Kì ri cɑ̈gø cøn, Jwøk ɑ́cwɑ̈j-ɑ mɑl kí piny. O piny ɑ́bëëd e bong ngïje o bɑ ölø, o wɑ̈thi pï bɑ muudhø yøw, o wëyi Jwøk kwöd ɑ́ yømø kì kömi pï. Akööb Jwøk kinni, “Wiy bëëd e dɑ cɑr.” Kɑ dɑ cɑr. Kɑ lidh yi Jwøk kinni cɑr døøj, ɑdɑ̈ɑ̈nge cɑr geki muudhø. Kɑ cɑr cɑg yi Jwøk ɑ́ “Dicɑ̈ng,” kɑ muudhø cɑge ɑ́ “Wɑ̈r.” Kɑ böörø obëënø kɑ mwøl ólunyø bëënø, bene cyɑ̈ng-ɑ mɑl. Akööb Jwøk kinni, “Wiy bëëd e dɑ kɑɑm me dɑ̈ɑ̈ng pï gɑ kɑ̈jj ɑ́ryew.” Codhe, ɑgwøøg kɑɑmɑni yi Jwøk, kɑ kwï pï cïbe wïj kɑɑmɑni, kɑ møg-ɑ kyeelø cïbe piny. Kɑ kɑɑmɑni cɑg yi Jwøk ɑ́ “Mɑl.” Kɑ böörø obëënø, kɑ mwøl ólunyø bëënø, bene ryeew cyɑ̈ng. Akööb Jwøk kinni, “Wiy pïg-ɑ thɑ mɑl cøng gen ri gen kej ɑ́kyel, o bëëd e dɑ keny thwøwø me nënni.” Kɑ pï ri gen cøng gen. Kɑ keny-ɑ thwøwø cɑg yi Jwøk ɑ́ “Piny,” kɑ pïg-ɑ ɑ́cøng ri gen kej ɑ́kyel cɑge gɑ “Nɑ̈mmì.” Kɑ lidh yi Jwøk kinni gïgɑni døøj. Akööb Jwøk kinni, “Wiy piny twïye ki lùm kí yenh, o kwï gen nywøl gen kí nying mø bɑ köödh. O köödhi lùm geki yenh bënn, nyi nywøl gen ki nywøl mø bɑ kïddi gen ceth.” Kɑ løg-ɑ kinøw. Piny ɑ́twïy ki lùm mø ri gen di nywøl mø bɑ köödh, kí yenh mø nywøl ki nywøl mø ri gen di köödh. Köödhø nyi twïy ɑ́ kïdi yɑdh, wɑlɑ̀ kïdi lum-ɑ di köödhe. Kɑ lidh yi Jwøk kinni gïgɑni døøj bënn. Kɑ böörø obëënø, kɑ mwøl ólunyø bëënø, bene dɑ̈ɑ̈g cyɑ̈ng. Akööb Jwøk kinni, “Wiy bëëd e dɑ gïg mënyø kì mɑl, o ge dɑ̈ɑ̈ng gen dicɑ̈ng geki wɑ̈r. O ge bëëd gen gɑ ngïjji møg nyi kwɑɑn cyɑ̈ng geki runn kí cyɑ̈nggi kwër. Ge óying mɑl, o ge nëngi gen piny ki cɑr.” Kɑ løg-ɑ kinøw. Kinøw, ɑgöög Jwøk ki cɑrr mø døngø gɑ ɑ́ryew. Agwøge cɑr-ɑ dwøng o jɑɑge dicɑ̈ng, o cɑr-ɑ thinh jɑɑge wɑ̈r. Kɑ kyell gwøge thyew. Kɑ ge cïb mɑl yi Jwøk o ge meny gen piny. O ge jyɑ̈ɑ̈g gen kì kömi dicɑ̈ng kí wɑ̈r, o ge dɑ̈ɑ̈ng gen cɑr geki muudhø. Kɑ lidh yi Jwøk kinni møgɑni døøj bënn. Kɑ böörø obëënø, kɑ mwøl ólunyø bëënø, bene ngween cyɑ̈ng. Akööb Jwøk kinni, “Wiy yethi pï pɑ̈ng gen yi gïg nëënø, kɑ winy pɑ̈rri gen kì yij yømø kì kömi piny.” Codhe, kɑ lɑ̈yy-ɑ døngø kì nɑm geki gïg-ɑ nëënø kì yije bënn, cwɑ̈j yi Jwøk. Kɑ nɑm opɑ̈ngø yi wɑ̈thi gïg-ɑ nëënø møgɑni, kɑ wɑ̈thi winyyi obërr bënn cwɑ̈j yi en. Kɑ lidh yi Jwøk kinni gïgɑni døøj. Kɑ ge kwëng yi Jwøk kinni, “Nywøl wun kɑ wu ngënyi wun kɑ pï pɑ̈ng wun kì nɑm, kɑ winy ngënyi gen kì kömi piny.” Kɑ böörø obëënø, kɑ mwøl ólunyø bëënø, bene bïïj cyɑ̈ng. Akööb Jwøk kinni, “Wiy piny pɑ̈nge yi lɑ̈yy geki dhög kí dyëg, e men nywøl-ɑ kïde. Wiy bëëd e dɑ lɑ̈yy-ɑ døngø, kí lɑ̈yy-ɑ thønhø, kí møg-ɑ mulli; men dɑ kïde.” Kɑ løg-ɑ kinøw. Codhe, kɑ lɑ̈yy-ɑ døngø gwøg yi Jwøk geki lɑ̈yy-ɑ thønhø, kí møg-ɑ mulli, men nywøl-ɑ kïde. Kɑ lidh yi Jwøk kinni gïgɑni døøj bënn. Akööb Jwøk kinni, “Gwøg wɑ dhɑnhø e bɑ ngïjee, e pɑ̈r ki kïddee. O ójyɑ̈ɑ̈ge kì kömi rijji nɑm, kí kömi winyyi mɑl, kí lɑ̈yy geki dhög kí dyëg kì piny bëne, kí gïg-ɑ mulli kì kömi piny.” Kɑ dhɑnhø cwɑ̈j yi Jwøk e bɑ ngïje, pɑ̈r ki kïdi Jwøk keny-ɑ ɑ́cwɑ̈je gøn. Dhɑnhø ɑ́cwɑ̈j yi en ɑ́ jɑlø kí dhɑjø. Kɑ ge kwëng yi Jwøk kinni, “Nywøl wun, kɑ wu ngënyi wun; pɑ̈ng wun piny, kɑ jɑɑg wun, kɑ rijji nɑm jɑɑg wun, kí winyyi mɑl, kí gïg-ɑ nëënø bënn møg-ɑ mulli kì kömi piny.” Kɑ gï köbbe kinni, “Wu ɑ́mëggɑ lùm-ɑ nyi nywøl ki nying bënn, kí yenh-ɑ nyi nywøl bënn, ge ɑ́mëggɑ wun gɑ gïncɑm. Kɑ lɑ̈yy geki winyyi mɑl kí gïg-ɑ mulli kì piny bënn møg-ɑ nëënø, mëggɑ lùm-ɑ mɑr bënn gɑ gïncɑɑm gen.” Kɑ løg-ɑ kinøw. Kɑ Jwøk gïg-ɑ ɑ́gwøg yi en lidhe bënn, kɑ gï yode ge døøj cɑrø. Kɑ böörø obëënø, kɑ mwøl ólunyø bëënø, bene bïkyeel cyɑ̈ng. Codhe kɑ lɑ̈bø bëne órumø ki cwɑ̈jø. Jwøk gwøng-ɑ ɑ́bëëd gø ogwøgø yi en ɑ́tyëge, kɑ oywömø kì bïryeew cyɑ̈ng. Kɑ bïryeew cyɑ̈ng kwëng yi Jwøk, kɑ gø kwëre, mɑ́ bene cyɑ̈ngɑni ɑ ɑ́ywöme ree ki gwøng-ɑ ɑ́bëëd gø ogwøgø yi en, ɑ løg gwøøg cwɑ̈j. Bene kër-ɑ ɑ́cwɑ̈ɑ̈j lɑ̈bø ɑnɑn yi Jwøk, Jwøng-ɑ Ácwɑ̈ɑ̈j. Keny-ɑ ɑ́cwɑ̈ɑ̈j mɑl geki piny yi Jwøk, ɑ́bëëd e bong lùm kí yenh kì kömi piny. Bong yenh kí lùm mɑ ɑ́bëëd ge twïyø, mɑ́ kødh ɑ́bëëd gø nuti kɑ̈ɑ̈l en kömi piny. O ɑ́bong-ɑ dhɑnhø me purø, de ɑ́dɑ pï mø nyi bï kì piny, kɑ lɑ̈bø bëne nyii thïnyø yi gen. Kɑ Jwøk, Jwøng-ɑ Ácwɑ̈ɑ̈j ókɑ̈bbø ki lɑ̈bø kì piny, kɑ ocwɑ̈jø ki dhɑnhø ki lɑ̈mɑni. Akudhe órømme ki wëy, kɑ dhɑnhø ogöögø ɑ́ ngɑn nëënø. Kɑ Jwøk, Jwøng-ɑ Ácwɑ̈ɑ̈j opïdhø ki bɑg kì Eden, kì wɑɑng cyɑ̈ɑ̈ng mwøl, kɑ dhɑnhø men-ɑ ɑ́cwɑ̈je cïbe yij bɑngɑni. Kɑ piny göjji twïyø yi Jwøk, Jwøng-ɑ Ácwɑ̈ɑ̈j ki yɑdh bëne, mø myëër ki nennø, kí yɑdh bëne mø døøj ki cɑmø, kɑ yɑɑdh wëy geki yɑɑdh ngɑ̈nyi gïndøj kí gïnrɑj cïbe dïdyëri bɑg. Ádɑ nɑm me nyi mulli kì Eden, kɑ bɑg gø nyi cɑwe. Nɑmɑni kɑrø kì kenyɑni kɑ ogöögø ki nɑ̈mmì ɑ́ngwen. Nɑm-ɑ kyeel gen cwøl ɑ́ Picön, mølli e kɑ̈ll-ɑ kö piny Abïlɑ̀ bëne, kun-ɑ di dhɑb. Dhɑɑb pinyɑni døøj cɑrø, o kunɑni dɑ ɑ́dwøngi bedölɑ̀ kí kïtti coɑm (møg-ɑ myëër). Nyingi nɑm-ɑ ryeew gen cwøl ɑ́ Gïön, en ɑ winni piny Kuc bëne. Nyingi nɑm-ɑ dɑ̈ɑ̈g gen cwøl ɑ́ Tigrì, en ɑ kɑ̈l kuni wɑɑng cyɑ̈ɑ̈ng mwøl kì Acuur. O nɑm-ɑ ngween gen bene Porɑt. Jwøk, Jwøng-ɑ Ácwɑ̈ɑ̈j, dhɑnhø ɑ́cïbe bɑɑg Eden kipe kinni o gø kore, o gø nyi pure. Kɑ Jwøk, Jwøng-ɑ Ácwɑ̈ɑ̈j dhɑnhø cege kinni, “Yï ócuggø cɑm ni kɑ̀ dwɑddí kì ri nywøli yenh-ɑ yij bɑg bënn, de yɑɑdh ngɑ̈nyi gïndøj kí gïnrɑj, yï ko pɑ̈nyi cɑm kì ree, mɑ́ keny-ɑ ócyɑ̈ɑ̈m kì ree, yï ceg-ɑ thøø ceth.” Kɑ Jwøk, Jwøng-ɑ Ácwɑ̈ɑ̈j okööbø kinni, “Pɑ døøj eni bëëdi dhɑnhø kete. Ógöggɑ ki ngɑn me bëëdi gen røøm ki gøn, men-ɑ ókønyii.” Kɑ Jwøk, Jwøng-ɑ Ácwɑ̈ɑ̈j jɑmmì bënn gwøge kì ri lɑ̈bø, ɑ løg lɑ̈yyi pɑ̈l bënn kí winyyi mɑl bënn, kɑ gï muuje dhɑnhø, o gï cɑ̈gge ki nying. Nying-ɑ ɑ́cɑɑgii yi dhɑnhø, en ɑ óbëëd ɑ́ nyinge. Codhe, kɑ lɑ̈yy bënn geki winy cɑ̈ggi yi dhɑnhø ki nying. De men ɑ́ en kiree, ɑ́jɑ̈ddi ki ngɑn bëëdi gen røøm ki gøn, me kønyii. Codhe, kɑ dhɑnhø göjji nenø yi Jwøk, Jwøng-ɑ Ácwɑ̈ɑ̈j, kɑ ónenø ki nin mø peeg. Kɑ̈ng-ɑ ɑ́nine, kɑ Jwøk kɑ̈n-ɑ wɑ̈g ki ɑ́kyel kì kelli ngëdde, kɑ kenyɑni cyëge ki rïngø. Kɑ ngënɑni gwøg yi Jwøk, Jwøng-ɑ Ácwɑ̈ɑ̈j ɑ́ dhɑkøw, codhe kɑ dhɑkøw muuje dhɑnhø. Akööb dhɑnhø kinni, “Anɑn, men bɑ ngɑn me cue ɑ́kɑ̈ɑ̈l ri cuɑ, dële ɑ́kɑ̈ɑ̈l-ɑ ri dëlɑ, ócwølli yi yɑn ɑ́ dhɑkøw, mɑ́ e ɑ́kwɑny-ɑ ri dhɑnhø.” Bene ɑ bɑnge nyi wiy dhɑnhø wïye geki meye, kɑ ómɑ̈gø kì ri cyëge, kɑ ge ogöögø ki ɑ́kyel. Dhɑnhø geki cyëge, ge ɑ́bëëd ge cyɑ̈dh-ɑ nøw, de bong ɑyɑ̈r mɑ ɑ́böggi yi gen. Thwöl bene en ɑ ɑ́bëëd e pëddi wëënyø kì kelli lɑ̈yy-ɑ ɑ́cwɑ̈j yi Jwøk, Jwøng-ɑ Ácwɑ̈ɑ̈j bënn. Kɑ dhɑkøw pyëj yi thwöl cyɑ̈ng megø kinni, “Wu ɑ́di köbbø yi Jwøk kidyër kinni ko di nywøli yɑdh me cɑm yi wun kì yij bɑg?” Aløøg kwøbbi thwöl yi dhɑkøw kinni, “Wø ócuggø cɑm ki nywøli yenh-ɑ yij bɑg. De Jwøk wø ɑ́köbbe kinni, ‘Wu ko pɑ̈nyi cɑm ki nywøli yɑnh-ɑ dïbɑg. Ko pɑ̈nyi yi wun ki nywɑlø, kipe wu óthøw.’ ” Kɑ thwöl yöd e köbb-ɑ dhɑkøw kinni, “Wu pɑ thøw. Ngɑ̈nyi yi Jwøk kinni keløg wu ocyɑ̈mø ki nywøli yɑnhɑni, nyingi wun ceg yi wun kɑ yiebø, kɑ wu ogöögø wu pɑ̈r ki en, kɑ gïndøj kí gïnrɑj nyi ngij yi wun!” Kɑ lidh yi dhɑkøw kinni yɑnhɑni myëër, o nywøle døøj ki cɑmø, kí kinni wïj ócuggø pïlø yi en. Codhe, ɑkɑ̈bbe ki nywøli yɑnhɑni kɑ gï cɑme. Kɑ jɑlgøle nënge thyew, kɑ gï cɑme. Kɑ wɑ̈thi gen óyïëbbø. Kɑ ngij yi gen kinni ge cyɑ̈dh-ɑ nøw, ɑkwööj gen ki yïthhi ólɑm, kɑ gï gwøg gen gɑ møg kum gen ri gen. Kɑ Jwøk, Jwøng-ɑ Ácwɑ̈ɑ̈j lïngi yi gen e ócyɑ̈dhø kì yij bɑg, keny-ɑ ɑ́kwööj piny. Kɑ dhɑnhø geki cyëge pɑ̈n-ɑ kelli yenh kì yij bɑg, mɑ́ ge ɑ́bwøg yi Jwøk, Jwøng-ɑ Ácwɑ̈ɑ̈j. Acwöddi Jwøk, Jwøng-ɑ Ácwɑ̈ɑ̈j kinni, “Dhɑnhø! Yï ying-ɑ keny?” Alögge kinni, “Yɑ ɑ́lïng-ɑ cwɑggí kì yij bɑg, ɑpɑ̈nɑ mɑ́ yɑ cyɑ̈dh-ɑ nøw.” Apyëjii yi Jwøk kinni, “Á men ɑ ɑ́köbbi yïn kinni yï cyɑ̈dh-ɑ nøw? Yï ɑ́ceg-ɑ cɑm kì ri nywøli yɑnh-ɑ ɑ́kyëddɑ yïn kinni yï ko cyɑ̈ɑ̈m kì ree?” Alöggi Dhɑnhø kinni, “Bɑ yïn ɑ ɑ́muuj yɑn dhɑkøw men, o bɑ en ɑ ɑ́nëngi yɑn ki nywøli yɑdh, kɑ ge cɑmɑ.” Kɑ Jwøk, Jwøng-ɑ Ácwɑ̈ɑ̈j dhɑkøw köbbe kinni, “Yïde ɑ göög ki gïn ni men?” Alögge kinni, “Thwöl ɑ ɑ́wëny yɑn, kɑ yɑ ocyɑ̈mø ki nywøli yɑdh.” Kɑ thwöl köbbi yi Jwøk, Jwøng-ɑ Ácwɑ̈ɑ̈j kinni, “Cyën ying-ɑ kömí kipe kɑ ɑ́gwøøg gïn ni men. Yï bɑ ɑcyen kì kelli lɑ̈yy bënn. Yï ómul-ɑ́ɑ̀ kömi yijí, o yï ócɑm lɑ̈bø kì yethi runn-ɑ ónëën yi yïn bënn. Wu ógwøg yi yɑn wu mɑ̈n wuki dhɑkøw. Kwɑrre geki kwɑrrí óbëëdø ge mɑ̈n ki ri gen. Wïjí ómød yi en, o tïg tyele ókɑj yi yïn.” Codhe, ɑköbbi dhɑkøw yi Jwøk kinni, “Yï óköllɑ orɑng keny-ɑ óbëëd yijí dɑ dhɑnhø, yï ónywøl kɑ nywølø me dhøge ledh. Jɑɑl wun ótyer yi yïn ki mendwøng, de yï ójɑɑg yi en.” Codhe ɑköbbe Adɑm kinni, “Yï ɑ́lïng ki kwøbbi cyëgí, kɑ yï ocyɑ̈mø ki nywøli yɑnh-ɑ ɑ́cïgɑ yïn kinni ko cɑɑm, kì bɑng bɑ̈jjø menɑni, piny ócyen ki göjí, o yï óceg gwøg ki gwøg me teg kipe gïncɑmí. Gïncɑmí óyɑb yi yïn kɑ yɑbø me dhøge ledh, ki runn-ɑ óbëëd yi yïn kì kömi piny bënn. Piny ótwïy ki koodh geki okurø yi göjí, o yï ócɑm-ɑ jɑmmi pwödhø. Yï ógöögø ki gwøg me teg, kɑ yï opirø ki kwɑ̈g kipe kinni o yï yïddí ki gïncɑm. Yï ódøøg yij lɑ̈bø, mɑ́ yï ɑ́kwɑny-ɑ ree. Yï bɑ lɑ̈bø, o yï døøg-ɑ yij lɑ̈bø.” Kɑ Adɑm cyëge cɑge ɑ́ Awɑ̀ kipe bene en ɑ bɑ meyi gïn-ɑ nëënø bëne. Kɑ Adɑm geki cyëge ngïnyi yi Jwøk, Jwøng-ɑ Ácwɑ̈ɑ̈j ki lɑ̈ni lɑ̈yy mø rug yi gen. Codhe, ɑkööb Jwøk, Jwøng-ɑ Ácwɑ̈ɑ̈j kinni, “Dhɑnhø ɑ́göög e nɑ wɑ, gïndøj kí gïnrɑj ngɑ̈nyi yi en. Ko wëggi wɑ cɑm ki nywøli yɑɑdh wëy, kipe e ónëënø gïti ɑtheer.” Acyeed dhɑnhø wɑ̈g yi Jwøk, Jwøng-ɑ Ácwɑ̈ɑ̈j kì yij bɑɑg Eden, o pure ki lɑ̈m-ɑ́ yije ɑ́kwɑnyii. Keny-ɑ ɑ́rum dhɑnhø ki cyëëd wɑ̈g kì yij bɑg, kɑ dhø bɑg kì wɑɑng cyɑ̈ɑ̈ng mwøl cïbi yi Jwøng-ɑ Ácwɑ̈ɑ̈j ki kerobb, ki pilø me bɑ mɑc me lyel, e cem-ɑ rɑ̈d kì wɑ̈thi tùng bënn, menɑni bɑ kipe kinni o bëëd e bong ngɑn kedhi buti yɑɑdh wëy. Adɑm ɑ́buddi geki cyëge Awɑ̀, kɑ Awɑ̀ ongølø ki dhɑnhø. Anywøl Awɑ̀ ki wɑ̈d, ɑkööbe kinni, “Jwøng-ɑ Ácwɑ̈ɑ̈j, yɑ ɑ́nënge ki wɑ̈d.” Acɑge gøn ɑ́ Kɑin. Kì bɑnge kɑ Awɑ̀ onywølø ki wɑ̈d megø me cwøl ɑ́ Abel. Abel ɑ́kwɑy-ɑ dyëg, o Kɑin göögø ɑ́ jɑlpur. Kì bøli keny megø, Kɑin ɑ́muuj ki jwödhø men mëggi Jwøk, Jwøng-ɑ Ácwɑ̈ɑ̈j kì ri jɑmm-ɑ ɑ́pure. Kɑ Abel kì tunge, ólunyø ki kɑ̈nø ki órömø me bɑ kɑyø, e pëddi døøjø kì kelli dyëge. Kɑ jwödhø mi Abel yïëy yi Jwøng-ɑ Ácwɑ̈ɑ̈j, de Kɑin nuti yïëy en geki jwönh-ɑ ɑ́muuje. Codhe, kɑ Kɑin pyëwe órënyø ki mendwøng. Apyëëj Kɑin yi Jwøng-ɑ Ácwɑ̈ɑ̈j kinni, “Yïde ɑ bëëd pyëwí rɑɑj? Yïde ɑ nënní bølí looj? Keløg jɑmmí di gwøg yi yïn kidøøj, yï di ceg-ɑ bønyø, de ge nuti gwøgø yi yïn kidøøj, orøg cung-ɑ́ɑ̀ dhø ødí, e dwɑdd-ɑ jɑɑgi yïn, de dwɑddií tyɑmø.” Kɑ Kɑin ómen Abel köbbe kinni, “Kedhi wɑ yethi pwödh.” Keny-ɑ ɑ́ying gen yethi pwödh, kɑ Kɑin pɑ̈ɑ̈r-ɑ kömi ómen, kɑ gø nɑ̈ge. Apyëëj Kɑin yi Jwøng-ɑ Ácwɑ̈ɑ̈j kinni, “Abel ómyëw ying-ɑ keny?” Alöggi Kɑin kinni, “Kwïj yi yɑn, bɑ gwøgɑ eni kori ómïɑ?” Codhe ɑköbbe gøn kinni, “Á ngø ɑ ɑ́gwøg yi yïn? Remi ómyëw ceg-ɑ ywøg kì piny, cwɑgge ɑ́wɑ̈nhi yïɑ. Kì bɑng bɑ̈jjø menɑni cyënní óbëëd ge døngø kibøli cyënni piny-ɑ pur yi yïn, eni piny-ɑ́ yije ɑ́dëëm yi remi ómyëw kì cingí. Piny ópur yi yïn, de pɑ cigi nywølø ki gïjø me døøj këti, o yï ópëggi be wïïnø kì kömi piny.” Aköbbi Jwøng-ɑ Ácwɑ̈ɑ̈j yi Kɑin kinni, “Cɑ́yɑni peeg kiperɑ! Yɑ ɑ́mɑ̈ɑ̈n yi yïn puri piny dicyɑ̈ngtïn, kɑ yɑ cyeddí kì butí. Yɑ bɑ men pëggi be wïïnø kì kömi piny, o yɑ ócuggø nɑ̈gø yi ngɑn røøm wøn.” Aköbbi Kɑin yi Jwøng-ɑ Ácwɑ̈ɑ̈j kinni, “Pɑth ki en! Keløg yï onɑ̈gø yi dhɑnhø, kejí nɑ̈ɑ̈g-ɑ ji ɑ́bïryew.” Codhe, kɑ bøli Kɑin dïjji yi Jwøng-ɑ Ácwɑ̈ɑ̈j ki ngïji, o ócöge e bong ngɑn nɑ̈gii. Codhe, kɑ Kɑin odhwödhø kì buti Jwøng-ɑ Ácwɑ̈ɑ̈j, kɑ kedh-ɑ be bëëdø kì piny Nod, kì bøli Eden, kì wɑɑng cyɑ̈ɑ̈ng mwøl. Kɑ cï Kɑin óyïddø ki dhɑnhø, ɑnywøle Enök. Kì bøli kenyɑni, Kɑin ɑ́bëëd e ogëdø ki kɑɑl me dwøng. Kɑɑlɑni ɑ́cɑge ki nyingi wɑ̈de Enök. Enök yïe ɑ́dɑ wɑ̈de me cwøl ɑ́ Irɑd. Irɑd yïe ɑ́dɑ wɑ̈de me cwøl ɑ́ Mekuyɑil. Mekuyɑil yïe ɑ́dɑ wɑ̈de me cwøl ɑ́ Metucɑil. Metucɑil yïe ɑ́dɑ wɑ̈de me cwøl ɑ́ Lɑmek. Lɑmek ɑ́nyömi ki mɑ̈nn ɑ́ryew, Adɑ̀ geki Dhilɑ̀. Adɑ̀ ɑ ɑ́nywøl Yɑbɑl, en ɑ bɑ kweyi tyëng-ɑ nyi bëëdø kì yethi kemmì, ge bɑ kwɑ̈yyì. Ómï Yubɑl cwøl ɑ́ Yubɑl, en ɑ bɑ kweyi bödhhi thøm geki kɑ̈ngì. Dhilɑ̀ ɑ ɑ́nywøl Tubɑl Kɑin, ɑ løg kweyi bödhh-ɑ nyi thɑ̈dhø ki jɑmm-ɑ thɑ̈dh ki ngyënyø dilɑl geki ngyënyø dødø. Nyimï Tubɑl Kɑin ɑ cwøl ɑ́ Nɑɑmɑ̀. Kɑ Lɑmek mɑ̈nne ryeet köbbe kinni, “Adɑ̀ wuki Dhilɑ̀, lïngu kwøbbɑ! Wu mɑ̈nni Lɑmek, lïngu kwøbb-ɑ kwøb yi yɑn. Yɑ ɑ́nɑ̈gi ki jɑl megø kipe kɑ ɑ́thödhe yɑn ki kedø, kɑ nyel me thiinh nɑ̈gɑ kipe kɑ ɑ́gøje yɑn. Keløg kej Kɑin nɑ̈ɑ̈g-ɑ ji ɑ́bïryew, kej Lɑmek nɑ̈ɑ̈g-ɑ ji pyɑ̈r ɑ́bïryew wïdɑ́bïryew.” Kɑ Adɑm óbuddø ki cyëge Awɑ̀ këti, kɑ cyëge onywølø ki wɑ̈d. Kɑ cɑg yi meye ɑ́ Ceeth, kinni, “Yɑ ɑ́nëngi yi Jwøk ki wɑ̈d megø. En ɑ ókwɑny kej Abel, nyel-ɑ ɑ́nɑ̈g yi Kɑin.” Ceeth ɑ́nywøl thyew ki wɑ̈d, kɑ cɑg ɑ́ Enöc. Bøli kenyɑni ɑ ɑ́døøg ji be kwɑ̈jjø ki nyingi Jwøng-ɑ Ácwɑ̈ɑ̈j. Keny-ɑ ɑ́göög runni Adɑm ki miyø kí pyɑ̈r ɑ́dɑ̈g, ɑnywøle ki wɑ̈de megø, me bɑ kïde ceth, kɑ nyinge cɑge ɑ́ Ceeth. Kì bɑng kɑ ɑ́rum Ceeth ki nywølø, kɑ Adɑm obëëdø ki runn miy ɑ́bïdɑ̈g, kɑ onywølø ki wɑ̈dd møøgø kí womɑ̈nn. Adɑm ɑ́thøw runne bɑ miy ɑ́bïngwen kí pyɑ̈r ɑ́dɑ̈g. Keny-ɑ ɑ́göög runni Ceeth ki miyø kí ɑ́bïj, ɑnywøle ki wɑ̈de me cwøl ɑ́ Enöc. Kì bɑng kɑ ɑ́rum Enöc ki nywølø, kɑ Ceeth obëëdø ki runn miy ɑ́bïdɑ̈g kí ɑ́bïryew, kɑ onywølø ki wɑ̈dd møøgø kí womɑ̈nn. Ceeth ɑ́bëëd ki runn miy ɑ́bïngwen kí pyɑ̈rø wïdɑ́ryew, codhe ɑthøwe. Keny-ɑ ɑ́göög runni Enöc ki pyɑ̈r ɑ́bïngwen, ɑnywøle ki wɑ̈d me cwøl ɑ́ Kenɑn. Kì bɑng kɑ ɑ́rum Kenɑn ki nywølø, kɑ Enöc obëëdø ki runn miy ɑ́bïdɑ̈g kí pyɑ̈rø wïdɑ́bïj, kɑ onywølø ki wɑ̈dd møøgø kí womɑ̈nn. Enöc ɑ́bëëd kɑ runn miy ɑ́bïngwen wïdɑ́bïj, codhe ɑthøwe. Keny-ɑ ɑ́göög runni Kenɑn ki pyɑ̈r ɑ́bïryew, ɑnywøle ki wɑ̈de me cwøl ɑ́ Mɑɑ̈lɑlel. Kì bɑng kɑ ɑ́rum Mɑɑ̈lɑlel ki nywølø, kɑ Kenɑn obëëdø ki runn miy ɑ́bïdɑ̈g kí pyɑ̈r ɑ́ngwen, kɑ onywølø ki wɑ̈dd møøgø kí womɑ̈nn. Kenɑn ɑ́bëëd ki runn miy ɑ́bïngwen kí pyɑ̈rø, codhe ɑthøwe. Keny-ɑ ɑ́göög runni Mɑɑ̈lɑlel ki pyɑ̈r ɑ́bïkyel wïdɑ́bïj, ɑnywøle ki wɑ̈de me cwøl ɑ́ Yɑred. Kì bɑng kɑ ɑ́rum Yɑred ki nywølø, kɑ Mɑɑ̈lɑlel obëëdø ki runn miy ɑ́bïdɑ̈g kí pyɑ̈r ɑ́dɑ̈g, kɑ onywølø ki wɑ̈dd møøgø kí womɑ̈nn. Mɑɑ̈lɑlel ɑ́bëëd ki runn miy ɑ́bïdɑ̈g kí pyɑ̈r ɑ́bïngwen wïdɑ́bïj, codhe ɑthøwe. Keny-ɑ ɑ́göög runni Yɑred ki miyø kí pyɑ̈r ɑ́bïkyel wïdɑ́ryew, ɑnywøle ki wɑ̈de me cwøl ɑ́ Enök. Kì bɑng kɑ ɑ́rum Enök ki nywølø, kɑ Yɑred obëëdø ki runn miy ɑ́bïdɑ̈g, kɑ onywølø ki wɑ̈dd møøgø kí womɑ̈nn. Yɑred ɑ́bëëd ki runn miy ɑ́bïngwen kí pyɑ̈r ɑ́bïkyel wïdɑ́ryew, codhe ɑthøwe. Keny-ɑ ɑ́göög runni Enök ki pyɑ̈r ɑ́bïkyel wïdɑ́bïj, ɑnywøle ki wɑ̈de me cwøl ɑ́ Metucelɑ̀. Kì bɑng kɑ ɑ́rum Metucelɑ̀ ki nywølø, kɑ Enök obëëdø ki runn miy ɑ́dɑ̈g e cyɑ̈dhi kɑ Jwøk, kɑ onywølø ki wɑ̈dd møøgø kí womɑ̈nn. Enök ɑ́bëëd ki runn miy ɑ́dɑ̈g kí pyɑ̈r ɑ́bïkyel wïdɑ́bïj. Enök ɑ́cyɑ̈dhi kɑ Jwøk, kɑ ólɑ̈ɑ̈nyø cyɑ̈ng ɑ́kyel. Ákɑ̈l yi Jwøk ki dële. Keny-ɑ ɑ́göög runni Metucelɑ̀ ki miyø kí pyɑ̈r ɑ́bïdɑ̈g wïdɑ́bïryew, ɑnywøle ki wɑ̈de me cwøl ɑ́ Lɑmek. Kì bɑng kɑ ɑ́rum Lɑmek ki nywølø, kɑ Metucelɑ̀ obëëdø ki runn miy ɑ́bïryew kí pyɑ̈r ɑ́bïdɑ̈g wïdɑ́ryew, kɑ onywølø ki wɑ̈dd møøgø kí womɑ̈nn. Metucelɑ̀ ɑ́bëëd ki runn miy ɑ́bïngwen kí pyɑ̈r ɑ́bïkyel wïdɑ́bïngwen, codhe ɑthøwe. Keny-ɑ ɑ́göög runni Lɑmek ki miyø kí pyɑ̈r ɑ́bïdɑ̈g wïdɑ́ryew, ɑnywøle ki wɑ̈d. Kɑ Lɑmek wɑ̈de cɑge ɑ́ Nöö, mɑ́ e ɑ́kööb kinni, “Wɑ ócïj yi en ki gwøgee kì piny-ɑ ɑ́göjji cyën yi Jwøng-ɑ Ácwɑ̈ɑ̈j.” Kì bɑng kɑ ɑ́rum Nöö ki nywølø, kɑ Lɑmek obëëdø ki runn miy ɑ́bïj kí pyɑ̈r ɑ́bïngwen wïdɑ́bïj, kɑ onywølø ki wɑ̈dd møøgø kí womɑ̈nn. Lɑmek ɑ́bëëd ki runn miy ɑ́bïryew kí pyɑ̈r ɑ́bïryew wïdɑ́bïryew, codhe ɑthøwe. Kì bɑng kɑ ɑ́göög runni Nöö ki miy ɑ́bïj, ɑnywøle Cem, kí Kɑm, kí Yɑpeth. Keny-ɑ ɑ́ngënyi ji kɑ ge tɑɑy-ɑ kömi piny, kɑ ge onywølø ki womɑ̈nn, kwï wɑ̈ddi mɑl nyigi ji ɑ́lidh yi gen ge myëër, kɑ ge ókɑ̈bbø ki møg-ɑ ɑ́dwɑddi yi gen gɑ mɑ̈nn. Codhe, ɑkööb Jwøng-ɑ Ácwɑ̈ɑ̈j kinni, “Wëyɑ pɑ bëëdø kì ri ji gïti ɑtheer, mɑ́ ge nyøødh, ge bɑ møg thøw. Cɑg ɑnɑn ceth, ge pɑ cuggi bëëdø kì kömi piny ki runn mø pöödh miyø kí pyɑ̈r ɑ́ryew.” Kì yethi cyɑ̈nggɑni cɑgg ɑ́ kì bɑng gen ki kɑɑm megø, ɑ́dɑ ji mø bɑ jödd mø pëddi döng kì kömi piny, gen ɑ bɑ nyigi ji-ɑ bɑ mɑ̈nn møg-ɑ ɑ́kwɑny yi wɑ̈ddi mɑl gɑ mɑ̈nni gen. Gen ɑ ɑ́bëëd gɑ tyëngteg mø kɑ̈ge dööng. Keny-ɑ ɑ́liidh rɑ̈ji ji yi Jwøng-ɑ Ácwɑ̈ɑ̈j, ki rɑ̈ji rummi gen kì bøli kenyɑni, ɑpɑ̈dde kipe kɑ ɑ́cwɑ̈je dhɑnhø kɑ gø cïbe kömi piny. Ápɑ̈di ki mendwøng, kɑ ceg-ɑ kwøb kinni, “Ji-ɑ ɑ́cwɑ̈j yi yɑn ek, ge ópuujɑ wɑ̈g kì kömi piny, kí lɑ̈yy thyew geki winy, mɑ́ yɑ ɑ́pɑ̈di kipe kɑ ɑ́cwɑ̈jɑ gen.” De Jwøng-ɑ Ácwɑ̈ɑ̈j pyëwe ɑ́bëëd e med ki Nöö. De dhɑnhø bëne ɑ́bëëd e rɑɑj kì bøli Jwøk, o ji ɑ́bëëd ge mød-ɑ ri gen kì kɑ̈jj bënn. Kɑ Jwøk lïïdh-ɑ kömi piny, kɑ gø lidhe e rɑɑj, mɑ́ ji bënn ɑ́bëëd-ɑ bëëdø me rɑɑj. Kɑ Nöö köbbi yi Jwøk kinni, “Dhɑnhø bëne nɑ̈gɑ’ nɑ̈gø. Ge ónɑ̈g yi yɑn kinni tweet, mɑ́ kömi piny ɑ́pɑ̈ng yi orøøg gen. Guddí rií ki yɑ̈y me dwøng, gur ki pɑ̈m me teg, kɑ yije göggí ki ud mø gïïr, kɑ yije geki köme mwøøn ki dök. Gwøøg e nɑ men: bɑ̈re bɑ mïtïr miyø kí pyɑ̈r ɑ́dɑ̈g wïdɑ́dɑ̈g, lɑ̈je bɑ mïtïr pyɑ̈r ɑ́ryew wïdɑ́ryew, döre bɑ mïtïr pyɑ̈rø wïdɑ́dɑ̈g. Göggí ki tɑnø, kɑ kɑɑm tɑnø geki dörø wïyí ki sentimïtïr pyɑ̈r ɑ́ngwen wïdɑ́ngwen ɑ́ wɑ̈w. Kɑ guddí ki ød me dörre bɑ ɑ́dɑ̈g; men ying-ɑ kömi men, kɑ dhøge cïb wɑɑng ngëde. Bɑɑyø örɑ’ piny, o nɑ̈ge gïg-ɑ nëënø bënn. Gïg-ɑ kömi piny ceg-ɑ thøø bënn, de kwøbbee óthuunh yi wɑ. Kedhí yij yɑ̈y wuki cyëgí, kí wɑ̈ddí geki mɑ̈nni gen. Kɑ̈ɑ̈d ki wɑ̈thi gïgcɑmm bënn kiper wun, wuki gïgɑni.” Kɑ møg-ɑ ɑ́kwøb yi Jwøk bënn gwøg yi Nöö ceth. Kɑ Jwøng-ɑ Ácwɑ̈ɑ̈j, Nöö köbbe kinni, “Kedhí yij yɑ̈y wuki gølí bëne, ɑ́yod yi yɑn kinni bɑ yïn, yï ketí ɑ gøggi dyër kì kömi piny bëne. Kɑ̈bbí ki cwøw ɑ́bïryew kí mɑ̈nn ɑ́bïryew kì ri lɑ̈yy-ɑ dhïw, ɑ cuggi cɑmø, de kwɑny jɑlø ɑ́kyel kí dhɑjø ɑ́kyel kì ri lɑ̈yy-ɑ ywëdhø, ɑ pɑ cuggi cɑmø. Kɑ̈bbí thyew ki winyy-ɑ cwøw ɑ́bïryew kí winyy-ɑ mɑ̈nn ɑ́bïryew kì ri wɑ̈thi winy bënn. Gwøg møgɑni o wɑ̈thi lɑ̈yy geki winy bënn mïdhi ge onëënø, o ge ódøøg gen ki nywølø kì kömi piny. Yɑ óöni piny ki kødh me dwøng bɑng cyɑ̈ng ɑ́bïryew, kønhɑni ómɑ̈gi kɑ cyɑ̈ng pyɑ̈r ɑ́ngwen kí wɑ̈rr pyɑ̈r ɑ́ngwen, o nɑ̈ge gïg-ɑ nëënø bënn møg-ɑ ɑ́cwɑ̈j yi yɑn.” Kɑ kwøbb-ɑ ɑ́kwøb yi Jwøng-ɑ Ácwɑ̈ɑ̈j gwøg yi Nöö bënn. Nöö ɑ́bëëd runne bɑ miy ɑ́bïkyel keny-ɑ ɑ́bëën bɑɑyø. En kí cyëge, kí wɑ̈dde geki mɑ̈nni gen, ge ɑ́kedhi yij yɑ̈y ge bënn kipe ge ómud yi pïi bɑɑyø. Lɑ̈yy-ɑ dhïw, kí lɑ̈yy-ɑ ywëdhø, kí winy, kí gïn-ɑ mulli kì piny bëne, ɑ́bï yï Nöö. Ge ɑ́kedhi yij yɑ̈y gɑ ɑ́ryew ɑ́ryew, ni kɑ ɑ́köbbi Nöö yi Jwøk. Kì bɑng cyɑ̈ng ɑ́bïryew kɑ kødh ócɑ̈gø ki mɑ̈gø. Keny-ɑ ɑ́bëëd runni Nöö bɑ miy ɑ́bïkyel ɑ ɑ́bëën bɑɑyø. Nyingi pï kì piny ri gen ɑ́yieb yi gen, kɑ ɑwɑjji mɑl ri gen yieb gen, kɑ ge kuny-ɑ piny ki pï kì pyɑ̈rø wïdɑ́bïryeew cyɑ̈ng kì ryeew dwɑ̈tt kì yij run. Kɑ kødh ómɑ̈gø ki cyɑ̈ng pyɑ̈r ɑ́ngwen, kí wɑ̈rr pyɑ̈r ɑ́ngwen. Cyɑ̈ng-ɑ ɑ́cɑ̈gi kødh, en ɑ ɑ́kedhi Nöö yij yɑ̈y, en geki cyëge, kí wɑ̈dde ɑ løg, Cem, kí Kɑm, kí Yɑpeth, geki mɑ̈nni gen. Kɑ wɑ̈thi lɑ̈yyi pɑ̈l, kí lɑ̈yyi pɑc, kí lɑ̈yy-ɑ mulli kì piny, kí wɑ̈thi winy bënn kedh-ɑ yij yɑ̈y ki gen. Lɑ̈yy-ɑ nyi yëgø bënn ɑ́bï yï Nöö gɑ ɑ́ryew ɑ́ryew. Jɑlø ɑ́kyel kí dhɑjø ɑ́kyel kì ri wɑ̈thi gïg-ɑ nëënø bënn, ge ɑ́bï yï Nöö ni kɑ ɑ́kwøbii yi Jwøk ceth. Codhe, kɑ dhø yɑ̈y cyëëg kömi gen yi Jwøng-ɑ Ácwɑ̈ɑ̈j. Kɑ bɑɑyø piny tyëge kì yethi cyɑ̈ng pyɑ̈r ɑ́ngwen. Kɑ pï óngënyø, kɑ piny opɑ̈ngø, kɑ yɑ̈y othwørø kì wɑ̈thi pï. Pï ɑ́ngënyi ki mendwøng, kɑ piny omudø bëne, cɑgg ɑ́ kïtt-ɑ bɑ̈rrø, wɑ̈thi gen ɑ́lɑ̈ɑ̈ny. Kɑ pï ókedhø ge óngënyø, kɑ wɑ̈thi kïttì döng-ɑ thɑ́ pï ki mïtïr ɑ́bïryew. Gïg-ɑ nëënø møg-ɑ ɑ́cyɑ̈dhi kì kömi piny bënn ɑ́thøw. Winy, kí dhög, kí dyëg, kí lɑ̈yyi pɑ̈l, kí gïg-ɑ mulli geki ji bënn ge ɑ́thøw. Gïïpiny bëne men-ɑ ɑ́bëëd kì keny-ɑ thwøwø kì kömi piny bëne, ɑ ɑ́bëëd e oyëgø, ɑ́thøw kinni tweet. Kɑ gïg-ɑ nëënø kì kömi piny bëne, ɑ løg ji, kí lɑ̈yy, kí winy, kí gïg-ɑ mulli bënn, lɑ̈ɑ̈ny yi Jwøk kì kömi piny, kɑ döng ɑ́ Nöö geki teen-ɑ́ ying yij yɑ̈y ki en. Kɑ pï ócungø kì piny ki cyɑ̈ng miyø kí pyɑ̈r ɑ́bïj. Nöö ɑ́nudd e opɑrrø yi Jwøk, en kí lɑ̈yyi pɑ̈l geki dhög kí dyëg møg-ɑ ying gen yij yɑ̈y. Kɑ yømø gøøje kömi piny, kɑ pï ócɑ̈gø ki døøg piny. Kɑ nyingi piny ówïyø’ mullø ki pï, kɑ pøøl kì mɑl ówïyø kunyi piny ki kødh. Pï ɑ́kedh ge døøg-ɑ piny gïti kɑ ɑ́nënni wɑ̈thi kïttì kì cyɑ̈ng-ɑ mɑl kì ri pyɑ̈ri dwɑ̈tt kì yij run. Kì bɑng cyɑ̈ng pyɑ̈r ɑ́ngwen møøgø, kɑ Nöö óyïëbbø ki ɑwɑj. Aöde ki ɑ́gɑg. Ágɑg nuti dwöögø, de ɑ́wɑ̈dhi pëggi be wïïnø gïti keny-ɑ ɑ́dwön pï. Codhe, ɑöd Nöö ki ɑkur kinni o gø yode, mɑ́ dwöön pï kì kömi piny, de ɑkur ɑ́jɑd ki keny me cïbe tyele, kɑ dwöög-ɑ yij yɑ̈y yï Nöö, mɑ́ piny ɑ́bëëd e nudd e pɑ̈ng yi pï, ɑrïïje cinge kɑ gø kwɑnye, ɑkɑ̈ɑ̈le gøn yij yɑ̈y. Kɑ oyïdø ki cyɑ̈ng ɑ́bïryew møøgø, ɑdøøge ɑkur ki örø. Kɑ ɑkur dwöög-ɑ yïe kì böörø, e ókɑ̈ddø ki yïth ólɑm me mɑr kì dhøge, kɑ yod yi Nöö kinni pï nungø kì kömi piny. Codhe, ɑnëëne ki cyɑ̈ng ɑ́bïryew møøgø, ɑcige ɑkur örø, de ɑkur ɑ́cög e pɑ dwöög. Kì cyɑ̈ng-ɑ mɑl kì ri dwɑ̈n-ɑ mɑl kì yij run, e runni Nöö bɑ miy ɑ́bïkyel kí ɑ́kyel, ɑ ɑ́dwön pï kì piny, kɑ wïj yɑ̈y yɑl yi Nöö, kɑ nenn-ɑ wɑ̈g kì wɑ̈thi tùng bënn, ɑlidhe gøn kinni piny thwøwø. De piny nuti ti thwøwø gïti kɑ ɑ́göög cyɑ̈nggi ryeew dwɑ̈tt ki pyɑ̈r ɑ́ryew wïdɑ́bïryew. Kɑ Nöö köbbi yi Jwøk kinni, “Yïn, wuki cyëgí, kí wɑ̈ddí geki mɑ̈nni gen, kedhu wɑ̈g kì yij yɑ̈y. Kɑ̈ɑ̈l lɑ̈yy bënn wɑ̈g kì yij yɑ̈y, winy, kí lɑ̈yy, kí gïg-ɑ mulli kì piny bënn. Wiy ge nywøl gen o ge ngënyi gen kì kömi piny.” Codhe, kɑ Nöö bï-ɑ wɑ̈g geki cyëge, kí wɑ̈dde geki mɑ̈nni gen. Lɑ̈yy bënn, kí gïg-ɑ mulli bënn, kí wɑ̈thi winy bënn ɑ́kedhi wɑ̈g, ge cyɑ̈dhi gɑ jɑlø kí dhɑjø. Codhe, kɑ Nöö ogëdø ki këli lɑm mi Jwøng-ɑ Ácwɑ̈ɑ̈j. Kɑ ókɑ̈bbø kì ri winy geki lɑ̈yy-ɑ dhïw, kɑ gï rɑ̈be kì kömi këli lɑm, gɑ gïg mëgge Jwøk. Kɑ Jwøng-ɑ Ácwɑ̈ɑ̈j pyëwe ómïnø yi gënh-ɑ nyi rɑ̈b bëne menɑni, ɑköbbe ree kinni, “Piny pɑ cigi cɑyø yi yɑn këti kipe gööj ji. Rummi ji rijjø, cɑgg ge nudd gɑ othønhø, de gïg-ɑ nëënø kì kömi piny pɑ cigi nɑ̈gø yi yɑn këti ni men. Ni kɑ cyɑ̈dhi piny, kɑ̈g geki kɑj ki byel, kööjø geki lëdhi piny, lew geki wuudø, wɑ̈r geki dicɑ̈ng ge pɑ cungi.” Codhe, kɑ Nöö geki wɑ̈dde kwëng yi Jwøk, ɑkööbe kinni, “Nywøl wun, kɑ wu ngënyi wun, kɑ piny pɑ̈ng wun. Lɑ̈yy bënn, kí winyyi mɑl bënn, kí gïg-ɑ mulli kì piny bënn, kí rij bënn kì nɑm, wu ówør yi gen kɑ wu böggi yi gen. Gïn-ɑ cyɑ̈dhi, kí gïn-ɑ nëënø, bɑ gïncɑmí, ge ɑ́mëggɑ wun geki lùm-ɑ mɑr, gɑ gïncɑm. De wu ko cyɑ̈ɑ̈m ki gïïpiny e nudd ree dɑ remø, mɑ́ wëy ying-ɑ ri remø. Keløg e dɑ ngɑn nɑ̈gi ki dhɑnhø, ceg kɑ cɑyø, ócɑy yi yɑn ki thøø, eni ngɑn-ɑ ónɑ̈ggi ki dhɑnhø. Dhɑnhø ɑ́cwɑ̈j ɑ́ ngïji Jwøk, kì bɑng menɑni, ngɑn-ɑ ónɑ̈ggi ki dhɑnhø, ónɑ̈g-ɑ yi dhɑnhø ni en. “De wun, nywøl wun, kɑ wu ngënyi wun, kɑ piny pɑ̈ng wun.” Kɑ Nöö geki wɑ̈dde köbbi yi Jwøk kinni, “Anɑn yɑ nywɑg-ɑ kwøbbɑ ki yïn, wuki kwɑrrí møg-ɑ óbï kì bɑngí, kí gïg-ɑ nëënø bënn, winy bënn, kí lɑ̈yy bënn, kí gïn-ɑ ɑ́bï wɑ̈g kí yïn kì yij yɑ̈y, kí gïn-ɑ nëënø kì kömi piny. Kwøb møg-ɑ nywɑg yi wɑ ek: gïg-ɑ nëënø bënn pɑ cigɑ nɑ̈gø ki bɑɑyø këti, piny pɑ cigi nɑ̈gø yi bɑɑyø.” Akööb Jwøk kinni, “Men bɑ ngïji nywɑgi kwøb kì kɑɑmee wɑki lɑ̈yy, Órøngɑ ɑ́cïbɑ yethi pøøl, o ógöögø ɑ́ ngïji kì kɑɑm wøn ki piny. Keny-ɑ ókɑ̈ɑ̈lɑ pøøl kömi piny, kɑ órøngø ocwöbø kì yethi pøøl, nywɑgi kwøb men-ɑ kɑɑmee wɑki lɑ̈yy kí gïn-ɑ nëënø kì kömi piny bëne, ópɑrri yi yɑn ceth, o pï cög gen ge pɑ göögø ki bɑɑyø, me nɑ̈g gïg-ɑ nëënø kì kömi piny. Keny-ɑ óying órøngø yethi pøøl, ólidh yi yɑn, kɑ kwøbb-ɑ ɑ́nywɑg yi wɑ, ge pɑth ki møg pɑ̈d, pɑr yi yɑn, eni kwøbb-ɑ ɑ́nywɑg yi Jwøk geki gïg-ɑ nëënø bënn møg-ɑ ri gen di remø kì kömi piny.” Codhe, kɑ Nöö köbbi yi Jwøk kinni, “Ócungi ɑ́ ngïji nywɑgi kwøb kì kɑɑm wøki gïg-ɑ ri gen di remø kì kömi piny.” Wɑ̈ddi Nöö møg-ɑ ɑ́bï wɑ̈g kì yij yɑ̈y bɑ Cem, kí Kɑm, kí Yɑpeth. Kɑm bene wïyi Kɑnɑɑn. Jøgɑni gɑ ɑ́dɑ̈g bɑ wɑ̈ddi Nöö, o ji bënn kì kömi piny kɑ̈ɑ̈l-ɑ ri jøgɑni gɑ ɑ́dɑ̈g. Kɑ Nöö ogöögø ki jɑlpur. Kɑ ogöögø ki bɑɑg oløg, o bɑ en ɑ ɑ́kwöngi ki pïdhø ki oløg. Kɑ Nöö omɑ̈dhø ki møgi nywøli oløg cyɑ̈ng megø, kɑ wïje nɑ̈g yi møgi oløg, kɑ óbuddø ree bong ógødh kì yij kemɑ̀ mee. Kɑm wïyi Kɑnɑɑn, wïye ɑ́lidhe e buud köme bong ógødh, kɑ kedh-ɑ be köbbi nyiimen kì wɑ̈g. Codhe, kɑ Cem geki Yɑpeth ókɑ̈bbø ki ógødh, kɑ ógønhɑni peedh gen wɑ̈thi tøggi gen gø mïdhi ge’ mïdhø, kɑ ge kedh-ɑ yij kemɑ̀ ge cyɑ̈dh-ɑ ngɑ̈thi gen, kɑ wïyi gen kum gen, wɑ̈thi gen løg gen kipe wïyi gen ólidh yi gen e buud köme bong ógødh. Nöö ɑ́bëëd e onenø kì bɑng møng-ɑ ɑ́mɑdhe. Keny-ɑ ɑ́lɑ̈ɑ̈ny møgi oløg kì wïje, kɑ gïn-ɑ ɑ́göggii yi wɑ̈de nyelthinh, ɑ løg Kɑm yode, ɑkööbe kinni, “Cyën ópɑ̈dhi kömi Kɑnɑɑn! Óbëëd ɑ́ bɑ̈ng nyiimen. Jwøng-ɑ Ácwɑ̈ɑ̈j Jwøøg Cem ólejji! Kɑnɑɑn óbëëd ɑ́ bɑ̈ng Cem. Piny Yɑpeth ólɑny yi Jwøk, yethi kemmi Cem óbëëd yi kwɑrri Yɑpeth, o Kɑnɑɑn óbëëd ɑ́ bɑ̈ng gen.” Nöö ɑ́bëëd ki runn miy ɑ́dɑ̈g kí pyɑ̈r ɑ́bïj (350) kì bɑng bɑɑyø. Runni Nöö bënn ɑ́göög ki miy ɑ́bïngwen kí pyɑ̈r ɑ́bïj, codhe ɑthøwe cyee. Møg bɑ kwɑrri wɑ̈ddi Nöö, gøl Cem, kí gøl Kɑm, kí gøl Yɑpeth, wɑ̈ddi Nöö, gɑ ɑ́dɑ̈g, ge ɑ́yïddi ki wɑ̈dd kì bɑng bɑɑyø. Wɑ̈ddi Yɑpeth bɑ Gömer, kí Mɑgög, kí Mɑdɑy, kí Yɑbɑn, kí Tubɑl, kí Mecek, kí Tïrɑs. Wɑ̈ddi Gömer bɑ Ackenɑdh, kí Rïpɑth, kí Tögɑrmɑ̀. Wɑ̈ddi Yɑbɑn bɑ Elicɑɑ̀, kí Tɑrcic, kí Kïtïm, kí Dödɑnïm. Bene gen ɑ løg kweyyi jurr-ɑ bëëdø kì kömi Nɑɑm Omeli Tɑr geki kɑggi nɑ̈mmì. Tyëngɑni ɑ bɑ kwɑrri Yɑpeth, ge ɑ́göög ki pödhh, kí jurrì mø 'kööb dhøg mø bɑ̈ɑ̈n, ɑkuun 'kööb-ɑ dhøge kì wɑ̈ye. Wɑ̈ddi Kɑm bɑ Kuc, kí Misrɑim, kí Put, kí Kɑnɑɑn. Wɑ̈ddi Kuc bɑ Sebɑ̀, kí Abïlɑ̀, kí Sɑbtɑ̀, kí Rɑmɑ̀, kí Sɑbtekɑ̀. Wɑ̈ddi Rɑmɑ̀ bɑ Sebɑ̀ kí Dedɑn. Kuc yïe ɑ́dɑ kwɑre thyew me cwøl ɑ́ Nimröd, ɑ ɑ́göög ki ngɑn teg kì kömi piny bëne. Ábëëd ɑ́ jɑldwɑr me teg mɑ ɑ́køny yi Jwøng-ɑ Ácwɑ̈ɑ̈j, en ɑ nyi kømmi yi ji kinni, “Nɑ Nimröd, bɑ jɑldwɑr me teg mɑ ɑ́køny yi Jwøng-ɑ Ácwɑ̈ɑ̈j.” Kì tyeli mɑl jyɑ̈gi Nimröd ɑ́kwɑny-ɑ Bɑbïl, kí Erek, kí Akɑd, kí Kɑlnè kì piny Bɑbïlöniyɑ̀. Keny-ɑ ɑ́rume mɑgi kɑ̈jjɑni, ɑkedhe Acuur kun-ɑ ɑ́cöbe ki kɑ̈dd, ɑ løg Ninɑwɑ̀, kí Reöböth, kí Kɑlɑ̀. Agere Resen thyew, kɑɑl-ɑ ɑ́bëëd e dwøng kì kɑɑm Ninɑwɑ̀ geki Kɑlɑ̀. Kwɑrri Misrɑim bɑ tyëng Lud, kí tyëng Anɑm, kí tyëng Leɑb, kí tyëng Nɑptu. Kí tyëng Pɑthrus, kí tyëng Kɑslu, kí tyëng Kɑptör. Tyëng Pelistiyɑ̀ kɑ̈ɑ̈l-ɑ ri tyëng Kɑslu. Kɑnɑɑn ɑ bɑ wïyi Sïdön, Sïdön ɑ bɑ kɑye, bɑnge dɑ Keth. En thyew ɑ bɑ kweyi tyëng Yebus, kí tyëng Amör, kí tyëng Girgɑc, kí tyëng Kib, kí tyëng Arkì, kí tyëng Sïnɑ̀, kí tyëng Arbɑd, kí tyëng Dhemɑrì, kí tyëng Amɑth. Kɑ jurri Kɑnɑɑn otɑyø. Piny Kɑnɑɑn cɑ̈g-ɑ́ɑ̀ Sïdön kì wɑɑng wurlwɑl, kɑ wɑ̈dh-ɑ Gerɑr kì buti Gɑdhɑ̀, kɑ wɑ̈dh-ɑ Sødømɑ̀ kí Gømørɑ̀ kì wɑɑng cyɑ̈ɑ̈ng mwøl, kɑ wɑ̈dh-ɑ Admɑ̀ geki Dheböïm kì buti Lɑcɑ̀. Møgɑni bënn bɑ kwɑrri Kɑm, wɑ̈thi kɑ̈llɑni bënn yï gen dɑ dhøggi gen, kí pìnyi gen, o ge bɑ pödhh. Cem bene ómï Yɑpeth, nyel-ɑ dwøng, en thyew yïe ɑ́dɑ wɑ̈dd, bɑ en ɑ ree ɑ́kɑ̈ɑ̈l yi kwɑrri Eber bënn. O wɑ̈ddi Cem gen ɑ løg Elɑm, kí Acuur, kí Arpɑkcɑd, kí Lud, kí Arɑm. Wɑ̈ddi Arɑm bɑ Udh, kí Uul, kí Gether, kí Mecek. Arpɑkcɑd en ɑ bɑ wïyi Celɑ̀, o Celɑ̀ ɑ bɑ wïyi Eber. Eber yïe ɑ́dɑ wɑ̈dde ɑ́ryew, ɑ løg Peleg kipe piny ɑ́pɑ̈ngi e nud, o ómen cwøl ɑ́ Yoktɑn. Yoktɑn bɑ wïyi Almödɑd, kí Celep, kí Adhɑrmɑbeth, kí Yerɑ̀, kí Adörɑm, kí Udhɑl, kí Diklɑ̀, kí Obɑl, kí Abimɑil, kí Cebɑ̀, kí Opir, kí Abïlɑ̀, kí Yöbɑb. Jiɑni bënn bɑ kwɑrri Yoktɑn. Ge ɑ́bëëd ɑ kɑɑm Mecɑ̀ geki Sepɑr kí myërri kelli kïttì, kì wɑɑng cyɑ̈ɑ̈ng mwøl. Tyëngɑni bɑ gøl Cem, ge bɑ ɑpyël gɑ wɑ̈thi kɑ̈llì, yï gen dɑ dhøg møg 'kööb gen, o ri gen pɑ̈ngi gen gɑ pödhh. Menɑni bene lwömi gøl Nöö, e bɑ ɑpyël pödhø ki pödhø. Kɑ̈llɑni ɑ ri gen ɑ́kɑ̈ɑ̈l yi jurri kömi piny bëne, møg-ɑ ɑ́tɑɑy kömi piny kì bɑng bɑɑyø. Kì bøli kenyɑni dhɑnhø bëne kì kömi piny, ɑ́kööb-ɑ dhøg ɑ́kyel, ge kømm-ɑ kwøb ɑ́kyel. Keny-ɑ ɑ́dhwödh ji kì wɑɑng cyɑ̈ɑ̈ng mwøl, ge ɑ́yïddi ki tör me dwøng kì piny Bɑbïlöniyɑ̀, kɑ ge pëgg-ɑ kenyɑni. Kɑ ri gen köbbi gen kinni, “Pɑ̈ɑ̈m wɑ ki thob, kɑ bul wɑ o tënge.” Codhe, ɑdøøg gen be gyer ki thob ɑ́ kej kïttì, kí dök ɑ́ kej lɑ̈m-ɑ thij. Codhe, ɑköbbi gen ri gen kinni, “Gëëd wɑ ki kɑɑl, kɑ wɑ gëëd wɑ ki ønbɑ̈r me bɑ̈ɑ̈r cɑrø. Peree ótëngi. Codhe, o wɑ cög wɑ pɑ tɑɑy kömi piny bëne.” Kɑ Jwøng-ɑ Ácwɑ̈ɑ̈j bï-ɑ piny be lidhi kɑɑl-ɑ ɑ́ger yi ji geki ønbɑ̈r men-ɑ ger yi gen. Akööb Jwøng-ɑ Ácwɑ̈ɑ̈j kinni, “Anɑn ji møg ri gen reb gen, ge 'kööb-ɑ dhøg ɑ́kyel bënn. Men bene cɑ̈gi gen ki gwøg ki gïn-ɑ dwɑddi gwøgø yi gen. Gïn-ɑ dwɑddi yi gen ócuggø gwøgø yi gen. Bïu kedhi wɑ piny be bɑ̈nni dhøggi gen, o bëëd e bong ngɑn lïngi dhø ngɑn-ɑ bëëdø kì bute.” Codhe, kɑ ge kedhhi yi Jwøng-ɑ Ácwɑ̈ɑ̈j kì kömi piny bëne, kɑ ge ówïyø gyer ki kɑɑlɑni. Codhe, ɑcɑɑg kenyɑni ɑ́ Bɑbïl, mɑ́ kenyɑni ɑ ɑ́bɑ̈nni dhøggi kömi piny bënn yi Jwøng-ɑ Ácwɑ̈ɑ̈j. Codhe, kɑ ge göjji tɑɑy kömi piny bëne yi Jwøng-ɑ Ácwɑ̈ɑ̈j. Møg bɑ kwɑrri Cem. Kì bɑng bɑɑyø ki runn ɑ́ryew, e runni Cem bɑ miyø, ɑ ɑ́nywøøl Arpɑkcɑd wɑ̈de. Codhe, kɑ Cem obëëdø ki runn miy ɑ́bïj kì bɑng kɑ ɑ́nywøøl Arpɑkcɑd, kɑ onywølø kí wɑ̈dd møøgø kí womɑ̈nn. Keny-ɑ ɑ́göög runni Arpɑkcɑd ki pyɑ̈r ɑ́dɑ̈g wïdɑ́bïj, ɑnywøøl Celɑ̀ wɑ̈de. Codhe, kɑ Arpɑkcɑd obëëdø ki runn miy ɑ́ngwen kí ɑ́dɑ̈g, kɑ onywølø ki wɑ̈dd møøgø kí womɑ̈nn. Keny-ɑ ɑ́göög runni Celɑ̀ ki pyɑ̈r ɑ́dɑ̈g, ɑnywøøl Eber wɑ̈de. Codhe, kɑ Celɑ̀ obëëdø ki runn miy ɑ́ngwen kí ɑ́dɑ̈g, kɑ onywølø ki wɑ̈dd møøgø kí womɑ̈nn. Keny-ɑ ɑ́göög runni Eber ki pyɑ̈r ɑ́dɑ̈g wïdɑ́ngwen, ɑnywøøl Peleg wɑ̈de. Codhe, kɑ Eber obëëdø ki runn miy ɑ́ngwen kí pyɑ̈r ɑ́dɑ̈g, kɑ onywølø ki wɑ̈dd møøgø kí womɑ̈nn. Keny-ɑ ɑ́göög runni Peleg ki pyɑ̈r ɑ́dɑ̈g, ɑnywøøl Reu wɑ̈de. Codhe, kɑ Peleg obëëdø ki runn miy ɑ́ryew kí ɑ́bïngwen, kɑ onywølø ki wɑ̈dd møøgø kí womɑ̈nn. Keny-ɑ ɑ́göög runni Reu ki pyɑ̈r ɑ́dɑ̈g wïdɑ́ryew, ɑnywøøl Serug wɑ̈de. Codhe, kɑ Reu obëëdø ki runn miy ɑ́ryew kí ɑ́bïryew, kɑ onywølø ki wɑ̈dd møøgø kí womɑ̈nn. Keny-ɑ ɑ́göög runni Serug ki pyɑ̈r ɑ́dɑ̈g, ɑnywøøl Nɑor wɑ̈de. Codhe, kɑ Serug obëëdø ki runn miy ɑ́ryew, kɑ onywølø ki wɑ̈dd møøgø kí womɑ̈nn. Keny-ɑ ɑ́göög runni Nɑor ki pyɑ̈r ɑ́ryew wïdɑ́bïngwen, ɑnywøøl Terɑ̀ wɑ̈de. Codhe, kɑ Nɑor obëëdø ki runn miyø kí pyɑ̈rø wïdɑ́bïngwen, kɑ onywølø ki wɑ̈dd møøgø kí womɑ̈nn. Keny-ɑ ɑ́göög runni Terɑ̀ ki pyɑ̈r ɑ́bïryew, ɑnywøle wɑ̈dde, ɑ løg Abrɑm, kí Nɑor, kí Arɑn. Møg bɑ kwɑrri Terɑ̀. Terɑ̀ ɑ bɑ wïyi Abrɑm geki Nɑor, kí Arɑn. Arɑn en ɑ bɑ wïyi Lot. Arɑn ɑ́thøw kì Ur, kì piny Bɑbïlöniyɑ̀, e Terɑ̀ wïye nudd e onëënø. Kɑ Abrɑm geki Nɑor ónyömø ryeet. Cï Abrɑm cwøl ɑ́ Sɑrɑy, o cï Nɑor cwøl ɑ́ Milkɑ̀, nyɑɑr Arɑn. Sɑrɑy ɑ́bëëd ɑ́ bwøj bong nyir kì yïe. Kɑ Terɑ̀, wɑ̈de Abrɑm kwɑnye, kí Lot kwɑre, wɑ̈d Arɑn wɑ̈de, kí Sɑrɑy kwɑre, cï Abrɑm wɑ̈de, kɑ odhwödhø kì Ur kì piny Bɑbïlöniyɑ̀. Ge ɑ́dwɑdd-ɑ kedhi piny Kɑnɑɑn, de keny-ɑ ɑ́wɑ̈dhi gen Arɑn, kɑ ge pëgg-ɑ piny kì kenyɑni. Terɑ̀ ɑ́bëëd, kɑ runne ogöögø ki miy ɑ́ryew kí ɑ́bïj, codhe ɑthøwe kì Arɑn. Kɑ Abrɑm köbbi yi Jwøng-ɑ Ácwɑ̈ɑ̈j kinni, “Wiy pödhi wun, kí wɑddi wun, kí gøl wïyí, kɑ yï kedhí piny-ɑ ónyudhɑ yïn. Yï ógwøg yi yɑn yïn ɑ́ pödhø me dwøng, o yï ógyëdh yi yɑn, kɑ perí ótëngø yi dhɑnhø bëne, o yï óbëëd yïn ɑ́ gyëdh kipe pödhh-ɑ kyeelø. Tyëng-ɑ ólɑ̈mmi yïn gyëdh, ógyëdh yi yɑn. De tyëng-ɑ ólɑ̈mmi yïn cyën, ge ógöjjɑ cyën. Dhɑnhø bëne kì kömi piny, ógyëdh yi yɑn, e gyëdh kedh-ɑ́ɑ̀ rií.” Kɑ Abrɑm odhwödhø kì Arɑn ni kɑ ɑ́köbbii yi Jwøng-ɑ Ácwɑ̈ɑ̈j, kɑ Lot ókedhø ki en. Kì bøli kenyɑni Abrɑm runne ɑ́bëëd gɑ pyɑ̈r ɑ́bïryew wïdɑ́bïj. Cyëge Sɑrɑy ɑ́kɑ̈ɑ̈le geki Lot wɑ̈d ómen, kí bɑ̈ngg møg-ɑ ɑ́yod yi gen kì Arɑn bënn, kí gïg-ɑ nud kì yï gen bënn. Ge ɑ́dhwödh kì Arɑn kɑ ge kedh-ɑ piny Kɑnɑɑn. Keny-ɑ ɑ́wɑ̈dhi Abrɑm piny Kɑnɑɑn, kɑ Abrɑm ókedhø, pinyɑni bɑ̈ɑ̈ne’ bɑ̈ɑ̈nø gïti kɑ ɑ́wɑ̈dhe keny-ɑ di yɑdh óthuri Moriyɑ̀ men-ɑ dwøng kì Cekïm. Tyëng Kɑnɑɑn ɑ́bëëd ɑ pinyɑni kì bøli kenyɑni. Acwöb Jwøng-ɑ Ácwɑ̈ɑ̈j kì bøli Abrɑm, ɑkööbe kinni, “Piny men ómëggɑ kwɑrrí.” Codhe, kɑ Abrɑm ogëdø ki këli lɑm kì kenyɑni, ɑ́ mi Jwøng-ɑ Ácwɑ̈ɑ̈j; Ngɑn-ɑ ɑ́cwöb kì bøle. Codhe, kɑ kedh-ɑ thɑ kït men-ɑ kuni wɑɑng cyɑ̈ɑ̈ng mwøl kì Betiil, kɑ ogudø ki kɑɑl kì kenyɑni. Betiil ying-ɑ kuni wɑɑng cyɑ̈ɑ̈ng böörø, o Aɑy ying-ɑ kuni wɑɑng cyɑ̈ɑ̈ng mwøl. Kɑ Abrɑm ogëdø kì kenyɑni ki këli lɑm ɑ́ mi Jwøng-ɑ Ácwɑ̈ɑ̈j, kɑ gø mɑlle. Codhe, kɑ Abrɑm odhwödhø e dɑ̈g-ɑ kuni wɑɑng wurlwɑl kì yij piny Kɑnɑɑn. Kì bøli kenyɑni, gïgcɑmm ɑ́bëëd ge nøg kì piny Kɑnɑɑn, ɑdhwödh gøl Abrɑm kɑ kedh-ɑ Rïp be bëëdø kì kunɑni, mɑ́ kɑ̈j ɑ́bëëd e dwøng. Keny-ɑ ɑ́cyɑ̈ngi gen ki Rïp, kɑ Sɑrɑy cyëge köbbe kinni, “Ngɑ̈nyi yi yɑn kinni yï bɑ ngɑndhɑjø me myëër. Keny-ɑ óliidh yïn yi tyëng Rïp, ge ókööbø kinni, Nyɑɑn, bɑ cyëge. Codhe, kɑ yɑ nɑ̈g yi gen, de yï ówiy yi gen yï onëënø. Köbbí gen kinni yï bɑ nyimïɑ, o yɑ ómïdhi yi gen kidøøj kiperí, o wëyɑ ókorri yi gen kì bɑngí.” Keny-ɑ ɑ́wɑ̈dhi Abrɑm Rïp, kɑ lidh yi tyëng Rïp kinni Sɑrɑy myëër kidyër. Álidh yi jɑggi Rïp, kɑ rɑ̈ɑ̈dh Rïp köbbi yi gen ki myër-ɑ myëre. Kɑ Abrɑm göggi ki gïg mø døøj yi rɑ̈dh, mɑ́ e ɑ́rum kinni Abrɑm bɑ ómï Sɑrɑy. Kɑ Abrɑm nënge ki dyëg, kí dhög, kí ɑderr-ɑ mɑ̈nn kí cwøw, kí ɑmɑl, kí bɑ̈ngg-ɑ mɑ̈nn geki bɑ̈ngg-ɑ cwøw. De Jwøng-ɑ Ácwɑ̈ɑ̈j, rɑ̈dh geki tyëng gøle bënn ɑ́göjje rɑ̈ɑ̈m dëllì, kipe Sɑrɑy cï Abrɑm. Kɑ Abrɑm cwøl yi rɑ̈dh, kɑ gø köbbe kinni, “Á ngø ɑ göggí yɑn ni men? Á kipe ngø ɑ ɑ́bɑɑny yɑn ki köbbø kinni bɑ cyëgí? Yïde ɑ ɑ́kööb kinni Sɑrɑy bɑ nyimyëw, ɑkwɑnyɑ en ɑ́ cyëgɑ? Anɑn cyëgí èn. Kwɑɑny, kɑ yï kedh!” Codhe, kɑ rɑ̈dh jøge ciire be ryeem Abrɑm wɑ̈g kì Rïp, kɑ Abrɑm ókedhø geki cyëge, kɑ gïg-ɑ ɑ́ying yïe bënn kɑ̈ɑ̈le. Codhe, kɑ Abrɑm geki cyëge kí Lot odhwödhø kì Rïp, e jɑmmi gen bënn okɑ̈llø yi gen, kɑ ge kedh-ɑ Kɑnɑɑn kì kuni wɑɑng wurlwɑl. Abrɑm yïe ɑ́dɑ jɑmmì mø gïïr cɑrø, dhög kí dyëg, kí ɑderr, kí dhɑb, kí ɑ́tegø. Kɑ ódøøgø dhwödhø kì Kɑnɑɑn, kɑ døøg-ɑ Betiil keny-ɑ ɑ́gudde ki kɑɑl kɑ̈ge dööng, kì kɑɑm Betiil geki Aɑy, kɑ ogëdø ki këli lɑm kì kenyɑni. Codhe, kɑ Jwøng-ɑ Ácwɑ̈ɑ̈j mɑlle kì kenyɑni. Lot ɑ́bëëd e ócyɑ̈dhø geki Abrɑm kì bøli kenyɑni. O Lot ɑ́bëëd thyew yïe dɑ dhög, kí dyëg kí ɑderr, kí kɑ̈llì mø gïïr. Abrɑm geki Lot ɑ́bëëd dhögi gen gïïr cɑrø, kɑ piny ódhïngø yi gen. Kɑ jøg-ɑ kwɑy dhögi Abrɑm owërø ki jøg-ɑ kwɑy dhögi Lot. Tyëng Kɑnɑɑn geki tyëng Perïdh ɑ́bëëd ge nud thyew kì pönhɑni, kì bøli kenyɑni. Aköbbi Lot yi Abrɑm kinni, “Ko di wëërø kì kɑɑmee, wɑlɑ̀ kì kɑɑm kwɑ̈yyi dhögí geki kwɑ̈yyi dhögɑ, mɑ́ wɑ bɑ wɑdd. Wɑ ceg-ɑ dɑ̈ngø. Piny bëne ɑ bølí ɑnɑn. Keløg yï kedh-ɑ wïj kyëj, yɑ ókedhi wïj cɑɑm.” Kɑ Lot wïje tïnge, kɑ Töör Urdun lidhe pï gïïr kì yije. Nënni e nɑ bɑɑg Jwøng-ɑ Ácwɑ̈ɑ̈j, pɑ̈r ki piny Rïp kì tung-ɑ døøg kuni Dhoɑr. Kì bøli kenyɑni Sødømɑ̀ geki Gømørɑ̀ ɑ́bëëd ge nuti nɑ̈gø yi Jwøng-ɑ Ácwɑ̈ɑ̈j. Codhe, kɑ Lot myeg-ɑ Töör Urdun. Kɑ dɑ̈g-ɑ yije kì kuni wɑɑng cyɑ̈ɑ̈ng mwøl. Bene kër-ɑ ɑ́dɑ̈ngi gen ɑnɑn. Abrɑm ɑ́döng kì piny Kɑnɑɑn, de Lot ɑ́pëggi kelli myërr kì yij Töör Urdun, kɑ ogudø ki kɑɑl kì buti Sødømɑ̀. Kì bøli kenyɑni, tyëng Sødømɑ̀ ɑ́bëëd ge orøngø ki orøg me rɑj kì bøli Jwøng-ɑ Ácwɑ̈ɑ̈j. Kɑ Abrɑm köbbi yi Jwøng-ɑ Ácwɑ̈ɑ̈j, ge rum dɑ̈ngø ki Lot kinni, “Tïng wïjí yï ying-ɑ keny-ɑ di yïn ɑnɑn, kɑ yï lïïdh bølí, kɑ yï lïïdh wɑɑng wuudø kí wɑɑng wurlwɑl, kɑ yï lïïdh wɑɑng cyɑ̈ɑ̈ng mwøl kí wɑɑng cyɑ̈ɑ̈ng böörø, mɑ́ yï mëggɑ’ piny-ɑ bølí ɑnɑn bëne, wuki kwɑrrí gïti ɑtheer. Kwɑrrí ógwøg yi yɑn ge gïïr ni tør kì piny, keløg e dɑ ngɑn lwɑ̈ng tør ki kwɑnø, kwɑrrí ócuggø kwɑnø yi en thyew. Dhwödhí mɑl! Cyɑ̈dhí kì yij pinyɑni bëne, mɑ́ e mëggɑ’ yïn ɑnɑn.” Codhe, kɑ Abrɑm kemme puthe, kɑ dɑ̈g-ɑ buti óthurri Moriyɑ̀ kì buti Kibrön. Kɑ ogëdø ki këli lɑm mi Jwøng-ɑ Ácwɑ̈ɑ̈j. Kì bøli kenyɑni, Amrɑpel bɑ rɑ̈ɑ̈dh Bɑbïlöniyɑ̀, Aryök bɑ rɑ̈ɑ̈dh Elɑsɑr, Kedorlɑomer bɑ rɑ̈ɑ̈dh Elɑm, o Tidɑl bɑ rɑ̈ɑ̈dh Göyïm. Rɑ̈nhhɑni bënn, ge ɑ́kedhi be nyɑɑg ki pödhhi rɑ̈nhh-ɑ kyeelø, ɑ løg, Berɑ̀ rɑ̈ɑ̈dh Sødømɑ̀, kí Bircɑ̀ rɑ̈ɑ̈dh Gømørɑ̀, kí Cinɑb rɑ̈ɑ̈dh Admɑ̀, kí Cemeber rɑ̈ɑ̈dh Dheböïm, kí rɑ̈ɑ̈dh Belɑ̀. Belɑ̀ cwølli thyew ɑ́ Dhoɑr. Kɑ rɑ̈nhhɑni bënn, møg-ɑ kömi gen ɑ́tëër liny, yɑ̈yyi gen reb gen kì yij Töör Sïdïm, ɑ bɑ Luuy Omelø ɑnɑn. Ge ɑ́bëëd ge køny-ɑ Kedorlɑomer ki runn pyɑ̈rø wïdɑ́ryew, de kì ri pyɑ̈rø wïdɑ́dɑ̈ɑ̈g runn, kɑ ge ngɑ̈ny-ɑ wɑ̈yi gen. Codhe, kɑ kì ri pyɑ̈rø wïdɑ́ngween runn, Kedorlɑomer geki rɑ̈nhh-ɑ tunge, ɑ́bï ki liny kɑ tyëng Repɑim kí Acteröth Kɑrnɑim tyɑm yi gen, kí tyëng Dhudhïm kì Aɑm, kí Emïm kì yij Töör Kiriɑtɑim, kí tyëng Kör kì wɑ̈thi kïtti Seir, gïti Elpɑrɑn kì leggi thïm. Keny-ɑ ɑ́dwöög gen myërri gen, ge ɑ́kɑ̈ɑ̈l-ɑ köthi myërri Ein Micpɑt, ɑ løg Kɑdic, kɑ tyëng Amɑlek tyɑm yi gen, geki tyëng Amör møg-ɑ bëëdø kì Adhɑdhön Tɑmɑr. Codhe, kɑ rɑ̈ɑ̈dh Sødømɑ̀, ki rɑ̈ɑ̈dh Gømørɑ̀, ki rɑ̈ɑ̈dh Admɑ̀, ki rɑ̈ɑ̈dh Belɑ̀ ɑ cwøl ɑ́ Dhoɑr, kedh-ɑ be nyɑɑg ki gen kì yij Töör Sïdïm. Kɑ ge ónyïɑ̈ggø ki liny-ɑ kwølli yi Kedorlɑomer, rɑ̈ɑ̈dh Elɑm, kí Tidɑl rɑ̈ɑ̈dh Göyïm, kí Amrɑpel rɑ̈ɑ̈dh Bɑbïlöniyɑ̀, kí Aryök rɑ̈ɑ̈dh Elɑsɑr, pödhh ɑ́ngwen ɑ nyïɑ̈ggi ki pödhh ɑ́bïj. Ádɑ burri dök mø gïïr kì Töör Sïdïm. Keny-ɑ ɑ́cyeddi rɑ̈ɑ̈dh Sødømɑ̀ geki rɑ̈ɑ̈dh Gømørɑ̀ ki liny-ɑ kwølli yi gen bënn, kwï gen ɑ́pɑ̈dhi yethi burri dök, de møg-ɑ ɑ́döng ge nuti pɑ̈dhi yethi burrì, ge ɑ́rengi kɑ ge tɑɑy-ɑ kelli kïttì. Kɑ dhögi Gømørɑ̀ geki Sødømɑ̀ kɑ̈l kí gïgcɑmmi gen bënn yi Kedorlɑomer geki liny-ɑ cyɑ̈dhi ki en. Kɑ Lot, wɑ̈d ómï Abrɑm, ɑ ɑ́bëëd kì Sødømɑ̀, kɑ̈l geki dhöge bënn. Codhe, kɑ ge ókedhø, gen ɑ tyëng-ɑ ɑ́tyɑ̈ɑ̈m. Kɑ nyel ɑ́kyel me cögø e nuti mɑgø, kedh-ɑ yï Abrɑm, ɑ løg Ibrì, kɑ gø köbbe gïn-ɑ ɑ́cwöb. Abrɑm ɑ́nudd e bëëd ɑ buti óthurri Mɑmɑrɑ̀ Kwɑɑr Amör. Mɑmɑrɑ̀ bɑ ómï Acköl, kí Aner jøg-ɑ nywɑ̈gø ki kwøb geki Abrɑm. Keny-ɑ ɑ́lïng Abrɑm kinni wɑ̈d ómen ómɑgø kɑ kɑ̈l, ɑcønge jø kɑɑle kwɑnni gen bɑ miy ɑ́dɑ̈g kí pyɑ̈rø wïdɑ́bïdɑ̈g møg-ɑ ɑ́nywøl kì kɑɑle, kɑ reng-ɑ bɑng gen gïti kɑ ɑ́pïïde gïn kì Dɑn. Kì wɑ̈rɑni kɑ Abrɑm liny-ɑ kɑ̈lli yi en pɑ̈nge ɑ́ ɑkudd ɑ́ngwen, kɑ tyëngmɑ̈ɑ̈nø pɑ̈ɑ̈y gen piny. Kɑ gï cyeddi gen gïti Öbɑ̀, ngɑ̈ɑ̈j Dimɑceg kì kuni wɑɑng wuudø. Kɑ dhög dwöög yi Abrɑm bënn, kɑ Lot wɑ̈d ómen dwööge geki jɑmme bënn, kí tyëng-ɑ mɑ̈nn thyew, geki ji-ɑ ɑ́mɑg bënn. Kɑ Abrɑm ócɑ̈gø ki døøg kɑɑle keny-ɑ ɑ́rume tyɑmi Kedorlɑomer geki rɑ̈nhh-ɑ ɑ́lwööb ki en. Kɑ ge pɑɑr yöö yi rɑ̈ɑ̈dh Sødømɑ̀, e bï-ɑ be yïddø ki Abrɑm, kì yij Töör Cebɑ̀. Törɑni cwøl ɑ́ Töör Rɑ̈nhì. Kɑ Melkidhedek rɑ̈ɑ̈dh Cɑlem, ókɑ̈nø ki ópun geki møgi oløg. Melkidhedek ɑ́bëëd ɑ́ ókwëri Jwøng-ɑ Pëddi Döng. Kɑ Abrɑm kwënge kinni, “Abrɑm, yï ógyëdh yi Jwøng-ɑ Pëddi Döng, Jwøng-ɑ ɑ́cwɑ̈j mɑl kí piny. O wɑ lejj-ɑ Jwøng-ɑ Pëddi Döng; Ngɑn-ɑ ɑ́køny yïn ki tyɑmi tyëngmɑ̈ɑ̈nø.” Codhe, kɑ Melkidhedek nëngi yi Abrɑm ki ɑ́kyel kì ri pyɑ̈rri gïg-ɑ ɑ́kɑ̈ɑ̈l yi en bënn kì kej liny. Kɑ rɑ̈ɑ̈dh Sødømɑ̀, Abrɑm köbbe kinni, “Dhög møgɑk bënn ócuggø mïdhø yi yïn gɑ møgí. Kɑ yɑ mëggí jiɑ, møg-ɑ ɑ́dwöög yi yïn kì kun-ɑ ɑ́kïdhi gen.” De Abrɑm, rɑ̈ɑ̈dh Sødømɑ̀ ɑ́köbbe kinni, “Yɑ ɑ́rum ki köngø kì bøli Jwøng-ɑ Ácwɑ̈ɑ̈j, Jwøng-ɑ Pëddi Döng, ɑ ɑ́cwɑ̈j mɑl kí piny. Yɑ ɑ́köngi kinni bong gïjø me bɑ mií men-ɑ ókwɑny yi yɑn. Yɑ pɑ pɑ̈nyi kɑ̈bbø ki gïïpiny kinni tek, cɑgg ɑ́ kori rød, wɑlɑ̀ dibɑ̈ɑ̈mi wɑrø, kipe yï ókööbø kinni, ‘Abrɑm ɑ́gwøgɑ ɑ́ jɑlkɑ̈r.’ Bong gïjø mɑ ɑ́kwɑny yi yɑn, den-ɑ́ gïg-ɑ ɑ́cɑm yi yɑɑg-ɑ cyɑ̈dhi ki yɑn. De Aner, geki Ecköl kí Mɑmɑrɑ̀ rɑ̈nhh-ɑ ɑ́nyɑg wøn liny, tuung gen ókwɑny yi gen.” Kì bɑng keny-ɑ ɑ́rum gïgɑni ki cwöbø, kɑ Jwøk, Jwøng-ɑ Ácwɑ̈ɑ̈j møge köbbe Abrɑm kì yethi lɑ̈g, ɑ́kööb kinni, “Abrɑm, yï ko böggi, yï ókor yi yɑn, kɑ yï nëngɑ ki köögi me dwøng cɑrø.” De Abrɑm ɑ́kööb kinni, “Á ngø ɑ ómëggí yɑn, yïn ɑ Wɑ̈ɑ Jwøng-ɑ Ácwɑ̈ɑ̈j? Yïɑ bong wɑ̈d, o bɑ Eliedher jɑl Dimɑceg ɑ ólɑg jɑmmɑ bënn keny-ɑ óthøwɑ.” Akööb Abrɑm kinni, “Lidh, bong wɑ̈d mɑ ɑ́mëggí yɑn, de bɑ bɑ̈ng men-ɑ ɑ́nywøl kì gølɑ, ɑ ólɑg jɑmmɑ bënn.” Aköbbi Abrɑm yi Jwøng-ɑ Ácwɑ̈ɑ̈j kinni, “Pɑth ki en ɑ ólɑg jɑmmí. Dïl wɑ̈dí ceth, en ɑ ólɑg jɑmmí.” Kɑ Abrɑm kïdhi wɑ̈g yi Jwøng-ɑ Ácwɑ̈ɑ̈j, ɑköbbe gøn kinni, “Lïïdh mɑl kɑ kyell kwɑɑn, keløg ge olwɑ̈ngø yi yïn ki kwɑnø.” Kɑ dhøge leenge kinni, “Kwɑrrí thyew óbëëd ge gïïr kinøw, ge pɑ cuggi kwɑnø.” Abrɑm ɑ́yïëy ki kwøbbi Jwøng-ɑ Ácwɑ̈ɑ̈j. Kɑ yïëyi Abrɑm yïëy yi Jwøng-ɑ Ácwɑ̈ɑ̈j kinni bɑ dyër, kì bɑng yïëyø menɑni, Abrɑm ɑ́kwɑny yi Jwøng-ɑ Ácwɑ̈ɑ̈j ɑ́ ngeti dyër. Abrɑm ɑ́köbbi yi Jwøng-ɑ Ácwɑ̈ɑ̈j kinni, “Yɑ bene Jwøng-ɑ Ácwɑ̈ɑ̈j, ɑ ɑ́kɑ̈ɑ̈l yïn wɑ̈g ki Ur kì piny Bɑbïlöniyɑ̀, o yï mëggɑ piny men ɑ́ mií gïti ɑtheer.” De Abrɑm ɑ́kööb kinni, “Wuö Jwøng-ɑ Ácwɑ̈ɑ̈j, óyod yi yɑn kidï kinni piny men ógöögø ki miɑ?” Aløøg møge yi Jwøng-ɑ Ácwɑ̈ɑ̈j kinni, “Kɑ̈bbí ki røjø runne ɑ́dɑ̈g, kí dyel ɑ́tegø runne ɑ́dɑ̈g, kí órömø runne ɑ́dɑ̈g, kí ɑkur dwøng, kí ɑkur ójwɑt.” Kɑ gïgɑni bënn muujii yi Abrɑm. Kɑ gï nɑ̈ge, kɑ gï kɑge kì dïdyëri gen bënn, de winy nuti kɑgø yi en. Kɑ buddɑni pyëële piny gï rwöme’ rwömø. Kɑ winyy-ɑ døngø bï-ɑ piny be cɑmi gïgɑni, de ge ɑ́ryemmi yi Abrɑm. Keny-ɑ ɑ́bëën cɑ̈ng e kedh-ɑ piny, kɑ Abrɑm ónenø ki nin mø peeg. Kɑ̈ng-ɑ ɑ́nine, kɑ muudhø me rɑj ceg-ɑ ì kum. Codhe, kɑ Jwøng-ɑ Ácwɑ̈ɑ̈j Abrɑm köbbe kinni, “Ngɑ̈nyí wøw kinni kwɑrrí ótwɑ̈li kɑ ge obëëdø gɑ wëdhh kì piny me pɑth ki mi gen. Ge ógwøg gɑ bɑ̈ngg yi tyëng pönhɑni, kɑ nyingi gen guud, ki runn miy ɑ́ngwen. De pönh-ɑ yije óbëëd yi gen gɑ bɑ̈ngg ócɑy yi yɑn. Codhe, o kwɑrrí dhwödh gen cyee kì pinyɑni, ge ókɑ̈ddø ki kɑ̈r me dwøng. O yïn Abrɑm, yï óthøw kɑ mër, yï ókony yï rum yöø. Kwɑrrí ódwöög piny men, e kwɑrri kwɑrrí rumø nywølø. Ómɑ̈gi ki keny me bɑ̈ɑ̈r kinøw, mɑ́ bøli keny-ɑ ócɑyɑ tyëng Amör kipe orøøg gen nuti bëënø.” Keny-ɑ ɑ́buddi cɑ̈ng, kɑ piny ólunyø ki mendwøng. Kɑ yïrø ceg-ɑ ì twɑ̈ɑ̈g kì yij óthɑgø kí redhø me lyel kì mɑc, kɑ ge kɑ̈l-ɑ kɑɑm buddi lɑ̈yy-ɑ ɑ́kɑg yi Abrɑm. Dicyɑ̈ngɑni Jwøng-ɑ Ácwɑ̈ɑ̈j kwøb ɑ́nywɑg gen geki Abrɑm, ɑkööb Jwøng-ɑ Ácwɑ̈ɑ̈j kinni, “Kwɑrrí ómëggɑ piny-ɑ kɑɑm nɑɑm Rïp geki nɑm-ɑ dwøng Porɑt. Kí piny tyëng Ken, kí piny tyëng Kenidh, kí piny tyëng Kɑdmen, Kí piny tyëng Kit, kí piny tyëng Perïdh, kí piny Repɑim, Kí piny Amör, kí piny tyëng Kɑnɑɑn, kí piny tyëng Girgɑc, kí piny Yebus.” Sɑrɑy, cï Abrɑm, ɑ́bëëd yïe bong nywøl, de yïe ɑ́dɑ bɑ̈ng-ɑ dhɑjø mɑ ɑ́kɑ̈ɑ̈l kì Rïp me cwøl ɑ́ Äjer. Kɑ Abrɑm köbbi yi Sɑrɑy kinni, “Lidh, yɑ ɑ́mɑ̈ɑ̈n yi Jwøng-ɑ Ácwɑ̈ɑ̈j ki nywøl. Wude ɑ pɑ kedhu ød wuki bɑ̈ngɑ men-ɑ ónyödde yɑn ki wɑ̈d?” Kɑ møg-ɑ ɑ́kwøb yi Sɑrɑy yïëy yi Abrɑm. Äjer nyɑn-ɑ ɑ́kɑ̈ɑ̈l kì Rïp, ɑ́mëggi Abrɑm yi Sɑrɑy, ge rum bëëdø ki runn pyɑ̈rø kì piny Kɑnɑɑn. Kɑ Abrɑm kedh-ɑ ød geki Äjer, kɑ Äjer ongølø ki dhɑnhø. Keny-ɑ ɑ́yodii yi Äjer kinni yije dɑ dhɑnhø, kɑ døøg-ɑ be benyi men Sɑrɑy. Kɑ Abrɑm köbbi yi Sɑrɑy kinni, “Men bɑ bɑ̈jjí. Bɑ̈ngɑ ɑ́mëggɑ yïn, o keny-ɑ ɑ́yɑɑje, yöd e ceg-ɑ cɑ̈gø ki benyi yɑn. Wiy e ónyodh yi Jwøng-ɑ Ácwɑ̈ɑ̈j mɑ́ løge men ɑ bɑ̈jjø kì kellee, yɑn wɑlɑ̀ yïn.” De Abrɑm Sɑrɑy ɑ́köbbe kinni, “Yï bɑ mï Äjer. Göggí gïn-ɑ dwɑddi yi yïn.” Codhe, kɑ Sɑrɑy yije órönyø ki Äjer, kɑ Äjer opɑ̈ɑ̈rø. Kɑ Äjer yod yi wëywöni Jwøng-ɑ Ácwɑ̈ɑ̈j kì wïj wɑɑng pï kì yij pɑ̈l, kì kö yuu Cur, Akööb wëywönɑni kinni, “Äjer, bɑ̈ng Sɑrɑy, yï kɑ̈ɑ̈l-ɑ keny, o yï kedh-ɑ keny?” Kɑ ólöggø kinni, “Yɑ ceg-ɑ pɑ̈ɑ̈rø kì buti mïɑ.” Kɑ köbbi yi wëywöni Jwøng-ɑ Ácwɑ̈ɑ̈j kinni, “Døøg yï myëw kɑ kwøbbe nyi lïngí.” Kɑ cigi köbbø yi wëywöni Jwøng-ɑ Ácwɑ̈ɑ̈j kinni, “Yï ónëngɑ ki kwɑrr mø gïïr, ge pɑ cuggi kwɑnø.” Kɑ wëywönɑni okööbø kinni, “Yijí dɑ dhɑnhø ɑnɑn, o yï ónywøl ki wɑ̈d. Kɑ nyinge ócɑɑg ɑ́ Icmɑil, mɑ́ ywøgí ɑ́lïngi yi Jwøng-ɑ Ácwɑ̈ɑ̈j. Icmɑil óni ɑderø me wïïnø kì pɑ̈l, óbëëd e mɑ̈n ki ji bënn, kɑ mɑɑn thyew yi ji bënn, óbëëdø’ wɑ̈ye kì kelli nyiimen.” Kɑ Äjer ree pyëje kinni, “Jwøk ɑ́di lidhø yi yɑn kidyër, kɑ yɑ onëënø o yɑ ókwøbɑ møgɑni?” Codhe, ɑ cɑge Wë men-ɑ ɑ́cwöb kì bøle ɑ́ “Jwøng Nëënø”. Bene ɑ cɑɑg yith men-ɑ kɑɑm Kɑdic geki Bered, ɑ́ Bir Lɑhɑy Roì, ɑ wɑngi Yiith Ngɑn Nëënø ɑ Álïdhi. Kɑ Abrɑm nyöddi ki wɑ̈d yi Äjer, kɑ cɑg yi Abrɑm ɑ́ Icmɑil. Abrɑm runne ɑ́bëëd gɑ pyɑ̈r ɑ́bïdɑ̈g wïdɑ́bïkyel keny-ɑ ɑ́pɑ̈dhi Icmɑil piny yi Äjer. Keny-ɑ ɑ́göög runni Abrɑm ki pyɑ̈r ɑ́bïngwen wïdɑ́bïngwen, kɑ Jwøng-ɑ Ácwɑ̈ɑ̈j ocwöbø kì bøle, ɑkööbe kinni, “Bene yɑn Jwøk Áyïmø. Lïngí kwøbbɑ, kɑ yï gøggí dyër. Kwøbbee ónywɑg yi wɑ, o yï ógwøg yi yɑn yïn ɑ́ kweyi ji mø ngenyø.” Codhe, kɑ Abrɑm ree bøødhe wïje kuule’ piny. Aköbbii yi Jwøk kinni, “Møgɑ ɑ köbbɑ yïn dicyɑ̈ɑ̈ng èn, pɑ wil yi yɑn, yï ógwøg yi yɑn yïn ɑ́ wïyi jurrì mø gïïr. Nyingí kinni Abrɑm ceg yi yɑn kɑ wilø ɑ́ Abrɑhɑm, mɑ́ yï gwøgɑ’ gwøgø yïn ɑ́ wïyi jurrì mø gïïr. Yï ónëngɑ ki kwɑrr mø gïïr. Ódi rɑ̈nhì møg-ɑ ókɑ̈ɑ̈l rií. “De kwøbbee ceg kɑ rebø yi wɑ; yïn wuki kwɑrrí kì tuung, kí yɑn kì tung-ɑ kyeelø, cɑg ɑnɑn ceth gïti ɑtheer, Yɑ óbëëdø yɑn ɑ́ Jwøgí, o Yɑ óbëëdø yɑn ɑ́ Jwøøg kwɑrrí. Wu bëëd ɑ piny Kɑnɑɑn ɑnɑn, wu nɑ wëdhh, de piny men bëne mëggɑ’ yïn, wuki kwɑrrí gïti ɑtheer. O yɑ ógöögø yɑn ɑ́ Jwøøg kwɑrrí.” Codhe, kɑ Abrɑhɑm köbbi yi Jwøk kinni, “Yïn, wuki kwɑrrí, mïdhi wun møg-ɑ ɑ́nywɑg yi wɑ dicyɑ̈ngtïn ceth, ge ko wiy wun gïti ɑtheer. Yïëëy wuki kwɑrrí ki ngøli ji møg-ɑ bɑ cwøw bënn kì kelli wun. Ngøl wun ceth, ɑ́ nyuudhi kinni wu ɑ́yïëy ki cyɑ̈dhø kì kömi kwøbb-ɑ ɑ́nywɑg yi wɑ. Cɑg ɑnɑn ceth, keløg nyel-ɑ jɑlø pɑ̈dh-ɑ piny, ngøl ceth kì bïdɑ̈ɑ̈g cyɑ̈ng. Ji møg-ɑ nywøl kì gølí, kí bɑ̈ngg-ɑ ngew gɑ tyëngpɑth, ngøl gen. Ngøl gen bënn, gen ɑ møg-ɑ nywøl kì gølí ki møg-ɑ ngew. Keny-ɑ óbëëde kinøw møg-ɑ ɑ́nywɑg yi wɑ ónënni ɑ́ ngïji kì dëlli wun; ngïji me pɑ lɑ̈ɑ̈ny gïti ɑtheer. O keløg e dɑ jɑlø me nuti ngølø, pɑ kwɑɑn kelli jiɑ, mɑ́ kwøbb-ɑ ɑ́nywɑg yi yɑn ki wun nuti mïdhø yi en.” Abrɑhɑm ɑ́köbbi yi Jwøk kinni, “Nyingi cyëgí ko cwøl ɑ́ Sɑrɑy këti, cɑg ɑnɑn, nyinge ócwøl ɑ́ Sɑrɑ̀. Ógyëdh yi yɑn kɑ yï nëngɑ ki wɑ̈d kì ree. Sɑrɑ̀ óbëëd ɑ́ meyi jurrì mø gïïr. Rɑ̈nhì møg-ɑ ójɑɑg jurrì ókɑ̈ɑ̈l-ɑ ree.” Kɑ Abrɑhɑm ree bøødhe wïje kuule’ piny. Kɑ óngedhø, ɑkööbe ki pyëwe kinni, “Jɑlø ócuggø nywølø ki nyir, e runne bɑ miyø? Wɑlɑ̀ Sɑrɑ̀ ócuggø yïddø ki dhɑnhø, e runne bɑ pyɑ̈r ɑ́bïngwen?” Kɑ Abrɑhɑm Jwøk pyëje kinni, “Ede Icmɑil ɑ pɑ wiyí, o bëëde ɑ́ ngɑn-ɑ ólɑg jɑmmɑ?” Alöggi Jwøng-ɑ Ácwɑ̈ɑ̈j kinni, “Bɑ Sɑrɑ̀ cyëgí, ɑ ónyöddi yïn ki wɑ̈d, kɑ nyinge ócɑɑg ɑ́ Isɑɑk. O kwøbbi wøn óthuunh wøn ki en geki kwɑrre kì bɑnge gïti ɑtheer. O keløg ɑ́ per Icmɑil, gïn-ɑ ɑ́kwɑjji yi yïn kipere ɑ́løøg yi yɑn. Ógyëdh yi yɑn kidyër, ónywøl kɑ óngënyø ki mendwøng. Óbëëd ɑ́ wïyi jɑgg pyɑ̈rø wïdɑ́ryew. O ógwøg yi yɑn ɑ́ pödhø me dwøng. De kwëng møg-ɑ ɑ́köbbɑ yïn ying-ɑ kömi Isɑɑk, nyel-ɑ ónywøl yi Sɑrɑ̀ piny nɑ men run-ɑ óbï.” Keny-ɑ ɑ́rum Jwøk ki kwøb geki Abrɑhɑm, ɑdhwödhe kì buti Abrɑhɑm kɑ kedh-ɑ mɑl. Codhe, kɑ Abrɑhɑm wɑ̈de Icmɑil kwɑnye, kɑ gø ngøle geki bɑ̈ngg-ɑ ɑ́nywøl kì gøle, kí bɑ̈ngg-ɑ ɑ́ngewe gɑ tyëngpɑth bënn, yɑɑg-ɑ cwøw bënn kì gøl Abrɑhɑm gï ɑ́ngøle kì cyɑ̈ngɑni ceth, ni kɑ ɑ́köbbii yi Jwøk. Abrɑhɑm runne ɑ́bëëd gɑ pyɑ̈r ɑ́bïngwen wïdɑ́bïngwen keny-ɑ ɑ́ngølii. O wɑ̈de Icmɑil ɑ́bëëd runne bɑ pyɑ̈rø wïdɑ́dɑ̈g keny-ɑ ɑ́ngølii. Kinøw, Abrɑhɑm geki wɑ̈de Isɑɑk ɑ́ngøl ɑ dicyɑ̈ngɑni ceth, geki jø gøle bënn, bɑ̈ngg-ɑ ɑ́nywøl kì gøle, ki møg-ɑ ɑ́ngëëw yi en kì wɑ̈g, ge ɑ́ngøl kyeel ki en. Jwøng-ɑ Ácwɑ̈ɑ̈j ɑ́cwöb kì bøli Abrɑhɑm kì buti yenh óthurri Mɑmɑrɑ̀. Abrɑhɑm ɑ́bëëd ɑ dhø kemɑ̀ mee, kì bøli keny-ɑ nyi lënhi cɑ̈ng kì dicɑ̈ng. Kɑ Abrɑhɑm wïje tïnge, ɑlïdhe ki jøg ɑ́dɑ̈g ge ócungø ge cyɑ̈gi. Keny-ɑ ɑ́lidhe gïn, kɑ jwɑn-ɑ dhwödhø kì dhø kemɑ̀, e kedh-ɑ be yïddø ki gen, kɑ ree bøødhe wïje kuule’ piny, ɑkööbe kinni, “Wuö, keløg pyëwí med ki bɑ̈ngí, bɑ̈ngí ko pöödh. Wiy yɑ kɑ̈nɑ ki pï mø nøg, o ge lwøg wun tyelli wun, o ri wun ywööm wun kì thɑ yɑdh keny. Pyëwɑ med mɑ́ wu ɑ́töngi yï bɑ̈ngí. Kɑ wiy yɑ yɑ̈bbɑ ki gïn cɑm yi wun, o dëlli wun døøg gen ki tëngø, o wu kedhu yuu wun.” Alöggi jøgɑni kinni, “Døj, gwøg gïg-ɑ ɑ́kwøb yi yïn.” Kɑ Abrɑhɑm jwɑn-ɑ yij kemɑ̀ kun-ɑ di Sɑrɑ̀, kɑ gø köbbe kinni, “Pyeew, kɑ̈bbí ki møng-ɑ búr gemè, kì yij lwøl, kɑ gwøøg ɑ́ ópùn.” Codhe, kɑ Abrɑhɑm reng-ɑ kelli dhöge, kɑ ókɑ̈bbø ki røjø me myëër kì kelli røjje. Kɑ gø mëgge bɑ̈ng megø kì kelli bɑ̈ngge. Kɑ bɑ̈ngɑni jwɑn-ɑ be ngɑlii, kɑ gø gwire. Kɑ jøgɑni gɑ ɑ́dɑ̈g muuj røjø e rumø’ thɑlø, kí cɑg-ɑ bɑ̈ɑ̈y, kí cɑg-ɑ kyeedh yi Abrɑhɑm. Kɑ Abrɑhɑm pëgg-ɑ be kɑ̈lli gen kɑ̈ng-ɑ ɑ́cyɑ̈ɑ̈m gen. Kɑ Abrɑhɑm pyëj yi jøgɑni kinni, “Cyëgí Sɑrɑ̀ ying-ɑ keny?” Akööb Abrɑhɑm kinni, “Ying-ɑ yij kemɑ̀ kun-ɑcɑ̀.” Codhe, ɑkööb wëlø kinni, “Yɑ ódwöög dhung-ɑcɑ̀ piny nɑ men, kì bøli kenyɑni Sɑrɑ̀ cyëgí óbëëd kööre dɑ wɑ̈d.” Sɑrɑ̀ ɑ́bëëd e ying-ɑ ngɑ̈je, e obëëdø kì dhø kemɑ̀, kɑ wɑ́ji gen lïnge. O Abrɑhɑm geki Sɑrɑ̀ ɑ́bëëd ge rum yöø ki mendwøng, o Sɑrɑ̀ kwëre rum cung. Kɑ Sɑrɑ̀ óngedhø, kɑ okööbø ki pyëwe, kinni, “Wø ócuggi buddø wø rum yöø ni men wøki jɑlgølɑ?” De Abrɑhɑm ɑ́pyëj yi Jwøng-ɑ Ácwɑ̈ɑ̈j kinni, “Ede Sɑrɑ̀ ɑ ngedhe kɑ okööbø ki pyëwe kinni, ‘Wø pɑ cuggi nywølø, wø rum yöø ni men wøki jɑlgølɑ?’ Dɑ gïjø me dhɑ̈li gwøgø yi Jwøng-ɑ Ácwɑ̈ɑ̈j? Yɑ ódwöög piny nɑ men ki run-ɑ óbï, o Sɑrɑ̀ óbëëdø kööre dɑ wɑ̈d.” Kɑ Sɑrɑ̀ obwøgø, ɑkyëde e ceg-ɑ pyed kinni, “Yɑ nuti ngedhø.” Alögge kinni, “Yï ɑ́ngedhi kidyër.” Codhe, kɑ jøgɑni ócɑ̈gø ki dhwödhø ge kedh-ɑ kuni Sødømɑ̀. Kɑ ge lwøøg yöö yi Abrɑhɑm. Kɑ Jwøng-ɑ Ácwɑ̈ɑ̈j ree köbbe kinni, “Gïn-ɑ dwɑddɑ gwøgø pɑ kɑ̈nnɑ Abrɑhɑm. Nyigi Abrɑhɑm ógöögø ki pödhø me dwøng, me pëddi tegø, o jurri kömi piny bënn, gyëdhhi gen ókɑ̈ɑ̈l-ɑ ree. Ámyeg yi yɑn kɑ per kinni, o ócege nyige geki kwɑrre, o ge bëëd gen ki yëth-ɑ dwɑddi yi yɑn kì bɑng keny-ɑ ógøggi gen gïg-ɑ tir, ɑ bɑ dyër, o møg-ɑ ɑ́kwøbɑ kiper Abrɑhɑm gwøg yi yɑn.” Codhe, ɑkööb Jwøng-ɑ Ácwɑ̈ɑ̈j kinni, “Mɑ́ gønyy ɑ́ngënyi kì kömi Sødømɑ̀ geki Gømørɑ̀, o orøøg gen ɑ́døngi ki mendwøng, Yɑ ceg-ɑ kedhi be lïdhø mɑ bëëd gen ge rijjø ni kɑ ɑ́lïngɑ, o møgɑni yod yi yɑn.” Kɑ jøg-ɑ bɑ ɑ́ryew ókedhø kì kenyɑni, ge kedh-ɑ kuni Sødømɑ̀, de Abrɑhɑm ɑ́döng kì bøli Jwøng-ɑ Ácwɑ̈ɑ̈j. Codhe, kɑ Abrɑhɑm pyëwe cwede, ɑpyëje Jwøng-ɑ Ácwɑ̈ɑ̈j kinni, “Tyëngtir ónɑ̈g yi yïn kyeel kí tyëngrijjø? Keløg e dɑ ji pyɑ̈r ɑ́bïj mø tir kì kɑɑlɑni, kɑɑl ócuggø nɑ̈gø yi yïn bëne? Pɑ wiy yi yïn kipe kinni o yï yiel pyɑ̈r ɑ́bïj? Yï pɑth ki ngɑn cuggi nɑ̈gi tyëngtir kyeel geki tyëngrijjø, o ngɑntir bëëde e nɑ ngɑnrɑj! Pɑ cuggi gwøgø yi yïn eni gïn ni menɑni, yïn ɑ́ ngɑn-ɑ ólidh gøøny lɑ̈bø bëne.” Alöggi Jwøng-ɑ Ácwɑ̈ɑ̈j kinni, “Ke yïddɑ ki ji pyɑ̈r ɑ́bïj mø tir kì Sødømɑ̀, kɑɑlɑni ówiy yi yɑn bëne kiper gen.” Akööb Abrɑhɑm kinni, “Cɑgg yɑ bɑ lɑ̈bø geki búr yøw, pyëwɑ ɑ́cwïddɑ kwøb wøki Wɑ̈ɑ. Bëëd ɑ dï keløg e dɑ ji pyɑ̈r ɑ́ngwen wïdɑ́bïj mø tir kì kɑɑlɑni, kɑɑl ócuggø nɑ̈gø yi yïn bëne ke bëëde e bong ɑ́bïj?” Akööb Jwøng-ɑ Ácwɑ̈ɑ̈j kinni, “Keløg yɑ óyïddø ki pyɑ̈r ɑ́ngwen wïdɑ́bïj, kɑɑlɑni pɑ cuggi nɑ̈gø yi yɑn bëne.” Kɑ Abrɑhɑm cig-ɑ kwøb këti kinni, “Keløg yï yod-ɑ ji pyɑ̈r ɑ́ngwen mɑwɑnø.” Akööb Jwøng-ɑ Ácwɑ̈ɑ̈j kinni, “Ke yïddɑ ki pyɑ̈r ɑ́ngwen, kɑɑlɑni pɑ nɑ̈g yi yɑn.” Codhe, ɑkööb Abrɑhɑm kinni, “Wuö, pyëwí ko rënyi ki yɑn, de wiy yɑ kööbɑ. Keløg yï yod-ɑ ji pyɑ̈r ɑ́dɑ̈g mø tir, ócuggø nɑ̈gø yi yïn eni kɑɑlɑni?” Akööb Jwøng-ɑ Ácwɑ̈ɑ̈j kinni, “Ke yodɑ ji pyɑ̈r ɑ́dɑ̈g mø døøj, kɑɑlɑni pɑ nɑ̈g yi yɑn.” Abrɑhɑm okööbø kinni, “Kwøbbɑ ɑ́ngënyi kì bøli Wɑ̈ɑ. De bëëd ɑ dï keløg e dɑ ji pyɑ̈r ɑ́ryew mø tir kì kɑɑlɑni?” Kɑ Jwøng-ɑ Ácwɑ̈ɑ̈j ólöggø kinni, “Ke yodɑ pyɑ̈r ɑ́ryew, kɑɑlɑni pɑ nɑ̈g yi yɑn.” Codhe, ɑkööb Abrɑhɑm kinni, “Wuö, pyëwí ko rënyi ki yɑn, wiy yɑ døøgɑ’ kwøb tyelø ɑ́kyel këti. Bëëd ɑ dï keløg yï yod-ɑ pyɑ̈rø kì kunɑni?” Akööb Jwøng-ɑ Ácwɑ̈ɑ̈j kinni, “Ke yodɑ pyɑ̈rø kì kunɑni, kɑɑlɑni pɑ nɑ̈g yi yɑn.” Keny-ɑ ɑ́rum Jwøng-ɑ Ácwɑ̈ɑ̈j ki kwøb geki Abrɑhɑm, ɑkedhe. Kɑ Abrɑhɑm døøg-ɑ pɑɑre. Wëywödd ɑ́ryew møgɑni ɑ́wɑ̈dhi Sødømɑ̀ kì böörɑni. Kɑ Lot yuud yi gen e obëëdø kì dhø döri kɑɑl. Keny-ɑ ɑ́lidhe gïn, ɑdhwödhe mɑl kɑ kedh-ɑ be mɑ̈dhi gen, kɑ ree bøødhe wïje kuule’ piny. Akööb Lot kinni, “Wun ɑ wëll, yɑ kwɑjj-ɑ wun bïu gølɑ, o wu nin wun kì yije. O wu óyïddi wun ki pï møg lwøg wun tyelli wun. Wu ódhwödhi yöö kì mwøl.” Kɑ wëywödd ólöggø kinni, “Pɑth, wø ónin kì dïkɑɑl.” De ge ɑ́dyej yi Lot ki kwøbbi kedhi kɑl, ɑyïëy gen kɑ ge kedh-ɑ gøle. Kɑ ge göggi ki gïncɑm. Ge ɑ́buddi ki ópuun møng-ɑ olwëny, kɑ gø cɑm gen. E bøli kej buddø nuti bëënø, kɑ jø Sødømɑ̀, yɑɑg-ɑ wøbb geki jøgdøngø obëënø, kɑ ød Lot tyeg yi gen. Acwøl gen Lot, kɑ ge okööbø kinni, “Jøg-ɑ ɑ́bï yïí ɑ́tïni kì böörø ying-ɑ keny? Kɑ̈ɑ̈l gen wɑ̈g yï wøn, o ge niin yi wøn.” Kɑ Lot kedh-ɑ wɑ̈g yï gen, ød cyëëge’ bɑnge. Akööbe kinni, “Pɑth, nyiimïɑ! Gïnrɑj ni men ko gwøg yi wun. Lïdhi wun! Yïɑ dɑ nyigɑ ɑ́ryew mø nuti pɑ̈nyø’ nywɑlø yi jɑlø. Ge ómëggɑ wun, kɑ ge göggu gïn-ɑ dwɑddi yi wun. De yɑ kwɑjj-ɑ wun, ko di gïnrɑj me göggu jøg. Ge ɑ́bï-ɑ gølɑ, o ge ceg kɑ korø yi yɑn ceth.” Kɑ jøg-ɑ bɑdhhi ød okööbø kinni, “Yï ko rïwwi kì bøli wøn, yï bɑ wëdh! Yï bɑ men, ɑ köbbí wøn gïn-ɑ gwøg yi wøn? Yï ko rïwwi kì bøli wøn, kipe yï ógöggi yi wøn ki gïnrɑj me lod men-ɑ göggi jøgɑni yi wøn.” Kɑ Lot cøør gen cyɑ̈n, kɑ ge kedh-ɑ be tori dhø ød. De jøg-ɑ ød cinggi gen ɑ́rïj gen, kɑ Lot teel gen yiny-ɑ ød, kɑ ød cyëëg gen. Kɑ teen-ɑ wɑ̈g bëne göjji gen cøørø, kɑ nyingi gen ódhɑ̈lø nënnø, kɑ ge ódhɑ̈lø ki yodi dhø ød. Kɑ Lot köbbi yi jøgɑni ryeet kinni, “Keløg yïí dɑ ji møøgø kì kɑɑl keny, mø bɑ cwøwi nyigí, kí womɑ̈nn, wɑlɑ̀ wɑdd møøgø yøw, köbbí gen dhwödh gen ɑnɑn ceth, kipe wø ɑ́cyɑ̈ngi ki nɑ̈gi kɑɑl men. Gïgrijjø møg-ɑ gøggi kì keny bënn, ɑ́rum ki lïngø yi Jwøng-ɑ Ácwɑ̈ɑ̈j, ɑör wøn be nɑ̈gii.” Codhe, kɑ Lot kedh-ɑ yï yɑɑg-ɑ nywøm nyige, kɑ gï köbbe kinni, “Pyewu, dhwödh wun kɑ wu kedh wun kì kɑɑl men, kipe kɑɑl bɑ men nɑ̈g yi Jwøng-ɑ Ácwɑ̈ɑ̈j bëne.” De ge ɑ́rum i Lot ceg-ɑ nɑ̈n yøw. Keny-ɑ ɑ́tɑ̈ri piny kì mwøl, ɑkwɑjji Lot yi wëywöddɑni kinni pyewe. Ge ɑ́kööb kinni, “Kedh! Kwɑny cyëgí geki nyigí ryeet, o wu ócög wu pɑ thøw keny-ɑ ócɑɑy kɑɑl.” De Lot ɑ́yöd e ócwöngø. Codhe, ɑmɑɑg Lot kí cyëge geki nyige ryeet yi jøgɑni, kɑ gï peej gen wɑ̈g kì kɑɑl, ge ceg kɑ yielø, mɑ́ Jwøng-ɑ Ácwɑ̈ɑ̈j pyëwe ɑ́lɑ̈ɑ̈m ki Lot geki gøle. Kì bɑng kɑ ɑ́rum gen ki kɑ̈ɑ̈l wɑ̈g, kɑ wëywödø ɑ́kyel okööbø kinni, “Rengi wun, yielu ri wun! Yï ko cungi kì yij tör. Rengí thɑ kït kipe yï óthøw.” Akööb Lot kinni, “Pɑth ki kinøw wuö. Anɑn bɑ̈ngí pyëwí ɑ́lɑ̈ɑ̈m ki en ki mendwøng, kɑ yiel yi yïn kì yij thøø. De yɑ pɑ cuggi rengi thɑ kït, yɑ ópïïd yi ryɑ̈g kɑ yɑ othøø. Lidh, pɑc me thiinh ɑcinee, pɑ ti lɑ̈wø. Wiy yɑ rengɑ kunɑni. Bɑ pɑc me thiinh yøw, wiy wëyɑ yieelɑ yije.” Aköbbi Lot yi wëywönɑni kinni, “Døj, yï ówiy yɑn o yï kedhí kɑɑlɑni. Kɑɑlɑni pɑ nɑ̈g yi yɑn. De jwɑn rengi kunɑni kipe yɑ pɑ cɑ̈gi ki nɑ̈gi Sødømɑ̀, yï nuti wɑ̈dhi kɑɑlɑni ki tɑrø.” Kɑɑlɑni ɑ́cɑg ɑ́ Dhoɑr kì bɑng kɑ ɑ́kwøbii yi Lot kinni i thiinh. Lot ɑ́wɑ̈dhi Dhoɑr cɑ̈ng rum wɑ̈dhi mɑl. Kɑ Jwøng-ɑ Ácwɑ̈ɑ̈j mɑc, kïbrït me dyëm ni kødh, gøøje kömi Sødømɑ̀ geki Gømørɑ̀. Kɑ myërrɑni rɑ̈be. Töör Urdun ɑ́rɑ̈be thyew geki jɑmm-ɑ yethi myërr bënn, ki lum geki yenh. Kì bøli kenyɑni, kɑ cï Lot lïïdh-ɑ ngɑ̈je. Keny-ɑ ɑ́lïïdhe ngɑ̈je kɑ ree løge lööj omelø. Kì mwøl-ɑ kyeelø, ɑdhwödh Abrɑhɑm kɑ kedh-ɑ keny-ɑ ɑ́cunge kì bøli Jwøng-ɑ Ácwɑ̈ɑ̈j cyɑ̈ng-ɑcɑ̀. Kɑ lïïdh-ɑ Sødømɑ̀ geki Gømørɑ̀, ki Töör Urdun, kɑ yïrø lidhe e töng-ɑ mɑl ni yïri bwörø me dwøng cɑrø. Myërri yij törɑni ɑ́rɑ̈b yi Jwøk bënn, de gïn-ɑ ɑ́kwɑjji yi Abrɑhɑm nuti wïlø wïje. Kɑɑl-ɑ́ yije ɑ́di Lot ɑ́rɑ̈b yi Jwøk, de wëyi Lot ɑ́yiele. Lot ɑ́bëëd e óböggø ki bëëdø kì Dhoɑr, codhe ɑdhwödhe geki nyige kɑ ge dɑ̈g-ɑ kelli kïttì, kɑ ge obëëdø kì yij órøngi kït. Cyɑ̈ng ɑ́kyel, kɑ nyɑn-ɑ kɑyø nyimen nyɑnthinh köbbe kinni, “Wïyee ɑ́døngi, o bong jɑlø me cyɑ̈gi, me cuggi nywømi wɑ ni kwööng kömi piny. Bïí kɑɑg wɑ en ki møgi oløg, o wɑ buddi wɑ ki en, o wïj wïyee nywøl yi wɑ.” Kɑ woɑni wïyi gen kɑɑg gen ki møgi oløg kì wɑ̈rɑni, kɑ nyɑn-ɑ kɑyø obëënø kɑ ge óbuddø ki wïye, o kwïj yi jɑlɑni ki kër-ɑ niin en ki gøn, kí kër-ɑ dhwöödh en. Dhuki, ɑköbbi nyɑnthinh yi nyɑn-ɑ kɑyø kinni, “Yɑ ɑ́buddi wøki en ɑ́wɑ̈ɑ̈r. Døøg wɑ en ki kɑɑgø ki møgi oløg tïn kì wɑ̈r, o yï lunyí ki kedhi be buddø ki en thyew. Ki yuu-ɑ ni men, wïj wïyee ócuggø nywølø yi wɑ, o wïj gølee cöge e pɑ pɑ̈ɑ̈dh.” Codhe, kɑ wïyi gen døøg gen ki kɑɑgø ki møgi oløg këti, kì wɑ̈r-ɑ kyeelø, kɑ nyɑn-ɑ thinh ókedhø, kɑ ge óbuddø ki wïye. Kwïj yi Lot thyew ki kër-ɑ niin en ki gøn, kí kër-ɑ dhwöödh en. Codhe, kɑ nyigi Lot ryeet yɑj yi wïyi gen. Kɑ nyɑn-ɑ kɑyø pɑ̈dh-ɑ piny ki wɑ̈d, kɑ gø cɑge ɑ́ Moɑb. Bene en ɑ bɑ kweyi tyëng Moɑb bënn møg-ɑ nudd ge nud ɑnɑn dicyɑ̈ngtïn. Nyɑn-ɑ thinh ɑ́nywøl ki wɑ̈d thyew, kɑ gø cɑge ɑ́ Ben Amì. Bene en ɑ bɑ kweyi tyëng Amön bënn møg-ɑ nudd ge nud ɑnɑn dicyɑ̈ngtïn. Abrɑhɑm ɑ́dhwödh kì Kibrön, kɑ kedh-ɑ Kɑnɑɑn, kuni wɑɑng wurlwɑl. Kɑ pëgg-ɑ kɑɑm Gɑdic geki Cur. Kɑ̈ng-ɑ ɑ́bëëde kì Gerɑr, ji ɑ́köbbe kì kunɑni kinni Sɑrɑ̀ cyëge, bɑ nyimen. Kɑ møgɑni lïngi yi Abimelek rɑ̈ɑ̈dh Gerɑr, codhe ɑöde ki bɑ̈ngge møg dwɑɑy Sɑrɑ̀ cï Abrɑhɑm. De Abimelek ɑ́köbbi yi Jwøk cyɑ̈ng ɑ́kyel kì wɑ̈r, kì yethi lɑ̈g kinni, “Yï bɑ men thøw. Ngɑndhɑjø men-ɑ ɑ́kwɑny yi yïn bɑ ɑnywøm.” De Sɑrɑ̀ ɑ́bëëd e nuti nywɑlø yi Abimelek, ɑkööbe kinni, “Wuö, pödhø me bong gïjø me rëny en ónɑ̈g yi yïn kiper ngø? Abrɑhɑm kiree ɑ ɑ́kööb kinni, ngɑnɑni bɑ nyimïɑ. Kɑ ngɑnɑni okööbø thyew kinni, bɑ ómïɑ. Yïɑ bɑ̈r. Yɑ ɑ́bëëd yɑ kwïj wøw kinni yɑ gwøg-ɑ gïnrɑj.” Codhe, ɑköbbi Abimelek yi Jwøk kì yethi lɑ̈ggɑni kinni, “Awøø, ngɑ̈nyi yi yɑn kinni ɑ́bëëd e nuti yodø yi yïn, eni gïn-ɑ ɑ́gwøg yi yïn. Acöög yï pɑ wiy yi yɑn, o yï røngi ki ngɑnɑni, kɑ pyëwɑ di rënyi ki yïn. Döggí Abrɑhɑm cyëge. Abrɑhɑm bɑ bɑ̈ng Jwøk. Ókwɑ̈jji kiperí, kɑ yï ocögø yï pɑ thøw. De keløg Sɑrɑ̀ pɑ dwøøg yi yïn, yï bɑ men thøw wuki gølí bëne.” Codhe, ɑcwööl jøg-ɑ jɑgg yi Abimelek dhuki kì mwøl ceth, kɑ gï köbbe gïg-ɑ ɑ́cwöb bënn kì yethi lɑ̈ggɑni. Kɑ ge obwøgø ki mendwøng. Codhe, ɑcwööl Abrɑhɑm yi Abimelek, kɑ gø köbbe kinni, “Á ngø ɑ göggí wøn ni men? Á gïnrɑj mɑ ngø ɑ ɑ́göggɑ yïn, ɑ kɑ̈ɑ̈l göny-ɑ dwøng èn kömɑ wøki pödhɑ? Yɑ ɑ́rum kinni yɑ pɑ di göggi yi yïn ki gïn ni men. Á ngø ɑ ɑ́rømmi yi yïn, ɑ bɑnge göög yi yïn ki gïn-ɑ ni men?” Alöggi Abrɑhɑm kinni, “Yɑ ɑ́rum kinni bong dhɑnhø me wør Jwøk kì keny, o yɑ ócuggø nɑ̈gø yi ngɑn megø kɑ Sɑrɑ̀ kwɑnye. Bɑ dyër ceth kinni bɑ nyimïɑ. Bɑ nyiwɑ̈ɑ, wø dɑ̈ɑ̈ng-ɑ yi mëëg. Keny-ɑ ɑ́kööb Jwøk kinni dhwödhɑ kì gøl wïyɑ, kɑ yɑ kedh-ɑ be wïïnø kì kɑ̈jj mø gïïr, Sɑrɑ̀ ɑ́köbbɑ kinni, ‘Göggí yɑn ki gïjø me døøj, kì keny-ɑ ókedhi yi wɑ, nyi köbbí ji kinni yɑ bɑ ómyëw.’ ” Codhe, kɑ Abrɑhɑm nëngi yi Abimelek ki dyëg, kí dhög, kí bɑ̈ngg-ɑ mɑ̈nn geki bɑ̈ngg-ɑ cwøw. Kɑ döggi Sɑrɑ̀ cyëge. Aköbbii yi Abimelek kinni, “Lidh pinyɑ ɑnɑn bëne. Yï ócuggø bëëdø kì keny-ɑ dwɑddi yi yïn kì yij pinyɑni.” Aköbbe Sɑrɑ̀ kinni, “Ómyëw ɑ́nëngɑ ki ngyëny ɑ́tegg miyø, gɑ møg geedhɑ yïn kì bøli teedø, kipe keløg e dɑ gïn-ɑ órømmø yi gen kì rií, o yï bëëd yï bɑ óleenyø kì bøli dhɑnhø bëne; o yod yi ji bënn kinni bong bɑ̈jjø mɑ ɑ́gwøg yi yïn.” Sɑrɑ̀ ɑ́nudd e opɑrrø yi Jwøng-ɑ Ácwɑ̈ɑ̈j, kɑ møg-ɑ ɑ́kwøbe kinni gï ógögge Sɑrɑ̀ gwøge. Kɑ Sɑrɑ̀ óyïddø’ dhɑnhø, kɑ Abrɑhɑm nyödde ki wɑ̈d, e rum yöø yøw, kì bøli keny-ɑ ɑ́kwøb yi Jwøk ceth. Kɑ Abrɑhɑm wɑ̈de cɑge ɑ́ Isɑɑk, eni wɑ̈n-ɑ ɑ́nywøl yi Sɑrɑ̀. Kɑ Isɑɑk ngøle keny-ɑ ɑ́göög cyɑ̈ngge gɑ ɑ́bïdɑ̈g ni kɑ ɑ́köbbii yi Jwøk. Abrɑhɑm runne ɑ́bëëd gɑ miyø keny-ɑ ɑ́nywøøl Isɑɑk. Kɑ Sɑrɑ̀ okööbø kinni, “Jwøk yɑ ɑ́wëgge ngedhø. Ngɑn-ɑ ólïngi møg, óngedhi kyeel ki yɑn. Bong dhɑnhø mɑ ɑ́rum kinni yɑ ócuggø nyöddi Abrɑhɑm ki nyir, de cɑgg ɑ́ kɑ̀ yöø Abrɑhɑm ni men, nuti nyöddø yi yɑn ki wɑ̈d?” Isɑɑk ɑ́døngi ɑpønii. Kɑ Abrɑhɑm ogöögø ki ryëj me dwøng keny-ɑ ɑ́pønii. De Sɑrɑ̀ Icmɑil, wɑ̈n-ɑ ɑ́nyölli Abrɑhɑm yi Äjer ɑ́lidhe cyɑ̈ng ɑ́kyel e otugø geki wɑ̈de Isɑɑk. Aköbbe Abrɑhɑm kinni, “Ryem bɑ̈ng geki wɑ̈de, mɑ́ wɑ̈d bɑ̈ng pɑ cuggi lɑ̈gø ki jɑmmì kyeel geki wɑ̈dɑ Isɑɑk.” Kɑ pyëw Abrɑhɑm órënyø yi møgɑni mɑ́ Icmɑil bɑ wɑ̈de thyew. De Abrɑhɑm ɑ́köbbi yi Jwøk kinni, “Pyëwí ko rɑ̈ɑ̈m kipe nyelthinh geki Äjer bɑ̈ngí. Gwøg gïn-ɑ óköbbi yïn yi Sɑrɑ̀. Kwɑrr møg-ɑ ɑ́kømmi yi yɑn ge ónywøl-ɑ yi Isɑɑk. Kwɑrri Icmɑil ógwøg yi yɑn gɑ pödhø me dwøng mɑ́ e bɑ wɑ̈dí thyew.” Adhwödh Abrɑhɑm kì mwøl ceth, kɑ ókɑ̈bbø ki ópun kí ɑtheeb pï. Kɑ gï mëgge Äjer, ɑryeme gøn geki wɑ̈de. Kɑ Äjer ókedhø e cyɑ̈dhi e muumø kì yij pɑ̈ɑ̈l Bircebɑ̀. Keny-ɑ ɑ́thumi pï kì yij ɑtheb, ɑcïbe nyelthinh thɑ yɑdh. Codhe, ɑkedhe kɑ pëgg-ɑ piny kì wɑ̈ye ki kɑɑm me bɑ mïtïr miyø, mɑ́ e ɑ́kööb kinni, “Wɑ̈dɑ pɑ thøw e onennø yi yɑn.” Ápëggi kenyɑni kɑ ócɑ̈gø ywøg. Nyelthinh ɑ́lïngi yi Jwøk e óywöngø, kɑ Äjer cwøl yi wëywöni Jwøk kì mɑl kinni, “Äjer, ɑ́ ngø ɑ ɑ́bɑ̈jji? Yï ko böggi! Nyelthinh ɑ́lïngi yi Jwøk e óywöngø. Dhwöödh kɑ kwɑɑny. Kwɑrre ógwøg yi yɑn gɑ pödhø me dwøng.” Codhe, kɑ Äjer nyinge yieb yi Jwøk, ɑlïdhe ki yith. Kɑ kedh-ɑ wïj yiinhɑni, ɑpɑ̈nge ɑtheb ki pï, ɑnënge nyelthinh ki pï kɑ ómɑ̈dhø. Kɑ nyelthinh mïdhi yi Jwøk kɑ ódøngø, e bëëd ɑ yij pɑ̈ɑ̈l Pɑrɑn, kɑ ogöögø ki jɑlpöd ki weth. Kɑ muuj ki dhɑjø yi meye kì Rïp. Kì bøli kenyɑni, kɑ Abimelek geki Piköl pënyi linye, Abrɑhɑm köbbi gen kinni, “Gïg-ɑ gøggi yi yïn bënn nyi kunyy-ɑ yïn yi Jwøk. Anɑn, köngí kì bøli Jwøk kinni bong gïnrɑj men-ɑ ógöggí yɑn, wɑlɑ̀ nyigɑ geki kwɑrrɑ dhuki megø. Bëëd ki bëëndøj ceth ki ji møg-ɑ kelli gen bëëd yi yïn, yïn ɑ́ wëdh, ni kɑ ɑ́bëëdɑ ki bëëndøj ki yïn ceth.” Kɑ Abrɑhɑm okööbø kinni, “Møgɑni ómïdhi yi yɑn.” Acɑ̈gi Abrɑhɑm ki gøønyi bɑ̈ng Abimelek men-ɑ ɑ́kɑb yith kì yï Abrɑhɑm. De Abimelek ɑ́löggi kinni, “Ngɑn-ɑ ɑ́gwøg gïn ni menɑni kwïj yi yɑn. Møgɑni nuti köbbi yɑn yi yïn, gïti dicyɑ̈ngtïn.” Codhe, kɑ Abimelek nëngi yi Abrɑhɑm ki dyëg kí dhög. Kɑ lwöbø reb yi gen. Kɑ Abrɑhɑm dyëg römm ɑ́bïryew peeje bøli Abimelek. Apyëëj Abrɑhɑm yi Abimelek kinni, “Á kipe ngø ɑ cïb dyëg römm gɑ ɑ́bïryew wɑ̈yi gen?” Alöggi Abrɑhɑm kinni, “Kwɑny dyëg römm møg kì yïɑ, gɑ møg nyodh kinni yï ɑ́yïëy kinni bɑ yɑn ɑ ɑ́kony yiinh.” Codhe, ɑcög kenyɑni e cwøl ɑ́ Bircebɑ̀, mɑ́ kenyɑni ɑ yije ɑ́köngi yi gen ryeet. Keny-ɑ ɑ́rum Abrɑhɑm ki lwöbø, kɑ dhøggi gen nywɑg gen geki Abimelek, kì Bircebɑ̀, kɑ Abimelek geki Piköl pënyi linye døøg-ɑ piny Pelistiyɑ̀. Apïïdh Abrɑhɑm ki kwël ólɑm kì Bircebɑ̀, kɑ Jwøng-ɑ Ácwɑ̈ɑ̈j, Jwøng-ɑ Nëënø gïti ɑtheer mɑlli yi en. Kɑ Abrɑhɑm obëëdø ɑ́ wëdh kì piny Pelistiyɑ̀ ki keny me bɑ̈ɑ̈r. Kì bɑng møgɑni, kɑ Abrɑhɑm yïëye rɑng yi Jwøk. Ácwøl yi Jwøk kinni, “Abrɑhɑm!” Ayïëye kinni, “Yɑn èn.” Codhe, kɑ Jwøk okööbø kinni, “Kwɑny wɑ̈dí, wɑ̈dkyel, kwɑny Isɑɑk wɑ̈n-ɑ mɑɑr yi yïn, kɑ yï kedhí piny Moriyɑ̀. Nɑ̈ɑ̈g kì kunɑni kɑ rɑ̈bbí yɑn ɑ́ gëëdhi kì wïj kïn-ɑ ónyudhɑ yïn.” Kɑ Abrɑhɑm odhwödhø kì mwøl, kɑ sïrïj twööje kömi ɑdere. Kɑ okɑ̈gø ki yugg møg rɑ̈ɑ̈b gëëdhi. Kɑ Isɑɑk cwøle geki bɑ̈ngg ɑ́ryew, kɑ ge ókedhø ki en, ge kedh-ɑ kun-ɑ ɑ́köbbii yi Jwøk. Kì ri dɑ̈ɑ̈g cyɑ̈ng kɑ Abrɑhɑm wïje tïnge, kɑ kenyɑni lidhe e lɑ̈wi. Aköbbe bɑ̈ngge kinni, “Bëëd wun kì keny ki ɑderø, wø kedh-ɑ kun-ɑcɑ̀ be mɑ̈ddø wøki nyelthinh, orum wøn, wø ódwöög yï wun.” Kɑ yugg-ɑ rɑ̈ɑ̈b gëëdhi kwɑny yi Abrɑhɑm, kɑ gï mëgge wɑ̈de, o gï tyëdde, dɑ́ en ɑ kɑ̈lli pɑlø geki mɑc. Codhe, kɑ ge ókedhø geki wɑ̈de. Kɑ Isɑɑk Abrɑhɑm wïye cwøle kinni, “Wïyø!” Kɑ Abrɑhɑm ólöggø kinni, “Á ngø wɑ̈dɑ?” Kɑ Isɑɑk okööbø kinni, “Yïee dɑ mɑc ki yugg, de dyel men-ɑ rɑ̈b ɑ́ gëëdhi ying-ɑ keny?” Alöggi Abrɑhɑm kinni, “Jwøk ómuujø wɑ̈dɑ.” Codhe, kɑ Abrɑhɑm cɑ̈dhh-ɑ bøli gen geki wɑ̈de. Kɑ ge wɑ̈dh-ɑ keny-ɑ ɑ́köbbii yi Jwøk. Agëëd Abrɑhɑm ki këli lɑm kì kenyɑni. Kɑ yugg tɑɑge kömi gøn, ɑtwöje wɑ̈de Isɑɑk, kɑ gø bøødhe kömi yugg kì wïj këli lɑm. Kɑ Abrɑhɑm cinge rïïje, ɑkwɑnye pɑlø ɑ́ men ngɑɑle wɑ̈de. De ɑ́cwøl yi wëywöni Jwøng-ɑ Ácwɑ̈ɑ̈j kì mɑl kinni, “Abrɑhɑm! Abrɑhɑm!” Alöggi Abrɑhɑm kinni, “Yɑ olïngø.” Kɑ wëywönɑni okööbø kinni, “Wɑ̈dí ko nyïɑ̈ɑ̈g, wɑlɑ̀ ko nywɑɑl. Álidh yi yɑn ɑnɑn kinni Jwøk ogɑ̈nø yi yïn, kɑ wɑ̈dí ocögø e nuti mɑ̈ɑ̈n yïn. Wɑ̈dí, wɑ̈dkyel nuti mɑ̈ɑ̈n yïn yɑn.” Kɑ Abrɑhɑm wïje tïnge, kɑ ólïdhø ki órömø men-ɑ ómɑgø yi koodh kì ri tùnge. Akedh Abrɑhɑm kɑ órömɑni kwɑnye, ɑnɑ̈ge gøn. Gø ɑ́mëgge Jwøk ɑ́ gënh-ɑ nyi rɑ̈b bëne, e bɑ kej wɑ̈de. Kɑ kenyɑni cɑg yi Abrɑhɑm ɑ́ Jwøng-ɑ Ácwɑ̈ɑ̈j ómuujø. Cɑgg ɑ́ dicyɑ̈ngtïn ji nyii kööbø kinni, “Kì wïj kïti Jwøng-ɑ Ácwɑ̈ɑ̈j ómuujø.” Acigi Abrɑhɑm cwølø yi wëywöni Jwøng-ɑ Ácwɑ̈ɑ̈j kì mɑl këti, ɑkööbe kinni, “Jwøng-ɑ Ácwɑ̈ɑ̈j okööbø kinni, ‘Mɑ́ wɑ̈dí nuti mɑ̈ɑ̈n yïn, wɑ̈dí wɑ̈dkyel nuti mɑ̈ɑ̈n yïn yɑn, yɑn ɑ köngi èn ki nyingɑ, yï gyëdhɑ’ gyëdhø, o yï ónëngɑ ki kwɑrr mø gïïr. Ge ógöögø ge gïïr ni kyelli mɑl kí ɑyejø kì thɑ̈ngi nɑɑm omelø. Myërri tyëngmɑ̈ɑ̈nø ómɑg yi gen. Jurri kömi piny bënn óyïddi ki gyëdh kì bɑng kwɑrrí, kipe kɑ ɑ́lïngí kwøbbɑ.” Codhe, kɑ Abrɑhɑm døøg-ɑ yï bɑ̈ngge. Kɑ ge odhwödhø ge kedh-ɑ Bircebɑ̀, kɑ Abrɑhɑm obëëdø kì Bircebɑ̀. Kì bɑng kɑ ɑ́cwöb gïgɑni, kɑ Abrɑhɑm köbbi yi ngɑn megø kinni, “Nɑor ómyëw geki Milkɑ̀ cyëge yï gen dɑ nywøl. Nyel-ɑ dwøng cwøl ɑ́ Udh, o nyel-ɑ bɑnge cwøl ɑ́ Budh. Dɑ̈ɑ̈g wɑ̈dde cwøl ɑ́ Kemuel wïyi Arɑm. Thyew dɑ yɑɑg mø cwølli gɑ Kesed, kí Adhö, kí Pildɑc, kí Yidlɑp, kí Bethuel.” Bethuel ɑ bɑ wïyi Rebekɑ̀. Jøgɑni gɑ ɑ́bïdɑ̈g, ge ɑ́nyöll-ɑ Nɑor ómï Abrɑhɑm yi cyëge Milkɑ̀. Nɑor ɑ́nyöddi thyew ki wɑ̈dd ɑ́ngwen yi ngɑndhɑjø mɑ bɑ̈nge me nyinge cwøl ɑ́ Reumɑ̀, nyingi yɑɑgɑni cwølli gɑ Tebɑ̀, kí Gɑɑ̈m, kí Tɑkɑc, kí Mɑɑkɑ̀. Sɑrɑ̀ ɑ́bëëd, kɑ runne ogöögø ki miyø kí pyɑ̈r ɑ́ryew wïdɑ́bïryew. Athøwe kì Kiriɑt Arbɑ̀, ɑ cwøl ɑ́ Kibrön kì piny Kɑnɑɑn. Abrɑhɑm yije ɑ́rɑ̈ɑ̈m yi thøwi cyëge, kɑ gø ywøge ki mendwøng. Kɑ Abrɑhɑm odhwödhø kì buti dhɑnhø kɑ kwɑrri Kit köbbe kinni, “Yɑ bɑ wëdh, o yɑ bɑ ngɑnpɑth kì kelli wun keny. Ngëwwi wun yɑn kì ri piny wun ki keny me koonyɑ cyëgɑ men-ɑ ɑ́thøw.” Kɑ kwøbbi Abrɑhɑm løøg yi kwɑrri Kit kinni, “Jɑldwøng, yï bɑ ngɑn-ɑ ɑ́tïng mɑl yi Jwøk kì kelli wøn. Kɑ̈bbí ki keny-ɑ døøj ki konyi cyëgí. Yï ócuggø kunyi keny-ɑ dwɑddi yi yïn kì kelli kɑ̈jj-ɑ nyi kunyi yi wøn, bong ngɑn-ɑ ómɑ̈ɑ̈n yïn konyi cyëgí kì kelli wøn.” Kɑ Abrɑhɑm ree bøødhe kì bøli tyëngpiny, ɑ løg kwɑrri Kit, Kɑ gï köbbe kinni, “Keløg wu dwɑdd-ɑ kønyi yɑn, kinni o cyëgɑ kony yi yɑn kì keny, kööb wun ki Eprön wɑ̈d Dhoɑr. Kwɑjju en o órøngi Kïti Mɑkpïlɑ̀ kì thɑ pwödhe, ngëwwe yɑn. Ngyënyy-ɑ dwɑddi yi en, culɑ’ en bënn. O wu ócungi wun ceth wun ɑ́ tyëng-ɑ bøli gen ɑ́ngeew kenyɑni ɑ́ mi kony ki ji.” Eprön ɑ́bëëd e ying-ɑ kej burø kì kelli kwɑrri Kit, kì dhø döri kɑɑl. Kɑ kwøbbi Abrɑhɑm løøge kinni, “Jɑldwøng, yï ɑ́mëggɑ pinyɑni geki órøngi kït men-ɑ yije, kì bøli ji møg bënn. Kony cyëgí men-ɑ ɑ́thøw.” Kɑ Abrɑhɑm wïje kuule piny kì bøli kwɑrri Kit. Aköbbe Eprön kì bøli ji bënn kinni, “Yɑ kwɑjj-ɑ yïn, wiy yï culɑ ngyënyy-ɑ ngeew pwödhø. Yïëy ngyëny møgɑ, o cyëgɑ koonyɑ kenyɑni.” Aløøg kwøbbi Abrɑhɑm yi Eprön kinni, “Jɑldwøng, piny ngew kɑ ngyëny ɑ́tegg miy ɑ́ngwen. Ngyënyyɑni bong per gen kì kɑɑmee? Kwɑny pinyɑni kɑ cyëgí koony yije.” Abrɑhɑm ɑ́yïëy kɑ ngyënyy-ɑ ɑ́kwøb yi Eprön muuje kì bøli kwɑrri Kit. Ngyëny ɑ́kwɑne ceth gɑ ɑ́tegg miy ɑ́ngwen, ngyëny ɑ́kwɑn gen ceth ni kenyi kwɑ̈ɑ̈n jøngyew. Bene kër-ɑ ɑ́göög piny-ɑ́ løg mi Eprön kì Mɑkpïlɑ̀ kì buti Mɑmɑrɑ̀ ɑ́ mi Abrɑhɑm ɑnɑn. Piny-ɑ ɑ́ngew yi Abrɑhɑm, ɑ́ngew ɑ bøli Kwɑrri Kit møg-ɑ ɑ́ying kenyɑni bënn, kɑ yïëy yi gen ceth kinni ɑ́göög ki mi Abrɑhɑm. Codhe, kɑ Abrɑhɑm Sɑrɑ̀ cyëge koonye yij órøngi kïnɑni kì piny Kɑnɑɑn. Kɑ pwödhø geki órøngi kït men-ɑ yije ogöögø ki mø Abrɑhɑm, gø ɑ́ngewe kì yï kwɑrri Kit ɑ́ keny nyi koony ji. Kɑ Abrɑhɑm oyöø ki mendwøng. Abrɑhɑm ɑ́gyëdh yi Jwøng-ɑ Ácwɑ̈ɑ̈j ki gïïpiny bëne. Kɑ Abrɑhɑm jɑngi bɑ̈ngge, jɑl-ɑ mïdhi gøle köbbe kinni, “Cïb cingí thɑ rɑ̈mɑ. Kɑ yï köngí kì bøli Jwøng-ɑ Ácwɑ̈ɑ̈j, Jwøøg mɑl kí piny kinni wɑ̈dɑ ko yɑ̈bbí ki dhɑjø kì kelli nyigi Kɑnɑɑn, tyëng-ɑ buti gen bëëd yi yɑn ek. De yï ókedhi pödhi wøn, kɑ wɑ̈dɑ Isɑɑk yɑ̈bbí ki dhɑjø kì kelli tyëng gøl wøn.” Aköbbii yi bɑ̈ngɑni kinni, “O keløg nyɑnɑni óbɑ̈nyi bëënø yø? Dwøøgɑ wɑ̈dí pödhi wun, kun-ɑ́ yije ɑ́kɑ̈ɑ̈l yi yïn?” Alöggi Abrɑhɑm kinni, “Wɑ̈dɑ ko dwøøg kunɑni! Jwøng-ɑ Ácwɑ̈ɑ̈j, Jwøøg mɑl, en ɑ ɑ́kɑ̈ɑ̈l yɑn wɑ̈g kì gøl wïyɑ, kì piny-ɑ́ yije ɑ́nywøøl yɑn, kɑ óköngø kinni piny men, ómëggɑ kwɑrrí. Wëywöne óöre bølí, o yï yïddí ki dhɑjø men muuj wɑ̈dɑ Keløg nyɑnɑni óbɑ̈nyø bëënø, yïí bɑ̈r. De wɑ̈dɑ ko dwøøg kunɑni kinni tek!” Codhe, kɑ bɑ̈ngɑni cinge cïbe thɑ rɑ̈ɑ̈m Abrɑhɑm wɑ̈n, ɑkönge kinni møg-ɑ ɑ́kwøb yi Abrɑhɑm ógwøg yi en. Kɑ bɑ̈ng-ɑ mïdhi jɑmmi Abrɑhɑm, ókɑ̈bbø ki ɑmɑl pyɑ̈rø kì ri ɑmɑlli wɑ̈n, kɑ kedh-ɑ kɑɑl-ɑ bëëd yi Nɑor kì Misøpøtɑmiyɑ̀. Keny-ɑ ɑ́wɑ̈dhe, kɑ ɑmɑl gøøje piny kì buti wɑɑng pï kì tøg kɑɑl, piny bɑ böörø, bøli keny-ɑ nyi römmi tyëng-ɑ mɑ̈nn ki pï. Kɑ bɑ̈ngɑni okööbø kinni, “Yï Jwøng-ɑ Ácwɑ̈ɑ̈j, Yïn ɑ bɑ Jwøøg Abrɑhɑm wɑ̈ɑ, yɑ kwɑjj-ɑ yïn, køny yɑn, kɑ Abrɑhɑm wɑ̈ɑ göggí ki gïndøj dicyɑ̈ngtïn. Yɑn ɑ cungi kì kömi wɑɑng pï èn, o womɑ̈nni kɑɑl bï-ɑ be römmø ki pï. Ákyel kì kelli gen óköbbɑ kinni, yɑ kwɑjj-ɑ yïn, dwöög pugí piny o yɑ mɑ̈dhɑ ki pï. Keløg e ókööbø kinni mɑ̈dhí, o ɑmɑllí muujɑ ki pï thyew, óbëëd ɑ́ en ɑ ɑ́mëggí bɑ̈ngí Isɑɑk, o óyod yi yɑn thyew kinni wɑ̈ɑ ɑ́køny yi yïn.” Kɑ Rebekɑ̀ nyɑɑr Bethuel wɑ̈d Nɑor ómï Abrɑhɑm, bï-ɑ wɑ̈g kì kɑɑl, e bɑ̈ngɑni nudd e ókwɑ̈jjø. Rebekɑ̀ ɑ́bëëd e byell-ɑ pugi pïge kì wïj tøge. Ábëëd e myëër cɑrø, o nuti pɑ̈nyø nywɑlø yi jɑlø. Akedhe kömi wɑɑng pï, kɑ puge pɑ̈nge ki pï. Kɑ dwöög-ɑ wɑ̈g kì yij mɑ̈n-ɑ di wɑɑng pï. Kɑ bɑ̈ngɑni reng-ɑ yïe, ɑkööbe kinni, “Yɑ kwɑjj-ɑ yïn, dwöög pugí piny o yɑ mɑ̈dhɑ ki pï.” Kɑ Rebekɑ̀ okööbø kinni, “Mɑ̈dhí jɑldwøng.” Kɑ puge jwɑne’ yeej piny kì wïj tøge, kɑ gø nënge ki pïg mɑdhe. Keny-ɑ ɑ́rume mɑdh, ɑkööb Rebekɑ̀ kinni, “Amɑllí ótömmɑ ki pï thyew.” Codhe, kɑ pïg-ɑ yij puge kønye yij ɑwöl-ɑ nyi mɑ̈ɑ̈dh yi ɑmɑl. Kɑ reng-ɑ be dwɑ̈ddø ki pï, kɑ pëgg-ɑ be rïngø ki pï, o gï nyi kønye yij ɑwöl gïti kɑ ɑ́rum ɑmɑl ki mɑdh bënn. Kɑ kwølli ki nennø yi bɑ̈ngɑni. Ádwɑdd-ɑ yodi kinni wele ɑ́pɑ̈dhi keje kì bɑng kunyi Jwøng-ɑ Ácwɑ̈ɑ̈j. Keny-ɑ ɑ́rum ɑmɑl ki mɑdh kɑ Rebekɑ̀ nënge ki gweli dhɑb me ngewe teeg, kɑ gø gøøde órøme. Kɑ cingge budhe ki yëlli dhɑb ɑ́ryew. Akööbe kinni, “Yɑ kwɑjj-ɑ yïn, köbbí yɑn, wïyí bɑ men? Dɑ keny me cuggi buddø yi wøn tïn kì wɑ̈r, wøki jøg-ɑ cyɑ̈dhi ki yɑn?” Alöggi Rebekɑ̀ kinni, “Wïyɑ bɑ Bethuel wɑ̈d Nɑor, ɑ meye cwøl ɑ́ Milkɑ̀.” Kɑ okööbø kinni, “Yï wøn dɑ lum kí thinyø men cɑm yi ɑmɑl, o dɑ keny buddi yi wun.” Codhe, kɑ jɑlɑni cønge rume piny kɑ Jwøng-ɑ Ácwɑ̈ɑ̈j mɑlle. Kɑ okööbø kinni, “Yɑ lenh-ɑ Jwøng-ɑ Ácwɑ̈ɑ̈j, ɑ bɑ Jwøøg wɑ̈ɑ Abrɑhɑm. Jwøng-ɑ Ácwɑ̈ɑ̈j døøj, o gøgg-ɑ dyër kipe wɑ̈ɑ, kɑ yɑ kööle gøl wɑddi wɑ̈ɑ.” Kɑ Rebekɑ̀ órengø, kɑ gøl meye köbbe gïgɑni bënn. Yïe dɑ ómen me cwøl ɑ́ Lɑbɑn. Kɑ Lɑbɑn reng-ɑ wïj wɑɑng pï kun-ɑ di bɑ̈ng Abrɑhɑm. Møg-ɑ ɑ́kwøb yi Rebekɑ̀ ɑ́lïngi yi Lɑbɑn, kɑ gwelø geki yël lidhe kì ri nyimen. Codhe, ɑrenge wïj wɑɑng pï, ɑyuude jøgɑni kunɑni, ge ócungø kì buti ɑmɑl kì wïj wɑɑng pï. Kɑ Lɑbɑn okööbø kinni, “Bïí pɑc yï ngɑn-ɑ ɑ́gyëdh yi Jwøng-ɑ Ácwɑ̈ɑ̈j, yï ko cungi kì pɑ̈l. Kej wun ɑ́rum ki pyëlø kì kɑl, o kej ɑmɑlli wun ɑ́rum ki pyëlø thyew.” Codhe, kɑ bɑ̈nggi Abrɑhɑm kedh-ɑ kɑl. Keny-ɑ ɑ́rum jɑmmì ki kɑ̈ɑ̈l wɑ̈g yi Lɑbɑn kì kömi ɑmɑl, kɑ gï thödhe ki lum, kɑ bɑ̈ng Abrɑhɑm geki jøg-ɑ cyɑ̈dhi ki en nënge ki pï, mø lwøg gen tyelli gen. Keny-ɑ ɑ́kɑ̈ɑ̈l gïncɑm, kɑ jɑlɑni okööbø kinni, “Yɑ pɑ cyɑ̈mø gïti keny-ɑ ókwøbɑ gïn-ɑ pere ɑ́bëënɑ.” Kɑ Lɑbɑn okööbø kinni, “Adɑ́ kööb.” Kɑ okööbø kinni, “Yɑ bɑ bɑ̈ng Abrɑhɑm, wɑ̈ɑ ɑ́gyëdh yi Jwøng-ɑ Ácwɑ̈ɑ̈j ki gïïpiny bëne, kɑ ogöögø ki jɑlkɑ̈r. Ánëngi yi Jwøng-ɑ Ácwɑ̈ɑ̈j ki dyel bëne, kí dhög, kí ɑ́tegø kí dhɑb, kí bɑ̈ngg-ɑ mɑ̈nn kí bɑ̈ngg-ɑ cwøw, kí ɑmɑl, kí kyënyì. Sɑrɑ̀ cï wɑ̈ɑ, ɑ́pɑ̈dhi piny ki wɑ̈d e rum yöø, o wɑ̈ɑ jɑmm-ɑ ying yïe bënn ɑ́mëgge wɑ̈nɑni. Yɑ ɑ́köbbi yi wɑ̈ɑ kinni köngɑ kinni, møg-ɑ köbbe yɑn ómïdhɑ, ɑ́kööb kinni, ‘Wɑ̈dɑ ko yɑ̈bbí ki dhɑjø kì kelli nyigi Kɑnɑɑn, tyëng-ɑ buti gen bëëd yi yɑn ek. De kedhí pödhi wøn, kɑ wɑ̈dɑ Isɑɑk yɑ̈bbí ki dhɑjø kì kelli tyëng gøl wøn.’ Aköbbɑ wɑ̈ɑ kinni, O keløg nyɑnɑni óbɑ̈nyi bëënø yø? De ɑ́kööb kinni, ‘Jwøng-ɑ Ácwɑ̈ɑ̈j ngɑn-ɑ bøle cyɑ̈dhi yi yɑn wëywöne óöre bɑngí, o yï køny yi en. Yï óyïddi ki dhɑjø me nywøm yi wɑ̈dɑ kì yij gøl wøn, kì gøl wïyɑ ceth. Codhe, o møg-ɑ ɑ́kwöng yi yïn thume cyee. De keløg yï ómɑ̈ɑ̈n yi gen ki dhɑjø me muuj wɑ̈dɑ, yïí bɑ̈r.’ “Yɑ ɑ́bï kɑ dhøngɑni dicyɑ̈ngtïn. Átïni yɑ ɑ́kööb kì kömi wɑɑng pï kinni, Yï Jwøng-ɑ Ácwɑ̈ɑ̈j, yïn ɑ bɑ Jwøøg Abrɑhɑm wɑ̈ɑ, yɑ kwɑjj-ɑ yïn, køny yɑn. Yɑn ɑ cungi kì kömi wɑɑng pï èn. Yɑ oyïdø ki nyɑndhɑjø men-ɑ óbï be römmø ki pï, o óköbbɑ kinni, yɑ kwɑjj-ɑ yïn, dwöög pugí piny o yɑ mɑ̈dhɑ ki pï. Kɑ wiy kööbe kinni, mɑdh pï møg. Amɑllí ótömmɑ ki pï thyew, nyɑnɑni óbëëd ɑ́ en ɑ ɑ́muuj yi yïn ɑ́ dhɑjø me muuj wɑ̈d wɑ̈ɑ. E kwɑ̈jjɑ nuti thumø, ɑbëën Rebekɑ̀ wɑ̈g kì kɑɑl, e puge obyellø yi en kì wïj tøge, kɑ kedh-ɑ be tömø ki pï. Aköbbɑ en kinni, ‘Yɑ kwɑjj-ɑ yïn, nëngí yɑn ki pï møg mɑ̈ɑ̈dhɑ.’ Kɑ pug gø jwɑne’ yeej piny kì wïj tøge, ɑkööbe kinni, ‘Mɑ̈dhí, ɑmɑllí ótömmɑ ki pï thyew.’ Codhe, ɑmɑ̈dhɑ, kɑ ɑmɑllɑ nënge ki pï thyew. Keny-ɑ ɑ́pyëjɑ en kinni, wïyí bɑ men? Alögge kinni, ‘Wïyɑ bɑ Bethuel wɑ̈d Nɑor, ɑ meye cwøl ɑ́ Milkɑ̀.’ Codhe, ɑgøødɑ gwelø órøme, kɑ yëll bødhɑ cingge. Kɑ wïjɑ kuulɑ piny, ɑpwøjɑ Jwøng-ɑ Ácwɑ̈ɑ̈j, Jwøøg Abrɑhɑm wɑ̈ɑ, kipe kɑ ɑ́kwølle yɑn kì yuu-ɑ dyër, be kwɑjji nyɑɑr ómï wɑ̈ɑ, o muuj wɑ̈de. Anɑn keløg wu dwɑdd-ɑ göggi wɑ̈ɑ ki gïndøj, kɑ wu oyïëyø, köbbu yɑn, o rummɑ gwirɑ, ying yɑ töng-ɑ wïj cɑɑm wɑlɑ̀ wïj kyëj.” Alöggi Lɑbɑn geki Bethuel kinni, “Kwøb nënni ge kɑ̈ɑ̈l-ɑ yï Jwøng-ɑ Ácwɑ̈ɑ̈j, bong gïjø me cuggi kwøbø yi wøn, ɑ́ gïjø me rɑɑj wɑlɑ̀ me døøj. Rebekɑ̀ ɑ bølí ɑnɑn, kwɑɑny kɑ yï kedh. Wiy nywøm yi wɑ̈d wöw ni kɑ ɑ́kwøbii yi Jwøng-ɑ Ácwɑ̈ɑ̈j.” Keny-ɑ ɑ́lïngi kwøbbɑni yi bɑ̈ng Abrɑhɑm, kɑ wïje kuule piny kinni kì bøli Jwøng-ɑ Ácwɑ̈ɑ̈j. Codhe, kɑ Rebekɑ̀ nënge ki gwel kí yëll, kí ɑ́cwecwelli ɑ́tegg geki dhɑb, kí ógudh. Wïye geki meye ɑ́thödhi thyew kí jɑmmì mø ngewi gen teeg. Kɑ bɑ̈ngɑni geki jøg-ɑ cyɑ̈dhi ki en ocyɑ̈mø kɑ ge omɑ̈dhø, kɑ ge nïnn-ɑ gølɑni. Keny-ɑ ɑ́dhwödh gen dhuki kì mwøl, kɑ bɑ̈ngɑni okööbø kinni, “Wiy yɑ døøgɑ yï wɑ̈ɑ ɑnɑn.” Kɑ meyi Rebekɑ̀ geki ómen okööbø kinni, “Wiy nyɑnthinh bëëde ki wøn ki osboo wɑlɑ̀ ki cyɑ̈ng pyɑ̈rø, codhe o kedhe.” De ge ɑ́köbbi yi bɑ̈ngɑni kinni, “Yɑ ko cöngi wun, mɑ́ yɑ ɑ́rum ki kønyø yi Jwøng-ɑ Ácwɑ̈ɑ̈j. Wiyu yɑn, o yɑ døøgɑ yï wɑ̈ɑ.” Kɑ ómï Rebekɑ̀ geki meye okööbø kinni, “Cwøl wɑ nyɑnthinh o pëjji wɑ kej dhøge.” Kɑ Rebekɑ̀ cwøl yi gen, ɑpyëj ge gøn kinni, “Yï dwɑdd-ɑ kedhø wuki jɑɑl, ɑnɑn?” Kɑ okööbø kinni, “Ngee, yɑ dwɑdd-ɑ kedhø.” Codhe, ɑwiy gen Rebekɑ̀ kedhe geki nyɑn-ɑ bɑ 'mïdhe, kí bɑ̈ng Abrɑhɑm geki jøg-ɑ cyɑ̈dhi ki en. Kɑ Rebekɑ̀ kwëng yi gen, ge okööbø kinni, “Yï bɑ nyimï wøn, kwɑrrí óngënyi kɑ ge ogöögø ki ɑ́lïp mø ngenyø ki mendwøng. Myërri tyëng-ɑ mɑɑn gen ólɑg yi gen!” Codhe, kɑ Rebekɑ̀ geki nyɑn-ɑ bɑ bɑ̈nge pëgg-ɑ kömi ɑmɑl, kɑ ge løg-ɑ bɑng bɑ̈ng Abrɑhɑm geki jøg-ɑ cyɑ̈dhi ki en. Codhe, kɑ Rebekɑ̀ mɑg-ɑ yöö geki bɑ̈ngɑni. Kì bøli kenyɑni, Isɑɑk rum dhwödhø kì Bir Lɑhɑy Roì, o bëëd ɑ piny Kɑnɑɑn kì wɑɑng wurlwɑl. Kɑ kedh-ɑ be wïïnø yethi pwödh cyɑ̈ng ɑ́kyel kì böörø, e cyɑ̈dhi e orumø, ɑtïnge wïje kɑ ólïdhø ki ɑmɑl ge obëënø. Rebekɑ̀ wïje ɑ́tïnge thyew, kɑ Isɑɑk lidhe, kɑ bï-ɑ piny kì kömi ɑmɑlø, Kɑ bɑ̈ngɑni pyëje kinni, “Jɑl-ɑ cyɑ̈dhi kì yij pwödhø ɑcɑ̀, e bï-ɑ yïee, bɑ men?” Alöggi bɑ̈ngɑni kinni, “Jɑlɑni bene wɑ̈ɑ.” Codhe, kɑ Rebekɑ̀ wïje kume ki thɑrɑ̀. Kɑ gïg-ɑ ɑ́cwöb löbbi Isɑɑk yi bɑ̈ngɑni ge bënn. Kɑ Rebekɑ̀ kïdhi yi Isɑɑk yij kemɑ̀ mi meye Sɑrɑ̀. Kɑ ogöögø ki cyëge. Kɑ mɑɑr yi Isɑɑk ki mendwøng. Isɑɑk óyïddi ki ngɑn tïïn wɑnge kì bɑng thøwi meye. Kɑ Abrɑhɑm ókɑ̈bbø dhɑjø me cwøl ɑ́ Keturɑ̀. Kɑ onywølø ki yɑɑg mø cwølli gɑ Dhimrɑn, kí Yokcɑn, kí Medɑn, kí Midyɑn, kí Icbɑk, kí Cuɑ̀. Yokcɑn ɑ bɑ wïyi Cebɑ̀ geki Dedɑn. Kwɑrri Dedɑn bene gen ɑ bɑ tyëng Acuur, kí Lethuc, kí Leum. Wɑ̈ddi Midyɑn bɑ Epɑ̀, Eper, Aɑnök, Abïdɑ̀, kí Eldɑ̀. Jøgɑni bënn bɑ kwɑrri Keturɑ̀. Abrɑhɑm jɑmme bënn ɑ́wïye Isɑɑk. De Abrɑhɑm kɑ̈ng-ɑ ɑ́bëëde e onëënø, wɑ̈dde møg-ɑ ɑ́nywøl yi mɑ̈nn-ɑ kyeelø ɑ́thödhe ki jɑmmì. Kɑ gï köbbe dɑ̈ɑ̈g gen. Ge ɑ́dɑ̈ggi kuni wɑɑng cyɑ̈ɑ̈ng mwøl, o ri gen lɑ̈ɑ̈w gen ki Isɑɑk. Abrɑhɑm ɑ́bëëd ki runn miyø kí pyɑ̈r ɑ́bïryew wïdɑ́bïj. Ákɑ̈l yi Jwøk e rum yöø ki mendwøng. Ábëëd ki keny me bɑ̈ɑ̈r ki bëëdø me døøj. Kɑ kony yi wɑ̈dde ryeet, ɑ løg Isɑɑk geki Icmɑil kì yij órøngi Kïti Mɑkpïlɑ̀ kì yij pwödhi Eprön kì buti Mɑmɑrɑ̀ (Eprön bɑ wɑ̈d Dhoɑr kwɑɑr Kit). Abrɑhɑm ɑ́koony-ɑ buti cyëge Sɑrɑ̀, kì yij pwönh-ɑ ɑ́ngew yi en ki yï kwɑrri Kit. Kì bɑng kɑ ɑ́thøw Abrɑhɑm, kɑ Isɑɑk wɑ̈de gyëdh yi Jwøk. Isɑɑk ɑ́bëëd ɑ Bir Lɑhɑy Roì kì bøli kenyɑni. Bene kwɑrri Icmɑil wɑ̈d Abrɑhɑm ek: Äjer nyɑɑr Rïp, bɑ̈ng Sɑrɑ̀ ɑ bɑ meyi Icmɑil. Wɑ̈ddi Icmɑil ek, gɑ ɑwɑd ki këër nywølø, Nebɑyoth ɑ mɑl, bɑnge dɑ Kedɑr, kí Adbeel, kí Mibsɑm. Kí Micmɑ̀, kí Dumɑ̀, kí Mɑɑsɑ̀. Kí Adɑd, kí Temɑ̀, kí Yetur, kí Nɑpic, kí Kedemɑ̀. Bene gen wɑ̈ddi Icmɑil ɑgɑk. Bene nyingi gen ɑnɑn møg-ɑ ɑ́göög ki nyingi kɑ̈lli gen kì kɑ̈jj-ɑ bëëd gen. Ge ɑ́göög ki wɑ̈thi kɑ̈llì pyɑ̈rø wïdɑ́ryew. Athøw Icmɑil e runne bɑ miyø kí pyɑ̈r ɑ́dɑ̈g wïdɑ́bïryew. Ge ɑ́bëëd ɑ myërr-ɑ kɑɑm Abïlɑ̀ geki Cur, ge cyɑ̈gi ki Rïp, kì kö yuu Acuur, e ri gen rwööm gen ki kwɑrri nyiiwɑ̈n. Bene kwɑrri gøl Isɑɑk ek: Abrɑhɑm ɑ́nywøl ki wɑ̈d me cwøl ɑ́ Isɑɑk. Keny-ɑ ɑ́göög runni Isɑɑk ki pyɑ̈r ɑ́ngwen, ɑnywøme Rebekɑ̀, nyɑn-ɑ ɑ́kɑ̈ɑ̈l kì Misøpøtɑmiyɑ̀. Bɑ nyɑɑr Bethuel, o bɑ nyimï Lɑbɑn jɑl Arɑm. Cï Isɑɑk ɑ́dhɑ̈li yïddø ki dhɑnhø, kɑ Jwøng-ɑ Ácwɑ̈ɑ̈j kwɑjji yi Isɑɑk kipere. Kwɑ̈jji Isɑɑk ɑ́yïëy yi Jwøng-ɑ Ácwɑ̈ɑ̈j, kɑ Rebekɑ̀ ongølø ki dhɑnhø. Ábëëd e bɑ ɑcwegg ɑ yije, kɑ ɑcweggɑni ónyïɑ̈ggø kì yije. Kɑ okööbø kinni, “Á kipe ngø ɑ cuggi gïn ni men ki cwöbø.” Kɑ kedh-ɑ be pyëji Jwøng-ɑ Ácwɑ̈ɑ̈j. Kɑ köbbi yi Jwøng-ɑ Ácwɑ̈ɑ̈j kinni, “Pödhh ɑ́ryew ɑ yijí, yï ónywøl ki ji mø mɑ̈n ki ri gen. Ákyel óbëëd e teg kibøli men-ɑ kyeelø. Nyel-ɑ dwøng óbëëd ɑ́ bɑ̈ng nyel-ɑ thinh.” Keny-ɑ ɑ́wɑ̈nhi bøli kej pɑ̈dhi piny, kɑ pɑ̈dh-ɑ piny ki ɑcwegg-ɑ cwøw. Kɑ Ngör bï-ɑ wɑ̈g dële pɑ̈ng yi yëyy, de ce rug-ɑ lɑwø me kwɑrø, kɑ nyinge cɑg ɑ́ Isøø. Abëën Cyɑ̈n wɑ̈g e mïdh-ɑ tyeli Isøø, kɑ cɑg ɑ́ Yɑgob. Ge ɑ́nywøl e Isɑɑk runne bɑ pyɑ̈r ɑ́bïkyel. Kɑ yɑnythønhø ódøngø. Isøø ɑ́göög ki jɑldwɑr, nyi mɑɑr-ɑ wïïnø kì pɑ̈l, de Yɑgob nyi tyer-ɑ bëëdø kì pɑc. Isɑɑk ɑ́mɑɑr-ɑ Isøø, mɑ́ e tyer-ɑ cɑm ki lɑ̈yyi dwɑr. De Rebekɑ̀ ɑ́mɑɑr-ɑ Yɑgob. Cyɑ̈ng ɑ́kyel e Yɑgob otɑ̈dø ki ɑ́dɑs, ɑbëën Isøø e kɑ̈ɑ̈l-ɑ be dwɑr. Ábëëd ree dɑ kɑ̈j. Aköbbe Yɑgob kinni, “Yɑ kwɑjj-ɑ yïn, nëngí yɑn ki gïn-ɑ kwɑrø ɑnɑn, yɑ ɑ́nyönhi yi kɑ̈j.” (Bene ɑ bɑnge døøgii be cwøllø yi teedø ɑ́ Edöm. ) Kɑ Yɑgob okööbø kinni, “Yï ónëngi yi yɑn keløg kejí, kej kɑyø ómëggí yɑn.” Kɑ Isøø okööbø kinni, “Yɑ bɑ men thøw ni men, kej kɑyø ɑ́ me gwøøg ngø yi yɑn?” Kɑ Yɑgob okööbø kinni, “Köngí møti kinni kejí, kej kɑyø ɑ́mëggí yɑn.” Isøø ɑ́köngi, kɑ keje mëgge Yɑgob. Kɑ Isøø nëngi yi Yɑgob ki ópun kí muli ɑ́dɑs. Kɑ ocyɑ̈mø, kɑ omɑ̈dhø ki pï. Kej kɑyø ɑ́ngëwwe Yɑgob. Kɑ kɑ̈j ómɑ̈gø kì pönhɑni, pɑth ki kɑ̈ny-ɑ ɑ́mɑ̈gi e Abrɑhɑm nudd e onëënø. Kɑ Isɑɑk dɑ̈g-ɑ Gerɑr kun-ɑ ɑ́bëëd yi Abimelek, rɑ̈ɑ̈dh Pelistiyɑ̀. Acwöb Jwøng-ɑ Ácwɑ̈ɑ̈j kì bøli Isɑɑk, ɑkööbe kinni, “Yï ko kedhi Rïp, de bëëd kì piny-ɑ óköbbɑ yïn. Bëëd kì piny men, yɑ óbëëdø kì butí o yï ógyëdh yi yɑn. Piny men bëne ómëggɑ yïn, wuki kwɑrrí. O møg-ɑ ɑ́köbbɑ wïyí Abrɑhɑm ómïdhi yi yɑn. Kwɑrrí ógwøg yi yɑn ge gïïr ni kyelli mɑl, kɑ ge mëggɑ piny møg bënn. Jurri kömi piny óyïddi ki gyëdh kì bɑng kwɑrrí. Gïgɑni ógwøg yi yɑn kipe kɑ ɑ́lïngi dhøgɑ yi wïyí Abrɑhɑm. Gïn-ɑ ɑ́kwøb yi yɑn ɑ́gwøg yi en, kɑ ciggɑ lïnge, kɑ pwönyɑ mïdhe, kɑ yïëy-ɑ jɑɑgø yi yɑn.” Codhe, kɑ Isɑɑk obëëdø kì Gerɑr. Rebekɑ̀ cyëge ɑ́bëëd e myëër cɑrø, kɑ Isɑɑk pyëj yi jø pönhɑni kipere. Kɑ Isɑɑk okööbø kinni, “Bɑ nyimïɑ.” Mɑ́ e ɑ́bëëd e óböggø ki köbbi gen kinni bɑ cyëge. Árum cem e ócuggø nɑ̈gø yi tyëngɑni, o nyɑnɑni kwɑny yi gen. Isɑɑk ɑ́bëëd kì kunɑni ki keny me bɑ̈ɑ̈r. Cyɑ̈ng ɑ́kyel, e Abimelek ceg-ɑ wɑ̈dhi lïdhi wɑ̈g kì ɑwɑj, kɑ Isɑɑk lidhe ge ongyëdø ki Rebekɑ̀ cyëge. Acwøøl Isɑɑk yi Abimelek, ɑkööbe kinni, “Ngɑɑn bɑ cyëgí. Á kipe ngø ɑ ɑ́kööb kinni bɑ nyimyëw?” Aköbbii yi Isɑɑk kinni, “Yɑ ɑ́bëëd yɑ óböggø kinni, yɑ ónɑ̈g ke di kööbɑ kinni nyɑnɑni bɑ cyëgɑ.” Kɑ Abimelek okööbø kinni, “Á ngø ɑ göggí wøn ni men? Ke di bëëd e dɑ ngɑn buddø ki cyëgí kì kelli wøn, pɑ di kɑ̈ni ki orøg!” Codhe, kɑ teedø bëne kyëddi yi Abimelek kinni, “Ngɑn-ɑ ónywɑl jɑɑl wɑlɑ̀ cyëge, ceg kɑ nɑ̈gø.” Kɑ Isɑɑk opurø kì pönhɑni, kɑ byelle ocyegø kidøøj kì wɑɑngɑni. Ágyëdh yi Jwøng-ɑ Ácwɑ̈ɑ̈j ki mendwøng, Kɑ ogöögø ki jɑlkɑ̈r. Álïm ki jɑmmì gïti kɑ ɑ́gööge ɑ́ jɑlkɑ̈r me luudø. Yïe ɑ́dɑ bɑ̈ngg mø gïïr, kí dhög, kí dyëg, kɑ mod yi tyëng Pelistiyɑ̀. Kɑ yïïth møg-ɑ ɑ́kony yi bɑ̈nggi wïyí Isɑɑk kɑ̈ge dööng rïg yi gen. Yïïthɑni ɑ́kony e Abrɑhɑm nudd e onëënø. Yïïthɑni ɑ́pɑ̈ng ki lɑ̈bø yi tyëng Pelistiyɑ̀. Kɑ Isɑɑk köbbi yi Abimelek kinni, “Dhwöödh kì pödhi wøn, mɑ́ yï ɑ́göög yï teg kibøli wøn.” Codhe, kɑ Isɑɑk odhwödhø kì kenyɑni, kɑ gudd-ɑ yij Töör Gerɑr, ɑbëëde kì yije. Ádɑ yïïth mɑ ɑ́bëëd ge ókonyø yi Abrɑhɑm kɑ̈ge dööng, de ge ɑ́rïg ki lɑ̈bø yi tyëng Pelistiyɑ̀. Codhe, kɑ yïïthɑni thödh yi Isɑɑk. Kɑ ge cwølli ki nying-ɑ ɑ́cɑɑg gen ceth yi Abrɑhɑm wïye. Kɑ bɑ̈nggi Isɑɑk okunyø ki yith kì yij tör, kɑ yiinhɑni töng-ɑ kömi wɑɑng pï. De jøkwɑ̈yi Gerɑr ɑ́wër ki gen kɑ ge okööbø kinni, “Pï møg bɑ mø wøn.” Kɑ yiinhɑni cɑg yi Isɑɑk ɑ́ Wëërø. Kɑ bɑ̈ngge cig-ɑ kony ki yith megø, keny-ɑ ɑ́døøg teenɑni ki wëërø, ɑcɑɑg yiinhɑni yi Isɑɑk ɑ́ Liny. Kɑ odɑ̈gø kì kenyɑni, ɑcige kony ki yith megø. Bong ngɑn mɑ ɑ́wër kipe menɑni, ɑcɑge gøn ɑ́ Keny Lɑj. Isɑɑk ɑ́kööb kinni, “Anɑn Jwøng-ɑ Ácwɑ̈ɑ̈j ɑ́muuj ki keny lɑj, wɑ ódönyi kì keny.” Kɑ Isɑɑk odhwödhø kì kenyɑni, kɑ kedh-ɑ Bircebɑ̀. Kɑ Jwøng-ɑ Ácwɑ̈ɑ̈j ocwöbø kì bøle kì wɑ̈rɑni, ɑkööbe kinni, “Bene yɑn Jwøøg wïyí Abrɑhɑm. Yï ko böggi, yɑ cyɑ̈dhi kɑ yïn, yï ógyëdh yi yɑn, o yï ónëngɑ ki kwɑrr mø gïïr kipe bɑ̈ngɑ Abrɑhɑm.” Codhe, kɑ Isɑɑk ogëdø ki këli lɑm, kɑ Jwøng-ɑ Ácwɑ̈ɑ̈j mɑlle kì kenyɑni. Águd ki kɑɑl kì kenyɑni, kɑ bɑ̈ngge okunyø ki yith. Abimelek ɑ́bï kì Gerɑr e bï-ɑ yï Isɑɑk. Kɑ Abudhɑdh jɑl-ɑ nyi kønyii ki kwøb geki Piköl pënyi linye gï kɑ̈ɑ̈le. Apyëjii yi Isɑɑk kinni, “Á kipe ngø ɑ bëën wun yïɑ? Wu ɑ́bëëd wu mɑ̈n ki yɑn, kɑ yɑ cyeddi yi wun kì pödhi wun?” Alöggi gen kinni, “Áyod yi wøn ɑnɑn kinni Jwøng-ɑ Ácwɑ̈ɑ̈j cyɑ̈dhi kɑ yïn. Köngi wɑ kì kɑɑmee. Wiy kwøbbee reb yi wɑ, kinni koo di gïnrɑj me göggí wøn, ni kɑ ɑ́bëëde e bong gïnrɑj mɑ ɑ́göggi yïn yi wøn, de bëëdi wøn ɑ́bëëd e døøj ki yïn gïti kɑ ɑ́köbbi yïn yi wøn kinni kedh ki mër, ɑnɑn yï bɑ ɑgyëdh yi Jwøng-ɑ Ácwɑ̈ɑ̈j.” Codhe, kɑ gï ryeje, ɑcyɑ̈ɑ̈m gen kɑ ge omɑ̈dhø. Kì mwøl keny-ɑ ɑ́ru wøw, kɑ ge óköngø kì kɑɑm gen kinni, bong ngɑn nywɑl ngɑn-ɑ kyeelø. Codhe, ɑmɑ̈ɑ̈dh gen yi Isɑɑk, kɑ ge ókedhø ki mër. Dicyɑ̈ngɑni ɑ ɑ́bëën bɑ̈nggi Isɑɑk yïe be köbbii kwøbbi yith men-ɑ ókonyø yi gen, ɑkööb gen kinni, “Wø ɑ́yïddi ki pï!” Kɑ yiinhɑni cɑg yi Isɑɑk ɑ́ Cebɑ̀, o kɑɑlɑni cwøl ɑ́ Bircebɑ̀ gïti dicyɑ̈ngtïn. Keny-ɑ ɑ́göög runni Isøø ki pyɑ̈r ɑ́ngwen, ɑnywøme Judith nyɑɑr Beerì geki Bɑsemɑth nyɑɑr Elön, ge bɑ nyigi tyëng Kit bënn. Isɑɑk geki Rebekɑ̀ ɑ́thödhi ki rɑ̈ɑ̈m pyëw yi woɑni ryeet. Keny-ɑ ɑ́døngi Isɑɑk, nyinge ɑ́göög ge ceg-ɑ dhïïdhø, kɑ ódhɑ̈lø nënnø kidøøj. Cyɑ̈ng ɑ́kyel wɑ̈de nyeldwøng ɑ́cwøle kɑ gø köbbe kinni, “Wɑ̈dɑ!” Alöggi Isøø kinni, “Yɑn èn.” Akööb Isɑɑk kinni, “Yɑ ɑ́yöø, o kej thøwɑ kwïj yi yɑn. Kwɑny jɑmmí, wethí kí nywøle kɑ yï kedhí wɑg be dwɑ̈rri yɑn ki lɑ̈y men cɑm yi yɑn. Keny-ɑ ógwøøg gïncɑm-ɑ med kì pyëwɑ, kɑ muuj yɑn, o cɑm yi yɑn. Codhe, o yï lɑ̈mmɑ gyëdh, yɑ nuti thøø.” Codhe, kɑ Isøø kedh-ɑ be dwɑr. De kwøbb-ɑ ɑ́kwøb yi Isɑɑk, e köbb-ɑ Isøø wɑ̈de, ólïngø yi Rebekɑ̀. Kɑ Rebekɑ̀, Yɑgob wɑ̈de köbbe kinni, “Lïng, yɑ ɑ́lïng e wïyí köbb-ɑ Isøø ómyëw kinni, kɑ̈ní ki lɑ̈ɑ̈y dwɑr, kɑ thɑ̈llí yɑn, o yï lɑ̈mmɑ gyëdh kì bøli Jwøng-ɑ Ácwɑ̈ɑ̈j, yɑ nuti thøø. De lïngí kwøbbɑ wɑ̈dɑ, kɑ gïn-ɑ köbbɑ yïn gwøøg ceth. Kedhí kelli dyëgee, kɑ yɑ muuj ki ónyögg ɑ́ryew møg thønhø, o ge thɑ̈llɑ wïyí ki thɑl-ɑ nyi mɑɑr yi en. Codhe, o gïncɑmɑni muuj wïyí yi yïn, o yï lɑ̈mme gyëdh, e nuti thøø.” De Yɑgob Rebekɑ̀ meye ɑ́köbbe kinni, “Isøø ómïɑ dële dɑ yëyy de dëlɑ lïw! Keløg yɑ ónywɑl yi wïyɑ, óyod yi en kinni yɑ pɑth ki Isøø. Kɑ yɑ ocögø yɑ pɑ lɑ̈mme gyëdh, de yɑ óyöd yɑ lɑ̈mme’ cyën kipe kɑ ɑ́wënyɑ en.” Codhe, ɑköbbii yi Rebekɑ̀ kinni, “Keløg yï lɑ̈mm-ɑ cyën yi wïyí, cɑ́yɑ óyïëy yi yɑn. Gwøg gïn-ɑ kømmi yi yɑn yøw, kedh kɑ dyëg muuj yɑn.” Codhe, kɑ Yɑgob kedh-ɑ wɑ̈g kɑ ókɑ̈bbø ki dyëg ɑ́ryew, kɑ gï muuje meye, kɑ ge thɑl yi en ki thɑl-ɑ nyi mɑɑr yi Isɑɑk. Kɑ Rebekɑ̀ ógudh-ɑ døj mø Isøø wɑ̈de nyeldwøng, møg-ɑ ying yïe kì ød kwɑnye, kɑ gï lønye ri Yɑgob wɑ̈de nyelthinh. Kɑ ókɑ̈bbø thyew ki lɑ̈ni dyëg, kɑ gï kume cinggi Yɑgob geki kɑ̈jj-ɑ bong yëyy kì mune, mɑ́ ge lïw. Codhe, kɑ rïng-ɑ ɑ́thɑle geki ópun-ɑ ɑ́gwøge cïbe cingi Yɑgob. Akedhi Yɑgob yï wïye ɑkööbe kinni, “Wïyø!” Kɑ wïye okööbø kinni, “Yɑ olïngø, yïn ɑ́ men wɑ̈dɑ?” Aköbbii yi Yɑgob kinni, “Yɑ Isøø wɑ̈dí, wɑ̈n-ɑ kɑyø. Gïn-ɑ ɑ́kwøb yi yïn ɑ́gwøg yi yɑn. Dhwödhí mɑl, o yï cyɑ̈ɑ̈m ki rïngi lɑ̈y-ɑ ɑ́dwɑ̈rrɑ yïn. Codhe, o yɑ lɑ̈mmi gyëdh yi yïn.” De Isɑɑk wɑ̈de ɑ́pyëje kinni, “Lɑ̈y ɑ́jwɑn yi yïn kɑ yodø kidï kɑ nɑ̈g yi yïn?” Alöggi Yɑgob kinni, “Jwøgí, Jwøng-ɑ Ácwɑ̈ɑ̈j yɑ ɑ́kønye ki yodii.” Codhe, ɑköbbi Yɑgob yi Isɑɑk kinni, “Bïí butɑ o yï nywɑl yi yɑn wɑ̈dɑ, o yodɑ cyee mɑ bëëd yï bɑ Isøø wɑ̈dɑ kidyër.” Codhe, kɑ Yɑgob kedh-ɑ buti Isɑɑk wïye. Kɑ nywɑl yi Isɑɑk, ɑkööbe kinni, “Cwɑggí nɑ cwɑggi Yɑgob. De cinggí dɑ yëyy ni cinggi Isøø.” Nuti ngijø yi Isɑɑk kinni bɑ Yɑgob, mɑ́ cingge dɑ yëyy ni cinggi Isøø, cem e lɑ̈mm-ɑ gyëdh yi Isɑɑk, ɑcigii pyëjø yi Isɑɑk kinni, “Yï bɑ Isøø wɑ̈dɑ kidyër?” Alöggi Yɑgob kinni, “Ngee, bɑ yɑn.” Codhe, kɑ Isɑɑk okööbø kinni, “Mëggí yɑn gïncɑmɑni, o cɑm yi yɑn, o yï lɑ̈mmɑ gyëdh.” Codhe, ɑmëggii gïncɑmɑni yi Yɑgob, ɑcyɑ̈me. Kɑ nëngi ki møgi oløg yi Yɑgob kɑ ómɑ̈dhø. Aköbbii yi Isɑɑk wïye kinni, “Nyïngí butɑ, kɑ yɑ nuum kì pïnɑ wɑ̈dɑ.” Kɑ kedh-ɑ bute, ɑnuume gøn. Kɑ yømi ógudhe ngwɑ̈j yi wïye kɑ gø kwënge, kinni, “Arøwøø, yømi wɑ̈dɑ ngwɑ̈ɑ̈j nɑ yømi pwödhø men-ɑ ógyëdhø yi Jwøng-ɑ Ácwɑ̈ɑ̈j. Jwøgɑ yï ónënge ki kødh me gïïr, kɑ yï nënge ki piny me døøj, o yï óbëëd yïí dɑ byel mø gïïr geki møgi oløg me nyɑ̈n. Yï ógöggi yi jurrì bënn. Kɑ ji ri gen bøødh gen bølí. Yï óbëëd yï teg kibøli nyiimyëw. Wɑ̈ddi meyí, ri gen óbødh yi gen kì bøli. Ngɑn-ɑ ólɑ̈mmi yïn cyën ócyen, o ngɑn-ɑ ólɑ̈mmi yïn gyëdh ógyëdh.” Ri bëëni Yɑgob wɑ̈g ceth kì buti Isɑɑk wïye, kɑ ɑ́rume lɑ̈mmi gyëdh, bøli kenyɑni ceth ɑ ɑ́dwöög Isøø kì wɑg kun-ɑ ɑ́kedhe be dwɑr. Isøø thyew ɑ́tɑ̈ɑ̈d ki gïncɑm me døøj cɑrø. Kɑ gø muuje wïye. Kɑ wïye köbbe kinni, “Dhwöödh wïyø, o yï cyɑ̈ɑ̈m ki rïngi lɑ̈y-ɑ ɑ́dwɑr yi wɑ̈dí, o yɑ lɑ̈mmí gyëdh, ki medi pyëwí.” Apëjji Isɑɑk kinni, “Yï bɑ men?” Alögge kinni, “Yɑ wɑ̈dí, wɑ̈n-ɑ kɑyø, yɑ Isøø.” Kɑ Isɑɑk dële okïrrø ki menteg, ɑkööbe kinni, “Dɑ́ men ɑ ɑ́dwɑ̈rri yɑn lɑ̈yɑni, kɑ yɑ muuje ki gïncɑm, yï nuti bëënø? Ácɑm yi yɑn kɑ lɑ̈mmɑ gyëdh. O bɑ men cög ki gyëdhhɑni ceth.” Isøø keny-ɑ ɑ́lïnge kwøbbi wïye, kɑ óryeerø ki rɑ̈ɑ̈m pyëwe. Aköbbe wïye kinni, “Lɑ̈mmí yɑn gyëdh thyew wïyø!” De wïye ɑ́kööb kinni, “Ómyëw ɑ́bï, kɑ yɑ wëny yi en. Gyëdh ɑ́rum ki kɑ̈ɑ̈lø yi en.” Kɑ Isøø okööbø kinni, “Yɑgob bɑ nying-ɑ dyër kipere. Yɑ ɑ́wëny yi en ki tyel ɑ́ryew ɑnɑn. Jɑmm-ɑ di bëëd gɑ tungɑ kì ri jɑmmí bënn, ɑ́rum ki kwɑnyø yi en kì yïɑ, o ɑnɑn gyëdh møgɑ ɑ́kɑ̈l yi en.” Codhe, kɑ Isøø okööbø kinni, “Bong gyëdh mø nøg yøw mɑ ɑ́wïyí yɑn?” Alöggi Isɑɑk kinni, “Yɑ ɑ́muuj ki tegø me bëëd Yɑgob bɑ jɑgø kì kömí. O nyiimen bënn óbëëd gɑ bɑ̈ngge. Kɑ gwøgɑ e teg kì ri mïdhi byel geki møng-ɑ nyɑ̈n. Bong gïjø mɑ ɑ́döng me mëggɑ yïn wɑ̈dɑ.” De Isøø nuti wïyø, ɑ́kööb kinni, “Yï nyi gëdh-ɑ́ɑ̀ tyelø ɑ́kyel kete, wïyø? Gyëdh yɑn thyew, wïyø!” Codhe, kɑ Isøø ócɑ̈gø’ ywøg ki ywøng dwøng. Kɑ köbbi yi Isɑɑk kinni, “Yï óbëëdø yï lɑ̈wi ki piny-ɑ pëddi døøjø. Yï óbëëdø yïí pɑ wɑ̈dhi yi kødh. Kejí ónyɑg yi yïn kɑ tøng. O yï óbëëdø yï bɑ bɑ̈ng kì yï ómyëw. De keny-ɑ ónyɑɑg rií, yï óbï wɑ̈g kì cinge.” Kɑ Yɑgob mɑɑn yi Isøø ki mendwøng kì bɑng gyënh-ɑ ɑ́gyëdhii yi Isɑɑk wïye. Kɑ ree köbbe kinni, “Wïyɑ ɑ́cyɑ̈ngi ki thøø, Yɑgob ómïɑ ónɑ̈g yi yɑn keny-ɑ óthøw wïyɑ.” Kɑ kwøbbi dwɑddi Yɑgob nɑ̈gø yi Isøø lïngi yi Rebekɑ̀. Codhe, kɑ öd-ɑ yï Yɑgob kinni, “Isøø ómyëw pyëwe mɑg yi en kɑ kinni o yï ónɑ̈g yi en keny-ɑ óthøw wïyí. De yïn, wɑ̈dɑ, gwøg gïn-ɑ köbbɑ yïn. Lɑbɑn ómïɑ nud kì Arɑn. Kedhí yïe ɑnɑn ceth! Kɑ yï kɑl bëëdø kì bute gïti keny-ɑ ólɑ̈ɑ̈ny liny ómyëw. Keny-ɑ ókwööj linye, kɑ wïje owïlø ki gïn-ɑ ɑ́göggií, yɑ óödi yïí ki bɑ̈ng men-ɑ ódwöög yïn. Yɑ pɑ dwɑddi kinni o wɑ̈ddɑ ryeet lɑ̈ɑ̈ny gen kì bølɑ cyɑ̈ng ɑ́kyel.” Codhe, ɑköbbi Isɑɑk yi Rebekɑ̀ kinni, “Köörɑ ɑ́buudh yi nyigi Kit. Keløg Yɑgob ónyömø kì kelli nyigi Kit kì pönhï, yɑ óbëëdø yɑ onëënø kɑ per ngø?” Kɑ Yɑgob cwøl yi Isɑɑk kɑ gø kwënge, ɑköbbe gøn kinni, “Yï ko nyömi ki dhɑjø kì kelli nyigi Kɑnɑɑn. Dhwöödh, kedhí Töör Arɑm gøl Bethuel wïyi meyí, kɑ yï nyömí kì kelli nyigi Lɑbɑn ómï meyí. Yï ógyëdh yi Jwøk Áyïmø, kɑ yï nënge ki nywøl mø ngenyø, møg-ɑ ógöögø ki jurrì mø gïïr. Kɑ gyëdhhi Abrɑhɑm mëgge yïn, wuki nyigí. Piny-ɑ bëëd yi yïn ɑnɑn yï bɑ wëdh, ólɑg yi yïn, eni piny-ɑ ɑ́mëggi Abrɑhɑm yi Jwøk.” Aör Yɑgob yi Isɑɑk, kɑ kedh-ɑ Töör Arɑm kun-ɑ bëëd yi Lɑbɑn wɑ̈d Bethuel ómï Rebekɑ̀, meyi Yɑgob geki Isøø. Kɑ yod yi Isøø kinni Isɑɑk Yɑgob ɑ́gyëdhe kɑ gø öre Töör Arɑm be nyömø ki dhɑjø. Áyod yi en thyew kinni Yɑgob ɑ́cege kinni ko nyömi kì kelli nyigi Kɑnɑɑn. Áyode thyew kinni Yɑgob kwøbbi wïye geki meye lïng en kɑ kedh-ɑ Töör Arɑm. Codhe, ɑyode gøn kinni Isɑɑk wïye pɑ dwɑddi kinni o wɑ̈dde nyömi gen ki nyigi Kɑnɑɑn. Codhe, kɑ Isøø kedh-ɑ yï Icmɑil, ɑnywøme nyimï Nebɑyoth, nyɑn-ɑ cwøl ɑ́ Mɑlɑɑth nyɑɑr Icmɑil wɑ̈d Abrɑhɑm, e gø nywøøme’ kömi mɑ̈nn-ɑ yïe. Kɑ Yɑgob odhwödhø kì Bircebɑ̀ e kedh-ɑ Arɑn. Keny-ɑ ɑ́wɑ̈dhe keny megø ɑbudde, mɑ́ cɑ̈ng ɑ́kedhi piny. Kɑ ókɑ̈bbø ki tungi kït me thɑ̈ɑ̈nhe wïje, ɑnene. Kɑ Yɑgob ólɑ̈gø, e lidh-ɑ yïdhi men-ɑ ócwöödh piny, wïje nywɑ̈ddø ki mɑl, ɑlidhe wëywöddi Jwøk ge nyi yedh-ɑ mɑl kɑ ge nyi yïnh-ɑ piny kì wïj yïnhɑni. Aliidh Jwøng-ɑ Ácwɑ̈ɑ̈j yi Yɑgob e ócungø kì wïj yïdhi, ɑkööbe kinni, “Bene yɑn Jwøng-ɑ Ácwɑ̈ɑ̈j, Yɑ Jwøøg Abrɑhɑm kweyí, o bene yɑn Jwøøg Isɑɑk. Yï ómëggɑ piny-ɑ buud yi yïn èn, wuki kwɑrrí. Kwɑrrí ógöögø ge nɑ tør kɑ wɑ̈thi tùngi piny bënn pɑ̈ng yi gen. Kɑ jurri kömi piny bënn óyïddø ki gyëdh kì bɑngí wuki kwɑrrí. Yɑ ócyɑ̈dhi ki yïn kì kɑ̈jj-ɑ kedhi yi yïn bënn, kɑ yï dwöögɑ piny men. Yï pɑ pɑ̈nyɑ’ wiyø gïti keny-ɑ ógwøgɑ gïg-ɑ ɑ́köbbɑ yïn bënn.” Codhe, kɑ Yɑgob ócyëwø, ɑkööbe kinni, “Jwøng-ɑ Ácwɑ̈ɑ̈j nud kì keny kidyër, de yɑ bëëdø yɑ kwïj wøw.” Kɑ obwøgø, ɑkööbe kinni, “Yɑ óböggø yi keny! Bɑ ød Jwøk kidyër, o men bɑ dhø yuu mɑl.” Kɑ Yɑgob jwɑn-ɑ dhwödhø kì mwøl, kɑ tungi kïn-ɑ ɑ́thɑ̈ɑ̈nhe wïje kwɑnye, kɑ gø cwöödhe piny, ɑkunye köme ki møw. Kenyɑni ɑ́bëëd e cwøl ɑ́ Ludh, de ɑ́døøg ki cɑgø yi Yɑgob ɑ́ Betiil (ød Jwøk). Kɑ Yɑgob óköngø kinni, “Keløg Jwøk ócyɑ̈dhi ki yɑn, kɑ yɑ kor yi en ki yuu-ɑ cyɑ̈dhi yi yɑn èn, kɑ yɑ thödhe ki gïncɑm men cɑm yi yɑn, ki ógudh møg rug yi yɑn, kɑ yɑ dwööge gøl wïyɑ ki tɑrø, Jwøng-ɑ Ácwɑ̈ɑ̈j óbëëd ɑ́ Jwøgɑ ceth. Kït men-ɑ ɑ́cwöödhɑ piny èn, óbëëd ɑ́ ød Jwøk. Pyɑ̈ri wɑ̈thi jɑmmɑ bënn møg-ɑ ómëggi yɑn yi Jwøk, ójwödhɑ en.” Codhe, kɑ Yɑgob ódøøgø wɑ̈di yöö, kɑ wɑ̈dh-ɑ Töör Arɑm. Atïnge wïje, kɑ ólïdhø ki yith me wïje di dɑggi dyëg ɑ́dɑ̈g ge obuddø kì piny, mɑ́ ge nyi mɑ̈ɑ̈dh ɑ yij yiinhɑni ki pï. Kït me dwøng ócïb dhø yith. Tyëng-ɑ kwɑ̈yø ki dyëg ɑ́bëëd ge nyi ceg-ɑ cugø bënn, o kït ngyel yi gen kì dhø yith, o dyëg tömmi ki pï. Codhe, o kït nyi dwøøg keje kì dhø yith. Kɑ kwɑ̈yyi dyëg pyëj yi Yɑgob kinni, “Nyiimïɑ, wu kɑ̈ɑ̈l-ɑ keny?” Kɑ ge ólöggø kinni, “Wø kɑ̈ɑ̈l-ɑ Arɑn.” Apëjje kinni, “Lɑbɑn kwɑɑr Nɑor ngɑ̈nyi yi wun?” Akööb gen kinni, “Ngɑ̈nyi yi wøn.” Kɑ Yɑgob okööbø kinni, “Dële yööd?” Akööb gen kinni, “Dële yööd. Lidh, Rebekɑ̀ nyɑre ɑ bï ɑcinee ki dyëg.” Akööb Yɑgob kinni, “De cɑ̈ng ce nudd e dwøng. Pɑth ki bøli keny-ɑ nyi køøl dyëg pɑc. Tömmu gen ki pï, kɑ wiy ge døøg gen be cɑm.” Kɑ ge okööbø kinni, “Pɑth, wø ceg-ɑ yïd gïti keny-ɑ ókööl dyëg bënn, o kït ngyel kì dhø yith, o dyëg tömmi ki pï cyee.” Kɑ̈ng-ɑ ɑ́kööb Yɑgob geki kwɑ̈yyi dyëg, ɑwɑ̈nhi Rɑceel ki dyëgi wïye, mɑ́ en ɑ ɑ́bëëd e kwɑy-ɑ dyëg. Yɑgob keny-ɑ ɑ́lidhe Rɑceel nyɑɑr Lɑbɑn geki dyëgi Lɑbɑn, ɑkedhe wïj yith, kɑ kït ngyëële wɑ̈g kì dhø yith, kɑ dyëgi Lɑbɑn tömme ki pï. Lɑbɑn bɑ ómï Rebekɑ̀ meyi Yɑgob. Codhe, kɑ Rɑceel nuum yi Yɑgob, kɑ Yɑgob ceg-ɑ ì túl ki ywøg. Aköbbe nyɑnɑni kinni ge bɑ wɑdd, o bɑ wɑ̈d Rebekɑ̀. Codhe, ɑrengi Rɑceel pɑc, kɑ wïye köbbe. Lɑbɑn keny-ɑ ɑ́lïnge wööni Yɑgob wɑ̈d nyimen, ɑrenge be pɑɑrii, kɑ dööb kɑ̈w yi Lɑbɑn, kɑ gø nuume, kɑ gø kïdhe gøle. Aköbbii yi Yɑgob ki gïg-ɑ ɑ́cwöb bënn. Akööb Lɑbɑn kinni, “Wɑ bɑ remø ɑ́kyel.” Kɑ Yɑgob obëëdø kì kunɑni ki dwɑ̈y. Codhe, ɑköbbi Yɑgob yi Lɑbɑn kinni, “Yï bɑ wɑɑd wøn kidyër, de pɑ døøj kiperí kinni o yï göög e bong köögi men mëggɑ yïn. Köbbí yɑn, yï køøg kɑ ngø?” Lɑbɑn ɑ́bëëd yïe dɑ nyige, womɑ̈nn ɑ́ryew. Nyɑn-ɑ dwøng cwøl ɑ́ Leɑ̀, o nyɑn-ɑ thinh cwøl ɑ́ Rɑceel. Leɑ̀ ɑ́bëëd bøle myëër, de Rɑceel ɑ́bëëd ɑ́ ɑ́ywinyø, o myëër cɑrø. Rɑceel mɑɑr yi Yɑgob. Codhe, ɑköbbe Lɑbɑn kinni, “Yï ógöggɑ ki runn ɑ́bïryew, othumi gen, o yɑ mëggí nyɑrí Rɑceel ɑ́ dhɑjø.” Kɑ Lɑbɑn okööbø kinni, “Lɑ̈w kipere ke nywømii yi yïn kibøli ke di nywømii yi jɑlø megø. Bëëd kì butɑ keny.” Codhe, kɑ Yɑgob obëëdø e göög ɑ cingi Lɑbɑn ki runn ɑ́bïryew kipe kinni o ómëggi Rɑceel keny-ɑ óthumi runnɑni. Gï nenne ge nɑ cyɑ̈ng mø nøg yøw, yi kɑ mɑɑre Rɑceel ki mendwøng. Kì bɑng runn ɑ́bïryew, ɑköbbi Lɑbɑn yi Yɑgob kinni, “Mëggí yɑn Rɑceel, o nywøm yi yɑn. Runni gwøg møg-ɑ ɑ́nywɑg yi wɑ ɑ́thumi.” Codhe, kɑ tyëng myërrɑni ryej yi Lɑbɑn. Keny-ɑ ɑ́yuudh wøw kɑ Lɑbɑn yöd e muuj-ɑ Leɑ̀ nyɑre, kɑ gø kïdhe ød geki Yɑgob. Kɑ Lɑbɑn nyɑbɑ̈nge Dhilpɑ̀ mëgge Leɑ̀ nyɑre ɑ́ bɑ̈ng. Kì mwøl keny-ɑ ɑ́yodii yi Yɑgob kinni ge buddø kɑ Leɑ̀, ɑköbbe Lɑbɑn kinni, “Á ngø ɑ göggí yɑn kinnï! Yɑ ɑ́göög ki gwøng teg ki runn ɑ́bïryew kɑ per kinni, o yɑ nywømɑ Rɑceel! Yïde ɑ wëëny yɑn?” Kɑ Lɑbɑn okööbø kinni, “Kì pödhi wøn, nyɑnthinh pɑ nyi wëggi nywømø kì bøli nyimen nyɑndwøng. De tyëgu cyɑ̈ng ɑ́bïryew kì ød wuki Leɑ̀, o yï mëggɑ Rɑceel, o nywøm yi yïn thyew. De yï ceg-ɑ døøgø gwøg ki runn ɑ́bïryew møøgø.” Kɑ møgɑni yïëy yi Yɑgob. Keny-ɑ ɑ́thumi cyɑ̈ng ɑ́bïryew e ying-ɑ ød geki Leɑ̀, kɑ Lɑbɑn Rebekɑ̀ nyɑre mëgge Yɑgob ɑ́ dhɑjø. (Kɑ Lɑbɑn bɑ̈nge Bilɑ̀ mëgge Rɑceel nyɑre ɑ́ bɑ̈ng.) Codhe, kɑ Yɑgob kedh-ɑ ød geki Rɑceel thyew, kɑ Rɑceel mɑɑr yi Yɑgob kidøøj kibøli Leɑ̀. Kɑ Yɑgob ogöögø kì cingi Lɑbɑn ki runn ɑ́bïryew møøgø. Keny-ɑ ɑ́lidhii yi Jwøng-ɑ Ácwɑ̈ɑ̈j kinni Rɑceel mɑɑr kidøøj yi Yɑgob kibøli Leɑ̀, ɑgöjje Leɑ̀ nywølø, kɑ Rebekɑ̀ göjje bøøjø. Leɑ̀ ɑ́yɑɑj kɑ onywølø ki wɑ̈d. Kɑ gø cɑge ɑ́ Ruben, mɑ́ e ɑ́kööb kinni, “Jwøng-ɑ Ácwɑ̈ɑ̈j orɑngɑ ɑ́lidhe. Jɑlgølɑ yɑ ómɑɑr yi en ɑnɑn.” Leɑ̀ ɑ́cigi yɑɑjø kɑ onywølø ki wɑ̈d megø. Kɑ gø cɑge ɑ́ Cimeøn, mɑ́ e ɑ́kööb kinni, “Jwøng-ɑ Ácwɑ̈ɑ̈j ɑ́lïng kinni yɑ pɑ mɑɑr, ɑmëgge yɑn wɑ̈ɑ̈n.” Leɑ̀ ɑ́cigi yɑɑjø, kɑ onywølø ki wɑ̈d megø. Kɑ gø cɑge ɑ́ Leebì, mɑ́ e ɑ́kööb kinni, “Anɑn jɑlgølɑ órëbi ki yɑn, mɑ́ e ɑ́nyöddɑ ki wɑ̈dd ɑ́dɑ̈g.” Codhe, kɑ Leɑ̀ onywølø ki wɑ̈d megø. Kɑ gø cɑge ɑ́ Yeudɑ̀, mɑ́ e ɑ́kööb kinni, “Anɑn, Jwøng-ɑ Ácwɑ̈ɑ̈j ólejjɑ.” Codhe, kɑ Leɑ̀ ódhɑ̈lø yïddø ki dhɑnhø megø. Keny-ɑ ɑ́yodii yi Rɑceel kinni bɑ bwøj, kɑ mɑg yi tyiel ki Leɑ̀ nyimen, ɑköbbe Yɑgob kinni, “Nëngí yɑn ki nywøl, ke pɑ nywølɑ yɑ othøø.” Kɑ Yɑgob mɑg yi liny ki en, ɑkööbe kinni, “Gïn-ɑ nyi gwøg yi Jwøk kete, olwɑ̈ngø yi yɑn ki gwøgø? En ɑ ɑ́mɑ̈ɑ̈n yïn nywølø.” Akööb Rɑceel kinni, “Bɑ̈ngɑ Bilɑ̀ ɑnɑn. Kedhu ød ki en, o yɑ nyödde ki nywøl. O gølɑ tïng yi en.” Codhe, kɑ Rɑceel bɑ̈nge Bilɑ̀ mëgge Yɑgob ɑ́ dhɑjø, kɑ kedh-ɑ ød ki gøn. Ayɑɑj Bilɑ̀, kɑ Yɑgob nyödde ki wɑ̈d. Kɑ Rɑceel okööbø kinni, “Álidh yi Jwøk kinni yïɑ bɑ̈r. Kwɑ̈jjɑ ɑ́lïnge, kɑ yɑ nënge ki wɑ̈d.” Acɑge gøn ɑ́ Dɑn. Bilɑ̀ ɑ́cigi yɑɑjø, kɑ onywølø ki ryeew wɑ̈dde. Akööb Rɑceel kinni, “Wø ɑ́byëddi ki nyimïɑ ki byëddø me teg, kɑ tyɑm yi yɑn.” Codhe, ɑcɑge gøn ɑ́ Nɑptɑlì. Keny-ɑ ɑ́yodii yi Leɑ̀ kinni nyöde ɑ́cungi, ɑmëgge bɑ̈nge Dhilpɑ̀ Yɑgob ɑ́ dhɑjø. Keny-ɑ ɑ́nywøl Dhilpɑ̀ ki wɑ̈d, ɑkööb Leɑ̀ kinni, “Yïɑ dɑ dhwɑ̈ng.” Codhe, ɑcɑge gøn ɑ́ Gɑd. Yɑgob ɑ́nyöddi yi Dhilpɑ̀ ki wɑ̈d megø, kɑ Leɑ̀ okööbø kinni, “Pyëwɑ med cɑrø! Anɑn yɑ ócwølli yi tyëng-ɑ mɑ̈nn yɑn ɑ́ ngɑn pyëwe med.” Acɑge gøn ɑ́ Aceer. Kɑ Ruben kedh-ɑ yethi pwödh cyɑ̈ng ɑ́kyel, ji onyɑ̈rø kí gemè, kɑ óyïddø ki dödɑyim, kɑ gï muuje meye Leɑ̀. Kɑ Leɑ̀ kwɑjji yi Rɑceel kinni, “Thödhí yɑn ki kwï dödɑyim mø wɑ̈dí.” Alöggi Leɑ̀ kinni, “Jɑlgølɑ ɑ́rum ki kɑ̈ɑ̈lø yi yïn, o ɑnɑn yï dwɑddí kwɑnyi dödɑyim mø wɑ̈dɑ?” De Rɑceel ɑ́löggi kinni, “Keløg yɑ onëngø yi yïn ki dödɑyim mø wɑ̈dí, wu ócuggø buddø wuki Yɑgob tïn kì wɑ̈r.” Keny-ɑ ɑ́dwöög Yɑgob kì pwödhø kì böörø, ɑkedhi Leɑ̀ be pɑɑrii. Kɑ okööbø kinni, “Yï buddi kɑ yɑn tïn kì wɑ̈r, mɑ́ yï ɑ́rum ki kïrø yi yɑn ki dödɑyim mø wɑ̈dɑ.” Codhe, kɑ Yɑgob óbuddø ki en kì wɑ̈rɑni. Codhe, kɑ kwɑ̈jji Leɑ̀ lïngi yi Jwøk, kɑ óyɑɑjø këti. Anyödde Yɑgob ki bïïj wɑ̈dde. Kɑ okööbø kinni, “Yɑ ɑ́nëngi yi Jwøk ki köögi, mɑ́ bɑ̈ngɑ ɑ́mëggɑ jɑlgølɑ.” Codhe, kɑ Leɑ̀ wɑ̈de cɑge ɑ́ Isɑkɑr. Leɑ̀ ɑ́cigi yɑɑjø, kɑ Yɑgob nyödde ki bïkyeel wɑ̈dde. Kɑ okööbø kinni, “Jwøk yɑ ɑ́mëgge gïn-ɑ nyi tyer yi pyëw. Yɑgob óyïëy bëëdø ki yɑn ɑnɑn cyee, mɑ́ e ɑ́nyöddɑ ki wɑ̈dd ɑ́bïkyel.” Codhe, ɑcɑge gøn ɑ́ Dhebulun. Kɑ Leɑ̀ onywølø kì cyɑ̈ɑ̈n piny ki nyɑndhɑjø, ɑcɑge gøn ɑ́ Dïnɑ̀. Codhe, ɑpɑɑr Rɑceel yi Jwøk, kɑ kwɑ̈jje lïngi yi en, kɑ nyöde yiebe. Kɑ óyɑɑjø, ɑnywøle ki wɑ̈d, ɑkööbe kinni, “Ayɑ̈rɑ ɑ́kɑ̈ɑ̈l wɑ̈g yi Jwøk kì kömɑ.” Kɑ gø cɑge ɑ́ Yosep. Rɑceel ɑ́kööb kinni, “Yɑ kwɑjj-ɑ Jwøng-ɑ Ácwɑ̈ɑ̈j o yɑ nënge ki wɑ̈d megø.” Kì bɑng kɑ ɑ́rum Yosep ki nywølø, ɑköbbi Lɑbɑn yi Yɑgob kinni, “Wiy yɑn, o yɑ døøgɑ pödhi wøn. Mëggí yɑn mɑ̈nnɑ geki nyigɑ, kɑ wiy yɑ kedhɑ. Yɑ ɑ́ceg-ɑ gwøg kiper gen, o ngɑ̈nyi yi yïn kidøøj eni gwøng-ɑ ɑ́göggɑ yïn.” Aköbbii yi Lɑbɑn kinni, “Keløg pyëwí med ki yɑn, yɑ kwɑjj-ɑ yïn bëëd. Ngɑ̈nyi yi yɑn kinni yɑ ɑ́gyëdh yi Jwøng-ɑ Ácwɑ̈ɑ̈j kɑ perí. Köbbí yɑn gïn-ɑ dwɑddi yi yïn, o culɑ yïn.” Alöggi Yɑgob kinni, “Ngɑ̈nyi yi yïn kidøøj kinni yï ɑ́göggɑ kɑ gwøg me teg, kɑ dyëgí óngënyø kɑ ɑ́korrɑ gen. Keny-ɑ ɑ́bëënɑ, yïí ɑ́dɑ mø nøg, de ɑnɑn yïí dɑ mø ngenyø. Kenyi di gïí me gwøg yi yɑn ceth, yï nyi ceg kɑ gyëdhø yi Jwøng-ɑ Ácwɑ̈ɑ̈j. Dɑ́ ki wën ɑ ólunyɑ ki gwøg yɑ gögg-ɑ gølɑ?” Apyëëj Yɑgob yi Lɑbɑn kinni, “Mëggɑ yïn ngø?” Aløøg møge yi Yɑgob kinni, “Ko di gïn mëggí yɑn. Göggí yɑn gïn kete yøw; wiy yɑ kedhɑ be kwɑyi dyëgí kí dhögí, o ge korri yi yɑn. Kɑ wiy yɑ kɑ̈llɑ kelli dyëgí bënn tïn, o møg-ɑ ógeddø, ki møg-ɑ ri gen di kïddì kì kelli gen køjɑ wɑ̈yi gen geki órömm-ɑ lojø bënn. Kí dyëg ɑ́tegg geki dhög-ɑ ri gen di kïddì, o møgɑni bëëd gen gɑ kööngɑ. O ólidh yi yïn dhuki megø mɑ bëëdɑ yɑ pɑth ki wëny. Keny-ɑ óbëën be lidhi dyëgɑ, keløg yï ólïdhi ki dyel ɑ́tegø me pɑth ki ɑgid wɑlɑ̀ ree bong kïddì, wɑlɑ̀ órömø me pɑth ki dïtɑ̈ng, óbëëd ɑ́ ɑkwɑl yi yɑn.” Alöggi Lɑbɑn kinni, “Yɑ ɑ́yïëy! Wiy bëëde ni kɑ ɑ́kwøbií.” De kì dicyɑ̈ngɑni ceth, Lɑbɑn dyëg ɑ́tegg-ɑ ri gen di kïddì kí møg-ɑ ógeddø, kí møg-ɑ ógwelø ki kïdd-ɑ tɑr, kí dyëg-ɑ lojø bënn gï ɑ́køje wɑ̈yi gen, o wɑ̈dde nenni gen dyëgɑni. Kɑ dyëgɑni køøle kun me lɑ̈wi ki Yɑgob, kunɑni cɑɑdh kɑ cyɑ̈ng ɑ́dɑ̈g. Dyëg-ɑ ɑ́döng ɑ́korri yi Yɑgob. Kɑ Yɑgob ókɑ̈bbø ki bɑ̈ddi yenh odɑɑrø, kí ɑkemel, kí ɑ́cøngø, kɑ gï celle, kɑ gï gwede e gööb-ɑ pɑ̈ddi gen wɑ̈g, o kɑ̈jji gen döng gen ge tɑr. Kɑ lødh møgɑni cwöödhe kɑ̈jj-ɑ nyi mɑ̈ɑ̈dh yi dyëg geki dhög ki pï. Dyëg kí dhög nyi tïg ɑ kenyi bëën gen be mɑdh ki pï. Codhe, kɑ dyëg nyii tïgø kì bøli lødhɑni. Kɑ møg-ɑ nyi nywøl yi gen nyi nywøl ri gen dɑ kïddì, ge ógeddø. Kɑ dyëg-ɑ thønhø geki røjj-ɑ thønhø møgɑni køj wɑ̈yi gen yi Yɑgob kì ri møg-ɑ kyeelø, ɑ løg dyëgi Lɑbɑn. Kenyi tïg møg-ɑ teg (møg-ɑ dëlli gen døøj), kɑ lødh nyi cwöödh bøli gen yi Yɑgob, o gï nenni gen kɑ̀ tïg gen. De kenyi tïg møg-ɑ nyødh (møg-ɑ dëlli gen rijjø), lødh pɑ nyi cwöödh bøli gen yi Yɑgob. Codhe, kɑ møg-ɑ nywøl yi dhög geki dyëg-ɑ rijjø løg-ɑ mø Lɑbɑn, o møg-ɑ nywøl yi møg-ɑ teg bɑ mø Yɑgob. Yɑgob ɑ́göög ɑ́ jɑlkɑ̈r kì bɑng gwøng ni menɑni. Kɑ óyïddø ki dhyɑng kí dyel bëne. Kɑ jɑmme óngënyø, yïe dɑ bɑ̈ngg-ɑ mɑ̈nn kí bɑ̈ngg-ɑ cwøw, kí ɑmɑl, kí ɑderr. Cyɑ̈ng ɑ́kyel kɑ wɑ̈ddi Lɑbɑn lïngi ge okööbø yi Yɑgob. Ge ɑ́kööb kinni, “Yɑgob jɑmmi wïyee ɑ́kwɑnye bënn, bene ɑ bɑnge kɑ̈re.” Kɑ yod yi Yɑgob kinni Lɑbɑn bëëde ɑ́kedh e órënyø ki en. Kɑ Yɑgob köbbi yi Jwøng-ɑ Ácwɑ̈ɑ̈j kinni, “Døøg piny kweyyi wun, yɑ ócyɑ̈dhi ki yïn.” Codhe, kɑ Rɑceel geki Leɑ̀ cwøøl yethi pwödh yi Yɑgob, kun-ɑ ɑ́ködde ki kɑɑle. Aköbbe gïn kinni, “Álidh yi yɑn kinni wïyi wun bëëde ɑ́kedh e órënyø ki yɑn, pɑ pɑ̈r ki bëëdi cøn. De Jwøøg wïyɑ yɑ ɑ́korre. Ngɑ̈nyi yi wun ryeet, kinni yɑ ɑ́göög kì cingi wïyi wun ki gwøg me teg, de yɑ ɑ́ruj yi en, kɑ kööngɑ wile ki tyel pyɑ̈rø. De Jwøk wïyi wun nuti wiyø yi en, o yɑ gögge ki gïnrɑj. Keny-ɑ ɑ́kööb Lɑbɑn kinni, ‘Yï ócuggø kwɑnyi dyëg-ɑ ri gen di kïddì bënn gɑ kööngí.’ Kɑ dyëg nywøl-ɑ møg mø ri gen di kïddì. Menɑni wɑng-ɑ kinni dyëg ɑ́kwɑny yi Jwøk kì yï wïyi wun, kɑ gï mëgge yɑn. “Yɑ ɑ́lɑ̈gi kì bøli kej tïïg dyëg geki dhög. Yɑ ɑ́lidh-ɑ ónyögg-ɑ tïgø gɑ ɑgid, kí ɑgwel, kí møg-ɑ ócwinyø ki kïddì keti gen ɑ tïgø. Wëywöni Jwøk ɑ́kööb ki yɑn kì yethi lɑ̈ggɑni, ɑkööbe kinni, ‘Yɑgob!’ Ayïëyɑ kinni, ‘Wööy!’ Kɑ wëywönɑni okööbø kinni, ‘Lïdhí, ónyögg-ɑ bɑ ɑgwel ki møg-ɑ ógeddø geki møg-ɑ ócwinyø ki kïddì, bɑ ge keti gen ɑ tïgø. Gïn ni men gwøg yi yɑn kɑ per kɑ ɑ́lidhɑ gïg-ɑ göggi yïn yi Lɑbɑn bënn. Bene yɑn Jwøng-ɑ ɑ́cwöb kì bølí kì Betiil, kun-ɑ ɑ́kunyí kömi tungi kïn-ɑ ɑ́cwöödh yi yïn piny ki møw, kɑ yï óköngø kì bølɑ. Anɑn yɑ dwɑdd-ɑ yïn, dhwöödh kì keny, kɑ yï døøg piny-ɑ́ yije ɑ́nywøøl yïn.’ ” Kɑ Leɑ̀ geki Rɑceel ólöggø kinni, “Bong gïjø men-ɑ ólɑg yi wøn kì bɑng wïyi wøn keny-ɑ óthøwe. Wø ɑ́mïdhi yi en wø nɑ tyëngpɑth. Wø ɑ́ngëwwe yïn, kɑ ngyëny møg-ɑ ɑ́muuj yi yïn cɑme. Jwøk jɑmm-ɑ ɑ́kwɑnye bënn kì yï wïyi wøn, bɑ mø wøn, wøki nyigi wøn. De gwøg gïn-ɑ ɑ́köbbi yïn yi Jwøk kinni gwøøg.” Codhe, kɑ Yɑgob nyige kí mɑ̈nne cïbe kömi ɑmɑl. Kɑ ge ócɑ̈gø ki døøg yï wïye Isɑɑk kì piny Kɑnɑɑn. Jɑmmi Yɑgob bënn kwøl ɑ bøli gen. Jɑmm-ɑ ɑ́lem yi en bënn kì Töör Arɑm ɑ́kɑ̈l yi en. Kɑ ngïjji jwöggi gøl Lɑbɑn kwɑl yi Rɑceel, e Lɑbɑn ying-ɑ be teb ki yëyyi dyëge. Yɑgob, Lɑbɑn jɑl Arɑm ɑ́wënye; nuti köbbø yi en kinni ceg-ɑ dɑ̈ɑ̈g. Yɑgob ɑ́jwɑn dhwödhø geki tyëng gøle, kɑ Nɑm Porɑt bɑ̈ɑ̈n gen, kɑ ge ókedhø ge töng-ɑ kuni myërri kïtti Gilyɑd. Kɑ Lɑbɑn olïngø kì bɑng cyɑ̈ng ɑ́dɑ̈g kinni, i Yɑgob pɑ̈ɑ̈rø. Codhe, kɑ wɑddi gen cønge, kɑ ge reng-ɑ bɑnge. Bɑng cyɑ̈ng ɑ́bïryew, ɑpïïdii kelli kïtti Gilyɑd yi Lɑbɑn. Kɑ Jwøk bï-ɑ yï Lɑbɑn jɑl Arɑm kì wɑ̈rɑni, ɑkööbe kinni, “Køkødh! Ko di gïjø me köbbí Yɑgob, cɑgg ɑ́ gïndøj wɑlɑ̀ gïnrɑj.” Yɑgob ɑ́pïïd yi Lɑbɑn, ɑ́pïïd yi en e rum gur ki kɑɑle kì kelli kïttì, codhe kɑ Lɑbɑn geki jøg-ɑ cyɑ̈dhi ki en pëgg-ɑ kelli kïtti Gilyɑd. Kɑ Yɑgob köbbi yi Lɑbɑn kinni, “Á ngø ɑ ɑ́kedhi wïjí ɑ kɑ̈ɑ̈l nyigɑ de ge ce mɑɑg yïn ɑ yij liny? Yïde ɑ kwɑɑl rií, kɑ yɑ wëny yi yïn? Yɑde ɑ bɑɑny yɑn ki köbbø? Yï di lwøøg yöö ki dhwɑ̈ng e bullì opwödø, o kɑ̈ngì okodhø. Yɑ nuti wëggi yïn mɑ̈dhi nyigɑ geki kwɑrrɑ, keny-ɑ ɑ́dhwödh gen. Gïn ni menɑni ɑ́gwøg yi yïn kɑ nøgi wïjí! Yï di cuggi göggø yi yɑn ki gïnrɑj. De ɑ́wɑ̈ɑ̈r, Jwøøg wïyi wøn yɑ ɑ́kyëdde kinni, i yï ko köbbɑ ki kwøb ying gɑ møg døj wɑlɑ̀ mø rijjø. Ngɑ̈nyi yi yɑn yï dwɑdd-ɑ døøg pödhi wun, dɑ́ per ngø ɑ kwɑɑl ngïjji jwöggi gølɑ?” Alöggi Yɑgob kinni, “Yɑ ɑ́ceg-ɑ riɑ ki kwɑlø, mɑ́ yɑ ɑ́bögg-ɑ kinni nyigí ókwɑny yi yïn kì yïɑ. Keløg e dɑ ngɑn-ɑ óyod yi yïn kì keny, e ngïjji jwöggi gølí kwɑɑny en, ngɑnɑni ceg kɑ nɑ̈gø! Yɑ kööb ɑ bøli wɑddi wun ɑnɑn, dhøgɑ ómïdhɑ. Yɑ̈ɑ̈b ki jɑmm-ɑ bɑ møgí, kɑ jɑmmí kwɑɑny.” Kwïj yi Yɑgob kinni ge ókwɑɑl-ɑ yi Rɑceel. Kɑ Lɑbɑn oyɑ̈bø kì yij kemi Yɑgob, kì yij kemi Leɑ̀. Kí yij kem-ɑ bëëd yi bɑ̈ngg, de ngïjji jwöggi gøle nuti yood en. Kɑ kedh-ɑ yij kemi Rɑceel e kɑ̈ɑ̈l-ɑ kemi Leɑ̀. Rɑceel ngïjji jwöggɑni kɑɑn en kelli jɑmmi kömi ɑmɑlø, o bëëd ɑ kömi gïn. Yij kemɑ̀ ɑ́yɑb bëne yi Lɑbɑn, de ge ɑ́cög gï pɑ yode. Rɑceel wïye ɑ́köbbe kinni, “Wïyø, yï ko mɑg yi liny ki yɑn. Yɑ pɑ cuggi dhwödhi mɑl kì bølí, kipe riɑ dɑ thɑ̈nggɑ.” Codhe, ɑyɑ̈ɑ̈b Lɑbɑn kì yij kemɑ̀ bëne, de ngïjji jwöggi gøle ɑ́cög gï pɑ yode. Codhe, kɑ Yɑgob mɑg yi liny ki menteg, ɑkööbe kinni, “Á gïn ɑ ɑ́bɑj yi yɑn? Á cigg mɑ ngø ɑ ɑ́pyemɑ, ɑ rïngí kì bɑngɑ? Jɑmm-ɑ yïɑ bënn yethi gen ɑ́rum ki yɑbø yi yïn, de bong gïjø mɑ mií, mɑ ɑ́yod yi yïn. Keløg e dɑ gïn yood yïn, nyudhí ji bënn kì keny. Cïb bøli wɑddi wun geki wɑddi wøn, kɑ wiy ge kwøb gen ngɑn-ɑ yïe di dyër kì kɑɑmee. Yɑ ɑ́göög kì cingí ki runn pyɑ̈r ɑ́ryew ɑnɑn. Kì kɑɑmɑni bëne, bong dyel wɑlɑ̀ nyɑɑr dyel me thinh mɑ ɑ́thøw e ceg kɑ nywølø, o bong órömø mɑ ɑ́cɑm yi yɑn kì kelli römmí. Kenyi di dyel me cɑm yi lɑ̈ɑ̈y pɑ̈l, pɑ nyi muujɑ yïn, de keje nyi col-ɑ yi yɑn kiriɑ, keje nyi kwɑny yi yïn ɑ yïɑ, ying e cɑm-ɑ wɑ̈r wɑlɑ̀ dicɑ̈ng. Yɑ nyi ceg kɑ nɑ̈gø yi cɑ̈ng kì dicɑ̈ng, o yɑ nyi ceg-ɑ tödø yi yømø kì wɑ̈r kɑ yɑ nyii dhɑ̈lø’ nenø. Yɑ ɑ́göög yɑ nɑ bɑ̈ng kì yïí ki runn pyɑ̈r ɑ́ryew, runn pyɑ̈rø wïdɑ́ngwen kipe nywømi nyigi ryeet, o runn ɑ́bïkyel møg-ɑ kyeelø kipe yïddø ki dyëgí. Kì kɑɑmɑni bëne köggɑ ɑ́wil yi yïn ki tyel pyɑ̈rø. De Jwøøg wïyɑ, Jwøøg Abrɑhɑm geki Isɑɑk ɑ́ying-ɑ kömɑ. Keløg e di bëëd e lɑ̈wi ki yɑn, yɑ di ör pödhi wøn yi yïn kɑ cinggɑ. De orɑngɑ ɑ́lidh yi en, ki gwøng teg men-ɑ ɑ́gwøg yi yɑn, ɑkyëdde yïn kì wɑ̈r-ɑ ɑ́wɑ̈ɑ̈.” Kɑ Yɑgob köbbi yi Lɑbɑn kinni, “Womɑ̈nn møg bɑ nyigɑ. Nyigi gen bɑ møgɑ, o dyëg møg bɑ møgɑ. Jɑmm-ɑ nenni yi yïn kì keny bënn bɑ møgɑ, dɑ́ ngø ɑ ógwøg yi yɑn ɑnɑn kipe nyigɑ geki othønh-ɑ ɑ́nywøl yi gen? Ceg wɑ lwöbø, kɑ wɑ rööri wɑ piny ki kïttì møg nyi pɑr wɑ lwömɑni.” Codhe, kɑ Yɑgob ókɑ̈bbø ki kït me dwøng, kɑ gø cwöödhe piny. Kɑ Yɑgob wɑdde köbbe kinni cung gen ki tuggi kïttì, ɑkwɑny gen tuggi kïttɑni, kɑ gï röör gen piny ge myeer-ɑ mɑl gɑ lwøbb. Kenyɑni ɑ́cɑg yi Lɑbɑn ɑ́ Yegɑr Sɑdutɑ̀, ɑ wɑngi kïtti lwöbø. De ɑ́cɑg yi Yɑgob ɑ́ Gilyɑd, nyingɑni wɑng-ɑ gïjø ɑ́kyel. Kɑ Yɑgob köbbi yi Lɑbɑn kinni, “Lwøøb tuggi kïttì møg, bɑ møg nyi pɑ̈ddi wɑ ki lwöm-ɑ kɑɑmee.” Bene ɑ bɑnge cwøllii ɑ́ Gilyɑd. Kenyɑni nyii cwøllø thyew ɑ́ Midhpɑ̀, mɑ́ e ɑ́kööb thyew kinni, “Wɑ ónenni yi Jwøk kɑ̀ dɑ̈ɑ̈ng wɑ. Ngɑ̈nyí wøw kinni wɑ kööb ɑ bøli Jwøk, cɑgg e di bëëd e bong ji mø lïngø. Óbëëd e ngɑ̈nyi yi en, ke göggí nyigɑ yi yïn ki gïnrɑj, wɑlɑ̀ ke nyömmí kömi gen ki mɑ̈nn møøgø. Lwøøb tuggi kïttì men-ɑ ɑ́röör yi yɑn piny èn, bɑ men nyi pɑ̈ddi wɑ ki lwöm-ɑ kɑɑmee. Lwøøb tuggi kïttì møg geki tungi kïn-ɑ ócwöödh piny èn, bɑ møg nyi pɑ̈ddi wɑ ki lwömee. Lwøøb tuggi kïttì men pɑ cuggi kɑdhø yi yɑn, o yɑ kedhɑ be göggi yïn ki gïnrɑj. Kɑ yï ko bï løøng-ɑ di yɑn be göggi yɑn ki gïnrɑj. Jwøøg Abrɑhɑm, ɑ bɑ Jwøøg Nɑor, kɑ en ɑ bɑ Jwøøg wëëg gen, wiy e ócɑɑye ngɑn-ɑ ópɑ̈d lwömɑni kì kɑɑmee.” Codhe, kɑ Yɑgob óköngø ki nyingi Jwøng-ɑ nyi mɑlli yi wïye Isɑɑk. Kɑ Yɑgob ongɑ̈dø ki gëëdhi kì kelli kïttɑni, kɑ wɑddi gen cwøle, o ge cyɑ̈ɑ̈m gen. Acyɑ̈ɑ̈m gen kɑ ge óbuddø kì kelli kïttɑni. Kì mwøl, ɑdhwödh Lɑbɑn kɑ kwɑrre mɑ̈dhe geki nyige ryeet, kɑ gï kwënge, ɑkedhe kɑ døøg-ɑ pödhi gen. Keny-ɑ ɑ́lunyi Yɑgob ki kedhø ki yuue, ɑrøøm gen ki wëywöddi Jwøk. Keny-ɑ ɑ́lidhe gïn, ɑkööbe kinni, “Men bene kɑɑl Jwøk.” Codhe, kɑ kenyɑni cɑge ɑ́ Mɑɑ̈nɑim. Isøø ómï Yɑgob ɑ́bëëd e ying-ɑ Edöm, ɑ cwøl ɑ́ Seir. Yɑgob ɑ́ödi yï Isøø ki ji, kɑ gï köbbe kinni, “Köbbu wöödø men Isøø wɑ̈ɑ kinni, ‘Bene møg-ɑ ɑ́kwøb yi Yɑgob bɑ̈ngí ek: Yɑ ɑ́bëëd ɑ buti Lɑbɑn gïti bøli keny-ɑ dwöögɑ èn. Yïɑ dɑ dhög, kí ɑderr, kí dyel bëne, kí bɑ̈ngg-ɑ mɑ̈nn kí bɑ̈ngg-ɑ cwøw. Wöödø men örɑ’ yïn kɑ per kinni, o wø yïëy yi yïn ki bëënø.” Kɑ jøg-ɑ ɑ́ör dwöög-ɑ yï Yɑgob ge okööbø kinni, “Wø ɑ́kedhi yï ómyëw Isøø. Bï-ɑ be pɑ̈ɑ̈ri yïn, cyɑ̈dhi kɑ jøg mø kwɑnni gen bɑ miy ɑ́ngwen.” Kɑ Yɑgob obwøgø, kɑ pyëwe ceg-ɑ olïng. Kɑ ji møg-ɑ cyɑ̈dhi ki en pɑ̈nge gɑ kɑ̈jj ɑ́ryew. Kɑ dyëg kí dhög kí ɑmɑl pɑ̈nge kì dyëri gen thyew. Gï ɑ́pɑ̈nge gɑ kɑ̈dd ɑ́ryew. Yɑgob ɑ́rømm-ɑ kinni, ke bëën Isøø, kɑ töng-ɑ be nɑ̈gi kɑɑl ɑ́kyel, kɑɑl-ɑ kyeelø órengi kɑ obødhø. Kɑ Yɑgob okööbø kinni, “Yïn ɑ Jwøøg kweyɑ Abrɑhɑm, kɑ yï løg-ɑ Jwøøg wïyɑ Isɑɑk, Yïn ɑ Jwøng-ɑ Ácwɑ̈ɑ̈j, yɑ ɑ́köbbi yi yïn kinni døøgɑ gøl wøn kì pödhi wøn. Yï ɑ́kööb kinni yɑ ókorri yi yïn kidøøj. Yɑ ɑ́göggi yi yïn ki gïgdøj mø lod møg-ɑ rømmɑ, kɑ yɑ kor yi yïn kidøøj; keny-ɑ ɑ́bɑ̈ɑ̈nɑ Nɑm Urdun yɑ ceg-ɑ kedhø, ɑ́bɑ̈ɑ̈n yi yɑn yɑ kɑ̈ll-ɑ lodh kete. De ɑnɑn, yɑ nuti nëngi yi yïn ki jɑmmì mø gïïr, mø bɑ kɑ̈dd ɑ́ryew? Yɑ kwɑjj-ɑ yïn, yiel yɑn ki ómïɑ Isøø. Yɑ óböggø kinni óbï, kɑ wø nɑ̈ge bënn, kí tyëng-ɑ mɑ̈nn geki nyigi gen. Yɑ ɑ́köbbí kinni, yɑ ókorri yi yïn kidøøj kɑ nyigɑ gwøøg ge gïïr ni ɑyejø kì thɑ̈ngi nɑɑm omelø; ge dhɑ̈li kwɑnø.” Yɑgob ɑ́nin kì kenyɑni, kɑ okujø ki jɑmmi møg mëggi Isøø kì ri jɑmm-ɑ nud kì yïe. Ákuj ki dyëg ɑ́tegg gɑ miy ɑ́ryew, kí ónyögg pyɑ̈r ɑ́ryew, kí römm miy ɑ́ryew, kí órömm pyɑ̈r ɑ́ryew. Kí ɑmɑll-ɑ mɑ̈nn pyɑ̈r ɑ́dɑ̈g kí thönhh pyɑ̈rø, kí ɑderr-ɑ mɑ̈nn pyɑ̈r ɑ́ryew kí thönhh pyɑ̈rø. Kɑ ɑkud ɑ́kyel köme nyi cïbi ki bɑ̈ng yi Yɑgob, kɑ gï köbbe kinni, “Kedhu mɑl bølɑ, kɑ kɑɑm jɑmmì mïdhi wun ge lɑ̈wi ki møg-ɑ kyeelø.” Kɑ ge ceg yi Yɑgob ki gïn-ɑ ókwøb yi gen. Bɑ̈ng-ɑ kwølli jɑmm-ɑ mɑl ɑ́köbbe kinni, “Orøøm wun ki ómïɑ Isøø kɑ yï pyëj yi en kinni, ‘Yï bɑ bɑ̈ng men? Yï kedh-ɑ keny? O ɑ́ jɑmmi men ek?’ Codhe, kɑ yï löggí kinni, ‘Ge bɑ mø Yɑgob bɑ̈ngí. Gï ɑ́öre gï mëgge’ yïn, yïn ɑ wɑ̈ɑ Isøø, Yɑgob obëënø thyew kì bɑng wøn.’ ” Kɑ ryeew bɑ̈ngg ceg yi Yɑgob kinøw, kí dɑ̈ɑ̈g bɑ̈ngg, kí bɑ̈ngg-ɑ kyeelø bënn, gï ɑ́cege kinøw bënn kinni, “Köbbu Isøø gïjø ɑ́kyel wu bënn, keny-ɑ órøøm wun ki en. Kööb wun kinni, ‘Bɑ̈ngí, Yɑgob obëënø kì bɑng wøn.’ ” Yɑgob ɑ́rum kinni, keløg jɑmm-ɑ muuj yi yɑn örɑ’ bølɑ, Isøø pyëwe ólɑ̈ɑ̈m ki yɑn mɑwɑnø. Codhe, o keny-ɑ óyïddi wøn ki en, o yɑ óyïëye yɑn ɑ́ wɑd. Codhe, kɑ Yɑgob jɑmm-ɑ ɑ́muuje öre yï Isøø, de en kiree, ɑ́nin kì kenyɑni, kì wɑ̈rɑni. Kì wɑ̈rɑni kɑ Nɑm Yɑbok bɑ̈ɑ̈n yi Yɑgob geki mɑ̈nne ryeet, kí bɑ̈ngg-ɑ mɑ̈nn ryeet, ki wɑ̈dde gɑ pyɑ̈rø wïdɑ́kyel. Gøle kí jɑmme bënn ɑ́kïdhe løøg nɑm. Kɑ Yɑgob odöngø kete. Kɑ jɑl megø obëënø, kɑ óbyëddø ki Yɑgob, gïti kɑ ɑ́tuul cɑ̈ng ge óbyëddø. Keny-ɑ ɑ́lidhii yi jɑlɑni kinni Yɑgob dhɑ̈li ki tyɑmø yi en, ɑgøje ɑ́cwiig Yɑgob kɑ orunyø. Aköbbe Yɑgob kinni, “Wiy yɑ kedhɑ. Cɑ̈ng bï-ɑ mɑl.” De Yɑgob ɑ́kööb kinni, “Yï ówiy yi yɑn o yï kedh keløg yɑ ókwëng yi yïn.” Apyëjii yi jɑlɑni kinni, “Nyingí ɑ́ men?” Alögge kinni, “Yɑgob.” Codhe, ɑkööb jɑlɑni kinni, “Nyingí pɑ cwøl ɑ́ Yɑgob këti. Nyingí ócwøl ɑ́ Isrɑil, mɑ́ wu ɑ́byëddi ki Jwøk, kɑ wu óbyëddø ki ji, kɑ yï otyɑ̈mø.” Apyëjii yi Yɑgob kinni, “Köbbí yɑn, nyingí ɑ́ men?” Kɑ jɑlɑni okööbø kinni, “Á kipe ngø ɑ pyëëj nyingɑ?” Codhe, kɑ Yɑgob kwënge kì kenyɑni. Codhe, ɑcɑɑg kenyɑni yi Yɑgob ɑ́ Peniel, mɑ́ e ɑ́kööb kinni, “Jwøk ɑ́lidh yi yɑn, de yɑ nudd yɑ onëënø.” Kɑ cɑ̈ng wɑ̈nh-ɑ mɑl kedh Yɑgob ókedhø kì kenyɑni. Yɑgob ɑ́cyɑ̈dhi e ókwömø yi ɑ́cwige. Gïti ɑnɑn, tyëng Isrɑil pɑ nyi cyɑ̈mø’ rɑ̈ri ɑ́cwig, mɑ́ Yɑgob ɑ́gøj ɑ kenyɑni. Kɑ Yɑgob wïje tïnge, ɑlidhe Isøø e obëënø, e cyɑ̈dhi kɑ jøg mø bɑ miy ɑ́ngwen. Codhe, kɑ Yɑgob nyige pɑ̈nge kì kɑɑm Leɑ̀, kí Rɑceel, kí bɑ̈ngg-ɑ mɑ̈nn ryeet. Kɑ bɑ̈nggɑni geki nyigi gen cïb mɑl yi Yɑgob. Kɑ Leɑ̀ geki nyige cïbe bɑng gïn. Kɑ Rɑceel geki Yosep cïbe cyɑ̈n. Kɑ Yɑgob kiree kedh-ɑ bøli gen mɑl, kɑ ree bøødhe piny tyel ɑ́bïryew kɑ̈ng-ɑ ɑ́kedhe, e kedh-ɑ yï ómen. De Isøø ɑ́yöd e reng-ɑ yï Yɑgob, kɑ gø dööbe kööre. Codhe, kɑ nuum kì pïne yi Isøø, kɑ ge óywöngø ryeet. Isøø keny-ɑ ɑ́tïnge wïje kɑ tyëng-ɑ mɑ̈nn lidhe geki othønhø, ɑpëjje kinni, “Tyëng-ɑ cyɑ̈dhi ki yïn ek bɑ møg?” Alöggi Yɑgob kinni, “Bene gen nyig-ɑ ɑ́mëggi yɑn yi Jwøk. Yɑ ɑ́göggi yi Jwøk ki gïgdøj, yɑn ɑ bɑ̈ngí.” Codhe, kɑ bɑ̈nggɑni ryeet kedh-ɑ bøli Isøø geki nyigi gen, kɑ ri gen bøødh gen piny kì bøle. Kɑ Leɑ̀ geki nyige ólunyø’ kedhø, kɑ ri gen bøødh gen piny kì bøle. Alunyi Rɑceel geki Yosep ki kedhi bøle kì cyɑ̈ɑ̈n gen bënn, kɑ ri gen bøødh gen piny thyew kì bøle. Apëjji Isøø kinni, “Kɑ ɑ́bëën wø keny, wø ɑ́røøm ki jɑmmì mø gïïr ge okwøllø. Menɑni wɑng-ɑ ngø?” Alöggi Yɑgob kinni, “Bɑ kipe kinni o pyëw wɑ̈ɑ lɑ̈ɑ̈me ki yɑn.” Akööb Isøø kinni, “Yïɑ dɑ jɑmmì mø gïïr, ómïɑ. Mïdhí møg-ɑ yïí.” Kɑ Yɑgob okööbø kinni, “Pɑth! Yɑ kwɑjj-ɑ yïn! Keløg pyëwí mïnø ki yɑn, yïëy gïg-ɑ ɑ́mëggɑ yïn. Pyëwɑ med cɑrø kɑ ɑ́lidhɑ yïn këti, nɑ men-ɑ́ lidhi Jwøk, kipe kɑ ɑ́yïëëy yɑn. Yɑ kwɑjj-ɑ yïn, kwɑny jɑmm-ɑ ɑ́mëggɑ yïn. Yɑ ɑ́køny yi Jwøk ki mendwøng, o yïɑ dɑ gïïpiny bëne.” Kɑ Isøø oyïëyø ki kwɑnyi jɑmmì kì bɑng kɑ ɑ́kwɑjjii yi Yɑgob. Codhe, ɑkööb Isøø kinni, “Kedh wɑ, yɑ ócyɑ̈dhi ki wun.” De ɑ́kyëddi yi Yɑgob kinni, “Wuö, ngɑ̈nyi yi yïn kinni othønhø nyøødh, o kwï jɑmmɑ bɑ ɑ́nyödd nywøli gen thønhø, keløg ge ocirø yi yɑn o ge cyɑ̈dhi gen ki kɑɑm me lɑɑj cyɑ̈ng ɑ́kyel, jɑmmì bɑ møg thøw bënn. De kedh, møøl bølɑ wuö, bɑ̈ngí óbï bɑngí. Yɑ óbï bɑngí mɑ̈ɑ̈dh, yɑ ócyɑ̈dhi mɑ̈ɑ̈dh kì bɑng dyëg geki othønhø. Wɑ óyïddi kì Seir, wuö.” Codhe, ɑkööb Isøø kinni, “Keløg ɑ́ kinøw, wiy yï wïyɑ ki kwï jiɑ.” Kɑ Yɑgob okööbø kinni, “Pɑth! Pɑth! Ge ódwɑddi yi yɑn kɑ per ngø? Gïn-ɑ dwɑddi yi yɑn yøw, bɑ kinni o pyëw wɑ̈ɑ mede ki yɑn.” Codhe, kɑ Isøø ócɑ̈gø’ døøg Seir kì cyɑ̈ngɑni. De Yɑgob ɑ́kedhi Suköth. Kɑ ree gëdde ki ød kì kunɑni, kɑ ogëdø ki ɑkɑnnì kipe dhöge geki dyëge. Bene ɑ bɑnge cwølli kenyɑni ɑ́ Suköth, Suköth wɑng-ɑ ɑkɑnnì. Kɑ Yɑgob wɑ̈dh-ɑ Cekïm kì piny Kɑnɑɑn, ki bëën-ɑ ɑ́bëëne e kɑ̈ɑ̈l-ɑ Töör Arɑm, kɑ pëgg-ɑ buti kɑɑlɑni. Kɑ piny-ɑ́ yije ɑ́pëgge ngewe kì yï kwɑɑr Amör, wïyi Cekïm ki ngyëny ɑ́tegg miyø. Kɑ ogëdø ki këli lɑm kì kenyɑni, kɑ gø cɑge ɑ́ Iil, Jwøøg Isrɑil. Cyɑ̈ng ɑ́kyel, kɑ Dïnɑ̀ nyɑɑr Yɑgob, ɑ meye cwøl ɑ́ Leɑ̀, kedh-ɑ be lidhi nyigi pönhɑni. Keny-ɑ ɑ́lidhii yi Cekïm wɑ̈d Amör jɑngi pönhɑni, ɑmɑge gøn, kɑ gø ciire be buddø ki en. De Dïnɑ̀ ɑ́bëëd e myëër cɑrø, ɑmɑɑrii yi Cekïm kɑ gø kwɑjje ki kwøb mø døøj. Kɑ Amör wïye köbbe kinni, “Nyömmí yɑn nyɑɑn.” Yɑgob ɑ́lïng ki kër-ɑ ómød nyɑre yi Cekïm, de ɑ́cög e okudø, mɑ́ wɑ̈dde ɑ́bëëd ge tøøk, ge ying-ɑ kɑɑl-ɑ ɑ́köddi yi gen ki dhög. Kɑ̈ng-ɑ ɑ́yïde bëëni wɑ̈dde, ɑbëën Amör wïyi Cekïm be kwøb ki Yɑgob. Wɑ̈ddi Yɑgob keny-ɑ ɑ́lïng gen ki gïn-ɑ ɑ́cwöb, ɑdwöög gen kì pɑ̈l-ɑ ɑ́köddi yi gen. Ge ɑ́bëëd pëthi gen rijjø ki mendwøng kì bɑng kɑ ɑ́göggi Isrɑil ki gïnrɑj ni menɑni yi Cekïm. Ábɑ̈jji kɑ ɑ́budde ki nyɑɑr Yɑgob, o bɑ gïjø me bɑ ɑkerø. De Amör ɑ́lwööb geki nyiimï Dïnɑ̀, ɑkööbe kinni, “Dïnɑ̀ mɑɑr yi wɑ̈dɑ Cekïm ki mendwøng. Yɑ kwɑjj-ɑ wun, wiy gø nywøm yi en. Wɑ ócuggø nywømi riee, mëggu wøn nyigi wun, o ge nywøm yi wøn, kɑ wu nyömi wun ki nyigi wøn. Wu óbëëdø kì piny wøn. Piny ɑnɑn, gëëd wun, kɑ wu kwɑ̈ɑ̈y wun, kɑ wu pur wun kì yije.” Cekïm ɑ́lwööb thyew ki nyiimï Dïnɑ̀ geki wïyi gen, ɑkööbe kinni, “Yïëyu kwɑ̈jjɑ, wu ómëggɑ gïn-ɑ cwøl yi wun. Cwöddi wun ki gïn-ɑ dwɑddi yi wun ɑ́ kɑ̈ny, o mëggɑ wun. Kɑ wiy yɑ nywømɑ Dïnɑ̀ kete yøw.” Kwøbbi Cekïm geki wïye ɑ́løøg yi wɑ̈ddi Yɑgob kɑ wëënyø, kipe kɑ ɑ́rënyi Dïnɑ̀ nyimï gen yi Cekïm. Akööb nyiimëëgɑni kinni, “Nyimï wøn pɑ wëggi wøn nywømø yi wun, mɑ́ wu nuti ngølø. Menɑni bɑ gïnrɑj kì yï wøn. De wø óyïëy ki nywööm wun keløg wu ógöögø ni wøn, kɑ jøg-ɑ cwøw bënn ngøl kì kɑɑl wun. Orum wun ki ngølø cyee, o wu nyömi wun ki nyigi wøn. Wø ónyömi thyew ki nyigi wun, kɑ wɑ obëëdø kì pödhø ɑ́kyel, kɑ wɑ ogöögø ki jur ɑ́kyel. Keløg wu óbɑ̈nyø’ ngølø, Dïnɑ̀ ókwɑny yi wøn kɑ wø ókedhø.” Møg-ɑ ɑ́kwøb yi gen ɑ́nënni ge døøj kì yï Amör geki Cekïm. Codhe, kɑ Cekïm jwɑn-ɑ be ngølø, mɑ́ nyɑɑr Yɑgob mɑɑr yi en. Cekïm ɑ́bëëd ɑ́ en ɑ ceg ki wørø ki mendwøng kì gøl gen. Codhe, kɑ Amör geki Cekïm kedh-ɑ kej burø kì dhø döri kɑɑl gen be kwøb ki jø kɑɑlɑni, ge ɑ́kööb kinni, “Tyëngɑni dwɑdd-ɑ bëëdø gɑ wɑdd ki wɑ. Wiy ge bëëd gen kì pinyee, kɑ ge göög gen ki jɑmmi gen. Piny lɑɑj. Nyömi wɑ ki nyigi gen, kɑ wiy ge nyömi gen ki nywølee. De wɑ ceg-ɑ yïëyø ki gïjø ɑ́kyel, Jøg-ɑ cwøw ceg kɑ ngølø bënn kì kɑɑlee ni tyëngɑni. Codhe, o ge yïëy gen ki bëëdø kì pinyee, wɑ ógöögø ki jur ɑ́kyel. Dhögi gen kí dyëgi gen kí jɑmm-ɑ kyeelø bënn ceg-ɑ gwøg ki møgee, keløg møg-ɑ kømmi yi gen oyïëyø yi wɑ, kɑ ge obëëdø ki wɑ kì pinyee. Gwøg wɑ gïn-ɑ kømmi yi gen.” Kwøbbɑni ɑ́lïngi yi tyëng-ɑ ɑ́bëëd ge nud kì kenyɑni bënn. Kɑ kwøbbi Amör geki Cekïm yïëy yi gen, kɑ jøg-ɑ cwøw ngøl bënn. Kɑ cyɑ̈ng ɑ́dɑ̈g opödhø e kɑ̈jj-ɑ ɑ́ngøl nuti nøggø. Abëën wɑ̈ddi Yɑgob ɑ́ryew, Cimeøn geki Leebì, nyiimï Dïnɑ̀, e cinggi gen dɑ pil, kɑ ge pödh-ɑ kɑɑlɑni, kɑ jøg-ɑ cwøw nɑ̈g gen bënn. Amör ɑ́nɑ̈g yi gen geki wɑ̈de Cekïm, kɑ Dïnɑ̀ kwɑny gen kì gøl Cekïm, kɑ ge ókedhø. Codhe, kɑ wɑ̈ddi Yɑgob kedh-ɑ kömi kɑɑl-ɑ ɑ́nɑ̈g, kɑ jɑmme kwɑny gen gɑ møg cool kej gïn-ɑ ɑ́göggi nyimï gen yi Cekïm. Codhe, kɑ nyiimëëgɑni dhög, kí dyëg, kí ɑderr, kí jɑmm-ɑ kɑɑl, kí jɑmm-ɑ yethi pwödh bënn kwɑny yi gen. Jɑmmi kɑɑlɑni møg-ɑ døj ɑ́kwɑny yi gen bënn, cɑgg ɑ́ jɑmm-ɑ yethi ud, ki tyëng-ɑ mɑ̈nn geki othønhø ɑ́kɑ̈l yi gen bënn. Kɑ Cimeøn geki Leebì köbbi yi Yɑgob kinni, “Yɑ ɑ́muuj yi wun ki göj. Anɑn, yɑ ómɑɑn yi tyëng Kɑnɑɑn geki tyëng Perïdh, ɑ løg tyëngpiny men. O kwɑnnee nøg ni men, keløg ge órëbø, kɑ ge pɑ̈ɑ̈r-ɑ kömee, yɑ bɑ men nɑ̈g yi gen wøki jiɑ bënn.” Kɑ ge ólöggø kinni, “Dɑ́ kinni o nyimï wøn gwøge ɑ́ ngɑn nyi tuug yi cwøw?” Kɑ Yɑgob köbbi yi Jwøk kinni, “Kedhí Betiil kɑ yï bëëd kì kunɑni, kɑ Jwøng-ɑ ɑ́cwöb kì bølí keny-ɑ ɑ́pɑ̈ɑ̈r, yï bwøg-ɑ ómyëw Isøø, gëddí ki këli lɑm kì kunɑni.” Codhe, kɑ Yɑgob tyëng gøle geki tyëng-ɑ bute bënn köbbe kinni, “Weddu ngïjji jwögg-ɑ pɑth møg-ɑ yï wun, kɑ wu lwøggi wun, o wun dhïwi wun, kɑ ógudhi wun wil wun. Wɑ ceg-ɑ dhwödhø kì keny, wɑ kedh-ɑ Betiil. Jwøng-ɑ ɑ́køny yɑn kì bøli keny-ɑ ɑ́bëëdɑ yɑ orɑngø, ógëddɑ ki këli lɑm kì kunɑni. Ábëëd e cyɑ̈dhi kɑ yɑn kì kɑ̈jj-ɑ ɑ́cyɑ̈dhɑ bënn.” Codhe, kɑ ngïjji jwögg-ɑ pɑth møg-ɑ yï gen, geki gwell-ɑ yïthhi gen bënn mëggi gen Yɑgob. Kɑ ge koony thɑ óthur-ɑ dwøng kì buti Cekïm yi Yɑgob. Codhe, kɑ Yɑgob odhwödhø geki wɑ̈dde kì kenyɑni. De tyëng myërr-ɑ cyɑ̈gi ɑ́göjji wɑ̈ɑ̈rø yi Jwøk, kɑ ge ocögø ge pɑ løg bɑng gen. Kɑ Yɑgob geki tyëng-ɑ cyɑ̈dhi ki en bënn kedh-ɑ Ludh, kɑɑl-ɑ cwølli ɑnɑn ɑ́ Betiil, kì piny Kɑnɑɑn. Kɑ Yɑgob ogëdø ki këli lɑm kì kunɑni, ɑcɑge gøn ɑ́ Betiil, ɑ wɑngi ød Jwøk, mɑ́ Jwøk ɑ́cwöb kì bøle kì kenyɑni wɑɑng-ɑ ɑ́pɑ̈ɑ̈re, e bwøg-ɑ ómen. Kɑ Debörɑ̀ 'mïdhi nyigi Rebekɑ̀ othøø, kɑ koony thɑ óthur-ɑ Betiil, kɑ kenyɑni cɑg gen ɑ́ “Óthuri Ywøg.” Keny-ɑ ɑ́dwöög Yɑgob kì Töör Arɑm, Jwøk ɑ́cwöb kì bøle kɑ gyëdhe. Kɑ köbbi yi Jwøk kinni, “Nyingí cwøl ɑ́ Yɑgob, de yï pɑ cigi cwøllø yïn ɑ́ Yɑgob, nyingí ócwøl ɑ́ Isrɑil.” Codhe, ɑcɑge gøn ɑ́ Isrɑil. Aköbbii yi Jwøk kinni, “Yɑ bene Jwøk Áyïmø. Nywøøl kɑ yï ngënyí, kɑ yï göög yïn ɑ́ pödhø. Yï ógöögø ki kweyi jurrì mø gïïr, kɑ yï løg-ɑ kweyi rɑ̈nhì. Piny-ɑ ɑ́mëggɑ Abrɑhɑm geki Isɑɑk ómëggɑ yïn, wuki kwɑrrí.” Akedhi Jwøk mɑl, kɑ gø wiye keny-ɑ ɑ́di gen. Kɑ Yɑgob cwödh-ɑ piny ki kït kì keny-ɑ ɑ́kööb gen ki Jwøk, kɑ kömi kïnɑni kunye ki møgi oløg geki møw møg thyëye gøn Jwøk. Keny-ɑ ɑ́kööb yi Yɑgob geki Jwøk gø ɑ́cɑge ɑ́ Betiil. Kɑ ge odɑ̈gø kì Betiil. Kɑ Rɑceel pïïd yi pɑ̈dhi piny ge nuti wɑ̈nhi Eprɑtɑ̀ ki kɑɑm me lɑɑj, de ɑ́bëëd ɑ́ pɑ̈dhi piny me rɑɑj. Kɑ̈ng-ɑ bëëde e orɑngø kinøw, ɑköbbii yi gɑ̈ɑ̈mi kinni, “Yï ko böggi Rɑceel. Yï nywøl-ɑ wɑ̈d megø.” Wɑ̈nɑni ɑ́nywøl yi Rɑceel, de Rɑceel kiree ɑ́thøw. Wɑ̈nɑni ɑ́cɑge ɑ́ Ben Onì, codhe ɑthøwe. De wɑ̈nɑni ɑ́døøg ki cɑgø yi wïye ɑ́ Ben Yɑmïn. Athøw Rɑceel. Kɑ koony kö yuu Eprɑtɑ̀, kɑɑl-ɑ cwøl ɑ́ Betleem ɑnɑn. Kɑ Yɑgob cwödh-ɑ piny ki kït kì wïj röre, ɑ́ kïn-ɑ nyi pɑɑr Rɑceel, gïti dicyɑ̈ngtïn, nud kì kenyɑni. Codhe, kɑ Yɑgob ódøøgø wɑ̈di yöö, kɑ gudd-ɑ buti ønbɑ̈r kì Eder. Kɑ̈ng-ɑ ɑ́ying Isrɑil kunɑni, kɑ Ruben kedh-ɑ ri Bilɑ̀ cï wïye, kɑ møgɑni lïngi yi Isrɑil, kɑ pyëwe órënyø. Yɑgob yïe ɑ́dɑ wɑ̈dd pyɑ̈rø wïdɑ́ryew. Wɑ̈ddi Leɑ̀ cï Yɑgob nyɑn-ɑ dwøng bɑ ɑ́bïkyel: Ruben, wɑ̈n-ɑ kɑyø, kí Cimeøn, kí Leebì, kí Yeudɑ̀, kí Isɑkɑr, kí Dhebulun. Ányöddi ki wɑ̈dd ɑ́ryew yi Rɑceel: Yosep kí Ben Yɑmïn. Ányöddi ki wɑ̈dd ɑ́ryew yi Bilɑ̀ bɑ̈ng Rɑceel: Dɑn kí Nɑptɑlì. Kɑ nyöddi ki wɑ̈dd ɑ́ryew yi Dhilpɑ̀ bɑ̈ng Leɑ̀, Gɑd kí Aceer. Bene gen wɑ̈ddi Yɑgob ɑgɑk, møg-ɑ ɑ́nywøl kì Töör Arɑm. Kɑ Yɑgob kedh-ɑ yï wïye kì Mɑmɑrɑ̀ buti Kibrön, kun-ɑ ɑ́bëëd yi Abrɑhɑm geki Isɑɑk. Isɑɑk ɑ́bëëd ki runn miyø kí pyɑ̈r ɑ́bïdɑ̈g. Athøw Isɑɑk kì cyɑ̈ɑ̈n piny cyee, e rum yöø ki mendwøng. Kɑ kony yi Isøø geki Yɑgob wɑ̈dde. Men bɑ gøl Isøø, ɑ løg Edöm. Isøø ɑ́nyömi ki nyigi piny Kɑnɑɑn; Adɑ̀ nyɑɑr Elön kwɑɑr Kit. Kí Olibɑmɑ̀ nyɑɑr Anɑ̀ wɑ̈d Dhibeon kwɑɑr Kit, kí Bɑsemɑth nyɑɑr Icmɑil, nyimï Nibɑyoth. Kɑ Adɑ̀ Isøø nyödde ki wɑ̈d me cwøl ɑ́ Elipɑdh. Kɑ Bɑsemɑth nywøl-ɑ Reuel. Kɑ Olibɑmɑ̀ nywøl-ɑ Yeuc, kí Yɑlɑm, kí Körɑ̀. Bene gen wɑ̈ddi Isøø ɑgɑk, møg-ɑ ɑ́nywøl kì piny Kɑnɑɑn. Codhe, kɑ Isøø mɑ̈nne, kí wɑ̈dde, kí nyige womɑ̈nn, kí tyëng-ɑ gøle bënn, kí dhöge, kí dyëge, kí jɑmme bënn kwɑnye, kɑ dɑ̈g-ɑ piny megø me lɑ̈wi ki keny-ɑ bëëd yi ómen Yɑgob. Jɑmmi Isøø geki jɑmmi Yɑgob ɑ́kedh ge óngënyø, kɑ piny ódhïngø yi gen. Piny-ɑ́ yije ɑ́di gen ɑ́dhïngi kɑ ge ódhɑ̈lø bëëdø kì yije, mɑ́ dhög kí dyëg ɑ́ngënyi ki mendwøng. Codhe, kɑ Isøø dɑ̈g-ɑ kelli Kïti Seir (nyingi Isøø cwøl ɑ́ Edöm thyew). Bene lwömi gøl Isøø ɑnɑn. En ɑ bɑ kweyi tyëng Edöm, møg-ɑ bëëdø kì kelli kïttì Seir. Dɑ̈ɑ̈g mɑ̈nni Isøø bɑ Olibɑmɑ̀ nyɑɑr Anɑ̀. Anɑ̀ bɑ wɑ̈d Dhibeon. Isøø geki Olibɑmɑ̀ ɑ́nywøl-ɑ Yeuc, kí Yɑlɑm, kí Körɑ̀. Bene jø wïj gøl Isøø ɑgɑk, wɑ̈d Isøø nyel-ɑ dwøng bɑ Elipɑdh. En ɑ ree ɑ́kɑ̈ɑ̈l yi pëjjì møg: Temɑn, Omɑr, Dhepö, Kenɑdh, Körɑ̀, Gɑtɑm kí Amɑlek. Bene gen pëjji gøl Elipɑdh kì piny Edöm. Ge bɑ kwɑrri Adɑ̀. Reuel wɑ̈d Isøø ɑ bɑ wïyi pëjjì møg: Nɑɑ̈th, Dherɑ̀, Cɑmɑ̀, kí Mïdhɑ̀. Bene gen pëjji gøl Reuel kì piny Edöm. Ge bɑ kwɑrri Bɑsemɑth cï Isøø. Olibɑmɑ̀ cï Isøø ɑ́nywøl-ɑ pëjjì møg: Yeuc, Yɑlɑm, kí Körɑ̀. Bene gen pëjjì møg-ɑ kɑ̈ɑ̈l ri cï Isøø, Olibɑmɑ̀ nyɑɑr Anɑ̀. Bene gen wɑ̈ddi Isøø. Isøø ɑ cwøl ɑ́ Edöm. O møgɑk bene gen pëjji gen. Møg bɑ wɑ̈ddi Seir kwɑɑr Orït ɑ ɑ́bëëd kì piny Edöm, Lötɑn, Cöbɑl, Dhibeon kí Anɑ̀, Dïcön, Edher kí Dïcɑn. Bene gen wɑ̈ddi Seir jɑl Orït, møgɑni ɑ́bëëd gɑ pëjjì kì Edöm. Wɑ̈ddi Lötɑn bɑ Örì, kí Ëmɑm. (Timnɑ̀ bɑ nyimï Lötɑn.) Wɑ̈ddi Cöbɑl bɑ Albɑn, Mɑnɑɑth, Ebɑl, Cepì, kí Onɑm. Wɑ̈ddi Dhibeon bɑ Aiyɑ̀, kí Anɑ̀. Anɑ̀ bene jɑl-ɑ ɑ́yod wɑɑng pïg-ɑ lyëdh kì yij ryɑng, e kwɑy-ɑ ɑderr kì wɑ̈ye. Anɑ̀ bɑ wïyi Dïcön, ɑ løg kweyi Olibɑmɑ̀ nyɑɑr Anɑ̀. Wɑ̈ddi Dïcön bɑ Ëmdɑn, Ecbɑn, Ithrɑn, kí Kerɑn. Yïe ɑ́dɑ nyɑre me cwøl ɑ́ Olibɑmɑ̀. Wɑ̈ddi Edher bɑ Bilɑɑn, Dhɑbɑn, kí Akɑn. Wɑ̈ddi Dïcɑn bɑ Udh kí Arɑn. Bene nyingi pëjji Orït ek: Lötɑn, Cöbɑl, Dhibeon, Anɑ̀, Dïcön, Edher kí Dïcɑn. Jøgɑni bene gen pëjji kɑ̈lli Orït møg-ɑ ɑ́bëëd kì piny Edöm. Yɑgob ɑ́bëëd ɑ piny Kɑnɑɑn, keny-ɑ ɑ́bëëd yi wïye kɑ̈ge dööng. O men bɑ lwöbø kì ri bëëdi gøl Yɑgob, ɑ løg Yosep geki nyiiwɑ̈n. Yosep e runne bɑ pyɑ̈rø wïdɑ́bïryew, ɑ́kwɑy-ɑ dyëg, e nyi køny-ɑ nyiiwɑ̈n, wɑ̈ddi Bilɑ̀ kí Dhilpɑ̀ mɑ̈nni wïye Yɑgob. Kɑ gïgrijjø møg-ɑ nyi gwøg yi nyiiwɑ̈n nyi köbbe wïye Yɑgob. Kɑ Yosep mɑɑr yi Yɑgob ki mendwøng kibøli wɑ̈dde bënn, kipe kɑ̀ bëëde ɑ́ nyelthinh me døøj, o wïje pel, kɑ gø gögge ki ógødh me kïdde myëër. Keny-ɑ ɑ́lidhii yi nyiiwɑ̈n kinni Yosep mɑɑr kibøli gen yi wïyi gen, ɑmɑɑn ge gøn ki mendwøng, kɑ ge ówïyø kwøb ki en. Kɑ Yosep ólɑ̈gø kì wɑ̈r. Keny-ɑ ɑ́köbbe lɑ̈ggɑni nyiiwɑ̈n, kɑ ceg-ɑ pëddø ki mɑɑnø yi gen. Gï ɑ́köbbe kinni, “Lïngu lɑ̈g møg-ɑ ɑ́lɑ̈gi yi yɑn, Wɑ ying-ɑ pwödhø, wɑ bënn, wɑ otöjø ki thyɑng. Kɑ thyɑngg-ɑ ɑ́twöj yi yɑn ócungø ri gen cwöödh gen piny. Kɑ wɑ̈thi thyɑnggi wun obëënø, kɑ thyɑnggɑ wen gen dïdyër, ɑbøødh gen ri gen piny.” Kɑ pyëj yi nyiiwɑ̈n kinni, “Yï rømm-ɑ kinni yï ógöögø ki rɑ̈dh, kɑ wø jɑɑg yi yïn?” Kɑ pëthi gen ti-ɑ rënyø ki gøn kì bɑng lɑ̈gge, ki kipe kenyi kööbe thyew e nɑ ngɑn pere teg. Yosep ɑ́cigi lɑ̈gø, ɑköbbe nyiiwɑ̈n kinni, “Yɑ ɑ́lɑ̈gi këti, kì yethi lɑ̈ggɑni, yɑ ɑ́lidh-ɑ cɑ̈ng kí dwɑ̈y, kí kyell pyɑ̈rø wïdɑ́kyel, ri gen bøødh gen piny kì bølɑ.” Lɑ̈ggɑni ɑ́köbbe wïye thyew, kɑ cɑ̈wwi yi wïye kinni, “Á lɑ̈g mø ngø ɑ bëëdø kinøw? Yï rømm-ɑ kinni meyí kí nyiimyëw, kí yɑn, wø bɑ møg-ɑ óbï, kɑ ri wøn bøødh wøn piny kì bølí?” Kɑ nyiiwɑ̈n yethi gen mɑg yi tyiel, de wïye møgɑni mïdhe’ mïdhø kì pyëwe. Cyɑ̈ng ɑ́kyel, e nyiiwï Yosep wɑ̈dhi Cekïm be kwɑ̈yø ki jɑmmi wïyi gen, ɑ ɑ́köbbi Yosep yi Yɑgob kinni, “Yɑ dwɑdd-ɑ öri yïn Cekïm kun-ɑ ɑ́kwɑ̈yyi yi nyiiwöw.” Alöggi Yosep kinni, “Døj, yɑ ókedh.” Kɑ wïye okööbø kinni, “Kedh, lidh nyiiwöw mɑ yöd dëlli gen, kí dyëg mɑ nud gen. Kɑ yï dwöög be köbbi yɑn.” Codhe, ɑöre gøn kì Töör Kibrön. Kɑ Yosep wɑ̈dh-ɑ Cekïm, ɑlidhii e wɑ̈dh-ɑ wïïnø yi jɑl megø. Apyëje gøn kinni, “Á ngø ɑ yɑb yi yïn?” Alögge kinni, “Yɑ yɑb-ɑ nyiimïɑ, köbbí yɑn, ge kwɑ̈ɑ̈y ɑ keny?” Jɑlɑni ɑ́kööb kinni, “Ge ɑ́kedh kì keny, ge ɑ́lïngi yi yɑn ge okööbø kinni, ‘Kedhi wɑ Döthɑn.’ ” Kɑ Yosep kedh-ɑ bɑng nyiiwɑ̈n, ɑyode gïn kì Döthɑn. Álidh yi gen e nudd e lɑ̈wi, kɑ ge okööbø ki ri gen, e nuti wɑ̈nhi buti gen kinni, ge dwɑdd-ɑ nɑ̈gii. Akööb gen kinni, “Jɑɑl lɑ̈g ɑ́bï! Nɑ̈g wɑ en, kɑ leeng wɑ yij yith ɑ́kyel kì kelli yïïth-ɑ thwøwø ek. Wɑ ókööbø kinni, ɑ́cɑm yi lɑ̈ɑ̈y pɑ̈l. O lidh yi wɑ mɑ løge’ ngø ɑ ónywøl yi lɑ̈gge!” Keny-ɑ ɑ́lïngi møgɑni yi Ruben, kɑ ree pɑ̈nye ki yieli Yosep, ɑkööbe kinni, “Ko nɑ̈g wɑ, wɑ̈dhi wɑ en ki leeng yij yith kì pɑ̈l keny. De ko nyïɑ̈g wɑ.” Møgɑni ɑ́kwøbe ceth, e orumø kinni dwɑdd-ɑ yieli Yosep. O gø dögge wïye. Keny-ɑ ɑ́wɑ̈nhi Yosep buti gen, ɑmɑg ge gøn, kɑ ógønh-ɑ rug yi en, luny gen wɑ̈g, eni ógønh-ɑ kïdde myëër. Kɑ Yosep kɑ̈l gen, ɑleeng ge gøn yij yith me thwøwø. Keny-ɑ ɑ́rum Yosep ki leeng yij yith, ɑcɑ̈gi gen ki cɑm, kedh Ruben kedh-ɑ be lyeewi dyëg kun-ɑ ɑ́cɑ̈mmi yi gen. Kɑ̈ng-ɑ́ nudd ge ocyɑ̈mø, ɑ́lidh gen kwɑrri Icmɑil møg-ɑ nyi ngyëwi ge kɑ̈ɑ̈l-ɑ Gilyɑd, o ge kedh-ɑ Rïp. Kömi ɑmɑlli gen dɑ gïg-ɑ yømi gen med, møg-ɑ nyi kïdhi ri mulø, ni cumɑ̈r ki pïlpïl. Kɑ Yeudɑ̀ nyiimen köbbe kinni, “Á ngø ɑ óyod yi wɑ, ke nɑ̈g wɑ ómïee, kɑ kɑn yi wɑ? Ngëwwi wɑ en tyëngngyëwø, o cöge e pɑ nyïɑ̈g yi wɑ, mɑ́ e ceg bëëdø e bɑ ómïee, ki reme geki dële.” Ayïëy nyiimen. Keny-ɑ ɑ́wɑ̈nhi jøngyew møgɑni buti gen, kɑ nyiimëëgɑni Yosep mïïd gen wɑ̈g kì yij yith. Kɑ gø ngëwwi gen tyëngɑni ki ngyëny ɑ́tegg pyɑ̈r ɑ́ryew. Kɑ kïdhi Rïp yi tyëng-ɑ ɑ́ngewii, gen ɑ kwɑrri Icmɑil mø kɑ̈ɑ̈l Midyɑn. Keny-ɑ ɑ́døøg Ruben wïj yith, ɑyode Yosep e tøøk, kɑ ógødhe kɑge yi rɑ̈ɑ̈m pyëwe. Adwööge yï nyiimen, ɑkööbe kinni, “Nyelthinh tøøk, o yɑ göög ɑ dï cyee?” Codhe, ɑkwɑny gen ógødh kïdø mi Yosep, kɑ ge ngɑ̈dø ki ónywøg me thiinh, kɑ ógønhɑni jwɑ̈ɑ̈g gen yij remø. Kɑ ógødh kïdø menɑni muuj gen wïyi gen, ɑkööb gen kinni, “Lidh gïn-ɑ ɑ́yod yi wøn. Ngij, bɑ ógødh wɑ̈dí?” Kɑ gø ngije, ɑkööbe kinni, “Ngee, bɑ mee! Ácɑm yi lɑ̈y me rɑj. Wɑ̈dɑ Yosep ɑ́cɑm yi lɑ̈ɑ̈y pɑ̈l!” Kɑ Yɑgob ógødhe kɑge, kɑ ree töjje ki kwɑ̈llì, kɑ ocögø e ywøg-ɑ wɑ̈de ki cyɑ̈ng mø gïïr. Wɑ̈dde kí nyige womɑ̈nn bënn ɑ́bï be lugii, de ɑ́dhɑ̈li lugø. Kɑ okööbø kinni, “Yɑ ópïïd yi thøø, yɑ nudd yɑ óywöngø ki wɑ̈dɑ.” Codhe, kɑ tyëg-ɑ piny e óywöngø ki wɑ̈de Yosep. Kì Rïp, Yosep ɑ́ngëwwi Pøtipɑr yi kwɑrri Icmɑil. Pøtipɑr ɑ́bëëd ɑ́ jɑngi ɑlɑthkerr møg-ɑ nyi kor gøl rɑ̈dh. Kì bɑng kenyɑni, kɑ Yeudɑ̀ odhwödhø kì buti nyiimen, kɑ dɑ̈g-ɑ buti jɑl kɑɑl Adulɑm me cwøl ɑ́ Kirɑ̀. Kɑ nyɑn mɑ nyɑɑr Kɑnɑɑn me nyingi wïye cwøl ɑ́ Cuɑ̀, lidhe kì kunɑni, kɑ gø nywøme. Kɑ nyɑnɑni óyɑɑjø, ɑnywøle ki wɑ̈d, kɑ gø cɑge ɑ́ Er. Kɑ cig-ɑ yɑɑjø, ɑnywøle ki wɑ̈d megø, kɑ gø cɑge ɑ́ Onɑ̈n. Kɑ cig-ɑ yɑɑjø këti, ɑpɑ̈dhe piny kì Akdhïb ki wɑ̈d kɑ gø cɑge ɑ́ Celɑ̀. Kɑ Yeudɑ̀ wɑ̈de, Er nyel-ɑ kɑyø, nyöme ki dhɑjø me cwøl ɑ́ Tɑmɑr. O kì bɑng kɑ ɑ́bëëd Er kɑyi Yeudɑ̀ orøngø, kɑ nɑ̈g yi Jwøng-ɑ Ácwɑ̈ɑ̈j. Kɑ Onɑ̈n köbbi yi Yeudɑ̀ kinni, “Kedhu ød wuki cï ómyëw, o ómyëw nyöddi yi yïn ki wïj.” Kɑ yod yi Onɑ̈n kinni nywøl koo bëëdø gɑ møge. Kɑ tyew nyi kønye piny kenyi budde ki cï ómen, kipe kinni o wïj ómen cöge gø pɑ nywøl yi en. Kɑ cɑy yi Jwøng-ɑ Ácwɑ̈ɑ̈j kipe gïn-ɑ ɑ́gwøg yi en, ɑnɑ̈ge gøn thyew. Kɑ Yeudɑ̀ kwɑre Tɑmɑr köbbe kinni, “Kedh bëëd kì gøl wïyí, mɑ́ yïí bong jɑlø. Bëëd kì kunɑni gïti keny-ɑ ódøngi Celɑ̀ wɑ̈dɑ.” Mɑ́ e ɑ́rum kinni, óthøw thyew ni nyiimen. Codhe, kɑ Tɑmɑr kedh-ɑ be bëëdø kì gøl wïye. Kì bɑng keny me bɑ̈ɑ̈r, kɑ cï Yeudɑ̀ othøø. Keny-ɑ ɑ́rume ywøgi cyëge, kɑ kedh-ɑ Timnɑ̀ kun-ɑ teb yëyyi dyëge, geki mɑ̈dhe Kirɑ̀ jɑl Adulɑm. Kɑ Tɑmɑr köbbi kinni, “Kweyí obëënø e kedh-ɑ be tebi yëyyi dyëge.” Kɑ thøll-ɑ ywøøge jɑlgøle lunye wɑ̈g, kɑ wïje kume ki thɑrɑ̀, ɑkode ree ki ógudh, kɑ pëgg-ɑ tøg yuu Enɑim kì kö yuu Timnɑ̀. Mɑ́ gø ngɑ̈nyi yi en kinni, Celɑ̀ wɑ̈d Yeudɑ̀ ɑ́rum ki døngø, o ɑ́cög ge nuti kïdhi ød ki en. Keny-ɑ ɑ́lidhii yi Yeudɑ̀, ɑrume kinni bɑ ngɑn nyi niin ki köögi, mɑ́ wïje bɑ ɑkum. Kɑ kedh-ɑ yïe kì tøg yöö, ɑkööbe kinni, “Døj, yï nyi køøg kɑ ngyëny ɑ́dï?” Ábëëd gø kwïje kinni bɑ cï wɑ̈de. Akööb nyɑnɑni kinni, “Ngø? Yɑ culí ngyëny kɑ̀ buddi wɑ?” Kɑ Yeudɑ̀ okööbø kinni “Yï óödi yi yɑn ki dyel nyibwøng kì kelli dyëgɑ.” De nyɑnɑni ɑ́löggi kinni, “Yɑ ceg-ɑ mɑ̈gø ki gïïpiny kì yïí. Ódöggɑ yïn keny-ɑ ókɑ̈ɑ̈l dyel.” Kɑ Yeudɑ̀ okööbø kinni, “Á gïjø mɑ ngø, ɑ dwɑddi yi yïn o mëggɑ yïn?” Kɑ nyɑnɑni ólöggø kinni, “Kitimí geki thøle, kí lodhí.” Codhe, kɑ gï mëgge gøn. Kɑ ge óbuddø, kɑ nyɑnɑni yɑɑj yi en. Codhe, kɑ nyɑnɑni ókedhø’ wɑ̈ye. Kɑ thɑr-ɑ ɑ́kume wïje kɑ̈ɑ̈le wɑ̈g, kɑ thøll-ɑ ywøøge jɑlgøle dwøøge ree. Dyel ɑ́muuj yi Yeudɑ̀ kɑ kɑ̈l yi mɑ̈dhe, jɑl Adulɑm, o pɑ̈ɑ̈de jɑmm-ɑ ɑ́mɑg yi ngɑnɑni, de ngɑnɑni nuti yood en. Kɑ tyëng kɑɑlɑni pyëje kinni, “Ngɑn nyi niin ki köögi men-ɑ ɑ́bëëd kì tøg yöö ying-ɑ keny?” De ge ɑ́kyëëd kinni, “Bong ngɑn nyi niin ki köögi mɑ ɑ́bëëd e ying-ɑ keny.” Codhe, ɑdøøge yï Yeudɑ̀, kɑ okööbø kinni, “Ngɑnɑni nuti yood yɑn, o tyëng kɑɑlɑni ɑ́kyëëd thyew kinni i bong ngɑn nyi niin ki köögi mɑ ɑ́ying kenyɑni.” Kɑ Yeudɑ̀ okööbø kinni, “Wiy mïdhe gïn kipe wɑ ógöögø ki møg ngedhi yi teedø. Ádwɑddɑ’ mëggi dyel men, de ɑ́cög e pɑ yod yi yïn.” Kì bɑng dwɑ̈tt ɑ́dɑ̈g, kɑ Yeudɑ̀ köbbi kinni, “Tɑmɑr cï wɑ̈dí ɑ́göög ɑ́ ngɑn nyi niin ki köögi, men-ɑ́ yije dɑ dhɑnhø me yood en ki cwøw-ɑ yɑb yi en.” Kɑ Yeudɑ̀ okööbø kinni, “Kïdhu en be rɑ̈bø.” Keny-ɑ ɑ́kɑ̈ɑ̈lii e kïdh-ɑ be rɑ̈bø, ɑöde yï kweye kinni, “Jɑl-ɑ ɑ́yɑj yɑn, en ɑ bɑ wïi jɑmmì møg.” Kɑ cig-ɑ kwøb kinni, “Bɑ mø men eni loonh geki kitim?” Ge ɑ́ngij yi Yeudɑ̀, ɑkööbe kinni, “Nyɑnɑni tir kibølɑ, mɑ́ e ɑ́cög e nuti kïdhi ød yi yɑn geki Celɑ̀ wɑ̈dɑ.” Kɑ ocögø e pɑ buddi geki nyɑnɑni këti. Keny-ɑ ɑ́bëën kej pɑ̈dhe piny, ɑ́yod yije dɑ ɑcwegg! Kɑ̈ng-ɑ́ nudd e ceg kɑ gɑmø, kɑ ɑ́kyel kì kelli ɑcweggɑni cinge cude wɑ̈g. Kɑ cingɑni töjji ki korø me kwɑrø yi gɑ̈ɑ̈mi ɑ́ men ngijii kinni bɑ en ɑ ɑ́kwöngi ki bëën wɑ̈g. De kɑ ɑ́rum korø ki twöjø, kɑ cinge dwøøge, kɑ ómen bï-ɑ wɑ̈g. Kɑ gɑ̈ɑ̈mi okööbø kinni, “Yïde ɑ cɑɑg pönhø ki pönhi dwøng?” Acɑɑg nyinge ɑ́ Peredh. Alunyi ómen nyel-ɑ cinge di korø ki bëën wɑ̈g, kɑ cɑg ɑ́ Dherɑ̀. Kwɑrri Icmɑil, keny-ɑ ɑ́kïdhi Yosep Rïp yi gen, gø ɑ́ngëwwi gen Pøtipɑr, jɑl ɑ́kyel kì kelli jyɑ̈ggi tøg buri rɑ̈ɑ̈dh Rïp. En ɑ ɑ́bëëd ɑ́ jɑngi ɑlɑthkerr. Yosep ɑ́køny yi Jwøk kɑ jɑmm-ɑ nyi gøggi yi en bënn nyi pɑ̈dh-ɑ kɑ̈jji gen. Ábëëd ɑ gøl jɑl-ɑ ɑ́ngewii, jɑl Rïp. Kɑ yod yi jɑlɑni kinni, Yosep mɑɑr yi Jwøk, kɑ gwøng-ɑ nyi mëggii nyi gwøge kidøøj. Pøtipɑr pyëwe ɑ́bëëd e med ki Yosep. Kɑ gø cïbe ɑ́ jɑgø kì kömi gøle. Kɑ jɑmme bënn cïbe cingi Yosep. Kɑ gøl jɑl Rïp gyëdh yi Jwøk kipe Yosep. Kɑ jɑmme óngënyø. Pøtipɑr jɑmme ɑ́cïbe cingi Yosep ge bënn, bong gïjø me rømme den-ɑ́ gïn-ɑ cɑm yi en kete, ɑ nyi pëjje jɑlthɑl. Yosep ɑ́bëëd dële døøj, o bøle myëër. Kì bɑng keny megø, kɑ Yosep tyer yi cï jɑlkɑl. Kɑ gø kwɑjje kinni, “Bïí ødɑ, o wɑ buddi wɑ.” Kɑ óbɑ̈nyø, ɑkööbe kinni, “Lidh, jɑmmì bënn ɑ́cïb cingɑ yi jɑldwøng, yɑn ɑ mïdhi jɑmme bënn. Yïɑ dɑ tegø kì kɑl keny ni jɑlɑni ceth. Dɑ́ yïn, yï ketí ɑ nuti cïb cingɑ yi en, mɑ́ yï bɑ cyëge. Yɑ göög ɑ dï cyee ki gïnrɑj ni men, o bɑ orøg kì bøli Jwøk?” Cɑgg ɑ́ kɑ ɑ́pëggi ngɑnɑni be kwɑjji Yosep yethi cyɑ̈ng bënn, Yosep ɑ́kyëddi wɑ̈g, kɑ døøg-ɑ be këëji ngɑnɑni. De cyɑ̈ng ɑ́kyel Yosep ɑ́kedhi øndwøng be yɑ̈bbø ki gïjø megø. O ɑ́bëëd e bong dhɑnhø ki tung-ɑ di ønɑni. Ayood Yosep kunɑni yi ngɑnɑni, kɑ jwɑn-ɑ yïe, kɑ gø mɑge kì ri ógødhe, ɑkööbe kinni, “Bïí o wɑ buddi wɑ.” De Yosep ɑ́bodh kɑ reng-ɑ wɑ̈g lɑwe wiye’ cingi ngɑnɑni. Keny-ɑ ɑ́lidhii yi ngɑnɑni kinni ógødhe ɑ́wiye kɑ órengø, kɑ bɑ̈ngge cwøle, ɑkööbe kinni, “Lïdhi wun! Wɑ̈d jur men-ɑ ɑ́kɑ̈ɑ̈l keny yi jɑldwøng, yɑ ɑ́dhɑ̈ɑ̈l yi en. Ábï ødɑ kɑ yɑ dwɑdde mødø. De yɑ ɑ́ryeer ki ryeeri dwøng. Keny-ɑ ɑ́kïïwɑ, ɑrenge wɑ̈g ógødhe wiye’ butɑ.” Kɑ ógødhe mïdhi yi ngɑnɑni gïti kɑ ɑ́bëën jɑlgøle. Kɑ gø löbbe mø ni møg-ɑ ɑ́köbbe bɑ̈ngg ɑ́tïni, ɑ́kööb kinni, “Ójur men, bɑ̈ng-ɑ ɑ́kɑ̈ɑ̈l yi yïn keny, ɑ́bï ødɑ kɑ yɑ dhɑ̈ɑ̈le. De keny-ɑ ɑ́kïïwɑ, ɑrenge wɑ̈g ógødhe wiye’ butɑ.” Kɑ wïi Yosep dële okïrrø yi liny keny-ɑ ɑ́lïnge kinni, i cyëge ódwɑddi mødø yi bɑ̈ng. Kɑ Yosep kwɑnye kɑ gø leenge ød mɑg, men-ɑ yije nyi kïdhi ɑmɑggi rɑ̈dh. Kɑ Yosep obëëdø kì ød mɑg. De Yosep ɑ́køny yi Jwøk, kɑ gø gyëdhe. Kɑ jɑngi ød mɑg pyëwe løg-ɑ me med ki en. Kɑ Yosep kwɑnye ɑ́ jɑngi ɑmɑgg. Kɑ jɑmm-ɑ gøggi bënn kì ød mɑg cïbe cingi Yosep. Jɑngi ød mɑg pyëwe nuti pɑ̈nyi olïng kipe jɑmm-ɑ ɑ́cïbe cingi Yosep, mɑ́ Yosep bɑ dhɑnhi Jwøk, o jɑmm-ɑ nyi gwøg yi en bënn, nyi pɑ̈dh-ɑ kɑ̈jji gen ceth. Kì bɑng keny megø, kɑ jɑngi kɑ̈ddø ki cɑ̈wwì geki jɑngi thɑl møg-ɑ gøl rɑ̈ɑ̈dh Rïp, ogöögø ki bɑ̈jjø mɑ ɑ́rënyi pyëw rɑ̈dh, wïi gen. Rɑ̈dh pyëwe ɑ́rënyi ki jøgɑni ryeet, ɑ løg jɑngi cɑ̈wwì geki jɑngi thɑl, kɑ gï kïdhe ød mɑg men-ɑ ying gøl jɑngi ɑlɑthkerr, kì keny-ɑ ɑ́mɑɑg Yosep. Kɑ Yosep kwɑny yi jɑngi ød mɑg ɑ́ ngɑn kɑ̈lli gen. Kɑ ge kɑl-ɑ bëëdø ki cyɑ̈ng kì ød mɑg. Kɑ jøgɑni ryeet, ɑ løg jɑngi kɑ̈ddø ki cɑ̈wwì geki jɑngi tyëngthɑl, ólɑ̈gø kì ød mɑg kì wɑ̈r ɑ́kyel. Ngɑɑn ɑ́lɑ̈gi kì wɑ̈ye, gïn-ɑ wɑngi yi lɑ̈ggɑni bɑ̈ɑ̈n. Keny-ɑ ɑ́bëën Yosep be lidhi gen kì mwøl, ɑyuude gïn ge okïïmø. Kɑ ge pyëj yi Yosep kinni, “Wude ɑ nënni wun pëthi wun rijjø dicyɑ̈ngtïn?” Akööb gen kinni, “Wø ɑ́lɑ̈gi ɑ́wɑ̈ɑ̈r, de bong ngɑn nyudhi wøn gïn-ɑ wɑngi yi lɑ̈ggɑni.” Kɑ mø gen løøg yi Yosep kinni, “Bɑ Jwøk ɑ nyi nyudhø ki lɑ̈g. Köbbu yɑn lɑ̈ggi wun.” Kɑ jɑngi tyëng kɑ̈ddø ki cɑ̈wwì lɑ̈gge köbbe Yosep. Gø ɑ́köbbe kinni, “Kì yethi lɑ̈ggɑ, yɑ ɑ́lidh-ɑ byëlø kì bølɑ. Wïj byëlɑni dɑ ɑ́kɑrr ɑ́dɑ̈g, kɑ ge odhɑ̈yø, ɑbug gen ki búr, kɑ ge ómɑ̈rø, ɑcyeg gen. Óthɑ̈ngi rɑ̈dh ɑ́ying-ɑ cingɑ. Kɑ byellɑni jwɑnɑ ki kɑjø, kɑ ge jwɑnɑ’ gwøøg møgø. Kɑ bijɑ. Kɑ kïdhɑ yij óthɑ̈ngi rɑ̈dh, kɑ óthɑ̈ngɑni cïbɑ cingi rɑ̈dh.” Aköbbii yi Yosep kinni, “Gïn-ɑ wɑngi yi lɑ̈ggí èn: ɑ́kɑrr ɑ́dɑ̈g, bɑ cyɑ̈ng ɑ́dɑ̈g. Kì dɑ̈ɑ̈g cyɑ̈ng, rɑ̈dh pyëwe ólɑ̈ɑ̈m ki yïn, kɑ yï dwøøge kej gwøgí, óthɑ̈ngi rɑ̈dh ócïb yi yïn cinge ceth ni kenyi göög cøn, ɑ́ yïn ɑ kɑ̈llii. De pɑ̈ddí rɑ̈dh kiperɑ. Kɑ yɑ køny ki bëën wɑ̈g kì ød mɑg keny-ɑ ódøøg kejí këti. Thyew, yɑ ɑ́ceg kɑ kwɑ̈ɑ̈lø kì pödhø me lɑ̈wi, me ying løøg nɑm. De gïn-ɑ pëddi rɑ̈jø, bɑ kɑ ɑ́wɑ̈dhi yɑn ki myenø yøw, kɑ yɑ leeng ød mɑg keny, ngö bong gïjø mɑ ɑ́rënyɑ.” Keny-ɑ ɑ́yodii yi jɑngi thɑl kinni lɑ̈ggi jɑl-ɑ kyeelø ɑ́løøg yi Yosep kidøøj, ɑköbbe lɑ̈gge Yosep kinni, “Yɑn thyew, yɑ ɑ́lɑ̈gi yɑ tyëdd-ɑ ɑ́ridhh ɑ́dɑ̈g kì wïjɑ, ge myeer yɑn mɑl. Men-ɑ mɑl yije dɑ gïgcɑmm møg-ɑ ɑbul bënn, de ge ocɑmø yi winy kì yij ɑ́ridh kì wïjɑ.” Alöggi Yosep kinni, “Gïn-ɑ wɑngi yi lɑ̈ggɑni èn: dhöng ɑ́dɑ̈g bɑ cyɑ̈ng ɑ́dɑ̈g. Kì dɑ̈ɑ̈g cyɑ̈ng, wïjí ókïb wɑ̈g yi rɑ̈dh, kɑ yï ngɑɑb wïj lööj yɑdh, kɑ yï cɑm yi winy.” Kɑ jɑggi Rïp ryej yi rɑ̈dh kì dɑ̈ɑ̈g cyɑ̈ng, kipe pɑri cyɑ̈ng-ɑ́ yije ɑ́nywøølii. Kɑ jɑngi jøkɑ̈ddø ki cɑ̈wwì geki jɑngi tyëngthɑl kɑ̈ɑ̈l wɑ̈g kì ød mɑg, kɑ ge kïdhi bøli jyɑ̈ggi rɑ̈dh. Kɑ jɑngi jøkɑ̈ddø ki cɑ̈wwì dwøøg kej gwøge. Kɑ kedh-ɑ be kɑ̈lli rɑ̈dh. Kɑ jɑngi tyëngthɑl nɑ̈g ni kɑ ɑ́kwøbii yi Yosep ceth. De jɑngi tyëngkɑ̈ddø ki cɑ̈wwì nuti rumø kì ri Yosep, wïje ɑ́wïl ki en. Bɑng runn ɑ́ryew, kɑ rɑ̈dh ólɑ̈gø e cung-ɑ́ɑ̀ kömi Kiir, ɑ́lidh-ɑ dhög ɑ́bïryew mø cwiy, o ge lwiy, ge bï-ɑ wɑ̈g kì nɑm, kɑ ge ócɑ̈gø cɑm ki lum. Kɑ dhög ɑ́bïryew møøgø mø pɑ nëënø yi rɑ̈jø, o ge gwɑ̈lø gwɑ̈lø, bï-ɑ wɑ̈g kì nɑm, kɑ ge ócungø kì buti dhögi tyeli mɑl. Kɑ dhög-ɑ cwiy cɑm yi dhög-ɑ gwɑ̈lø kinni tweet. Kɑ rɑ̈dh ócyëwø. Acige nenø kɑ ólɑ̈gø, ɑ́lidh-ɑ wɑ̈thi byel ɑ́bïryew, kì wïj thyɑngø ɑ́kyel, ri gen pɑ̈ng yi nyingi byel mø myëër. Kɑ byel ɑ́bïryew møøgø otwïyø kì buti gen, welli gen lewø lewø, o bong byel kì wɑ̈thi gen. Kɑ well-ɑ wɑ̈thi gen pɑ̈ng yi nyingi byel mwøøny yi møg-ɑ lewø. Codhe, kɑ rɑ̈dh ócyëwø. Ce ying-ɑ lɑ̈g! Adhwödh rɑ̈dh kì mwøl wïje cungø yi møgɑni. Kɑ öd-ɑ yij Rïp bëne, kɑ ɑ́jwöggì geki tyëng-ɑ wɑ̈thi gen pel cwööl bënn. Kɑ rɑ̈dh lɑ̈gge löbbe gïn. De bong dhɑnhø mɑ ɑ́cuggi köbbi rɑ̈dh gïn-ɑ wɑngi yi lɑ̈ggɑni. Kɑ jɑngi tyëngkɑ̈ddø ki cɑ̈wwì rɑ̈dh köbbe kinni, “Wuö, bɑ̈jjɑ ɑ́pɑr yi yɑn dicyɑ̈ngtïn. Tyelø ɑ́kyel ówëni, rɑ̈dh pyëwe ɑ́rënyi ki bɑ̈ngge. Kɑ yɑ kïdhe ød mɑg men-ɑ gøl jɑngi ɑlɑthkerr, kyeel ki jɑngi tyëngthɑl. Kɑ wø ólɑ̈gø kì wɑ̈r ɑ́kyel ki lɑ̈g mø bɑ̈ɑ̈n. Kɑ gïn-ɑ wɑngi yi lɑ̈ggɑni köbbi wøn yi nyel megø men-ɑ ókɑ̈ɑ̈lø kì løøg nɑm, o bɑ bɑ̈ng jɑngi ɑlɑthkerr, keny-ɑ ɑ́wɑ̈jjii lɑ̈ggɑni yi wøn ceth. Kɑ møgɑni pɑ̈dh-ɑ kɑ̈jji gen ceth ni kɑ ɑ́kwøbe gïn. Yɑ ɑ́gøny, kɑ yɑ dwöög kej gwøgɑ, kɑ jɑngi tyëngthɑl nɑ̈g.” Codhe, kɑ rɑ̈dh öd-ɑ ød mɑg. Kɑ Yosep jwɑn ki gööny wɑ̈g, kɑ wïje lyel, kɑ ógudhe wil. Akïdhii bøli rɑ̈dh. Kɑ Yosep köbbi yi rɑ̈dh kinni, “Yɑ ɑ́lɑ̈gi, de bong ngɑn mɑ ɑ́nyudhi yɑn gïn-ɑ wɑngi yi lɑ̈ggɑni. De yɑ ɑ́köbbi, i yïn kenyi lïngí lɑ̈g, gïn-ɑ wɑngi yi gen nyii cuggø nyodhø yi yïn.” Alöggi Yosep kinni, “Pɑ lwɑ̈ng yi yɑn wuö, de Jwøk rɑ̈dh ónyudhe.” Codhe, ɑköbbi Yosep yi rɑ̈dh kinni, “Yɑ ɑ́lɑ̈gi yɑ cung-ɑ́ɑ̀ kömi Kiir. Kɑ dhög ɑ́bïryew mø cwiy, dëlli gen lwiy, bï-ɑ wɑ̈g kì nɑm. Kɑ ge ocyɑ̈mø’ lum kì gɑ̈d. Kɑ dhög ɑ́bïryew møøgø mø gwɑ̈lø gwɑ̈lø ólunyø bëën wɑ̈g kì nɑm. Bong dhög mɑ ɑ́lidh yi yɑn ge gwɑ̈lø ni gen kì Rïp keny! Kɑ dhög-ɑ cwiy gɑ ɑ́bïryew mø tyeli mɑl, cɑm yi dhög-ɑ gwɑ̈lø. De bong ngɑn cuggi ngïjø kinni dhög-ɑ cwiy ɑ́cɑm-ɑ yi gen, mɑ́ ge nudd ge gwɑ̈lø ceth. Kɑ yɑ ócyëwø. Kì yethi lɑ̈ggɑ møg-ɑ kyeelø, yɑ ɑ́lidh-ɑ byëlø, wïje dɑ wɑ̈thi byel ɑ́bïryew, byell-ɑ wïje myëër cɑrø, o nyingi gen gïïr. Kɑ byel ɑ́bïryew møøgø otwïyø kì buti gen, welli gen lewø lewø, ge órɑ̈bø yi mel. Kɑ wɑ̈thi byell-ɑ døj mwøøny yi møg-ɑ rijjø. Ájwöggì ɑ́köbbɑ lɑ̈ggɑni, de bong ngɑn mɑ ɑ́nyudhi yɑn gïn-ɑ wɑngi yi gen.” Kɑ rɑ̈dh köbbi yi Yosep kinni, “Lɑ̈ggi rɑ̈dh wɑng-ɑ gïjø ɑ́kyel. Rɑ̈dh ɑ köbbi yi Jwøk ki gïn-ɑ dwɑdde gwøgø. Dhög ɑ́bïryew møg-ɑ døj bɑ runn ɑ́bïryew. O wɑ̈thi byel ɑ́bïryew møg-ɑ døj bɑ runn ɑ́bïryew. Bɑ lɑ̈g ɑ́kyel. Dhög-ɑ gwɑ̈lø gɑ ɑ́bïryew møg-ɑ ɑ́bï wɑ̈g kì cyɑ̈n, bɑ runn ɑ́bïryew, geki wɑ̈thi byel ɑ́bïryew møg-ɑ lewø. Ge bɑ runni kɑ̈j ɑ́bïryew. Nɑ kɑ ɑ́köbbɑ rɑ̈dh ceth. Jwøk nyudh-ɑ rɑ̈dh ki gïn-ɑ dwɑdde gwøgø. Runn ɑ́bïryew mø yɑ̈ɑ̈ngø obëënø. Rïp óyɑ̈ng bëne. Bɑng gen óbëën yi runn ɑ́bïryew mø kɑ̈j. Kɑ yɑ̈ng-ɑ ɑ́bëëd ji ge yɑ̈ngø kì piny Rïp bëne owïlø. Mɑ́ Rïp órënyi yi kɑ̈j bëne. Kɑ̈r-ɑ ɑ́ying yij pödhø ówïl kì wɑ̈thi ji, mɑ́ kɑ̈ny-ɑ óbï kì bɑnge óbëëd e teg ki mendwøng. Gïn-ɑ pere jøli lɑ̈ggɑni tyel ɑ́ryew, bɑ kinni, Jwøk møgɑni gwøge’ gwøgø ceth kì bɑng nyɑ keny me thiinh. “Anɑn yɑ̈ɑ̈b rɑ̈dh ki dhɑnhø me døj, o wïje pel, kɑ gø cïbe kömi pödhø bëne. Kɑ rɑ̈dh kɑ̈bbe thyew ki ji-ɑ ónenni gwøngɑni kì yij pödhø bëne, kì yethi runni yɑ̈ɑ̈ngø gɑ ɑ́bïryew. Kɑ byel nyi pɑ̈ngi gɑ bud ɑ́bïj, o budø ɑ́kyel nyi cïb piny kì yethi runni yɑ̈ɑ̈ngø gɑ ɑ́bïryew. Köbbí gen o byel cøng yi gen kì yethi runn-ɑ døj bënn, ki nyingi rɑ̈dh. Kɑ byellɑni kor yi gen kidøøj. Mïdhi byellɑni gɑ møg-ɑ óyieel ji kì yethi runni kɑ̈j, o Rïp cöge, e pɑ nɑ̈g yi kɑ̈j.” Kɑ kwøbbi Yosep pwøj yi rɑ̈dh geki jɑggi bure. Kɑ jɑggɑni köbbi yi rɑ̈dh kinni, “Bong dhɑnhø men-ɑ óyod yi wɑ, me lod Yosep, ngɑn-ɑ ree di wëyi Jwøk.” Kɑ Yosep köbbi yi rɑ̈dh kinni, “Mɑ́ e bɑ yïn ɑ ɑ́nyudhi yi Jwøk ki møgɑni bënn, menɑni wɑng-ɑ kinni bɑ yïn ɑ wïjí pel, o yijí dɑ rummì kibøli ji bënn. Pödhɑ bëne cïbɑ’ cingí. O jiɑ bënn ólïng-ɑ kwøbbí, bong dhɑnhø men-ɑ óying mɑl kibølí den-ɑ́ yɑn, yɑ ketɑ.” Codhe, ɑköbbi Yosep yi rɑ̈dh kinni, “Anɑn yï rønyɑ’ rønyø yïn ɑ́ jɑgø kì kömi Rïp bëne.” Kɑ gwelø men-ɑ köme ógweed nyingi rɑ̈dh kɑ̈ɑ̈le wɑ̈g kì lwede, kɑ gø bødhe lwedi Yosep. Aruuge gøn ki ógødh men-ɑ ócwɑ̈jø ki kor-ɑ yöm. Kɑ yedhe lunyi ki ɑ́cwecwelli dhɑb. Kɑ mëggi ryeew yɑ̈thi gøl rɑ̈dh, møg-ɑ nyi pyejji yi kyënyì, o kɑ̈lli kì yij yɑ̈yɑni bøle orïngø yi ɑlɑthkerr, ge óryeerø kinni, “Wëggu yöö! Wëggu yöö! Rum wun cøngi wun piny kì bøle!” Kinøw, Yosep ɑ́røny ɑ́ jɑngi Rïp bëne. Kɑ Yosep köbbi yi rɑ̈dh kinni, “Yɑ bene rɑ̈dh, o bong dhɑnhø men-ɑ ódi gïn gwøge kì Rïp bëne, yï kwïj wøw.” Kɑ Yosep cɑge ɑ́ Dhɑpenɑdh Pɑniyɑ̀. Kɑ gø nënge ki dhɑjø me cwøl ɑ́ Asenɑth nyɑɑr jɑl me cwøl ɑ́ Pøtiperɑ̀ ókwëri On. Kɑ Yosep pere lïngi kì yij Rïp bëne. Yosep runne ɑ́bëëd gɑ pyɑ̈r ɑ́dɑ̈g keny-ɑ ɑ́cɑ̈ge’ göggi rɑ̈dh, ɑkedhe e owïïnø kì yij Rïp bëne. Byel ɑ́cyeg kidyër kì yethi runni yɑ̈ɑ̈ngø gɑ ɑ́bïryew, møg-ɑ ɑ́kwøb yi Yosep ceth. Kɑ byel congi kì yethi myërri Rïp bënn kì yethi runni yɑ̈ɑ̈ngø gɑ ɑ́bïryew. Byel ɑ́bëëd ge gïïr cɑrø ki mendwøng. Kɑ Yosep ówïyø rømi gen, mɑ́ byëlø nɑ tør. Kɑ Yosep nyöddi ki wɑ̈dd ɑ́ryew yi Asenɑth, kɑ̈ng-ɑ ɑ́bëëd runni kɑ̈j nuti bëënø. Kɑ wɑ̈de nyel-ɑ kɑyø cɑge ɑ́ Mɑnɑsè, mɑ́ e ɑ́kööb kinni, “Jwøk wïjɑ ɑ́wëgge wïlø ki orɑngɑ, geki gøl wïyɑ bëne.” Acɑge ryeew wɑ̈dde ɑ́ Eprɑim, mɑ́ e ɑ́kööb kinni, “Jwøk yɑ ɑ́nënge ki nywøl yɑn ɑ́ wëdh.” Kɑ runni yɑ̈ɑ̈ngø gɑ ɑ́bïryew, møg-ɑ́ yethi gen ɑ́bëëd tyëng Rïp ge yɑ̈ngø, óthumø. Kɑ runni kɑ̈j møg-ɑ ɑ́kømmi yi Yosep gɑ ɑ́bïryew ócɑ̈gø bëënø. Pödhh-ɑ kyeelø ɑ́bëëd yethi gen dɑ kɑ̈j, de ɑ́dɑ gïncɑm kì yij Rïp bëne. Keny-ɑ ɑ́tëngi kɑ̈j, kɑ ji ywøøg-ɑ yï rɑ̈dh kipe gïncɑm. Kɑ tyëng Rïp bënn köbbi yi rɑ̈dh kinni, “Kedhu yï Yosep. Kɑ gïn-ɑ ókwøb yi en gwøg wun ceth.” Kɑ kɑ̈j ótëngø ki mendwøng kì yij pödhø bëne, ɑyieeb kɑ̈jj-ɑ ɑ́mïdhi byel yi Yosep. Kɑ ócɑ̈gø ki ngëwwi tyëng Rïp bënn. Kɑ kömi piny bëne bï-ɑ Rïp yï Yosep be ngyew ki byel, mɑ́ piny bëne ɑ́mɑg yi kɑ̈j me teeg. Kɑ̈j ɑ́bëëd e teeg cɑrø kì Kɑnɑɑn, e Yɑgob wïyi Yosep nudd e onëënø. Keny-ɑ ɑ́yodii yi Yɑgob kinni dɑ byel kì Rïp, ɑköbbe wɑ̈dde kinni, “Wude ɑ pɑ nyɑg wun ri wun? Yɑ olïngø i dɑ byel kì Rïp. Kedhu kunɑni, kɑ wu ngëëw wun ki byel kipe wɑ óywɑj yi kɑ̈j.” Codhe, ɑkedh nyiiwï Yosep gɑ pyɑ̈rø, be ngyew ki byel kì Rïp. De Ben Yɑmïn ómï Yosep, ɑ́mɑ̈ɑ̈n kedhø yi wïyi gen, mɑ́ e ɑ́bwøg kinni nyelthinh ódi gïn-ɑ ókedhi ree. Wɑ̈ddi Yɑgob ɑ́bï Rïp, geki ji møøgø be ngyew ki byel, mɑ́ kɑ̈j teeg kì piny Kɑnɑɑn. Yosep jɑngi Rïp, en ɑ yïe nyi kedhi yi tyëng-ɑ kɑ̈ɑ̈l pödhhi kömi piny bënn, o yïëye kinni thödhi gen ki byel. Kɑ nyiiwï Yosep kedh-ɑ yïe. Kɑ wɑ̈thi gen kuul gen piny kì bøle, gïti kɑ ɑ́nywɑ̈ddi wɑ̈thi gen ki piny. Yosep keny-ɑ ɑ́lidhe nyiiwɑ̈n, gï ɑ́ngije ceth, de ree nuti nyudh en gïn. Kɑ gï pyëje ki cwɑg mø teeg kinni, “Wu kɑ̈ɑ̈l-ɑ keny?” Alöggi gen kinni, “Wø kɑ̈ɑ̈l-ɑ Kɑnɑɑn. Wø ɑ́bï-ɑ be ngyew ki byel.” Yosep nuti pɑ̈nyø’ ngijø yi gen, ngö ge ɑ́ngij yi Yosep. Kɑ lɑ̈gg-ɑ ɑ́lɑ̈ge kɑ̈ge dööng pɑɑre. Kɑ nyiiwɑ̈n köbbe kinni, “Wu bɑ yïthhi piny. Wu ɑ́bï-ɑ be lidhi tung-ɑ nyødh pödhø.” Kɑ ge okööbø kinni, “Pɑth wuö! Bɑ̈nggí yɑb-ɑ gïncɑm yøw. Wø bɑ nyiimëëg bënn, wø pɑth ki yïthhi piny wuö, wø bɑ ji mø døøj.” Aköbbi gen yi Yosep kinni, “Pɑth, wu ɑ́bï-ɑ be lidhi tung-ɑ nyødh pödhi wøn, o liny tëër wun.” Akööb gen kinni, “Wø ɑ́bëëd wø bɑ nyiimëëg pyɑ̈rø wïdɑ́ryew, wøn ɑ́ wɑ̈ddi jɑl ɑ́kyel, ómï wøn ɑ́kyel ɑ́thøw. O nyel-ɑ thinh ɑ́döngi pɑc geki wïyi wøn.” Kɑ Yosep okööbø kinni, “Nɑ kɑ ɑ́kööbɑ ceth! Wu bɑ yïthhi piny. Wu órɑng kinni, yɑ ɑ́köngi ki nyingi rɑ̈dh kinni, wu pɑ kedh ɑnɑn, den-ɑ́ keny-ɑ óbëën ómï wun nyel-ɑ thinh keny, ɑ ókedh wun. Wiy dhɑnhø ɑ́kyel kì kelli wun kedhe be dwɑɑyii. Tyëng-ɑ döng ókor gïti keny-ɑ óyood kwøbbi wun kinni ge bɑ dyër, o ke pɑth gen ki dyër, rɑ̈dh ɑ kwömø, wu bɑ yïthhi piny.” Kɑ gï mɑge ki cyɑ̈ng ɑ́dɑ̈g. Kɑ ge cwööl wɑ̈g yi Yosep kì dɑ̈ɑ̈g cyɑ̈ng. Kɑ gï köbbe kinni, “Yɑ bɑ dhɑnhø me böggi Jwøk. Wu pɑ nɑ̈g keløg kwøbbi wun bɑ dyër. Wu ówiy yi yɑn kɑ per gïjø ɑ́kyel. Kipe nyodhi kinni wu bɑ ji mø døøj, ɑ́kyel kì kelli wun óbëëdø kì ød mɑg keny-ɑ ɑ́mïdhi wun, kɑ møg-ɑ kyeelø bënn kedhi gen be kɑ̈li byel, o ge yiel gen kɑ̈lli wun møg-ɑ ywɑj yi kɑ̈j. De muuj wun ómï wun nyel-ɑ thinh yɑn ceth, bene keny-ɑ óyïëyɑ kinni wu kømm-ɑ dyër, o wu cög wun wu pɑ nɑ̈g yi yɑn.” Kɑ ge oyïëyø. Kɑ ge okööbø kì ri gen keti gen kinni, “Ngee, ɑnɑn wɑ rɑng ɑ bɑng gïnrɑj men-ɑ ɑ́göggi ómïee yi wɑ, cɑni wɑnge ɑ́lidh yi wɑ keny-ɑ ɑ́kwɑjje wɑ kinni wiy, de wɑ nuti lïngø. Bene ɑ bɑnge pɑ̈dhi yi wɑ yij orɑng men ɑnɑn. Wɑ ɑ́cyen yi ómïee.” Kɑ Ruben okööbø kinni, “Wu ɑ́köbbɑ kinni nyelthinh ko nywɑl, de wu ɑ́dhɑ̈li lïngø! Anɑn cyënni nyelthinh ɑ́pɑ̈dhi kömee.” Kwøbb-ɑ kømmi yi gen olïngø yi Yosep bënn, de kwïj yi gen kinni ge di lïngø yi en, mɑ́ ge 'kööb-ɑ dhøg gen, o kwøbb-ɑ kwøb yi gen nyi løg-ɑ yi dhumi. O Yosep 'kööb-ɑ dhøg tyëng Rïp. Keny-ɑ ɑ́lidhii yi Yosep kinni bɑ men ywöngi kì bøli gen, ɑkedhe wɑ̈ye kun ywönge, e pɑ nenni. Keny-ɑ ɑ́døøg opɑ̈we piny, ɑdwööge yï gen. Akwɑnye Cimeøn kɑ ɑlɑthkerr köbbe kinni, “Twöj wun cingge.” Kɑ cingge twöj kì bøli gen. Kɑ jɑngi jøgwøg köbbi yi Yosep kinni, “Pɑ̈ng wun jɑmmi gen ki byel, kɑ ge thödhi ki gïn cɑɑm gen yöö.” Kɑ møgɑni órumø ki gwøgø. Kɑ nyiimëëgɑni jɑmmi gen cïb gen kömi ɑderri gen. Kɑ ge ókedhø. Kɑ nyel ɑ́kyel dhø kidhe pɑ̈de kipe kinni o thödhe ɑdere ki byel kì keny-ɑ ɑ́nïni yi gen kì kö yöö. Kɑ ngyënye yode kì wɑ̈thi byel. Kɑ óryeerø kinni, “Ngyënyyɑ ódöggi yɑn. Gen ɑ yij kidhø èn.” Kɑ dëlli gen ójuurø, kɑ ge okööbø ge óböggø kinni, “Á ngø ɑ göggi wɑ yi Jwøk ni men?” Keny-ɑ ɑ́wɑ̈dhi gen yï wïyi gen kì Kɑnɑɑn, ɑlwøb gen gïg-ɑ ɑ́cwöb bënn kinni, “Jɑngi Rïp ɑ́kööb ki wøn ki kwøb mø rijjø, kɑ wø myene kinni i wø bɑ yïthhi piny møg lyewwi pödhe. De wø ɑ́kyëëd kinni wø pɑth ki yïthhi piny, wø bɑ ji mø døøj. Wø ɑ́bëëd wø bɑ nyiimëëg pyɑ̈rø wïdɑ́ryew, wɑ̈ddi jɑl ɑ́kyel.” Kɑ jɑlɑni ólöggø kinni, “Bene yuu-ɑ óyodɑ wun èn, keløg wu bɑ ji mø døøj kidyër, ɑ́kyel kì kelli wun ódöng kì butɑ keny. Møgɑk bënn ókedhi be muuji byel kɑ̈lli wun møg-ɑ ywɑj yi kɑ̈j. Muuju yɑn ómï wun nyel-ɑ thinh. Bene keny-ɑ óyodɑ kinni wu pɑth ki yïthhi piny, de wu bɑ tyëngdøj. Ómï wun ódöggɑ wun, kɑ wu wiy o wu nyi ngëëw wun kì pönhï.” Keny-ɑ ɑ́kuny byel wɑ̈g kì yethi kidhhì, ɑyood ngyënyyi gen bënn, kɑ ge obwøgø geki wïyi gen bënn, keny-ɑ ɑ́lidh gen ngyëny. Aköbbi gen yi wïyi gen kinni, “Wu dwɑdd-ɑ lɑ̈ɑ̈nyi nyigɑ bënn? Yosep ɑ́lɑ̈ɑ̈ny, Cimeøn ɑ́lɑ̈ɑ̈ny, o ɑnɑn wu dwɑdd-ɑ kɑ̈li Ben Yɑmïn? Yɑ bɑ men nɑ̈g yi ywøg!” Kɑ Ruben wïye köbbe kinni, “Keløg Ben Yɑmïn pɑ döggɑ yïn, wɑ̈ddɑ gɑ ɑ́ryew ócuggø nɑ̈gø yi yïn. Cïb cingɑ, ódwöög yi yɑn.” De Yɑgob ɑ́kyëëd kinni, “Wɑ̈dɑ pɑ kedh ki wun. Ómen ɑ́thøw, o bɑ e kete ɑ ɑ́döng. O keløg e dɑ gïn kedhi ree kì yuu-ɑ kïdhu en, yɑ bɑ yu ni men, yɑ ceg kɑ nɑ̈gø yi rummì ki gööj wun.” Kɑ̈j ɑ́tëngi ki mendwøng kì Kɑnɑɑn. Keny-ɑ ɑ́thumi byel møg-ɑ ɑ́kɑ̈ɑ̈l kì Rïp kì gøl Yɑgob, kɑ Yɑgob wɑ̈dde köbbe kinni, “Døøg wun be ngëwø ki byel møg cɑm yi wɑ.” Aköbbii yi Yeudɑ̀ kinni, “Jɑlɑni ɑ́kyëëd ki menteg kinni, i wø koo wɑ̈dhi bøle, keløg ómï wøn pɑ kɑ̈l. Keløg e oörø yi yïn, wø ókedhi be ngëwwi yïn ki byel. De ke pɑ dwɑddií, wø pɑ kedh, mɑ́ jɑlɑni ɑ́kööb kinni i wø ko wɑ̈dhi bute, ke pɑ kɑ̈l wøn nyelthinh.” Kɑ Yɑgob okööbø kinni, “Yɑde ɑ muuju yɑn ki göj? Ede ɑ ɑ́köbbu en kinni dɑ ómï wun megø?” Alöggi gen kinni, “Jɑlɑni ɑ́pëggi be pyënyi wøn ki bëëdi gøl wøn kinni, ‘Wïyi wun nudd e onëënø? Dɑ ómï wun megø?’ O pyëjje ɑ́dwɑdd-ɑ løøgø ceth. Di bëëd e ngɑ̈nyi yi wøn kidï kinni ókööbø i kɑ̈ɑ̈l ómï wøn?” Kɑ Yeudɑ̀ wïye köbbe kinni, “Ör nyelthinh ki wøn, o wø jwɑn wøn dhwödhø. O cöge e bong ngɑn thøw yi kɑ̈j. Wëyɑ ómuujɑ kipe nyelthinh, ke di gïn cwöb. Yɑ ócungi kì kömi dhøgɑ ceth. Ke pɑ döggɑ en yïn ki tɑrø, kɑ yï ywøøg riɑ. Lidh, keløg wɑ pɑ di bëëd ki keny me bɑ̈ɑ̈r, ti wø rum kɑ̈nø ki byel tyel ɑ́ryew ɑnɑn.” Akööb wïyi gen kinni, “Keløg ɑ́ kinøw, muuj wun jɑlɑni ki jɑmmì møg pwøj wun en, yɑ̈bbu en ki nywøli oløg møg thwøwø, kí nyɑ møøw kïc, kí tugø geki benø, kí jɑmm-ɑ nyi kïdhi ri mulø. Kɑ ngyënyyi tyeli mɑl dwøøg wun. Kɑ wu kɑ̈ɑ̈d wun ki møg ni gen, mɑ́ wɑ kwïj wøw ki gïn-ɑ bɑ̈jjø. Kɑ̈l wun ómï wun, dhwödh wun ɑnɑn ceth. Jɑlɑni pyëwe ódwöög yi Jwøk Áyïmø, kɑ pyëwe ólɑ̈ɑ̈mø ki wun, kɑ wu dögge Ben Yɑmïn, geki ómï wun nyel-ɑ kyeelø. Keløg ɑ́ perɑ yøw, cɑgg nyigɑ thumi, ɑ́ ngø ɑ gwøgɑ?” Codhe, kɑ nyiimëëgɑni jɑmmi gen kwɑny gen, ɑ løg ngyënyyi tyeli mɑl, kí møg-ɑ kïdhi be ngyew, kí jɑmmi pwøj møg-ɑ muuj. Akedh gen geki Ben Yɑmïn. Keny-ɑ ɑ́wɑ̈dhi gen Rïp, ɑkïdhi gen bøli Yosep. Keny-ɑ ɑ́liidh Ben Yɑmïn kì kelli gen yi Yosep, ɑköbbe bɑ̈ng-ɑ mïdhi gøle kinni, “Kïdhí jøg gølɑ. Ge ócyɑ̈ɑ̈m ɑ kej ɑ́kyel ki yɑn dicyɑ̈ngtïn. Köbbí jɑlthɑl kinni tɑ̈ɑ̈de ki rïngø me gïïr. Yɑ óbï kì dicɑ̈ng.” Akɑ̈ɑ̈l gen yi jɑlɑni. Kɑ jɑlthɑl köbbe møg-ɑ ɑ́kwøb yi Yosep. Ge ɑ́kïdhi kɑl ge óböggø, ge okööbø ki pëthi gen kinni, “Wɑ kɑ̈ɑ̈l kɑ per ngyëny møg-ɑ ɑ́døøg kì yethi kidhhee cyɑ̈ng-ɑcɑ̀. Ge bɑ møg-ɑ ópɑ̈ɑ̈r kömee, kɑ ɑderree kwɑny gen. Kɑ wɑ gwøøg bɑ̈ngg yi jɑlɑni.” Kì ɑ́dyëddi kɑl, ɑköbbi gen jɑl-ɑ kɑ̈lli gen kinni, “Lïng jɑldwøng, wø ɑ́kwöngi ki bëën be ngyew ki gïncɑm cyɑ̈ng-ɑcinee. Kɑ kidhhi wøn yieb wøn kì kö yöö keny-ɑ ɑ́nïni yi wøn, kɑ ngɑɑn ngyënyye yode kì wɑ̈thi byelle; gen ceth ki kwɑnni gen, bong gïn tøøk kinni tek. Ngyënyyɑni ɑ́dwöög yi wøn. Wø ɑ́kɑ̈ni thyew ki ngyëny møg-ɑ óngëëw yi wøn ki gïncɑm. Ngɑn-ɑ dwøøg ngyënyyi wøn yethi kidhhì, kwïj yi wøn.” Kɑ bɑ̈ngɑni okööbø kinni, “Pëthi wun ko lïngi. Wu ko böggi. Jwøøg wun, jwøøg gøl wun, óbëëd ɑ́ en ɑ dwøøg ngyënyyi wun yethi kidhhi wun. Ngyënyyi wun ɑ́rum ki kwɑnyø yi yɑn.” Codhe, ɑkɑ̈ɑ̈le Cimeøn yï gen. Akïdhi nyiimëëgɑni ød yi bɑ̈ngɑni. Kɑ ge muuj ki pï møg lwøg gen tyelli gen. Kɑ ɑderri gen thödhi ki gïjø me cɑm yi gen. Kɑ jɑmm-ɑ ɑ́muuj gen Yosep, mɑ̈ɑ̈g gen ki pyëlø, o gï ómëggii keny-ɑ óbëëne kì dicɑ̈ng, mɑ́ ge ɑ́rum ki köbbø kinni ge ócyɑ̈mø kɑ en. Keny-ɑ ɑ́wɑ̈nhi Yosep kɑl, ɑkïdhi gen jɑmmɑni ød yïe. Kɑ wɑ̈thi gen kuul gen piny ki mendwøng kì bøle. Apyëje gïn mɑ yöd dëlli gen. Kɑ okööbø kinni, “Yɑ ɑ́köbbi yi wun i dɑ wïyi wun me bɑ yu, bëëd ɑ dï? Nudd e onëënø, o dële yööd?” Kɑ ge ólöggø kinni, “Bɑ̈ngí; wïyi wøn, nudd e onëënø.” Kɑ cøngi gen rum gen piny, ɑkuul gen wɑ̈thi gen piny kì bøle. Kɑ Yosep lïïdh-ɑ yï Ben Yɑmïn ɑkööbe kinni, “O nyel, bene en ómï wun, nyelthinh men-ɑ ɑ́kømmi yi wun? Yï ómïdhi yi Jwøk nyɑrɑ.” Kɑ Yosep ree gwɑre kì buti gen, kɑ jwɑn-ɑ øde be ywøg, mɑ́ yije ɑ́røy kɑ̀ nenne nyiimen. Kɑ óywöngø yi medi pyëwe. Keny-ɑ ɑ́rume ywøg, ɑlwøge nyinge, kɑ dwöög-ɑ keny-ɑ di gen. Acwøle gïncɑm. Yosep ɑ́cyɑ̈ɑ̈m ɑ wïj pɑ̈me kì wɑ̈ye, o nyiimen ying-ɑ wïj pɑ̈m-ɑ kyeelø. Tyëng Rïp møg-ɑ ɑ́ying ød ɑ́nëng ɑ wɑ̈yi gen, mɑ́ e bɑ ɑkerø, ge pɑ nyi cyɑ̈mø geki tyëng løøg nɑm. Nyiimëëgɑni, pɑ̈ɑ̈m gen ɑ́cïb e rwöm ki Yosep. Kɑ yɑɑgɑni cïb ge ówɑdø ki kö pɑ̈m, cɑg kì ri nyel-ɑ dwøng gïti ri nyel-ɑ thinh kì cyɑ̈n. Keny-ɑ ɑ́lidh gen pyël-ɑ ópyëël gen, kɑ ge ongɑ̈ngø yi møgɑni. Gïncɑm ɑ́ying-ɑ kömi pɑ̈m-ɑ di Yosep, o nyi kɑ̈ɑ̈l e ocïmmø kì bøli gen. Ben Yɑmïn bøle nyi cïb-ɑ gïncɑm me dwøng kibøli mø yɑɑg-ɑ kyeelø. Ge ɑ́cyɑ̈ɑ̈m kɑ ge omɑ̈dhø geki Yosep gïti kɑ ɑ́wïïn wɑ̈thi gen yi møgi oløg. Yosep jɑngi jøgwøg ɑ́köbbe kinni, “Kïdhí yethi jɑmm-ɑ ɑ́kɑ̈ɑ̈l yi jøgɑni ki byel møg-ɑ cuggi lwɑ̈ngø ki tyëddø yi ɑderri gen. Kɑ ngyënyyi gen cïb wɑ̈thi byel. Kɑ óthɑ̈ngɑ, óthɑ̈ng-ɑ bɑ ɑ́tegø kïdhí yij kidhi nyel-ɑ thinh geki ngyëny møge.” Kɑ møgɑni gwøg ni kɑ ɑ́kwøøb gen yi Yosep. Kì mwøl ceth, ɑwiy nyiimëëgɑni kedh gen ki ɑderri gen. Keny-ɑ ɑ́kɑl gen lɑ̈wø ki kɑɑldwøng, kɑ Yosep bɑ̈ng-ɑ mïdhi gøle köbbe kinni, “Rengí bɑng jøgɑni, opïïd gen kɑ ge pyëëj kinni, ‘Wude ɑ col wun gïndøj ki gïnrɑj? Á kipe ngø ɑ kwɑl wun óthɑ̈ngi ɑ́tegø mi wɑ̈ɑ? Bene gøn ɑ yije nyi mɑ̈ɑ̈dh yi en. En ɑ bɑ mi kwër kì yïe. Wu ɑ́göög ki orøg! Wu ócɑy ki cɑ́y mø døngø.’ ” Keny-ɑ ɑ́pïïd gen yi bɑ̈ngɑni, ɑkwøbe møgɑni. Alöggi gen kinni, “Yï kɑ̈n-ɑ́ɑ̀ keny ki kwøbb-ɑ ni møg? Yï wɑng-ɑ ngø jɑldwøng? Yïde ɑ kööb kinøw? Wø ceg-ɑ köngø kinni wø nuti göögø ki gïn ni menɑni. Yï ngɑ̈ny wøw kinni ngyënyy-ɑ ɑ́yod yi wøn kì wɑ̈thi byel ɑ́dögi wun yi wøn, ge ɑ́dwöög yi wøn kì piny Kɑnɑɑn. Dɑ́ per ngø cyee, ɑ kwɑ̈ddi wøn ki ɑ́tegø wɑlɑ̀ dhɑɑb gøl wöw? Lïng jɑldwøng, ngɑn-ɑ yïe óyoodií kì kelli wøn, ceg kɑ nɑ̈gø, o møg-ɑ kyeelø göög gen gɑ bɑ̈nggi wun.” Kɑ bɑ̈ngɑni okööbø kinni, “Yɑ ɑ́yïëy, de bɑ ngɑn-ɑ yïe óyodɑ óthɑ̈gi, ɑ ókwɑny yi yɑn ɑ́ bɑ̈ngɑ. Møg-ɑ kyeelø pɑ mɑg.” Codhe, kɑ jɑmmi gen jwɑn gen ki tïng piny kì kömi ɑderr. Kɑ dhøggi kidhhi gen jwɑn gen ki pɑ̈dø. Kɑ bɑ̈ng Yosep ócɑ̈gø ki yɑb mɑ̈ɑ̈dh. Ácɑ̈gi kɑ jɑmmi nyel-ɑ dwøng gïti ri jɑmmi nyel-ɑ thinh. Kɑ óthɑ̈gi yode kì yij kidhi Ben Yɑmïn. Kɑ nyiimëëgɑni obwøgø ki mendwøng, kɑ ógudhi gen pyëëd gen yi rɑ̈ji pëthi gen. Adwøøg gen jɑmmi gen kömi ɑderr, kɑ ge døøg-ɑ kɑɑldwøng. Keny-ɑ ɑ́wɑ̈dhi Yeudɑ̀ gøl Yosep geki nyiimen, Yosep ɑ́yuud yi gen e nudd e ying-ɑ kɑl. Kɑ wɑ̈thi gen kuul gen piny kì bøle. Kɑ Yosep okööbø kinni, “Á kipe ngø ɑ kwɑl wun óthɑ̈ngɑ? Kwïj yi wun kinni yïɑ dɑ tegø men yodɑ jɑmm-ɑ bɑ ɑkɑnn?” Kɑ Yeudɑ̀ ólöggø kinni, “Á ngø ɑ kwøb yi wøn wuö? Wø ópëm ɑ dï? Ri wøn óyiel yi wøn kidï? Bɑ̈jji wøn ɑ́nyodh yi Jwøk. Wø bɑ bɑ̈nggí bënn, pɑth ki nyel-ɑ́ yïe ɑ́yood óthɑ̈gi kete.” Yosep ɑ́kööb kinni, “Pöy! Pɑ cuggi, yɑ pɑ dwɑddi wun wu bënn! Ngɑn-ɑ yïe ɑ́yood óthɑ̈gi kete, en ɑ mɑg yi yɑn ɑ́ bɑ̈ng.” Kɑ Yeudɑ̀ kɑl-ɑ nyegi buti Yosep, ɑkööbe kinni, “Yɑ kwɑjj-ɑ yïn wuö, wiy yɑ kwøbɑ møg-ɑ pyëwɑ. Pyëwí ko rënyi ki yɑn, yï pɑ̈r ki rɑ̈dh ceth. Wuö, wø ɑ́pyëj yi yïn cøn, kinni, dɑ wïyi wun wɑlɑ̀ ómï wun megø? Kɑ wø okööbø kinni, wïyi wøn nud de bɑ yu, ki ómï wøn me thiinh, ɑ́nywøl e wïyi wøn rum yöø. Ómï nyelɑni ɑ́thøw, o bɑ e kete ɑ nud kì yij meye. Mɑɑr yi wïye ki mendwøng. Kɑ wø köbbí wuö kinni, ‘Kɑ̈ɑ̈l wun en keny o lidhɑ.’ Alöggi wøn kinni, ‘Nyelthinh wïye pɑ cuggi wiyø yi en, ke wiye gøn, bɑ men thøw.’ Kɑ yï okööbø kinni, ‘Wu pɑ wɑ̈nhi bølɑ këti, keløg nyelthinh pɑ bï ki wun.’ “Keny-ɑ ɑ́døøg wøn yï wïyi wøn, kɑ löbbi wøn møg-ɑ ɑ́kwøb yi yïn. Codhe, keny-ɑ ɑ́thumi byel, ɑköbbe wøn i dwɑ̈nni wøn ki byel. Akööb wøn kinni, ‘Wø pɑ kedh, kipe wø pɑ cuggi yïëyø o wø kedhi wøn bøli jɑlɑni, keløg ómï wøn nyelthinh pɑ kedh thyew.’ Kɑ wïyi wøn okööbø kinni, ‘Ngɑ̈nyi yi wun kinni cyëgɑ Rɑceel, yɑ ɑ́nyölle’ wɑ̈dd ɑ́ryew keti gen. Yɑ ɑ́rum ki wiy piny yi ɑ́kyel, ɑ́cɑm yi lɑ̈ɑ̈y pɑ̈l, mɑ́ e nuti liidh yɑn kër-ɑ ɑ́kedhe. Keløg men okɑ̈ɑ̈lø yi wun ɑnɑn, kɑ dɑ gïn kedhi ree, yɑ bɑ yu ni men, yɑ ceg kɑ nɑ̈gø yi rummì.” Reb ki kinni yɑ ɑ́böyi kinni wëyɑ ómuujɑ kipe nyelthinh ke di gïn cwöb, wïyɑ ɑ́köbbɑ kinni, ‘Keløg nyelthinh pɑ döggɑ yïn ki tɑrø, kɑ yï ywøøg riɑ.’ Anɑn wuö, yɑ óbëëdø kì keny yɑn ɑ́ kej nyelthinh, kɑ wiy kedhe yï wïye geki nyiimen. Yɑ ókedhi yï wïyɑ kidï, keløg nyelthinh pɑ døg? Pyëwɑ pɑ løg me med ki bëëni gïnrɑj ni men kömi wïyɑ!” Kɑ Yosep pyëwe ónyönhø ki mendwøng keny-ɑ ɑ́lïnge kwøbbi Yeudɑ̀, kɑ gø yode kinni bɑ men ywöngi, o nuti dwɑddø yi en kinni o lidh yi tyëng Rïp e óywöngø. Aköbbe bɑ̈ng-ɑ mïdhi gøle kinni, “Kedhu wɑ̈g bënn, kɑ yɑ wiy wun wøki wëll møg.” Keny-ɑ ɑ́döng gen keti gen, kɑ Yosep ree köbbe nyiimen, e 'kööb-ɑ dhøg gen. Aywönge kɑ genge lïngi yi tyëng Rïp kì wɑ̈g, kɑ wöödø wɑ̈dh-ɑ gøldwøng. Yosep nyiimen ɑ́köbbe kinni, “Bene yɑn Yosep. Wïyee nudd e onëënø?” De keny-ɑ ɑ́lïngi møgɑni yi nyiiwɑ̈n, ge ɑ́ceg bwøgø ki mendwøng, kɑ ge ódhɑ̈lø löggø. Aköbbi gen yi Yosep kinni, “Yɑ kwɑjj-ɑ wun, kɑlu nyïngi keny.” Kɑ ge nyeg-ɑ bute. Kɑ okööbø kinni, “Bene yɑn Yosep, ómï wun, nyel-ɑ ɑ́ngëwwu tyëng-ɑ ɑ́kɑ̈ɑ̈lii Rïp. Anɑn pëthi wun ko rɑ̈ɑ̈m. Ri wun ko cɑyyi wun kipe kɑ ɑ́ngeew wun yɑn. Bɑ Jwøk kidyër ɑ ɑ́ör yɑn bøli wun be yieli ji. Men bɑ ryeew runni kɑ̈j kì pönhï, runn ɑ́bïj møøgø nudd ge obëënø, runn-ɑ óbong byel møg-ɑ ócyeg kì yethi gen. Yɑ ɑ́ör bøli wun yi Jwøk ki yuu-ɑ dhɑ̈li gɑmø yi wɑ̈thee èn, kɑ per kinni o wu bødh wun, wuki nyigi wun. Kɑ̀ bëëde kinøw, pɑth ki wun, de bɑ Jwøk ɑ ɑ́kɑ̈ɑ̈l yɑn pönhï. Kɑ yɑ cïbe mɑl kibøli jyɑ̈ggi rɑ̈dh bënn, bene yɑn jɑngi Rïp bëne. “Anɑn jwɑni wun yï wïyɑ, kɑ köbbu kinni, bene møg-ɑ ɑ́kwøb yi wɑ̈dí Yosep ek: ɑ́kööb kinni: ‘Jwøk yɑ ɑ́gwøge yɑn ɑ́ jɑngi Rïp bëne; jwɑn bëën yïɑ, yï ko cwööng. Wu ócuggø bëëdø kì myërri Göcen, keny-ɑ cuggi wun ki bëëdø wu cyɑ̈gi ki yɑn, wuki nyigí, kí kwɑrrí, kí dyëgi wun, kí dhögi wun, kí jɑmmi wun møg-ɑ kyeelø bënn. Keny-ɑ óying wun Göcen, wu ócuggø korø yi yɑn. Nudd e dɑ runn ɑ́bïj mø kɑ̈j, o yɑ pɑ dwɑddi kinni o wu thøw wun yi kɑ̈j, wuki kɑ̈lli wun kí dhögi wun bënn.’ ” Kɑ Yosep okööbø kinni, “Anɑn wu bënn, kí yïn thyew Ben Yɑmïn, ɑ́lidh yi wun kinni yɑ bɑ Yosep. Köbbu wïyɑ, kinni ɑ́ tegø me ni ngø ɑ yïɑ kì Rïp keny! Kɑ köbbu jɑmm-ɑ ɑ́lidh yi wun bënn.” Kɑ ómen Ben Yɑmïn dööbe kööre e óywöngø. Ben Yɑmïn ɑ́ywöngi thyew keny-ɑ ɑ́dööbii kɑ̈w yi ómen. Codhe, e pïi nyinge nuti pooj en, ɑcɑ̈ge ki döbbi nyiiwɑ̈n, kɑ gï nuume bënn. Codhe cyee, ɑcɑ̈gi nyiiwɑ̈n ki kwøb ki en. Keny-ɑ ɑ́wɑ̈dhi wöödø gøldwøng, kinni i nyiimï Yosep bëënø, kɑ rɑ̈dh pyëwe ómïnø ki mendwøng geki jøg-ɑ jɑgg. Kɑ Yosep köbbi yi rɑ̈dh kinni, “Köbbí nyiimyëw cïb gen jɑmmi gen kömi ɑderr, kɑ ge døøg gen piny Kɑnɑɑn. Kɑ̈ɑ̈l gen wïyi gen geki kɑ̈lli gen, kɑ ge dwöög gen keny. Ge ómëggɑ piny men-ɑ pëddi døøjø kì Rïp. O ge óyïddi ki gïgcɑmm mø gïïr. Köbbí gen kɑ̈ɑ̈d gen ki yɑ̈ɑ̈th møg-ɑ ókɑ̈ɑ̈l mɑ̈nni gen kí nyigi gen møg-ɑ thønhø kí wïyi gen. Pëthi gen ko lïngi kipe jɑmmi gen møg-ɑ ódhɑ̈li wɑ̈nhø, mɑ́ jɑmm-ɑ døj bënn kì Rïp óbëëdø gɑ mø gen.” Wɑ̈ddi Yɑgob ɑ́göög ni kɑ ɑ́köbbi gen ceth. Ge ɑ́nëngi ki yɑ̈ɑ̈th yi Yosep ni kɑ ɑ́kööb rɑ̈dh, kɑ ge thödhi ki gïg cɑɑm gen yöö. Kɑ ge nëngi yi en ki ógudh møg-ɑ ówil gen ógudh-ɑ rug yi gen kì kö yöö. De Ben Yɑmïn ɑ́mëgge’ ógudh ɑ́bïj, kí ngyëny ɑ́tegg miy ɑ́dɑ̈g. Kɑ wïye öde ki ɑderr pyɑ̈rø, møg pyëjji ki yɑ̈ɑ̈th, kömi gen dɑ jɑmm-ɑ døj mø Rïp. Kí pyɑ̈rø møøgø møg kömi gen di ɑ́bwög, kí ópùni ɑ́bwög, kí gïg møøgø møg-ɑ ócɑɑm yöö. Aöre nyiimen yöö, kɑ gï köbbe kinni, “Wu ko wër kì kö yöö.” Kɑ ge odhwödhø kì Rïp, ge døøg-ɑ yï wïyi gen kì piny Kɑnɑɑn. Kɑ ge wɑ̈dh-ɑ kɑɑl gen. Aköbbi gen wïyi gen kinni, “Yosep nudd e onëënø! En ɑ bɑ jɑngi Rïp bëne!” Kɑ Yɑgob ongɑ̈ngø, kɑ ódhɑ̈lø yïëyi kwøbbi gen. De keny-ɑ ɑ́köbbii kwøbb-ɑ ɑ́köbbi gen yi Yosep bënn, kí kɑ ɑ́lidhe yɑ̈th-ɑ pyejji yi ɑderr møg-ɑ ɑ́ör yi Yosep gɑ møg kïdhii Rïp, ɑdwöög pyëwe cyee. Kɑ okööbø kinni, “Ngøø, de wɑ̈dɑ Yosep nud e onëënø! Yɑ kedh-ɑ be lidhii kɑ̈ng-ɑ nuti thøw yɑn.” Isrɑil jɑmme ɑ́cønge bënn kɑ kedh-ɑ Bircebɑ̀. Kɑ Jwøøg wïye Isɑɑk mɑlle kì kunɑni, ɑngɑ̈ɑ̈de ki dhög gɑ gëdhhì. Aköbbi Isrɑil yi Jwøk kì yethi lɑ̈g kì wɑ̈r kinni, “Yɑgob, Yɑgob.” Kɑ ólöggø kinni, “Yɑn èn.” Akööb Jwøk kinni, “Yɑ bɑ Jwøøg wïyí, kedhí Rïp. Kwɑrrí ókuun yi yɑn kì kunɑni, kɑ ge ogöögø ki pödhø me dwøng. Wɑ ókedhi Rïp kyeel. Kwɑrrí ódwöögɑ piny men. Yosep óbëëd e ying-ɑ butí keny-ɑ óthøw.” Kɑ Yɑgob odhwödhø kì Bircebɑ̀, en, kí othønhø, kí tyëng-ɑ mɑ̈nn. Ge ɑ́cïb yethi yɑ̈ɑ̈th møg-ɑ ɑ́ör yi rɑ̈ɑ̈dh Rïp gɑ møg-ɑ ókɑ̈l gen. Dhög kí dyëg, kí jɑmm-ɑ ɑ́lem yi gen kì piny Kɑnɑɑn, ɑ́kïdhi Rïp yi gen. Yɑgob ɑ́kedhi Rïp geki gøle bëne, Wɑ̈dde, kí kwɑrre, kí nyige møg-ɑ cwøw, kí kwɑrre møg-ɑ mɑ̈nn, ge ɑ́kedh bënn. Tyëng gøl Isrɑil møg-ɑ ɑ́kedhi Rïp ki en bɑ, wɑ̈de nyel-ɑ dwøng, ɑ løg Ruben, kí wɑ̈ddi Ruben, Aɑnök, Pɑlu, Ëdhrön kí Kɑrmì. Cimeøn kí wɑ̈dde, Yɑmuel, Yɑmïn, Oɑ̈ɑ̈d, Yɑkin, Dhoɑr, kí Cɑul wɑ̈d nyɑɑr Kɑnɑɑn. Leebì kí wɑ̈dde, Gercön, Kɑ̈ɑ̈th kí Merɑrì. Kí wɑ̈ddi Yeudɑ̀, Celɑ̀, Peredh kí Dherɑ̀. Wɑ̈ddi Yeudɑ̀ ɑ́ryew, ɑ løg Er kí Onɑ̈n, ge ɑ́thøw kì piny Kɑnɑɑn. Wɑ̈ddi Peredh bɑ Ëdhrön kí Amul. Kí wɑ̈ddi Isɑkɑr, Tölɑ̀, Puɑ̀, Yɑcub kí Cimrön. Kí wɑ̈ddi Dhebulun, Sered, Elön kí Yɑliil. Møgɑk bɑ wɑ̈dd-ɑ ɑ́nyölli Yɑgob yi Leɑ̀ kì Töör Arɑm, kɑ onywølø ki nyɑre thyew me cwøl ɑ́ Dïnɑ̀. Kwɑrri Yɑgob møg-ɑ kɑ̈ɑ̈l ri Leɑ̀, kwɑnni gen bënn bɑ pyɑ̈r ɑ́dɑ̈g wïdɑ́dɑ̈g Kí wɑ̈ddi Gɑd, Dhepön, Agì, Cunì, Idhbön, Erì, Aröd, kí Arelì. Kí wɑ̈ddi Aceer, Imnɑ̀, Icbɑ̀, Icbì, Beriyɑ̀ kí nyimï gen Serɑ̀. Wɑ̈ddi Beriyɑ̀ bɑ Keber kí Mɑlkiel. Pyɑ̈rø wïdɑ́bïkyel møgɑk bɑ kwɑrri Yɑgob møg-ɑ kɑ̈ɑ̈l ri Dhilpɑ̀, bɑ̈ng-ɑ dhɑjø men-ɑ ɑ́muuj yi Lɑbɑn e nëng-ɑ nyɑre Leɑ̀. Wɑ̈ddi Rɑceel bɑ ɑ́ryew, Yosep kí Ben Yɑmïn. Kɑ Yosep nyöddi ki wɑ̈dd ɑ́ryew, Mɑnɑsè kí Eprɑim, yi Asenɑth nyɑɑr Pøtiperɑ̀, ókwëri On. Kí wɑ̈ddi Ben Yɑmïn bɑ Belɑ̀, Becer, Acbel, Gerɑ̀, Nɑɑmɑn, Ekì, Röc, Mupïm, Upïm kí Ard. Pyɑ̈rø wïdɑ́ngwen møgɑk, bɑ kwɑrri Yɑgob møg-ɑ kɑ̈ɑ̈l ri Rɑceel. Dɑn kí wɑ̈de Ucim. Kí wɑ̈ddi Nɑptɑlì, Yɑdhiil, Gunì, Yedher, kí Cilem. Ábïryew møgɑk bɑ kwɑrri Yɑgob møg-ɑ kɑ̈ɑ̈l ri Bilɑ̀, bɑ̈ng-ɑ dhɑjø men-ɑ ɑ́muuj yi Lɑbɑn e nëng-ɑ nyɑre Rɑceel. Kwɑnni møg-ɑ ceg bëëdø gɑ kwɑrri Yɑgob, møg-ɑ ɑ́kedhi Rïp, bɑ pyɑ̈r ɑ́bïkyel wïdɑ́bïkyel. Mɑ̈nni wɑ̈dde pɑth ki ɑkwɑn. Wɑ̈dd ɑ́ryew ɑ ɑ́nywøl yi Yosep kì Rïp. Gøl Yɑgob kɑ̀ rëbe bëne, kì bøli keny-ɑ ɑ́dɑ̈ggi gen Rïp, gwøg-ɑ pyɑ̈r ɑ́bïryew. Kɑ Yɑgob Yeudɑ̀ öre bøle be cwøli Yosep, o bëe be yïddø ki gen keny-ɑ ɑ́wɑ̈nhi gen Göcen. Kɑ Yosep pëgg-ɑ yij yɑ̈ye men-ɑ nyi pyejji yi kyënyì. Kɑ kedh-ɑ Göcen be yïddø ki wïye. Keny-ɑ ɑ́cyɑ̈nge ki wïye, ɑpɑ̈ɑ̈re piny kì yij yɑ̈y, kɑ reng-ɑ yïe, kɑ cingge myeene mune, kɑ óywöngø ki keny me bɑ̈ɑ̈r. Kɑ Yɑgob Yosep köbbe kinni, “Cɑgg yɑ thøw ɑnɑn, pyëwɑ med kɑ ɑ́rumɑ ki lidhi yïn. Kɑ yod yi yɑn kinni yï nudd yï onëënø.” Kɑ Yosep nyiimen geki gøl wïye bëne köbbe kinni, “Yɑ dwɑdd-ɑ kedhø, o rɑ̈dh köbbi yi yɑn kinni, nyiimïɑ geki gøl wïyɑ bëne møg-ɑ ɑ́bëëd kì Kɑnɑɑn, ge ɑ́bï yïɑ bënn. Óköbbi yi yɑn kinni wu bɑ tyëngkwɑ̈yø, wu ɑ́bï wu kwøll-ɑ dhögi wun ki dyëgi wun. Keny-ɑ ócwøøl wun yi rɑ̈dh, kɑ wu pyëj yi en kinni gwøøg wun bɑ ngø? Köbbu en ceth kinni gwøøg wøn bɑ kwɑ̈yø ki dyëg geki dhög kër-ɑ ɑ́pïïdh wøn, ni kɑ ɑ́bëëd kweyyi wun ceth. Keløg e óköbbi yi wun kinøw, wu ówiy yi en, o wu bëëd wun kì Göcen.” Møgɑni ɑ́kwøb yi Yosep e ngɑ̈ny wøw kinni tyëng Rïp pɑ nyi dwɑddi bëëdø kì kej ɑ́kyel ki tyëngkwɑ̈yø. Codhe, kɑ Yosep ókɑ̈bbø ki ɑ́bïj kì kelli nyiimen, ɑkïdhe gïn bøli rɑ̈dh, ɑkööbe kinni, “Wïyɑ geki nyiimïɑ ge ɑ́bï kì piny Kɑnɑɑn, kí dhögi gen kí dyëgi gen, kí jɑmmi gen bënn. Ge ying-ɑ Göcen ɑnɑn.” Anyudhe nyiimen rɑ̈dh. Apyëëj gen yi rɑ̈dh kinni, “Gwøøg wun bɑ ngø?” Kɑ ge okööbø kinni “Wø bɑ tyëngkwɑ̈yø wuö, ni kɑ ɑ́bëëd kweyyi wøn. Wø ɑ́bï-ɑ be bëëdø kì pönhï, mɑ́ kɑ̈j rɑɑj kì piny Kɑnɑɑn. Dhögi wøn ki dyëgi wøn ɑ́jɑd thyew ki lum men cɑm yi gen. Wø kwɑjj-ɑ yïn, wiy wø bëëd wøn kì Göcen.” Aköbbi Yosep yi rɑ̈dh kinni, “Anɑn kɑ ɑ́wɑ̈nhi wïyí geki nyiimyëw, piny Rïp bɑ mi gen. Wiy ge bëëd gen kì Göcen. Bene en keny-ɑ døøj kì yij pödhø. Kɑ keløg e dɑ ji mø ngɑ̈ny mïdhø kidøøj kì kelli gen, cïb dhögɑ cinggi gen.” Codhe, kɑ Yosep wïye kɑ̈ɑ̈le, ɑkïdhe gøn bøli rɑ̈dh. Kɑ rɑ̈dh kwëng yi Yɑgob. Kɑ pyëj yi rɑ̈dh kinni, “Runní bɑ ɑ́dï?” Alöggi Yɑgob kinni, “Yïɑ dɑ runn miyø kí pyɑ̈r ɑ́dɑ̈g, yɑ owïïnø ki dhögɑ geki dyëgɑ, runnɑ ceggø, o yɑ ɑ́rɑngi kì yethi gen. Pɑ pɑ̈r ki runn-ɑ́ nyi tyëg yi kweyyɑ.” Kɑ rɑ̈dh cigi kwëngø yi Yɑgob, codhe kɑ ókedhø. Kɑ Yosep wïye geki nyiimen cïbe piny kì Rïp. Gï ɑ́thödhe ki jɑmm-ɑ døj bënn. Kɑ ge ogudø ki kɑɑl kì Rɑmsis, ni kɑ ɑ́kwøbii yi rɑ̈dh. Yosep nyiimen ɑ́thödhe ki gïgcɑmm geki kɑ̈lli gen, kí ji-ɑ ɑ́kɑ̈lli yi gen bënn, kí møg-ɑ thønhø, bong ngɑn di gïjø mɑ ɑ́jɑ̈ddii. Kɑ̈j ɑ́bëëd e teeg, bong gïncɑm me nud kì keny megø. Kɑ tyëng Rïp geki tyëng Kɑnɑɑn ónyönhø yi kɑ̈j. Kenyi bëën ji be ngyew ki byel, ngyënyy-ɑ ngëëw yi gen nyi ceg kɑ cøngø yi Yosep bënn, kɑ gï nyi kïdhe gøldwøng. Keny-ɑ ɑ́thumi ngyëny kì piny Rïp geki Kɑnɑɑn, ɑbëën tyëng Rïp yï Yosep, kɑ ge okööbø kinni, “Thödhí wøn ki gïncɑm, wø ko wëggí thøø. Yiel wøn! Ngyënyyi wøn ɑ́thumi.” Alöggi Yosep kinni, “Kɑ̈ɑ̈l wun dhögi wun, ge ówil yi yɑn ki byel, keløg ngyënyyi wun thumø.” Codhe, kɑ dhögi gen muuj gen Yosep. Møøgø ɑ́kɑ̈ɑ̈l-ɑ kyënyì, kí dyëg ɑ́tegg kí römm, kí ɑderr. Runɑni ɑ́tyëg yi gen ge cɑm-ɑ byell-ɑ ɑ́wiil jɑmmi gen. Keny-ɑ ɑ́thumi runɑni, ɑbëën gen yïe kì run-ɑ kyeelø, ɑkööb gen kinni, “Bong gïn kɑ̈nni yïn yi wøn wuö, ngyënyyi wøn ɑ́thumi, o dhög kí lɑ̈yy-ɑ kyeelø bɑ møgí bënn. Bong gïjø mɑ ɑ́döng me cuggi mëggi yïn, den-ɑ́ wøn ki dëlli wøn, kí pwödhhi wøn. Wø ko wëggí thøø. Yiel wøn! Pwödhhi wøn ko wëggi döngi piny. Ngew wøn, wøki pwödhhi wøn. Wø óbëëdø wø bɑ bɑ̈nggi rɑ̈dh. O pwödhhi wøn óbëëdø gɑ møge. Thödhí wøn ki byel møg cɑm, ki köödh møg kɑ̈g yi wøn, kì yethi pwödhhi wøn.” Kɑ Yosep piny Rïp bëne ngewe, kɑ ogöögø ki mi rɑ̈dh. Yosep ji bënn ɑ́gwøge gɑ bɑ̈nggi rɑ̈dh, cɑg kì tuung gïti tung-ɑ kyeelø kì piny Rïp. Pìnyi ókwër ɑ ɑ́cög ge nuti kwɑɑny en keti gen, mɑ́ ókwër ɑ́bëëd ge nyii thödhø ki gïncɑm yi rɑ̈dh, bene ɑ cög pìnyi gen nuti ngeew gen. Kɑ ji köbbi yi Yosep kinni, “Álidh yi wun? Wu ɑ́ngëwwɑ rɑ̈dh, wuki pìnyi wun bënn. Kwɑnyu köödh møg, kɑ pwödhhi wun kɑ̈g wun. Kì bøli keny-ɑ ókɑɑj byel, pɑ̈ngu gen gɑ bud ɑ́bïj, kɑ budø ɑ́kyel nyi mëggi rɑ̈dh. Møg-ɑ döng ógwøøg köödh kí gïncɑm yi kɑ̈lli wun.” Kɑ ge okööbø kinni, “Wëyi wøn ɑ́yiel yi yïn, wø ɑ́mïdhi yi yïn kidøøj wuö. Wø ɑ́yïëy, wø bɑ bɑ̈nggi rɑ̈dh.” Kɑ cïb ɑ́ cigg yi Yosep kinni, nyi mëggi bïïj buddi byel rɑ̈dh. Ciggɑni nudd ge ogöögø dicyɑ̈ngtïn. Pwödhhi ókwër keti gen ɑ ɑ́döng ge pɑth ki mø rɑ̈dh. Gøl Isrɑil ɑ́bëëd kì Göcen kì Rïp. Ge ɑ́kɑ̈ri kì kunɑni, kɑ kwɑnni gen óngënyø ki mendwøng. Yɑgob ɑ́bëëd kì Rïp ki runn pyɑ̈rø wïdɑ́bïryew, gïti kɑ ɑ́göög runne gɑ miyø kí pyɑ̈r ɑ́ngwen wïdɑ́bïryew. Keny-ɑ ɑ́cyɑ̈ngi kej thøwe, ɑcwøle wɑ̈de Yosep, kɑ gø köbbe kinni, “Cïb cingí thɑ rɑ̈mɑ, kɑ yï köngí ki mendwøng kinni, yɑ pɑ kony yi yïn kì Rïp. Yɑ dwɑdd-ɑ koony keny-ɑ ɑ́koony wëëgɑ. Kïdhí yɑn wɑ̈g kì pönhï, kɑ yɑ koony kun-ɑ ɑ́koony gen.” Kɑ Yosep okööbø kinni, “Møg-ɑ ɑ́kwøb yi yïn ógwøg yi yɑn.” Kɑ okööbø kinni, “Köngí kì bølɑ.” Kɑ Yosep óköngø kì bøle. Kɑ Yɑgob Jwøk mɑlle, e obuddø kì wïj pyëne. Kɑ Yosep muuj wöödø cyɑ̈ng megø, kì cyɑ̈ɑ̈n piny kinni, “Wïyí ɑ́cöög piny ki rɑ̈ɑ̈m dële.” Kɑ wɑ̈dde, Eprɑim geki Mɑnɑsè kwɑnye, kɑ ge kedh-ɑ be këëmi Yɑgob. Keny-ɑ ɑ́köbbi Yɑgob kinni wɑ̈de Yosep bëën be lidhii, kɑ ree nyɑge, ɑdhwödhe mɑl kì yij pyën. Kɑ Yosep köbbi yi Yɑgob kinni, “Jwøk Áyïmø, ɑ́bï yïɑ kì yethi lɑ̈g, keny-ɑ ɑ́yingɑ Ludh kì piny Kɑnɑɑn, kɑ yɑ gyëdhe. Yɑ ɑ́köbbe kinni, ‘Yï ónëngi yi yɑn ki nywøl mø gïïr, o kwɑrrí göög gen ki pödhh mø gïïr, piny men ómëggɑ kwɑrrí gïti ɑtheer.’ “Yosep, wɑ̈ddí ryeet møg-ɑ ɑ́nywøl kì Rïp, yɑ nuti wɑ̈nhi keny, bɑ møgɑ, ɑ løg Mɑnɑsè geki Eprɑim, ge bɑ wɑ̈ddɑ ceth ni Ruben geki Cimeøn. Ke di wɑ̈ddí møøgø, ge pɑ cölli yɑn, ge pɑ lɑ̈gi ki gïïpiny kì yïɑ, de ge óyïd-ɑ́ɑ̀ bɑng Eprɑim geki Mɑnɑsè. Yɑ göögø kinøw kɑ per meyí Rɑceel. Yɑ ɑ́ywöngi ki ywøng teg keny-ɑ ɑ́thøwe kì piny Kɑnɑɑn, kì buti Eprɑtɑ̀, yɑ dwöög ɑ Misøpøtɑmiyɑ̀. Kɑ konyɑ kì kenyɑni, kì tøg yuu-ɑ kedhi Eprɑtɑ̀.” (Eprɑtɑ̀ cwølli ɑnɑn ɑ́ Betleem.) Yɑgob keny-ɑ ɑ́lidhe wɑ̈ddi Yosep, ɑpëjje kinni, “Á møg ek?” Alöggi Yosep kinni, “Ge bɑ wɑ̈ddɑ møg-ɑ ɑ́gëdhhi yɑn yi Jwøk kì piny Rïp keny.” Kɑ Yɑgob okööbø kinni, “Kɑ̈ɑ̈l gen butɑ, o ge mëggɑ gyëdh.” Yɑgob nyinge pɑ nëënø kidøøj yi döng, nyinge ceg-ɑ dhïïdhø. Kɑ yɑnythønhø nyiig bute yi Yosep. Kɑ gï dööbe kööre, ɑnuume gïn. Aköbbi Yosep yi Isrɑil kinni, “Yɑ ɑ́rømm-ɑ kinni yï rum thøø, o yï pɑ lidhɑ këti. Lidh, ɑnɑn Jwøk yɑ ɑ́nyudhe nyigí.” Kɑ ge kɑl ki nyiig cyɑ̈n yi Yosep kì ri Yɑgob. Kɑ wïje kuule piny kì bøli wïye, gïti kɑ ɑ́nywɑ̈ddi wïje ki piny. Yosep Eprɑim ɑ́cïbe wïj cɑɑm Yɑgob, kɑ Mɑnɑsè cïbe wïj kyëje. De Yɑgob cingge ɑ́bɑ̈ɑ̈ne, kɑ cingi kyëje cïbe wïj Eprɑim, ngö e bɑ en ɑ thinh. Kɑ cingi cɑɑme cïbe wïj Mɑnɑsè, en ɑ nyeldwøng. Akwënge Yosep geki wɑ̈dde kinni, “Yɑnythønhø møg ógyëdh yi Jwøng-ɑ́ bøle ɑ́cyɑ̈dhi yi wëëgɑ, Abrɑhɑm geki Isɑɑk. Ge ógyëdh yi Jwøng-ɑ ɑ́kor yɑn kër-ɑ ɑ́wönɑ yɑ thiinh gïti ɑnɑn. Wiy wëywön-ɑ ɑ́yiel yɑn kì yethi rɑj bënn, kore gen. Wiy nyingɑ kí nyingi wëëgɑ, Abrɑhɑm kí Isɑɑk cungi gen kì kömi gen. Wiy ge yïddi gen ki wɑ̈dd, kí kwɑrr mø gïïr.” Yosep pyëwe ɑ́rënyi keny-ɑ ɑ́lidhe wïye, e cingi kyëje cïb en wïj Eprɑim. Kɑ cingi wïye mɑɑge, gø cïbe’ wïj Mɑnɑsè. Aköbbe wïye kinni, “Pɑth, dwöög cingí tuung wïyø, nyeldwøng èn, cïb cingi kyëjí wïje.” Kɑ wïye óbɑ̈nyø ɑkööbe kinni, “Ngɑ̈nyi yi yɑn; ngɑ̈nyi yi yɑn wɑ̈dɑ. Kwɑrri Mɑnɑsè ógöögø ki pödhø me dwøng. De gøl ómen nyelthinh ógöögø ki pödhh mø døngø, óbëëd e dwøng kibøle.” Codhe, ɑkwënge gïn kì cyɑ̈ngɑni kinni, “Kwɑrri Isrɑil ócwøl-ɑ nyingi wun kenyi kwɑ̈jji gen ki gyëdh. Ge ókwɑ̈jji kinni, ‘Yï ógyëdh ni Eprɑim geki Mɑnɑsè.’ ” Kinøw, Yɑgob Eprɑim ɑ́cïbe bøli Mɑnɑsè. Kɑ Yosep köbbi yi Yɑgob kinni, “Ni kɑ̀ nëën, yɑ ɑ́cyɑ̈ngi ki thøø, de yï ókøny yi Jwøk, kɑ yï dwøøge piny kweyyi wun. Bɑ yïn, pɑth ki nyiimyëw ɑ ɑ́mëggɑ Cekïm, piny-ɑ lɑ̈be med, ɑ ɑ́kɑb yi yɑn kì yï Amör, ki pilø geki weth.” Kɑ Yɑgob wɑ̈dde cwøle, ɑkööbe kinni, “Nyïngu butɑ, o wu köbbɑ gïn-ɑ ócwöb dhuki megø. Bïu cung wun ri wun, kɑ wu lïng wun, wɑ̈ddi Yɑgob. Lïngu kwøbbi Isrɑil wïyi wun.” “Ruben, kɑyɑ, bene yïn tegɑ. Bene yïn ɑ ɑ́nywøl yi yɑn, yɑ bɑ wøb. Yï bɑ jɑlngöönø, nyel-ɑ teg kì kelli wɑ̈ddɑ bënn. Yï nɑ muud me dhøge di ɑpɑgø. De pɑth ki yïn ɑ óbëëdø perí teg, mɑ́ ɑkwɑnyɑ ɑ́niin yi yïn, Pënni wïyí nuti wøør yïn.” “Cimeøn geki Leebì bɑ nyiimëëg, tøngg kɑ̈lli yi gen gɑ møg mud ki ji. Yɑ pɑ kedhi yethi kwøbb-ɑ kømmi yi gen kì wɑ̈yi gen. Wɑlɑ̀ yɑ pɑ kedhi yij buri gen, mɑ́ ge nyi ceg-ɑ nɑ̈ggø kenyi rënyi pëthi gen. Kenyi med pëthi gen, rɑ̈rri tyelli wɑdh nyii kebbø yi gen, o dhɑ̈le’ cyɑ̈dhø. Keji pëthi gen bɑ mi cyën, mɑ́ e pëddi rɑ̈jø. Ge ókedhhi yi yɑn kì yij piny Isrɑil, kì bɑng rɑ̈ji pëthi gen. “Yeudɑ̀, yï ópøjji yi nyiimyëw. Cinggí óying muddi tyëngmɑ̈ɑ̈nø. Wɑ̈ddi wïyí ri gen óbødhhi yi gen kì bølí. Yeudɑ̀ nɑ ngur, nyi nɑ̈ggi e døøg-ɑ øde, kɑ óbuddø ree rïïj en, bong ngɑn pɑ̈nyii ki nywɑlø. Yeudɑ̀ ɑ ómïdhi kwøøm rɑ̈ɑ̈dhø. Kwɑrre ójyɑ̈ɑ̈gø ceth. Pödhh bënn óyömmi yïe. Kwøbbe ólïngi yi jurrì bënn. Adere mɑɑge’ ri oløg men-ɑ pëddi døøjø. Nyɑɑr ɑdere ying-ɑ ri bɑng-ɑ døøj. Ógudhe nyi lwøg en kɑ møgi oløg men kwɑrø ni remø. Nyinge kwɑ̈rrø yi møgi oløg. Legge tɑr yi mɑdh ki cɑg. “Dhebulun óbëëdø kì tøg nɑɑm omelø. Dhøøwɑ̈dhhe bɑ kɑ̈jj-ɑ mɑ̈ɑ̈g yi yɑ̈ɑ̈th. Dhøg pinye ówɑ̈dhi Sïdön. “Isɑkɑr pɑ̈r ki ɑderø me cungi ree ther en köme dɑ jɑmme. Kɑ̀ lïdhe kinni piny døøj, o lɑ̈bø med kì pödhø, kɑ pyëwe nyi göjje gwøg, kɑ ogöögø e nɑ bɑ̈ng. “Dɑn óbëëd ɑ́ jɑgø kì kömi jie. Ge óni kɑ̈lli Isrɑil møg-ɑ kyeelø. Dɑn óbëëd ɑ́ thwöl kì tøg yöö; thwöl mɑ nɑ̈ɑ̈g kì tøg yöö, me nyi kɑj tyeli kyeny. O ngɑn-ɑ köme leenge piny. “Yɑ ngɑ̈dh-ɑ bëëni yïëdø mií, Yïn ɑ Jwøng-ɑ Ácwɑ̈ɑ̈j! “Gɑd köme ópɑ̈ɑ̈r yi kurrì. De ree óluge gïn, kɑ gï cyedde. “Piny Aceer yije ócyeeg yi jɑmmì mø døj. En ɑ yïe ódi gïgcɑmm møg-ɑ døøj cɑrø, møg-ɑ nyi tyer yi rɑ̈nhì. “Nɑptɑlì bɑ ɑ́køny me rïngi wïje tɑ̈dø, o nyige óbëëd ge myëër ceth. “Yosep nɑ odyerø kenyi cunge kì tøg nɑm. Nɑ wɑ̈d kyeny kì kelli kïttì. Köme opɑ̈ɑ̈rø yi tyëngmɑ̈ɑ̈nø ki menrɑj kɑ cyeddi yi gen ki wethhi gen. De wethe mïdhe’ mïdhø ki tegø. Cingge ócwedø ge teeg yi Jwøøg Yɑgob, Jwøng Teg, ɑ yïe kɑ̈ɑ̈l yi tegi Isrɑil. Bɑ Jwøøg wïyí ɑ korri yïn, Áyïmø ɑ gyëdh yïn ki kønh-ɑ kɑ̈ɑ̈l mɑl. Kí pïg-ɑ thɑ piny. Yï ógëdhe dhög kí nywøl. Yï ógëdhe ɑ́bwög kí okøgg yï ógëdhe kïtt-ɑ weenø. Yï ógëdhe gïg mø pëddi døøjø ge kɑ̈ɑ̈l-ɑ ri kïtt-ɑ weenø. Wiy gyëdhhɑni bï gen kömí Yosep, yï ngɑn-ɑ ɑ́yieny kì kelli nyiimyëw. “Ben Yɑmïn nɑ thwøønh gøøl. Nyii nɑ̈ggø kì mwøl kí böörø, kɑ gëe nyi cɑme.” Møgɑk bene gen wɑ̈thi kɑ̈lli Isrɑil gɑ pyɑ̈rø wïdɑ́ryew. O bene gen møg-ɑ ɑ́kwøb yi wïyi gen ɑgɑk, keny-ɑ ɑ́cyɑ̈nge ki thøø. Kɑ Yɑgob wɑ̈dde cege kinni, “Anɑn yɑ kedh-ɑ kun-ɑ di kweyyɑ, yɑ othøø. Koony yɑn buti wëëgɑ, kì yij órøngi kït men-ɑ bɑɑg Eprön kwɑɑr Kit, kì Mɑkpïlɑ̀, tung-ɑ røøm ki Mɑmɑrɑ̀, kì piny Kɑnɑɑn. Órøngi kïnɑni ɑ́ngew-ɑ yi Abrɑhɑm kì yï Eprön ɑ́ men yije nyi koony tyëngthøø. Kenyɑni ɑ ɑ́koony Abrɑhɑm geki Sɑrɑ̀ cyëge, kenyɑni ɑ ɑ́koony Isɑɑk geki Rebekɑ̀ cyëge, o kenyɑni ɑ ɑ́koonyɑ Leɑ̀. Bɑg menɑni geki órøngi kït, ɑ́ngew-ɑ yï kwɑrri Kit. Koony wun yɑn kunɑni.” Yɑgob keny-ɑ ɑ́rume cegi wɑ̈dde, ɑdøøge ki buddø, kɑ wɑnge mije. Kɑ Yosep ree leenge kömi wïye, e óywöngø, e numm-ɑ gøn. Acwödde ki ji mø gïny wïye ki møw men-ɑ nyi mɑ̈ɑ̈n dhɑnhø kwɑ̈gø. Kɑ tyëg-ɑ cyɑ̈ng pyɑ̈r ɑ́ngwen, e ogïnyyø ki møwɑni. Bene gen cyɑ̈ngg-ɑ nyi tyëg yi gwøngɑni, ɑ nyi thwøw dhɑnhø e pɑ kwɑ̈g. Kɑ Yɑgob ywøg yi tyëng Rïp ki cyɑ̈ng pyɑ̈r ɑ́bïryew. Keny-ɑ ɑ́thumi cyɑ̈nggi ywøg, kɑ jyɑ̈ggi buri rɑ̈dh köbbi yi Yosep kinni, “Yɑ kwɑjj-ɑ wun, muuj wun wöödø men rɑ̈dh. Keny-ɑ ɑ́cyɑ̈ngi wïyɑ ki thøø, yɑ ɑ́köbbe köngø kinni ókïdhɑ be koony yij rörø men-ɑ ɑ́wöd yi en kì yij kït, kì piny Kɑnɑɑn. Yɑ kwɑjj-ɑ yïn, wiy yɑ kedhɑ be konyi wïyɑ, o rume’ konyø, yɑ ódwöög.” Kɑ rɑ̈dh ólöggø kinni, “Kedh, kony wïyí ni kɑ ɑ́köngí.” Codhe, ɑkedhi Yosep be konyi wïye. Jyɑ̈ggì bënn, kí jøgdøngi burø, kí pëjji Rïp, ge ɑ́kedh bënn geki Yosep. Gøle kí nyiimen, kí ji mø gïïr cɑrø, kí gøl wïye, ge ɑ́kedh ki en. Bɑ othønhø, kí dyëg, kí dhög ɑ ɑ́döng kì Göcen. Cwøw møøgø cyɑ̈dh-ɑ́ɑ̀ kömi kyënyì, møøgø ying-ɑ yethi yɑ̈th-ɑ pyejji yi kyënyì. Ábëëd ɑ́ yɑy me dwøng cɑrø. Keny-ɑ ɑ́wɑ̈dhi gen buti rɑri pwödhi Atɑd, kì kömi Nɑm Urdun kì wɑɑng cyɑ̈ɑ̈ng mwøl, ɑgud gen kì kenyɑni, kɑ ge óywöngø ki ywøg me dwøng, ki keny me bɑ̈ɑ̈r. Yosep wïye ɑ́ywøge ki cyɑ̈ng ɑ́bïryew kì kenyɑni. Tyëng Kɑnɑɑn ɑ́ngɑ̈ng keny-ɑ ɑ́lidh gen ywøøg gen kì rɑri Atɑd, kɑ ge okööbø kinni, “Á ywøøg ngø ɑ ywøg yi tyëng Rïp kinøw?” Bene ɑ bɑnge cɑɑg kenyɑni ɑ́ Abel Misrɑim. Kɑ wɑ̈ddi Yɑgob møg-ɑ ɑ́ceg yi wïyi gen, gwøg yi gen ceth. Ákɑ̈l yi gen, kɑ gø koony gen yij órøngi kït kì Mɑkpïlɑ̀, kì tung-ɑ døøg kuni Mɑmɑrɑ̀, kì yij bɑng-ɑ ɑ́ngew yi Abrɑhɑm kì yï Eprön kwɑɑr Kit ɑ́ keny nyi koony tyëngthøø. Keny-ɑ ɑ́rum Yosep ki konyi wïye, ɑdøøge Rïp, geki nyiimen, kí ji-ɑ ɑ́lwøøgii bënn. Nyiiwï Yosep keny-ɑ ɑ́rum wïyi gen ki konyø, ge ɑ́kööb ki ri gen kinni, “Wɑ göög ɑ dï, keløg Yosep pyëwe nudd e rɑɑj ki wɑ, kipe gïnrɑj men-ɑ ɑ́göggii yi wɑ, kɑ keje dwɑdde colø?” Aödi gen yï Yosep kinni, “Keny-ɑ́ nuti thøw wïyee, ɑ́kööb i kwɑjji wøn yïn kinni, ‘Lɑ̈ɑ̈m pyëwí ki nyiimyëw kipe gïnrɑj men-ɑ ɑ́göggi yïn yi gen.’ Anɑn wø kwɑjj-ɑ yïn, lɑ̈ɑ̈m pyëwí ki wøn kipe gïnrɑj men-ɑ göggi yïn yi wøn, mɑ́ wø bɑ bɑ̈nggi Jwøøg wïyí.” Yosep ɑ́ywöngi keny-ɑ ɑ́lïnge møgɑni. Kɑ nyiiwɑ̈n obëënø cyee, kɑ ri gen bøødh gen piny kì bøle, ɑkööb gen kinni, “Wøn ɑ bølí èn, wø bɑ bɑ̈nggí.” Kɑ gï köbbe kinni, “Wu ko böggi. Yɑ pɑ cuggi cïbi riɑ kej Jwøk. Wu ɑ́dwɑdd-ɑ göggi yɑn gïnrɑj, de ɑ́løg gïndøj yi Jwøk, kipe mïdhi wëyi ji møg-ɑ nudd ge onëënø ɑnɑn dicyɑ̈ngtïn, kì bɑng kɑ̀ yingɑ keny. Bong gïn böggi yi wun, wu ókorri yi yɑn wuki nyigi wun bënn.” Kɑ pëthi gen dwöög yi en ki kwøb mø døøj. Kɑ Yosep obëëdø kì Rïp geki gøl wïye. Runne ɑ́bëëd gɑ miyø kí pyɑ̈rø keny-ɑ ɑ́thøwe. Ábëëd kɑ wɑ̈ddi Eprɑim, kɑ kwɑrre lidhe. Thyew keny-ɑ ɑ́yïddi Mɑkir wɑ̈d Mɑnɑsè kí wɑ̈dde, Yosep ɑ́bëëd e nudd e onëënø. Kɑ nyiimen köbbe kinni, “Yɑ ɑ́cyɑ̈ngi ki thøø. De wu ókorri yi Jwøk, kɑ wu dwøøge piny-ɑ ɑ́mëgge Abrɑhɑm, kí Isɑɑk, kí Yɑgob.” Kɑ Yosep tyëng gøl gen köbbe köngi gen, ɑ́kööb kinni, “Köngi wun kì bølɑ kinni, keny-ɑ ópeej wun pinyɑni yi Jwøk, yɑ ókɑ̈l yi wun.” Codhe, ɑthøw Yosep kì Rïp, e runne bɑ miyø kí pyɑ̈rø. Kɑ gïny ki møw men-ɑ nyi mɑ̈ɑ̈n dhɑnhø kwɑ̈gø. Kɑ kïdhi yij Sɑndug. Møg bene gen nyingi wɑ̈ddi Yɑgob, jøg-ɑ ɑ́dɑ̈ggi Rïp geki Yɑgob, ngɑɑn kí gøle, ge bɑ Ruben, Cimeøn, Leebì, Yeudɑ̀, Isɑkɑr, Dhebulun, Ben Yɑmïn, Dɑn, Nɑptɑlì, Gɑd, kí Aceer. Kwɑnni gøl Yɑgob, ɑ løg wɑ̈dde geki kwɑrre ɑ́bëëd gɑ pyɑ̈r ɑ́bïryew. Yosep ɑ́ying-ɑ Rïp. Codhe, kɑ Yosep othøø geki nyiimen ki rïnyɑni bëne. De kwɑrri gen, tyëng Isrɑil ɑ́nywøl kɑ kwɑnni gen óngënyø kɑ ge ótëngø ki mendwøng, kɑ piny opɑ̈ngø yi gen. Codhe, kɑ lɑwø kwɑny kì Rïp yi rɑ̈dh me nyɑ̈n me kwïj Yosep. Kɑ rɑ̈nhɑni jie köbbe kinni, “Lidhu tyëng Isrɑil, ge ɑ́ceg ngënyø kɑ ge ótëngø kibølee. Ke di liny me bï, ge ócuggø rëbø ki tyëngmɑ̈ɑ̈nø, kɑ ge ónyïɑ̈ggø ki wɑ, codhe, kɑ ge odhwödhø kì pödhee. Yɑ̈ɑ̈b wɑ ki yöö men mɑ̈ɑ̈n wɑ gen ngënyø.” Codhe, kɑ tyëng Isrɑil cïb cinggi jɑggi gwøg møg cir gen, o köthi gen buudh ki gwøng teg. Kɑ kɑ̈dd ɑ́ryew, ɑ løg Pithöm kí Rɑmsis ger yi gen gɑ møg mïdhi jɑmmi rɑ̈dh. De tyëng Isrɑil ɑ́yöd ge ceg-ɑ ngënyø keny-ɑ ɑ́pëddi köthi gen ki buudhø, kɑ tyëng Rïp ti-ɑ bwøgø yi gen. Kɑ yethi tyëng Isrɑil ti ki pɑ̈dø ki gwøng teg. Yethi gen ɑ́pɑ̈d ki tïj; ge ɑ́cïri gwøøg gyer kí pur kì yethi pwödh, o pëthi tyëng Rïp pɑ nyi lɑ̈ɑ̈m ki gen. Kɑ rɑ̈ɑ̈dh Rïp gɑ̈mmi mɑ̈nni Isrɑil ryeet, ɑ løg Ciprɑ̀ geki Puɑ̀ köbbe kinni, “Kenyi gɑm wun ngeti Isrɑil e pɑ̈dh-ɑ piny, nyi nɑ̈gu men-ɑ nywøl keløg ɑ́ jɑlø, de wiy bëëde keløg ɑ́ dhɑjø.” De gɑ̈mmɑni ryeet ɑ́bëëd gɑ ji mø böggi Jwøk, kɑ kwøbbi rɑ̈ɑ̈dh Rïp pyem yi gen, cwøw ɑ́yöd ge ceg kɑ wiyø yi gen. Kɑ gɑ̈mmɑni cwøl yi rɑ̈ɑ̈dh Rïp, kɑ gï pyëje kinni, “Wude, ɑ göög wun kinnï? Ede møg-ɑ nywøl gɑ cwøw ɑ nyi wiyu gen ge pɑ nɑ̈g yi wun?” Kɑ ge ólöggø kinni, “Mɑ̈nni tyëng Ibru pɑ pɑ̈r ki mɑ̈nni Rïp, pɑ̈dhi gen piny yööd, ge nyi pɑ̈dhi piny e gɑ̈ɑ̈mi nuti wɑ̈dhi yï gen.” Kɑ gɑ̈mmɑni korri yi Jwøk kidøøj. Kɑ tyëng Isrɑil óngënyø ki mendwøng. Kɑ kɑ̈lli gɑ̈mmɑni tyeny yi Jwøk, mɑ́ ge bɑ ji mø böggi Jwøk. Kɑ rɑ̈dh tyëng pödhe köbbe kinni, “Kwɑny wun wɑ̈ddi tyëng Ibru møg-ɑ ócer nywølø, kɑ ge leengu Kiir, de wiy møg-ɑ bɑ mɑ̈nn bëëd gen.” Kɑ jɑl megø kì gøl Leebì ókedhø, kɑ ónyömø ki nyɑɑr gøl Leebì ni en. Kɑ nyɑnɑni óyɑɑjø, ɑpɑ̈dhe piny ki wɑ̈d, kɑ gø lidhe e myëër, ɑkɑnne gøn ki dwɑ̈tt ɑ́dɑ̈g. Keny-ɑ ɑ́dhɑ̈le kɑnnø, kɑ gø cwɑ̈jje ki dyëëny ókut, ɑmwøne gøn ki dök kí lɑ̈bø. Kɑ nyelthinh pyëële yije, ɑcïbe gøn tøg Kiir kì nɑm kelli lum. Kɑ nyimen ócungø e lɑ̈wi, e nenn-ɑ gïn-ɑ ócwöb. Kɑ nyɑɑr rɑ̈dh bï-ɑ gɑ̈d be lwøggø e cyɑ̈dhi kɑ bɑ̈ngge, bɑ̈ngg-ɑ mɑ̈nn, ɑlidhe dyënyɑni kì kelli lum kì nɑm, kɑ bɑ̈nge ɑ́kyel öre be dwɑɑyii. Keny-ɑ ɑ́yɑle gøn, ɑyode gøn ɑ́ nyɑgïnthinh, e óywöngø. Kɑ yij nyɑɑr rɑ̈dh óywöngø kipere, ɑkööbe kinni, “Men óceg bëëdø ɑ́ nyɑɑr tyëng Ibru.” Codhe, ɑköbbi nyɑɑr rɑ̈dh yi nyimï nyɑgïnɑni kinni, “Kedhɑ be cwöd ki ngeti Ibru me dhwødhii?” Alöggi nyɑɑr rɑ̈dh kinni, “Kedh kɑ̈ní.” Codhe, kɑ ókedhø, ɑcwööl meyi nyɑgïnthinh. Aköbbi ngɑnɑni yi nyɑɑr rɑ̈dh kinni, “Kwɑny nyelthinh men, kɑ dhwøødh. Pïdhí yɑn, kööngí ómëggɑ yïn.” Codhe, ɑkwɑɑny nyɑgïnɑni yi ngɑnɑni kɑ gø pidhe. Kɑ nyelthinh ódøngø, ɑmuujii nyɑɑr rɑ̈dh yi ngɑnɑni. Kɑ cɑg yi nyɑɑr rɑ̈dh ɑ́ Mosɑ̀, mɑ́ e ɑ́kööb kinni, “Ákɑ̈ɑ̈l ɑ nɑm.” Keny-ɑ ɑ́døngi Mosɑ̀, ɑkedhe be lidhi wɑddi gen, ɑ løg tyëng Ibru, o lidhe orɑng-ɑ rɑngi gen. Kɑ jɑl Rïp megø lidhe e gøj-ɑ wɑ̈d Ibru, ɑ løg wɑɑd Mosɑ̀. Kɑ Mosɑ̀ lïïdh-ɑ tuung kí tuung, kɑ bong-ɑ dhɑnhø me lidhe, ɑgøje jɑl Rïp kɑ gø nɑ̈ge. Kɑ gø gööle thɑ ɑyejø. Acige kedhø dhuki, kɑ wɑ̈ddi Ibru ɑ́ryew yuude ge ónyïɑ̈ggø. Kɑ jɑl-ɑ ɑ́bɑ̈jji pyëje kinni, “Ede wɑɑd wun ɑ pwöödií?” Alöggi jɑlɑni kinni, “Á men ɑ ɑ́gwøg yïn, yïn ɑ́ jɑgø me nenni gønyyi wøn? Yï dwɑdd-ɑ nɑ̈gi yɑn ni wɑ̈d Rïp?” Kɑ Mosɑ̀ okööbø kinni, “Ngøø kwøbbɑni óyodø!” Kɑ kwøbbɑni lïngi yi rɑ̈dh. Kɑ Mosɑ̀ yɑbe o gø di nɑ̈ge, ɑpɑ̈ɑ̈r Mosɑ̀ Midyɑn. Keny-ɑ ɑ́wɑ̈dhi Mosɑ̀ kunɑni, ɑpëgge wïj yith. Yethrø, ókwëri Midyɑn ɑ́bëëd yïe dɑ nyige womɑ̈nn ɑ́bïryew. Kɑ ge bï-ɑ wïj yith be pɑ̈ngi ɑwöl-ɑ yije nyi mɑ̈ɑ̈dh yi dyëgi wïyi gen ki pï. De kwɑ̈yyi dyëg møøgø ɑ́bï, kɑ womɑ̈nn møgɑni cyeddi yi gen. Adhwödh Mosɑ̀, kɑ gï cwɑge, ɑtömme dyëgi gen ki pï. Keny-ɑ ɑ́døøg gen yï wïyi gen, ɑpyëje gïn kinni, “Wude ɑ jwɑn wun dwöögø dicyɑ̈ɑ̈ng?” Kɑ ge okööbø kinni, “Jɑl Rïp megø, wø ɑ́yiele kì cinggi kwɑ̈yyi dyëg. Kɑ wø tömme ki pï thyew, ɑmɑ̈ɑ̈dh dyëg.” Kɑ nyige köbbe kinni, “De jɑlɑni ying-ɑ keny? Ede ɑ wiyu en? Cwöölu en o cyɑ̈me ki gïncɑm.” Kɑ Mosɑ̀ oyïëyø ki bëëdø kì buti jɑlɑni. Kɑ jɑlɑni nyɑre Dhiporɑ̀ mëgge Mosɑ̀ ɑ́ dhɑjø. Kɑ pɑ̈dh-ɑ piny ki wɑ̈d, kɑ gø cɑge ɑ́ Gercöm mɑ́ e ɑ́kööb kinni, “Yɑ bɑ wëdh.” Kì bɑng keny me bɑ̈ɑ̈r, kɑ rɑ̈ɑ̈dh Rïp othøø. Kɑ tyëng Isrɑil nyingi gen ti ki guudø yi tyëng Rïp. Kɑ ge ywøøg-ɑ kö Jwøk. Kɑ ywøøg gen lïngi yi Jwøk, Jwøk ɑ́bëëd e nudd e mïdh-ɑ lwöm-ɑ kɑɑm gen kí Abrɑhɑm, kí Isɑɑk, kí Yɑgob. Kɑ orɑɑng tyëng Isrɑil lidh yi Jwøk, ɑywöngi yije kipe gïn. Mosɑ̀ ɑ́bëëd e kwɑy-ɑ dyëgi Yethrø øre, ókwëri Midyɑn, kɑ dyëg køøle løøg ryɑng tung-ɑ kyeelø, kɑ wɑ̈dh-ɑ wïj Kïti Sinɑy, Kïti Jwøk. Kɑ wëywöni Jwøng-ɑ Ácwɑ̈ɑ̈j ocwöbø kì bøle kì kunɑni kì yij mɑc kì ri nyɑ kïrø, nyɑ kïrɑni ɑ́lidhe e olyelø, de pɑ rɑ̈bbi. Kɑ Mosɑ̀ okööbø kinni, “Wiy yɑ töng-ɑ be lïdhø ki gïn-ɑ bëëdø kinni, ede nyɑ kïrø ɑ lyele e pɑ rɑ̈bbi?” Keny-ɑ ɑ́lidhii yi Jwøng-ɑ Ácwɑ̈ɑ̈j kinni ɑ́töngi be lïdhø, ɑcwøle gøn cwɑgge kɑ̈ɑ̈l-ɑ yij nyɑ kïrø, kinni, “Mosɑ̀! Mosɑ̀!” Alöggi Mosɑ̀ kinni, “Yɑn èn.” Kɑ okööbø kinni, “Yï ko nyïngi keny, kɑ̈ɑ̈l wɑrrí wɑ̈g kì tyellí, kipe keny-ɑ di yïn èn bɑ ɑkwër.” Codhe, ɑkööbe kinni, “Yɑ bɑ Jwøøg kweyyí, Jwøøg Abrɑhɑm, kí Isɑɑk, kí Yɑgob.” Kɑ Mosɑ̀ nyinge kume, mɑ́ e ɑ́bwøg ki nenni yï Jwøk. Codhe, ɑkööb Jwøng-ɑ Ácwɑ̈ɑ̈j kinni, “Orɑng men-ɑ rɑngi yi jiɑ kì Rïp ɑ́lidh yi yɑn, kɑ ywøøg gen wɑ̈nh-ɑ yïɑ, guun-ɑ guud nyingi gen ngɑ̈nyi yi yɑn. Abëënɑ piny be yieli gen kì cinggi tyëng Rïp, o ge kɑ̈ɑ̈lɑ wɑ̈g kì pinyɑni, o ge kïdhɑ piny me døj, o lɑɑj, piny me yije mulli yi cɑg geki møøw kïc, keny-ɑ bëëd yi tyëng Kɑnɑɑn, kí tyëng Kit, kí tyëng Amör, kí tyëng Perïdh, kí tyëng Kib, kí tyëng Yebus. Anɑn ywøøg tyëng Isrɑil ɑ́wɑ̈nhi yïɑ, o guun-ɑ guud nyingi gen yi tyëng Rïp, ɑ́lidh yi yɑn. Anɑn yï örɑ’ yï rɑ̈ɑ̈dh Rïp, o jiɑ kɑ̈ɑ̈l yi yïn wɑ̈g kì pinye.” Kɑ Jwøk köbbi yi Mosɑ̀ kinni, “Yɑn ɑ́ men, ɑ kedhɑ yï rɑ̈dh, kɑ tyëng Isrɑil kɑ̈ɑ̈lɑ wɑ̈g kì Rïp?” Alöggi Jwøk kinni, “Yɑ ócyɑ̈dhi ki yïn, o keny-ɑ ókɑ̈ɑ̈l jiɑni wɑ̈g kì Rïp, yɑ ómɑlli yi wun kì wïj kït men. Menɑni óbëëd ɑ́ ngïji kinni yɑn ɑ ɑ́ör yïn be kɑ̈ɑ̈li gen wɑ̈g kì Rïp.” Kɑ Jwøk köbbi yi Mosɑ̀ kinni, “Keny-ɑ ókedhɑ yï tyëng Isrɑil, kɑ ge köbbɑ kinni, yɑ ɑ́ör-ɑ yi Jwøøg kweyyi wun, okööb gen kinni nyinge ɑ́ men? Á ngø ɑ óköbbɑ gen?” Kɑ Mosɑ̀ köbbi yi Jwøk kinni, “Yɑ bɑ Yɑn.” Kɑ okööbø kinni, “Kedh, köbbí kwɑrri Isrɑil kinni, ‘Ngɑn-ɑ cwøl ɑ́ “Yɑ bɑ Yɑn” ɑ ɑ́ör yɑn yï wun.’ ” Kɑ Mosɑ̀ cigi köbbø yi Jwøk kinni, “Bene gen møg-ɑ óköbbí kwɑrri Isrɑil ɑgɑk, kinni, ‘Jwøøg kweyyi wun, Jwøng-ɑ Ácwɑ̈ɑ̈j, ɑ bɑ Jwøøg Abrɑhɑm, kí Isɑɑk, kí Yɑgob, en ɑ ɑ́ör yɑn yï wun, bene nyinge møg-ɑ ópɑɑrii ɑnɑn, kì ri rïny kí rïny, gïti ɑtheer.’ Kedh kɑ jøgdøngi Isrɑil cøng, kɑ ge köbbí kinni, ‘Jwøøg kweyyi wun, Jwøng-ɑ Ácwɑ̈ɑ̈j ɑ́cwöb kì bølɑ, eni Jwøøg Abrɑhɑm, Jwøøg Isɑɑk, Jwøøg Yɑgob. Kɑ okööbø cem e bëën-ɑ be këëmi wun, o orɑɑng wun kì Rïp ɑ́lidh yi en.’ Kɑ okööbø kinni, ‘Wu ókɑ̈ɑ̈lɑ wɑ̈g kì yij orɑng-ɑ rɑngi yi wun kì Rïp, o wu kïdhɑ piny tyëng Kɑnɑɑn, kí piny tyëng Kit, kí piny tyëng Amör, kí piny tyëng Perïdh, kí piny tyëng Kib, kí piny tyëng Yebus; wu ókïdhɑ piny me yije mulli yi cɑg geki møøw kïc.’ “Kwøbbí ólïngi yi jøgdøngi Isrɑil. Kɑ wu kedhu yï rɑ̈ɑ̈dh Rïp wuki jøgdøngi Isrɑil, kɑ köbbu kinni, ‘Jwøøg tyëng Ibru, Jwøng-ɑ Ácwɑ̈ɑ̈j, ɑ́bï be këëmi wøn, kɑ wø cwøle kinni kedhi wøn yij pɑ̈l keny me cɑɑdh ki cyɑ̈ng ɑ́dɑ̈g, o ngɑ̈ddi yi wøn ki gëdhhì kì kunɑni.’ De ngɑ̈nyi yi yɑn kinni rɑ̈ɑ̈dh Rïp pɑ yïëy ki kedhi wun, de óceg kɑ cïrri møgɑni. De cingɑ ócïbɑ ri Rïp, ógøj yi yɑn, kɑ göggɑ ki gïïngɑ̈ngø, o wu ógøny yi en cyee. “Wu ówëggɑ wørø yi tyëng Rïp kì bɑng gïn-ɑ ógöggɑ gen, o wu cög wu pɑ kedh ki cinggi wun. Tyëng-ɑ mɑ̈nni Isrɑil ókedhi yï mɑ̈nni Rïp møg-ɑ bɑ tyëng byëëg gen, geki møg-ɑ kɑ̈lli gïn bëëd yi gen, kɑ ge ócwöddø ki yëlli dhɑb kí yëlli ɑ́tegg, kí ógudh møg ruug wun nyigi wun, geki wɑ̈ddi wun, o jɑmmi Rïp kɑ̈l yi wun.” Kɑ kwøbbi Jwøng-ɑ Ácwɑ̈ɑ̈j løøg yi Mosɑ̀ kinni, “De keløg tyëng Isrɑil óbɑ̈nyi ki yïëyø, kɑ ge ódhɑ̈lø lïngi kwøbb-ɑ óköbbɑ gen, göögɑ kidï, keløg ge ókööbø kinni yï nuti cwöbø kì bølɑ.” Apyëjii yi Jwøng-ɑ Ácwɑ̈ɑ̈j kinni, “Á ngø ɑ cingí ɑnɑn?” Kɑ Mosɑ̀ okööbø kinni, “Lodh.” Kɑ Jwøng-ɑ Ácwɑ̈ɑ̈j okööbø kinni, “Leeng piny.” Kɑ gø leenge piny. Kɑ ree løge thwöl, kɑ Mosɑ̀ reng-ɑ cyɑ̈n. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Rïj cingí kɑ mɑɑg kì yëbe.” Kɑ cinge rïïje, ɑmɑge gøn, kɑ ree løge lodh kì cinge. Kɑ Jwøng-ɑ Ácwɑ̈ɑ̈j okööbø kinni, “Gwøg møgɑni kipe kinni o ge yïëy gen kinni, bɑ Jwøøg kweyyi gen; Jwøøg Abrɑhɑm, kí Isɑɑk, kí Yɑgob ɑ ɑ́cwöb kì bølí.” Kɑ köbbi yi Jwøng-ɑ Ácwɑ̈ɑ̈j këti kinni, “Cød cingí thɑ ógødhí.” Kɑ cinge cøde, kɑ gø dwööge wɑ̈g e tɑr nɑ ɑ́piy. Aköbbe gøn kinni, “Dwøøg cingí thɑ ógødhí.” Adwøøge gøn, kɑ gø dwööge wɑ̈g e pɑ̈ɑ̈rø ki dële. Kɑ Jwøng-ɑ Ácwɑ̈ɑ̈j okööbø kinni, “Keløg ge pɑ yïëy ki kwøbbí, wɑlɑ̀ ge pɑ yïëy ki ngïji tyeli mɑl, ge óyïëy ki ngïny-ɑ kyeelø. Ocög ge pɑ yïëy ki ngïjjɑni ryeet, kɑ yï kɑ̈bbí ki pïi Kiir, kɑ ge køny piny keny-ɑ thwøwø. Pïgɑni ceg-ɑ gwøg gɑ remø.” Kɑ Mosɑ̀, Jwøng-ɑ Ácwɑ̈ɑ̈j köbbe kinni, “Wuö, yɑ kwïj kwøb kër-ɑ ɑ́pïïdhɑ gïti kɑ̀ kööb wɑ ɑnɑn, mɑ́ dhøgɑ peeg geki lebɑ.” Aköbbii yi Jwøng-ɑ Ácwɑ̈ɑ̈j kinni, “Á men ɑ ɑ́göggi dhɑnhø ki dhøg? O bɑ men ɑ nyi løg dhɑnhø ming, wɑlɑ̀ ɑ nyi wëggii dhɑ̈lø ki kwøb; ɑ nyi løg dhɑnhø ngɑn nëënø wɑlɑ̀ cwør, pɑth ki yɑn, yɑ Jwøng-ɑ Ácwɑ̈ɑ̈j? Anɑn kedh, dhøgí ókøny yi yɑn ki kwøb, o yï ópwönyi yi yɑn ki møg-ɑ ókømmi yi yïn.” Kɑ Mosɑ̀ okööbø kinni, “Yɑ kwɑjj-ɑ yïn Wuö, öd ki ngɑn megø.” Kɑ Jwøng-ɑ Ácwɑ̈ɑ̈j mɑg yi liny ki Mosɑ̀. Kɑ okööbø kinni, “Aɑron pɑth ki ómyëw? Ngɑ̈nyi yi yɑn kinni nyii kööbø kidøøj. Bï-ɑ be yïddø ki yïn ɑnɑn, o pyëwe ómïni keny-ɑ ólidhe yïn. Wu ókööbø ki en, kɑ köbbí møg-ɑ ókwøbe, wu ókøny yi yɑn ki kwøb, o gïg-ɑ ógwøg yi wun, óköbbɑ wun. En ɑ ókööbø ki ji ɑ́ kej dhøgí, o yï óbëëdø yï bɑ kej Jwøk kì yïe. Kɑ lodh men kɑ̈llí kì cingí, en ɑ ógöög yi yïn ki gïïngɑ̈ngø.” Kɑ Mosɑ̀ ókedhø, kɑ døøg-ɑ yï Yethrø øre, kɑ gø köbbe kinni, “Yɑ kwɑjj-ɑ yïn, wiy yɑ døøgɑ yï wɑddi wøn møg-ɑ Rïp, o ge lidh yi yɑn mɑ nudd ge onëënø.” Kɑ Mosɑ̀ köbbi yi Yethrø kinni, “Kedh ki mër.” Kɑ Mosɑ̀ köbbi yi Jwøng-ɑ Ácwɑ̈ɑ̈j kì Midyɑn kinni, “Kedh, døøg Rïp, tyëng-ɑ ɑ́dwɑddi nɑ̈gi yïn ɑ́thøw bënn.” Kɑ Mosɑ̀ cyëge kwɑnye geki wɑ̈dde, kɑ gï cïbe kömi ɑderø, codhe, kɑ døøg-ɑ piny Rïp, loodh Jwøk okɑ̈llø yi en kì cinge. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kedhí Rïp, gwøg gïïngɑ̈ngø møg-ɑ ɑ́cïbɑ cingí kì bøli rɑ̈dh, de pyëwe ógwøgɑ e teeg, o ji cög gï pɑ wëgge kedhø. Kɑ rɑ̈dh köbbí kinni, Jwøng-ɑ Ácwɑ̈ɑ̈j ɑ́kööb kinni, ‘Isrɑil bɑ wɑ̈dɑ, wɑ̈n-ɑ kɑyø. Yï ɑ́köbbɑ kinni, gøny wɑ̈dɑ o yɑ mɑlle, kɑ yï óbɑ̈nyø ki gønyii, kì bɑng menɑni, wɑ̈dí wɑ̈n-ɑ kɑyø nɑ̈gɑ’ nɑ̈gø.’ ” Kì keny-ɑ ɑ́nïni yi gen ge kedh-ɑ Rïp, ɑrøøm Mosɑ̀ geki Jwøng-ɑ Ácwɑ̈ɑ̈j, kɑ Mosɑ̀ gø dwɑdde nɑ̈gø. Kɑ Aɑron köbbi yi Jwøng-ɑ Ácwɑ̈ɑ̈j kinni, “Kedhí be pɑɑri Mosɑ̀ yij pɑ̈l.” Kɑ ókedhø, ɑyode gøn kì Kïti Jwøk. Kɑ gø mɑ̈dhe, gø nuume’ nuumø. Kɑ Aɑron köbbi yi Mosɑ̀ møg-ɑ ɑ́kwøb yi Jwøng-ɑ Ácwɑ̈ɑ̈j, kí gïg-ɑ per gen ɑ́örii, kí gïïngɑ̈ngø møg-ɑ ɑ́köbbii kinni gwøge gïn. Kɑ Mosɑ̀ ókedhø geki Aɑron, kɑ jøgdøngi Isrɑil cøng yi gen. Kɑ kwøbb-ɑ ɑ́köbbi Mosɑ̀ yi Jwøng-ɑ Ácwɑ̈ɑ̈j lwøb yi Aɑron bënn, kɑ gïïngɑ̈ngø møgɑni gwøge kì bøli jøgɑni. Kɑ teedø oyïëyø. Keny-ɑ ɑ́lïng gen kinni Jwøng-ɑ Ácwɑ̈ɑ̈j ɑ́bï yï gen, kɑ guun-ɑ guud nyingi gen lidh yi en, ɑbøødh gen ri gen piny, kɑ mɑl yi gen. Codhe, kɑ Mosɑ̀ geki Aɑron kedh-ɑ yï rɑ̈dh. Kɑ rɑ̈dh köbbi gen kinni, “Jwøøg Isrɑil, Jwøng-ɑ Ácwɑ̈ɑ̈j okööbø kinni, ‘Wiy jiɑ kedh gen, o yɑ wøw yi gen kì yij pɑ̈l.’ ” Kɑ rɑ̈dh okööbø kinni, “Jwøng-ɑ Ácwɑ̈ɑ̈j bɑ men, ɑ lïngɑ kwøbbe, ɑ pere gønyɑ Isrɑil? Jwøng-ɑ Ácwɑ̈ɑ̈j kwïj yi yɑn, o Isrɑil pɑ wiy yi yɑn o kedhe thyew.” Kɑ ge okööbø kinni, “Wø ɑ́cwøl-ɑ yi Jwøøg tyëng Ibru. Wiy wø kedhi wøn keny me cɑɑdh ki cyɑ̈ng ɑ́dɑ̈g, kì yij pɑ̈l, o Jwøøg wøn, Jwøng-ɑ Ácwɑ̈ɑ̈j ngɑ̈ddi yi wøn ki gëdhhì, kipe wø ónɑ̈g yi en ki rɑ̈ɑ̈m dëllì, wɑlɑ̀ ki liny.” Kɑ ge köbbi yi rɑ̈ɑ̈dh Rïp kinni, “Mosɑ̀ wuki Aɑron, ɑ́ kipe ngø ɑ mɑ̈ɑ̈nu ji gwøgi gwøøg gen? Kedhu be tïïj wun.” Kɑ rɑ̈dh okööbø kinni, “Tyëngpiny ɑ́ngënyi ɑnɑn, o ge gögg-ɑ yi wun ki gwøøg gen.” Kɑ jøg-ɑ nenni gwøg geki jɑggi Isrɑil ceg yi rɑ̈dh kinni, “Jiɑni ko cigi wun muujø ki nor men-ɑ nyi göög ki thob këti, ni kenyi muuj wun gen cøn. Wiy ge kedhi gen be yɑb ki nor keti gen. Kɑ wu ko kɑ̈ni wɑ̈g kì ri kwɑnni thob møg-ɑ nyi gwøg yi gen cøn, ko di thob ɑ́kyel me tøøk. Gwøøg gen ceg-ɑ nøg, bene ɑ kööb gen kinni, ‘Wiy wø kedhi wøn be ngɑ̈ddi Jwøøg wøn ki gëdhhì.’ Thödhu jøgɑni ki gwøg me teeg, o ge jɑ̈ddi gen ki keny lïng gen ki kwøbbi pyed.” Codhe, kɑ jøg-ɑ nyi cïrø ki gwøg geki jɑgg-ɑ nenni gwøg ókedhø, kɑ jiɑni köbbi gen kinni, “Rɑ̈dh okööbø kinni, i wu ko thödhi ki nor. Kedh wun, yɑ̈ɑ̈b wun ki nor kì keny-ɑ óyïddi wun, de bong gïjø me kɑ̈ɑ̈l wɑ̈g kì ri kwɑnni thob.” Codhe, kɑ teenɑni tɑɑy-ɑ yij piny Rïp be yɑb ki wél møg gwøg ɑ́ nor. Kɑ ge cir yi jɑggi gwøg kinni, “Nyi tyëgu gwøøg wun ceth, gwøøg cyɑ̈ɑ̈ng kí cyɑ̈ɑ̈ng, ni kɑ ɑ́bëëd wu nyii thödhø ki nor.” Kɑ jɑggi tyëng Isrɑil møg-ɑ ɑ́cïb kömi gwøg pwöd yi jɑggi Rïp møg-ɑ cïrø ki gwøg, ge ɑ́kööb kinni, “Ede kwɑnni thob møg-ɑ dwɑddi, ɑ bɑnyu gen ki tyëgø gwøgø, ɑ́wɑ̈ɑ̈ ki dicyɑ̈ɑ̈ng ni kenyi göög wun cøn?” Kɑ jɑggi tyëng Isrɑil ókedhø, kɑ ge ywøøg-ɑ kö rɑ̈dh, ge ɑ́kööb kinni, “Ede bɑ̈nggí ɑ göggí gen ki gïn ni men? Bong nor mɑ ɑ́mëggi wøn, o wø yöd wø ceg kɑ cirø kinni, ‘Gwøgu thob!’ Wø ceg kɑ pwödø, o bɑ̈jjø bɑ mi jií.” Alögge kinni, “Wu bɑ rɑjj, bene ɑ kööb wun kinni, ‘Wiy wø kedhi wøn be ngɑ̈ddi Jwøng-ɑ Ácwɑ̈ɑ̈j ki gëdhhì!’ Dhwödh wun, kedhu be tïj! O wu pɑ thödhi ki nor, de gwøg wun kwɑnni thob men-ɑ dwɑddi kì yï wun ceth!” Kɑ jɑggi tyëng Isrɑil wɑ̈thi gen ócungø yi cigg-ɑ ɑ́köbbi gen kinni, i kwɑnni thob møg-ɑ nyi gwøg ki cyɑ̈ɑ̈ng ko dwöög cyɑ̈n kinni tek. Kɑ Mosɑ̀ geki Aɑron yuud yi gen ge ócungø kì yöö keny-ɑ ɑ́kedh gen kì buti rɑ̈dh. Kɑ gï köbbi gen kinni, “Jwøng-ɑ Ácwɑ̈ɑ̈j ree óluge wun kɑ wu cɑy yi en, kipe kɑ ɑ́løgu wøn tyëngrijjø kì bøli rɑ̈dh geki jɑgge, kɑ cinggi gen cïbi yi wun ki pilø men nɑ̈g gen wøn.” Codhe, kɑ Mosɑ̀ døøg-ɑ yï Jwøng-ɑ Ácwɑ̈ɑ̈j, ɑkööbe kinni, “Wuö, ede jií ɑ göggí gen ki gïnrɑj ni men? Á kipe ngø ɑ ɑ́ör yɑn? Kër-ɑ ɑ́bëënɑ be kwøb wøki rɑ̈dh ki nyingí, ji ceg kɑ göggø yi en ki gïnrɑj, o jií nuti yielø yi yïn kinni tek.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Gïn-ɑ ógöggɑ rɑ̈ɑ̈dh Rïp ólidh yi yïn ɑnɑn, ge ócyeddi yi en ki tegø, gï óryeeme wɑ̈g kì pinye ki tegø.” Jwøk ɑ́kööb geki Mosɑ̀, kɑ Mosɑ̀ köbbe kinni, “Bene yɑn Jwøng-ɑ Ácwɑ̈ɑ̈j. Yɑ ɑ́cwöb kì bøli Abrɑhɑm, kɑ yɑ ocwöbø kì bøli Isɑɑk, kí bøli Yɑgob. Yɑ ɑ́cwølli yi gen yɑn ɑ́ Jwøk Áyïmø, de nyingɑ kinni Jwøng-ɑ Ácwɑ̈ɑ̈j nuti nyudhi gen yi yɑn. Kɑ kɑɑm wøn cïbɑ ki lwöbø wøki gen thyew, kinni ge ómëggɑ piny Kɑnɑɑn, piny-ɑ́ yije ɑ́bëëd yi gen gɑ wëdhh. Ywøøg tyëng Isrɑil ɑ́rum ki lïngø yi yɑn, yi gööj bɑ̈ɑ̈ngø men-ɑ ɑ́cïb kömi gen yi tyëng Rïp. O köngɑ ɑ́pɑr yi yɑn. Köbbí tyëng Isrɑil kinni, Bene yɑn Jwøng-ɑ Ácwɑ̈ɑ̈j, wu ókɑ̈ɑ̈l yi yɑn wɑ̈g kì yij tïny-ɑ ɑ́cïb kömi wun yi ji-ɑ ɑ́cïb kömi wun yi tyëng Rïp, wu ókɑ̈ɑ̈lɑ wɑ̈g kì yij bɑ̈ɑ̈ngø. O wu óyiel yi yɑn ki tegø geki cɑ́y mø døngø. Wu ókwɑny yi yɑn wu bɑ jiɑ, o yɑ óbëëdø yɑ bɑ Jwøøg wun. O yod yi wun kinni yɑn, yɑ Jwøøg wun, Jwøng-ɑ Ácwɑ̈ɑ̈j, ɑ kɑ̈ɑ̈l wun wɑ̈g kì yij piny Rïp. Wu ókïdhɑ piny-ɑ́ pere ɑ́köngɑ kinni ómëggɑ Abrɑhɑm, kí Isɑɑk, kí Yɑgob. O ómuuj yi yɑn ceth, yɑ Jwøng-ɑ Ácwɑ̈ɑ̈j, o lɑg yi wun ceth.” Kɑ møgɑni köbbi tyëng Isrɑil yi Mosɑ̀, de ge ɑ́dhɑ̈li lïngi kwøbbi Mosɑ̀, mɑ́ köthi gen buudhø yi bɑ̈ɑ̈ngø. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Bïí kedh köbbí rɑ̈ɑ̈dh Rïp, o tyëng Isrɑil öre wɑ̈g kì piny Rïp.” Kɑ Mosɑ̀ okööbø kì bøli Jwøng-ɑ Ácwɑ̈ɑ̈j kinni, “Lidh tyëng Isrɑil, kwøbbɑ nuti lïngø yi gen, de rɑ̈dh ólïng ɑ dï, yɑ bɑ ngɑn nyi dhɑ̈li kwøb!” Kɑ Mosɑ̀ geki Aɑron, köbbi yi Jwøng-ɑ Ácwɑ̈ɑ̈j kinni, “Köbbu tyëng Isrɑil geki rɑ̈ɑ̈dh Rïp kinni, bɑ yɑn ɑ ɑ́köbbi wun kinni peej wun tyëng Isrɑil wɑ̈g kì Rïp.” Møg bene gen wɑ̈thi kɑ̈lli gen: Wɑ̈ddi Ruben, kɑyi Yɑgob, Aɑnök kí Pɑlu, Ëdhrön kí Kɑrmì, bene gen kɑ̈lli Ruben ɑgɑk. Wɑ̈ddi Cimeøn, Yemuel kí Yɑmïn, kí Oɑ̈ɑ̈d, kí Yɑkin, kí Dhoɑr, kí Cɑul wɑ̈d nyɑɑr Kɑnɑɑn, kɑ̈llɑni cöll-ɑ nyingi kweyyi gen. Møg bene gen nyingi wɑ̈thi kɑ̈lli Leebì: Gercön, kí Kɑ̈ɑ̈th, kí Merɑrì. Leebì ɑ́bëëd kɑ runn miyø kí pyɑ̈r ɑ́dɑ̈g wïdɑ́bïryew. Wɑ̈ddi Gercön. Libnì kí Cimeì. Wɑ̈ddi Kɑ̈ɑ̈th bɑ Amrɑm, kí Idhɑr, kí Kibrön, kí Udhiel. Kɑ̈ɑ̈th ɑ́bëëd kɑ runn miyø kí pyɑ̈r ɑ́dɑ̈g wïdɑ́dɑ̈g. Wɑ̈ddi Merɑrì bɑ Mɑklì, kí Mucì. Møgɑni bene gen wɑ̈thi kɑ̈lli Leebì ɑgɑk kɑ̀ lwøøb gen. Kɑ Amrɑm, Yökebed wønye nywøm yi en, ɑnywøle Aɑron geki Mosɑ̀. Amrɑm ɑ́bëëd kɑ runn miyø kí pyɑ̈r ɑ́dɑ̈g wïdɑ́bïryew. Wɑ̈ddi Idhɑr bɑ Körɑ̀, kí Nepeg, kí Dhikrì. Wɑ̈ddi Udhiel bɑ Micɑil, kí Eldhɑpɑn, kí Sïthrì. Kɑ Alicebɑ̀ nyɑɑr Aminɑdɑb, ɑ bɑ nyimï Nɑɑ̈cön, nywøm yi Aɑron. Anyölle gøn Nɑdɑb, kí Abiu, kí Eliɑdhɑr, kí Ithɑmɑr. O wɑ̈ddi Körɑ̀ bɑ Asïïr, kí Elkɑnɑ̀, kí Abiyɑsɑp. Bene gen wɑ̈thi kɑ̈lli Körɑ̀ ɑgɑk. Kɑ Eliɑdhɑr wɑ̈d Aɑron ónyömø ki dhɑjø kì kelli nyigi Putiel, ɑnyölle gøn Pineɑs. Møgɑni bene wɑ̈thi kɑ̈lli Leebì. Aɑron geki Mosɑ̀, bɑ gen ɑ ɑ́köbbi yi Jwøng-ɑ Ácwɑ̈ɑ̈j kinni, “Kɑ̈ɑ̈lu kɑ̈lli Isrɑil wɑ̈g kì Rïp.” Gen ɑ ɑ́kööb ki rɑ̈ɑ̈dh Rïp, o kɑ̈ɑ̈le tyëng Isrɑil wɑ̈g kì cinggi tyëng Rïp, bene gen Mosɑ̀, geki Aɑron kì ri gen. Keny-ɑ ɑ́kööb Jwøng-ɑ Ácwɑ̈ɑ̈j geki Mosɑ̀ kì piny Rïp, Mosɑ̀ ɑ́köbbe kinni, “Yɑn, yɑ Jwøng-ɑ Ácwɑ̈ɑ̈j ɑ kööbø, köbbí rɑ̈ɑ̈dh Rïp ki møg-ɑ óköbbɑ yïn bënn.” Kɑ Mosɑ̀ okööbø kì bøli Jwøng-ɑ Ácwɑ̈ɑ̈j kinni, “Dhøgɑ nyii dhɑ̈lø ki kwøb, o kwøbbɑ ólïngi yi rɑ̈dh kidï!” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Yï ɑ́gwøg yi yɑn yï nɑ Jwøk kì yï rɑ̈dh, o Aɑron ómyëw bëëde ɑ́ jɑltöngí. Nyi kwøb møg-ɑ cïgɑ yïn bënn, o Aɑron ómyëw nyi köbbe rɑ̈dh kipe kinni, o tyëng Isrɑil wiye kedh gen kì pinye. De pyëw rɑ̈ɑ̈dh Rïp ógwøgɑ e teeg, o ngïjjì geki gïïngɑ̈ngø møgɑ gwøgɑ ge gïïr kì piny Rïp. Keny-ɑ ódhɑ̈li rɑ̈dh ki lïngi kwøbbi wun, cingɑ ócïbɑ ri Rïp, kɑ yɑyɑ, ɑ løg jiɑ, tyëng Isrɑil kɑ̈ɑ̈lɑ wɑ̈g kì piny Rïp ki cɑ́y mø teg. O óyod yi tyëng Rïp kinni yɑ bɑ Jwøng-ɑ Ácwɑ̈ɑ̈j, keny-ɑ ócïbɑ cingɑ ri Rïp, kɑ tyëng Isrɑil kɑ̈ɑ̈lɑ wɑ̈g kì kelli gen.” Møgɑni ɑ́gwøg yi Mosɑ̀ geki Aɑron, møg-ɑ ɑ́cïgi gen yi Jwøng-ɑ Ácwɑ̈ɑ̈j ceth, ɑ ɑ́gwøg yi gen. Mosɑ̀ runne ɑ́bëëd gɑ pyɑ̈r ɑ́bïdɑ̈g, o Aɑron runne bɑ pyɑ̈r ɑ́bïdɑ̈g wïdɑ́dɑ̈g keny-ɑ ɑ́kööb gen ki rɑ̈dh. Kɑ Mosɑ̀ geki Aɑron köbbi yi Jwøng-ɑ Ácwɑ̈ɑ̈j kinni, “Keny-ɑ ókööb rɑ̈dh ki wun, kɑ okööbø kinni, ‘Nyodh wun ngïjji wun!’ Köbbí Aɑron kinni, ‘Kwɑny lodhí, kɑ leeng piny kì bøli rɑ̈dh.’ Ree órøje thwöl.” Kɑ Mosɑ̀ geki Aɑron kedh-ɑ bøli rɑ̈dh, kɑ ge ogöögø ni kɑ ɑ́kööb Jwøng-ɑ Ácwɑ̈ɑ̈j. Kɑ Aɑron lodhe leenge piny kì bøli rɑ̈dh geki jyɑ̈gge, kɑ ree løge thwöl. Kɑ rɑ̈ɑ̈dh Rïp tyëdde geki ɑ́jwögge cwööle, kɑ ge ogöögø kinøw ki yɑɑdh gen. Kɑ ɑ́jwöggì lødhi gen leeng gen piny, kɑ ri gen løg gen thöllì. Kɑ lødhi gen mwøøny yi loodh Aɑron. De pyëw rɑ̈dh ɑ́yöd e ceg-ɑ tëngø, kɑ ódhɑ̈lø lïngi kwøbbi gen ni kɑ ɑ́kööb Jwøng-ɑ Ácwɑ̈ɑ̈j. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Rɑ̈dh wïje teeg, ji ɑ́mɑ̈ɑ̈ne kedhø. Kedhí yï rɑ̈dh dhuki kì mwøl keny-ɑ ókedhe gɑ̈d, kɑ yï cungí kì bøle kì gɑ̈d, e lonh-ɑ ɑ́røj ree ɑ́ thwöl okɑ̈llø yi yïn kì cingí.” Kɑ köbbí kinni, “Jwøøg tyëng Ibru, yɑ ɑ́öre yïí be kwøb kinni, ‘Wiy jiɑ kedh gen, o yɑ mɑlli yi gen kì yij pɑ̈l.’ De yï ɑ́dhɑ̈li lïngø gïti ɑnɑn.” Jwøng-ɑ Ácwɑ̈ɑ̈j ɑ́kööb kinni, i óyod yi yïn kì ri møg ki mɑ løge’ men. Lidh, pïi nɑm ógøj yi yɑn ki lodh men-ɑ cingɑ èn, o pï ri gen løg gen remø. O rij thøw gen kì Kiir. Kiir ópënni, kɑ tyëng Rïp ódhɑ̈lø mɑdh ki pïi Kiir.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí Aɑron kinni, ‘Kwɑny lodhí kɑ bɑdí rïïj kömi nɑ̈mmi Rïp, kí ɑgɑlle, kí luyyi pï, o pï ri gen løg gen remø. Pï ógöögø’ remø kì Rïp, cɑgg ɑ́ møg ying yethi ɑ́tɑ̈yyi ɑ́bwödd, wɑlɑ̀ yethi ɑ́tɑ̈yyi kïttì.” Kɑ Mosɑ̀ geki Aɑron ogöögø ni kɑ ɑ́cïg Jwøng-ɑ Ácwɑ̈ɑ̈j. Kɑ Aɑron lodh tïnge, kɑ pïg-ɑ nɑm gøje e onennø yi rɑ̈dh geki bɑ̈ngge, kɑ pïi nɑm bënn ogöögø ki remø. Kɑ rij othøø kì Kiir. Nɑm ɑ́pëni, kɑ tyëng Rïp ódhɑ̈lø mɑdh kì Kiir. Kɑ pïngø bëne ogöögø ki remø kì piny Rïp. Kɑ ɑ́jwöggi Rïp ogöögø ni menɑni ki yɑɑdh gen. Kɑ pyëw rɑ̈dh ótëngø, kɑ ódhɑ̈lø lïngi kwøbbi gen ni kɑ ɑ́kööb Jwøng-ɑ Ácwɑ̈ɑ̈j. Kɑ rɑ̈dh kedh-ɑ gøle kì wɑ̈ye e gïgɑni wøye’ wøyø. Kɑ tyëng Rïp ceg-ɑ kony ki pïg mɑ̈ɑ̈dh kì tøggi nɑm, mɑ́ ge pɑ cuggi mɑdh ki pïi Kiir. Kɑ cyɑ̈ng ɑ́bïryew opödhø kì bɑng gøji nɑm yi Jwøng-ɑ Ácwɑ̈ɑ̈j. Aköbbi Mosɑ̀ yi Jwøng-ɑ Ácwɑ̈ɑ̈j kinni, “Kedhí yï rɑ̈dh kɑ köbbí kinni, Jwøng-ɑ Ácwɑ̈ɑ̈j okööbø kinni, ‘Ör jiɑ, o yɑ mɑlli yi gen. Keløg yï óbɑ̈nyi ki öri gen, myërrí bënn göjjɑ’ ógwɑ̈llì. Nɑm óngøg ki ógwɑ̈llì, kɑ ógwɑ̈llì turr-ɑ gølí, kɑ ge kedh-ɑ øn-ɑ nyi buud yi yïn. Kɑ ge pɑ̈ɑ̈r-ɑ wïj pyëní, kɑ ge kedh-ɑ kɑ̈lli jø tøg burí, kí kɑ̈lli tyëng pödhí, kí yethi udd-ɑ nyi bul ópùn, kí ɑ́tɑ̈yy-ɑ yethi gen nyi nyööm ɑwɑ̈jj. Ógwɑ̈llì ópɑ̈rri kì kömí, kí kömi jií, kí kömi jø tøg burí bënn.’ ” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí Aɑron kinni, ‘Rïj bɑdí ki lodhí kì cingí; rïïj kömi nɑ̈mmì kí ɑgɑll, kí luyyì, kɑ ógwɑ̈llì kɑ̈ɑ̈l kömi piny Rïp.’ ” Kɑ Aɑron bɑde rïïje kömi pïi Rïp, kɑ ógwɑ̈llì bï-ɑ wɑ̈g, kɑ piny Rïp opɑ̈ngø yi gen, de lɑ̈bø pɑ nënni. Kɑ ɑ́jwöggì ogöögø kinøw ki yɑɑdh gen, kɑ ge kɑ̈n-ɑ piny Rïp ki ógwɑ̈llì. Kɑ Mosɑ̀ geki Aɑron cwøl yi rɑ̈dh, ɑköbbi gen yi rɑ̈dh kinni, “Kwɑjju Jwøng-ɑ Ácwɑ̈ɑ̈j o ógwɑ̈llì nyiig yi en kì riɑ, kí ri jiɑ, codhe, o wu ör yi yɑn wuki jii wun, o wu kedhu be ngɑ̈ddi Jwøng-ɑ Ácwɑ̈ɑ̈j ki gëdhhì.” Kɑ rɑ̈dh köbbi yi Mosɑ̀ kinni, “Köbbí yɑn bøli keny-ɑ dwɑddi yi yïn, o Jwøng-ɑ Ácwɑ̈ɑ̈j kwɑjji yi yɑn kiperí, kí per jø tøg burí, kí jií, o ógwɑ̈llì nɑ̈g kì gølí, kí kɑ̈lli jø tøg burí geki kɑ̈lli jií, o dönge ɑ́ møg-ɑ ying Kiir?” Kɑ rɑ̈dh okööbø kinni, “Dhuki!” Kɑ Mosɑ̀ okööbø kinni, “Nɑ kɑ ɑ́kwøbií, o yod yi yïn kinni bong ngɑn pɑ̈r ki Jwøøg wøn, Jwøng-ɑ Ácwɑ̈ɑ̈j. Ógwɑ̈llì ókedh kì butí kí kɑ̈llí, kí kɑ̈lli jø tøg burí, kí kɑ̈lli jií; møg-ɑ Kiir keti gen ɑ ódöng.” Akedh Mosɑ̀ geki Aɑron kì buti rɑ̈dh, kɑ Mosɑ̀ ywøøg-ɑ kö Jwøng-ɑ Ácwɑ̈ɑ̈j kipe kwøbbi ógwɑ̈llì møg-ɑ ɑ́göjje rɑ̈ɑ̈dh Rïp. Kɑ Jwøng-ɑ Ácwɑ̈ɑ̈j oyïëyø’ kwøbbi Mosɑ̀, ɑthøw ógwɑ̈llì kì yethi ud, kí yethi kɑ̈llì, kí yethi pwödh. Kɑ ge congi gɑ börr, kɑ piny ceg-ɑ pënnø yi gen. De keny-ɑ ɑ́lidhii yi rɑ̈dh kinni ryɑ̈ngɑni ɑ́lɑ̈ɑ̈ny, kɑ wïje ótëngø, kɑ ódhɑ̈lø lïngi kwøbbi gen ni kɑ ɑ́kööb Jwøng-ɑ Ácwɑ̈ɑ̈j. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí Aɑron kinni, ‘Rïj bɑdí kí lodhí kì cingí, kɑ tør kì piny gøøj, o ree løge bɑ̈y kì piny Rïp bëne.’ ” Agöög Aɑron kinøw, kɑ bɑde rïje ki lodhe kì cinge, kɑ tør gøje ki lodhe, kɑ bɑ̈yø ceg-ɑ ì thoodh kì kelli ji geki kelli lɑ̈yy. Tør ree ɑ́løge bɑ̈y kì piny Rïp bëne. Kɑ ɑ́jwöggì ri gen pɑ̈nyi gen ki gwøg kinøw ki yɑɑdh gen, de ge ɑ́dhɑ̈li gwøg ki bɑ̈y kì ri tør, kɑ bɑ̈y tɑɑy-ɑ kömi ji geki lɑ̈yy. Aköbbi rɑ̈dh yi ɑ́jwöggì kinni, “Men bɑ gwøøg Jwøk!” De pyëw rɑ̈dh nudd e teeg, kɑ ódhɑ̈lø lïngi kwøbbi gen ni kɑ ɑ́kööb Jwøng-ɑ Ácwɑ̈ɑ̈j. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Møøl yï rɑ̈dh dhuki kì mwøl, keny-ɑ óbëëne gɑ̈d, kɑ köbbí kinni, Jwøng-ɑ Ácwɑ̈ɑ̈j okööbø kinni, ‘Wiy jiɑ kedh gen, o yɑ wøw yi gen. Mɑ́ keløg jiɑ ómɑ̈ɑ̈n kedhø yi yïn, yï ógöjjɑ lwɑngì wuki jø tøg burí, kí jií, kí uddí, kí uddi Rïp bënn, men-ɑ́ keny-ɑ ódi gen ópɑ̈ng yi lwɑngø bëne. De myërri Göcen, kun-ɑ bëëd yi jiɑ, ógeedɑ wɑ̈ye, o óbëëd e bong lwɑngì møg-ɑ óying kunɑni, o yod yi yïn kinni, Yɑn yɑ Jwøng-ɑ Ácwɑ̈ɑ̈j, yɑ nud kì piny keny. O kɑɑm jiɑ geki jií ócïbɑ ki kew. Ngïji menɑni ócwöb dhuki.’ ” Kɑ møgɑni gwøg yi Jwøng-ɑ Ácwɑ̈ɑ̈j, lwɑngì ɑ́ceg ì buk kì gøl rɑ̈dh, kí kɑ̈lli jø tøg bure, kí piny Rïp bëne, kɑ piny órënyø yi lwɑngì. Kɑ Mosɑ̀ geki Aɑron cwøl yi rɑ̈dh kɑ gï köbbe kinni, “Kedh wun, ngɑ̈ddu Jwøøg wun kì pönhï.” Akööb Mosɑ̀ kinni, “Pɑth ki dyër eni gwøgi gïn ni menɑni, mɑ́ gïn-ɑ óngɑ̈lli wøn Jwøøg wøn ɑ́ gëëdhi, pɑ cuggi nywɑlø yi tyëng Rïp. Keløg wø ongɑ̈dø ki gïjø me pɑ cuggi nywɑlø yi tyëng Rïp kì bøli gen, wø pɑ bɑ̈lli yi gen ki tuggi kïttì! Wø ceg-ɑ kedhi yij pɑ̈l kɑɑm me cɑɑdh ki cyɑ̈ng ɑ́dɑ̈g, o Jwøøg wøn, Jwøng-ɑ Ácwɑ̈ɑ̈j, ngɑ̈ddi yi wøn ki gëdhhì kì kunɑni ni kɑ ɑ́cege wøn.” Kɑ rɑ̈dh okööbø kinni, “Wu ówiy yi yɑn o wu kedhu yij pɑ̈l be ngɑ̈ddi Jwøøg wun, Jwøng-ɑ Ácwɑ̈ɑ̈j ki gëdhhì. De wu ko kedhi kun me lɑ̈wi cɑrø. Kɑ wu kwɑ̈jji wun kiperɑ cyee!” Kɑ Mosɑ̀ okööbø kinni, “Yɑn ɑ kedh kì bølí èn, Jwøng-ɑ Ácwɑ̈ɑ̈j ókwɑjji yi yɑn kipe kinni o lwɑngì kedh gen kì gølí geki kɑ̈lli jø tøg burí, kí kɑ̈lli jií dhuki. De wø ko cigí wënyø këti, ji ko mɑ̈ɑ̈n kedhi be ngɑ̈ddi Jwøng-ɑ Ácwɑ̈ɑ̈j ki gëdhhì.” Kɑ Mosɑ̀ ókedhø kì buti rɑ̈dh, ɑkwɑjje Jwøng-ɑ Ácwɑ̈ɑ̈j. Kɑ møg-ɑ ɑ́kwɑjji yi Mosɑ̀ yïëy yi Jwøng-ɑ Ácwɑ̈ɑ̈j. Akedh lwɑngì kì gøl rɑ̈dh, kí kɑ̈lli jø tøg bure, kí kɑ̈lli jie. Bong ɑ́kyel mɑ ɑ́döng. De rɑ̈dh wïje ɑ́tëngi thyew këti, kɑ ji mɑ̈ɑ̈ne kedhø. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kedhí yï rɑ̈dh kɑ köbbí kinni, ‘Jwøng-ɑ Ácwɑ̈ɑ̈j Jwøøg tyëng Ibru okööbø kinni, Ör jiɑ, o ge kedhi gen be wøwi yɑn. De keløg yï óbɑ̈nyi këti ki öri gen, jɑmmí ógøj yi yɑn, dhögí, kí kyënyí, kí ɑderrí, kí ɑmɑllí, kí dyëgí ge óthøw, óbëëd ɑ́ ryɑ̈g me dwøng. O kɑɑm jɑmmi tyëng Isrɑil geki jɑmmi tyëng Rïp ócïbɑ ki kew, bong gïjø men-ɑ óthøw kì kelli jɑmmi tyëng Isrɑil. Kɑ bøli kenyɑni cïb yi Jwøng-ɑ Ácwɑ̈ɑ̈j, ɑ́kööb kinni, ‘Gïnɑni ógwøg yi yɑn dhuki kì pönhï.’ ” Kɑ møgɑni gwøg yi Jwøng-ɑ Ácwɑ̈ɑ̈j dhuki, kɑ jɑmmi tyëng Rïp othøø, de bong gïjø ɑ́kyel mɑ ɑ́thøw kì ri jɑmmi tyëng Isrɑil. Kɑ rɑ̈dh oödø kinni liidh jɑmmi tyëng Isrɑil mɑ thøw gen, kɑ yod e bong ɑ́kyel me thøø kì kelli jɑmmi tyëng Isrɑil. Kɑ pyëw rɑ̈dh ótëngø, ɑmɑ̈ɑ̈ne tyëng Isrɑil kedhø. Kɑ Mosɑ̀ geki Aɑron köbbi yi Jwøng-ɑ Ácwɑ̈ɑ̈j kinni, “Kɑ̈bbi wun ki búr cinggi wun pɑ̈ng kì yij purun, kɑ wiiw mɑl yi Mosɑ̀ kì bøli rɑ̈dh. Ógöögø ki tør me tɑɑy yij piny rɑ̈ɑ̈dh Rïp bëne, dëlli ji kí dëlli lɑ̈yy ómɑg yi børi búrɑni, kɑ kɑ̈jj-ɑ bɑ bør ópyëdø ge ololø ki túd.” Codhe, kɑ ge ókɑ̈bbø ki búr kì yij purun, ɑcungi gen kì bøli rɑ̈dh, kɑ búrɑni kwøør mɑl yi Mosɑ̀, kɑ ogöögø ki bør, ge ololø ki túd kì ri ji geki lɑ̈yy. Ájwöggì ɑ́dhɑ̈li gwøg ki gwøng ni menɑni, mɑ́ gen kì ri gen dëlli gen ɑ́mɑg yi bør kyeel ki tyëng Rïp møg-ɑ kyeelø. De pyëw rɑ̈dh ɑ́gwøg e teeg yi Jwøng-ɑ Ácwɑ̈ɑ̈j, kɑ ódhɑ̈lø lïngi kwøbbi gen ni kɑ ɑ́kööb Jwøng-ɑ Ácwɑ̈ɑ̈j. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Møøl yï rɑ̈dh kì mwøl, kɑ köbbí kinni, Jwøøg tyëng Ibru, Jwøng-ɑ Ácwɑ̈ɑ̈j okööbø kinni, ‘Wiy jiɑ kedhi gen be mɑlli yɑn. Mɑ́ kì bøli keny ɑnɑn, ryɑ̈gɑ tööngɑ’ kömí, wuki jø tøg burí, kí jií bënn, o yod yi yïn kinni bong ngɑn pɑ̈r ki yɑn kì piny bëne. Mɑ́ ɑnɑn cingɑ di rïïjɑ kɑ yï nɑ̈g yi yɑn wuki jií bënn, kɑ wɑ̈thi wun di pɑ̈ɑ̈dh kì pönhï. De yï ɑ́wiy yi yɑn kɑ per kinni, o yï nyudhɑ tegɑ, thyew o nyingɑ geki perɑ yod kì kömi piny bëne. Anɑn yï nudd yï gengg-ɑ jiɑ, ge mɑ̈ɑ̈ní kedhø! Dhuki piny nɑ men, yɑ óöni ki yømi ɑ́piy me dwøng cɑrø, yømi ɑ́piy me ni menɑni nuti pɑ̈nyi könø kì Rïp kër-ɑ ɑ́cöbii gïti ɑnɑn. Öd kinni kïdhi dhögí kí jɑmmí bënn yethi lwɑ̈gg, kɑ ji kedhi gen yethi ud. Møg-ɑ ópïïd yij pwödhø yi ɑ́piy ceg-ɑ thøø.’ ” Tyëng-ɑ ɑ́bwøg yi kwøbbi Jwøng-ɑ Ácwɑ̈ɑ̈j kì kelli jø rɑ̈dh, ge ɑ́rengi yethi ud, gen ki bɑ̈nggi gen ki jɑmmi gen. De tyëng-ɑ ɑ́pëëm, bɑ̈nggi gen geki jɑmmi gen ɑ́wiy wɑ̈g yi gen. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Rïïj cingí mɑl, o ɑtuni ɑ́piy pɑ̈dhe kömi Rïp bëne, o ködde kömi dhɑnhø kí lɑ̈y bëne, kí luum pɑ̈l kì piny Rïp bëne.” Kɑ Mosɑ̀ lodhe nyoodhe mɑl. Kɑ Jwøng-ɑ Ácwɑ̈ɑ̈j ɑ́piy gööje piny, kɑ mɑl opödø kɑ piny rɑ̈be, kɑ yømø me lïb gøøj yij piny Rïp yi Jwøng-ɑ Ácwɑ̈ɑ̈j. Kɑ ji othøø yi kööjø e mɑl ceg-ɑ pöd, o mɑc cem-ɑ rɑ̈d, o ɑ́piy odyëmø. Atunø me ni menɑni nuti pɑ̈nyø lidhø kì piny Rïp kër-ɑ ɑ́cööb pönhɑni. Kɑ ji geki lɑ̈yy møg-ɑ ɑ́yuud wɑ̈g yi ɑtuni ɑ́piy menɑni othøø bënn. Kɑ jɑmm-ɑ twïyø kì yethi pwödh órënyø bënn, kɑ yenh ótørrø bënn. De bong ɑtuni ɑ́piy mɑ ɑ́bëëd e nud kì piny Göcen, kun-ɑ bëëd yi tyëng Isrɑil. Kɑ rɑ̈dh oödø, ɑcwööl Mosɑ̀ geki Aɑron kɑ gï köbbe kinni, “Yɑ ɑ́bɑ̈jji ɑnɑn këti. Jwøng-ɑ Ácwɑ̈ɑ̈j bɑ ngɑntir, dɑ́ wøn ɑ rijjø wøki jiɑ. Kwɑjju Jwøng-ɑ Ácwɑ̈ɑ̈j, o pööd mɑl geki ɑtuni ɑ́piy cungi gen. Wu ówiy yi yɑn o wu kedh wun. Wu koo nudd wu bëëd ɑ keny këti.” Aköbbii yi Mosɑ̀ kinni, “Keny-ɑ ókedhɑ wɑ̈g kì kɑɑl, yɑ ókedh kɑ cinggɑ thɑ̈ngɑ Jwøng-ɑ Ácwɑ̈ɑ̈j, o mɑl wïye ki pöd, o ɑ́piy cöge e pɑ cigi dyëmø. O yod yi yïn kinni, piny bɑ mi Jwøng-ɑ Ácwɑ̈ɑ̈j. De ngɑ̈nyi yi yɑn kinni, Jwøk, Jwøng-ɑ Ácwɑ̈ɑ̈j nudd e pɑ böggi yi wun, wuki jø tøg burí.” Kitɑn geki ceir ɑ́rënyi, mɑ́ ceir ɑ́yuud e rum dhɑ̈yø, o kitɑn rum køøg. De gemè geki gɑthɑnì nuti rënyø mɑ́ ge nyi cyeg-ɑ cyɑ̈n. Kɑ Mosɑ̀ ókedhø kì buti rɑ̈dh kì kɑɑl e cingge thɑ̈ng en Jwøng-ɑ Ácwɑ̈ɑ̈j. Kɑ pööd mɑl ócungø geki yømø, kɑ kødh ówïyø dyëëm piny. Keny-ɑ ɑ́lidhii yi rɑ̈dh kinni kødh ɑ́cög, kɑ pööd mɑl ócungø geki ɑ́piy, ɑdøøge ki bɑ̈jjø, kɑ pyëwe cwede geki bɑ̈ngge. Kɑ pyëw rɑ̈dh ótëngø, kɑ tyëng Isrɑil ocögø gï pɑ wëgge kedhø, ni kɑ ɑ́kööb Jwøng-ɑ Ácwɑ̈ɑ̈j kì ri Mosɑ̀. Codhe, kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kedhí yï rɑ̈dh, mɑ́ pyëwe ɑ́wëggɑ tëngø geki jø tøg bure, kɑ per kinni o yɑ nyodhɑ ngïjjì møgɑ. Thyew kiper kinni o møgɑni óköbbí wɑ̈ddí, kí wɑ̈ddi wɑ̈ddí, gen ɑ gïg-ɑ ɑ́göggɑ tyëng Rïp, tyëng-ɑ dhëgg, geki ngïjjì møg-ɑ ɑ́nyodh yi yɑn kì kelli gen, o óyod yi wun kinni yɑ bene Jwøng-ɑ Ácwɑ̈ɑ̈j.” Kɑ Mosɑ̀ geki Aɑron kedh-ɑ yï rɑ̈dh, ɑköbbii yi gen kinni, “Jwøøg tyëng Ibru, Jwøng-ɑ Ácwɑ̈ɑ̈j okööbø kinni, ‘Yï gït-ɑ wɑɑng yï bɑ̈nyi ki dwöögi wïjí piny kì bølɑ? Wiy jiɑ kedh gen, o yɑ mɑlli yi gen. Mɑ́ keløg yï óbɑ̈nyi ki wiyi jiɑ, myërrí ómuuj yi yɑn ki bɑ̈nyø dhuki. Piny ókum yi bɑ̈nyø. Kɑ piny ódhɑ̈lø nënnø yi ngenyi bɑ̈nyø. O jɑmm-ɑ ɑ́döng kì yï wun kì bɑng ɑtuni ɑ́piy cɑm yi en, o yenh-ɑ twïyø kì yethi bɑ̈gg cɑm yi en. Kɑ̈llí ópɑ̈ng yi bɑ̈nyø, kí kɑ̈lli jø tøg burí geki kɑ̈lli tyëng Rïp bënn, gïjø me nuti pɑ̈nyø lidhø yi wëëg wun, kí wëëg wëëg wun ki kër-ɑ ɑ́bëëd gen kì kömi piny, gïti dicyɑ̈ngtïn.’ ” Kɑ Mosɑ̀ ókedhø kì buti rɑ̈dh. Kɑ rɑ̈dh köbbi yi jø tøg bure kinni, “Jɑɑl, gït-ɑ wɑɑng e muuj-ɑ wɑ ki ryɑ̈g! Kwïj yi yïn kinni Rïp ɑ́rënyi? Wiy tyëng Isrɑil kedhi gen be mɑlli Jwøøg gen, Jwøng-ɑ Ácwɑ̈ɑ̈j.” Codhe, kɑ Mosɑ̀ geki Aɑron dwöög bøli rɑ̈dh. Aköbbi gen yi rɑ̈dh kinni, “Kedhu be mɑlli Jwøøg wun, Jwøng-ɑ Ácwɑ̈ɑ̈j. De köbbu yɑn mɑ yinge’ men ki men ɑ kedh?” Kɑ Mosɑ̀ okööbø kinni, “Wøkí yɑɑg-ɑ wøbb kí jøgdøngi wøn ɑ kedh, kí wɑ̈ddi wøn geki nyigi wøn, kí dyëgi wøn geki dhögi wøn, mɑ́ wø kedh-ɑ be wøwi Jwøng-ɑ Ácwɑ̈ɑ̈j.” Kɑ rɑ̈dh okööbø kinni, “Bɑ Jwøng-ɑ Ácwɑ̈ɑ̈j ɑ ókøny wun ke wiyɑ wun, o wu kedh wun, wuki nyigi wun kì Rïp. Nënni wu dwɑdd-ɑ gwøg ki gïnrɑj. Pɑth! Jøg-ɑ cwøw keti gen ɑ kedhi be mɑlli Jwøng-ɑ Ácwɑ̈ɑ̈j, o bene gïn-ɑ kwɑjji yi wun.” Codhe, kɑ Mosɑ̀ ryeem wɑ̈g yi rɑ̈dh geki Aɑron kì gøle. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Tïng cingí mɑl kì kömi piny Rïp, o bɑ̈nyø bëe. Bɑ̈nyø ótɑɑy yij piny Rïp bëne, o lum geki yenh-ɑ ɑ́döng kì bɑng ɑtuni ɑ́piy cɑm yi en.” Kɑ Mosɑ̀ lodhe tïnge mɑl kì kömi piny Rïp, kɑ Jwøng-ɑ Ácwɑ̈ɑ̈j ókönø ki yømø kì kuni wɑɑng cyɑ̈ɑ̈ng mwøl, kɑ cɑ̈ng tyëge e ókwöddø kì pönhɑni kì cyɑ̈ngɑni, kɑ wɑ̈r tyëge. Keny-ɑ ɑ́bëën mwøl, yømɑni rum kɑ̈nø ki bɑ̈nyø. Kɑ bɑ̈nyø pɑ̈ɑ̈r-ɑ kömi piny Rïp bëne, kɑ ceg-ɑ ì nɑb kì yethi myërri Rïp bënn ɑ́ thïgø thïgø, bong bɑ̈nyø mɑ ɑ́pɑ̈nyi bëënø e nɑ menɑni, wɑlɑ̀ bong men-ɑ óbï kì bɑnge e pɑ̈r ki en. Piny ɑ́dhɑ̈li nennø yi bɑ̈nyø. Kɑ piny ólunyø yi bɑ̈nyø. Kɑ lum geki yenh cɑm yi en kinni tweet, kí yenhi nywøl møg-ɑ ɑ́döng kì bɑng ɑtuni ɑ́piy. Bong gïjø mɑ ɑ́döng e mɑr kì ri lùm geki yenh kì yethi pwödh, kì piny Rïp bëne. Kɑ Mosɑ̀ geki Aɑron jwɑn ki cwølø yi rɑ̈dh, ɑköbbe gïn kinni, “Yɑ ɑ́bɑ̈jji kì bøli Jwøøg wun, Jwøng-ɑ Ácwɑ̈ɑ̈j, kí bøli wun. Anɑn lɑ̈ɑ̈m pëthi wun ki yɑn, kɑ Jwøøg wun, Jwøng-ɑ Ácwɑ̈ɑ̈j, kwɑjji wun kiperɑ, o gïn-ɑ bɑ nɑ̈ɑ̈g ni men kɑ̈l yi en kì butɑ.” Codhe, ɑkedh Mosɑ̀ kì buti rɑ̈dh, kɑ Jwøng-ɑ Ácwɑ̈ɑ̈j kwɑjje. Kɑ yømø me teeg cɑrø lug yi Jwøng-ɑ Ácwɑ̈ɑ̈j kì kuni wɑɑng cyɑ̈ɑ̈ng böörø, kɑ bɑ̈nyø wøøje, kɑ gø cuure Nɑɑm Omeli Kwɑrø. Bong bɑ̈nyø ɑ́kyel mɑ ɑ́döng kì myërri Rïp bënn. Kɑ pyëw rɑ̈dh wëggi tëngø yi Jwøng-ɑ Ácwɑ̈ɑ̈j, ɑcöge tyëng Isrɑil pɑ wëgge kedhø. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Tïng cingí mɑl kì kömi piny Rïp, o piny gööge ki muudhø, me yije cɑɑg wɑ̈rrø.” Kɑ Mosɑ̀ bɑde rïïje mɑl, kɑ muudhø me dwøng bï-ɑ kömi piny Rïp bëne ki cyɑ̈ng ɑ́dɑ̈g. Bong dhɑnhø mɑ ɑ́lidh wɑɑd gen; bong dhɑnhø mɑ ɑ́dhwödh kì keje ki cyɑ̈ng ɑ́dɑ̈g. De kɑ̈jj-ɑ bëëd yi tyëng Isrɑil ɑ́bëëd e dɑ cɑr. Kɑ Mosɑ̀ cwøl yi rɑ̈dh, ɑköbbe gøn kinni, “Kedh wun kɑ Jwøng-ɑ Ácwɑ̈ɑ̈j mɑlli wun, kɑ dhögi wun geki dyëgi wun wiy, de mɑ̈nni wun geki nyigi wun ócuggø kedhø kí wun.” Kɑ Mosɑ̀ ólöggø kinni, “De yïn thyew, muuj ki gëdhhì møg-ɑ óngɑ̈lli wøn Jwøøg wøn, Jwøng-ɑ Ácwɑ̈ɑ̈j. Jɑmmi wøn thyew ceg-ɑ kedhø kí wøn, bong dɑdø me döng, mɑ́ gen ɑ ri gen ókɑ̈bbi yi wøn ki møg-ɑ wøw wøn Jwøøg wøn, Jwøng-ɑ Ácwɑ̈ɑ̈j. Kwïj yi wøn eni gïn-ɑ ówøw wøn Jwøøg wøn, Jwøng-ɑ Ácwɑ̈ɑ̈j, gïti keny-ɑ ówɑ̈dhi wøn kunɑni.” De pyëw rɑ̈dh ɑ́wëggi tëngø yi Jwøng-ɑ Ácwɑ̈ɑ̈j, kɑ óbɑ̈nyø ki wëggi gen kedhø. Aköbbi Mosɑ̀ yi rɑ̈dh kinni, “Kedhí wɑ̈g kì keny, kɑ yï ko dwöög këti. Odwöög yïɑ, yï ceg-ɑ thøø!” Codhe, ɑköbbi rɑ̈dh yi Mosɑ̀ kinni, “Gen ɑgɑk, ɑ́kwøb yi yïn, yɑ pɑ dwöög be lidhi yïn këti.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Ádöng ɑ́ ryɑ̈g ɑ́kyel ɑ ókɑ̈ɑ̈lɑ kömi Rïp, codhe o wu ör wɑ̈g yi rɑ̈dh, wu bënn, wu ócire ki cïïr dwøng. Köbbí jøg-ɑ cwøw geki mɑ̈nni Isrɑil kinni, cwöddi gen ki jɑmm-ɑ bɑ dhɑb kí ɑ́tegø kì yï mɑ̈dhhi gen.” Jwøng-ɑ Ácwɑ̈ɑ̈j tyëng Isrɑil ɑ́wëgge wørø yi tyëng Rïp. Mosɑ̀ thyew mïdhi ɑ́ jɑl me pere teeg cɑrø yi rɑ̈dh geki jø tøg bure, kí ji bënn. Codhe, kɑ rɑ̈dh köbbi yi Mosɑ̀ kinni, “Jwøng-ɑ Ácwɑ̈ɑ̈j okööbø kinni, ‘Tïn kì dïwɑ̈r, yɑ kedh-ɑ kelli Rïp, wɑ̈n-ɑ kɑyø bëne ceg-ɑ thøø kì piny Rïp, cɑg kì ri kɑyi rɑ̈dh ngɑn-ɑ bëëdø kì wïj kwøm, gïti ri kɑyi bɑ̈ng-ɑ dhɑjø men-ɑ rɑ̈ɑ̈gø ki byel. Cɑgg ɑ́ kɑyyi lɑ̈yy thyew, ge ceg-ɑ thøø. Ywøg me dwøng óbëëd e nud kì piny Rïp bëne. Bong mɑ ɑ́bëëd e nɑ menɑni, o bong men-ɑ ókɑ̈ɑ̈l bɑnge e nɑ en. De bong gwög men-ɑ ógwɑ̈y tyëng Isrɑil, dhɑnhø kí lɑ̈y pɑ gwɑ̈y yi en, o yod yi wun kinni yɑ ɑ́cïb ki kew kì kɑɑm Rïp geki Isrɑil.’ ” Kɑ Mosɑ̀ okööbø kinni, “Jø tøg burí bënn óbï yïɑ, kɑ ri gen bøødh gen piny kì bølɑ, ge okööbø kinni, ‘Kedh kɑ jií kɑ̈ɑ̈l bënn.’ Codhe o yɑ kedhɑ cyee.” Kɑ Mosɑ̀ ókedhø kì buti rɑ̈dh pyëwe rɑɑj cɑrø. Aköbbi Mosɑ̀ yi Jwøng-ɑ Ácwɑ̈ɑ̈j kinni, “Kwøbbi wun pɑ lïngi yi rɑ̈dh gïti keny-ɑ óngënyi ngïjjì møgɑ kì piny Rïp.” Ngïjjì møgɑni bënn ɑ́gwøg yi Mosɑ̀ geki Aɑron kì bøli rɑ̈dh, kɑ pyëw rɑ̈dh wëggi tëngø yi Jwøng-ɑ Ácwɑ̈ɑ̈j, ɑcöge tyëng Isrɑil pɑ wëgge kedhø kì pinye. Kɑ Mosɑ̀ geki Aɑron köbbi kì Rïp yi Jwøng-ɑ Ácwɑ̈ɑ̈j kinni, “Dwɑ̈y men bene dwɑ̈n-ɑ mɑl kì yï wun kibøli dwɑ̈tt bënn. Bene en dwɑ̈n-ɑ mɑl kì yij run. Köbbu tyëng Isrɑil bënn kinni, yɑ̈ɑ̈b dhɑnhø ki órömø kipe tyëng gøle, keny-ɑ ógöög cyɑ̈nggi dwɑ̈y men ki pyɑ̈rø. Keløg e bong ji mø gïïr kì kɑl møg cuggi tyëgi órömɑni, nywɑg ge gøn ki gøl-ɑ bute, e røøm ki kwɑnni ji. Kwɑn ceth ɑ́ kɑ̈jji dhøggi jiɑni, eni órömø. Yɑb ɑ́ órömø me bong gïnrɑj kì ree, rune ɑ́kyel. Dyelɑni ócuggø bëëdø ɑ́ órömø wɑlɑ̀ ónywøg. Kɑ ge mïdhi wun gïti keny-ɑ ógöög cyɑ̈nggi dwɑ̈y men ki pyɑ̈rø wïdɑ́ngwen. Ngɑɑl gen yi kɑ̈lli Isrɑil bënn kì böörø kì cyɑ̈ngɑni, e piny nuti lunyø. Kɑ ge kɑ̈bbi gen kì ri remø, kɑ gɑ̈ɑ̈j ri bɑ̈lli ud geki bøli tëdd kì mɑl, kì kɑ̈ll-ɑ yethi gen cɑɑm dyelɑni. Kɑ dyelɑni bul ki mɑc kì wɑ̈rɑni. Kɑ cɑm ki lùm mø keej geki ópun me bɑ ɑbul ɑ́ ɑwɑj me bɑ olwëny. Ko di gïjø me cɑm kì ree e nuti cyegø, wɑlɑ̀ ko di me thɑl ki pï, de ceg ki bulø ki mɑc, kí wïje geki tyelle, kí cïnne. Kɑ ko di men wiy yi wun kì ree gïti mwøl, keløg e dɑ men wɑ̈dhi mwøl, rɑ̈b wun en ki mɑc. Cɑmu en, e wënnì ween wun yethi wun, o wɑrri wun ying-ɑ tyelli wun, o lødhi wun ying-ɑ cinggi wun, bene kër-ɑ ócɑm wun en ɑnɑn, mɑ́ e bɑ Ákɑɑdh mi Jwøng-ɑ Ácwɑ̈ɑ̈j. “Yɑ ókɑ̈lli yij piny Rïp bëne kì wɑ̈rɑni, o kɑyyì bënn nɑ̈g yi yɑn, cɑg kì ri kɑyi dhɑnhø, gïti ri kɑyi lɑ̈y. O jwöggi Rïp bënn ócɑy yi yɑn, bene yɑn Jwøng-ɑ Ácwɑ̈ɑ̈j. O remø óbëëd ɑ́ ngïjji kɑ̈ll-ɑ di wun. Gøl-ɑ ree lidhɑ remø, ókɑɑdh yi yɑn. Bong gïn-ɑ ónywɑl wun keny-ɑ ócɑyɑ piny Rïp. Nyi pɑru cyɑ̈ngɑni ceth, kɑ wu nyi tuug wun kì yije wu wøw-ɑ yɑn. Rïjji Isrɑil bënn, wør gen yɑn ki wööwø cyɑ̈ngɑni, cɑg ɑnɑn gïti ɑtheer. “Cyɑ̈nggi wööwø menɑni bɑ ɑ́bïryew, wu cɑm-ɑ olwëny kì yethi cyɑ̈nggɑni. Kɑ̈ɑ̈l wun ówɑj wɑ̈g kì yethi kɑ̈lli wun kì cyɑ̈ng-ɑ mɑl. De ngɑn-ɑ ócyɑ̈mø ki ówɑj kì yethi cyɑ̈nggɑni, cɑg kì cyɑ̈ng-ɑ mɑl gïti bïryeew cyɑ̈nggɑni, ngɑnɑni kɑ̈ɑ̈l-ɑ wɑ̈g kì kelli Isrɑil. Nyi cugi wun ki cyɑ̈ng-ɑ mɑl geki bïryeew cyɑ̈ng; ge bɑ cyɑ̈nggi kwër kì yï wun. Bong gïjø me gwøg kì cyɑ̈nggɑni den-ɑ́ gïn-ɑ cɑm kete ɑ cuggi gwøgø yi wun. Mïdhu kwëër olwëny, mɑ́ e bɑ cyɑ̈ngɑni ɑ ɑ́kɑ̈ɑ̈lɑ wun wɑ̈g kì piny Rïp. Mïdhu menɑni ɑ́ cyɑ̈ɑ̈ng kwër kì yethi rïjj bënn gïti ɑtheer. Cɑ̈gi wun ki cɑmi olwëny kì dwɑ̈n-ɑ mɑl kì cyɑ̈nggi dwɑ̈y pyɑ̈rø wïdɑ́ngwen kì thyënhø, gïti keny-ɑ ógöög cyɑ̈nggi dwɑ̈yɑni ki pyɑ̈r ɑ́ryew wïdɑ́kyel kì thyënhø. Ko di ówɑj me nud kì kɑ̈lli wun ki cyɑ̈ng ɑ́bïryew. De ngɑn-ɑ ócyɑ̈mø ki ówɑj kì kelli tyëng Isrɑil cɑgg ɑ́ wëdh, ngøl ngɑn ni menɑni wɑ̈ye. Wu ko cyɑ̈ɑ̈m ki gïjø me wɑj kì yethi kɑ̈lli wun bënn, cɑm wun olwëny kì yethi cyɑ̈nggi kwërɑni.” Codhe, kɑ jøgdøngi Isrɑil bënn cwøl yi Mosɑ̀, ɑköbbe gïn kinni, “Kedh wun, kɑ kɑl kɑ̈bbe ki órömø wɑlɑ̀ wɑ̈dtegø kɑ ge ngɑl wun, o kɑ̈lli wun göög gen ki Kwëër Ákɑɑdh. Kɑ wu kɑ̈bbi wun ki yelø, kɑ jwɑ̈ɑ̈g wun yij tɑm-ɑ di remø, kɑ remɑni gɑ̈ɑ̈j wun bɑ̈lli uddi wun geki wɑ̈thi tëdd kì mɑl. Kɑ ko di dhɑnhø kì kelli wun men bɑ̈ɑ̈n ɑ́dyëddi kɑl e bï-ɑ wɑ̈g, gïti keny-ɑ óru wøw. Keny-ɑ óbëën Jwøng-ɑ Ácwɑ̈ɑ̈j be gøji Rïp, kɑ remø lidh yi en kì bɑ̈lli ød geki wïj tëd kì mɑl, gø ókɑɑdhe, kɑ ngɑn-ɑ nɑ̈gø mɑ̈ɑ̈ne kedhi yethi kɑ̈lli wun be nɑ̈ggø. Kɑ møgɑni mïdhi wun gɑ cigg kiper wun, wuki wɑ̈ddi wun gïti ɑtheer. O keny-ɑ ókedhu piny-ɑ ɑ́kwøb yi Jwøng-ɑ Ácwɑ̈ɑ̈j kinni gø ómëgge wun, mïdhu guöngɑni ceth kidøøj. O keny-ɑ ópëjji wɑ̈ddi wun kinni, ‘Guöng bɑ ngø kì yï wun?’ Kɑ wu kööb wun kì bøli kenyɑni kinni, ‘Bɑ gëëdhi, Ákɑɑdh mi Jwøng-ɑ Ácwɑ̈ɑ̈j, ngɑn-ɑ ɑ́kɑɑdh kɑ̈lli tyëng Isrɑil kì Rïp, keny-ɑ ɑ́gøje Rïp, de kɑ̈llee ɑ́yiele.’ ” Kɑ ji ri gen bøødh gen piny, kɑ Jwøng-ɑ Ácwɑ̈ɑ̈j mɑl yi gen. Kɑ tyëng Isrɑil ókedhø, ɑgwøg gen møg-ɑ ɑ́cïgi Mosɑ̀ geki Aɑron yi Jwøng-ɑ Ácwɑ̈ɑ̈j. Møgɑni ɑ́gwøg yi gen ceth. Kì dïwɑ̈rɑni ceth, kɑ kɑyyì bënn nɑ̈g yi Jwøng-ɑ Ácwɑ̈ɑ̈j kì piny Rïp, cɑg kì ri kɑyi rɑ̈dh men-ɑ ólɑg kwøme, gïti ri kɑyi ɑmɑg men-ɑ ød mɑg, kí kɑyyi lɑ̈yy bënn. Kɑ rɑ̈dh ócyëwø kì wɑ̈rɑni geki jø tøg bure bënn, kí tyëng Rïp bënn. Ádɑ ywøg me dwøng kì Rïp bëne, bong kɑl me yije jɑdø ki ngɑnthøø. Kɑ Mosɑ̀ geki Aɑron cwøle kì wɑ̈rɑni kɑ gï köbbe kinni, “Dhwödh wun, kedhu wɑ̈g kì kelli jiɑ, wuki tyëng Isrɑil. Kɑ wu kedhu be mɑlli Jwøng-ɑ Ácwɑ̈ɑ̈j ni kɑ ɑ́kööb wun. Kɑ dhögi wun geki dyëgi wun kwɑny wun thyew ni kɑ ɑ́kööb wun, kɑ wu kedh wun. Kwɑ̈jji wun ki gyëdh kiperɑ thyew.” Kɑ Isrɑil jwɑn yi tyëng Rïp ki kwøbbi dhwödhø, ge okööbø kinni, “Jwɑnu kedhø kipe wø óthøw bënn.” Codhe, kɑ teedø tɑ̈mmi ɑwɑ̈jji gen pɑ̈ng gen ki ɑwɑj olwëny. Kɑ tɑ̈mmi ɑwɑ̈jj bɑɑn gen yethi ógudh, kɑ gï byel gen. Tyëng Isrɑil ɑ́göög ni kɑ ɑ́köbbi gen yi Mosɑ̀ ceth. Kɑ ge ócwöddø kì yï tyëng Rïp ki jɑmm-ɑ bɑ dhɑb kí ɑ́tegg, kí ógudhi dhwɑ̈ng. Kɑ pëthi tyëng Rïp yïëbbi Isrɑil yi Jwøng-ɑ Ácwɑ̈ɑ̈j, ɑmuuj gen jɑmm-ɑ ɑ́kwɑjji kì yï gen bënn. Kɑ kɑ̈ɑ̈r Rïp kɑ̈l yi tyëng Isrɑil. Tyëng Isrɑil ɑ́dhwödh ki tyelli gen kì Rɑmsis ge kedh-ɑ Suköth. Kwɑnni jøg-ɑ cwøw bɑ ɑ́lïp miy ɑ́bïkyel, tyëng-ɑ mɑ̈nn geki othønhø pɑth ki ɑkwɑn. Ji møøgø mø kwɑnni gen ngenyø thyew ɑ́kedh ki gen, kɑ ge oköödø ki dhög kí dyëg ɑ́tegg kí römm mø gïïr. Tyëng Isrɑil ɑ́bud ki ópun ki ɑwɑny-ɑ olwëny men-ɑ ɑ́kɑ̈ɑ̈l yi gen kì Rïp. Awɑnyɑni ɑ́kɑ̈l yi gen e nuti wɑ̈nyyø, mɑ́ ge ɑ́ceg kɑ cyeed wɑ̈g kì Rïp, kɑ ge ójɑ̈ddø ki keny göög gen ki gïn cɑɑm yöö. Kwɑnni runn møg-ɑ ɑ́bëëd tyëng Isrɑil kì Rïp bɑ miy ɑ́ngwen kí pyɑ̈r ɑ́dɑ̈g. Keny-ɑ ɑ́thumi runnɑni gɑ miy ɑ́ngwen kí pyɑ̈r ɑ́dɑ̈g, ɑbëën yɑɑy Jwøng-ɑ Ácwɑ̈ɑ̈j wɑ̈g kì piny Rïp, kí wɑ̈thi kɑ̈lle bënn. Bɑ wɑ̈r men mïdhi ɑ́ mi Jwøng-ɑ Ácwɑ̈ɑ̈j, wɑ̈r-ɑ ɑ́kɑ̈ɑ̈le gïn wɑ̈g kì Rïp, mïdhi yi tyëng Isrɑil, rïny kí rïny, gïti ɑtheer. Kɑ Mosɑ̀ geki Aɑron köbbi yi Jwøng-ɑ Ácwɑ̈ɑ̈j kinni, “Bene Kwëër Ákɑɑdh ɑnɑn. Bong wëdh me cyɑ̈mø ki gïi Kwëër Ákɑɑdh. De bɑ̈ng-ɑ jɑlø men bɑ ɑngew ki ngyëny ócuggø cɑm, ke rum en ki ngølø. Wëlø geki ngɑn-ɑ bɑ ɑkïr, pɑ cyɑ̈mø kì ree. Cɑm kì kɑl, ko di rïnge me kïdhi wɑ̈g kì gølɑni, kɑ ko di cögø me tor yi wun kì ri cue. Nyi gwøøg kwërɑni ceth yi wɑ̈thi kɑ̈lli Isrɑil bënn. Ngɑnpɑth men-ɑ bëëdø kì butí ócuggø gwøg ki Ákɑɑdh mi Jwøng-ɑ Ácwɑ̈ɑ̈j. De ngølu møg-ɑ bɑ cwøw bënn; ngɑn-ɑ ɑ́rum ki ngølø, ócuggø gwøg mɑ́ e ɑ́göög e nɑ ngɑn-ɑ ónywølø kì pönhï. Cigg ɑ́kyel ɑ dwɑddi kinni o ge mïdhi yi tyëng Isrɑil geki tyëngpɑth møg-ɑ bëëdø kì kelli gen.” Tyëng Isrɑil ɑ́yïëy bënn ki møg-ɑ ɑ́cïgi Mosɑ̀ geki Aɑron yi Jwøng-ɑ Ácwɑ̈ɑ̈j, kɑ gïgɑni nyi gwøg yi gen ceth. Wɑ̈thi kɑ̈lli Isrɑil bënn ɑ́kɑ̈ɑ̈l wɑ̈g yi Jwøng-ɑ Ácwɑ̈ɑ̈j kì piny Rïp kì cyɑ̈ngɑni. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Thyëyí yɑn kɑyy-ɑ cwøw bënn kì Isrɑil, ying-ɑ́ dhɑnhø wɑlɑ̀ lɑ̈y, bɑ miɑ.” Kɑ teedø köbbi yi Mosɑ̀ kinni, “Pɑrri wun cyɑ̈ng-ɑ ɑ́bëën wun wɑ̈g kì Rïp. Cyɑ̈ng-ɑ ɑ́bëën wun wɑ̈g kì yij bɑ̈ɑ̈ngø. Mɑ́ wu ɑ́kɑ̈ɑ̈l wɑ̈g yi Jwøng-ɑ Ácwɑ̈ɑ̈j kɑ tegø me dwøng. Wu ɑ́bï wɑ̈g kì cyɑ̈ɑ̈ng kì dwɑ̈n-ɑ mɑl. Jwøng-ɑ Ácwɑ̈ɑ̈j wu ókïdhe piny tyëng Kɑnɑɑn, geki piny tyëng Kit, kí piny tyëng Amör, kí piny tyëng Kib, kí piny tyëng Yebus. Bene piny men-ɑ ɑ́könge kweyyi wun kinni gø ómëgge wun, eni piny-ɑ yije mulli yi cɑg geki møøw kïc, nyi gwøgu kwër menɑni kì dwɑ̈ɑ̈n. Cyɑ̈ng ɑ́bïryew wu cɑm-ɑ olwëny, o bïryeew cyɑ̈nggɑni bɑ cyɑ̈ng-ɑ wøøw Jwøng-ɑ Ácwɑ̈ɑ̈j. Cyɑ̈ng ɑ́bïryew wu cɑm-ɑ olwëny, ko di ówɑj wɑlɑ̀ gïjø me wɑj kì yethi kɑ̈lli wun. Köbbu wɑ̈ddi wun kì cyɑ̈ngɑni kinni, ‘Wööwø men gwøg yi wɑ kɑ per gïn-ɑ ɑ́gwøg yi Jwøng-ɑ Ácwɑ̈ɑ̈j kì cyɑ̈ng-ɑ ɑ́bëën wɑ wɑ̈g kì Rïp. O kwërɑni bëëde e bɑ ngïji kì cinggi wun, e nɑ gïn nyi pɑ̈ddi yïn kì bølí, o Ciggi Jwøng-ɑ Ácwɑ̈ɑ̈j ying gen dhøgí, mɑ́ yï ɑ́kɑ̈ɑ̈l wɑ̈g yi Jwøng-ɑ Ácwɑ̈ɑ̈j kì Rïp kɑ tegø me dwøng. Kɑ ciggɑni mïdhí, yï nyi gwøg-ɑ kwërɑni kì bøli keje ceth kì yethi runn bënn. “O keny-ɑ ókïdhi wun piny Kɑnɑɑn yi Jwøng-ɑ Ácwɑ̈ɑ̈j ni kɑ ɑ́köbbe wun, wuki wëëg wun, kɑ kɑyy-ɑ cwøw, ying gɑ ji wɑlɑ̀ lɑ̈yy, thyeey gen gɑ mø Jwøng-ɑ Ácwɑ̈ɑ̈j. De nyi pɑ̈ɑ̈d kɑyi ɑderø ki órömø. O keløg e pɑ pɑ̈d yi yïn, tor mune. O kɑyi dhɑnhø ócuggø pɑ̈dø, pɑ̈d kɑyyì møg-ɑ bɑ wɑ̈ddí ceth. Opyëëj yïn dhuki megø yi wɑ̈dí kinni, ‘Men bɑ ngø?’ Kɑ köbbí kinni, ‘Wɑ ɑ́kɑ̈ɑ̈l wɑ̈g yi Jwøng-ɑ Ácwɑ̈ɑ̈j kì Rïp, kì yij bɑ̈ɑ̈ngø kɑ tegø me dwøng. Rɑ̈ɑ̈dh Rïp ɑ́bëëd wïje teeg, kɑ wɑ mɑ̈ɑ̈ne bëën wɑ̈g. Kɑ kɑyyì bënn møg-ɑ bɑ cwøw, ji ki lɑ̈yy nɑ̈g yi Jwøng-ɑ Ácwɑ̈ɑ̈j kì yij piny Rïp bëne. Bene ɑ bɑnge nyi thyëyi wɑ wɑ̈n-ɑ kɑyø Jwøng-ɑ Ácwɑ̈ɑ̈j ɑ́ gëëdhi, o nyi pɑ̈ɑ̈d-ɑ wɑ̈g. Wööwø men pɑ̈r ki gïjø men-ɑ ótwööj cingí, o pɑ̈r ki gïjø men-ɑ ótwööj bølí ɑ́ men nyi pɑ̈ddi yïn kinni, Jwøng-ɑ Ácwɑ̈ɑ̈j wɑ ɑ́kɑ̈ɑ̈le wɑ̈g kì Rïp kɑ tegø me dwøng.’ ” Keny-ɑ ɑ́ryeem tyëng Isrɑil yi rɑ̈ɑ̈dh Rïp, ge nuti wiyø yi Jwøng-ɑ Ácwɑ̈ɑ̈j o ge kɑ̈l gen yuu piny Pelistiyɑ̀, ngö ɑ́ en ɑ cyɑ̈gi. Mɑ́ Jwøng-ɑ Ácwɑ̈ɑ̈j ɑ́kööb kinni, yɑ pɑ dwɑddi kinni o ji ópɑ̈di gen, keny-ɑ óyod gen liny, kɑ ge døøg-ɑ Rïp. Kɑ ji wen yi Jwøng-ɑ Ácwɑ̈ɑ̈j ki yuu yij pɑ̈l, gï töönge’ Nɑɑm Omeli Kwɑrø. Yɑɑy Isrɑil ɑ́bï wɑ̈g kì Rïp e rum duudø. Kɑ dëël Yosep kwöög yi Mosɑ̀. Mɑ́ tyëng Isrɑil ɑ́köbbi yi Yosep cøn kinni köngi gen ki köngi dwøng, kinni, “Wu bɑ møg-ɑ óyiel yi Jwøk kɑ wu kïdhe wɑ̈g kì keny, okedh wun, kɑ dëlɑ kɑ̈l wun.” Akedh gen kì Suköth kɑ ge oywömø kì Ethɑm kì tøg ryɑng. Jwøng-ɑ Ácwɑ̈ɑ̈j nyi cyɑ̈dh-ɑ́ɑ̀ bøli gen ɑ́ lööj pøølø kì dicɑ̈ng, o nyudhe gen yöö, o bɑ lööj mɑc kì wɑ̈r, o menye yuu gen. Kipe kinni o ge cuggi gen ki cyɑ̈dhø kì dicɑ̈ng kí wɑ̈r. Lööj pøølø nuti pɑ̈nyi nyegø kì bøli gen kì dicɑ̈ng, o lööj mɑc nuti nyegø kì wɑ̈r. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil o ge døøg gen ngɑ̈thi gen, kɑ ge gud gen kì bøli Pi Akiröth, kɑɑm Migdöl geki Nɑɑm Omeli Kwɑrø kì buti Bɑɑl Dhepön. O rɑ̈dh rume kinni i tyëng Isrɑil lɑ̈ɑ̈nyø, de ge wɑ̈dh-ɑ wïïnø kì yij pɑ̈l. Codhe, o pyëw rɑ̈dh cwed yi yɑn, o renge bɑng gen. O yɑ yïddɑ ki dhwɑ̈ng kì bɑng rɑ̈dh geki yɑye, o yod yi tyëng Rïp kinni yɑ bene Jwøng-ɑ Ácwɑ̈ɑ̈j.” Kɑ møgɑni gwøg yi gen ceth. Keny-ɑ ɑ́köbbi rɑ̈ɑ̈dh Rïp kinni, i tyëng Isrɑil kedhø, kɑ rumme wile geki bɑ̈ngge, kɑ ge okööbø kinni, “Á ngø ɑ ɑ́gwøg yi wɑ kinnï, ɑ wëggi tyëng Isrɑil kedhø yi wɑ? Bɑ̈nggee ɑ́kedh!” Kɑ yɑ̈ye cwøle, kɑ jølinye kwɑnye. Kɑ oyïënyø kì kelli yɑ̈the ki yɑ̈ɑ̈th miy ɑ́bïkyel. Kɑ yɑ̈thi liny mø Rïp bënn ki pëjji liny kì yethi gen odhwödhø. Pyëw rɑ̈ɑ̈dh Rïp ɑ́cwed yi Jwøng-ɑ Ácwɑ̈ɑ̈j, kɑ reng-ɑ bɑng tyëng Isrɑil, ge ɑ́kedh pëthi gen pɑ lïngø. Kɑ bɑng gen rengi yi tyëng Rïp. Kɑ ge pïïd yi kyënyì geki yɑ̈thi rɑ̈dh, kí jøg-ɑ kömi kyënyì; ge ɑ́pïïd yi liny rɑ̈dh ge guddø kì kömi Nɑɑm Omeli Kwɑrø kì buti Pi Akiröth, kì bøli Bɑɑl Dhepön. Keny-ɑ ɑ́cyɑ̈ngi rɑ̈dh geki linye, ɑliidh tyëng Rïp yi tyëng Isrɑil ge bï-ɑ kömi gen. Kɑ ge obwøgø ki mendwøng. Kɑ tyëng Isrɑil ywøøg-ɑ kö Jwøng-ɑ Ácwɑ̈ɑ̈j. Aköbbi Mosɑ̀ yi gen kinni, “Á ngø ɑ göggí wøn kinnï? Yïde ɑ kɑ̈ɑ̈l wøn wɑ̈g kì Rïp o wø thøw wøn kì yij pɑ̈l? Wø di jɑ̈ddi ki kɑ̈jj møg koony wøn kì Rïp? Pɑth ki gïn-ɑ ɑ́köbbi yïn yi wøn kì Rïp, kinni, wiy wøn, o wø göggi wøn tyëng Rïp. Mɑ́ göggi tyëng Rïp lɑ̈w kibøli ke thøw wøn kì yij pɑ̈l?” Kɑ ji köbbi yi Mosɑ̀ kinni, “Wu ko böggi! Cungi wun kɑ wu nëën wun ki yiel-ɑ óyieel wun yi Jwøng-ɑ Ácwɑ̈ɑ̈j dicyɑ̈ɑ̈ng. Tyëng Rïp møg-ɑ nenni yi wun ek dicyɑ̈ɑ̈ng, ge pɑ cigi lidhø yi wun gïti ɑtheer. Per wun ónyɑg yi Jwøng-ɑ Ácwɑ̈ɑ̈j. Pëthi wun ko lïngi.” Codhe, ɑköbbi Mosɑ̀ yi Jwøng-ɑ Ácwɑ̈ɑ̈j kinni, “Yïde ɑ ywöög köörɑ? Köbbí tyëng Isrɑil kinni cɑ̈gi gen ki kedhø. De yïn, kwɑny lodhí kɑ bɑdí rïïj kömi nɑm, o pyëde, o tyëng Isrɑil kedhi gen yije e thwøwø. O pyëw rɑ̈ɑ̈dh Rïp ócwed yi yɑn, o kedhe bɑng gen, o yɑ yïddɑ ki dhwɑ̈ng kì bɑng rɑ̈ɑ̈dh Rïp geki yɑye, kí yɑ̈the, kí kyënye. Wiy yod yi tyëng Rïp kinni bene yɑn Jwøng-ɑ Ácwɑ̈ɑ̈j, keny-ɑ óyïddɑ ki dhwɑ̈ng kì bɑng rɑ̈ɑ̈dh Rïp geki yɑye, kí yɑ̈the, kí kyënye.” Kɑ wëywöni Jwøng-ɑ Ácwɑ̈ɑ̈j men-ɑ ɑ́bëëd e cyɑ̈dh-ɑ́ɑ̀ bøli kɑɑl Isrɑil ócyɑ̈gø, kɑ døøg-ɑ ngɑ̈thi gen. Kɑ lööj pøølø ócyɑ̈gø kì bøli gen, kɑ døøg-ɑ ngɑ̈thi gen. Kɑ pëgg-ɑ kɑɑm yɑɑy Rïp geki yɑɑy Isrɑil. Kɑ tung-ɑ di tyëng Rïp gwøge ɑ́ muudhø, de tuung Isrɑil dɑ cɑr kì wɑ̈rɑni, kɑ yɑɑy ocögø e pɑ cyɑ̈ngi ki yɑɑy. Codhe, kɑ Mosɑ̀ cinge tïnge, ɑgööj yømø yi Jwøng-ɑ Ácwɑ̈ɑ̈j kì kuni wɑɑng cyɑ̈ɑ̈ng mwøl, kɑ tyëg-ɑ wɑ̈r e ókwöddø, kɑ pï pyëëde, nɑm ree ɑ́løge keny thwøwø. Akedh tyëng Isrɑil ge kɑ̈ll-ɑ yij nɑm kì piny me thwøwø, e pï nɑ dör ɑ́ryew, ɑ́kyel kì wɑ̈thi këjji gen, kí ɑ́kyel kì wɑ̈thi cyɑ̈mmi gen. Kɑ tyëng Rïp kedh-ɑ nɑm bɑng gen, kí yɑ̈thi gen geki kyënyi gen bënn. Keny-ɑ ɑ́ru wøw, kɑ Jwøng-ɑ Ácwɑ̈ɑ̈j lïïdh-ɑ kömi yɑɑy Rïp kì yij lööj yïrø geki mɑc, kɑ yɑɑy Rïp omyëlø yi wɑ̈ɑ̈rø. Kɑ tyelli yɑ̈thi gen dije, kɑ ge døøg-ɑ be cyɑ̈dhø ge ywɑjj-ɑ ri gen, kɑ tyëng Rïp okööbø kinni, “Rengi wɑ, mɑ́ Jwøng-ɑ Ácwɑ̈ɑ̈j nyïɑ̈ggi ki Rïp kɑ per gen.” Aköbbi Mosɑ̀ yi Jwøng-ɑ Ácwɑ̈ɑ̈j kinni, “Tïng cingí kì kömi nɑm, o pï døøg gen kömi tyëng Rïp, geki yɑ̈thi gen, kí jø gen møg-ɑ kömi kyënyì.” Kɑ Mosɑ̀ cinge rïïje kömi nɑm, kɑ nɑm døøg-ɑ keje kì ri ru wøw. Kɑ tyëng Rïp órengø yi pï, kɑ ge wøøj nɑm yi Jwøng-ɑ Ácwɑ̈ɑ̈j. Pï ɑ́dwöög kɑ yɑ̈ɑ̈th geki jøg-ɑ kömi kyënyì mud yi gen, eni yɑɑy Rïp men-ɑ ɑ́kedhi nɑm bɑng gen bëne, bong ɑ́kyel mɑ ɑ́döng. De tyëng Isrɑil ɑ́kedh ge bɑ̈ɑ̈n-ɑ nɑm, e pï bɑ dörø kì wɑ̈thi këjji gen, kí wɑ̈thi cyɑ̈mmi gen. Bene kër-ɑ ɑ́yieel tyëng Isrɑil yi Jwøng-ɑ Ácwɑ̈ɑ̈j kì cinggi tyëng Rïp ɑnɑn, kì cyɑ̈ngɑni. Kɑ tyëng Rïp lidh yi Isrɑil ge buud ge thøø kì tøggi nɑm. Kɑ tyëng Isrɑil obwøgø yi Jwøng-ɑ Ácwɑ̈ɑ̈j, keny-ɑ ɑ́lidh gen gïn-ɑ ɑ́gögge Rïp. Kɑ Jwøng-ɑ Ácwɑ̈ɑ̈j wør yi gen geki Mosɑ̀ bɑ̈nge. Bøli kenyɑni ɑ ɑ́wör Mosɑ̀ geki tyëng Isrɑil ki wörri pwøj møg lejji Jwøng-ɑ Ácwɑ̈ɑ̈j yi gen kinni, “Yɑ owörø kì bøli Jwøng-ɑ Ácwɑ̈ɑ̈j, mɑ́ mɑ̈re ɑ́døngi ki mendwøng. Kyeny geki ngɑn-ɑ köme ɑ́leenge nɑɑm omelø. Jwøng-ɑ Ácwɑ̈ɑ̈j bene ngɑnteg men-ɑ korri yɑn. Bene en ɑ ɑ́yiel yɑn. Bɑ Jwøgɑ; ólejji yi yɑn Jwøøg kweyyɑ, yɑ ówör yɑ lejj-ɑ dönge. Jwøng-ɑ Ácwɑ̈ɑ̈j bɑ jɑl-liny. Nyinge bɑ “Jwøng-ɑ Ácwɑ̈ɑ̈j. “Yɑ̈thi rɑ̈ɑ̈dh Rïp geki kyënye ɑ́leenge nɑm, pëjji liny geki jödde ɑ́leenge Nɑɑm Omeli Kwɑrø. Ge ɑ́kum piny yi ɑpɑgø. Ge ɑ́ludhi tyeli nɑm ni kït. “Yïn ɑ Jwøng-ɑ Ácwɑ̈ɑ̈j, cingi kyëjí pëddi tegø; ngetimɑ̈ɑ̈nø nyi ngølle’ ngøllø ɑ́ thullì. Kì yij tyɑ̈m-ɑ dwøng men-ɑ ɑ́tyɑɑm tyëngmɑ̈ɑ̈nø, pyëwí ɑ́rënyi, kɑ ge rɑ̈ɑ̈b ni lum. Pï ri gen ɑ́röör gen mɑl yi yøm-ɑ kɑ̈ɑ̈l órømmí; pïg-ɑ ɑ́bëëd ge ócyɑ̈dhø, ge ɑ́cungi ni dörø; pïi keny-ɑ pɑ̈ng ɑ́göög ge teeg kì dïnɑm. Ngetimɑ̈ɑ̈nø ɑ́kööb kinni, ‘Yɑ órengi bɑng gen, kɑ ge mɑgɑ; jɑmmi gen ópɑ̈ngi yi yɑn, kɑ møg-ɑ dwɑddɑ kwɑnyɑ bënn. Pilɑ ówöödhɑ wɑ̈g, kɑ ge nɑ̈gɑ ki cingɑ.’ De yï ɑ́yëggi kömi gen, kɑ ge kum piny yi pïi nɑm. Ge ɑ́biil piny ni ɑ́yömø, kɑ ɑpɑgø ceg-ɑ ì bɑɑw kì kömi gen. “Yïn ɑ Jwøng-ɑ Ácwɑ̈ɑ̈j, dɑ jwøg me ni yïn? Yï bɑ Kwërø, bong ngɑn pɑ̈r ki yïn. Bong ngɑn pɑ̈r ki yïn kì ri gwøg ki gïïngɑ̈ngø. Cingi kyëjí ɑ́rïj yi yïn, kɑ ge mwøøny yi lɑ̈bø. Ji-ɑ ɑ́yiel yi yïn ópyejji yi yïn ki mɑ̈ɑ̈dø mií. Ge ókøøl yi yïn kej bëëdí kwërø ki tegí. Pödhh bënn ɑ́lïng kɑ dëlli gen ceg-ɑ okïr, tyëng-ɑ bëëdø kì Pelistiyɑ̀ ɑ́moom piny. Pëjji Edöm ɑ́bwøg ki menteg. Yɑɑg-ɑ teg kì Moɑb dëlli gen ɑ́kïïr. tyëng Kɑnɑɑn ɑ́thøw yi wɑ̈ɑ̈rø. Wɑ̈ɑ̈rø ɑ́pɑ̈dhi kömi gen, keny-ɑ ɑ́lidh gen tegí, yïn ɑ Jwøng-ɑ Ácwɑ̈ɑ̈j. Ge ɑ́cungi kì kɑ̈jji gen ni kïttì, gïti kɑ ɑ́pöödh jií, gen ɑ ji-ɑ ɑ́kwɑny yi yïn gɑ møgí. Jií ópej yi yïn, kɑ ge cïb wïj kït men-ɑ bɑ mií, keny-ɑ ɑ́gwøg yi yïn, Yïn ɑ Jwøng-ɑ Ácwɑ̈ɑ̈j, ɑ́ kej bëëdí; eni Keng-ɑ ɑ́ger yi yïn kirií Yïn ɑ Jwøng-ɑ Ácwɑ̈ɑ̈j, yï óbëëdø yïn ɑ́ rɑ̈dh gïti ɑtheer.” Kɑ tyëng Isrɑil nɑɑm omelø bɑ̈ɑ̈n gen ge cyɑ̈dh-ɑ tyelli gen, kì keny thwøwø. De keny-ɑ ɑ́kedhi yɑ̈thi Rïp møg-ɑ pyejji yi kyënyì kí tyëng-ɑ kwølli gen nɑm, kɑ pïi nɑɑm omelø gøøj kömi gen yi Jwøng-ɑ Ácwɑ̈ɑ̈j, kɑ ge omudø. Kì bøli kenyɑni, kɑ Miryɑm ngetitöng, nyimï Aɑron ókɑ̈bbø ki nyɑ bul. Kɑ gø pwöde ki cinge, kɑ bɑnge kedhi yi tyëng-ɑ mɑ̈nn ge opödø ki bullì mø ni menɑni, ge ocöngø. Kɑ ge köbbi yi Miryɑm kinni, “Wör wun kì bøli Jwøng-ɑ Ácwɑ̈ɑ̈j, mɑ́ e myëër ki wørø ki mendwøng, kyeny geki ngɑn-ɑ köme ɑ́leenge nɑɑm omelø.” Codhe, kɑ Mosɑ̀ tyëng Isrɑil peeje kì kömi Nɑɑm Omeli Kwɑrø, gï peeje’ yij pɑ̈ɑ̈l Cur. Ge ɑ́cyɑ̈dhi ki cyɑ̈ng ɑ́dɑ̈g kì yij pɑ̈l, de bong pï mɑ ɑ́yod yi gen. Codhe, ɑwɑ̈dhi gen Mɑrɑ̀, kɑ ge óyïddø ki pï kì kunɑni, de pïgɑni ɑ́dhɑ̈li mɑdhø yi gen, mɑ́ ge keej cɑrø (Bene ɑ bɑnge ɑ cɑɑg kenyɑni ɑ́ Mɑrɑ̀, ɑ wɑngi kinni keej). Kɑ ji göny-ɑ yï Mosɑ̀ ge okööbø kinni, “Wø mɑdh-ɑ ngø?” Codhe, kɑ Mosɑ̀ ywøøg-ɑ kö Jwøng-ɑ Ácwɑ̈ɑ̈j, kɑ nyudhi yi Jwøng-ɑ Ácwɑ̈ɑ̈j ki yɑdh megø. Keny-ɑ ɑ́leeng yɑnhɑni yethi pï yi Mosɑ̀, kɑ pïgɑni yïëy-ɑ mɑdhø. Kunɑni ɑ ɑ́thödhi jiɑni ki cigg geki kwöng men köme bëëd. Kunɑni thyew ɑ ɑ́rɑnge bëëdi tyëngɑni mɑ mïdhi gen cigge. Ákööb kinni, “Lïngí kwøbbɑ, kɑ gïn-ɑ kwøb yi yɑn nyi gwøøg ceth. Keløg kwøbbɑ geki ciggɑ ómïdhi yi yïn, bong gïjø ɑ́kyel kì kelli gïgrijjø møg-ɑ ɑ́göggɑ tyëng Rïp men-ɑ ógöggɑ yïn. Yɑ bene Jwøng-ɑ Ácwɑ̈ɑ̈j, ngɑn-ɑ tuur yïn.” Codhe, kɑ tyëngɑni kedh-ɑ Elïm. Kunɑni ɑ́dɑ nying mø rïngi yi pï gɑ ɑ́bïryew, kí yenh benø gɑ pyɑ̈r ɑ́bïryew. Codhe, kɑ ge ogudø kì kenyɑni kì buti pï. Codhe, kɑ tyëng Isrɑil odhwödhø bënn kì Elïm, kɑ ge kɑ̈l-ɑ yij ryɑng-ɑ kɑɑm Elïm geki Sinɑy. Ge ɑ́dhwödh ɑ cyɑ̈nggi dwɑ̈y pyɑ̈rø wïdɑ́bïj kì ryeew dwɑ̈tt, kì bɑng dhwödhi gen kì Rïp. Kɑ tyëng Isrɑil göny-ɑ yï Mosɑ̀ geki Aɑron kì yij pɑ̈l. Gï ɑ́köbbi gen kinni, “Di bëëd e lɑ̈w ke di nɑ̈ɑ̈g wøn yi Jwøng-ɑ Ácwɑ̈ɑ̈j kì piny Rïp. Ádɑ rïngø me nyi cɑm yi wøn, gïg-ɑ dwɑddi cɑmø yi wøn bënn nyii yodø yi wøn. De wu ɑ́kɑ̈ɑ̈l-ɑ wøn yij pɑ̈l keny kipe kinni, o wø thøw wøn yi kɑ̈j kì yije.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Gïncɑm ógöjjɑ dyëmø kì mɑl ni kødh, ɑ́ men cɑm yi wun, wu bënn. Nyi kedhi ji be gwen kì tøggi kɑɑl ki gïn-ɑ cɑm yi gen yethi cyɑ̈ng bënn. Yɑ dwɑdd-ɑ lïdhø men-ɑ ógöög ji ki gïn-ɑ pwönyɑ gen. Kì bïkyeel cyɑ̈nggi osboo, gwëën ji ki mi cyɑ̈ng ɑ́ryew. Gwëni gen yethi gïg-ɑ nyi gwëni yi gen kì cyɑ̈ɑ̈ng, e yethe bɑ ɑ́ryew.” Codhe, kɑ tyëng Isrɑil bënn köbbi yi Mosɑ̀ geki Aɑron kinni, “Óyod yi wun tïn kì böörø kinni bɑ Jwøng-ɑ Ácwɑ̈ɑ̈j ɑ ɑ́kɑ̈ɑ̈l wun wɑ̈g kì Rïp. Dhuki kì mwøl mɑ̈ɑ̈r Jwøng-ɑ Ácwɑ̈ɑ̈j ólidh yi wun, mɑ́ wu ɑ́lïngi yi en wu oköörø kì ree, wu nuti köör ɑ ri wøn, den-ɑ́ ri Jwøng-ɑ Ácwɑ̈ɑ̈j ɑ ɑ́köör yi wun, mɑ́ wø nyi gwøg-ɑ gïn-ɑ nyi kwøb yi en.” Kɑ Mosɑ̀ okööbø kinni, “Wu óthödhi yi Jwøng-ɑ Ácwɑ̈ɑ̈j ki rïngø men cɑm yi wun, kì böörø yethi cyɑ̈ng. O kì mwøl yethi cyɑ̈ng, wu óthödhi yi en ki gïncɑm men-ɑ dwɑddi yi wun. Mɑ́ wu ɑ́lïngi yi en keny-ɑ ɑ́köör wun kì ree. Wu nuti köör ɑ riɑ wøki Aɑron, mɑ́ per wøn bogøn, wu ɑ́köör ɑ ri Jwøng-ɑ Ácwɑ̈ɑ̈j.” Codhe, ɑköbbi Aɑron yi Mosɑ̀ kinni, “Köbbí tyëng Isrɑil bënn kinni, ‘Cøng wun ri wun kì bøli Jwøng-ɑ Ácwɑ̈ɑ̈j, mɑ́ køør wun ɑ́lïngi yi en.’ ” Kɑ̈ng-ɑ́ nudd Aɑron e okööbø ki gen, kɑ mɑ̈ɑ̈r Jwøng-ɑ Ácwɑ̈ɑ̈j lidh yi gen kì yij pøølø. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Køør tyëng Isrɑil ɑ́lïngi yi yɑn; de köbbí gen kinni, kì böörø wu ócyɑ̈mø ki rïngø, o kì mwøl wu ócyɑ̈mø ki gïncɑm kì yethi cyɑ̈ng bënn. O yod yi wun kì bɑng møgɑni kinni bene yɑn Jwøøg wun, Jwøng-ɑ Ácwɑ̈ɑ̈j.” Kɑ ɑkɑrø obëënø kì böörø, kɑ kɑɑl opɑ̈ngø yi en. O kì mwøl, kɑ tøggi kɑɑl dɑ thöjj kì piny. Keny-ɑ ɑ́thwøw thöjj, ɑliidh piny e ókumø yi gïjø me ni kwɑ́j. Keny-ɑ ɑ́lidhii yi tyëng Isrɑil, kɑ ri gen pyënyi gen kinni, “Bɑ ngø?” Kipe kɑ̀ kwïjjii yi gen mɑ bëëde ɑ́ ngø. Codhe, ɑköbbi gen yi Mosɑ̀ kinni, “Men bene gïncɑm men-ɑ ɑ́mëggi wun yi Jwøng-ɑ Ácwɑ̈ɑ̈j ɑ́ men cɑm yi wun. Jwøng-ɑ Ácwɑ̈ɑ̈j ɑ́cïg kinni, i dhɑnhø gwene men-ɑ dwɑddi yi en ki cɑmø, røthøl ɑ́ngwen kipe dhɑnhø ɑ́kyel, kɑ kwɑny ɑ́ kwɑnni ji kì kɑl.” Codhe, kɑ møgɑni gwøg yi tyëng Isrɑil, kwï ji ɑ́gwëën ki mø gïïr, møøgø ɑ́gwëën ki mø nøg. Codhe, kɑ gø røm gen. Ngɑn-ɑ ɑ́gwen mø gïïr møge nuti løg mø ngenyø, o ngɑn-ɑ ɑ́gwen mø nøg, møge nuti jɑdø, kɑ yod yi gen kinni dhɑnhø gween-ɑ kej dhøge ceth. Kɑ ge köbbi yi Mosɑ̀ kinni, “Wu ko wïyi kì ree ki men cɑɑm dhuki.” De kwï gen ɑ́pëëm ki kwøbbi Mosɑ̀, kɑ ge owïyø ki men cɑɑm dhuki. Menɑni ɑ́mɑg yi kunnì kɑ yøme ópënnø. Kɑ Mosɑ̀ mɑg yi liny ki tyëngɑni ki mendwøng. Yethi cyɑ̈ng kì mwøl, ngɑn nyi gwen-ɑ men-ɑ dwɑdde cɑmø, de kenyi lënhi cɑ̈ng, men-ɑ piny nyi ceg-ɑ nøyø. O kì bïkyeel cyɑ̈nggi osboo, kɑ ge gwen-ɑ gïncɑm mi cyɑ̈ng ɑ́ryew. Árøm ɑ́ røthøl ɑ́bïdɑ̈g ɑ bɑ mø dhɑnhø ɑ́kyel. Keny-ɑ ɑ́bëën pëjji Isrɑil be köbbi møgɑni Mosɑ̀, kɑ Mosɑ̀ okööbø kinni, “Bene gen møg-ɑ ɑ́ceg yi Jwøng-ɑ Ácwɑ̈ɑ̈j ɑgɑk, kipe dhuki bɑ Sɑbɑth, cyɑ̈ng-ɑ ɑ́kwër yi Jwøng-ɑ Ácwɑ̈ɑ̈j, bɑ cyɑ̈ɑ̈ng ywömø. Kyel wun møg-ɑ dwɑddu kyelø, kɑ møg-ɑ dwɑddu bɑ̈gø bɑ̈g wun dicyɑ̈ɑ̈ng. Kɑ kwï gïncɑm mïdhi yi wun gïti dhuki.” Codhe, kɑ ji owïyø ki men wɑ̈dhi dhuki, ni kɑ ɑ́cïg Mosɑ̀, o bong men mɑ ɑ́pëni kì ree, wɑlɑ̀ bong men mɑ ree ɑ́kedhi yi kunnì. Kɑ ji köbbi yi Mosɑ̀ kinni, “Cɑm wun gïncɑm-ɑ ɑ́gwen yi wun ɑ́wɑ̈ɑ̈, cyɑ̈ɑ̈ng bɑ cyɑ̈ɑ̈ng Sɑbɑth, cyɑ̈ɑ̈ng ywömø men-ɑ ɑ́cïb yi Jwøng-ɑ Ácwɑ̈ɑ̈j, wu pɑ yïddi kì cyɑ̈ngɑni. Gwëën wun ki gïncɑm ki cyɑ̈ng ɑ́bïkyel, de bïryeew cyɑ̈ng bɑ cyɑ̈ɑ̈ng Sɑbɑth. Kì cyɑ̈ngɑni, bong gïncɑm me nud kì piny.” Kɑ kwï ji kedh-ɑ be gwen kì bïryeew cyɑ̈ng, kɑ ge ocögø ge pɑ yïddi. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Wu wɑ̈dh-ɑ wɑɑng wu opëmø, wu dhɑ̈li mïdhi ciggɑ geki pwönyɑ? Adɑ́ lïng wun, Sɑbɑth ɑ́gwøg yi Jwøng-ɑ Ácwɑ̈ɑ̈j ɑ́ cyɑ̈ɑ̈ng ywömø me ywöm wun ri wun. O kì bïkyeel cyɑ̈ng, wu óthödhi yi en ki gïncɑɑm cyɑ̈ng ɑ́ryew. De kì bïryeew cyɑ̈ng, bëëd dhɑnhø kì gøle, ko di keny kedhe.” Codhe, kɑ ji oywömø kì bïryeew cyɑ̈ng. Codhe, kɑ gïncɑmɑni cɑg yi tyëng Isrɑil ɑ́ mɑnɑ̀. Mɑnɑ̀ tɑr e nɑ nywøli kɑsbɑrɑ̀, med e nɑ kɑɑk men-ɑ óbulø ki møøw kïc. Codhe, kɑ Mosɑ̀ okööbø kinni, “Jwøng-ɑ Ácwɑ̈ɑ̈j ɑ́kööb kinni, i cïbi wɑ piny ki mɑnɑ̀ men-ɑ ólidh yi kwɑrree. O gïncɑm men-ɑ ɑ́mëggi wɑ ɑ́ men cɑm yi wɑ, lidh yi gen, eni gïncɑm-ɑ ɑ́cɑm yi wɑ kì yij pɑ̈l keny-ɑ ɑ́kɑ̈ɑ̈le wɑ wɑ̈g kì piny Rïp.” Kɑ Aɑron köbbi yi Mosɑ̀ kinni, “Kɑ̈bbí ki pug kɑ yije kïdhi ki røthøl ɑ́ngwen mø mɑnɑ̀, kɑ cïb bøli Jwøng-ɑ Ácwɑ̈ɑ̈j, kɑ mïdhi kiper kwɑrri wun.” Codhe, kɑ møg-ɑ ɑ́köbbi Mosɑ̀ yi Jwøng-ɑ Ácwɑ̈ɑ̈j gwøg yi Aɑron. Pugi mɑnɑ̀ ɑ́cïbe bøli Sɑnduug Cigg, kinni o mïdhi. Tyëng Isrɑil ɑ́cyɑ̈ɑ̈m ki mɑnɑ̀ ki runn pyɑ̈r ɑ́ngwen, gïti kɑ ɑ́wɑ̈dhi gen keny-ɑ ɑ́pëggi gen piny, ge ɑ́cyɑ̈ɑ̈m ki mɑnɑ̀ gïti keny-ɑ ɑ́wɑ̈dhi gen wïj tuung piny Kɑnɑɑn. (Rumi men-ɑ ɑ́rum, yije nyi røm-ɑ yi røthøl pyɑ̈r ɑ́ngwen). Kɑ tyëng Isrɑil odhwödhø bënn kì pɑ̈ɑ̈l Sin, ge cyɑ̈dhi ge nyii ywömø ni kɑ ɑ́kööb Jwøng-ɑ Ácwɑ̈ɑ̈j. Ge ɑ́gud kì Repïdïm, kɑ bong-ɑ pï mø mɑdh yi ji. Codhe, ɑwër gen ki Mosɑ̀, kɑ ge okööbø kinni, “Nëngí wøn ki pïg mɑdh.” Alöggi Mosɑ̀ kinni, “Wude ɑ wër wun ki yɑn? Wude ɑ pɑ̈nyi wun Jwøng-ɑ Ácwɑ̈ɑ̈j?” De ji ɑ́bëëd ri gen dɑ röödhø ki mendwøng, kɑ ge pëgg-ɑ be køør kì ri Mosɑ̀. Ge ɑ́kööb kinni, “Yïde ɑ ɑ́kɑ̈ɑ̈l wøn wɑ̈g kì Rïp? Bɑ kipe kinni o wø nɑ̈g yi yïn ki röödhø wøki nyigi wøn kí dhögi wøn?” Kɑ Mosɑ̀ ywøøg-ɑ kö Jwøng-ɑ Ácwɑ̈ɑ̈j, kinni, “Á ngø ɑ göggɑ ji møg? Yɑ óbɑ̈lli yi gen ki kïttì, kì bɑng nyɑ keny me thiinh, o yɑ thøwɑ.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kɑ̈bbí ki kwï jøgdøngi Isrɑil, kɑ wu pödhu mɑl bøli ji ki gen. Kɑ lodhí men-ɑ ɑ́gøøj Kiir, kɑ̈ɑ̈l kì cingí. Yɑ ócungi kì bølí kì wïj nyɑ kït, kì buti Kïti Sinɑy. Kɑ kït gøøj, o pï mulli gen wɑ̈g kì yije, o ji mɑ̈ɑ̈dh gen.” Kɑ møgɑni gwøg yi Mosɑ̀ e onennø yi jøgdøngi Isrɑil. Kenyɑni ɑ́cɑg ɑ́ Mɑɑsɑ̀ kí Merïbɑ̀ (Pɑ̈nyø ki Wëërø), mɑ́ tyëng Isrɑil ɑ́wër ki Jwøng-ɑ Ácwɑ̈ɑ̈j. Kɑ Jwøng-ɑ Ácwɑ̈ɑ̈j pɑ̈nyi yi gen ge ɑ́kööb kinni, “Jwøng-ɑ Ácwɑ̈ɑ̈j nud kì kellee kidyër wɑlɑ̀ tøøk?” Abëën kwɑrri Amɑlek kɑ ge ónyïɑ̈ggø ki Isrɑil kì Repïdïm. Kɑ Jöcwø köbbi yi Mosɑ̀ kinni, “Kɑ̈bbí ki kwï jøg-ɑ cwøw, kɑ wu kedhu be nyïɑ̈ggi ki kwɑrri Amɑlek dhuki. Yɑ ócungi kì wïj nyɑ kït ki loodh Jwøk kì cingɑ.” Kɑ møg-ɑ ɑ́köbbi Jöcwø yi Mosɑ̀ gwøge ceth, kɑ ge ónyïɑ̈ggø ki kwɑrri Amɑlek. O Mosɑ̀ geki Aɑron kí Ur ɑ́ying-ɑ wïj nyɑ kït. Isrɑil nyi ceg-ɑ tyɑ̈mø kɑ̈ng-ɑ bëëd cinggi Mosɑ̀ gɑ ɑtïng kì mɑl. De kenyi dwöög Mosɑ̀ cingge piny, kɑ kwɑrri Amɑlek nyii tyɑ̈mø. Keny-ɑ ɑ́pïd bɑ̈ddi Mosɑ̀, kɑ ge ókɑ̈bbø ki ɑ́tungi kït, kɑ gø cïb gen piny, kɑ Mosɑ̀ pëgg-ɑ köme. O Aɑron geki Ur mïdhi gen cingge kì mɑl, ngɑɑn kì tuung, ngɑɑn kì tuung. Kɑ orïïjø kinøw, cingge ying-ɑ mɑl gïti kɑ ɑ́buddi cɑ̈ng. Kɑ kwɑrri Amɑlek tyɑm yi Jöcwø kì yij linyɑni. Codhe, ɑköbbi Mosɑ̀ yi Jwøng-ɑ Ácwɑ̈ɑ̈j kinni, “Gweed kwøbbi liny menɑni yij wɑ̈nyø, o ge cög ge pɑ wïl. Köbbí Jöcwø kinni, kwɑrri Amɑlek ótyëg yi yɑn ki nɑ̈gø.” Kɑ Mosɑ̀ ogëdø ki këli lɑm, kɑ gø cɑge ɑ́ “Jwøng-ɑ Ácwɑ̈ɑ̈j Bɑ Berɑ.” Kɑ okööbø kinni, “Tïngu beer Jwøng-ɑ Ácwɑ̈ɑ̈j mɑl! Jwøng-ɑ Ácwɑ̈ɑ̈j, ócög e ónyïɑ̈ggø ki kwɑrri Amɑlek gïti ɑtheer!” Kɑ Yethrø ókwëri Midyɑn, øri Mosɑ̀ olïngø ki jɑmm-ɑ ɑ́göggi Mosɑ̀ geki jie yi Jwøng-ɑ Ácwɑ̈ɑ̈j bënn, kí kër-ɑ ɑ́kɑ̈ɑ̈l Isrɑil wɑ̈g yi Jwøng-ɑ Ácwɑ̈ɑ̈j kì Rïp. Kɑ Yethrø øri Mosɑ̀, Dhiporɑ̀ cï Mosɑ̀ kɑ̈ɑ̈le yï Mosɑ̀, mɑ́ gø ɑ́öre yïe, kí wɑ̈dde ryeet, Gercöm kí Eliedher. Mosɑ̀ ɑ́ceg-ɑ kwøb kinni, “Yɑ ɑ́bëëd yɑ bɑ wëdh kì piny me pɑth.” Acɑge wɑ̈de ɑ́ Gercöm. O nyingi nyel-ɑ kyeelø bɑ Eliedher, mɑ́ keny-ɑ ɑ́nywølii, Mosɑ̀ ɑ́kööb kinni, “Jwøøg wïyɑ bene en ɑ ɑ́køny yɑn. Yɑ ɑ́yiel yi en kì cingi rɑ̈ɑ̈dh Rïp.” Yethrø øri Mosɑ̀, wɑ̈ddi Mosɑ̀ geki cï Mosɑ̀ ɑ́kɑ̈ɑ̈le yij pɑ̈l, kun-ɑ ɑ́gudde ki kɑɑl kì thɑ kïti kwër. Aöde yï Mosɑ̀ kinni, “Yɑn, yɑ ørí Yethrø, yɑ bï-ɑ yïí wøki cyëgí kí wɑ̈dde ryeet.” Kɑ Mosɑ̀ kedh-ɑ be pɑɑri øre, kɑ wïje kuule piny kì bøle, kɑ gø nuume, ɑmɑ̈dh gen ri gen, kɑ ge kedh-ɑ yij kemi Mosɑ̀. Kɑ Mosɑ̀ øre löbbe gïg-ɑ ɑ́göggi rɑ̈ɑ̈dh Rïp geki tyëng Rïp yi Jwøng-ɑ Ácwɑ̈ɑ̈j kiper tyëng Isrɑil. Kí orɑng-ɑ ɑ́rɑngi gen kì kö yöö, ki kër-ɑ ɑ́yieel gen yi Jwøng-ɑ Ácwɑ̈ɑ̈j. Kɑ Yethrø pyëwe ómïnø kipe gïgdøj møg-ɑ ɑ́göggi Isrɑil yi Jwøng-ɑ Ácwɑ̈ɑ̈j, kɑ ɑ́yiele gïn kì cinggi tyëng Rïp. Kɑ okööbø kinni, “Pwøj wɑ ngɑn-ɑ ɑ́yiel wun kì cingi rɑ̈ɑ̈dh Rïp geki yɑye, eni Jwøng-ɑ Ácwɑ̈ɑ̈j ngɑn-ɑ ɑ́yiel jie kì yij bɑ̈ɑ̈ngø! Áyod yi yɑn ɑnɑn kinni Jwøng-ɑ Ácwɑ̈ɑ̈j dwøng ɑ́ en kibøli jwögg bënn, kipe gïg-ɑ ɑ́nyodhe møg-ɑ ɑ́gøøje kömi Rïp.” Codhe, kɑ Yethrø øri Mosɑ̀ omuujø ki gënh-ɑ nyi rɑ̈b bëne, kí gëdhhì møøgø mø ngɑ̈lli Jwøk. Kɑ Aɑron geki jøgdøngi Isrɑil bënn bï-ɑ be cɑm geki øri Mosɑ̀ kì bøli Jwøk. Dhuki ɑpëggi Mosɑ̀ piny be lidhi gønyyi ji, kɑ ji orïïjø ge ócungø kì kömi Mosɑ̀, cɑg kì mwøl gïti böörø. Kɑ gïg-ɑ gwøg yi Mosɑ̀ bënn, lidh yi øre, gen ɑ gïg-ɑ gögge ji. Akööbe kinni, “Á ngø ɑ göggí ji kinnï? Á kipe ngø ɑ bëëd kì piny yï ketí, o ji cungi gen kì kömí, cɑg kì mwøl gïti böörø?” Kɑ Mosɑ̀ ólöggø kinni, “Kipe kenyi bëën ji yïɑ be pyëji Jwøk, ki kër-ɑ liidh gønyyi gen. Mɑ́ kenyi di gøny kì kɑɑm dhɑnhø geki wɑɑd gen, ge nyi bï-ɑ yïɑ, o ngɑn-ɑ bɑ̈jjø nyi nyodh yi yɑn, o ge nyi nyudhɑ Ciggi Jwøk geki pwönye.” De Mosɑ̀ ɑ́köbbi yi øre kinni, “Gïn-ɑ gwøg yi yïn pɑ døøj. Yï pïd-ɑ rií, o ji ceg-ɑ pïdø thyew, mɑ́ gwøngɑni peeg kiperí, pɑ cuggi gwøgø yi yïn, yï ketí. Anɑn lïngí kwøbbɑ, yï óköbbɑ gïn-ɑ dwɑddi yi yɑn o gwøg yi yïn, yï ókøny yi Jwøk. Yɑ dwɑdd-ɑ kinni, bëëd kì bøli Jwøk, kɑ gønyyi ji nyi thërri Jwøk. Nyi pɑ̈ddí gen ki cigg geki pwönyi Jwøng-ɑ Ácwɑ̈ɑ̈j. Kɑ ge pwönyí ki yuu bëëdø men-ɑ døj, ki gïn-ɑ dwɑddi kinni o gwøg yi gen. Kɑ̈bbí kì kelli ji ki jøg mø tir, ji mø böggi Jwøk. Jøg-ɑ dyër, yɑɑg-ɑ mɑɑn ngewø. Cïb gen gɑ jɑgg kì kömi ji, møøgø jɑɑg gen ji ɑ́lïp, møøgø jɑɑg-ɑ miy, o møøgø jɑɑg-ɑ pyɑ̈r ɑ́bïjj, o møøgø jɑɑg-ɑ pyɑ̈r. Kɑ wiy jøgɑni nyi lidh gen gønyyi ji kì bøli keny-ɑ di gøny. O kwøbb-ɑ peeg nyi muuj yïn yi gen, o møg-ɑ yööd bënn nyi løøg yi gen. O gwøg yöne kì kömí, mɑ́ gwøg ceg kɑ pɑ̈ngø yi yïn, wuki gen. Ke gwøøg møgɑni ni kɑ ɑ́ceg yïn yi Jwøk, bene keny-ɑ ólwɑ̈ɑ̈ng gwøgí, kɑ ji bënn nyi døøg-ɑ kɑ̈lli gen, e gønyyi gen rumø ki lidhø.” Kɑ Mosɑ̀ kwøbb-ɑ ɑ́kwøb yi øre yïëye bënn. Kɑ møg-ɑ ɑ́kwøbe bënn gwøg yi en. Ákɑ̈bbi ki yɑɑg tir kì kelli tyëng Isrɑil, kɑ gï gwøge gɑ jɑgg kì kömi ji, kwï gen jɑɑg-ɑ ji ɑ́lïp, møøgø jɑɑg-ɑ miy, møøgø jɑɑg-ɑ pyɑ̈r ɑ́bïjj, møøgø jɑɑg-ɑ pyɑ̈r. Kɑ jøgɑni pëgg-ɑ be nenni gønyyi ji. Kɑ gønyy-ɑ teeg nyi muuj gen Mosɑ̀, de gønyy-ɑ yöd nyi lidh-ɑ yi gen keti gen. Codhe, kɑ Mosɑ̀ øre lwøøge yöö, kɑ Yethrø døøg-ɑ pɑɑre. Kì ri thumi dwɑ̈tt ɑ́dɑ̈g ceth, kì bɑng dhwödhi tyëng Isrɑil kì piny Rïp, ɑ ɑ́wɑ̈dhi gen Sinɑy. Ge ɑ́dhwödh kì Repïdïm, kɑ ge kedh-ɑ yij pɑ̈ɑ̈l Sinɑy. Kɑ Isrɑil ogudø kì pɑ̈lɑni ge rwöm ki kït. Kɑ Mosɑ̀ kedh-ɑ mɑl yï Jwøk. Kɑ Mosɑ̀ cwøl yi Jwøng-ɑ Ácwɑ̈ɑ̈j kì ri kït kinni, “Köbbí gøl Yɑgob, kɑ Isrɑil tönggí kwøb kinni, Gïn-ɑ ɑ́göggɑ Rïp ɑ́lidh yi wun; ɑ́lidh yi wun keny-ɑ ɑ́kɑ̈ɑ̈lɑ wun wɑ̈g kì Rïp kì kömi obërri cor. Kɑ wu kɑ̈ɑ̈l-ɑ yïɑ keny. O ɑnɑn ke lïngu kwøbbɑ, kɑ ciggɑ mïdhi yi wun, wu obëëdø wu bɑ jiɑ, møg-ɑ ɑ́yïëënyɑ wɑ̈g kì kelli jurrì, mɑ́ piny bëne bɑ miɑ. Wu ógöögø ki pödhɑ; pödhi kwër møg göggi yɑn.” Kɑ Mosɑ̀ obëënø, kɑ jøgdøngi Isrɑil cwööle, ɑthëre gïn møg-ɑ ɑ́ceg yi Jwøng-ɑ Ácwɑ̈ɑ̈j bënn. Kɑ ji ólöggø bënn wïj ɑ́kyel kinni, “Møg-ɑ ɑ́kwøb yi Jwøng-ɑ Ácwɑ̈ɑ̈j bënn ógwøg yi wøn.” Kɑ kwøbbi jiɑni döggi Jwøng-ɑ Ácwɑ̈ɑ̈j yi Mosɑ̀. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Yɑn ɑ bï yïí èn kì yij pøølø me looj, kipe kinni o yɑ lïngi yi ji yɑ okööbø ki yïn, o ge yïëy gen ki yïn thyew gïti ɑtheer.” Kɑ møg-ɑ ɑ́kwøb yi ji, köbbi Jwøng-ɑ Ácwɑ̈ɑ̈j yi Mosɑ̀. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kedhí yï ji, kɑ ri wun kwër wun dicyɑ̈ɑ̈ng kí dhuki, kɑ ógudhi wun lwøg wun. Kɑ ri gen gwir gen kipe dɑ̈ɑ̈g cyɑ̈ng, mɑ́ kì dɑ̈ɑ̈g cyɑ̈ng, Yɑ óbï piny, o Yɑ lidh yi ji bënn kì wïj Kïti Sinɑy. De göög ki kew me wen kït. Kɑ ko di dhɑnhø me bɑ̈ɑ̈n kewɑni.” Kɑ okööbø kinni, “Ko di ngɑn yedhi wïj kït. Kɑ ko di ngɑn nywɑl tøg kït, ngɑn nywɑl kïnɑni ceg-ɑ thøø ceth. Ko nywɑl ki cingø; ngɑn nywɑlii, bɑ̈lli ki kïttì o thøwe; wɑlɑ̀ pwöd ki weth, cɑgg ɑ́ dhɑnhø wɑlɑ̀ lɑ̈y, ko wiy, nɑ̈g ceth. Keny-ɑ óywöngi tuung órömø e pɑ jwɑn kudø, ge ócuggø yedhi mɑl wïj kït cyee.” Codhe, kɑ Mosɑ̀ yïnh-ɑ piny kì wïj kït kɑ ji kwënge, kɑ ógudhi gen lwøg gen. Kɑ ji köbbe kinni, “Bëëd wun ri wun gwiir wun kipe dɑ̈ɑ̈g cyɑ̈ng, ko di ngɑn kedhi ri ngɑndhɑjø.” Kì dɑ̈ɑ̈g cyɑ̈ng, kì ri ru wøw, kɑ wïj kït rïïm yi pøølø. Kɑ mɑl omɑ̈rrø, kɑ orɑ̈ɑ̈dø, kɑ cwɑggi kɑng me teeg cɑrø lïngi. Kɑ ji dëlli gen okïïrø yi wɑ̈ɑ̈rø. Kɑ ji-ɑ ɑ́kɑ̈ɑ̈l wɑ̈g yi Mosɑ̀ kì kɑɑl, o ge yïddi gen ki Jwøk, ócungø kì thɑ kït. Wïj Kïti Sinɑy ɑ́bëëd e ócyëgø bëne yi yïrø. Mɑ́ Jwøng-ɑ Ácwɑ̈ɑ̈j ɑ́bï köme kì yij mɑc. Kɑ yïrø ceg-ɑ ì dut ni yïri bwörø me dwøng, kɑ kït onhɑ̈nhø ki menteg. Kɑ cwɑggi kɑng ókedhø ge ótëngø ki mendwøng. Mosɑ̀ okööbø, o møge nyi løøg yi Jwøng-ɑ Ácwɑ̈ɑ̈j kì yij omɑ̈ɑ̈r mɑl. Kɑ Jwøng-ɑ Ácwɑ̈ɑ̈j bï-ɑ piny wïj Kïti Sinɑy, kɑ Mosɑ̀ cwøøle wïj kït, kɑ Mosɑ̀ yedh-ɑ mɑl. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kedhí piny kyëddí ji, kipe ge ópönhi wïj kït ge bï-ɑ be lïdhø, keløg ge ólïdhø, mø gïïr kì kelli gen ceg-ɑ thøø. Cɑgg gɑ ókwër, møg cuggi bëën butɑ, kwër gen ri gen. Keløg ri gen pɑ kwër yi gen, ge ócɑy yi yɑn, Yɑ Jwøng-ɑ Ácwɑ̈ɑ̈j.” Kɑ Jwøng-ɑ Ácwɑ̈ɑ̈j köbbi yi Mosɑ̀ kinni, “Ji pɑ cuggi bëën mɑl wïj Kïti Sinɑy, mɑ́ yɑ ɑ́köbbi yi yïn kinni, ‘Wen kït ki kew, kɑ kwëër.’ ” Kɑ köbbi yi Jwøng-ɑ Ácwɑ̈ɑ̈j kinni, “Kedh, yedhí piny, kɑ Aɑron kɑ̈ɑ̈l mɑl. De ókwër geki ji, ri gen ko pɑ̈nyi gen ki bëën mɑl yïɑ, keløg kew óbɑ̈ɑ̈n yi gen, ge cɑyɑ’ cɑyø.” Codhe kɑ Mosɑ̀ yïnh-ɑ piny yï ji, kɑ gï köbbe møgɑni. Møg-ɑ ɑ́kwøb yi Jwøk ek bënn: “Yɑ bɑ Jwøgí, Jwøng-ɑ Ácwɑ̈ɑ̈j, ɑ ɑ́kɑ̈ɑ̈l yïn wɑ̈g kì piny Rïp, kì yij bɑ̈ɑ̈ngø. “Yïí ko di Jwögg møøgø den-ɑ́ yɑ ketɑ. “Rií ko twïgí ki ngïjjì, kɑ yï ko göög ki ngïji gïjø me ying mɑl, wɑlɑ̀ gïjø me ying piny, wɑlɑ̀ gïjø me ying nɑm kì thɑ piny. Rií ko bøødh bøli gen, kɑ ge ko mɑllí, kipe yɑn yɑ Jwøgí, Jwøng-ɑ Ácwɑ̈ɑ̈j, yɑ bɑ Jwøk me rɑj ki tyiel, körri orøøg wëëg nyi piirɑ’ yï wɑ̈ddi tyëng-ɑ mɑɑn yɑn, kí kwɑrri gen, kí kwɑrri kwɑrri gen. De døøjɑ nyi nyudhɑ’ rïjj mø ngenyø, gen ɑ ji møg-ɑ mɑɑr yɑn, o ciggɑ omïdhø yi gen. “Nyingɑ ko tïng dhøgí ki bɑ̈jjø, mɑ́ Jwøng-ɑ Ácwɑ̈ɑ̈j pyëwe pɑ nyi lɑ̈ɑ̈m ki ngɑn-ɑ tïng nyinge dhøge ki bɑ̈jjø. “Nyi pɑr cyɑ̈ɑ̈ng Sɑbɑth kɑ nyi kwëër. Yïí dɑ cyɑ̈ng ɑ́bïkyel møg yethi gen gwøøg gwøgí. De bïryeew cyɑ̈ng, bɑ Sɑbɑth mi Jwøgí, Jwøng-ɑ Ácwɑ̈ɑ̈j. Ko di gwøg me tïj yi yïn, wuki wɑ̈dí ki nyɑrí, kí bɑ̈ngí ying-ɑ́ jɑlø wɑlɑ̀ dhɑjø, kí dhií, kí wëlø men-ɑ bëëdø kì butí. Mɑ́ mɑl kí piny, kí jɑmm-ɑ yethi gen bënn ɑ́cwɑ̈j yi Jwøng-ɑ Ácwɑ̈ɑ̈j kɑ cyɑ̈ng ɑ́bïkyel. Kɑ oywömø kì bïryeew cyɑ̈ng, bene ɑ bɑnge gyëëdh cyɑ̈ɑ̈ng Sɑbɑth yi Jwøng-ɑ Ácwɑ̈ɑ̈j kɑ gø kwëre. “Wør wïyí ki meyí, o runní óngënyi gen kì yij piny-ɑ ɑ́mëggi yïn yi Jwøgí, Jwøng-ɑ Ácwɑ̈ɑ̈j. “Yï ko nɑ̈gi ki dhɑnhø. “Yï ko niin kí ngɑn nuti nywøøm wun ri wun. “Yï ko kwɑ̈ddi. “Wɑɑd wun ko gøøny ki kwøbbi pyed. “Gøl wɑɑd wun ko tyeer. Cï wɑɑd wun ko tyeer, cɑgg ɑ́ bɑ̈nge, bɑ̈ng-ɑ jɑlø wɑlɑ̀ bɑ̈ng-ɑ dhɑjø, wɑdhe ko tyeer, wɑlɑ̀ ɑdere. Ko di gïi wɑɑd wun me tyeer yi yïn.” Ji keny-ɑ ɑ́lïngi gen omɑ̈ɑ̈r mɑl geki ywøøg kɑng, kɑ ogwel mɑl geki yïrø men-ɑ dung kì ri kït lidh yi gen, kɑ dëlli gen ceg-ɑ okïr yi wɑ̈ɑ̈rø, kɑ ge ócungø ge lɑ̈wi kì buti kït. Codhe, ɑköbbi Mosɑ̀ yi gen kinni, “Kööb ɑ́ yïn ki wøn, wø ólïngø. De Jwøk ko kööb ki wøn kipe wø óthøw.” Kɑ ge köbbi yi Mosɑ̀ kinni, “Wu ko böggi, mɑ́ Jwøk ɑ́bï-ɑ be pɑ̈nyi wun, o böögø mee bëëde e nud kì pëthi wun, o wu cög wun, wu pɑ røngi.” Ji ɑ́cungi ge lɑ̈wi ki kït, de Mosɑ̀ ɑ́kedhi buti pøøl-ɑ looj, keny-ɑ di Jwøk. Codhe, kɑ Mosɑ̀ köbbi yi Jwøng-ɑ Ácwɑ̈ɑ̈j kinni, köbbe tyëng Isrɑil kinni, “Álidh yi wun kì ri wun, keny-ɑ ɑ́kööbɑ kì mɑl ki wun. Wu ko göög ki ngïji gïïpiny ki dhɑb wɑlɑ̀ ki ɑ́tegø møg göggu ri wun gɑ jwögg, gïgɑni ko mɑlli yi wun kyeel ki yɑn. Gëddí yɑn ki këlli lɑm ki lɑ̈bø, o wïje ómuuj gëdhh-ɑ rɑ̈bbí yɑn, geki gëdhhi mër kì ri dyëgí kí dhögí. Mɑllí yɑn kì keny-ɑ ómyeg yi yɑn, o yɑ bïɑ, o yï gyëdh yi yɑn. Keløg këli lɑm gërí yɑn ki ɑ́tuggi kïttì, kïtt-ɑ tøggi gen bɑ ɑtweg ki ged ko gëëd yi yïn, otweg gen ki ged, ge ceg yi yïn kɑ bwölø ki ged menɑni. Yï ko yedhi wïj këlɑ ki yïdhi, kipe thɑrí ónënni kì köme. “Mëggí tyëng Isrɑil cigg møg: Keløg yï ongëwø ki bɑ̈ng me bɑ ngeti Ibru, gögge yïn ki runn ɑ́bïkyel. Kɑ gøøny kì bïryeew runn, o kedhe kì wɑ̈ye e bong gïn col. Keløg e bëënø ɑ́ ɑ́kyel, kedhe e bɑ ɑ́kyel. Keløg e dɑ cyëge me bëënø ki en, kedhe ki en. De keløg e ónëng-ɑ yi wɑ̈n ki dhɑjø, kɑ nyöddi yi nyɑnɑni ki wɑ̈dd wɑlɑ̀ womɑ̈nn, dhɑjø menɑni bɑ mi wɑ̈n, nyɑnɑni ki nyige bënn bɑ mø wɑ̈n, o nyelɑni kete ɑ kedh. De keløg bɑ̈ngɑni kiree okööbø kinni, ‘Wɑ̈ɑ mɑɑr yi yɑn, geki cyëgɑ kí nyigɑ, yɑ pɑ dwɑddi gønyø o yɑ kedhɑ.’ Kɑ cïb bøli Jwøk kì ɑ́dyëddi ød yi wɑ̈n, kɑ yïthe twïy ki gïjø me bedh. Codhe cyee, o bɑ̈ngɑni cöge e gögg-ɑ wɑ̈n gïti ɑtheer. “Keløg e dɑ jɑl me ngeew nyɑre wɑ̈g ɑ́ bɑ̈ng. Pɑ gøny ki gønyi bɑ̈ngg-ɑ cwøw. Ke yodii e pɑ døøj yi wɑ̈n ngö gø ɑ́dwɑddi yi en ɑ́ dhɑjø, døøg ki ngëwwi wɑddi gen, ko ngëwwi tyëngpɑth yi en, mɑ́ gø ɑ́ceg yi en kɑ bɑnyø yøw, e rum yïëyø kì tyeli mɑl. Keløg e dɑ jɑl me ngëwwi wɑ̈de ki bɑ̈ng ɑ́ dhɑjø, pɑ̈ɑ̈re nyɑnɑni ki nyɑre. Keløg jɑlø ónyömø ki ryeew mɑ̈nne, ko di gïjø me nungi kì ri ógudh kí gïgcɑmm-ɑ́ nyi mëggi nyɑn-ɑ́ köme ɑ́nyömmi, kɑ ko wïyi ki buddø’ en. O keløg e óbɑ̈nyø ki muuji gïjø ɑ́kyel kì kelli møgɑk gɑ ɑ́dɑ̈g, tɑ̈nge gøn, kɑ ko di jɑmme møg dwɑdde kì bɑnge. “Ngɑn gøj dhɑnhø kɑ gø nɑ̈ge, nɑ̈g thyew. De keløg e ceg-ɑ gwɑ̈nyø, e nuti dwɑddi nɑ̈gii, yɑ̈bbe ki keny me yömme. De keløg ngɑnɑni gø cɑɑg en kɑ lebbø, kɑ gø nɑ̈ge, cɑgg e yömmi ri këli lɑmɑ, dwɑɑy kɑ nɑ̈g. “Ngɑn gøj wïye wɑlɑ̀ meye, nɑ̈g. “Ngɑn kwɑl dhɑnhø kɑ gø ngeewe wɑ̈g, oyodii, nɑ̈g. “Ngɑn yɑny wïye wɑlɑ̀ meye, nɑ̈g. “Keløg jøg ɑ́ryew ónyïɑ̈ggø kɑ ngɑɑn gøj yi ngɑn-ɑ kyeelø, wɑlɑ̀ kɑ gø bɑ̈le ki tuug, keløg e nuti thøø, de ɑ́buud ki kenɑni, codhe, kɑ kemø kwɑnye kɑ ócyɑ̈dhø, wiy ngɑn-ɑ ɑ́göjji, de ngɑn-ɑ ɑ́buud ceg kɑ cudø yi en ki wïj kɑɑm-ɑ ɑ́buude kì piny, o ngyënyy-ɑ ɑ́tuurii col yi en. “Keløg dhɑnhø bɑ̈nge, bɑ̈ng-ɑ jɑlø wɑlɑ̀ dhɑjø ogøjø yi en ki lodh kɑ othøø, kej gøn ceg kɑ colø. De ke mɑ̈ge ki cyɑ̈ng ɑ́kyel wɑlɑ̀ cyɑ̈ng ɑ́ryew e onëënø, keje pɑ col, mɑ́ e ngew yi jɑlɑni kɑ ngyëny. “Keløg jøg-ɑ cwøw ónyïɑ̈ggø kɑ ngɑn mɑ ɑ́yɑjø gum yi gen, kɑ dhɑnhø bï-ɑ wɑ̈g kì yije, e bong kedø kì ri ngɑnɑni, cud ngɑn-ɑ ɑ́gumii ki kwör men-ɑ cwøl yi jɑldhɑjø keløg e oyïëyø yi jɑgg. De ke di kedø men kedhi ri ngɑndhɑjø menɑni, wëy col kɑ wëy, Wɑng ki wɑng, lëjø ki lëjø, cingø ki cingø, o tyelø ki tyelø. Cwɑ̈ɑ̈yø’ mɑc ki cwɑ̈ɑ̈yø’ mɑc, kedø ki kedø, bwödhø ki bwödhø. “O keløg dhɑnhø bɑ̈nge, bɑ̈ng-ɑ jɑlø wɑlɑ̀ dhɑjø ogøjø yi en kì wɑnge, kɑ wɑnge otøyø, gønye gøn o kedhe kì wɑ̈ye, ɑ́ coli kej wɑnge. O keløg dhɑnhø bɑ̈nge, bɑ̈ng-ɑ jɑlø wɑlɑ̀ dhɑjø ogøjø yi en, kɑ lëje bï-ɑ wɑ̈g, gønye gøn o kedhe kì wɑ̈ye, ɑ́ coli kej lëje. “Keløg dhɑnhø, jɑlø wɑlɑ̀ dhɑjø ocwøbø yi wɑdh, kɑ othøø, bɑ̈lli wɑnhɑni o thøwe, kɑ rïnge ko cɑm, de wïi wɑdh pɑ cɑy. De keløg wɑnhɑni bëëdø e nyii cööbø, o wɑ̈n óköbbø, de wɑdhe ɑ́dhɑ̈li korø yi en, kɑ ónɑ̈ggø ki dhɑnhø, ying-ɑ́ jɑlø wɑlɑ̀ dhɑjø, bɑ̈lli wɑnhɑni geki wɑ̈n thyew, o ge thøw gen ryeet. Keløg ɑ́ kwör ɑ ócïb köme, cole kwörɑni ceth, kipe yieli wëye. Thyew keløg e cwøb-ɑ nyelthinh, wɑlɑ̀ nyɑnthinh, bɑ cigg mø ni møgɑni ɑ kömi gen göggi. O keløg wɑdh cwøb-ɑ bɑ̈ng, ying-ɑ́ jɑlø wɑlɑ̀ dhɑjø, cud wïi wɑnhɑni ki ngyëny ɑ́tegg pyɑ̈r ɑ́dɑ̈g, gɑ mø culi wïi bɑ̈ng, kɑ wɑnhɑni bɑ̈lli o thøwe. “Keløg dhɑnhø wïj yithe owiyø yi en gø nuti kum en, kɑ dhyɑng wɑlɑ̀ ɑderø pɑ̈dh-ɑ yije, jɑl yiinhɑni cude ki ngyëny møg mëgge wïi gïnɑni, o gïn-ɑ ɑ́pɑ̈dhi yij yith kɑ othøø, bɑ mi jɑl yith. Keløg wɑɑdh dhɑnhø ócöbbø ki wɑɑdh ngɑn megø, kɑ othøø, ngeew wɑnh-ɑ nëënø wɑ̈g, kɑ ngyënyye pɑ̈ngi yi jøgɑni ryeet. Kɑ rïngi wɑnh-ɑ thøø pɑ̈ngi yi gen thyew. De keløg e ngɑ̈nyi kinni wɑnhɑni nyii cööbø, de ɑ́dhɑ̈li mɑgø yi wɑ̈n, cole wɑdh men-ɑ ɑ́cwøb yi wɑdhe. O wɑnh-ɑ thøø bɑ mi jɑl wɑnh-ɑ ɑ́cöbbi. “Keløg dhɑnhø ókwɑ̈ddø ki wɑdh, wɑlɑ̀ órömø kɑ gø ngɑle, wɑlɑ̀ kɑ gø ngeewe wɑ̈g, cole wɑnhɑni ki dhög ɑ́bïj, o órömø col kɑ dyëg ɑ́ngwen. “Keløg dhɑnhø jɑmme køøle pwödhe be cɑm, kɑ jɑmme kedh-ɑ pwödhi ngɑn megø, cud jɑl dhög kì ri jɑmm-ɑ døøj kì pwödhe wɑlɑ̀ kì bɑge. “Keløg dhɑnhø orɑ̈bø ki mɑc kì pwödhe, kɑ mɑnyɑni ködd-ɑ yij pwödhi ngɑn megø kɑ byel rɑ̈be, ying ge nudd ge ócungø wɑlɑ̀ ge ying-ɑ wïj pëm, byellɑni ceg kɑ colø yi ngɑn-ɑ ɑ́cwiny mɑc. “Keløg dhɑnhø wɑɑd gen kɑ̈nne’ ngyëny, kɑ ngyënyyɑni kwɑl kì gøl ngɑn-ɑ ɑ́kɑ̈nni, keløg kur óyod, col yi kurɑni gɑ kɑ̈jj ɑ́ryew. De keløg kur pɑ yod, kïdhi jɑlkɑl bøli Jwøk be köngø kinni, jɑmmi wɑɑd gen nuti kwɑl-ɑ yi en. “Keløg ji ɑ́ryew opëmø kì kömi gïïpiny, ngɑn okööbø ce gø bɑ mee, ying-ɑ́ kömi dhyɑng, ɑderø, dyel, ógudh, wɑlɑ̀ gïjø megø me wɑ̈ɑ̈nyø, kïdhi gen ryeet bøli Jwøk. Ngɑn-ɑ ókwøb yi Jwøk kinni bɑ en ɑ bɑ̈jjø, gïnɑni col en ɑ́ kɑ̈jj ɑ́ryew. “Keløg dhɑnhø kɑ̈nn-ɑ yï wɑɑd gen ki ɑderø, wɑlɑ̀ dhyɑng, wɑlɑ̀ dyel, kí lɑ̈yy-ɑ kyeelø bënn kinni o mɑ̈ggii, kɑ gïnɑni othøø, wɑlɑ̀ otorø, wɑlɑ̀ okɑ̈ɑ̈lø yi ngɑn me nuti lidhø, gïnɑni pɑ col yi ngɑn-ɑ ɑ́kɑ̈nni. Ngɑn-ɑ ɑ́kɑ̈nni ceg-ɑ köngø kì bøli Jwøk kinni gïn-ɑ ɑ́kɑ̈nnii yi wɑɑd gen nuti kwɑɑny en, kɑ ngeti gïnɑni yïëye ceth, ki köngi wɑɑd gen møg-ɑ ɑ́kwönge kì bøli Jwøk. O gïnɑni pɑ col. De keløg gïnɑni ocɑɑg kɑ kwɑlø kì yïe, gø ceg yi en kɑ culi wɑ̈n. De keløg e ócɑɑm-ɑ yi lɑ̈ɑ̈y pɑ̈l, kɑ̈ni jɑl-ɑ ɑ́kɑ̈nni ki thulli gïn-ɑ ɑ́cɑm, o gïn-ɑ ɑ́cɑm yi lɑ̈ɑ̈y pɑ̈l pɑ col. “Keløg dhɑnhø ówïdhø ki gïïpiny kì yï wɑɑd gen, kɑ dɑ gïn kedhi ree, wɑlɑ̀ othøø e wɑ̈n tøøk, ngeti gïnɑni ceg kɑ cudø yi ngɑn-ɑ ɑ́wïdhi. De keløg wïi lɑ̈yɑni nud kì bute, kì bøli kenyɑni, jɑl-ɑ ɑ́wïdhi pɑ cudø. Keløg lɑ̈yɑni ceg kɑ kïrø, ngyënyy-ɑ ɑ́kïrii ɑ cyëëg keje. “Ngɑn kedhi ri nyɑnɑjur me pɑ nywøm, kɑ óbuddø ki gøn, muuje kɑ̈nye kɑ gø nywøme ceth. De keløg wïyi nyɑnɑni óbɑ̈nyi ki nyömmii en, ngɑnɑni nudd e ceg-ɑ muujø ceth ki kɑ̈ɑ̈ny nyɑnɑjur. “Nɑ̈gu nyɑdheyɑdh, ko wëggi nënnø. “Nɑ̈gu ngɑn niin lɑ̈y. “Ngɑn ngɑ̈ddi jwögg møøgø ki gëëdhi, nɑ̈gu en, nɑ̈g ceth keløg e pɑth ki yɑn ɑ ngɑ̈dde, yɑ Jwøng-ɑ Ácwɑ̈ɑ̈j. “Wëdh ko göggí ki gïnrɑj, wɑlɑ̀ ko ruj, mɑ́ yï ɑ́bëëd yï bɑ wëdh kì piny Rïp. Thwöm wɑlɑ̀ kïj, ko göggí ki gïnrɑj. Keløg e ógöggi yi yïn ki gïnrɑj, kɑ ywöög-ɑ köörɑ, ywøge lïngɑ’ lïngø, kɑ pyëwɑ órënyø ki wun, kɑ wu nɑ̈gɑ ki pilø, o mɑ̈nni wun döng gen gɑ thwömm, o wɑ̈ddi wun göög gen ki kïj. “Keløg jiɑ, tyëng-ɑ jɑdø møg-ɑ bëëdø kì butí ge ówïdhø ki ngyëny kì yïí, ko di møg nywøl yi ngyënyyɑni møg pir yi yïn keny-ɑ ódwöög gen. Keløg lɑni wɑɑd wun omɑgø yi yïn kipe kwör me ying cwɑgge, döggií keny-ɑ óbuddi cɑ̈ng. Mɑ́ bene ógønhɑni ɑ nyi kume ree, ke pɑ döggií en, ree ókum yi en kɑ ngø? Keløg e ódi ywöög köörɑ, cwɑgge lïngɑ’ lïngø, mɑ́ pyëwɑ nyii lɑ̈ɑ̈mø. “Yï ko kööb ki kwøb mø rijjø kì ri Jwøk, kɑ jɑngi tyëng pödhi wun ko lɑɑm ki lɑm mø rijjø. “Yɑ ko mɑ̈ɑ̈n ki gëëdhi kì ri mwölli byellí geki møgi oløg. “Kɑ wɑ̈dí, wɑ̈n-ɑ kɑyø mëggí yɑn. Mëggí yɑn kɑyyi dyëgí geki kɑyyi dhögí. Wiy kɑy-ɑ jɑlø bëëde ki meye ki cyɑ̈ng ɑ́bïryew, kɑ muuj yɑn kì bïdɑ̈ɑ̈g cyɑ̈ng. “Yï ko cyɑ̈ɑ̈m ki kwɑ̈ɑ̈l me dööngø kì bɑng lɑ̈ɑ̈y pɑ̈l; de mëggí gwögg. “Yï ko nyi kööb ki kwøbbi pyed. Keløg yï bɑ cwɑ̈g kì burø, ngɑnrɑj ko køny ki kwøbi kwøbbi pyed. Yï ko göög ki orøg kipe kɑ̀ gøggii yi ji bënn. Keløg yï bɑ cwɑ̈g kì burø, gøny me døøj ko rënyi yi yïn. Yï ko kööb ki kwøbbi pyed, mɑ́ ji bënn ceg-ɑ pyed. Yï ko nyi cwɑg ngɑn wɑnge cɑn kì burø, kipe cɑni wɑnge yøw. “Keløg wɑɑdh ngetimɑ̈ɑ̈nø, wɑlɑ̀ ɑdere oyodø yi yïn e ótwɑ̈lø kì pɑ̈l, döggí. Keløg ɑderi ngɑn me mɑɑn yïn olidhø yi yïn e pɑ̈ɑ̈dhø yi pegi jɑmm-ɑ köme, ko wiy kì kenyɑni, køny ki tïngii mɑl. “Ngɑn wɑnge cɑn ko ruj kì burø kipe cɑni wɑnge yøw. Yï ko pëëd keløg yï gøøny-ɑ ngɑn megø kì burø. Ngɑn yïe bɑ̈r, wɑlɑ̀ ngɑn kømmi dyër ko wëggí cɑyø ki nɑ̈gø, mɑ́ tyëngorøg pɑ nyi mïdhi yi yɑn ge nɑ ji-ɑ yï gen bɑ̈r. Yï ko yïëy ki ngyënyy-ɑ mëggi yïn yi ngɑn dwɑddi kinni o yï pëëd kì burø, mɑ́ yï ómɑ̈ɑ̈n lidhi gïn-ɑ dyër yi ngyënyyɑni. Ngyënyy-ɑ ni møgɑni, tyëngdøj nyi kölli ge’ kwøb ki kwøbbi pyed. “Wëdh ko göggí ki gïnrɑj, mɑ́ bëëdi wëdh ngɑ̈nyi yi wun, wu ɑ́bëëd wu bɑ wëdhh kì piny Rïp. “Kɑ̈g pinyí kɑ byelle kɑɑj ki runn ɑ́bïkyel. Kɑ ywööm kì bïryeew runn. (Ke di gïg cyeg kì yije ki wɑɑngɑni), wiy ge cɑm yi tyëng-ɑ jɑdø kì kelli tyëng pödhi wun, o di møg döng kì bɑng gen, ge ócɑm yi lɑ̈yyi pɑ̈l. Göög kinøw ceth ki pwödhi nyïm geki bɑɑg yenhí. “Gwøg gwøgí ki cyɑ̈ng ɑ́bïkyel, kɑ yï ywööm kì bïryeew cyɑ̈ng, o wɑdhí (wɑɑdh pur) ywöme geki ɑderí thyew, o bɑ̈ng-ɑ ɑ́nywøl kì gølí geki wënh-ɑ bëëdø kì butí ywöm gen ri gen. “Mïdhu møg-ɑ ɑ́köbbɑ wun bënn. Kɑ nyingi jwögg møøgø ko nyi kwøb yi wun, nyingi gen ko lïngi kì dhøggi wun. “Wøw yɑn ki tyel ɑ́dɑ̈g kì yij run. Gwøg kwëër olwëny ni kɑ ɑ́cegɑ yïn. Cyɑ̈ng ɑ́bïryew yï cɑm-ɑ olwëny kì bøli keny-ɑ ɑ́cïb yi yɑn kì dwɑ̈y Abib, mɑ́ en ɑ yije ɑ́kɑ̈ɑ̈lɑ yïn wɑ̈g kì Rïp. Ko di ngɑn bï be mɑlli yɑn e bong jwödhø me muuje yɑn. “Gwøg Kwëër Kɑj ki byel, jwöödh jɑmm-ɑ kwøng yi yïn ki kɑjø kì yij pwödhí. “Gwøg Kwëër Akɑnnì kì ri thumi run, kenyi cøng jɑmmi gwøgí kì yij pwödhø. Jøg-ɑ cwøw bënn nyi kedhi gen be mɑlli Jwøgí, Jwøng-ɑ Ácwɑ̈ɑ̈j ki tyel ɑ́dɑ̈g kì yij run. “Kenyi ngɑ̈ddí yɑn ki gëëdhi, ko nyi thyeer ki ówɑj. Kɑ dwɑ̈li gënhí ko nin kɑ gït-ɑ mwøl. “Jɑmm-ɑ kwöngi ki cyegø, gɑ liil kì pinyí, kïdhí gen ød wöw Jwøgí. “Ónywøng dhødh ko thɑɑl ki cɑɑg meye. “Yɑ óödi bølí ki wëywödø, o yï kor yi en kì yöö, o yï kïdhe keny-ɑ ɑ́pyël yi yɑn. Mïdhí ki bëëdø me døj, kɑ kwøbbe lïngí. Kɑ dhøge ko pyeem, mɑ́ pyëwe koo lɑ̈ɑ̈m ki orøøg wun, mɑ́ tegɑ ying-ɑ ree. Keløg møg-ɑ kwøb yi en olïngø yi yïn kidøøj, kɑ gïn-ɑ kwøb yi en nyi gwøg yi yïn, Yɑ ómɑ̈ni ki tyëng-ɑ mɑɑn yïn. Yɑ ónyïɑ̈ggi ki tyëng-ɑ ónyïɑ̈ggi ki yïn bënn. Wëywönɑ ócyɑ̈dhi kì bølí, kɑ yï kïdhe piny tyëng Amör, kí piny tyëng Kit, kí piny tyëng Perïdh, kí piny tyëng Kɑnɑɑn, kí piny tyëng Kib, kí piny tyëng Yebus, kɑ ge nɑ̈g yi yɑn bënn. Rií ko bøødh bøli jwöggi gen, wɑlɑ̀ ge ko mɑl yi yïn. Yï ko bëëd ki bëëdi tyëngɑni. Tørrí ngïjji jwöggi gen. Kɑ löjji gen tørrí. Ke mɑllu yɑn, yɑ Jwøøg wun, Jwøng-ɑ Ácwɑ̈ɑ̈j, gïgcɑmmi wun geki pïi wun ógyëdh yi yɑn. Rɑ̈ɑ̈m dëllì ólɑ̈ɑ̈ny yi yɑn kì kelli wun. Bong ngɑndhɑjø me yije dwöög wɑ̈g yi dhɑnhø, wɑlɑ̀ bong bwøj men-ɑ óying me nud kì pinyí. Runní óløgɑ mø ngenyø kì kömi piny. “Mɑ̈rɑ óörɑ bølí; tyëng-ɑ kelli gen kedhi yi yïn óbwøg yi yɑn. Tyëng-ɑ nyïɑ̈ggi ki yïn, wɑ̈thi gen óbɑ̈nni yi yɑn, tyëngmɑ̈ɑ̈nø ógöjjɑ cyeddø yi yïn. Thɑpin óörɑ bølí, kɑ tyëng Kib, kí tyëng Kɑnɑɑn, kí tyëng Kit cyeddi yi en kì bølí. Ge pɑ cyeedɑ wɑ̈g kì bølí ki run ɑ́kyel, kipe piny ódöng nøw, kɑ lɑ̈yyi pɑ̈l óngënyø kibøli wun. Ge ócyeedɑ wɑ̈g kì bølí mɑ̈ɑ̈dh mɑ̈ɑ̈dh, gïti keny-ɑ óngënyi wun, kɑ piny kwɑny yi wun. Piny men-ɑ mëggɑ yïn dhøge cɑ̈g-ɑ́ɑ̀ ri Nɑɑm Omeli Kwɑrø gïti Nɑɑm Omeli Tɑr, o cɑ̈g-ɑ́ɑ̀ ryɑng e gït-ɑ Nɑm Porɑt, mɑ́ tyëngpiny ócïbɑ cinggi wun, kɑ ge cyeddi yi wun; ge pɑ cungi kì bøli wun. Ko di lwöbø me ying kɑɑm wun ki gen, geki jwöggi gen. Ge ko wëggí bëëdø kì pinyí, kipe yï óthɑɑb be orøg yi gen kì bølɑ, keny-ɑ ómɑlli jwöggi gen, kɑ ge ogöögø ki ɑ́kɑ̈llì møg mɑg yïn.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Bïu yïɑ, yïn kí Aɑron, kí Nɑdɑb, kí Abiu kí ji pyɑ̈r ɑ́bïryew kì kelli jøgdøngi Isrɑil, kɑ ri wun bøødh wun piny wu nudd wu lɑ̈wi. Yï ketí ɑ ówɑ̈nhi butɑ, de jøg-ɑ kyeelø ko wɑ̈nhi butɑ, ji ko yedhi wïj kït thyew.” Mosɑ̀ ɑ́kedh kɑ ji köbbe kwøbbi Jwøng-ɑ Ácwɑ̈ɑ̈j geki cigge bënn. Kɑ ji ólöggø bënn wïj ɑ́kyel kinni, “Møg-ɑ ɑ́kwøb yi Jwøng-ɑ Ácwɑ̈ɑ̈j bënn ógwøg yi wøn!” Kɑ kwøbbi Jwøng-ɑ Ácwɑ̈ɑ̈j gwed yi Mosɑ̀ ge bënn. Kɑ ogëdø dhuki ki këli lɑm kì thɑ kït, gø ɑ́ger yi en kɑ ɑ́tuggi kïttì mø døngø, gɑ pyɑ̈rø wïdɑ́ryew, ge cungi gɑ kwɑnni wɑ̈thi kɑ̈lli Isrɑil. Codhe, ɑöde ki yɑɑg-ɑ wøbb møg kedhi be rɑ̈bbi Jwøng-ɑ Ácwɑ̈ɑ̈j kene men-ɑ ɑ́ngɑ̈llii, kɑ ge ongɑ̈dø ki dhög kiper mër. Kɑ budi remø kwɑny yi Mosɑ̀, kɑ gø kïdhe yethi löd. Kɑ bun-ɑ kyeelø kinye ri këli lɑm. Codhe, ɑkwɑnye wɑ̈nyi lwöbø, wɑ̈ny-ɑ yije ógweed Ciggi Jwøng-ɑ Ácwɑ̈ɑ̈j. Kɑ gø rɑ̈nge ji e óryeerø. Kɑ ge okööbø kinni, “Kwøbbi Jwøng-ɑ Ácwɑ̈ɑ̈j ólïngi yi wøn, o gïg-ɑ ɑ́kwøb yi Jwøng-ɑ Ácwɑ̈ɑ̈j ógwøg yi wøn ge bënn.” Codhe, ɑkwɑɑny rem-ɑ yethi löd yi Mosɑ̀ kɑ gø wiide ri ji. Akööbe kinni, “Men bɑ rem-ɑ cïb lwöm-ɑ kɑɑm wun ki Jwøng-ɑ Ácwɑ̈ɑ̈j keje.” Kɑ Mosɑ̀, kí Aɑron, kí Nɑdɑb kí Abiu geki jøgdøngi Isrɑil pyɑ̈r ɑ́bïryew yedh-ɑ mɑl wïj kït. Kɑ Jwøøg Isrɑil lidh yi gen. Pɑ̈ltyelle bɑ óbɑng nɑ kïdi mɑl, e ceg-ɑ orɑ̈ng, e lïw nɑ kïn-ɑ cwøl ɑ́ sɑpir yi dhïw-ɑ dhïwe. De bong gïnrɑj mɑ ɑ́gögge jøgdøngi Isrɑil. Ge ɑ́nenni yï Jwøk kidyër, codhe ɑcyɑ̈ɑ̈m gen kɑ ge omɑ̈dhø kì kej ɑ́kyel. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Yïnhí yïɑ wïj kït. Kɑ yï bëëd kì keny, yï óthödhɑ ki ópɑ̈nni kït. Kömi ópɑ̈nnɑni ɑ ɑ́gweedɑ ciggɑ, gɑ møg-ɑ ópwönyi ji.” Kɑ Mosɑ̀ odhwödhø geki Jöcwø nyel-ɑ nyi kønyii, kɑ Mosɑ̀ yedh-ɑ mɑl wïj Kïti Sinɑy, Kïti Jwøk. Kɑ jøgdøngø köbbe kinni, “Bëëd wun kì keny gïti keny-ɑ ódwöög wøn yï wun. Aɑron geki Ur ɑ keny èn ki wun, ngɑn yïe di gøny, nyi gönye yï gen.” Ayedhi Mosɑ̀ wïj Kïti Sinɑy, kɑ kïnɑni kum yi yïrø. Kɑ mɑ̈ɑ̈r Jwøng-ɑ Ácwɑ̈ɑ̈j pëgg-ɑ kömi Kïti Sinɑy. Kɑ obëëdø ɑ́ ɑkum yi yïrø ki cyɑ̈ng ɑ́bïkyel. Kɑ Mosɑ̀ cwøl yi Jwøng-ɑ Ácwɑ̈ɑ̈j kì ri bïryeew cyɑ̈ng, e cwɑgge kɑ̈ɑ̈l-ɑ yij yïrø. O mɑ̈ɑ̈r Jwøng-ɑ Ácwɑ̈ɑ̈j nenni yi Isrɑil ɑ́ mɑc me lyel kì wïj kït. Kɑ Mosɑ̀ kedh-ɑ yij yïrɑni. Kɑ Mosɑ̀ obëëdø kì wïj kïnɑni ki cyɑ̈ng pyɑ̈r ɑ́ngwen, kí wɑ̈rr pyɑ̈r ɑ́ngwen. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí wɑ̈ddi Isrɑil kinni, muuj yɑn ki lwøl yi ngɑn pyëwe dwɑddi thödhi yɑn. Gïg-ɑ cuggi kwɑnyø yi wun kì yï gen bɑ dhɑb, kí ɑ́tegø, kí dilɑl, kí ógudh-ɑ kïddi gen bɑ ówɑw kí ɑ́cwïcwïl, kí møg kwɑrø, kí ógudh-ɑ bɑ ɑcwɑ̈j gɑ korø, kí møg-ɑ bɑ ɑcwɑ̈j gɑ yëyyi dyëg, kí pënni dyëg møg-ɑ ójwɑ̈ɑ̈gø ki kïn-ɑ kwɑrø, ki pënn-ɑ yöm, kí yɑdh ɑ́lwiy. Kí møøw lɑ̈mbɑ̈ɑ̈, kí mɑ̈th-ɑ nyi gïïny møg-ɑ yømi gen med, kí bɑkur, kí ócï geki tigg-ɑ kyeelø mø tɑɑg lɑni Ókwër-ɑ Dwøng, geki pɑrø. Gëddi yɑn yi ji ki kej kwër kipe kinni o yɑ bëëdɑ kì kelli gen. Geru en ceth e pɑ̈r ki kej bëëdø, kí jɑmm-ɑ yije ge nɑ møg-ɑ ónyudhɑ yïn. “Göög ki Sɑnduug yɑdh ɑ́lwiy bɑ̈re bɑ sentimïtïr miyø kí pyɑ̈rø, o lɑ̈je bɑ sentimïtïr pyɑ̈r ɑ́bïkyel wïdɑ́bïkyel, o döre bɑ sentimïtïr pyɑ̈r ɑ́bïkyel wïdɑ́bïkyel. Kɑ gøøj ki dhɑm dhïw kì yije geki köme, kɑ göggí ki dööli dhɑb kì wɑ̈thi tøgge. Kɑ kunyí ki yëll ɑ́ngwen mø dhɑb, kɑ ge gøød wɑ̈thi tøgge gɑ ɑ́ngwen, ɑ́ryew kì tuung, kí ɑ́ryew kì tung-ɑ kyeelø. Codhe, kɑ yï tëëng ki lødhi ɑ́lwiy, kɑ ge gøøj ki dhɑb. Kɑ lødhɑni cød yethi yëll-ɑ tøggi Sɑndug, gɑ møg nyi kɑ̈llii. Kɑ wiy lødhɑni bëëd gen kì ri yëlli Sɑndug, ge ko kɑ̈ɑ̈l wɑ̈g kì ree. Kɑ lwöm-ɑ ɑ́lwøb yi wɑ cïb yij Sɑndungɑni. “Göggí ki kum ki dhɑm-ɑ dhïw, bɑ̈re bɑ sentimïtïr miyø kí pyɑ̈rø, o lɑ̈je bɑ sentimïtïr pyɑ̈r ɑ́bïkyel wïdɑ́bïkyel. Kɑ yï thɑ̈ɑ̈dh ki kerobb ɑ́ryew, gwøg gen ki dhɑb, kɑ ge cuung kì wɑ̈thi tøggi kumɑni. Cïb kerob ɑ́kyel wïj tøg kumɑni kì tuung, kɑ men-ɑ kyeelø cïb tøge kì tung-ɑ kyeelø. Mɑɑg gen ri kum, o ge cyɑ̈dhi gen kyeel. Gwøg kerobb ge nenn-ɑ nyingi gen, e obërri gen tïng gen mɑl, gï peedh gen, ge gëng-ɑ kumɑni, e wɑ̈thi gen nenn-ɑ yï gøn. Cïb kumɑni kömi Sɑnduug Cigg. Kɑ Ópɑ̈nni Cigg-ɑ ómëggɑ yïn ócïb yij Sɑndungɑni. Yɑ óyïddi ki yïn kì kenyɑni, o yɑ kööbɑ ki yïn, yɑ ying-ɑ wïj kumɑni, kì kɑɑm kerobbɑni ryeet, kì kömi Sɑnduug Cigg, o møg-ɑ cïgɑ tyëng Isrɑil nyi köbbɑ yïn. “Göög ki tɑrɑbedhɑ̀ mi gïncɑm ki yɑdh ɑ́lwiy, bɑ̈re bɑ sentimïtïr pyɑ̈r ɑ́bïdɑ̈g wïdɑ́bïdɑ̈g, o lɑ̈je bɑ sentimïtïr pyɑ̈r ɑ́ngwen wïdɑ́ngwen, o döre bɑ sentimïtïr pyɑ̈r ɑ́bïkyel wïdɑ́bïkyel. Kɑ gøøj ki dhɑm dhïw, kɑ tøgge dööl ki dhɑb. Kɑ göggí ki gël me döre bɑ mïlimïtïr pyɑ̈r ɑ́bïryew wïdɑ́bïj, kì tøgge bënn. Kɑ gëlɑni dööl ki dhɑb. Kɑ göggí ki yëlli dhɑb ɑ́ngwen, kɑ ge cïb wɑ̈thi tøggi tɑrɑbenhɑni gɑ ɑ́ngwen kì ri, kì kɑ̈jj-ɑ di tyelle gɑ ɑ́ngwen. Cïb yëll ge cyɑ̈gi ki dööl-ɑ tøggi tɑrɑbedhɑ̀, mɑ́ gen ɑ ómïdhi lødh møg-ɑ nyi kɑ̈llii. Gwøg lødhɑni gɑ ɑ́lwiy, kɑ ge gøøj ki dhɑb, kɑ tɑrɑbedhɑ̀ nyi kɑ̈lli ki lødhɑni. Kɑ siniy møge, kí thɑnhhe, kí óthɑ̈gge, kí ɑ́thïwwe køny ge bënn gɑ dhɑm dhïw. Kɑ gïncɑm men-ɑ bɑ lwølɑ nyi cïb kenyɑni ceth, kì kömi tɑrɑbenhɑni. “Göög ki teggi lɑ̈mbɑ̈ɑ̈ ki dhɑm dhïw, kɑ tyele geki kööre kí bɑ̈dde gwøøg ki dhɑm-ɑ ɑtøg, geki gwedde kí okøgge, wiy bëëd gen gɑ ɑ́kyel bënn, e bong men cuggi puth wɑ̈ye. Bɑ̈dd ɑ́bïkyel ɑ kɑr kì wɑ̈thi tùnge, ɑ́dɑ̈g kì tuung kí ɑ́dɑ̈g kì tuung. Bɑ̈ddɑni bënn ri gen dɑ ɑbuj, kí ɑnɑ̈bb, kí okøgg mø ógwøgø kì ri gen, ge bɑ kɑ̈jj ɑ́dɑ̈g, kì ri bɑ̈dd-ɑ kɑrø bënn. O bëëde wïj tengi lɑ̈mbɑ̈ ɑ́kyel dɑ ɑbuj ɑ́ngwen mø bɑ ɑ́tug, kí ɑnɑ̈bb, kí okøgg. Göggí thɑ̈thi bɑ̈dd-ɑ kɑrø ki ɑnɑ̈bb bënn, göggí bɑ̈ddɑni bënn gɑ ɑ́bïkyel. Wiy tyele geki kööre kí bɑ̈dde bënn, bëëd gen gɑ ɑ́kyel e bong men cuggi puth wɑ̈ye, e bɑ ɑgwøg bëne ki dhɑm dhïw. Codhe, kɑ yï göög ki lɑ̈mbɑ̈ɑ̈ ɑ́bïryew møg thønhø, kɑ ge cïb wɑ̈thi teggɑni, o ge mënyyi gen bøle. Gwøg digɑ̈bbe, geki óthɑ̈ngge gɑ dhɑm dhïw. Dhɑm-ɑ gwøøg teggɑni geki jɑmme bënn røm ɑ́ kïllì pyɑ̈r ɑ́dɑ̈g wïdɑ́bïj. Nëën kidøøj cyee, o men-ɑ ógwøg yi yïn bëëde e nɑ men-ɑ ɑ́nyudhɑ yïn kì wïj kït.” “Kɑ Kemi Kwër gwøøg ki sitɑrr pyɑ̈rø mø ócwɑ̈jø ki kor-ɑ yöm, ge ókwenø kidøøj. Ri gen dɑ kïddì mø bɑ ówɑw, kí ɑ́cwïcwïl, kí kïni kwɑrø, ri gen ókwïnnø yi bødhø me cinge døj ki ngïjji kerobb. Bɑ̈ri sitɑrɑ̀ ɑ́kyel bɑ mïtïr pyɑ̈rø wïdɑ́ryew, o döre bɑ mïtïr ɑ́ryew. Gwøg sitɑrr møgɑni ge pɑ̈r bënn. Kɑ ɑ́bïj rød kej ɑ́kyel, kɑ ɑ́bïj-ɑ kyeelø rød kej ɑ́kyel thyew. Thuulí wïj sitɑrr-ɑ ɑ́rød kej ɑ́kyel ki ógødh me kïde bɑ ówɑw, kɑ ri møg-ɑ kyeelø loony ki rudø thyew. Rudí tøggi ógønh-ɑ bɑ ówɑw ki dölli korø pyɑ̈r ɑ́bïj kì thɑ sitɑrɑ̀. Kí dölli korø møøgø gɑ pyɑ̈r ɑ́bïj thyew kì thɑ sitɑr-ɑ kyeelø. Döllɑni bëëd gen ri gen rwööm gen, men røm ki men Kɑ yï göög ki odöbbi dhɑb pyɑ̈r ɑ́bïj møg mɑɑg buddɑni ryeet kej ɑ́kyel. O tɑni Kemi Kwër bëëde ɑ́ ɑ́kyel. “Codhe, kɑ yï göög ki tɑnø megø me kum tɑni Kemi Kwër, gwøøg ki sitɑr pyɑ̈rø wïdɑ́kyel mø ócwɑ̈jø ki yëyyi dyëg. Bɑ̈ri sitɑrɑ̀ ɑ́kyel bɑ mïtïr pyɑ̈rø wïdɑ́dɑ̈g, o döre bɑ mïtïr ɑ́ryew, kɑ ge gwøg ge pɑ̈r. Kɑ ɑ́bïj rød kej ɑ́kyel, o ge göög gen ki ɑ́kyel. Codhe, kɑ ɑ́bïj loony ki rød kej ɑ́kyel. Bɑn bïkyeel sitɑr yethe ɑ́ryew kì bøli kemɑ̀. Göög ki dölli korø pyɑ̈r ɑ́bïj kì thɑ sitɑrr-ɑ ɑ́rød kej ɑ́kyel. Kɑ møg-ɑ tung-ɑ kyeelø loony ki göggø. Göög ki yëlli dilɑl gɑ pyɑ̈r ɑ́bïj, kɑ ge kïdhí yethi dölli korø, o ge mɑɑg gen buddɑni ryeet kej ɑ́kyel, o kumɑni bëëde ɑ́ ɑ́kyel. Kɑ kwï ógønh-ɑ ɑ́döng ɑ́ ɑbɑn ryërre kì cyɑ̈n e gëng-ɑ ngɑ̈ɑ̈j Kemi Kwër. Ógønh-ɑ ɑ́döng e bɑ̈re bɑ sentimïtïr pyɑ̈r ɑ́bïj kì wɑ̈thi tùngi Kemi Kwër, wiy bëëde ree cwɑɑl en piny, o gënge tøgge kì tùngɑni ryeet. “Göög ki kum Kemi Kwër ki pënni dyëg mø ójwɑ̈ɑ̈gø ki kïn-ɑ kwɑrø, kɑ köme kum thyew ki pënnì møg-ɑ órød kej ɑ́kyel. “Ngud ki yenh ɑ́lwiy møg cwöödh piny, gɑ møg mïdhi Kemi Kwër. Bɑ̈ri ɑ́kyel bɑ mïtïr ɑ́ngwen, lɑ̈je bɑ sentimïtïr pyɑ̈r ɑ́bïkyel wïdɑ́bïkyel, e pɑ̈m dɑ tyelle ɑ́ryew kelli gen cyɑ̈gi. Gwøg gen ge pɑ̈r bënn. Göög ki yenh pyɑ̈r ɑ́ryew kipe tung-ɑ wɑɑng wurlwɑl. Kɑ tyelli yenhɑni cïbí ki tëddi ɑ́tegø gɑ pyɑ̈r ɑ́ngwen. O yɑdh ɑ́kyel bëëde yïe dɑ tëddì ɑ́ryew kipe tyelle ryeet. Tyellɑni bɑ pij møg-ɑ ócwöödh piny. Kɑ tung-ɑ kyeelø men-ɑ wɑɑng wuudø göggí ki pɑ̈mmì pyɑ̈r ɑ́ryew thyew. Kɑ ge göggí thyew ki tëddi ɑ́tegø gɑ pyɑ̈r ɑ́ngwen. O yɑdh ɑ́kyel bëëde yïe dɑ tëddì ɑ́ryew kipe tyelle ryeet. Kɑ ngɑ̈ɑ̈j Kemi Kwër göggí ki yenh ɑ́bïkyel. Kɑ wɑ̈thi tùnge kïdhí ki yenh ɑ́ryew, yenhi wɑ̈thi tùng, bëëd gen ge ómɑɑg kej ɑ́kyel kì piny, o wɑ̈thi gen mɑl bɑ ɑmɑg ki döölø me bɑ ngyënyø dødø. Pɑ̈mm-ɑ wɑ̈thi tùng, gwøøg gen ryeet kinøw. O bëëde ɑ́ pɑ̈mmì ɑ́bïdɑ̈g ɑ ócwöödh piny kì cyɑ̈n. Kí tëddi ɑ́tegø gɑ pyɑ̈rø wïdɑ́bïkyel, tëddì ɑ́ryew kì thɑ pɑ̈m ɑ́kyel. “Kɑ yï göög ki yenh ɑ́lwiy pyɑ̈rø wïdɑ́bïj, ɑ́bïj møg mɑɑg wɑ̈thi yenh-ɑ cungi kì kej ɑ́kyel kì tuung kemɑ̀, kí ɑ́bïj møøgø kì tung-ɑ kyeelø, kí ɑ́bïj møøgø thyew kì cyɑ̈n kì kuni wɑɑng cyɑ̈ɑ̈ng böörø. Yɑnh-ɑ bɑ rïwi wiy yinge dïkïl kì wɑ̈thi yenh, kɑ wiy bɑ̈ɑ̈ne gøn kì dyëre e wɑ̈dh-ɑ tuung kí tuung. Kïdhí ri yenh-ɑ cungi ki yëlli dhɑb møg-ɑ ómïdhi wɑ̈thi gen. Kɑ yenh-ɑ cungi bënn gøøj ki dhɑb. Ger Kemi Kwër ceth, e nɑ men-ɑ ɑ́nyudhɑ yïn kì wïj kït. “Göög ki sitɑrɑ̀ ki kor-ɑ yöm, ree dɑ kïddì mø bɑ ówɑw kí ɑ́cwïcwïl kí kïni kwɑrø, keny-ɑ órum ree ki kwïnø yi bødhø me cinge døøj ki kerobb. Kɑ ngɑɑb ri löjj ɑ́ngwen mø yɑdh ɑ́lwiy, mø bɑ ɑgøj ki dhɑb, mø ri gen di odöbb, ge ócungø kömi tëddì ɑ́ngwen møg ɑ́tegø. Kɑ sitɑrɑ̀ yinge me ryërri kì ri odöbb. Codhe, kɑ Sɑnduug Cigg men-ɑ yije di ópɑ̈nni kït ryeet kɑ̈ɑ̈l, kɑ cïb kenyɑni, kì ngɑ̈ɑ̈j sitɑrɑ̀, men-ɑ dɑ̈ɑ̈ng kej kwër, geki Kejkwërdwøng. Cïb kum kömi Sɑnduug Cigg. Kɑ tɑrɑbedhɑ̀ cïb bøli Kej Kwërdwøng kì yiny-ɑ wɑ̈g, kì wɑɑng wuudø. Cïb teggi lɑ̈mbɑ̈ɑ̈ wɑɑng wurlwɑl e rwööm ki tɑrɑbedhɑ̀. “Codhe, kɑ dhø kemɑ̀ ngɑ̈bbí ki sitɑrɑ̀ me bɑ ɑcwɑ̈j ki kor-ɑ yöm, e ókwenø ki korø me kïdde di møg bɑ ówɑw kí ɑ́cwïcwïl, kí møg kwɑrø. Kwen gen yi bødhø me cinge døj. Cwödhí piny ki löjji ɑ́lwiy ɑ́bïj mø bɑ ɑgøj ki dhɑb. Göggi ri gen ki odöbb mø bɑ dhɑb, møg ri gen mɑɑg sitɑrɑni, kɑ ge göggí ki tëddì ɑ́bïj møg-ɑ ókønyø gɑ dilɑl. “Kɑ këli lɑm gwøøg ki ɑ́lwiy, gwøøg köme mɑl ɑ́ óør, nyingi ngëdde ɑ́ngwen pɑ̈r, bɑ̈re bɑ mïtïr ɑ́ryew kí sentimïtïr pyɑ̈r ɑ́ryew, o lɑ̈je bɑ mïtïr ɑ́ryew kí sentimïtïr pyɑ̈r ɑ́ryew, o döre bɑ mïtïr ɑ́kyel kí sentimïtïr pyɑ̈r ɑ́dɑ̈g. Kɑ göggí ki tùng kì wɑ̈thi tøgge gɑ ɑ́ngwen bënn, de cɑɑg gen ki køjø kì ri yɑnh-ɑ gwøøg këli lɑm, kɑ gøøj ki dilɑl. Kɑ jɑmme bënn thɑ̈dh gɑ dilɑl; ɑ løg tɑ̈mm-ɑ nyi jøøb búr, kí ɑtögge, kí tɑ̈mme, kí odöbbe, kí dikɑ̈bbi mɑc. Gwøøg jɑmmɑni ki dilɑl. Göggi ki bøøy dilɑl óør, wɑ̈thi tùnge gɑ ɑ́ngwen bënn dɑ yëll, ge ómɑɑg tøgge. Kɑ cïb piny thɑ tøg këlø, o bëëde e ying-ɑ kuni dïdyër. Kɑ këlø göggí ki lødh ɑ́ryew mɑ ɑ́lwiy, kɑ ge gøj ki dilɑl. Kɑ lødhɑni cød yethi yëll-ɑ tøggi këlø gɑ møg nyi kɑ̈llii. Kɑ këlø gwøg ki pɑ̈mmì, kɑ yije gwøg ɑ́ göl. Gwøg ceth e pɑ̈r ki men-ɑ ɑ́nyudhɑ yïn kì wïj kït. “Göög ki dörø ki sitɑrɑ̀, ɑ́ kɑl me wen Kemi Kwër. Dör-ɑ kuni wɑɑng wurlwɑl gwøg ɑ́ ógødh mɑ ɑcwɑ̈j ki kor-ɑ yöm, bɑ̈re bɑ mïtïr pyɑ̈r ɑ́ngwen wïdɑ́ngwen. Ngɑɑb sitɑrɑni ri löjji dilɑl pyɑ̈r ɑ́ryew, kɑ mɑɑg ri gen ki odöbb mø bɑ ɑ́tegø, kɑ twöj ki win ɑ́tegø. Gwøg tëddi löjjɑni ki dilɑl, kwɑnni gen bɑ pyɑ̈r ɑ́ryew. Tung-ɑ wɑɑng wuudø dɑ löjji dilɑl mø ni møgɑni, ge ócungø kömi tëddi dilɑl pyɑ̈r ɑ́ryew, o sitɑr mø bɑ̈ri gen bɑ mïtïr, mɑɑg ri gen ki odöbb geki win-ɑ tööj mɑ ɑ́tegø. Dör-ɑ kuni wɑɑng cyɑ̈ɑ̈ng böörø bɑ̈ri sitɑre bɑ mïtïr pyɑ̈r ɑ́ryew wïdɑ́ryew, o bɑ ɑngɑb kì ri löjj pyɑ̈rø mø di tëddi pyɑ̈rø. O dör-ɑ kuni wɑɑng cyɑ̈ɑ̈ng mwøl, ɑ løg tung-ɑ di dhø kɑl, bɑ̈re bɑ mïtïr pyɑ̈r ɑ́ryew wïdɑ́ryew thyew. Tung ɑ́kyel kì bøli dhø kɑl bɑ̈ri sitɑrre bɑ mïtïr ɑ́bïkyel kí sentimïtïr pyɑ̈r ɑ́bïkyel, ge óngɑɑb-ɑ ri löjj ɑ́dɑ̈g mø di tyel ɑ́dɑ̈g. Sitɑrr møg-ɑ tung-ɑ kyeelø pɑ̈r ki gen, ge bɑ mïtïr ɑ́bïkyel kí sentimïtïr pyɑ̈r ɑ́bïkyel, ge óngɑɑb-ɑ ri löjj ɑ́dɑ̈g mø di tëddi ɑ́dɑ̈g. Sitɑri dhø kɑl bɑ mïtïr ɑ́bïngwen, e ócwɑ̈jø ki kor-ɑ yöm, me bɑ ɑgwel ki kïddì mø bɑ ówɑw kí ɑ́cwïcwïl kí møg kwɑrø, o ócwɑ̈j-ɑ yi bødhø me cinge døj. O ngɑɑb ri löjj ɑ́ngwen mø di tyel ɑ́ngwen. O löjjɑni bënn møg-ɑ tuum kɑl, bɑ ɑrïw ki lødhi ɑ́tegø ri gen dɑ odöbbi ɑ́tegø kí tëddi dilɑl. Bëëd bɑ̈ri kɑl ceth ɑ́ mïtïr pyɑ̈r ɑ́ngwen wïdɑ́ngwen, o lɑ̈je bɑ mïtïr pyɑ̈r ɑ́ryew wïdɑ́ryew, o döri sitɑre bɑ mïtïr ɑ́ryew kí sentimïtïr pyɑ̈r ɑ́ryew. Kɑ jɑmm-ɑ göög kì gølɑni bëëd gen ceth ge bɑ ɑthɑ̈dh ki dilɑl, gen ɑ pijji kemɑ̀ bënn, kɑ löjji dör-ɑ bɑ kɑl bëëd gen gɑ dilɑl bënn. “Kɑ tyëng Isrɑil köbbí, o yï nëngi yi gen ki møøw dhetun men-ɑ bɑ ɑ́bïj, men mïdhi lɑ̈mbɑ̈ɑ̈ møg-ɑ wɑ̈thi tegg ge olyelø. Aɑron geki wɑ̈dde mïdhi gen lɑ̈mbɑ̈ɑ̈ ge olyelø kì bølɑ cɑg kì böörø gïti mwøl. Mɑnyɑni yinge yij Kemi Kwër, kì kuni wɑ̈g kì ri sitɑrɑ̀ men-ɑ gëng Sɑnduug Cigg. Ciggɑni mïdhi gen ceth yi tyëng Isrɑil, cɑg ɑnɑn gïti ɑtheer kì ri rïjj bënn.” “Köbbí Aɑron ómyëw bëe yïí geki wɑ̈dde, Nɑdɑb, kí Abiu, kí Eliɑdhɑr, kí Ithɑmɑr. Dɑ̈ɑ̈ng gen ki tyëng Isrɑil møg-ɑ kyeelø, o ge göggi gen yɑn gɑ ókwër. Göggí ómyëw Aɑron ki ógudh, o myëre, o wør yi ji. Köbbí bödhhì bënn møg-ɑ ɑ́thödhi ki peli wïj geki døøji cingø, o Aɑron göggi yi gen ki ógudh mø bëëdi gen ying wɑ̈yi gen. Ógudh møg nyodhii kinni bɑ miɑ, ngɑn göggi yɑn ɑ́ ókwërø. Ógudh-ɑ dwɑddi yi yɑn o gï gwøg yi gen ek: Bøj kí pɑrø, kí ɑ́ywönhdwøng, kí ɑ́ywönhthinh, kí thɑgi wïj, kí wëni yij. Göggi ógudh møgɑni Aɑron ómyëw geki wɑ̈dde yi bödhhì, o yɑ göggi yi gen gɑ ókwër. Cwɑ̈ɑ̈j gen yi bödhhɑni ki korri yëyy mø kïddi gen bɑ ówɑw kí ɑ́cwïcwïl, kí kïni kwɑrø, ki korri dhɑb, ki kor-ɑ yöm “Göög gen ki pɑrø ki korri yëyy mø kïddi gen bɑ ówɑw kí ɑ́cwïcwïl, kí kïni kwɑrø, ki korri dhɑb, ki kor-ɑ yöm, kɑ ge cwɑ̈ɑ̈j ɑ́ywönhdwøng. Cwɑ̈ɑ̈j ógønhɑni yi bödhh-ɑ cinggi gen døøj. Bëëd wɑ̈thi tøgge ómɑɑg kej ɑ́kyel. Bëëd wën-ɑ nyi twööjii ɑ́ ɑrød kì ree, e bɑ ɑgwøg ki jɑmm-ɑ ni møgɑni. Kɑ yï kɑ̈bbí ki ópɑ̈nni kïtt-ɑ nyi göög ki tigg gɑ ɑ́ryew, kɑ nyingi wɑ̈ddi Isrɑil gweed kömi gen, e kööl ɑ ri ngɑn-ɑ dwøng, ɑ́bïkyel kì kömi kïnï, kí ɑ́bïkyel kì kömi kïn-ɑ kyeelø. Gweed nyingi wɑ̈ddi Isrɑil kömi ópɑ̈nni kïttɑni ryeet, ge ceg yi yïn kɑ twegø, ni kenyi gwëëd bødhø ki kitim. Kunyi tøggi kïttɑni ki dhɑb men-ɑ ómɑɑg gen ri ógødh kwër. Codhe, kɑ ópɑ̈nni kïttɑni twööj ri digɑ̈bbi wɑ̈thi tøggi ɑ́ywönhdwøng gɑ møg nyi pɑɑr wɑ̈ddi Isrɑil gɑ pyɑ̈rø wïdɑ́ryew. Rug nyingi gen yi Aɑron kì bølɑ gɑ møg nyi pɑɑr wɑ̈ddi Isrɑil. Göög ki ɑ́tuggi dhɑb ɑ́ryew møg mïdhi kïttɑni. Kɑ yï göög ki ɑ́cwecwelli dhɑb ɑ́ryew ki dhɑm dhïw. Mɑɑg ɑ́cwecwellɑni ri ɑ́tuggi dhɑb møg-ɑ ri kïttɑni, o ge mïdhi ge gïn. “Göggi Ókwër-ɑ Dwøng ki bøj men nyi kunyi ki løøgi kwøb, gwøg yi bödhhì ni kɑ ɑ́gwøg gen pɑrø, cwɑ̈j ge gøn ki kor-ɑ yöm mø kïddi gen bɑ ówɑw kí ɑ́cwïcwïl, kí kïni kwɑrø, kí korri dhɑb. Gwøg bøj ɑ́ óør tùnge pɑ̈r, bɑ̈re bɑ sentimïtïr pyɑ̈r ɑ́ryew wïdɑ́ryew, o lɑ̈je bɑ sentimïtïr pyɑ̈r ɑ́ryew wïdɑ́ryew, ɑ́ ɑbɑn yethe ɑ́ryew, o gööge e nɑ jyeb. Kɑ ree rudi ki lwøbb ɑ́ngwen mø ópɑ̈nni kïtt-ɑ nyi göög ki tigg; lwøm-ɑ mɑl yije dɑ rërø, kí óbwörø, kí ómɑrø. O ryeew lwøbb yije dɑ ówɑw me kømi lojø, kí óbɑng, kí óbøw. Dɑ̈ɑ̈g lwøbb yije dɑ ɑ́dwøgø, kí oget, kí ɑ́gør tïl. Ngween lwøbb yije dɑ ówɑw, kí ditɑ̈ng, kí ɑcwïl. Kɑ ge mɑɑg kej ɑ́kyel bënn ge otumø yi yïn ki dhɑb. Bëëd kwɑnni ópɑ̈nni kïttɑni gɑ pyɑ̈rø wïdɑ́ryew ceth kì kömi bønyɑni, ɑ́kyel cungi ɑ́ nyingi wɑ̈d Isrɑil ɑ́kyel, men ki kïte men ki kïte. Gweed nyingi ngɑɑn kömi kïte, yï ce tweg-ɑ kitim. Göög ki ɑ́cwecwelli dhɑm dhïw, e nɑ thøl ɑkɑ̈d me ngɑɑb bøj. Göög ki yëlli dhɑb ɑ́ryew, kɑ ge gøød wɑ̈thi tøggi bøj kì mɑl. Mɑɑg ɑ́cwecwelli dhɑb ri yëllɑni. Mɑɑg dhøggi ɑ́cwecwellɑni ryeet kì tung-ɑ kyeelø ri ɑ́tuggi dhɑb møg-ɑ ri pɑrø, kì ri digɑ̈bbì, kì wɑ̈thi tøg kì bøli pɑrø. Göög ki yëlli dhɑb ɑ́ryew møøgø kɑ ge gøød wɑ̈thi tøggi bøj kì kuni piny, kì yiny-ɑ yij tung-ɑ kömi pɑrø. Göög ki yëll ɑ́ryew møøgø, kɑ ge gøød kuni piny kì ri digɑ̈bbì wïj tøg pɑrø, kì kuni bøle, cïb mɑl ri keny-ɑ órød wëni pɑrø. Twööj yëlli pɑɑrø ri wëëni me kïde bɑ ówɑw, gï orebø ki wëëni kipe kinni o bøj cöge e pɑ lëwwø kì kömi pɑrø. “Kɑ̈lli nyingi wɑ̈ddi Isrɑil yi Aɑron ceth kì ri bøj, bøj mi löggø. Kɑ̈lle gïn kì ɑ́ngɑne ceth ɑ́ men nyi pɑ̈ddi ji, kì bøli kenyi kedhe kej kwër. Cïb Urïm geki Thumïm yij bøj, o ge ying gen kömi mini Aɑron kenyi kedhe bøli Jwøng-ɑ Ácwɑ̈ɑ̈j. O Aɑron kɑ̈lle jɑmmi løøgi gøny kì Isrɑil kì bølɑ kì yethi cyɑ̈ng bënn gïti ɑtheer. “Göög ki ɑ́ywönhdwøng, rød ɑ́ ógødh me bɑ ówɑw bëne. Göggi ki keny me twïyø kì wïje mɑl, me nyi cød wïj Aɑron, kɑ cwɑ̈jji ki munø, kipe e ópyëëd. Göög ki gïg mø bɑ ɑ́tug ni nywøli romɑn ki kor, mø kïddi gen bɑ ówɑw kí ɑ́cwïcwïl kí møg kwɑrø, kɑ ge ngɑɑb tøggi ɑ́ywönhdwøng, o ge ryërri gen. Kɑ kelli gen cwil ki mɑ̈lli dhɑb, (mɑ̈lø ki romɑn gïti keny-ɑ ótuume). Rug ógønhɑni yi Aɑron ceth kenyi gööge ɑ́ ókwërø. O ywøøg mɑ̈lli dhɑb nyi lïngi kenyi kedhe, kí kenyi dwööge wɑ̈g kì kej kwër kì bølɑ, o Aɑron cöge e pɑ thøw. “Göög ki ópɑni dhɑb, kɑ kwøb møg gweed ge twegí ree, yï ce tweg-ɑ kitim kinni, ‘Kwëër Jwøng-ɑ Ácwɑ̈ɑ̈j.’ Kɑ twööj bøli thɑɑg ki ɑcwɑdø me kïde bɑ ówɑw. Nyi rug yi Aɑron ceth kì bøle, o kɑ̈lle körri orøøg tyëng Isrɑil kinøw kì ri jɑmm-ɑ muuj yɑn yi gen. Nyi kɑ̈lli yi Aɑron ceth gø twööj en bøle, kenyi kedhe bølɑ, o jɑmm-ɑ muuj yi ji yïëy yi yɑn. “Cwɑ̈j ɑ́ywönhthinh ki kor-ɑ yöm, kɑ thɑɑg cwɑ̈j ki kor-ɑ yöm thyew, kɑ wëëni ceg ki kwenø yi bødhø me cinge døj. “Göggi wɑ̈ddi Aɑron thyew ki ɑ́ywödhh-ɑ thønhø, kí wënni yeth, geki wënni wɑ̈ɑ̈th, kipe kinni o ge nënni gen ge myëër, o ge wør yi ji. Løny ógudhɑni ri Aɑron ómyëw geki wɑ̈dde. Kɑ ge gïïny ki møøw dhetun. Kɑ ge thyey kipe gwøg men-ɑ gwøg yi gen. Kɑ ge kwër, o ge bëëd gen gɑ ókwër møgɑ. Kɑ ge göggí ki ɑköjji kor-ɑ yöm, mø kum gen ri gen, e cɑ̈g-ɑ́ɑ̀ pyer gïti ri cøng. O ge nyi rug yi Aɑron geki wɑ̈dde kì thɑ̈thi ɑ́ywödhhi gen kenyi kedhi gen yij Kemi Kwër, kì bøli keny-ɑ kedhi gen buti këli lɑm be gwøg gɑ ókwër kì kej kwër. Kipe ge ókɑ̈ni ki orøg kɑ ge othøø. Møgɑni bɑ cigg møg mïdhi kidøøj yi Aɑron geki wɑ̈dde, kí kwɑrre gïti ɑtheer. “Gwøg møg-ɑ köbbɑ yïn èn, kɑ Aɑron kwëër geki wɑ̈dde gɑ ókwër møgɑ, kɑ̈bbí ki wɑdh me thinh, ki órömm ɑ́ryew mø bong gïjø me rɑj kì ri gen. Kɑ yï göög ki ópun ki møng-ɑ búr gemè e bɑ olwëny, nyöm ɑwɑnyɑni ki møøw dhetun. Göög ki ópùn møg thwøwø, møg bɑ ɑgïny ki møw. Kɑ ge kïdhi yij ɑ́ridh, kɑ kɑ̈ɑ̈l geki wɑdh, kí órömmɑni ryeet. “Kɑ Aɑron geki wɑ̈dde kɑ̈ɑ̈l dhø Kemi Kwër, kɑ ge lwøøg ki pï. Kɑ ógudh kwɑɑny, kɑ ɑ́ywönhthinh løny ree, kɑ ɑ́ywönhdwøng løny köme, kɑ ɑköj løny, kí pɑrø. Kɑ ɑköj twööj ree ki wëne men-ɑ bɑ ɑkwen yi bødhø me cinge døj. Kɑ thɑɑg cïb wïje, kɑ Athyeey Jwøng-ɑ Ácwɑ̈ɑ̈j twööj kömi thɑɑg kì bøle. Kɑ møøw röny kwɑɑny, kɑ køny wïje, kɑ gïïny. “Kɑ wɑ̈dde kɑ̈ɑ̈l, kɑ ɑ́ywödhhi gen løny ri gen. Kɑ thɑ̈ggì cïb wɑ̈thi gen, kɑ wënnì twööj yethi gen. Aɑron geki kwɑrre óbëëdø gɑ ókwër kì Isrɑil e bɑ cigg møg cɑ̈gi ɑnɑn gïti ɑtheer. Bene kër-ɑ ókwëër Aɑron geki wɑ̈dde ɑnɑn gɑ ókwër. “Kɑ̈ɑ̈l wɑdh dhø Kemi Kwër. Kɑ Aɑron geki wɑ̈dde cïb gen cinggi gen wïj wɑnhɑni. Kɑ wɑnhɑni ngɑɑl kì bølɑ kì dhø Kemi Kwër. Kɑ yï kɑ̈bbí ki kwï remi wɑdh, kɑ kiny ri tùngi këli lɑm ki lwedí. Kɑ rem-ɑ döng bëne køny thɑ këli lɑm. Kɑ dwɑ̈lø men-ɑ yij, kí dhøg ócuny kí dwɑ̈l-ɑ ree, kí røng ryeet geki dwɑ̈l-ɑ kömi gen, kɑ ge rɑ̈ɑ̈b kì wïj këli lɑm. Kɑ pyëën wɑdh, kí rïnge geki wɑyye, rɑ̈ɑ̈b kì ngɑ̈ɑ̈j kɑɑl, bɑ gënhi orøg. “Kɑ órömø ɑ́kyel kwɑɑny, kɑ Aɑron geki wɑ̈dde cinggi gen cïb gen wïje. Kɑ órömɑni ngɑɑl, kɑ yï kɑ̈bbí kì ri reme, kɑ kiny ri këli lɑm, e owenø yi yïn. Kɑ órömɑni ngølli ɑ́ ɑ́tug, kɑ cïnne lwøøg geki tyelle, kɑ ge cïb wïj këli lɑm kyeel ki wïj órömø. Kɑ órömɑni rɑ̈ɑ̈b bëne kì wïj këli lɑm, yømi tole twel, bɑ kenɑ. “Kɑ ryeew órömm kwɑɑny, kɑ Aɑron geki wɑ̈dde cinggi gen cïb gen wïje. Kɑ órömɑni ngɑɑl, kɑ yï kɑ̈bbí kì ri reme, kɑ gɑ̈ɑ̈j ri ɑ́kwɑɑn yïth Aɑron, geki ɑ́kwɑnni yïthhi wɑ̈dde, kí ri lwedd-ɑ døngø mø cinggi këjji gen geki tyelli këjji gen bënn. Kɑ rem-ɑ döng kiny ri këli lɑm, e owenø yi yïn. Kɑ yï kɑ̈bbí kì ri rem-ɑ wïj këlø, kɑ yï kɑ̈bbí kì ri møøw gïïnyø, kɑ ge kiny ri Aɑron geki wɑ̈dde, kí ri ógudhi gen bënn. Menɑni ónyodh kinni Aɑron geki wɑ̈dde kí ógudhi gen bënn, ɑ́rum ki mëggi yɑn, o ge göggi gen yɑn. “Codhe, kɑ dwɑ̈li órömɑni kwɑɑny, kí ótïde, kí røng ryeet geki dwɑ̈l-ɑ kömi gen, kí dhøg ócuny kí dwɑ̈l-ɑ ree. Kí rɑ̈ɑ̈m kyëj. Mɑ́ e bɑ órömi röny. Kɑ̈bbí ki ópuun olwëny ɑ́kyel, kí ópun ɑ́kyel kì ri ópùn-ɑ ɑ́nyöm ki møw, kí kɑɑk ɑ́kyel kì yij dhöng-ɑ bølɑ. Cïb jɑmmɑni bënn cingi Aɑron geki wɑ̈dde, kɑ ge köbbí o gï kïdhi gen bølɑ, bɑ kenɑ. Kɑ ge kwɑɑny kì cinggi gen, kɑ ge rɑ̈ɑ̈b kì wïj këli lɑm, yømi tool gen twel, bɑ kenɑ. “Kɑ ɑ́ngɑni óröm-ɑ ɑ́røøny Aɑron kwɑɑny, kɑ thyeer bølɑ. Bene en ɑ óbëëd ɑ́ mií. “Thyer ɑ́ngɑni dyeel röny geki bɑde, kɑ ge kwëër, eni ɑ́ngɑdø geki bɑɑd dyel-ɑ ɑ́røøny Aɑron geki wɑ̈dde. O ge bëëd gen gɑ mø Aɑron geki wɑ̈dde. Nyi muuj gen ceth yi tyëng Isrɑil gɑ mø ókwër kì ri jɑmm-ɑ nyi ngɑl yi gen gɑ kenɑ gïti ɑtheer. “Kɑ ógudhi Aɑron møg-ɑ bɑ ɑkwër mïdhi wun gɑ møg-ɑ órøøny ngɑn-ɑ kwɑny keje kì kelli wɑ̈dde gïti ri kwɑrre. Ngɑn-ɑ kwɑny keje ɑ́ Ókwër-ɑ Dwøng, nyi ruge ógudhɑni ki cyɑ̈ng ɑ́bïryew, kenyi kedhe yij Kemi Kwër be gwøg ki kwër. “Kɑ órömi röny kwɑny, kɑ thɑl kì keny me bɑ ɑkwër. Kɑ órömi kwër cɑm yi Aɑron geki wɑ̈dde kì dhø Kemi Kwër, cɑm ge gøn kyeel ki ópùn-ɑ yij dhöngø. Cɑm gen gënhɑni keti gen, mɑ́ e ɑ́gøøm-ɑ bøli gen keny-ɑ ɑ́thyeey gen, kɑ ge kwër. De ko di ngɑn megø me cyɑ̈mø, mɑ́ e bɑ ɑkwër. O keløg e dɑ rïngi dyeel röny me döng, wɑlɑ̀ dɑ ópun me döng kɑ wɑ̈dh-ɑ mwøl, rɑ̈ɑ̈b møg-ɑ ɑ́döng bënn. Ko cɑm, mɑ́ ge bɑ ɑkwër. “Bene gïn-ɑ ógöggí Aɑron geki wɑ̈dde ɑnɑn, ni kɑ ɑ́cegɑ yïn ceth. Rööny gen tyëg-ɑ cyɑ̈ng ɑ́bïryew. Nyi ngɑ̈ɑ̈d ki wɑdh kì yethi cyɑ̈nggɑni gɑ ɑ́bïryew, cyɑ̈ɑ̈ng ki wɑdh, cyɑ̈ɑ̈ng ki wɑdh, ɑ́ men gøøm bøli orøøg Aɑron geki wɑ̈dde, kɑ këli lɑm kwëër, kɑ köme kunyí ki møw, o gööge ki ɑkwër. Tyëg cyɑ̈ng ɑ́bïryew yï kwër-ɑ këli lɑm, yï thyey-ɑ en. O këli lɑm gööge ɑ́ ɑkwër, gïn-ɑ nywɑlii ceg-ɑ gwøg ki ɑkwër. “Bene gïg-ɑ ómuuj yi yïn kì këli lɑm ek: Órömm ɑ́ryew mø runi gen ɑ́kyel, kì yethi cyɑ̈ng, ki cyɑ̈ng ɑ́bïryew. Nɑ̈g órömø ɑ́kyel kì mwøl, kɑ óröm-ɑ kyeelø nɑ̈ɑ̈g kì böörø. Kɑ yï muuj ki møng-ɑ búr ɑ́ kïlø ɑ́kyel kí órömi mwøl, kí kïlø megø kí órömi böörø, nyööm møng-ɑ búrɑni ki røthøl ɑ́ryew mø møøw dhetun. Kɑ yï muuj ki møgi oløg røthøl ɑ́ryew Nɑ̈g óröm-ɑ kyeelø kì böörø kɑ yï muuj ki møng-ɑ búr, kí møøw dhetun, kí møgi oløg mø pɑ̈r ki møg-ɑ ɑ́muuj yi yïn kì mwøl. Menɑni bɑ men-ɑ rɑ̈bbi yɑn, yømi tole twel, bɑ kenɑ. Nyi rɑ̈ɑ̈b jɑmmɑni yethi cyɑ̈ng bënn, ge rɑ̈bb-ɑ yɑn, cɑg ɑnɑn ceth gïti ɑtheer, nyi rɑ̈ɑ̈b gen kì dhø Kemi Kwër kì bølɑ. Kenyɑni ɑ nyi yïddɑ wøki jiɑ, ɑ kööbɑ wøki yïn. Wø óyïddi ki tyëng Isrɑil kì kenyɑni, o kenyɑni óbëëd ɑ́ ɑkwër kipe mɑ̈rɑ. Kemi Kwër geki këli lɑm ókwër yi yɑn. Aɑron geki wɑ̈dde ókwër yi yɑn thyew, o yɑ ógöggi yi gen gɑ ókwër. Yɑ óbëëdø kì kelli tyëng Isrɑil, kɑ yɑ ogöögø ki Jwøøg gen. O óyod yi gen kinni yɑn, yɑ Jwøng-ɑ Ácwɑ̈ɑ̈j, yɑ bɑ Jwøøg gen, ngɑn-ɑ ɑ́kɑ̈ɑ̈l gen wɑ̈g kì piny Rïp, kipe kinni o yɑ óbëëdɑ kì kelli gen. Bene yɑn Jwøøg gen, Jwøng-ɑ Ácwɑ̈ɑ̈j. “Göög ki këli bɑkur, gwøøg ki yɑdh ɑ́lwiy. Gwøg ɑ́ óbɑr, bɑ̈re bɑ sentimïtïr pyɑ̈r ɑ́ngwen wïdɑ́bïj, o lɑ̈je bɑ sentimïtïr pyɑ̈r ɑ́ngwen wïdɑ́bïj, o döre bɑ sentimïtïr pyɑ̈r ɑ́bïngwen, o yïe dɑ tùng mø bɑ ɑkøj kì ri yɑnhɑni. Kɑ wïje mɑl, kí nyingi ngëdde, kí tùnge gøøj ki dhɑm dhïw. Kɑ ween ki dööli dhɑb. Kɑ ree göddi ki yëlli dhɑb ɑ́ryew møg nyi kɑ̈llii ki lødh. Gwøg lødhɑni gɑ yɑdh ɑ́lwiy, kɑ ge gøøj ki dhɑb. Kɑ këli bɑkur cïb bøli gëng, e rwööm ki Sɑnduug Cigg, ɑ yije di ópɑ̈nni cigg pyɑ̈rø, e rwöm ceth ki kum Sɑndug, keny-ɑ nyi yïddi wɑ. O köme nyi rɑ̈ɑ̈b yi Aɑron ki bɑkur kì mwøl yethi cyɑ̈ng bënn, kenyi kedhe be nɑ̈gi lɑ̈mbɑ̈ɑ̈. Nyi døøge’ rɑ̈b ki bɑkur kì böörø kenyi kedhe be cwinyi lɑ̈mbɑ̈ɑ̈, codhe, o bɑkur nyi duunge kì bølɑ yethi cyɑ̈ng bënn, kì ri rïjj bënn. Ko di bɑkur me pɑth ki mi kwër men rɑ̈b kì këlɑni, kɑ ko di kenø me rɑ̈b kì köme, ying-ɑ́ rïngø wɑlɑ̀ byëlø, kɑ ko di gïn køny wïje. Nyi kwër yi Aɑron tyelø ɑ́kyel kì yij run, o dhïwe. Nyi kwër ceth kì yethi rïjj bënn. Nyi kïnye ri tùnge ki remi gëdhhi orøg. Këlø menɑni bene kej kwër-ɑ dwøng kì yïɑ.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Keny-ɑ ókwɑɑn tyëng Isrɑil, muuj dhɑnhø ki gïn gøøme wëye kipe ri gen ókedhi yi gïnrɑj keny-ɑ ókwɑɑn gen. Muuj ngɑn-ɑ kwɑɑn kelli ji ki ngyëny ɑ́tegg ge røm kɑ rumi kej kwër. Ngɑn-ɑ kedhi yethi kwɑn, cɑg kì ri ngɑn runne bɑ pyɑ̈r ɑ́ryew gïti mɑl, ceg-ɑ muujø ceth e thödh-ɑ Jwøng-ɑ Ácwɑ̈ɑ̈j. Kɑ ngetikɑ̈r ko muuj ki møg ngenyø kibøli ngɑn wɑnge cɑn, wɑlɑ̀ ngɑn wɑnge cɑn ko muuj ki møg nøg, mɑ́ e bɑ men mëggi Jwøng-ɑ Ácwɑ̈ɑ̈j, ɑ́ men gøøm bøli wëyi wun. O ɑ́tegø men-ɑ cøng yi yïn kì yï tyëng Isrɑil bëëde ɑ́ men nyi ngëëw ki jɑmm-ɑ dwɑddi kipe Kemi Kwër. O óbëëde ɑ́ pɑɑr kì bøli Wïi wun kinni, tyëng Isrɑil bøli wëyi gen ɑ́gøøm.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Göög ki ɑ́tɑɑy dilɑl, o dööli thɑre bɑ dilɑl thyew, kɑ cïb kɑɑm Kemi Kwër geki këli lɑm, kɑ pɑ̈ng ki pï, o yije nyi kɑ̈bbi yi Aɑron geki wɑ̈dde ki pïg nyi lwøg gen cinggi gen geki tyelli gen, kenyi bëën gen ge kedh-ɑ yij Kemi Kwër, wɑlɑ̀ kenyi wɑ̈dhi gen buti këli lɑm, kenyi bëëd e dɑ gïn muuj ɑ́ men rɑ̈bbi Jwøng-ɑ Ácwɑ̈ɑ̈j. Nyi lwøg gen cinggi gen geki tyelli gen, kipe ge óthøw. Mïdhi gen ciggɑni, cɑg ɑnɑn gïti ɑtheer.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kɑ̈bbí ki ryɑ̈ɑ̈ møg-ɑ yømi gen pëddi medø, gɑ røthøl pyɑ̈rø wïdɑ́dɑ̈g kí budi røthøl; kí ryɑ̈ mor me dhïw, me bɑ cɑ̈wwì. Kí røthøl ɑ́bïryew mø møøw sinɑmön, kí røthøl ɑ́bïryew mø lùm-ɑ yømi gen med. Kí møøw kɑsiyɑ̀ ɑ́ røthøl pyɑ̈rø wïdɑ́dɑ̈g kí budi røthøl, kí røthøl ɑ́bïdɑ̈g mø møøw dhetun men-ɑ dhïw, røm gen bënn ki rumi kej kwër. Kɑ ge gwøg gɑ møøw gïïnyø me yøme med, gwøg yi bødhø me cinge døj, o bëëde e bɑ møøw gïïnyø mi kwër. Gïny Kemi Kwër geki Sɑnduug Cigg ki møwɑni. Kɑ tɑrɑbedhɑ̀ mi gïncɑm gïïny geki jɑmme bënn, kɑ teggi lɑ̈mbɑ̈ɑ̈ gïïny geki jɑmmi gen bënn. Kɑ këli bɑkur gïïny. Kɑ këli lɑm gïïny geki jɑmme bënn, kɑ ɑ́tɑy gïïny geki dööli thɑre. Kwër gen bënn, o ge göög gen ki jɑmmi Kwëër Dwøng, o gïn nywɑl gen ceg-ɑ gwøg ki gïi kwër. Kɑ Aɑron gïïny thyew geki wɑ̈dde; kwër gen gɑ ókwërrɑ. Kɑ wɑ̈ddi Isrɑil köbbí kinni, menɑni bɑ møwɑ, møøw kwër men nyi gïïny kì ri rïjj bënn gïti ɑtheer. Ko gïïny dhɑnhø megø, o ko di møw me gwøg e nɑ en, mɑ́ e bɑ ɑkwër, bëëde ceth ɑ́ ɑkwër kì yï wun. Ngɑn-ɑ ógöögø ki men ni en, wɑlɑ̀ ngɑn kwɑny møwɑni kɑ gø gïnye, e pɑth ki ókwërø, ngøl ngɑnɑni wɑ̈g kì kelli jie.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kɑ̈bbí ki yenh-ɑ yømi gen med, kwɑny gen kɑ ge røm ge pɑ̈r bënn, kì ri meɑ̀, kí ɑniicɑ̀, kí gïïnɑ̀, kí lubɑn, reb gen, kɑ ge gwøøg gɑ bɑkur, me bɑ ɑyöl ki døøji cingø, e thøø yi gwirø kidøøj ɑ́ ɑkwër. Guur kwëe ɑ́ búr, kɑ kwëe cïb bøli Sɑnduug Cigg kì yij Kemi Kwër, keny-ɑ nyi yïddi wɑ. Bëëd bɑkurɑni ceth ɑ́ gïi kwër me pere teg kì yï wun. De keny-ɑ ógwøøg bɑkur menɑni, ri wun ko göggi wun ki men ni en, bëëde ɑ́ ɑkwër ceth kì yï wun, ɑ́ mi Jwøng-ɑ Ácwɑ̈ɑ̈j. Ngɑn-ɑ ógöögø ki men ni en, ngøl wɑ̈g kì kelli jie.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Bedhɑlel wɑ̈d Urì wɑ̈d Ur kì gøl Yeudɑ̀, ɑ́rum ki kwɑnyø yi yɑn. Bedhɑlel ɑ́pɑ̈ng yi yɑn ki wëyi Jwøk, kɑ thödhɑ ki døøji cingø, kɑ thödhɑ ki peli wïj geki tegø me gwøge gïgɑni bënn. Ócuggø gwøg ki jɑmm-ɑ køny gɑ dhɑb, ki møg-ɑ køny gɑ ɑ́tegø, ki møg-ɑ køny gɑ dilɑl. Ócuggø gwøg ki tigg kɑ gï roobe ri winø. Ócuggø tyeng ki yenh, kɑ jɑmmì bënn lwɑ̈nge ki gwøgø. Thyew Oliɑb wɑ̈d Akisɑmɑk, kì gøl Dɑn, ógöögø geki Bedhɑlel. Bödhhɑni ryeet ɑ́thödhɑ ki døøji cingø geki tegi pyëw men gwøg gen gïg-ɑ ɑ́köbbɑ yïn bënn, ɑ løg Kemi Kwër, kí Sɑnduug Cigg kí kume, geki jɑmm-ɑ yij kemɑni bënn. Kí tɑrɑbedhɑ̀ geki gïg-ɑ wïje bënn, ki teggi lɑ̈mbɑ̈ɑ̈ men-ɑ ógwøgø ki dhɑm dhïw, geki jɑmm-ɑ ree bënn, kí tɑrɑbeedh bɑkur, kí këli lɑm geki jɑmme bënn, kí ɑ́tɑy geki dööle. Aɑron geki wɑ̈dde ócwɑ̈jji yi gen ki ógudhi ókwër møg nyi rug yi gen kenyi göög gen ki gwøøg kwër. Møøw röny ógwøg yi gen, geki bɑkur. Gwøg gen jɑmmi kwër møg-ɑ ɑ́cïgɑ yïn bënn.” Codhe, kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni mïdhu Sɑbɑth miɑ thyew, mɑ́ e óbëëd ɑ́ ngïji kì kɑɑmee, kì ri rïjj bënn, o yod kinni yɑn yɑ Jwøng-ɑ Ácwɑ̈ɑ̈j ɑ kwër wun. Gwøgu Sɑbɑth ɑ́ cyɑ̈ɑ̈ng ywömø. Ngɑn koo mïdhii, ceg kɑ nɑ̈gø. Ngɑn-ɑ ógöögø kì cyɑ̈ɑ̈ng Sɑbɑth, ceg kɑ ngøl wɑ̈g kì kelli jie. Gwøøg tïj ki cyɑ̈ng ɑ́bïkyel, de bïryeew cyɑ̈ng bɑ Sɑbɑth, cyɑ̈ɑ̈ng kwër mi Jwøng-ɑ Ácwɑ̈ɑ̈j. Ngɑn-ɑ ógöögø kì cyɑ̈ɑ̈ng Sɑbɑth, ceg kɑ nɑ̈gø ceth. Mïdhi Sɑbɑth yi tyëng Isrɑil, e cungi ɑ́ lwöbø ceth, kì ri rïjj bënn gïti ɑtheer. Bɑ ngïji kì kɑɑm wøn ki tyëng Isrɑil gïti ɑtheer, mɑ́ mɑl kí piny ɑ́cwɑ̈j yi Jwøng-ɑ Ácwɑ̈ɑ̈j kɑ cyɑ̈ng ɑ́bïkyel. Kɑ ówïyø gwøg kì bïryeew cyɑ̈ng, kɑ ree ywöme.” Keny-ɑ ɑ́rume kwøb ki gøn kì wïj Kïti Sinɑy, ɑmëgge Mosɑ̀ ópɑ̈nni kït ɑ́ryew, ge bɑ ɑgwed ki lwedi Jwøk. Kɑ lidh yi ji kinni Mosɑ̀ ɑ́cwöngi, e pɑ jwɑn dwöög piny kì wïj kït. Kɑ ji ri gen cøng gen buti Aɑron, ɑköbbii yi gen kinni, “Jɑl-ɑ ɑ́kɑ̈ɑ̈l wɑ wɑ̈g kì Rïp ɑ́cöög yïnø, kwïj yi wɑ mɑ göög en kidï! Dhwöödh, göggí wɑ ki jwøg men cyɑ̈dhi kì bølee.” Kɑ ge köbbi yi Aɑron kinni, “Kɑ̈ɑ̈lu dhɑb men-ɑ yïthhi mɑ̈nni wun, kí men-ɑ yïthhi wɑ̈ddi wun geki nyigi wun, kɑ̈ɑ̈lu en wɑ̈g kɑ muuju yɑn.” Kɑ ji bënn dhɑb kɑ̈ɑ̈l gen wɑ̈g kì yïthhi gen, kɑ gø muuj gen Aɑron. Kɑ gø kwɑnye kì cinggi gen, kɑ gø lenye, kɑ gø kønye ɑ́ røjø. Kɑ ge okööbø kinni, “Jwøgí ɑnɑn Isrɑil, jwøng-ɑ ɑ́kɑ̈ɑ̈l yïn wɑ̈g kì piny Rïp.” Keny-ɑ ɑ́lidhii kinøw yi Aɑron, ɑgëëde ki këli lɑm kì bøle, kɑ Aɑron óryeerø kinni, “Dhuki bɑ cyɑ̈ɑ̈ng wøwi Jwøng-ɑ Ácwɑ̈ɑ̈j.” Amøøl gen be ngɑl ki gëdhh-ɑ nyi rɑ̈b geki gëdhhi mër. Kɑ ji pëgg-ɑ piny be cɑm, kɑ ge omɑ̈dhø, kɑ ge dhwödh-ɑ be ngyëëdø. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Bïí dhwöödh kedhí piny, kipe jií, møg-ɑ ɑ́kɑ̈ɑ̈l yi yïn wɑ̈g kì piny Rïp, ge ɑ́døøg cyɑ̈n. Ge ɑ́jwɑn kedhi wɑ̈g kì yuu-ɑ ɑ́cïgɑ gen. Ri gen ɑ́göggi gen ki røjø me bɑ ɑkøny ɑ́ dhɑb, kɑ ri gen bøødh gen piny kì bøle, kɑ gø ngɑ̈ddi gen ki jɑmmì ge okööbø kinni, ‘Jwøgí ɑnɑn Isrɑil, bene jwøng-ɑ ɑ́kɑ̈ɑ̈l yïn wɑ̈g kì piny Rïp.’ ” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Jiɑni ɑ́lidhɑ, ge bɑ ji mø muddi gen teeg. Anɑn wiy pyëwɑ rënye ki gen, o ge nɑ̈gɑ, codhe o yïn, wuki kwɑrrí, wu gwøg yi yɑn wun ɑ́ pödhø me dwøng.” De Mosɑ̀ Jwøge, Jwøng-ɑ Ácwɑ̈ɑ̈j ɑ́kwɑjje kinni, “Yïn ɑ Jwøng-ɑ Ácwɑ̈ɑ̈j, jií ko nɑ̈ɑ̈g ki rɑ̈ji pyëwí, gen ɑ ji møg-ɑ ɑ́kɑ̈ɑ̈l yi yïn wɑ̈g kì piny Rïp ki teng-ɑ dwøng, ede tyëng Rïp ɑ wëggí gen kwøb kinni, i ge kɑ̈ɑ̈l yïn kɑ rɑ̈ji pyëwí, kiper kinni o ge nɑ̈ɑ̈g yi yïn kelli kïttì, o ge tyëg yi yïn kì kömi piny. Dwöög pyëwí, kɑ pyëwí lɑ̈ɑ̈me ki gïnrɑj men-ɑ ɑ́gwøg yi jií. Pɑr bɑ̈nggí: Abrɑhɑm, kí Isɑɑk, kí Yɑgob. Pɑr møg-ɑ ɑ́köbbí gen kinni, ‘Nyigi wun ógwøg yi yɑn ge gïïr ni kyelli mɑl, o piny men bëne mëggɑ’ kwɑrri wun, o gø kwɑny gen ɑ́ mi gen gïti ɑtheer.’ ” Kɑ Jwøng-ɑ Ácwɑ̈ɑ̈j pyëwe ólɑ̈ɑ̈mø ki gïnrɑj men-ɑ ɑ́gwøg yi jie. Kɑ Mosɑ̀ wïje løge kɑ bï-ɑ piny kì wïj kït e kɑ̈ll-ɑ ópɑ̈nni kït ryeet møg-ɑ kömi gen ɑ́gweed cigg. Ciggɑni ógweed-ɑ kömi ópɑ̈nnɑni ryeet. Ópɑ̈nnɑni ɑ́gwøg-ɑ yi Jwøk, o gwedd-ɑ kömi gen ɑ́gwed-ɑ yi Jwøk, en ɑ ɑ́gwëdi kömi gen ki cigge. Kɑ cwɑggi ji lïngi yi Jöcwø ge ogwɑgø, ɑköbbe Mosɑ̀ kinni, “Kɑ lïngɑ, dhɑ̈y ji ce ceg-ɑ nyïɑ̈ggø kì kɑɑl.” Alöggi Mosɑ̀ kinni, “Pɑth ki ɑgwɑɑg ji møg tyɑ̈mø; pɑth ki ɑgwɑɑg ji møg-ɑ ótyɑmø; bɑ cwɑggi ji mø ceg wör ɑ lïngɑ.” Keny-ɑ ɑ́cyɑ̈ngi Mosɑ̀ ki kɑɑl, ɑlidhe rønyi dhɑb, kɑ ji lidhe ge ocöngø. Kɑ mɑg yi liny ki menteg. Aleenge ópɑ̈nni kït piny kì thɑ kït, kɑ ri gen mød gen kì kenyɑni ceth. Codhe, kɑ røny-ɑ ɑ́gwøg yi ji kwɑnye, kɑ gø lenye ki mɑc, kɑ gø guure ɑ́ búr, kɑ gø pwööge kömi pï, kɑ pïgɑni mëgge tyëng Isrɑil o gï mɑdh gen. Apyëëj Aɑron yi Mosɑ̀ kinni, “Á ngø ɑ ɑ́göggi yïn yi ji møgɑni, ɑ kɑ̈ni kömee ki orøg men-ɑ dwøng ni men?” Kɑ Aɑron okööbø kinni, “Pyëwí ko rënyi ki bɑ̈ngí. Ngɑ̈nyi yi yïn kinni jiɑni gwøgi gïnrɑj lweny yi gen. Yɑ ɑ́ceg kɑ köbbø yi gen kinni, ‘Mosɑ̀, jɑl-ɑ ɑ́kɑ̈ɑ̈l wɑ wɑ̈g kì Rïp ɑ́cöög yïnø, kwïj yi wɑ mɑ göög en kidï. Dhwöödh göggí wɑ ki jwøg men cyɑ̈dhi kì bølee.’ Aköbbɑ gen kinni ngɑn yïe di dhɑb, mëgge gøn yɑn. Kɑ yɑ thödhi gen ki dhɑb. Akïdhɑ en mɑc, ɑbëëne ɑ́ røjø men.” Kɑ lidh yi Mosɑ̀ kinni tyëngɑni pɑ cuggi lwɑ̈ngø, mɑ́ ge ɑ́wëggi bodhø yi Aɑron, ge di ceg gwøg ki møg gɑggi yi tyëngmɑ̈ɑ̈nø. Kɑ Mosɑ̀ ócungø kì tøg kɑɑl, ɑkööbe kinni, “Ngɑn ying tuung Jwøng-ɑ Ácwɑ̈ɑ̈j, bëe yïɑ.” Kɑ Kwɑrri Leebì bënn órëbø ki en. Kɑ gï köbbe kinni, “Møg-ɑ ɑ́kwøb yi Jwøng-ɑ Ácwɑ̈ɑ̈j, ɑ bɑ Jwøøg Isrɑil ek: Kwɑny pilí, kɑ wu kedhu kɑɑl, cɑg kì tuung gïti tung-ɑ kyeelø. Ngɑn nɑ̈ge ómen, kí mɑ̈dhe ki ngɑn gøle ying bute, ko di gøl wiy yi wun.” Kɑ Kwɑrri Leebì ogöögø ni kɑ ɑ́köbbi gen yi Mosɑ̀ ceth. Kɑ ji mø kwɑnni gen bɑ gïn ni ɑ́lïp ɑ́dɑ̈g othøø kì cyɑ̈ngɑni. Kɑ Mosɑ̀ okööbø kinni, “Thyëyu ri wun Jwøng-ɑ Ácwɑ̈ɑ̈j dicyɑ̈ngtïn, mɑ́ dhɑnhø ɑ́nɑ̈g-ɑ wɑ̈de geki ómen, o wu ɑ́gyëdh dicyɑ̈ngtïn kipe gwøngɑni.” Kì mwøl dhuki, ɑköbbi ji yi Mosɑ̀ kinni, “Wu ɑ́bɑ̈jji ki bɑ̈jjø me dwøng, de ɑnɑn kwɑjju Jwøng-ɑ Ácwɑ̈ɑ̈j men-ɑ ólɑ̈ɑ̈m pyëwe, kɑ orøøg wun kɑ̈ɑ̈le wɑ̈g kì pyëwe.” Codhe, kɑ Mosɑ̀ døøg-ɑ yï Jwøng-ɑ Ácwɑ̈ɑ̈j, ɑkööbe kinni, “Tyëngɑni ɑ́røngi ki orøng dwøng. Ri gen ɑ́göggi gen ki jwøg me bɑ dhɑb. Lɑ̈ɑ̈m pyëwí ki gen, de keløg pyëwí pɑ lɑ̈ɑ̈m ki gen, rɑ̈ɑ̈j nyingɑ wɑ̈g kì yij wɑ̈nyø men-ɑ ɑ́gweed jií.” Aköbbi Mosɑ̀ yi Jwøng-ɑ Ácwɑ̈ɑ̈j kinni, “Ngɑn-ɑ ɑ́bɑ̈jji kì bølɑ, en ɑ nyinge rɑ̈ɑ̈jɑ wɑ̈g kì yij wɑ̈nyɑ. Anɑn kedh, kïdhi ji kun-ɑ ɑ́köbbɑ yïn, yï ópej yi wëywönɑ, keny-ɑ óbëën bøli kej cɑyi gen, ge ócɑy yi yɑn kipe orøøg gen.” Kɑ ji göggi yi Jwøng-ɑ Ácwɑ̈ɑ̈j ki gïg mø rijjø ki mendwøng, kipe gïn-ɑ ɑ́gwøg yi gen, ɑ løg rønyi dhɑb men-ɑ ɑ́gwøg yi Aɑron. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kedh, wuki ji møg-ɑ ɑ́kɑ̈ɑ̈l yi yïn wɑ̈g kì piny Rïp, kedhu piny-ɑ ɑ́köbbɑ Abrɑhɑm, kɑ köbbɑ Isɑɑk, kɑ köbbɑ Yɑgob kinni pinyɑni ómëggɑ gen. Wëywönɑ óörɑ bølí, kɑ tyëng Kɑnɑɑn, kí tyëng Amör, kí tyëng Kit, kí tyëng Perïdh, kí tyëng Kib, kí tyëng Yebus cyeedɑ wɑ̈g kì pinyɑni; piny-ɑ yije mulli yi cɑg geki møøw kïc. Yɑ pɑ kedh ki wun mɑ́ wu bɑ ji mø muddi wun teeg, ke kedh wɑ, wu bɑ møg nɑ̈g yi yɑn kì kö yöö.” Ji keny-ɑ ɑ́lïngi gen kwøbb-ɑ peeg ni møgɑni, kɑ ge óywöngø, kɑ jɑmmi dhwɑ̈ng pyëëd gen wɑ̈g kì ri gen. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, Wu bɑ ji mø muddi wun teeg. Ke kedhɑ yöö ki wun, cɑgg ɑ́ ki nyɑ kɑɑm me nøg, wu bɑ møg nɑ̈g yi yɑn. Adɑ́ kɑ̈ɑ̈l wun jɑmmi dhwɑ̈ng wɑ̈g kì ri wun, o lidh yi yɑn men-ɑ ógöggɑ wun ngø.” Codhe, ɑkɑ̈ɑ̈l gen jɑmmi dhwɑ̈ng wɑ̈g, kì bɑng menɑni, kër-ɑ ɑ́dhwödh tyëng Isrɑil kì Kïti Sinɑy, bong dhɑnhø mɑ ɑ́rug ki jɑmmi dhwɑ̈ng. Kenyi gud tyëng Isrɑil ki kɑɑl, kemɑni nyii kwɑnyø yi Mosɑ̀, kɑ gø gure ngɑ̈ɑ̈j kɑɑl e lɑ̈wi, o ngɑn dwɑddi pyëjji Jwøng-ɑ Ácwɑ̈ɑ̈j nyi kedhe dhø kemɑni, cwøl ɑ́ Kemi Kwër. O kenyi kedh Mosɑ̀ kì kɑɑl e kedh-ɑ Kemi Kwër, ji nyi ceg-ɑ bëën wɑ̈g kì yethi kemmi gen, o ge cungi gen ge nenn-ɑ bɑng Mosɑ̀, gïti keny-ɑ ókedhe yij Kemi Kwër. Kenyi kedhi Mosɑ̀ yij Kemi Kwër ceth, kɑ pøølø nyi bï-ɑ piny, kɑ nyii cungø e bɑ̈ɑ̈r kì dhø Kemi Kwër, kɑ Jwøng-ɑ Ácwɑ̈ɑ̈j nyii kööbø geki Mosɑ̀. Kenyi liidh pøølɑni yi ji, kɑ ngɑn ree nyi bøødhe piny kì dhø kemɑ̀ mee. Kɑ Jwøng-ɑ Ácwɑ̈ɑ̈j nyii kööbø geki Mosɑ̀, e kɑɑm gen cyɑ̈gi ni kenyi kööb dhɑnhø geki mɑ̈dhe. Kenyi rum gen ki kwøb, kɑ Mosɑ̀ nyi dwöög-ɑ kɑɑl, de Jöcwø wɑ̈d Nun, bɑ̈nge nyi döng e obëëdø kì yij Kemi Kwër. Kɑ Jwøng-ɑ Ácwɑ̈ɑ̈j köbbi yi Mosɑ̀ kinni, “Yɑ ɑ́köbbi yi yïn kidyër kinni, ‘Peej ji møg yöö,’ de yɑ nuti nyudhø yi yïn ki tyëng-ɑ kedh wøn. Yï ɑ́kööb kinni, ‘Yï ɑ́cwööl yi yɑn kɑ nyingí, o pyëwɑ med ki yïn ceth kidyër.’ Anɑn keløg pyëwí med ceth kidyër ki yɑn, nyudhí yɑn bëëdí, o yï yod yi yɑn kipe kinni, o yɑ cögɑ yɑ med kì pyëwí. Kwɑɑny thyew kinni ji møg bɑ jii pödhí.” Kɑ Jwøng-ɑ Ácwɑ̈ɑ̈j okööbø kinni, “Yɑ ócyɑ̈dhi ki yïn, o yï ókøny yi yɑn.” Kɑ köbbi yi Mosɑ̀ kinni, “Keløg yï pɑ kedh ki wøn, wø ko wëggí kedhø kì keny. Óyod kidï kinni pyëwí med ki jií, keløg yï pɑ cyɑ̈dhi ki wøn. O wø ónënni wøn wø bɑ̈ɑ̈n ki ji bënn kì kömi piny? Bɑ keløg yï ócyɑ̈dhø ki yɑn wøki jií, ɑngij wøn kì kelli jurrì bënn.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Gïn-ɑ kwɑjji yi yïn ógöggɑ yïn, mɑ́ yï ngɑ̈nyi yi yɑn kidøøj, o pyëwɑ med ki yïn.” Kɑ Mosɑ̀ okööbø kinni, “Yɑ kwɑjj-ɑ yïn nyudhí yɑn bëëdí!” Aløøg møge yi Jwøng-ɑ Ácwɑ̈ɑ̈j kinni, “Dhwɑ̈ngɑ bëne ówiy yi yɑn o kɑ̈ɑ̈le bølí, o nyingɑ kwërø ócwøl yi yɑn kì bølí, dhwɑ̈ng-ɑ nyi muuj yi yɑn geki lɑ̈mpyëwɑ ónyudhɑ yïn.” Kɑ gø köbbe kinni, “De wɑngɑ pɑ cuggi lidhø yi yïn, mɑ́ e bong dhɑnhø me lidh wɑngɑ kɑ onëënø këti.” Kɑ Jwøng-ɑ Ácwɑ̈ɑ̈j okööbø kinni, “Nëën, dɑ keny me cyɑ̈gi ki yɑn kì keny. Cungí kì wïj nyɑ kït, o kɑ̈ng-ɑ ókɑ̈ɑ̈lɑ bølí ki bëëdɑ bëne, yï ócïbɑ yij órøngi nyɑ kïnɑni, o yï gëng yi yɑn ki cingɑ gïti keny-ɑ ópöödhɑ. Codhe, o cingɑ nyiigɑ cyee, o yï lidh kömɑ, de bølɑ pɑ nyi lidh.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Twïg ki ópɑ̈nni kït ɑ́ryew mø pɑ̈r ki mø tyeli mɑl, møg-ɑ ɑ́tor yi yïn, o kwøbb-ɑ ɑ́ying kömi ópɑ̈nni tyeli mɑl gweedɑ kömi gen. Bëëd ge rumø dhuki kì mwøl, kɑ yï yedhí mɑl wïj Kïti Sinɑy dhuki kì mwøl, kɑ yï cungi kì wïj kït kunɑni. Ko di dhɑnhø me yedhi mɑl ki yïn, ko di dhɑnhø thyew me lidh e cyɑ̈ngø kït, cɑgg ɑ́ dyel wɑlɑ̀ dhyɑng, ko wëggi wɑ̈dhi buti kïnɑni.” Kɑ Mosɑ̀ otwïgø ki ópɑ̈nni kït ɑ́ryew mø pɑ̈r ki mø tyeli mɑl, kɑ møøl-ɑ wïj Kïti Sinɑy kì mwøl ni kɑ ɑ́cegii yi Jwøng-ɑ Ácwɑ̈ɑ̈j, ɑ́kedh ópɑ̈nni kït ryeet okɑ̈llø yi en kì cinge. Kɑ Jwøng-ɑ Ácwɑ̈ɑ̈j bï-ɑ piny kì yij pøølø, kɑ ge ócungø’ kì kenyɑni. Kɑ nyingi Jwøng-ɑ Ácwɑ̈ɑ̈j kwøbe. Kɑ bøle bɑ̈ɑ̈n yi Jwøng-ɑ Ácwɑ̈ɑ̈j e okööbø kinni, “Yɑn yɑ Jwøng-ɑ Ácwɑ̈ɑ̈j, yɑ bɑ Jwøng pyëwɑ nyi lɑ̈ɑ̈m, o pyëwɑ yöd, o yɑ pɑ nyi jwɑn ki mɑgø yi liny, o lɑ̈mpyëwɑ pɑ nyi thumi, o yɑ nyi gøgg-ɑ dyër ceth. Lɑ̈mpyëwɑ nyi wɑ̈dh-ɑ ri rïjj mø kwɑnni gen bɑ ɑ́lïp mø ngenyø, pyëwɑ nyii lɑ̈ɑ̈mø ki ji mø ceg ywëdh, kí ji mø pëmø geki tyëngorøg. De ngɑn-ɑ ɑ́røngi pɑ nyi bødh ki cɑyø yi yɑn, o körri orøøg wëëg nyi cul-ɑ yɑn yi wɑ̈dd gïti ri ngween rïjj.” Kɑ Mosɑ̀ jwɑn-ɑ pëggi piny, kɑ ree bøødhe. Akööbe kinni, “Keløg pyëwí lɑ̈ɑ̈mø ki yɑn wuö, yɑ kwɑjj-ɑ yïn kedh ki wøn, mɑ́ wø bɑ ji mø muddi wøn teeg. Kɑ orøøg wøn lɑ̈ɑ̈ny, kɑ pyëwí lɑ̈ɑ̈me ki bɑ̈jji wøn, kɑ wø kwɑɑny wøn ɑ́ møgí.” Alöggi Jwøng-ɑ Ácwɑ̈ɑ̈j kinni, “Kɑɑmee cïbɑ’ cïbø ki cigg, o yɑ göögɑ ki ngïjjì kì bøli tyëng Isrɑil, bong ngïjjì møg-ɑ óni møgɑni mɑ ɑ́pɑ̈nyi cwöbø kì kelli jurri piny bëne. O gwøøg Jwøng-ɑ Ácwɑ̈ɑ̈j lidh yi ji-ɑ kelli gen bëëd yi yïn, mɑ́ e bɑ gïjø me pëddi rɑ̈jø ɑ ógwøg yi yɑn kiperí. Mïdhí gïg-ɑ cïgɑ yïn dicyɑ̈ngtïn. Lidh, ji cyeddɑ’ cyeddø kì bølí, ɑ løg tyëng Amör, kí tyëng Kɑnɑɑn, kí tyëng Kit, kí tyëng Perïdh, kí tyëng Kib, kí tyëng Yebus. Ko di lwöbø kì kɑɑm wun ki jurr-ɑ kelli gen kedhi yi yïn, kipe ge óyöd ge ceg-ɑ gwøg ki ɑ́kɑ̈llì kì cwɑggí. De cøør wun këlli lɑm mø gen piny, kɑ yïkk-ɑ bɑ̈rrø mø gen mød wun piny, kɑ ngïjji Aceerɑ̀ ngøl wun piny. “Mɑ́ yï bɑ ɑkerø ki mɑlli jwögg møøgø, o yɑ bɑ Jwøk me pëddi tyiel. Yï ko lwööb ki tyëng-ɑ bëëdø kì pinyɑni, mɑ́ keløg yï olwöbø ki gen, yï bɑ men cwøl yi gen, kɑ yï kedh-ɑ be cɑm ki gïg-ɑ ngɑ̈lli gen jwöggi gen. O ke nyömi wɑ̈ddí kì kelli nyigi gen, wɑ̈ddí ócuggø thɑɑb be mɑlli jwöggi gen yi mɑ̈nn-ɑ ónywøm yi gen. “Rií ko göggí ki jwögg mø køny gɑ dhɑb wɑlɑ̀ ɑ́tegø. “Mïdhí kwëër olwëny; cyɑ̈ɑ̈m ki olwëny ki cyɑ̈ng ɑ́bïryew kì dwɑ̈y Abib, ni kɑ ɑ́cegɑ yïn, mɑ́ kì dwɑ̈y Abib ɑ ɑ́kedhu wɑ̈g kì Rïp. “Wɑ̈dd-ɑ bɑ kɑyyì møg-ɑ bɑ cwøw bënn bɑ møgɑ, geki kɑyyi lɑ̈yy møg-ɑ pidh yi wun, cɑg kì ri dhyɑng gïti ri dyel. Kɑ kɑyi ɑderø keje nyi cïbi ki órömø, de keløg keje pɑ cïbi, toor mune. Wɑ̈dí wɑ̈n-ɑ kɑyø cïbí keje ki gïn pɑ̈ɑ̈dií. “Ko di ngɑn wɑ̈nhi bølɑ ki cingge e bong gïn muuje yɑn. “Göög ki cyɑ̈ng ɑ́bïkyel, kɑ yï ywööm kì bïryeew cyɑ̈ng. Ywööm ceth, cɑgg e bɑ bøli kej pur wɑlɑ̀ bøli kej kɑj ki byel. “Gwøg Kwëër Kɑj kì ri cɑ̈gi nyɑri gemè. Kí kwëër cungø, kì ri thumi run kenyi cɑ̈gí ki cøng ki nywøli yenhí. “Nyi bï wɑ̈ddí bënn yï Jwøng-ɑ Ácwɑ̈ɑ̈j, ɑ bɑ Jwøøg Isrɑil tyel ɑ́dɑ̈g kì yij run ɑ́kyel. Jurrì bënn ócyeddi yi yɑn kì bølí, kɑ myërrí lɑɑnyɑ. Bong ngɑn kwɑny pinyí keny-ɑ ókedhi bøli Jwøgí, Jwøng-ɑ Ácwɑ̈ɑ̈j ki tyel ɑ́dɑ̈g kì yij run ɑ́kyel. “Yï ko muuj ki ópun me wɑj keny-ɑ óngɑ̈ddí yɑn ki gïïpiny. Kɑ rïngi Kwëër Ákɑɑdh ko wiy gïte mwøl cyɑ̈ng-ɑ kyeelø. “Møg-ɑ myëër cɑrø kì kelli gïg-ɑ ókwöngi ki cyegø kì piny, kɑ̈ɑ̈l gen ød Jwøgí, Jwøng-ɑ Ácwɑ̈ɑ̈j.” “Nyɑɑr dyel ko thɑɑl ki cɑɑg meye.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Gweed kwøb møgɑni piny, mɑ́ ri kwøbbɑni ɑ ódi lwöm-ɑ óløg me nud kì kɑɑmee, kí kɑɑm wøn ki Isrɑil.” Kɑ Mosɑ̀ obëëdø kì kunɑni geki Jwøng-ɑ Ácwɑ̈ɑ̈j ki cyɑ̈ng pyɑ̈r ɑ́ngwen, kí wɑ̈rr pyɑ̈r ɑ́ngwen, nuti cyɑ̈mø ki gïncɑm, o nuti mɑ̈dhø ki pï. Kɑ kwøbbi Lwöbø gweede kömi ópɑ̈nni kït, gen ɑ Cigg-ɑ Pyɑ̈rø. Codhe, kɑ Mosɑ̀ yïnh-ɑ piny kì wïj Kïti Sinɑy, e ópɑ̈nni kït møg-ɑ kömi gen di Cigg-ɑ Pyɑ̈rø okɑ̈llø yi en kì cingge. De kwïj wøw kinni lele omënyø, mɑ́ e ɑ́kööb geki Jwøng-ɑ Ácwɑ̈ɑ̈j. Keny-ɑ ɑ́lïdhi Aɑron geki tyëng Isrɑil kinni leli Mosɑ̀ omënyø, kɑ ge obwøgø ki kedhi bute. De ge ɑ́cwøl yi Mosɑ̀, codhe kɑ Aɑron geki jøgdøngi Isrɑil døøg-ɑ yï Mosɑ̀, kɑ Mosɑ̀ okööbø ki gen. Codhe cyee, ɑbëën tyëng Isrɑil bute, kɑ gï köbbe møg-ɑ ɑ́ceg bënn yi Jwøng-ɑ Ácwɑ̈ɑ̈j kì wïj Kïti Sinɑy. Keny-ɑ ɑ́rum Mosɑ̀ ki kwøb ki gen, ɑkume wïje ki thɑrɑ̀. Mosɑ̀ kenyi kedhe be kwøb geki Jwøng-ɑ Ácwɑ̈ɑ̈j, thɑrɑ̀ nyi kɑ̈ɑ̈le’ wɑ̈g kì wïje, o wïje pɑ nyi kum yi en gïti kenyi bëëne wɑ̈g kì yij Kemi Jwøng-ɑ Ácwɑ̈ɑ̈j. O gø nyi kum yi en kenyi bëëne wɑ̈g be köbbi tyëng Isrɑil møg-ɑ ɑ́cïgii. Kenyi liidh leli Mosɑ̀ e omënyø yi tyëng Isrɑil, Mosɑ̀ wïje ɑ́bëëd gø nyi ceg yi en kɑ døøgø kumø ki thɑrɑ̀, gïti kenyi døøge be kwøb ki Jwøng-ɑ Ácwɑ̈ɑ̈j. Kɑ tyëng Isrɑil cøng yi Mosɑ̀ ge bënn, ɑköbbe gïn kinni, “Bene gen møg-ɑ ɑ́ceg yi Jwøng-ɑ Ácwɑ̈ɑ̈j i gwøgu gen ek: Göög ki cyɑ̈ng ɑ́bïkyel, de bïryeew cyɑ̈ng óbëëd ɑ́ cyɑ̈ɑ̈ng kwër, Sɑbɑth cyɑ̈ɑ̈ng ywömø me yije wøør Jwøng-ɑ Ácwɑ̈ɑ̈j. Ngɑn-ɑ ógöögø kì cyɑ̈ngɑni ceg ki nɑ̈gø ceth. Ko di mɑc me koodh kì yethi kɑ̈lli wun kì cyɑ̈ɑ̈ng Sɑbɑth.” Tyëng Isrɑil bënn ɑ́köbbi yi Mosɑ̀ kinni, “Møg-ɑ ɑ́ceg yi Jwøng-ɑ Ácwɑ̈ɑ̈j ek: Thödhu Jwøng-ɑ Ácwɑ̈ɑ̈j kì ri jɑmm-ɑ nud kì yï wun. Wiy ngɑn-ɑ dwɑddi muujø kɑ̈ne yï Jwøng-ɑ Ácwɑ̈ɑ̈j ki jɑmmì møg: dhɑb, ɑ́tegø, dilɑl, kí kor møg kïddi gen bɑ ówɑw kí ɑ́cwïcwïl, kí møg kwɑrø, kí kor-ɑ yöm, kí yëyyi dyëg, kí lɑ̈ni órömm møg-ɑ ójwɑ̈ɑ̈gø ki kïn-ɑ kwɑrø. Kɑ̈ni gen thyew ki lɑ̈n-ɑ ónginyø, kí ɑ́lwiy, kí møøw dhetun mi lɑ̈mbɑ̈ɑ̈, kí yenh-ɑ yømi gen med møg nyi kïdhi ri møøw röny geki bɑkur, kɑ̈ni gen ki kïti ɑ́gør kí ócï, kí kïtt-ɑ nyi göög ki tigg-ɑ per gen teg, møg tɑɑg kömi pɑri ɑ́ngɑni Ókwër-ɑ Dwøng. “Bï bödhh-ɑ cinggi gen døøj bënn be gwøgi gïg-ɑ ɑ́ceg yi Jwøng-ɑ Ácwɑ̈ɑ̈j, ɑ løg Kemi Kwër, kí kemi köme, geki kume, kí odöbbe, kí pɑ̈mme, kí rïwwe, kí yenh-ɑ cwöödh piny, kí tëddi tyelli yenhɑni, kí Sɑnduug Cigg geki lødhe ryeet, kí kum Sɑnduug Cigg, ki gëng men-ɑ gëng Sɑnduug Cigg. Kí tɑrɑbedhɑ̀ geki lødhe ryeet, kí jɑmme bënn, kí gïncɑɑm jwödhø. Kí teggi lɑ̈mbɑ̈ɑ̈ geki jɑmme, kí møøw gen, kí këli bɑkur geki lødhe ryeet, kí møøw röny, kí bɑkur-ɑ yøme med, kí thïgi dhø Kemi Kwër. Kí këli lɑm geki bøøy dilɑl mee, kí lødhe ryeet, kí jɑmme bënn, kí ɑ́tɑɑy dilɑl geki dööle. Kí kɑl geki yenh-ɑ cwöödhii piny, kí tëddi tyelli yenhɑni, kí thïgi dhø kɑl. Kí pijji Kemi Kwër geki thølli gen. Kí ógudhi ókwër møg-ɑ nyi rug yi gen kì kej kwër, ɑ løg ógudhi ókwërø Aɑron geki wɑ̈dde, ógudh-ɑ nyi rug yi gen kenyi göög gen ki jɑmmi kwër.” Codhe, kɑ tyëng Isrɑil ókedhø bënn kì buti Mosɑ̀. Kɑ tyëng-ɑ ɑ́dwɑddi muujø bënn obëënø, kɑ ge ókɑ̈nø ki jɑmmì mø muuj gen Jwøng-ɑ Ácwɑ̈ɑ̈j, ɑ løg jɑmm-ɑ gwøøg Kemi Kwër, geki jɑmm-ɑ yij Kemɑni bënn, kí ógudhi kwër. Jøg-ɑ cwøw geki tyëng-ɑ mɑ̈nn møg-ɑ́ pëthi gen ɑ́dwɑddi muujø ɑ́kɑ̈ni ki dhɑb, kí wïj tigø bëne, kí lïïb (ngömmi dhɑb møg nyi mɑ̈ɑ̈g ki ógudh), kí gïi yïthh, kí gwel, kí yëll. Ge ɑ́kɑ̈ni bøli Jwøng-ɑ Ácwɑ̈ɑ̈j ki jɑmm-ɑ bɑ dhɑb bënn. Ngɑn-ɑ́ yïe ɑ́di kor mø kïddi gen bɑ ówɑw kí ɑ́cwïcwïl, kí møg kwɑrø geki kor-ɑ yöm, kí yëyyi dyëg, kí lɑ̈ni órömm møg-ɑ ójwɑ̈ɑ̈gø ki kïn-ɑ kwɑrø, wɑlɑ̀ lɑ̈n-ɑ ónginyø, ɑ́muuj gen. Ngɑn-ɑ ɑ́cuggi muujø ki ɑ́tegø wɑlɑ̀ dilɑl, gø ɑ́muuje. Kɑ ngɑn-ɑ́ yïe ɑ́di yenh ɑ́lwiy gï muuje. Kɑ mɑ̈nn-ɑ cinggi gen døj ókɑ̈nø ki korr-ɑ kïddi gen bɑ ówɑw kí ɑ́cwïcwïl, kí møg kwɑrø, kí kor-ɑ yöm, møg-ɑ ɑ́lɑdh yi gen. Tyëng-ɑ mɑ̈nn-ɑ cinggi gen døj møg-ɑ ɑ́dwɑddi lɑ̈ɑ̈dhø ki yëyyi dyëg, ɑ́lɑ̈ɑ̈dh ki møg muuj yi gen. Kɑ jøgdøngø ókɑ̈nø ki kïtti ɑ́gør kí ócï, kí tigg møøgø, møg kïdhi ri ɑ́ywönhdwøng geki pɑri ɑ́ngɑni ókwërø. Ge ɑ́kɑ̈ni thyew ki yenh-ɑ yømi gen med, kí møøw dhetun, kí bɑkur, kí møøw röny geki møøw lɑ̈mbɑ̈ɑ̈. Tyëng Isrɑil bënn, cwøw kí mɑ̈nn, ɑ́kɑ̈ni yï Jwøng-ɑ Ácwɑ̈ɑ̈j ki jɑmmì møg muuj yi gen gɑ møg gwøøg gïg-ɑ ɑ́cïgi Mosɑ̀ geki ji bënn yi Jwøng-ɑ Ácwɑ̈ɑ̈j kinni i gwøøg gen. Kɑ tyëng Isrɑil köbbi yi Mosɑ̀ kinni, “Bedhɑlel wɑ̈d Urì wɑ̈d Ur kì gøl Yeudɑ̀, ɑ́rum ki kwɑnyø yi Jwøng-ɑ Ácwɑ̈ɑ̈j. Bedhɑlel ɑ́pɑ̈ng yi Jwøng-ɑ Ácwɑ̈ɑ̈j ki wëyi Jwøk, kɑ gø thödhe ki døøji cingø geki tegø, kí ngɑ̈nyi wøw me gööge ki wɑ̈thi jɑmmì bënn. Ócuggø gwøg ki jɑmm-ɑ gwøg ki dhɑb, wɑlɑ̀ ɑ́tegø, wɑlɑ̀ dilɑl. Ócuggø tweg ki tuggi kïttì kɑ gï kïdhe ri win. Ócuggø tyeng ki yenh, kɑ ogöögø ki wɑ̈thi jɑmmì bënn. Thyew Bedhɑlel geki Oliɑb wɑ̈d Akisɑmɑk kì gøl Dɑn, ge ɑ́thödhi yi Jwøng-ɑ Ácwɑ̈ɑ̈j ki tegø me pwönyi gen ji møøgø. Ge ɑ́thödhi yi Jwøng-ɑ Ácwɑ̈ɑ̈j ki dïdø me lwɑ̈ng gen jɑmmì bënn ki gwøgø. Ge ócuggø tweg ki jɑmmì kì ri win geki kïttì. Ge ócuggø rudi ri ógudh ki jɑmmì mø bɑ ɑgwel ki korr-ɑ kïddi gen bɑ ówɑw kí ɑ́cwïcwïl kí møg-ɑ kïddi gen kwɑrø. Ge ócuggø cwɑ̈j ki jɑmmì thyew. “Bedhɑlel geki Oliɑb, kí bödhh-ɑ ɑ́thödhi yi Jwøng-ɑ Ácwɑ̈ɑ̈j ki døøji cingø geki tegø me cuggi gen ki gwøg, tyëng-ɑ ngɑ̈ny gwøg ki jɑmmì bënn, gïg-ɑ dwɑddi gwøgø bënn ógwøg yi gen ni kɑ ɑ́cïg Jwøng-ɑ Ácwɑ̈ɑ̈j ceth.” Kɑ Bedhɑlel geki Oliɑb, kí bödhh-ɑ dwɑddi kunyø cwøl yi Mosɑ̀, kɑ gï köbbe kinni cɑ̈gi gen ki gwøg. Codhe, kɑ jɑmm-ɑ ɑ́kɑ̈ɑ̈l yi tyëng Isrɑil gɑ møg göög ki Kemi Kwër, kwɑny yi gen bënn kì yï Mosɑ̀. De keny-ɑ nudd ji ókɑ̈nø, jɑmmì ɑ́ti ngënyø, mɑ́ ge nyi ceg-ɑ kɑ̈nø kì yethi cyɑ̈ng. Kɑ bödhh-ɑ göögø obëënø men wiy-ɑ gwøge, ɑköbbi Mosɑ̀ yi gen kinni, “Jɑmm-ɑ ɑ́kɑ̈ɑ̈l yi ji gɑ møg gwøøg gwøng-ɑ ɑ́ceg yi Jwøng-ɑ Ácwɑ̈ɑ̈j ɑ́ngënyi, o ge nudd ge ceg-ɑ kɑ̈nø ɑnɑn.” Codhe, ɑödi Mosɑ̀ yethi kɑ̈llì ki wöödø kinni, “Ko di jɑlø wɑlɑ̀ dhɑjø me yɑ̈bø ki gïn kɑ̈ɑ̈le ɑ́ mi gwøøg Kemɑ̀ këti!” Codhe, kɑ ji ówïyø kɑ̈nø. Jɑmm-ɑ ɑ́kɑ̈ɑ̈l yi gen ɑ́bëëd ge gïïr cɑrø ki mendwøng kibøli møg-ɑ ɑ́dwɑddi kipe gwøg. Codhe, kɑ bödhh-ɑ göögø, Kemi Kwër gwøg yi gen kí sitɑr pyɑ̈rø mɑ ɑ́cwɑ̈j yi gen ki kor-ɑ yöm, kɑ kïdd-ɑ bɑ ówɑw kí ɑ́cwïcwïl kí møg kwɑrø rød gen ri sitɑrrɑni gɑ kerobb, møgɑni bene tɑni Kemi Kwër. Bɑ̈ri sitɑrɑ̀ ɑ́kyel bɑ mïtïr pyɑ̈rø wïdɑ́ryew, o döre bɑ mïtïr ɑ́ryew, ge bɑ ɑrøm ge pɑ̈r bënn. Kɑ sitɑr ɑ́bïj rød kej ɑ́kyel, kɑ ɑ́bïj-ɑ kyeelø rød kej ɑ́kyel thyew. Kɑ sitɑrr-ɑ ɑ́rød kej ɑ́kyel gɑ ɑ́bïj tøggi gen thuuli kì tung ɑ́kyel ki ógødh me kïde bɑ ówɑw, kɑ ɑ́bïj-ɑ kyeelø tøggi gen lony ki thuulø. Kɑ ógønh-ɑ bɑ ówɑw ree rudi ki dölli korø pyɑ̈r ɑ́bïj kì tøgge, kɑ dölli korø møøgø gɑ pyɑ̈r ɑ́bïj thyew rød tøg sitɑr-ɑ kyeelø. Döllɑni bënn ri gen rwööm gen, men røøm ki men, men røøm ki men. Kɑ ge ogöögø ki odöbbi dhɑb pyɑ̈r ɑ́bïj, kɑ buddɑni ryeet mɑɑg gen kej ɑ́kyel. Kɑ ge ogöögø ki sitɑr pyɑ̈rø wïdɑ́kyel mø kömi tɑnø, ge ócwɑ̈jø kɑ yëyyi dyëg. Bɑ̈ri sitɑrɑ̀ ɑ́kyel bɑ mïtïr pyɑ̈rø wïdɑ́dɑ̈g, o döre bɑ mïtïr ɑ́ryew, ge ɑ́røm ge pɑ̈r bënn. Kɑ sitɑr ɑ́bïj rød kej ɑ́kyel yi gen, kɑ ɑ́bïj rød gen wɑ̈yi gen thyew. Kɑ ge ogöögø ki döll pyɑ̈r ɑ́bïj kì tøggi mø tyeli mɑl, kɑ ge ogöögø thyew ki döll pyɑ̈r ɑ́bïj kì ri møg-ɑ kyeelø. Codhe, ɑgöög gen ki odöbbi dilɑl møg mɑɑg gen kej ɑ́kyel, o ge göög gen gɑ ɑ́kyel bënn. Kɑ ge ogöögø ki kum Kemi Kwër ki lɑ̈ni dyëg møg-ɑ ónginyø, o ge ójwɑ̈ɑ̈gø ki kïn-ɑ kwɑrø, kɑ köme kïdhi ki tɑnø megø me ócwɑ̈jø ki pënnì møg-ɑ órød kej ɑ́kyel. Kɑ ge cwödh-ɑ piny ki yenh ɑ́lwiy. Bɑ̈ri yɑdh ɑ́kyel bɑ mïtïr ɑ́ngwen, o lɑ̈je bɑ sentimïtïr pyɑ̈r ɑ́bïkyel wïdɑ́bïkyel. Kɑ yɑdh ɑ́kyel gwøg yïe dɑ tyel ɑ́ryew mø røøm. Yenh-ɑ ɑ́cwöödh piny bënn, bëëd gen kinøw. Tung-ɑ kuni wɑɑng wurlwɑl ɑ́cwöödh-ɑ yenh pyɑ̈r ɑ́ryew. Kɑ ge ogöögø ki tëddi tyelli yenhɑni mø bɑ ɑ́tegø, kwɑnni gen bɑ pyɑ̈r ɑ́ngwen. Yɑdh ɑ́kyel yïe dɑ tëddì ɑ́ryew. Tung-ɑ røøm ki en, kì kuni wɑɑng wuudø ɑ́göggi thyew ki yenh pyɑ̈r ɑ́ryew, ki tëddi tyelli gen gɑ pyɑ̈r ɑ́ngwen gɑ ɑ́tegø, yɑdh ɑ́kyel tyele dɑ ɑ́ryew. Kɑ ngɑ̈ɑ̈j Kemɑ̀ kì tung-ɑ døøg kuni wɑɑng cyɑ̈ɑ̈ng böörø kïdhí ki yenh ɑ́bïkyel, kɑ wɑ̈thi tùnge ryeet kïdhí ki yenh ɑ́ryew kì cyɑ̈n. Kɑ yenhɑni mɑɑg kej ɑ́kyel kì piny, kɑ wɑ̈thi gen mɑl mɑg ki döölø me bɑ ngyënyø dødø. Kɑ yenhi wɑ̈thi tùngɑni ryeet gwøg yi gen kinøw. O bëëde ɑ́ ɑ́bïdɑ̈g ɑ ócwöödh piny kì cyɑ̈n, ki tëddi ɑ́tegø gɑ pyɑ̈rø wïdɑ́bïkyel, tëddì ɑ́ryew kì thɑ yɑdh ɑ́kyel. Kɑ ge ogöögø ki rïwwi yɑdh ɑ́lwiy gɑ pyɑ̈rø wïdɑ́bïj, ɑ́bïj kipe tung-ɑ wɑɑng wurlwɑl, kí ɑ́bïj møøgø kì kuni wɑɑng wuudø. Kí ɑ́bïj møøgø kì kuni wɑɑng cyɑ̈ɑ̈ng böörø. Kɑ rïwi men-ɑ dïdyër gwøg yi gen e bɑ̈ɑ̈n-ɑ yenh-ɑ kyeelø kì dyëri gen, e pödh-ɑ tung-ɑ kyeelø. Kɑ yenhɑni gøj yi gen ki dhɑb. Kɑ ge göggi yi gen ki dölli dhɑb møg mɑɑg yenhɑni, kɑ yenh-ɑ bɑ rïwwì gøj yi gen thyew ki dhɑb. Kɑ gëng gwøg yi gen ki kor-ɑ yöm me bɑ ɑlɑdh, ree dɑ kïddì mø bɑ ówɑw kí ɑ́cwïcwïl kí møg kïddi gen kwɑrø, kɑ ɑ́rum ree ki rudø yi bødhø me cinge døj ki ngïjji kerobb. Kɑ göggi yi gen ki yenh ɑ́ngwen møg-ɑ ócwöödh piny ge bɑ ɑgøj ki dhɑb, ri gen dɑ odöbbi dhɑb ɑ́ngwen, ge ócungø kömi tëddì ɑ́ngwen mø bɑ ɑ́tegø. Kɑ dhø Kemi Kwër cwɑ̈jji gen ki thïgø me ree di kïddì mø bɑ ówɑw kí ɑ́cwïcwïl kí kïddi mø kwɑrø, ki kor-ɑ yöm me bɑ ɑlɑdh yi bødhø me cinge døj. Yïe dɑ yenh ɑ́bïj møg-ɑ ócwöödh piny, ri gen dɑ odöbbi dhɑb. Kɑ gï gøj gen ki dhɑb, o tëddi tyelli gen bɑ dilɑl. Kɑ Sɑnduug Cigg gwøg yi Bedhɑlel ki ɑ́lwiy, bɑ̈re bɑ sentimïtïr miyø kí pyɑ̈rø, o lɑ̈je bɑ sentimïtïr pyɑ̈r ɑ́bïkyel wïdɑ́bïkyel, o döre bɑ sentimïtïr pyɑ̈r ɑ́bïkyel wïdɑ́bïkyel. Kɑ gø gøje ki dhɑm dhïw kì yije kí köme, kɑ gø gögge ki dööli dhɑb e wen-ɑ tøgge. Kɑ gø gögge ki yëlli dhɑb ɑ́ngwen møg cïb ri tyelle gɑ ɑ́ngwen. Yëll ɑ́ryew kì tuung, kí ɑ́ryew møøgø kì tung-ɑ kyeelø. Kɑ ogöögø ki lødhi ɑ́lwiy ɑ́ryew, kɑ gï gøje ki dhɑb. Kɑ lødhɑni cøde yethi yëll møg-ɑ tøgge, gɑ møg nyi kɑ̈lli sɑndungɑni. Kɑ gø gögge ki kum dhɑm dhïw, bɑ̈re bɑ sentimïtïr miyø kí pyɑ̈rø, o lɑ̈je bɑ sentimïtïr pyɑ̈r ɑ́bïkyel wïdɑ́bïkyel. Kɑ ogöögø ki kerobb ɑ́ryew ki dhɑb, gï ceg yi en kɑ thɑ̈dhø ki ɑ́bɑny, kì wɑ̈thi tùngi kumɑni, kerob ɑ́kyel kì tuung ki ɑ́kyel kì tung-ɑ kyeelø. Kerobbɑni ryeet ɑ́gwøg yi en ge ying-ɑ ri kum kì wɑ̈thi tùnge. Kerobbɑni yï gen dɑ obërr mø peedh gen gï tïng gen mɑl, ge gëng-ɑ kum ki obërri gen. Ge nenn-ɑ nyingi gen, ri gen lugi gen kumɑni. Kɑ ogöögø ki tɑrɑbeedh ɑ́lwiy, bɑ̈re bɑ sentimïtïr pyɑ̈r ɑ́bïdɑ̈g wïdɑ́bïdɑ̈g, o lɑ̈je bɑ sentimïtïr pyɑ̈r ɑ́ngwen wïdɑ́ngwen, o döre bɑ sentimïtïr pyɑ̈r ɑ́bïkyel wïdɑ́bïkyel. Kɑ gø gøje ki dhɑm dhïw, kɑ gø gögge ki dööli dhɑb e wen-ɑ gøn, kì wɑ̈thi tøgge. Kɑ gø gögge ki gël kì mɑl wɑ̈thi tøgge, me döre bɑ mïlimïtïr pyɑ̈r ɑ́bïryew wïdɑ́bïj, kɑ gëlɑni dööle ki dhɑb. Kɑ gø gögge ki yëlli dhɑb ɑ́ngwen, kɑ gï gøøde wɑ̈thi tøgge gɑ ɑ́ngwen kì ri tyelle. Yëll ying-ɑ thɑ gël, gɑ møg mïdhi lødh-ɑ nyi byelli tɑrɑbenhɑni. Kɑ ogöögø ki lødhi ɑ́lwiy møg nyi kɑ̈lli tɑrɑbenhɑni, kɑ gï gøje ki dhɑb. Kɑ jɑmmi wïj tɑrɑbedhɑ̀ gwøge gɑ dhɑm dhïw, jɑmmɑni bɑ siniy, kí tɑ̈mmì, kí óthɑ̈ggì, kí ɑ́thïwwì. Kɑ teggi lɑ̈mbɑ̈ɑ̈ gwøge ki dhɑm dhïw. Tegø ɑ́gwøge, kí tyele, kí bɑ̈dde, gï thɑ̈dh yi en kɑ ɑ́bɑny, kí ködhhi møwe, kí ɑnɑ̈bbe, kí ɑbujje, kí okøgge; gï ɑ́gwøge kɑ dhɑm dhïw ge bënn, ge bɑ ɑ́kyel, (bong men cuggi puth wɑ̈ye). Bɑ̈dde kɑ̈ɑ̈l-ɑ nyingi ngëdde, gɑ ɑ́bïkyel, bɑ̈dd ɑ́dɑ̈g ɑ tung ɑ́kyel kì ri tengɑni, ki bɑ̈dd ɑ́dɑ̈g ki tung-ɑ kyeelø. Bɑ̈ddɑni bënn ri gen dɑ ɑbuj, kí ɑnɑ̈b, kí okøgg ge bɑ kɑ̈jj ɑ́dɑ̈g. Tengɑni ree dɑ ɑbujji okøgg ɑ́ngwen, kí ɑnɑ̈bb kí okøgg kì ri gen. Kɑ ɑnɑ̈m-ɑ ree di okøg nyi cïbe thɑ́ bɑ̈dd-ɑ kɑɑr tuung kí tuung gɑ ɑ́ryew, kɑ thɑ̈thi ɑ́kɑrrɑni cïbe ki okøgg ge bënn gɑ ɑ́bïkyel. Tengɑni geki bɑ̈dde, kí okøgge bënn, bɑ dhɑm dhïw, ge bɑ ɑthɑ̈dh gɑ ɑ́kyel bong men puth wɑ̈ye. Kɑ ogöögø ki lɑ̈mbɑ̈ɑ̈ ɑ́bïryew, ki dikɑ̈bbi gen, ki óthɑ̈nggi dhɑm dhïw. Dhɑm-ɑ ɑ́gwøøgii bëne kí jɑmme kɑ ɑ́rømii, bɑ kïllì mø dhɑm dhïw gɑ pyɑ̈r ɑ́dɑ̈g wïdɑ́bïj. Kɑ ogöögø ki këli bɑkur ki yɑdh ɑ́lwiy. Bɑ̈re bɑ sentimïtïr pyɑ̈r ɑ́ngwen wïdɑ́bïj, o lɑ̈je bɑ sentimïtïr pyɑ̈r ɑ́ngwen wïdɑ́bïj, o döre bɑ sentimïtïr pyɑ̈r ɑ́bïngwen, tùnge nɑ pij, ge bɑ ɑkøj kì ri yɑnhɑni kete. Kɑ gø gøje ki dhɑm dhïw kì tøgge, kí wïje mɑl, kí tùnge. Kɑ gø gögge ki gëël dhɑb kì wɑ̈thi tøgge mɑl. Kɑ gø gögge ki yëlli dhɑb ɑ́ryew kì thɑ gël, kì nyingi ngëdde, ge rwööm, gɑ møg mïdhi lødh-ɑ nyi byellii. Lødhɑni ɑ́gwøge ki ɑ́lwiy kɑ gï gøje ki dhɑb. Kɑ møøw röny men-ɑ bɑ mi kwër gwire kidøøj ki døøji cingø, geki bɑkur-ɑ yøme med ni kenyi gwøøg gen ceth yi bødhø me dïdø kidøøj. Kɑ këli lɑm gwøge ki yɑdh ɑ́lwiy, bɑ̈re bɑ mïtïr ɑ́ryew kí sentimïtïr pyɑ̈r ɑ́ryew, o lɑ̈je bɑ mïtïr ɑ́ryew kí sentimïtïr pyɑ̈r ɑ́ryew, o döre bɑ mïtïr ɑ́kyel kí sentimïtïr pyɑ̈r ɑ́dɑ̈g, o köme mɑl bɑ óør. Kɑ gø gögge ki tùng kì wɑ̈thi tùnge gɑ ɑ́ngwen bënn, ge bɑ ɑkøj kì ri yɑnh-ɑ ɑ́gwøøg këli lɑm. Codhe, kɑ gø gøje ki dilɑl. Kɑ jɑmmi këlɑni gwøge bënn ki dilɑl, ɑ løg; tɑ̈mm-ɑ nyi jøøb búr, kí ɑtögg kí tɑ̈mmì, kí odöbb kí dikɑ̈bbi mɑc. Kɑ ogöögø ki bøøy dilɑl óør e ómɑɑg tøgge, kɑ gø cïbe thɑ këlɑni kì tøge kì kuni piny, e ying-ɑ dïdyër. Kɑ wɑ̈thi tùngi bøøy dilɑl gödde ki yëll ɑ́ngwen møg nyi mïdhi lødh. Kɑ ogöögø ki lødhi ɑ́lwiy ɑ́ryew, kɑ gï gøje ki dilɑl. Kɑ lødhɑni cøde yethi yëll kì tøggi këlø gɑ møg nyi kɑ̈llii. Kɑ ɑ́tɑɑy lwøg gwøge ki dilɑl, o dööli thɑre bɑ dilɑl thyew, gø ɑ́gwøge kɑ rɑ̈ngi dilɑl mø tyëng-ɑ mɑ̈nn møg-ɑ ɑ́bëëd ge ying-ɑ dhø Kemi Kwër. Kɑ kɑl ger yi Bedhɑlel, kì kuni wɑɑng wurlwɑl ki sitɑr mø ócwɑ̈jø ki kor-ɑ yöm, bɑ̈re bɑ mïtïr pyɑ̈r ɑ́ngwen wïdɑ́ngwen. Yenh-ɑ ókoonyii piny kwɑnni gen bɑ pyɑ̈r ɑ́ryew, kì yethi tëddi dilɑl pyɑ̈r ɑ́ryew, ki odöbb, ki rïwwi ɑ́tegø kì mɑl. Tung-ɑ wɑɑng wuudø pɑ̈r ki men-ɑ wɑɑng wurlwɑl. De tung-ɑ kuni wɑɑng cyɑ̈ɑ̈ng böörø, bɑ̈ri sitɑrre bɑ mïtïr pyɑ̈r ɑ́ryew wïdɑ́ryew. Yenhe møg-ɑ ókoony piny bɑ pyɑ̈rø, rïwwi yenhɑni geki odöbbe bɑ ɑ́tegø. O dör-ɑ kuni wɑɑng cyɑ̈ɑ̈ng mwøl, tung-ɑ di dhø kɑl, bɑ̈ri sitɑrre bɑ mïtïr pyɑ̈r ɑ́ryew wïdɑ́ryew. Tung ɑ́kyel kì bøli dhø kɑl bɑ̈ri sitɑrre bɑ mïtïr ɑ́bïkyel kí sentimïtïr pyɑ̈r ɑ́bïkyel, yenh-ɑ ókoonyii piny bɑ ɑ́dɑ̈g, o tëddi tyelli gen bɑ ɑ́dɑ̈g. Bɑ̈ri sitɑrri tung-ɑ kyeelø kì kuni wɑɑng wuudø kì dhø kɑl bɑ mïtïr ɑ́bïkyel kí sentimïtïr pyɑ̈r ɑ́bïkyel, yenh-ɑ ókoonyii piny bɑ ɑ́dɑ̈g, o tëddi tyelli gen bɑ ɑ́dɑ̈g. Sitɑrr møg-ɑ wen kɑl bënn ócwɑ̈jø kɑ kor-ɑ yöm me bɑ ɑlɑdh. O tëddi yenh-ɑ ócwöödh piny bɑ dilɑl, o rïwwi gen geki odöbbi gen bɑ ɑ́tegø, kì ri yenhi kɑl bënn. Bɑ̈ri sitɑri dhø kɑl bɑ mïtïr ɑ́bïngwen, o döre bɑ mïtïr ɑ́ryew ni döri kɑl ceth, e bɑ ɑcwɑ̈j ɑ́ kor-ɑ yöm, ree dɑ kïddi ówɑw kí ɑ́cwïcwïl kí møg kwɑrø, bɑ gwøøg bødhø me cinge døøj. Yenh-ɑ ócwöödh piny kì dhø kɑl, bɑ ɑ́ngwen, o tëddi gen bɑ ɑ́ngwen gɑ dilɑl, odöbbi gen bɑ ɑ́tegø, o rïwwi wɑ̈thi gen bɑ ɑ́tegø geki winn-ɑ ótwööj gen. Pijji Kemi Kwër geki pijj-ɑ ógur kɑl piny bɑ dilɑl bënn. Bene kwɑnni wɑ̈thi winn-ɑ ɑ́göög ki Kemi Kwër ek, kɑ ɑ́røm gen, Mosɑ̀ ɑ ɑ́kööb i kwɑɑn gen, ɑgwøøg møgɑni yi Kwɑrri Leebì, e gwøngɑni nenn-ɑ yi Ithɑmɑr wɑ̈d ókwërø Aɑron. O bɑ Bedhɑlel wɑ̈d Urì wɑ̈d Ur kì gøl Yeudɑ̀ ɑ ɑ́gwøg jɑmm-ɑ ɑ́cïgi Mosɑ̀ bënn yi Jwøng-ɑ Ácwɑ̈ɑ̈j. E køny-ɑ yi Oliɑb wɑ̈d Akisɑmɑk kì gøl Dɑn, bɑ jɑl me cinge pëddi døøjø kì ri gwøøg tweg, kí gwed, kí rød ki kïddi kwɑrø, kí ówɑw kí ɑ́cwïcwïl, kí cwɑ̈j ki kor-ɑ tɑr men-ɑ bɑ ɑlɑdh. Dhɑb men-ɑ ɑ́gwɑj yi ji ɑ́ men göög ki jɑmmi Kemi Kwër keny-ɑ ɑ́rømii ki rumi kej kwër, ɑ́göög ki kïllì ɑ́lïp. O ɑ́tegø men-ɑ ɑ́gwɑj yi tyëng-ɑ ɑ́kwɑn kì gøl Isrɑil ɑ́bëëd ɑ́ kïllì ɑ́lïp kí miy ɑ́ngwen kí pyɑ̈r ɑ́dɑ̈g, kɑ ɑ́rømii bëne ki rumi kej kwër. Tyëng-ɑ ɑ́kwɑn bënn, ɑ løg ngɑn-ɑ runne ɑ́wɑ̈dhi ri pyɑ̈r ɑ́ryew gïti mɑl, ɑ́muuj ki ɑ́tegø men-ɑ ɑ́dwɑddi kì yï dhɑnhø ceth, e røm kɑ rumi kej kwër. O tyëng-ɑ ɑ́kwɑn, kwɑnni gen ɑ́bëëd gɑ ɑ́lïp miy ɑ́bïkyel kí ɑ́dɑ̈g, kí miy ɑ́bïj kí pyɑ̈r ɑ́bïj. Áteng-ɑ ɑ́göög ki tëddi yenhi Kemi Kwër geki tëddi yenhi sitɑr gɑ miyø, ɑ́göög ki kïllì ɑ́lïp ɑ́dɑ̈g kí miy ɑ́ngwen. Kïllì pyɑ̈r ɑ́dɑ̈g wïdɑ́ngwen ɑ ɑ́gwøøg tëni yɑdh ɑ́kyel. De men-ɑ ɑ́döng kì ri ɑ́tegø e bɑ kïllì pyɑ̈r ɑ́dɑ̈g, en ɑ ɑ́göög ki odöbb-ɑ mɑɑg yenh, geki winn-ɑ rïïw wɑ̈thi gen, ki gøji wɑ̈thi yenhɑni. O dilɑl men-ɑ ɑ́muuj yi ji keny-ɑ ɑ́rømii ɑ́göög ki kïllì ɑ́lïp ɑ́ryew kí miy ɑ́ngwen kí pyɑ̈r ɑ́ryew wïdɑ́bïj. Dilɑlɑni ɑ ɑ́göög ki tëddi yenhi Kemi Kwër, ki këli dilɑl geki bøye men-ɑ bɑ dilɑl, ki jɑmme bënn. Kí tëddi yenhi kɑl, kí tëddi yenhi dhø kɑl, kí pijji Kemi Kwër bënn geki pijji kɑl men-ɑ wenii. Kɑ ge ogöögø ki ógudhi ókwër møg-ɑ nyi rug kì kej kwër. Ácwɑ̈j yi gen kɑ korr-ɑ kïddi gen bɑ ówɑw kí ɑ́cwïcwïl, kí møg kwɑrø, Aɑron ɑ́cwɑ̈jji yi gen ki ógudhi kwër ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j. Pɑrø ɑ́gwøg yi gen kɑ korri dhɑb, kí korr-ɑ kïddi gen bɑ ówɑw kí ɑ́cwïcwïl, kí møg kwɑrø, kí kor-ɑ yöm me bɑ ɑlɑdh. Kɑ ge otugø ki dhɑb me rød kelli kïdd-ɑ bɑ ówɑw kí ɑ́cwïcwïl, kí møg kwɑrø, kí kor-ɑ yöm me bɑ ɑlɑdh. Kɑ gø göggi gen ki digɑ̈bbì møg mɑɑg wɑ̈thi tøgge kej ɑ́kyel, ge ómɑɑg-ɑ ri wɑ̈thi tùnge. Wën-ɑ bɑ ógwel ógwøgø e nɑ pɑrø, e bɑ ɑrød kì ree, bɑ ɑgwel ki korri dhɑb, kí korr-ɑ kïddi gen bɑ ówɑw kí ɑ́cwïcwïl, ki møg kwɑrø, ki kor-ɑ yöm me bɑ ɑlɑdh, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j. Kɑ ópɑ̈nni kïti yedhè ryeet, tøggi gen dööl ki dhɑb, kïttɑni ryeet gen ɑ kömi gen ógweed nyingi wɑ̈ddi Isrɑil. Ge ɑ́cïb yi gen ri digɑ̈bbì kì wɑ̈thi tøggi pɑrø, ge cungi gɑ nyingi wɑ̈ddi Isrɑil, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j. Kɑ bøj gwøg yi gen e nɑ pɑrø, ki korri dhɑb, ki korr-ɑ kïddi gen bɑ ówɑw kí ɑ́cwïcwïl, kí møg kwɑrø, kí kor-ɑ yöm me bɑ ɑlɑdh. Bɑ óør, o óbɑnø yethe ɑ́ryew, bɑ̈re bɑ sentimïtïr pyɑ̈r ɑ́ryew wïdɑ́ryew, o lɑ̈je bɑ sentimïtïr pyɑ̈r ɑ́ryew wïdɑ́ryew. Kɑ köme rudi gen ki lwøbb ɑ́ngwen mø ópɑ̈nni kïtt-ɑ nyi göög ki tigg. Lwøm-ɑ mɑl yije dɑ rërø, kí óbwörø, kí ómɑrø. O ryeew lwøbb yije dɑ ówɑw me kømi lojø, kí óbɑng, kí óbøw. Dɑ̈ɑ̈g lwøbb yije dɑ ɑ́dwøgø, kí oget, kí ɑ́gør tïl. O ngween lwøbb yije dɑ ówɑw, kí ditɑ̈ng, kí ɑcwïl. Ge ómɑɑg kej ɑ́kyel bënn ki dhɑb e ótuumø kì wɑ̈thi tøgge. Kïttɑni kwɑnni gen pɑ̈r ki kwɑnni wɑ̈ddi Isrɑil, kömi gen ógweed nyingi gen, ngɑn ki kïte ngɑn ki kïte. Nying pyɑ̈rø wïdɑ́ryew kí kïttì pyɑ̈rø wïdɑ́ryew, ɑ løg wɑ̈thi kɑ̈lli Isrɑil gɑ pyɑ̈rø wïdɑ́ryew, ge ógwedø ni kitim. Kɑ kömi bøj göggi gen ki ɑ́cwecwelli dhɑm dhïw mø bɑ ɑdøg ni thøl. Kɑ ge ogöögø ki yëlli dhɑb ɑ́ryew, kɑ gï gøød gen wɑ̈thi tøggi bøj kì mɑl. Kɑ ɑ́cwecwelli dhɑb mɑɑg gen ri yëllɑni kì tøggi bøj. Kɑ dhøggi ɑ́cwecwellɑni ryeet mɑɑg gen ri pɑrø kì ri digɑ̈bbì kì wɑ̈thi tøggi bøj kì kuni mɑl. Kɑ ge ogöögø ki yëlli dhɑb ɑ́ryew møøgø, kɑ gï gøød gen wɑ̈thi tøggi bøj kì kuni piny, kì yiny-ɑ yij, o bøj yinge kömi pɑrø. Kɑ ge ogöögø ki yëlli dhɑb ɑ́ryew møøgø, kɑ gï gøød gen kuni piny kì ri digɑ̈bbi wɑ̈thi tøggi pɑrø, kì kuni bøle kì mɑl keny-ɑ órød wëni pɑrø. Bøj bɑ ɑmɑg kì kej ɑ́kyel kì ri yëlle geki yëlli pɑrø ki wëëni me kïde bɑ ówɑw, kipe kinni o bøj cöge e pɑ lëwwø kì kömi pɑrø, ni kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j. Kɑ ɑ́ywönhdwøng men-ɑ köme nyi cïb pɑrø cwɑ̈j yi gen ki kor-ɑ kïde bɑ ówɑw kete. Muni ógønhɑni men-ɑ ɑ́yieb kì dïdyëre ɑ́ kej wïj, ókwenø ki korø, kipe e ópyëëd. Kɑ tøgge ngɑ̈bbi ki gïg mø bɑ ɑ́tug ni nywøli romɑn, møøgø kïddi gen bɑ ówɑw, møøgø kïddi gen bɑ ɑ́cwïcwïl, o møøgø kïddi gen kwɑrø, ge bɑ ɑcwɑ̈j ki korrɑni. Kɑ ge ogöögø thyew ki mɑ̈lli dhɑm dhïw, kɑ mɑ̈llɑni cwiil gen kelli nywøli romɑn, ge ryër-ɑ́ɑ̀ tøggi ógødh, ge tuumø kì tøggi ógønhɑni kì piny, ge bɑ ɑmyer mɑ̈lø kí romɑn, mɑ̈lø kí romɑn kì tøggi ógødh kwër ni kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j. Kɑ Aɑron geki wɑ̈dde cwɑ̈jji gen ki ɑ́ywödhh mø kor-ɑ yöm, kɑ ge göggi ki thɑ̈ggì, kí wënni yeth mø korø me bɑ ɑgwel, kí ɑköjj. Gï ɑ́cwɑ̈j yi gen kɑ korø me bɑ ɑlɑdh. De wënni yeth ɑ́cwɑ̈j yi gen kɑ kor-ɑ yöm, me bɑ ɑlɑdh, ree dɑ kïddì mø bɑ ówɑw kí ɑ́cwïcwïl, kí møg kwɑrø, e ceg kɑ kwenø, ni kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j. Kɑ ópɑni dhɑb gwøg yi gen ki dhɑm dhïw, kɑ gwed yi gen ni kenyi gweed kitim kinni “Athyeey Jwøng-ɑ Ácwɑ̈ɑ̈j.” Kɑ ree kïdhi yi gen ki ɑcwɑdø me twööjii ri thɑgi wïj Aɑron, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j. Codhe, kɑ jɑmm-ɑ gwøøg Kemɑ̀ órumø ki pyëlø bënn yi tyëng Isrɑil, ni kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j. Codhe, kɑ Kemi Kwër muuj Mosɑ̀ yi gen, Kemɑni kí jɑmme bënn, kí odöbbe, kí yenhe, kí pɑ̈mme, kí tëddi tyelli yenhe. Kí tɑne men-ɑ bɑ ɑgwøg ki lɑ̈ni dyëg møg-ɑ bɑ ɑnginy, ge ójwɑ̈ɑ̈gø ki kïn-ɑ kwɑrø, kí tɑn-ɑ bɑ ɑgwøg ki pënnì, kí sitɑrɑ̀ men-ɑ bɑ gëëng Kej Kwërdwøng kì yij Kemi Kwër. Kí Sɑnduug Cigg geki lødhe kí kume. Kí tɑrɑbeedh gïncɑm, kí gïncɑɑm jwödhø. Kí teggi dhɑb, kí lɑ̈mbɑ̈ɑ̈ møge, kí jɑmme bënn, kí møøw lɑ̈mbɑ̈ɑ̈. Kí këli dhɑb mi bɑkur, kí møøw röny, kí bɑkur-ɑ yøme med, kí sitɑr-ɑ bɑ thïgi dhø Kemi Kwër. Kí këli dilɑl, ɑ bɑ këli lɑm geki bøye, kí lødhe ryeet, kí jɑmme bënn, kí ɑ́tɑɑy lwøg geki dööli thɑre. Kí sitɑr-ɑ bɑ kɑl, kí yenhe, kí tëddi yenhe, kí sitɑr-ɑ bɑ dhø kɑl, kí thølle, kí pijje, kí jɑmm-ɑ göög bënn kì Kemi Kwër. Kí ógudh-ɑ bɑ ɑcwɑ̈j møg-ɑ nyi rug yi ngɑn-ɑ göögø kì kej kwër, kí ógudhi kwër møg-ɑ nyi rug yi Aɑron, kí ógudhi wɑ̈dde, ɑ løg ókwër. Gwøngɑni bëne ɑ́gwøg yi tyëng Isrɑil, e bɑ men-ɑ ɑ́cïgi Mosɑ̀ yi Jwøng-ɑ Ácwɑ̈ɑ̈j ceth. Kɑ lidh yi Mosɑ̀ kinni gwøngɑni ɑ́gwøg yi gen ni men-ɑ ceg yi Jwøng-ɑ Ácwɑ̈ɑ̈j ceth. Codhe ɑthyeey jɑmmɑni yi Mosɑ̀. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Cwöödh Kemi Kwër piny kì cyɑ̈ng-ɑ mɑl kì dwɑ̈y Abib. Kɑ Sɑnduug Cigg, ɑ yije di ópɑ̈nni kït cïb yije, kɑ Sɑnduug Cigg gëëng ki sitɑrɑ̀. Kïdhí tɑrɑbeedh bɑkur yije, kɑ jɑmme cïb wïje, kɑ teggi lɑ̈mbɑ̈ɑ̈ kïdhí yije, kɑ lɑ̈mbɑ̈ɑ̈ møge gweel, kɑ tɑrɑbeedh dhɑb mi bɑkur cïb e rwööm ki Sɑnduug Cigg. Codhe, kɑ sitɑr-ɑ bɑ thïgi dhø Kemi Kwër cïb dhøge. Cïb këli lɑm e rwööm ki dhø Kemi Kwër. Cïb ɑ́tɑy kɑɑm Kemi Kwër geki këli lɑm, kɑ yije pɑ̈ɑ̈ng ki pï. Kɑ kɑl cwöödh piny e Kemi Kwër wene wenø, kɑ sitɑrr-ɑ bɑ dhø kɑl cïb kej gen. “Kwɑny møøw röny kɑ Kemi Kwër gïïny geki jɑmm-ɑ yije bënn, yï thyey-ɑ gen, o ge göög gen ki jɑmmi kwër. Codhe, kɑ këli lɑm, ɑ köme nyi rɑ̈ɑ̈b, gïïny geki jɑmme bënn, yï thyey-ɑ gen, o këlɑni gööge ɑ́ kej Kwëër Dwøng. Kɑ ɑ́tɑy gïïny geki dööle, yï thyey-ɑ en.” Kɑ Aɑron kɑ̈ɑ̈l dhø Kemi Kwër geki wɑ̈dde, kɑ ge lwøøg ki pï. Kɑ ógudhi kwër løny ri Aɑron, kɑ gïïny, yï thyey-ɑ en, o yɑ ógöggi yi en ɑ́ ókwërø. Kɑ wɑ̈dde kɑ̈ɑ̈l, kɑ ri gen lunyi ki ɑ́ywödhh, kɑ ge gïïny ni kɑ ɑ́gïïny wïyi gen, o yɑ ógöggi yi gen gɑ ókwër. O gïïnyø menɑni bëëde ɑ́ gïïnyi rønyi gen gɑ ókwër kì ri rïjj bënn gïti ɑtheer. Møgɑni ɑ́gwøg yi Mosɑ̀ ni kɑ ɑ́köbbii yi Jwøng-ɑ Ácwɑ̈ɑ̈j, gï ɑ́gwøge kinøw ceth. Kemi Kwër ɑ́cwöödh piny kì dwɑ̈y Abib, kì cyɑ̈ng-ɑ mɑl kì yij dwɑ̈yɑni, kì ryeew runn. Tëddi yenh ɑ́cïbe piny, kɑ yenh cwöödhe piny, kɑ rïwwi wɑ̈thi yenh cïbe, e winn-ɑ bɑ rïwwì cøde’ wɑ̈thi yenh-ɑ ócwöödh piny. Kɑ tɑnø cïbe wïj Kemi Kwër, kɑ kum kemɑni cïbe köme, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j ceth. Kɑ ópɑ̈nni kït, ɑ kömi gen ógweed Cigg-ɑ Pyɑ̈rø, kwɑnye, kɑ gï cïbe yij Sɑnduug Cigg. Kɑ lødh cïbe kɑ̈jji gen, kì ri Sɑndungɑni. Codhe, kɑ kum cïbe kömi Sɑndug. Kɑ Sɑndug kïdhe yij Kemi Kwër, kɑ sitɑr-ɑ bɑ gëng cïbe keje. Sɑnduug Cigg kinøw ceth, ni kɑ ɑ́cïg Jwøng-ɑ Ácwɑ̈ɑ̈j. Kɑ tɑrɑbedhɑ̀ cïbe yij Kemi Kwër kì bøli gëng kì kuni wɑ̈g, kì tuung cɑɑm, kì kuni wɑɑng wuudø. Kɑ ópun-ɑ bɑ keni Jwøng-ɑ Ácwɑ̈ɑ̈j pyële kì wïj tɑrɑbedhɑ̀ kì bøli Jwøng-ɑ Ácwɑ̈ɑ̈j, ni kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j. Kɑ teggi lɑ̈mbɑ̈ɑ̈ cïbe yij Kemi Kwër e rwööm ki tɑrɑbedhɑ̀, kì kuni wɑɑng wurlwɑl. Kɑ lɑ̈mbɑ̈ɑ̈ cwinye kì bøli Jwøng-ɑ Ácwɑ̈ɑ̈j, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j ceth. Tɑrɑbeedh dhɑb ɑ́cïbe yij Kemi Kwër kì bøli sitɑr-ɑ bɑ gëng, Kɑ orɑ̈bø ki bɑkur-ɑ yøme med kì wïje, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j ceth. Codhe, kɑ sitɑri dhø Kemi Kwër cïbe keje. Kɑ këli lɑm cïbe bøli Kemi Kwër kì yij kɑl. Kɑ byëlø geki gënh-ɑ nyi rɑ̈b bëne, rɑ̈be kì köme, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j ceth. Kɑ ɑ́tɑy cïbe kɑɑm Kemi Kwër geki këli lɑm, kɑ yije kunye ki pïg nyi löög. En ɑ yije nyi kɑ̈bbi yi Mosɑ̀, ki Aɑron geki wɑ̈dde, ki pïg lwøg gen cinggi gen geki tyelli gen. Ge nyi ceg-ɑ lwøg kenyi bëën ge kedh-ɑ yij Kemi Kwër, kí kenyi kedhi gen buti këli lɑm, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j ceth. Codhe, ɑcwöödhe kɑl piny, e wen-ɑ Kemi Kwër geki këli lɑm, kɑ sitɑr-ɑ bɑ thïgi dhø kɑl cïbe keje. Keny-ɑ ɑ́tyëëg gwøngɑni yi Mosɑ̀. Kɑ Kemi Kwër kum yi pøølø, kɑ opɑ̈ngø yi mɑ̈ɑ̈r Jwøng-ɑ Ácwɑ̈ɑ̈j. Mosɑ̀ ɑ́dhɑ̈li kedhi yij Kemi Kwër mɑ́ e ɑ́kum piny yi pøølø, kɑ opɑ̈ngø yi mɑ̈ɑ̈r Jwøng-ɑ Ácwɑ̈ɑ̈j. Kí wɑ̈nh-ɑ ɑ́cɑɑdh yi tyëng Isrɑil bëne, ge ɑ́bëëd ge pɑ nyi dhwödh kì keny-ɑ di gen gïti kenyi dhwödh pøølɑni kì kömi Kemi Kwër, odhwödh pøølø, bene ge ɑ́wɑ̈ddi yöö. De keløg pøølø pɑ dhwödh, ge pɑ cuggi dɑ̈g gïti bøli keny-ɑ ódhwödh pøølø. Mɑ́ pøøli Jwøng-ɑ Ácwɑ̈ɑ̈j nyi ying-ɑ kömi Kemi Kwër kì dicɑ̈ng, o yij pøølɑni nyi lyel ɑ́ mɑc kì wɑ̈r, e onennø yi gøl Isrɑil bëne, kì yij wɑ̈nh-ɑ ɑ́cɑɑdh yi gen bëne. Kɑ Mosɑ̀ cwøl yi Jwøng-ɑ Ácwɑ̈ɑ̈j, kɑ ge okööbø e Jwøng-ɑ Ácwɑ̈ɑ̈j ying-ɑ yij Kemi Kwër, ɑköbbii yi Jwøng-ɑ Ácwɑ̈ɑ̈j kinni, i köbbe tyëng Isrɑil kinni, Keløg dhɑnhø kɑ̈n-ɑ yï Jwøng-ɑ Ácwɑ̈ɑ̈j ki dyel wɑlɑ̀ dhyɑng, kɑ̈bbe kì kelli jɑmme. Keløg gïn-ɑ kɑ̈ɑ̈l yi en bɑ gënh-ɑ nyi rɑ̈b bëne, e kɑ̈n-ɑ́ɑ̀ kelli jɑmme, kɑ̈ɑ̈le gøn ɑ́ wɑdh me dële døøj bëne. Kɑ̈ɑ̈le gøn dhø Kemi Kwër, kɑ gø thërre Jwøng-ɑ Ácwɑ̈ɑ̈j e ókwɑ̈jjø, o Jwøng-ɑ Ácwɑ̈ɑ̈j pyëwe mïne ki wun. Kɑ cingí thɑɑny wïj gënh-ɑ nyi rɑ̈b bëne, o yïëy yi Jwøng-ɑ Ácwɑ̈ɑ̈j, o pyëwe lɑ̈ɑ̈me ki yïn. Kɑ wɑnhɑni ngɑle kì bøli Jwøng-ɑ Ácwɑ̈ɑ̈j, kɑ reme kɑ̈ɑ̈l yi wɑ̈ddi Aɑron ókwër, kɑ gø kiny gen ri këli lɑm gø wen ge wenø, eni kël-ɑ cungi kì dhø Kemi Kwër. Kɑ gënh-ɑ nyi rɑ̈b bëne yej yi ngɑn-ɑ ɑ́kɑ̈ɑ̈lii, kɑ gø ngølle ɑ́ ɑ́tug. Kɑ wɑ̈ddi Aɑron kudh gen ki mɑc kì wïj këli lɑm, kɑ köme tɑ̈ggi gen ki yenh. Kɑ ɑ́tuggi rïngɑni tɑɑg wɑ̈thi yenh-ɑ ɑ́pyël yi wɑ̈ddi Aɑron geki wïj wɑdh kí dwɑ̈le. Kɑ tyelli wɑdh geki cïnne lwøg yi ngɑn-ɑ ɑ́kɑ̈ɑ̈l gënhɑni, codhe kɑ ge rɑ̈b yi ókwërø kì wïj këli lɑm gɑ gënh-ɑ nyi rɑ̈b bëne, men muuj ki mɑc e yømi tole bɑ men mïni pyëw Jwøng-ɑ Ácwɑ̈ɑ̈j. O keløg gënh-ɑ nyi rɑ̈b bëne men-ɑ kɑ̈ɑ̈l yi en bɑ rømø wɑlɑ̀ ɑ́tegø, wiy bëëde ɑ́ thwønh me dële døøj bëne. Kɑ gø ngɑle kì buti këli lɑm kì kuni wɑɑng wuudø, kɑ reme kiny ri këli lɑm e owenø yi ókwër wɑ̈ddi Aɑron. Kɑ gø ngølle ɑ́ ɑ́tug, kɑ ɑ́tuggɑni geki wïje tɑɑg kömi yenh-ɑ bɑ ɑtɑg kì wïj këli lɑm, yenh-ɑ lyel. Pyëël gen yi ókwërø. Kɑ cïnne geki tyelle lwøge. Codhe, kɑ ge mëgge ókwërø o ge rɑ̈b bënn, gɑ gënh-ɑ nyi rɑ̈b bëne men muuj ki mɑc, e yømi tole bɑ men mïni pyëw Jwøng-ɑ Ácwɑ̈ɑ̈j. De keløg gënh-ɑ nyi rɑ̈b bëne men-ɑ kɑ̈ɑ̈l yi en bɑ winyø, wiy bëëde ɑ́ ɑkur dwøng, wɑlɑ̀ ɑkur ójwɑt. Kïdhi buti këli lɑm yi ókwërø kɑ wïje dwööj wɑ̈g, kɑ wïnyɑni rɑ̈be kì wïj këli lɑm. Kɑ reme biij piny kì buti këli lɑm. Kɑ ókøle kɑ̈ɑ̈le wɑ̈g ki jɑmm-ɑ yije, kɑ gï leenge buti këli lɑm kì wɑɑng wuudø, keny-ɑ nyi cøng búr. Kɑ gø pyëde ki cingge kì köme kelli obërre e gø pɑ dɑ̈ɑ̈nge. Kɑ rɑ̈b yi ókwërø kì wïj këli lɑm, kì kömi yenh mø lyel ɑ́ gënh-ɑ nyi rɑ̈b bëne men muuj ki mɑc, e yømi tole bɑ men mïni pyëw Jwøng-ɑ Ácwɑ̈ɑ̈j. Keløg dhɑnhø kɑ̈n-ɑ yï Jwøng-ɑ Ácwɑ̈ɑ̈j ki byëlø, kɑ̈ɑ̈le gøn ɑ́ møng-ɑ búr kɑ köme kunye ki møw, kɑ köme cïbe ki bɑkur, kɑ gø muuje ókwër wɑ̈ddi Aɑron, o ókwërø kɑ̈bbe ki cinge ki møng-ɑ búr kí møw kí bɑkur, o gï rɑ̈be kì wïj këli lɑm gɑ gënh-ɑ nyi rɑ̈b bëne men muuj ki mɑc e yømi tole bɑ men mïni pyëw Jwøng-ɑ Ácwɑ̈ɑ̈j. De kwï møng-ɑ búr men-ɑ döng bɑ mi Aɑron geki wɑ̈dde, bɑ ɑkwër ɑ́ gënh-ɑ nyi rɑ̈b bëne men-ɑ mëggi Jwøng-ɑ Ácwɑ̈ɑ̈j ki mɑc. Keløg gïncɑm men-ɑ muuj bɑ ɑbul ki purun, wiy bëëde e ónyömø kɑ møw, wɑlɑ̀ ójwɑ̈ɑ̈g yij møw. O keløg byël-ɑ kɑ̈ɑ̈l bɑ ɑthɑl ki thɑɑgø, wiy bëëde búre bɑ ɑnyöm ki møøw dhetun, kɑ wiy bëëde e bɑ olwëny. Pøddi kɑ köme kunyi ki møw, bɑ byëli Jwøng-ɑ Ácwɑ̈ɑ̈j. O keløg yï muuj-ɑ ópun me bɑ ɑkyel, wiy bëëde ɑ́ ɑnyöm ki møøw dhetun. Kɑ̈ɑ̈l gïncɑm men-ɑ muuj Jwøng-ɑ Ácwɑ̈ɑ̈j ɑ́ gëëdhi, kɑ mëggí ókwërø, o gø kïdhe bøli këli lɑm. O ókwërø kɑ̈bbe kì ree ki men kïdhe wïj këli lɑm ɑ́ gënh-ɑ nyi rɑ̈b bëne men muuj ki mɑc, e yømi tole bɑ men mïni pyëw Jwøng-ɑ Ácwɑ̈ɑ̈j. Men-ɑ döng bɑ mi Aɑron geki wɑ̈dde, bɑ ɑkwër ɑ́ gënh-ɑ nyi rɑ̈b bëne men-ɑ mëggi Jwøng-ɑ Ácwɑ̈ɑ̈j ki mɑc. Byëlø men-ɑ muuju Jwøng-ɑ Ácwɑ̈ɑ̈j ko gwøg ɑ́ ówɑj. Byëli Jwøng-ɑ Ácwɑ̈ɑ̈j men-ɑ mëggu en ko di thɑbø wɑlɑ̀ kɑmïrɑ̀ kí møøw kïc kì ree. Nyi muuj Jwøng-ɑ Ácwɑ̈ɑ̈j ki byell-ɑ kwöngi ki cyegø kì pwödhí, de ge ko rɑ̈b ki mɑc kì wïj këli lɑm. Nyi kïdhi ri byëlø men-ɑ muuj Jwøng-ɑ Ácwɑ̈ɑ̈j ki omelø, mɑ́ omelø cungi ɑ́ ngïjji lwöbø men-ɑ kɑɑm wun ki Jwøng-ɑ Ácwɑ̈ɑ̈j. Nyi kïdhi kömi byël-ɑ muuj yi yïn ceth ki omelø. Keløg yï omuujø kì ri møg-ɑ ɑ́kwöngi ki cyegø kì ri byellí, muuj gen gɑ byel ɑgïny, wɑlɑ̀ ɑ́ møng-ɑ ɑbulø. Kɑ ree kïdhí ki møw, kɑ köme cïbí ki bɑkur, bɑ keni Jwøng-ɑ Ácwɑ̈ɑ̈j ɑ ree ókɑ̈bbi yi ókwërø ki men-ɑ órɑ̈b geki ópun kí møw geki bɑkur bëne, bɑ gënh-ɑ nyi rɑ̈bi Jwøng-ɑ Ácwɑ̈ɑ̈j bëne, men muuj ki mɑc, e yømi tole bɑ men mïni pyëw Jwøng-ɑ Ácwɑ̈ɑ̈j. Keløg dhɑnhø omuujø ki dhyɑng wɑlɑ̀ wɑdh wɑlɑ̀ røjø ɑ́ mi mër, muuje gøn ɑ́ dhyɑng me bong gïnrɑj kì ree, kɑ gø kɑ̈ɑ̈le bøli Jwøng-ɑ Ácwɑ̈ɑ̈j. Kɑ cinge cïbe wïje, kɑ gø ngɑle kì dhø Kemi Kwër, kɑ remø kiny ri këli lɑm yi ókwër, wɑ̈ddi Aɑron, gø wen ge wenø. O ókwërø rɑ̈be dwɑ̈l-ɑ kömi cïn, kí røng geki dwɑ̈l-ɑ kömi gen, kí dwɑ̈li yij dhyɑng, kí dhøg ócuny geki dwɑ̈l-ɑ ree. Rɑ̈ɑ̈b gïgɑni bënn yi ókwërø kì wïj këli lɑm, kyeel geki gënh-ɑ nyi rɑ̈b bëne, e yømi tool gen bɑ men mïni pyëw Jwøng-ɑ Ácwɑ̈ɑ̈j. O keløg ɑ́ dyel ɑ muuj yi dhɑnhø, kɑ̈ɑ̈le gøn yï Jwøng-ɑ Ácwɑ̈ɑ̈j ɑ́ thwønh, wɑlɑ̀ mɑdh me bong gïnrɑj kì ree. Keløg e muuj-ɑ órömø, kɑ̈ɑ̈le gøn bøli Jwøng-ɑ Ácwɑ̈ɑ̈j. Kɑ cinge cïbe wïj órömɑni, kɑ gø ngɑle kì dhø Kemi Kwër. Kɑ reme kiny ri këli lɑm yi ókwër wɑ̈ddi Aɑron, gø wen ge wenø. Kɑ gïg kwɑnye kì ri lɑ̈yɑni, gɑ møg rɑ̈bbi Jwøng-ɑ Ácwɑ̈ɑ̈j, kɑ gï rɑ̈be kì wïj këli lɑm; rɑ̈be dwɑ̈lø bëne kì bøli Jwøng-ɑ Ácwɑ̈ɑ̈j, kí ótïd, kí dwɑ̈l-ɑ kömi cïn bëne, kí røng geki dwɑ̈l-ɑ kömi gen, kí dhøg ócuny geki dwɑ̈l-ɑ ree. Rɑ̈ɑ̈b gen yi ókwërø kì wïj këli lɑm, gɑ keni Jwøng-ɑ Ácwɑ̈ɑ̈j. O keløg e muuj yi en ɑ́ dyel ɑ́tegø, kɑ̈ɑ̈le gøn bøli Jwøng-ɑ Ácwɑ̈ɑ̈j. Kɑ cinge cïbe wïj dyelɑni, kɑ gø ngɑle kì dhø Kemi Kwër. Kɑ reme kiny ri këli lɑm yi ókwër wɑ̈ddi Aɑron, gø wen ge wenø, kɑ gïg kwɑnye gen kì ree gɑ møg rɑ̈bbi Jwøng-ɑ Ácwɑ̈ɑ̈j, rɑ̈be dwɑ̈li kömi cïn, kɑ røng kɑ̈ɑ̈le wɑ̈g, geki dwɑ̈l-ɑ kömi gen, kí dwɑ̈l-ɑ yij dyel, kí dhøg ócuny geki dwɑ̈l-ɑ ree, kɑ ge rɑ̈b yi ókwërø kì wïj këli lɑm, gɑ gënh-ɑ nyi rɑ̈b bëne, me yømi tole mïni pyëw Jwøng-ɑ Ácwɑ̈ɑ̈j. Dwɑ̈lø bëne bɑ mi Jwøng-ɑ Ácwɑ̈ɑ̈j. Mïdhu cigg møg kì yethi rïjj bënn kì keny-ɑ bëëd yi wun gïti ɑtheer kinni, wu ko cyɑ̈ɑ̈m ki dwɑ̈lø geki remø kinni tek. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, i cege tyëng Isrɑil kinni, keløg dhɑnhø óbɑ̈jjø ki gïjø ɑ́kyel kì kelli cigg-ɑ ɑ́muuj yi Jwøng-ɑ Ácwɑ̈ɑ̈j, e gø pɑ ceg yi en ki tøønyø, kɑ ogöögø ki gïjø me bɑ ɑkerø, gwøge gïg: Keløg ɑ́ Ókwër-ɑ Dwøng ɑ göögø ki bɑ̈jjø, kɑ ji muuje ki ryɑ̈g, kɑ̈ne ki wɑdh ówöb men muuje Jwøng-ɑ Ácwɑ̈ɑ̈j ɑ́ gënhi orøg. Kɑ̈ɑ̈le wɑnhɑni dhø Kemi Kwër bøli Jwøng-ɑ Ácwɑ̈ɑ̈j, kɑ cinge cïbe wïj wɑnhɑni, ngɑɑle wɑnhɑni kì bøli Jwøng-ɑ Ácwɑ̈ɑ̈j. Kɑ Ókwër-ɑ Dwøng kɑ̈bbe kì ri remi wɑnhɑni kɑ gø kïdhe yij Kemi Kwër. Kɑ ókwërɑni lwede jwɑ̈ɑ̈ge yij remø, kɑ kïnye piny ki remø kì bøli Jwøng-ɑ Ácwɑ̈ɑ̈j kì buti gëng tyel ɑ́bïryew. Kɑ ri tùngi këli bɑkur kì yij Kemi Kwër gɑ̈jje ki remø, kɑ kwï rem-ɑ döng bëne køny thɑ këli lɑm kì dhø Kemi Kwër. Kɑ dwɑ̈li yij wɑnh-ɑ bɑ gënhi orøg kɑ̈ɑ̈le wɑ̈g bëne, kí røng geki dwɑ̈l-ɑ kömi gen, kí dhøg ócuny geki dwɑ̈l-ɑ ree. Kwɑɑny gen yi ókwërø kɑ gï rɑ̈be kì wïj këli lɑm kì dhø Kemi Kwër, ni kenyi gwøøg gënhi mër. De kwɑɑny rïngi wɑdh bëne kí wïje, kí tyelle, kí cïnne kí wɑyye, kɑ ge tëër ngɑ̈ɑ̈j kɑɑl, tung-ɑ nyi weddi búr, bɑ kej kwër, kɑ ge rɑ̈b yi ókwërø kì kunɑni ki mɑɑc yugg kì kömi búr. Tyëng Isrɑil ócuggø bɑ̈jjø bënn, kɑ ge ogöögø ki gïjø me bɑ ɑkerø yi Jwøng-ɑ Ácwɑ̈ɑ̈j, kɑ ge orøngø. De menɑni ócuggø bëëdø e nuti yodø yi buri jøgdøngø kinni bɑ orøg, keny-ɑ óyood menɑni kinni bɑ bɑ̈jjø, pödhø bëne ceg-ɑ kɑ̈nø ki wɑdh ɑ́ gëëdhi kipe orøng-ɑ ɑ́gwøg yi ji, kɑ gø kɑ̈ɑ̈l gen dhø Kemi Kwër. Kɑ jøgdøngø cinggi gen cïb gen wïj wɑnhɑni kì bøli Jwøng-ɑ Ácwɑ̈ɑ̈j, kɑ wɑnhɑni ngɑl kì bøli Jwøng-ɑ Ácwɑ̈ɑ̈j. Kɑ Ókwër-ɑ Dwøng kïdhe yij Kemi Kwër ki remø. Kɑ ókwërɑni lwede jwɑ̈ɑ̈ge yij remø, kɑ kïnye piny kì bøli Jwøng-ɑ Ácwɑ̈ɑ̈j, kì buti gëng ki remø tyel ɑ́bïryew. Kɑ ri tùngi këli bɑkur kì bøli Jwøng-ɑ Ácwɑ̈ɑ̈j gɑ̈jje ki remø, kɑ kwï remø men-ɑ döng bëne køny thɑ këli lɑm ki dhø Kemi Kwër. Kɑ dwɑ̈lø bëne kɑ̈ɑ̈l wɑ̈g yi ókwërø, kí røng geki dwɑ̈l-ɑ kömi gen, kí dhøg ócuny geki dwɑ̈l-ɑ ree, kɑ gï rɑ̈be kì wïj këli lɑm. Kɑ wɑdh gwøg ni kɑ ɑ́gwøøg wɑɑdh gënhi orøg, o ókwërø kwɑ̈jje kiper gen, o lɑ́ɑ̀w ódwöög piny kipe orøøg gen. Kɑ kwï wɑdh men-ɑ ɑ́döng bëne kïdhi ngɑ̈ɑ̈j kɑɑl kɑ rɑ̈b ni kɑ ɑ́rɑ̈ɑ̈b wɑɑdh tyeli mɑl, bɑ gënhi orøg me gøøm bøli pödhø bëne. Keløg ɑ́ jɑgø ɑ bɑ̈jji, kɑ ogöögø ki gïjø me bɑ ɑkerø yi Jwøge, Jwøng-ɑ Ácwɑ̈ɑ̈j, kɑ bɑ̈jje yod yi en, wɑlɑ̀ ócɑɑg kɑ pɑ̈ddø ki orøge, kɑ̈ne ki ónywøg wɑ̈dtegø me bong gïjø me rɑj kì ree. Cïbe cinge wïj ónywøngɑni, kɑ ngɑl kì keny-ɑ nyi ngɑɑl gënh-ɑ nyi rɑ̈b bëne, kì bøli Jwøng-ɑ Ácwɑ̈ɑ̈j, bɑ gënhi orøg. Kɑ ókwërɑni kɑ̈bbe ki remi gënhi orøg menɑni kɑ gø gɑ̈ɑ̈je ri tùngi këli lɑm, kɑ rem-ɑ ɑ́döng bëne, kønye thɑ këli lɑm. Kɑ dwɑ̈le bëne rɑ̈be kì wïj këli lɑm, ni kenyi rɑ̈be dwɑ̈li gënhi mër. O ókwërø kwɑ̈jje kipere, o lɑ́ɑ̀w dwöög piny kipere. Keløg dhɑnhø ɑ́kyel kì kelli ji óbɑ̈jjø, kɑ ogöögø ki gïjø me bɑ ɑkerø yi Jwøng-ɑ Ácwɑ̈ɑ̈j, kɑ bɑ̈jje yod yi en, wɑlɑ̀ ócɑɑg kɑ pɑ̈ddø ki orøge, kɑ̈ne ki dyel ɑ́tegø me bɑ bwøng me bong gïjø me rɑj kì ree, kipe gïn-ɑ ɑ́bɑj yi en. Kɑ cinge cïbe wïj dyelɑni, kɑ gënhi orøg menɑni ngɑl kì keny-ɑ nyi ngɑɑl gënh-ɑ nyi rɑ̈b bëne. Kɑ ókwërø kɑ̈bbe kì ri remø, kɑ gø gɑ̈ɑ̈je ri tùngi këli lɑm ki lwede, kɑ rem-ɑ ɑ́döng bëne kønye thɑ këli lɑm. Kɑ dwɑ̈lø bëne kɑ̈ɑ̈le wɑ̈g ni dwɑ̈li gënhi mër, ɑ́ me yømi tole mïni pyëw Jwøng-ɑ Ácwɑ̈ɑ̈j. O ókwërø kwɑ̈jje kipere, o lɑ́ɑ̀w dwöög piny kipere. Keløg gënhi orøg men-ɑ kɑ̈ɑ̈l yi en bɑ dyel rømø, kɑ̈ɑ̈le gøn ɑ́ mɑdh me bong gïjø me rɑj kì ree. Kɑ cinge cïbe wïj gënhɑni, kɑ ngɑl ki ngɑli gënhi orøg kì keny-ɑ nyi ngɑɑl gënh-ɑ nyi rɑ̈b bëne. Kɑ ókwërø kɑ̈bbe kì ri remi gënhɑni ki lwede, kɑ gø gɑ̈ɑ̈je ri tùngi këli lɑm, kɑ rem-ɑ döng bëne køny thɑ këli lɑm. Kɑ dwɑ̈lø kɑ̈ɑ̈l wɑ̈g bëne ni dwɑ̈li gënhi mër, kɑ rɑ̈bbi Jwøng-ɑ Ácwɑ̈ɑ̈j yi ókwërø kì wïj këli lɑm, o ókwërø kwɑ̈jje kipere, o lɑ́ɑ̀w dwöög piny kipere. Gënhi orøg di dwɑddø keløg møg obɑjø yi dhɑnhø: Keløg dhɑnhø ocwølø kì burø kipe kinni o kwøbe gïn lïng en, wɑlɑ̀ gïn liidh en, de ngɑnɑni okudø ki kwøbbɑni, ngɑnɑni ɑ́røngi. Ngɑn nywɑl gïn ywëdhø, ying-ɑ́ lɑ̈y me thøø kì kelli lɑ̈yy-ɑ bɑ ɑkerø ki cɑmø, wɑlɑ̀ twöngø me bɑ ɑkerø, ngɑnɑni ɑ́bɑ̈jji, o ɑ́göög e ywëdhø, cɑgg gø kwïj en kinni gø nywɑɑl en. Ngɑn nywɑl gïjø ɑ́kyel kì kelli jɑmm-ɑ nyi ywëdh dhɑnhø, e gø kwïje, kɑ óyïddø ki ngɑn köbbii møgɑni, ɑ́göög ki ngɑn-ɑ ɑ́bɑ̈jji. Ngɑn dhøge bodh kɑ óköngø, ying-ɑ́ köngø me døøj wɑlɑ̀ me rɑj, cɑgg e köngø kɑ per gwøgi gïndøj wɑlɑ̀ gïnrɑj de gø ɑ́yode kì cyɑ̈n, ɑ́göög ki ngɑn-ɑ ɑ́bɑ̈jji. Ngɑn yod ree kinni bɑ̈jjø ki ɑ́kyel kì kelli møgɑk, tönge gïn-ɑ ɑ́bɑj yi en. Codhe, kɑ kɑ̈ne yï Jwøng-ɑ Ácwɑ̈ɑ̈j ki gënhi orøge men-ɑ ɑ́gwøg yi en, kɑ̈ɑ̈le gøn ɑ́ dyel rømø wɑlɑ̀ ɑ́tegø, o ókwërø kwɑ̈jje kiper dwöögi lɑ́ɑ̀w piny kipe orøge. O keløg e pɑ yïddi ki dyel yi jɑdi cinge, muuje Jwøng-ɑ Ácwɑ̈ɑ̈j ki gëëdhi me bɑ ɑkùr ɑ́ryew mø døngø, wɑlɑ̀ muuje ki ɑkùr ójwɑt ɑ́ryew, o ɑ́kyel bëëde ɑ́ gënhi orøg, o men-ɑ kyeelø bëëde ɑ́ gënh-ɑ nyi rɑ̈b bëne. Kɑ gï kɑ̈ɑ̈le yï ókwërø, kɑ ókwërø kwɑnye gëëdhi møti, kɑ gø ngɑle kì tyeli töge, de wïje ko ngule wɑ̈g. Kɑ wɑɑng ngëdi këli lɑm kïnye ki remø, kɑ remø men-ɑ döng, biije thɑ këli lɑm, bɑ gënhi orøg. Kɑ ryeew gen muuj ɑ́ gënh-ɑ nyi rɑ̈b bëne, kɑ gwøg ki gwøng-ɑ nyi gwøøg gënh-ɑ nyi rɑ̈b bëne ceth. O ókwërø kwɑ̈jje kipere, o lɑ́ɑ̀w ódwöög piny kipere. O keløg e pɑ yïddi ki ɑkùr, yi cɑni wɑnge, kɑ̈ne ki gïncɑm ɑ́ gëëdhi kipe orøge, kɑ̈ne ki kïlø ɑ́kyel mi møng-ɑ búr me ngedhø, kɑ ree ko kïdhi ki møw, o köme ko cïbi ki bɑkur, mɑ́ e bɑ gënhi orøg. Kɑ gø mëgge ókwërø, o ókwërø kɑ̈bbe kì cinge, o gø rɑ̈be kì wïj këli lɑm, gø rɑ̈bbe’ Jwøng-ɑ Ácwɑ̈ɑ̈j ɑ́ gënhi orøg. O ókwërø kwɑ̈jje kipere, kipe göj ɑ́kyel men-ɑ ɑ́gwøge kì ri møgɑk, o lɑ́ɑ̀w ódwöög piny kipere. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, i keløg dhɑnhø óbɑ̈jjø kɑ jɑmmi kwëër Jwøng-ɑ Ácwɑ̈ɑ̈j rënye, muuje Jwøng-ɑ Ácwɑ̈ɑ̈j ki gëëdhi, kɑ̈ne ki órömø me dële døøj, kɑ kwɑnni ngyëny møg-ɑ cuggi ngewii nyodh yi ókwërø, ki ngyëny-ɑ ngëëw kì kej kwër, o ngyënyyɑni cole gïn-ɑ ɑ́rënyi yi en kì ri jɑmmi kwër, keny-ɑ órum kwör ki cïb kömi ngyënyyi dyel, ɑ́ ɑ́kyeel ɑ́bïj, kɑ gø mëgge ókwërø, o wiy yi ókwërø, kɑ̀ rume ki muuji dyeel gedh, o Jwøng-ɑ Ácwɑ̈ɑ̈j lɑɑwe ódwööge piny kipere. Keløg dhɑnhø óbɑ̈jjø kɑ ogöögø ki gïjø me bɑ ɑkerø yi Jwøng-ɑ Ácwɑ̈ɑ̈j, ngɑnɑni ɑ́røngi, o orøge ceg-ɑ cung kì köme ceth. Ngɑnɑni kɑ̈ne yï ókwërø ki gëëdhi kipe orøg. Kɑ̈ne ki órömø me dële døøj bëne, kwɑnni ngyëny møg-ɑ cuggi ngewii ónyodh yi ókwërø, o wiy yi ókwërø kɑ̀ rume’ muujø ki dyeel gedh, kipe orøng-ɑ ɑ́gwøge gø kwïje. O Jwøng-ɑ Ácwɑ̈ɑ̈j lɑɑwe ódwööge piny kipere. Menɑni bɑ gënhi orøg, mɑ́ ngɑnɑni ɑ́røngi kì bøli Jwøng-ɑ Ácwɑ̈ɑ̈j. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Keløg dhɑnhø óbɑ̈jjø kɑ orøngø kì bøli Jwøng-ɑ Ácwɑ̈ɑ̈j, kɑ óbɑ̈nyø ki döggi ɑkɑn wɑ̈n, wɑlɑ̀ óbɑ̈nyø ki muuji gïn-ɑ ómɑ̈ggii o gø mïdhe ɑ́ mi wɑ̈n, wɑlɑ̀ óbɑ̈nyø ki dwøøgi gïn kwɑɑny en ki wëënyø, wɑlɑ̀ gïn cɑɑg en ki kɑbø, wɑlɑ̀ yod-ɑ gïi dhɑnhø kɑ gø mɑ̈ɑ̈ne, wɑlɑ̀ cɑɑg-ɑ köngø ki pyed, ki gïjø me gwøøg en, kɑ orøngø, ke yood bɑ̈jje kí orøge, dögge gïn-ɑ ɑ́kwɑnye ki wëënyø wɑ̈n, wɑlɑ̀ gïn-ɑ kwɑɑl en, wɑlɑ̀ gïn-ɑ ókɑ̈nnii, wɑlɑ̀ gïn lɑ̈ɑ̈nyø kɑ gø yode, wɑlɑ̀ gïn-ɑ köme ɑ́könge ki köngi pyed, cole gïnɑni, kɑ köme kïdhe ki ɑ́kyeel ɑ́bïj kì ri ngyënyy-ɑ di ngeew gïnɑni. Cule gøn wïi gïnɑni ceth keny-ɑ óyode bɑ̈jje. Kɑ kɑ̈ne yï ókwërø ki órömø me dële døøj bëne, ɑ́ kwör-ɑ cule Jwøng-ɑ Ácwɑ̈ɑ̈j, ɑ́ gëëdhi. O ókwërø kwɑ̈jje kipere kì bøli Jwøng-ɑ Ácwɑ̈ɑ̈j, o lɑ́ɑ̀w ódwöög piny kipere, o orøng-ɑ gwøøg en lɑ̈ɑ̈ny.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, i köbbe Aɑron geki wɑ̈dde kinni, wiy gënh-ɑ nyi rɑ̈b bëne bëëde kì mɑc kì wïj këli lɑm, e tyëg-ɑ wɑ̈r bëne gïti mwøl, kɑ wiy mɑc lyele ceth. Codhe, kɑ ókwërø ɑ́ywödhe geki ɑköje møg-ɑ bɑ ógudhi korø lønye ree, kɑ búr twɑ̈ɑ̈re wɑ̈g kì wïj këli lɑm, kɑ gø cïbe wɑɑng ngëdi këlɑni. Codhe, kɑ ógudhe wile ki ógudh møøgø, kɑ búr tëëre ngɑ̈ɑ̈j kɑɑl keny-ɑ bɑ ɑkwër e dhïw. Wiy mɑc bëëde e olyelø kì wïj këli lɑm, ko wëggi thøø, kɑ nyi lëngi yi ókwërø ki yugg yethi cyɑ̈ng kì mwøl, kömi yuggɑni ɑ nyi tɑɑge gënh-ɑ nyi rɑ̈b bëne, geki dwɑ̈li gënhi mër. Wiy mɑc bëëde e olyelø ceth, ko wëggi thøø kinni tek! O møg bene gen ciggi kër-ɑ nyi muuj møng-ɑ búr kì bøli Jwøng-ɑ Ácwɑ̈ɑ̈j kì wïj këli lɑm, Kɑ̈bbi ókwërø ki møng-ɑ búr cinge pɑ̈ng, kɑ møw kwɑnye, kí bɑkur-ɑ kömi møng-ɑ búr; kɑ gï rɑ̈be kì wïj këli lɑm. Yømi tool gen bɑ men mïni pyëw Jwøng-ɑ Ácwɑ̈ɑ̈j. Men-ɑ döng kì ree bëne cɑm yi Aɑron geki wɑ̈dde, cɑm ɑ́ olwëny kì keny-ɑ bɑ ɑkwër kì yij gøl Kemi Kwër. Ree ko kïdhi ki kɑmïrɑ̀ kɑ̀ thɑɑlii, mɑ́ e ɑ́gwøg yi yɑn ɑ́ mi ókwër kì ri gëdhh-ɑ nyi rɑ̈bbi yɑn. Bɑ gïi kwër me dwøng ni gënhi bɑ̈jjø geki gënhi orøg. Nyi cɑm yi wɑ̈ddi Aɑron, e bɑ cigg kì yethi rïjj bënn gïti ɑtheer, ko nywɑl yi ngɑn pɑth ki ɑkwër. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, i köbbe Aɑron geki wɑ̈dde kinni bene gïn-ɑ nyi muuj yi ngɑn-ɑ røny èn, kì cyɑ̈ng-ɑ rønyii, ngɑn-ɑ røny kɑ̈ne kì cyɑ̈ng-ɑ rønyii ki kïlø ɑ́kyel mi møng-ɑ búr me ngedhø, møng-ɑ búr men nyi muuj ceth, bude muuj kì mwøl, o bun-ɑ kyeelø muuj kì böörø. Møng-ɑ búrɑni bëëde e bɑ ɑnyöm ki møøw dhetun, o bɑ ɑthɑl ki thɑɑgø, codhe kɑ pøddi, o muuj ɑ́ men mïni pyëw Jwøng-ɑ Ácwɑ̈ɑ̈j. Nyi muuj ókwërr-ɑ døngø møg-ɑ nyi røny gɑ kɑ̈jji wëëg gen, ki møng-ɑ búr me ni menɑni e bɑ kwööng Jwøng-ɑ Ácwɑ̈ɑ̈j gïti ɑtheer. Kɑ nyi rɑ̈b bëne. Gïn-ɑ muuj yi ókwërø nyi rɑ̈b bëne, ko di men cɑm kì ree. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, i köbbe Aɑron geki wɑ̈dde kinni, bene gen ciggi gëdhhi orøg ek: Nyi ngɑɑl gëdhhi orøg kì bøli Jwøng-ɑ Ácwɑ̈ɑ̈j, kì keny-ɑ nyi ngɑɑl gënh-ɑ nyi rɑ̈b bëne. Bɑ gïi kwër me dwøng. Kɑ cɑm yi ókwër-ɑ ɑ́gwøgii kì keny-ɑ bɑ ɑkwër kì yij gøl Kemi Kwër. Ko nywɑl yi ngɑn me nuti kwërø, o keløg e dɑ reme me kedhi ri ógødh, lwøøg ógønhɑni kì keny-ɑ bɑ kej kwër. Kɑ ɑ́tɑɑy lɑ̈bø men-ɑ́ yije ɑ́thɑɑlii tøg, de keløg e óthɑɑl ɑ yij ɑ́tɑy me bɑ dilɑl, yoj kɑ lɑw ki pï. Cɑm-ɑ yi ókwërr-ɑ cwøw keti gen, mɑ́ e bɑ gïi kwër me dwøng. Gïn ngɑl ɑ́ gëëdhi kɑ reme kïdhi yij Kemi Kwër, ko di gïjø me cɑm kì ree, de ceg ki rɑ̈bø ki mɑc bëne. Møg bene gen ciggi gënhi orøg, bɑ kwër me pere teg kiree: ngɑɑl gënhi orøg kì keny-ɑ nyi ngɑɑl gënh-ɑ nyi rɑ̈b bëne, kɑ reme kiny ri këli lɑm e owenø. O dwɑ̈le, kí ótïd, kí dwɑ̈l-ɑ kömi cïn kɑ̈ɑ̈l wɑ̈g yi ókwërø, kí røng ryeet geki dwɑ̈l-ɑ kömi gen, kí dhøg ócuny geki dwɑ̈l-ɑ ree, kɑ ge rɑ̈b yi ókwërø kì wïj këli lɑm; rɑ̈bbi gen Jwøng-ɑ Ácwɑ̈ɑ̈j gɑ gënhi orøg. Jøg-ɑ cwøw bënn kì gøl kwër, gøl Aɑron ócuggø cɑm ki gënhi orøg, de cɑm ɑ kej kwër, mɑ́ e bɑ gïi kwër me dwøng kiree. Ciggi gënhi bɑ̈jjø geki gënhi orøg bɑ ɑ́kyel, rïngø bɑ mi ókwër-ɑ gwøg kwër. O ókwër-ɑ thyer gënh-ɑ nyi rɑ̈b bëne mi ngɑn kɑ̈ni, en ɑ kwɑny pyëën gïn-ɑ ngɑl, ying-ɑ́ dhyɑng wɑlɑ̀ dyel. O gïncɑm men-ɑ muuj e bɑ ɑbul ki purun, wɑlɑ̀ men-ɑ bɑ ɑkyel, wɑlɑ̀ men-ɑ bɑ ɑthɑl ki thɑɑgø, bɑ mi ókwër-ɑ thërrii Jwøng-ɑ Ácwɑ̈ɑ̈j. De gïgcɑmm-ɑ kɑ̈ɑ̈l ge nuti cyegø bënn, ying ge ónyömø ki møw wɑlɑ̀ nuti, ge bɑ mø wɑ̈ddi gøl Aɑron, ɑ løg ókwër, pɑ̈ngi e pɑ̈r kì kelli gen. O møg bene gen ciggi gënhi mër, men-ɑ nyi mëggi Jwøng-ɑ Ácwɑ̈ɑ̈j. Keløg e muuj ɑ́ mi pwøj, muuj kyeel ki gïn-ɑ ngɑl, e bɑ ópun me bɑ olwëny me ónyömø ki møøw dhetun, wɑlɑ̀ ɑbul men-ɑ ókïdhø ki møw, wɑlɑ̀ men-ɑ óthɑlø ki thɑɑgø o ree ókïdhø ki møøw dhetun. Muuje thyew ki ópun me bɑ ówɑj kyeel ki gënhi mër men-ɑ pwøje Jwøng-ɑ Ácwɑ̈ɑ̈j. Muuje kì ri wɑ̈thi ópùnɑni bënn, gï thërre’ Jwøng-ɑ Ácwɑ̈ɑ̈j, ge bɑ mø ókwër-ɑ kwɑny remø kɑ gø kinye ri këli lɑm. Cɑɑm rïngi gënhi mër kì cyɑ̈ng-ɑ ngɑlii ceth, ko di kwëe me wiy gïti dhuki. O keløg ɑ́ gïn muuj ɑ́ wïj köngø wɑlɑ̀ muuj yi dhɑnhø ɑ́ jwödhø, cɑɑm rïnge cyɑ̈ng-ɑ ngɑɑlii. De keløg e dɑ men döng, ócuggø cɑmø dhuki. Ke di rïngø me döng këti, rɑ̈b ki mɑc kì ri dɑ̈ɑ̈g cyɑ̈ng. Keløg e dɑ ngɑn cyɑ̈mø kì ri dɑ̈ɑ̈g cyɑ̈ng ki rïngi gïn ngɑɑl en ɑ́ gënhi mër, gënhɑni pɑ yïëy yi Jwøng-ɑ Ácwɑ̈ɑ̈j këti, mɑ́ e bɑ gïn ywëdhø kì yï Jwøng-ɑ Ácwɑ̈ɑ̈j, o ngɑnɑni ɑ́göög ki bɑ̈jjø. O rïngø men nywɑl yi gïn ywëdhø, ko cɑm wun, ceg wu en ki rɑ̈bø’ mɑc. Ngɑn ywëdhø, ɑ løg ngɑn di gïn wør en, ko cyɑ̈ɑ̈m ki rïngi gïi kwër. De ke de ngɑn cyɑ̈mø ki rïngi gïi kwër e ywëdhø, kɑ̈ɑ̈l ngɑn ni menɑni wɑ̈g kì kelli jie. Thyew keløg e dɑ ngɑn cyɑ̈mø ki rïngi gïi kwër, e nywɑ̈ddø ki gïn ywëdhø, ying e ywëdh-ɑ yi dhɑnhø wɑlɑ̀ lɑ̈y, kɑ̈ɑ̈l ngɑn ni menɑni wɑ̈g kì kelli jie. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, dwɑ̈li dhyɑng, kí dwɑ̈li dyel rømø, kí dwɑ̈li dyel ɑ́tegø ko cɑm yi wun. Dwɑ̈li gïnthøø kete, wɑlɑ̀ dwɑ̈li gïn-ɑ ónɑ̈ɑ̈g-ɑ yi lɑ̈ɑ̈y pɑ̈l, göögu gen ki jɑmmì møøgø, de ge ko cɑm wun. Ke di ngɑn cyɑ̈mø ki dwɑ̈li gïn ngɑ̈lli Jwøng-ɑ Ácwɑ̈ɑ̈j, kɑ̈ɑ̈l ngɑn ni menɑni wɑ̈g kì kelli jie. Wu ko cyɑ̈ɑ̈m ki remø kinni tek, wiy cɑm yi lɑ̈yy geki winy. Ke di ngɑn cyɑ̈mø ki remø, kɑ̈ɑ̈l ngɑn ni menɑni wɑ̈g kì kelli jie.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, ngɑn kɑ̈ni yï Jwøng-ɑ Ácwɑ̈ɑ̈j ki gënhi mër, muuje tung-ɑ bɑ mi kwër, muuje mi Jwøng-ɑ Ácwɑ̈ɑ̈j ki cinge ceth, kɑ̈ɑ̈le dwɑ̈lø geki ɑ́ngɑdø kɑ gï thërre Jwøng-ɑ Ácwɑ̈ɑ̈j. Kɑ dwɑ̈lø rɑ̈b yi ókwërø kì wïj këli lɑm, o ɑ́ngɑdø bɑ mi gøl kwër. O rɑ̈ɑ̈m kyëj bɑ mi ókwër-ɑ thërrii Jwøng-ɑ Ácwɑ̈ɑ̈j, ɑ løg ókwër-ɑ ɑ́kɑ̈l dwɑ̈lø geki remi gënhi mër. Mɑ́ ɑ́ngɑdø geki rɑ̈ɑ̈m kyëj kì ri gëdhhi mër møg-ɑ nyi kɑ̈ɑ̈l yi tyëng Isrɑil, ɑ ɑ́kwɑny yi yɑn, kɑ ge mëggɑ gøl kwër, møgɑni cungi gɑ cigg kì kömi tyëng Isrɑil kì ri rïjj bënn e gïti ɑtheer.” Møg bene gen tuung gøl kwër kì ri gëdhhi mër møg-ɑ nyi muuj Jwøng-ɑ Ácwɑ̈ɑ̈j, kì cyɑ̈ng-ɑ røøny gen gɑ ókwërri Jwøng-ɑ Ácwɑ̈ɑ̈j. Men-ɑ ɑ́kwøb yi Jwøng-ɑ Ácwɑ̈ɑ̈j kinni nyi mëggi gen cyɑ̈ng-ɑ røøny gen, e møgɑni ceg bëëdø gɑ cigg kì kömi tyëng Isrɑil kì ri rïjj bënn, gïti ɑtheer. Møgɑk bënn bene gen Ciggi Jwøng-ɑ Ácwɑ̈ɑ̈j kipe gënh-ɑ nyi rɑ̈b bëne, ɑ løg gïncɑm, ki gënhi bɑ̈jjø, ki gënhi orøg, ki gïi röny, ki gënhi mër. Møg-ɑ ɑ́cïgi Mosɑ̀ yi Jwøng-ɑ Ácwɑ̈ɑ̈j kì wïj Kïti Sinɑy, kì cyɑ̈ng-ɑ ɑ́cege tyëng Isrɑil kì yij pɑ̈ɑ̈l Sinɑy ki kwøbbi kɑ̈nø ki gïn muuj Jwøng-ɑ Ácwɑ̈ɑ̈j. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kwɑny Aɑron geki wɑ̈dde, kí ógudh, kí møøw röny, kí wɑdh me bɑ gënhi bɑ̈jjø, kí órömm ɑ́ryew, kí ɑ́ridh me yije di ópùn-ɑ olwëny. Kɑ ji bënn cøng dhø Kemi Kwër.” Kɑ møg-ɑ ɑ́kwøb yi Jwøng-ɑ Ácwɑ̈ɑ̈j gwøg yi Mosɑ̀, kɑ ji bënn ri gen cøng gen dhø Kemi Kwër. Kɑ ji köbbi yi Mosɑ̀ kinni, “Bene ge møg-ɑ ɑ́ceg yi Jwøng-ɑ Ácwɑ̈ɑ̈j, ɑ gwøg yi yɑn ek.” Kɑ Aɑron thyer geki wɑ̈dde yi Mosɑ̀, kɑ gï lwøge ki pï. Kɑ ɑ́ywönhthinh lønye ri Aɑron, kɑ gø wene ki wëëni, kɑ ɑ́ywönhdwøng lønye köme, kɑ pɑrø lønye kömi ɑ́ywönhdwøng, kɑ gø twöje ki wëni pɑrø, kɑ bøj cïbe köme, kɑ Urïm geki Thumïm kïdhe yij bøj. Kɑ thɑɑg cïb wïj Aɑron yi Mosɑ̀, kɑ ópɑni dhɑb men-ɑ ógwedø kinni “Kwëër Jwøng-ɑ Ácwɑ̈ɑ̈j” ngɑɑbe ri thɑɑg kì bøle, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j. Kɑ møøw röny kwɑny yi Mosɑ̀, kɑ Kemi Kwër gïïnye geki jɑmm-ɑ yije bënn, kɑ gï kwëre. Kɑ ri këli lɑm kïnye ki møw tyel ɑ́bïryew, kɑ këli lɑm gïïnye geki jɑmme bënn kí ɑ́tɑy geki dööle, kɑ gï kwëre. Kɑ wïj Aɑron kunye ki møøw röny, kɑ Aɑron gïïnye, kɑ gø kwëre. Kɑ wɑ̈ddi Aɑron thyer yi Mosɑ̀, kɑ ri gen lunye ki ɑ́ywödhh, kɑ gï wene ki wënnì, kɑ wɑ̈thi gen kïdhe ki thɑ̈ggì, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j. Kɑ wɑnh-ɑ bɑ gënhi orøg thyer yi Mosɑ̀, kɑ Aɑron geki wɑ̈dde cinggi gen cïb gen wïje, kɑ ngɑl yi Mosɑ̀, codhe kɑ Mosɑ̀ ókɑ̈bbø ki remø kɑ gø kinye ri tùngi këli lɑm ki lwede gø wene’ wenø, kɑ rem-ɑ ɑ́döng bëne kønye thɑ këli lɑm, ɑkwëre gøn kɑ gø thyere. Kɑ dwɑ̈l-ɑ kömi cïn bëne kwɑny yi Mosɑ̀, kí dhøg ócuny geki dwɑ̈l-ɑ ree, kí røng ryeet geki dwɑ̈l-ɑ kömi gen, kɑ gï rɑ̈be kì wïj këli lɑm. Kɑ rïngi wɑdh bëne, kí pyëne, kí cïnne geki wɑyye rɑ̈be kì ngɑ̈ɑ̈j kɑɑl ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j. Kɑ óröm-ɑ bɑ gënh-ɑ nyi rɑ̈b bëne thyer yi Mosɑ̀, kɑ Aɑron geki wɑ̈dde cinggi gen cïb gen wïj órömɑni. Kɑ ngɑl, kɑ reme kiny ri këli lɑm yi Mosɑ̀ gø wene’ wenø. Kɑ órömø ngølli yi Mosɑ̀, kɑ gø rɑ̈be geki wïj, kí dwɑ̈lø, kɑ cïn geki tyel lwøge ki pï, kɑ gï rɑ̈bbe Jwøng-ɑ Ácwɑ̈ɑ̈j bënn kì wïj këli lɑm, e yømi tool gen bɑ men mïni pyëw Jwøng-ɑ Ácwɑ̈ɑ̈j, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j ceth. Kɑ óröm-ɑ kyeelø, órömi röny thyer yi Mosɑ̀, kɑ Aɑron geki wɑ̈dde cinggi gen cïb gen wïj órömɑni, kɑ ngɑl yi Mosɑ̀. Akɑ̈bbi Mosɑ̀ kì ri reme, kɑ gø gɑ̈ɑ̈je ri ɑ́kwɑɑn yïth kyëëj Aɑron, kí ri lwedi cinge lwen-ɑ dwøng kì tuung kyëj, kí ri lwedi tyele, lwen-ɑ dwøng kì tuung kyëj. Kɑ wɑ̈ddi Aɑron ónyïngø, kɑ ɑ́kwɑnni yïthhi gen, kí lweddi gen, lweddi tyelli gen kí cinggi gen, lwedd-ɑ døngø kì tuung kyëj gɑ̈jji ki remø yi Mosɑ̀, kɑ ri këli lɑm kïnye ki remø gø wene’ wenø, kɑ dwɑ̈lø kwɑnye kí ótïd, kí dwɑ̈l-ɑ kömi cïn bëne, kí dhøg ócuny geki dwɑ̈l-ɑ ree, kí røng ryeet geki dwɑ̈l-ɑ kömi gen, kí rɑ̈ɑ̈m kyëj. Kɑ ókɑ̈bbø kì yij ɑ́rinh-ɑ bøli Jwøng-ɑ Ácwɑ̈ɑ̈j ki ópuun olwëny ɑ́kyel, kí ɑbulø ɑ́kyel me bɑ ɑnyöm ki møøw dhetun, kí ɑbulø me reeb ɑ́kyel. Kɑ gï cïbe kömi dwɑ̈lø geki rɑ̈ɑ̈m kyëj. Kɑ gïgɑni bënn cïbe cinggi Aɑron geki wɑ̈dde, kɑ gï thërri gen Jwøng-ɑ Ácwɑ̈ɑ̈j. Codhe, ɑkwɑɑny gen yi Mosɑ̀ kì cinggi gen, kɑ gï rɑ̈be kì wïj këli lɑm, gɑ gënh-ɑ nyi rɑ̈bbi Jwøng-ɑ Ácwɑ̈ɑ̈j bëne mi röny, me yømi tole mïni pyëw Jwøng-ɑ Ácwɑ̈ɑ̈j. Kɑ ɑ́ngɑni dyeel röny kwɑny yi Mosɑ̀ kɑ gø thërre Jwøng-ɑ Ácwɑ̈ɑ̈j. Ángɑnɑni bɑ mi Mosɑ̀ ni kɑ ɑ́cegii yi Jwøng-ɑ Ácwɑ̈ɑ̈j. Kɑ Mosɑ̀ ókɑ̈bbø kì ri møøw röny, kɑ ókɑ̈bbø kì ri rem-ɑ wïj këli lɑm, kɑ gø kinye ri Aɑron kí ri ógudhe, kí ri wɑ̈dde kí ógudhi wɑ̈dde, kɑ Aɑron kwëre, kí ógudhe, kí wɑ̈dde kí ógudhi gen. Kɑ Aɑron geki wɑ̈dde köbbi yi Mosɑ̀ kinni, “Thɑlu rïngø kì dhø Kemi Kwër, kɑ cɑm wun kì kenyɑni geki gïncɑm men-ɑ yij ɑ́riidh röny, ni kɑ ɑ́cïg Jwøng-ɑ Ácwɑ̈ɑ̈j kinni, cɑm-ɑ yi Aɑron geki wɑ̈dde. Kɑ men-ɑ ódöng kì ri rïngø geki gïncɑm rɑ̈b wun ki mɑc. Bëëd wun kì gøl Kemi Kwër, wu ko kedhi wɑ̈g gïti keny-ɑ óthumi cyɑ̈ng ɑ́bïryew, mɑ́ röny rum-ɑ́ɑ̀ bɑng cyɑ̈ng ɑ́bïryew. Wɑ ceg kɑ cegø yi Jwøng-ɑ Ácwɑ̈ɑ̈j kinni i gwøg wɑ gïn-ɑ ɑ́gwøg yi wɑ dicyɑ̈ngtïn, kipe kinni o orøøg wun lɑ̈ɑ̈ny. Bëëd wun kì gøl Kemi Kwër, kì dicɑ̈ng kí wɑ̈r, ki cyɑ̈ng ɑ́bïryew, wu ko pɑ̈nyi kedhi wɑ̈g, bëëd wun wu gøgg-ɑ gïg-ɑ ɑ́ceg yi Jwøng-ɑ Ácwɑ̈ɑ̈j, keløg møgɑni pɑ lïngi yi wun, wu ceg-ɑ thøø. Bene møg-ɑ ɑ́cïgi yɑn ɑgɑk.” Kɑ møg-ɑ ɑ́kwøb yi Jwøng-ɑ Ácwɑ̈ɑ̈j ki dhøg Mosɑ̀ gwøg bënn yi Aɑron geki wɑ̈dde. Kì bïdɑ̈ɑ̈g cyɑ̈ng, ɑcwøøl Aɑron geki wɑ̈dde, ki jøgdøngi Isrɑil yi Mosɑ̀. Kɑ Aɑron köbbe kinni, “Kɑ̈bbí kí wɑdh me thinh ɑ́ gënhi orøg, kí órömø ɑ́ gënh-ɑ nyi rɑ̈b bëne, yieny gen e bong gïnrɑj kì ri gen, kɑ ge thërri Jwøng-ɑ Ácwɑ̈ɑ̈j. Kɑ tyëng Isrɑil köbbí kinni, ‘Kɑ̈bbi wun kí ónywøg me thinh ɑ́ gënhi orøg, kí wɑdh me thinh, kí órömø rune ɑ́kyel, yieeny gen e bong gïnrɑj kì ri gen, møg muuj gɑ gënh-ɑ nyi rɑ̈b bëne. Kí wɑdh, kí órömø møg muuj gɑ gëdhhi mër møg ngɑl kì bøli Jwøng-ɑ Ácwɑ̈ɑ̈j. Kɑ wu kɑ̈ni wun thyew ki gïncɑm men-ɑ ónyömø ki møw, mɑ́ Jwøng-ɑ Ácwɑ̈ɑ̈j ree nyudhe’ wun dicyɑ̈ngtïn.” Kɑ gïg-ɑ ɑ́kwøb yi Mosɑ̀ kwɑny gen, kɑ gï kïdhi gen dhø Kemi Kwër. Kɑ tyëng Isrɑil obëënø bënn, kɑ ge ócungø kì dhø Kemi Kwër. Kɑ Mosɑ̀ okööbø kinni, “Bene møg-ɑ ɑ́kwøb yi Jwøng-ɑ Ácwɑ̈ɑ̈j i gwøgu gen ek, o mɑ̈ɑ̈r Jwøng-ɑ Ácwɑ̈ɑ̈j cwöbe kì bøli wun.” Kɑ Aɑron köbbi yi Mosɑ̀ kinni, “Kedhí buti këli lɑm, kɑ gënhi orøgí ngɑɑl, geki gënh-ɑ nyi rɑ̈b bëne mií, o orøgí lɑ̈ɑ̈ny geki orøøg ji bënn, kɑ gïn-ɑ ɑ́muuj yi ji thyeer, o orøøg gen lɑ̈ɑ̈ny ni kɑ ɑ́cïg Jwøng-ɑ Ácwɑ̈ɑ̈j.” Codhe, kɑ Aɑron kedh-ɑ buti këli lɑm, kɑ wɑdhe, ɑ bɑ gënhi orøge ngɑle, kɑ Aɑron mëggi remø yi wɑ̈dde, ɑcød Aɑron lwede yij remø kɑ gø gɑ̈ɑ̈je ri tùngi këli lɑm, kɑ rem-ɑ ɑ́döng bëne kønye thɑ këli lɑm. Codhe, kɑ dwɑ̈lø rɑ̈be kì wïj këli lɑm geki røng kí dwɑ̈l-ɑ kömi gen; kí dhøg ócuny geki dwɑ̈l-ɑ ree, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j. Kɑ rïngø geki pyën rɑ̈be kì ngɑ̈ɑ̈j kɑɑl. Kɑ gënh-ɑ nyi rɑ̈b bëne ngɑle, kɑ reme gɑ̈mmii yi wɑ̈dde, kɑ gø kinye ri këli lɑm gø wene’ wenø. Kɑ gɑ̈mmi gënh-ɑ nyi rɑ̈b bëne e rumø’ ngøllø, geki wïj, ɑrɑ̈be gïn kì wïj këli lɑm. Kɑ cïn geki tyel lwøge, kɑ gï rɑ̈be kì wïj këli lɑm kyeel ki rïngø geki wïj. Codhe, kɑ dyeel tyëng Isrɑil thyere, kɑ ónywøng-ɑ bɑ gënhi orøøg teedø kwɑnye, kɑ gø ngɑle, ɑgwøge gøn ni kɑ ɑ́gwøge gënhi orøg mi tyeli mɑl. Kɑ gënh-ɑ nyi rɑ̈b bëne thyere, ɑgwøge gøn ni kɑ ɑ́kwøbii kì yethi cigg. Athyere gïncɑm, kɑ cinge pɑ̈nge ki møng-ɑ búr, kɑ gø rɑ̈be kì wïj këli lɑm, (menɑni kedh-ɑ kömi møng-ɑ búr-ɑ bɑ keni mwøl.) Kɑ wɑdh geki órömø møg-ɑ ɑ́kɑ̈ɑ̈l yi tyëng Isrɑil gɑ gënhi mër ngɑle, kɑ gɑ̈mmi remø yi wɑ̈dde, ɑkinye gøn ri këli lɑm gø wene’ wenø. Kɑ dwɑ̈li wɑdh geki dwɑ̈li órömø, kí ótïd, kí dwɑ̈l-ɑ kömi cïn, kí røng geki dwɑ̈l-ɑ kömi gen, kí dhøg ócuny geki dwɑ̈l-ɑ ree, cïb yi gen kömi ɑ́ngɑdd ryeet, kɑ dwɑ̈lø rɑ̈b kì wïj këli lɑm. Ángɑdd geki rɑ̈mmi këjj, ɑ́ceg kɑ thyeer bøli Jwøng-ɑ Ácwɑ̈ɑ̈j yi Aɑron, ni kɑ ɑ́ceg Mosɑ̀. Codhe, kɑ Aɑron cingge tïnge kì kömi ji, kɑ gï kwënge, kɑ døøg-ɑ cyɑ̈n kì buti këli lɑm keny-ɑ ɑ́rume gwøgi gënhi orøg, kí gënh-ɑ nyi rɑ̈b bëne, kí gënhi mër. Kɑ Mosɑ̀ kedh-ɑ yij Kemi Kwër geki Aɑron, kɑ ge dwöög-ɑ wɑ̈g, ɑkwëng gen ji bënn. Kɑ mɑ̈ɑ̈r Jwøng-ɑ Ácwɑ̈ɑ̈j ocwöbø kì bøli ji bënn. Kɑ mɑc obëënø e kɑ̈ɑ̈l-ɑ yï Jwøng-ɑ Ácwɑ̈ɑ̈j, kɑ gënh-ɑ nyi rɑ̈b bëne geki dwɑ̈l-ɑ wïj këli lɑm cɑm yi mɑnyɑni kinni tweet. Kɑ ji obwøgø bënn, ɑryeer gen ki medi pëthi gen, kɑ ri gen bødh gen wɑ̈thi gen kuul gen piny. Kɑ Nɑdɑb geki Abiu wɑ̈ddi Aɑron ókɑ̈bbø ki ɑtöggi mɑc, men ki mee, kɑ gï kïdhi gen ki mɑc, kɑ kömi mɑc kïdhi gen ki bɑkur, kɑ gï kïdhi gen bøli Jwøng-ɑ Ácwɑ̈ɑ̈j. De mɑnyɑni pɑth ki ɑkwër, mɑ́ e pɑth ki Jwøng-ɑ Ácwɑ̈ɑ̈j ɑ ɑ́köbbi gen kinni kɑ̈ɑ̈l ge gøn. Kɑ mɑc megø obëënø e kɑ̈ɑ̈l-ɑ yï Jwøng-ɑ Ácwɑ̈ɑ̈j, kɑ ge rɑ̈b yi mɑnyɑni, kɑ ge othøø. Kɑ Aɑron köbbi yi Mosɑ̀ kinni, “Bene gen møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk kinni, ‘Tyëng-ɑ göggi yɑn, wør gen bëëdɑ yɑ bɑ kwërø. O döngɑ nyudhɑ jiɑ bënn.’ ” De Aɑron ɑ́cög e okudø. Kɑ Micɑil geki Eldhɑpɑn wɑ̈ddi Udhiel ómï wïyi Aɑron cwøl yi Mosɑ̀, kɑ gï köbbe kinni, “Kwɑnyu nyiimɑ̈ɑ̈dh wun kì dhø kej kwër, kɑ ge kïdhu ngɑ̈ɑ̈j kɑɑl.” Codhe, ɑkedh gen kɑ gï tïng gen ngɑ̈ɑ̈j kɑɑl ki ógudhi gen kì ri gen ni kɑ ɑ́kööb Mosɑ̀. Kɑ Aɑron geki Eliɑdhɑr kí Ithɑmɑr wɑ̈dde köbbi yi Mosɑ̀ kinni, “Yëyyi wɑ̈thi wun ko yölli wun, wɑlɑ̀ ógudhi wun ko kɑg wun, wu ywøg-ɑ gen, kipe wu óthøw kɑ cyën bï-ɑ kömi ji bënn. De nyiimï wun, ɑ løg Isrɑil bëne, wiy ywönge, e ywøg-ɑ mɑny-ɑ ɑ́rɑ̈ɑ̈b yi Jwøng-ɑ Ácwɑ̈ɑ̈j. Kɑ dhø gøl Kemi Kwër ko pɑ̈nyi wun ki bɑ̈ɑ̈nø wu kedh-ɑ wɑ̈g, ke bɑ̈ɑ̈nu en, wu ceg-ɑ thøø, mɑ́ møøw röny mi Jwøng-ɑ Ácwɑ̈ɑ̈j ying-ɑ kömi wun, mɑ́ wu ɑ́thyëyi Jwøng-ɑ Ácwɑ̈ɑ̈j.” Kɑ kwøbbi Mosɑ̀ yïëy yi Aɑron geki wɑ̈dde. Kɑ Aɑron köbbi yi Jwøng-ɑ Ácwɑ̈ɑ̈j kinni, “Wu ko kedhi yij kemɑ wuki wɑ̈ddí, wu rum mɑdh ki møgi oløg wɑlɑ̀ møgi byel, ke göög wun kinøw, wu ceg-ɑ thøø. Møg bɑ cigg kì kömí wuki gølí bëne. Dɑ̈ɑ̈ng kɑɑm jɑmm-ɑ bɑ jɑmmi kwër geki jɑmm-ɑ bɑ ɑyïëy ki nywɑlø yi teedø, kɑ gïn ywëdhø dɑ̈ɑ̈ng ki gïn dhïw. Pwönyu tyëng Isrɑil ki cigg-ɑ ɑ́köbbɑ Mosɑ̀ bënn.” Kɑ Aɑron geki wɑ̈dde Eliɑdhɑr kí Ithɑmɑr, yɑɑg-ɑ ɑ́döng köbbi yi Mosɑ̀ kinni, “Kwɑnyu gïncɑm-ɑ ɑ́döng kì bɑng mɑc mi Jwøng-ɑ Ácwɑ̈ɑ̈j, kɑ cɑm wun ɑ́ olwëny kì buti këli lɑm, mɑ́ e bɑ gïi kwër me dwøng kiree. Cɑmu en kì kej kwër, mɑ́ e bɑ cigg kiper wuki wɑ̈ddí, kinni bene tung-ɑ cɑm yi wun kì ri gïncɑɑm Jwøng-ɑ Ácwɑ̈ɑ̈j, mɑ́ yɑ ɑ́ceg-ɑ nøw. Kɑ ɑ́ngɑdø geki rɑ̈m møg-ɑ ɑ́thyer, cɑm wun kì keny me dhïw wuki wɑ̈ddí kí nyigí, bɑ cigg kinni bene tung-ɑ nyi mëggi wun kì ri gïncɑɑm Jwøng-ɑ Ácwɑ̈ɑ̈j men-ɑ kɑ̈ɑ̈l yi tyëng Isrɑil, e ngɑl ɑ́ mi mër. Rɑ̈m geki ɑ́ngɑdø ɑ nyi muuj yi gen o thërri Jwøng-ɑ Ácwɑ̈ɑ̈j, codhe, o ge mëggi wuki wɑ̈ddí, gɑ tung-ɑ cɑm yi wun, ni kɑ ɑ́cïg Jwøng-ɑ Ácwɑ̈ɑ̈j.” Apyëëj per ónywøg men-ɑ nyi ngɑl ɑ́ gënhi orøg yi Mosɑ̀, kɑ gø yode kinni rumø ki rɑ̈bø. Kɑ mɑg yi liny ki Eliɑdhɑr geki Ithɑmɑr wɑ̈ddi Aɑron, yɑɑg-ɑ ɑ́döng, ɑkööbe kinni, “Ede gënhi orøg ɑ bɑnyu en ki cɑmø kì kej kwër, e ceg bëëdø ɑ́ gïi kwër me dwøng kiree? O ɑ́mëggi wun ɑ́ men gøøm bøli orøøg gen kì yï Jwøng-ɑ Ácwɑ̈ɑ̈j. Di ceg yi wun kɑ cɑmø kì kej kwër ni kɑ ɑ́köbbɑ wun, mɑ́ reme nuti kïdhi yij Kemi Kwër.” Kɑ Mosɑ̀ köbbi yi Aɑron kinni, “Lidh, teedø ɑ́kɑ̈ni bøli Jwøng-ɑ Ácwɑ̈ɑ̈j dicyɑ̈ngtïn ki gënhi orøg geki gënh-ɑ nyi rɑ̈b bëne, kɑ pöli rɑw ni menɑni ocwöbø kì yïɑ, keløg yɑ di cyɑ̈ɑ̈m ki gënhi orøg dicyɑ̈ngtïn, pyëw Jwøng-ɑ Ácwɑ̈ɑ̈j di løg me med?” Keny-ɑ ɑ́lïngi kwøbbi Aɑron yi Mosɑ̀, kɑ pyëwe ómïnø. Kɑ Mosɑ̀ geki Aɑron köbbi yi Jwøng-ɑ Ácwɑ̈ɑ̈j kinni, “Köbbu tyëng Isrɑil kinni, bene gïg nëënø møg-ɑ cɑm yi wun ek: Cɑmu lɑ̈yy-ɑ yï gen di dɑdd, ɑ nyi dwöögø ki lum. Wu ko cyɑ̈ɑ̈m ki kundhøngø. Ge ywëdhø, yï gen dɑ dɑdd, de ge pɑ nyi dwöögø ki lum. Lɑ̈yyɑni ko pɑ̈nyi yi wun ki cɑmø, wɑlɑ̀ ko nywɑl e thøø; ge ywëdhø. “Cɑmu rëny-ɑ ree di ótùn, o köme dɑ kwɑ́j kì kelli rijji nɑm. De gïg-ɑ ri gen bong ótùn, o kömi gen bong kwɑ́j kì kelli gïg-ɑ nëënø kì nɑm bënn, ko cɑm wun. Lɑ̈yyɑni mïdhu gen gɑ gïg ywëdhø, ge ko cɑm wun wɑlɑ̀ ko nywɑl e thøø. Gïn ree bong ótùn kì kelli jɑmmi nɑm, o köme bong kwɑ́j, bɑ mugø kiper wun. “Twöngg-ɑ ri gen di obërr, ɑ nyi pɑ̈rri bënn, ge ywëdhø. De cɑmu møg-ɑ nyi pɑ̈rri kì piny. Møg-ɑ cɑm yi wun kì ri gen ek: Wɑ̈thi bɑ̈ny-ɑ nyi cyɑ̈dhi ɑ́ dɑɑg bëne, kí ɑ́wél, kí bɑ̈ny-ɑ nyi cyɑ̈dhi ɑ́ ɑ́kyell, ɑ tùnge ceggø. De twöngg-ɑ thønhø bënn møg-ɑ di obërr geki møg-ɑ mulli kì piny, ywëdhø. “Gïgɑni wu oywëdhø yi gen, ngɑn nywɑl me thøø kì kelli gen ceg-ɑ ywëdhø, kɑ gït-ɑ böörø e ywëdhø. Ngɑn tïngii e thøø, lwøge ógudhe, o ceg-ɑ gïti böörø e ywëdhø. Lɑ̈yy-ɑ yï gen di dɑdd de dɑddɑni pɑ dɑ̈ɑ̈ngø, o ge pɑ dwöögø ki lum, ywëdhø. Ngɑn nywɑl gen ceg-ɑ ywëdhø. Lɑ̈yy-ɑ tyelli gen bɑ ódhɑ̈nyy, ɑ cyɑ̈dhi kì kömi tyel ɑ́ngwen, ywëdhø. O ngɑn nywɑl gen ge thøø, lwøge ógudhe, de ceg-ɑ gïti böörø e ywëdhø. Ge ywëdhø ki per wun. “Møg-ɑ ywëdhø kì kelli gïg-ɑ mulli kì piny ek: ɑ́pedø, kí yëjø, kí wɑ̈thi böngø bënn, kí ɑbɑthur, kí ngwej, kí ɑkwijnyɑjwøk, kí ɑngɑgrɑw. Bene gen møg-ɑ ywëdhø, ɑ bɑ ɑkerø kiper wun kì kelli gïg-ɑ mulli kì piny ɑgɑk. Ngɑn nywɑl gen ceg-ɑ gïti böörø e ywëdhø. Ke di gïjø me köme pɑ̈dhi yi ɑ́kyel kì kelli gen, e rum thøø, gø ywëdhe’ ywëdhø, yinge e bɑ pɑ̈m, wɑlɑ̀ ógødh, wɑlɑ̀ pyën, wɑlɑ̀ ocwɑ̈lø, wɑlɑ̀ gïjø ɑ́kyel kì kelli jɑmmi gwøg. Kïdhi gïn-ɑ köme ɑ́pɑ̈dhi yethi pï, kɑ wiy bëëde gïti böörø, o dhïwe cyee. O keløg ɑ́kyel kì kelli gen dëëm-ɑ yij gïn-ɑ ócwɑ̈jø ɑ́ lɑ̈bø, gïn-ɑ yij lɑ̈mɑni ceg-ɑ ywëdhø, kɑ lɑ̈mɑni tøg. Gïn-ɑ di cɑm de ógwøgø kɑ pïi lɑ̈mɑni, ceg-ɑ gwøg e ywëdhø, o gïn mɑdh men ying yij lɑ̈mɑni ceg-ɑ gwøg e ywëdhø thyew. Gïn-ɑ köme dëëm yi lɑ̈yɑni e thøø ceg-ɑ ywëdhø, keløg ɑ́ pug wɑlɑ̀ purun ceg ki tøgø, de keløg ɑ́ wɑɑng pï, wɑlɑ̀ yith ɑ yije dëëme, cɑgg gïnɑni thøø pɑ ywëdh, pɑ ywëdh yi gen ni jɑmm-ɑ kyeelø. Ke dëëme kömi köödh, köödh pɑ ywëdh yi gen. De keløg köödhɑni bɑ ɑlug ki pï, kɑ kömi gen dëëm yi ɑ́kyel kì kelli gen, köödhɑni ceg-ɑ ywëdhø. “Keløg lɑ̈y me nyi cɑm othøø, ngɑn nywɑlii ceg-ɑ gïti böörø e ywëdhø. Ngɑn cyɑ̈mø kì ri lɑ̈yɑni lwøge ógudhe, de ceg-ɑ gïti böörø e ywëdhø, ngɑn tïng gïn thøø lwøge ógudhe, de ceg-ɑ gïti böörø e ywëdhø. “Wu ko cyɑ̈ɑ̈m ki lɑ̈yy-ɑ mulli kì piny, ying e mull-ɑ yije wɑlɑ̀ cyɑ̈dh-ɑ tyel ɑ́ngwen. Ge bɑ ɑkerø, wu ko cyɑ̈ɑ̈m ki gen. Ri wun ko ywëdh wun ki lɑ̈yy-ɑ ni møgɑni kɑ̀ cɑmu gen. Bene yɑn Jwøøg wun, Jwøng-ɑ Ácwɑ̈ɑ̈j, yɑ bɑ kwërø, bëëd wun wu dhïw, kɑ ri wun thyëyu yɑn. Bene yɑn Jwøng-ɑ Ácwɑ̈ɑ̈j, ngɑn-ɑ ɑ́kɑ̈ɑ̈l wun wɑ̈g kì piny Rïp, o yɑ bëëdɑ yɑn ɑ́ Jwøøg wun. Bëëd wun wu bɑ ɑkwër, mɑ́ yɑ bɑ kwërø.” Bene gen cigg-ɑ ɑ́cïb kipe lɑ̈yyi pɑ̈l, kí winy, kí lɑ̈yyi nɑm geki møg-ɑ mulli kì piny ɑgɑk. O møg-ɑ dhïw dɑ̈ɑ̈ng yi wun ki møg-ɑ ywëdhø, o møg-ɑ cɑm dɑ̈ɑ̈ng yi wun ki møg-ɑ bɑ ɑkerø cɑmø thyew. Jwøng-ɑ Ácwɑ̈ɑ̈j ɑ́kööb ki Mosɑ̀ kɑ gø köbbe kinni, “Köbbí tyëng Isrɑil kinni, keløg ngɑndhɑjø óyɑɑjø kɑ pɑ̈dh-ɑ piny ki jɑlø, óbëëd e ywëdhø ki cyɑ̈ng ɑ́bïryew, mɑ́ ree dɑ bïy. Bëëde ni kenyi bëëde kì ri remi dwɑ̈ye. Ngøl nyɑgïnɑni kì bïdɑ̈ɑ̈g cyɑ̈ng. Kɑ wiy ngɑnɑni bëëde ki cyɑ̈ng pyɑ̈r ɑ́dɑ̈g wïdɑ́dɑ̈g, codhe o dhïwe cyee, kipe remø men-ɑ ɑ́bï wɑ̈g kì ree. Ko nywɑ̈ddi ki gïn-ɑ bɑ ɑkwër, wɑlɑ̀ ko kedhi kej kwër kì dhø Kemi Kwër gïti keny-ɑ ótyëge cyɑ̈nggɑni. “O keløg e bɑ dhɑjø ɑ nywøl yi en, ceg-ɑ bëëdø e ywëdhø ki cyɑ̈ng pyɑ̈rø wïdɑ́ngwen, ni kenyi bëëde kì ri remi dwɑ̈ye. Codhe, o bëëde ki cyɑ̈ng pyɑ̈r ɑ́bïkyel wïdɑ́bïkyel, o dhïwe cyee. “Keny-ɑ óthumi cyɑ̈nggi dhïwe, cɑgg e nywøøl jɑlø wɑlɑ̀ dhɑjø, muuj ókwërø kì dhø Kemi Kwër, kɑ̈l ki órömø rune ɑ́kyel ɑ́ gënh-ɑ nyi rɑ̈b bëne, kí ɑkur dwøng wɑlɑ̀ ɑkur ójwɑt ɑ́ gënhi orøg. Thyeer gen bøli Jwøng-ɑ Ácwɑ̈ɑ̈j yi ókwërø, kɑ kwɑ̈jje kiper ngɑnɑni o dhïwe. Bene gïn-ɑ dwɑddi gwøgø yi ngɑndhɑjø ɑnɑn kenyi pɑ̈dhe piny. “Keløg ngɑnɑni pɑ cuggi yïddø ki órömø, kɑ̈ne ki ɑkùr-ɑ døngø ɑ́ryew, wɑlɑ̀ ɑkùr ójwɑt ɑ́ryew, ɑ́kyel bɑ gënh-ɑ nyi rɑ̈b bëne, o ɑ́kyel bɑ gënhi orøg, kɑ guöög dhïwø gwøg yi ókwërø, o ngɑnɑni dhïwe.” Kɑ Mosɑ̀ geki Aɑron köbbi yi Jwøng-ɑ Ácwɑ̈ɑ̈j kinni, Keløg dhɑnhø dële dɑ keny me kwödø, wɑlɑ̀ bor, wɑlɑ̀ keny me wɑ̈ɑ̈jø, ɑ́ men cuggi løgi ree lɑ̈y, muuj ngɑnɑni ókwërø Aɑron, wɑlɑ̀ muuj nget ɑ́kyel kì kelli wɑ̈dde o gø lidhe. Rɑɑng kenyɑni yi ókwërø, o keløg gø ólidh yi en kinni yëyyi kenyɑni ri gen løg gen ge tɑr, o kenyɑni dël twïy en kɑ wɑ̈dh-ɑ piny, bɑ lɑ̈y, kiiw ngɑnɑni yi ókwërɑni kinni bɑ ngɑn ywëdhø. De keløg kenyledh menɑni ólidh yi ókwërø e tɑr, o yëyyi kenyɑni ri gen nuti løg gen ge tɑr, o dël nuti twïyø yi kenyɑni kɑ wɑ̈dh-ɑ piny, cïb ngɑnɑni wɑ̈ye yi ókwërø ki cyɑ̈ng ɑ́bïryew. Kɑ døøg ki rɑngø yi ókwërɑni kì bïryeew cyɑ̈ng, o keløg gø ólidh yi en kinni kenyledh menɑni nënni e nɑ keny-ɑ́ cyɑ̈ng-ɑcɑ̀, e nuti lɑ̈nyyø, døøge ngɑnɑni ki cïb wɑ̈ye ki cyɑ̈ng ɑ́bïryew møøgø. Kɑ døøg lidh yi ókwërɑni kì bɑng cyɑ̈ng ɑ́bïryew-ɑ kyeelø, o ólidhe gøn kinni kenyɑni ree cïïl en, o nuti lɑ̈nyyø, kiiwe ngɑnɑni kinni bɑ ngɑn dhïw, o menɑni bëëdø ɑ́ bor yøw. Lwøge ógudhe; ɑ́dhïwi. De keløg borɑni ódøøgø cwöbø kì bɑng kɑ ɑ́rume lidhø yi ókwërø, kɑ gø kwøbe kinni i dhïwø, døøge yï ókwërɑni. Kɑ døøg ki rɑngø yi ókwërɑni, o ólidhe gøn kinni lɑ̈nyyø, kiiwe ngɑnɑni kinni ywëdhø, bɑ lɑ̈y gïnrɑj ɑ dële. “Keløg dhɑnhø dële dɑ kenyledh me rɑj, muuj ókwërø, o rɑng yi ókwërɑni. Keløg dële dɑ bor me tɑr, me løg yëyyi kenyɑni ge tɑr, o yije dɑ túd, bɑ lɑ̈y ɑ ree, kiw yi ókwërø kinni bɑ ngɑn ywëdhø, ko cïbe wɑ̈ye kinni o døøg ki rɑngø mɑ́ e bɑ ngɑn ywëdhø. Keløg dhɑnhø dële ogöögø ki wɑɑny bëne, cɑg kì wïje gïti tyelle, døøg ki rɑngø yi ókwërɑni. Oyode gøn kidyër kinni dële ótyëgø yi wɑɑny bëne, kiiwe ngɑnɑni kinni dhïw. Keløg dële ree løg en wɑɑny bëne, bɑ ngɑn dhïw. De kì cyɑ̈ng-ɑ óliidh keny me lol ki túd kì ree, ɑ́göög e ywëdhø. Døøg ki rɑngø yi ókwërø këti, olïdhe ki keny me lol ki túd, kiiwe gøn kinni bɑ ngɑn ywëdhø. Keny-ɑ lol ki túd bɑ kenyledh me rɑj, o ngɑn-ɑ ree lool yi túd bɑ ngɑn ywëdhø. De keløg kenyɑni ónøgø kɑ dële ogöögø e tɑr këti, ɑ́ wɑɑny ni dële bëne, kedhi ngɑnɑni yï ókwërø, kɑ rɑng yi ókwërɑni, ke lidhii yi ókwërø kinni kenyɑni ɑ́døøg ki tɑ̈rø, ngɑnɑni dhïw, kɑ kiw yi ókwërɑni kinni bɑ ngɑn dhïw. “Keløg dhɑnhø ree dɑ bor me nøggø, kɑ kenyɑni cig-ɑ kwödø, wɑlɑ̀ kɑ ogöögø ki bor këti, wɑlɑ̀ ree løge’ me wɑ̈ɑ̈jø, kedhi ngɑnɑni yï ókwërø. Rɑng yi ókwërø, o keløg kenyɑni ónënni e ludhø kibøli dël-ɑ tøgge, o yëyy-ɑ kenyɑni ri gen løg gen ge tɑr, kiiwe gøn ɑ́ ngɑn ywëdhø. Bɑ kenyledh me rɑj ɑ cɑ̈gi ki borɑni. De keløg e ólidh yi ókwërø kinni bong yëyy mø tɑr kì yije, o yije pɑ ludhø kibøli dël-ɑ tøgge, cïbe ngɑnɑni wɑ̈ye ki cyɑ̈ng ɑ́bïryew. Keløg kenyledh menɑni ólɑ̈nyi, kiiw ngɑnɑni yi ókwërø kinni ywëdhø, menɑni bɑ cɑ̈gi kenyledh me rɑj. De keløg e ocöge ree pɑ wil en, kɑ ocögø e pɑ lɑ̈nyyi, menɑni bɑ bɑlø yøw, kiiw ngɑnɑni yi ókwërø kinni dhïw. “Keløg dhɑnhø órɑ̈ɑ̈b-ɑ yi mɑc, o keløg dëël kej mɑc ree løge’ me tɑr, wɑlɑ̀ keløg kenyɑni ocögø e ludhø, rɑng yi ókwërø. Keløg yëyy ri gen løg gen ge tɑr, o kenyɑni ludhø kibøli dël-ɑ tøgge, menɑni bɑ kenyledh me rɑj ɑ cɑ̈gi kì kej mɑc, kiiw ngɑnɑni yi ókwërø kinni ywëdhø. O keløg yëyyi kenyɑni ólidh yi ókwërø kinni ge nuti tɑ̈rø, o kenyɑni pɑ ludhø kibøli dël-ɑ tøgge, de ceg-ɑ cyɑ̈ɑ̈rø, cïb ngɑnɑni wɑ̈ye ki cyɑ̈ng ɑ́bïryew. Cigi rɑngø yi ókwërø kì ri bïryeew cyɑ̈ng, o keløg e kedh e ceg-ɑ lɑ̈nyyø, bɑ kenyledh me rɑj, kiiw ngɑnɑni yi ókwërø kinni ywëdhø. De keløg kenyɑni ree pɑ wil en, wɑlɑ̀ pɑ lɑ̈nyyi, o ceg-ɑ cyɑ̈ɑ̈rø, pɑth ki kenyledh me rɑj. Kiiw ngɑnɑni yi ókwërø kinni dhïw, mɑ́ menɑni bɑ bɑli kej mɑc yøw. “Keløg dhɑnhø, jɑlø wɑlɑ̀ dhɑjø ree dɑ kenyledh kì wïje wɑlɑ̀ tïge, rɑɑng kenyɑni yi ókwërø. Keløg e nënni e ludhø kibøli dël-ɑ tøgge, o yëyye nënni gɑ dibwör, o ge lewø, bɑ kenyledh me rɑj. Kiiw ngɑnɑni yi ókwërø kinni ywëdhø. Bɑ kenyledh me rɑj ɑ wïje wɑlɑ̀ tïge. De keny-ɑ órɑɑngii yi ókwërø, kɑ gø yode e pɑ ludhø kibøli dël-ɑ tøgge, de yëyy nënni gɑ poodh kì yije, cïbe ngɑnɑni wɑ̈ye ki cyɑ̈ng ɑ́bïryew. Døøg kenyɑni ki lidhø yi ókwërø këti kì bïryeew cyɑ̈ng, o keløg e nuti lɑ̈nyyø o bong yëyy mø bɑ dibwör kì yije, o nënni e pɑ ludhø kibøli dël-ɑ tøgge, lyeel yëyy-ɑ tøggi kenyledh menɑni yi wɑ̈n. Codhe, kɑ døøg ki cïb wɑ̈ye yi ókwërɑni ki cyɑ̈ng ɑ́bïryew møøgø. Liidh kenyledh yi ókwërɑni këti kì bïryeew cyɑ̈ng, o keløg e nuti lɑ̈nyyø, o pɑ nënni e ludhø kibøli dël-ɑ tøgge, kiiw ngɑnɑni yi ókwërɑni kinni dhïw. Ngɑnɑni lwøge ógudhe, ɑ́dhïwi. De keløg kenyledh menɑni otugø kì bɑng kɑ ɑ́rume kiiwø kinni ɑ́dhïwi, cigi rɑngø yi ókwërɑni. Keløg kenyledh lɑ̈nyyø, ko yɑ̈ɑ̈b ki yëyy-ɑ bɑ dibwör, ngɑn ni menɑni ywëdhø ceth. De ke lidhii yi ókwërø kinni kenyledh menɑni nuti lɑ̈nyyø, o yëyy mø looj twïyø’ yije, kenyledh menɑni ɑ́nøgi, kiiw ngɑnɑni yi ókwërø kinni dhïw. “Keløg dhɑnhø, jɑlø wɑlɑ̀ dhɑjø dɑ keny me tɑr e omïllø kì dële, kɑ rɑng yi ókwërø, kɑ gø yode kinni kɑ̈jjɑni tɑr, ge køm-ɑ wɑ̈ɑ̈jø, menɑni bɑ bögø ɑ cɑ̈gi kì dële, ngɑnɑni dhïw. “Keløg ngɑn-ɑ jɑlø wïje obudhø kɑ ogöögø e lïw, ngɑn ni menɑni dhïw. Keløg yëyyi wïje obudhø kì kuni bøle wɑlɑ̀ töge, dhïw. De keløg keny-ɑ budhø kì wïje dɑ kɑ̈jj mø tɑr, ge køm-ɑ kwɑrø, bɑ wɑɑny ɑ cɑ̈gi kì yij keny-ɑ budhø, rɑng yi ókwërø. O keløg e dɑ kɑ̈jj mø ledh, mø tɑr ge køm-ɑ kwɑrø, kiiw ngɑnɑni yi ókwërø kinni ywëdhø, kipe bɑ wɑɑny ɑ wïje. “Ngɑn ree di kenyledh me rɑj, ruge ógudh mø kɑggø, kɑ wiye yëyye ge pɑ pyël, kɑ wïje ko nyi kum, kɑ dhøge, dhø mɑl kume, o yëyyi dhøge cög ge pɑ nënni, kɑ nyi ryeere kinni, “Ywëdhø, ywëdhø!” Kì kɑɑm-ɑ di dëël ngɑnɑni kenyledh menɑni, ngɑnɑni bëëdø e ywëdhø, o kɑ̀ bëëde e ywëdhø, bëëde kì wɑ̈ye kì ngɑ̈ɑ̈j kɑɑl, e lɑ̈wi ki ji. “Ógødh odi ree ɑ́buu, e bɑ ógødh korø wɑlɑ̀ yëyy, e bɑ ɑcwɑ̈j wɑlɑ̀ bɑ ɑkwen, wɑlɑ̀ bɑ lɑwø wɑlɑ̀ pyën, kɑ kïde ree løge me mɑr, wɑlɑ̀ køm-ɑ kwɑrø, bɑ ɑ́buu men-ɑ nyi tɑy. Nyudhi ókwërø ceth. Liidh ɑ́buu menɑni yi ókwërø, kɑ ógønhɑni cïbe wɑ̈ye ki cyɑ̈ng ɑ́bïryew. Døøge ɑ́buu menɑni ki lidhø kì bïryeew cyɑ̈ng. Keløg ɑ́buu tɑyø kì ri ógødh, o ógønh-ɑ bɑ ɑcwɑ̈j, wɑlɑ̀ bɑ ɑkwen, wɑlɑ̀ lɑwø, cɑgg lɑnɑni nyii gwøøg-ɑ ngø, bɑ ɑ́buu men rɑj, ógønhɑni wɑlɑ̀ lɑnɑni ywëdhø. Rɑ̈ɑ̈b ógønhɑni yi ókwërø, cɑgg ɑ́ ɑcwɑ̈j wɑlɑ̀ ɑkwen, ying-ɑ́ yëyy wɑlɑ̀ korø, wɑlɑ̀ bɑ lɑwø, mɑ́ ɑ́buu kedh e ódøngø; rɑ̈b ceth. “Keløg e ólidh yi ókwërɑni kinni ɑ́buu nuti døngø, kööbe kinni lwøøg ógønhɑni wɑlɑ̀ lɑnɑni kɑ cïb wɑ̈ye ki cyɑ̈ng ɑ́bïryew møøgø. Keny-ɑ ɑ́rum ɑ́buu ki lwøgø, døøg ki lidhø yi ókwërø. Keløg ɑ́buu menɑni nudd e nënni e nɑ keje, gïnɑni ywëdhø, cɑgg ɑ́buu nuti døngø. Rɑ̈bu en ki mɑc, cɑgg ɑ́buu menɑni ying tung ɑ́kyel. De keløg ɑ́buu ólidh yi ókwërø e wɑɑjø kì ri ógønhɑni wɑlɑ̀ lɑnɑni keny-ɑ ɑ́rume lwøgø, yööd keny-ɑ di ɑ́buu wɑ̈g yi ókwërø kì ri lɑwø wɑlɑ̀ ógødh, ɑcwɑ̈j wɑlɑ̀ ɑkwen. De keløg ɑ́buu ódøøg ki cwöbø kì ri ógønhɑni wɑlɑ̀ lɑnɑni, ying-ɑ́ ɑcwɑ̈j wɑlɑ̀ ɑkwen, ɑ́buu tɑyø. Rɑ̈ɑ̈b gïn-ɑ ree di ɑ́buu ki mɑc. Keløg ógødh, ɑcwɑ̈j wɑlɑ̀ ɑkwen, wɑlɑ̀ lɑwø olwøgø, kɑ ɑ́buu ólɑ̈ɑ̈nyø, cigi lwøgø, codhe, o dhïwe cyee.” Møgɑk bene gen ciggi ɑ́buu kì ri ógødh korø wɑlɑ̀ yëyy wɑlɑ̀ lɑwø, men nyodh kinni dhïw wɑlɑ̀ ywëdhø. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Møg bene gen ciggi dhïwi dhɑnhø men-ɑ ɑ́bëëd ree dɑ kenyledh, kɑ muuj ókwërø keny-ɑ ɑ́nøgi kenyɑni. Ngɑnɑni ceg kɑ muuj ókwërø, kɑ ókwërɑni kedhe ngɑ̈ɑ̈j kɑɑl, kɑ ngɑn-ɑ́ ree ɑ́di kenyledh lidh yi en. Keløg kenyɑni nøggø, cwöddi ókwërø ki winy ɑ́ryew mø dhïw, ge onëënø, kí ɑnɑ̈ɑ̈b yɑdh sɑndɑl, kí kori kwɑrø, kí yelø; ge kɑ̈ɑ̈l gɑ møg wïddi ri ngɑn-ɑ́ ree ɑ́di kenyledh ki pï, o dhïwe. Kɑ ókwërø kööbe kinni ngɑɑl winyø ɑ́kyel kì wïj tɑbø me yije di pï møg tïl. Codhe, kɑ winy-ɑ nëënø kwɑny yi ókwërø, kyeel ki ɑnɑ̈ɑ̈b yɑdh sɑndɑl, kí kori kwɑrø, kí yelø; kwɑnye gïn bënn kɑ gï jwɑ̈ɑ̈ge yij remi winy-ɑ ɑ́ngɑl kì kömi pïg-ɑ tïl. Kɑ ókwërø wïdde ri ngɑn-ɑ gwøg ki remɑni tyel ɑ́bïryew. Kööbe kinni ngɑnɑni ɑ́dhïwi. Kɑ winyø men-ɑ nëënø wiye o pɑ̈ɑ̈re pɑ̈l. Ngɑn-ɑ́ ree ɑ́wïddi ki pï lwøge ógudhe, kɑ yëyye lyele bënn, codhe, kɑ lwøgge o dhïwe. Orume cyee, o kedhe kɑɑl, o pëgge wɑ̈g kì dhø kemɑ̀ mee, bëëde kì wɑ̈g ki cyɑ̈ng ɑ́bïryew. Lyele yëyye bënn kì bïryeew cyɑ̈ng, ɑ løg yëyyi wïje, kí yëyyi tïge, kí yëyyi nyinge, kí yëyy-ɑ kyeelø bënn. Lwøge ógudhe, kɑ lwøgge, codhe, o dhïwe. “Kì bïdɑ̈ɑ̈g cyɑ̈ng, kɑ̈bbi ngɑn-ɑ́ ree ɑ́di kenyledh ki órömm ɑ́ryew mø bong gïnrɑj kì ri gen, kí dyel rømø rune ɑ́kyel, me bong gïnrɑj kì ree. Kí møng-ɑ búr me bɑ kïllì ɑ́dɑ̈g, ge bɑ ɑnyöm ki møøw dhetun, kí røthøl ɑ́kyel mi møøw dhetun, kì yij gïjø megø. Kïdhi ngɑn-ɑ ree wïddi ki pï geki jɑmmɑni bënn be thyeer dhø Kemi Kwër yi ókwër-ɑ wïddi ree ki pï. Kɑ órömø ɑ́kyel geki røthøl møw kwɑny yi ókwërø gɑ gëdhhi bɑ̈jjø, kɑ gï thyeere bøli Jwøng-ɑ Ácwɑ̈ɑ̈j Kɑ órömɑni ngɑl kì kej kwër, keny-ɑ yije nyi ngɑɑl gënhi bɑ̈jjø geki gënh-ɑ nyi rɑ̈b bëne, mɑ́ gënhi orøg nɑ gënhi bɑ̈jjø, ge bɑ mø ókwërø. Bɑ kwër me dwøng kiree. Kɑ ókwërø kɑ̈bbe kì ri remi gënhi bɑ̈jjø, kɑ gø gɑ̈ɑ̈je ri ɑ́kwɑɑn yïth kyëëj ngɑn-ɑ kïdhi bøli Jwøng-ɑ Ácwɑ̈ɑ̈j, kí ri lwedi cingi kyëje, lwen-ɑ dwøng, kí lwedi tyeli kyëje, lwen-ɑ dwøng. Kɑ ókwërø kɑ̈bbe kì ri møw, kɑ gø kønye cinge, cingi cɑɑme. Kɑ ókwërø lwedi kyëje jwɑ̈ɑ̈ge yij møw men-ɑ cingi cɑɑme, kɑ kïnye piny bøli Jwøng-ɑ Ácwɑ̈ɑ̈j ki møw ki lwede tyel ɑ́bïryew. Kɑ kɑ̈bbe kì ri møw-ɑ ɑ́döng kì cinge, kɑ gø gɑ̈ɑ̈je ri ɑ́kwɑɑn yïth ngɑn-ɑ kïdhi bøli Jwøng-ɑ Ácwɑ̈ɑ̈j, yïth kyëje, geki lwedi cingi kyëje, lwen-ɑ dwøng, kí lwedi tyeli kyëje, lwen-ɑ dwøng, e møw gɑ̈ɑ̈je’ kɑ̈jj-ɑ ɑ́gɑ̈jji ki remi gënhi bɑ̈jjø kì kömi remø. Kɑ møw-ɑ ɑ́döng kì cingi ókwërø gïïnye wïj ngɑn-ɑ kïdhi bøli Jwøng-ɑ Ácwɑ̈ɑ̈j. Ki yuu-ɑ ni menɑni, ngɑnɑni ɑ́rum ki gwøgø yi ókwërø ɑ́ ngɑn dhïw kì bøli Jwøng-ɑ Ácwɑ̈ɑ̈j. “Kɑ gënhi orøg thyer yi ókwërø, kɑ guöög dhïwø gwøge. Codhe, kɑ órömɑni ngɑle ɑ́ gënh-ɑ nyi rɑ̈b bëne. Kɑ gënh-ɑ nyi rɑ̈b bëne geki møng-ɑ búr rɑ̈be kì wïj këli lɑm, kɑ ókwërø kwɑ̈jje kipere o dhïwe. “De keløg ngɑnɑni cinge jɑdø, o pɑ cuggi yïddø ki gëdhhì møgɑk, kɑ̈bbe ki órömø ɑ́kyel me thyer kì bøli Jwøng-ɑ Ácwɑ̈ɑ̈j ɑ́ gënhi bɑ̈jjø, o nyɑnɑni dhïwe. Kɑ kɑ̈ne thyew ki kïlø ɑ́kyel møng-ɑ búr me bɑ ɑnyöm ki møøw dhetun, kí røthøl møøw dhetun kì yij gïjø megø. Kɑ̈ne ki ɑkùr-ɑ døngø ɑ́ryew; ke bong ge gïn, kɑ̈ne ki ɑkùr ójwɑt ɑ́ryew. Winyø ɑ́kyel bɑ gënhi orøg, o men-ɑ kyeelø bɑ gënh-ɑ nyi rɑ̈b bëne. Kɑ̈ɑ̈l gen yï ókwërø yi ngɑnɑni kì bïdɑ̈ɑ̈g cyɑ̈ng kì bɑng dhïwe, kɑ̈ɑ̈le gïn yï ókwërø kì dhø Kemi Kwër bøli Jwøng-ɑ Ácwɑ̈ɑ̈j. Kɑ óröm-ɑ bɑ gënhi bɑ̈jjø kwɑny yi ókwërø geki røthøl møw, kɑ gï thyeere bøli Jwøng-ɑ Ácwɑ̈ɑ̈j, kɑ órömø nɑ̈ge, kɑ kɑ̈bbe ki remø, kɑ gø gɑ̈ɑ̈je ri ɑ́kwɑɑn yïth kyëëj ngɑn-ɑ kïdhi bøli Jwøng-ɑ Ácwɑ̈ɑ̈j, kí ri lwedi cingi kyëje, lwen-ɑ dwøng, kí lwedi tyeli kyëje, lwen-ɑ dwøng. Kɑ ókwërø kɑ̈bbe kì ri møw, kɑ gø kønye cinge, cingi cɑɑme. Kɑ ókwërø lwedi kyëje jwɑ̈ɑ̈ge yij møw-ɑ cinge. Kɑ kïnye piny bøli Jwøng-ɑ Ácwɑ̈ɑ̈j ki møw ki lwede tyel ɑ́bïryew. Kɑ ókwërø kɑ̈bbe kì ri møw-ɑ ɑ́döng kì cinge kɑ gø gɑ̈ɑ̈je ri ɑ́kwɑɑn yïth ngɑn-ɑ kïdhi bøli Jwøng-ɑ Ácwɑ̈ɑ̈j, yïth kyëje, geki lwedi cingi kyëje, lwen-ɑ dwøng, ki lwedi tyeli kyëje lwen-ɑ dwøng e møw gɑ̈ɑ̈je’ kɑ̈jj-ɑ ɑ́gɑ̈jji ki remi gënhi bɑ̈jjø kì kömi remø. Kɑ møw-ɑ ɑ́döng kì cingi ókwërø gïïnye wïj ngɑn-ɑ kïdhi bøli Jwøng-ɑ Ácwɑ̈ɑ̈j, ki yuu-ɑ ni menɑni, ngɑnɑni ɑ́rum ki gwøgø yi ókwërø ɑ́ ngɑn dhïw kì bøli Jwøng-ɑ Ácwɑ̈ɑ̈j. Kɑ ɑ́kyel kì kelli ɑkùr-ɑ døngø wɑlɑ̀ ɑkùr ójwɑt møg-ɑ ólwɑ̈ng yi en ki yodø, ngɑl ɑ́ gënhi orøg, kɑ men-ɑ kyeelø gwøg ɑ́ gënh-ɑ nyi rɑ̈b bëne kyeel geki møng-ɑ búr. Nyi gwøøg dhɑnhø kinøw yi ókwërø o dhïwe kì bøli Jwøng-ɑ Ácwɑ̈ɑ̈j. Møgɑni bene gen ciggi gwøgi ngɑn-ɑ́ ree ɑ́di kenyledh me rɑj men-ɑ cinge jɑdø kì bøli keny-ɑ ɑ́dönye. “Kɑ Mosɑ̀ geki Aɑron köbbi yi Jwøng-ɑ Ácwɑ̈ɑ̈j kinni, Piny Kɑnɑɑn mëggɑ’ jii wun. Okedhu yije, eni piny-ɑ mëggɑ wun, ɑ́ men kwɑny yi wun, kɑ keløg yɑ cïb-ɑ ri ød kì piny-ɑ ókwɑny yi wun ki ɑ́buu, jɑl-ɑ yïe di ød kedhe be köbbi ókwërø, kɑ kööbe kinni, ‘Yɑ ɑ́lïdhi ki gïjø me ni ɑ́buu kì ri ød.’ Codhe, kɑ ókwërø ji köbbe kinni kɑ̈ɑ̈l jɑmmì wɑ̈g kì ønɑni e nuti kedhi be lidhi ɑ́buu, mɑ́ ke yuude jɑmmì ød ceg-ɑ kwøb kinni ge ywëdhø bënn. Codhe, kɑ ókwërø kedhe be lidhi ød cyee, keny-ɑ órum jɑmmì ki kɑ̈ɑ̈l wɑ̈g. Lidhe ɑ́buu, o keløg ɑ́buu nënni kì kö dörø e mɑr wɑlɑ̀ kwɑɑr, o keje nënni e ludhø kì ri dörø, kedhe wɑ̈g kì ød, kɑ ønɑni cyëge ki cyɑ̈ng ɑ́bïryew. Dwöög ókwërø kì bïryeew cyɑ̈ng be rɑngi ønɑni. Keløg ɑ́buu lɑ̈nyyø kì ri döri ød, kɑ ókwërø ji köbbe kinni, kɑ̈ɑ̈l kïtt-ɑ ri gen di ɑ́buu wɑ̈g kì ri döri ød. Kɑ ge weddi keny me ywëdhø kì ngɑ̈ɑ̈j kɑɑl. Codhe, kɑ kwöjø gööb wɑ̈g kì ri dörø bëne. Kɑ kwöny-ɑ ɑ́gööb wɑ̈g kì ri dörø bëne tër, kɑ weddi keny me ywëdhø kì ngɑ̈ɑ̈j kɑɑl. Orume kɑ kɑ̈jji kïttì møg-ɑ ɑ́kɑ̈ɑ̈l wɑ̈g cïbi ki kïttì mø nyɑ̈n, kɑ dörø bëne mwøn ki kwöjø me nyɑ̈n. “De keløg ɑ́buu cig-ɑ cwöbø këti kì bɑng kɑ ɑ́rum kïtt-ɑ́ ri gen ɑ́di ɑ́buu ki kɑ̈ɑ̈l wɑ̈g, kɑ kɑ̈jji gen cïbi ki møg nyɑ̈n, kɑ kwöjø gööb wɑ̈g, kɑ dörø mwøn ki kwöjø me nyɑ̈n, kedhi ókwërø be lïdhø. O keløg ɑ́buu ólidh yi en e ngënyø, bɑ ɑ́buu me rɑj, ønɑni ywëdhø. Cøør ønɑni piny, kɑ kïtte, kí yenhe, kí kwönye yëëg keny me ywëdhø kì ngɑ̈ɑ̈j kɑɑl. Ngɑn kedhi ønɑni kì bøli keny-ɑ ɑ́bëëde e bɑ ɑcyëg, o ji bɑ ɑkerø ki kedhi yije, óbëëd e ywëdhø gïti keny-ɑ óbuddi cɑ̈ng. Ngɑn buddi kì ønɑni, wɑlɑ̀ cyɑ̈mø kì ønɑni lwøge ógudhe ceth. “De keny-ɑ ódwöög ókwërø kɑ ɑ́buu yuude e nuti ngënyø kì ri ød, kì bɑng kɑ ɑ́rum ønɑni ki gwøgø kɑ mwøn, kööbe kinni ønɑni ɑ́dhïwi, mɑ́ ɑ́buu ɑ́rum ki kɑ̈ɑ̈l wɑ̈g kì ree kinni tweet. O kipe gwøgi ønɑni e dhïw këti, kɑ̈bbi ókwërø ki winy ɑ́ryew, kí ɑnɑ̈ɑ̈b yɑdh sɑndɑl, kí kori kwɑrø kí yelø. Ngɑle winyø ɑ́kyel kì wïj tɑbø me di pïg tïl, Codhe, kɑ winy-ɑ nëënø kwɑnye, kí ɑnɑ̈ɑ̈b yɑdh sɑndɑl, kí yelø geki kori kwɑrø, kɑ gï jwɑ̈ɑ̈ge yij remi winy-ɑ ɑ́ngɑl kì wïj tɑbø men-ɑ yije di pïg tïl. Kɑ ókwërø wïdde ri ønɑni ki remø tyel ɑ́bïryew. Ød gwøg yi en e dhïw kì bøli Jwøng-ɑ Ácwɑ̈ɑ̈j kɑ remi winyø, kí pïg tïl, kí winy-ɑ nëënø, kí ɑnɑ̈ɑ̈b yɑdh sɑndɑl, kí yelø, kí kori kwɑrø. Codhe, kɑ winy-ɑ nëënø kïdhe ngɑ̈ɑ̈j kɑɑl, kɑ wiy pɑ̈ɑ̈re pɑ̈l. Bene kenyi gwøøg ød e dhïw kì bøli Jwøng-ɑ Ácwɑ̈ɑ̈j yi ókwërø ɑnɑn.” Møgɑk bene gen cigg kipe kɑ̈jji ledh møg rijjø kì dël, kí ɑ́buu kì ri lɑ̈nì wɑlɑ̀ kì ri ud, kí kɑ̈jj-ɑ köddi, kí bør, geki kɑ̈jj-ɑ wɑ̈ɑ̈jø kì ri dël. Ciggɑni køny-ɑ ji ki yodi kinni jɑmmì ywëdhø wɑlɑ̀ ge dhïw. Møgɑni bene gen cigg kì ri rɑjjɑni bënn. Kɑ Mosɑ̀ geki Aɑron köbbi yi Jwøng-ɑ Ácwɑ̈ɑ̈j kinni, “Köbbu tyëng Isrɑil kinni, keløg jɑlø jɑmme olwöyø, gïg-ɑ lwöy kì ree ywëdhø, cɑgg e nudd e olwöyø wɑlɑ̀ dɑ gïn cuung lwöye, bëëde e ywëdhø ceth. Pyën-ɑ yije pëggi yi en, wɑlɑ̀ pyën-ɑ buddi yi en ceg-ɑ ywëdhø. Ngɑn nywɑl pyëne, lwøge ógudhe, kɑ kedhe be lwøggø; de ceg-ɑ bëëdø e ywëdhø gïti keny-ɑ óbuddi cɑ̈ng. Kɑ ngɑn pëggi wïj gïn-ɑ ɑ́pëggi yi ngɑn jɑmme lwöy, lwøge ógudhe, kɑ kedhe be lwøggø, de ceg-ɑ bëëdø e ywëdhø gïti keny-ɑ óbuddi cɑ̈ng. Ngɑn nywɑl ngɑn-ɑ jɑmme lwöy, lwøge ógudhe, kɑ kedhe be lwøggø; de ceg-ɑ bëëdø e ywëdhø gïti keny-ɑ óbuddi cɑ̈ng. Keløg ngɑn-ɑ jɑmme lwöy ngudd-ɑ ri ngɑn dhïw ki lɑ́ɑ̀w, ngɑn-ɑ ree ɑ́nguddi lwøge ógudhe, kɑ kedhe be lwøggø; de ceg-ɑ bëëdø e ywëdhø gïti keny-ɑ óbuddi cɑ̈ng. Kwøm-ɑ pëggi yi ngɑn-ɑ jɑmme lwöy kì yij yɑ̈y, wɑlɑ̀ gïn-ɑ köme pëggi yi en kì kömi ɑderø wɑlɑ̀ kyeny, ceg-ɑ ywëdhø. Gïg-ɑ kömi gen pëggi yi ngɑn-ɑ jɑmme lwöy bëëdø ge ywëdhø gïti keny-ɑ óbuddi cɑ̈ng. O ngɑn kɑ̈lli gïgɑni lwøge ógudhe, kɑ kedhe be lwøggø; de ceg-ɑ bëëdø e ywëdhø gïti keny-ɑ óbuddi cɑ̈ng. Keløg ngɑn-ɑ jɑmme lwöy cingge nuti lwøøg en ki pï, kɑ ónywɑ̈dø ki dhɑnhø, ngɑn-ɑ nywɑl yi en lwøge ógudhe, kɑ kedhe be lwøggø; de ceg-ɑ bëëdø e ywëdhø gïti keny-ɑ óbuddi cɑ̈ng. Keløg ngɑn-ɑ jɑmme lwöy ónywɑ̈dø ki gïjø ɑ́kyel kì kelli lɑ̈b, tørri gïnɑni. Keløg e ónywɑ̈dø ki gïjø me bɑ ɑ́bwödø, lwøøg ɑ́bwönɑni ki pï. “Keny-ɑ ówïyi jɑmme ki lwöyø, ceg-ɑ bëëdø ki cyɑ̈ng ɑ́bïryew, codhe kɑ ógudhe lwøge kɑ kedhe be lwøggø, o dhïwe. Kì bïdɑ̈ɑ̈g cyɑ̈ng, kɑ kɑ̈bbe kí ɑkùr-ɑ døngø ɑ́ryew, wɑlɑ̀ ɑkùr ójwɑt ɑ́ryew, kɑ gï kïdhe dhø Kemi Kwër, kɑ gï mëgge ókwërø. Gwøøg ɑ́kyel yi ókwërø ɑ́ gënhi orøg, kɑ men-ɑ kyeelø gwøg ɑ́ gënh-ɑ nyi rɑ̈b bëne. Bene kër-ɑ ódwøøgii bøli Jwøng-ɑ Ácwɑ̈ɑ̈j yi ókwërø ɑnɑn. “Keløg jɑlø ódyëddø ki tyew, kedhe be lwøggø; de ceg-ɑ bëëdø e ywëdhø gïti keny-ɑ óbuddi cɑ̈ng. Ógødh wɑlɑ̀ lɑwø keløg ree okedhø yi tyew, ceg ki lwøgø ceth; de ceg-ɑ bëëdø e ywëdhø gïti keny-ɑ óbuddi cɑ̈ng. Keløg jɑlø óbuddø ki dhɑjø kɑ ódyëddø ki tyew, kedhi gen be lwøggø ryeet; de ge ceg-ɑ bëëdø ge ywëdhø gïti keny-ɑ óbuddi cɑ̈ng. “Ngɑndhɑjø keny-ɑ óbëën bøli kej kwëre, ceg-ɑ bëëdø e ywëdhø ki cyɑ̈ng ɑ́bïryew. Ngɑn nywɑlii ceg-ɑ bëëdø e ywëdhø gïti keny-ɑ óbuddi cɑ̈ng. Gïn-ɑ köme pëggi yi ngɑnɑni kì yethi cyɑ̈ngg-ɑ kwëre, ceg-ɑ ywëdhø. Ngɑn nywɑl pyëne, lwøge ógudhe kɑ kedhe be lwøggø; ngɑnɑni ceg-ɑ bëëdø e ywëdhø gïti keny-ɑ óbuddi cɑ̈ng. Ngɑn nywɑl gïn-ɑ köme pëggi yi ngɑnɑni, lwøge ógudhe, kɑ kedhe be lwøggø, ceg-ɑ bëëdø e ywëdhø gïti keny-ɑ óbuddi cɑ̈ng. Pɑ̈r bënn ceth, keløg dhɑnhø nywɑl-ɑ pyëne wɑlɑ̀ gïn-ɑ köme pëgge, ngɑn-ɑ nywɑ̈ddi ceg-ɑ ywëdhø ceth, bëëdø e ywëdhø gïti keny-ɑ óbuddi cɑ̈ng. O keløg jɑlø óbuddø ki en kì yethi cyɑ̈ngg-ɑ kwëre, jɑlɑni ceg-ɑ bëëdø e ywëdhø ki cyɑ̈ng ɑ́bïryew. O pyën-ɑ yije buddi yi jɑlɑni ceg-ɑ ywëdhø. “Keløg remø ócyɑ̈dhø kì ri ngɑndhɑjø e pɑth kì bøli kej kwëre, wɑlɑ̀ remi kwëre cɑɑg-ɑ cögø e pɑ cungi, ceg-ɑ bëëdø e ywëdhø kì cyɑ̈ngg-ɑ cyɑ̈dhi remø kì ree. Pyën-ɑ buude kì cyɑ̈ngg-ɑ cyɑ̈dhi remø kì ree, nɑ pyën-ɑ nyi buude e ceg-ɑ kwër, kí gïn-ɑ köme pëgge, ge ywëdhø ni menɑni ceth. Ngɑn nywɑl gen lwøge ógudhe, kɑ kedhe be lwøggø; de ceg-ɑ bëëdø e ywëdhø gïti keny-ɑ óbuddi cɑ̈ng. Kì bɑng keny-ɑ ócungi remø, ceg-ɑ bëëdø ki cyɑ̈ng ɑ́bïryew, o dhïwe cyee. Kì bïdɑ̈ɑ̈g cyɑ̈ng, kɑ kɑ̈bbe kí ɑkùr-ɑ døngø ɑ́ryew wɑlɑ̀ ɑkùr ójwɑt ɑ́ryew kɑ gï kïdhe yï ókwërø kì dhø Kemi Kwër. Kɑ ɑ́kyel gwøg yi ókwërø ɑ́ gënhi orøg, kɑ men-ɑ kyeelø gwøge ɑ́ gënh-ɑ nyi rɑ̈b bëne. Bene kër-ɑ ódwøøgii bøli Jwøng-ɑ Ácwɑ̈ɑ̈j yi ókwërø ɑnɑn. “Cegu tyëng Isrɑil kinni, lɑ̈ɑ̈w gen ri gen ki gïg-ɑ ywëdh gen, o ge ócög gen ge pɑ thøw, mɑ́ keløg kemɑ, men-ɑ dyëri gen oywëdhø yi gen, ge ceg-ɑ thøø.” Møgɑk bene gen cigg kipe ngɑn jɑmme lwöy geki ngɑn dyëddi ki tyew, kí ngɑndhɑjø men-ɑ kwër dwɑ̈ye, wɑlɑ̀ jɑlø men buddi ki dhɑjø me ywëdhø. Kì bɑng thøwi wɑ̈ddi Aɑron gɑ ɑ́ryew, kipe gööj kɑ ɑ́kïdhi gen bøli Jwøng-ɑ Ácwɑ̈ɑ̈j ki mɑc me pɑth ki ɑkwër, ɑköbbi møg Mosɑ̀ yi Jwøng-ɑ Ácwɑ̈ɑ̈j, gø ɑ́köbbe kinni, “Köbbí Aɑron ómyëw kinni ko nyi rïïj e bï-ɑ yij gëng Kej Kwërdwøng, mɑ́ kenyɑni ɑ nyi cwöbɑ kì yij pøølø kì kömi Sɑnduug Cigg. Keløg e ópëmø ceg-ɑ thøø. De ócuggø kedhi Kej Kwërdwøng, keny-ɑ órume ki kɑ̈nø ki nyɑ wɑdh ɑ́ gënhi orøg, kí órömø ɑ́ gënh-ɑ nyi rɑ̈b bëne. “Lwøgge, kɑ ógudhi ókwërø lønye ree, ɑ løg ɑ́ywönhthinh, kí ɑköj, kí wëni yij geki wëni wïj. “Nëngi Aɑron yi tyëng Isrɑil kí ónyögg ɑ́ryew mø gënhi orøg, kí órömø ɑ́kyel mɑ gënh-ɑ nyi rɑ̈b bëne. Kɑ nyɑ wɑdh gwøg yi Aɑron ɑ́ gënhi orøg, me gøøm bøli orøge kí orøøg tyëng gøle. Codhe, kɑ ónyögg ryeet kïdhe dhø Kemi Kwër. Kɑ lënge ki gɑgg ɑ́ryew, ɑ́kyel ógwedø kinni “Mi Jwøng-ɑ Ácwɑ̈ɑ̈j.” O men-ɑ kyeelø ógwedø kinni “Mi Adhɑdhel.” Kwɑny Aɑron ónywøg men-ɑ́ wëële ópɑ̈dhi ki gɑng-ɑ ógwedø kinni, “Mi Jwøng-ɑ Ácwɑ̈ɑ̈j,” kɑ gø gwøge ɑ́ gënhi orøg. Thyeer ónywøng-ɑ pɑ̈dhi ki Adhɑdhel bøli Jwøng-ɑ Ácwɑ̈ɑ̈j, kɑ køøl pɑ̈l yï Adhɑdhel, o kɑ̈ɑ̈le orøøg teedø. “Aɑron keny-ɑ óngɑle nyɑ wɑnh-ɑ bɑ gënhi orøg kipere geki tyëng gøle, kɑ̈bbe ki lelli mɑc kì wïj këli lɑm ki óthɑgø, kɑ kɑ̈bbe thyew ki bɑkur men-ɑ yøme med kì yethi cingge ɑ́ryew kɑ gï kïdhe Kej Kwërdwøng. Kɑ bɑkur kïdhe mɑc kì bøli Jwøng-ɑ Ácwɑ̈ɑ̈j, o kum mi Sɑnduug Cigg (ɑ løg kwøøm lɑ̈mpyëw) mɑ̈ɑ̈n nënnø yi yïri bɑkur, kipe gø ólidh yi en kɑ othøø. Kɑ̈bbe ki ri remi wɑdh, kɑ kïnye bøli kwøøm lɑ̈mpyëw ki remø kì kuni wɑɑng cyɑ̈ɑ̈ng mwøl, kɑ kïnye piny ki remø ki lwede tyel ɑ́bïryew kì bøli Sɑnduug Cigg. “Codhe, kɑ ónywøng-ɑ bɑ gënhi orøg ngɑle, kɑ kïdhe Kej Kwërdwøng ki remø, kɑ remɑni kinye ni kɑ ɑ́gwøge remi wɑdh, gø kinye’ piny ki lwede kì bøli Kwøøm Lɑ̈mpyëw tyel ɑ́bïryew. Bene kër-ɑ ógeedhe Kej Kwërdwøng ɑnɑn kipe ywëdhi tyëng Isrɑil, kí gïg-ɑ nyi gwøg yi gen kí pëëmø, kí orøøg gen bënn. Ko di ngɑn ying yij Kemi Kwër kì bøli keny-ɑ ókedhe Kej Kwërdwøng be gwøgi kwër, gïti keny-ɑ óbëëne wɑ̈g. Orume ki gøømi bøle geki gøle, kí bøli tyëng Isrɑil bënn. Codhe, kɑ kedhe wɑ̈g, kɑ këli lɑm men-ɑ bøli Kemi Kwër geedhe, kɑ̈bbe ki remi wɑdh, kɑ kɑ̈bbe ki remi ónywøg kɑ gø gɑ̈ɑ̈je ri tùngi këli lɑm. Kɑ kïnye ree ki remø ki lwede tyel ɑ́bïryew. Bene yuu-ɑ lɑɑwe gøn ɑnɑn, kipe orøøg tyëng Isrɑil, o gø kwëre. “Keny-ɑ órume ki gedhi kej kwër, ɑ løg Kej Kwërdwøng, kí këli lɑm, kɑ ónywøng-ɑ bɑ mi Adhɑdhel thyeere bøli Jwøng-ɑ Ácwɑ̈ɑ̈j. Aɑron cïbe cingge ryeet wïj ónywøngɑni, kɑ rɑj, kí orøøg Isrɑil, kí pyëëm Isrɑil gøønye kömi ónywøngɑni, o gï kɑ̈ɑ̈le kì wïje. Codhe, kɑ dyelɑni køøl pɑ̈l yi dhɑnhø me bɑ ɑkwɑny ɑ́ men køølii pɑ̈l. Orøøg gen bënn ókïdhi pɑ̈l yi dyelɑni, kɑ dyel wiy e owïïnø kì yij pɑ̈l. “Codhe, kɑ Aɑron kedhe yij Kemi Kwër kɑ ógudhi kwër møg-ɑ ɑ́løny yi en ɑ́tïni, e nuti kedhi Kej Kwërdwøng gï lunye wɑ̈g, kɑ gï wiye kì kenyɑni. Lwøgge kì keny me bɑ ɑkwër, kɑ ógudh-ɑ bɑ møge lønye ree. Codhe o kedhe wɑ̈g be muuji gënh-ɑ nyi rɑ̈b bëne ɑ́ mi lɑ̈ɑ̈nyi orøge kí orøøg teedø. Kɑ dwɑ̈li gënhi orøg rɑ̈be kì wïj këli lɑm. Jɑl-ɑ ɑ́køøl dyel pɑ̈l yï Adhɑdhel, lwøge ógudhe, kɑ lwøgge kì pɑ̈l kunɑni, o rume cyee, o bëe kɑɑl. Kɑ wɑdh men-ɑ bɑ gënhi orøg geki ónywøg men-ɑ bɑ gënhi orøg møg-ɑ́ remi gen ɑ́kïdhi be gedhi kej kwër, kïdhi ngɑ̈ɑ̈j kɑɑl, kɑ ge rɑ̈b ki mɑc, rɑ̈ɑ̈b rïnggi gen bënn, kí pënni gen, kí cïnni gen. Kɑ ngɑn-ɑ rɑ̈b gen lwøge ógudhe, kɑ lwøgge, kì pɑ̈l kunɑni, o rume cyee, o bëe kɑɑl. “Mïdhi cigg møg kì yethi runn bënn. Kì bïryeew dwɑ̈tt, kì cyɑ̈nggi dwɑ̈y pyɑ̈rø, tyëng Isrɑil geki tyëngpɑth møg-ɑ bëëdø kì kelli gen, ko di gwøg me gwøg yi gen, kɑ ge ko cyɑ̈ɑ̈m. Gwøøg guöög dhïwø kipe lɑ̈ɑ̈nyi orøg kì cyɑ̈ngɑni, o ji dhïwi gen. Cyɑ̈ngɑni bɑ cyɑ̈ɑ̈ng kwër me dwøng, bɑ cyɑ̈ɑ̈ng twöni rek ki gïncɑm, o bɑ cyɑ̈ɑ̈ng ywömø. Mïdhi cigg møg kì yethi rïjj bënn. Guöngɑni gwøg-ɑ yi Ókwër-ɑ Dwøng, men-ɑ órønyø ɑ́ kej wïye, kɑ ruug ki ógudhi kwër. En ɑ lɑw Kej Kwërdwøng, geki Kemi Kwër mi Jwøng-ɑ Ácwɑ̈ɑ̈j, kí këli lɑm, kí ókwërr-ɑ kyeelø bënn, kí teedø bëne. Mïdhi cigg møgɑk kì yethi runn bënn gïti ɑtheer. Guög men nyi gwøg tyelø ɑ́kyel kì yethi runn bënn, kipe lɑwi dëlli tyëng Isrɑil ki orøøg gen.” Kɑ møg-ɑ ɑ́ceg yi Jwøng-ɑ Ácwɑ̈ɑ̈j gwøg yi Mosɑ̀ bënn. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí Aɑron geki wɑ̈dde kí tyëng Isrɑil bënn kinni, bene møg-ɑ ɑ́ceg yi Jwøng-ɑ Ácwɑ̈ɑ̈j ek: Keløg wɑ̈d gøl Isrɑil ongɑ̈dø ki dhyɑng wɑlɑ̀ dyel rømø wɑlɑ̀ ɑ́tegø, kì kɑɑl wɑlɑ̀ pɑ̈l, e gø pɑ kɑ̈ɑ̈le, o gø ngɑle kì dhø Kemi Kwër, o gø mëgge Jwøng-ɑ Ácwɑ̈ɑ̈j ɑ́ gëëdhi, ngɑn ni menɑni cinge dɑ remø, bɑ remø ɑ ɑ́kønye piny, cɑ́y ying-ɑ köme kipe remɑni. Kɑ̈ɑ̈l ngɑn ni menɑni wɑ̈g kì kelli jie. Menɑni wɑng-ɑ kinni tyëng Isrɑil bɑ ɑceg kinni nyi muuj gen Jwøng-ɑ Ácwɑ̈ɑ̈j lɑ̈yy-ɑ ɑ́bëëd gï ongɑllø yi gen kì pɑ̈l, wu bɑ ɑceg ɑnɑn kinni nyi muuj gen ókwërø kì dhø Kemi Kwër, kɑ ge nyi ngɑ̈lli Jwøng-ɑ Ácwɑ̈ɑ̈j gɑ gënhi mër. Kɑ ókwërø nyi kïnye ri këli lɑm ki remø, kɑ dwɑ̈lø rɑ̈be kì wïj këli lɑm kì dhø Kemi Kwër, e yømi tole bɑ men mïni pyëw Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j ko cigi wiy piny yi tyëng Isrɑil, ge ko døøg be ngɑ̈ddi wɑ̈li dyel kì pɑ̈l këti. Mïdhi cigg møg yi tyëng Isrɑil gïti ɑtheer. “Ko di wɑ̈d Isrɑil, wɑlɑ̀ ngɑnpɑth me bëëdø kì kelli gen, me ngɑ̈dø ki gënh-ɑ nyi rɑ̈b bëne, wɑlɑ̀ gëëdhi megø, kɑ ocögø gø pɑ kɑ̈ɑ̈le be ngɑlø kì bøli Jwøng-ɑ Ácwɑ̈ɑ̈j, ngɑn-ɑ ógöögø kinøw kɑ̈ɑ̈l wɑ̈g kì kelli jie. “Ngɑn-ɑ ócyɑ̈mø ki remø kì kelli tyëng Isrɑil, wɑlɑ̀ ngɑnpɑth me bëëdø kì kelli gen, Jwøng-ɑ Ácwɑ̈ɑ̈j ngɑ̈je luge’ ngɑnɑni, o bɑ men kɑ̈ɑ̈l wɑ̈g kì kelli jie. Mɑ́ wëyi gïn-ɑ nëënø bëne ying-ɑ ri remø, bene ɑ bɑnge cegɑ wun kinni nyi kiny remø ri këli lɑm ɑ́ men gøøm bøli orøøg wun. Remø, ɑ bɑ wëy, en ɑ lwöög orøg wɑ̈g. Bene gïn-ɑ pere ɑ́kyëddɑ tyëng Isrɑil geki tyëngpɑth møg-ɑ bëëdø kì kelli gen kinni ge ko nyi cyɑ̈ɑ̈m ki remø. “Ngɑn dwɑr lɑ̈y me nyi cɑm, wɑlɑ̀ winyø kì kelli wɑ̈ddi Isrɑil, wɑlɑ̀ ngɑnpɑth me bëëdø kì kelli gen, kønye reme piny kɑ gø rïge ki lɑ̈bø. Mɑ́ wëyi gïn-ɑ nëënø bëne ying-ɑ ri remø, o tyëng Isrɑil ɑ́kyëddɑ kinni, ko di remi gïïpiny me cɑm yi wun, mɑ́ wëyi gïn-ɑ nëënø bëne bɑ reme, o ngɑn cɑmii ceg kɑ ngøl wɑ̈ye. “Wɑ̈d Isrɑil, wɑlɑ̀ ngɑnpɑth me bëëdø kì kelli gen, ke cyɑ̈me ki lɑ̈y me bɑ kwɑ̈ɑ̈l, ying e thøø kete wɑlɑ̀ dööng ɑ bɑng lɑ̈y me cyɑ̈mø, lwøge ógudhe, kɑ kedhe be lwøggø, o ceg-ɑ bëëdø e ywëdhø gïti keny-ɑ óbuddi cɑ̈ng. De keløg ógudhe pɑ lwøg yi en, wɑlɑ̀ pɑ kedhi be lwøggø, ngɑnɑni ócyɑ̈dhi ki cyënne.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, bene yɑn, yɑ Jwøøg wun, Jwøng-ɑ Ácwɑ̈ɑ̈j, wu ko göög ki gïg-ɑ ɑ́gøggi yi tyëng Rïp kun-ɑ ɑ́bëëd wun. Kɑ wu ko göög ki gïg-ɑ gøggi kì piny Kɑnɑɑn kun-ɑ kïdhɑ wun. Kwööng gen ko ngøy wun. Mïdhu ciggɑ, kɑ møg-ɑ kwøb yi yɑn nyi gwøg wun. Mïdhu ciggɑ geki kwöngɑ. Ngɑn-ɑ ómïdhi gen óyïddi ki nënnì kì bɑng gen. Bene yɑn Jwøng-ɑ Ácwɑ̈ɑ̈j. “Ko di ngɑn niin wɑɑd gen. Bene yɑn Jwøng-ɑ Ácwɑ̈ɑ̈j. Wïyí ko yɑ̈ɑ̈r, kì bɑng kɑ niin meyí. Men-ɑ́ meyí ko yɑ̈r yi yïn. Mɑ̈nni wïyí ko niin yi yïn. Wør gen ki wør-ɑ wøør wïyí. Nyimyëw ko niin yi yïn, ko niin yi yïn kinni tek, cɑgg e ópidh ɑ pɑ̈l. Kwɑrí, nyɑɑr wɑ̈dí, wɑlɑ̀ nyɑɑr nyɑrí ko niin yi yïn, menɑni óbëëd ɑ́ ɑyɑ̈r kì kömí. Nyiwöw ko niin yi yïn, bɑ nyimyëw thyew. Cï ómï wïyí ko niin yi yïn, bɑ meyí thyew. Kwɑrí, cï wɑ̈dí ko niin yi yïn. Cï ómyëw ko niin yi yïn. Nyɑndhɑjø men-ɑ meye óniin yi yïn, ko niin yi yïn, wɑlɑ̀ kwɑɑr ngɑnɑni. Møgɑni bɑ wɑdde mø cyɑ̈gi cɑrø, o menɑni óbëëd ɑ́ ɑyɑ̈r kì kömí. Nyɑndhɑjø ko nywøøm kömi nyimen, e nyimen men-ɑ köme nyömmi onëënø. “Ngɑndhɑjø ko niin yi yïn kì bøli kej kwëre, mɑ́ e ywëdhø. Cï jɑlø megø, ko niin yi yïn, yï ceg-ɑ ywëdhø. Nyigí ko rɑ̈bbí Mölek ki mɑc gɑ gëdhhì, kipe nyingi Jwøgí óbwöl yi yïn. Bene yɑn Jwøng-ɑ Ácwɑ̈ɑ̈j. Ko di ngɑn niin jɑlø ni en, menɑni mɑɑn yi Jwøk. Lɑ̈y ko niin yi yïn, o yï ywëdh yi en. Wɑlɑ̀ ngɑndhɑjø ree ko wëgge niin yi lɑ̈y, menɑni bɑ tøønyi orøg. Gïn ni menɑni ko wöl ki gwøgø. “Rií ko ywëëdh ki gïg ni møgɑni, mɑ́ jurr-ɑ cyeddi yi yɑn kì bølí ɑnɑn ɑ́ceg-ɑ ri gen ki ywëdhø. Kɑ piny oywëdhø yi gïg-ɑ ɑ́gøggi yi gen, ɑ bɑnge cɑyɑ piny, kɑ piny jie ngøøge wɑ̈g. De wun, mïdhu ciggɑ, kɑ wu ko göög ki gïgrijjø ni møgɑni, wu bënn kì pönhï, kí tyëngpɑth møg-ɑ bëëdø kì kelli wun. Mɑ́ gïgrijjø møgɑni ɑ́gøgg-ɑ yi tyëng-ɑ ɑ́kwöngi ki bëëdø kì pönhɑni wu nuti kedhi yije, kɑ piny oywëdhø. Keløg pinyɑni óywëdh yi wun, wu pɑ lony yi en ki ngøgø ni kɑ ɑ́ngøge jurr-ɑ ɑ́kwöngi ki ying yije? Ngee, ngɑn-ɑ ógöögø ki gïgrijjø ni møgɑni, pɑ cigi kwɑɑn kelli jii Jwøk.” Akööb Jwøng-ɑ Ácwɑ̈ɑ̈j kinni, “Mïdhu ciggɑ kɑ wu ko göög ki gïgrijjø møg-ɑ ɑ́gøggi yi tyëng-ɑ ɑ́ying piny menɑni, kɑ ri wun ko ywëdh wun ki gwøgi gïgɑni. Bene yɑn, Jwøøg wun, Jwøng-ɑ Ácwɑ̈ɑ̈j.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil bënn kinni, bëëd wun wu bɑ ɑkwër, mɑ́ yɑ bɑ Kwërø, yɑ Jwøøg wun, Jwøng-ɑ Ácwɑ̈ɑ̈j. Wør ngɑn meye geki wïye, kɑ Sɑbɑth ɑ bɑ cyɑ̈ɑ̈ng ywömø mïdhi wun ni kɑ ɑ́cegɑ wun. Bene yɑn Jwøøg wun, Jwøng-ɑ Ácwɑ̈ɑ̈j. “Yɑ ko wiyu piny, kɑ wu ko kedhi be mɑlli jwögg-ɑ pɑth ki dyër, ri wun ko thɑ̈dhhi wun ki jwögg ki ngyënyø gɑ møg mɑlli yi wun. Bene yɑn Jwøøg wun, Jwøng-ɑ Ácwɑ̈ɑ̈j. “Keny-ɑ óngɑ̈ɑ̈d ki gënhi mër, mïdhí cigg-ɑ ɑ́köbbɑ yïn, o gënhí óyïëy yi yɑn. Cɑɑm rïngø kì cyɑ̈ng-ɑ ngɑɑl jwödhø kí dhuki. O keløg e dɑ men döng kɑ pïïd yi dɑ̈ɑ̈g cyɑ̈ng, rɑ̈b ki mɑc. Mɑ́ e ywëdhø, de keløg e dɑ ngɑn cyɑ̈mø kì dɑ̈ɑ̈g cyɑ̈ng, rïngɑni bɑ gïn kwɑ̈gø, pɑth ki ɑyïëy. O ngɑn cyɑ̈mø ki en ɑ́røngi, mɑ́ e bwöl-ɑ gïn-ɑ ɑ́thyey ɑ́ mi Jwøng-ɑ Ácwɑ̈ɑ̈j, o ngɑn ni menɑni ceg kɑ ngøl wɑ̈g kì kelli jie. “Keny-ɑ ócɑ̈gi wun ki kɑj ki jɑmm-ɑ ókɑj yi wun kì piny wun, møg-ɑ leggi pwödhø ko nyi kɑj, wɑlɑ̀ møg-ɑ bodh kì bɑng kɑj ko nyi gwen. Wu ko nyi døøg be lori bɑ̈ggi wun kenyi rum gen ki pønø, wɑlɑ̀ nywøli yenh møg-ɑ dëëmø ko nyi gwen wun, wïyu gen tyëng-ɑ nyingi gen cɑn geki tyëngpɑth møg-ɑ bëëdø kì kelli wun. Bene yɑn Jwøøg wun, Jwøng-ɑ Ácwɑ̈ɑ̈j. “Wu ko kwɑ̈ɑ̈d, wɑlɑ̀ wu ko wëëny, kɑ wɑddi wun ko nyi göggi wun ki ɑmolpiny. wu ko nyi köngi ki nyingɑ kinni gïn-ɑni ógwøg yi yïn keløg pëthi wun pɑ dwɑddi gwøgii kidyër, menɑni bɑ bwöli nyingɑ. Bene yɑn Jwøgí, Jwøng-ɑ Ácwɑ̈ɑ̈j. “Ko di ngɑn wɑnge guud yi yïn, wɑlɑ̀ gëe ko kɑɑb. Muuj köggi ngɑn-ɑ kïr yi yïn kì cyɑ̈ngɑni ceth, kɑ ko wëggí wɑ̈dhi dhuki. Ming ko yɑɑny wɑlɑ̀ bøli cwør ko cïbí ki gïjø me cwɑny tyele. Lïngu møgɑ, Bene yɑn Jwøgí, Jwøng-ɑ Ácwɑ̈ɑ̈j. “Nyi cïbu kwøb kɑ̈jji gen kì burø, wu ko nyi wɑ̈dhi ngɑn wɑnge cɑn ki cwɑgø yøw, wɑlɑ̀ wu ko nyi böggi yi ngetikɑ̈r, de nyi lidhu gøøny wɑddi wun kidøøj. Wu ko nyi tuum ki gïg-ɑ pɑth ki dyër kì ri wɑddi wun. Kɑ wu ko nyi göög ki gïn bɑnge cuggi wɑɑd wun ki thøø. Bene yɑn Jwøng-ɑ Ácwɑ̈ɑ̈j. “Wɑddi wun ko nyi mɑɑn wun ki pëthi wun. Keløg wɑɑd wun óbɑ̈jjø, köbbí bɑ̈jje, ke pɑ köbbií, yï ócɑy. Nyi wïl wɑ̈thi wun ki gïgrijjø møg-ɑ nyi göggi wun yi ji møøgø, wɑlɑ̀ ngɑn göggi yïn ki gïnrɑj ko mɑɑn. De mɑɑr ngɑn-ɑ butí ni kɑ̀ mɑɑr rií. Bene yɑn Jwøng-ɑ Ácwɑ̈ɑ̈j. “Lɑ̈yy-ɑ mïdhi yi wun kì pɑc ko wëggu tïg ki møg bɑ̈ɑ̈n. Wu ko nyi kɑ̈ɑ̈g ki wɑ̈thi köödh ɑ́ryew kì yij pwödhø ɑ́kyel. Wu ko nyi rug ki ógudh mø bɑ ɑcwɑ̈j ki wɑ̈thi jɑmmì ɑ́ryew mø bɑ̈ɑ̈n. “Keløg jɑlø óbuddø ki bɑ̈ng-ɑ dhɑjø men-ɑ ólöggi jɑlø megø, cɑgg jɑl-ɑ ɑ́löggii nuti muujø ki jɑmmì, bɑ̈ngɑni kí jɑl-ɑ ɑ́buddi gen ceg kɑ cɑyø. De ge pɑ nɑ̈g, mɑ́ nyɑnɑni nuti pɑ̈dø, nudd ɑ́ bɑ̈ng. Kɑ̈ne dhø Kemi Kwër ki órömø me gøøm bøli orøge. Órömɑni ógwøg yi ókwërø ɑ́ gënhi orøg, o Jwøk lɑɑwe dwööge piny kipe orøge. “Keny-ɑ ókedhu piny Kɑnɑɑn kɑ wu opïdhø ki yenh-ɑ nywøli gen nyi cɑm, møg-ɑ ónywøl yi yenhɑni kì tyeli mɑl bɑ ɑkerø cɑmø yi wun ki runn ɑ́dɑ̈g. Wu ko cyɑ̈ɑ̈m ki nywøli yenhɑni ki runn ɑ́dɑ̈gɑni. Kì ngween runn, thyey wun nywøli yenhɑni bënn, kɑ ge muuj wun gɑ møg pwøj wun yɑn, yɑ Jwøng-ɑ Ácwɑ̈ɑ̈j. De cɑmu gen kì bïïj runn. Keløg møgɑni ógwøg yi wun bënn, yenhi wun ceg-ɑ kɑ̈nø ki nywøl mø gïïr. Bene yɑn Jwøøg wun, Jwøng-ɑ Ácwɑ̈ɑ̈j. “Wu ko cyɑ̈ɑ̈m ki gïïpiny e ree dɑ remø. Wu ko nyi rɑ̈ɑ̈ng ki ɑ́jwöggì, wɑlɑ̀ wu ko nyi kedhi be pëjjø ki yɑdh. Thɑ̈nggi wun ko nyi lyel wun, wɑlɑ̀ yëyyi tïggi wun ko nyi teb wun. Dëlli wun ko nyi kɑggi wun kɑ̀ ywøgu ngɑnthøø, wɑlɑ̀ ri wun ko gör wun ki gwedd. Bene yɑn Jwøng-ɑ Ácwɑ̈ɑ̈j. “Ayɑ̈r ko kɑ̈ɑ̈l kömí; nyɑrí ko göjjí gwøg ki ɑ́mɑ̈ɑ̈j kengø, kipe piny órënyi yi orøg. Koru cyɑ̈ɑ̈ng Sɑbɑth, kɑ keny-ɑ yije nyi mɑlli yɑn wør wun. Bene yɑn Jwøng-ɑ Ácwɑ̈ɑ̈j. “Wu ko nyi kedhi yï ɑ́jwöggì be pëjjø ki yɑdh, keløg wu kedh-ɑ yï gen, wu ceg-ɑ ywëdhø. Bene yɑn Jwøøg wun, Jwøng-ɑ Ácwɑ̈ɑ̈j. “Lïngu kwøbbi tyëngdøngø, kɑ ge wør wun. Kɑ Jwøøg wun böggi wun. Bene yɑn Jwøng-ɑ Ácwɑ̈ɑ̈j. “Tyëngpɑth møg-ɑ bëëdø kì piny wun nyingi gen ko guud wun. Mïdhu gen ge pɑ̈r ki wɑddi wun ceth, kɑ ge mɑɑr wun ni kɑ̀ mɑɑr wun ri wun. Wɑ̈thi wun ko wïl kinni, wu ɑ́bëëd wu bɑ tyëngpɑth kì piny Rïp. Bene yɑn Jwøøg wun, Jwøng-ɑ Ácwɑ̈ɑ̈j. “Wu ko nyi wëëny kɑ̀ rum wun ki jɑmmì, ying gɑ møg røm bɑ̈r, wɑlɑ̀ pegø, wɑlɑ̀ møg-ɑ yethi gen nyi rum. Rømu jɑmmì ki rum-ɑ dyër. Bene yɑn Jwøøg wun, Jwøng-ɑ Ácwɑ̈ɑ̈j, ɑ ɑ́kɑ̈ɑ̈l wun wɑ̈g kì piny Rïp. Mïdhu kwöngɑ geki ciggɑ. Bene yɑn Jwøng-ɑ Ácwɑ̈ɑ̈j.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, wɑ̈d Isrɑil wɑlɑ̀ ngɑnpɑth men-ɑ bëëdø kì kelli wun men mëggi nyige Mölek, ceg ki nɑ̈gø, bɑ̈lli ki tuggi kïttì yi teedø bëne, o thøwe. Ngɑn mëggi nyige Mölek, kɑ Kemi kwërɑ ywëdhe, kɑ nyingɑ bwöle, ngɑ̈jɑ lugɑ’ en, o pɑ cigi mïdhø yi yɑn ɑ́ dhɑnhø ɑ́kyel kì kelli jiɑ këti. De keløg e ówøy yi teedø kɑ ocögø gø pɑ nɑ̈g yi gen, ngɑ̈jɑ lugɑ’ ngɑnɑni geki tyëng-ɑ ɑ́rudi bɑnge bënn, kɑ ge kedh-ɑ be mɑlli Mölek. Ge pɑ cigi mïdhø yi yɑn gɑ jiɑ këti. “Keløg e dɑ ngɑn kedhi yï ɑjwøgø be pëjjø ki yɑdh, ngɑ̈jɑ lugɑ’ en, o pɑ cigi mïdhø yi yɑn ɑ́ dhɑnhø ɑ́kyel kì kelli jiɑ këti. Bëëd wun wu bɑ ɑkwër, mɑ́ bene yɑn Jwøøg wun, Jwøng-ɑ Ácwɑ̈ɑ̈j. Mïdhu ciggɑ, mɑ́ bene yɑn Jwøng-ɑ Ácwɑ̈ɑ̈j, o bɑ yɑn ɑ kwër wun.” Kɑ Jwøng-ɑ Ácwɑ̈ɑ̈j omuujø ki cigg møg kinni, “Nɑ̈ɑ̈g ngɑn yɑny wïye wɑlɑ̀ meye, ɑ́yɑny-ɑ wïye wɑlɑ̀ meye, óthøw ki cyënne. “Keløg dhɑnhø kedh-ɑ ri cï wɑ̈d Isrɑil, nɑ̈ɑ̈g jɑlɑni geki ngɑndhɑjø ryeet. Ngɑn buddi ki ɑ́kyel kì kelli mɑ̈nni wïye, wïye ɑ́yɑ̈r en, nɑ̈g geki ngɑnɑni ryeet. Ge óthøw ki cyënni gen. Keløg dhɑnhø kwɑre, cï wɑ̈de oniin yi en, nɑ̈ɑ̈g gen ryeet. Ge ɑ́tir-ɑ orøg, o ge óthøw ki cyënni gen. Keløg jɑlø oniin yi jɑlø megø, ge ɑ́gwøg-ɑ gïjø me mɑɑn yi Jwøk, nɑ̈ɑ̈g gen ryeet. Ge óthøw ki cyënni gen. Ngɑn-ɑ ónywøøm ngɑndhɑjø kömi nyɑre, o ge göög gen ki mɑ̈nne ryeet, rɑ̈ɑ̈b jɑlɑni geki tyëngɑni ryeet ki mɑc, o ge thøw gen kipe ɑyɑ̈r men-ɑ ɑ́gwøg yi gen, gïn ni menɑni ko wöl ki gwøgø kì kelli wun. Ke di ngɑn niin lɑ̈y, nɑ̈ɑ̈g ngɑnɑni geki lɑ̈yɑni ryeet. Keløg ngɑndhɑjø ree wëgge’ niin yi lɑ̈y, nɑ̈gu ngɑnɑni geki lɑ̈yɑni ryeet, ge óthøw ki cyënni gen. “Keløg dhɑnhø nywøm-ɑ nyimen wɑlɑ̀ nyiwɑ̈n, yɑ̈ɑ̈r gen kì bøli ji kɑ ge cyeed wɑ̈yi gen. Ngɑn-ɑ óniin nyimen cyɑ̈dhe ki cyënne. Keløg jɑlø óbuddø ki dhɑjø me ceg kwër ki dwɑ̈ye, cyeed gen wɑ̈yi gen kì kelli ji, mɑ́ ngɑnɑni ɑ́buddi ki en e ywëdhø, ree dɑ remø. “Keløg dhɑnhø niin-ɑ wønye nyimï wïye, wɑlɑ̀ mɑɑy gen nyimï meye, ge ɑ́tir-ɑ orøg, cɑɑy gen ryeet. Keløg dhɑnhø niin-ɑ cï ómï wïye, wïye nuti wøør en, cɑɑy nyelɑni geki ngɑnɑni ryeet, ge ócyɑ̈dhi ki orøøg gen, o ge ceg-ɑ thøø ki wɑ̈thi gen. Keløg dhɑnhø kwɑny-ɑ cï ómen, ge ceg-ɑ thøø ki wɑ̈thi gen geki ngɑnɑni. Ágwøg-ɑ gïjø me ywëdhø, kɑ ómen lɑre.” Jwøng-ɑ Ácwɑ̈ɑ̈j okööbø kinni, “Mïdhu kwöngɑ geki ciggɑ, o wu ócög wu pɑ bɑny yi piny Kɑnɑɑn, piny-ɑ yije kïdhɑ wun. Wu ko ngöyi ki bëëdi tyëng-ɑ bëëdø kì kunɑni, jurrɑni cyeedɑ’ wɑ̈g kɑ per kinni o wu kïdhɑ pinyɑni. Yɑ køm-ɑ ngwøggø yi gïg-ɑ gøggi yi gen. De pinyɑni, ɑ yije mulli yi cɑg geki møøw kïc, piny kɑ̈r ɑ́mëggɑ wun ɑ́ mi wun. O mëggɑ’ wun ceth. Bene yɑn Jwøøg wun, Jwøng-ɑ Ácwɑ̈ɑ̈j, ɑ ɑ́yieny wun kì kelli jurrì. Kì bɑng menɑni, lɑ̈yy geki winy møg-ɑ ywëdhø ko cɑm wun. Wu ko cyɑ̈ɑ̈m ki lɑ̈yy geki winy møg-ɑ ywëdhø. Ge ɑ́kwøbɑ kinni ge ywëdhø, o ke cɑm wu gen, wu ceg-ɑ ywëdhø. Bëëd wun wu bɑ ɑkwër wun ɑ́ møgɑ, mɑ́ yɑn, yɑ Jwøng-ɑ Ácwɑ̈ɑ̈j, yɑ bɑ kwërø, kɑ wu yïëënyɑ wɑ̈g kì kelli jurrì kipe kinni o wu bëëd wun, wun ɑ́ møgɑ. “Nɑ̈ɑ̈g ngɑn-ɑ ree di yɑdh, ying-ɑ́ jɑlø wɑlɑ̀ dhɑjø, bɑ̈lli gen ki tuggi kïttì o ge thøw gen, ge óthøw ki cyënni gen.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí ókwër, wɑ̈ddi Aɑron kinni ko di ngɑn ywëdh ree kì kelli gen ki cølø, de ócuggø kedhi yij cølø keløg ngɑn-ɑ thøø bɑ wɑɑd remø, ɑ́ meye, wɑlɑ̀ wïye, wɑlɑ̀ wɑ̈de, wɑlɑ̀ nyɑre, wɑlɑ̀ ómen, kí nyimen nyɑn-ɑ nuti nywømø. Ko kedhi yij cølø keløg ngɑn-ɑ thøø bɑ ørø. “Ko di ókwërø me lyel budi wïje wɑlɑ̀ teb yëyyi tïge, wɑlɑ̀ dële ko gööre e nyodh-ɑ kinni ceg-ɑ ywøg ki ngɑnthøø. Bëëde e bɑ ɑkwër ceth kɑ nyingɑ ko bwöle, mɑ́ gen ɑ nyi muuj jɑmmɑ møg-ɑ nyi muuj ki mɑc. Kì bɑng menɑni bëëd gen ceth ge bɑ ɑkwër. Ókwërø ko nyömi ki dhɑjø me kwöngø ki bëëdø ki jɑlø, ko nyömi ki nyɑnɑjur men-ɑ ónywɑlø yi jɑlø, wɑlɑ̀ ɑtɑ̈ng, mɑ́ ókwërø bɑ ngɑn-ɑ ɑ́kwërri Jwøk. Mïdhu ókwërø ɑ́ ɑthyey, mɑ́ en ɑ nyi muuj jɑmmi Jwøøg wun, bëëde ɑ́ ɑkwër ceth, mɑ́ yɑn, yɑ Jwøng-ɑ Ácwɑ̈ɑ̈j ngɑn-ɑ kwër wun, yɑ bɑ kwërø. Keløg nyɑɑr ókwërø ogöögø ki ngɑn niin ki köögi, wïye ɑ́bwöl yi en, rɑ̈b ki mɑc. “Ókwër-ɑ dwøng wïje ɑ́kunyi ki møøw röny, ɑ́rum ki thyeyø kinni o ruge kí ógudhi kwër, yëyye ko wiy yi en o ge bëëd gen ri gen yölli gen, wɑlɑ̀ ógødhe ko kɑge e nyodh-ɑ kinni ywøg-ɑ ngɑnthøø. Ko kedhi kömi ngɑnthøø, kɑ ko kedhi yij cølø cɑgg e bɑ wïye wɑlɑ̀ meye ɑ thøø. Ko kedhi wɑ̈g kì kej kwër, wɑlɑ̀ kej kwëër Jwøge ko bwöle, mɑ́ e bɑ ngɑn-ɑ ɑ́thyëyi Jwøge keny-ɑ ɑ́kunyi wïje ki møøw röny. Bene yɑn Jwøng-ɑ Ácwɑ̈ɑ̈j. Nywøme ngɑn nuti buddø ki jɑlø, de ko nyömi ki nyɑn jɑlgøle thøø, wɑlɑ̀ ɑtɑ̈ng, wɑlɑ̀ nyɑn me kwöngø ki bëëdø ɑ́ ngɑn nyi niin ki köögi. Nyöme kì kelli jur gen ki nyɑn nuti pɑ̈nyø’ nywɑlø yi jɑlø, kipe nyige ko bëëd ge ywëdhø kì kelli jie. Bene yɑn Jwøng-ɑ Ácwɑ̈ɑ̈j, o Ókwër-ɑ Dwøng ɑ́cïbɑ wɑ̈ye kɑ per gwøgɑ.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí Aɑron kinni, ko di dhɑnhø kì kelli kwɑrre kì yethi rïjj bënn me wëggi kɑ̈ni bøli Jwøge ki gïïpiny keløg ngɑnɑni bɑ bøøl. Ngɑn di gïnrɑj kì ree ko cyɑ̈ngi ki kej kwër ying-ɑ́ cwør, wɑlɑ̀ ngwøl, wɑlɑ̀ bøle órënyø, wɑlɑ̀ bɑ ɑ́cɑj, ngɑn cinge ngøølø wɑlɑ̀ tyele ngøølø, ɑgøngøtot wɑlɑ̀ ngɑn twilø, kí ngɑn nyinge ledh wɑlɑ̀ ree dɑ kedø, wɑlɑ̀ ngɑn mɑnne ótøgø ko wɑ̈dhi kej kwër. Ko di dhɑnhø kì kelli kwɑrri Aɑron me ree di gïjø me rɑj me wëggi muuji yɑn gënh-ɑ nyi rɑ̈b bëne. Ngɑn ni menɑni ócuggø cɑm ki jɑmmi Kwëër Dwøng geki jɑmmi kwër møg-ɑ kyeelø. De mɑ́ e dɑ kenyledh kì ree, ko wɑ̈dhi buti gëng, wɑlɑ̀ ko kedhi buti këli lɑm. Jɑmmi kwër møgɑni ko bwöl en, mɑ́ bene yɑn Jwøng-ɑ Ácwɑ̈ɑ̈j, o bɑ yɑn ɑ kwër gen.” Codhe, kɑ møgɑni löbbi Aɑron geki wɑ̈dde, kí tyëng Isrɑil bënn yi Mosɑ̀. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí Aɑron geki wɑ̈dde kinni nyingɑ ko bwöl gen, wør gen jɑmm-ɑ nyi thyëyi yɑn yi tyëng Isrɑil. Bene yɑn Jwøng-ɑ Ácwɑ̈ɑ̈j. Ke di dhɑnhø ɑ́kyel kì kelli kwɑrre, ɑ løg tyëng kwër me kedhi buti jɑmm-ɑ thyëyi yɑn yi tyëng Isrɑil, e ywëdhø, pɑ kedhi be gwøg ki jɑmmi kwër kì wïj këli lɑm këti. Mïdhi ciggɑni kì yethi rïjj bënn. Bene yɑn Jwøng-ɑ Ácwɑ̈ɑ̈j. “Ko di dhɑnhø kì gøl Aɑron me cyɑ̈mø ki gïi kwër e dële dɑ kenyledh, wɑlɑ̀ e jɑmme olwöyø gïti keny-ɑ ódhïwe. Ókwërø ceg-ɑ ywëdhø keløg e ónywɑ̈dø ki gïn ywëdhø; oywëdhø ke nywɑle ngɑnthøø, oywëdhø yi tyewe kete; oywëdhø ke nywɑle lɑ̈y me mulli kì piny; oywëdhø ke nywɑle ngɑn ywëdhø ki gïn-ɑ ywëëdh en. Ngɑn nywɑl gïgɑni ceg-ɑ bëëdø e ywëdhø gïti keny-ɑ óbuddi cɑ̈ng. Ngɑn ni menɑni ko cyɑ̈ɑ̈m ki gïi kwër, de ócuggø cɑm keny-ɑ órume ki lwøggø. Ódhïwi keny-ɑ óbuddi cɑ̈ng. Codhe cyee, o cyɑ̈me ki jɑmmi kwër, mɑ́ gïgcɑmmɑni nyi cɑm-ɑ yi gøl kwër. Ko cyɑ̈ɑ̈m ki rïngi lɑ̈y men-ɑ thøw kete, wɑlɑ̀ lɑ̈y men-ɑ ónɑ̈g-ɑ yi lɑ̈ɑ̈y pɑ̈l, ree ko ywëdhe ki gen. Bene yɑn Jwøng-ɑ Ácwɑ̈ɑ̈j. “Ókwër bënn mïdhi gen cigg møg-ɑ ɑ́muuj yi yɑn. Ke pɑ mïdhi gen, ge ógöögø ki møg-ɑ ɑ́røngi kɑ ge othøø, mɑ́ ciggi kwër ɑ́pyem yi gen. Bene yɑn Jwøng-ɑ Ácwɑ̈ɑ̈j, o bɑ yɑn ɑ kwër gen. “Tyëng gøl kwër keti gen ɑ cyɑ̈mø ki jɑmmi kwër, ko di dhɑnhø megø me cyɑ̈mø’ gen, cɑgg ɑ́ ngɑn bëëdø kì gøl ókwërø, wɑlɑ̀ ngɑn göögø kì cinge ko cyɑ̈ɑ̈m. Bɑ̈ng ókwërø men-ɑ ngeew en ki ngyënye wɑlɑ̀ ónywøøl ɑ gøle ócuggø cɑm ki gïg-ɑ cɑm yi ókwërɑni, gɑ jɑmmi kwër. Nyɑɑr ókwërø men-ɑ ónywømø yi ngɑn me pɑth ki ókwërø, pɑ cyɑ̈mø ki jɑmmi kwër. De keløg nyɑɑr ókwërø bɑ thwöm wɑlɑ̀ ɑtɑ̈ng, o bong nyɑre, kɑ dwöög-ɑ gøl wïye, o cyɑ̈me kì cinge ni kɑ ɑ́bëëde e thinh, ócuggø cɑm ki gïi kwër men-ɑ cɑm yi wïye. Tyëng gøl kwër keti gen ɑ cyɑ̈mø’ gen. “Keløg ngɑn me pɑth ki ngeti gøl kwër ocyɑ̈mø e kwïj wøw, cole gïnɑni kɑ köme kïdhe ki ɑ́kyeel ɑ́bïj. Cule ókwërø gïi kwër men-ɑ cɑɑm en ceth. Jɑmm-ɑ thyëyi Jwøng-ɑ Ácwɑ̈ɑ̈j yi tyëng Isrɑil ko wëggi bwölø yi ókwër, mɑ́ ke göög gen kinøw, ge göjj-ɑ ji orøg men kɑ̈ni ki cɑ́y. Bene yɑn Jwøng-ɑ Ácwɑ̈ɑ̈j, o bɑ yɑn ɑ kwër gen.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí Aɑron geki wɑ̈dde, kí tyëng Isrɑil bënn kinni, ‘Wɑ̈d Isrɑil wɑlɑ̀ ngɑnpɑth me bëëdø kì kelli gen, keny-ɑ ódwɑdde kɑ̈nø ki gënh-ɑ nyi rɑ̈b bëne, ying gø muuje ɑ́ wïj köngø, wɑlɑ̀ mi mër me rɑ̈bbe Jwøng-ɑ Ácwɑ̈ɑ̈j, ke kɑ̈ne, kɑ̈ɑ̈le gøn ɑ́ thwønh me bong gïjø me rɑj kì ree, ɑ́ wɑdh, wɑlɑ̀ órömø, wɑlɑ̀ ónywøg, o óyïëy kì yïe. Ko kɑ̈ni ki lɑ̈y me di gïjø me rɑj kì ree, ke di gïjø me rɑj kì ree, pɑ yïëy kì yïe. Ngɑn kɑ̈ni yï Jwøng-ɑ Ácwɑ̈ɑ̈j ki gënhi mër, wɑlɑ̀ wïj köngø, ócuggø bëëdø ɑ́ dhyɑng wɑlɑ̀ dyel, de bëëde e bong gïjø me rɑj kì ree keløg gø dwɑddi yi en kinni o yïëy. Wu ko nyi kɑ̈ni yï Jwøng-ɑ Ácwɑ̈ɑ̈j ki gïn ngɑl ɑ́ gëëdhi e bɑ cwør, wɑlɑ̀ ree dɑ turø, wɑlɑ̀ ree dɑ kedø, wɑlɑ̀ dɑ kɑ̈jj mø lol kì ree, wɑlɑ̀ dɑ kɑ̈jj mø kwödø, wɑlɑ̀ dɑ kɑ̈jj mø nuti nøggø’ ree, dhøggi gen dɑ pɑ̈ngø. Wu ko muuj ki lɑ̈y me ni møgɑni ɑ́ men rɑ̈bbi Jwøng-ɑ Ácwɑ̈ɑ̈j kì wïj këli lɑm. Wɑdh wɑlɑ̀ órömø me ree di gïjø me nøg wɑlɑ̀ me dwøng (ni tyelø), ócuggø muujø ɑ́ jwödhø, de ke muujii ɑ́ wïj köngø pɑ yïëy. Jwøng-ɑ Ácwɑ̈ɑ̈j ko ngɑ̈ddi wun ki lɑ̈y me mɑnne ótøgø, wɑlɑ̀ mɑnne ónyɑjø, wɑlɑ̀ mɑnne bɑ ɑngøl. Gïn ni menɑni ko gwøg wun kì piny wun. “Lɑ̈y me ni møgɑni ko ngew wun kì yï ngɑnpɑth ɑ́ men ngɑ̈llu Jwøøg wun, mɑ́ gø pɑ yïëy yi en ki yï wun, kì bɑng kɑ̀ bëëde e dɑ gïjø me rɑj kì ree.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Keny-ɑ ónywøøl wɑdh, wɑlɑ̀ órömø wɑlɑ̀ ónywøg, wiy bëëde ki meye ki cyɑ̈ng ɑ́bïryew. De keny-ɑ óthumi cyɑ̈ng ɑ́bïryew, ócuggø ngɑ̈lli yɑn ɑ́ gënh-ɑ nyi rɑ̈b bëne kì bøli keny-ɑ ódwɑddii. De lɑ̈y ko nɑ̈g geki meye kì cyɑ̈ng ɑ́kyel cɑgg e bɑ dhyɑng wɑlɑ̀ dyel. Keløg yï dwɑdd-ɑ muuji Jwøng-ɑ Ácwɑ̈ɑ̈j ki gënhi pwøj, gwøøg ki yuu-ɑ mïni pyëwe. Cɑmu lɑ̈yɑni kì cyɑ̈ngɑni ceth, kɑ ko di rïngø me wiy gïti dhuki. Bene yɑn Jwøng-ɑ Ácwɑ̈ɑ̈j. “Nyi gwøgu gïg-ɑ ɑ́cïgɑ wun. Bene yɑn Jwøng-ɑ Ácwɑ̈ɑ̈j. Nyingɑ ko bwöl wun, tyëng Isrɑil bënn ngɑ̈nyi gen wøw kinni yɑ bɑ kwërø. Bene yɑn Jwøng-ɑ Ácwɑ̈ɑ̈j, o bɑ yɑn ɑ kwër wun, o bɑ yɑn ɑ ɑ́kɑ̈ɑ̈l wun wɑ̈g kì piny Rïp, o yɑ göögɑ yɑn ɑ́ Jwøøg wun. Bene yɑn Jwøng-ɑ Ácwɑ̈ɑ̈j.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, cyɑ̈ngg-ɑ ɑ́cïb yi Jwøng-ɑ Ácwɑ̈ɑ̈j gɑ cyɑ̈nggi wööwø, mïdhu gen gɑ cyɑ̈nggi kwër. Bene gen cyɑ̈ngg-ɑ ɑ́cïb yi yɑn gɑ møgɑ ek: Yï wun dɑ cyɑ̈ng ɑ́bïkyel mø yethi gen gwøg wun gwøøg wun, de wɑ̈thi wun ko wïl kinni bïryeew cyɑ̈ng, ɑ løg Sɑbɑth, bɑ cyɑ̈ɑ̈ng ywömø. Wu ko nyi göög kì cyɑ̈ngɑni, de cøng wu ri wun be mɑ̈ddø. Sɑbɑth bɑ mi Jwøng-ɑ Ácwɑ̈ɑ̈j, kwëru en kì keny-ɑ bëëd wun. Bene gen cyɑ̈nggi kwëër Jwøng-ɑ Ácwɑ̈ɑ̈j ek, nyi wøwu gen kì bøli kɑ̈jji gen. “Bøli kej Kwëër Ákɑɑdh bɑ kì dwɑ̈n-ɑ mɑl kì ri cɑ̈gi run, kì cyɑ̈nggi dwɑ̈y pyɑ̈rø wïdɑ́ngwen kì böörø. Bɑ Ákɑɑdh mi Jwøng-ɑ Ácwɑ̈ɑ̈j, (ɑ løg Pisɑ̀). Wööwi ópun-ɑ olwëny cɑ̈g-ɑ́ɑ̀ pyɑ̈rø wïdɑ́bïïj cyɑ̈ng, o wu tyëg-ɑ cyɑ̈ng ɑ́bïryew wu cɑm-ɑ olwëny. Cugi wun kì cyɑ̈ng-ɑ mɑl kì ri cyɑ̈nggɑni kipe mɑ̈ddø, kɑ wu ko göög kì cyɑ̈ngɑni ki gwøøg yethi cyɑ̈ng. De nyi nëngu Jwøng-ɑ Ácwɑ̈ɑ̈j ki gënh-ɑ nyi rɑ̈b bëne men-ɑ nyi muuj ki mɑc kì yethi cyɑ̈ng ɑ́bïryew møgɑni. Cigu ri wun cøng be mɑ̈ddø kì bïryeew cyɑ̈ng, kɑ wu ko göög kì cyɑ̈ngɑni ki gwøøg yethi cyɑ̈ng.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, keny-ɑ ókedhu piny-ɑ mëggɑ wun, kɑ wu okɑ̈jø ki byelle, dhöngø men-ɑ kwøng ki kɑjø kì pwödhø, muuj wu en ókwërø. Thyeer dhöngɑni bøli Jwøng-ɑ Ácwɑ̈ɑ̈j yi ókwërø, o Jwøng-ɑ Ácwɑ̈ɑ̈j pyëwe mïne’ wun. Thyer yi ókwërø kì mwøli cyɑ̈ɑ̈ng Kwëër Ákɑɑdh. Muuj wun thyew ki órömø rune ɑ́kyel me bong gïjø me rɑj kì ree, me gwøg ɑ́ gënh-ɑ nyi rɑ̈b bëne kì cyɑ̈ng-ɑ muuju byëli Jwøng-ɑ Ácwɑ̈ɑ̈j. Muuj wun ki kïllì ɑ́ryew mø møng-ɑ búr, mø bɑ ɑnyöm ki møøw dhetun kyeel ki órömø. Yømi tole bɑ men mïni pyëw Jwøng-ɑ Ácwɑ̈ɑ̈j. Kɑ wu muuj wun thyew ki óthɑ̈ngi møgi oløg kyeel ki gøn. Byell-ɑ nyɑ̈n ko wöl ki belø, ge ko nyɑm ge nuti cyegø, wɑlɑ̀ ge bɑ ɑmɑ̈l ki mɑc, wɑlɑ̀ ɑbul, gïti keny-ɑ ómuuj byëli Jwøgí. Mïdhi cigg møg kì yethi rïjj bënn, kì keny-ɑ bëëd wun gïti ɑtheer. “Kɑ wu kwɑ̈ɑ̈n wun ki osboo ɑ́bïryew kì bɑng Sɑbɑth; cyɑ̈ng-ɑ ɑ́muuj wun Jwøng-ɑ Ácwɑ̈ɑ̈j ki byëlø. Kì ri pyɑ̈r ɑ́bïïj cyɑ̈ng, cyɑ̈ng-ɑ mɑl kì bɑng thumi osboo ɑ́bïryew, cigu Jwøng-ɑ Ácwɑ̈ɑ̈j muujø ki byëlø megø kì ri byell-ɑ nyɑ̈n. Muuj wun kì cyɑ̈ngɑni ki ópùn ɑ́ryew mø kɑ̈ɑ̈l yi wun kì kɑ̈lli wun gɑ møg mëggi Jwøng-ɑ Ácwɑ̈ɑ̈j. Gwøøg ópun ɑ́kyel ɑ́ kïllì ɑ́ryew mø ri gen di kɑmïrɑ̀ kɑ muuj ɑ́ byëli Jwøng-ɑ Ácwɑ̈ɑ̈j kì ri byell-ɑ nyɑ̈n. Muuj Isrɑil bëne ki órömm ɑ́bïryew runi gen ɑ́kyel e bong gïjø me rɑj kì ri gen, kí wɑdh ówöb ɑ́kyel, kí órömm-ɑ thønhø ɑ́ryew. Göggi gen Jwøng-ɑ Ácwɑ̈ɑ̈j gɑ gënh-ɑ nyi rɑ̈b bëne kyeel kí byëlø, kí ópun geki byël-ɑ kunyi Jwøng-ɑ Ácwɑ̈ɑ̈j, o tool gen bɑ men mïni pyëw Jwøng-ɑ Ácwɑ̈ɑ̈j. Muuj wun thyew ki ónywøg me gwøg ɑ́ gënhi orøg, ki órömm ɑ́ryew runi gen ɑ́kyel mø gwøg gɑ jwödhi mër. Thyeer gen bøli Jwøng-ɑ Ácwɑ̈ɑ̈j kyeel kí ópun mi byell-ɑ nyɑ̈n yi ókwërø. Ge thërr-ɑ Jwøng-ɑ Ácwɑ̈ɑ̈j, o ge bɑ mø ókwërø. Cøngu ri wun be mɑ̈ddø kì cyɑ̈ngɑni, kɑ ko di gwøg me gwøg yi wun. Mïdhu cigg møg kì yethi rïjj bënn, kì keny-ɑ bëëd wun gïti ɑtheer. “Keny-ɑ ókɑɑj jɑmm-ɑ ókɑ̈g yi yïn kì pinyí, møg-ɑ leggi pwödhø ko kɑɑj. Keløg e dɑ møg dëëm piny ge ko kwɑɑny. Wïyí gen tyëng-ɑ jɑdø geki tyëngpɑth kì yij pödhø. Bene yɑn Jwøøg wun, Jwøng-ɑ Ácwɑ̈ɑ̈j.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, cyɑ̈ng-ɑ mɑl kì ri bïryeew dwɑ̈tt bɑ cyɑ̈ɑ̈ng ywömø, cugi wun be mɑ̈ddø keny-ɑ ókoodh kɑ̈ngì. Ko di gwøg me gwøg yi wun kì cyɑ̈ngɑni, kɑ Jwøng-ɑ Ácwɑ̈ɑ̈j ngɑ̈ddi wun ki gënh-ɑ nyi rɑ̈b bëne.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Cyɑ̈nggi dwɑ̈y pyɑ̈rø kì bïryeew dwɑ̈tt, bɑ Cyɑ̈ɑ̈ng Gøøm, cøngu ri wun be mɑ̈ddø kì cyɑ̈ngɑni, kɑ ko di gwøg me gwøg yi wun, kɑ Jwøng-ɑ Ácwɑ̈ɑ̈j ngɑ̈ddi wun ki gënh-ɑ nyi rɑ̈b bëne. Ko di gwøg kì cyɑ̈ngɑni, mɑ́ e bɑ cyɑ̈ng-ɑ gøøm bøli orøøg wun. Ngɑn-ɑ ócyɑ̈mø kì cyɑ̈ngɑni, kɑ̈ɑ̈l wɑ̈g kì kelli jie. O men-ɑ́ ngɑn-ɑ ógöögø kì cyɑ̈ngɑni bɑ Jwøng-ɑ Ácwɑ̈ɑ̈j kiree ɑ ónɑ̈gii. Ko di gwøg me gwøg yi wun kinni tek, mïdhu cigg møg kì yethi rïjj bënn, kì keny-ɑ bëëd wun. Bëëde ɑ́ cyɑ̈ɑ̈ng ywömø me dwøng kì yï wun, cɑg kì ri buddi cɑ̈ng kì cyɑ̈nggi dwɑ̈y ɑ́bïngwen gïti buddi cɑ̈ng kì cyɑ̈nggi dwɑ̈y pyɑ̈rø.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, cyɑ̈nggi dwɑ̈y pyɑ̈rø wïdɑ́bïj kì bïryeew dwɑ̈tt, bɑ cyɑ̈ɑ̈ng Kwëër Akɑnnì, o wööwɑni tyëg-ɑ cyɑ̈ng ɑ́bïryew gɑ møg yethi gen wøør Jwøng-ɑ Ácwɑ̈ɑ̈j. Cøngu ri wun be mɑ̈ddø kì cyɑ̈ng-ɑ mɑl, kɑ ko di gwøg me gwøg yi wun. Kɑ Jwøng-ɑ Ácwɑ̈ɑ̈j nyi ngɑ̈ddi wun ki gënh-ɑ nyi rɑ̈b bëne kì yethi cyɑ̈ng ɑ́bïryew møgɑni. Cøng wun ri wun be mɑ̈ddø këti kì bïdɑ̈ɑ̈g cyɑ̈ng, kɑ Jwøng-ɑ Ácwɑ̈ɑ̈j ngɑ̈ddi wun ki gënh-ɑ nyi rɑ̈b bëne. Menɑni bɑ kwër me dwøng, ko di gwøg me gwøg yi wun kì cyɑ̈ngɑni. (Møgɑk bene gen cyɑ̈nggi kwëër Jwøng-ɑ Ácwɑ̈ɑ̈j, ɑ yethi gen nyi cøng wun ri wun be mɑ̈ddø, kɑ Jwøng-ɑ Ácwɑ̈ɑ̈j nyi muuj wun ki gëdhhì. Nyi ngɑ̈ddi Jwøng-ɑ Ácwɑ̈ɑ̈j ki gënh-ɑ nyi rɑ̈b bëne, kɑ nyi muuj wun ki byëlø, kí jwödhi mër, ki byël-ɑ kunyi Jwøng-ɑ Ácwɑ̈ɑ̈j, ni kɑ dwɑddii kì yethi cyɑ̈ng bënn. Gëdhhɑni kedh-ɑ kömi mø cyɑ̈nggi Sɑbɑth, reb ki gëdhh-ɑ nyi muuj yi wun gɑ mø gøøm, kí mø wïj köngø, geki møg-ɑ nyi dwɑddi yi pëthi wun ki muujø.) Kì bɑng menɑni, nyi wøwu Jwøng-ɑ Ácwɑ̈ɑ̈j kì cyɑ̈nggi bïryeew dwɑ̈tt gɑ pyɑ̈rø wïdɑ́bïj, keny-ɑ órum wun ki kɑji jɑmm-ɑ ɑ́kɑ̈g yi wun kì yethi pwödhhi wun. Wøwu Jwøng-ɑ Ácwɑ̈ɑ̈j ki cyɑ̈ng ɑ́bïryew. Ywööm wun kì cyɑ̈ng-ɑ mɑl geki bïdɑ̈ɑ̈g cyɑ̈ng. Kɑ̈ɑ̈d wun kì cyɑ̈ng-ɑ mɑl ki møg-ɑ døj kì ri nywøli yenhi wun, kí ówɑwwi benø møg mɑr, kí ɑnɑ̈bbi yenh, kí wijø me ree di okøgg, kɑ wu tuug wun ki cyɑ̈ng ɑ́bïryew kì bøli Jwøng-ɑ Ácwɑ̈ɑ̈j Jwøøg wun. Nyi wøwu Jwøng-ɑ Ácwɑ̈ɑ̈j kinøw ki cyɑ̈ng ɑ́bïryew kì yethi runn bënn. Mïdhu cigg møg kì yethi rïjj bënn kì keny-ɑ bëëd wun, nyi tuug wun ceth kì bïryeew dwɑ̈tt. Bëëd wun kì yethi ɑkɑnnì ki cyɑ̈ng ɑ́bïryew, bëëd tyëng Isrɑil bënn kì yethi ɑkɑnnì, o yod yi kwɑrri wun kinni tyëng Isrɑil ɑ́göjjɑ bëëdø kì yethi ɑkɑnnì ki kɑɑm-ɑ ɑ́kɑ̈ɑ̈lɑ gen wɑ̈g kì piny Rïp. Bene yɑn Jwøøg wun, Jwøng-ɑ Ácwɑ̈ɑ̈j.” Bene kër-ɑ ɑ́löbbi tyëng Isrɑil yi Mosɑ̀ ɑnɑn ki cyɑ̈ngg-ɑ yethi gen nyi wøøw Jwøng-ɑ Ácwɑ̈ɑ̈j. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Ceg tyëng Isrɑil kinni muuj gen yïn ki møøw dhetun men-ɑ dhïw, me lyel kì yethi lɑ̈mbɑ̈ɑ̈, o mɑc nyi lɑɑnge wɑ̈r e olyelø. Nyi cwiny lɑ̈mbɑ̈ɑ̈ møgɑni yi Aɑron kì böörø o ge lɑng gen wɑ̈r ge olyelø gïti mwøl, kì bøli Jwøng-ɑ Ácwɑ̈ɑ̈j kì ngɑ̈ɑ̈j gëng, kì bøli Sɑnduug Cigg men-ɑ Kej Kwërdwøng. Mïdhi cigg møg gïti ɑtheer. Mïdhi lɑ̈mbɑ̈ɑ̈ møgɑni ge olyelø ceth kì bøli Jwøng-ɑ Ácwɑ̈ɑ̈j yi Aɑron, kì wɑ̈thi teggi dhɑm dhïw. “Kɑ̈bbí ki møng-ɑ búr me ngedhø kɑ yï bud ki ópùn pyɑ̈rø wïdɑ́ryew, gwøg ópun ɑ́kyel ɑ røthøl ɑ́ryew. Cïb ópùnɑni wïj tɑrɑbeedh dhɑb kì bøli Jwøng-ɑ Ácwɑ̈ɑ̈j, gɑ lwøbb ɑ́ryew, ópùn ɑ́bïkyel kì yij lwøb ɑ́kyel. Kɑ ri lwøbbɑni ryeet kïdhí ki bɑkur me dhïw ɑ́ men-ɑ ókwɑny kej ópùn. Nyi cïb ópùn bøli Jwøng-ɑ Ácwɑ̈ɑ̈j kì yethi cyɑ̈nggi Sɑbɑth bënn. Bɑ cigg møg mïdhi yi Isrɑil gïti ɑtheer, gïncɑmɑni bɑ mi Aɑron geki gøle, nyi cɑm ge gøn kì kej kwër, mɑ́ e bɑ gïi kwër me pere teg kiree, nyi muuj Jwøng-ɑ Ácwɑ̈ɑ̈j kɑ per ókwër.” Ádɑ jɑl megø me bɑ wɑ̈d nyɑɑr Isrɑil, mɑ ɑ́bëëd kì kelli tyëng Isrɑil. O wïyi nyelɑni bɑ jɑl Rïp, kɑ wɑ̈d nyɑɑr Isrɑil owërø ki wɑ̈d Isrɑil megø kì kɑɑl. Kɑ wɑ̈d nyɑɑr Isrɑil Jwøng-ɑ Ácwɑ̈ɑ̈j yɑnye ki yɑ̈d mø rijjø. Codhe, kɑ muuj Mosɑ̀, (nyelɑni nyingi meye cwøl ɑ́ Cɑlömith nyɑɑr Dibrì kì gøl Dɑn). Kɑ mïdhi yi gen ɑ́ ɑmɑg ge nenn-ɑ gïn-ɑ óløøg yi Jwøng-ɑ Ácwɑ̈ɑ̈j kipere. Codhe, kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kɑ̈ɑ̈lu ngɑn-ɑ ɑ́yɑ̈ddi wɑ̈g kì kɑɑl, kɑ cinggi tyëng-ɑ ɑ́lïngi yɑ̈dde cïb gen wïje, kɑ bɑ̈lli ki tuggi kïttì yi teedø bëne gïti keny-ɑ óthøwe. Orume, kɑ tyëng Isrɑil köbbí kinni ngɑn-ɑ óyɑny Jwøk, óthøw ki cyënne. Nɑ̈ɑ̈g ngɑn yɑny Jwøk, bɑ̈lli ki tuggi kïttì yi teedø bëne. Keny-ɑ óyɑɑny Jwøk yi wɑ̈d Isrɑil wɑlɑ̀ yi ngɑnpɑth, nɑ̈ɑ̈g ngɑn-ɑ ɑ́yɑ̈ddi. “Ngɑn nɑ̈g dhɑnhø, lony ki nɑ̈gø, ngɑn nɑ̈g gïi ngɑn megø, cole gøn ceth, wëy ki wëy. “Ngɑn thödhi wɑɑd gen ki kedø, lony ki thödhø’ kedø ni menɑni. Keløg e tor-ɑ cögø, toor cögø ɑ́kyel kì kelli cue, keløg e tøy-ɑ wɑng, tøy wɑnge ɑ́kyel, keløg e tor-ɑ lëjø, toor lëje ɑ́kyel. Ken-ɑ ni men-ɑ ɑ́kïdhe ri ngɑn-ɑ kyeelø, lony ki kïdhi ree. Ngɑn nɑ̈g lɑ̈ɑ̈y ngɑn-ɑ kyeelø, cole gøn, de nɑ̈ɑ̈g ngɑn nɑ̈g dhɑnhø. Ciggɑni ying-ɑ kömi wun bënn, wu tyëng Isrɑil ki tyëngpɑth møg-ɑ bëëdø kì kelli wun, mɑ́ bene yɑn Jwøøg wun, Jwøng-ɑ Ácwɑ̈ɑ̈j.” Keny-ɑ ɑ́rum Mosɑ̀ ki köbbi ciggɑni bënn tyëng Isrɑil, ɑkwɑny gen nyel-ɑ ɑ́yɑ̈ɑ̈d kɑ gø kïdhi gen ngɑ̈ɑ̈j kɑɑl, ɑbɑ̈lli ge gøn ki tuggi kïttì gïti kɑ ɑ́thøwe. Kinøw, møg-ɑ ɑ́cïgi Mosɑ̀ yi Jwøng-ɑ Ácwɑ̈ɑ̈j ɑ́gwøg yi tyëng Isrɑil. Kɑ Mosɑ̀ köbbi yi Jwøng-ɑ Ácwɑ̈ɑ̈j kì wïj Kïti Sinɑy kinni, “Köbbí tyëng Isrɑil kinni, keny-ɑ ókedhu piny-ɑ mëggɑ wun, nyi ywömu piny e pɑ kɑ̈g yi wun kì bɑng runn ɑ́bïryew, wu wør-ɑ Jwøng-ɑ Ácwɑ̈ɑ̈j. Nyi kɑ̈gu pwödhhi wun, kɑ yenhi nywøl møg-ɑ bɑ mø wun nyi teb wun, kɑ pwödhhi wun nyi kɑj wun ki runn ɑ́bïkyel. De bïryeew runn, bɑ runi ywömø me dwøng kipe piny, run menɑni ɑ́thyey ɑ́ mi Jwøng-ɑ Ácwɑ̈ɑ̈j, pwödhhi wun ko kɑ̈g wun, wɑlɑ̀ yenhi nywøl møg-ɑ bɑ mø wun ko teb wun kì runɑni. Köllì ko wöl ki kɑjø, kɑ nywøli yenh møg-ɑ cyeg e yenh nuti tebø ko lem wun. Bɑ runi ywömø me dwøng me wøru Jwøng-ɑ Ácwɑ̈ɑ̈j. Cɑgg ɑ́ kɑ̀ bëëd piny e pɑ kɑ̈g ki runɑni, Jwøng-ɑ Ácwɑ̈ɑ̈j wu óthödhe’ gïncɑm ceth, wuki bɑ̈nggi wun, kí tyëng-ɑ kïr yi wun, kí tyëngpɑth møg-ɑ bëëdø kì kelli wun, kí lɑ̈yy-ɑ pidh yi wun, kí lɑ̈yyi pɑ̈l. Gïg-ɑ ónywøl yi pinyɑni bɑ møg cɑm. “Kɑ wu kwɑ̈ɑ̈n wun ki runn pyɑ̈r ɑ́ngwen wïdɑ́bïngwen. Codhe, kì pyɑ̈ri cyɑ̈nggi bïryeew dwɑ̈tt, Cyɑ̈ɑ̈ng Gøøm, öd wun ki ngɑn kodh kɑɑng tung kì yij piny bëne. Thyey wun pyɑ̈r ɑ́bïïj runn, kɑ ji gøny wun kì yethi töjji bɑ̈ɑ̈ngø kì yij piny bëne. Cwøl ɑ́ runi tung. Döggi ngɑn jɑmme, kɑ ngɑn døøge gøl gen. Pyɑ̈r ɑ́bïïj runn bɑ runi medi pëëth kì yï wun. Wu ko kɑ̈ɑ̈g wɑlɑ̀ köllì ko kɑj wun, wɑlɑ̀ nywøli yenh ko lem wun kì runɑni. Runɑni bɑ runi kwër kì yï wun. Cɑmu gïg-ɑ nywøl yi piny keti gen. “Kì yij Runi Dwöggø menɑni, døøg ngɑn kömi jɑmme møg-ɑ ngeew en wɑ̈g. O keløg piny ngëwwií wɑɑd wun wɑ̈d Isrɑil, wɑlɑ̀ yï ngëëw ɑ yïe, ko di gwem. Ngeew piny e gïg-ɑ nywøl en kì yethi runn-ɑ bøli Runi Dwöggø men-ɑ óbï di rømmø. Keløg runnɑni nuti ge gïïr, tïng ngyew mɑl, de keløg ɑ́ runn mø nøg ɑ döngø, dwöög ngyew piny, mɑ́ e bɑ gïg-ɑ ónywøl yi piny, ɑ ceg ki ngewø. Ko di ngɑn gwem wɑ̈d Isrɑil wɑɑd gen, de mïdhu ciggi Jwøøg wun, Jwøng-ɑ Ácwɑ̈ɑ̈j. “Kì bɑng menɑni nyi mïdhu Ciggi Jwøng-ɑ Ácwɑ̈ɑ̈j geki kwönge, o wu óbëëd wun kì pinyɑni pëthi wun pɑ lïngø. Piny ónywøl ki gïg-ɑ dwɑddi yi wun kipe cɑmø bënn, wu ónin kì yije. “Wu ócuggø pëjjø kinni, ‘Keløg wø pɑ kɑ̈gø, o wø pɑ lïmø ki köllì, wø ócɑm-ɑ ngø kì bïryeew runn?’ Wu ónëngɑ ki gyëdh mø døngø kì bïkyeel runn, kɑ pwödh ocyegø ki byel mø cɑm ki runn ɑ́ryew. Keny-ɑ ókɑ̈ɑ̈g wun kì bïdɑ̈ɑ̈g runn, wu óbëëdø wu nudd wu cɑm-ɑ byell-ɑ ɑ́cyeg kì bïkyeel runn, o wu obëëdø wu nudd wu ocyɑ̈mø ki byellɑni gïti keny-ɑ ócyeg byell-ɑ ɑ́kɑ̈g yi wun. “Piny ko ngew e cöög-ɑ yï ngɑn-ɑ ngewii, mɑ́ piny ceg bëëdø ɑ́ miɑ, mɑ́ wu bɑ tyëngpɑth, o wu bëëd ɑ pinyɑ. “Keny-ɑ óngeew piny, ngɑ̈nyu wøw kinni ódöggi wɑ̈n. Keløg wɑ̈d Isrɑil jɑdø, kɑ pinye ngeewe wɑ̈g, døøg ki ngëwwii yi wɑɑd gen, wɑɑd nyöödø. Keløg e bong ngɑn ngëwwii en, de óyïddø ki ngyëny dhuki megø, cule jɑl-ɑ ɑ́ngew piny kì yïe ngyënyyi runn-ɑ ɑ́döng kipe bëëni Runi Dwöggø, kɑ døøge pinye. De keløg e pɑ yïddi ki ngyëny mø lwɑ̈nge gøn ki døøgø’ ngewø, bëëde kì yï ngɑn-ɑ ɑ́ngëëw gïti keny-ɑ óbëën Runi Dwöggø. Döggi piny wɑ̈n kì runɑni. “Keløg dhɑnhø ngeew-ɑ øde wɑ̈g kì kɑɑl me ógerø ki dörø, ócuggø døøgø ngewø yi en keny-ɑ óthumi run-ɑ mɑl kì ri ngewii. De keløg ønɑni pɑ cuggi døøgø ki ngewø yi en kì runɑni, pɑ cigi døøgø ngëwwii, o ød ceg-ɑ cögø ɑ́ mi jɑl-ɑ ɑ́ngewii; ɑ́göög ki mi gøl gen. Pɑ döggi wɑ̈n kì Runi Dwöggø. De udd-ɑ pɑ ying kɑɑl dörø; uddi kelli myërr, ge nɑ pwödh, ge ócuggø døøgø ngewø yi wɑ̈n, o ge ceg kɑ döggii kì Runi Dwöggø. De Kwɑrri Leebì jɑmmi gen ócuggø døøgø ngewø yi gen kì yethi myërr-ɑ ɑ́mëggi gen kì bøli keny-ɑ dwɑddi yi gen. Keløg ød ngeew-ɑ wɑ̈g yi Kwɑɑr Leebì kì yethi myërrɑni, de gø nuti døøg en ki ngëwwi ree, döggii ceth kì Runi Dwöggø, mɑ́ myërri Kwɑrri Leebì bɑ mø gen, mø pɑ kɑ̈ɑ̈l wɑ̈g kì yï gen kì kelli Isrɑil. De pɑ̈l-ɑ nyi cyɑ̈ɑ̈m yi dhög kì tøggi myërri gen ko wöl ki ngeew wɑ̈g, cungi gɑ mø gen ceth gïti ɑtheer. “Keløg wɑ̈d Isrɑil me bëëdø kì butí cinge ojɑdø, thödhí ki gïn-ɑ jɑ̈ddii ni kenyi thödhí wëlø, wɑlɑ̀ ngɑnpɑth men-ɑ bëëdø kì butí, o ómyëw óbëëde kì butí ceth. Ko köbbí col ki mø ngenyø kibøli møg-ɑ ɑ́wïdhii, o ómyëw óbëëde kì butí ceth. Ko wëggí col ki møg-ɑ nywøl yi ngyëny, kɑ gïncɑm-ɑ ɑ́wïdhii col e nɑ keje ceth. Bene yɑn Jwøøg wun, Jwøng-ɑ Ácwɑ̈ɑ̈j, ɑ ɑ́kɑ̈ɑ̈l wun wɑ̈g kì piny Rïp, o wu mëggɑ piny Kɑnɑɑn, o yɑ óbëëdɑ yɑn ɑ́ Jwøøg wun. “Keløg wɑɑd wun wɑ̈d Isrɑil me bëëdø kì butí ojɑdø kɑ ree ngëwwe yïn ɑ́ bɑ̈ng, ko wëggi gwøg ki gwøøg bɑ̈ng, mïdhí ni ngɑn-ɑ kïr, kɑ wiy gögge yïn gïti bøli keny-ɑ óbëën Runi Dwöggø. Obëën bøli kenyɑni, kɑ wiy døøge gøl gen kì piny kwɑn, kɑ wiy nyige kɑ̈l yi en. Mɑ́ tyëng Isrɑil bɑ bɑ̈nggɑ, møg-ɑ ɑ́kɑ̈ɑ̈lɑ wɑ̈g kì piny Rïp, o ge pɑ cuggi ngewø gɑ bɑ̈ngg. Ge ko kwïj cengø, de böggí Jwøgí. Keløg wu dwɑdd-ɑ ngyew ki bɑ̈ngg, ngëëw wun ki jurr-ɑ kyeelø. Wu ócuggø ngyew thyew ki nyigi jurr-ɑ kyeelø møg-ɑ bëëdø kì kelli wun, ki møg-ɑ ónywølø yi kɑ̈lli gen ge bëëd ɑ piny wun, ge ócuggø gwøg gɑ mø wun. Ge ócuggø lɑgø yi nyigi wun kì bɑng wun, göggi gen kɑ̈lli wun gïti thøø, de wɑddi wun tyëng Isrɑil ko kwïju cengø. “Keløg ngɑnpɑth kɑ̈rø, kɑ wɑ̈d Isrɑil me bëëdø kì bute ojɑdø, kɑ ree ngëwwe ngɑnpɑth menɑni, wɑlɑ̀ ree ngëwwe’ wɑɑd ngɑnpɑth menɑni, keny-ɑ órume ngewø, ngyew ócuggø pɑ̈dø yi nget ɑ́kyel kì kelli wɑddi gen, ying-ɑ́ ómï wïye, wɑlɑ̀ ówɑ̈n, wɑlɑ̀ ócuggø pɑ̈dø yi wɑd megø kì gøl gen. Wɑlɑ̀ ke kɑ̈re, ree ócuggø pɑ̈dø yi en, kɑ ngyënyy-ɑ ɑ́ngewii col yi en. Köbbe jɑl-ɑ ɑ́ngewii, kɑ ge kwɑn gen runn, cɑg kì ri keny-ɑ ɑ́ngëwwe ree gøn, gïti Runi Dwöggø men-ɑ óbï, kɑ ngyënyy-ɑ ɑ́ngewii cole ge kwɑɑn-ɑ ri köggi ngɑn ceg ki kïrø. e dhɑ̈y nɑ ngɑn-ɑ ɑ́kïr. Ko kwïj cengø yi wɑ̈n ngɑn-ɑ ɑ́ngewii. O ke cöge e pɑ pɑ̈d ki yëëth møgɑk, gøny geki nyige kì Runi Dwöggø men-ɑ óbï. Mɑ́ tyëng Isrɑil bɑ bɑ̈nggɑ. Ge bɑ bɑ̈nggɑ møg-ɑ ɑ́kɑ̈ɑ̈lɑ wɑ̈g kì piny Rïp. Bene yɑn Jwøøg wun, Jwøng-ɑ Ácwɑ̈ɑ̈j.” Kɑ Jwøng-ɑ Ácwɑ̈ɑ̈j okööbø kinni, “Ri wun ko göggi wun ki jwögg-ɑ pɑth ki dyër, kɑ ri wun ko twïgi wun ki ngïjjì, wɑlɑ̀ wu ko cwödhi piny ki löj, kɑ wu ko twïg ki kït men mɑlli yi wun. Mɑ́ bene yɑn Jwøøg wun, Jwøng-ɑ Ácwɑ̈ɑ̈j. Mïdhu cyɑ̈nggi Sɑbɑth møgɑ, kɑ jɑmmi kwër møgɑ böggi wun. Bene yɑn Jwøng-ɑ Ácwɑ̈ɑ̈j. “Keløg wu óbëëdø wu mïdh-ɑ ciggɑ geki kwöngɑ, wu ómëggɑ kødh kì bøli keje, o piny yije cyeeg yi jɑmmì, o yenh nywøl gen. Pwödhhi wun ócyeg kidøøj, ki me pïïd wun yi cyegi nywøli yenh wu nudd wu okɑ̈jø ki byel, kɑ wu pïïd yi kɑ̈g wu nudd wu olïmø ki nywøli yenhi bɑ̈ggi wun. Gïg-ɑ dwɑddi yi wun ki cɑmø óbëëdø ge nud kì yï wun, o wu óbëëdø wu pɑ böggi kì piny wun. “Wu ónëngi yi yɑn ki mër kì piny wun, o wu ónin wun e bong gïjø me böggi yi wun. Lɑ̈yy-ɑ cyɑ̈mø ónyiig yi yɑn kì pinyɑni, o óbong liny kì yij piny wun. Tyëng-ɑ mɑɑn wun ócyeddi yi wun, kɑ ge ópɑ̈nhø keny-ɑ ɑ́kebbu gen ki pil. Ábïj kì kelli wun tyɑm-ɑ ji miyø, o miyø ɑ́kyel tyɑm-ɑ ji miy pyɑ̈rø. Wu ógyëdh yi yɑn kɑ wu nëngɑ ki nywøl mø gïïr, dhøgɑ ómïdhɑ kì ri lwöbø men-ɑ kɑɑmee. Byelli wun ócyeg kidøøj, kɑ wu pïïd yi byell-ɑ nyɑ̈n wu ocyɑ̈mø ki wöyyì, kɑ byell-ɑ wöyyì ceg yi wun ki weddø, o yethi óköddì kïdhi byell-ɑ nyɑ̈n. Yɑ óbëëdø’ kelli wun kì yij kemɑ, o wu pɑ pɑ̈nyɑ’ lugi ngɑ̈jɑ. Yɑ ócyɑ̈dhi ki wun ceth; Yɑ óbëëdø yɑn ɑ́ Jwøøg wun, o wu óbëëdø wun ɑ́ jiɑ. Yɑn yɑ Jwøøg wun, Jwøng-ɑ Ácwɑ̈ɑ̈j, ɑ ɑ́kɑ̈ɑ̈l wun wɑ̈g kì piny Rïp kun-ɑ ɑ́bëëd wun, wu bɑ bɑ̈ngg, kɑ lødhi ɑcebbì mø wun tørri yi yɑn, kɑ wu wëggɑ cyɑ̈dhø wu törr-ɑ wɑ̈thi wun. “De keløg kwɑbbɑ pɑ lïngi yi wun, kɑ gïg-ɑ cïgɑ wun pɑ nyi gwøg yi wun, o keløg ngɑ̈thi wun lugu’ ciggɑ, kɑ kwöngɑ bɑny yi wun, wu bɑny-ɑ lïngi kwøbbɑ, bene pɑ̈di lwöbø yi wun ɑnɑn. O keny-ɑ ópɑ̈d wun lwöbø, bene gïg-ɑ ógöggɑ wun ek: wu ógöjjɑ ryɑ̈g me dwøng, wu ógöjjɑ rɑ̈ɑ̈m dëllì, kí lëdhi dëllì men-ɑ ócør nyingi wun, kɑ wu dhile’ nɑ̈gø. Wu óthuw kɑ̈g ki byel, mɑ́ byellɑni ócɑm-ɑ yi ji mø mɑ̈n ki wun. Nyingee ónenni yi wɑ, kɑ wu tyɑm yi ji mø mɑɑn wun, kɑ wu jɑɑg yi ji mø mɑɑn wun; o wu ówɑ̈dhi rengø yi wɑ̈ɑ̈rø e bong ngɑn me cyeddi wun. “O keløg wu óbëëd wu nudd wu opëmø ki kwøbbɑ, kömi cɑ́yi wun ócigɑ kïdhø ki tyel ɑ́bïryew. Ki lɑ̈n-ɑ lɑ̈ddi wun ɑnɑn, wɑ̈thi wun ódwöögɑ piny, óbëëd e bong kødh, piny wun óthwøw kɑ ogöögø’ dødø. Cɑgg wu göögø wu teeg, bong gïjø me yod yi wun, mɑ́ e bong gïjø me cyeg kì pinyɑni, o yenh pɑ kɑ̈ni ki nywøl. “Keløg wu óyöd wu kɑ̈l-ɑ wɑ̈yi wun, kɑ wu óbɑ̈nyø ki lïngi kwøbbɑ, kömi cɑ́yi wun ócigɑ kïdhø ki tyel ɑ́bïryew. Lɑ̈yy-ɑ nyi cyɑ̈mø óörɑ kelli wun, kɑ nyigi wun cɑm yi gen, kɑ dhögi wun cɑm yi gen, kɑ wu odöngø wu nøg, o yëëth döng gen ge bong ji møg cyɑ̈dhi kì yethi gen. “O rum cɑ́yɑni ki pɑ̈dhi kömi wun de wu pɑ yewi, wu nudd wu bɑny-ɑ møgɑ, wu ceg yi yɑn kɑ cɑyø ki cɑ́y mø lod møgɑni ki tyel ɑ́bïryew. Liny óköölɑ kömi wun, liny me cɑɑy wun kipe kɑ ɑ́pɑ̈du lwöbø men-ɑ ɑ́ying kɑɑmee, o keløg wu pɑ̈n-ɑ yethi kɑ̈ddi dör, wu örɑ’ rɑ̈ɑ̈m dëllì møg-ɑ ójɑ̈ddi ki yɑdh, kɑ wu yömm-ɑ yï ji mø mɑ̈n ki wun. Wu ótwönɑ ki gïncɑm, kɑ men-ɑ́ tyëng-ɑ mɑ̈nn pyɑ̈rø rïb-ɑ kömi purun ɑ́kyel, o nyi ceg ki teggø yi gen, o keny-ɑ órume ki cɑmø yi wun bëne, kɑ̈ɑ̈j wun pɑ lɑ̈ɑ̈ny. “O rum cɑ́yɑni ki pɑ̈dhi kömi wun de wu pɑ yewi, wu nudd wu bɑny-ɑ møgɑ, pyëwɑ órënyi kɑ kömi cɑ́yɑni cigɑ kïdhø ki mø pëddi rɑ̈jø, mø lod mø tyeli mɑl ki tyel ɑ́bïryew. Kɑ̈ɑ̈j wun ótëngi ki mendwøng kɑ nyigi wun cɑm yi wun. Kɑ̈jji mɑ̈ddø mø wun kì wɑ̈thi ótøng ócøørɑ piny, kɑ këlli bɑkur dhurɑ piny, kɑ wu leengɑ kömi ngïjji jwöggi wun wu thøø, wu ómɑn yi yɑn ki mendwøng. Kɑ̈ddi wun ócøørɑ piny geki kɑ̈jji mɑ̈ddø mø wun, o yɑ óbɑ̈nyi ki gëdhh-ɑ ómuuj yi wun. Piny wun órënyi yi yɑn ki menteg, kɑ men-ɑ́ tyëng-ɑ óbï be kwɑnyii ceg-ɑ ngɑ̈ngø yi rëny-ɑ rëny en. Wu óköllɑ liny kɑ wu tɑɑy-ɑ kelli jurrì møøgø. Piny wun ódöng nøw, kɑ kɑ̈ddi wun odöngø ge rënyø. Codhe, o piny ree ywöme keny-ɑ ókïdhi wun pödhhi ji mø mɑ̈n ki wun. Piny wun pyëwe ómïni yi ywömø keny-ɑ ódöönge e wɑ̈dh-ɑ bëëdø yøw. Piny ree óywöme ki ywömø me lod men-ɑ di mëggu en kì yethi cyɑ̈nggi Sɑbɑth, keny-ɑ́ nudd wu obëëdø’ yije. “Tyëng-ɑ ónudd ge onëënø pëthi gen ónyönhi kì piny tyëngmɑ̈ɑ̈nø. Ge óbwøg yi yïthhi yɑdh kɑ̀ yɑngi gen yi yømø. Ge órengi e dhɑ̈y ce dɑ ngɑn cyeddi gen ki pilø, kɑ ge ópɑ̈nhø e bong ngɑn cyeddi gen. Kɑ ngɑn pɑ̈dh-ɑ kömi ngɑn, e ce dɑ ngɑn cyeddi gen ki pilø, ngö e bong ngɑn cyeddi gen. Wu ónyönhi, liny pɑ lwɑ̈ng yi wun. Wu óthøw kelli pödhh møøgø, kɑ wu lɑ̈ny-ɑ yethi pödhhi ji mø mɑ̈n ki wun. O tyëng-ɑ ódöng ge onëënø kwɑ̈ɑ̈g gen yethi pödhhi ji mø mɑ̈n ki gen kì bɑng orøøg gen. Ge kwɑ̈ɑ̈g-ɑ yïnø thyew kipe orøøg kweyyi gen. “De kwɑrri wun oyewi gen ki orøøg gen geki orøøg kweyyi gen, jøg-ɑ ɑ́pyem kwøbbɑ, kɑ ngɑ̈thi gen lugi gen yɑn, ɑwëggi gen pyëwɑ rënyø, ɑkøølɑ gen pɑ̈l yij piny ji mø mɑ̈n ki gen. Kì cyɑ̈n cyee keny-ɑ óyömmi kwɑrri wun, kɑ cɑ́yi gen yïëy yi gen, lwöm-ɑ ɑ́ying kɑɑm wøn ki Abrɑhɑm ópɑr yi yɑn, kí lwömi wøn ki Isɑɑk, kí lwömi wøn ki Yɑgob, kinni piny ómëggɑ jiɑ. Piny ówiy e dööng nøw yi gen, o piny pyëwe mïne kì kɑɑm-ɑ bëëde e ywöm-ɑ ree, o ge yïëy gen ki cɑyø kipe kɑ ɑ́bɑny gen kwöngɑ geki ciggɑ. Cɑgg ɑ́ kinøw ceth, kɑ̈ng-ɑ óying gen piny ji mø mɑ̈n ki gen, ge pɑ ti yi yɑn ki weddø, wɑlɑ̀ ge pɑ nɑ̈gɑ pɑ̈l ge bënn, mɑ́ menɑni óbëëd ɑ́ cögi lwömɑ ki gen, o bene yɑn Jwøøg gen, Jwøng-ɑ Ácwɑ̈ɑ̈j. Ge ópɑ̈ddɑ ki lwömi tyeli mɑl, lwöm-ɑ ree ɑ́kɑ̈ɑ̈lɑ gen wɑ̈g kì piny Rïp, e jurrì onëënø bënn, kipe kinni o yɑ óløgɑ Jwøøg gen, yɑ Jwøng-ɑ Ácwɑ̈ɑ̈j.” Møgɑk bene gen kwöng geki cigg møg-ɑ ɑ́mëggi Mosɑ̀ yi Jwøng-ɑ Ácwɑ̈ɑ̈j kì wïj Kïti Sinɑy kipe tyëng Isrɑil. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí cigg møg tyëng Isrɑil, kinni keny-ɑ órum dhɑnhø ki mëggi Jwøng-ɑ Ácwɑ̈ɑ̈j ɑ́ wïj köngø, jɑlø runne pyɑ̈r ɑ́ryew gïti pyɑ̈r ɑ́bïkyel pɑ̈d kɑ ngyëny ɑ́tegg pyɑ̈r ɑ́bïj. Røm gen ri ɑ́tuggi ɑ́tegg møg-ɑ ónyodh yi ókwër. Ngɑndhɑjø runne pyɑ̈r ɑ́ryew gïti pyɑ̈r ɑ́bïkyel pɑ̈d kɑ ngyëny ɑ́tegg pyɑ̈r ɑ́dɑ̈g. Nyel-ɑ jɑlø runne ɑ́bïj gïti pyɑ̈r ɑ́ryew pɑ̈d kɑ ngyëny ɑ́tegg pyɑ̈r ɑ́ryew. Dhɑjø pɑ̈d kɑ ngyëny ɑ́tegg pyɑ̈rø. Nyɑgïnthinh-ɑ jɑlø dwɑ̈ye ɑ́kyel gïti runn ɑ́bïj, pɑ̈d kɑ ngyëny ɑ́tegg ɑ́bïj. Nyɑgïnthinh-ɑ dhɑjø pɑ̈d kɑ ngyëny ɑ́tegg ɑ́dɑ̈g. Jɑlø runne pyɑ̈r ɑ́bïkyel gïti mɑl, pɑ̈d kɑ ngyëny ɑ́tegg pyɑ̈rø wïdɑ́bïj. O dhɑjø pɑ̈d kɑ ngyëny ɑ́tegg pyɑ̈rø. “Ngɑn dhɑl yi col muuj ókwërø, o ngyënyy-ɑ col en cïb yi ókwërø, ngyënyy-ɑ cuggi lwɑ̈ngø ki colø yi ngɑn-ɑ ɑ́köngi, ókwøb-ɑ yi ókwërø. “Keløg wïj köngø bɑ lɑ̈y me cuggi mëggi Jwøng-ɑ Ácwɑ̈ɑ̈j; kɑ cyee, gïn-ɑ ɑ́mëggi Jwøng-ɑ Ácwɑ̈ɑ̈j bɑ gïi kwër. Lɑ̈y-ɑ ɑ́muuj keje ko cïbi, wɑlɑ̀ ko wil, ying e wil kɑ men døj wɑlɑ̀ men rɑj, ke pɑ̈nyii ki wilø, lɑ̈yyɑni ryeet ceg-ɑ gwøg ki mø kwër. Lɑ̈yy-ɑ ywëdhø pɑ cuggi mëggi Jwøng-ɑ Ácwɑ̈ɑ̈j gɑ gëdhhì, o ke di ngɑn kɑ̈ni yï Jwøng-ɑ Ácwɑ̈ɑ̈j ki ɑ́kyel kì kelli lɑ̈yyɑni, muuj ókwërø. Kɑ ngyënyy-ɑ ngeew lɑ̈yɑni cïb yi ókwërø e køøl-ɑ kömi døøje wɑlɑ̀ rɑ̈je, ni kɑ̀ nennii yi ókwërɑni, bene gen ngyënyy-ɑ ókwøb yi ókwërø ɑ ngeewii. Keløg ngɑn-ɑ ɑ́kɑ̈ni dwɑdd-ɑ dwøøgi gëe, kɑ ɑ́kyeel ɑ́bïj kì ri ngyënyy-ɑ ɑ́cïb yi ókwërø gɑ møg ngeew lɑ̈yɑni cïb kömi ngyënyy-ɑ col en, o cole mø ngenyø. “Keløg dhɑnhø muuj-ɑ øde, gø mëgge’ Jwøng-ɑ Ácwɑ̈ɑ̈j ɑ́ mi kwër, cïb ngyënyye yi ókwërø, e ködd-ɑ kömi rɑ̈je wɑlɑ̀ døøje, ngyënyy-ɑ ókwøb yi ókwërø bene gen ngyënyy-ɑ ngeew ønɑni. De keløg ngɑn-ɑ ɑ́muuj ød dwɑdd-ɑ døøgi øde ki ngewø, cïb ɑ́kyeel ɑ́bïj kì ri ngyënyyɑni kömi ngyënyyi ngyew, o cole mø ngenyø. Codhe, o ød døøge ɑ́ mi wɑ̈n këti. “Keløg dhɑnhø muuj-ɑ pwödhø kì ri piny gøl gen, ngyënyy-ɑ ngeew pwödhø pɑ̈ɑ̈r kɑ ngyënyy-ɑ ngeew köödh møg-ɑ kɑ̈ɑ̈gii, kwɑn ɑ́ ngyëny ɑ́tegg pyɑ̈rø ɑ ngeew gïn ni rummì pyɑ̈rø mø ceir. Keløg pwödhø muuj yi ngɑnɑni kì Runi Dwöggø, cungi ngyënyy-ɑ ngeewii gɑ møg-ɑ ɑ́kwøb yi ókwërø ceth. De keløg e ómuuj yi ngɑnɑni kì bɑng runi Dwöggø, cïb ngyënyyi ngyew yi ókwërø ge kwɑɑn-ɑ ri runn-ɑ ɑ́döng kipe bëëni Runi Dwöggø. Kɑ kwɑnnɑni ngul wɑ̈g kì ri ngyënyyi ngyew. Keløg ɑ́ ngɑn-ɑ ɑ́muujii ɑ dwɑddii døøgø ngewø, cïb ɑ́kyeel ɑ́bïj kì ri ngyënyyɑni kömi gen, o cole mø ngenyø. Codhe cyee, o pwödhø døøge ɑ́ mi wɑ̈n këti. Keløg pwönhɑni pɑ døøg ki ngewø yi wɑ̈n, wɑlɑ̀ keløg e ngew-ɑ yi ngɑn megø, pɑ cigi døøgø ngewø yi jɑl-ɑ ɑ́muujii. Keny-ɑ ópɑ̈ɑ̈d piny kì Runi Dwöggø, pinyɑni ceg-ɑ gwøg ɑ́ mi kwër, bɑ mi Jwøng-ɑ Ácwɑ̈ɑ̈j, ni piny-ɑ ócɑɑgø mëggii. Ceg-ɑ gwøg ki mi ókwër, ɑ løg gøl kwër. “Keløg dhɑnhø mëgg-ɑ Jwøng-ɑ Ácwɑ̈ɑ̈j piny me cɑɑg en ki ngewø, e pɑth ki piny gøl gen, kwɑɑn runn-ɑ ɑ́döng kipe bëëni Runi Dwöggø yi ókwërø, kɑ ngyënyy-ɑ ngeew pinyɑni cïbe, kɑ ngyënyyi ngyew muuj kì cyɑ̈ngɑni ceth, ngyënyyɑni bɑ mø kwër, ɑ løg mø Jwøng-ɑ Ácwɑ̈ɑ̈j. Keny-ɑ óbëën Runi Dwöggø, pinyɑni døøg-ɑ yï wɑ̈n ngeti tyeli mɑl, yï gøl-ɑ ɑ́ngeew pinyɑni wɑ̈g. “Nyi rum wun ki rum-ɑ ɑ́cïb yi kej kwër, kɑ̀ cud wun ki ngyënyyi ngew møgɑk, e bɑ ngyënyø me cuggi pɑ̈ngø gɑ bud pyɑ̈r ɑ́ryew. “Keløg lɑ̈y bɑ kɑyi meye, ceg bëëdø ɑ́ mi Jwøng-ɑ Ácwɑ̈ɑ̈j, ko cigi mëggii yi ji. Keløg ɑ́ dhyɑng wɑlɑ̀ dyel, bɑ mi Jwøng-ɑ Ácwɑ̈ɑ̈j. Keløg lɑ̈yɑni ywëdhø, døøg ki ngewø yi wɑ̈n ki ngyënyy-ɑ ókwøb yi ókwërø. Kɑ kömi ngyëny kïdhi yi ngɑnɑni ki ɑ́kyeel ɑ́bïj. Keløg e pɑ døøg ki ngewø yi wɑ̈n, ngeew wɑ̈g yi ókwërø ki ngyënyy-ɑ ɑ́cïb en. “Bong dhɑnhø me cuggi dwøøgi gïn-ɑ ɑ́muuje ki cwɑgge, kɑ gø thyeye ɑ́ mi Jwøng-ɑ Ácwɑ̈ɑ̈j, cɑgg ɑ́ dhɑnhø, wɑlɑ̀ lɑ̈y, wɑlɑ̀ pwödhø men-ɑ bɑ mee, wɑlɑ̀ mi gøl gen. Ceg cögø ɑ́ mi Jwøng-ɑ Ácwɑ̈ɑ̈j ceth, pɑ cuggi døøgø ngewø wɑlɑ̀ pɑ gøøm. “Keløg dhɑnhø ómuujø kɑ per nɑ̈gø, pɑ cuggi gøømø, ceg ki nɑ̈gø ceth. “Ákyeel pyɑ̈rri byel, geki jɑmm-ɑ pidh bënn, bɑ miɑ, kì ri jɑmm-ɑ cyeg kì pwödh geki nywøli yenhi bɑ̈gg. Ákyeel pyɑ̈rri bud menɑni bɑ mi kwër. Keløg e dɑ ngɑn dwɑddi dwøøgi ɑ́kyeel pyɑ̈rrɑni, kömi ngyënyy-ɑ ngewii ceg kɑ kïdhø ki ɑ́kyeel ɑ́bïj. Kwɑɑny ɑ́kyeel pyɑ̈ri lɑ̈yy kì yï dhɑnhø yi ókwërø, ying gɑ dyëg wɑlɑ̀ dhög, o ge bɑ mø kwër, ɑ løg mø Jwøng-ɑ Ácwɑ̈ɑ̈j. Ngɑn-ɑ di lɑ̈yye ko wöl wïïdø, ying-ɑ́ men rɑj ɑ wil ki men døj, wɑlɑ̀ men døj ɑ wil ki men rɑj. Keløg e owïïdø lɑ̈yyɑni ryeet ceg-ɑ gwøg ki mø Jwøng-ɑ Ácwɑ̈ɑ̈j, ge pɑ cuggi døøgø ngewø yi wïi gen.” Møgɑk bene gen cigg-ɑ ɑ́mëggi Mosɑ̀ yi Jwøng-ɑ Ácwɑ̈ɑ̈j kì wïj Kïti Sinɑy kipe tyëng Isrɑil. Jwøng-ɑ Ácwɑ̈ɑ̈j ɑ́kööb geki Mosɑ̀ kì yij Kemi Kwër kì yij pɑ̈ɑ̈l Sinɑy, kì kyeel cyɑ̈nggi ryeew dwɑ̈tt, kì ryeew runni bɑng bëëni gen wɑ̈g kì piny Rïp. Jwøng-ɑ Ácwɑ̈ɑ̈j Mosɑ̀ ɑ́köbbe kinni, “Kwɑnu tyëng Isrɑil wuki Aɑron, kwɑn gɑ wɑ̈thi ud, kí wɑ̈thi kɑ̈llì, gwedu jøg-ɑ cwøw bënn, Cɑg kì ri ngɑn runne bɑ pyɑ̈r ɑ́ryew gïti mɑl, ɑ́ ngɑn cuggi kedhi be liny. Kɑ̈bbí ki jøgdøngø, ɑ́kyel kì wïj kɑl, gɑ møg køny wun, o bëëde ɑ́ jɑngi gøl gen.” Kɑ jøgɑni gɑ pyɑ̈rø wïdɑ́ryew cwøl yi Mosɑ̀ geki Aɑron. Kɑ pödhø bëne cwøl yi gen kì kyeel cyɑ̈nggi ryeew dwɑ̈tt, kɑ ji gwed gɑ wɑ̈thi ud, kí wɑ̈thi kɑ̈llì. Jøg-ɑ cwøw ɑ́gwed bënn, cɑg kì ri ngɑn runne bɑ pyɑ̈r ɑ́ryew gïti mɑl, ni kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j. Nyingi ji ɑ́gwed-ɑ yij Ryɑɑng Sinɑy yi Mosɑ̀. Kwɑrri Leebì nuti gwedø ni kɑ̈ll-ɑ kyeelø, kipe kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j kinni, “Keny-ɑ ógweed jøg-ɑ kedhi be liny, Kwɑrri Leebì ko gwed. Cïb gøl Leebì ɑ́ en ɑ korri Kemi Kwër, o ge nyi byelli gen kemɑni ki jɑmme bënn, nenni ge gïn ceth. Kɑ kemmi gen nyi geer gen bɑdhhe. Kenyi dɑ̈ɑ̈g ji, Kemi Kwër nyi pɑ̈d-ɑ yi Kwɑrri Leebì, o kenyi gurii piny, bɑ gen ɑ gurii piny ceth. Nɑ̈ɑ̈g ngɑnpɑth ki Kwɑɑr Leebì men-ɑ ókedhi buti gøn. Kɑ tyëng Isrɑil møg-ɑ kyeelø guddi gen piny, gɑ byëgg, ngɑn kì byëëg gen kì buti bere. De Kwɑrri Leebì guddi gen bɑdhhi Kemi Kwër, o gø kor gen, o bëëd e bong ngɑn kedhi bute kɑ pyëwɑ órënyø ki tyëng Isrɑil, kɑ ge ryɑ̈gɑ.” Codhe, kɑ møg-ɑ ɑ́köbbi Mosɑ̀ yi Jwøng-ɑ Ácwɑ̈ɑ̈j, gwøg ceth yi tyëng Isrɑil. Cigg møg-ɑ bï ek ɑ́mëgg-ɑ Mosɑ̀ geki Aɑron yi Jwøng-ɑ Ácwɑ̈ɑ̈j. Kinni kenyi gud Isrɑil ki kɑɑl, nyi guddi ngɑn byëëg gøl gen, kì buti beer gen. Gur kɑɑl Isrɑil e wen-ɑ Kemi Kwër dyëre kì wɑ̈thi tùng bënn. Bɑng byëggɑni ryeet løg-ɑ yi gøl Leebì e kɑ̈ll-ɑ Kemi Kwër. Lwøøb wɑ̈dh ceth, ni guddi piny, men kì keje ki bere kì bøle. Kɑ ɑ́gweed gen gɑ byëgg ge ɑ́bëëd gɑ 603,350. De Mosɑ̀ ɑ́kyëddi yi Jwøng-ɑ Ácwɑ̈ɑ̈j kinni i gøl Leebì ko gwed, ni kɑ̈lli Isrɑil møg-ɑ kyeelø. Codhe, kɑ gïg-ɑ ɑ́cïgi Mosɑ̀ yi Jwøng-ɑ Ácwɑ̈ɑ̈j gwøg ceth yi tyëng Isrɑil. Ge ɑ́gud, byëëng ki bere kì bøle. Kenyi wɑ̈ddi gen yöö, men cyɑ̈dhi kɑ gøl gen. Wɑ̈ddi Aɑron geki Mosɑ̀ ek, kì bøli keny-ɑ ɑ́kööb Mosɑ̀ geki Jwøng-ɑ Ácwɑ̈ɑ̈j kì Kïti Sinɑy. Aɑron yïe ɑ́dɑ wɑ̈dd ɑ́ngwen: Nɑdɑb nyel-ɑ kɑyø, kí Abiu, kí Eliɑdhɑr, ki Ithɑmɑr. Wɑ̈thi gen ɑ́kunyi ki møøw dhetun, kɑ ge røny gɑ ókwër, de Nɑdɑb geki Abiu ɑ́nɑ̈g kì Ryɑɑng Sinɑy kipe kɑ ɑ́kïdhi gen bøli Jwøng-ɑ Ácwɑ̈ɑ̈j ki mɑc me pɑth ki ɑkwër. Yï gen ɑ́bong-ɑ nywøl. Ábëëd ɑ́ Eliɑdhɑr geki Ithɑmɑr ɑ ɑ́göög gɑ ókwër keny-ɑ ɑ́nud Aɑron. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Cwööl gøl Leebì, kɑ wiy ge køny gen ókwërø Aɑron. Gwøg gen gwøng-ɑ dwɑddi kipe Kemi Kwërɑ, o ge køny gen ókwër geki pödhø bëne. Gen ɑ kor jɑmmi Kemi Kwër, o gen ɑ gwøg kej Isrɑil bëne. Gwøøg gøl Leebì bɑ kønyi Aɑron geki wɑ̈dde kete. Kwɑny Aɑron geki wɑ̈dde gɑ ókwër, de ke di ngɑn kedhi buti gen, nɑ̈ɑ̈g ngɑnɑni.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kwɑrri Leebì ɑ ɑ́kwɑny yi yɑn kì kelli kɑ̈lli Isrɑil gɑ kɑ̈jji kɑyyì bënn. Mɑ́ kɑyyì bënn ɑ́kwɑny yi yɑn kì cyɑ̈ng-ɑ ɑ́nɑ̈gɑ kɑyyi Rïp bënn, kɑ kɑyø bëne kwër yi yɑn kì Isrɑil, cɑg kì ri kɑyi dhɑnhø gïti ri kɑyi lɑ̈y, ge bɑ møgɑ bënn, yɑ Jwøng-ɑ Ácwɑ̈ɑ̈j.” Kɑ Mosɑ̀ köbbi yi Jwøng-ɑ Ácwɑ̈ɑ̈j kì Ryɑɑng Sinɑy kinni, i gwede Kwɑrri Leebì gɑ wɑ̈thi ud, i gweed cwøw bënn, cɑg kì ri men-ɑ yïe di dwɑ̈y kër-ɑ ɑ́nywøølii gïti mɑl. Kɑ møgɑni gwøg yi Mosɑ̀. Gøl Gercön yïe dɑ wɑ̈ɑ̈th ɑ́ryew. Libnì kí Cimeì. Kwɑnni cwøw kì gølɑni keny-ɑ ɑ́gweed gen, cɑg kì ri men-ɑ yïe di dwɑ̈y kër-ɑ ɑ́nywøølii gïti mɑl bɑ ɑ́lïp ɑ́bïryew kí miy ɑ́bïj. Gølɑni nyi gudd-ɑ wɑɑng cyɑ̈ɑ̈ng böörø kì ngɑ̈ɑ̈j Kemi Kwër. Jɑngi gøl Gercön bɑ Eliɑsɑp wɑ̈d Lɑel. Gen ɑ mïdhi Kemi Kwër, ki gëng men-ɑ yiny-ɑ yij, geki men-ɑ yiny-ɑ wɑ̈g, ki gëëng dhø Kemi Kwër. Kí ógudh-ɑ nyi geer kɑl men-ɑ wen Kemi Kwër geki këli lɑm, kí gëëng dhø kɑl, gen ɑ gøggi gïgɑni bënn. Gøl Kɑ̈ɑ̈th dɑ wɑ̈ɑ̈th ɑ́ngwen: Amrɑm, kí Idhɑr, kí Kibrön, kí Udhiel. Kwɑnni cwøw kì gølɑni keny-ɑ ɑ́gweed gen cɑg kì ri men-ɑ yïe di dwɑ̈y kër-ɑ ɑ́nywøølii gïti mɑl bɑ ɑ́lïp ɑ́bïdɑ̈g kí miy ɑ́bïkyel. Gølɑni nyi gudd-ɑ wɑɑng wurlwɑl kì buti Kemi Kwër. Jɑngi gøl Kɑ̈ɑ̈th bɑ Elidhɑpɑn wɑ̈d Udhiel. Gen ɑ mïdhi Sɑnduug Cigg kí tɑrɑbedhɑ̀ kí teggi lɑ̈mbɑ̈ɑ̈, kí këli lɑm, geki jɑmm-ɑ nyi göög yi ókwër kì kej kwër, kí gëng mi Kej Kwërdwøng. Gen ɑ gøggi gïgɑni bënn. Jɑngi pëjji gøl Leebì men-ɑ jɑɑg tyëng-ɑ nyi göögø kì kej kwër, bɑ Eliɑdhɑr wɑ̈d ókwërø Aɑron. Gøl Merɑrì bɑ wɑ̈ɑ̈th ɑ́ryew: Mɑklì ki Mucì Kwɑnni cwøw kì gølɑni keny-ɑ ɑ́gweed gen cɑg kì ri ngɑn-ɑ yïe di dwɑ̈y kër-ɑ ɑ́nywøølii gïti mɑl bɑ ɑ́lïp ɑ́bïkyel kí miy ɑ́ryew. Gølɑni nyi gudd-ɑ wɑɑng wuudø kì buti Kemi Kwër. Jɑngi gøl Merɑrì bɑ Dhuriel wɑ̈d Abikɑil. Gen ɑ mïdhi mɑ̈ggi Kemi Kwër, o gen ɑ mïdhi löjj, kí rïwwì ki tëddì geki jɑmm-ɑ nyi mɑɑg gen bënn. Gen ɑ gøggi gïgɑni bënn. Gen ɑ mïdhi löjj, kí tëddì kí pij kí thølli kɑl thyew. Mosɑ̀, kí Aɑron geki wɑ̈dde, nyi guddi gen wɑɑng cyɑ̈ɑ̈ng mwøl kì bøli Kemi Kwër. Gen ɑ gwøg kwër kì kej kwër kipe tyëng Isrɑil, ke di ngɑn pɑth ki ngeti gølɑni me pɑ̈nyi gwøg ki gwøøg kwër, nɑ̈g. Kwɑnni Kwɑrri Leebì bënn, cɑg kì ri men yïe di dwɑ̈y kër-ɑ ɑ́nywøølii gïti mɑl, gen ɑ møg-ɑ cwøw ɑ́bëëd gɑ ɑ́lïp pyɑ̈r ɑ́ryew wïdɑ́ryew, keny-ɑ ɑ́gweed gen ni kɑ ɑ́kwøbii yi Jwøng-ɑ Ácwɑ̈ɑ̈j. Møgɑni ɑ́lïngi yi Mosɑ̀, codhe ɑgwede kɑyy-ɑ cwøw bënn, cɑg kì ri men-ɑ bɑ dwɑ̈y kër-ɑ ɑ́nywøølii gïti mɑl, kwɑnni gen bënn ɑ́bëëd gɑ ɑ́lïp pyɑ̈r ɑ́ryew wïdɑ́ryew kí miy ɑ́ryew kí pyɑ̈r ɑ́ryew wïdɑ́dɑ̈g. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Thyey Kwɑrri Leebì gɑ møgɑ kì kɑ̈jji kɑyyi Isrɑil møg-ɑ cwøw, kɑ jɑmmi Kwɑrri Leebì thyëyi yɑn gɑ kɑ̈jji kɑyyi jɑmmi Isrɑil. Mɑ́ kwɑnni kɑyyi Isrɑil pöödh-ɑ kwɑnni Kwɑrri Leebì ki ji miy ɑ́ryew kí pyɑ̈r ɑ́bïryew kí ɑ́dɑ̈g, gøøny møg-ɑ wɑ̈thi kwɑn ki ngyëny. Nget ɑ́kyel gøny ki ngyëny ɑ́tegg ɑ́bïj, ngyënyy-ɑ bɑ ɑyïëy kì kej kwër. Kɑ ngyënyyɑni mëggi Aɑron geki wɑ̈dde.” Codhe kɑ ngyënyyɑni kwɑny yi Mosɑ̀, gɑ ngyëny ɑ́tegg ɑ́lïp kí miy ɑ́dɑ̈g kí pyɑ̈r ɑ́bïkyel wïdɑ́bïj. Kɑ gï mëgge Aɑron geki wɑ̈dde. Kɑ Mosɑ̀ köbbi yi Jwøng-ɑ Ácwɑ̈ɑ̈j i kwɑne gøl Kɑ̈ɑ̈th Kwɑrri Leebì, kɑ gwede cwøw-ɑ runni gen bɑ pyɑ̈r ɑ́dɑ̈g gïti pyɑ̈r ɑ́bïj, jøg-ɑ cwøw møg-ɑ cuggi gwøg kì Kemi Kwër. Gwøøg gen bɑ kɑ̈lli jɑmmi kwër møg-ɑ per gen teg cɑrø. Mosɑ̀ ɑ́ceg yi Jwøng-ɑ Ácwɑ̈ɑ̈j kinni, i obëën kɑɑl e odhwödhø, kedhi Aɑron geki wɑ̈dde yij Kemi Kwër, kɑ gëng men-ɑ bøli Sɑnduug Cigg gøny gen, kɑ gø kum gen Sɑndungɑni. Kɑ köme pëdhi gen ki pyën me yöm, kɑ köme pëdhi ki ógødh me bɑ ówɑw, codhe kɑ lødh-ɑ nyi byellii cød kɑ̈jji gen. Kɑ tɑrɑbeedh byëli Jwøng-ɑ Ácwɑ̈ɑ̈j köme pëdhi gen ki ógødh me bɑ ówɑw, codhe kɑ tɑ̈mmì, kí ópɑ̈nni bɑkur, kí óthɑ̈ggì geki puggi møgi oløg cïb yij ógønhɑni. Bëëde e dɑ gïncɑm me bɑ ópun ceth kì wïj tɑrɑbenhɑni. Kɑ kömi jɑmmɑni bënn pëdhi gen ki ógødh me kwɑrø, kɑ kum ki pyën me yöm, codhe kɑ lødh-ɑ nyi byellii cød kɑ̈jji gen. Kɑ ge kɑ̈bbi gen ki ógødh me bɑ ówɑw, kɑ gø kum gen teggi lɑ̈mbɑ̈ɑ̈, ki gïg-ɑ nyi nɑ̈ɑ̈g mɑc, ki ópɑ̈nni ki gïg-ɑ yethi gen di møøw lɑ̈mbɑ̈ɑ̈. Kɑ gø bɑɑn gen yij pyën me yöm geki jɑmmɑni bënn, codhe kɑ gï cïb gen wɑ̈thi lødh-ɑ nyi byellii. Kɑ këli dhɑb köme pëdhi gen ki ógødh me bɑ ówɑw, kɑ köme pëdhi ki pyën me yöm, codhe kɑ lødh-ɑ nyi byellii cød ree. Kwɑny gen jɑmm-ɑ nyi göög kì yij Kemi Kwër bënn, kɑ gï bɑɑn gen yij ógødh me bɑ ówɑw, kɑ ge kum gen ki pyën me yöm, codhe kɑ gø cïb gen kömi lødh-ɑ nyi byellii. Kɑ búr kɑ̈ɑ̈l gen wɑ̈g kì yij këli lɑm, kɑ kömi këlɑni pëdhi ki ógødh ówɑw. Kɑ jɑmm-ɑ nyi göög bënn kì wïj këli lɑm bøødh wïje, ɑ løg, dikɑ̈bbì, kí kerr, kí ɑtögg, kí óthɑ̈ggì, kí wïddì. Kɑ gï kum gen ki pyën me yöm, codhe kɑ lødh-ɑ nyi byellii cød ree. Keny-ɑ ódhwödh kɑɑl, kɑ gøl Kɑ̈ɑ̈th Kwɑrri Leebì bï gen be kwɑnyi jɑmmi kwër bënn, ge rumø ki kumø yi Aɑron geki wɑ̈dde. Jɑmmi kwër ko nywɑl yi gøl Kɑ̈ɑ̈th ki cinggi gen, ke nywɑl ge gïn, ge othøø. Bene gwøøg gøl Kɑ̈ɑ̈th ɑnɑn kenyi kɑ̈ɑ̈l Kemi Kwër. Eliɑdhɑr wɑ̈d ókwërø Aɑron mïdhe Kemi Kwër kí jɑmme bënn, ɑ løg møøw lɑ̈mbɑ̈ɑ̈, kí bɑkur, kí byëli Jwøng-ɑ Ácwɑ̈ɑ̈j, kí møøw röny, kí gïg-ɑ yij Kemi Kwër møg-ɑ rumø ki thyëyi Jwøng-ɑ Ácwɑ̈ɑ̈j. Kɑ Mosɑ̀ geki Aɑron köbbi yi Jwøng-ɑ Ácwɑ̈ɑ̈j kinni, “Wïj ød Kɑ̈ɑ̈th ko wëggi wun pɑ̈ɑ̈dhø kì yij gøl Leebì, de nyi nyudhu gen kenyi kedhi gen kej kwër buti jɑmmi kwër, nyi kedhi Aɑron geki wɑ̈dde bøli gen, kɑ ngɑn nyi nyudhi gïn-ɑ byelli yi en. De keløg e dɑ ngeti gøl Kɑ̈ɑ̈th me kedhi yij Kemi Kwër, kɑ ókwër lidhe ge ócungø ki jɑmmi kwër, ngɑnɑni ceg-ɑ thøø.” Kɑ Mosɑ̀ köbbi yi Jwøng-ɑ Ácwɑ̈ɑ̈j, i kwɑne gøl Gercön Kwɑrri Leebì, Kɑ gwede tyëng-ɑ runni gen bɑ pyɑ̈r ɑ́dɑ̈g gïti pyɑ̈r ɑ́bïj, jøg-ɑ cwøw møg-ɑ cuggi gwøg kì Kemi Kwër. Gwøøg gen bɑ kɑ̈lli jɑmmì møg: Kemi Kwër kí ógødhe men-ɑ yiny-ɑ yij, kí ógønh-ɑ yiny-ɑ wɑ̈g, kí pyën-ɑ yöm men-ɑ nyi bɑ̈ɑ̈j köme, geki gëng-ɑ bɑ thïgi dhø Kemɑni, kí gëng-ɑ bɑ thïgi dhø kɑl men-ɑ yije di Kemi Kwër geki këli lɑm, geki thølli gëngɑni, kí mɑ̈ggi kɑl møg-ɑ kyeelø bënn. Bene gwøøg gøl Gercön ɑnɑn kenyi kɑ̈ɑ̈l Kemi Kwër. Nenni gwøøg gøl Gercön yi Mosɑ̀ geki Aɑron, o bɑ Aɑron geki wɑ̈dde ɑ nyudhi gølɑni gwøge ki gïg-ɑ kɑ̈lli yi gen. Bene gwøøg gøl Gercön ɑnɑn kenyi kɑ̈ɑ̈l Kemi Kwër. Ithɑmɑr wɑ̈d ókwërø Aɑron ɑ nenni gwøøg gen. Kɑ Mosɑ̀ köbbi yi Jwøng-ɑ Ácwɑ̈ɑ̈j, i kwɑne gøl Merɑrì Kwɑrri Leebì. Kɑ gwede tyëng-ɑ runni gen bɑ pyɑ̈r ɑ́dɑ̈g gïti pyɑ̈r ɑ́bïj, jøg-ɑ cwøw møg-ɑ cuggi gwøg kì Kemi Kwër. Gwøøg gen bɑ kɑ̈lli löjj, kí rïwwì, ki mɑ̈ggì geki tëddi löjj mø Kemi Kwër, geki löjj, kí tëddì, kí pij, kí thølli kɑl men-ɑ yije di Kemi Kwër, geki mɑ̈ggi gen. Dhɑnhø nyi mëgg-ɑ gïn-ɑ kɑ̈lle. Bene gwøøg gøl Merɑrì ɑnɑn kenyi kɑ̈ɑ̈l Kemi Kwër. Ithɑmɑr wɑ̈d ókwërø Aɑron ɑ nenni gwøøg gen. Kɑ̈llɑni ɑ́gwed yi Mosɑ̀ bënn, ni kɑ ɑ́kwøbii yi Jwøng-ɑ Ácwɑ̈ɑ̈j, kɑ gøl mëggi gwøge, wɑlɑ̀ gïn-ɑ nyi kɑ̈lle. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Ceg tyëng Isrɑil kinni, cyeddi gen ngɑn ree di lɑ̈y wɑlɑ̀ wɑɑny, cyeed wɑ̈g kì kɑɑl, geki ngɑn lwöy, wɑlɑ̀ ngɑn ree di cølø. Cyeddi ceth, ying-ɑ́ jɑlø wɑlɑ̀ dhɑjø. Cyeddi gen kipe kɑɑl óbwöl yi gen, eni kɑɑl-ɑ yije bëëdɑ kì kelli jiɑ.” Møgɑni ɑ́yïëy yi tyëng Isrɑil, kɑ gï cyeed gen wɑ̈g kì kɑɑl. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni keløg e dɑ ngɑn bɑ̈jji ki dhɑnhø wɑɑd gen, e bɑ orøg kì bøli Jwøng-ɑ Ácwɑ̈ɑ̈j, kɑ ngɑnɑni bɑ̈jje yode, tönge orøg men-ɑ ɑ́gwøg yi en. Kɑ gïnɑni cole bëne, kɑ köme kïdhe ki ɑ́kyeel ɑ́bïj mi gïnɑni, kɑ gø mëgge wɑ̈n. De keløg wïi gïnɑni thøø, o bong wɑɑd gen men culii, mëggu gïnɑni Jwøng-ɑ Ácwɑ̈ɑ̈j, ɑ́ mi ókwërø, reb ki gënhi orøg, men-ɑ gøøm bøli orøge yi ókwërø. Thyew gïn-ɑ muuj Jwøng-ɑ Ácwɑ̈ɑ̈j yi tyëng Isrɑil, bɑ mi ókwërø men-ɑ ɑ́thërrii gïnɑni. Ókwërø kwɑnye gëdhh-ɑ ɑ́thyere.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, ke di jɑlø me rumø kinni cyëge oyɑ̈bø ki cwøw, kɑ gø rømme kinni i buddø ki jɑlø, de ókɑnø yi ngɑnɑni, o ngɑnɑni nuti pïïdø ki jɑlø, wɑlɑ̀ cɑgg jɑlø mɑg yi tyiel kinni i cyëge oyɑ̈bø ki cwøw, e ngɑnɑni pɑ yɑ̈bø ki cwøw kidyër, kïdhe ngɑnɑni yï ókwërø. Kɑ kɑ̈ɑ̈de thyew ki gëëdhi men-ɑ kɑ̈ɑ̈le ngɑnɑni, e bɑ kïlø ɑ́kyel mi møng-ɑ búr ceir, de köme ko kunye ki møøw dhetun, wɑlɑ̀ köme ko cïbe ki bɑkur, mɑ́ e bɑ gëëdhi men muuj yi jɑl yije di tyiel kipe yodi dyër. “Kɑ̈ɑ̈l ngɑnɑni yi ókwërø kɑ cuung kì bøli këli lɑm. Kɑ ókwërø kɑ̈bbe ki pïi kwër kì yij tɑbø, kɑ kömi pïgɑni kïdhe ki lɑ̈bø me bɑ tør gø kwɑny en kì piny kì yij Kemi Kwër. Kɑ yëyyi ngɑnɑni pɑ̈d yi ókwërø, kɑ møng-ɑ búr-ɑ ɑ́kɑ̈ɑ̈l cïb cingge. Kɑ tɑm-ɑ yije di pïi cyën mïdhi yi ókwërɑni ki cingge. Codhe, o ngɑnɑni köbbi yi ókwërø kinni yïëye ki köngø ki köng-ɑ ókwøb yi ókwërɑni kinni, ‘Keløg yï nuti buddø ki jɑlø megø, cyën-ɑ kɑ̈ɑ̈l yi pï møg pɑ kedhi rií. De keløg yï buddø ki jɑlø megø, yï ógwøg yi Jwøng-ɑ Ácwɑ̈ɑ̈j yï nyi pɑ̈rr-ɑ cyën yi wɑddi wun. Bɑmmí ógöjje bɑbø, kɑ yijí okwödø. Pï møg kedh-ɑ yijí, o yijí kwöde yi gen, kɑ bɑmmí obɑbø.’ “Kɑ ngɑnɑni lögge kinni, ‘Yɑ ɑ́yïëy! Yɑ ɑ́yïëy!’ Codhe, kɑ lɑmmi cyën møgɑni gwed yi ókwërø, kɑ gweddɑni lwøøge yij tɑbi pïi cyën. Kɑ pïgɑni mëggi ngɑnɑni yi ókwërø, o gï mɑdhe, o thödhi yi pïgɑni ki cyën, kɑ̀ kedhi gen dële, kɑ óyïddø ki rɑ̈ɑ̈m dël. Codhe, kɑ møng-ɑ búr tyiel kwɑny yi ókwërø kì cinggi ngɑnɑni, kɑ gø thërre Jwøng-ɑ Ácwɑ̈ɑ̈j, kɑ gø cïbe wïj këli lɑm. Kɑ kɑ̈bbe kì yij cinge ki men rɑ̈b yi en ɑ́ mi pɑɑr kì wïj këli lɑm. Codhe, o pïgɑni mëgge ngɑnɑni, o gï mɑdhe. Keløg e buddø ki jɑlø megø, göjj-ɑ rɑ̈ɑ̈m dël yi pïgɑni, kɑ yije okwödø, kɑ bɑmme obɑbø. Nyinge ópɑ̈rr-ɑ cyën yi wɑddi gen. De keløg yïe bɑ̈r, bong gïn kedhi ree, ceg-ɑ nywølø.” Bong kwöör orøg kì kömi jɑlø, de ngɑndhɑjø keløg e røngø, bɑ en ɑ órɑngi. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, i köbbe tyëng Isrɑil kinni, ke di ngɑn köngi ying-ɑ́ jɑlø wɑlɑ̀ dhɑjø kinni ree thyëye’ Jwøng-ɑ Ácwɑ̈ɑ̈j, Ko mɑ̈ɑ̈dh ki møgi oløg wɑlɑ̀ møgi byel, kɑ ko mɑ̈ɑ̈dh ki pïi oløg, wɑlɑ̀ ko nyɑ̈ɑ̈m ki ópùni oløg, wɑlɑ̀ nywøli oløg møg-ɑ cer pønø. Ki kɑɑm ni kɑɑm-ɑ ɑ́thyeye ree bëne, ko cyɑ̈ɑ̈m ki gïn-ɑ kɑ̈ɑ̈l ri oløg ying-ɑ́ nywøle wɑlɑ̀ pɑ̈ddi kömi nywøle. Kì kɑɑm-ɑ nuti thumi cyɑ̈nggi thyeye, yëyyi wïje ko pɑ̈nyi ki lyelø, gïti keny-ɑ óthumi cyɑ̈ngg-ɑ ɑ́thyëye ree Jwøng-ɑ Ácwɑ̈ɑ̈j, wiy yëyyi wïje bɑ̈ri gen, mɑ́ e bɑ ɑthyeey Jwøng-ɑ Ácwɑ̈ɑ̈j. Ki kɑɑm ni kɑɑm-ɑ bëëde ɑ́ ɑthyeey Jwøng-ɑ Ácwɑ̈ɑ̈j, ko kedhi buti ngɑnthøø, kipe ree ókedhi yi cølø. Ree ko wëgge kedhi yi cølø, cɑgg ɑ́ wïye, wɑlɑ̀ meye, wɑlɑ̀ ómen, wɑlɑ̀ nyimen ɑ thøø, ree ko kïdhe ki cøli gen, mɑ́ yëyy-ɑ wïje nyodh-ɑ kinni bɑ ɑthyeey Jwøge. Kɑ̈ng-ɑ óbëëd gen gɑ ɑthyeyy, ge bɑ ɑthyeyyi Jwøng-ɑ Ácwɑ̈ɑ̈j. Keløg dhɑnhø okegø, e bëëd ɑ bute, bɑ kinni ree ɑ́kedhi yi cølø. Kɑ bëëde ki cyɑ̈ng ɑ́bïryew, othumi cyɑ̈ngɑni, kɑ yëyyi wïje lyel, o dhïwe. Kɑ kɑ̈ɑ̈de kì bïdɑ̈ɑ̈g cyɑ̈ng ki ɑkùr ɑ́ryew, wɑlɑ̀ ɑkùr ójwɑt ɑ́ryew, kɑ gï mëgge ókwërø kì dhø Kemi Kwër mi Jwøng-ɑ Ácwɑ̈ɑ̈j. Gwøøg ɑ́kyel yi ókwërø ɑ́ gënhi orøg, kɑ men-ɑ kyeelø gwøge ɑ́ gënh-ɑ nyi rɑ̈b bëne, kɑ guöög dhïwø gwøg yi ókwërø, o ngɑnɑni dhïwe kipe cølø men-ɑ ɑ́kedhi ree. Kɑ yëyyi wïje kwëre kì cyɑ̈ngɑni ceth. Kɑ ree cige thyëyi Jwøng-ɑ Ácwɑ̈ɑ̈j, thyey-ɑ ɑ́pöödh pɑ cigi kwɑnø, mɑ́ yëyy-ɑ ɑ́thyeeyii ɑ́ywëdh yi cølø. Kɑ muuje ki órömø rune ɑ́kyel ɑ́ gënhi orøg. Møg bɑ cigg kipe ɑthyeyy, kenyi thumi bøli kɑɑm-ɑ ɑ́thyeey gen. Nyi kɑ̈ɑ̈l ɑthyey dhø Kemi Kwër, kɑ gënhe mëgge Jwøng-ɑ Ácwɑ̈ɑ̈j, e bɑ órömø me bong gïnrɑj kì ree, rune ɑ́kyel ɑ́ gënh-ɑ nyi rɑ̈b bëne, kí dyel rømø me bong gïnrɑj kì ree, rune ɑ́kyel ɑ́ gënhi orøg, kí órömø ɑ́kyel me bong gïnrɑj kì ree, ɑ́ gënhi mër. Muuje ki kɑɑk kì yij ɑ́ridh, e bɑ ɑgwøg kì ri møng-ɑ búr me ree bong kɑmïrɑ̀: ɑbulø mø bɑ ɑnyöm ki møøw dhetun, kí ɑbulø mø bɑ ɑgïny ki møøw dhetun, kí kunyi møgi oløg. Kɑ ge thyeer bøli Jwøng-ɑ Ácwɑ̈ɑ̈j yi ókwërø, kɑ gënhi orøge muuje geki gënh-ɑ nyi rɑ̈b bëne, Kɑ órömø muuje gø mëgge’ Jwøng-ɑ Ácwɑ̈ɑ̈j ɑ́ gënhi mër geki gïncɑm, kí ɑ́riidh kɑɑk, kí møgi oløg. Kɑ ɑthyey lyele yëyyi wïje møg-ɑ ɑ́thyeeyii kì dhø Kemi Kwër, kɑ yëyyɑni kwɑnye kɑ gï kïdhe mɑc men-ɑ köme di gënhi mër kì këli lɑm. Keny-ɑ óthɑɑl órömø, kɑ ocyegø, kwɑɑny bɑde yi ókwërø, kɑ gø cïbe cinggi ngɑn-ɑ ɑ́thyey, kyeel ki møng-ɑ ɑbulø olwëny ɑ́kyel, ki kɑɑk ɑ́kyel gø kwɑny en ɑ yij ɑ́ridh, e wïj ɑthyey rumø ki lyelø Thërri gen Jwøng-ɑ Ácwɑ̈ɑ̈j yi ókwërø, ge bɑ mø kwër møg kwɑny yi ókwërø, reb ki ɑ́ngɑdø, kí rɑ̈m ɑ nyi bëëdø ceth gɑ mø ókwërø kì yij kwöng. Codhe cyee, o ɑthyey cugge mɑdh ki møgi oløg. Møgɑk bene gen ciggi thyeyi dhɑnhø, de keløg e köngø ki köngø megø thyew kì kömi köngi thyeyø, muuje gënhi wïj köngɑni ceth kyeel ki mi thyeyø. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, i köbbe Aɑron geki wɑ̈dde, kinni kenyi kwëng gen tyëng Isrɑil nyi kööb gen kinni, “Yï ógyëdh yi Jwøng-ɑ Ácwɑ̈ɑ̈j kɑ yï mïdhe. Yï ómïdhi yi Jwøng-ɑ Ácwɑ̈ɑ̈j kidøøj, kɑ yï thödhe ki dhwɑ̈ng. Jwøng-ɑ Ácwɑ̈ɑ̈j thɑ̈wwe óluge yïn, kɑ yï nënge ki mër. Kɑ Jwøng-ɑ Ácwɑ̈ɑ̈j okööbø kinni, “Keløg nyingɑ ótöng yi gen gɑ kwëng kì kömi Isrɑil ni menɑni, tyëng Isrɑil ógyëdh yi yɑn.” Cyɑ̈ng-ɑ ɑ́rum Mosɑ̀ ki cwöödhi kemi kwëër Jwøng-ɑ Ácwɑ̈ɑ̈j piny, gø ɑ́gïïnye ki møøw dhetun geki jɑmme bënn, kí jɑmmi këli lɑm, kɑ gï thyeye bënn. Codhe, kɑ jø wɑ̈thi kɑ̈llì, ɑ ɑ́bëëd gɑ jɑgg kì Isrɑil, jøg-ɑ ɑ́cungi kì kömi kwɑni ji, ókɑ̈nø ki gïg muuj gen Jwøng-ɑ Ácwɑ̈ɑ̈j, ge ɑ́kɑ̈ɑ̈l-ɑ yɑ̈th-ɑ nyi pyejji gɑ ɑ́bïkyel, kí wɑ̈dhh-ɑ pyejji gen gɑ pyɑ̈rø wïdɑ́ryew. Jɑgg ɑ́ryew kì kömi yɑ̈y ɑ́kyel, o jɑgø ɑ́muuj-ɑ wɑdh ɑ́kyel. Aköbbi Mosɑ̀ yi Jwøng-ɑ Ácwɑ̈ɑ̈j kinni, “Kwɑny gïgɑni kipe gwøng-ɑ nyi gwøg kì Kemi Kwër. Mëggí gen Kwɑrri Leebì, yï ködd-ɑ kömi gïg-ɑ nyi gwøg yi gen.” Codhe, kɑ wɑ̈dhh geki yɑ̈ɑ̈th mëggi Kwɑrri Leebì yi Mosɑ̀. Gøl Gercön ɑ́mëgge yɑ̈ɑ̈th ɑ́ryew, kí wɑ̈dhh ɑ́ngwen. Kɑ gøl Merɑrì wɑ̈d Aɑron mëgge yɑ̈ɑ̈th ɑ́ngwen kí wɑ̈dhh ɑ́bïdɑ̈g De gøl Kɑ̈ɑ̈th nuti nëngø yi Mosɑ̀ ki yɑ̈ɑ̈th wɑlɑ̀ wɑ̈dhh, mɑ́ jɑmmi kwër møg-ɑ mïdhi yi gen nyi byel ɑ wɑ̈thi tøg. Pëjjɑni ɑ́kɑ̈ni thyew ki gïg-ɑ thyeey këli lɑm. Keny-ɑ ɑ́wɑ̈nhi jɑmmɑni bøli këli lɑm, ɑköbbi Mosɑ̀ yi Jwøng-ɑ Ácwɑ̈ɑ̈j kinni, “Köbbí gen kinni, ki cyɑ̈ng pyɑ̈rø wïdɑ́ryew, bɑ jɑgø ɑ́kyel ɑ nyi muujø kì cyɑ̈ng ɑ́kyel ki jɑmme kì këli lɑm.” Keny-ɑ ɑ́kedhi Mosɑ̀ yij Kemi Kwër be kwøb ki Jwøng-ɑ Ácwɑ̈ɑ̈j, cwɑggi Jwøng-ɑ Ácwɑ̈ɑ̈j ɑ́lïngi yi en ge kɑ̈ɑ̈l-ɑ kömi kum Sɑnduug Cigg kì kɑɑm kerobb ryeet. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí Aɑron kinni keny-ɑ ócïbe lɑ̈mbɑ̈ɑ̈ møg-ɑ bɑ ɑ́bïryew wɑ̈thi tegg, cïbe gïn e cɑɑr mɑc mënyy-ɑ bøli gen.” Codhe kɑ lɑ̈mbɑ̈ɑ̈ cïb yi Aɑron ge nenn-ɑ bøli tegg. Teggɑni bɑ ɑtøg gɑ dhɑb, cɑg kì piny gïti mɑl, ni men-ɑ ɑ́nyudhi Mosɑ̀ yi Jwøng-ɑ Ácwɑ̈ɑ̈j. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kïdhí Kwɑrri Leebì wɑ̈yi gen, dɑ̈ɑ̈ng gen ki tyëng Isrɑil møg-ɑ kyeelø, kɑ ge gwøøg o ge bong gïnrɑj kì ri gen. Gwøg gen ki yöö men: Wïddí ri gen ki pï, kɑ ge köbbí lyel gen yëyy-ɑ dëlli gen bënn, kí wɑ̈thi gen, kɑ ógudhi gen lwøg gen, o bongii gïnrɑj kì ri gen kipe kwër. Codhe kɑ ge kɑ̈ni gen ki wɑdh ówöb, ki møng-ɑ búr me bɑ ɑnyöm ki møøw dhetun, kɑ yï kɑ̈bbí ki wɑdh ówöb megø me gwøg ɑ́ gënhi orøg. Kɑ tyëng Isrɑil cwööl bënn, kɑ Kwɑrri Leebì cuung kì dhø Kemi Kwër. Cïb tyëng Isrɑil cinggi gen wɑ̈thi Kwɑrri Leebì, kɑ Kwɑrri Leebì thyëyi yɑn yi Aɑron, mëggi gen yɑn yi tyëng Isrɑil, o ge gwøg gen gwøgɑ. Codhe kɑ Kwɑrri Leebì cinggi gen cïb gen wɑ̈thi wɑ̈dhhɑni ryeet, ɑ́kyel muuj ɑ́ gënhi orøg, o men-ɑ kyeelø bɑ gënh-ɑ nyi rɑ̈b bëne, o ge gwøøgɑ Kwɑrri Leebì, o gen dhïwi gen. “Thyëyi Kwɑrri Leebì yɑn, kɑ Aɑron geki wɑ̈dde cïb gɑ jɑggi gen. Kɑ̈ɑ̈l Kwɑrri Leebì wɑ̈g kì kelli Isrɑil gɑ møgɑ. Keny-ɑ órum Kwɑrri Leebì ki gwøgø kɑ ge thyey, bene en cyee ɑ ógöög gen ge myër ki gwøg kì Kemi Kwër. Ge ɑ́kwɑny yi yɑn gɑ kɑ̈jji kɑyyi Isrɑil bënn, o ge ɑ́kwɑny yi yɑn gɑ møgɑ. Keny-ɑ ɑ́nɑ̈gɑ kɑyyì bënn kì Rïp, kɑyyi Isrɑil bënn ɑ́kwërɑ gɑ møgɑ geki kɑyyi jɑmmi gen bënn. Kɑ Kwɑrri Leebì kwɑny yi yɑn gɑ kɑ̈jji kɑyyi Isrɑil bënn. Kwɑrri Leebì mëggɑ’ Aɑron geki wɑ̈dde keny-ɑ órum gen ki mëggi yɑn yi tyëng Isrɑil, o ge göög gen kì Kemi Kwër, ge gwøg-ɑ bøli tyëng Isrɑil, kipe ge ócɑy yi yɑn keny-ɑ ónyïngi gen buti kej kwër.” Codhe kɑ Kwɑrri Leebì thyey yi Mosɑ̀ ki Aɑron geki tyëng Isrɑil bënn, ni kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j. Kɑ Kwɑrri Leebì ri gen kwër gen, o bëëd e bong gïnrɑj kì ri gen, kɑ ógudhi gen lwøg gen, kɑ ge thyey yi Aɑron gï mëgge’ Jwøng-ɑ Ácwɑ̈ɑ̈j. Kɑ gï gwøge thyew ki guöög dhïwø. Gïg-ɑ ɑ́köbbi Mosɑ̀ yi Jwøng-ɑ Ácwɑ̈ɑ̈j kipe Kwɑrri Leebì, ɑ́gwøg yi tyëng Isrɑil, ɑgöög Kwɑrri Leebì ge myër ki gwøg kì Kemi Kwër, ge jɑɑg-ɑ yi Aɑron geki wɑ̈dde. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kwɑrri Leebì møg-ɑ runni gen ɑ́wɑ̈dhi ri pyɑ̈r ɑ́ryew wïdɑ́bïj, wiy göög gen kì Kemi Kwërɑ. O ngɑn runne wɑ̈dhi ri pyɑ̈r ɑ́bïj wïye ki gwøg. De ócuggø kønyi wɑdde ki kori Kemi Kwër, e ceg-ɑ kunyø yøw. Bene kër-ɑ nyi thödhi Kwɑrri Leebì ki gwøøg gen ɑnɑn.” Kɑ Mosɑ̀ okööbø ki Jwøng-ɑ Ácwɑ̈ɑ̈j kì Ryɑɑng Sinɑy, kì kyeel dwɑ̈tt, kì ryeew runni tyëng Isrɑil ge rum bëën wɑ̈g kì Rïp, ɑkööbe kinni, “Wiy tyëng Isrɑil nyi göög gen ki Kwëër Ákɑɑdh kì bøli keje ceth. Nyi gwøg ge gøn kì cyɑ̈nggi dwɑ̈y pyɑ̈rø wïdɑ́ngwen, kì dwɑ̈ɑ̈n, kì thyënhø, kɑ nyi gwøg ceth kì bøli keje, ki kwëre bëne.” Codhe kɑ teedø köbbi yi Mosɑ̀ kinni mïdhi gen Kwëër Ákɑɑdh. Kɑ gø gwøg gen ceth kì thyënhø, kì cyɑ̈nggi kyeel dwɑ̈y gɑ pyɑ̈rø wïdɑ́ngwen kì Ryɑɑng Sinɑy. Codhe, kɑ gïgɑni bënn gwøg yi teedø ni kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j. De ɑ́dɑ ji møøgø mø ri gen di cølø cyɑ̈ngɑni, ge nywɑ̈ddø ki ngɑnthøø, kɑ ge ocögø ge pɑ göögø ki Kwëër Ákɑɑdh kì cyɑ̈ngɑni, ɑkedhi gen yï Mosɑ̀ geki Aɑron, kɑ ge okööbø kinni, “Wø ɑ́nywɑ̈ddi ki ngɑnthøø, ri wøn dɑ cølø, wø mɑ̈ɑ̈n-ɑ gwøg ki Kwëër Ákɑɑdh wø keti wøn kì kelli Isrɑil?” Aköbbi gen yi Mosɑ̀ kinni, “Cungi wun, wiy yɑ lïngɑ møg-ɑ ókwøb yi Jwøng-ɑ Ácwɑ̈ɑ̈j.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, i köbbe tyëng Isrɑil kinni, “Keløg e dɑ dhɑnhø dhuki megø me ree di cølø, wɑlɑ̀ ying-ɑ be wel kì cyɑ̈ɑ̈ng Kwëër Ákɑɑdh, o pyëwe tyer-ɑ gwøgi Kwëër Ákɑɑdh, gwøge kwërɑni kì ryeew dwɑ̈tt, kì thyënhø, cyɑ̈nggi dwɑ̈y pyɑ̈rø wïdɑ́ngwen. Gwøge gøn ki olwëny, kí lùm-ɑ kej. Ko di kwï gïncɑm me wiy, kɑ wɑ̈dh-ɑ dhuki e nud. Kɑ ko di cöngi nyɑ órömɑni me tor. Gwøøg Kwëër Ákɑɑdh ni kɑ ɑ́cïgɑ ceth. De keløg e dɑ dhɑnhø me dhïw, o pɑ ying be wel, kɑ ocögø e pɑ göögø ki Kwëër Ákɑɑdh, pɑ cigi kwɑɑn kelli jiɑ, mɑ́ yɑ nuti theeg en kì bøli kej theg. Ceg-ɑ orɑng ceth kì bɑng orøge. “Keløg e dɑ wëdhh mø bëëdø kì kelli wun, o ge dwɑdd-ɑ gwøg ki Kwëër Ákɑɑdh, gwøg ge gøn ceth ki kwönge geki cigge. Cigg ɑ́kyel ceth ɑ kömi ji bënn, tyëng pödhø geki wëdhh.” Kenyi lɑ̈ɑ̈ny pøølø, tyëng Isrɑil kɑɑl nyi ceg kɑ puthø yi gen, o kenyi cungi pøølø kɑ bï-ɑ piny, en ɑ nyi gud gen ki kɑɑl. Puthi kɑɑl nyi kwøb-ɑ yi Jwøng-ɑ Ácwɑ̈ɑ̈j, o gure piny nyi kwøb-ɑ yi en thyew. Kì kɑɑm-ɑ bëëd pøølø nud kì kömi Kemi Kwër, kɑɑl nyi bëëd ɑ keje. Kenyi bëëd pøølø kì kömi Kemi Kwër ki keny me bɑ̈ɑ̈r, tyëng Isrɑil nyi ceg-ɑ bëëdø kì kenyɑni, ge pɑ nyi dhwödh, dhø Jwøng-ɑ Ácwɑ̈ɑ̈j pɑ nyi pyem yi gen. Tyel møøgø, pøølø nyii bëëdø kɑ cyɑ̈ng mø nøg, de ke jwɑne kedhø, ge ceg-ɑ kedhø, ke bëëde ki cyɑ̈ng mø gïïr, ge ceg-ɑ bëëdø ni kɑ̀ dwɑddii yi Jwøng-ɑ Ácwɑ̈ɑ̈j. Tyel møøgø dɑ kɑ̀ bëëd pøølø cɑg kì thyënhø gïti mwøl, o ge nyi ceg-ɑ dhwödhø kì mwølɑni ceth. Wɑlɑ̀ keløg e obëëdø cɑg kì mwøl gïti böörø, bøli keny-ɑ dhwödhe ceth, ge ceg-ɑ dhwödhø. Cɑgg pøølɑni bëëdø ki cyɑ̈ng ɑ́ryew, wɑlɑ̀ ki dwɑ̈y, wɑlɑ̀ ki run, tyëng Isrɑil ceg-ɑ bëëdø kì kɑɑlɑni ceth, ge pɑ dhwödh e pøølø nud kì kömi Kemi Kwër, de keny-ɑ ódhwödh pøølø ceth, ge ceg-ɑ dhwödhø. Guri kɑɑl kwøb-ɑ yi Jwøng-ɑ Ácwɑ̈ɑ̈j, o puthi kɑɑl kwøb-ɑ yi Jwøng-ɑ Ácwɑ̈ɑ̈j. Ciggi Jwøng-ɑ Ácwɑ̈ɑ̈j ɑ́lïngi yi gen, ni kɑ ɑ́cïgi gen Mosɑ̀ yi Jwøng-ɑ Ácwɑ̈ɑ̈j. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Thɑ̈ɑ̈dh ki kɑ̈ngi ɑ́tegø ɑ́ryew møg nyi cwøøl ji kej ɑ́kyel, kenyi puth kɑɑl. Kenyi koodh kɑ̈ngɑni ryeet, nyi bï pödhø bëne yïí kì dhø Kemi Kwër. O keny-ɑ ókoodh ɑ́kyel, nyi bï jɑggi wɑ̈thi kɑ̈lli Isrɑil yïí keti gen. Keny-ɑ ókoodh kɑng ki köögø, dhwödh byëng-ɑ wɑɑng cyɑ̈ɑ̈ng mwøl. Ocigi kɑng kodhø ki köögø, kɑ byëng-ɑ wɑɑng wurlwɑl dhwödhe. Kodhi kɑng ki köögø cwɑgge ongøllø ge ceggø, wɑng-ɑ dhwödhø. De keny-ɑ ódwɑddi pödhø cwølø, nyi koodh kɑng cwɑgge pɑ ngølli ge ceggø. Nyi koodh kɑ̈ngì yi wɑ̈ddi Aɑron, ɑ løg ókwër. “Mïdhi møg gɑ kwöng kì yethi rïjj bënn. Keny-ɑ ókedhu be liny kì yij piny wun, wu nyïɑ̈ggi kɑ tyëngmɑ̈ɑ̈nø møg guud nyingi wun, kodh wun kɑ̈ngì, o wu óyiel yi yɑn kì cinggi tyëngmɑ̈ɑ̈nø, yɑ Jwøøg wun, Jwøng-ɑ Ácwɑ̈ɑ̈j. Nyi koodh kɑ̈ngì thyew kì cyɑ̈nggi medi pëëth kì ri pɑ̈ri dwɑ̈y geki cyɑ̈nggi kwër møg-ɑ kyeelø. Nyi koodh kɑ̈ngì kenyi thyer wun gënh-ɑ nyi rɑ̈b bëne geki gënhi mër mø wun. O wu køny yi yɑn, yɑ Jwøøg wun, Jwøng-ɑ Ácwɑ̈ɑ̈j.” Kì pyɑ̈r ɑ́ryeew cyɑ̈nggi ryeew dwɑ̈tt, kì ryeew runn, kì bɑng bëëni tyëng Isrɑil wɑ̈g kì Rïp, pøølø ɑ́dhwödh kì kömi Kemi Kwëër Jwøng-ɑ Ácwɑ̈ɑ̈j, kɑ tyëng Isrɑil odhwödhø kì Ryɑɑng Sinɑy. Kɑ pøølɑni pëgg-ɑ piny kì pɑ̈ɑ̈l Pɑrɑn. Dhwönh-ɑ ɑ́dhwödh gen kì kenyɑni bene en dhwönh-ɑ mɑl, ge ɑ́dhwödh ge köbb-ɑ yi Jwøng-ɑ Ácwɑ̈ɑ̈j, o ge pyejj-ɑ yi Mosɑ̀. Byëëg Yeudɑ̀ ɑ ɑ́wɑd mɑl, e pyejj-ɑ yi jɑngi gen, Nɑkcön wɑ̈d Aminɑdɑb. Nethɑnel wɑ̈d Dhuɑr ɑ pyejji gøl Isɑkɑr. O Eliɑb wɑ̈d Kelön ɑ pyejji gøl Dhebulun. Codhe, o Kemi Kwër pɑ̈d. Orume, o gøl Gercön geki gøl Merɑrì, kɑ̈ll-ɑ nyi kɑ̈lli Kemi Kwër wɑ̈ddi gen yöö. Codhe, o bɑng gen løg yi byëëg Ruben ge pyejj-ɑ yi jɑngi gen Elidhur wɑ̈d Cedeur. Celumeil wɑ̈d Dhuricɑdɑy ɑ pyejji gøl Cimeøn. O Eliɑsɑp wɑ̈d Deuel ɑ pyejji gøl Gɑd. Codhe, o gøl Kɑ̈ɑ̈th Kwɑɑr Leebì, ɑ nyi kɑ̈lli jɑmmi kwër løge bɑng gen. Keny-ɑ ówɑ̈dhi gen kɑɑl-ɑ dɑ̈gi, Kemi Kwër yuud yi gen e rumø ki cwöödh piny. Codhe, o bɑng gen løg yi byëëg Eprɑim, ge pyejj-ɑ yi jɑngi gen Elicɑmɑ̀ wɑ̈d Amiud. Gɑmɑliel wɑ̈d Pedɑdhur ɑ pyejji gøl Mɑnɑsè, O Abidɑn wɑ̈d Gideonì ɑ pyejji gøl Ben Yɑmïn. Byëëg Dɑn ɑ dhwödh kì cyɑ̈n, o gen ɑ korri ngɑ̈thi ji bënn, ge pyejj-ɑ yi jɑngi gen, Akiedher wɑ̈d Amicɑdɑy. Pɑgiel wɑ̈d Okrɑn ɑ pyejji gøl Aceer, O Akirɑ̀ wɑ̈d Enɑn ɑ pyejji gøl Nɑptɑlì. Bene kër-ɑ nyi lwøøb dhwödhi kɑɑl Isrɑil ɑnɑn, nyi dhwödh ɑ́ byëg kì bɑng byëng-ɑ kyeelø Kɑ Mosɑ̀ øre ómï cyëge, Kobɑb wɑ̈d Yethrø jɑl Midyɑn köbbe kinni, “Wø ceg-ɑ cɑ̈gø kedhi piny men-ɑ ɑ́kwøb yi Jwøng-ɑ Ácwɑ̈ɑ̈j kinni gø ómëgge wøn. Jwøng-ɑ Ácwɑ̈ɑ̈j ɑ́kööb kinni Isrɑil ógwøg en kɑ ódönyø, bïí kedh wɑ, døøjø menɑni ónywɑg yi wɑ.” Kɑ Kobɑb ólöggø kinni, “Pɑth, yɑ døøg-ɑ piny wøn.” Kɑ Mosɑ̀ okööbø kinni, “Yɑ kwɑjj-ɑ yïn, wø ko wiy piny, mɑ́ kɑ̈jj-ɑ døøj ki guddø kì yij ryɑng ngɑ̈nyi yi yïn. Wiy yï óbëëd yïn ɑ́ kej wɑng kì yï wøn. Keløg yï ócyɑ̈dhi ki wøn, gïgdøj bënn møg-ɑ ógëdhi wøn yi Jwøng-ɑ Ácwɑ̈ɑ̈j, ceg kɑ nywɑgø yi wɑ ceth.” Keny-ɑ ɑ́dhwödh teedø kì Sinɑy, kïti kwër, ge ɑ́cyɑ̈dhi ki cyɑ̈ng ɑ́dɑ̈g, Sɑnduug Ciggi Jwøng-ɑ Ácwɑ̈ɑ̈j tyëd ɑ mɑl bøli gen, kipe yɑ̈bbi gen ki kej ywömø. Kenyi dhwödh gen kì kɑɑl ge dɑ̈g-ɑ kɑɑl megø, ge nyi cyɑ̈dhi kì dicɑ̈ng ge ógëngø yi pøøli Jwøng-ɑ Ácwɑ̈ɑ̈j. Kenyi cɑ̈gi Sɑnduug Cigg ki dhwödhø, Mosɑ̀ nyi ceg-ɑ kwøb kinni, “Dhwöödh yïn ɑ Jwøng-ɑ Ácwɑ̈ɑ̈j, cyeddí tyëngmɑ̈ɑ̈nø, kɑ wiy tyëng-ɑ mɑɑn yïn rengi gen!” O kenyi cunge, nyi ceg-ɑ kwøb kinni, “Yïn ɑ Jwøng-ɑ Ácwɑ̈ɑ̈j, dwöög yï tyëng Isrɑil, tyëng-ɑ kwɑnni gen bɑ ɑ́lïp mø gïïr cɑrø.” Kɑ teedø ócɑ̈gø ki køør kì ri Jwøng-ɑ Ácwɑ̈ɑ̈j ki køør mɑ ɑ́rënyi pyëwe. Keny-ɑ ɑ́lïng Jwøng-ɑ Ácwɑ̈ɑ̈j, ɑöne kömi gen ki mɑc, kɑ mɑc ceg-ɑ ì twɑ̈ɑ̈g, kɑ tøg kɑɑl rɑ̈be kì tung ɑ́kyel. Kɑ teedø ywøøg-ɑ kö Mosɑ̀. Akwɑjji Jwøng-ɑ Ácwɑ̈ɑ̈j yi Mosɑ̀, kɑ mɑc othøø. Codhe, ɑcɑɑg kenyɑni ɑ́ Tɑbeerɑ̀, ɑ wɑngi kinni mɑɑc Jwøng-ɑ Ácwɑ̈ɑ̈j ɑ́lyeel ri gen. Ádɑ tyëngpɑth mø cyɑ̈dhi ki tyëng Isrɑil. Tyëngɑni ɑ́gööny ce ge dwɑdd-ɑ cɑm ki rïngø, kɑ tyëng Isrɑil óywöngø thyew kinni, “Á men ɑ óthödhi wøn ki rïngø men cɑm? Kì Rïp, wø ɑ́bëëd wø ceg-ɑ cɑm ki rij ni kɑ ɑ́dwɑddii yi wøn, e rij pɑ ceg ki ngewø, kí ɑ́wɑjø men-ɑ cwøl ɑ́ ɑjuur, kí ócøyø, kí nɑ̈ɑ̈ybɑsɑl ɑ nyi mïni yømi gïncɑm, kí bɑsɑl, kí bɑsɑl tuum. De ɑnɑn dëlli wøn ɑ́nyönhi yi bongi gïjø me cɑm, den-ɑ́ mɑnɑ̀ ɑ rïïj e ocɑmø yethi cyɑ̈ng!” (Mɑnɑ̀ ɑ́bëëd nyinge thønhø, kïde bɑ ɑyɑw. Kɑ køør teedø bëne lïngi yi Mosɑ̀, kɑ̀ köör gen kì dhøggi kemmi gen. Ábëëd e ceg-ɑ kïïmø, mɑ́ Jwøng-ɑ Ácwɑ̈ɑ̈j pyëwe ɑ́bëëd e rɑɑj ki gen. Kɑ Jwøng-ɑ Ácwɑ̈ɑ̈j köbbe kinni, “Yɑde ɑ göggí yɑn ki gïnrɑj ni men? Yïde ɑ rɑj pyëwí ki yɑn? Gede ji møg bënn ɑ ɑ́wëggí gen jɑɑgø yi yɑn? Pɑth ki yɑn ɑ ɑ́cwɑ̈j gen, wɑlɑ̀ pɑth ki yɑn ɑ ɑ́nywøl gen! Yɑde ɑ gwøøg yɑn yɑ nɑ 'mïdhi me kwööm gen piny-ɑ ɑ́mëggí kweyyi gen yi yïn? Yɑ kɑ̈n-ɑ́ɑ̀ keny ki rïngø men rømi ri ji møg? Ge jud-ɑ yɑn ki kwøb kinni, ‘Nëngí wøn ki rïngø men cɑm yi wøn.’ Ji møg pɑ lwɑ̈ng yi yɑn ki mïdhø yɑ ketɑ, menɑni teeg ki kiperɑ! Keløg ɑ́ yuu-ɑ mïdhí yɑn èn, lɑ̈ɑ̈m pyëwí ki yɑn, kɑ yɑ nɑ̈ɑ̈g, yɑ ko wëggí nenni orɑng-ɑ rɑngɑ.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Cwöddí ki jøgdøngi Isrɑil mø kwɑnni gen bɑ pyɑ̈r ɑ́bïryew, jøg mø bɑ pëjjì, mø wør yi teedø. Kɑ wu cungi wun ki gen kì bøli Kemi Kwër. Yɑ óbï kɑ yɑ okööbø ki yïn kì kenyɑni. Yɑ ókɑ̈bbi kì ri wëy-ɑ ɑ́mëggɑ yïn ki men kïdhɑ ri gen, o yï ókøny yi gen ki mïdhi ji, kipe gwøngɑni ópɑ̈dhi kömí yï ketí. Kɑ teedø köbbí kinni, ‘Kwër wun ri wun kipe dhuki wu ócyɑ̈mø ki rïngø, mɑ́ køør wun ɑ́lïngi yi Jwøng-ɑ Ácwɑ̈ɑ̈j, kɑ̀ kømmu kinni, ‘Wø dwɑdd-ɑ rïngø.’ Kí kinni, ‘Rïp døøj kibøli keny.’ Anɑn wu óthödhi yi Jwøng-ɑ Ácwɑ̈ɑ̈j ki rïngø men cɑm yi wun, o ceg kɑ cɑmø yi wun ceth. Pɑ cɑm yi wun kɑ cyɑ̈ng ɑ́kyel, wɑlɑ̀ cyɑ̈ng ɑ́ryew, wɑlɑ̀ cyɑ̈ng ɑ́bïj, wɑlɑ̀ cyɑ̈ng pyɑ̈rø, wɑlɑ̀ cyɑ̈ng pyɑ̈r ɑ́ryew, de wu ócyɑ̈mø ki dwɑ̈y gïti keny-ɑ ólɑ̈mmi pëthi wun yi rïngø. Møgɑni ócwöb, mɑ́ Jwøng-ɑ Ácwɑ̈ɑ̈j, ɑ bëëdø kì kelli wun ɑ́bɑny yi wun, kɑ wu oköörø kinni i bɑ per ngø ɑ ɑ́kɑ̈ɑ̈le wun wɑ̈g kì Rïp.’ ” Kɑ Jwøng-ɑ Ácwɑ̈ɑ̈j köbbi yi Mosɑ̀ kinni, “Yɑ cyɑ̈dhi kɑ yɑy me kwɑnne bɑ ɑ́lïp miy ɑ́bïkyel, o yï okööbø ce ge óthödhi yi yïn ki rïngø men tyëg dwɑ̈y gø ocɑmø yi gen? Bɑ dɑɑg dhög ki dɑɑg dyëg ɑ nɑ̈ggí gen, ɑ óyɑ̈ng gen? Wɑlɑ̀ rijji nɑm bënn ɑ cungí gen, ɑ óyɑ̈ng gen?” Alöggi Jwøng-ɑ Ácwɑ̈ɑ̈j kinni, “Tegɑ dɑ cöge? Ólidh yi yïn ɑnɑn kinni møg-ɑ kømmɑ bɑ dyër, wɑlɑ̀ pɑth ki dyër!” Codhe, ɑkedh Mosɑ̀, kɑ møg-ɑ ɑ́kwøb yi Jwøng-ɑ Ácwɑ̈ɑ̈j köbbe teedø. Akɑ̈bbe ki jøgdøngi pödhø gɑ pyɑ̈r ɑ́bïryew kɑ gï cuunge kì bɑdhhi Kemi Kwër. Codhe, ɑbëën Jwøng-ɑ Ácwɑ̈ɑ̈j piny kì yij pøølø, ɑkööbe geki Mosɑ̀. Akɑ̈bbe kì ri wëy-ɑ ɑ́mëgge Mosɑ̀, kɑ gø kïdhe ri jøgɑni gɑ pyɑ̈r ɑ́bïryew. Keny-ɑ ɑ́kedhi wëyɑni ri gen, kɑ ge ócɑ̈gø ki ryeerø ni kenyi göög tyëngtöng, de ge nuti mɑ̈gø ki keny me bɑ̈ɑ̈r ge óryeerø. Jøg ɑ́ryew kì kelli pyɑ̈r ɑ́bïryewɑni dööngø kì kɑɑl, ge nuti kedhi dhø Kemi Kwër, nyingi gen bɑ Eldɑd kí Medɑd. Wëyi Jwøng-ɑ Ácwɑ̈ɑ̈j kedhi ri gen ge ying-ɑ kɑɑl, kɑ ge ócɑ̈gø ki ryeerø ni tyëngtöng. Arengi nyelthinh megø, kɑ Mosɑ̀ köbbe kinni, “Eldɑd kí Medɑd ceg-ɑ töng kì kɑɑl.” Kɑ Jöcwø wɑ̈d Nun, nyel-ɑ ɑ́wöni e thiinh e nyi køny-ɑ Mosɑ̀ okööbø kinni, “Kyëddí gen jɑldwøng!” Aköbbii yi Mosɑ̀ kinni, “Yï mɑg yi tyiel kɑ perɑ? Kì yïɑ, jii Jwøng-ɑ Ácwɑ̈ɑ̈j ce di bëëd gɑ tyëngtöng bënn, e wëyi Jwøng-ɑ Ácwɑ̈ɑ̈j cïb en ri gen.” Codhe, ɑdøøg Mosɑ̀ kɑɑl geki jøgdøngɑni. Kɑ ɑkɑrø ör yi Jwøng-ɑ Ácwɑ̈ɑ̈j ki yømø mɑ ɑ́köölii kì nɑɑm omelø, e pɑ̈rri e cyɑ̈gi ki piny ki sentimïtïr pyɑ̈r ɑ́bïdɑ̈g wïdɑ́bïdɑ̈g. Kɑ pëgg-ɑ bɑdhhi kɑɑl, kì ki kɑɑm me bɑ kïlomïtïr mɑ kwɑnn kì wɑ̈thi tùng bënn. Codhe, kɑ teedø tyëg-ɑ cyɑ̈ngɑni kí wɑ̈r, kí dhuki bëne, ge omɑ̈gø ki ɑkɑrø, bong ngɑn me møge nøg kibøli kïllì ɑ́lïp. Kɑ gï mɑ̈j gen kì tøggi kɑɑl. Kɑ̈ng-ɑ nudd teedø ge ocyɑ̈mø ki rïngø, o rïngø ceg-ɑ twɑ̈lø, kɑ pyëw Jwøng-ɑ Ácwɑ̈ɑ̈j órënyø ki gen, kɑ gï göjje yømø nɑ̈ɑ̈g me dwøng. Kenyɑni ɑ́cɑg ɑ́ Kibröt Atɑɑbɑ̀, ɑ wɑngi rörri döngi pëëth, mɑ́ kenyɑni ɑ ɑ́koony tyëng-ɑ́ pëthi gen ɑ́døngi. Codhe, ɑdhwödh teedø kì kenyɑni, kɑ ge gudd-ɑ Adheröth. Kɑ Miryɑm geki Aɑron okööbø ki kwøb mø rijjø kì ri Mosɑ̀, kipe kɑ ɑ́nyöme ki nyɑɑr Kuc. Ge ɑ́kööb kinni, “Jwøng-ɑ Ácwɑ̈ɑ̈j ɑ́kööb ɑ ri Mosɑ̀ kete? Nuti kööbø kì riee thyew?” Kɑ Jwøng-ɑ Ácwɑ̈ɑ̈j olïngø. Mosɑ̀ ɑ́bëëd ɑ́ mölø kibøli dhɑnhø bëne kì kömi piny. Apɑ̈ɑ̈y Mosɑ̀ geki Aɑron ki Miryɑm piny yi Jwøng-ɑ Ácwɑ̈ɑ̈j, kɑ gï köbbe kinni, “Bïu dhø Kemi Kwër wun ɑ́ ɑ́dɑ̈g.” Kɑ ge ókedhø gɑ ɑ́dɑ̈g. Kɑ Jwøng-ɑ Ácwɑ̈ɑ̈j bï-ɑ piny e kɑ̈ɑ̈l-ɑ mɑl kì yij lööj pøølø, kɑ pøølɑni ócungø kì dhø Kemi Kwër, kɑ ócwöddø kinni, “Aɑron! Miryɑm!” Kɑ ge nyeg-ɑ bøli gen ryeet. Akööb Jwøng-ɑ Ácwɑ̈ɑ̈j kinni, “Lïngu kwøbbɑ! Ke di tyëngtöng kì kelli wun, riɑ nyi nyudhɑ’ gen kɑ cyɑ̈rø. Wø nyi kööbø kɑ gen kì yethi lɑ̈g. Pɑ pɑ̈r ki bɑ̈ngɑ Mosɑ̀, ɑ gølɑ bëne, ɑ løg tyëng Isrɑil cïb yɑn cinge. Wø nyi kööbø wø lømm-ɑ dhøggi wøn, wøki en, ki kwøbb-ɑ ɑcony. Kɑ bëëdɑ nyi lidhe. Wude ɑ pɑ böggi wun ki kwøb kì ri bɑ̈ngɑ Mosɑ̀ ki kwøb mø rijjø?” Jwøng-ɑ Ácwɑ̈ɑ̈j ɑ́bëëd pyëwe rɑɑj ki gen ryeet, kɑ kì ri dhwönhe ceth, e pøølø odhwödhø kì Kemi Kwër, kɑ dëël Miryɑm ceg-ɑ ì tɑr ni ɑ́piy, dële ɑ́göög ki wɑɑny. Keny-ɑ ɑ́lïïdh Aɑron yï Miryɑm, kɑ gø lidhe dële göögø ki wɑɑny, ɑköbbe Mosɑ̀ kinni, “Wø ko cɑɑy wuö ki gïn ni men, mɑ́ bɑ̈jjø menɑni ɑ́gwøg yi wøn kɑ nøgi wɑ̈thi wøn. Ko wëggí bëëdø ni ngɑnthøø, men-ɑ ónywølø yi meye budi dële ree cɑɑm en.” Aywøøg Mosɑ̀ kö Jwøng-ɑ Ácwɑ̈ɑ̈j kinni, “Yïn ɑ Jwøng-ɑ Ácwɑ̈ɑ̈j, gwøg ngɑnɑni o dönye!” Alöggi Jwøng-ɑ Ácwɑ̈ɑ̈j kinni, “Keløg nyinge di nguddi yi wïye ki lɑ́ɑ̀w, ɑyɑ̈rɑni di kɑ̈lle kì köme ki cyɑ̈ng ɑ́bïryew. Bëëde kì ngɑ̈ɑ̈j kɑɑl ki cyɑ̈ng ɑ́bïryew. Kɑ døøge kɑɑl keny-ɑ óthumi cyɑ̈ngɑni.” Amïdhi Miryɑm kì ngɑ̈ɑ̈j kɑɑl ki cyɑ̈ng ɑ́bïryew, kɑ teedø ocögø ge pɑ dhwödh gïti keny-ɑ ɑ́dwöög Miryɑm kɑɑl. Codhe, ɑdhwödh gen kì Adheröth, kɑ ge gudd-ɑ pɑ̈ɑ̈l Pɑrɑn. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Öd ki ji møg lyeew piny Kɑnɑɑn, piny-ɑ mëggɑ tyëng Isrɑil. Kɑ̈bbí ki dhɑnhø ɑ́kyel kì wïj kɑl ɑ́ jɑgø men cungi ɑ́ wïj gøl gen.” Bene gen nyingi jøg-ɑ ɑ́ör yi Mosɑ̀ be lyewwi piny ɑgɑk. Kɑ nyingi Öciyɑ̀ wɑ̈d Nun, wil yi Mosɑ̀ gɑ Jöcwø. Keny-ɑ ɑ́ör gen be lyeewi piny Kɑnɑɑn yi Mosɑ̀, gï ɑ́köbbe kinni, “Kɑ̈l wun wɑɑng wurlwɑl, kɑ wu kedhu myërri kelli kïttì. Kɑ pinyɑni lidh wun mɑ bëëde kidï, kí mɑ bëëd tyëng-ɑ yije nyødh wɑlɑ̀ ge teg, kí mɑ nøg gen, kí mɑ ngeeny gen. Mɑ døøj piny-ɑ bëëd yi gen wɑlɑ̀ rɑɑj, kí mɑ bëëd kɑ̈ddi gen bɑ kemmì, wɑlɑ̀ ɑger ki dör. Kí mɑ bëëd lɑ̈mɑni med wɑlɑ̀ pɑ med. Kí mɑ di yije thïm wɑlɑ̀ bong gøn. Kɑ wu kɑ̈ni wun ki jɑmm-ɑ nyi cyeg kì pinyɑni.” Ábëëd ɑ́ bøli keny-ɑ nyi cɑ̈gi oløg ki cyegø. Codhe, ɑkedh gen ge lyeww-ɑ piny, cɑg kì pɑ̈ɑ̈l Dhin gïti Reköb kì yuu-ɑ töngi Amɑth. Kɑ ge kɑ̈l-ɑ kuni wɑɑng wurlwɑl møti, ɑtöngi gen Kibrön. Akimɑn, kí Cecɑy, kí Telmɑ̀; bɑ kwɑrri Anɑk ɑ́bëëd ɑ kunɑni. Kibrön en ɑ ɑ́kwøng ki gerø, O Kɑɑl Dhoɑn kì Rïp ɑ́ger-ɑ bɑnge e bëëdø ki runn ɑ́bïryew. Kɑ ge wɑ̈dh-ɑ Töör Acköl, kɑ ge óngudø kì kunɑni ki bɑɑd oløg me ree di cyɑ̈l, cyɑ̈lɑni ɑ́bëëd e peeg cɑrø, ɑ́byelli yi jøg ɑ́ryew kɑ lodh kì kɑɑm gen. Ge ɑ́kɑ̈ɑ̈d thyew ki nywøli romɑn ki nywøli ólɑm. Törɑni ɑ́cɑg ɑ́ Töör Acköl, ɑ wɑngi Töör Cyɑ̈l, kipe cyɑ̈ɑ̈l oløg men-ɑ ɑ́ngøl yi jø Isrɑil kì kenyɑni. Adwöög lyëwwì keny-ɑ ɑ́rum gen ki lyewwi pinyɑni ki cyɑ̈ng pyɑ̈r ɑ́ngwen. Ge ɑ́dwöög yï Mosɑ̀ kí Aɑron geki gøl Isrɑil bëne, kì Gɑdic kì pɑ̈ɑ̈l Pɑrɑn. Kɑ gï dwöggi gen gïg-ɑ ɑ́lidh yi gen, ɑnyodh gen nywøli yenh-ɑ ɑ́kɑ̈ɑ̈l yi gen. Kɑ Mosɑ̀ köbbi yi gen kinni “Pinyɑni ɑ́lyewwi yi wøn, kɑ yod yi wøn ɑ́ piny kɑ̈r, me yije mulli yi cɑg geki møøw kïc, o nywøli yenh-ɑ yije ek. De ji-ɑ yije teg, o kɑ̈ddi gen døngø ge thøø yi gerø ki dör. Gïn-ɑ pëddi rɑ̈jø, bɑ kinni kwɑrri Anɑk ɑ́yod wøn kì kunɑni, eni dhɑnh-ɑ bɑ jöd bëne. Tyëng Amɑlek bëëd ɑ wɑɑng wurlwɑl kì pinyɑni geki tyëng Kit, kí tyëng Yebus. O tyëng Amör bëëd ɑ kelli kïttì, o tyëng Kɑnɑɑn bëëd ɑ kuni Nɑɑm Omeli Tɑr geki kuni Nɑm Urdun.” Kɑ tyëng-ɑ ɑ́köör kì ri Mosɑ̀ kwøbbi gen ngøl yi Kɑlib. Kɑlib ɑ́kööb kinni, “Pɑ̈ɑ̈r wɑ kömi pinyɑni ɑnɑn ceth, kɑ kwɑny wɑ, wɑ teg, ócugge ki kwɑnyø yi wɑ.” De jøg-ɑ ɑ́kedh ki Kɑlib ɑ́kyëëd kinni, “Pɑth, wɑ pɑ teg ki tegø me lwɑ̈ng wɑ liny gen, ji møgɑni teeg cɑrø kibølee.” Codhe ɑkedhi gen be kɑ̈lli kwøb mø pɑth ki dyër kì kelli tyëng Isrɑil. Ge okööbø kinni, “Tyëngpinyɑni pɑ nyi yɑ̈ng yi gïg-ɑ cyeg kì yije. Ji møg-ɑ ɑ́lidh yi wøn bënn ceg bëëdø ge bɑ̈rrø, men-ɑ́ wø ɑ́lïdhi thyew ki jödd, kwɑrri Anɑk. Kɑ ri wøn ceg wøn ki lidhø wø nɑ bɑ̈nyy, o wø nenni yi gen ɑ nøw ceth.” Kɑ teedø lɑng-ɑ wɑ̈r ge oköörø, ge ceg-ɑ ywøg. Ge ɑ́köör kì ri Mosɑ̀ kí Aɑron ge okööbø kinni, “Lɑ̈w ke di thøw wøn kì Rïp, wɑlɑ̀ lɑ̈w ke thøw wøn kì pɑ̈l men. De wøde ɑ yöd wø kïdh-ɑ piny me nɑ̈ɑ̈g wøn ki pilø yi Jwøng-ɑ Ácwɑ̈ɑ̈j, o mɑ̈nni wøn geki nyigi wøn mɑg. Pɑ lɑ̈w døøg Rïp?” Kɑ ri gen köbbi gen kinni, “Kɑ̈bbi wɑ ki jɑgø, kɑ wɑ døøg wɑ Rïp.” Codhe, kɑ Mosɑ̀ geki Aɑron wɑ̈thi gen kuul gen piny kì bøli teeni Isrɑil bëne, kɑ Jöcwø wɑ̈d Nun geki Kɑlib wɑ̈d Yepunɑ̀, ɑ ɑ́ying kelli jøg-ɑ ɑ́kedhi be lyewwi piny, ógudhi gen kɑggi gen yi rɑ̈ɑ̈m pëthi gen, kɑ teedø köbbi gen kinni, “Piny-ɑ ɑ́lyeew yi wøn bɑ piny me døøj cɑrø. Keløg Jwøng-ɑ Ácwɑ̈ɑ̈j pyëwe med ki wɑ, wɑ ókïdhe kunɑni kɑ pinyɑni mëgge wɑ, eni piny-ɑ yije mulli yi cɑg geki møøw kïc. Wu ko ngɑ̈nyi wɑ̈yi wun, Jwøng-ɑ Ácwɑ̈ɑ̈j ko wiy wun. O wu ko böggi yi tyëng pinyɑni, mɑ́ ge ótyɑm yi wɑ ceth. Jwøng-ɑ Ácwɑ̈ɑ̈j ying-ɑ tungee, o jwöggi gen ɑ́rum ki tyɑmø yi en, wu ko böggi.” Teedø ɑ́dwɑdd-ɑ bɑ̈lli gen ki tuggi kïttì o ge thøw gen, de mɑ̈ɑ̈r Jwøng-ɑ Ácwɑ̈ɑ̈j ɑ́ceg ì tɑr kì kömi Kemi Kwër, kɑ lidh yi teenɑni bëne. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Yɑ gït-ɑ wɑɑng yɑ obɑnyø yi ji møg? Ge gït-ɑ wɑɑng yɑ pɑ gɑ̈n yi gen, e men-ɑ́ yɑ ɑ́göög ki gïïngɑ̈ngø mø ngenyø kì bøli gen? Ge ógöjjɑ yømø nɑ̈ɑ̈g men nɑ̈g gen, de yï ógwøgɑ yïn ɑ́ wïyi pödhø me dwøng, me teeg cɑrø kibøli ji møg.” De Mosɑ̀ Jwøng-ɑ Ácwɑ̈ɑ̈j ɑ́köbbe kinni, “Jiɑni bɑ yïn ɑ ɑ́kɑ̈ɑ̈l gen wɑ̈g kì Rïp ki tegí. Keny-ɑ ólïng tyëng Rïp, møgɑni óköbbi gen tyëng-ɑ bëëdø kì pinyɑni. Ge ɑ́rum ki lïngø kinni yïn, yï Jwøng-ɑ Ácwɑ̈ɑ̈j, yï cyɑ̈dhi kɑ jií, o rií nyi nyudhí gen, pøølí ying-ɑ kömi gen. O yï nyi cyɑ̈dh-ɑ́ɑ̀ bøli gen kì yij lööj pøølø kì dicɑ̈ng, kí yij lööj mɑc kì wɑ̈r. Ke nɑ̈ɑ̈g jií bënn ɑnɑn, pödhh-ɑ ɑ́lïngi tegi perí ceg-ɑ kwøb kinni, i jií nɑ̈ɑ̈g yïn pɑ̈l kɑ per kɑ ɑ́dhɑɑl yïn yi kïdhi gen piny-ɑ ɑ́kwøb yi yïn kinni ge ókïdhí yije, kɑ mëggí gen ɑ́ mi gen. Nyudhí wøn tegí ni kɑ ɑ́kööb ceth kinni, ‘Yɑn, yɑ Jwøng-ɑ Ácwɑ̈ɑ̈j, yɑ pɑ nyi jwɑn ki mɑgø yi liny, o mɑ̈ɑ̈dø miɑ geki lɑ̈mpyëwɑ pɑ nyi thumi; pyëwɑ nyii lɑ̈ɑ̈mø ki orøg geki pëëmø. De ngɑn-ɑ ɑ́røngi pɑ nyi bødh ki cɑyø yi yɑn kì ri wëëg gïti ri ngween rïjj.’ O ɑnɑn, yïn ɑ Jwøng-ɑ Ácwɑ̈ɑ̈j, mɑ́ yï bɑ ngɑn pyëwí nyi lɑ̈ɑ̈m, mɑ́ mɑ̈ɑ̈dø mií pɑ nyi lwënyi, yɑ kwɑjj-ɑ yïn, dwöög lɑɑwí piny kipe orøøg ji møg, ni kenyi lɑ̈ɑ̈m pyëwí ki gen kër-ɑ ɑ́kɑ̈ɑ̈l gen wɑ̈g kì Rïp.” Alöggi Jwøng-ɑ Ácwɑ̈ɑ̈j kinni, “Pyëwɑ ólɑ̈ɑ̈m ki gen ni kɑ ɑ́kwɑ̈jjí. De yɑn ɑ köngi èn, yɑn ɑ nëënø, ni kɑ̀ pɑ̈ɑ̈ng kömi piny bëne yi mɑ̈rɑ, bong dhɑnhø kì kelli ji møg men-ɑ ókedhi pinyɑni. Mɑ̈rɑ ɑ́lidh yi gen, kí gïïngɑ̈ngø møg-ɑ ɑ́gwøgɑ kì Rïp geki yij ryɑng, de yɑ nyii rɑngø yi gen, kɑ ge óbɑ̈nyø ki lïngi kwøbbɑ. Ge pɑ kedhi piny-ɑ ɑ́köbbɑ kweyyi gen kinni ómëggɑ gen. Bong dhɑnhø kì kelli ji-ɑ ɑ́bɑny yɑn ek, men-ɑ ókedhi pinyɑni. De bɑ̈ngɑ Kɑlib, mɑ́ pyëwe ying-ɑ wɑ̈ye, kɑ ocögø e gɑ̈n-ɑ yɑn, en ɑ ókïdhɑ piny-ɑ ɑ́lyeew yi en, o pinyɑni ólɑg yi kwɑrre. De mɑ́ törɑni bëëd-ɑ yi tyëng Amɑlek geki tyëng Kɑnɑɑn, løgu wɑ̈thi wun dhuki, kɑ wu kedh wun, wu kɑ̈ll-ɑ yij ryɑng, wu døøg-ɑ kuni Nɑɑm Omeli Kwɑrø.” Kɑ Mosɑ̀ geki Aɑron köbbi yi Jwøng-ɑ Ácwɑ̈ɑ̈j kinni, “Tyëngrijjø møg gït-ɑ wɑɑng ge oköörø kì riɑ? Yɑ ɑ́pïd yi køør gen! Anɑn köbbí gen kinni, Yɑ ɑ́köngi, ni kɑ̀ nëënɑ, wu göggɑ’ gïn-ɑ ɑ́lïngɑ kì yï wun ceth. Yɑn ɑ kööbø, yɑ Jwøng-ɑ Ácwɑ̈ɑ̈j. Wu óthøw, kɑ cu wun ótwɑ̈lø kì yij ryɑng men, mɑ́ wu ɑ́köör kì riɑ, bong dhɑnhø ɑ́kyel kì kelli wun, wu tyëng-ɑ runni wun wɑ̈dhi ri pyɑ̈r ɑ́ryew gïti mɑl men-ɑ ókedhi pinyɑni. Yɑ ɑ́kööb cøn kinni wu óbëëdø’ yije, de bong dhɑnhø men-ɑ ókedhi yije kì kelli wun den-ɑ́ Kɑlib wɑ̈d Yepunɑ̀ geki Jöcwø wɑ̈d Nun. Wɑ̈ddi wun ɑ ɑ́kwøb yi wun kinni i ge ómɑg, ge ókïdhɑ piny-ɑ ɑ́bɑny yi wun, kɑ ge obëëdø kì yije. De wu óthøw-ɑ yij pɑ̈l. Nyigi wun ówïïnø kì yij pɑ̈l ki runn pyɑ̈r ɑ́ngwen, ge órɑngi yi gööj kɑ̀ nuti yïëëy wun, gïti keny-ɑ óthøw wun wu bënn. Wu órɑngi yi körri orøøg wun ki runn pyɑ̈r ɑ́ngwen. Pinyɑni ɑ́lyewwi yi wun kɑ cyɑ̈ng pyɑ̈r ɑ́ngwen, o wu ceg-ɑ mɑ̈gø ki runn pyɑ̈r ɑ́ngwen kì yij ryɑng men, cyɑ̈ng ɑ́kyel bɑ run ɑ́kyel, o rɑ̈ji pyëwɑ yod yi wun. Yɑ ɑ́köngi kinni møgɑni göggɑ’ wun, wun ɑ tyëngrijjø, wun ɑ ɑ́cungi ri wun yɑn. Wu ceg-ɑ thumø ki thøø kì yij ryɑng men.” Bɑ Kɑlib geki Jöcwø ɑ ɑ́döng ge nuti thøø kì ri lyëww-ɑ ɑ́ör gɑ pyɑ̈rø wïdɑ́ryew. Keny-ɑ ɑ́köbbi møg-ɑ ɑ́kwøb yi Jwøng-ɑ Ácwɑ̈ɑ̈j Isrɑil yi Mosɑ̀, kɑ teedø óywöngø ki ywøng teg. Dhuki kì mwøl, kɑ ge odhwödhø ge kedh-ɑ kuni wɑ̈thi kïttì, ge okööbø kinni, “Anɑn wø kedh-ɑ piny-ɑ ɑ́kwøb yi Jwøng-ɑ Ácwɑ̈ɑ̈j, mɑ́ wø ɑ́yïëy kinni wø ɑ́bɑ̈jji.” De ge ɑ́kyëddi yi Mosɑ̀ kinni, “Wude ɑ pyem wun dhø Jwøng-ɑ Ácwɑ̈ɑ̈j? Menɑni koo cuggi! Wu ko kedh. Jwøng-ɑ Ácwɑ̈ɑ̈j tøøk kì kelli wun. Wu bɑ møg tyɑm ki menrɑj yi tyëngmɑ̈ɑ̈nø. Keny-ɑ ónyïɑ̈ggi wun ki tyëng Amɑlek geki tyëng Kɑnɑɑn, wu ceg kɑ nɑ̈gø yi gen, Jwøng-ɑ Ácwɑ̈ɑ̈j koo løg me nud kì kelli wun, mɑ́ wu ɑ́bɑ̈nyi lugø kì bɑnge.” De ge ɑ́kedhi myërri wɑ̈thi kïttì kinøw ngö Mosɑ̀ ɑ́döng kì kɑɑl geki Sɑnduug Ciggi Jwøng-ɑ Ácwɑ̈ɑ̈j. Codhe, kɑ tyëng Amɑlek geki tyëng Kɑnɑɑn møg-ɑ bëëdø kì kunɑni bï-ɑ be nyɑɑg ki gen. Kɑ ge tyɑm, kɑ ge cyeddi, gïti kɑ ɑ́wɑ̈dhi gen Órmɑ̀ ge ocyeddø. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, i köbbe cigg møg tyëng Isrɑil gɑ møg-ɑ ómïdhi yi gen keny-ɑ ókedhu piny-ɑ mëgge gïn. Kɑ Jwøng-ɑ Ácwɑ̈ɑ̈j nëngi wun ki wɑdh, wɑlɑ̀ órömø, wɑlɑ̀ ónywøg wɑ̈dtegø, møg muuj gɑ gënh-ɑ nyi rɑ̈b bëne, wɑlɑ̀ gënhi wïj köngø, wɑlɑ̀ jwödhø, wɑlɑ̀ mø kwër, møg muuj ki mɑc, yømi tool gen bɑ men mïni pyëw Jwøng-ɑ Ácwɑ̈ɑ̈j. Keny-ɑ ómuuj órömø, thyer kɑ møng-ɑ búr me ngedhø ɑ́ kïllì ɑ́ryew mø bɑ ɑnyöm ki møøw dhetun me bɑ røthøl ɑ́dɑ̈g, muuj kyeel ki møgi oløg me bɑ røthøl ɑ́dɑ̈g. Yømi gëdhhɑni med kì pyëw Jwøng-ɑ Ácwɑ̈ɑ̈j. Keny-ɑ ómuuj wɑdh Jwøng-ɑ Ácwɑ̈ɑ̈j ɑ́ gënh-ɑ nyi rɑ̈b bëne, wɑlɑ̀ ɑ́ wïj köngø, wɑlɑ̀ ɑ́ keni mër, thyer ki møng-ɑ búr me yöm ɑ́ kïllì ɑ́dɑ̈g, e bɑ ɑnyöm ki møøw dhetun me bɑ røthøl ɑ́ngwen. Muuj kyeel ki møgi oløg me bɑ røthøl ɑ́ngwen. Yømi gëdhhɑni med ki pyëw Jwøng-ɑ Ácwɑ̈ɑ̈j. Bene gïg-ɑ nyi muuj kyeel ki wɑdh, wɑlɑ̀ órömø, wɑlɑ̀ dyel rømø, wɑlɑ̀ ɑ́tegø ɑgɑk. Kenyi ngeeny gëdhhì, jɑmm-ɑ muuj kyeel ki gen nyi ceg kɑ medø ni kwɑnni gen ceth. Ngeti pödhø wɑ̈d Isrɑil men muujø ki gïn tole mïni pyëw Jwøng-ɑ Ácwɑ̈ɑ̈j, gwøge gïgɑni kinøw ceth. O kì yethi rïjj bënn, wëdh men bëëdø kì kelli wun, ying e cöög-ɑ kelli wun, wɑlɑ̀ ódhwödh, muuje ki gïn yømi tole mïni pyëw Jwøng-ɑ Ácwɑ̈ɑ̈j, gwøge gøn ceth ni kenyi gwøgii yi wun. Cigg-ɑ kömi wun bɑ ɑ́kyel ceth wuki wëdhh møg-ɑ bëëdø kì kelli wun gïti ɑtheer. Wu pɑ̈r ki gen ceth kì bøli Jwøng-ɑ Ácwɑ̈ɑ̈j. Cigg kí kwöng ɑ́kyel ceth ɑ kömi wun, wuki gen.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, i köbbe tyëng Isrɑil kinni, keny-ɑ ówɑ̈dhi gen piny-ɑ kïdhe gïn, nyi muuj wun Jwøng-ɑ Ácwɑ̈ɑ̈j ki gëëdhi kì ri gïgcɑmm-ɑ cyeg kì pinyɑni. Keny-ɑ óbud wun ki ópùni jɑmm-ɑ cer cyegø, cïb ópun-ɑ kwøng ki bulø wɑ̈ye ɑ́ mi Jwøng-ɑ Ácwɑ̈ɑ̈j. Muuj ceth ni kenyi muuj byëli Jwøng-ɑ Ácwɑ̈ɑ̈j kenyi pwöd wun byel. Nyi muuj wun Jwøng-ɑ Ácwɑ̈ɑ̈j kì ri jɑmm-ɑ cer cyegø kì yethi rïjj bënn. Keløg bɑ̈jjø menɑni gwøg yi teedø kɑ kwïji wøw, muuj gen ki wɑdh ɑ́ gënh-ɑ nyi rɑ̈b bëne, men yømi tole mïni pyëw Jwøng-ɑ Ácwɑ̈ɑ̈j, muuj kyeel kí byëli Jwøng-ɑ Ácwɑ̈ɑ̈j, kí møgi oløg, men-ɑ ɑ́kwøb yi cigg. Kɑ ge muuj gen thyew ki ónywøg ɑ́ gënhi bɑ̈jjø. Gwøøg guög menɑni yi ókwërø o ji dhïwi gen, mɑ́ bɑ̈jjø menɑni ɑ́gwøg yi gen kɑ kwïji wøw, muuj gen Jwøng-ɑ Ácwɑ̈ɑ̈j ki gënh-ɑ nyi rɑ̈b bëne geki gënhi bɑ̈jjø. Codhe cyee, o lɑ́ɑ̀w dwöög piny kipe tyëng Isrɑil, geki wëdhh møg-ɑ bëëdø kì kelli gen, mɑ́ e bɑ teedø bëne ɑ ɑ́bɑ̈jji. Keløg nget ɑ́kyel óbɑ̈jjø kì bɑng kwïji wøw, muuje ki dyel ɑ́tegø rune ɑ́kyel, ɑ́ gënhi bɑ̈jjø. Gwøøg guög menɑni yi ókwërø kì bøli Jwøng-ɑ Ácwɑ̈ɑ̈j, o lɑ́ɑ̀w dwöög piny kipe ngɑnɑni. Ciggɑni ying-ɑ kömi ji bënn, ngɑn bɑ̈jji ying-ɑ́ wɑ̈d Isrɑil wɑlɑ̀ wëdh men-ɑ bëëdø kì kelli tyëng Isrɑil. De ngɑn tir bɑ̈jjø, ying e bɑ wɑ̈d Isrɑil wɑlɑ̀ wëdh ceg ki nɑ̈gø, mɑ́ e ɑ́bɑny-ɑ møg-ɑ ɑ́kwøb yi Jwøng-ɑ Ácwɑ̈ɑ̈j, kɑ cigge tøønye ki pyemø. Tyelø ɑ́kyel e tyëng Isrɑil ying-ɑ yij ryɑng, jɑl megø ɑ́lidh yi gen e ogwënø ki yugg kì cyɑ̈ɑ̈ng Sɑbɑth. Kɑ kïdhi bøli Mosɑ̀ geki Aɑron kí teedø bëne. Kɑ cïb ød mɑg, mɑ́ gïn-ɑ göggii nuti yodø. Codhe, ɑköbbi Mosɑ̀ yi Jwøng-ɑ Ácwɑ̈ɑ̈j kinni, “Jɑlɑni ceg-ɑ thøø. Bɑ̈lli yi teedø bëne ki tuggi kïttì kì ngɑ̈ɑ̈j kɑɑl, o thøwe.” Kɑ kïdhi ngɑ̈ɑ̈j kɑɑl yi teedø bëne, ɑ bɑ̈llii ki tuggi kïttì kɑ othøø, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, göög wun ki ojwɑrr kɑ ge twööj wun tøggi ógudhi wun, kɑ ri ojwɑrrɑni nyi töjji ki nyɑ ógødh me bɑ ówɑw, töjji ri gen bënn, kì yethi rïjj bënn. Ojwɑrrɑni bɑ møg nyi pɑ̈ddi wun ki ciggɑ, kenyi lidh wun gen, ciggɑ bënn ópɑr yi wun, o wu cög wun wu pɑ tyer gøggi jɑmm-ɑ nenni yi wun, ki møg-ɑ tyer yi pëthi wun. Wu ópɑ̈ddi yi ojwɑrrɑni ki mïdhi møg-ɑ ɑ́ceg yi yɑn, o wu óbëëd wun, wun ɑ́ møgɑ ceth kidyër. Bene yɑn Jwøøg wun, Jwøng-ɑ Ácwɑ̈ɑ̈j, ɑ ɑ́kɑ̈ɑ̈l wun wɑ̈g kì piny Rïp, o yɑ bëëdɑ yɑn ɑ́ Jwøøg wun. Bene yɑn Jwøøg wun, Jwøng-ɑ Ácwɑ̈ɑ̈j.” Kɑ ri gen cøng gen bøli Mosɑ̀ geki Aɑron, ge okööbø kinni, “Mi wun ɑ́pöödh ki mendwøng! Dhɑnhø men bëne bɑ jii Jwøng-ɑ Ácwɑ̈ɑ̈j. O Jwøng-ɑ Ácwɑ̈ɑ̈j ying-ɑ kömee bënn. Dɑ́ kipe ngø Mosɑ̀, ɑ cïb rií mɑl kibøli jii Jwøng-ɑ Ácwɑ̈ɑ̈j?” Keny-ɑ ɑ́lïngi møgɑni yi Mosɑ̀, kɑ ree leenge piny. Codhe, ɑköbbe Körɑ̀ geki jøge kinni, “Dhuki Jwøng-ɑ Ácwɑ̈ɑ̈j ngete ónyodhe, ngɑn-ɑ ɑ́myege ówiy yi en o kedhe buti këli lɑm. Kɑ Körɑ̀ köbbi yi Mosɑ̀ kinni “Lïng wun, wun ɑ Kwɑrri Leebì! Bwøøn wun, eni kwɑny-ɑ ɑ́kwɑɑny wun yi Jwøøg Isrɑil kì kelli Isrɑil bëne, kinni o wu nyi kedhu bøle, o wu gwøgu kwëre kì kömi piny, o wu cungi wun kì bøli teedø wu gwøg-ɑ kej gen? Wun ɑ ɑ́mëgge dhwɑ̈ng menɑni bëne, o ɑnɑn wu dwɑdd-ɑ kwɑnyi kej ókwërø thyew! Kɑ̀ köör wun kì ri Aɑron, bɑ Jwøng-ɑ Ácwɑ̈ɑ̈j ɑ køør yi wun, wuki jøgí.” Kɑ Mosɑ̀ öd-ɑ be cwööli Dɑthɑn geki Abirɑm wɑ̈ddi Eliɑb. Kɑ ge okööbø kinni, “Wø pɑ bï! Wø nuti rumø ki kɑ̈ɑ̈l wɑ̈g yi yïn kì Rïp, o wø nɑ̈g yi yïn kì yij ryɑng men, yï orumø kinni møgɑni lweny? Rií dwɑddí cïb kömi wøn yïn ɑ́ jɑgø thyew? Wø nuti kɑ̈ɑ̈l yïn piny me yije mulli yi cɑg geki møøw kïc, wø nuti nëngø yi yïn ki pwödh geki bɑ̈gg, o yï dwɑdd-ɑ wënyi wøn ɑnɑn. Wø pɑ bï!” Mosɑ̀ pyëwe ɑ́rënyi ki mendwøng, kɑ Jwøng-ɑ Ácwɑ̈ɑ̈j köbbe kinni, “Yï ko yïëy ki gëëdhi men-ɑ ómuuj yi gen. Bong dhɑnhø mɑ ɑ́göggɑ ki gïnrɑj kì kelli gen, o bong ɑderi dhɑnhø mɑ ɑ́kwɑnyɑ.” Kɑ Körɑ̀ köbbi yi Mosɑ̀ kinni, “Bïí dhø Kemi Kwër dhuki wuki jøgí gɑ miy ɑ́ryew kí pyɑ̈r ɑ́bïj, Aɑron óbëëd e nud kì kenyɑni thyew. Kɑ̈ni ngɑn ki ópɑne, yije dɑ lelli mɑc kí bɑkur kì köme, kɑ ge thyeer wun këli lɑm.” Codhe, kɑ ngɑn ókɑ̈bbø ki ópɑne, kɑ yije kïdhe ki lelli mɑc geki bɑkur, ɑcungi gen kì dhø Kemi Kwër geki Mosɑ̀ ki Aɑron. Codhe kɑ Körɑ̀ teedø bëne cønge dhø Kemi Kwër. Kɑ ge ócungø ge nenn-ɑ yï Mosɑ̀ geki Aɑron kɑ mɑ̈ɑ̈r Jwøng-ɑ Ácwɑ̈ɑ̈j lidh yi teedø bëne e omënyø, kɑ Mosɑ̀ geki Aɑron köbbi yi Jwøng-ɑ Ácwɑ̈ɑ̈j kinni, “Nyegu cyɑ̈n kì buti tyëng Isrɑil, o ge gwɑɑrɑ piny.” Kɑ Mosɑ̀ geki Aɑron ri gen bødh gen wɑ̈thi gen kuul gen piny kɑ ge okööbø kinni “Jwøk, bɑ yïn ɑ yï kɑ̈ɑ̈l yi wëy. Ke bɑ̈jji dhɑnhø ɑ́kyel, pyëwí rënyi kɑ ji bënn?” Aköbbi Mosɑ̀ yi Jwøng-ɑ Ácwɑ̈ɑ̈j kinni, “Köbbí teedø bënn, kinni nyegi gen kì buti kemmi Körɑ̀, kí Dɑthɑn geki Abirɑm.” Kɑ Mosɑ̀ kedh-ɑ yï Dɑthɑn geki Abirɑm ki jøgdøngi Isrɑil kì bɑnge, kɑ ji köbbe kinni, “Cungi wun wu lɑ̈wi kì buti kemmi jøgi orøg møgɑni. Kɑ gïi gen ko nywɑl wun, kipe wu óbɑɑb ki gen ki gööj orøøg gen.” Codhe, ɑnyɑni teedø cyɑ̈n kì buti kemmi Körɑ̀ kí Dɑthɑn geki Abirɑm. Dɑthɑn geki Abirɑm bëën wɑ̈g, de ge ócungø kì dhøggi kemmi gen geki mɑ̈nni gen kí nyigi gen. Kɑ ji köbbi yi Mosɑ̀ kinni, “Bene gïn-ɑ ree óyodu en kinni yɑ ɑ́ör-ɑ yi Jwøng-ɑ Ácwɑ̈ɑ̈j be gwøgi gïgɑni bënn, de møgɑni pɑ nyi kɑ̈ɑ̈l-ɑ pyëwɑ. Keløg jøg óthøw kɑ thøw-ɑ nyi thøw yi dhɑnhø bëne, e bong cɑ́yi Jwøk møg nënni, pɑth ki Jwøng-ɑ Ácwɑ̈ɑ̈j ɑ ɑ́myeg yɑn. De ogöög Jwøng-ɑ Ácwɑ̈ɑ̈j ki gïjø me nuti pɑ̈nyø lïngø, kɑ piny ree yiebe, kɑ jøgɑni mwønye kí jɑmmi gen bënn, o ge kedhi gen pödhi tyëngthøø ge onëënø, óyod yi wun kinni jøgɑni ɑ́bɑny-ɑ Jwøng-ɑ Ácwɑ̈ɑ̈j.” Ri rume ki kwøb kinøw ceth, kɑ piny ree yiebe kì thɑ́ tyelli Dɑthɑn geki Abirɑm, Kɑ ge mwøøny yi piny geki kɑ̈lli gen, kyeel ki jii Körɑ̀ geki jɑmmi gen bënn. Ge ɑ́kedhi piny pödhi tyëngthøø ge onëënø geki jɑmmi gen. Acyëëg piny ree kömi gen kɑ ge ólɑ̈ɑ̈nyø. Tyëng Isrɑil møg-ɑ ɑ́ying kenyɑni ɑ́rengi keny-ɑ ɑ́lïngi gen ywøøg gen, ge okööbø kinni, “Wɑ ómwøøny yi piny thyew! Rengi wɑ!” Codhe, kɑ Jwøng-ɑ Ácwɑ̈ɑ̈j ön-ɑ piny ki mɑc me lyel, ɑrɑ̈be jøg-ɑ ɑ́muuj ki bɑkur gɑ miy ɑ́ryew kí pyɑ̈r ɑ́bïj. Aköbbi Mosɑ̀ yi Jwøng-ɑ Ácwɑ̈ɑ̈j kinni, “Köbbí Eliɑdhɑr wɑ̈d ókwërø Aɑron kinni, kwɑnye ópɑ̈nni bɑkur møg-ɑ bɑ ngyënyø dilɑl kì ri jøg-ɑ ɑ́rɑ̈bi. Kɑ mɑc kedhhe, mɑ́ ópɑ̈nnɑni bɑ ɑkwër. Ge ɑ́göög ki ɑkwër kɑ ɑ́thyeer gen bøli këli lɑɑm Jwøng-ɑ Ácwɑ̈ɑ̈j. Kwɑɑny ópɑ̈nni bɑkur mø jøg-ɑ ɑ́nɑ̈g kì bɑng orøøg gen, kɑ ópɑ̈nnɑni køny gɑ gïn nyi kum këli lɑm. Ge óbëëdø gɑ ngïji kipe tyëng Isrɑil!” Codhe, ɑkwɑɑny ópɑ̈nni bɑkur møgɑni yi ókwërø Eliɑdhɑr, kɑ gï kïdhe be thɑ̈dhø gɑ kum këli lɑm. Menɑni óbëëd ɑ́ ngïji kipe tyëng Isrɑil kinni, ko di dhɑnhø me pɑth ki kwɑɑr Aɑron me bï këli lɑm be rɑ̈bbi Jwøng-ɑ Ácwɑ̈ɑ̈j ki bɑkur. Ngɑn nyïngi bute, ceg-ɑ thøø ni Körɑ̀ geki jøge. Møgɑni bënn ɑ́gwøg ceth ni kɑ ɑ́ceg Eliɑdhɑr yi Jwøng-ɑ Ácwɑ̈ɑ̈j ki dhø Mosɑ̀. Dhuki, kɑ teedø bëne oköörø kì ri Mosɑ̀ geki Aɑron, ge okööbø kinni, “Jii Jwøng-ɑ Ácwɑ̈ɑ̈j ɑ́nɑ̈g yi wun!” Keny-ɑ ɑ́cugi teedø bëne be wëërø ki Mosɑ̀ geki Aɑron, ge ɑ́lïïdh kuni Kemi Kwër, kɑ gø lidh gen e ókumø yi pøølø. O mɑ̈ɑ̈r Jwøng-ɑ Ácwɑ̈ɑ̈j omënyø. Akedh Mosɑ̀ geki Aɑron kɑ ge ócungø kì dhø Kemi Kwër. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Lɑ̈ɑ̈w wun ri wun ki ji møg, o ge gwɑɑrɑ piny!” Kɑ ri gen bøødh gen piny ryeet wɑ̈thi gen kuul gen piny. Kɑ Aɑron köbbi yi Mosɑ̀ kinni, “Kwɑny ópɑní, kɑ kïdhí ki mɑc kì wïj këli lɑm, kɑ kïdhí ki bɑkur. Codhe kɑ yï jwɑní be gwøg ki guöög dhïwø! Pyëw Jwøng-ɑ Ácwɑ̈ɑ̈j ɑ́rum ki rënyø, o yømø nɑ̈ɑ̈g ɑ́gøøje kelli ji, yømɑni ɑ́cɑ̈gi ki nɑ̈g, jwɑní!” Codhe, ɑkwɑɑny ópɑni bɑkur yi Aɑron ni kɑ ɑ́kwøbii yi Mosɑ̀, ɑrenge kelli ji. Keny-ɑ ɑ́lïdhe kinni yømø rum cɑ̈gø ki nɑ̈g ki ji, ɑkïdhe bɑkur mɑc kɑ ócɑ̈gø’ guöög dhïwi jiɑni. Kɑ yømø nɑ̈ɑ̈g menɑni cuung yi guöngɑni. Adöng Aɑron e ócungø kì kɑɑm tyëngnëënø geki tyëngthøø. Kwɑnni ji-ɑ ɑ́thøw, bɑ ɑ́lïp pyɑ̈rø wïdɑ́ngwen kí miy ɑ́bïryew, e ji-ɑ ɑ́thøw kì bɑng Körɑ̀ nuti kwɑɑn kelli gen. Kɑ Aɑron døøg-ɑ yï Mosɑ̀ kì dhø Kemi Kwër keny-ɑ ɑ́rum yømø nɑ̈ɑ̈g ki cung. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni kɑ̈ni gen ki lødh pyɑ̈rø wïdɑ́ryew, kɑ̈ni jɑngi wïj kɑl ki lodh ɑ́ kej gøl gen. Kɑ nyingi kɑl nyi gweed kömi lodhe, kɑ nyingi Aɑron gweed kömi lonh-ɑ cungi ɑ́ wïj gøl Leebì, lodh ɑ́kyel cungi ɑ́ wïj kɑl ɑ́kyel. Kɑ ge kïdhí yij Kemi Kwër, kɑ ge cïb bøli keny-ɑ nyi yïddi wɑ. Loodh ngɑn-ɑ ómyeg yi yɑn ónyog, o køør tyëng Isrɑil kì ri wun cung yi yɑn ki yuuɑni.” Codhe, kɑ tyëng Isrɑil köbbi yi Mosɑ̀, kɑ jɑggi gen omuujø ki lødh; lodh ɑ́kyel cungi ɑ́ wïj kɑl, kwɑnni gen bɑ pyɑ̈rø wïdɑ́ryew yi loodh Aɑron. Codhe, ɑcïb lødhɑni yij Kemi Kwër kì bøli Sɑnduug Ciggi Jwøng-ɑ Ácwɑ̈ɑ̈j yi Mosɑ̀. Dhuki keny-ɑ ɑ́kedhi Mosɑ̀ yij Kemi Kwër, ɑyuude loodh Aɑron lonh-ɑ cungi ɑ́ wïj gøl Leebì e nyogø. Lonhɑni kɑrø kɑ oköögø, kɑ nywøle ocyegø! Akwɑɑny lødhɑni bënn yi Mosɑ̀, kɑ gï nyudhe tyëng Isrɑil. Kɑ ngɑn lodhe kwɑnye. Aköbbi Mosɑ̀ yi Jwøng-ɑ Ácwɑ̈ɑ̈j kinni, “Dwøøg loodh Aɑron bøli Sɑnduug Cigg. Mïdhi ɑ́ ngïji kipe tyëng Isrɑil møg-ɑ pëmø, kinni ge bɑ møg thøw keløg ge pɑ wïyi ki køør.” Kɑ møg-ɑ ɑ́kwøb yi Jwøng-ɑ Ácwɑ̈ɑ̈j gwøg yi Mosɑ̀. Kɑ Mosɑ̀ köbbi yi tyëng Isrɑil kinni, “Wø ɑ́gɑ̈g! Wø ɑ́thøw bënn! Ngɑn nyegi buti Kemi Kwër ceg-ɑ thøø, wø ceg-ɑ thumø ki thøø bënn!” Kɑ Aɑron köbbi yi Jwøng-ɑ Ácwɑ̈ɑ̈j kinni, “Yïn, wuki wɑ̈ddí, kí gøl Leebì, bɑ wun ɑ órɑngi kì bɑng bɑ̈jjø men-ɑ ógwøg kì Kemi Kwër. De bɑ wuki wɑ̈ddí keti wun ɑ órɑngi ki gwøøg ókwër. Cwööl wɑddí, ɑ løg Kwɑrri Leebì, o yï køny yi gen ki gwøg kì kɑɑm-ɑ nyi bëëd wu göög ɑ yij Kemi Kwër wuki wɑ̈ddí. Gwøg gen gwøøg gen ge onennø yi yïn kenyi göög gen kì kej kwër. De ge ko nywɑ̈ddi ki jɑmmi kwër kì kej kwër geki këli lɑm. Ke nywɑl gen jɑmmɑni wu ceg-ɑ thøø bënn wuki gen. Göög gen ge køny-ɑ yïn; gwøg gen gwøng-ɑ bɑ mi gen kì Kemi Kwër, de ko di ngɑnpɑth me göögø ki yïn. Wukí wɑ̈ddí keti wun ɑ göögø kì kej kwër geki këli lɑm, o yɑ cögɑ pyëwɑ pɑ cigi rënyø ki tyëng Isrɑil. Bɑ yɑn ɑ ɑ́kwɑny wɑddí, Kwɑrri Leebì kì kelli Isrɑil bëne gɑ møg mëggɑ yïn. Ge ɑ́thyëyi yɑn. O ge göög gen ki gwøøg Kemi Kwër. Yïn, wuki wɑ̈ddí keti wun ɑ gwøg kwër kì Kemi Kwër geki këli lɑm, kí Kej Kwërdwøng. Møgɑni bene gïg-ɑ gwøg yi yïn, mɑ́ yï ɑ́mëggɑ gwøøg kwër. Ngɑnpɑth men nywɑ̈ddi ki jɑmmi kwër ceg-ɑ thøø.” Kɑ Aɑron köbbi yi Jwøng-ɑ Ácwɑ̈ɑ̈j kinni, “Yï ɑ́mëggɑ jɑmmi kwër bënn møg-ɑ nyi thërri yɑn yi tyëng Isrɑil. Ge ɑ́mëggɑ yïn gɑ møgí, o ge ócög gɑ mø kwɑrrí gïti ɑtheer. Kinni jɑmmi Kwëër Dwøng møg-ɑ pɑ nyi rɑ̈b kì wïj këli lɑm, bɑ møgí, ɑ løg gïncɑm, kí gëdhhi bɑ̈jjø, kí gëdhhi orøg, geki gïg-ɑ nyi muuj bënn. Nyi cɑm wun gïgɑni kì kej kwër, cwøw bënn ócuggø cɑm ki gen, bɑ gïi kwër kì yï wun. “Thyew, jɑmm-ɑ kyeelø møg-ɑ nyi thërri yɑn yi tyëng Isrɑil ɑ́mëggɑ yïn. Ge ɑ́mëggɑ yïn, wuki nyigí yɑɑg-ɑ cwøw geki womɑ̈nn kì yethi rïjj bënn. Tyëng gølí møg-ɑ dhïw, ge ócuggø cɑm ki gïgɑni. “Yï ɑ́mëggɑ mwölli jɑmm-ɑ nyi cyeg kì yï tyëng Isrɑil kì yethi runn bënn, ɑ løg møøw dhetun kí møgi oløg, kí byel. Ge bɑ møgí bënn. Tyëng gølí møg-ɑ dhïw, ge ócuggø cɑm ki gïgɑni. “Gïg-ɑ bɑ ɑthyey bënn kì Isrɑil gɑ møgɑ, bɑ møgí.” “Kɑyyi ji, kí kɑyyi dhög, kí kɑyyi dyëg, kí kɑyyi ɑderr møg-ɑ thyëyi yɑn yi Isrɑil bɑ møgí. De kɑyø ócuggø pɑ̈dø ki gïïpiny. Kɑ kɑyyi lɑ̈yy-ɑ ywëdhø nyi pɑ̈d ki ngyëny. Nyi pɑ̈ɑ̈d othinh kì dwɑ̈n-ɑ ɑ́nywøølii, ki ngyëny ɑ́tegg ɑ́bïj, ngyënyy-ɑ bɑ ɑyïëy kì kej kwër. De kɑyyi dhög, kí kɑyyi dyëg römm geki ɑ́tegg ko pɑ̈d, ge bɑ møgɑ ceth, nyi ngɑɑl gen gɑ gëdhhì. Kɑ remmi gen nyi kiny ri këli lɑm, kɑ dwɑ̈li gen nyi rɑ̈b, o pyëwɑ mïne yi yømi tool gen. Rïnggi gen bɑ møgí, ni ɑ́ngɑdø geki rɑ̈ɑ̈m kyëj mø gëdhh-ɑ nyi thërri yɑn. “Gïg-ɑ nyi kɑ̈ɑ̈l yi tyëng Isrɑil bënn ge muuj-ɑ yɑn, ge ɑ́mëggɑ yïn, wuki nyigí, kí kwɑrrí. Men-ɑ mëggɑ yïn èn bɑ kwöng me pɑ cuggi wiyø yi yïn, wuki nyigí, cwøw geki mɑ̈nn kì yethi rïjj bënn.” Kɑ Aɑron köbbi yi Jwøng-ɑ Ácwɑ̈ɑ̈j kinni, “Bong piny men-ɑ ómëggi yïn, yïn ɑ gøl kwër, jɑmmɑ gen ɑ bɑ møgí.” Kɑ Jwøng-ɑ Ácwɑ̈ɑ̈j okööbø kinni, “Kwɑrri Leebì ɑ́mëggɑ ɑ́kyeel pyɑ̈rri gïg-ɑ nyi mëggi yɑn yi tyëng Isrɑil bënn. Menɑni bene köögi mi gen kipe gwøng-ɑ gwøg yi gen kì Kemi Kwërɑ. Tyëng Isrɑil møg-ɑ kyeelø ko kedhi buti Kemi Kwër këti kipe ge ócɑy ki thøø. Cɑg ɑnɑn ceth, Kwɑrri Leebì ɑ gwøg gwøøg Kemi Kwër, o gen ɑ korrii kì yethi rïjj bënn, e bɑ kwöng gïti ɑtheer. Kwɑrri Leebì bong piny mɑ mi gen kì Isrɑil, mɑ́ ge ɑ́mëggɑ ɑ́kyeel pyɑ̈rri jɑmmì møg-ɑ nyi muuj yɑn yi tyëng Isrɑil. Bene ɑ pere köbbɑ gen kinni, koo di piny me mëggi gen ɑ́ budi gen kì Isrɑil.” Kɑ Mosɑ̀ köbbi yi Jwøng-ɑ Ácwɑ̈ɑ̈j, i köbbe Kwɑrri Leebì kinni, “Kenyi kɑ̈bbi wun kì yï tyëng Isrɑil ki ɑ́kyeel pyɑ̈rri jɑmmì gɑ mø wun, nyi mëggu Jwøng-ɑ Ácwɑ̈ɑ̈j ɑ́kyeel pyɑ̈rri gen, møgɑni ópɑ̈ɑ̈r ceth ki møg-ɑ muuj ge kɑ̈ɑ̈l ɑ rɑrø geki møgi oløg men kɑ̈ɑ̈l kì kej bïjø. Bene en kër-ɑ nëngu Jwøng-ɑ Ácwɑ̈ɑ̈j kì ri ɑ́kyeel pyɑ̈rri jɑmm-ɑ kwɑny yi wun ki yï tyëng Isrɑil ɑnɑn. Nyi mëggu gïgɑni ókwërø Aɑron. Nyi muuj wun kì ri jɑmm-ɑ døj kì yï wun. Keny-ɑ órum wun ki muuji møg-ɑ døj kì ri gen, kɑ møg-ɑ döng mïdhi wun gɑ mø wun, ni ngɑn purø ceth kenyi rume ki muuji byëli Jwøng-ɑ Ácwɑ̈ɑ̈j. Møg-ɑ ódöng gɑ mø wun ócuggø cɑmø yi wun kì keny-ɑ cɑm wun gen, mɑ́ ge bɑ köggi gwøøg wun kì Kemi Kwër. Bong körri orøg møg-ɑ óying kömi wun, ke rum wun ki thödhi Jwøng-ɑ Ácwɑ̈ɑ̈j kì ri møg-ɑ døj kì ri gen. De jɑmmi kwër ko bwöl wun, kɑ wu ocyɑ̈mø kì ri gen e Jwøng-ɑ Ácwɑ̈ɑ̈j nuti nëngø yi wun kì ri møg-ɑ døj kì ri gen, ke bwöl wun gen, wu ceg-ɑ thøø.” Kɑ Mosɑ̀ kí Aɑron köbbi yi Jwøng-ɑ Ácwɑ̈ɑ̈j kinni i köbbi gen tyëng Isrɑil kinni, i muuj gen Mosɑ̀ geki Aɑron ki røjø nyilɑlø me bong gïnrɑj kì ree, me köme nuti pɑ̈nyø töjjø ki ɑcebi pur. Kɑ muuj wun ókwërø Eliɑdhɑr. Kɑ rønyɑni kïdhi ngɑ̈ɑ̈j kɑɑl, kɑ ngɑl kì kunɑni kì bøli ókwërø Eliɑdhɑr. Kɑ Eliɑdhɑr kɑ̈bbe kì ri reme, kɑ gø kinye kuni Kemi Kwër ki lwede tyel ɑ́bïryew. Kɑ rønyɑni rɑ̈b bëne ki pyëne, kí rïnge, kí reme, kí cïnne, e onennø yi ókwërø. Kɑ ókwërø kɑ̈bbe ki ɑnɑ̈ɑ̈b yɑdh sɑndɑl, geki yelø, kí korø me kwɑrø, kɑ gï leenge yij mɑny-ɑ rɑ̈ɑ̈b røjø. Orume, kɑ ókwërø ógødhe lwøge, kɑ lwøgge codhe o dwööge kɑɑl. Ceg-ɑ rïïjø, e ywëdhø gïti buddi cɑ̈ng. Ngɑn-ɑ ɑ́rɑ̈b rønyɑni lwøge ógødhe, kɑ lwøgge; de ceg-ɑ rïïjø e ywëdhø gïti buddi cɑ̈ng. Codhe, kɑ búr cøng yi jɑl me dhïw, kɑ gø cïbe keny me dhïw ki ngɑ̈ɑ̈j kɑɑl, ree ókɑ̈bbi yi tyëng Isrɑil ki búr men nyi kïdhi ri pïi guöög dhïwø. Guöngɑni bɑ mi lɑ̈ɑ̈nyi orøg. Jɑl-ɑ ɑ́cøng búrɑni lwøge ógødhe, kɑ lwøgge; de ceg-ɑ rïïjø e ywëdhø gïti buddi cɑ̈ng. Menɑni óbëëd ɑ́ kwöng kì yï tyëng Isrɑil geki wëdhh-ɑ bëëdø kì kelli gen gïti ɑtheer. Ngɑn nywɑl dhɑnhø me thøø, ceg-ɑ bëëdø e ywëdhø ki cyɑ̈ng ɑ́bïryew. Lɑwe ree ki pïi dhïwø, kì dɑ̈ɑ̈g cyɑ̈ng geki bïryeew cyɑ̈ng, codhe o dhïwe cyee. De ngɑn koo lɑw ree kì dɑ̈ɑ̈g cyɑ̈ng geki bïryeew cyɑ̈ng, pɑ dhïwi. Ngɑn nywɑ̈ddi ki dhɑnhø me thøø, kɑ ocögø ree pɑ lɑwe, cög e ywëdhø, mɑ́ ree nuti wïddø ki pïi dhïwø. Ngɑn ni menɑni bwöl-ɑ Kemi Kwëër Jwøng-ɑ Ácwɑ̈ɑ̈j, o pɑ kwɑɑn kelli jii Jwøng-ɑ Ácwɑ̈ɑ̈j këti. Keløg dhɑnhø othøø kì yij kemɑ̀, ngɑn ying kemɑni kì bøli keny-ɑ thøw dhɑnhø, wɑlɑ̀ ngɑn kedhi yije, ceg-ɑ bëëdø e ywëdhø ki cyɑ̈ng ɑ́bïryew. Jɑmm-ɑ yij kemɑni ying gɑ puggì, wɑlɑ̀ dɑ̈gg møg ri gen nuti töjjø ki ɑ́yömø ceg-ɑ ywëdhø thyew. O ngɑn nywɑl dhɑnhø men-ɑ ónɑ̈gø, wɑlɑ̀ dhɑnhø me thøø kete, wɑlɑ̀ ngɑn nywɑl cöngi dhɑnhø wɑlɑ̀ rörø, ceg-ɑ bëëdø e ywëdhø ki cyɑ̈ng ɑ́bïryew. Kipe lɑwi cølø, kwɑɑny búr kì ri búr røjø nyilɑlø men-ɑ ɑ́rɑ̈b ɑ́ gënhi orøg, kɑ köme kunyi ki pïg tïl kì yij lwøl. Kɑ jɑl me dhïw kɑ̈bbe ki yelø, kɑ gø cøde yethi pïgɑni kɑ ri kem-ɑ́ yije ɑ́thøw yi dhɑnhø geki jɑmm-ɑ ɑ́ying yije bënn, kí ji møg-ɑ ɑ́ying kenyɑni wïdde ki pï. Keløg ɑ́ ngɑn-ɑ ócɑɑg kɑ nɑ̈gø, wɑlɑ̀ thøø kete, wɑlɑ̀ cöngi dhɑnhø, wɑlɑ̀ rörø ɑ ónywɑlø, wïddi ri ngɑn-ɑ ɑ́nywɑ̈ddi ki pï yi jɑl me dhïw. Wïddi ri ngɑn-ɑ ywëdhø yi cølø ki pï yi jɑl-ɑ dhïw kì dɑ̈ɑ̈g cyɑ̈ng geki bïryeew cyɑ̈ng. Orum ree ki wïddø ki pï kì bïryeew cyɑ̈ng, lwøge ógødhe, kɑ lwøgge; de ceg-ɑ rïïjø e ywëdhø gïti buddi cɑ̈ng. Ngɑn ywëdh yi cølø, kɑ ocögø ree pɑ lɑwe, cög e ywëdhø, mɑ́ ree nuti wïddø ki pïi dhïwø. Ngɑn ni menɑni bwöl-ɑ Kemi Kwëër Jwøng-ɑ Ácwɑ̈ɑ̈j, o pɑ kwɑɑn kelli jii Jwøng-ɑ Ácwɑ̈ɑ̈j këti. Mïdhu kwöngɑni kì yethi rïjj bënn. Ngɑn-ɑ ɑ́wïddi ki pï, lwøge ógødhe thyew; ngɑn nywɑl pïgɑni ceg-ɑ rïïjø e ywëdhø gïti buddi cɑ̈ng. Gïn nywɑl yi ngɑn ywëdhø, ceg-ɑ ywëdhø, o ngɑn nywɑl gïnɑni ceg-ɑ ywëdhø, dhïw-ɑ́ɑ̀ keny-ɑ óbuddi cɑ̈ng. Kɑ tyëng Isrɑil bënn wɑ̈dh-ɑ pɑ̈ɑ̈l Sin, kɑ ge ogudø kì Gɑdic. Kɑ Miryɑm othøø kɑ kony kì kenyɑni. Ábong-ɑ pï kì keny-ɑ ɑ́guddi yi gen, codhe kɑ teedø ri gen cøng gen buti Mosɑ̀ geki Aɑron. Aköör gen kì wïj Mosɑ̀ ge okööbø kinni, “Di løg me lɑ̈w ke di thøw wøn, kì bøli Kemi Kwëër Jwøng-ɑ Ácwɑ̈ɑ̈j kyeel ki wɑddi wøn tyëng Isrɑil møg-ɑ ɑ́thøw. Wøde ɑ ɑ́kɑ̈ɑ̈l wøn yij ryɑng keny? Wø ɑ́kɑ̈ɑ̈lí be thøø wøki dhögi wøn? Wøde ɑ ɑ́kɑ̈ɑ̈l wøn wɑ̈g kì Rïp, ɑ kɑ̈ɑ̈l wøn keny-ɑ rɑj ni men, keny bong gïn twïy kì yije? Bong byel, bong nywøli yenh møg cɑm, o men-ɑ́ bong pïg mɑdh!” Kɑ Mosɑ̀ odhwödhø kì buti teedø, kɑ ge kedh-ɑ dhø Kemi Kwër geki Aɑron. Kɑ wɑ̈thi gen kuul gen piny bøli gen ónywɑ̈ddø’ piny, kɑ mɑ̈ɑ̈r Jwøng-ɑ Ácwɑ̈ɑ̈j omënyø kì kömi gen. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kwɑny lonh-ɑ bøli Sɑnduug Cigg, kɑ teedø bënn cwööl, wuki Aɑron, kɑ nyɑ kïn-ɑcɑ̀ köbbi wun, ge olïngø kinni, kɑ̈ne wɑ̈g ki pïge. Yï ókɑ̈ni wɑ̈g ki pï kì kenyɑni, kɑ ge omɑ̈dhø geki dhögi gen.” Akedh Mosɑ̀ kɑ lodh dwɑɑye ni kɑ ɑ́köbbii yi Jwøng-ɑ Ácwɑ̈ɑ̈j. Kɑ Mosɑ̀ geki Aɑron teedø bëne cwøøl gen buti nyɑ kït, kɑ Mosɑ̀ okööbø kinni, “Anɑn lïng wun tyëngpëëmø, kɑ̈ni wøn wɑ̈g ki pï kì ri nyɑ kït men kiper wun?” Codhe ɑgøøj nyɑ kïnɑni yi Mosɑ̀ ki lodhe tyel ɑ́ryew, kɑ pïngø ceg-ɑ ì bɑɑw kì wɑ̈g kì ri nyɑ kït, kɑ teedø bëne omɑ̈dhø geki jɑmmi gen. De Mosɑ̀ geki Aɑron ge ɑ́cyɑ̈r yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j ɑ́kööb kinni “Mɑ́ yɑ nuti yïëëy wun, kɑ yɑ ocögø yɑ pɑ kwër yi wun kì bøli tyëng Isrɑil, ge koo peej-ɑ yi wun piny-ɑ ɑ́mëggɑ gen.” Møgɑni ɑ́cwöb-ɑ Merïbɑ̀, mɑ́ tyëng Isrɑil ɑ́köör kì ri Jwøng-ɑ Ácwɑ̈ɑ̈j kì kenyɑni, ɑnyudhe ree gen kinni bɑ Kwërø. Mosɑ̀ ɑ́öd kì Gɑdic ki jøg mø kedhi yï rɑ̈ɑ̈dh Edöm, o gø köbbi gen kinni, “Wø nyiiwöw, tyëng Isrɑil wø okööbø kinni, orɑng-ɑ ɑ́rɑngi wøn ngɑ̈nyi yi yïn, kër-ɑ ɑ́dhwödh kweyyi wøn, kɑ ge dɑ̈g-ɑ Rïp, kun-ɑ ɑ́bëëd wøn ki runn mø gïïr, thyew nyingi wøn ɑ́guud yi tyëng Rïp, ɑywøøg wøn kö Jwøøg wøn, Jwøng-ɑ Ácwɑ̈ɑ̈j, ɑlïnge, ɑöre wëywön-ɑ ɑ́pëëj wøn wɑ̈g kì Rïp. Anɑn wø ying-ɑ Gɑdic kɑɑl-ɑ tøg pödhí. Wø kwɑjj-ɑ yïn wiy wø bɑ̈ɑ̈n wøn pinyí. Wø pɑ kɑ̈l yij pwödhø, wø pɑ kɑ̈l yij bɑg, de wø óbødh yöö, wø pɑ rudi tuung kyëj wɑlɑ̀ tuung cɑɑm gïti keny-ɑ ópöödh wøn myërrí, o wø pɑ mɑ̈dhi ki pï kì yethi yïïthi wun.” De tyëng Edöm ɑ́löggi kinni, “Wø ɑ́bɑ̈nyi, wu pɑ kɑ̈l yij piny wøn. Keløg wu óbï, wɑ ceg-ɑ nyɑɑg.” Kɑ tyëng Isrɑil okööbø kinni, “Wø óbødh yöö, de keløg wø ómɑ̈dhi ki pï wɑlɑ̀ gïg-ɑ kwølli yi wøn ómɑ̈dhø, pïgɑni ceg kɑ colø yi wøn, gïn-ɑ dwɑddi yi wøn bɑ bɑ̈ɑ̈ni piny yøw.” Kɑ tyëng Edöm cig-ɑ kwøb kinni, “Wø ɑ́bɑ̈nyi!” Kɑ ge odhwödhø gɑ yɑy me dwøng ge kedh-ɑ be nyɑɑg ki tyëng Isrɑil. Codhe, ɑkëjji tyëng Isrɑil ge kɑ̈ll-ɑ yöö megø, mɑ́ ge ɑ́mɑ̈ɑ̈n bɑ̈ɑ̈ni piny Edöm yi tyëng Edöm. Tyëng Isrɑil ɑ́dhwödh bënn kì Gɑdic kɑ ge wɑ̈dh-ɑ Kïti Ör, ki tøg piny Edöm. Codhe, ɑköbbi Mosɑ̀ geki Aɑron yi Jwøng-ɑ Ácwɑ̈ɑ̈j kinni, “Aɑron pɑ kedhi piny-ɑ ɑ́kwøb yi yɑn kinni mëggɑ’ tyëng Isrɑil, ceg-ɑ thøø, mɑ́ dhøgɑ ɑ́pyem yi wun ryeet kì Merïbɑ̀. Kïdhí Aɑron wïj Kïti Ör geki Eliɑdhɑr wɑ̈de, Kɑ ógudhi kwër mø Aɑron luny wɑ̈g, kɑ ge løny ri Eliɑdhɑr kì kunɑni. Aɑron thøw-ɑ kunɑni ceth.” Kɑ møg-ɑ ɑ́kwøb yi Jwøng-ɑ Ácwɑ̈ɑ̈j gwøg yi Mosɑ̀. Ge ɑ́yedhi wïj Kïti Ör ge onennø yi teedø bëne, ɑluny ógudhi kwër wɑ̈g yi Mosɑ̀ kì ri Aɑron, kɑ gï lønye ri Eliɑdhɑr. Kɑ Aɑron othøø kì wïj kït kunɑni. Adwöög Mosɑ̀ piny geki Eliɑdhɑr. Áyod yi tyëng Isrɑil kinni Aɑron thøø, ɑywøøgii yi teedø ki cyɑ̈ng pyɑ̈r ɑ́dɑ̈g. Keny-ɑ ɑ́lïng rɑ̈ɑ̈dh tyëng Kɑnɑɑn kì Arɑd, kì tuung Kɑnɑɑn kì wɑɑng wurlwɑl, kinni i tyëng Isrɑil obëënø ki yuu Athɑrïm, ɑkedhe be nyɑɑg ki gïn, kɑ ómɑ̈gø ki kwï gen. Codhe, ɑköngi tyëng Isrɑil kì bøli Jwøng-ɑ Ácwɑ̈ɑ̈j kinni “Wëggí wøn tyɑmi jiɑni, ge thyëyi wø’ yïn kí kɑ̈ddi gen bënn, kɑ ge nɑ̈g yi wøn ki jɑmmi gen.” Kwøbbi gen ɑ́yïëy yi Jwøng-ɑ Ácwɑ̈ɑ̈j kɑ gï kønye ki tyɑmi tyëng Kɑnɑɑn. Anɑ̈ɑ̈g gen ki jɑmmi gen bënn yi tyëng Isrɑil, kɑ kɑ̈ddi gen cøør piny. Kɑ kenyɑni cɑg ɑ́ Órmɑ̀, ɑ wɑngi ɑthyey. Kɑ ge odhwödhø ki Kïti Ör ge kɑ̈l-ɑ yuu Nɑɑm Omeli Kwɑrø, kipe kinni o ge wen gen piny Edöm. De teedø pëthi gen ɑ́nyönhi, kɑ ge oköörø kì ri Jwøk geki Mosɑ̀, ge okööbø kinni, “Wude ɑ ɑ́kɑ̈ɑ̈l wun wøn wɑ̈g kì Rïp, ɑ kɑ̈ɑ̈l wun wøn be thøø kì keny-ɑ bong gïncɑm wɑlɑ̀ pï èn? Wø ɑ́ngïr yi gïncɑm-ɑ rɑɑj èn!” Agöjji jiɑni thöllì mø bɑ nɑ̈ɑ̈g yi Jwøng-ɑ Ácwɑ̈ɑ̈j. Kɑ ji mø gïïr kì kelli gen kɑ̈ɑ̈j yi thöllɑni kɑ ge othøø. Kɑ ji kedh-ɑ yï Mosɑ̀, ɑkööb gen kinni, “Wø ɑ́bɑ̈jji, wø ɑ́köör kì ri Jwøng-ɑ Ácwɑ̈ɑ̈j, kí rií thyew. Kwɑjjí Jwøng-ɑ Ácwɑ̈ɑ̈j kiper wøn, o thöllì nyiige.” Codhe ɑkwɑ̈jji Mosɑ̀ kiper tyëng Isrɑil. Aköbbi Mosɑ̀ yi Jwøng-ɑ Ácwɑ̈ɑ̈j kinni gööge ki thwöl me bɑ ngyënyø dilɑl, kɑ gø ngɑɑbe wïj löj, kɑ ngɑn nyi kɑj yi thwöl nyi lïïdhe ree, o cöge e pɑ thøw. Codhe ɑgöög Mosɑ̀ ki thwööl dilɑl, kɑ gø cïbe wïj löj. Kenyi kɑɑj dhɑnhø yi thwöl, o nyi lïïdh-ɑ ri thwööl dilɑl, kɑ nyii bødhø ki thøø. Tyëng Isrɑil ɑ́dhwödh kɑ ge ogudø kì Oböth. Keny-ɑ ɑ́dhwödh gen kì kenyɑni, ɑgud gen kì wïj kɑɑl Abɑrïm kì yij ryɑng kì wïj tuung Moɑb kì kuni wɑɑng cyɑ̈ɑ̈ng mwøl. Adhwödh gen kì kenyɑni kɑ ge gudd-ɑ Töör Dhɑred. Acigi gen dhwödhø kì kenyɑni, kɑ ge gudd-ɑ kömi Nɑm Arnön kì tung-ɑ wɑɑng wuudø, kì yij pɑ̈l-ɑ göjji myërri piny Amör. Arnön ɑ́bëëd ɑ́ keew Moɑb kí Amör. Bene ɑ bɑnge kööb Wɑ̈nyi Lìnyi Jwøng-ɑ Ácwɑ̈ɑ̈j kì ri kɑɑl Wɑyïb kì Supɑ̀ geki Töör Nɑm Arnön. Kí tör-ɑ ngelli kɑɑl Aɑr geki keew Moɑb. Adhwödh gen kì kenyɑni, kɑ ge kedh-ɑ keny me cwøl ɑ́ Yïïth, ɑ yije ɑ́köbbi Mosɑ̀ yi Jwøng-ɑ Ácwɑ̈ɑ̈j kinni, “Cøng ji o ge nëngɑ ki pï.” Tyëng Isrɑil ɑ́wör ki wör møg kì bøli kenyɑni. “Yïïth, twïy pïi wun, Ge ómɑ̈dh yi wøn ki wör Yiinh-ɑ ɑ́kony yi nyiirɑ̈dhh, yiinh-ɑ ɑ́kony yi jɑgg, yiinh-ɑ ɑ́kony ki loodh rɑ̈ɑ̈dhø kí lødhi gen thyew.” Ge ɑ́dhwödh kì yij ryɑng kɑ ge kedh-ɑ Mɑtɑnɑ̀. Adhwödh gen kɑ ge kedh-ɑ Mɑɑ̈liel, ɑdhwödh gen kì Mɑɑ̈liel kɑ ge kedh-ɑ Bɑmöth. Adhwödh gen kì Bɑmöth kɑ ge kedh-ɑ Töör Moɑb, tör-ɑ bøli Kïti Pisgɑ̀, ɑ rwöm ki ryɑng. Kɑ tyëng Isrɑil öd-ɑ yï Sïön rɑ̈ɑ̈dh Amör, ki jøgdøngø møg köbbii kinni, “Wø kwɑjj-ɑ yïn, wiy wø bɑ̈ɑ̈n wøn pinyí. Wø pɑ kɑ̈l yij pwödhø, wø pɑ kɑ̈l yij bɑg, wø pɑ mɑ̈dhi ki kì yij yith, wø óbødh yöö ceth wø bɑ̈ɑ̈n-ɑ myërri wun.” De Sïön nuti yïëyø ki bɑ̈ɑ̈ni pinye yi tyëng Isrɑil. Yɑye ɑ́cønge kɑ kedh-ɑ Yɑɑ̈dh yij ryɑng be nyɑɑg ki tyëng Isrɑil. Kɑ tyɑm yi tyëng Isrɑil, kɑ ji mø gïïr nɑ̈g kì kelli yɑye, cɑg kì kömi Nɑm Arnön gïti Yɑbok. Piny-ɑ ngɑ̈ɑ̈j Yɑbok bɑ piny tyëng Amön, o myërri Amön teg. Codhe kɑ myërri tyëng Amör bënn mɑg yi tyëng Isrɑil, kɑ ge pëgg-ɑ Kicbön geki myërr-ɑ kyeelø bënn. Kicbön bene kɑɑl-ɑ́ yije ɑ́jyɑ̈ɑ̈g yi Sïön rɑ̈ɑ̈dh tyëng Amör, gø ɑ́mɑg en keny-ɑ ɑ́nyïɑ̈gge ki rɑ̈ɑ̈dh Moɑb cøn, kɑ pinyɑni kwɑnye kì yï rɑ̈ɑ̈dh Moɑb gïti Arnön. Bene ɑ bɑnge ɑ́cɑɑg wör kinni, “Bïu Kicbön, bïu kɑɑl Rɑ̈dh Sïön! Wø dwɑdd-ɑ gerii o døøge keje. Tyeli liny ɑ́dhwödh ki Kicbön. Yɑɑy Sïön ɑ́kedh e olyelø ni mɑc, kɑ kɑɑl Aɑr kì Moɑb cɑme, kɑ kïtti kwøømø mwønye. Ri wun dɑ cyën, wu ɑ́gɑ̈g wu tyëng Moɑb! Wun ɑ mɑlli jwøg Kemöc! Jwøøg wun wɑ̈dde ɑ́wëgge töngi yïnø, kɑ tyëng-ɑ mɑ̈nn ogöögø ki ɑmɑggi Sïön rɑ̈ɑ̈dh tyëng Amör. De ɑnɑn kwɑrri gen ɑ́nɑ̈g, cɑg kì Kicbön kí Dïbön, kɑ cig-ɑ cɑ̈gø kì Nɑcim gïti Nöpɑ̀ kì buti Medebɑ̀.” Codhe, kɑ tyëng Isrɑil pëgg-ɑ myërri tyëng Amör. Kɑ Mosɑ̀ oödø ki jøg mø kedhi be lyeewi Yedher, kí yɑbi kër-ɑ ómɑgii. Kɑ mɑg yi tyëng Isrɑil, eni kɑɑlɑni geki myërr-ɑ bute. Kɑ tyëng Amör møg-ɑ ɑ́ying myërrɑni cyeddi. Kɑ tyëng Isrɑil ri gen løg gen ge kɑ̈l-ɑ yuu Bɑcɑn. Kɑ Og rɑ̈ɑ̈dh Bɑcɑn bï-ɑ wɑ̈g kì kɑɑl, be nyɑɑg ki gen kì Edrey, ɑ́kedh kɑ yɑye bëne. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Yï ko böggi yi en, ówëggɑ tyɑmø yi yïn, geki yɑye kí pinye bënn. Ógöggi yi yïn ki gïn ni men-ɑ ɑ́göggí Sïön rɑ̈ɑ̈dh Amör ɑ ɑ́bëëd kì Kicbön.” Kɑ Og, kí wɑ̈dde, kí jie bënn nɑ̈g yi tyëng Isrɑil, bong dhɑnhø mɑ ɑ́bødh, ɑpëggi Isrɑil pinye. Tyëng Isrɑil ɑ́dhwödh, kɑ ge gudd-ɑ thwøri Moɑb kì løøg Nɑm Urdun kì kuni wɑɑng cyɑ̈ɑ̈ng mwøl kì bøli Yerikö. Kɑ gïg-ɑ ɑ́göggi tyëng Amör yi Isrɑil, lïngi yi Rɑ̈dh Bɑlɑk wɑ̈d Dhipor, rɑ̈ɑ̈dh tyëng Moɑb. Kɑ Moɑb obwøgø ki mendwøng yi tyëng Isrɑil, mɑ́ kwɑnni gen ɑ́bëëd ge gïïr. Kɑ pëjji Midyɑn köbbi yi Moɑb kinni “Nënni gïg-ɑ butee jwɑn kɑ rënyø yi tyëngwïïnø møgɑni, ni wɑdh kenyi nwɑɑje lum dhøge kì pɑ̈l.” Codhe, kɑ Rɑ̈dh Bɑlɑk, oödø ki jøg mø cwööl Bɑlɑɑm wɑ̈d Beor, e ying-ɑ Pethur kì kömi Nɑm Porɑt kì piny Amɑw, gø ɑ́öde ki wöödø kinni, “Dɑ ji mɑ ɑ́bï ge kɑ̈ɑ̈l-ɑ Rïp, jiɑni ɑ́tɑɑy yij piny bëne, o ɑnɑn ge bëëdø ge rwööm ki pödhɑ. Bïí kɑ ge lɑ̈mmí cyën, o ge ótyɑm yi yɑn, men-ɑ́ kwɑnni gen gïïr kibøli wøn. Yɑ ngɑ̈ny wøw kinni lɑmmí pɑ nyi pɑ̈dhi piny, ngɑn lɑ̈mmí gyëdh nyi ceg kɑ gyëdhø, o ngɑn lɑ̈mmí cyën, nyi ceg kɑ cyenø.” Codhe, kɑ jøgdøngi Moɑb geki jøgdøngi Midyɑn ókedhø ge ókɑ̈ddø ki köggi lɑm. Awɑ̈dhi gen yï Bɑlɑɑm, kɑ gø köbbi gen ciggi Bɑlɑk. Aköbbi gen yi Bɑlɑɑm kinni, “Nin wun kì keny, wu ódwöggɑ møg-ɑ óköbbi yɑn yi Jwøng-ɑ Ácwɑ̈ɑ̈j dhuki.” Codhe, kɑ jɑggi Moɑb geki jɑggi Midyɑn nïnn-ɑ gøl Bɑlɑɑm. Kɑ Jwøk bï-ɑ yï Bɑlɑɑm, ɑpëjje kinni, “Jøg-ɑ gølí bɑ møg?” Alöggi Bɑlɑɑm kinni, “Jøgɑni ɑ́ör-ɑ yïɑ yi rɑ̈ɑ̈dh Moɑb, Bɑlɑk wɑ̈d Dhipor ki wöödø kinni, “Dɑ ji mɑ ɑ́bï ge kɑ̈ɑ̈l-ɑ Rïp, ge ɑ́tɑɑy yij piny bëne, bïí lɑ̈mmi gen yɑn, o ge tyɑm yi yɑn, o ge cyeddɑ.” Aköbbi Bɑlɑɑm yi Jwøk kinni, “Yï ko kedh ki jøgɑni, o tyëng Isrɑil ko lɑɑm ki lɑm mø rijjø, mɑ́ gyëdhhɑ ying-ɑ kömi gen.” Akedhi Bɑlɑɑm yï jøg-ɑ ɑ́ör yi Bɑlɑk, kɑ gï köbbe kinni, “Døøg wun pödhi wun, Jwøng-ɑ Ácwɑ̈ɑ̈j yɑ ɑ́mɑ̈ɑ̈ne kedhø ki wun.” Codhe, ɑdøøg gen yï Bɑlɑk kɑ ge okööbø kinni, “Bɑlɑɑm ɑ́bɑ̈nyi bëënø.” Codhe, kɑ Bɑlɑk cig-ɑ ör ki jøgdøngø mø kwɑnni gen ngenyø, o per gen teeg kibøli jø tyeli mɑl. Ge ɑ́kedhi yï Bɑlɑɑm kɑ gø köbbi gen wöön-ɑ ɑ́kɑ̈ɑ̈l yi gen kì yï Bɑlɑk kinni, “Yɑ kwɑjj-ɑ yïn kinni, ko di gïn mɑ̈ɑ̈n yïn bëënø. Yï ótheg yi yɑn ki mendwøng. O gïg-ɑ ókwøb yi yïn ógwøg yi yɑn ge bënn, lɑ̈mmí yɑn jiɑni.” Alöggi Bɑlɑɑm kinni, “Bɑlɑk, cɑgg yɑ mëgge gøle gø pɑ̈ɑ̈ng en ki dhɑb geki ngyënyø ɑ́tegø, møg-ɑ kwøb yi Jwøgɑ, Jwøng-ɑ Ácwɑ̈ɑ̈j, pɑ pyem yi yɑn, cɑgg ɑ́ kì ri kwøb mø yöd. De nin wun kì keny ni jø tyeli mɑl, o yɑ óyodɑ møg-ɑ ócigi köbbi yɑn yi Jwøng-ɑ Ácwɑ̈ɑ̈j.” Kɑ Jwøk bï-ɑ yï Bɑlɑɑm kì wɑ̈rɑni, ɑkööbe kinni “Keløg jøgɑni bëën-ɑ be dwɑ̈ɑ̈yi yïn, kedh ki gen, de gwøg gïn-ɑ óköbbɑ yïn ceth.” Adhwödh Bɑlɑɑm kì mwøl, kɑ pëgg-ɑ kömi ɑdere, ɑkedhe geki jɑggi Moɑb. Jwøk ɑ́bëëd pyëwe orɑ̈mø ki kedhi Bɑlɑɑm. Bɑlɑɑm ɑ́kedh e cyɑ̈dh-ɑ ɑdere, kí bɑ̈ngge ɑ́ryew kì bɑnge, ɑrødhii yi wëywöni Jwøng-ɑ Ácwɑ̈ɑ̈j. Kɑ wëywönɑni lidh yi ɑdere e ócungø kì dïyöö ki pilø kì cinge, ɑkëjji ɑderø e töng-ɑ yij pwödhø, ɑgøøj ɑderø yi Bɑlɑɑm gø dwööge’ yij yöö. Codhe, ɑcungi wëywönɑni kì kɑɑm bɑ̈ggi oløg ɑ́ryew mø kelli gen cyɑ̈gi, o dörri gen bɑ ɑger ki kïttì. Keny-ɑ ɑ́liidh wëywödø yi ɑderø, ɑkëjje ree dijje’ ri dörø, kɑ tyeli Bɑlɑɑm pög yi dörɑni. Kɑ ɑderø cigi gøjø yi Bɑlɑɑm. Kɑ wëywönɑni cig-ɑ kedhi bøli gen, ɑcunge kì kɑɑm me dhiing ki mendwøng, me bong keny këjji. Keny-ɑ ɑ́liidh wëywödø yi ɑderø, ɑbudde kì piny kí Bɑlɑɑm kì köme, ɑrënyi pyëw Bɑlɑɑm kɑ ɑderø gøje. Codhe, kɑ ɑderø dhøge tug yi Jwøng-ɑ Ácwɑ̈ɑ̈j, ɑköbbe Bɑlɑɑm kinni, “Á ngø ɑ ɑ́göggɑ yïn, ɑ pere gøøj yɑn ki tyel ɑ́dɑ̈g?” Alöggi Bɑlɑɑm kinni, “Yï ɑ́pwöd yi yɑn kɑ per kɑ ɑ́gwøøg dhëg! Ke di bëëde e dɑ pilø kì cingɑ yï di nɑ̈gɑ.” Alöggi ɑderø kinni, “Yɑ pɑth ki ɑder-ɑ köme nyi cyɑ̈dhi yi yïn cøn? Dɑ gïjø me ni men mɑ ɑ́pɑ̈nyɑ ki göggi yïn?” Kɑ Bɑlɑɑm okööbø kinni, “Bong gøn!” Codhe, ɑyieeb nyingi Bɑlɑɑm yi Jwøng-ɑ Ácwɑ̈ɑ̈j, kɑ wëywönɑni lidhe e ócungø ki pilø kì cinge, ɑleeng Bɑlɑɑm ree piny wïje kuul en piny. Apëjji wëywödø kinni, “Ede ɑderø ɑ ɑ́gøjí ki tyel ɑ́dɑ̈g? Yɑ ɑ́bï-ɑ be cyëëgi yuuí, mɑ́ yï nuti dwɑddø kinni o yï kedh. De yɑ ɑ́lidh yi ɑderø, ɑkëjje ki tyel ɑ́dɑ̈g. Keløg e pɑ di këjji, yï di nɑ̈g yi yɑn kɑ ɑderø wiyɑ.” Alöggi Bɑlɑɑm kinni, “Yɑ ɑ́røngi, kwïj yi yɑn kinni yï ócungø kì yuuɑ. De ɑnɑn keløg yï pɑ dwɑddi kinni o yɑ kedhɑ, yɑ ceg-ɑ døøg pɑc.” Akööb wëywödø kinni, “Pɑth, kedh wuki jøgɑni, kɑ yï kwøb møg-ɑ óköbbɑ yïn keti gen.” Codhe, ɑkedh Bɑlɑɑm geki jøg-ɑ ɑ́ör yi Bɑlɑk. Keny-ɑ ɑ́lïng Bɑlɑk kinni i Bɑlɑɑm obëënø, ɑkedhe be pɑɑrii Aɑr, kɑɑl-ɑ ying kömi Nɑm Arnön kì wïj tuung Moɑb. Kɑ Bɑlɑɑm pyëje kinni “Yïde ɑ bɑɑny bëënø keny-ɑ ɑ́kwøngɑ yïn ki cwølø? Yï ɑ́ceg-ɑ rumø kinni yï koo theg yi yɑn?” Aköbbi Bɑlɑk yi Bɑlɑɑm kinni, “Dɑ́ ngø yɑ ɑ́bï ɑnɑn yøw? O yɑ koo kwøb-ɑ møgɑ, de yɑ ókwøb-ɑ møg-ɑ óköbbi yɑn yi Jwøng-ɑ Ácwɑ̈ɑ̈j ceth.” Codhe, ɑdhwödh Bɑlɑk geki Bɑlɑɑm kɑ ge kedh-ɑ kɑɑl Kudhöt. Kɑ Bɑlɑk ongɑ̈dø ki dhög kí dyëg gɑ gëdhhì, kɑ Bɑlɑɑm geki jyɑ̈gg-ɑ cyɑ̈dhi ki en nënge ki rïngø. Dhuki ɑkïdhi Bɑlɑɑm Bɑmöth Bɑɑl yi Bɑlɑk kun-ɑ nënni kwï tyëng Isrɑil. Aköbbe Bɑlɑk kinni, “Gëëd ki këlli lɑm ɑ́bïryew kì keny, kɑ yɑ muuj ki wɑ̈dhh ɑ́bïryew kí órömm ɑ́bïryew.” Kɑ gïg-ɑ ɑ́kwøb gwøg yi Bɑlɑk, kɑ wɑ̈thi këlli lɑm møgɑni rɑ̈ɑ̈b ki gëdhhì. Wɑdh kí órömø ɑ ɑ́rɑ̈b kì wïj këli lɑm ɑ́kyel. Codhe, ɑköbbi Bɑlɑk yi Bɑlɑɑm kinni, “Cungí kì buti gënhí, gënh-ɑ nyi rɑ̈b bëne, kɑ wiy yɑ kedhɑ men-ɑ óbëën Jwøng-ɑ Ácwɑ̈ɑ̈j yïɑ, yï óköbbɑ møg-ɑ óyɑ̈lle yɑn bënn.” Codhe, ɑkedhe wïj nyɑ kït e kete. Kɑ Jwøk bï-ɑ yï Bɑlɑɑm, ɑköbbii yi Bɑlɑɑm kinni, “Yɑ ɑ́göög ki këlli lɑm ɑ́bïryew, kɑ yɑ orɑ̈bø ki wɑdh kí órömø kì wɑ̈thi gen bënn.” Aköbbi Bɑlɑɑm yi Jwøk ki gïn-ɑ óköbbe Bɑlɑk, ɑöre gøn yï Bɑlɑk o gø köbbe møgɑni. Adøøge, kɑ Bɑlɑk yuude e nudd e ócungø kì buti gënhe, gënh-ɑ nyi rɑ̈b bëne, kí jɑggi Moɑb bënn kì bute. Atööng møg yi Bɑlɑɑm: “Yɑ ɑ́kɑ̈ɑ̈l yi Bɑlɑk rɑ̈ɑ̈dh Moɑb, yɑ ɑ́kɑ̈ɑ̈l kì Arɑm kì thɑ́ kïtti wɑɑng cyɑ̈ɑ̈ng mwøl, ɑ́kööb kinni, ‘Bïí lɑ̈mmí Isrɑil cyën! Töng cyënni Isrɑil!’ Ede ngɑn-ɑ ógyëdhø yi Jwøk ɑ lɑ̈mmɑ en cyën? Yɑde ɑ töngɑ cyën mø nuti kwøbø yi Jwøng-ɑ Ácwɑ̈ɑ̈j? Ge onennø yi yɑn yɑ ying-ɑ wïj kït. Ge okwøllø yi yɑn ki nennø yɑ ying-ɑ wïj ótong. Ge bɑ pödhø me bëëde ying wɑ̈ye, ge ngɑ̈ny wøw kinni ge bɑ ɑgyëdh yi Jwøk Kwɑrri Yɑgob nɑ tør Ge pɑ cuggi kwɑnø. Wiy yɑ óthøwɑ ki thøwi ngɑntir, wiy yɑ óthøwɑ ki thøwi jii Jwøk.” Aköbbi Bɑlɑɑm yi Bɑlɑk kinni, “Á gïn ɑ göggí yɑn kinnï? Yï ɑ́kɑ̈ɑ̈lɑ’ be lɑ̈mmi cyën tyëngmɑ̈ɑ̈nø, de yöd yï ceg-ɑ gen ki kwëngø?” Alögge kinni, “Yɑ ɑ́kwøb-ɑ gïn-ɑ ɑ́köbbi yɑn yi Jwøng-ɑ Ácwɑ̈ɑ̈j, kinni kwøbɑ en.” Aköbbi Bɑlɑɑm yi Bɑlɑk kinni, “Bïí kedhi wɑ keny megø me cuggí nenní kwï tyëng Isrɑil. Kɑ ge lɑ̈mmí cyën kì kenyɑni.” Akïdhe gøn pwödhi Dhöpïm kì wïj Kïti Pisgɑ̀. Agëëde kì kenyɑni ki këlli lɑm ɑ́bïryew, kɑ orɑ̈bø kì kömi gen ki gëdhhì, wɑdh ki órömø kì wïj këlø ɑ́kyel. Aköbbi Bɑlɑk yi Bɑlɑɑm kinni, “Cungí kì buti gënhí, gënh-ɑ rɑ̈b bëne, kɑ wiy yɑ kedhɑ be yïddø wøki Jwøk kì kun-ɑcɑ̀.” Kɑ Jwøng-ɑ Ácwɑ̈ɑ̈j bï-ɑ yï Bɑlɑɑm, ɑköbbe gøn ki møg-ɑ óköbbe Bɑlɑk, ɑöre gøn yï Bɑlɑk, o gø köbbe møgɑni. Adøøge, kɑ Bɑlɑk yuude e nudd e ócungø kì buti gënhe, gënh-ɑ nyi rɑ̈b bëne, kí jɑggi Moɑb bënn kì bute. Apyëjii yi Bɑlɑk kinni, “Á ngø ɑ ɑ́kwøb yi Jwøng-ɑ Ácwɑ̈ɑ̈j?” Atööng møg yi Bɑlɑɑm: “Bïí, Bɑlɑk wɑ̈d Dhepor Kɑ møg-ɑ kwøbɑ lïngí kidøøj. Jwøk pɑ ni dhɑnhø ɑ nyi pëëdø. Pɑ ni dhɑnhø ɑ nyi wil rumme. Gïn-ɑ kwøbe nyi gwøge’ gwøgø. Kɑ̀ kööbe, nyi kwøb-ɑ dyër. Yɑ ɑ́köbb-ɑ kwëng. Árum ki gëdhhø, o gyëdhhɑni pɑ cuggi dwøøgø yi yɑn. Nënni e bong rɑj møg-ɑ óbï kömi Isrɑil. Bong cyën kì ree, Jwøng-ɑ Ácwɑ̈ɑ̈j Jwøøg gen ying-ɑ kömi gen, en ɑ wør yi gen ɑ́ rɑ̈ɑ̈dh gen. Jwøk ɑ ɑ́kɑ̈ɑ̈l gen wɑ̈g kì Rïp. O ceg-ɑ nyïɑ̈ggø kiper gen ni wɑnh-ɑ thwønh. Bong yɑnh lwɑ̈ɑ̈ng Isrɑil ki thyëdhø, keje pɑ cuggi rɑngø, mɑ́ ɑnɑn teedø ɑ́døøg be kwøb kì ree kinni, Jwøøng teeg nɑ ngø! Pödhi Isrɑil nɑ ngur me teg, pɑ nyi ywömø e nuti nɑ̈ggø, kɑ gïn-ɑ mɑge nyi cɑme, kɑ reme nyi mɑdhe.” Aköbbi Bɑlɑɑm yi Bɑlɑk kinni, “Ge ko yöd ge ceg kɑ kwëngø yi yïn, yï ceg-ɑ bɑ̈nyø ki lɑ̈mmi gen cyën!” Alöggi Bɑlɑɑm kinni, “Yï nuti köbbø yi yɑn kinni yɑ ógwøg-ɑ gïn-ɑ köbbi yɑn yi Jwøng-ɑ Ácwɑ̈ɑ̈j?” Kɑ Bɑlɑk okööbø kinni, “Bïí kedhi wɑ keny megø, men-ɑ óyïëy Jwøk ki lɑ̈mmi gen cyën yi wɑ kì kenyɑni.” Codhe, ɑkïdhe Bɑlɑɑm wïj Kïti Peor. Kïnɑni nenn-ɑ yij ryɑng. Kɑ Bɑlɑk köbbi yi Bɑlɑɑm kinni, “Gëëd ki këlli lɑm ɑ́bïryew kɑ yɑ muuj ki wɑ̈dhh ɑ́bïryew, kí órömm ɑ́bïryew.” Kɑ gïg-ɑ ɑ́kwøb yi Bɑlɑɑm gwøg yi Bɑlɑk. Kɑ orɑ̈bø kì wɑ̈thi këllɑni ki gëdhhì; wɑdh kí órömø kì wïj këlø ɑ́kyel. Kɑ yod yi Bɑlɑɑm kinni Jwøng-ɑ Ácwɑ̈ɑ̈j dwɑdd-ɑ gyëdhi tyëng Isrɑil, ɑcöge e nuti kedhi be yïddø’ Jwøng-ɑ Ácwɑ̈ɑ̈j, ni tyeli mɑl geki ryeew gen. Wïje ɑ́wɑ̈dhe’ løg kuni yij pɑ̈l, ɑlidhe tyëng Isrɑil ge guddø gɑ kɑ̈llì; gøl ying-ɑ wɑ̈ye, gøl ying-ɑ wɑ̈ye. Kɑ wëyi Jwøk bï-ɑ köme, ɑtönge møg: “Kwøbbi Bɑlɑɑm wɑ̈d Beor. Kwøbbi jɑl-ɑ bɑ tyëd. Jɑl-ɑ cuggi lïngi møg-ɑ kømmi yi Jwøk, ɑ lidh gïn-ɑ cɑ̈rrii yi Áyïmø. Møg-ɑ cɑ̈rri yɑn yi Áyïmø nyi lidh yi yɑn nyingɑ yieeb yɑn. Kemmi Isrɑil myëër, ge cungi nɑ ɑtøddi kɑnø, ge nɑ bɑ̈gg kì tøggi nɑm. Ge nɑ yenh sɑbɑr møg-ɑ ópidhø yi Jwøng-ɑ Ácwɑ̈ɑ̈j, wɑlɑ̀ nɑ yenh sɑndɑl kì tøggi nɑm. Kødh óbëëd e gïïr kì piny gen, pwödhhi gen pɑ jɑ̈ddi ki kødh, rɑ̈ɑ̈dh gen óbëëd e dwøng kibøli Rɑ̈dh Agɑg. Pödhe ódøngi kɑ ólɑ̈nyø. Ge ɑ́kɑ̈ɑ̈l wɑ̈g ɑ yi Jwøk kì Rïp, o Jwøk ceg-ɑ nyïɑ̈ggø kiper gen ni wɑnh-ɑ thwønh. Pödhh-ɑ mɑ̈n ki gen cɑme’ cɑmø, gï ókëlle kɑ cu gen møde. Pönhɑni nɑ ngur me teg, kɑ̀ nine, bong ngɑn pɑ̈nyii ki tugø. Ngɑn lɑ̈mmi Isrɑil gyëdh, ceg kɑ gyëdhø o ngɑn lɑ̈mmii cyën, ceg kɑ cyenø.” Amɑɑg Bɑlɑk yi liny kɑ cinge kere, ɑkööbe kinni, “Yï ɑ́cwøl yi yɑn kɑ per lɑ̈mmi tyëngmɑ̈ɑ̈nø cyën, de yï yöd yï lɑ̈mm-ɑ gen gyëdh ki tyel ɑ́dɑ̈g! Anɑn dhwöödh kedhí pödhi wun, yɑ ɑ́kööb kinni yï ótheg yi yɑn, de yï ɑ́mɑ̈ɑ̈n thegø yi Jwøng-ɑ Ácwɑ̈ɑ̈j.” Alöggi Bɑlɑɑm kinni, “Jøg-ɑ ɑ́örí yɑn ɑ́köbbɑ kinni, “Bɑlɑk, cɑgg yɑ mëgge gøle gø pɑ̈ɑ̈ng en ki dhɑb geki ɑ́tegø, møg-ɑ ókwøb yi Jwøgɑ, Jwøng-ɑ Ácwɑ̈ɑ̈j, pɑ pyem yi yɑn, cɑgg ɑ́ kì ri kwøb mø yöd, yɑ ókwøb-ɑ møg-ɑ köbbi yɑn yi Jwøng-ɑ Ácwɑ̈ɑ̈j kinni i kwøbɑ gen.” Aköbbi Bɑlɑk yi Bɑlɑɑm kinni, “Anɑn yɑ døøg-ɑ kun-ɑ di tyëng pödhi wøn, de yï ceg kɑ mɑ̈ɑ̈gø ki köbbø yi yɑn ki gïg-ɑ ógöggi wun yi tyëng Isrɑil dhuki megø.” Codhe, ɑtönge møg: “Kwøbbi Bɑlɑɑm wɑ̈d Beor, kwøbbi jɑl-ɑ nyi tïïdø kidøøj. Jɑl-ɑ cuggi lïngi møg-ɑ kømmi yi Jwøk, ɑ lidh gïn-ɑ cɑ̈rrii yi Jwøng-ɑ Pëddi Döng. Møg-ɑ cɑ̈rri yɑn yi Áyïmø, nyi lidh yi yɑn nyingɑ yieeb yɑn. Gïn-ɑ ócwöb dhuki megø onennø yi yɑn. O pödhi Isrɑil onennø yi yɑn. Rɑ̈dh me ni kyelø me tɑr ócwöb kì pönhɑni Óbëëdø e nɑ kyel-ɑ nyi cør yij mɑl. Jɑggi Moɑb ópwööde piny. Kwɑrri Ceeth ótyëge bënn. Tyëng-ɑ mɑɑnii ótyɑme kì Edöm Kɑ piny gen gwøge ɑ́ mee. Kedh Isrɑil ceg-ɑ pëddø tyɑ̈mø. Ge ónyøn yi pödhi Isrɑil. Ngɑn pɑ̈r kì kɑɑl nɑ̈ge’ nɑ̈gø ceth.” Acɑ̈rrii kwɑrri Amɑlek, kɑ møg tönge kinni, “Amɑlek ɑ mɑl kibøli pödhh bënn. De bɑ men wïje pɑ̈ɑ̈dh gïti ɑtheer.” Acɑ̈rrii kwɑrri Ken, kɑ møg tönge kinni, “Keny-ɑ bëëd yi yïn døøj bong gïn böggí, nɑ ød winyø men-ɑ ógeer wïj yɑdh me bɑ̈r De men-ɑ́ wun, wu tyëng Ken, wu óryɑ̈g, kɑ wu køøl wu bɑ ɑmɑgg yi tyëng Acuur.” Kɑ møg tönge kinni, “Tyëng-ɑ congi ri gen kì kuni wɑɑng wuudø bɑ møg? Dɑ ji mø bï be mɑ̈nyø ge kɑ̈ɑ̈l-ɑ Kobros. Acuur ómɑg yi gen gïti Eber. De ge ólony ki tɑ̈ɑ̈y piny, o ge pɑ dhwödh gïti ɑtheer.” Codhe, ɑdhwödh Bɑlɑɑm, kɑ døøg-ɑ pödhi gen. Kɑ Bɑlɑk ókedhø kì wɑ̈ye. Keny-ɑ ɑ́bëëd tyëng Isrɑil ge ying-ɑ Töör Álwiy, jø Isrɑil ɑ́kedhi ri nyigi Moɑb. Kɑ ge cwøøl be mɑlli jwøøg Moɑb. Jwøngɑni ɑ́kwɑjji yi gen, kɑ ge ocyɑ̈mø ki jɑmm-ɑ mëggi jwøngɑni, ɑ løg Bɑɑl Peor. Kɑ pyëw Jwøng-ɑ Ácwɑ̈ɑ̈j órënyø ki gen, ɑ köbbe Mosɑ̀ kinni, “Kwɑny jɑggi Isrɑil bënn, kɑ ge ngɑɑb kì bøli teedø bëne. Gwøg møg-ɑ ɑ́köbbɑ yïn, o pyëwɑ lɑ̈ɑ̈me ki tyëng Isrɑil.” Kɑ jɑgg köbbi yi Mosɑ̀ kinni, “Nɑ̈gu tyëng-ɑ ɑ́kedhi be mɑlli Bɑɑl Peor. Nyi nɑ̈g ngɑn tyëng-ɑ bɑ tyëng gøl gen.” Kɑ wɑ̈d Isrɑil megø obëënø ge ócyɑ̈dhø ki nyɑɑr Midyɑn, kɑ gø kïdhe yij kemɑ̀ mee e onennø yi teedø bëne, e teenɑni óywöngø kì dhø Kemi Kwëër Jwøng-ɑ Ácwɑ̈ɑ̈j. Adhwödh Pineɑs wɑ̈d Eliɑdhɑr, wɑ̈d ókwërø Aɑron, kɑ ókɑ̈bbø ki tøng, kɑ kedh-ɑ bɑng jɑlɑni geki nyɑnɑni kì yij kem-ɑ ɑ́kedhi yi gen, ɑcööbe gïn. Codhe, ɑcungi yømø nɑ̈ɑ̈g kɑ ówïyø nɑ̈g ki ji. Yømɑni ɑ́cungi e rum nɑ̈g ki ji ɑ́lïp pyɑ̈r ɑ́ryew wïdɑ́ngwen. Aköbbi Mosɑ̀ yi Jwøng-ɑ Ácwɑ̈ɑ̈j kinni, “Pyëwɑ ɑ́dwöög kì bɑng gïn-ɑ ɑ́gwøg yi Pineɑs wɑ̈d Eliɑdhɑr, wɑ̈d ókwërø Aɑron, wɑ̈ddi Isrɑil bɑ møg di tyëg yi yɑn ki nɑ̈gø, mɑ́ yɑ ɑ́mɑg yi tyiel. Köbbí Pineɑs kinni wø reb-ɑ kwøb ki en, kwøb møg-ɑ ócög gɑ kwööng mër gïti ɑtheer. En geki wɑ̈dde kí kwɑrre, ge ócög gɑ ókwër gïti ɑtheer. Mɑ́ e ɑ́mɑg yi tyiel kiperɑ, kɑ bøli Isrɑil gøøme, ɑlɑ̈ɑ̈m pyëwɑ ki gen.” Nyingi wɑ̈d Isrɑil men-ɑ ɑ́nɑ̈g geki nyɑɑr Midyɑn cwøl ɑ́ Dhimrì wɑ̈d Sɑlu, o bɑ jɑngi gøl gen, kì wïj gøl Cimeøn. O nyɑɑr Midyɑn men-ɑ ɑ́nɑ̈g kyeel ki en nyinge cwøl ɑ́ Kosbì nyɑɑr Dhur, o Dhur ɑ́bëëd ɑ́ jɑngi wïj kɑl kì Midyɑn. Aköbbi Mosɑ̀ yi Jwøng-ɑ Ácwɑ̈ɑ̈j kinni, “Pɑ̈ɑ̈r kömi tyëng Midyɑn, kɑ ge nɑ̈ɑ̈g, Kipe gïnrɑj men-ɑ ɑ́göggi wun yi gen, ɑ wëny gen wun kì Peor, o kipe Kosbì nyɑn-ɑ ɑ́nɑ̈g kì cyɑ̈ɑ̈ng yømø nɑ̈ɑ̈g kì Peor.” Keny-ɑ ɑ́lɑ̈ɑ̈ny yømø nɑ̈ɑ̈g, ɑköbbi Mosɑ̀ geki Eliɑdhɑr wɑ̈d Aɑron yi Jwøng-ɑ Ácwɑ̈ɑ̈j kinni, “Kwɑnu tyëng Isrɑil gɑ wɑ̈thi kɑ̈llì, gweed jøg-ɑ cwøw bënn, cɑg kì ri tyëng-ɑ runni gen bɑ pyɑ̈r ɑ́ryew gïti mɑl, ɑ́ ngɑn cuggi kedhi be liny.” Acwøøl teedø thwøri Moɑb kì kömi Nɑm Urdun kì bøli Yerikö yi Mosɑ̀ geki Eliɑdhɑr, kɑ ge okööbø kinni, “Kwɑɑn ji, cɑg kì ri ngɑn runne bɑ pyɑ̈r ɑ́ryew gïti mɑl ni kɑ ɑ́kwøbii yi Jwøng-ɑ Ácwɑ̈ɑ̈j.” Møg bene gen tyëng Isrɑil møg-ɑ ɑ́bï wɑ̈g kì Rïp: Wïj gøl Ruben: Ruben ɑ bɑ kɑyi Yɑgob. Gøl Aɑnök ki Pɑlu, Ëdhrön kí Kɑrmì. Kɑ̈llɑni kwɑnni jø gen bɑ ɑ́lïp pyɑ̈r ɑ́ngwen wïdɑ́dɑ̈g kí miy ɑ́bïryew kí pyɑ̈r ɑ́dɑ̈g. Gøl Pɑlu bɑ Eliɑb geki wɑ̈dde Nemuel, kí Dɑthɑn, kí Abirɑm. Bene gen Dɑthɑn geki Abirɑm møg-ɑ ɑ́kwɑny yi teedø. Gen ɑ ɑ́bɑny jyɑ̈gi Mosɑ̀ geki Aɑron, ɑrëbi gen ki jø Körɑ̀ ge bɑny-ɑ Jwøng-ɑ Ácwɑ̈ɑ̈j. Ayieb piny ree kɑ gï mwønye, ɑthøw gen geki Körɑ̀ kí jie, keny-ɑ ɑ́rɑ̈ɑ̈b ji miy ɑ́ryew kí pyɑ̈r ɑ́bïj yi mɑc, kɑ ge ogöögø ki ngïji kipe teedø. De wɑ̈ddi Körɑ̀ nuti thøø. Wïj gøl Cimeøn: Gøl Cimeøn dɑ Nemuel, kí Yɑmïn, kí Yɑkin, Dherɑ̀, ki Cɑul. Kɑ̈llɑni kwɑnni jø gen bɑ ɑ́lïp pyɑ̈r ɑ́ryew wïdɑ́ryew kí miy ɑ́ryew. Gøl Gɑd: Gøl Gɑd ɑ di Dhepön, kí Agì, kí Cunì, Odhnì, Erì, Aröd kí Arelì. Kɑ̈llɑni kwɑnni jø gen bɑ ɑ́lïp pyɑ̈r ɑ́ngwen kí miy ɑ́bïj. Kɑ̈llɑni kwɑnni jø gen bɑ ɑ́lïp pyɑ̈r ɑ́bïryew wïdɑ́bïkyel kí miy ɑ́bïj. Wïj gøl Isɑkɑr: Gøl Isɑkɑr ɑ di Tölɑ̀, Puɑ̀, Yɑcub kí Cimrön, Kɑ̈llɑni kwɑnni jø gen bɑ ɑ́lïp pyɑ̈r ɑ́bïkyel wïdɑ́ngwen kí miy ɑ́dɑ̈g. Wïj gøl Dhebulun: Gøl Dhebulun ɑ di Sered, Elön, kí Yɑliil. Kɑ̈llɑni kwɑnni jø gen bɑ ɑ́lïp pyɑ̈r ɑ́bïkyel kí miy ɑ́bïj. Wïj gøl Yosep: Yosep yïe dɑ wɑ̈dd ɑ́ryew. Mɑnɑsè ki Eprɑim. Mɑkir wɑ̈d Mɑnɑsè ɑ bɑ wïyi Gilyɑd, o gøl Gilyɑd ɑ di Iedher, Keleg, Asriel, Cekïm, Cemïdɑ̀, kí Eper, Dhelopekɑd wɑ̈d Eper yïe bong wɑ̈dd, de ɑ́nywøl-ɑ mɑ̈nn, nyingi gen bɑ Mɑklɑ̀, Nöö, Oglɑ̀, Milkɑ̀ ki Tirdhɑ̀. Kɑ̈llɑni kwɑnni jø gen bɑ ɑ́lïp pyɑ̈r ɑ́bïj wïdɑ́ryew, kí miy ɑ́bïryew. Wïj gøl Eprɑim: Gøl Eprɑim ɑ di Cuthelɑ̀, kí Becer, kí Tɑɑn. Cuthelɑ̀ ɑ ree kɑ̈ɑ̈l yi gøl Erɑn. Kɑ̈llɑni kwɑnni jø gen bɑ ɑ́lïp pyɑ̈r ɑ́dɑ̈g wïdɑ́ryew kí miy ɑ́bïj. Bene gen kɑ̈ll-ɑ kɑ̈ɑ̈l ri Yosep ɑgɑk. Wïj gøl Ben Yɑmïn: Gøl Ben Yɑmïn ɑ di Belɑ̀, Acbel, Akirɑm, Cepupɑm kí Upɑm. Gøl Ard kí gøl Nɑɑmɑn kɑ̈ɑ̈l-ɑ ri gøl Belɑ̀. Kɑ̈llɑni kwɑnni jø gen bɑ ɑ́lïp pyɑ̈r ɑ́ngwen wïdɑ́bïj kí miy ɑ́bïkyel. Wïj gøl Dɑn: Gøl Dɑn ɑ bɑ gøl Cuɑm. Kwɑnni jø gølɑni bɑ ɑ́lïp pyɑ̈r ɑ́bïkyel wïdɑ́ngwen, kí miy ɑ́ngwen. Wïj gøl Aceer: Gøl Aceer ɑ di Imnɑ̀, Icbì, Beriyɑ̀. Keber geki Mɑlkiel kɑ̈ɑ̈l-ɑ ri gøl Beriyɑ̀. Aceer yïe ɑ́dɑ nyɑre me cwøl ɑ Serɑ̀. Kɑ̈llɑni kwɑnni jø gen bɑ ɑ́lïp pyɑ̈r ɑ́bïj wïdɑ́dɑ̈g, kí miy ɑ́ngwen. Wïj gøl Nɑptɑlì: Gøl Nɑptɑlì ɑ di Yɑkdhil, Gunì, Yedher, kí Cilem. Kɑ̈llɑni kwɑnni jø gen bɑ ɑ́lïp pyɑ̈r ɑ́ngwen wïdɑ́bïj, kí miy ɑ́ngwen. Jø Isrɑil bënn, kwɑnni gen bɑ ɑ́lïp miy ɑ́bïkyel kí ɑ́kyel, kí miy ɑ́bïryew kí pyɑ̈r ɑ́dɑ̈g. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Pɑ̈ngí piny kì kelli kɑ̈llì, nëngí wïj gøl ki men røøm ki kwɑnne. Gøl-ɑ dwøng nyi mëggí piny me dwøng, kɑ gøl-ɑ thinh nyi mëggí piny me thinh, mëggí wïj kɑl piny-ɑ røøm kí kwɑnne. De piny pɑ̈ngi e ceg kɑ lengø ki wél, e cungi ɑ́ nyingi kwɑyy, e kɑ̈ll-ɑ døngø wéli gen ying-ɑ wɑ̈yi gen, o kɑ̈ll-ɑ thønhø wéli gen ying-ɑ wɑ̈yi gen.” Wïj gøl Leebì ɑ di kɑ̈llì møg: Gercön, Kɑ̈ɑ̈th kí Merɑrì. Gølɑni ɑ ree kɑ̈ɑ̈l yi kɑ̈ll-ɑ thønhø møg: Libnì, Kibrön, Mɑklì, Mucì, kí Körɑ̀. Kɑ̈ɑ̈th ɑ bɑ wïyi Amrɑm, jɑl-ɑ ɑ́nywøm nyɑɑr Leebì nyɑn-ɑ cwøl ɑ́ Yökebed, nyɑn-ɑ ɑ́nywøl kì Rïp. Ányöddi yi Yökebed ki wɑ̈dd ɑ́ryew, ɑ løg Aɑron kí Mosɑ̀, kí Miryɑm nyimï gen. Aɑron yïe ɑ́dɑ wɑ̈dd ɑ́ngwen: Nɑdɑb, Abiu, Eliɑdhɑr kí Ithɑmɑr. Nɑdɑb ɑ́thøw geki Abiu kipe kɑ ɑ́kïdhi gen bøli Jwøng-ɑ Ácwɑ̈ɑ̈j ki mɑc me pɑth ki ɑkwër. Kwɑnni cwøw kì gøl Leebì, cɑg kì ri men-ɑ ónywølø e yïe dɑ dwɑ̈y ɑ́kyel gïti mɑl, ɑ́bëëd gɑ ɑ́lïp pyɑ̈r ɑ́ryew wïdɑ́dɑ̈g. Ge ɑ́gweed-ɑ wɑ̈yi gen, ge nuti gweed kelli jø Isrɑil, mɑ́ e bong piny mɑ ɑ́mëggi gen kì Isrɑil. Kɑ wɑ̈thi kɑ̈llɑni órumø ki gwedø bënn yi Mosɑ̀ geki Eliɑdhɑr, keny-ɑ ɑ́kwɑn gen teedø kì kömi Nɑm Urdun kì bøli Yerikö. Bong dhɑnhø ɑ́kyel mɑ nudd e onëënø kì kelli jøg-ɑ ɑ́ying mø nud keny-ɑ ɑ́kwøøng ji ki gwedø yi Mosɑ̀ geki Aɑron kì yij Ryɑɑng Sinɑy. Ákwøb yi Jwøng-ɑ Ácwɑ̈ɑ̈j ceth kinni ge ceg-ɑ thøø bënn kì yij ryɑng, rïnyɑni ɑ́thøw bëne den-ɑ́ Kɑlib wɑ̈d Yepunɑ̀ geki Jöcwø wɑ̈d Nun ɑ ɑ́döng ge nuti thøø. Kɑ nyigi Dhelopekɑd wɑ̈d Eper, wɑ̈d Gilyɑd, wɑ̈d Mɑkir, wɑ̈d Mɑnɑsè wɑ̈d Yosep obëënø. Nyingi woɑni bɑ Mɑklɑ̀, Nöö, Oglɑ̀, Milkɑ̀ ki Tirdhɑ̀. Kɑ ge ócungø kì bøli Mosɑ̀ geki ókwërø Eliɑdhɑr, e pëjji pödhø nud geki teedø bëne kì dhø Kemi Kwër, kɑ ge okööbø kinni, “Wïyi wøn ɑ́thøw kì yij pɑ̈l, e bong wɑ̈de. Nuti’ ying-ɑ kelli jø Körɑ̀, jøg-ɑ ɑ́köör kì ri Jwøng-ɑ Ácwɑ̈ɑ̈j, ɑ́thøw kɑ per orøge kì wɑ̈ye. Mɑ́ wïyi wøn yïe bong wɑ̈dde, bene ɑ pere lɑ̈ɑ̈ny nyinge kì Isrɑil? Nëngi wøn ki piny kì kelli wɑddi wïyi wøn.” Akïdhi gøøny gen bøli Jwøng-ɑ Ácwɑ̈ɑ̈j yi Mosɑ̀. Aköbbi Mosɑ̀ yi Jwøng-ɑ Ácwɑ̈ɑ̈j kinni, “Nyigi Dhelopekɑd, kømm-ɑ dyër, nëngí gen ki piny kì kelli wɑddi wïyi gen. Wiy piny wïyi gen lɑg yi gen. Köbbí tyëng Isrɑil kinni, othøw dhɑnhø e bong wɑ̈d me wiy yi en, lɑɑg jɑmme yi nyɑre. Ke bong yïe nyɑre, lɑɑg jɑmme yi nyiimen yɑɑg-ɑ cwøw. Keløg yïe bong nyiimen yɑɑg-ɑ cwøw, lɑɑg jɑmme yi nyiimï wïye yɑɑg-ɑ cwøw. O keløg e bong nyiimï wïye yɑɑg-ɑ cwøw, lɑɑg jɑmme yi wɑɑd gen, wɑn-ɑ cyɑ̈gi ki en, kɑ jɑmmɑni mïdhi yi ngɑnɑni gɑ møge. Mïdhi møgɑni yi tyëng Isrɑil gɑ kwöng. Ciggɑ møg, mïdhi gen ceth yi tyëng Isrɑil.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Yedhí mɑl wïj Kïti Abɑrïm, kɑ piny-ɑ mëggɑ tyëng Isrɑil liidh. Orume ki lidhø yi yïn, o yï kedhí bɑng jií ni Aɑron ómyëw, mɑ́ ciggɑ ɑ́pyem-ɑ yi wun ryeet kì yij pɑ̈ɑ̈l Dhin. Keny-ɑ ɑ́köör teedø kì riɑ kì Merïbɑ̀, wu ɑ́bɑ̈nyi nyodhi tegɑ kwërø kì ri pï kì bøli teedø.” (Merïbɑ̀ bɑ wɑɑng pï kì Gɑdic kì yij pɑ̈ɑ̈l Dhin). Akwɑjji Jwøng-ɑ Ácwɑ̈ɑ̈j yi Mosɑ̀ kinni, “Yïn ɑ Jwøk, Jwøng-ɑ Ácwɑ̈ɑ̈j, bɑ yïn ɑ yïí nyi kɑ̈ɑ̈l yi wëy bënn, yɑ kwɑjj-ɑ yïn, kɑ̈bbí ki dhɑnhø men-ɑ ópyejji ji, ɑ ópyejji gen kì yij liny, o yɑyí cöge e pɑ göögø ni dyëg møg bong ngɑn kwɑy gen.” Aköbbi Mosɑ̀ yi Jwøng-ɑ Ácwɑ̈ɑ̈j kinni, “Jöcwø wɑ̈d Nun bɑ jöd, kwɑɑny kɑ cinggí thɑɑny wïje. Kɑ cuung kì bøli ókwërø Eliɑdhɑr, geki teedø bëne, kɑ kwøøb kì kenyɑni kinni bɑ en ɑ kwɑny kejí. Kɑ nëngí kì ri mɑ̈rí, o ówør yi tyëng Isrɑil bënn. Ókøny yi ókwërø Eliɑdhɑr. Eliɑdhɑr ónyudhɑ ki gïn-ɑ dwɑddɑ kì ri Urïm geki Thumïm. Eliɑdhɑr ɑ nyudhi Jöcwø geki teedø bëne ki gïg-ɑ gøggi yi gen bënn.” Kɑ Mosɑ̀ møg-ɑ ɑ́köbbii yi Jwøng-ɑ Ácwɑ̈ɑ̈j gwøge bënn. Kɑ Jöcwø cuunge kì bøli Eliɑdhɑr geki teedø bëne. Kɑ Mosɑ̀ cingge thɑɑnye wïj Jöcwø, ɑkwøbe gøn kinni bɑ en ɑ kwɑny keje. Møgɑni ɑ́gwøg yi Mosɑ̀ ceth ni kɑ ɑ́köbbii yi Jwøng-ɑ Ácwɑ̈ɑ̈j. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, i cege tyëng Isrɑil kinni, jwödhø mi Jwøng-ɑ Ácwɑ̈ɑ̈j gënh-ɑ nyi muuj ki mɑc ɑ́ men yømi tole mïni pyëw Jwøng-ɑ Ácwɑ̈ɑ̈j, nyi muuj wun en kì bøli keje ceth. Kɑ ge köbbe kinni, møg bene gen jɑmmi jwödhø møg-ɑ nyi mëggi Jwøng-ɑ Ácwɑ̈ɑ̈j: Nyi muuj órömm ɑ́ryew runi gen ɑ́kyel gɑ gënh-ɑ nyi rɑ̈b bëne yethi cyɑ̈ng ceth. Muuj wun órömø ɑ́kyel kì mwøl, kɑ men-ɑ kyeelø muuj kì böörø, ɑ́kyel muuj kyeel kɑ gïncɑm, kïlø ɑ́kyel møng-ɑ búr me bɑ ɑnyöm ki røthøl ɑ́ryew mø møøw dhetun. Bene jwödhø mi yethi cyɑ̈ng ɑnɑn, men-ɑ nyi rɑ̈b bëne, ɑ́ jwödhø men-ɑ ɑ́gwøg kì Kïti Sinɑy ɑ́ men yømi tole mïni pyëw Jwøng-ɑ Ácwɑ̈ɑ̈j. Kɑ wïj këli lɑm kunyi ki røthøl ɑ́ryew mø møgi oløg ɑ́ kunyi Jwøng-ɑ Ácwɑ̈ɑ̈j. Kɑ óröm-ɑ kyeelø muuj kì böörø, gwøg ni mi mwøl ceth, kyeel ki kunyi møgi oløge, bɑ gënh-ɑ nyi rɑ̈b bëne me yømi tole mïni pyëw Jwøng-ɑ Ácwɑ̈ɑ̈j. Nyi muuj wun ki órömm ɑ́ryew mø bong gïnrɑj kì ri gen kì cyɑ̈ɑ̈ng Sɑbɑth, kyeel ki kïllì ɑ́ryew møng-ɑ búr me bɑ ɑnyöm ki møøw dhetun, geki kunyi møgi oløg. Nyi muuj gënhi Sɑbɑth kì cyɑ̈nggi Sɑbɑth bënn kyeel ki gëdhhi yethi cyɑ̈ng. Nyi muuj wun ki gënh-ɑ nyi rɑ̈b bëne kì ri cɑ̈gi dwɑ̈tt bënn, bɑ wɑ̈dhh ɑ́ryew, ki órömø ɑ́kyel me dwøng, ki órömm ɑ́bïryew mø thønhø runi gen ɑ́kyel ge bong gïnrɑj kì ri gen. Wɑdh ɑ́kyel kɑ̈ɑ̈l kɑ gïncɑm møng-ɑ búr me bɑ ɑnyöm ki møøw dhetun, ki møng-ɑ búr me bɑ kïllì ɑ́ryew. O órömm-ɑ thønhø, ɑ́kyel kɑ̈ɑ̈l kɑ møng-ɑ búr kïlø ɑ́kyel. Jɑmmi jwödhø møgɑni bɑ gënh-ɑ nyi rɑ̈b bëne me yømi tole mïni pyëw Jwøng-ɑ Ácwɑ̈ɑ̈j. Kunyi møgi oløg bɑ røthøl ɑ́ngwen, ɑ kedh ki wɑdh ɑ́kyel, o bɑ røthøl ɑ́dɑ̈g ɑ kedh ki óröm-ɑ dwøng, o óröm-ɑ thinh ɑ́kyel kedh kɑ røthøl ɑ́ryew. Møgɑni bene gen ciggi gënh-ɑ nyi rɑ̈b bëne men-ɑ nyi muuj kì cyɑ̈ng-ɑ mɑl kì yethi dwɑ̈tt bënn kì yij run. Kì yethi cyɑ̈ng bënn, nyi muuj ónywøg wɑ̈dtegø ɑ́ gënhi orøg kyeel geki møg-ɑ kyeelø, kí kunye. Nyi gwøøg Kwëër Ákɑɑdh men-ɑ nyi theeg Jwøng-ɑ Ácwɑ̈ɑ̈j, kì pyɑ̈rø wïdɑ́bïj cyɑ̈nggi kyeel dwɑ̈tt. Kwërɑni cɑ̈g-ɑ́ɑ̀ cyɑ̈nggi dwɑ̈y pyɑ̈rø wïdɑ́bïj, o tyëg-ɑ cyɑ̈ng ɑ́bïryew teedø cɑm-ɑ olwëny. Bong tïj me tïj kì cyɑ̈ng-ɑ mɑl, de cugi wun be mɑ̈ddø. Kɑ wu muuj wun ki gënh-ɑ nyi rɑ̈b bëne. Wɑ̈dhh ɑ́ryew, kí órömø ɑ́kyel me dwøng, ki órömm ɑ́bïryew mø thønhø runi gen ɑ́kyel ge bong gïnrɑj kì ri gen. Kɑ wu muuj wun ki møng-ɑ búr me bɑ ɑnyöm ki møøw dhetun, e bɑ kïllì ɑ́dɑ̈g ɑ kedh ki óröm-ɑ dwøng, o kïlø ɑ́kyel ɑ kedh ki óröm-ɑ thinh ɑ́kyel. Muuj wun thyew ki ónywøg wɑ̈dtegø ɑ́ gënhi orøg, me gøøm bøli orøøg wun. Jɑmmi kwër møgɑni muuj kyeel kɑ jwödhø mi mwøl kì yethi cyɑ̈ng bënn. Nyi muuj wun kinøw ceth ki gënh-ɑ nyi rɑ̈b bëne kì cyɑ̈ngɑni gɑ ɑ́bïryew bënn. Reb ki gënh-ɑ nyi rɑ̈b bëne mi yethi cyɑ̈ng bënn, geki kunyi møgi oløg. Kɑ wu cugi wun be mɑ̈ddø kì bïryeew cyɑ̈nggɑni. Bong tïj thyew ki bïryeew cyɑ̈ng. Keny-ɑ ómuuj byëli Jwøng-ɑ Ácwɑ̈ɑ̈j kì ri cɑ̈gi kɑj ki byel, cøng wun ri wun be mɑ̈ddø, kɑ ko di tïj me tïj kì cyɑ̈ngɑni. Kɑ wu muuj wun ki gënh-ɑ nyi rɑ̈b bëne, me yømi tole mïni pyëw Jwøng-ɑ Ácwɑ̈ɑ̈j. Muuj wun ki wɑ̈dhh ɑ́ryew, kí órömø ɑ́kyel me dwøng, kí órömm ɑ́bïryew mø thønhø runi gen ɑ́kyel, ge bong gïnrɑj kì ri gen. Kɑ wu muuj wun ki byëlø; møng-ɑ búr me bɑ ɑnyöm ki møøw dhetun, wɑdh ɑ́kyel kɑ̈l kɑ kïllì ɑ́dɑ̈g, o óröm-ɑ dwøng kɑ̈l kɑ kïllì ɑ́ryew. O órömm-ɑ thønhø, ɑ́kyel kɑ̈l kɑ kïlø ɑ́kyel. Muuj wun thyew ki ónywøg wɑ̈dtegø ɑ́ gënhi orøg, men gøøm bøli ji. Muuj wun gen geki kunyi møgi oløg men-ɑ kedh ki gen. Kí gënh-ɑ nyi rɑ̈b bëne mi yethi cyɑ̈ng geki byëli Jwøng-ɑ Ácwɑ̈ɑ̈j. Bëëd jɑmmɑni ge bong gïnrɑj kì ri gen. Kyeel cyɑ̈nggi bïryeew dwɑ̈tt bɑ cyɑ̈ng kwër, cøng wun ri wun be mɑ̈ddø kì cyɑ̈ngɑni, kɑ ko di tïj me tïj. Kɑ kɑ̈ngì kodh kì cyɑ̈ngɑni. Muuj wun ki gënh-ɑ nyi rɑ̈b bëne kì cyɑ̈ngɑni ɑ́ men yømi tole mïni pyëw Jwøng-ɑ Ácwɑ̈ɑ̈j, muuj ɑ́ wɑdh ówöb, kí órömø me dwøng, kí órömm ɑ́bïryew mø thønhø runi gen ɑ́kyel, mø bong gïnrɑj kì ri gen. Kí byëlø, møng-ɑ búr me bɑ ɑnyöm ki møøw dhetun, kïllì ɑ́dɑ̈g ɑ kɑ̈ɑ̈l wɑdh, o kïllì ɑ́ryew ɑ kɑ̈ɑ̈l óröm-ɑ dwøng. O órömm-ɑ thønhø, ɑ́kyel kɑ̈l kɑ kïlø ɑ́kyel. Kɑ wu muuj wun ki ónywøg wɑ̈dtegø ɑ́ gënhi orøg, me gøøm bøli ji, reb ki gënh-ɑ nyi rɑ̈b bëne mi yethi cyɑ̈ng, kí byële, kí kunyi møgi oløg. Møgɑni bɑ keni Jwøng-ɑ Ácwɑ̈ɑ̈j men yømi tool gen mïni pyëw Jwøng-ɑ Ácwɑ̈ɑ̈j. Cøng wun ri wun be mɑ̈ddø kì pyɑ̈ri cyɑ̈nggi bïryeew dwɑ̈tt, wu ko cyɑ̈ɑ̈m ki gïncɑm, kɑ wu ko tïj kì cyɑ̈ngɑni. Muuj wun ki gënh-ɑ nyi rɑ̈b bëne kì cyɑ̈ngɑni ɑ́ men yømi tole mïni pyëw Jwøng-ɑ Ácwɑ̈ɑ̈j, muuj ɑ́ wɑdh ówöb, ki órömø me dwøng, kí órömm ɑ́bïryew mø thønhø runi gen ɑ́kyel, ge bong gïnrɑj kì ri gen. Kí byëli gen, møng-ɑ búr me bɑ ɑnyöm ki møøw dhetun. Kïllì ɑ́dɑ̈g ɑ kɑ̈ɑ̈l wɑdh, o kïllì ɑ́ryew ɑ kɑ̈ɑ̈l óröm-ɑ dwøng. O órömm-ɑ thønhø, ɑ́kyel kɑ̈l kɑ kïlø ɑ́kyel. Kɑ wu muuj wun ki ónywøg wɑ̈dtegø ɑ́ gënhi orøg, me gøøm bøli ji. Reb ki gënh-ɑ nyi rɑ̈b bëne mi yethi cyɑ̈ng, kí byële, kí kunyi møgi oløg. Cøngu ri wun be mɑ̈ddø kì pyɑ̈rø wïdɑ́bïïj cyɑ̈nggi bïryeew dwɑ̈tt. Kwërɑni gwøg yi wun ɑ́ men wør wun Jwøng-ɑ Ácwɑ̈ɑ̈j, ki cyɑ̈ng ɑ́bïryew. Kɑ ko di tïj me tïj kì yethi cyɑ̈nggɑni. Muuj wun ki gënh-ɑ nyi rɑ̈b bëne kì kyeel cyɑ̈nggɑni ɑ́ men yømi tole mïni pyëw Jwøng-ɑ Ácwɑ̈ɑ̈j, muuj ɑ́ wɑ̈dhh ówöbb gɑ pyɑ̈rø wïdɑ́dɑ̈g, ki órömm ɑ́ryew mø døngø, kí órömm mø thønhø runi gen ɑ́kyel, ge bong gïnrɑj kì ri gen, gɑ pyɑ̈rø wïdɑ́ngwen. Kí byëli gen, møng-ɑ búr me bɑ ɑnyöm ki møøw dhetun. Kïllì ɑ́dɑ̈g ɑ kɑ̈ɑ̈l wɑdh ɑ́kyel, o kïllì ɑ́ryew ɑ kɑ̈ɑ̈l óröm-ɑ dwøng ɑ́kyel. O órömm-ɑ thønhø, ɑ́kyel kɑ̈l kɑ kïlø ɑ́kyel. Kɑ wu muuj wun ki ónywøg wɑ̈dtegø ɑ́ gënhi orøg. Reb ki gënh-ɑ nyi rɑ̈b bëne mi yethi cyɑ̈ng, kí byële, kí kunyi møgi oløg. Muuj wun kì ryeew cyɑ̈ng ki wɑ̈dhh ówöbb pyɑ̈rø wïdɑ́ryew, kí órömm ɑ́ryew mø døngø, kí órömm-ɑ thønhø runi gen ɑ́kyel, gɑ pyɑ̈rø wïdɑ́ngwen, ge bong gïnrɑj kì ri gen. Kí byëli gen, kí kunyi gen, gɑ kwɑnn-ɑ nyi kɑ̈ɑ̈l gen ceth. Kí ónywøg wɑ̈dtegø ɑ́ gënhi orøg mi yethi cyɑ̈ng, kí byële, kí kunyi møgi oløg. Muuj wun kì dɑ̈ɑ̈g cyɑ̈ng ki wɑ̈dhh ówöbb pyɑ̈rø wïdɑ́kyel, kí órömm ɑ́ryew mø døngø, kí órömm mø thønhø gɑ pyɑ̈rø wïdɑ́ngwen, ge bong gïnrɑj kì ri gen. Kí byëli gen, kí kunyi gen, gɑ kwɑnn-ɑ nyi kɑ̈ɑ̈l gen ceth. Kí ónywøg wɑ̈dtegø ɑ́ gënhi orøg men gøøm bøli ji. Reb ki gënh-ɑ nyi rɑ̈b bëne mi yethi cyɑ̈ng, kí kunyi møgi oløg. Muuj wun kì ngween cyɑ̈ng ki wɑ̈dhh ówöbb pyɑ̈rø, kí órömm ɑ́ryew mø døngø, kí órömm mø thønhø gɑ pyɑ̈rø wïdɑ́ngwen, ge bong gïnrɑj kì ri gen. Kí byëli gen, kí kunyi gen, gɑ kwɑnn-ɑ nyi kɑ̈ɑ̈l gen ceth. Kí ónywøg wɑ̈dtegø ɑ́ gënhi orøg men gøøm bøli ji. Reb ki gënh-ɑ nyi rɑ̈b bëne mi yethi cyɑ̈ng, kí byële, kí kunyi møgi oløg. Muuj wun kì bïïj cyɑ̈ng ki wɑ̈dhh ówöbb ɑ́bïngwen, kí órömm ɑ́ryew mø døngø, kí órömm mø thønhø gɑ pyɑ̈rø wïdɑ́ngwen, runi gen ɑ́kyel, ge bong gïnrɑj kì ri gen. Kí byëli gen, kí kunyi gen, gɑ kwɑnn-ɑ nyi kɑ̈ɑ̈l gen ceth. Kí ónywøg wɑ̈dtegø ɑ́ gënhi orøg men gøøm bøli ji. Reb ki gënh-ɑ nyi rɑ̈b bëne mi yethi cyɑ̈ng, kí byële, kí kunyi møgi oløg. Muuj wun kì bïkyeel cyɑ̈ng ki wɑ̈dhh ówöbb ɑ́bïdɑ̈g, kí órömm-ɑ døngø ɑ́ryew, kí órömm thønhø gɑ pyɑ̈rø wïdɑ́ngwen, runi gen ɑ́kyel, ge bong gïnrɑj kì ri gen. Kí byëli gen, kí kunyi gen, gɑ kwɑnn-ɑ nyi kɑ̈ɑ̈l gen ceth. Kí ónywøg wɑ̈dtegø ɑ́ gënhi orøg men gøøm bøli ji. Reb ki gënh-ɑ nyi rɑ̈b bëne mi yethi cyɑ̈ng, kí byële, kí kunyi møgi oløg. Muuj wun kì bïryeew cyɑ̈ng ki wɑ̈dhh ówöbb ɑ́bïryew, kí órömm ɑ́ryew mø døngø, kí órömm mø thønhø gɑ pyɑ̈rø wïdɑ́ngwen, runi gen ɑ́kyel, ge bong gïnrɑj kì ri gen. Kí ónywøg wɑ̈dtegø ɑ́ gënhi orøg men gøøm bøli ji. Reb ki gënh-ɑ nyi rɑ̈b bëne mi yethi cyɑ̈ng, kí byële, kí kunyi møgi oløg. Cøng wun ri wun be mɑ̈ddø kì bïdɑ̈ɑ̈g cyɑ̈ng, kɑ ko di tïj me tïj yi wun. Kɑ wu muuj wun ki gënh-ɑ nyi rɑ̈b bëne kì cyɑ̈ngɑni ɑ́ men yømi tole mïni pyëw Jwøng-ɑ Ácwɑ̈ɑ̈j. Muuj ɑ́ wɑdh ówöb, ki órömø ɑ́kyel me dwøng, ki órömm ɑ́bïryew mø thønhø, runi gen ɑ́kyel, ge bong gïnrɑj kì ri gen bënn. Kí byëli gen, kí kunyi gen, gɑ kwɑnn-ɑ nyi kɑ̈ɑ̈l gen ceth. Kí ónywøg wɑ̈dtegø ɑ́ gënhi orøg men gøøm bøli ji. Reb ki gënh-ɑ nyi rɑ̈b bëne mi yethi cyɑ̈ng, kí byële, kí kunyi møgi oløg. Møgɑk bene gen cigg kiper gënh-ɑ nyi rɑ̈b bëne, kí byële, kí kunyi møgi oløg, kí gëdhhi mër møg-ɑ nyi muuj kì bøli kej kwëër gen. Gëdhhi wïj köngø, ki jwödhø kedh-ɑ kömi gen. Møg-ɑ ɑ́ceg yi Jwøng-ɑ Ácwɑ̈ɑ̈j bënn, ɑ́köbbi tyëng Isrɑil yi Mosɑ̀. Kɑ jɑggi Isrɑil mëggi cigg møg yi Mosɑ̀ kinni: Kenyi köngi dhɑnhø kinni gïïpiny ómëgge Jwøng-ɑ Ácwɑ̈ɑ̈j, wɑlɑ̀ köngø kinni, pɑ cyɑ̈mø ki gïïpiny, könge ko pɑ̈d yi en, de gwøge gïn-ɑ ɑ́kwöng yi en kinni gø ógwøge ceth. Kenyi köngi nyɑnɑjur, me nudd e ying-ɑ gøl wïye, kinni gïïpiny ómëgge Jwøng-ɑ Ácwɑ̈ɑ̈j, wɑlɑ̀ köngø kinni pɑ cyɑ̈mø ki gïïpiny, gwøge møg-ɑ ɑ́kwönge, wɑlɑ̀ gïn-ɑ ɑ́kyere, keløg wïye pɑ bɑ̈nyi keny-ɑ ólïnge møgɑni. De keløg wïye olïngø kɑ gø mɑ̈ɑ̈ne gwøgi gïn-ɑ ɑ́kwönge, nyɑnɑni pɑth ki ɑcerø ki mïdhi köngɑni. Keløg ngɑndhɑjø me pɑth ki ɑnywøm óköngø e ceg yi en kɑ tøønyø, wɑlɑ̀ dhøge ceg-ɑ bodhø, kinni yɑ ómuujø ki gïn-ɑni, wɑlɑ̀ kinni riɑ ótwönɑ gïn-ɑni, codhe kɑ nywøm, gwøge gïn-ɑ ɑ́kwöng yi en ceth, keløg jɑlgøle pɑ kyëdø keny-ɑ ólïnge møgɑni. De keløg jɑlgøle okyëdø keny-ɑ ólïnge møgɑni, pɑth ki ɑcerø ki mïdhi köngø menɑni, Jwøng-ɑ Ácwɑ̈ɑ̈j pyëwe ólɑ̈ɑ̈m ki en. Ngɑn jɑlgøle thøø, wɑlɑ̀ ngɑn bɑ ɑtɑ̈ng keløg e óköngø kinni ómuujø ki gïïpiny, wɑlɑ̀ ree ótwöne ki gïïpiny, gwøge møg-ɑ ɑ́kwöng yi en ceth. Ngɑndhɑjø ɑnywøm e jɑlgøle nud, keløg e óköngø ki gïïpiny, gwøge møg-ɑ ɑ́kwönge bënn ceth keløg jɑlgøle pɑ kyëdø keny-ɑ ólïnge møgɑni. De keløg jɑlgøle okyëdø keny-ɑ ólïnge møgɑni, pɑth ki ɑcerø ki mïdhi kwöngɑni, Jwøng-ɑ Ácwɑ̈ɑ̈j pyëwe ólɑ̈ɑ̈m ki en mɑ́ e bɑ jɑlgøle ɑ ɑ́kyëëd. Jɑlgøle yïe dɑ dyër ke yïëye wɑlɑ̀ ke bɑ̈nye ki könge keny-ɑ ólïnge. Keløg könge ólïnge, kɑ ocögø e bong gïn kwøbe, cungi ngɑnɑni kì kömi köng-ɑ ɑ́könge ceth, mɑ́ jɑlgøle nuti löggø kì bøli keny-ɑ ɑ́lïnge ceth. De keløg köngɑni ókyer yi en e piny kɑ̈ɑ̈l kun, bɑ en ɑ köme di cɑ́yi cögi gïn-ɑ ɑ́kwöng e pɑ gwøg. Bene gen cigg-ɑ ɑ́mëggi Mosɑ̀ yi Jwøng-ɑ Ácwɑ̈ɑ̈j ɑgɑk, kì ri kwööng mɑ̈nn-ɑ kɑ̈lli wëëg gen, kí møg-ɑ bɑ ɑnywøm. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Col gøøli tyëng Isrɑil ki tyëng Midyɑn, o rume o yï kedhí kun-ɑ di kweyyí.” Codhe, ɑköbbi teedø yi Mosɑ̀ kinni, “Kɑ̈bbi wun ki jøg mø kedhi be pɑ̈ɑ̈r kömi tyëng Midyɑn, o ge nɑ̈g kipe gïnrɑj men-ɑ ɑ́göggi Jwøng-ɑ Ácwɑ̈ɑ̈j yi gen. Kɑ̈bbi kɑl ɑ́kyel ki jøg mø kwɑnni gen bɑ ɑ́lïp, møg kedhi be liny.” Codhe, ɑmyeeg ɑ́lïp kì gøl kí gøl, kɑ kwɑnni jøliny ogöögø ki ɑ́lïp pyɑ̈rø wïdɑ́ryew, gen ɑ jø kɑ̈llɑni gɑ pyɑ̈rø wïdɑ́ryew. Aör gen be liny yi Mosɑ̀ ge pyejj-ɑ yi Pineɑs wɑ̈d ókwërø Eliɑdhɑr, e ókɑ̈ddø ki jɑmmi kwër geki kɑng. Kɑ ge pɑ̈ɑ̈r-ɑ kömi tyëng Midyɑn, ɑnɑ̈g gen cwøw bënn, kí rɑ̈nhi Midyɑn gɑ ɑ́bïj. Ebì, Rekem, Dhur, Ur kí Tebɑ̀. Kɑ Bɑlɑɑm wɑ̈d Beor nɑ̈g yi gen thyew. Kɑ mɑ̈nni Midyɑn ki nyigi gen mɑg yi Isrɑil, kɑ dhögi gen kwɑny, kɑ kɑ̈ɑ̈r gen yɑy bëne, kɑ myërri gen rɑ̈b geki kɑ̈ddi gen. Kɑ gïg-ɑ ɑ́mɑg bënn kɑ̈ɑ̈l gen, kí ji geki dyëg kí dhög, ge muuj-ɑ Mosɑ̀ geki Eliɑdhɑr, kí teedø bëne kì kɑɑl thwøri Moɑb kì kömi Nɑm Urdun kì bøli Yerikö. Kɑ liny pɑɑr ngɑ̈ɑ̈j kɑɑl yi Mosɑ̀ geki Eliɑdhɑr, kí jɑgg geki teedø bëne. Mosɑ̀ ɑ́bëëd pyëwe rɑɑj ki pëjji liny, ɑ løg pëjji ɑ́lïp geki pëjji miy, møg-ɑ ɑ́kɑ̈ɑ̈l be liny. Kɑ ge pyëje kinni, “Gede tyëng-ɑ mɑ̈nn bënn ɑ wiyu gen ge onëënø? Wɑ̈thi wun ɑ́ceg-ɑ wïlø kinni bɑ tyëng-ɑ mɑ̈nn ɑ ɑ́lïngi kwøbbi Bɑlɑɑm kì Peor, ɑthɑ̈bbi gen ji orøg kì bøli Jwøng-ɑ Ácwɑ̈ɑ̈j? Pɑth ki gööj gen ɑ ɑ́kɑ̈ɑ̈l yømø nɑ̈ɑ̈g men-ɑ ɑ́nɑ̈g jii Jwøng-ɑ Ácwɑ̈ɑ̈j? Nɑ̈gu yɑɑg thønhø bënn geki tyëng-ɑ mɑ̈nn møg-ɑ rumø niin yi cwøw. Kɑ womɑ̈nn geki wojur møg-ɑ nuti niin yi cwøw kwɑny wun. Kɑ wun, wu tyëng-ɑ ɑ́nɑ̈ɑ̈g ki ji, wɑlɑ̀ ɑ ɑ́nywɑ̈ddi ki ngɑnthøø, bëëd wun kì ngɑ̈ɑ̈j kɑɑl ki cyɑ̈ng ɑ́bïryew. Kɑ ri wun lɑw wun ki dɑ̈ɑ̈g cyɑ̈ng geki bïryeew cyɑ̈ng, o wu dhïwi wun, wuki mɑ̈nn-ɑ ɑ́mɑg yi wun. Lɑw wun ógudhi wun bënn, ki gïg-ɑ ócwɑ̈jø ki yëyyi dyëg geki møg-ɑ ótyengø gɑ yɑdh.” Kɑ jøg-ɑ ɑ́dwöög kì be liny köbbi yi ókwërø Eliɑdhɑr kinni, “Møg bene gen cigg-ɑ ɑ́mëggi Mosɑ̀ yi Jwøng-ɑ Ácwɑ̈ɑ̈j: Lwøg wun ógudhi wun kì bïryeew cyɑ̈ng, kɑ wu lwøggi wun, o wu dhïwi wun, codhe o wu kedhu kɑɑl cyee.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kwɑn jɑmm-ɑ ɑ́mɑ̈ɑ̈g bënn; ji kí dhög, kí dyëg, kí ɑderr. Kwɑnu gen wuki ókwërø Eliɑdhɑr kí jɑgg-ɑ kyeelø, kɑ ge pɑ̈ngi wun gɑ bud ɑ́ryew mø pɑ̈r, budø ɑ́kyel mi jøg-ɑ ɑ́kedhi be liny, o bun-ɑ kyeelø mi teedø. Kɑ yï kɑ̈bbí ki gwɑ̈ɑ̈j Jwøng-ɑ Ácwɑ̈ɑ̈j kì ri budø mi jøg-ɑ ɑ́kedhi be liny, nyi kɑ̈bbí ki ɑ́kyel kì ri miy ɑ́bïj møg-ɑ bɑ ji, kí dhög, kí ɑderr kí dyëg. Kɑ ge mëggí ókwërø Eliɑdhɑr gɑ jwödhø mi Jwøng-ɑ Ácwɑ̈ɑ̈j. Kɑ̈bbí thyew kì ri bun-ɑ bɑ mi teedø ki ɑ́kyel kì ri pyɑ̈r ɑ́bïj møg-ɑ bɑ ji, kí dhög, kí ɑderr, kí dyëg. Kɑ ge mëggí Kwɑrri Leebì jøg-ɑ korri Kemi Kwëër Jwøng-ɑ Ácwɑ̈ɑ̈j.” Kɑ møg-ɑ ɑ́cïgi Mosɑ̀ yi Jwøng-ɑ Ácwɑ̈ɑ̈j, gwøg ceth yi Mosɑ̀ geki Eliɑdhɑr. Codhe, ɑmëggi gwɑ̈nyɑni Eliɑdhɑr yi Mosɑ̀ ɑ́ jwödhø mi Jwøng-ɑ Ácwɑ̈ɑ̈j, ni møg-ɑ ɑ́cïgi Mosɑ̀ yi Jwøng-ɑ Ácwɑ̈ɑ̈j. Ri gen ɑ́kɑ̈bbi yi Mosɑ̀ ki ɑ́kyel kì ri pyɑ̈r ɑ́bïj møg-ɑ bɑ ji, kí dhög, kí ɑderr, kí dyëg, kɑ gï mëgge Kwɑrri Leebì møg-ɑ ɑ́korri Kemi Kwëër Jwøng-ɑ Ácwɑ̈ɑ̈j, ni møg-ɑ ɑ́cïgi Mosɑ̀ yi Jwøng-ɑ Ácwɑ̈ɑ̈j. Kɑ pëjjì møg-ɑ ɑ́pej liny kedh-ɑ yï Mosɑ̀, ɑköbbi ge gøn kinni, “Jɑldwøng, jøg-ɑ ɑ́peej yi wøn be liny ɑ́kwɑn yi wøn, bong dhɑnhø ɑ́kyel me tøøk. Bene ɑ bɑnge kɑ̈ɑ̈l wøn dhɑb men-ɑ bɑ yëll, kí gyell, kí gwelli lwedd, kí gwelli yïthh, kí ɑ́cwecwelli yedh møg-ɑ ɑ́kɑ̈ɑ̈l yi wøn, ge muuj wø’ Jwøng-ɑ Ácwɑ̈ɑ̈j, gɑ møg-ɑ ɑ́gøøm bøli wëyi wøn, o wø ókorri yi en ceth.” Akwɑɑny jɑmmi dhɑb møgɑni yi Mosɑ̀ geki Eliɑdhɑr. Jɑmmɑni ɑ́røm gɑ gïn ni kïllì miy ɑ́ryew, gen ɑ møg-ɑ ɑ́kɑ̈ɑ̈l yi pëjji liny. De jøg-ɑ pɑth ki pëjjì, jɑmmi dhɑb møg-ɑ ɑ́kɑ̈ɑ̈l yi gen nuti muujø yi gen. Kɑ dhɑmɑni kïdhi Kemi Kwër yi Mosɑ̀ geki Eliɑdhɑr, kipe kinni o tyëng Isrɑil korri yi Jwøng-ɑ Ácwɑ̈ɑ̈j. Gøl Ruben kí gøl Gɑd yï gen ɑ́dɑ dhög mø gïïr, kɑ lidh yi gen kinni piny Yɑdher geki piny Gilyɑd bɑ kɑ̈jj mø døøj kipe jɑmmì. Akedhi gen yï Mosɑ̀ geki Eliɑdhɑr kí jɑggi Isrɑil møg-ɑ kyeelø, kɑ ge okööbø kinni, Wø kwɑjj-ɑ yïn, mëggí wøn pinyɑni ɑ́ mi wøn, wø ko wëggí kedhi løøg Nɑm Urdun.” Alöggi Mosɑ̀ kinni, “Wu dwɑdd-ɑ dööngø kì keny, o wɑddi wun kedhi gen be liny? Wude ɑ dwɑddu wëggi pëthi tyëng Isrɑil nyönhø, o ge bwøg gen ki kedhi piny-ɑ ɑ́mëggi gen yi Jwøng-ɑ Ácwɑ̈ɑ̈j? Bene gïn-ɑ ɑ́gwøg yi wëëg wun ɑnɑn keny-ɑ ɑ́örɑ gen be lyewwi piny, teedø ying-ɑ Gɑdic Berniyɑ̀. Akedh gen kɑ ge wɑ̈dh-ɑ Töör Acköl, ɑdwöög gen kɑ teedø pɑng yi gen ki kwøbbi pyed, ɑdhɑ̈li ji ki kedhi piny-ɑ ɑ́mëggi gen yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j pyëwe ɑ́ceg rënyø kì cyɑ̈ngɑni, ɑkööbe kinni, “Yɑ ɑ́köngi kinni bong dhɑnhø men-ɑ ókedhi pinyɑni, ngɑn runne bɑ pyɑ̈r ɑ́ryew gïti mɑl, ɑ løg tyëng-ɑ ɑ́kɑ̈ɑ̈l Rïp, ge pɑ kedhi piny-ɑ ɑ́mëggɑ Abrɑhɑm, kí Isɑɑk, kí Yɑgob, mɑ́ ge ɑ́bɑ̈nyi lïngi kwøbbɑ.” Kɑ döng ɑ́ Kɑlib wɑ̈d Yepunɑ̀ geki Jöcwø wɑ̈d Nun, mɑ́ gen ɑ ɑ́mïdhi kwøbbi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j pyëwe ɑ́ceg-ɑ rënyø ki ji, ɑkölle ji twɑ̈lø kì yij ryɑng ki runn pyɑ̈r ɑ́ngwen, gïti kɑ ɑ́thumi jøgɑni ki thøø bënn. Anɑn wu dwɑdd-ɑ døøg kej wëëg wun, wun ɑ́ rïj me rɑj, men cigi kɑ̈ni kömi Isrɑil ki ryɑ̈g, keny-ɑ órënyi pyëw Jwøng-ɑ Ácwɑ̈ɑ̈j? Keløg wu óbɑ̈nyø ki lugø kì bɑng Jwøng-ɑ Ácwɑ̈ɑ̈j, wu gøl Ruben kí gøl Gɑd, Jwøng-ɑ Ácwɑ̈ɑ̈j pyëwe ceg-ɑ rënyø ki ji møg bënn, kɑ gï wiye piny kì yij ryɑng men, ji thuw-ɑ gööj wun.” Alöggi gen kinni, “Wiy dyëgi wøn gëddi yi wøn ki kyell, o wø gëëd wøn ki kɑ̈ddi dör kipe mɑ̈nni wøn geki nyigi wøn kì keny. Codhe o wø kedhi wøn be liny wøki wɑddi wøn, tyëng Isrɑil gïti keny-ɑ óthumi piny-ɑ bɑ mi gen ki mɑgø. O keny-ɑ óying wøn kej liny, pëthi wøn ócög ge pɑ lïngø kipe jɑmmi wøn geki nyigi wøn, mɑ́ ge ɑ́gëddi ki kɑ̈jj-ɑ pɑ yood gen yi tyëng pönhï. Wø pɑ dwöög pɑc gïti keny-ɑ órum tyëng Isrɑil møg-ɑ kyeelø ki mɑgi kɑ̈jji gen. Wø pɑ kɑ̈bbi ki piny kì løøg Nɑm Urdun, mɑ́ wø ɑ́rum ki kɑ̈bbø kì løøng-ɑ wɑɑng cyɑ̈ɑ̈ng mwøl èn.” Alöggi Mosɑ̀ kinni, “Keløg wu kømm-ɑ dyër, gwir wun ri wun kipe liny ɑnɑn kì bøli Jwøng-ɑ Ácwɑ̈ɑ̈j. Bɑ̈ɑ̈n wun Nɑm Urdun wuki jøliny wun, kɑ wu nyïɑ̈ggi wun ki tyëngmɑ̈ɑ̈nø gïti keny-ɑ ótyɑɑm tyëngɑni yi Jwøng-ɑ Ácwɑ̈ɑ̈j, Kɑ pinyɑni kwɑnye. Orume, o wu dwöög wun, e kwöör wun løøgø kì bøli Jwøng-ɑ Ácwɑ̈ɑ̈j, kí bøli tyëng Isrɑil. Codhe o Jwøng-ɑ Ácwɑ̈ɑ̈j yïëye kinni piny-ɑ løøg Nɑm Urdun kì wɑɑng cyɑ̈ɑ̈ng mwøl bɑ mi wun. De yɑ köbb-ɑ wun kinni keløg wu koo cungi kì kömi dhøggi wun, ngɑ̈ny wun wøw kinni wu ɑ́røngi kì bøli Jwøng-ɑ Ácwɑ̈ɑ̈j. O wu pɑ bødh ki cɑyø yi Jwøng-ɑ Ácwɑ̈ɑ̈j kipe orøngɑni. Gëddu nyigi wun ki kɑ̈dd, kɑ dyëgi wun gëddi wun ki kyell, kɑ wu cungi wun kì kömi dhøggi wun ceth!” Kɑ gøl Gɑd geki gøl Ruben okööbø kinni, “Møg-ɑ ɑ́kwøb yi yïn ógwøg yi wøn, jɑldwøng! Mɑ̈nni wøn kí nyigi wøn kí dhögi wøn, ge ódöng kì myërri Gilyɑd keny. De wø kedh-ɑ be liny Jwøng-ɑ Ácwɑ̈ɑ̈j, Nɑm Urdun óbɑ̈ɑ̈n yi wøn, wø kedh-ɑ be nyɑɑg ni men-ɑ ɑ́kwøb yi yïn.” Aceg ókwërø Eliɑdhɑr, kí Jöcwø wɑ̈d Nun geki jøg-ɑ jɑgg yi Mosɑ̀ kinni, “Keløg jø gøl Gɑd kí gøl Ruben Nɑm Urdun óbɑ̈ɑ̈n yi gen, kɑ ge kedh-ɑ be nyɑɑg ni møg-ɑ ɑ́ceg yi Jwøng-ɑ Ácwɑ̈ɑ̈j, kɑ wu køny yi gen ki mɑgi pinyɑni, mëggu gen piny Gilyɑd ɑ́ mi gen. De keløg ge pɑ nyïɑ̈ggi kyeel ki wun, ge ónëng ɑ Kɑnɑɑn ki piny ni wun.” Alöggi jø gøl Gɑd geki gøl Ruben kinni, “Møg-ɑ ɑ́kwøb yi Jwøng-ɑ Ácwɑ̈ɑ̈j ógwøg yi wøn, jɑldwøng. Nɑm Urdun óbɑ̈ɑ̈n yi wøn, kɑ wø kedh-ɑ piny Kɑnɑɑn be nyɑɑg ki liny Jwøng-ɑ Ácwɑ̈ɑ̈j, de piny wøn ying-ɑ løøg Nɑm Urdun løøng.” Codhe, kɑ Mosɑ̀ piny Rɑ̈dh Sïön rɑ̈ɑ̈dh tyëng Amör, geki piny Og rɑ̈ɑ̈dh Bɑcɑn kí kɑ̈ddi gen, kí myërri gen mëgge gøl Gɑd kí gøl Ruben geki budi gøl Mɑnɑsè wɑ̈d Yosep. Kɑ gøl Mɑkir wɑ̈d Mɑnɑsè Gilyɑd mɑnye, kɑ tyëng Amör møg-ɑ ɑ́ying yije cyedde, kɑ pëgg-ɑ yije. Codhe, ɑmëggi gøl Mɑkir Gilyɑd yi Mosɑ̀, kɑ gølɑni pëgg-ɑ yije. Akedh Yɑir wɑ̈d Mɑnɑsè, kɑ ómɑ̈gø kí myërr møøgø, ɑcɑge myërrɑni gɑ “Myërri Yɑir.” Kɑ Nöbɑ̀ ókedhø, ɑpɑ̈ɑ̈re kömi kɑɑl Kenɑth kɑ gø mɑge. Acɑge gøn ɑ́ Nöbɑ̀ ni nyinge. Møg-ɑ bï ek bɑ nyingi kɑ̈jj-ɑ ɑ́guddi yi Isrɑil kì yij wɑ̈nh-ɑ ɑ́cyɑ̈dhi gen ge pyejj-ɑ yi Mosɑ̀ geki Aɑron, keny-ɑ ɑ́bëën gen wɑ̈g kì Rïp. Mosɑ̀ ɑ́ceg kɑ köbbø yi Jwøng-ɑ Ácwɑ̈ɑ̈j kinni i nyi gwede nyingi keny-ɑ nyi guddi yi gen, codhe ɑ nyi gwede gøn. Tyëng Isrɑil ɑ́dhwödh kì Rɑmsis kì pyɑ̈rø wïdɑ́bïïj cyɑ̈nggi kyeel dwɑ̈tt kì yij run. Ge ɑ́dhwödh-ɑ cyɑ̈ng-ɑ bɑng Kwëër Ákɑɑdh mi tyeli mɑl, e pëthi gen pɑ lïngø ngö ge onennø yi tyëng Rïp. Tyëng Rïp ɑ́bëëd ge kony-ɑ kɑyyi gen møg-ɑ ɑ́nɑ̈g yi Jwøng-ɑ Ácwɑ̈ɑ̈j, be nyodhi kinni Jwøng-ɑ Ácwɑ̈ɑ̈j teg kibøli jwöggi Rïp. Tyëng Isrɑil ɑ́dhwödh kì Rɑmsis kɑ ge gudd-ɑ Suköth. Adhwödh gen kì Suköth kɑ ge gudd-ɑ Ethɑm kì tøg ryɑng. Adhwödh gen kì Ethɑm ge døøg-ɑ Pi Akiröth, ɑ bøli Bɑɑl Dhepön, kɑ ge gudd-ɑ buti Migdöl. Adhwödh gen kì Pi Akiröth, kɑ Nɑɑm Omeli Kwɑrø bɑ̈ɑ̈n gen ge töng-ɑ Ryɑɑng Cur, kɑ ge ócyɑ̈dhø ki cyɑ̈ng ɑ́dɑ̈g, ɑgud gen kì Mɑrɑ̀, Kɑ ge odhwödhø kì Mɑrɑ̀, ɑguddi gen Elïm, mɑ́ kenyɑni ɑ́dɑ nyingi pï pyɑ̈rø wïdɑ́ryew kí yenh benø pyɑ̈r ɑ́bïryew. Adhwödh gen kì Elïm, kɑ ge gudd-ɑ buti Gøøli Sowes. Adhwödh gen kì kenyɑni kɑ ge gudd-ɑ Ryɑɑng Sin. Adhwödh gen kì Ryɑɑng Sin kɑ ge gudd-ɑ Döpkɑ̀, ɑdhwödh gen kì Döpkɑ̀ kɑ ge gudd-ɑ Aluc. Adhwödh gen kì Aluc, kɑ ge gudd-ɑ Repïdïm, kɑ ji ojɑdø kì kenyɑni ki pï møg mɑdh yi gen. Adhwödh gen kì Repïdïm, kɑ gudd-ɑ Ryɑɑng Sinɑy, Adhwödh gen kì Ryɑɑng Sinɑy, kɑ ge gudd-ɑ Kibröt Tɑɑbɑ̀. Adhwödh gen kì Kibröt Tɑɑbɑ̀, kɑ ge gudd-ɑ Adheröth. Adhwödh gen kì Adheröth, kɑ ge gudd-ɑ Ritmɑ̀. Adhwödh gen kì Ritmɑ̀, kɑ ge gudd-ɑ Rimön Peredh. Adhwödh gen kì Rimön Peredh, kɑ ge gudd-ɑ Libnɑ̀. Adhwödh gen kì Libnɑ̀, kɑ ge gudd-ɑ Risɑ̀. Adhwödh gen kì Risɑ̀, kɑ ge gudd-ɑ Kelɑtɑ̀. Adhwödh gen kì Kelɑtɑ̀, kɑ ge gudd-ɑ Kïti Cɑper. Adhwödh gen kì Kïti Cɑper, kɑ ge gudd-ɑ Kɑrɑdɑ̀. Adhwödh gen kì Kɑrɑdɑ̀, kɑ ge gudd-ɑ Mɑkelöt. Adhwödh gen kì Mɑkelöt, kɑ ge gudd-ɑ Tɑɑt. Adhwödh gen kì Tɑɑt, kɑ ge gudd-ɑ Terɑ̀. Adhwödh gen kì Terɑ̀, kɑ ge gudd-ɑ Mitkɑ̀. Adhwödh gen kì Mitkɑ̀, kɑ ge gudd-ɑ Acmönɑ̀. Adhwödh gen kì Acmönɑ̀, kɑ ge gudd-ɑ Moseröt. Adhwödh gen kì Moseröt, kɑ ge gudd-ɑ Beni Yɑɑkɑn. Adhwödh gen kì Beni Yɑɑkɑn, kɑ ge gudd-ɑ Agidgɑd. Adhwödh gen kì Agidgɑd, kɑ ge gudd-ɑ Yotbɑthɑ̀. Adhwödh gen kì Yotbɑthɑ̀, kɑ ge gudd-ɑ Abrönɑ̀. Adhwödh gen kì Abrönɑ̀, kɑ ge gudd-ɑ Edhïön Geber. Adhwödh gen kì Edhïön Geber, kɑ ge gudd-ɑ yij pɑ̈ɑ̈l Dhin, ɑ cwøl ɑ́ Kɑdic. Adhwödh gen kì Gɑdic, kɑ ge gudd-ɑ Kïti Ör, kì tøg piny Edöm. Kɑ ókwërø Aɑron yedh-ɑ wïj Kïti Ör ni kɑ ɑ́kwøbii yi Jwøng-ɑ Ácwɑ̈ɑ̈j, kɑ thøw-ɑ kunɑni kì pyɑ̈r ɑ́ngween runni bëëni tyëng Isrɑil wɑ̈g kì Rïp, kì kyeel cyɑ̈nggi bïïj dwɑ̈tt. Aɑron ɑ́thøw kì wïj Kïti Ör e runne bɑ miyø kí pyɑ̈r ɑ́ryew wïdɑ́dɑ̈g. Rɑ̈ɑ̈dh Arɑd kì piny Kɑnɑɑn kì wɑɑng wurlwɑl ɑ́lïng kinni i tyëng Isrɑil obëënø. Adhwödh tyëng Isrɑil kì Kïti Ör, kɑ ge gudd-ɑ Dhɑlmönɑ̀, Adhwödh gen kì Dhɑlmönɑ̀, kɑ ge gudd-ɑ Punön. Adhwödh gen kì Punön, kɑ ge gudd-ɑ Oböth. Adhwödh gen kì Oböth, kɑ ge gudd-ɑ Wïj Abɑrïm kì myërri Moɑb. Adhwödh gen kì wïj Abɑrïm, kɑ ge gudd-ɑ Dïbön Gɑd. Adhwödh gen kì Dïbön Gɑd, kɑ ge gudd-ɑ Almön Diblɑtɑim. Adhwödh gen kì Almön Diblɑtɑim, kɑ ge gudd-ɑ Kïti Abɑrïm kì buti Kïti Nebö. Adhwödh gen kì Kïti Abɑrïm, kɑ ge gudd-ɑ thwøri Moɑb, kì kömi Nɑm Urdun, kì bøli Yerikö. Kɑɑl gen ɑ́gur yi gen e bɑ ɑmyer kì kömi Nɑm Urdun, cɑg kì Bet Yecimöth gïti Abel Cithïm kì Thwøri Moɑb. Kɑ Jwøng-ɑ Ácwɑ̈ɑ̈j okööbø geki Mosɑ̀ kì Thwøri Moɑb kì kömi Nɑm Urdun, Mosɑ̀ ɑ́köbbe kinni, “Köbbí tyëng Isrɑil kinni, keny-ɑ óbɑ̈ɑ̈n wun Nɑm Urdun, wu kedh-ɑ piny Kɑnɑɑn, cyeddi wun tyëng-ɑ bëëdø kì pinyɑni. Kɑ ngïjji jwöggi gen møg-ɑ ótwegø gɑ kïttì, kí møg-ɑ ókønyø gɑ ngyëny tørri wun, kɑ yïkki gen geki kenggi gen cøør wun piny. Kwɑnyu pinyɑni kɑ wu pëggu yije, mɑ́ pinyɑni ɑ́mëggɑ wun ɑ́ mi wun. Pɑ̈ngi piny e leng kɑ wél, pɑ̈ngi ɑ́ wɑ̈thi kɑ̈llì; wïj gøl-ɑ dwøng nyi mëggi piny me dwøng, kɑ wïj gøl-ɑ thinh nyi mëggi piny me thinh. De keløg tyëng-ɑ bëëdø kì pinyɑni pɑ cyeddi yi wun, møg-ɑ ówiy yi wun kì kelli gen óni wél kì nyingi wun, kɑ ge nɑ koodh kì nyingi ngëddi wun, wu ójud yi gen ki liny. Keløg ge pɑ cyeddi yi wun, wu óryɑ̈g yi yɑn ni kɑ ɑ́dwɑddɑ ryɑ̈gi gen.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Ceg tyëng Isrɑil; köbbí gen kinni keny-ɑ ókedhu Kɑnɑɑn, piny-ɑ mëggɑ wun, piny Kɑnɑɑn bëne, Kew kì kuni wɑɑng wurlwɑl cɑ̈g-ɑ́ɑ̀ pɑ̈ɑ̈l Dhin e kɑ̈ll-ɑ tøg piny Edöm, keew wun kì kuni wɑɑng wurlwɑl cɑ̈g-ɑ́ɑ̀ tøg Luuy Omelø kì wɑɑng cyɑ̈ɑ̈ng mwøl. Codhe, o kewɑni pödhe wɑɑng cyɑ̈ɑ̈ng mwøl e kedh-ɑ Ókømi Akrɑbïm, e bɑ̈ɑ̈n-ɑ Dhin gïti Gɑdic Berniyɑ̀. Codhe o ree løge kuni wɑɑng cyɑ̈ɑ̈ng böörø, e kedh-ɑ Adher Adɑr e pödh-ɑ Adhmön, o ree løge kì Adhmön kì keew Rïp, o thøwe Nɑɑm Omeli Tɑr. “Kew men-ɑ wɑɑng cyɑ̈ɑ̈ng böörø bɑ Nɑɑm Omeli Tɑr. “Kew men-ɑ wɑɑng wuudø cɑ̈g-ɑ́ɑ̀ Nɑɑm Omeli Tɑr gïti Kïti Ör. O cɑ̈ge kì kenyɑni gïti Yuu-ɑ töngi Amɑth e pödh-ɑ Dhedɑd, gïti Dhiprön, o thøwe kì Adhɑr Einɑn. “Kew kì wɑɑng cyɑ̈ɑ̈ng mwøl cɑ̈g-ɑ́ɑ̀ Adhɑr Einɑn gïti Cepɑm. Kewɑni cɑ̈g-ɑ́ɑ̀ Arbel kì bøli Ain kì wɑɑng cyɑ̈ɑ̈ng mwøl, e pödh-ɑ kelli kïtt-ɑ thønhø kì kömi Tɑɑy Gɑlelì kì wɑɑng cyɑ̈ɑ̈ng mwøl, codhe o tönge kuni wɑɑng wurlwɑl gïti Nɑm Urdun e pödh-ɑ Luuy Omelø. “Møgɑk bene gen keww ɑ́ngwen mø piny wun.” Aköbbi tyëng Isrɑil yi Mosɑ̀ kinni, “Bene piny men-ɑ ókwɑny yi wun ɑnɑn, e leng kɑ wél, piny-ɑ ɑ́mëggi wɑ̈thi kɑ̈llì ɑ́bïngwen ki budi wïj kɑl yi Jwøng-ɑ Ácwɑ̈ɑ̈j. Gøl Ruben kí gøl Gɑd geki budi gøl Mɑnɑsè ɑ́rum ki mëggi piny gen, ɑ́pɑ̈ngi e røøm ki kɑ̈lli wëëg gen, kì løøg Nɑm Urdun kì wɑɑng cyɑ̈ɑ̈ng mwøl kì bøli Yerikö.” Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Piny ópɑ̈ngi kì kelli ji yi ókwërø Eliɑdhɑr geki Jöcwø wɑ̈d Nun. Kɑ yï kɑ̈bbí thyew ki dhɑnhø me køny gen kì wɑ̈thi kɑ̈llì; dhɑnhø ɑ́kyel kì wïj kɑl.” Bene gen jøg-ɑ ɑ́kwɑny yi Jwøng-ɑ Ácwɑ̈ɑ̈j, o ge pɑ̈ngi gen piny kì kelli tyëng Isrɑil ɑgɑk, kì yij piny Kɑnɑɑn. Kɑ Mosɑ̀ köbbi yi Jwøng-ɑ Ácwɑ̈ɑ̈j kì thwøri Moɑb kì kömi Nɑm Urdun, kì bøli Yerikö kinni, “Ceg tyëng Isrɑil kinni, nëngi gen Kwɑrri Leebì ki kɑ̈dd kì piny-ɑ ópɑ̈dhi ki gen, kɑ ge nëngi thyew ki cɑ̈mmi dhög kì bɑdhhi kɑ̈ddɑni. Kɑ̈ddɑni óbëëdø gɑ mø Kwɑrri Leebì, o bene yethi gïn ɑ óbëëd yi gen. O cɑ̈mmi dhög ócyɑ̈ɑ̈m-ɑ yi dhögi gen geki jɑmmi gen møg-ɑ kyeelø. Piny-ɑ wiy ɑ́ cɑ̈mmi dhög kì bɑdhhi kɑɑl kì ngɑ̈ɑ̈j dörø, cöddi cyɑ̈n kɑ mïtïr miy ɑ́ngwen kí pyɑ̈r ɑ́bïj, kì wɑ̈thi tùng bënn, o bëëd e dɑ piny me bɑ ɑ́bɑ̈rø, lɑ̈je bɑ mïtïr miy ɑ́bïngwen kì wɑ̈thi tùng bënn, kí kɑɑl kì dyëre. Kɑ Kwɑrri Leebì nëngi wun ki kɑ̈dd ɑ́bïkyel møg yethi gen nyi yömmi yi ngɑn nɑ̈g dhɑnhø e ceg-ɑ gwɑ̈nyø. Kɑ ge nëngu thyew ki kɑ̈dd pyɑ̈r ɑ́ngwen wïdɑ́ryew møøgø, kí cɑ̈mmi dhög mø gen, o kwɑnni kɑ̈ddɑni bënn göög gen ki pyɑ̈r ɑ́ngwen wïdɑ́bïdɑ̈g. Kwɑnni kɑ̈dd-ɑ mëggi Kwɑrri Leebì yi wïj kɑl ɑ́kyel, kwɑɑn-ɑ ri döngi piny gølɑni.” Kɑ Mosɑ̀ köbbi yi Jwøng-ɑ Ácwɑ̈ɑ̈j, i köbbe tyëng Isrɑil kinni, “Keny-ɑ óbɑ̈ɑ̈n wun Nɑm Urdun, kɑ wu kedh-ɑ piny Kɑnɑɑn, kɑ wu kɑ̈bbi wun ki kɑ̈ddi yömmø, møg yethi gen nyi pɑ̈ɑ̈r yi ngɑn nɑ̈g dhɑnhø, e ceg-ɑ gwɑ̈nyø. Bëëde kì kunɑni e lɑ̈wi ki wɑddi ngɑn-ɑ ɑ́nɑ̈g yi en, møg dwɑddi nɑ̈ɑ̈gii kej wɑɑd gen. Ko di ngɑn nɑ̈g dhɑnhø e gønye nuti lidhø kì bøli teedø. Kɑ̈bbi wun ki kɑ̈dd ɑ́bïkyel; ɑ́dɑ̈g kì løøg Nɑm Urdun kì wɑɑng cyɑ̈ɑ̈ng mwøl, kí ɑ́dɑ̈g kì piny Kɑnɑɑn. Møgɑni óbëëdø gɑ kɑ̈ddi yömmø yi tyëng Isrɑil geki tyëngpɑth møg-ɑ bëëdø kì Isrɑil. Ngɑn nɑ̈gi ki dhɑnhø e ceg-ɑ gwɑ̈nyø, renge yij kɑɑl ɑ́kyel kì kelli kɑ̈ddɑni. “Ngɑn gøj dhɑnhø ki gïjø me bɑ ngyënyø dødø, kɑ ngɑn-ɑ ɑ́gøj othøø, nɑ̈ɑ̈g ngɑn-ɑ ɑ́göjji. Ngɑn gøj dhɑnhø ki gïjø me bɑ kït, kɑ ngɑn-ɑ ɑ́gøj othøø, nɑ̈ɑ̈g ngɑn-ɑ ɑ́göjji. Nɑ ngɑn gøj dhɑnhø kí lodh, kɑ ngɑn-ɑ ɑ́gøj othøø, nɑ̈ɑ̈g ngɑn-ɑ ɑ́göjji. Nɑ̈ɑ̈g ngɑn-ɑ ɑ́nɑ̈g dhɑnhø yi ngɑn-ɑ́ wɑɑd gen ɑ́nɑ̈g. Nɑ̈ge gøn ceth keny-ɑ óyode gøn. “Keløg dhɑnhø mɑɑn-ɑ ngɑn megø, kɑ ngɑn-ɑ mɑɑn yi en cøøre piny, wɑlɑ̀ köme leenge’ gïjø megø kɑ othøø, wɑlɑ̀ gø gøj en kɑ cinge kipe kɑ̀ mɑɑne gøn, kɑ ngɑnɑni othøø, nɑ̈ɑ̈g ngɑn-ɑ ɑ́nɑ̈g dhɑnhø. Nɑ̈ɑ̈g ngɑn-ɑ ɑ́nɑ̈g dhɑnhø yi ngɑn-ɑ́ wɑɑd gen ɑ́nɑ̈g. Nɑ̈ge gøn ceth keny-ɑ óyode gøn. “De ngɑn nɑ̈g dhɑnhø e ceg-ɑ gwɑ̈nyø, o bong mɑ̈ɑ̈nø me ying kɑɑm gen, ying gø cøør en piny, wɑlɑ̀ köme pɑ̈dh-ɑ yi gïjø megø, wɑlɑ̀ kït ɑ bodh kɑ pɑ̈dh-ɑ köme kɑ ókɑ̈nø ki thøø, liidh møgɑni yi burø, e cwɑɑg-ɑ́ ngɑn-ɑ ɑ́nɑ̈g dhɑnhø, de pɑth ki wɑɑd ngɑn-ɑ ɑ́thøw. Koor ngɑn-ɑ ɑ́nɑ̈g dhɑnhø yi teedø; ko wëggi nɑ̈gø yi ngɑn-ɑ́ wɑɑd gen ɑ́nɑ̈g. Kɑ wiy døøge be bëëdø kì kɑɑl-ɑ́ yije ɑ́yömme. Bëëde kì kunɑni gïti keny-ɑ óthøw Ókwër-ɑ Dwøng, codhe, o dwööge pinye cyee. Keløg ngɑn-ɑ ɑ́nɑ̈g dhɑnhø bï-ɑ wɑ̈g kì kɑɑl-ɑ́ yije ɑ́yömme, kɑ yod yi wɑɑd ngɑn-ɑ ɑ́nɑ̈g yi en, nɑ̈g yi wɑɑd ngɑn-ɑ ɑ́nɑ̈ge, cönge pɑ col. Bëëd ngɑn-ɑ ɑ́nɑ̈gi ki dhɑnhø kì kɑɑl-ɑ́ yije ɑ́yömme ceth, bëëde kì kunɑni gïti keny-ɑ óthøw Ókwër-ɑ Dwøng men-ɑ́ ree ɑ́cwöb møgɑni, othøw ókwërɑni, codhe o dwööge pinye cyee. Møg bɑ ciggi gøny, mïdhu gen ceth wuki kwɑrri wun kì keny-ɑ bëëd yi wun. “Keløg dhɑnhø ogøønyø kinni i nɑ̈gø ki dhɑnhø, kɑ møgɑni yod gɑ dyër; cɑɑy ngɑnɑni ki thøø, kì kömi dhøggi tyëng-ɑ́ buti gen ɑ́nɑ̈ɑ̈g dhɑnhø, gɑ ji ɑ́ryew wɑlɑ̀ ɑ́dɑ̈g. Dhɑnhø ko nɑ̈ɑ̈g kömi dhøg nget ɑ́kyel. Nɑ̈ɑ̈g ngɑn-ɑ tir dhɑnhø ki nɑ̈gø. Ngɑn-ɑ ɑ́nɑ̈g yi en ko col kipe kinni o ngɑn-ɑ ɑ́nɑ̈gii wiy; nɑ̈g ceth. Keløg dhɑnhø reng-ɑ kɑɑl me yömme, ko wëggi wun col ki gïïpiny kipe kinni o dwööge pinye, e Ókwër-ɑ Dwøng nuti thøø. Ke gwøg wun gïn ni menɑni, wu bwöl-ɑ piny-ɑ yije bëëd yi wun. Piny nyii bwölø yi nɑ̈gi dhɑnhø, bong guög me cuggi gwøgø kipe kinni o dhïwe, eni keny-ɑ ɑ́nɑ̈ɑ̈g dhɑnhø. Piny-ɑ bëëd yi wun ko bwöl wun, mɑ́ yɑn, Yɑ Jwøng-ɑ Ácwɑ̈ɑ̈j, yɑ bëëd ɑ kelli tyëng Isrɑil.” Jø gøl Gilyɑd wɑ̈d Mɑkir wɑ̈d Mɑnɑsè, wɑ̈d Yosep, ge ɑ́kedhi yï Mosɑ̀ geki jɑgg-ɑ kyeelø, kɑ ge okööbø kinni, “Yï ɑ́köbbi yi Jwøng-ɑ Ácwɑ̈ɑ̈j kinni i pɑ̈ngí piny kì kelli tyëng Isrɑil, e leng kɑ wél. Yï ɑ́köbbe thyew kinni i mëggí nyigi Dhelopekɑd ówï wøn piny wïyi gen. De lidh, keløg ge onywømø kì kɑl megø, pinyɑni ceg-ɑ gwøg ki mi gøl-ɑ ɑ́nyömi, kɑ piny-ɑ ɑ́mëggi wøn ónungø. Keny-ɑ óbëën Runi Dwöggø, piny Dhelopekɑd kedh-ɑ yï gøl-ɑ nywøm nyige, o pɑ yod yi wøn këti.” Codhe ɑmuuj cigg møg yi Mosɑ̀ ge kɑ̈ɑ̈l-ɑ yï Jwøng-ɑ Ácwɑ̈ɑ̈j kinni, “Møg-ɑ kømmi yi gøl Mɑnɑsè bɑ dyër, bene ɑ pere kööb Jwøng-ɑ Ácwɑ̈ɑ̈j kinni, nyigi Dhelopekɑd ócuggø nywømø yi cwøw-ɑ dwɑddi yi gen, de nywøøm gen yi kwɑrri Mɑnɑsè kweyi gen. Piny-ɑ muuj ɑ́ mi wïj kɑl kì Isrɑil cög ɑ́ mi gølɑni ceth. Nyɑndhɑjø men lɑ̈gi ki piny kì Isrɑil nywøm yi wïj gøl gen ceth, keny-ɑ ógwøøgii kinøw, ji ólɑg piny-ɑ bɑ mi kweyi gen kì Isrɑil, o piny kɑl nyi cöge ɑ́ mee ceth.” Kɑ møg-ɑ ɑ́köbbi Mosɑ̀ yi Jwøng-ɑ Ácwɑ̈ɑ̈j gwøg ceth yi nyigi Dhelopekɑd, Kɑ woɑni Mɑklɑ̀, Tirdhɑ̀, kí Oglɑ̀, kí Milkɑ̀ kí Nöö nywøm yi nyiiwï gen. Ge ɑ́nywøm yi kwɑrri Mɑnɑsè wɑ̈d Yosep, kɑ piny gen ocögø ɑ́ mi wïj gøl gen. Møgɑk bene gen cigg geki kwöng møg-ɑ ɑ́cïgi tyëng Isrɑil yi Jwøng-ɑ Ácwɑ̈ɑ̈j ki dhø Mosɑ̀, kì thwøri Moɑb, kì kömi Nɑm Urdun, kì bøli Yerikö. Møg-ɑ yij wɑ̈nyø men, bɑ kwøbb-ɑ ɑ́köbbi tyëng Isrɑil bënn yi Mosɑ̀, keny-ɑ ɑ́ying gen yij pɑ̈l kì kömi Nɑm Urdun kì wɑɑng cyɑ̈ɑ̈ng mwøl. Ge ɑ́ying-ɑ Töör Urdun kì buti Sup, kɑɑm Pɑrɑn kì tuung, geki kɑ̈ddi Töpel, Lɑbɑn, Kɑdheröt, kí Didhɑɑb kì tung-ɑ kyeelø. (Bɑ cyɑ̈ng pyɑ̈rø wïdɑ́kyel ɑ nyi tyëg dhɑnhø ócyɑ̈dhø, e dhwödh ɑ Kïti Sinɑy e kedh-ɑ Kɑdic Berniyɑ̀ ki yuu myërri kïtti Edöm). Kì cyɑ̈ng-ɑ mɑl, kì pyɑ̈rø wïdɑ́kyeel dwɑ̈tt, kì pyɑ̈r ɑ́ngween runni bëëni tyëng Isrɑil wɑ̈g kì Rïp, ɑ ɑ́köbbi tyëng Isrɑil bënn yi Mosɑ̀ ki møg-ɑ ɑ́ceg yi Jwøng-ɑ Ácwɑ̈ɑ̈j bënn i köbbe gï gen, kì bɑng keny-ɑ ɑ́rume ki tyɑmi Rɑ̈dh Sïön rɑ̈ɑ̈dh tyëng Amör, ɑ bëëdø kì Kicbön geki Og rɑ̈ɑ̈dh Bɑcɑn, ɑ ɑ́jyɑ̈ɑ̈g kì kɑ̈ddi Actɑröth kí Edrey. Bɑ løøg Nɑm Urdun kì wɑɑng cyɑ̈ɑ̈ng mwøl kì piny Moɑb, ɑ ɑ́lwøøb Ciggi Jwøk yi Mosɑ̀ kidøøj, gï kwene kwenø, geki møg-ɑ pwönyi yi ciggɑni bënn. Ákööb kinni, “Keny-ɑ ɑ́ying wɑ Kïti Sinɑy, wɑ ɑ́köbbi yi Jwøgee, Jwøng-ɑ Ácwɑ̈ɑ̈j kinni, ‘Wu ɑ́bëëd ki keny me bɑ̈ɑ̈r kì buti kït men. Puth wun kɑɑl, kɑ wu kedhu bøli wun. Kedhu myërri kïtti Amör kì Töör Urdun, kí myërri kelli kïttì geki myërri thwørø, kí myërr-ɑ wɑɑng wurlwɑl geki myërri kömi Nɑɑm Omeli Tɑr. Kedhu piny Kɑnɑɑn geki myërri ngɑ̈thi kïtti Lubnɑn. Kɑ wu kedh wun gïti kömi Nɑm Porɑt. Pinyɑni bëne, bene en piny-ɑ ɑ́kwøb yi yɑn cøn, yɑ Jwøng-ɑ Ácwɑ̈ɑ̈j kinni ómëggɑ kweyyi wun, Abrɑhɑm, kí Isɑɑk, kí Yɑgob geki kwɑrri gen. Kedh wun, kwɑny wun en.’ ” “Kɑ wu köbbɑ keny-ɑ́ nudd wɑ ying-ɑ Ryɑɑng Sinɑy kinni, ‘Wu pɑ lwɑ̈ng yi yɑn ki jɑɑgø yɑ ketɑ. Jwøøg wun, Jwøng-ɑ Ácwɑ̈ɑ̈j, wu ɑ́gwøge wu ngenyø ni kyelli mɑl. Jwøng-ɑ Ácwɑ̈ɑ̈j, ɑ bɑ Jwøøg kweyyi wun, kwɑnni wun ómed yi en ki tyel ɑ́lïp, kɑ kej wun gwøge o dönye ceth, ni kɑ ɑ́kwøbe gøn! De men-ɑ́ yɑn, yɑ ketɑ, gønyyi wun ólwɑ̈ng yi yɑn kidï ki lidhø? Kɑ̈bbi wun ki jøg mø wɑ̈thi gen pel, ge ngɑ̈ny kwøb o ge dïdø, nyi kwɑɑny dhɑnhø ɑ́kyel kì wïj kɑl, o ge gwøgɑ gɑ jɑggi wun.’ Kɑ wu oyïëyø kinni møgɑni døøj. Codhe, ɑkwɑnyɑ jøg-ɑ wɑ̈thi gen pel, ɑ ngɑ̈ny kwøb, jøg-ɑ ɑ́yieny yi wun, kɑ ge gwøgɑ gɑ jɑggi wun. Kwï gen jɑɑg-ɑ ji ɑ́lïp, møøgø jɑɑg-ɑ ji miyø, møøgø jɑɑg-ɑ pyɑ̈r ɑ́bïj, møøgø jɑɑg-ɑ ji pyɑ̈rø, kɑ yɑ ókɑ̈bbø thyew ki jyɑ̈ggi wɑ̈thi kɑ̈lli wun. “Ge ɑ́köbbɑ kì bøli kenyɑni kinni, ‘Nyi lïngi wun gønyyi jii wun, kɑ kwøbbɑni nyi løøg wun. Nyi løøg wun gøny kidøøj, ying dhɑnhø gönyø kɑ wɑɑd gen, wɑlɑ̀ geki wëdh ɑ gönyø. Nyi løøgu kwøb yethi wun bong geny, mïdhu ji ge pɑ̈r, cɑgg ge løg møg wɑlɑ̀ møg. Ko di dhɑnhø me böggi yi wun, mɑ́ lögg-ɑ løøg yi wun kɑ̈ɑ̈l-ɑ yï Jwøk. Ke di gøny me teeg, e dhɑl-ɑ wun, muuju en yɑn, óløøg yi yɑn.’ Wu ɑ́cegɑ thyew kipe gïg-ɑ kyeelø møg-ɑ ɑ́gøggi yi wun. “Aköbbi wɑ yi Jwøng-ɑ Ácwɑ̈ɑ̈j kinni i dhwödh wɑ. Kɑ wɑ odhwödhø kì buti Kïti Sinɑy, wɑ bɑ̈ɑ̈n-ɑ ryɑng-ɑ dwøng, ryɑng-ɑ ceg ki böggø, wɑ kedh-ɑ myërri kïtti tyëng Amör. Kɑ wɑ wɑ̈dh-ɑ Kɑdic Berniyɑ̀, “De yɑ ɑ́köbbi yi wun kinni, ‘Wiy wɑ öd wɑ ki ji møg lyeew pinyɑni møti, o wɑ ónyudhi yi gen ki yuu-ɑ ókɑ̈ɑ̈l yi wɑ, o kɑ̈ddi gen lidh, mɑ bëëd gen kidï.’ “Kwøbbɑni ɑ́nënni ge døøj, ɑkɑ̈bbɑ ki jøg-ɑ cwøw pyɑ̈rø wïdɑ́ryew kì wɑ̈thi kɑ̈lli wun bënn, wïj gøl ki dhɑnhø. Kɑ ge kedh-ɑ myërri kelli kïttì, gïti kɑ ɑ́wɑ̈dhi gen Töör Acköl, kɑ yije yɑb yi gen. Kɑ ge ódwöögø ge ókɑ̈ddø ki nywøli yenhi pinyɑni, ge okööbø kinni, ‘Piny-ɑ mëggi wɑ yi Jwøng-ɑ Ácwɑ̈ɑ̈j, bɑ piny me lɑ̈be med cɑrø.’ “De dhøg Jwøøg wun, Jwøng-ɑ Ácwɑ̈ɑ̈j ɑ́pyem wun, kɑ wu ocögø wu pɑ kedhi pinyɑni. Wu ɑ́yöd wu ceg-ɑ gøny keti wun kinni ‘Wɑ mɑɑn yi Jwøng-ɑ Ácwɑ̈ɑ̈j! Wɑ ɑ́kɑ̈ɑ̈le wɑ̈g kì Rïp kɑ per kinni, o wɑ cïbe cinggi tyëng Amör, o wɑ nɑ̈g yi gen. Wɑ kedhi kunɑni kɑ per ngø, e wɑ óböggø?’ Kɑ jøg-ɑ ɑ́ör yi wɑ okööbø kinni i tyëng pönhɑni teg, o ge bɑ̈rrø kibølee, i kɑ̈ddi gen bɑ ɑger ki dör mø wɑ̈dhi mɑl, o tyëng pönhɑni bɑ kwɑrri Anɑk, ge ceg bëëdø gɑ jödd bënn!’ “De wu ɑ́köbbɑ kinni, ‘Wu ko böggi yi jiɑni. Jwøøg wun, Jwøng-ɑ Ácwɑ̈ɑ̈j ɑ cyɑ̈dhi kì bøli wun, ónyïɑ̈ggi kiper wun, ni kɑ ɑ́nyïɑ̈gge kiper wun kì Rïp, kɑ lidh yi wun ki nyingi wun. Kɑ lidh yi wun ki kër-ɑ ɑ́kɑ̈lle wun kì yij pɑ̈l, wu kwɑgge’ kwɑggø ni wɑ̈d, gïti kɑ ɑ́wɑ̈nhi wun keny.’ De Jwøng-ɑ Ácwɑ̈ɑ̈j nuti gɑ̈nø yi wun, ngö møgɑni ngɑ̈nyi yi wun ge bënn, e men-ɑ́ en, nyi cyɑ̈dh-ɑ́ɑ̀ bøli wun, o wu yɑ̈bbe ki keny guddi yi wun ki kɑɑl. Nyi cyɑ̈dhi kì bøli wun ɑ́ lööj mɑc kì wɑ̈r, o bɑ lööj pøølø kì dicɑ̈ng e nyodh-ɑ yöö. “Gøøny wun ɑ́lïngi yi Jwøng-ɑ Ácwɑ̈ɑ̈j, kɑ pyëwe órënyø ki mendwøng, ɑkööbe ki rɑ̈ji pyëwe kinni, ‘Bong dhɑnhø ɑ́kyel kì kelli wun, wu rïny-ɑ rɑj èn, men-ɑ ókedhi pinyɑni, piny-ɑ lɑ̈be med, piny-ɑ ɑ́kwøbɑ cøn kinni ómëggɑ kweyyi wun. Dɑ́ Kɑlib wɑ̈d Yepunɑ̀ kete ɑ ókedhi pinyɑni. En ɑ ɑ́mïdhi kwøbbɑ, o piny-ɑ ɑ́lyeewe ómëggɑ en geki wɑ̈dde.’ O ki gööj wun thyew, Jwøng-ɑ Ácwɑ̈ɑ̈j pyëwe ɑ́rënyi ki yɑn, ɑkööbe kinni, ‘Cɑgg ɑ́ yïn thyew Mosɑ̀, yï pɑ kedhi pinyɑni. De cïj Jöcwø wɑ̈d Nun, nyel-ɑ nyi køny yïn, bɑ en ɑ ópeej Isrɑil be kwɑnyi pinyɑni.’ “Codhe, ɑköbbi wɑ bënn yi Jwøng-ɑ Ácwɑ̈ɑ̈j kinni, ‘Nyigi wun møg-ɑ nudd ge thønhø, ɑ kwïj gïnrɑj kí gïndøj, gen ɑ ókedhi pinyɑni; gen ɑ nywøl-ɑ ɑ́kwøb yi wun kinni i ge ómɑg yi tyëngmɑ̈ɑ̈nø. Pinyɑni ómëggɑ gen, o ókwɑny yi gen ceth. De wun, løg wun ri wun, kɑ wu kedhu yij pɑ̈l, wu døøg-ɑ kuni Gøøli Agɑbɑ̀.’ “Kɑ wu ólöggø kinni, ‘Mosɑ̀, wø ɑ́røngi kì bøli Jwøng-ɑ Ácwɑ̈ɑ̈j. De ɑnɑn wø kedh-ɑ be nyɑɑg ni kɑ ɑ́kööb Jwøng-ɑ Ácwɑ̈ɑ̈j.’ Akwɑny wun jɑmmi liny, wu orumø kinni i mɑgi myërri kelli kïttì óbëëd e yööd. “De Jwøng-ɑ Ácwɑ̈ɑ̈j yɑ ɑ́köbbe kinni, ‘Kyëddí gen, ge ko kedhi be nyɑɑg, mɑ́ yɑ koo ying me nud kì kelli gen, keløg ge ókedh, ge pɑ tyɑ̈mø.’ Møg-ɑ ɑ́kwøb yi Jwøng-ɑ Ácwɑ̈ɑ̈j ɑ́köbbɑ wun ceth, de wu nuti lïngø. Dhøg Jwøng-ɑ Ácwɑ̈ɑ̈j ɑ́pyem wun, kɑ wu kedh-ɑ myërri kelli kïttì wu ótøllø. Codhe, kɑ tyëng Amör møg-ɑ bëëdø kì kelli kïttɑni wøøw-ɑ kelli wun ni kïc. Kɑ wu cyeddi yi gen, cɑg kì Seir gïti Órmɑ̀, wu pwööd ge’ piny. Codhe, ɑywøøg wun kö Jwøng-ɑ Ácwɑ̈ɑ̈j, o wu køny yi en, de kwøbbi wun nuti lïngø yi en. “Kɑ wɑ obëëdø kì Kɑdic ki keny me bɑ̈ɑ̈r. Codhe, ɑdhwödh wɑ cyee wɑ døøg-ɑ yij pɑ̈l, wɑ døøg-ɑ kuni Gøøli Agɑbɑ̀, ni kɑ ɑ́ceg wɑ yi Jwøng-ɑ Ácwɑ̈ɑ̈j. Kɑ wɑ tyëg-ɑ keny me bɑ̈ɑ̈r wɑ wen-ɑ kïtti Seir. “Codhe, ɑköbbi yɑn yi Jwøng-ɑ Ácwɑ̈ɑ̈j kinni, ‘Wu ɑ́tyëg-ɑ keny me bɑ̈ɑ̈r wu wen-ɑ kït men, løg wun wɑ̈thi wun wɑɑng wuudø. Kɑ teedø köbbí kinni, ɑnɑn wu ɑ́cyɑ̈ngi ki kɑ̈li yethi myërri nyiimï wun, wɑ̈ddi Isøø. Ge óbwøg yi wun, de wu ko nyïɑ̈ggi ki gen, mɑ́ wu pɑ nëngi yi yɑn kì ri piny gen, cɑgg ɑ́ men-ɑ́ keny cïb tyelø yøw. Pinyɑni ɑ́rum ki mëggi kwɑrri Isøø yi yɑn. Ceg wun ngyew ki gïncɑm geki pï kì yï gen.’ “Nyi pɑrru kër-ɑ ɑ́gyëëdh wun yi Jwøng-ɑ Ácwɑ̈ɑ̈j, kì ri gïg-ɑ gøggi yi wun bënn. Wu ɑ́korre kì kɑɑm-ɑ ɑ́wïïn wun kì yij pɑ̈l-ɑ lɑɑj èn. Wu ɑ́konge ki runn pyɑ̈r ɑ́ngwen, kɑ bong-ɑ gïjø mɑ ɑ́jɑ̈ddi wun. “Codhe ɑdhwödh wɑ, wɑ kyëj-ɑ nyiimïee kwɑrri Isøø, wɑ bɑ̈ɑ̈n-ɑ yuu-ɑ kedhi Luuy Omelø, e pödh-ɑ Elɑth geki Edhïön Geber, ɑløg wɑ wɑ̈thee wɑɑng wuudø kì kuni wɑɑng cyɑ̈ɑ̈ng mwøl, wɑ kedh-ɑ Moɑb. Kɑ yɑ köbbi yi Jwøng-ɑ Ácwɑ̈ɑ̈j kinni, ‘Tyëng Moɑb kwɑrri Lot ko nywɑl wun, wɑlɑ̀ wu ko nyïɑ̈ggi ki gen, mɑ́ wu pɑ nëngi yi yɑn kì ri piny gen, ge ɑ́mëggɑ Kɑɑl Aɑr.’ ” (Ádɑ ji mø bɑ jödd mø cwølli gɑ Emïm, ge ɑ́bëëd ɑ Aɑr, ge ɑ́bëëd ge bɑ̈rrø ni kwɑrri Anɑk. Ge ɑ́cwølli gɑ Repɑim ni kwɑrri Anɑk, de ge nyi cwølli gɑ Emïm yi tyëng Moɑb. Tyëng Kör ɑ́bëëd ɑ Edöm (Seir) de ge ɑ́cyeddi yi kwɑrri Isøø, kɑ kwɑrri Isøø pëgg-ɑ pinyɑni, ni tyëng Isrɑil kɑ ɑ́lony gen tyëngmɑ̈ɑ̈nø ki cyeddø, kɑ ge pëgg-ɑ piny gen.) “Codhe, ɑbɑ̈ɑ̈n wɑ Dhøg Dhered ni kɑ ɑ́köbbi wɑ yi Jwøng-ɑ Ácwɑ̈ɑ̈j. Bɑ runn pyɑ̈r ɑ́dɑ̈g wïdɑ́bïdɑ̈g ɑ ɑ́pöödh, kër-ɑ ɑ́dhwödh wɑ kì Kɑdic Berniyɑ̀, gïti kɑ ɑ́bɑ̈ɑ̈n wɑ Dhøg Dhered. Kì bøli kenyɑni rïny-ɑ ɑ́bëëd gɑ jøliny rum thumø ki thøø bënn, ni kɑ ɑ́kööb Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j ɑ́bëëd e cɑyy-ɑ gen ceth, gïti kɑ ɑ́tyëge gïn ki nɑ̈gø bënn. “Keny-ɑ ɑ́rum gen ki thøø bënn, ɑköbbi wɑ yi Jwøng-ɑ Ácwɑ̈ɑ̈j kinni, ‘Bɑ̈ɑ̈n wun piny Moɑb dicyɑ̈ngtïn wu kɑ̈l-ɑ yuu Aɑr. Wu ócyɑ̈ngi ki kwɑrri Amön, ɑ løg Kwɑrri Lot. Ge ko nywɑl wun, wɑlɑ̀ wu ko nyïɑ̈ggi ki gen, kipe wu pɑ nëngi yi yɑn kì ri piny-ɑ ɑ́mëggɑ gen.’ ” (Repɑim, bene nying-ɑ ɑ́bëëd ge nyi cwøl-ɑ tyëng-ɑ ɑ́bëëd kì pinyɑni, o ge cwølli yi tyëng Amön gɑ Dhɑmdhumïm. Ge ɑ́bëëd ge bɑ̈rrø bënn ni kwɑrri Anɑk. Ge ɑ́bëëd ge gïïr, o ge bɑ jur me teeg cɑrø. De ge ɑ́ryɑ̈g yi Jwøng-ɑ Ácwɑ̈ɑ̈j kipe kinni, o pinyɑni kwɑny yi tyëng Amön, o ge pëggi gen yije. Gïn ni menɑni ɑ ɑ́gwøg yi Jwøng-ɑ Ácwɑ̈ɑ̈j kipe tyëng Edöm, kwɑrri Isøø ɑ ɑ́bëëd kì Seir; tyëng Kör ɑ́ryɑ̈ge kipe kinni o piny gen kwɑny yi tyëng Edöm, kwɑrri Isøø, o ge pëggi gen yije, ɑ nudd ge bëëd ɑ kenyɑni ɑnɑn. Piny-ɑ kömi Nɑɑm Omeli Tɑr, ɑ́bëëd-ɑ yi ji mɑ ɑ́kɑ̈ɑ̈l muji Kirit. Kɑ tyëng-ɑ ɑ́ying pinyɑni, ɑ løg tyëng Abɑ̀ nɑ̈g yi gen, ɑkwɑny gen piny gen bëne gïti Gɑdhɑ̀ kì wɑɑng wurlwɑl.) “Kì bɑng kɑ ɑ́rum wɑ ki bɑ̈ɑ̈ni piny Moɑb, ɑköbbi wɑ yi Jwøng-ɑ Ácwɑ̈ɑ̈j kinni, ‘Anɑn, kedh wun, kɑ Nɑm Arnön bɑ̈ɑ̈n wun. Sïön rɑ̈ɑ̈dh tyëng Amör, ɑ jyɑ̈gø kì Kicbön, cïbɑ’ cinggi wun, geki pinye. Pɑ̈ɑ̈r wun köme, kɑ pinye kwɑny wun. Cɑg dicyɑ̈ngtïn ceth, dhɑnhø bëne óløgɑ me böggi yi wun. Dhɑnhø bëne dële óceg okïr kenyi lïng gen kinni wu cyɑ̈ngø ki gen.’ “Codhe, ɑödɑ ki ji kì Kedemöth, yɑ öd-ɑ yï Rɑ̈dh Sïön kì Kicbön, yɑ kwɑjj-ɑ en kipe mër kinni, ‘Wiy wø kedh wøn wø bɑ̈ɑ̈n-ɑ pinyí. Wø ókedh wø bødh-ɑ yöö ceth. Wø óceg ngyew ki gïncɑm geki pï kì yï wun. Wø dwɑdd-ɑ bɑ̈ɑ̈ni pinyí kete yøw, gïti keny-ɑ óbɑ̈ɑ̈n wøn Nɑm Urdun, wø kedh-ɑ piny-ɑ ɑ́mëggi wøn yi Jwøøg wøn, Jwøng-ɑ Ácwɑ̈ɑ̈j. Kwɑrri Isøø møg-ɑ bëëdø kì Edöm, geki tyëng Moɑb møg-ɑ bëëdø kì Aɑr ɑ́rum ki yïëyø, kɑ piny gen bɑ̈ɑ̈n yi wøn.’ “De Rɑ̈dh Sïön wɑ ɑ́mɑ̈ɑ̈ne kɑ̈l yij pödhe. Ágöjji tegi wïj geki pëëmø yi Jwøøg wun, Jwøng-ɑ Ácwɑ̈ɑ̈j, kipe kinni, o ótyɑm yi wɑ kɑ pinye kwɑny wɑ, ni kɑ̀ nudd e bëëd-ɑ yi wɑ ɑnɑn. “Codhe, ɑköbbi yɑn yi Jwøng-ɑ Ácwɑ̈ɑ̈j kinni, ‘Wu ókøny yi yɑn ki tyɑmi Rɑ̈dh Sïön geki pödhe. Dhwödh wun, kedhu be kwɑnyi pinyɑni.’ Kɑ Sïön bï-ɑ be nyɑɑg ki wɑ geki yɑye bëne, kì buti Yɑɑ̈dh, de ɑ́cïb cinggee yi Jwøgee, Jwøng-ɑ Ácwɑ̈ɑ̈j, kɑ nɑ̈g yi wɑ geki wɑ̈dde kí jøge bënn. Amɑg wɑ kɑ̈dde bënn, kɑ ge rënyi yi wɑ, kɑ dhɑnhø bëne nɑ̈g wɑ, mɑ̈nn, kí cwøw kí othønhø. Bong dhɑnhø mɑ ɑ́döng e onëënø. Dhög ɑ́kwɑny yi wɑ, kɑ kɑ̈dd yɑg yi wɑ. Cɑg kì Aröeer, kì tøg töör Arnön, kí kɑɑl-ɑ dïtörɑni gïti Gilyɑd. Bong kɑɑl dörø mɑ ɑ́döng e nuti cïb cinggee yi Jwøgee, Jwøng-ɑ Ácwɑ̈ɑ̈j. De wɑ ɑ́cög wɑ nuti kedhi myërri kwɑrri Amön, o wɑ nuti wɑ̈dhi kömi Nɑm Yɑbok, kí myërri kelli kïttì, wɑlɑ̀ wɑ nuti kedhi kɑ̈jj-ɑ ɑ́kyëddi wɑ yi Jwøgee, Jwøng-ɑ Ácwɑ̈ɑ̈j kinni i wɑ ko kedhi yethi gen. “Codhe ɑkedh wɑ, wɑ kedh-ɑ kuni myërri Bɑcɑn, kɑ Rɑ̈dh Og bï-ɑ be nyɑɑg ki wɑ, ki men-ɑ́ yɑye bëne, kì buti Edrey. De yɑ ɑ́köbbi yi Jwøng-ɑ Ácwɑ̈ɑ̈j kinni, ‘Yï ko böggi yi en, cïbɑ’ cingí, en kí jøge geki kɑ̈dde bënn. Göggí gïn-ɑ ɑ́göggí Rɑ̈dh Sïön rɑ̈ɑ̈dh tyëng Amör, ɑ ɑ́jyɑ̈ɑ̈g kì Kicbön.’ “Codhe, ɑcïb Rɑ̈dh Og kí jøge geki kɑ̈dde cinggee yi Jwøng-ɑ Ácwɑ̈ɑ̈j. Kɑ ge nɑ̈g wɑ bënn. Kɑ kɑ̈dde bënn yɑg yi wɑ. Bong kɑɑl ɑ́kyel mɑ ɑ́döng e nuti mɑɑg wɑ, wɑ ɑ́mɑg-ɑ kɑ̈dd pyɑ̈r ɑ́bïkyel kì myërri Argöb møg-ɑ ɑ́jɑɑg yi Rɑ̈dh Og, rɑ̈ɑ̈dh Bɑcɑn. Kɑ̈ddɑni bënn ɑ́bëëd gɑ ɑwen ki dör mø wɑ̈dhi mɑl, dhøggi dörrɑni, dɑ thïg mø bɑ ɑgɑ̈r. O kɑ̈dd-ɑ thønhø ɑ nuti gëddø ki dör pɑ kwɑn. Kɑ̈ddɑni ɑ́rënyi yi wɑ, kɑ jøg-ɑ cwøw nɑ̈g yi wɑ geki mɑ̈nn kí othønhø, ni men-ɑ ɑ́göggi wɑ kɑ̈ddi Sïön rɑ̈ɑ̈dh Kicbön. Dhög ɑ́kwɑny yi wɑ, kɑ kɑ̈ddɑni yɑg yi wɑ. “Kì bøli kenyɑni, piny-ɑ løøg Nɑm Urdun kì wɑɑng cyɑ̈ɑ̈ng mwøl, cɑg kì kömi Nɑm Arnön gïti Kïti Kermön ɑ́kwɑny yi wɑ kì yï rɑ̈nhi tyëng Amör ryeet. (Kïti Kermön cwøl ɑ́ Sïrïön yi tyëng Sïdön, o cwøl ɑ́ Senïr yi tyëng Amör.) Myërri Og rɑ̈ɑ̈dh Bɑcɑn ɑ́kwɑny yi wɑ, ɑ løg myërr-ɑ kwøømø, kí myërri Gilyɑd, kí Bɑcɑn gïti kɑ̈ddi Cɑlicɑ̀ geki Edrey kì kuni wɑɑng cyɑ̈ɑ̈ng mwøl.” (Rɑ̈dh Og kete ɑ dööngø kì bɑng tyëng Repɑim kɑ ɑ́thumi gen. Sɑrire men-ɑ ógwøgø ɑ́ ngyënyø dødø, bɑ̈re bɑ mïtïr ɑ́ngwen, o lɑ̈je bɑ mïtïr ɑ́ryew, nudd e nud kì Rɑbɑ̀, kɑɑl tyëng Amön.) “Pinyɑni ɑ́mɑg yi wɑ kì bøli kenyɑni, e dhøge cɑ̈g-ɑ́ɑ̀ kɑɑl Aröeer kì kömi Nɑm Arnön, kí budi myërri kïtti Gilyɑd, geki kɑ̈ddi gen bënn, kɑ mëggɑ gøl Ruben geki gøl Gɑd. Kɑ budi Gøl Mɑnɑsè mëggɑ bun-ɑ ɑ́döng kì ri Gilyɑd, kí Bɑcɑn bëne, piny-ɑ ɑ́jɑɑg yi Og, ɑ løg myërri Argöb bënn.” (Bɑcɑn ɑ́bëëd e cwøl ɑ́ piny Repɑim. Myërri Argöb bënn, ɑ løg Bɑcɑn gïti keew Gecur geki Mɑɑkɑ̀, ɑ́kwɑny yi Yɑir wɑ̈d Mɑnɑsè. Myërrɑni ɑ́cɑge ki nyinge, ge nudd ge cwølli gɑ myërri Yɑir gïti dicyɑ̈ngtïn.) “Gilyɑd ɑ́mëggɑ gøl Mɑkir wɑ̈d Mɑnɑsè. Kɑ wïj gøl Ruben geki wïj gøl Gɑd mëggɑ myërr-ɑ cɑ̈gi kì Gilyɑd gïti kömi Nɑm Arnön. Keew gen kì wɑɑng wurlwɑl ying-ɑ dïnɑmɑni. O keew gen kì wɑɑng wuudø bɑ Nɑm Yɑbok, kwëe ɑ bɑ keew Amön. Keew gen kì wɑɑng cyɑ̈ɑ̈ng böörø, wɑ̈dh-ɑ kömi Nɑm Urdun, o cɑ̈g-ɑ́ɑ̀ Tɑɑy Gɑlelì gïti Luuy Omelø kì wɑɑng wuudø, kɑ gït-ɑ thɑ Kïti Pisgɑ̀ kì wɑɑng cyɑ̈ɑ̈ng mwøl. “Kɑ kɑ̈ll-ɑ ɑ́döngi løøng-ɑ wɑɑng cyɑ̈ɑ̈ng mwøl cegɑ kì bøli kenyɑni kinni, ‘Piny men, ɑ́mëggi wun yi Jwøøg wun, Jwøng-ɑ Ácwɑ̈ɑ̈j, kì løøg Nɑm Urdun wɑɑng cyɑ̈ɑ̈ng mwøl, o wu bëëd wun kì yije. Anɑn, kwɑnyu jɑmmi liny, kɑ nɑm bɑ̈ɑ̈n wun. Møøl liny wun bøli nyiimï wun, tyëng Isrɑil be kønyi gen ki mɑgi piny gen. Mɑ̈nni wun geki othønhø kí dhögi wun bene gen ɑ ódöng kì kɑ̈dd-ɑ ɑ́mëggɑ wun, o ngɑ̈nyi yi yɑn kinni yï wun dɑ dhög mø gïïr. Køny wun wɑddi wun, tyëng Isrɑil gïti keny-ɑ ócïb gen piny yi Jwøng-ɑ Ácwɑ̈ɑ̈j ni wun kì piny-ɑ ɑ́mëgge gïn, kì løøg Nɑm Urdun kì wɑɑng cyɑ̈ɑ̈ng böörø. O rume cyee, o wu døg wun, ngɑn kedh-ɑ piny-ɑ ɑ́mëggɑ en.’ “Codhe, ɑcegɑ Jöcwø kinni, ‘Álidh yi yïn ki wɑngí, eni gïn-ɑ ɑ́göggi Rɑ̈dh Sïön geki Rɑ̈dh Og yi Jwøgí, Jwøng-ɑ Ácwɑ̈ɑ̈j, gïn ni menɑni ɑ ógögge rɑ̈nh-ɑ pinye köme ópɑ̈ɑ̈r yi wun. Wu ko böggi yi gen, mɑ́ Jwøøg wun, Jwøng-ɑ Ácwɑ̈ɑ̈j, ónyïɑ̈ggø kiper wun.’ “Kɑ yɑ ókwɑ̈jjø yɑ odhɑmmø kì bøli kenyɑni kinni, ‘Wuö, Jwøng-ɑ Ácwɑ̈ɑ̈j, ngɑ̈nyi yi yɑn kinni yɑ ɑ́nyudhí’ mø nøg yøw kì ri gïgdøngø møg-ɑ ógwøg yi yïn ki tegí. Bong jwøg megø kì mɑl wɑlɑ̀ kì piny, me cuggi gwøg ki gïg ni møgɑni! Yïn ɑ Jwøng-ɑ Ácwɑ̈ɑ̈j, wiy yɑ kedhɑ løøg Nɑm Urdun, o piny-ɑ lɑ̈be med kì løøngɑni lidhɑ, piny-ɑ bɑ kwøømø, geki myërri kïtti Lubnɑn. “De Jwøng-ɑ Ácwɑ̈ɑ̈j ɑ́bëëd pyëwe dɑ liny ki yɑn, kì bɑng gööj wun. Kɑ yɑ köbbe kinni, ‘Árum, yɑ pɑ dwɑddi lïngø ki møgɑni këti! Yedhí oledh Kïti Pisgɑ̀, kɑ yï lïïdh wɑɑng wuudø kí wɑɑng wurlwɑl, kɑ yï lïïdh wɑɑng cyɑ̈ɑ̈ng mwøl kí wɑɑng cyɑ̈ɑ̈ng böörø. Gïg-ɑ ólidh yi yïn, ti gen ki nennø kidøøj, mɑ́ yï pɑ pɑ̈nyi kedhi løøg Nɑm Urdun. Ceg Jöcwø, kɑ cïïj o pyëwe tënge, kipe bɑ en ɑ ópeej ji pinyɑni, o gï mëgge piny-ɑ ɑ́lidh yi yïn.’ “Codhe, ɑ pëggi wɑ yij tör-ɑ rwööm ki Betpeor.” Codhe, ɑköbbi teedø yi Mosɑ̀ kinni, “Lïngu cigg-ɑ pwönyɑ wun bënn, o wu ónëën wun, kɑ wu kedh-ɑ yij piny-ɑ mëggi wun yi Jwøøg kweyyi wun, Jwøng-ɑ Ácwɑ̈ɑ̈j. Ko di gïn kïdhi yi wun kömi møg-ɑ ɑ́cïgɑ wun, kɑ ko di gïn kɑ̈ɑ̈l yi wun wɑ̈g kì ri gen. Mïdhu ciggi Jwøøg wun Jwøng-ɑ Ácwɑ̈ɑ̈j, cigg-ɑ cïgɑ wun èn. Gïn-ɑ ɑ́gwøg yi Jwøng-ɑ Ácwɑ̈ɑ̈j kì Bɑɑl Peor ɑ́lidh yi wun. Tyëng-ɑ ɑ́kwɑjji Bɑɑl ɑ́nɑ̈ge bënn kì kunɑni, de wun, wu tyëng-ɑ ɑ́mɑ̈gi kì ri Jwøng-ɑ Ácwɑ̈ɑ̈j, wu nudd wu onëënø dicyɑ̈ngtïn. “Wu ɑ́pwönyɑ ki cigg bënn, ni kɑ ɑ́köbbi yɑn yi Jwøgɑ, Jwøng-ɑ Ácwɑ̈ɑ̈j. Mïdhu gen ceth kì piny-ɑ yije kedhi yi wun, ɑ́ men kwɑny yi wun. Mïdhu ciggɑni, kɑ wu göög wun kì ri gen, o yod yi pödhh-ɑ kyeelø kinni wɑ̈thi wun pel. Keny-ɑ ólïngi gen ciggɑni, ge ókööbø kinni, ‘Á peli wïj geki dïdø me bëëdø kidï, ɑ yï pönh-ɑ dwøng ni men!’ “Bong pödhø me nud, cɑgg e dwøng ni ngø, me yïe di jwøg me cyɑ̈gi ki en, kenyi cwøl ge gøn; bong jwøg me pɑ̈ɑ̈r ki Jwøgee, Jwøng-ɑ Ácwɑ̈ɑ̈j, ɑ nyi jwɑn löggø kenyi cwøl wɑ en. Bong pödhø me nud, cɑgg e di bëëd e dwøng ni ngø, me yïe di cigg mø døøj ni cigg-ɑ ɑ́pwönyɑ wun dicyɑ̈ngtïn. Bëëd wun nyingi wun yieeb wun! Wɑ̈thi wun ko wëggu wïlø ki gïg-ɑ ɑ́lidh yi wun kí nyingi wun, ki kɑɑm ni kɑɑm-ɑ óbëëd wun kì kömi piny. Köbbi wun nyingi wun geki kwɑrri wun, ki gïg-ɑ ɑ́cwöb kì cyɑ̈ng-ɑ ɑ́cungi wun kì bøli Jwøøg wun, Jwøng-ɑ Ácwɑ̈ɑ̈j, kì thɑ Kïti Sinɑy, kí kɑ ɑ́köbbe yɑn kinni, ‘Cwøl teedø, o ge lïngi gen gïn-ɑ dwɑddɑ kwøbø, o ge dïd gen ki mïdhi ciggɑ, ki cyɑ̈ng-ɑ óbëëd gen kì kömi piny, o nyigi gen ólony ki pwönyø yi gen.’ “Köbbu nyigi wun ki kër-ɑ ɑ́cungi wun kì thɑ kït, e bɑ ɑkum yi pøølø me looj, kí mɑc me lyel e wɑ̈dhi mɑl, yïrø ì dut. Köbbu gen ki kër-ɑ ɑ́kööb Jwøng-ɑ Ácwɑ̈ɑ̈j ki wun, e kööb ɑ yij mɑc, kí kɑ ɑ́lïngii yi wun e okööbø, de pɑ nenni yi wun, wu lïng-ɑ cwɑg keti gen. Kɑ wu nyudhe kinni mïdhu lwöbø men-ɑ kɑɑm wuki en, kí Cigg-ɑ Pyɑ̈rø møg-ɑ ɑ́gweede kömi ópɑ̈nni kït ɑ́ryew. Yɑ ɑ́köbbi yi Jwøng-ɑ Ácwɑ̈ɑ̈j kinni pwönyɑ wun ki cigg bënn møg-ɑ ómïdhi yi wun kì piny-ɑ yije kedhi yi wun, ɑ́ men kwɑny yi wun. “Keny-ɑ ɑ́kööb Jwøng-ɑ Ácwɑ̈ɑ̈j ki wun kì Kïti Sinɑy, kì yij mɑc, nuti liidh wun mɑ bëëde kidï. Menɑni bɑ kiper wun, ɑdɑ́ cyee, wu ko røngi kɑ ri wun göggi wun ki ngïji jwøg me pɑth kinni tek, cɑgg e gwøg ɑ́ jɑlø wɑlɑ̀ dhɑjø, lɑ̈y wɑlɑ̀ winyø, gïn mulli kì piny wɑlɑ̀ rëjø. Ri wun ko wëggu thɑbø, kɑ wu døøg-ɑ be kwɑjji gïg-ɑ nenni yi wun kì mɑl, ɑ løg cɑ̈ng, kí dwɑ̈y, kí kyell. Gïgɑni ɑ́mëgg-ɑ pödhh-ɑ kyeelø yi Jwøøg wun, Jwøng-ɑ Ácwɑ̈ɑ̈j, o gï mɑlli gen. De wun, wu ɑ́kwɑny yi Jwøng-ɑ Ácwɑ̈ɑ̈j, kɑ wu kɑ̈ɑ̈le wɑ̈g kì yij mɑc, kì Rïp, wu ɑ́kɑ̈ɑ̈l yi en kɑ per kinni o wu gwøge wun ɑ́ jie ni kɑ̀ bëëd wun dicyɑ̈ngtïn. Jwøøg wun, Jwøng-ɑ Ácwɑ̈ɑ̈j, pyëwe ɑ́rënyi ki yɑn, kɑ yɑ mɑ̈ɑ̈ne bɑ̈ɑ̈ni Nɑm Urdun. Yɑ ɑ́mɑ̈ɑ̈ne kedhi piny-ɑ mëgge wun, piny-ɑ lɑ̈be med kì bɑng gööj wun. Yɑ óthøw kì piny men, nɑm pɑ bɑ̈ɑ̈nɑ, de wu ókedh, kɑ wu pëgg-ɑ pinyɑni, piny-ɑ lɑ̈be med. Wɑ̈thi wun ko wïl cyee ki mïdhi lwöbø men-ɑ kɑɑm wun ki Jwøøg wun, Jwøng-ɑ Ácwɑ̈ɑ̈j. Mïdhu cigge, kɑ ri wun ko göggi wun ki ngïji jwøng mɑlli yi wun, mɑ́ Jwøøg wun, Jwøng-ɑ Ácwɑ̈ɑ̈j nɑ mɑc me ceg rɑ̈b, o bɑ Jwøk me rɑj ki tyiel. “Cɑgg ɑ́ keny-ɑ ópëggi wun pinyɑni, kɑ wu onywølø ki nyigi wun, kɑ wu óyïddø ki kwɑrri wun, ri wun ko göggi wun ki ngïjji jwögg mø pɑth kinni tek. Menɑni bɑ gïnrɑj kì yï Jwøng-ɑ Ácwɑ̈ɑ̈j, o pyëwe bɑ men rënyi. Anɑn wu ɑ́cyɑ̈ngi ki bɑ̈ɑ̈ni Nɑm Urdun, de yɑ cwööl-ɑ mɑl kí piny, o ge lïngi gen møg-ɑ köbbɑ wun, o wu ócɑy yi gen keny-ɑ ópyem wun møg-ɑ köbbɑ wun, ke pyem wun dhøgɑ, wu bɑ møg jwɑn lɑ̈ɑ̈nyø kì pinyɑni, wu pɑ mɑ̈gi ki keny me bɑ̈ɑ̈r. Wu ókedhhi yi Jwøng-ɑ Ácwɑ̈ɑ̈j kì kelli ji møøgø, o bɑ mø nøg ɑ óbødh kì kelli wun kì kunɑni. Kì kunɑni, wu ókwɑjji jwögg møg-ɑ ógwøgø ki cingi dhɑnhø; jwögg-ɑ ógwøgø ki yɑdh geki kït, jwögg-ɑ pɑ nëënø, ɑ pɑ lïngø, ɑ pɑ cyɑ̈mø wɑlɑ̀ ɑ pɑ ngwɑ̈jø. Kì kunɑni, Jwøøg wun, Jwøng-ɑ Ácwɑ̈ɑ̈j, óyɑb yi wun, o óyod yi wun, keløg e óyɑb yi wun ki pëthi wun bënn. Keny-ɑ ópɑ̈dhi wun yethi ɑkørr, kɑ gïgɑni bënn bï-ɑ kömi wun, wu ódøøg kö Jwøng-ɑ Ácwɑ̈ɑ̈j, kɑ kwøbbe lïngi yi wun. Wu pɑ wiye piny, wɑlɑ̀ wu pɑ ryɑ̈g yi en, o wïje pɑ wïl ki lwöbø men-ɑ ɑ́lwøb yi en kiree geki kweyyi wun, mɑ́ e bɑ Jwøng lɑ̈mpyëwe pɑ nyi thumi. “Yɑ̈ɑ̈b wun ki tyelli kwøb, cɑg kì kër-ɑ ɑ́cwɑ̈ɑ̈j dhɑnhø yi Jwøk kì kömi piny. Yɑ̈ɑ̈b wun kì yij piny bëne. Dɑ gïjø me dwøng ni men, mɑ ɑ́cwöb cøn? Dɑ dhɑnhø mɑ ɑ́pɑ̈nyi lïngø ki gïn ni menɑni? Dɑ ji mɑ ɑ́cög ge nuti thøø keny-ɑ ɑ́lïngi gen Jwøk e okööbø kì yij mɑc ni wun? Dɑ jwøg mɑ ɑ́pɑ̈nyi kedhø, kɑ okööbø ki ji kì pödhø megø, kɑ gï gwøge gɑ jie, ni Jwøøg wun, Jwøng-ɑ Ácwɑ̈ɑ̈j, ɑ ɑ́kɑ̈ɑ̈l wun kì Rïp? Tege ɑ́nyodhe kì bøli wun, ɑ́bï ki ryɑ̈g geki liny, kɑ ogöögø ki gïïngɑ̈ngø, kɑ gïg mø böggi yi ji göjje cwöbø. Gïgɑni ɑ́gwøg yi Jwøng-ɑ Ácwɑ̈ɑ̈j kɑ per kinni, o yod yi wun kinni, e kete ɑ bɑ Jwøk, bong jwøg megø. Wu ɑ́wëgge lïngi cwɑgge, e cwɑgge kɑ̈ɑ̈l-ɑ mɑl, kipe kinni, o cugge cegi wun, kɑ mɑc mee Kwërø wëgge lidhø yi wun kì piny keny. Wu ɑ́myege, mɑ́ kweyyi wun mɑɑr yi en, kɑ wu kɑ̈ɑ̈le wɑ̈g kì Rïp ki tege, teng-ɑ dwøng. Ácyɑ̈dhi kì bøli wun kɑ pödhh mø døngø kibøli wun cyedde. Kipe kinni, o wu kïdhe piny-ɑ bɑ mi wun. Pɑ̈ddi wun dicyɑ̈ngtïn, kɑ cïb wun pëthi wun kinni, Jwøøg wun, Jwøng-ɑ Ácwɑ̈ɑ̈j, bɑ Jwøk kì mɑl kí piny. Bong jwøg megø këti. Mïdhu cigge bënn, cigg-ɑ mëggɑ wun dicyɑ̈ngtïn, o wu óbëëd wun ki tɑrø wuki nyingi wun, kí kwɑrri wun, kì piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j, o runni wun óbëëd ge ngenyø, o pinyɑni cöge ɑ́ mi wun gïti ɑtheer.” Codhe, kɑ Mosɑ̀ ókɑ̈bbø ki kɑ̈dd ɑ́dɑ̈g kì løøg Nɑm Urdun kì wɑɑng cyɑ̈ɑ̈ng mwøl, gɑ kɑ̈dd møg nyi yömmi yi ngɑn nɑ̈g dhɑnhø, e yieel-ɑ wëye kunɑni, keløg dhɑnhø ceg-ɑ gwɑ̈nyø kì cinge, e bong mɑ̈ɑ̈nø mɑ ɑ́ying kɑɑm gen ki wɑɑd gen menɑni. Yömme yij kɑɑl ɑ́kyel kì kelli kɑ̈ddɑni, o cöge e pɑ nɑ̈g. Gøl Ruben nyi yömme Bedher, kɑɑl-ɑ yij thwørø, o gøl Gɑd nyi yömme Rɑmöth kì Gilyɑd, o gøl Mɑnɑsè nyi yömme Gölɑn kì myërri Bɑcɑn. Ciggi Jwøk geki pwönye ɑ́mëggi tyëng Isrɑil yi Mosɑ̀. Kɑ pinye kwɑny yi gen geki piny Rɑ̈dh Og, rɑ̈ɑ̈dh Bɑcɑn, rɑ̈ɑ̈dh tyëng Amör, rɑ̈nh-ɑ kyeelø, ɑ ɑ́ying løøg Nɑm Urdun kì wɑɑng cyɑ̈ɑ̈ng mwøl. Pinyɑni kön-ɑ́ɑ̀ kɑɑl Aröeer kì tøg töör Arnön e gït-ɑ Kïti Sïrïön, ɑ løg Kïti Kermön. Arëbi thyew ki piny-ɑ løøg Nɑm Urdun kì wɑɑng cyɑ̈ɑ̈ng mwøl, e töng-ɑ wɑɑng wurlwɑl, kì kömi Luuy Omelø, gïti thɑ Kïti Pisgɑ̀ kì wɑɑng cyɑ̈ɑ̈ng mwøl. Kɑ tyëng Isrɑil bënn cwøøl kej ɑ́kyel yi Mosɑ̀, ɑköbbe gïn kinni, “Wun ɑ tyëng Isrɑil, lïngu cigg-ɑ köbbɑ wun dicyɑ̈ngtïn. Dïd wun ciggɑni kɑ ge mïdhi wun. Jwøgee, Jwøng-ɑ Ácwɑ̈ɑ̈j, ɑ́nywɑ̈ɑ̈g ki kwøb kí wɑ kì Kïti Sinɑy. Kwøbbɑni nuti nywɑɑg en kɑ wëëgee, dɑ́ kí wɑ, wɑ ɑ nud èn bënn wɑ onëënø. Jwøk ɑ́kööb ɑ bøli wun, e kööb ɑ wïj kït kì yij mɑc. Yɑ ɑ́bëëd yɑ ócungø kì kɑɑm wun, wuki Jwøng-ɑ Ácwɑ̈ɑ̈j, o wu nyi dwöggɑ møg-ɑ kwøb yi Jwøng-ɑ Ácwɑ̈ɑ̈j, mɑ́ wu ɑ́bwøg yi mɑc, kɑ wu ocögø wu pɑ yedhi wïj kït. “Jwøng-ɑ Ácwɑ̈ɑ̈j ɑ́kööb kinni, ‘Bene yɑn, Jwøgí, Jwøng-ɑ Ácwɑ̈ɑ̈j, ɑ ɑ́kɑ̈ɑ̈l yïn wɑ̈g kì Rïp, kej bɑ̈ɑ̈ngø. “ ‘Ko di jwøg me mɑlli yi yïn den-ɑ́ yɑ ketɑ. “ ‘Rií ko göggí ki ngïji gïjø me ying mɑl wɑlɑ̀ piny, wɑlɑ̀ gïg-ɑ ying piny thɑ́ pï. Rií ko bøødh bøli ngïji jwøg me pɑth, ko mɑɑl, mɑ́ yɑn yɑ Jwøgí, Jwøng-ɑ Ácwɑ̈ɑ̈j, yɑ pëddi tyiel. Tyëng-ɑ mɑɑn yɑn nyi cɑyɑ’ cɑyø geki kwɑrri gen gïti ngween rïjj. De døøjɑ nyi nyudhɑ’ rïjj ɑ́lïp mø kwɑnni gen ngenyø, ɑ løg ji-ɑ mɑɑr yɑn, o ciggɑ omïdhø yi gen. “ ‘Nyingɑ ko nyi tïng dhøgí ki bɑ̈jjø, mɑ́ yɑn, yɑ Jwøgí, Jwøng-ɑ Ácwɑ̈ɑ̈j, pyëwɑ pɑ nyi lɑ̈ɑ̈m ki ngɑn-ɑ kømmi nyingɑ ki bɑ̈jjø. “ ‘Nyi pɑr cyɑ̈ɑ̈ng Sɑbɑth, kɑ mïdhí ɑ́ ɑkwër, ni kɑ ɑ́cegɑ yïn, yɑ Jwøgí, Jwøng-ɑ Ácwɑ̈ɑ̈j. Yïí dɑ cyɑ̈ng ɑ́bïkyel møg yethi gen göög yi yïn ki gwøgí, de bïryeew cyɑ̈ng bɑ cyɑ̈ɑ̈ng ywömø, bɑ ɑthyey ɑ́ miɑ. Bong dhɑnhø me göögø kì cyɑ̈ngɑni, ko di gïn gwøg yi yïn, wuki nyigí, kí bɑ̈nggí, kí ɑderrí, kí tyëngpɑth møg-ɑ bëëdø kì butí. Ywööm bɑ̈ngí ceth ni yïn. Nyi pɑr kinni, yï ɑ́bëëd yï bɑ bɑ̈ng kì Rïp, o bɑ yɑn, yɑ Jwøgí, Jwøng-ɑ Ácwɑ̈ɑ̈j, ɑ ɑ́yiel yïn ki tegɑ, teng-ɑ dwøng. Bene ɑ bɑnge cegɑ yïn kinni, kwër cyɑ̈ɑ̈ng Sɑbɑth. “ ‘Wør wïyí geki meyí, ni kɑ ɑ́cegɑ yïn, yɑ Jwøgí, Jwøng-ɑ Ácwɑ̈ɑ̈j, o yï óbëëd ki døøjø, ki keny me bɑ̈ɑ̈r kì piny-ɑ mëggɑ yïn. “ ‘Yï ko nɑ̈gi ki dhɑnhø. “ ‘Yï ko niin ki ngɑn nuti nywøøm wun ri wun. “ ‘Yï ko kwɑ̈ɑ̈d. “ ‘Wɑɑd wun ko gøøny ki kwøbbi pyed. “ ‘Yï ko tyer cï wɑɑd wun, gøle ko tyeer, wɑlɑ̀ pinye, wɑlɑ̀ bɑ̈ngge, wɑlɑ̀ dhöge, wɑlɑ̀ ɑderre, wɑlɑ̀ jɑmm-ɑ kyeelø møg-ɑ bɑ møge.’ “Møg-ɑ ɑ́köbbɑ wun ɑnɑn, bene gen cigg-ɑ ɑ́ceg wun, wu bënn yi Jwøng-ɑ Ácwɑ̈ɑ̈j keny-ɑ ɑ́bëëd wu cugø kì thɑ kït. Bene gen cigg-ɑ ɑ́muuje ki cwɑg mø teeg, e kööb ɑ yij mɑc kì yij pøølø me looj, bong cigg møøgø. Codhe ɑ gweede gïn kömi ópɑ̈nni kït ɑ́ryew, kɑ gï mëgge yɑn. “Keny-ɑ ɑ́lïngi wun cwɑggɑni ge kɑ̈ɑ̈l-ɑ yij muudhø, e kït ceg-ɑ lyelø, ɑbëën jɑggi wɑ̈thi kɑ̈lli wun yïɑ. Kɑ ge okööbø kinni, ‘Jwøgee, Jwøng-ɑ Ácwɑ̈ɑ̈j, wø ɑ́nyudhe dönge geki mɑ̈re keny-ɑ ɑ́kööbe kì yij mɑc, e olïngø yi wøn! Áyod yi wøn dicyɑ̈ngtïn kinni dhɑnhø ócuggø cöögø e pɑ thøw, cɑgg Jwøk kööbø ki en. Dɑ́ kipe ngø ɑ bøy wøn thøø këti? Wø pɑ nɑ̈g yi mɑc menɑni? Ngɑ̈nyi yi wøn, wø ceg-ɑ thøø ke lïngi wøn Jwøøg wøn, Jwøng-ɑ Ácwɑ̈ɑ̈j, e okööbø këti. Á dhɑnhø mɑ ngø ɑ ɑ́lïngi Jwøng-ɑ Nëënø e okööbø kì yij mɑc, kɑ ocögø e pɑ thøw? Mosɑ̀, Døøg, kɑ møg-ɑ ókwøb yi Jwøgee, Jwøng-ɑ Ácwɑ̈ɑ̈j lïngí. Kɑ yï dwöög be köbbi wøn møg-ɑ óköbbe yïn, møgɑni ólïngi yi wøn, kɑ gïn-ɑ dwɑdde gwøg wøn.’ “Keny-ɑ ɑ́lïngi møgɑni yi Jwøng-ɑ Ácwɑ̈ɑ̈j, ɑköbbe yɑn kinni ‘Møg-ɑ ɑ́kwøb yi jiɑni ɑ́lïngɑ, o kwøbbi gen bɑ dyër. Ge ce di cög ge rum ɑ nï! Ke wør gen yɑn, kɑ gïn-ɑ köbbɑ gen nyi gwøg yi gen, bong gïn jɑ̈ddi gen geki kwɑrri gen gïti ɑtheer. Kedh köbbí gen døøg gen yethi kemmi gen. De yïn, Mosɑ̀, bëëd kì butɑ keny, o yï mëggɑ ciggɑ geki kwöngɑ. Pwönyi gen teedø, o gï ómïdhi gen kì piny-ɑ mëggɑ gen.’ “Wu tyëng Isrɑil, nyi gwøg wun møg-ɑ ɑ́cïgi wun yi Jwøøg wun, Jwøng-ɑ Ácwɑ̈ɑ̈j. Ko di ɑ́kyel me pyem yi wun kì ri cigge. Mïdhu cigge bënn, o bëëde e bong gïn jɑ̈ddi wun, o wu óbëëd wun ki døøjø kì piny-ɑ óbëëd ɑ́ mi wun. “Møg bene gen cigg geki kwöng, møg-ɑ ɑ́köbbi yɑn yi Jwøgí, Jwøng-ɑ Ácwɑ̈ɑ̈j, i pwönyɑ gen yïn. Mïdhí ciggɑni kì piny-ɑ óbëëd ɑ́ mi wun. Mïdhí ciggɑni wuki kwɑrrí kidøøj. Kɑ Jwøgí, Jwøng-ɑ Ácwɑ̈ɑ̈j wøør, kɑ kwøbbe lïngí. Kɑ cigge mïdhí ki runn-ɑ nud kì kömi piny bënn, o yï óbëëd kì pinyɑni ki keny me bɑ̈ɑ̈r. Lïngu gen, wu tyëng Isrɑil, kɑ ge mïdhi wun! O óbëëd e bong gïn jɑ̈ddi wun, o wu ógöög wun ki pödhø me dwøng, me kɑ̈rø kì yij piny-ɑ mulli yi cɑg geki møøw kïc, ni kɑ ɑ́kööb Jwøøg kweyyi wun, Jwøng-ɑ Ácwɑ̈ɑ̈j. “Lïngí møg yïn ɑ Isrɑil, Jwøng-ɑ Ácwɑ̈ɑ̈j kete ɑ bɑ Jwøgee. Mɑɑr Jwøgí, Jwøng-ɑ Ácwɑ̈ɑ̈j ki pyëwí bëne, kí wëyí bëne, kí tegí bëne. Wïjí ko pɑ̈nyi wïlø ki cigg-ɑ mëggɑ yïn dicyɑ̈ngtïn. Pwönyí gen nyigí. Nyi cigí gen kwøbø kenyi ying wun kɑl, kí kenyi ying wun wɑ̈g; kenyi bëëd wu ywöm-ɑ ri wun, kí kenyi bëëd wun wu ogöögø. Twööju gen bɑ̈ddi wun, kɑ ge rug wun kì bøli wun, gɑ møg nyi pɑ̈ddi wun. Gweedu gen ɑ́dyëddi uddi wun, kí dhøggi dörri kɑ̈ddi wun. “Ni kɑ ɑ́köbbi kweyyi wun, Abrɑhɑm, kí Isɑɑk, kí Yɑgob yi Jwøøg wun, Jwøng-ɑ Ácwɑ̈ɑ̈j kinni, wu ónënge ki piny me døøj, me yije di kɑ̈dd mø døngø, kɑ̈dd mø nuti ger-ɑ yi wun, gø mëgge’ wun ceth. Ud óbëëd ge pɑ̈ng yi jɑmmì mø nuti kïdh-ɑ yi wun yethi gen. Kunɑni dɑ yïïth mø nuti kony-ɑ yi wun, kí bɑ̈ggi yenh mø nuti pidh-ɑ yi wun. Keny-ɑ ókïdhi wun pinyɑni yi Jwøng-ɑ Ácwɑ̈ɑ̈j, kɑ gïg-ɑ dwɑddu cɑmø bënn yood wun kunɑni, wɑ̈thi wun ko wïl ki Jwøng-ɑ Ácwɑ̈ɑ̈j, ɑ ɑ́yïëël wun wɑ̈g kì Rïp, kun-ɑ ɑ́bëëd wun, wu bɑ bɑ̈ngg. Wør Jwøgí, Jwøng-ɑ Ácwɑ̈ɑ̈j, kɑ mɑllí e kete kete, kɑ yï nyi köngí ki nyinge kete. Yï ko mɑ̈ddi ki jwögg møøgø, kì kelli jwöggi ji-ɑ bëëdø kì bɑdhhi wun. Keløg wu ókwɑ̈jji ki jwögg møøgø, Jwøøg wun, Jwøng-ɑ Ácwɑ̈ɑ̈j pyëwe órënyi ki wun, kɑ wu nɑ̈ge kì pinyɑni, mɑ́ Jwøøg wun, Jwøng-ɑ Ácwɑ̈ɑ̈j, ɑ bëëdø kì kelli wun, pëddi tyiel. “Jwøgí, Jwøng-ɑ Ácwɑ̈ɑ̈j ko rɑɑng, ni kɑ ɑ́rɑng wun en kì Mɑɑsɑ̀. Mïdhu ciggi Jwøøg wun, Jwøng-ɑ Ácwɑ̈ɑ̈j ceth. Nyi gwøgu gïn-ɑ kwøb yi Jwøng-ɑ Ácwɑ̈ɑ̈j kinni døøj ki gwøgø, o bëëd e bong gïn jɑ̈ddi wun, o wu ócuggi wun ki kwɑnyi piny-ɑ døøj, ɑ ɑ́köbbe kweyyi wun, kɑ ji mø mɑ̈n ki wun cyeddi yi wun ni kɑ ɑ́kööb Jwøng-ɑ Ácwɑ̈ɑ̈j. “Keny-ɑ ópyëëj yïn yi nyigí dhuki megø kinni, ‘Á cigg mɑ ngø ɑ ɑ́mëggi wun yi Jwøgee, Jwøng-ɑ Ácwɑ̈ɑ̈j?’ Kɑ ge köbbí kinni, ‘Wɑ ɑ́bëëd wɑ bɑ bɑ̈nggi rɑ̈ɑ̈dh Rïp, de wɑ ɑ́yïëël wɑ̈g yi Jwøng-ɑ Ácwɑ̈ɑ̈j ki tegø. Jwøng-ɑ Ácwɑ̈ɑ̈j ɑ́göög ki gïïngɑ̈ngø, wø onëënø ki nyingi wøn. Möy! Bɑ gïgrijjø mø ni ngø ɑ ɑ́gögge Rïp geki rɑ̈dhe, kí gøl rɑ̈dh geki jyɑ̈gge bënn! Wɑ ɑ́göönye wɑ̈g kì yij bɑ̈ɑ̈ngø kì Rïp, ɑkɑ̈ɑ̈le wɑ piny men, ni kɑ ɑ́köbbe kweyyee cøn kinni pinyɑni ómëgge wɑ. Codhe ɑköbbi wɑ yi Jwøgee, Jwøng-ɑ Ácwɑ̈ɑ̈j kinni i mïdhi wɑ cigg møgɑni bënn, kɑ Jwøgee wør yi wɑ, o wɑ kor yi en, o wɑ óbëëd wɑ ki døøjø e bong gïjø me cɑ̈nni wɑ, ni kɑ̀ bëëd wɑ dicyɑ̈ngtïn. O bëëdø men-ɑ døøj kì yïee wɑng-ɑ mïdhi kwöngɑni geki gøggi møg-ɑ ɑ́cïgi wɑ yi Jwøgee, Jwøng-ɑ Ácwɑ̈ɑ̈j.’ “Jwøgí, Jwøng-ɑ Ácwɑ̈ɑ̈j yï ókïdhe piny-ɑ óbëëd yi yïn, o jurrì ɑ́bïryew ócyeddi yi en kì yije, keny-ɑ ókedh yï kedh-ɑ yije, kedh gï cyedde’ cyeddø. Ge bɑ jurrì mø døngø kibølí, ɑ løg Kit, kí Girgɑc, kí Amör, kí Kɑnɑɑn, kí Perïdh, kí Kib, kí Yebus. Keny-ɑ ócïb jurrɑni bënn cingí yi Jwøgí, Jwøng-ɑ Ácwɑ̈ɑ̈j, nɑ̈g gen bënn. Wu ko lwööb kí gen, pyëwí ko lɑ̈ɑ̈m kí gen. Rií ko wëggí nyömø ki nyɑɑr gen, kɑ wɑ̈ddí ko nyömi ki nyigi gen, wɑlɑ̀ nyɑrí ko nywøm yi gen, kipe nyigi wun óthɑɑb yi gen be mɑlli jwögg-ɑ pɑth ki dyër, kɑ pyëw Jwøng-ɑ Ácwɑ̈ɑ̈j órënyø, kɑ wu jwɑne ki nɑ̈gø. Keny-ɑ ómɑg wun pinyɑni, cøør wun këlli lɑm mø gen piny, kɑ yïkki gen pyeed wun piny, kɑ löjji Aceerɑ̀ tørri wun, kɑ ngïjji jwöggi gen rɑ̈b wun ki mɑc. Gwøgu møgɑni, mɑ́ wu bɑ jii Jwøøg wun, Jwøng-ɑ Ácwɑ̈ɑ̈j. Wun ɑ ɑ́yieny yi en kì kelli jurri kömi piny bënn, o wu bëëd wun, wun ɑ́ jie. “Pɑth kiper ngenyi kwɑnni wun kibøli jurr-ɑ kyeelø, ɑ ɑ́mɑɑr wun yi Jwøng-ɑ Ácwɑ̈ɑ̈j, kɑ wu yienye wun ɑ́ møge, kwɑnni wun nøg kibøli pödhh-ɑ kyeelø kì kömi piny. De Jwøng-ɑ Ácwɑ̈ɑ̈j wu ɑ́mɑɑre, kɑ lwöm-ɑ ɑ́ying kɑɑme kí kweyyi wun mïdhe. Bene ɑ bɑnge yiele wun kì cingi rɑ̈ɑ̈dh Rïp, kì yij bɑ̈ɑ̈ngø, kɑ wu kɑ̈ɑ̈le wɑ̈g ki tegø. Wɑ̈thi wun ko wïl kinni Jwøøg wun, Jwøng-ɑ Ácwɑ̈ɑ̈j, en ɑ bɑ Jwøk, ɑ nyi mïdhi kwøbbe geki lwöm-ɑ ɑ́lwøbe. Lwöbø nyi mïdhe’ mïdhø, o mɑ̈ɑ̈dø mee nyi nyudhe’ ji-ɑ mɑɑrii, ɑ mïdhi cigge kì yethi rïjj ɑ́lïp, de tyëng-ɑ mɑɑnii nyi cɑye’ cɑyø. Anɑn mïdhu møg-ɑ ɑ́pwönyi wun, mïdhu cigg-ɑ ɑ́mëggɑ wun bënn dicyɑ̈ngtïn. “Keløg ciggɑni olïngø yi wun, kɑ ge mïdhi yi wun kidøøj, Jwøøg wun, Jwøng-ɑ Ácwɑ̈ɑ̈j, lwöme ómïdhe kí wun kì bɑng mɑ̈ɑ̈dø mee men-ɑ pɑ nyi lwënyi, ni kɑ ɑ́köbbe kweyyi wun. Wu ómɑɑre kɑ wu gyëdhe, o wu óbëëd wun kì piny-ɑ lɑ̈be med, yï wun dɑ nywøl, kɑ kwɑnni wun óngënyø. Pwödhhi wun ógyëdhe, o wu óbëëd wun yï wun dɑ byel, kí møgi oløg, ki møøw dhetun. Kɑ wu gëdhhe dhög ki dyëg mø ngenyø. Gyëdhhɑni bënn ómëgge wun, kì yij piny-ɑ ɑ́köbbe kweyyi wun, kinni gø ómëgge wun. Bong pödhø megø kì kömi piny men-ɑ ógyëdh ni wun. Bong bwøj men-ɑ óying me nud kì kelli wun, o bong ɑ́ror men-ɑ óløg me nud kì kelli jɑmmi wun. Wu ókorri yi Jwøng-ɑ Ácwɑ̈ɑ̈j ki rɑ̈ɑ̈m dëllì, wu koo göjje rɑ̈ɑ̈m dëll-ɑ rijjø møg-ɑ ɑ́lidh yi wun kì Rïp, de gïgɑni ógöjje tyëngmɑ̈ɑ̈nø bënn. Rënyu pödhh-ɑ ócïb cinggi wun yi Jwøøg wun, Jwøng-ɑ Ácwɑ̈ɑ̈j, nɑ̈gu gen kɑ pëthi wun ko lɑ̈ɑ̈m kí gen. Jwöggi gen ko kwɑjji wun kipe ge ógöögø ki ɑ́kɑ̈lli thøø kì cwɑggi wun. “Wu ko kööb kinni jurrì møgɑni døngø kibøli wun, o ge pɑ lwɑ̈ng yi wun ki tyɑmø. Wu ko böggi yi gen, nyi pɑrru gïg-ɑ ɑ́göggi rɑ̈ɑ̈dh Rïp geki tyëng pödhe bënn yi Jwøøg wun, Jwøng-ɑ Ácwɑ̈ɑ̈j. Nyi pɑrru ryɑ̈g men-ɑ ɑ́lidh yi wun kí nyingi wun, kí gïïngɑ̈ngø, kí ngïjjì møg teg, geki teng-ɑ dwøng men-ɑ ɑ́yieel wun yi Jwøng-ɑ Ácwɑ̈ɑ̈j. Rëny-ɑ ɑ́rënye Rïp, en ɑ órënye jurr-ɑ böggi yi wun ɑnɑn bënn. Ge ógöjji ryɑ̈g yi Jwøøg wun, Jwøng-ɑ Ácwɑ̈ɑ̈j, kɑ møg-ɑ ópɑ̈nni kì kelli gen nɑ̈ge. Wu ko böggi yi gen, mɑ́ Jwøøg wun, Jwøng-ɑ Ácwɑ̈ɑ̈j ying-ɑ kelli wun, o bɑ Jwøk me dwøng me böggi kiree. Jurrɑni ónyiige kì bøli wun ceth. De gï koo cyedde wïj ɑ́kyel, kipe kwɑnni lɑ̈yyi pɑ̈l óngënyi kibøli kwɑnni wun, kɑ wu óböggø yi gen. Ge ócïb cinggi wun yi Jwøng-ɑ Ácwɑ̈ɑ̈j ceth, mɑ́ gï ógöjje böggø yi wun. Ge ótyɑm yi wun kɑ ge nɑ̈g yi wun. Rɑ̈nhi gen ówëgge tyɑmø yi wun. Ge ónɑ̈g yi wun kɑ ge owïlø kì wɑ̈ɑ̈th. Bong dhɑnhø men-ɑ ócungi kì bøli wun gïti keny-ɑ ónɑ̈g wun gen bënn. Rɑ̈bu ngïjji jwöggi gen, kɑ dhɑb kí ɑ́teng-ɑ ri gen ko kwɑny wun, mɑ́ ge mɑɑn yi Jwøøg wun, Jwøng-ɑ Ácwɑ̈ɑ̈j, o ge bɑ møg-ɑ ógöögø ki ɑ́kɑ̈lli thøø kì cwɑggi wun. O gïg-ɑ mɑɑn yi Jwøng-ɑ Ácwɑ̈ɑ̈j ko kɑ̈ɑ̈l wun yethi kɑ̈lli wun, kipe wu óyïddi ki göj kì bɑng gen. Bɑnyu ngïjji jwöggɑni kɑ ge mɑɑn wun, kipe cyënni gen óbï kömi wun, mɑ́ ge bɑ mø cyën. “Mïdhu cigg-ɑ ɑ́mëggɑ wun bënn dicyɑ̈ngtïn, o wu ónëën wun, o kwɑnni wun óngënyi gen, o wu ókwɑnyu piny men-ɑ ɑ́kwøb yi Jwøng-ɑ Ácwɑ̈ɑ̈j kinni gø ómëgge kweyyi wun. Nyi pɑrru kër-ɑ ɑ́pëëj wun wɑ̈g yi Jwøøg wun, Jwøng-ɑ Ácwɑ̈ɑ̈j, kì yij wɑ̈nh-ɑ ɑ́bëën wun kì Rïp, wu bɑ̈ɑ̈n-ɑ ryɑng ki runn pyɑ̈r ɑ́ngwen. Kɑ wu nyi rɑnge ki gïg teg, o gø yode mɑ mïdhi wun cigge ceth. Wu ɑ́göjje kɑ̈j, kɑ wu cɑɑme ki mɑnɑ̀, gïncɑm-ɑ nuti pɑ̈nyø cɑmø yi wun, wuki kweyyi wun cøn. Møgɑni ɑ́gwøg yi en kɑ per pwönyi wun kinni, pɑth ki gïncɑm kete ɑ nyi mïdhi dhɑnhø e onëënø, den-ɑ́ gïn-ɑ kwøb yi Jwøng-ɑ Ácwɑ̈ɑ̈j. Kì yethi runn pyɑ̈r ɑ́ngwen møgɑni, ógudhi wun nuti pyëdø, o tyelli wun nuti kwödø yi wɑ̈dh. Ngɑ̈nyi wun wøw kinni wu ceg yi Jwøng-ɑ Ácwɑ̈ɑ̈j nɑ dhɑnhø kenyi cege nyige, kɑ gï nyi pwöde. Nyi gwøgu møg-ɑ ɑ́cïgi wun yi Jwøng-ɑ Ácwɑ̈ɑ̈j, kɑ ge mïdhi wun, kɑ Jwøng-ɑ Ácwɑ̈ɑ̈j wør wun. Wu kïdh-ɑ piny me lɑ̈be med yi Jwøøg wun, Jwøng-ɑ Ácwɑ̈ɑ̈j, piny me yije di nɑ̈mm-ɑ rïngi kí nyingi pï, kí pïg töngi wɑ̈g kì piny ge mödd-ɑ yij tör, kí kwøømø. Piny me yije cyeg gemè, kí ceir, kí oløg, kí ólɑm kí romɑn, kí dhetun, kí møøw kïc. Wu koo pɑ̈nyi ki mɑgø yi kɑ̈j kì kunɑni, wɑlɑ̀ bong gïjø men-ɑ ócɑ̈nni wun. Yethi kïtte dɑ ngyënyø dødø, o wu ócuggø kony ki dilɑl kì wɑ̈thi kwøømme. Wu ócyɑ̈mø kɑ wu oyɑ̈ngø, kɑ Jwøøg wun, Jwøng-ɑ Ácwɑ̈ɑ̈j pwøj yi wun kipe piny-ɑ lɑ̈be med, ɑ ɑ́mëgge wun. “Wɑ̈thi wun ko wëggu wïlø ki Jwøøg wun, Jwøng-ɑ Ácwɑ̈ɑ̈j, ri wun ko wëggu dhɑlø yi mïdhi cigge møg-ɑ ɑ́mëggɑ wun dicyɑ̈ngtïn. Keny-ɑ óyɑ̈ng wun kɑ wu ogëdø ki ud mø døngø, kɑ wu pëgg-ɑ piny, kɑ dhögi wun óngënyø geki dyëgi wun, kɑ dhɑb, kí ɑ́tegø óngënyø kì yï wun, kɑ jɑmmi wun óngënyø bënn, wɑ̈thi wun ko wëggu tɑ̈dø kí Jwøøg wun, Jwøng-ɑ Ácwɑ̈ɑ̈j, ɑ ɑ́yïëël wun wɑ̈g kì Rïp kun-ɑ ɑ́bëëd wun, wu bɑ bɑ̈ngg. Wu ɑ́pyejje wu bɑ̈ɑ̈n-ɑ ryɑng-ɑ dwøng, ɑ pëddi rɑ̈jø; eni piny-ɑ thwøwø ɑ yije bong pï, kí thölle geki ïïdhe møg-ɑ bɑ nɑ̈ɑ̈g. Kɑ wu thödhe ki pï kì yij kït mɑ gïwi. Wu ɑ́mëgge mɑnɑ̀ kì yij pɑ̈l, o cɑm yi wun, eni gïn nuti pɑ̈nyø cɑmø yi kweyyi wun. Kɑ wu göjje orɑng møti e pɑ̈ny-ɑ wun, kipe kinni o wu ógëdhe gïgdøj cyee. Kɑ wu ko rum cyee kinni wu ɑ́kɑ̈ri kɑ tegi wun. Wɑ̈thi wun ko nyi wïl kinni bɑ Jwøng-ɑ Ácwɑ̈ɑ̈j, Jwøøg wun, ɑ ɑ́thödhi wun ki tegø men-ɑ bɑnge kɑ̈ri wun, mɑ́ e nudd e mïdh-ɑ møg-ɑ ɑ́nywɑge kí kweyyi wun cøn, ni kɑ̀ bëëde dicyɑ̈ngtïn. De keløg wɑ̈thi wun ówïl ki Jwøøg wun, Jwøng-ɑ Ácwɑ̈ɑ̈j, kɑ wu kedh-ɑ be mɑlli jwögg møøgø, wɑ̈thi wun ópɑ̈ɑ̈dh. Wu ɑ́rum ki kyëddø yi yɑn dicyɑ̈ngtïn. Keløg kwøbbi Jwøng-ɑ Ácwɑ̈ɑ̈j pɑ lïngi yi wun, wu ónɑ̈g yi en ni jurr-ɑ dwɑdde nɑ̈gø ɑnɑn, kì bøli wun. “Lïng wun, wun ɑ tyëng Isrɑil! Dicyɑ̈ngtïn Nɑm Urdun obɑ̈ɑ̈nø yi wun, wu kedh-ɑ be kwɑnyi pìnyi jurrì mø døngø, mø teg kibøli wun, pödhø me yije di kɑ̈dd mø døngø, gɑ ɑwen ki dör mø wɑ̈dhi mɑl. Tyëngpinyɑni, kwɑrri Anɑk, ngëddi gen døngø, o ge bɑ̈rrø, per gen ɑ́lïngi yi wun kinni bong ji mø cuggi cung kì bøli gen. De ólidh yi wun dicyɑ̈ngtïn kinni Jwøøg wun, Jwøng-ɑ Ácwɑ̈ɑ̈j cyɑ̈dh-ɑ́ɑ̀ bøli wun, e opɑ̈mmø ni mɑc. Gï ótyɑme, kɑ ge cyeddi yi wun, ge ójwɑn ki nɑ̈gø yi wun ni kɑ ɑ́kööb Jwøng-ɑ Ácwɑ̈ɑ̈j. “Keny-ɑ órum gen ki cyeddø yi Jwøng-ɑ Ácwɑ̈ɑ̈j kiper wun, kɑ wu ko rum kinni pinyɑni ɑ́mëggi wun kɑ per døøji wun, dɑ́ kipe rɑ̈ji tyëngɑni. Pɑth kiper bëëdi wun wu tir, o wu gøgg-ɑ dyër ɑ wëggi wun kwɑnyi piny gen yi Jwøng-ɑ Ácwɑ̈ɑ̈j. Gï cyeede wɑ̈g kɑ per rɑ̈ji gen, geki kɑ̀ dwɑdde mïdhi lwöbø men-ɑ ɑ́lwøb yi en geki kweyyi wun: Abrɑhɑm, kí Isɑɑk, kí Yɑgob. Ngɑ̈nyu wøw kinni piny-ɑ døj ni menɑni nuti mëggi wun yi Jwøng-ɑ Ácwɑ̈ɑ̈j kɑ per kɑ̀ myër wun kí pinyɑni. Wu ceg bëëdø wu bɑ ji mø muddi wun teeg. “Wɑ̈thi wun ko wïl ki kɑ ɑ́wëggu pyëw Jwøøg wun, Jwøng-ɑ Ácwɑ̈ɑ̈j rënyø kì yij pɑ̈l. Wu ɑ́cɑ̈gi pëmø kì cyɑ̈ng-ɑ ɑ́dhwödh wun kì Rïp gïti dicyɑ̈ngtïn wu pemm-ɑ dhøg Jwøng-ɑ Ácwɑ̈ɑ̈j. Cɑgg ɑ́ kì Kïti Sinɑy, Jwøng-ɑ Ácwɑ̈ɑ̈j pyëwe ɑ́wëggi rënyø yi wun ki mendwøng, me di nɑ̈ge wun. Yɑ ɑ́yedhi wïj kït be dwɑɑyi ópɑ̈nni kït ɑ́ryew, ópɑ̈nn-ɑ kömi gen ógweed Cigg, kɑ yɑ obëëdø kì wïj kït ki cyɑ̈ng pyɑ̈r ɑ́ngwen yɑ pɑ cyɑ̈mø, o bong pï mɑ ɑ́mɑdhɑ. Codhe, ɑmëggi yɑn ópɑ̈nni kït møgɑni ryeet, gen ɑ kïtt-ɑ kömi gen ɑ́gweede møg-ɑ ɑ́köbbe wun, e kööb ɑ yij mɑc. Gï ɑ́gwede ki cinge, gen ɑ møg-ɑ ɑ́köbbe wun, wu ócungø kì thɑ kït. Kì bɑng cyɑ̈ng pyɑ̈r ɑ́ngwen kí wɑ̈rr pyɑ̈r ɑ́ngwen, ɑ ɑ́mëggi yɑn kïttɑni ryeet, kïtt-ɑ kömi gen ógweed Cigg. “Codhe, ɑköbbi yɑn yi Jwøng-ɑ Ácwɑ̈ɑ̈j kinni, ‘Jwɑn kedhi piny thɑ kït, kipe jií møg-ɑ ɑ́kɑ̈ɑ̈l yi yïn kì Rïp ɑ́rënyi, kɑ ge ogöögø ki gïnrɑj. Møg-ɑ ɑ́cïgɑ gen ɑ́jwɑn gen ki wiyø, ri gen ɑ́göggi gen ki ngïji.’ “Yɑ ɑ́köbbi thyew yi Jwøng-ɑ Ácwɑ̈ɑ̈j kinni, ‘Jiɑni ngɑ̈nyi yi yɑn kinni muddi gen teeg. Yɑ ko pɑ̈nyí jogø, wiy ge nɑ̈gɑ bënn, o nyingi gen lɑ̈ɑ̈nyɑ kì kömi piny, o yï gwøgɑ yïn ɑ́ pödhø me dwøng kibøli gen.’ “Codhe, ɑløgɑ riɑ kɑ yɑ yïnh-ɑ piny kì wïj kït, yɑ kɑ̈ll-ɑ ópɑ̈nni kït ɑ́ryew møg-ɑ kömi gen ógweed Cigg. Kït ɑ́bëëd e ceg-ɑ lyelø ɑ́ mɑc. Kɑ yodɑ ceth kinni Ciggi Jwøøg wun Jwøng-ɑ Ácwɑ̈ɑ̈j pyeem wun, kɑ ri wun göggi wun ki røjø mɑ dhɑb, ɑ́ ngïji jwøg, wu ɑ́jwɑn pɑ̈dø kì ri Jwøng-ɑ Ácwɑ̈ɑ̈j. Aleengɑ ópɑ̈nni kït møgɑni ryeet piny kì bøli wun, kɑ ri gen mød gen. Abøødhɑ riɑ bøli Jwøng-ɑ Ácwɑ̈ɑ̈j ki cyɑ̈ng pyɑ̈r ɑ́ngwen, kí wɑ̈rr pyɑ̈r ɑ́ngwen ni tyeli mɑl, yɑ nuti cyɑ̈mø, o bong pï mɑ ɑ́mɑdhɑ, ki gööj orøng-ɑ ɑ́gwøg yi wun, ɑ ɑ́rënyi pyëw Jwøng-ɑ Ácwɑ̈ɑ̈j. Yɑ ɑ́bëëd yɑ óböggø yi rɑ̈ji pyëw Jwøng-ɑ Ácwɑ̈ɑ̈j, mɑ́ pyëwe ɑ́rënyi ki mendwøng, ki me di nɑ̈ge wun, de kwɑ̈jjɑ ɑ́cigi lïngø yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j ɑ́bëëd thyew pyëwe rɑɑj ki Aɑron, ki men di nɑ̈ge gøn, de yɑ ɑ́kwɑ̈jji kipere kì bøli kenyɑni. Kɑ gïi orøg men-ɑ ɑ́gwøg yi wun, ɑ løg rønyi dhɑb kwɑnyɑ, kɑ leengɑ mɑc. Kɑ tørrɑ, ɑgurɑ en, kɑ ogöögø ɑ́ búr, kɑ búrɑni pwöögɑ nɑm-ɑ rïngi piny kì wïj kït. “Pyëw Jwøøg wun, Jwøng-ɑ Ácwɑ̈ɑ̈j ɑ́wëggu rënyø thyew keny-ɑ ɑ́ying wun Tɑbeerɑ̀, kí Mɑɑsɑ̀, kí Kibrön Atɑɑbɑ̀. Keny-ɑ ɑ́öre wun kì Kɑdic Berniyɑ̀, kinni kedhu be kwɑnyi piny-ɑ mëgge wun. Jwøøg wun, Jwøng-ɑ Ácwɑ̈ɑ̈j dhøge ɑ́pyem yi wun, kɑ ocögø e pɑ gɑ̈n yi wun. Wu ɑ́bëëd wu nyi pemm-ɑ dhøg Jwøng-ɑ Ácwɑ̈ɑ̈j ceth, ki kër-ɑ ɑ́ngɑ̈nyɑ wun. “Codhe, ɑbuudɑ yijɑ rum yɑn piny kì bøli Jwøng-ɑ Ácwɑ̈ɑ̈j ki cyɑ̈ng pyɑ̈r ɑ́ngwen, kí wɑ̈rr pyɑ̈r ɑ́ngwen, mɑ́ e ɑ́yodɑ kinni dwɑdd-ɑ nɑ̈gi wun. Kɑ Jwøng-ɑ Ácwɑ̈ɑ̈j kwɑjjɑ kinni, “Wuö, Jwøng-ɑ Ácwɑ̈ɑ̈j, jií ko nɑ̈ɑ̈g, gen ɑ ji-ɑ ɑ́yiel yi yïn, kɑ ge kɑ̈ɑ̈l yi yïn wɑ̈g kì Rïp, ki tegí. Wïjí ko wïl ki bɑ̈nggí: Abrɑhɑm, kí Isɑɑk, kí Yɑgob, kɑ yï ko nenni rɑ̈ji ji møg geki tegi muddi gen, kí orøøg gen. Mɑ́ ke nɑ̈ɑ̈g gen, tyëng Rïp okööbø kinni, i yï ódhɑlø yi kïdhi jií yij piny-ɑ ɑ́kwøb yi yïn kinni ge ókïdhí yije, bene ɑ bɑnge nɑ̈ɑ̈g gen yi yïn kì yij pɑ̈l. Ge okööbø kinni i jií kïdhi yïn yij pɑ̈l be nɑ̈gø, mɑ́ ge mɑɑn yi yïn. O bene gen ji-ɑ ɑ́myeg yi yïn gɑ jií, ji-ɑ ɑ́kɑ̈ɑ̈l yi yïn wɑ̈g kì Rïp ki tegí, teng-ɑ dwøng cɑrø.’ “Codhe, ɑköbbi yɑn yi Jwøng-ɑ Ácwɑ̈ɑ̈j kinni, ‘Twïg ki ópɑ̈nni kït ɑ́ryew ni mø tyeli mɑl, kɑ yï göög ki sɑndug mɑ yɑdh men yije cïb gen. Kɑ yï bï yïɑ mɑl wïj kït, o kwøbb-ɑ ɑ́ying kömi ópɑ̈nni møg-ɑ ɑ́mød ri gen kɑ ɑ́leeng gen piny, gweedɑ kömi møg-ɑ kɑ̈ɑ̈l yi yïn, codhe o ge kïdhi yi yïn yij Sɑndug.’ “Codhe, ɑgöögɑ ki Sɑndug ki yɑdh ɑ́lwiy, kɑ yɑ otwïgø ki ópɑ̈nni kït ɑ́ryew ni mø tyeli mɑl, kɑ ge kïdhɑ mɑl wïj kït. Codhe, kɑ Jwøng-ɑ Ácwɑ̈ɑ̈j møg-ɑ ɑ́kwønge ki gwedø kì kömi kïtti tyeli mɑl, gweede kömi mø cyɑ̈n, ɑ løg Cigg-ɑ Pyɑ̈rø møg-ɑ ɑ́mëgge wun, wu ying-ɑ thɑ kït, e kööb ɑ yij mɑc, cyɑ̈ng-ɑ ɑ́cugi wun. Ge ɑ́mëggi yɑn yi Jwøng-ɑ Ácwɑ̈ɑ̈j, gen ɑ ópɑ̈nni kït møgɑni ryeet, ɑløgɑ riɑ, kɑ yɑ dwöög-ɑ piny thɑ kït. Kɑ ge cïbɑ yij sɑndung-ɑ ɑ́gwøg yi yɑn, ɑbëëd gen kì kenyɑni ni kɑ ɑ́köbbi yɑn yi Jwøng-ɑ Ácwɑ̈ɑ̈j.” (Tyëng Isrɑil ɑ́dhwödh kì wɑ̈thi yïïth-ɑ ɑ́bëëd gɑ mø Beni Yɑɑkɑn, kɑ ge kedh-ɑ Moserɑ̀. Athøw Aɑron kì kunɑni kɑ kony, kɑ keje, kej Ókwër-ɑ Dwøng, kwɑny yi wɑ̈de Eliɑdhɑr. Adhwödh gen kì kenyɑni, kɑ ge kedh-ɑ Gudgɑdɑ̀, kɑ ge odhwödhø këti, kɑ ge kedh-ɑ Yotbɑthɑ̀ kun-ɑ ngeeny pï. Kenyɑni ɑ ɑ́kwɑɑny gøl Leebì yi Jwøng-ɑ Ácwɑ̈ɑ̈j gɑ tyëng kɑ̈lli Sɑnduug Cigg, o ge nyi cungi gen kì bøle ge gögg-ɑ en gɑ ókwër, o ge nyi kwëëng gen ki nyinge. A nudd ɑ́ gwøøg gen gïti dicyɑ̈ngtïn. Bene ɑ ɑ́cög gøl Leebì nuti nëngø ki piny ni kɑ̈ll-ɑ kyeelø, lɑ̈ng-ɑ ɑ́mëggi gen bɑ bëëdi gen gɑ ókwërri Jwøng-ɑ Ácwɑ̈ɑ̈j, ni kɑ ɑ́kwøbii ceth yi Jwøng-ɑ Ácwɑ̈ɑ̈j Jwøøg wun.) “Yɑ ɑ́bëëd kì wïj kït, ki cyɑ̈ng pyɑ̈r ɑ́ngwen, kí wɑ̈rr pyɑ̈r ɑ́ngwen ni kɑ ɑ́bëëdɑ cøn. Kwɑ̈jjɑ ɑ́cigi lïngø yi Jwøng-ɑ Ácwɑ̈ɑ̈j, kɑ wu ocögø wu pɑ nɑ̈g yi en. Codhe, ɑköbbe yɑn i peejɑ wun be kwɑnyi piny-ɑ ɑ́köbbe kweyyi wun kinni gø ómëgge gïn. “Anɑn wun ɑ tyëng Isrɑil, lïngu gïn-ɑ dwɑddi yi Jwøøg wun, Jwøng-ɑ Ácwɑ̈ɑ̈j kì yï wun, Mɑllu Jwøng-ɑ Ácwɑ̈ɑ̈j, kɑ møg-ɑ nyi kwøbe bënn nyi gwøg wun. Mɑɑr wun en, kɑ göggi wun ki pëthi wun bënn. Kɑ Cigge bënn mïdhi wun. Ciggɑni bënn mëggɑ’ wun dicyɑ̈ngtïn kɑ per kinni, o wu yïddi wun ki døøjø. Cɑgg ɑ́ mɑl ɑ lɑ̈wi, bɑ mi Jwøng-ɑ Ácwɑ̈ɑ̈j. Piny bɑ mee thyew geki jɑmm-ɑ yije bënn. De kweyyi wun mɑɑr yi Jwøng-ɑ Ácwɑ̈ɑ̈j ki mendwøng kibøli tyëng-ɑ kyeelø, ɑmyege wun, wun ɑ́ jie gïti dicyɑ̈ngtïn. Kɑ ɑ́rum bëëde kinøw, mïdhu kwøbbi Jwøng-ɑ Ácwɑ̈ɑ̈j, kɑ wu ko pëëm këti. Jwøøg wun, Jwøng-ɑ Ácwɑ̈ɑ̈j, bɑ Jwøk me dwøng kibøli jwögg bënn, bong tegø me pɑ̈r ki tege. Dwøng o ceg kɑ böggø. Pɑ nyi gënyø o pɑ nyi yïëy kwɑjjø ki gïïpiny. Pɑ nyi dwɑddi kinni, o kïj geki thwöm ruj, tyëngpɑth møg-ɑ bëëdø kì kellee mɑɑr yi en, kɑ gï nyi thödhe ki gïncɑm kí ógudh. Kɑ̀ bëëde kinøw, mɑɑr wun tyëngpɑth møg-ɑ bëëdø kì kelli wun, mɑ́ wu ɑ́bëëd wu bɑ wëdhh kì Rïp. Lïngí kwøbbi Jwøgí, Jwøng-ɑ Ácwɑ̈ɑ̈j, kɑ mɑllí, e kete kete. Mïdhí cigge, kɑ yï nyi köngí ki nyinge kete. Lenhí, bɑ Jwøgí. O men-ɑ́ gïïngɑ̈ngø møg-ɑ døngø, møg-ɑ ɑ́gwøge kiper wun ɑ́lidh yi yïn ki wɑngí. Keny-ɑ ɑ́kedhi kweyyi wun Rïp, kwɑnni gen ɑ́bëëd gɑ pyɑ̈r ɑ́bïryew codhi gen. De ɑnɑn kwɑnni wun nuti gwøgø yi Jwøøg wun, Jwøng-ɑ Ácwɑ̈ɑ̈j, ge gïïr ni kyell kì mɑl? “Mɑɑru Jwøøg wun, Jwøng-ɑ Ácwɑ̈ɑ̈j, kɑ cigge bënn mïdhi wun ceth. Dicyɑ̈ngtïn, pɑr wun møg-ɑ ɑ́dïd yi wun kì yï Jwøng-ɑ Ácwɑ̈ɑ̈j. Pɑth ki nyigi wun ɑ ɑ́lidh møgɑni, dɑ́ men-ɑ́ wun kì ri wun. Álidh yi wun eni döngi Jwøng-ɑ Ácwɑ̈ɑ̈j geki tege, kí gïïngɑ̈ngø møg-ɑ ɑ́gwøge. Gïg-ɑ ɑ́gögge rɑ̈ɑ̈dh Rïp geki pödhe bëne ɑ́lidh yi wun. Álidh yi wun kër-ɑ ɑ́nɑ̈ge yɑɑy Rïp bëne kí kyënye geki yɑ̈the, keny-ɑ ɑ́rïngi gen bɑng wun, kɑ gï mudde Nɑɑm Omeli Kwɑrø. Gïg-ɑ ɑ́gwøg yi Jwøng-ɑ Ácwɑ̈ɑ̈j kì yij pɑ̈l kiper wun, gïti kɑ ɑ́wɑ̈nhi wun keny, ɑ́lidh yi wun. Pɑru gïn-ɑ ɑ́gögge Dɑthɑn geki Abirɑm wɑ̈ddi Eliɑb kì gøl Ruben. A ɑ́yieb piny ree e onennø yi dhɑnhø bëne, kɑ gï mwønye geki kɑ̈lli gen, kí kemmi gen, kí bɑ̈nggi gen geki dhögi gen. Wun kiri wun ceth, ɑ ɑ́lidh gïgdøngø møg-ɑ ɑ́gwøg yi Jwøng-ɑ Ácwɑ̈ɑ̈j. “Mïdhu cigg-ɑ ɑ́mëggɑ wun bënn dicyɑ̈ngtïn, o wu ócuggi wun ki bɑ̈ɑ̈ni nɑm, wu kedh-ɑ be kwɑnyi pinyɑni. O wu óbëëd wun ki keny me bɑ̈ɑ̈r kì piny kɑ̈r, piny-ɑ yije mulli yi cɑg geki møøw kïc, piny-ɑ ɑ́köbbi kweyyi wun yi Jwøng-ɑ Ácwɑ̈ɑ̈j kinni gø ómëgge kwɑrri gen. Piny-ɑ ókwɑny yi wun ɑ́ mi wun, pɑ pɑ̈r ki piny Rïp, kun-ɑ ɑ́bëëd wun kɑ̈ge dööng. Kenyi kɑ̈ɑ̈g wun kì kunɑni, jɑmm-ɑ kɑ̈g nyi ceg kɑ cɑwwø, o bɑ gwøg me teeg, de piny-ɑ kedhi yi wun bɑ piny me yije di kïttì, kí törr; piny me yije nyi mɑ̈gi yi kødh. Pinyɑni kor-ɑ yi Jwøøg wun, Jwøng-ɑ Ácwɑ̈ɑ̈j kì yij run bëne. “Kɑ̀ bëëde kinøw, mïdhu cigg-ɑ ɑ́mëggɑ wun dicyɑ̈ngtïn, mɑɑru Jwøøg wun, Jwøng-ɑ Ácwɑ̈ɑ̈j, kɑ göggi wun ki pëthi wun bënn. Keny-ɑ ógwøg wun møgɑni, Jwøng-ɑ Ácwɑ̈ɑ̈j ókɑ̈ni piny ki kødh kì bøli keny-ɑ dwɑddii, o bëëd e bong mel, o bëëd e dɑ byel, kí møgi oløg, kí møøw dhetun kì yï wun, kí lum men cɑm yi dhögi wun. O wu óyɑ̈ng wun. Ri wun ko wëggu thɑbø, kɑ Jwøng-ɑ Ácwɑ̈ɑ̈j wiyu piny, kɑ wu kedh-ɑ be mɑlli jwögg møøgø, kɑ ri wun bøødh wun bøli gen. Ogöög wun ki gïn ni menɑni, Jwøng-ɑ Ácwɑ̈ɑ̈j pyëwe órënyi ki wun, kɑ kødh mɑ̈ɑ̈ne, kɑ wu ojɑdø ki byel. Codhe, kɑ wu jwɑn-ɑ thøø kì kunɑni, cɑgg ɑ́ kɑ̀ bëëd pinyɑni ɑ́ piny me døj. “Cïbu ciggɑni pëthi wun. Twööj wun gen bɑ̈ddi wun, kɑ ge rug wun gɑ ɑcwɑddì kì wɑ̈thi wun, gɑ møg nyi pɑ̈ddi wun. Pwönyu gen nyigi wun. Nyi kööb wun kì ri gen kenyi ying wun pɑc, wɑlɑ̀ wu ying-ɑ pɑ̈l, wɑlɑ̀ wu ceg-ɑ ywömø, wɑlɑ̀ wu ogöögø. Kɑ ge gweed wun ɑ́dyëddi uddi wun kí dhøggi kɑ̈lli wun. O wu óbëëd wun, wuki nyigi wun ki keny me bɑ̈ɑ̈r kì piny-ɑ ɑ́kwøb yi Jwøng-ɑ Ácwɑ̈ɑ̈j kinni, gø ómëgge kweyyi wun. Wu óbëëdø kì pinyɑni ki kɑɑm me bɑ̈ɑ̈r ni kɑɑm-ɑ nud mɑl kì kömi piny. “Cigg-ɑ ɑ́mëggɑ wun, mïdhu gen kidøøj. Mɑɑru Jwøøg wun, Jwøng-ɑ Ácwɑ̈ɑ̈j, nyi gwøgu gïn-ɑ ɑ́cïgɑ wun, kɑ yïëyø mi wun mïdhi wun. Codhe o jurr-ɑ kyeelø bënn cyedde kì bøli wun, o pödhh-ɑ ɑ́bëëd ge teg, o ge døngø kibøli wun kwɑny yi wun. Piny-ɑ ókedhi yi wun, kɑ tyelli wun këël wun yije, ceg-ɑ gwøg ɑ́ mi wun. Piny wun cɑ̈g-ɑ́ɑ̀ yij pɑ̈l kì wɑɑng wurlwɑl gïti kïtti Lubnɑn kì wɑɑng wuudø, o cɑ̈ge kì kömi Nɑm Porɑt kì wɑɑng cyɑ̈ɑ̈ng mwøl, gïti kömi Nɑɑm Omeli Tɑr kì wɑɑng cyɑ̈ɑ̈ng böörø. Ji ógöjji bwøgø yi Jwøng-ɑ Ácwɑ̈ɑ̈j kì keny-ɑ kedhi yi wun kì yij pinyɑni, ni kɑ ɑ́kööbe ceth, o bong dhɑnhø men-ɑ ólwɑ̈ng wun ki jogø. “Yɑ cïb-ɑ gyëdh geki cyën bøli wun dicyɑ̈ngtïn; bɑ gyëdh ke mïdhu ciggi Jwøøg wun, Jwøng-ɑ Ácwɑ̈ɑ̈j, cigg-ɑ ɑ́mëggɑ wun dicyɑ̈ngtïn. De bɑ cyën ke pɑ mïdhi ciggɑni yi wun, kɑ wu kedh-ɑ be mɑlli jwögg møøgø, mø nuti pɑ̈nyø mɑllø yi wun cøn. Keny-ɑ ókïdhi wun piny-ɑ ókwɑny yi wun ɑ́ mi wun yi Jwøng-ɑ Ácwɑ̈ɑ̈j, wøw wun gyëdh kì Kïti Geridhïm, kɑ cyën wøw wun kì Kïti Ebɑl. (Kïttɑni ryeet ying-ɑ løøg Nɑm Urdun kì wɑɑng cyɑ̈ɑ̈ng böörø kì piny tyëng Kɑnɑɑn møg-ɑ bëëdø kì Töör Urdun. Ge ying-ɑ wɑɑng cyɑ̈ɑ̈ng böörø, o ge cyɑ̈gi ki yenhi kwër kì Moriyɑ̀ kì buti Gilgɑl). Wu bɑ̈ɑ̈n-ɑ Nɑm Urdun, wu kedh-ɑ be kwɑnyi pönh-ɑ ɑ́mëggi wun yi Jwøøg wun, Jwøng-ɑ Ácwɑ̈ɑ̈j, ókwɑny yi wun ceth, kɑ wu obëëdø kì yije. De wu di dwɑddø o wu mïdhu cigg geki kwöng-ɑ ɑ́mëggɑ wun dicyɑ̈ngtïn, mïdhu gen ceth. “Bene cigg-ɑ ómïdhi yi wun ek, ki runn-ɑ óbëëd wun kì piny-ɑ mëggi wun yi Jwøng-ɑ Ácwɑ̈ɑ̈j, ɑ bɑ Jwøøg kweyyi wun ɑ́ men kwɑny yi wun gïti ɑtheer. Mïdhu ciggɑni kidøøj, kɑ wu göög wun kì bɑng gen. Kɑ̈jj-ɑ ɑ́bëëd ge nyii mɑ̈ddø yi jurr-ɑ ɑ́ying pinyɑni, cøøru gen piny, kɑ kɑ̈jj-ɑ nyi mɑlli jwögg møgɑni kì wɑ̈thi ótøng cøør wun piny, kí møg-ɑ thɑ̈thi yenh-ɑ mɑr. Cøøru këlli lɑm mø gen piny, kɑ yïkki gen kedhhi wun. Rɑ̈bu ngïjji Aceerɑ̀ jwøøg gen, jwøng-ɑ dhɑjø, kɑ ngïji jwögg tørri wun, o ge cög gen ge pɑ cigi mɑllø kì kɑ̈jjɑni. “Jwøøg wun, Jwøng-ɑ Ácwɑ̈ɑ̈j, ko mɑlli wun ki yëth-ɑ mɑlli jwögg-ɑ kyeelø yi jii gen. Jwøøg wun, Jwøng-ɑ Ácwɑ̈ɑ̈j ókɑ̈bbi kì kelli pìnyi wɑ̈thi kɑ̈lli wun, ki kej ɑ́kyel me nyi kedhi yi teedø bëne be mɑllii. Kenyɑni ɑ kïdhi wun gëdhhi wun, gëdhh-ɑ rɑ̈b geki gëdhh-ɑ kyeelø, kí ɑ́kyeel pyɑ̈rri jɑmmi wun, kí jwödhø, kí wïj köngi wun, kí kɑyyi dhögi wun geki dyëgi wun. Kenyɑni kì bøli Jwøøg wun, Jwøng-ɑ Ácwɑ̈ɑ̈j, ɑ ógyëëdh wun, kenyɑni ɑ ócyɑ̈ɑ̈m wun, wuki kɑ̈lli wun, o pëthi wun med gen kɑ̀ cɑmu jɑmm-ɑ ɑ́gwøg yi wun ki kwɑ̈ɑ̈g wun. “Keny-ɑ óbëën bøli kenyɑni, wu koo göögø ki gwøøg cøn, ɑ ɑ́göög dhɑnhø wïje. Gïti ɑnɑn, wu kwɑ̈jj-ɑ yëth-ɑ dwɑddi yi wun, kipe kɑ̀ nuti kedhu piny-ɑ mëggi wun yi Jwøøg wun Jwøng-ɑ Ácwɑ̈ɑ̈j, piny-ɑ yije óbëëd yi wun ki mër. Keny-ɑ óbɑ̈ɑ̈n wun Nɑm Urdun, wu ówëggi bëëdø kì pinyɑni yi Jwøng-ɑ Ácwɑ̈ɑ̈j, wu ókorri yi en kipe tyëngmɑ̈ɑ̈nø bënn, wu óbëëdø ki mër. Jwøng-ɑ Ácwɑ̈ɑ̈j ómëggi ki kej ɑ́kyel ɑ́ keny nyi mɑllii, kɑ jɑmm-ɑ ɑ́cïge wun bënn nyi kïdhu kunɑni, ɑ løg gëdhhì mø wun møg-ɑ rɑ̈b geki gëdhh-ɑ kyeelø, kí ɑ́kyeel pyɑ̈rri jɑmmi wun geki jwödhø, kí wïj köngi wun møg-ɑ ɑ́köbbu Jwøng-ɑ Ácwɑ̈ɑ̈j kinni ge ómuuj yi wun. Bëëd wun pëthi wun omedø kì bøli Jwøøg wun, Jwøng-ɑ Ácwɑ̈ɑ̈j wuki nyigi wun, kí bɑ̈nggi wun, kí Kwɑrri Leebì møg-ɑ bëëdø kì kɑ̈ddi wun, mɑ́ yï gen bong piny mɑ ɑ́mëggi gen ɑ́ mi gen, ni wɑ̈thi kɑ̈ll-ɑ kyeelø. Wu ko nyi wɑ̈dhi ngɑl ki gëëdhi kì keny-ɑ dwɑddi yi wun, nyi ngɑl wun gen kì keny-ɑ ómyeg yi Jwøng-ɑ Ácwɑ̈ɑ̈j kì yij piny kɑl ɑ́kyel kì kelli kɑ̈ddi wɑ̈thi kɑ̈lli wun. Kenyɑni ɑ ómuuj wun ki gëdhh-ɑ rɑ̈b, yije thyew ɑ ógwøøg jɑmm-ɑ kyeelø bënn møg-ɑ ɑ́cïgɑ wun. “De wu ócuggø cɑm ki rïnggi jɑmmi wun kì keny-ɑ bëëd wun. Wu ócuggø cɑm ki jɑmm-ɑ ɑ́mëggi wun yi Jwøng-ɑ Ácwɑ̈ɑ̈j bënn, ni kɑ̀ dwɑddu en. Wu ceg-ɑ cɑm ki gen cɑgg wu ywëdhø, wɑlɑ̀ wu dhïw, ni ke di cɑm wun rïngi tɑ̈ng wɑlɑ̀ rïngi ɑ́køny. De remmi gen ko cɑm wun, kønyu remmi gen piny ni pï. Jɑmm-ɑ mëggu Jwøng-ɑ Ácwɑ̈ɑ̈j ko cɑm kì keny megø, cɑgg ɑ́ ɑ́kyeel pyɑ̈ri byelli wun, wɑlɑ̀ møgi oløg, wɑlɑ̀ møøw dhetun, kí kɑyyi dyëgi wun geki dhögi wun, kí wïj köngi wun, kí jwödhø, wɑlɑ̀ gëdhh-ɑ kyeelø. Cɑmu jɑmmɑni kì keny-ɑ ómyeg yi Jwøøg wun, Jwøng-ɑ Ácwɑ̈ɑ̈j, cɑɑm gen kì bøli Jwøng-ɑ Ácwɑ̈ɑ̈j yi wun, wuki nyigi wun, kí bɑ̈nggi wun, kí Kwɑrri Leebì møg-ɑ bëëdø kì kɑɑl wun, kɑ wu bëëd wun pëthi wun omedø kipe gïn-ɑ gwøg yi wun. Jɑmm-ɑ nyi mëggi Kwɑrri Leebì ko nyi wiy ki muujø kì cyɑ̈ngg-ɑ óbëëd wun bënn kì pinyɑni, piny wun. “Keny-ɑ ólɑɑny piny wun yi Jwøøg wun, Jwøng-ɑ Ácwɑ̈ɑ̈j ni kɑ ɑ́kööbe, wu ócyɑ̈mø ki rïngø ni kɑ̀ dwɑddii yi wun. Mɑ́ keny-ɑ ómyeg yi Jwøng-ɑ Ácwɑ̈ɑ̈j ógöögø ki me lɑ̈wi ki wun, dhɑnhø ócuggø ngɑl ki dyel wɑlɑ̀ dhyɑng me cɑm yi en, kì keny-ɑ bëëde, kì ri jɑmm-ɑ ɑ́mëggi wun yi Jwøøg wun, Jwøng-ɑ Ácwɑ̈ɑ̈j, kɑ wu ocyɑ̈mø ki rïngø ni kɑ̀ dwɑddii yi wun, kì kɑɑl wun ni kɑ ɑ́köbbɑ wun. Ngɑn dhïw wɑlɑ̀ ywëdhø ócuggø cɑm ki rïngɑni, ni ke di cɑm wun rïngi tɑ̈ng wɑlɑ̀ rïngi ɑ́køny. De rïngø ko cɑm wun ki remø kì ree, remø bɑ wëy, ko cɑm wun kyeel ki rïngø. Remø ko cɑm wun, nyi køny wu en piny ni pï. Keløg ciggɑni ómïdhi yi wun, Jwøng-ɑ Ácwɑ̈ɑ̈j pyëwe óbëëd e med, kɑ bong-ɑ gïn cɑ̈nni wun, wuki kwɑrri wun. Jwödhø geki wïj köngø bënn, nyi kïdhu gen kej mɑ̈ddø men-ɑ ómyeg yi Jwøng-ɑ Ácwɑ̈ɑ̈j. Muuj wun kì kenyɑni kì wïj këli lɑm mi Jwøng-ɑ Ácwɑ̈ɑ̈j ki gënh-ɑ nyi rɑ̈b bëne, nyi ngɑ̈ɑ̈d wun kì kenyɑni ki gëdhh-ɑ kyeelø thyew, gɑ møg cɑm yi wun, kɑ remmi gen nyi køny wïj këli lɑm. Mïdhu møg-ɑ ɑ́cïgɑ wun bënn, o bëëd e bong gïn cɑ̈nni wun, wuki kwɑrri wun gïti ɑtheer, mɑ́ wu gwøg-ɑ dyër, gïn-ɑ mïni pyëw Jwøøg wun, Jwøng-ɑ Ácwɑ̈ɑ̈j. “Pödhh-ɑ kyeelø ónɑ̈g yi Jwøng-ɑ Ácwɑ̈ɑ̈j, Jwøøg wun keny-ɑ ókedh wun, wu mɑɑg-ɑ piny gen, kɑ pinyɑni kwɑny yi wun, kɑ wu pëgg-ɑ yije. Keny-ɑ órum jurrɑni ki nɑ̈gø yi Jwøng-ɑ Ácwɑ̈ɑ̈j, wu ko ngöyi ki yëth-ɑ nyi kwɑjji gen jwöggi gen, mɑ́ menɑni óbëëd ɑ́ gïn kɑ̈ni ki thøø. Jwøøg wun, Jwøng-ɑ Ácwɑ̈ɑ̈j ko kwɑjji wun ki yëth-ɑ nyi kwɑjji jurrɑni jwöggi gen, mɑ́ kenyi kwɑjji gen jwöggi gen, ge nyi gøgg-ɑ gïgrijjø mø mɑɑn yi Jwøng-ɑ Ácwɑ̈ɑ̈j. Men-ɑ́ nyigi gen nyi rɑ̈bbi ge’ jwöggi gen kì wɑ̈thi këlli lɑm, gɑ gëdhhì. “Gwøgu gïg-ɑ ɑ́cïgɑ wun bënn, kɑ ge ko med wun, wɑlɑ̀ ko di gïn kɑ̈ɑ̈l wun wɑ̈g kì ri gen. “Jøtöng wɑlɑ̀ tyëng-ɑ nyi bɑ̈gø ki lɑ̈g ócuggø kwøb ce ge ogöögø ki gïïngɑ̈ngø, kipe kinni o wu cɑ̈gi wun ki kwɑjji jwögg mø nuti pɑ̈nyø kwɑjjø yi wun cøn. De cɑgg møg-ɑ kwøb yi gen bï gɑ dyër, kwøbbi gen ko lïngi wun. Ge bɑ møg rɑɑng wun yi Jwøng-ɑ Ácwɑ̈ɑ̈j, kipe kinni o yod mɑ́ mɑɑr wun Jwøng-ɑ Ácwɑ̈ɑ̈j ki pëthi wun bënn. Lugi wun kì bɑng Jwøng-ɑ Ácwɑ̈ɑ̈j kɑ wør wun, lïngu kwøbbe kɑ cigge mïdhi wun, nyi mɑllu en kɑ yïëyø mi wun mïdhi wun. De nyi nɑ̈g wun tyëngbɑg ki lɑ̈g, geki tyëngtöng møg-ɑ köbbi wun bɑnyi kwøbbi Jwøng-ɑ Ácwɑ̈ɑ̈j, ɑ ɑ́yïëël wun wɑ̈g kì Rïp kun-ɑ ɑ́bëëd wun, wu bɑ bɑ̈ngg. Ji-ɑ ni møgɑni rijjø, ge dwɑdd-ɑ kɑ̈ɑ̈li wun wɑ̈g kì yij bëëdø men-ɑ ɑ́cïgi wun yi Jwøng-ɑ Ácwɑ̈ɑ̈j. Nɑ̈ɑ̈g gen ceth, o ri wun yiel wun ki rɑjjɑni. “Cɑgg ɑ́ ómyëw, wɑlɑ̀ wɑ̈dí, wɑlɑ̀ nyɑrí, wɑlɑ̀ cyëgí men-ɑ mɑɑr yi yïn, wɑlɑ̀ mɑ̈dhí mɑ̈nh-ɑ pere teg, yï ócuggø pɑngø yi en kì gød, kɑ yï thɑɑbe be kwɑjji jwögg-ɑ pɑth, jwögg-ɑ ɑ́bëëd ge kwïj yi kweyyi wun. Ódi ɑ́kyel kì kelli gen me thɑɑb yïn be mɑlli jwöggi tyëng-ɑ bëëdø kì keny, wɑlɑ̀ jwöggi tyëng-ɑ bëëdø kì kun lɑ̈wi. Rií ko wëggí thɑbø yi gen, yï ko pɑ̈nyi lïngø ki kwøbbi gen. Pyëwí ko lɑ̈ɑ̈m ki gen, wɑlɑ̀ yijí ko ywöngi kipere, kɑ ge ko korrí. Nɑ̈g gen! Wiy bëëde ɑ́ yïn ɑ kwöngi ki bɑ̈ddø, kɑ ge bɑ̈lli yi ji bënn. Bɑ̈lli gen ki tuggi kïttì o ge thøw gen! Mɑ́ ge dwɑdd-ɑ peeji wun yïnø. O Jwøøg wun, Jwøng-ɑ Ácwɑ̈ɑ̈j wiy yi wun, eni ngɑn-ɑ ɑ́yiel wun kì cingi Rïp kun-ɑ ɑ́bëëd wun, wu bɑ bɑ̈ngg. Keny-ɑ ólïngi gïn-ɑ ɑ́cwöb yi tyëng Isrɑil, ge óbwøg, kɑ bong-ɑ dhɑnhø me göögø ki orøng ni menɑni këti. “Keny-ɑ ópëggu kɑ̈dd-ɑ mëggi wun yi Jwøøg wun, Jwøng-ɑ Ácwɑ̈ɑ̈j, wu ólïngø kinni, i dɑ ji mø rijjø kì kelli tyëng pödhi wun, mø thɑɑb tyëng kɑɑl gen be mɑlli jwögg mø nuti mɑllø yi wun cøn. Keløg wu olïngø ki gïg ni møgɑni, yɑbu thɑ́ kwøbbɑni kidøøj, mɑ bëëd gɑ dyër, kinni gïn ni menɑni cwöbø. Keløg ɑ́ dyër, kɑ tyëng kɑɑlɑni nɑ̈g wun bënn geki dhögi gen kí dyëgi gen thyew. Rënyu kɑɑlɑni bëne ceth, ko di gïn döng. Cøngu jɑmmi kɑɑlɑni bënn dïkɑɑl, kɑ ge rɑ̈bbu Jwøøg wun, Jwøng-ɑ Ácwɑ̈ɑ̈j gɑ gëëdhi, kɑ kɑɑlɑni wiy bëëde e rënyø gïti ɑtheer, ko cigi gerø këti. Ko di gïjø me kwɑny yi wun kì ri jɑmm-ɑ ɑ́kwøb kinni rënyi gen kinni tek, o liny Jwøng-ɑ Ácwɑ̈ɑ̈j kwöje, o pyëwe lɑ̈ɑ̈me ki wun; pyëwe ólɑ̈ɑ̈m ki wun, kɑ wu óngënyø ni kɑ ɑ́köbbe kweyyi wun cøn, keløg cigge bënn møg-ɑ ɑ́mëggɑ wun dicyɑ̈ngtïn ómïdhi yi wun, kɑ gïg-ɑ dwɑddi yi en nyi gwøg yi wun. “Kenyi ywøg wun wɑddi wun møg-ɑ ɑ́thøw, ri wun ko nyi kɑggi wun ki pɑll, wɑlɑ̀ yëyyi bøli wun ko nyi lyel wun ni kenyi göög teen-ɑ kyeelø. Wu bɑ jii Jwøøg wun, Jwøng-ɑ Ácwɑ̈ɑ̈j, wu ɑ́yieny yi en kì kelli jurri kömi piny bëne, o wu gwøge wun ɑ́ møge. “Wu ko pɑ̈nyi cɑm ki gïn-ɑ ɑ́kwøb yi Jwøng-ɑ Ácwɑ̈ɑ̈j kinni ywëdhø. Wu ócuggø cɑm ki dhög, kí dyëg ɑ́tegg geki römm, kí nger, kí tenø, kí tɑ̈ng, geki lɑ̈yy-ɑ yï gen di dɑdd, ɑ nyi dwöögø ki lum. De lɑ̈yy-ɑ yï gen bong dɑdd, ɑ pɑ nyi dwöögø ki lum, ko pɑ̈nyi ki cɑmø yi wun: Amɑlø, kí ɑ́pwøjø, kí kunikït ge ko cɑm wun, ge ywëdhø, mɑ́ ge odwöögø de yï gen bong dɑdd. Wu ko cyɑ̈ɑ̈m ki kundhøngø. Kundhøngø ywëdhø, mɑ́ yïe dɑ dɑdd, de pɑ dwöögø ki lum. Lɑ̈yyɑni ko pɑ̈nyi wun ki cɑmø, wɑlɑ̀ ko pɑ̈nyi wun ki nywɑlø ge thøø. “Wu ócuggø cɑm ki rijj-ɑ ri gen di kwɑ́j, o ri gen dɑ ótùn, de wu ko cyɑ̈ɑ̈m ki gïg-ɑ nɑm, ɑ ri gen bong kwɑ́j kí ótùn, ge ywëdhø. “Wu ócuggø cɑm ki winyy-ɑ dhïw. “Twöngg-ɑ ri gen di obërr bënn ywëdhø, ge ko cɑm wun. Wu ócuggø cɑm ki twöngg-ɑ dhïw. “Wu ko cyɑ̈ɑ̈m ki lɑ̈y-ɑ thøw kete. Wiy cɑm yi tyëngpɑth møg-ɑ bëëdø kì kelli wun, wɑlɑ̀ ócuggø ngëwwi tyëngpɑth møøgø yi wun. De wu bɑ jii Jwøøg wun, Jwøng-ɑ Ácwɑ̈ɑ̈j. “Nyɑɑr dyel rømø wɑlɑ̀ ɑ́tegø ko thɑl wun ki cɑɑg meye. “Nyi pɑ̈ngu jɑmm-ɑ cyeg kì pwödhhi wun bënn gɑ pyɑ̈r, kɑ ɑ́kyeel pyɑ̈r nyi kwɑny wun, kɑ cïb wɑ̈ye kì yethi runn bënn. Codhe, kɑ wu kedhu keny-ɑ ómyeg yi Jwøøg wun, Jwøng-ɑ Ácwɑ̈ɑ̈j ɑ́ keny mɑllii, kɑ ɑ́kyeel pyɑ̈rri jɑmmi wun cɑm kì kenyɑni, kì bøle, cɑɑm gen kì bøli Jwøng-ɑ Ácwɑ̈ɑ̈j ceth, eni byëlø, kí møgi oløg, kí møøw dhetun, kí kɑyyi dhögi wun geki dyëgi wun. Nyi gwøg wun gïn ni menɑni ceth, o wu dïd wun ki wøri Jwøng-ɑ Ácwɑ̈ɑ̈j. Kɑ ge ngëëw wun ki gïg-ɑ dwɑddi yi wun, ying-ɑ́ dhyɑng, wɑlɑ̀ dyel, wɑlɑ̀ møgi oløg, wɑlɑ̀ møgi byel, kɑ jɑmmɑni cɑm wun kì bøli Jwøøg wun, Jwøng-ɑ Ácwɑ̈ɑ̈j kì kunɑni wuki kɑ̈lli wun, ki medi pëëth. “Kɑ Kwɑrri Leebì møg-ɑ bëëdø kì kelli wun ko twöön wun, mɑ́ yï gen bong jɑmmì mø bɑ mø gen. Nyi cøng wun ɑ́kyeel pyɑ̈rri jɑmmi wun bënn kej ɑ́kyel kì kɑ̈ddi wun, kì ri thumi dɑ̈ɑ̈g runn. Gïncɑm menɑni bɑ mi Kwɑrri Leebì, mɑ́ yï gen bong jɑmmì, gï nywɑg yi gen kɑ wëdhh, kí kïjj, kí thwömm møg-ɑ kɑ̈ddi wun. Nyi dwɑ̈ni gen ki gïg-ɑ dwɑddi yi gen bënn. Nyi gwøgu møgɑni ceth, o jɑmm-ɑ gøggi yi wun bënn gyëdh yi Jwøøg wun, Jwøng-ɑ Ácwɑ̈ɑ̈j. “Kì ri thumi bïryeew runn, kɑ ngyënyyi wun møg-ɑ cwɑggi ji wïyu gen, ge pɑ col këti. Kinni ngɑn wïdhi wɑɑd gen ngeti Isrɑil ki ngyëny, wïye kwör ngɑnɑni, ngyënyyɑni ko col këti, kwörɑni ɑ́kyer-ɑ yi Jwøng-ɑ Ácwɑ̈ɑ̈j kiree kinni ko pir. Ngyënyyí møg-ɑ cwɑggi ngɑnpɑth ócuggø pirø yi yïn, de wɑɑd wun ngeti Isrɑil, wïyí kwör-ɑ cwɑgge, ko piir. “Yï ógyëdh yi Jwøgí, Jwøng-ɑ Ácwɑ̈ɑ̈j kì piny-ɑ mëgge yïn. Bong dhɑnhø kì kelli jii wun men-ɑ óbëëdø wɑnge cɑn, keløg kwøbbi Jwøng-ɑ Ácwɑ̈ɑ̈j ólïngi yi yïn kɑ møg-ɑ ɑ́cïgɑ wun dicyɑ̈ngtïn mïdhi yi wun kidøøj. Wu ógyëdh yi Jwøng-ɑ Ácwɑ̈ɑ̈j ceth ni kɑ ɑ́kööbe, pödhh mø gïïr ówïdhi kì yï wun, de wu pɑ wïdhi kì yï gen, pödhh mø gïïr ójɑɑg yi wun, de wu pɑ jɑɑg yi gen. “Keløg e dɑ wɑɑd wun me jɑ̈ddi kì kɑɑl ɑ́kyel kì kelli kɑ̈dd-ɑ piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j, kønyu en ceth. Nyi wïdhu en ki gïn-ɑ dwɑddi yi en ceth. Kɑ ko mɑ̈ɑ̈n wun, kipe kinni runi wiyi körr cyɑ̈ngø. Rumm-ɑ rijjø ni møgɑni ko wëggu bëën wɑ̈thi wun. Keløg e mɑ̈ɑ̈nu wïdhø, ywøøg-ɑ kö Jwøk, kɑ wu óyïddø ki ker. Thödhí wɑɑd wun yijí bong ɑ́dud, o jɑmmì bënn møg-ɑ gøggi yi yïn gyëdh yi Jwøng-ɑ Ácwɑ̈ɑ̈j. Ódi tyëng Isrɑil mø nyingi gen cɑn, ge jɑdø ceth, yɑ ceg-ɑ wun cyee, ge ko nyi twöön wun. “Wɑɑd wun, ngeti Isrɑil ying-ɑ́ jɑlø wɑlɑ̀ dhɑjø, keløg ree ngëwwe’ yïn ɑ́ bɑ̈ng, gøøny o kedhe keny-ɑ órume ki göggi yïn ki runn ɑ́bïkyel. Gøny keny-ɑ óbëën bïryeew runn. Keny-ɑ ógønyí, ko wëggí kedhø ki cingge, nëngí kì ri jɑmm-ɑ ɑ́gëdhhi yïn yi Jwøng-ɑ Ácwɑ̈ɑ̈j; ɑ løg dyëg, kí byel, kí møgi oløg. Pɑrru kinni wu ɑ́bëëd wu bɑ bɑ̈ngg kì Rïp, ɑgøøny wun yi Jwøøg wun, Jwøng-ɑ Ácwɑ̈ɑ̈j kì yij bɑ̈ɑ̈ngø, bene ɑ bɑnge cïgɑ wun møg dicyɑ̈ngtïn. “De keløg bɑ̈ngí óbɑ̈nyø’ kedhø, ócuggø bëëdø, mɑ́ yï mɑɑr yi en wuki gølí, o pyëwe tyer-ɑ bëëdø ki wun. Cïb ɑ́dyëddi ødí, kɑ yïthe twïy, ceg-ɑ gwøg ki bɑ̈ngí ki runn-ɑ ónëëne bënn. Gwøg bɑ̈ngg-ɑ mɑ̈nn kinøw thyew. Yï ko bëëd yijí teeg ki gønyi bɑ̈ng, mɑ́ yï ɑ́göggi yi en kɑ budi köögi mi ngɑn di kïr, ki runn ɑ́bïkyel. Ogønyií, gïg-ɑ gøggi yi yïn bënn ógyëdh yi Jwøgí, Jwøng-ɑ Ácwɑ̈ɑ̈j. “Kɑyy-ɑ cwøw møg-ɑ nywøl yi dhögi wun geki dyëgi wun, thyëyu gen Jwøøg wun, Jwøng-ɑ Ácwɑ̈ɑ̈j, ge ko gwøg gɑ møg göögø, wɑlɑ̀ yëyyi gen ko nyɑr. Nyi cɑmu gen wuki kɑ̈lli wun kì bøli Jwøng-ɑ Ácwɑ̈ɑ̈j, kì keny-ɑ bɑ kej mɑ̈ddø, kì yethi runn bënn. De ke di gïjø me rɑj kì ree, ying-ɑ́ ngwøl, wɑlɑ̀ cwør, wɑlɑ̀ dɑ gïjø megø me rɑj kì ree, ko pɑ̈nyi ki ngɑ̈lli Jwøøg wun, Jwøng-ɑ Ácwɑ̈ɑ̈j. Cɑmu møgɑni kì kɑɑl wun, cɑɑm gen yi tyëng-ɑ dhïw geki tyëng-ɑ ywëdhø bënn, ni rïngi ɑ́køny wɑlɑ̀ rïngi tɑ̈ng. De remmi gen ko cɑm wun, nyi køny piny ni pï. “Wøw Jwøgí, Jwøng-ɑ Ácwɑ̈ɑ̈j kì dwɑ̈y Abib; dwɑ̈n-ɑ mɑl, dwɑ̈n-ɑ́ yije ɑ́kɑ̈ɑ̈l wun wɑ̈g yi Jwøng-ɑ Ácwɑ̈ɑ̈j kì Rïp kì wɑ̈r. Kedhí keny-ɑ nyi mɑ̈ddi, kɑ yï ngɑ̈ɑ̈d kì kenyɑni ki órömø, wɑlɑ̀ wɑdh kì kelli jɑmmí, men cɑm ɑ́ Ákɑɑdh men wøøw Jwøgí, Jwøng-ɑ Ácwɑ̈ɑ̈j. Cɑm ki ópuun olwëny, cɑm wun olwëny, ɑ cwøl ɑ́ ópuun orɑng, ki cyɑ̈ng ɑ́bïryew, wu pɑr-ɑ cyɑ̈ng-ɑ ɑ́bëën wun wɑ̈g kì Rïp wu ójwɑnø, cyɑ̈ngɑni ko pɑ̈nyi wïlø kì wɑ̈thi wun ki cyɑ̈ngg-ɑ ónëën wun kì kömi piny. Ko di kɑl me yije di ówɑj kì piny wun ki cyɑ̈ng ɑ́bïryew møgɑni, kɑ rïngi dyel wɑlɑ̀ rïngi dhyɑng men-ɑ ónɑ̈g kì cyɑ̈ng-ɑ mɑl cɑm bëne kì wɑ̈rɑni ceth, ko di men wɑ̈dhi dhuki. Thɑɑl rïngø kɑ cɑm kì kej mɑ̈ddø, kɑ yï døøg pɑɑrí dhuki kì mwøl. Kɑ wu tyëg wun cyɑ̈ng ɑ́bïkyel wu cɑm-ɑ olwëny, kɑ ri wun cøng wun be mɑlli Jwøøg wun, Jwøng-ɑ Ácwɑ̈ɑ̈j kì bïryeew cyɑ̈ng. Kɑ ko di gwøg kì cyɑ̈ngɑni. “Kwɑ̈ɑ̈n ki osboo ɑ́bïryew kì ri cɑ̈gi kɑj ki byel. Codhe, kɑ Kwëër Kɑj gwøøg yï wør-ɑ Jwøgí, Jwøng-ɑ Ácwɑ̈ɑ̈j. Kɑ yï muuj ki jwödhø me kyëëw ki jɑmm-ɑ ɑ́gëdhhi yïn yi Jwøng-ɑ Ácwɑ̈ɑ̈j. Kɑ yï bëëd pyëwí med kì bøli Jwøng-ɑ Ácwɑ̈ɑ̈j, wuki nyigí, kí bɑ̈nggí, kí Kwɑrri Leebì, kí wëdhh, kí kïjj geki thwömm møg-ɑ bëëdø kì kɑɑl wun. Mïdhu ciggɑni ceth, kɑ wɑ̈thi wun ko wïl kinni wu ɑ́bëëd wu bɑ bɑ̈ngg kì Rïp. “Gwøg Kwëër Akɑnnì keny-ɑ órum ki kɑji byellí, kɑ oløg órumø ki bijø. Wøw Kwëër Akɑnnì ki cyɑ̈ng ɑ́bïryew. Tug wun kì yethi cyɑ̈nggɑni wuki nyigí, kí bɑ̈nggí, kí Kwɑrri Leebì, kí wëdhh, kí kïjj geki thwömm møg-ɑ bëëdø kì kɑɑl wun. Wør wun Jwøøg wun, Jwøng-ɑ Ácwɑ̈ɑ̈j ki kwërɑni ki cyɑ̈ng ɑ́bïryew, kì keny-ɑ ómyeg yi Jwøng-ɑ Ácwɑ̈ɑ̈j ɑ́ kej mɑ̈ddø. Med pëthi wun mɑ́ gïg-ɑ ɑ́gøggi yi wun bënn ɑ́gëdhhi wun yi Jwøng-ɑ Ácwɑ̈ɑ̈j, kɑ kɑj órumø. “Jøg-ɑ cwøw bënn kì pödhø, nyi cugi gen kì keny-ɑ ómyeg yi Jwøng-ɑ Ácwɑ̈ɑ̈j ɑ́ kej mɑ̈ddø, tyel ɑ́dɑ̈g kì yij run, ɑ løg cyɑ̈nggi Kwëër Ákɑɑdh, kí Kwëër Kɑj, kí Kwëër Akɑnnì. Kɑ dhɑnhø nyi kɑ̈ne ki jwödhø, men-ɑ cuggi yodø yi en, e kyëëw ki jɑmm-ɑ ɑ́gëdhhii yi Jwøng-ɑ Ácwɑ̈ɑ̈j. “Kɑ wu rööny wun ki jɑggi burø geki jɑgg-ɑ kyeelø kì piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j. Jøgɑni jɑɑg gen ji yethi gen bong geny. Ge ko bëëd gɑ tyëngruj wɑlɑ̀ tyëng-ɑ nyi gënyø, kɑ ge ko nyi yïëy ki kwɑjjø ki gïïpiny, mɑ́ nyingi dhɑnhø nyii cøørø yi gïg-ɑ mëggii, kɑ gøny rënye, cɑgg e ceg bëëdø ɑ́ ngɑntir. Bëëd wun wu pɑ gënyø, wu gøgg-ɑ dyër, o wu ókwɑny wun piny-ɑ mëggi wun yi Jwøng-ɑ Ácwɑ̈ɑ̈j, o wu ócög wun wu obëëdø kì yije. “Keny-ɑ óger wun këli lɑm mi Jwøøg wun, Jwøng-ɑ Ácwɑ̈ɑ̈j, bute ko cïbi wun ki ngïji yɑdh mi Aceerɑ̀, jwøng-ɑ dhɑjø. Kɑ wu ko cwödhi piny ki löj mɑ kït, gïgɑni mɑɑn yi Jwøng-ɑ Ácwɑ̈ɑ̈j. “Jwøøg wun, Jwøng-ɑ Ácwɑ̈ɑ̈j, ko nyi ngɑ̈ddi wun ki dhyɑng wɑlɑ̀ dyel me ree di gïnrɑj, menɑni mɑɑn yi Jwøng-ɑ Ácwɑ̈ɑ̈j. “Wu ólïngø kinni i dɑ dhɑnhø ying-ɑ́ jɑlø wɑlɑ̀ dhɑjø, me røngø kɑ Ciggi Jwøng-ɑ Ácwɑ̈ɑ̈j pyeme. Kɑ kedh-ɑ be mɑlli jwögg møøgø, wɑlɑ̀ cɑ̈ng, wɑlɑ̀ dwɑ̈y wɑlɑ̀ kyell, gïg-ɑ ɑ́kyer yi Jwøng-ɑ Ácwɑ̈ɑ̈j. Keny-ɑ ólïngu møgɑni, yɑbu thɑ́ gen kidøøj, keløg ɑ́ dyër kinni gïnrɑj ni menɑni cwöbø kì Isrɑil, kwɑnyu dhɑnhø menɑni, kɑ kïdhu ngɑ̈ɑ̈j kɑɑl, kɑ bɑ̈lli wun ki tuggi kïttì, o thøwe. Nɑ̈ɑ̈g-ɑ kömi dhøggi ji-ɑ́ buti gen ɑ́gwøøg bɑ̈jjø menɑni gɑ ɑ́ryew wɑlɑ̀ ge ngenyø, de ko nɑ̈g keløg ɑ́ dhɑnhø ɑ́kyel ɑ köngi ce lïdhø. Tyëng-ɑ köngi ce bɑ̈jjø menɑni liidh gen, gen ɑ kwöngi ki bɑ̈ddø ki tuggi kïttì, o teedø lunye’ bɑ̈l kì bɑng gen, bene yuu-ɑ ólɑ̈ɑ̈ny rɑjjɑni kì kelli wun. “Keløg e dɑ gøny me teeg me dhɑ̈li løøgø yi jɑggi wun, me bɑ gøøny jɑmmì wɑlɑ̀ kedø, wɑlɑ̀ keløg e dhɑ̈lø’ yodø kinni ngɑn-ɑ nɑ̈ɑ̈g dhɑnhø nɑ̈ggø e ceg-ɑ gwɑ̈nyø, wɑlɑ̀ gø cɑɑg en kɑ tøønyø ki nɑ̈gø, kïdhu gøny-ɑ ni menɑni keny-ɑ ómyeg yi Jwøøg wun, Jwøng-ɑ Ácwɑ̈ɑ̈j ɑ́ kej mɑ̈ddø. Kɑ gønyɑni thërri wun ókwër Kwɑrri Leebì, geki jɑngi burø men-ɑ ójyɑ̈ɑ̈gø kì bøli kenyɑni. Kɑ wiy gønyɑni løøg yi gen. Gïn-ɑ ókwøb yi gen, en ɑ gwøg yi wun ceth. Yïëy wun löggi gen, kɑ møg-ɑ ókwøb yi gen gwøg wun ceth, ko di gïn wiyu wɑ̈g kì ri gen. Nɑ̈ɑ̈g ngɑn pyem dhøg ókwërø, wɑlɑ̀ dhøg jɑngi burø, bene yuu-ɑ ólɑ̈ɑ̈ny rɑjjɑni kì Isrɑil. Codhe, o óbëëd e bong ngɑn göögø’ nøw këti. “Keny-ɑ órum wun ki kwɑnyi piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j, kɑ wu pëgg-ɑ yije, wu ókööbø ce wu dwɑdd-ɑ rɑ̈dh me jɑɑg wun ni pödhh-ɑ kyeelø møg-ɑ bɑdhhi wun. Røny wun ngɑn-ɑ ómyeg yi Jwøng-ɑ Ácwɑ̈ɑ̈j kì kelli wɑddi wun, wu ko rööny ki ngɑnpɑth, ɑ́ rɑ̈dh me jɑɑg wun. Rɑ̈dh ko bëëd yïe dɑ kyënyi liny mø gïïr, wɑlɑ̀ ko ödi Rïp ki jøg dwɑ̈ddi ki kyënyì, mɑ́ Jwøng-ɑ Ácwɑ̈ɑ̈j ɑ́kyëëd kinni jie ko døøg pönhɑni këti. Rɑ̈dh ko bëëd yïe dɑ mɑ̈nn mø gïïr kipe pyëwe ókedhi wɑ̈ye kì ri Jwøng-ɑ Ácwɑ̈ɑ̈j, wɑlɑ̀ yïe ko di dhɑb kí ɑ́tegø mø ngenyø ki mendwøng. Keny-ɑ ópëgge wïj kwøøm rɑ̈ɑ̈dhø ceth, bëëde yïe dɑ wɑ̈nyi Ciggi Jwøk, gwed e kwɑny-ɑ ri men-ɑ yï Kwɑrri Leebì ókwër. Bëëd wɑ̈nyɑni kì bute ceth, o nyi rɑ̈nge kì yije kì yethi cyɑ̈ngg-ɑ ónëëne kì kömi piny, o dïde ki wøri Jwøng-ɑ Ácwɑ̈ɑ̈j, o mïdhe møg-ɑ ɑ́ceg yi Jwøng-ɑ Ácwɑ̈ɑ̈j bënn. O mɑ̈ɑ̈n rumø yi bëëdi wɑ̈nyɑni kì bute, kinni pere teg kibøli tyëng Isrɑil møg-ɑ kyeelø, o Ciggi Jwøng-ɑ Ácwɑ̈ɑ̈j cög gï pɑ pɑ̈nye ki pyemø. Bene keny-ɑ ójyɑ̈ɑ̈ge ki runn mø gïïr, kɑ Isrɑil jɑɑg yi kwɑrre ki rïjj mø gïïr. “Ókwër, ɑ løg Kwɑrri Leebì, bong piny me mëggi gen kì Isrɑil, de ge cɑm-ɑ jwödhø geki gëdhh-ɑ kyeelø møg-ɑ nyi mëggi Jwøng-ɑ Ácwɑ̈ɑ̈j. Bong piny men-ɑ óbëëd ɑ́ mi gen ni kɑ̈ll-ɑ kyeelø. Lɑ̈gø mi gen, bɑ bëëdi gen gɑ ókwërri Jwøng-ɑ Ácwɑ̈ɑ̈j, ni kɑ ɑ́kööb Jwøng-ɑ Ácwɑ̈ɑ̈j ceth. “Kenyi ngɑɑl dhyɑng wɑlɑ̀ dyel ɑ́ gëëdhi, nyi mëggi ókwër bɑd, kí lëmø, kí ɑkwej. Nyi nëngi gen kì ri mwölli byel ceth, geki mwölli møgi oløg, kí møøw dhetun, kí yëyyi dyëg. Gøl Leebì ɑ ɑ́myeg kì kelli kɑ̈lli wun bënn yi Jwøøg wun, Jwøng-ɑ Ácwɑ̈ɑ̈j ɑ́ men göggii gɑ ókwër, gïti ɑtheer. “Ke dhwödh Kwɑɑr Leebì kì kɑɑl-ɑ bëëde kì kelli kɑ̈ddi wun, kɑ dɑ̈g-ɑ keny-ɑ tyer yi pyëwe, wiy gööge ki nyingi Jwøng-ɑ Ácwɑ̈ɑ̈j ni wɑddi gen møg-ɑ göögø kì kɑɑl-ɑ ɑ́dɑ̈gge. Nyi thödhi ceth ki gïncɑm me pɑ̈r ki men-ɑ mëggi ókwërr-ɑ kyeelø, o ke di gïn mëggii yi gøl gen kì kun-ɑ ɑ́kɑ̈ɑ̈le, bɑ mee. “Keny-ɑ ókedhu yij piny-ɑ ɑ́mëggi wun yi Jwøøg wun, Jwøng-ɑ Ácwɑ̈ɑ̈j, wu ko ngöyi ki gïgrijjø møg-ɑ gøggi yi jurr-ɑ bëëdø kì kenyɑni. Nyigi wun ko rɑ̈b wun gɑ gëdhhì, kɑ ko di ngɑn thëdhø, wɑlɑ̀ rɑ̈ngø ki ɑjwøgø, wɑlɑ̀ kedhi yï tyëdd, wɑlɑ̀ tyëng wëyrijjø, kɑ ko di ngɑn kedhi be pëjjø ki yɑdh. Tyëng-ɑ nyi göögø ki gïgrijjø ni møgɑni mɑɑn yi Jwøgí, Jwøng-ɑ Ácwɑ̈ɑ̈j, o bene ɑ bɑnge cyeede jurrɑni wɑ̈g, kɑ̀ kedh wu kedh-ɑ pinyɑni. Mïdhu yïëyø mi wun ki Jwøng-ɑ Ácwɑ̈ɑ̈j ceth.” Codhe, ɑkööb Mosɑ̀ kinni, “Kì piny-ɑ yije kedhi yi wun, ji nyi kedh-ɑ yï ɑ́jwöggì be thyëdh, o ge nyi kedh-ɑ be pëjjø ki yɑdh. De wu bɑ ɑkerø yi Jwøøg wun, Jwøng-ɑ Ácwɑ̈ɑ̈j ki gwøg ki gwøng ni menɑni. De wu óöde ki jɑltöng ni yɑn, men-ɑ ókwɑny yi en kì kelli wun; kɑ kwøbbe ólïngi wun ceth. “Cyɑ̈ng-ɑ ɑ́cugi wun kì Kïti Sinɑy, wu ɑ́kwɑ̈jji kinni cwɑggi Jwøng-ɑ Ácwɑ̈ɑ̈j pɑ lïngi wun e okööbø këti, wɑlɑ̀ kinni mɑc men-ɑ yije nude pɑ lidh yi wun këti, mɑ́ wu ɑ́bwøg kinni wu óthøw. Aköbbi yɑn yi Jwøng-ɑ Ácwɑ̈ɑ̈j kinni, ‘Ge ɑ́kwøb gïjø me døøj. Ge óödɑ ki jɑltöng ni yïn, kì kelli jii gen. Óköbbɑ gïn-ɑ ókwøbe, o ji ólonye’ köbbi møg-ɑ cïgɑ en bënn. Ókööbø kɑ nyingɑ, o ngɑn pɑ lïngi dhøge cɑyɑ’ cɑyø. De keløg jɑltöng ókööbø ki nyingɑ ki wöödø me nuti köbbii yi yɑn, ceg-ɑ thøø kipe møgɑni. Jɑltöng men-ɑ ókööbø ki nyingi jwögg møøgø, ceg-ɑ thøø thyew.’ “Keløg wu órumø ki pëthi wun kinni óyod yi wun kidï kinni wöödø men pɑ kɑ̈ɑ̈l-ɑ yï Jwøng-ɑ Ácwɑ̈ɑ̈j, ke 'kööb jɑltöng ki nyingi Jwøng-ɑ Ácwɑ̈ɑ̈j, kɑ møg-ɑ ɑ́kwøbe ocögø ge pɑ pɑ̈dhi kɑ̈jji gen, wöönɑni nuti kɑ̈ɑ̈l-ɑ yï Jwøng-ɑ Ácwɑ̈ɑ̈j, jɑltöngɑni 'kööb-ɑ cwɑgge, kɑ ko böggi wun. “Keny-ɑ órum tyëng-ɑ piny gen mëggi wun ki nɑ̈gø yi Jwøng-ɑ Ácwɑ̈ɑ̈j, kɑ kɑ̈ddi gen kí uddi gen kwɑny yi wun, kɑ wu pëgg-ɑ yethi gen, Ngɑn cinge gwɑ̈ɑ̈ny yi dhɑnhø, e ɑ́bëëd e bong mɑ̈ɑ̈nø kì kɑɑm gen, yömme kɑɑl ɑ́kyel kì kelli kɑ̈ddɑni. Nimi keløg ji ɑ́ryew kedh-ɑ wɑg be ngøl ki yenh, kɑ nget ɑ́kyel ongudø ki yɑdh, kɑ dørø pɑ̈ɑ̈r-ɑ wɑ̈g kì ri böle, kɑ nyel-ɑ kyeelø nɑ̈g yi en, ngɑn-ɑ́ cinge ɑ́gwɑ̈ɑ̈ny yi dhɑnhø, yömme kɑɑl ɑ́kyel kì kelli kɑ̈ddɑni. Ke bëëde ɑ́ kɑɑl ɑ́kyel ɑ nyi yömmi, ócuggø bëëdø e lɑ̈wi, kɑ ngɑn-ɑ́ cinge ɑ́gwɑ̈ɑ̈ny yi dhɑnhø ódhɑ̈lø jwɑn wɑ̈dhi yije, kɑ pïïd yi ngɑn-ɑ́ wɑɑd gen ɑ́nɑ̈g, kɑ gø nɑ̈ge ki rɑ̈ji pyëwe, ngö dhɑnhø ɑ́ceg-ɑ gwɑ̈nyø yøw kì cingi wɑɑd gen. Bene ɑ bɑnge kööbɑ kinni kɑ̈bbi wun ki kɑ̈dd ɑ́dɑ̈g. “Keny-ɑ ólɑɑny piny wun yi Jwøng-ɑ Ácwɑ̈ɑ̈j, ni kɑ ɑ́köbbe kweyyi wun, kɑ piny-ɑ ɑ́kwøbe kinni gø ómëgge wun bëne muuje, kɑ wu kɑ̈bbi wun ki kɑ̈dd ɑ́dɑ̈g. Wu ómëggi pinyɑni yi Jwøøg wun, Jwøng-ɑ Ácwɑ̈ɑ̈j, keløg møg-ɑ cïgɑ wun dicyɑ̈ngtïn ómïdhi yi wun kidøøj, kɑ Jwøøg wun, Jwøng-ɑ Ácwɑ̈ɑ̈j mɑɑr yi wun, kɑ wu obëëdø wu mïdh-ɑ cigge geki pwönye. Gwøgu møgɑni o óbëëd e bong ngɑn yïe bɑ̈r me nɑ̈g kì piny-ɑ mëggi wun yi Jwøng-ɑ Ácwɑ̈ɑ̈j, kipe wu óyïddi ki cyën kì bɑng kɑ̀ nɑ̈g wun ngɑn yïe bɑ̈r, kì piny-ɑ mëggi wun yi Jwøng-ɑ Ácwɑ̈ɑ̈j. “De keløg dhɑnhø mɑ̈n ki wɑɑd gen, kɑ gø libe, kɑ gø nɑ̈ge, kɑ reng-ɑ kɑɑl ɑ́kyel kì kelli kɑ̈ddɑni, öd jøgdøngi kɑɑlɑni, kɑ ngɑnɑni dwöög, kɑ wiy nɑ̈ɑ̈g kej cögø yi wɑddi ngɑn-ɑ ɑ́nɑ̈g yi en. Pëthi wun ko lɑ̈ɑ̈m ki ngɑn tir dhɑnhø ki nɑ̈gø; ko bëëd kì Isrɑil, o óbëëd e bong rɑj kì kömi wun. “Keew wun ki wɑɑd wun ko cɑɑg yi yïn, kew-ɑ kɑ̈ge dööng ko cɑɑg kì piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j. “Ngɑn köngi ɑ́ ɑ́kyel kinni ngɑn-ɑni ɑ́bɑ̈jji, kwøbbe ko kwɑny gɑ dyër, de ji-ɑ köngi ce ge lïdhø, bëëd gen gɑ ɑ́ryew, o ngɑn-ɑ gøøny ócugge’ nyodhø kinni bɑ̈jjø. Keløg e dɑ ngɑn mënni kömi dhɑnhø ki kwøb kipe kinni o yïdde ki gïnrɑj, kedhi gen yï ókwër geki jɑggi burø kì kej mɑ̈ddø, o gøøny gen lidh kì kunɑni. Thɑ́ kwøbbɑni óyɑb yi jɑggi burø kidøøj, o keløg e óyod kinni ngɑnɑni mënn-ɑ kömi wɑ̈d Isrɑil ki kwøb mø pɑth ki dyër, cɑɑy ngɑnɑni ki cɑ́y-ɑ di cɑɑy ngɑn-ɑ köme ɑ́mënni yi en. Bene yuu-ɑ ólɑ̈ɑ̈ny wun rɑjj-ɑ ni møgɑni. Keny-ɑ ólïngi gïn-ɑ ɑ́cwöb yi teedø, ge óbwøg, kɑ bong-ɑ dhɑnhø me göögø ki orøng ni menɑni këti. Pëthi wun ko nyi lɑ̈ɑ̈m ki møgɑni, cɑ́y bɑ kinni ceth, wëy col kɑ wëy, wɑng col kɑ wɑng, lëjø col kɑ lëjø, cingø col kɑ cingø, tyelø col kɑ tyelø. “Keny-ɑ ókedhu be nyɑɑg ki tyëngmɑ̈ɑ̈nø, kɑ wu ólïdhø ki yɑ̈ɑ̈th, kí kyënyì geki yɑy me dwøng, me lod yɑɑy wun, wu ko bwøg yi gen. Jwøøg wun, Jwøng-ɑ Ácwɑ̈ɑ̈j, ɑ ɑ́yïëël wun wɑ̈g kì Rïp, óying tuung wun. Kedhi ókwërø bøli yɑy, e liny nuti tuumø kɑ kööbe kinni, ‘Wun ɑ jø Isrɑil, lïng wun! Wu kedh-ɑ be nyɑɑg dicyɑ̈ngtïn. Wu ko bwøg yi tyëngmɑ̈ɑ̈nø, wɑlɑ̀ pëthi wun ko nyönhi, wɑlɑ̀ wu ko myël. Jwøøg wun, Jwøng-ɑ Ácwɑ̈ɑ̈j cyɑ̈dhi kɑ wun, o wu ówëgge tyɑ̈mø.’ “Codhe, o jɑngi liny köbbe yɑy kinni, “Dɑ ngɑn mɑ ɑ́cer gyer ki ød kì keny, de gø nuti thyeey en? Ke di ngɑn nuti thyeey øde, døøge pɑc, kipe keløg e ónɑ̈g kì yij liny, øde thyey-ɑ yi ngɑn megø. Dɑ ngɑn cer pïdhø ki bɑg kì keny? Ke di ngɑn pïdhø ki bɑɑg oløg, de nywøli oløg nuti pɑ̈nyø’ lemø yi en, døøge pɑc, kipe keløg e ónɑ̈g kì yij liny, bɑ ngɑn megø ɑ ókwøng møgi oløge ki belø. Dɑ ngɑn nyömi kì keny? Ke di ngɑn nyömi døøge pɑc, kipe keløg e ónɑ̈g kì yij liny, nyɑn-ɑ nywøm yi en, ónywøm-ɑ yi ngɑn megø.’ “Pyëëj yɑy thyew yi pëjji liny kinni, ‘Dɑ ngɑn mɑ ɑ́bwøg kɑ pyëwe ónyönhø? Døøg ngɑnɑni pɑc kipe yɑy pyëwe ónyönhi kì bɑnge.’ Keny-ɑ órum pëjji liny ki löggi yɑy, ngølli yɑy, kɑ wïj ɑkud nyi cïbi ki pëëji. “Kenyi kedhu be pɑ̈ɑ̈r kömi kɑɑl, nyi köbbu tyëng kɑɑlɑni kinni yömmi gen. Keløg dhø döri kɑɑl óyieb yi gen, kɑ ge óyömmø, teen-ɑ kɑɑlɑni bëne ceg-ɑ gwøg ki bɑ̈ngg møg göggi wun. De keløg kɑɑlɑni óbɑ̈nyø ki yömmø, de ge dwɑdd-ɑ nyɑɑg, tyeg wun kɑɑlɑni. Keny-ɑ ówëggi wun mɑgi kɑɑlɑni yi Jwøøg wun, Jwøng-ɑ Ácwɑ̈ɑ̈j, nɑ̈gu jøg-ɑ cwøw bënn. De tyëng-ɑ mɑ̈nn geki othønhø, kí dhög geki jɑmm-ɑ kyeelø bënn ócuggø kwɑnyø yi wun. Kwɑny wun jɑmmi tyëngmɑ̈ɑ̈nø møg-ɑ ɑ́cïb cinggi wun yi Jwøøg wun, Jwøng-ɑ Ácwɑ̈ɑ̈j. Bene kër-ɑ ógwøg wun pödhh-ɑ lɑ̈wi ki piny-ɑ óbëëd yi wun ɑnɑn. “De keny-ɑ ómɑg wun kɑ̈dd-ɑ piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j, nɑ̈gu ji bënn. Nɑ̈gu jiɑni bënn, ɑ løg tyëng Kit, kí tyëng Amör, kí tyëng Kɑnɑɑn, kí tyëng Perïdh, kí tyëng Kib, kí tyëng Yebus, nɑ̈gu gen bënn ceth, ni kɑ ɑ́ceg wun yi Jwøng-ɑ Ácwɑ̈ɑ̈j. Nɑ̈gu gen, o wu cög wu pɑ kölli gen orøg kì bøli Jwøng-ɑ Ácwɑ̈ɑ̈j, yi keny-ɑ ópwönyi gen wun ki gïgrijjø møg-ɑ gøggi yi gen kenyi mɑlli gen jwöggi gen. “Keny-ɑ ótyeg wun kɑɑl, wu dwɑdd-ɑ mɑgii, yenhi nywøl ko ngøl wun piny, cɑgg tyëg mɑg keny me bɑ̈ɑ̈r, cɑm wun nywøli yenhɑni, kɑ ge ko ngøl piny, mɑ́ yenh pɑth ki ji mø nyïɑ̈ggi ki wun. De wu ócuggø ngøl ki yenh-ɑ kyeelø gɑ møg yïdhhi gïti keny-ɑ ómɑg wun kɑɑl. “Keløg dhɑnhø oyodø e ónɑ̈gø kì piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j, o ngɑn-ɑ nɑ̈ɑ̈gii kwïj, kedh jøgdøngø, kɑ kɑɑm keny-ɑ ɑ́yood dhɑnhø røm ki kɑ̈dd-ɑ cyɑ̈gi. Kɑ jøgdøngi kɑɑl-ɑ cyɑ̈gi ki keny-ɑ ɑ́yood dhɑnhø, kɑ̈bbi gen ki røjø me nuti pɑ̈nyi køøg ki pwödhø. Kɑ gø kïdhi gen tøg nɑm me pɑ nyi dwön, kì keny me nuti pɑ̈nyø purø. Kɑ mune tor gen. Bëëd Kwɑrri Leebì ge nud kì kenyɑni thyew, mɑ́ gen ɑ cinggi gen di gøny, gen ɑ ɑ́yieny yi Jwøøg wun, Jwøng-ɑ Ácwɑ̈ɑ̈j, o ge göggi gen en, o ge nyi kwëng gen ji ki nyinge. Codhe, kɑ jøgdøngi kɑɑl-ɑ cyɑ̈gi ki keny-ɑ ɑ́yood dhɑnhø e ónɑ̈gø, cinggi gen lwøøg gen kömi rønyɑni, kɑ ge kööb gen kinni ‘Dhɑnhø nuti nɑ̈g-ɑ yi wøn, o ngɑn-ɑ nɑ̈ɑ̈gii kwïj. Yïn ɑ Jwøng-ɑ Ácwɑ̈ɑ̈j, lɑ̈ɑ̈m pyëwí ki Isrɑil, jií møg-ɑ ɑ́yïëël yi yïn wɑ̈g kì Rïp. Lɑ̈ɑ̈m pyëwí ki wøn, kɑ wø ko kwɑ̈nni cyënni ngɑn yïe bɑ̈r.’ Bene kër-ɑ ókɑ̈ɑ̈l wun cyënni ngɑn yïe bɑ̈r wɑ̈g kì kömi wun, keny-ɑ ógwøg wun gïndøj kì bøli Jwøng-ɑ Ácwɑ̈ɑ̈j. “Keny-ɑ ówëggi wun tyɑ̈mø yi Jwøng-ɑ Ácwɑ̈ɑ̈j kì yij liny, kɑ wu ómɑ̈gø ki ji, kɑ yï ólïdhø ki ngɑndhɑjø me myëër, kɑ dwɑddí ki kwɑnyø ɑ́ dhɑjø, kïdhí pɑc, kɑ yëyyi wïje lyel, kɑ könggi lwedde teb, kɑ ógudhe wil. Kɑ wiy bëëde kì gølí ki dwɑ̈y e ywøg-ɑ wɑdde, codhe kɑ kïdhí ød, o gööge ki cyëgí. Keny-ɑ ógööge e pɑ dwɑddi yi pyëwí, tɑ̈ɑ̈ng, kɑ wiy kedhe, ko ngeew wɑ̈g ɑ́ bɑ̈ng, mɑ́ e ɑ́rum ki gwøøg dhɑjø yi yïn. “Keløg dhɑnhø yïe dɑ mɑ̈nn ɑ́ryew, kɑ ge okɑyø ki wɑ̈dd ryeet, de nyel-ɑ dwøng pɑth ki wɑ̈d cyëge men-ɑ mɑɑr yi en, wɑ̈d nyɑn-ɑ mɑɑr yi en ócuggø kwɑnyø yi en ɑ́ wïj kɑl, kì cyɑ̈ng-ɑ ópɑ̈nge jɑmme møg-ɑ ólɑg. De nyel-ɑ dwøng, ɑ løg wɑ̈d ɑ́lɑni ceg kɑ mëggi budi jɑmme bënn yi en, mɑ́ en ɑ bɑ kɑyi legge kidyër. Jɑmmì møge cïb gɑ møg di mëggi ji ɑ́ryew, mɑ́ kɑyø ceth ɑ bɑ wïj kɑl. “Keløg dhɑnhø yïe dɑ wɑ̈de me pëmø, mune teeg, o pɑ lïngø’ kwøbbi wïye geki meye, cɑgg gø ceg yi gen, kɑ̈l yi meye geki wïye, kɑ cïb bøli jøgdøngi kɑɑl-ɑ bëëd yi gen. Kɑ gønye lidh. Kɑ jøgdøngø köbbi gen kinni, ‘Wɑ̈d wøn ceg-ɑ pëmø, o pɑ lïngø ki kwøbbi wøn, rëny-ɑ jɑmmì, o bɑ mɑ̈dhi møgø.’ Codhe kɑ nyelɑni bɑ̈lli ki tuggi kïttì yi jø kɑɑlɑni o thøwe, o rɑjj-ɑ ni møgɑni kɑ̈ɑ̈l wun wɑ̈g kì kelli wun, o Isrɑil lïnge, o bwøge. “Keløg dhɑnhø onɑ̈gø kipe gïn bɑɑj en, kɑ ngɑɑb ri lööj yɑdh, ko wëggi nïnni ri yɑnhɑni; kony kì cyɑ̈ngɑni ceth, mɑ́ dhɑnhø men-ɑ ryërri kì ri yɑdh köme dɑ cyënni Jwøk. Kony ceth, kipe piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j óbwöl yi wun. “Oliidh dhii wɑ̈d Isrɑil, wɑlɑ̀ dyele e pɑ̈rø, ko wøøy, döggií. De keløg wɑ̈n bëëd ɑ keny me lɑ̈wi, wɑlɑ̀ ying wɑ̈n kwïj yi yïn, wiy bëëde kì yïí. Keny-ɑ óbëën wɑ̈n e oyɑ̈bø ki gøn, kɑ mëggií. Gïi wɑɑd wun, ngeti Isrɑil keny-ɑ óyodií, döggií ceth, ying-ɑ́ ɑderø, wɑlɑ̀ ógødh, wɑlɑ̀ gïjø megø yøw. “Ke pɑ̈ɑ̈dh dhii ngeti Isrɑil wɑlɑ̀ ɑdere, ko wøøy; køny wɑɑd wun ki tïngii kömi tyelle. “Tyëng-ɑ mɑ̈nn ko rug ki ógudhi cwøw, kɑ cwøw ko rug ki ógudhi mɑ̈nn, ngɑn gwøg gïn ni menɑni mɑɑn yi Jwøøg wun, Jwøng-ɑ Ácwɑ̈ɑ̈j. “Keløg winyø oyodø yi yïn e buud-ɑ kömi nywøle kì wïj yɑdh, wɑlɑ̀ kì piny, ying nywølɑni rumø’ tøgø wɑlɑ̀ ge nuti, meyi gen ko kwɑɑny geki nyige bënn. Kwɑny nywøl, kɑ wiy meyi gen kedhe, o yï óbëëd kì kömi piny ki tɑrø ki keny me bɑ̈ɑ̈r. “Keny-ɑ ógëëd ki ød me nyɑ̈n, gëddí tøgge kì wïje mɑl ki gël, e bɑ ɑwen bëne yi gëlɑni. O yï ócöög yï pɑ cɑy keløg e dɑ dhɑnhø me pɑ̈ɑ̈dh kì wïj ønɑni kɑ othøø. “Yï ko kɑ̈ggi yij bɑɑg oløg ki gïg møøgø, keløg ge kɑ̈ɑ̈gí bɑg ɑ́kyel, yï bɑ ɑkerø ki cɑmi gen bënn. “Wɑdh ko twööj ri gïjø ɑ́kyel men-ɑ köög ki pwödhø geki ɑderø. “Yï ko rug ki ógødh men-ɑ ócwɑ̈jø ki yëyy geki korø, gɑ ɑreb. “Rudí wɑ̈thi tùngi ógudhí gɑ ɑ́ngwen bënn ki ojwɑrr. “Ke nyömi jɑlø ki dhɑjø, kɑ ge kedh-ɑ ød, kɑ gø bɑnye kì cyɑ̈ɑ̈n piny, ce gø yood en e ree ókedhø yi jɑlø megø, kɑ gø løge nyɑnrɑj, o kööbe kinni, ‘Nyɑɑn ɑ́nywømɑ kidyër, de keny-ɑ ɑ́kedhɑ ød wøki en, ɑ́yodɑ ree ókedhø yi jɑlø megø.’ “Keløg gïn ni menɑni ocwöbø, kedhi wïyi nyɑnɑni burø geki meye, ge kɑ̈ll-ɑ ógønh-ɑ ɑ́kïdhi nyɑɑr gen ød, kɑ gø nyudhi gen jɑgg. Kɑ jɑggɑni köbbi yi wïyi nyɑnɑni kinni, ‘Nyɑrɑ ɑ́mëggɑ jɑɑl ɑ́ dhɑjø, o ɑnɑn gø ɑ́bɑnye, köme ɑ́mënne ki kwøb, ce gø yood en ree ókedhø yi jɑlø megø, keny-ɑ ɑ́kïdhi gen ød. De lidh wun ógønh-ɑ ɑ́kïdhii ød èn ki remø kì ree!’ Pwööd nyelɑni yi jɑggi kɑɑl. Kɑ köbbi gen cude ki ngyëny ɑ́tegg miyø, kɑ ge mëggi wïyi nyɑnɑni, gɑ møg geedh nyɑre, men-ɑ́ nyɑɑr Isrɑil. O nyɑnɑni ceg-ɑ cögø ɑ́ cyëge, ko pɑ̈nye tɑ̈ngø ki cyɑ̈ng-ɑ óbëëde bënn kì kömi piny. “De keløg gønyɑni bɑ dyër kinni, nyɑnɑni ree ókedhø yi jɑlø megø, e nuti nywømø, kïdhi nyɑnɑni dhøg gøl wïye, kɑ bɑ̈lli ki tuggi kïttì yi jø kɑɑlɑni, o thøwe. Nyɑnɑni ɑ́gwøg-ɑ gïnrɑj kì Isrɑil, kɑ ɑ́yɑ̈ɑ̈be ki cwøw e nuti nywømø; nɑ̈g ceth, o rɑjj-ɑ ni møgɑni kɑ̈ɑ̈l wun wɑ̈g kì kelli wun. “Ke mɑɑg jɑlø e niin-ɑ cï jɑlø megø, nɑ̈ɑ̈g jɑlɑni geki ngɑn-ɑ ɑ́niine, o rɑjj-ɑ ni møgɑni kɑ̈ɑ̈l wun wɑ̈g kì kelli wun. “Ke mɑɑg jɑlø e niin-ɑ dhɑjø me ceg ki nywømø, ge mɑg-ɑ kɑɑl, kïdhu gen ryeet dhø pöör, kɑ ge bɑ̈lli wun ki tuggi kïttì, o ge thøw gen. Nyɑndhɑjø thøw kɑ per kɑ̀ nuti kïïw en keny-ɑ ɑ́mødii, ngö e ying-ɑ kɑɑl. O jɑlø thøw kɑ per kɑ ɑ́møde cï wɑɑd gen. Nɑ̈ɑ̈g gen ceth, o rɑjj-ɑ ni møgɑni kɑ̈ɑ̈l wun wɑ̈g kì kelli wun. “De keløg nyɑndhɑjø men-ɑ nywøm mød-ɑ pɑ̈l yi jɑlɑni, bɑ jɑlø kete ɑ nɑ̈g. Kɑ ko di gïn göggu nyɑndhɑjø, mɑ́ e bong gïn-ɑ ɑ́bɑje. Menɑni pɑ̈r ki ngɑn pɑ̈ɑ̈r kömi dhɑnhø kɑ gø nɑ̈ge. Nyɑn-ɑ nywøm ɑ́mød-ɑ pɑ̈l yi jɑlɑni, ɑ́kïïw ceth de bong dhɑnhø mɑ ɑ́lïngi cwɑgge, mɑ́ kenyɑni bɑ yij pɑ̈l. “Keløg jɑlø omɑgø e mød-ɑ dhɑjø me pɑ nywøm, mëgge wïyi nyɑnɑni kɑ̈ny ceth, cole ngyëny ɑ́tegg pyɑ̈r ɑ́bïj, kɑ nyɑnɑni gööge ɑ́ cyëge ceth, mɑ́ gø ɑ́ceg yi en kɑ mødø. Ko pɑ̈nye ki tɑ̈ngø ki cyɑ̈ngg-ɑ ónëëne bënn kì kömi piny. “Ko di ngɑn yɑ̈r wïye, kɑ cï wïye niine. “Ngɑn bɑ órøj, wɑlɑ̀ cule óngul wɑ̈g, ko kwɑɑn kelli jii Jwøng-ɑ Ácwɑ̈ɑ̈j. “Wɑ̈n-ɑ kɑ̈ɑ̈l kì wɑ̈g, cɑgg ɑ́ kwɑrre gïti ri rïjj pyɑ̈rø, ko kwɑɑn kelli jii Jwøng-ɑ Ácwɑ̈ɑ̈j. “Tyëng Amön, kí tyëng Moɑb, cɑgg ɑ́ kwɑrri gen, gïti ri rïjj pyɑ̈rø, ko kwɑɑn kelli jii Jwøng-ɑ Ácwɑ̈ɑ̈j. Kipe kɑ ɑ́bɑ̈nyi gen ki thödhi wun ki pï geki gïncɑm keny-ɑ ɑ́bëën wun wu kɑ̈ɑ̈l-ɑ Rïp. Kɑ Bɑlɑɑm wɑ̈d Beor jɑl Pethör kì Arɑm kïr yi gen, o wu lɑ̈mme cyën. De kwøbbi Bɑlɑɑm ɑ́bɑny yi Jwøøg wun, Jwøng-ɑ Ácwɑ̈ɑ̈j, kɑ cyën løge gyëdh, mɑ́ wu mɑɑr yi en. Pödhhɑni ko køny wun, o ge dönyi gen kinni tek. “Tyëng Edöm ko bɑny wun, ge bɑ wɑddi wun. Kɑ tyëng Rïp ko bɑny wun mɑ́ wu ɑ́bëëd ɑ piny gen cøn. Kwɑrri gen cɑg kì ri dɑ̈ɑ̈g rïjj, ócuggø kedhi kelli jii Jwøng-ɑ Ácwɑ̈ɑ̈j. “Keny-ɑ óbëëd wun wu ying-ɑ kɑɑl-ɑ gur ɑ́ kɑɑl liny, këëj wun gïg-ɑ cuggi ywëdhi wun. Ke di jɑl me lɑ̈gø kì wɑ̈r, kɑ oywëdhø yi kɑ ɑ́kedhi ree yi tyew, rïïje e ying-ɑ ngɑ̈ɑ̈j kɑɑl. Kɑ lwøgge kì böörø, codhe o dwööge kɑɑl cɑ̈ng óbuddø. “Kɑ wu cïb wun ki keny me nyi meej tyel kì ngɑ̈ɑ̈j kɑɑl. Kɑ dhɑnhø kɑ̈dde ki lodh me nyi konye kej cyëdhe, o gø nyi rïge ki lɑ̈bø kenyi rume ki mɑɑgi ree piny. Mɑ́ Jwøøg wun, Jwøng-ɑ Ácwɑ̈ɑ̈j ócyɑ̈dhø kì kɑɑl wun, e køny-ɑ wun, o wu tyɑm wun tyëngmɑ̈ɑ̈nø. Mïdhu kɑɑl wun e dhïw, kipe Jwøng-ɑ Ácwɑ̈ɑ̈j ólïdhi ki gïn ywëdhø, kɑ ngɑ̈je luge wun. “Keløg bɑ̈ng opɑ̈ɑ̈rø kì yï wɑ̈n, kɑ yömm-ɑ yï wun, ko döggi wɑ̈n. Wiy bëëde kì kɑɑl-ɑ dwɑddi yi en kì kelli kɑ̈ddi wun, kɑ wu bëëd wun mɑ̈ɑ̈dh ki en. “Ko di ngeti Isrɑil ying-ɑ́ jɑlø wɑlɑ̀ dhɑjø me göögø ki ɑ́mɑ̈ɑ̈j kengø. Thyew ngyëny møg-ɑ yod kì bɑng gïn ni menɑni, ko kïdhi ød Jwøøg wun, Jwøng-ɑ Ácwɑ̈ɑ̈j gɑ wïj köngø. Ámɑ̈jji keng mɑɑn yi Jwøng-ɑ Ácwɑ̈ɑ̈j. “Keløg yï wïdh-ɑ wɑɑd wun ngeti Isrɑil ki ngyëny, wɑlɑ̀ gïncɑm, wɑlɑ̀ gïjø megø yøw, köme ko kïdhi keny-ɑ ócolii. Wu ócuggø kïdhi kömi gïn wïdhi ngɑnpɑth ki ngeti Isrɑil, de gïn-ɑ widh yi ngeti Isrɑil köme ko kïdhi keny-ɑ ócolii; col ɑ́ en ceth. Mïdhu ciggɑni, o jɑmm-ɑ ógøggi yi wun bënn kì piny-ɑ mëgge wun gyëdh yi Jwøøg wun, Jwøng-ɑ Ácwɑ̈ɑ̈j. “Keløg yï óköngø kì bøli Jwøng-ɑ Ácwɑ̈ɑ̈j, gwøg gïn-ɑ kwöng yi yïn kinni ógwøg yi yïn ceth, köngí ómïdhi yi Jwøng-ɑ Ácwɑ̈ɑ̈j ɑ́ cwɑggí ceth, o keløg gïnɑni pɑ gwøg yi yïn, menɑni bɑ orøg. Pɑth ki orøg keløg yï pɑ köngi kinni, ‘Jwøng-ɑ Ácwɑ̈ɑ̈j ógöggɑ gïn-ɑni.’ O keløg yï óköngø, mïdhí köngí ceth. “Keløg yï ócyɑ̈dhø yï kɑ̈ll-ɑ yij bɑɑg oløg mi wɑɑd wun, cɑ̈mmí yijí ki oløg, de yï ko kïdhi yij gïjø me kɑ̈lli yi yïn. Kɑ keløg yï kɑ̈ll-ɑ pwödhi gemè mi wɑɑd wun, mööd cinggí ki byel mø nyɑm yi yïn, de yï ko nyɑ̈ɑ̈r ki ɑ́ngön. “Keløg dhɑnhø ónyömø ki dhɑjø, kɑ nyɑnɑni dɑ̈g-ɑ yïe. Kɑ bɑny yi pyëwe ge rum kedhi ød ki gøn, kì bɑng kɑ ɑ́yïdde ki gïnrɑj kì ree, kɑ gø gwëde ki wɑ̈nyi tɑ̈ng, kɑ gø ryeme kì gøle ki wɑ̈nyi tɑ̈ng kì cinge, keny-ɑ ókedhe kɑ nywøm yi jɑlø megø, kɑ cigi bɑnyø yi jɑl-ɑ ɑ́nyömi kì cyɑ̈n, kɑ gø gwëde ki wɑ̈nyi tɑ̈ng, kɑ gø tɑ̈nge, wɑlɑ̀ jɑl-ɑ cyɑ̈n ceg-ɑ thøø, pɑ cigi kwɑnyø yi jɑl-ɑ ɑ́kwøngii ki nywømø kɑ gø tɑ̈nge, mɑ́ e ɑ́göög ɑ́ ɑbwöl, gïn ni menɑni bɑny yi Jwøng-ɑ Ácwɑ̈ɑ̈j, o piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j ko thödhi wun ki ker. “Keny-ɑ óbëëd dhɑnhø cer-ɑ nywöm, ko wëggi kedhi be liny, wɑlɑ̀ ko göög ki gïg-ɑ nyi gwøg yi yɑy. Wiy bëëde kì gøle ki run ɑ́kyel, o tïïne wɑɑng cyëge. “Keløg yï wïdh-ɑ dhɑnhø ki gïïpiny, kïti ɑwɑɑj gøle ko mɑɑg ɑ́ men döggii keny-ɑ ócole gïnɑni, kipe gøle ójɑd ki gïn guur ɑwɑj, kɑ ge mɑg yi kɑ̈j. “Ngɑn kwɑl ngeti Isrɑil, wɑlɑ̀ wëdh, kɑ gø kïdhe be ngeew wɑ̈g ɑ́ bɑ̈ng, ceg ki nɑ̈gø. O rɑjj-ɑ ni møgɑni kɑ̈ɑ̈l wun wɑ̈g kì kelli wun. “Keløg rií dɑ lɑ̈y, gwøg gïn-ɑ köbbi yïn yi ókwër, Kwɑrri Leebì ceth; mïdhu møg-ɑ ɑ́cïgɑ gen ceth. Nyi pɑr wun gïn-ɑ ɑ́göggi Miryɑm yi Jwøng-ɑ Ácwɑ̈ɑ̈j kì kö yöö, keny-ɑ ɑ́bëën wun wu kɑ̈ɑ̈l-ɑ Rïp. “Keny-ɑ ówïdhí wɑɑd wun ki gïïpiny, yï ko kedhi gøle be dwɑɑyi ógødhe men-ɑ mɑg yi yïn gïti keny-ɑ ócool gïnɑni, de cungí kì wɑ̈g, kɑ wiy gø muuje yïn. Keløg ɑ́ jɑl me wɑnge cɑn, ógødhe ko nin kì yïí, nyi döggií kì thyënhø, o ree nyi kume ki gøn. O yï ópøjji yi en, kɑ Jwøgí, Jwøng-ɑ Ácwɑ̈ɑ̈j pyëwe løg-ɑ me med ki yïn. “Bɑ̈ng-ɑ göögø kì cingí ki köögi, ko ruj yi yïn, cɑgg e bɑ wɑ̈d Isrɑil, wɑlɑ̀ bɑ wëdh; nyi culí köönge cɑ̈ng nuti buddø, yethi cyɑ̈ng bënn, mɑ́ ge bɑ ji mø nyingi gen cɑn, kipe óywøøg kö Jwøk, kɑ yï cɑy yi Jwøk. “Wëëg ko nɑ̈g kipe bɑ̈jji wɑ̈ddi gen, o wɑ̈dd ko nɑ̈g kipe bɑ̈jji wëëg gen. Dhɑnhø nɑ̈g kɑ per bɑ̈jjø men-ɑ ɑ́gwøge kiree. “Gïi wëdh kí gïi kïj ko kwɑɑny, kɑ ógødh thwöm ko mɑɑg ɑ́ men-ɑ ódöggii keny-ɑ ócool gïn-ɑ ɑ́widhe kì yïí. Nyi pɑrru kinni wu ɑ́bëëd wu bɑ bɑ̈ngg kì Rïp, ɑkɑ̈ɑ̈l wun wɑ̈g kì yij bɑ̈ɑ̈ngø yi Jwøøg wun, Jwøng-ɑ Ácwɑ̈ɑ̈j, bene ɑ bɑnge cïgɑ wun møgɑni. “Keny-ɑ ókɑɑj byellí, kɑ óyïddø ki møg rumø’ kɑjø møg wïlø kì pwödhø, møgɑni ko dwɑɑy, wiy ge gwen yi wëdhh kí kïjj, geki thwömm, o yï ógëdhi gïg-ɑ gøggí bënn yi Jwøgí, Jwøng-ɑ Ácwɑ̈ɑ̈j. Keny-ɑ órum ki lemi nywøli yenh dhetun møgí, yï ko døøg be lemi møg-ɑ ɑ́bodh, wiy ge lem yi wëdhh kí kïjj, geki thwömm. Keny-ɑ ólem oløgí, ko loor ki lemø këti, wiy møg-ɑ bodh lem yi wëdhh kí kïjj, geki thwömm. Nyi pɑru kinni wu ɑ́bëëd wu bɑ bɑ̈ngg kì Rïp, bene ɑ bɑnge cïgɑ wun møgɑni. “Keløg tyëng Isrɑil ɑ́ryew kedh-ɑ burø be gøny, kɑ ɑ́kyel kì kelli gen cwɑg, kɑ ngɑn-ɑ kyeelø cɑy, keløg ngɑnɑni cɑy kɑ pwödø, köbbi yi jɑgø kinni budde yije rum en piny, kɑ pwöd. Kwɑnni dëll-ɑ pwöödii kyëëw kɑ döngi gïn-ɑ ɑ́bɑj yi en. Ócuggø pwödø ki dëllì pyɑ̈r ɑ́ngwen, de ko di dhɑnhø me pwöd ki møg pöödh dëllì pyɑ̈r ɑ́ngwen, kipe wɑɑd wun pyëwe ónyönhi kì bøli teedø. “Wɑnh-ɑ pyejji gïn-ɑ pwööd byel dhøge ko nyi twööj. “Keløg nyiimëëg obëëdø kì kej ɑ́kyel, kɑ nyel ɑ́kyel othøø e bong wɑ̈d me wiy yi en, cyëge ko wëggi kedhi wɑ̈g, lɑɑg cyëge yi ómen. Wɑ̈n-ɑ ókwøng yi gen ki nywølø, cöll-ɑ nyel-ɑ ɑ́thøw kipe wïje ópɑ̈ɑ̈dh kì Isrɑil. De keløg nyelɑni pɑ dwɑddi lɑgi cï ómen, kedhi nyɑnɑni yï jøgdøngi pɑc, kɑ̀ kööbe kinni, ‘Ómï jɑlgølɑ ɑ́bɑ̈nyi lɑgi yɑn, pɑ dwɑddi nywølø ki wïj ómen kipe wïj ómen ópɑ̈ɑ̈dh kì Isrɑil.’ Codhe kɑ nyelɑni cwööl yi jøgdøngø, kɑ köbbi. O keløg e nudd e óbɑ̈nyø ki lɑgii, kedhi cï ómen yïe, kɑ wɑri nyelɑni lunye wɑ̈g. Kɑ nyingi nyelɑni ngudde ki lɑ́ɑ̀w kì bøli jøgdøngø ceth, kɑ ngɑnɑni kööbe kinni, ‘Bene gïn-ɑ nyi göggi ngɑn-ɑ bɑ̈nyi ki nyöddi ómen ki wïj ɑnɑn.’ Gøle ócwøllì kì Isrɑil ɑ́ gøl jɑl-ɑ wɑre óluny wɑ̈g.” “Keløg cwøw ɑ́ryew ónyïɑ̈ggø, kɑ cï jɑl ɑ́kyel kì kelli gen kedh-ɑ be cwɑggi jɑlgøle, kɑ mɑ̈nni jɑl-ɑ kyeelø mɑge, pëthi wun ko lɑ̈ɑ̈m ki ngɑndhɑjø menɑni, ngølu cinge. Mïdhí gïg nyi rum gɑ møg-ɑ dyër, møg pɑ ruj, o yï óbëëd ki keny me bɑ̈ɑ̈r kì piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j. Tyëng-ɑ nyi gwëmø mɑɑn yi Jwøøg wun, Jwøng-ɑ Ácwɑ̈ɑ̈j. “Wɑ̈thi wun ko wïl ki gïn-ɑ ɑ́göggi wun yi kwɑrri Amɑlek, keny-ɑ ɑ́bëën wun, wu kɑ̈ɑ̈l-ɑ Rïp. A ɑ́cög gen ge nuti böggø’ Jwøk, kɑ ge wïnn-ɑ ngɑ̈thi wun, ɑnɑ̈g gen tyëng-ɑ dhɑ̈rø yi wɑ̈dh kì cyɑ̈ɑ̈n wun. Codhe cyee, keny-ɑ ówɑ̈dhi wun piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j, kɑ wu pëgg-ɑ piny kidøøj, kɑ tyëngmɑ̈ɑ̈nø møg-ɑ bɑdhhi wun tyɑm yi wun ge bënn, nɑ̈g wun kwɑrri Amɑlek bënn kinni tweet, o nyingi gen lɑ̈ɑ̈ny gen kì kömi piny. Wɑ̈thi wun ko pɑ̈nyi wïlø ki nɑ̈gi gen. “Keny-ɑ órum wun ki kwɑnyi piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j, kɑ wu pëgg-ɑ yije, nyi kɑ̈bbi dhɑnhø kì ri mwölli jɑmm-ɑ ɑ́cyeg kì yïe, ki dhöngø ɑ́kyel kì ri gïjø ɑ́kyel, kɑ gø kïdhe kej mɑ̈ddø. Kedhe yï ókwërø men-ɑ nud kì bøli kenyɑni, kɑ gø köbbe kinni, ‘Yɑ ɑ́yïëy dicyɑ̈ngtïn kì bøli Jwøgɑ, Jwøng-ɑ Ácwɑ̈ɑ̈j, kinni yɑ ɑ́wɑ̈nhi yij piny-ɑ ɑ́könge kweyyi wøn kinni gø ómëgge wøn.’ “Kwɑɑny dhöngø kì cinge yi ókwërø, kɑ gø cïbe bøli këli lɑm mi Jwøgí, Jwøng-ɑ Ácwɑ̈ɑ̈j. Kɑ kwøb møg kwøbe kì bøli Jwøng-ɑ Ácwɑ̈ɑ̈j kinni, ‘Kweyi wøn bɑ jɑl Arɑm, o ɑ́bëëd e owïïnø, kɑ gøle kïdhe Rïp kipe kinni o ge bødh gen. Ge ɑ́kedhi kunɑni kwɑnni gen nøg, de ge ɑ́göög ki pödhø me dwøng, me pere teg. Kɑ wø göggi gïjø me rɑɑj yi tyëng Rïp, kɑ wø cïrri gwøg ki bɑ̈ngg. Kɑ wø ywøøg-ɑ kö Jwøng-ɑ Ácwɑ̈ɑ̈j ɑ bɑ Jwøøg kweyyi wøn, kɑ ywøøg wøn lïngi yi en. Kɑ wø yïëële wɑ̈g ki tegø kì Rïp. Ágöög ki ngïjjì geki gïïngɑ̈ngø mø døngø, kí gïg böggi mø døngø. Kɑ wø kɑ̈ɑ̈le piny men, piny-ɑ yije mulli yi cɑg geki møøw kïc. Anɑn yɑ muuj-ɑ Jwøng-ɑ Ácwɑ̈ɑ̈j mwölli jɑmm-ɑ ɑ́cyeg kì yïɑ, kì ri jɑmm-ɑ ɑ́mëgge yɑn.’ “Codhe kɑ dhöngø cïb piny kì bøli Jwøng-ɑ Ácwɑ̈ɑ̈j, kɑ mɑɑl. Bëëd yï ópwöjjø kipe gïgdøj møg-ɑ ɑ́mëggi yïn, wuki gølí yi Jwøgí, Jwøng-ɑ Ácwɑ̈ɑ̈j, kɑ wiy Kwɑrri Leebì geki tyëngpɑth møg-ɑ bëëdø kì kelli wun tuug gen kyeel ki wun. “Kì bɑng runn ɑ́dɑ̈g, nyi mëggi ɑ́kyeel pyɑ̈rri jɑmmí Kwɑrri Leebì, kí wëdhh, kí kïj geki thwömm, o ge cög ge bong gïn jɑ̈ddi gen kì kelli tyëng-ɑ bëëd yi gen. Keny-ɑ órum ki gwøgi møgɑni, kɑ Jwøng-ɑ Ácwɑ̈ɑ̈j köbbí kinni, ‘Bong ɑ́kyeel pyɑ̈rri jɑmmì, ɑ løg jɑmmi kwër mɑ ɑ́döng kì gølɑ, ge ɑ́mëggɑ Kwɑrri Leebì, kí wëdhh, kí kïjj, kí thwömm ni kɑ ɑ́ceg yɑn yi yïn. Ciggi ɑ́kyeel pyɑ̈rri jɑmmì nuti wïlø kì wïjɑ, wɑlɑ̀ ge nuti pyeem yɑn. Yɑ nuti kɑ̈bbø kì ri gen keny-ɑ ɑ́ywöngɑ, yɑ nuti nywɑ̈ddø ki gen keny-ɑ ɑ́bëëdɑ yɑ ywëdhø, o yɑ nuti kɑ̈bbø kì ri gen ki men kunyi tyëngthøø, kwøbbí ɑ́mïdhɑ ceth Yïn ɑ Jwøng-ɑ Ácwɑ̈ɑ̈j, møg-ɑ ɑ́ceg yi yïn bënn kipe ɑ́kyeel pyɑ̈rri jɑmmì ɑ́gwøgɑ. Lïïdh piny, yï ying-ɑ kej kwërí kì mɑl, kɑ Isrɑil jií gyëëdh, kɑ piny-ɑ yije mulli yi cɑg geki møøw kïc; piny kɑ̈r men-ɑ ɑ́mëggí wøn gyëëdh, ni kɑ ɑ́köngí kì bøli kweyyi wøn.’ “Wu ɑ́ceg yi Jwøng-ɑ Ácwɑ̈ɑ̈j dicyɑ̈ngtïn kinni mïdhu cigge bënn, mïdhu gen ceth ki pëthi wun bënn. Wu ɑ́yïëy dicyɑ̈ngtïn kinni, Jwøng-ɑ Ácwɑ̈ɑ̈j bɑ Jwøøg wun. Wu ɑ́rum ki yïëyø kinni, kwøbbe ómïdhi yi wun, o gïg-ɑ ɑ́kwøb yi en bënn ógwøg yi wun. Wu ɑ́yïëy yi Jwøng-ɑ Ácwɑ̈ɑ̈j wun ɑ́ jie, ni kɑ ɑ́köbbe wun, ɑ ɑ́cege wun kinni mïdhu cigge bënn. Wu ógwøg yi en wu døngø kibøli pödhh-ɑ kyeelø møg-ɑ ɑ́cwɑ̈je bënn, o ówør kɑ nyinge lejji kì bɑng wun. Wu óbëëdø wun ɑ́ dïl jie ni kɑ ɑ́kööbe.” Codhe kɑ teedø bëne geki pëjji Isrɑil köbbi yi Mosɑ̀ kinni, “Mïdhu cigg-ɑ mëggɑ wun dicyɑ̈ngtïn ge bënn. Cyɑ̈ng-ɑ óbɑ̈ɑ̈n wun Nɑm Urdun, kɑ wu kedh-ɑ piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j, cïbu piny ki ópɑ̈nni kït mø lɑjjø, kɑ kömi gen mwøn wun, codhe kɑ cigg geki pwönyø men gweed wun kömi gen, keny-ɑ ókedhu piny-ɑ yije mulli yi cɑg geki møøw kïc, piny-ɑ ɑ́kwøb yi Jwøng-ɑ Ácwɑ̈ɑ̈j, ɑ bɑ Jwøøg kweyyi wun kinni gø ómëgge wun, kɑ wu órumø ki wɑ̈dhi løøng-ɑcɑ̀, cwöödh wun ópɑ̈nni kïttɑni wïj Kïti Ebɑl ni kɑ̀ köbbɑ wun dicyɑ̈ngtïn, kɑ ge mwøn wun. Kɑ Jwøøg wun, Jwøng-ɑ Ácwɑ̈ɑ̈j gëddi wun ki këli lɑm kì kunɑni, ger ki tuggi kïttì mø tøggi gen nuti twïg wɑ̈g ki ngyënyø dødø, mɑ́ kël-ɑ gëri Jwøøg wun, Jwøng-ɑ Ácwɑ̈ɑ̈j, nyi ger kɑ tuggi kïttì mø nuti twegø. Kömi këlɑni ɑ rɑ̈ɑ̈b wun ki gënh-ɑ nyi rɑ̈b bëne, wu rɑ̈bb-ɑ Jwøøg wun, Jwøng-ɑ Ácwɑ̈ɑ̈j. Kɑ wu muuj wun ki keni mër, kɑ wu cyɑ̈ɑ̈m wun kì kunɑni pëthi wun omedø kì bøli Jwøøg wun, Jwøng-ɑ Ácwɑ̈ɑ̈j. Kɑ kwøbbi cigg møg bënn gweed kömi ópɑ̈nni kït møg-ɑ bɑ ɑmwøn ge ónënnø kidøøj.” Codhe, ɑköbbi teedø geki Kwɑrri Leebì ókwër yi Mosɑ̀ kinni, “Lïngu kwøbbɑ kidøøj wun ɑ tyëng Isrɑil, wu ɑ́göög ki jii Jwøøg wun, Jwøng-ɑ Ácwɑ̈ɑ̈j dicyɑ̈ngtïn. Kɑ ɑ́rum bëëde kinøw, lïngu kwøbbe, kɑ cigge bënn mïdhi wun, gen ɑ cigg-ɑ ɑ́mëggɑ wun dicyɑ̈ngtïn.” Codhe, ɑköbbi tyëng Isrɑil yi Mosɑ̀ kinni, “Keny-ɑ órum wun ki bɑ̈ɑ̈ni Nɑm Urdun, kɑ̈llì møg cungi gen kì wïj Kïti Geridhïm keny-ɑ ókwøøb kwëng, ɑ løg gøl Cimeøn, kí gøl Leebì, kí gøl Yeudɑ̀, kí gøl Isɑkɑr, kí gøl Yosep, kí gøl Ben Yɑmïn. Keny-ɑ ókwøøb kwøbbi cyën, kɑ gøl Ruben, kí gøl Gɑd, kí gøl Aceer, kí Dhebulun, kí gøl Dɑn, kí gøl Nɑptɑlì, cungi gen kì wïj Kïti Ebɑl. Kɑ møgɑni kwøb yi Kwɑrri Leebì ki cwɑg mø døngø, ge köbb-ɑ tyëng Isrɑil kinni, “ ‘Cyënni Jwøk ying-ɑ kömi ngɑn göögø ki ngïji mɑ kït wɑlɑ̀ yɑdh, wɑlɑ̀ ngyënyø, ɑ́ men mɑlle kì gød; kwɑjji ngïjjì mɑɑn yi Jwøng-ɑ Ácwɑ̈ɑ̈j.’ “Kɑ teedø bëne lögge kinni, ‘Amen!’ “ ‘Cyënni Jwøk ying-ɑ kömi ngɑn pɑ wør wïye wɑlɑ̀ meye.’ “Kɑ ji bënn löggi gen kinni ‘Amen!’ “ ‘Cyënni Jwøk ying-ɑ kömi ngɑn cɑɑg keew gen geki wɑɑd gen.’ “Kɑ ji bënn löggi gen kinni, ‘Amen!’ “ ‘Cyënni Jwøk ying-ɑ kömi ngɑn peej cwør wɑ̈g kì yij yöö.’ “Kɑ ji bënn löggi gen kinni ‘Amen!’ “ ‘Cyënni Jwøk ying-ɑ kömi ngɑn ruj wëdh, kí kïj, kí thwöm.’ “Kɑ ji bënn löggi gen kinni, ‘Amen!’ “ ‘Cyënni Jwøk ying-ɑ kömi ngɑn yɑ̈r wïye, kɑ óbuddø ki cï wïye.’ “Kɑ ji bënn löggi gen kinni, ‘Amen!’ “ ‘Cyënni Jwøk ying-ɑ kömi ngɑn niin lɑ̈y.’ “Kɑ ji bënn löggi gen kinni, ‘Amen!’ “ ‘Cyënni Jwøk ying-ɑ kömi ngɑn niin nyimen wɑlɑ̀ nyiwɑ̈n, wïyi gen ɑ́kyel.’ “Kɑ ji bënn löggi gen kinni, ‘Amen!’ “ ‘Cyënni Jwøk ying-ɑ kömi ngɑn niin øre, meyi cyëge.’ “Kɑ ji bënn löggi gen kinni, ‘Amen!’ “ ‘Cyënni Jwøk ying-ɑ kömi ngɑn luj dhɑnhø, kɑ gø nɑ̈ge.’ “Kɑ ji bënn löggi gen kinni, ‘Amen!’ “ ‘Cyënni Jwøk ying-ɑ kömi ngɑn kïr ki ngyëny kipe kinni o nɑ̈ge dhɑnhø me yïe bɑ̈r.’ “Kɑ ji bënn löggi gen kinni, ‘Amen!’ “ ‘Cyënni Jwøk ying-ɑ kömi ngɑn pyem Ciggi Jwøk bënn geki pwönye.’ “Kɑ ji bënn löggi gen kinni, ‘Amen!’ “O ke lïngí kwøbbi Jwøgí, Jwøng-ɑ Ácwɑ̈ɑ̈j, kɑ cigge møg-ɑ ɑ́köbbɑ wun dicyɑ̈ngtïn mïdhi yi yïn, yï cïb-ɑ mɑl kibøli pödhh-ɑ kyeelø yi Jwøgí, Jwøng-ɑ Ácwɑ̈ɑ̈j. Gyëdh møgɑni bënn bï-ɑ kömí ke mïdhí kwøbbi Jwøgí, Jwøng-ɑ Ácwɑ̈ɑ̈j. “Yï ócyɑ̈dhi ki gyëdh kì kɑɑl, o yï ócyɑ̈dhi ki gyëdh keny-ɑ óying yij pwödhø. “Gyëdh óying kömi nyigí geki pwödhhí, yï ógëdhi dhög kí dyëg. “Byel geki gïncɑm-ɑ gwøg yi yïn ki byellɑni ógëdhi yïn yi Jwøng-ɑ Ácwɑ̈ɑ̈j. “Gïg-ɑ gøggi yi yïn bënn ógëdhi yïn yi Jwøng-ɑ Ácwɑ̈ɑ̈j. “Tyëngmɑ̈ɑ̈nø ótyɑm yi Jwøng-ɑ Ácwɑ̈ɑ̈j keny-ɑ óbëën gen be nyɑɑg ki yïn. Ge ópɑ̈ɑ̈r kömí ge kɑ̈ɑ̈l-ɑ tung ɑ́kyel, de ge órengi ge tɑɑy wɑ̈thi tùng bënn. “Gwøgí ógyëdh yi Jwøng-ɑ Ácwɑ̈ɑ̈j, kɑ thebbí pɑ̈ɑ̈nge ki byëlø bëne. Yï ógyëdh yi en kì piny-ɑ mëgge yïn. “Ke lïngí kwøbbi Jwøøg wun, Jwøng-ɑ Ácwɑ̈ɑ̈j, kɑ gïg-ɑ cïge yïn bënn nyi gwøg yi yïn, wu ógwøge wun ɑ́ jie ceth, ni kɑ ɑ́kööbe. Codhe o lidh yi jurri kömi piny bënn kinni, wun ɑ ɑ́yieny yi Jwøng-ɑ Ácwɑ̈ɑ̈j wun ɑ́ jie, kɑ wu böggi yi gen. Yï ónëngi yi Jwøng-ɑ Ácwɑ̈ɑ̈j ki nywøl mø gïïr, kí dhög mø gïïr. Byëlø óceg twɑ̈lø kì piny-ɑ ɑ́köbbe kweyyi wun kinni gø ómëgge wun. Yï óöde ki kønh-ɑ mïdhe kì mɑl kì bøli kej kødh ceth, o yï ócuggí ki wïdhi pödhh mø ngenyø, de yï koo wïdhi kì yï gen. Yï ógwøg yi Jwøng-ɑ Ácwɑ̈ɑ̈j, ɑ bɑ Jwøgí, yïn ɑ́ pëëji mi pödhh mø ngenyø yïn ɑ Isrɑil, de yï koo pyejji, yï ócög yï døøj keløg yïëyí ómïdhi yi yïn, geki cigge bënn møg-ɑ ɑ́mëggɑ yïn dicyɑ̈ngtïn. De ciggɑni ko pɑ̈nyi wun ki pyemø, wɑlɑ̀ wu ko pɑ̈nyi kedhi be mɑlli jwögg møøgø. “De keløg dhø Jwøng-ɑ Ácwɑ̈ɑ̈j ópyem yi yïn, kɑ cigge pyem yi yïn, gen ɑ cigg-ɑ ɑ́mëggɑ wun dicyɑ̈ngtïn, gïgrijjø møg bënn ceg-ɑ pɑ̈dhi kömi wun. “Kɑ̈ddi wun geki pwödhhi wun ógöjji cyën yi Jwøng-ɑ Ácwɑ̈ɑ̈j. “Pwödhhi wun ki gïgcɑmmi wun ógöjji cyën yi Jwøng-ɑ Ácwɑ̈ɑ̈j. “Wu ógöjji cyën yi Jwøng-ɑ Ácwɑ̈ɑ̈j, kɑ wu nywøl-ɑ nywøl mø nøg, kɑ pwödhhi wun ocögø ge pɑ ti cyegø, kɑ dhögi wun kí dyëgi wun løg-ɑ mø nøg. “Gïg-ɑ gøggi yi wun bënn ógöjji cyën yi Jwøng-ɑ Ácwɑ̈ɑ̈j. “Keløg wu ógöögø ki gïnrɑj kɑ Jwøng-ɑ Ácwɑ̈ɑ̈j bɑny yi wun, wu ógöjje ryɑ̈g, kí muumø, kí ɑkørr kì ri gïg-ɑ ógøggi yi wun bënn, gïti keny-ɑ ójwɑɑn wun ki tyëgø nɑ̈gø. Ógöjji kömi wun ki rɑ̈ɑ̈m dëllì, kɑ nyi cig-ɑ önø, gïti keny-ɑ óthumi wun kì piny-ɑ yije kedhi yi wun, ɑ́ men kwɑny yi wun. Wu ógöjji yømø nɑ̈ɑ̈g yi Jwøng-ɑ Ácwɑ̈ɑ̈j, kí kɑ̈jj-ɑ köddi, kí lëdhi dëllì. Wu ógöjje mel kí ɑtunø me rënyi byelli wun, wu pɑ wiy yi rɑ̈ɑ̈m dëllì møgɑni gïti keny-ɑ óthøw wun. Bong kødh men-ɑ ódëëm; lɑ̈bø ógöögø ɑ́ gïwi ni ngyënyø dødø. Bøli keny di dëëm kødh, dëëm ɑ́ tør kí ɑyejø gïti keny-ɑ óthøw wun. “Jwøng-ɑ Ácwɑ̈ɑ̈j, wu ógöjje tyɑmø yi tyëngmɑ̈ɑ̈nø. Wu ópɑ̈ɑ̈r kömi gen wu kɑ̈ɑ̈l-ɑ tung ɑ́kyel, de wu ócyeddi yi gen, kɑ wu reng-ɑ wɑ̈thi tùng bënn, kɑ ji bënn kì kömi piny obwøgø keny-ɑ ólidh gen gïn-ɑ ɑ́cwöb kiper wun. Keny-ɑ óthøw wun, wu ócɑm-ɑ yi winy geki lɑ̈yyi pɑ̈l, bong ngɑn-ɑ óryem gen kì kömi wun. Wu ógöjji köddi dëllì yi Jwøng-ɑ Ácwɑ̈ɑ̈j, ni men-ɑ ɑ́göjje tyëng Rïp. Dëlli wun ógöjje lolø ki túd. Dëlli wun óbëëdø ge bøllø, kɑ dëlli wun ópëddø yïllø, de bong gïn yïëdø. Wɑ̈thi wun ówëggi nungø yi Jwøng-ɑ Ácwɑ̈ɑ̈j, wu ógöjje cøørø kí muumø. Wu óthɑ̈mmi kì dicɑ̈ng ni cörr, o yuu-ɑ kedhi yi wun pɑ yod yi wun. Wu koo dönyi cɑgg wu göögø ki gwøng teg. Wu ónyøn kɑ jɑmmi wun kɑbbi, bong ngɑn køny wun. “Yï ócuggø nywöm, de nyɑn-ɑ nywøm ótɑ̈ng yi jɑlø megø. Yï ógëdø ki ød, de yï koo bëëdø kì yije. Yï ógöögø ki bɑg, de nywøli yenhi bɑngɑni koo cɑm-ɑ yi yïn. Dhögí óngɑlli ge onennø yi yïn, de yï koo cyɑ̈mø ki rïnggi gen. Aderrí ókɑ̈l ge onennø yi yïn, de ge koo döggi yïn. Dyëgí ómëggi tyëngmɑ̈ɑ̈nø, de bong ngɑn køny yïn. Wɑ̈ddí geki nyigí womɑ̈nn ómëggi tyëngpɑth gɑ bɑ̈ngg. Nyingí ótöd yi nenni yöö yethi cyɑ̈ng kinni nyigí ódwöög, de ge pɑ dwöög, Byell-ɑ pur yi yïn bënn ki gwøng teg ókɑ̈l-ɑ yi pödhø megø, o bong gïn yod yi yïn den-ɑ́ orɑng kí rɑ̈ji bëëdø. Wïjí ómuum kì bɑng orɑngí. Dëlí ógöjji kɑ̈jjiledh mø pɑ nøggi, kɑ̈jji lol ki túd óbëëdø ge pɑ̈ng dëlí, cɑg kì wïjí gïti ri tyellí. “Wu ókïdhi pödhø megø me pɑth wuki rɑ̈dhí yi Jwøng-ɑ Ácwɑ̈ɑ̈j, wu ókïdhe keny me nuti pɑ̈nyø’ bëëdø yi wun, wɑlɑ̀ kweyyi wun cøn. Wu ókwɑ̈jji kì kunɑni kì yï jwögg mø ógwøgø kɑ yɑdh geki kït. Ji óngɑ̈ng kì pödhh-ɑ yethi gen ókedhhi wun yi Jwøng-ɑ Ácwɑ̈ɑ̈j, kɑ wu gɑggi yi gen kipe gïn-ɑ ɑ́pɑ̈dhi kömi wun. “Wu ókɑ̈gø ki byel mø gïïr, de wu ókɑj-ɑ mø nøg yøw, mɑ́ byelli wun ócɑm yi bɑ̈nyø. Wu ópïdhø ki oløg me gïïr, kɑ ge pur yi wun kidøøj, de wu koo lïmø ki oløg, wɑlɑ̀ wu koo mɑ̈dhø ki møgi oløg, mɑ́ nywøli oløg ócɑm yi twöngø. Ólɑm ótwïy kì yij pinyí bëne, de yï koo lïmø ki nywøle, mɑ́ ge ódyëm ge nuti cyegø. Yïi wun ódi wɑ̈dd kí nyigi wun womɑ̈nn, de wu koo bëëdø ki gen, mɑ́ ge ókɑ̈l gɑ ɑmɑggi liny. Nywøli yenhi wun geki byelli wun bënn ócɑm yi twöngø. “Tyëngpɑth møg-ɑ bëëdø kì piny wun ókedh ge ótëngø, de wu ókedh wu ónyönhø. Yïi gen ódi ngyëny mø wïdhi gen wun, de yï wun koo di ngyëny mø wïdhi wun gen. Ge ógöögø gɑ jɑggi wun kì cyɑ̈ɑ̈n piny. “Rɑjjɑni bënn óying kömi wun gïti keny-ɑ óthumi wun bënn, mɑ́ wu ɑ́bɑ̈nyi lïngi kwøbbi Jwøng-ɑ Ácwɑ̈ɑ̈j Jwøøg wun, kɑ wu óbɑ̈nyø ki mïdhi cigg-ɑ ɑ́mëgge wun. Gen ɑ nyi cɑ̈yyi wun ceth yi Jwøk wuki kwɑrri wun gïti ɑtheer. Wu ɑ́gëdhhi gïïpiny bëne yi Jwøng-ɑ Ácwɑ̈ɑ̈j, de Jwøng-ɑ Ácwɑ̈ɑ̈j nuti göggø yi wun ki medi pëthi wun. De wu ógögg-ɑ tyëngmɑ̈ɑ̈nø møg-ɑ ókɑ̈ɑ̈l kömi wun yi Jwøng-ɑ Ácwɑ̈ɑ̈j. Kɑ rume bëëde kinøw, wu ómɑg yi kɑ̈j kí röödhø, kɑ wu cyɑ̈dh-ɑ nøw, kɑ wu cɑ̈nn-ɑ jɑmmi bënn. Nyingi wun óguud yi Jwøng-ɑ Ácwɑ̈ɑ̈j gïti keny-ɑ óthumi wun. Kömi wun ókɑ̈ni yi Jwøng-ɑ Ácwɑ̈ɑ̈j kì pödhø me kɑ̈ɑ̈l cögi piny, pödhø me dhøge kwïj yi wun. Ge ócwøøy kömi wun ni cor. Pëthi gen koo lɑ̈ɑ̈m ki dhɑnhø, ying-ɑ́ yu wɑlɑ̀ othinh. Dhögi wun kí byelli wun ócɑm yi gen, de wu óywɑj yi kɑ̈j. Jɑmmi wun ókɑ̈l yi gen bënn, ɑ løg byel kí møgi oløg, kí møøw dhetun, kí dhög, kí dyëg, kɑ wu ywɑj yi kɑ̈j. Kɑ̈dd bënn kì yij piny-ɑ mëggi wun yi Jwøng-ɑ Ácwɑ̈ɑ̈j óyɑg yi gen, kɑ dörri kɑ̈dd møg-ɑ ngɑ̈dh yi wun cøør piny. “Keny-ɑ ótyeeg kɑ̈ddi wun yi tyëngmɑ̈ɑ̈nø, wu ójɑ̈ddi ki gïncɑm, nyigi wun, nyig-ɑ ɑ́mëggi wun yi Jwøng-ɑ Ácwɑ̈ɑ̈j ócɑm yi wun. “Keløg kwøbbi Jwøk koo mïdhi yi wun kidøøj, kɑ nyingi Jwøøg wun, Jwøng-ɑ Ácwɑ̈ɑ̈j, Jwøng-ɑ ceg ki böggø pɑ wør yi wun, wu göjje’ rɑ̈ɑ̈m dëllì mø pɑ cuggi tuurø wuki nyigi wun. Kɑ wu göjje yømø nɑ̈ɑ̈g, me pɑ cuggi jogø. Rɑ̈ɑ̈m dëllì mø rijjø ni møg-ɑ ɑ́lidh yi wun kì Rïp göjje’ wun, dëlli wun pɑ pɑ̈nyi yönø. Óöni thyew ki rɑ̈ɑ̈m dëllì geki yømø nɑ̈ɑ̈g mø nuti gwedø kì yij wɑ̈nyi Ciggi Jwøk men, wu óthøw. Cɑgg wu ngënyi ni kyelli mɑl, bɑ ji mø nøg ɑ óbodh kì kelli wun, mɑ́ kwøbbi Jwøøg wun, Jwøng-ɑ Ácwɑ̈ɑ̈j nuti lïngi wun. Ni kɑ ɑ́bëëd Jwøng-ɑ Ácwɑ̈ɑ̈j pyëwe med keny-ɑ ɑ́gwøge wun, kɑ wu ódönyø, kɑ kwɑnni wun óngënyø, nɑ menɑni ceth, pyëwe óløg me med ki rënyi wun geki nɑ̈gi wun. Wu ódhwööy wɑ̈g kì piny-ɑ kwɑɑny yi wun. “Wu ókedhhi yi Jwøng-ɑ Ácwɑ̈ɑ̈j kì kelli pödhh bënn, kì kömi piny; wu ówɑ̈dhi pödhh-ɑ cögi piny, kɑ wu mɑll-ɑ jwögg møg-ɑ ógwøgø kɑ yɑdh geki kït; jwögg mø nuti pɑ̈nyø’ mɑllø yi wun, wɑlɑ̀ yi kweyyi wun. Bong keny yod wun mër, o bong kej wun, wu ógöjji ywøøg yij, kí olïng pëëth yi Jwøng-ɑ Ácwɑ̈ɑ̈j. Wu óbëëdø wu óböggø ki thøø kì wɑ̈r kí dicɑ̈ng. Pëthi wun óbëëdø ge opödø yi wɑ̈ɑ̈rø kì wɑ̈r kí dicɑ̈ng. Kì dicɑ̈ng wu cem-ɑ wɑ̈r óbï kì wɑɑng? O kì wɑ̈r wu cem-ɑ wøw óru kì wɑɑng? Wu ódwøøg Rïp yi Jwøng-ɑ Ácwɑ̈ɑ̈j ki yɑ̈thi nɑm, cɑgg ɑ́ kɑ̀ rum en ki kwøb kinni wu koo døøg kunɑni këti. Ri wun ópɑ̈nyi yi wun ki ngeew yï tyëngmɑ̈ɑ̈nø kì kunɑni wu bɑ bɑ̈ngg, de bong ngɑn-ɑ ódwɑddi ngewi wun.” Menɑni bene lwöbø men-ɑ kɑɑm Jwøng-ɑ Ácwɑ̈ɑ̈j geki tyëng Isrɑil, lwöm-ɑ ɑ́köbbi Mosɑ̀ yi Jwøng-ɑ Ácwɑ̈ɑ̈j kinni, nywɑg ge gøn ki tyëng Isrɑil kì Moɑb, reb ki lwöm-ɑ ɑ́lwøb kì Kïti Sinɑy. Kɑ tyëng Isrɑil cwøøl kej ɑ́kyel yi Mosɑ̀, ɑköbbe gïn kinni, “Álidh yi wun ki ri wun, eni gïn-ɑ ɑ́göggi rɑ̈ɑ̈dh Rïp geki jyɑ̈gge kí pödhe bëne yi Jwøng-ɑ Ácwɑ̈ɑ̈j. Wu ɑ́lïdhi ki ryɑ̈g me dwøng, kí gïïngɑ̈ngø, geki gïgdøngø møg-ɑ ɑ́gwøg yi Jwøng-ɑ Ácwɑ̈ɑ̈j. De wu nuti wëg en yodi tyelli gïg-ɑ ɑ́lidh yi wun. Wu ɑ́pyejji yi Jwøng-ɑ Ácwɑ̈ɑ̈j kì yij pɑ̈l ki runn pyɑ̈r ɑ́ngwen, o ógudhi wun geki wɑrri wun nuti rënyø. Yïi wun ɑ́bong-ɑ ópùn møg cɑm yi wun, wɑlɑ̀ møgi oløg geki møgi byel men mɑdh yi wun, de wu nuti ywɑjø yi kɑ̈j, kipe kinni o yod yi wun kinni, bɑ Jwøøg wun, Jwøng-ɑ Ácwɑ̈ɑ̈j, ɑ kor wun. O keny-ɑ ɑ́wɑ̈nhi wɑ keny, Rɑ̈dh Sïön, rɑ̈nh-ɑ ɑ́jyɑ̈ɑ̈g kì Bɑcɑn geki Rɑ̈dh Og, rɑ̈nh-ɑ ɑ́jyɑ̈ɑ̈g kì Kicbön ge ɑ́tëni kömee ki liny, kɑ ge tyɑm yi wɑ, ɑkwɑny wɑ piny gen kɑ pɑ̈ngi yi wɑ kì kelli wɑ̈thi kɑ̈lli Ruben ki Gɑd, ki budi gøl Mɑnɑsè. Mïdhu lwöbø men kidøøj, o gïg-ɑ gøggi yi wun nyi pɑ̈dhi gen kɑ̈jji gen bënn. “Dicyɑ̈ngtïn wu ɑ́bëëd wu ócungø kì bøli Jwøøg wun, Jwøng-ɑ Ácwɑ̈ɑ̈j, wu bënn, pëjji wun geki jɑggi wun, cwøw, kí mɑ̈nn, kí othønhø, kí wëdhh møg-ɑ bëëdø kì kelli wun, ɑ nyi nguddi wun ki yenh, ɑ nyi tëddi wun ki pï. Wu ying-ɑ keny wu bënn ɑnɑn kipe kinni o wu lwööb wun ki Jwøøg wun, Jwøng-ɑ Ácwɑ̈ɑ̈j, o lwömɑni ómïdhi yi wun ceth, o wu óyïëy yi Jwøng-ɑ Ácwɑ̈ɑ̈j, wun ɑ́ jie, ni kɑ ɑ́köbbe wun, wuki kweyyi wun: Abrɑhɑm, kí Isɑɑk, kí Yɑgob. Pɑth ki wun keti wun ɑ lwöbø wuki Jwøng-ɑ Ácwɑ̈ɑ̈j ki lwöbø men, ɑ́ men mïdhi yi wun. Lwömɑni ying-ɑ kɑɑm ji-ɑ cungi kì keny èn bënn geki Jwøng-ɑ Ácwɑ̈ɑ̈j, wɑ kí kwɑrree møg-ɑ nuti nywølø. “Ngɑ̈nyi yi wun eni bëën-ɑ ɑ́bëëd yi wɑ kì piny Rïp, kí kër-ɑ ɑ́bëën wɑ, wɑ bɑ̈ɑ̈n-ɑ pödhh, o ngïjji jwögg, gïg lɑ̈mmi pëëth møg-ɑ ógwøgø ki dhɑb, kí ɑ́tegø, kí yɑdh ge ɑ́lidh yi wun. Ko di dhɑnhø, ying-ɑ́ jɑlø wɑlɑ̀ dhɑjø, wɑlɑ̀ wïj ød, wɑlɑ̀ wïj kɑl kì kelli tyëng-ɑ lïngi møg kì keny èn, men-ɑ ólugi ngɑ̈je Jwøgee, Jwøng-ɑ Ácwɑ̈ɑ̈j, kɑ kedh-ɑ be mɑlli jwöggi pödhh-ɑ kyeelø. Menɑni óni gïn pidh kì pwödhø, kɑ ree løge men nɑ̈g ji keny-ɑ ócyege kɑ cɑm. Ko di dhɑnhø kì kelli tyëng-ɑ keny èn dicyɑ̈ngtïn, tyëng-ɑ lïngi kwøbbi lwöbø men, men-ɑ órumø kinni bong gïjø me rɑj, cɑgg mune tëngi kɑ kedh-ɑ be mɑlli jwöggi pödhhɑni. Ngɑn ni menɑni nɑ̈g-ɑ wun wu bënn, tyëngrijjø kí tyëngdøj. Pyëw Jwøng-ɑ Ácwɑ̈ɑ̈j pɑ lɑ̈ɑ̈m ki ngɑn ni menɑni, de rɑ̈ji pyëw Jwøng-ɑ Ácwɑ̈ɑ̈j óceg lyelø ni mɑc, cyënn-ɑ ɑ́gwed kì yij wɑ̈nyø men ceg-ɑ pɑ̈dhi köme bënn, gïti keny-ɑ ótɑ̈ɑ̈y wïje piny yi Jwøng-ɑ Ácwɑ̈ɑ̈j. Ngɑnɑni ógwøg yi Jwøng-ɑ Ácwɑ̈ɑ̈j ɑ́ nyuudhi kipe wɑ̈thi kɑ̈lli Isrɑil bënn, o cyënn-ɑ bɑ ɑgwed kì yij wɑ̈nyi pwönyø men, ceg-ɑ pɑ̈dhi köme bënn, gen ɑ møg-ɑ ɑ́nywɑg. “Kwɑrri wun kì yethi rïjj-ɑ óbï geki wëdhh-ɑ óbï be bëëdø kì kelli wun, ge kɑ̈ɑ̈l-ɑ pìny mø lɑ̈wi, ryɑ̈g geki rɑ̈ɑ̈m dëllì møg-ɑ ógöjji wun yi Jwøng-ɑ Ácwɑ̈ɑ̈j, ólidh yi gen. Pwödh ógöögø ki ryɑng me yije pɑ̈ng yi kïbrït kí omelø, bong gïjø me kɑ̈g kì yethi gen, cɑgg ɑ́ lum pɑ twïy kì yethi gen. Piny wun ógöögø e nɑ Sødømɑ̀ kí Gømørɑ̀, kɑ nɑ Admɑ̀ kí Dheböïm, ɑ ɑ́nɑ̈g yi Jwøng-ɑ Ácwɑ̈ɑ̈j keny-ɑ ɑ́rënyi pyëwe. Lɑ̈bø bëne ópëjji kinni, ‘Á kipe ngø ɑ gwøøg piny men kinøw yi Jwøng-ɑ Ácwɑ̈ɑ̈j, ɑ́ ngø ɑ ɑ́wëggi pyëwe rënyø kinøw?’ Pyëjjɑni óløøg kinni, ‘Bɑ kipe kɑ ɑ́pɑ̈ɑ̈d lwöbø yi jii Jwøng-ɑ Ácwɑ̈ɑ̈j, eni lwöm-ɑ ɑ́nywɑg yi gen geki Jwøøg kweyyi gen, keny-ɑ ɑ́kɑ̈ɑ̈le gïn wɑ̈g kì piny Rïp. Ge ɑ́ceg-ɑ kedhi be mɑlli jwögg mø kwïj yi gen cøn, gen ɑ jwögg-ɑ ɑ́kyer yi Jwøng-ɑ Ácwɑ̈ɑ̈j kinni ge ko mɑlli yi jie. Bene ɑ ɑ́rënyi pyëw Jwøng-ɑ Ácwɑ̈ɑ̈j, ɑ göjje piny gen ryɑ̈gg-ɑ bɑ ɑgwed kì yij wɑ̈nyø men. Jwøng-ɑ Ácwɑ̈ɑ̈j pyëwe ɑ́ceg-ɑ rënyø ki menrɑj, ɑdhööye gïn wɑ̈g kì piny gen, kɑ gï leenge piny me pɑth, keny-ɑ di gen dicyɑ̈ngtïn.’ “Dɑ møøgø mɑ ɑ́mïdhi yi Jwøgee, Jwøng-ɑ Ácwɑ̈ɑ̈j gɑ ɑkɑnn, de cigge ɑ́nyodhe, o ciggɑni di dwɑddø o ge mïdhi yi wɑ, wɑ ki kwɑrree gïti ɑtheer. “Bølí ɑ́cïbɑ jɑmmì ɑ́ryew ɑnɑn, ɑ løg gyëdh kí cyën. Keny-ɑ óbëën gïgɑni kömí, wu bëëd ɑ yethi pödhh møøgø, kì kun-ɑ ókedhhi wun yi Jwøgí, Jwøng-ɑ Ácwɑ̈ɑ̈j, møg-ɑ ɑ́cïbɑ bølí ópɑr yi yïn. Keløg yï dwöög-ɑ kö Jwøng-ɑ Ácwɑ̈ɑ̈j wuki nyigí, ki pëthi wun bënn, kɑ cigge møg-ɑ ɑ́mëggɑ wun dicyɑ̈ngtïn mïdhi yi wun, Jwøøg wun, Jwøng-ɑ Ácwɑ̈ɑ̈j, pyëwe ólɑ̈ɑ̈m ki wun. Kɑ wu dwööge kì yethi pödhh-ɑ ɑ́kedhhe wun, kɑ wu dwøøge yij kɑ̈r këti. Wu ódwöög yi Jwøøg wun, Jwøng-ɑ Ácwɑ̈ɑ̈j, cɑgg wu tɑyø, kɑ wu wɑ̈dh-ɑ wɑ̈thi tùngi piny, kun lɑ̈wi. Wu ódwööge, o wu kwɑny wun piny-ɑ ɑ́bëëd yi kweyyi wun cøn. Wu óthödhe ki kɑ̈r kɑ kwɑnni wun óngënyø kibøli kwɑnni kweyyi wun kɑ̈ge dööng. Pëthi wun, wuki kwɑrri wun ólug yi Jwøng-ɑ Ácwɑ̈ɑ̈j, kɑ Jwøøg wun, Jwøng-ɑ Ácwɑ̈ɑ̈j mɑɑr yi wun ki pëthi wun bënn, kí wëyi wun bënn, o wu óyïddi wun ki nënnì. Kɑ cyën møgɑk bënn gøøj kömi tyëng-ɑ mɑɑn yïn, gen ɑ tyëng-ɑ ɑ́guud wɑngí. Kɑ yï døøg-ɑ be lïngø ki kwøbbi Jwøng-ɑ Ácwɑ̈ɑ̈j, kɑ cigge, cigg-ɑ ɑ́mëggɑ yïn dicyɑ̈ngtïn mïdhi yi yïn. Jwøng-ɑ Ácwɑ̈ɑ̈j yï ógëdhe gïg-ɑ gøggi yi yïn bënn, kɑ nyigí óngënyø, kɑ dhögí kí dyëgí óngënyø, kɑ jɑmm-ɑ kɑ̈g yi yïn bënn nyi ceg-ɑ cyegø kidøøj. Pyëwe óløg me med ki gwøgí, o yï dönyí ni döny-ɑ ɑ́dönyi kweyyi wun. De lïngu kwøbbe, kɑ cigge bënn mïdhi wun, geki pwönye, ɑ løg møg-ɑ bɑ ɑgwed kì yij wɑ̈nyø men. “Cigg-ɑ mëggɑ wun dicyɑ̈ngtïn pɑ teeg, wɑlɑ̀ pɑ lɑ̈wi ki wun. Ciggɑni pɑ ying mɑl, o wu koo pëjji kinni, ‘Á men ɑ ókedhi mɑl be muuji wɑ ciggɑni, o ge lïngi yi wøn, o gïn-ɑ kømmi yi gen gwøg yi wɑ?’ O ge pɑ ying løøg nɑɑm omelø. O wu koo pëjji kinni, ‘Á men ɑ ókedhi løøg nɑɑm omelø be muuji gen wøn, o ge lïngi yi wøn, o gïn-ɑ kømmi yi gen gwøg yi wøn?’ Pɑth ki gen, ciggɑni ying-ɑ yïi wun keny, ge nud kì pyëwí, o ge ócuggø kwøbø yi yïn, kɑ gïn-ɑ kømmi yi gen gwøg yi yïn. “Dicyɑ̈ngtïn bølí cïbɑ’ jɑmmì ɑ́ryew mø kelli gen kɑ̈bbi yi yïn, kɑɑm gïnrɑj kí gïndøj, thøø kí nënnì. Ke lïngí ciggi Jwøgí, Jwøng-ɑ Ácwɑ̈ɑ̈j, cigg-ɑ ɑ́mëggɑ yïn dicyɑ̈ngtïn; ke mɑɑrií kɑ gïn-ɑ kømme gwøg yi yïn, kɑ cigge bënn mïdhí, wu ódönyø, kɑ wu ogöögø ki pödhø me dwøng. Wu ógyëdh yi Jwøøg wun, Jwøng-ɑ Ácwɑ̈ɑ̈j kì yij piny-ɑ kwɑɑny yi wun. De keløg wu ópëmø kɑ wu ódhɑ̈lø lïngø, kɑ wu thɑɑb be kwɑjji jwögg møøgø, wu órënyi. Wun ɑ mɑ̈ɑ̈g ki kyëddø yi yɑn èn, ke pëëm wun, wu koo bëëdø ki keny me bɑ̈ɑ̈r kì løøg Nɑm Urdun, piny-ɑ kwɑɑny yi wun. Anɑn yɑ cwööl-ɑ mɑl geki piny, o ge lïng gen dicyɑ̈ngtïn kinni, bøli wun ɑ́cïbɑ’ nënnì geki thøø, kí gyëdh geki cyën. Myeg wun nënnì, o wu ónëën wun, wuki kwɑrri wun! Mɑɑr Jwøgí, Jwøng-ɑ Ácwɑ̈ɑ̈j, kɑ møg-ɑ kømme nyi gwøøg, kɑ yïëyí mïdhí, o yï óbëëd wuki kwɑrrí ki keny me bɑ̈ɑ̈r kì yij piny-ɑ ɑ́kwönge kinni gø ómëgge kweyyi wun Abrɑhɑm, kí Isɑɑk, kí Yɑgob.” Mosɑ̀ nudd e okööbø ki tyëng Isrɑil, okööbø kinni, “Runnɑ ɑ́göög ki miyø kí pyɑ̈r ɑ́ryew, yɑ ɑ́yöø, yɑ pɑ cuggi bëëdø yɑn ɑ́ pëëji mi wun këti. Yɑ ɑ́köbbi thyew yi Jwøng-ɑ Ácwɑ̈ɑ̈j kinni i Nɑm Urdun pɑ bɑ̈ɑ̈n yi yɑn. Jwøøg wun, Jwøng-ɑ Ácwɑ̈ɑ̈j kiree ɑ ócyɑ̈dhi kì bøli wun, kɑ pödhh-ɑ bëëdø kì pinyɑni nɑ̈ge, o piny gen kwɑny yi wun, o bɑ Jöcwø ɑ óbëëd ɑ́ pëëji mi wun ni kɑ ɑ́kööb Jwøng-ɑ Ácwɑ̈ɑ̈j. Pödhhɑni ónɑ̈g yi Jwøng-ɑ Ácwɑ̈ɑ̈j ceth, ni kɑ ɑ́nɑ̈ge Sïön geki Og, rɑ̈nhi tyëng Amör, kɑ pödhi gen tɑ̈ɑ̈ye piny. Jwøng-ɑ Ácwɑ̈ɑ̈j wu ówëgge tyɑmi gen, de gwøgu gen ceth ni møg-ɑ ɑ́köbbɑ wun. Cwedu pëthi wun, kɑ wu ko böggi. Wu ko bwøg yi gen, Jwøøg wun, Jwøng-ɑ Ácwɑ̈ɑ̈j kiree ócyɑ̈dhi ki wun. Wu pɑ wøy yi en, o wu pɑ wiye piny.” Codhe, ɑcwøøl Jöcwø yi Mosɑ̀ kɑ gø köbbe kì bøli tyëng Isrɑil bënn kinni, “Cwed pyëwí kɑ yï ko böggi, bɑ yïn ɑ ópeej ji møg be kwɑnyi piny-ɑ ɑ́köbbi kweyyi gen yi Jwøng-ɑ Ácwɑ̈ɑ̈j, kinni gø ómëgge gïn. Wu ópyejj-ɑ yi Jwøng-ɑ Ácwɑ̈ɑ̈j kiree. Wu pɑ wøy yi en, o wu pɑ wiye piny, de cwed wun pëthi wun, kɑ wu ko böggi.” Codhe, kɑ Ciggi Jwøk gwed yi Mosɑ̀, kɑ gï mëgge Kwɑrri Leebì ókwër, jøg-ɑ mïdhi Sɑnduug Ciggi Jwøng-ɑ Ácwɑ̈ɑ̈j, geki jɑggi Isrɑil. Kɑ gï cege kinni, “Kenyi thumi runn ɑ́bïryew, kenyi bëën run-ɑ nyi wiy körr, nyi rɑɑng cigg møg kì kej wööwi Kwëër Akɑnnì. Nyi rɑ̈ngu ciggɑni tyëng Isrɑil, kenyi bëën gen be mɑlli Jwøøg wun, Jwøng-ɑ Ácwɑ̈ɑ̈j kì keny-ɑ ómyeg yi en ɑ́ kej mɑ̈ddø. Cwööl jøg-ɑ cwøw bënn, kí tyëng-ɑ mɑ̈nn geki othønhø kí wëdhh møg-ɑ bëëdø kì kɑ̈ddi wun, o ciggɑni lïngi yi gen bënn, o Jwøøg wun, Jwøng-ɑ Ácwɑ̈ɑ̈j wør, o cigge geki pwönye mïdhi kidøøj. O kwɑrri wun, ɑ nuti pɑ̈nyi ciggi Jwøøg wun, Jwøng-ɑ Ácwɑ̈ɑ̈j ki lïngø, lïng gen. O ge dïd gen ki mïdhi kwøbbe kì piny-ɑ ókwɑny yi gen kì løøg Nɑm Urdun.” Codhe, kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Kej thøwí ɑ́cyɑ̈ngi. Cwøl Jöcwø kɑ kɑ̈ɑ̈l dhø Kemi Kwër, o ceg yi yɑn.” Kɑ Mosɑ̀ kedh-ɑ dhø Kemi Kwër geki Jöcwø, Acwöb Jwøng-ɑ Ácwɑ̈ɑ̈j kì bøli gen kì yij lööj pøølø kì dhø Kemɑni. Kɑ Mosɑ̀ köbbi yi Jwøng-ɑ Ácwɑ̈ɑ̈j kinni, “Yï ɑ́cyɑ̈ngi ki thøø. Ji ódøøg be pëmø kì bɑng thøwí, kɑ lwöm-ɑ kɑɑm wøn ki gen pɑ̈d yi gen. Yɑ ówiy piny yi gen, kɑ ge kedh-ɑ be mɑlli jwöggi piny-ɑ yije kedhi yi gen. Keny-ɑ ócwöb gïg ni møgɑni, pyëwɑ órënyi ki gen, kɑ ge wiyɑ piny, o ge rënyi gen, ryɑ̈g me dwøng ópɑ̈dhi kömi gen, o óyod yi gen ceth, kinni rɑjjɑni ɑ́bï kömi gen kì bɑng kɑ̀ bëëdɑ yɑ tøøk kì kelli gen. O ge koo køny yi yɑn, mɑ́ ge ɑ́göög ki gïnrɑj, kɑ ge kedh-ɑ be mɑlli jwögg møøgø. “Anɑn gwed wörø men. Kɑ pwönyí tyëng Isrɑil, o ócunge ɑ́ gïn-ɑ köme ócɑ̈yyi gen. Ge ókïdhɑ piny-ɑ ɑ́köbbɑ kweyyi gen kinni gø ómëggɑ gen, eni piny-ɑ yije mulli yi cɑg geki møøw kïc. Bong gïncɑm men-ɑ ócɑ̈nni gen kì kunɑni, o ge óbëëdø pëthi gen omedø. De wɑ̈thi gen óløg gen be mɑlli jwögg møøgø, yɑ óbɑny yi gen kɑ lwöbø pɑ̈d yi gen, kɑ ryɑ̈g me dwøng bï-ɑ kömi gen. De wörø men ónudd e owörø ceth, o bɑ wörɑni ɑ ócɑ̈yyi gen. Cɑgg ɑ́ kɑ̀ nuti kïdhi yɑn gen yij piny-ɑ ɑ́kwøbɑ kinni gø ómëggɑ gen ceth, gïn-ɑ rømmi yi gen ngɑ̈nyi yi yɑn.” Wörɑni ɑ́gwed yi Mosɑ̀ kì cyɑ̈ngɑni ceth, kɑ gø pwönye tyëng Isrɑil. Codhe, ɑlunyi Jwøng-ɑ Ácwɑ̈ɑ̈j ki kwøb ki Jöcwø wɑ̈d Nun, kɑ gø köbbe kinni, “Cwed pyëwí kɑ yï ko böggi. Bɑ yïn ɑ ópeej tyëng Isrɑil yij piny-ɑ ɑ́kwøb yi yɑn kinni gø ómëggɑ gen ceth, o yɑ ócyɑ̈dhi ki wun.” Kɑ Ciggi Jwøk gweed yij wɑ̈nyø yi Mosɑ̀, bong nyɑ gïjø ɑ́kyel mɑ ɑ́wëgge bodhø. Keny-ɑ ɑ́rume gwedi gïn, ɑköbbe ókwër Kwɑrri Leebì møg-ɑ nyi kɑ̈lli Sɑnduug Ciggi Jwøng-ɑ Ácwɑ̈ɑ̈j kinni, “Kwɑny wun wɑ̈nyø men, wɑ̈nyi Ciggi Jwøk, kɑ cïb wun buti Sɑnduug Ciggi Jwøøg wun, Jwøng-ɑ Ácwɑ̈ɑ̈j, o óbëëde ɑ́ gïn-ɑ köme ócɑ̈yyi jii Jwøk. Tegi muddi wun ngɑ̈nyi yi yɑn, o wu pëddi pëmø, keløg wu opëmø ki dhø Jwøng-ɑ Ácwɑ̈ɑ̈j, yɑ nud ɑnɑn kì kelli wun, óbëëd ɑ dï keny-ɑ óthøwɑ! Cungu wɑ̈thi kɑ̈lli wun kí jɑggi gen bølɑ keny, o ge köbbɑ møgɑni, mɑl kí piny ócwöölɑ, o wu köbbɑ kì bøli gen. Ngɑ̈nyi yi yɑn kinni keny-ɑ órumɑ’ thøø, ji ógöögø ki tyëngrijjø, kɑ møg-ɑ ɑ́pwönyɑ gen bɑny yi gen, kɑ ryɑ̈g me dwøng bï-ɑ kömi gen. Mɑ́ pyëw Jwøng-ɑ Ácwɑ̈ɑ̈j ówëggi gen rënyø, keny-ɑ ógwøg gen gïg-ɑ ɑ́kyer yi Jwøng-ɑ Ácwɑ̈ɑ̈j.” Kɑ wörø men wör yi Mosɑ̀, e tyëng Isrɑil bënn olïngø. “Mɑl wuki piny, lïngu kwøbbɑ, lïngu kwøbbɑ kidøøj. Kwøbbɑ ódyëm ni kødh, ge ónënni ge nɑ thöjj kì piny. Kwøbbɑ ódyëm ni onywiyì kì kömi ɑ́pöjø, ni onywiyi kødh kì kömi lum me lewø. Nyingi Jwøng-ɑ Ácwɑ̈ɑ̈j ólenhi, jie ókööbø ki kwøbbi dönge. “Jwøng-ɑ Ácwɑ̈ɑ̈j bene ngɑn teg men-ɑ kor wun, ying-ɑ keje o pɑ nyi rujø. Jwøøg wun nyi kømm-ɑ dyër dhøge pɑ nyi wil yi en. Nyi gøgg-ɑ gïgdøj mø bɑ dyër. De wu pɑ nyi mïdhi ki yïëyø mi wun; wu pɑ døøj ki bëëdø wun ɑ́ jie, wu bɑ pödhi orøg, wu pëddi wëënyø. Men bene yuu-ɑ mïdhu Jwøng-ɑ Ácwɑ̈ɑ̈j, wun ɑ wɑ̈thi wun nøg, pëthi wun bong gïn? Bɑ wïyi wun, en ɑ ɑ́cwɑ̈j wun, kɑ wu gwøge wun ɑ́ pödhø. “Rum wun kì ri møg-ɑ ɑ́pöödh kɑ̈ge dööng, pyëj wun wëëg wun ki gïn-ɑ ɑ́cwöb cøn, pyëj wun tyëngdøngø, o wu köbbi gen gïg-ɑ ɑ́pöödh kɑ̈ge dööng. Jwøng-ɑ Pëddi Döng, pödhh ɑ́ngude ki pìnyi gen. Keny-ɑ bëëd yi ji kwøb-ɑ yi en. Kömi pödhø nyi cïbe’ cïbø ki ngeti mɑl. De Yɑgob geki kwɑrre ɑ́kwɑny yi en gɑ jie. “Gï ɑ́yode ge wïïn ɑ yij pɑ̈l, pɑ̈l me yije kwöddi yi ɑtunø. Gï ɑ́konge kɑ gï korre ki mendwøng, ni kongg-ɑ di kongge ree. Isrɑil ɑ́korri yi Jwøng-ɑ Ácwɑ̈ɑ̈j, ni cor ɑ nyi gɑm nyɑre ki obërre kenyi pwönye gøn ki pɑ̈rrø. Isrɑil ɑ́mɑ̈ɑ̈n pɑ̈ɑ̈dhø yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j kete ɑ ɑ́pyejji jie, bong jwøng pɑth mɑ ɑ́kønyii. “Gï ɑ́wëgge jɑggi myërri kwøømø ge cɑm-ɑ jɑmm-ɑ cyeg kì yethi pwödh. Ge ɑ́yïddi ki møøw kïc kì kelli kïttì, oløøg gen ɑ́pëddi cyegø kì piny-ɑ di kïttì. Dhögi gen geki dyëgi gen köthi gen dɑ cɑngø bëne, dhög-ɑ døj kí dyëg römm kí ɑ́tegg ying-ɑ yï gen, kí gemè men-ɑ lwiy geki møgi oløg men-ɑ med. “Jii Jwøng-ɑ Ácwɑ̈ɑ̈j ɑ́kɑ̈ri, de muddi gen teeg, ge cwiy, o ge yɑ̈ngø yɑ̈ngø. Jwøng-ɑ ɑ́cwɑ̈j gen ɑ́wiy gen piny, ngɑn-ɑ ɑ́yiel gen ki tegø ɑ́bɑny gen. Jwøng-ɑ Ácwɑ̈ɑ̈j pyëwe ɑ́mɑg yi tyiel, kì bɑng kɑ ɑ́kwɑjji gen jwögg mø bɑ ngïjjì, pyëwe ɑ́rënyi yi gïnrɑj men-ɑ ɑ́gwøg yi gen. Ge ngɑ̈dd-ɑ jwögg-ɑ pɑth ki dyër ki gëdhhì, jwögg mø nyɑ̈n mø kwïj yi kweyyi gen cøn. jwögg mø kwøbbi gen nuti pɑ̈nyø mïdhø yi Isrɑil. Wɑ̈thi gen ɑ́wïl ki Jwøøg gen, ngɑn-ɑ ɑ́yiel gen ki tegø, ɑ ɑ́nëngi gen ki wëy. “Pyëw Jwøng-ɑ Ácwɑ̈ɑ̈j ɑ́rënyi keny-ɑ ɑ́lidhe møgɑni, ɑbɑnye wɑ̈dde kí nyige womɑ̈nn. Kɑ Jwøng-ɑ Ácwɑ̈ɑ̈j okööbø kinni, ‘Ge pɑ cigɑ kønyø, o gïn-ɑ ógwøg yi gen lidhɑ gen ɑ tyëng-ɑ muddi gen teeg, ɑ pɑ nyi mïdhi yïëyø mi gen. Pyëwɑ ɑ́wëggi gen rënyø yi kɑ̀ kwɑjji gen ngïjji jwögg. Yɑ ɑ́mɑg yi tyiel ki gïg-ɑ cwølli gen gɑ jwögg, gen ɑ jwögg-ɑ pɑth ki jwögg kidyër. Pëthi gen ówëggɑ rënyø kɑ pödhø megø, ge ówëggɑ mɑgø yi tyiel ki pödhø me jie bɑ dhëgg. Linyɑ ólyel ni mɑc, kɑ gïïpiny bëne rɑ̈be kì kömi piny. Mɑnyɑni ówɑ̈dhi piny thɑ lɑ̈bø, kɑ tyelli kïttì rɑ̈be. Yɑ ógöjji kömi gen ki ryɑ̈ng pɑ thumi, nywøli wethɑ bënn óthumi ri gen. Ge ónɑ̈g yi kɑ̈j geki lëdhi dël, ge ónɑ̈g yi rɑ̈ɑ̈m dëllì mø rijjø. Ge óödɑ ki lɑ̈yyi pɑ̈l møg cɑm gen, kí thöll-ɑ bɑ nɑ̈ɑ̈g, møg kɑ̈ɑ̈j gen. Ge ónɑ̈g yi liny kì yethi yëëth, bong kɑl men-ɑ ódöng e pɑ ywöngi. Yɑɑg-ɑ wøbb kí wojur óthøw, othønh-ɑ dhødh geki ywödhh pɑ wiy yi yɑn. Ge di ceg kɑ nɑ̈gø yi yɑn ge bënn, o bëëd e bong ngɑn-ɑ ópɑr gen. De tyëngmɑ̈ɑ̈nø pɑ wëggɑ pwödi köthi gen ce jiɑ tyɑɑm gen, e ceg bëëdø ɑ́ yɑn kiriɑ ɑ ɑ́nɑ̈g gen. Isrɑil bɑ pödhø me pyëwe bong gøn, bong peli wïj kì yï gen kinni tek. Ge ɑ́dhɑ̈li yodi gïn-ɑ pere ɑ́tyɑɑm gen, gïn-ɑ ɑ́cwöb pɑ gɑm yi wɑ̈thi gen, Ji ɑ́lïp gede ɑ ɑ́tyɑɑm gen yi nget ɑ́kyel, kɑ ɑ́lïp pyɑ̈rø tyɑm yi ji ɑ́ryew? Ge ɑ́wiy piny yi Jwøøg gen, Jwøng-ɑ Ácwɑ̈ɑ̈j, ge ɑ́weddi yi Jwøøg gen, Jwøng-ɑ teg. Ngɑ̈nyi yi tyëngmɑ̈ɑ̈nø kinni jwögg-ɑ kyeelø nyødh, ge pɑ teg ni Jwøøg Isrɑil. Tyëngmɑ̈ɑ̈nø rijjø ni tyëng Sødømɑ̀ kí Gømørɑ̀, ge nɑ oløg me nywøl ki nywøl mø keej, mø nɑ̈gø. Møgi oløg mi gen bɑ kuggi thwöl. “Gïn-ɑ ɑ́göggi gen yi tyëngmɑ̈ɑ̈nø pɑ wïl kì wïj Jwøng-ɑ Ácwɑ̈ɑ̈j, de yïd-ɑ bøli keny-ɑ ócɑye gïn. Gøølø ócol yi Jwøng-ɑ Ácwɑ̈ɑ̈j, gï ócɑye bøli keny-ɑ ópɑ̈ɑ̈dh gen obëënø, cyɑ̈ɑ̈ng ryɑ̈g ɑ́cyɑ̈ngi ki bëën kömi gen. Jwøng-ɑ Ácwɑ̈ɑ̈j jie óyiele keny-ɑ ólidhe gïn ge nyönhø. Pyëwe ólɑ̈ɑ̈m ki tyëng-ɑ göggii keny-ɑ ólidhe gïn ge dhɑ̈rø. Codhe, o Jwøng-ɑ Ácwɑ̈ɑ̈j jie pyëje kinni, “Jwögg-ɑ teg møg-ɑ ɑ́ngɑ̈dh yi wun ɑ́gøne gen? Ge ɑ́cɑɑm yi wun kɑ dwɑ̈lli gëdhhi wun, kɑ ge nyi nëngi wun ki møgi oløg men mɑdh yi gen. Adɑ́ wiy ge bï gen be kønyi wun ɑnɑn, wiy ge rïngi gen be yieli wun. “ ‘Bɑ yɑn, yɑ ketɑ ɑ bɑ Jwøk, bong jwøg megø mɑ dyër. Yɑn ɑ nyi nɑ̈gø, ɑ nyi muujø ki wëy, ɑ nyi tuurø. bong ngɑn jog yɑn kɑ yɑ mɑ̈ɑ̈ne gwøgi gïn dwɑddɑ gwøgø. Yɑ Jwøng-ɑ Nëënø cingɑ tïngɑ’ mɑl kɑ yɑ óköngø kinni, pilɑ, pil-ɑ rɑ̈ɑ̈dø pɑgɑ’ pɑgø, o yɑ dwɑdd-ɑ kinni gøggi dyër ceth. Gøølɑ ócolɑ ki tyëngmɑ̈ɑ̈nø, o tyëng-ɑ mɑɑn yɑn cɑyɑ’ cɑyø. Nywøli wethɑ ólɑɑj piny ki remmi gen, tyëng-ɑ mɑɑn yɑn bënn, ónɑ̈g yi pilɑ. Ngɑn nyïɑ̈ggi ki yɑn pɑ wiy cɑgg ɑ́ ji mø ri gen di kedd wɑlɑ̀ ɑmɑgg, ge ceg-ɑ thøø.’ “Wun ɑ pödhh bënn, lenhu jii Jwøng-ɑ Ácwɑ̈ɑ̈j, tyëng-ɑ nɑ̈g jie nyi cɑye’ cɑyø. Gøøle nyi cole’ colø ki tyëngmɑ̈ɑ̈nø, kɑ lɑɑwe nyi dwööge piny kipe orøøg jie.” Wörɑni ɑ́wör yi Mosɑ̀ geki Jöcwø wɑ̈d Nun, kɑ gø nyi cigi gen göönyø, kipe kinni o dïd yi tyëng Isrɑil. Keny-ɑ ɑ́rum Mosɑ̀ ki pwönyi teedø ki kwøbbi Jwøk, ɑkööbe kinni, “Wɑ̈thi wun ko wëggu wïlø ki mïdhi cigg-ɑ ɑ́mëggɑ wun dicyɑ̈ngtïn, nyi cigu gen köbbi nyigi wun, o yïëyø mi gen cöge e pɑ wil yi gen, o ge cög gen ge mïdh-ɑ kwøbbi Jwøk. Kwøbbɑni pɑth ki kwøb yøw, bene gen wëyi wun. Mïdhu gen ceth, o wu óbëëd wun ki keny me bɑ̈ɑ̈r kì piny-ɑ yije kedhi yi wun ɑnɑn wu kedh-ɑ be kwɑnyii.” Kɑ Mosɑ̀ köbbi yi Jwøng-ɑ Ácwɑ̈ɑ̈j cyɑ̈ngɑni ceth kinni, “Kedhí Kïti Abɑrïm kì piny Moɑb, ɑ rwöm ki kɑɑl Yerikö, kɑ yï yedhí wïj Kïti Nebö, kɑ yï lïïdh piny Kɑnɑɑn, piny-ɑ mëggɑ tyëng Isrɑil. Yï óthøw kì wïj kïnɑni ni ómyëw Aɑron ɑ ɑ́thøw wïj Kïti Ör, kipe kɑ̀ nuti mïdhu yïëyi wun ki yɑn kì bøli tyëng Isrɑil, yɑ nuti wøør wun kì bøli tyëng Isrɑil kì kömi pïi Merïbɑ̀, kì buti kɑɑl Kɑdic kì pɑ̈ɑ̈l Dhin. Pinyɑni ólidh yi yïn yï lɑ̈wi ki en, de yï pɑ kedhi yij piny-ɑ mëggɑ tyëng Isrɑil.” Møg bene kwëngg-ɑ ɑ́kwëëng kɑ̈lli Isrɑil yi Mosɑ̀ jɑlkwøbbi Jwøk. Jwøng-ɑ Ácwɑ̈ɑ̈j ɑ́bï e kɑ̈ɑ̈l-ɑ Kïti Sinɑy ɑ́tuul ni cɑ̈ng kì Edöm kɑ omënyø kì kömi jie e cɑre kɑ̈ɑ̈l-ɑ Kïti Pɑrɑn. Ge ɑ́cyɑ̈dhi kɑ wëywödd ɑ́lïp pyɑ̈rø, kí mɑc me pɑ̈mmø kì wïj kyëje. Jwøng-ɑ Ácwɑ̈ɑ̈j jie mɑɑr yi en, ji-ɑ bɑ møge korre’ korrø. Bøødh wɑ riee dhøggi tyelle, kɑ cigge mïdhi wɑ. Cigg-ɑ ɑ́mëggi wøn yi Mosɑ̀ ómïdhi yi wøn, gen ɑ cigg-ɑ bɑ kɑ̈r kì yï pödhi wøn. Jwøng-ɑ Ácwɑ̈ɑ̈j ɑ́göög ɑ́ rɑ̈ɑ̈dh tyëng Isrɑil keny-ɑ ɑ́bëëd wɑ̈thi kɑ̈lli gen cugø kì kej ɑ́kyel geki jɑggi gen. Møg-ɑ ɑ́kwøb yi Mosɑ̀ kipe gøl Ruben ek: “Wïj Ruben koo pɑ̈ɑ̈dh, cɑgg ɑ́ kɑ̀ bëëd jie ge nøg.” Kɑ okööbø kipe gøl Yeudɑ̀ kinni, “Yïn ɑ Jwøng-ɑ Ácwɑ̈ɑ̈j, lïngí ywøøg gen kɑ̀ kwɑ̈jji gen kipe kønyø. Cigí gen rebø ki kɑ̈ll-ɑ kyeelø. Nyïɑ̈ggí kiper gen, yïn ɑ Jwøng-ɑ Ácwɑ̈ɑ̈j. Kɑ ge køny ki tyɑmi tyëngmɑ̈ɑ̈nø.” Kɑ okööbø kipe gøl Leebì kinni, “Yïn ɑ Jwøng-ɑ Ácwɑ̈ɑ̈j, nyodh møgí ki Urïm geki Thumïm, kì cinggi bɑ̈nggí, bɑ̈ngg-ɑ mïdhi kwøbbí; Kwɑrri Leebì. Ge ɑ́rɑng yi yïn kì Mɑɑsɑ̀, kɑ ge yod yi yïn ge døøj kì Merïbɑ̀. Yï ɑ́wør yi gen ki mendwøng, kɑ yï mɑɑr yi gen kibøli wëëg gen geki mëëg gen, kí nyiimï gen wɑlɑ̀ nyigi gen. Kɑ ciggí mïdhi yi gen Lwöbø mií nuti pɑ̈ɑ̈d gen. O jií ópwönyi yi gen ki mïdhi ciggí, gen ɑ nyi muujø ki gëdhhì kì wïj këli lɑm mií. Yïn ɑ Jwøng-ɑ Ácwɑ̈ɑ̈j, wiy gøl gen tënge. Med pyëwí ki gïg-ɑ gøggi yi gen. Mød tyëng-ɑ mɑɑn gen bënn, tyëngmɑ̈ɑ̈nø ko wëggí dhwödhø këti.” Kɑ okööbø kipe gøl Ben Yɑmïn kinni, “Bene gøl-ɑ mɑɑr yi Jwøng-ɑ Ácwɑ̈ɑ̈j èn, gøl-ɑ korri yi en. Gï korre’ korrø kì dicɑ̈ng bëne. O bëëd ɑ kelli gen.” Kɑ okööbø kipe gøl Yosep kinni, “Wiy piny gen gëdhhi kødh yi Jwøng-ɑ Ácwɑ̈ɑ̈j kí pïg-ɑ kɑ̈ɑ̈l thɑ piny. Wiy nywøli gïn-ɑ pidh yi gen cyeg gen kidøøj, o nywøli yenh-ɑ døj bëëd ge nud kì yij run bëne kì piny gen. Wiy wɑ̈thi kwøømmi gen, kwøømm-ɑ weenø bëëd ge pɑ̈ng yi nywøli yenh-ɑ døj. Wiy piny gen bëëde e pɑ̈ng yi gïg-ɑ døj bënn. Gyëdhhe kɑ̈ɑ̈l-ɑ ri døøji Jwøng-ɑ Ácwɑ̈ɑ̈j, ɑ ɑ́kööb kì ri kïrø me lyel ki mɑc. Wiy gyëdhhɑni bï gen kömi gøl Yosep. Mɑ́ en ɑ ɑ́bëëd ɑ́ pëëji kì kelli nyiimen. Yosep teg ni wɑdh; men-ɑ́ tegi tùngi ógïg ɑ yïe! Tùnge bɑ ɑ́lïppi gøl Mɑnɑsè Kí ɑ́lïp pyɑ̈r mø Eprɑim. Tùngɑni ɑ cööbe pödhh, Kɑ gï cøøre cögi piny.” Kɑ okööbø kipe gøl Dhebulun geki gøl Isɑkɑr kinni, “Wiy gøl Dhebulun dönye kì bɑng ngyëw-ɑ ngyëwe kì kömi nɑɑm omelø. Kɑ wiy kɑ̈ɑ̈r Isɑkɑr dønge kì yethi myërr. Tyëngpɑth nyi cwööl ge’ wɑ̈thi kïtti gen. Kɑ ge omuujø ki gëdhh-ɑ dyër kì kunɑni. Kɑ̈ɑ̈r gen yod yi gen ɑ nɑɑm omelø, kí ri ɑyejø kì thɑ̈ngi nɑɑm omelø.” Kɑ okööbø kipe gøl Gɑd kinni, “Lenhi Jwøk, ɑ ɑ́gwøg piny gen e lɑɑj. Gɑd lïïbø nɑ ngur, men nyi cöd bɑd wɑlɑ̀ rɑ̈m. Piny-ɑ pëddi døøjø, ɑ ɑ́kwɑny yi gen ɑ́ mi gen. Bun-ɑ nyi bëëdø ɑ́ mi jɑgø ɑ ɑ́mëggi gen. Ciggi Jwøng-ɑ Ácwɑ̈ɑ̈j geki kwönge ɑ́mïdhi yi gen, keny-ɑ ɑ́cugi pëjji Isrɑil.” Kɑ okööbø kipe gøl Dɑn kinni, “Dɑn bɑ wɑ̈d ngur, pɑ̈r e kɑ̈ɑ̈l-ɑ Bɑcɑn.” Kɑ okööbø kì ri gøl Nɑptɑlì kinni, “Nɑptɑlì bëëd ɑ yij dhwɑ̈ng-ɑ ɑ́gëdhhii yi Jwøng-ɑ Ácwɑ̈ɑ̈j. Pinye wɑ̈dh-ɑ kuni wɑɑng cyɑ̈ɑ̈ng böörø geki kuni wɑɑng wurlwɑl, e kön-ɑ́ɑ̀ Tɑɑy Gɑlelì.” Kɑ okööbø kipe gøl Aceer kinni, “Gøl Aceer bɑ ɑgyëdh kibøli kɑ̈ll-ɑ kyeelø. Wiy e ómɑɑr yi nyiimen. Wiy pinye óbëëde e pɑ̈ng yi yenh dhetun. Wiy dhøggi dörri kɑ̈dde óbëëd gen ge nyi cyëëg kɑ thïggi ngyënyø dødø. Wiy e óbëëde pyëwe pɑ lïngø.” Wun ɑ tyëng Isrɑil, bong jwøg me pɑ̈r ki Jwøøg wun, ɑ cyɑ̈dhi ki dhwɑ̈ng kì yij mɑl, ɑ cyɑ̈dhi kì yethi pøøl e bï-ɑ be kønyi yïn. Bɑ Jwøk ɑ nyi korri yïn ceth. Cingge, cingg-ɑ teg gen ɑ korri yïn ceth. Tyëngmɑ̈ɑ̈nø ɑ́cyeede wɑ̈g, kedh yï kedh-ɑ bølí, kɑ yï köbbe kinni nɑ̈g gen bënn. Bëëd wun ki mër wun ɑ kwɑrri Yɑgob, pëthi wun koo lïngø kì piny-ɑ pɑ̈ng yi byëlø bëne geki møgi oløg. Piny-ɑ nyi thïnyi yi thöjj-ɑ kɑ̈ɑ̈l mɑl. Isrɑil, pyëwí med nɑ ngø! Bong pödhø me pɑ̈r ki yïn. Yï pönh-ɑ ɑ́yiel yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j kiree ɑ bɑ kwödí geki pilí møg-ɑ korrí rií, o yï tyɑ̈ɑ̈m. Tyëngmɑ̈ɑ̈nø óbï ge kwɑjj-ɑ lɑ̈mpyëw, o ge ónyøn yi yïn. Kɑ Mosɑ̀ odhwödhø kì thwøri Moɑb, kɑ kedh-ɑ Kïti Nebö, kɑ yedh-ɑ oledh Kïti Pisgɑ̀ kì bøli Yerikö, kì wɑɑng cyɑ̈ɑ̈ng mwøl. Kɑ nyudhi pinyɑni bëne yi Jwøng-ɑ Ácwɑ̈ɑ̈j, ɑ løg piny Gilyɑd, e göjj-ɑ wɑɑng wuudø gïti kɑɑl Dɑn, kí piny Nɑptɑlì bëne, kí piny Eprɑim geki Mɑnɑsè, kí piny Yeudɑ̀, e gït-ɑ kömi Nɑɑm Omeli Tɑr, kí piny Yeudɑ̀ kì wɑɑng wurlwɑl, kí thwør-ɑ cɑ̈gi kì Dhoɑr gïti Yerikö, kɑɑl benø. Codhe, ɑköbbi Mosɑ̀ yi Jwøng-ɑ Ácwɑ̈ɑ̈j kinni, “Bene piny-ɑ ɑ́köbbɑ Abrɑhɑm, kí Isɑɑk, kí Yɑgob kinni ómëggɑ kwɑrri gen ceth. Áwëggɑ lidhø yi yïn, de yï koo wëggɑ kedhi yije.” Codhe, ɑthøw Mosɑ̀ bɑ̈ng Jwøng-ɑ Ácwɑ̈ɑ̈j kì piny Moɑb, ni kɑ ɑ́kööb Jwøng-ɑ Ácwɑ̈ɑ̈j kinni óthøw-ɑ kenyɑni. Kɑ kony yi Jwøng-ɑ Ácwɑ̈ɑ̈j kì yij tör kì Moɑb, kenyɑni rwöm ki Betpeor, de bong dhɑnhø mɑ ɑ́yod dïl keny-ɑ ɑ́koonyii gïti dicyɑ̈ngtïn. Mosɑ̀ runne ɑ́bëëd gɑ miyø kí pyɑ̈r ɑ́ryew keny-ɑ ɑ́thøwe, de ɑ́bëëd dële nudd e teeg ni kɑ ɑ́bëëde ceth, o nyinge onëënø kidøøj. Kɑ ywøg yi tyëng Isrɑil kì piny Moɑb ki cyɑ̈ng pyɑ̈r ɑ́dɑ̈g. Jöcwø wɑ̈d Nun, ɑ́bëëd yïe dɑ peli wïj me dwøng, mɑ́ Mosɑ̀ ɑ́kwɑny-ɑ en ɑ́ ngɑn mɑg keje. Kwøbbi Jöcwø nyii lïngø yi tyëng Isrɑil. Kɑ Ciggi Jwøng-ɑ Ácwɑ̈ɑ̈j cigg-ɑ ɑ́muuj yi Mosɑ̀ mïdhi gen kidøøj. Bong jɑltöng mɑ ɑ́dhwödh kì Isrɑil me pɑ̈r ki Mosɑ̀, ɑ ɑ́kööb ki Jwøk ge nenn-ɑ nyingi gen. Bong jɑltöng mɑ ɑ́göög ki gïïngɑ̈ngø geki ngïjjì mø døngø ni møg-ɑ ɑ́wëggi gøggø yi Mosɑ̀, keny-ɑ ɑ́örii yï rɑ̈ɑ̈dh Rïp geki jyɑ̈gge, kí pödhe bëne yi Jwøng-ɑ Ácwɑ̈ɑ̈j. Bong jɑltöng mɑ ɑ́göög ki gïgdøngø mø böggi ni Mosɑ̀ kì Isrɑil. Kì bɑng thøwi Mosɑ̀ bɑ̈ng Jwøng-ɑ Ácwɑ̈ɑ̈j, ɑköbbi Jöcwø wɑ̈d Nun, ngɑn-ɑ ɑ́bëëd e nyi køny-ɑ Mosɑ̀, yi Jwøng-ɑ Ácwɑ̈ɑ̈j kinni, “Bɑ̈ngɑ Mosɑ̀ ɑ́thøw. De yïn, wuki tyëng Isrɑil bënn, tyenyu ri wun, kɑ Nɑm Urdun bɑ̈ɑ̈n wun, wu kedh-ɑ piny-ɑ mëggɑ wun. Ni kɑ ɑ́köbbɑ Mosɑ̀ kinni keny-ɑ ókëël wun tyelli wun, ɑ́mëggɑ wun bëne. Cögi piny wun ówɑ̈dhi ryɑng-ɑ wɑɑng wurlwɑl gïti kïtti Lubnɑn kì wɑɑng wuudø. Cɑg kì Nɑm Porɑt kì wɑɑng cyɑ̈ɑ̈ng mwøl, e cør-ɑ yij pödhi Kit, gïti Nɑɑm Omeli Tɑr kì wɑɑng cyɑ̈ɑ̈ng böörø. Jöcwø, bong ngɑn tyɑm yïn kinni tek kɑ̈ng-ɑ nëën! Yï ókøny yi yɑn ceth ni kɑ ɑ́kønyɑ Mosɑ̀, yï pɑ wiyɑ piny kinni tek. Bëëd yï teg, kɑ pyëwí cwed, mɑ́ bene yïn ɑ ópeej ji møg be kwɑnyi piny-ɑ ɑ́köngɑ kweyyi gen. Bëëd pyëwí teg, pyëwí ko wëggí nyönhø kinni tek, kɑ cigg-ɑ ɑ́mëggi yïn yi Mosɑ̀ bɑ̈ngɑ mïdhí kidøøj, ko di kwï gen mø wøy yi yïn. O gïg-ɑ dwɑddi yi yïn gwøgø nyi lwɑ̈ng yi yïn, kì kɑ̈jj-ɑ ócyɑ̈dhi yi yïn bënn. Nyi kømmí møg-ɑ yij wɑ̈nyi Cigg yethi cyɑ̈ng bënn. Nyi rømmí møgɑni kì wɑ̈r kí dicɑ̈ng, nyi mïdhí møgɑni per gen teeg cɑrø ki mendwøng, o yï yïddí ki gïgdøj, o gïg-ɑ nyi dwɑddí gwøgø nyi lwɑ̈ng yi wun. Rømmí møg-ɑ ɑ́köbbɑ yïn cøn kinni bëëd yï teg, kɑ pyëwí cwed, ko di gïn böggi yi yïn, mɑ́ yï ókøny yi yɑn, yɑ Jwøgí, Jwøng-ɑ Ácwɑ̈ɑ̈j, kì kun-ɑ ókedhi yi yïn.” Kɑ pëjjì köbbi yi Jöcwø kinni, kedhi gen yethi kemmì bënn, o ji köbbi yi gen kinni, “Gwiru gïgcɑmmi wun, kipe wu kedh-ɑ be bɑ̈ɑ̈ni Nɑm Urdun kì bɑng cyɑ̈ng ɑ́dɑ̈g, wu kedh-ɑ be kwɑnyi piny-ɑ ɑ́mëggi wun yi Jwøng-ɑ Ácwɑ̈ɑ̈j, Jwøøg wun.” Kɑ gøl Ruben, geki gøl Gɑd kí budi gøl Mɑnɑsè, köbbi yi Jöcwø kinni, “Pɑru kwøbb-ɑ köbbi wun yi Mosɑ̀ bɑ̈ng Jwøng-ɑ Ácwɑ̈ɑ̈j kinni, piny-ɑ wɑɑng cyɑ̈ɑ̈ng mwøl kì ri Nɑm Urdun ómëggi wun yi Jwøng-ɑ Ácwɑ̈ɑ̈j, Jwøøg wun, ɑ́ myërri wun. Wiy wun mɑ̈nni wun, kí nyigi wun, kí dhögi wun, kɑ jøliny mø wun kedhi gen be liny kyeel geki nyiimï gen, tyëng Isrɑil møg-ɑ kedhi løøg Nɑm Urdun. Gïti keny-ɑ ókwɑny gen piny-ɑ ɑ́muuj yi Jwøng-ɑ Ácwɑ̈ɑ̈j. Bene keny-ɑ ódøøg wun myërri wun, myërr-ɑ ɑ́mëggi wun yi Jwøng-ɑ Ácwɑ̈ɑ̈j, kì løøg Nɑm Urdun kì wɑɑng cyɑ̈ɑ̈ng mwøl.” Aløøg gen mø Jöcwø kinni, “Gïg-ɑ ɑ́köbbí wøn bënn, ógwøg yi wøn. Wø ókedhi keny-ɑ ör wøn. Kwøbbí ólïngi yi wøn, ni kɑ ɑ́lïngi wøn kwøbbi Mosɑ̀, yï ókøny yi Jwøgí, Jwøng-ɑ Ácwɑ̈ɑ̈j ni kɑ ɑ́kønye Mosɑ̀! Ngɑn-ɑ ótyëddi yïn, wɑlɑ̀ ɑ ópyem møg-ɑ ɑ́cïgí wøn, ónɑ̈g. Bëëd pyëwí teeg, kɑ ko di gïn böggi yi yïn!” Codhe, ɑöd Jöcwø kì Cithïm ki jøg ɑ́ryew møg lyeew piny, kɑ gï köbbe kinni, “Kedh wun, lidh wun piny Kɑnɑɑn, kɑ kɑɑl Yerikö ti wun ki nennø.” Akedh gen, kɑ ge kedh-ɑ gøl ngɑn nyi niin ki köögi me nyinge cwøl ɑ́ Rɑɑ̈b, ɑbuddi gen kì gølɑni. Alïng rɑ̈ɑ̈dh Yerikö kinni, i dɑ jø Isrɑil mø bëën kɑɑl kì wɑ̈rɑni, ge bï-ɑ be lyewwi piny. Aödi rɑ̈ɑ̈dh Yerikö yï Rɑɑ̈b kinni i kɑ̈ɑ̈le jøg-ɑ ɑ́bï gøle wɑ̈g, mɑ́ ge ɑ́bï-ɑ be lyewwi piny. Akedhi jøg-ɑ yɑ̈bø bɑng jø Isrɑil gïti kɑ ɑ́wɑ̈dhi gen keny-ɑ nyi lwøød Nɑm Urdun, kì bɑng gen ceth, ɑcyëëg dhøg kɑɑl. Kɑ̈ng-ɑ́ nuti buddi jøgɑni, ɑkedhi Rɑɑ̈b yï gen wïj ød, ɑköbbe gïn kinni, “Ngɑ̈nyi yi yɑn kinni piny men ɑ́rum ki mëggi wun yi Jwøng-ɑ Ácwɑ̈ɑ̈j, wø ɑ́bwøg yi wun. Jii pönhï bënn ɑ́bwøg ki mendwøng. Yuu-ɑ ɑ́wëggi Nɑɑm Omeli Kwɑrø thwøwø yi Jwøng-ɑ Ácwɑ̈ɑ̈j kì bøli wun keny-ɑ ɑ́bëënu wɑ̈g kì Rïp, ɑ́lïngi yi wøn geki kër-ɑ ɑ́nɑ̈g wun rɑ̈nhi tyëng Amör ryeet, ɑ løg Sïön geki Og, møg-ɑ ɑ́bëëd kì wɑɑng cyɑ̈ɑ̈ng mwøl kì løøg Nɑm Urdun. Pëthi wøn ɑ́nyönhi keny-ɑ ɑ́lïngi wøn møgɑni, mɑ́ Jwøng-ɑ Ácwɑ̈ɑ̈j, Jwøøg wun, bɑ Jwøøg mɑl kí piny. Anɑn köngi wun ki nyingi Jwøng-ɑ Ácwɑ̈ɑ̈j kinni, ni kɑ ɑ́göggɑ wun ki gïndøj, gøl wïyɑ ólony yi wun ki göggø ki gïndøj thyew, kɑ yɑ nëngi wun ki ngïji men nyodh kinni dhøggi wun pɑ wil yi wun. Köngi wun ɑnɑn kinni, wïyɑ, kí meyɑ kí nyiimïɑ yɑɑg-ɑ cwøw kí mɑ̈nn, kí wɑddi wøn bënn koo wëggi wun nɑ̈gø!” Aköbbi Rɑɑ̈b yi jøgɑni kinni, “Keløg e bong ngɑn köbbi yi yïn ki gwøøg wøn, wiy wø ónɑ̈g yi Jwøk, keløg köng-ɑ ɑ́köngi wøn koo mïdhi yi wøn. Yï ógöggi yi wøn ki gïndøj, keny-ɑ ómëggi wøn piny men yi Jwøng-ɑ Ácwɑ̈ɑ̈j.” Amiid jøgɑni piny kì ɑwɑj ki thøl yi Rɑɑ̈b, mɑ́ gøle ying-ɑ ri döri kɑɑl. Aköbbi jøgɑni yi Rɑɑ̈b kinni, “Kɑ̈l wun myërri kelli kïttì, o wu cögu wu pɑ yod yi jø rɑ̈dh møg-ɑ yɑb wun, kɑ ri wun kɑnni wun kì kunɑni ki cyɑ̈ng ɑ́dɑ̈g, gïti keny-ɑ ódwöög jøgɑni, codhe o wu lunyi wun ki kedhi yuu wun.” Aköbbi Rɑɑ̈b yi jøgɑni kinni, “Köng-ɑ ɑ́wëggi wøn köngø ómïdhi yi wøn ceth. Keny-ɑ óbëën wøn be mɑgi piny men, twööj thøl-ɑ kwɑrø èn ri ɑwɑny-ɑ ɑ́kïdhí wøn piny. Kɑ wïyí, kí meyí, kí nyiimyëw, kí gøl wïyí bëne cøng gølí. Keløg e dɑ dhɑnhø ɑ́kyel men-ɑ ókedhi wɑ̈g kì gølí, e kedh-ɑ yij yöö, ngɑnɑni ócyen-ɑ ree kete, o wø koo cɑy kipe thøwe, de keløg e dɑ ngɑn-ɑ ónywɑl dhɑnhø ɑ́kyel kì kelli tyëng-ɑ gølí, cyënni ngɑnɑni óying kömi wøn. De keløg gwøng-ɑ ɑ́gwøg yi wøn óköbbí ji møøgø, óbong-ɑ cɑ́y kì kömi wøn kipe møg-ɑ ɑ́köbbí wøn kinni köngi wøn.” Akööb Rɑɑ̈b kinni, “Wiy ge bëëd gen ni møg-ɑ ɑ́kwøb yi wun ceth.” Aöre gïn yöö. Atwööje thølɑni ri ɑwɑj. Akedhi jøgɑni kelli kïttì, ɑbëëd gen kì kunɑni ki cyɑ̈ng ɑ́dɑ̈g gïti kɑ ɑ́dwöög jøg-ɑ ɑ́yɑb gen kɑɑl, mɑ́ ge ɑ́yɑ̈ɑ̈b kì kɑ̈jj bënn, de gï nuti yood gen. Ayïnhi jøgɑni ryeet piny kì wïj kït, ɑbɑ̈ɑ̈n gen Nɑm Urdun, ɑbëën gen yï Jöcwø wɑ̈d Nun. Alwöbbi ge gøn gïg-ɑ ɑ́göög bënn. Kɑ Jöcwø köbbi gen kinni, “Pinyɑni rumø ki cïb cinggee yi Jwøng-ɑ Ácwɑ̈ɑ̈j kidyër, tyëng pönhɑni ceg-ɑ böggø yi wɑ ki mendwøng.” Adhwödh Jöcwø geki tyëng Isrɑil bënn kì mwøl e piny nudd e looj, kì Cithïm, ge kedh-ɑ løøg Nɑm Urdun, ɑkɑl gen bëëdø kì kenyɑni e nɑm nuti bɑ̈ɑ̈n gen. Kì bɑng cyɑ̈ng ɑ́dɑ̈g, ɑkedhi pëjji liny kelli kemmì. Kɑ ji ceg yi gen kinni “Keny-ɑ ólidhu Sɑnduug Ciggi Jwøng-ɑ Ácwɑ̈ɑ̈j, Jwøøg wun e obyellø yi ókwër, Kwɑrri Leebì, kɑ wu dhwödh wun kì kɑ̈jji wun, kɑ wu løgu bɑnge. Cɑgg ɑ́ kɑ̀ nuti pɑ̈nyi wun kɑ̈l yuuɑni tyelø ɑ́kyel, wu ónyudhi yi gen ki yöö, de cyɑ̈dhi wun kì bɑnge e dɑ kïlomïtïr ɑ́kyel, kì kɑɑm wun ki Sɑnduug Cigg.” Aköbbi ji yi Jöcwø kinni, “Kwëru ri wun ɑnɑn, kipe dhuki Jwøng-ɑ Ácwɑ̈ɑ̈j ógöögø ki gïïngɑ̈ngø kì kelli wun.” Codhe, ɑköbbi ókwër yi Jöcwø, o Sɑnduug Cigg kwɑny yi gen, o gø mwøøl gen bøli ji. Kɑ Jöcwø köbbi yi Jwøng-ɑ Ácwɑ̈ɑ̈j kinni, “Gïn-ɑ ógwøg yi yɑn dicyɑ̈ngtïn, bɑ gïn-ɑ per ówøør yïn yi tyëng Isrɑil, o yod kinni yï nyii kønyø yi yɑn ni kɑ ɑ́kønyɑ Mosɑ̀. Ceg ókwërr-ɑ byelli Sɑnduug Cigg kinni, keny-ɑ ówɑ̈dhi gen tøg Nɑm Urdun, kɑ ge cungi gen kì kenyɑni.” Kɑ tyëng Isrɑil köbbi yi Jöcwø kinni, “Bïu lïngu møg-ɑ kømmi yi Jwøng-ɑ Ácwɑ̈ɑ̈j, Jwøøg wun. O yod yi wun kinni Jwøng-ɑ Ácwɑ̈ɑ̈j, Jwøng-ɑ Nëënø nud kì kelli wun. O tyëng Kɑnɑɑn, kí tyëng Kit, kí tyëng Kib, kí tyëng Perïdh, kí tyëng Girgɑc, kí tyëng Amör, kí tyëng Yebus, gï ócyedde kì bøli wun ceth, keny-ɑ órum Sɑnduug Ciggi Wïi piny bëne ki bɑ̈ɑ̈ni Nɑm Urdun, e kɑ̈l ɑ bøli wun. Kɑ wu yïëëny wun ki jøg-ɑ cwøw pyɑ̈rø wïdɑ́ryew kì kɑ̈lli Isrɑil, jɑl ɑ́kyel kì wïj kɑl ɑ́kyel. Ókwërr-ɑ ɑ́byelli Sɑnduug Ciggi Wïi piny bëne, en ɑ Jwøng-ɑ Ácwɑ̈ɑ̈j, keny-ɑ ókëël gen tyelli gen yethi pï, Nɑm Urdun ócungi; kɑ pïg-ɑ rïngi piny kì mɑl ri gen cøng gen kej ɑ́kyel.” ɑcungi pïg-ɑ rïngi kì mɑl, ge lɑ̈wi ki keny-ɑ cwøl ɑ́ Adɑm, ɑ cyɑ̈gi ki Dhɑretɑn. Kɑ pïg-ɑ rengi yij Luuy Omelø ceg-ɑ ì lɑɑw. Codhe, ɑbɑ̈ɑ̈n nɑm yi ji kì bøli Yerikö. Ókwërr-ɑ ɑ́byelli Sɑnduug Cigg ɑ́cungi kì piny me thwøwø kì dyëri Nɑm Urdun, gïti kɑ ɑ́thumi tyëng Isrɑil ki wɑ̈dhi wɑ̈g bënn. Keny-ɑ ɑ́rum tyëng Isrɑil ki wɑ̈dhi løøg Nɑm Urdun bënn. Aköbbi Jöcwø yi Jwøng-ɑ Ácwɑ̈ɑ̈j kinni, “Yïëëny ki ji pyɑ̈rø wïdɑ́ryew kì kelli tyëng Isrɑil, jɑl ɑ́kyel kì wïj kɑl. Kɑ ge köbbí kinni, ‘Kɑ̈bbi wun ki tuggi kïttì pyɑ̈rø wïdɑ́ryew kì dïdyëri Nɑm Urdun, kì keny-ɑ cungi yi ókwër, kɑ ge tëëru wɑ̈g, kɑ ge cïb wun piny kì keny-ɑ óbuddi yi wun tïn kì wɑ̈r.’ ” Acwööl jøg-ɑ pyɑ̈rø wïdɑ́ryew møg-ɑ ɑ́yieny yi Jöcwø kì kelli tyëng Isrɑil. Aköbbe gïn kinni, “Kedhu bøli Sɑnduug Ciggi Jwøng-ɑ Ácwɑ̈ɑ̈j, Jwøøng wun, wu kedh-ɑ dïdyëri Nɑm Urdun. Kɑ̈bbi dhɑnhø ɑ́kyel kì kelli wun ki tungi kït ɑ́kyel ɑ́ mi wïj gøl gen, kɑ gø byele. Tuggi kïttɑni óbëëd gɑ ngïjjì kiper wun, kenyi pyëëj wun yi nyigi wun dhuki megø kinni, ‘Kïttì møg bɑ mø ngø kì yï wun cøn?’ Ge óköbbi yi wun kinni, ‘Pïi Nɑm Urdun ri gen ɑ́pɑ̈ngi gen kì bøli Sɑnduug Ciggi Jwøng-ɑ Ácwɑ̈ɑ̈j, keny-ɑ ɑ́kɑ̈ɑ̈lii e bɑ̈ɑ̈n-ɑ Nɑm Urdun.’ Wiy tuggi kïttɑni nyi pɑ̈ddi gen tyëng Isrɑil ki møgɑni gïti ɑtheer.” Codhe, ɑgwøøg møg-ɑ ɑ́kwøb yi Jöcwø bënn yi tyëng Isrɑil, ɑkwɑnye tuggi kïttì pyɑ̈rø wïdɑ́ryew ni kwɑnni wɑ̈thi kɑ̈lli Isrɑil, kì dïdyëri Nɑm Urdun ni kɑ ɑ́köbbi Jöcwø yi Jwøng-ɑ Ácwɑ̈ɑ̈j, kɑ gï tëër gen keny-ɑ pëggi yi gen, ɑcïb ge gïn piny kì kenyɑni. Akɑ̈bbi Jöcwø ki tuggi kïttì pyɑ̈rø wïdɑ́ryew møøgø, kɑ gï cïbe dïdyëri Nɑm Urdun keny-ɑ ɑ́cungi yi ókwërr-ɑ ɑ́byelli Sɑnduug Cigg. Ge nud kì kenyɑni gïti dicyɑ̈ngtïn. Ókwërr-ɑ ɑ́byelli Sɑnduug Cigg ɑ́cungi kì dïdyëri Nɑm Urdun, gïti kɑ ɑ́thumi møg-ɑ ɑ́köbbi Jöcwø yi Jwøng-ɑ Ácwɑ̈ɑ̈j ki gwøgø bënn, ni kɑ ɑ́köbbi gen Jöcwø yi Mosɑ̀ cøn. Ajwɑn ji ri gen ki gwɑɑr wɑ̈g. Keny-ɑ ɑ́rum ji ki wɑ̈dhi løøgø bënn, kɑ ókwërr-ɑ byelli Sɑnduug Ciggi Jwøng-ɑ Ácwɑ̈ɑ̈j kedh-ɑ bøli gen. Kɑ jø gøl Ruben, kí jø gøl Gɑd kí budi jø gøl Mɑnɑsè, nɑm bɑ̈ɑ̈n gen ge møøl-ɑ bøli tyëng Isrɑil, ri gen tyeeny gen ceth kipe liny, ni kɑ ɑ́köbbi gen yi Mosɑ̀. Gïn ni jøliny ɑ́lïp pyɑ̈r ɑ́ngwen ɑ́kedhi bøli Jwøng-ɑ Ácwɑ̈ɑ̈j, kì thwøri Yerikö. Kì bɑng gïn-ɑ ɑ́gwøg yi Jwøng-ɑ Ácwɑ̈ɑ̈j dicyɑ̈ngɑni, Jöcwø ɑ́göög pere teeg kì yï tyëng Isrɑil, kɑ gø gɑ̈nni gen kì yij bëëde bëne, ni kɑ ɑ́gɑ̈nni Mosɑ̀ yi gen. Aköbbi Jöcwø yi Jwøng-ɑ Ácwɑ̈ɑ̈j kinni, “Köbbí ókwërr-ɑ byelli Sɑnduug Cigg, kinni bï gen wɑ̈g kì nɑm.” Aköbbi ókwër yi Jöcwø kinni, “Bïu wɑ̈g kì nɑm.” Keny-ɑ ɑ́wɑ̈dhi ókwërr-ɑ byelli Sɑnduug Ciggi Jwøng-ɑ Ácwɑ̈ɑ̈j wɑ̈g ceth, kɑ pï døøg-ɑ be ngwej ni kenyi rïngi gen cøn, kɑ tøggi nɑm opɑ̈ngø ni kɑ ɑ́bëëd gen. Ji Nɑm Urdun ɑ́bɑ̈ɑ̈n gen kì pyɑ̈ri cyɑ̈nggi dwɑ̈n-ɑ mɑl. Agud gen ki kemmì kì Gilgɑl kì bøli Yerikö, kì wɑɑng cyɑ̈ɑ̈ng mwøl. Kɑ tuggi kïttì pyɑ̈rø wïdɑ́ryew møg-ɑ ɑ́kɑ̈ɑ̈l gen wɑ̈g kì Nɑm Urdun, cïb Gilgɑl yi Jöcwø. Aköbbi tyëng Isrɑil yi Jöcwø kinni, “Kenyi pyëj kwɑrri wun wëëg gen, kì bøli keny megø kinni, ‘Á tuggi kïttì mø ngø ek?’ Wiy e óyod yi kwɑrri wun kinni Isrɑil ɑ́kɑ̈l-ɑ keny thwøwø kì Nɑm Urdun. Mɑ́ Jwøng-ɑ Ácwɑ̈ɑ̈j, Jwøøg wun, pïi Nɑm Urdun ɑ́göjje thwøwø, gïti kɑ ɑ́bɑ̈ɑ̈n wun en, ni gïn-ɑ ɑ́gögge Nɑɑm Omeli Kwɑrø, ɑ ɑ́göjje gøn thwøwø kiperee, gïti kɑ ɑ́rum wɑ ki wɑ̈dhi wɑ̈g. Kipe kinni o tegi Jwøng-ɑ Ácwɑ̈ɑ̈j yod yi tyëng-ɑ bëëdø kì kömi lɑ̈bø bënn, o Jwøng-ɑ Ácwɑ̈ɑ̈j, Jwøøg wun böggi yi wun gïti ɑtheer.” Keny-ɑ ɑ́lïng rɑ̈nhi tyëng Amör, møg-ɑ bëëdø kì løøg Nɑm Urdun kì wɑɑng cyɑ̈ɑ̈ng böörø, kí rɑ̈nhi Kɑnɑɑn bënn møg-ɑ kömi Nɑɑm Omeli Tɑr, kinni Nɑm Urdun ógöjji thwøwø yi Jwøng-ɑ Ácwɑ̈ɑ̈j kì bøli tyëng Isrɑil, gïti kɑ ɑ́wɑ̈dhi gen wɑ̈g, ɑbwøg gen yi tyëng Isrɑil, kɑ yethi gen okïïrø. Aköbbi Jöcwø yi Jwøng-ɑ Ácwɑ̈ɑ̈j kinni, “Göög ki pɑlli kïttì, kɑ tyëng Isrɑil ngøl.” Agöög Jöcwø ki pɑll, kɑ tyëng Isrɑil ngøle kì keny me cwøl ɑ́ wïj kwøømi ngøl. Acïb wɑ̈ddi gen kɑ̈jji gen yi Jwøng-ɑ Ácwɑ̈ɑ̈j; wɑ̈ddi gen ɑ ɑ́ngøl yi Jöcwø, mɑ́ ge ɑ́bëëd ge nuti ngølø kì kö yöö cøn. Keny-ɑ ɑ́rum ji ki ngølø bënn, ɑbëëd gen gïti kɑ nøgi kɑ̈jjɑni. Aköbbi Jöcwø yi Jwøng-ɑ Ácwɑ̈ɑ̈j kinni, “Ayɑ̈r-ɑ ɑ́ying kömi wun kì Rïp, kɑ̈ɑ̈lɑ’ wɑ̈g dicyɑ̈ngtïn.” Bene ɑ cwølli kenyɑni ɑ́ Gilgɑl gïti dicyɑ̈ngtïn. Kɑ̈ng-ɑ ɑ́bëëd tyëng Isrɑil kì Gilgɑl kì yij thwør-ɑ bøli Yerikö, Kwëër Ákɑɑdh ɑ́gwøg yi gen, kì cyɑ̈nggi dwɑ̈y pyɑ̈rø wïdɑ́ngwen kì wɑɑng thyënhø. Dhuki kì bɑng Kwëër Ákɑɑdh, ɑcyɑ̈ɑ̈m gen ki jɑmm-ɑ cyeg kì pönhɑni, ópùn-ɑ ri gen bong kɑmïrɑ̀, ki gemè men-ɑ bɑ ɑgïny. Dhuki ɑcungi mɑnɑ̀ keny-ɑ ɑ́cyɑ̈ɑ̈m gen ki jɑmm-ɑ ɑ́cyeg kì pönhɑni, bong mɑnɑ̀ mɑ ɑ́yod yi tyëng Isrɑil këti, de ge ɑ́cɑm-ɑ jɑmm-ɑ ɑ́cyeg kì piny Kɑnɑɑn kì yij runɑni bëne. Keny-ɑ ɑ́ying Jöcwø buti Yerikö, ɑtïnge wïje, kɑ ólïdhø ki jɑl megø me cungi kì bøle e cinge dɑ pilø me rumø ki wöödh wɑ̈g kì yij bøje. Kɑ Jöcwø kedh-ɑ yïe, kɑ gø pyëje kinni, “Yï bɑ ngeti wøn wɑlɑ̀ ngetimɑ̈ɑ̈nø?” Alöggi jɑlɑni kinni, “Yɑ pɑth ki gen bënn. Yɑ bɑ pënyi liny Áyïmø.” Abøødh Jöcwø ree piny kì bøli jɑlɑni, kɑ okööbø kinni, “Á ngø ɑ köbbí bɑ̈ngí wuö?” Aköbbi Jöcwø yi pënyi liny Áyïmø kinni, “Gööd wɑrrí wɑ̈g, mɑ́ keny-ɑ cungi yi yïn ɑnɑn bɑ kej kwër.” Kɑ Jöcwø wɑrre gööde wɑ̈g kì tyelle ni kɑ ɑ́köbbii ceth. Yerikö ɑ́bëëd e bɑ ɑcyëg kipe tyëng Isrɑil. Bong ngɑn cuggi bëën wɑ̈g, wɑlɑ̀ ngɑn cuggi kedhi yij kɑɑl. Kɑ Jöcwø köbbi yi Jwøng-ɑ Ácwɑ̈ɑ̈j kinni, “Lidh, Yerikö ɑ́mëggɑ yïn, kí rɑ̈dhe kí jöddi linye. Yïn, wuki jølinyí, nyi wen wun kɑɑl tyelø ɑ́kyel kì yij cyɑ̈ng ɑ́kyel, ki cyɑ̈ng ɑ́bïkyel. Kɑ ókwër ɑ́bïryew mø kɑ̈ddi ki tùngi órömm møg-ɑ nyi kodh, cyɑ̈dhi gen kì bøli Sɑnduug Cigg. Kɑ kì bïryeew cyɑ̈ng, wiinu kɑɑl tyel ɑ́bïryew, tùng okodhø yi ókwër. Kɑ tùng kodh yi ókwër wïj ɑ́kyel ki keny me bɑ̈ɑ̈r, kɑ ji ryeer gen bënn ki cwɑg mø døngø keny-ɑ ólïngi gen ywøøg tùng, döri kɑɑl Yerikö ópɑ̈ɑ̈dh kinni rup kì piny, kɑ ji kedh-ɑ yij kɑɑl men töng-ɑ́ɑ̀ bøle.” Acwøøl ókwër yi Jöcwø kɑ gï köbbe kinni, “Kwɑnyu Sɑnduug Cigg, kɑ ókwër ɑ́bïryew kɑ̈ddi gen ki tùng ɑ́bïryew, kì bøli Sɑnduug Ciggi Jwøng-ɑ Ácwɑ̈ɑ̈j.” Kɑ ji köbbi yi Jöcwø kinni, “Cɑ̈gi wun ki weni kɑɑl, wiy jøliny kedhi gen bøli Sɑnduug Ciggi Jwøng-ɑ Ácwɑ̈ɑ̈j.” De ji ɑ́köbbi yi Jöcwø kinni, ge ko wøw wɑlɑ̀ cwɑggi gen ko wëggi gen lïngø, wɑlɑ̀ ko di kwøb mø pɑ̈ɑ̈r wɑ̈g kì dhøggi gen, gïti cyɑ̈ng-ɑ óköbbe gïn kinni ryeer gen, codhe o ge ryeer gen. Awen kɑɑl ki Sɑnduug Ciggi Jwøng-ɑ Ácwɑ̈ɑ̈j ki tyelø ɑ́kyel, ɑdøøg gen yethi kemmi gen, ɑbuddi gen. Adhwödh Jöcwø dhuki kì mwøl ceth, kɑ Sɑnduug Ciggi Jwøng-ɑ Ácwɑ̈ɑ̈j kwɑny yi ókwër. Kɑ jøliny møg-ɑ kurø kì mɑl wɑ̈d-ɑ yöö, bɑng gen dɑ ókwër ɑ́bïryew ge okudhø ki tùng ɑ́bïryew, o bɑng gen dɑ ókwërr-ɑ byelli Sɑnduug Ciggi Jwøng-ɑ Ácwɑ̈ɑ̈j, cyɑ̈ɑ̈n gen dɑ jøliny møg-ɑ kurø kì cyɑ̈n. Kì ryeew cyɑ̈ng, ge ɑ́døøg be weni kɑɑl ki tyelø ɑ́kyel, kɑ ge døøg-ɑ yethi kemmi gen. Kɑ Yerikö nyi wen gen tyelø ɑ́kyel cyɑ̈ng ɑ́kyel, ki cyɑ̈ng ɑ́bïkyel. Kì bïryeew cyɑ̈ng, ɑdhwödh gen piny nudd e looj, ɑwinni kɑɑl yi gen ni cyɑ̈ngg-ɑ ɑ́pöödh ki tyel ɑ́bïryew. Bene cyɑ̈ngɑni kete ɑ wen gen kɑɑl ki tyel ɑ́bïryew. Kì bïryeew weni kɑɑl, keny-ɑ ɑ́koodh tùng yi ókwër, ɑköbbi ji yi Jöcwø kinni, “Ryeer wun, mɑ́ kɑɑl ɑ́mëggi wun yi Jwøng-ɑ Ácwɑ̈ɑ̈j. Cøør kɑɑl Yerikö piny, kɑ ji nɑ̈g, ki jɑmm-ɑ yije bënn rënyi gɑ gëdhhi Jwøng-ɑ Ácwɑ̈ɑ̈j. Den-ɑ́ Rɑɑ̈b ngɑn nyi niin ki köögi, geki tyëng-ɑ gøle ɑ ówiy ge pɑ nɑ̈g, mɑ́ lyëwwì møg-ɑ ɑ́ör ɑ́kɑn yi en. De wun lɑ̈ɑ̈w wun ri wun ki jɑmm-ɑ rënyi, wu ko pɑ̈nyi kɑ̈bbø kì ri gen, kipe Isrɑil óyïddi ki ryɑ̈g kì bɑng wun. De gïg-ɑ bɑ ɑcwɑ̈j ki ɑ́tegø, kí dhɑb, kí ngyënyø dilɑl, kí ngyënyø dødø, thyëyi gen Jwøng-ɑ Ácwɑ̈ɑ̈j, kɑ ge kïdhi yij Kemi Kwër.” Akoodh tùng yi ókwër, keny-ɑ ɑ́lïngi ywøøg tùng yi teenɑni, ɑryeer gen ki ryeeri dwøng, ɑpɑ̈ɑ̈dh dörø kinni rup kì piny, ɑkedhi liny yij kɑɑl, ngɑn töng-ɑ́ɑ̀ bøle, ɑmɑg gen kɑɑl. Arënyi kɑɑl ki menrɑj, kɑ ji bënn, jøg-ɑ cwøw kí tyëng-ɑ mɑ̈nn, kí othønhø, kí tyëngdøngø, kí dhög, kí dyëg, kí ɑderr nɑ̈g yi gen gɑ gëdhhi Jwøng-ɑ Ácwɑ̈ɑ̈j. Aköbbi jøg ɑ́ryew-ɑ ɑ́lyeew piny yi Jöcwø kinni, “Kedhu gøl ngɑn-ɑ nyi niin ki köögi, kɑ kɑ̈ɑ̈l wun wɑ̈g geki tyëng gøl gen, ni kɑ ɑ́köngi wun.” Akedhi jøg-ɑ ɑ́bëëd gɑ lyëwwì gøl Rɑɑ̈b, kɑ gø kɑ̈ɑ̈l gen wɑ̈g, geki wïye, kí meye, kí nyiimen kí wɑddi gen, kí bɑ̈nggi gen bënn. Akɑ̈l ge gïn, kɑ gï cïb gen buti kɑɑl tyëng Isrɑil. Arɑ̈b gen kɑɑl Yerikö, kí jɑmm-ɑ yije bënn. Gïg-ɑ bɑ dhɑb, kí ɑ́tegø, kí ngyënyø dilɑl, kí ngyënyø dødø, gï ɑ́kɑ̈l gen, kɑ gï cïb gen kelli jɑmmi Jwøng-ɑ Ácwɑ̈ɑ̈j. De Rɑɑ̈b ngɑn nyi niin ki köögi, geki gøl wïye kí wɑddi gen, ge ɑ́yiel yi Jöcwø kipe kɑ ɑ́kɑne lyëwwì ɑ́ryew møg-ɑ ɑ́ör Yerikö, ɑbëëd kwɑrri Rɑɑ̈b kì Isrɑil gïti dicyɑ̈ngtïn. Aköngi Jöcwø kì bøli kenyɑni kinni, “Ngɑn-ɑ ópɑ̈nyi Yerikö ki døøgø’ gerø, ree dɑ cyën kì bøli Jwøng-ɑ Ácwɑ̈ɑ̈j. Ngɑn-ɑ ókëël tyeli döri kɑɑlɑni piny, wɑ̈de wɑ̈n-ɑ kɑyø ceg-ɑ thøø; o ngɑn-ɑ óger dhøg döri kɑɑlɑni wɑ̈de wɑ̈n-ɑ kunø ceg-ɑ thøø.” Jöcwø ɑ́køny yi Jwøng-ɑ Ácwɑ̈ɑ̈j, ɑbëëde e ngɑ̈nyi kì yij pödhø bëne. Jwøng-ɑ Ácwɑ̈ɑ̈j ɑ́rum ki kyëddi tyëng Isrɑil kinni ge ko kɑ̈bbi ki jɑmmì kì Yerikö, dɑ́ kinni rënyi gïgɑni bënn. De Akɑn wɑ̈d Kɑrmì, wɑ̈d Dhɑbdì, wɑ̈d Dherɑ̀ kì wïj gøl Yeudɑ̀, kɑ̈bbø ki kwï jɑmm-ɑ ɑ́kyer, ɑrënyi pyëw Jwøng-ɑ Ácwɑ̈ɑ̈j ki Isrɑil ki mendwøng. Jöcwø ɑ́öd ki ji kì Yerikö, e öd-ɑ Aɑy, ɑ cyɑ̈gi ki Bet Aben, e ying-ɑ wɑɑng cyɑ̈ɑ̈ng mwøl kì bøli Betiil, kɑ gï köbbe kinni, “Kedh wun, kɑ piny lyeew wun.” Adwöög gen yï Jöcwø kɑ gø köbbi gen kinni, “Yï ko kedhi Aɑy ki linyí bëne, wiy gïn ni jøg ɑ́lïp ɑ́ryew wɑlɑ̀ ɑ́lïp ɑ́dɑ̈g kedhi gen be pɑ̈ɑ̈r kömi Aɑy, ji ri gen ko pïd gen ki kedhø bënn, mɑ́ tyëng pönhɑni nøg.” Akedh jøg mø kwɑnni gen bɑ ɑ́lïp ɑ́dɑ̈g, kɑ ge cyeddi yi tyëng Aɑy. Ge ɑ́cyeddi yi jø Aɑy, cɑg kì dhøg kɑɑl gïti yuu-ɑ töngi piny kì buti kïtti gyer. Anɑ̈ggi jø Aɑy ki ji pyɑ̈r ɑ́dɑ̈g wïdɑ́bïkyel kì kelli yɑɑy Isrɑil kì kö yuuɑni. Amɑɑg yɑɑy Isrɑil yi wɑ̈ɑ̈rø, kɑ nyingi gen obɑɑrø ki mendwøng. Kɑ Jöcwø ógødhe kɑge geki jøgdøngi Isrɑil, ɑ́ nyuudhi mi rɑ̈ɑ̈m pëthi gen. Abuddi gen yethi gen rum gen piny, e wɑ̈thi gen ónywɑ̈ddø’ piny, kì bøli Sɑnduug Ciggi Jwøng-ɑ Ácwɑ̈ɑ̈j, o wɑ̈thi gen yëddi gen ki tør, kɑ ge gït-ɑ böörø ge obuddø kinøw. Akööb Jöcwø kinni, “Wuö Jwøng-ɑ Ácwɑ̈ɑ̈j, ɑ́ per ngø ɑ ɑ́kɑ̈ɑ̈l ji møg kì løøg Nɑm Urdun? Bɑ kipe kinni o wø cïb cinggi tyëng Amör, o wø nɑ̈g yi gen? Á kipe ngø ɑ bɑɑny wøn ki wiyø, o wø di bëëd wøn kì løøngɑni? Anɑn Wuö, ɑ́ ngø ɑ kwøb yi yɑn e Isrɑil ɑ́cyeddi yi tyëngmɑ̈ɑ̈nø? Mɑ́ tyëng Kɑnɑɑn, kí tyëng-ɑ bëëdø kì pönhï bënn, møgɑni ólïngi yi gen, kɑ wø tyeg yi gen, kɑ wø nɑ̈g yi gen. Dɑ́ ngø ɑ ógöggi nyingí, nying-ɑ per gen teg?” Aköbbi Jöcwø yi Jwøng-ɑ Ácwɑ̈ɑ̈j kinni, “Dhwöödh! Yïde ɑ buud kì piny kinnï? Tyëng Isrɑil ɑ́røngi; ciggɑ ɑ́pyem yi gen, ge ɑ́kɑ̈bbi ki kwï jɑmm-ɑ ɑ́kyerɑ, ge ɑ́kwɑ̈ddi o ge ceg-ɑ pyed; men-ɑ́ jɑmmɑni ɑ́ti gen ki kïdhi kelli jɑmmi gen. Bene ɑ pɑ cuggi tyëng Isrɑil ki cung kì bøli tyëngmɑ̈ɑ̈nø. Ge ɑ́cyeddi yi tyëngmɑ̈ɑ̈nø, mɑ́ ge ceg-ɑ thøø gɑ gëdhhì. Yɑ pɑ bëëdø kì kelli gen këti gïti keny-ɑ órënyu jɑmm-ɑ ɑ́kërrɑ wun. Dhwöödh! Kwër ji kɑ ge köbbí kinni, kwër gen ri gen kipe dhuki, mɑ́ Jwøng-ɑ Ácwɑ̈ɑ̈j, Jwøøg Isrɑil okööbø i jɑmm-ɑ ɑ́kyer nudd ge nud kì yï wun. Yïn ɑ Isrɑil, yï pɑ cuggi cung kì bøli tyëngmɑ̈ɑ̈nø gïti keny-ɑ ókɑ̈ɑ̈l wun jɑmm-ɑ ɑ́kyer wɑ̈g kì kelli jɑmmi wun. Köbbí gen kinni bï gen dhuki kì mwøl, ge bɑ wɑ̈thi kɑ̈llì, wïj gøl-ɑ ókwɑny yi Jwøng-ɑ Ácwɑ̈ɑ̈j, bëe ɑ́ dhøggi kɑ̈llì, dhø gøl-ɑ ókwɑny yi Jwøng-ɑ Ácwɑ̈ɑ̈j, bëe ɑ́ dhɑnhø ɑ́kyel ɑ́kyel. Ngɑn-ɑ ɑ́kwɑny jɑmm-ɑ ɑ́kyer, órɑ̈b ki mɑc geki jɑmme bënn, mɑ́ Ciggi Jwøng-ɑ Ácwɑ̈ɑ̈j ɑ́pyem yi en, kí kipe kɑ ɑ́gögge Isrɑil ki ɑyɑ̈r.” Adhwödh Jöcwø kì mwøl ceth, ɑkɑ̈ɑ̈le Isrɑil gɑ wɑ̈thi kɑ̈llì, ɑkwɑɑny gøl Yeudɑ̀, ɑkɑ̈ɑ̈le gøl Yeudɑ̀, ɑkwɑɑny gøl Dherɑ̀, ɑkɑ̈ɑ̈le gøl Dherɑ̀ ɑ́ ød kí ød, ɑkwɑɑny ød Dhɑbdì, ɑkɑ̈ɑ̈l gøl Dhɑbdì ɑ́ ɑ́kyel ɑ́kyel, ɑkwɑɑny Akɑn wɑ̈d Kɑrmì wɑ̈d Dhɑbdì wɑ̈d Dherɑ̀ kì gøl Yeudɑ̀. Aköbbi Akɑn yi Jöcwø kinni, “Wɑ̈dɑ nëngí Jwøng-ɑ Ácwɑ̈ɑ̈j, Jwøøg Isrɑil ki dhwɑ̈ng, kɑ lejjí. Köbbí yɑn gïn-ɑ ɑ́gwøg yi yïn, kɑ ko kɑ̈nní yɑn.” Alöggi Akɑn kinni, “Kidyër, yɑ ɑ́røngi kì bøli Jwøng-ɑ Ácwɑ̈ɑ̈j, Jwøøg Isrɑil, gïn-ɑ ɑ́gwøg yi yɑn èn: Keny-ɑ ɑ́lïdhɑ ki jɑmmì mø myëër kì kelli jɑmm-ɑ ɑ́kyer, ɑ løg ógødh Bɑbïlöniyɑ̀ men-ɑ ngewe teeg, kí gïn ni kïllì ɑ́ryew ɑ́tegø, kí óbɑɑr dhɑb me bɑ budi kïlø, ɑrengi gen pyëwɑ kɑ ge kwɑnyɑ. Ge bɑ ɑkony kì yij kemɑ̀ miɑ.” Kɑ Jöcwø oödø ki ji, ɑkedhi gen yij kemi Akɑn, ɑyod gen jɑmmɑni ge ókoony piny kì yij kemɑ̀. Akɑ̈ɑ̈l gen wɑ̈g kì yij kemɑ̀, kɑ ge muuj Jöcwø geki tyëng Isrɑil bënn, ɑthyeer gen bøli Jwøng-ɑ Ácwɑ̈ɑ̈j. Akwɑɑny Akɑn kí jɑmmɑni bënn yi Jöcwø geki tyëng Isrɑil, en kí wɑ̈dde kí dhöge, kí ɑderre kí dyëge, kí kemɑ̀ mee geki jɑmme bënn, kɑ ge kïdhi Töör Akørr. Aköbbii yi Jöcwø kinni, “Yïde ɑ kɑ̈ní kömi wøn ki rɑjj-ɑ ni møg? Kömí ɑ́kɑ̈ni yi Jwøng-ɑ Ácwɑ̈ɑ̈j ki rɑj ɑnɑn!” Abɑ̈lli Akɑn geki cyëge, kí nyige, ki tuggi kïttì yi ji bënn, kɑ ge othøø. Kɑ ge rɑ̈b kí jɑmme bënn. Aröri kömi gen ki tuggi kïttì. Tuggi kïttɑni nud gïti dicyɑ̈ngtïn, bene ɑ cwølli törɑni ɑ́ Töör Akørr. Kɑ pyëw Jwøng-ɑ Ácwɑ̈ɑ̈j ókwöjø. Aköbbi Jöcwø yi Jwøng-ɑ Ácwɑ̈ɑ̈j kinni, “Yï ko böggi, kɑ yï ko bëëd dëlí juurø, kwɑny jølinyí bënn, kɑ yï dhwöödh kedhí Aɑy. Rɑ̈ɑ̈dh Aɑy ɑ́cïbɑ cingí, geki kɑɑl-ɑ bëëde, kí jie, kí pinye. Aɑy kí rɑ̈dhe ógöggi yi yïn ki gïn-ɑ ɑ́göggí Yerikö geki rɑ̈dhe, de gïg-ɑ óyod yi wun ying gɑ dhög wɑlɑ̀ jɑmm-ɑ kyeelø, óbëëdø gɑ mø wun, tyeny rií kɑ kɑɑlɑni liib piny.” Kɑ Jöcwø ree tyenye geki jølinye bënn kipe kedhi Aɑy, kɑ Jöcwø oyïënyø ki jöddi liny gɑ ɑ́lïp pyɑ̈r ɑ́dɑ̈g, ɑöre gïn kì wɑ̈r. Ge ɑ́köbbi yi Jöcwø kinni, “Tyegu kɑɑl kì ngɑ̈je, tyëng kɑɑlɑni kwïj wøw, wu ko bëëd wu lɑ̈wi ki kɑɑl, de bëëd wun ri wun tyeeny wun kipe liny ceth. Yɑn, wøki jøg-ɑ cyɑ̈dhi wøn, wø ócyɑ̈ngi kì ri kɑɑl Aɑy, o keny-ɑ órïngi tyëng kɑɑlɑni yï wøn, ri wøn óløg yi wøn, kɑ wø órengø ni tyeli mɑl. Ge órïngi wɑ̈g bɑng wøn, pïd keny-ɑ óthɑ̈ɑ̈b wø gen wɑ̈g kì yij kɑɑl, mɑ́ ge órumø kinni, wø rengi, wø bwøg-ɑ yi gen ni tyeli mɑl. Codhe, o wu bïu wɑ̈g kì yethi kɑ̈jj-ɑ ɑ́pɑ̈nni yi wun, o kɑɑl mɑg yi wun, mɑ́ e ɑ́cïb cinggi wun yi Jwøng-ɑ Ácwɑ̈ɑ̈j, Jwøøg wun. Keny-ɑ órum kɑɑl ki mɑgø yi wun, kɑ cwiny wun ki mɑc ni kɑ ɑ́kwøbii yi Jwøng-ɑ Ácwɑ̈ɑ̈j, bene møg-ɑ cïgɑ wun ɑgɑk.” Aör gen yi Jöcwø, kɑ ge kedh-ɑ kɑ̈jj-ɑ pɑ̈ni yi gen, ɑbuddi gen kì kɑɑm Betiil geki Aɑy, kì wɑɑng cyɑ̈ɑ̈ng böörø. Kɑ Jöcwø óbuddø kì yij kemɑ̀. Kɑ Jöcwø odhwödhø dhuki kì mwøl ceth, ɑcønge jøliny, ɑpëggi gen bøli ji geki pëjji Isrɑil, ge kedh-ɑ Aɑy. Akedh jøliny bënn møg-ɑ ɑ́cyɑ̈dhi ki Jöcwø, kɑ ge bï-ɑ bøli Aɑy. Aguddi gen piny ki kemmì kì wɑɑng wuudø kì bøli Aɑy, ɑ́ tör ɑ kɑɑm gen ki Aɑy. Kɑ Jöcwø ókɑ̈bbø ki jøliny gïn ni ɑ́lïp ɑ́bïj, ɑcïbe gïn kɑ̈jj-ɑ pɑ̈ni gen kì wɑɑng cyɑ̈ɑ̈ng böörø kì bøli Aɑy, kì kɑɑm Betiil geki Aɑy. Acïb jøliny, e yɑy-ɑ dwøng ying-ɑ wɑɑng wuudø kì bøli kɑɑl, kwï yɑy ying-ɑ wɑɑng cyɑ̈ɑ̈ng böörø. De Jöcwø ɑ́nïn-ɑ yij tör kì wɑ̈rɑni. Keny-ɑ ɑ́liidh gen yi rɑ̈ɑ̈dh Aɑy geki jie bënn, kɑ jø kɑɑlɑni jwɑn-ɑ bëën wɑ̈g ge bï-ɑ kuni Töör Urdun be nyïɑ̈ggø ki tyëng Isrɑil kì kej tyeli mɑl. De kwïj yi gen kinni dɑ kwï yɑy me pɑ̈nnø kì ngɑ̈ɑ̈j kɑɑl. Agöög Jöcwø geki Isrɑil, dhɑ̈y ge ce ceg kɑ cyeddø yi gen, ɑrengi gen kuni ryɑng. Acwööl tyëng-ɑ ɑ́ying kɑɑl bënn be cyeddi tyëng Isrɑil, kɑ ge ólɑ̈wø ki kɑɑl, ge rïng-ɑ́ɑ̀ bɑng Jöcwø geki jøge. Bong dhɑnhø ɑ́kyel mɑ ɑ́döng e kor-ɑ Aɑy wɑlɑ̀ Betiil, ge ɑ́rengi bɑng Isrɑil bënn, dhø döri kɑɑl ɑ́wiy yi gen ɑ́ ɑyieb, kɑ ge reng-ɑ bɑng Isrɑil. Codhe ɑköbbi Jöcwø yi Jwøng-ɑ Ácwɑ̈ɑ̈j kinni, “Cem tøng-ɑ cingí ɑnɑn kuni kɑɑl Aɑy, mɑ́ Aɑy cïbɑ’ cingí.” Kɑ Jöcwø tøng ceme kuni Aɑy. Kɑ tyëng-ɑ ɑ́bëëd ge pɑ̈nø jwɑn-ɑ dhwödhø kì kɑ̈jji gen, keny-ɑ ɑ́rïj Jöcwø cinge, ɑrengi gen, kɑ kɑɑl mɑg yi gen, ɑjwɑn gen kɑɑl ki cwinyø ki mɑc. Keny-ɑ ɑ́lïïdh jø Aɑy ngɑ̈thi gen, ɑlidh gen yïri kɑɑl e kwöddi mɑl, kɑ ge ódhɑ̈lø rengi tuung wɑlɑ̀ tuung, mɑ́ tyëng Isrɑil møg-ɑ ɑ́rengi yij ryɑng ɑ́dwöög kömi gen be nɑ̈gi gen. Keny-ɑ ɑ́lïdhi Jöcwø geki Isrɑil bëne kinni tyëng-ɑ ɑ́pɑ̈ni, kɑɑl ɑ́mɑg gen, o yïri kɑɑl ɑ́lidh gen e kwöddi mɑl, ɑdwöög gen, ɑnɑ̈g gen jø Aɑy. Abëën jø Isrɑil møg-ɑ ɑ́ying kɑɑl wɑ̈g, ɑyod jø Aɑy ri gen ge ótyeeg dïdyër yi tyëng Isrɑil. Anɑ̈ɑ̈g gen yi tyëng Isrɑil, kɑ bong-ɑ dhɑnhø ɑ́kyel mɑ ɑ́wiy, wɑlɑ̀ mɑ ɑ́bodh. De rɑ̈ɑ̈dh Aɑy ɑ́kɑ̈l yi gen e onëënø, kɑ gø muuj gen Jöcwø. Keny-ɑ ɑ́rum Isrɑil ki nɑ̈gi tyëng Aɑy kì yij ryɑng-ɑ ɑ́rengi yi gen, ɑdøøg gen Aɑy, kɑ tyëng-ɑ ɑ́döng kì kɑɑlɑni nɑ̈g gen bënn. Tyëng Aɑy bënn møg-ɑ ɑ́nɑ̈g dicyɑ̈ngɑni, cwøw kí mɑ̈nn ge bɑ ɑ́lïp pyɑ̈rø wïdɑ́ryew. Jöcwø cinge, cing-ɑ ɑ́rïïje kuni Aɑy ki tøng, nuti dwöög en piny, gïti kɑ ɑ́rum tyëng Aɑy ki nɑ̈gø bënn kinni tweet. Dhög kí jɑmmi gen ɑ́kwɑny yi tyëng Isrɑil, ni kɑ ɑ́köbbi Jöcwø yi Jwøng-ɑ Ácwɑ̈ɑ̈j. Aɑy ɑ́rɑ̈b yi Jöcwø geki jølinye, kɑ gø wiy gen e ryɑ̈gø gïti dicyɑ̈ngtïn. Angɑɑb rɑ̈ɑ̈dh Aɑy wïj yɑdh yi Jöcwø pïd böörø. Kɑ Jöcwø jøge köbbe kinni kɑ̈ɑ̈l piny kì wïj yɑdh, keny-ɑ ɑ́kwɑɑr cɑ̈ng piny. Kɑ leeng dhø döri Aɑy, kɑ köme rööri ki tuggi kïttì, tuggi kïttɑni nud gïti dicyɑ̈ngtïn. Codhe, ɑgëëd Jöcwø ki këli lɑm mi Jwøng-ɑ Ácwɑ̈ɑ̈j, Jwøøg Isrɑil kì wïj Kïti Ebɑl. Ágwøge ni kɑ ɑ́köbbi tyëng Isrɑil yi Mosɑ̀ bɑ̈ng Jwøng-ɑ Ácwɑ̈ɑ̈j, ni kɑ ógweedii yij wɑ̈nyi Ciggi Mosɑ̀ kinni, “Këli lɑm nyi ger kɑ tuggi kïttì møg nuti ngølø ki gïn-ɑ ógwøgø ɑ́ ngyënyø.” Jwøng-ɑ Ácwɑ̈ɑ̈j ɑ́nëngi yi gen kì wïj këli lɑmɑni ki gënh-ɑ nyi rɑ̈b bëne, kɑ ge omuujø ki gënhi mër thyew. Ajøli Ciggi Mosɑ̀ ki gwedø yi Jöcwø kì kömi ópɑ̈nni kït kì kenyɑni, kì bøli tyëng Isrɑil. Isrɑil bëne, kí jɑgge, kí pëjji liny, kí jyɑ̈ggi gøny, kí tyëngpɑth møg-ɑ kelli gen, ɑ́bëëd ge ócungø kì wɑ̈thi tùngi Sɑnduug Ciggi Jwøng-ɑ Ácwɑ̈ɑ̈j kì tuung kí tuung, ge rwöm ki ókwërri gøl Leebì møg-ɑ nyi byelli Sɑnduug Cigg. Budi ji cungi ngɑ̈thi gen løg gen kuni Kïti Geridhïm, o bun-ɑ kyeelø ngɑ̈thi gen løg gen kuni Kïti Ebɑl. Ge ɑ́köbb-ɑ yi Mosɑ̀, bɑ̈ng Jwøng-ɑ Ácwɑ̈ɑ̈j kinni i cungi gen kinøw, o ge kwëng yi ókwër kɑ̈ng-ɑ nuti rɑɑng Ciggi Mosɑ̀ yi Jöcwø. Codhe, ɑrɑɑng Cigg bënn yi Jöcwø e óryeerø, ki gyëdh geki cyën ni kɑ ógweed gen kì yij wɑ̈nyi Cigg. Ciggi Mosɑ̀ ɑ́rɑng yi Jöcwø bënn, kì bøli tyëng Isrɑil bënn; tyëng-ɑ mɑ̈nn, kí othønhø, kí tyëngpɑth møg-ɑ bëëdø kì kelli gen. Keny-ɑ ɑ́lïng rɑ̈nh-ɑ bëëdø kì løøg Nɑm Urdun kì wɑɑng cyɑ̈ɑ̈ng böörø, geki tyëng myërri kwøømø, kí tyëng myërr-ɑ thwørø, kí tyëng myërri kömi Nɑɑm Omeli Tɑr, kí tyëng myërri Lubnɑn, kí tyëng Kit, kí tyëng Amör, kí tyëng Kɑnɑɑn, kí tyëng Perïdh, kí tyëng Kib, kí tyëng Yebus; keny-ɑ ɑ́lïngi gen wööni tyɑ̈mi Isrɑil, ɑcøng gen ri gen bënn kipe nyɑɑg ki Jöcwø geki Isrɑil. De tyëng Gibeon, ɑ bɑ tyëng Kib, keny-ɑ ɑ́lïngi gen gïn-ɑ ɑ́göggi Yerikö geki Aɑy yi Jöcwø, ge ɑ́göög ki wëënyø, ɑkedh gen kɑ ge oyɑ̈bø ki gïncɑm me thwøwø, o ree mød en, kɑ gø cïb gen kömi ɑderri gen, kì yethi ocwɑ̈llì mø kɑggø, kí ɑthebbi møgi oløg mø rënyø, o ge ókwøjø. Kɑ tyelli gen kïdhi gen ki wɑr mø kɑggø, o ge óbuulø. Kɑ ri gen lunyi gen ki ógudh mø kɑggø. Akedhi gen yï Jöcwø kì kɑɑl-ɑ ɑ́gur kì Gilgɑl, ɑköbbi ge gøn geki jø Isrɑil kinni, “Wø kɑ̈ɑ̈l-ɑ pödhø me lɑ̈wi, de lwööb wɑ.” Aköbbi tyëng Gibeon yi jø Isrɑil kinni, “Wɑ lwööb ɑ dï, ying wu bëëd ɑ keny me cyɑ̈gi ɑnɑn ø?” Aköbbi Jöcwø yi gen kinni, “Wø bɑ bɑ̈nggí.” Apyëëj gen yi Jöcwø kinni, “Wu bɑ møg? O wu kɑ̈ɑ̈l-ɑ keny?” Kɑ Jöcwø köbbi yi gen kinni, “Wø kɑ̈ɑ̈l-ɑ kun me lɑ̈wi wuö, wø ɑ́lïng-ɑ nyingi Jwøng-ɑ Ácwɑ̈ɑ̈j, Jwøgí. Gïg-ɑ ɑ́gögge Rïp bënn, ɑ́lïngi yi wøn, kí gïg-ɑ ɑ́gögge rɑ̈nhi Amör ryeet, møg-ɑ løøg Nɑm Urdun kì wɑɑng cyɑ̈ɑ̈ng mwøl, Sïön, rɑ̈ɑ̈dh Kicbön, geki Og, rɑ̈ɑ̈dh Bɑcɑn, ɑ bëëdø kì Actɑröth. Pëjji wøn, kí tyëng pödhi wøn bënn wø ɑ́köbbi gen kinni, ‘Kɑ̈ɑ̈d wun ki gïncɑm kiper wel, kɑ wu kedhu be yïddø ki gen, kɑ ge köbbi wun kinni, wø bɑ bɑ̈nggi wun, bïu o wɑ lwööb wɑ ɑnɑn.’ Lidhu gïncɑɑm wøn, ɑ́bëëd e nudd e lëëdh keny-ɑ ɑ́kwɑny wøn en kì kɑ̈lli wøn, ɑ́ gïncɑɑm wel, kì cyɑ̈ng-ɑ ɑ́cɑ̈gi wøn ki wɑ̈dh, wø bï-ɑ yï wun, de liidh ɑnɑn, ɑ́thwøw o ree ɑ́møde! Athebbi møgi oløg møg-ɑ ɑ́bëëd ge nyɑ̈n keny-ɑ ɑ́pɑ̈ɑ̈ng gen yi wøn, ge ɑ́kɑggi. Kɑ wɑrri wøn liidh kí ógudhi wøn, ge ɑ́kɑggi yi lɑ̈wi piny.” Kɑ jø Isrɑil ocyɑ̈mø ki gïncɑɑm gen, e Jwøng-ɑ Ácwɑ̈ɑ̈j nuti pyëëj gen. Kɑ Jöcwø ogöögø ki mër ki tyëng Gibeon, kɑ olwöbø ki gïn, kinni o ge bëëd gen ki mër. Kɑ pëjji Isrɑil óköngø kinni lwöbø menɑni ómïdhi yi gen. Kì bɑng cyɑ̈ng ɑ́dɑ̈g ge rum lwöbø, ɑlïng tyëng Isrɑil kinni tyëngɑni cyɑ̈gi ki gen, ge bëëd ɑ buti gen kidyër. Abëën tyëng Isrɑil, kɑ ge wɑ̈dh-ɑ kɑɑl tyëngɑni kì ri dɑ̈ɑ̈g cyɑ̈ng, o kɑ̈ddi gen bɑ Gibeon, kí Kepïrɑ̀, kí Biröth, kí Kiriɑt Yeɑrïm. De ge nuti nɑ̈gø yi tyëng Isrɑil, mɑ́ pëjji tyëng Isrɑil ɑ́kwöng-ɑ Jwøng-ɑ Ácwɑ̈ɑ̈j, Jwøøg Isrɑil, kɑ ji owërø ki pëjjɑni. Aköbbi gen yi pëjjɑni bënn kinni, “Ge ɑ́köngi wøn Jwøng-ɑ Ácwɑ̈ɑ̈j, Jwøøg Isrɑil, ge pɑ cuggi nywɑlø yi wɑ.” Gïn-ɑ ógöggi wɑ gen bɑ kinni, wiy ge nëën gen, kipe wɑ ócɑy yi Jwøk kipe møg-ɑ ɑ́köngi wø gen. De ge óbëëd ge nyi ngøl-ɑ yenh, o ge nyi tëddi gen ji bënn ki pï, ni kɑ ɑ́köbbi gen yi pëjjì ceth. Acwøøl tyëng Gibeon yi Jöcwø, kɑ gï pyëje kinni, “Á kipe ngø ɑ wënyu wøn, cem wu kɑ̈ɑ̈l-ɑ kun me lɑ̈wi, wu bëëd ɑ buti wøn? Anɑn wu ɑ́cɑy yi Jwøk kipe kɑ ɑ́göög wun kinøw, kwï wun ceg-ɑ bëëdø gɑ bɑ̈ngg, ge nyi ngøl-ɑ yenh, o ge nyi tyëdd-ɑ pï mø ød Jwøgɑ yethi cyɑ̈ng.” Aløøg gen mø Jöcwø kinni, “Møgɑni ɑ́gwøg yi wøn wuö, kɑ per kɑ ɑ́lïng wøn kinni, Jwøng-ɑ Ácwɑ̈ɑ̈j, Jwøøg wun, Mosɑ̀ bɑ̈nge ɑ́cege kinni piny bëne bɑ men mëgge wun, o tyëng-ɑ bëëdø kì yij pinyɑni bëne bɑ møg nɑ̈g yi en kì bøli wun. Bene ɑ bwøg wøn ki mendwøng. De wø ɑ́göög kinøw kɑ per kinni o wø bødh wøn. Anɑn, wø ying-ɑ cingí, gwøg gïn-ɑ rømmi yi yïn e døøj kiper wøn.” Ayiele gïn kì cinggi tyëng Isrɑil, ɑcög gï nuti nɑ̈ɑ̈g gen. De ge ɑ́gwøg yi Jöcwø kì cyɑ̈ngɑni gɑ jøngøl ki yenh, kí tyëng nyi tëddi tyëng Isrɑil ki pï, geki këli Jwøng-ɑ Ácwɑ̈ɑ̈j, gïti dicyɑ̈ngtïn, kì keny-ɑ yieny yi Jwøng-ɑ Ácwɑ̈ɑ̈j ɑ́ keny mɑllii. Keny-ɑ ɑ́lïng Adönidhedek, rɑ̈ɑ̈dh Yerusɑlem kinni i Jöcwø Aɑy mɑɑg en, o gø rëny en ki rënyi dwøng, o rɑ̈dhe nɑ̈ɑ̈g en, ni gïn-ɑ ɑ́gögge Yerikö geki rɑ̈dhe, kí kinni tyëng Gibeon göögø ki mër geki Isrɑil, o ge bëëd ɑ kej ɑ́kyel, ɑbwøge ki mendwøng, mɑ́ Gibeon bɑ kɑɑl me dwøng, o bɑ ɑ́kyel kì kelli kɑ̈ddi rɑ̈ɑ̈dhø, kí kɑ̀ bëëde e dwøng kibøli Aɑy, o jøge bɑ jödd. Aödi Adönidhedek yï Oɑ̈ɑ̈m, rɑ̈ɑ̈dh Kibrön, kí yï Pirɑm, rɑ̈ɑ̈dh Yɑrmuth, kí yï Yɑpiyɑ̀, rɑ̈ɑ̈dh Lɑkic, kí yï Debir, rɑ̈ɑ̈dh Eglön, kinni, “Bïu, kønyu yɑn ki pɑ̈ɑ̈r kömi Gibeon, mɑ́ tyëng kɑɑlɑni ɑ́göög ki mër ki Jöcwø geki tyëng Isrɑil.” Kɑ rɑ̈nhi Amör gɑ ɑ́bïj, ɑ løg rɑ̈ɑ̈dh Yerusɑlem, kí rɑ̈ɑ̈dh Kibrön, kí rɑ̈ɑ̈dh Yɑrmuth, kí rɑ̈ɑ̈dh Lɑkic, kí rɑ̈ɑ̈dh Eglön, jøliny mø gen bënn cøng gen, kɑ ge kedh-ɑ be nyɑɑg ki Gibeon. Kɑ Jöcwø ödi ki wöödø yi jø Gibeon, e ying-ɑ Gilgɑl kinni, “Cingí ko lwɑ̈nggí kì ri bɑ̈nggí, jwɑn bëën yï wøn, kɑ wø yieel, køny wøn ki liny, mɑ́ rɑ̈nhi Amör møg-ɑ bëëdø kì myërri kelli kïttì bënn, ri gen ɑ́cøng gen kiper wøn!” Kɑ Jöcwø kedh-ɑ Gilgɑl, geki jølinye bënn, kí jöddi linye møg-ɑ pëddi tegø. Aköbbi Jöcwø yi Jwøng-ɑ Ácwɑ̈ɑ̈j kinni, “Yï ko böggi yi gen, mɑ́ ge cïbɑ’ cingí, bong jɑl ɑ́kyel kì kelli gen men-ɑ ócungi kì bølí.” Apɑ̈ɑ̈y tyëng Amör piny yi Jöcwø, mɑ́ ge ɑ́lɑng-ɑ wɑ̈r ge ócyɑ̈dhø, ge kɑ̈ɑ̈l-ɑ Gilgɑl. Agöjji tyëng Amör wɑ̈ɑ̈rø yi Jwøng-ɑ Ácwɑ̈ɑ̈j, kɑ wɑ̈thi gen tummi gen, keny-ɑ ɑ́lidh gen liny Isrɑil. Anɑ̈ɑ̈g gen yi tyëng Isrɑil ki nɑ̈gø me rɑj kì Gibeon. Acyeddi kwï gen kì yuu-ɑ töngi piny kì wïj Kïti Bet Örøn, ge pwööd-ɑ piny gïti Adhekɑ̀ geki Mɑkedɑ̀. Kɑ̈ng-ɑ ɑ́cyeddi tyëng Amör yi Isrɑil kì yuu-ɑ töngi piny kì wïj kït kì Bet Örøn, ge ɑ́bɑ̈lli yi Jwøng-ɑ Ácwɑ̈ɑ̈j ki tuggi ɑ́piy mø døngø, gïti kɑ ɑ́wɑ̈dhi gen Adhekɑ̀, kɑ ge othøø. Tyëng-ɑ ɑ́nɑ̈g yi tuggi ɑ́piy, gïïr kibøli møg-ɑ ɑ́nɑ̈g yi jø Isrɑil. Cyɑ̈ng-ɑ ɑ́wëggi gen tyɑmi tyëng Amör yi Jwøng-ɑ Ácwɑ̈ɑ̈j, Jöcwø ɑ́kööb geki Jwøng-ɑ Ácwɑ̈ɑ̈j; kɑ okööbø kì bøli jø Isrɑil bënn kinni, “Cɑ̈ng! Cungí kì wïj Gibeon, Dwɑ̈y! Cungí kì wïj Töör Ayɑlön.” Acungi cɑ̈ng ceth, kɑ dwɑ̈y obëëdø, gïti kɑ ɑ́col ji gøøli gen ki tyëngmɑ̈ɑ̈nø. Møgɑni bɑ ɑgwed kì yij Wɑ̈nyi Yɑcɑr kinni, cɑ̈ng ɑ́cungi kì dïmɑl, o nuti kedhi be buddø ki cyɑ̈ng ɑ́kyel kí dönge. Bong cyɑ̈ng mɑ ɑ́bëëd e nɑ cyɑ̈ngɑni cøn, wɑlɑ̀ kì bɑnge, mɑ ɑ́lïng Jwøng-ɑ Ácwɑ̈ɑ̈j, ki dhøg dhɑnhø, mɑ́ Jwøng-ɑ Ácwɑ̈ɑ̈j ɑ́nyïɑ̈ggi kɑ per Isrɑil! Adøg Jöcwø geki tyëng Isrɑil bënn, ge døøg-ɑ kɑɑl-ɑ ɑ́gur kì Gilgɑl. Kɑ rɑ̈nhhɑni gɑ ɑ́bïj órengø, kɑ ge pɑ̈n-ɑ yij órøngi kït kì Mɑkedɑ̀. Kɑ ge yod, ɑköbbi Jöcwø kinni, “Rɑ̈nhhɑni gɑ ɑ́bïj ɑ́yod, ge pɑ̈ni yij órøngi kït kì Mɑkedɑ̀.” Akööb Jöcwø kinni, “Ngyëli dhøg órøngɑni ki tungi kït me dwøng, kɑ kenyɑni cïbi ki jøg mø kurø, De ko bëëd ɑ́ wun ɑ kurø, cyeddi wun tyëngmɑ̈ɑ̈nø, gøju yɑɑy gen kì ngɑ̈je, ge ko wëggu wɑ̈dhi yethi myërri gen, mɑ́ ge ɑ́rum ki cïb cinggi wun yi Jwøng-ɑ Ácwɑ̈ɑ̈j, Jwøøg wun.” Jöcwø geki jø Isrɑil ɑ́nɑ̈ɑ̈g ki mø gïïr kì kelli gen, de mø nøg kì kelli gen, ɑ́wɑ̈dhi yethi kɑ̈ddi gen, kɑ̈ddi dör, kɑ ge obødhø. Codhe, ɑdøøg ji bënn yï Jöcwø kì kɑɑl kì Mɑkedɑ̀, e bong gïnrɑj kiper gen. Bong dhɑnhø ɑ́kyel kì yij pödhø mɑ ɑ́pɑ̈nyi dhøge ki tugø ki tyëng Isrɑil. Kɑ, Jöcwø okööbø kinni, “Yiebu dhøg órøngi kït, kɑ rɑ̈nhhɑni gɑ ɑ́bïj kɑ̈ɑ̈l wun wɑ̈g, kɑ ge muuj wun yɑn.” Akɑ̈ɑ̈l rɑ̈nhhɑni wɑ̈g gɑ ɑ́bïj kì yij órøngi kït, ɑ løg, rɑ̈ɑ̈dh Yerusɑlem, kí rɑ̈ɑ̈dh Kibrön, kí rɑ̈ɑ̈dh Yɑrmuth, kí rɑ̈ɑ̈dh Lɑkic, kí rɑ̈ɑ̈dh Eglön. Keny-ɑ ɑ́kɑ̈ɑ̈l rɑ̈nhhɑni wɑ̈g yï Jöcwø, ɑcwøøl jø Isrɑil bënn yi Jöcwø, ɑköbbe jyɑ̈ggi jøliny møg-ɑ ɑ́kedh kí en kinni, “Bïu, cïb wun tyelli wun muddi rɑ̈nhì møg.” Codhe ɑbëën gen, kɑ tyelli gen cïb gen muddi rɑ̈nhhɑni. Aköbbi gen yi Jöcwø kinni, “Wu ko böggi, kɑ pëthi wun ko nyönhi, bëëd pëthi wun ge teeg, mɑ́ bene gïg ni møg ɑ göggi tyëng-ɑ mɑɑn wun, ge ɑ́nɑ̈ggi wun yi Jwøng-ɑ Ácwɑ̈ɑ̈j.” Anɑ̈ɑ̈g rɑ̈nhhɑni yi Jöcwø, ɑngɑɑb gen ri yenh ɑ́bïj, ɑwiy gen ge óryërø gïti böörø. Kì ri buddi cɑ̈ng, ɑmuuj Jöcwø ki cigg kinni, i kɑ̈ɑ̈l gen piny, ɑkɑ̈ɑ̈l gen piny kì ri yenh, ɑleeng gen yij órøngi kït men-ɑ́ yije ɑ́pɑ̈ni yi gen, kɑ dhøg órøngɑni ngyëdi ki tungi kït me dwøng, tungi kïnɑni, nudd e ying-ɑ kenyɑni dicyɑ̈ngtïn. Amɑɑg Mɑkedɑ̀ yi Jöcwø dicyɑ̈ngɑni, ɑnɑ̈ge tyëng kɑɑlɑni bënn, bong dhɑnhø mɑ ɑ́bodh. Agögge rɑ̈ɑ̈dh Mɑkedɑ̀ ki gïn-ɑ ɑ́gögge rɑ̈ɑ̈dh Yerikö. Codhe, ɑkedh Jöcwø geki Isrɑil bëne, kì Mɑkedɑ̀ ge kedh-ɑ Libnɑ̀, ɑnyïɑ̈gge ki Libnɑ̀. Acïb Libnɑ̀ geki rɑ̈dhe cingi Isrɑil yi Jwøng-ɑ Ácwɑ̈ɑ̈j, ɑnɑ̈ɑ̈g tyëng Libnɑ̀ bënn, bong dhɑnhø mɑ ɑ́döng kì yije, ɑgögge rɑ̈ɑ̈dh Libnɑ̀ gïn-ɑ ɑ́gögge rɑ̈ɑ̈dh Yerikö, Akedh Jöcwø geki Isrɑil bëne kì Libnɑ̀ ge kedh-ɑ Lɑkic, ɑtyege gøn, ɑnyïɑ̈gge ki gøn. Kɑ Lɑkic cïb cingi Isrɑil yi Jwøng-ɑ Ácwɑ̈ɑ̈j, ɑmɑge gøn kì ryeew cyɑ̈ng, ɑnɑ̈g gen tyëng Lɑkic bënn ni gïn-ɑ ɑ́gögge Libnɑ̀. Codhe, ɑbëën Örɑm, rɑ̈ɑ̈dh Gedher be kønyi Lɑkic, kɑ nɑ̈g yi Jöcwø, kɑ jie nɑ̈g thyew, bong dhɑnhø mɑ ɑ́wiy yi en. Akedh Jöcwø kí Isrɑil bëne kì Lɑkic, ge kedh-ɑ Eglön, ɑtyeg ge gøn, ɑnyïɑ̈ggi gen ki gøn. Anɑ̈g gen jii kɑɑlɑni bënn dicyɑ̈ngɑni, ni gïn-ɑ ɑ́göggi Lɑkic. Akedh Jöcwø kí Isrɑil bëne kì Eglön, ge kedh-ɑ Kibrön, ɑnyïɑ̈ggi gen ki gøn. Amɑg ge gøn, ɑnɑ̈g gen tyëng Kibrön, ni gïn-ɑ ɑ́gögge Eglön ki myërr-ɑ cyɑ̈gi ki gøn, ɑnɑ̈g gen tyëng Kibrön bënn, kɑ bong-ɑ dhɑnhø ɑ́kyel mɑ ɑ́döng, ni gïn-ɑ ɑ́göggi Eglön, gø ɑ́rënyi gen ki mendwøng, kí jie bënn. Adøøg Jöcwø Debir geki Isrɑil bëne, ɑnyïɑ̈gge ki gøn. Amɑge gøn geki rɑ̈dhe kí myërre bënn, ɑnɑ̈g gen tyëng Debir ki menrɑj, bong dhɑnhø ɑ́kyel mɑ ɑ́döng; gïn-ɑ ɑ́göggi Kibrön, kí Libnɑ̀ kí rɑ̈nhi gen, en ɑ ɑ́gögge Debir kí rɑ̈dhe thyew. Kɑ pinyɑni bëne, mɑg yi Jöcwø, gen ɑ myërri kelli kïttì, kí myërr-ɑ kuni wɑɑng wurlwɑl, kí myërri thwørø, kí myërri wɑ̈thi kïttì kí rɑ̈nhi gen bënn. Bong dhɑnhø ɑ́kyel mɑ ɑ́wiy e onëënø; o bene møg-ɑ ɑ́ceg Jwøng-ɑ Ácwɑ̈ɑ̈j, Jwøøg Isrɑil. Ge ɑ́tyɑm yi Jöcwø cɑg kì Gɑdic Berniyɑ̀ gïti Gɑdhɑ̀ kì kömi Nɑɑm Omeli Tɑr, kí Göcen gïti Gibeon. Rɑ̈nhhɑni bënn ɑ́tyɑm yi Jöcwø, kɑ piny gïn kwɑnye wïj ɑ́kyel, mɑ́ Jwøng-ɑ Ácwɑ̈ɑ̈j, Jwøøg Isrɑil ɑ ɑ́nyïɑ̈ggi kipe Isrɑil. Codhe, kɑ Jöcwø døøg-ɑ kɑɑl-ɑ ɑ́gur kì Gilgɑl geki Isrɑil bëne. Keny-ɑ ɑ́wɑ̈nhi wööni tyɑ̈mi Isrɑil yï Yɑbïn, rɑ̈ɑ̈dh Adhör, ɑöde yï Yöbɑb, rɑ̈ɑ̈dh Mɑdön, kí yï rɑ̈nhi Cimrön geki Akcɑp, kí yï rɑ̈nhi myërri kïttì kì wɑɑng wuudø, kí Töör Urdun kì wɑɑng wurlwɑl, kí Tɑɑy Gɑlelì, kí thɑ́ kïttì, kí thɑ̈ngi nɑm men-ɑ cyɑ̈gi ki Dör. Kɑ öd-ɑ yï tyëng Kɑnɑɑn ki wöödø thyew kì tøggi Nɑm Urdun tuung kí tuung, kí yï tyëng Amör, kí yï tyëng Kit, kí yï tyëng Perïdh, kí yï tyëng Yebus kì myërri kïttì, kí yï tyëng Kib møg-ɑ bëëdø kì thɑ Kïti Kermön kì piny Midhpɑ̀. Kɑ ge obëënø kí jøliny mø gen bënn, kwɑnni gen gïïr nɑ ɑyejø kì thɑ̈ngi nɑɑm omelø. Yï gen ɑ́dɑ kyënyì mø gïïr kí yɑ̈thi liny. Kɑ jøliny mø rɑ̈nhhɑni reb yi gen bënn, kɑ ge pëgg-ɑ yethi kemmì kì Dhøg Meröm, ge nenn-ɑ nyɑɑg ki Isrɑil. Aköbbi Jöcwø yi Jwøng-ɑ Ácwɑ̈ɑ̈j kinni, “Yï ko böggi yi gen. Piny nɑ men dhuki, ge ówëggɑ nɑ̈gø yi Isrɑil ge bënn, kɑ rɑ̈rri tyelli kyënyi gen kebbi yi yïn, kɑ yɑ̈thi liny mø gen rɑ̈b yi yïn.” Codhe, ɑpɑ̈ɑ̈r kömi gen yi Jöcwø geki jøge bënn kì Dhøg Meröm. Awëggi Isrɑil tyɑmi gen yi Jwøng-ɑ Ácwɑ̈ɑ̈j, ɑnɑ̈g ge gïn, kɑ ge cyeed wɑɑng wuudø pïd Misrepöth Mɑim kì Sïdön, gïti Töör Midhpɑ̀ kì wɑɑng cyɑ̈ɑ̈ng mwøl. Liny ɑ́nyïɑ̈ggi gïti kɑ ɑ́bongii ngetimɑ̈ɑ̈nø ɑ́kyel mɑ ɑ́döng e onëënø. Ge ɑ́göggi yi Jöcwø ki møg-ɑ ɑ́kwøb yi Jwøng-ɑ Ácwɑ̈ɑ̈j ceth, kɑ rɑ̈rri tyelli kyënyi gen kebbe, kɑ yɑ̈thi liny mø gïn rɑ̈be ki mɑc. Codhe, ɑdwöög Jöcwø, kɑ Adhör kwɑnye kɑ rɑ̈dhe nɑ̈ge, kì bøli kenyɑni Adhör ɑ́bëëd ɑ́ en ɑ teg kì kelli pödhhi rɑ̈nhhɑni bënn. Tyëng-ɑ ɑ́ying kɑɑlɑni ɑ́nɑ̈g bënn yi gen, bong dhɑnhø mɑ ɑ́wiy e onëënø, kɑ kɑɑl Adhör rɑ̈b. Kɑ̈ddɑni bënn ɑ́mɑg yi Jöcwø, kɑ rɑ̈nhi gïn nɑ̈ge, ni møg-ɑ ɑ́kwøb yi Mosɑ̀, bɑ̈ng Jwøng-ɑ Ácwɑ̈ɑ̈j. De tyëng Isrɑil kɑ̈dd-ɑ wɑ̈thi kïttì nuti rɑ̈ɑ̈b gen, den-ɑ́ Adhör ɑ ɑ́rɑ̈b yi Jöcwø. Jɑmm-ɑ per gen teg kì yethi kɑ̈ddɑni, kí dhög ɑ́kwɑny yi tyëng Isrɑil. De ji ɑ́nɑ̈g yi gen bënn, bong dhɑnhø mɑ ɑ́wiy e onëënø. Ni kɑ ɑ́ceg Jwøng-ɑ Ácwɑ̈ɑ̈j Mosɑ̀ bɑ̈nge, møgɑni ɑ́mëggi Jöcwø yi Mosɑ̀, kɑ ge mïdhi yi Jöcwø ceth. Kɑ Jöcwø møgɑni gwøge bënn ni kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j. Akɑɑb piny bëne yi Jöcwø, myërri wɑ̈thi kïttì geki myërri thɑ́ kïttì, kì wɑɑng wuudø geki wɑɑng wurlwɑl, kí piny Göcen bëne, kí ryɑng-ɑ wɑɑng wurlwɑl, kí Töör Urdun thyew. Kɑɑl-ɑ ɑ́göög ki mër ki tyëng Isrɑil bɑ Gibeon kete, kun-ɑ ɑ́bëëd yi kwï tyëng Kib. Kɑ̈jj-ɑ kyeelø ɑ́kwɑny kɑ liny. Muddi gen ɑ́gwøg yi Jwøng-ɑ Ácwɑ̈ɑ̈j ge teeg kipe nyɑɑg ki tyëng Isrɑil, kipe kinni o ge nɑ̈g bënn yi tyëng Isrɑil, e bong lɑ̈mpyëw, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j. Bøli kenyɑni ɑ ɑ́kedh Jöcwø, kɑ tyëng Anɑk nɑ̈ge, gen ɑ jøg-ɑ bɑ jödd bënn, møg-ɑ ɑ́bëëd kì myërri kïttì, kí Kibrön, kí Debir, kí Anɑb, kí myërri kïtti Yeudiyɑ̀ geki kïttì Isrɑil. Ge ɑ́nɑ̈g bënn yi Jöcwø kɑ kɑ̈ddi gïn rënye bënn. Bong tyëng Anɑk mɑ ɑ́döng kì piny Isrɑil, de ɑ́kyëllì nud mɑ ɑ́döng kì Gɑdhɑ̀, kí Gɑth geki Acdöd. Pinyɑni bëne ɑ́kwɑny yi Jöcwø, ni kɑ ɑ́köbbi Mosɑ̀ yi Jwøng-ɑ Ácwɑ̈ɑ̈j, ɑmëggi pinyɑni Isrɑil yi Jöcwø ɑ́ mi gen, gø pɑ̈nge ɑ́ bud kì kelli wɑ̈thi kɑ̈lli Isrɑil. Codhe ɑywöm ji ri gen ki liny. Mosɑ̀ tyëng Isrɑil ɑ́peeje be tyɑmi rɑ̈nhì ɑ́ryew, kì wɑɑng cyɑ̈ɑ̈ng mwøl kì løøg Nɑm Urdun, kipe kinni o piny gen kwɑny. Pinyɑni cɑ̈g-ɑ́ɑ̀ Töör Arnön gïti Nɑm Urdun kì wɑɑng wuudø, e pïd-ɑ Kïti Kermön. Sïön rɑ̈ɑ̈dh Amör ɑ bëëdø kì Kicbön, piny-ɑ ɑ́jɑɑg yi en wɑ̈dh-ɑ Aröeer kì tøg töör Arnön, e kɑ̈l-ɑ dyëri Nɑm Arnön gïti Nɑm Yɑbok, wïj keew tyëng Amön, e kwɑny-ɑ budi piny Gilyɑd. Kew kì wɑɑng cyɑ̈ɑ̈ng böörø bɑ Töör Urdun, cɑg kì Tɑɑy Gɑlelì kì wɑɑng wuudø gïti Luuy Omelø kì wɑɑng wurlwɑl, e kwɑny-ɑ piny-ɑ wɑɑng cyɑ̈ɑ̈ng mwøl kì Luuy Omelø gïti Bet Yecimöth gïti Kïti Pisgɑ̀. Og rɑ̈ɑ̈dh Bɑcɑn ɑ́tyɑm yi gen thyew, ɑ ɑ́bëëd ɑ́ e kete ɑ dööngø kì ri tyëng Repɑim. Ájyɑ̈ɑ̈g ɑ Actɑröth geki Edrey. Ájɑɑg-ɑ Kïti Kermön kì wɑɑng wuudø gïti Sɑlekɑ̀ kì wɑɑng cyɑ̈ɑ̈ng mwøl. Bɑcɑn bëne ɑ́jɑɑg-ɑ yi en thyew, gïti piny Gecur geki Mɑɑkɑ̀ kì wɑɑng cyɑ̈ɑ̈ng mwøl. Kí bun-ɑ wɑɑng wuudø kì ri piny Gilyɑd gïti piny Sïön, rɑ̈ɑ̈dh Kicbön kì wɑɑng wurlwɑl. Rɑ̈nhhɑni ryeet ɑ́tyɑm yi Mosɑ̀ geki tyëng Isrɑil. Mosɑ̀, bɑ̈ng Jwøng-ɑ Ácwɑ̈ɑ̈j, piny gïn ɑ́mëgge wɑ̈thi kɑ̈lli Ruben, kí Gɑd, kí budi gøl Mɑnɑsè, gøn-ɑ́ mi gen. Jöcwø geki tyëng Isrɑil rɑ̈nhi piny-ɑ wɑɑng cyɑ̈ɑ̈ng böörø kì kömi Nɑm Urdun, ɑ́tyɑm yi gen bënn, cɑg kì Bɑɑl Gɑd, kí töör Lubnɑn gïti Kïti Alɑk kì wɑɑng wurlwɑl, kì buti Edöm. Apɑ̈ngi pinyɑni yi Jöcwø kì kelli wɑ̈thi kɑ̈llì; gøl mëgg-ɑ mee. Piny-ɑ ɑ́pɑ̈ngi yi Jöcwø reb-ɑ myërri kïttì, kí myërri thɑ́ kïttì kì wɑɑng cyɑ̈ɑ̈ng böörø, kí Töör Urdun geki myërri thɑ́ kïttì, kí myërr-ɑ luung piny kì wɑɑng cyɑ̈ɑ̈ng mwøl, kí piny-ɑ thwøwø kì wɑɑng wurlwɑl. Pinyɑni ɑ́bëëd ɑ́ pödhi tyëng Kit, kí Amör, kí Kɑnɑɑn, kí Perïdh, kí Kib, kí Yebus. Tyëng Isrɑil ɑ́tyɑm-ɑ rɑ̈nhì møg: Rɑ̈ɑ̈dh Yerikö, kí rɑ̈ɑ̈dh Aɑy kì buti Betiil. Rɑ̈ɑ̈dh Yerusɑlem, kí rɑ̈ɑ̈dh Kibrön. Rɑ̈ɑ̈dh Yɑrmuth, kí rɑ̈ɑ̈dh Lɑkic. Rɑ̈ɑ̈dh Eglön, kí rɑ̈ɑ̈dh Gedher. Rɑ̈ɑ̈dh Debir, kí rɑ̈ɑ̈dh Geder. Rɑ̈ɑ̈dh Órmɑ̀, kí rɑ̈ɑ̈dh Arɑd. Rɑ̈ɑ̈dh Libnɑ̀, kí rɑ̈ɑ̈dh Adulɑm. Rɑ̈ɑ̈dh Mɑkedɑ̀, kí rɑ̈ɑ̈dh Betiil. Rɑ̈ɑ̈dh Tɑpuɑ̀, kí rɑ̈ɑ̈dh Eper. Rɑ̈ɑ̈dh Ápek, kí rɑ̈ɑ̈dh Lɑcɑrön. Rɑ̈ɑ̈dh Mɑdön, kí rɑ̈ɑ̈dh Adhör. Rɑ̈ɑ̈dh Cimrön Merön, kí rɑ̈ɑ̈dh Akcɑp. Rɑ̈ɑ̈dh Tɑɑnɑk, kí rɑ̈ɑ̈dh Megidø. Rɑ̈ɑ̈dh Kedec, kí rɑ̈ɑ̈dh Yokneɑm kì Kɑrmel. Rɑ̈ɑ̈dh Dör, kì myërri gɑ̈d, kí rɑ̈ɑ̈dh Göyïm kì Gɑlelì. Kí rɑ̈ɑ̈dh Tirdhɑ̀. Kwɑnni gen bënn bɑ rɑ̈nhì pyɑ̈r ɑ́dɑ̈g wïdɑ́kyel. Anɑn Jöcwø ɑ́døngi, kɑ runne óngënyø, ɑköbbii yi Jwøng-ɑ Ácwɑ̈ɑ̈j kinni, “Yï ɑ́døngi, o runní ɑ́ngënyi, de pìny-ɑ dwɑddi kwɑnyø nudd ge gïïr. Møg bene gen pìny-ɑ ɑ́döng, ɑ nudd ge dwɑdd-ɑ kwɑnyø, piny Pelistiyɑ̀ bëne, kí piny Gecur bëne kì wɑɑng cyɑ̈ɑ̈ng mwøl kì wïj keew Rïp, kí piny tyëng Abɑ̀ bëne kì kuni wɑɑng wurlwɑl. Thyew piny-ɑ cɑ̈gi kì ri Nɑm Cïör kì wïj keew Rïp gïti wɑɑng wuudø, kí Ekrön nuti kwɑnyø, ɑ løg piny Kɑnɑɑn, kí piny-ɑ bëëd yi rɑ̈nhi Pelistiyɑ̀ gɑ ɑ́bïj, ɑ kɑ̈ddi gen bɑ Gɑdhɑ̀, kí Acdöd, kí Ackelön, kí Gɑth, kí Ekrön. Kí piny Kɑnɑɑn geki Meɑrɑ̀, bɑ mi tyëng Sïdön gïti Ápek kì wïj keew tyëng Amör. Kí piny tyëng Gebɑl, kí piny Lubnɑn bëne kì wɑɑng cyɑ̈ɑ̈ng mwøl, cɑg kì Bɑɑl Gɑd ɑ ying kuni wɑɑng wurlwɑl, kí Kïti Kermön gïti Ókømi Amɑth. Kí piny tyëng Sïdön bëne, tyëng-ɑ bëëdø kì kelli kïttì kì kɑɑm Kïttì Lubnɑn geki Misrepöth Mɑim. Ge ócyeddɑ kì bøli tyëng Isrɑil. Kɑ pìnyɑni pɑ̈ngí kì kelli tyëng Isrɑil ni kɑ ɑ́cegɑ yïn ceth. Anɑn, pɑ̈ngí piny men kì kelli wɑ̈thi kɑ̈llì ɑ́bïngwen, kí budi gøl Mɑnɑsè ɑ́ mi gen. Pɑ̈ngí piny-ɑ wɑɑng cyɑ̈ɑ̈ng mwøl kì kömi Nɑm Urdun.” Gøl Ruben, kí gøl Gɑd, kí budi gøl Mɑnɑsè møg-ɑ kyeelø, ɑ́rum ki yïddø kì piny-ɑ ɑ́muuj yi Mosɑ̀, bɑ̈ng Jwøng-ɑ Ácwɑ̈ɑ̈j, kì løøg Nɑm Urdun, kì wɑɑng cyɑ̈ɑ̈ng mwøl. Piny gen pïd-ɑ Aröeer kì tøg töör Arnön, kí kɑɑl-ɑ dyëri törɑni, kí tör-ɑ cɑ̈gi kì Medebɑ̀ gïti Dïbön. Kí kɑ̈ddi Sïön, rɑ̈ɑ̈dh Amör, ɑ ɑ́jyɑ̈ɑ̈g kì Kicbön gïti piny Amön. Kí Gilyɑd, kí piny Gecur geki Mɑɑkɑ̀, kí Kïti Kermön bëne, kí piny Bɑcɑn bëne gïti Sɑlekɑ̀. Kí piny Rɑ̈dh Og, ɑ ɑ́bëëd ɑ́ e kete ɑ döngø kì ri tyëng Repɑim, ɑ ɑ́jyɑ̈ɑ̈g kì Actɑröth kí Edrey. Tyëngɑni bënn ɑ́tyɑm yi Mosɑ̀ kɑ gï cyedde. Tyëng Gecur, kí tyëng Mɑɑkɑ̀ nuti cyeddø yi tyëng Isrɑil, de ge ɑ́cög ge obëëdø kì Isrɑil gïti dicyɑ̈ngtïn. Bong piny mɑ ɑ́mëggi Kwɑrri Leebì yi Mosɑ̀ ni kɑ ɑ́köbbii yi Jwøng-ɑ Ácwɑ̈ɑ̈j cøn. Ge nyi yïd-ɑ́ɑ̀ ri gëdhh-ɑ nyi rɑ̈bbi Jwøng-ɑ Ácwɑ̈ɑ̈j, Jwøøg Isrɑil kì wïj këli lɑm. Kwï piny ɑ́mëggi wïj gøl Ruben yi Mosɑ̀ ɑ́ mi gen. Piny gen gït-ɑ Aröeer kì tøg töör Arnön, kí kɑɑl-ɑ dyër törɑni, kí töör Medebɑ̀. Piny gen reb-ɑ Kicbön, kí kɑ̈dd-ɑ wïj kwøømø bënn, ɑ løg. Dïbön, kí Bɑmöth Bɑɑl, kí Bet Bɑɑlmeon, kí Yɑɑdh, kí Kedemöth, kí Mepɑɑth, kí Kiriɑtɑim, kí Sibmɑ̀, kí Dhereth Cɑ̈ɑ̈r kí wɑ̈thi kwøøm kí yij törɑni. Kí Betpeor, kí myërri tøg Kïti Pisgɑ̀, kí Bet Yecimöth, e reb-ɑ myërri yij tör bënn, kí piny rɑ̈ɑ̈dh Amör, Sïön bëne, gen ɑ rɑ̈nh-ɑ ɑ́jyɑ̈ɑ̈g kì Kicbön. Ádɑ pëjji jurrì ɑ́bïj mɑ ɑ́jyɑ̈ɑ̈g kì Midyɑn, ɑ løg Ebì, kí Rekem, kí Dhur, kí Ur, kí Rebɑ̀. Ge bënn, ge ɑ́jyɑ̈ɑ̈g kɑ Rɑ̈dh Sïön. Jɑɑl rɑng, Bɑlɑɑm wɑ̈d Beor, bɑ dhɑnhø ɑ́kyel kì kelli tyëng-ɑ ɑ́nɑ̈g yi Isrɑil Nɑm Urdun ɑ́bëëd ɑ́ keew gøl Ruben kì wɑɑng cyɑ̈ɑ̈ng böörø, bene myërrɑni ɑ ɑ́mëggi tyëng gøl Ruben gøn ɑ́ mi gen. Tyëng gøl Gɑd ɑ́nëngi yi Mosɑ̀ thyew ki kwï pinyɑni ɑ́ mi gen. Pinyɑni ɑ́reb-ɑ Yɑdher, kí kɑ̈ddi Gilyɑd bënn, kí budi piny Amön gïti Aröeer, ɑ ying buti Rɑbɑ̀ kì wɑɑng cyɑ̈ɑ̈ng mwøl. Piny gen cɑ̈g-ɑ́ɑ̀ Kicbön gïti Rɑmɑth Midhpè, kí Betonïm, cɑg kì Mɑɑ̈nɑim gïti keew Debir. Kì yij Töör Urdun, piny gen reb-ɑ Bet Arɑm, kí Bet Nimrɑ̀, kí Suköth, kí Dhɑpön, kí kwï piny Rɑ̈dh Sïön, rɑ̈ɑ̈dh Kicbön. Keew gen kì kuni wɑɑng cyɑ̈ɑ̈ng böörø ɑ́bëëd ɑ́ Nɑm Urdun e gït-ɑ Tɑɑy Gɑlelì kì wɑɑng wuudø. Bene kɑ̈ddɑni ɑ ɑ́mëggi tyëng gøl Gɑd gïn ɑ́ mø gen. Budi gøl Mɑnɑsè ɑ́rum ki nëngø ki piny yi Mosɑ̀. Piny gen ɑ́gït-ɑ Mɑɑ̈nɑim e reb-ɑ Bɑcɑn bëne, kí piny Rɑ̈dh Og bëne, kí myërri Yɑir gɑ pyɑ̈r ɑ́bïkyel bënn thyew. Áreb-ɑ budi Gilyɑd, kí Actɑröth geki Edrey, kí kɑɑl-ɑ ɑ́jyɑ̈ɑ̈g yi Rɑ̈dh Og, rɑ̈ɑ̈dh Bɑcɑn. Møgɑni bënn ɑ́mëggi budi gøl Mɑkir wɑ̈d Mɑnɑsè. Bene kër-ɑ ɑ́pɑ̈ngi piny-ɑ wɑɑng cyɑ̈ɑ̈ng mwøl kì bøli Yerikö kì løøg Nɑm Urdun ɑnɑn yi Mosɑ̀ keny-ɑ ɑ́yinge thwøri Moɑb. De bong piny mɑ ɑ́mëggi kwɑrri Leebì yi Mosɑ̀. Gï ɑ́köbbe kinni ge nyi yïd-ɑ́ɑ̀ ri gëdhhi Jwøng-ɑ Ácwɑ̈ɑ̈j, Jwøøg Isrɑil. Ókwërø Eliɑdhɑr, geki Jöcwø wɑ̈d Nun, kí pëjji kɑ̈lli Isrɑil, gen ɑ ɑ́pɑ̈ngi piny Kɑnɑɑn, piny-ɑ wɑɑng cyɑ̈ɑ̈ng böörø kì løøg Nɑm Urdun kì kelli tyëng Isrɑil. Ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j, piny wɑ̈thi kɑ̈llì ɑ́bïngwen kì wɑɑng cyɑ̈ɑ̈ng böörø kì løøg Nɑm Urdun ɑ́leng kɑ wél. Piny ɑ́pɑ̈ngi yi tyëng Isrɑil ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j ceth. Kɑ tyëng Yeudiyɑ̀ bï-ɑ yï Jöcwø kì Gilgɑl, kí Kɑlib wɑ̈d Yepunɑ̀ jɑl Kenidh kì kelli gen. Aköbbi Jöcwø yi Kɑlib kinni, “Kwøbb-ɑ ɑ́köbbi Mosɑ̀, jɑlkwøbbi Jwøk yi Jwøng-ɑ Ácwɑ̈ɑ̈j kiperee kì Gɑdic Berniyɑ̀, ngɑ̈nyi yi yïn. Yɑ ɑ́bëëd runnɑ bɑ pyɑ̈r ɑ́ngwen keny-ɑ ɑ́ör yɑn kì Gɑdic Berniyɑ̀, be lyeewi piny yi Mosɑ̀, bɑ̈ng Jwøng-ɑ Ácwɑ̈ɑ̈j, kɑ muujɑ kwøbb-ɑ dyër ceth. De jøg-ɑ ɑ́kedh wøn, pëthi ji ɑ́thödhi yi gen ki wɑ̈ɑ̈rø, kɑ løg-ɑ yɑn, yɑ ketɑ ɑ ɑ́ngɑ̈dh Jwøng-ɑ Ácwɑ̈ɑ̈j, Jwøgɑ ceth. Aköngi Mosɑ̀ dicyɑ̈ngɑni kinni, ‘Piny-ɑ́ yije ɑ́ywööny tyelí bëne, óbëëd ɑ́ mií, wuki kwɑrrí gïti ɑtheer, mɑ́ yï ɑ́cyɑ̈dhi kì bɑng Jwøng-ɑ Ácwɑ̈ɑ̈j, Jwøgɑ ceth!’ Anɑn, yɑ ɑ́mïdhi yi Jwøng-ɑ Ácwɑ̈ɑ̈j, yɑ onëënø ki runn pyɑ̈r ɑ́ngwen ni kɑ ɑ́köbbe Mosɑ̀ kɑ̈ng-ɑ ɑ́cyɑ̈dhi Isrɑil kì pɑ̈l. Anɑn dicyɑ̈ngtïn yïɑ dɑ runn pyɑ̈r ɑ́bïdɑ̈g wïdɑ́bïj. Yɑ nudd yɑ teeg dicyɑ̈ngtïn ni kɑ ɑ́bëëdɑ yɑ teg kì cyɑ̈ng-ɑ ɑ́ör yɑn yi Mosɑ̀, yɑ teeg ki liny geki cyɑ̈dhø. Mëggí yɑn myërri kelli kïttì, møg-ɑ ɑ́kwøb yi Jwøng-ɑ Ácwɑ̈ɑ̈j keny-ɑ ɑ́dwöög kì cyɑ̈ngɑni, kinni gø ómëgge yɑn. Wu ɑ́köbbi yi wøn kinni myërrɑni bëëd-ɑ yi ji mø døngø, mø cwølli gɑ tyëng Anɑk, ge bëëd ɑ yethi kɑ̈dd mø thøø yi gerø ki dör. Yɑ ócɑɑg kɑ kønyø yi Jwøng-ɑ Ácwɑ̈ɑ̈j mɑwɑnø, ɑcyeddɑ gen ni kɑ ɑ́kööb Jwøng-ɑ Ácwɑ̈ɑ̈j.” Kɑ Kɑlib wɑ̈d Yepunɑ̀ kwëng yi Jöcwø, kɑ Kibrön mëgge gøn ɑ́ mee. Kibrön nudd ɑ́ mi gøl Kɑlib wɑ̈d Yepunɑ̀ jɑl Kenidh gïti dicyɑ̈ngtïn, mɑ́ e ɑ́cyɑ̈dh ɑ bɑng Jwøøg Isrɑil, Jwøng-ɑ Ácwɑ̈ɑ̈j. Keny-ɑ́ nuti kwɑɑny Kibrön yi Kɑlib, ɑ́cwøl ɑ́ Kiriɑt Arbɑ̀. O ɑ́bëëd ɑ́ en ɑ dwøng kì kelli kɑ̈ddi kwɑrri Anɑk. Codhe, ɑywöm ji ri gen ki liny. Gøl Yeudɑ̀ piny-ɑ bɑ mi gen ɑ́leng, e pɑ̈ng ɑ kelli kɑ̈lli gen. Piny gen ɑ́wɑ̈dh-ɑ cögi pɑ̈ɑ̈l Dhin kì kuni wɑɑng wurlwɑl, kì ri keew Edöm. Keew gen kì wɑɑng wurlwɑl kɑ̈l-ɑ ri cögi Luuy Omelø, e kedh-ɑ kuni wɑɑng wurlwɑl, cɑg kì Ókømi Akrɑbïm gïti Dhin. Rengi e kɑ̈l-ɑ kuni wɑɑng wurlwɑl kì ri Gɑdic Berniyɑ̀, e cør-ɑ Ëdhrön gïti Adɑr, e töng-ɑ ri Kɑrkɑ̀, e kedh-ɑ Adhmön, e kɑ̈l-ɑ ri nɑm-ɑ ri keew Rïp gïti Nɑɑm Omeli Tɑr, keny-ɑ cöög yi kewɑni. Bene keew Yeudiyɑ̀ geki Isrɑil kì kuni wɑɑng wurlwɑl ɑnɑn. Keew piny gøl Yeudɑ̀ kì wɑɑng cyɑ̈ɑ̈ng mwøl, ɑ́bëëd ɑ́ Luuy Omelø, gïti keny-ɑ töngi Nɑm Urdun ree. Kenyɑni bene cɑ̈gi keew Yeudiyɑ̀ kì wɑɑng wuudø, gïti Bet Oglɑ̀ e kɑ̈l-ɑ kuni wɑɑng wuudø kì Bet Arbɑ̀. Codhe, o kedhe gïti Kïti Böɑn wɑ̈d Ruben. O kewɑni cɑ̈ge kì Töör Akørr gïti Debir, o tönge Gilgɑl kì tung-ɑ di Adumïm kì kuni wɑɑng wurlwɑl kì ri törɑni. Kewɑni wɑ̈dh-ɑ ri nyingi pïi Ein Cemec gïti Enrögel, e kɑ̈l-ɑ yij Töör Kinöm kì kuni wɑɑng wurlwɑl, kì ri kïn-ɑ köme ógeer Yerusɑlem, kɑɑl tyëng Yebus. O kew pödhe wɑ̈thi ótøng-ɑ kuni wɑɑng cyɑ̈ɑ̈ng böörø kì ri Töör Kinöm, kì ri cögi Töör Repɑim kì wɑɑng wuudø. Kewɑni kɑ̈l-ɑ wɑ̈thi kïttì gïti nyingi pïi Neptoɑ̀, o cɑ̈ge kì kenyɑni gïti kɑ̈ddi Kïti Eprön, e töng-ɑ kuni Bɑɑlɑ̀, ɑ bɑ Kiriɑt Yeɑrïm, e wen-ɑ ree kuni wɑɑng cyɑ̈ɑ̈ng böörø kì ri Bɑɑlɑ̀ gïti kïtti Edöm, e pödh-ɑ tøg Kïti Yeɑrïm (wɑlɑ̀ Kesɑlön) kì wɑɑng wuudø. Codhe, o tönge piny kì ri Bet Cemec, e pödh-ɑ Timnɑ̀. Codhe, e kew kɑ̈l-ɑ ri ótong kì kuni wɑɑng wuudø kì ri Ekrön, e töng-ɑ kuni Cikerön, e kɑ̈l-ɑ ri Kïti Bɑɑlɑ̀ gïti Yɑmniyɑ̀. Cög ɑ ri Nɑɑm Omeli Tɑr, menɑni bene keew kuni wɑɑng cyɑ̈ɑ̈ng böörø. Bene keew piny-ɑ bëëd yi gøl Yeudɑ̀ ɑnɑn. Ni kɑ ɑ́ceg Jöcwø yi Jwøng-ɑ Ácwɑ̈ɑ̈j, kwï piny Yeudɑ̀ ɑ́mëggi Kɑlib wɑ̈d Yepunɑ̀, ɑ løg jɑl ɑ́kyel kì kelli jø wïj gøl Yeudɑ̀. Ámëgg-ɑ Kiriɑt Arbɑ̀, wïyi Anɑk, ɑ cwøl ɑ́ Kibrön. Acyeddi kwɑrri Anɑk gɑ ɑ́dɑ̈g yi Kɑlib kì kenyɑni, ɑ løg gøl Cecɑy, kí Akimɑn, kí Tɑlmɑy, Akedhi Kɑlib be nyïɑ̈ggø ki tyëng-ɑ bëëdø kì Debir. Debir ɑ́cwøl ɑ́ Kiriɑt Seper. Akööb Kɑlib kinni, “Ngɑn-ɑ ónyïɑ̈ggi ki Kiriɑt Seper kɑ gø mɑge, ómëggɑ nyɑrɑ Aksɑ̀ ɑ́ dhɑjø.” Amɑɑg kɑɑlɑni yi Othniel wɑ̈d Kenɑdh ómï Kɑlib. Kɑ mëggi Aksɑ̀ ɑ́ dhɑjø yi Kɑlib. Kì cyɑ̈ɑ̈ng nywöm, ɑcwɑɑg Aksɑ̀ mɑl yi Othniel kinni, kwɑjje wïye kinni dwɑdd-ɑ nyingi pï. Keny-ɑ ɑ́yïnhe piny kì kömi ɑdere, ɑpyëjii yi Kɑlib wïye kinni, “Á ngø ɑ dwɑddi yi yïn?” Alögge kinni, “Nëngí yɑn ki nyingi pï, mɑ́ yɑ ɑ́cïbí piny me thwøwø.” Kɑ nyingi pïg-ɑ kwøømø geki nyingi pïg-ɑ yij tör mëggii yi Kɑlib. Møg bene gen pìny-ɑ ɑ́mëggi wɑ̈thi kɑ̈lli Yeudɑ̀ gïn-ɑ́ mø gen. Kɑ̈dd-ɑ bɑ mø tyëng gøl Yeudɑ̀ møg-ɑ wïj tung-ɑ wɑɑng wurlwɑl, kì kuni keew Edöm ɑ́bëëd gɑ Kɑbdhiil, kí Eder, kí Yɑgur, kí Kinɑ̀, kí Dimönɑ̀ kí Adɑdɑ̀ kí Kedec, kí Adhör, kí Ithnɑn. Kí Dhïp, kí Telem, kí Beɑlöth, kí Adhör Adɑtɑ̀, kí Keryöth Ëdhrön, kí Amɑm, kí Cemɑ̀, kí Mölɑdɑ̀, kí Adhɑr Gɑdɑ̀, kí Ëcmön, kí Betpelet, kí Adhɑr Cuɑɑl, kí Bircebɑ̀, kí Bidhyöthiyɑ̀, kí Bɑɑlɑ̀, kí Iim, kí Edhem, kí Eltölɑd, kí Kesil, kí Órmɑ̀, kí Dhiglɑg, kí Mɑdmɑnɑ̀, kí Sɑnsɑnɑ̀, kí Lebɑöth, kí Cilkim, kí Ain, kí Rimön. Ge bënn, ge bɑ kɑ̈dd pyɑ̈r ɑ́ryew wïdɑ́bïngwen kí myërri gen. Kɑ̈ddi thɑ́ kïttì bɑ Ectɑol, kí Dhorɑ̀, kí Acnɑ̀, kí Dhɑnoɑ̀, kí Ein Gɑnïm, kí Tɑpuɑ̀, kí Enɑm, kí Yɑrmuth, kí Adulɑm, kí Sökö, kí Adhekɑ̀, kí Cɑɑrɑim, kí Adithɑim, kí Gederɑ̀ geki Gederötɑim, ge bɑ kɑ̈dd pyɑ̈rø wïdɑ́ngwen kí myërri gen. Kí Dhenɑn thyew, kí Adɑcɑ̀, kí Megdɑlgɑd, Kí Dileɑn, kí Midhpɑ̀, kí Yoktheel, Kí Lɑkic, kí Bodhkɑth, kí Eglön kí Kɑbön, kí Lɑmɑm, kí Kitlïc, kí Gederöth, kí Bet Dɑgön, kí Nɑɑmɑ̀ geki Mɑkedɑ̀. Ge bënn ge bɑ kɑ̈dd pyɑ̈rø wïdɑ́bïkyel kí myërri gen. Kí Libnɑ̀ thyew, kí Ether, kí Acɑn, kí Iptɑ̀, kí Acnɑ̀, kí Nedhib, kí Keilɑ̀, kí Akdhïb geki Mɑrecɑ̀, ge bɑ kɑ̈dd ɑ́bïngwen kí myërri gen. Kí Ekrön thyew, geki myërre. Kí kɑ̈dd geki myërri gen bënn møg-ɑ cyɑ̈gi ki Acdöd, cɑg kì Ekrön gïti Nɑɑm Omeli Tɑr. Kí Acdöd geki Gɑdhɑ̀ thyew, kí myërri gen gïti nɑm-ɑ wïj keew Rïp, kí myërr-ɑ kömi Nɑɑm Omeli Tɑr. Kì myërri kelli kïttì, ɑ́dɑ Cɑmïr, kí Yɑtir, kí Sökö, kí Dɑnɑ̀, kí Kiriɑt Seper (Debir) kí Anɑb, kí Ectemoɑ̀, kí Anïm, kí Göcen, kí Kölön geki Gilø, ge bɑ kɑ̈dd pyɑ̈rø wïdɑ́kyel kí myërri gen. Kí Árɑb thyew, kí Dumɑ̀, kí Ecɑn kí Yɑnïm, kí Bet Tɑpuɑ̀, kí Ápekɑ̀, kí Umtɑ̀, kí Kibrön geki Dhiyör, ge bɑ kɑ̈dd ɑ́bïngwen kí myërri gen. Kí Mɑon thyew, kí Kɑrmel, kí Dhïp, kí Yutɑ̀, kí Yidhriil, kí Yokdeɑm, kí Dhɑnoɑ̀, kí Kɑin, kí Gibeɑ̀ geki Timnɑ̀. Ge bɑ kɑ̈dd pyɑ̈rø kí myërri gen. Kí Alul, kí Betdhur, kí Gedör kí Mɑɑrɑth, kí Betɑnöth geki Eltekön, ge bɑ kɑ̈dd ɑ́bïkyel kí myërri gen. Kí Kiriɑt Bɑɑl ɑ bɑ Kiriɑt Yeɑrïm, kí Rɑbɑ̀, ge bɑ kɑ̈dd ɑ́ryew kí myërri gen. Kì yij ryɑng, ɑ́dɑ Bet Árɑbɑ̀, kí Mïdïn, kí Sekɑkɑ̀, kí Nibcɑn, kí kɑɑl Omelø geki Ein Gedì, ge bɑ kɑ̈dd ɑ́bïkyel kí myërri gen. De tyëng Yebus, tyëng-ɑ ɑ́bëëd kì Yerusɑlem, nuti cyeddø yi gøl Yeudɑ̀, ge bëëdø kì kej ɑ́kyel geki gøl Yeudɑ̀ kì Yerusɑlem, gïti dicyɑ̈ngtïn. Piny kwɑrri Yosep, kewe kì wɑɑng wurlwɑl cɑ̈g-ɑ́ɑ̀ kömi Nɑm Urdun kì buti Yerikö kì wɑɑng cyɑ̈ɑ̈ng mwøl kì buti nyingi pïi Yerikö, e kɑ̈l-ɑ yij pɑ̈l. O døøge ki cɑ̈gø kì Yerikö e kɑ̈l-ɑ yethi myërri kïttì, gïti Betiil. O døøge ki cɑ̈gø kì Betiil gïti Ludh, e pɑ̈dh-ɑ Atɑröth Adɑr, kun-ɑ ɑ́bëëd yi tyëng Arkì. Codhe, o kedhe piny tyëng Yɑpleth kì wɑɑng cyɑ̈ɑ̈ng böörø, gïti yij tör kì Bet Örøn. O tönge Gedher, o thøwe kömi Nɑɑm Omeli Tɑr. Kwɑrri Yosep, ɑ løg gøl Eprɑim geki gøl Mɑnɑsè gen ɑ ɑ́mëggi pinyɑni gøn ɑ́ mi gen. Keew gøl Eprɑim cɑ̈g-ɑ́ɑ̀ Atɑröth Adɑr e ködd-ɑ wɑɑng cyɑ̈ɑ̈ng mwøl gïti myërri kwøømi Bet Örøn, e töng-ɑ Nɑɑm Omeli Tɑr gïti Mikmethɑth kì wɑɑng wuudø. O tönge kuni wɑɑng cyɑ̈ɑ̈ng mwøl kì Tɑɑnɑth Cilø, e pödh-ɑ Yɑnoɑ̀ kì wɑɑng cyɑ̈ɑ̈ng mwøl. Codhe, o tönge piny kì Yɑnoɑ̀ e pödh-ɑ Atɑröth geki Nɑɑrɑ̀, o thøwe Yerikö kì kömi Nɑm Urdun. O kewɑni cige kedhø kì Tɑpuɑ̀ e pödh-ɑ dhøg Kɑnɑ̀, o thøwe Nɑɑm Omeli Tɑr. Bene piny-ɑ ɑ́mëggi gøl Eprɑim gøn ɑ́ mi gen ɑnɑn, de kwï kɑ̈dd-ɑ tøggi pinyɑni geki myërri gen ge ɑ́mëggi gøl Eprɑim. De tyëng Kɑnɑɑn møg-ɑ ɑ́bëëd kì Gedher nuti cyeddø yi tyëng gøl Eprɑim, ge obëëdø kí gïn gïti dicyɑ̈ngtïn, de ge ɑ́gwøg yi tyëng gøl Eprɑim gɑ tyëng nyi göggi gen ni bɑ̈ngg. Kwï piny ɑ́mëggi gøl Mɑnɑsè kì kömi Nɑm Urdun kì wɑɑng cyɑ̈ɑ̈ng böörø yi Jöcwø, mɑ́ ge bɑ kwɑrri Mɑnɑsè kɑyi Yosep. Mɑkir bɑ kɑyi Mɑnɑsè, o Mɑkir yïe ɑ́dɑ wɑ̈de mø cwøl ɑ́ Gilyɑd. Mɑkir ɑ́bëëd ɑ́ jɑl-liny me teg, ɑmëggii piny Gilyɑd geki Bɑcɑn yi Jöcwø kì wɑɑng cyɑ̈ɑ̈ng mwøl kì løøg Nɑm Urdun. Anɑn piny-ɑ løøg Nɑm Urdun kì wɑɑng cyɑ̈ɑ̈ng böörø ɑ́pɑ̈ngi yi Jöcwø kì kelli gøl Mɑnɑsè møg-ɑ ɑ́döng ge nuti nëngø, kwɑrri Mɑnɑsè yɑɑg-ɑ cwøw bɑ Abiedher kí Ëlek, kí Asriel, kí Cekïm, kí Ëper, kí Cemïdɑ̀. Bene gen ɑ ɑ́bëëd gɑ jyɑ̈ggi wɑ̈thi kɑ̈llì. Wɑ̈thi kɑ̈lli gen bënn ɑ́nëngi ki piny kì løøg Nɑm Urdun kì wɑɑng cyɑ̈ɑ̈ng mwøl. Gilyɑd wɑ̈d Mɑkir, wɑ̈d Mɑnɑsè ɑ́bëëd yïe dɑ wɑ̈de me cwøl ɑ́ Dhelopekɑd, mɑ́ yïe ɑ́bong-ɑ wɑ̈dd, de yïe ɑ́dɑ nyige womɑ̈nn, nyingi gen bɑ Mɑklɑ̀, kí Nöö, kí Oglɑ̀, kí Milkɑ̀, kí Tirdhɑ̀. Akedhi woɑni yï ókwërø Eliɑdhɑr, geki Jöcwø kí pëjjì, ɑkööb gen kinni, “Jwøng-ɑ Ácwɑ̈ɑ̈j Mosɑ̀ ɑ́cege kinni i nëngi wøn ki piny ni kɑ ɑ́nëngi wɑddi wøn yɑɑg-ɑ cwøw.” Anëngi gen ki piny kyeel ki wɑddi gen yɑɑg-ɑ cwøw ni kɑ ɑ́kööb Jwøng-ɑ Ácwɑ̈ɑ̈j cøn. Piny Mɑnɑsè cɑ̈g-ɑ́ɑ̀ kì Aceer e gït-ɑ Mikmethɑth kì wɑɑng cyɑ̈ɑ̈ng mwøl kì bøli Cekïm. O kewɑni kɑ̈l-ɑ wɑɑng wurlwɑl gïti nyingi pï kì Tɑpuɑ̀. Piny-ɑ buti Tɑpuɑ̀ bɑ piny gøl Mɑnɑsè de kɑɑl Tɑpuɑ̀ bɑ mi gøl Eprɑim. Codhe, o kewɑni kedhe gïti dhøg Kɑnɑ̀. Myërr-ɑ wɑɑng wurlwɑl kì kömi dhøngɑni bɑ mø Eprɑim cɑgg ɑ́ kɑ̀ ying gen piny gøl Mɑnɑsè. Codhe, o keew piny Mɑnɑsè kedhe kì kömi dhøngɑni kì wɑɑng wuudø, o thøwe Nɑɑm Omeli Tɑr, Eprɑim ying-ɑ wɑɑng wurlwɑl, O Mɑnɑsè yinge wɑɑng wuudø, o Nɑɑm Omeli Tɑr bene keew gen kì wɑɑng cyɑ̈ɑ̈ng böörø. Aceer ying-ɑ wɑɑng wuudø kì kuni wɑɑng cyɑ̈ɑ̈ng böörø, o Isɑkɑr ying-ɑ wɑɑng wuudø kì kuni wɑɑng cyɑ̈ɑ̈ng mwøl. Kì yij piny Isɑkɑr geki piny Aceer, Mɑnɑsè yïe ɑ́dɑ Betcɑn geki Iblïm, kí myërri gen. Kí Dör geki Tɑɑnɑk, kí Megidø kí myërri gen. Tyëng gøl Mɑnɑsè, tyëng Kɑnɑɑn møg-ɑ ɑ́bëëd kì kɑ̈ddɑni nuti cyeddi gen. Ge ɑ́bëëd kì pinyɑni geki tyëng Kɑnɑɑn. Cɑgg ɑ́ kɑ ɑ́tëngi tyëng Isrɑil, tyëng Kɑnɑɑn nuti cyeddi gen, de gï ɑ́gwøg gen gɑ bɑ̈ngg. Kì bøli keny-ɑ ɑ́pɑ̈ngi piny yi Jöcwø kì kelli Isrɑil, ɑ ɑ́bëën kwɑrri Yosep yïe, kɑ gø köbbi gen kinni, “Wø ɑ́gyëdh yi Jwøng-ɑ Ácwɑ̈ɑ̈j ki ji mø gïïr, de wøde ɑ mëggí wøn piny ɑ́ budø ɑ́kyel kete?” Alöggi Jöcwø kinni, “Keløg wu gïïr, o myërri kïtti Eprɑim nøg kiper wun, kedhu yij thïm, kɑ ri wun gwëjji wun ki piny, kì piny tyëng Perïdh geki tyëng Repɑim.” Alöggi gen kinni, “Myërri kelli kïttì nøg kiper wøn, de tyëng Kɑnɑɑn kì myërri thwørø yï gen dɑ yɑ̈thi liny, møg-ɑ ógwøgø ki ngyënyø dødø, gen ɑ tyëng-ɑ bëëdø kì Betcɑn geki myërre, kí møg-ɑ bëëdø kì yij Töör Yidhriil.” Aköbbi gøl Eprɑim geki gøl Mɑnɑsè kì wɑɑng cyɑ̈ɑ̈ng böörø yi Jöcwø kinni, “Wu gïïr ceth, o wu teeg cɑrø, wu dwɑdd-ɑ piny me dwøng kibøli budø ɑ́kyel. Myërri kelli kïttì óbëëdø gɑ mø wun, cɑgg ɑ́ kɑ̀ bëëde e bɑ thïm, ógwej yi wun, kɑ kwɑny yi wun ɑ́ mi wun, cɑg kì cöge tuung kí tuung. Tyëng Kɑnɑɑn ócyeddi yi wun, cɑgg yï gen di yɑ̈thi liny, o ge teg.” Keny-ɑ ɑ́rum piny ki kwɑnyø yi tyëng Isrɑil, ɑcugi gen bënn kì Cilø. Kemi Kwëër Jwøng-ɑ Ácwɑ̈ɑ̈j ɑ́ying-ɑ kenyɑni. Ábëëd e dɑ wɑ̈thi kɑ̈lli Isrɑil ɑ́bïryew mø nuti nëngø ki piny mø gen. Kɑ tyëng Isrɑil pyëj yi Jöcwø kinni, “Wu gït-ɑ wɑɑng wu ogïrrø; kedhu be kwɑnyi piny-ɑ ɑ́mëggi wun yi Jwøng-ɑ Ácwɑ̈ɑ̈j, Jwøøg kweyyi wun? Kwɑrri Leebì pɑ nëngi ki piny ni kɑ̈lli wun, mɑ́ lɑ̈gi gen bɑ bëëdi gen gɑ ókwërri Jwøng-ɑ Ácwɑ̈ɑ̈j. O gøl Gɑd, kí gøl Ruben, kí budi gøl Mɑnɑsè, ge ɑ́rum ki nëngø kí piny kì løøg Nɑm Urdun kì wɑɑng cyɑ̈ɑ̈ng mwøl yi Mosɑ̀ bɑ̈ng Jwøng-ɑ Ácwɑ̈ɑ̈j.” Aköbbi jøg-ɑ ɑ́yieny yi Jöcwø kinni, “Kedhu yij pinyɑni bëne, kɑ kër-ɑ bëëde gwed wun. Codhe, kɑ lwömɑni muuj wun yɑn kì Cilø. Jwøng-ɑ Ácwɑ̈ɑ̈j ópyëj yi yɑn, kì Cilø keny ki kër-ɑ ópɑ̈ngii kì kɑɑm wun, e leng kɑ wél.” Akedhi jøgɑni yij pinyɑni bëne, kɑ kër-ɑ bëëde gwed yi gen, ɑ́ bud ɑ́bïryew. Nyingi myërr-ɑ yij budø ɑ́kyel kì kelli buddɑni ɑ́gweed gen piny thyew. Codhe, ɑdwöög gen yï Jöcwø kì Cilø. Kɑ Jwøng-ɑ Ácwɑ̈ɑ̈j pyëj yi Jöcwø, e leng-ɑ wél ki kër-ɑ pɑ̈ngi pinyɑni kì kelli gen. Codhe, kɑ wïj gøl nyi mëgge piny-ɑ pɑ̈dhi ki en. Gøl Ben Yɑmïn en ɑ ɑ́kwöngi ki pɑ̈dhø ki piny. Piny-ɑ ɑ́pɑ̈dhi ki gen ying-ɑ kɑɑm piny gøl Yeudɑ̀ kí piny gøl Yosep. Keew gølɑni kì wɑɑng wuudø cɑ̈g-ɑ́ɑ̀ kömi Nɑm Urdun, e kɑ̈l-ɑ ri Yerikö kì wɑɑng wuudø, e töng-ɑ kuni wɑɑng cyɑ̈ɑ̈ng böörø, e kɑ̈l-ɑ myërri kelli kïttì gïti pɑ̈ɑ̈l Bet Aben. O kewɑni ree løge wɑɑng wurlwɑl e kɑ̈l-ɑ Ludh, (ɑ cwøl ɑ́ Betiil,) codhe o tönge Atɑröth Adɑr, kì wïj kïn-ɑ Bet Örøn kì wɑɑng wurlwɑl. O kewɑni tönge wɑɑng wurlwɑl e kɑ̈l-ɑ kuni wɑɑng cyɑ̈ɑ̈ng böörø kì ri kïnɑni gïti Bet Örøn, o thøwe Kiriɑt Bɑɑl ɑ cwøl ɑ́ Kiriɑt Yeɑrïm. O kɑɑlɑni bɑ mi tyëng Yeudiyɑ̀. Kew-ɑ kuni wɑɑng wurlwɑl cɑ̈g-ɑ́ɑ̀ buti Kiriɑt Yeɑrïm e töng-ɑ nyingi pïi Neptoɑ̀. O kedhe e töng-ɑ piny thɑ kïn-ɑ rwöm ki Töör Kinöm kì cögi Töör Repɑim. Cɑ̈gi kì kenyɑni e kɑ̈l-ɑ yij Töör Kinöm, e rud-ɑ kuni wɑɑng wurlwɑl e bødh-ɑ piny tyëng Yebus gïti nyingi pïi Enrögel. Codhe, o tönge Ein Cemec e kedh-ɑ Gelilöth, ɑ rwöm ki Ókømi Adumïm. Codhe, o tönge Kïti Böɑn wɑ̈d Ruben. O pödhe wɑɑng wuudø kì ri kwøøm-ɑ nenni Töör Urdun. O pödhe wɑɑng wuudø kì ri kwøømi Bet Oglɑ̀ e töng-ɑ keny-ɑ rengi pïi Nɑm Urdun yij Luuy Omelø. Bene keew kuni wɑɑng wurlwɑl ɑnɑn. Nɑm Urdun bene en ɑ bɑ kew kì wɑɑng cyɑ̈ɑ̈ng mwøl. Bene gen kewwi piny-ɑ ɑ́mëggi gøl Ben Yɑmïn. Kɑ̈dd-ɑ bɑ mø gøl Ben Yɑmïn bɑ, Yerikö, kí Bet Oglɑ̀, kí Emek Kedhïdh, kí Bet Árɑbɑ̀, kí Dhemɑrɑim, kí Betiil kí Abɑ̀, kí Pɑrɑ̀, kí Óprɑ̀, kí Kepɑrɑmönì, kí Ópnì, kí Gebɑ̀. Ge bɑ kɑ̈dd-ɑ døngø gɑ pyɑ̈rø wïdɑ́ryew kí myërri gen. Kí Gibeon, kí Rɑmɑ̀, kí Beeröth, kí Midhpɑ̀, kí Kepïrɑ̀, kí Mödhɑ̀, kí Rekem, kí Irpiil, kí Tɑrɑlɑ̀, kí Dhelɑ̀, kí Aɑlep, kí Yebus ɑ bɑ Yerusɑlem, kí Gibeɑ̀, kí Kiriɑt Yeɑrïm. Kɑ̈ddɑni bɑ pyɑ̈rø wïdɑ́ngwen kí myërri gen. Bene piny-ɑ ɑ́mëggi gøl Ben Yɑmïn ɑnɑn ɑ́ mi gen. Ryeew pìny ɑ́pɑ̈dhi kɑ gøl Cimeøn. Piny-ɑ ɑ́mëggi gen ɑ́kɑ̈bbi kì ri piny gøl Yeudɑ̀. Pinyɑni reb-ɑ Bircebɑ̀, kí Cebɑ̀, kí Mölɑdɑ̀ kí Adhɑr Cuɑɑl, kí Bɑlɑ̀, kí Edhem, kí Eltölɑd, kí Bethul, kí Órmɑ̀, kí Dhiglɑg, kí Bet Mɑrkɑböt, kí Adhɑr Susɑ̀, kí Bet Lebɑöth geki Cɑruen: ge bɑ kɑ̈dd pyɑ̈rø wïdɑ́dɑ̈g, kí myërri gen. Tyëng gøl Cimeøn ɑ́nëngi ki kɑ̈dd ɑ́ngwen møøgø thyew, kí myërri gen, kɑ̈ddɑni bɑ Ain, kí Rimön, kí Ether geki Acɑn. Piny gøl Cimeøn ɑ́reb-ɑ kɑ̈dd, kí myërr-ɑ wɑ̈dhi kɑɑl Bɑɑlɑth Biir, ɑ cwøl ɑ́ Rɑmɑ̀ kì kuni wɑɑng wurlwɑl. Bene piny-ɑ ɑ́mëggi gøl Cimeøn ɑnɑn. Jöcwø tyëng gøl Yeudɑ̀ ɑ́mëgge’ piny me dwøng kiper gen, bene ɑ mëgge kwï pinyɑni tyëng gøl Cimeøn. Dɑ̈ɑ̈g pìny ɑ́pɑ̈dhi kɑ gøl Dhebulun. Piny-ɑ ɑ́mëggi gen cög ɑ Sɑrïd Cɑg kì kenyɑni, kew gït-ɑ Mɑriel kì kuni wɑɑng cyɑ̈ɑ̈ng böörø, e kɑ̈l-ɑ Dɑbeceth geki nɑm-ɑ kuni wɑɑng cyɑ̈ɑ̈ng mwøl kì ri Yokneɑm. O kì tung-ɑ kyeelø kì ri Sɑrïd, kɑ̈l-ɑ kuni wɑɑng cyɑ̈ɑ̈ng mwøl kì ri keew Kislöt Tɑbör, codhe o kedhe Dɑberɑth pïd Yɑpiyɑ̀. O pödhe kuni wɑɑng cyɑ̈ɑ̈ng mwøl gïti Gɑth Eper geki Ethkɑdhin, e töng-ɑ kuni Neɑ̀ kì dhø yuu Rimön. Kì wɑɑng wuudø kewɑni töng-ɑ kuni Anɑthön o cöge kì Töör Iptɑel. Pinyɑni reb-ɑ kɑ̈dd pyɑ̈rø wïdɑ́ryew geki myërri gen. Kwï kɑ̈ddɑni bɑ Kɑtɑth, kí Nɑɑ̈lɑl, kí Cimrön, kí Idɑlɑ̀ geki Betleem. Bene kɑ̈dd kí myërr-ɑ ying yij piny gøl Dhebulun ɑnɑn. Ngween pìny ɑ́pɑ̈dhi kɑ gøl Isɑkɑr Piny Isɑkɑr reb-ɑ kɑ̈ddi Yidhriil, kí Kesulöth, kí Cunem, kí Eprɑim, kí Cïön, kí Anɑɑrɑth, kí Rɑbith, kí Kïcïön, kí Ebedh, kí Remeth, kí Ein Gɑnïm, kí Ein Adɑ̀ geki Betpɑdhedh. Bïïj pìny ɑ́pɑ̈dhi kɑ gøl Aceer. Keew gøl Aceer kì kuni wɑɑng wurlwɑl e kedh-ɑ kuni wɑɑng cyɑ̈ɑ̈ng böörø, cɑ̈g-ɑ́ɑ̀ Ëlkɑth, kí Älì, kí Beten, kí Akcɑp, kí kɑ̈ddi Alɑmelek, kí Amɑd, kí Micɑl. Kì kuni wɑɑng cyɑ̈ɑ̈ng böörø kewɑni wɑ̈dh-ɑ Kɑrmel geki Cïör Libnɑ̀. O kew ree løge wɑɑng cyɑ̈ɑ̈ng mwøl e kɑ̈l-ɑ Bet Dɑgön, e ónywɑ̈dø kì ri piny gøl Dhebulun geki Töör Iptɑel kì dhø yuu-ɑ wɑɑng wuudø kì ri Betemek geki Neiel, e pödh-ɑ kuni wɑɑng wuudø gïti Kɑbul, kí Abrön, kí Reköb, kí Amön geki Kɑnɑ̀ gïti Sïdön. Codhe, o kewɑni ree løge Rɑmɑ̀ pïd kɑɑl Suur kɑɑl-ɑ thøø yi gerø ki dörø, codhe o tönge Ösɑ̀ pïd Nɑɑm Omeli Tɑr, e reb-ɑ Mɑɑlɑb kí Akdhïb. Bïkyeel pìny ɑ́pɑ̈dhi kɑ gøl Nɑptɑlì. Keew pinyɑni cɑ̈g-ɑ́ɑ̀ Ëlep e gït-ɑ óthuri Dhɑɑnɑnïm e pödh-ɑ Adɑminekeb geki Yɑmniyɑ̀, e wɑ̈dh-ɑ Lɑkum, o thøwe kömi Nɑm Urdun. Codhe, o kew døøge wɑɑng cyɑ̈ɑ̈ng böörø gïti Adhnöth Tɑbör, e pödh-ɑ Okök, e ónywɑ̈dø kì ri piny gøl Dhebulun kì wɑɑng wurlwɑl, kí piny gøl Aceer kì wɑɑng cyɑ̈ɑ̈ng böörø geki Nɑm Urdun kì wɑɑng cyɑ̈ɑ̈ng mwøl. Piny Nɑptɑlì reb-ɑ kɑ̈ddi Dhidïm, kí Dher, kí Amɑth, kí Rɑkɑth, kí Kinereth, kí Adɑmɑ̀, kí Rɑmɑ̀, kí Adhör, kí Kedec, kí Edrey, kí Ein Adhör, kí Yirön, kí Migdɑlel, Orem, kí Betɑnɑth, kí Bet Cemec. Kɑ̈ddɑni kí myërri gen ying-ɑ yij piny-ɑ ɑ́mëggi gøl Nɑptɑlì Bïryeew pìny ɑ́pɑ̈dhi kɑ gøl Dɑn. Piny gølɑni ɑ́reb-ɑ kɑ̈ddi Dhorɑ̀, kí Ectɑol, kí Ircemec, kí Cɑɑlbïm, kí Ayɑlön, kí Ithlɑ̀, kí Elön, kí Timnɑ̀, kí Ekrön, kí Eltekè, kí Gibethön, kí Bɑɑlɑth, kí Yeuud, kí Beni Berɑk, kí Gɑthrimön, kí Mejɑrkön geki Rɑkön, geki myërri Yɑpɑ̀. Keny-ɑ ɑ́rum tyëng Isrɑil ki pɑ̈ngi piny, ɑnëngi gen Jöcwø ki piny men-ɑ bɑ mee, ni kɑ ɑ́cïg Jwøng-ɑ Ácwɑ̈ɑ̈j ceth. Gø ɑ́mëggi gen kɑɑl-ɑ ɑ́cwøl yi en, ɑ løg Timnɑ̀ Serɑ̀, kì myërri kïtti Eprɑim. Adøøge kɑɑlɑni ki gerø, kɑ pëgg-ɑ yije. Tyëng Isrɑil ɑ́ceg-ɑ cugø bënn kì dhø Kemi Kwër, ge ɑ́cugi kì kenyɑni kɑ per kinni, o ókwërø Eliɑdhɑr, geki Jöcwø, kí jɑggi wɑ̈thi kɑ̈lli Isrɑil, pɑ̈ngi gen piny-ɑ wɑɑng cyɑ̈ɑ̈ng böörø kì løøg Nɑm Urdun. Piny ɑ́pɑ̈ngi yi gen e leng kɑ wél. Aköbbi Jöcwø yi Jwøng-ɑ Ácwɑ̈ɑ̈j kinni, “Köbbí tyëng Isrɑil kinni, yïëëny gen ki kɑ̈ddi yömmø møg-ɑ ɑ́cïgɑ Mosɑ̀ cøn. O ngɑn-ɑ cinge ógwɑ̈ɑ̈ny yi dhɑnhø nyi yömme yethi kɑ̈ddɑni, o bødhe kì cingi wɑɑd ngɑn-ɑ ɑ́gwɑ̈ny, men-ɑ ódwɑddi cudø ki gøølø. Ngɑn-ɑ cinge gwɑ̈ɑ̈ny yi dhɑnhø ócuggø yömmi kɑɑl ɑ́kyel kì kelli kɑ̈ddɑni, kɑ kedh-ɑ burø kì dhø döri kɑɑl, kɑ gønye nyudhe jøgdøngø kì kenyɑni. Codhe o wiy yi gen, o kedhe yij kɑɑl be bëëdø. Keløg ngɑn-ɑ dwɑddi col ki gøølø óløg bɑnge, ko mëggii yi tyëng kɑɑlɑni, mɑ́ dhɑnhø ɑ́ceg-ɑ gwɑ̈nyø, de gø nuti cɑɑg en kɑ tirø ki nɑ̈gø e bong liny kì kɑɑm gen. Codhe, o yiel yi tyëng kɑɑlɑni. Ócuggø bëëdø kì kɑɑlɑni gïti keny-ɑ óliidh gønye, kɑ yod yïe bɑ̈r. Kɑ bëëde kì kɑɑlɑni gïti keny-ɑ óthøw Ókwër-ɑ Dwøng. Codhe, o døøge kɑɑl gen, kun-ɑ ɑ́rïnge cøn.” Ayieeny kɑ̈dd-ɑ wɑɑng cyɑ̈ɑ̈ng böörø gɑ Kedec kì myërri Gɑlelì, kì kelli kïtti Nɑptɑlì, kí Cekïm kì myërri kïtti Eprɑim, kí Kibrön kì myërri kelli kïtti Yeudiyɑ̀. Kɑ̈dd-ɑ wɑɑng cyɑ̈ɑ̈ng mwøl bɑ Bedher kì piny Ruben, kí Rɑmöth kì Gilyɑd kì piny Gɑd, kí Gölɑn kì Bɑcɑn kì piny Mɑnɑsè. Ngeti Isrɑil kí ngɑnpɑth men-ɑ bëëdø kì kelli tyëng Isrɑil, men-ɑ cinge gwɑ̈ɑ̈ny yi dhɑnhø, ócuggø yieeli ree yethi kɑ̈ddɑni. Óbëëdø kì kunɑni gïti keny-ɑ óliidh gønye, o pɑ cuggi nɑ̈gø yi ngɑn-ɑ ɑ́dwɑddi col ki gøølø, keløg e óyod kinni dhɑnhø cɑɑg-ɑ gwɑ̈nyø kidyër. Abëën jøgdøngi gøl Leebì yï ókwërø Eliɑdhɑr geki Jöcwø, kí jɑggi wɑ̈thi kɑ̈lli Isrɑil. Aköbbi ge gïn kì Cilø, kì piny Kɑnɑɑn kinni, “Jwøng-ɑ Ácwɑ̈ɑ̈j Mosɑ̀ ɑ́cege kinni i wø ónëngi yi wun piny men yije bëëd yi wøn, kí keny yije nyi cyɑ̈ɑ̈m yi jɑmmi wøn.” Kì bɑng Ciggi Jwøng-ɑ Ácwɑ̈ɑ̈j ceth, ɑnëngi gen yi tyëng Isrɑil ki kɑ̈dd møg bëëd yi gen, geki keny yije nyi cyɑ̈ɑ̈m yi jɑmmi gen. Gøl Kɑ̈ɑ̈th, ɑ løg kwɑrri Aɑron, bɑ gen ɑ ɑ́kwøng ki nëngø kì kelli kwɑrri Leebì. Ge ɑ́mëgg-ɑ kɑ̈dd pyɑ̈rø wïdɑ́dɑ̈g kì piny Yeudɑ̀, kí piny Cimeøn, kí piny Ben Yɑmïn. Kwï wïj gøl Kɑ̈ɑ̈th ɑ́nëngi ki kɑ̈dd pyɑ̈rø møøgø kì piny Eprɑim, kí piny Dɑn, kí piny Mɑnɑsè kì wɑɑng cyɑ̈ɑ̈ng böörø. Wïj gøl Gercön ɑ́nëngi ki kɑ̈dd pyɑ̈rø wïdɑ́dɑ̈g kì piny Isɑkɑr, kí piny Aceer, kí piny Nɑptɑlì, kí piny Mɑnɑsè kì wɑɑng cyɑ̈ɑ̈ng mwøl. Wïj Gøl Merɑrì ɑ́nëngi ki kɑ̈dd pyɑ̈rø wïdɑ́ryew kì piny Ruben, kí piny Gɑd, kí piny Dhebulun. Piny-ɑ ɑ́mëggi Kwɑrri Leebì yi tyëng Isrɑil ɑ́ men bëëd yi gen, kí men yije nyi cyɑ̈ɑ̈m yi jɑmmi gen, ɑ́leng kɑ wél, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j cøn. Kɑ̈dd-ɑ ɑ́muuj kì piny Yeudɑ̀, kí piny Cimeøn bɑ: Gøl Kɑ̈ɑ̈th ɑ ɑ́kwøng ki nëngø kì wïj gøl Aɑron. Ge ɑ́mëgg-ɑ kɑɑl Arbɑ̀. Arbɑ̀ ɑ bɑ kweyi tyëng Anɑk, ɑ løg Kibrön kì myërri kïtti Yeudiyɑ̀, kí kɑ̈jj-ɑ nyi cyɑ̈ɑ̈m yi jɑmmi gen kì bɑdhhi kɑ̈ddɑni. De pwödhhi kɑ̈ddɑni geki myërre ɑ́mëgg-ɑ Kɑlib wɑ̈d Yepunɑ̀ gïn ɑ́ møge. Kibrön, ɑ́bëëd ɑ́ kɑɑl ɑ́kyel kì kelli kɑ̈ddi yömmø, ɑ́mëgg-ɑ gøl ókwërø Aɑron, reb kí Libnɑ̀, kí Yɑtir, kí Ectemoɑ̀, kí Olön, kí Debir, kí Ain, kí Yutɑ̀ geki Bet Cemec, kí tör-ɑ nyi cyɑ̈ɑ̈m yi jɑmmi gen kì buti kɑ̈ddɑni bënn. Ge bɑ kɑ̈dd ɑ́bïngwen kì piny Yeudɑ̀ geki piny Cimeøn. Kì piny Ben Yɑmïn, ge ɑ́mëgg-ɑ kɑ̈dd ɑ́ngwen, ɑ løg Gibeon, kí Gebɑ̀, kí Anɑthöth geki Almön, kí tör-ɑ nyi cyɑ̈ɑ̈m yi jɑmmi gen. Kɑ̈dd pyɑ̈rø wïdɑ́dɑ̈g, kí törri gen ɑ ɑ́mëggi ókwërri gøl Aɑron. Kwï kɑ̈lli wïj gøl Kɑ̈ɑ̈th, kwɑrri Leebì, kí kwï kwɑrri Leebì møøgø, ge ɑ́nëng ɑ ri kɑ̈ddi piny Eprɑim. Ge ɑ́mëgg-ɑ kɑ̈dd ɑ́ngwen, ɑ løg Cekïm kí töre, kì myërri kïtti Eprɑim. Cekïm bɑ ɑ́kyel kì kelli kɑ̈ddi yömmø, geki Gedher. Kí Kibdhɑim geki Bet Örøn, kɑ̈dd ɑ́ngwen kí törri gen. Kì piny Dɑn, ge ɑ́mëgg-ɑ kɑ̈dd ɑ́ngwen, ɑ løg Eltekè, kí Gibethön, kí Ayɑlön geki Gɑthrimön, kí törri gen. Kì piny Mɑnɑsè, kì wɑɑng cyɑ̈ɑ̈ng böörø, ge ɑ́mëgg-ɑ kɑ̈dd ɑ́ryew, ɑ løg Tɑɑnɑk geki Gɑthrimön, kí töör gen. Kɑ̈dd pyɑ̈rø kí törri gen, ɑ ɑ́mëggi kwï gøl Kɑ̈ɑ̈th, møg-ɑ ɑ́döng ge nuti nëngø kì kelli kwɑrri Leebì. Kwɑrri Leebì mø wïj gøl Gercön, ɑ́mëgg-ɑ kɑ̈dd ɑ́ryew kì piny Mɑnɑsè, kì wɑɑng cyɑ̈ɑ̈ng mwøl, ɑ løg Gölɑn kí myërri Bɑcɑn, ɑ bɑ kɑɑl ɑ́kyel kì kelli kɑ̈ddi yömmø. Kí Beecterɑ̀, kí törri gen. Kì piny Isɑkɑr, ge ɑ́mëgg-ɑ kɑ̈dd ɑ́ngwen, ɑ løg Kicïön, kí Dɑberɑth, kí Yɑrmuth, kí Ein Gɑnïm, kí törri gen. Kì piny Aceer, ge ɑ́mëgg-ɑ kɑ̈dd ɑ́ngwen, ɑ løg Micɑl, kí Abdön, kí Ëlkɑth, kí Reköb, kí törri gen. Kì piny Nɑptɑlì, ge ɑ́mëgg-ɑ kɑ̈dd ɑ́dɑ̈g, ɑ løg Kɑdic kì myërri Gɑlelì. Kɑdic bɑ ɑ́kyel kì kelli kɑ̈ddi yömmø, kí Amöth Dör, kí Kɑrtɑn, kí törri gen. Kɑ̈lli wïj gøl Gercön ɑ́mëgg-ɑ kɑ̈dd pyɑ̈rø wïdɑ́dɑ̈g, kí törri gen. Kwï Kwɑrri Leebì møg-ɑ ɑ́döng, ɑ løg gøl Merɑrì, ɑ́mëgg-ɑ kɑ̈dd ɑ́ngwen kì piny Dhebulun, ɑ løg Yökneɑm, kí Kɑrtɑ̀, kí Dimnɑ̀, kí Nɑɑ̈lɑl, kí törri gen. Kì piny Ruben, ge ɑ́mëgg-ɑ kɑ̈dd ɑ́ngwen, ɑ løg Bedher, kí Yɑɑdh, kí Kedemöth, kí Mepɑɑth, kí törri gen. Kì piny Gɑd, ge ɑ́mëgg-ɑ Rɑmöth kì Gilyɑd. Rɑmöth bɑ ɑ́kyel kì kelli kɑ̈ddi yömmø, kí Mɑɑ̈nɑim, kí Kicbön, kí Yɑdher, kí törri gen. Kɑ̈dd-ɑ ɑ́mëggi wïj gøl Merɑrì bënn, bɑ pyɑ̈rø wïdɑ́ryew. Codhe, ɑmëggi piny Isrɑil yi Jwøng-ɑ Ácwɑ̈ɑ̈j, ni kɑ ɑ́köbbe kweyyi gen. Akwɑny gen pinyɑni, kɑ ge pëgg-ɑ yije. Anëngi gen ki mër yi Jwøng-ɑ Ácwɑ̈ɑ̈j, kì yij pinyɑni bëne, ni kɑ ɑ́köbbe kweyyi gen. Bong pödhø ɑ́kyel kì kelli pödhhi tyëngmɑ̈ɑ̈nø, mɑ ɑ́cungi kì bøli gen, mɑ́ ge ɑ́wëggi tyɑmi pödhhɑni yi Jwøng-ɑ Ácwɑ̈ɑ̈j. Gïgdøj møg-ɑ ɑ́kwøb yi Jwøng-ɑ Ácwɑ̈ɑ̈j bënn kinni gï ógögge Isrɑil, ɑ́gwøge ceth. Keny-ɑ ɑ́rum piny kì wɑɑng cyɑ̈ɑ̈ng böörø ki kwɑnyø yi tyëng Isrɑil, ɑcwøøl gøl Ruben, kí gøl Gɑd, kí budi gøl Mɑnɑsè mø wɑɑng cyɑ̈ɑ̈ng mwøl yi Jöcwø. Aköbbe gïn kinni, “Gïg-ɑ ɑ́köbbi wun yi Mosɑ̀ bɑ̈ng Jwøng-ɑ Ácwɑ̈ɑ̈j kinni gwøgu gen, ɑ́gwøg yi wun ceth, kɑ cigg-ɑ nyi köbbɑ wun bënn nyi mïdhi yi wun thyew. Kì kɑɑmɑni bëne nyiimï wun, tyëng Isrɑil nuti pɑ̈nyi wun ki wiy piny, de Ciggi Jwøng-ɑ Ácwɑ̈ɑ̈j Jwøøg wun ɑ́mïdhi yi wun ceth kidøøj. Ni møg-ɑ ɑ́kwøb yi Jwøng-ɑ Ácwɑ̈ɑ̈j Jwøgee, nyiimï wun, tyëng Isrɑil ɑ́nënge ki mër. Kɑ ɑ́rum bëëde kinøw, døøg wun piny wun, piny-ɑ ɑ́mëggi wun yi Mosɑ̀ kì løøg Nɑm Urdun kì wɑɑng cyɑ̈ɑ̈ng mwøl. Kɑ wɑ̈thi wun ko nyi wïl ki møg-ɑ ɑ́cïgi wun yi Mosɑ̀ kinni, ‘Mɑɑr Jwøng-ɑ Ácwɑ̈ɑ̈j, Jwøgí; nyi mïdhí cigge, kɑ nyi gɑ̈nní ceth, kɑ nyi göggí ki pyëwí bëne geki tegí bëne.’ ” Akwëëng gen yi Jöcwø, kɑ gï köbbe kedh gen, ɑkedhi gen myërri gen. Budi gøl Mɑnɑsè ɑ́nëngi yi Mosɑ̀ ki piny kì Bɑcɑn, de bun-ɑ kyeelø ɑ́nëng-ɑ yi Jöcwø geki nyiimï gen kì wɑɑng cyɑ̈ɑ̈ng böörø kì løøg Nɑm Urdun. Keny-ɑ ɑ́köbbi gen, kinni kedhi gen piny gen thyew yi Jöcwø, ɑkwënge gïn. Aköbbe gïn kinni, “Wun ɑ døøg myërri wun, wu kɑ̈rø ki mendwøng ɑnɑn, o yï wun dɑ dhög mø gïïr, kí dhɑb, kí ɑ́tegø, kí dilɑl, kí ngyënyø dødø, kí ógudh mø gïïr, pɑ̈ngi wun jɑmmɑni, bɑ møg-ɑ ɑ́kɑb yi wun kì yi tyëngmɑ̈ɑ̈nø wuki nyiimï wun.” Akedh gen. Budi gøl Mɑnɑsè ɑ́bëëd e rumø ki nëngø yi Mosɑ̀ ki piny kì løøg Nɑm Urdun kì wɑɑng cyɑ̈ɑ̈ng mwøl, de bun-ɑ kyeelø ɑ́nëng-ɑ yi Jöcwø kì løøg Urdun tung-ɑ wɑɑng cyɑ̈ɑ̈ng böörø, kyeel ki kɑ̈ll-ɑ kyeelø. Akedh gøl Ruben, kí gøl Gɑd, kí budi gøl Mɑnɑsè, ge wiy-ɑ kwï tyëng Isrɑil Cilø kì piny Kɑnɑɑn, ge døøg-ɑ myërri gen kì piny Gilyɑd, kì løøg Nɑm Urdun kì wɑɑng cyɑ̈ɑ̈ng mwøl. Kɑ̈ng-ɑ́ nuti thøw Mosɑ̀, gï ɑ́köbbe kinni, “Jwøng-ɑ Ácwɑ̈ɑ̈j dwɑdd-ɑ kinni o piny men kwɑny yi wun ɑ́ mi wun.” Keny-ɑ ɑ́wɑ̈dhi gøl Ruben, kí gøl Gɑd, kí budi gøl Mɑnɑsè buti Nɑm Urdun, kì yij piny Kɑnɑɑn, ge nudd ge ying-ɑ løøng-ɑ wɑɑng cyɑ̈ɑ̈ng böörø, ɑgëëd gen ki këli lɑm me dwøng. Kɑ tyëng Isrɑil møg-ɑ kyeelø olïngø kinni, i gøl Ruben, kí gøl Gɑd, kí budi gøl Mɑnɑsè, gëdø ki këli lɑm kì kömi Nɑm Urdun kì løøng-ɑ wɑɑng cyɑ̈ɑ̈ng böörø. Kɑ kɑ̈lli wɑɑng cyɑ̈ɑ̈ng böörø ócugø bënn kì Cilø, kipe kedhi be liny ki kɑ̈lli wɑɑng cyɑ̈ɑ̈ng mwøl. Abëën gen Gilyɑd, yï gøl Ruben, kí gøl Gɑd, kí budi gøl Mɑnɑsè. Akööb gen kinni ge kööbø gɑ kej dhøggi jii Jwøk bënn, kɑ ge okööbø kinni, “Á ngø ɑ göggu Jwøøg Isrɑil, ɑ rɑɑj èn? Ciggi Jwøng-ɑ Ácwɑ̈ɑ̈j ɑ́pyem yi wun, kɑ ɑ́gëddi wun ri wun ki këli lɑm! Wu pɑ nudd wu ócyɑ̈dhø kì bɑnge. Wɑ̈thi wun ɑ́ceg-ɑ wïlø ki orøng-ɑ ɑ́gwøg yi wɑ kì Peor, ɑ bɑnge ɑ́cɑy Jwøng-ɑ Ácwɑ̈ɑ̈j jie ki yømø nɑ̈ɑ̈g? Wɑ nuti cɑɑg-ɑ orɑng kì bɑnge, menɑni ceg-ɑ nøg? Wu ceg-ɑ bɑ̈nyø ki cyɑ̈dhø kì bɑng Jwøng-ɑ Ácwɑ̈ɑ̈j dicyɑ̈ɑ̈ng? Keløg Ciggi Jwøng-ɑ Ácwɑ̈ɑ̈j opyemø yi wun, pyëwe órënyi ki tyëng Isrɑil bënn dhuki. Keløg piny wun ywëdhø, o yije pɑ cuggi kwɑjji Jwøk, bïu piny Jwøng-ɑ Ácwɑ̈ɑ̈j, piny-ɑ yije cungi yi keme, kɑ wu kɑ̈bbi wun ki piny kì kelli wøn. De pɑth ki kinni o wu pyemu Ciggi Jwøng-ɑ Ácwɑ̈ɑ̈j, o wu gëëd wun ki këli jwøg megø kì kömi këli Jwøng-ɑ Ácwɑ̈ɑ̈j, Jwøgee. Pɑth ki Akɑn wɑ̈d Dherɑ̀ ɑ ɑ́bɑ̈nyi mïdhi Ciggi Jwøng-ɑ Ácwɑ̈ɑ̈j, kɑ ókɑ̈bbø ki jɑmm-ɑ ɑ́kyer, ɑ bɑnge ɑ́cɑɑy ji bënn yi Jwøng-ɑ Ácwɑ̈ɑ̈j ki thøø ki göje?” Kɑ mø pëjji tyëng-ɑ wɑɑng cyɑ̈ɑ̈ng böörø løøg yi gøl Ruben, kí gøl Gɑd, kí budi gøl Mɑnɑsè kinni, “Jwøng-ɑ teg bene Jwøng-ɑ Ácwɑ̈ɑ̈j! Ngɑ̈nyi yi en eni gïn-ɑ́ pere ɑ́göög wøn kinøw, o wø dwɑdd-ɑ kinni o wu ngɑ̈nyu wøw thyew. Keløg wø pyem-ɑ Ciggi Jwøng-ɑ Ácwɑ̈ɑ̈j, kɑ wø nɑ̈g wun. Keløg wø pyem-ɑ Ciggi Jwøng-ɑ Ácwɑ̈ɑ̈j, kɑ wø ogëdø ki këli lɑm men nyi rɑ̈ɑ̈b wøn ki gëdhhì. Wiy wø cɑy yi Jwøng-ɑ Ácwɑ̈ɑ̈j kiree. Menɑni ɑ́gwøg yi wøn kɑ per kinni, dhuki megø keløg kwɑrri wun, kwɑrri wøn óbødh yi gen kinni, ‘Jwøøg Isrɑil, Jwøng-ɑ Ácwɑ̈ɑ̈j, yïe bɑ̈r ki wun. Nɑm Urdun ɑ́cïbe kɑɑmee ɑ́ kew, kej wun bong gøn kì piny Jwøng-ɑ Ácwɑ̈ɑ̈j.’ Kɑ kwɑrri wun, kwɑrri wøn mɑ̈ɑ̈n yi gen mɑlli Jwøng-ɑ Ácwɑ̈ɑ̈j. Këlɑni nuti geer wøn ɑ́ men wïje nyi rɑ̈ɑ̈b yi wøn ki gëdhhì. De ɑ́ger yi wøn ɑ́ men nyudhi jii wun kí jii wøn kì yethi rïjj-ɑ óbï, kinni wɑ nyi mɑll-ɑ Jwøng-ɑ Ácwɑ̈ɑ̈j kì bøli keme, Kemi Kwër kí gëdhhì møgee bënn. Kipe kwɑrri wøn, óköbbi yi kwɑrri wun kinni, ‘Wu pɑth ki jii Jwøng-ɑ Ácwɑ̈ɑ̈j.’ Këlɑni ɑ́ger yi wøn kɑ per kinni, keløg e ódi kwøb mø ni møgɑni, o kwɑrri wøn ókööb gen kinni, ‘Lidhu kweyyi wøn ɑ́gëëd ki këli lɑm me ni mi Jwøng-ɑ Ácwɑ̈ɑ̈j, pɑth ki men wïje rɑ̈ɑ̈b ki gënh-ɑ nyi rɑ̈b bëne wɑlɑ̀ gëdhh-ɑ kyeelø, de ɑ́ger ɑ́ ngïji kipe jii wøn geki jii wun.’ Wø pɑ cuggi pyemi Ciggi Jwøng-ɑ Ácwɑ̈ɑ̈j kinni tek, kɑ wø ogëdø ki këli lɑm megø, men nyi nëngi Jwøng-ɑ Ácwɑ̈ɑ̈j ki gëdhhì, kì kömi këli Jwøng-ɑ Ácwɑ̈ɑ̈j men-ɑ ying bøli keme.” Ókwërø Pineɑs geki pëjji wɑ̈thi kɑ̈lli wɑɑng cyɑ̈ɑ̈ng böörø, kwøbb-ɑ ɑ́lwøb yi jø wɑɑng cyɑ̈ɑ̈ng mwøl ɑ́lïngi yi gen, kɑ pëthi gen ókwöjø yi lwömɑni. Aköbbi gen yi ókwërø Pineɑs wɑ̈d Eliɑdhɑr kinni, “Áyod yi wɑ ɑnɑn kinni Jwøng-ɑ Ácwɑ̈ɑ̈j jie mïdhe’ mïdhø. Ciggi Jwøng-ɑ Ácwɑ̈ɑ̈j nuti pyeem wun, o tyëng Isrɑil ɑ́yiel yi wun ki gwøng ni menɑni, o ge cög ge pɑ cɑy yi Jwøng-ɑ Ácwɑ̈ɑ̈j.” Kɑ Pineɑs odøøgø geki jɑggi wɑ̈thi kɑ̈llì, ge kedh-ɑ be dwöggi møgɑni tyëng Isrɑil, kì piny Kɑnɑɑn. Kɑ gøl Ruben, kí gøl Gɑd wiy gen kì Gilyɑd. Ayïëy tyëng Isrɑil, kɑ Jwøk pwøj yi gen. Kɑ kwøbbi kedhi be nyɑɑg ki gøl Ruben geki gøl Gɑd wiy yi gen. Akööb gøl Ruben geki gøl Gɑd kinni, “Këli lɑm menɑni bëëde ɑ́ nyuudhi kiperee wɑ bënn kinni, Jwøng-ɑ Ácwɑ̈ɑ̈j en ɑ bɑ Jwøk.” Codhe, kɑ gø cɑg gøn ɑ́ “Nyuudhi.” Kɑ Isrɑil ywöm yi Jwøng-ɑ Ácwɑ̈ɑ̈j ki liny geki tyëngmɑ̈ɑ̈nø møg-ɑ bɑdhhi gen, e piny kɑ̈ɑ̈l kun. Kì bøli kenyɑni Jöcwø rum døngø ki mendwøng. Kɑ Isrɑil cwøl bëne yi Jöcwø, ɑ løg jøgdøngø, kí jyɑ̈ggi wɑ̈thi kɑ̈llì, kí jɑggi burø, kí pëjji liny, kɑ gï köbbe kinni, “Anɑn yɑ ɑ́døngi ki mendwøng, o gïg-ɑ ɑ́göggi tyëng-ɑ buti wun bënn yi Jwøng-ɑ Ácwɑ̈ɑ̈j Jwøøg wun, ge ɑ́lidh yi wun, mɑ́ Jwøng-ɑ Ácwɑ̈ɑ̈j, Jwøøg wun ɑ ɑ́nyïɑ̈ggi kiper wun. Piny tyëng-ɑ ɑ́döng ge nudd ge obëëdø ɑ́mëggɑ wun ɑ́ mi wun, ni pìnyi tyëng-ɑ ɑ́kwɑny yi wun keny-ɑ ɑ́pyejjɑ wun, cɑg kì kömi Nɑm Urdun kì wɑɑng cyɑ̈ɑ̈ng mwøl gïti Nɑɑm Omeli Tɑr kì wɑɑng cyɑ̈ɑ̈ng böörø. Jwøng-ɑ Ácwɑ̈ɑ̈j Jwøgee ɑ́köngi kinni, ‘Tyëngmɑ̈ɑ̈nø ówëggɑ rengø kì bøli wun, ge ówëggɑ rengø keny-ɑ ókedh wu obëënø wu kedh-ɑ piny gen, o kwɑny yi wun.’ Jwøng-ɑ Ácwɑ̈ɑ̈j, Jwøgee köngɑni ómïdhi yi en. Tyëng-ɑ nudd ge obëëdø ócyedde. Nyi mïdhu møg-ɑ ɑ́gwed kì yij wɑ̈nyi Ciggi Mosɑ̀, kɑ ge nyi gwøg wun ceth, e bong kwï gen møg wiy yi wun, ge pɑ gwøg yi wun, jwöggi gen ko nyi mɑlli wun, wu ko nyi kwɑ̈jji ki nyingi gen, kɑ wu ko nyi köngi ki nyingi gen. Ni kɑ ɑ́ngɑ̈dh wun Jwøng-ɑ Ácwɑ̈ɑ̈j cøn, nyi ngɑ̈dhu en ceth. Pödhh-ɑ døngø, o ge teg ɑ́cyeddi yi Jwøng-ɑ Ácwɑ̈ɑ̈j kì bøli wun, kɑ bong ngɑn-ɑ ɑ́cuggi cung kì bøli wun. Dhɑnhø ɑ́kyel kì kelli wun, ji ɑ́lïp nyii cuggø cyeddø yi en, mɑ́ Jwøng-ɑ Ácwɑ̈ɑ̈j, Jwøgee ɑ́nyïɑ̈ggi kiperee ni kɑ ɑ́könge cøn. Kɑ̀ bëëde kinøw, wɑ̈thi wun ko nyi wïl ki mɑɑri Jwøng-ɑ Ácwɑ̈ɑ̈j Jwøøg wun kinni tek. Keløg Jwøng-ɑ Ácwɑ̈ɑ̈j ówiy piny yi wun, kɑ wu órëbø ki kwï tyëng pönhɑni møg-ɑ ɑ́döng kì kelli wun, kɑ ri wun nywøm wun ki gen, kɑ wu ngɑ̈nyu wøw kinni, ge pɑ cyeddi yi Jwøng-ɑ Ácwɑ̈ɑ̈j këti, ge óbëëdø gɑ ɑ́kɑ̈lli kì cwɑggi wun, ge óni dël-ɑ nyi pööd kì kömi wun, wɑlɑ̀ ge óni koodh kì nyingi wun, kɑ bong-ɑ dhɑnhø ɑ́kyel kì kelli wun, men-ɑ ódöng kì piny-ɑ ɑ́mëggi wun yi Jwøng-ɑ Ácwɑ̈ɑ̈j, Jwøgee. “Anɑn bøli kej thøwɑ ɑ́cyɑ̈ngi. Ngɑ̈nyi yi wun bënn kidøøj kinni, gïgdøj møg-ɑ ɑ́köngi wun yi Jwøng-ɑ Ácwɑ̈ɑ̈j, Jwøgee ɑ́gögge wun ceth. Köng-ɑ ɑ́kwöng yi en bënn, ɑ́pɑ̈dhi kɑ̈jji gen, bong ɑ́kyel mɑ ɑ́bɑ̈jji. De nɑ kɑ ɑ́mïdhe møg-ɑ ɑ́kwönge bënn, óbëëdø kinøw ceth ki köng-ɑ rijjø. Keløg lwöm-ɑ ɑ́cïgi wun yi Jwøng-ɑ Ácwɑ̈ɑ̈j, Jwøgee pɑ mïdhi yi wun, kɑ wu kedh-ɑ be mɑlli jwögg møøgø, pyëwe órënyi ki wun, kɑ wu cɑye, kɑ bong-ɑ dhɑnhø ɑ́kyel kì kelli wun men-ɑ ódöng kì yij piny-ɑ døj men-ɑ ɑ́mëgge wun.” Acwööl wɑ̈thi kɑ̈lli Isrɑil bënn Cekïm yi Jöcwø, keny-ɑ ɑ́wɑ̈nhi gen, ɑcwøle jøgdøngø, kí jyɑ̈ggi wɑ̈thi kɑ̈llì, kí jɑggi burø geki pëjji liny kinni bï gen, o ge cungi gen kì bøli Jwøk. Aköbbe gïn kinni, “Møg bene møg-ɑ ɑ́köbbi wun yi Jwøng-ɑ Ácwɑ̈ɑ̈j, Jwøøg Isrɑil èn, kinni, ‘Kɑ̈ge dööng, kweyyi wun ɑ́bëëd ɑ løøg Nɑm Porɑt kì wɑɑng cyɑ̈ɑ̈ng mwøl, o ge ɑ́mɑll-ɑ jwögg mø pɑth. Ákyel kì kelli kweyyi wun bɑ Terɑ̀, wïyi Abrɑhɑm geki Nɑor. Kɑ kweyi wun Abrɑhɑm kwɑnyɑ kì piny-ɑ løøg Nɑm Porɑt, ɑkɑ̈ɑ̈lɑ en yij piny Kɑnɑɑn. Amëggɑ en wɑ̈de Isɑɑk, kɑ nëngɑ ki kwɑrre mø ngenyø kì ri wɑ̈de Isɑɑk. Kɑ Isɑɑk nëngɑ ki wɑ̈dde ɑ́ryew, ɑ løg Yɑgob geki Isøø. Isøø ɑ́mëggɑ myërri kïtti Edöm gïn-ɑ́ møge, de kweyi wun Yɑgob ɑ́kedh-ɑ Rïp geki nyige. Kì bøli keny megø, ɑörɑ Mosɑ̀ geki Aɑron yï kweyyi wun kì Rïp. Akɑ̈nɑ kömi Rïp ki rɑj mø døngø, de kweyyi wun ɑ́kɑ̈ɑ̈lɑ wɑ̈g kì Rïp. Kɑ tyëng Rïp reng-ɑ bɑng gen, ki yɑ̈thi liny geki kyënyi liny, keny-ɑ ɑ́wɑ̈dhi gen Nɑɑm Omeli Kwɑrø, ɑywøøg gen yïɑ kinni o ge kønyɑ, ɑcïbɑ kelli gen geki tyëng Rïp ki muudhø. Awëggɑ pïi Nɑɑm Omeli Kwɑrø døøg kömi tyëng Rïp, ɑmud gen. Gïg-ɑ ɑ́göggɑ Rïp ɑ́lidh yi wun ki nyingi wun. “ ‘Kɑ wu obëëdø kì yij pɑ̈l ki keny me bɑ̈ɑ̈r. Akɑ̈ɑ̈lɑ wun piny tyëng Amör, tyëng-ɑ ɑ́bëëd kì løøg Nɑm Urdun kì wɑɑng cyɑ̈ɑ̈ng mwøl. Anyïɑ̈ggi gen ki wun, de ge ɑ́wëggɑ tyɑmø yi wun, ge ɑ́rënyɑ kiper wun, ɑkwɑny wun piny gen ɑ́ mi wun. Kɑ Bɑlɑk wɑ̈d Dhipor, rɑ̈ɑ̈dh Moɑb ónyïɑ̈ggø ki wun. Aöde yï Bɑlɑɑm kinni o wu di lɑ̈mme cyën. De nuti wiy yɑn o kömi wun kïdhe ki cyën, de ɑ́yöd e wëggɑ’ gyëdhi wun, ɑbødh wun kì cingi Bɑlɑk. Abɑ̈ɑ̈n wun Nɑm Urdun, wu kedh-ɑ Yerikö. Anyïɑ̈ggi wun ki jø Yerikö, kí jø Amör, kí jø Perïdh, kí jø Kɑnɑɑn, kí jø Kit, kí jø Girgɑc, kí jø Kib, kí jø Yebus. De ge ɑ́wëggɑ tyɑmø yi wun ge bënn. Ge ɑ́göjjɑ wɑ̈ɑ̈rø, kɑ rɑ̈nhi Amör ryeet cyeddi yi wun. Menɑni pɑth ki tegi wun, wɑlɑ̀ tegi jɑmmi liny mø wun. Wu ɑ́mëggɑ piny me nuti kɑ̈ɑ̈g-ɑ yi wun, kí kɑ̈dd mø nuti ger-ɑ yi wun. Anɑn wu bëëd ɑ kenyɑni wu ocyɑ̈mø ki nywøli ólɑm geki dhetun møg nuti pidh-ɑ yi wun.’ Akööb Jöcwø kinni, “Böggi wun Jwøng-ɑ Ácwɑ̈ɑ̈j, nyi göggu en ki pyëw ɑ́kyel. Wiyu jwögg-ɑ pɑth møg-ɑ ɑ́mɑlli yi kweyyi wun ki Misøpøtɑmiyɑ̀ geki Rïp, kɑ wu mɑllu Jwøng-ɑ Ácwɑ̈ɑ̈j kete. Keløg wu pɑ dwɑddi mɑlli Jwøng-ɑ Ácwɑ̈ɑ̈j, kɑ̈bbi wun dicyɑ̈ngtïn ki jwøng-ɑ ómɑlli yi wun, ying gɑ jwögg-ɑ ɑ́mɑlli yi kweyyi wun, wɑlɑ̀ jwöggi Amör, ɑ piny gen bëëd yi wun. De keløg ɑ́ perɑ wøki gølɑ, wø ómɑlli Jwøng-ɑ Ácwɑ̈ɑ̈j.” Alöggi ji kinni, “Jwøng-ɑ Ácwɑ̈ɑ̈j pɑ wiy wøn piny kinni tek, o wø pɑ kedhi be mɑlli jwögg møøgø. Jwøng-ɑ Ácwɑ̈ɑ̈j Jwøøg wøn bɑ en ɑ ɑ́kɑ̈ɑ̈l kweyyi wøn wɑ̈g kì yij bɑ̈ɑ̈ngø kì Rïp, gïïngɑ̈ngø møg-ɑ ɑ́gwøg yi en kiper gen, ɑ́lïngi yi wøn. Wø ɑ́kor yi en kì kɑ̈jj-ɑ ɑ́cyɑ̈dhi wøn bënn, kì kelli jurr-ɑ ɑ́kɑ̈lli yi wøn. Keny-ɑ ɑ́bëën wɑ yij piny men, piny tyëng Amör, ge ɑ́cyeed wɑ̈g yi Jwøng-ɑ Ácwɑ̈ɑ̈j kiperee. Kì bɑng menɑni, bene Jwøng-ɑ Ácwɑ̈ɑ̈j ɑ ómɑlli yi wɑ kete, mɑ́ bene Jwøgee.” Aköbbi ji yi Jöcwø kinni, “Wu pɑ cuggi mɑlli Jwøng-ɑ Ácwɑ̈ɑ̈j, mɑ́ e bɑ kwërø, o pëddi tyiel, o pyëwe koo lɑ̈ɑ̈m ki orøøg wun geki kerri orøøg wun. Keløg Jwøng-ɑ Ácwɑ̈ɑ̈j ówiy yi wun, kɑ wu kedh-ɑ be mɑlli jwögg møøgø, ree óluge wun kɑ wu cɑye. Wu órënye, cɑgg ɑ́ kɑ ɑ́bëëde wu nyi gögge’ göggø ki gïgdøj cøn.” Aköbbi Jöcwø yi ji kinni, “Pɑth, bene Jwøng-ɑ Ácwɑ̈ɑ̈j ɑ ómɑlli yi wøn.” Aköbbi gen yi Jöcwø kinni, “Wu ómɑg yi lebbi wun, mɑ́ wu ɑ́kwɑny-ɑ mɑlli Jwøng-ɑ Ácwɑ̈ɑ̈j.” Ayïëy gen kinni, “Awøø, wiy wø ómɑg yi lebbi wøn ceth.” Aköbbe gïn kinni, “Døj, weddi wun ngïjji jwögg-ɑ pɑth møg-ɑ yï wun, kɑ pëthi wun cïb wun ri Jwøng-ɑ Ácwɑ̈ɑ̈j, Jwøøg Isrɑil.” Aköbbi Jöcwø yi teedø kinni, “Jwøng-ɑ Ácwɑ̈ɑ̈j, Jwøøg wøn, en ɑ ómɑlli yi wøn. Cigge ómïdhi yi wøn.” Kɑ lwöm-ɑ ɑ́lwøb yi gen kì Cekïm dicyɑ̈ngɑni, cïb yi Jöcwø ɑ́ kwöng. Agweed kwøbbɑni yij wɑ̈nyi Ciggi Jwøk yi Jöcwø. Kɑ Jöcwø ókɑ̈bbø ki tungi kït me dwøng, kɑ gø cïbe thɑ óthur-ɑ buti kej kwër. Aköbbi ji bënn yi Jöcwø kinni, “Tungi kït men, bene nyuudhi miee; kwøbb-ɑ ɑ́köbbi Jwøng-ɑ Ácwɑ̈ɑ̈j yi wɑ bënn ɑ́lïngi yi en. Wiy bëëde ɑ́ nyuudhi kipe kinni, o wu ócög wun Ciggi Jwøk pɑ pyem yi wun.” Aköbbi ji yi Jöcwø kinni kedh gen, ɑdøøg gen myërri gen bënn. Kɑ Jöcwø bɑ̈ng Jwøng-ɑ Ácwɑ̈ɑ̈j, othøø e runne bɑ miyø kí pyɑ̈rø. Kɑ kony yi tyëng Isrɑil, kì pinye kì Timnɑ̀ Serɑ̀, kì myërri kïtti Eprɑim, ɑ rwöm ki Kïti Gɑɑc kì wɑɑng wuudø. Isrɑil ɑ́mɑll-ɑ Jwøng-ɑ Ácwɑ̈ɑ̈j kì yethi cyɑ̈ngg-ɑ ɑ́bëëd Jöcwø geki pëjj-ɑ ɑ́döng ge obëëdø kì bɑnge, bene gen tyëng-ɑ ɑ́lidh gïg-ɑ ɑ́göggi Isrɑil yi Jwøng-ɑ Ácwɑ̈ɑ̈j bënn. Cu Yosep, keny-ɑ ɑ́kɑ̈ɑ̈l gen yi tyëng Isrɑil kì Rïp, ge ɑ́koony-ɑ Cekïm, kì yij bɑng-ɑ ɑ́ngew yi Yɑgob kì yï kwɑrri Amör, wïyi Cekïm, ki ngyëny ɑ́tegg miyø. Pinyɑni bɑ mi kwɑrri Yosep. Kɑ Eliɑdhɑr wɑ̈d Aɑron othøø, ɑkonyii kì Gibeɑ̀, kɑɑl Pineɑs wɑ̈de, kɑɑl-ɑ ɑ́mëggii kì myërri kïtti Eprɑim. Keny-ɑ ɑ́rum Jöcwø ki thøø, ɑpyëëj Jwøng-ɑ Ácwɑ̈ɑ̈j yi tyëng Isrɑil kinni, “Á tyëng gøl men ɑ ókwöngi ki kedhi be nyɑɑg ki tyëng Kɑnɑɑn?” Alöggi Jwøng-ɑ Ácwɑ̈ɑ̈j kinni, “Gøl Yeudɑ̀ ɑ ókwöngi ki kedhø. Piny cïbɑ’ cinggi gen.” Aköbbi gøl Cimeøn yi nyiiwï gen, gøl Yeudɑ̀ kinni, “Bïu, kedhi wɑ piny men-ɑ ɑ́mëggi wøn, o wɑ nyïɑ̈ggi wɑ ki tyëng Kɑnɑɑn. O wø ókedh wøn thyew ki wun keny-ɑ ókedhu be nyɑɑg kipe piny men-ɑ ɑ́mëggi wun.” Codhe, ɑkedh gøl Cimeøn, geki gøl Yeudɑ̀. Ge ɑ́kedh kɑ ge ónyïɑ̈ggø ki liny kyeel. Athödhi gen ki tegø yi Jwøng-ɑ Ácwɑ̈ɑ̈j, kɑ tyëng Kɑnɑɑn geki tyëng Perïdh tyɑm yi gen. Ge ɑ́tyɑm kì Bedhek e kwɑnni gen bɑ ɑ́lïp pyɑ̈rø. Ayod gen Adönibedhek kì Bedhek, kɑ ge ónyïɑ̈ggø ki gøn. Arengi Adönibedhek, kɑ ge reng-ɑ bɑnge, ɑmɑgii yi gen, ɑngøl lwedd-ɑ døngø kì cingge geki tyelle. Akööb Adönibedhek kinni, “Rɑ̈nhì pyɑ̈r ɑ́bïryew mø lwedd-ɑ døngø kì cinggi gen geki tyelli gen bɑ ɑngøl, ɑ́bëëd ge nyii gwënø ki thullì kì thɑ tɑrɑbedhɑ̀ kì tɑwɑ. De ɑnɑn Jwøk yɑ ɑ́gögge gïn-ɑ ɑ́göggɑ gen.” Akïdhii Yerusɑlem kɑ othøø kì kunɑni. Jø gøl Yeudɑ̀ ɑ́pɑ̈ɑ̈r kömi Yerusɑlem, kɑ mɑg gen. Anɑ̈g gen jie, kɑ kɑɑlɑni rɑ̈b yi gen. Codhe, ɑkedhi gen be nyïɑ̈ggø ki tyëng Kɑnɑɑn møg-ɑ bëëdø kì wɑ̈thi kïttì, kí myërri thɑ́ kïttì, kí tyëng yij ryɑng kì wɑɑng wurlwɑl. Apödhi gen be nyïɑ̈ggø ki tyëng Kɑnɑɑn møg-ɑ bëëdø kì kɑɑl Kibrön men-ɑ ɑ́bëëd e nyi cwøl ɑ́ Kiriɑt Arbɑ̀. Atyɑɑm Cecɑy, kí Akimɑn, kí Tɑlmɑy yi gøl Yeudɑ̀. Kɑ ge pödh-ɑ be nyïɑ̈ggø ki tyëng Debir, kì bøli keny-ɑ ɑ́bëëde cwøl ɑ́ Kiriɑt Seper. Akööb Kɑlib kinni, “Ngɑn-ɑ ónyïɑ̈ggi ki Kiriɑt Seper kɑ gø mɑge, ómëggɑ nyɑrɑ Aksɑ̀ ɑ́ dhɑjø.” Kɑ kɑɑlɑni mɑg yi Othniel wɑ̈d Kenɑdh. Kenɑdh bɑ ómï Kɑlib nyel-ɑ thinh. Codhe, kɑ Kɑlib nyɑre Aksɑ̀ mëgge Othniel. Keny-ɑ ɑ́dɑ̈ggi Aksɑ̀ yï Othniel. Kɑ Aksɑ̀ pɑng yi Othniel kinni, i cwödde ki pwödhø kì yï wïye. Keny-ɑ ɑ́yïnhi Aksɑ̀ piny kì kömi ɑdere, ɑpyëjii yi wïye kinni, “Á gïn ɑ dwɑddi yi yïn?” Alögge kinni, “Nëngí yɑn ki keny me di nyingi pï, mɑ́ piny-ɑ ɑ́mëggí yɑn kì kuni wɑɑng wurlwɑl yije bong pï.” Codhe, ɑmëggii nyingi pï møg-ɑ wïj kwøømø, kí møg-ɑ yij tör yi Kɑlib. Ørri Mosɑ̀, kwɑrri Ken, geki tyëng Yeudiyɑ̀ ɑ́kedh kì Yerikö, kɑɑl benø, ge kedh-ɑ yij ryɑng kì pɑ̈ɑ̈l Yeudiyɑ̀, kɑ ge pëgg-ɑ yij ryɑng-ɑ wɑɑng wurlwɑl kì Arɑd. Ge ɑ́pëggi kelli tyëng Amɑlek. Kɑ gøl Yeudɑ̀ geki nyiiwï gen, gøl Cimeøn kedh-ɑ yï tyëng Kɑnɑɑn møg-ɑ bëëdø kì kɑɑl Dhepɑth, kɑ gï tyɑm gen, kɑ kɑɑlɑni rënyi gen. Codhe, kɑ kɑɑlɑni cɑg yi gen ɑ́ Órmɑ̀. De kɑ̈ddi Gɑdhɑ̀, kí Ackelön, kí Ekrön, kí myërri gen nuti mɑɑg gen. Akøny gøl Yeudɑ̀ yi Jwøng-ɑ Ácwɑ̈ɑ̈j, kɑ myërr-ɑ wɑ̈thi kïttì mɑg yi gen, de tyëng-ɑ bëëdø kì yij tör ɑ́dhɑ̈li cyeed wɑ̈g yi gen, mɑ́ ge ɑ́bëëd yï gen dɑ yɑ̈thi liny mɑ ngyënyø dødø. Amëggi Kibrön Kɑlib ni kɑ ɑ́cïg Mosɑ̀. Acyeed kwɑrri Anɑk wɑ̈g gɑ wɑ̈thi kɑ̈llì ɑ́dɑ̈g yi Kɑlib. De tyëng Yebus, møg-ɑ bëëdø kì Yerusɑlem nuti cyeed wɑ̈g yi gøl Ben Yɑmïn, ge ɑ́döng ge obëëdø ki gøl Ben Yɑmïn gïti dicyɑ̈ngtïn. Apɑ̈ɑ̈r gøl Eprɑim geki gøl Mɑnɑsè kömi Betiil, kɑ ge køny yi Jwøng-ɑ Ácwɑ̈ɑ̈j. Kɑɑlɑni ɑ́bëëd e cwøl ɑ́ Ludh kì bøli kenyɑni, kɑ oödø ki lyëwwì. Aliidh jɑl megø yi lyëwwɑni e bï-ɑ wɑ̈g kì kɑɑl, kɑ gø köbbi gen kinni, “Nyudhí wøn yuu-ɑ kedhi kɑɑl, o yï ógöggi yi wøn ki gïndøj.” Codhe, ɑnyudhe gïn yöö, kɑ ji bënn kì kɑɑlɑni nɑ̈g yi gøl Eprɑim geki gøl Mɑnɑsè, kɑ jɑlɑni geki gøl gen bëne ör wɑ̈g yi gen kinni kedh gen. Akedhi jɑlɑni pödhi tyëng Kit, ɑgëëde ki kɑɑl kì kunɑni, kɑ nyingi kɑɑlɑni cɑge ɑ́ Ludh, nyingɑni ɑ cöllii gïti dicyɑ̈ngtïn. Tyëng-ɑ ɑ́bëëd kì kɑ̈ddi Betcɑn, kí Tɑɑnɑk, kí Dör, kí Ibleɑm, kí Megidø, kí tyëng myërr-ɑ buti gen nuti cyeed wɑ̈g yi gøl Mɑnɑsè, tyëng Kɑnɑɑn ɑ́cög ge obëëdø kì kunɑni. Keny-ɑ ɑ́yïddi tyëng Isrɑil ki tegø, ɑcir gen tyëng Kɑnɑɑn, kɑ gï løg gen møg göggi gen, de gï nuti cyeed gen wɑ̈g. Tyëng Kɑnɑɑn møg-ɑ ɑ́bëëd kì Gedher nuti cyeed wɑ̈g yi gøl Eprɑim, de tyëng Kɑnɑɑn ɑ́cög ge obëëdø ki gen kì kunɑni. Tyëng-ɑ ɑ́bëëd kì kɑ̈ddi Kitrön geki Nɑɑ̈lɑl nuti cyeed wɑ̈g yi gøl Dhebulun, de tyëng Kɑnɑɑn ɑ́cög ge obëëdø kì kunɑni ki gen, kɑ gï løg gen møg göggi gen. Tyëng-ɑ ɑ́bëëd kì kɑ̈ddi Ákö, kí Sïdön, kí Alɑb, kí Akdhïb, kí Kelbɑ̀, kí Ápek, kí Reköb nuti cyeed wɑ̈g yi gøl Aceer. Tyëng gøl Aceer ɑ́bëëd kì kej ɑ́kyel ki tyëng Kɑnɑɑn møg-ɑ pönhɑni, gï nuti cyeed gen wɑ̈g. Tyëng-ɑ bëëdø kì kɑ̈ddi Bet Cemec geki Betɑnɑth, nuti cyeddø yi gøl Nɑptɑlì, gøl Nɑptɑlì ɑ́bëëd kì kelli tyëng Kɑnɑɑn, kɑ gï løg gen møg göggi gen. Gøl Dɑn ɑ́cyeed myërr-ɑ wɑ̈thi kïttì yi tyëng Amör, ge nuti wiyø yi gen o ge dwöög gen thɑ́ kïttì piny këti. Tyëng Amör ɑ́cög ge obëëdø kì Ayɑlön, kí Cɑɑlbïm kì wïj Kïti Ëres, de ge ɑ́jɑɑg yi gøl Eprɑim geki tyëng gøl Mɑnɑsè, kɑ gï løg gen møg göggi gen. Cɑ̈gi dhøg piny tyëng Amör ying-ɑ keny-ɑ cwøl ɑ́ Ókømi Akrɑbïm kì Selɑ̀, e pödh-ɑ wɑɑng wuudø. Wëywöni Jwøng-ɑ Ácwɑ̈ɑ̈j ɑ́dhwödh kì Gilgɑl, kɑ kedh-ɑ Bokïm, kɑ tyëng Isrɑil köbbe kinni, “Yɑn ɑ ɑ́kɑ̈ɑ̈l wun wɑ̈g kì Rïp, ɑkɑ̈ɑ̈lɑ wun pönh-ɑ ɑ́köbbɑ kweyyi wun. Yɑ ɑ́kööb kinni, ‘Lwöbø men-ɑ ɑ́nywɑg yi wɑ pɑ pɑ̈d yi yɑn gïti ɑtheer. Kɑ ko di lwöbø men-ɑ ónywɑg yi wun ki tyëng-ɑ bëëdø kì pönhɑni. Kɑ këlli lɑmmi jwöggi gen toor wun piny.’ De kwøbbɑ nuti lïngø yi wun, wu ɑ́gwøg-ɑ ngø? De ɑnɑn wun ɑ köbbi yi yɑn èn kinni, tyëngɑni pɑ cyeddi yi yɑn kì bøli wun keny-ɑ ókedhu yï gen. Ge óbëëdø gɑ tyëngmɑ̈ɑ̈nø ki wun, kɑ jwöggi gen ogöögø ki ɑ́kɑ̈llì kì cwɑggi wun.” Keny-ɑ ɑ́kwøøb møgɑni yi wëywöni Jwøng-ɑ Ácwɑ̈ɑ̈j, kɑ tyëng Isrɑil ócɑ̈gø ki ywøg bënn, bene ɑ cwølli kenyɑni ɑ́ Bokïm. Angɑ̈ddi gen Jwøng-ɑ Ácwɑ̈ɑ̈j ki gëdhhì. Aör tyëng Isrɑil yi Jöcwø kinni kedh gen, kɑ ngɑn kedhe be kwɑnyi pinye. Tyëng Isrɑil Jwøng-ɑ Ácwɑ̈ɑ̈j ɑ́mɑlli gen, keny-ɑ ɑ́bëëd Jöcwø nuti thøø, kí bɑng thøwe thyew, keny-ɑ́ nuti thøw jøgdøngi Isrɑil møg-ɑ ɑ́lidh gïgdøngø møg-ɑ ɑ́göggi Isrɑil yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j ɑ́mɑlli yi gen. Jöcwø wɑ̈d Nun, bɑ̈ng Jwøng-ɑ Ácwɑ̈ɑ̈j ɑ́thøw e runne bɑ miyø kí pyɑ̈rø. Akoonyii pinye kì Timnɑ̀ Serɑ̀ kì myërri kïtti Eprɑim kì Gɑɑc kì wɑɑng wuudø. Kɑ rïj menɑni bëne othøø thyew, kɑ rïj megø obëënø kì bɑng gen, me kwïj Jwøng-ɑ Ácwɑ̈ɑ̈j ki gïg-ɑ ɑ́gwøge kipe Isrɑil. Agöög tyëng Isrɑil ki gïnrɑj kì bøli Jwøng-ɑ Ácwɑ̈ɑ̈j, kɑ ge døøg-ɑ be mɑlli ngïjji jwøng-ɑ cwøl ɑ́ Bɑɑl. Ge ɑ́wïyi ki mɑlli Jwøng-ɑ Ácwɑ̈ɑ̈j, Jwøøg kweyyi gen, Jwøng-ɑ ɑ́kɑ̈ɑ̈l gen wɑ̈g kì Rïp, de ge ɑ́cɑ̈gi ki mɑlli jwögg møøgø, jwöggi tyëng-ɑ ying buti gen, kɑ ri gen nyi bøødh gen piny kì bøli jwöggɑni, kɑ pyëw Jwøng-ɑ Ácwɑ̈ɑ̈j órënyø ki gen. Ge ɑ́wïyi ki mɑlli Jwøng-ɑ Ácwɑ̈ɑ̈j, de ge mɑll-ɑ ngïji Bɑɑl geki ngïji jwøng-ɑ cwøl ɑ́ Actɑröth. Arënyi pyëw Jwøng-ɑ Ácwɑ̈ɑ̈j ki menteg ki Isrɑil, kɑ Isrɑil wiye o köme nyi pɑ̈ɑ̈r yi tyëng-ɑ nyi mɑ̈nyø, ɑkɑɑb jɑmmi gen yi tyëngɑni. Kɑ tyëngmɑ̈ɑ̈nø bënn møg-ɑ buti gen thödhe ki tegø, kɑ tyëng Isrɑil ódhɑ̈lø yieli ri gen kì cinggi tyëngɑni. Kenyi kedhi gen be nyïɑ̈ggø ki liny, ge nyii cɑyø yi Jwøng-ɑ Ácwɑ̈ɑ̈j kì bɑng rɑ̈ji gen, ni kɑ ɑ́könge ceth. Kɑ wɑ̈thi gen omuumø ki mendwøng. Codhe, ɑnëngi Isrɑil yi Jwøng-ɑ Ácwɑ̈ɑ̈j ki jɑgg møg yielii kì cinggi tyëng-ɑ nyi mɑnyii. De tyëng Isrɑil kwøbbi jɑggi gen nuti lïngø yi gen thyew. Jwøng-ɑ Ácwɑ̈ɑ̈j ɑ́wiy piny yi Isrɑil ni ngɑn wiy gøle piny. Ciggi Jwøng-ɑ Ácwɑ̈ɑ̈j ɑ́bëëd ge omïdhø yi wëëg gen, de rïj men-ɑ nyɑ̈n ɑ́jwɑn wïyø ki mïdhi møgɑni. Kì bøli keny-ɑ nyi nëngi Isrɑil ki jɑgø yi Jwøng-ɑ Ácwɑ̈ɑ̈j, jɑngɑni nyii kønyø yi Jwøng-ɑ Ácwɑ̈ɑ̈j, kɑ tyëng Isrɑil nyi yiele kì cinggi tyëngmɑ̈ɑ̈nø, kɑ̈ng-ɑ bëëde e onëënø. Jwøng-ɑ Ácwɑ̈ɑ̈j pyëwe nyii lɑ̈ɑ̈mø ki gen, kenyi ywöngi gen kì yij orɑng men-ɑ guud nyingi gen. De kenyi thøw jɑngɑni, kɑ tyëng Isrɑil nyii døøgø ki gwøg ki gïnrɑj men-ɑ kɑ̈ge dööng, me lod men-ɑ ɑ́gwøg yi rïny-ɑ ɑ́ying bøli gen, ge nyi kedh-ɑ bɑng jwögg møøgø, kɑ gï mɑlli gen, kɑ ge nyii bɑ̈nyø ki wiyi gwøg ki gïgrijjø møg-ɑ ɑ́gwøg yi gen kɑ̈ge dööng yi tegi muddi gen. Codhe, kɑ Jwøng-ɑ Ácwɑ̈ɑ̈j pyëwe nyii rënyø ki Isrɑil, kɑ nyii kööbø kinni, “Pönhï, lwöbø men-ɑ ɑ́nywɑg yi yɑn wøki kweyyi gen ɑ́pɑ̈d yi gen, mɑ́ kwøbbɑ ɑ́bɑny yi gen ki lïngø. Pödhh-ɑ ɑ́döng ge nuti mɑgø kì bøli keny-ɑ ɑ́thøw Jöcwø, pɑ cyeedɑ wɑ̈g kì bøli gen. Isrɑil órɑng yi yɑn, kɑ tyëngɑni, o lidh yi yɑn mɑ mïdhi gen kwøbbɑ ni kɑ ɑ́mïdhi gen yi kweyyi gen, wɑlɑ̀ koo mïdhi yi gen.” Awiy tyëngɑni yi Jwøng-ɑ Ácwɑ̈ɑ̈j ge obëëdø kì pinyɑni, ge nuti wëg en tyɑmø yi Jöcwø, wɑlɑ̀ ge nuti jwɑɑn en ki cyeed wɑ̈g kì pönhɑni, keny-ɑ ɑ́rum Jöcwø ki thøø. Codhe, ɑwiy kwï jurrì møøgø ge obëëdø kì pönhɑni yi Jwøng-ɑ Ácwɑ̈ɑ̈j, kipe kinni o jurrɑni gï rɑɑnge tyëng Isrɑil møg-ɑ nuti pɑ̈nyi nyɑɑg ki liny kì Kɑnɑɑn. Gïnɑni ɑ́gwøg yi en yøw kipe rïjji Isrɑil bënn, e pwöny-ɑ gen ki liny, de ɑ́dwɑdd-ɑ pwönyi rïjj-ɑ nuti nyïɑ̈ggø ki liny cøn. Tyëng-ɑ ɑ́döng ge obëëdø ki pönhɑni bɑ tyëng kɑ̈ddi Pelistiyɑ̀ ɑ́bïj kí tyëng Kɑnɑɑn bënn, kí tyëng Sïdön, kí tyëng Kib møg-ɑ bëëdø kì wɑ̈thi kïtti Lubnɑn, cɑ̈gi kì Kïti Bɑɑl Kermön gïti dhø döri Amɑth. Ge ɑ́bëëd gɑ møg rɑɑng Isrɑil yi Jwøng-ɑ Ácwɑ̈ɑ̈j, mɑ mïdhi gen cigg-ɑ ɑ́mëgge kweyyi gen kì ri Mosɑ̀, wɑlɑ̀ gï pɑ mïdhi yi gen. Codhe, kɑ tyëng Isrɑil obëëdø kì kelli tyëng Kɑnɑɑn, kí tyëng Kit, kí tyëng Amör, kí tyëng Perïdh, kí tyëng Kib, kí tyëng Yebus. Anywøm gen ri gen ki tyëngɑni, kɑ jwöggi tyëngɑni nyi mɑlli yi gen. Tyëng Isrɑil, Jwøng-ɑ Ácwɑ̈ɑ̈j, Jwøøg gen ɑ́wïl kì wɑ̈thi gen, kɑ ge ogöögø ki gïnrɑj kì bøli Jwøng-ɑ Ácwɑ̈ɑ̈j, kɑ Bɑɑl geki Aceerɑ̀ jwögg-ɑ pɑth mɑlli gen. Codhe, ɑrënyi pyëw Jwøng-ɑ Ácwɑ̈ɑ̈j ki menteg ki Isrɑil, kɑ gï cïbe cingi Kucɑn Ricɑthɑim, rɑ̈ɑ̈dh Misøpøtɑmiyɑ̀, ɑjɑɑg gen yi rɑ̈nhɑni ki runn ɑ́bïdɑ̈g. Aywøøg tyëng Isrɑil kö Jwøng-ɑ Ácwɑ̈ɑ̈j, ɑöni Jwøng-ɑ Ácwɑ̈ɑ̈j ki jɑl-ɑ ɑ́yiel gen. Jɑlɑni bɑ Othniel wɑ̈d Kenɑdh ómï Kɑlib nyel-ɑ thinh. Wëyi Jwøng-ɑ Ácwɑ̈ɑ̈j ɑ́bï ri Othniel ɑgööge ɑ́ jɑngi Isrɑil. Akedhe be nyɑɑg ki rɑ̈ɑ̈dh Misøpøtɑmiyɑ̀, kɑ thödhi ki tegø yi Jwøng-ɑ Ácwɑ̈ɑ̈j, kɑ rɑ̈nhɑni tyɑm yi en. Abëëd pödhø ki mër ki runn pyɑ̈r ɑ́ngwen. Codhe ɑthøw Othniel. Adøøg tyëng Isrɑil be gwøg ki gïgrijjø kì bøli Jwøng-ɑ Ácwɑ̈ɑ̈j, kɑ Eglön rɑ̈ɑ̈dh Moɑb wëgge tëngø kibøli tyëng Isrɑil. Arëbi Eglön ki tyëng Amɑlek, kí tyëng Amön, kɑ Isrɑil tyɑm yi gen, ɑmɑɑg Yerikö, ɑ løg kɑɑl benø yi gen. Ajɑɑg tyëng Isrɑil yi Eglön ki runn pyɑ̈rø wïdɑ́bïdɑ̈g. Kɑ tyëng Isrɑil ywøøg-ɑ kö Jwøng-ɑ Ácwɑ̈ɑ̈j, kɑ Eud wɑ̈d Gerɑ̀, jɑl mɑ cɑɑm kì wïj gøl Ben Yɑmïn ör yi Jwøng-ɑ Ácwɑ̈ɑ̈j be yieli gen. Eud ɑ́ör yï Eglön rɑ̈ɑ̈dh Moɑb yi tyëng Isrɑil kinni kɑ̈ɑ̈le jɑmm-ɑ ɑ́mëggi Eglön yi gen. Eud thɑ̈dhø ki pilø me bɑ̈re bɑ gïn ni sentimïtïr pyɑ̈r ɑ́bïj, me bedh kì tùnge bënn, ying-ɑ yij bøje gø twööj en rɑ̈me kì tuung kyëj kì thɑ ógødhe. Codhe, ɑmëgge jɑmmɑni Eglön. Eglön bɑ jɑl me cwiy ki mendwøng. Keny-ɑ ɑ́rum jɑmmì ki mëggii yi Eud, ɑköbbe jøg-ɑ ɑ́kɑ̈lli jɑmmì kinni, døøg gen pɑc. De Eud ɑ́dwöög kì buti ngïjjì, kì buti Gilgɑl, ɑköbbe Eglön kinni, “Wuö, yïɑ dɑ wöödø me dwɑddɑ köbbi yïn kì wɑ̈yí.” Codhe, kɑ rɑ̈dh jøge köbbe kinni, “Kedh wun, wiy wø döng wøn keti wøn!” Kɑ jøgɑni kedh-ɑ wɑ̈g bënn. Abëën Eud yï rɑ̈dh, e obëëdø kì wɑ̈ye kì øde, øn-ɑ mɑl, øn-ɑ ngij. Akööbe kinni, “Yïɑ dɑ wöödø me muujɑ yïn, e kɑ̈ɑ̈l-ɑ yï Jwøk.” Adhwödhi rɑ̈dh mɑl. Kɑ Eud pile wöödhe wɑ̈g ki cingi cɑɑme kì ópɑɑb kyëje, kɑ rɑ̈dh cwøbe kì yije. Apödhi pilø yije ki böle, kɑ cïnne røy-ɑ piny. Pilø nuti puth wɑ̈g yi Eud, mɑ́ e cödhø bëne yi dwɑ̈lø. Akedhi Eud wɑ̈g kɑ dhøggi ud bënn dijje köme. Codhe ɑkedhe. Keny-ɑ ɑ́bëën jøg-ɑ bɑ bɑ̈nggi rɑ̈dh, ɑlidh gen dhøggi ud gɑ ɑcyëg bënn, de ge ɑ́rum kinni i rɑ̈dh mɑɑg-ɑ ree piny. Ayïd gen kɑ ge opïdø yi yïd, de keny-ɑ ɑ́cwönge e ød nuti yieeb en, ɑkwɑny gen muptɑɑ̀, kɑ dhø ød tug gen. Kɑ wïi gen yood gen e obuddø kì piny e thøø. Eud, kedhø kì wɑ̈ye kɑ̈ng-ɑ ɑ́yïd gen. Kedhø e ójwɑnø kì gøddi kïtt-ɑ ótwegø, kɑ kedh-ɑ Seir. Keny-ɑ ɑ́wɑ̈nhe myërri kïtti Eprɑim, ɑkodhe tung e cwøl-ɑ tyëng Isrɑil kipe nyɑɑg, ɑpeeje gïn piny thɑ́ kïttì. Aköbbe gïn kinni, “Bïu bɑngɑ! Jwøng-ɑ Ácwɑ̈ɑ̈j wu ɑ́thödhe ki tegø men tyɑm wun tyëng-ɑ mɑɑn wun, tyëng Moɑb.” Akedhi gen bɑng Eud, kɑ dhøwɑdh men-ɑ di kɑ̈nhi yi tyëng Moɑb wɑ̈g kì Nɑm Urdun mɑg yi gen, bong dhɑnhø ɑ́kyel mɑ ɑ́wiy yi gen o kɑdhe wɑ̈g. Isrɑil ɑ́nɑ̈gi ki ji ɑ́lïp pyɑ̈rø, gɑ jøliny mø teg. Kɑ tyëng Moɑb tyɑm dicyɑ̈ngɑni yi Isrɑil. Kɑ pödhø obëëdø ki mër ki runn pyɑ̈r ɑ́bïdɑ̈g. Bɑng Eud, ɑ ɑ́bëën yi Cɑmgɑr wɑ̈d Anɑth. Isrɑil ɑ́yiel yi en thyew, kɑ ónɑ̈gø ki tyëng Pelistiyɑ̀ mø kwɑnni gen bɑ miy ɑ́bïkyel, ki lodh kïrø men-ɑ nyi kwølle wɑdhe, wɑɑdh pur. Keny-ɑ ɑ́rum Eud ki thøø, ɑgöög tyëng Isrɑil ki gïgrijjø këti kì bøli Jwøng-ɑ Ácwɑ̈ɑ̈j. Codhe, ɑwëggi gen tyɑmø yi Yɑbïn rɑ̈ɑ̈dh Kɑnɑɑn, ɑ ɑ́jyɑ̈ɑ̈g kì kɑɑl Adhör yi Jwøng-ɑ Ácwɑ̈ɑ̈j. Pënyi linye ɑ́bëëd ɑ́ Siserɑ̀, ɑ ɑ́bëëd kì Kɑröceth Pödhh-ɑ kyeelø. Yɑbïn ɑ́bëëd yïe dɑ yɑ̈thi liny miy ɑ́bïngwen, mø bɑ ngyënyø dødø, kí jøliny mø ngenyø. Kɑ tyëng Isrɑil jɑɑge ki runn pyɑ̈r ɑ́ryew, kɑ nyingi gïn guude. Codhe, ɑywøøg tyëng Isrɑil kö Jwøng-ɑ Ácwɑ̈ɑ̈j. Kì bøli kenyɑni, ngetitöng, Debörɑ̀ cï Lɑpidöt, ɑ́bëëd ɑ́ jɑngi burø kì Isrɑil. Debörɑ̀ nyi bëëd ɑ thɑ benø, kì kɑɑm Rɑmɑ̀ geki Betiil, kì myërri kïtti Eprɑim, kɑ tyëng Isrɑil nyi kedh-ɑ yïe be lidhi gønyyi gen. Aöde yï Bɑrɑk wɑ̈d Abinoɑm kì kɑɑl Kedec kì Nɑptɑlì ki wöödø kinni, “Jwøøg Isrɑil, Jwøng-ɑ Ácwɑ̈ɑ̈j, yï ɑ́cege kinni, ‘Kɑ̈bbí ki ji ɑ́lïp pyɑ̈rø kì kelli jø gøl Nɑptɑlì geki gøl Dhebulun, kɑ wu kedhu Kïti Tɑbör. Siserɑ̀, pënyi liny Yɑbïn ókɑ̈ɑ̈lɑ be nyɑɑg ki yïn, kì kömi Nɑm Gicön. Óbï ki yɑ̈the geki jølinye, de ge ócïbɑ cingí.’ ” De Bɑrɑk ɑ́löggi kinni, “Keløg yï ókedhø ki yɑn, yɑ ókedh, de keløg yï pɑ kedh, yɑ pɑ kedh thyew.” Alöggi Debörɑ̀ kinni, “Døj, wɑ ókedh, de bong pwøj møg-ɑ óyod yi yïn, mɑ́ Siserɑ̀ ócïb-ɑ cingi ngɑndhɑjø yi Jwøng-ɑ Ácwɑ̈ɑ̈j.” Codhe, ɑdhwödh Debörɑ̀ geki Bɑrɑk, kɑ ge kedh-ɑ Kɑdic. Acwøøl gøl Dhebulun geki gøl Nɑptɑlì kì Kɑdic yi Bɑrɑk, kɑ jøg mø kwɑnni gen bɑ ɑ́lïp pyɑ̈rø løg-ɑ bɑnge. Kɑ Debörɑ̀ ókedhø thyew ki gen. Kì bøli kenyɑni, Keber rum dhwödhø kì buti tyëng Ken møg-ɑ kyeelø, ɑ løg kwɑrri Köbɑb, ørri Mosɑ̀. Kɑ gudd-ɑ buti óthurø kì Dhɑnɑnïm. Keny-ɑ ɑ́lïng Siserɑ̀ kinni Bɑrɑk wɑ̈d Abinoɑm kedhi Kïti Tɑbör, kɑ Siserɑ̀ yɑ̈thi linye gɑ miy ɑ́bïngwen, kí jøliny bënn cwööle kì Kɑröceth Pödhh-ɑ kyeelø, kɑ ge kedh-ɑ kömi Nɑm Gicön. Aköbbi Bɑrɑk yi Debörɑ̀ kinni, “Dhwöödh kedh, wu opejø yi Jwøng-ɑ Ácwɑ̈ɑ̈j dicyɑ̈ngtïn! Mɑ́ men bene cyɑ̈ng-ɑ cïb Siserɑ̀ cingí yi Jwøng-ɑ Ácwɑ̈ɑ̈j.” Abëën Bɑrɑk piny kì wïj Kïti Tɑbör kí jøge, mø kwɑnni gen bɑ ɑ́lïp pyɑ̈rø. Keny-ɑ ɑ́pɑ̈ɑ̈r Bɑrɑk kömi Siserɑ̀ kí yɑ̈the, kí jølinye bënn, ɑmuum wɑ̈thi gen yi Jwøng-ɑ Ácwɑ̈ɑ̈j. Apɑ̈ɑ̈r Siserɑ̀ piny kì yij yɑ̈ye, kɑ órengø ki tyelle. Acyeddi Siserɑ̀ kí jøge kí yɑ̈the yi Bɑrɑk gïti Kɑröceth Pödhh-ɑ kyeelø. Anɑ̈ɑ̈g jøliny Siserɑ̀ bënn, bong dhɑnhø ɑ́kyel mɑ ɑ́döng. Kɑ Siserɑ̀ reng-ɑ kun-ɑ di kemɑ̀ mi Yɑil, cï Keber Kwɑɑr Ken, mɑ́ Yɑbïn rɑ̈ɑ̈dh Kɑnɑɑn, ɑ ɑ́jyɑ̈ɑ̈g kì Kɑdhör, kɑɑm gen ɑ́dɑ mër ki gøl Keber. Abëën Yɑil wɑ̈g kì yij kemɑ̀, kɑ Siserɑ̀ köbbe kinni, “Bïí jɑldwøng, bïí yij kemɑ̀ miɑ, yï ko böggi.” Codhe, ɑkedhe yij kemɑ̀, kɑ kum ki ógødh dhø kemɑ̀ yi ngɑnɑni. Aköbbe ngɑnɑni kinni, “Døj, nëngí yɑn ki pïg mɑdhɑ, riɑ dɑ röödhø.” Ayiebe dhøg ɑtheeb cɑg, ɑnënge gøn kɑ omɑ̈dhø, ɑdøøgii ki kumø yi ngɑnɑni. Aköbbi ngɑnɑni yi en kinni, “Cungí kì dhø kemɑ̀, kɑ keløg e dɑ dhɑnhø men-ɑ óbï, kɑ ópëjjø kinni, ‘Dɑ dhɑnhø me nud kì yij kemɑ̀?’ Kɑ kyëddí kinni bong dhɑnhø.” Siserɑ̀ ɑ́jwɑn nenø, mɑ́ e pïdø ki mendwøng. Kɑ Yɑil cï Keber ókɑ̈bbø ki piji kemɑ̀, kɑ pyëdh cïbe cinge, kɑ kedh-ɑ köme mɑ̈ɑ̈dh, ɑgure pijø thɑ̈nge, kɑ twïy-ɑ wɑ̈g kì thɑ̈nge tung-ɑ kyeelø, kɑ othøø. Keny-ɑ ɑ́bëën Bɑrɑk e yɑb-ɑ Siserɑ̀, ɑkedhi Yɑil wɑ̈g be mɑ̈dhii, kɑ okööbø kinni, “Bïí o yï nyudhɑ jɑl-ɑ yɑb yi yïn.” Akedhi gen yij kemɑ̀, ɑlidhe Siserɑ̀ e buud-ɑ piny e thøø, kí piji kemɑ̀ e twïy wɑ̈g kì thɑ̈nge. Isrɑil ɑ́thödhi yi Jwøk dicyɑ̈ngɑni ki tegø men-ɑ ɑ́tyɑme Yɑbïn rɑ̈ɑ̈dh Kɑnɑɑn. Tyëng Isrɑil ɑ́kedh ge ótëngø ki mendwøng, kɑ̀ nyïɑ̈ggi gen, gïti kɑ ɑ́tyɑm gen Yɑbïn, kɑ gø nɑ̈g gen. Debörɑ̀ geki Bɑrɑk wɑ̈d Abinoɑm ɑ́wör ki wörø men kì cyɑ̈ngɑni kinni: Lenhu Jwøng-ɑ Ácwɑ̈ɑ̈j! Liny ɑ́pej yi pëjji Isrɑil, ji ri gen ɑ́muuj gen keti gen ki medi pëëth, Lïng wun, wun ɑ rɑ̈nhì! Kyën wun yïthhi wun, wun ɑ jɑgg. Yɑ ówör kì bøli Jwøng-ɑ Ácwɑ̈ɑ̈j, yɑ othumø ki thøm, yɑ otugø kì bøli Jwøøg Isrɑil, Jwøng-ɑ Ácwɑ̈ɑ̈j. Keny-ɑ ɑ́dhwöödh, yïn ɑ Jwøng-ɑ Ácwɑ̈ɑ̈j kì kïtti Seir, kɑ yï ókedhø kì piny Edöm, piny ɑ́nhɑ̈nhi kɑ kødh ódëëmø, ngee, pï ɑ́ceg ì bɑɑw kì piny ge kɑ̈ɑ̈l-ɑ yethi pøøl. Kïttì ɑ́kïïr kì bøli Jwøng-ɑ Ácwɑ̈ɑ̈j, en ɑ Wïi Sinɑy, ge ɑ́nhɑ̈nhi kì bøli Jwøøg Isrɑil, Jwøng-ɑ Ácwɑ̈ɑ̈j. Kì yethi cyɑ̈nggi Cɑmgɑr wɑ̈d Anɑth, kí yethi cyɑ̈nggi Yɑil, yëëth ɑ́wiy ki cɑɑdhø, wëll ɑ́kɑ̈ll-ɑ pɑ̈l. Myërri Isrɑil ɑ́wiy, ge ɑ́bëëd ge lïïwø gïti kɑ ɑ́dhwödhɑ yɑ Debörɑ̀, yɑn ɑ́ meyi Isrɑil. Keny-ɑ ɑ́kɑ̈bbi gen ki jwögg mø nyɑ̈n, liny nuti wɑ̈nhi dhøggi kɑ̈ddi gen? Ádɑ kwöd wɑlɑ̀ tøng mɑ ɑ́lidh kì yï jø Isrɑil, ki kwɑnni gen gɑ ɑ́lïp pyɑ̈r ɑ́ngwen? Pyëwɑ ying-ɑ kömi pëjji Isrɑil møg-ɑ ɑ́muuj ri gen kì kelli ji. Lenhu Jwøng-ɑ Ácwɑ̈ɑ̈j! Lïng wun, wun ɑ tyëng-ɑ cyɑ̈dhi kì kömi ɑderr-ɑ kïddi gen tɑr, wun ɑ bëëdø kì kömi ódïïb, kí wun ɑ cyɑ̈dhi tyelli wun! Lïngu cwɑggi tyëng-ɑ wör kì kömi yïïthi pï, ge wör-ɑ wörri tyɑ̈mø men-ɑ ɑ́muuj yi Jwøng-ɑ Ácwɑ̈ɑ̈j. Tyɑ̈m-ɑ ɑ́tyɑ̈ɑ̈m jølinye! Akedhi jii Jwøng-ɑ Ácwɑ̈ɑ̈j wɑ̈g kì yethi kɑ̈ddi gen. Pyëjjí, Pyëjjí, Debörɑ̀, Pyëjjí! Gönyí ki wörø! Pödhí bølí Bɑrɑk wɑ̈d Abinoɑm, køøl ɑmɑggí. Kɑ ji-ɑ ɑ́mïdhi dhøggi gen, bï-ɑ yï jɑggi gen; jii Jwøng-ɑ Ácwɑ̈ɑ̈j ɑ́bï yïe ri gen gwiir gen kipe liny, Ge ɑ́bï kì Eprɑim ge kedh-ɑ yij tör, ge kedh-ɑ bɑng gøl Ben Yɑmïn geki jie. Pëjji liny ɑ́bï ge kɑ̈ɑ̈l-ɑ Mɑkir, gøl Dhebulun ɑ pyejji liny. Pëjji Isɑkɑr ɑ́bï geki Debörɑ̀, Isɑkɑr ɑ́bï kɑ Bɑrɑk obëënø thyew, ge ɑ́pödhi bɑnge kì yij tör. De tyëng gøl Ruben ri gen pɑ̈ngi gen, rummi gen ɑ́dhɑ̈li rëbø kipe kedhi be liny. Gede ɑ döngi gen cyɑ̈n kí dyëg? Kipe kinni o ge lïngi gen cwɑggi jøkwɑ̈yø møg-ɑ kwølli dyëg? Ngee, tyëng gøl Ruben ɑ́bëëd ri gen pɑ̈ngi gen, rummi gen ɑ́dhɑ̈li rëbø kipe kedhi be liny. Tyëng gøl Gɑd ɑ́döng ge obëëdø kì løøg Nɑm Urdun kì wɑɑng cyɑ̈ɑ̈ng mwøl, Adöng tyëng gøl Dɑn kì buti sɑpïnnì. Tyëng gøl Aceer ɑ́cöög gɑ̈d, ge ɑ́cög ge bëëd ɑ thɑ̈ngi nɑm. De gøl Dhebulun geki gøl Nɑptɑlì, ge ɑ́böyi ki kedhi be liny. Rɑ̈nhì ɑ́bï kɑ ge ónyïɑ̈ggø kì Tɑɑnɑk, kì kömi Nɑm Megidø, Rɑ̈nhi Kɑnɑɑn ɑ́nyïɑ̈ggi, de bong ngyënyø ɑ́tegø mɑ ɑ́kɑ̈l yi gen. Kyell ɑ́nyïɑ̈ggi kì mɑl, keny-ɑ ɑ́kedh gen ge bɑ̈ɑ̈n-ɑ mɑl ge ɑ́nyïɑ̈ggi ki Siserɑ̀. Ge ɑ́wøøj Nɑm Kicön yi bɑɑyø, eni Kicön nɑm-ɑ göjji bøle Yɑ ópödhi bølɑ ki tegø! Kɑ kyënyì bï-ɑ köme ge óbeddø, e piny omɑ̈rrø yi gen. Wëywöni Wë okööbø kinni, “Gøøj cyën kömi tyëng-ɑ bëëdø kì Merödh! Mɑ́ ge nuti bëën be kønyi Wë ki nyɑɑg ki tyëngmɑ̈ɑ̈nø møg-ɑ teg.” Ngɑn-ɑ ree di gyëdh mø døngø kì kelli tyëng-ɑ mɑ̈nn, bɑ Yɑil cï Keber jɑl Ken, en ɑ gyëdhhe døngø kibøli gyëdhhi tyëng-ɑ mɑ̈nn møg-ɑ bëëdø kì yethi kemmì. Siserɑ̀ ɑ́cwøl-ɑ pï, de ɑ́mëgge’ cɑg; ɑ́mëgge cɑg ɑdïng kì yij lwøøl jɑgg. Piji kemɑ̀ ɑ́kwɑnye ki cingi cɑɑme, o pyëdh ying-ɑ cingi kyëje. Pijø ɑ́gure thɑ̈ngi Siserɑ̀, kɑ wïje ópyëdø, pijø ɑ́gure kɑ twïy-ɑ wɑ̈g kì thɑ̈nge tung-ɑ kyeelø. Ápɑ̈ɑ̈dh cønge këële’ piny, ɑ́pɑ̈dhi dhø tyelli Yɑil; Cønge ɑ́rume piny kì bøle kɑ ópɑ̈ɑ̈dhø; ɑ́pɑ̈ɑ̈dh e kegø, kɑ cöög-ɑ kenyɑni. Meyi Siserɑ̀ nenn-ɑ wɑ̈g kì ɑwɑj; ɑ́mëddi kì ngɑ̈ɑ̈j wini ɑwɑj, ɑryeere kinni, “Ede yɑ̈ye ɑ cöge e pɑ jwɑn wɑ̈nhø? Gede kyënye ɑ dhɑ̈li gen ki dwöögø?” Alöggi nyɑn-ɑ wïje pel kì kelli bɑ̈ngge, kɑ löggɑni nyi cigi jølø yi meyi Siserɑ̀ e köbb-ɑ ree kinni, “Ge nudd ge ócunggø ki jɑmmì møg pɑ̈ngi, nyɑnɑjur ɑ́kyel wɑlɑ̀ ɑ́ryew ɑ mëggi jɑl-liny ɑ́kyel, o ógudhi kïdd-ɑ myër ɑ mëggi Siserɑ̀, ógudhi kïddì møg-ɑ ókwenø kì wɑ̈thi tùngi gen bɑ møgɑ.” Yïn ɑ Jwøng-ɑ Ácwɑ̈ɑ̈j, wiy tyëngmɑ̈ɑ̈nø bënn thøw gen kinøw, de wiy tyëng-ɑ mɑɑr yïn mëëny gen ni cɑ̈ng me ceg tuulø! Abëëd pödhø ki mër ki runn pyɑ̈r ɑ́ngwen. Kɑ tyëng Isrɑil cig-ɑ gwøg ki gïnrɑj kì bøli Jwøng-ɑ Ácwɑ̈ɑ̈j, ɑcïb gen cinggi tyëng Midyɑn yi Jwøng-ɑ Ácwɑ̈ɑ̈j, kɑ ge jɑɑg yi gen ki runn ɑ́bïryew. Tyëng Midyɑn ɑ́bëëd ge teg kibøli tyëng Isrɑil, ɑdøøg tyëng Isrɑil be pɑ̈nnø yi gen kì yethi órøggi kïttì, kí kɑ̈jj-ɑ bɑ gødd. Kenyi rum tyëng Isrɑil ki kɑ̈g ki byelli gen, tyëng Midyɑn, kí tyëng Amɑlek, kí jurr-ɑ wɑɑng cyɑ̈ɑ̈ng mwøl nyii bëënø kɑ ge pɑ̈ɑ̈r-ɑ köme. Ge nyii guddø ki kɑɑl kì Isrɑil, kɑ jɑmmì nyi kwɑny yi gen gïti buti Gɑdhɑ̀ kì wɑɑng wurlwɑl. Byel nyii kɑ̈ɑ̈lø yi gen, kí jɑmmì bënn, dyëg kí dhög, kí ɑderr, tyëng Isrɑil nyi wiy yi gen kɑ kɑ̈j. Ge nyii bëënø kí dhögi gen, kí kemmi gen, ge nɑ bɑ̈nyø. Gen kí ɑmɑlli gen, ge pɑ cuggi kwɑnø. Ge nyii bëënø kɑ pödhø ryɑ̈g yi gen. Kɑ tyëng Isrɑil nyingi gen guud yi tyëng Midyɑn, ɑywøøg gen kö Jwøng-ɑ Ácwɑ̈ɑ̈j. Keny-ɑ ɑ́ywøøg tyëng Isrɑil kö Jwøng-ɑ Ácwɑ̈ɑ̈j, kinni o gï yiele kì cinggi tyëng Midyɑn, ge ɑ́ödi yi Jwøng-ɑ Ácwɑ̈ɑ̈j, Jwøøg Isrɑil, ki jɑltöng men köbbi gen kinni, “Yɑn ɑ ɑ́kɑ̈ɑ̈l wun wɑ̈g kì Rïp, kì yij bɑ̈ɑ̈ngø. Wu ɑ́yielɑ kì cinggi tyëng Rïp, kí cinggi ji-ɑ ɑ́nyïɑ̈ggi ki wun bënn. Tyëngɑni ɑ́cyeddɑ kì bøli wun, kɑ piny gen mëggɑ wun. Wu ɑ́köbbɑ kinni, ‘Yɑ bɑ Jwøøg wun, Jwøng-ɑ Ácwɑ̈ɑ̈j, jwöggi tyëng Amör, ɑ piny gen bëëd yi wun ko mɑlli wun.’ De kwøbbɑ nuti lïngi wun.” Abëën wëywöni Jwøng-ɑ Ácwɑ̈ɑ̈j, kɑ pëgg-ɑ thɑ óthurø kì Óprɑ̀, yɑnhɑni bɑ mi Yöɑc kì gøl Abiedher. Gideon, wɑ̈de ɑ́bëëd e opödø ki gemè kì bur men-ɑ yije nyi bïïj ki møgi oløg, e kɑnn-ɑ ree kipe ólidh yi tyëng Midyɑn. Acwöb wëywöni Jwøng-ɑ Ácwɑ̈ɑ̈j kì bøli Gideon, kɑ gø köbbe kinni, “Yï ómïdhi yi Jwøng-ɑ Ácwɑ̈ɑ̈j, nyelteg!” Alöggi Gideon kinni, “Keløg Jwøng-ɑ Ácwɑ̈ɑ̈j nudd wø mïdhe’ mïdhø, ede gïg ni møg bënn ɑ cwöb gen kiper wøn, wuö? Gïïngɑ̈ngø bënn møg-ɑ ɑ́gögge kweyyi wøn, kɑ wø wɑ̈jji yi gen, gïgɑni ying-ɑ keny? Bɑ Jwøng-ɑ Ácwɑ̈ɑ̈j ɑ ɑ́kɑ̈ɑ̈l kweyyi wøn wɑ̈g kì Rïp kidyër? De ɑnɑn Jwøng-ɑ Ácwɑ̈ɑ̈j wø ɑ́wiye cinggi tyëng Midyɑn.” Codhe, ɑköbbii yi Jwøng-ɑ Ácwɑ̈ɑ̈j kinni, “Kedh ki tegí bëne, kɑ tyëng Isrɑil yieel kì cinggi tyëng Midyɑn. Bɑ yɑn kiriɑ ɑ ör yïn.” Apyëjii yi Gideon kinni, “Isrɑil óyiel yi yɑn kidï, wuö? Gøl wøn bene gøl-ɑ pëddi nyøødhø kì kelli kɑ̈lli gøl Mɑnɑsè kì Isrɑil, o bɑ yɑn ɑ thinh kì gøl wøn.” Alöggi Jwøng-ɑ Ácwɑ̈ɑ̈j kinni, “Yï ókøny yi yɑn, kɑ tyëng Midyɑn tyɑm yi yïn, ge nɑ dhɑnhø ɑ́kyel yøw.” Kɑ møge løøg yi Gideon kinni, “Keløg pyëwí med ki yɑn, nëngí yɑn ki ngïji me nyodh kinni yï bɑ Jwøng-ɑ Ácwɑ̈ɑ̈j.” Akööbe kinni, “Døj, bëëd yï ko kedh gïti keny-ɑ ódwöögɑ yɑ ókɑ̈ddø ki gëëdhi.” Kɑ wëywönɑni okööbø kinni, “Yɑ óbëëdø gïti keny-ɑ ódwöög.” Akedhi Gideon gøle, kɑ otɑ̈dø ki nyɑ ónywøg, kɑ kïllì pyɑ̈rø mø møng-ɑ búr gemè nyöme, kɑ gø bule ɑ́ ópùni olwëny, ɑkïdhe rïngø yij ɑ́ridh kɑ cwɑyø kïdhe yij dɑg, kɑ gï muuje wëywöni Jwøng-ɑ Ácwɑ̈ɑ̈j kì thɑ óthurø, kɑ gï mëgge gøn. Aköbbii yi wëywödø kinni, “Cïb rïngø geki ópun kömi kït men, kɑ cwɑyø køny kömi gen.” Agwøøg møgɑni ceth yi Gideon. Kɑ wëywödø, rïngø geki ópun nywɑle ki leeb lonh-ɑ kɑ̈lle kì cinge. Alyel mɑc kì ri kït, kɑ rïngø geki ópun rɑ̈be. Kɑ wëywödø ólɑ̈ɑ̈nyø kì bøle. Keny-ɑ ɑ́ngijii yi Gideon kinni bɑ wëywöni Jwøng-ɑ Ácwɑ̈ɑ̈j, ɑbwøge kɑ ogɑ̈ɑ̈yø kinni, “Möy! Wuö Jwøng-ɑ Ácwɑ̈ɑ̈j! Wëywöní ɑ́lidhɑ, kɑ nyingi wøn kyëël wøn ki en!” De ɑ́köbbi yi Jwøng-ɑ Ácwɑ̈ɑ̈j kinni, “Bëëd ki mër, yï ko böggi, yï pɑ thøw!” Codhe, ɑgëddi Jwøng-ɑ Ácwɑ̈ɑ̈j ki këli lɑm yi Gideon, kɑ kenyɑni cɑge ɑ́, “Jwøng-ɑ Ácwɑ̈ɑ̈j bɑ mër.” (Këlɑni nudd e ócungø kì Óprɑ̀ pɑɑ gøl Abiedher gïti dicyɑ̈ngtïn). Kì wɑ̈rɑni, ɑköbbi Gideon yi Jwøng-ɑ Ácwɑ̈ɑ̈j kinni, “Kwɑny wɑɑdh wïyí geki wɑdh megø, me runne bɑ ɑ́bïryew, kɑ këli lɑm mi Bɑɑl, men-ɑ bɑ mi wïyí cøør piny, kɑ ngïjji jwøng-ɑ dhɑjø, Aceerɑ̀ men-ɑ bute toor piny. Kɑ Jwøgí, Jwøng-ɑ Ácwɑ̈ɑ̈j gëddí ki këli lɑm me myëër kì kömi lɑ̈mɑni. Kɑ wɑnh-ɑ pɑth ki mi wïyí kwɑɑny, kɑ rɑ̈ɑ̈b bëne ɑ́ gëëdhi, gwøg ngïji Aceerɑ̀ men-ɑ ɑ́tor yi yïn ɑ́ yugg.” Codhe, ɑkɑ̈bbi Gideon ki ji pyɑ̈rø kì kelli bɑ̈ngge, ɑgwøge møg-ɑ ɑ́köbbii yi Jwøng-ɑ Ácwɑ̈ɑ̈j. Møg-ɑ ɑ́kwøb yi Jwøng-ɑ Ácwɑ̈ɑ̈j ɑ́gwøg yi en kì wɑ̈r, mɑ́ e ɑ́bëëd e óböggø yi tyëng gøl gen, kí tyëng kɑɑl. Kì mwøl dhuki, keny-ɑ ɑ́dhwödh tyëng kɑɑl, ɑyuud gen këli lɑm mi Bɑɑl geki ngïji Aceerɑ̀ men-ɑ bute ge ótoor piny, o wɑnh-ɑ pɑth ki mi wïye órɑ̈bø ɑ́ gëëdhi kì kömi këli lɑm men-ɑ ɑ́ger. Kɑ ji ri gen pyënyi gen kinni, “Á men ɑ ɑ́gwøg gïn ni men?” Apëëj gen, kɑ yod yi gen kinni bɑ Gideon wɑ̈d Yöɑc ɑ göögø kinøw. Aköbbi Yöɑc yi gen kinni, “Kɑ̈ɑ̈l wɑ̈dí wɑ̈g keny, o nɑ̈g yi wøn! Këli lɑm mi Bɑɑl ɑ́cøøre piny, kɑ ngïji Aceerɑ̀ men-ɑ bute toore piny.” Aköbbi ji bënn møg-ɑ ɑ́dhwödh ki liny kipere, yi Yöɑc kinni, “Wu nyïɑ̈ggi kɑ per Bɑɑl? Wu cwɑg-ɑ en? Ngɑn-ɑ ónyïɑ̈ggi kipere ónɑ̈g kì mwøl dhuki! Keløg Bɑɑl bɑ jwøg, wiy nyɑɑge linye, mɑ́ e bɑ këli lɑme ɑ ɑ́cøøre piny.” Acɑɑg Gideon yi gen dicyɑ̈ngɑni ɑ́ Yerubɑɑl, mɑ́ Yöɑc ɑ́kööb kinni, “Wiy Bɑɑl nyïɑ̈gge ki Gideon, mɑ́ en ɑ ɑ́cøør kële piny.” Arëbi tyëng Midyɑn, kí tyëng Amɑlek, kí jurr-ɑ wɑɑng cyɑ̈ɑ̈ng mwøl, kɑ ge kɑdh-ɑ løøg Nɑm Urdun, kɑ ri gen cøng gen kì Töör Yidhriil. Abëën wëyi Jwøng-ɑ Ácwɑ̈ɑ̈j ri Gideon, kɑ kɑng kodhe e cwøl-ɑ tyëng gøl Abiedher, kinni bï gen bɑnge. Aöde myërri kɑ̈lli Mɑnɑsè ryeet ki tyëngwöödø e cwøl-ɑ gïn kinni bï gen bɑnge. Kɑ öd-ɑ yï gøl Aceer, kí gøl Dhebulun, kí gøl Nɑptɑlì. Abëën gen kɑ ge órëbø ki gøn. Codhe, ɑköbbi Jwøk yi Gideon kinni, “Yï okööbø kinni ce yɑ ógwøøg ngɑn yiel Isrɑil, døj, yɑn ɑ cïb yëyy piny yij rɑri gemè èn; keløg thöjj óying mø nud kì ri yëyy, de piny óbëëd e thwøwø, bene en ɑ óyodɑ en kinni Isrɑil óyiel yi yïn kì riɑ.” Acwöb gen ceth. Kì mwøl dhuki, ɑbiij yëyy yi Gideon, kɑ lwøl opɑ̈ngø yi pïg-ɑ ɑ́bïïje wɑ̈g kì ri yëyy. Aköbbi Jwøk yi Gideon kinni, “Yï ko mɑg yi liny ki yɑn. Wiy yɑ cigɑ kwøb kinni, wiy yëyy keti gen bëëd ge thwøwø, kɑ wiy piny bëne bëëde e thij yi thöjj.” Agwøøg møgɑni ceth yi Jwøk kì wɑ̈rɑni. Dhuki kì mwøl, yëyy thwøwø, dɑ́ piny kete ɑ thij yi thöjj. Kɑ Yerubɑɑl, ɑ løg Gideon ókedhø kì mwøl geki jøge bënn, kɑ ge pëgg-ɑ kömi wɑɑng pïi Kɑröd. O tyëng Midyɑn ying-ɑ wɑɑng wuudø kì thɑ Kïti Morè kì yij tör. Aköbbi Gideon yi Jwøng-ɑ Ácwɑ̈ɑ̈j kinni, “Jií gïïr kì yïɑ kipe tyɑmi tyëng Midyɑn. O Isrɑil cöge e pɑ thwøg kinni ɑ́yiel-ɑ yi tege kete. Anɑn köbbí ji kinni, ‘Ke di dhɑnhø me yije kïïr yi wɑ̈ɑ̈rø, døøge pɑc, de wø óbëëdø kì Kïti Gilyɑd keny.’ ” Codhe, ɑdøg ji ɑ́lïp pyɑ̈r ɑ́ryew wïdɑ́ryew, kɑ ji ɑ́lïp pyɑ̈rø odöngø kí en. De Jwøng-ɑ Ácwɑ̈ɑ̈j Gideon ɑ́köbbe kinni, “Ji nudd ge gïïr, kïdhí gen nɑm, ge óyieny yi yɑn, yï óköbbi yi yɑn kinni, dhɑnhø men kedhe, kɑ men ko kedh. Kɑ ngɑn-ɑ ókyer yi yɑn ko kedh.” Codhe, ɑkïdhe gïn nɑm. Kɑ köbbi yi Jwøng-ɑ Ácwɑ̈ɑ̈j kinni, “Dɑ̈ɑ̈ng ji møg-ɑ gɑ̈dø ki lebbi gen ni gwögg, ki ji møg-ɑ órum cøngi gen piny kɑ̀ mɑ̈dhi gen.” Amɑ̈dhi ji miy ɑ́dɑ̈g ki pï ge tömm-ɑ dhøggi gen ki cinggi gen. Kɑ møg-ɑ kyeelø ómɑ̈dhø ki dhøggi gen, ge ying-ɑ wɑ̈thi cøngi gen. Aköbbi Gideon yi Jwøng-ɑ Ácwɑ̈ɑ̈j kinni, “Wu óyiel yi yɑn kì cinggi tyëng Midyɑn kɑ ji miy ɑ́dɑ̈g møg-ɑ ɑ́mɑ̈dhi ki cingi gen, kɑ wiy ji møgɑk bënn døøg gen pɑc.” Codhe, ɑör tyëng Isrɑil møg-ɑ kyeelø bënn pɑc yi Gideon. Adöng ji miy ɑ́dɑ̈g keti gen, ɑ løg tyëng-ɑ ɑ́mïdhi jɑmmi liny kí kɑ̈ngì kì cinggi gen. Kì bøli kenyɑni kɑɑl tyëng Midyɑn ɑ́ying-ɑ yij tör. Aköbbi Gideon yi Jwøng-ɑ Ácwɑ̈ɑ̈j kì wɑ̈rɑni kinni, “Dhwöödh, kedhí be pɑ̈ɑ̈r kömi kɑɑlɑni, mɑ́ e ɑ́cïbɑ cinggi wun. De keløg yï óböggø, kedhí kɑɑlɑni møti wuki Purɑ̀ bɑ̈ngí. Yï ólïngø ki møg-ɑ ókømmi yi gen, kɑ pyëwí ótëngø, kɑ yï kedh-ɑ be nyɑɑg ki gen.” Codhe, ɑkedh Gideon geki bɑ̈nge Purɑ̀ tøg kɑɑl tyëngmɑ̈ɑ̈nø. Tyëng Midyɑn, kí tyëng Amɑlek, kí jurr-ɑ wɑɑng cyɑ̈ɑ̈ng mwøl bënn pëggi yij tör, ge gïïr nɑ bɑ̈nyø. Amɑlli gen gïïr nɑ ɑyejø kì thɑ̈ngi nɑɑm omelø. Gideon ɑ́wɑ̈dhi ceth, e jɑl megø köbb-ɑ mɑ̈dhe lɑ̈g mø lɑ̈g en kinni, “Yɑ ɑ́lɑ̈g-ɑ ópuun ceir e ngyëël-ɑ ree kɑɑlee, kɑ pɑ̈dh-ɑ kömi kemɑ̀. Kɑ kemɑni ópɑ̈ɑ̈dhø yije reeny en piny.” Alöggi mɑ̈dhe kinni, “Bong gïjø megø këti, den-ɑ́ pili Gideon wɑ̈d Yöɑc jɑl Isrɑil. Midyɑn geki yɑye bëne ɑ́cïb cinge yi Jwøk!” Keny-ɑ ɑ́lïngi lɑ̈ggɑni yi Gideon, kí gïn-ɑ wɑngi yi gen, ɑbøødhe ree piny, kɑ Jwøng-ɑ Ácwɑ̈ɑ̈j mɑle. Adøøge kɑɑl Isrɑil, kɑ jøge köbbe kinni, “Dhwödhu mɑl! Tyëng Midyɑn ɑ́cïb cingge yi Jwøng-ɑ Ácwɑ̈ɑ̈j!” Apɑ̈nge jøge, kwɑnni gen bɑ miy ɑ́dɑ̈g gɑ ɑkudd ɑ́dɑ̈g, ɑcïbe cinggi gen bënn ki kɑ̈ngì, kí puggì mø yethi gen di redhhi mɑc. Kɑ gï köbbe kinni, “Nennu yɑn, kɑ gïn-ɑ ógwøg yi yɑn keny-ɑ ówɑ̈dhɑ tøg kɑɑlɑni, gwøg wun. Keny-ɑ ókodh wøn kɑ̈ngi, wøki jøgɑ, kɑ kɑ̈ngi wun lony wun ki kodhø. Kɑ wu ryeer wun ki ngɑ̈ɑ̈j kɑɑl kinni, ‘Kipe Jwøng-ɑ Ácwɑ̈ɑ̈j geki Gideon!’ ” Gideon kí jøge, kwɑnni gen bɑ miyø, ɑ́wɑ̈dhi tøg kɑɑlɑni kì dïwɑ̈r bøli keny-ɑ nyi wiil ji-ɑ kurø. Akodh gen kɑ̈ngì, kɑ puggì nɑ̈g gen. Alunyi ɑkudd-ɑ kyeelø ryeet ki kodhi kɑ̈ngi gen, kɑ puggi gen nɑ̈g gen. Atïng redhhi mɑc mɑl yi gen bënn ki cinggi cyɑ̈mmi gen, o kɑ̈ngì ying-ɑ cinggi këjji gen, ɑryeer gen kinni, “Pili Jwøng-ɑ Ácwɑ̈ɑ̈j geki Gideon!” Acungi jø Gideon kì tøggi kɑɑlɑni, ɑrengi tyëng Midyɑn ge okïïwø. Keny-ɑ ɑ́koodh kɑ̈ngì yi jø Gideon, ɑgöjji kɑɑlɑni kebbi ree ki pil yi Jwøng-ɑ Ácwɑ̈ɑ̈j. Arengi liny kuni Dhɑretɑn, kɑ ge gït-ɑ Bet Cïtɑ̀, kí kɑɑl Abel Mekölɑ̀, ɑ cyɑ̈gi ki Tɑbɑth. Acwøøl tyëng kɑ̈lli Nɑptɑlì, kí gøl Aceer, kí gøl Mɑnɑsè, ɑcyeddi tyëng Midyɑn yi gen. Aöd Gideon ki tyëngwöödø e öd-ɑ myërri kïtti Eprɑim kinni, “Bïu be nyɑɑg ki tyëng Midyɑn, mɑgu kömi Nɑm Urdun geki nɑ̈mm-ɑ thønhø gïti Bet Bɑrɑ̀, o tyëng Midyɑn cög gen, ge pɑ kɑdhi løøgø.” Acøng jøgi Eprɑim ri gen kej ɑ́kyel kɑ ge pëgg-ɑ kömi Nɑm Urdun, geki nɑ̈mm-ɑ thønhø gïti Bet Bɑrɑ̀. Acyeddi tyëng Midyɑn kɑ jɑggi gen ryeet Oreb geki Dhiib, mɑg. Anɑ̈ɑ̈g Oreb kì ri Kïti Oreb. Kɑ Dhiib nɑ̈ɑ̈g keny-ɑ nyi biij oløøg Dhiib. Kɑ wïj Oreb geki wïj Dhiib muuj Gideon yi jøge, e ying-ɑ løøg Nɑm Urdun kì kuni wɑɑng cyɑ̈ɑ̈ng mwøl. Aköbbi Gideon yi jø gøl Eprɑim kinni, “Yïde ɑ göggí wøn ki gïn ni men? Wøde ɑ bɑɑny wøn ki cwølø yi yïn keny-ɑ ɑ́kedhí be nyɑɑg ki tyëng Midyɑn?” Kɑ ge owërø’ en ki menteg. De kwøbbi gen ɑ́løøg yi en kinni, “Gïn-ɑ ɑ́gwøg yi yɑn pɑ pɑ̈ɑ̈r ki men-ɑ ɑ́gwøg yi wun. Cɑgg ɑ́ gïjø me gwøøg wun e thiinh wu jø Eprɑim, pɑ pɑ̈ɑ̈r ki men-ɑ gwøg yi gøl Abiedher bëne. Oreb geki Dhiib jɑggi Midyɑn ryeet ɑ́cïb cinggi wun yi Jwøk. Á gïn ɑ ɑ́gwøg yi yɑn ɑ lod gwøøg wun?” Kì bɑng keny-ɑ ɑ́kwøbe møgɑni, ɑkwööj pëthi gen. Gideon ɑ́bëëd e pïdø geki jøge kwɑnni gen miy ɑ́dɑ̈g, keny-ɑ ɑ́bɑ̈ɑ̈n gen Nɑm Urdun, de ge ɑ́nudd ge ócyëddø ki liny Midyɑn. Keny-ɑ ɑ́wɑ̈dhe Suköth, ɑköbbe jø kɑɑlɑni kinni, “Thödhu jøgɑ ki gïncɑm. Ge ɑ́dhɑ̈ɑ̈r, o yɑ nudd yɑ cyedd-ɑ rɑ̈nhi Midyɑn; Dhebɑ̀ geki Dhɑlmunɑ̀.” De ɑ́köbbi yi pëjji Suköth kinni, “Wøde ɑ thödhi wøn jøgí ki gïncɑm, o Dhebɑ̀ nuti mɑɑg yïn geki Dhɑlmunɑ̀?” Aköbbi gen yi Gideon kinni, “Døj! Keny-ɑ ócïb Dhebɑ̀ geki Dhɑlmunɑ̀ cingɑ yi Jwøng-ɑ Ácwɑ̈ɑ̈j, wu ópwöd yi yɑn ki koodh kí otwelø.” Kɑ kedh-ɑ Penuel, ɑcige cwöd ki gïncɑm, de jø Penuel ɑ́kwøb-ɑ møg-ɑ ɑ́köbbii yi jø Suköth. Codhe, ɑköbbe gïn kinni, “Keny-ɑ ódwöögɑ ki tɑrø, ønbɑ̈r men-ɑ nyi koor kɑɑl wun ódhurɑ piny.” Kì bøli kenyɑni Dhebɑ̀ geki Dhɑlmunɑ̀ ge ɑ́ying-ɑ Kɑrkör geki jøliny gen mø kwɑnni gen bɑ ɑ́lïp pyɑ̈rø wïdɑ́bïj. Jøg-ɑ ɑ́nɑ̈g, kwɑnni gen bɑ ɑ́lïp miyø kí pyɑ̈r ɑ́ryew. Akedhi Gideon yï Dhebɑ̀ geki Dhɑlmunɑ̀, e kɑ̈ll-ɑ tøg ryɑng, kì kuni wɑɑng cyɑ̈ɑ̈ng mwøl kì Nöbɑ̀ geki Yogbeɑ̀, ɑpɑ̈ɑ̈ye gïn piny. Arengi Dhebɑ̀ geki Dhɑlmunɑ̀, rɑ̈nhi Midyɑn ryeet, de ɑ́rengi bɑng gen kɑ gï mɑge, kɑ liny gen kedhhe. Gideon wɑ̈d Yöɑc ɑ́dwöög kì be nyɑɑg e bï e kɑ̈ll-ɑ yuu Ëres. Kɑ ómɑ̈gø ki nyelthinh me kɑ̈ɑ̈l Suköth, kɑ gø pyënye, kɑ nyingi pëjjì geki jøgdøngi Suköth gwëdii yi nyelɑni, kwɑnni gen bɑ pyɑ̈r ɑ́bïryew wïdɑ́bïryew. Kɑ Gideon obëënø, ɑköbbe jø Suköth kinni, “Dhebɑ̀ geki Dhɑlmunɑ̀ ɑ keny èn, tyëng-ɑ́ per gen ɑ́yɑnyu yɑn wu okööbø kinni, ‘Wøde ɑ thödhi wøn jøgí ki gïncɑm, e Dhebɑ̀ geki Dhɑlmunɑ̀ nuti mɑɑg yïn?’ ” Amɑɑg jøgdøngi Suköth yi Gideon, kɑ gï pwöde ki koodh kí otwelø. Adhure ønbɑ̈r men-ɑ koor Penuel piny, kɑ jø kɑɑlɑni nɑ̈ge. Kɑ Dhebɑ̀ geki Dhɑlmunɑ̀ pyëj yi en kinni, “Á jøg mø bëëdø kidï ɑ ɑ́nɑ̈g yi wun kì Tɑbör?” Alöggi gen kinni, “Jøg mø pɑ̈r ki yïn, ge nɑ nyiirɑ̈dhh.” Alöggi Gideon kinni, “Jøgɑni bɑ nyiimïɑ, meyi wøn ɑ́kyel. Yɑn ɑ köngi èn ki nyingi Jwøng-ɑ Ácwɑ̈ɑ̈j, Jwøng-ɑ Nëënø kinni, keløg ge pɑ di nɑ̈g yi wun, wu pɑ di nɑ̈g yi yɑn.” Aluge ree Yether, wɑ̈de nyel-ɑ kɑyø, ɑköbbe gøn kinni, “Kedh, nɑ̈g gen!” De Yether pile nuti wöödh en wɑ̈g kì yij bøj, mɑ́ e ɑ́bëëd e óböggø yi kɑ̀ nudd e thiinh. Aköbbii yi Dhebɑ̀ geki Dhɑlmunɑ̀ kinni, “Bïí nɑ̈g wøn, yïn kirií, lɑ̈w nɑ̈gi wøn yi nyelteg ni wøn.” Codhe, ɑnɑ̈ɑ̈g gen yi Gideon, kɑ gïg-ɑ ódhyɑɑw muddi ɑmɑlli gen gï kwɑnye. Aköbbi Gideon yi tyëng Isrɑil kinni, “Jɑɑg wøn, yïn kí wɑ̈dí kí kwɑrí, mɑ́ wø ɑ́yiel yi yïn kì cinggi tyëng Midyɑn.” De ge ɑ́köbbi yi Gideon kinni, “Wu pɑ jɑɑg yi yɑn, wɑlɑ̀ wu pɑ jɑɑg yi wɑ̈dɑ. Wu jɑɑg-ɑ yi Jwøng-ɑ Ácwɑ̈ɑ̈j.” Aköbbe gïn kinni, “Dɑ gïjø ɑ́kyel me dwɑddɑ kì yï dhɑnhø bëne kì kelli wun kinni mëggu yɑn dhɑbbi yïthh møg-ɑ ɑ́kɑ̈ɑ̈l yi wun.” (Ábëëd ɑ́ kwöng kì yï tyëng kuni wɑɑng cyɑ̈ɑ̈ng mwøl eni rug ki dhɑbbi yïthh). Alöggi gen kinni, “Pëthi wøn omedø ki mëggi gen yïn.” Codhe, ɑpëdhi gen piny ki ógødh, kɑ dhɑbbi yïthh møg-ɑ ɑ́kɑ̈ɑ̈l yi gen, leeng gen yij ógønhɑni. Agöög dhɑbbi yïthh møg-ɑ ɑ́yod yi Gideon ki gïn ni kïllì pyɑ̈r ɑ́ryew, o jɑmm-ɑ kyeelø; ɑ́cwecwelli yedh, kí yëll ɑ́tegg, kí ógudh-ɑ nyi rug yi rɑ̈nhi Midyɑn, kí jɑmm-ɑ nyi dhyɑɑw muddi ɑmɑl, ge nuti kwɑnø. Agöög dhɑmɑni ki ngïji yi Gideon, kɑ gø cïbe Óprɑ̀ kɑɑl gen. Awiy Jwøk yi tyëng Isrɑil bënn, kɑ ge døøg-ɑ be mɑlli ngïji menɑni kì kunɑni, kɑ ngïji menɑni ogöögø ki ɑ́kɑ̈lli kì cwɑggi Gideon kí gøl gen. Tyëng Midyɑn ɑ́tyɑm yi Isrɑil, ɑcög gen wɑ̈thi gen nuti tïng gen këti. Abëëd pödhø ki mër ki runn pyɑ̈r ɑ́ngwen gïti kɑ ɑ́thøw Gideon. Gideon wɑ̈d Yöɑc ɑ́døøg pɑɑ gen be bëëdø. Gideon wɑ̈dde ɑ́bëëd gɑ pyɑ̈r ɑ́bïryew, mɑ́ mɑ̈nne ɑ́bëëd ge gïïr. Ányöddi thyew ki wɑ̈d yi nyɑn-ɑ ɑ́kwɑnye kì Cekïm, ɑcɑge gøn ɑ́ Abimelek. Gideon wɑ̈d Yöɑc ɑ́thøw e yöø ki mendwøng, kɑ koony buti wïye Yöɑc kì Óprɑ̀, kɑɑl gøl Abiedher. Keny-ɑ ɑ́rum Gideon ki thøø, ɑwiy Jwøk yi tyëng Isrɑil, kɑ ge døøg-ɑ be mɑlli Bɑɑl. Agwøg gen Bɑɑl Berit ɑ́ jwøøg gen. Kɑ Jwøng-ɑ Ácwɑ̈ɑ̈j Jwøøg gen, ɑ ɑ́yiel gen kì cinggi tyëngmɑ̈ɑ̈nø møg-ɑ ɑ́ying bɑdhhi gen, owïlø kì wɑ̈thi gen. Bong gïndøj mɑ ɑ́göggi gøl Gideon yi tyëng Isrɑil, kipe gïgdøj bënn møg-ɑ ɑ́gwøge kiper gen. Abimelek wɑ̈d Yerubɑɑl ɑ́kedhi yï nɑ̈yye kì kɑɑl Cekïm, ɑköbbe gïn bënn kinni, i pyëj gen tyëng Cekïm bënn kinni, “Á men ɑ́ lɑ̈w ki jɑɑgi wun, wɑ̈ddi Yerubɑɑl gɑ pyɑ̈r ɑ́bïryew, wɑlɑ̀ lɑ̈w jɑɑgi wun yi dhɑnhø ɑ́kyel kì kelli gen? Rum wun kinni yɑ bɑ wɑɑd wun, wɑɑd nyöödø.” Aköbbi tyëng Cekïm bënn kipere yi nɑ̈yye, ɑkedhi pëthi gen kömi Abimelek, mɑ́ e bɑ ókɑ̈ɑ̈y gen. Anëngii yi gen ki ngyëny ɑ́tegg pyɑ̈r ɑ́bïryew kì kengi Bɑɑl Berit, kɑ ngyëny ɑ́teggɑni ngëëwe ki jøg mø bong per gen, jøgöj. Akedhi gen bɑnge. Kɑ kedh-ɑ gøl wïye kì Óprɑ̀, ɑnɑ̈ge nyiiwɑ̈n pyɑ̈r ɑ́bïryew, wɑ̈ddi Yerubɑɑl kì kömi kït ɑ́kyel. Kɑ bødh ɑ́ Yöthɑm wɑ̈d Yerubɑɑl nyel-ɑ thinh kete, mɑ́ e ɑ́pɑ̈ni. Kɑ tyëng Cekïm órëbø kí tyëng Bet Milö bënn, kɑ ge kedh-ɑ thɑ óthuri kwër kì Cekïm, ɑrøny gen Abimelek ɑ́ rɑ̈dh. Keny-ɑ ɑ́köbbi Yöthɑm møgɑni, ɑyedhe oledh Kïti Geridhïm ɑryeere kinni, “Lïngu møgɑ, wun ɑ tyëng Cekïm, o mø wun ólony ki lïngø yi Jwøk thyew! Cyɑ̈ng ɑ́kyel yenh ɑ́cugi kipe rönyi ri gen ki rɑ̈dh me jɑɑg gen. Aköbbi gen dhetun kinni, ‘Bëëd yï bɑ rɑ̈ɑ̈dh wøn.’ Alöggi dhetun kinni, ‘Keløg yɑ orønyø yi wun, yɑ ceg-ɑ wïyø ki gwøg ki møwɑ; eni møw-ɑ nyi kwëër jwögg geki ji.’ Aköbbi ólɑm yi yenh kinni, ‘Bïí göög ki rɑ̈ɑ̈dh wøn.’ De ólɑm ɑ́löggi kinni, ‘Keløg wu ójɑɑg yi yɑn, yɑ ceg-ɑ wïyø ki nywølø ki nyigɑ nyig-ɑ med.’ Codhe, ɑköbbi oløg yi yenh kinni, ‘Bïí o yï bëëd yïn ɑ́ rɑ̈ɑ̈dh wøn.’ De oløg ɑ́löggi kinni, ‘Keløg wu ójɑɑg yi yɑn, yɑ ceg-ɑ wïyø ki gwøg ki møgø miɑ; eni møng-ɑ nyi mïni pëthi jwögg geki ji.’ Codhe cyee, ɑköbbi but yi yenh bënn kinni, ‘Bïí o yï bëëd yïn ɑ́ rɑ̈ɑ̈dh wøn.’ Alöggi but kinni, ‘Keløg wu dwɑdd-ɑ yɑn kidyër, o yɑ røny yi wun, yɑn ɑ́ rɑ̈ɑ̈dh wun, bïu tïbɑ. De keløg wu óbɑ̈nyø, bɑ̈ddɑ, bɑ̈dd-ɑ pɑ̈ng yi koodh óceg ì pɑɑt ki mɑc, kɑ yenh sɑndɑl mø Lubnɑn rɑ̈be.’ ” Kɑ Yöthɑm cig-ɑ kwøb kinni, “Anɑn dɑ gɑ̈nø, kí tɑri pëëth kì yï wun, kɑ̀ røny wun Abimelek ɑ́ rɑ̈dh? Gideon ɑ́di wørø yi wun, kɑ pɑrri wun, kɑ gøle göggi wun ki gïndøj men-ɑ myër ki en? Nyi rum wun kinni wïyɑ ɑ́nyïɑ̈ggi kɑ per wun. Thøø ɑ́bøye kipe yieli wun kì cinggi tyëng Midyɑn. De wu ɑ́yöd wu töng-ɑ ri gøl wïyɑ dicyɑ̈ngtïn. Anɑ̈g wun wɑ̈dde gɑ pyɑ̈r ɑ́bïryew kì kömi kït ɑ́kyel kipe Abimelek wɑ̈de, ɑ meye bɑ ɑkwɑny, mɑ́ e bɑ ókɑ̈ɑ̈y wun, ɑgwøgii yi wun ɑ́ rɑ̈ɑ̈dh Cekïm. De ɑnɑn, keløg gïn-ɑ ɑ́göggi Gideon kí gøle yi wun dicyɑ̈ngtïn, gwøøg wun kɑ tɑri pëëth, wu óbëëdø ki medi pëëth wuki Abimelek. De keløg e pɑth ki tɑri pëëth ɑ göög wun, mɑc óceg ì pɑɑt kì ri Abimelek, kɑ jø Cekïm geki jø Bet Milö rɑ̈be. O mɑc óceg ì pɑɑt kì ri jø Cekïm geki jø Bet Milö, kɑ Abimelek rɑ̈be.” Arengi Yöthɑm kɑ kedh-ɑ be bëëdø kì Biir, mɑ́ e ɑ́bëëd e óböggø yi Abimelek ówɑ̈n. Ajɑɑg Isrɑil yi Abimelek ki runn ɑ́dɑ̈g. Aör wëy mø rijjø kɑɑm Abimelek geki jø Cekïm yi Jwøk, kɑ ge ómɑ̈nø ki ri gen, kɑ ge ogöögø liny ki gøn. Gïnɑni ɑ́cwöb kì kɑɑm Abimelek geki pëjji Cekïm møg-ɑ ɑ́cïïjii ki gwøgi orøng-ɑ ɑ́nɑ̈ge nyiiwɑ̈n, wɑ̈ddi Yerubɑɑl gɑ pyɑ̈r ɑ́bïryew kipe kinni o kɑ̈jji cu gen col. Acïb jøg mø kurø wïj kït mɑl yi pëjji Cekïm, kɑ jɑmmi tyëng-ɑ kɑ̈lli yöö nyi kɑb yi gen. Kɑ møgɑni köbbi Abimelek. Awɑ̈dhi Gɑɑl wɑ̈d Ebed bëënø e bï-ɑ Cekïm geki nyiimen, kɑ kwøbbe yïëy yi pëjji Cekïm. Akedhi gen wɑ̈g bënn yethi bɑ̈ggi gen, kɑ ge opunø ki nywøli oløg, ɑgöggi gen ri gen ki møgø kɑ ge otugø. Akedhi gen be cɑm kí mɑdh kì yij kengi jwøøg gen, ɑkööb gen kì kenyɑni kì ri Abimelek, e obenyø yi gen. Kɑ Gɑɑl wɑ̈d Ebed okööbø kinni, “Abimelek ɑ́ men? O wɑ tyëng Cekïm, wɑ ceg bëëd ɑ dï, ɑ jɑɑge wɑ? Pɑth ki wɑ̈d Yerubɑɑl, o pɑth ki Dhebul ɑ bɑ ókwøme? Wɑde ɑ göög wɑ kipere? Gɑ̈nni wɑ kweyee Amör, ɑ ree ɑ́kɑ̈ɑ̈l yi gølee! Keløg ji møg di pyejj-ɑ yi yɑn, Abimelek di nɑ̈g yi yɑn. Abimelek di köbbɑ kinni, ‘Cwööl linyí bëne, kɑ yï bïí be nyɑɑg!’ ” Møg-ɑ ɑ́kwøb yi Gɑɑl wɑ̈d Ebed, keny-ɑ ɑ́lïngi gen yi Dhebul jɑngi kɑɑlɑni, kɑ pyëwe ceg-ɑ rënyø ki menrɑj. Aöde yï Abimelek kì Arumɑ̀ ki wöödø kinni, “Gɑɑl wɑ̈d Ebed geki nyiimen ɑ́bï Cekïm, o yï pɑ wëggi bëën kɑɑl yi gen. De bïí wuki jøgí kì wɑ̈r, kɑ wu pɑ̈ni wun kì yethi pwödh. Kɑ wu dhwönhi wun kì mwøl ri tuuli cɑ̈ng, kɑ wu pɑ̈ɑ̈r wun kömi kɑɑl. Keny-ɑ óbëën Gɑɑl geki jøge be nyɑɑg ki yïn, kɑ ge pwööd piny.” Codhe, kɑ Abimelek geki jøge bënn ódhwönhø kì wɑ̈r, ɑpɑ̈ni gen kì pɑ̈l kì buti Cekïm gɑ dhøg ɑ́ngwen. Kɑ Gɑɑl wɑ̈d Ebed obëënø, kɑ ócungø kì dhø döri kɑɑl. Keny-ɑ ɑ́lidhii yi Abimelek geki jøge, ɑdhwödhi gen mɑl kì kɑ̈jj-ɑ ɑ́pɑ̈ni yi gen. Keny-ɑ ɑ́liidh gen yi Gɑɑl, ɑköbbe Dhebul kinni, “Lïdhí, dɑ ji mø bï ge kɑ̈ɑ̈l-ɑ wɑ̈thi kïttì.” Alöggi Dhebul kinni, “Tïbbi kïttì ɑ nenni yi yïn ge nɑ ji.” Acigi Gɑɑl kwøb kinni, “Lïdhí, ji ɑ bï ɑcɑ̀ ge kɑ̈ɑ̈l-ɑ wɑ̈thi kïttì. O ɑkud megø kɑ̈ɑ̈l-ɑ ri óthur-ɑ thɑre nyi rɑ̈ɑ̈ng yi ɑ́jwöggì.” Kɑ köbbi yi Dhebul kinni, “Athwøgí ɑ́gøn en ɑnɑn? Pɑth ki yïn ɑ ɑ́kööb kinni, Abimelek bɑ men ɑ jɑɑge wɑ? Bene liny-ɑ ɑ́benyi yi yïn ɑnɑn. Kedh nyïɑ̈ggí ki en!” Codhe, ɑpeej tyëng Cekïm yi Gɑɑl, kɑ ge ónyïɑ̈ggø ki Abimelek. Kɑ Gɑɑl cyeddi gïti dhø pöör yi Abimelek, kɑ ji mø gïïr ri gen kedhi yi kedd. Abëëd Abimelek kì Arumɑ̀, kɑ Gɑɑl geki nyiimen cyeed wɑ̈g yi Dhebul kì Cekïm. Dhuki, ɑlïng Abimelek kinni i tyëng Cekïm dwɑdd-ɑ kedhi wɑ̈g yethi pwödh. Codhe, ɑkɑ̈ɑ̈le jøge gï pɑ̈ng en gɑ dhøg ɑ́dɑ̈g. Abuddi gen kì yethi pwödh. Keny-ɑ ɑ́lidhe ji ge bï-ɑ wɑ̈g kì kɑɑl, ɑpɑ̈ɑ̈r gen kömi gïn kɑ gï nɑ̈g gen. Kɑ Abimelek geki jøge reng-ɑ be mɑgi dhø döri kɑɑl, kedh ɑkudd ɑ́ryew reng-ɑ yethi pwödh be nɑ̈g ki ji. Kɑ liny tyëg-ɑ cɑ̈ng bëne e ónyïɑ̈ggø. Amɑɑg kɑɑl yi Abimelek, ɑnɑ̈ge jii kɑɑlɑni bënn. Atoore kɑɑl piny, kɑ piny wïwe ki omelø, (e lɑm-ɑ gøn kinni o cöge ɑ́ ryɑng). Keny-ɑ ɑ́lïngi møgɑni yi jøg-ɑ bɑ pëjji kì Cekïm, ɑrengi gen be yieeli wëyi gen yij kengi Bɑɑl Berit, ønteg. Aköbbi Abimelek kinni ri gen cøng gen kì kunɑni. Codhe, ɑkedhe wïj Kïti Dhɑlmön geki jøge. Kɑ ókɑ̈bbø ki dørø, ɑngude ki yungø, kɑ gø cïbe wïj tøge. Aköbbe jøge kinni pyew gen, göög gen ki gïn ni men-ɑ ɑ́gwøge. Codhe, ɑngud dhɑnhø bëne ki yungø, ɑløg gen bɑng Abimelek kɑ yuggɑni röör gen kömi ønteg menɑni. Acwiny kenyɑni yi gen kí ji kì yije, kɑ ji othøø bënn kwɑnni gen bɑ ɑ́lïp ɑ́kyel, jøg-ɑ cwøw kí tyëng-ɑ mɑ̈nn. Akedhi Abimelek Tebedh, kɑ kɑɑlɑni tyege, ɑmɑge gøn. Kunɑni ɑ́dɑ ønbɑ̈r me teg, o tyëng kɑɑlɑni bënn kí jɑggi gen, rengi yij ønɑni. Kɑ gø cyëëg gen kömi gen, kɑ kwï gen yedh-ɑ wïje. Keny-ɑ ɑ́kedhi Abimelek, be mɑgi ønbɑ̈r menɑni, ɑ́ceg-ɑ yedhi mɑl be cwinyii ki mɑc kì dhøge. De ngɑndhɑjø megø, kïn-ɑ nyi gur ɑ́kwɑnye kɑ gø leenge wïj Abimelek, kɑ wïje ópyëdø. Acwøle nyel-ɑ kɑ̈lli jɑmmi linye kinni, “Kɑ̈ɑ̈l pilø mi wɑ̈g kɑ yɑ nɑ̈ɑ̈g. Yɑ pɑ dwɑddi kinni, o yɑ kømmi kinni yɑ ɑ́nɑ̈g-ɑ yi ngɑndhɑjø.” Codhe, ɑcwøbii yi nyelɑni kɑ othøø. Keny-ɑ ɑ́lidhii yi tyëng Isrɑil kinni Abimelek ɑ́thøw, ɑdøøg gen yethi myërri gen. Bɑ Jwøk ɑ ɑ́cɑy Abimelek kipe orøng-ɑ ɑ́gögge gøl wïye, ɑ ɑ́nɑ̈ge nyiiwɑ̈n gɑ pyɑ̈r ɑ́bïryew. Tyëng Cekïm ɑ́göjji orɑng yi Jwøk kipe gïgrijjø møg-ɑ ɑ́gwøg yi gen, ni kɑ ɑ́lɑ̈mmi gen cyën yi Yöthɑm wɑ̈d Yerubɑɑl. Kì bɑng thøwi Abimelek, ɑdhwödh Tölɑ̀ wɑ̈d Puɑ̀ kwɑɑr Dödö, wɑ̈d gøl Isɑkɑr, e bï-ɑ be yieli Isrɑil. Ábëëd ɑ Cɑmïr kì myërri kïtti Eprɑim. Isrɑil ɑ́jɑɑg yi en ki runn pyɑ̈r ɑ́ryew wïdɑ́dɑ̈g. Kɑ othøø, ɑkonyii kì Cɑmïr. Bɑng Tölɑ̀, ɑdhwödh Yɑir kì Gilyɑd, ɑjɑɑge Isrɑil ki runn pyɑ̈r ɑ́ryew wïdɑ́ryew. Yïe ɑ́dɑ wɑ̈dd pyɑ̈r ɑ́dɑ̈g, ge nyi cyɑ̈dh-ɑ́ɑ̀ kömi ɑderr pyɑ̈r ɑ́dɑ̈g, o yï gen ɑ́dɑ kɑ̈dd pyɑ̈r ɑ́dɑ̈g, møg-ɑ nudd ge ocwøllø gɑ kɑ̈ddi Yɑir gïti dicyɑ̈ngtïn kì myërri Gilyɑd. Athøw Yɑir, kɑ kony kì Kɑmön. Agöög tyëng Isrɑil këti ki gïnrɑj kì bøli Jwøng-ɑ Ácwɑ̈ɑ̈j, kɑ Bɑɑl geki Actɑröth mɑlli gen, kí jwöggi tyëng Acuur, kí jwöggi Sïdön, kí jwöggi Moɑb, kí jwöggi Amön, kí jwöggi Pelistiyɑ̀. Aweddi Jwøng-ɑ Ácwɑ̈ɑ̈j yi gen kɑ ge ówïyø mɑllii. Codhe, ɑrënyi pyëw Jwøng-ɑ Ácwɑ̈ɑ̈j ki menteg ki Isrɑil, kɑ gï göjje tyɑmø yi tyëng Pelistiyɑ̀ geki tyëng Amön. Aguud gen nyingi tyëng Isrɑil møg-ɑ bëëdø kì løøg Nɑm Urdun kì wɑɑng cyɑ̈ɑ̈ng mwøl, kì piny Amör kì Gilyɑd, ki runn pyɑ̈rø wïdɑ́bïdɑ̈g. Kɑ tyëng Amön kɑdh-ɑ løøg Nɑm Urdun be nyɑɑg ki gøl Yeudɑ̀, kí gøl Ben Yɑmïn thyew, kí gøl Eprɑim, kɑ Isrɑil yije obɑɑrø ki mendwøng. Aywøøg tyëng Isrɑil kö Jwøng-ɑ Ácwɑ̈ɑ̈j ge okööbø kinni, “Wø ɑ́røngi kì bølí, mɑ́ yï ɑ́weddi yi wøn, yïn ɑ Jwøøg wøn, kɑ Bɑɑl mɑlli wøn.” Aköbbi tyëng Isrɑil yi Jwøng-ɑ Ácwɑ̈ɑ̈j kinni, “Yɑn ɑ ɑ́yiel wun kɑ̈ge dööng kì cinggi tyëng Rïp, kí tyëng Amör, kí tyëng Amön, kí tyëng Pelistiyɑ̀, kí tyëng Sïdön, kí tyëng Amɑlek, kí tyëng Moɑb, kɑ ɑ́guud gen nyingi wun, kɑ wu ywöög-ɑ köörɑ. Wu nuti yieel yɑn kì cinggi gen? De yɑ ɑ́wiyu piny, kɑ wu kedh-ɑ be mɑlli jwögg møøgø, kɑ ɑ́rum bëëde kinøw, wu pɑ yiel yi yɑn këti. Kedh wun, kɑ wu ywøøg wun yï jwögg-ɑ mɑlli yi wun, wiy wu nyi yiel yi gen kenyi yïddi wun ki rɑj.” De tyëng Isrɑil Jwøng-ɑ Ácwɑ̈ɑ̈j ɑ́köbbi gen kinni, “Wø ɑ́røngi, de gwøg gïn-ɑ nenni yi yïn e døøj. Wø ókwɑ̈jjø kinni yiel wøn dicyɑ̈ngtïn.” Codhe, ɑweddi gen jwögg-ɑ pɑth, kɑ Jwøng-ɑ Ácwɑ̈ɑ̈j mɑlli gen, kɑ yije óywöngø kipe bɑɑri nyingi tyëng Isrɑil. Kɑ liny tyëng Amön ree gwire kipe nyɑɑg, ɑcøng gen ri gen kì Gilyɑd. Kɑ tyëng Isrɑil ri gen cøng gen, kɑ liny cïb gen Midhpɑ̀ kì Gilyɑd. Kɑ jøgdøngø geki teedø bëne ri gen pyënyi gen kì kenyɑni kinni, “Á men-ɑ ópej liny kɑ̀ kedhi wɑ be nyɑɑg ki tyëng Amön? Ngɑn-ɑ ópej liny óbëëd ɑ́ jɑngi dhɑnhø bëne kì Gilyɑd!” Yeptɑɑ̀ ɑ́bëëd ɑ́ jɑl-liny me teg kì Gilyɑd, bɑ wɑ̈d ngɑn mɑ ɑ́bëëd ɑ́ ngɑn nyi niin ki köögi. Wïyi Yeptɑɑ̀ cwøl ɑ́ Gilyɑd. De Gilyɑd yïe ɑ́dɑ wɑ̈dde thyew ki cyëge, keny-ɑ ɑ́døngi wɑ̈dde, ɑcyeed gen Yeptɑɑ̀ wɑ̈g kì pɑc, kɑ gø köbbi gen kinni, “Bong gïn-ɑ ólɑg yi yïn kì ri jɑmmi wïyi wøn, mɑ́ yï bɑ wɑ̈d dhɑjø megø.” Codhe, ɑpɑ̈r Yeptɑɑ̀ kì buti nyiiwɑ̈n, kɑ kedh-ɑ be bëëdø kì piny Töb. Acøng jøg-ɑ bong per gen ri gen bɑng Yeptɑɑ̀, kɑ ge nyi kedh-ɑ be mɑ̈nyø ki gïn. Kì bɑng keny megø, ɑkedhi tyëng Amön be nyɑɑg ki Isrɑil. Keny-ɑ ɑ́pɑ̈ɑ̈r tyëng Amön kömi Isrɑil, ɑkedhi jøgdøngi Gilyɑd piny Töb be dwöögi Yeptɑɑ̀. Kɑ Yeptɑɑ̀ köbbi yi gen kinni, “Bïí o yï bëëd yïn ɑ́ pënyi liny wøn, o wɑ kedhi wɑ be nyɑɑg ki tyëng Amön.” Aløøg kwøbbi jøgdøngi Gilyɑd yi Yeptɑɑ̀ kinni, “Bɑ wun kì ri wun ɑ ɑ́mɑɑn yɑn, kɑ yɑ cyeed wɑ̈g yi wun kì gøl wïyɑ, wude ɑ bëën wun yïɑ ɑnɑn kɑ̀ ying wun yethi rɑj?” Aköbbi Yeptɑɑ̀ yi jøgdøngi Gilyɑd kinni, “Kidyër ceth, wø ɑ́dwöög köörí ɑnɑn, keløg yï ókedhø ki wøn, o wɑ nyïɑ̈ggi wɑ ki tyëng Amön, yï óbëëdø yïn ɑ́ pënyi liny Gilyɑd bëne.” Aköbbi jøgdøngi Gilyɑd yi Yeptɑɑ̀ kinni, “Døj, yɑ dwøøg yi wun kɑ per nyɑɑg ki tyëng Amön, de keløg ge ócïb cingɑ yi Jwøng-ɑ Ácwɑ̈ɑ̈j, yɑ ceg-ɑ gwøg ki jɑngi wun.” Aløøg kwøbbi Yeptɑɑ̀ yi jøgdøngi Gilyɑd kinni, “Wø ɑ́yïëy, Jwøng-ɑ Ácwɑ̈ɑ̈j kiree ɑ́ bøle ɑ́lwööb wɑ.” Codhe, ɑkedh Yeptɑɑ̀ geki jøgdøngi Gilyɑd, ɑgwøgii yi gen ɑ́ pënyi liny, o bɑ jɑgø. Kɑ møgɑni bënn døøg ki kwøbø yi Yeptɑɑ̀ kì bøli Jwøng-ɑ Ácwɑ̈ɑ̈j kì Midhpɑ̀. Aödi Yeptɑɑ̀ yï rɑ̈ɑ̈dh Amön ki tyëngwöödø, o gø köbbi gen kinni, “Yïde ki wøn? Yïde ɑ bëën be mɑnyi pödhi wøn?” Aløøg kwøbbi tyëngwöödø mø Yeptɑɑ̀ yi rɑ̈ɑ̈dh Amön kinni, “Keny-ɑ ɑ́bëën Isrɑil kì Rïp, pinyɑ ɑ́kwɑny yi gen, cɑg kì ri Nɑm Arnön gïti Nɑm Yɑbok, kí Nɑm Urdun. Anɑn döggu yɑn kɑ̈jjɑni ki mër.” Acigi Yeptɑɑ̀ ödi yï rɑ̈ɑ̈dh Amön ki tyëngwöödø, e løøg-ɑ kinni, “Isrɑil bong piny Moɑb, wɑlɑ̀ piny tyëng Amön mɑ ɑ́kwɑnye. Keny-ɑ ɑ́dhwödh Isrɑil kì Rïp, ɑ́kɑ̈ll-ɑ yij pɑ̈l, ɑkedhe dhø Gøøli Agɑbɑ̀, kɑ ge kedh-ɑ Kɑdic. Kɑ ge öd-ɑ yi rɑ̈ɑ̈dh Edöm kinni o ge wiy ge kedh gen, ge kɑ̈l-ɑ yij pödhe. De ge nuti wiyø yi rɑ̈ɑ̈dh Edöm o ge kɑ̈l gen yij pödhe. Angɑ̈j gen rɑ̈ɑ̈dh Moɑb, de ɑ́bɑ̈nyi thyew. Codhe, ɑbëëd tyëng Isrɑil kì Kɑdic. Kɑ ge ócyɑ̈dhø ge owïïnø kì yij pɑ̈l, ge kɑ̈ll-ɑ tøggi piny Edöm geki Moɑb gïti kɑ ɑ́wɑ̈nhi gen Moɑb kì kuni wɑɑng cyɑ̈ɑ̈ng mwøl, kì tøg Nɑm Arnön løøng-ɑ kyeelø. Agur gen kemmi gen piny kì kunɑni, de ge nuti kɑdhi løøg Nɑm Arnön mɑ́ e bɑ keew Moɑb. Kɑ tyëng Isrɑil öd-ɑ yï Sïön rɑ̈ɑ̈dh Amör kì Kicbön ki wöödø kinni o ge wiy ge kedh gen, ge bɑ̈ɑ̈n-ɑ yij pödhe, ge kedh-ɑ pödhø men-ɑ bɑ mi gen. De Sïön ɑ́bɑ̈nyi. Kɑ linye bëne cønge kì Yɑɑdh, kɑ pɑ̈ɑ̈r-ɑ kömi Isrɑil. De Jwøng-ɑ Ácwɑ̈ɑ̈j, Jwøøg Isrɑil, Isrɑil ɑ́thödhe ki tegø, kɑ Sïön tyɑm kí linye bëne. Codhe, ɑkwɑɑny piny tyëng Amör møg-ɑ ɑ́bëëd kì pönhɑni yi tyëng Isrɑil. Apëggi gen piny Amör bëne, cɑg kì Arnön gïti Yɑbok, o cɑg kì ryɑng gïti Nɑm Urdun. De bɑ Jwøng-ɑ Ácwɑ̈ɑ̈j, Jwøøg Isrɑil ɑ ɑ́cyeddi tyëng Amör kipe jie tyëng Isrɑil. Dwɑddií døøgø ki kwɑnyø? Yï ócuggø kwɑnyi gïg-ɑ ɑ́mëggi yïn yi jwøgí Kemöc. De gïg-ɑ ɑ́mëggi wøn yi Jwøng-ɑ Ácwɑ̈ɑ̈j, Jwøøg wøn ómïdhi bënn yi wøn. Yï orumø kinni Bɑlɑk wɑ̈d Dhipor rɑ̈ɑ̈dh Moɑb lod yi yïn? Ádi wërø ki tyëng Isrɑil, wɑlɑ̀ ɑ́di kedhi be nyɑɑg ki gen? Isrɑil ɑ́bëëd kì Kicbön kí Aröeer, kí myërr-ɑ buti gen, kí kɑ̈dd-ɑ thɑ̈ngi Nɑm Arnön bënn kì runn miy ɑ́dɑ̈g, gede ɑ nuti kwɑɑny gen yi yïn ki kɑɑm-ɑn bëne? Pɑth, bong gïnrɑj mɑ ɑ́göggɑ yïn. De mií bɑ bɑ̈jjø kɑ̀ göög ki liny kí yɑn. Jwøng-ɑ Ácwɑ̈ɑ̈j bɑ en ɑ ólidh møgɑni. Gïn-ɑ kɑɑm tyëng Isrɑil geki kwɑrri Amön ótyëg yi Jwøng-ɑ Ácwɑ̈ɑ̈j dicyɑ̈ngtïn.” De rɑ̈ɑ̈dh Amön wööni Yeptɑɑ̀ ɑ́bɑny yi en ki lïngø. Kɑ wëyi Jwøng-ɑ Ácwɑ̈ɑ̈j bï-ɑ kömi Yeptɑɑ̀, ɑkedhe myërri Gilyɑd kí Mɑnɑsè kɑ dwöög-ɑ Midhpɑ̀ kì Gilyɑd, kɑ pödh-ɑ Amön. Aköngi Yeptɑɑ̀ kì bøli Jwøng-ɑ Ácwɑ̈ɑ̈j kinni, “Keløg tyëng Amön ócïb yi yïn cingɑ, dhɑnhø men-ɑ ókwöngi ki bëën wɑ̈g, kì gølɑ e kedh-ɑ be pɑɑri yɑn keny-ɑ ódwöögɑ ki tɑrø, kì be nyɑɑg ki tyëng Amön, mëggɑ’ Jwøng-ɑ Ácwɑ̈ɑ̈j ɑ́ gënh-ɑ nyi rɑ̈b bëne.” Akɑdhi Yeptɑɑ̀ løøgø, be nyɑɑg ki tyëng Amön, kɑ ge cïb cinge yi Jwøng-ɑ Ácwɑ̈ɑ̈j. Akedhhe gïn, cɑg kì Aröeer gïti Minith, gɑ kɑ̈dd pyɑ̈r ɑ́ryew bënn, pïd kö yuu Abel Kerɑmïm. Ji mø gïïr ɑ́nɑ̈g kɑ tyëng Amön tyɑm yi tyëng Isrɑil. Keny-ɑ ɑ́wɑ̈nhi Yeptɑɑ̀ pɑɑre kì Midhpɑ̀, bɑ nyɑre ɑ ɑ́bï wɑ̈g be pɑɑrii, e ocöngø e opödø ki nyɑ bul! Bɑ nyɑn me thinh, o yïe bong nyiimen. Keny-ɑ ɑ́lïdhe, ɑkɑge ógødhe, e yije ceg-ɑ ywøg, ɑkööbe kinni, “Pöy nyɑrɑ! Minɑ ɑ́cöd yi yïn! Ede ɑ bëëde ɑ́ yïn ɑ thödhi yɑn ki orɑng? Yɑ ɑ́rum ki köngø kì bøli Jwøng-ɑ Ácwɑ̈ɑ̈j, o yɑ pɑ cuggi døøg cyɑ̈n!” Akööbe kinni, “Wïyø, göggí yɑn gïn-ɑ ɑ́kwöng yi yïn kì bøli Jwøng-ɑ Ácwɑ̈ɑ̈j, mɑ́ yï ɑ́wëgge tyɑmi tyëngmɑ̈ɑ̈nø, ɑ løg tyëng Amön.” De wïye ɑ́köbbe kinni, “Göggí yɑn gïjø ɑ́kyel men, wiy yɑn, o yɑ bëëdɑ ki dwɑ̈tt ɑ́ryew, kipe kinni, o yɑ kedhɑ wɑ̈thi kïttì be wïïnø, wøki mɑ̈dhhɑ, o wø kïïm wøn kipe thøwɑ yɑn ɑ́ jùr me nuti nywɑlø yi jɑlø.” Aköbbii yi wïye kinni kedhe, e ör-ɑ gøn wɑ̈g ki dwɑ̈tt ɑ́ryew. Akedhe geki mɑ̈dhhe kelli kïttì, kipe kɑ̀ thøwe e nuti nywɑlø yi jɑlø, kí kɑ̀ bong yïe nyɑre. Kì bɑng dwɑ̈tt ɑ́ryew ɑdwööge yï wïye, ɑgwøøg gïn-ɑ ɑ́kwöng yi wïye kì bøli Jwøng-ɑ Ácwɑ̈ɑ̈j, kɑ othøø ɑ́ jùr me nuti nywɑlø yi jɑlø. Bene cɑ̈gi kwöngɑni kì Isrɑil, men-ɑ nyi kedhi womɑ̈nn, wɑ̈g ki cyɑ̈ng ɑ́ngwen kì yij run, o ge kïïm gen kipe nyɑɑr Yeptɑɑ̀ jɑl Gilyɑd. Kɑ jø gøl Eprɑim ri gen cwøl gen, ɑkedhi gen løøg Nɑm Urdun ge kedh-ɑ yï Yeptɑɑ̀ kì Dhɑpön, kɑ gø köbbi gen kinni, “Á kipe ngø ɑ bɑ̈ɑ̈n nɑm, kɑ yï kedh-ɑ be nyɑɑg ki tyëng Amön, o wø nuti cwøøl yïn? Ød rɑ̈ɑ̈b wø’ kömí.” Aköbbi gen yi Yeptɑɑ̀ kinni, “Yɑn wøki jøgɑ, wø ɑ́wër ki tyëng Amön ki wëërø me teeg, kɑ wu cwølɑ, de wu nuti bëën be cwɑgi yɑn. Keny-ɑ ɑ́lidhɑ en kinni yɑ pɑ cwɑg yi wun, ɑböyyɑ kɑ yɑ kedh-ɑ be nyɑɑg ki tyëng Amön, ɑcïb gen cingɑ yi Jwøng-ɑ Ácwɑ̈ɑ̈j. De wude ɑ bëën wun be nyɑɑg ki yɑn ɑnɑn?” Acøng jø Gilyɑd bënn yi Yeptɑɑ̀ kɑ ónyïɑ̈ggø ki gøl Eprɑim, ɑtyɑɑm gøl Eprɑim yi jø Gilyɑd, mɑ́ gøl Eprɑim ɑ́kööb kinni, “Wun, wu tyëng Gilyɑd, wu bɑ ji mø kɑrri tyelli wun kì kɑɑm Eprɑim geki Mɑnɑsè.” Amɑɑg dhøøwɑ̈dhh-ɑ nyi kɑ̈dhhi kì Nɑm Urdun yi jø Gilyɑd, kɑ ngeti Eprɑim men-ɑ nyi bodh ree kinni o kɑdhe nyi pyëj yi jø Gilyɑd kinni, “Yï bɑ jɑl Eprɑim?” Keløg e okyëdø kinni, “Pɑth.” Nyii köbbø kinni, kööbe kinni, “Cibolet” de nyi kwøb-ɑ, “Sibolet,” mɑ́ e nyii dhɑlø yi kwøbii kidøøj. Kɑ nyi mɑg kɑ nɑ̈g yi gen kì kömi Nɑm Urdun, tyëng gøl Eprɑim møg-ɑ ɑ́nɑ̈g yi gen ki yuuɑni bɑ ɑ́lïp pyɑ̈r ɑ́ngwen wïdɑ́ryew. Kɑ Isrɑil jɑɑg yi Yeptɑɑ̀ ki runn ɑ́bïkyel, ɑthøwe kɑ kony kì pɑɑre kì Gilyɑd. Kì bɑng Yeptɑɑ̀, ɑjɑɑg Isrɑil yi Ibdhɑn, kì Betleem. Yïe ɑ́dɑ wɑ̈dde pyɑ̈r ɑ́dɑ̈g, kí nyige womɑ̈nn pyɑ̈r ɑ́dɑ̈g. Nyige ɑ́muuje o ge nywøm yi ji mø pɑth ki tyëng gøl gen, kɑ ókɑ̈nø ki womɑ̈nn mø bɑ nyigi jurrì møøgø gɑ pyɑ̈r ɑ́dɑ̈g gɑ mɑ̈nni wɑ̈dde. Isrɑil ɑ́jɑɑg yi Ibdhɑn ki runn ɑ́bïryew. Kɑ othøø, ɑkonyii kì Betleem. Kì bɑng Ibdhɑn, ɑjɑɑg Isrɑil yi Elön kwɑɑr Dhebulun ki runn pyɑ̈rø. Kɑ Elön othøø, ɑkonyii kì Ayɑlön kì piny Dhebulun. Kì bɑng Elön, ɑjɑɑg Isrɑil yi Abdön wɑ̈d Yilel kì Pirɑthön. Yïe ɑ́dɑ wɑ̈dd pyɑ̈r ɑ́ngwen, kí kwɑrre wɑ̈ddi wɑ̈dde pyɑ̈r ɑ́dɑ̈g møg-ɑ nyi cyɑ̈dhi kì kömi ɑderr pyɑ̈r ɑ́bïryew. Isrɑil ɑ́jɑɑg yi en ki runn ɑ́bïdɑ̈g. Kɑ Abdön wɑ̈d Yilel othøø, ɑkonyii kì Pirɑthön kì piny Eprɑim kì myërri kïtti Amɑlek. Adøøg tyëng Isrɑil ki gwøg ki gïnrɑj kì bøli Jwøng-ɑ Ácwɑ̈ɑ̈j, ɑcïb gen cinggi tyëng Pelistiyɑ̀ yi Jwøng-ɑ Ácwɑ̈ɑ̈j, kɑ ge jɑɑg yi gen ki runn pyɑ̈r ɑ́ngwen. Ádɑ jɑl megø kì kɑɑl Dhorɑ̀ kì gøl Dɑn me cwøl ɑ́ Mɑnowɑ̀, o cyëge bɑ bwøj, nuti wöl nywølø ki dhɑnhø. Kɑ wëywöni Jwøng-ɑ Ácwɑ̈ɑ̈j ocwöbø kì bøli ngɑnɑni, kɑ gø köbbe kinni, “Yï bɑ bwøj, yï nuti wöl nywølø ki dhɑnhø; de yï óyɑɑj, kɑ yï pɑ̈dh-ɑ piny ki wɑ̈d. Yï ko pɑ̈nyi mɑ̈dhø ki møgi oløg kí møgi byel, wɑlɑ̀ ki gïn ree di thɑbø, wɑlɑ̀ yï ko pɑ̈nyi cɑm ki gïgcɑmm møg-ɑ ywëdhø. Keny-ɑ órum wɑ̈dí ki pɑ̈dhi piny yi yïn, yëyyi wïje ko pɑ̈nyi ki lyelø, mɑ́ nyelthinh menɑni óbëëd ɑ́ ɑthyeey Jwøk kër-ɑ ónywøølii. En ɑ óyiel Isrɑil kì cinggi tyëng Pelistiyɑ̀.” Akedh ngɑnɑni kɑ jɑlgøle köbbe kinni, “Jɑlkwøbbi Jwøk ɑ́bï yïɑ, nënni e nɑ wëywöni Jwøk. Dhɑnhø ceg-ɑ böggø yi en. Nuti pyëëj yɑn ki kun-ɑ ɑ́kɑ̈ɑ̈le, o nyinge nuti köbbi yɑn yi en. De yɑ ɑ́köbbe kinni, i yɑ óyɑɑj kɑ yɑ pɑ̈dh-ɑ piny ki wɑ̈d. Aköbbe yɑn kinni cɑg ɑnɑn, yɑ ko mɑ̈ɑ̈dh ki møgi oløg wɑlɑ̀ møgi byel, kɑ yɑ ko cyɑ̈ɑ̈m ki gïg-ɑ ywëdhø, mɑ́ nyelthinh óbëëd ɑ́ ɑthyeey Jwøk kì yethi cyɑ̈ngg-ɑ ónëëne bënn.” Kɑ Jwøng-ɑ Ácwɑ̈ɑ̈j kwɑjji yi Mɑnowɑ̀ kinni, “Yïn ɑ Jwøng-ɑ Ácwɑ̈ɑ̈j, yɑ kwɑjj-ɑ yïn, wiy dhɑnhø mií men-ɑ ɑ́ör yi yïn dwööge be nyudhi wøn ki gïn-ɑ ógöggi wøn nyelthinh men-ɑ ónywøl.” Alïngi kwɑ̈jji Mɑnowɑ̀ yi Jwøk, kɑ wëywöni Jwøk dwöög-ɑ yï ngɑnɑni e ying-ɑ yij pwödhø, de jɑlgøle Mɑnowɑ̀ ɑ́bëëd e tøøk kì bute. Arengi ngɑnɑni yï jɑlgøle, kɑ gø köbbe kinni, “Lïdhí, jɑl-ɑ ɑ́cwöb kì bølɑ cyɑ̈ng-ɑcɑ̀ èn!” Adhwödh Mɑnowɑ̀, kɑ løg-ɑ bɑng cyëge. Keny-ɑ ɑ́wɑ̈nhe buti jɑlɑni, ɑkööbe kinni, “Bɑ yïn ɑ ɑ́kööb ki cyëgɑ?” Kɑ oyïëyø kinni, “Yɑn.” Codhe, ɑpëjji Mɑnowɑ̀ kinni, “Keny-ɑ ópɑ̈dhi kwøbbí, nyelthinh ócïg-ɑ ngø, o ógwøg-ɑ ngø kì yij bëëde?” Alöggi wëywöni Jwøng-ɑ Ácwɑ̈ɑ̈j kinni, “Cyëgí gwøge møg-ɑ ɑ́cïgɑ en bënn ceth; ngɑnɑni ko cyɑ̈ɑ̈m ki gïn kɑ̈ɑ̈l ri oløg, kɑ ko mɑ̈ɑ̈dh ki møgi oløg, wɑlɑ̀ møgi byel, wɑlɑ̀ ko cyɑ̈ɑ̈m ki gïg-ɑ ywëdhø. Gwøge møg-ɑ ɑ́köbbɑ en bënn.” Apyëëj wëywöni Jwøng-ɑ Ácwɑ̈ɑ̈j yi Mɑnowɑ̀, kinni, “Nyingí ɑ́ men, o yï ótheg yi wøn keny-ɑ ópɑ̈dhi kwøbbí kɑ̈jji gen?” Alögge kinni, “Á kipe ngø ɑ pyënyí nyingɑ? Ge bɑ nying mø bɑ gïïngɑ̈ngø.” Codhe, ɑkwɑɑny nyɑ ónywøg yi Mɑnowɑ̀ geki byëlø, kɑ gï mëgge Jwøng-ɑ Ácwɑ̈ɑ̈j gɑ gënh-ɑ nyi rɑ̈b bëne kì kömi nyɑ kït me thiinh. Acwöb gïïngɑ̈ngø men-ɑ ɑ́gwøg yi Jwøng-ɑ Ácwɑ̈ɑ̈j, e onennø yi Mɑnowɑ̀ geki cyëge. Kɑ Mɑnowɑ̀ cyëge köbbe kinni, “Wɑ bɑ møg thøw ceth, kipe kɑ ɑ́liidh Jwøk yi wɑ.” Alöggi cyëge kinni, “Keløg Jwøng-ɑ Ácwɑ̈ɑ̈j di dwɑddi nɑ̈gi wɑ, ti gënh-ɑ nyi rɑ̈b bëne geki byëlø pɑ di yïëy yi en kì cinggee, wɑlɑ̀ wɑ pɑ di nyudhe gïg-ɑk bënn, wɑlɑ̀ bong gïn di köbbe wɑ.” Kɑ ngɑnɑni pɑ̈dh-ɑ piny ki wɑ̈d, kɑ nyinge cɑge ɑ́ Cimcön. Kɑ nyelthinh ódøngø, kɑ gyëdh yi Jwøng-ɑ Ácwɑ̈ɑ̈j. Kɑ wëyi Jwøng-ɑ Ácwɑ̈ɑ̈j ócɑ̈gø’ gwøg kì ree keny-ɑ ɑ́bëëde e ying-ɑ Dɑn, kì kɑɑm Dhorɑ̀ geki Ectɑol. Kɑ Cimcön kedh-ɑ Timnɑ̀, kɑ ólïdhø ki dhɑjø kì kelli nyigi Pelistiyɑ̀. Kɑ ódwöögø, ɑköbbe wïye geki meye kinni, “Dɑ nyɑɑr Pelistiyɑ̀ mɑ ɑ́lidhɑ kì Timnɑ̀, nyömmu en yɑn.” Aköbbii yi wïye geki meye kinni, “Bong dhɑjø kì kelli nyigi wɑddee, wɑlɑ̀ kì kelli nyigi tyëng pödhee bënn, ɑ pere tiir kedhi be nywöm ki nyɑɑr Pelistiyɑ̀ tyëng-ɑ pɑ nyi ngøl?” De Cimcön wïye ɑ́köbbe kinni, “Nyömmu en yɑn, bɑ en e kete ɑ dir yɑn.” Wïye geki meye ɑ́bëëd ge kwïj wøw kinni møgɑni kɑ̈ɑ̈l-ɑ yï Jwøng-ɑ Ácwɑ̈ɑ̈j, kinni o bëëde ɑ́ møg-ɑ ócwɑ̈ɑ̈g tyëng Pelistiyɑ̀ geki tyëng Isrɑil, mɑ́ Isrɑil ɑ́bëëd e jɑɑg-ɑ yi Pelistiyɑ̀ kì bøli kenyɑni. Akedhi Cimcön Timnɑ̀ geki wïye kí meye. Keny-ɑ ɑ́wɑ̈dhi gen ri bɑ̈ggi oløg, kɑ ngur ówöb lïnge e óngɑ̈rrø. Ajwɑn tegi Jwøng-ɑ Ácwɑ̈ɑ̈j bëën köme, kɑ ngur pyëëde ki cingge keti gen, ɑ́ bud ɑ́ryew, e ce pyëëd-ɑ nyɑ ónywøg. De wïye geki meye nuti köbbø yi en ki gïn-ɑ ɑ́gwøge. Akedhi Cimcön yï nyɑnɑni kɑ ge okööbø, ɑyïëëy Cimcön yi en. Kɑ ódwöögø kì bɑng cyɑ̈ng e bï-ɑ be nywømi nyɑnɑni. Kɑ kej ngur men-ɑ ɑ́nɑ̈ge lyeewe, kɑ ongɑ̈ngø kɑ ɑ́yode kïc geki møøw kïc kì yij kwɑ̈ɑ̈l ngur. Kɑ kɑ̈n-ɑ wɑ̈g ki møøw kïc ki cinge, kɑ ókedhø e ocyɑ̈mø. Keny-ɑ ɑ́pïïde wïye geki meye, ɑnënge gïn ki møøw kïc, kɑ gø cɑm gen. De ge nuti köbbø yi Cimcön kinni, bɑ ri kwɑ̈ɑ̈l ngur ɑ ɑ́kɑ̈ɑ̈le møøw kïc menɑni. Akedhi wïye gøl nyɑnɑni, kɑ Cimcön ogöögø ki ryëj men-ɑ nyi gwøg yi yɑɑg-ɑ wøbb. Keny-ɑ ɑ́lidhii yi tyëng Pelistiyɑ̀, ɑödi gen yïe ki yɑɑg-ɑ wøbb pyɑ̈r ɑ́dɑ̈g møg bëëdø kì bute. Aköbbi gen yi Cimcön kinni, “Wiy wu nëngi yi yɑn ki wïjkyeny men-ɑ óbɑgii yi wun, cyɑ̈nggi nywöm gɑ ɑ́bïryew nuti thumø. Keløg e óbɑg yi wun, wu ónëngɑ ki ógudh-ɑ yöm pyɑ̈r ɑ́dɑ̈g, kí møg-ɑ nyi wiil gen. De keløg e pɑ bɑg yi wun, yɑ ceg kɑ nëngø yi wun ki ógudh-ɑ yöm pyɑ̈r ɑ́dɑ̈g, kí møg-ɑ ówiil gen.” Akööb gen kinni, “Köbbí wøn wïjkyenyí.” Akööb Cimcön kinni, “Ri gïn nyi cyɑ̈mø ɑ́bëën yi gïncɑm; ri gïn teg ɑ́bëën yi gïn lwïy.” Kɑ ge ómɑ̈gø ki cyɑ̈ng ɑ́dɑ̈g e wïjkyenyɑni dhɑ̈li bɑgø yi gen. Kì ngween cyɑ̈ng, ɑbëën gen yï cï Cimcön, kɑ gø köbbi gen kinni, “Thɑbbí jɑlgølí, o wø nyudhe wïjkyenye. Keløg yï óbɑ̈nyø, gøl wïyí rɑ̈ɑ̈b wø’ kömi wun. Wø ɑ́ryej yi wun kɑ per kinni o jɑmmi wøn kwɑny yi wun? Pɑ cuggi.” Akedhi cï Cimcön yïe kɑ óywöngø kì bøle e okööbø kinni, “Yɑ mɑɑn yi yïn ceth kidyër, yɑ pɑ mɑɑr yi yïn. Wɑ̈ddi pödhi wøn ɑ́nëngi yi yïn ki wïjkyeny, o men-ɑ́ yɑn, yɑ nuti nyudhø yi yïn.” Aköbbe gøn kinni, “Men-ɑ́ wïyɑ geki meyɑ nuti nyudhø yi yɑn. Yïde ɑ köbbɑ yïn?” Atyëge cyɑ̈ng ɑ́bïryew bënn mø ryëj e óywöngø. Kɑ wïjkyenyɑni köbbii yi Cimcön kì bïryeew cyɑ̈ng, mɑ́ kööre ɑ́buudh yi nyɑnɑni. Kɑ tyëng pödhi gen köbbe wïjkyenyɑni. Codhe, kì bïryeew cyɑ̈ng, ɑbëën yɑɑgɑni e Cimcön nuti kedhi øn-ɑ nyi buude, kɑ gø köbbi gen kinni, “Á gïn ɑ lod møøw kïc ki lwïyø? Á gïn ɑ lod ngur ki tegø?” Alöggi Cimcön kinni, “Keløg wu pɑ di köbb-ɑ yi røjø miɑ, wïjkyenyɑ pɑ di bɑg yi wun.” Kɑ wëyi Jwøng-ɑ Ácwɑ̈ɑ̈j bï-ɑ köme, kɑ ogöögø ki me teeg, ɑkedhe Ackelön kɑ ónɑ̈ggø ki ji pyɑ̈r ɑ́dɑ̈g, kɑ ógudhi gen lunye wɑ̈g, ɑmuuje gïn yɑɑg-ɑ ɑ́bɑg wïjkyenye. Codhe, ɑkedhe pɑc pyëwe rɑɑj. Kɑ cyëge mëggi nyel-ɑ ɑ́bëëd ɑ́ mɑ̈dhe kì cyɑ̈ɑ̈ng nywöme. Kì bɑng keny megø, kì bøli keny-ɑ nyi nyɑɑr gemè, ɑ ɑ́kɑ̈bbi Cimcön ki nyɑ ónywøg, kɑ kedh-ɑ be këëmi cyëge. Aköbbe wïyi cyëge kinni, “Yɑ dwɑdd-ɑ kedhi ød wøki cyëgɑ.” De jɑlɑni, Cimcön nuti wiy en, o kedhe ød. Kɑ Cimcön köbbe kinni, “Yɑ ɑ́ceg-ɑ rumø kinni nyɑnɑni mɑɑn yi yïn, ɑmëggɑ en mɑ̈dhí. Nyimen nyɑn-ɑ thinh bëëd ɑ dï, pɑ myëër kibøle? Kwɑɑny ɑ́ keje.” Kɑ Cimcön okööbø kinni, “Wɑngtïn bong gïn-ɑ ócɑ̈yyi yɑn yi tyëng Pelistiyɑ̀ keny-ɑ ógöggɑ gen ki gïnrɑj.” Codhe ɑkedhe, kɑ ómɑ̈gø ki ógwøgg miy ɑ́dɑ̈g, ɑgööge ki redhhì, kɑ yëbbi ógwøgg ɑ́ryew nyi twööje kej ɑ́kyel, kɑ redhø nyi twööje ri gen. Kɑ mɑc gweele ri redhhì, kɑ ógwøgg wiye rengi gen yethi pwödhhi tyëng Pelistiyɑ̀, ɑrɑ̈b gen byell-ɑ rumø kɑjø, kí møg-ɑ nudd ge ócungø, kí bɑ̈ggi oløg geki yenh dhetun. Apëjji tyëng Pelistiyɑ̀ kinni, “Á men ɑ ɑ́gwøg gïn ni men?” Aköbbi gen kinni, “Bɑ Cimcön, øri jɑl Timnɑ̀, kipe kɑ ɑ́mëgge cï Cimcön mɑ̈ɑ̈dh Cimcön.” Akedh tyëng Pelistiyɑ̀ kɑ nyɑnɑni geki wïye rɑ̈b yi gen ki mɑc. Aköbbi gen yi Cimcön kinni, “Keløg wu göög ɑ nøw! Yɑ pɑ wïyi gïti keny-ɑ ócolɑ kejɑ.” Anyïɑ̈gge ki nyɑɑg me teg ki gen, kɑ ónɑ̈gø ki ji mø gïïr kì kelli gen. Kɑ kedh-ɑ be bëëdø kì órøngi Kïti Atɑm. Abëën tyëng Pelistiyɑ̀ kɑ ge ogudø kì Yeudiyɑ̀, kɑ ge pɑ̈ɑ̈r-ɑ kömi kɑɑl Lekì. Apyëëj gen yi jø Yeudiyɑ̀ kinni, “Wude ɑ bëënu be nyɑɑg ki wøn?” Alöggi gen kinni, “Wø ɑ́bï-ɑ be dwɑ̈ɑ̈yi Cimcön, o kɑ̈l yi wøn ɑ́ ɑmɑg, o göggi yi wøn gïn-ɑ ɑ́gögge wøn.” Kɑ jø Yeudiyɑ̀ mø kwɑnni gen bɑ ɑ́lïp ɑ́dɑ̈g kedh-ɑ mɑl yij órøngi Kïti Atɑm, kɑ Cimcön köbbi gen kinni, “Ngɑ̈nyi yi yïn kinni wɑ jɑɑg-ɑ yi tyëng Pelistiyɑ̀, yïde ɑ göggí wøn ki gïn ni men?” Alögge kinni, “Ge ɑ́göggɑ’ gïn-ɑ ɑ́göggi yɑn yi gen.” Aköbbii yi gen kinni, “Wø ɑ́bï-ɑ be twöji yïn o yï mëggi gen yi wøn.” Akööb Cimcön kinni, “Köngi wun kinni yɑ pɑ nɑ̈g yi wun.” Alöggi gen kinni, “Pɑth, yï pɑ nɑ̈g yi wøn de yï ótwöj yi wøn yøw, kɑ yï cïb wøn cinggi gen.” Codhe, ɑtwöjii yi gen ki thøll ɑ́ryew mø nyɑ̈n kɑ gø kɑ̈ɑ̈l gen wɑ̈g kì yij órøngi kït. Keny-ɑ ɑ́wɑ̈nhe Lekì, ɑbëën tyëng Pelistiyɑ̀ yïe ge óryeerø kipere. Ajwɑn wëyi Jwøng-ɑ Ácwɑ̈ɑ̈j bëën köme kɑ ótëngø, ɑcödde thøll-ɑ ótwöjii kì bɑ̈dde geki cingge e dhɑ̈y ge nɑ kor mø rɑ̈bbø. Kɑ óyïddø ki lëmi ɑderø me cer thøø. Akuunge piny kɑ gø kwɑnye, kɑ ji ɑ́lïp nɑ̈ge ki gøn. Codhe, ɑwör Cimcön kinni, “Yɑ ɑ́nɑ̈gi ki ji ɑ́lïp ki lëmi ɑderø, kɑ ge röörɑ piny gɑ börr.” Keny-ɑ ɑ́rume wör, ɑleenge lëmi ɑderø piny kì kenyɑni, bene ɑ cwølli kenyɑni ɑ́ Rɑmɑth Lekì. Amɑgii yi röödhø, kɑ Jwøng-ɑ Ácwɑ̈ɑ̈j cwøle kinni, “Tyɑ̈mø men-ɑ dwøng cɑrø èn, ɑ́cïb-ɑ yi yïn cingi bɑ̈ngí, yɑ ceg kɑ nɑ̈gø yi röödhø o yɑ pɑ̈dh-ɑ cinggi tyëng-ɑ nuti ngølø?” Kɑ keny megø yieb yi Jwøk kì piny kì Lekì, ɑbëën pï wɑ̈g. Amɑ̈dhi Cimcön kɑ dële ókwöjø. Codhe ɑcɑɑg wɑngɑni ɑ́ Akor, nud ɑnɑn kì Lekì. Ajɑɑg Isrɑil yi Cimcön ki runn pyɑ̈r ɑ́ryew ɑ́ tyëng Pelistiyɑ̀ ɑ mïdhi pödhø. Akedhi Cimcön Gɑdhɑ̀, kɑ ólïdhø ki ngɑn nyi niin ki köögi kì kunɑni, ɑkedhe ød ki gøn. Ayood pere yi tyëng Gɑdhɑ̀ kinni nud kì kɑɑlɑni, ɑcøng gen ri gen kej ɑ́kyel, kɑ kenyɑni tyeg gen. Akor gen dhø döri kɑɑl kì wɑ̈r bëne, ge okudø, kɑ ge nyii möngø kinni, “Yïd wɑ gïti keny-ɑ ótɑ̈ri piny, o nɑ̈g yi wɑ.” De Cimcön nuti wɑ̈dhi mwøl kì kenyɑni, ɑ́dhwödh kì dïwɑ̈r, kɑ thïgi döri kɑɑl mɑge, kí rïwwe gɑ ɑ́ryew, kɑ gï puthe wɑ̈g, ɑkɑ̈ɑ̈le gïn ki winni gen bënn. Kɑ gï byeele mɑl wïj kït men-ɑ buti Kibrön. Codhe, ɑmɑɑre ngɑndhɑjø me cwøl ɑ́ Delïlɑ̀, me bëëdø kì Töör Sörek. Akedhi rɑ̈nhi Pelistiyɑ̀ yï ngɑnɑni, kɑ köbbi yi gen kinni, “Thɑb Cimcön, o yï köbbe gïn-ɑ mëggii teng-ɑ dwøng cɑrø, kí gïn-ɑ cuggi göggii o nyönhe, o twöj yi wɑ. Yï ónëngi yi wøn bënn ki ngyëny ɑ́tegg, e dhɑnhø ɑ́kyel muuj-ɑ ɑ́lïp kí miyø.” Codhe, kɑ Cimcön köbbi yi Delïlɑ̀ kinni, “Köbbí yɑn, ɑ́ gïn ɑ mëggi yïn teng-ɑ dwøng cɑrø? Keløg dhɑnhø dwɑdd-ɑ twöji yïn o yï nyönhí, ɑ́ ngø ógwøg yi en?” Aköbbii yi Cimcön, “Keløg yɑ otwöjø ki pujji weth ɑ́bïryew møg-ɑ nyɑ̈n ge nuti thwøwø, yɑ ceg-ɑ gwøg yɑ nyøødh ni dhɑnhø yøw.” Codhe, ɑkɑ̈ni rɑ̈nhi Pelistiyɑ̀ ki pujji weth ɑ́bïryew mø nyɑ̈n ge nuti thwøwø kɑ gï muuj gen Delïlɑ̀, ɑtwöje Cimcön. Ádɑ jøg møøgø mø lïïbø, o ge pɑ̈n-ɑ øn-ɑ kyeelø, ɑryeere kinni, “Cimcön! Tyëng Pelistiyɑ̀ ɑ́bï kömí!” De Cimcön pujji weth ɑ́cödde, ni kenyi ngølli kor yi mɑc. Codhe, ɑcög gïn-ɑ mëggii teng-ɑ dwøng nuti yodø yi gen. Aköbbi Cimcön yi Delïlɑ̀ kinni, “Yïde ɑ tuug yɑn, kɑ yɑ köbbí kwøbbi pyed? Köbbí yɑn ɑnɑn, yï cuggi twöjø kɑ ngø?” Aköbbii yi en kinni, “Keløg yɑ otwöjø ki thøll møg-ɑ nyɑ̈n, ɑ nuti pɑ̈nyø ki twöj, yɑ ceg-ɑ gwøg yɑ nyøødh ni dhɑnhø yøw.” Codhe, ɑkɑ̈ni Delïlɑ̀ ki thøll mø nyɑ̈n, kɑ twöj yi en ki gïn, jøg-ɑ lïïbø nud kì øn-ɑ kyeelø. Aryeere kinni, “Cimcön! Tyëng Pelistiyɑ̀ ɑ́bï kömí!” De Cimcön thøll ɑ́cödde kì bɑ̈dde de ce cödd-ɑ kor. Aköbbii yi Delïlɑ̀ kinni, “Yɑ nudd yɑ ceg kɑ tugø yi yïn, yïde ɑ pɑ köbbí yɑn gïn-ɑ bɑ dyër. Köbbí yɑn gïn-ɑ cuggi twöji yïn.” Alögge kinni, “Keløg ɑkɑ̈ddi yëyyɑ ɑ́bïryew ódøg yi yïn kej ɑ́kyel, kɑ ge mɑɑg ri loodh lɑ̈nhi korø, kɑ gur piny ki pijø, yɑ ceg-ɑ gwøg yɑ nyøødh ni dhɑnhø yøw.” Codhe, kɑ thɑb yi Delïlɑ̀, ɑnene. Kɑ ɑkɑ̈ddi yëyye ɑ́bïryew døge ri loodh lɑ̈nhi korø, kɑ gø gure piny ki pijø. Aryeere kinni, “Cimcön! Tyëng Pelistiyɑ̀ ɑ́bï kömí!” Acyëwe, kɑ yëyye tëële wɑ̈g kì ri pijø, Kɑ köbbi yi en kinni, “Yï ókööbø kinni yɑ mɑɑr yi yïn kidï, keløg yɑ pɑ gɑ̈n yi yïn? Ágöög ki tyel ɑ́dɑ̈g yi men, yɑ pɑ nyudhí gïn-ɑ mëggi yïn teng-ɑ dwøng cɑrø.” Kɑ nyi pyënyi yi en yethi cyɑ̈ng e okøørø yi en. Anyönhi pyëwe yi køørɑni. Kì cyɑ̈n cyee, ɑköbbii yi en ki dyër kinni, “Yëyyɑ nuti pɑ̈nyø lyelø, mɑ́ yɑ bɑ ɑthyeey Jwøk kër-ɑ ɑ́nywøøl yɑn. Keløg yëyyɑ olyelø, tegø men-ɑ riɑ ceg-ɑ kedhø, kɑ yɑ ogöögø yɑ nyøødh ni dhɑnhø yøw.” Keny-ɑ ɑ́lidhii yi Delïlɑ̀ kinni møg-ɑ pyëwe ɑ́kwøbe bënn, ɑöde yï rɑ̈nhi Pelistiyɑ̀ kinni, “Bïu cyee, mɑ́ yɑ ɑ́köbbe møg-ɑ pyëwe bënn.” Abëën rɑ̈nhi Pelistiyɑ̀ yïe ki ngyëny kì cinggi gen. Kɑ Cimcön thɑb yi Delïlɑ̀, ɑnene wïje thɑ̈ɑ̈nh en kömi tyelli nyɑnɑni. Acwödde ki jɑl me lyëël ɑkɑ̈ddi yëyye wɑ̈g gɑ ɑ́bïryew kì wïje. Alɑ̈ɑ̈ny tege kɑ ónyönhø. Codhe, ɑryeer Delïlɑ̀ kinni, “Cimcön! Tyëng Pelistiyɑ̀ ɑ́bï kömí!” Acyëwe, e orumø i nɑ cyɑ̈ɑ̈ng. De kwïj yi en kinni ówiy piny yi Jwøng-ɑ Ácwɑ̈ɑ̈j. Amɑgii yi tyëng Pelistiyɑ̀, kɑ nyinge lööl wɑ̈g, ɑkïdhii Gɑdhɑ̀, kɑ twöj ki ɑ́cwecwelli dilɑl. Amëggii gwøøg gur ki byel kì ød mɑg. De yëyyi wïje ɑ́kedh ge ócɑ̈gø ki twïyø, kì bɑng kɑ ɑ́rum gen ki lyelø. Acugi rɑ̈nhi Pelistiyɑ̀ kipe tugø, kí nëngi Dɑgön jwøøg gen ki gëdhh-ɑ døngø, ge owörø kinni, “Jwøgee wɑ ɑ́thödhe ki tegø men-ɑ ɑ́tyɑm wɑ Cimcön ngetimɑ̈ɑ̈nø.” Keny-ɑ ɑ́lidhii yi teenɑni, ɑmɑlli gen jwøøg gen ge okööbø kinni, “Jwøgee ngetimɑ̈ɑ̈nø ɑ́cïbe cinggee, eni ngetimɑ̈ɑ̈nø men-ɑ ɑ́ryɑ̈g pödhee, kɑ ónɑ̈gø kì kellee ki ji mø gïïr.” Keny-ɑ ɑ́mïni pëthi gen, ɑkööb gen kinni, “Kɑ̈ɑ̈lu Cimcön keny, o cönge kì bølee.” Codhe, kɑ Cimcön pëëj kì ød mɑg, kɑ ocöngø kì bøli gen. Keny-ɑ ɑ́cuungii kì kɑɑm mënhhì, ɑköbbe nyelthinh men-ɑ ɑ́pyejjii kì cinge kinni, “Cïb yɑn keny-ɑ di mënhh-ɑ mïdhi kengø, o ge nywɑlɑ, o riɑ jyɑ̈ɑ̈ngɑ ri gen.” Yij kengø ɑ́bëëd e pɑ̈ng yi dhɑnhø bëne, jøg-ɑ cwøw kí tyëng-ɑ mɑ̈nn. Rɑ̈nhi Pelistiyɑ̀ bënn gɑ ɑ́bïj ɑ́bëëd ge nud kì kenyɑni, wïj óthɑɑng kengø mɑl ɑ́dɑ ji mø kwɑnni gen bɑ ɑ́lïp ɑ́dɑ̈g, jøg-ɑ cwøw kí tyëng-ɑ mɑ̈nn, ge nenn-ɑ Cimcön kɑ̀ cöönge. Kɑ Jwøng-ɑ Ácwɑ̈ɑ̈j kwɑjji yi Cimcön kinni, “Wuö Jwøng-ɑ Ácwɑ̈ɑ̈j, pɑr yɑn, yïn ɑ Jwøk, yɑ kwɑjj-ɑ yïn, thödhí yɑn ki tegø tyelø ɑ́kyel yøw, o kej nyingɑ colɑ ki tyëng Pelistiyɑ̀.” Amɑge mënhì ɑ́ryew møg-ɑ dïkengø, ɑ ri gen cungi yi kengø, ɑ́kyel ɑ́mɑge ki cingi kyëje, kɑ men-ɑ kyeelø mɑge ki cingi cɑɑme, ɑdhure gïn, kɑ óryeerø kinni, “Wiy yɑ thøwɑ wøki tyëng Pelistiyɑ̀!” Kɑ gï dhure ki tege bëne, kɑ kengø pɑ̈dh-ɑ kömi rɑ̈nhi Pelistiyɑ̀ geki ji bënn møg-ɑ ɑ́ying yije. Ji-ɑ ɑ́nɑ̈g yi Cimcön kì ri thøwe gïïr kibøli møg-ɑ ɑ́nɑ̈g yi en keny-ɑ ɑ́bëëde e onëënø. Abëën nyiimen geki tyëng gøl gen, ɑkɑ̈l ge gøn, kɑ gø kony gen kì kɑɑm Dhorɑ̀ geki Ectɑol kì buti röri wïye Mɑnowɑ̀. Isrɑil ɑ́jɑɑg yi en kɑ runn pyɑ̈r ɑ́ryew. Ádɑ jɑl megø me cwøl ɑ́ Miikɑ̀, jɑlɑni ɑ́bëëd ɑ myërri kïtti Eprɑim. Kɑ meye köbbe kinni, “Átuggi ɑ́tegg møgí gɑ miyø kí pyɑ̈rø wïdɑ́kyel møg-ɑ ɑ́kwɑl kì yïí, kɑ yï olɑ̈mø, kinni ngɑn-ɑ kwɑɑl gen óyïddi ki cyën, yɑ ɑ́bëëd yɑ olïngø keny-ɑ ɑ́lɑ̈ɑ̈m. Yɑn ɑ ɑ́kwɑny gen, ge nud kì yïɑ!” Akööb meye kinni, “Yï ógyëdh yi Jwøng-ɑ Ácwɑ̈ɑ̈j, wɑ̈dɑ!” Adögge ɑ́teggɑni meye, kɑ meye okööbø kinni, “Áteggɑni bënn ɑ́thyëyɑ Jwøng-ɑ Ácwɑ̈ɑ̈j, kipe kinni o cyënnɑni cög ge pɑ pɑ̈dhi kömi wɑ̈dɑ. Ógöög ki ngïji mɑ yɑdh, o mwøn ki ɑ́tegø. De ɑnɑn ɑ́tuggi ɑ́teggɑni döggɑ’ yïn.” Kɑ gï dögge meye. Akɑ̈bbi meye ki ɑ́tuggi ɑ́tegg miy ɑ́ryew, kɑ gï mëgge bødhø, kɑ ogöögø ki ngïji mɑ yɑdh, ɑmwønii ki ɑ́tegø. Acïbii ød kì gøl Miikɑ̀. Miikɑ̀, yïe ɑ́dɑ ød Jwøk. Kɑ ogöögø ki ngïjji geki pɑri kwër, kɑ ɑ́kyel kì kelli wɑ̈dde gwøge ɑ́ ókwërø. Ábëëd e bong rɑ̈dh kì Isrɑil kì bøli kenyɑni, dhɑnhø bëne ɑ́göög-ɑ wïje ni kɑ̀ dwɑdde gøn. Kì bøli kenyɑni, ɑ́dɑ nyelɑwøb me bɑ Kwɑɑr Leebì, me bëëdø kì Betleem kì Yeudiyɑ̀. Adhwödh nyelɑni kì Betleem, kɑ kedh-ɑ be yɑb ki kej bëëdø megø. Kɑ töng-ɑ gøl Miikɑ̀ kì myërri kïtti Eprɑim. Apyëjii yi Miikɑ̀ kinni, “Yï kɑ̈ɑ̈l-ɑ kun?” Alögge kinni, “Yɑ bɑ wɑ̈d gøl Leebì kì Betleem kì Yeudiyɑ̀, yɑ ceg-ɑ yɑb ki kej bëëdø.” Aköbbii yi Miikɑ̀ kinni, “Bëëd kì butɑ, o yɑ nyi cïj yi yïn, o yï bëëd yïn ɑ́ ókwërɑ, o yï nyi thödhɑ ki ngyëny ɑ́tegg pyɑ̈rø kì yij run, kí ógudh geki gïgcɑmmí.” Ayïëy wɑ̈d gøl Leebì menɑni ki bëëdø kì buti Miikɑ̀, kɑ ogöögø e nɑ dhɑnhø ɑ́kyel kì kelli wɑ̈dde. Akwëër wɑ̈d gøl Leebì yi Miikɑ̀, kɑ ogöögø ki ókwërø kipere, ɑbëëde kì gøl Miikɑ̀. Akööb Miikɑ̀ kinni, “Anɑn Jwøng-ɑ Ácwɑ̈ɑ̈j yɑ ɑ́gögge ki gïndøj, mɑ́ ókwërɑ bɑ wɑ̈d gøl Leebì.” Kì bøli kenyɑni, ɑ́bëëd e bong rɑ̈dh kì Isrɑil. Tyëng gøl Dɑn, ɑ́bëëd kì kenyɑni ge oyɑ̈bø ki piny me yije pëggi yi gen, mɑ́ yï gen ɑ́bong-ɑ piny mɑ ɑ́yod yi gen ni kɑ̈lli Isrɑil møg-ɑ kyeelø. Aödi gøl Dɑn wɑ̈g ki jøg ɑ́bïj møg-ɑ teg kì dhøggi kɑ̈lli gen bënn kì Dhorɑ̀ geki Ectɑol, kipe kinni o ge kedhi gen be lyewwi piny. Aköbbi jøgɑni kinni, “Kedh wun, lyeewu piny!” Keny-ɑ ɑ́kedh gen, ɑwɑ̈dhi gen myërri kïtti Eprɑim ɑpëggi gen gøl Miikɑ̀. Keny-ɑ ɑ́ying gen kenyɑni, ɑngij gen nyelɑwøb men-ɑ bɑ Kwɑɑr Leebì kì ri kwøbbe. Apyëjii yi gen kinni, “Á men ɑ ɑ́kɑ̈ɑ̈l yïn keny? Á gïn ɑ gwøg yi yïn kì keny?” Alögge kinni, “Yɑ ɑ́kïr yi Miikɑ̀ ki ngyëny o yɑ bëëdɑ yɑn ɑ́ ókwëre.” Aköbbii yi gen kinni, “Døj, pyëj Jwøk o yod yi wøn, men-ɑ óyod wøn gïn-ɑ pere cɑɑdh yi wøn.” Alöggi ókwërø kinni, “Kedh wun ki mër, Jwøng-ɑ Ácwɑ̈ɑ̈j ócyɑ̈dhø kì bøli wun.” Codhe, ɑdhwödh jøgɑni gɑ ɑ́bïj, kɑ ge kedh-ɑ Lɑic. Alidh gen ji-ɑ bëëdø kì kunɑni kinni ge bëëdø wɑ̈thi gen kïïdhø, ni bëën-ɑ ɑ́bëëd yi tyëng Sïdön. Ge bɑ tyëngmër; ji mø ngɑ̈ny bëëdø, yï gen bong wëërø ki ngɑn megø. Yï gen dɑ jɑmmì bënn møg-ɑ dwɑddi kipe bëëdi gen. Ge bëëd ge lɑ̈wi ki tyëng Sïdön. Bong gïjø me reb gen ki ji møøgø. Keny-ɑ ɑ́dwöög jøg ɑ́bïj Dhorɑ̀ geki Ectɑol, ɑpyëëj gen yi tyëng pödhi gen kinni, “Wu ɑ́yod-ɑ ngø?” Alöggi gen kinni, “Bïu, kedhi wɑ be pɑ̈ɑ̈r kömi Lɑic! Piny ɑ́rum ki lidhø yi wøn kinni døøj cɑrø. Wu ko wɑ̈dhi bëëdø yøw! Pyew wun, kedhu be kwɑnyi pinyɑni. Keny-ɑ ówɑ̈dhi wun kunɑni, ji óyuud yi wun wɑ̈thi gen kïïdhø. Bɑ pödhø me dwøng; me bong gïn cɑn kì yije.” Codhe, kɑ jøliny miy ɑ́bïkyel kì gøl Dɑn, kì Dhorɑ̀ geki Ectɑol kedh-ɑ be nyɑɑg. Agur gen kemmi gen piny kì kö yöö kì buti Kiriɑt Yeɑrïm kì Yeudiyɑ̀. Bene ɑ pere cwølli kenyɑni ɑ́ Dɑn gïti dicyɑ̈ngtïn. Apöödh gen ge wɑ̈dh-ɑ gøl Miikɑ̀, kì myërri kïtti Eprɑim. Kɑ jøg-ɑ bɑ ɑ́bïj møg-ɑ ɑ́kedhi be lyeewi piny Lɑic, nyiimï gen köbbi gen kinni, “Ngɑ̈nyi yi wun kinni dɑ ød ɑ́kyel kì kelli udd-ɑcɑ̀ me yije di ngïji yɑdh men-ɑ ómwønø ki ɑ́tegø? Thyew dɑ ngïjjì møøgø kí pɑri kwër. Á ngø ɑ ceg ki gwøgø yi wɑ?” Kɑ ri gen løg gen ge töng-ɑ gøl Miikɑ̀ keny-ɑ yije bëëd yi nyelɑwøb men-ɑ bɑ Kwɑɑr Leebì, kɑ mɑ̈dh gen ki mër. Kɑ jøliny miy ɑ́bïkyel, jø gøl Dɑn ócungø ki jɑmmi nyɑɑg mø gen kì dhøg kɑl. Akedhi jøg-ɑ bɑ ɑ́bïj møg-ɑ ɑ́lyeew piny ød, kɑ ngïjji yɑdh men-ɑ ómwønø ki ɑ́tegø, kí ngïjji jwögg-ɑ kyeelø kwɑny yi gen, kí pɑri kwër, e ókwërø geki jøliny miy ɑ́bïkyel, ge ócungø kì dhøg kɑl. Keny-ɑ ɑ́kedhi jøgɑni ød Miikɑ̀, kɑ jɑmmi kwër kwɑny gen, kɑ ge ɑ́pyëj yi ókwërø kinni, “Á gïn ɑ gwøg yi wun ni men?” Alöggi gen kinni, “Kud! Mij dhøgí, yï ko pɑ̈nyi kwøb. Bïí kedh wɑ, o yï bëëd yïn ɑ́ ókwëri wøn, o wø nyi cïj yi yïn. Pɑ lɑ̈w keløg yï di gögg-ɑ kɑl ɑ́kyel kì kelli kɑ̈lli Isrɑil yïn ɑ́ ókwërø, kibøli bëëdí yïn ɑ́ ókwëri dhɑnhø ɑ́kyel?” Kɑ ókwërø pyëwe ómïnø. Akwɑnye jɑmmi kwër kɑ ókedhø ki gen. Aløg gen ri gen, kɑ ge ókedhø kí nyigi gen, kí jɑmmi gen, kí dhögi gen ge okwøllø kì bøli gen. Keny-ɑ ɑ́wɑ̈dhi gen kun me lɑ̈wi ki gøl Miikɑ̀, kɑ jøg-ɑ myërr-ɑ buti gøl Miikɑ̀ ri gen cwøøl gen kej ɑ́kyel, kɑ ge reng-ɑ bɑng jø gøl Dɑn. Aryeer gen ge ócwöddø kì bɑng gen, ɑlug jø gøl Dɑn ri gen, kɑ Miikɑ̀ pyëj gen kinni, “Yɑy men ɑ́ mi ngø?” Alöggi Miikɑ̀ kinni, “Jwögg-ɑ ɑ́gwøgɑ ɑ́kwɑny yi wun, kí ókwërɑ, kɑ wu ókedhø! Á gïn ɑ ɑ́döng kì yïɑ?” De jø gøl Dɑn ɑ́löggi kinni, “Yï ko cigi ryeerø këti, kipe ji-ɑ pëthi gen kej ótöngi rií, kɑ wëyí kí wëyi tyëng gølí bënn lɑ̈ɑ̈ny yi gen.” Codhe, ɑkedh jø gøl Dɑn kì wɑ̈yi gen, kɑ Miikɑ̀ dwöög-ɑ pɑc keny-ɑ ɑ́lidhe gïn kinni ge teg kibøle. Kì bɑng kɑ ɑ́rum jwøøg Miikɑ̀ ki kwɑnyø yi jø gøl Dɑn, ɑpödhi gen kömi tyëng Lɑic, ji møg-ɑ lebbi gen bong orøg, ɑ kwïj pyed. Anɑ̈g gen ji, kɑ kɑɑl rɑ̈b gen. Ge nuti yielø, mɑ́ ge bëëdø ge lɑ̈wi ki tyëng Sïdön, o kɑɑm gen bong gïjø me reb gen ki dhɑnhø megø, mɑ́ ge ying-ɑ yij tör kì Betreköb. Kɑ kɑɑlɑni døøg ki gerø yi tyëng gøl Dɑn, kɑ ge pëgg-ɑ piny kì kunɑni. Kɑ kɑɑlɑni cɑg yi gen ki nyingi kweyi gen Dɑn, ɑ bɑ wɑ̈d Yɑgob. Kɑɑlɑni ɑ́bëëd cøn e cwøl ɑ́ Lɑic. Kɑ ngïji cïb piny yi gøl Dɑn, kɑ nyi mɑlli gen, kɑ Yönɑthɑn wɑ̈d Gercöm wɑ̈d Mosɑ̀ ogöögø ɑ ókwëri gøl Dɑn, kɑ kwɑrre ogöögø gɑ ókwër gïti bøli keny-ɑ ɑ́kïdhi ji yïnø. Abëëd ngïji men-ɑ ɑ́gwøg yi Miikɑ̀ ki kɑɑmɑni bëne, de kemi Jwøk ɑ́cung ɑ Cilø. Kì bøli keny-ɑ ɑ́bëëd e bong rɑ̈dh kì Isrɑil, ɑ́dɑ jɑl megø mɑ Kwɑɑr Leebì mɑ ɑ́bëëd kì ngɑ̈thi myërri kïtti Eprɑim. Kɑ ókɑ̈bbø ki dhɑjø kì Betleem kì myërri Yeudiyɑ̀, de nyɑnɑni pyëwe ɑ́rënyi ki en, ɑdhwödhe kɑ kedh-ɑ gøl wïye kì Betleem, kɑ obëëdø kì kunɑni ki dwɑ̈tt ɑ́ngwen. Adhwödh jɑlgøle kɑ kedh-ɑ bɑnge be lugii, kinni o dwööge yïe. Ákedh geki bɑ̈nge ki ɑderr ɑ́ryew. Kɑ ge kïdhi ød yi nyɑnɑni kì gøl wïye. Keny-ɑ ɑ́bëën wïyi nyɑnɑni, ɑmɑ̈dhii kidøøj yi wïyi nyɑnɑni. Ajogii yi wïyi cyëge kɑ obëëdø ki cyɑ̈ng ɑ́dɑ̈g. Ge ɑ́bëëd, o ge ocyɑ̈mø. Kɑ jwɑn-ɑ dhwödhø kì mwøl ceth kì ngween cyɑ̈ng, e dwɑdd-ɑ kedhø. De ɑ́köbbi yi wïyi cyëge kinni, “Cyɑ̈ɑ̈m wun møti ki gïncɑm men mɑg wun pëthi wun, o wu ókedh wun cyee.” Codhe, ɑpëggi jøgɑni piny gɑ ɑ́ryew, ɑcyɑ̈ɑ̈m gen kɑ ge omɑ̈dhø kì kej ɑ́kyel. Kɑ köbbi yi wïyi nyɑnɑni kinni, “Buddí kì keny, kɑ ko di gïn böggi yi wun.” Keny-ɑ ɑ́dhwödh Kwɑɑr Leebì kinni o kedhe, ɑjogii yi wïyi cyëge, ɑbëëde kɑ onenø kì wɑ̈rɑni. Kì mwøl ceth, kì ri bïïj cyɑ̈ng, ɑcɑ̈ge ki dhwödhø kinni o di kedhe, ɑköbbii yi wïyi cyëge kinni, “Cyɑ̈ɑ̈m ki gïncɑm. Bëëd gïti keny-ɑ ówɑ̈dhi cɑ̈ng dïmɑl.” Codhe, ɑcyɑ̈ɑ̈m gen gɑ ɑ́ryew kì kej ɑ́kyel. Keny-ɑ ɑ́dhwödh jɑlɑni kɑ cyëge kwɑnye geki bɑ̈nge, kinni o ge di kedh gen, ɑkööb wïyi cyëge kinni, “Lidh piny ɑ́göög ɑ́ böörø. Nin wun, wøw ɑ́yuudh. Mïdhu ri wun ki medi pëthi wun. Wu ódhwödh dhuki kì mwøl piny nuti tɑ̈rø, o wu kedhu pödhi wun.” De jɑlɑni ɑ́bɑ̈nyi nïnni kɑɑlɑni, ɑdhwödhe kɑ ókedhø, ɑwɑ̈dhe bøli Yebus ɑ løg Yerusɑlem, ki ɑderre gɑ ɑ́ryew kömi gen dɑ sïrïj kí jɑmmì, kí cyëge nyɑn-ɑ bɑ ɑkwɑny. Ge ɑ́wɑ̈dhi bøli Yebus, wøw kedh e óyuudhø, kɑ bɑ̈ng wɑ̈n köbbe kinni, “Töngi wɑ kɑɑl tyëng Yebus, o wɑ buddi wɑ gïti mwøl?” Codhe, ɑpöödh gen, ɑbuddi cɑ̈ng ge ying-ɑ bøli Gibeɑ̀ kì myërri gøl Ben Yɑmïn. Atöngi gen Gibeɑ̀ kinni, o ge buddi gen gïti mwøl, ɑpëggi gen ódɑ̈ri kɑɑl, de bong dhɑnhø mɑ ɑ́kïdhi gen gøle. Kì thyënhø, ɑbëën jɑldwøng mɑ yu, e kɑ̈ɑ̈l-ɑ pwödhe. Jɑlɑni bɑ jɑl myërri kïtti Eprɑim, de ying-ɑ Gibeɑ̀, o tyëng kɑɑlɑni bɑ tyëng gøl Ben Yɑmïn. Keny-ɑ ɑ́lidhe wëll kì ódɑ̈ri kɑɑl, ɑpëjje kinni, “Yï kedh-ɑ keny? O yï bï yï kɑ̈ɑ̈l-ɑ kun?” Alöggi Kwɑɑr Leebì kinni, “Wø ɑ́ying-ɑ Betleem kì Yeudiyɑ̀, de ɑnɑn wø kedh-ɑ ngɑ̈thi myërri kïtti Eprɑim kun-ɑ bëëdɑ, de bong ngɑn mɑ ɑ́cwøøl wøn gøle. Yï wøn dɑ ópun kí møgi oløg kiperɑ wøki cyëgɑ kí bɑ̈ngɑ, o dɑ luum ɑderri wøn. Bong gïn dwɑddi yi wøn, jɑldwøng.” Aköbbi gen yi jɑldwøngɑni kinni, “Bïu gølɑ, wu ónëngi yi yɑn ki gïn-ɑ ódwɑddi yi wun. Wu pɑ cuggi buddø kì ódɑ̈ri kɑɑl kì wɑ̈r.” Codhe, ɑkïdhe gïn gøle, kɑ ɑderri gen nënge ki lum. Keny-ɑ ɑ́rum gen ki lwøgi tyelli gen, ɑcyɑ̈ɑ̈m gen ki gïncɑm kɑ ge omɑ̈dhø. Keny-ɑ ɑ́mïni pëthi gen kɑ ge owɑ̈jø, ɑbëën jøgi orøg kì kɑɑlɑni, kɑ kɑl tyeg gen. Apwöd gen dhøg kɑl, ge óryeerø ge cwøl-ɑ jɑldwøøng kɑl kinni, “Kɑ̈ɑ̈l jɑl-ɑ ɑ́bï gølí wɑ̈g, o niin yi wøn.” Akedhi jɑldwøøng kɑl wɑ̈g yï gen, kɑ okööbø kinni, “Pɑth, køkødh nyiimïɑ, wu ko göög ki gïnrɑj ni men, wëlø menɑni bëëd ɑ tïbɑ. Ayɑ̈r ni men ko gwøg wun. Lïdhi wun, nyɑrɑ èn bɑ jùr geki cyëge. Ge ókɑ̈ɑ̈lɑ wɑ̈g yï wun, o ge ócuggø göggø yi wun ki gïn-ɑ dwɑddi yi wun. De jɑɑl ko göggi wun ki ɑyɑ̈r ni menɑni.” De kwøbbe ɑ́dhɑ̈li lïngø yi jøgɑni. Codhe, kɑ jɑlɑni ɑkwɑnye öre wɑ̈g yï jøgɑni, kɑ mød yi gen, ɑtyëg gen wɑ̈r e oniin yi gen, kɑ gø wiy gen kì bɑ̈ɑ̈rø. Kì mwøl cɑ̈ng nuti tuulø, ɑbëën nyɑnɑni, kɑ ópɑ̈ɑ̈dhø kì dhø tëëd øn-ɑ di jɑlgøle kì gøl jɑldwøngɑni. Abuude kì kenyɑni gïti kɑ ɑ́tɑ̈ri piny. Keny-ɑ ɑ́dhwödh jɑlgøle kì mwøl, kɑ ød yiebe kinni o di cïme yuue, ɑyode cyëge e obuddø kì dhøg ød, cingge rïïj en kì wïj tëd. Aköbbe gøn kinni, “Dhwödhí mɑl, o wɑ kedh wɑ.” De nuti pɑ̈nyi löggø, ɑcïbe gøn kömi ɑdere, kɑ kedh-ɑ pödhi gen. Keny-ɑ ɑ́wɑ̈dhe gøle, ɑkɑ̈bbe ki pɑlø, kɑ ɑkwɑnye ngølle ki cue bënn, ɑ́ ɑ́tug pyɑ̈rø wïdɑ́ryew. Kɑ kɑ̈lli Isrɑil, kì myërri gen gɑ pyɑ̈rø wïdɑ́ryew öde, gøl öre’ ɑ́tunge. Kɑ tyëng-ɑ ɑ́lidhii bënn, okööbø kinni, “Gïn ni men nuti pɑ̈nyø’ lidhø, wɑlɑ̀ nuti pɑ̈nyø’ gwøgø kì Isrɑil, kër-ɑ ɑ́dhwönhi Isrɑil wɑ̈g kì Rïp.” Akööb gen kinni, “Kwøbbɑni ceg kɑ lidhø yi wɑ, dɑ́ ngø ɑ gwøg?” Tyëng Isrɑil, ɑ́bï wɑ̈g, cɑg kì Dɑn gïti Bircebɑ̀, kí myërri Gilyɑd, ɑrëbi gen bënn, kɑ ri gen cøng gen kì bøli Jwøng-ɑ Ácwɑ̈ɑ̈j kì Midhpɑ̀. Jɑggi wɑ̈thi kɑ̈lli Isrɑil bënn, ɑ́bëëd ge nud kì keny-ɑ ɑ́cugi jii Jwøk, ɑ́dɑ jøliny tyel mø kwɑnni gen bɑ ɑ́lïp miy ɑ́ngwen. Alïng tyëng gøl Ben Yɑmïn, kinni tyëng Isrɑil ri gen cøng gen Midhpɑ̀. Apëjji tyëng Isrɑil kinni, “Köbbu wøn, orøng-ɑ rɑɑj cɑrø èn, ɑ́cwöb-ɑ dï?” Akööb Kwɑɑr Leebì, jɑlgøl nyɑn-ɑ ɑ́nɑ̈g kinni, “Yɑn wøki cyëgɑ, wø ɑ́töngi Gibeɑ̀ kì myërri Ben Yɑmïn, kinni o wø nïnni wøn yije. Adhwönhi jø Gibeɑ̀ bɑngɑ kì wɑ̈r, ɑtyeg gen gøl-ɑ́ yije ɑ́di yɑn, ge dwɑdd-ɑ nɑ̈gi yɑn, kɑ cyëgɑ mød yi gen, kɑ othøø. Akwɑnyɑ cyëgɑ kɑ ngøllɑ ɑ́ ɑ́tug, kɑ ɑ́tuug ɑ́kyel ör-ɑ kɑl ɑ́kyel kì kelli kɑ̈lli Isrɑil bënn gɑ pyɑ̈rø wïdɑ́ryew, kipe kinni o yod kinni, jiɑni ɑ́göög ki gïnrɑj ki mendwøng kì Isrɑil. Anɑn, wun ɑ tyëng Isrɑil løøgu kwøbbɑni.” Adhwödhi tyëng Isrɑil mɑl bënn, kɑ ge ólöggø ki dhøg ɑ́kyel kinni, “Bong ngɑn kedhi gøle kì kellee. De gïn-ɑ nud, ɑ ógöggi wɑ tyëng Gibeɑ̀ bɑ kinni, wɑ ólëngø ki wél, kipe yienyi ji-ɑ ókedhi be liny. Ji pyɑ̈rø ókwɑny yi wɑ kì ri miyø kì wɑ̈thi kɑ̈lli Isrɑil, kipe kinni o ge thödhi gen yɑy ki gïgcɑmm, o ji-ɑ kyeelø ókedhi be nyɑɑg Gibeɑ̀ ki gøl Ben Yɑmïn, o ge göggi ki gïnrɑj, kipe gïnrɑj men-ɑ ɑ́gwøg yi gen kì Isrɑil.” Codhe, ɑcøng Isrɑil ree bëne, kɑ ge órëbø kipe nyɑɑg ki kɑɑlɑni. Aödi tyëng Isrɑil myërri Ben Yɑmïn bëne ki ji, mø pyëj gen kinni, “Wude ɑ göög wun ki gïnrɑj ni men? Mëggu wøn jø Gibeɑ̀ o ge nɑ̈g yi wøn, kipe kinni o gïnrɑj men-ɑ kömi Isrɑil lɑ̈ɑ̈nye.” De kwøbbi tyëng Isrɑil nuti lïngø yi tyëng gøl Ben Yɑmïn. Codhe, kɑ tyëng gøl Ben Yɑmïn ri gen cøng gen, kì kɑ̈ddi gen, ɑbëën gen Gibeɑ̀ kipe kinni o ge nyïɑ̈ggi gen ki tyëng Isrɑil møg-ɑ kyeelø. Tyëng Isrɑil kì wɑ̈yi gen e gøl Ben Yɑmïn tøøk, ɑ́cung ki jøliny ɑ́lïp miy ɑ́ngwen, ge bɑ jöddi liny bënn. Akedhi tyëng Isrɑil Betiil, kɑ Jwøk pyëj yi gen, ge okööbø kinni, “Á gøl-ɑ́ kì kelli kɑ̈lli wøn, ɑ ókwöngi ki kedhi be nyɑɑg ki tyëng gøl Ben Yɑmïn?” Alöggi Jwøng-ɑ Ácwɑ̈ɑ̈j kinni, “Gøl Yeudɑ̀ ɑ ókwöngi ki kedhø.” Dhuki kì mwøl, ɑdhwödh tyëng Isrɑil, kɑ kɑɑl gen gur gen buti Gibeɑ̀. Akedhi tyëng Isrɑil be nyɑɑg ki gøl Ben Yɑmïn, kɑ liny cïmmi gen ge nenn-ɑ kɑɑlɑni. Abëën gøl Ben Yɑmïn wɑ̈g kì Gibeɑ̀, kɑ ji ɑ́lïp pyɑ̈r ɑ́ryew wïdɑ́ryew odöngø kì piny ge thøø kì kelli tyëng Isrɑil dicyɑ̈ngɑni. Kɑ tyëng Isrɑil liny gen kedh-ɑ be nyɑɑg ki gøl Ben Yɑmïn kì ryeew cyɑ̈ng. Kì ryeew cyɑ̈ng menɑni, ɑdøøg liny gøl Ben Yɑmïn ki bëën wɑ̈g kì Gibeɑ̀, kɑ ge ónɑ̈ggø këti ki jii Isrɑil mø kwɑnni gen bɑ ɑ́lïp pyɑ̈rø wïdɑ́bïdɑ̈g, ge bɑ jöddi liny bënn. Akedhi tyëng Isrɑil bënn Betiil, ɑpëggi gen be ywøg kì bøli Jwøng-ɑ Ácwɑ̈ɑ̈j, kɑ ri gen twöön gen ki gïncɑm dicyɑ̈ngɑni, gïti böörø. Anëngi Jwøng-ɑ Ácwɑ̈ɑ̈j yi gen ki gënhi mër, geki gënh-ɑ nyi rɑ̈b bëne. Kì bøli kenyɑni, Sɑnduug Ciggi Jwøk ɑ́bëëd e ying-ɑ kenyɑni. Apyëëj Jwøng-ɑ Ácwɑ̈ɑ̈j yi tyëng Isrɑil, kinni, “Kedhi wøn be nyɑɑg këti ki nyiimï wøn, gøl Ben Yɑmïn, wɑlɑ̀ wø ko kedh?” Pineɑs wɑ̈d Eliɑdhɑr Kwɑɑr Aɑron, en ɑ ɑ́bëëd e bɑ ókwërø. Alöggi Jwøng-ɑ Ácwɑ̈ɑ̈j kinni, “Kedh wun! Mɑ́ dhuki kì mwøl ge ócïb yi yɑn cinggi wun.” Codhe, kɑ jø Isrɑil ókɑ̈bbø ki jøg mø lïïbø kì tøggi Gibeɑ̀ bëne. Akedhi tyëng Isrɑil be nyɑɑg ki gøl Ben Yɑmïn kì dɑ̈ɑ̈g cyɑ̈ng, kɑ ge ogudø ge rwöm ki Gibeɑ̀ ni tyeli mɑl. Kɑ gøl Ben Yɑmïn bï-ɑ wɑ̈g be liny. Acɑ̈gi gen ki nɑ̈g ki jii Isrɑil ni tyeli mɑl kì yij thwørø, kí kö yuu-ɑ kedhi Betiil geki kö yuu-ɑ kyeelø men-ɑ kedhi Gibeɑ̀. Ji gïn ni pyɑ̈r ɑ́dɑ̈g ɑ́nɑ̈g yi gen kì kelli tyëng Isrɑil. Tyëng gøl Ben Yɑmïn ɑ́bëëd ge rømm-ɑ kinni, ge ótyɑ̈mø, ni tyeli mɑl. De tyëng Isrɑil rummi gen ɑ́reb gen kinni, “Rengi wɑ liny wɑ̈g kì buti kɑɑl, o ge pönhi gen wɑ̈g kì kɑɑl, ge rïng-ɑ́ɑ̀ bɑngee.” Kɑ liny wøøg cyɑ̈n yi tyëng Isrɑil bënn, ɑreb liny ree kì Bɑɑl Tɑmɑr, kɑ jøg-ɑ lïïbø kì tøggi Gibeɑ̀ pönh-ɑ wɑ̈g kì kɑ̈jj-ɑ ɑ́pɑ̈ni yi gen. Kɑ jø Isrɑil ɑ́lïp pyɑ̈rø møg-ɑ ɑ́yieny kì kelli Isrɑil bëne pɑ̈ɑ̈r-ɑ kömi Gibeɑ̀. Anyïɑ̈ggi liny ki nyɑɑg me teeg. Tyëng gøl Ben Yɑmïn ɑ́bëëd ge kwïj wøw kinni ryɑ̈g pɑ̈dhi kömi gen. Isrɑil ɑ́thödhi ki tegø yi Jwøng-ɑ Ácwɑ̈ɑ̈j, kɑ gøl Ben Yɑmïn cyedde. Anɑ̈ggi tyëng Isrɑil ki ji mø kwɑnni gen bɑ ɑ́lïp pyɑ̈r ɑ́ryew wïdɑ́bïj kí miyø ɑ́kyel, kì kelli tyëng gøl Ben Yɑmïn, ge bɑ jöddi liny bënn. Alidhii yi gøl Ben Yɑmïn kinni ge ɑ́tyɑm. Liny Isrɑil bëne ree ɑ́wøøge cyɑ̈n kì myërri gøl Ben Yɑmïn, mɑ́ ge ɑ́bëëd ge gɑ̈nn-ɑ lïbbi gen møg-ɑ tøggi Gibeɑ̀. Apɑ̈ɑ̈r lïbbɑni kömi Gibeɑ̀, kɑ ge jwɑn-ɑ tɑɑy kelli Gibeɑ̀, kɑ ji bënn, nɑ̈g yi gen kì kɑɑl. Liny Isrɑil ɑ́bëëd e rum nywɑ̈g ki kwøbbi ngïji. Kinni keny-ɑ óliidh yïrø me dwøng me töngi mɑl ɑ́ pøølø kì kɑɑl, liny Isrɑil bëne men-ɑ wïj kër ree óluge. Tyëng gøl Ben Yɑmïn ɑ ɑ́kwöngi ki nɑ̈ggø ki ji mø kwɑnni gen bɑ pyɑ̈r ɑ́dɑ̈g kì kelli tyëng Isrɑil, ɑrum gen kinni, ge ótyɑ̈mø ni liny tyeli mɑl. De ngïji ɑ́cwöb; yïrø mɑ pøølø ɑ́töngi mɑl kì kɑɑl. Alïïdh tyëng gøl Ben Yɑmïn ngɑ̈thi gen, kɑ ge ongɑ̈ngø kɑ̀ kɑ̈ɑ̈l lebbi mɑc mɑl kì kɑɑl bëne. Alug tyëng Isrɑil ri gen, kɑ tyëng gøl Ben Yɑmïn mɑg yi wɑ̈ɑ̈rø, mɑ́ e ɑ́yod yi gen kinni ryɑ̈g ɑ́pɑ̈dhi kömi gen. Arengi gen kì bøli Isrɑil, ge reng-ɑ yij piny mɑ ryɑng, de ge nuti bodhø. Ge ɑ́tum kej ɑ́kyel yi liny Isrɑil men-ɑ ɑ́dwöög kì wïj kër, kí men-ɑ ɑ́bï e dwöög ɑ kɑɑl, kɑ ge nɑ̈g. Tyëng Isrɑil, gøl Ben Yɑmïn ɑ́tyeeg gen kej ɑ́kyel, kɑ ge ódhɑ̈lø wïyø ki cyeddi gen, gïti Gibeɑ̀ kì kuni wɑɑng cyɑ̈ɑ̈ng mwøl, mø gïïr kì kelli gen ɑ́nɑ̈g yi tyëng Isrɑil. Jø gøl Ben Yɑmïn møg-ɑ teg, mø kwɑnni gen bɑ ɑ́lïp pyɑ̈rø wïdɑ́bïdɑ̈g ɑ́nɑ̈g yi tyëng Isrɑil. Aløg kwï gen ri gen kɑ ge reng-ɑ piny-ɑ bɑ ryɑng kì kuni Kïti Rimön. Anɑ̈ɑ̈g ji mø kwɑnni gen bɑ ɑ́lïp ɑ́bïj kì kelli gen. Adhɑ̈li tyëng Isrɑil ki wïyø cyeddi gen, ɑwɑ̈dhi gen Gïdöm, kɑ ge ónɑ̈gø ki ji mø kwɑnni gen bɑ ɑ́lïp ɑ́ryew. Kwɑnni tyëng gøl Ben Yɑmïn bënn møg-ɑ ɑ́nɑ̈g dicyɑ̈ngɑni, bɑ ɑ́lïp pyɑ̈r ɑ́ryew wïdɑ́bïj, ge bënn ge bɑ jønyɑɑg mø teg. De jøg mø kwɑnni gen bɑ miy ɑ́bïkyel ɑ́bodh; ge ɑ́rengi myërri yij ryɑng men-ɑ kuni Kïti Rimön, kɑ ge obëëdø ki dwɑ̈tt ɑ́ngwen kì kunɑni. Adøøg tyëng Isrɑil yï tyëng gøl Ben Yɑmïn, kɑ kwï møg-ɑ ɑ́döng nɑ̈g yi gen, gen ɑ jøg-ɑ cwøw, kí tyëng-ɑ mɑ̈nn, kí othønhø, kí dhög, kí gïg-ɑ ɑ́yod yi gen. Kɑ jɑmmì bënn rɑ̈b gen geki kɑ̈dd bënn. Jø Isrɑil ɑ́köngi kì Midhpɑ̀ kinni, “Bong dhɑnhø kì kellee men-ɑ ówëggi nyɑre nywømø yi jɑl gøl Ben Yɑmïn.” Akedhi ji Betiil, ɑbëëd gen kì kunɑni kì bøli Jwøk gïti böörø. Aryeer gen, ge óywöngø kinni, “Yïn ɑ Jwøng-ɑ Ácwɑ̈ɑ̈j, Jwøøg Isrɑil, ede gïn ni men ɑ cwöbe kì Isrɑil? Ede kɑl ɑ́kyel ɑ pɑ̈ɑ̈dh wïje dicyɑ̈ngtïn kì kelli kɑ̈lli Isrɑil?” Dhuki kì mwøl, ɑgeer këli lɑm kenyɑni yi ji, ɑmuuj gen ki gënhi mër, kí gënh-ɑ nyi rɑ̈b bëne. Apëjji tyëng Isrɑil kinni, “Dɑ kɑl ɑ́kyel kì kelli kɑ̈llì me nuti bëën bøli Jwøng-ɑ Ácwɑ̈ɑ̈j kì Midhpɑ̀ keny?” (Mɑ́ ge ɑ́köngi kinni dhɑnhø men-ɑ pɑ kedhi Midhpɑ̀ bøli Jwøng-ɑ Ácwɑ̈ɑ̈j ceg kɑ nɑ̈gø.) Kì kenyɑni ceth, kɑ tyëng Isrɑil yethi gen óywöngø kipe nyiimï gen, tyëng gøl Ben Yɑmïn, ɑkööb gen kinni, “Kɑl ɑ́kyel wïje ɑ́pɑ̈ɑ̈dh kì Isrɑil dicyɑ̈ngtïn. Á gïn ɑ ógwøg o ge yïddi gen ki mɑ̈nn? Wɑ ɑ́rum ki köngø kì bøli Jwøng-ɑ Ácwɑ̈ɑ̈j kinni, bong nyigee møg-ɑ ówëggi wɑ nywømø yi gøl Ben Yɑmïn.” Keny-ɑ ɑ́pëjji gen mɑ di kɑl ɑ́kyel kì kelli kɑ̈lli Isrɑil me nuti bëën kej buri Jwøng-ɑ Ácwɑ̈ɑ̈j kì Midhpɑ̀, ɑyodii yi gen kì kej burø kinni bong dhɑnhø me nud ɑ́ ngeti Yɑbic kì Gilyɑd. Keny-ɑ ɑ́mɑɑm liny, ɑyodii yi gen kinni bong jɑl Yɑbic kì Gilyɑd me nud kì yij burø kì kenyɑni. Codhe, kɑ jønyɑɑg mø teg mø kwɑnni gen bɑ ɑ́lïp pyɑ̈rø wïdɑ́ryew ör yi burø, kɑ ge ceg yi burɑni kinni, “Kedh wun, nɑ̈gu tyëng Yɑbic bënn jøg-ɑ cwøw kí mɑ̈nn, kí othønhø. Nɑ̈gu jøg-ɑ cwøw bënn kí mɑ̈nn-ɑ rumø niin yi cwøw.” Kɑ ge óyïddø ki wojur mø nuti nywɑlø yi cwøw, mø kwɑnni gen bɑ miy ɑ́ngwen kì kelli tyëng Yɑbic, ɑkɑ̈ɑ̈l gen Cilø kì piny Kɑnɑɑn. Kɑ burø bëne oödø ki wöödø mi mër, e öd-ɑ yï jø gøl Ben Yɑmïn kì Kïti Rimön, kinni liny ɑ́rum. Codhe, ɑdwöög jø gøl Ben Yɑmïn pɑc, ɑmëggi gen wojurri Yɑbic kì Gilyɑd møg-ɑ ɑ́wiy ge nuti nɑ̈gø. De kwɑnni wojurɑni nuti rømi ri gen, mɑ́ ge nøg. Aywöngi yethi ji kipe gøl Ben Yɑmïn, mɑ́ Jwøng-ɑ Ácwɑ̈ɑ̈j kelli kɑ̈lli Isrɑil ɑ́cïbe ki kew. Akööb jøgdøngi burø kinni, “Göög wɑ kidï kipe kinni o ji møg-ɑ ɑ́döng ge nuti yïddø ki mɑ̈nn kì gøl Ben Yɑmïn yïddi gen? Mɑ́ mɑ̈nni gen bënn ɑ́nɑ̈g. Kipe kinni o wïj kɑl ɑ́kyel kì kelli kɑ̈llì pyɑ̈rø wïdɑ́ryew cöge e pɑ pɑ̈ɑ̈dh, yɑ̈ɑ̈b wɑ ki yöö me tïng wïj gøl Ben Yɑmïn, de wɑ pɑ cuggi yïëyø kinni, o nyigee nywøm yi gen, mɑ́ wɑ ɑ́rum ki köngø kinni cyën óying kömi dhɑnhø men-ɑ ómëggi nyɑre jɑlø kì gøl Ben Yɑmïn.” Arum gen kinni “Kwëër cɑ̈gi run ɑ́cyɑ̈ngi ki gwøgø kì Cilø.” (Cilø ying-ɑ wɑɑng wuudø kì bøli Betiil, o ying-ɑ wɑɑng wurlwɑl kì bøli Libnɑ̀, o ying-ɑ kuni wɑɑng cyɑ̈ɑ̈ng mwøl kì yuu-ɑ kɑɑm Betiil geki Cekïm). Aköbbi jø gøl Ben Yɑmïn yi gen kinni, “Kedh wun kɑ wu pɑ̈ni wun kì yethi bɑ̈ggi oløg. Kɑ wu nëën wun. Keny-ɑ óbëën womɑ̈nn Cilø kej kwër be cøng, kɑ wu bïu wɑ̈g kì kelli oløg. Kɑ dhɑnhø nyi pödhe be mɑ̈gø ki dhɑjø ki tege, kɑ wu døøgu myërri Ben Yɑmïn. Keløg wëëg gen wɑlɑ̀ nyiimï gen óbï yï wun be gøny, köbbu gen kinni, ‘Wïyu gen wøn, mɑ́ ge nuti kɑbø yi wøn kɑ liny, o yï wun bɑ̈r, mɑ́ nyigi wun nuti cɑɑg wun kɑ mëggi gen.’ ” Kɑ møgɑni gwøg yi gøl Ben Yɑmïn, ge ɑ́mɑ̈ɑ̈g kì kelli womɑ̈nn møg-ɑ ɑ́bï ge kedh-ɑ be cøng, ngɑn mɑg-ɑ dhɑjø men-ɑ dwɑdde, kɑ gø kɑ̈ɑ̈le gøn ɑ́ cyëge. Codhe, ɑdøøg gen yethi myërri gen, kɑ kɑ̈ddi gen døøg yi gen ki gerø, ɑpëggi gen piny. Codhe, ɑdhwödh tyëng Isrɑil, kɑ ge døøg-ɑ yethi myërri gen. Ábëëd e bong rɑ̈dh kì Isrɑil kì bøli kenyɑni, de dhɑnhø bëne ɑ́göög-ɑ wïje. Kɑ̈ge dööng kì bøli keny-ɑ ɑ́bëëd Isrɑil jɑɑg-ɑ yi jɑgg, ɑ́dɑ kɑ̈j me dwøng kì pönhɑni. Kɑ jɑl megø kì Betleem kì Yeudiyɑ̀, odhwödhø geki cyëge kí wɑ̈dde ɑ́ryew, kɑ ge dɑ̈g-ɑ pödhi Moɑb. Nyingi jɑlɑni cwøl ɑ́ Elimelek, cyëge cwøl ɑ́ Nɑomì, o wɑ̈dde ryeet cwølli gɑ Mɑklön kí Kilyön. Ge bɑ tyëng gøl Eprɑtɑ̀ kì Betleem, kì Yeudiyɑ̀. Ge ɑ́wɑ̈dhi Moɑb, kɑ ge obëëdø kì Moɑb. Athøw Elimelek, kɑ Nɑomì odöngø ki wɑ̈dde ryeet. Kɑ yɑɑgɑni ónyömø ki nyigi Moɑb, ɑ́kyel cwøl ɑ́ Órpɑ̀, o nyɑn-ɑ kyeelø cwøl ɑ́ Ruth. Kɑ ge obëëdø kì pönhɑni ki gïn ni runn pyɑ̈rø. Codhe, kɑ jøgɑni ryeet Mɑklön ki Kilyön othøø thyew. Adöng ngɑnɑni ɑ́ thwöm kì bɑng kɑ ɑ́thøw jɑlgøle kí wɑ̈dde ɑ́ryew bënn. Kɑ Nɑomì olïngø, e ying-ɑ Moɑb, i Jwøng-ɑ Ácwɑ̈ɑ̈j jie pɑɑr en, kɑ gï thödhe ki gïncɑm. Arume ki kwøbbi døøgø. Adhwödhe geki kwɑrre kì keny-ɑ ɑ́bëëd gen, kɑ ge døøg-ɑ Yeudiyɑ̀. De kɑ̈ng-ɑ ɑ́nudd ge ócyɑ̈dhø kì kö pönhɑni, Nɑomì kwɑrre ɑ́köbbe kinni, “Døg wun; døøg ngɑɑn gøl meye. Wu ókøny yi Jwøng-ɑ Ácwɑ̈ɑ̈j kipe bëëndøj men-ɑ ɑ́bëëd wun kì bøli cwøwi wun, kí kɑ ɑ́döng wɑ ketee. Yɑ kwɑjj-ɑ Jwøng-ɑ Ácwɑ̈ɑ̈j, o wu nywøm kì kɑ̈llì mø døøj!” Kɑ okööbø kinni, “Døj kedh wun.” Aywöngi mɑ̈nni wɑ̈dde. Kɑ köbbi yi gen kinni, “Pɑth, wø dwɑdd-ɑ kedhi pödhi wun ceth ki yïn.” Alöggi Nɑomì kinni, “Døg wun nyigɑ! Á kipe ngø, ɑ kedh wun ki yɑn? Yɑ ócuggø nywølø ki wɑ̈dd møg døngi, kɑ ge ogöögø ki cwøwi wun? Døg wun nyigɑ; mɑ́ yɑ ɑ́yöø, yɑ pɑ cuggi nywømø këti. Cɑgg yɑ kööbø kinni, yɑ ócuggø nywømø, wɑlɑ̀ cɑgg yɑ nywøm tïn kì wɑ̈r, kɑ yɑ onywølø ki wɑ̈dd, ge ócuggø yïdø yi wun o ge døngi gen? Ri wun mɑ̈ɑ̈n wu nywømø kiper gen? Pöy! Pɑth en, nyigɑ! Pyëwɑ orɑ̈mø ki mendwøng kiper wun, mɑ́ yɑ ɑ́ryɑ̈g yi Jwøng-ɑ Ácwɑ̈ɑ̈j.” Adøøg gen ki ywøg. Kɑ Órpɑ̀ wønge mɑ̈dhe, ɑdøøge gøl gen. De Ruth ɑ́mɑ̈gi kì ri wønge. Akööb Nɑomì kinni, “Liidh, nyɑ̈gí ɑ́døøg yï gøl gen, ɑ́døøg yï jwögge. Kedhí bɑng nyɑ̈gí.” De Ruth ɑ́löggi kinni, “Yɑ ko kwɑjjí kipe wiyi yïn, kinni o yɑ døøgɑ, o yɑ cögɑ yɑ pɑ kedh ki yïn. Mɑ́ yɑ dwɑdd-ɑ kinni, keny-ɑ ókedhi yi yïn, en ɑ kedhɑ, o keny-ɑ óbëëd yi yïn, en ɑ bëëdɑ, wɑddí bɑ wɑddɑ, o Jwøgí bɑ Jwøgɑ. Wɑ thøw-ɑ kej ɑ́kyel, o wɑ koony-ɑ kej ɑ́kyel ceth. Yɑ lɑm-ɑ riɑ ɑnɑn kinni, wiy yɑ ócɑy yi Jwøng-ɑ Ácwɑ̈ɑ̈j keløg dhøgɑ ódi wilø yi yɑn. Bong gïn dɑ̈ɑ̈ng wɑ den-ɑ́ thøø kete.” Keny-ɑ ɑ́lidhii yi Nɑomì kinni Ruth pɑ yïëy døøgø, ɑwiye møgɑni. Codhe, ɑkedh gen. Kɑ ge wɑ̈dh-ɑ Betleem. Keny-ɑ ɑ́wɑ̈dhi gen Betleem, kɑ tyëng kɑɑlɑni yïthhi gen otyegø bënn; tyëng-ɑ mɑ̈nn okööbø kinni, “Men bɑ Nɑomì kidyër?” Akööb Nɑomì kinni, “Yɑ ko cwølli wun yɑn ɑ́ Nɑomì, cwøllu yɑn, yɑn ɑ́ Mɑrɑ̀, mɑ́ Áyïmø, bëëdɑ ɑ́løge me keej ni kenø. Yɑ ɑ́kedh köörɑ pɑ̈ng, ɑdwöög yɑn yi Jwøng-ɑ Ácwɑ̈ɑ̈j èn, ki cinggɑ. Yɑ ócwølli yi wun yɑn ɑ́ Nɑomì kidï, yɑ ɑ́ryɑ̈g yi Áyïmø!” Bene dwöng-ɑ ɑ́dwöög Nɑomì ɑnɑn kì piny Moɑb, ge ɑ́dwöög kɑ kwɑre, Ruth nyɑɑr Moɑb. Ge ɑ́wɑ̈nhi Betleem kì ri cɑ̈gi nyɑri ceir. Nɑomì yïe ɑ́dɑ ywöre, ówï Elimelek, mɑ jɑlkɑ̈r me pere teg kì yij pödhi gen, nyinge cwøl ɑ́ Boɑdh. Cyɑ̈ng ɑ́kyel, Ruth nyɑɑr Moɑb, Nɑomì ɑ́köbbe kinni, “Yɑ dwɑdd-ɑ kedhi yethi pwödh, men-ɑ óyïddɑ ki ngɑn me døj, me wiy yɑn o yɑ gwënɑ kì yij pwödhe ki byel møg-ɑ nyi dyëm kì bɑng jøgwøg.” Alöggi Nɑomì kinni, “Kedh, nyɑrɑ.” Codhe, ɑkedhi Ruth yethi pwödh. Kɑ Ruth ogwënø kì yij pwödhø megø, kì bɑng tyëng-ɑ nyɑ̈rø. Áwɑ̈dh-ɑ töngø yøw, de pwödhø ce ying-ɑ pwödhi Boɑdh, jɑl-ɑ bɑ wɑd ki Elimelek. Abëën Boɑdh, e kɑ̈ɑ̈l-ɑ Betleem. Kɑ tyëng-ɑ göögø mɑ̈dhe kinni, “Wu ómïdhi yi Jwøng-ɑ Ácwɑ̈ɑ̈j.” Alöggi gen kinni, “Yï ógyëdh yi Jwøng-ɑ Ácwɑ̈ɑ̈j.” Apyëëj jɑngi jøgwøg yi Boɑdh, kinni, “Á nyɑɑr men ɑnɑn?” Alöggi jɑngi jøgwøg kinni, “Bɑ nyɑɑr Moɑb men-ɑ ɑ́bï geki Nɑomì keny-ɑ ɑ́dwööge kì Moɑb. Ákööb kinni, ‘Yɑ kwɑjj-ɑ yïn, wiy yɑ gwënɑ kì kɑɑm dhøggi ceir, kì bɑng tyëng-ɑ nyɑ̈rø.’ Ying-ɑ kömi tyelle kër-ɑ ɑ́bëëne ɑ́cøøn. Bene kɑle ree ki ywömø ɑnɑn kì tïbø.” Aköbbi Ruth yi Boɑdh kinni, “Lïng nyɑrɑ, yï ko kedhi be gwen yij pwödhø megø. Ko di keny kedhi yi yïn, de bëëd kì kelli wo-ɑ gwënø kì pwödhɑ. Nenní pwönh-ɑ kɑ̈ɑ̈j yi yɑɑg ceth, kɑ yï lugí kì bɑng gen; mɑ́ ge ɑ́rum ki kyëddø yi yɑn kinni yï ko nyi dhɑ̈ɑ̈l yi gen. Kenyi mɑɑg yïn yi röödhø, nyi mɑ̈dhí kì yethi pugg-ɑ nyi tömmi yi gen ki pï.” Kɑ Ruth ree bøødhe wïje kuule’ piny kì bøli Boɑdh, ɑkööbe kinni, “Á kipe ngø ɑ køny yɑn kinøw, yɑn ɑ́ nyɑɑr jur megø yøw?” Alöggi Boɑdh kinni, “Yɑ ɑ́köbbi ki gïgdøj møg-ɑ ɑ́göggí wøngí, kër-ɑ ɑ́thøw jɑlgølí, kí kër-ɑ ɑ́wiy wïyí piny geki meyí, kì keny-ɑ yije ɑ́nywøøl yïn, kɑ yï bï-ɑ yï ji mø kwïj yi yïn. Yï ókøøg yi Jwøng-ɑ Ácwɑ̈ɑ̈j kipe gwøng-ɑ døj ni men. Yï óyïddi ki köögi kì yï Jwøøg Isrɑil, Jwøng-ɑ Ácwɑ̈ɑ̈j, ngɑn-ɑ́ tïbe ɑ́yömmi yi yïn!” Alögge kinni, “Bɑ̈ngí ɑ́køny yi yïn kidøøj jɑldwøng, cɑgg ɑ́ kɑ̀ bëëdɑ yɑ pɑth ki dhɑnhø ɑ́kyel kì kelli bɑ̈nggí kidyër yøw!” Keny-ɑ ɑ́wɑ̈nhi bøli kej cɑm, ɑköbbii yi Boɑdh kinni, “Bïí keny, o yï cyɑ̈ɑ̈m. Kɑ ópun nyi jwɑ̈ɑ̈g yij mulø.” Codhe, ɑpëgge buti jøgwøg. Kɑ nëngi yi Boɑdh ki ópuun jirɑyø. Kɑ Ruth ocyɑ̈mø, gïti kɑ ɑ́yɑ̈nge, kɑ kwï ópune odöngø. Keny-ɑ ɑ́døøge be gwen këti, kɑ Boɑdh, jøgwøge cege kinni, “Pɑth ki kinni, o nyɑnɑni wiy yi wun gwëne kì bɑng wun kì kɑɑm dhøggi ceir kete, de nyi rönhu wɑ̈g kì ri dhøg møg-ɑ töjji yi wun, ki kwï thyɑng mø wɑ̈thi gen di byel, kɑ ge nyi wiyu piny, o gï gwene. Kɑ ko nyi cyɑ̈r wun.” Kɑ Ruth ogwënø kì yij pwönhɑni gïti böörø. Codhe, ɑtøge møg-ɑ ɑ́gwene. Ceir men-ɑ ɑ́yod yi en, bɑ gïn ni thɑpiyø ɑ́kyel. Kɑ gø tëëre pɑc. Kɑ ceir men-ɑ ɑ́gwene lidh yi wønge. Kɑ Ruth gïncɑm men-ɑ ɑ́döng kì bɑnge ɑ́tïni, mëgge wønge. Apyëjii yi Nɑomì kinni, “Yï ɑ́gwëën ɑ keny dicyɑ̈ɑ̈ng? Yï ɑ́göög ɑ keny? Jɑl-ɑ ɑ́køny yïn ógyëdh yi Jwøk!” Aköbbe wønge ngɑn-ɑ́ pwödhe ɑ́gööge, kinni, “Nyingi jɑl-ɑ́ pwödhe ɑ́göögɑ dicyɑ̈ɑ̈ng, cwøl ɑ́ Boɑdh.” Kɑ Nɑomì kwɑre köbbe kinni, “Ógyëdh yi Jwøng-ɑ Ácwɑ̈ɑ̈j, ngɑn-ɑ ɑ́dhɑ̈li wïyø ki kønyi tyëngnëënø, kí tyëngthøø thyew.” Kɑ Nɑomì kwɑre löbbe kër-ɑ bëëd jɑlɑni ɑ́ wɑd kinni, “Jɑlɑni, wɑ bɑ wɑdd ki en; bɑ ɑ́kyel kì kelli tyëng-ɑ cuggi lɑ̈gø.” Kɑ Ruth nyɑɑr Moɑb okööbø kinni, “Men-ɑ́ yɑ ɑ́köbbe thyew kinni, ‘Cöög yï ogwënø ki bɑng jøgwøgɑ, gïti keny-ɑ órum jɑmmɑ bënn ki kɑjø.’ ” Kɑ Nɑomì mø kwɑre løøge kinni, “Lɑ̈w nyɑrɑ, keløg yï cyɑ̈dhi kɑ womɑ̈nni pwödhe, kipe yï ódhɑ̈ɑ̈l kì yij pwödhø megø.” Codhe, ɑcög Ruth e cyɑ̈dhi kɑ womɑ̈nni pwödhi Boɑdh. Ágwëën kì yethi pwödhhi Boɑdh gïti kɑ ɑ́thumi ceir ki nyɑrø. Kɑ gemè lony ki nyɑrø, kɑ óthumø. Adøøge be rïïjø kì pɑc geki wønge. Kɑ Ruth köbbi yi wønge cyɑ̈ng ɑ́kyel kinni, “Nyɑrɑ, yɑ dwɑdd-ɑ yɑ̈bbi yïn ki jɑlø, kí keny-ɑ yije ócuggi bëëdø pyëwí omedø. Anɑn yïee dɑ jɑl mɑ wɑd, ɑ løg Boɑdh, jɑl-ɑ́ pwödhe ɑ́gwëën yi yïn, wuki wo-ɑ kyeelø. Ónïn-ɑ yij rɑrø tïn be kwödø ki ceir. Lwøggí, kɑ yï gïïny, kɑ yï ruggí kidøøj. Codhe, kɑ yï kedhí rɑrø. De rií ko wëggí lidhø yi jɑlɑni gïti keny-ɑ órume ki cɑm. Okedhe be buddø, kɑ keny-ɑ buude tiid kidøøj. Onene, kɑ rií liib kun-ɑ di en, yɑl tyelle, kɑ yï buddí kì dhøggi tyelle. Yï óköbbe gïn-ɑ dwɑddi yi en, o gwøg yi yïn.” Alöggi Ruth kinni, “Møg-ɑ ɑ́kwøb yi yïn bënn, ógwøg yi yɑn.” Akedhe rɑrø, kɑ møg-ɑ ɑ́cïgii yi wønge gwøge ceth. Keny-ɑ ɑ́rum Boɑdh ki cɑm kɑ omɑ̈dhø, ɑdhwödhe pyëwe omedø. Kɑ óbuddø kì buti pëm. Codhe, kɑ Ruth ree liibe yïe mɑ̈ɑ̈dh, kɑ tyelli jɑlɑni yɑle, ɑbudde kì dhøggi tyelle. Kì dïwɑ̈r keny-ɑ ɑ́bëëne e ócyëwø ɑpɑ̈ye, kɑ ongɑ̈ngø yi kɑ̀ di ngɑndhɑjø me buud kì dhøggi tyelle! Apëjji Boɑdh kinni, “Yï bɑ men?” Alöggi nyɑnɑni kinni, “Yɑ Ruth bɑ̈ngí. Kum yɑn, mɑ́ yï bɑ ywörɑ, men-ɑ cuggi lɑgi yɑn.” Kɑ Boɑdh okööbø kinni, “Yï ógyëdh yi Jwøng-ɑ Ácwɑ̈ɑ̈j, nyɑrɑ! Gïndøj men-ɑ gwøg yi yïn èn, lod-ɑ men-ɑ ɑ́göggí Nɑomì wøngí, mɑ́ yï nuti yɑb ki wøb me di nywøm yïn, ying-ɑ́ wøm kɑ̈rø wɑlɑ̀ me wɑnge cɑn. Anɑn yï ko böggi nyɑrɑ, gïn-ɑ dwɑddi yi yïn ógöggɑ yïn ceth. Tyëng kɑɑl keny ngɑ̈ny wøw bënn kinni yï bɑ dhɑnhø me døøj. Yɑ bɑ ywörí kidyër, de dɑ ywörí megø, me cyɑ̈gi ki yïn kibølɑ. Buddí kì keny. Ólidh yi wɑ kì mwøl, keløg e oyïëyø ki lɑgi yïn, døøj! Wiy yï lɑg yi en. De keløg e pɑ dwɑddi lɑ̈gø, yɑn ɑ köngi èn, ki nyingi Jwøng-ɑ Ácwɑ̈ɑ̈j, Jwøng-ɑ Nëënø, yï lɑgɑ’ lɑgø! Buddí, møgɑni ólidh yi wɑ kì mwøl.” Codhe, ɑbuude kì dhøggi tyelli jɑlɑni gïti mwøl. Kɑ nyɑnɑni odhwödhø piny nudd e looj. Boɑdh ɑ́rum thyew kinni, “Wiy cöge, e pɑ yod yi ji kinni nyɑnɑni bëën rɑrø.” Kɑ okööbø kinni, “Pedh lɑní.” Kɑ Ruth lɑne pedhe. Kɑ yij ógødhe rumi yi Boɑdh ki kïllì pyɑ̈r ɑ́ryew mø ceir, kɑ gï yeeje wïj Ruth. Kɑ Ruth døøg-ɑ kɑɑl. Keny-ɑ ɑ́wɑ̈nhe kɑl, ɑpyëjii yi wønge kinni, “Yï ɑ́göög ɑ dï nyɑrɑ?” Aköbbe gøn gïg-ɑ ɑ́gwøg yi jɑlɑni bënn kipere. Akööbe thyew kinni, “Yɑ ɑ́thödhe ki kïllì pyɑ̈r ɑ́ryew mø ceir, ɑ́kööb kinni, ‘Yï ko døøg yï wøngí ki cinggí.’ ” Akööb Nɑomì kinni, “Nëën, Ruth nyɑrɑ, gïti keny-ɑ óyod wɑ tung-ɑ ópɑ̈dhi yi kwøb, mɑ́ Boɑdh ree pɑ ywöme dicyɑ̈ngtïn, gïti keny-ɑ ótyëge kwøbbɑni.” Amøøl Boɑdh dhø döri Betleem, kej burø, kɑ pëgg-ɑ piny. Alunyi jɑl-ɑ ɑ́wɑngi yi Boɑdh, i bɑ en ɑ di lɑ̈gi ki bëënø. Ábï e kɑ̈ll-ɑ tøg burø. Acwølii yi Boɑdh kinni, “Bïí, kɑ yï pëggí piny wɑ̈d wɑ̈ɑ!” Codhe, ɑbëëne kɑ pëgg-ɑ piny. Kɑ Boɑdh, jøgdøngø pyɑ̈rø cwööle, kɑ gï köbbe kinni, “Pëggu piny.” Kɑ ge pëgg-ɑ piny. Aköbbe ówɑ̈n kinni, “Anɑn Nɑomì ɑ́dwöög kì Moɑb, o dwɑdd-ɑ ngeewi piny Elimelek wɑ̈g. Yɑ ɑ́rum kinni lɑ̈w ke thërrɑ møgɑni yïn; kwøb dhøgí kì bøli jøg-ɑ bëëdø kì keny èn, kì yij buri jɑggi pödhee. Keløg yï dwɑdd-ɑ ngewii, ngeew! De keløg yï pɑ dwɑddi ngewii, köbbí yɑn, o yɑ ngɑ̈nyɑ wøw. Mɑ́ e bong ngɑn cuggi ngyew, den-ɑ́ yïn ceth. O ke bɑɑnyí, bɑ yɑn ɑ ngewii.” Kɑ nyelɑni okööbø kinni, “Yɑ dwɑdd-ɑ ngewii.” Kɑ Boɑdh okööbø kinni, “Keny-ɑ óngeew piny kì yï Nɑomì, kɑ cingi Ruth cï nyel-ɑ ɑ́thøw mɑɑg ceth, o gølɑni cöge wïje pɑ pɑ̈ɑ̈dh.” Akööb nyelɑni kinni, “Keløg ɑ́ kinøw, pinyɑni pɑ cuggi ngewø yi yɑn, jɑmmɑ órënyi. Kejɑ wïyɑ’ yïn, møgɑni pɑ lwɑ̈ng yi yɑn.” Ábëëd ɑ́ kwöng kì bøli kenyɑni kì pödhi Isrɑil, kinni ke di gïn lɑg, wɑlɑ̀ gïn ngew, ngɑn-ɑ yïe ngeew gïïpiny, wɑre ɑ́kyel nyi mëgge’ ngɑn-ɑ ngew gïnɑni. Bene gïn-ɑ́ nyi gwøg kì Isrɑil. Codhe, kɑ jɑl-ɑ di lɑ̈gi, keny-ɑ ɑ́köbbe Boɑdh kinni, “Kwɑɑny,” wɑre ɑ́kɑ̈ɑ̈le wɑ̈g kɑ gø mëgge Boɑdh. Aköbbi jøgdøngø geki teedø bëne yi Boɑdh kinni, “Álïngi yi wun dicyɑ̈ngtïn kinni jɑmmi Elimelek, kí mø wɑ̈dde Kilyön geki Mɑklön ɑ́kwɑnyɑ kì yï Nɑomì. Ruth nyɑɑr Moɑb, cï Mɑklön, kwɑnyɑ’ kwɑnyø thyew ɑ́ dhɑjø, kipe mïdhi nyingi nyel-ɑ ɑ́thøw kì kömi jɑmme. O nyinge cög ge pɑ lɑ̈ɑ̈ny kì kelli yɑɑg gen, kì pɑɑ gen. Gen ɑ thumi kì bøli wun èn dicyɑ̈ngtïn.” Kɑ tyëng-ɑ burø bënn, kí jøg-ɑ jɑgg ólöggø kinni, “Wø ɑ́yïëy, kwɑjji wɑ Jwøng-ɑ Ácwɑ̈ɑ̈j, Jwøgee, o ngɑn-ɑ bï gølí ɑnɑn pɑ̈ɑ̈re ki Rɑceel geki Leɑ̀, tyëng-ɑ ɑ́tïng gøl Isrɑil! Yï ókɑ̈ri kɑ yï ódøngø kì pɑɑree Eprɑtɑ̀, ɑ cwøl ɑ́ Betleem! Gølí ógöögø ni gøl Peredh, wɑ̈n-ɑ ɑ́nyölli Yeudɑ̀ yi Tɑmɑr, kì bɑng wɑ̈dd-ɑ ómëggi yïn yi Jwøng-ɑ Ácwɑ̈ɑ̈j kì ri nyɑnthinh men.” Codhe, ɑlɑɑg Ruth yi Boɑdh, kɑ ge obëëdø ki gøn. Kɑ nëngi yi Jwøng-ɑ Ácwɑ̈ɑ̈j ki dhɑnhø, kɑ onywølø ki wɑ̈d. Kɑ tyëng-ɑ mɑ̈nn, Nɑomì köbbi gen kinni, “Lejji wɑ Jwøng-ɑ Ácwɑ̈ɑ̈j, mɑ́ yï nuti twöön en ki ngɑn tïng wïjí! Wiy nyinge ócungi gen ceth kì Isrɑil. Yï ónënge ki medi pyëw kì yij döng, mɑ́ e ɑ́nywøl-ɑ yi kwɑrí me mɑɑr yïn ki mendwøng, lɑ̈w kibøli wɑ̈dd ɑ́bïryew møg-ɑ di nywøl yi yïn.” Akwɑɑny nyɑgïnthinh yi Nɑomì. Kɑ gø cïbe kööre. Kɑ gø kuune. Kɑ cɑ̈ggi ki nying yi mɑ̈nni byëëg gen, ge ɑ́kööb kinni, “Nɑomì ɑ́nyöddi ki wɑ̈d.” Acɑg ge gøn ɑ́ Obed, en ɑ bɑ wïyi Yesì, Yesì ɑ bɑ wïyi Debïd. Men bene lwömi gøl Peredh. Peredh ɑ ɑ́nywøl Ëdhrön. Ëdhrön ɑ ɑ́nywøl Rɑm, Rɑm ɑ ɑ́nywøl Aminɑdɑb. Aminɑdɑb ɑ ɑ́nywøl Nɑɑ̈cön, Nɑɑ̈cön ɑ ɑ́nywøl Sɑlmön, Sɑlmön ɑ ɑ́nywøl Boɑdh, Boɑdh ɑ ɑ́nywøl Obed, Obed ɑ ɑ́nywøl Yesì. O Yesì ɑ ɑ́nywøl Debïd. Ádɑ jɑl megø mɑ wɑ̈d gøl Dhup, kì Rɑmɑ̀, kì myërri kïtti Eprɑim, me cwøl ɑ́ Elkɑnɑ̀ wɑ̈d Yeroɑm, wɑ̈d Elïu, wɑ̈d Tøu, wɑ̈d Dhup. Elkɑnɑ̀ yïe ɑ́dɑ mɑ̈nn ɑ́ryew, Anɑ̀ kí Peninɑ̀. Peninɑ̀ ɑ́bëëd yïe dɑ nywøl, de Anɑ̀ ɑ́bëëd ɑ́ bwøj. Jɑlɑni ɑ́bëëd e nyi kedh-ɑ Cilø yethi runn bënn be mɑ̈ddø, kí be ngɑl ki gënhi Wïlɑ̈bø, Jwøng-ɑ Ácwɑ̈ɑ̈j. Ópenì geki Pineɑs wɑ̈ddi ókwërø Elì ɑ ɑ́bëëd gɑ ókwër mø Jwøng-ɑ Ácwɑ̈ɑ̈j kì bøli kenyɑni. Kenyi ngɑɑl gëëdhi, rïngø nyi pɑ̈ngi yi en kì kelli tyëng kɑl e pɑ̈r, ɑ løg Peninɑ̀ geki nyige kí wɑ̈dde, de Anɑ̀ nyi mëgge’ mi ji ɑ́ryew mɑ́ gø mɑɑr en, ngö nyöde ɑ́cyëëg yi Jwøng-ɑ Ácwɑ̈ɑ̈j. De nyii lɑrrø yi nyɑ̈ge kì bɑng kɑ̀ bëëde ɑ́ bwøj. Kɑ pyëwe nyii rënyø. Anɑ̀ nyii lɑrrø yi nyɑ̈ge yethi runn bënn kenyi kedhi gen ød Jwøng-ɑ Ácwɑ̈ɑ̈j. Kɑ Anɑ̀ nyii ywöngø ki rɑ̈ɑ̈m pyëwe, kɑ nyii konø ki cɑm. Kɑ nyi köbbi yi Elkɑnɑ̀ kinni, “Anɑ̀ yï ywøg-ɑ ngø? O yïde ɑ pɑ cyɑ̈ɑ̈m? Yïde ɑ nyi kïïm? Yɑ pɑ lɑ̈w kì yïí kibøli wɑ̈dd pyɑ̈rø?” Tyelø ɑ́kyel keny-ɑ ɑ́rum gen ki cɑm, ge ying-ɑ Cilø, ɑdhwödh Anɑ̀ e ókwërø Elì bëëd ɑ wïj kwøm kì dhø ød Jwøng-ɑ Ácwɑ̈ɑ̈j. Anɑ̀ ɑ́bëëd pyëwe orɑ̈mø ki mendwøng, kɑ Jwøng-ɑ Ácwɑ̈ɑ̈j kwɑjje e óywöngø. Akönge kinni, “Yïn ɑ Wïlɑ̈bø Jwøng-ɑ Ácwɑ̈ɑ̈j, ke liidh orɑɑng bɑ̈ngí, kɑ yɑ pɑr yi yïn, kɑ yɑ nëngi yi yïn ki wɑ̈d, thyëyɑ’ yïn ki cyɑ̈ngg-ɑ ónëëne bënn. O yëyyi wïje pɑ pɑ̈nyi ki lyelø.” Anɑ̀ ɑ́mɑ̈gi ki keny me bɑ̈ɑ̈r e ókwɑ̈jjø kì bøli Jwøng-ɑ Ácwɑ̈ɑ̈j, o Elì nenn-ɑ dhøge. Ákwɑ̈jji kɑ yethi cwɑgge, dhøge onywenø de gïn-ɑ kømme pɑ lïngi. Arum Elì kinni i wïje dɑ møgø. Kɑ köbbi yi Elì kinni, “Yï gït-ɑ wɑɑng wïjí dɑ møgø? Wiy mɑdh ki møgø!” Alöggi Anɑ̀ kinni, “Wïjɑ bong møgø jɑldwøng, yɑ nuti mɑ̈dhø ki møgø. Yɑ bɑ ngɑn pyëwe rɑ̈mø. Dɑ́ møg-ɑ pyëwɑ ɑ göny-ɑ Jwøng-ɑ Ácwɑ̈ɑ̈j. Yï ko rum kinni yɑ bɑ ngɑn me rɑj, bɑ ngenyi ɑkørr geki muumø ɑ wëggi yɑn kwøb kinøw.” Aløøg møge yi Elì kinni, “Kedh ki mër, gïn-ɑ kwɑjji yi yïn ómëggi yïn yi Jwøøg Isrɑil.” Kɑ Anɑ̀ okööbø kinni, “Wiy bɑ̈ngí yïdde ki gyëdh kì bɑngí.” Codhe, ɑkedhe kɑ ocyɑ̈mø ki gïncɑm. Nuti cigi ywøg këti. Kɑ ge odhwödhø dhuki kì mwøl ceth. Kɑ Jwøng-ɑ Ácwɑ̈ɑ̈j mɑl yi gen, kɑ ge døøg-ɑ Rɑmɑ̀. Kɑ Elkɑnɑ̀ óbuddø ki Anɑ̀ cyëge, kɑ Anɑ̀ pɑr yi Jwøng-ɑ Ácwɑ̈ɑ̈j. Ayïdde ki dhɑnhø kɑ pɑ̈dh-ɑ piny ki wɑ̈d. Kɑ gø cɑge ɑ́ Sɑmwel, mɑ́ gø ɑ́kwɑjji yi en ɑ yï Jwøng-ɑ Ácwɑ̈ɑ̈j. Kɑ Elkɑnɑ̀ geki gøle bëne kedh-ɑ Cilø be muuji gënhi Jwøng-ɑ Ácwɑ̈ɑ̈j, kí gëdhhi wïj könge. De Anɑ̀ nuti kedhø kì runɑni. Jɑlgøle ɑ́köbbe kinni, “Yɑ ókedh ɑ keny-ɑ ópøn dhɑnhø, o kïdhɑ bøli Jwøng-ɑ Ácwɑ̈ɑ̈j kun-ɑ óbëëde gïti ɑtheer.” Aköbbii yi Elkɑnɑ̀ jɑlgøle kinni, “Gwøg gïn-ɑ rømmi yi yïn e døøj. Bëëd kì pɑc gïti keny-ɑ ópøn dhɑnhø. Jwøng-ɑ Ácwɑ̈ɑ̈j kwøbbe ócïbe kɑ̈jji gen.” Codhe, ɑdöng Anɑ̀ kì pɑc e kun-ɑ wɑ̈de. Keny-ɑ ɑ́døngi Sɑmwel kɑ pøn, ɑkïdhi ge gøn ød Jwøng-ɑ Ácwɑ̈ɑ̈j kì Cilø. Ákɑ̈l kɑ wɑdh me runne bɑ ɑ́dɑ̈g, kí kïllì pyɑ̈rø mø møng-ɑ búr, kí ɑtheb me pɑ̈ng yi møgi oløg. Sɑmwel ɑ́kïdhi ød Jwøng-ɑ Ácwɑ̈ɑ̈j kì Cilø e nudd e thiinh. Keny-ɑ ɑ́rum gen ki nɑ̈gi wɑnh-ɑ bɑ gëëdhi, ɑmuuj gen nyelthinh ókwërø Elì. Aköbbi Elì yi Anɑ̀ kinni, “Wëyí ómïdhi yi Jwøng-ɑ Ácwɑ̈ɑ̈j wuö, kidyër bene yɑn ngɑn-ɑ ɑ́cungi kì butí keny kɑ̈ge dööng e kwɑjj-ɑ Jwøng-ɑ Ácwɑ̈ɑ̈j. Yɑ ɑ́kwɑjj-ɑ dhɑnhø men. Kɑ mëggi yɑn yi Jwøng-ɑ Ácwɑ̈ɑ̈j. Anɑn yɑ thyëy-ɑ en Jwøng-ɑ Ácwɑ̈ɑ̈j, o bëëde ɑ́ mi Jwøng-ɑ Ácwɑ̈ɑ̈j gïti keny-ɑ óthøwe.” Kɑ Jwøng-ɑ Ácwɑ̈ɑ̈j mɑlli yi gen kì Cilø kunɑni. Kɑ Anɑ̀ owörø e ómɑ̈ddø kinni, “Jwøng-ɑ Ácwɑ̈ɑ̈j yɑ ɑ́nënge ki medi pyëw me dwøng cɑrø. Jwøng-ɑ Ácwɑ̈ɑ̈j yɑ ɑ́gwøøge ngɑn teg ki mendwøng. Tyëngmɑ̈ɑ̈nø ócuggø lɑrø yi yɑn. Pyëwɑ omedø, mɑ́ yɑ ɑ́køny yi Jwøng-ɑ Ácwɑ̈ɑ̈j. Bong dhɑnhø ɑ́kyel mɑ kwërø me pɑ̈r ki Jwøng-ɑ Ácwɑ̈ɑ̈j, Bong ngɑn pɑ̈r ki en kidyër, Bong kwöd me këëj ni Jwøgee, Yï ko kööb yï tɑ̈dø këti, ko di kwøbbi lɑ̈ɑ̈rø mø kɑ̈ɑ̈l dhøgí. Mɑ́ Jwøng-ɑ Ácwɑ̈ɑ̈j, bɑ Jwøk men-ɑ ngɑ̈nyi jɑmmì bënn, gïg-ɑ gøggi bënn nenne’ nennø. Tønggi yɑɑg teg ɑ́tørri, kɑ yɑɑg nyødh óyïddø ki tegø. Tyëng-ɑ ɑ́bëëd ge yɑ̈ngø cøn, ge ɑ́døøg be gwøg kì cinggi tyëngmøøgø kipe gïncɑm. De tyëng-ɑ ɑ́bëëd ki kɑ̈j ɑ́yɑ̈ng. Bwøj ɑ́nywøl ki ɑ́bïryew, de meyi nywøl-ɑ ngenyø ɑ́döng ki cingge Jwøng-ɑ Ácwɑ̈ɑ̈j ɑ nyi nɑ̈gi, o en ɑ nyi muuj wëy. En ɑ nyi kïdhi thɑ lɑ̈bø, o en ɑ nyi tïngi mɑl. Jwøng-ɑ Ácwɑ̈ɑ̈j ɑ nyi kɑ̈ɑ̈l jɑdø, o en ɑ nyi muuj kɑ̈r. En ɑ nyi dwøøg dhɑnhø cyɑ̈n, o en ɑ nyi tïng dhɑnhø mɑl. Abuur nyi tïnge’ mɑl kì yij tør, kɑ ngɑn jɑdø tïnge mɑl kì yij búr. Kɑ gï cïbe kej ɑ́kyel ki gøl rɑ̈ɑ̈dhø, kɑ gï nyi cïbe keny wøør gen. Mɑ́ tyelli piny bɑ mø Jwøng-ɑ Ácwɑ̈ɑ̈j, en ɑ ɑ́cïb piny kömi tyellɑni. Tyëng-ɑ gɑ̈nii ókor yi en, de tyëngorøg thøw-ɑ yij muudhø, mɑ́ dhɑnhø pɑ nyi tyɑ̈ɑ̈m-ɑ tege. Tyëng-ɑ bɑny Jwøng-ɑ Ácwɑ̈ɑ̈j ókedhhi, ge ópwöde e ying-ɑ mɑl. Gønyyi kömi piny bëne ólidh-ɑ yi Jwøng-ɑ Ácwɑ̈ɑ̈j, rɑ̈dhe óthödhe ki tegø. Rɑ̈nh-ɑ ɑ́røny yi en ówëgge tyɑ̈mø.” Codhe, ɑdøøg Elkɑnɑ̀ Rɑmɑ̀ pɑɑ gen. De nyelthinh ɑ́döng kì buti ókwërø Elì, e gögg-ɑ Jwøng-ɑ Ácwɑ̈ɑ̈j Wɑ̈ddi Elì ɑ́bëëd gɑ tyëngorøg, Jwøk pɑ böggi yi gen. Ciggi ókwër ɑ́bëëd ɑ́ kinni, i ke di ngɑn kɑ̈ni ki gëëdhi, bɑ̈ng ókwërø ceg-ɑ bëënø e rïngø othɑlø, e ókɑ̈ddø ki gɑ̈ɑ̈bi me bɑ keer kì cinge. Codhe, o keerɑni cwøøbe yij ɑ́tɑy, wɑlɑ̀ yij dɑg men-ɑ tɑ̈ɑ̈d ki rïngø. Rïngø men-ɑ kɑ̈ɑ̈l wɑ̈g yi keerɑni, bene en ɑ bɑ mi ókwërø. Bene kër-ɑ nyi kɑ̈bbi gen ɑnɑn, kì yï tyëng Isrɑil møg-ɑ nyi bï Cilø, be nëngi Jwøng-ɑ Ácwɑ̈ɑ̈j ki gëdhhì. Cɑgg dwɑ̈lø nuti rɑ̈bø, bɑ̈ng nyii bëënø kɑ ngɑn-ɑ ngɑ̈dø ki gëëdhi köbbe kinni, “Nguddí ókwërø ki rïngø men bullii, mɑ́ e pɑ nyi yïëy ki rïng-ɑ bɑ ɑthɑl, den-ɑ́ men-ɑ nuti cyegø ɑ dwɑdde kete kì yïí.” Keløg ngɑn-ɑ ɑ́ngɑ̈ɑ̈d ólöggø kinni, “Wiy dwɑ̈li gëëdhi rɑ̈b møti, o rume, o yï kɑ̈bbí ki rïngø men-ɑ dwɑddi yi yïn cyee.” Bɑ̈ng nyi løøg-ɑ kinni, “Pɑth, mëggí yɑn ɑnɑn ceth, ke pɑ muujií, ókɑb yi yɑn ki tegø.” Alïdhi Jwøng-ɑ Ácwɑ̈ɑ̈j kinni orøøg wɑ̈ddi Elì dwøng cɑrø, mɑ́ gëdhhi Jwøng-ɑ Ácwɑ̈ɑ̈j pɑ wør yi gen. De Jwøng-ɑ Ácwɑ̈ɑ̈j ɑ́bëëd e ogɑ̈nø yi Sɑmwel, o Sɑmwel ɑ́bëëd e ogöögø kì ød Jwøng-ɑ Ácwɑ̈ɑ̈j e orugø ki pɑri kwër. Nyii muujø yi meye ki ógødh yethi runn bënn, kì bøli keny-ɑ nyi bëën gen be gwøg ki kwër geki jɑlgøle. Kɑ ge nyi kwëng yi ókwërø Elì kinni, “Wu ónëngi yi Jwøng-ɑ Ácwɑ̈ɑ̈j ki nywøl møg cool kej nyelthinh-ɑ ɑ́muuj yi wun.” Codhe, kɑ ge nyi døøg-ɑ pɑc, kenyi rum møgɑni. Agyëëdh Anɑ̀ yi Jwøng-ɑ Ácwɑ̈ɑ̈j, kɑ gø nënge ki nywøl, ɑnywøle ki wɑ̈dd ɑ́dɑ̈g ki womɑ̈nn ɑ́ryew. Kɑ Sɑmwel ópïïdhø e gögg-ɑ Jwøng-ɑ Ácwɑ̈ɑ̈j. Elì ɑ́døngi ki mendwøng, kɑ gïgrijjø møg-ɑ nyi göggi tyëng Isrɑil yi wɑ̈dde lïnge bënn, kinni tyëng-ɑ mɑ̈nn møg-ɑ nyi kunyi ki gwøg kì dhø ød Jwøng-ɑ Ácwɑ̈ɑ̈j nyii niin yi gen. Aköbbe gïn kinni, “Yɑ ɑ́lïng ki gïgrijjø møg-ɑ gøggi yi wun, kì yï yɑy men bëne. Á kipe ngø ɑ göög wun ki gïg ni møg? Pɑth ki gïg mø døøj ɑ nyi lïngɑ kì ri wun, wiyu orøngɑni nyigɑ! Menɑni bɑ gïjø me pëddi rɑ̈jø. Jii Jwøk bënn okööbø kì ri wun. Keløg dhɑnhø óbɑ̈jjø ki ngɑn megø, ócuggø kønyø yi Jwøk. De keløg dhɑnhø bɑ̈jji kɑ Jwøng-ɑ Ácwɑ̈ɑ̈j, ɑ́ men-ɑ ókønyiì?” De kwøbbi Elì nuti lïngø yi wɑ̈dde, mɑ́ ge ɑ́dwɑdd-ɑ nɑ̈gø yi Jwøng-ɑ Ácwɑ̈ɑ̈j ceth. De Sɑmwel ɑ́døngi e bëëde døøj kì bøli Jwøng-ɑ Ácwɑ̈ɑ̈j geki bøli ji. Kɑ jɑltöng megø bï-ɑ yï Elì, ɑkööbe kinni Jwøng-ɑ Ácwɑ̈ɑ̈j okööbø kinni, “Riɑ ɑ́nyudhɑ gøl kweyi wun Aɑron, kì Rïp, kej bɑ̈ɑ̈ngø. Kì kelli kɑ̈lli Isrɑil bënn, bɑ gøle ɑ ɑ́kwɑny yi yɑn gɑ ji møg-ɑ nyi göggi yɑn kì këli lɑm, o ge nyi rɑ̈b gen bɑkur, o ge nyi rug gen pɑ̈rri kwër, o ge nyi töng gen møgɑ. Kɑ ge wiyɑ o ge nyi mïdhi gen gëdhh-ɑ nyi rɑ̈b møg-ɑ nyi muuj gɑ mø kwër yi tyëng Isrɑil. Dɑ́ kipe ngø cyee, ɑ døngi pëthi wun ki jɑmmi kwër geki gëdhhì møg-ɑ nyi cwøl yi yɑn kì yï jiɑ? Á kipe ngø Elì, ɑ wøør wɑ̈ddí kibølɑ? Wude ɑ pidh wun ri wun ki rïngg-ɑ døøj kì ri jɑmmi kwër møg-ɑ nyi ngɑ̈lli yɑn yi jiɑ? Yɑn, Yɑ Jwøøg Isrɑil, Jwøng-ɑ Ácwɑ̈ɑ̈j, yɑ ɑ́kööb kɑ̈ge dööng kinni, gøl wun óbëëd ɑ́ jiɑ gïti ɑtheer. De ɑnɑn yɑ ɑ́kyëëd; møgɑni pɑ cuggi këti. Kɑ ɑ́rum bëëde kinøw, yɑ ówør ji møg-ɑ wør yɑn, o ji-ɑ pɑ wør yɑn bɑnyɑ’ bɑnyø. Lïng, bøli keny-ɑ ókɑ̈ɑ̈lɑ tegø wɑ̈g kì cingí geki cingi gøl wïyí ɑ́wɑ̈nhi, bong dhɑnhø men-ɑ óyöø kì gøl wun. Wu órɑngø, kɑ wu mɑg yi tyiel, kipe jɑmm-ɑ ómëggɑ tyëng-ɑ kyeelø kì Isrɑil. De bong dhɑnhø ɑ́kyel men-ɑ óyöø kì gølí. De dhɑnhø ɑ́kyel ówiy yi yɑn e onëënø kì yethi rïjj bënn, o gögge yɑn ɑ́ ókwërø. De nyingí ócør yi ywøg, kɑ pyëwí ónyönhø yi kïïmø, mɑ́ kwɑrrí møg-ɑ kyeelø óthøw bënn ki thøø me rɑj. Yï ónyudhɑ kinni, yɑ kømm-ɑ dyër keløg wɑ̈ddí ryeet Ópenì geki Pineɑs óthøw cyɑ̈ng ɑ́kyel. Yɑ ókɑ̈bbi ki ókwërø men nyi gwøg gïn-ɑ köbbɑ en ceth. Ónëngɑ ki kwɑrr møg göggi yɑn kì bøli rɑ̈dh men-ɑ órøny yi yɑn. Ngɑn-ɑ ódöng e onëënø kì kelli kwɑrrí, ókwɑ̈jji kì yï ókwërɑni ki ngyëny, kí gïncɑm. Ree ókwɑjje kipe kønyø, o yïdde ki gïncɑm me nøg.” Nyelthinh Sɑmwel ɑ́göög kì ød Jwøng-ɑ Ácwɑ̈ɑ̈j e ying-ɑ buti ókwërø Elì. Kwøbbi Jwøng-ɑ Ácwɑ̈ɑ̈j geki wödde ɑ́göög ki møg nungi kì bøli kenyɑni, kɑ bong-ɑ gïg mø nyi nyodh yi Jwøng-ɑ Ácwɑ̈ɑ̈j kì yethi lɑ̈g. Elì ɑ́bëëd nyinge ceg-ɑ dhïïdhø yi döng. Elì ɑ́buud-ɑ keny-ɑ nyi buude kì wɑ̈ye, o Mɑɑc Jwøng-ɑ Ácwɑ̈ɑ̈j nyi bëëd e olyelø, o Sɑmwel buud-ɑ ød Jwøng-ɑ Ácwɑ̈ɑ̈j kì buti Sɑnduug Cigg. Kɑ Sɑmwel cwøl yi Jwøng-ɑ Ácwɑ̈ɑ̈j, ɑyïëye kinni, “Yɑn èn.” Kɑ reng-ɑ yï Elì, ɑkööbe kinni, “Yɑn èn. Pɑth ki yïn ɑ ɑ́cwøl yɑn?” De Elì ɑ́löggi kinni, “Yɑ nuti cwöddø. Døøg buddí.” Adøøge kɑ óbuddø. Acigi Sɑmwel cwølø yi Jwøng-ɑ Ácwɑ̈ɑ̈j ki dɑ̈ɑ̈g cwöd. Adhwödhe, kɑ reng-ɑ yï Elì, ɑkööbe kinni, “Yɑn èn. Pɑth ki yïn ɑ ɑ́cwøl yɑn?” Kɑ yod yi Elì kinni bɑ Jwøng-ɑ Ácwɑ̈ɑ̈j ɑ cwølli nyelthinh. Aköbbe Sɑmwel kinni, “Døøg buddí. O keløg yï ócwøl yi en këti, kɑ yï kööb kinni, ‘Kööb yïn ɑ Jwøng-ɑ Ácwɑ̈ɑ̈j, bɑ̈ngí olïngø.’ ” Akedh Sɑmwel kɑ óbuddø kì keje. Abëën Jwøng-ɑ Ácwɑ̈ɑ̈j kɑ ócungø kì buti Sɑmwel, kɑ ócwöddø ni cwöddi tyeli mɑl kinni “Sɑmwel! Sɑmwel!” Alöggi Sɑmwel kinni, “Kööb yïn ɑ Jwøng-ɑ Ácwɑ̈ɑ̈j, bɑ̈ngí olïngø.” Kɑ Sɑmwel köbbi yi Jwøng-ɑ Ácwɑ̈ɑ̈j kinni, “Yɑ ógöögø ki gïïpiny men-ɑ ódhɑl lïngø yi Isrɑil, gïjø men-ɑ óbëëd wɑ̈thi tyëng-ɑ ólïngii ceg-ɑ tïgø. Kì cyɑ̈ngɑni, Elì geki gøle ógöggɑ gïg-ɑ ɑ́kwøb yi yɑn bënn, cɑg kì ri møg-ɑ mɑl gïti cyɑ̈ɑ̈n gen. Elì ɑ́rum ki köbbø yi yɑn kinni, gøle ócɑy yi yɑn gïti ɑtheer, kipe orøng-ɑ ngɑ̈nyi yi en, mɑ́ yɑ ɑ́bwöl yi wɑ̈dde, de wɑ̈dde nuti kyëddø yi en. Kì bɑng menɑni, yɑ ɑ́köngi kinni, orøøg gøl Elì pɑ cuggi gøømø ki gënh-ɑ ngɑl, wɑlɑ̀ ki byëlø men-ɑ mëggi yɑn.” Kɑ Sɑmwel gït-ɑ mwøl e obuddø kì piny. Codhe, ɑdhwödhe kɑ dhøggi ød Jwøng-ɑ Ácwɑ̈ɑ̈j yiebe. Ábëëd e óböggø ki köbbi Elì ki møg-ɑ ɑ́köbbii yi Jwøng-ɑ Ácwɑ̈ɑ̈j. Kɑ cwøl yi Elì kinni, “Sɑmwel wɑ̈dɑ.” Alöggi Sɑmwel kinni, “Yɑn èn.” Apyëjii yi Elì kinni, “Á ngø ɑ ɑ́köbbe yïn? Yɑ ko kɑ̈nní. Yï ócɑy yi Jwøk keløg yɑ ókɑ̈nni yi yïn møg-ɑ ɑ́köbbe yïn.” Codhe kɑ møgɑni köbbi Elì yi Sɑmwel, bong kwøb mɑ ɑ́kɑ̈nne gøn. Codhe ɑkööb Elì kinni, “Bɑ Jwøng-ɑ Ácwɑ̈ɑ̈j, wiy gwøge gïn-ɑ nenni yi en e døøj.” Kɑ Sɑmwel ódøngø e okorø yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j ying-ɑ köme, o bong kwøbbi pyed kì lebe. Kɑ yod yi pödhi Isrɑil bëne, cɑg kì tuung gïti tung-ɑ kyeelø, kinni Sɑmwel bɑ jɑltöng mi Jwøng-ɑ Ácwɑ̈ɑ̈j kidyër. Kɑ Jwøng-ɑ Ácwɑ̈ɑ̈j ocögø ree nyi nyodhe’ nyodhø kì Cilø. Kunɑni ɑ ɑ́cwöbe kì bøli Sɑmwel, kɑ okööbø ki gøn. Kwøbbi Sɑmwel ɑ́bëëd ge nyii lïngø yi Isrɑil bëne. Kɑ tyëng Isrɑil kedh-ɑ be nyɑɑg ki tyëng Pelistiyɑ̀. Isrɑil ɑ́pëggi keny-ɑ cwøl ɑ́ Eben Edher, kɑ Pelistiyɑ̀ pëgg-ɑ Ápek. Adhwönhi liny Pelistiyɑ̀ kömi Isrɑil, kɑ liny ónyïɑ̈ggø ki menteg. Kɑ Isrɑil tyɑm yi Pelistiyɑ̀, kɑ kelli gen nɑ̈gi ki ji ɑ́lïp ɑ́ngwen kì wïj kër. Keny-ɑ ɑ́døøg kwï yɑɑy Isrɑil møg-ɑ bodh kɑɑl gen, kɑ jøgdøngi Isrɑil ópëjjø kinni, “Ede Jwøng-ɑ Ácwɑ̈ɑ̈j ɑ wëgge wɑ tyɑmø yi tyëng Pelistiyɑ̀ dicyɑ̈ngtïn? Kedhi wɑ Cilø be dwɑɑyi Sɑnduug Ciggi Jwøng-ɑ Ácwɑ̈ɑ̈j Jwøk. O Jwøng-ɑ Ácwɑ̈ɑ̈j bëe kellee, o wɑ yiel yi en kì cinggi tyëngmɑ̈ɑ̈nø.” Codhe, ɑödi gen Cilø. Kɑ Sɑnduug Ciggi Wïlɑ̈bø, Jwøng-ɑ Ácwɑ̈ɑ̈j, ɑ kwömø kì kɑɑm kerobb, kɑ̈ɑ̈l yi gen geki wɑ̈ddi Elì, ɑ løg Ópenì geki Pineɑs. Keny-ɑ ɑ́wɑ̈nhi Sɑnduug Cigg, kɑ yɑɑy Isrɑil bëne óryeerø ki ryeeri dwøng kɑ piny ceg-ɑ onhɑ̈nh. Keny-ɑ ɑ́lïngi cwɑggi gen yi tyëng Pelistiyɑ̀, ɑpyënyi gen ri gen kinni, “Á ngø ɑ ɑ́cwöb kì kɑɑl tyëng Ibru ɑ pere kïïw gen?” Kɑ yod yi gen kinni bɑ Sɑnduug Cigg ɑ wɑ̈nhi kɑɑlɑni. Kɑ tyëng Pelistiyɑ̀ obwøgø ge okööbø kinni, “Jwøk ɑ́wɑ̈nhi kɑɑlɑni!” Kɑ ge okööbø kinni, “Riee dɑ cyën! Bong gïn ni men mɑ ɑ́cwöb cøn! Gïnrɑj me dwøng ɑ́bï kömee! Á men ɑ óyiel wɑ kì cingi Jwøng ni men. Eni Jwøng-ɑ ɑ́nɑ̈g tyëng Rïp kì yij pɑ̈l. Cwed wun pëthi wun, wun ɑ tyëng Pelistiyɑ̀. Ke pɑ cwed wun pëthi wun, wu bɑ møg løg gen bɑ̈ngg ni kɑ ɑ́bëëd gen gɑ bɑ̈nggee. Bëëd wun, wun ɑ́ cwøw, kɑ wu nyïɑ̈ggi wun.” Kɑ liny Pelistiyɑ̀ ónyïɑ̈ggø ki nyɑɑg me teg, kɑ yɑɑy Isrɑil cyeed yethi myërre. Kɑ ji ɑ́lïp pyɑ̈r ɑ́dɑ̈g nɑ̈g kì kelli liny Isrɑil kì cyɑ̈ngɑni. Kɑ Sɑnduug Ciggi Jwøk mɑg yi tyëng Pelistiyɑ̀. Kɑ wɑ̈ddi Elì ryeet, ɑ løg Ópenì geki Pineɑs nɑ̈g. Kɑ jɑl mɑ wɑ̈d gøl Ben Yɑmïn obëënø e rïng-ɑ́ɑ̀ kej liny kì cyɑ̈ngɑni ceth, kɑ wɑ̈nh-ɑ Cilø, ógudhe kɑggø, o wïje dɑ tør, men nyodh ywøg. Keny-ɑ ɑ́wɑ̈nhe, Elì ɑ́yuude e obëëdø kì wïj kwøm, e nenn-ɑ yöö, mɑ́ pyëwe olïngø kipe Sɑnduug Ciggi Jwøk. Keny-ɑ ɑ́wɑ̈nhi jɑlɑni Cilø, ɑkwøbe wööni tyɑmi Isrɑil. Kɑ pɑc óywöngø bëne. Alïngi ywøg yi Elì, kɑ ópëjjø kinni, “Ywøng ni men wɑng-ɑ ngø?” Ajwɑni jɑlɑni be köbbi Elì. Kì bøli kenyɑni, Elì runne ɑ́bëëd gɑ pyɑ̈r ɑ́bïngwen wïdɑ́bïdɑ̈g, o nyinge rum cøørø. Akööb jɑlɑni kinni, “Bene yɑn ɑ ɑ́kɑ̈ɑ̈l kej liny. Yɑ ɑ́pɑ̈r-ɑ yij liny dicyɑ̈ɑ̈ng.” Apëjji Elì kinni, “Liny ɑ́bëëd ɑ dï wɑ̈dɑ?” Alöggi jɑlwöönɑni kinni, “Isrɑil ɑ́cyeddi yi Pelistiyɑ̀, kɑ ji mø gïïr nɑ̈g. Wɑ̈ddí ryeet, Ópenì geki Pineɑs ɑ́nɑ̈g thyew. Kɑ Sɑnduug Ciggi Jwøk mɑg.” Keny-ɑ ɑ́kwøøb kwøbbi Sɑnduug Ciggi Jwøk, ɑpɑ̈ɑ̈dh Elì kì wïj kwøm e pɑ̈dh-ɑ ngɑ̈je, kɑ mune otorø kɑ othøø, mɑ́ e yöø, o bɑ jɑl me peg. Isrɑil ɑ́jɑɑg yi en kɑ runn pyɑ̈r ɑ́ngwen. Kwɑɑr Elì, cï wɑ̈de Pineɑs, ɑ́bëëd e bɑ ɑ́yɑjø, dwɑ̈tte rum thumø. Ngɑnɑni keny-ɑ ɑ́lïnge kwøbbi mɑgi Sɑnduug Ciggi Jwøk, kí thøwi kweye, geki thøwi jɑlgøle Pineɑs, ɑgööge ki men moom piny, kɑ pɑ̈dh-ɑ piny ki wɑ̈d. Aköbbii yi gɑ̈ɑ̈mi e buud-ɑ piny e cyɑ̈ngø ki thøø kinni, “Yï ko böggi, mɑ́ yï ɑ́nywøl-ɑ wɑ̈d.” De nuti löggø, o kwøbbɑni nuti gɑmø yi pyëwe. Acɑge wɑ̈nɑni ɑ́ Ikɑböd, e wɑng-ɑ kinni, mɑ̈r ɑ́lɑ̈ɑ̈ny kì Isrɑil. Møgɑni ɑ́kwøb yi en kinøw kì bɑng mɑgi Sɑnduug Ciggi Jwøk geki thøwi jɑlgøle geki wïyi jɑlgøle. Akööbe kinni, “Dhwɑ̈ng ɑ́lɑ̈ɑ̈ny kì Isrɑil.” Mɑ́ Sɑnduug Ciggi Jwøk ɑ́kɑ̈l. Sɑnduug Ciggi Jwøk, keny-ɑ ɑ́mɑgii yi tyëng Pelistiyɑ̀, gø ɑ́kɑ̈l gen kì Eben Edher, kɑ gø kïdhi gen Acdöd. Akwɑɑny Sɑnduug Cigg yi tyëng Pelistiyɑ̀, kɑ gø cïb gen yij kengi Dɑgön, kì buti Dɑgön jwøøg gen. Kɑ tyëng Acdöd omøølø kì mwøl, ɑyuud gen Dɑgön e pɑ̈ɑ̈dhø, yije rum en piny kì bøli Sɑnduug Ciggi Jwøng-ɑ Ácwɑ̈ɑ̈j. Atïng Dɑgön mɑl yi gen, kɑ cïb keje, keny-ɑ ɑ́bëëde. Amøl gen kì mwøl-ɑ kyeelø, kɑ Dɑgön yuud gen e pɑ̈ɑ̈dhø këti kì bøli Sɑnduug Ciggi Jwøng-ɑ Ácwɑ̈ɑ̈j, wïje geki cingge tørrø, ge ying-ɑ piny kì dhø ød. Den-ɑ́ dële kete ɑ döngø e buud-ɑ piny. Bene en ɑ pɑ nyi ywööny wïj tëëd kengi Dɑgön yi ókwër geki tyëng-ɑ kedhi yij kengi Dɑgön kì Acdöd gïti dicyɑ̈ngtïn. Kɑ tyëng Acdöd geki tyëng myërr-ɑ cyɑ̈gi ki gen cɑy yi Jwøng-ɑ Ácwɑ̈ɑ̈j ki menteg, gï ɑ́göjje köddi dëllì. Keny-ɑ ɑ́liidh gïg-ɑ ɑ́cwöb, yi tyëng Acdöd, ɑkööb gen kinni, “Sɑnduug Ciggi Jwøøg Isrɑil, pɑ cigi mïdhø yi wɑ kì keny. Jwøk wɑ ɑ́cɑye bënn, wɑki Dɑgön jwøgee.” Acwøøl rɑ̈nhi Pelistiyɑ̀ bënn kej ɑ́kyel yi tyëng Acdöd, kɑ gï pyëj gen kinni, “Gwøg wɑ ngø kipe Sɑnduug Jwøøg Isrɑil?” Alöggi rɑ̈nhi Pelistiyɑ̀ kinni, “Kïdhi Gɑth.” Codhe kɑ Sɑnduug Ciggi Jwøøg Isrɑil kïdhi Gɑth. De keny-ɑ ɑ́kïdhii Gɑth, ɑcɑɑy tyëng Gɑth yi Jwøng-ɑ Ácwɑ̈ɑ̈j, kɑ ryɑ̈g me dwøng pɑ̈dh-ɑ kömi gen, gï ɑ́göjje köddi dëllì, tyëngdøngø geki othønhø bënn dëlli gen ɑ́köddi. Aör Sɑnduug Cigg Ekrön, ɑ bɑ kɑɑl ɑ́kyel kì kelli kɑ̈ddi Pelistiyɑ̀, de keny-ɑ ɑ́wɑ̈dhe kɑɑlɑni, ɑryeer ji kinni, “Sɑnduug Ciggi Jwøøg Isrɑil ɑ́kɑ̈ɑ̈l keny kipe kinni o wɑ nɑ̈ge bënn!” Acwööl rɑ̈nhi Pelistiyɑ̀ kej ɑ́kyel këti yi gen, kɑ ge köbbi yi gen kinni, “Öru Sɑnduug Ciggi Jwøøg Isrɑil kun-ɑ ɑ́kɑ̈ɑ̈lii, o wɑ cög wɑ pɑ nɑ̈g yi en wɑ kí kɑ̈llee.” Ábëëd e dɑ ryɑ̈g me dwøng mɑ ɑ́bï kömi jii kɑɑlɑni, mɑ́ e ɑ́cɑy yi Jwøk ki menrɑj. Cɑgg ɑ́ tyëng-ɑ ɑ́bødh ki thøø, dëlli gen ɑ́köddi, kɑ ge ywøøg-ɑ yï jwöggi gen kipe kinni o ge køny. Kɑ dwɑ̈tt ɑ́bïryew tyëg yi Sɑnduug Ciggi Jwøng-ɑ Ácwɑ̈ɑ̈j e ying-ɑ Pelistiyɑ̀. Acwøøl ókwër geki tyënglɑ́ɑ̀w yi tyëng Pelistiyɑ̀, kɑ gï pyëj gen kinni, “Á ngø ɑ gwøg yi wɑ kipe Sɑnduug Ciggi Jwøng-ɑ Ácwɑ̈ɑ̈j? Kɑ̈l yi wɑ kɑ ngø? Ör yi wɑ keje kɑ ngø?” Alöggi gen kinni, “Keløg Sɑnduug Ciggi Jwøøg Isrɑil oörø yi wun, ör yi wun kɑ gëdhhi orøg, codhe o dëlli wun dönyi gen. Ocög wu pɑ dönyi, o yod yi wun cyee kinni bëëdø e pɑth kiper Sɑnduug Ciggi Jwøng-ɑ Ácwɑ̈ɑ̈j ɑ pere ócɑɑy wun.” Apëjji ji kinni, “Á gëdhhì mɑ ngø ɑ ör yi wɑ kí en?” Alöggi gen kinni, “Ngïjji dhɑb ɑ́bïj mø nyodh kɑ̈jj-ɑ köddi kì dëlli ji, kí ngïjji yëjj ɑ́bïj, mɑ́ ge gøøm-ɑ bøli rɑ̈nhì ɑ́bïj geki jii gen, mɑ́ ryɑ̈ng-ɑ ɑ́pɑ̈dhi kömi wun, wuki rɑ̈nhi wun bɑ ɑ́kyel. Göög wun ki ngïjji kɑ̈jj-ɑ köddi kì ri wun geki ngïjji yëjj møg-ɑ ɑ́rënyi piny wun, bene kër-ɑ ówør wun Jwøøg Isrɑil, o wu wiy yi en ki cɑyø wuki jwöggi wun kí piny wun. Wu ko bëëd wɑ̈thi wun teeg ni wïj rɑ̈ɑ̈dh Rïp geki tyëng pödhe, ɑ ɑ́wëggi tyëng Isrɑil kedhø kì bɑng kɑ ɑ́rum gen ki cɑyø ki mendwøng yi Jwøk. Gud wun ki yɑ̈y, kɑ twööj ri dhög ɑ́nyödd ɑ́ryew mø cer nywølø. Dhögɑni ko bëëd ri gen ókwöngø ki töjjø ki ɑcebbi pur, kɑ dhögɑni twööju ri yɑ̈yɑni, kɑ nyigi gen dwøøg wun pɑc. Kɑ Sɑnduug Ciggi Jwøng-ɑ Ácwɑ̈ɑ̈j kwɑny wun, kɑ cïbu yij yɑ̈yɑni, kɑ jɑmm-ɑ bɑ dhɑb møg-ɑ örii yi wun gɑ gëdhh-ɑ ɑ́muuj yi wun gɑ møg gøøm orøøg wun, cïb wun bute kì yij Sɑndug megø. Codhe kɑ yɑ̈yɑni ör wun o kedhe ki yuue. Codhe, kɑ nenni wun kɑ̀ kedhe, keløg ge ókedhi yuu Bet Cemec, bɑ Jwøøg Isrɑil ɑ ɑ́kɑ̈ɑ̈l ryɑ̈g menɑni. De ke pɑ kɑ̈l gen yuuɑni, ryɑ̈ngɑni töng ɑ wɑ̈ye.” Kɑ møgɑni gwøg yi tyëng Pelistiyɑ̀; ge ɑ́kɑ̈bbi ki dhög ɑ́nyödd ɑ́ryew, kɑ yɑ̈y twööj ri gen, kɑ nyigi gen cyëëg lwɑg kì pɑc. Acïb gen Sɑnduug Ciggi Jwøng-ɑ Ácwɑ̈ɑ̈j yij yɑ̈yɑni, geki Sɑndung-ɑ yije di yëjji dhɑb geki ngïjji dhɑb mø gïg-ɑ köddi kì dëlli. Dhögɑni ɑ́mɑg yöö, ge cïm-ɑ Bet Cemec. Ge ɑ́bødh-ɑ yöö ɑ́kyel ge óywöngø, ge nuti pɑ̈nyi këjji wïj kyëj wɑlɑ̀ wïj cɑɑm. Aløg rɑ̈nhi Pelistiyɑ̀ bɑng dhögɑni gïti kɑ ɑ́wɑ̈dhi gen buti Bet Cemec. Tyëng Bet Cemec ɑ́bëëd ge onyɑ̈rø ki gemè kì yij bɑ̈j kì bøli kenyɑni. Keny-ɑ ɑ́tïng gen wɑ̈thi gen, ɑ́lidh gen Sɑnduug Ciggi Jwøng-ɑ Ácwɑ̈ɑ̈j, kɑ pëthi gen ómïnø ki mendwøng. Kɑ yɑ̈yɑni, wɑ̈dh-ɑ yij pwödhi jɑl Bet Cemec me cwøl ɑ́ Jöcwø, ɑcunge kì kenyɑni kì buti tungi kït me dwøng, ɑkɑɑg pɑ̈mmi yɑ̈yɑni yi tyëng Bet Cemec gɑ yugg, kɑ dhögɑni ngɑ̈lli gen Jwøng-ɑ Ácwɑ̈ɑ̈j gɑ gënh-ɑ nyi rɑ̈b bëne. Sɑnduug Cigg ɑ́tïng piny yi Kwɑrri Leebì kyeel ki Sɑndung-ɑ yije di jɑmm-ɑ bɑ dhɑb, kɑ ge cïb kömi tungi kïn-ɑ dwøng menɑni. Codhe, kɑ Jwøng-ɑ Ácwɑ̈ɑ̈j ngɑ̈ddi ki gënh-ɑ nyi rɑ̈b bëne, kí gëdhh-ɑ kyeelø yi tyëng Bet Cemec. Møgɑni ɑ́lidh yi rɑ̈nhi Pelistiyɑ̀ ɑ́bïj, kɑ ge døøg-ɑ Ekrön kì cyɑ̈ngɑni ceth. Ngïjji gïg-ɑ köddi ɑ́ör gɑ ɑ́bïj yi tyëng Pelistiyɑ̀ gɑ gëdhhi Jwøng-ɑ Ácwɑ̈ɑ̈j møg gøøm gen orøøg gen, kɑɑl ɑ́kyel kì kelli kɑ̈dd-ɑ døngø geki myërr-ɑ thønhø møg-ɑ buti gen; kɑ̈ddɑni bɑ Acdöd, kí Gɑdhɑ̀, kí Ackelön, kí Gɑth, kí Ekrön. Ge ɑ́öd thyew ki yëjji dhɑb, ɑ́kyel cungi ɑ́ wïj kɑɑl kí myërr-ɑ bute, gen ɑ kɑ̈ddi dör møg-ɑ jɑɑg yi rɑ̈nhhɑni. Tungi kïn-ɑ dwøng kì pwödhi Jöcwø jɑl Bet Cemec, kïn-ɑ́ köme ɑ́cïb Sɑnduug Ciggi Jwøng-ɑ Ácwɑ̈ɑ̈j nud dicyɑ̈ngtïn ɑ́ ngïji. Kɑ tyëng Bet Cemec cɑy yi Jwøng-ɑ Ácwɑ̈ɑ̈j kipe kɑ ɑ́lïïdh gen yij Sɑnduug Ciggi Jwøng-ɑ Ácwɑ̈ɑ̈j. Anɑ̈ggi Jwøng-ɑ Ácwɑ̈ɑ̈j ki ji pyɑ̈r ɑ́bïryew kì kelli gen. Kɑ tyëng Bet Cemec óywöngø kipe kɑ ɑ́nɑ̈ɑ̈g gen yi Jwøng-ɑ Ácwɑ̈ɑ̈j. Akööb jø Bet Cemec kinni, “Á men ɑ cuggi cung kì bøli Jwøng-ɑ Ácwɑ̈ɑ̈j, Jwøng-ɑ bɑ kwërø ni men? Á kun ɑ ör wɑ en o kedhe kì butee?” Codhe, ɑödi gen Kiriɑt Yeɑrïm ki ji mø kööbø kinni, “Sɑnduug Ciggi Jwøng-ɑ Ácwɑ̈ɑ̈j ɑ́dwöög yi tyëng Pelistiyɑ̀, bïu dwɑ̈ɑ̈yu en.” Codhe, kɑ Sɑnduug Ciggi Jwøng-ɑ Ácwɑ̈ɑ̈j dwɑɑy yi tyëng Kiriɑt Yeɑrïm, kɑ kïdhi gen gøl jɑl me cwøl ɑ́ Abinɑdɑb me pɑɑre ying wïj kït. Kɑ Eliɑdhɑr wɑ̈d Abinɑdɑb kwër, o mïdhe Sɑnduug Ciggi Jwøng-ɑ Ácwɑ̈ɑ̈j. Sɑnduug Ciggi Jwøng-ɑ Ácwɑ̈ɑ̈j ɑ́bëëd kì Kiriɑt Yeɑrïm ki keny me bɑ̈ɑ̈r, ɑ́tyëg-ɑ runn pyɑ̈r ɑ́ryew kì kunɑni, kɑ tyëng Isrɑil bënn ywøøg-ɑ kö Jwøng-ɑ Ácwɑ̈ɑ̈j. Kɑ tyëng Isrɑil köbbi yi Sɑmwel kinni, “Keløg wu dwɑdd-ɑ dwöög yï Jwøng-ɑ Ácwɑ̈ɑ̈j ki pëthi wun bënn, wiy wun jwögg-ɑ pɑth bënn, geki ngïjji Actɑröth, kɑ pëthi wun lugi wun Jwøng-ɑ Ácwɑ̈ɑ̈j kete, o wu yiel yi en, kì cinggi tyëng Pelistiyɑ̀.” Kɑ ngïjji Bɑɑl kí ngïjji Actɑröth weddi yi tyëng Isrɑil, kɑ ge døøg-ɑ be mɑlli Jwøng-ɑ Ácwɑ̈ɑ̈j kete. Kɑ Sɑmwel okööbø kinni, “Cøng wun tyëng Isrɑil Midhpɑ̀. Jwøng-ɑ Ácwɑ̈ɑ̈j ókwɑjji yi yɑn kiper wun kì kunɑni.” Kɑ tyëng Isrɑil ócugø bënn kì Midhpɑ̀, kɑ ge ótömmø ki pï, kɑ pïgɑni køny gen piny kì bøli Jwøng-ɑ Ácwɑ̈ɑ̈j. Arïïj gen ki kɑ̈j dicyɑ̈ngɑni, ge okööbø kinni, “Wø ɑ́bɑ̈jji kì bøli Jwøng-ɑ Ácwɑ̈ɑ̈j.” Kɑ Sɑmwel obëëdø ɑ́ jɑng-ɑ bøle nyi gööny yi tyëng Isrɑil kì Midhpɑ̀. Keny-ɑ ɑ́lïng tyëng Pelistiyɑ̀ kinni, tyëng Isrɑil ri gen cøng gen Midhpɑ̀, kɑ rɑ̈nhi gen bënn, tëdd-ɑ kömi Isrɑil ki liny. Kɑ tyëng Isrɑil obwøgø keny-ɑ ɑ́lïng gen i dɑ liny Pelistiyɑ̀ me bï. Kɑ Sɑmwel köbbi yi tyëng Isrɑil kinni, “Wø ko wøøy, kɑ yï ko wïyi ki ywøøg kö Jwøgee, Jwøng-ɑ Ácwɑ̈ɑ̈j, o wɑ yiel yi en kì cinggi tyëng Pelistiyɑ̀.” Akɑ̈bbi Sɑmwel ki nyɑ órömø me dhødh, kɑ gø ngɑ̈lle Jwøng-ɑ Ácwɑ̈ɑ̈j, ɑ́ gënh-ɑ nyi rɑ̈b bëne. Akwɑ̈jji Sɑmwel e ywøøg-ɑ kö Jwøng-ɑ Ácwɑ̈ɑ̈j kipe Isrɑil. Kɑ kwɑ̈jje yïëy yi Jwøng-ɑ Ácwɑ̈ɑ̈j. Kɑ̈ng-ɑ́ nudd Sɑmwel e rɑ̈b-ɑ nyɑ órömø, kɑ tyëng Pelistiyɑ̀ pönh-ɑ kömi tyëng Isrɑil, de keny-ɑ ɑ́cyɑ̈ngi gen, kɑ ge göjji pwödø yi mɑl yi Jwøng-ɑ Ácwɑ̈ɑ̈j, ge ɑ́pwöd yi mɑl ki menteg. Kɑ wɑ̈thi gen omuumø, ɑbwøg gen kɑ ge órengø. Arïngi Isrɑil wɑ̈g kì Midhpɑ̀. Acyeddi gen tyëng Pelistiyɑ̀, gï pwööd ge’ piny gïti kɑ ɑ́wɑ̈dhi gen Betkɑr. Kɑ Sɑmwel ókɑ̈bbø ki tungi kït, ɑcïbe gøn kɑɑm Midhpɑ̀ kí Cen, kɑ okööbø kinni, “Wɑ ɑ́køny yi Jwøng-ɑ Ácwɑ̈ɑ̈j gïti kɑ wɑ̈nhi wɑ keny.” Acɑge kenyɑni ɑ́ Eben Edher. Tyëng Pelistiyɑ̀ ɑ́tyɑm kɑ ge ocögø ge pɑ dwöög piny Isrɑil këti; tyëng Pelistiyɑ̀ ɑ́mɑ̈ɑ̈n bëën piny Isrɑil yi Jwøng-ɑ Ácwɑ̈ɑ̈j, kì kɑɑm-ɑ ɑ́bëëd Sɑmwel e onëënø bëne. Myërri Isrɑil møg-ɑ ɑ́kwɑny yi tyëng Pelistiyɑ̀ kì kɑɑm Ekrön kí Gɑth kɑ̈ge dööng, ɑ́dwöög gen, kɑ piny Isrɑil døøg-ɑ yïe bëne. Kɑ dɑ mër thyew kì kɑɑm Isrɑil geki tyëng Amör. Isrɑil ɑ́jɑɑg yi Sɑmwel ki runn-ɑ ɑ́nëëne bënn. Nyi kedh-ɑ Betiil, kí Gilgɑl, kí Midhpɑ̀ yethi runn bënn, e nenn-ɑ gønyyi ji kì kɑ̈jjɑni. Codhe, o nyi døøge Rɑmɑ̀ pɑɑ gen, keny-ɑ ɑ́bëëde ɑ́ jɑngi burø. Jwøng-ɑ Ácwɑ̈ɑ̈j ɑ́gëdde ki ød kì Rɑmɑ̀. Keny-ɑ ɑ́göög Sɑmwel ɑ́ yu, ɑgwøge wɑ̈dde ryeet gɑ jɑgg-ɑ bøli gen nyi gööny yi Isrɑil. Wɑ̈de nyel-ɑ kɑyø cwøl ɑ́ Yöiil, o nyel-ɑ ngɑ̈je cwøl ɑ́ Abiyɑ̀. Yöiil geki Abiyɑ̀ ɑ́jyɑ̈ɑ̈g ɑ Bircebɑ̀. De wɑ̈ddi Sɑmwel nuti bëëdø ni wïyi gen. Ge nyii kɑ̈bbø ki ngyëny kì yï ji møg-ɑ kwɑjji gen kì cyɑ̈n, kipe kinni o gøny cöge e pɑ cïb keje. Kɑ jøgdøngi Isrɑil ri gen cøng gen, kɑ ge bï-ɑ yï Sɑmwel kì Rɑmɑ̀. Aköbbii yi gen kinni, “Yï ɑ́døngi, o wɑ̈ddí pɑ bëëdø ki bëën-ɑ ɑ́bëëd yi yïn. Anɑn nëngí wøn ki rɑ̈dh men jɑɑg wøn ni tyëng pödhh-ɑ kyeelø.” Keny-ɑ ɑ́kööb jøgdøngi Isrɑil kinøw, kɑ Sɑmwel pyëwe órënyø yi møgɑni, ɑkwɑjji Jwøng-ɑ Ácwɑ̈ɑ̈j yi Sɑmwel. Kɑ Sɑmwel köbbi yi Jwøng-ɑ Ácwɑ̈ɑ̈j kinni, “Lïngí gïn-ɑ köbbi yïn yi gen, mɑ́ e pɑth ki yïn ɑ ɑ́bɑny yi gen, de bɑ yɑn ɑ ɑ́bɑny yi gen kinni ge ko jɑɑg yi yɑn, yɑn ɑ́ rɑ̈ɑ̈dh gen. Gïg-ɑ göggi yïn yi gen ɑnɑn, pɑ̈r ki gïg-ɑ ɑ́göggi yɑn yi gen keny-ɑ ɑ́kɑ̈ɑ̈lɑ gen wɑ̈g kì Rïp, ɑ ɑ́wiy gen yɑn, kɑ ge kedh-ɑ be mɑlli jwögg møøgø. Gwøg gïn-ɑ dwɑddi yi gen, de nyudhí gen cyee ki gïg-ɑ ógöggi gen yi rɑ̈nh-ɑ ójɑɑg gen.” Codhe, ɑköbbi tyëng-ɑ cwöddi ki rɑ̈dh yi Sɑmwel møg-ɑ ɑ́kwøb bënn yi Jwøng-ɑ Ácwɑ̈ɑ̈j. Ge ɑ́köbbi yi Sɑmwel kinni, “Keløg yï wun ódi rɑ̈dh men jɑɑg wun, wu ógöggi yi en ki gïg ni møg: wɑ̈ddi wun gï ógwøge gɑ jølinye, møøgø órïng-ɑ yɑ̈ɑ̈th, møøgø ócyɑ̈dh-ɑ kyënyì, o ge órïngi gen kì mɑl bøli yɑ̈the. Kwï wɑ̈ddi wun ógwøg yi rɑ̈nhɑni gɑ pëjji liny mø pyejji ji ɑ́lïp, wɑlɑ̀ ji pyɑ̈r ɑ́bïj. Kwï wɑ̈ddi wun ógwøge gɑ møg pur pwödhe, o ge nyi kɑj gen byelle. Møøgø ókwɑny en o ge bëëd gen gɑ bödhhì møg thɑ̈dhhii ki tønggi liny. Nyigi wun womɑ̈nn ókwɑny yi en, o ge nyi bïjji gen en ki møw, o ge nyi buddi gen en ki ópùn, o ge tɑ̈ddi gen en ki gïgcɑmm. Pwödhhi wun møg-ɑ døj, kí bɑ̈ggi wun, gï ókwɑnye kɑ gï mëgge bɑ̈ngge. Ókɑ̈bbi ki dhöngø ɑ́kyel kì ri dhöng pyɑ̈rø kì ri jɑmmì møg-ɑ cyeg kì yethi pwödhhi wun kí bɑ̈ggi wun, o gï mëgge pëjji linye. Bɑ̈nggi wun, bɑ̈ngg-ɑ cwøw kí womɑ̈nn ókwɑny en, kí dhögi wun møg-ɑ myër, kí ɑderri wun, o ge gwøg gen gwøng-ɑ mee. Ókɑ̈bbi ki ɑ́kyeel pyɑ̈rri jɑmmí møg-ɑ nud kì lwɑg, kɑ wun kì ri wun, wu ógwøøge bɑ̈ngge. Keny-ɑ óbëën bøli kenyɑni, wu óywöngi, wu ogönyø kipe gïg-ɑ göggi wun yi rɑ̈ɑ̈dh wun, men-ɑ ɑ́røny yi wun, de ywøøg wun koo lïngi yi Jwøng-ɑ Ácwɑ̈ɑ̈j.” De bong dhɑnhø mɑ ɑ́lïngi kwøbbi Sɑmwel kì kelli tyëngɑni. De ge nyi kwøb-ɑ kinni, “Pɑth, wø dwɑdd-ɑ rɑ̈dh. Kipe kinni o wø pɑ̈ɑ̈r wøn ki jii pödhh-ɑ kyeelø. Gønyyi wøn ónenni yi rɑ̈ɑ̈dh wøn, o wø nyi peeje be nyɑɑg ki liny.” Kɑ møg-ɑ ɑ́kwøb yi teedø bënn lïngi yi Sɑmwel, ɑdøøge møgɑni ki köbbi Jwøng-ɑ Ácwɑ̈ɑ̈j. Alöggi Jwøng-ɑ Ácwɑ̈ɑ̈j kinni, “Gwøg gïn-ɑ dwɑddi yi gen ceth, nëngí gen ki rɑ̈dh.” Codhe, ɑköbbi tyëng Isrɑil yi Sɑmwel kinni, “Døøg wun yethi myërri wun.” Ádɑ jɑl megø me cwøl ɑ́ Kïc, wɑ̈d Abiel, wɑ̈d Dherör, wɑ̈d Bekurɑth, wɑ̈d Apiyɑ̀ kì gøl Ben Yɑmïn. Kïc ɑ́bëëd ɑ́ jɑl me pere teg. Yïe ɑ́dɑ wɑ̈de me cwøl ɑ́ Cɑul, nyel me døøj, bøle myëër. Cɑul bong ngɑn lodii ki bɑ̈r geki myëërø kì Isrɑil. Kɑ ɑderr mø bɑ mø Kïc wïyi Cɑul ówɑ̈ɑ̈nyø. Aköbbi Cɑul yi Kïc wïye kinni, “Kɑ̈bbí ki ɑ́kyel kì kelli yɑɑg gwøg, kɑ wu kedhu be yɑbi ɑderr.” Codhe, ɑkedhe e kɑ̈ll-ɑ myërri kïtti Eprɑim. Kɑ kɑ̈l-ɑ thwøri Cɑlicɑ̀, de ɑderr nuti yood gen. Akedh gen kɑ ge pödh-ɑ Cɑɑlïm, gï nuti yood gen kì kunɑni. Codhe, ɑbëën gen, ge oyɑ̈bø kì myërri gøl Ben Yɑmïn bënn, de gï nuti yood gen thyew. Keny-ɑ ɑ́wɑ̈dhi gen myërri Dhup, kɑ Cɑul bɑ̈nge köbbe kinni, “Bïí døøg wɑ pɑc, kipe wïyɑ ówïyi ki tɑgi kwøbbi ɑderr, kɑ pyëwe ócɑ̈gø ki olïng kiperee.” Alöggi bɑ̈nge kinni, “Dɑ jɑltöng kì kɑɑl-ɑcɑ̀, me ceg ki wørø ki mendwøng, gïn-ɑ kwøb yi en nyi bï ɑ́ dyër. Kedhi wɑ yïe, wɑ óköbbe yuu-ɑ cɑɑdh yi wɑ mɑwɑnø.” Aköbbii yi Cɑul kinni, “Keløg wɑ ókedhø, ɑ́ ngø ɑ ómëggii yi wɑ? Gïgcɑmm møg-ɑ ɑ́ying yethi kidhhee ɑ́thumi. Bong gïn-ɑ ómëggi jɑltöng yi wɑ. Dɑ gïjø me nud kì yïee?” Acigi kwøbbi Cɑul løøgø yi bɑ̈nge kinni, “Yïɑ dɑ nyɑ ngyënyø ɑ́tegø me thiinh, ómëggi wɑ jɑltöng, kipe kinni o wɑ köbbe ki yuu-ɑ cɑɑdh yi wɑ.” Kɑ̈ge dööng kì Isrɑil, ke di ngɑn dwɑddi pyëjji Jwøk nyii kwøbø kinni, “Bïí kedhi wɑ yï jɑl-ɑ nyi nëënø.” Mɑ́ jɑltöng nyi cwøl ɑ́ jɑl nyi nëënø kɑ̈ge dööng. Kɑ Cɑul bɑ̈nge köbbe kinni, “Kwøbbí døøj, kedh wɑ.” Codhe, ɑkedhi gen kɑɑl-ɑ yije bëëd yi jɑlkwøbbi Jwøk. Keny-ɑ ɑ́kedh gen, ge yedh-ɑ kwøømø men-ɑ köme ógeer kɑɑlɑni, ɑrøøm gen ki womɑ̈nn mø bï be tömø ki pï. Apyëj ge gïn kinni, “Jɑl-ɑ nyi nëënø nud kì kɑɑl?” (Kì bøli kenyɑni, jɑltöng ɑ́bëëd e nyi cwøl ɑ́ ngɑn nyi nëënø, o ngɑn dwɑddi pyëji Jwøk, nyi kwøb-ɑ kinni, “Kedhi wɑ yï ngɑn-ɑ nyi nëënø.”) Alöggi gen kinni, “Ngee nud kì bøli wun, jwɑni wun ceth, ɑ́ceg-ɑ bëën kɑɑl dicyɑ̈ngtïn, mɑ́ e dɑ gëëdhi mɑ ɑ́ngɑl yi tyëng kɑɑl kì wïj kwøømø, kej mɑ̈ddø. Kedh wun, wu ójwɑnø, o pïïd yi wun e nuti kedhi wïj kwøømø be cɑm, mɑ́ ji pɑ cyɑ̈mø gïti keny-ɑ ówɑ̈dhe kunɑni, o rïngi gëëdhi thyey yi en, codhe o ji cyɑ̈ɑ̈m gen cyee.” Akedhi Cɑul kɑɑlɑni geki bɑ̈nge. Keny-ɑ ɑ́wɑ̈dhi gen tøg kɑɑl, kɑ Sɑmwel bï-ɑ yï gen e kedh-ɑ wïj kwøømø kej mɑ̈ddø. Sɑmwel ɑ́bëëd e rumø ki köbbø yi Jwøng-ɑ Ácwɑ̈ɑ̈j, e döngø ɑ́ wɑ̈r ɑ́kyel ki kwøbbi bëëni Cɑul kinni, “Piny nɑ men dhuki, jɑl megø kì myërri Ben Yɑmïn óörɑ yïn. Kwɑɑny ɑ́ ngɑn-ɑ ójɑɑg jiɑ, tyëng Isrɑil. Jiɑ óyiel yi en kì cinggi tyëng Pelistiyɑ̀, orɑɑng jiɑ ɑ́lidhɑ, o ywøøg gen ɑ́lïngɑ.” Keny-ɑ ɑ́liidh Cɑul yi Sɑmwel, ɑ́köbbii yi Jwøng-ɑ Ácwɑ̈ɑ̈j kinni, “Bene en jɑl-ɑ ɑ́köbbɑ yïn kinni, jiɑ ójɑɑg yi en.” Codhe, ɑkedhi Cɑul yï Sɑmwel, kɑ ge røøm-ɑ dhø pöör, ɑpyëje gøn kinni, “Köbbí wøn, ɑ́gøne gøl jɑl-ɑ nyi nëënø?” Alöggi Sɑmwel kinni, “Bene yɑn jɑl-ɑ nyi nëënø, kedhí bølɑ kej mɑ̈ddø, mɑ́ yï ócyɑ̈mø kɑ yɑn dicyɑ̈ngtïn. O dhuki kì mwøl, yï óköbbɑ gïg-ɑ pyëwí, o yï örɑ yöö. De ying-ɑ́ per ɑderr-ɑ ɑ́wɑ̈ɑ̈ny cyɑ̈ng ɑ́dɑ̈g møg-ɑ ɑ́pöödh, pyëwí ko lïngi kiper gen, ge ɑ́rum ki yodø. Dɑ́ men ɑ dwɑddi yi tyëng Isrɑil ki mendwøng? Bɑ yïn, wuki gøl wïyí.” Alöggi Cɑul kinni, “De yɑ bɑ wɑ̈d gøl Ben Yɑmïn; gøl-ɑ nøg kì kelli kɑ̈lli Isrɑil, o gøl wïyɑ bene gøl-ɑ pëddi nøgø kì yij gøl Ben Yɑmïn. Yïde ɑ köbbí yɑn kwøbb-ɑ ni møg?” Codhe, ɑkïdhi Cɑul geki bɑ̈nge yij ød me dwøng yi Sɑmwel, kɑ gï cïbe kelli ji mø kwɑnni gen bɑ pyɑ̈r ɑ́dɑ̈g kì wïj tɑw. Aköbbi jɑlthɑl yi Sɑmwel kinni, “Kɑ̈ɑ̈l rïng-ɑ ɑ́mëggɑ yïn, men-ɑ ɑ́kwøb yi yɑn kinni cïb wɑ̈ye.” Codhe, ɑkɑ̈ɑ̈l rɑ̈m bëne yi jɑlthɑl, kɑ gø cïbe bøli Cɑul. Akööb Sɑmwel kinni, “Rïng-ɑ ɑ́wïyi yïn èn, cɑɑm. Ámïdhi yi yɑn ɑ́ men-ɑ ócɑm yi yïn kì bøli wëll-ɑ ɑ́ryejɑ.” Codhe, ɑcyɑ̈ɑ̈m Cɑul geki Sɑmwel dicyɑ̈ngɑni. Keny-ɑ ɑ́døøg gen kɑɑl, ɑgwøøg keny-ɑ buddi yi Cɑul kì mɑl wïj óthɑɑng ød. Kɑ óbuddø kì kunɑni. Kì bɑ̈ɑ̈rø, ɑcwøøl Cɑul yi Sɑmwel kinni, “Dhwödhí mɑl, o yï örɑ yuuí.” Adhwödhi Cɑul mɑl kɑ lwøøg yöö yi Sɑmwel. Keny-ɑ ɑ́wɑ̈dhi gen ngɑ̈ɑ̈j kɑɑl, ɑköbbi Cɑul yi Sɑmwel kinni, “Köbbí bɑ̈ngí kinni kedhe mɑl bølee. Kɑ yï dööng kì keny, o yï köbbɑ wöödø mɑ ɑ́öri yïn yi Jwøk.” Kɑ tuung møw kwɑny yi Sɑmwel, kɑ møw-ɑ yije kønye wïj Cɑul. Kɑ Cɑul nuume, ɑkööbe kinni, “Jwøng-ɑ Ácwɑ̈ɑ̈j yï ɑ́kwɑnye, yïn ɑ́ jɑngi jie, o ge kor yi yïn, men bene nyudhi. Keny-ɑ ókedh dicyɑ̈ngtïn, yï órøøm ki jøg ɑ́ryew, buti röri Rɑceel kì Dheldhɑ̀, kì myërri Ben Yɑmïn, yï óköbbi yi gen kinni, i ɑderr-ɑ ɑ́yɑb yi yïn, ge rumø ki yodø, o wïyí wïyø ki rumø kì ri gen, de pyëwe lïngø kɑ perí, e kømm-ɑ kinni, ‘Yɑ gwøg-ɑ ngø cyee kipe wɑ̈dɑ?’ Yï ókedh kì kenyɑni gïti keny-ɑ ówɑ̈dhí thɑ óthuri Tɑbör, kì kenyɑni wu órøøm ki jøg ɑ́dɑ̈g møg kedhi Betiil ge wel-ɑ ød Jwøk. Ákyel ókwöddø ki dyëg ɑ́dɑ̈g, ryeew gen ókɑ̈ddø ki ópùn ɑ́dɑ̈g, o dɑ̈ɑ̈g gen ókɑ̈ddø ki ɑtheeb møgi oløg. Yï ómɑ̈dh yi gen, kɑ yï nëngi yi gen ki ópùn ɑ́ryew. Kwɑny ópùnɑni kì cinggi gen. Codhe kɑ yï kedhí wïj Kïti Jwøk kì Gibeɑ̀ keny-ɑ ɑ́di kɑɑl tyëng Pelistiyɑ̀. Keny-ɑ ótöngí pɑc, wu órøøm ki jøtöng mø bï piny ge kɑ̈ɑ̈l-ɑ kej mɑ̈ddø, ge otugø, ge othumø ki thøm, ge opödø ki bullì, ge ocöngø, ge otöngø ki kwøbbi Jwøk. Kì bɑng keny me thiinh, wëyi Jwøng-ɑ Ácwɑ̈ɑ̈j óbï kömí kɑ yï kedh-ɑ kelli jøgɑni, kɑ yï otöngø ki kwøbbi Jwøk kyeel ki gen, kɑ yï ogöögø ki ngɑn megø. Keløg ngïjjɑni ócwöb kɑ ge lidh yi yïn, gwøg gïn-ɑ gwøg yi yïn, mɑ́ yï ókøny yi Jwøk. Kɑ yï møøl bølɑ, kedhí Gilgɑl, yɑ óbï yïí kunɑni, o Jwøng-ɑ Ácwɑ̈ɑ̈j ngɑ̈ddi yi yɑn ki gënh-ɑ nyi rɑ̈b bëne geki gënhi mër. Yïd yɑn ki cyɑ̈ng ɑ́bïryew. Codhe o yɑ bïɑ, o yï köbbɑ gïn-ɑ gwøg yi yïn.” Keny-ɑ ɑ́løg Cɑul ree e wiy-ɑ Sɑmwel, ɑnëngii ki pyëw megø yi Jwøk. Kɑ ngïjjɑni bënn pɑ̈dh-ɑ kɑ̈jji gen, kì cyɑ̈ngɑni ceth. Keny-ɑ ɑ́wɑ̈nhi Cɑul Gibeɑ̀, ɑrøøm gen ki jøtöng. Kɑ wëyi Jwøk bï-ɑ kömi Cɑul, kɑ órëbø ki gïn, ɑcɑ̈ge töng ki kwøbbi Jwøk kyeel geki jøtöng møgɑni. Keny-ɑ ɑ́liidh Cɑul yi ji-ɑ ngɑ̈nyii, ɑpyënyi gen ri gen kinni, “Á gïn ɑ ɑ́cwöb kì ri wɑ̈d Kïc? Men-ɑ́ Cɑul ɑ́ceg-ɑ gwøg ɑ́ jɑltöng thyew?” Alöggi jɑl megø kì kenyɑni kinni, “O jøtöng møg-ɑ kyeelø, wëëg gen bɑ møg?” Codhe, ɑcög møgɑni gɑ gɑ́j møg nyi kømmi yi teedø kinni, “Cɑul ɑ́ceg-ɑ gwøg ɑ́ jɑltöng thyew?” Keny-ɑ ɑ́rum Cɑul ki töng ki kwøbbi Jwøk, ɑkedhe kej mɑ̈ddø. Keny-ɑ ɑ́liidh Cɑul geki bɑ̈nge yi nɑ̈ye, ɑpyëje gïn kinni, “Wu ɑ́ying-ɑ keny?” Alöggi Cɑul kinni, “Wø ɑ́ying-ɑ be yɑb ki ɑderr. Keny-ɑ ɑ́dhɑ̈li gen ki yodø yi wøn, ɑkedhi wøn yï Sɑmwel.” Akööb nɑ̈yi Cɑul kinni, “Köbbu yɑn, ɑ́ ngø ɑ ɑ́kwøb yi Sɑmwel?” Akööb Cɑul kinni, “Ákööb kinni i ɑderr rumø ki yodø.” De nɑ̈ye nuti köbbø yi en ki kwøbb-ɑ ɑ́köbbii yi Sɑmwel kinni ógöögø ki rɑ̈dh. Kɑ tyëng Isrɑil bënn cwøøl Midhpɑ̀, bøli Jwøng-ɑ Ácwɑ̈ɑ̈j yi Sɑmwel. Aköbbe gïn kinni, “Møg bɑ kwøbb-ɑ ɑ́kwøb yi Jwøøg Isrɑil, Jwøng-ɑ Ácwɑ̈ɑ̈j, ɑ́kööb kinni, ‘Yɑn ɑ ɑ́kɑ̈ɑ̈l wun wɑ̈g kì Rïp. Kɑ wu yielɑ kì cingi Rïp, geki pödhh-ɑ kyeelø møg-ɑ ɑ́buudh köthi wun. De Jwøng-ɑ ɑ́yiel wun kì yethi rɑj bënn ɑ́bɑny yi wun dicyɑ̈ngtïn, mɑ́ wu okööbø ɑnɑn kinni, ‘Pɑth, wø dwɑdd-ɑ rɑ̈dh me jɑɑg wøn.’ Cungi wun ɑnɑn kì bøli Jwøng-ɑ Ácwɑ̈ɑ̈j, wun ɑ́ wɑ̈thi kɑ̈llì; kí jɑggi wun kì bøli wun.” Keny-ɑ ɑ́cøng wɑ̈thi kɑ̈lli Isrɑil bënn yi Sɑmwel, ɑkwɑnye wëëli pödhø. Kɑ wëëlø ópɑ̈dhø ki gøl Ben Yɑmïn. Apɑ̈ngi gøl Ben Yɑmïn ree ɑ́ dhøggi kɑ̈llì, kɑ wëëlø ópɑ̈dhø ki gøl Mɑtrì. Akwɑɑny wéli jø gøl Mɑtrì, kɑ kwɑɑny ɑ́ wëëli Cɑul wɑ̈d Kïc. Ayɑbii kì kelli ji, kɑ ocögø e pɑ yod. Apyëj gen Jwøng-ɑ Ácwɑ̈ɑ̈j këti kinni, “Cɑul ɑ́di bëën keny?” Alöggi Jwøng-ɑ Ácwɑ̈ɑ̈j kinni, “Ngee ópɑ̈nnø kì gøddi thyɑng kì kun-ɑcɑ̀.” Codhe, ɑrengi teedø be dwɑɑyii. Keny-ɑ ɑ́cungi Cɑul kì kelli ji, kɑ wïje kɑ̈ɑ̈l-ɑ mɑl. Aköbbi ji yi Sɑmwel kinni, “Lidhu jɑl-ɑ ɑ́yieny yi Jwøng-ɑ Ácwɑ̈ɑ̈j ɑnɑn. Bong ngɑn pɑ̈r ki en kì kellee bënn.” Kɑ ji óryeerø bënn kinni, “Rɑ̈dh ómïdhi yi Jwøk!” Alwöbbi ji ciggi rɑ̈ɑ̈dhø kí yëth-ɑ óbëëd rɑ̈dh yïe dɑ tegø yi Sɑmwel. Kɑ gï gweede yij wɑ̈nyø, kɑ wɑ̈nyɑni cïbe bøli Jwøng-ɑ Ácwɑ̈ɑ̈j. Codhe, ɑköbbe ji kinni døøg gen yethi myërri gen. Kɑ Cɑul døøg-ɑ Gibeɑ̀, pɑɑ gen thyew. Dɑ jøg pɑ nyi böggi møg pëthi gen ɑ́lug yi Jwøk, kɑ ge kedh-ɑ bɑng Cɑul. De Cɑul ɑ́bɑny yi jøgi orøg møøgø; kɑ ge okööbø kinni, “Jɑl-ɑ ni men wɑ ócuggø yielø yi en?” Kɑ ge ocögø ge nuti kedhi be gɑ̈jii. De Cɑul ɑ́cög e okudø kì wɑ̈ye. Kɑ ɑ́thumi dwɑ̈y, kɑ Nɑkɑc rɑ̈ɑ̈dh Amön, liny pëëje kɑɑl Yɑbic kì Gilyɑd, kɑ gø tyege ki yɑye. Aköbbi Nɑkɑc yi tyëng Yɑbic bënn kinni, “Nywɑ̈ɑ̈g wɑ ki kwøb, o wø ójɑɑg yi yïn.” Alöggi Nɑkɑc kinni, “Yɑ ónywɑ̈gø ki kwøb ki wun keløg wu oyïëyø ki gööli nyingi këjji wun wɑ̈g bënn. Codhe o Isrɑil yɑ̈re bëne.” Aköbbi Nɑkɑc, yi jøgdøngi Yɑbic kinni, “Nëngí wøn ki cyɑ̈ng ɑ́bïryew, o wø ödi wøn myërri Isrɑil bënn ki wöödø. O keløg e bong ngɑn bï be yieli wøn, wø óyömmi yïí.” Keny-ɑ ɑ́wɑ̈nhi tyëngwöödø Gibeɑ̀ kun-ɑ bëëd yi Cɑul, kɑ ji köbbi yi gen ki wöönɑni, ɑywöngi gen ki ywøg me teeg cɑrø. Kì bøli kenyɑni ceth Cɑul kedh e obëënø e kɑ̈ɑ̈l-ɑ be køg ki pwödhe, e ócyɑ̈dhø kì bɑng wɑ̈dhhe, ɑpëjje kinni, “Á gïn ɑ rɑj, ɑ ywöngi ji?” Codhe, ɑköbbi Cɑul wöön-ɑ ɑ́kɑ̈ɑ̈l kì Yɑbic. Keny-ɑ ɑ́lïngi kwøbbɑni yi Cɑul, kɑ wëyi Jwøk bï-ɑ köme, kɑ mɑg yi liny ki menteg. Akɑ̈bbi Cɑul ki wɑ̈dhhe ɑ́ryew, kɑ gï ngølle gɑ ɑ́tug, ɑmëgge ɑ́tuggɑni tyëngwöödø, o gï kïdhi gen yethi myërri Isrɑil bënn, ji köbbi ge’ köbbø kinni, “Bene gïn-ɑ ógöggi dhögi ngɑn pɑ kedhi be liny kyeel ki Cɑul geki Sɑmwel.” Kɑ tyëng Isrɑil obwøgø yi Jwøng-ɑ Ácwɑ̈ɑ̈j, kɑ liny kedh-ɑ wɑ̈g bëne ki pyëw ɑ́kyel. Acøng ji bënn kej ɑ́kyel yi Cɑul kì Bedhek. Tyëng Isrɑil ɑ́bëëd kwɑnni gen bɑ ɑ́lïp miy ɑ́dɑ̈g, o tyëng Yeudiyɑ̀ bɑ ɑ́lïp pyɑ̈r ɑ́dɑ̈g. Aköbbi tyëng Yɑbic møg-ɑ ɑ́kɑ̈ɑ̈l wöödø kinni, “Köbbu tyëng Yɑbic kì Gilyɑd kinni, ge ódøm dhuki keny-ɑ ólënhi cɑ̈ng.” Codhe, ɑkedh jøwöödø, kɑ tyëng Yɑbic köbbi gen møgɑni kɑ pëthi gen ómïnø. Aköbbi Nɑkɑc yi tyëng Yɑbic kinni, “Wø óbï yïí dhuki, o wø göggu gïn-ɑ dwɑddu göggi wøn.” Kì wɑ̈rɑni, kɑ Cɑul jøge pɑ̈nge gɑ ɑkudd ɑ́dɑ̈g. Kɑ ge turr-ɑ dyëri kɑɑl Amön kì bɑ̈ɑ̈rø, ɑtyɑɑm tyëng Amön yi gen e cɑ̈ng nuti lënhø. Tyëng Amön møg-ɑ ɑ́bodh ɑ́rengi ge tɑyø, bong ji ɑ́ryew kì kelli gen mɑ ɑ́rïngi kì kej ɑ́kyel. Aköbbi Sɑmwel yi yɑy kinni, “Á møg ɑ nuti dwɑddi bëëdi Cɑul ɑ́ rɑ̈dh? Kɑ̈ɑ̈l gen keny o ge nɑ̈g yi wɑ!” Akööb Cɑul kinni, “Pɑth! Bong dhɑnhø me nɑ̈g dicyɑ̈ɑ̈ng, mɑ́ tyëng Isrɑil ɑ́døm yi Jwøng-ɑ Ácwɑ̈ɑ̈j dicyɑ̈ngtïn.” Aköbbi yɑy yi Sɑmwel kinni, “Bïu kedhi wɑ Gilgɑl, o Cɑul cigi mɑlø yi wɑ ɑ́ rɑ̈dh.” Codhe, ɑkedhi gen Gilgɑl ge bënn, kɑ Cɑul mɑl yi gen ɑ́ rɑ̈dh, kì kej kwër kì kunɑni. Kɑ Jwøng-ɑ Ácwɑ̈ɑ̈j ngɑ̈ddi yi gen ki gënhi mër. Kɑ Cɑul otugø geki tyëng Isrɑil bënn ki medi pëthi gen. Kɑ tyëng Isrɑil köbbi yi Sɑmwel kinni, “Møg-ɑ ɑ́dwɑddi yi wun bënn ɑ́yïëy yi yɑn, kɑ wu rönyɑ ki rɑ̈dh. Rɑ̈nhɑni ɑ bøli wun ɑnɑn. Keløg ɑ́ kiperɑ, yɑ ɑ́yöø, yëyyɑ ɑ́tɑ̈ri, wɑ̈ddɑ ɑ kelli wun ɑgɑk, yɑ ɑ́wöni yɑ bɑ jɑngi wun, yɑ bɑ wøb gïti dicyɑ̈ngtïn. Yɑn ɑ cungi kì bøli wun èn. Keløg e dɑ gïjø ɑ́kyel me rɑɑj me gwøøg yɑn, gøønyu yɑn kì bøli Jwøng-ɑ Ácwɑ̈ɑ̈j geki rɑ̈dh men-ɑ ɑ́yieny yi en. Á dhii men ɑ ɑ́kwɑny yi yɑn? Wɑlɑ̀ ɑ́ ɑderi men ɑ ɑ́kwɑny yi yɑn? Á men ɑ ɑ́rujɑ, wɑlɑ̀ ɑ́ men ɑ ɑ́mødɑ? Á cingi men ɑ ɑ́kɑ̈bbɑ ki gïïpiny kipe kinni o gøny cwɑ̈ggɑ en? Ke di gïi dhɑnhø me kɑɑb yɑn, culɑ’ en.” Alöggi gen kinni, “Bong dhɑnhø mɑ ɑ́ruj yi yïn, o bong dhɑnhø mɑ gëe ɑ́kɑb yi yïn. Bong gïi dhɑnhø mɑ ɑ́kwɑny yi yïn.” Aköbbi gen yi Sɑmwel kinni, “Jwøng-ɑ Ácwɑ̈ɑ̈j en ɑ ngɑ̈ny wøw ki gïn-ɑ ɑ́kwøb yi wun. Rɑ̈nh-ɑ ɑ́yieny yi en ngɑ̈ny wøw thyew dicyɑ̈ngtïn kinni, bong gïjø me rɑɑj kì riɑ.” Akööb gen kinni, “Bɑ dyër!” Kɑ Sɑmwel teedø köbbe kinni, “Bɑ Jwøng-ɑ Ácwɑ̈ɑ̈j ɑ ɑ́yieny Mosɑ̀ geki Aɑron. O en ɑ ɑ́kɑ̈ɑ̈l kweyyi wun wɑ̈g kì Rïp. Anɑn cungi wun kì keny, o wu löbbɑ gïgdøj bënn møg-ɑ ɑ́göggi wun, wuki kweyyi wun yi Jwøng-ɑ Ácwɑ̈ɑ̈j. Keny-ɑ ɑ́kedhi Yɑgob Rïp geki gøle, kɑ nyingi gen guud yi tyëng Rïp, ɑywøøg kweyyi wun kö Jwøng-ɑ Ácwɑ̈ɑ̈j kipe kinni o ge køny, ɑör Mosɑ̀ geki Aɑron yi Jwøng-ɑ Ácwɑ̈ɑ̈j, kɑ kweyyi wun kɑ̈ɑ̈l gen wɑ̈g kì Rïp, kɑ ge pëgg-ɑ piny-ɑ bëëd yi wun èn. De wɑ̈thi gen ɑ́wïl ki Jwøøg gen, Jwøng-ɑ Ácwɑ̈ɑ̈j, codhe, ɑgöjji gen liny ki Siserɑ̀ pënyi liny Adhör, kí tyëng Pelistiyɑ̀, kí rɑ̈ɑ̈dh Moɑb. Kɑ ge ónyïɑ̈ggø ki kweyyi wun, kɑ kweyyi wun tyɑm yi gen. Kɑ ge ywøøg-ɑ kö Jwøng-ɑ Ácwɑ̈ɑ̈j, ge okööbø kinni, ‘Wø ɑ́røngi, mɑ́ Jwøng-ɑ Ácwɑ̈ɑ̈j ɑ́wiy yi wøn, kɑ wø kedh-ɑ be mɑlli Bɑɑl geki ngïjji Actɑröth. Yiel wøn kì cinggi tyëngmɑ̈ɑ̈nø. Yï ómɑlli yi wøn!’ Kɑ Jwøng-ɑ Ácwɑ̈ɑ̈j wu öre Gideon, kí Bɑrɑk, kí Yeptɑɑ̀, ɑöre yɑn kì cyɑ̈ɑ̈n gen bënn. Kɑ wu yiel kì cinggi tyëngmɑ̈ɑ̈nø møg-ɑ bɑdhhi wun bënn yi tyëng-ɑ ɑ́ör. Kɑ wu obëëdø ki mër. De keny-ɑ ɑ́lidh wun Nɑkɑc rɑ̈ɑ̈dh Amön e bï-ɑ yï wun ki liny, ɑköbbu yɑn kinni, ‘Nëngí wøn ki rɑ̈dh!’ Á Jwøøg wun, Jwøng-ɑ Ácwɑ̈ɑ̈j ɑ ceg bëëdø ɑ́ rɑ̈ɑ̈dh wun. “Rɑ̈ɑ̈dh wun; rɑ̈nh-ɑ ɑ́yɑb yi wun èn. Wu ɑ́rum ki nëngø yi Jwøng-ɑ Ácwɑ̈ɑ̈j ki rɑ̈dh. Óbëëd e døøj keløg Jwøng-ɑ Ácwɑ̈ɑ̈j ómɑlli yi wun, kɑ kwøbbe nyi lïngi yi wun, wuki rɑ̈ɑ̈dh wun. De keløg kwøbbi Jwøng-ɑ Ácwɑ̈ɑ̈j pɑ lïngi yi wun, kɑ cigge pyem yi wun, wu ógögge ki gïnrɑj ni men-ɑ ɑ́gögge kweyyi wun. De ɑnɑn dhwödh wun, o wu lïdhi wun ki gïgdøngø møg-ɑ ógwøg yi Jwøng-ɑ Ácwɑ̈ɑ̈j. Piny bɑ lew ɑnɑn, pɑth kidyër? De Jwøk ókwɑjji yi yɑn, o mɑl pööde, o kødh dëëme. Keløg gïgɑni ócwöb, yod wun en kinni wu ɑ́göög ki orøg me dwøng kì bøli Jwøng-ɑ Ácwɑ̈ɑ̈j.” Codhe, ɑkwɑjji Jwøng-ɑ Ácwɑ̈ɑ̈j yi Sɑmwel, kɑ mɑl göjji pöd yi Jwøng-ɑ Ácwɑ̈ɑ̈j. Kɑ kødh ómɑ̈gø kì cyɑ̈ngɑni, kɑ ji obwøgø yi Jwøng-ɑ Ácwɑ̈ɑ̈j geki Sɑmwel ki mendwøng. Kɑ Sɑmwel köbbi yi gen kinni, “Døj jɑldwøng, kwɑjjí Jwøgí, Jwøng-ɑ Ácwɑ̈ɑ̈j kiper wøn, o wø cög wøn wø pɑ thøw. Áyod yi wøn ɑnɑn kinni, wø ɑ́røngi kɑ ɑ́cwöddi wøn ki rɑ̈dh.” Aköbbi gen yi Sɑmwel kinni, “Wu ko böggi, bɑ dyër kinni, wu ɑ́røngi kì bøli Jwøng-ɑ Ácwɑ̈ɑ̈j ki tyel mø gïïr, de Jwøng-ɑ Ácwɑ̈ɑ̈j ko bɑny wun, göggu en ki pëthi wu bënn. Ri wun ko lugi wun jwögg-ɑ pɑth, wu pɑ køny yi jwöggɑni, wɑlɑ̀ wu pɑ yiel yi gen, mɑ́ ge bɑ jwögg mø bong per gen. Jwøng-ɑ Ácwɑ̈ɑ̈j ɑ́köngi kinni, jie pɑ cuggi bɑnyø yi en, mɑ́ wu dwɑdde’ mïdhø wu bɑ jie. Yɑ pɑ wïyi ki kwɑ̈jjø kiper wun, mɑ́ menɑni ógöögø ki bɑ̈jjø kì bøli Jwøng-ɑ Ácwɑ̈ɑ̈j. Wu ópwönyi yi yɑn ki gwøgi gïndøj men-ɑ bɑ dyër. Gɑ̈nu Jwøng-ɑ Ácwɑ̈ɑ̈j, kɑ wu göög wun ki gïndøj ki pëthi wun bënn. De keløg wu, nudd wu ogöögø ki orøg wuki rɑ̈ɑ̈dh wun bënn, wu ónɑ̈g yi en.” Cɑul runne ɑ́bëëd gɑ pyɑ̈r ɑ́dɑ̈g keny-ɑ ɑ́gööge ɑ́ rɑ̈ɑ̈dh Isrɑil. Kɑ Isrɑil jɑɑg yi en ki runn pyɑ̈r ɑ́ngwen wïdɑ́ryew. Cɑul ɑ́kɑ̈bbi ki ji ɑ́lïp ɑ́dɑ̈g møg-ɑ ɑ́yieny yi en kì kelli jø Isrɑil, ɑbëëd gen kì Mikmɑc kì myërri kïtti Betiil. Adöng Yönɑthɑn kí ɑ́lïp ɑ́kyel kì Gibeɑ̀, kì myërri Ben Yɑmïn. Yönɑthɑn ɑ́pɑ̈ɑ̈r kömi pënyi liny Pelistiyɑ̀ kì Gebɑ̀ kɑ gø nɑ̈ge, kɑ møgɑni lïngi yi tyëng myërr-ɑ kyeelø kì Pelistiyɑ̀. Codhe kɑ Cɑul oödø ki ji mø cwööl tyëng Isrɑil ki kɑng. Kɑ tyëng Isrɑil bënn olïngø kinni i pënyi tyëng Pelistiyɑ̀ onɑ̈gø yi Cɑul, o ge mɑɑn yi tyëng Pelistiyɑ̀. Codhe, ɑcwøøl tyëng Isrɑil bënn yi Cɑul, kɑ ge kedh-ɑ Gilgɑl. Acøng tyëng Pelistiyɑ̀ ri gen be nyɑɑg ki tyëng Isrɑil. Tyëng Pelistiyɑ̀ yï gen ɑ́dɑ yɑ̈thi liny ɑ́lïp pyɑ̈r ɑ́dɑ̈g, kí jøliny kyënyì ɑ́lïp ɑ́bïkyel, kí yɑy me dwøng cɑrø. Akedhi gen Mikmɑc, kì wɑɑng cyɑ̈ɑ̈ng mwøl kì bøli Bet Aben. Agud gen ki kɑɑl kì kunɑni. Keny-ɑ ɑ́lidhii yi tyëng Isrɑil kinni linyɑni pɑ lwɑ̈ng yi gen, ɑrengi gen be pɑ̈nnø kì yethi órøggi kïttì, kí yethi burrì, kí kelli kïtt-ɑ thønhø, kí yethi ɑwöll geki yïïth-ɑ rum dwönø. Kɑ kwï ji kwɑng-ɑ løøg Nɑm Urdun kì Gɑd kí Gilyɑd. Cɑul ɑ́nudd e obëëdø kì Gilgɑl, de jøge, dëlli gen ceg-ɑ okïr yi wɑ̈ɑ̈rø. Kɑ cyɑ̈ng ɑ́bïryew óthumø e Sɑmwel nuti bëënø, Sɑmwel ɑ́kööb cem e yïdii yi Cɑul kì kunɑni ki cyɑ̈ng ɑ́bïryew. De keny-ɑ ɑ́cög Sɑmwel nuti bëën Gilgɑl, kɑ jø Cɑul ócɑ̈gø ki tɑyø. Codhe, ɑkööb Cɑul kinni, “Kɑ̈ni wun ki gënh-ɑ rɑ̈b geki gënhi mër.” Codhe, ɑngɑ̈ddi Jwøng-ɑ Ácwɑ̈ɑ̈j yi Cɑul. Keny-ɑ ɑ́rum Cɑul ceth, ki rɑ̈bbi gënhɑni Jwøng-ɑ Ácwɑ̈ɑ̈j, ɑwɑ̈nhi Sɑmwel kɑ Cɑul kedh-ɑ be pɑɑrii. Apëjji Sɑmwel kinni, “Yï ɑ́gwøg-ɑ ngø?” Alöggi Cɑul kinni, “Ji ɑ́lidh yi yɑn, ge ócɑ̈gø ki kedhø, yɑ owiyø yi gen, o yï nuti bëënø kì bøli keny-ɑ ɑ́kwøb yi yïn kinni yï óbï, o tyëng Pelistiyɑ̀, ri gen ɑ́cøng gen kì Mikmɑc. Arumɑ kinni, tyëng Pelistiyɑ̀ bɑ møg bï be nyɑɑg ki yɑn kì Gilgɑl, o Jwøng-ɑ Ácwɑ̈ɑ̈j nuti mɑlø yi yɑn, bene ɑ bɑnge ɑ́böyɑ ki rɑ̈bbii gënhe.” Aköbbii yi Sɑmwel kinni, “Yï ɑ́gwøg-ɑ gwøøg dhëëgø! Ciggi Jwøgí, Jwøng-ɑ Ácwɑ̈ɑ̈j nuti mïdhø yi yïn, keløg ge di mïdhi yi yïn, lɑwí di cïbe piny kì Isrɑil gïti ɑtheer. De ɑnɑn lɑwí pɑ kedhi bøle. Jwøng-ɑ Ácwɑ̈ɑ̈j óyɑ̈ɑ̈bø ki ngɑn-ɑ dwɑdde, gwøgø ɑ́ jɑngi jie.” Kɑ Sɑmwel odhwödhø kì Gilgɑl, kɑ kedh-ɑ Gibeɑ̀ kì myërri Ben Yɑmïn. Kɑ Cɑul jøg-ɑ ɑ́döng ki en kwɑne, ɑyode kwɑnni gen ge bɑ miy ɑ́bïkyel. Kɑ Cɑul geki wɑ̈de Yönɑthɑn, kí yɑye pëgg-ɑ Gebɑ̀ kì myërri gøl Ben Yɑmïn. O tyëng Pelistiyɑ̀, kɑɑl gen ying-ɑ Mikmɑc. Kɑ liny Pelistiyɑ̀ bï-ɑ wɑ̈g kì kɑɑl gen gɑ dhøg ɑ́dɑ̈g. Kɑ dhøg ɑ́kyel kɑ̈l-ɑ yuu Óprɑ̀, yuu-ɑ kedhi myërr-ɑ piny Cuɑɑl. Kɑ dhøng-ɑ kyeelø kedh-ɑ Bet Örøn, kɑ dɑ̈ɑ̈g gen kɑ̈l-ɑ wïj kew-ɑ nenni Töör Dheböïm kì yij ryɑng. Ábong-ɑ bødhø me nyi thɑ̈dhø kì Isrɑil bëne, mɑ́ tyëng Pelistiyɑ̀ ɑ́bëëd ge óböggø kinni, keløg Isrɑil óyïddø ki bödhhì, ge ócuggø thɑ̈dh ki tøngg kí pil. Tyëng Isrɑil ɑ́bëëd ge nyi kedh-ɑ Pelistiyɑ̀ be tyegi kwërri køøg, kí dørrì, kí ɑ́ngönn, kí gïg-ɑ nyi kuny ki piny. Jɑmmì bënn ɑ́bëëd ge nyi tyeg kɑ ngyëny mø nøg. De kì cyɑ̈ɑ̈ng liny, ɑ́bong-ɑ wɑ̈d Isrɑil me yïe di tøng wɑlɑ̀ pilø, den-ɑ́ Cɑul geki Yönɑthɑn wɑ̈de ɑ yï gen ɑ́di pil ki tøngg. Kɑ tyëng Pelistiyɑ̀ oödø ki liny me kor dhø yuu Mikmɑc. Cyɑ̈ng ɑ́kyel, Yönɑthɑn wɑ̈d Cɑul, nyel-ɑ kɑ̈lli jɑmmi linye ɑ́köbbe kinni, “Bïí kedhi wɑ tung-ɑ kyeelø løøng-ɑ di kɑɑl tyëng Pelistiyɑ̀.” De Yönɑthɑn wïye nuti köbbø yi en. Cɑul ɑ́bëëd e ying-ɑ thɑ yɑdh romɑn me ying buti Gibeɑ̀. Kwɑnni jøge bɑ miy ɑ́bïkyel ge ying-ɑ bute ceth. Akiyɑ̀ wɑ̈d Akitub ómï Ikɑböd wɑ̈d Pineɑs wɑ̈d Elì ókwëri Jwøng-ɑ Ácwɑ̈ɑ̈j kì Cilø, ɑ́bëëd e nud kì kenyɑni, e kɑ̈ll-ɑ Sɑnduug Ciggi Jwøng-ɑ Ácwɑ̈ɑ̈j. Kwïj yi yɑy kinni Yönɑthɑn kedhø. Yuu-ɑ ɑ́dwɑddi yi Yönɑthɑn kinni o kɑ̈ɑ̈le yije, e kedh-ɑ kɑɑl Pelistiyɑ̀ dɑ kïttì ɑ́ryew møg pödhi mɑl, ɑ́kyel cwøl ɑ́ Bödhedh, o men-ɑ kyeelø cwøl ɑ́ Senè. Tuung kït ɑ́kyel pödh-ɑ mɑl e nenn-ɑ Mikmɑc kì wɑɑng wuudø, o tuung kït men-ɑ kyeelø pödh-ɑ mɑl e nenn-ɑ Gebɑ̀ kì wɑɑng wurlwɑl. Aköbbe nyel-ɑ kɑ̈lli jɑmmi linye kinni, “Bïí kedhi wɑ kɑɑl jøgɑni, jøg-ɑ nuti ngølø, men-ɑ ókøny wɑ yi Jwøng-ɑ Ácwɑ̈ɑ̈j, keløg wɑ ókøny yi en, bong gïn-ɑ ómɑ̈ɑ̈n gen tyɑmø yi wɑ, cɑgg wɑ nøg.” Alöggi nyelɑni kinni, “Gwøg gïn-ɑ dwɑddi yi yïn.” Akööb Yönɑthɑn kinni, “Døj, kedhi wɑ tung-ɑcɑ̀, o wɑ lidh yi tyëng Pelistiyɑ̀. Keløg wɑ óköbbi yi gen kinni yïd wɑ gen, o wɑ cög wɑ, wɑ obëëdø kì keje. De keløg ge ókööbø kinni kedhi wɑ yï gen, o wɑ kedhi wɑ mɑl yï gen, kipe menɑni óbëëd ɑ́ ngïji miee kinni ge ɑ́cïb cinggee yi Jwøng-ɑ Ácwɑ̈ɑ̈j.” Codhe, ɑnyudhi gen ri gen tyëng Pelistiyɑ̀, kɑ tyëng Pelistiyɑ̀ okööbø kinni, “Lïdhi wun! Tyëng Ibru kwï gen ɑ́mulli wɑ̈g kì yethi burrì møg-ɑ ɑ́pɑ̈nni gen!” Kɑ Yönɑthɑn cwøl gen geki nyel-ɑ cyɑ̈dhi ki en kinni, “Bïu mɑl yï wøn, o wu nyudhi ki gïïpiny!” Codhe, kɑ Yönɑthɑn nyel-ɑ cyɑ̈dhi ki en köbbe kinni, “Yïnhí mɑl bɑngɑ, ge ɑ́mëggi wɑ yi Jwøøg Isrɑil, Jwøng-ɑ Ácwɑ̈ɑ̈j.” Ayedhi Yönɑthɑn mɑl e mull-ɑ cingge, kí nyel-ɑ kɑ̈lli jɑmmi liny møge kì bɑnge ceth. Apödhi Yönɑthɑn kömi tyëng Pelistiyɑ̀, kɑ gï cøøre piny kedh ge onɑ̈gø yi nyel-ɑ bɑnge. Kì yij liny tyeli mɑl, Yönɑthɑn geki nyel-ɑ nyi kɑ̈lli jɑmmi linye ɑ́nɑ̈g-ɑ gïn ni pyɑ̈r ɑ́ryew, kì keny me thiinh me lɑ̈ji yije bɑ budi pedɑn. Kɑ yɑɑy tyëng Pelistiyɑ̀ obwøgø ki mendwøng, gen ɑ møg-ɑ kɑɑl ki møg-ɑ be yɑg yethi myërr. Kɑ piny onhɑ̈nhø! Ryɑ̈g me dwøng ɑ́ör yi Jwøng-ɑ Ácwɑ̈ɑ̈j. Kɑ jøg-ɑ ɑ́kor Cɑul kì Gibeɑ̀ kì myërri gøl Ben Yɑmïn, tyëng Pelistiyɑ̀ lidh gen, ge órïngø ge tumm-ɑ wɑ̈thi gen kì kɑɑl gen. Codhe, ɑköbbi Cɑul jøge kinni, “Mɑmu yɑy, o yod mɑ løge’ men ɑ tøøk.” Akwɑn gen yɑy, kɑ Yönɑthɑn geki nyel-ɑ nyi kɑ̈lli jɑmmi liny møge yod ge tøøk. Codhe ɑköbbi ókwërø Akiyɑ̀ yi Cɑul kinni, “Kɑ̈ɑ̈l Sɑnduug Ciggi Jwøng-ɑ Ácwɑ̈ɑ̈j keny!” Akiyɑ̀ ɑ́bëëd e kɑ̈ll-ɑ Sɑnduug Ciggi Jwøng-ɑ Ácwɑ̈ɑ̈j kì bøli tyëng Isrɑil dicyɑ̈ngɑni. Kɑ̈ng-ɑ́ nudd Cɑul e okööbø ki ókwërø, ɑtëngi liny ki menteg kì kɑɑl tyëng Pelistiyɑ̀, codhe ɑköbbi Akiyɑ̀ yi Cɑul kinni, “Bong keny pyëj wɑ Jwøng-ɑ Ácwɑ̈ɑ̈j.” Kɑ Cɑul yɑye cønge, kɑ pödh-ɑ yij liny. Ayuud gen tyëng Pelistiyɑ̀, wɑ̈thi gen muumø de ge kebb-ɑ ri gen keti gen ki pilli gen. Kwï tyëng Isrɑil møg-ɑ ɑ́ying kelli tyëng Pelistiyɑ̀, kì kɑɑl gen, ri gen ɑ́løg gen, kɑ ge dwöög-ɑ tung-ɑ di Cɑul geki Yönɑthɑn. Keny-ɑ ɑ́lïng tyëng Isrɑil møg-ɑ ɑ́bëëd ge ópɑ̈nnø kì kelli kïtti Eprɑim, kinni tyëng Pelistiyɑ̀ ócyeddø, ɑbëën gen yij liny thyew, kɑ ge reng-ɑ bɑng tyëng Pelistiyɑ̀. Isrɑil ɑ́køny yi Jwøng-ɑ Ácwɑ̈ɑ̈j dicyɑ̈ngɑni kɑ liny gït-ɑ Bet Aben. Tyëng Isrɑil bënn ɑ́mɑg yi kɑ̈j ki menteg dicyɑ̈ngɑni, mɑ́ Cɑul köngø kinni, “Ko di dhɑnhø me pɑ̈nyi cɑm ki gïncɑm gïti böörø, keny-ɑ órume ki tyɑmi tyëngmɑ̈ɑ̈nø. Keløg e dɑ ngɑn-ɑ ócyɑ̈mø, ngɑnɑni köme ódi cyën.” Kɑ bong-ɑ wɑ̈d Isrɑil mɑ ɑ́cyɑ̈ɑ̈m. Awɑ̈dhi yɑy yij thïm, keny me mulli yi møøw kïc kì piny. Akɑ̈l gen kömi møøw kïc, de bong dhɑnhø mɑ ɑ́bïdi kì kelli yɑy, mɑ́ ge óböggø ki cyën. De Yönɑthɑn kwïj wøw, nuti lïngø ki köng-ɑ ɑ́köngi yi Cɑul. Codhe, ɑcøde lodhe yij møøw kïc kɑ kɑ̈n-ɑ wɑ̈g, ɑcɑme gøn. Kɑ kɑ̈j ólɑ̈ɑ̈nyø kì ree, kɑ nyinge ótɑ̈rø. Aköbbi Yönɑthɑn yi jɑl ɑ́kyel kì kelli yɑy kinni, “Wïyí ɑ́köngi, kɑ yɑy kyëdde bëne kinni, ‘Ngɑn-ɑ ópɑ̈nyi cɑm dicyɑ̈ɑ̈ng, köme ódi cyën. Bene ɑ ngiin kɑ̈j ceth yi ji.’ ” Alöggi Yönɑthɑn kinni, “Wïyɑ pödhø ɑ́kïdhe yij orɑng! Lidh, dëlɑ ɑ́dwöög keny-ɑ ɑ́bïdɑ ki nyɑ me thiinh. Di bëëd e lɑ̈w keløg yɑy di cyɑ̈ɑ̈m dicyɑ̈ɑ̈ng, ki gïgcɑmm møg-ɑ ɑ́mɑg yi gen kì yï tyëngmɑ̈ɑ̈nø. O tyëng Pelistiyɑ̀ mø gïïr di nɑ̈g yi wɑ!” Tyëng Pelistiyɑ̀ ɑ́cyeddi, ge pwööd-ɑ piny yi tyëng Isrɑil, cɑg kì Mikmɑc gïti Ayɑlön, kɑ ge opïdø ki menteg. Amɑɑg dyëg, kí dhög, kí røjj mø tyëng Pelistiyɑ̀ yi gen. Kì bøli kenyɑni kɑ̈j ɑ́tëngi kì ri gen ki menteg, kɑ dyëg, kí dhög jwɑn yi gen ki nɑ̈gø, kɑ rïngø cɑm yi gen e nuti cyegø, kí remø kì ree. Aköbbi Cɑul kinni, “Lidh! Jwøk ɑ́bwöl yi yɑy, kɑ rïngø cɑm e ree dɑ remø.” Akööb Cɑul e óryeerø kinni, “Jwøk ɑ́bwöl yi wun! Ngyëli wun keny ki kït me dwøng!” Codhe, ɑkööbe kinni, “Kedhu yï ji, kɑ ge köbbu bënn kinni, kɑ̈ɑ̈l ngɑn dyele wɑlɑ̀ wɑdhe, kɑ gø nɑ̈ge kì keny kɑ gø cɑme. Jwøng-ɑ Ácwɑ̈ɑ̈j pɑ ceg yi wun ki bwölø ki cɑm-ɑ cɑm wun rïngø ree dɑ remø?” Akɑ̈ɑ̈l gen dyëgi gen kí dhögi gen kenyɑni kì wɑ̈rɑni. Bene kenyɑni ɑ ɑ́kwöngi Cɑul ki gyer ki këli Jwøng-ɑ Ácwɑ̈ɑ̈j. Këlɑni bene en men-ɑ ɑ́kwøng ki gerø yi en kì tyeli mɑl ɑ́ mi Jwøng-ɑ Ácwɑ̈ɑ̈j. Akööb Cɑul kinni, “Bïu kedhi wɑ bɑng tyëng Pelistiyɑ̀, o wɑ pɑ̈ɑ̈r wɑ kömi gen kì wɑ̈r tïn, o jɑmmi gen mɑg yi wɑ. Bong dhɑnhø ɑ́kyel men-ɑ ówiy yi wɑ kì kelli gen e onëënø.” Alöggi jøge kinni, “Göög ki gïn-ɑ rømmí yi yïn e døøj.” De ókwërø ɑ́kööb kinni, “Wiy Jwøk pyëj yi wɑ møti.” Codhe, ɑpyëëj Jwøng-ɑ Ácwɑ̈ɑ̈j yi Cɑul kinni, “Rengɑ bɑng tyëng Pelistiyɑ̀? Ge ócïb yi yïn cinggi wøn, o ge tyɑm yi wøn?” De Jwøng-ɑ Ácwɑ̈ɑ̈j kwøbbi Cɑul nuti løøg en, kì bøli kenyɑni. Codhe ɑköbbi pëjji liny yi Cɑul kinni, “Bïu keny. Yod wɑ gïn-ɑ bɑ̈jjø dicyɑ̈ɑ̈ng. Yɑn ɑ köngi èn, ki nyingi Jwøng-ɑ Nëënø, ɑ ɑ́thödhi Isrɑil ki teng-ɑ ɑ́tyɑ̈ɑ̈me, kinni ngɑn-ɑ gwøøg orøg, ceg kɑ cɑyø ki thøø, cɑgg e bɑ wɑ̈dɑ Yönɑthɑn.” Codhe, ɑköbbi gen yi Cɑul kinni, “Cungi wun kì kun-ɑcɑ̀ wu bënn, yɑ ócungi kì keny wøki Yönɑthɑn.” Alöggi gen kinni, “Göög ki gïn-ɑ rømmi yïn e døøj.” Codhe, ɑkwɑjji Jwøøg Isrɑil, Jwøng-ɑ Ácwɑ̈ɑ̈j yi Cɑul kinni, “Nyudhí yɑn gïn-ɑ bɑ dyër.” Apɑ̈dhi wëëlø ki Yönɑthɑn geki Cɑul, kɑ teedø bënn odöngø kì piny. Akööb Cɑul kinni, “Gïnɑni pɑ̈dh-ɑ kömi men kì kelli wøki wɑ̈dɑ Yönɑthɑn?” Kɑ wëëlø ópɑ̈dhø ki Yönɑthɑn. Aköbbi Yönɑthɑn yi Cɑul kinni, “Köbbí yɑn gïn-ɑ ɑ́gwøg yi yïn.” Alöggi Yönɑthɑn kinni, “Bɑ møøw kïc me thiinh ɑ ɑ́bel yi yɑn kì ri lodhɑ keny-ɑ ɑ́cwögɑ en. Yɑn èn, yɑ ócuggø nɑ̈gø.” Akööb Cɑul kinni, “Yɑ ɑ́köngi ki nyingi Jwøk, yï ceg kɑ nɑ̈gø Yönɑthɑn!” De ji Cɑul ɑ́köbbi yi gen kinni, “Á men ɑ nɑ̈g? Yönɑthɑn kiree? Ngɑn-ɑ ɑ́tyɑm tyëng Pelistiyɑ̀! Pɑ cuggi kinni tek! Ki nyingi Jwøng-ɑ Ácwɑ̈ɑ̈j, bong yëyi wïje ɑ́kyel me cuggi dëëm piny. Kipe gïn-ɑ ɑ́gwøg yi en dicyɑ̈ɑ̈ng, ɑ́gwøg yi en kɑ kunyi Jwøng-ɑ Ácwɑ̈ɑ̈j.” Ayieel Yönɑthɑn yi gen, kɑ ocögø e pɑ nɑ̈g. Kɑ Cɑul ówïyø cyeddi tyëng Pelistiyɑ̀, kɑ ge døøg-ɑ myërri gen. Keny-ɑ ɑ́göög Cɑul ki rɑ̈ɑ̈dh Isrɑil, ɑ́nyïɑ̈ggi kì wɑ̈thi tùng bënn, ki tyëngmɑ̈ɑ̈nø. Ányïɑ̈ggi ki tyëng Moɑb, kí tyëng Amön, kí tyëng Edöm, kí rɑ̈ɑ̈dh Dhöbɑ̀, kí tyëng Pelistiyɑ̀. Kì kɑ̈jj-ɑ ɑ́kedhi yi Cɑul bënn, tyëng-ɑ mɑ̈n ki Isrɑil gï nyi tyɑme’ tyɑmø. Ányïɑ̈ggi ki nyɑɑg me teeg cɑrø ki tyëng Amɑlek. Tyëng Isrɑil ɑ́yiele kì cinggi tyëng-ɑ nyi kɑb jɑmmi gen. Wɑ̈ddi Cɑul bɑ Yönɑthɑn, kí Icbì, kí Mɑlkicuɑ̀. Nyɑre, nyɑn-ɑ dwøng cwøl ɑ́ Merɑb, o nyɑn-ɑ thinh cwøl ɑ́ Mikɑl. Cï Cɑul cwøl ɑ́ Akinoɑm nyɑɑr Akimɑɑdh. Abner pënyi linye, bɑ wɑ̈d Ner, ówï wïyi Cɑul. Wïyi Cɑul Kïc geki wïyi Abner bɑ wɑ̈ddi Abiel. Cɑul keny-ɑ ɑ́bëëde e onëënø ɑ́nyïɑ̈ggi ki tyëng Pelistiyɑ̀ ki nyɑɑg me teeg. Kenyi di dhɑnhø me lidh yi Cɑul e teeg, o wïje pel, gø nyi ceg yi en kɑ kïdhi kelli jølinye. Kɑ Cɑul köbbi yi Sɑmwel kinni, “Bɑ yɑn ɑ ɑ́ör yi Jwøng-ɑ Ácwɑ̈ɑ̈j be rønyi yïn, yïn ɑ rɑ̈ɑ̈dh jie, ɑ løg tyëng Isrɑil. Anɑn lïngí kwøbbi Jwøng-ɑ Ácwɑ̈ɑ̈j. Wïlɑ̈bø Jwøng-ɑ Ácwɑ̈ɑ̈j ɑ́kööb kinni, kwɑrri Amɑlek bɑ møg cɑy yi en, mɑ́ tyëng Isrɑil ɑ́rødh yi kweyyi gen, kɑ gï mɑ̈ɑ̈n gen bëën piny Kɑnɑɑn keny-ɑ ɑ́bëën gen wɑ̈g kì Rïp. Kedh ɑnɑn, kɑ kwɑrri Amɑlek nɑ̈ɑ̈g. Kɑ jɑmmi gen bënn møg-ɑ nud ki yï gen nɑ̈ɑ̈g, o ge bëëd gen gɑ gëdhhì mø Jwøng-ɑ Ácwɑ̈ɑ̈j. Ko di gïjø ɑ́kyel me wiy yi wun; nɑ̈g gen bënn, jøg-ɑ cwøw geki tyëng-ɑ mɑ̈nn, kí othønhø kí dhög, kí dyëg, kí ɑmɑl, kí ɑderr.” Acwøøl yɑy bëne kej ɑ́kyel yi Cɑul, kì Telɑim. Kwɑnni jø Isrɑil ɑ́bëëd gɑ ji ɑ́lïp miy ɑ́ryew møg-ɑ cyɑ̈dhi tyelli gen, kí jø Yeudiyɑ̀ gɑ ɑ́lïp pyɑ̈rø. Codhe, ɑkedhi Cɑul kɑɑl kwɑrri Amɑlek be liibi gen piny kì yij tör. Aköbbi tyëng Ken yi Cɑul kinni, “Kedhu wɑ̈yi wun, wiyu tyëng Amɑlek keti gen, o wu cög wu pɑ nɑ̈g yi wøn kyeel ki gen.” Codhe, ɑdhwödh tyëng Ken. Atyɑɑm tyëng Amɑlek yi Cɑul, kɑ ge cyeddi yi en, cɑg kì Abïlɑ̀ gïti Cur kì wïj keew Rïp kì tung-ɑ wɑɑng cyɑ̈ɑ̈ng mwøl. Kɑ ji bënn nɑ̈ge, ɑmɑge Agɑg e onëënø, de yɑɑy Agɑg gø ɑ́nɑ̈ge bëne, gï kebbe’ kebbø ki pilø. Agɑg ɑ́wiy e onëënø yi Cɑul. Dyëg-ɑ døj, kí dhög-ɑ cwiy, kí jɑmm-ɑ døj, gï nuti nɑ̈gø yi gen. Ge ɑ́nɑ̈g-ɑ jɑmm-ɑ rijjø, kí møg-ɑ gwɑ̈lø gwɑ̈lø. Aköbbi Sɑmwel yi Jwøng-ɑ Ácwɑ̈ɑ̈j kinni, “Yijɑ ɑ́ywöngi kipe kɑ ɑ́gwøgɑ Cɑul ɑ́ rɑ̈dh, ngɑ̈je ɑ́luge yɑn, ciggɑ ɑ́bɑnye, gï pɑ lïnge.” Amɑɑg Sɑmwel yi liny, kɑ lɑng-ɑ wɑ̈r e ywøøg-ɑ kö Jwøk. Dhuki kì mwøl, ɑdhwödh Sɑmwel kɑ kedh-ɑ be yïddø ki Cɑul. De ɑ́köbbi yi ji kinni i Cɑul kedhi Kɑrmel kun-ɑ gëdde ree ki lyel, codhe kɑ kedh-ɑ Gilgɑl. Akedhi Sɑmwel yï Cɑul, ɑkööb Cɑul kinni, “Yï ógyëdh yi Jwøng-ɑ Ácwɑ̈ɑ̈j! Møg-ɑ ɑ́ceg yi Jwøng-ɑ Ácwɑ̈ɑ̈j ɑ́rum ki gwøgø yi yɑn.” Apëjji Sɑmwel kinni, “De dhög geki dyëg-ɑ cwɑggi gen lïngɑ ek, ge ɑ́kɑ̈ɑ̈l ɑ keny?” Alöggi Cɑul kinni, “Ge ɑ́kɑ̈ɑ̈l-ɑ yi yɑy, kì yï tyëng Amɑlek. Dyëg geki dhög møg-ɑ myëër ɑ ɑ́kɑ̈ɑ̈l yi gen, gɑ mø ngɑ̈lli Jwøgí, Jwøng-ɑ Ácwɑ̈ɑ̈j, de møg-ɑ kyeelø ɑ́nɑ̈g yi wøn bënn.” Akyëëd Sɑmwel kinni, “Kud, o yï köbbɑ møg-ɑ ɑ́köbbi yɑn yi Jwøng-ɑ Ácwɑ̈ɑ̈j ɑ́wɑ̈ɑ̈r.” Akööb Cɑul kinni, “Köbbí yɑn.” Kɑ Sɑmwel okööbø kinni, “Cɑgg rií rømmi yi yïn yï thiinh, yïn ɑ bɑ jɑngi Isrɑil. Bɑ Jwøng-ɑ Ácwɑ̈ɑ̈j ɑ ɑ́røny yïn, yïn ɑ́ rɑ̈ɑ̈dh Isrɑil bëne. Keny-ɑ ɑ́ör yïn yi Jwøng-ɑ Ácwɑ̈ɑ̈j, yï nuti köbbø yi en kinni, ‘Kedh kɑ yï nyïɑ̈ggí ki tyëngorøg, ɑ løg tyëng Amɑlek. Nyïɑ̈ggí ki gen kɑ ge nɑ̈ɑ̈g bënn, ko di gïjø me wiy yi yïn?’ Yïde ɑ pyeem kwøbbi Jwøng-ɑ Ácwɑ̈ɑ̈j? Yïde ɑ ɑ́kwɑɑny jɑmmì møg-ɑ myëër, ɑ göög ki gïn rënyi pyëw Jwøng-ɑ Ácwɑ̈ɑ̈j?” Alöggi Cɑul kinni, “Kwøbbi Jwøng-ɑ Ácwɑ̈ɑ̈j nuti pyeem yɑn. Gïn-ɑ ɑ́köbbi yɑn yi Jwøng-ɑ Ácwɑ̈ɑ̈j ɑ́gwøgɑ. Tyëng Amɑlek ɑ́nɑ̈gɑ bënn ni kɑ ɑ́kööb Jwøng-ɑ Ácwɑ̈ɑ̈j, kɑ Agɑg rɑ̈ɑ̈dh gen kɑ̈ɑ̈lɑ. Dɑ́ yɑy ɑ ɑ́kwɑny-ɑ dyëg geki dhög-ɑ døj, o ge ɑ́kɑ̈ɑ̈l gɑ møg ngɑ̈lli Jwøgí, Jwøng-ɑ Ácwɑ̈ɑ̈j kì Gilgɑl gɑ gëdhhì.” Kɑ Sɑmwel ólöggø kinni, “Á gïn ɑ dwɑddi yi Jwøng-ɑ Ácwɑ̈ɑ̈j, gëdhh-ɑ ngɑl, wɑlɑ̀ lïngi møg-ɑ kwøb yi en? Gwøgi gïn-ɑ dwɑddi yi Jwøng-ɑ Ácwɑ̈ɑ̈j lɑ̈w kibøli ngɑ̈dde ki gëdhhì. Pyemi kwøbbi Jwøng-ɑ Ácwɑ̈ɑ̈j rɑɑj, pɑ̈r ki thyëdh, o ɑthwøg rɑɑj, pɑ̈r ki kwɑjji jwögg-ɑ pɑth. Yï ɑ́bɑny yi Jwøng-ɑ Ácwɑ̈ɑ̈j, yï pɑth ki rɑ̈dh, mɑ́ cigge ɑ́bɑny yi yïn.” Codhe, ɑköbbi Sɑmwel yi Cɑul kinni, “Yɑ ɑ́røngi. Ciggi Jwøng-ɑ Ácwɑ̈ɑ̈j nuti mïdhø yi yɑn geki kwøbbí. Yɑ ɑ́bëëd yɑ óböggø yi yɑy, ɑgwøgɑ gïn-ɑ ɑ́kwøb yi gen. De ɑnɑn yɑ kwɑjj-ɑ yïn, lɑ̈ɑ̈m pyëwí, kɑ wïjí wïle ki orøgɑ, kɑ wɑ døøg wɑ Gilgɑl, o Jwøng-ɑ Ácwɑ̈ɑ̈j mɑl yi yɑn.” Alöggi Sɑmwel kinni, “Wɑ pɑ døg. Yï ɑ́pyem-ɑ Ciggi Jwøng-ɑ Ácwɑ̈ɑ̈j, o yï ɑ́bɑny yi en, yï pɑ bëëdø yïn ɑ́ rɑ̈ɑ̈dh Isrɑil këti.” Codhe, ɑløg Sɑmwel ree e ókedhø, kɑ mɑg yi Cɑul kì ri bɑɑd ɑ́ywönhdwøng men-ɑ ree, kɑ ɑ́ywödh ópyëdø. Aköbbii yi Sɑmwel kinni, “Jwøng-ɑ Ácwɑ̈ɑ̈j lɑwi Isrɑil ɑ́pyëëde wɑ̈g kì kömí dicyɑ̈ngtïn, kɑ gø mëgge ngɑn megø me lɑ̈w kibølí. Jwøøg Isrɑil, Jwøng-ɑ dwøng pɑ nyi kømmi pyed, mɑ́ e pɑth ki dhɑnhø ɑ nyi wil dhøge.” Akööb Cɑul kinni, “Yɑ ɑ́røngi, de kɑl yɑn ki wørø kì bøli pëjji yɑy geki tyëng Isrɑil bënn. Bïí døg wɑ, o Jwøgí, Jwøng-ɑ Ácwɑ̈ɑ̈j mɑl yi yɑn.” Codhe, ɑdøøg Sɑmwel Gilgɑl geki Cɑul. Kɑ Jwøng-ɑ Ácwɑ̈ɑ̈j mɑl yi Cɑul. Kɑ Sɑmwel okööbø kinni, “Kɑ̈ɑ̈l wun Agɑg rɑ̈ɑ̈dh Amɑlek.” Abëën Agɑg yï Sɑmwel e dële okïrrø yi wɑ̈ɑ̈rø, e okööbø ki pyëwe kinni, “Thøø dhøge ledh kidyër!” Kɑ Sɑmwel okööbø kinni, “Pilí mëëg ɑ́gwøøge thwömm, meyí ceg-ɑ lunyø’ gwøg ɑ́ thwöm!” Kɑ Agɑg celle ɑ́ gullì kì bøli Jwøng-ɑ Ácwɑ̈ɑ̈j kì Gilgɑl. Codhe, ɑkedhi Sɑmwel Rɑmɑ̀, kɑ Rɑ̈dh Cɑul kedh-ɑ pɑɑre kì Gibeɑ̀. Rɑ̈dh nuti cigi lidhø yi Sɑmwel, gïti kɑ ɑ́pïïd Sɑmwel yi thøø, De ɑ́bëëd e ywøg-ɑ Cɑul ceth, kɑ Jwøng-ɑ Ácwɑ̈ɑ̈j yije óywöngø kipe kɑ ɑ́gwøge Cɑul ɑ́ rɑ̈ɑ̈dh Isrɑil. Kɑ Sɑmwel köbbi yi Jwøng-ɑ Ácwɑ̈ɑ̈j kinni, “Yï gït-ɑ wɑɑng yï óywöngø kipe Cɑul? Ábɑnyɑ, pɑth ki rɑ̈ɑ̈dh Isrɑil këti. De ɑnɑn dhwöödh, pɑ̈ng tungí ki møøw dhetun, kɑ yï kedhí Betleem, yï jɑl-ɑ cwøl ɑ́ Yesì. Yɑ ɑ́lïdhi kì kelli wɑ̈dde ki ngɑn-ɑ ógöögø ɑ́ rɑ̈dh.” Apëjji Sɑmwel kinni, “Yɑ kedh-ɑ́ɑ̀ dï! Keløg møgɑni ólïngi yi Cɑul, yɑ pɑ nɑ̈g yi en?” Aköbbii yi Jwøng-ɑ Ácwɑ̈ɑ̈j kinni, “Kɑ̈ɑ̈d ki nyɑ wɑdh, kɑ yï kööb kinni yï kedh-ɑ be ngɑ̈ddi Jwøng-ɑ Ácwɑ̈ɑ̈j ki gëëdhi. Kɑ Yesì cwøøl kenyɑni, yï óköbbi yi yɑn ki gïn-ɑ ógwøg yi yïn. Wïj nyel-ɑ ɑ́yieny yi yɑn ɑ́ rɑ̈dh, ókunyi yi yïn ki møw.” Agwøøg gïn-ɑ ɑ́kwøb yi Jwøng-ɑ Ácwɑ̈ɑ̈j yi Sɑmwel. Keny-ɑ ɑ́wɑ̈dhi Sɑmwel Betleem, kɑ jøgdøngi pɑc bï-ɑ yïe, ge óböggø, kɑ ge ópëjjø kinni, “Yï cyɑ̈dh-ɑ tɑrø?” Alöggi Sɑmwel kinni, “Ngee, yɑ cyɑ̈dh-ɑ tɑrø! Yɑ ɑ́bï-ɑ be ngɑ̈ddi Jwøng-ɑ Ácwɑ̈ɑ̈j ki gëëdhi. Kwëru ri wun, kɑ wu bïu kej kwër.” Yesì ɑ́köbbi thyew yi en kinni kwër gen ri gen geki wɑ̈dde, kɑ ge kedhi gen kej kwër. Keny-ɑ ɑ́wɑ̈nhi gen, kɑ Sɑmwel Eliɑb wɑ̈d Yesì lidhe, ɑrume kinni, “Nyel-ɑ cungi kì bøli Jwøng-ɑ Ácwɑ̈ɑ̈j èn, bene nyel-ɑ ɑ́yieny yi en.” De ɑ́köbbi yi Jwøng-ɑ Ácwɑ̈ɑ̈j kinni, “Yï ko nenni bɑ̈re ki myëri dële, ɑ́bɑnyɑ, mɑ́ yɑn, yɑ Jwøng-ɑ Ácwɑ̈ɑ̈j, yɑ nyi nenn-ɑ pyëw.” Codhe, kɑ Yesì wɑ̈de Abinɑdɑb cwøle, kɑ gø muuje Sɑmwel. De Sɑmwel ɑ́löggi kinni, “Pɑth, nuti myegø yi Jwøng-ɑ Ácwɑ̈ɑ̈j thyew.” Kɑ Cɑmɑ̀ kɑ̈ɑ̈l yïe yi Yesì, ɑdøøg Sɑmwel ki kwøb kinni, “Pɑth nuti myegø yi Jwøng-ɑ Ácwɑ̈ɑ̈j thyew.” Kɑ Yesì wɑ̈dde ɑ́bïryew óthumø ki cwöölø yi en, de Sɑmwel ɑ́kyëëd kinni, Jwøng-ɑ Ácwɑ̈ɑ̈j nuti mëggø kì kelli gen. Apyëjii yi Sɑmwel kinni, “Yïí dɑ wɑ̈dd møøgø?” Alöggi Yesì kinni, “Nyel-ɑ thinh nud, de ying-ɑ bɑng dyëg.” Akööb Sɑmwel kinni, “Öd ki ngɑn dwɑɑyii, mɑ́ wɑ pɑ pëggi piny, gïti keny-ɑ ówɑ̈nhe keny.” Codhe, kɑ Yesì öd-ɑ be dwɑɑyii. Bɑ nyelthinh me dële døøj, bøle myëër. Kɑ Jwøng-ɑ Ácwɑ̈ɑ̈j Sɑmwel köbbe kinni, “Bene en ɑnɑn, køny møw wïje.” Akwɑɑny møw yi Sɑmwel, kɑ gø kønye wïj Debïd, kì bøli nyiimen bënn. Kɑ wëyi Jwøk kedh-ɑ ri Debïd kì bøli kenyɑni ceth, kɑ obëëdø kì ree. Codhe, kɑ Sɑmwel døøg-ɑ Rɑmɑ̀. Wëyi Jwøng-ɑ Ácwɑ̈ɑ̈j ɑ́dhwödh kì ri Cɑul, kɑ ree kedhi yi wëyrɑj mɑ ɑ́örii yi Jwøng-ɑ Ácwɑ̈ɑ̈j. Aköbbi Cɑul yi bɑ̈ngge kinni, “Ngɑ̈nyi yi wøn kinni, dɑ wëyrɑj mɑ ɑ́ör rií yi Jwøng-ɑ Ácwɑ̈ɑ̈j kipe kinni, o yï rɑngí. De wiy wøn wuö, o wø kedhi wøn be yɑ̈bbi yïn ki dhɑnhø me ngɑ̈ny thumø ki thom kidøøj. O kenyi bëën wëyɑni, o jɑlɑni nyi thume ki thom, o pyëwí nyi dwööge.” Aköbbi gen yi Cɑul kinni, “Yɑ̈bbu yɑn ki jɑl me ngɑ̈ny thumø ki thom kidøøj, kɑ kɑ̈ɑ̈lu yïɑ.” Aköbbii yi nyel ɑ́kyel kì kelli jøg-ɑ kenyɑni kinni, “Yesì, jɑl kɑɑl Betleem yïe dɑ wɑ̈de me nyi thumø ki thom kidøøj. Bɑ nyel me wïje pel thyew, o bøle myëër. Bɑ jɑl-liny me teg, o ngɑ̈ny kwøb kidøøj. Jwøng-ɑ Ácwɑ̈ɑ̈j ying-ɑ köme.” Codhe, ɑödi Cɑul yï Yesì kinni, “Örí yɑn wɑ̈dí Debïd, nyel-ɑ kwɑ̈yø ki dyëg.” Aör Debïd yï Cɑul yi Yesì, e ókɑ̈ddø ki ónywøg, kí ɑderø köme pɑ̈ng yi ópùn, kí ɑtheb me pɑ̈ng yi møgi oløg. Abëën Debïd yï Cɑul, kɑ ócɑ̈gø ki gwøg. Kɑ gwøge pwøj yi Cɑul ki mendwøng, kɑ gø kwɑnye ɑ́ ngɑn nyi kɑ̈lli jɑmmi linye. Codhe, ɑödi Cɑul yï Yesì ki wöödø kinni, “Wiy Debïd bëëde kì yij gwøge, mɑ́ e odwɑddø yi yɑn.” Kenyi bëën wëyɑni ri Cɑul, kɑ Debïd thom nyi kwɑnye, kɑ Cɑul nyii dönyø, kɑ pyëwe nyii dwöögø. Kɑ liny tyëng Pelistiyɑ̀ ree kiwe, ɑcøng gen ri gen Sökö kì Yeudiyɑ̀, kɑ liny gen pëgg-ɑ Epes Dɑmïm kì kɑɑm Sökö geki Adhekɑ̀. Kɑ Cɑul gudd-ɑ Töör Elɑ̀ geki liny Isrɑil, ge nenn-ɑ nyɑɑg ki tyëng Pelistiyɑ̀. Tyëng Pelistiyɑ̀ liny ɑ́tɑd yi gen kì tuung, kɑ tyëng Isrɑil liny gen tɑd gen kì tung-ɑ kyeelø, ge nenn-ɑ yij tör bënn. Kɑ jɑl megø bï-ɑ wɑ̈g kì kɑɑl Pelistiyɑ̀, jɑlɑni bɑ jɑl Gɑth kì Pelistiyɑ̀, o cwøl ɑ́ Gölyɑth. Bɑ jɑl me bɑ̈ɑ̈r; bɑ̈re bɑ gïn ni mïtïr ɑ́dɑ̈g. Kööre luny en ki ɑ́dhedheg me pege bɑ gïn ni kïllì pyɑ̈r ɑ́bïj wïdɑ́bïryew, o wïje dɑ ɑcudh mɑ ngyënyø dilɑl. Tyelle dɑ ɑ́dhedheg møg-ɑ óbødh ri gen, o yïe dɑ ɑkebïdh mɑ ngyënyø dilɑl kì wïj tøge. Bööl ɑkebïdhe dwøøng nɑ leg. O men-ɑ́ ɑkebïnhɑni peeg cɑrø, bɑ gïn ni kïllì ɑ́bïryew. Nyel-ɑ kɑ̈lli kwöde cyɑ̈dh-ɑ́ɑ̀ bøle Acungi Gölyɑth, kɑ óryeerø e köbb-ɑ yɑɑy Isrɑil kinni, “Wude ɑ ɑ́bëën wun be liny? Yɑ pɑth ki wɑ̈d Pelistiyɑ̀, o wu pɑth ki bɑ̈nggi Cɑul! Yïëëny wun ki dhɑnhø ɑ́kyel, kɑ ör wun be nyɑɑg ki yɑn. Keløg e ócuggø nyɑɑg ki yɑn, kɑ yɑ nɑ̈ge, wø ógöögø ki bɑ̈nggi wun. De keløg ɑ́ en ɑ ónɑ̈g yi yɑn, wu ógöögø wun ɑ́ bɑ̈nggi wøn.” Kɑ okööbø kinni, “Yɑɑy Isrɑil ɑ́lɑr yi yɑn dicyɑ̈ngtïn, ödu yɑn ki ngɑn bï be nyɑɑg ki yɑn.” Keny-ɑ ɑ́lïngi kwøbbi wɑ̈d Pelistiyɑ̀ yi Cɑul geki tyëng Isrɑil, ɑbwøg gen ki mendwøng. Debïd bɑ wɑ̈d Yesì, kì Eprɑtɑ̀, ɑ løg Betleem kì myërri Yeudiyɑ̀. Yesì yïe ɑ́dɑ wɑ̈dde ɑ́bïdɑ̈g kì wɑɑng-ɑ ɑ́jyɑ̈ɑ̈g Cɑul. Yesì ɑ́bëëd ɑ́ jɑldwøng me rum yöø. Wɑ̈dde yɑɑg-ɑ døngø gɑ ɑ́dɑ̈g ɑ́ying-ɑ kej liny kì kelli yɑɑy Cɑul. Nyel-ɑ kɑyø cwøl ɑ́ Eliɑb, o bɑnge cwøl ɑ́ Abinɑdɑb, o dɑ̈ɑ̈g gen cwøl ɑ́ Cɑmɑ̀. Debïd ɑ bɑ kunø. Yesì wɑ̈dde yɑɑg-ɑ døngø gɑ ɑ́dɑ̈g ɑ́kedhi bɑng Cɑul be liny. De Debïd nyi kedh-ɑ kun-ɑ di Cɑul kɑ nyi dwöög-ɑ Betleem kun-ɑ bëëde e kwɑy-ɑ dyëgi wïye. Kɑ wɑ̈d Pelistiyɑ̀ tyëg-ɑ cyɑ̈ng pyɑ̈r ɑ́ngwen, e nyi bï-ɑ wɑ̈g kì mwøl kí böörø, yethi cyɑ̈ng, kɑ nyii cungø kì bøli yɑɑy Isrɑil. Cyɑ̈ng ɑ́kyel, kɑ Yesì wɑ̈de Debïd köbbe kinni, “Kwɑny omøddi byel møg, kí ópùn pyɑ̈rø, kɑ ge muuj nyiimyëw kì kɑɑl. Kɑ̈ɑ̈d ki ɑ́tuggi jïbnɑ̀ pyɑ̈rø, kɑ ge mëggí jɑl-ɑ pyejji liny geki nyiimyëw. Kedh, lidh nyiimyëw mɑ bëëd gen kidï, kɑ yï kɑ̈ní ki ngïji men nyudhi yɑn kinni ge nud bënn ki yödi dëlli gen. Nyiimyëw ying-ɑ kej ɑ́kyel ki Cɑul kí yɑy bëne, kì yij Töör Elɑ̀, ge ceg-ɑ nyïɑ̈ggø ki tyëng Pelistiyɑ̀.” Kɑ Debïd odhwödhø kì bɑ̈ɑ̈rø, kɑ dyëg wiye ki jɑlkwɑ̈yø megø. Akwɑnye gïncɑm, kɑ ókedhø ni kɑ ɑ́köbbii yi Yesì. Keny-ɑ ɑ́wɑ̈dhi Debïd wïj kër, ɑyuude liny e kedh-ɑ be nyɑɑg e okïïwø ki ɑkyeew liny. Tyëng Isrɑil ki tyëng Pelistiyɑ̀ cong-ɑ ri gen gɑ køøm, ge nenn-ɑ nyingi gen. Awiy gïncɑm yi Debïd kì buti jɑl-ɑ cinge nyi cïb gïgcɑmm, kɑ reng-ɑ wïj kër, o yïdde ki nyiimen. Kì bøli kenyɑni e nuti e okööbø ki nyiimen, ɑbëën Gölyɑth wɑ̈d Pelistiyɑ̀ jɑl Gɑth. Aryeere e kømm-ɑ gïgrijjø kì ri Isrɑil. Kɑ kwøbbe lïngi yi Debïd. Keny-ɑ ɑ́liidh Gölyɑth yi tyëng Isrɑil, kɑ ge obwøgø ɑrengi gen, ge okööbø kinni, “Lidhu jɑɑl! Nyi cög e bï-ɑ wɑ̈g be lɑri Isrɑil. Ngɑn-ɑ ónɑ̈gii óthödhi yi rɑ̈dh ki ngyëny mø gïïr. Ngɑn-ɑ ónɑ̈gii ómëgge nyɑre thyew. O gøl gen pɑ cudø ki gwɑ̈j kì Isrɑil.” Kɑ Debïd jɑl-ɑ cungi kì bute pyëje kinni, “Á ngø ɑ køøg ngɑn nɑ̈g wɑ̈d Pelistiyɑ̀ men, kɑ ɑyɑ̈r kɑ̈ɑ̈le wɑ̈g kì kömi Isrɑil? Ree rømmi yi en ɑ́ ngø, eni wɑ̈d Pelistiyɑ̀ men-ɑ nuti ngølø? Ede ɑ lɑrre yɑɑy Jwøng-ɑ Nëënø?” Aköbbi Debïd gïn-ɑ ókøøg jɑl-ɑ ónɑ̈g Gölyɑth. Keny-ɑ ɑ́lïngi Debïd e okööbø ki jøgɑni yi ómen Eliɑb, nyel-ɑ dwøng, ɑrënyi pyëwe ki Debïd. Apyëje Debïd kinni, “Yïde ɑ ɑ́bëën keny? Á men ɑ kor dyëgí kì pɑ̈l? Yï ngɑ̈nyi yi yɑn, yï bɑ ngeti ɑthwøg kí orøg. Yï ɑ́bï keny kɑ per nenni liny yøw?” Apëjji Debïd kinni, “Gïnrɑj ɑ́ ngø ɑ ɑ́gwøgɑ ɑnɑn? Yɑ pɑ cuggi thyew ki kwøb?” Keny-ɑ ɑ́luge ree jøg møøgø, kɑ gï pyëje ki møgɑni, kɑ tyëngɑni nyi løøg-ɑ møg ni møg-ɑ ɑ́tïni ceth. Dɑ ji mɑ ɑ́lïngi møg-ɑ ɑ́kwøb yi Debïd, kɑ Cɑul köbbi gen møgɑni, ɑöde be dwɑɑyi Debïd. Aköbbi Cɑul yi Debïd kinni, “Ko di ngɑn me wɑnge bɑɑr, yɑ ókedhi be nyïɑ̈ggø ki wɑ̈d Pelistiyɑ̀ menɑni.” Alöggi Cɑul kinni, “Yï pɑ cuggi kedhi be nyɑɑg ki ngɑn ni wɑ̈d Pelistiyɑ̀ menɑni. Yï bɑ nyelthinh yøw. Gölyɑth bɑ ngeti nyɑɑg kër-ɑ ɑ́bëëde ɑ́ wøb.” De Cɑul ɑ́köbbi yi Debïd kinni, “Bɑ̈ngí mïdh-ɑ dyëgi wïye. Kenyi bëën ngur, wɑlɑ̀ óthwönh, kɑ ógwɑ̈rrø ki dyel kì kelli dyëg, yɑ nyi reng-ɑ bɑnge. Wø nyii nyïɑ̈ggø ki gøn, kɑ dyel yielɑ kì dhøge, kɑ̀ nyïɑ̈ggi wøn ki en, nyi mɑgɑ’ mɑgø kì ri yɑ̈re, kɑ tøgɑ, kɑ othøø. Bɑ̈ngí ɑ́nɑ̈gi ki ngur, kí óthwönh. O wɑ̈d Pelistiyɑ̀ men-ɑ nuti ngølø èn, óni gen, mɑ́ yɑɑy Jwøng-ɑ Nëënø ɑ́lɑr yi en. Jwøng-ɑ Ácwɑ̈ɑ̈j ngɑn-ɑ ɑ́yiel yɑn, ɑbødhɑ kì dhø ngur geki óthwönh, yɑ óyiele ki wɑ̈d Pelistiyɑ̀ men.” Aköbbi Debïd yi Cɑul kinni, “Kedh, Jwøng-ɑ Ácwɑ̈ɑ̈j yï ókɑ̈l yi en ki tɑrø.” Kɑ Cɑul ɑ́dhedhege kïdhe ri Debïd. Abudhe wïje ki ɑcudh liny mɑ ngyënyø dilɑl, kɑ cinge cïbe ki kwöd. Kɑ Debïd, pili Cɑul ngɑɑbe ree. Kɑ ócyɑ̈dhø e pɑ̈ny-ɑ gïn, kɑ dhɑl yi pegi gen, mɑ́ gïgɑni nuti pɑ̈nyø yi en ki rugø. Aköbbe Cɑul kinni, “Yɑ pɑ cuggi kedhø ki gïg, mɑ́ ge nuti pɑ̈nyi yɑn ki rugø.” Kɑ Debïd lodhe cïbe cinge, kɑ ogwënø ki lel ɑ́bïj, mø lïw kì tyeli nɑm. Akïdhe gïn yij ɑthebe, kí bɑ̈ɑ̈di mee kì cinge, codhe ɑkedhe e pödh-ɑ yï wɑ̈d Pelistiyɑ̀. Kì bøli kenyɑni ceth, kedh wɑ̈d Pelistiyɑ̀ bï-ɑ yï Debïd, e nyel-ɑ kɑ̈lli kwöde ócyɑ̈dhø kì bøle. Keny-ɑ ɑ́liidh Debïd yi Gölyɑth kinni bɑ nyelthinh yøw, mɑ́ gø nenni yi en ɑ́ nyelthinh me bøle myëër. Aköbbe Debïd kinni, “Yï orumø kinni yɑ bɑ gwög, me yïe bëën yi yïn ki lodh?” Agwɑdde Debïd gø lɑme’ lɑmø kinni, o göggi yi jwøge ki gïnrɑj. Kɑ Debïd köbbe kinni, “Bïí yïɑ, o yï mëggɑ winyy-ɑ pɑ̈rri kì mɑl geki lɑ̈yyi pɑ̈l, o yï cɑm yi gen.” Alöggi Debïd kinni, “Yï bï be nyɑɑg ki yɑn, yï kɑ̈ll-ɑ pilø, kí tøng, kí ɑdïmø, de yɑ bï yïí kɑ nyingi Wïlɑ̈bø, Jwøng-ɑ Ácwɑ̈ɑ̈j, Jwøøg yɑ̈yyi Isrɑil, ɑ ɑ́bwöl yi yïn. Jwøng-ɑ Ácwɑ̈ɑ̈j yï cïbe’ cingɑ dicyɑ̈ngtïn, yï nɑ̈gɑ’ nɑ̈gø, wïjí ngulɑ’ wɑ̈g. Yɑɑy Pelistiyɑ̀ ocɑmø yi winyyi mɑl geki lɑ̈yyi pɑ̈l dicyɑ̈ngtïn. O yod yi piny bëne kinni dɑ Jwøk kì Isrɑil. O yod yi teenɑni bëne kinni Jwøng-ɑ Ácwɑ̈ɑ̈j tyɑ̈mø nyi muuje’ muujø, cɑgg cingi dhɑnhø bong pilø, wɑlɑ̀ bong tøng. Mɑ́ linyɑni bɑ liny Jwøng-ɑ Ácwɑ̈ɑ̈j, o wu ócïbe cinggi wøn ceth.” Kɑ Gölyɑth ócyɑ̈ngø e kedh-ɑ yï Debïd, kedh Debïd jwɑn-ɑ rengi yï wɑ̈d Pelistiyɑ̀ menɑni. Akɑ̈ni Debïd wɑ̈g ki lelø kì yij ɑthebe, kɑ gø cïbe yij bɑ̈ɑ̈di, kɑ gø lewe, ɑbɑ̈dde, kɑ lelø pɑ̈dh-ɑ bøli wɑ̈d Pelistiyɑ̀, kɑ lelø ceg-ɑ ì cød kì bøle, ɑpɑ̈ɑ̈dhe yije rum en piny. Debïd wɑ̈d Pelistiyɑ̀ ɑ́tyɑme ki bɑ̈ɑ̈di geki lelø yøw, gø ɑ́gøje kɑ gø nɑ̈ge e bong pilø kì cinge. Codhe, ɑrengi Debïd, kɑ ócungø kì köme. Awöödhe pili Gölyɑth wɑ̈g kì yij bøje, kɑ wïje ngule wɑ̈g, kɑ othøø. Keny-ɑ ɑ́lïdhi tyëng Pelistiyɑ̀ kinni pënyi liny gen ɑ́thøw, ɑrengi gen. Kɑ jø Isrɑil geki jø Yeudiyɑ̀ reng-ɑ bɑng tyëng Pelistiyɑ̀ ge okïïwø, kɑ gï cyeddi gen kì yuu kɑɑl Gɑth gïti dhø döri Ekrön. Kɑ tyëng Pelistiyɑ̀ odöngø kì piny ge thøø kì kö yuu Cɑɑrɑim gïti Gɑth, kí Ekrön. Keny-ɑ ɑ́dwöög tyëng Isrɑil kì be cyeddi tyëng Pelistiyɑ̀, kɑ kɑɑl Pelistiyɑ̀ yɑg yi gen. Akïdhi wïj Gölyɑth Yerusɑlem yi Debïd, de ɑkebïdh Gölyɑth geki pile, kí kwöde ɑ́cïbe yij kemɑ̀ mee. Keny-ɑ ɑ́liidh Debïd yi Cɑul e kedh-ɑ yï Gölyɑth, ɑpyëje Abner jɑng-ɑ pyejji liny kinni, “Abner, wïyi nyelthinh men ceg bëëdø ɑ́ men?” Alöggi Abner kinni, “Kwïj yi yɑn wuö.” Akööb rɑ̈dh kinni, “Kedh pëjjí, mɑ bëëde ɑ́ wɑ̈d men.” Keny-ɑ ɑ́dwöög Debïd kì be nɑ̈gi Gölyɑth, ɑkïdhii yï Cɑul yi Abner, e wïj Gölyɑth nudd gø mïdhe’ mïdhø kì cinge. Apyëjii yi Cɑul kinni, “Nyelthinh, wïyí bɑ men?” Alöggi Debïd kinni, “Yɑ bɑ wɑ̈d bɑ̈ngí Yesì kì Betleem.” Keny-ɑ ɑ́rum Debïd ki kwøb geki Cɑul, ɑgöög Yönɑthɑn ki men pyëwe med ki Debïd, kɑ gø mɑɑre, ni kɑ̀ mɑɑre ree. Kɑ Debïd kwɑny yi Cɑul kì cyɑ̈ngɑni, gø ɑ́mɑ̈ɑ̈ne døøg pɑɑ gen. Aköngi Yönɑthɑn geki Debïd kinni ri gen ómɑɑr yi gen ceth ni mɑɑr-ɑ mɑɑr dhɑnhø ree. Kɑ Yönɑthɑn ógønhdwøng mee lunye wɑ̈g, kɑ gø mëgge Debïd, kyeel kí ɑ́dhedhege geki pile, kí wethe, kí wëni yije. Debïd nyii tyɑ̈mø kì kɑ̈jji lìny-ɑ ber gen nyi örii yi Cɑul. Codhe, ɑgwøøg Debïd yi Cɑul ɑ́ jɑngi yɑy. Amïni pëthi pëjji liny geki tyëng-ɑ kyeelø bënn. Keny-ɑ ɑ́rum wɑ̈d Pelistiyɑ̀ ki nɑ̈gø yi Debïd, ɑdwööge pɑc geki jøg møøgø. Abëën tyëng-ɑ mɑ̈nn wɑ̈g bënn kì yethi kɑ̈ddi Isrɑil, ge bï-ɑ be pɑɑri Rɑ̈dh Cɑul, ge ocöngø, o ge owörø ki wörri medi pëëth, o ge opödø ki bullì, kí thøm. Tyëng-ɑ mɑ̈nn ɑ́cööng ge owörø kinni, “Cɑul ɑ́lïp mø gïïr ɑ́nɑ̈ge. De Debïd ɑ́nɑ̈g-ɑ ɑ́lïp pyɑ̈r.” Arënyi pyëw Cɑul yi wörri tyëng-ɑ mɑ̈nn. Árum kinni tyëng-ɑ mɑ̈nn kømm-ɑ kinni, “Debïd ɑ́nɑ̈g-ɑ ɑ́lïp pyɑ̈r. De gïn-ɑ ɑ́döng, ɑ tøøk kipere, bɑ rɑ̈ɑ̈dhø kete.” Cyɑ̈ngɑni ɑ ɑ́göög Cɑul ki men wɑnge cuul ki Debïd. Dhuki, kɑ wëyrɑj menɑni pönh-ɑ kömi Cɑul e kɑ̈ɑ̈l-ɑ yï Jwøk, kɑ ócɑ̈gø ki myëlø kì gøle, e Debïd othumø ki thom ni kenyi thume yethi cyɑ̈ng, o Cɑul ɑ́bëëd cinge dɑ tøng. Kɑ tøngɑni tïm yi Cɑul, ɑköbbe ree kinni, “Debïd miinɑ’ ri dörø!” Kɑ ókëddø tyel ɑ́ryew, kɑ tøng nyi kyëj yi Debïd. Wëyi Jwøng-ɑ Ácwɑ̈ɑ̈j ɑ́ying-ɑ ri Debïd, de Cɑul ɑ́wiy yi wëyɑni. Codhe, ɑgöög Cɑul ki men böggi yi Debïd. Akɑ̈ɑ̈le Debïd wɑ̈g kì gøle, kɑ gwøg yi en ɑ́ pënyi liny, me pyëjji ki ɑ́lïp. Jø linye ɑ́pyejj-ɑ yi Debïd. Gïg-ɑ nyi gwøg yi Debïd bënn nyi ceg kɑ lwɑ̈ngø yi en, mɑ́ Jwøng-ɑ Ácwɑ̈ɑ̈j ying-ɑ köme. Keny-ɑ ɑ́liidh Debïd yi Cɑul e nyii tyɑ̈mø ceth, ɑgööge e ceg-ɑ böggø yi Debïd ki mendwøng. De Debïd mɑɑr yi tyëng Isrɑil bënn geki tyëng Yeudiyɑ̀, mɑ́ e ɑ́bëëd ɑ́ pënyi liny me teg. Aköbbi Debïd yi Cɑul kinni, “Nyɑrɑ, Merɑb nyɑn-ɑ kɑyø, ómëggɑ yïn. Gïn-ɑ dwɑddi yi yɑn bɑ kinni, bëëd wïjí onëënø, kɑ yï nyɑg liny Jwøng-ɑ Ácwɑ̈ɑ̈j.” Cɑul ɑ́kööb ki pyëwe kinni, “Debïd pɑ nɑ̈g yi yɑn ki cingɑ, wiy e ónɑ̈g yi tyëng Pelistiyɑ̀.” De kwøbbi Cɑul ɑ́løøg yi Debïd kinni, “Yɑn ɑ́ men? O gøl wøn dɑ keje kì Isrɑil, me pere göögɑ ki øri rɑ̈dh?” De keny-ɑ ɑ́wɑ̈nhi bøli keny-ɑ di mëggi Merɑb Debïd, ɑ́yöd e mëgg-ɑ Adriel jɑl Mekölɑ̀ yi Cɑul. Kì bøli kenyɑni Mikɑl nyɑɑr Cɑul ɑ́bëëd Debïd mɑɑr yi en. Keny-ɑ ɑ́köbbi møgɑni Cɑul, ɑmïni pyëwe. Ree ɑ́köbbe kinni, “Ómëggɑ Debïd, o gø nywøme. Codhe, o nyɑnɑni bëëde ɑ́ men-ɑ óthɑbii, o yïdde ki keny nɑ̈gii yi tyëng Pelistiyɑ̀.” Codhe, ɑköbbi Debïd yi Cɑul këti kinni, “Yï ócuggø gwøg ki ørɑ.” Kɑ Cɑul bɑ̈ngge cege kì gød, o ge kööb gen ki Debïd kì cyɑ̈n kinni, “Álidh yi yïn, rɑ̈dh pyëwe med ki yïn, o yï omɑɑrø yi bɑ̈ngge. Rɑ̈dh dwɑdd-ɑ kinni o nyɑre nywøm yi yïn.” Keny-ɑ ɑ́köbbi møgɑni Debïd yi bɑ̈nggi Cɑul, ɑlöggi Debïd kinni, “Wu orumø kinni nywømi nyirɑ̈dh bɑ gïjø me yöd? Yɑ bɑ ngɑn wɑngɑ cɑn, yɑ bong perɑ.” Keny-ɑ ɑ́köbbi Cɑul møg-ɑ ɑ́kwøb yi Debïd, ɑkööbe kinni, “Köbbu Debïd kinni bong kɑ̈ny me dwɑddɑ kì yïe. Gïn-ɑ dwɑddɑ bɑ dëlli wɑ̈thi jɑmmi jø Pelistiyɑ̀ gɑ miyø. Møgɑni bene gen ɑ mëggi yɑn ɑ́ kɑ̈ny, gen ɑ cud yi rɑ̈dh ki kɑ̈jji jie møg-ɑ ɑ́nɑ̈g yi tyëngmɑ̈ɑ̈nø.” (Møgɑni ɑ́gwøg yi Cɑul kɑ per kinni, o Debïd di nɑ̈g yi tyëng Pelistiyɑ̀.) Keny-ɑ ɑ́köbbi Debïd møgɑni yi bɑ̈nggi Cɑul, ɑmïni pyëwe kinni bɑ men göögø ki øri rɑ̈dh. Codhe, ɑkedh Debïd geki jøge, kɑ ge ónɑ̈ggø ki tyëng Pelistiyɑ̀ miy ɑ́ryew. Akɑ̈ɑ̈l dëlli wɑ̈thi jɑmmi gen gɑ miy ɑ́ryew yi Debïd, kɑ ge kwɑɑn bøli rɑ̈dh, o nyɑre muuje. Codhe, kɑ Cɑul nyɑre Mikɑl mëgge Debïd. Áyod yi Cɑul kinni wëyi Jwøng-ɑ Ácwɑ̈ɑ̈j nud kì ri Debïd, o Debïd omɑɑrø yi nyɑre Mikɑl. Kɑ ceg-ɑ pëddø böggi Debïd, kɑ ocögø e Debïd mɑɑn yi en. Jɑgg-ɑ pyejji liny Pelistiyɑ̀ nyi tëdd-ɑ kömi Isrɑil ki liny, kɑ Debïd nyi ceg-ɑ pëddø tyɑ̈mø kibøli pëjji liny Isrɑil møg-ɑ kyeelø. Kɑ Debïd pere yöd e ceg-ɑ tëngø ki mendwøng. Cɑul wɑ̈de Yönɑthɑn geki bɑ̈ngge bënn gï ɑ́köbbe kinni i nɑ̈g gen Debïd, de Yönɑthɑn Debïd mɑɑr yi en ki mendwøng. Kɑ Yönɑthɑn Debïd köbbe kinni, “Wïyɑ Cɑul dwɑdd-ɑ nɑ̈gi yïn, kor rií kì wɑ̈r, dhuki kɑ yï pɑ̈ɑ̈r. Wø ókedhi yij pwönh-ɑ ópɑ̈ni yi yïn wøki wïyɑ. Wø ócungi kì buti keny-ɑ ópɑ̈ni yi yïn. Wø ókööbø kì rií, o møg-ɑ kømme ólonyɑ ki köbbi yïn.” Keny-ɑ ɑ́kööb Yönɑthɑn geki wïye Cɑul, ɑ́köbbe’ gïjø me døøj kì ri Debïd. Yönɑthɑn ɑ́kööb kinni, “Bɑ̈ngí, Debïd ko göggí ki gïnrɑj, mɑ́ e bong gïnrɑj mɑ ɑ́gögge yïn. Gïg mø døngø ɑ́gwøge e køny-ɑ yïn. Debïd wëye ɑ́muuje keny-ɑ ɑ́nɑ̈ge Gölyɑth wɑ̈d Pelistiyɑ̀, kɑ Isrɑil thödhi yi Jwøng-ɑ Ácwɑ̈ɑ̈j ki tegø me tyɑ̈ɑ̈me. Álidh yi yïn kɑ pyëwí ómïnø. Yïde ɑ dwɑddí göggi Debïd ki gïnrɑj? Bɑ dhɑnhø me yïe bɑ̈r. Bong gïjø me pere nɑ̈gii!” Alïngi kwøbbi Yönɑthɑn yi Cɑul kɑ óköngø kinni, “Ki nyingi Jwøng-ɑ Nëënø, Debïd pɑ nɑ̈g!” Codhe, ɑcwøøl Debïd yi Yönɑthɑn kɑ gø köbbe gïg-ɑ ɑ́kwøb bënn. Akɑ̈ɑ̈l Debïd yï Cɑul, ɑdøøg buri Debïd geki Cɑul keny-ɑ ɑ́bëëde cøn. Kɑ liny døøg-ɑ mɑl këti ki Pelistiyɑ̀, ɑkedhi Debïd be liny, kɑ ónyïɑ̈ggø ki tyëng Pelistiyɑ̀. Atyɑme gïn, kɑ gï cyedde. De wëyrɑj ɑ́døøg ki pönhi kömi Cɑul, e kɑ̈ɑ̈l-ɑ yï Jwøng-ɑ Ácwɑ̈ɑ̈j, e Cɑul obëëdø kì gøle ki tønge kì cinge, o Debïd othumø ki thom. Apɑ̈nyi Cɑul ree ki lemi Debïd kinni o gø di miine ri dörø ki tøng. De tøng ɑ́kyëj yi Debïd, ɑpɑ̈dhi tøng ri dörø, ɑbodh Debïd kì wɑ̈rɑni, kɑ órengø. Aöd Cɑul ki ji møg kedhi be tyegi gøl Debïd, kinni o gø di nɑ̈ge kì mwøl. De Mikɑl cï Debïd, Debïd ɑ́köbbe kinni, “Ceg pɑ̈ɑ̈rø, yï kɑn-ɑ rií. Keløg yï pɑ pɑ̈r ɑnɑn kì wɑ̈r, yï othøø kì mwøl.” Amiide Debïd piny gø kɑ̈ɑ̈le’ wɑɑng ɑwɑj, ɑrenge kɑ opɑ̈ɑ̈rø. Codhe, ɑkwɑɑny ngïji dhɑnhø yi Mikɑl, kɑ gø pyële wïj pyën, kɑ yëyyi dyel cïbe wïje, ɑkume gøn ki ógudh. Aöd Cɑul ki ji møg kɑ̈ɑ̈l Debïd ɑ́ ɑmɑg, de Mikɑl ɑ́kööb kinni, “Dële orɑ̈mø.” Adøøge ki ödi be dwɑɑyi Debïd, kɑ okööbø kinni, “Kɑ̈ɑ̈lu en ki pyëne, o nɑ̈gɑ!” Keny-ɑ ɑ́kedhi jøgɑni ød Debïd, kɑ ge yod-ɑ ngïji dhɑnhø, me wïje ócïbø ki yëyyi dyel kì wïj pyën. Aköbbi Mikɑl yi Cɑul kinni, “Yïde ɑ wëëny yɑn ki yuu-ɑ ni men, ɑwëggí ngetimɑ̈ɑ̈nø bodhø?” Aløøg kwøbbi Cɑul yi Mikɑl kinni, “Yɑ ɑ́köbbi yi Debïd kinni i yɑ ónɑ̈g yi en keløg e pɑ wiy yi yɑn o pɑ̈ɑ̈re.” Keny-ɑ ɑ́rum Debïd ki bodhø kì cingi Cɑul, ɑkedhe Rɑmɑ̀ kun-ɑ di Sɑmwel, ɑlwöbbe Sɑmwel gïg-ɑ ɑ́göggii bënn yi Cɑul. Codhe, kɑ Debïd kedh-ɑ Nɑyöth geki Sɑmwel, ɑbëëd gen kì kunɑni. Alïng Cɑul kinni Debïd ying-ɑ Nɑyöth kì Rɑmɑ̀. Codhe, ɑöde ki ji mø mɑgii. De keny-ɑ ɑ́lidh gen jøtöng mø töngø, o bɑ Sɑmwel ɑ jɑɑg gen, ɑkedhi wëyi Jwøk ri jø Cɑul, kɑ ge ócɑ̈gø ki cøng ge óryeerø. Keny-ɑ ɑ́lïng Cɑul, ɑöde ki ji møøgø, kɑ ge pëgg-ɑ be cøng thyew. Acige ör ki jøg møøgø dɑ̈ɑ̈g gen, de gen thyew ge ɑ́pëggi be cøng. Codhe, ɑdhwödh Cɑul kiree, kɑ kedh-ɑ Rɑmɑ̀. Keny-ɑ ɑ́wɑ̈dhe kömi yith kì Seku, ɑpëjje kinni, “Sɑmwel ying-ɑ keny geki Debïd?” Aköbbii kinni ge ying-ɑ Nɑyöth kì Rɑmɑ̀. Akedhe Nɑyöth kì Rɑmɑ̀, kɑ wëyi Jwøk kedh-ɑ ree thyew. Acɑ̈ge ki cøng e óryeerø gïti kɑ ɑ́wɑ̈dhe Nɑyöth. Kɑ ógudhe lunye wɑ̈g, kɑ ócɑ̈gø ki cøng e óryeerø kì bøli Sɑmwel. Codhe, ɑbudde kɑ tyëg-ɑ dicɑ̈ng kí wɑ̈r e buud-ɑ nøw. Bene ɑ bɑnge nyi kööb ji kinni, “Cɑul ɑ́ceg-ɑ gwøg ɑ́ jɑltöng thyew?” Kɑ Debïd opɑ̈ɑ̈rø kì Nɑyöth kì Rɑmɑ̀, kɑ kedh-ɑ yï Yönɑthɑn, ɑpyëje gøn kinni, “Gïnrɑj ɑ́ ngø ɑ ɑ́gwøgɑ? Á orøg mɑ ngø ɑ ɑ́göggɑ wïyí, ɑ pere dwɑdde nɑ̈gi yɑn? Á ngø ɑ ɑ́bɑj yi yɑn kì bøli wïyí?” Alöggi Yönɑthɑn kinni, “Pɑth, yï pɑ thøw! Wïyɑ yɑ nyi köbbe’ köbbø ki kwøbb-ɑ peg kí møg-ɑ yöd bënn, kí gïg-ɑ nyi dwɑdde gwøgø, bong gïn nyi kɑ̈nne yɑn.” Kɑ Debïd óköngø këti, ɑköbbe gøn kinni, “Men-ɑ med pyëwí ki yɑn ngɑ̈nyi yi wïyí, bene ɑ mïdhe møgɑni kì pyëwe gï pɑ köbbe yïn, kipe pyëwí órënyi. Yɑn ɑ köngi èn ki nyingi Jwøng-ɑ Ácwɑ̈ɑ̈j Jwøng-ɑ Nëënø, thøø ɑ́cyɑ̈ngi ki yɑn!” Aköbbi Debïd yi Yönɑthɑn kinni, “Gïn-ɑ dwɑddi yi pyëwí ógöggɑ yïn.” Alöggi Debïd kinni, “Dhuki bɑ cyɑ̈ɑ̈ng kwëër cɑ̈gi run, o yɑ bɑ ɑryej yi rɑ̈dh. De keløg e óbëëd e døøj kì yïí, yɑ ókedh kɑ yɑ ópɑ̈nø kì pɑ̈l gïti böörø, kì cyɑ̈ng ɑ́dɑ̈g. Keløg yɑ óyɑb yi wïyí, köbbí kinni, ‘Yɑ ɑ́ngɑ̈j yi Debïd cem e jwɑn-ɑ pɑɑ gen Betleem, mɑ́ gøl gen bëne ceg-ɑ cugø kipe kwëër cɑ̈gi run.’ Keløg e ókööbø ki kwøb mø døøj, bene yɑ óbødh ki göggø yi en ki gïnrɑj, de keløg e ómɑg yi liny, kɑ yood ceth kinni yɑ dwɑdde’ göggø ki gïnrɑj! Göggí bɑ̈ngí ki gïndøj, mɑ́ wɑ ɑ́köngi kì bøli Jwøng-ɑ Ácwɑ̈ɑ̈j. De keløg yɑ bɑ̈jjø nɑ̈g yɑn ɑ́ yïn! Yɑde ɑ kïdhí yɑn be nɑ̈gø yi wïyí?” Alöggi Yönɑthɑn kinni, “Yï ko rum kì ri gïn ni menɑni! Keløg e ngɑ̈nyi yi yɑn ceth kinni, wïyɑ dwɑdd-ɑ nɑ̈gi yïn, yï pɑ di köbbi yi yɑn?” Codhe, ɑpyëjii yi Debïd kinni, “Á men ɑ yïe ólïngɑ, keløg wïyí kwøbbí óløøge ki rɑ̈ji pyëwe?” Alöggi Yönɑthɑn kinni, “Bïí kedhi wɑ wɑ̈ye yij pɑ̈l.” Codhe, ɑkedh gen gɑ ɑ́ryew. Aköngi Yönɑthɑn kinni, “Ki nyingi Jwøøg Isrɑil, Jwøng-ɑ Ácwɑ̈ɑ̈j, kinni bɑng dhuki e piny nɑ men, gïn-ɑ pyëw wïyɑ ki yïn óyod yi yɑn. Keløg pyëwe bong gïnrɑj ki yïn, yɑ óöni yïí ki wöödø o yï óbëëd yï ngɑ̈ny wøw. De keløg wïyɑ pyëwe dɑ gïnrɑj me dwɑdde göggi yïn, yï ónyudhɑ, kɑ yï örɑ yöö, o yï kedh ki tɑrø. Wiy yɑ ócɑy yi Jwøng-ɑ Ácwɑ̈ɑ̈j ki cɑyi dwøng keløg gïn ni men pɑ göggɑ yïn. Yï ómïdhi yi Jwøng-ɑ Ácwɑ̈ɑ̈j ni kɑ ɑ́mïdhe wïyɑ! Kɑ møg-ɑ ɑ́kwöng kì bøli Jwøng-ɑ Ácwɑ̈ɑ̈j ómïdhí kɑ̈ng-ɑ nëënɑ, de keløg yɑ óthøw, wiy köngɑni cunge kì kömi nyigɑ ceth dhuki megø, yï ko wïyi ki göggi gøl wøn ki gïgdøj cɑgg tyëngmɑ̈ɑ̈nø ki nɑ̈gø yi Jwøng-ɑ Ácwɑ̈ɑ̈j bënn. Wiy møg-ɑ nywɑg yi wɑ ek cög ge pɑ pɑ̈d. Keløg ge ópɑ̈d yi yïn, yï ócɑy yi Jwøng-ɑ Ácwɑ̈ɑ̈j.” Acigi Debïd köbbø yi Yönɑthɑn kinni, könge këti keløg e mɑɑr yi en, mɑ́ Debïd mɑɑr yi Yönɑthɑn ni mɑɑr-ɑ mɑɑre ree. Aköbbi Debïd yi Yönɑthɑn kinni, “Dhuki bɑ cyɑ̈ɑ̈ng kwëër cɑ̈gi dwɑ̈y. Óyod dhuki kinni yï tøøk, mɑ́ kwømí óbëëd e bong dhɑnhø kì wïje. Kì ri dɑ̈ɑ̈g cyɑ̈ng, kɑ yï kedhí keny-ɑ ɑ́pɑ̈nni yi yïn óthyënhø, kɑ yï pëggí buti nyɑ kït. Yɑ ógöjji ri nyɑ kïnɑni ki nywøli weth ɑ́dɑ̈g, e dhɑ̈y yɑ ce lem-ɑ gøn. Orume, nyelthinh óörɑ be yɑ̈ɑ̈bi nywøli weth. Keløg e óköbbi yi yɑn kinni, nywøli weth ying-ɑ tung-ɑ di yïn, kɑ̈ɑ̈l gen, yï ócuggø bëën wɑ̈g kì keny-ɑ ɑ́pɑ̈nní, yï ɑ́bodh. O yɑ ceg-ɑ köngø ki nyingi Jwøng-ɑ Ácwɑ̈ɑ̈j, Jwøng-ɑ Nëënø kinni bong gïn nywɑl yïn. De keløg nyelthinh óköbbɑ kinni, ‘Nywøli weth ying-ɑ tung-ɑcɑ̀,’ kɑ yï dhwöödh kedh, mɑ́ e bɑ Jwøng-ɑ Ácwɑ̈ɑ̈j ɑ ör yïn. De keløg ɑ́ per lwöm-ɑ kɑɑmee, møgɑni ónenni yi Jwøng-ɑ Ácwɑ̈ɑ̈j gïti ɑtheer.” Codhe, ɑpɑ̈ni Debïd kì yij pwödhø. Keny-ɑ ɑ́bëën cyɑ̈ɑ̈ng kwëër cɑ̈gi dwɑ̈y, ɑpëggi rɑ̈dh piny kì kej ryëj. Ápëgg-ɑ keny-ɑ nyi bëëde yethi cyɑ̈ng kì buti dörø. Apëggi Yönɑthɑn piny e røøm ki wïye, kɑ Abner pëgg-ɑ buti Cɑul, de kej Debïd ɑ́döng e wɑ̈dh-ɑ bëëdø. Dicyɑ̈ngɑni Cɑul bong gïn-ɑ ɑ́kwøbe. Mɑ́ e ɑ́rum kinni ódi gïjø megø me mɑ̈ɑ̈n Debïd bëënø, wɑlɑ̀ óbëëd e ywëdhø mɑwɑnø. De dhuki cyɑ̈nggi dwɑ̈y bɑ ɑ́ryew, kej Debïd ɑ́bëëd nudd e wɑ̈dh-ɑ bëëdø. Codhe, ɑpyëëj Yönɑthɑn yi Cɑul kinni, “Ede wɑ̈d Yesì ɑ nuti bëën en ɑ́wɑ̈ɑ̈ kí dicyɑ̈ɑ̈ng?” Alöggi Yönɑthɑn kinni, “Debïd yɑ ɑ́ngɑ̈je cem e kedh-ɑ Betleem, ɑ́kööb kinni, ‘Wiy yɑ kedhɑ, mɑ́ tyëng gøl wøn yï gen dɑ gëëdhi me ngɑl yi gen kì pɑɑ wøn. Kɑ yɑ ceg yi ómïɑ kinni i kedhɑ kunɑni. Wiy yɑ kedhɑ be këëmi wɑddi wøn.’ Bene gïn-ɑ pere bëëde e tøøk kì tɑɑw rɑ̈dh.” Amɑɑg Cɑul yi liny ki menteg ki Yönɑthɑn, ɑkööbe kinni, “Yï rɑj ki pëmø ni meyí! Ngɑ̈nyi yi yɑn kinni, wɑ̈d Yesì ɑ́kɑ̈ɑ̈l yi yïn ɑ́ men yɑ̈ɑ̈r rií wuki meyí. Keløg wɑ̈d Yesì nudd e onëënø kì kömi piny, yï pɑ cuggi gwøg ki rɑ̈dh kinni tek, wɑlɑ̀ lɑwø pɑ yod yi yïn. Kedh ɑnɑn ceth kɑ muuj yɑn, o nɑ̈gɑ!” Kɑ Yönɑthɑn wïye pyëje kinni, “Ede Debïd ɑ dwɑddií nɑ̈gø? Á gïnrɑj mɑ ngø ɑ ɑ́gwøge?” Kɑ tøng cïmmi Yönɑthɑn yi Cɑul, gø dwɑdde’ këlø. Kɑ yod yi Yönɑthɑn kinni wïye dwɑdd-ɑ nɑ̈gi Debïd kidyër. Arënyi pyëw Yönɑthɑn ki mendwøng yi gïn-ɑ ɑ́gwøg yi wïye kipe Debïd. Abɑ̈nye ki cɑm, kɑ odhwödhø kì tɑw. Cyɑ̈ngɑni ɑ́bëëd ɑ́ ryeew cyɑ̈nggi dwɑ̈y. Kì mwøl, ɑmøøl Yönɑthɑn yij pwödhø be yïddø ki Debïd ni møg-ɑ ɑ́nywɑg yi gen. Ge ɑ́kedh kɑ nyel me thiinh, ɑkööbe kinni, “Rengí yɑɑb nywøli weth møg-ɑ ógøjɑ.” Arengi nyelɑni. Agøøj nyɑɑr weth bøle e nudd e órïngø yi Yönɑthɑn. Keny-ɑ ɑ́wɑ̈dhi nyelɑni kun-ɑ ɑ́pɑ̈dhi yi nyɑɑr weth, ɑryeer Yönɑthɑn kinni, “Nyɑɑr weth nudd e ying-ɑ bølí.” Acigi Yönɑthɑn ryeerø kinni, “Pyeew! Jwɑní! Yï ko pëggi be cung.” Apudh nyɑɑr weth yi nyelɑni kɑ gø dögge wɑ̈n. Gïn-ɑ wɑngi yi møgɑni kwïj yi nyelɑni, den-ɑ́ Yönɑthɑn geki Debïd keti gen ɑ ngɑ̈ny wøw. Codhe, ɑmëgge nyelthinh weth geki nywøle ki lodhe geki tøng. Kɑ gø köbbe kinni, “Kedh, døøg kɑɑl.” Keny-ɑ ɑ́kedh nyelthinh, ɑbëën Debïd wɑ̈g kì gøød kït kì tung-ɑ døøg wɑɑng wurlwɑl. Abøødhe ree wïje kuule’ piny tyel ɑ́dɑ̈g, kì bøli Yönɑthɑn. Codhe, kɑ Debïd geki Yönɑthɑn ri gen nummi gen, ɑywöngi gen ryeet, de Debïd ɑ́ti ywøg ki menteg. Aköbbi Debïd yi Yönɑthɑn kinni, “Kedh ki tɑrø. Wɑ ɑ́rum ki köngø ki nyingi Jwøng-ɑ Ácwɑ̈ɑ̈j kinni wɑ ócög wɑ bɑ mɑ̈dhh. Wɑ ɑ́kööb kinni, Jwøng-ɑ Ácwɑ̈ɑ̈j óying kɑɑmee, kí kɑɑm gøl wøn kí gøl wun gïti ɑtheer, mɑ́ wɑ ɑ́rum ki köngø.” Codhe, ɑkedh Debïd, kɑ Yönɑthɑn døøg-ɑ kɑɑl. Akedhi Debïd Nöb yï ókwërø Akimelek. Kɑ Akimelek dhwödh-ɑ be pɑɑri Debïd dële okïrrø, ɑpyëje gøn kinni, “Yïde ɑ cyɑ̈dhí ketí? Ede ɑ bëëd e bong dhɑnhø ɑ́kyel me cyɑ̈dhi ki yïn?” Aløøg møge yi Debïd kinni, “Yɑ ɑ́thödhi ki cigg mø per gen teg yi rɑ̈dh, ɑ́kööb kinni, ‘Ko di dhɑnhø ɑ́kyel me wëggí lïngi møgɑni.’ Jøgɑ ɑ́rum ki köbbø yi yɑn ki keny-ɑ óyïddi wøn ki gen. Á gïncɑm mɑ ngø ɑ nud kì yïí ɑnɑn? Nëngí yɑn ki ópùn ɑ́bïj wɑlɑ̀ gïn-ɑ cuggi yodø yi yïn.” Aköbbi Debïd yi ókwërø kinni, “Yïɑ bong ópùn møg nyi wɑ̈dhi cɑmø yøw, de møg-ɑ nud kì yïɑ bɑ mø kwër. Ócuggø cɑmø yi wuki jøgí, keløg e bong mɑ̈nn møg-ɑ ócer niin yi wun.” Alöggi Debïd kinni, “Kidyër ceth, wø bɑ ɑkerø ki kedhi ri tyëng-ɑ mɑ̈nn kenyi bëëd e dɑ keny kedhi yi wøn. Jøgɑni dhïw dicyɑ̈ngtïn geki jɑmmi gen bënn.” Codhe, ɑnëngi Debïd yi ókwërø kì ri ópùni kwër møg-ɑ bøli Jwøng-ɑ Ácwɑ̈ɑ̈j, mɑ́ e bong møøgø mø nud kì kenyɑni. Yethi cyɑ̈ng ópùni kwër nyi ceg kɑ wilø ki ópùn mø lëëdh. Dicyɑ̈ngɑni, bɑ̈ng Cɑul ɑ́kyel ɑ́bëëd e nud kì kunɑni. Ábëëd ɑ́ ɑmɑg kì bøli Jwøng-ɑ Ácwɑ̈ɑ̈j. Cwøl ɑ́ Doeg jɑl Edöm, o bɑ jɑngi jøkwɑ̈yø mø Cɑul. Apyëëj Akimelek yi Debïd kinni, “Yïí dɑ tøng wɑlɑ̀ pilø kì keny? Yɑ ɑ́ceg kɑ jwɑɑn yöö yi rɑ̈dh, bene ɑ bɑnge ɑ́dhwönhɑ ki cinggɑ.” Alöggi Akimelek kinni, “Pili Gölyɑth wɑ̈d Pelistiyɑ̀ men-ɑ ɑ́nɑ̈g yi yïn kì Töör Elɑ̀ nud. Bɑ ɑbɑ̈j ki ógødh kì thɑ pɑri kwër. Ócuggø kwɑnyø yi yïn ke dwɑddií. Bong pilø megø kì keny, den-ɑ́ en kete ɑ nud.” Akööb Debïd kinni, “Bong pilø me pɑ̈r ki en. Mëggí yɑn.” Dicyɑ̈ngɑni ɑ ɑ́dhwödh Debïd e lɑ̈ɑ̈w-ɑ ree ki Cɑul. Kɑ kedh-ɑ yï Akïc rɑ̈ɑ̈dh Gɑth. Aköbbi Akïc yi bɑ̈ngge kinni, “Pɑth ki Debïd, rɑ̈ɑ̈dh pödhø èn! En ɑ nyinge nyi wej kinni, ‘Cɑul ɑ́nɑ̈g-ɑ ɑ́lïp ɑ́kyëllì, de Debïd ɑ́nɑ̈g-ɑ ɑ́lïp pyɑ̈r.’ ” Kwøbbɑni ɑ́lïngi yi Debïd kɑ obwøgø yi Akïc rɑ̈ɑ̈dh Gɑth. Codhe, kɑ Debïd ree gwøge ni dhëg kì bøli Akïc geki bɑ̈ngge. Kɑ̈ng-ɑ ɑ́bëëde kì bute, ree ɑ́gwøøge e nɑ ngɑn wïje di ɑ́nɑ̈gø, kɑ tyelle pwöde ki piny kì dhø ød, e lɑɑwe kɑ̈ɑ̈w-ɑ piny, kɑ ge møll-ɑ ri yëyyi tïge. Kɑ Akïc bɑ̈ngge köbbe kinni, “Lidhu jɑlɑni! Wïje dɑ ɑ́nɑ̈gø! Ede ɑ muuj wun en yɑn? Butɑ dɑ tyëngɑnɑ̈gø mø gïïr, ede ɑ ɑ́kɑ̈ɑ̈lu en be judi yɑn? Bï-ɑ be bëëdø kì gølɑ?” Apɑ̈r Debïd kì Gɑth kɑ kedh-ɑ yij órøngi kït kì buti kɑɑl Adulɑm. Keny-ɑ ɑ́lïngi pere yi nyiimen geki wɑdde møøgø, kinni nud kì kunɑni, ɑkedhi gen be lidhii. Tyëng-ɑ ɑ́ying yij orɑng bënn, kí møg-ɑ nyingi gen guud, kí møg-ɑ cwɑggi gen di körr geki møg-ɑ pëthi gen rɑ̈mø, ri gen ɑ́cøng gen bɑnge, kɑ ogöögø ɑ́ pënyi gen. Kɑ kwɑnni gen ogöögø ki gïn ni miy ɑ́ngwen. Kɑ Debïd kedh-ɑ Midhpɑ̀ kì Moɑb, ɑköbbe rɑ̈ɑ̈dh Moɑb kinni, “Wiy wïyɑ geki meyɑ bï gen be bëëdø kì butí gïti keny-ɑ óyodɑ gïn-ɑ dwɑddi göggi yɑn yi Jwøk.” Codhe, kɑ Debïd wïye geki meye wiye kì buti rɑ̈ɑ̈dh Moɑb. Kɑ ge obëëdø kì kunɑni kì kɑɑm-ɑ ɑ́bëëd Debïd e ópɑ̈nnø kì yij órøngi kït. Kɑ Gɑd jɑltöng bï-ɑ yï Debïd ɑkööbe kinni, “Yï ko bëëd kì keny, kedhí piny Yeudɑ̀.” Codhe, ɑdhwödh Debïd kɑ kedh-ɑ yij thïm Éreth. Cɑul ɑ́ying-ɑ Gibeɑ̀ keny-ɑ ɑ́lïnge kinni, Debïd geki jøg-ɑ cyɑ̈dhi ki en keny-ɑ bëëd gen óyodø. Álïng e bëëd ɑ thɑ yɑdh kì kwøømi Gibeɑ̀ e tønge ying-ɑ cinge, o jøge ócungø kì bute. Aköbbi gen yi Cɑul kinni, “Lïng wun, wun ɑ jø gøl Ben Yɑmïn! Wu orumø kinni wu ónëngi yi wɑ̈d Yesì ki pwödh wu bënn, kɑ wu nënge ki bɑ̈ggi oløg? Wu ógwøg yi Debïd wun ɑ́ pëjji liny møg pyejji jøliny ɑ́lïp? Wude ɑ buudh wun yɑn e bong dhɑnhø ɑ́kyel me köbbi yɑn kinni, wɑ̈dɑ dhøggi gen nywɑɑg gen geki wɑ̈d Yesì. Kejɑ bong gøn kì yï wun? Bong dhɑnhø ɑ́kyel me köbbi yɑn kinni, bɑ̈ngɑ óköbbø yi wɑ̈dɑ i liibe yɑn piny?” Doeg jɑl Edöm ɑ́bëëd e nud kì kenyɑni e ócungø kì kelli pëjji liny. Akööbe kinni, “Wɑ̈d Yesì ɑ́lidhɑ. Ábï yï Akimelek wɑ̈d Akitub kì Nöb. Kɑ Jwøng-ɑ Ácwɑ̈ɑ̈j kwɑjji yi Akimelek kiper Debïd, kɑ gø nënge ki gïncɑm, ɑmëgge gøn pili Gölyɑth jɑl Pelistiyɑ̀.” Codhe, ɑöd rɑ̈dh kinni, i dwɑɑy ókwërø Akimelek wɑ̈d Akitub geki tyëng gøl gen bënn møg-ɑ bɑ ókwër kì Nöb. Kɑ ge bï-ɑ yï rɑ̈dh bënn. Aköbbi Akimelek yi Cɑul kinni, “Lïng Akimelek!” Alöggi Akimelek kinni, “Yɑ olïngø wuö.” Akööb Cɑul kinni, “Wude ɑ lød wun yɑn kì piny wuki Debïd? Ede ɑ nëngí ki ópun ki pilø, kɑ Jwøk kwɑjjí kipere? O ɑnɑn Debïd ree ɑ́luge yɑn e oyɑ̈bø ki kej wɑng men nɑ̈ge yɑn.” Alöggi Akimelek kinni, “Á men ɑ pɑ̈r ki Debïd kì kelli bɑ̈nggí? Bɑ dhɑnhø me døj, o bɑ øri rɑ̈dh. Bɑ jɑngi tyëng-ɑ kor yïn. Ceg kɑ wørø yi ji bënn kì gøldwøng. Yɑ ɑ́cɑ̈g ɑ dicyɑ̈ɑ̈ng ki kwɑjji Jwøk kiper Debïd? Yï ko töngi riɑ wuö, wɑlɑ̀ ri dhɑnhø ɑ́kyel kì kelli tyëng gøl wøn. Yïɑ bɑ̈r, bong gïn ngɑ̈nyɑ kì ri gïg-ɑ göögø.” De rɑ̈dh ɑ́kööb kinni, “Akimelek, wu ceg-ɑ thøø wuki tyëng gøl wun bënn.” Codhe, ɑköbbe jøg-ɑ cungi kì bute kinni, “Kedh wun, nɑ̈g wun ókwërri Jwøng-ɑ Ácwɑ̈ɑ̈j, mɑ́ ge ying-ɑ tuung Debïd. Ngɑ̈nyi yi gen kinni, bɑ men pɑ̈r, o ge ɑ́bɑ̈nyi köbbi yɑn.” De pëjji liny rɑ̈dh ɑ́bɑ̈nyi nɑ̈gi ókwër. Codhe, ɑköbbi Doeg yi rɑ̈dh kinni, “Kedh kɑ ókwër nɑ̈ɑ̈g.” Codhe, ɑkedh Doeg jɑl Edöm, kɑ ókwër nɑ̈ge. Ánɑ̈g-ɑ jøg-ɑ cwøw pyɑ̈r ɑ́bïdɑ̈g wïdɑ́bïj, gen ɑ møg-ɑ rugø ki pɑ̈rri kwër. Kɑ Nöb kɑɑl ókwër nɑ̈g yi Cɑul, jøg-ɑ cwøw, kí tyëng-ɑ mɑ̈nn, kí othønhø, kí ɑderr, kí dyëg, kí dhög, gï ɑ́nɑ̈ge bënn. Abiyɑthɑr wɑ̈d Akimelek ɑ́bodh. Akedhe kɑ órëbø ki Debïd. Aköbbi Debïd yi Abiyɑthɑr ki kër-ɑ ɑ́nɑ̈ɑ̈g ókwërri Nöb yi Cɑul. Codhe, ɑköbbi Abiyɑthɑr yi Debïd kinni, “Doeg jɑl Edöm ɑ́bëëd e nud kì Nöb dicyɑ̈ngɑni, o yɑ ɑ́bëëd yɑ ngɑ̈ny wøw kinni Cɑul óköbbi yi en ceth. De bɑ perɑ ɑ ɑ́nɑ̈ɑ̈g tyëng gøl wun bënn yi Cɑul. Bëëd kì butɑ. Yï ko böggi. Cɑul dwɑdd-ɑ nɑ̈gi wɑ ryeet. De yï óbødh ke bëëd kì kelli wøn.” Kɑ Debïd olïngø kinni, i tyëng Pelistiyɑ̀ nyi bï-ɑ kɑɑl Keilɑ̀ be mɑ̈nyø, o ge ceg-ɑ kɑ̈b ki byel kì wɑ̈thi pëmmì. Apyëëj Jwøng-ɑ Ácwɑ̈ɑ̈j yi Debïd kinni, “Kedhɑ be nyïɑ̈ggø ki tyëng Pelistiyɑ̀?” Aløøg møge yi Jwøng-ɑ Ácwɑ̈ɑ̈j kinni, “Ngee kedh. Pɑ̈ɑ̈r kömi gen, kɑ tyëng Keilɑ̀ døm.” De Debïd ɑ́köbbi yi jøge kinni, “Wɑ óböggø kì Yeudiyɑ̀ keny, óbëëdø kidï keløg wɑ kedh-ɑ Keilɑ̀ kun-ɑ di liny Pelistiyɑ̀!” Acigi Jwøng-ɑ Ácwɑ̈ɑ̈j pyëjø yi Debïd, kɑ Jwøng-ɑ Ácwɑ̈ɑ̈j ólöggø kinni, “Kedh wun, pɑ̈ɑ̈r wun kömi gen kì Keilɑ̀. Ge ócïbɑ cinggi wun.” Codhe, ɑkedhi Debïd Keilɑ̀ geki jøge, kɑ ge ónyïɑ̈ggø ki tyëng Pelistiyɑ̀, kɑ dhögi gen kwɑny yi Debïd, tyëng Pelistiyɑ̀ ɑ́tyɑm yi Debïd, kɑ tyëng Keilɑ̀ døme. Keny-ɑ ɑ́bëën Abiyɑthɑr wɑ̈d Akimelek yï Debïd kì Keilɑ̀, ɑ́bï e ókɑ̈ddø ki pɑri kwër. Kɑ Cɑul köbbi kinni, i Debïd kedhi Keilɑ̀, ɑkööbe kinni, “Ácïb cingɑ yi Jwøk. Debïd ree ɑ́mɑge kete, ɑ́kedhi kɑɑl me bɑ ɑger ki dörø, e ócyëgø ki win.” Codhe, kɑ Cɑul linye cwøle kej ɑ́kyel, ɑgwir gen ri gen kipe kinni o ge kedhi gen Keilɑ̀ be pɑ̈ɑ̈r kömi Debïd geki jøge. Kɑ yod yi Debïd kinni Cɑul dwɑdd-ɑ pɑ̈ɑ̈r köme, ɑköbbe ókwërø Abiyɑthɑr kinni, “Kɑ̈ɑ̈l pɑri kwër keny.” Akwɑ̈jji Debïd kinni, “Yïn ɑ Jwøøg Isrɑil, Jwøng-ɑ Ácwɑ̈ɑ̈j, yɑ ɑ́lïng kinni i Cɑul dwɑdd-ɑ bëën be rënyi Keilɑ̀ ki göjɑ. Yɑ ódi mëggi Cɑul yi tyëng Keilɑ̀? Cɑul óbï kidyër, ni kɑ ɑ́lïngɑ en? Yïn ɑ Jwøøg Isrɑil, Jwøng-ɑ Ácwɑ̈ɑ̈j, yɑ kwɑjj-ɑ yïn, løøg møgɑ!” Alöggi Jwøng-ɑ Ácwɑ̈ɑ̈j kinni, “Cɑul óbï.” Kɑ Debïd cig-ɑ pëjjø kinni, “De tyëng Keilɑ̀ wø ódi mëggi Cɑul yi gen wøki jøgɑ?” Alöggi Jwøng-ɑ Ácwɑ̈ɑ̈j kinni, “Wu ómuuj yi gen!” Codhe, ɑdhwödh Debïd kì Keilɑ̀ geki jøge gɑ miy ɑ́bïkyel, kɑ ge ócyɑ̈dhø ge cɑngg-ɑ piny. Keny-ɑ ɑ́yodii yi Cɑul kinni Debïd dhwödhø kì Keilɑ̀, ɑcöge e nuti kedhi kunɑni. Apɑ̈nni Debïd kì yethi órøggi kïttì kì kelli kïttì kì pɑ̈ɑ̈l Dhïp. Kɑ Cɑul pëgg-ɑ be yɑbi Debïd, de nuti cïb cinge yi Jwøk. Kɑ̈ng-ɑ ɑ́bëëd Debïd ying-ɑ Örec kì yij pɑ̈ɑ̈l Dhïp, ɑyode gøn kinni Cɑul bï-ɑ be nɑ̈gii, kɑ obwøgø. De Yönɑthɑn wɑ̈d Cɑul ɑ́kedhi yï Debïd, ɑcïïje gøn kinni, yïëye kidøøj ki Jwøk. Aköbbii yi Yönɑthɑn kinni, “Yï ko böggi, mɑ́ wïyɑ yï ko lwɑ̈ng yi en ki nɑ̈gø. Yï ógöögø rɑ̈ɑ̈dh Isrɑil, o yɑ óbëëdø yɑ bɑ ókwømí. Cɑgg ɑ́ wïyɑ møgɑni ngɑ̈nye.” Aköngi gen gɑ ɑ́ryew kì bøli Jwøng-ɑ Ácwɑ̈ɑ̈j kinni ge ócög gɑ mɑ̈dhh. Codhe, ɑkedhi Yönɑthɑn pɑc, kɑ Debïd odöngø e obëëdø kì Örec. Akedhi tyëng Dhïp yï Cɑul kì Gebɑ̀, kɑ gø köbbi gen kinni, “Debïd ópɑ̈nnø kì pödhi wøn. Pɑ̈n-ɑ́ɑ̀ Örec, kì wïj Kïti Akïlɑ̀ kì kuni wɑɑng wurlwɑl kì Yecimön. Anɑn yïn ɑ rɑ̈ɑ̈dh wøn, ngɑ̈nyi yi wøn kinni yï dwɑdd-ɑ mɑgi Debïd ki mendwøng, bïí myërri wøn, ówëggi wøn mɑgø yi yïn!” Alöggi Cɑul kinni, “Wu ógyëdh yi Jwøng-ɑ Ácwɑ̈ɑ̈j kipe køny-ɑ køny wun yɑn ɑnɑn. Kedh wun, kɑ keje yɑb wun kidøøj. Yɑbu keny-ɑ bëëde kɑ nenni wun kidøøj. Yɑ ɑ́lïng kinni i bɑ wëny. Yod wun kɑ̈jj-ɑ pɑ̈nne bënn, kɑ wu dwöög wun be nyudhi yɑn møgɑni bënn. O yɑ ókedhɑ ki wun. Keløg Debïd nud kì tungɑni ódwɑr yi yɑn kì yethi myërri Yeudiyɑ̀ bënn.” Codhe, ɑkedhi gen Dhïp ge møøl-ɑ bøli Cɑul. Debïd geki jøge, ɑ́ying-ɑ yij pɑ̈ɑ̈l Mɑon, kì kuni wɑɑng wurlwɑl kì Yecimön. Akedhi Cɑul geki jøge be yɑbi Debïd. De per gen ólïngø yi Debïd, ɑkedhe cyɑ̈n wïj kït, kɑ obëëdø kì yij pɑ̈ɑ̈l Mɑon. Keny-ɑ ɑ́lïng Cɑul, ɑløge bɑng Debïd yij pɑ̈ɑ̈l Mɑon. Cɑul cyɑ̈dh-ɑ́ɑ̀ kö kït kì tuung, o Debïd geki jøge cyɑ̈dh-ɑ́ɑ̀ tung-ɑ kyeelø, ge ójwɑnø, ge dwɑdd-ɑ yömi Cɑul, o Cɑul geki jøge dwɑdd-ɑ gengi Debïd, o gø mɑge geki jøge. Kenyɑni ɑ ɑ́bëën jɑl megø, kɑ Cɑul köbbe kinni, “Bïí jwɑn wɑ døøgø! Tyëng Pelistiyɑ̀ ɑ́pɑ̈ɑ̈r kömi pödhee!” Codhe, ɑwïyi Cɑul ki ngwej kì bɑng Debïd, ɑkedhe be nyïɑ̈ggø kì tyëng Pelistiyɑ̀. Bene en ɑ cwølli kenyɑni ɑ́ Kïti Dɑ̈ngø. Debïd ɑ́dhwödh thyew kì yij pɑ̈ɑ̈l Mɑon, kɑ kedh-ɑ be pɑ̈nø kì Ein Gedì. Keny-ɑ ɑ́dwöög Cɑul kì be liny ki tyëng Pelistiyɑ̀, ɑköbbii kinni, “Debïd ying-ɑ yij pɑ̈l kì Ein Gedì.” Codhe, ɑyïënye kì kelli jø Isrɑil bënn ki yɑɑg-ɑ teg gɑ ɑ́lïp ɑ́dɑ̈g. Kɑ ge kedh-ɑ be yɑbi Debïd, kì buti kïn-ɑ cwøl ɑ́ Dyëgi Pɑ̈l. Abëën Cɑul kyeel dyëg ki tøg yöö. Kenyɑni dɑ órøngi kït, kɑ kedh-ɑ yij órøngi kïnɑni be mɑɑgi ree piny, o Debïd pɑ̈n-ɑ yiny-ɑ cyɑ̈n geki jøge. Aköbbi Debïd yi jøgɑni kinni, “Dicyɑ̈ɑ̈ng bɑ cyɑ̈ng-ɑ ɑ́kwøb yi Jwøng-ɑ Ácwɑ̈ɑ̈j kinni, ‘Ngetimɑ̈ɑ̈nø ókɑ̈ɑ̈lɑ, kɑ cïbɑ cingí. Gwøg gïn-ɑ dwɑddí göggii.’ ” Codhe, ɑmølli Debïd kun-ɑ di Cɑul mɑ̈ɑ̈dh, kɑ ngud-ɑ wɑ̈g ki nyɑ keny me thiinh kì ri ógødh Cɑul, e Cɑul kwïj wøw. Kì cyɑ̈n, ɑywöngi yij Debïd kipe kɑ ɑ́ngude wɑ̈g kì ri ógødh Cɑul. Aköbbe jøge kinni, “Bɑ ɑkerø yi Jwøng-ɑ Ácwɑ̈ɑ̈j, gïn ni men pɑ göggɑ rɑ̈dhɑ! Rønyi Cɑul ɑ́ rɑ̈dh ɑ́kɑ̈ɑ̈l-ɑ yï Jwøng-ɑ Ácwɑ̈ɑ̈j. Cingɑ pɑ tïnggɑ en, e ɑ́røny-ɑ yi Jwøng-ɑ Ácwɑ̈ɑ̈j.” Kɑ Debïd jøge kyëdde kinni ge ko pɑ̈ɑ̈r kömi Cɑul. Adhwödhe kì kenyɑni kɑ ókedhø ki yuue. Keny-ɑ ɑ́bëën Debïd wɑ̈g kì yij órøngi kït, ɑryeere e cwøl ɑ́ Cɑul kinni, “Wuö rɑ̈dh!” Alïïdh Cɑul ngɑ̈je, kɑ Debïd ree bøødhe wïje kuule’ piny, e mɑl-ɑ rɑ̈dh. Aköbbe Cɑul kinni, “Yïde ɑ nyi lïngí kwøbbi tyëng-ɑ nyi köbbi yïn kinni, ‘Debïd dwɑdd-ɑ nɑ̈gi yïn?’ Álidh yi yïn kirií dicyɑ̈ngtïn kì yij órøngi kït keny-ɑ ɑ́cïb yïn cingɑ yi Jwøng-ɑ Ácwɑ̈ɑ̈j. Yɑ ɑ́köbbi yi jøgɑ kinni i nɑ̈gɑ yïn, dɑ́ yɑn ɑ pyëwɑ ɑ́lɑ̈ɑ̈m. Akööbɑ kinni, wɑ̈ɑ pɑ cuggi nɑ̈gø yi yɑn, mɑ́ Jwøng-ɑ Ácwɑ̈ɑ̈j ɑ ɑ́rønyii ɑ́ rɑ̈dh. Lidh, budi ógødhí men-ɑ cingɑ èn, wïyø! Ángulɑ’ wɑ̈g kì tuung ógødhí, de yɑ nuti dwɑddi nɑ̈gi yïn. Wiy Jwøng-ɑ Ácwɑ̈ɑ̈j, gïn-ɑ kɑɑmee ólidh en, ying-ɑ́ men kì kellee ɑ bɑ̈jjø. Kɑ wiy yï ócɑye kipe gïnrɑj men-ɑ ɑ́göggí yɑn! De yïɑ bɑ̈r ki yïn. Dɑ kwøb mø kɑ̈gi gen dööng mø nyi kööbø kinni, ‘Gïgrijjø nyi kɑ̈ɑ̈l-ɑ yi ji-ɑ rijjø.’ De yɑn, bong gïnrɑj kì yïɑ ki yïn. Lidh gïn-ɑ dwɑddi nɑ̈gø yi rɑ̈ɑ̈dh Isrɑil! Á bɑng men ɑ rïngi yi rɑ̈ɑ̈dh Isrɑil? Yï rïng-ɑ́ɑ̀ bɑng gwöng thøø, wɑlɑ̀ bɑng cwɑrø yøw? Gïn-ɑ kɑɑmee ólidh-ɑ yi Jwøng-ɑ Ácwɑ̈ɑ̈j, o gïn-ɑ kɑɑmee óngøl-ɑ yi en. Yɑ óyiel yi en kì cingí.” Keny-ɑ ɑ́rum Debïd ki kwøb, ɑpëjji Cɑul kinni, “Bɑ yïn ceth kidyër ɑ kööbø, Debïd wɑ̈dɑ?” Kɑ ceg-ɑ ì túl ki ywøg. Akööbe kinni, “Yï kømm-ɑ dyër, yɑ ɑ́bɑ̈jji. Yï døøj, de yï ɑ́göggɑ ki gïnrɑj. Yɑ ɑ́nyudhi yi yïn dicyɑ̈ngtïn ki gïgdøj møg-ɑ ɑ́göggí yɑn. Yɑ ɑ́rum ki cïb cingí yi Jwøng-ɑ Ácwɑ̈ɑ̈j, de yɑ nuti nɑ̈gø yi yïn. Á men ɑ ɑ́yod dhɑnhø men-ɑ mɑ̈n ki en, kɑ gø wiye e bong gïn gögge gøn? Yï ókøøg yi Jwøng-ɑ Ácwɑ̈ɑ̈j kipe gïndøj men-ɑ ɑ́göggí yɑn dicyɑ̈ɑ̈ng! Áyod yi yɑn ɑnɑn kinni yï ójyɑ̈ɑ̈gø. Kɑ pödhi Isrɑil ódönyø kì rií. Köngí ki nyingi Jwøng-ɑ Ácwɑ̈ɑ̈j, ɑnɑn kì bølɑ, kinni kwɑrrɑ koo nɑ̈g yi yïn, o nyingɑ pɑ rɑ̈ɑ̈j yi yïn wɑ̈g kì gøl wïyɑ.” Codhe, ɑköngi Debïd kì bøli Cɑul. Kɑ Cɑul døøg-ɑ pɑc, kɑ Debïd geki jøge, kedh-ɑ yij órøngi kït kej gen. Kɑ Sɑmwel othøø, ɑbëën tyëng Isrɑil bënn be ywøgii. Kɑ kony kì Rɑmɑ̀, pɑɑre. Kɑ Debïd dɑ̈g-ɑ yij pɑ̈ɑ̈l Pɑrɑn. Kɑ̈ng-ɑ ɑ́ying Debïd yij pɑ̈l, ɑlïnge kinni Nɑbɑl ceg-ɑ nyɑr ki yëyyi dyëge, dyëg-ɑ römm. Codhe, ɑöde ki yɑɑg-ɑ wøbb pyɑ̈rø, kɑ gï köbbe kinni, “Kedhu yï Nɑbɑl kì Kɑrmel, kɑ mɑ̈dh wun. Köbbu en kinni Debïd okööbø kinni, ‘Yï óbëëdø ki mër, gølí óbëëdø ki mër, jɑmm-ɑ yïí bënn óbëëdø ki mër! Yɑ ɑ́lïng kinni, i yï ceg-ɑ nyɑr ki yëyyi dyëgí, jøkwɑ̈yø møgí ɑ́cer-ɑ ying buti wøn, ge nuti göggø yi wøn ki gïnrɑj. Bong gïjø ɑ́kyel mɑ ɑ́lɑ̈ɑ̈ny kì yï gen keny-ɑ ɑ́ying gen Kɑrmel! Pyëj yɑɑg-ɑ wøbbí, yï óköbbi yi gen. Wø bï-ɑ cyɑ̈ɑ̈ng medi pëëth. Yɑ kwɑjj-ɑ yïn, muuj ki gïndøj men-ɑ cuggi mëggi wøn ɑ bɑ̈nggí, kí wɑ̈dí Debïd.’ ” Kɑ Nɑbɑl köbbi wöönɑni yi jø Debïd keny-ɑ ɑ́wɑ̈dhi gen. Aløøg kwøbbi gen yi Nɑbɑl kinni, “Debïd bɑ men? Wɑ̈d Yesì bɑ men cøn? Pere nuti pɑ̈nyø lïngø yi yɑn! Pödhø ɑ́pɑ̈ng yi bɑ̈ngg møg-ɑ rengi pɑ̈l kì cinggi wëëg gen yethi cyɑ̈ng møg. Yïɑ dɑ pï kí ópùn, o yïɑ dɑ rïngø mi gïn-ɑ ɑ́ngɑ̈llɑ jøg-ɑ nyɑr yëyyi dyëgɑ. De ge pɑ mëggɑ ji mø kwïj yi yɑn.” Adøøg jø Debïd yïe, kɑ Debïd köbbi gen møg-ɑ ɑ́kwøb bënn yi Nɑbɑl. Codhe, kɑ Debïd jøge köbbe kinni, “Kwɑnyu pilli wun!” Kɑ pilli gen cïb gen cinggi gen, kɑ Debïd thyew pile kwɑnye. Akedh Debïd ki jøg mø kwɑnni gen wɑ̈dhi ri miy ɑ́ngwen, kɑ miy ɑ́ryew odöngø ge kor-ɑ jɑmmì. Aköbbi Abigɑil, cï Nɑbɑl yi jɑl ɑ́kyel kì kelli bɑ̈nggi gen kinni, “Yï ɑ́lïng cøn, kinni i Debïd jøge ör en kinni mɑ̈dh gen wïyee, de ge ɑ́gwɑddi yi Nɑbɑl? Jøgɑni wø ɑ́køny yi gen keny-ɑ ɑ́ying wøn wɑg. Bong gïnrɑj mɑ ɑ́göggi wøn yi gen. Bong gïjø mɑ ɑ́kɑb yi gen kì cyɑ̈ngg-ɑ ɑ́bëëd wøn kì buti gen. Wø ɑ́kor yi gen kì dicɑ̈ng kì wɑ̈r, kɑ ɑ́bëëd wøn kì buti gen, o dyëgee okorrø yi gen. Rum kidøøj ki gïn-ɑ cuggi göggi wïyee geki gøle bëne. Nɑbɑl bɑ dhɑnhø me rɑɑj, bong ngɑn kwøbbe cuggi lïngø yi en.” Kɑ Abigɑil ókɑ̈bbø ki ópùn miy ɑ́ryew, kí puggi møgi oløg ɑ́ryew, kí rïnggi dyëg ɑ́bïj mø bɑ ɑbul, kí byel mø bɑ ɑgïny gɑ kïllì pyɑ̈rø wïdɑ́bïryew, kí cyɑ̈lli nywøli yenh mø thwøwø gɑ miyø, ɑköbbe bɑ̈ngge kinni, “Kedh wun, yɑ ólunyi ki bëën bɑng wun.” De jɑlgøle nuti köbbø yi en. Akedh Abigɑil e cyɑ̈dh-ɑ ɑderø, e kɑ̈ll-ɑ gøddi kïttì. Kɑ ge ceg-ɑ wɑ̈dhi røømø ki Debïd geki jøge, ge bï-ɑ piny yïe. Debïd ɑ́bëëd e orumø kinni, “Á kipe ngø ɑ ɑ́korɑ jɑmmi jɑl ni men kì yij pɑ̈l? Bong gïjø ɑ́kyel mɑ ɑ́pɑ̈nyi ki kwɑlø kì yïe, ɑ yöd e gögg-ɑ yɑn gïn ni men! Wiy yɑ ónɑ̈g yi Jwøk, keløg jøg bënn pɑ nɑ̈g yi yɑn e wøw nuti ru!” Keny-ɑ ɑ́liidh Debïd yi Abigɑil, kɑ jwɑn-ɑ bëën piny kì kömi ɑdere, kɑ óbuddø yije reeny en piny kì bøli Debïd, ɑkööbe kinni, “Jɑldwøng lïngí møgɑ, cɑ́y bɑ møgɑ! Jɑldwøng, yï ko lïng ki gïn-ɑ kwøb yi ngɑn bong pere ni Nɑbɑl, pɑ̈r ki nying-ɑ cwøllii ceth. Gïn-ɑ wɑngi yi nyinge bɑ kinni dhëg, o kidyër bɑ dhëg. De yɑn, yɑ bɑ̈ngí, jøg-ɑ ɑ́ör yi yïn nuti liidh yɑn. Bɑ Jwøng-ɑ Ácwɑ̈ɑ̈j ɑ ɑ́jog yïn, ɑ cöög tyëngmɑ̈ɑ̈nø pɑ nɑ̈g yi yïn. De ɑnɑn yɑn ɑ köngi èn ki nyingi Jwøng-ɑ Ácwɑ̈ɑ̈j kinni tyëngmɑ̈ɑ̈nø bënn, kí tyëng-ɑ dwɑddi göggi yïn ki gïgrijjø ócɑy ni Nɑbɑl. Jɑldwøng, kwɑny gïn-ɑ muuj yïn èn kipe jøgí. Lɑ̈ɑ̈m pyëwí ki yɑn jɑldwøng, kipe bɑ̈jjø men-ɑ ɑ́gwøg yi yɑn. Jwøng-ɑ Ácwɑ̈ɑ̈j yï ógwøge yïn ɑ́ rɑ̈dh wuki kwɑrrí thyew, mɑ́ yï ɑ́nyɑg-ɑ linye. Keløg e dɑ dhɑnhø ɑ́kyel me pɑ̈ɑ̈r kömí e dwɑdd-ɑ nɑ̈gi yïn, Jwøgí, Jwøng-ɑ Ácwɑ̈ɑ̈j yï óyiele, tyëngmɑ̈ɑ̈nø óleenge wɑ̈yi gen ni lelø kì dhø bɑ̈ɑ̈di. Keny-ɑ ógwøøg jɑmm-ɑ døj bënn yi Jwøng-ɑ Ácwɑ̈ɑ̈j kiperí, ni kɑ ɑ́könge kinni yï ógwøge, yïn ɑ́ rɑ̈ɑ̈dh Isrɑil, wiy yï ócöög yï pɑ pɑ̈d, wɑlɑ̀ yï pɑ rɑngø, mɑ́ bong gïnrɑj mɑ ɑ́gwøg yi yïn. Yï nuti nɑ̈gø ki ji mø nuti kɑ̈ni ki göj, o bong ji mɑ ɑ́cɑy yi yïn. De wïjí ko wïl ki yɑn cyee jɑldwøng, keny-ɑ ógyëëdh yïn yi Jwøng-ɑ Ácwɑ̈ɑ̈j.” Aköbbii yi Debïd kinni, “Lejjí Jwøøg Isrɑil, Jwøng-ɑ Ácwɑ̈ɑ̈j, en ɑ ngɑn-ɑ ɑ́ör yïn be yïddø ki yɑn dicyɑ̈ɑ̈ng! Pwøj Jwøk kipe peli wïjí geki døøji rummí kipe gïn-ɑ ɑ́gwøg yi yïn dicyɑ̈ɑ̈ng, keny-ɑ ɑ́joog yɑn, kɑ yɑ mɑ̈ɑ̈n gwøg ki orøg, kɑ cinggɑ di kedhi yi remmi ji. Jwøøg Isrɑil, Jwøng-ɑ Ácwɑ̈ɑ̈j en ɑ ɑ́jog yɑn, o wu cög wu pɑ nɑ̈g yi yɑn. Keløg yï pɑ di jwɑn bëënø be yïddø ki yɑn, bong dhɑnhø kì kelli jø Nɑbɑl me di wɑ̈dhi mwøl e onëënø.” Codhe, ɑyïëëy gïg-ɑ ɑ́kɑ̈ɑ̈le yi Debïd, kɑ ngɑnɑni köbbe kinni, “Kedhí pɑc ki mër. Kwøbbí ɑ́lïngi yi yɑn, bong gïnrɑj men-ɑ ógöggɑ wun.” Keny-ɑ ɑ́døøg Abigɑil yï Nɑbɑl kì pɑc, gø ɑ́yuude e ocyɑ̈mø ni rɑ̈dh. O wïje dɑ møgø, o pyëwe omedø. Codhe ɑcöge e okudø, bong gïn-ɑ ɑ́köbbe gøn gïti mwøl. Kì mwøl keny-ɑ ɑ́bëëd wïje bong møgø ɑköbbii yi cyëge ki møgɑni bënn, kɑ mɑg yi wɑ̈ɑ̈rø, kɑ wïje ócungø. Bɑng cyɑ̈ng pyɑ̈rø, ɑnɑ̈ɑ̈g Nɑbɑl yi Jwøng-ɑ Ácwɑ̈ɑ̈j. Keny-ɑ ɑ́lïng Debïd kinni i Nɑbɑl thøø, ɑkööbe kinni, “Mɑl wɑ Jwøng-ɑ Ácwɑ̈ɑ̈j! Nɑbɑl ɑ́gwɑdd-ɑ yɑn, de Jwøng-ɑ Ácwɑ̈ɑ̈j yɑ ɑ́cwɑge! Nɑbɑl ɑ́cɑy yi Jwøng-ɑ Ácwɑ̈ɑ̈j kipe orøge.” Codhe, ɑödi Debïd yï Abigɑil ki wöödø kinni, o gööge ki cyëge. Bɑ̈ngge ɑ́kedhi Kɑrmel, kɑ Abigɑil köbbi yi gen kinni, “Wø ɑ́ör-ɑ yi Debïd kinni, i kɑ̈l wøn yïn, o yï bëëd yïn ɑ́ cyëge.” Abuddi Abigɑil yije rum en piny, e wïje këël en piny, kɑ okööbø kinni, “Yɑ bɑ bɑ̈nge, o tyelli bɑ̈ngge ólwøg yi yɑn ceth.” Ajwɑne dhwödhi mɑl, kɑ kɑdh-ɑ kömi ɑderø, ɑkedh gen ki jøg-ɑ ɑ́örii yi Debïd, kí tyëng-ɑ mɑ̈nn ɑ́bïj møg göögø kì cinge. Kɑ ogöögø ɑ́ cï Debïd. Akinoɑm nyɑɑr Yidhriil ɑ́bëëd e rumø ki nywømø thyew yi Debïd, Abigɑil ɑ́nywøøme’ köme. Mikɑl nyɑɑr Cɑul ɑ́bëëd ɑ́ cï Debïd thyew, de ɑ́mëggi Pɑltì wɑ̈d Lɑic jɑl Gɑlïm yi wïye Cɑul. Kɑ tyëng Dhïp kedh-ɑ yï Cɑul kì Gebɑ̀, kɑ gø köbbi gen kinni, “Debïd ópɑ̈nnø kì wïj Kïti Akïlɑ̀, kì pɑ̈ɑ̈l Yeudiyɑ̀.” Codhe, ɑdhwödh Cɑul kɑ kedh-ɑ yij pɑ̈ɑ̈l Dhïp e cyɑ̈dhi kɑ jöddi Isrɑil kwɑnni gen bɑ ɑ́lïp ɑ́dɑ̈g, ge kedh-ɑ be yɑbi Debïd. Kɑ Cɑul pëgg-ɑ wïj Kïti Akïlɑ̀ kì tøg yöö, de Debïd ɑ́cög e obëëdø kì yij pɑ̈l keny-ɑ ɑ́lïnge kinni, Cɑul yɑb-ɑ en kì kunɑni. Aöde ki lyëwwì mø kedhi be yodi per Cɑul, mɑ wɑ̈nh en Kïti Akïlɑ̀ kidyër. Akedhi Debïd kun-ɑ di Cɑul. Alidhe keny-ɑ di Cɑul geki Abner wɑ̈d Ner, pënyi linye ge onenø. Cɑul onenø kì dïdyër e ótɑgø yi linye bëne. Apyëëj Akimelek wɑ̈d Kit geki Abicɑy wɑ̈d Dheruyɑ̀, ómï Yöɑb yi Debïd kinni, “Á men ɑ ókedhi wøn kɑɑl Cɑul.” Alöggi Abicɑy kinni, “Wɑ ókedh!” Codhe, ɑkedhi Debïd kɑɑl Cɑul geki Abicɑy kì wɑ̈rɑni, ɑyuud gen Cɑul e onenø kì dïkɑɑl, kí tønge gø cwöödh en piny kì kuni wïje. Abner geki jøliny onenø, e Cɑul tyeeg gen dïdyër. Aköbbi Debïd yi Abicɑy kinni, “Dicyɑ̈ɑ̈ng, Jwøk ngetimɑ̈ɑ̈nø ɑ́cïbe cingí. Wiy Cɑul cwøøbɑ piny ki tøngɑ. Pɑ cwøb yi yɑn tyel ɑ́ryew, ceg-ɑ kegø yi cwøbø ɑ́kyel.” De Debïd, Abicɑy ɑ́kyëdde kinni, “Ko di gïnrɑj me göggií! Á men ɑ cuggi tïngi cinge ngɑn-ɑ ɑ́yieny yi Jwøng-ɑ Ácwɑ̈ɑ̈j, kɑ ocögø e pɑ cyen?” Kɑ Debïd okööbø kinni, “Yɑn ɑ köngi èn ki nyingi Jwøng-ɑ Ácwɑ̈ɑ̈j ɑ Nëënø. Bɑ Jwøng-ɑ Ácwɑ̈ɑ̈j kiree ɑ ónɑ̈gii, wɑlɑ̀ bɑ bøli keje ɑ óbï kɑ othøø, wɑlɑ̀ ókedhi be liny kɑ nɑ̈g. De yɑ pɑ göögø ki gïnrɑj kì bøli Jwøng-ɑ Ácwɑ̈ɑ̈j, kɑ cingɑ tïnggɑ rɑ̈nh-ɑ ɑ́yieny yi Jwøng-ɑ Ácwɑ̈ɑ̈j. Kwɑny wɑ tønge men-ɑ cwöödh en buti wïje ɑnɑn, geki ɑtheeb pï men-ɑ bute, kɑ yï bïí kedh wɑ.” Codhe, ɑkwɑɑny tøng yi Debïd kí ɑtheeb pï men-ɑ ɑ́ying buti Cɑul, kɑ ge ókedhø. Bong dhɑnhø mɑ ɑ́lidh gen, wɑlɑ̀ mɑ ɑ́yod per gen, wɑlɑ̀ dhɑnhø mɑ ɑ́cyëëw, mɑ́ ge ɑ́göjji nenø yi Jwøng-ɑ Ácwɑ̈ɑ̈j. Codhe, ɑcør piny yi Debïd, kɑ kedh-ɑ tuung kït tung-ɑ kyeelø, kɑ yedh-ɑ mɑl wïj kït, e lɑ̈wi ki gen. Aryeer Debïd e cwøll-ɑ liny Cɑul geki Abner wɑ̈d Ner kinni, “Abner! Yï pɑ löggi!” Alöggi Abner kinni, “Yïn ɑ́ men ɑ ryeer ki yïthhi rɑ̈dh èn?” Alöggi Debïd kinni, “Abner, pɑth ki yïn ɑ bɑ jɑl-ɑ dwøng kì Isrɑil? De yïde ɑ pɑ koor wöw? Mɑ́ e dɑ dhɑnhø mɑ ɑ́bï be nɑ̈gi wöw. Yï ɑ́dhɑl yi nenni gwøgí Abner! Yɑn ɑ köngi èn ki nyingi Jwøng-ɑ Ácwɑ̈ɑ̈j, wu bënn, wu døj ki thøø, mɑ́ ngɑndwøøng wun men-ɑ ɑ́yieny yi Jwøng-ɑ Ácwɑ̈ɑ̈j ɑ́ rɑ̈dh pɑ kor yi wun kidøøj. Lidh, tøøng rɑ̈dh ying-ɑ keny? Atheeb pï men-ɑ ɑ́ying bute kì kuni wïje ying-ɑ keny?” Angij cwɑggi Debïd yi Cɑul, kɑ okööbø kinni, “Bɑ yïn ɑ kööbø Debïd wɑ̈dɑ?” Alöggi Debïd kinni, “Ngee bɑ yɑn wuö, rɑ̈dhɑ!” Akööb Debïd këti kinni, “Yïde ɑ rïngí kì bɑngɑ wuö? Á gïnrɑj mɑ ngø ɑ ɑ́göggɑ yïn? Á gïn ɑ ɑ́bɑjɑ? Lïngí møg, wuö rɑ̈dhɑ. Keløg ɑ́ Jwøng-ɑ Ácwɑ̈ɑ̈j ɑ wëggi pyëwí rënyø ki yɑn, ke nëngí Jwøng-ɑ Ácwɑ̈ɑ̈j ki gëëdhi, pyëwe ólɑ̈ɑ̈mø. De keløg ɑ́ ji, cyënni Jwøng-ɑ Ácwɑ̈ɑ̈j ópɑ̈dhi kömi gen. Mɑ́ yɑ ɑ́cyeed pɑ̈l yi gen, o yɑ twɑ̈lɑ kì kömi piny-ɑ ɑ́muuj yi Jwøng-ɑ Ácwɑ̈ɑ̈j, ɑkedhɑ kun kwɑjjɑ jwögg mø pɑth. Remɑ ko wëggí dëëmø kì pɑ̈l kun lɑ̈wi ki Jwøng-ɑ Ácwɑ̈ɑ̈j. Ede rɑ̈ɑ̈dh Isrɑil ɑ bëëne be nɑ̈gi dhɑnhø me ni yɑn, ɑ pɑ̈r ki cwɑrø yøw? Ede ɑ dwɑre yɑn, de yɑ nɑ winyi pɑ̈l?” Alöggi Cɑul kinni, “Yɑ ɑ́bɑ̈jji, bïí dwöög, Debïd wɑ̈dɑ. Dicyɑ̈ɑ̈ng wëyɑ ɑ́wør yi yïn, bong gïnrɑj me göggɑ yïn këti. Yɑn ɑ bɑ dhëg!” Alöggi Debïd kinni, “Tøngí èn wuö, wiy dhɑnhø ɑ́kyel bëe be dwɑ̈ɑ̈yii. Jwøng-ɑ Ácwɑ̈ɑ̈j nyi køøg-ɑ tyëngtir møg-ɑ mïdhi bëëndøj, yï ɑ́rum ki cïb cingɑ yi Jwøng-ɑ Ácwɑ̈ɑ̈j dicyɑ̈ngtïn, de yï nuti nywɑɑl yɑn, yï ngɑn-ɑ ɑ́røny ɑ́ rɑ̈dh yi Jwøng-ɑ Ácwɑ̈ɑ̈j. Yɑ ólony ki wiyø yi Jwøng-ɑ Ácwɑ̈ɑ̈j, kɑ yɑ yiele ki ɑkørr!” Aköbbi Debïd yi Cɑul kinni, “Yï ógyëdh yi Jwøk wɑ̈dɑ! Gïg-ɑ gwøg yi yïn ópɑ̈dhi bënn.” Codhe, ɑkedh Debïd, kɑ Cɑul døøg-ɑ pɑc. Kɑ Debïd ree köbbe kinni, “Yɑ ómɑg yi Cɑul cyɑ̈ng megø. Gïn-ɑ lɑ̈w ɑ cuggi gwøgø yi yɑn, bɑ dɑ̈gi Pelistiyɑ̀, o Cɑul wïye ki yɑbi yɑn kì Isrɑil, o riɑ yielɑ.” Codhe, ɑdhwödh Debïd geki jøge gɑ miy ɑ́bïkyel kì Isrɑil, kɑ ge kedh-ɑ yï Akïc wɑ̈d Mɑok rɑ̈ɑ̈dh Gɑth. Apëggi Debïd Gɑth geki jøge kì buti Akïc. Debïd ɑ́kedh kɑ mɑ̈nne ryeet, ɑ løg Akinoɑm nyɑɑr Yidhriil, kí Abigɑil nyɑɑr Kɑrmel, ɑ ɑ́bëëd ɑ́ cï Nɑbɑl. Keny-ɑ ɑ́lïng Cɑul kinni Debïd pɑ̈ɑ̈r Gɑth, ɑwïye ki yɑbii. Aköbbi Akïc yi Debïd kinni, “Keløg pyëwí med ki yɑn, nëngí yɑn ki kɑɑl ɑ́kyel kì kelli kɑ̈ddí, ɑ́ men yije bëëdɑ. Bong gïn pere bëëdɑ kì kej ɑ́kyel ki yïn kì kɑɑldwøng, wuö.” Codhe, ɑmëgge Debïd kɑɑl Dhiglɑg. Kɑ Dhiglɑg ogöögø ki piny rɑ̈nhi Yeudiyɑ̀ gïti dicyɑ̈ngtïn. Debïd ɑ́bëëd kì Pelistiyɑ̀ ki run ɑ́kyel kí dwɑ̈tt ɑ́ngwen. Kì bøli kenyɑni, Debïd geki jøge nyi kedh-ɑ be nyɑɑg ki pödhi Gecur, kí pödhi Girdhì, kí pödhi Amɑlek. Tyëngɑni ɑ́bëëd ɑ pìnyɑni kɑ̈ge dööng. Pödhhɑni nyii yɑgø yi en cɑ̈gi kì Cur gïti Rïp. Kɑ jøg-ɑ cwøw kí tyëng-ɑ mɑ̈nn nyi nɑ̈ge, kɑ dyëgi gen, kí dhögi gen, kí ɑderri gen, kí ɑmɑlli gen, kí ógudhi gen thyew nyi kwɑny yi gen. Codhe, o nyi døøge yï Akïc. Kɑ Debïd nyi pyëj yi Akïc kinni, “Á kun ɑ ɑ́mɑ̈nyi yi wun kì yethi cyɑ̈nggï?” Kɑ Akïc nyi köbbi yi Debïd kinni, “Yɑ ɑ́kedh-ɑ Yeudiyɑ̀ kì kuni wɑɑng wurlwɑl.” Dɑ kɑ̀ kwøbe pödhi Yerɑmel, wɑlɑ̀ piny-ɑ bëëd yi tyëng Ken. Ji bënn nyii nɑ̈gø yi Debïd, jøg-ɑ cwøw, ki tyëng-ɑ mɑ̈nn, o bong dhɑnhø ɑ́kyel me nyi kedhi Gɑth be kwøbi gïn-ɑ dyër men-ɑ ɑ́gwøge geki jøge. Bene gïg-ɑ ɑ́gøggi yi Debïd keny-ɑ ɑ́bëëde kì Pelistiyɑ̀. De Debïd ɑ́bëëd e ogɑ̈nø yi Akïc, kɑ ree nyi köbbe kinni, “Debïd mɑɑn yi tyëng pödhi gen, wiy cöge ɑ́ dhɑnhɑ.” Kì bøli keny megø ɑcøng tyëng Pelistiyɑ̀ liny gen, kipe nyɑɑg ki Isrɑil, ɑköbbi Debïd yi Akïc kinni, “Ngɑ̈nyi yi yïn kidøøj kinni yïn, wuki jøgí, wu ónyïɑ̈ggi wu køny-ɑ yɑn ki liny.” Alöggi Debïd kinni, “Bɑ dyër ceth, yɑ bɑ bɑ̈ngí, o gïn-ɑ ógwøg yi yɑn ólidh yi yïn kirií.” Akööb Akïc kinni, “Døj! Yï ógwøg yi yɑn yïn ɑ́ ngɑn nyi kor yɑn, yï pɑ pɑ̈nyi ki wilø.” Kì bøli kenyɑni Sɑmwel rum thøø, o tyëng Isrɑil bënn okïïmø kipere, ɑ́kony ɑ Rɑmɑ̀ pɑɑre. Kì bøli kenyɑni, ɑ́jwöggì geki tyëdd rumø ki cyeddø kì Isrɑil yi Cɑul. Acøng tyëng Pelistiyɑ̀ ri gen, kɑ ge pëgg-ɑ buti kɑɑl Cunem. Kɑ Cɑul tyëng Isrɑil cønge, kɑ ge pëgg-ɑ Kïti Gilboɑ̀. Keny-ɑ ɑ́liidh liny Pelistiyɑ̀ yi Cɑul, ɑbwøge ki mendwøng. Codhe, kɑ Jwøng-ɑ Ácwɑ̈ɑ̈j pyëje kipe gïn cuggi gwøgø. De kwøbbe nuti løøgø yi Jwøng-ɑ Ácwɑ̈ɑ̈j kì yethi lɑ̈g, o ge nuti løøg en ki Urïm geki Thumïm, wɑlɑ̀ ki dhøggi tyëngtöng. Kɑ Cɑul bɑ̈ngge köbbe kinni, “Yɑ̈bbu yɑn ki dheyɑdh, o yɑ kedhɑ yïe, o pyëj yi yɑn ki gïn-ɑ ócwöb.” Alöggi bɑ̈ngge kinni, “Dheyɑdh nud kì Ein Dör.” Codhe, ɑlunyi Cɑul ree ki ógudh møøgø, kipe kinni o cöge e pɑ ngij, ɑkedhe yï ngɑnɑni kì wɑ̈r geki bɑ̈ngge ɑ́ryew. Aköbbi ngɑnɑni yi Cɑul kinni, “Pyëj yɑdh kiperɑ, kɑ yɑ cöllí ngɑn-ɑ nyinge köbbɑ yïn.” De ɑ́köbbi yi ngɑnɑni kinni “Kidyër ngɑ̈nyi yi yïn eni gïn-ɑ ɑ́gwøg yi Cɑul, kinni ɑ́jwöggì geki tyëdd, kí tyëngtöng ɑ́cyedde kì yij pödhø. Wu dwɑdd-ɑ mɑgi yɑn o yɑ nɑ̈g?” Aköngi Cɑul ki nyingi Jwøng-ɑ Ácwɑ̈ɑ̈j kì bøli ngɑnɑni kinni, “Kidyër ki nyingi Jwøng-ɑ Ácwɑ̈ɑ̈j, ɑ Nëënø, bong cɑ́y men-ɑ ócɑɑy yïn kipe gwøgi gïnɑni.” Apyëjii yi ngɑnɑni kinni, “Cöllɑ yïn nyingi men, o dhwödhe?” Alögge kinni, “Cöllí yɑn nyingi Sɑmwel.” Keny-ɑ ɑ́liidh Sɑmwel yi ngɑnɑni, ɑryeere ki mendwøng, kɑ Cɑul köbbe kinni, “Yïde ɑ wëëny yɑn! Yï bɑ Cɑul!” Aköbbii yi Rɑ̈dh Cɑul kinni, “Yï ko böggi, ɑ́ ngø ɑ ɑ́lidh yi yïn?” Aköbbii yi ngɑnɑni kinni, “Yɑ ɑ́lidh-ɑ tïbi dhɑnhø e bï-ɑ wɑ̈g kì yij lɑ̈bø.” Apyëjii yi Cɑul kinni, “Nënni e nɑ ngø?” Alöggi ngɑnɑni kinni, “Jɑl me bɑ yu, ree kood en ki ógødh.” Codhe, ɑyodii yi Cɑul kinni bɑ Sɑmwel, kɑ ree bøødhe wïje kuule’ piny. Apyëëj Cɑul yi Sɑmwel kinni, “Yïde ɑ pïd yɑn? Yïde ɑ kɑ̈ɑ̈l yɑn wɑ̈g, o yɑ dwöög mɑl?” Alöggi Cɑul kinni, “Yɑ ying-ɑ yij orɑng! Tyëng Pelistiyɑ̀ bɑ møg nyïɑ̈ggi ki yɑn, de Jwøk yɑ ɑ́wiye. Kwøbbɑ pɑ nyi løøge këti kì yethi lɑ̈g, wɑlɑ̀ ki dhøggi tyëngtöng, bene ɑ cwølɑ yïn, o yɑ köbbí gïn-ɑ dwɑddi kinni o gwøg yi yɑn.” Akööb Sɑmwel kinni, “Yïde ɑ cwøøl yɑn keny-ɑ ɑ́lïdhí kinni yï ɑ́wiy yi Jwøng-ɑ Ácwɑ̈ɑ̈j, kɑ ree løge ngetimɑ̈ɑ̈nø ki yïn? Jwøng-ɑ Ácwɑ̈ɑ̈j yï ɑ́gögge gïn-ɑ ɑ́dwɑddi yi en keny-ɑ ɑ́köbbe yïn kinni lɑwø ɑ́kɑ̈ɑ̈le wɑ̈g kì cingí, kɑ gø mëgge wɑɑd wun Debïd. Ciggi Jwøng-ɑ Ácwɑ̈ɑ̈j ɑ́pyem yi yïn, kɑ kwɑrri Amɑlek ocögø ge nuti nɑ̈gø yi yïn bënn. O jɑmmi gen nuti rënyø yi yïn. Bene ɑ pere göggi yïn kinøw ɑnɑn yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j wu cïbe’ cinggi tyëng Pelistiyɑ̀ wuki tyëng Isrɑil møg-ɑ ócyɑ̈dhi ki yïn. Wu óying butɑ wuki wɑ̈ddí dhuki. Yɑɑy Isrɑil ɑ́cïb cinggi tyëng Pelistiyɑ̀ thyew yi Jwøng-ɑ Ácwɑ̈ɑ̈j.” Kɑ Cɑul ópɑ̈ɑ̈dhø kì kenyɑni ceth, ɑ́bwøg yi kwøbbi Sɑmwel. Ábëëd dële nyøødh yi kɑ̈j thyew mɑ́ e nuti cyɑ̈mø kì dicyɑ̈ngɑni bëne, kí wɑ̈re bëne. Codhe, ɑbëën ngɑndhɑjø menɑni yï Cɑul, keny-ɑ ɑ́lidhe gøn e dële thøø yi wɑ̈ɑ̈rø, ɑkööbe kinni, “Lidh yɑn yɑ bɑ̈ngí, dhøgí nuti pyeem yɑn. Wëyɑ ɑ́böyyɑ thøø, kɑ gïn-ɑ ɑ́köbbí yɑn kinni gwøgɑ en, gwøgɑ. Anɑn lïngí møgɑ jɑldwøng, wiy yï nëngɑ ki gïncɑm o dëlí tënge, o yï kedhí yuuí.” De Cɑul ɑ́bɑ̈nyi cɑm, ɑkööbe kinni, “Yɑ pɑ cyɑ̈mø!” Kɑ bɑ̈ngge ókunyø ki kwɑjjii kyeel kí ngɑnɑni kinni cyɑ̈me, kɑ kwøbbi gen lïngi yi en. Codhe, ɑdhwödhe mɑl, kɑ pëgg-ɑ wïj pyën. Ngɑnɑni yïe ɑ́dɑ nyɑ wɑdh me piidh en kì gøle, ɑjwɑne gøn ki ngɑlø, kɑ ókɑ̈bbø ki møng-ɑ búr, kɑ gø jwɑne ki nyömø, ɑbule gøn ɑ́ ópùni møng-ɑ olwëny. Acïbe gïncɑmɑni bøli Cɑul geki jøge, kɑ ge ocyɑ̈mø. Adhwödh gen kɑ ge ókedhø kì wɑ̈rɑni ceth. Liny tyëng Pelistiyɑ̀ ree ɑ́cønge Ápek, kɑ liny tyëng Isrɑil pëgg-ɑ piny kì buti wɑɑng pïi Töör Yidhriil. Acyɑ̈ɑ̈m rɑ̈nhi Pelistiyɑ̀ gɑ ɑ́bïj ki yɑ̈yyi gen, e ri gen køjji gen gɑ miy, kí ɑ́lïp, o Debïd kí jøge ge ócyɑ̈dhø kì bɑng Akïc. Aliidh gen yi pëjji liny Pelistiyɑ̀, kɑ ge ópëjjø kinni, “Tyëng Isrɑil møg gwøg-ɑ ngø kì keny?” Alöggi Akïc kinni, “Men bɑ Debïd, ɑ́göög kɑ Cɑul rɑ̈ɑ̈dh Isrɑil. De ɑ́bëëd ɑ butɑ ki keny me bɑ̈ɑ̈r. Bong gïnrɑj mɑ ɑ́gwøge kër-ɑ ɑ́wiye Cɑul, ɑ ɑ́bëëne keny.” De pëjji liny Pelistiyɑ̀ pëthi gen ɑ́rënyi ki Akïc, kɑ gø köbbi gen kinni, “Ör Debïd, døøge keny-ɑ ɑ́mëggií. Pɑ kedhi be liny kyeel ki wɑ. Keløg e ókedhø ree luge’ wɑ kì yij liny. Ree kwɑɑje’ ri rɑ̈dh kinni o pyëwe mïne ki en, kɑ ree luge wɑ, kɑ ji nɑ̈ge. Pɑth ki Debïd ɑ nyinge nyi wör yi mɑ̈nni Isrɑil kinni, ‘Cɑul ɑ́nɑ̈g-ɑ ɑ́lïp ɑ́kyëllì, de Debïd ɑ́nɑ̈g-ɑ ɑ́lïp pyɑ̈r.’ ” Codhe, ɑcwøøl Debïd yi Akïc kɑ gø köbbe kinni, “Yɑn ɑ köngi èn ki nyingi Jwøng-ɑ Ácwɑ̈ɑ̈j ɑ Nëënø kinni, pyëwí ying-ɑ kömɑ, o wɑ ying-ɑ tung ɑ́kyel. Pyëwɑ ɑ́bëëd e omedø kinni o yï di nyïɑ̈ggí yï køny-ɑ yɑn ki liny. Bong gïnrɑj mɑ ɑ́gwøg yi yïn kër-ɑ ɑ́bëën, ɑbëëd kì buti wøn. De rɑ̈nhì møg-ɑ kyeelø yï ɑ́bɑny yi gen. De yïn, døøg pɑc ki mër, kɑ yï ko göög ki gïjø me rɑj men-ɑ órënyi pëthi gen.” Alöggi Debïd kinni, “Dɑ́ ngø ɑ ɑ́gwøgɑ? Á gïnrɑj mɑ ngø ɑ ɑ́yod yi yïn kì ri bɑ̈ngí, cɑg kì cyɑ̈ng-ɑ ɑ́cungɑ kì bølí gïti ɑnɑn, ɑ pere mɑ̈ɑ̈n yɑn kedhi be nyɑɑg ki tyëngmɑ̈ɑ̈nø wøki wɑ̈ɑ rɑ̈dh?” Alöggi Akïc kinni, “Áyod yi yɑn kinni, yï nɑ wëywöni Jwøk. De rɑ̈nhì møg-ɑ kyeelø ge okööbø kinni i yï pɑ cuggi kedhi yij liny kyeel ki wøn. De kì mwøl dhuki keny-ɑ ótɑ̈ri piny, kɑ yï dhwöödh wuki jøgí, jwɑn dhwödhø ceth kɑ yï kedh.” Codhe, kɑ Debïd odhwödhø geki jøge kì mwøl piny nudd e looj, ɑkedh gen ge døøg-ɑ Pelistiyɑ̀, kɑ tyëng Pelistiyɑ̀ kedh-ɑ Yidhriil. Kɑ Debïd wɑ̈dh-ɑ Dhiglɑg bɑng cyɑ̈ng ɑ́ryew geki jøge. Tyëng Amɑlek mɑ̈nyi Yeudiyɑ̀ kì kuni wɑɑng wurlwɑl, o ge pɑ̈ɑ̈r kömi kɑɑl Dhiglɑg, kɑ gø rɑ̈b gen. Tyëng-ɑ mɑ̈nn mɑɑg gen geki ji bënn, othønhø kí tyëngdøngø, bong dhɑnhø me nɑ̈ɑ̈g gen, de ji cɑɑg gen kɑ kɑ̈ɑ̈lø. Keny-ɑ ɑ́wɑ̈nhi Debïd Dhiglɑg geki jøge, ɑyuud gen kɑɑl e órɑ̈bø, o mɑ̈nni gen kí wɑ̈ddi gen, kí wojur; ge ókɑ̈ɑ̈lø gɑ ɑmɑgg. Kɑ Debïd geki jøge óywöngø ki ywøng dwøng, kɑ ge ódhɑ̈rø yi ywøg. Mɑ̈nni Debïd ryeet Akinoɑm geki Abigɑil ókɑ̈ɑ̈lø thyew. Kɑ Debïd ogöögø ki ngɑn ying yij orɑng, mɑ́ jøge bënn pëthi gen ɑ́rënyi yi tøøki wɑ̈ddi gen geki nyigi gen, de ge dwɑdd-ɑ bɑ̈lli Debïd ki tuggi kïttì, de pyëwe ɑ́cwed yi Jwøge, Jwøng-ɑ Ácwɑ̈ɑ̈j kɑ ogöögø e teeg. Aköbbi ókwërø, Abiyɑthɑr wɑ̈d Akimelek yi Debïd kinni, “Muuj yɑn pɑri kwër!” Kɑ muujii yi Abiyɑthɑr. Codhe, ɑpyëëj Jwøng-ɑ Ácwɑ̈ɑ̈j yi Debïd kinni, “Yɑ ócuggø rengi bɑng tyëngmɑ̈ɑ̈nø møgɑni? Ge ópïïd yi yɑn?” Codhe ɑløøg mø Debïd yi Jwøng-ɑ Ácwɑ̈ɑ̈j kinni, “Rengí bɑng gen, ge ópïïd yi yïn, o ji ócuggi ki yielø yi yïn kì cinggi gen.” Kɑ Debïd kí jøge gɑ miy ɑ́bïkyel dhwödh-ɑ bɑng gen. Keny-ɑ ɑ́wɑ̈dhi gen dhøg Bisör, ɑdöngi kwï gen cyɑ̈n. Apöödh Debïd geki jøg mø bɑ miy ɑ́ngwen. Jøg-ɑ kyeelø gɑ miy ɑ́ryew ɑ́pïd ki mendwøng, kɑ ge ódhɑ̈lø bɑ̈ɑ̈ni dhøg Bisör, codhe ɑdöngi gen cyɑ̈n. Ayïddi jøg-ɑ cyɑ̈dhi ki Debïd ki jɑl Rïp, kì yethi pwödh, kɑ gø kɑ̈ɑ̈l gen yï Debïd. Anëngii yi gen ki pï kí gïncɑm, kɑ nëngi yi gen thyew ki ópuun nywøli yenh, kí cyɑ̈ll ɑ́ryew mø nywøli yenh møg thwøwø. Codhe, ɑlɑ̈ɑ̈ny kɑ̈j kì ree, mɑ́ e ɑ́bëëd ree dɑ kɑ̈j me teeg, bong gïn cɑɑm en, wɑlɑ̀ pï mø mɑɑdh en ki cyɑ̈ng ɑ́dɑ̈g kí wɑ̈rr ɑ́dɑ̈g. Apyëjii yi Debïd kinni, “Wöw bɑ men? Yï kɑ̈ɑ̈l-ɑ kun?” Alögge kinni, “Yɑ bɑ wɑ̈d Rïp, yɑ bɑ bɑ̈ng wɑ̈d Amɑlek. Kì yethi cyɑ̈ng ɑ́dɑ̈g møg-ɑ ɑ́pöödh, wɑ̈ɑ yɑ ɑ́wiye piny kipe kɑ̀ rɑ̈ɑ̈m dëlɑ. Wø ɑ́kedh-ɑ Yeudiyɑ̀, kì tung-ɑ wɑɑng wurlwɑl, ɑmɑny wøn tyëng Kereth, kí kwɑrri Kɑlib. Arɑ̈b wøn Dhiglɑg.” Apyëjii yi Debïd kinni, “Yɑ ócuggø nyudhø yi yïn keny-ɑ di tyëng-ɑ ɑ́kɑ̈l mɑ̈nni wøn?” Alögge kinni, “Ngee, keløg Jwøk okwöngø yi yïn kinni yɑ pɑ nɑ̈g yi wun, o yɑ pɑ cïb wun cingi wɑ̈ɑ.” Kɑ Debïd peeje kun-ɑ di tyëng Amɑlek. Ayuud ge gïn kunɑni ge tɑyø, kwï gen ocyɑ̈mø, møøgø omɑ̈dhø, o kwï gen otugø yi medi pëëth kipe jɑmm-ɑ ɑ́kɑ̈ɑ̈l yi gen ge gïïr kì Pelistiyɑ̀, kí myërri Yeudiyɑ̀. Apɑ̈ɑ̈r Debïd kömi gen kì bɑ̈ɑ̈rø, kɑ gït-ɑ böörø dhung-ɑ kyeelø, e onɑ̈gø ki gïn. Bɑ ji miy ɑ́ngwen keti gen ɑ ɑ́bodh; gen ɑ møg-ɑ ɑ́pɑ̈ɑ̈r kömi ɑmɑlli gen kɑ ge órengø. Ayieel dhɑnhø bëne yi Debïd, kɑ jɑmm-ɑ ɑ́kɑ̈l bënn yi tyëng Amɑlek dwöög, kí mɑ̈nne gɑ ɑ́ryew. Bong gïïpiny ɑ́kyel mɑ ɑ́yuud e tøøk kì ri gen bënn. Debïd nyige, kí jøge, yɑɑg-ɑ wøbb kí womɑ̈nn, kí jɑmmì bënn, møg-ɑ ɑ́kɑ̈l yi tyëng Amɑlek ɑ́dwööge. Akwɑɑny dyëg kí dhög yi Debïd, kɑ ge kööl yi jøge kì bøli gen, ge kømm-ɑ kinni, “Møg bɑ mø Debïd!” Keny-ɑ ɑ́dwöög Debïd, yï jøge, møg-ɑ miy ɑ́ryew møg-ɑ ɑ́dhɑ̈ɑ̈r yi wɑ̈dh, kɑ ge odöngø kì dhøg Bisör, ɑpɑɑr Debïd yi gen geki jøg-ɑ ɑ́kedh ki en. Keny-ɑ ɑ́wɑ̈nhe buti gïn, ɑkedhi Debïd be mɑ̈dhi gen. De jøg-ɑ yethi gen looj, kí jøgi orøg kì kelli teen-ɑ ɑ́kedh ki Debïd ge ɑ́kööb kinni, “Mɑ́ ge nuti kedhø kyeel ki wɑ, ge pɑ pɑ̈ggi ki wɑ ki jɑmm-ɑ ɑ́kɑ̈ɑ̈l. Ge ócuggø kwɑnyi mɑ̈nni gen kí nyigi gen, kɑ ge kedh gen.” Alöggi Debïd kinni, “Pɑth ki kinøw, wun ɑ nyiimïɑ. Gïn ni men ko gwøg wun, wɑ ɑ́rum ki nëngø yi Jwøng-ɑ Ácwɑ̈ɑ̈j. Wɑ ɑ́kor yi en, kɑ tyëngmɑ̈ɑ̈nø møg-ɑ ɑ́pɑ̈ɑ̈r kömee tyɑm yi wɑ. Bong ngɑn cuggi yïëyi kwøbbi wun! Pɑ̈ngi jɑmmì ge pɑ̈r kì kelli wun bënn, Ji-ɑ ɑ́döng ge kor-ɑ jɑmmì, geki tyëng-ɑ ɑ́kedhi be nyïɑ̈ggø ki liny.” Agwøøg menɑni ɑ́ cigg yi Debïd, ɑ nudd ciggɑni omïdhø kì Isrɑil gïti dicyɑ̈ngtïn. Keny-ɑ ɑ́wɑ̈nhi Debïd Dhiglɑg, ɑöre kwï jɑmm-ɑ ɑ́mɑg yi en, kì yï tyëng Amɑlek, gï öre’ jøgdøngi Yeudiyɑ̀, kɑ okööbø kinni, “Men bɑ jwödhø men-ɑ mëggɑ wun kì ri jɑmm-ɑ ɑ́mɑg yi wøn kì cinggi tyëng-ɑ mɑɑn Jwøng-ɑ Ácwɑ̈ɑ̈j.” Kɑ Debïd öd-ɑ yï jyɑ̈ggi Betiil, kí jyɑ̈ggi Rɑmɑ̀ ki jɑmmì, kí myërri Yeudiyɑ̀, kí kɑ̈ddi Yɑtir, kí Aröeer, kí Sipmöth, kí Ectemoɑ̀ geki Rɑkɑl, kí kɑ̈ddi Yerɑmel, kí tyëng Ken. Kí myërri Órmɑ̀, kí Börɑcɑn, kí Athɑk. Kí Kibrön geki yï tyëng-ɑ kyeelø kì kɑ̈jj-ɑ ɑ́cyɑ̈dhi yi Debïd bënn. Tyëng Pelistiyɑ̀ ɑ́nyïɑ̈ggi geki tyëng Isrɑil, kɑ Isrɑil tyɑm yi gen. Tyëng Isrɑil mø gïïr ɑ́nɑ̈g kì wïj Kïti Gilboɑ̀. Tyëng Pelistiyɑ̀ ɑ́nyïɑ̈ggi ki nyɑɑg me teeg. Kɑ Cɑul nɑ̈g kì yij liny geki wɑ̈dde, Yönɑthɑn, kí Abinɑdɑb, kí Mɑlkicuɑ̀. Liny ɑ́nyïɑ̈ggi ki nyɑɑg me teeg kì tung-ɑ di Cɑul, ɑpɑ̈dhi nyɑɑr weth ree, kɑ ogöögø ki kedø me rɑɑj cɑrø. Aköbbe nyel-ɑ kɑ̈lli jɑmmi liny møge kinni, “Wöödh pilí wɑ̈g kɑ yɑ nɑ̈ɑ̈g, o yɑ cögɑ yɑ pɑ tuug yi tyëng Pelistiyɑ̀ møg-ɑ nuti ngølø.” De nyelɑni ɑ́bɑ̈nyi mɑ́ e ɑ́bwøg ki mendwøng. Codhe, kɑ Cɑul pile kwɑnye, kɑ ree møøde köme. Keny-ɑ ɑ́lidhii yi nyelɑni kinni Cɑul ɑ́thøw, ɑlonye ree ki møød kömi pile, kɑ othøø kyeel ki Cɑul. Bene kër-ɑ ɑ́thøw Cɑul geki wɑ̈dde gɑ ɑ́dɑ̈g, kí nyel-ɑ kɑ̈lli jɑmmi liny mø Cɑul dicyɑ̈ngɑni. Keny-ɑ ɑ́lïng tyëng Isrɑil, møg-ɑ Töör Yidhriil, kí møg-ɑ bëëdø kì kömi Nɑm Urdun kinni Cɑul thøø, kí wɑ̈dde bënn gɑ ɑ́dɑ̈g, ɑbwøg gen, kɑ ge odhwödhø kì myërri gen. Codhe, ɑbëën tyëng Pelistiyɑ̀ kɑ ge pëgg-ɑ myërrɑni. Dhuki, keny-ɑ ɑ́bëën tyëng Pelistiyɑ̀ be kwɑnyi jɑmm-ɑ per gen teg kì ri tyëng-ɑ thøø, ɑyod gen Cɑul ki wɑ̈dde gɑ ɑ́dɑ̈g, ge thøø kì wïj Kïti Gilboɑ̀. Angul gen wïj Cɑul wɑ̈g, kɑ tønge kí jɑmmi linye kwɑny yi gen, codhe ɑödi gen myërri Pelistiyɑ̀ bënn, ge köbb-ɑ ji kì kɑ̈jj-ɑ mɑlli jwöggi gen. Acïb gen jɑmmi liny mø Cɑul yij kengi Actɑröth. Kɑ Cɑul gur gen mɑl kì ri döri Betcɑn. Keny-ɑ ɑ́lïng tyëng-ɑ bëëdø kì Yɑbic kì Gilyɑd ki gïn-ɑ ɑ́göggi Cɑul yi tyëng Pelistiyɑ̀, ɑkedhi yɑɑg teg Betcɑn kì wɑ̈r, kɑ Cɑul kí wɑ̈dde kɑ̈ɑ̈l gen wɑ̈g kì ri döri Betcɑn, kɑ gï kɑ̈ɑ̈l gen Yɑbic kɑ gï rɑ̈b gen. Codhe, ɑkwɑny gen cu gen, kɑ gï koony gen thɑ yɑdh kì Yɑbic. Kɑ tyëng Yɑbic othuumø ki cyɑ̈ng ɑ́bïryew. Debïd ɑ́dwöög keny-ɑ ɑ́rume tyɑmi tyëng Amɑlek, kì bɑng thøwi Cɑul, kɑ obëëdø kì Dhiglɑg ki cyɑ̈ng ɑ́ryew. Kì ri dɑ̈ɑ̈g cyɑ̈ng, ɑbëën nyel me kɑ̈ɑ̈l kɑɑl Cɑul. Ógudhe pyëëd en, o wïje kïdh en ki tør. Akedhe yï Debïd, kɑ ree bøødhe wïje kuule’ piny. Kɑ pyëj yi Debïd kinni, “Yï kɑ̈ɑ̈l-ɑ keny?” Alögge kinni, “Yɑ ɑ́pɑ̈r-ɑ kɑɑl Isrɑil.” Kɑ Debïd okööbø kinni, “Köbbí yɑn gïn-ɑ ɑ́cwöb.” Kɑ ólöggø kinni, “Kɑɑlee ɑ́cyeddi, o ji mø gïïr ɑ́nɑ̈g kì kelli jiee. Cɑul geki Yönɑthɑn wɑ̈de ɑ́nɑ̈g thyew.” Apëjji Debïd kinni, “Áyod yi yïn kidï kinni Cɑul geki Yönɑthɑn thøø?” Alöggi nyelɑni kinni, “Yɑ ɑ́ying-ɑ wïj Kïti Gilboɑ̀, ɑlidhɑ Cɑul e ócungø ree mïdh en kɑ ɑkebïdhe, gø cwöödh en piny, o yɑ̈thi tyëngmɑ̈ɑ̈nø geki jøg-ɑ kömi kyënyì kedh ge ócyɑ̈ngø ki en. Codhe, ɑlïïdhe ngɑ̈je, kɑ yɑ lidhe, ɑcwøle yɑn. Kɑ yɑ ólöggø kinni, yɑn èn wuö! Apyëje yɑn mɑ løgɑ men, kɑ köbbɑ kinni yɑ bɑ kwɑɑr Amɑlek. Codhe, ɑkööbe kinni, ‘Bïí nɑ̈g yɑn! Riɑ dɑ kedø me rɑɑj, o wëyɑ nudd ge nud kì riɑ.’ Codhe, ɑkedhɑ yïe kɑ nɑ̈gɑ, mɑ́ e ɑ́yod yi yɑn kinni bɑ men thøw ceth keny-ɑ ópɑ̈ɑ̈dhe. Codhe, ɑkwɑnyɑ yɑ̈r kì wïje kí ɑ́tegø kì cinge, ɑmuujɑ gen yïn èn wuö.” Kɑ Debïd ógødhe kɑge ki rɑ̈ɑ̈m pyëwe, kɑ jøge bënn ógudhi gen pyëëd gen. Kɑ ge wɑ̈dh-ɑ böörø ge óywöngø, o ge okïïmø, o ge pɑ cyɑ̈mø, ge ywøg-ɑ Cɑul geki Yönɑthɑn, kí Isrɑil jii Jwøng-ɑ Ácwɑ̈ɑ̈j, møg-ɑ ɑ́nɑ̈g kì yij liny. Apyëëj nyel-ɑ ɑ́kɑ̈ɑ̈l wöödø yi Debïd kinni, “Yï bɑ jɑl keny?” Alögge kinni, “Yɑ bɑ kwɑɑr Amɑlek, de yɑ bëëd ɑ pödhi wun.” Apyëjii yi Debïd kinni, “Yïde ɑ pɑ bwøøg ki nɑ̈gi rɑ̈nh-ɑ ɑ́myeg yi Jwøng-ɑ Ácwɑ̈ɑ̈j?” Kɑ Debïd nyel ɑ́kyel kì kelli jøge cwøle, ɑköbbe gøn kinni, “Bïí nɑ̈ɑ̈g!” Kɑ wɑ̈d Amɑlek diny yi nyelɑni ki pilø, kɑ gø kege. Aköbbii yi Debïd kinni, “Yï ɑ́nɑ̈g yi lebí, kí bɑng kɑ ɑ́yïëëy kinni yïn ɑ ɑ́nɑ̈g ngɑn-ɑ ɑ́yieny yi Jwøk ɑ́ rɑ̈dh.” Awör Debïd ki wöri ywøg men, e ywøg-ɑ Cɑul geki wɑ̈de Yönɑthɑn. Kɑ Debïd okööbø kinni pwönyi wörɑni tyëng Yeudiyɑ̀. (Wörɑni bɑ ɑgwed kì yij Wɑ̈nyi Yɑcɑr) “Pëjjee ɑ́thøw kì wɑ̈thi kïtti Isrɑil! Jöddi Isrɑil ɑ́pɑ̈ɑ̈dh! Møgɑni ko dwøg kì Gɑth, kɑ ge ko ngɑ̈j kì Ackelön. Pëthi mɑ̈nni Pelistiyɑ̀ ko wëggu mïnø; nyigi jurr-ɑ kyeelø ko wëggu ngedhø. “Bong kødh wɑlɑ̀ thöjj møg-ɑ ódëëm wɑ̈thi kïtti Gilboɑ̀; wiy pwödhhe cög gen gɑ ryɑng. Mɑ́ köddi jödd ɑ́döngi piny kì kunɑni ki ɑyɑ̈r, kwööd Cɑul pɑ mïllø yi møw këti. Nyɑɑr weth Yönɑthɑn pɑ nyi dëëm piny, o pili Cɑul pɑ nyi dwöög e tïl, nyi ceg-ɑ pöddi piny ki yɑɑg teg, nɑ̈g-ɑ tyëngmɑ̈ɑ̈nø. “Cɑul geki Yönɑthɑn yɑɑg døj, jøg-ɑ bëëdi gen med. ge nuti dɑ̈ngø ge onëënø, o ge ɑ́thøw kyeel, yɑɑg-ɑ yöd kibøli cør, yɑɑg-ɑ teg kibøli ngurrì. “Ywøgu Cɑul, wun ɑ mɑ̈nni Isrɑil, mɑ́ en ɑ ɑ́ruug wun ki ógudh-ɑ myëër, kí tigg geki dhɑb. “Jöddi yɑy ɑ́pɑ̈ɑ̈dh, ge ɑ́nɑ̈g kì yij liny Yönɑthɑn buud e thøø kì kelli kïttì. “Yönɑthɑn ómïɑ, yɑ ywøg-ɑ yïn; perí ɑ́bëëd e teeg cɑrø kì yïɑ. Yɑ ɑ́mɑɑr yi yïn ki mendwøng, ki mɑ̈ɑ̈dø me lod mi mɑ̈nn. “Jöddi yɑy ɑ́pɑ̈ɑ̈dh, tønggi gen ɑ́döngi piny, e bong gïn gwøøg gen.” Codhe, ɑpyëëj Jwøng-ɑ Ácwɑ̈ɑ̈j yi Debïd kinni, “Kedhɑ kɑɑl ɑ́kyel kì kelli kɑ̈ddi Yeudiyɑ̀?” Kɑ Jwøng-ɑ Ácwɑ̈ɑ̈j ólöggø kinni, “Kedh!” Apëjji Debïd kinni, “Kedhɑ kɑɑl-ɑ́?” Kɑ Jwøng-ɑ Ácwɑ̈ɑ̈j okööbø kinni, “Kedhí Kibrön.” Codhe, kɑ Debïd dɑ̈g-ɑ Kibrön geki mɑ̈nne ryeet, Akinoɑm nyɑɑr Yidhriil geki Abigɑil cï Nɑbɑl jɑl Kɑrmel, nyɑn-ɑ ɑ́lɑg yi Debïd. Debïd jøge ɑ́kɑ̈ɑ̈le thyew, kí tyëng kɑ̈lli gen, kɑ ge pëgg-ɑ Kibrön geki myërr-ɑ bute. Kɑ tyëng Yeudiyɑ̀ bï-ɑ Kibrön, ɑrøny gen Debïd ɑ́ rɑ̈dh, o jɑɑge gøl Yeudɑ̀. Keny-ɑ ɑ́köbbi Debïd kinni bɑ jø Yɑbic kì Gilyɑd ɑ koony Cɑul, ɑöde yï jø Yɑbic Gilyɑd ki ngɑn köbbi gen kinni, “Wu ógyëdh yi Jwøng-ɑ Ácwɑ̈ɑ̈j kipe kɑ ɑ́konyu wïi wun Cɑul, menɑni bɑ wuödø me dwøng. Anɑn wu ókorri yi Jwøng-ɑ Ácwɑ̈ɑ̈j kɑ wu mïdhe kidøøj, yɑn thyew yɑ ógöögø ni menɑni. Cwed wun pëthi wun kɑ wu bëëd wu teeg, mɑ́ wïi wun Cɑul ɑ́thøw, o yɑ ɑ́røny yi gøl Yeudɑ̀ yɑn ɑ́ rɑ̈ɑ̈dh gen.” Kɑ Icböceth wɑ̈d Cɑul kwɑny yi Abner, pënyi liny Cɑul, kɑ gø kïdhe Mɑɑ̈nɑim. Kɑ gø rønye ɑ́ rɑ̈ɑ̈dh myërri Gilyɑd, kí Aceer, kí Yidhriil, kí Eprɑim, kí myërri gøl Ben Yɑmïn geki Isrɑil bëne. Icböceth wɑ̈d Cɑul runne ɑ́bëëd gɑ pyɑ̈r ɑ́ngwen keny-ɑ ɑ́gööge ɑ́ rɑ̈ɑ̈dh Isrɑil, kɑ ojyɑ̈gø ki runn ɑ́ryew. De gøl Yeudɑ̀ ɑ́jɑɑg-ɑ yi Debïd. Kɑɑm-ɑ ɑ́jyɑ̈ɑ̈g Debïd ɑ́ rɑ̈dh kì Yeudiyɑ̀, bɑ runn ɑ́bïryew kí dwɑ̈tt ɑ́bïkyel e bëëd ɑ Kibrön. Kɑ Abner wɑ̈d Ner odhwödhø kì Mɑɑ̈nɑim geki jø Icböceth wɑ̈d Cɑul kɑ ge kedh-ɑ Gibeon. Kɑ Yöɑb wɑ̈d Dheruyɑ̀ geki jø Debïd ókedhø thyew, kɑ ge røøm-ɑ kömi luy. Kɑɑl ɑ́kyel ɑ́pëggi kömi luy tuung, kɑ kɑɑl-ɑ kyeelø pëgg-ɑ tung-ɑ kyeelø. Codhe, ɑköbbi Yöɑb yi Abner kinni, “Wiy yɑnythønhø dhwödh gen, o ge nyïɑ̈ggi gen kì bølee.” Kɑ Yöɑb okööbø kinni, “Dhwödh gen!” Codhe, ɑdhwödh gen, kɑ ge kwɑn gɑ pyɑ̈rø wïdɑ́ryew kì tuung gøl Ben Yɑmïn geki Icböceth wɑ̈d Cɑul, kí pyɑ̈rø wïdɑ́ryew kì kelli jø Debïd. Kɑ ngɑn pödh-ɑ yï ngɑn-ɑ rwöm ki en, kɑ gø pɑ̈rre kì wïje kedh pile cwøøbe wɑɑng ngëdi ngɑn-ɑ rwöm ki en, kɑ jøgɑni bënn gɑ pyɑ̈r ɑ́ryew wïdɑ́ngwen othøø kì kenyɑni ceth. A bɑnge cwølli kenyɑni ɑnɑn kì Gibeon ɑ́ “Pwödhi pil.” Kɑ liny ree pödhe ki menteg, kɑ Abner geki jø Isrɑil tyɑm yi jø Debïd. Wɑ̈ddi Dheruyɑ̀ gɑ ɑ́dɑ̈g, ɑ́bëëd ge nud kì kenyɑni, ɑ løg Yöɑb, kí Abicɑy, kí Asɑiil. Asɑiil pëddi ngwej ni tenø kì pɑ̈l, Kɑ Abner cyeddi yi Asɑiil, e ceg-ɑ rïngø e pödh-ɑ yïe ceth. Alïïdh Abner ngɑ̈je, kɑ ópëjjø kinni, “Bene yïn Asɑiil?” Akööbe kinni, “Yɑn!” Aköbbii yi Abner kinni, “Këjjí wïj cɑɑmí wɑlɑ̀ wïj kyëjí, pïïd ɑ́kyel kì kelli yɑɑg-ɑ wøbb, kɑ tønge kwɑɑny.” De Asɑiil nuti wïyø ki cyeddii. Kɑ cigi cyɑ̈rø yi Abner kinni, “Wïyí ki cyeddi yɑn! Yɑ cïrrí nɑ̈gi yïn kɑ per ngø? Nyingi wøn ólidh yi wøn kidï ki Yöɑb ómyëw, keløg yï onɑ̈gø yi yɑn?” De Asɑiil ɑ́bɑ̈nyi wïyø ki cyeddii, codhe ɑcwøøb Asɑiil yi Abner ki tøng kì yije, kɑ tøng twïy-ɑ wɑ̈g kì köme. Apɑ̈ɑ̈dhe kɑ othøø kì kenyɑni ceth. Ngɑn kɑ̈l keny-ɑ ɑ́pɑ̈dhi yi Asɑiil kɑ othøø, nyi ceg-ɑ cung kɑ̀ wɑ̈dhe kenyɑni. De Yöɑb geki Abicɑy ɑ́rengi bɑng Abner, kɑ cɑ̈ng kedh-ɑ piny ge wɑ̈dh-ɑ ri kïti Amɑ̀, kì buti Giyɑ̀ kì kö yuu pɑ̈ɑ̈l Gibeon. Codhe, kɑ jø gøl Ben Yɑmïn ócugø kì buti Abner këti, kɑ liny tɑd gen kì wïj kït. Aryeer Abner e köbb-ɑ Yöɑb kinni, “Pilø cög e ceg-ɑ nɑ̈g ceth? Pɑ nenni yi yïn kinni møgɑni pɑ thumi ge med? Jøgí ókyëddi yi yïn kì wɑɑng, o nyiimï gen wiy yi gen ki cyeddø?” Alöggi Yöɑb kinni, “Jwøk ɑ Nëënø! Keløg yï pɑ di kööb, jøgɑni pɑ di wïyi ki cyeddi nyiimï gen gïti mwøl.” Codhe, ɑkoodh kɑng yi Yöɑb, kɑ jøgɑni ócungø bënn, ge ɑ́wïyi ki cyeddi Isrɑil, o ge nuti nyïɑ̈ggø këti. Kɑ Abner geki jøge tyëg-ɑ wɑ̈rɑni bëne ge ócyɑ̈dhø ge bødh-ɑ Töör Urdun. Abɑ̈ɑ̈n gen Nɑm Urdun, kɑ ge tyëg-ɑ cɑ̈ng ge ócyɑ̈dhø, codhe ɑwɑ̈dhi gen Mɑɑ̈nɑim. Adwöög Yöɑb kì be cyeddi Abner, kɑ jøge mɑme bënn. Asɑiil geki jøg møøgø mø bɑ pyɑ̈rø wïdɑ́bïngwen, ɑ ɑ́bëëd ge tøøk kì kelli jø Debïd. De jø Debïd ɑ́nɑ̈gi ki ji miy ɑ́dɑ̈g kí pyɑ̈r ɑ́bïkyel kì kelli jø gøl Ben Yɑmïn møg-ɑ ɑ́løg bɑng Abner. Kɑ Asɑiil kwɑny yi jø Debïd, kɑ gø koony gen buti röri wïye kì Betleem. Codhe, kɑ Yöɑb geki jøge lɑng-ɑ wɑ̈r ge ócyɑ̈dhø. Ge ɑ́wɑ̈dhi Kibrön cɑ̈ng ceg-ɑ tuulø. Kɑ liny ómɑ̈gø ki keny me bɑ̈ɑ̈r kì kɑɑm Debïd kí jøge kì tuung, geki gøl Cɑul kí tyëng-ɑ köme kì tung-ɑ kyeelø. Kɑ jø Debïd ókedhø ge ótëngø, de jøg-ɑ kömi gøl Cɑul kedh ge ónyönhø. Debïd ɑ́nyöddi yi mɑ̈nne ki wɑ̈dd kì Kibrön. Nyel-ɑ kɑyø bɑ Amnön, meye bɑ Akinoɑm nyɑɑr Yidhriil. Ryeew wɑ̈dde bɑ Kileɑb, meye bɑ Abigɑil cï Nɑbɑl jɑl Kɑrmel, nyɑn-ɑ ɑ́lɑg yi Debïd. Dɑ̈ɑ̈g wɑ̈dde bɑ Abcɑlöm, meye bɑ Mɑɑkɑ̀ nyɑɑr Tɑlmɑy, rɑ̈ɑ̈dh Gecur. Ngween gen bɑ Adöniyɑ̀, meye bɑ Agith. Bïïj gen bɑ Cepɑtiyɑ̀, meye bɑ Abitɑl. Bïkyeel gen bɑ Ithreɑm, meye bɑ Eglɑ̀, cï Debïd. Wɑ̈ddɑni bënn ɑ́nywøl e Debïd ying-ɑ Kibrön. Kì yethi cyɑ̈ngg-ɑ́ nudd gøl Cɑul ónyïɑ̈ggø geki Debïd, Abner ree ɑ́løge pënyi liny gøl Cɑul. Cɑul ɑ́bëëd yïe dɑ dhɑjø mɑ ɑ́kwɑny yi en, me cwøl ɑ́ Ridhpɑ̀ nyɑɑr Aiyɑ̀. Kɑ Abner köbbi yi Icböceth kinni, “Á kipe ngø ɑ gwøøg cï wïyɑ dhɑjø?” Kɑ Abner pyëwe órënyø ki mendwøng yi møg-ɑ ɑ́kwøb yi Icböceth, ɑkööbe kinni, “Yɑ ɑ́ceg bëëdø yɑ ying-ɑ kömi Cɑul geki gøle kí mɑ̈dhhe! Kɑ yï ocögø yï pɑ cïbɑ cingi Debïd. Yɑ pɑth ki ngeti ɑmolpiny me göggi kömi Yeudiyɑ̀! De ɑnɑn yöd yï ceg-ɑ kwøb i dɑ bɑ̈jjø me gwøøg yɑn kipe ngɑndhɑjø men! Kɑ Icböceth obwøgø yi Abner ki mendwøng, kɑ ocögø e okudø, bong gïjø mɑ ɑ́kwøbe. Codhe, kɑ Abner öd-ɑ yï Debïd, e Debïd ying-ɑ Kibrön, ki ji møg pyëjii kinni, “Á men ɑ ójɑɑg piny? Lwööb wɑ! Yï ókøny yi yɑn ki rebi Isrɑil bëne.” Kɑ Debïd ólöggø kinni, “Døj! Wɑ ólwöbø, de bɑ gïjø ɑ́kyel ɑ dwɑddi yi yɑn kì yïí. Muuj yɑn Mikɑl nyɑɑr Cɑul keny-ɑ óbëën, ke pɑ muujií yɑn, nyingee pɑ lidh yi wɑ!” Codhe, kɑ Debïd öd-ɑ yï Icböceth wɑ̈d Cɑul ki ji, ɑköbbe gïn kinni, “Döggí yɑn Mikɑl cyëgɑ. Árum ki mëggi yɑn, kɑ kɑ̈nye muujɑ ɑ́ dëlli wɑ̈thi jɑmmi jø Pelistiyɑ̀ gɑ miyø.” Codhe, ɑöd Icböceth ki jøg mø dwɑɑy Mikɑl yï Pɑltiel wɑ̈d Lɑic. Kɑ jɑlgøl Mikɑl løg-ɑ bɑng cyëge e óywöngø, kɑ wɑ̈dh-ɑ kɑɑl Bɑkurïm. Codhe, ɑköbbii yi Abner kinni, “Døøg pɑc!” Adøøge pɑc. Alwööb Abner geki jøgdøngø. Kɑ okööbø kinni, “Cøn wu ɑ́dwɑdd-ɑ gwøgi Debïd ɑ́ rɑ̈ɑ̈dh wun. Wu yïd-ɑ ngø ɑnɑn! Mɑ́ Jwøng-ɑ Ácwɑ̈ɑ̈j Debïd ɑ́köbbe kinni, ‘Debïd bɑ̈ngɑ bene kej cingɑ, en ɑ ree óyielɑ jiɑ, tyëng Isrɑil kì cingi tyëng Pelistiyɑ̀, geki tyëngmɑ̈ɑ̈nø møg-ɑ kyeelø bënn.’ ” Kɑ Abner kiree kedh-ɑ be kwøb ki gøl Ben Yɑmïn. Codhe, ɑkedhe Kibrön be köbbi Debïd ki gïn-ɑ dwɑddi gwøgø yi Isrɑil geki gøl Ben Yɑmïn bëne. Kɑ Abner wɑ̈dh-ɑ Kibrön e cyɑ̈dhi kɑ jøg mø kwɑnni gen bɑ pyɑ̈r ɑ́ryew. Kɑ Abner geki jøge ryej yi Debïd. Codhe, ɑköbbi Debïd yi Abner kinni, “Wiy yɑ kedhɑ ɑnɑn ceth, o Isrɑil cungɑ wɑ̈ɑ rɑ̈dh, o yï røny yi gen yïn ɑ́ rɑ̈ɑ̈dh gen, o yï ójyɑ̈ɑ̈g ni kɑ̀ dwɑddii yi pyëwí.” Awiy Abner kedhe yi Debïd ki mër. Bøli kenyɑni ceth ɑ ɑ́dwöög Yöɑb geki jø Debïd kì be mɑ̈nyø, ge ɑ́bï ge ókɑ̈ddø ki jɑmmì mø gïïr cɑrø. De Abner nuti pïïd gen buti Debïd kì Kibrön, mɑ́ e ɑ́rum ki ör yöö yi Debïd ki mër. Keny-ɑ ɑ́wɑ̈nhi Yöɑb geki jøliny bënn, ɑköbbii kinni, i Abner wɑ̈d Ner bëën yï rɑ̈dh, i de ówiyø yi rɑ̈dh kɑ ókedhø ki mër. Kɑ Yöɑb kedh-ɑ yï rɑ̈dh, ɑkööbe kinni, “Á ngø ɑ gwøg yi yïn kinni! Abner ɑ́bï yïí. Á kipe ngø ɑ wëggií kedhø? Abner wɑ̈d Ner ngɑ̈nyi yi yïn, ɑ́bï-ɑ be wënyi yïn kipe kinni o bëëdí lidh yi en geki gïg-ɑ gøggi yi yïn bënn.” Adhwödh Yöɑb kì buti Debïd, kɑ öd-ɑ bɑng Abner ki ji. Kɑ gø dwöög gen kì buti yiith Sirɑ̀ e Debïd kwïj wøw. Keny-ɑ ɑ́wɑ̈nhi Abner Kibrön, ɑcwøølii wɑ̈ye yi Yöɑb kì dhø döri kɑɑl, e dhɑ̈y ce dɑ kwøbb-ɑ ɑkɑnn møg köbbe gøn, ɑcwøbe gøn kì yije kɑ othøø, gø nɑ̈ɑ̈ge’ kej cöngi ómen Asɑiil. Kì cyɑ̈n cyee keny-ɑ ɑ́lïng Debïd ɑkööbe kinni, “Yɑn kí pödhɑ bëne, yï wøn bɑ̈r ki thøwi Abner. Møgɑni ngɑ̈nyi yi Jwøng-ɑ Ácwɑ̈ɑ̈j. Yöɑb geki gøle ɑ cinggi gen di cöngɑni. Gøle ócög yije dɑ ngɑn jɑmme lwöy, kí ngɑn ree di wɑɑny kì yethi rïjj bënn. Gøle ódi ngɑn kwömi ki kïïl ceth. Kwï tyëng gøle ónɑ̈g-ɑ yij liny. Pɑ jɑd ki ngɑn rɑngi yi kɑ̈j kì gøle kì yethi rïjj bënn.” Bene kër-ɑ ɑ́nɑ̈ɑ̈g Abner yi Yöɑb geki Abicɑy ómen, gø nɑ̈ɑ̈g ge’ kej ómï gen Asɑiil, nyel-ɑ ɑ́nɑ̈g yi Abner kì yij liny kì Gibeon. Codhe, ɑköbbi Yöɑb geki ji bënn yi Debïd kinni, “Pyëëd wun ógudhi wun, kɑ ri wun lunyi wun ki ocwɑ̈llì, kɑ Abner ywøg wun.” Debïd kiree ɑ́løg bɑng dhɑnhø keny-ɑ ɑ́kïdhii be konyø. Abner ɑ́kony kì Kibrön, kɑ Debïd geki ji bënn óywöngø kì wïj röri Abner. Kɑ Abner ywøg yi rɑ̈dh ki wör kinni, “Á kipe ngø ɑ thøw Abner ki thøwi dhëg? Cingge nuti twöjø, o tyelle bong digïddì! Áthøw ki thøwi ngɑn nɑ̈g yi ɑ́muddi ji!” Kɑ ji cig-ɑ døøgø ki ywøg. Kɑ ji tyëg-ɑ cɑ̈ng ge kwɑjj-ɑ Debïd kinni cyɑ̈me, de Debïd ɑ́köngi kinni, “Nɑ̈ɑ̈g yɑn yi Jwøk keløg yɑ ódi cɑm ki gïncɑm, wɑlɑ̀ gïjø megø e cɑ̈ng nuti kedhi piny!” Gïg-ɑ ɑ́cwöb ɑ́lidh yi ji bënn, kɑ gïg-ɑ ɑ́gwøg yi rɑ̈dh yïëy yi gen. Bɑ dyër, pëthi ji nyi løg-ɑ mø med ki gïn-ɑ nyi gwøg yi rɑ̈dh. Áyod yi jø Debïd geki tyëng Isrɑil bënn kinni Debïd bong cinge kì ri nɑ̈gi Abner. Rɑ̈dh jøge ɑ́köbbe kinni, “Nuti yood wun kinni bɑ dhɑnhø me dwøng ɑ ɑ́pɑ̈ɑ̈dh dicyɑ̈ngtïn kì Isrɑil? Cɑgg ɑ́ kɑ̀ bëëdɑ yɑn ɑ́ rɑ̈nh-ɑ ɑ́myeg yi Jwøk èn, pyëwɑ ɑ́nyönhi dicyɑ̈ngtïn. Wɑ̈ddi Dheruyɑ̀ ceg-ɑ teg kibølɑ? Ámuddi ji møgɑni ócɑy yi Jwøk kipe rɑ̈ji gen!” Keny-ɑ ɑ́lïng Icböceth wɑ̈d Cɑul kinni i Abner thøø kì Kibrön, dële ɑ́ceg okïr, kɑ Isrɑil obwøgø bëne. Kɑ jøg ɑ́ryew mɑ ɑ́bëëd gɑ pëjji liny Cɑul kedh-ɑ yï Icböceth. Ákyel cwøl ɑ́ Bɑnɑ̀, o jɑl-ɑ kyeelø cwøl ɑ́ Rekɑb. Ge bɑ wɑ̈ddi Rimön jɑl Beeröth, jɑlɑni bɑ wɑ̈d gøl Ben Yɑmïn. O Beeröth bɑ pɑɑ myërri gøl Ben Yɑmïn. Tyëng Beeröth ɑ́ceg-ɑ dɑ̈gi Gitɑim, ge nudd ge bëëd ɑ kunɑni gɑ wëdhh gïti ɑnɑn. Yönɑthɑn wɑ̈d Cɑul yïe ɑ́dɑ wɑ̈d me cwøl ɑ́ Mepiböceth. Ábëëd runne bɑ ɑ́bïj keny-ɑ ɑ́kɑ̈ɑ̈l wöödø kì Yidhriil kinni i Cɑul thøø geki Yönɑthɑn. Akwɑɑny Mepiböceth yi nyɑn-ɑ ɑ́mïdhii, kɑ reng-ɑ pɑ̈l gø kɑ̈lle’ kɑ̈llø. De ɑ́bodh kì yï nyɑnɑni kɑ ópɑ̈ɑ̈dhø, bene ɑ bëëd tyelle ryeet ngøølø ɑnɑn. Kɑ Rekɑb geki Bɑnɑ̀, wɑ̈ddi Rimön jɑl Beeröth kedh-ɑ gøl Icböceth e ceg-ɑ nenø kì dicɑ̈ng. Ngɑndhɑjø men-ɑ kor kɑl nenø yi kɑ ɑ́pïde yi yieg ki gemè, kɑ Rekɑb kedh-ɑ ød geki Bɑnɑ̀, ge ce kedh-ɑ be dwɑ̈ddø ki gemè, kɑ ri gen liib gen ød, ɑcwøb ge gøn kì yije kɑ gø nɑ̈g gen, kɑ wïje ngøl gen, kɑ gø kwɑny gen. Codhe, ɑboodh gen ri gen wɑ̈g, kɑ ge ókedhø. Kɑ ge lɑng-ɑ wɑ̈r ge ócyɑ̈dhø ge bødh-ɑ yij Töör Urdun. Keny-ɑ ɑ́wɑ̈dhi gen Kibrön, kɑ wïj Icböceth mëggi gen Debïd, ge okööbø kinni, “Wïj Icböceth wɑ̈d Cɑul ngetimɑ̈ɑ̈nø èn. Ádwɑdd-ɑ nɑ̈gi yïn! Dicyɑ̈ngtïn Cɑul geki gøle ɑ́kölli yïn yi Jwøng-ɑ Ácwɑ̈ɑ̈j ki gööj gïn-ɑ ɑ́göggi yïn yi gen.” Aløøg kwøbbi Rekɑb geki Bɑnɑ̀ yi Debïd kinni, “Ki nyingi Jwøng-ɑ Ácwɑ̈ɑ̈j ɑ Nëënø! En ɑ ɑ́yiel yɑn ki rɑjj-ɑ ɑ́ying kömɑ. Jɑl-ɑ ɑ́muuj yɑn wööni thøwi Cɑul e rømm-ɑ kinni kɑ̈ɑ̈l-ɑ wöödø me døøj yïɑ, nuti nɑ̈ɑ̈g yɑn kì Dhiglɑg! Bene köögi men-ɑ ɑ́mëggɑ en kipe wöödø men-ɑ ɑ́kɑ̈ɑ̈le. Anɑn wu bɑ tyëngrijjø ni møg, wu ɑ́nɑ̈g-ɑ dhɑnhø me tir kì øde, e buud-ɑ yij pyëne, wu nɑ̈gɑ’ nɑ̈gø!” Codhe, kɑ Debïd jøge köbbe kinni nɑ̈g gen Rekɑb geki Bɑnɑ̀. Kɑ Rekɑb geki Bɑnɑ̀ cinggi gen geki tyelli gen ngul wɑ̈g, kɑ ge ngɑɑb mɑl kì kömi luy kì Kibrön. Codhe, ɑkwɑɑny wïj Icböceth kɑ koony buti röri Abner kì Kibrön. Kɑ wɑ̈thi kɑ̈lli Isrɑil bënn bï-ɑ yï Debïd kì Kibrön, ɑköbbii yi gen kinni, “Wɑ bɑ remø ɑ́kyel. Cɑgg ɑ́ kɑ ɑ́bëëd Cɑul e onëënø, yïn ɑ ɑ́pyejji liny Isrɑil. O yï ɑ́rum ki köbbø yi Jwøng-ɑ Ácwɑ̈ɑ̈j kinni, ‘Bene yïn ɑ ókwɑy jiɑ, ɑ løg tyëng Isrɑil. Yï óbëëdø yï bɑ jɑngi gen.’ ” Kɑ wɑ̈thi jøgdøngi Isrɑil bï-ɑ yï Debïd kì Kibrön. Kɑ kwøb nywɑg gen kí Debïd kì bøli Jwøng-ɑ Ácwɑ̈ɑ̈j. Kɑ Debïd røny yi gen ɑ́ rɑ̈ɑ̈dh Isrɑil. Debïd runne ɑ́bëëd gɑ pyɑ̈r ɑ́dɑ̈g keny-ɑ ɑ́jɑ̈gge. Ájyɑ̈ɑ̈g ki runn pyɑ̈r ɑ́ngwen. Yeudiyɑ̀ ɑ́jɑɑg yi en ki runn ɑ́bïryew kí dwɑ̈tt ɑ́bïkyel e ying-ɑ Kibrön. Kɑ Isrɑil geki Yeudiyɑ̀ jɑɑge bënn ki runn pyɑ̈r ɑ́dɑ̈g wïdɑ́dɑ̈g e ying-ɑ Yerusɑlem. Rɑ̈dh geki linye ɑ́kedhi Yerusɑlem kɑɑl tyëng Yebus, ɑ løg tyëngpiny. Kɑ Debïd köbbi yi tyëng kɑɑlɑni kinni, “Yï pɑ wɑ̈nhi kɑɑl wøn, kɑɑl dör-ɑ teg. Cɑgg ɑ́ men-ɑ́ cörr geki ngöll yï ócuggø jogø yi gen.” Ge ɑ́rum i Debïd pɑ cuggi kedhi kɑɑl gen. De kɑɑl Dhɑyøn ɑ́lwɑ̈ng ki mɑgø yi Debïd, ngö e bɑ ɑwen ki dör mø teg, kɑ ogöögø ɑ́ kɑɑl Debïd. Debïd jøge ɑ́ceg kɑ köbbø yi en kì cyɑ̈ngɑni kinni, “Dɑ ngɑn mɑɑn tyëng Yebus ni kɑ̀ mɑɑnɑ gen? O dwɑdd-ɑ nɑ̈gi gen? Keløg ɑ́ kinøw, kɑ̈llu wɑɑng wøøl pï, kɑ wu pɑ̈ɑ̈r wun kömi cörr-ɑ bɑ ngöll.” (Bene ɑ bɑnge nyi kømii kinni, “Cörr geki ngöll pɑ cuggi kedhi ød Wë.”) Codhe, kɑ Debïd pëgg-ɑ kɑɑl dör-ɑ teg menɑni, kɑ gø cɑge ɑ́ kɑɑl Debïd. Bɑdhhi kɑɑlɑni ɑ́gëddi yi Debïd ki ud mø ngenyø, cɑg kì wïj óthør e kön-ɑ yij. Kɑ Debïd ceg-ɑ pëddø tëngø, mɑ́ e ɑ́køny yi Wïlɑ̈bø, Jwøng-ɑ Ácwɑ̈ɑ̈j. Kirɑm rɑ̈ɑ̈dh Suur ɑ́ödi yï Debïd ki ji kyeel kí yenh sɑndɑl, kí bödhhi pɑ̈mmì geki bödhhi tweg ki kïttì, kɑ Debïd gëddi yi gen ki ød. Ayodii yi Debïd kinni ɑ́rum ki cïbø yi Jwøng-ɑ Ácwɑ̈ɑ̈j ɑ́ rɑ̈ɑ̈dh Isrɑil, kɑ lɑ̈ge gwøg e dwøng, mɑ́ Jwøng-ɑ Ácwɑ̈ɑ̈j jie, tyëng Isrɑil mɑɑr yi en. Debïd ɑ́kɑ̈bbi ki mɑ̈nn, kɑ ónyömø ki mɑ̈nn keny-ɑ ɑ́rume dɑ̈g kì Kibrön, kɑ pëgg-ɑ Yerusɑlem. Kɑ nyöddi yi mɑ̈nne ki wɑ̈dd geki womɑ̈nn mø gïïr. Møg bɑ wɑ̈ddi Debïd yɑɑg-ɑ ɑ́nywøl kì Yerusɑlem. Cɑmuɑ̀, kí Cöbɑb, kí Nɑthɑn, kí Sølømøn. Kí Ibɑɑr, kí Elicuɑ̀, kí Nepeg, kí Yɑpiyɑ̀. Kí Elicɑmɑ̀, kí Eliɑdɑ̀, kí Elipelet. Keny-ɑ ɑ́lïng tyëng Pelistiyɑ̀ kinni i Debïd órønyø ɑ́ rɑ̈ɑ̈dh Isrɑil, kɑ tyëng Pelistiyɑ̀ bënn kedh-ɑ be mɑgii. De keny-ɑ ɑ́lïngi kwøbbɑni yi Debïd, ɑkedhe kɑɑl dörø. Abëën tyëng Pelistiyɑ̀ kɑ ge gudd-ɑ Töör Repɑim. Apyëëj Jwøng-ɑ Ácwɑ̈ɑ̈j yi Debïd kinni, “Pɑ̈ɑ̈rɑ kömi tyëng Pelistiyɑ̀? Ge ócïb yi yïn cingɑ?” Kɑ Debïd köbbi yi Jwøng-ɑ Ácwɑ̈ɑ̈j kinni, “Kedh! Ge ócïbɑ cingí ceth.” Akedhi Debïd Bɑɑl Perɑdhïm, kɑ tyëng Pelistiyɑ̀ tyɑme kì kunɑni. Kɑ Debïd okööbø kinni, “Jwøng-ɑ Ácwɑ̈ɑ̈j ɑ́möddi kömi tyëngmɑ̈ɑ̈nø kì bølɑ ni kenyi möddi bɑɑyø.” Acɑɑg kenyɑni yi Debïd ɑ́ Bɑɑl Perɑdhïm, (Jwøng-ɑ Ácwɑ̈ɑ̈j ɑ́möddi). Tyëng Pelistiyɑ̀ ngïjji jwöggi gen ɑ́wiy gen Bɑɑl Perɑdhïm, kɑ ge kwɑny yi Debïd geki jøge. Kɑ tyëng Pelistiyɑ̀ cig-ɑ dwöögø këti, ɑguddi gen Töör Repɑim. Keny-ɑ ɑ́kwɑjji Jwøng-ɑ Ácwɑ̈ɑ̈j yi Debïd, ɑlöggi Jwøng-ɑ Ácwɑ̈ɑ̈j kinni, “Yï ko turri kömi tyëng Pelistiyɑ̀ kì bøli gen. Kɑ̈l ngɑ̈thi gen, kɑ yï töngí yï gen kì bøli yenh bɑlsɑm. Keny-ɑ ólïngí ywøøg tyel kì wɑ̈thi yenh bɑlsɑm, kɑ yï jwɑn göjjø! Bɑ yɑn, ɑ møøl bølí be tyɑmi liny tyëng Pelistiyɑ̀.” Kɑ møg-ɑ ɑ́kwøb yi Jwøng-ɑ Ácwɑ̈ɑ̈j gwøg yi Debïd ceth. Tyëng Pelistiyɑ̀ ɑ́tyɑme, kɑ gï cyedde kì Gebɑ̀ gïti Gedher. Kɑ Debïd jöddi Isrɑil døøge ki cøngø, kwɑnni gen bɑ ɑ́lïp pyɑ̈r ɑ́dɑ̈g Kɑ Debïd geki jøge bënn kedh-ɑ Bɑɑlɑ̀ kì Yeudiyɑ̀ be dwɑɑyi Sɑnduug Ciggi Jwøk. Sɑndungɑni cwøl ɑ́ Nying, Nyingi Wïlɑ̈bø, Jwøng-ɑ Ácwɑ̈ɑ̈j, ɑ kwömø kì kɑɑm kerobb. Kɑ Sɑnduug Ciggi Jwøk kwɑny yi gen, kɑ gø cïb gen yij yɑ̈y me nyɑ̈n. Kɑ gø kɑ̈ɑ̈l gen wɑ̈g kì gøl Abinɑdɑb kì wïj kït. Udhɑ̀ kí Akiyö, wɑ̈ddi Abinɑdɑb ɑ kwølli yɑ̈y-ɑ nyɑ̈n, eni yɑ̈y-ɑ kɑ̈lli Sɑnduug Ciggi Jwøk. Akiyö ɑ cyɑ̈dhi kì bøli yɑ̈y. O Debïd geki tyëng Isrɑil bënn ceg-ɑ yëggø kì bøli Jwøng-ɑ Ácwɑ̈ɑ̈j, ge opödø ki bullì, kɑ̈ngì okodhø, thøm othomø. Keny-ɑ ɑ́wɑ̈dhi gen rɑri pwödhi Nɑkön, kɑ Udhɑ̀ cinge rïïje, ɑmɑge Sɑnduug Ciggi Jwøk, mɑ́ wɑ̈dhh-ɑ pyejji yɑ̈y ɑ́ceg-ɑ cyerø. Kɑ Jwøng-ɑ Ácwɑ̈ɑ̈j pyëwe órënyø ki Udhɑ̀, kɑ gø nɑ̈ge kì kenyɑni ceth, kì buti Sɑnduug Ciggi Jwøk. Debïd ɑ́bëëd yije ledh kipe kɑ ɑ́nɑ̈ɑ̈g Udhɑ̀ yi Jwøng-ɑ Ácwɑ̈ɑ̈j. Kenyɑni cwølli ɑnɑn ɑ́ Cɑ́yi Udhɑ̀. Debïd ɑ́bwøg yi Jwøng-ɑ Ácwɑ̈ɑ̈j dicyɑ̈ngɑni, ɑkööbe kinni, “Sɑnduug Ciggi Jwøng-ɑ Ácwɑ̈ɑ̈j ówɑ̈nhi yïɑ kidï ɑnɑn?” Codhe, kɑ Debïd ocögø e Sɑnduug Ciggi Jwøk pɑ kïdhe Yerusɑlem. Kɑ gø yöd gø kïdhe’ gøl Obed Edöm jɑl Gɑth. Kɑ Sɑnduug Ciggi Jwøng-ɑ Ácwɑ̈ɑ̈j obëëdø kì gøl Obed Edöm jɑl Gɑth ki dwɑ̈tt ɑ́dɑ̈g. Kɑ Obed Edöm gyëdh yi Jwøng-ɑ Ácwɑ̈ɑ̈j geki gøle bëne. Kɑ Debïd köbbi yi teedø kinni, “Obed Edöm ɑ́gyëdh yi Jwøng-ɑ Ácwɑ̈ɑ̈j geki gøle bëne kí jɑmme bënn, kipe kɑ̀ ying Sɑnduug Ciggi Jwøk gøle.” Codhe, ɑkedh Debïd, kɑ gø kɑ̈ɑ̈le Yerusɑlem ki dhwɑ̈ng. Keny-ɑ ɑ́wɑ̈ddi jøg-ɑ byelli Sɑnduug Cigg yöö ki yethi tyel ɑ́bïkyel, kɑ Debïd ongɑ̈dø ki wɑdh kí røjø gɑ gëdhhì. Codhe, kɑ Debïd óyëggø kì bøli Jwøng-ɑ Ácwɑ̈ɑ̈j ki menteg. Debïd ɑ́rug-ɑ ógudhi kwër kì bøli kenyɑni. Debïd geki tyëng Isrɑil bënn Sɑnduug Ciggi Jwøk ɑ́kɑ̈lli yi gen ge óryeerø, kɑ̈ngì okodhø, o thøm othomø. Ri wɑ̈nhi Sɑnduug Ciggi Jwøng-ɑ Ácwɑ̈ɑ̈j kɑɑl Debïd ceth, kɑ Mikɑl nyɑɑr Cɑul ómëddø kì ɑwɑj. Keny-ɑ ɑ́lidhe Debïd e óyëggø, kɑ gø byenye ki pyëwe. Kɑ Sɑnduug Ciggi Jwøng-ɑ Ácwɑ̈ɑ̈j cïb keje kì yij Kemɑ̀ men-ɑ ɑ́gurrii yi Debïd. Kɑ Debïd ongɑ̈dø ki gënh-ɑ nyi rɑ̈b bëne geki keni mër kì bøli Jwøng-ɑ Ácwɑ̈ɑ̈j. Kɑ Debïd órumø ki gwøgi gënh-ɑ nyi rɑ̈b bëne geki keni mër, ɑkwënge ji ki nyingi Wïlɑ̈bø, Jwøng-ɑ Ácwɑ̈ɑ̈j. Apɑ̈nge gïncɑm kì kelli tyëng Isrɑil bënn, jøg-ɑ cwøw kí tyëng-ɑ mɑ̈nn, kɑ ngɑɑn nyi nënge, ki ɑ́tungi rïngø, kí ópun, kí ópuun nywøli yenh. Codhe, kɑ ji kedh-ɑ kɑ̈lli gen. Kɑ Debïd kedh-ɑ be kwëngi gøle, kɑ Mikɑl nyɑɑr Cɑul bï-ɑ wɑ̈g yïe, kɑ gø köbbe kinni, “Rɑ̈ɑ̈dh Isrɑil ówør dicyɑ̈ɑ̈ng! Anyodhe ree kì bøli bɑ̈ngg-ɑ mɑ̈nn, ni dhëng-ɑ nyi wɑ̈dhi ógudhe ki luny wɑ̈g kì bøli ji, e wïje pɑ lɑ̈ɑ̈y.” Aköbbi Mikɑl yi Debïd kinni, “Yɑ ɑ́yëggi kì bøli Jwøng-ɑ Ácwɑ̈ɑ̈j, ɑ ɑ́myeg yɑn, o yɑ jɑɑg-ɑ tyëng Isrɑil, de wïyí ɑ́bɑnye geki gøle bëne. Yɑ ceg-ɑ yëggø ceth kì bøli Jwøng-ɑ Ácwɑ̈ɑ̈j. Yɑ ócuggø cögø yɑ pɑ wør, wɑlɑ̀ ji ócuggø rumø i yɑ bɑ dhëg, de yɑ ówør yi bɑ̈ngg-ɑ mɑ̈nn møg-ɑ kømmi yi yïn ɑnɑn!” Mikɑl nyɑɑr Cɑul nuti nywølø ki nyir gïti kɑ ɑ́thøwe. Kɑ Debïd pëgg-ɑ piny kì gøle kì bɑng kɑ ɑ́thödhii ki mër yi Jwøng-ɑ Ácwɑ̈ɑ̈j, ɑcöge e pɑ jud yi jurr-ɑ bɑdhhi pödhe. Codhe, kɑ Nɑthɑn jɑltöng köbbi yi Rɑ̈dh Debïd kinni, “Lidh, yɑ bëëd ɑ ød me bɑ ɑger ki pɑ̈mmi yɑdh sɑndɑl, de Sɑnduug Ciggi Jwøng-ɑ Ácwɑ̈ɑ̈j bëëd ɑ yij kemɑ̀!” Kɑ rɑ̈dh köbbi yi Nɑthɑn kinni, “Gwøg gïg-ɑ dwɑddi yi pyëwí bënn, mɑ́ yï bɑ ɑkøny yi Jwøk.” Cyɑ̈ngɑni kì wɑ̈r, ɑköbbi Nɑthɑn yi Jwøng-ɑ Ácwɑ̈ɑ̈j kinni, “Kedh köbbí bɑ̈ngɑ Debïd kinni, møg-ɑ kwøb yi Jwøng-ɑ Ácwɑ̈ɑ̈j ek: ‘Pɑth ki yïn ɑ ógëddi yɑn ki ød me yije bëëdɑ. Kër-ɑ ɑ́kɑ̈ɑ̈lɑ tyëng Isrɑil wɑ̈g kì Rïp gïti ɑnɑn, yɑ nuti bëëdø kì ød. Yɑ ɑ́cyɑ̈dhi kì kɑɑmɑni ɑ́ kemɑ̀ ɑ bɑ ødɑ. Keny-ɑ ɑ́cyɑ̈dhɑ ki tyëng Isrɑil, bong jɑgø ɑ́kyel kì kelli jɑggi gen mɑ ɑ́köbbɑ kinni ede ɑ bɑnye yɑn ki gëddø ki ød yɑdh sɑndɑl.’ “Köbbí bɑ̈ngɑ Debïd kinni, møg-ɑ kwøb yi Wïlɑ̈bø, Jwøng-ɑ Ácwɑ̈ɑ̈j ek, ‘Yï ɑ́kɑ̈ɑ̈l-ɑ yi yɑn kì bɑng dyëg, o yï göög ki jɑngi jiɑ tyëng Isrɑil. Yɑ ɑ́cyɑ̈dhi kɑ yïn kì keny-ɑ ɑ́kedhi yi yïn, kɑ tyëng-ɑ mɑɑn yïn tyɑ̈mmɑ yïn. Yï ɑ́tïngɑ mɑl kɑ perí ótëngø ni tyëng-ɑ per gen teeg kì kömi piny. Thyew tyëng Isrɑil jiɑ ɑ́yɑ̈bbɑ ki kej gen, kɑ ge cïbɑ piny, o ge bëëd gen kì yethi myërri gen. Bong ngɑn nywɑl gen këti. Ge pɑ jud yi tyëngrijjø këti ni kɑ ɑ́bëëd gen cøn, kɑ ɑ́kɑ̈bbɑ ki jɑgg mø jɑɑg Isrɑil jiɑ. Yɑ köbb-ɑ yïn thyew kinni kwɑrrí ógwøg yi yɑn gɑ rɑ̈nhi Isrɑil kì bɑngí. Keny-ɑ óthumi cyɑ̈nggí, kɑ yï kedh-ɑ bɑng kweyyí, ɑ́kyel kì kelli wɑ̈ddí ógwøg yi yɑn ɑ́ rɑ̈dh, kɑ pödhe tyenyɑ. Yɑ ógëdd-ɑ yi en ki ød, o lɑwe ómïdhi yi yɑn gïti ɑtheer. Yɑ óbëëdø yɑ bɑ wïye, o óbëëd e bɑ wɑ̈dɑ. Keny-ɑ órønge, ópwödɑ ni dhɑnhø kenyi pwöde wɑ̈de. Yɑ ɑ́wïyi ki mɑɑri Cɑul jɑl-ɑ ɑ́nyiig yi yɑn kì bølí, de yɑ pɑ wïyi ki mɑɑri wɑ̈dí. Gølí geki lɑwí ócungi kì bølɑ ceth. Kwømí óbëëd e nud gïti ɑtheer.’ ” Kɑ møg-ɑ ɑ́kwøb yi Jwøk bënn, köbbi Debïd yi Nɑthɑn. Kɑ Rɑ̈dh Debïd kedh-ɑ yij Kemi Kwër, ɑbøødhe ree piny kì bøli Jwøng-ɑ Ácwɑ̈ɑ̈j, kɑ okööbø kinni, “Yïn ɑ wɑ̈ɑ Jwøng-ɑ Ácwɑ̈ɑ̈j, yɑ bɑ gïn? Gølɑ bɑ gïn? Yɑde ɑ kïdhí yɑn keny ni men? De menɑni bong pere kì yïí, yïn ɑ wɑ̈ɑ Jwøng-ɑ Ácwɑ̈ɑ̈j. Yï ɑ́kööb kì ri gøl bɑ̈ngí ki kër-ɑ óbëëde, menɑni bɑ bëëdi dhɑnhø ceth. Á ngø ɑ köbbɑ yïn ɑnɑn këti yïn ɑ wɑ̈ɑ Jwøng-ɑ Ácwɑ̈ɑ̈j, e bëëdɑ ngɑ̈nyi yi yïn kidøøj? Kipe møg-ɑ ɑ́kwøb yi yïn, ni kɑ ɑ́tyerii yi pyëwí, ɑ bɑnge ɑ́gwøøg gïn-ɑ dwøng ni men, ɑ nyudhí møgɑni bɑ̈ngí. Yï Dwøng yïn ɑ wɑ̈ɑ Jwøng-ɑ Ácwɑ̈ɑ̈j! Bong jwøg me pɑ̈r ki yïn. Bong jwøg megø den-ɑ́ yï ketí ɑ bɑ Jwøk. Bong pödhø me ni Isrɑil kì kömi piny, gen ɑ ji-ɑ ɑ́yïëël yi yïn wɑ̈g kì yij bɑ̈ɑ̈ngø, kipe kinni o ge gwøøg gɑ jií, kɑ yï ogöögø ki gïgdøngø kiper gen. Tyëng Isrɑil ɑ́myeg yi yïn o ge bëëd gen gɑ jií gïti ɑtheer, o yï bëëd yïn ɑ́ Jwøøg gen, yïn ɑ Jwøng-ɑ Ácwɑ̈ɑ̈j. “Anɑn yïn ɑ Jwøk, Jwøng-ɑ Ácwɑ̈ɑ̈j, mïdhí møg-ɑ ɑ́kwøb yi yïn kinni ge ógwøg yi yïn kiperɑ wøki gølɑ gïti ɑtheer. Gwøg møg-ɑ ɑ́kwøb yi yïn. O yï ówør, o ji nyi kööb gen kinni, ‘Wïlɑ̈bø, Jwøng-ɑ Ácwɑ̈ɑ̈j, bɑ Jwøk kì Isrɑil!’ O gøl bɑ̈ngí Debïd cunge kì bølí. Mɑ́ bene yïn Wïlɑ̈bø, Jwøøg Isrɑil, Jwøng-ɑ Ácwɑ̈ɑ̈j, ɑ ɑ́kwɑ̈ddi yïthhi bɑ̈ngí ki kwøb kinni, ‘Gølí ógwøg yi yɑn ɑ́ kɑl me dwøng.’ Bene ɑ bɑnge cwed bɑ̈ngí pyëwe kɑ yï kwɑjje. “Anɑn yïn ɑ wɑ̈ɑ Jwøng-ɑ Ácwɑ̈ɑ̈j, yï bɑ Jwøk, o kwøbbí bɑ dyër. O møg døj møg-ɑ ɑ́kwøb yi yïn, ge ógöggí yɑn ceth. Yɑ kwɑjj-ɑ yïn gyëdh gølɑ. Wiy cöge e ying-ɑ bølí ceth. Yïn ɑ wɑ̈ɑ Jwøng-ɑ Ácwɑ̈ɑ̈j, møgɑk bɑ møgí. Wiy gyëdhhí cöög gen gølɑ gïti ɑtheer.” Kì bɑng keny megø, kɑ Debïd ónyïɑ̈ggø ki Pelistiyɑ̀ kɑ gï tyɑme, ɑdwööge gïn thɑ́ cigge, kɑ pinyɑni kwɑnye kì yï tyëng Pelistiyɑ̀. Tyëng Moɑb ɑ́tyɑm yi Debïd thyew. Gï ɑ́cïre buddø kì piny, kɑ gï røme ki thøl. Yethi thøll ɑ́ryew nyi nɑ̈g, o yij thøl ɑ́kyel nyi wiy. Codhe, kɑ tyëng Moɑb ogöögø ki bɑ̈nggi Debïd, ge nyi ceg-ɑ col ki gwɑ̈j. Adɑdedher wɑ̈d Reköb rɑ̈ɑ̈dh Dhöbɑ̀, keny-ɑ ɑ́kedhe myërri kömi Nɑm Porɑt be dwöögi gen thɑ́ cigge, ɑnyïɑ̈ggi Debïd ki en, kɑ tyɑm yi Debïd. Amɑɑg jøkyënye gɑ ɑ́lïp kí miy ɑ́bïryew yi Debïd, kí jøliny tyel gɑ ɑ́lïp pyɑ̈r ɑ́ryew. Akebbi rɑ̈rri tyelli kyënyì yi Debïd, kɑ wiy-ɑ kyënyì miyø keti gen. Keny-ɑ ɑ́bëën tyëng Arɑm møg-ɑ bëëdø kì Dimɑceg, be kønyi Rɑ̈dh Adɑdedher ki liny, kɑ Debïd ónɑ̈ggø kì kelli gen ki ɑ́lïp pyɑ̈r ɑ́ryew wïdɑ́ryew. Kɑ Debïd cïb-ɑ myërri Dimɑceg ki jøge. Codhe, ɑgöög tyëng Dimɑceg ki bɑ̈ngge, kɑ ge nyii muujø ki gwɑ̈j. Debïd ɑ́thödhi ki tegø yi Jwøng-ɑ Ácwɑ̈ɑ̈j; nyi ceg-ɑ tyɑ̈mø liny kì keny-ɑ kedhe. Köddi dhɑb møg-ɑ ɑ́bëëd gɑ mø pëjji liny Adɑdedher ɑ́kwɑny yi Debïd, kɑ gï kɑ̈ɑ̈le Yerusɑlem. Debïd ɑ́kɑ̈ɑ̈d ki jɑmmì mø gïïr møg-ɑ óthɑ̈dhø ki dilɑl kì Betɑ̀ kí Beröthɑy, gen ɑ kɑ̈dd-ɑ ɑ́jɑɑg yi Adɑdedher. Kɑ Töì rɑ̈ɑ̈dh Amɑth olïngø kinni i liny Adɑdedher ótyɑmø yi Debïd. Codhe ɑöre wɑ̈de Yörɑm yï Debïd, be köbbi Debïd kinni pyëwe med kɑ ɑ́tyɑɑm Adɑdedher. Mɑ́ Adɑdedher ɑ́bëëd ge mɑ̈n ki Töì. Yörɑm ɑ́kɑ̈ɑ̈d ki jɑmmì møg-ɑ óthɑ̈dhø gɑ dhɑb, møøgø bɑ ɑ́tegø, møøgø bɑ dilɑl. Kɑ jɑmmɑni thyey yi Debïd gɑ mø Jwøng-ɑ Ácwɑ̈ɑ̈j, ni kɑ ɑ́thyeye dhɑb kí ɑ́tegø men-ɑ ɑ́mɑg yi en kì yï jurr-ɑ kyeelø, ɑ́kɑ̈ni kì Edöm, kí Moɑb, kí Amön, kí Pelistiyɑ̀, kí Amɑlek. Kí møg-ɑ ɑ́mɑg kì yï Adɑdedher wɑ̈d Reköb rɑ̈ɑ̈dh Dhöbɑ̀. Kɑ Debïd nyinge ti-ɑ kedhi mɑl kì bɑng kɑ ɑ́dwööge kì be pwöödi tyëng Edöm piny, gɑ ɑ́lïp pyɑ̈rø wïdɑ́bïdɑ̈g kì Töör Omelø. Kɑ Debïd cïb-ɑ myërri Edöm ki jøge, ɑgöög tyëng Edöm ki bɑ̈ngge, kɑ ge nyii muujø ki gwɑ̈j. Debïd ɑ́thödhi ki tegø yi Jwøng-ɑ Ácwɑ̈ɑ̈j, nyi ceg-ɑ tyɑ̈mø liny kì keny-ɑ kedhe. Kɑ Isrɑil bëne jɑɑg yi Debïd kidøøj, e mïdh-ɑ dyër geki lögg-ɑ døj kì yij pödhe bëne. Yöɑb wɑ̈d Dheruyɑ̀ ɑ ɑ́bëëd ɑ́ pënyi liny, o Yöcɑpɑt wɑ̈d Akilud ɑ ɑ́bëëd ɑ́ 'mïdhi wɑ̈j. Dhɑdök wɑ̈d Akitub geki Akimelek wɑ̈d Abiyɑthɑr ɑ ɑ́bëëd gɑ ókwër. O Serɑiyɑ̀ ɑ́bëëd ɑ́ sikriter. Benɑiyɑ̀ wɑ̈d Yöyɑdɑ̀ ɑ ɑ́jɑɑg jøg-ɑ kor Debïd, o wɑ̈ddi Debïd ɑ́bëëd gɑ ókwër. Kɑ Debïd ópëjjø cyɑ̈ng ɑ́kyel kinni, “Dɑ dhɑnhø me döngø kì gøl Cɑul? Ke di gøn, yɑ dwɑdd-ɑ göggii ki gïndøj kipe Yönɑthɑn.” Ádɑ jɑl mɑ ɑ́bëëd ɑ́ bɑ̈ng Cɑul me cwøl ɑ́ Dhiibɑ̀. Kɑ Dhiibɑ̀ cölli Debïd. Apyëjii yi rɑ̈dh kinni, “Bene yïn Dhiibɑ̀?” Alögge kinni, “Yɑn wuö.” Kɑ rɑ̈dh okööbø kinni, “Dɑ dhɑnhø mɑ ɑ́döng kì gøl Cɑul, me cuggi göggø yi yɑn ki gïndøj kipe Yönɑthɑn, ni kɑ ɑ́köngɑ kì bøli Jwøk?” Kɑ Dhiibɑ̀ okööbø kinni, “Dɑ ɑ́kyel mɑ ɑ́döng kì kelli wɑ̈ddi Yönɑthɑn. Tyelle ryeet ngøølø.” Kɑ rɑ̈dh ópëjjø kinni, “Ying-ɑ keny?” Alöggi Dhiibɑ̀ kinni, “Nud kì gøl Mɑkir wɑ̈d Amiel kì Lödebɑr.” Aöd Debïd ki bɑ̈ngg, ɑkɑ̈ɑ̈lii kì gøl Mɑkir wɑ̈d Amiel kì Lödebɑr. Kɑ Mepiböceth wɑ̈d Yönɑthɑn wɑ̈d Cɑul kedh-ɑ yï Debïd, ɑbøødhe ree piny kì bøle, kɑ gø mɑle. Kɑ Debïd okööbø kinni, “Mepiböceth!” Alögge kinni, “Yɑn wuö.” Aköbbii yi Debïd kinni, “Yï ko böggi. Yï ógöggi yi yɑn ki gïndøj, kiper Yönɑthɑn wïyí. Piny-ɑ ɑ́bëëd ɑ́ mi kweyí Cɑul döggɑ’ yïn, o yï ócög yï cyɑ̈ɑ̈m ɑ tɑwɑ.” Kɑ rɑ̈dh mɑl yi Mepiböceth, ɑkööbe kinni, “Á kipe ngø ɑ göggí yɑn ki gïndøj yɑ pɑ̈r ki gwöng thøø ni men?” Kɑ Dhiibɑ̀ bɑ̈ng-ɑ ɑ́mïdhi gøl Cɑul cwøl yi rɑ̈dh, ɑköbbe gøn kinni, “Jɑmm-ɑ ɑ́bëëd gɑ mø Cɑul geki jɑmmi gøle bëne, mëggɑ’ kwɑɑr wöw. Purrí pwödhe en, wuki wɑ̈ddí kí bɑ̈nggí. Kɑ byel nyi muuju en, o gøl kwɑɑr wöw yïdde ki gïncɑm. De Mepiböceth cög e cyɑ̈ɑ̈m ɑ tɑwɑ.” Dhiibɑ̀ ɑ́bëëd yïe dɑ wɑ̈dd pyɑ̈rø wïdɑ́bïj, kí bɑ̈ngg pyɑ̈r ɑ́ryew. Kɑ rɑ̈dh köbbi yi Dhiibɑ̀ kinni, “Møg-ɑ ɑ́kwøb yi rɑ̈dh ógwøg yi bɑ̈nge ceth.” Kɑ Mepiböceth ocögø e cyɑ̈ɑ̈m ɑ tɑɑw rɑ̈dh ni wɑ̈d rɑ̈dh. Mepiböceth ɑ́bëëd yïe dɑ wɑ̈de me thiinh, me cwøl ɑ́ Miikɑ̀. Gøl Dhiibɑ̀ bëne ɑ́göög ki bɑ̈nggi Mepiböceth. Kɑ Mepiböceth pëgg-ɑ Yerusɑlem, mɑ́ e ɑ́cög e cyɑ̈ɑ̈m ɑ tɑɑw rɑ̈dh. Kɑ Nɑkɑc rɑ̈ɑ̈dh Amön othøø, ɑkwɑɑny lɑne yi Anun wɑ̈de. Kɑ Debïd okööbø kinni, “Yɑ dwɑdd-ɑ göggi Anun wɑ̈d Nɑkɑc ki gïndøj ni gïndøj men-ɑ ɑ́göggi yɑn yi wïye.” Codhe, ɑöd Debïd ki ji møg këëmii ki thøwi wïye. Kɑ jøg-ɑ ɑ́ör yi Debïd wɑ̈dh-ɑ piny Amön. De jøgdøngi Amön wïi gen Anun ɑ́köbbi gen kinni, “Bɑ per thøwi wïyí ɑ teg kì yï Debïd, ɑöne ki ji møg këëm yïn? Pɑth! Ge ɑ́ör-ɑ be lidhi kɑɑl yi Debïd, o gø tid gen, o ge óbï gen be mɑgii ki liny.” Codhe, kɑ jøg-ɑ ɑ́ör yi Debïd mɑg yi Anun. Kɑ budi tïggi gen lyele, kɑ ógudhi gen ngøl ge ruud-ɑ wɑ̈g kì kömi rwödhhi gen. Codhe, kɑ gï öre yöö. Aöd Debïd ki ji mø pɑɑr gen, mɑ́ ge cyɑ̈dhi ge yɑ̈rø ki menrɑj. Kɑ Rɑ̈dh Debïd okööbø kinni, “Bëëd wun kì Yerikö gïti keny-ɑ ótwïy yëyyi tïggi wun këti. Codhe, kɑ wu dwöög wun.” Kɑ yod yi tyëng Amön kinni Debïd ɑ́mɑ̈ni ki gen. Aödi gen yï tyëng Arɑm, kɑ ge okïrø ki ji ɑ́lïp pyɑ̈r ɑ́ryew kì Betreköb geki Dhöbɑ̀. Kɑ rɑ̈ɑ̈dh Mɑɑkɑ̀ obëënø ki ji ɑ́lïp ɑ́kyel, kɑ ɑ́lïp pyɑ̈rø wïdɑ́ryew obëënø kì Töb. Alïng Debïd kɑ Yöɑb öre geki jøliny bënn. Kɑ jøgi Amön bï-ɑ wɑ̈g, kɑ liny gen ócungø kì dhø pöör, de jøgi Arɑm, geki jø Dhöbɑ̀, kí jø Reköb, kí jø Töb, kí jø Mɑɑkɑ̀ ri gen ɑ́thyeer gen wɑ̈yi gen kì dhø pɑ̈l. Kɑ lidh yi Yöɑb kinni bɑ ɑtyeg yi liny, møøgø ying-ɑ bøle, møøgø ying-ɑ ngɑ̈je. Codhe, ɑkɑ̈bbe ki jøg-ɑ teg kì Isrɑil, o ge kedhi gen be nyïɑ̈ggø ki tyëng Arɑm. Kɑ linyɑni bëne mëgge Abicɑy ómen, o gï pyejje. Codhe, ɑöre gïn be nyïɑ̈ggø ki tyëng Amön. Kɑ Abicɑy köbbi yi Yöɑb kinni, “Otëngi Arɑm kibølɑ, kɑ yï bï be kønyi yɑn. O keløg ɑ́ Amön ɑ tëngi kibølí, yɑ óbï be kønyi yïn. Cwed pyëwí, kɑ wɑ nyïɑ̈ggi wɑ kipe jiee geki myërri Jwøgee. Jwøng-ɑ Ácwɑ̈ɑ̈j ógwøg gïn-ɑ nenni yi en e døøj.” Codhe, kɑ Yöɑb geki yɑye pödh-ɑ yï tyëng Arɑm, kɑ tyëng Arɑm órengø. Kɑ lidh yi Amön kinni Arɑm ɑ́rengi, codhe ɑlunyi gen ki rengø kì bøli Abicɑy, kɑ ge døøg-ɑ kɑɑl gen. Kɑ Yöɑb ódwöögø kì kun-ɑ ɑ́nyïɑ̈gge ki tyëng Amön, kɑ bï-ɑ Yerusɑlem. Keny-ɑ ɑ́lidhii yi tyëng Arɑm kinni ge ɑ́tyɑm yi Debïd, kɑ ri gen cøng gen gɑ yɑy me dwøng. Adɑdedher ɑ́öd, kɑ tyëng Arɑm møg-ɑ løøg Nɑm Porɑt kì wɑɑng cyɑ̈ɑ̈ng mwøl cwøle, kɑ ge obëënø, kɑ ge kedh-ɑ Kelɑm ge pyejj-ɑ yi Cöbɑk, pënyi liny Adɑdedher. Møgɑni ólïngø yi Debïd, kɑ Isrɑil cønge bëne, ɑbɑ̈ɑ̈n gen Nɑm Urdun kɑ ge kedh-ɑ Kelɑm. Kɑ liny Arɑm odhwödhø kɑ ge pödh-ɑ yï Debïd, de tyëng Arɑm ɑ́yöd ge ceg kɑ cyeddø yi Debïd. Kɑ Debïd ónɑ̈ggø ki jøliny yɑ̈ɑ̈th gɑ miy ɑ́bïryew, kí jøkyënyì gɑ ɑ́lïp pyɑ̈r ɑ́ngwen. Cöbɑk pënyi liny Adɑdedher ɑ́nɑ̈g thyew kì kenyɑni. Keny-ɑ ɑ́lidhii yi rɑ̈nhh-ɑ ɑ́køny Adɑdedher bënn kinni ge ɑ́dhɑ̈li cung kì bøli Isrɑil, ɑyömmi gen yï Isrɑil. Kɑ ge døøg-ɑ be göggi Isrɑil. Kɑ tyëng Arɑm obwøgø ki kønyi tyëng Amön ki liny këti. Kì ri thumi run, bøli keny-ɑ nyi kedhi rɑ̈nhì be mɑ̈nyø, kɑ Yöɑb ki linye geki tyëng Isrɑil bënn ör yi Debïd. Kɑ myërri Amön rënyi yi gen, kɑ kɑɑl Rɑbɑ̀ tyeg gen. De Debïd ɑ́döng e bëëd ɑ Yerusɑlem. Kɑ Debïd wɑ̈dh-ɑ dhwödhø cyɑ̈ng ɑ́kyel kì böörø, kì keny-ɑ ɑ́buude. Kɑ kedh-ɑ wïj óthɑɑng ød kì gøldwøng. Kɑ ólïdhø e ying-ɑ wïj óthɑɑng ød ki ngɑndhɑjø me lwøg. Ngɑnɑni myëër cɑrø. Kɑ Debïd oödø ki ji møg yod ngɑnɑni mɑ løge men. Kɑ gø yode kinni nyɑnɑni bɑ Bɑtcebɑ̀ nyɑɑr Eliɑm. O bɑ cï Uriyɑ̀ wɑ̈d Kit. Aöd Debïd ki ngɑn me dwɑɑy Bɑtcebɑ̀. Keny-ɑ ɑ́bëëne yïe, ɑbudde ki gøn. (Bɑtcebɑ̀ cer-ɑ rumø ki kwëri dwɑ̈ye.) Codhe, kɑ døøg-ɑ gøle. Kɑ Bɑtcebɑ̀ óyɑɑjø, ɑöde yï Debïd kinni, “Yijɑ dɑ dhɑnhø.” Kɑ Debïd öd-ɑ yï Yöɑb ki wöödø kinni, “Örí yɑn Uriyɑ̀ wɑ̈d Kit.” Kɑ Uriyɑ̀ öri Debïd yi Yöɑb. Keny-ɑ ɑ́wɑ̈nhi Uriyɑ̀, ɑpyëjii yi Debïd mɑ bëëd Yöɑb kidï, kí mɑ bëëd jøge kidï, kí mɑ bëëd liny cyɑ̈dh-ɑ́ɑ̀ dï. Codhe, ɑköbbi Uriyɑ̀ yi Debïd kinni, “Kedhí gølí kɑ rií ywööm.” Codhe, kɑ Uriyɑ̀ bï-ɑ wɑ̈g kì gøldwøng, ɑödi gøle yi rɑ̈dh ki gïi jwödhø. De Uriyɑ̀ ɑ́cög e nuti kedhi gøle. Áyöd e ceg-ɑ buddø kì dhø gøldwøng geki jø rɑ̈dh. Kɑ Debïd köbbi kinni, “Uriyɑ̀ nuti kedhi gøle.” Kɑ Uriyɑ̀ köbbi yi Debïd kinni, “Yï ɑ́kɑ̈ɑ̈l-ɑ yöö, yïde ɑ cöög yï pɑ kedhi gølí?” Aköbbi Debïd yi Uriyɑ̀ kinni, “Sɑnduug Cigg, kí Isrɑil geki Yeudiyɑ̀ ge bëëd ɑ yethi ɑkɑnnì. O Yöɑb geki bɑ̈nggi wɑ̈ɑ ge ying-ɑ pɑ̈l. O yɑ kedhɑ gølɑ, o yɑ cyɑ̈mɑ, o yɑ mɑ̈dhɑ, o yɑ buddɑ ki cyëgɑ? Yɑ ɑ́köngi kinni gïn ni menɑni pɑ cuggi gwøgø yi yɑn kinni tek.” Aköbbi Uriyɑ̀ yi Debïd kinni, “Bëëd kì keny dicyɑ̈ɑ̈ng. Yï óörɑ kej liny dhuki.” Kɑ Uriyɑ̀ obëëdø kì Yerusɑlem cyɑ̈ngɑni kí dhuki. Codhe, ɑcwøøl Uriyɑ̀ yi Debïd, kɑ Uriyɑ̀ ocyɑ̈mø kɑ omɑ̈dhø kì tɑɑw Debïd. Kɑ Uriyɑ̀ kɑɑg yi Debïd ki møgø, kɑ nɑ̈g yi møgø. De Uriyɑ̀ nuti kedhi gøle. Uriyɑ̀ ɑ́buud-ɑ dhø gøldwøng kì wɑ̈rɑni. Agwëdi Yöɑb ki wɑ̈nyø yi Debïd. Kɑ wɑ̈nyɑni mëgge Uriyɑ̀ o gø kɑ̈l en. Møg-ɑ ɑ́gwede bɑ kinni, “Cïb Uriyɑ̀ yedh yɑy kì keny-ɑ di liny-ɑ teeg. Kɑ wu dwöögu cyɑ̈n kì bɑnge, kɑ wiy nɑ̈g.” Kɑɑlɑni ɑ́bëëd ɑ́ ɑtyeg yi Yöɑb, kɑ keny-ɑ di liny-ɑ teeg lidhe, ɑcïbe Uriyɑ̀ kenyɑni. Keny-ɑ ɑ́bëën jø kɑɑlɑni wɑ̈g be nyïɑ̈ggø ki Yöɑb, ge ɑ́nɑ̈ɑ̈g ki kwï jø Debïd. Uriyɑ̀ wɑ̈d Kit bɑ ɑ́kyel kì kelli jøg-ɑ ɑ́nɑ̈g. Kɑ Yöɑb öd-ɑ yï Debïd ki kwøbbi kër-ɑ cyɑ̈dhi liny. Jɑl-ɑ ɑ́ör yi en ɑ́köbbe kinni, “Keny-ɑ órum ki köbbi rɑ̈dh ki kër-ɑ cyɑ̈dhi liny, keløg rɑ̈dh ómɑg yi liny, kɑ okööbø kinni, ‘Wude ɑ ti wun cyɑ̈ngø ki dörø wu ónyïɑ̈ggø? Kwïj yi wun kinni ge ócuggø pöd ki wethh ge ying-ɑ wïj dörø? Á men ɑ ɑ́nɑ̈g Abimelek wɑ̈d Gideon? Pɑth ki ngɑndhɑjø ɑ ɑ́leeng kïti ɑwɑj köme, e ngɑnɑni ying-ɑ wïj dörø kì Tebedh kɑ gø nɑ̈ge? De wude ɑ ɑ́ti wun cyɑ̈ngø ki dörø?’ Kɑ yï kööb kinni bɑ̈ngí Uriyɑ̀ wɑ̈d Kit ɑ́nɑ̈g thyew.” Codhe, kɑ jɑl-ɑ ɑ́ör ókedhø, kɑ møg-ɑ ɑ́cïgii yi Yöɑb köbbe rɑ̈dh bënn. Debïd ɑ́köbbi yi jɑl-ɑ ɑ́ör kinni, “Wø ɑ́ceg kɑ kømi tyɑmø yi jøgi Amön. Kɑ ge bï-ɑ wɑ̈g kì kɑɑl be nyïɑ̈ggø ki wøn, de ge ɑ́cyeddi yi wøn gïti dhø dörø. Kɑ bɑ̈nggí pwöd yi gen ki wethh ge ying-ɑ wïj dörø, kɑ kwï jøgí nɑ̈g. Uriyɑ̀ wɑ̈d Kit ɑ́nɑ̈g thyew.” Kɑ jɑl-ɑ ɑ́kɑ̈ɑ̈l wöödø köbbi yi Debïd kinni “Cïj Yöɑb kɑ köbbí kinni pyëwí ko wëggí løgø yi møgɑni, mɑ́ pilø nyi wɑ̈dh-ɑ kɑ̈bbø yøw, ying e kwɑny-ɑ men, wɑlɑ̀ men-ɑcɑ̀. Turrí kömi kɑɑlɑni, kɑ mɑɑg.” Kɑ cï Uriyɑ̀ olïngø ki thøwi jɑlgøle, kɑ óywöngø kipere. Keny-ɑ ɑ́thumi bøli kej ywøge, kɑ Debïd oödø ki bɑ̈ngg mø kɑ̈ɑ̈lii gøle. Kɑ ogöögø ki cï Debïd. Kɑ Debïd nyödde ki wɑ̈d, de gïn-ɑ ɑ́gwøg yi Debïd ɑ́bɑny yi Jwøng-ɑ Ácwɑ̈ɑ̈j. Kɑ Nɑthɑn öri Debïd yi Jwøng-ɑ Ácwɑ̈ɑ̈j. Keny-ɑ ɑ́wɑ̈dhe yï Debïd, ɑkööbe kinni, “Ádɑ ji ɑ́ryew mɑ ɑ́bëëd kì kɑɑl ɑ́kyel. Jɑl ɑ́kyel kɑ̈rø, o jɑl-ɑ kyeelø jɑdø. Jɑl-ɑ kɑ̈rø yïe ɑ́dɑ dyëg kí dhög mø gïïr cɑrø. De jɑl-ɑ jɑdø yïe ɑ́dɑ órömø ɑ́kyel kete. Gø ɑ́ceg yi en kɑ ngewø, kɑ gø pidhe kyeel ki nyige. Nyɑ órömɑni nyi cyɑ̈ɑ̈m ɑ ri gïncɑme, o mɑ̈ɑ̈dh ɑ yij köödh pïge, kɑ nyii buddø kì kööre. Nyɑ órömɑni ɑ́bëëd e nɑ nyɑre. Codhe, kɑ jɑlkɑ̈r këëm yi wëlø. Jɑlkɑ̈r ɑ́dwɑdd-ɑ ngɑ̈ddi wëlø, de nuti dwɑddi kɑ̈bbø kì kelli dyëge, wɑlɑ̀ kì kelli dhöge, de ɑ́yöd e kwɑny-ɑ órömi ɑbuur, kɑ gø thɑ̈lle wële.” Kɑ Debïd pyëwe órënyø ki mendwøng ki jɑlkɑ̈r. Aköbbe Nɑthɑn kinni, “Jwøng-ɑ Ácwɑ̈ɑ̈j ɑ Nëënø. Jɑl-ɑ ɑ́gwøg gïn-ɑ ni men di ceg kɑ nɑ̈gø! Cole dyelɑni ki dyëg ɑ́ngwen kipe kɑ ɑ́gööge ki gïn ni men, kí kɑ ɑ́cög pyëwe pɑ lɑ̈ɑ̈m.” Kɑ Debïd köbbi yi Nɑthɑn kinni, “Bene yïn jɑlɑni! Møg-ɑ ɑ́kwøb yi Jwøøg Isrɑil, Jwøng-ɑ Ácwɑ̈ɑ̈j ek: ‘Yï ɑ́myeg yi yɑn yïn ɑ́ rɑ̈ɑ̈dh Isrɑil, kɑ yï yiel yi yɑn kì cingi Cɑul. Amëggɑ yïn gøle geki mɑ̈nne. Kɑ yï gwøg yi yɑn yïn ɑ́ rɑ̈ɑ̈dh Isrɑil geki Yeudiyɑ̀. O ke di bëëd møgɑni nøg, kömi gen di kïdhɑ ki møøgø. Yïde ɑ bɑɑny Ciggi Jwøng-ɑ Ácwɑ̈ɑ̈j? Yïde ɑ gwøøg gïn-ɑ ɑ́kwøb yi en kinni rɑɑj? Uriyɑ̀ wɑ̈d Kit ɑ́nɑ̈g yi yïn ki pili tyëng Amön, kɑ cyëge kwɑny yi yïn ɑ́ dhɑjø! Pilø pɑ wïyi ki nɑ̈g kì gølí gïti ɑtheer, mɑ́ yɑ nuti wøør yïn, kɑ ɑ́kwɑɑny cï Uriyɑ̀ wɑ̈d Kit ɑ́ dhɑjø. Møg-ɑ kwøb yi Jwøng-ɑ Ácwɑ̈ɑ̈j ek: ‘Yï muujɑ’ ɑkørr mø kɑ̈ɑ̈l gølí. Mɑ̈nní ókwɑny yi yɑn kì yïí yï onëënø, kɑ ge mëggɑ dhɑnhø me cyɑ̈gi ki yïn. Mɑ̈nní óniin yi en kì dicɑ̈ng. Bɑtcebɑ̀ ɑ́niin ɑ gød yi yïn, de møg ógwøg yi yɑn kì dɑ̈ri cɑ̈ng, kipe kinni o gïn ni menɑni lidh yi Isrɑil bëne.’ ” Kɑ Nɑthɑn köbbi yi Debïd kinni, “Yɑ ɑ́røngi kì bøli Jwøng-ɑ Ácwɑ̈ɑ̈j.” Aköbbi Debïd yi Nɑthɑn kinni, “Orøgí ɑ́rɑ̈ɑ̈j wɑ̈g yi Jwøng-ɑ Ácwɑ̈ɑ̈j. Yï pɑ thøw. De gïn-ɑ ɑ́gwøg yi yïn mɑ̈ɑ̈n-ɑ Jwøng-ɑ Ácwɑ̈ɑ̈j wørø yi tyëngmɑ̈ɑ̈nø. Kì bɑng menɑni, wɑ̈n-ɑ ɑ́nyölli yïn ceg-ɑ thøø.” Codhe, kɑ Nɑthɑn døøg-ɑ pɑɑre. Kɑ wɑ̈d Debïd men-ɑ ɑ́nyöllii yi Bɑtcebɑ̀ cï Uriyɑ̀, göjji rɑ̈ɑ̈m dël yi Jwøng-ɑ Ácwɑ̈ɑ̈j. Kɑ Jwøng-ɑ Ácwɑ̈ɑ̈j kwɑjji yi Debïd kipe nyelthinh. Kɑ Debïd óbɑ̈nyø cɑm. Ákedhi gøle, kɑ wɑ̈r nyi tyëge e buud-ɑ piny gwög. Kɑ jø tøg bure kedh-ɑ yïe be kwɑjjii kinni dhwödhe kì piny, kɑ cyɑ̈me, de ɑ́bɑ̈nyi ki dhwödhø, kɑ óbɑ̈nyø cɑm. Kɑ nyelthinh othøø kì bïryeew cyɑ̈ng. Jø Debïd ɑ́bwøg ki köbbii kinni nyelthinh ɑ́thøw. Ge okööbø kinni, “Debïd ɑ́dhɑ̈li lïngi kwøbbee e nyelthinh obuddø ki rɑ̈ɑ̈m dële. Keløg e oköbbø yi wɑ kinni nyelthinh ɑ́thøw ócuggø gwøg ki gïjø me rɑɑj.” Debïd keny-ɑ ɑ́lidhe bɑ̈ngge ge ómöngø, ɑyode gøn kinni dhɑnhø thøø. Codhe, ɑpyëje gïn kinni, “Dhɑnhø ɑ́thøw?” Alöggi gen kinni, “Ngee, dhɑnhø ɑ́thøw.” Codhe, ɑdhwödhi Debïd mɑl kì piny. Kɑ kedh-ɑ be lwøggø, kɑ ogïnyø ki møw, ɑwile ógudhe. Kɑ kedh-ɑ ød Jwøng-ɑ Ácwɑ̈ɑ̈j be mɑ̈ddø. Keny-ɑ ɑ́rume, ɑkedhe gøle kɑ ócwöddø ki gïncɑm. Kɑ Debïd pyëj yi bɑ̈ngge kinni, “Á kipe ngø ɑ ɑ́göög kinøw? Keny-ɑ ɑ́nëën dhɑnhø yï ɑ́bɑ̈nyi cɑm, o yï ceg-ɑ ywøg. O ɑnɑn keny-ɑ ɑ́thøw dhɑnhø, yï ɑ́dhwödh kɑ yï ocyɑ̈mø.” Alöggi Debïd kinni, “Keny-ɑ ɑ́nudd nyelthinh onëënø, yɑ ɑ́bɑ̈nyi cɑm kɑ yɑ pëgg-ɑ be ywøg, mɑ́ yɑ ɑ́rum kinni, ɑ́ men ɑ ngɑ̈nyii, pyëw Jwøng-ɑ Ácwɑ̈ɑ̈j ólɑ̈ɑ̈m mɑwɑnø kɑ nyelthinh wiye nëëne. De ɑnɑn keny-ɑ ɑ́rum dhɑnhø ki thøø, ɑ́ kipe ngø ɑ óbɑ̈nyɑ ki cɑm? Ócuggi dwöög wɑ̈g yi yɑn kì yij thøø? Yɑ ókedhi kun-ɑ di en cyɑ̈ng megø, de pɑ cuggi dwöög yïɑ.” Kɑ Debïd Bɑtcebɑ̀ cyëge luge. Kɑ ge kedh-ɑ ød. Ayɑɑje këti kɑ onywølø ki wɑ̈d megø. Kɑ wɑ̈nɑni cɑg yi Debïd ɑ́ Sølømøn. Sølømøn ɑ́mɑɑr yi Jwøng-ɑ Ácwɑ̈ɑ̈j. Kɑ Nɑthɑn jɑltöng ör yi Jwøng-ɑ Ácwɑ̈ɑ̈j be kwøb kinni cɑɑg nyelthinh ɑ́ Yedidiyɑ̀ mɑ́ nyɑnyelɑni mɑɑr yi Jwøng-ɑ Ácwɑ̈ɑ̈j. Yöɑb ɑ́nyïɑ̈ggi ki Rɑbɑ̀ kɑɑl-ɑ di rɑ̈ɑ̈dh Amön, kɑ ócyɑ̈ngø ki mɑgø yi en. Aödi Yöɑb yï Debïd ki ji møg köbbii kinni, “Yɑ ɑ́nyïɑ̈ggi ki tyëng Rɑbɑ̀, kɑ kɑ̈jj-ɑ nyi dwɑ̈ddi yi gen ki pï mɑgɑ. Anɑn kwɑny yɑy-ɑ kyeelø kɑ peej kɑɑlɑni o mɑg yi yïn, kipe ócölli nyingɑ keløg ɑ́ yɑn ɑ mɑgii!” Codhe, kɑ yɑy bëne cøng yi Debïd, ɑkedhe Rɑbɑ̀, ɑnyïɑ̈gge ki kɑɑlɑni, kɑ gø mɑge. Kɑ yɑ̈ɑ̈r wïj Mölek jwøøg gen kwɑny kì wïje yi Debïd. Kɑ cïb wïj Debïd. Yɑ̈rɑni bɑ dhɑb, o ree dɑ tigg mø ngewi gen teeg, pegi yɑ̈rɑni bɑ kïllì pyɑ̈r ɑ́dɑ̈g wïdɑ́bïj. Kɑ Debïd okɑ̈dø ki jɑmmì mø gïïr mø per gen teeg kì kɑɑlɑni. Kɑ cinggi tyëng kɑɑlɑni cïbe ki mocɑrr, kí kwërrì, kí dørrì, kɑ gï cïrre gwøg, geki gwøgi thob. Tyëng kɑ̈ddi Amön bënn ɑ́gögge gïn ni menɑni. Codhe, kɑ Debïd dwöög-ɑ Yerusɑlem ki yɑye. Abcɑlöm wɑ̈d Debïd yïe ɑ́dɑ nyimen me myëër, me cwøl ɑ́ Tɑmɑr, o nyɑnɑni omɑɑrø yi Amnön wɑ̈d Debïd. Gø ɑ́mɑɑr en ki mendwøng, kɑ ceg ki kømi nɑ̈gø yi rumme, mɑ́ nyɑnɑni bɑ nyɑnɑjur, o yode teeg. Amnön wɑ̈d Debïd yïe ɑ́dɑ mɑ̈dh me wïje pel, me cwøl ɑ́ Yönɑdɑb, o bɑ wɑ̈d Cɑmɑ̀ ómï Debïd. Kɑ Amnön köbbi yi Yönɑdɑb kinni, “Ede dëlí ɑ kedhe e óthumø kinni nyirɑ̈dh? Á ngø ɑ rɑ̈mø kì pyëwí?” Aköbbii yi Amnön kinni, “Tɑmɑr nyimï Abcɑlöm ówɑ̈ɑ, ɑ mɑɑr yi yɑn.” Kɑ Amnön köbbi yi Yönɑdɑb kinni, “Göög e dhɑ̈y dëlí ceg-ɑ rɑ̈m, kɑ yï buddí. Keny-ɑ óbëën wïyí be këëmi yïn, köbbí kinni, ‘Yɑ kwɑjj-ɑ yïn, wiy Tɑmɑr nyiwɑ̈ɑ bëe, o yɑ thödhe ki gïncɑm. Wiy gïncɑm thɑl yi en kì bølɑ, o yɑ cɑɑm yi en.’ ” Codhe, kɑ Amnön ree løge ngɑn dële rɑ̈mø, ɑkedhe be buddø. Kɑ këëm yi Rɑ̈dh Debïd, ɑköbbii yi Amnön kinni, “Yɑ kwɑjj-ɑ yïn, wiy Tɑmɑr bëe, o yɑ tɑ̈dde ki gïncɑm kì keny, o gø mëgge yɑn kiree.” Kɑ Tɑmɑr cwööl yi Debïd kì gøldwøng, ɑköbbe gøn kinni, “Kedhí gøl Amnön, kɑ göggí ki gïncɑm.” Akedhe kunɑni kɑ Amnön yuude e budd-ɑ piny. Kɑ ókɑ̈bbø ki ɑwɑj kɑ gø pɑme ɑ́ kɑɑk, e bëëd ɑ keny nennii yi Amnön. Codhe, kɑ kɑɑk gø bule, kɑ gï kønye yij siniyɑ̀ kì bøli Amnön, o gï cɑme, de ɑ́cög e nuti cɑɑm en. Aköbbe Tɑmɑr kinni, “Kɑ̈ɑ̈l kɑɑk buti pyënɑ keny, kɑ yï bï cɑɑm yɑn.” Akwɑnye kɑɑk kɑ kedh-ɑ yïe. Cem e Tɑmɑr muuj-ɑ kɑɑk, kɑ gø mɑge, ɑköbbe gøn kinni, “Bïí buddi wɑ!” Kɑ Tɑmɑr okööbø kinni, “Pɑth ómïɑ! Yɑ ko mød! Gïn ni men pɑ nyi gwøg kì Isrɑil, yï ko göög ki ɑyɑ̈ɑ̈r ni men! Wïjɑ ótïng yi yɑn kidï këti kì kelli ji? O yïn ø, yï koo ceg bëëdø yï nɑ dhëgg-ɑ yɑ̈rø kì Isrɑil? Yɑ kwɑjj-ɑ yïn köbbí rɑ̈dh, mɑ́ yɑ pɑ mɑ̈ɑ̈ne nywømø yi yïn.” De Amnön ɑ́dhɑ̈li lïngi kwøbbi Tɑmɑr. Tɑmɑr ɑ́tyɑm en, kɑ gø møde, mɑ́ e teeg kibøle. Kɑ Amnön pyëwe mɑg yi mɑ̈ɑ̈nø ki Tɑmɑr ki menteg, kɑ mɑɑr-ɑ ɑ́mɑɑre gøn lod yi mɑ̈ɑ̈nø. Kɑ gø köbbe kinni, “Kedhí wɑ̈g!” Kɑ Tɑmɑr okööbø kinni, “Pɑth! Ryem-ɑ ryeem yɑn èn rɑɑj, lod-ɑ gïn-ɑ ɑ́gwøg yi yïn ɑnɑn.” De Amnön ɑ́bɑ̈nyi lïngi kwøbbe. Kɑ bɑ̈nge cwøle, ɑköbbe gøn kinni, “Kïdhí ngɑndhɑjø men wɑ̈g, nyiig kì butɑ, kɑ dhøg kɑl cyëëg.” Kɑ Tɑmɑr cøør wɑ̈g yi bɑ̈ngɑni, ɑcyëge kɑl. Tɑmɑr ɑ́bëëd e rug-ɑ ɑ́ywödh me bɑ̈dde bɑ̈rrø; ɑ́ywödhh-ɑ ni menɑni ɑ nyi rug yi nyiirɑ̈dh møg-ɑ nuti nywømø. Kɑ Tɑmɑr ókɑ̈bbø ki búr këlø kɑ gø kïdhe wïje, kɑ ɑ́ywödhe men-ɑ ruge pyëde, kɑ ókedhø e okïïwø ki ywøg, cingge cïb en wïje. Kɑ Tɑmɑr köbbi yi Abcɑlöm ómen kinni, “Yï ɑ́mød yi Amnön! Kud ɑnɑn nyimïɑ. Nyelɑni bɑ ówöw. Pyëwí ko cïb ri møgɑni.” Kɑ Tɑmɑr pëgg-ɑ gøl ómen Abcɑlöm kì wɑ̈ye. Møgɑni ɑ́lïngi yi Rɑ̈dh Debïd kɑ pyëwe órënyø ki mendwøng. Amnön bong gïjø mɑ ɑ́köbbii yi Abcɑlöm, ying-ɑ́ møg døj wɑlɑ̀ møg rijjø. De Amnön ɑ́mɑɑn en ki pyëwe, kiper ɑyɑ̈r-ɑ ɑ́gögge nyimen Tɑmɑr. Kì bɑng runn ɑ́ryew, kɑ nyiirɑ̈dh bënn ryej yi Abcɑlöm, kì Bɑɑl Adhör, kì buti kɑɑl Eprɑim, kun-ɑ nyɑɑr yëyyi dyëge. Kɑ Abcɑlöm kedh-ɑ yï rɑ̈dh, ɑkööbe kinni, “Yëyyi dyëgi bɑ̈ngí ceg kɑ nyɑrø, yɑ kwɑjj-ɑ rɑ̈dh kinni kedhe geki bɑ̈ngge kun-ɑ ryeej gen yi bɑ̈nge.” Kɑ Abcɑlöm köbbi yi Rɑ̈dh Debïd kinni, “Pɑth wɑ̈dɑ, wɑ pɑ kedh bënn, kipe yï ótor yi ngenyi kwɑnni ji.” Kɑ rɑ̈dh dyej yi Abcɑlöm, de rɑ̈dh nuti yïëyø ki kedhø, kɑ muuj-ɑ kwëngge. Kɑ Abcɑlöm okööbø kinni, “Keløg yï pɑ kedh, wiy Amnön ówɑ̈ɑ kedhe ki wøn.” Apëjji Rɑ̈dh Debïd kinni, “Kedh kɑ per ngø?” Kɑ Abcɑlöm pëgg-ɑ be kwɑjji rɑ̈dh, gïti kɑ ɑ́yïëy rɑ̈dh kinni kedh Amnön geki nyiirɑ̈dh bënn kun-ɑ cwöddi yi Abcɑlöm. Abcɑlöm ɑ́gwøg-ɑ ryëj me dwøng; ryëny ni menɑni nyi theeg-ɑ rɑ̈dh. Kɑ Abcɑlöm jøge cege kinni, “Tidu Amnön. Keny-ɑ ónɑ̈ɑ̈gii yi møgø, wu óköbbi yi yɑn kinni, ‘Nɑ̈gu Amnön.’ Nɑ̈gu en kì bøli kenyɑni ceth! Wu ko böggi, mɑ́ yɑn ɑ ɑ́köbbi wun. Cwedu ri wun, wu ko böggi!” Codhe, kɑ Amnön nɑ̈g yi bɑ̈nggi Abcɑlöm, ni kɑ ɑ́ceg gen. Kɑ nyiirɑ̈dh kɑdh-ɑ kömi ógɑlli gen, kɑ ge órengø. Kɑ wöödø wɑ̈nh-ɑ yï Debïd e nyiirɑ̈dh nudd ge ying-ɑ yöö kinni, “Nyiirɑ̈dh ɑ́nɑ̈g bënn yi Abcɑlöm! Bong ɑ́kyel mɑ ɑ́döng kì kelli gen.” Kɑ Rɑ̈dh Debïd dhwödh-ɑ mɑl, kɑ ógødhe pyëde ki rɑ̈ɑ̈m pyëwe, ɑleenge ree piny. Kɑ jøge møg-ɑ ɑ́ying kenyɑni ógudhi gen pyëëd gen bënn. De Yönɑdɑb wɑ̈d Cɑmɑ̀ ómï Debïd ɑ́kööb kinni, “Yï ko kööb wuö kinni bɑ nyiirɑ̈dh bënn ɑ ɑ́nɑ̈g. Pɑth, bɑ Amnön kete ɑ ɑ́nɑ̈g! Gïn ni menɑni ɑ́bëëd e omïdhø yi pyëw Abcɑlöm, kër-ɑ ɑ́mød Tɑmɑr nyimen yi Amnön. Yï ko yïëy wuö, kinni nyiirɑ̈dh thøø bënn. Bɑ Amnön kete ɑ ɑ́thøw.” Kɑ Abcɑlöm opɑ̈ɑ̈rø kì bøli kenyɑni. Kɑ jɑl-ɑ kurø kì wïj dörø ólïdhø ki ji mø gïïr mø kɑ̈ɑ̈l løøg kït tung-ɑ kyeelø. Kɑ Debïd köbbi yi Yönɑdɑb kinni, “Lïdhí, yɑ ɑ́kømm-ɑ dyër! Nyiirɑ̈dh obëënø!” Ri rumi Yönɑdɑb ki kwøb ceth, kɑ nyiirɑ̈dh ówɑ̈nhø ge óryeerø ki ywøg. Kɑ Debïd ólunyø ki ywøg geki jøge. De keny-ɑ ɑ́rum Debïd ki ywøgi Amnön, kɑ kej Abcɑlöm ódwɑ̈ddø kì yïe ki mendwøng. Kɑ yod yi Yöɑb wɑ̈d Dheruyɑ̀ kinni kej Abcɑlöm ɑ́dwɑ̈ddi kì yï Rɑ̈dh Debïd ki mendwøng. Kɑ Yöɑb öd-ɑ Tekoɑ̀ be dwɑɑyi ngɑndhɑjø me wïje pel. Kɑ ngɑnɑni köbbe kinni, “Gwøg rií yï nɑ ngɑn ceg ywøg. Kɑ muní kïdhí ki thølli kïjjø, kɑ yï ko gïïny ki møw, wɑlɑ̀ yëyyi wïjí ko pyëël. O yï nënní yï nɑ ngɑn me mɑɑg cyɑ̈ng mø gïïr e ywøg-ɑ thøø. Codhe, kɑ yï kedhí yï Rɑ̈dh Debïd, kɑ yï kööb kinnï.” Kɑ kwøbb-ɑ ókwøbe cïb dhøge yi Yöɑb. Codhe, kɑ ngeti Tekoɑ̀ kedh-ɑ be kwøb ki rɑ̈dh. Ákedh kɑ wïje kuule piny ree bøødhe bøødhø kì bøli rɑ̈dh, kɑ gø mɑle, ɑkööbe kinni, “Køny yɑn, wuö rɑ̈dhɑ.” Kɑ rɑ̈dh okööbø kinni, “Yïde?” Kɑ okööbø kinni, “Yɑ bɑ ngɑn yïe bong jɑlø, jɑlgølɑ ɑ́thøw. Bɑ̈ngí yïe ɑ́dɑ wɑ̈dd ɑ́ryew, kɑ ge ónyïɑ̈ggø keti gen kì wɑg, o bong dhɑnhø me yiel gen. Kɑ nyel ɑ́kyel gøj yi nyel-ɑ kyeelø kɑ gø nɑ̈ge. Kɑ wɑddɑ bënn bï-ɑ yïɑ ge okööbø kinni, ‘Mëggí wøn nyel-ɑ ɑ́nɑ̈g ómen, o nɑ̈g yi wøn kipe kɑ ɑ́nɑ̈ge ómen, cɑgg wïj gølɑni pɑ̈ɑ̈dh.’ Wɑ̈dɑ menɑni en ɑ ɑ́döng kete, o keløg e onɑ̈gø yi gen, wïj gølɑ ceg-ɑ pɑ̈ɑ̈dhø, o nyingi jɑlgølɑ ceg-ɑ lɑ̈ɑ̈nyø kì kömi lɑ̈bø.” Kɑ ngɑnɑni köbbi yi rɑ̈dh kinni, “Kedhí gølí, yɑ ómuujø ki cigg kiperí.” Kɑ rɑ̈dh köbbi yi ngeti Tekoɑ̀ kinni, “Cɑ́y óying kömɑ wøki gøl wøn. Wɑ̈ɑ rɑ̈dh yïe bɑ̈r geki kwøme.” Kɑ rɑ̈dh okööbø kinni, “Ngɑn-ɑ ópɑ̈nyi kwøb ki yïn cɑɑg ki muuj yɑn. O yï pɑ døøg yi en ki nywɑlø këti.” Kɑ ngɑnɑni okööbø kinni, “Köngí ki nyingi Jwøgí, Jwøng-ɑ Ácwɑ̈ɑ̈j. O ngɑn-ɑ dwɑddi nɑ̈gi kej dhɑnhø cöge wɑ̈dɑ pɑ nɑ̈g yi en.” Kɑ rɑ̈dh okööbø kinni, “Yɑn ɑ köngi èn ki nyingi Jwøng-ɑ Ácwɑ̈ɑ̈j, bong ngɑn-ɑ ónywɑl wɑ̈dí. Bong yëyi wïje men-ɑ ódëëm piny.” Kɑ ngɑnɑni okööbø kinni, “Bɑ̈ngí dɑ gïn dwɑdde kwøbø, yïn ɑ wɑ̈ɑ rɑ̈dh.” Kɑ rɑ̈dh okööbø kinni, “Kööb!” Codhe, kɑ ngɑnɑni okööbø kinni, “Gede jii Jwøk ɑ göggí gen ki bɑ̈jjø me ni men? Wɑ̈dí ɑ́cög e pɑ dwöög yi yïn kì pɑ̈l. Rií ɑ́cɑy yi yïn ɑnɑn ki møg-ɑ ɑ́kwøb yi yïn. Wɑ óthøw bënn. Wɑ nɑ pïg røyø, ɑ bong ngɑn nyi døøg gen ki tømø. Cɑgg ɑ́ Jwøk, dhɑnhø pɑ nyi dwööge mɑl, de rɑ̈dh dhɑnhø ócuggø dwöögø yi en kì yïnø. Wuö rɑ̈dh, møgɑni ɑ́kwøb yi yɑn kɑ per kɑ ɑ́göjji yɑn wɑ̈ɑ̈rø yi teedø! Arumɑ kinni, wiy yɑ kedhɑ be köbbi rɑ̈dh. Gïn-ɑ dwɑddi yi yɑn, ógwøg en mɑwɑnø. Ólïngø mɑwɑnø. Kɑ wø yiel yi en wøki wɑ̈dɑ kì cinggi tyëng-ɑ dwɑddii nɑ̈gø, o wø di mɑ̈ɑ̈n gen gïn-ɑ ɑ́mëggi wøn yi Jwøk. Anɑn yɑ okööbø kinni, “Pyëwɑ ɑ́kwööj yi kwøbbi wɑ̈ɑ rɑ̈dh. Yï pɑ̈r ki wëywöni Jwøk, gïn-ɑ rɑj ki gïn-ɑ døj, ngɑ̈nyi yi yïn. Yï ókøny yi Jwøgí, Jwøng-ɑ Ácwɑ̈ɑ̈j!” Codhe, kɑ Rɑ̈dh Debïd okööbø kinni, “Gïn-ɑ pëjjɑ yïn, ko kɑ̈nní yɑn.” Kɑ ngɑnɑni okööbø kinni, “Pëjjí wuö, rɑ̈dhɑ.” Kɑ rɑ̈dh okööbø kinni, “Yöɑb dɑ dhøge kì ri kwøb møg?” Kɑ ngɑnɑni okööbø kinni, “Yï ómïdhi yi Jwøk, wuö rɑ̈dh, bong keny këjji. Yï kømm-ɑ dyër. Yɑ ɑ́köbb-ɑ yi Yöɑb i kwøbɑ møgɑni. Møgɑni ɑ́gwøg yi bɑ̈ngí Yöɑb kɑ per wili kwøb. De wɑ̈ɑ rɑ̈dh pɑ̈r ki wëywöni Jwøk, ɑ ngɑ̈nyi gïg-ɑ nyi cwöb kì piny bëne.” Kɑ Yöɑb köbbi yi rɑ̈dh kinni, “Gïn-ɑ ɑ́kwøb yi yɑn ógwøg yi yɑn. Dwöög nyelthinh Abcɑlöm.” Kɑ Yöɑb ree bøødhe bøli rɑ̈dh, kɑ gø mɑle, ɑkwënge rɑ̈dh. Codhe, ɑkööbe kinni, “Áyod yi yɑn dicyɑ̈ngtïn kinni pyëwí med ki yɑn, mɑ́ gïn-ɑ ɑ́kwɑjji yi yɑn ɑ́gwøg yi yïn.” Kɑ Yöɑb odhwödhø, ɑkedhe Gecur, kɑ Abcɑlöm kɑ̈ɑ̈le Yerusɑlem. De Rɑ̈dh Debïd ɑ́kööb kinni, “Töngi Abcɑlöm gøle. Nyingi wøn pɑ lidh yi wøn ki en.” Atöngi Abcɑlöm gøle, nyingi gen nuti liidh gen ki rɑ̈dh. Bong jɑlø mɑ ɑ́bëëd e myër ni Abcɑlöm kì Isrɑil bëne, bong gïnrɑj kì ree cɑ̈gi kì tyele gïti wïje. Kenyi thumi run, yëyyi wïj Abcɑlöm nyi ceg yi en kɑ nyɑrø, mɑ́ ge nyi ceg-ɑ gwøg ge bɑ̈rrø, kɑ ge ópëngø. Kɑ̀ røm gen, ge nyi gwøg-ɑ gïn ni røthøl ɑ́bïj ki rumi kej kwër. Abcɑlöm yïe ɑ́dɑ wɑ̈dd ɑ́dɑ̈g ki nyɑndhɑjø ɑ́kyel. Nyingi nyɑre cwøl ɑ́ Tɑmɑr, o bɑ nyɑn me myëër cɑrø. Kɑ Abcɑlöm obëëdø ki runn ɑ́ryew kì Yerusɑlem, e nyingi gen nuti liidh gen ki rɑ̈dh. Kɑ Yöɑb cwøl yi Abcɑlöm kinni o gø di öre yï rɑ̈dh, de Yöɑb ɑ́bɑ̈nyi bëën yïe. Kɑ cig-ɑ ödi yïe, kɑ cig-ɑ bɑ̈nyø. Kɑ Abcɑlöm bɑ̈ngge köbbe kinni, “Lïdhi wun, pwödhi Yöɑb ying-ɑ buti pwödhɑ, o yïe dɑ ceir kì yije. Kedh wun, kɑ rɑ̈b wun.” Codhe, kɑ pwödhi Yöɑb rɑ̈b yi bɑ̈nggi Abcɑlöm. Adhwödh Yöɑb kɑ kedh-ɑ yï Abcɑlöm kì gøle, kɑ gø pyëje kinni, “Á kipe ngø ɑ rɑ̈ɑ̈b pwödhɑ yi bɑ̈nggí?” Kɑ Abcɑlöm ólöggø kinni, “Lidh, yɑ ɑ́ödi yïí kinni o yï di örɑ yï rɑ̈dh, o di pyëjɑ kinni, ɑ́ kipe ngø ɑ ɑ́kɑ̈ɑ̈le yɑn kì Gecur. Di løg me lɑ̈w ke di bëëdɑ kì kunɑni! Anɑn wiy yɑ kedhɑ yï rɑ̈dh. Keløg yɑ røngø, wiy yɑ nɑ̈g yi en!” Codhe, kɑ Yöɑb kedh-ɑ yï rɑ̈dh, ɑköbbe gøn kwøbbi Abcɑlöm. Acwøøl Abcɑlöm yi rɑ̈dh. Kɑ Abcɑlöm ree bøødhe piny kì bøli rɑ̈dh. Kɑ Abcɑlöm dööb kɑ̈w yi rɑ̈dh, kɑ gø nuume ki mër. Codhe, ɑgöög Abcɑlöm ki yɑ̈y, kɑ ókɑ̈bbø ki kyënyì mø pyejji yɑ̈yɑni, kí jøg mø kwɑnni gen bɑ pyɑ̈r ɑ́bïj mø rïngi kì bøle. Abcɑlöm nyi møøl-ɑ dhø döri kɑɑl, kɑ ngɑn bï e kedh-ɑ yï rɑ̈dh be gøny nyi cwøle, o gø nyi pyëje kinni, “Yï kɑ̈ɑ̈l-ɑ kɑɑl ɑ́?” Kɑ ngɑnɑni nyii löggø kinni, “Bɑ̈ngí bɑ wɑ̈d kɑl ɑ́kyel kì kelli kɑ̈lli Isrɑil.” Kɑ nyi köbbi yi Abcɑlöm kinni, “Nënni gønyí bɑ dyër, de bong jɑngi burø mɑ ɑ́kwɑny yi rɑ̈dh kipe lidhi gønyí.” Kɑ Abcɑlöm nyi köbb-ɑ bøle kinni, “Keløg yɑ di kwɑny yɑn ɑ́ jɑngi burø kì pönhï, gønyyi ji di lidh yi yɑn kidøøj, kɑ ngɑɑn nyi mëggɑ gëe.” O kenyi göög jɑl-ɑ kööb gen e dwɑdd-ɑ mɑlii, kɑ cingge nyi rïïje yïe gø dööbe kööre, kɑ gø nyi nuume. Kɑ gïn ni menɑni nyi göggi tyëng Isrɑil bënn møg-ɑ bï yï rɑ̈dh be gøny yi Abcɑlöm. Kɑ tyëng Isrɑil pɑng yi Abcɑlöm ki gwøng ni menɑni. Kì ri thumi runn ɑ́ngwen, ɑköbbi rɑ̈dh yi Abcɑlöm kinni, “Yɑ kwɑjj-ɑ yïn, wiy yɑ kedhɑ Kibrön. Yɑ dwɑdd-ɑ gwøgi wïj köng-ɑ ɑ́köngi yi yɑn kì bøli Jwøng-ɑ Ácwɑ̈ɑ̈j kì Kibrön. Mɑ́ bɑ̈ngí ɑ́köngi e nudd e obëëdø kì Gecur kinni, keløg Jwøng-ɑ Ácwɑ̈ɑ̈j yɑ dwøøge’ Yerusɑlem, Jwøng-ɑ Ácwɑ̈ɑ̈j mɑllɑ’ mɑllø kì Kibrön.” Kɑ Abcɑlöm köbbi yi rɑ̈dh kinni, “Kedh ki mër.” Codhe, kɑ odhwödhø, ɑkedhe Kibrön. Kɑ Abcɑlöm öd-ɑ yï kɑ̈ddi Isrɑil bënn ki ji mø kööbø kinni, “Keny-ɑ ólïngu cwɑggi kɑng, kɑ wu ryeer wun kinni, ‘Abcɑlöm ɑ́jɑ̈ggi ɑ́ rɑ̈dh kì Kibrön!’ ” Jøg mø kwɑnni gen bɑ miy ɑ́ryew ɑ ɑ́kedh ki Abcɑlöm kì Yerusɑlem, ge ɑ́wɑ̈dh-ɑ cwølø yøw de bong gïn ngɑ̈nyi yi gen. Kɑ Abcɑlöm öd-ɑ be cwøli Akithöpel kì Gilø pɑɑ gen, kɑ̈ng-ɑ́ nudd e gwøg-ɑ gëëdhi. Akithöpel ɑ́bëëd ɑ́ jɑl tøg buri Debïd. Kɑ per Abcɑlöm ókedhø e ótëngø, kɑ ji óngënyø kì tunge. Kɑ Debïd muuj ki wöödø kinni, “Jø Isrɑil ɑ́døøg tuung Abcɑlöm.” Kɑ Debïd jøge møg-ɑ ying Yerusɑlem köbbe kinni, “Jwɑn wɑ dhwödhø! Ke pɑ pyew wɑ bong keny kɑ̈ɑ̈l yi wɑ yi Abcɑlöm. Jwɑni wɑ kipe wɑ ópïïd yi en kɑ tyëng Yerusɑlem nɑ̈ge.” Kɑ köbbi yi jøge kinni, “Gïn-ɑ kwøb yi yïn, en ɑ gwøg yi wøn.” Kɑ rɑ̈dh ókedhø geki tyëng gøle bënn, de ɑ́wïy ki mɑ̈nn-ɑ ɑkwɑnyy pyɑ̈rø, o ge kor gen gøldwøng. Rɑ̈dh ɑ́dhwödh geki jie bënn ki tyel, kɑ ge ócungø kì kɑl megø me lɑ̈wi. Bɑ̈nggi rɑ̈dh ɑ́pöödh bënn, kɑ jøkor, kí teen-ɑ ɑ́kɑ̈ɑ̈l Gɑd bënn opödhø geki jøg-ɑ ɑ́lug bɑnge gɑ miy ɑ́bïkyel. Kɑ Itɑy pënyi gen, köbbi yi rɑ̈dh kinni, “Á kipe ngø ɑ kedh thyew kí wøn? Døøg kɑ wu bëëd wun ki rɑ̈nh-ɑ nyɑ̈n, mɑ́ yï bɑ wɑ̈d jur megø, o yï ɑ́ceg kɑ cyëëd yïnø kì pödhi wun. Yï ɑ́bï-ɑ kì ɑ́wɑ̈ɑ̈ èn, o yï cigi wøn göjji twɑ̈lø kí wøn tïn, o men-ɑ́ keny-ɑ kedhi yi yɑn kwïj yi yɑn? Døøg, kɑ jií dwøøg, wu ókor yi Jwøng-ɑ Ácwɑ̈ɑ̈j.” Kɑ mø rɑ̈dh løøg yi Itɑy kinni, “Yɑn ɑ köngi èn ki nyingi Jwøng-ɑ Ácwɑ̈ɑ̈j, ɑ Nëënø, geki wɑ̈ɑ rɑ̈dh, keny-ɑ kedhi yi wɑ̈ɑ rɑ̈dh, ying-ɑ́ keny yije thøw, wɑlɑ̀ keny nëën, bene keny-ɑ kedhi yi bɑ̈ngí!” Aköbbi Itɑy yi Debïd kinni, “Døj! Pödhí bølí!” Codhe, kɑ Itɑy kwɑɑr Kit pödh-ɑ bøle geki jøge, kí ji-ɑ kɑ̈lli yi gen bënn. Kɑ myërrɑni óywöngø keny-ɑ ɑ́bëën yɑye ceg-ɑ pödhø. Kɑ dhøg Kidrön bɑ̈ɑ̈n yi rɑ̈dh, kí yɑye kí bɑnge, kɑ ge töng-ɑ pɑ̈l. Ókwërø Dhɑdök ɑ́bëëd e nud geki Kwɑrri Leebì ge kɑ̈ll-ɑ Sɑnduug Cigg. Gø ɑ́cïb gen piny, kɑ ocögø gø pɑ tïng yi gen gïti keny-ɑ ɑ́thumi ji ki bëën wɑ̈g kì kɑɑl. Abiyɑthɑr ɑ́bï wɑ̈g kì kɑɑl thyew. Kɑ Dhɑdök köbbi yi rɑ̈dh kinni, “Dwøøg Sɑnduug Ciggi Jwøk kɑɑl. Keløg pyëw Jwøng-ɑ Ácwɑ̈ɑ̈j med ki yɑn, yɑ ódwööge be lidhii cyɑ̈ng megø, kɑ keny-ɑ bëëde lidhɑ. De keløg e ódi kwøb kinni, ‘Yï pɑ dwɑddi yi yɑn.’ Bong gïn ying yïɑ, wiy gwøge gïn-ɑ dwɑdde göggi yɑn.” Aköbbi ókwërø Dhɑdök yi rɑ̈dh kinni, “Døøgu kɑɑl wuki Abiyɑthɑr, kí wɑ̈ddi wun ryeet, ɑ løg Akimɑɑdh wɑ̈dí geki Yönɑthɑn wɑ̈d Abiyɑthɑr. Yɑ óyïdø kì dhø pɑ̈l, gïti keny-ɑ óyïddɑ ki yïth kì yï wun.” Codhe, kɑ Sɑnduug Cigg dwøøg kɑɑl yi Dhɑdök geki Abiyɑthɑr, kɑ ge obëëdø kì kɑɑl kunɑni. Kɑ Debïd kedh-ɑ wïj Kïti Dhetun e cyɑ̈dhi e óywöngø, wïje kum en, tyelle bong wɑr. Kɑ tyëng-ɑ cyɑ̈dhi ki en bënn kedh-ɑ bɑnge ge óywöngø wɑ̈thi gen kum gen. Kɑ Debïd köbbi kinni i Akithöpel rëbø ki Abcɑlöm, ɑkwɑ̈jje kinni, “Yïn ɑ Jwøng-ɑ Ácwɑ̈ɑ̈j wiy Akithöpel gööge e pɑ nyi løøg dyër.” Keny-ɑ ɑ́wɑ̈dhi Debïd wïj kït, keny-ɑ nyi mɑlli Jwøk, ɑyuude Kucɑy jɑl Arkì mɑ̈dhe kenyɑni, ógudhe pyëëd en, o wïje kïdh en ki tør. Kɑ köbbi yi Debïd kinni, “Keløg yï ókedhø ki yɑn, yɑ pɑ lwɑ̈ng yi yïn ki kønyø. De yɑ ócuggø kønyø yi yïn ke døøg kɑɑl, kɑ Abcɑlöm köbbí kinni, ‘Yï ógöggi yi yɑn ki pyëw ɑ́kyel ni kɑ ɑ́göggɑ wïyí.’ Kɑ rií pɑ̈nyí kidøøj ki pyemi møg-ɑ nyi løøg yi Akithöpel. Ókwërø Dhɑdök, geki Abiyɑthɑr óbëëd ge nud kì kenyɑni, nyi köbbí gen møg-ɑ nyi lïngi yi yïn kì gøldwøng. Wɑ̈ddi gen, ɑ løg Akimɑɑdh wɑ̈d Dhɑdök geki Yönɑthɑn wɑ̈d Abiyɑthɑr nud kì buti gen, nyi öru gen yïɑ, o yɑ nyi köbbi yi gen ki gïg-ɑ nyi lïngi yi wun bënn.” Codhe, kɑ Kucɑy mɑ̈ɑ̈dh Debïd døøg-ɑ kɑɑl, kedh Abcɑlöm wɑ̈dh-ɑ kɑɑlɑni. Keny-ɑ ɑ́kɑl Debïd yedhi piny kì wïj kït, ɑrøøm gen ki Dhiibɑ̀ bɑ̈ng Mepiböceth, e ókwöddø ki ɑderr ɑ́ryew kömi gen dɑ ópùn miy ɑ́ryew, kí cyɑ̈lli nywøli yenh møg thwøwø gɑ miyø, kí cyɑ̈lli nywøli yenh møg thij gɑ miyø, kí ɑtheb me pɑ̈ng yi møgi oløg. Apyëjii yi Rɑ̈dh Debïd kinni, “Gïg-ɑk bënn bɑ møg gwøøg ngø yi yïn?” Alöggi Dhiibɑ̀ kinni, “Aderr bɑ møg kömi gen ócyɑ̈dhi yi gølí, ópùn geki nywøli yenh bɑ møg cɑm yi jøgí, o møgø bɑ men-ɑ ómɑdh yi gen keny-ɑ ópïd gen kì yij pɑ̈l.” Apëjji rɑ̈dh kinni, “Mepiböceth kwɑɑr wöw Rɑ̈dh Cɑul ying-ɑ keny?” Alöggi Dhiibɑ̀ kinni, “Ying-ɑ Yerusɑlem, mɑ́ e orumø kinni lɑni kweye, Rɑ̈dh Cɑul ódöggii dicyɑ̈ngtïn yi tyëng Isrɑil.” Kɑ rɑ̈dh okööbø kinni, “Jɑmm-ɑ ɑ́bëëd gɑ mø Mepiböceth bënn bɑ møgí.” Kɑ Dhiibɑ̀ ólöggø kinni, “Yɑ bɑ bɑ̈ngí, wiy pyëwí cöge e med ki yɑn!” Keny-ɑ ɑ́wɑ̈dhi Debïd Bekurïm, kɑ jɑl gøl Cɑul me cwøl ɑ́ Cimeì wɑ̈d Gerɑ̀ bï-ɑ yïe e kɑ̈ɑ̈l-ɑ kɑɑlɑni, e gwɑdd-ɑ Debïd. Kɑ Cimeì ócɑ̈gø ki bɑ̈lli Debïd geki jøg-ɑ cyɑ̈dhi ki Debïd, o Debïd kwï jöddi linye ying-ɑ wïj kyëje møøgø ying-ɑ wïj cɑɑme. Cimeì ɑ́kööb e ceg-ɑ gwɑ̈dø kinni, “Kedh! Kedh! Jɑlnɑ̈g ki ji! Ámuddi ji! Yï ɑ́kwɑny-ɑ lɑwi Cɑul, o ɑnɑn yï ɑ́cɑy yi Jwøng-ɑ Ácwɑ̈ɑ̈j cyee kipe remmi ji-ɑ ɑ́nɑ̈g yi yïn kì gøl Cɑul. Lɑwí ɑ́mëggi wɑ̈dí Abcɑlöm yi Jwøng-ɑ Ácwɑ̈ɑ̈j, yï ɑ́gɑ̈g cyee, jɑlnɑ̈g ki ji!” Kɑ rɑ̈dh köbbi yi Abicɑy, ɑ meye cwøl ɑ́ Dheruyɑ̀ kinni, “Ede ɑ wëggí gwɑddi yïn ni men wuö? Wiy yɑ kedhɑ yïe, o wïje ngulɑ wɑ̈g!” Kɑ Abicɑy geki ómen Yöɑb köbbi yi rɑ̈dh kinni, “Menɑni pɑth ki gwøøg wun wɑ̈ddi Dheruyɑ̀. Keløg yɑ ɑ́gwɑddi yi en e óköbb-ɑ yi Jwøng-ɑ Ácwɑ̈ɑ̈j, ɑ́ men ɑ cuggi pëjjø kinni ede ɑ gööge kinøw?” Kɑ Debïd, Abicɑy geki jøge bënn köbbe kinni, “Men-ɑ́ wɑ̈dɑ ɑ dwɑddi nɑ̈gi yɑn, de wude ki wɑ̈d gøl Ben Yɑmïn men? Wiy gwɑ̈de, mɑ́ e ɑ́köbb-ɑ yi Jwøng-ɑ Ácwɑ̈ɑ̈j. Cɑni wɑngɑ ólidh yi Jwøng-ɑ Ácwɑ̈ɑ̈j mɑwɑnø. Kɑ rɑ̈ny-ɑ ɑ́lɑ̈mme yɑn løg gyëdh yi Jwøng-ɑ Ácwɑ̈ɑ̈j.” Codhe, kɑ Debïd geki jøge opödhø ki yuu gen. Kɑ Cimeì ócyɑ̈dhø e kɑ̈ll-ɑ wïj kwøømø, wïje pɑ̈ɑ̈r en ki gen, gï bɑ̈lle’ bɑ̈llø ki tuggì, kɑ tør nyi kwøøre yï gen. Rɑ̈dh geki jøge bënn ɑ́wɑ̈dhi kömi Nɑm Urdun ge pïdø, codhe ɑywööm gen kì kunɑni. Kɑ Abcɑlöm geki tyëng Isrɑil bënn møg-ɑ cyɑ̈dhi ki en, wɑ̈dh-ɑ Yerusɑlem. Akithöpel ɑ́cyɑ̈dhi kɑ gen. Kucɑy jɑl Arkì, mɑ̈ɑ̈dh Debïd keny-ɑ ɑ́yïddi gen ki Abcɑlöm, kɑ ceg-ɑ ryeerø kinni, “Rɑ̈dh ókwöömø! Rɑ̈dh ókwöömø!” Apyëjii yi Abcɑlöm kinni, “Wu ɑ́ceg-ɑ dɑ̈ngø wuki Debïd mɑ̈dhí? Yïde ɑ bɑɑny kedhø wuki en?” Alöggi Kucɑy kinni, “Yɑ kedh kɑ per ngø? Yɑ ying-ɑ kömi ngɑn-ɑ ɑ́myeg yi Jwøng-ɑ Ácwɑ̈ɑ̈j, eni ngɑn-ɑ ɑ́myeg yi ji møg, geki tyëng Isrɑil bënn. Yɑ óbëëdø kì butí. Yɑ di gögg-ɑ men cøn, keløg e pɑth ki wɑ̈d wɑ̈ɑ? Yï göggɑ’ göggø ni kɑ ɑ́göggɑ wïyí.” Codhe, kɑ Abcɑlöm ree luge Akithöpel, ɑpyëje gøn kinni, “Wɑ ɑ́wɑ̈nhi keny ɑnɑn, yï rømm-ɑ ngø ɑ døøj ki gwøgø yi wɑ?” Aköbbi Abcɑlöm yi Akithöpel kinni, “Kedh, kɑ yï buddí ki mɑ̈nn møg-ɑ bɑ ɑkwɑnyyi wïyí møg-ɑ ɑ́wiye gøldwøng. O yod yi ji bënn kì Isrɑil kinni wu ɑ́mɑ̈ni ki wïyí, o ji-ɑ bɑngí tëngi gen.” Codhe, kɑ Abcɑlöm guddi ki kemɑ̀ kì wïj óthɑɑng ød kì gøldwøng. Kɑ Abcɑlöm nyi kedh-ɑ be buddø ki ɑkwɑnyyi wïye kì yij kemɑni, o onennø yi dhɑnhø bëne. Møg-ɑ nyi kwøb yi Akithöpel ɑ́bëëd ge nyi ceg kɑ yïëyø bënn, kì yethi cyɑ̈nggɑni, de ge nɑ møg-ɑ ókwøb-ɑ yi Jwøk. Bene kër-ɑ ɑ́bëëd kwøb ɑgɑk, kì yï Debïd geki Abcɑlöm; dhøg Akithöpel pɑ nyi pyem yi gen. Kɑ Abcɑlöm köbbi yi Akithöpel kinni, “Wiy yɑ kɑ̈bbɑ ki jøg-ɑ cwøw ɑ́lïp pyɑ̈rø wïdɑ́ryew, o yɑ kedhɑ bɑng Debïd tïn kì wɑ̈r. O yɑ pɑ̈ɑ̈rɑ köme kɑ̈ng-ɑ nudd e pïdø, pyëwe ngɑnyø. Óbwøg kɑ jøge bënn órengø, o yɑ ónɑ̈gɑ rɑ̈dh kete. Codhe, o ji bënn döggɑ yïn. Thøwi ngɑnɑni wɑng-ɑ dwöögi ji bënn yïí, bong gïnrɑj men ɑ ókedhi ri ji.” Kɑ Abcɑlöm geki jøgdøngi Isrɑil, møgɑni lidh gen ge nɑ dyër. Kɑ Abcɑlöm okööbø kinni, “Cwølu Kucɑy jɑl Arkì, o møg-ɑ kwøbe lony yi wɑ ki lïngø thyew.” Kɑ Kucɑy kedh-ɑ yï Abcɑlöm. Kɑ köbbi yi Abcɑlöm kinni, “Møg-ɑ ɑ́köbbi wøn yi Akithöpel ek: Kɑ̈l wøn bɑng dhøge? Keløg wø pɑ kɑ̈l bɑng dhøge, kwøb møgí.” Alöggi Kucɑy kinni, “Møg-ɑ ɑ́kwøb yi Akithöpel dicyɑ̈ngtïn pɑ døøj. Ngɑ̈nyi yi yïn kinni Debïd wïyí, geki jøge bɑ yɑɑg teg ki liny, o ge keej ni mɑɑdh ngur men nywøle ókɑ̈ɑ̈lø kì yïe. Wïyí bɑ jɑl me ngɑ̈ny yëthi liny, o pɑ nyi buddi kì kej ɑ́kyel geki jøliny kì wɑ̈r. Kɑ̀ kööb wɑ ɑnɑn, rum pɑ̈ni yij órøngi kït, wɑlɑ̀ pɑ̈ni keny me pɑ yodii. Ke kwöngi wïyí ki pɑ̈ɑ̈r kömi yɑyí, ngɑn lïngi møgɑni ceg-ɑ kwøb kinni yɑɑy Abcɑlöm ɑ́tyɑm yi Debïd. Kɑ jøg-ɑ pëddi tegø obwøgø, jøg-ɑ teg ni ngurrì ceg-ɑ bwøgø, mɑ́ Isrɑil bëne ngɑ̈ny wøw kinni wïyí geki jøge bɑ jöddi liny mø teg. Møg-ɑ köbbɑ yïn bɑ kinni, cøng yɑɑy Isrɑil bëne, cɑg kì tuung gïti tung-ɑ kyeelø, ge gïïr ni tør, kɑ ge peej yij liny yi yïn kirií ceth. Debïd ceg yi wɑ kɑ yodø kì keny-ɑ bëëde, o wɑ ceg wɑ ì jɑɑj kì kömi gen ni bøy kenyi kume rij piny, o thøwe ki jøge bënn, bong ngɑn bodh kì ri gen. O keløg e yömm-ɑ kɑɑl, Isrɑil ceg-ɑ kedhø bëne. Kɑ kɑɑlɑni cøøre piny yij tör, kɑ keje odöngø ɑ́ ryɑng.” Kɑ Abcɑlöm geki jø Isrɑil bënn okööbø kinni, “Møg-ɑ ɑ́kwøb yi Kucɑy lɑ̈w kibøli mø Akithöpel.” Árum ki cïbø yi Jwøng-ɑ Ácwɑ̈ɑ̈j kinni o møg-ɑ døøj ɑ ɑ́kwøb yi Akithöpel cög gen ge pɑ gwøg, o ryɑ̈g pɑ̈dhe kömi Abcɑlöm. Codhe, ɑköbbi ókwërø Dhɑdök geki Abiyɑthɑr yi Kucɑy ki møg-ɑ ɑ́köbbe Abcɑlöm geki tyëng Isrɑil, kí møg-ɑ ɑ́kwøb yi Akithöpel. Akööb Kucɑy kinni, “Pyew wun ɑnɑn, jwɑnu ödi yï Debïd ki wöödø, kinni nïnne løøg nɑm tïn. O cöge e pɑ mɑg kɑ nɑ̈g geki jøge.” Yönɑthɑn wɑ̈d Abiyɑthɑr geki Akimɑɑdh wɑ̈d Dhɑdök ɑ́bëëd ɑ Enrögel, o ge nyi muuj wöödø yi nyɑnthinh mɑ bɑ̈ng, o wöönɑni nyi lony gen ki muuj Rɑ̈dh Debïd. Mɑ́ ge ɑ́bëëd ge óböggø ki lidhø ge kedh-ɑ kɑɑl. Kɑ ge lidh yi nyel me thiinh, ɑkedhe be köbbi Abcɑlöm, ɑjwɑn gen dhwödhø kɑ ge kedh-ɑ gøl jɑl megø kì Bekurïm. Jɑlɑni yïe ɑ́dɑ yith kì gøle, codhe kɑ ge yedh-ɑ yij yiinhɑni. Kɑ wïj yith kum yi cï jɑlɑni, kɑ wïje këdhhe ki byel, o ge cög ge pɑ yod. Kɑ jøgi Abcɑlöm kedh-ɑ gølɑni, kɑ ngɑnɑni pyëj gen kinni, “Ágøne Akimɑɑdh geki Yönɑthɑn?” Kɑ ge köbbi yi ngɑnɑni kinni, “Ge ɑ́löddi wɑ̈g kì yij dhøg.” Ayɑ̈ɑ̈b gen, kɑ Akimɑɑdh geki Yönɑthɑn ocögø gï pɑ yod yi gen, ɑdøøg gen Yerusɑlem. Keny-ɑ ɑ́døøg jø Abcɑlöm, ɑyïnhi Akimɑɑdh wɑ̈g geki Yönɑthɑn kì yij yith. Akedh gen kɑ Rɑ̈dh Debïd köbbi gen. Kɑ löbbi yi gen ki gïn-ɑ ɑ́dwɑddi gwøgø yi Akithöpel, codhe ɑköbbi gen rɑ̈dh kinni, “Pyeew, jwɑn kedhi løøg nɑm.” Acɑ̈gi Debïd geki jøge ki bɑ̈ɑ̈ni Nɑm Urdun. Kɑ ge wɑ̈dh-ɑ wɑ̈g bënn kì ri tɑ̈ri piny. Keny-ɑ ɑ́lïdhi Akithöpel kinni kwøbbe ɑ́bɑny, ɑtwööje sïrïj kömi ɑdere, kɑ kedh-ɑ kɑɑl-ɑ ɑ́nywølii ki ɑdere. Kɑ ɑ́rume gwiri jɑmme, ɑngɑbe ree. Kɑ koony kelli lɑ̈bbi tyëng gøl gen. Keny-ɑ ɑ́bɑ̈ɑ̈n Nɑm Urdun yi Abcɑlöm geki yɑɑy Isrɑil, Debïd rum wɑ̈dhi Mɑɑ̈nɑim geki jøge. Amɑsɑ̀ ɑ ɑ́cïb kej Yöɑb yi Abcɑlöm ɑ́ pënyi liny. Amɑsɑ̀ bɑ wɑ̈d jɑl me cwøl ɑ́ Yether kwɑɑr Icmɑil. En ɑ ɑ́nywøm Abigɑil nyɑɑr Nɑkɑc, o Abigɑil bɑ nyimï Dheruyɑ̀ meyi Yöɑb. Kɑ Abcɑlöm geki yɑɑy Isrɑil gudd-ɑ piny Gilyɑd ki kemmi gen. Keny-ɑ ɑ́wɑ̈dhi Debïd Mɑɑ̈nɑim, ɑkedhi Cöbì wɑ̈d Nɑkɑc, jɑl Rɑbɑ̀ kì piny Amön yïe, kí Mɑkir wɑ̈d Amiel kì Lödebɑr, kí Bɑrdhilɑy jɑl Rögelïm kì piny Gilyɑd. Ge ɑ́bï yï Debïd ge ókɑ̈ddø ki pënn-ɑ nyi buud, kí tɑ̈mmì, kí puggì, kí gemè, kí ceir, kí møng-ɑ búr, kí pulø, kí ɑ́dɑs, kí byel ɑgïny. Kí møøw kïc, kí møøw bwöbø, kí dyëg, kí cɑɑg dhyɑng. Gïgɑni ɑ́kɑ̈ɑ̈l yi gen gɑ møg cɑm yi Debïd geki jøge, mɑ́ ge ngɑ̈ny wøw kinni Debïd geki jøge óbëëd ge ómɑgø yi kɑ̈j, o ge ódhɑ̈rø yi röödhø kì yij pɑ̈l. Kɑ Rɑ̈dh Debïd jøge cønge kej ɑ́kyel, ɑpɑ̈nge gïn gɑ ɑkudd mø yethi gen di ji ɑ́lïp, møøgø dɑ miyø, kɑ wɑ̈thi gen cïbe ki pëjji liny. Codhe, ɑöre gïn wɑ̈g gɑ kɑ̈dd ɑ́dɑ̈g. Kɑ̈ddɑni pyejj-ɑ yi Yöɑb, kí Abicɑy ómï Yöɑb, kí Itɑy jɑl Gɑth, e men kwøll-ɑ kɑɑle. Kɑ rɑ̈dh jøge köbbe kinni, “Yɑ ceg-ɑ kedhø kí wun.” Kɑ jøgɑni okööbø kinni, “Yï pɑ kedh ki wøn. Bong per wøn kì yï tyëngmɑ̈ɑ̈nø ke cyeddi wøn, cɑgg budi wøn nɑ̈g yi gen, de yï pɑ̈r kɑ ji ɑ́lïp pyɑ̈rø kì kelli wøn. Lɑ̈w keløg yï pëgg-ɑ kɑɑl keny, o wø óceg ki kønyø yi yïn.” Alöggi rɑ̈dh kinni, “Yɑ ógwøg gïn-ɑ nenni yi wun e døøj.” Codhe, kɑ rɑ̈dh ócungø kì dhø döri kɑɑl e nenn-ɑ linye kɑ̀ kedhe wɑ̈g ɑ́ ɑkuddi miyø kí ɑkuddi ɑ́lïp. Kɑ Yöɑb, kí Abicɑy, kí Itɑy ceg yi Debïd kinni, “Ko di gïnrɑj me göggu nyelthinh Abcɑlöm. Kipe pyëwɑ óngɑny.” Kɑ ji bënn olïngø ki ciggi Debïd kiper Abcɑlöm. Kɑ yɑɑy Debïd kedh-ɑ thïm Eprɑim be nyɑɑg ki Isrɑil. Kɑ Isrɑil tyɑm yi jø Debïd ki tyɑmø me rɑj. Kelli Isrɑil ɑ́nɑ̈gi ki ji ɑ́lïp pyɑ̈r ɑ́ryew dicyɑ̈ngɑni. Kɑ liny tɑɑy-ɑ kelli myërr. Ji-ɑ ɑ́thøw kì yij thïm kì cyɑ̈ngɑni, ngenyø kibøli møg-ɑ ɑ́nɑ̈g yi pilø. Kɑ Abcɑlöm órøømø ki jø Debïd kì yij liny. Abcɑlöm ɑ́cyɑ̈dh ɑ kömi ógɑlø. Kɑ ógɑlø kɑ̈l-ɑ thɑ ɑ̈r me dwøng, kɑ wïj Abcɑlöm mɑg yi ɑ̈r, kɑ ógɑlø opödhø. Adöng Abcɑlöm e óryërø. Kɑ lidh yi jɑl ɑ́kyel kì kelli jø Debïd, ɑkedhe be köbbi Yöɑb kinni, “Abcɑlöm ɑ́lidh yi yɑn e óryërø kì ri ɑ̈r.” Kɑ jɑl-ɑ ɑ́köbbii gø köbbe kinni, “Keløg e liidh yïn, ede ɑ bɑɑnyí ki nɑ̈gø ceth? Yï di nëngi yi yɑn ki ngyëny ɑ́tegg pyɑ̈rø, kí wëëni ɑ́kyel.” Kɑ Yöɑb köbbi yi jɑlɑni kinni, “Cɑgg yɑ nëngi yi yïn ki ngyëny ɑ́tegg ɑ́lïp, cingɑ pɑ di tïnggɑ wɑ̈d rɑ̈dh. Rɑ̈dh ɑ́lïngi yi wøn keny-ɑ ɑ́cege yïn, wuki Abicɑy kí Itɑy kinni, ‘Ko di gïnrɑj me göggu nyelthinh Abcɑlöm kipe pyëwɑ óngɑny.’ Keløg ciggi rɑ̈dh di pyem yi yɑn, kɑ Abcɑlöm nɑ̈gɑ, rɑ̈dh di lïng, o yɑ pɑ di køny yi yïn ki gøny.” Akööb Yöɑb kinni, “Yɑ pɑ tyëg piny yɑ opëmø ki yïn.” Akɑ̈bbe ki tøngg ɑ́dɑ̈g, kɑ gï këële ɑ́ngɑni Abcɑlöm e óryërø kì ri ɑ̈r e onëënø. Codhe, kɑ Abcɑlöm cööb yi ji pyɑ̈rø kì kelli jø Yöɑb, kɑ gø nɑ̈g gen. Codhe, ɑkoodh kɑng yi Yöɑb, kɑ liny ódwöögø kì kun-ɑ ɑ́cyëddi gen ki Isrɑil. Akwɑny gen Abcɑlöm kɑ gø kïdhi gen yij bur me ludhø kì yij thïm. Kɑ burɑni köme röri gen ki kïttì mø gïïr. Kɑ tyëng Isrɑil órengø, men reng-ɑ gøle kì wɑ̈ye. Abcɑlöm kɑ̈ng-ɑ ɑ́bëëde e onëënø, ree ɑ́gëdde ki lyel kì yij Töör Rɑ̈dh, mɑ́ yïe bong wɑ̈de me nyinge ócöllii. Acɑge lyelɑni ki nying-ɑ cwøllii gïti dicyɑ̈ngtïn, ɑ́ lyeel Abcɑlöm. Codhe, ɑköbbi Yöɑb yi Akimɑɑdh wɑ̈d Dhɑdök kinni, “Wiy yɑ rengɑ o yɑ köbbɑ wöön-ɑ med èn rɑ̈dh, kinni rɑ̈dh ɑ́yiel yi Jwøng-ɑ Ácwɑ̈ɑ̈j ki tyëng-ɑ mɑɑnii.” Kɑ Yöɑb okööbø kinni, “Pɑth, dicyɑ̈ngtïn yï pɑ kedhi be kɑ̈li wöödø. Yï ókedh cyɑ̈ng megø, de pɑth ki dicyɑ̈ɑ̈ng, mɑ́ e bɑ wɑ̈d rɑ̈dh ɑ ɑ́thøw.” Codhe, ɑköbbe wɑ̈d Kuc kinni, “Kedh kɑ rɑ̈dh köbbí ki gïn-ɑ ɑ́lidh yi yïn.” Kɑ bɑ̈ngɑni ree bøødhe, ɑdhwödhe kɑ órengø. De Yöɑb ɑ́cigi köbbø yi Akimɑɑdh wɑ̈d Dhɑdök kinni, “Cwɑggɑ bong gøn ki gïn-ɑ ócwöb, wiy yɑ rengɑ be kɑ̈li wöödø thyew.” Apyëjii yi Yöɑb kinni, “Yï rengi kɑ per ngø wɑ̈dɑ? Bong köögi men-ɑ óyod yi yïn kiper wöönɑni.” Kɑ Akimɑɑdh okööbø kinni, “Yɑ ceg-ɑ rengø ceth.” Akööb Yöɑb kinni, “Adɑ́ rengí.” Codhe, ɑrengi Akimɑɑdh e bødh-ɑ thwørø kì kömi Nɑm Urdun, kɑ wɑ̈d Kuc yöme. Debïd ɑ́bëëd e ying-ɑ thɑ ɑkɑnø kì dhø döri kɑɑl. Kɑ jɑl-ɑ kurø kì wïj ɑkɑni dhø dörø, kedh-ɑ wïj döri kɑɑl, ɑtïnge wïje, kɑ ólïdhø ki dhɑnhø me rïngi kete. Alënge dhøge jøg-ɑ piny, kɑ rɑ̈dh köbbe. Alöggi rɑ̈dh kinni, “Keløg e bɑ dhɑnhø ɑ́kyel, kɑ̈ɑ̈l-ɑ wöödø me døøj.” Keny-ɑ ɑ́kedhe e ócyɑ̈ngø. Acigi jɑlkor lïdhø ki dhɑnhø megø me rïngi. Kɑ jɑlkor jɑldhøkɑl köbbe kinni, “Dɑ dhɑnhø megø me rïngi kete.” Kɑ rɑ̈dh okööbø kinni, “Jɑlɑni kɑ̈ɑ̈l-ɑ wöödø me døøj thyew.” Kɑ jɑlkor okööbø kinni, “Jɑl-ɑ mɑl nenni yi yɑn e ce rïng ɑ́ Akimɑɑdh wɑ̈d Dhɑdök.” Akööb rɑ̈dh kinni, “Bɑ jɑldøj, bï e kɑ̈ll-ɑ wöödø me døøj.” Kɑ Akimɑɑdh ree bøødhe kì bøli rɑ̈dh, kɑ rɑ̈dh mɑle. Kɑ okööbø kinni, “Lejjí Jwøgí, Jwøng-ɑ Ácwɑ̈ɑ̈j, ngɑn-ɑ ɑ́thödhi yïn ki teng-ɑ ɑ́tyɑɑm ngɑn-ɑ ɑ́tïnggi cinge rɑ̈dh.” Apëjji rɑ̈dh kinni, “Nyelthinh Abcɑlöm nud?” Alöggi Akimɑɑdh kinni, “Wuö, keny-ɑ ɑ́ör yɑn yi bɑ̈ngí Yöɑb, dɑ teedø mø gïïr mɑ ɑ́lidhɑ ge cong-ɑ ri gen, de gïn-ɑ pere congi gen ri gen kwïj yi yɑn.” Aköbbii yi rɑ̈dh kinni, “Døj, cungí kì keny-ɑn.” Codhe, kɑ kɑl-ɑ nyegi cyɑ̈n, ɑcunge kì kenyɑni. Awɑ̈nhi wɑ̈d Kuc, kɑ rɑ̈dh köbbe kinni, “Yɑ ngɑ̈jɑ yïn wuö, kinni, yï ɑ́cwɑg yi Jwøng-ɑ Ácwɑ̈ɑ̈j dicyɑ̈ngtïn. Kɑ tyëng-ɑ ɑ́tïnggi cinggi gen yïn tyɑm yi yïn!” Apyëëj wɑ̈d Kuc yi rɑ̈dh kinni, “Nyelthinh Abcɑlöm nud?” Alöggi wɑ̈d Kuc kinni, “Tyëng-ɑ mɑɑn rɑ̈dh, geki tyëng-ɑ ɑ́dhwödh ge gögg-ɑ rɑ̈dh ki gïnrɑj, ce di ceg-ɑ gwøg ni Abcɑlöm.” Kɑ rɑ̈dh pyëwe ongɑɑnyø. Kɑ yedh-ɑ øn-ɑ mɑl kì wïj dhø döri kɑɑl, e óywöngø kinni, “Yeki wɑ̈dɑ yø! Wɑ̈dɑ Abcɑlöm! Abcɑlöm wɑ̈dɑ! Lɑ̈w ke di thøwɑ yɑn ɑ́ kejí yøw! Wɑ̈dɑ! Abcɑlöm wɑ̈dɑ!” Kɑ Yöɑb köbbi kinni, i rɑ̈dh ceg-ɑ ywøg ki Abcɑlöm wɑ̈de. Kɑ medi pyëw tyɑ̈mø ree løge rɑ̈ji pyëw dicyɑ̈ngɑni, kì yï yɑy bëne, mɑ́ yɑy ɑ́lïng bëne kinni rɑ̈dh ceg-ɑ ywøg kipe wɑ̈de. Kɑ yɑy ree liibe kɑɑl ni ji-ɑ ócyeddø kì yij liny. Rɑ̈dh wïje ɑ́kume kɑ pëgg-ɑ be ywøg ki cwɑg mø døngø kinni, “Yeki wɑ̈dɑ yø! Wɑ̈dɑ Abcɑlöm! Abcɑlöm wɑ̈dɑ!” Kɑ Yöɑb kedh-ɑ yï rɑ̈dh kì gøle, ɑkööbe kinni, “Jií ɑ́yɑ̈r yi yïn dicyɑ̈ngtïn, ngö ge ɑ́yiel-ɑ wëyí, kí wëyi wɑ̈ddí, kí wëyi mɑ̈nní geki wëyi ɑkwɑnyyí! Mɑ́ yï mɑɑr-ɑ tyëng-ɑ mɑɑn yïn, o yï mɑɑn tyëng-ɑ mɑɑr yïn. Ányodh yi yïn dicyɑ̈ɑ̈ng kinni tyëng-ɑ mɑɑr yïn mɑɑn yi yïn, o yï køny-ɑ tyëng-ɑ mɑɑn yïn! Ányodh yi yïn kinni pëjji liny geki yɑy bëne bong per gen kì yïí. Álidh yi yɑn dicyɑ̈ɑ̈ng kinni, yï di bëëd pyëwí med, keløg wø di thøw bënn, o Abcɑlöm wɑ̈dí di bëëde e onëënø! Dhwöödh ɑnɑn, kɑ yï kedhí be dwöögi pyëw yɑyí, mɑ́ keløg yï pɑ kedhi yï gen, yɑn ɑ köngi èn ki nyingi Jwøng-ɑ Ácwɑ̈ɑ̈j, bong dhɑnhø me nin kì butí kì wɑ̈ɑ̈r tïn. O gïn ni menɑni óbëëd e pëddi rɑ̈jø kibøli rɑj møg-ɑ ɑ́cwöb kì yij bëëdí bëne!” Adhwödh rɑ̈dh kɑ pëgg-ɑ wïj kwøme kì dïkɑɑl. Kɑ yɑy bëne ngɑ̈j kinni, i rɑ̈dh okwömø kì dïkɑɑl, ɑkedh gen kɑ ri gen cøng bute. Tyëng Isrɑil ɑ́rengi yethi myërri gen Kɑ ji pëgg-ɑ be wërø kì yethi myërri gen ge cem-ɑ, “Wɑ ɑ́yiel yi Rɑ̈dh Debïd ki tyëngmɑ̈ɑ̈nø. Wɑ ɑ́yiele kì cinggi tyëng Pelistiyɑ̀. O ɑnɑn ɑ́yöd e cyeed-ɑ wɑ̈g kì yij pödhø yi Abcɑlöm! Abcɑlöm ɑ́røny yi wɑ ɑ́ rɑ̈dhee, de ɑ́nɑ̈g kì yij liny. Ede Rɑ̈dh Debïd ɑ pɑ dwöögii?” Kɑ møg-ɑ kømmi yi tyëng Isrɑil lïngi yi rɑ̈dh. Codhe, ɑöre ókwërø Dhɑdök geki Abiyɑthɑr yï jøgdøngi Yeudiyɑ̀, o gï pyëj gen kinni “Wude ɑ cwöng wun, rɑ̈dh pɑ dwöög yi wun gøle, o møg-ɑ kømmi yi Isrɑil ɑ́wɑ̈dhi yïthhi rɑ̈dh? Wu bɑ wɑddɑ, wɑ bɑ remø ɑ́kyel, wu yöm-ɑ dï yi Isrɑil, ki kwøbbi dwöögi yɑn?” Ge ɑ́köbbi yi Debïd thyew kinni, “Köbbu Amɑsɑ̀ kinni, ‘Wɑ pɑth ki remø ɑ́kyel? Yï ógwøg yi yɑn yï bɑ pënyi liny kì kej Yöɑb. Wiy yɑ ónɑ̈g yi Jwøk keløg møgɑni pɑ gwøg yi yɑn!’ ” Kwøbbi Debïd ɑ́yïëy yi jø Yeudiyɑ̀ bënn, kɑ ge öd-ɑ yïe kinni bëe geki pëjji linye bënn. Adhwödh rɑ̈dh e ceg-ɑ dwöögø, kɑ røøm-ɑ kömi Nɑm Urdun ki jø Yeudiyɑ̀ møg-ɑ ɑ́pɑɑrii. Ge ɑ́bï Gilgɑl kɑ per kɑ̈ɑ̈li rɑ̈dh kì løøg Nɑm Urdun. Kɑ Cimeì wɑ̈d Gerɑ̀, kì gøl Ben Yɑmïn, kì Bekurïm, jwɑn-ɑ be pɑɑri Rɑ̈dh Debïd. Ácyɑ̈dhi kɑ jø gøl Ben Yɑmïn mø kwɑnni gen bɑ ɑ́lïp. Kɑ Dhiibɑ̀ bɑ̈ng gøl Rɑ̈dh Cɑul, obëënø thyew geki wɑ̈dde gɑ pyɑ̈rø wïdɑ́bïj, kí bɑ̈ngge gɑ pyɑ̈r ɑ́ryew. Kɑ ge ókwöngø ki wɑ̈dhi kömi Nɑm Urdun e rɑ̈dh nuti wɑ̈nhø. Kɑ ge kedh-ɑ løøg nɑm, kinni o rɑ̈dh ókɑ̈ɑ̈l løøng yi gen, o gïn-ɑ ódwɑddi yi rɑ̈dh ógwøg yi gen. Keny-ɑ ɑ́bëën Debïd e bɑ̈ɑ̈n-ɑ nɑm, kɑ Cimeì ree bøødhe piny kì bøle, Kɑ okööbø kinni, “Wuö rɑ̈dh, wïl wïjí ki gïnrɑj men-ɑ ɑ́göggɑ yïn cyɑ̈ng-ɑ ɑ́bëën wɑ̈g kì Yerusɑlem. Møgɑni ko nudd ge omïdhø yi yïn, wɑlɑ̀ yï ko rum kì ri gen. Ngɑ̈nyi yi yɑn wuö, kinni yɑ ɑ́røngi, bene ɑ bɑnge bëëde ɑ́ yɑn ɑ kwöngi ki bëën be yïddø ki yïn kibøli tyëng myërri Isrɑil bënn, ɑ yingɑ bølí dicyɑ̈ngtïn.” Alöggi Abicɑy wɑ̈d Dheruyɑ̀ kinni, “Cimeì pɑ ceg ki nɑ̈gø kipe gwɑnn-ɑ ɑ́gwɑdde rɑ̈nh-ɑ ɑ́yieny yi Jwøng-ɑ Ácwɑ̈ɑ̈j?” Kɑ Abicɑy geki Yöɑb ómen köbbi yi Debïd kinni, “Wude ki yɑn wɑ̈ddi Dheruyɑ̀? Dɑ dhɑnhø me cuggi nɑ̈gø kì Isrɑil dicyɑ̈ngtïn? Bene yɑn ɑ bɑ rɑ̈dh ɑnɑn, bong dhɑnhø me nɑ̈g tïn.” Kɑ Cimeì köbbe kinni, “Yïn ɑ köbbɑ èn. Yï pɑ nɑ̈g.” Codhe, kɑ Mepiböceth kwɑɑr Cɑul bï-ɑ be pɑɑri rɑ̈dh. Könggi lweddi tyelle nuti teb en, o yëyyi tïge nuti lyeel en, o ógudhe nuti lwøøg en kër-ɑ ɑ́dhwödh rɑ̈dh kì Yerusɑlem gïti kɑ ɑ́dwööge e rum tyɑ̈mø. Keny-ɑ ɑ́bëën Mepiböceth be pɑɑri rɑ̈dh e kɑ̈ɑ̈l-ɑ Yerusɑlem, ɑpyëjii yi rɑ̈dh kinni, “Mepiböceth, yïde ɑ bɑɑny kedhø kyeel ki yɑn?” Alögge kinni, “Ngɑ̈nyi yi yïn wuö, yɑ bɑ pudh. Bɑ̈ngɑ ɑ́köbbɑ ceth kinni cïbe sïrïj kömi ɑderø, o yɑ di kɑdhɑ köme, o yɑ di kedhɑ bɑngí, de yɑ ɑ́yöd yɑ ceg kɑ twɑnyø yi bɑ̈ngɑni. Kɑ yï gönye gøny me pɑth ki dyër, de yï pɑ̈r ki wëywöni Jwøk. Gwøg gïn-ɑ dwɑddi yi yïn. Gøl wïyɑ bëne myër kɑ nɑ̈gø yi yïn wuö, de yɑ ce ɑ́di nëngø yi yïn ki dhwɑ̈ng me cyɑ̈ɑ̈mɑ kì tɑwí? Dɑ gïjø me cigɑ kwɑjjø kì yïí këti wuö?” Kɑ rɑ̈dh okööbø kinni, “Bong gïn di kwøb yi yïn këti, yɑ ɑ́kööb kinni pɑ̈ngi jɑmmi Cɑul yi wuki Dhiibɑ̀.” Kɑ Mepiböceth okööbø kinni, “Wiy ge kwɑny yi Dhiibɑ̀ bënn. Dwööngí ki mër, en ɑ ɑ́dwɑddi yi yɑn.” Bɑrdhilɑy jɑl Gilyɑd ɑ́bï thyew e kɑ̈ɑ̈l-ɑ Rögelïm, e bï-ɑ be kønyi rɑ̈dh ki bɑ̈ɑ̈ni Nɑm Urdun. Bɑrdhilɑy bɑ jɑl me yöø ki mendwøng, runne wɑ̈dhi ri pyɑ̈r ɑ́bïdɑ̈g. Ábëëd e kɑ̈rø ki mendwøng, rɑ̈dh ɑ́bëëd gø nyii muujø yi en ki gïgcɑmm keny-ɑ ɑ́bëëd rɑ̈dh ying-ɑ Mɑɑ̈nɑim. Kɑ köbbi yi rɑ̈dh kinni, “Bïí kedhi wɑ Yerusɑlem, yï ókorri yi yɑn kì kunɑni.” De Bɑrdhilɑy ɑ́löggi kinni, “Á runn ɑ́dï ɑ ótyëg yi yɑn yɑ onëënø, ɑ kedhɑ Yerusɑlem wøki rɑ̈dh? Runnɑ ɑ́wɑ̈dhi ri pyɑ̈r ɑ́bïdɑ̈g, bong gïjø me nëngi yɑn ki medi pyëw këti. Dɑ medi gïncɑm me ngɑ̈nyi yi bɑ̈ngí këti? Dɑ wör mø cigɑ lïngø këti wuö? Rɑ̈dh koo yöd e ceg-ɑ torø yi yɑn? Kööng-ɑ dwøng ni men pɑ døøj. Yï ókɑl yi yɑn ki lwøøgø gïti løøg Nɑm Urdun. Orume, kɑ yɑ wiy, o yɑ døøgɑ pɑc, o yɑ thøwɑ kì pɑɑ wøn, o yɑ koony buti rörri wïyɑ geki meyɑ. Kimɑɑm wɑ̈dɑ ókedh ki yïn wuö, óbëëd ɑ́ bɑ̈ngí, kwɑɑny, kɑ̈ɑ̈l wuö, kɑ göggí gïn-ɑ rømmi yi yïn e døøj kipere.” Alöggi rɑ̈dh kinni, “Ókɑ̈l yi yɑn, o gïn-ɑ dwɑddi yi yïn kipere göggɑ’ en. O gïn-ɑ cwøl yi yïn göggɑ’ yïn ceth.” Codhe, kɑ Nɑm Urdun bɑ̈ɑ̈n yi Debïd geki jøge bënn. Amɑ̈dhe Bɑrdhilɑy kɑ gø kwënge. Codhe, kɑ Bɑrdhilɑy døøg-ɑ pɑɑre. Keny-ɑ ɑ́bɑ̈ɑ̈n Nɑm Urdun yi rɑ̈dh, kí jø Yeudiyɑ̀ geki budi jø Isrɑil, ɑkedhe Gilgɑl, kɑ Kimɑɑm ókedhø ki en. Kɑ jø Isrɑil bënn kedh-ɑ yï rɑ̈dh kɑ ge okööbø kinni, “Wuö, ede nyiimï wøn jø Isrɑil ɑ rum gen ce bɑ gen ɑ yï gen di dyër, ɑ bɑ̈ɑ̈n ge yïn nɑm wuki gølí kɑ yï kɑ̈l yi gen?” Alöggi jø Yeudiyɑ̀ kinni, “Wø ɑ́göög kinøw mɑ́ rɑ̈dh bɑ wɑɑd wøn. O pëthi wun rɑ̈mø kɑ per ngø? Bong gïncɑm mɑ ɑ́mëggi wøn yi rɑ̈dh, o bong gïjø mɑ ɑ́pɑ̈nye ki mëggi wøn.” Kɑ jø Isrɑil okööbø kinni, “Wø ying-ɑ mɑl kibøli wun ki tyel pyɑ̈rø. Pɑth ki wøn ɑ ɑ́kwøng kwøbbi dwöögi rɑ̈dh ki kømmø?” Kɑ kwøbbi jø Yeudiyɑ̀ løg-ɑ mø teg kibøli mø jø Isrɑil. Ádɑ jɑlgöj me cwøl ɑ́ Cebɑ̀ wɑ̈d Bikrì kì gøl Ben Yɑmïn. Jɑlɑni kɑng ɑ́kodhe, kɑ óryeerø kinni, “Á ngø ɑ yod yi wɑ kì bɑng Debïd! Bong gïn-ɑ ólɑg yi wɑ kì bɑng wɑ̈d Yesì? Isrɑil, kedhí myërrí! Debïd, dööng yï nenn-ɑ gølí!” Kɑ Debïd wiy yi tyëng Isrɑil, ɑløg gen bɑng Cebɑ̀ wɑ̈d Bikrì, de tyëng Yeudiyɑ̀ rɑ̈dh ɑ́lwøøg yi gen, cɑg kì kömi Nɑm Urdun gïti Yerusɑlem. Kɑ Debïd kedh-ɑ gøle kì Yerusɑlem, ɑkɑ̈ɑ̈le ɑkwɑnyy-ɑ pyɑ̈rø møg-ɑ ɑ́wiy yi en ge kor-ɑ gøldwøng, kɑ gï cïbe keny me koor gen. Ge ɑ́bëëd kì kenyɑni gïti kɑ ɑ́thøw gen, e rɑ̈dh nuti kedhi ri gen; ge ɑ́thøw gɑ thwömm. Kɑ Amɑsɑ̀ köbbi yi rɑ̈dh kinni, “Kedh cöllí yɑn jø Yeudiyɑ̀, kɑ yï dwöög bɑng cyɑ̈ng ɑ́dɑ̈g.” Amɑsɑ̀ ɑ́kedhi be cwööli Yeudiyɑ̀, de ɑ́cög e pɑ dwöög kì ri cyɑ̈ngg-ɑ ɑ́kwøb yi Debïd. Aköbbi Abicɑy yi Debïd kinni, “Cebɑ̀ wɑ̈d Bikrì, wɑ ómuuje ki göj me lod gööj Abcɑlöm. Tug liny kɑ yï løg bɑnge, kɑ̈ng-ɑ nuti yïd en ki kɑɑl dörø me yije kedhe kɑ obodhø kì cinggee.” Akedhi bɑnge yi Yöɑb geki liny kyënyì, kí liny tyel, geki pëjji liny bënn, ge ɑ́dhwödh kì Yerusɑlem ge løg-ɑ bɑng Cebɑ̀ wɑ̈d Bikrì. Keny-ɑ ɑ́wɑ̈dhi gen buti kïn-ɑ dwøng kì Gibeon, kɑ Amɑsɑ̀ wɑ̈dh-ɑ ì nyɑn kì bøli gen. Yöɑb ɑ́bëëd e rug-ɑ jɑmmi liny, kömi gïn twööj en wëne, o pilø ying-ɑ yij bøje, kɑ pilø bï-ɑ wɑ̈g kì yij bøj kɑ ódëëmø. Aköbbi Amɑsɑ̀ yi Yöɑb kinni, “Ómïɑ, dëlí yööd?” Kɑ tïg Amɑsɑ̀ mɑg yi Yöɑb ki cingi kyëje o gø nuume. De pilø nuti lidhø yi Amɑsɑ̀ kì cingi Yöɑb. Kɑ cwøb yi Yöɑb kì yije ki pilø, kɑ cïnne røy-ɑ piny, gø nuti jøl en ki cwøbø, codhe kɑ othøø. Kɑ Yöɑb geki Abicɑy ómen jwɑn-ɑ be pïïdi Cebɑ̀ wɑ̈d Bikrì. Jɑl ɑ́kyel kì kelli jø Yöɑb ɑ́cungi kì buti Amɑsɑ̀, e óryeerø kinni, “Ngɑn ying tuung Yöɑb, kí ngɑn ying kömi Debïd, løge bɑng Yöɑb!” Amɑsɑ̀ ɑ́bëëd e buud-ɑ tøg yöö kì yij reme. Jɑl-ɑ kurø keny-ɑ ɑ́lïdhe kinni ngɑn-ɑ kɑ̈l yöö nyi ceg-ɑ cung kì kenyɑni, ɑkwɑnye Amɑsɑ̀ kì tøg yöö kɑ gø ywɑɑje yij pwödhø me cyɑ̈gi, ɑkume gøn ki ógødh. Keny-ɑ ɑ́rum Amɑsɑ̀ ki ywɑjø kì tøg yöö, kɑ jøgɑni wɑ̈d-ɑ yöö bënn, ge kedh-ɑ bɑng Yöɑb be pïïdi Cebɑ̀ wɑ̈d Bikrì. Cebɑ̀ kɑ̈ɑ̈l yethi myërri Isrɑil bënn kɑ kedh-ɑ Abel kì Bet Mɑɑkɑ̀, kɑ jø gøl Bikrì ri gen cøng gen bënn, kɑ ge løg-ɑ bɑnge. Jø Yöɑb ɑ́kedh, kɑ Abel kì Bet Mɑɑkɑ̀, kɑɑl-ɑ ɑ́kedhi yi Cebɑ̀, tyeg yi gen. Kɑ ge othurø ki kɑ̈jj mø nenni wïj dörø, kɑ thɑ dörø kony gen thyew kipe kinni o pɑ̈dhe. Kɑ ngɑndhɑjø me wïje pel ócwöddø e ying-ɑ yiny-ɑ kɑɑl kinni, “Lïng wun! Lïng wun! Köbbu Yöɑb bëe keny, o köbbi yi yɑn.” Kɑ Yöɑb kedh-ɑ yïe. Kɑ ngɑnɑni ópëjjø kinni, “Bene yïn Yöɑb?” Kɑ Yöɑb ólöggø kinni, “Bene yɑn!” Kɑ ngɑnɑni okööbø kinni, “Lïngí møg-ɑ kwøb yi bɑ̈ngí.” Kɑ Yöɑb okööbø kinni, “Yɑ olïngø.” Kɑ ngɑnɑni okööbø kinni, “Ábëëd e nyii kømmø kɑ̈ge dööng kinni, ‘Kwøbbí óløøg kì Abel.’ Kɑ møgɑni nyii bëënø gɑ dyër. Kɑɑl wøn bɑ kɑɑl me dwøng. O bɑ kɑɑl me mɑɑr mër kì Isrɑil! Yïde ɑ dwɑddí rënyi jɑmm-ɑ bɑ mø Jwøng-ɑ Ácwɑ̈ɑ̈j?” Alöggi Yöɑb kinni, “Bong kwøbbi nɑ̈g, wɑlɑ̀ rënyi kɑɑl kì pyëwɑ! Bong gøn kinni tek! De bɑ jɑl megø kì myërri kïtti Eprɑim, me cwøl ɑ́ Cebɑ̀ wɑ̈d Bikrì, ɑ ɑ́tïnggi cinge Rɑ̈dh Debïd. Mëggu jɑlɑni wøn, e kete. Omuuju en, ji møg ódwøøg yi yɑn.” Kɑ Yöɑb köbbi yi ngɑnɑni kinni, “Wïje ólëngi yïn ki wïj dörø.” Akedhi ngɑnɑni yï ji bënn, kɑ gï köbbe møgɑni. Kɑ wïj Cebɑ̀ wɑ̈d Bikrì ngøl, kɑ lëngi Yöɑb ki wïj dörø. Codhe ɑkoodh kɑng yi Yöɑb, kɑ yɑy ópyëdø, ɑdøøg teedø myërri gen. Kɑ Yöɑb døøg-ɑ yï rɑ̈dh kì Yerusɑlem. Yöɑb ɑ́bëëd ɑ́ jɑngi liny Isrɑil bëne, Benɑiyɑ̀ wɑ̈d Yöyɑdɑ̀ ɑ́bëëd ɑ́ jɑngi jøg-ɑ kor rɑ̈dh. Adönirɑm ɑ́bëëd ɑ́ jɑngi jøgwøg. Yöcɑpɑt wɑ̈d Akilud ɑ́bëëd ɑ́ 'mïdhi wɑ̈j. Cebɑ̀ ɑ́bëëd ɑ́ sikriter. O Dhɑdök geki Abiyɑthɑr ɑ́bëëd gɑ ókwër. Irɑ̀ jɑl Yɑir ɑ́bëëd thyew ɑ́ ókwëri Debïd kì gøldwøng. Ádɑ kɑ̈j mɑ ɑ́mɑ̈gi kì yethi runn-ɑ ɑ́jyɑ̈ɑ̈g Debïd, kɑ̈nyɑni ɑ́tyëg-ɑ runn ɑ́dɑ̈g ge lwøb-ɑ ri gen. Kɑ Jwøng-ɑ Ácwɑ̈ɑ̈j pyëj yi Debïd. Alöggi Jwøng-ɑ Ácwɑ̈ɑ̈j kinni, “Bɑ cyënni ji-ɑ ɑ́nɑ̈g yi Cɑul geki gøle. Dɑ tyëng Gibeon mɑ ɑ́nɑ̈g yi en.” (Tyëng Gibeon pɑth ki gøl Isrɑil, de ge bɑ ɑ́kyëll-ɑ ɑ́döng kì ri tyëng Amör, tyëng Isrɑil rum köngø kinni gï ówiy yi gen ge pɑ nɑ̈g. De Cɑul ɑ́dwɑdd-ɑ tɑ̈ɑ̈yi wɑ̈thi gen piny, mɑ́ e tyiel-ɑ per Isrɑil geki Yeudiyɑ̀.) Kɑ tyëng Gibeon pyëj yi Debïd kinni, “Gwøgɑ ngø kiper wun? Wu ógedh kɑ ngø? O jii Jwøng-ɑ Ácwɑ̈ɑ̈j kwëng yi wun?” Kɑ tyëng Gibeon ólöggø kinni, “Bong ɑ́tegø wɑlɑ̀ dhɑb me dwɑddi yi wøn kì yï Cɑul geki gøle. O bong dhɑnhi kɑl megø me nywɑl yi wøn kì Isrɑil.” Alöggi Debïd kinni, “Gïn-ɑ kwøb yi wun, ógöggɑ wun.” Codhe, ɑköbbi rɑ̈dh yi gen kinni, “Jɑl-ɑ ɑ́nɑ̈g wøn, ɑ ɑ́dwɑddi tɑ̈ɑ̈yi wɑ̈thi wøn piny kipe kinni o di bëëd e bong kej wøn kì Isrɑil, thödhu wøn ki wɑ̈ddi gøle ɑ́bïryew, o ge ngɑb yi wøn, kì bøli Jwøng-ɑ Ácwɑ̈ɑ̈j, kì Gibeɑ̀ kɑɑl Cɑul rɑ̈nh-ɑ ɑ́yieny yi Jwøng-ɑ Ácwɑ̈ɑ̈j.” Alöggi rɑ̈dh kinni, “Ge ómëggɑ wun.” Rɑ̈dh Mepiböceth wɑ̈d Yönɑthɑn wɑ̈d Cɑul ɑ́wiy yi en, kipe köng-ɑ ɑ́köngi yi Yönɑthɑn geki Debïd kì bøli Jwøng-ɑ Ácwɑ̈ɑ̈j. Kɑ rɑ̈dh kwɑny-ɑ Armönì geki Mepiböceth wɑ̈ddi Ridhpɑ̀ nyɑɑr Aiyɑ̀ møg-ɑ ɑ́nyölle Cɑul. Kí wɑ̈ddi Merɑb nyɑɑr Cɑul gɑ ɑ́bïj møg-ɑ ɑ́nyölle Adriel wɑ̈d Bɑrdhilɑy, jɑl Mekölɑ̀. Kɑ gï mëgge tyëng Gibeon. Angɑɑb gen kì wïj kït kì bøli Jwøng-ɑ Ácwɑ̈ɑ̈j, ge ɑ́thøw gɑ ɑ́bïryew bënn wïj ɑ́kyel. Ge ɑ́nɑ̈g-ɑ ri cɑ̈gi ceir ki nyɑrø. Codhe, kɑ Ridhpɑ̀ nyɑɑr Aiyɑ̀ ókɑ̈bbø ki ocwɑ̈lø, kɑ gø gwøøge ɑkɑnø kì wïj kït, kɑ pëgg-ɑ kenyɑni be kori ji, cɑg kì ri cɑ̈gi nyɑri ceir gïti kɑ ɑ́dëëm kødh, ji nuti wëg en cɑmø yi winy kì dicɑ̈ng, wɑlɑ̀ yi lɑ̈yy kì wɑ̈r. Debïd óköbbi gïn-ɑ ɑ́gwøg yi Ridhpɑ̀ nyɑɑr Aiyɑ̀ ɑkwɑɑny Cɑul. Kɑ Debïd kedh-ɑ be dwɑɑyi cu Cɑul geki cu Yönɑthɑn wɑ̈d Cɑul kì yï tyëng Yɑbic kì Gilyɑd, gen ɑ tyëng-ɑ ɑ́kwɑl gen kì ri döri Betcɑn, kun-ɑ ɑ́ngɑɑb gen yi tyëng Pelistiyɑ̀, kì cyɑ̈ng-ɑ ɑ́nɑ̈g gen Cɑul geki Yönɑthɑn wɑ̈de kì wïj Kïti Gilboɑ̀. Cu Cɑul geki cu Yönɑthɑn wɑ̈de ɑ́kɑ̈ɑ̈l yi en kì kenyɑni, kɑ cu jøg-ɑ ɑ́ngɑb thyew gɑ ɑ́bïryew cønge. Codhe, kɑ cu Cɑul kí cu Yönɑthɑn kony kì keny-ɑ ɑ́koony Kïc wïyi Cɑul, kì Dhelɑ̀, kì myërri gøl Ben Yɑmïn. Keny-ɑ ɑ́rum gïg-ɑ ɑ́kwøb yi rɑ̈dh bënn ki gwøgø, ɑløøg kwɑ̈jji pödhø cyee yi Jwøk. Kɑ Isrɑil cig-ɑ këddø ki Pelistiyɑ̀, kɑ Debïd kí jøge kedh-ɑ be linyɑni, ɑnyïɑ̈ggi gen ki tyëng Pelistiyɑ̀. Kɑ Debïd ódhɑ̈rø yi liny. Kɑ jöd ɑ́kyel kì kelli wɑ̈ddi Rɑpɑ̀ me cwøl ɑ́ Icbibenöb me kɑ̈lli tøng me dwøng, me peg; pege bɑ kïllì ɑ́dɑ̈g ki budi kïlø; o ókɑ̈ddø ki pilø me nyɑ̈n, orumø ce Debïd nɑ̈ge’ nɑ̈gø. De Abicɑy wɑ̈d Dheruyɑ̀, Debïd ɑ́kønye, kɑ jönɑni nɑ̈ge. Aköbbi Debïd yi jøge kinni, “Köngí kinni yï pɑ kedhi be liny kyeel ki wøn këti, kipe mɑɑc Isrɑil óthøw.” Kì bɑng linyɑni, kɑ liny megø otugø kì kɑɑm tyëng Pelistiyɑ̀ geki Isrɑil kì Göb. Bene yij linyɑni ɑ ɑ́nɑ̈ɑ̈g jöd me cwøl ɑ́ Sɑp yi Sibekɑy jɑl Ucɑ̀. Kɑ liny megø cig-ɑ tugø kì Göb, ki tyëng Pelistiyɑ̀. Kenyɑni ɑ ɑ́nɑ̈ɑ̈g Gölyɑth jɑl Gɑth, jɑl-ɑ bööl ɑkebïdhe ni leg, ɑ́nɑ̈g-ɑ yi Elɑɑnɑn wɑ̈d Yɑir jɑl Betleem. Liny megø ɑ́cigi tuumø kì Gɑth, linyɑni ɑ yije ɑ́nɑ̈ɑ̈g jöd me mɑɑr liny. Jönɑni lweddi cingge bɑ ɑ́bïkyel kí ɑ́bïkyel, o lweddi tyelle bɑ ɑ́bïkyel kí ɑ́bïkyel, lweddi tyelle kí lweddi cingge bɑ pyɑ̈r ɑ́ryew wïdɑ́ngwen. Keny-ɑ ɑ́lɑre Isrɑil, kɑ nɑ̈g yi Yönɑthɑn wɑ̈d Cɑmɑ̀ ómï Debïd. Jöddɑni gɑ ɑ́ngwen bɑ wɑ̈ddi Rɑpɑ̀ ki Gɑth, ge ɑ́nɑ̈g-ɑ yi Debïd geki jøge. Keny-ɑ ɑ́rum Debïd ki kɑ̈ɑ̈l wɑ̈g yi Jwøng-ɑ Ácwɑ̈ɑ̈j kì cingi Cɑul geki cinggi tyëngmɑ̈ɑ̈nø møg-ɑ kyeelø, ɑwöre e lenh-ɑ Jwøng-ɑ Ácwɑ̈ɑ̈j ki wör møg: Jwøng-ɑ Ácwɑ̈ɑ̈j ɑ kor yɑn, bene dörɑ dör-ɑ teg, Jwøgɑ bene en ɑ kor yɑn, keny-ɑ ɑ́yingɑ bute, bong gïjø mɑ ɑ́nywɑl yɑn. Yɑ gëngge’ gënggø ni kwöd, ónyïɑ̈ggø kiperɑ, bong gïn nywɑl yɑn, Bɑ yïënɑ, Yɑ korre’ korrø, kɑ yɑ nyi yiele ki rɑj bënn. Jwøng-ɑ Ácwɑ̈ɑ̈j nyinge ɑ́cwølɑ kɑ yɑ yiel yi en, kì cinggi tyëngmɑ̈ɑ̈nø. Jwøng-ɑ Ácwɑ̈ɑ̈j ɑ lenhɑ ki mendwøng! Yɑ ɑ́wen yi ngwölli thøø, ngwölli ryɑ̈g ri gen ɑ́bɑɑb gen kömɑ. Böögi thøø yɑ wen en, rörø ying-ɑ bølɑ ni ɑ́kɑ̈llì. Nyingi Jwøng-ɑ Ácwɑ̈ɑ̈j ɑ́cwølɑ keny-ɑ ɑ́tyeeg yɑn yi ɑkørr, Jwøgɑ ɑ́cwølɑ o yɑ yiel yi en. Cwɑggɑ ɑ́lïnge kì Kenge, ywøgɑ ɑ́wɑ̈dhi yïthhe. Codhe, kɑ piny okïrrø kɑ onhɑ̈nhø, tyelli mɑl ɑ́kïïr kɑ ge okennø, mɑ́ Jwøk pyëwe ɑ́rënyi! Yïrø ɑ́kɑ̈ɑ̈l órømme, kɑ mɑc me rɑ̈bi kí cug mø lyel kɑ̈ɑ̈l-ɑ dhøge. Mɑl ɑ́pyëde kɑ bï-ɑ piny, kí pøølø me looj kì thɑ́ tyelle. Ápɑ̈rri e ying-ɑ kömi kerob, ɑ́lidh e ying-ɑ wɑ̈thi obërri yømø. Ree ɑ́kume ki muudhø, ɑ́wen yi pøøl mø looj mø ri gen di pï. Cug ɑ́ceg ì pɑ̈b ki mɑc kì ri cɑr-ɑ mëënyø kì bøle. Jwøng-ɑ Ácwɑ̈ɑ̈j ɑ́mɑ̈r kì mɑl, cwɑggi Jwøng-ɑ Pëddi Döng ɑ́lïngi. Ágöjji ki wethe kɑ tyëngmɑ̈ɑ̈nø cyedde, mɑ̈re ɑ́rɑ̈ɑ̈d kì kömi gen kɑ ge ceg-ɑ ì dïr ki ngwej. Tyeli nɑɑm omelø ɑ́döng ɑ́ tɑngdɑr, kɑ tyelli piny ri gen yɑl gen keny-ɑ ɑ́cyɑ̈ɑ̈r tyëngmɑ̈ɑ̈nø yi Jwøng-ɑ Ácwɑ̈ɑ̈j, kɑ ngɑ̈ɑ̈r-ɑ kömi gen ki liny. Jwøng-ɑ Ácwɑ̈ɑ̈j cinge ɑ́rïïje piny kɑ yɑ mɑge, yɑ ɑ́tëële wɑ̈g kì yethi pï mø ngenyø. Yɑ ɑ́yiele kì cinggi tyëngmɑ̈ɑ̈nø møg teg, geki tyëng-ɑ mɑɑn yɑn bënn, ge ɑ́bëëd ge teeg cɑrø kibølɑ. Ge ɑ́pɑ̈ɑ̈r kömɑ keny-ɑ ɑ́di kömɑ ɑkørr, de yɑ ɑ́kor yi Jwøng-ɑ Ácwɑ̈ɑ̈j. Yɑ ɑ́kɑ̈ɑ̈le wɑ̈g kì yethi rɑj, yɑ ɑ́yiele, mɑ́ pyëwe med ki yɑn. Yɑ ɑ́køøg yi Jwøng-ɑ Ácwɑ̈ɑ̈j, mɑ́ yɑ ɑ́gøgg-ɑ dyër, yɑ ɑ́gyëdhe mɑ́ yïɑ bɑ̈r. Ciggi Jwøng-ɑ Ácwɑ̈ɑ̈j ɑ́mïdhɑ, ngɑ̈jɑ nuti lugi yɑn Jwøgɑ Cigge ɑ́mïdhɑ bënn, cigge nuti pyeem yɑn. Ngɑ̈ny wøw kinni bong gïn-ɑ ɑ́bɑj yi yɑn, ngɑ̈ny wøw kinni, yɑ ɑ́bëëd yɑ lɑ̈wi ki orøg. A bɑnge køøge yɑn, mɑ́ yɑ ɑ́gøgg-ɑ dyër, mɑ́ yɑ ngɑ̈nyi yi en kinni yïɑ bɑ̈r. Tyëng-ɑ lïngi kwøbbí omïdhø yi yïn Wuö, o tyëng-ɑ bëëdi gen døøj, okorø yi yïn kidøøj. Ngɑntir nyi göggií gïgtir, ngeti ɑ́wenɑwenø nyii wenø yi yïn. Tyëng-ɑ mööl nyii yielø yi yïn, kɑ tyëng-ɑ tɑ̈dø nyi dwøøg cyɑ̈n. Yï bɑ cɑrɑ, yïn ɑ Jwøng-ɑ Ácwɑ̈ɑ̈j, muudhɑ nyi løgí cɑr. Ki tegí, yɑ ócuggø pödhi kömi tyëngmɑ̈ɑ̈nø, dörri tyëngmɑ̈ɑ̈nø cøørɑ’ piny ki tegi Jwøgɑ! Yuu Jwøng-ɑ Ácwɑ̈ɑ̈j bɑ óbödh. Kwøbbi Jwøng-ɑ Ácwɑ̈ɑ̈j tir. Bɑ kwöd kì yï tyëng-ɑ nyi yömmi yïe. Jwøng-ɑ Ácwɑ̈ɑ̈j kete ɑ bɑ Jwøk. Jwøng-ɑ Ácwɑ̈ɑ̈j kete ɑ nyi nyïɑ̈ggi kiperee. Jwøøng bene keny teg, ɑ yije yömmɑ, yëthɑ nyi gwøge’ gwøgø gɑ kɑ̈jj-ɑ bong böögø. Tyellɑ nyi løge’ mø teg ni tyelli ɑ́køny, yɑ nyi løge’ me cuggi cung kì wɑ̈thi ótøng. Yɑ nyi pwönye’ pwönyø ki liny. Kɑ wenh teg nyi lwɑ̈ngɑ ki gøjø. Wuö, yɑ nyii korø yi yïn, kɑ yɑ yiel yi yïn, perɑ ɑ́tëngi kì bɑng kunyí. Yɑ ɑ́mɑ̈ɑ̈n yi yïn mɑgø, o yɑ nuti pɑ̈ɑ̈dhø. Tyëng-ɑ mɑɑn yɑn nyi cyeddɑ’ cyeddø, kɑ ge tyɑmɑ. Yɑ pɑ nyi wïyi ki cyëddø gïti kenyi nɑ̈gɑ gen. Ge ɑ́pwöödɑ piny; ge pɑ cuggi dhwödhø; ge buud-ɑ thɑ́ tyellɑ gɑ ɑtyɑm, Kɑ yɑ thödhi yi yïn ki tegø me nyïɑ̈ggɑ ki liny, tegø me tyɑɑmɑ tyëng-ɑ mɑɑn yɑn. Tyëngmɑ̈ɑ̈nø ɑ́göjjí rïngø kì yïɑ, tyëng-ɑ mɑɑn yɑn ɑ́nɑ̈gɑ. Ge oyɑ̈bø ki kønyø, de bong ngɑn yiel gen, Jwøng-ɑ Ácwɑ̈ɑ̈j ocwøllø yi gen, de pɑ löggi. Ge ɑ́mødɑ kɑ ge ópɑ̈ɑ̈rø ki tør. Ge ɑ́nyønɑ ni lɑ̈bø kì yethi yëëth. Yɑ ɑ́yiel yi yïn ki ji-ɑ ɑ́tïnggi cinggi gen yɑn, kɑ jurrì jɑɑg yi yɑn, ji-ɑ ɑ́bëëd ge kwïjɑ, ɑ́göög ki møg jɑɑg yi yɑn. Jurr-ɑ kyeelø kull-ɑ wɑ̈thi gen kì piny kì bølɑ, kenyi lïngi gen kwøbbɑ, gï pɑ nyi pyem yi gen. Ge nyii bwøgø kɑ ge bï-ɑ wɑ̈g, kì yethi dörri gen dëlli gen okïrrø. Jwøng-ɑ Ácwɑ̈ɑ̈j ɑ Nëënø! Ngɑn-ɑ nyi yiel yɑn lenhɑ’ lenhø! Wøwu döngi Jwøng teg, Jwøng-ɑ ɑ́yiel yɑn! Yɑ ɑ́thödhe ki tegø me tyɑɑmɑ tyëngmɑ̈ɑ̈nø, jurrì ɑ́dwööge thɑ́ ciggɑ, kɑ yɑ yiele kì cinggi tyëng-ɑ mɑɑn yɑn. Yïn ɑ Jwøng-ɑ Ácwɑ̈ɑ̈j, yɑ ɑ́thödhí ki tegø me tyɑɑmɑ tyëng-ɑ mɑɑn yɑn, kɑ yɑ kor yi yïn ki jøg-ɑ mudø ki ji. Alejjɑ yïn kì kelli jurrì, yɑ wör yɑ lenh-ɑ yïn. Jwøk rɑ̈nh-ɑ ɑ́rønye ɑ́mëgge tyɑ̈mø ki mendwøng, ngɑn-ɑ ɑ́yienye ɑ́mɑɑre ki mɑ̈ɑ̈dø me pɑ lwënyi. Debïd ɑ mɑɑr yi en geki kwɑrre gïti ɑtheer. Debïd wɑ̈d Yesì bene jɑl-ɑ ɑ́gwøg yi Jwøk e dwøng; ɑ́yieny yi Jwøøg Yɑgob ɑ́ rɑ̈dh, o ɑ́bëëd thyew ɑ́ ɑcɑ̈ɑ̈g wör mø myër kì Isrɑil. Møg bene gen cyɑ̈ɑ̈n kwøbbi Debïd: Wëyi Jwøng-ɑ Ácwɑ̈ɑ̈j ɑ́kööb kì riɑ, wööne ying-ɑ dhøgɑ Jwøøg Isrɑil ɑ́kööb; ngɑn-ɑ kor Isrɑil yɑ ɑ́köbbe kinni, “Rɑ̈nh-ɑ jyɑ̈gø e gøgg-ɑ dyër, ɑ jyɑ̈gø e wør-ɑ Jwøk, pɑ̈r ki yeeri cɑ̈ng kì mwøl, e bong pøøl kì mɑl, cɑ̈ng ɑ nyi wëggi lum omɑ̈l, kɑ̀ cer kødh mɑ̈gø.” Bene kër-ɑ ógyëëdh kwɑrrɑ yi Jwøk, mɑ́ kɑɑm wøn ɑ́cïbi wøn ki lwöbø wøki Jwøk gïti ɑtheer, lwöbø me pɑ pɑ̈d, kwöng me pɑ wil. Bene codhi gïn-ɑ tyer yi yɑn menɑni ɑ óbëëd ɑ́ tyɑ̈mɑ, o møgɑni ómuuj yi Jwøk ceth. De jøg-ɑ yï gen bong jwøg nɑ koodh ɑ nyi weddi pɑ̈l, bong ngɑn nywɑl gen ki cinge, ngɑn nywɑl gen nywɑ̈ddi kɑ keer kí dikøg; ge órɑ̈bbi kì kenyɑni ceth! Nyingi pëjji liny Debïd ek: Jɑl-ɑ mɑl bɑ Yöceeb Bɑscebeth wɑ̈d gøl Tɑkemön, en ɑ ɑ́nyïɑ̈ggi ki ji miy ɑ́bïdɑ̈g kɑ gï nɑ̈ge, gï cöbe’ cöbø ki ɑkebïdhe. Ryeew gen bɑ Eliɑdhɑr wɑ̈d Dödö kì gøl Ákö. Cyɑ̈ng ɑ́kyel tyëng Pelistiyɑ̀ mø cøng ri gen kipe liny ɑ́tøøny yi en geki Debïd. Kɑ Isrɑil nyɑɑny cyɑ̈n de nuti nyegø kì keje. Ányïɑ̈ggi ki tyëng Pelistiyɑ̀ kɑ gï pwööde piny ki pile, kɑ cinge tööd-ɑ ri pilø. Jwøng-ɑ Ácwɑ̈ɑ̈j ɑ́tyɑ̈ɑ̈m ki mendwøng dicyɑ̈ngɑni. Codhe, ɑdwöög yɑy keny-ɑ di Eliɑdhɑr, de ge ɑ́dwöög-ɑ be kwɑnyi pilli tyëng-ɑ ɑ́nɑ̈g yøw. Dɑ̈ɑ̈g gen bɑ Cɑmɑ̀ wɑ̈d Ageè jɑl Arɑr. Jø Pelistiyɑ̀ ri gen ɑ́cøng gen Lekì, kì keny mɑ ɑ́di pwödhi ngöör. Kɑ Isrɑil cyeddi yi Pelistiyɑ̀, de Cɑmɑ̀ ɑ́cungi kì yij pwönhɑni e nyɑg-ɑ per pwödhø, kɑ jø Pelistiyɑ̀ nɑ̈ge. Jwøng-ɑ Ácwɑ̈ɑ̈j ɑ́tyɑ̈ɑ̈m ki mendwøng dicyɑ̈ngɑni. Keny-ɑ ɑ́cɑ̈gi kɑj ki byel, kɑ ɑ́dɑ̈g-ɑ mɑl kì wɑ̈thi pëjji pyɑ̈r ɑ́dɑ̈g kedh-ɑ Adulɑm kun-ɑ ɑ́bëëd yi Debïd, kì bøli kenyɑni ɑ́dɑ kɑɑl Pelistiyɑ̀ kì Töör Repɑim. Debïd ɑ́bëëd ɑ wïj kït mɑ gël, kɑ Betleem mɑg yi ɑkuud Pelistiyɑ̀. Kɑ Debïd nɑ̈g yi rummi pɑc, ɑkööbe kinni, “Ce di bëëd e dɑ ngɑn muuj yɑn ki pï mø mɑdh yi yɑn kì yij yiinh-ɑ dhø döri Betleem!” Kɑ ɑ́dɑ̈g-ɑ mɑl kì kelli pëjjì, yuu gen nyɑny gen ge bɑ̈ɑ̈n-ɑ kɑɑl Pelistiyɑ̀, ɑtömi gen ki pï kì yij yiinhɑni, ɑmuuj gen pïgɑni Debïd. De pïgɑni nuti mɑɑdh en, pï ɑ́yöd gï kunye’ Jwøng-ɑ Ácwɑ̈ɑ̈j gɑ gëëdhi, ɑkööbe kinni, “Wuö, pïg pɑ cuggi mɑdhø yi yɑn! Óni remmi jøgɑni gɑ ɑ́dɑ̈g ɑ mɑɑdh yɑn, mɑ́ ge ɑ́bøy-ɑ thøø!” Codhe, ɑcöge gï pɑ mɑdhe. Bene gen gïg-ɑ ɑ́gwøg yi jöddi liny, yɑɑg ɑ́dɑ̈g møg pɑ nyi böggi ɑgɑk. Abicɑy ómï Yöɑb (ɑ meyi gen cwøl ɑ́ Dheruyɑ̀) ɑ́bëëd ɑ́ pëëji, ɑ́nyïɑ̈ggi ki ji miy ɑ́dɑ̈g kɑ gï nɑ̈ge bënn, ɑkwɑɑnii kelli jöddi liny pyɑ̈r ɑ́dɑ̈g møg-ɑ ngɑ̈nyi kì yij pödhø. En ɑ ti ki ngɑ̈nyø kì kelli jöddɑni gɑ pyɑ̈r ɑ́dɑ̈g, de nyinge nuti ti pödhi mɑl ni nyingi ɑ́dɑ̈g-ɑ mɑl. Benɑiyɑ̀ wɑ̈d Yöyɑdɑ̀, jɑl Kɑbdhiil ɑ́bëëd ɑ́ jɑl-liny me pere nud, pɑ nyi böggi, o ɑ́göög ki gïg teg mø ngenyø. Kí nɑ̈gi jöddi liny Moɑb ɑ́ryew. Ákedhi yij ød ngur cyɑ̈ng ɑ́kyel e piny pɑ̈ng yi ɑ́piy, kɑ ngurɑni nɑ̈ge. Jööd Rïp me ngëde dwøng, me cinge di ɑkebïdh gø ɑ́nɑ̈ge thyew. Benɑiyɑ̀ ɑ́kedhi yïe kɑ lodh, ɑgwɑre ɑkebïdh ki yï jööd Rïp, kɑ gø nɑ̈ge ki tøngɑni. Benɑiyɑ̀ ɑ́bëëd ɑ́ ɑ́kyel kì kelli jödd-ɑ pyɑ̈r ɑ́dɑ̈g, o bene gïg-ɑ ɑ́gwøg yi en ɑgɑk. Ábëëd nyinge ying-ɑ mɑl kì kelli gen, de nyinge nuti ti pödhi mɑl ni nyingi ɑ́dɑ̈g-ɑ mɑl. Ácïb yi Debïd ɑ́ jɑngi jøg-ɑ korrii. Kɑ pyëw Jwøng-ɑ Ácwɑ̈ɑ̈j cig-ɑ rënyø ki Isrɑil, ɑwëgge Debïd kɑ̈ni kömi tyëng Isrɑil geki Yeudiyɑ̀ ki göj, kɑ Debïd köbbi yi Jwøng-ɑ Ácwɑ̈ɑ̈j kinni, “Kedh, kwɑn tyëng Isrɑil geki Yeudiyɑ̀.” Kɑ Yöɑb jɑngi pëjji liny köbbi yi rɑ̈dh kinni, “Kedhí yethi myërri Isrɑil, cɑg kì Dɑn gïti Bircebɑ̀, kɑ ji kwɑɑn, o kwɑnni gen yod yi yɑn.” Aløøg kwøbbi rɑ̈dh yi Yöɑb kinni, “Jií ómed yi Jwøgí, Jwøng-ɑ Ácwɑ̈ɑ̈j ki tyel miyø, o yï ómïdhi yi Jwøng-ɑ Ácwɑ̈ɑ̈j gïti keny-ɑ óliidh møgɑni wuö! Á kipe ngø ɑ dwɑddí gwøgi gïn ni men?” De Yöɑb ɑ́cir yi rɑ̈dh geki pëjji liny, codhe ɑdhwödh gen kɑ ge kedh-ɑ be kwɑni tyëng Isrɑil. Keny-ɑ ɑ́rum gen ki bɑ̈ɑ̈ni Nɑm Urdun, ɑguddi gen buti Aröeer ki kemmi gen, kì kuni wɑɑng wurlwɑl kì yij bɑ̈j. Kɑ kɑ̈l-ɑ kö Gɑd geki Yɑdher. Kɑ ge kedh-ɑ Gilyɑd geki piny Tɑɑtïm Kodcïm, kí Dɑn, kɑ ge wïnn-ɑ Sïdön. Ge ɑ́kedhi kɑɑl döri Suur, kí myërri tyëng Kib, kí myërri tyëng Kɑnɑɑn. Kì cyɑ̈n cyee, ɑkedhi gen Bircebɑ̀ kì myërri Yeudiyɑ̀. Kɑ piny tyëg gen ki cɑɑdhø kì bɑng dwɑ̈tt ɑ́bïngwen kí cyɑ̈ng pyɑ̈r ɑ́ryew. Codhe, ɑdwöög gen Yerusɑlem. Kɑ wɑ̈nyi kwɑnni ji mëggi rɑ̈dh yi Yöɑb. Kwɑnni jøg-ɑ cuggi nyïɑ̈ggø ki pil, bɑ ɑ́lïp miy ɑ́bïdɑ̈g kì Isrɑil, kí ɑ́lïp miy ɑ́bïj kì Yeudiyɑ̀. Debïd ree ɑ́cɑye keny-ɑ ɑ́rume kwɑnyi wɑ̈nyi kwɑnni ji. Kɑ Jwøng-ɑ Ácwɑ̈ɑ̈j köbbe kinni, “Yɑ ɑ́røngi ki mendwøng ki gïn-ɑ ɑ́gwøg yi yɑn. Yɑ kwɑjj-ɑ yïn, Yïn ɑ Jwøng-ɑ Ácwɑ̈ɑ̈j, lɑ̈ɑ̈m pyëwí ki yɑn, yɑn ɑ bɑ̈ngí, mɑ́ yɑ ɑ́göög-ɑ nøgi wïjɑ.” ɑkedhi Gɑd yïe, kɑ gø köbbe møg-ɑ ɑ́kwøb yi Jwøng-ɑ Ácwɑ̈ɑ̈j, gø ɑ́pyëje kinni, “Á ngø ɑ dwɑddi yi yïn o bëe? Mɑ̈gi kɑ̈j ki runn ɑ́dɑ̈g kì piny? Wɑlɑ̀ dwɑ̈tt ɑ́dɑ̈g, yï ocyeddø yi tyëngmɑ̈ɑ̈nø? Wɑlɑ̀ cyɑ̈ng ɑ́dɑ̈g e yømø nɑ̈ɑ̈g onɑ̈gø ji kì pinyí? Jwɑn rumø ɑnɑn, kɑ yɑ köbbí lögg-ɑ muujɑ Jwøng-ɑ Ácwɑ̈ɑ̈j.” Alöggi Debïd kinni, “Yɑ ɑ́dhing yi møgɑni! De yɑ pɑ dwɑddi pɑ̈dhi cingi dhɑnhø. Wiy yɑ pɑ̈dhɑ cingi Jwøng-ɑ Ácwɑ̈ɑ̈j kiree, mɑ lɑ̈mpyëwe pɑ nyi thumi.” Codhe, ɑör yømø nɑ̈ɑ̈g Isrɑil yi Jwøng-ɑ Ácwɑ̈ɑ̈j; ɑ́cɑ̈gi kì mwølɑni gïti bøli keny-ɑ ɑ́cïb yi en. Kɑ yømɑni tɑɑy-ɑ yij pödhø bëne, cɑg kì tuung gïti tung-ɑ kyeelø, kɑ onɑ̈gø ki jøg-ɑ cwøw ɑ́lïp pyɑ̈r ɑ́bïryew. Kɑ wëywön-ɑ nɑ̈gø cinge rïïje kömi Yerusɑlem o gø di nɑ̈ge, de Jwøng-ɑ Ácwɑ̈ɑ̈j pyëwe ɑ́lɑ̈ɑ̈m ki ji, ɑkyëdde wëywön-ɑ nɑ̈gø kinni, “Cungí! Árum! Dwøøg cingí piny!” Kì bøli kenyɑni wëywöni Jwøng-ɑ Ácwɑ̈ɑ̈j ɑ́ying-ɑ yij rɑri pwödhi Arɑunɑ̀ wɑ̈d Yebus. Debïd keny-ɑ ɑ́lidhe wëywön-ɑ ɑ́nɑ̈g ji, ɑköbbe Jwøng-ɑ Ácwɑ̈ɑ̈j kinni, “Bɑ yɑn ɑ ɑ́røngi; yɑn ɑ ɑ́göög ki bɑ̈jjø. Ji møg ɑ́wɑ̈dh-ɑ løg bɑngɑ yøw ni kenyi lugi dyëg-ɑ römm. Bong bɑ̈jjø mɑ ɑ́gwøg yi gen. Cɑy yɑn wøki gølɑ.” Kɑ Gɑd bï-ɑ yï Debïd kì cyɑ̈ngɑni, ɑköbbe gøn kinni, “Kedh, kɑ Wë gëddí ki këli lɑm kì yij rɑri pwödhi Arɑunɑ̀ wɑ̈d Yebus.” Codhe, ɑkedhi Debïd be gwøgi møg-ɑ ɑ́köbbii yi Gɑd ni møg-ɑ ɑ́ceg yi Jwøng-ɑ Ácwɑ̈ɑ̈j. Kɑ Arɑunɑ̀ wïje tïnge, ɑlidhe rɑ̈dh geki bɑ̈ngge ge bï-ɑ yïe. Codhe, ɑkedh Arɑunɑ̀ kɑ rɑ̈dh mɑle ree bøødhe’ piny. Kɑ Arɑunɑ̀ okööbø kinni, “Á kipe ngø, ɑ bëën wɑ̈ɑ rɑ̈dh yïɑ?” Alöggi Debïd kinni, “Yɑ ɑ́bï-ɑ be ngewi rɑri pwödhí, o yije gëddɑ ki këli lɑm mi Jwøng-ɑ Ácwɑ̈ɑ̈j, o yøm-ɑ nɑ̈gø cunge.” Kɑ Debïd köbbi yi Arɑunɑ̀ kinni, “Wuö rɑ̈dhɑ, kwɑny gïn-ɑ dwɑddi yi yïn kipe këli lɑm. Wɑ̈dhh ek møg nɑ̈g gɑ gëdhhì. O lëggi cøg ki byel ek, geki ɑcebbi gen, kwɑny gen gɑ yugg. Jɑmmɑni bënn ɑ́mëggɑ yïn, rɑ̈dhɑ.” Kɑ Arɑunɑ̀ rɑ̈dh köbbe thyew kinni, “Wiy kwɑ̈jjí yïëy yi Jwøgí, Jwøng-ɑ Ácwɑ̈ɑ̈j ki medi pyëwe.” De kwøbbi Arɑunɑ̀ ɑ́løøg yi rɑ̈dh kinni, “Pɑth, yï ócuddɑ kipe piny. Jwøgɑ, Jwøng-ɑ Ácwɑ̈ɑ̈j pɑ cuggi mëggi gïg nuti ngeew yɑn ɑ́ gënh-ɑ nyi rɑ̈b bëne.” Codhe, kɑ rɑrø geki wɑ̈dhh ngew yi Debïd ki ngyëny ɑ́tegg gɑ pyɑ̈r ɑ́bïj. Codhe, ɑgëdde Jwøng-ɑ Ácwɑ̈ɑ̈j ki këli lɑm, kɑ ongɑ̈dø ki gënh-ɑ nyi rɑ̈b bëne, geki keni mër. Kɑ kwɑ̈jje løøg yi Jwøng-ɑ Ácwɑ̈ɑ̈j, kɑ yøm-ɑ ɑ́nɑ̈ɑ̈g kì Isrɑil ócungø. Kɑ Rɑ̈dh Debïd oyöø ki mendwøng, dële pɑ nyi lënhi kenyi kumii ki ógudh. Kɑ köbbi yi bɑ̈ngge kinni, “Wuö, wiy yï yɑ̈bbi yi wøn ki nyɑndhɑjø me bëëdø ki yïn, o nyi buude kì butí, o dëlí nyi murre.” Kɑ ge kedh-ɑ yethi myërri Isrɑil be yɑb ki nyɑndhɑjø me myëër. Ayod gen nyɑn me cwøl ɑ́ Abicɑg kì Cunem, kɑ gø muuj gen rɑ̈dh. Nyɑnɑni myëër cɑrø. Kɑ pëgg-ɑ be kɑ̈lli rɑ̈dh. Dëël rɑ̈dh nyii murrø yi en de gø nuti gwøøg en dhɑjø. Keny-ɑ ɑ́rum Abcɑlöm ki thøø, kɑ Adöniyɑ̀ wɑ̈d Agith ree tïnge cem ɑ́ rɑ̈dh. Kɑ ree gögge ki yɑ̈y, kɑ ókɑ̈bbø ki kyënyì mø pyejji yɑ̈yɑni, ɑkɑ̈bbe ki jøg mø kwɑnni gen bɑ pyɑ̈r ɑ́bïj møg rïngi kì bøle. Nuti pɑ̈nyø cyɑ̈rø yi wïye cyɑ̈ng ɑ́kyel kinni, “Yïde ɑ göög kinøw!” Ábëëd bøle myëër thyew, o bɑ ngɑ̈ɑ̈j Abcɑlöm. Adöniyɑ̀ kwøb ɑ́nywɑg yi en kɑ Yöɑb wɑ̈d Dheruyɑ̀, kí ókwërø Abiyɑthɑr. De ókwërø Dhɑdök, kí Benɑiyɑ̀ wɑ̈d Yöyɑdɑ̀, kí Nɑthɑn jɑltöng, kí Cimeì, kí Reì, kí jøg-ɑ kor Rɑ̈dh Debïd; kwøbbi Adöniyɑ̀ nuti yïëëy gen. Kɑ Adöniyɑ̀ ongɑ̈dø cyɑ̈ng ɑ́kyel ki dhög kí dyëg, kí røjj-ɑ cwiy gɑ gëdhhì, kì kömi nyɑ Kïti Dhökel kì buti Enrögel. Kɑ wɑ̈ddi rɑ̈dh ryeje bënn geki jø Yeudiyɑ̀. De Nɑthɑn jɑltöng, kí Benɑiyɑ̀, kí jøg-ɑ kor rɑ̈dh geki Sølømøn nuti cwøøl en. Codhe, ɑköbbi Bɑtcebɑ̀ meyi Sølømøn yi Nɑthɑn kinni, “Yï nuti lïngø kinni i Adöniyɑ̀ wɑ̈d Agith göögø ki rɑ̈dh e Debïd wïye kwïj wøw! Gïn-ɑ köbbɑ yïn bɑ kinni keløg yï dwɑdd-ɑ yieli wëyí geki wëyi Sølømøn wɑ̈dí, jwɑn kedhi yï Rɑ̈dh Debïd ɑnɑn ceth, kɑ pyëëj kinni, ‘Yɑ nuti köbbø yi yïn wuö, kinni wɑ̈dɑ Sølømøn, bɑ en ɑ ójɑ̈ggi ɑ́ rɑ̈dh kì bɑngí? Dɑ́ kipe ngø ɑ göög Adöniyɑ̀ ki rɑ̈dh?’ O kɑ̈ng-ɑ ónudd wu okööbø ki rɑ̈dh, yɑ óbï, o nyudhɑ kinni yï kømm-ɑ dyër.” Codhe, kɑ Bɑtcebɑ̀ kedh-ɑ ød yï rɑ̈dh. Rɑ̈dh yöø ki mendwøng, o okɑ̈llø yi Abicɑg nyɑn-ɑ ɑ́kɑ̈ɑ̈l kì Cunem. Kɑ Bɑtcebɑ̀ ree bøødhe, kɑ rɑ̈dh mɑle. Apyëjii yi rɑ̈dh kinni, “Yï dwɑdd-ɑ ngø?” Alögge kinni, “Wuö, yɑ nuti köbbø yi yïn kinni, ‘Wɑ̈dɑ Sølømøn bɑ en ɑ ójɑ̈ggi ɑ́ rɑ̈dh kì bɑngɑ!’ Møgɑni ɑ́kwøb yi yïn, kɑ yï óköngø ki nyingi Jwøgí, Jwøng-ɑ Ácwɑ̈ɑ̈j, kinni ge ómïdhi yi yïn ceth. De liidh ɑnɑn, Adöniyɑ̀ ree ɑ́gwøge ɑ́ rɑ̈dh, yï kwïj wøw. Ángɑ̈ɑ̈d ki dhög mø gïïr, kí røjj-ɑ cwiy kí dyëg gɑ gëdhhì, kɑ wɑ̈ddi rɑ̈dh ryeje bënn, geki ókwërø Abiyɑthɑr, kí Yöɑb pënyi liny, de bɑ̈ngí Sølømøn nuti ryeej en. O ɑnɑn wuö rɑ̈dh, Isrɑil bëne nenn-ɑ yïí, o ge köbbi yi yïn ki ngɑn-ɑ ópëggi wïj kwøm kì bɑngí. Ke pɑ löggí, kɑ rɑ̈dh kɑ̈l yi Jwøk, wø ókwɑny wøn ɑ́ tyëngrijjø wøki Sølømøn wɑ̈dɑ.” Kɑ pïïd e nudd e okööbø geki rɑ̈dh yi Nɑthɑn jɑltöng. Kɑ rɑ̈dh köbbe kinni “Nɑthɑn jɑltöng ɑ́wɑ̈nhi.” Kɑ Nɑthɑn kedh-ɑ yï rɑ̈dh, ɑbøødhe ree, kɑ rɑ̈dh mɑle. Akööb Nɑthɑn kinni, “Wuö, yï ɑ́di kwøb kinni Adöniyɑ̀ bɑ en ɑ ójɑ̈ggi kì bɑngí? Adöniyɑ̀ ɑ́ngɑ̈ɑ̈d dicyɑ̈ngtïn ki dhög mø gïïr, kí røjj-ɑ cwiy, kí dyëg, kɑ wɑ̈ddí møg-ɑ kyeelø ryeje bënn, geki pëjji liny kí ókwërø Abiyɑthɑr. Ge ceg-ɑ cɑm geki Adöniyɑ̀ ɑnɑn. Ge okööbø kinni, ‘Rɑ̈dh Adöniyɑ̀ ómïdhi yi Jwøk!’ De yɑ nuti ryeej en, yɑn ɑ bɑ̈ngí. O ókwërø Dhɑdök, kí Benɑiyɑ̀ wɑ̈d Yöyɑdɑ̀, o wɑ̈dí Sølømøn nuti ryeej en thyew. Møgɑni ɑ́yïëy yi yïn, e bɑ̈nggí nuti köbbi yïn ngɑn-ɑ ójɑ̈ggi kì bɑngí?” Kɑ Rɑ̈dh Debïd okööbø kinni, “Cöllí yɑn Bɑtcebɑ̀.” Kɑ Bɑtcebɑ̀ bï-ɑ yï rɑ̈dh, kɑ ócungø kì bøle. Kɑ rɑ̈dh óköngø kinni, “Yɑn ɑ köngi èn ki nyingi Jwøng-ɑ Ácwɑ̈ɑ̈j ngɑn-ɑ ɑ́yiel wëyɑ kì yethi rɑj bënn. Yï ɑ́rum ki köbbø yi yɑn kì bøli Jwøøg Isrɑil, Jwøng-ɑ Ácwɑ̈ɑ̈j kinni wɑ̈dí Sølømøn bɑ en ɑ ójɑ̈ggi kì bɑngɑ, o bɑ en ɑ pëggi wïj kwømɑ ceth dicyɑ̈ngtïn!” Kɑ Bɑtcebɑ̀ ree bøødhe piny, kɑ rɑ̈dh köbbe kinni, “Wɑ̈ɑ ómïdhi yi Jwøk gïti ɑtheer.” Kɑ rɑ̈dh okööbø kinni, “Cöllu yɑn ókwërø Dhɑdök, geki Nɑthɑn jɑltöng, kí Benɑiyɑ̀ wɑ̈d Yöyɑdɑ̀.” Codhe, kɑ ge bï-ɑ bøli rɑ̈dh. Kɑ ge köbbi yi rɑ̈dh kinni, “Cwølu bɑ̈nggɑ, jø tøg burø, kɑ Sølømøn wɑ̈dɑ cïb wun kömi ógɑlø miɑ, kɑ kïdhu kömi wɑɑng pï kì Gekön. Kɑ wïje kunyi ki møw e røny ɑ́ rɑ̈ɑ̈dh Isrɑil yi Dhɑdök geki Nɑthɑn. Kɑ kɑng kodh wun, kɑ wu ryeer wun kinni, ‘Rɑ̈dh Sølømøn ómïdhi yi Jwøk!’ Kɑ wu bï wun wu ócyɑ̈dhø kì bɑnge keny-ɑ óbëëne be pëggi wïj kwømɑ kì keny. En ɑ jɑ̈ggi kì kejɑ, mɑ́ en ɑ ɑ́myeg yi yɑn ɑ́ jɑngi Isrɑil geki Yeudiyɑ̀.” Kɑ Benɑiyɑ̀ ólöggø kinni, “Møgɑni ógwøg ceth. O ge óyïëy yi Jwøgí, Jwøng-ɑ Ácwɑ̈ɑ̈j! Sølømøn ókorri yi Jwøng-ɑ Ácwɑ̈ɑ̈j ni korr-ɑ ɑ́korre yïn wuö, kɑ kwøme ódøngø kibøli kwømí.” Codhe, kɑ Sølømøn kwɑny yi ókwërø Dhɑdök geki Nɑthɑn jɑltöng, kí Benɑiyɑ̀ wɑ̈d Yöyɑdɑ̀, kí bölidhh. Kɑ gø cïb gen kömi ógɑli rɑ̈dh, ɑkïdhi ge gøn kömi wɑɑng pï kì Gekön. Kɑ ókwërø Dhɑdök okɑ̈dø ki tuung møw kì yij Kemi Kwër. Kɑ møw kønye wïj Sølømøn gø rønye’ rønyø ɑ́ rɑ̈dh. Kɑ kɑng kodh. Kɑ teedø bëne óryeerø kinni, “Rɑ̈dh Sølømøn ómïdhi yi Jwøk!” Ge ɑ́ryeer yi medi pëthi gen, kɑ piny onhɑ̈nhø yi cwɑggi gen. Kɑ ywøøg kɑng lïngi yi Adöniyɑ̀ geki jøg-ɑ ɑ́ryej yi en bënn, kedh ge ceg-ɑ rumø ki cɑm. Kɑ Yöɑb ópëjjø keny-ɑ ɑ́lïnge ywøøg kɑng, kinni, “Awøw-ɑ wøw ji kì kɑɑl wɑng-ɑ ngø?” Kɑ Yönɑthɑn wɑ̈d ókwërø Abiyɑthɑr ówɑ̈nhø, e Yöɑb nudd e okööbø. Akööb Adöniyɑ̀ kinni, “Bïí, ɑdhwɑ̈ng! Yï óbëëd yï kɑ̈ll-ɑ wöödø me med.” Kɑ Adöniyɑ̀ köbbi yi Yönɑthɑn kinni, “Bong wöödø me med. Sølømøn ɑ́gwøg ɑ́ rɑ̈dh yi Rɑ̈dh Debïd. Ókwërø Dhɑdök geki Nɑthɑn jɑltöng, kí Benɑiyɑ̀ wɑ̈d Yöyɑdɑ̀ geki bölidhh ɑ́öre, kɑ Sølømøn cïb kömi ógɑli rɑ̈dh. Kɑ wïje kunyi ki møw yi ókwërø Dhɑdök geki Nɑthɑn jɑltöng kì kömi wɑɑng pï kì Gekön. Adwöög gen kì kunɑni pëthi gen omedø, kɑ kɑɑl ceg-ɑ dhwödhø bëne. Bene ɑwøwɑni ɑ ɑ́lïngi yi wun. Sølømøn ɑ́rum ki pëggi wïj kwøøm rɑ̈ɑ̈dhø. Bɑ̈nggi rɑ̈dh ɑ́bï be pwøji Rɑ̈dh Debïd ge okööbø kinni, ‘Nyingi Sølømøn ótïng mɑl yi Jwøgí kibøli nyingí, kɑ kwøme gwøge e dwøng kibøli kwømí.’ Kɑ Rɑ̈dh Debïd ómɑ̈ddø e ying-ɑ yij pyëne. Kɑ okööbø kinni, ‘Lenhi wɑ Jwøøg Isrɑil, Jwøng-ɑ Ácwɑ̈ɑ̈j, ɑ ɑ́muuj dicyɑ̈ngtïn ki ngɑn pëggi wïj kwømɑ, yɑ nudd yɑ onëënø.’ ” Codhe, kɑ wëlli Adöniyɑ̀ obwøgø, ɑdhwödh gen kɑ men ókedhø ki yuue kì wɑ̈ye. Kɑ Adöniyɑ̀ obwøgø ki mendwøng yi Sølømøn, ɑdhwödhe kɑ kedh-ɑ yij Kemi Kwër, be mïdhi tùngi këli lɑm. Kɑ Rɑ̈dh Sølømøn köbbi kinni, Adöniyɑ̀ ceg-ɑ böggø, o mïdh-ɑ tùngi këli lɑm, i kööbø kinni, “Yɑ dwɑdd-ɑ kinni köngi Rɑ̈dh Sølømøn møti kinni yɑ koo nɑ̈g yi en.” Alöggi Sølømøn kinni, “Obëëde ɑ́ jöd, bong yëyø ɑ́kyel men-ɑ ódëëm kì wïje, de obëëde e rɑj, bɑ men thøw.” Aöd Rɑ̈dh Sølømøn, kɑ Adöniyɑ̀ kɑ̈ɑ̈l piny kì wïj këli lɑm. Kɑ obëënø, kɑ Rɑ̈dh Sølømøn mɑle. Aköbbii yi Sølømøn kinni, “Kedhí gølí.” Kɑ Debïd ócyɑ̈ngø ki thøø. Acege wɑ̈de Sølømøn kinni, “Kej thøwɑ ɑ́cyɑ̈ngi, yɑ kedh-ɑ kun-ɑ nyi kedhi yi dhɑnhø bëne. Bëëd yï teeg ni jɑlø. Gwøg gwøøg Jwøgí, Jwøng-ɑ Ácwɑ̈ɑ̈j, kɑ yï cyɑ̈dhí kì yuue, yï mïdh-ɑ cigge geki kwönge kí pwönye, ni kɑ ógwedii kì yij wɑ̈nyi Mosɑ̀, kipe kinni o gïg-ɑ nyi gwøg yi yïn kì keny-ɑ kedhi yi yïn, nyi lwɑ̈ng yi yïn. Keløg møgɑni ómïdhi yi yïn kidøøj, møg-ɑ ɑ́köbbi yɑn yi Jwøng-ɑ Ácwɑ̈ɑ̈j ópɑ̈dhi kɑ̈jji gen, kinni, keløg kwøbbe ómïdhi yi wɑ̈ddɑ kidyër ki pëthi gen, gen ɑ ójyɑ̈ɑ̈gø ceth kì Isrɑil. “Yï ngɑ̈ny wøw thyew ki gïn-ɑ ɑ́göggi yɑn yi Yöɑb wɑ̈d Dheruyɑ̀ keny-ɑ ɑ́nɑ̈ge pëjji liny Isrɑil ɑ́ryew kipe gïjø me rënyi gen kì yij liny cøn, ɑ løg Abner wɑ̈d Ner, kí Amɑsɑ̀ wɑ̈d Yether, e piny dɑ mër. Jøgɑni ryeet ɑ́wɑ̈dhe’ nɑ̈gø, o cɑ́yi Jwøk bï gen kömɑ. Göög peli wïjí, kɑ ko wëggi thøø ki mër, e wïje tɑr yi wɑ́r. “De göggí wɑ̈ddi Bɑrdhilɑy jɑl Gilyɑd ki gïndøj, kɑ wiy ge nyi cyɑ̈ɑ̈m gen kì tɑwí, kipe gïndøj men-ɑ ɑ́göggi yɑn yi gen kì Mɑɑ̈nɑim, keny-ɑ ɑ́cyeed yɑn pɑ̈l yi Abcɑlöm ówöw. “Cimeì wɑ̈d Gerɑ̀ jɑl gøl Ben Yɑmïn kì kɑɑl Bekurïm, yɑ ɑ́gwɑdde ki gwɑddø me ledh, yɑ kedh-ɑ Mɑɑ̈nɑim, de ɑ́kedhi be kwɑjji yɑn kì kömi Nɑm Urdun, kɑ yɑ óköngø ki nyingi Jwøng-ɑ Ácwɑ̈ɑ̈j kinni, pɑ nɑ̈g yi yɑn. De ɑnɑn ko wiy, mɑ́ yï bɑ ngɑn wïjí pel, nɑ̈ɑ̈g o kedhe yij rörø wɑ́ri wïje cödhø yi remø.” Kɑ Debïd kedh-ɑ kun-ɑ di kweyye, ɑkonyii kì kɑɑl Debïd. Ábëëd ɑ́ rɑ̈dh kì Isrɑil ki runn pyɑ̈r ɑ́ngwen. Ájyɑ̈ɑ̈g ki runn ɑ́bïryew kì Kibrön, kɑ ojyɑ̈gø ki runn pyɑ̈r ɑ́dɑ̈g wïdɑ́dɑ̈g kì Yerusɑlem. Sølømøn ɑ ɑ́jɑ̈ggi ɑ́ rɑ̈dh kì bɑng Debïd wïye. Kɑ lɑwe cïbe piny kidøøj. Kɑ Adöniyɑ̀, ɑ meye cwøl ɑ́ Agith kedh-ɑ yï Bɑtcebɑ̀ meyi Sølømøn. Kɑ pyëj yi ngɑnɑni kinni, “Yï cyɑ̈dh-ɑ mër?” Alögge kinni, “Yɑ cyɑ̈dh-ɑ mër!” Kɑ okööbø kinni, “Dɑ gïjø me kwɑjji yi yɑn kì yïí.” Kɑ Bɑtcebɑ̀ okööbø kinni, “Kwøøb!” Kɑ okööbø kinni, “Ngɑ̈nyi yi yïn kinni rɑ̈ɑ̈dhø di bëëd ɑ́ miɑ, o bɑ yɑn ɑ ɑ́rømmi yi Isrɑil bëne, kinni yɑn ɑ óbëëdø yɑn ɑ́ rɑ̈dh. De lɑwø ɑ́yöd e kedh-ɑ yï ówɑ̈ɑ, mɑ́ møgɑni ɑ́kɑ̈ɑ̈l-ɑ yï Jwøng-ɑ Ácwɑ̈ɑ̈j. O ɑnɑn bɑ gïjø ɑ́kyel ɑ kwɑjjɑ kì yïí. Yɑ kwɑjj-ɑ yïn, ko mɑ̈ɑ̈n yɑn!” Apëjji Bɑtcebɑ̀ kinni, “Yï kwɑjj-ɑ ngø?” Alögge kinni, “Yɑ kwɑjj-ɑ yïn, kedhí yï Rɑ̈dh Sølømøn, o yɑ mëgge Abicɑg ɑ́ dhɑjø, nyɑn-ɑ ɑ́kɑ̈ɑ̈l kì Cunem. Yɑ ngɑ̈ny wøw kinni gïn-ɑ cwøl yi yïn kì yïe pɑ cugge mɑ̈ɑ̈n yïn!” Kɑ Bɑtcebɑ̀ okööbø kinni, “Døj, yɑ ókedhi be köbbi kwøbbí rɑ̈dh.” Codhe, kɑ Bɑtcebɑ̀ kedh-ɑ yï rɑ̈dh be köbbii kwøbbi Adöniyɑ̀. Kɑ rɑ̈dh dhwödh-ɑ be pɑɑrii, ɑmɑ̈dhe gøn. Kɑ Sølømøn pëgg-ɑ wïj kwøme. Kɑ meye muuj ki kwøm megø, kɑ kwømɑni cïb wïj kyëëj rɑ̈dh. Kɑ meyi rɑ̈dh okööbø kinni, “Dɑ nyɑ gïjø me thiinh me kwɑjjɑ kì yïí. Kɑ ko mɑ̈ɑ̈n yɑn.” Alöggi rɑ̈dh kinni, “Kwøb gïnɑni meyø, gïn-ɑ kwɑjji yi yïn pɑ mɑ̈ɑ̈nɑ yïn!” Kɑ meye okööbø kinni, “Wiy Abicɑg nyɑn-ɑ ɑ́kɑ̈ɑ̈l kì Cunem mëggi Adöniyɑ̀ ówöw ɑ́ dhɑjø.” Kɑ Sølømøn meye köbbe kinni, “Ede Adöniyɑ̀ ɑ kwɑ̈jjií Abicɑg kete? Ede ɑ pɑ kwɑ̈jjií lɑwø thyew, mɑ́ e bɑ ówɑ̈ɑ nyeldwøng? Ókwërø Abiyɑthɑr geki Yöɑb wɑ̈d Dheruyɑ̀ pɑ ying köme?” Kɑ Rɑ̈dh Sølømøn óköngø ki nyingi Jwøng-ɑ Ácwɑ̈ɑ̈j kinni, “Wiy yɑ ócɑy yi Jwøk keløg Adöniyɑ̀ pɑ thuw møgɑni! Jwøng-ɑ Ácwɑ̈ɑ̈j yɑ ɑ́cïbe wïj kwøøm wïyɑ Debïd, dhøge ɑ́mïdhe ceth kɑ gø mëgge yɑn. Adöniyɑ̀ onɑ̈gø dicyɑ̈ngtïn!” Kɑ Benɑiyɑ̀ wɑ̈d Yöyɑdɑ̀ ör yi Rɑ̈dh Sølømøn, ɑnɑ̈ge Adöniyɑ̀. Kɑ ókwërø Abiyɑthɑr köbbi yi rɑ̈dh kinni, “Kedhí Anɑthöth pɑɑrí! Yï di ceg kɑ nɑ̈gø, de yï pɑ nɑ̈g yi yɑn dicyɑ̈ngtïn, mɑ́ yï ɑ́kɑ̈ll-ɑ Sɑnduug Ciggi Jwøng-ɑ Ácwɑ̈ɑ̈j kì bøli wïyɑ Debïd, kɑ yï ongïnø ki orɑng-ɑ ɑ́rɑngi yi wïyɑ bëne.” Kɑ Abiyɑthɑr kɑ̈ɑ̈l wɑ̈g yi Sølømøn kì keny-ɑ ɑ́bëëde ɑ́ ókwëri Jwøng-ɑ Ácwɑ̈ɑ̈j. Kɑ møg-ɑ ɑ́kwøb yi Jwøng-ɑ Ácwɑ̈ɑ̈j kì ri gøl ókwërø Elì kì Cilø pɑ̈dh-ɑ kɑ̈jji gen. Keny-ɑ ɑ́lïngi møgɑni yi Yöɑb, ɑrenge yij Kemi Kwër, kɑ ómɑ̈gø kì ri tùngi këli lɑm. Yöɑb ɑ́ying-ɑ kömi Adöniyɑ̀ cɑgg ɑ́ kɑ̀ nuti kedh en bɑng Abcɑlöm kɑ̈ge dööng. Keny-ɑ ɑ́lïng Rɑ̈dh Sølømøn kinni Yöɑb rengi yij Kemi Jwøng-ɑ Ácwɑ̈ɑ̈j, o ying-ɑ buti këli lɑm, ɑöde ki dhɑnhø me pyëjii kinni, ɑ́ kipe ngø ɑ renge buti këli lɑm. Kɑ Yöɑb ólöggø kinni ɑ́rengi yï Jwøng-ɑ Ácwɑ̈ɑ̈j e bwøg-ɑ Sølømøn. Codhe kɑ Benɑiyɑ̀ ör be nɑ̈gi Yöɑb yi Sølømøn. Akedhi Benɑiyɑ̀ Kemi Jwøng-ɑ Ácwɑ̈ɑ̈j, kɑ Yöɑb köbbe kinni, “Rɑ̈dh okööbø kinni i bïí wɑ̈g!” Alöggi Yöɑb kinni, “Köbbí rɑ̈dh kinni, yɑ pɑ bï wɑ̈g! Yɑ thøw-ɑ keny!” Kɑ møg-ɑ ɑ́kwøb yi Yöɑb dwöggi rɑ̈dh yi Benɑiyɑ̀. Kɑ rɑ̈dh okööbø kinni, “Göggí Yöɑb gïn-ɑ ɑ́kwøb yi en ceth. Nɑ̈ɑ̈g kì kenyɑni, kɑ koony! O cyënni ji-ɑ ɑ́nɑ̈g yi Yöɑb bï gen wɑ̈g kì gølɑ geki gøl wïyɑ. Cyënne ɑ́dwøøg köme yi Jwøng-ɑ Ácwɑ̈ɑ̈j, mɑ́ e ɑ́nɑ̈g-ɑ jøgtir ɑ́ryew, jøg mø døj kibøle ɑ ɑ́nɑ̈g yi en e wïyɑ Debïd kwïj wøw, ɑ løg Abner wɑ̈d Ner pënyi liny Isrɑil, kí Amɑsɑ̀ wɑ̈d Yether pënyi liny Yeudiyɑ̀. Cyënni gen døøg-ɑ wïj Yöɑb geki gøle gïti ɑtheer. O gøl Debïd óthödhi yi Jwøng-ɑ Ácwɑ̈ɑ̈j ki døøjø gïti ɑtheer.” Codhe, ɑkedhi Benɑiyɑ̀ wɑ̈d Yöyɑdɑ̀ Kemi Jwøng-ɑ Ácwɑ̈ɑ̈j, kɑ Yöɑb nɑ̈ge. Kɑ Yöɑb koony pɑɑre kì myërri thwørø. Kɑ Benɑiyɑ̀ wɑ̈d Yöyɑdɑ̀ cïb kej Yöɑb ɑ́ pënyi liny yi rɑ̈dh. Kɑ ókwërø Dhɑdök cïbe kej Abiyɑthɑr. Kɑ rɑ̈dh oödø, ɑcwööl Cimeì, kɑ gø köbbe kinni, “Gëddí rií ki ød kì Yerusɑlem. Kɑ yï bëëd kì Yerusɑlem, yï ko pɑ̈nyi kedhi wɑ̈g kì yije. De cyɑ̈ng-ɑ ókedhí wɑ̈g kɑ dhøg Kidrön bɑ̈ɑ̈n yi yïn, ngɑ̈nyí wøw kinni yï ceg-ɑ thøø, o yï ócyɑ̈dhi ki cyënní.” Alöggi Cimeì kinni, “Døj wuö, gïn-ɑ ɑ́kwøb yi yïn ógwøg yi yɑn.” Kɑ Cimeì obëëdø kì Yerusɑlem ki keny me bɑ̈ɑ̈r. Kɑ kì ri thumi runn ɑ́dɑ̈g, ɑpɑ̈r bɑ̈nggi Cimeì ɑ́ryew, kɑ ge kedh-ɑ yï Akïc wɑ̈d Mɑɑkɑ̀ rɑ̈ɑ̈dh Gɑth. Kɑ olïngø kinni bɑ̈ngge ying-ɑ Gɑth. Kɑ pëgg-ɑ kömi ɑdere, ɑkedhe Gɑth yï Rɑ̈dh Akïc be yɑɑbi bɑ̈ngge. Gï ɑ́yode kɑ gï kɑ̈ɑ̈le kì Gɑth. Kɑ Sølømøn olïngø kinni i Cimeì kedhi Gɑth, kɑ ódwöögø. Kɑ rɑ̈dh oödø, ɑcwööl Cimeì. Kɑ Cimeì köbbe kinni, “Yï nuti köbbø yi yɑn kinni köngí ki nyingi Jwøng-ɑ Ácwɑ̈ɑ̈j kinni yï pɑ kedhi wɑ̈g kì Yerusɑlem. Kɑ yï köbbi yi yɑn kì bøli teedø kinni cyɑ̈ng-ɑ ókedhi wɑ̈g, ngɑ̈nyí wøw kinni yï ceg-ɑ thøø? Kɑ yï okööbø kinni ‘Døj, gïn-ɑ ɑ́kwøb yi yïn ógwøg yi yɑn.’ O gede møg-ɑ ɑ́kwöng yi yïn ki nyingi Jwøng-ɑ Ácwɑ̈ɑ̈j ɑ bɑɑny gen ki mïdhø geki cigg-ɑ ɑ́cegɑ yïn? Gïgrijjø møg-ɑ ɑ́göggí wïyɑ Debïd ngɑ̈nyi yi yïn kidøøj. Rɑjjɑni ɑ dwøøg kömí yi Jwøng-ɑ Ácwɑ̈ɑ̈j ɑnɑn. Yɑ ógyëdh yi en, o kwøøm Debïd ócungi kì keje gïti ɑtheer.” Codhe, ɑköbbi Benɑiyɑ̀ yi rɑ̈dh, ɑkedhe kɑ Cimeì nɑ̈ge. Kɑ lɑwø cïb piny kidøøj yi Sølømøn. Kɑ Sølømøn onywɑ̈gø ki kwøb geki rɑ̈ɑ̈dh Rïp, ɑnywøme nyɑɑr rɑ̈nhɑni, kɑ gø cïbe kɑɑl Debïd, o bëëde kì kenyɑni gïti keny-ɑ órum gøle ki gerø, geki ød Jwøng-ɑ Ácwɑ̈ɑ̈j, kí döri kɑɑl Yerusɑlem. Ji ɑ́bëëd ge nudd ge nyi ngɑ̈ɑ̈d ɑ kɑ̈jji mɑ̈ddø ki gëdhhì, mɑ́ ød Jwøng-ɑ Ácwɑ̈ɑ̈j ɑ́bëëd e bong gøn men-ɑ ógerø. Jwøng-ɑ Ácwɑ̈ɑ̈j ɑ́bëëd e mɑɑr yi Sølømøn. Kɑ obëëdø ki bëëdi wïye Debïd. De ɑ́bëëd e nudd e nyi ngɑ̈ɑ̈d ɑ kɑ̈jji mɑ̈ddø ki gëdhhì, kɑ nyii rɑ̈bø kì kɑ̈jjɑni ki bɑkur. Kɑ rɑ̈dh kedh-ɑ Gibeon tyelø ɑ́kyel, be ngɑl ki gëdhhì, mɑ́ kej mɑ̈ddø men-ɑ Gibeon ɑ dwøng. Sølømøn ɑ́wöni e nyii ngɑ̈dø kì kenyɑni ki gëdhhì mø gïïr cɑrø. Kɑ Jwøng-ɑ Ácwɑ̈ɑ̈j bï-ɑ yï Sølømøn kì yethi lɑ̈g kì Gibeon kì wɑ̈r. Kɑ köbbi yi Jwøk kinni, “Yï kwɑjj-ɑ ngø, o mëggɑ yïn?” Alöggi Sølømøn kinni, “Bɑ̈ngí, wïyɑ Debïd ɑ́mɑɑr yi yïn ki mendwøng, keny-ɑ ɑ́cyɑ̈dhe kì bølí ki pyëw ɑ́kyel, e mïdh-ɑ dyër, yije bong ɑ́dud. Mɑɑr-ɑ ɑ́mɑɑrií nuti lwënyø, mɑ́ wɑ̈de ɑ́røny yi yïn, kɑ cïb yi yïn wïj kwøme, ɑ jyɑ̈ge dicyɑ̈ngtïn. Anɑn Yïn ɑ Jwøgɑ, Jwøng-ɑ Ácwɑ̈ɑ̈j, yɑ ɑ́gwøg yi yïn ɑ́ rɑ̈dh, kɑ yɑ cïb yi yïn wïj kwøøm wïyɑ Debïd, de yɑ bɑ othinh, yɑ kwïj jyɑ̈gø. O yɑ ying-ɑ kelli jií, ji-ɑ ɑ́yieny yi yïn, gen ɑ ji-ɑ pɑ cuggi ki kwɑnø yi ngenyi gen, thödhí yɑn ki peli wïj men jɑɑgɑ jií, o gïndøj kí gïnrɑj nyi ngijɑ, ɑ́ men ɑ cuggi jɑɑgi jií, eni yɑy-ɑ dwøng ni men?” Kɑ pyëw Jwøng-ɑ Ácwɑ̈ɑ̈j ómïnø yi møg-ɑ ɑ́kwøb yi Sølømøn. Kɑ köbbi yi Jwøk kinni, “Mɑ́ yï ɑ́cwøl-ɑ peli wïj me jɑɑg ji kidøøj, o yï nuti cwøøl ngenyi runn kì kömi piny, kí kɑ̈r, kí thøwi tyëngmɑ̈ɑ̈nø, gïn-ɑ ɑ́cwøl yi yïn mëggɑ’ yïn, yï ɑ́thödhɑ ki peli wïj geki tïïdø ki kwøb, bong dhɑnhø me yïe ɑ́di peli wïnyɑni, wɑlɑ̀ bong dhɑnhø me yïe ódi peli wïny ni menɑni men-ɑ óbï kì bɑngí. Yï óthödhɑ ki gïg-ɑ nuti cwølø yi yïn thyew. Yï óthödhɑ ki kɑ̈r geki dhwɑ̈ng, bong rɑ̈dh men-ɑ óni yïn. Keløg yï ócyɑ̈dhi kì yuuɑ, yï mïdh-ɑ ciggɑ geki kwöngɑ, ni kɑ ɑ́bëëd wïyí Debïd, runní óløgɑ mø ngenyø kì kömi piny.” Acyëëw Sølømøn, kɑ gø yode kinni bɑ Jwøk ɑ kööbø kí en kì yethi lɑ̈g. Codhe ɑkedhe Yerusɑlem kɑ ócungø kì bøli Sɑnduug Cigg. Kɑ Jwøng-ɑ Ácwɑ̈ɑ̈j ngɑ̈dde ki gënh-ɑ nyi rɑ̈b bëne geki gënhi mër, codhe, kɑ jyɑ̈gge ryeje bënn. Cyɑ̈ng ɑ́kyel, tyëng-ɑ nyi niin ki köögi ɑ́ryew ɑ́bï bøli Rɑ̈dh Sølømøn. Kɑ ɑ́kyel kì kelli gen okööbø kinni, “Wuö, wø bëëd ɑ ød ɑ́kyel wøki ngɑɑn, kɑ yɑ pɑ̈dh-ɑ piny ki wɑ̈d, e nud kì kenyɑni. Alunyi ngɑnɑni ki pɑ̈dhi piny ki wɑ̈d kì ri dɑ̈ɑ̈g cyɑ̈ng, yɑ rum pɑ̈dhi piny. Wø keti wøn ɑ ɑ́ying ønɑni, bong dhɑnhø megø. Cyɑ̈ng ɑ́kyel kì wɑ̈r, ngɑnɑni ree ngyeel en kömi wɑ̈de, kɑ othøø. Adhwödhe kì wɑ̈rɑni, kɑ wɑ̈dɑ kwɑnye kì butɑ yɑ onenø, kɑ gø pyëële bute. Kɑ wɑ̈de wɑ̈n-ɑ thøø pyëële butɑ. Keny-ɑ ɑ́dhwödhɑ kì mwøl kinni o yɑ dhwødhɑ wɑ̈dɑ, ɑlidhɑ dhɑnhø e thøø. Kɑ yɑ nenn-ɑ ree kidøøj, ɑngijɑ en e pɑth ki wɑ̈dɑ.” De ngɑn-ɑ kyeelø ɑ́kööb kinni, “Pɑth! Dhɑnhø men-ɑ nëënø bɑ wɑ̈dɑ, o men-ɑ thøø bɑ wɑ̈dí!” Alöggi ngɑn-ɑ ɑ́kwöngi ki kwøb kinni, “Pɑth! Dhɑnhø men-ɑ thøø bɑ mií, o men-ɑ nëënø bɑ miɑ!” Codhe kɑ ge opëmø kì bøli rɑ̈dh. Codhe ɑkööb Rɑ̈dh Sølømøn kinni, “Wu ɑ́köngi ryeet, ngɑn okööbø ce dhɑnhø men-ɑ nëënø bɑ wɑ̈de, o dhɑnhø men-ɑ thøø bɑ wɑ̈d ngɑn-ɑ kyeelø.” Kɑ rɑ̈dh okööbø kinni, “Muuju yɑn ki pilø.” Kɑ pilø kɑ̈ɑ̈l bøli rɑ̈dh. Kɑ rɑ̈dh okööbø kinni, “Kɑgu dhɑnhø men-ɑ nëënø ɑ́ ɑ́ryew, kɑ budø mëggi ngɑɑn, kɑ bun-ɑ kyeelø mëggi ngɑɑn.” Kɑ ngɑn-ɑ wɑ̈de nëënø, yije okïïrø kipe wɑ̈de, kɑ rɑ̈dh köbbe kinni, “Wuö, mëggu dhɑnhø men-ɑ nëënø ngɑnɑni! Ko nɑ̈g!” De ngɑn-ɑ kyeelø ɑ́kwøb-ɑ kinni, “Ko di ngɑn mëggii kì kelli wøn. Kɑgu en!” Alöggi rɑ̈dh kinni, “Dhɑnhø ko nɑ̈g! Mëggi ngɑn-ɑ ɑ́kyer nɑ̈ge, en ɑ bɑ meye kidyër!” Kɑ yuu-ɑ ɑ́yieel gønyɑni yi rɑ̈dh lïngi yi Isrɑil bëne. Kɑ ji døøg-ɑ be böggi rɑ̈dh, mɑ́ gø ɑ́lidh gen kinni ɑ́thödhi yi Jwøk ki peli wïj men nenne gønyy. Isrɑil bëne ɑ́jɑɑg yi Rɑ̈dh Sølømøn. O jøg, bene gen ɑ ɑ́jyɑ̈ɑ̈g ki en: Adhɑriyɑ̀ wɑ̈d Dhɑdök, ɑ bɑ ókwërø. Elikörep geki Akiyɑ̀ wɑ̈ddi Cicɑ̀ bɑ sikriterr. Yöcɑpɑt wɑ̈d Akilud ɑ bɑ 'mïdhi wɑ̈j. Benɑiyɑ̀ wɑ̈d Yöyɑdɑ̀ ɑ bɑ pënyi liny. O Dhɑdök geki Abiyɑthɑr ɑ bɑ ókwër. Adhɑriyɑ̀ wɑ̈d Nɑthɑn, ɑ dwøng kì kelli jɑggi yethi myërr. Dhɑbud wɑ̈d Nɑthɑn ɑ bɑ ókwëri gøldwøng. Akicɑr ɑ bɑ jɑngi gøldwøng. Adönirɑm wɑ̈d Abdɑ̀ ɑ bɑ jɑngi tïj. Sølømøn ɑ́rööny ki jɑggi yethi myërr, mø kwɑnni gen bɑ pyɑ̈rø wïdɑ́ryew, gen ɑ jɑɑg myërri Isrɑil bënn. Gen ɑ nyi muuj gøldwøng ki gïgcɑmm, ge kɑ̈n-ɑ́ɑ̀ yethi myërr-ɑ jɑɑg yi gen, jɑl ɑ́kyel gøldwøng nyi kɑ̈lli yi en kɑ dwɑ̈y ɑ́kyel kì yij run. Nyingi jøgɑni gɑ pyɑ̈rø wïdɑ́ryew ek: Benkur, ɑ́jɑɑg-ɑ myërri kïtti Eprɑim. Bendeker, ɑ́jɑɑg-ɑ kɑ̈ddi Mɑkɑdh, kí Cɑɑlbïm, kí Bet Cemec, kí Elön kí Bet Aɑnɑn. Benkesed, ɑ́jɑɑg-ɑ kɑ̈ddi Aruböth, kí Sökö geki myërri Ëper bënn. Ben Abinɑdɑb, ɑ ɑ́nywøm Tɑpɑth nyɑɑr Sølømøn, ɑ́jɑɑg-ɑ myërri Dör bënn. Bɑnɑ̀ wɑ̈d Akilud, ɑ́jɑɑg-ɑ kɑ̈ddi Tɑɑnɑk, kí Megidø, geki myërri Betcɑn, ɑ buti kɑɑl Dhɑretɑn, kì ngɑ̈ɑ̈j kɑɑl Yidhriil kì wɑɑng wurlwɑl, cɑg kì myërri Betcɑn gïti Abel Mekölɑ̀, e pïd-ɑ løøg Yokmeɑm. Ben Geber, ɑ́jɑɑg-ɑ Rɑmöth Gilyɑd, geki myërri gøl Yɑir kì piny Gilyɑd, kí myërri Argöb bënn, kí Bɑcɑn geki kɑ̈dde, kɑ̈dd-ɑ ówenø ki dör, dhøggi gen ócyëgø kɑ thïggi ngyënyø dilɑl. Akinɑdɑb wɑ̈d Idö, ɑ́jɑɑg-ɑ myërri Mɑɑ̈nɑim. Akimɑɑdh, ɑ ɑ́nywøm Bɑsemɑth nyɑɑr Sølømøn, ɑ́jɑɑg-ɑ myërri Nɑptɑlì. Bɑnɑ̀ wɑ̈d Kucɑy, ɑ́jɑɑg-ɑ myërri Aceer geki kɑɑl Beɑlöth. Yöcɑpɑt wɑ̈d Pɑruɑ̀, ɑ́jɑɑg-ɑ myërri Isɑkɑr. Cimeì wɑ̈d Elɑ̀, ɑ́jɑɑg-ɑ myërri gøl Ben Yɑmïn. Geber wɑ̈d Urì, ɑ́jɑɑg-ɑ myërri Gilyɑd møg-ɑ ɑ́bëëd ge jɑɑg-ɑ yi Rɑ̈dh Sïön rɑ̈ɑ̈dh tyëng Amör geki Og rɑ̈ɑ̈dh Bɑcɑn. Ádɑ jɑngi dwøng ɑ́kyel me jɑɑg pödhø bëne. Kɑ kwɑnni ji ceg-ɑ ngënyø ki mendwøng, ni ɑyejø kì thɑ̈ngi nɑɑm omelø, kì Isrɑil geki Yeudiyɑ̀, kɑ dhɑnhø oyɑ̈ngø bëne de pyëwe ceg-ɑ medø. Lɑ̈gi Sølømøn ɑ́døngi ki mendwøng, kɑ pödhh-ɑ thɑ́ cigge bënn nyi kɑ̈n-ɑ yïe ki gwɑ̈j, cɑg kì kömi Nɑm Porɑt gïti Pelistiyɑ̀, gïti tøg Rïp, ge ɑ́cög ge ocudø ki gwɑ̈j kì kɑɑm-ɑ ɑ́nëën Sølømøn bëne. Bɑ gïgcɑmm mø ngenyø ɑ ɑ́bëëd ge nyii cɑmø cyɑ̈ng ɑ́kyel kì gøldwøng. Jɑmmɑni kì cyɑ̈ng ɑ́kyel bɑ: røthøl ɑ́lïp pyɑ̈rø mø møng-ɑ búr-ɑ ngedhø, kí ɑ́lïp pyɑ̈r ɑ́ryew mø møng-ɑ búr-ɑ nuti ti ngedhø. Wɑ̈dhh-ɑ pidh kì lwɑg gɑ pyɑ̈rø, kí wɑ̈dhh-ɑ cyɑ̈mø kì pɑ̈l gɑ pyɑ̈r ɑ́ryew, kí órömm miyø, reb ki lɑ̈yyi dwɑr geki gyen. Piny-ɑ kömi Nɑm Porɑt kì wɑɑng cyɑ̈ɑ̈ng böörø ɑ́jɑɑg-ɑ yi Sølømøn, cɑg kì Tipsɑ̀ kì kömi Nɑm Porɑt e gït-ɑ Gɑdhɑ̀ kì wɑɑng cyɑ̈ɑ̈ng böörø. Ábëëd e mër ki rɑ̈nhh-ɑ ɑ́jyɑ̈ɑ̈g kì pinyɑni. Ádɑ mër kì kɑɑm gen geki pödhh-ɑ cyɑ̈gi bënn. Bong gïjø mɑ ɑ́böggi yi Isrɑil bëne, ɑ́bëëd e kɑl yïe dɑ keje kí bɑ̈ggi oløge kì wɑ̈ye. Sølømøn yïe ɑ́dɑ ɑ́lïp pyɑ̈r ɑ́ngwen, gïg yethi gen nyi cyɑ̈ɑ̈m yi kyënyì møg-ɑ nyi pyejji yɑ̈the. Kí ɑ́lïp pyɑ̈rø wïdɑ́ryew, jøg rïngi ki kyënyì. Jɑggi yethi myërr ɑ́bëëd ge nyi kɑ̈n-ɑ gøldwøng ki gïgcɑmm, men kì dwɑ̈ye men kì dwɑ̈ye, ɑ́bëëd e bong gïjø me nyi jɑ̈ddi kì gøldwøng. Jɑng-ɑ kɑ̈ddi ki gïgcɑmm, en ɑ nyi kɑ̈ni ki ceir geki lum men-ɑ cɑm yi kyënyì kì kɑ̈jji gen. Kɑ Sølømøn thödhi yi Jwøk ki peli wïj me dwøng, kí tïïdø’ kwøb, kí dïdø me dwøng me bong gïn pɑ̈ɑ̈rii. Sølømøn ɑ́bëëd wïje pel ki mendwøng kibøli jøg wɑ̈thi gen pel møg-ɑ ɑ́ying pödhh-ɑ wɑɑng cyɑ̈ɑ̈ng mwøl geki Rïp. Wïje pel kibøli dhɑnhø bëne, wïje pel kibøli Ethɑn jɑl Edhrɑ̀, kí wɑ̈ddi Mɑköl, kí Ëmɑn, kí Kɑlköl, kí Dɑrdɑ̀. Ákööb ki gɑ́j ɑ́lïp ɑ́dɑ̈g. Kɑ ocyɑ̈gø ki wör ɑ́lïp ɑ́kyel kí ɑ́bïj. Kɑ okööbø kì ri yenh, cɑg kì ri yɑdh sɑndɑl men-ɑ Lubnɑn gïti ri ɑ́buu men-ɑ nyi twïy kì ri dörø, kɑ okööbø kì ri lɑ̈yy, kí winy, kí gïg-ɑ mulli, kí rij. Kwøbbi peli wïje ɑ́lïngi yi rɑ̈nhi kömi piny, kɑ ge oödø ki ji møg kedhi be lïngi kwøbbi peli wïje. Kɑ Kirɑm rɑ̈ɑ̈dh Suur öd-ɑ yï Sølømøn ki cwɑ̈gg keny-ɑ ɑ́lïnge kinni i Sølømøn órøøny kej wïye, Rɑ̈dh Debïd. Kirɑm ɑ́wöni gɑ mɑ̈dhh geki Debïd. Kɑ Sølømøn ólunyø ör ki wöödø kinni, “Ngɑ̈nyi yi yïn kinni Debïd wïyɑ ɑ́dhɑ̈li gyer ki ød Jwøge, Jwøng-ɑ Ácwɑ̈ɑ̈j, mɑ́ e ɑ́bëëd e ónyïɑ̈ggø ki liny geki pödhh-ɑ bɑdhhe bënn, gïti kɑ ɑ́konyii yi Jwøng-ɑ Ácwɑ̈ɑ̈j kɑ gï tyɑme. De ɑnɑn yɑ ɑ́thödhi yi Jwøgɑ, Jwøng-ɑ Ácwɑ̈ɑ̈j ki mër, wøki pödhh-ɑ bɑdhhi pödhɑ bënn, bong mɑ̈ɑ̈nø o bong rɑj. Yɑ dwɑdd-ɑ gëddi Jwøgɑ, Jwøng-ɑ Ácwɑ̈ɑ̈j ki ød, ni møg-ɑ ɑ́köbbe wïyɑ Debïd kinni, ‘Wɑ̈dí men-ɑ ócïbɑ kejí kì wïj kwømí, en ɑ ógëddi yɑn ki ød.’ Anɑn kööb, o yɑ nguddi ki yenh sɑndɑl kì Lubnɑn, o bɑ̈nggɑ ógöög gen kyeel ki bɑ̈nggí. Köggi bɑ̈nggí ómëggɑ gen. Ge ómëggɑ gïn-ɑ kwøb yi yïn, mɑ́ e ngɑ̈nyi yi yïn kinni bong tyëng pödhɑ møg ngɑ̈ny ngøl ki yenh ni tyëng Sïdön.” Kɑ Kirɑm pyëwe ómïnø ki mendwøng keny-ɑ ɑ́lïnge kwøbbi Sølømøn, ɑkööbe kinni, “Pwøj wɑ Jwøng-ɑ Ácwɑ̈ɑ̈j, ɑ ɑ́thödhi Debïd ki wɑ̈d me wïje pel men bëëdø kì wïj kwøme dicyɑ̈ngtïn e jɑɑg-ɑ dhɑnh-ɑ ngenyø ni men.” Codhe, kɑ Kirɑm öd-ɑ yï Sølømøn kinni, “Møg-ɑ ɑ́ör yi yïn ɑ́lïngɑ. Gïg-ɑ dwɑddi yi yïn bënn ógwøg yi yɑn, yï ónguddi ki yenh sɑndɑl kí ɑmedh. Ge ókɑ̈l yi bɑ̈nggɑ kì Lubnɑn, gï kïdhi ge’ kömi Nɑɑm Omeli Tɑr. Ge ógwøg gɑ óthyɑgg kì nɑm. O ge ómɑɑg keny-ɑ ókwøb yi yïn. O gï nyi pɑ̈d gen kì kunɑni, o ge yëg yi bɑ̈nggí. O yï nyi lunyí thyew ki thödhi jøgɑ ki gïncɑm.” Codhe, kɑ Sølømøn nyi muuj yi Kirɑm ki yenh sɑndɑl kí ɑmedh møg-ɑ dwɑdde, o Sølømøn nyi nënge Kirɑm ki ɑ́lïp ɑ́ryew tøn mø gemè, kí møøw dhetun ɑ́ røthøl ɑ́lïp miy ɑ́bïdɑ̈g, gɑ møg cɑm yi jøge kì yij runï kí runï. Kɑ Sølømøn thödhi yi Jwøng-ɑ Ácwɑ̈ɑ̈j ki peli wïj ni kɑ ɑ́köbbe gøn. Kɑ Kirɑm ocögø ge mër ki Sølømøn, kɑɑm gen ɑ́dɑ lwöbø. Kɑ Rɑ̈dh Sølømøn ókɑ̈bbø ki jøtïj kì yij Isrɑil bëne, kwɑnni gen bɑ ɑ́lïp pyɑ̈r ɑ́dɑ̈g. Kɑ Adönirɑm kwɑnye ɑ́ jɑngi tïj. Kɑ ge pɑ̈nge gɑ ɑkudd ɑ́dɑ̈g, ɑkud ɑ́kyel yije dɑ ji ɑ́lïp pyɑ̈rø. O ɑkud ɑ́kyel nyi kedhe be gwøg kì Lubnɑn ki dwɑ̈y ɑ́kyel, o nyi bëëde kì pɑc ki dwɑ̈tt ɑ́ryew. Sølømøn yïe ɑ́dɑ ji ɑ́lïp pyɑ̈r ɑ́bïdɑ̈g møg twïgø ki kïttì, kí ji ɑ́lïp pyɑ̈r ɑ́bïryew møg yëëg kïttɑni kɑɑl. Reb kí jøg-ɑ kwølli jøgwøg, kwɑnni gen bɑ ɑ́lïp ɑ́dɑ̈g kí miy ɑ́dɑ̈g. Kɑ rɑ̈dh okööbø kinni i twïg gen ki ópɑddi kïttì mø døngø, ge tweg ge lïw, gɑ møg cïb tyeli ød. Kɑ ópɑddi kïttɑni tweg yi bödhhi Sølømøn geki bödhhi Kirɑm, kí jø Gibɑl. Codhe, kɑ kïttì geki yenh-ɑ geer Kengø órumø ki pyëlø. Kɑ Rɑ̈dh Sølømøn ócɑ̈gø ki gëddi Jwøng-ɑ Ácwɑ̈ɑ̈j ki ød, kì ngween runne kì yij lɑwø, kì Dhïp (ɑ løg ryeew dwɑ̈tti Yeud.) Kì bøli kenyɑni tyëng Isrɑil yï gen ɑ́dɑ runn miy ɑ́ngwen kí pyɑ̈r ɑ́bïdɑ̈g, kër-ɑ ɑ́bëën gen wɑ̈g kì Rïp. Øn-ɑ ɑ́gërri Jwøng-ɑ Ácwɑ̈ɑ̈j yi Rɑ̈dh Sølømøn bɑ ɑ́bɑ̈rø, bɑ̈re bɑ mïtïr pyɑ̈r ɑ́ryew wïdɑ́bïryew, o lɑ̈je bɑ mïtïr ɑ́bïngwen, o döre bɑ mïtïr pyɑ̈rø wïdɑ́dɑ̈g kí sentimïtïr pyɑ̈r ɑ́bïj. Øn-ɑ yïëbbi yij Kengø lɑ̈je e kɑ̈ɑ̈l-ɑ ri Kengø, bɑ mïtïr ɑ́ngwen kí sentimïtïr pyɑ̈r ɑ́bïj e reng-ɑ piny, o lɑ̈je bɑ mïtïr ɑ́bïngwen, e rwöm kɑ lɑ̈ji Kengø. Kɑ Kengø göggi ki ɑwɑjj møg-ɑ órïwwø ki dëddi. Sølømøn ɑ́gëëd thyew ki ud møg-ɑ ómyeer mɑl, ge wen-ɑ Kengø ge bødh-ɑ ri dörø kì yiny-ɑ wɑ̈g, bɑ̈ri dörri uddɑni bënn pɑ̈r, ge bɑ mïtïr ɑ́ryew kí sentimïtïr pyɑ̈r ɑ́ryew. Øn-ɑ piny lɑ̈je bɑ mïtïr ɑ́ryew kí sentimïtïr pyɑ̈r ɑ́ryew, o øn-ɑ dïdyër lɑ̈je bɑ mïtïr ɑ́ryew kí sentimïtïr pyɑ̈r ɑ́bïryew, o øn-ɑ mɑl lɑ̈je bɑ mïtïr ɑ́dɑ̈g kí sentimïtïr pyɑ̈rø. Uddɑni ócïb-ɑ ri nyïɑ̈rø me cöddi wɑ̈g kì ri döri Kengø de pɑth ki ɑmin kì ri dörø. Kïtt-ɑ ɑ́geer Kengø ɑ́tweg-ɑ pɑ̈l keny-ɑ ɑ́kwɑɑny gen ceth kì ri kït. Ge ɑ́kɑ̈ɑ̈l ge cïb-ɑ kɑ̈jji gen, bene ɑ bɑnge ɑ́bëëd e bong ywøøg ɑ́bɑny, wɑlɑ̀ dørø, wɑlɑ̀ gïi gwøg megø mɑ ɑ́lïngi keny-ɑ ɑ́geer Kengø. Dhøng-ɑ töngi øn-ɑ piny ying-ɑ wïj kyëëj Kengø, kenyɑni ɑ di pɑ̈ltyel møg-ɑ yedhi yij øn-ɑ dïdyër geki øn-ɑ mɑl. Codhe kɑ Kengø órumø ki gerø yi Sølømøn. Kɑ tɑnø gënge ki pɑ̈mmì geki mënhhi yɑdh sɑndɑl. Dörr-ɑ nyingi ngëddi Kengø ge ómyerø gɑ dör ɑ́dɑ̈g, bɑ̈ri dörø ɑ́kyel bɑ mïtïr ɑ́ryew kí sentimïtïr pyɑ̈r ɑ́ryew, o ge ógerø ge ying-ɑ yiny-ɑ wɑ̈g kì ri döri Kengø, o ge ómɑɑg ree kɑ pɑ̈mmi yɑdh sɑndɑl. Kɑ Sølømøn köbbi yi Jwøng-ɑ Ácwɑ̈ɑ̈j kinni, “Kí øn-ɑ geer yïn èn, keløg yï ócög kwöngɑ ogwøgø yi yïn, kɑ gïn-ɑ kwøbɑ nyi gwøg yi yïn, kɑ ciggɑ mïdhi yi yïn bënn, møg-ɑ ɑ́köbbɑ Debïd wïyí kiperí ógwøg yi yɑn. Yɑ óbëëdø kì kelli tyëng Isrɑil. O jiɑ, tyëng Isrɑil pɑ wiyɑ piny kinni tek.” Codhe kɑ Kengø órumø ki gerø yi Sølømøn. Kɑ döri Kengø geki tɑne tɑg kì yiny-ɑ ød ki pɑ̈mmi yɑdh sɑndɑl, kɑ piny pedh ki pɑ̈mmi yɑdh ɑmedh. Kɑ tɑtyeel gëddi ki gëng, Kej Kwërdwøng, bɑ̈re bɑ mïtïr ɑ́bïngwen, ógerø kɑ pɑ̈mmi yɑdh sɑndɑl cɑ̈gi kì piny gïti ri tɑnø. O yij ød men-ɑ ɑ́döng, kì bøli Kej Kwërdwøng, bɑ̈re bɑ mïtïr pyɑ̈rø wïdɑ́bïdɑ̈g. Pɑ̈mmi yɑdh sɑndɑl møg-ɑ ótɑɑg dörø bɑ ɑtweg ki ngïjji kenø mø ri gen di okøgg. Dörø bëne bɑ ɑtɑg ki pɑ̈mmi yɑdh sɑndɑl, kït pɑ nënni. Kej Sɑnduug Ciggi Jwøng-ɑ Ácwɑ̈ɑ̈j ɑ́ger e bɑ nyɑ ød me thiinh kì tɑtyeel. Gëngɑni bɑ̈re bɑ mïtïr ɑ́bïngwen, o lɑ̈je bɑ mïtïr ɑ́bïngwen, o döre bɑ mïtïr ɑ́bïngwen. Kɑ yiny-ɑ ød bëne mwøn ki dhɑm dhïw. Këli lɑm men-ɑ Kej Kwërdwøng bɑ ɑtɑg ki yɑdh sɑndɑl. Kɑ Kengø mwøn yi Sølømøn ki dhɑb kì yiny-ɑ ød. Kɑ thïgi gëng ree gödde ki ɑ́cwecwelli dhɑb, thïngɑni bɑ ɑmwøn ki dhɑb thyew. Kɑ ød bëne tyëge ki mwønø ki dhɑb. Kɑ këli lɑm men-ɑ Kej Kwërdwøng mwøn bëne ki dhɑb. Codhe kɑ ød óthumø bëne ki mwønø ki dhɑb. Kɑ ngïjji kerobb ɑ́ryew tyeng gɑ yɑdh dhetun, bɑ̈ri ɑ́kyel bɑ mïtïr ɑ́ngwen kí sentimïtïr pyɑ̈r ɑ́ngwen. Kɑ ge cïb Kej Kwërdwøng. Kerobbɑni ryeet ɑ́cïb Kej Kwërdwøng men ying-ɑ buti men, obëri kerob ɑ́kyel nywɑll-ɑ dörø, o obër-ɑ kyeelø nywɑll-ɑ tøg obëri kerom-ɑ kyeelø. O kerom-ɑ kyeelø cungi e nɑ menɑni, obëre ɑ́kyel nywɑll-ɑ dörø kì tuung, o obër-ɑ kyeelø nywɑll-ɑ tøg obëri kerom-ɑ kyeelø. Kɑ kerobbɑni ryeet mwøn ki dhɑb. Kɑ dörø bëne kì yiny-ɑ ød kí yiny-ɑ wɑ̈g ngweg ki ngïjji kerobb geki yenh benø kí okøgg. Kɑ yij ød kì piny mwøn ki dhɑb bëne. Kɑ dhø Kej Kwërdwøng kïdhi ki thïgø ɑ́buddiryew, me bɑ yɑdh dhetun me bɑ ɑtɑg, ɑ́ ɑdöl kì mɑl. Buddi thïgi gëng ryeet bɑ ɑngweg ki ngïjji kerobb, geki yenh benø kí okøgg. Kɑ thïngɑni mwøn ki dhɑb geki ngïjji kerobb møg-ɑ ree, kí yɑdh benø kí okøgg. Kɑ rïwi thïgi dhø Kengø gwøg ɑ́ yɑdh dhetun, ɑ́ ɑ́bɑ̈rø. Kɑ kïdhi ki thïgø ɑ́buddiryew mɑ yɑdh ɑmedh. Kɑ kömi thïngɑni ngweg ki ngïjji kerobb, kí yenh benø kí okøgg. Kɑ ge mwøn ki dhɑb. Kɑ bøli Kengø gëddi ki ódɑ̈rø, ɑ́ ɑger ki löjji yenh sɑndɑl geki kïttì, e bɑ ɑgwel, yɑdh ɑ́kyel kí kïttì ɑ́dɑ̈g ge myeer-ɑ mɑl. Tyeli Kengø ɑ́cïb kì ngween runni Rɑ̈dh Sølømøn kì yij lɑwø, kì Dhïp (ɑ løg ryeew dwɑ̈tti Yeud). Kɑ Kengø órumø ki gerø ni kɑ ɑ́dwɑddii ceth kì pyɑ̈rø wïdɑ́kyeel runni Rɑ̈dh Sølømøn kì yij lɑwø kì dwɑ̈y Bul (ɑ løg bïdɑ̈ɑ̈g dwɑ̈tti Yeud). Sølømøn ɑ́tyëg-ɑ runn ɑ́bïryew e ogëdø ki Kengø. Sølømøn ree ɑ́gëdde thyew ki gøldwøng mɑ ɑ́tyëg runn pyɑ̈rø wïdɑ́dɑ̈g e ogerø. Kɑ ɑwɑjj cïb gɑ lwøbb ɑ́dɑ̈g ge rwööm. Dhøggi ud geki ɑwɑjj bɑ óbɑrr bënn. Gølɑni yije ɑ́dɑ ød me lɑɑj, bɑ̈re bɑ mïtïr pyɑ̈r ɑ́ryew wïdɑ́ryew, o lɑ̈je bɑ mïtïr pyɑ̈rø wïdɑ́dɑ̈g kí sentimïtïr pyɑ̈r ɑ́bïj. Ønɑni wïje dɑ tɑnø me mïdhi yi bɑ̈rrì. Sølømøn ɑ́gëëd thyew ki ød kwøm, ɑ cwøl ɑ́ ød gøny. Kenyɑni ɑ nyi lidhe gønyy, ønɑni bɑ ɑtɑg bëne ki pɑ̈mmi yɑdh sɑndɑl, cɑg kì piny gïti ri tɑnø. Udd-ɑ bëëd yi Sølømøn ying-ɑ ngɑ̈ɑ̈j ød gøny, ge ógerø ge pɑ̈r ki udd-ɑ kyeelø. Sølømøn cyëge nyɑɑr rɑ̈ɑ̈dh Rïp ɑ́gëdde ki ød me ni ønɑni. Uddɑni geki ød gøny, bɑ ɑger ki ópɑddi kïttì, cɑg kì tyelli gen piny gïti mɑl. Ópɑddi kïttɑni bɑ ɑtweg kidøøj, ge lïw. Tyelli uddɑni bɑ ɑcïb ki ópɑddi kïttì mø døngø mø óngɑ̈ɑ̈ny yienyø, møøgø bɑ̈ri gen bɑ mïtïr ɑ́dɑ̈g kí sentimïtïr pyɑ̈r ɑ́bïj, møøgø bɑ̈ri gen bɑ mïtïr ɑ́ngwen. Kömi ópɑddi kïttɑni ɑ ɑ́cïb ópɑddi kïttì møg-ɑ kedhi mɑl ge lïw geki bɑ̈rri yɑdh sɑndɑl. Øn-ɑ dwøng kì gøldwøng geki øn-ɑ dwøng kì Kengø, ki udd-ɑ tøggi Kengø, ge ógëddø ki kɑ̈llì. Dörrɑni ógerø kɑ lwøbbi ópɑddi kïttì ɑ́dɑ̈g kí lwøøb pɑ̈mmi yɑdh sɑndɑl ɑ́kyel. Kɑ Rɑ̈dh Sølømøn oödø, ɑkɑ̈ɑ̈l jɑl me cwøl ɑ́ Kurɑm kì Suur. Meye bɑ nyɑɑr gøl Nɑptɑlì, o wïye bɑ jɑl Suur, o ɑ́bëëd ɑ́ bødhi køny ki ngyënyø dilɑl, o keny-ɑ ɑ́thøw wïye, ɑdönge e gwøg-ɑ gwøngɑni. Kɑ ceg-ɑ wɑ̈ɑ̈dhø ki gwøngɑni, wïje pel, o cinge døøj. Awɑ̈nhe bøli Rɑ̈dh Sølømøn kɑ ócɑ̈gø gwøg ki jɑmm-ɑ gwøg ki dilɑl bënn. Kɑ Kurɑm okunyø ki löjji dilɑl ɑ́ryew, bɑ̈ri ɑ́kyel bɑ mïtïr ɑ́bïdɑ̈g, o dööle bɑ mïtïr ɑ́bïj kí sentimïtïr pyɑ̈r ɑ́dɑ̈g. O löny-ɑ kyeelø pɑ̈r ki en, kɑ gï cïbe dhø Kengø. Kɑ Kurɑm ogöögø ki ɑtɑ̈nyyi dilɑl ɑ́ryew møg cïb wɑ̈thi löjjɑni. Bɑ̈ri ɑtɑ̈ny ɑ́kyel bɑ mïtïr ɑ́ryew kí sentimïtïr pyɑ̈r ɑ́ryew. Kɑ wɑ̈thi gen cwɑ̈jji ki bøy dilɑl. Kí gïg mø ni nywøli yɑdh romɑn gɑ lwøbb ɑ́ryew ge bɑ ɑkøny gɑ ngyënyø dilɑl, ge ówen wɑ̈thi tøggi ɑtɑ̈nyyɑni ryeet. Atɑ̈nyy-ɑ wɑ̈thi löjjɑni ɑ́gwøg ge nɑ okøggi sosɑn, bɑ̈ri ɑ́kyel bɑ mïtïr ɑ́kyel kí sentimïtïr pyɑ̈r ɑ́bïdɑ̈g, o men-ɑ kyeelø nɑ en. Tøggi ɑtɑ̈nyy-ɑ wɑ̈thi löjj, kì kömi bøøy dilɑl, ówenø ki lwøbbi nywøli yɑdh romɑn mø dilɑl møg ryërri gɑ miy ɑ́ryew. Kɑ löjjɑni cwöödh piny kì bøli Kengø, löny-ɑ tuung cɑɑm ɑ́cwöödh piny kɑ cɑg ɑ́ Yɑkin. Kɑ löny-ɑ tuung kyëj cwöödh piny kɑ cɑg ɑ́ Boɑdh. Atɑ̈nyyi dilɑl møg-ɑ pɑ̈r ki okøggi sosɑn ɑ́cïb wɑ̈thi löjjɑni ryeet. Codhe kɑ löjj órumø ki gwøgø. Kɑ Kurɑm ogöögø ki luy me bɑ ɑ́dulø ki dilɑl, rïwi dööle bɑ mïtïr ɑ́ngwen kí sentimïtïr pyɑ̈r ɑ́ngwen, o yije ludhø ki mïtïr ɑ́ryew kí sentimïtïr pyɑ̈r ɑ́ryew, o bɑ̈ri dööle bɑ mïtïr pyɑ̈rø wïdɑ́dɑ̈g kí sentimïtïr pyɑ̈r ɑ́ryew. Tøggi tyeli luyɑni dɑ ngïji kenø, mø bɑ ɑkøny ge ótɑɑg ri tøggi luyɑni gɑ lwøbb ɑ́ryew. Luyɑni ócïb-ɑ kömi wɑ̈dhh pyɑ̈rø wïdɑ́ryew, ɑ́dɑ̈g nenn-ɑ wɑɑng wuudø, ɑ́dɑ̈g nenn-ɑ wɑɑng cyɑ̈ɑ̈ng böörø, ɑ́dɑ̈g nenn-ɑ wɑɑng wurlwɑl, o ɑ́dɑ̈g nenn-ɑ wɑɑng cyɑ̈ɑ̈ng mwøl, e ngɑ̈thi gen tuum gen. Tøggi luyɑni bɑ dhïl ki mïlimïtïr pyɑ̈r ɑ́bïryew wïdɑ́bïj, tøgge nɑ tøggi lwøl, ri gen tɑ̈ɑ̈ny gen ni okøggi sosɑn. Luyɑni yije rømm-ɑ yi røthøl ɑ́lïp pyɑ̈r ɑ́bïdɑ̈g. Kɑ Kurɑm ogöögø ki yɑ̈thi dilɑl gɑ pyɑ̈rø, ɑ́kyel bɑ̈re bɑ mïtïr ɑ́kyel kí sentimïtïr pyɑ̈r ɑ́bïdɑ̈g, o lɑ̈je bɑ mïtïr ɑ́kyel kí sentimïtïr pyɑ̈r ɑ́bïdɑ̈g, o döre bɑ mïtïr ɑ́kyel kí sentimïtïr pyɑ̈r ɑ́dɑ̈g. Thɑ̈ngge bɑ óbɑrr ge ómɑɑg-ɑ ri mɑ̈ggì. Mɑ̈ggɑni ri gen ótwïggø ki ngïjji ngurrì, kí wɑ̈dhh, kí kerobb, o rïww-ɑ mɑl ri gen ótwïggø thyew ki ngurrì kí wɑ̈dhh, kí kerobb, o rïww-ɑ thɑ́ tyelli gen ógöggø ki ngïjji okøgg. Yɑ̈y ree dɑ tyelli dilɑl ɑ́ngwen mø rïwwi gen bɑ dilɑl. O ri tyellɑni dɑ mɑ̈ggì kì gødde gɑ ɑ́ngwen kì thɑ yɑ̈y, mɑ̈ggɑni bɑ ɑkøny, o ge ógöggø ki ngïjji okøgg. Dɑ óthɑgø kì yij yɑ̈yɑni, me tøgge kì mɑl di pij mø bɑ sentimïtïr pyɑ̈r ɑ́ngwen wïdɑ́bïj, kí møøgø mø bɑ sentimïtïr pyɑ̈rø wïdɑ́bïdɑ̈g kì thɑre piny. Óthɑngɑni wïje mɑl bɑ ɑ́dulø kí tyele piny. Köme ótwïggø ki ngïjjì ɑ́ ɑwen bëne. Tyel ying-ɑ piny kì ri rïwwì mø ómɑɑg ri yɑ̈y kì thɑw-ɑ piny. Bɑ̈ri tyelø bɑ sentimïtïr pyɑ̈r ɑ́bïkyel wïdɑ́bïkyel. Tyellɑni bɑ ɑgwøg ge pɑ̈r ki tyelli yɑ̈th-ɑ nyi pyejji yi kyënyì. De tyellɑni geki winni dölli gen, kí rïwwi gen, kí ɑwölli tyelli gen, bɑ ɑkøny gɑ dilɑl bënn. Dɑ mɑ̈ggì kì gøddi yɑ̈y kì piny gɑ ɑ́ngwen ge ómɑɑg ri rïwwi tyel. Yij yɑ̈yɑni dɑ óthɑgø me ludhø ki sentimïtïr pyɑ̈r ɑ́ryew wïdɑ́ryew. O bɑ ɑ́dulø e ókøny-ɑ ri yɑ̈y. Kɑ thɑ̈nggi yɑ̈y tweg ki ngïjji kerobb, kí ngurrì, ki yenh benø. Bong nyɑ keny me döngø e nuti twegø kì ree. Yɑ̈thɑni ɑ́gwøg-ɑ nøw gɑ pyɑ̈rø bënn. Kɑ Kurɑm ogöögø thyew ki ɑ́tɑ̈yyì pyɑ̈rø gɑ møg cïb yethi yɑ̈thɑni bënn gɑ pyɑ̈rø, ɑ́kyel kì yij men, ɑ́kyel kì yij men. Yij ɑ́tɑy ɑ́kyel røm-ɑ yi pï gɑ røthøl ɑ́lïp kí miy ɑ́bïkyel. Rïwi dööli ɑ́tɑy bɑ mïtïr ɑ́kyel kí sentimïtïr pyɑ̈r ɑ́bïdɑ̈g. Kɑ yɑ̈ɑ̈th ɑ́bïj cïb tuung kyëëj Kengø, kɑ ɑ́bïj-ɑ kyeelø cïb tuung cɑɑm Kengø. Kɑ luy cïb tuung kyëëj Kengø kì kɑɑm wɑɑng wurlwɑl geki wɑɑng cyɑ̈ɑ̈ng mwøl. Jɑmmi Kengi Jwøng-ɑ Ácwɑ̈ɑ̈j bënn ɑ́gwøg-ɑ yethi lɑ̈b kì yij Töör Urdun, kì kɑɑm Suköth geki Dhɑretɑn. Dilɑl men-ɑ ɑ́køny nuti rømø yi Sølømøn o pege di yod, mɑ́ e ngenyø ki mendwøng. Pege ɑ́dhɑ̈li yodø. Dɑ jɑmmi dhɑb mɑ ɑ́gwøg yi Sølømøn kiper Kengø, ge bɑ: këli lɑm, kí tɑrɑbedhɑ̀ men-ɑ nyi cïb byëlø, kí teggi lɑ̈mbɑ̈ɑ̈ gɑ pyɑ̈rø kì bøli Kej Kwërdwøng, ɑ́bïj kì tuung kyëj, kí ɑ́bïj kì tuung cɑɑm. Kí okøgg, kí lɑ̈mbɑ̈ɑ̈, kí dikɑ̈bbì, kí óthɑ̈ggì, kí gïg nyi nɑ̈ɑ̈g mɑc, kí tɑ̈mmì, kí óthɑ̈nggi bɑkur, kí ópɑ̈nni cug, kí mɑ̈ggi thïgi Kej Kwërdwøng geki thïggi Kengø. Gïgɑni bënn bɑ dhɑb. Keny-ɑ ɑ́rum Sølømøn ki gwøgi Kengø geki jɑmme, kɑ gïg-ɑ ɑ́thyëyi Jwøng-ɑ Ácwɑ̈ɑ̈j yi Debïd wïye, cïbe yethi kɑ̈nni Kengø, gïgɑni bɑ ɑ́tegø kí dhɑb, kí gïg-ɑ kyeelø. Kɑ jøgdøngi Isrɑil, kí jɑggi wɑ̈thi kɑ̈llì geki jɑggi yethi myërr cwööl yi Rɑ̈dh Sølømøn, o ge kɑ̈ɑ̈l gen Sɑnduug Ciggi Jwøng-ɑ Ácwɑ̈ɑ̈j kì kɑɑl Debïd, ɑ løg Dhɑyøn, o kïdhi yij Kengø. Kɑ ge wɑ̈dh-ɑ bøli Rɑ̈dh Sølømøn bënn kì bïryeew dwɑ̈tt, kì cyɑ̈nggi Kwëër Akɑnnì. Keny-ɑ ɑ́wɑ̈nhi jøgdøngi Isrɑil bënn, ɑkwɑɑny Sɑnduug Cigg yi ókwër, kɑ byel yi gen. Codhe kɑ Kemi Kwër geki jɑmmi kwër møg-ɑ kyeelø kɑ̈ɑ̈l yi ókwër geki Kwɑrri Leebì, kɑ gï kïdhi gen yij Kengø. Kɑ Rɑ̈dh Sølømøn geki tyëng Isrɑil møg-ɑ nud kì kenyɑni, ongɑ̈dø kì bøli Sɑnduug Cigg ki dyëg kí dhög mø gïïr cɑrø, mø pɑ cuggi kwɑnø yi ngenyi gen. Codhe, kɑ Sɑnduug Cigg kïdhi keje yi ókwër, gø ɑ́kïdhi gen yij gëng, Kej Kwërdwøng, thɑ̈thi obërri kerobb. Mɑ́ kerobb ɑ́bëëd obërri gen ópeedh kömi keny-ɑ ɑ́cïb Sɑnduug Cigg, o Sɑnduug Cigg geki lødhe møg-ɑ nyi kɑ̈llii, gëng yi gen kì kuni mɑl. Lødhɑni cöddi wɑ̈g, ge ócuggø lidhø yi ngɑn cungi kì yij Kengø e rwöm ki dhø Kej Kwërdwøng, de ge pɑ nënni kì wɑ̈g. (Ge nudd ge nud kì kenyɑni gïti dicyɑ̈ngtïn.) Bɑ ópɑ̈nni kït ryeet ɑ yij Sɑnduug Cigg, ópɑ̈nn-ɑ ɑ́cïb yije yi Mosɑ̀ kì Kïti Sinɑy, keny-ɑ ɑ́lwööb Jwøng-ɑ Ácwɑ̈ɑ̈j geki tyëng Isrɑil, keny-ɑ ɑ́kɑ̈ɑ̈le gïn wɑ̈g kì Rïp, kïttɑni keti gen ɑ nud kì yije. Keny-ɑ ɑ́bëën ókwër wɑ̈g ceth kì Kengø, kɑ ød Jwøng-ɑ Ácwɑ̈ɑ̈j opɑ̈ngø yi pöölø. Kɑ ókwër ódhɑ̈lø døøg be gwøg yi pöölɑni, mɑ́ ød Jwøng-ɑ Ácwɑ̈ɑ̈j ɑ́pɑ̈ng yi mɑ̈re. Codhe, ɑkwɑ̈jji Sølømøn kinni, “Yïn ɑ Jwøng-ɑ Ácwɑ̈ɑ̈j, yïn ɑ ɑ́cïb cɑ̈ng mɑl, de yï ɑ́myeg bëëdø kì yethi pøøl kí muudhø. Anɑn yï ɑ́gëddɑ Yïn ɑ Jwøng-ɑ Ácwɑ̈ɑ̈j, ki Kengø me myëër, keny-ɑ yije óbëëd yi yïn gïti ɑtheer.” Kɑ rɑ̈dh ree luge teedø, ɑkwënge tyëng Isrɑil bënn, teedø bëne cung-ɑ́ɑ̀ kenyɑni. Kɑ okööbø kinni, “Lenhi wɑ Jwøng-ɑ Ácwɑ̈ɑ̈j, Jwøøg Isrɑil, ɑ ɑ́gwøg møg-ɑ ɑ́köbbe Debïd wïyɑ, keny-ɑ kööbe kinni, ‘Kër-ɑ ɑ́kɑ̈ɑ̈lɑ jiɑ wɑ̈g kì Rïp, bong kɑɑl mɑ ɑ́myegɑ kì kelli kɑ̈ddi Isrɑil, ɑ́ keny gëddi yɑn kì Kengø men cungi ɑ́ miɑ. De yɑ ɑ́myeg-ɑ yïn, Debïd o yï jɑɑg jiɑ, tyëng Isrɑil.’ “Wïyɑ Debïd ɑ́dwɑdd-ɑ gyer ki Kengø men yije mɑlli Jwøøg Isrɑil, Jwøng-ɑ Ácwɑ̈ɑ̈j. De Debïd wïyɑ ɑ́köbbi yi Jwøng-ɑ Ácwɑ̈ɑ̈j kinni, ‘Døøj kɑ̀ dwɑddí gyer ki Kengø. De pɑth ki yïn ɑ óger Kengɑni, den-ɑ́ wɑ̈dí ceth, ɑ óger Kengɑ.’ “Kɑ møg-ɑ ɑ́kwøb yi Jwøng-ɑ Ácwɑ̈ɑ̈j gwøge ceth, ɑcïbe yɑn kej wïyɑ Debïd, kɑ yɑ pëgg-ɑ wïj kwøøm Isrɑil. Agerɑ Keng-ɑ thyey ɑ́ mi Jwøøg Isrɑil, Jwøng-ɑ Ácwɑ̈ɑ̈j. Kɑ yij Kengø göggɑ ki keny cïb Sɑnduug Cigg men-ɑ yije di lwöm-ɑ ɑ́nywɑg yi Jwøng-ɑ Ácwɑ̈ɑ̈j geki kweyyee, keny-ɑ ɑ́kɑ̈ɑ̈le gïn wɑ̈g kì Rïp.” Kɑ Sølømøn ócungø kì bøli këli lɑm mi Jwøng-ɑ Ácwɑ̈ɑ̈j, e tyëng Isrɑil nud bënn, kɑ cingge thɑɑnge mɑl. Kɑ okööbø kinni, “Yïn ɑ Jwøøg Isrɑil, Jwøng-ɑ Ácwɑ̈ɑ̈j, bong Jwøk me pɑ̈r ki yïn kì mɑl kí piny, men mïdhi lwöm-ɑ kɑɑme geki bɑ̈ngge. Kɑ kwøbbí mïdhi yi gen, kɑ ge ócyɑ̈dhø kì yuuí ki pëthi gen bënn. Møg-ɑ ɑ́köbbí bɑ̈ngí, Debïd wïyɑ, ɑ́mïdhi yi yïn. Møgɑni ɑ́gwøg yi yïn dicyɑ̈ngtïn ki tegí. Anɑn yɑ kwɑjj-ɑ yïn, Yïn ɑ Jwøøg Isrɑil, Jwøng-ɑ Ácwɑ̈ɑ̈j, mïdhí møg-ɑ ɑ́köbbí bɑ̈ngí, wïyɑ Debïd thyew kinni, óbëëd e dɑ wɑ̈d gøle ceth men bëëdø kì wïj kwøøm Isrɑil, keløg wɑ̈dde óbëëdø kidøøj, kɑ ge ócyɑ̈dhø kì yuuí ni bëën-ɑ ɑ́bëëd yi bɑ̈ngí Debïd. Anɑn yïn ɑ Jwøøg Isrɑil, wiy gïg-ɑ ɑ́köbbí bɑ̈ngí, wïyɑ Debïd pɑ̈dhi gen kɑ̈jji gen. “De yïn ɑ Jwøk, yï nyii bëëdø kì kömi piny kidyër? E men-ɑ́ mɑl ɑ dwøng kiree dhing kiperí, yï røm-ɑ yij Kengø men-ɑ geer yɑn èn? Lïngí kwɑ̈jji bɑ̈ngí geki odhɑme, yïn ɑ Jwøgɑ, Jwøng-ɑ Ácwɑ̈ɑ̈j, lïngí ywøgɑ geki kwɑny-ɑ kwɑjjɑ yïn dicyɑ̈ngtïn. Kor Kengø men kì wɑ̈r kí dicɑ̈ng, eni Keng-ɑ ɑ́kwøb yi yïn kinni, ‘Yɑ óbëëdø kì kenyɑni.’ Lïngí kwɑny-ɑ kwɑjjɑ yïn kì keny. Nyi lïngí kwɑ̈jjɑ kí kwɑ̈jji tyëng Isrɑil, kì bøli keny-ɑ kwɑ̈jji gen kì keny, lïng kì pɑɑrí mɑl, kɑ pyëwí lɑ̈ɑ̈me ki gen. “Keløg dhɑnhø óbɑ̈jjø ki wɑɑd gen, kɑ kɑ̈ɑ̈l be köngø kì bøli këli lɑm kì Kengø men, lïng kì pɑɑrí mɑl, kɑ gøøny bɑ̈nggí liidh. Cɑy ngɑn-ɑ ɑ́bɑ̈jji ki cɑ́y-ɑ kyëëw ki bɑ̈jje, kɑ ngeti dyër mëggí dyëre. “Keny-ɑ ótyɑɑm tyëng Isrɑil yi tyëngmɑ̈ɑ̈nø kipe bɑ̈jji gen kì bølí, kɑ ge dwöög-ɑ yïí, kɑ nyingí lejji yi gen, kɑ yï kwɑjji yi gen, kɑ ge odhɑmmø kì bølí kì yij Kengø men, lïng kì mɑl, kɑ pyëwí lɑ̈ɑ̈me ki jií, tyëng Isrɑil, kɑ ge dwöög piny-ɑ ɑ́mëggí kweyyi gen. “Keny-ɑ ócyëëg mɑl, kɑ kødh ocögø e pɑ mɑ̈gi kipe bɑ̈jji gen kì bølí, kɑ ge ókwɑ̈jjø kì keny, kɑ nyingí lejji yi gen, kɑ ge óyewø ki orøøg gen, mɑ́ ge ɑ́rɑngi, lïng kì mɑl, kɑ pyëwí lɑ̈ɑ̈me ki bɑ̈nggí, ɑ løg tyëng Isrɑil, mɑ́ ge nyii nyudhø yi yïn ki yuu-ɑ døj men yije cyɑ̈dhi yi gen, kɑ pödhí pönh-ɑ ɑ́mëggí jií nëngí ki kødh. “Keløg piny ódi kɑ̈j, wɑlɑ̀ yømø nɑ̈ɑ̈g, wɑlɑ̀ byel ócɑm yi ɑ́lïlø, wɑlɑ̀ yi bɑ̈nyø, wɑlɑ̀ ji mɑɑg-ɑ piny yi tyëngmɑ̈ɑ̈nø, kí rɑjj-ɑ bï geki rɑ̈ɑ̈m dëllì bënn, ngɑn kwɑ̈jji kì kelli jií, tyëng Isrɑil kipe gïnrɑj men-ɑ ɑ́pɑ̈dhi köme, kɑ cingge thɑ̈nge Kengø men, lïng kì mɑl, kɑ pyëwí lɑ̈ɑ̈me, kɑ ngɑnɑni mëggí gïn-ɑ myër ki en, mɑ́ yï ketí ɑ ngɑ̈nyi gïn-ɑ pyëw dhɑnhø bëne. Nyi køny gen, o yï óböggi yi gen kì kɑɑm-ɑ nëën gen kì kömi piny men-ɑ ɑ́mëggí kweyyi gen. “Kí ngɑnpɑth, keløg e obëënø e kɑ̈ɑ̈l-ɑ kun lɑ̈wi e lïng-ɑ nyingí, mɑ́ perí ólïngi, kɑ tegí yod yi en, kɑ bï-ɑ be kwɑ̈jjø kì Kengø men, lïng kì pɑɑrí mɑl, kɑ ngɑnpɑth menɑni mëggí gïg-ɑ kwɑjji yi en kì yïí bënn, o nyingí yod yi jurr-ɑ kömi piny, o yï böggi yi gen, ni böng-ɑ böggi yïn yi jií, ɑ løg tyëng Isrɑil. O yod kinni øn-ɑ geer yɑn èn, bɑ en ɑ yije nyi mɑlli nyingí. “O keløg jií kedh-ɑ be nyɑɑg ki tyëngmɑ̈ɑ̈nø, ki yuu ni yuu-ɑ ör gen yi yïn, kɑ yï kwɑjji yi gen, ge nenn-ɑ kuni kɑɑl-ɑ ɑ́myeg yi yïn, kɑɑl-ɑ yije di Kengø men-ɑ ɑ́gërrɑ yïn, lïngí kwɑ̈jji gen geki odhɑɑm gen kì mɑl, kɑ kwøbbi gen løøg. “O keløg ge óbɑ̈jjø kì bølí, kɑ bong-ɑ dhɑnhø me döng e nuti bɑ̈jjø, keny-ɑ órënyi pyëwí, kɑ ge cïb yi yïn cinggi ji mø mɑɑn gen, kɑ ge kïdhi pödhi jiɑni ying-ɑ́ keny lɑ̈wi, wɑlɑ̀ keny cyɑ̈gi, kɑ pëthi gen ódwöögø kì pɑ̈l-ɑ ɑ́kïdhi gen, kɑ ge dwöög-ɑ yïí ge odhɑmmø kì yij pɑ̈lɑni ge okööbø kinni, ‘Wø ɑ́røngi, wø ɑ́göög ki bɑ̈jjø, wø ɑ́göög ki gïnrɑj.’ Kɑ ge dwöög-ɑ yïí ki pëthi gen bënn, kì piny tyëngmɑ̈ɑ̈nø, kɑ yï kwɑjji yi gen ge nenn-ɑ kuni piny gen, piny-ɑ ɑ́mëggí kweyyi gen, kí kɑɑl-ɑ ɑ́myeg yi yïn, ɑ yije di Kengø men-ɑ ɑ́gërrɑ yïn, lïngí kwɑ̈jji gen geki odhɑɑm gen, kì pɑɑrí mɑl, kɑ kwøbbi gen løøg. Lɑ̈ɑ̈m pyëwí ki orøøg gen geki gïgrijjø møg-ɑ ɑ́gwøg yi gen kì bølí. Kɑ wiy pëthi tyëng-ɑ ɑ́køøl gen lɑ̈ɑ̈m gen ki jií. Mɑ́ ge bɑ jií, ji-ɑ ɑ́kɑ̈ɑ̈l yi yïn wɑ̈g kì Rïp, kì yij Purun-ɑ nyi leeny ngyënyø dødø. “Yïn ɑ Jwøk, nyi lïngí odhɑɑm bɑ̈ngí rɑ̈ɑ̈dh Isrɑil, kí odhɑɑm tyëng-ɑ bɑ jií, kɑ ge nyi mëggí gïg-ɑ kwɑjji yi gen kì yïí bënn, mɑ́ gen ɑ ɑ́kwɑny yi yïn gɑ jií kì kelli jurri kömi piny bënn, ni møg-ɑ ɑ́köbbí Mosɑ̀ bɑ̈ngí keny-ɑ ɑ́kɑ̈ɑ̈l kweyyi wøn wɑ̈g kì Rïp.” Keny-ɑ ɑ́rum Sølømøn ki kwɑjji Jwøng-ɑ Ácwɑ̈ɑ̈j e odhɑmmø, ɑdhwödhe kì bøli këli lɑm mi Jwøng-ɑ Ácwɑ̈ɑ̈j, mɑ́ e ɑ́bëëd cønge rum en piny, o cingge thɑɑng en mɑl. Adhwödhe, kɑ tyëng Isrɑil møg-ɑ cugø kì kenyɑni kwënge cwɑgge tïng en kinni, “Lenhi wɑ Jwøng-ɑ Ácwɑ̈ɑ̈j, ɑ ɑ́thödhi jie, tyëng Isrɑil ki mër. Møg-ɑ ɑ́köbbe bɑ̈nge Mosɑ̀ bënn, ɑ́cïbe kɑ̈jji gen, bong nyɑ gïjø ɑ́kyel mɑ ɑ́kwøbe, kɑ ocögø e pɑ pɑ̈dhi keje. Wɑ ɑ́korri yi Jwøgee, Jwøng-ɑ Ácwɑ̈ɑ̈j, ni korr-ɑ ɑ́korre kweyyee, pɑ kedh, o wɑ pɑ wiye piny. Wiy pëthee løge yïe, o wɑ cyɑ̈dhi wɑ kì yuue, wɑ mïdh-ɑ cigge geki kwönge men-ɑ ɑ́mëgge kweyyee. Wiy kwɑ̈jjɑ, kí odhɑm-ɑ dhɑmmi wɑ èn, cungi gen kì bøli Jwøgee, Jwøng-ɑ Ácwɑ̈ɑ̈j, kì wɑ̈r kí dicɑ̈ng, o nyi løøge kwøbbi bɑ̈nge rɑ̈ɑ̈dh Isrɑil geki kwøbbi jie, tyëng Isrɑil kì yethi cyɑ̈ng bënn. Kɑ gï nyi mëgge gïn-ɑ kwɑjji yi gen. O yod yi jurri kömi piny bënn kinni Jwøng-ɑ Ácwɑ̈ɑ̈j kete ɑ bɑ Jwøk, bong jwøg megø këti. Mëggu pëthi wun Jwøgee, Jwøng-ɑ Ácwɑ̈ɑ̈j, kɑ wu cyɑ̈dhi wun kì yuu Jwøng-ɑ Ácwɑ̈ɑ̈j, wu mïdh-ɑ cigge ni men-ɑ gwøg yi wun dicyɑ̈ngtïn.” Kɑ rɑ̈dh geki tyëng Isrɑil bënn, Jwøng-ɑ Ácwɑ̈ɑ̈j ngɑ̈ddi yi gen ki gëdhhì. Sølømøn ɑ́ngɑ̈ɑ̈d ki dhög ɑ́lïp pyɑ̈r ɑ́ryew wïdɑ́ryew kí dyëg ɑ́lïp miyø kí pyɑ̈r ɑ́ryew, gɑ gënhi mër men mëggi Jwøng-ɑ Ácwɑ̈ɑ̈j. Bene kër-ɑ ɑ́thyeey Kengi Jwøng-ɑ Ácwɑ̈ɑ̈j yi rɑ̈dh geki tyëng Isrɑil bënn ɑnɑn. Kɑ ódɑ̈r-ɑ dhø Kengø thyey yi rɑ̈dh dicyɑ̈ngɑni. Kenyɑni ɑ ɑ́muuje gënh-ɑ nyi rɑ̈b bëne, kí byëli Jwøng-ɑ Ácwɑ̈ɑ̈j, geki dwɑ̈lli gëdhhi mër, gï rɑ̈bbe’ Jwøng-ɑ Ácwɑ̈ɑ̈j ki mɑc, mɑ́ këli lɑm men-ɑ bɑ dilɑl, men-ɑ ying bøli Jwøng-ɑ Ácwɑ̈ɑ̈j ɑ́nungi, gënh-ɑ nyi rɑ̈b bëne, kí byëli Jwøng-ɑ Ácwɑ̈ɑ̈j geki dwɑ̈lli gënhi mër pɑ rømi wïje. Dhø Kengø kenyɑni ɑ ɑ́gwøøg Kwëër Akɑnnì yi Rɑ̈dh Sølømøn geki tyëng Isrɑil bënn, ki cyɑ̈ng ɑ́bïryew. Kɑ ge cig-ɑ mɑ̈gø ki cyɑ̈ng ɑ́bïryew këti, kɑ cyɑ̈nggi gen ogöögø ki pyɑ̈rø wïdɑ́ngwen. Ádɑ ji mø gïïr cɑrø. Ji mø gïïr ɑ́kɑ̈ɑ̈l-ɑ Amɑth kun lɑ̈wi, møøgø kɑ̈ɑ̈l-ɑ myërr-ɑ buti Rïp. Kì cyɑ̈ng-ɑ bɑ pyɑ̈rø wïdɑ́bïïj cyɑ̈ng, ɑör ji myërri gen yi rɑ̈dh. Kɑ rɑ̈dh pwøj yi gen, ɑkedhi gen myërri gen, pëthi gen omedø yi gïgdøj møg-ɑ ɑ́gëdhhi Debïd geki tyëng Isrɑil yi Jwøng-ɑ Ácwɑ̈ɑ̈j. Keny-ɑ ɑ́rum Sølømøn ki geri Kengø geki gøldwøng, kí jɑmm-ɑ ɑ́dwɑdde gerø bënn, kɑ Jwøng-ɑ Ácwɑ̈ɑ̈j bï-ɑ yïe kì yethi lɑ̈g këti ni men-ɑ ɑ́kwönge ki bëën yïe kì Gibeon. Kɑ köbbi yi Jwøng-ɑ Ácwɑ̈ɑ̈j kinni, “Kwɑ̈jjí geki odhɑmí ɑ́lïngɑ. Kengø men-ɑ ɑ́gërrí yɑn ókwër yi yɑn. Ngɑ̈jɑ pɑ lugɑ en, pyëwɑ óying köme ceth gïti ɑtheer. O ɑnɑn keløg yï ócyɑ̈dhi kì bølɑ ki pyëwí bëne, e yijí bong ɑ́dud, ni kɑ ɑ́bëëd wïyí Debïd, kɑ ciggɑ mïdhi yi yïn, kɑ møg-ɑ nyi kwøb yi yɑn nyi gwøg yi yïn, kwøøm rɑ̈ɑ̈dhø mií cïbɑ’ piny, kɑ Isrɑil jɑɑg yi yïn gïti ɑtheer, ni møg-ɑ ɑ́köbbɑ wïyí Debïd kinni, ‘Gølí pɑ jɑd ki ngɑn pëggi wïj kwøøm Isrɑil.’ De keløg ngɑ̈thi wun ólugu yɑn wuki kwɑrri wun, kɑ ciggɑ ocögø ge pɑ mïdhi yi wun, kɑ møg-ɑ kwøb yi yɑn nyii cögø ge pɑ gwøg yi wun, kɑ wu kedh-ɑ be göggi jwögg møøgø, kɑ ge mɑlli yi wun, Isrɑil kɑ̈ɑ̈lɑ’ wɑ̈g kì piny-ɑ ɑ́mëggɑ en, o Keng-ɑ ɑ́kwër yi yɑn ɑ́ mi nyingɑ óbɑnyɑ. Kɑ Isrɑil ogöögø ɑ́ gɑ́j, kɑ gɑggi yi ji bënn. Keng-ɑ wɑ̈dhi mɑl èn óbëëd ɑ́ ngɑ̈ngø kì yï tyëng-ɑ nyi kɑ̈l keny dhuki megø, ge óbëëd ge pyëny-ɑ ri gen kinni, ‘Á kipe ngø ɑ göggi piny men geki Kengø ki gïn ni men yi Jwøng-ɑ Ácwɑ̈ɑ̈j?’ Ji ólöggi kinni, ‘Kipe wiy-ɑ ɑ́wiy gen Jwøøg gen, Jwøng-ɑ Ácwɑ̈ɑ̈j, eni Jwøng-ɑ ɑ́kɑ̈ɑ̈l kweyyi gen wɑ̈g kì Rïp, kɑ ge ómɑ̈gø kì ri jwögg møøgø, ge mɑll-ɑ jwöggɑni, o bɑ gïn ɑ kwɑjji yi gen. Bene ɑ bɑnge kɑ̈ni kömi gen ki ryɑ̈ng-ɑ dwøng ni men yi Jwøng-ɑ Ácwɑ̈ɑ̈j.’ ” Sølømøn ɑ́tyëg-ɑ runn pyɑ̈r ɑ́ryew e ger-ɑ Kengø geki gøldwøng. Kirɑm rɑ̈ɑ̈dh Suur, Sølømøn ɑ́muuje ki yenh sɑndɑl kí yenh ɑmedh, kí dhɑb møg-ɑ ɑ́dwɑddi yi en. Kɑ Rɑ̈dh Kirɑm lony ki nëngø yi Sølømøn ki kɑ̈dd pyɑ̈r ɑ́ryew kì kelli kɑ̈ddi Gɑlelì. Akedhi Kirɑm be lidhi myërrɑni, kɑ ge okwønø kì wɑnge. Kɑ okööbø kinni, “Á myërr mø ngø ɑ mëggi yɑn ge nɑ møg yi ómïɑ?” Acɑge myërrɑni gɑ Kɑbul, nyingɑni nudd ge cöll-ɑ myërrɑni gïti dicyɑ̈ngtïn. Dhɑb men-ɑ ɑ́öri Rɑ̈dh Sølømøn yi Rɑ̈dh Kirɑm pöödh-ɑ kïllì ɑ́lïp ɑ́ngwen. Bene kwøbbi gwøng-ɑ ɑ́cïri ji yi Sølømøn èn; ge ɑ́cïr-ɑ geri Kengi Jwøng-ɑ Ácwɑ̈ɑ̈j, kí gøldwøng, kí thøri piny, kí geri döri Yerusɑlem, kí geri kɑ̈ddi Adhör, kí Megidø, kí Gedher. Rɑ̈ɑ̈dh Rïp ɑ́bï kɑ Gedher mɑge ki liny, kɑ gø rɑ̈be ki mɑc. Kɑ tyëng Kɑnɑɑn møg-ɑ ɑ́bëëd kì kɑɑlɑni nɑ̈ge, kɑ kɑɑlɑni muuje ɑ́ gïn kïdhi nyɑre yï jɑlgøle, keny-ɑ ɑ́nywøøm nyɑnɑni yi Sølømøn. Kɑ Gedher døøg ki gerø yi Sølømøn, geki Bet Örøn kì yij tör. Kí Bɑɑlɑth, kí Tɑmɑr kì Töör Yeudiyɑ̀. Kí kɑ̈dd-ɑ ɑ́mïdhi jɑmme, kí kɑ̈dd-ɑ ɑ́mïdhi kyënyì geki yɑ̈th-ɑ nyi pyejji yi kyënyì, kí gïg-ɑ ɑ́dwɑdde gerø kì Yerusɑlem, kí Lubnɑn, kí keny-ɑ ɑ́dwɑdde gyer kì yij piny men-ɑ jɑɑg yi en bëne. Ji møg-ɑ ɑ́döng bënn kì piny Isrɑil, kì ri tyëng Amör, kí tyëng Kit, kí tyëng Perïdh, kí tyëng Kib, kí tyëng Yebus, ɑ pɑth ki tyëng Isrɑil, kwɑrri gen møg-ɑ ɑ́döng kì piny, ɑ ɑ́cög ge nuti nɑ̈gø yi Isrɑil, gen ɑ ɑ́cïri gwøg yi Sølømøn gïti dicyɑ̈ngtïn. Bong tyëng Isrɑil mɑ ɑ́cïri gwøg yi Sølømøn, de gï ɑ́mïdhe gɑ jølinye, kí jyɑ̈gge, kí pëjji linye, kí jøg-ɑ kwølli jøgwøge, kí jøg-ɑ kwølli yɑ̈the geki kyënye. Ádɑ jøg mø kwølli jøgwøg mø Sølømøn kwɑnni gen bɑ miy ɑ́bïj kí pyɑ̈r ɑ́bïj, gen ɑ cir jøg-ɑ göögø. Keny-ɑ ɑ́rum nyɑɑr rɑ̈ɑ̈dh Rïp ki bëëdø kì kɑɑl Debïd, kɑ dɑ̈ng-ɑ øn-ɑ ɑ́gërrii yi Rɑ̈dh Sølømøn, ɑcwɑ̈ɑ̈j Sølømøn ki keny mɑ óthør. Sølømøn Jwøng-ɑ Ácwɑ̈ɑ̈j ɑ́ngɑ̈dde ki gënh-ɑ nyi rɑ̈b bëne, kí gënhi mër, kɑ gï rɑ̈be kì wïj këli lɑm men-ɑ ɑ́ger yi en, ɑ́ngɑ̈ɑ̈d ki tyel ɑ́dɑ̈g kì yij runɑni, kɑ nyii rɑ̈bø ki bɑkur kì bøli Jwøng-ɑ Ácwɑ̈ɑ̈j, codhe kɑ Kengø órumø ki thyeyø. Kɑ Rɑ̈dh Sølømøn ogudø ki yɑ̈thi nɑm (sɑpïnɑ̀) kì Edhïön Geber ɑ buti Elɑth kì kömi Nɑɑm Omeli Kwɑrø kì piny Edöm. Kɑ Rɑ̈dh Kirɑm oödø ki jøkëw ki yɑ̈ɑ̈th møg ngɑ̈nyi nɑm kidøøj, o ge køny gen jøkëw mø yɑ̈thi Sølømøn. Codhe kɑ ge kedh-ɑ Opir, kɑ ge ókɑ̈nø kì kunɑni ki dhɑb me pöödh kïllì ɑ́lïp pyɑ̈rø wïdɑ́ngwen. Kɑ gø muuj gen Rɑ̈dh Sølømøn. Kɑ rɑ̈ɑ̈dh Cebɑ̀, rɑ̈nh-ɑ dhɑjø, olïngø ki per Sølømøn, kì bɑng tɑyi nyingi Jwøng-ɑ Ácwɑ̈ɑ̈j, kɑ bï-ɑ be rɑngii ki pyëj mø teeg. Áwɑ̈nhi Yerusɑlem e lwøngg-ɑ yi yɑy me dwøng cɑrø, ge ókɑ̈ddø kì kömi ɑmɑl mø gïïr ki yenh-ɑ yømi gen med, kí dhɑb me ngenyø ki mendwøng, kí tigg mø ngewi gen teeg. Keny-ɑ ɑ́wɑ̈nhe bøli Sølømøn, kɑ Sølømøn pyënye ki gïg-ɑ pyëwe bënn. Kɑ pyëjjɑni løøg yi Sølømøn bënn, bong pyëj mɑ ɑ́dhɑ̈li løøgø yi en. Keny-ɑ ɑ́liidh peli wïj Sølømøn yi rɑ̈ɑ̈dh Cebɑ̀, kí gøl-ɑ bëëde, kí gïgcɑmm-ɑ tɑwe, kí bëëdi jyɑ̈gge, kí gwir-ɑ ógwiir jøg-ɑ kɑ̈ddi kì tɑɑw rɑ̈dh, kí ógudh-ɑ rug yi gen, kí gëdhhì møg-ɑ nyi ngɑl kì Kengø gɑ møg mëggi Jwøng-ɑ Ácwɑ̈ɑ̈j ki mɑc, kɑ pyëwe ceg-ɑ lɑ̈ɑ̈nyø. Aköbbe Rɑ̈dh Sølømøn kinni, “Møg-ɑ ɑ́lïngi yi yɑn kì pödhi wøn ce ying-ɑ dyër! Eni møg-ɑ kømmi yi yïn geki peli wïjí! Yɑ ɑ́bëëd kwøbbɑni nuti yïëëy yɑn gïti kɑ ɑ́bëënɑ keny. Ayodɑ en kinni møg-ɑ ɑ́lïngi yi yɑn kì pödhi wøn, nøg yi møg-ɑ ɑ́lidhɑ ki wɑngɑ kì keny. Jií ri gen dɑ gyëdh, o jyɑ̈ggí ri gen dɑ gyëdh geki tyëng-ɑ rïïj ge cung-ɑ́ɑ̀ bølí ek, ge olïngø ki kwøbbi peli wïjí. Lenhí Jwøgí, Jwøng-ɑ Ácwɑ̈ɑ̈j, ɑ ɑ́nyodh medi pyëwe ki yïn, kɑ yï cïbe wïj kwøøm Isrɑil! Bɑ kipe mɑ̈ɑ̈dø men-ɑ pɑ lwënyi, mɑɑr-ɑ mɑɑr Isrɑil yi Jwøng-ɑ Ácwɑ̈ɑ̈j, ɑ ɑ́rønye yïn, o yï jyɑ̈ɑ̈g yï gøgg-ɑ dyër.” Kɑ gïg-ɑ ɑ́këëme Rɑ̈dh Sølømøn muuje, ge bɑ, kïlli dhɑb ɑ́lïp ɑ́ngwen, kí yenh-ɑ yømi gen med mø ngenyø ki mendwøng, kí tigg mø ngewi gen teeg. Bong yenh-ɑ yømi gen med mø ngenyø ni møg-ɑ ɑ́muuj Rɑ̈dh Sølømøn yi rɑ̈ɑ̈dh Cebɑ̀, mɑ ɑ́cigi lidhø. Yɑ̈thi Rɑ̈dh Kirɑm møg-ɑ ɑ́kɑ̈ni ki dhɑb kì Opir, ɑ́kɑ̈ni thyew ki yenh sɑndɑl mø gïïr cɑrø, kí tigg mø ngewi gen teeg. Kɑ yenh sɑndɑl göög ki dëddi Kengø geki dëddi gøldwøng, kí thøm-ɑ nyi thom. Bong yenh sɑndɑl mø ngenyø ni møgɑni mɑ ɑ́cigi lidhø gïti dicyɑ̈ngtïn. Kɑ gïg-ɑ ɑ́cwøl yi rɑ̈ɑ̈dh Cebɑ̀ kì yï Rɑ̈dh Sølømøn mëgge gøn bënn, reb ki gïg-ɑ ɑ́mëggii yi rɑ̈dh. Codhe, ɑdøøge pödhi gen geki jøg-ɑ ɑ́lwöögii. Dhɑb men-ɑ nyi wɑ̈nhi yï Sølømøn kì yij run ɑ́kyel nyii göögø ki kïllì ɑ́lïp pyɑ̈r ɑ́ryew wïdɑ́dɑ̈g. Reb kí gïg-ɑ nyi kɑ̈ɑ̈l yi jøngyew, kí møg-ɑ nyi muuj yi jøg-ɑ nyi ngëwwi yij pödhø, kí møg-ɑ nyi kɑ̈ɑ̈l yi rɑ̈nhi pödhhi Árɑb geki jɑggi myërri Isrɑil. Sølømøn ɑ́thɑ̈ɑ̈dh ki köddi dhɑb miy ɑ́ryew, pegi kwöd ɑ́kyel bɑ kïllì ɑ́bïryew. Kɑ othɑ̈dhø ki köddi dhɑb miy ɑ́dɑ̈g, pegi kwöd ɑ́kyel bɑ kïllì ɑ́ryew. Kɑ ge cïb gøl-ɑ cwøl ɑ́ Wɑɑg Lubnɑn yi rɑ̈dh. Kɑ rɑ̈dh ogöögø thyew ki kwøøm lëji lyej, kɑ gø mwøne ki dhɑm dhïw. Pɑ̈ltyel ɑ́bïkyel ɑ yedhi mɑl wïj kwømɑni. Keny-ɑ nyi jyɑ̈ɑ̈ng rɑw kì ri kwømɑni, wïje ódöölø. Yïe dɑ bɑd kì tuung kí tuung. Ngɑ̈ɑ̈j kwømɑni dɑ ngïji wïj wɑdh, kí ngurrì ɑ́ryew møg cungi kì buti bɑ̈dde ryeet; ɑ́kyel kì buti bɑɑn kí bɑɑn. Kí ngurrì pyɑ̈rø wïdɑ́ryew kì wɑ̈thi tøggi pɑ̈ltyel, ɑ́bïkyel kì tuung, kí ɑ́bïkyel kì tung-ɑ kyeelø. Bong kwøm me ni menɑni mɑ ɑ́pɑ̈nyi ki gwøgø kì pödhø megø. Óthɑ̈gg-ɑ nyi mɑ̈ɑ̈dh yi Sølømøn bɑ dhɑb bënn, o jɑmmi cɑm kì gøl-ɑ cwøl ɑ́ Wɑɑg Lubnɑn bɑ dhɑb bënn. Átegø ɑ́bëëd e bong pere kì bøli keny-ɑ ɑ́jyɑ̈ɑ̈g Sølømøn. Yïe ɑ́dɑ yɑ̈thi nɑm mø døngø møg nyi weli kyeel ki yɑ̈thi Kirɑm. Yɑ̈the møgɑni nyi dwöög-ɑ bɑng runn ɑ́dɑ̈g, ge ókɑ̈ddø ki dhɑb, kí ɑ́tegø, kí lëji lyej, kí ɑ́ywömmì, kí ɑtwɑg. Rɑ̈dh Sølømøn ɑ́bëëd e kɑ̈rø ki mendwøng, o wïje pel kibøli rɑ̈nhh-ɑ kyeelø. Kɑ kömi piny bëne bï-ɑ yï Sølømøn be lïngø ki kwøbbi peli wïj møg-ɑ ɑ́cïb pyëwe yi Jwøk. O ngɑn bï yïe, nyi bï e ókɑ̈ddø ki gïi dhwɑ̈nge me muuje Sølømøn, o gïïpiny bëne, ɑ løg, jɑmmi ɑ́tegø, kí dhɑb, kí ógudh, kí jɑmmi liny, kí yenh-ɑ yømi gen med, kí kyënyì, kí ógɑll, ge nyi ceg kɑ kɑ̈ɑ̈lø ceth kì yethi runn bënn. Kɑ Sølømøn olïmø ki yɑ̈ɑ̈th geki kyënyì, kɑ yɑ̈the ogöögø ki ɑ́lïp kí miy ɑ́ngwen, kí kyënyì ɑ́lïp pyɑ̈rø wïdɑ́ryew, møøgø ɑ́cïbe kɑ̈ddi yɑ̈thi kyënyì, o møøgø ying-ɑ buti rɑ̈dh kì Yerusɑlem. Kì yij jyɑ̈gi Sølømøn, ɑ́tegø geki yɑdh sɑndɑl, ɑ́göög e ceg-ɑ twɑ̈lø ni kïttì kì Yerusɑlem, kɑ yenh sɑndɑl ogöögø ge nɑ ólɑm. Kyënyi Sølømøn ɑ́bëëd ge nyi kɑ̈ɑ̈l ɑ Rïp kí Tekoɑ̀, ge nyi ngew yi jøngyew mø rɑ̈dh kɑ ngyëny kì Tekoɑ̀. Yɑ̈ɑ̈y kyeny ɑ́bëëd e nyi ngëëw ɑ Rïp ki ngyëny ɑ́tegg miy ɑ́bïkyel, o kyeny ngëëw ki miyø kí pyɑ̈r ɑ́bïj, o ge nyi lony yi gen ki ngëwwi rɑ̈nhi Kit geki rɑ̈nhi Arɑm. Mɑ̈nn mø gïïr mø pɑth ki nyigi Isrɑil ɑ́mɑɑr yi Sølømøn. Kɑ kömi nyɑɑr rɑ̈ɑ̈dh Rïp nyömme kí nyigi Moɑb, kí nyigi Amön, kí nyigi Edöm, ki nyigi Sïdön, kí nyigi Kit. Ányömi ki nyigi jurr-ɑ ɑ́kërri tyëng Isrɑil yi Jwøng-ɑ Ácwɑ̈ɑ̈j kinni i tyëng Isrɑil ri gen ko nywøm gen ki jiɑni, kipe pëthi gen óløg yi gïn, kɑ ge kedh-ɑ bɑng jwöggi gen. Sølømøn yïe ɑ́dɑ mɑ̈nn miy ɑ́bïryew kì gøldwøng, kí ɑkwɑnyy miy ɑ́dɑ̈g, kɑ pyëwe løg yïnø yi mɑ̈nne. Keny-ɑ ɑ́yöø Sølømøn, pyëwe nuti ying-ɑ kömi Jwøge, Jwøng-ɑ Ácwɑ̈ɑ̈j ni kɑ ɑ́bëëd Debïd wïye. Kɑ Sølømøn nyi kedh-ɑ be mɑlli Actöreth jwøøg tyëng Sïdön, kí Mölek jwøøg tyëng Amön. Kɑ Sølømøn ogöögø ki gïnrɑj kì bøli Jwøng-ɑ Ácwɑ̈ɑ̈j, nuti cungø kì bøli Jwøng-ɑ Ácwɑ̈ɑ̈j ni kɑ ɑ́bëëd Debïd wïye. Kɑ Kemöc jwøøg tyëng Moɑb göggi ki kej mɑ̈ddø yi Sølømøn kì wïj kïn-ɑ røøm ki Yerusɑlem, geki Mölek jwøøg tyëng Amön. Ágöög thyew ki kɑ̈jji mɑ̈ddø møg nyi rɑ̈ɑ̈b ki bɑkur yi mɑ̈nne, nyigi jurr-ɑ pɑth. Jwøng-ɑ Ácwɑ̈ɑ̈j pyëwe ɑ́bëëd e rɑɑj ki Sølømøn, kipe kɑ ɑ́luge ngɑ̈je Jwøøg Isrɑil, Jwøng-ɑ Ácwɑ̈ɑ̈j, eni Jwøng-ɑ ɑ́bï yïe kì yethi lɑ̈g ki tyel ɑ́ryew, kɑ gø cïge møgɑni kinni, ko kedhi bɑng jwögg møøgø. De møg-ɑ ɑ́cïgii yi Jwøng-ɑ Ácwɑ̈ɑ̈j ɑ́pyeme. Kɑ Sølømøn köbbi yi Jwøng-ɑ Ácwɑ̈ɑ̈j kinni, “Mɑ́ lwöm-ɑ ɑ́ying kɑɑmee ɑ́pɑ̈d yi yïn, kɑ møg-ɑ ɑ́cïgɑ yïn bɑny yi yïn, lɑwø yöödɑ’ wɑ̈g kì kömí, o mëggɑ’ bɑ̈ngí. De gïn ni menɑni pɑ gwøg yi yɑn, yï nudd yï onëënø kiper Debïd wïyí, óyöödɑ wɑ̈g kì kömi wɑ̈dí. O pɑth ki pödhø bëne ɑ ókɑ̈ɑ̈lɑ wɑ̈g kì cinge, de ówïyɑ ki kɑl ɑ́kyel me jɑɑg yi en kiper bɑ̈ngɑ Debïd, kí per Yerusɑlem kɑɑl-ɑ ɑ́gwøg yi yɑn ɑ́ miɑ.” Kɑ ɑter tug yi Jwøng-ɑ Ácwɑ̈ɑ̈j kì kɑɑm Sølømøn geki Adɑd jɑl Edöm, o bɑ wɑ̈d gøl rɑ̈ɑ̈dhø kì Edöm. Kɑ̈ge dööng keny-ɑ ɑ́rum tyëng Edöm ki tyɑmø yi Debïd, Yöɑb pënyi liny Isrɑil ɑ́kedhi be konyi ji-ɑ ɑ́nɑ̈g yi liny, kɑ cwøw nɑ̈ge bënn kì Edöm. Mɑ́ Yöɑb ɑ́bëëd kì kunɑni geki jø Isrɑil bënn ki dwɑ̈tt ɑ́bïkyel, cwøw ɑ́tyëg yi gen ki nɑ̈gø bënn kì Edöm. Kɑ bodh ɑ́ Adɑd geki kwï tyëng Edöm mø bɑ bɑ̈nggi wïye, mɑ́ ge ɑ́yömm-ɑ Rïp, e Adɑd bɑ nyelthinh. Ge ɑ́dhwödh kì Midyɑn, kɑ ge kedh-ɑ Pɑrɑn, kun-ɑ ɑ́rëbi gen ki jøg møøgø. Codhe, ɑkedhi gen Rïp, kɑ nëngi ki ød kí gïncɑm yi rɑ̈ɑ̈dh Rïp, kɑ gø nënge ki piny. Rɑ̈ɑ̈dh Rïp ɑ́bëëd pyëwe med ki Adɑd ki mendwøng, kɑ gø nyömme nyimï cyëge, nyimï Bɑ̈rɑ̈dh Tɑpenes. Kɑ nyöddi ki wɑ̈d yi nyimï Tɑpenes, ɑ løg wɑ̈de Negubeth. Kɑ pøn, ɑkïdhii gøldwøng yï Tɑpenes. Kɑ Negubeth obëëdø kì gøldwøng geki wɑ̈ddi rɑ̈ɑ̈dh Rïp. Kɑ Adɑd olïngø kì Rïp kinni i Debïd kedhi kun-ɑ di kweyye, o Yöɑb pënyi liny thøø, ɑköbbe rɑ̈dh kinni, “Wiy yɑ døøgɑ pödhi wøn.” Kɑ köbbi yi rɑ̈dh kinni, “Á ngø ɑ jɑ̈ddi yïn kì yïɑ, ɑ dwɑddí døøg pödhi wun?” Kɑ Adɑd okööbø kinni, “Wiy yɑ kedhɑ yøw.” Adɑd keny-ɑ ɑ́bëëde ɑ́ rɑ̈ɑ̈dh Arɑm, ɑ́bëëd e rɑj, o mɑ̈n ki mendwøng ki Isrɑil Dɑ ngetimɑ̈ɑ̈nø mɑ ɑ́kölli Sølømøn yi Jwøk, ɑ løg Redhön wɑ̈d Eliɑdɑ̀, jɑl-ɑ ɑ́pɑ̈r kì cingi wɑ̈n Rɑ̈dh Adɑdedher kì Dhöbɑ̀, keny-ɑ ɑ́bëëd ge onɑ̈gø yi Debïd. Jøg møøgø ɑ́cønge köme, kɑ ogöögø ki pënyi liny, ɑkedhi gen Dimɑceg, kɑ ge pëgg-ɑ kunɑni, ɑrønyii ɑ́ rɑ̈dh kì Dimɑceg. Ábëëd e mɑ̈n ki Isrɑil kì yethi runn-ɑ ɑ́jyɑ̈ɑ̈g Sølømøn bënn. Kɑ Yeroboɑm wɑ̈d Nebɑt jɑl Dhered kì myërri Eprɑim cinge tïngge Sølømøn, o ɑ́bëëd e gögg-ɑ rɑ̈dh cøn. Gïg-ɑ ɑ́cwöb, ɑ bɑng gen ɑ́tïngge cinge rɑ̈dh ek: Sølømøn ɑ́bëëd e ogëdø ki óthør kì Yerusɑlem kì kuni wɑɑng cyɑ̈ɑ̈ng mwøl, kedh e thïg-ɑ döri kɑɑl wïye Debïd. Yeroboɑm ɑ́bëëd ɑ́ jɑltïj, o keny-ɑ ɑ́liidh gwøge yi Sølømøn e døøj, ɑgwøge gøn ɑ́ ngɑn-ɑ kwølli jøgwøg mø gøl Yosep bënn. Tyelø ɑ́kyel Yeroboɑm ɑ́dhwödh kì Yerusɑlem, kɑ kedh-ɑ be wel, kɑ yood yöö yi Akiyɑ̀ jɑltöng, jɑl Cilø. Akiyɑ̀ ɑ́bëëd e orugø ki ógødh me nyɑ̈n keny-ɑ ɑ́røøm gen, ge ɑ́bëëd gɑ ɑ́ryew keti gen kì yij pɑ̈l. Kɑ Akiyɑ̀ ógønh nyɑ̈n men-ɑ rug yi en lunye wɑ̈g, kɑ gø kɑgge ɑ́ bud pyɑ̈rø wïdɑ́ryew. Aköbbe Yeroboɑm kinni, “Kɑ̈bbí ki pyɑ̈rø. Mɑ́ Jwøøg Isrɑil, Jwøng-ɑ Ácwɑ̈ɑ̈j, ɑ́kööb kinni, ‘Lɑwø kɑ̈ɑ̈lɑ’ wɑ̈g kì cingi Sølømøn. O yï mëggɑ’ kɑ̈llì pyɑ̈rø, kɑl ɑ́kyel ɑ döng ɑ́ mee, kiper bɑ̈ngɑ Debïd, kí per Yerusɑlem kɑɑl-ɑ ɑ́myegɑ kì kelli kɑ̈ddi Isrɑil bënn. Kì bɑng wiy-ɑ ɑ́wiy gen yɑn, kɑ ge kedh-ɑ be mɑlli Actöreth jwøøg Sïdön, kí Kemöc jwøøg Moɑb, kí Mölek jwøøg Amön, kɑ Sølømøn dhøgɑ pyeme. Ábɑ̈jji kɑ ocögø ciggɑ pɑ mïdhi yi en ni mïnh-ɑ ɑ́mïdhi gen yi Debïd wïye. De lɑwø pɑ kɑ̈ɑ̈lɑ wɑ̈g bëne kì cinge, ówiy yi yɑn o jyɑ̈ge ki runn-ɑ nëëne bënn, kiper bɑ̈ngɑ Debïd, ngɑn-ɑ ɑ́myeg yi yɑn, kɑ kwøbbɑ lïnge, kɑ ciggɑ mïdhe. Lɑwø ókwɑny yi yɑn kì cingi wɑ̈de, o yï mëggɑ’ kɑ̈llì pyɑ̈rø. Wɑ̈de ómëggɑ kɑl ɑ́kyel kipe kinni o mɑɑc Debïd bɑ̈ngɑ bëëde e olyelø yethi cyɑ̈ng bënn, kì bølɑ kì Yerusɑlem kɑɑl-ɑ ɑ́myeg yi yɑn kinni o cunge ɑ́ mi nyingɑ. De yï ɑ́rum ki myegø yi yɑn, o yï jyɑ̈ɑ̈g ni kɑ̀ dwɑddii yi pyëwí, o yï bëëd yï bɑ rɑ̈ɑ̈dh Isrɑil. Keløg møg-ɑ cïgɑ yïn bënn ómïdhi yi yïn, kɑ yï ócyɑ̈dhø kì yuuɑ, kɑ yï ogöögø yijí bong ɑ́dud kì bølɑ, yï mïdh-ɑ kwøbbɑ geki ciggɑ ni bëën-ɑ ɑ́bëëd Debïd bɑ̈ngɑ, yɑ ócungi kì kömí, kɑ yï gëddɑ ki kɑl mɑ dyër, ni gøl-ɑ ɑ́gërrɑ Debïd, kɑ yï mëggɑ Isrɑil. O kwɑrri Debïd wɑ̈thi gen dwöögɑ cyɑ̈n kipe orøngɑni, de ge koo mïdhɑ kinøw gïti ɑtheer.’ ” Kɑ Yeroboɑm dwɑddi nɑ̈gø yi Sølømøn. Codhe ɑdhwödh Yeroboɑm, kɑ kedh-ɑ Rïp, yï Cicɑk rɑ̈ɑ̈dh Rïp. Kɑ obëëdø kì Rïp gïti kɑ ɑ́thøw Sølømøn. Gïg-ɑ kyeelø møg-ɑ ɑ́gwøg yi Sølømøn bënn, kí peli wïje, bɑ ɑgwed kì yij Wɑ̈nyi Wɑ́ji Sølømøn. Isrɑil bëne ɑ́jɑɑg yi Sølømøn e obëëdø kì Yerusɑlem ki runn pyɑ̈r ɑ́ngwen. Kɑ Sølømøn kedh-ɑ kun-ɑ di kweyye, kɑ kony kì kɑɑl Debïd wïye. Codhe, ɑjɑ̈ggi Reöboɑm wɑ̈de kì keje. Kɑ Reöboɑm kedh-ɑ Cekïm, mɑ́ Isrɑil bëne ɑ́kedhi Cekïm be rønyii ɑ́ rɑ̈dh. Keny-ɑ ɑ́lïng Yeroboɑm wɑ̈d Nebɑt e ying-ɑ Rïp kun-ɑ ɑ́pɑ̈ɑ̈re keny-ɑ ɑ́bwøge yi Rɑ̈dh Sølømøn, ɑdwööge kì Rïp. Ácwööl-ɑ yi tyëng Isrɑil. Kɑ Yeroboɑm obëënø geki yɑɑy Isrɑil bëne, kɑ Reöboɑm köbbi yi gen kinni, “Wø ɑ́pïd yi wïyí ki tïj me teeg cɑrø. Wiy gwøg yöne ɑnɑn, kɑ wø ko pïd ni pïn-ɑ ɑ́pïde wøn, o yï ógöggi yi wøn cyee.” Alöggi Reöboɑm kinni, “Kedh wun, kɑ wu dwöög wun kì bɑng cyɑ̈ng ɑ́dɑ̈g.” Rɑ̈dh Reöboɑm jøgdøng-ɑ ɑ́ying tøg buri wïye, keny-ɑ ɑ́bëëd wïye e onëënø, ɑ́pyëje kinni, “Wu dwɑdd-ɑ kinni løøgɑ kwøbbi jiɑni kidï?” Alöggi gen kinni, “Keløg yï ogöögø ki bɑ̈ng jiɑni dicyɑ̈ngtïn, kɑ kwøbbi gen løøg yi yïn kidøøj, ge ceg-ɑ gwøg ki bɑ̈nggí ceth.” De møg-ɑ ɑ́cïïjii yi jøgdøngø ɑ́bɑnye, kɑ yöd e kedh-ɑ be pyëji yɑɑg gen jøg-ɑ ɑ́pïïdh gen, møg-ɑ wɑ̈jø ki en. Kɑ gï pyëje kinni, “Wu dwɑdd-ɑ kinni löggɑ kidï ki møg-ɑ ɑ́kwøb yi ji kinni, ‘Wiy gwøg yöne kì kömi wøn?’ ” Alöggi yɑɑg-ɑ ɑ́pïïdh gen kinni, “Løøg kwøbbi ji-ɑ ɑ́köbbi yïn kinni, ‘Wø ɑ́pïd yi wïyí ki tïj me teeg cɑrø, wiy gwøg yöne kì kömi wøn.’ Köbbí gen kinni, ‘Ngëdi lwedɑ, lwen-ɑ ɑkïj, dwøng kibøli pyeer wïyɑ!’ Köbbí gen kinni, ‘Wïyɑ wu ɑ́mëgge gwøg me peeg, de kömi gwøngɑni kïdhɑ’ kïdhø o tie pëngø. Wu ɑ́pwöd yi wïyɑ kɑ wunø, de wu ópwöd yi yɑn kɑ dël!’ ” Kɑ Yeroboɑm geki yɑy bï-ɑ yï Reöboɑm kì dɑ̈ɑ̈g cyɑ̈ng, ni kɑ ɑ́köbbe gïn kinni, “Dwöög wun yïɑ kì dɑ̈ɑ̈g cyɑ̈ng.” Ciggi jøgdøngø ɑ́wiy yi rɑ̈dh, kɑ kwøbbi yɑy løøge ki löggø mø rijjø. Kɑ kwøb-ɑ møg-ɑ ɑ́köbbii yi yɑɑg-ɑ ɑ́pïïdh gen, kinni, “Wïyɑ wu ɑ́mëgge gwøg me peeg, de kömi gwøngɑni kïdhɑ’ kïdhe o tie pëngø. Wu ɑ́pwöd yi wïyɑ kɑ wunø, de wu ópwöd yi yɑn kɑ dël!” Kwøbbi ji nuti lïngø yi rɑ̈dh, mɑ́ e bɑ Jwøng-ɑ Ácwɑ̈ɑ̈j ɑ ɑ́dwɑddii kinøw, kipe kinni o kwøbbi Jwøng-ɑ Ácwɑ̈ɑ̈j møg-ɑ ɑ́kwøb yi Akiyɑ̀ e köbb-ɑ Yeroboɑm wɑ̈d Nebɑt pɑ̈dhi gen kɑ̈jji gen. Kɑ lidh yi Isrɑil bëne kinni kwøbbi gen nuti lïngø yi Rɑ̈dh. Aløøg gen mø rɑ̈dh kinni, “Á ngø ɑ yod yi wɑ kì bɑng Debïd! Bong gïn-ɑ ólɑg yi wɑ kì bɑng wɑ̈d Yesì? Isrɑil, kedhí myërrí! Debïd, dööng yï nenn-ɑ gølí!” Kɑ Isrɑil kedh-ɑ yethi myërre. Adöng tyëng myërri Yeudiyɑ̀ ɑ́ gen ɑ jɑɑg yi Reöboɑm. Codhe, ɑör Adönirɑm jɑngi tïj yi Rɑ̈dh Reöboɑm. Kɑ bɑ̈lli yi tyëng Isrɑil bënn ki tuggi kïttì, kɑ othøø. Ajwɑn Reöboɑm dhwödhø, ɑkɑdhe yij yɑ̈ɑ̈y kyënyì kɑ reng-ɑ Yerusɑlem. Acög tyëng Isrɑil ge mɑ̈n ki gøl Yeudɑ̀ gïti dicyɑ̈ngtïn. Keny-ɑ ɑ́lïng tyëng Isrɑil kinni i Yeroboɑm dwöögø kì Rïp, ɑöd gen, kɑ cwööl bøli teedø bëne, ɑrøny ge gøn ɑ́ rɑ̈ɑ̈dh Isrɑil bëne. Kɑ döng ɑ́ gøl Yeudɑ̀ kete ɑ jɑɑg yi gøl Debïd. Kɑ Reöboɑm wɑ̈nh-ɑ Yerusɑlem, ɑcønge gøl Yeudɑ̀ geki gøl Ben Yɑmïn, kwɑnni gen bɑ ɑ́lïp miyø kí pyɑ̈r ɑ́bïdɑ̈g, jøg nyi nyïɑ̈ggi ki liny, kinni o ge kedhi gen be nyɑɑg ki Isrɑil, kipe kinni o lɑwø dwöög yï Reöboɑm wɑ̈d Sølømøn. De Cemɑiyɑ̀, ɑ́köbbi yi Jwøk kinni, “Köbbí rɑ̈ɑ̈dh Yeudiyɑ̀, ɑ løg Reöboɑm wɑ̈d Sølømøn geki gøl Yeudɑ̀, kí gøl Ben Yɑmïn, geki ji-ɑ kyeelø bënn kinni, Jwøng-ɑ Ácwɑ̈ɑ̈j okööbø kinni i wu ko kedhi be nyɑɑg ki nyiimï wun, ɑ løg wɑ̈ddi Isrɑil, døøg ngɑɑn gøle kipe møgɑni ɑ́kɑ̈ɑ̈l-ɑ yïɑ.” Kwøbbi Jwøng-ɑ Ácwɑ̈ɑ̈j ɑ́yïëy yi gen, codhe ɑdøøg ngɑn gøle. Kɑ kɑɑl Cekïm gëddi ki dörø yi Yeroboɑm, kɑ pëgg-ɑ yije. Acige dhwödhø kì kenyɑni, kɑ kɑɑl Penuel gëdde ki dörø. Kɑ Yeroboɑm okööbø ki pyëwe kinni, “Anɑn lɑwø bɑ men døøg gøl Debïd, Keløg ji møg kedh-ɑ bɑ ngɑl ki gëdhhì kì Kengi Jwøng-ɑ Ácwɑ̈ɑ̈j kì Yerusɑlem, yɑ bɑ men nɑ̈g yi gen, kɑ ge døøg-ɑ yï wïi gen Reöboɑm rɑ̈ɑ̈dh Yeudiyɑ̀.” Codhe, kɑ rɑ̈dh orumø kì ri møgɑni kidøøj, ɑgööge ki røjji dhɑb ɑ́ryew. Kɑ ji köbbe kinni, “Wu ɑ́mɑ̈gi ki keny me bɑ̈ɑ̈r wu nyi kedh-ɑ Yerusɑlem. Jwøgí èn Isrɑil, eni Jwøng-ɑ ɑ́kɑ̈ɑ̈l yïn wɑ̈g kì Rïp!” Kɑ rønyi dhɑb ɑ́kyel cïbe Betiil, kɑ men-ɑ kyeelø cïbe Dɑn. Kɑ menɑni ogöögø ki orøg, mɑ́ ji nyi kedh-ɑ be mɑlli røny-ɑ Betiil geki men-ɑ Dɑn. Kɑ Yeroboɑm ogëdø ki kɑ̈jji mɑ̈ddø møg nyi mɑ̈ddi kì wɑ̈thi ótøng. Kɑ orönyø ki ókwër kì kelli ji, møg-ɑ bɑ tyëng gøl Leebì. Kɑ Yeroboɑm ogöögø ki kwër me ni men-ɑ nyi gwøg kì Yerusɑlem, kì pyɑ̈rø wïdɑ́kyeel dwɑ̈tt, kɑ nyii ngɑ̈dø ki gëdhhì kì wïj këli lɑm. Kwërɑni nyi gwøg yi en ɑ Betiil, keny-ɑ nyi ngɑ̈dde røjø men-ɑ ɑ́gwøg yi en ki gëdhhì, kɑ yije cïbe ki ókwër. Kɑ kedh-ɑ be ngɑl ki gëdhhì kì wïj këli lɑm men-ɑ Betiil, kì cyɑ̈nggi dwɑ̈y pyɑ̈rø wïdɑ́bïj kì bïdɑ̈ɑ̈g dwɑ̈tt, cyɑ̈ng-ɑ ɑ́kwɑnye ɑ́ cyɑ̈ɑ̈ng kwër kì Isrɑil. Kɑ jɑlkwøbbi Jwøk obëënø e kɑ̈ɑ̈l-ɑ Yeudiyɑ̀, e ör-ɑ Betiil yi Jwøng-ɑ Ácwɑ̈ɑ̈j. Áwɑ̈nhi e Yeroboɑm ócungø kì buti këli lɑm e orɑ̈bø ki gëdhhì. Aryeere e köbb-ɑ këli lɑm ki møg-ɑ ɑ́kwøb yi Jwøng-ɑ Ácwɑ̈ɑ̈j kinni, “Këli lɑm! Këli lɑm! Jwøng-ɑ Ácwɑ̈ɑ̈j ɑ́kööb kinni, dɑ wɑ̈d men-ɑ ónywøl kì gøl Debïd, nyinge bɑ Yöciyɑ̀. Ókwërri kɑ̈jji mɑ̈ddø óngɑl yi en kì kömí, gen ɑ ókwërr-ɑ ngɑ̈dø ki gëdhhì kì kömí ɑnɑn. Kömí órɑ̈ɑ̈b yi en ki cu ji.” Kɑ jɑlɑni okööbø kinni, “Këli lɑm men ópyëëd kɑ búr ókedhhø kì wïje. O yï yïëëy kinni yɑ ɑ́ör-ɑ yi Jwøng-ɑ Ácwɑ̈ɑ̈j.” Rɑ̈dh Yeroboɑm keny-ɑ ɑ́lïnge møg-ɑ ɑ́köbbi këli lɑm yi jɑlkwøbbi Jwøk, ɑrïïje cinge kì wïj këli lɑm, kɑ okööbø kinni, “Mɑgu en!” Kɑ bɑn-ɑ ɑ́rïïje bɑnge ceg-ɑ ì thwøøw, kɑ ódhɑ̈lø dolø. Kɑ këli lɑm ópyëdø, kɑ búr ókedhhø ni kɑ ɑ́kwøbii yi jɑlkwøbbi Jwøk, kinni ge ɑ́kwøb-ɑ yi Jwøng-ɑ Ácwɑ̈ɑ̈j, Alöggi rɑ̈dh, kɑ jɑlkwøbbi Jwøk köbbe kinni, “Yɑ kwɑjj-ɑ yïn, kwɑjjí Jwøgí, Jwøng-ɑ Ácwɑ̈ɑ̈j kiperɑ, o cingɑ døøge keje!” Akwɑjji Jwøng-ɑ Ácwɑ̈ɑ̈j yi jɑlkwøbbi Jwøk, kɑ cingi rɑ̈dh døøg-ɑ keje ni kɑ ɑ́bëëde kì tyeli mɑl. Codhe ɑköbbi jɑlkwøbbi Jwøk yi rɑ̈dh kinni, “Bïí kedh wɑ, o yï cyɑ̈ɑ̈m ki gïncɑm. Orume, o yï nëngɑ ki köögi!” Alöggi jɑlkwøbbi Jwøk kinni, “Cɑgg yɑ mëggí budi kɑ̈rí, yɑ pɑ kedh, o yɑ pɑ cyɑ̈mø ki gïncɑm, o yɑ pɑ mɑ̈dhø ki pï kì keny, mɑ́ yɑ ɑ́köbbi yi Jwøng-ɑ Ácwɑ̈ɑ̈j kinni, i yɑ ko cyɑ̈ɑ̈m ki gïncɑm, kɑ yɑ ko mɑ̈ɑ̈dh ki pï, kɑ yɑ ko dwöög ki yuu-ɑ ɑ́kedh yi yɑn.” Adøøge ki yöö megø, kɑ yuu-ɑ ɑ́bëëne Betiil wiye. Ádɑ jɑltöng me yöø, me bëëdø kì Betiil. Wɑ̈dde ɑ́kedhi yïe, kɑ gø köbbi gen gïg-ɑ ɑ́gwøg yi jɑlkwøbbi Jwøk men-ɑ ɑ́kɑ̈ɑ̈l Yeudiyɑ̀ kì cyɑ̈ngɑni ceth. Kɑ gø köbbi gen møg-ɑ ɑ́köbbi rɑ̈dh bënn. Apyëëj gen yi wïyi gen kinni, “Ákɑ̈l-ɑ yuu-ɑ́?” Anyudhii yuu-ɑ ɑ́kɑ̈ɑ̈l yi jɑlkwøbbi Jwøk men-ɑ ɑ́bï kì Yeudiyɑ̀ yi wɑ̈dde. Kɑ wɑ̈dde köbbe kinni, “Twööj wun sïrïj kömi ɑderø!” Kɑ sïrïj twööj gen köme. Codhe, kɑ kɑdh-ɑ kömi ɑderø. Akedhe bɑng Jɑlkwøbbi Jwøk. Kɑ gø yuude e obëëdø kì thɑ óthurø. Apyëje gøn kinni, “Bene yïn jɑlkwøbbi Jwøk men-ɑ ɑ́bï e kɑ̈ɑ̈l Yeudiyɑ̀?” Kɑ okööbø kinni, “Yɑn!” Aköbbe gøn kinni, “Kedhi wɑ pɑc, o yï cyɑ̈ɑ̈m ki gïncɑm.” Alögge kinni, “Yɑ pɑ cuggi døøgø, wɑ pɑ kedh, o yɑ pɑ cyɑ̈mø ki gïncɑm, wɑlɑ̀ yɑ pɑ mɑ̈dhø ki pï kì keny, mɑ́ yɑ ɑ́köbbi yi Jwøng-ɑ Ácwɑ̈ɑ̈j kinni, i yɑ ko cyɑ̈ɑ̈m ki gïncɑm, wɑlɑ̀ yɑ ko mɑ̈dhi ki pï kì kunɑni, i kɑ yɑ ko dwöög ki yuu-ɑ ɑ́kedh yi yɑn.” Aköbbii yi jɑltöng-ɑ yöø, ɑ løg jɑltöng-ɑ ɑ́yuud Betiil kinni, “Yɑ bɑ jɑltöng ni yïn thyew. O yɑ ɑ́köbb-ɑ yi wëywödø ki møg-ɑ ɑ́kwøb yi Jwøng-ɑ Ácwɑ̈ɑ̈j kinni, ‘Kedh, kɑ dwöög gølí, o cyɑ̈me ki gïncɑm, o mɑ̈dhe ki pï.’ ” Gø ɑ́wënye. Codhe ɑdøøge, kɑ omɑ̈dhø ki pï, kɑ ocyɑ̈mø ki gïncɑm kì gøle. Kɑ̈ng-ɑ́ nudd ge ocyɑ̈mø, kɑ kwøbbi Jwøng-ɑ Ácwɑ̈ɑ̈j cïbe dhø jɑltöng men-ɑ ɑ́dwöögii. Kɑ jɑlkwøbbi Jwøk, jɑl-ɑ ɑ́kɑ̈ɑ̈l Yeudiyɑ̀ köbbe kinni, “Jwøng-ɑ Ácwɑ̈ɑ̈j okööbø kinni, ‘Mɑ́ dhøgɑ ɑ́pyem yi yïn, kɑ møg-ɑ ɑ́cïgɑ yïn ocögø ge pɑ mïdhi yi yïn, kɑ yï ódwöögø, kɑ yï ocyɑ̈mø ki gïncɑm, kɑ yï omɑ̈dhø ki pï kì keny-ɑ ɑ́köbbɑ yïn kinni, yï ko mɑ̈ɑ̈dh ki pï, wɑlɑ̀ yï ko cyɑ̈ɑ̈m ki gïncɑm kì yije, yï pɑ koony pɑ kweyyí.’ ” Keny-ɑ ɑ́rum gen ki cɑm, kɑ jɑltöng-ɑ yöø sïrïj twööje kömi ɑderø, ɑ́ me köme kedh yi jɑl-ɑ ɑ́dwöög yi en. Akedhe, kɑ rødh yi ngur kì yöö, kɑ nɑ̈g yi ngurɑni. Kɑ obuddø kì yij yöö e thøø, o ɑderø geki ngur ócungø kì bute. Kɑ jøg møøgø kɑ̈l-ɑ kenyɑni, ɑlidh gen dhɑnhø e thøø kì yij yöö, kí ngur e ócungø kì bute. Akedh gen, kɑ møgɑni kwøb gen kì kɑɑl-ɑ yije bëëd yi jɑltöng-ɑ yöø. Kɑ jɑltöng men-ɑ ɑ́dwöögii kì yöö olïngø, ɑkööbe kinni, “Bɑ jɑlkwøbbi Jwøk men-ɑ ɑ́pyem dhø Jwøng-ɑ Ácwɑ̈ɑ̈j. Ákölli ngur yi Jwøng-ɑ Ácwɑ̈ɑ̈j. Köme ɑ́pɑ̈ɑ̈r yi ngur, kɑ gø nɑ̈ge, ni møg-ɑ ɑ́kwøb yi Jwøng-ɑ Ácwɑ̈ɑ̈j ceth.” Aköbbe wɑ̈dde kinni, “Twööju sïrïj kömi ɑderø.” Kɑ gø twöj gen. Akedhe kɑ dhɑnhø yuude e obuddø kì yöö, o ngur geki ɑderø ócungø kì bute. Dhɑnhø nuti cɑmø yi ngur, o ɑderø nuti nɑ̈ɑ̈g en. Kɑ jɑlkwøbbi Jwøk, tïng yi jɑltöng, kɑ gø cïbe kömi ɑderø, ɑdwööge gøn. Ákɑ̈ɑ̈l kɑɑl-ɑ bëëd yi jɑltöng-ɑ yöø kɑ per kinni, o ywøg, o kony. Akoonye gøn keny-ɑ ókoonyii, kɑ gø ywøg gen, e cem-ɑ, “Yeki ómïɑ yø!” Keny-ɑ ɑ́rume konyø, kɑ jɑltöng wɑ̈dde köbbe kinni, “Keny-ɑ óthøwɑ, kɑ yɑ koony wun keny-ɑ koony jɑlkwøbbi Jwøk èn, pyëël wun yɑn bute. Mɑ́ kwøbbi Jwøng-ɑ Ácwɑ̈ɑ̈j møg-ɑ ɑ́töng yi en kiper këli lɑm kì Betiil, geki ókwër kì kɑ̈ddi Sɑmɑriyɑ̀, ópɑ̈dhi kɑ̈jji gen ceth.” Yeroboɑm nuti yewø kì bɑng cwöbi møgɑni, de ɑ́yöd e pëgg-ɑ be røny ki ókwër kì kelli ji yøw. Ngɑn-ɑ dwɑdde rønyø ɑ́ ókwëri kej mɑ̈ddø, nyi wɑ̈dhe’ rønyø yøw, cɑgg e pɑth ki ngeti gøl kwër. Bene ɑ bɑnge yïddi gøl Yeroboɑm ki cyën-ɑ ɑ́pɑ̈ɑ̈dh wïj gøle. Kɑ Abiyɑ̀ wɑ̈d Rɑ̈dh Yeroboɑm mɑɑg piny yi rɑ̈ɑ̈m dële. Kɑ Yeroboɑm cyëge köbbe kinni, “Kedh kɑɑng rií, o yï dhɑ̈lí ki ngijø yïn ɑ́ cï Yeroboɑm, kɑ yï kedhí Cilø. Akiyɑ̀ jɑltöng, ngɑn-ɑ ɑ́kööb cøn kinni i yɑ ógöögø ki rɑ̈dh, bëëd ɑ kunɑni. Kɑ yï kɑ̈ɑ̈d ki ópùn pyɑ̈rø, kí ópùni nywøli yenh, kí ɑdhɑ̈dh e pɑ̈ng yi møøw kïc.” Kɑ cï Yeroboɑm ogöögø kinøw, codhe ɑkedhe Cilø, gøl Akiyɑ̀. Akiyɑ̀ rum cøørø yi yöø, de Akiyɑ̀ rumø ki köbbø yi Jwøng-ɑ Ácwɑ̈ɑ̈j kinni, “Cï Yeroboɑm obëënø e bï-ɑ be pëjjø ki kwøb kì yïí, kipe wɑ̈de me dële rɑ̈mø. Köbbí kinnï kí kinnï, keny-ɑ óbëëne, óbï ree kɑɑng en, kipe kinni o cöge e pɑ ngij.” Keny-ɑ ɑ́wɑ̈nhi cï Yeroboɑm, ree ɑ́gwøge e nɑ ngɑn megø yøw. Keny-ɑ ɑ́lïngi ywøøg tyelle e obëënø kì dhø ød yi Akiyɑ̀, ɑkööb Akiyɑ̀ kinni, “Bïí, cï Yeroboɑm! Yïde ɑ cyɑ̈dhí rií kɑɑng yïn? Yïɑ dɑ wöödø me teg, men köbbɑ yïn. Kedh köbbí Yeroboɑm kinni, Jwøøg Isrɑil, Jwøng-ɑ Ácwɑ̈ɑ̈j ɑ́kööb kinni, ‘Yï ɑ́tïngɑ mɑl kì kelli ji, kɑ yï gwøgɑ yïn ɑ́ jɑngi jiɑ Isrɑil, lɑwø ɑ́yöödɑ wɑ̈g kì gøl Debïd, kɑ mëggɑ yïn. De yï nuti bëëdø ni Debïd bɑ̈ngɑ, ɑ ɑ́mïdhi ciggɑ bënn, kɑ ócyɑ̈dhø kì bɑngɑ ki pyëw ɑ́kyel, e nyi gwøg-ɑ gïn-ɑ dwɑddi yi yɑn ceth. Yï ɑ́göög ki rɑj mø lod møg-ɑ ɑ́gwøg yi tyëng-ɑ ɑ́kwöngi kì bølí. Kɑ yï ókedhø kɑ rií göggí ki jwögg møøgø, kí ngïjjì møg rënyi pyëwɑ, kɑ yɑ weddí. Kɑ ɑ́rum bëëde kinøw, yɑ kɑ̈n-ɑ kömi gøl Yeroboɑm ki ryɑ̈g; cwøw ónɑ̈g yi yɑn kì gøl Yeroboɑm, gen ɑ møg-ɑ ɑmɑgg ki møg-ɑ cyɑ̈dhi wɑ̈thi gen bënn. Ngeti gøl Yeroboɑm men-ɑ óthøw kì pɑc ócɑm-ɑ yi gwögg. O men thøw kì pɑ̈l cɑm-ɑ yi winy, mɑ́ Jwøng-ɑ Ácwɑ̈ɑ̈j ɑ ɑ́kööb.’ ” Kɑ cï Yeroboɑm köbbi yi Akiyɑ̀ kinni, “Yïn, dhwöödh døøg gølí kun-ɑ ɑ́kɑ̈ɑ̈l. De nyelthinh bɑ men thøw ceth. Óywøg yi Isrɑil bëne, kɑ kony, mɑ́ e kete kì gøl Yeroboɑm ɑ ókïdhi yij rörø. Mɑ́ Jwøøg Isrɑil, Jwøng-ɑ Ácwɑ̈ɑ̈j, pyëwe med kɑ en kete kì gøl Yeroboɑm. Isrɑil órönyi yi Jwøng-ɑ Ácwɑ̈ɑ̈j ki rɑ̈dh men-ɑ ónɑ̈g gøl Yeroboɑm, o møgɑni ójwɑn cwöbø ceth. Isrɑil ógøj yi Jwøng-ɑ Ácwɑ̈ɑ̈j, kɑ onɑyyø ni thyɑngø kì yethi pï mø rïngi gɑ thew; Isrɑil ódhööye wɑ̈g kì piny-ɑ døj èn, piny-ɑ ɑ́mëgge kweyyi gen, kɑ ge kïdhi løøg Nɑm Porɑt. Mɑ́ pyëwe ɑ́rënyi ki gen, keny-ɑ ɑ́göggi gen ri gen ki ngïjji Aceerɑ̀. Isrɑil óbɑny yi en kipe orøng-ɑ ɑ́gwøg yi Yeroboɑm, kɑ Isrɑil göjje orøg.” Kɑ cï Yeroboɑm odhwödhø, ɑkedhe Tirdhɑ̀. E cïb-ɑ tyele wïj tëd ceth, kedh nyelthinh othøø. Kɑ kony, ɑywøøgii yi Isrɑil bëne ni kɑ ɑ́kwøbii yi Jwøng-ɑ Ácwɑ̈ɑ̈j ki dhø bɑ̈nge, Akiyɑ̀ jɑltöng. Kwï gïg-ɑ ɑ́gwøg yi Rɑ̈dh Yeroboɑm bënn geki lìny-ɑ ɑ́nyɑge bɑ ɑgwed kì yij Wɑ̈nyi Rɑ̈nhi Isrɑil. Kwɑnni runn-ɑ ɑ́jyɑ̈ɑ̈g Rɑ̈dh Yeroboɑm bɑ pyɑ̈r ɑ́ryew, codhe ɑkedhe kun-ɑ di kweyye, kɑ Nɑdɑb wɑ̈de røøny keje ɑ́ rɑ̈dh. Reöboɑm wɑ̈d Sølømøn runne ɑ́bëëd gɑ pyɑ̈r ɑ́ngwen wïdɑ́kyel keny-ɑ ɑ́rønyii ɑ́ rɑ̈ɑ̈dh Yeudiyɑ̀. Kɑ ojyɑ̈gø ki runn pyɑ̈rø wïdɑ́bïryew kì Yerusɑlem kɑɑl-ɑ ɑ́myeg yi Jwøng-ɑ Ácwɑ̈ɑ̈j kì kelli kɑ̈ddi Isrɑil bënn ɑ́ men cölli nyinge. Meye cwøl ɑ́ Nɑɑmɑ̀ nyɑɑr tyëng Amön. Kɑ tyëng Yeudiyɑ̀ ogöögø ki gïnrɑj kì bøli Jwøng-ɑ Ácwɑ̈ɑ̈j mɑ ɑ́rënyi pyëwe, kweyyi gen ɑ́lod gen ki orøg. Kɑ ge ogëdø thyew ki kɑ̈jji mɑ̈ddø mø jwögg-ɑ pɑth, geki löjji Aceerɑ̀ kì wɑ̈thi ótøng-ɑ døngø, kí thɑ̈thi yenh-ɑ tïbbi gen døngø. Ádɑ ɑ́mɑ̈jji keng møg-ɑ cwøw kí mɑ̈nn kì kɑ̈jji mɑ̈ddø thyew kì yij pödhø. Ge ɑ́ngøy gïgrijjø møg-ɑ gøggi yi jurr-ɑ kyeelø, jurr-ɑ ɑ́cyeddi yi Jwøng-ɑ Ácwɑ̈ɑ̈j kì pinyɑni kiper Isrɑil. Kì bïïj runni Reöboɑm ɑ́ rɑ̈dh, Cicɑk rɑ̈ɑ̈dh Rïp ɑ́bï Yerusɑlem ki liny. Kɑ jɑmmi Kengi Jwøng-ɑ Ácwɑ̈ɑ̈j geki jɑmmi gøldwøng kwɑnye. Jɑmmì bënn ɑ́kwɑnye geki köddi dhɑb møg-ɑ ɑ́gwøg yi Sølømøn. Kɑ kɑ̈jji gen gwøg yi Rɑ̈dh Reöboɑm gɑ köddi dilɑl, ɑmëgge gïn pëjji liny møg-ɑ kor dhø gøldwøng. Kenyi kedhi rɑ̈dh Kengi Jwøng-ɑ Ácwɑ̈ɑ̈j, ge nyii kwɑnyø yi pëjji jøkor, o ge nyi dwøøg ød jøkor. Kwï gïg-ɑ ɑ́gwøg yi Rɑ̈dh Reöboɑm bënn, bɑ ɑgwed kì yij Wɑ̈nyi Rɑ̈nhi Yeudiyɑ̀. O ɑ́dɑ liny mɑ ɑ́nyɑg ceth yi Rɑ̈dh Reöboɑm geki Yeroboɑm kì yethi runn bënn. Akedhi Reöboɑm kun-ɑ di kweyye, kɑ kony kì kɑɑl Debïd. Codhe, kɑ wɑ̈de Abiyɑ̀ røøny keje ɑ́ rɑ̈dh. Keny-ɑ ɑ́göög runni Yeroboɑm wɑ̈d Nebɑt ki pyɑ̈rø wïdɑ́bïdɑ̈g kì yij lɑwø, ɑ ɑ́jɑ̈ggi Abiyɑ̀ kì Yeudiyɑ̀. Ájyɑ̈ɑ̈g ki runn ɑ́dɑ̈g kì Yerusɑlem. Meye cwøl ɑ́ Mɑɑkɑ̀ nyɑɑr Abcɑlöm. Kɑ ogöögø ki orøg me ni men-ɑ ɑ́gwøg yi wïye cøn. Pyëwe nuti bëëdø ɑ́ óbödh kì bøli Jwøge, Jwøng-ɑ Ácwɑ̈ɑ̈j, ni Debïd kweye. De Abiyɑ̀ ɑ́nëngi yi Jwøge, Jwøng-ɑ Ácwɑ̈ɑ̈j ki wɑ̈d me jɑ̈ggi kì bɑnge, o mïdhe Yerusɑlem. Mɑ́ Debïd ɑ́bëëd e nyi gwøg-ɑ gïn-ɑ cïgii yi Jwøng-ɑ Ácwɑ̈ɑ̈j. O nuti pɑ̈nyi pëmø ki gïn-ɑ ceg yi Jwøng-ɑ Ácwɑ̈ɑ̈j, den-ɑ́ ri kwøbbi Uriyɑ̀ wɑ̈d Kit kete ɑ ri gen ɑ́bɑ̈jje. Liny-ɑ ɑ́cɑg yi Reöboɑm geki Yeroboɑm ɑ́wɑ̈dhi ri Abiyɑ̀ e nudd e ónyïɑ̈ggø ki runn-ɑ ɑ́nëëne bënn. O gïg-ɑ kyeelø møg-ɑ ɑ́gwøg yi Abiyɑ̀ bɑ ɑgwed kì yij Wɑ̈nyi Rɑ̈nhi Yeudiyɑ̀. Akedhi Abiyɑ̀ kun-ɑ di kweyye, kɑ kony kì kɑɑl Debïd. Arøøny Asɑ̀ wɑ̈de keje ɑ́ rɑ̈dh. Asɑ̀ ɑ́røny ɑ́ rɑ̈ɑ̈dh Yeudiyɑ̀, e runni Yeroboɑm rɑ̈ɑ̈dh Isrɑil bɑ pyɑ̈r ɑ́ryew kì yij lɑwø. Kɑ ojyɑ̈gø ki runn pyɑ̈r ɑ́ngwen wïdɑ́kyel kì Yerusɑlem. Nyingi wønge bɑ Mɑɑkɑ̀ nyɑɑr Abcɑlöm. Asɑ̀ ɑ́gøgg-ɑ gïg med kì pyëw Jwøng-ɑ Ácwɑ̈ɑ̈j ni Debïd kweye. Kɑ ɑ́mɑ̈jji keng møg-ɑ cwøw kí mɑ̈nn cyedde kì yij pödhø. Kɑ ngïjji jwögg-ɑ pɑth, møg-ɑ ɑ́gwøg yi wëëg gen bënn tuure wɑ̈g. Kɑ Mɑɑkɑ̀ wønge pɑ̈de kì keny-ɑ ɑ́cwøllii ɑ́ meyi rɑ̈dh kipe kɑ ɑ́gööge ki lööj Aceerɑ̀ jwøng-ɑ pɑth. Löje menɑni ɑ́ngøl piny yi Asɑ̀ kɑ gø rɑ̈be kì töör Kidrön. Cɑgg ɑ́ kɑ ɑ́cöge e kɑ̈jji mɑ̈ddø nuti tyëëg en ki cøør piny, pyëw Asɑ̀ ɑ́bëëd e mïdh-ɑ kwøbbi Jwøng-ɑ Ácwɑ̈ɑ̈j kì yethi runn-ɑ ɑ́jyɑ̈ɑ̈ge bënn. Jɑmmi dhɑb kí ɑ́tegø møg-ɑ ɑ́thyëye Jwøng-ɑ Ácwɑ̈ɑ̈j geki møg-ɑ ɑ́thyey yi wïye bënn, gï ɑ́kïdhe yij Kengi Jwøng-ɑ Ácwɑ̈ɑ̈j. Ádɑ liny kì kɑɑm Asɑ̀ geki Bɑcɑ̀ rɑ̈ɑ̈dh Isrɑil ki runn-ɑ ɑ́bëëd gen ge onëënø bënn. Kɑ Bɑcɑ̀ rɑ̈ɑ̈dh Isrɑil kedh-ɑ Yeudiyɑ̀ be mɑ̈nyø, kɑ Rɑmɑ̀ gere ki dörø, kɑɑlɑni ying-ɑ dhø yuu-ɑ kedhi Yeudiyɑ̀, kɑ bong-ɑ ngɑn kedhi Yeudiyɑ̀, wɑlɑ̀ ngɑn bï wɑ̈g kì yije. Codhe, kɑ dhɑb kí ɑ́tegø men-ɑ döngø kì kɑ̈nni Kengø geki gøldwøng kwɑny bëne yi Asɑ̀, ɑmëgge gïn bɑ̈ngge, kɑ gï muuj gen Benɑdɑd wɑ̈d Tɑbrimön wɑ̈d Kedhïön. Benɑdɑd bɑ rɑ̈ɑ̈dh Arɑm, o jyɑ̈ɑ̈g ɑ Dimɑceg. Kɑ Rɑ̈dh Benɑdɑd köbbi yi Asɑ̀ kinni, “Dɑ lwöbø mɑ ɑ́nywɑg yi wɑ kì kɑɑmee ryeet, kí kɑɑm wïyí geki wïyɑ. Yïn ɑ ödɑ èn ki jwödhi dhɑb kí ɑ́tegø. Kedh pɑ̈d lwöm-ɑ kɑɑm wun, wuki Bɑcɑ̀ rɑ̈ɑ̈dh Isrɑil, o nyege kì yuuɑ.” Rɑ̈dh Benɑdɑd ɑ́yïëy ki kwøbbi Rɑ̈dh Asɑ̀, kɑ pëjji liny öre ki yɑy, kɑ ge kedh-ɑ be pɑ̈ɑ̈r kömi kɑ̈ddi Isrɑil. Kɑ Iyön, kí Dɑn, kí Abel Bet Mɑɑkɑ̀, kí myërri kömi Tɑɑy Gɑlelì, geki myërri Nɑptɑlì mɑg gen bënn. Keny-ɑ ɑ́lïngi møgɑni yi Bɑcɑ̀, ɑwïye ki geri Rɑmɑ̀, kɑ pëgg-ɑ Tirdhɑ̀. Kɑ Rɑ̈dh Asɑ̀ oödø ki ji kì Yeudiyɑ̀, møg kedhi be tëëri ópɑddi kïttì geki yenh-ɑ ɑ́gëëd ki döri Rɑmɑ̀ yi Bɑcɑ̀, bong dhɑnhø mɑ ɑ́döng e nuti kedhø, kɑ gïgɑni gere Midhpɑ̀ geki Gebɑ̀ kì piny gøl Ben Yɑmïn. Gïg-ɑ kyeelø møg-ɑ ɑ́gwøg yi Asɑ̀, kí wɑ́ji tege, kí kɑ̈dd-ɑ ɑ́gere, bɑ ɑgwed kì yij Wɑ̈nyi Rɑ̈nhi Yeudiyɑ̀. Keny-ɑ ɑ́yöe, bɑ tyelle ɑ ɑ́rɑ̈ɑ̈m yøw. Akedhi Asɑ̀ kun-ɑ di kweyye, kɑ kony kì kɑɑl kweye Debïd. Kɑ Yöcɑpɑt wɑ̈de røøny keje ɑ́ rɑ̈dh. Nɑdɑb wɑ̈d Yeroboɑm ɑ́røny ɑ́ rɑ̈dh kì Isrɑil, e runni rɑ̈dh Asɑ̀ bɑ ɑ́ryew kì yij lɑwø. Kɑ ojyɑ̈gø ki runn ɑ́ryew. Kɑ ogöögø ki orøg kì bøli Jwøng-ɑ Ácwɑ̈ɑ̈j ni wïye, ɑ ɑ́göjji Isrɑil orøg. Kɑ Bɑcɑ̀ wɑ̈d Akiyɑ̀ kì gøl Isɑkɑr Nɑdɑb lebbe, kɑ gø nɑ̈ge, e tyeg-ɑ Gibethön, kɑɑl Pelistiyɑ̀, geki yɑɑy Isrɑil bëne. Nɑdɑb ɑ́nɑ̈g yi Bɑcɑ̀ e runni Asɑ̀ Rɑ̈ɑ̈dh Yeudiyɑ̀ bɑ ɑ́dɑ̈g kì yij lɑwø. Codhe, kɑ Bɑcɑ̀ ogöögø ɑ́ rɑ̈dh kì kej Nɑdɑb. Bɑcɑ̀ keny-ɑ ɑ́kwɑnye lɑwø ceth, ɑ ɑ́cɑ̈ge ki nɑ̈gi gøl Yeroboɑm. Bong dhɑnhø mɑ ɑ́döng kì gølɑni ni møg-ɑ ɑ́kwøb yi Jwøng-ɑ Ácwɑ̈ɑ̈j ki dhø bɑ̈nge Akiyɑ̀ jɑl Cilø, kì bɑng gööj orøng-ɑ ɑ́gwøg yi Yeroboɑm, ɑ ɑ́göjje Isrɑil orøg, kɑ pyëw Jwøng-ɑ Ácwɑ̈ɑ̈j órënyø ki mendwøng. Kwï gïg-ɑ ɑ́gwøg yi Nɑdɑb bënn, bɑ ɑgwed kì yij Wɑ̈nyi Rɑ̈nhi Isrɑil. Ádɑ liny kì kɑɑm Asɑ̀ geki Bɑcɑ̀ rɑ̈ɑ̈dh Isrɑil kì yethi runn-ɑ ɑ́jyɑ̈ɑ̈g gen bënn. Ri dɑ̈ɑ̈g runni Asɑ̀ rɑ̈ɑ̈dh Yeudiyɑ̀ kì yij lɑwø, ɑ ɑ́jɑ̈ggi Bɑcɑ̀ wɑ̈d Akiyɑ̀ kì Isrɑil, Isrɑil bëne ɑ́jɑɑge ki runn pyɑ̈r ɑ́ryew wïdɑ́ngwen e bëëd ɑ Tirdhɑ̀. Ágöög ki gïnrɑj kì bøli Jwøng-ɑ Ácwɑ̈ɑ̈j, ni Yeroboɑm, ɑ ɑ́göjji Isrɑil orøg. Jwøng-ɑ Ácwɑ̈ɑ̈j kwøb ɑ́cïbe dhø Yeeu wɑ̈d Aɑnɑnì e cɑy-ɑ Bɑcɑ̀ kinni, “Yï ɑ́tïngɑ mɑl kì yij tør, kɑ yï gwøgɑ yïn ɑ́ jɑngi jiɑ Isrɑil, de yï ɑ́yöd yï kɑ̈l-ɑ yuu orøøg Yeroboɑm, kɑ jiɑ Isrɑil göjjí orøg, o pyëwɑ rënyi yi gen. Anɑn wïj gøl Bɑcɑ̀ tɑ̈ɑ̈yɑ’ piny. Gølí ógwøg yi yɑn e nɑ gøl Yeroboɑm wɑ̈d Nebɑt. Ngeti gøl Bɑcɑ̀ men-ɑ óthøw kì pɑc, cɑm-ɑ yi gwögg, o men thøw pɑ̈l cɑm-ɑ yi winy.” Kwï kwøbbi Bɑcɑ̀ geki gïg-ɑ ɑ́gwøge bɑ ɑgwed kì yij Wɑ̈nyi Rɑ̈nhi Isrɑil. Akedhi Bɑcɑ̀ kun-ɑ di kweyye, kɑ kony kì Tirdhɑ̀. Kɑ Elɑ̀ wɑ̈de røøny keje ɑ́ rɑ̈dh. O thyew wööni Jwøng-ɑ Ácwɑ̈ɑ̈j men-ɑ ɑ́kwøb yi jɑltöng Yeeu wɑ̈d Anɑnì, e cɑy-ɑ Bɑcɑ̀ geki gøle, bɑ kinni gøl Bɑcɑ̀ ógöögø ni gøl Yeroboɑm, gøl-ɑ ɑ́tɑ̈ɑ̈y piny yi Bɑcɑ̀ kiree. Ócɑy ni menɑni kipe gïgrijjø bënn møg-ɑ ɑ́gwøg yi en, ɑ ɑ́rënyi pyëw Jwøng-ɑ Ácwɑ̈ɑ̈j. Elɑ̀ wɑ̈d Bɑcɑ̀ ɑ́røny ɑ́ rɑ̈ɑ̈dh Isrɑil, e runni Asɑ̀ rɑ̈ɑ̈dh Yeudiyɑ̀ bɑ pyɑ̈r ɑ́ryew wïdɑ́bïkyel kì yij lɑwø. Isrɑil ɑ́jɑɑg yi en ki runn ɑ́ryew e bëëd ɑ Tirdhɑ̀. Kɑ lugi rɑw yi Dhimrì jɑngi budi yɑ̈the, kɑ Elɑ̀ nɑ̈ɑ̈ge gøl Ardhɑ̀ kì Tirdhɑ̀, e Elɑ̀ omɑ̈dhø ki møgø. Dhimrì ɑ́kedhi gølɑni kɑ Elɑ̀ nɑ̈ge kì pyɑ̈r ɑ́ryew wïdɑ́bïryeew runni Asɑ̀ rɑ̈ɑ̈dh Yeudiyɑ̀ kì yij lɑwø. Codhe kɑ lɑwi Elɑ̀ kwɑny yi Dhimrì. Dhimrì keny-ɑ ɑ́kwɑnye lɑwø ceth, kɑ tyëng gøl Bɑcɑ̀ nɑ̈ge bënn, Wɑddi gøl Bɑcɑ̀ kí mɑ̈dhhe møg-ɑ cwøw ɑ́nɑ̈g yi Dhimrì bënn. Gøl Bɑcɑ̀ bëne ɑ́nɑ̈g yi Dhimrì ni møg-ɑ ɑ́kwøb yi Jwøng-ɑ Ácwɑ̈ɑ̈j kì ri Bɑcɑ̀ ki dhø Yeeu jɑltöng. Bɑ kipe orøøg Bɑcɑ̀ kí orøøg Elɑ̀ wɑ̈de, kí rɑ̈ji gen, kí göny-ɑ ɑ́göjje Isrɑil orøg, ɑ ɑ́rënyi pyëw Wë Jwøøg Isrɑil. Kwï gïg-ɑ ɑ́gwøg yi Elɑ̀ bënn bɑ ɑgwed kì yij Wɑ̈nyi Rɑ̈nhi Isrɑil. Dhimrì ɑ́jyɑ̈ɑ̈g ki cyɑ̈ng ɑ́bïryew kì Tirdhɑ̀, e runni Asɑ̀ rɑ̈ɑ̈dh Yeudiyɑ̀ bɑ pyɑ̈r ɑ́ryew wïdɑ́bïryew kì yij lɑwø. Yɑɑy Isrɑil ɑ́bëëd e ying-ɑ be tyegi Gibethön kì Pelistiyɑ̀. Kɑ yɑy olïngø e ying-ɑ be tyëg kinni i Dhimrì ree løg en, kɑ rɑ̈dh nɑ̈ge. Arøøny Ómrì, pënyi liny yi Isrɑil bëne ɑ́ rɑ̈dh dicyɑ̈ngɑni kì kej tyëg. Kɑ Ómrì odhwödhø geki yɑɑy Isrɑil bëne, kɑ ge kedh-ɑ be tyegi Tirdhɑ̀. Keny-ɑ ɑ́lïdhi Dhimrì kinni kɑɑl ɑ́mɑg, ɑkedhe øn-ɑ teg kì gøldwøng, kɑ gø rɑ̈ɑ̈be köme, ɑthøwe yij mɑc. Menɑni bɑ kipe orøg men-ɑ ɑ́gwøg yi en, ɑ ɑ́rënyi pyëw Jwøng-ɑ Ácwɑ̈ɑ̈j, kí per ngøy-ɑ ɑ́ngøye orøøg Yeroboɑm, ɑ ɑ́peej Isrɑil yij orøg. Gïg-ɑ kyeelø bënn møg-ɑ ɑ́gwøg yi Dhimrì, ki løng-ɑ ɑ́løge ree, bɑ ɑgwed kì yij Wɑ̈nyi Rɑ̈nhi Isrɑil. Kɑ tyëng Isrɑil ri gen pɑ̈ngi gen gɑ ɑkudd ɑ́ryew. Akud ɑ́kyel dwɑdd-ɑ rønyi Tibnì wɑ̈d Gïnɑth ɑ́ rɑ̈dh. O ɑkun-ɑ kyeelø ying-ɑ kömi Ómrì. De ɑkun-ɑ tuung Omrì ɑ́göög e teeg kibøli ɑkuud Tibnì wɑ̈d Gïnɑth, ɑthøw Tibnì, kɑ Ómrì ogöögø ɑ́ rɑ̈ɑ̈dh Isrɑil bëne. Codhe, ɑgöög Ómrì ki rɑ̈ɑ̈dh Isrɑil bëne, kì pyɑ̈r ɑ́dɑ̈g wïdɑ́kyeel runni Asɑ̀ rɑ̈ɑ̈dh Yeudiyɑ̀ kì yij lɑwø. Kɑ Ómrì ojyɑ̈gø ki runn pyɑ̈rø wïdɑ́ryew. Ájyɑ̈ɑ̈g ki runn ɑ́bïkyel e bëëd ɑ Tirdhɑ̀, ɑngewe Kïti Sɑmɑriyɑ̀ kì yï Cemer ki ngyëny ɑ́tegg ɑ́lïp ɑ́bïkyel. Agëëde ki kɑɑl kì wïj kïnɑni, kɑ kɑɑlɑni cɑge ɑ́ Sɑmɑriyɑ̀, ɑ bɑ nyingi jɑl-ɑ́ yïe ɑ́ngeew kït menɑni. Ómrì ɑ́røngi kì bøli Jwøng-ɑ Ácwɑ̈ɑ̈j ki orøg me lod men-ɑ ɑ́gwøg yi jøg-ɑ ɑ́ying bøle. Kɑ ogöögø ki gïg ni møg-ɑ ɑ́gwøg yi Yeroboɑm wɑ̈d Nebɑt. Kí göny-ɑ ɑ́göjje Isrɑil orøg, kɑ pyëw Jwøng-ɑ Ácwɑ̈ɑ̈j rënye ki orøøg gen. Kwï gïg-ɑ kyeelø bënn møg-ɑ ɑ́gwøg yi Ómrì ki wɑ́ji tege, ge bɑ ɑgwed kì yij Wɑ̈nyi Rɑ̈nhi Isrɑil. Akedhi Omrì kun-ɑ di kweyye, kɑ kony kì Sɑmɑriyɑ̀, ɑrøøny Akɑɑb wɑ̈de keje ɑ́ rɑ̈dh. Akɑɑb wɑ̈d Ómrì ɑ́göög ki rɑ̈ɑ̈dh Isrɑil kì pyɑ̈r ɑ́dɑ̈g wïdɑ́bïdɑ̈ɑ̈g runni Asɑ̀ rɑ̈ɑ̈dh Yeudiyɑ̀ kì yij lɑwø. Kɑ Akɑɑb ojyɑ̈gø kì Sɑmɑriyɑ̀ ki runn pyɑ̈r ɑ́ryew wïdɑ́ryew. Akɑɑb ɑ́røngi kì bøli Jwøng-ɑ Ácwɑ̈ɑ̈j ki orøg me lod men-ɑ ɑ́gwøg yi jøg-ɑ ɑ́ying bøle. Pɑth ki orøøg Yeroboɑm kete ɑ ɑ́ngøy yi en, de ɑ́pëddi ki orøg keny-ɑ ɑ́nywøme Yidhɑbel nyɑɑr Rɑ̈dh Ethbɑɑl kì Sïdön, kɑ pëgg-ɑ be mɑlli Bɑɑl. Bɑɑl ɑ́gëdde ki kengø kì Sɑmɑriyɑ̀, kɑ ngïji Bɑɑl cïbe kengɑni. Akɑɑb ɑ́cwödhi piny thyew ki lööj Aceerɑ̀, kɑ ogöögø ki gïgrijjø møøgø thyew mø bɑng gen ɑ́rënyi pyëw Jwøøg Isrɑil, Jwøng-ɑ Ácwɑ̈ɑ̈j, kɑ ogöögø ki orøg me lod orøng-ɑ ɑ́gwøg yi rɑ̈nhi Isrɑil møg-ɑ bøle ki rɑ̈jø. Bøli keny-ɑ ɑ́jyɑ̈ɑ̈ge, ɑ ɑ́døøg Yerikö ki gerø yi Kiyel, jɑl Betiil. Wɑ̈ddi Kiyel ryeet ɑ́thøw e ger-ɑ kɑɑlɑni, ni møg-ɑ ɑ́kwøb yi Jwøng-ɑ Ácwɑ̈ɑ̈j ki dhø bɑ̈nge Jöcwø wɑ̈d Nun, Abirɑm wɑ̈de wɑ̈n-ɑ kɑyø ɑ́thøw kì ri cɑ̈gi gyer, kɑ Segub wɑ̈de, wɑ̈n-ɑ thinh othøø kì ri cïbi thïggi döri kɑɑlɑni. Jɑltöng Eliyɑ̀ jɑl Ticbì, ɑ ɑ́bëëd kì Gilyɑd. Rɑ̈dh Akɑɑb ɑ́köbbe kinni, “Yɑ köbb-ɑ yïn ki nyingi Jwøng-ɑ Ácwɑ̈ɑ̈j, Jwøng-ɑ Nëënø, Jwøøg Isrɑil kinni, óbëëd e bong thöjj wɑlɑ̀ kødh kì Isrɑil kì yethi runn ɑ́ryew wɑlɑ̀ ɑ́dɑ̈g møg-ɑ óbï, gïti keny-ɑ ókööbɑ.” Codhe, ɑköbbi Eliyɑ̀ yi Jwøng-ɑ Ácwɑ̈ɑ̈j kinni, “Dhwöödh kì keny, kedhí kuni wɑɑng cyɑ̈ɑ̈ng mwøl, kɑ yï pɑ̈ní, kì buti Nɑm Kerith, tung-ɑ rwööm ki Nɑm Urdun. Yï ómɑ̈dhø kì nɑmɑni, ɑ́gɑ̈ggì ɑ́rum ki köbbø yi yɑn, o yï nyi muuj yi gen ki gïncɑm kì kunɑni.” Alïngi kwøbbi Jwøng-ɑ Ácwɑ̈ɑ̈j yi Eliyɑ̀, kɑ kedh-ɑ buti Nɑm Kerith, kì tung-ɑ rwööm ki Nɑm Urdun. Kɑ nyii mɑ̈dhø kì nɑmɑni, kɑ nyi muuj yi ɑ́gɑ̈ggì ki ópun kí rïngø kì mwøl kí böörø yethi cyɑ̈ng bënn. Kì bɑng keny megø, kɑ nɑmɑni odwönø yi bëëde e bong kødh. Codhe kɑ Eliyɑ̀ köbbi yi Jwøng-ɑ Ácwɑ̈ɑ̈j kinni, “Dhwöödh kedhí Dhɑrepɑth, kì myërri Sïdön, kɑ yï bëëd kì kunɑni. Ngɑndhɑjø me bɑ thwöm me bëëdø kì kunɑni, ɑ́köbbi yi yɑn, o yï ókɑ̈lli yi en.” Codhe kɑ Eliyɑ̀ kedh-ɑ Dhɑrepɑth. Keny-ɑ ɑ́wɑ̈dhe dhø döri kɑɑlɑni ceth, ɑlïdhe ki ngɑndhɑjø me bɑ thwöm e ogwënø ki yugg, kɑ gø cwøle, ɑköbbe gøn kinni, “Yɑ kwɑjj-ɑ yïn, nëngí yɑn ki pïg mɑdh yi yɑn.” Cem ngɑnɑni kedh-ɑ be dwɑ̈ddø ki pï, ɑlenge dhøge kinni, “Kɑ yɑ muuj ki gïncɑm thyew.” Alöggi ngɑnɑni kinni, “Yɑn ɑ köngi èn ki nyingi Jwøgí, Jwøng-ɑ Ácwɑ̈ɑ̈j, Jwøng-ɑ Nëënø, bong gïncɑm kì yïɑ kinni tek. Bɑ møng-ɑ búr me bɑ yij cingø ɑ́kyel yøw kì yij óted, kí nyingi møw kì tyeli ɑdhɑ̈dh ɑ nud kì yïɑ. Yɑ ɑ́bï-ɑ be gwen ki yugg mø thɑlɑ en, o cɑm yi wøn, wøki wɑ̈dɑ, codhe o wø thøw wøn.” Kɑ köbbi yi Eliyɑ̀ kinni, “Yï ko böggi, kedh thɑl gïncɑm. De kwøng yɑn ki tɑ̈ddø ki me thiinh, kɑ muuj yɑn. Codhe, kɑ men-ɑ ɑ́döng thɑ̈llí rií wuki wɑ̈dí. Mɑ́ Jwøøg Isrɑil, Jwøng-ɑ Ácwɑ̈ɑ̈j okööbø kinni, ‘Óted pɑ döng nøw, o møw pɑ thumi kì yij ɑdhɑ̈dh, gïti keny-ɑ óör kødh piny yi yɑn, yɑ Jwøng-ɑ Ácwɑ̈ɑ̈j.’ ” Codhe, ɑkedh thwömɑni, kɑ møg-ɑ ɑ́kwøb yi Eliyɑ̀ gwøge. Kɑ ge ocyɑ̈mø kì ri ɑwɑnyɑni ki cyɑ̈ng mø ngenyø. Óted nuti döng nøw, o møw nuti thumø kì yij ɑdhɑ̈dh, ni kɑ ɑ́kwøbii yi Jwøng-ɑ Ácwɑ̈ɑ̈j ki dhøg Eliyɑ̀. Kɑ wɑ̈d thwömɑni mɑg yi rɑ̈ɑ̈m dël me teeg, kì bɑng keny megø, kɑ dële ókedhø e órënyø, codhe ɑthøwe. Aköbbi Eliyɑ̀ yi ngɑnɑni kinni, “Yïde ki yɑn jɑlkwøbbi Jwøk? Yï ɑ́bï kɑ per kinni o orøgɑ pɑr yi Jwøk, o kɑ̈ne ki thøwi wɑ̈dɑ?” Akööb Eliyɑ̀ kinni, “Mëggí nyelthinh yɑn.” Kɑ nyelthinh kwɑnye kì kö ngɑnɑni, ɑkïdhe gøn ød mɑl, øn-ɑ yije nyi buude, ɑpyëële gøn yij pyëne. Kɑ Jwøk kwɑjje kinni, “Jwøgɑ, ɑ́ kiper ngø ɑ göggí thwöm ki gïn ni men? Yɑ okɑ̈llø yi en kidøøj, o yï yöd yï nɑ̈g-ɑ wɑ̈de!” Kɑ Eliyɑ̀ ree rïïje kömi nyelthinh tyel ɑ́dɑ̈g, ɑkwɑ̈jje kinni, “Yɑ kwɑjj-ɑ yïn, yïn ɑ Jwøgɑ, Jwøng-ɑ Ácwɑ̈ɑ̈j, dwöög wëyi nyelthinh!” Kɑ kwɑ̈jji Eliyɑ̀ yïëy yi Jwøng-ɑ Ácwɑ̈ɑ̈j, ɑdwöög wëyi nyelthinh kɑ ocyɑ̈rø. Kɑ nyelthinh dwöög piny kun-ɑ di meye yi Eliyɑ̀, ɑkööbe kinni, “Lidh wɑ̈dí, onëënø!” Alögge kinni, “Áyod yi yɑn ɑnɑn kinni, yï bɑ jɑlkwøbbi Jwøk kidyër, o kwøbbi Jwøng-ɑ Ácwɑ̈ɑ̈j møg-ɑ kɑ̈ɑ̈l dhøgí bɑ dyër!” Kì bɑng keny megø, kì yij dɑ̈ɑ̈g runni mel, ɑköbbi Eliyɑ̀ yi Jwøng-ɑ Ácwɑ̈ɑ̈j kinni, “Kedh, o yï lidh yi Akɑɑb, piny ónëngi yi yɑn ki kødh.” Codhe, ɑkedhi Eliyɑ̀ be nyudhi ree Akɑɑb. Kɑ̈j ɑ́bëëd e teeg cɑrø kì Sɑmɑriyɑ̀. Kɑ Obɑdiyɑ̀ jɑl-ɑ mïdhi gøldwøng cwøl yi Rɑ̈dh Akɑɑb. (Obɑdiyɑ̀ ɑ́bëëd Jwøng-ɑ Ácwɑ̈ɑ̈j wør yi en ki mendwøng. Keny-ɑ ɑ́nɑ̈ɑ̈g jøtöng mø Jwøng-ɑ Ácwɑ̈ɑ̈j yi Yidhɑbel, Obɑdiyɑ̀ ɑ́kɑ̈ɑ̈d ki jøtöng miyø, kɑ gï kɑɑne órøngi kït, pyɑ̈r ɑ́bïj kì kej ɑ́kyel, kí pyɑ̈r ɑ́bïj kì keny-ɑ kyeelø, kɑ gï nyi muuje ki pï kí gïgcɑmm.) Kɑ Obɑdiyɑ̀ köbbi yi Akɑɑb kinni, “Kedhi wɑ be lyeewi nyingi pï geki yethi tyelli nɑ̈mmì bënn, men-ɑ óyïddi wɑ ki lum men cɑm yi kyënyì, kí ógɑll. O kwï jɑmmee cög ge pɑ nɑ̈g yi wɑ.” Apɑ̈ngi gen piny, o ngɑɑn lyeewe keje. Kɑ ge odhwödhø, men kedh-ɑ tunge, Akɑɑb ɑ́kedh ki yuue kì wɑ̈ye, kɑ Obɑdiyɑ̀ ókedhø ki yuue. Kɑ Obɑdiyɑ̀ røøm-ɑ yöö geki Eliyɑ̀. Kɑ Eliyɑ̀ ngije, ɑbøødhe ree piny, ɑkööbe kinni, “Bɑ yïn Eliyɑ̀ wɑ̈ɑ?” Alöggi Eliyɑ̀ kinni, “Ngee, yɑn! Kedh, köbbí wöw rɑ̈dh kinni yɑ nud kì keny.” Alöggi Obɑdiyɑ̀ kinni, “Á ngø ɑ ɑ́bɑj yi yɑn, ɑ kölli yɑn nɑ̈gø yi Akɑɑb. Ki nyingi Jwøgí, Jwøng-ɑ Ácwɑ̈ɑ̈j, Jwøng-ɑ Nëënø, bong pödhø mɑ ɑ́döng kì kömi piny yï nuti yɑbø kì yije. Wɑlɑ̀ bong rɑ̈dh mɑ ɑ́döng e nuti pyëjø yi Akɑɑb kiperí. Kenyi cöög yï pɑ yod, rɑ̈nhɑni nyi ceg kɑ köbbi köngø yi Akɑɑb kinni yï tøøk kì pödhe. O ɑnɑn yï dwɑdd-ɑ kinni, o yɑ kedhɑ be köbbii kinni yï nud kì keny? Óbëëdø kidï keløg yï okɑ̈ɑ̈lø yi wëyi Jwøk, kɑ yï kïdhe kun kwïj, kɑ̈ng-ɑ kedhɑ? O keny-ɑ óköbbɑ Akɑɑb kinni yï nud kì keny, kɑ yï ocögø yï pɑ yod yi en, yɑ pɑ nɑ̈g yi en? Yɑ ceg kɑ nɑ̈gø yi en, ngö yɑ bɑ ngɑn wør Jwøng-ɑ Ácwɑ̈ɑ̈j kër-ɑ ɑ́wönɑ yɑ thiinh. Yï nuti lïngø kinni keny-ɑ ɑ́nɑ̈ɑ̈g jøtöng mø Jwøng-ɑ Ácwɑ̈ɑ̈j yi Yidhɑbel, yɑ ɑ́kɑ̈nni yij órøngi kït ki jøtöng miyø, pyɑ̈r ɑ́bïj kì keny, kí pyɑ̈r ɑ́bïj kì keny-ɑ kyeelø, kɑ ge nyi thödhi yi yɑn ki pï kí gïncɑm? O ɑnɑn yɑ ör yi yïn yï Akɑɑb, be kwøb kinni yï nud kì keny, o yɑ nɑ̈g yi en!” Alöggi Eliyɑ̀ kinni, “Ki nyingi Jwøng-ɑ Ácwɑ̈ɑ̈j, Jwøng-ɑ Nëënø, ɑ bøle cyɑ̈dhi yi yɑn, yɑ ólidh yi Akɑɑb dicyɑ̈ngtïn.” Codhe, kɑ Obɑdiyɑ̀ kedh-ɑ be yïddø ki Akɑɑb, ɑköbbe gøn møgɑni. Kɑ Akɑɑb kedh-ɑ be yïddø ki Eliyɑ̀. Akɑɑb keny-ɑ ɑ́lidhe Eliyɑ̀, kɑ Eliyɑ̀ köbbe kinni, “Bene yïn, ngɑn-ɑ nyïɑ̈g Isrɑil!” Alöggi Eliyɑ̀ kinni, “Pɑth ki yɑn ɑ nyïɑ̈g Isrɑil, bɑ Ciggi Jwøng-ɑ Ácwɑ̈ɑ̈j ɑ ɑ́bɑny yi wun, wuki gøl wïyí, kɑ wu døøg-ɑ be mɑlli Bɑɑl. Anɑn cwööl tyëng Isrɑil yïɑ, o wø yïddi wøn ki gen kì wïj Kïti Kɑrmel. Kɑ miy ɑ́ngwen kí pyɑ̈r ɑ́bïj, møg-ɑ bɑ jøtööng Bɑɑl, kí jøtööng Aceerɑ̀ gɑ miy ɑ́ngwen, møg-ɑ nyi cyɑ̈mø kì tɑɑw Yidhɑbel cwööl thyew.” Codhe, kɑ Akɑɑb, ókwërri Bɑɑl geki tyëng Isrɑil bënn, cwøøle Kïti Kɑrmel. Kɑ Eliyɑ̀ kedh-ɑ buti teedø, ɑkööbe kinni, “Wu gït-ɑ wɑɑng yethi wun ópyërø? Keløg ɑ́ Jwøng-ɑ Ácwɑ̈ɑ̈j ɑ bɑ Jwøk, mɑllu en! O keløg ɑ́ Bɑɑl ɑ bɑ Jwøk, mɑllu en!” De ji ɑ́cög ge pɑ löggi. Codhe, ɑkööb Eliyɑ̀ kinni, “Yɑ ketɑ ɑ ɑ́döng yɑn ɑ́ jɑltööng Jwøng-ɑ Ácwɑ̈ɑ̈j, O jøtööng Bɑɑl, kwɑnni gen bɑ miy ɑ́ngwen kí pyɑ̈r ɑ́bïj. Kɑ̈ni wun ki wɑ̈dhh ɑ́ryew, kɑ ɑ́kyel kwɑny yi jøtööng Bɑɑl. Nɑ̈g ge gøn, kɑ gø ngølli gen, kɑ gø tɑɑg gen kömi yugg, de ge ko kudhi ree ki mɑc. Wɑnh-ɑ kyeelø ógwøg yi yɑn kinøw. Kɑ wiy jøtöng mø Bɑɑl kwɑjji gen jwøøg gen, o Jwøng-ɑ Ácwɑ̈ɑ̈j ókwɑjji yi yɑn thyew. Jwøng-ɑ óyïëy kɑ óönø ki mɑc, bene en ɑ bɑ Jwøk.” Kɑ teedø okööbø kinni, “Kwøb mø døøj!” Aköbbi jøtööng Bɑɑl yi Eliyɑ̀ kinni, “Kwɑnyu wɑɑdh wun, kɑ kwøng wun ki gwøgø, mɑ́ wun ɑ kwɑnni wun ngenyø, de ri yugg ko kudhi wun ki mɑc.” Codhe, ɑkwɑny gen wɑnh-ɑ ɑ́mëggi gen, kɑ gø gwir gen. Kɑ cɑ̈ng wɑ̈dh-ɑ dïmɑl ge kwɑjj-ɑ Bɑɑl, ge óryeerø kinni, “Bɑɑl, løøg kwɑ̈jji wøn!” Ge ɑ́rïïj ge ocöngø kì bɑdhhi këli lɑm men-ɑ ɑ́ger yi gen. De Bɑɑl nuti löggø. Kɑ Eliyɑ̀ ócɑ̈gø ki gɑggi gen keny-ɑ ɑ́gud cɑ̈ng ki löj, ɑkööbe kinni, “Ti wun kwɑ̈jjø wu óryeerø! Bɑ nyɑ jwøg me thiinh yøw! Óbëëd e ceg-ɑ lɑ̈g e bëëd ɑ mɑl ɑnɑn, wɑlɑ̀ óbëëd e kedhi be meji tyelle, wɑlɑ̀ óbëëd e ying-ɑ be wel mɑwɑnø! Wɑlɑ̀ óbëëd e cɑɑg-ɑ nenø! Ti wun ryeerø o cyëëwe!” Kɑ jøtöngɑni ti-ɑ ryeerø, ge kɑgg-ɑ ri gen ki pil kí pɑll ni kenyi göög gen, kɑ remø ómullø. Kɑ cɑ̈ng ókëjjø ge nudd ge ókwɑ̈jjø, kɑ bøli kej gënhi böörø ócyɑ̈ngø, de kwɑ̈jji gen nuti løøgø, wɑlɑ̀ bong cwɑg mɑ ɑ́lïngi. Codhe ɑköbbi teedø yi Eliyɑ̀ kinni, “Nyïngu butɑ.” Kɑ ge nyeg-ɑ bute. Kɑ këli lɑm mi Jwøng-ɑ Ácwɑ̈ɑ̈j, men-ɑ ɑ́bëëd e ócøør piny, thïg yi Eliyɑ̀. Kɑ ókɑ̈bbø ki tuggi kïttì pyɑ̈rø wïdɑ́ryew, gɑ kwɑnni wɑ̈thi kɑ̈lli wɑ̈ddi Yɑgob, jɑl-ɑ ɑ́cɑg yi Jwøk ɑ́ Isrɑil. Kɑ kïttɑni tɑɑge gɑ këli lɑm mi Jwøng-ɑ Ácwɑ̈ɑ̈j. Kɑ bɑdhhe kunye ki wøl men yije rømi yi pï gɑ røthøl pyɑ̈r ɑ́ryew wïdɑ́bïdɑ̈g. Codhe, ɑtɑɑge yugg kömi këli lɑm, kɑ wɑdh ngølle ɑ́ ɑ́tug, kɑ gø cïbe kömi yugg. Kɑ okööbø kinni, “Pɑ̈ng wun puggì ɑ́ngwen ki pï, kɑ pïgɑni køny wun kömi gëëdhi geki yugg!” Agwøg gen møgɑni. Kɑ okööbø kinni, “Cigu köme kunyø këti!” Kɑ köme kunyi. Kɑ okööbø kinni, “Døøg wun köme ki kunyø!” Kɑ köme kunyi. Kɑ pï rɑɑr-ɑ piny kì kömi këli lɑm, kɑ wøl-ɑ wenii opɑ̈ngø. Keny-ɑ ɑ́bëën bøli keny-ɑ nyi rɑ̈ɑ̈b gënhi böörø, ɑnyegi Eliyɑ̀ buti këli lɑm, kɑ ókwɑ̈jjø kinni, “Yïn ɑ Jwøng-ɑ Ácwɑ̈ɑ̈j, Jwøøg Abrɑhɑm, kí Isɑɑk, kí Yɑgob, nyodh rií ɑnɑn kinni yï bɑ Jwøøg Isrɑil, o yɑ bɑ bɑ̈ngí, o møg bënn, gwøg yi yɑn ge ɑ́kwøb-ɑ yi yïn. Løøg kwɑ̈jjɑ Yïn ɑ Jwøng-ɑ Ácwɑ̈ɑ̈j, o yod yi ji møg kinni, yïn ɑ bɑ Jwøøg gen, Jwøng-ɑ Ácwɑ̈ɑ̈j, o pëthi gen lug gen rií!” Kɑ Jwøng-ɑ Ácwɑ̈ɑ̈j ön-ɑ piny ki mɑc, kɑ gëëdhi, kí yugg geki tuggi kïttì kí lɑ̈bø rɑ̈be. Kɑ wøl-ɑ wen këli lɑm othwøwø yi mɑc. Keny-ɑ ɑ́liidh møgɑni yi teedø, ɑbøødh gen ri gen piny ge okööbø kinni, “Jwøng-ɑ Ácwɑ̈ɑ̈j ɑ bɑ Jwøk, Jwøng-ɑ Ácwɑ̈ɑ̈j kete ɑ bɑ Jwøk!” Kɑ Eliyɑ̀ okööbø kinni, “Mɑg wun jøtööng Bɑɑl, ko di men wëggu bodhø!” Amɑɑg gen, kɑ ge køøl kömi Nɑm Kicön yi Eliyɑ̀, kɑ gï nɑ̈ge. Codhe, ɑköbbi Rɑ̈dh Akɑɑb yi Eliyɑ̀ kinni, “Kedhí be cɑm, kødh obëënø, ruure lïngɑ’ lïngø!” Keny-ɑ ɑ́kedhi Akɑɑb be cɑm, kedh Eliyɑ̀ yedh-ɑ wïj Kïti Kɑrmel. Kɑ ree bøødhe, wïje cøde’ kɑɑm tyelle. Kɑ bɑ̈nge köbbe kinni, “Kedh, kɑ yï lïïdh kuni nɑɑm omelø.” Akedh bɑ̈ngɑni kɑ ódwöögø, ɑkööbe kinni, “Bong gïjø mɑ ɑ́lidh yi yɑn.” Áör be lïdhø ki tyel ɑ́bïryew yi Eliyɑ̀. Kì bïryeew dwönge, ɑkööbe kinni, “Yɑ ɑ́lïdhi ki nyɑ pøølø me ni yij cingi dhɑnhø, e bï-ɑ wɑ̈g kì nɑɑm omelø.” Kɑ bɑ̈nge köbbe kinni, “Kedh köbbí Rɑ̈dh Akɑɑb kinni i kɑdhe yij yɑ̈ye, kɑ jwɑne pɑc kipe ómɑ̈ɑ̈n kedhø yi kødh.” Kì bɑng nyɑ keny me thiinh, kɑ mɑl cyëëg yi pøøl, kɑ yømø ókönø, kɑ kødh me dwøng ócɑ̈gø ki dëëmø. Akɑɑb ɑ́kɑdhi yij yɑ̈ye, kɑ kedh-ɑ Yidhriil. Tegi Jwøng-ɑ Ácwɑ̈ɑ̈j ɑ́bï kömi Eliyɑ̀, kɑ ógødhe weene yije, kɑ Akɑɑb yööme Yidhriil. Kɑ Yidhɑbel köbbi yi Akɑɑb ki gïg-ɑ ɑ́gwøg yi Eliyɑ̀ bënn, kí kër-ɑ ɑ́nɑ̈ge jøtöng bënn. Kɑ Yidhɑbel öd-ɑ yï Eliyɑ̀ ki wöödø kinni, “Wiy yɑ nɑ̈g yi jwögg dhuki piny nɑ men, keløg yï pɑ göggɑ gïn-ɑ ɑ́göggí jøtöngɑni.” Abwøg Eliyɑ̀, kɑ kedh-ɑ Bircebɑ̀, kì myërri Yeudiyɑ̀. Kɑ bɑ̈nge wiye kunɑni. Adhwödhe, kɑ tyëg-ɑ cɑ̈ng e ócyɑ̈dhø e töng-ɑ yij pɑ̈l. Kɑ pëgg-ɑ piny kì thɑ ɑ́lɑl, e dwɑdd-ɑ thøø. Akwɑ̈jje kinni, “Møg peeg cɑrø, Yïn ɑ Jwøng-ɑ Ácwɑ̈ɑ̈j! Kwɑny wëyɑ, thøø lɑ̈w kì yïɑ.” Abudde kì tïbi yɑdh kɑ ónenø. Kɑ gwel yi wëywödø, ɑköbbe gøn kinni, “Dhwöödh kɑ yï cyɑ̈ɑ̈m.” Atïnge wïje kɑ gïncɑm ópun lidhe geki nyɑ pugi pï kì kuni wïje. Acyɑ̈me kɑ omɑ̈dhø ki pï, codhe ɑcige buddø. Kɑ wëywöni Jwøng-ɑ Ácwɑ̈ɑ̈j ódwöögø, ɑcige gø tugø këti kɑ gø köbbe kinni, “Dhwöödh kɑ yï cyɑ̈ɑ̈m, mɑ́ keny-ɑ kedhi yi yïn lɑ̈wi.” Adhwödhe kɑ ocyɑ̈mø kɑ omɑ̈dhø ki pï. Athödhii yi gïncɑmɑni ki tegø mɑ ɑ́tyëge cyɑ̈ng pyɑ̈r ɑ́ngwen e ócyɑ̈dhø, e kedh-ɑ wïj Kïti Sinɑy; kïti kwër. Keny-ɑ ɑ́wɑ̈dhe kunɑni, ɑkedhe be buddø kì yij órøngi kït. Kɑ pyëj yi Jwøng-ɑ Ácwɑ̈ɑ̈j kinni, “Eliyɑ̀, yï gwøg-ɑ ngø kì keny?” Alögge kinni, “Yïn ɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́mɑg-ɑ yi tyiel, mɑ́ yï ɑ́wiy yi tyëng Isrɑil, kɑ këlli lɑm møgí cøør gen piny, kɑ tyëngtöng møgí bënn nɑ̈g yi gen. Adöngɑ ketɑ, o ge dwɑdd-ɑ nɑ̈gi yɑn.” Kɑ Jwøng-ɑ Ácwɑ̈ɑ̈j okööbø kinni, “Kedhí wɑ̈g, kɑ yï cungí kì bølɑ kì wïj kït.” Kɑ Jwøng-ɑ Ácwɑ̈ɑ̈j ókɑ̈nø ki ɑtunø me teeg, kïttì tørre’ tørrø; de Jwøng-ɑ Ácwɑ̈ɑ̈j tøøk kì yij yømɑni. Acungi yømø, kɑ piny onhɑ̈nhø, de Jwøng-ɑ Ácwɑ̈ɑ̈j tøøk kì yij onhɑ̈ɑ̈nh piny. Kɑ mɑc obëënø, de Jwøng-ɑ Ácwɑ̈ɑ̈j tøøk kì yij mɑnyɑni. Kì bɑng mɑc, ɑbëën cwɑg mø yöm mø ni möngø. Keny-ɑ ɑ́lïngi cwɑggɑni yi Eliyɑ̀, ɑkume nyinge ki lɑne, ɑkedhe kɑ ócungø kì dhøg órøngi kït, ɑpyëjii yi cwɑggɑni kinni, “Yï gwøg-ɑ ngø kì keny Eliyɑ̀?” Alögge kinni, “Yïn ɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́mɑg-ɑ yi tyiel, mɑ́ yï ɑ́wiy yi tyëng Isrɑil, kɑ këlli lɑm møgí cøør gen piny, kɑ tyëngtöng møgí bënn nɑ̈g yi gen. Adöngɑ ketɑ, o ge dwɑdd-ɑ nɑ̈gi yɑn.” Kɑ Jwøng-ɑ Ácwɑ̈ɑ̈j okööbø kinni, “Kedh døøg ki yuu-ɑ ɑ́bëën, kɑ yï pödhí pɑ̈ɑ̈l Dimɑceg. Keny-ɑ ówɑ̈dhí kunɑni, kɑ Adhɑil røøny ɑ́ rɑ̈ɑ̈dh Arɑm. Thyew kɑ Yeeu wɑ̈d Nimcì røøny ɑ́ rɑ̈ɑ̈dh Isrɑil. Kɑ Elicɑ̀ wɑ̈d Cɑpɑt jɑl Abel Mekölɑ̀, cïb kejí ɑ́ jɑltöng. Ngɑn-ɑ óbødh ki nɑ̈gø yi Adhɑil ónɑ̈g yi Yeeu, o ngɑn bødh ki nɑ̈gø yi Yeeu ónɑ̈g yi Elicɑ̀. Ji ɑ́lïp ɑ́bïryew ówiy yi yɑn kì Isrɑil, gen ɑ ji møg-ɑ nuti mɑlli Bɑɑl, ɑ nuti nuum ngïji Bɑɑl.” Eliyɑ̀ ɑ́kedh, kɑ Elicɑ̀ yuude e oköögø kì pwödhø ki kwërrì pyɑ̈rø wïdɑ́ryew, kwërr-ɑ nyi ywɑjji yi wɑ̈dhh, o en kiree ɑ kwølli men-ɑ cyɑ̈n. Kɑ Eliyɑ̀ pɑre lunye wɑ̈g, kɑ gø cïbe kömi Elicɑ̀. Codhe, kɑ Elicɑ̀ wɑ̈dhhe wiye, ɑrenge bɑng Eliyɑ̀ kɑ okööbø kinni, “Wiy yɑ mɑ̈ɑ̈dhɑ wïyɑ geki meyɑ. O yɑ bïɑ bɑngí.” Kɑ Eliyɑ̀ okööbø kinni, “Døj kedh, yï pɑ mɑ̈ɑ̈n yi yɑn!” Codhe, kɑ Elicɑ̀ wɑ̈dhh-ɑ ɑ́kwølle ngɑle, kɑ rïnggi gen thɑl kì yenhi kwërri køøg, kɑ rïnggɑni mëgge teedø o gø cɑm gen. Codhe ɑdhwödhe, kɑ kedh-ɑ bɑng Eliyɑ̀, ɑgööge ki ngɑn nyi kønyii. Kɑ Benɑdɑd rɑ̈ɑ̈dh Arɑm linye cønge, bɑnge dɑ jyɑ̈ggì pyɑ̈r ɑ́dɑ̈g wïdɑ́ryew, kí kyënyì, kí yɑ̈thi liny, ɑtyege Sɑmɑriyɑ̀. Kɑ ónyïɑ̈ggø ki gøn. Kɑ öd-ɑ yï Rɑ̈dh Akɑɑb kì Sɑmɑriyɑ̀ ki wöödø kinni, “Benɑdɑd okööbø kinni, ‘Ngyëny ɑ́teggí geki dhɑbí, kí mɑ̈nní mɑ̈nn-ɑ myëër geki nyigí womɑ̈nn ge bɑ møgɑ.’ ” Alöggi Akɑɑb kinni, “En ceth, köbbu wɑ̈ɑ, Rɑ̈dh Benɑdɑd kinni yɑ ɑ́yïëy, yɑ bɑ mee wøki jɑmmɑ bënn.” Kɑ tyëng-ɑ ɑ́ör cig-ɑ dwöögø ge okööbø kinni, “Benɑdɑd okööbø kinni, ‘Yɑ ɑ́ödi yïí kinni mëggí yɑn ngyënyyí; ɑ́tegg geki dhɑb, kí mɑ̈nní kí nyigí womɑ̈nn. Yɑ óöni ɑnɑn ki pëjji liny, o ge bï gen be yɑgi gølí kí kɑ̈lli jyɑ̈ggí, o gïg-ɑ per gen teg kwɑny yi gen. Ge óbï piny nɑ men dhuki.’ ” Kɑ jøgdøngi pödhø bënn cwööl yi Rɑ̈dh Akɑɑb, kɑ gï köbbe kinni, “Álidh yi wun, jɑɑl yɑb-ɑ ɑkørr. Áöni yïɑ cem e mɑ̈nnɑ geki nyigɑ womɑ̈nn, kí ngyëny ɑ́tegg geki dhɑb møgɑ di dwɑddø yi en. O ge nuti mɑ̈ɑ̈n yɑn en.” Kɑ rɑ̈dh köbbi yi jøgdøngø geki yɑy bëne kinni, “Kwøbbe ko lïngí, kɑ yï ko yïëy ki gïg-ɑ kømme.” Codhe, ɑköbbi jøg-ɑ ɑ́ör yi Benɑdɑd yi Akɑɑb kinni, “Köbbu wɑ̈ɑ rɑ̈dh kinni, yɑ ɑ́yïëy ki gïg-ɑ ɑ́kwøng yi en ki kwøbø, de yɑ pɑ cuggi yïëyø ki mø cyɑ̈n.” Jøgɑni ɑ́kedh kɑ ge cig-ɑ dwöögø këti ki wöödø megø, kì yï Benɑdɑd kinni, “Yɑ óöni ki yɑy me dwøng me cøør kɑɑlɑni piny, tuggi udd-ɑ cøør gen piny ókɑ̈l yi gen kì cinggi gen. Wiy yɑ nɑ̈g yi jwögg keløg møgɑni pɑ gwøg yi yɑn.” Alöggi Rɑ̈dh Akɑɑb kinni, “Jön-ɑ dyër, kööre nyi pwöd yi en e liny rumø, de pɑ nyi mɑ̈ɑ̈g ki pwödi kööre e liny nuti tøønyø.” Benɑdɑd ɑ́yuud yi wööni Akɑɑb e omɑ̈dhø ki møgø kì thɑ̈thi ɑkɑnnì geki jyɑ̈gg-ɑ cyɑ̈dhi ki en. Kɑ jøge köbbe kinni pɑ̈ɑ̈r gen kömi kɑɑlɑni, codhe kɑ liny tɑd gen. Kì bøli kenyɑni, ɑ́dɑ jɑltöng mɑ ɑ́kedhi yï Akɑɑb, ɑkööbe kinni, “Jwøng-ɑ Ácwɑ̈ɑ̈j ɑ́kööb kinni, ‘Yï ko böggi yi yɑy-ɑ dwøng èn! Ógöjjɑ tyɑmø yi yïn dicyɑ̈ngtïn, o yod yi yïn kinni bene yɑn Jwøng-ɑ Ácwɑ̈ɑ̈j.’ ” Apëjji Akɑɑb kinni, “Á men ɑ ónyɑg liny?” Alöggi jɑltöng kinni, “Jwøng-ɑ Ácwɑ̈ɑ̈j okööbø i bɑ yɑɑg-ɑ wøbb ɑ kedhi be liny, ge pyejj-ɑ yi jɑggi yethi myërr.” Apëjji rɑ̈dh kinni, “Dɑ́ men-ɑ ókwølli liny?” Kɑ jɑltöng okööbø kinni, “Yïn!” Codhe, ɑcwööl pëjji yɑɑg-ɑ wøbb kì yethi myërr yi rɑ̈dh, kwɑnni gen bɑ miy ɑ́ryew kí pyɑ̈r ɑ́dɑ̈g wïdɑ́ryew. Acwööle yɑɑy Isrɑil kwɑnne bɑ ɑ́lïp ɑ́bïryew. Liny ɑ́tuum e cɑ̈ng ying-ɑ dïmɑl. Benɑdɑd mɑ̈dhø ki møgø, o rumø ki nɑ̈gø yi møgø, ge obëëdø kì thɑ̈thi ɑkɑnnì geki jyɑ̈gg-ɑ pyɑ̈r ɑ́dɑ̈g wïdɑ́ryew møg-ɑ ɑ́bï be kønyii ki liny. Yɑɑg-ɑ wøbb ɑ ɑ́møøl mɑl. Kɑ twödd møg-ɑ ɑ́ör yi Benɑdɑd jwɑn-ɑ be köbbii kinni, i dɑ jøliny mø bï wɑ̈g kì Sɑmɑriyɑ̀. Kɑ Benɑdɑd okööbø kinni, “Mɑgu gen cɑgg ge bëën-ɑ be liny, wɑlɑ̀ ge kwɑ̈ɑ̈j-ɑ mër.” Kɑ liny pej yi yɑɑg-ɑ wøbb, kí yɑɑy Isrɑil kì bɑng gen, kɑ men ótuumø ki mee, kɑ gø nɑ̈ge. Kɑ yɑɑy Arɑm cyeddi yi Isrɑil, de Benɑdɑd ɑ́rengi kì kömi kyeny geki kwï jøge. Kɑ rɑ̈ɑ̈dh Isrɑil mödd-ɑ yij e omɑ̈gø ki kyënyì geki yɑ̈ɑ̈th, kɑ Arɑm tyɑm ki menteg. Codhe ɑkedhi jɑltöng yï Akɑɑb, ɑkööbe kinni, “Kedh kɑ linyí cïmmí, kɑ pyëël kidøøj, rɑ̈ɑ̈dh Arɑm ódwöög be liny ki yïn run-ɑ bï.” Kɑ Rɑ̈dh Benɑdɑd köbbi yi jɑggi linye kinni, “Jwöggi gen bɑ jwöggi kïttì, bene ɑ ɑ́tyɑɑm wɑ yi gen, de wiy wɑ nyïɑ̈ggi wɑ ki gen kì yij bɑ̈j, men-ɑ́ ge ceg yi wɑ kɑ tyɑmø. Pɑ̈d jyɑ̈gg-ɑ ɑ́pyëjji ki liny. Kɑ kɑ̈jji gen cïbí ki jöddi liny. Kɑ yï cung ki yɑy me dwøng ni men-ɑ ɑ́wiy yïn piny. Kí kyënyì geki yɑ̈ɑ̈th mø kwɑnni gen pɑ̈r ki mø tyeli mɑl. Wɑ ónyïɑ̈ggi ki gen kì yij bɑ̈j, o ge ceg yi wɑ kɑ tyɑmø ceth.” Kɑ kwøbbi gen yïëy yi Benɑdɑd. Kɑ møg-ɑ ɑ́cïgii yi gen gwøge. Run-ɑ kyeelø, ɑcønge yɑye, kɑ kedh-ɑ Ápek be nyɑɑg ki tyëng Isrɑil. Kɑ yɑɑy Isrɑil kiw, ɑbëën gen ki jɑmmi gen; ge ɑ́kedh kɑ ge ogudø ki kɑ̈dd ɑ́ryew mø rwööm ki yɑɑy Arɑm, ge nënni ge nɑ ɑkudd ɑ́ryew mø dyëg, de men-ɑ́ yɑɑy Arɑm piny pɑ̈ɑ̈ng en. Kɑ jɑltöng kedh-ɑ yï Akɑɑb, kɑ gø köbbe kinni, “Jwøng-ɑ Ácwɑ̈ɑ̈j okööbø kinni, ‘Mɑ́ tyëng Arɑm ɑ́kööb kinni i yɑ bɑ Jwøøg kïttì, o yɑ pɑth ki Jwøøg bɑ̈j, yɑɑy gen, yɑy-ɑ dwøng ɑnɑn göjjɑ’ tyɑmø yi wun, o yod yi ji kinni, bene yɑn Jwøng-ɑ Ácwɑ̈ɑ̈j.” Kɑ liny Isrɑil geki liny Arɑm tyëg-ɑ cyɑ̈ng ɑ́bïryew ge obëëdø kì kɑ̈ddi gen ge nenn-ɑ nyingi gen. Kɑ liny ócɑ̈gø kì bïryeew cyɑ̈ng. Kɑ Isrɑil ónɑ̈ggø ki ji ɑ́lïp miyø kì kelli liny Arɑm. Møg-ɑ ɑ́bodh ɑ́rengi Ápek, kɑ dörø pɑ̈dh-ɑ kömi ji ɑ́lïp pyɑ̈r ɑ́ryew wïdɑ́bïryew kì kelli gen. Benɑdɑd ɑ́rengi kɑɑlɑni thyew, kɑ pɑ̈n-ɑ tɑtyeel kì ød megø. Kɑ jyɑ̈gge kedh-ɑ yïe, ɑköbbii yi gen kinni, “Wø ɑ́lïng kinni i rɑ̈nhi Isrɑil pëthi gen nyii lɑ̈ɑ̈mø ki ji. Wiy wø kedhi wøn yï rɑ̈ɑ̈dh Isrɑil wø rug-ɑ ocwɑ̈llì ki thøll kì muddi wøn, men-ɑ ólɑ̈ɑ̈m pyëwe, kɑ yï wiy yi en yï pɑ nɑ̈g yi en.” Codhe, kɑ ri gen lunyi gen ki ocwɑ̈llì, kɑ muddi gen wëni gen ki thøll, ɑkedhi gen yï Akɑɑb, ɑkööb gen kinni, “Bɑ̈ngí, Benɑdɑd okööbø cem e kwɑjj-ɑ yïn kipe wëye.” Alöggi Akɑɑb kinni, “Nudd e onëënø! Bɑ ómïɑ!” Jyɑ̈ggi Benɑdɑd ɑ́bëëd ge tid-ɑ ngïjji døøjø, keny-ɑ ɑ́kööb Akɑɑb kinni, “Bɑ ómïɑ!” Ajwɑn gen dhøggi gen ki lengø kinni, “Nɑ kɑ ɑ́kwøbií ceth, Benɑdɑd bɑ ómyëw!” Kɑ Akɑɑb okööbø kinni, “Muuju en yɑn.” Keny-ɑ ɑ́wɑ̈nhi Benɑdɑd, ɑcwøølii yij yɑ̈y yi Akɑɑb. Kɑ Benɑdɑd okööbø kinni, “Myërr-ɑ ɑ́kwɑny yi wïyɑ kì yï wïyí döggɑ’ yïn! O rií ócuggø gëddø yi yïn ki kej ngyew kì Dimɑceg ni men-ɑ ɑ́gwøg yi wïyɑ kì Sɑmɑriyɑ̀.” Kɑ Akɑɑb okööbø kinni, “Yï ógøny yi yɑn kɑ per møgɑni.” Codhe, ɑgønye gøn, kɑ kɑɑm gen cïbi gen ki lwöbø. Jɑltöng megø, jɑl-ɑ kyeelø kì yij ɑkuud gen ɑ́köbbe kinni, “Jwøng-ɑ Ácwɑ̈ɑ̈j okööbø kinni i gøj yɑn.” De jɑl-ɑ ɑ́köbbi göjjø ɑ́bɑ̈nyi. Aköbbe gøn kinni, “Yï ónɑ̈g yi ngur keny-ɑ ókedh, mɑ́ yï ɑ́pyem-ɑ dhø Jwøng-ɑ Ácwɑ̈ɑ̈j.” Keny-ɑ ɑ́kedhe ceth, kɑ nɑ̈g yi ngur. Kɑ jɑltöngɑni kedh-ɑ yï jɑl megø, ɑköbbe gøn kinni, “Gøj yɑn!” Kɑ gøj yi jɑlɑni ki menteg, kɑ ree kïdhe ki kedø. Codhe ɑkedh jɑltöngɑni kɑ bøle kode ki ógødh, o cöge e pɑ ngij, kɑ pëgg-ɑ be yïdi rɑ̈ɑ̈dh Isrɑil kì yuu-ɑ ókɑ̈ɑ̈le. Keny-ɑ ɑ́bëën rɑ̈dh e opödhø, ɑkööb jɑltöngɑni kinni, “Wuö, kɑ ɑ́bëëdɑ yɑ ying-ɑ kej liny, jɑl megø ɑ́kɑ̈ni ki ɑmɑɑg liny, ɑköbbe yɑn kinni, ‘Kor jɑɑl, opɑ̈ɑ̈re, yï nɑ̈ɑ̈g-ɑ keje, wɑlɑ̀ yï ceg-ɑ col ki ngyëny ɑ́tegg ɑ́lïp pyɑ̈r ɑ́dɑ̈g.’ De wïjɑ ɑ́kɑ̈l yi gïg møøgø, kɑ jɑlɑni opɑ̈ɑ̈rø.” Alöggi rɑ̈dh kinni, “Cɑ́yí ɑ́rum ki kwøbø yi yïn, o kwörɑni ceg kɑ colø yi yïn ceth.” Kɑ jɑltöngɑni ógødh pɑ̈de wɑ̈g kì wïje, kɑ ceg ki ngijø yi rɑ̈dh ceth, kinni bɑ ɑ́kyel kì kelli jøtöng. Codhe, ɑköbbi rɑ̈dh yi jɑltöngɑni kinni, “Jwøng-ɑ Ácwɑ̈ɑ̈j ɑ́kööb kinni, ‘Mɑ́ jɑl-ɑ ɑ́kwøbɑ kinni nɑ̈g ɑ́wëggí kedhø, yï thøw-ɑ keje, o yɑyí thøw-ɑ kej yɑye.’ ” Kɑ rɑ̈dh døøg-ɑ Sɑmɑriyɑ̀ e juudø pyëwe rɑɑj. Buti gøl Rɑ̈dh Akɑɑb kì Yidhriil ɑ́dɑ bɑɑg jɑl me cwøl ɑ́ Nɑboth. Kɑ Nɑboth köbbi yi Akɑɑb cyɑ̈ng ɑ́kyel kinni, “Mëggí yɑn bɑgí mɑ́ e cyɑ̈gi kɑ gølɑ, di dwɑddø yi yɑn o pïïdhɑ ki gïgmɑr møg nyi cɑm. Yï óthödhi yi yɑn ki bɑg me døøj kibøle, o ke dwɑddií, yï ócuddi yi yɑn ki ngyëny mø gïïr.” Kɑ Nɑboth okööbø kinni, “Piny men, ɑ́lɑg yi yɑn ɑ yï kweyyɑ, o bɑ ɑkerø yi Jwøng-ɑ Ácwɑ̈ɑ̈j kinni ko wëggɑ kwɑnyø yi yïn.” Kɑ Akɑɑb kedh-ɑ gøle e juudø pyëwe rɑɑj ki gïg-ɑ ɑ́köbbii yi Nɑboth. Akedhe kɑ óbuddø kì yij pyëne wïje løg en ri dörø, kɑ óbɑ̈nyø ki cɑm. Kɑ cyëge Yidhɑbel kedh-ɑ yïe, ɑpyëje gøn kinni, “Yïde ɑ bëëd yï juudø pyëwí rɑɑj, ɑ bɑ̈nyí ki cɑm?” Alögge kinni, “Pyëwɑ rëny-ɑ yi gïn-ɑ ɑ́kwøb yi Nɑboth. Yɑ ɑ́dwɑdd-ɑ ngewi bɑge, wɑlɑ̀ ke di dwɑdde gøn di wil yi yɑn ki bɑg megø, de Nɑboth ɑ́bɑ̈nyi mëggii yɑn.” Alöggi Yidhɑbel kinni, “Yïn ɑ bɑ rɑ̈dh, wɑlɑ̀ pɑth ki yïn? Dhwöödh kɑ yï cyɑ̈ɑ̈m. Yï ómëggɑ bɑɑg Nɑboth!” Codhe, ɑgwëde ki wɑ̈j ki nyingi Akɑɑb, kɑ gï gøje ki kitim mi Akɑɑb, kɑ gï öre yï jɑgg geki yɑɑg-ɑ per gen teg kì Yidhriil. Kwøbb-ɑ ɑ́gweede yethi wɑ̈jjɑni bɑ kinni: “Köbbu teedø kinni thuum gen ki cyɑ̈ng ɑ́kyel. Kɑ ji cwøøl kej ɑ́kyel, kɑ Nɑboth cïb bøli teedø. Kɑ wu kɑ̈bbi wun ki ji ɑ́ryew møg köngi kinni, Jwøk geki rɑ̈dh ge ɑ́bwöl yi Nɑboth. Orume kɑ kïdhi wun ngɑ̈ɑ̈j kɑɑl, kɑ bɑ̈lli ki kïttì kì kunɑni o thøwe.” Kɑ gïg-ɑ ɑ́ceg yi Yidhɑbel gwøg ceth yi jɑgg geki jøg-ɑ bɑ pëjji kì Yidhriil. Ge ɑ́kööb i thuum ji ki cyɑ̈ng ɑ́kyel, ɑcwøøl gen ji kej ɑ́kyel, kɑ Nɑboth cïb bøli teedø. Kɑ jøg-ɑ ɑ́kɑ̈ɑ̈l be köngø gɑ ɑ́ryew kedh-ɑ bøli teedø, ɑköngi gen kinni i Jwøk geki rɑ̈dh óbwölø yi Nɑboth, codhe ɑkïdhi Nɑboth ngɑ̈ɑ̈j kɑɑlɑni, ɑbɑ̈llii ki tuggi kïttì, kɑ othøø. Kɑ wöödø öri Yidhɑbel kinni, “Nɑboth ɑ́nɑ̈g.” Keny-ɑ ɑ́wɑ̈dhi wöönɑni yï Yidhɑbel ceth, ɑköbbe Akɑɑb kinni, “Nɑboth ɑ́thøw. Kedh, kɑ bɑng-ɑ ɑ́bɑny yi en ki ngëwwi yïn kwɑɑny.” Adhwödh Akɑɑb kì bøli kenyɑni ceth e kedh-ɑ be kwɑnyi bɑngɑni. Kɑ Eliyɑ̀ jɑltöng, jɑl Ticbì köbbi yi Jwøng-ɑ Ácwɑ̈ɑ̈j kinni, “Dhwöödh kedhí yï Akɑɑb rɑ̈ɑ̈dh Sɑmɑriyɑ̀. Óyuud yi yïn yij bɑɑg Nɑboth, kun-ɑ ɑ́kedhe be kwɑnyi bɑngɑni. Köbbí kinni, Jwøng-ɑ Ácwɑ̈ɑ̈j okööbø kinni, ‘Jɑlɑni ɑ́nɑ̈g yi yïn o yï kwɑny gëe thyew?’ Köbbí kinni møg-ɑ kwøb yi Jwøng-ɑ Ácwɑ̈ɑ̈j ek: ‘Keny-ɑ́ yije ɑ́nɑɑng remi Nɑboth yi gwögg, remí ólony ki nɑngø yi gwögg kì yije ceth!’ ” Keny-ɑ ɑ́liidh Eliyɑ̀ yi Akɑɑb, ɑkööbe kinni, “Jɑl-ɑ mɑɑn yɑn, yɑ ɑ́yod yi yïn?” Alöggi Eliyɑ̀ kinni, “Ngee, yï ɑ́yod yi yɑn. Rií ɑ́gwøøg ceth yïn ɑ́ ngɑn nyi gwøg gïnrɑj kì bøli Jwøng-ɑ Ácwɑ̈ɑ̈j? Yïn ɑ köbbi yi Jwøng-ɑ Ácwɑ̈ɑ̈j èn kinni, ‘Ryɑ̈g kɑ̈ɑ̈lɑ’ kömí. Yï ónɑ̈g yi yɑn wuki ji-ɑ bɑ cwøw kì gølí, møg thønhø ki møg døngø. Gølí ógöögø ni gøl Yeroboɑm wɑ̈d Nebɑt, kɑ óni gøl Bɑcɑ̀ wɑ̈d Akiyɑ̀, kipe rëny-ɑ ɑ́rënyi pyëwɑ yi yïn, geki kipe kɑ ɑ́göjjí Isrɑil orøg.’ Jwøng-ɑ Ácwɑ̈ɑ̈j ɑ́kööb thyew kì ri Yidhɑbel kinni, ‘Yidhɑbel ócɑm-ɑ yi gwögg kì Yidhriil.’ Ngeti gølí men-ɑ óthøw kì pɑc ócɑm-ɑ yi gwögg, o men thøw pɑ̈l cɑm-ɑ yi winyyi mɑl.” (Bong dhɑnhø mɑ ɑ́göög ki gïgrijjø ni møg kì bøli Jwøng-ɑ Ácwɑ̈ɑ̈j. Akɑɑb ɑ́kwøll-ɑ yi cyëge Yidhɑbel. Ágöög ki ɑyɑ̈r me dwøng keny-ɑ ɑ́døøge be mɑlli ngïjji jwögg-ɑ pɑth, ni men-ɑ ɑ́gwøg yi tyëng Amör, ɑ ɑ́cyeddi yi Jwøng-ɑ Ácwɑ̈ɑ̈j kì piny men, kedh tyëng Isrɑil bï-ɑ yije). Keny-ɑ ɑ́rum Eliyɑ̀ ki kwøb, kɑ Akɑɑb ógudhe pyëëde wɑ̈g, kɑ ree lunye ki ocwɑ̈llì. Kɑ óbɑ̈nyø ki cɑm, e buud-ɑ yethi ocwɑ̈llì, kɑ døøg-ɑ be cyɑ̈dhø e ólyebbø. Aköbbi Eliyɑ̀ jɑltöng yi Jwøng-ɑ Ácwɑ̈ɑ̈j kinni, “Akɑɑb nuti liidh yïn, kɑ ɑ́gööge ɑ́ mölø kì bølɑ? Ryɑ̈g pɑ kɑ̈ɑ̈l yi yɑn kömi gøle e nudd e onëënø, kipe kɑ ɑ́gööge kinøw, ryɑ̈ngɑni ókɑ̈ɑ̈l yi yɑn kömi gøle kì ri wɑ̈de.” Runn ɑ́ryew ɑ́pöödh e bong liny kì kɑɑm Isrɑil geki Arɑm. Kɑ Yöcɑpɑt rɑ̈ɑ̈dh Yeudiyɑ̀ wël-ɑ yï Akɑɑb rɑ̈ɑ̈dh Isrɑil kì dɑ̈ɑ̈g runn. Kɑ Rɑ̈dh Akɑɑb jøge pyëje kinni, “Ngɑ̈nyi yi wun kinni Rɑmöth Gilyɑd bɑ miee? Dɑ́ kipe ngø ɑ lwɑ̈r wɑ riee, ɑ pɑ kwɑny wɑ en kì cingi rɑ̈ɑ̈dh Arɑm?” Apyëëj Yöcɑpɑt yi Akɑɑb kinni, “Yï ókedhi Rɑmöth Gilyɑd be liny kyeel ki wøn?” Alöggi Yöcɑpɑt kinni, “Ke kedh, yɑ ceg-ɑ kedhø! Ke kedh yɑyí, yɑyɑ ceg-ɑ kedhø! O ke kedh kyënyí, kyënyɑ ceg-ɑ kedhø! De pyëj wɑ Jwøng-ɑ Ácwɑ̈ɑ̈j møti.” Codhe kɑ jøtöng cwööl yi Akɑɑb kwɑnni gen bɑ miy ɑ́ngwen, kɑ gï pyëje kinni, “Kedhɑ be pɑ̈ɑ̈r kömi Rɑmöth Gilyɑd ki liny, wɑlɑ̀ yɑ ko kedh?” Alöggi gen kinni, “Kedh! Jwøng-ɑ Ácwɑ̈ɑ̈j yï ówëgge tyɑ̈mø.” Apëjji Yöcɑpɑt kinni, “Bong jɑltöng megø, mi Jwøng-ɑ Ácwɑ̈ɑ̈j me nud, o wɑ pëjji wɑ kì yïe?” Alöggi Akɑɑb kinni, “Dɑ jɑl ɑ́kyel me cwøl ɑ́ Mikɑiyɑ̀ wɑ̈d Imlɑ̀. De mɑɑn yi yɑn kipe bong gïndøj me nyi töng yi en kiperɑ, nyi töng-ɑ gïnrɑj ceth.” Alöggi Yöcɑpɑt kinni, “Yï ko kööb kinøw!” Codhe ɑ cwöddi Akɑɑb ki jɑngi tøg burø ɑ́kyel, kɑ gø öre kinni, jwɑne be dwɑɑyi Mikɑiyɑ̀. Rɑ̈nhhɑni ryeet ɑ́bëëd ge orugø ki ógudhi jyɑ̈ɑ̈gø, ge bëëd ɑ wɑ̈thi kwømmi gen, kì dhø döri Sɑmɑriyɑ̀ kì buti rɑrø, o jøtöng bënn ɑ́bëëd ge ceg-ɑ töng kì bøli gen. Ákyel kì kelli gen me cwøl ɑ́ Dhedekiyɑ̀ wɑ̈d Kenɑɑnɑ̀, ree ɑ́gögge ki tùngi ngyënyø dødø, kɑ Akɑɑb köbbe kinni, “Bene møg-ɑ ɑ́kwøb yi Jwøng-ɑ Ácwɑ̈ɑ̈j ek; yï ónyïɑ̈ggi ki Arɑm ki tùng møg, kɑ tyɑm yi yïn ki menteg.” Kɑ jøtöng-ɑ kyeelø kwøb-ɑ møg ni møgɑni. Ge ɑ́kööb kinni, “Kedh nyïɑ̈ggí! Rɑmöth Gilyɑd ócïb cingí yi Jwøng-ɑ Ácwɑ̈ɑ̈j.” Kɑ Mikɑiyɑ̀ köbbi yi jɑngi tøg burø men-ɑ ɑ́örii kinni, “Jøtöng møg-ɑ kyeelø bënn, ɑ́kööb kinni i rɑ̈dh ótyɑ̈mø! Yïn thyew kööb kinøw.” De Mikɑiyɑ̀ ɑ́løøg-ɑ kinni, “Yɑ ɑ́köngi ki nyingi Jwøng-ɑ Ácwɑ̈ɑ̈j kinni, gïn-ɑ óköbbi yɑn yi Jwøng-ɑ Ácwɑ̈ɑ̈j, en ɑ ókwøb yi yɑn!” Keny-ɑ ɑ́wɑ̈nhi Mikɑiyɑ̀ bøli Rɑ̈dh Akɑɑb, ɑpyëjii yi rɑ̈dh kinni, “Mikɑiyɑ̀, kedhɑ wøki Yöcɑpɑt be nyɑɑg ki Rɑmöth Gilyɑd, wɑlɑ̀ wø ko kedh?” Kɑ Mikɑiyɑ̀ okööbø kinni, “Kedh, pɑ̈ɑ̈r kömi gen! Yï ówëggi tyɑ̈mø yi Jwøng-ɑ Ácwɑ̈ɑ̈j.” De Akɑɑb ɑ́løøg-ɑ kinni, “Kenyi kööb ki yɑn, yï 'kööb-ɑ nyingi Jwøng-ɑ Ácwɑ̈ɑ̈j, nyi kwøb dyër! Yï ɑ́köbbi yi yɑn kinøw tyel ɑ́dï?” Akööb Mikɑiyɑ̀ kinni, “Isrɑil bëne ɑ́lidh yi yɑn e tɑɑy wɑ̈thi kïttì, ni dyëg møg bong ngɑn kwɑy gen. Kɑ Jwøng-ɑ Ácwɑ̈ɑ̈j okööbø kinni, ‘Jøgɑni bong pënyi gen, wiy ge døøg gen yethi myërri gen ki mër.’ ” Aköbbi Yöcɑpɑt yi Akɑɑb kinni, “Yï nuti köbbø yi yɑn kinni, pɑ nyi töng gïjø me døøj kiperɑ, den-ɑ́ gïnrɑj ceth?” Kɑ Mikɑiyɑ̀ okööbø kinni, “Anɑn lïngí møg-ɑ kømmi yi Jwøng-ɑ Ácwɑ̈ɑ̈j! Jwøng-ɑ Ácwɑ̈ɑ̈j ɑ́lidhɑ e obëëdø kì wïj kwøme kì pɑɑre mɑl kí wëywödde ge ócungø kì bɑdhhe. Apëjji Jwøng-ɑ Ácwɑ̈ɑ̈j kinni, ‘Á men ɑ óthɑb Akɑɑb, o kedhe be nɑ̈gø kì Rɑmöth Gilyɑd?’ Kɑ kwï wëywödd kwøb-ɑ gïn, kɑ møøgø kwøb-ɑ gïjø megø. Kɑ wëywödø megø kedh-ɑ bøli Jwøng-ɑ Ácwɑ̈ɑ̈j, ɑkööbe kinni, ‘Óthɑb yi yɑn.’ Kɑ Jwøng-ɑ Ácwɑ̈ɑ̈j ópëjjø kinni, ‘Óthɑb yi yïn kidï?’ Alöggi wëywönɑni kinni, ‘Yɑ ókedh, o jøtööng Akɑɑb göjjɑ pyed bënn.’ Kɑ Jwøng-ɑ Ácwɑ̈ɑ̈j okööbø kinni, ‘Kedh! Ólwɑ̈ng yi yïn ki thɑbø!’ ” Kɑ Mikɑiyɑ̀ kwøbbe ngøle kinni, “Bene gïg-ɑ ɑ́cwöb ɑgɑk: Jwøng-ɑ Ácwɑ̈ɑ̈j jøtöng møgí ɑ́göjje pyed, o yï nyi köbbi kwøbbi pyed yi gen. De yï ɑ́rum ki nɑ̈gø yi Jwøng-ɑ Ácwɑ̈ɑ̈j!” Codhe, kɑ jɑltöng Dhedekiyɑ̀ wɑ̈d Kenɑɑnɑ̀ kedh-ɑ yï Mikɑiyɑ̀, kɑ gø gøje kì pïne, ɑköbbe gøn kinni, “Yɑ ɑ́wiy ɑ́wën yi wëyi Jwøng-ɑ Ácwɑ̈ɑ̈j, ɑ kööbe kì rií?” Kɑ Mikɑiyɑ̀ okööbø kinni, “Óyod yi yïn cyɑ̈ng-ɑ ókedhí be pɑ̈nø kì tɑtyeel.” Kɑ Rɑ̈dh Akɑɑb jɑl ɑ́kyel kì kelli pëjji linye köbbe kinni, “Mɑg Mikɑiyɑ̀, kɑ muuj Amön, jɑngi kɑɑl geki nyirɑ̈dh Yöɑc. Köbbí gen kinni kïdhi ød mɑg, kɑ wiy cyɑ̈me pï gïti keny-ɑ ódwöögɑ ki tɑrø.” Kɑ Mikɑiyɑ̀ okööbø kinni, “Keløg yï ódwöög ki tɑrø, pɑth ki Jwøng-ɑ Ácwɑ̈ɑ̈j ɑ ɑ́kööb kì riɑ!” Kɑ dhøge cige lengø kinni, “Lïng wun bënn ki møg-ɑ ɑ́kwøb yi yɑn!” Codhe kɑ Akɑɑb rɑ̈ɑ̈dh Isrɑil, geki Yöcɑpɑt rɑ̈ɑ̈dh Yeudiyɑ̀ kedh-ɑ be nyɑɑg ki Rɑmöth Gilyɑd. Kɑ Yöcɑpɑt köbbi yi Akɑɑb kinni, “Yɑ ókedhi be liny riɑ kɑɑng yɑn, o yɑ cögɑ yɑ pɑ ngij, de yïn kedhí be liny ki ógudhi rɑ̈ɑ̈dhø.” Kɑ rɑ̈ɑ̈dh Isrɑil kedh-ɑ be liny ree kɑɑng en. Kɑ rɑ̈ɑ̈dh Arɑm pëjji linye gɑ pyɑ̈r ɑ́dɑ̈g wïdɑ́ryew ceg yi en kinni, i coony gen liny kömi rɑ̈ɑ̈dh Isrɑil kete. Keny-ɑ ɑ́lidh gen Yöcɑpɑt, ɑrum gen kinni en ɑ bɑ rɑ̈ɑ̈dh Isrɑil. Kɑ ri gen lugi ge gøn, kɑ Yöcɑpɑt óryeerø. Kɑ ngij yi gen kinni pɑth ki en ɑ bɑ rɑ̈ɑ̈dh Isrɑil, Codhe ɑdwøøg gen liny cyɑ̈n. Jɑl-liny Arɑm megø ɑ́wɑ̈dhi göjjø ki weth, kɑ weth pɑ̈dh-ɑ kɑɑm köjji ɑ́dhedheg-ɑ ri Rɑ̈dh Akɑɑb. Kɑ jɑl-ɑ kwølli kyënyi yɑ̈ye köbbe kinni, “Riɑ ɑ́kedhi yi kedø! Wir yɑ̈y kɑ yɑ kïdhí wɑ̈g kì yij liny.” Kɑ liny ótëngø ki mendwøng dicyɑ̈ngɑni, kɑ Rɑ̈dh Akɑɑb ocögø e bëëd ɑ yij yɑ̈ye, e nenn-ɑ kuni Arɑm. De kedø men-ɑ ree okyërø, kɑ yij yɑ̈y opɑ̈ngø yi remø. Codhe ɑthøwe kì böörø. Kɑ kɑɑl Isrɑil kiw kì bøli kej buddi cɑ̈ng kinni, “Døøg gen myërri gen!” Bene kër-ɑ ɑ́thøw Rɑ̈dh Akɑɑb ɑnɑn, ɑkïdhii Sɑmɑriyɑ̀, kɑ kony kì kunɑni. Alwöög remø wɑ̈g kì yij yɑ̈yɑni, kì tøg luuy Sɑmɑriyɑ̀, luy-ɑ yije nyi lwøøg yi ɑ́mɑ̈jj kì pönhɑni. Kɑ reme nɑng yi gwögg ni møg-ɑ ɑ́kwøb yi Jwøng-ɑ Ácwɑ̈ɑ̈j. Jɑmm-ɑ ɑ́gwøg yi Rɑ̈dh Akɑɑb bënn, kí gøldwøng men-ɑ ɑ́dhyɑw yi en ki leggi lyej, kí myërr-ɑ ɑ́ger yi en bënn, bɑ ɑgwed kì yij Wɑ̈nyi Rɑ̈nhi Isrɑil. Kɑ Akɑdhiyɑ̀ wɑ̈de røøny keje ɑ́ rɑ̈dh. Yöcɑpɑt wɑ̈d Asɑ̀ ɑ́røny ɑ́ rɑ̈ɑ̈dh Yeudiyɑ̀, e runni Akɑɑb rɑ̈ɑ̈dh Isrɑil bɑ ɑ́ngwen kì yij lɑwø. Árøny runne bɑ pyɑ̈r ɑ́dɑ̈g wïdɑ́bïj. Kɑ ojyɑ̈gø ki runn pyɑ̈r ɑ́ryew wïdɑ́bïj. Meye cwøl ɑ́ Adhubɑ̀ nyɑɑr Cilkì. Yöcɑpɑt ɑ́göög ki gïgdøj kì bøli Jwøng-ɑ Ácwɑ̈ɑ̈j ni wïye, de kɑ̈jj-ɑ nyi mɑlli jwögg-ɑ pɑth nuti dhur en piny, o ji nudd ge nyii ngɑ̈dø ki gëdhhì, o ge nudd ge nyii rɑ̈bø ki bɑkur kì kɑ̈jjɑni. Yöcɑpɑt ɑ́bëëd kɑɑm gen dɑ mër ki rɑ̈ɑ̈dh Isrɑil. Jɑmm-ɑ kyeelø møg-ɑ ɑ́gwøg yi Yöcɑpɑt, kí lìny-ɑ ɑ́nyɑge, kí tege kenyi tyɑ̈me, ge bɑ ɑgwed kì yij Wɑ̈nyi Rɑ̈nhi Yeudiyɑ̀. Ámɑ̈jji keng møg-ɑ bɑ cwøw kí mɑ̈nn, møg-ɑ ɑ́ying kɑ̈jji lɑmmi jwögg-ɑ pɑth, møg döngø kì bɑng wïye, ɑ́cyeede wɑ̈g kì yij pödhø. Ábëëd e bong rɑ̈dh ki Edöm kì bøli kenyɑni. De ɑ́jɑɑg-ɑ yi ókwøm me nyi røny yi rɑ̈ɑ̈dh Yeudiyɑ̀. Yöcɑpɑt ɑ́gud ki sɑpïnnì mø døngø, møg nyi kyewi kì nɑ̈mmi omel-ɑ døngø, yɑ̈thɑni ɑ́gwøg gɑ møg nyi dwɑ̈ddi Opir ki dhɑb. De ge ɑ́cög ge nuti wɑ̈dhi pönhɑni, ge ɑ́tørri kì Edhïön Geber. Codhe, kɑ Akɑdhiyɑ̀ wɑ̈d Akɑɑb, ɑ løg rɑ̈ɑ̈dh Isrɑil omuujø ki jøkëw, mø di køny jø Yöcɑpɑt. De møgɑni ɑ́bɑny yi Yöcɑpɑt. Kɑ Yöcɑpɑt kedh-ɑ kun-ɑ di kweyye, kɑ kony kì Yerusɑlem, kɑɑl Debïd kweye. Arøøny wɑ̈de Yeörɑm keje ɑ́ rɑ̈dh. Akɑdhiyɑ̀ wɑ̈d Akɑɑb ɑ́røny ɑ́ rɑ̈ɑ̈dh Isrɑil, e runni Yöcɑpɑt rɑ̈ɑ̈dh Yeudiyɑ̀ bɑ pyɑ̈rø wïdɑ́bïryew kì yij lɑwø. Kɑ ojyɑ̈gø ki runn ɑ́ryew kì Sɑmɑriyɑ̀. Ágöög ki gïgrijjø kì bøli Jwøng-ɑ Ácwɑ̈ɑ̈j, ni møg-ɑ ɑ́gwøg yi Akɑɑb wïye geki Yidhɑbel meye. Kɑ ge nɑ møg-ɑ ɑ́gwøg yi Yeroboɑm, ɑ ɑ́göjji tyëng Isrɑil orøg. Akɑdhiyɑ̀ ɑ́mɑll-ɑ Bɑɑl, kɑ pyëw Jwøng-ɑ Ácwɑ̈ɑ̈j rënye ki gïg-ɑ ɑ́gøgge ni møg-ɑ ɑ́gøggi yi wïye. Keny-ɑ ɑ́thøw Akɑɑb rɑ̈ɑ̈dh Isrɑil, kɑ pödhi Moɑb ngɑ̈ny-ɑ wɑ̈ye. Akɑdhiyɑ̀ rɑ̈ɑ̈dh Isrɑil ɑ́pɑ̈ɑ̈dh kì ød mɑl kì gøldwøng, kì Sɑmɑriyɑ̀, kɑ ree kedhi yi kedø me teeg. Codhe, ɑöde ki ji møg kedhi be pyëji Bɑɑldhebub, jwøøg Ekrön kì Pelistiyɑ̀, o yod yi en men-ɑ ódhwödhe mɑl kì yij buddø ki ken-ɑ ree. De Eliyɑ̀ jɑl Ticbì ɑ́köbbi yi wëywöni Jwøng-ɑ Ácwɑ̈ɑ̈j kinni kedhe be rødhi jøg-ɑ ɑ́ör yi Rɑ̈dh Akɑdhiyɑ̀, o gï pyëje kinni, “Wude ɑ kedhu be pyëji Bɑɑldhebub, jwøøg Ekrön? Wu orumø kinni bong Jwøk kì Isrɑil? Köbbu rɑ̈dh kinni, ‘Jwøng-ɑ Ácwɑ̈ɑ̈j okööbø kinni, ken-ɑ rií pɑ nøggi; yï ceg-ɑ thøø ceth.’ ” Akedh Eliyɑ̀, kɑ jøgɑni köbbe. Adøøg jøgɑni yï rɑ̈dh. Kɑ ge pyëj yi rɑ̈dh kinni, “Wude ɑ dwöög wun?” Alöggi gen kinni, “Wø ɑ́røøm ki jɑl megø, mɑ ɑ́köbbi wøn kinni, i dwöög wøn yïí, kɑ yï köbbi wøn kinni, yïde ɑ öd ki ji møg pyëj Bɑɑldhebub, jwøøg Ekrön? Bɑ kipe rumm-ɑ rømmi yi yïn kinni bong jwøg kì Isrɑil? Ken-ɑ rií pɑ nøggi; yï ceg-ɑ thøø ceth!” Apëjji rɑ̈dh kinni, “Jɑlɑni bëëd ɑ dï?” Alöggi gen kinni, “Jɑlɑni dële pɑ̈ng yi yëyy, o rug-ɑ lɑwi lɑ̈y, o wëni yije bɑ dël.” Akööbe kinni, “Bɑ Eliyɑ̀!” Codhe, ɑöd rɑ̈dh ki pënyi liny, e ókɑ̈ddø ki jøliny gɑ pyɑ̈r ɑ́bïj. O ge kedhi gen be dwɑɑyi Eliyɑ̀. Kɑ yuud yi pënyɑni e obëëdø kì wïj nyɑ kït. Aköbbii yi pënyɑni kinni, “Bïí piny jɑltöng, yï odwɑddø yi rɑ̈dh.” Kɑ Eliyɑ̀, okööbø kinni, “Keløg yɑ bɑ jɑltöng, wiy mɑc dëëme kì mɑl, o wu nɑ̈g yi en wuki jøgí.” Adëëm mɑc kì mɑl, kɑ jøgɑni cɑm yi mɑc bënn. Acigi rɑ̈dh önø ki pëëji megø, kí jøliny gɑ pyɑ̈r ɑ́bïj. Akedhi gen mɑl wïj nyɑ kïnɑni. Aköbbi Eliyɑ̀ yi pënyɑni kinni, “Jɑltöng, rɑ̈dh okööbø i jwɑn bëënø.” Alöggi Eliyɑ̀ kinni, “Keløg yɑ bɑ jɑltöng, wiy mɑc dëëme kì mɑl, o wu nɑ̈g yi en wuki jøgí!” Kɑ mɑɑc Jwøk ódëëmø kì mɑl kì bøli kenyɑni ceth, kɑ pënyɑni nɑ̈ge geki jøge bënn. Acigi rɑ̈dh önø ki pëëji megø ki jøliny gɑ pyɑ̈r ɑ́bïj. Akedh pënyi liny menɑni, kɑ yedh-ɑ mɑl yï Eliyɑ̀. Abøødhe ree piny kì bøle, kɑ gø kwɑjje kinni, “Jɑltöng, lɑ̈ɑ̈m pyëwí ki yɑn wøki jiɑ. Wø ko nɑ̈ɑ̈g! Pëjji liny møg-ɑ ɑ́bï ryeet geki jø gen, ge ɑ́rɑ̈b yi mɑny-ɑ ɑ́kɑ̈ɑ̈l mɑl. De lɑ̈ɑ̈m pyëwí ki yɑn!” Aköbbi Eliyɑ̀ yi wëywöni Jwøng-ɑ Ácwɑ̈ɑ̈j kinni, “Kedh wuki en, yï ko böggi.” Ayïnhi Eliyɑ̀ piny. Kɑ ge kedh-ɑ yï rɑ̈dh. Aköbbi rɑ̈dh yi Eliyɑ̀ kinni, “Jwøng-ɑ Ácwɑ̈ɑ̈j okööbø kinni, ‘Mɑ́ yï ɑ́ödi be pyëji Bɑɑldhebub, jwøøg Ekrön, de ce bong-ɑ jwøg kì Isrɑil me cuggi pyëjø, yï pɑ dönyi kinni tek, yï ceg-ɑ thøø!’ ” Kɑ Akɑdhiyɑ̀ othøø ni møg-ɑ ɑ́kwøb yi Jwøng-ɑ Ácwɑ̈ɑ̈j ki dhøg Eliyɑ̀. Akɑdhiyɑ̀ yïe ɑ́bong-ɑ wɑ̈d, bene ɑ bɑnge røøny Yörɑm ómen keje ɑ́ rɑ̈dh, kì ryeew runni Yeörɑm wɑ̈d Yöcɑpɑt rɑ̈ɑ̈dh Yeudiyɑ̀ kì yij lɑwø. Gïg-ɑ kyeelø møg-ɑ ɑ́gwøg yi Rɑ̈dh Akɑdhiyɑ̀, bɑ ɑgwed kì yij Wɑ̈nyi Rɑ̈nhi Isrɑil. Keny-ɑ ɑ́bëën bøli kej kïdhi Eliyɑ̀ mɑl kì yij ɑ́kødɑkødø yi Jwøng-ɑ Ácwɑ̈ɑ̈j, kɑ Eliyɑ̀ geki Elicɑ̀ odhwödhø kì Gilgɑl. Kɑ Elicɑ̀ köbbi yi Eliyɑ̀ kì kö yöö kinni, “Bëëd kì keny, yɑ ɑ́ör Betiil yi Jwøng-ɑ Ácwɑ̈ɑ̈j.” De Elicɑ̀ ɑ́löggi kinni, “Yɑn ɑ köngi èn ki nyingi Jwøng-ɑ Ácwɑ̈ɑ̈j, yï pɑ wiyɑ ketí.” Codhe ɑkedhi gen Betiil. Kɑ jøtöng mø ying Betiil kedh-ɑ yï Elicɑ̀, ɑköbbi ge gøn kinni, “Ngɑ̈nyi yi yïn kinni, wöw ókɑ̈l yi Jwøng-ɑ Ácwɑ̈ɑ̈j kì butí dicyɑ̈ngtïn?” Alöggi Elicɑ̀ kinni, “Kud wun, ngɑ̈nyɑ.” Codhe, kɑ Elicɑ̀ köbbi yi Eliyɑ̀ kinni, “Bëëd kì keny, yɑ ɑ́ör Yerikö yi Jwøng-ɑ Ácwɑ̈ɑ̈j.” De Elicɑ̀ ɑ́löggi kinni, “Yɑn ɑ köngi èn ki nyingi Jwøng-ɑ Ácwɑ̈ɑ̈j, yï pɑ wiyɑ ketí.” Codhe kɑ ge kedh-ɑ Yerikö. Kɑ jøtöng mø ying Yerikö kedh-ɑ yï Elicɑ̀, ɑköbbi ge gøn kinni, “Ngɑ̈nyi yi yïn kinni wöw ókɑ̈l yi Jwøng-ɑ Ácwɑ̈ɑ̈j kì butí dicyɑ̈ngtïn?” Alöggi Elicɑ̀ kinni, “Kud wun, ngɑ̈nyɑ.” Codhe, kɑ Elicɑ̀ köbbi yi Eliyɑ̀, kinni, “Bëëd kì keny, yɑ ɑ́ör kömi Nɑm Urdun yi Jwøng-ɑ Ácwɑ̈ɑ̈j.” De Elicɑ̀ ɑ́löggi kinni, “Yɑn ɑ köngi èn ki nyingi Jwøng-ɑ Ácwɑ̈ɑ̈j, yï pɑ wiyɑ ketí.” Codhe ɑkedh gen. Kɑ bɑng gen løg gɑ̈d yi jøtöng pyɑ̈r ɑ́bïj. Kɑ ge ócungø kì keny me cyɑ̈gi ki Eliyɑ̀ geki Elicɑ̀ kì gɑ̈d. Codhe, kɑ Eliyɑ̀ lɑwe lunye wɑ̈g, kɑ gø døge, kɑ pï gøje ki gøn. Kɑ pï ópyëdø møg døøg-ɑ tuung, møg døøg-ɑ tuung. Kɑ kedh-ɑ løøgø geki Elicɑ̀ ge kɑ̈ll-ɑ keny thwøwø. Keny-ɑ ɑ́rum gen ki wɑ̈dhi løøgø, ɑpyëëj Elicɑ̀ yi Eliyɑ̀ kinni, “Á ngø ɑ dwɑddi yi yïn, o göggɑ yïn kɑ̈ng-ɑ nuti kɑ̈ɑ̈l yɑn kì butí?” Alöggi Elicɑ̀ kinni, “Wiy yɑ lɑgɑ tegí, o yɑ göögɑ yɑn ɑ́ kejí.” Alöggi Eliyɑ̀ kinni, “Yï ɑ́cwøl gïjø me muuje teeg. De keløg yɑ ólidh yi yïn keny-ɑ ókɑ̈ɑ̈l yɑn kì butí, tengɑni bɑ men mëggi yïn, o ke pɑ liidh yɑn, pɑ mëggi yïn.” Akedh gen ge ócyɑ̈dhø ge okööbø, kɑ yɑ̈y me bɑ mɑc, me pyejji yi kyënyì mø bɑ mɑc, ceg-ɑ ì rïg kì kɑɑm gen, kɑ Eliyɑ̀ kïdhi mɑl kì yij ɑ́kødɑkødø. Kɑ lidh yi Elicɑ̀, ɑryeere kinni, “Wïyø! Wïyø! Yï ngɑn-ɑ ɑ́nyɑg per Isrɑil, yï ɑ́kedh!” Eliyɑ̀ nuti cigi lidhø yi en. Kɑ Elicɑ̀ ógødhe kɑge ɑ́ ɑ́ryew, yi rɑ̈ɑ̈m pyëwe. Kɑ lɑwi Eliyɑ̀ lɑw-ɑ ɑ́dëëm kì yïe, kwɑny yi Elicɑ̀. Adøøge, kɑ ócungø kì kömi Nɑm Urdun. Kɑ pï gøje ki lɑni Eliyɑ̀, ɑkööbe kinni, “Jwøøg Eliyɑ̀, Jwøng-ɑ Ácwɑ̈ɑ̈j, ying-ɑ keny?” Acige pï gøjø, kɑ pï ópyëdø møg døøg-ɑ tuung kí tuung. Kɑ Elicɑ̀ kedh-ɑ løøgø e cyɑ̈dh-ɑ́ɑ̀ keny thwøwø. Kɑ lidh yi jøtöng-ɑ ɑ́bï ge kɑ̈ɑ̈l-ɑ Yerikö, ɑkööb gen kinni, “Tegi Eliyɑ̀ ying-ɑ kömi Elicɑ̀!” Codhe, ɑkedhi gen be yïddø ki gøn. Kɑ wɑ̈thi gen kuul gen piny kì bøle, ge okööbø kinni, “Wø bɑ pyɑ̈r ɑ́bïj, wø teeg bënn. Wiy wø kedhi wøn be yɑbi wöw. Óbëëd e ókɑ̈ɑ̈lø yi wëyi Jwøng-ɑ Ácwɑ̈ɑ̈j, kɑ gø leenge wïj kït, wɑlɑ̀ yij tör.” Alöggi Elicɑ̀ kinni, “Wu ko kedh.” De ge ɑ́dyëëj gïti kɑ ɑ́buudh kööre kɑ oyïëyø. Akööbe kinni, “Døj kedh wun.” Codhe ɑkedh gen gɑ pyɑ̈r ɑ́bïj bënn be yɑbi Eliyɑ̀. Kɑ ge oyɑ̈bø ki cyɑ̈ng ɑ́dɑ̈g, de gø nuti yood gen. Codhe ɑdøøg gen yï Elicɑ̀, kɑ gø yuud gen e døøg Yerikö, ɑköbbe gïn kinni, “Wu nuti kyëddi yɑn kinni wu ko kedh?” Kɑ kwï jø Yerikö kedh-ɑ yï Elicɑ̀, kɑ gø köbbi gen kinni, “Ngɑ̈nyi yi yïn wuö kinni kɑɑl men, bɑ kɑɑl me døøj. De pïge rijjø; gïg-ɑ nyi pidh pɑ nyi twïy.” Aköbbi gen yi Elicɑ̀ kinni, “Kɑ̈ni wun ki lwøl me nyɑ̈n, kɑ yije kïdhi wun ki omelø.” Kɑ muujii. Codhe ɑkedhe wɑɑng pï, kɑ omelø kønye wɑɑng pïgɑni. Kɑ okööbø kinni, “Jwøng-ɑ Ácwɑ̈ɑ̈j okööbø kinni, ‘Pïg ɑ́gwøg yi yɑn ge døøj, ge pɑ kɑ̈ni ki thøø këti, wɑlɑ̀ gïg-ɑ nyi pidh pɑ mɑ̈ɑ̈n twïyø yi gen.’ ” Kɑ pïgɑni ódönyø, ni møg-ɑ ɑ́kwøb yi Elicɑ̀. Kɑ ge ocögø ge døøj. Adhwödh Elicɑ̀ kì Yerikö e kedh-ɑ Betiil. Kɑ gɑggi kì kö yöö yi yɑnythønhø mø kɑ̈ɑ̈l pɑc megø, ge ceg-ɑ ryeerø, ge okööbø kinni, “Kedh kì keny, wɑ̈d wïj ɑbudh!” Aløg Elicɑ̀ ree, kɑ lïïdh-ɑ yï gen, kɑ gï lɑme ki nyingi Jwøng-ɑ Ácwɑ̈ɑ̈j. Kɑ lɑ̈yy dub ɑ́ryew mø bɑ mɑdhh, bï-ɑ wɑ̈g kì yij thïm. Kɑ yɑnythønhø pyɑ̈r ɑ́ngwen wïdɑ́ryew nyɑɑr gen piny. Kɑ Elicɑ̀ pödh-ɑ Kïti Kɑrmel, codhe ɑdøøge Sɑmɑriyɑ̀. Kì pyɑ̈rø wïdɑ́bïdɑ̈ɑ̈g runni Yöcɑpɑt rɑ̈ɑ̈dh Yeudiyɑ̀ kì yij lɑwø, ɑ ɑ́røøny Yörɑm wɑ̈d Akɑɑb ɑ́ rɑ̈ɑ̈dh Isrɑil. Kɑ ojyɑ̈gø ki runn pyɑ̈rø wïdɑ́ryew kì Sɑmɑriyɑ̀. Yörɑm ɑ́göög ki gïgrijjø kì bøli Jwøng-ɑ Ácwɑ̈ɑ̈j, de nuti bëëdø e rɑɑj cɑrø ni wïye geki meye Yidhɑbel. Mɑ́ ngïji Bɑɑl men-ɑ ɑ́gwøg yi wïye ɑ́dhure piny. Yörɑm Isrɑil ɑ́peeje yij orøg ni Yeroboɑm wɑ̈d Nebɑt cøn, kɑ Yörɑm ódhɑ̈lø wïyø ki orøg. Mecɑ̀ rɑ̈ɑ̈dh Moɑb ɑ́bëëd yïe dɑ römm. Rɑ̈ɑ̈dh Isrɑil nyii muujø yi en ki órömm-ɑ thønhø ɑ́lïp miyø, kí yëyyi dyëg ɑ́tegg gɑ ɑ́lïp miyø yethi runn bënn ɑ́ gwɑ̈j. De keny-ɑ ɑ́thøw Rɑ̈dh Akɑɑb, kɑ rɑ̈ɑ̈dh Moɑb ngɑ̈nyi wɑ̈ye. Bøli kenyɑni ɑ ɑ́kedh Rɑ̈dh Yörɑm kì Sɑmɑriyɑ̀, kɑ liny Isrɑil bëne cønge. Aödi Rɑ̈dh Yörɑm yï Yöcɑpɑt rɑ̈ɑ̈dh Yeudiyɑ̀ ki wöödø kinni, “Rɑ̈ɑ̈dh Moɑb ɑ́ngɑ̈nyi wɑ̈ye. Yï ócuggø rëbø ki yɑn, o wɑ kedhi wɑ be nyɑɑg ki en?” Alöggi Rɑ̈dh Yöcɑpɑt kinni, “Yɑ ókedh. Yɑ nɑ yïn, o jiɑ nɑ jií, o kyënyɑ nɑ kyënyí. Wɑ ókɑ̈l-ɑ keny?” Kɑ Yörɑm okööbø kinni, “Wɑ ókɑ̈l-ɑ yij pɑ̈ɑ̈l Edöm.” Akedh Rɑ̈dh Yörɑm geki rɑ̈ɑ̈dh Yeudiyɑ̀, kí rɑ̈ɑ̈dh Edöm. Kì bɑng wɑ̈ɑ̈dh cyɑ̈ng ɑ́bïryew, kɑ ge ójɑ̈ddø ki pïg mɑdh yi gen geki jøliny, kí jɑmmi gen. Agɑ̈y Rɑ̈dh Yörɑm kinni, “Pöy! Wɑ ɑ́ceg kɑ cïb cingi rɑ̈ɑ̈dh Moɑb yi Jwøng-ɑ Ácwɑ̈ɑ̈j, e men-ɑ́ wɑ bɑ rɑ̈nhì ɑ́dɑ̈g?” Apëjji Rɑ̈dh Yöcɑpɑt kinni, “Dɑ jɑltöng me nud kì keny, me cuggi pyëji Jwøng-ɑ Ácwɑ̈ɑ̈j?” Alöggi pënyi liny ɑ́kyel kì kelli pëjji liny Rɑ̈dh Yörɑm kinni, “Elicɑ̀ wɑ̈d Cɑpɑt nud, en ɑ ɑ́bëëd e nyi køny-ɑ Eliyɑ̀.” Akööb Rɑ̈dh Yöcɑpɑt kinni, “Bɑ jɑltöng kidyër!” Akedhi rɑ̈nhhɑni yï Elicɑ̀ gɑ ɑ́dɑ̈g. Apyëëj rɑ̈ɑ̈dh Isrɑil yi Elicɑ̀ kinni, “Yïde ki yɑn? Kedhí be pyëji jøtöng møg-ɑ́ nyi pyëj yi wïyí geki meyí.” Alöggi Yörɑm kinni, “Pɑth! Bɑ Jwøng-ɑ Ácwɑ̈ɑ̈j ɑ ɑ́cïb wøn cingi rɑ̈ɑ̈dh Moɑb, wøn ɑ́ rɑ̈nhì ɑ́dɑ̈g.” Alöggi Elicɑ̀ kinni, “Yɑn ɑ köngi èn ki nyingi Jwøng-ɑ Ácwɑ̈ɑ̈j, Jwøng-ɑ Nëënø, ɑ bøle göögɑ yɑn ɑ́ bɑ̈nge, møgí pɑ di løøg yi yɑn, keløg e pɑth ki Yöcɑpɑt rɑ̈ɑ̈dh Yeudiyɑ̀ ɑ cyɑ̈dhi ki yïn, en ɑ wør yi yɑn. Muuj wun yɑn ki bødhi thom.” Keny-ɑ ɑ́thoom thom, ɑbëën tegi Jwøng-ɑ Ácwɑ̈ɑ̈j kömi Elicɑ̀. Kɑ okööbø kinni, “Jwøng-ɑ Ácwɑ̈ɑ̈j okööbø kinni, ‘Kuny wun ki ɑwöll kì tyeli nɑm keny-ɑ thwøwø èn. Cɑgg e bong kødh, wɑlɑ̀ yømø men-ɑ ólidh yi wun, tyeli nɑmɑni ópɑ̈ng yi pï, kɑ wu omɑ̈dhø ki pï, wuki jɑmm-ɑ kwølli yi wun, geki møg-ɑ tyëddi jɑmmi wun.’ ” Akööb Elicɑ̀ këti kinni, “Menɑni bɑ gïjø me gwøge yööd yi Jwøng-ɑ Ácwɑ̈ɑ̈j. Wu ówëgge tyɑmi tyëng Moɑb thyew. Kɑ̈ddi tyëng Moɑb, kɑ̈dd-ɑ thøø yi gerø ówëgge mɑgø yi wun. Yenhi gen, yenh-ɑ nywøli gen nyi cɑm, óngøl piny yi wun, kɑ nyingi pï mø gen rïg yi wun. Yethi pwödhhi gen, pwödhh-ɑ døøj ólëngi yi wun ki tuggi kïttì, kɑ ge rënyi yi wun.” Dhuki kì bøli keny-ɑ nyi muuj gënhi mwøl, ɑmwöj pï kì kuni Edöm, kɑ piny opɑ̈ngø yi pï. Keny-ɑ ɑ́lïng tyëng Moɑb kinni rɑ̈nhì ɑ́dɑ̈g bï-ɑ be nyɑɑg ki gen, kɑ tyëng-ɑ cuggi nyïɑ̈ggø, yɑɑg døngø, kí remthinh cøng, kɑ ge pëgg-ɑ wïj tuung pödhi gen. Keny-ɑ ɑ́cyëëw gen kì mwøl cɑ̈ng ótuulø, cɑre göjj-ɑ kömi pï, ɑliidh pï yi tyëng Moɑb, ge kwɑɑr nɑ remø. Aryeer gen kinni, “Menɑni bɑ remø! Jøliny mø rɑ̈nhhɑni gɑ ɑ́dɑ̈g ri gen nɑ̈ɑ̈g gen. Bïu kedhi wɑ kɑɑl gen be kwɑnyi jɑmmi gen!” De keny-ɑ ɑ́wɑ̈dhi gen kɑɑl Isrɑil, kɑ ge jöny yi liny Isrɑil. Adwøøg gen yöö ge pwööd-ɑ piny yi liny Isrɑil. Kɑ kɑ̈ddi gen rënyi. Kenyi yood pwödhø me døøj yi jø Isrɑil, ge nyi ceg-ɑ lëngi yije ki tuggi kïttì, kɑ pwödh órënyø. Nyingi pï ɑ́rïg yi gen thyew. Kɑ yenh-ɑ nywøli gen nyi cɑm ngøl gen piny. Kɑ döng ɑ́ kɑɑl Kïr Ëres, kɑɑl-ɑ dwøng kete ɑ nuti cøør piny, de ɑ́tyeg yi jøg-ɑ nyi bɑ̈ɑ̈dø ki bɑ̈ddi lel, kɑ gø bɑ̈lli gen. Keny-ɑ ɑ́lidhii yi rɑ̈ɑ̈dh Moɑb kinni nënni e otyɑmø, ɑkɑ̈bbe ki jøliny pil gɑ miy ɑ́bïryew, kinni o di turre wɑ̈g e cør-ɑ yij liny Isrɑil, o di pɑ̈ɑ̈re yï rɑ̈ɑ̈dh Arɑm, de ɑ́dhɑ̈li twïy wɑ̈g. Codhe ɑkwɑnye wɑ̈de, wɑ̈n-ɑ kɑyø, ɑ di lɑg keje ɑ́ rɑ̈dh, kɑ gø rɑ̈bbe jwøøg Moɑb ɑ́ gëëdhi, kì wïj döri kɑɑlɑni. Kɑ tyëng Isrɑil obwøgø ki mendwøng yi gïn ni menɑni, ɑdøøg gen myërri gen. Ngɑn jɑdø me jɑlgøle thøø, o jɑlɑni bëëdø ɑ́ jɑltöng, ɑ́kedhi yï Elicɑ̀, ɑkööbe kinni, “Jɑlgølɑ ɑ́thøw wuö! Ngɑ̈nyi yi yïn kinni ɑ́bëëd e bögg-ɑ Jwøng-ɑ Ácwɑ̈ɑ̈j. De ɑnɑn, jɑl me pirii ɑ́bï be kɑ̈li wɑ̈ddɑ ryeet, o gï gwøge gɑ bɑ̈ngg, gɑ wïj kwör-ɑ cwɑggi jɑlgølɑ.” Aköbbii yi Elicɑ̀ kinni, “Göggɑ yïn ngø? Köbbí yɑn, ɑ́ ngø ɑ nud kì yïí kì gølí?” Kɑ ngɑnɑni okööbø kinni, “Bong gïjø me nud kinni tek, den-ɑ́ pugi møøw dhetun me thiinh ɑ nud kete.” Akööb Elicɑ̀ kinni, “Kedh, kɑ yï kwɑ̈jjí kì yï tyëng byëëg wun bënn ki puggì mø gïïr. Kɑ gølí cyëëg kömí wuki wɑ̈ddí, kɑ puggɑni bënn kunyí ki møwɑni, kɑ men-ɑ nyi pɑ̈ng nyi cïb wɑ̈ye.” Akedhi ngɑnɑni gøle, kɑ gøle cyëëge köme geki wɑ̈dde. Kɑ pung-ɑ yije di møw kwɑny yi ngɑnɑni, kɑ møw nyi kønye yethi pugg-ɑ nyi gɑ̈mmii yi wɑ̈dde. Keny-ɑ ɑ́pɑ̈ng puggɑni bënn, ɑpëjji ngɑnɑni mɑ bëëd e dɑ puggì møøgø. Alöggi wɑ̈de ɑ́kyel kinni, “Bong megø mɑ ɑ́döng.” Kɑ møw ócungø. Akedh ngɑnɑni, kɑ jɑltöng lwöbbe. Aköbbi ngɑnɑni yi Elicɑ̀ kinni, “Kedh, kɑ møwɑni ngeew wɑ̈g, o yï yïddí ki ngyëny møg cool kwör-ɑ kömí. Ngyënyy-ɑ döng ócɑm yi yïn, wuki wɑ̈ddí.” Cyɑ̈ng ɑ́kyel Elicɑ̀ ɑ́kedhi Cunem, ɑ́dɑ ngɑndhɑjø me kɑ̈rø kì kɑɑlɑni. Kɑ ryej yi ngɑnɑni. Kì bɑng kenyɑni, kɑ nyi døøg-ɑ be cɑm kì gøl ngɑnɑni kenyi wele Cunem. Kɑ ngɑnɑni jɑlgøle köbbe kinni, “Men-ɑ́ jɑl-ɑ nyi bï gølee èn, be ngeti kwër. Gëëd wɑ ki ød me thiinh kì wïj óthɑɑng ød, kɑ yije cïbi ki pyën, kí tɑrɑbedhɑ̀ kí kwøm, kí lɑ̈mbɑ̈, o nyi bëëde kì ønɑni kenyi bëëne be këëmi wɑ.” Cyɑ̈ng ɑ́kyel Elicɑ̀ ɑ́weli Cunem, kɑ yedh-ɑ øde be ywömø. Kɑ bɑ̈nge, Gïëdhì öre be cwööli ngɑnɑni. Keny-ɑ ɑ́wɑ̈nhe, ɑköbbe Gïëdhì kinni, “Pyëj ngɑnɑni, ɑ́ ngø ɑ dwɑddi yi en, o göggɑ en, wïj gïg-ɑ ɑ́gögge wɑ ek bënn? Dɑ gïn cuggɑ ki köbbi rɑ̈dh wɑlɑ̀ pënyi liny, wɑlɑ̀ jɑgø kipere?” Kɑ ngɑnɑni okööbø kinni, “Bong gïjø me jɑ̈ddi yɑn kì kelli wɑddi wøn kì keny.” Apyëëj Gïëdhì yi Elicɑ̀ kinni, “Á ngø ɑ cuggi göggii yi yɑn cyee?” Alöggi Gïëdhì kinni, “Men-ɑ́ en, yïe bong wɑ̈d, o jɑlgøle bɑ yu.” Kɑ Elicɑ̀ okööbø kinni, “Köbbí bëe!” Kɑ cwøl yi Gïëdhì. Codhe, ɑbëëne kɑ ócungø kì dhø ød. Aköbbii yi Elicɑ̀ kinni, “Run-ɑ bï piny nɑ men, yï óbëëdø yï ómïdhø ki wɑ̈d kì köörí.” Agɑ̈ye kinni, “Möy! Yï bɑ jɑltöng, yɑ ko köbbí ki kwøbbi pyed!” De ngɑnɑni ɑ́yɑɑj, ɑnywøle ki wɑ̈d kì bøli keny-ɑ ɑ́köbbii yi Elicɑ̀ ceth. Kɑ nyelthinh ódøngø. Kɑ kedh-ɑ pwödhø yï wïye cyɑ̈ng ɑ́kyel byel okɑjø. Kɑ wïye köbbe kinni, “Wïjɑ orɑ̈mø! Wïjɑ orɑ̈mø!” Kɑ bɑ̈ng köbbi yi wïye kinni, “Kɑ̈ɑ̈l, muuj meye.” Codhe kɑ nyelthinh byeel yï meye yi bɑ̈ngɑni, kɑ mïdhi kì kɑ̈w yi meye gïti kɑ ɑ́wɑ̈dhi cɑ̈ng dïmɑl. Codhe, ɑmije wɑnge. Kɑ gø kïdhe ød mɑl, kɑ gø pyëële yij pyëën Elicɑ̀ jɑlkwøbbi Jwøk, kɑ ød cyëëge köme. Acwøle jɑlgøle kɑ gø köbbe kinni, “Ödí yɑn ki bɑ̈ng kí ɑderø, o yɑ jwɑnɑ yï jɑltöng, yɑ ójwɑn dwöögø.” Kɑ jɑlgøle okööbø kinni, “Yïde ɑ kedh dicyɑ̈ɑ̈ng, e pɑth ki cyɑ̈ng kwëër Sɑbɑth, wɑlɑ̀ pɑth ki cyɑ̈ɑ̈ng kwër cɑ̈gi dwɑ̈y?” Kɑ ngɑnɑni okööbø kinni, “Wiy yɑ kedhɑ yøw.” Codhe kɑ ɑderø muujii kí jɑmme kì köme, ɑköbbe bɑ̈ngɑni kinni, “Pwööd ɑderø yöö, kɑ ko wëggí cyɑ̈dhø mɑ̈ɑ̈dh, keløg e pɑth ki yɑn ɑ kööbø kinni nwöngí wɑ̈dh.” Codhe, ɑdhwödhe kɑ kedh-ɑ Kɑrmel yï jɑltöng. Kɑ lidh yi Elicɑ̀ e obëënø e nudd e lɑ̈wi, ɑköbbe bɑ̈nge Gïëdhì kinni, “Lidh ngeti Cunem ɑ bï ɑcinee. Jwɑní yïe kɑ pyëëj mɑ yöd dële geki jɑlgøle kí wɑ̈de.” Kɑ Gïëdhì köbbi yi ngɑnɑni kinni, “Bong gïnrɑj.” De keny-ɑ ɑ́wɑ̈nhe wïj kït yï Elicɑ̀, ɑbøødhe ree piny kì bøle, kɑ tyelli Elicɑ̀ mɑge. Kɑ Gïëdhì kedh-ɑ be teelii cyɑ̈n, de ɑ́kyëddi yi jɑltöng kinni, “Wiy! Pɑ nenni yi yïn pyëwe cödø? O bong gïjø mɑ ɑ́köbbi yɑn yi Jwøng-ɑ Ácwɑ̈ɑ̈j kì ri møgɑni.” Kɑ ngɑnɑni okööbø kinni, “Yɑ ɑ́di cwöd ki wɑ̈d kì yïí, wuö? Yï nuti köbbø yi yɑn kinni yɑ ko wëëny?” Kɑ Elicɑ̀ ree luge Gïëdhì, kɑ gø köbbe kinni, “Pyeew, kwɑny lodhɑ kɑ yï kedh. Yï ko pɑ̈nyi cung yï mɑ̈dh-ɑ dhɑnhø, omɑ̈ɑ̈dh yïn kɑ yï ko löggi, kedh pödhí ød, kɑ lodhɑ cïb wïj nyelthinh kì bøle.” Kɑ Elicɑ̀ köbbi yi ngɑnɑni kinni, “Yɑn ɑ köngi èn ki nyingi Jwøng-ɑ Ácwɑ̈ɑ̈j, Jwøng-ɑ Nëënø, yï pɑ wiy yi yɑn kinni tek!” Codhe ɑkedh Elicɑ̀ geki ngɑnɑni. Gïëdhì ɑ́møøl bøli gen, kɑ lodh bøødhe wïj nyelthinh, de nyelthinh ɑ́cög e ì lek, o pɑ pɑ̈nyi onywen. Adwööge yï Elicɑ̀ kɑ gø köbbe kinni, “Nyelthinh nuti dhwödhø.” Keny-ɑ ɑ́wɑ̈nhi Elicɑ̀, ɑkedhe ød, ɑlidhe nyelthinh e obuddø kì yij pyën e thøø. Acyëge ød kömi gen, gɑ ɑ́ryew, kɑ Jwøng-ɑ Ácwɑ̈ɑ̈j kwɑjje. Codhe, ɑbudde ree rïïj en kì kömi nyelɑni, dhøge rwööm en ki dhøg gøn, o nyinge rwööm en ki nyingi gøn, o cingge rwööm en ki cinggi gøn. Kɑ dëël nyelthinh ócɑ̈gø ki lënhø. Adhwödhi Elicɑ̀ mɑl, kɑ ócyɑ̈dhø e owïïnø kì yij ød, ɑdøøge ree ki rïïj kömi nyelthinh, ɑjerri nyelthinh tyel ɑ́bïryew, codhe kɑ nyinge yiebe. Acwøøl Gïëdhì yi Elicɑ̀, ɑköbbe gøn kinni, cwøle meyi nyelɑni. Keny-ɑ ɑ́bëëne yïe, ɑköbbe gøn kinni, “Kwɑny wɑ̈dí ɑnɑn.” Kɑ ngɑnɑni ree bøødhe wïje këële’ piny kì bøli Elicɑ̀, codhe ɑkwɑnye wɑ̈de, ɑkedhe. Kɑ Elicɑ̀ døøg-ɑ Gilgɑl. Piny ɑ́bëëd e dɑ kɑ̈j kì bøli kenyɑni. Elicɑ̀ ɑ́bëëd e pwöny-ɑ jøtöng, ɑköbbe bɑ̈nge kinni tɑ̈ɑ̈de ki gïjø me cɑm yi gen kì yij dɑg me dwøng. Akedhi nget ɑ́kyel kì kelli gen yij pwödhø be pøn ki lum, ɑyïdde ki lum me mulli, kɑ opunø ki nywøli gøn. Akɑ̈ɑ̈le gïn, kɑ gï ngøle dɑg, de gï kwïje, mɑ bëëd gɑ ngø. Atööge gïncɑm wɑ̈g kinni o jøgɑni cyɑ̈ɑ̈m gen. De keny-ɑ ɑ́bel gen gïncɑmɑni, ɑryeer gen, ge göny-ɑ Elicɑ̀, kinni, “Gïncɑmɑni bɑ men nɑ̈g ji!” Kɑ ódhɑ̈lø cɑmø yi gen. Acwöddi Elicɑ̀ ki møng-ɑ búr, kɑ gø leenge dɑg, ɑkööbe kinni, “Töggí gen ki gïncɑm.” Kɑ gïncɑmɑni ogöögø e bong gïnrɑj kì ree. Kɑ jɑl megø obëënø e kɑ̈ɑ̈l-ɑ Bɑɑl Cɑlicɑ̀, e muuj-ɑ Elicɑ̀ ki ópùn pyɑ̈r ɑ́ryew mø mwölli ceir, kí wɑ̈thi byel mø mɑr. Kɑ Elicɑ̀ bɑ̈nge köbbe kinni, nënge jøtöng ki gïncɑm yi gen kì ri jɑmmɑni. Alögge kinni, “Yï orumø kinni gïgcɑmmɑni órømmi ri ji miyø?” Alöggi Elicɑ̀ kinni, “Nëngí gen, o ge cyɑ̈ɑ̈m gen, mɑ́ Jwøng-ɑ Ácwɑ̈ɑ̈j okööbø kinni, i ge ócyɑ̈mø, kɑ kwï gïncɑmɑni odöngø.” Codhe ɑmuuje gïncɑm, ɑcyɑ̈ɑ̈m gen, kɑ kwï gïncɑm odöngø, ni møg-ɑ ɑ́kwøb yi Jwøng-ɑ Ácwɑ̈ɑ̈j ceth. Nɑɑmɑn pënyi liny Arɑm ɑ́bëëd pere teeg kì yï wɑ̈n, mɑ́ en ɑ ree ɑ́wëggi Arɑm tyɑ̈mø yi Jwøng-ɑ Ácwɑ̈ɑ̈j. Ábëëd ɑ́ jɑl me teg ki mendwøng, de ree ɑ́dɑ wɑɑny. Kì bøli keny megø, tyëng Arɑm mɑ̈nyi Isrɑil, kɑ nyɑnthinh megø kɑ̈l yi gen kì pödhi Isrɑil. Kɑ gwøg ɑ́ bɑ̈ng yi cï Nɑɑmɑn. Kɑ wɑ̈n köbbe cyɑ̈ng ɑ́kyel kinni, “Wɑ̈ɑ ce di ceg-ɑ kedhi yï jɑltöng men-ɑ bëëdø kì Sɑmɑriyɑ̀. Di yiel yi jɑltöngɑni ki wɑɑny men-ɑ ree.” Keny-ɑ ɑ́lïngi møgɑni yi Nɑɑmɑn. Akedhe, kɑ rɑ̈dh köbbe møg-ɑ ɑ́kwøb yi nyɑnthinh. Kɑ rɑ̈dh okööbø kinni, “Kedhí yï rɑ̈ɑ̈dh Isrɑil. Yï ógwëdɑ ki wɑ̈nyø men muujií.” Codhe, ɑkedh Nɑɑmɑn e ókɑ̈ddø ki ngyëny ɑ́tegg gɑ ɑ́lïp pyɑ̈r ɑ́dɑ̈g, kí ngyëny dhɑb gɑ ɑ́lïp ɑ́bïkyel, kí ógudh mø myëër gɑ pyɑ̈rø. Wɑ̈ny-ɑ ɑ́kɑ̈l yi en ógwedø kinni, “Wɑ̈nyø men örɑ’ yïn kí Nɑɑmɑn bɑ̈ngɑ; örɑ’ yïí kipe kinni o yiel yi yïn ki wɑɑny men-ɑ ree.” Keny-ɑ ɑ́rɑɑng wɑ̈nyɑni yi rɑ̈ɑ̈dh Isrɑil, kɑ ógødhe pyëde, mɑ́ pyëwe ɑ́rɑ̈ɑ̈m yi møgɑni, ɑkööbe kinni, “Rɑ̈ɑ̈dh Arɑm kɑ̈n-ɑ́ɑ̀ keny ki rumm-ɑ ni møg, kinni jɑɑl ócuggø yielø yi yɑn ki wɑɑny men-ɑ ree? Ceg-ɑ rumø kinni yɑ bɑ Jwøk me cuggi nɑ̈ggø, wɑlɑ̀ me cuggi muujø ki wëy? Nënni e yɑb-ɑ wëërø ki yɑn!” Keny-ɑ ɑ́lïngi møgɑni yi Elicɑ̀ jɑlkwøbbi Jwøk, ɑöde yï rɑ̈dh kinni, “Yïde ɑ rɑ̈ɑ̈m pyëwí, kɑ ógudhí pyëëd? Wiy bëe yïɑ, o nyudhɑ kinni dɑ jɑltöng kì Isrɑil!” Codhe, ɑkedh Nɑɑmɑn kí kyënye geki yɑ̈the, kɑ ócungø kì dhø gøl Elicɑ̀. Kɑ Elicɑ̀ öd-ɑ yïe ki bɑ̈ng men köbbii kinni i kedhe be lwøggø kì Nɑm Urdun, kɑ rønye ki tyel ɑ́bïryew, o dële døøge keje, o wɑɑny lɑ̈ɑ̈nye kì ree. De Nɑɑmɑn pyëwe ɑ́yöd e ceg-ɑ rënyø, kɑ ókedhø e okööbø kinni, “Yɑ ɑ́rømm-ɑ kinni di ceg-ɑ bëën wɑ̈g yïɑ, o Jwøge, Jwøng-ɑ Ácwɑ̈ɑ̈j di kwɑjje, o cinge di winne kì mɑl kömi kɑ̈jj-ɑ ledh, o gïn-ɑ riɑ lɑ̈ɑ̈nye. O thyew cøn, Abɑnɑ̀ geki Pɑrpɑr nɑ̈mmi Dimɑceg pɑ lɑ̈w kibøli nɑ̈mmi Isrɑil? Yɑ pɑ di lwøg kì yethi gen kɑ dëlɑ di dönyi?” Akedhi bɑ̈nge yïe, kɑ gø köbbe kinni, “Wuö, keløg yï di köbb-ɑ gïjø me gwøge teeg yi jɑltöng, pɑ di gwøg yi yïn? De ɑnɑn yï ɑ́köbbe’ lwøggø yøw, yïde ɑ pɑ lwøøg ceth, o dëlí dönye?” Akedhi Nɑɑmɑn Nɑm Urdun, kɑ røny-ɑ nɑm ki tyel ɑ́bïryew ni kɑ ɑ́köbbii yi jɑlkwøbbi Jwøk, kɑ dële ceg-ɑ dönyø bëne. Kɑ dële døøg-ɑ keje e dhïw ni dëël othinh. Codhe, ɑdwööge geki jøge, ɑköbbe jɑlkwøbbi Jwøk kinni, “Áyod yi yɑn, ɑnɑn cyee, kinni bong jwøg me nud, den-ɑ́ Jwøøg Isrɑil kete! De yɑ kwɑjj-ɑ yïn wuö, yïëy gïn-ɑ mëggɑ yïn èn.” Alöggi Elicɑ̀ kinni, “Yɑn ɑ köngi èn, ki nyingi Jwøng-ɑ Ácwɑ̈ɑ̈j, Jwøng-ɑ Nëënø, ɑ bøle göögɑ yɑ bɑ bɑ̈nge, yɑ pɑ pɑ̈nyi kɑ̈bbø ki gïïpiny.” Elicɑ̀ ɑ́dyej yi Nɑɑmɑn kinni o di yïëye, de nuti yïëyø kinni tek. Codhe, ɑkööb Nɑɑmɑn kinni, “Keløg gïn-ɑ mëggɑ yïn pɑ yïëy yi yïn, yɑ kwɑjj-ɑ yïn, thödhí yɑn ki lɑ̈bø men cuggi tërø yi ɑderr ɑ́ryew, men kïdhɑ pödhi wøn, kipe kinni cɑg ɑnɑn, bong jwøg men nëngi yi yɑn ki jwödhø, wɑlɑ̀ gënh-ɑ nyi rɑ̈b bëne den-ɑ́ Jwøng-ɑ Ácwɑ̈ɑ̈j kete. Wiy pyëw Jwøng-ɑ Ácwɑ̈ɑ̈j nyi lɑ̈ɑ̈me ki yɑn kenyi lwøøgɑ rɑ̈dh kengi Rimön jwøøg Arɑm, kí kenyi bøødhɑ riɑ piny kyeel ki en, mɑ́ e nyi døm-ɑ yi yɑn ki cingɑ.” Akööb Elicɑ̀ kinni, “Kedh ki mër.” Akedh Nɑɑmɑn. Nɑɑmɑn ɑ́bëëd e nuti wɑ̈dhi keny me lɑ̈wi, Kɑ Gïëdhì bɑ̈ng Elicɑ̀ jɑltöng, ree köbbe kinni, “Wɑ̈ɑ ɑ́bɑ̈nyi kɑ̈bbø kì ri gïg-ɑ ɑ́muuj yi Nɑɑmɑn jɑl Arɑm, ki nyingi Jwøng-ɑ Ácwɑ̈ɑ̈j, yɑ ceg-ɑ rengi bɑnge, o yɑ kɑ̈bbɑ ki gïïpiny kì yïe.” Codhe, ɑløge bɑng Nɑɑmɑn. Keny-ɑ ɑ́lïdhi Nɑɑmɑn kinni dɑ dhɑnhø me rïngi kì bɑnge, ɑyïnhe piny kì yij yɑ̈ye, kɑ døøg-ɑ be pɑɑri ngɑnɑni. Apyëje gøn kinni, “Dɑ gïjø mɑ ɑ́bɑ̈jji?” Kɑ Gïëdhì okööbø kinni, “Bong gøn! De yɑ ɑ́ör-ɑ yi wɑ̈ɑ i köbbɑ yïn kinni dɑ jøtöng ɑ́ryew møg kɑ̈ɑ̈l myërri kïtti Eprɑim, i nëngí gen ki ngyëny ɑ́tegg ɑ́lïp ɑ́dɑ̈g, ki ógudh ɑ́ryew møg myër.” Adyejii yi Nɑɑmɑn kinni, “Kɑ̈bbí ki ngyëny ɑ́tegg ɑ́lïp ɑ́bïkyel.” Kɑ ngyënyyɑni twööj yethi kidhhì ɑ́ryew yi Nɑɑmɑn, kí ógudh ɑ́ryew kí møg nyi wiil gen thyew. Kɑ gï mëgge bɑ̈ngge ɑ́ryew, o gï tyëddi gen kì bøli Gïëdhì. Keny-ɑ ɑ́wɑ̈nhi gen buti kït, keny-ɑ bëëd yi Elicɑ̀, ɑkwɑɑny kidhhɑni ryeet yi Gïëdhì, ɑkïdhe gïn kɑl. Codhe ɑköbbe bɑ̈nggi Nɑɑmɑn kinni døg gen. Akedhe kɑ ócungø kì bøli wɑ̈n, kɑ pyëj yi Elicɑ̀ kinni, “Yï kɑ̈ɑ̈l-ɑ keny, Gïëdhì?” Alöggi Gïëdhì kinni, “Bong keny mɑ ɑ́kedhɑ.” Alöggi Elicɑ̀ kinni, “Yï orumø tïbɑ nuti ying-ɑ kunɑni ɑ́tïni, keny-ɑ ɑ́yïnhi jɑlɑni piny kì yij yɑ̈ye, e bï-ɑ yïí? Men bɑ bøli keny kɑ̈bbi ki ngyëny møg ngëëw ki pwödh, kí bɑ̈ggi yenh dhetun, kí dyëg geki dhög, kí bɑ̈ngg-ɑ cwøw geki bɑ̈ngg-ɑ mɑ̈nn? De ɑnɑn wɑɑny Nɑɑmɑn ceg-ɑ mɑ̈gø kì rií, wuki kwɑrrí gïti ɑtheer.” Akedhe kì buti Elicɑ̀ e tɑr ni ɑ́piy yi wɑɑny. Cyɑ̈ng ɑ́kyel, e ɑkuud jøtöng obëëdø kì buti Elicɑ̀, kɑ gönyi yi gen kinni, “Keny-ɑ bëëd yi wøn twij! Wiy wø kedhi wøn kömi Nɑm Urdun be ngøl ki yenh, o wø gëëd wøn ki keny bëëd yi wøn.” Alöggi Elicɑ̀ kinni, “Døj, kedh wun.” Kɑ jɑl ɑ́kyel kì kelli gen Elicɑ̀ kwɑjje, kinni kedhe ki gen, ɑyïëye. Kɑ ge ókedhø kyeel. Keny-ɑ ɑ́wɑ̈dhi gen kömi Nɑm Urdun, ɑcɑ̈gi gen ki ngøl ki yenh. De cem jɑl ɑ́kyel kì kelli jøgɑni ngøl-ɑ yɑdh, ɑör dørø, kɑ dëëm-ɑ yethi pï. Aywøøg jɑlɑni kö Elicɑ̀ kinni, “Kɑ yɑ göög ɑ dï cyee, wuö? E dørɑni ɑ́ceg yi yɑn kɑ widhø!” Apyëjii yi Elicɑ̀ kinni, “Ádëëm ɑ keny?” Anyudhii kenyɑni yi jɑlɑni. Angud Elicɑ̀ ki okewi yɑdh, kɑ gø leenge kenyɑni, kɑ dørø othwørø. Aköbbi jɑlɑni yi Elicɑ̀ kinni, “Kwɑɑny, kɑ̈ɑ̈l wɑ̈g!” Arïïj jɑlɑni cinge, kɑ dørø kwɑnye. Kì bøli kenyɑni rɑ̈ɑ̈dh Arɑm ɑ́bëëd e ceg-ɑ nyɑɑg ki Isrɑil, kɑ pëjji linye pyëje kinni, “Wɑ gudd-ɑ keny ki kɑɑl?” Codhe ɑmyeg gen kej kɑɑl gen. De rɑ̈ɑ̈dh Isrɑil ɑ́kyëddi yi Elicɑ̀ kinni, ko kɑ̈l buti kenyɑni, mɑ́ yöö óbuddø yi tyëng Arɑm. Codhe, kɑ tyëng myërr-ɑ cyɑ̈gi ki kenyɑni köbbi yi rɑ̈ɑ̈dh Isrɑil kinni bëëd gen ge tid-ɑ yuuɑni. Kɑ ogöögø ki tyel mø gïïr, e nyi köbb-ɑ kɑ̈jj-ɑ ni møgɑni yi jɑltöng. Kɑ rɑ̈ɑ̈dh Arɑm pyëwe órënyø yi møgɑni, ɑcwøle pëjji linye, kɑ gï pyëje kinni, “Á men kì kelli wun ɑ nyi töddi rɑ̈ɑ̈dh Isrɑil?” Alöggi jɑl ɑ́kyel kì kelli gen kinni, “Bong ngɑn nyi töddii kì kelli wøn wuö, den-ɑ́ Elicɑ̀ jɑltöng men-ɑ bëëdø kì Isrɑil, ɑ nyi köbbi rɑ̈ɑ̈dh Isrɑil ki gïg-ɑ nyi kømmi yi yïn, cɑgg ɑ́ kwøbb-ɑ kømmi yi yïn kì ødí.” Kɑ rɑ̈ɑ̈dh Arɑm okööbø kinni, “Yɑbu keny-ɑ bëëde, o mɑg yi yɑn.” Keny-ɑ ɑ́köbbii kinni i Elicɑ̀ ying-ɑ Döthɑn, ɑöde ki kyënyì geki yɑ̈ɑ̈th, kí yɑy me dwøng. Kɑ ge ókedhø, ɑwɑ̈dhi gen kɑɑlɑni kì wɑ̈r, kɑ gø tyeg gen. Keny-ɑ ɑ́dhwödh bɑ̈ng Elicɑ̀, dhuki kì mwøl, kɑ bï-ɑ wɑ̈g kì ød, ɑlidhe kɑɑl e bɑ ɑtyeg yi yɑy, kí kyënyi gen geki yɑ̈thi gen. Kɑ døøg-ɑ yï Elicɑ̀, ɑkööbe kinni, “Wɑ ɑ́gɑ̈g! Wɑ göög ɑ dï wuö?” Alöggi Elicɑ̀ kinni, “Yï ko böggi. Linyee dwøng kibøli liny gen!” Codhe, ɑkwɑ̈jji Elicɑ̀ kinni, “Yïn ɑ Jwøng-ɑ Ácwɑ̈ɑ̈j, yieb nyinge, o lïdhe!” Kɑ nyingi bɑ̈ng Elicɑ̀ yieb yi Jwøng-ɑ Ácwɑ̈ɑ̈j, ɑtïnge wïje kɑ tøggi kït lidhe ge pɑ̈ng yi kyënyì geki yɑ̈thi mɑc, Elicɑ̀ ówenø yi gen kì wɑ̈thi tùng bënn. Keny-ɑ ɑ́bëën jø Arɑm ge dwɑdd-ɑ pɑ̈ɑ̈r kömi Elicɑ̀, ɑkwɑ̈jji Elicɑ̀ kinni, “Yïn ɑ Jwøng-ɑ Ácwɑ̈ɑ̈j, göjjí gen cøørø!” Kɑ ge göjji cøørø yi Jwøng-ɑ Ácwɑ̈ɑ̈j. Akedhi Elicɑ̀ yï gen, kɑ gï köbbe kinni, “Wu ɑ́wɑ̈ɑ̈ny ki yöö, men pɑth ki kɑɑl-ɑ yɑb yi wun. Lug wun bɑngɑ o wu nyudhɑ jɑl-ɑ yɑb yi wun.” Apeeje gïn Sɑmɑriyɑ̀. Keny-ɑ ɑ́wɑ̈dhi gen dïdyëri Sɑmɑriyɑ̀ ceth, ɑkwɑjji Jwøng-ɑ Ácwɑ̈ɑ̈j yi Elicɑ̀ kinni, “Yieb nyingi gen, Yïn ɑ Jwøng-ɑ Ácwɑ̈ɑ̈j, kɑ wiy ge lïdhi gen.” Kɑ nyingi gen yieb yi Jwøng-ɑ Ácwɑ̈ɑ̈j, ɑlïdhi gen kinni ge ying-ɑ dïdyëri Sɑmɑriyɑ̀. Keny-ɑ ɑ́liidh gen yi rɑ̈ɑ̈dh Isrɑil, ɑpyëje Elicɑ̀ kinni, “Nɑ̈gɑ gen wuö? Nɑ̈gɑ gen wuö?” Alöggi Elicɑ̀ kinni, “Ge ko nɑ̈ɑ̈g. Gede ɑ dwɑddí gen nɑ̈gø, e pɑth ki yïn ɑ ɑ́mɑg gen ki tegí? Ceg gen ki nëngø ki gïncɑm, kí pï, kɑ wiy ge døøg gen yï rɑ̈ɑ̈dh gen.” Codhe, ɑmuuj gen yi rɑ̈ɑ̈dh Isrɑil ki gïgcɑmm mø ngenyø. Keny-ɑ ɑ́rum gen ki cɑm, ɑwiy gen døøg gen yï rɑ̈ɑ̈dh Arɑm. Kì bɑng kenyɑni, kɑ liny Arɑm ówïyø bëën be mɑ̈nyø pödhi Isrɑil. Kì bɑng keny megø, kɑ Benɑdɑd rɑ̈ɑ̈dh Arɑm, jølinye cønge bënn, ɑbëëne kɑ Sɑmɑriyɑ̀ tyege. Atëngi kɑ̈j ki mendwøng kì Sɑmɑriyɑ̀, kì bɑng kɑ ɑ́tyegii ki keny me bɑ̈ɑ̈r, kɑ ngewi wïj ɑderø wɑ̈dh-ɑ ri ngyëny ɑ́tegg pyɑ̈r ɑ́bïdɑ̈g. Kɑ ngewi yij cingø ɑ́kyel mi cyedhhi ɑkur wɑ̈dh-ɑ ri ngyëny ɑ́tegg ɑ́bïj. Rɑ̈ɑ̈dh Isrɑil ɑ́bëëd e ócyɑ̈dhø kì wïj döri kɑɑl, ɑryeer ngɑndhɑjø megø e cwøl-ɑ gøn kinni, “Køny yɑn wuö rɑ̈dhɑ!” Alöggi rɑ̈dh kinni, “Keløg yï nuti kønyø yi Jwøng-ɑ Ácwɑ̈ɑ̈j, yɑ yïd-ɑ́ɑ̀ keny ki gïn kønyɑ yïn? Dɑ gemè wɑlɑ̀ møgi oløg me nud kì yïɑ?” Apyëjii yi rɑ̈dh kinni, “Á gïn ɑ rɑj cøn?” Alögge kinni, “Cyɑ̈ng-ɑcɑ̀ yɑ ɑ́köbbi yi ngɑɑn, i cɑm wøn wɑ̈dɑ, o wɑ̈de ólony yi wøn ki cɑmø dhuki. Codhe, ɑthɑl wøn wɑ̈dɑ, kɑ cɑm yi wøn. Dhuki keny-ɑ ɑ́köbbɑ en kinni, kɑ̈ɑ̈le wɑ̈de o cɑm yi wøn, wɑ̈de gø kɑɑn en.” Keny-ɑ ɑ́lïngi møgɑni yi rɑ̈dh, ɑkɑge ógødhe, mɑ́ pyëwe ɑ́rɑ̈ɑ̈m yi kwøbbɑni. Kɑ lidh yi tyëng-ɑ cyɑ̈gi kì ri dörø e rug-ɑ ocwɑ̈lø kì thɑ ógødhe. Akönge kinni, “Wiy yɑ nɑ̈g yi Jwøk, keløg wïj Elicɑ̀ pɑ ngulɑ wɑ̈g dicyɑ̈ngtïn!” Aöde ki ngɑn dwɑɑy Elicɑ̀. Elicɑ̀ ɑ́bëëd e ying-ɑ gøle geki kwï jøgdøngø møg këëmii. Aköbbi jøgɑni yi Elicɑ̀, e ngɑn-ɑ ɑ́ör yi rɑ̈dh nuti wɑ̈nhø, kinni, “Wɑ̈d jɑlnɑ̈g ki ji menɑni ɑ́öni ki ngɑn bï be nɑ̈gi yɑn. De keny-ɑ ówɑ̈nhe, kɑ ød cyëëg wun, o cöge e pɑ cuggi bëën ød. Rɑ̈dh kiree ɑ bï kì bɑnge.” Kɑ̈ng-ɑ́ nudd Elicɑ̀ okööbø ki gen, ɑwɑ̈nhi jɑl-ɑ ɑ́ör, kedh rɑ̈dh ówɑ̈nhø kì bɑnge ceth. Akööb rɑ̈dh kinni, “Bɑ Jwøng-ɑ Ácwɑ̈ɑ̈j ɑ ɑ́kɑ̈ɑ̈l ryɑ̈g men kömee! Dɑ́ ngø ɑ gɑ̈nni yi yɑn kì yïe?” Alöggi Elicɑ̀ kinni, “Lïng wun ki møg-ɑ kwøb yi Jwøng-ɑ Ácwɑ̈ɑ̈j! Dhuki piny nɑ men, kïllì ɑ́dɑ̈g mø gemè me døøj óngew kɑ ngyënyø ɑ́tegø ɑ́kyel, o kïllì ɑ́bïkyel mø ceir óngew kɑ ngyënyø ɑ́tegø ɑ́kyel thyew kì Sɑmɑriyɑ̀!” Alöggi pënyi liny men-ɑ cyɑ̈dhi ki rɑ̈dh kinni, “Gïn ni menɑni pɑ cuggi kinni tek, cɑgg mɑl ceg ki yiebø yi Jwøng-ɑ Ácwɑ̈ɑ̈j, kɑ byel kunye piny!” Kɑ Elicɑ̀ okööbø kinni, “Ólidh yi yïn ki wɑngí keny-ɑ ópɑ̈dhi møgɑni kɑ̈jji gen, de yï koo cyɑ̈mø ki gïgcɑmmɑni.” Ádɑ jøg ɑ́ngwen mø ri gen di wɑɑny, mø nyi bëëdø kì dhø döri Sɑmɑriyɑ̀. Kɑ jøgɑni ri gen köbbi gen kinni, “Wɑ pïd-ɑ wɑɑng wɑ obëëdø kì keny? Bong gïjø me pere kedhi wɑ kɑɑl, mɑ́ wɑ bɑ møg nɑ̈g yi kɑ̈j kì kɑɑlɑni. De ke bëëd wɑ kì keny thyew, wɑ bɑ møg thøw. Ceg wɑ kedhi kɑɑl Arɑm. Keløg wɑ owiyø yi gen, døøj. De keløg wɑ onɑ̈gø yi gen wɑ óthøw.” Codhe ɑdhwödh gen, kedh piny ólunyø, ge kedh-ɑ kɑɑl Arɑm. De keny-ɑ ɑ́wɑ̈dhi gen wïj tuung kɑɑlɑni, bong dhɑnhø mɑ ɑ́yod yi gen. Jøliny Arɑm ógöjji lïngø yi Jwøng-ɑ Ácwɑ̈ɑ̈j ki cwɑg mø ni cwɑggi yɑ̈thi liny, geki cwɑggi kyënyì, kí ɑwøw me ni ɑwøøw yɑy me dwøng, me bï kömi gen. Arum gen kinni i rɑ̈ɑ̈dh Isrɑil, rɑ̈ɑ̈dh Edöm geki rɑ̈ɑ̈dh Rïp gï kïr en, o ge bï-ɑ be nyɑɑg ki gen. Amwöj gen ki ngwej kì wɑɑng thyënh ge yiel-ɑ ri gen. Kɑ kyënyì geki ɑderr wiy gen ge ómɑɑg piny, kɑ kemmì odöngø ge ócungø kì kɑ̈jji gen. Keny-ɑ ɑ́wɑ̈dhi jøgɑni tøg kɑɑlɑni, gɑ ɑ́ngwen, ɑkedhi gen yij kemɑ̀ megø, kɑ ge ocyɑ̈mø ki gïgcɑmm møg döngø kì kenyɑni. Kɑ ge ókɑ̈bbø ki ógudh, kí dhɑb, geki ngyëny ɑ́tegg møg-ɑ ɑ́yod yi gen kì kenyɑni. Kɑ ge kedh-ɑ yij kem-ɑ kyeelø, ɑyïddi gen ki gïg ni møg-ɑ ɑ́tïni. Aköbbi gen ri gen kinni, “Gïn-ɑ gwøg yi wɑ èn pɑ døøj! Yïee dɑ wöödø me med dicyɑ̈ngtïn, de ede ɑ kɑn wɑ en? Keløg wöönɑni ómïdhi yi wɑ gïti mwøl, wɑ bɑ møg cɑy ceth. Kedh wɑ, kɑ pëjji liny rɑ̈dh köbbi wɑ!” Codhe ɑdhwödh gen kì kɑɑl Arɑm, kɑ ge døøg-ɑ Sɑmɑriyɑ̀. Aryeer gen ge cwøll-ɑ jøg-ɑ kor kɑɑl kinni, “Wø ɑ́kedhi kɑɑl Arɑm de bong dhɑnhø mɑ ɑ́lidh yi wøn, bong cwɑggi dhɑnhø mɑ ɑ́lïngi yi wøn thyew. Kyënyì geki ɑderr nudd ge ómɑɑg piny, o kemmì nudd ge ying-ɑ kɑ̈jji gen.” Acwöddi jøkor ki tyëng kïdhi wöönɑni gøldwøng. Keny-ɑ ɑ́lïngi møgɑni yi rɑ̈dh, ɑdhwödhe kì wɑ̈rɑni, ɑköbbe jøge kinni, “Wiy wu köbbi yi yɑn ki gïn-ɑ rømmi yi tyëng Arɑm, kí gïn-ɑ dwɑddi göggi wɑ yi gen! Ngɑ̈nyi yi gen kinni pödhee dɑ kɑ̈j, bene ɑ kedhi gen ngɑ̈ɑ̈j kɑɑl gen be pɑ̈nø. Ge ɑ́ceg-ɑ rumø kinni wɑ óbï wɑ̈g kì kɑɑlee, kɑ wɑ kedh-ɑ be yɑb ki gïgcɑmm, codhe o ge bï gen, o wɑ kɑ̈l yi gen wɑ bɑ ɑmɑgg. Codhe, o kɑɑlee mɑg yi gen.” Alöggi jɑl ɑ́kyel kì kelli jøge kinni, “Wiy jøg kɑ̈bbi gen ki kyënyì ɑ́bïj kì kelli kyëny-ɑ ɑ́döng, o ge kedhi gen be lidhi gïn-ɑ cwöbø. Tyëng-ɑ keny pɑ̈r ki tyëng Isrɑil møg-ɑ ɑ́thøw? O ge pɑ nudd gɑ møg-ɑ ɑ́thøw thyew?” Akɑ̈bbi gen ki jøg mø kwɑnni gen nøg. Aör gen yi rɑ̈dh kì yethi yɑ̈thi liny ɑ́ryew. Kɑ gï cege kinni, “Kedh wun, kɑ gïn-ɑ cwöbø kì kɑɑl Arɑm lidh wun.” Akedh gen, kɑ ge wɑ̈dh-ɑ kömi Nɑm Urdun, kɑ yöö yuud gen e pɑ̈ng yi ógudh kí jɑmm-ɑ dyëmø kì yï liny Arɑm kɑ̀ rïngi gen. Adwöög gen kɑ møgɑni köbbi rɑ̈dh yi gen. Arïngi tyëng Sɑmɑriyɑ̀ wɑ̈g, kɑ ge reng-ɑ kɑɑl Arɑm. Kɑ jɑmmi kɑɑlɑni kɑ̈l yi gen. Kɑ kïllì gemè ɑ́dɑ̈g ngew ki ngyënyø ɑ́tegø ɑ́kyel, kɑ kïlli ceir ɑ́bïkyel ngew ki ngyënyø ɑ́tegø ɑ́kyel thyew ni møg-ɑ ɑ́kwøb yi Jwøng-ɑ Ácwɑ̈ɑ̈j ceth. Pënyi liny men-ɑ ɑ́cyɑ̈dhi ki rɑ̈dh, keny-ɑ ɑ́kedhi gen yï Elicɑ̀, ókwɑnyø yi rɑ̈dh o kore dhø döri kɑɑl. Kɑ nyøn yi ji kɑ othøø, ni møg-ɑ ɑ́kwøb yi Elicɑ̀. Rɑ̈dh ɑ́köbbi yi Elicɑ̀ cøn kinni, “Dhuki piny nɑ men, kïllì ɑ́dɑ̈g mø gemè me døøj, óngew kɑ ngyënyø ɑ́tegø ɑ́kyel, o kïllì ɑ́bïkyel mø ceir, óngew kɑ ngyënyø ɑ́tegø ɑ́kyel thyew kì Sɑmɑriyɑ̀.” Kenyɑni ɑ ɑ́kööb pënyɑni kinni, “Gïn ni menɑni pɑ cuggi kinni tek. Cɑgg mɑl ceg ki yiebø yi Jwøng-ɑ Ácwɑ̈ɑ̈j, kɑ byel kunye piny!” Alöggi Elicɑ̀ kinni, “Ólidh yi yïn ki wɑngí keny-ɑ ópɑ̈dhi møgɑni kɑ̈jji gen, de yï koo cyɑ̈mø ki gïgcɑmmɑni.” Gïn ni menɑni ɑ́cwöb ceth; pënyɑni ɑ́nyøn yi ji kì dhø döri kɑɑlɑni, kɑ othøø. Kɑ ngɑn-ɑ́ wɑ̈de ɑ́tug kì yij thøø yi Elicɑ̀, köbbi yi Elicɑ̀ kinni dhwödhe geki gøle, kɑ ge kedhi gen be bëëdø kì pödhø megø. Mɑ́ Jwøng-ɑ Ácwɑ̈ɑ̈j ceg-ɑ öni kömi pönhɑni ki kɑ̈j me tyëg runn ɑ́bïryew. Alïngi kwøbbi Elicɑ̀ yi ngɑnɑni. Kɑ odhwödhø geki gøle, kɑ ge kedh-ɑ be bëëdø kì Pelistiyɑ̀ ki runn ɑ́bïryew. Keny-ɑ ɑ́dwöög ngɑnɑni Isrɑil, kì bɑng runn ɑ́bïryew møgɑni, ɑkedhe yï rɑ̈dh kipe kinni o kej øde kí pinye döggii. Ayuude rɑ̈dh e okööbø geki Gïëdhì, bɑ̈ng Elicɑ̀, e dwɑdd-ɑ yodi gïïngɑ̈ngø møg-ɑ ɑ́gwøg yi Elicɑ̀ kì yï Gïëdhì. De kɑ̈ng-ɑ ɑ́nudd Gïëdhì löbb-ɑ rɑ̈dh, ki kwøbbi dhɑnhø men-ɑ ótugø kì yij thøø yi Elicɑ̀, ɑ ɑ́bëën ngɑnɑni yï rɑ̈dh be gøny. Akööb Gïëdhì kinni, “Wuö rɑ̈dh, ngɑnɑni èn, geki wɑ̈de wɑ̈n-ɑ ɑ́tug kì yij thøø yi Elicɑ̀!” Keny-ɑ ɑ́pyëëj ngɑnɑni yi rɑ̈dh ki møgɑni, ɑløøge gïn kinni i ge bɑ dyër ceth. Acwöddi rɑ̈dh ki jɑgø, kɑ gø köbbe kinni i döggi ngɑnɑni jɑmme bënn, ki kwɑnni ngyënyy-ɑ ɑ́kɑ̈ɑ̈l yi jɑmm-ɑ ɑ́cyeg kì yethi pwödhhe, cɑg kì bøli keny-ɑ ɑ́kedhe gïti ɑnɑn. Akedhi Elicɑ̀ Dimɑceg. Benɑdɑd rɑ̈ɑ̈dh Arɑm dële ɑ́bëëd e orɑ̈mø kì bøli kenyɑni. Keny-ɑ ɑ́lïnge kinni Elicɑ̀ nud, ɑöre Adhɑil, jɑl ɑ́kyel kì kelli jyɑ̈ge, ɑköbbe gøn kinni, “Kɑ̈ɑ̈d ki gïïpiny men mëggí jɑltöng, kɑ köbbí kinni pyëje Jwøng-ɑ Ácwɑ̈ɑ̈j, men-ɑ óyöni dëlɑ.” Akïdhi kömi ɑmɑl pyɑ̈r ɑ́ngwen yi Adhɑil ki jɑmm-ɑ døj kì Dimɑceg, e kömi ɑmɑlø dɑ møg-ɑ lwɑ̈ng yi en ki tërø. Akedhe yï Elicɑ̀. Keny-ɑ ɑ́yïddi gen, ɑköbbe gøn kinni, “Yɑ ɑ́ör-ɑ be pyëji yïn yi bɑ̈ngí, Rɑ̈dh Benɑdɑd, ki men-ɑ óyöni dële.” Alöggi Elicɑ̀ kinni, “Yɑ ɑ́nyudhi yi Jwøng-ɑ Ácwɑ̈ɑ̈j kinni ceg-ɑ thøø, de kedh kɑ köbbí kinni dële óyöni.” Codhe, ɑti Elicɑ̀ nenni yï Adhɑil, kɑ Adhɑil wïje ólɑ̈ɑ̈yø yi nënnɑni. Kɑ jɑlkwøbbi Jwøk ceg-ɑ ì túl ki ywøg. Apyëëj Elicɑ̀ yi Adhɑil kinni, “Yïde ɑ ywöngí, wuö?” Alöggi Elicɑ̀ kinni, “Kipe ngɑ̈nyi yi yɑn kinni tyëng Isrɑil bɑ møg-ɑ ógöggi yi yïn ki gïgrijjø. Myërri gen møg-ɑ ógerø kidøøj órɑ̈b yi yïn, kɑ wøbbi gen nɑ̈g yi yïn, kɑ nyigi gen pwöd yi yïn pïd keny-ɑ óthøw gen, kɑ yethi ɑ́yɑjji gen kɑg yi yïn.” Apëjji Adhɑil kinni, “Gwöng ni yɑn óyïd-ɑ́ɑ̀ keny ki teng-ɑ ni men?” Alöggi Elicɑ̀ kinni, “Yɑ ɑ́nyudhi yi Jwøng-ɑ Ácwɑ̈ɑ̈j, kinni yï órøny yïn-ɑ́ rɑ̈ɑ̈dh Arɑm.” Adøøg Adhɑil yï Benɑdɑd, ɑpyëje gøn kinni, “Á ngø ɑ ɑ́köbbi yïn yi Elicɑ̀?” Alöggi Adhɑil kinni, “Yɑ ɑ́köbbi yi en, i dëlí óyöni.” Dhuki kì mwøl ɑkɑ̈bbi Adhɑil ki ógødh me bɑ dhïl, kɑ gø bïle ki pï, ɑpeedhe gøn bøli rɑ̈dh, órømme kí dhøge kum en, ɑthøwe. Kɑ Adhɑil røøny kej Benɑdɑd ɑ́ rɑ̈ɑ̈dh Arɑm. Kì bïïj runni Yörɑm wɑ̈d Akɑɑb rɑ̈ɑ̈dh Isrɑil kì yij lɑwø, ɑ ɑ́jɑ̈ggi Yeörɑm wɑ̈d Yöcɑpɑt kì Yeudiyɑ̀ Ájɑ̈ggi e runne bɑ pyɑ̈r ɑ́dɑ̈g wïdɑ́ryew. Kɑ ojyɑ̈gø ki runn ɑ́bïdɑ̈g kì Yerusɑlem. Cyëge bɑ nyɑɑr Akɑɑb. Kɑ pɑ̈dh-ɑ yij orøøg gøl Akɑɑb ni rɑ̈nhi Isrɑil møg-ɑ kyeelø. Árøngi kì bøli Jwøng-ɑ Ácwɑ̈ɑ̈j, de Jwøng-ɑ Ácwɑ̈ɑ̈j nuti dwɑddi ryɑ̈gi Yeudiyɑ̀, mɑ́ Debïd bɑ̈nge ɑ́köbbe kinni, kwɑrre ójyɑ̈ɑ̈gø ceth kì yethi runn bënn. Kì yethi runn-ɑ ɑ́jyɑ̈ɑ̈g Yeörɑm, Edöm ɑ́ngɑ̈nyi wɑ̈ye kì ri Yeudiyɑ̀, kɑ ree rönye ki rɑ̈dh. Codhe, ɑdhwödh Yeörɑm ki yɑ̈the bënn e kedh-ɑ Dhɑir. Kɑ ge tyeeg kunɑni yi liny Edöm. Kɑ ge turr-ɑ wɑ̈g kì kelli liny Edöm kì wɑ̈r, codhe ɑpɑ̈r gen ki yɑ̈thi gen, kɑ yɑɑy rɑ̈ɑ̈dh Isrɑil tɑɑy-ɑ yethi myërre. Acög Edöm ɑ́ pödhø kì wɑ̈ye, këër kenyɑni. Kɑ kɑɑl Libnɑ̀ ngɑ̈ny-ɑ wɑ̈ye thyew kì bøli kenyɑni. Gïg-ɑ kyeelø møg-ɑ ɑ́gwøg yi Yeörɑm bɑ ɑgwed kì yij Wɑ̈nyi Rɑ̈nhi Yeudiyɑ̀. Akedhi Yeörɑm kun-ɑ di kweyye, kɑ kony kì kɑɑl Debïd. Kɑ Akɑdhiyɑ̀ wɑ̈de røøny keje ɑ́ rɑ̈dh. Kì ri pyɑ̈rø wïdɑ́ryeew runni jyɑ̈gi Yörɑm wɑ̈d Akɑɑb ɑ́ rɑ̈ɑ̈dh Isrɑil, ɑ ɑ́göög Akɑdhiyɑ̀ wɑ̈d Yeörɑm ki rɑ̈ɑ̈dh Yeudiyɑ̀, e runne bɑ pyɑ̈r ɑ́ryew wïdɑ́ryew, kɑ ojyɑ̈gø kì Yerusɑlem ki run ɑ́kyel. Meye cwøl ɑ́ Athɑliyɑ̀, nyɑɑr Rɑ̈dh Akɑɑb, kwɑɑr Ómrì rɑ̈ɑ̈dh Isrɑil. Kipe kɑ ɑ́bëëd Akɑdhiyɑ̀ gɑ ør geki Rɑ̈dh Akɑɑb, ɑ́røngi kì bøli Jwøng-ɑ Ácwɑ̈ɑ̈j ni orøng-ɑ ɑ́gwøg yi gøl Akɑɑb. Rɑ̈dh Akɑdhiyɑ̀ ɑ́kedh geki Yörɑm rɑ̈ɑ̈dh Isrɑil be nyïɑ̈ggø ki Adhɑil rɑ̈ɑ̈dh Arɑm. Atuum liny kì Rɑmöth Gilyɑd, kɑ Yörɑm ree kedhi yi kedø kì yij liny. Adøøge kɑɑl Yidhriil be tuuri kede. Akedhi Akɑdhiyɑ̀, rɑ̈ɑ̈dh Yeudiyɑ̀ Yidhriil be këëmii. Acwöddi Elicɑ̀ jɑltöng ki ɑ́kyel kì kelli jøtöng-ɑ thønhø, kɑ gø köbbe kinni, “Dhwöödh, kedhí Rɑmöth Gilyɑd. Kɑ̈l tuung møw men. Keny-ɑ ówɑ̈dhí kunɑni, yɑb Yeeu wɑ̈d Yöcɑpɑt, wɑ̈d Nimcì. Cwøøl wɑ̈ye kì buti jø gen kɑ wu kedhu ød megø wu keti wun. Kɑ møw men køny wïje. Kɑ köbbí kinni, ‘Jwøng-ɑ Ácwɑ̈ɑ̈j okööbø kinni ce yï røøny en yïn ɑ́ rɑ̈ɑ̈dh Isrɑil.’ Kɑ ød yieeb kɑ yï jwɑn kedhø kì kenyɑni.” Akedhi jɑltöngɑni Rɑmöth Gilyɑd, Ayuude pëjji liny ge bëëd ɑ kej ɑ́kyel. Kɑ Yeeu köbbe kinni, “Dɑ gïn köbbɑ yïn jɑldwøng!” Apëjji Yeeu kinni, “Yï kööbø kɑ men kì kelli wøn?” Kɑ jɑltöng okööbø kinni, “Yɑ kööbø kɑ yïn jɑldwøng!” Codhe ɑkedhi gen ød gɑ ɑ́ryew, ɑkønye møw wïj Yeeu, kɑ gø köbbe kinni, “Jwøøg Isrɑil, Jwøng-ɑ Ácwɑ̈ɑ̈j okööbø ce yï røøny en yïn ɑ́ rɑ̈ɑ̈dh jie, tyëng Isrɑil. Yïn ɑ ódhur gøl wöw Akɑɑb piny. O gøølɑ colɑ ki Yidhɑbel ngɑn-ɑ ɑ́nɑ̈g jøtöng møgɑ, geki bɑ̈nggɑ møg-ɑ kyeelø. Wïj gøl Akɑɑb ceg-ɑ pɑ̈ɑ̈dhø. Yɑɑg-ɑ cwøw bënn kì gølɑni nɑ̈gɑ’ nɑ̈gø. Gøl Akɑɑb ógöggɑ gïn-ɑ ɑ́göggɑ gøl Yeroboɑm wɑ̈d Nebɑt, geki gøl Rɑ̈dh Bɑcɑ̀ wɑ̈d Akiyɑ̀ kì Isrɑil. Yidhɑbel ócɑm yi gwögg kì Yidhriil, bong ngɑn-ɑ ókonyii kinni tek.” Keny-ɑ ɑ́rume kwøbi møgɑni, ɑyiebe ød kɑ órengø. Keny-ɑ ɑ́dwöög Yeeu, ɑ pyëjii yi jø gen kinni, “Dɑ gïnrɑj? Jɑɑl ɑ́nɑ̈ngɑni ɑ́bï-ɑ be ngø?” Alöggi Yeeu kinni, “Jɑlɑni ngɑ̈nyi yi wun, o gïn-ɑ kømme ngɑ̈nyi yi wun.” Alöggi gen kinni, “Kwïj yi wøn, köbbí wøn gïn-ɑ ɑ́kwøb yi en!” Kɑ Yeeu okööbø kinni, “Yɑ ɑ́köbbe kinni i Jwøng-ɑ Ácwɑ̈ɑ̈j okööbø kinni, ‘Yï ɑ́røny yi yɑn, yïn ɑ́ rɑ̈ɑ̈dh Isrɑil.’ ” Kɑ ógudhi gen jwɑn gen ki peedh wïj tëd, o Yeeu cunge kì kömi gen. Akoodh kɑng, kɑ ge óryeerø kinni, “Yeeu bɑ rɑ̈dh!” Kɑ Yörɑm göggi ki ɑmolpiny yi Yeeu wɑ̈d Yöcɑpɑt, e Yörɑm ying-ɑ Yidhriil kun-ɑ ɑ́kedhe be tuuri keddi liny-ɑ ɑ́nyɑg yi en geki Adhɑil rɑ̈ɑ̈dh Arɑm kì Rɑmöth Gilyɑd. Yeeu jølinye ɑ́köbbe kinni, “Keløg wu ying-ɑ kömɑ, ko di ngɑn dhwödh, kɑ kedh-ɑ Yidhriil be töddi jiɑni.” Codhe ɑkɑdhi Yeeu yij yɑ̈ye, kɑ kedh-ɑ Yidhriil kun-ɑ buud yi Yörɑm, e Akɑdhiyɑ̀ rɑ̈ɑ̈dh Yeudiyɑ̀ bëën Yidhriil be këëmi Yörɑm, o nudd e nud kì Yidhriil. Jɑl-ɑ kurø kì ønbɑ̈r men-ɑ koor kɑɑl Yidhriil, Yeeu ɑ́lidhe geki jøge ge obëënø, ɑkööbe kinni, “Dɑ jøg mø nenni yi yɑn ge cyɑ̈dh-ɑ kyënyì.” Alöggi Yörɑm kinni, “Öd ki ngɑn kedhi yï gen ki kyeny, kɑ renge be lidhi gen, ying gɑ wɑdd wɑlɑ̀ tyëngmɑ̈ɑ̈nø.” Kɑ jɑl-ɑ ɑ́ör kedh-ɑ yï Yeeu ki kyeny, kɑ gø pyëje kinni, “Rɑ̈dh okööbø i yï cyɑ̈dhi kɑ mër?” Alöggi Yeeu kinni, “Cwɑggí ɑ́ ngø? Wir kyenyí kɑ yï døøg ngɑ̈jɑ!” Kɑ jɑlkor men-ɑ nëënø kì øn-ɑ koor kɑɑl okööbø kinni, “Jɑl-ɑ ɑ́ör ɑ́wɑ̈dhi yï gen, de nuti dwöögø.” Kɑ ge cig-ɑ ör ki jɑl megø. Akedhe yï gen, ɑkööbe kinni, “Rɑ̈dh okööbø i yï cyɑ̈dhi kɑ mër?” Acigi Yeeu löggø kinni, “Cwɑggí ɑ́ ngø? Wir kyenyí kɑ yï døøg ngɑ̈jɑ!” Kɑ jɑlkor cig-ɑ kwøb kinni, “Jɑl-ɑ ɑ́ör ɑ́wɑ̈dhi yï gen, de nuti dwöögø.” Kedh dhøge olengø yi en kinni, “Jɑl-ɑ pyejji jøgɑni, yɑ̈y kyewe kɑ ɑ́nɑ̈gø, nënni e nɑ Yeeu ceth!” Kɑ Rɑ̈dh Yörɑm okööbø kinni, “Gwir wun yɑ̈yɑ.” Keny-ɑ ɑ́rume gwirø ɑkɑdhe yij yɑ̈y. Kɑ Rɑ̈dh Akɑdhiyɑ̀ kɑdh-ɑ yij yɑ̈ye thyew, ɑkedhi gen be pɑɑri Yeeu, men kì yij yɑ̈ye. Kɑ ge røøm-ɑ buti pwönh-ɑ ɑ́bëëd ɑ́ mi Nɑboth. Apyëëj Yeeu yi Yörɑm, kinni, “Yï cyɑ̈dhi kɑ mër?” Alöggi Yeeu kinni, “Mër óying me nud kidï, e meyí Yidhɑbel nudd e mɑll-ɑ jwögg-ɑ pɑth, o nudd e ceg-ɑ cyɑ̈dhø kì yï ɑ́jwöggì?” Aryeer Yörɑm kinni, “Men bɑ rënyi pödhø, Akɑdhiyɑ̀!” Kedh yɑ̈ye oløgø yi en e órengø. Kɑ Yeeu wethe kwɑnye, kɑ gø tënne ki tege bëne, kɑ weth pɑ̈dh-ɑ kömi Yörɑm kì kelli bɑ̈dde, kɑ twïy-ɑ wɑ̈g mine pyëde’ pyëdø. Kɑ Yörɑm pɑ̈dh-ɑ yij yɑ̈ye e kegø. Kɑ Bidkɑr pënyi liny köbbi yi Yeeu kinni, “Kwɑnyu en kɑ leeng wun yij pwönh-ɑ ɑ́bëëd ɑ́ mi Nɑboth. Pɑr cyɑ̈ng-ɑ ɑ́cyɑ̈dhi wɑ kì bɑng Rɑ̈dh Akɑɑb wïyi Yörɑm, ɑ ɑ́köbbii yi Jwøng-ɑ Ácwɑ̈ɑ̈j kinni, ‘Nɑ̈gi Nɑboth geki wɑ̈dde ɑ́lidh yi yɑn ɑ́wɑ̈ɑ̈, Yɑn ɑ kööbø èn, yï ónɑ̈g-ɑ yij pwödhø men ceth.’ Kwɑnyu Yörɑm kɑ leeng wun yij pwönh-ɑ ɑ́bëëd ɑ́ mi Nɑboth, o møg-ɑ ɑ́kwøb yi Jwøng-ɑ Ácwɑ̈ɑ̈j pɑ̈dhi gen kɑ̈jji gen.” Akɑdhiyɑ̀ keny-ɑ ɑ́lidhe gïn-ɑ ɑ́cwöb, ɑrenge e kɑ̈l-ɑ kuni kɑɑl Bet Agɑn. Kɑ Yeeu løg-ɑ bɑnge, ɑköbbe jøge kinni, “Gøju en thyew!” Kɑ ree kïdhi gen ki kedø, e kedh-ɑ yuu Gur kì buti Iblïm. De ɑ́dyëëj ki wɑ̈dh pïd kɑ ɑ́wɑ̈dhe Megidø, ɑthøwe kì kunɑni. Akïdhii Yerusɑlem yi jøge ki yɑ̈y, kɑ koony buti kweyye kì kɑɑl Debïd. Akɑdhiyɑ̀ ɑ́røny ɑ́ rɑ̈ɑ̈dh Yeudiyɑ̀ e runni Yörɑm wɑ̈d Akɑɑb rɑ̈ɑ̈dh Isrɑil bɑ pyɑ̈rø wïdɑ́kyel kì yij lɑwø. Yeeu ɑ́wɑ̈dhi Yidhriil. Kɑ gïn-ɑ ɑ́cwöb lïngi yi Yidhɑbel, ɑgide nyinge, kɑ yëyye pyële kidøøj. Kɑ ócungø e nenn-ɑ wɑ̈g kì ɑwɑj, kedh Yeeu bï-ɑ kɑl. Akööb Yidhɑbel kinni, “Dɑ mër ki yïn, yï ɑ́nɑ̈g-ɑ wöw ni Dhimrì?” Kɑ Yeeu wïje tïnge e lïïdh-ɑ yï Yidhɑbel. Alïïdh jøg ɑ́ryew wɑlɑ̀ ɑ́dɑ̈g kì kelli bɑ̈ngg-ɑ bɑ órøj piny kì ɑwɑj, kɑ ge lidh yi Yeeu. Kɑ Yeeu okööbø kinni, “Cøøru en piny!” Kɑ gø leeng gen piny. Kɑ reme ceg-ɑ ì thiidh kì ri dörø geki kyënyì. Kɑ yɑ̈y kɑ̈ɑ̈l köme yi Yeeu. Codhe, ɑkedhi Yeeu ød kɑ ocyɑ̈mø. Keny-ɑ ɑ́rume, ɑkööbe kinni, “Kwɑnyu nyɑdhey cyën menɑni, kɑ kony wun. Mɑ́ e bɑ nyirɑ̈dh.” De keny-ɑ ɑ́kedh gen, ge ɑ́yod-ɑ tɑngdɑre geki cu tyelle kí cingge. Adøøg gen be köbbi Yeeu ki møgɑni. Kɑ Yeeu okööbø kinni, “Bene gïn-ɑ ɑ́kwøb yi Jwøng-ɑ Ácwɑ̈ɑ̈j ɑnɑn kinni i ócwöb, ɑ́kööb kinni, ‘Yidhɑbel ócɑm yi gwögg kì Yidhriil. Yidhɑbel ódhong kì piny ni cyëdhø kì Yidhriil, bong ngɑn-ɑ óngijii kinni men bɑ Yidhɑbel.’ ” Ádɑ yɑɑg gøl Akɑɑb pyɑ̈r ɑ́bïryew, mɑ ɑ́bëëd kì Sɑmɑriyɑ̀. Agwëëd Yeeu ki wɑ̈j møg ör Sɑmɑriyɑ̀, e gwëd-ɑ jɑgg geki jøgdøngø, kí tyëng-ɑ cinggi gen di yɑɑg gøl Akɑɑb kinni, “Keny-ɑ ówɑ̈nhi wɑ̈nyø men yï wun, mɑ́ yɑɑg gøl Akɑɑb ying-ɑ yï wun, o yï wun dɑ yɑ̈thi liny, kí kyënyì kí myërr-ɑ thøø yi gerø, kí jɑmmi liny, yïëëny wun ki dhɑnhø ɑ́kyel men-ɑ døj kì kelli wɑ̈ddi wïi wun, kɑ cïb wun wïj kwøøm wïye, kɑ wu nyïɑ̈ggi wun kipe gøl wïi wun.” Abwøg jɑggi Sɑmɑriyɑ̀, ɑkööb gen kinni, “Dhø Yeeu pyem-ɑ dï yi wɑ, e ɑ́dhɑ̈li lwɑ̈ngø yi Rɑ̈dh Yörɑm geki Rɑ̈dh Akɑdhiyɑ̀?” Codhe kɑ jɑngi gøl rɑ̈dh, kí jɑngi kɑɑl, kí jøgdøngø, kí tyëng-ɑ cinggi gen di yɑɑg gøl Akɑɑb öd-ɑ yï Yeeu kinni, “Wø bɑ bɑ̈nggí, gïn-ɑ köbbí wøn, ógwøg yi wøn. De wø pɑ pɑ̈nyi røny ki rɑ̈dh. Gwøg gïn-ɑ rømmi yi yïn e døøj.” Agwëde gïn ki ryeew wɑ̈j kinni, “Keløg wu ying-ɑ tungɑ, keløg kwøbbɑ ólïngi yi wun, ngul wun wɑ̈thi yɑɑg gøl Akɑɑb wɑ̈g, kɑ ge muuj wun yɑn kì Yidhriil dhuki piny nɑ men.” Yɑɑg gøl Akɑɑb gɑ pyɑ̈r ɑ́bïryew ɑ́bëëd ɑ buti jøg-ɑ mïdhi gen. Keny-ɑ ɑ́wɑ̈nhi wɑ̈nyø yï gen, ɑnɑ̈ɑ̈g yɑɑg gøl rɑ̈dh bënn gɑ pyɑ̈r ɑ́bïryew. Kɑ wɑ̈thi gen cïb yethi dhöng, ɑöri gen Yeeu kì Yidhriil. Keny-ɑ ɑ́muuj wöödø Yeeu kinni wɑ̈thi yɑɑg gøl Akɑɑb ɑ́rum ki kɑ̈ɑ̈lø, ɑkööbe kinni i cøng gen piny gɑ börr ɑ́ryew kì dhø döri kɑɑl, kɑ ge wiy bëëd gen kì kenyɑni gïti dhuki kì mwøl. Kì mwøl, ɑkedhi Yeeu dhø döri kɑɑl, ɑköbbe tyëng-ɑ ying kenyɑni kinni, “Yï wun bɑ̈r, yɑn ɑ ɑ́wen Rɑ̈dh Yörɑm, kɑ nɑ̈gɑ. Dɑ́ men ɑ ɑ́nɑ̈g ji møg bënn? Men nyodh-ɑ kinni møg-ɑ ɑ́kwøb yi Jwøng-ɑ Ácwɑ̈ɑ̈j kipe gøl Akɑɑb ɑ́pɑ̈dhi kɑ̈jji gen. Møg-ɑ ɑ́kwöng yi Jwøng-ɑ Ácwɑ̈ɑ̈j ki dhøg jɑltönge Eliyɑ̀ ɑ́gwøg yi en.” Codhe, ɑnɑ̈ɑ̈g wɑddi Akɑɑb bënn møg-ɑ ɑ́ying Yidhriil, kí pëjji linye, kí mɑ̈dhhe, kí ókwërre yi Yeeu. Bong dhɑnhø ɑ́kyel mɑ ɑ́wiy yi en kì kelli gen. Adhwödh Yeeu kì Yidhriil, e kedh-ɑ Sɑmɑriyɑ̀. Keny-ɑ ɑ́wɑ̈dhe Bet Eked, ɑ wɑngi kɑɑl kwɑ̈yyi dyëg, ɑrwööm gen ki kwï wɑddi Akɑdhiyɑ̀ rɑ̈ɑ̈dh Yeudiyɑ̀, ɑpyëje gïn kinni, “Wun-ɑ́ møg?” Alöggi gen kinni, “Wø bɑ wɑddi Akɑdhiyɑ̀, wø kedh-ɑ Yidhriil be këëmi nyigi Yidhɑbel, kí tyëng gøl rɑ̈dh møg-ɑ kyeelø.” Kɑ Yeeu jøge köbbe kinni, “Mɑgu gen!” Amɑg ge gïn, kɑ gï ngɑl gen kì buti wɑɑng pï, gɑ pyɑ̈r ɑ́ngwen wïdɑ́ryew, bong ɑ́kyel mɑ ɑ́wiy yi gen. Adhwödh Yeeu kì kenyɑni, kɑ ge órwömø ki Yönɑdɑb wɑ̈d Rekɑb, e bï-ɑ yïe. Amɑ̈dhe Yönɑdɑb kɑ gø pyëje kinni, “Yijí bong ɑ́dud ki yɑn ni kɑ̀ bong yijɑ ɑ́dud ki yïn?” Ayïëy Yönɑdɑb kinni, “Ngee, yijɑ bong ɑ́dud ki yïn.” Aköbbii yi Yeeu kinni, “Kɑ̈ɑ̈l cingí.” Amɑɑg cinge yi Yeeu, kɑ gø kønye ki yedhi yij yɑ̈y. Aköbbii yi Yeeu kinni, “Kedh wɑ, o tyiel-ɑ yijɑ kipe Jwøng-ɑ Ácwɑ̈ɑ̈j lidh yi yïn.” Akedhi gen Sɑmɑriyɑ̀ kyeel Keny-ɑ ɑ́wɑ̈dhi gen, ɑnɑ̈ɑ̈g wɑddi Akɑɑb bënn yi Yeeu, bong ɑ́kyel mɑ ɑ́wiy yi en, ɑpɑ̈dhi møg-ɑ ɑ́kwøb yi Jwøng-ɑ Ácwɑ̈ɑ̈j ki dhøg Eliyɑ̀ kɑ̈jji gen ceth. Tyëng Sɑmɑriyɑ̀ ɑ́cwøøl kej ɑ́kyel yi Yeeu, kɑ gï köbbe kinni, “Bɑɑl jwøg ɑ́mɑlli yi Akɑɑb kɑ mɑllø me nøg, de ómɑlli yi yɑn ki mɑllø me dwøng. Cwööl wun jøtööng Bɑɑl bënn, kí tyëng-ɑ nyi mɑllii bënn, kí ókwërre bënn. Ko di ngɑn wiy, mɑ́ yïɑ dɑ gëëdhi me dwøng men mëggɑ Bɑɑl, o ngɑn-ɑ óbëëd e tøøk ceg kɑ nɑ̈gø.” (Menɑni ɑ́gwøg ɑ́ wëënyø yi Yeeu kipe kinni o nɑ̈ge jii Bɑɑl.) Codhe, ɑkööb Yeeu kinni, “Kwøbu cyɑ̈ng-ɑ ówøøw Bɑɑl!” Kɑ cyɑ̈ngɑni kwøb. Kɑ öd-ɑ myërri Isrɑil bënn ki wööni wööwø. Kɑ tyëng-ɑ nyi mɑlli Bɑɑl obëënø bënn, bong dhɑnhø kì kelli gen mɑ ɑ́cög e nuti bëënø. Akedhi gen kengi Bɑɑl, kɑ kengɑni opɑ̈ngø kinni dhij. Kɑ Ókwër-ɑ Dwøng köbbi yi Yeeu kinni, kɑ̈ɑ̈le ógudhi kwër wɑ̈g, kɑ gï mëgge bɑ̈nggi Bɑɑl. Kɑ ógudhɑni muuje gïn. Kɑ Yeeu geki Yönɑdɑb wɑ̈d Rekɑb kedh-ɑ yij kengi Bɑɑl. Aköbbi bɑ̈nggi Bɑɑl yi Yeeu kinni, “Nennu kelli wun kidøøj, ying e dɑ bɑ̈nggi Jwøng-ɑ Ácwɑ̈ɑ̈j mø nud, wiy bëëde ɑ́ bɑ̈nggi Bɑɑl keti gen ɑ nud.” Codhe ɑkedhe be muuji gëëdhi geki gënh-ɑ nyi rɑ̈b bëne kì kengi Bɑɑl. Yeeu cïbi ngɑ̈ɑ̈j kengɑni ki jøg mø kwɑnni gen bɑ pyɑ̈r ɑ́bïdɑ̈g, o ge óköbbø yi en kinni, “Kɑ ge nɑ̈g wun bënn, ngɑn-ɑ ówëggi dhɑnhø bodhø, nɑ̈ɑ̈g-ɑ kej ngɑnɑni!” Keny-ɑ ɑ́rum Yeeu ki muuji gëëdhi ceth, ɑköbbe jøg-ɑ kurø geki pëjji liny kinni, “Kedhu ød kɑ ge nɑ̈g wun bënn, ko di ngɑn wëggu bodhø!” Akedhi gen ød ki pilli gen kì cinggi gen, kɑ gï nɑ̈g gen bënn, kɑ gï ywɑ̈ɑ̈j gen wɑ̈g. Codhe, ɑkedhi gen yij gëëng Kengø, kɑ lööj kwër kɑ̈ɑ̈l gen wɑ̈g, kɑ gø rɑ̈b gen. Lööj kwër ɑ́rɑ̈b, kɑ kengø cøør piny, kɑ gwøg ɑ́ kej pyellø gïti dicyɑ̈ngtïn. Bene kër-ɑ ɑ́kɑ̈ɑ̈l nyingi Bɑɑl wɑ̈g kì Isrɑil ɑnɑn yi Yeeu. De Yeeu ɑ́göög ki orøøg Yeroboɑm, ngɑn-ɑ ɑ́göjji Isrɑil orøg, kɑ cïb-ɑ Betiil geki Dɑn ki røjø dhɑb ɑ́ men mɑlli. Kɑ Yeeu köbbi yi Jwøng-ɑ Ácwɑ̈ɑ̈j kinni, “Kipe kɑ ɑ́göggí gøl Akɑɑb ki gïn-ɑ ɑ́tyer yi pyëwɑ, gølí ójyɑ̈ɑ̈gø kì Isrɑil kì yethi rïjj ɑ́ngwen.” De Yeeu nuti cyɑ̈dhø kì bøli Jwøøg Isrɑil, Jwøng-ɑ Ácwɑ̈ɑ̈j ki pyëwe bëne, ɑ́yöd e ngøy-ɑ bëëdi Yeroboɑm ngɑn-ɑ ɑ́göjji Isrɑil orøg. Kì bøli kenyɑni, piny Isrɑil kwëe ɑ́cööd wɑ̈g yi Jwøng-ɑ Ácwɑ̈ɑ̈j, Adhɑil rɑ̈ɑ̈dh Arɑm kwï piny Isrɑil ɑ́kɑbe. Cɑg kì kuni wɑɑng cyɑ̈ɑ̈ng mwøl kì kömi Nɑm Urdun, gïti kɑɑl Aröeer kì wɑɑng wurlwɑl kì kömi Nɑm Arnön, menɑni reb-ɑ myërri Gilyɑd kí Bɑcɑn, piny-ɑ bëëd yi gøl Gɑd, kí gøl Ruben, kí budi gøl Mɑnɑsè. Gïg-ɑ kyeelø møg-ɑ ɑ́gwøg yi Yeeu, ki tege bɑ ɑgwed kì yij Wɑ̈nyi Rɑ̈nhi Isrɑil. Akedhi Yeeu kun-ɑ di kweyye, kɑ kony kì Sɑmɑriyɑ̀, ɑrøøny Yöɑkɑdh wɑ̈de keje ɑ́ rɑ̈dh. Yeeu ɑ́jyɑ̈ɑ̈g ɑ́ rɑ̈ɑ̈dh Isrɑil ki runn pyɑ̈r ɑ́ryew wïdɑ́bïdɑ̈g kì Sɑmɑriyɑ̀. Keny-ɑ ɑ́lïng Athɑliyɑ̀ meyi Rɑ̈dh Akɑdhiyɑ̀ kinni wɑ̈de ónɑ̈gø, ɑkööbe kinni i nɑ̈ɑ̈g yɑɑg gøl rɑ̈dh bënn. Yöcebɑ̀ nyɑɑr Rɑ̈dh Yeörɑm, nyiwï Akɑdhiyɑ̀ wïyi gen ɑ́kyel, Yöɑc wɑ̈d Akɑdhiyɑ̀ ɑ́kwɑɑle wɑ̈g kì kelli nyiirɑ̈dh møg-ɑ dwɑddi nɑ̈gø. Akwɑnye gøn geki 'mïnhe, kɑ gï kɑɑne yij ød megø kì yij Kengø kipe Athɑliyɑ̀. Kɑ Yöɑc kɑnni kì yij Kengø yi Yöcebɑ̀ ki runn ɑ́bïkyel møg-ɑ jyɑ̈ɑ̈g Athɑliyɑ̀. De kì ri bïryeew runn, ɑödi ókwërø Yöyɑdɑ̀ yï pëjji liny møg-ɑ nyi kor gøldwøng, ɑcwööle gïn yij Kengi Jwøng-ɑ Ácwɑ̈ɑ̈j, ɑköbbe gïn kinni köngi gen kinni ge óyïëy ki gïn-ɑ dwɑddi gwøgø yi en, ɑnyudhe gïn nyirɑ̈ɑ̈dh gen. Aköbbi jøgɑni yi Yöyɑdɑ̀ kinni, “Keny-ɑ óbëënu be kwëri cyɑ̈ɑ̈ng Sɑbɑth, wiy kyeel ɑ́dɑ̈ɑ̈g wun kor gen gøldwøng, Kɑ kyeel ɑ́dɑ̈ɑ̈g wun men-ɑ kyeelø kore Dhøg Sur, kɑ kyeel ɑ́dɑ̈ɑ̈g wun men-ɑ döng, kore dhøng-ɑ pwödhø. Kɑ ɑkudd ɑ́ryew mø jøkor, møg-ɑ di kedhi kɑ̈lli gen kì cyɑ̈ɑ̈ng ywömø, kor gen Kengø, ge kor-ɑ rɑ̈dh. Kor gen rɑ̈dh e jɑmmi liny mø gen ying-ɑ cinggi gen ceth. Kɑ ngɑn-ɑ ócyɑ̈ngi nɑ̈g. Koru rɑ̈dh wu cyɑ̈dhi kɑ en, kenyi kedhe wɑ̈g, kí kenyi døøge ød.” Alïngi kwøbbi Yöyɑdɑ̀ yi pëjjɑni, kɑ jø gen kɑ̈ɑ̈l gen yïe, jøg-ɑ ɑ́bï be gwøg, ki møg-ɑ di kedhi kɑ̈lli gen. Kɑ tøngg kí ködd møg-ɑ ɑ́bëëd gɑ mø Rɑ̈dh Debïd mëggi gen yi Yöyɑdɑ̀, ókwëri Kengi Jwøng-ɑ Ácwɑ̈ɑ̈j. Kɑ jøkor cung, ngɑn ki jɑmme kì cinge kì bɑdhhi Kengø, ge kor-ɑ rɑ̈dh. Akɑ̈ɑ̈l nyirɑ̈dh wɑ̈g yi Yöyɑdɑ̀, kɑ yɑ̈ɑ̈r rɑ̈ɑ̈dhø cïbe wïje, ɑrønyii ɑ́ rɑ̈dh, kɑ mëggi wɑ̈nyi ciggi jyɑ̈gø. Ateng ji cinggi gen, kɑ ge óryeerø kinni, “Rɑ̈dh ómïdhi yi Jwøk!” Kɑ cwɑggi ji geki jøkor lïngi yi Rɑ̈dh Athɑliyɑ̀, ɑjwɑne Kengø kun-ɑ cugi teedø. Alidhe rɑ̈nh-ɑ nyɑ̈n e ócungø kì buti lööj dhø Kengø, ni kenyi cungi rɑ̈dh, kí jøg-ɑ jɑgg kì bɑdhhe, ji óryeerø ki medi pëëth, kɑ̈ngì okodhø. Kɑ Athɑliyɑ̀ ógødhe kɑge e óryeerø kinni, “Amolpiny! Amolpiny!” Yöyɑdɑ̀ nuti dwɑddi kinni o Athɑliyɑ̀ nɑ̈g kì buti Kengø, ɑköbbe pëjji liny kinni, “Kïdhu en wɑ̈g e bɑ ɑtyeg yi liny, kɑ ngɑn-ɑ ódwɑddi yielii nɑ̈g wun.” Kɑ gø mɑg gen, ɑkïdhii gøldwøng, kɑ nɑ̈g kì Dhøg Kyënyì. Kɑ kwøb thuunh yi Yöyɑdɑ̀ kì kɑɑm ji geki Jwøng-ɑ Ácwɑ̈ɑ̈j. Kinni ge óbëëdø gɑ jii Jwøng-ɑ Ácwɑ̈ɑ̈j. Kɑ Rɑ̈dh köbbe nywɑ̈g ki kwøb geki ji thyew. Codhe, ɑkedhi teedø kengi Bɑɑl, kɑ gø cøør gen piny, këlli lɑm ɑ́dhur gen piny geki ngïji Bɑɑl. Anɑ̈g gen Mɑtɑn, ókwëri Bɑɑl kì bøli këlli Bɑɑl. Kɑ Yöyɑdɑ̀ ókɑ̈bbø ki jøg-ɑ kor Kengø. Kɑ rɑ̈dh lwøøg gøldwøng yi en geki jyɑ̈ggì, kí liny-ɑ kor gøldwøng, ge ɑ́dhwödh-ɑ Kengø kɑ ge wɑ̈dh-ɑ gøldwøng, o teedø ócyɑ̈dhø kì bɑng gen. Kɑ Yöɑc kɑ̈l-ɑ Dhøg Jøkor, kɑ pëgg-ɑ wïj kwøm. Kɑ pëthi ji ómïnø bënn, kɑ kɑɑl ókwöjø, mɑ́ Athɑliyɑ̀ rumø ki nɑ̈gø kì gøldwøng. Yöɑc ɑ́røny ɑ́ rɑ̈ɑ̈dh Yeudiyɑ̀, e runne bɑ ɑ́bïryew. Kì bïryeew runni jyɑ̈gi Yeeu rɑ̈ɑ̈dh Isrɑil, ɑ ɑ́jɑ̈ggi Yöɑc rɑ̈ɑ̈dh Yeudiyɑ̀. Yöɑc ɑ́jyɑ̈ɑ̈g ki runn pyɑ̈r ɑ́ngwen kì Yerusɑlem. Meye cwøl ɑ́ Dhibiyɑ̀ kì Bircebɑ̀. Yöɑc ɑ́göög ki gïgdøj kì bøli Jwøng-ɑ Ácwɑ̈ɑ̈j kì yij bëëde bëne, mɑ́ e nyi köbb-ɑ yi ókwërø Yöyɑdɑ̀. Kɑ̈jji mɑ̈ddø nuti dhur en piny, tyëngɑni nudd ge nyii muujø ki gëdhhì, o ge orɑ̈bø ki bɑkur. Aköbbi ókwër yi Yöɑc kinni, ngyënyy-ɑ nyi muuj gɑ gëdhhi Kengø, kí ngyënyy-ɑ nyi gwɑj yi ji, kí jwödhø men-ɑ nyi muuj yi ji, nyi mïdhi gen bënn yi ókwërø, o ge nyi thïg Kengø, kenyi di keny me rɑj kì ree. De gïti ri runn pyɑ̈r ɑ́ryew wïdɑ́dɑ̈g ri jɑ̈ggi Yöɑc, bong keny mɑ ɑ́thïg yi ókwër kì ri Kengø. Acwøøl Yöyɑdɑ̀ geki ókwër yi Yöɑc, ɑpyëje gïn kinni, “Á kipe ngø ɑ bëëd e bong keny mɑ ɑ́thïg yi wun kì ri Kengø? Cɑg ɑnɑn ngyëny pɑ mëggi wun këti, kinni o ge mïdhi wun, muuj wun gen, o kɑ̈jj-ɑ ódwɑddi gwøgø gwøg.” Ayïëy ókwër ki møgɑni, kí kinni kɑ̈jj-ɑ rijjø koo gwøg-ɑ yi gen. Akɑ̈bbi ókwërø Yöyɑdɑ̀ ki sɑndug, kɑ kömi gøn twïye, ɑcïbe gøn buti këli lɑm kì tuung kyëj kì yij Kengi Jwøng-ɑ Ácwɑ̈ɑ̈j e dhɑnhø kedh-ɑ wɑ̈g. Codhe kɑ ngyënyy-ɑ nyi muuj yi ji, nyi cïb yije yi ókwërr-ɑ nyi göögø. Kenyi lidh ge gøn kinni ngyëny ɑ́ngënyi kì yij sɑdungɑni, o jɑngi gøldwøng geki Ókwër-ɑ Dwøng nyi kedhi gen be kwɑni ngyëny, o gï twööj gen yethi kidhhì kì Kengi Jwøng-ɑ Ácwɑ̈ɑ̈j. Ngyënyy-ɑ rum ki kwɑnø nyi mëgg-ɑ jøg-ɑ cinggi gen di gwøøg Kengø, o gï lony gen ki mëggi tyëng-ɑ gëdø. O jøg-ɑ nyi twïgø ki ópɑddi kïttì, kí pɑ̈m nyi ngëëw gen ki jɑmmɑni bënn. Bong kwï ngyënyyɑni mɑ ɑ́muuj gɑ møg ngëëw ki ɑ́tegø men thɑ̈ɑ̈dh ki óthɑ̈ggì, kí tɑ̈mmì, kí kɑ̈ngì, kí jɑmm-ɑ nyi gwøøg mɑny-ɑ nyi lyel, wɑlɑ̀ jɑmmi ɑ́tegø kí dhɑb møøgø. Ngyënyyɑni bënn nyi cul-ɑ jøg-ɑ nyi gwøg Kengi Jwøng-ɑ Ácwɑ̈ɑ̈j. Jøg-ɑ mïdhi gwøngɑni ɑ́bëëd cinggi gen tɑr, bene ɑ bɑnge ɑ́bëëd e bong ngɑn nyi pïd gen ki kwøbbi kwɑnni ngyëny. Ngyënyyi gënhi bɑ̈jjø, kí gënhi orøg pɑ nyi kɑ̈ɑ̈l yij Kengi Jwøng-ɑ Ácwɑ̈ɑ̈j, ge nyi mëgg-ɑ ókwër. Keny-ɑ ɑ́pɑ̈ɑ̈r Adhɑil rɑ̈ɑ̈dh Arɑm kömi kɑɑl Gɑth, kɑ gø mɑge. Ádwɑdd-ɑ bëën be nyïɑ̈ggø ki Yerusɑlem, Akwɑɑny gëdhhì bënn yi Yöɑc rɑ̈ɑ̈dh Yeudiyɑ̀, gen ɑ gëdhhi Yöcɑpɑt, kí Yeörɑm ɑ bɑnge ɑ́jɑ̈gge, kí gëdhhi Akɑdhiyɑ̀ wïye, rɑ̈ɑ̈dh Yeudiyɑ̀ møg-ɑ ɑ́thyey yi en. Kí gëdhhe, kí dhɑb men-ɑ ɑ́yod yi en kì yij Sɑndug kì yij Kengi Jwøng-ɑ Ácwɑ̈ɑ̈j, kɑ gï mëgge Adhɑil. Adøg Adhɑil, ɑcöge e pɑ bï Yerusɑlem. Gïg-ɑ kyeelø møg-ɑ ɑ́gwøg yi Yöɑc rɑ̈ɑ̈dh Yeudiyɑ̀, bɑ ɑgwed kì yij Wɑ̈nyi Rɑ̈nhi Yeudiyɑ̀. Kì pyɑ̈r ɑ́ryew wïdɑ́dɑ̈ɑ̈g runni Yöɑc wɑ̈d Akɑdhiyɑ̀ ɑ́ rɑ̈ɑ̈dh Yeudiyɑ̀, ɑ ɑ́røøny Yöɑkɑdh wɑ̈d Yeeu ɑ́ rɑ̈ɑ̈dh Isrɑil. Ajyɑ̈ɑ̈ge ki runn pyɑ̈rø wïdɑ́bïryew kì Sɑmɑriyɑ̀. Rɑ̈dh Yöɑkɑdh ɑ́göög ki orøg kì bøli Jwøng-ɑ Ácwɑ̈ɑ̈j, kɑ Isrɑil peeje yij orøg, kɑ ódhɑ̈lø wïyø ki orøg ni Rɑ̈dh Yeroboɑm wɑ̈d Nebɑt. Codhe, ɑrënyi pyëw Jwøng-ɑ Ácwɑ̈ɑ̈j ki Isrɑil, kɑ gø wëgge tyɑmø yi Adhɑil rɑ̈ɑ̈dh Arɑm geki wɑ̈de Benɑdɑd tyel mø gïïr. Akwɑjji Jwøng-ɑ Ácwɑ̈ɑ̈j yi Yöɑkɑdh, ɑløøg kwɑ̈jje yi Jwøng-ɑ Ácwɑ̈ɑ̈j, mɑ́ rɑjj-ɑ ɑ́göggi tyëng Isrɑil yi Adhɑil rɑ̈ɑ̈dh Arɑm ɑ́lidh yi en. Anëngi Isrɑil yi Jwøng-ɑ Ácwɑ̈ɑ̈j ki pëëji men yielii ki orɑnge kì cinggi tyëng Arɑm, kɑ tyëng Isrɑil døøg-ɑ be bëëdø kì yethi myërri gen ki mër ni kɑ ɑ́bëëd gen cøn. De tyëng Isrɑil nuti wïyø ki orøng-ɑ́ yije ɑ́peej gen yi Yeroboɑm, de ge nudd ge ceg-ɑ orøg ceth, ngïji Aceerɑ̀ nudd e nud kì Sɑmɑriyɑ̀. Bong jøliny mɑ ɑ́döng kì yï Yöɑkɑdh, den-ɑ́ jøkyënyì pyɑ̈r ɑ́bïj kí yɑ̈thi liny pyɑ̈rø, kí jøliny tyel gɑ ɑ́lïp pyɑ̈rø, mɑ́ ge ɑ́tyëg ki nɑ̈gø yi rɑ̈ɑ̈dh Arɑm, gï ɑ́nyøne ni ɑyejø kì piny. Gïg-ɑ kyeelø møg-ɑ ɑ́gwøg yi Yöɑkɑdh, kí tege bëne bɑ ɑgwed kì yij Wɑ̈nyi Rɑ̈nhi Isrɑil. Akedhi Yöɑkɑdh kun-ɑ di kweyye, kɑ kony kì Sɑmɑriyɑ̀, ɑrøøny wɑ̈de Yeöɑc keje ɑ rɑ̈dh. Kì pyɑ̈r ɑ́dɑ̈g wïdɑ́bïryeew runni Yöɑc wɑ̈d Yöɑkɑdh, rɑ̈ɑ̈dh Yeudiyɑ̀ kì yij lɑwø, ɑ ɑ́jɑ̈ggi Yeöɑc wɑ̈d Yöɑkɑdh rɑ̈ɑ̈dh Isrɑil, kɑ ojyɑ̈gø ki runn pyɑ̈rø wïdɑ́bïkyel kì Sɑmɑriyɑ̀. Ágöög ki gïgrijjø thyew kì bøli Jwøng-ɑ Ácwɑ̈ɑ̈j, ni orøøg Yeroboɑm wɑ̈d Nebɑt, ngɑn-ɑ ɑ́peej Isrɑil yij orøg. Gïg-ɑ kyeelø møg-ɑ gwøg yi Yeöɑc, kí tege kí linye geki Amɑdhiyɑ̀ rɑ̈ɑ̈dh Yeudiyɑ̀ bɑ ɑgwed kì yij Wɑ̈nyi Rɑ̈nhi Isrɑil. Akedhi Yeöɑc kun-ɑ di kweyye, kɑ kony kì rörri gøl rɑ̈ɑ̈dhø kì Sɑmɑriyɑ̀, ɑrøøny wɑ̈de Ryeew Yeroboɑm keje ɑ́ rɑ̈dh. Kɑ dëël Elicɑ̀ jɑltöng ócɑ̈gø ki rɑ̈m, o bene rɑ̈ɑ̈m dël menɑni ɑ ɑ́nɑ̈gii, kɑ këëm yi Rɑ̈dh Yeöɑc rɑ̈ɑ̈dh Isrɑil, ɑywöngi rɑ̈dh kì bute kinni, “Wïyø! Wïyø! Bene yïn ngɑn teg men-ɑ ɑ́korri Isrɑil!” Akööb Elicɑ̀ kinni, “Kɑ̈ní ki weth kí nywøle.” Akɑ̈ni Yeöɑc. Aköbbi rɑ̈ɑ̈dh Isrɑil yi Elicɑ̀ kinni, tënní weth, kɑ gø tënne; kɑ Elicɑ̀ cingge cïbe köme cinggi rɑ̈dh. Akööb Elicɑ̀ kinni, “Yieb ɑwɑj kì tung-ɑ kuni Arɑm.” Ayiebe gøn. Codhe, ɑkööb Elicɑ̀ kinni, “Gøj weth!” Agöjje. Akööb Elicɑ̀ kinni, “Weth Jwøng-ɑ Ácwɑ̈ɑ̈j men-ɑ ótyɑɑm Arɑm. Wu ónyïɑ̈ggi ki tyëng Arɑm kì Ápek pïd keny-ɑ ótyɑɑm gen.” Aköbbi rɑ̈dh yi Elicɑ̀ kinni, “Kwɑny nywøli weth møg-ɑ ɑ́döng kɑ ge gøøj piny!” Kɑ göjj-ɑ piny ki tyel ɑ́dɑ̈g, kɑ ówïyø. Amɑɑg jɑltöng yi liny ki gøn, kɑ gø köbbe kinni, “Yï di göjji kɑ tyel ɑ́bïj wɑlɑ̀ ɑ́bïkyel, bene ɑ di tyɑɑm Arɑm ki tyɑmi dwøng, de ɑnɑn ge ótyɑm yi yïn kɑ tyel ɑ́dɑ̈g kete.” Athøw Elicɑ̀, kɑ kony. Ádɑ jø Moɑb møg nyi bï be mɑ̈nyø Isrɑil kì ri cɑ̈gi run. Jøgɑni ɑ́bï cyɑ̈ng megø ji ceg-ɑ kony ki jɑl me thøø, ɑleengii yij buur Elicɑ̀ yi jøg-ɑ kunyø, kɑ ge órengø. Kɑ ɑ́nywɑɑl cu Elicɑ̀ yi jɑl-ɑ thøø, ɑcyɑ̈re, kɑ dhwödh-ɑ kömi tyelle. Kì ri jyɑ̈gi Yöɑkɑdh bëne, nyingi tyëng Isrɑil ɑ́guud yi Adhɑil rɑ̈ɑ̈dh Arɑm. De Jwøng-ɑ Ácwɑ̈ɑ̈j ɑ́bëëd pyëwe nyii lɑ̈ɑ̈mø ki tyëng Isrɑil, kɑ gï nyi kønye kipe møg-ɑ ɑ́könge Abrɑhɑm, kí Isɑɑk, kí Yɑgob, ɑcöge gï nuti wiy en piny gïti dicyɑ̈ngtïn. Keny-ɑ ɑ́thøw Adhɑil rɑ̈ɑ̈dh Arɑm, ɑrøøny Benɑdɑd wɑ̈de keje ɑ́ rɑ̈dh. Codhe, ɑdøøg myërr-ɑ ɑ́kɑb yi Adhɑil ki dwöögø yi Yeöɑc wɑ̈d Yöɑkɑdh kì cingi Benɑdɑd ki liny. Benɑdɑd ɑ́tyɑm yi Yeöɑc ki tyel ɑ́dɑ̈g, kɑ myërri Isrɑil bënn, møg-ɑ ɑ́mɑg yi Benɑdɑd kì ri jyɑ̈gi Yöɑkɑdh wïye dwööge. Kì ryeew runni Yeöɑc wɑ̈d Yöɑkɑdh ɑ́ rɑ̈ɑ̈dh Isrɑil kì yij lɑwø, ɑ ɑ́göög Amɑdhiyɑ̀ wɑ̈d Yöɑc ɑ́ rɑ̈ɑ̈dh Yeudiyɑ̀, ɑ́göög ki rɑ̈dh e runne bɑ pyɑ̈r ɑ́ryew wïdɑ́bïj, kɑ ojyɑ̈gø kì Yerusɑlem ki runn pyɑ̈r ɑ́ryew wïdɑ́bïngwen. Meye cwøl ɑ́ Yöɑdïn kì Yerusɑlem. Ágöög ki gïgdøj kì bøli Jwøng-ɑ Ácwɑ̈ɑ̈j de pɑ pɑ̈ɑ̈r ki kwɑn Debïd, mɑ́ e ɑ́gwøg-ɑ gïg ni møg-ɑ ɑ́gøggi yi Yöɑc wïye. Kɑ̈jji mɑ̈ddø nuti cøør en piny, o ji ɑ́bëëd ge nyi kedh-ɑ kɑ̈jjɑni be muujø ki gëdhhì kí be rɑ̈b ki bɑkur. Amɑdhiyɑ̀ keny-ɑ ɑ́rume cïbi lɑwø piny ceth, ɑnɑ̈ge jøg-ɑ ɑ́nɑ̈g wïye, De nyigi jøgɑni nuti nɑ̈ɑ̈g en, mɑ́ e bɑ ɑkerø kì yij Wɑ̈nyi Ciggi Mosɑ̀ kinni, “Wëëg ko nyi nɑ̈g kipe gïn bɑj yi nyigi gen. Kɑ othønhø ko nyi nɑ̈g kipe gïn bɑj yi wëëg gen. Dhɑnhø nɑ̈g kɑ per gïn-ɑ bɑj yi en kiree.” Amɑdhiyɑ̀ ɑ́nɑ̈gi kì kelli liny Edöm ki ji ɑ́lïp pyɑ̈rø kì yij töör Luuy Omelø. Kɑ kɑɑl Selɑ̀ mɑge kì yij linyɑni, kɑ gø cɑge ɑ́ Yoktheel, nudd e cwølli kɑ nyingɑni gïti dicyɑ̈ngtïn. Codhe, kɑ Amɑdhiyɑ̀ öd-ɑ yï Rɑ̈dh Yeöɑc wɑ̈d Yöɑkɑdh ki ji mø köbbii kinni, “Bïí pɑ̈nyi wɑ riee!” De ɑ́lony ki ödø ki wöödø yi Rɑ̈dh Yeöɑc kinni, “Tyelø ɑ́kyel kì wɑ̈thi Kïti Lubnɑn, otwelø ɑ́ödi yi óthurø ki wöödø kinni, ‘Mëggí nyɑrí wɑ̈dɑ ɑ́ dhɑjø.’ Kɑ lɑ̈y me dwøng obëënø e ócyɑ̈dhø kɑ otwelɑni nyøøne piny. Amɑdhiyɑ̀, yï ɑ́tɑ̈d kì bɑng kɑ ɑ́tyɑɑm tyëng Edöm. Cöög ki dhwɑ̈ng-ɑ yïí, kɑ yï pëggí pɑɑrí, yïde ɑ yɑ̈ɑ̈b ki göny rënyi yïn, wuki jií.” De Amɑdhiyɑ̀ ɑ́dhɑ̈li lïngø. Codhe, ɑdhwödhi Rɑ̈dh Yeöɑc, rɑ̈ɑ̈dh Isrɑil be nyɑɑg ki en, kì Bet Cemec kì myërri Yeudiyɑ̀. Kɑ Amɑdhiyɑ̀ tyɑm, kɑ jølinye otɑyø men reng-ɑ pɑɑ gen. Amɑdhiyɑ̀ ɑ́mɑg yi Yeöɑc kì yij linyɑni kì Bet Cemec kɑ gø køøle Yerusɑlem. Kɑ döri kɑɑl cøøre piny, cɑg kì Dhøg Eprɑim gïti Dhøg Wïj Tung, kɑɑmɑni bɑ̈ri kööre bɑ mïtïr miy ɑ́ryew. Kɑ dhɑb kí ɑ́tegø bëne men-ɑ ɑ́yode kwɑnye, jɑmmi Kengø geki mø gøldwøng ɑ́kwɑny en, kɑ gï kïdhe Sɑmɑriyɑ̀. Kɑ oköödø ki ɑmɑgg thyew. Gïg-ɑ kyeelø møg-ɑ ɑ́gwøg yi Yeöɑc, kí tegi linye, kí liny gen ki Amɑdhiyɑ̀ rɑ̈ɑ̈dh Yeudiyɑ̀, ge bɑ ɑgwed kì yij Wɑ̈nyi Rɑ̈nhi Isrɑil. Kɑ Yeöɑc kedh-ɑ kun-ɑ di kweyye, kɑ kony ki rörri gøl rɑ̈ɑ̈dhø kì Sɑmɑriyɑ̀. Kɑ wɑ̈de, Ryeew Yeroboɑm røøny keje. Rɑ̈dh Amɑdhiyɑ̀ ɑ́döng e onëënø keny-ɑ ɑ́thøw Rɑ̈dh Yeöɑc, rɑ̈ɑ̈dh Isrɑil, ɑ lunye ki thøø kì bɑng runn pyɑ̈rø wïdɑ́bïj. Gïg-ɑ kyeelø bënn møg-ɑ ɑ́gwøg yi Rɑ̈dh Amɑdhiyɑ̀ bɑ ɑgwed kì yij Wɑ̈nyi Rɑ̈nhi Yeudiyɑ̀. Ádɑ ɑmolpiny mɑ ɑ́göggi Amɑdhiyɑ̀ kinni o di nɑ̈g, codhe ɑpɑ̈ɑ̈re Lɑkic, de tyëngmɑ̈ɑ̈nø ɑ́løg bɑnge kɑ gø nɑ̈g gen kì kunɑni. Kɑ kïdhi Yerusɑlem e thøø, gø okɑ̈llø yi gen kì kömi kyeny. Kɑ koony rörri gøl rɑ̈ɑ̈dhø kì kɑɑl Debïd. Kɑ Udhiyɑ̀ wɑ̈d Amɑdhiyɑ̀ røøny kej wïye ɑ rɑ̈dh yi tyëng Yeudiyɑ̀, e runne bɑ pyɑ̈rø wïdɑ́bïkyel. Kɑ Elɑth døøg ki mɑgø yi Udhiyɑ̀ e wïye rum thøø, kɑ gø cige gerø. Kì pyɑ̈rø wïdɑ́bïïj runni Amɑdhiyɑ̀ wɑ̈d Yöɑc ɑ́ rɑ̈ɑ̈dh Yeudiyɑ̀, ɑ ɑ́jɑ̈ggi Yeroboɑm wɑ̈d Yeöɑc ɑ́ rɑ̈ɑ̈dh Isrɑil, ɑjyɑ̈ɑ̈ge kì Sɑmɑriyɑ̀ ki runn pyɑ̈r ɑ́ngwen wïdɑ́kyel. Yeroboɑm wɑ̈d Yeöɑc ɑ́røngi kì bøli Jwøng-ɑ Ácwɑ̈ɑ̈j ni orøng-ɑ ɑ́gwøg yi Yeroboɑm wɑ̈d Nebɑt cøn, ngɑn-ɑ ɑ́peej Isrɑil yij orøg. Pìny-ɑ ɑ́bëëd gɑ mø Isrɑil ɑ́dwööge bënn, cɑg kì Amɑth kì wɑɑng wuudø gïti Luuy Omelø kì wɑɑng wurlwɑl ni kwøbb-ɑ ɑ́kwøb yi Jwøøg Isrɑil, Jwøng-ɑ Ácwɑ̈ɑ̈j, ki dhø bɑ̈nge Yönɑ̀, wɑ̈d Amitɑy, jɑltööng Gɑth Ëper. Orɑng-ɑ ɑ́rɑngi tyëng Isrɑil e bong ngɑn køny gen ɑ́lidh yi Jwøng-ɑ Ácwɑ̈ɑ̈j. De ɑ́bëëd e pɑth ki gïn-ɑ ɑ́dwɑddi yi Jwøng-ɑ Ácwɑ̈ɑ̈j, kinni o Isrɑil nyinge lɑ̈ɑ̈nye kì kömi piny. Bene ɑ yiele gïn kì ri Ryeew Yeroboɑm. Gïg-ɑ kyeelø møg-ɑ ɑ́gwøg yi Ryeew Yeroboɑm, ɑ løg tege, kí yëth-ɑ ɑ́nyïɑ̈gge, kí kɑ ɑ́dwööge Dimɑceg geki Amɑth, bɑ ɑgwed kì yij Wɑ̈nyi Rɑ̈nhi Isrɑil. Akedhi Yeroboɑm kun-ɑ di kweyye, kɑ kony kì rörri gøl rɑ̈ɑ̈dhø, ɑrøøny Dhekɑriyɑ̀ wɑ̈de keje ɑ́ rɑ̈dh. Kì pyɑ̈r ɑ́ryew wïdɑ́bïryeew runni Ryeew Yeroboɑm rɑ̈ɑ̈dh Isrɑil kì yij lɑwø, ɑ ɑ́røøny Udhiyɑ̀ wɑ̈d Amɑdhiyɑ̀ ɑ́ rɑ̈ɑ̈dh Yeudiyɑ̀. Ájɑ̈ggi e runne bɑ pyɑ̈rø wïdɑ́bïkyel, kɑ ojyɑ̈gø ki runn pyɑ̈r ɑ́bïj wïdɑ́ryew kì Yerusɑlem. Ágöög ki gïgdøj kì bøli Jwøng-ɑ Ácwɑ̈ɑ̈j, ni wïye Amɑdhiyɑ̀. De kɑ̈jji mɑ̈ddø nuti dhur en piny, o ji ɑ́nudd ge nyii muujø ki gëëdhi, o ge orɑ̈bø ki bɑkur kì kɑ̈jjɑni. Agöjji Rɑ̈dh Udhiyɑ̀ wɑɑny yi Jwøng-ɑ Ácwɑ̈ɑ̈j, kɑ dële ocögø ɑ́ wɑɑny gïti cyɑ̈ng-ɑ ɑ́thøwe. Ábëëd ɑ øde kì wɑ̈ye. Pödhø ɑ́jɑɑg-ɑ yi Yöthɑm wɑ̈de. Gïg-ɑ kyeelø bënn møg-ɑ ɑ́gwøg yi Udhiyɑ̀, bɑ ɑgwed kì yij Wɑ̈nyi Rɑ̈nhi Yeudiyɑ̀. Akedhi Udhiyɑ̀ kun-ɑ di kweyye, kɑ koony buti kweyye kì kɑɑl Debïd. Arøøny Yöthɑm wɑ̈de keje ɑ́ rɑ̈dh. Kì pyɑ̈r ɑ́dɑ̈g wïdɑ́bïdɑ̈ɑ̈g runni Udhiyɑ̀ rɑ̈ɑ̈dh Yeudiyɑ̀ kì yij lɑwø, ɑ ɑ́røøny Dhekɑriyɑ̀ wɑ̈d Ryeew Yeroboɑm ɑ́ rɑ̈ɑ̈dh Isrɑil. Kɑ ojyɑ̈gø ki dwɑ̈tt ɑ́bïkyel kì Sɑmɑriyɑ̀. Ágöög ki gïgrijjø kì bøli Jwøng-ɑ Ácwɑ̈ɑ̈j ni wïye, ɑ́røngi ni Yeroboɑm wɑ̈d Nebɑt, ngɑn-ɑ ɑ́peej Isrɑil yij orøg. Kɑ Rɑ̈dh Dhekɑriyɑ̀ göggi ki ɑmolpiny yi Cɑlum wɑ̈d Yɑbic, ɑgøøje gøn piny kì Iblïm kɑ gø nɑ̈ge, kɑ ójɑ̈ggø kì keje. Gïg-ɑ kyeelø møg-ɑ ɑ́gwøg yi Dhekɑriyɑ̀ bɑ ɑgwed kì yij Wɑ̈nyi Rɑ̈nhi Isrɑil. Apɑ̈dhi møg-ɑ ɑ́köngi Yeeu yi Jwøng-ɑ Ácwɑ̈ɑ̈j kinni gøle ójyɑ̈ɑ̈gø kì yethi rïjj ɑ́ngwen. Kì pyɑ̈r ɑ́dɑ̈g wïdɑ́bïngween runni Udhiyɑ̀ rɑ̈ɑ̈dh Yeudiyɑ̀ kì yij lɑwø, ɑ ɑ́røøny Cɑlum wɑ̈d Yɑbic ɑ́ rɑ̈ɑ̈dh Isrɑil, ɑjyɑ̈ɑ̈ge ki dwɑ̈y ɑ́kyel kì Sɑmɑriyɑ̀. Codhe ɑbëën Menɑim wɑ̈d Gɑdì e kɑ̈ɑ̈l-ɑ Tirdhɑ̀, ɑnɑ̈ge Cɑlum wɑ̈d Yɑbic kì Sɑmɑriyɑ̀, ɑjɑ̈gge kì keje. Gïg-ɑ kyeelø møg-ɑ ɑ́gwøg yi Cɑlum wɑ̈d Yɑbic, kí ɑ́wenɑwenø men-ɑ ɑ́gwøge, bɑ ɑgwed kì yij Wɑ̈nyi Rɑ̈nhi Isrɑil. Keny-ɑ ɑ́bëën Menɑim e kɑ̈ɑ̈l-ɑ Tirdhɑ̀, ɑrënye kɑɑl Tɑpuɑ̀ ki rënyi teg, tyëng kɑɑlɑni, kí myërr-ɑ bute ɑ́nɑ̈ge bënn, mɑ́ tyëng kɑɑlɑni ɑ́bɑ̈nyi yömmi yïe, kɑ yethi ɑ́yɑjj kɑge thyew. Kì pyɑ̈r ɑ́dɑ̈g wïdɑ́bïngwen runni Udhiyɑ̀ rɑ̈ɑ̈dh Yeudiyɑ̀ kì yij lɑwø, ɑ ɑ́røøny Menɑim wɑ̈d Gɑdì ɑ́ rɑ̈ɑ̈dh Isrɑil, ɑjyɑ̈ɑ̈ge ki runn pyɑ̈rø kì Sɑmɑriyɑ̀. Menɑim ɑ́røngi kì bøli Jwøng-ɑ Ácwɑ̈ɑ̈j kì yij bëëde bëne, ki orøng ni orøøg Yeroboɑm wɑ̈d Nebɑt, ngɑn-ɑ ɑ́peej Isrɑil yij orøg. Abëën Tiglɑth Pileser, rɑ̈nhdwøøng Acuur be pɑ̈ɑ̈r kömi Isrɑil, ɑnëngii yi Menɑim ki ɑ́tegø ɑ́ kïllì ɑ́lïp pyɑ̈r ɑ́dɑ̈g wïdɑ́ngwen, kipe kinni o Menɑim køny yi en, o nëngi ki tegø men jɑɑge pödhø. Jøkɑ̈rì kì Isrɑil ɑ́gwɑj yi Menɑim, jɑl ɑ́kyel yïe ɑ́kɑ̈bbe ki ngyëny ɑ́tegg pyɑ̈r ɑ́bïj mø mëgge rɑ̈nhdwøøng Acuur, codhe ɑdøøg rɑ̈nhdwøøng Acuur pödhe. Gïg-ɑ kyeelø møg-ɑ ɑ́gwøg yi Menɑim bɑ ɑgwed kì yij Wɑ̈nyi Rɑ̈nhi Isrɑil. Akedhi Menɑim kun-ɑ di kweyye, kɑ koony buti kweyye, ɑrøøny Pekɑiyɑ̀ wɑ̈de keje ɑ́ rɑ̈dh. Kì pyɑ̈r ɑ́bïïj runni Udhiyɑ̀ rɑ̈ɑ̈dh Yeudiyɑ̀ kì yij lɑwø, ɑ ɑ́røøny Pekɑiyɑ̀ wɑ̈d Menɑim ɑ́ rɑ̈ɑ̈dh Isrɑil, ɑjyɑ̈ɑ̈ge ki runn ɑ́ryew kì Sɑmɑriyɑ̀. Pekɑiyɑ̀ ɑ́røngi kì bøli Jwøng-ɑ Ácwɑ̈ɑ̈j, ni orøng-ɑ ɑ́gwøg yi Yeroboɑm wɑ̈d Nebɑt, ngɑn-ɑ ɑ́peej Isrɑil yij orøg. Pënyi liny me cwøl ɑ́ Pekɑ̀ wɑ̈d Remɑliyɑ̀, ɑ́göög ki ɑmolpiny geki jøliny mø kwɑnni gen bɑ pyɑ̈r ɑ́bïj kì Gilyɑd, kɑ Pekɑiyɑ̀ nɑ̈g yi gen, kì øn-ɑ teg kì gøldwøng kì Sɑmɑriyɑ̀, ɑkwɑɑny kej Pekɑiyɑ̀ yi Pekɑ̀ kɑ ree gwøge ɑ́ rɑ̈ɑ̈dh Isrɑil. Gïg-ɑ kyeelø møg-ɑ ɑ́gwøg yi Pekɑiyɑ̀ bɑ ɑgwed kì yij Wɑ̈nyi Rɑ̈nhi Isrɑil. Kì pyɑ̈r ɑ́bïj wïdɑ́ryeew runni Udhiyɑ̀ rɑ̈ɑ̈dh Yeudiyɑ̀ kì yij lɑwø, ɑ ɑ́røøny Pekɑ̀ wɑ̈d Remɑliyɑ̀ ɑ́ rɑ̈ɑ̈dh Isrɑil, ɑjyɑ̈ɑ̈ge ki runn pyɑ̈r ɑ́ryew kì Sɑmɑriyɑ̀. Pekɑ̀ ɑ́røngi kì bøli Jwøng-ɑ Ácwɑ̈ɑ̈j ni orøng-ɑ ɑ́gwøg yi Yeroboɑm wɑ̈d Nebɑt, ɑ ɑ́peej Isrɑil yij orøg. Kì yethi cyɑ̈nggi jyɑ̈gi Pekɑ̀ rɑ̈ɑ̈dh Isrɑil ɑ ɑ́bëën Tiglɑth Pileser rɑ̈nhdwøøng Acuur, kɑ Iyön kí Abel Bet Mɑɑkɑ̀, kí Yɑnoɑ̀, kí Kedec, kí Adhör, kí Gilyɑd, kí Gɑlelì, kí myërri Nɑptɑlì gï mɑge bënn, kɑ jii myërrɑni kïdhe Acuur gɑ ɑmɑgg. Kì pyɑ̈r ɑ́ngween runni Yöthɑm wɑ̈d Udhiyɑ̀, rɑ̈ɑ̈dh Yeudiyɑ̀ kì yij lɑwø, ɑ ɑ́thuub Pekɑ̀ wɑ̈d Remɑliyɑ̀ yi Öciyɑ̀ wɑ̈d Elɑ̀, kɑ gø nɑ̈ge, ɑjɑ̈gge kì keje. Gïg-ɑ kyeelø møg-ɑ ɑ́gwøg yi Pekɑ̀ bɑ ɑgwed kì yij Wɑ̈nyi Rɑ̈nhi Isrɑil. Kì ryeew runni Pekɑ̀ wɑ̈d Remɑliyɑ̀ kì yij lɑwø, ɑ ɑ́røøny Yöthɑm wɑ̈d Udhiyɑ̀ ɑ́ rɑ̈ɑ̈dh Yeudiyɑ̀. Árøny runne bɑ pyɑ̈r ɑ́ryew wïdɑ́bïj, kɑ ojyɑ̈gø ki runn pyɑ̈rø wïdɑ́bïkyel kì Yerusɑlem. Meye cwøl ɑ́ Yerucɑ̀ nyɑɑr Dhɑdök. Yöthɑm ɑ́göög ki gïgdøj kì bøli Jwøng-ɑ Ácwɑ̈ɑ̈j ni wïye Udhiyɑ̀. De kɑ̈jji mɑ̈ddø nuti dhur en piny, ɑ́bëëd ji nudd ge nyii muujø ki gëdhhì kì kɑ̈jjɑni, kɑ ge nyii rɑ̈bø ki bɑkur. Yöthɑm en ɑ ɑ́ger Dhøg Wɑɑng Wuudø, men-ɑ yïëbbi Kengi Jwøng-ɑ Ácwɑ̈ɑ̈j. Gïg-ɑ kyeelø møg-ɑ ɑ́gwøg yi Yöthɑm bɑ ɑgwed kì yij Wɑ̈nyi Rɑ̈nhi Yeudiyɑ̀. Kì yethi cyɑ̈nggɑni ɑ ɑ́ör Redhïn rɑ̈ɑ̈dh Arɑm geki Pekɑiyɑ̀ rɑ̈ɑ̈dh Isrɑil yi Jwøng-ɑ Ácwɑ̈ɑ̈j be nyïɑ̈ggø ki Yeudiyɑ̀. Akedhi Yöthɑm kun-ɑ di kweyye, kɑ koony buti kweyye kì kɑɑl Debïd, ɑrøøny Akɑɑdh wɑ̈de keje ɑ́ rɑ̈dh. Kì bïryeew runni Pekɑ̀ wɑ̈d Remɑliyɑ̀ kì yij lɑwø, ɑ ɑ́göög Akɑɑdh wɑ̈d Yöthɑm ki rɑ̈ɑ̈dh Yeudiyɑ̀. Akɑɑdh ɑ́göög ki rɑ̈dh e runne bɑ pyɑ̈r ɑ́ryew, kɑ ojyɑ̈gø kì Yerusɑlem ki runn pyɑ̈rø wïdɑ́bïkyel. Nuti göögø ki gïgdøj kì bøli Jwøng-ɑ Ácwɑ̈ɑ̈j ni kwɑn Debïd, de ɑ́ngøy-ɑ bëëdi rɑ̈nhi Isrɑil. Wɑ̈de ɑ́rɑ̈be thyew ɑ́ gëëdhi, e ngøy-ɑ kwööng jurr-ɑ ɑ́cyeed wɑ̈g yi Jwøng-ɑ Ácwɑ̈ɑ̈j, kì bøli tyëng Isrɑil. Kɑ nyii rɑ̈bø ki gëdhhì, kí bɑkur kì kɑ̈jji mɑ̈ddø, geki wɑ̈thi kïttì kí thɑ̈thi yenh-ɑ tïbbi gen døngø. Redhïn rɑ̈ɑ̈dh Arɑm geki Pekɑ̀ rɑ̈ɑ̈dh Isrɑil ɑ́kedhi be nyɑɑg ki Akɑɑdh kì Yerusɑlem, kɑ Yerusɑlem tyeg yi gen de Akɑɑdh nuti tyɑɑm gen. Kɑ Elɑth døøg-ɑ yï rɑ̈ɑ̈dh Edöm kì bøli kenyɑni, kɑ tyëng Yeudiyɑ̀ møg-ɑ ɑ́bëëd kì yije cyeede wɑ̈g. Kɑ tyëng Edöm pëgg-ɑ yije, o ge nudd ge bëëd ɑ yije dicyɑ̈ngtïn. Akɑɑdh ɑ́ödi yï Tiglɑth Pileser rɑ̈nhdwøøng Acuur, ki ji møg köbbii kinni, “Yɑ bɑ bɑ̈ngí ceth. Bïí yiel yɑn ki rɑ̈ɑ̈dh Arɑm geki rɑ̈ɑ̈dh Isrɑil; wɑngɑ ɑ́guud yi gen.” Dhɑb geki ɑ́tegø ɑ́kwɑny yi Akɑɑdh kì Kengø geki gøldwøng, kɑ gï öre rɑ̈nhdwøøng Acuur, gɑ møg kwɑjjii. Kɑ rɑ̈nhdwøøng Acuur oyïëyø. Aöde Dimɑceg ki liny, kɑ döre cøør piny, kɑ Rɑ̈dh Redhïn nɑ̈g. Kɑ Akɑɑdh kedh-ɑ Dimɑceg be yïddø ki Rɑ̈nhdwøng Tiglɑth Pileser. Kɑ ólïdhø ki këli lɑm kì kɑɑlɑni, ɑöre ngïje Yerusɑlem yï ókwërø Uriyɑ̀, ki kër-ɑ ógerii. Codhe, kɑ Uriyɑ̀ ogëdø ki këli lɑm me ni menɑni. Kɑ órumø ki gerø e Akɑɑdh nudd e tøøk, ɑ́ger en e pɑ̈r ki ngïny-ɑ ɑ́örii kinni tïp. Keny-ɑ ɑ́dwöög Rɑ̈dh Akɑɑdh kì Dimɑceg, ɑyuude këli lɑm e rumø ki gerø. Kɑ ongɑ̈dø ki gënh-ɑ nyi rɑ̈b bëne kì köme, kɑ orɑ̈bø ki byëlø thyew. Kɑ köme kunye ki remi gënhi mër geki møgi oløg. Këli lɑm mi Jwøng-ɑ Ácwɑ̈ɑ̈j men-ɑ bɑ dilɑl ɑ́ying-ɑ kɑɑm këli lɑm men-ɑ nyɑ̈n geki Kengø, kɑ nyiig yi Akɑɑdh gø dwøøge’ kuni wɑɑng wuudø kì buti këli lɑm men-ɑ mee. Codhe, ɑ köbbe Uriyɑ̀ kinni, “Nyi rɑ̈ɑ̈b kì wïj këli lɑmɑ, men-ɑ lɑɑj èn ki gëdhhi mwøl geki byëli böörø, kɑ yï nyi ngɑ̈ɑ̈d kì wïje ki gënh-ɑ nyi rɑ̈b bëne mi rɑ̈dh, kí mø ji, kɑ byël-ɑ muuj yi rɑ̈dh nyi rɑ̈ɑ̈b kì wïje, kɑ wïje nyi kunyí ki møgi oløg geki remi gënhi mër, kɑ nyi kunyí ki remmi gëdhhì bënn. De mïdhí këli lɑm men-ɑ bɑ dilɑl ɑ́ men nyi rɑ̈ɑ̈b yi rɑ̈dh ki gëdhhì kenyi di gïn pyëj yi en kì yï Jwøng-ɑ Ácwɑ̈ɑ̈j.” Kɑ møg-ɑ ɑ́kwøb yi Rɑ̈dh Akɑɑdh gwøg yi Uriyɑ̀ ceth. Yɑ̈thi dilɑl ɑ́nyiig yi Rɑ̈dh Akɑɑdh, kɑ ɑ́tɑ̈yyì kɑ̈ɑ̈le wɑ̈g kì wɑ̈thi gen. Kɑ luy dilɑl tïnge piny kì kömi wɑ̈dhh møg-ɑ bɑ ɑkøny gɑ dilɑl, kɑ gø cïbe wɑ̈thi ɑ́tuggi kïttì. Kɑ óthør-ɑ wïje nyi cïb kwøøm rɑ̈dh kì yij Kengø pööge wɑ̈g, kɑ dhøng-ɑ nyi bëën rɑ̈dh Kengø cyëge, kipe kinni o pyëw rɑ̈nhdwøøng Acuur mïne. Gïg-ɑ kyeelø møg-ɑ ɑ́gwøg yi Rɑ̈dh Akɑɑdh bɑ ɑgwed kì yij Wɑ̈nyi Rɑ̈nhi Yeudiyɑ̀. Akedhi Akɑɑdh kun-ɑ di kweyye, kɑ koony rörri gøl rɑ̈ɑ̈dhø kì kɑɑl Debïd, kɑ wɑ̈de Kedhekiyɑ̀ røøny keje ɑ rɑ̈dh. Kì pyɑ̈rø wïdɑ́ryeew runni Akɑɑdh rɑ̈ɑ̈dh Yeudiyɑ̀ kì yij lɑwø, ɑ ɑ́røøny Öciyɑ̀ wɑ̈d Elɑ̀ ɑ́ rɑ̈ɑ̈dh Isrɑil, ɑjyɑ̈ɑ̈ge ki runn ɑ́bïngwen kì Sɑmɑriyɑ̀. Öciyɑ̀ ɑ́røngi kì bøli Jwøng-ɑ Ácwɑ̈ɑ̈j, de orøge nuti pɑ̈ɑ̈rø ki orøøg rɑ̈nhi Isrɑil møg-ɑ ɑ́jyɑ̈ɑ̈g kì bøle. Cɑlmɑneser, rɑ̈nhdwøøng Acuur ɑ́nyïɑ̈ggi geki Öciyɑ̀, ɑyömmi Öciyɑ̀ yïe, kɑ gø nyi cude ki gwɑ̈j yethi runn bënn. De kì yij run megø, Öciyɑ̀ ɑ́ödi yi Sö rɑ̈ɑ̈dh Rïp ki ji kipe kinni o køny, kɑ Öciyɑ̀ ocögø e rɑ̈nhdwøøng Acuur pɑ cude ki gwɑ̈j. Keny-ɑ ɑ́yood møgɑni yi Cɑlmɑneser, ɑleenge Öciyɑ̀ ød mɑg. Amɑɑny Isrɑil yi Cɑlmɑneser, kɑ Sɑmɑriyɑ̀ tyege. Kɑ Sɑmɑriyɑ̀ mɑge kì dɑ̈ɑ̈g runni tyëg menɑni. Kì bïngween runni Öciyɑ̀ kì yij lɑwø, ɑ ɑ́mɑɑg Sɑmɑriyɑ̀ yi rɑ̈nhdwøøng Acuur, kɑ tyëng Isrɑil kïdhe Acuur gɑ ɑmɑgg. Acïbe kwï gïn kɑɑl Alɑ̀, kɑ møøgø cïbe kömi Nɑm Abör kì myërri Gödhɑn, kɑ møøgø cïbe kɑ̈ddi Mɑdɑy. Sɑmɑriyɑ̀ ɑ́mɑg kì bɑng kɑ ɑ́røngi tyëng Isrɑil kì bøli Jwøng-ɑ Ácwɑ̈ɑ̈j, eni Jwøøg gen Jwøng-ɑ ɑ́kɑ̈ɑ̈l gen wɑ̈g kì cingi rɑ̈ɑ̈dh Rïp, kɑ ge døøg-ɑ be mɑlli jwögg mø pɑth. Tyëng Isrɑil ɑ́døøg be cyɑ̈dhø kì bɑng kwööng jurr-ɑ ɑ́cyeddi yi Jwøng-ɑ Ácwɑ̈ɑ̈j kì bøli gen, kɑ ge oyïëyø ki gïg-ɑ ɑ́gøggi yi rɑ̈nhi Isrɑil. Tyëng Isrɑil ɑ́göög ki gïg mø pɑth ki dyër, mø pɑ dwɑddi yi Jwøøg gen, Jwøng-ɑ Ácwɑ̈ɑ̈j. Ge ɑ́gëëd ki kɑ̈jji mɑ̈ddø kì yethi myërri gen bënn, cɑg kì myërr-ɑ thønhø gïti kɑ̈dd-ɑ døngø bënn. Tyëng Isrɑil ri gen ɑ́göggi gen ki löjj geki ngïjji Aceerɑ̀ kì wɑ̈thi ótøng, kí thɑ̈thi yenh-ɑ di tïbbì bënn. Kɑ ge nyii rɑ̈bø ki bɑkur kì kɑ̈jji mɑ̈ddø møgɑni, ni jurr-ɑ ɑ́cyeddi yi Jwøng-ɑ Ácwɑ̈ɑ̈j, kɑ ge ogöögø ki gïgrijjø mɑ ɑ́rënyi gen pyëw Jwøng-ɑ Ácwɑ̈ɑ̈j. Kwøbbi Jwøng-ɑ Ácwɑ̈ɑ̈j ɑ́pyem yi gen. Kɑ ge kedh-ɑ be mɑlli jwögg-ɑ pɑth møg-ɑ ɑ́kërri gen yi Jwøng-ɑ Ácwɑ̈ɑ̈j, kinni gï ko mɑlli gen. Isrɑil geki Yeudiyɑ̀ ɑ́rum ki kyëddø yi Jwøng-ɑ Ácwɑ̈ɑ̈j, kì ri tyëng-ɑ ɑ́ör yi en geki tyëng tyëngtöng kinni, “Wiyu yëthi orøg, kɑ ciggɑ mïdhi wun, gen ɑ cigg-ɑ ɑ́mëggɑ kweyyi wun, kɑ ge nyi örɑ wun ki bɑ̈nggɑ, jøtöng.” De ge pɑ lïngø, muddi gen teeg ni kweyyi gen, tyëng-ɑ bɑ̈nyi ki lïngi dhø Jwøøg gen, Jwøng-ɑ Ácwɑ̈ɑ̈j. Cigge ɑ́bɑny yi gen, köng-ɑ ɑ́könge kweyyi gïn nuti mïdhø yi gen. Kyën-ɑ ɑ́kyëde nuti lïngi gen. Ge ɑ́kedhi be mɑlli ngïjji jwögg-ɑ bong per gen, kɑ ge ogöögø ge bong per gen, kɑ ge óngöyø ki bëëdi jurr-ɑ buti gen, jurr-ɑ ɑ́kyëddi gen yi Jwøng-ɑ Ácwɑ̈ɑ̈j kinni ge ko ngöyi ki bëëdi gïn. Ciggi Jwøøg gen, Jwøng-ɑ Ácwɑ̈ɑ̈j ɑ́pyem yi gen, kɑ ri gen thɑ̈dhhi gen ki røjji ngyënyø ɑ́ryew, gɑ møg mɑlli yi gen, kɑ ge ogöögø thyew ki ngïji Aceerɑ̀, jwøng-ɑ dhɑjø, kɑ kyell mɑlli yi gen, kɑ Bɑɑl mɑlli gen. Wɑ̈ddi gen geki nyigi gen ɑ́rɑ̈bbi gen jwögg-ɑ pɑth gɑ gëdhhì, kɑ ge kedh-ɑ be rɑng yï ɑ́jwöggì, kɑ ge ogöögø ki gïgrijjø ki mendwøng kì bøli Jwøng-ɑ Ácwɑ̈ɑ̈j. Arënyi pyëw Jwøng-ɑ Ácwɑ̈ɑ̈j ki gen. Kì bɑng kɑ ɑ́rënyi pyëw Jwøng-ɑ Ácwɑ̈ɑ̈j ki tyëng Isrɑil, ɑcyeede gïn yïnø, ɑdönge ɑ́ gøl Yeudɑ̀ kete. De tyëng gøl Yeudɑ̀ ciggi jwøøg gen, Jwøng-ɑ Ácwɑ̈ɑ̈j nuti mïdhi gen thyew, de ge ɑ́ngøy-ɑ kwöng-ɑ ɑ́kwɑny yi tyëng Isrɑil. Abɑɑny tyëng Isrɑil yi Jwøng-ɑ Ácwɑ̈ɑ̈j, kɑ gï cɑye, kɑ gï cïbe cinggi tyëngrijjø pïd kɑ ɑ́wɑ̈ɑ̈ny gen kì bøle. Keny-ɑ ɑ́rum Isrɑil ki dɑ̈ngø yi Jwøng-ɑ Ácwɑ̈ɑ̈j geki gøl Debïd, ɑrønye Yeroboɑm wɑ̈d Nebɑt ɑ́ rɑ̈dh, ɑpeej Isrɑil wɑ̈g kì yuu Jwøng-ɑ Ácwɑ̈ɑ̈j yi Yeroboɑm wɑ̈d Nebɑt, kɑ ji göjje gwøg ki orøg me dwøng. Aløg tyëng Isrɑil bɑng orøøg Yeroboɑm, kɑ ódhɑ̈lø wiyø yi gen. Pïd kɑ ɑ́nyiig tyëng Isrɑil yi Jwøng-ɑ Ácwɑ̈ɑ̈j kì bøle, ni kɑ ɑ́kwøbe møgɑni cøn ki dhøggi bɑ̈ngge, jøtöng. Codhe, ɑtööng Isrɑil yïnø; ɑ́kïdhi Acuur, kun-ɑ bëëd yi gen dicyɑ̈ngtïn. Akɑ̈ni rɑ̈nhdwøøng Acuur ki ji kì Bɑbïl, kí Cuth, kí Abɑ̀, kí Amɑth, kí Sepɑrbɑim, kɑ gï cïbe Sɑmɑriyɑ̀, kɑ̈jji tyëng Isrɑil. Akwɑny gen Sɑmɑriyɑ̀, geki myërre. Kì yij cɑ̈gi gen ki bëëdø, ge ɑ́bëëd Jwøng-ɑ Ácwɑ̈ɑ̈j pɑ nyi mɑlli yi gen. Codhe kɑ kelli gen ödi yi Jwøng-ɑ Ácwɑ̈ɑ̈j ki ngurrì, kɑ kwï gen nɑ̈g yi ngurrɑni. Aödi yï rɑ̈nhdwøøng Acuur kinni, “Tyëng-ɑ ɑ́cïb yi yïn myërri Sɑmɑriyɑ̀ ciggi jwøøg pönhɑni kwïj yi gen, bene ɑ bɑnge öde gïn ki ngurrì mø nɑ̈g gen.” Codhe, ɑkööb rɑ̈nhdwøøng Acuur kinni, “Öd wun ki ókwërø ɑ́kyel kì kelli ókwër møg-ɑ ɑ́kɑ̈ɑ̈l kì kunɑni gɑ ɑmɑgg, o døøge be bëëdø kì kunɑni, o tyëngɑni pwönye ki ciggi jwøøg pönhɑni.” Abëën ókwërø ɑ́kyel mɑ ɑ́kɑ̈ɑ̈l kì Sɑmɑriyɑ̀ be bëëdø kì Betiil, ɑpwönye tyëngɑni ki yuu-ɑ nyi mɑlli Jwøng-ɑ Ácwɑ̈ɑ̈j. De tyëng-ɑ bëëdø ki Sɑmɑriyɑ̀ ɑ́bëëd ge nudd ge ogöögø ki jwöggi cwɑggi gen. Kɑ gï cïb gen yethi kengg-ɑ ɑ́ger yi tyëng Isrɑil. Tyëng kɑɑl nyi gögg-ɑ ri gen ki jwøøg gen kì kɑɑl-ɑ bëëd gen. Tyëng Bɑbïl ɑ́gwøg-ɑ ngïji Suköth Benöth, tyëng Cuth ɑ́gwøg-ɑ ngïji Nergɑl geki Acïmɑ̀, jwöggi tyëng Amɑth. Tyëng Abɑ̀ ɑ́gwøg-ɑ ngïjji Nibɑdh geki Tɑrtɑk, tyëng Sepɑrbɑim nyigi gen nyi rɑ̈bbi ge’ jwöggi gen, Adrɑmelek geki Anɑmelek gɑ gëdhhì. Jiɑni Jwøng-ɑ Ácwɑ̈ɑ̈j ɑ́bëëd gø nyii mɑllø yi gen thyew, kɑ ge ókɑ̈bbø ki ji kì kelli gen mø bëëdø gɑ ókwër møg nyi muuj gëdhhì kì kɑ̈jji mɑ̈ddø. Jwøng-ɑ Ácwɑ̈ɑ̈j ɑ́bëëd e nyii mɑllø yi gen, de jwöggi gen di mɑllø yi gen thyew, ni kwööng pönh-ɑ ɑ́kɑ̈ɑ̈l yi gen. Kwööng gen nudd gø omïdhø yi gen pïd dicyɑ̈ngtïn. Jwøng-ɑ Ácwɑ̈ɑ̈j pɑ nyi mɑlli yi gen, o cigg-ɑ ɑ́mëgge kwɑrri Yɑgob ngɑn-ɑ ɑ́cɑg yi en ɑ́ Isrɑil pɑ mïdhi yi gen. Jwøng-ɑ Ácwɑ̈ɑ̈j ɑ́nywɑ̈ɑ̈g ki kwøb geki tyëng-ɑ Isrɑil, kɑ ge köbbe kinni, “Wu ko kwɑ̈jji ki jwögg mø pɑth, ri wun ko nyi bøødh wun piny kì bøli gen, ge ko göggi wun wɑlɑ̀ ge ko nyi nëngi wun ki gëdhhì. De ngɑ̈dhu yɑn, yɑ Jwøng-ɑ Ácwɑ̈ɑ̈j, ɑ ɑ́kɑ̈ɑ̈l wun wɑ̈g kì Rïp ki tengi dwøng, nyi bøødh wun ri wun piny kì bølɑ, kɑ yɑ nyi nëngi wun ki gëdhhì. Kɑ ciggɑ geki kwöngɑ møg-ɑ ɑ́gwëdɑ wun mïdhi wun yethi cyɑ̈ng bënn. Wu ko nyi ngɑ̈dh jwögg-ɑ pɑth. Kɑ wɑ̈thi wun ko wïl ki møg-ɑ ɑ́nywɑg yi wɑ. Nyi lïngu kwøbbɑ, yɑ Jwøøg wun, Jwøng-ɑ Ácwɑ̈ɑ̈j, o wu óyiel yi yɑn kì cinggi tyëngmɑ̈ɑ̈nø.” De tyëngɑni nuti lïngø, ge nudd ge mïdh-ɑ kwööng pönh-ɑ ɑ́kɑ̈ɑ̈l yi gen. Tyëngɑni ɑ́bëëd Jwøng-ɑ Ácwɑ̈ɑ̈j nyii mɑllø yi gen, de ge kedh ge mɑll-ɑ ngïjji jwöggi gen thyew, o gïn ni menɑni nudd e ogwøgø yi kwɑrri gen pïd dicyɑ̈ngtïn. Kì dɑ̈ɑ̈g runni Öciyɑ̀ wɑ̈d Elɑ̀, rɑ̈ɑ̈dh Isrɑil kì yij lɑwø, ɑ ɑ́göög Kedhekiyɑ̀ wɑ̈d Akɑɑdh ki rɑ̈ɑ̈dh Yeudiyɑ̀. Ágöög ki rɑ̈dh e runne bɑ pyɑ̈r ɑ́ryew wïdɑ́bïj, kɑ ojyɑ̈gø kì Yerusɑlem ki runn pyɑ̈r ɑ́ryew wïdɑ́bïngwen. Meye cwøl ɑ́ Abì nyɑɑr Dhekɑriyɑ̀. Ágöög ki dyër kì bøli Jwøng-ɑ Ácwɑ̈ɑ̈j ni kwɑn Debïd. Kɑ̈jji mɑ̈ddø ɑ́cøøre piny, kɑ yïkk cøøre piny, kɑ ngïjji Aceerɑ̀ ngøle piny. Ngïji thwöl men-ɑ ɑ́køny yi Mosɑ̀ ki dilɑl ɑ́tørre thyew, thwölɑni ɑ́bëëd e cwøl ɑ́ Nekuctɑn. Thwölɑni ɑ́bëëd e nudd e omɑllø yi tyëng Isrɑil, kɑ nyi rɑ̈bbi gen ki bɑkur. Kedhekiyɑ̀ ɑ́gɑ̈nn-ɑ Jwøøg Isrɑil, Jwøng-ɑ Ácwɑ̈ɑ̈j. Yeudiyɑ̀ nuti pɑ̈nyi yïddø ki rɑ̈dh me ni en, o pɑth ki men-ɑ óyïddi këti ki rɑ̈nh ni en. Ábëëd e wør-ɑ Jwøng-ɑ Ácwɑ̈ɑ̈j, o dhø Jwøng-ɑ Ácwɑ̈ɑ̈j nuti pɑ̈nyø en ki pyemø. Cigg-ɑ ɑ́muuj yi Mosɑ̀ ɑ́mïdhe bënn. Akønyii yi Jwøng-ɑ Ácwɑ̈ɑ̈j, kɑ gïg-ɑ gwøg yi en nyi pɑ̈dh-ɑ kɑ̈jji gen bënn. Ángɑ̈nyi wɑ̈ye kɑ óbɑ̈nyø ki lïngi kwøbbi rɑ̈nhdwøøng Acuur. Tyëng Pelistiyɑ̀ ɑ́tyɑme kɑ myërri gen yɑge, cɑg kì pɑn-ɑ thinh gïti kɑɑl-ɑ dwøng, reb ki Gɑdhɑ̀ geki myërre bënn. Kì ngween runni Kedhekiyɑ̀ kì yij lɑwø, ɑ bɑ bïryeew runni Rɑ̈dh Öciyɑ̀ rɑ̈ɑ̈dh Isrɑil kì yij lɑwø, ɑ ɑ́bëën Cɑlmɑneser rɑ̈nhdwøøng Acuur Isrɑil ki liny, kɑ Sɑmɑriyɑ̀ tyege. Kɑ Sɑmɑriyɑ̀ ópɑ̈ɑ̈dhø kì dɑ̈ɑ̈g runni tyëngɑni, e Rɑ̈dh Kedhekiyɑ̀ yïe dɑ runn ɑ́bïkyel kì yij lɑwø, o bɑ bïngween runni Öciyɑ̀ kì yij lɑwø. Tyëng Isrɑil ɑ́kɑ̈l gɑ ɑmɑgg yi rɑ̈nhdwøøng Acuur, kɑ kwï gïn cïbe Alɑ̀, kɑ kwï gïn cïbe kömi Nɑm Abör kì myërri Gödhɑn, kɑ kwï gïn cïbe Mɑdɑy. Sɑmɑriyɑ̀ ɑ́pɑ̈ɑ̈dh, mɑ́ tyëng Isrɑil Jwøøg gen, Jwøng-ɑ Ácwɑ̈ɑ̈j nuti wørø yi gen, kɑ lwöbø men-ɑ ɑ́ying kɑɑm gen ki Jwøng-ɑ Ácwɑ̈ɑ̈j pɑ̈d yi gen, kɑ cigg-ɑ ɑ́muuj yi Mosɑ̀ bënn pyem gen, eni Mosɑ̀ bɑ̈ng Jwøng-ɑ Ácwɑ̈ɑ̈j. Ge ɑ́dhɑ̈li lïngø, o ge ɑ́bɑ̈nyi gwøgi møg-ɑ ɑ́cïgi gen. Senɑkerib, rɑ̈nhdwøøng Acuur ɑ́pɑ̈ɑ̈r kömi kɑ̈ddi dörri Yeudiyɑ̀, kɑ gï mɑge kì pyɑ̈rø wïdɑ́bïngween runni Rɑ̈dh Kedhekiyɑ̀ kì yij lɑwø. Kɑ Kedhekiyɑ̀ rɑ̈ɑ̈dh Yeudiyɑ̀ öd-ɑ yï rɑ̈nhdwøøng Acuur ki wöödø kinni, “Yɑ ɑ́bɑ̈jji, døøg kɑ yɑ wiy. Yï ómëggɑ gïn-ɑ cwøl yi yïn kì yïɑ.” Kɑ Kedhekiyɑ̀ köbbi yi rɑ̈nhdwøøng Acuur kinni cude ki ngyëny ɑ́tegg gɑ kïllì ɑ́lïp pyɑ̈rø, kí kïllì ɑ́lïp mø dhɑb. Kɑ ɑ́teng-ɑ Kengi Jwøng-ɑ Ácwɑ̈ɑ̈j bëne geki men-ɑ kɑ̈nni gøldwøng kwɑny yi Kedhekiyɑ̀ kɑ gø muuje. Dhɑm-ɑ ódhyɑɑw Kengø ɑ́yööde wɑ̈g thyew, geki dhɑb men-ɑ ɑ́mwøøn dëddi dhø Kengø yi en kiree, kɑ gï öre Senɑkerib bënn. Rɑ̈nhdwøøng Acuur ɑ́öd kì Lɑkic ki yɑy me dwøng me bï Yerusɑlem be nyɑɑg ki Kedhekiyɑ̀, linyɑni ɑ́pyejj-ɑ yi pëjj-ɑ døngø ɑ́dɑ̈g. Kɑ ge pëgg-ɑ yuu-ɑ nyi löög ki ógudh, kì kömi wøl-ɑ kɑ̈ni kɑɑl ki pï. Kɑ rɑ̈dh cwøl yi gen, ɑöri gen Eliɑkim wɑ̈d Kilkiyɑ̀, jɑngi gøldwøng, geki Cebnɑ̀, jɑlgwed, kí 'mïdhi wɑ̈j, Yöɑ̀ wɑ̈d Asɑp. Kɑ pëny-ɑ mɑl kì kelli pëjji liny Acuur okööbø kinni, “Köbbu Kedhekiyɑ̀ kinni, ‘Rɑ̈nhdwøøng Acuur okööbø i yï gɑ̈nn-ɑ ngø? Yï orumø kinni kwøbbi dhøg ócuggø pɑ̈ɑ̈rø ki nyɑɑg, kɑ gïn gwøg ki tegø lwɑ̈ng yi kwøb yøw? Yï orumø ce yïn ɑ́ men, ɑ pyeem kwøbbi Acuur? Yï orumø ce yï ókøny yi Rïp? De menɑni ko ni kwɑnyi okewi obej ɑ́ kemø. Ke kwömmí ki en, ree møde’ mødø kɑ cingí rodhe. Bene kenyi bëëd rɑ̈ɑ̈dh Rïp, ke cöllii kunyø yi ngɑn gɑ̈nnii.” Kɑ pënyi liny Acuur cig-ɑ kwøb kinni, “Wɑlɑ̀ wu dwɑdd-ɑ köbbi yɑn kinni wu gɑ̈nn-ɑ Jwøøg wun, Jwøng-ɑ Ácwɑ̈ɑ̈j? Pɑth ki Kenge geki këlli lɑm møge ɑ ɑ́cøør piny yi Kedhekiyɑ̀ keny-ɑ ɑ́köbbe tyëng Yeudiyɑ̀ kí Yerusɑlem kinni nyi kwɑ̈jji wun kì wïj këli lɑm men kete kì Yerusɑlem? Nywɑ̈ɑ̈g wɑ ki kwøb ki nyingi rɑ̈nhdwøng, yï ónëngɑ ki kyënyì ɑ́lïp ɑ́ryew men-ɑ óyïddí ki ji møg kɑdhi kömi gen! Wu pɑ kyëëw ki ngɑn-ɑ thinh kì kelli pëjji liny Acuur, o yï yöd yï ngɑ̈dh-ɑ Rïp kinni yï óöde ki yɑ̈thi liny geki jøkyënyì! Wu orumø kinni yɑ nuti køny-ɑ yi Jwøng-ɑ Ácwɑ̈ɑ̈j keny-ɑ ɑ́pɑ̈ɑ̈rɑ kömi myërri wun kɑ ge rënyɑ? Jwøng-ɑ Ácwɑ̈ɑ̈j kiree ɑ ɑ́köbbi yɑn i pɑ̈ɑ̈rɑ kömi gen kɑ ge rënyɑ.” Codhe, ɑköbbi pënyi linyɑni yi Eliɑkim, geki Cebnɑ̀ kí Yöɑ̀ kinni, “Kööb ki dhøg Arɑm wuö, yï ko 'kööb dhøg Ibru, mɑ́ dhøg Arɑm olïngø yi wøn, o tyëng-ɑ kömi dörø olïngø ki dhøngɑni thyew.” Alögge kinni, “Wu orumø kinni yɑ ɑ́ör-ɑ yï wun yi rɑ̈nhdwøng, o bɑ wuki rɑ̈dh keti wun ɑ köbbi møgɑni bënn? Pɑth, yɑ kööbø thyew kɑ teen-ɑ kömi dörø ɑnɑn, mɑ́ cyedhhi gen bɑ møg cɑm yi gen, kɑ lɑ́ji gen mɑdh gen kyeel ki wun.” Codhe, kɑ pënyi linyɑni dhwödh-ɑ mɑl kɑ óryeerø ki dhøg Ibru kinni, “Lïng wun ki møg-ɑ köbbi wun yi rɑ̈nhdwøøng Acuur! Kyëdd-ɑ wun kinni ri wun ko wëggu wënyø yi Kedhekiyɑ̀, mɑ́ wu pɑ lwɑ̈ng yi en ki yielø kì cinge. Kɑ wu ko yïëy ki köbbø yi Kedhekiyɑ̀ kinni ngɑ̈dhu Jwøng-ɑ Ácwɑ̈ɑ̈j, kí kinni wɑ óyiel yi Jwøng-ɑ Ácwɑ̈ɑ̈j kì cingi rɑ̈nhdwøøng Acuur. Kwøbbi Kedhekiyɑ̀ ko lïngi wun. Rɑ̈nhdwøøng Acuur okööbø i bï wun wɑ̈g kì kɑɑl, ko wu yömmi wun. Wu ówiy yi en, o wu cyɑ̈ɑ̈m wun ki nywøli oløøg wun geki nywøli yenhi bɑ̈ggi wun, o wu mɑ̈ɑ̈dh wun ki pï kì yethi yïïthi wun, gïti keny-ɑ ócïb wun pödhø me ni pödhi wun yi rɑ̈nhdwøng, kun di oløg me göög ki møgø, kí byel mø cɑm, bɑ piny me pɑ̈ng yi oløg, kí dhetun, kí møøw kïc. Lïngu kwøbbe o wu bødh wun, ri wun ko wëggu wënyø yi Kedhekiyɑ̀ kinni wu óyiel yi Jwøng-ɑ Ácwɑ̈ɑ̈j. Dɑ pödhø mɑ ɑ́pɑ̈nyi ki yielø yi jwögge kì cingi rɑ̈nhdwøøng Acuur? Jwöggi Amɑth geki Arpɑd ying-ɑ keny ɑnɑn? Jwöggi Sepɑrbɑim, Ënɑ̀ geki Ibɑ̀ ge ying-ɑ keny? Sɑmɑriyɑ̀ ɑ́di yielø yi gen kì cingi rɑ̈nhdwøng? Á men kì kelli jwöggi pödhhɑni, ɑ ɑ́yiel pödhe kì cingi rɑ̈nhdwøøng wøn, ɑ rum wun kinni Yerusɑlem óyiel yi Jwøng-ɑ Ácwɑ̈ɑ̈j?” Teedø ɑ́cög ge okudø, bong ngɑn mɑ ɑ́løøg kwøbbe, mɑ́ ji rumø ki kyëddø yi rɑ̈dh kinni ko di ngɑn löggi. Kɑ Eliɑkim, kí Cebɑ̀ geki Yöɑ̀ ógudhi gen pyëëd gen, codhe ɑkedh gen, kɑ møg-ɑ ɑ́kwøb yi pënyi liny Acuur löbbi rɑ̈dh yi gen. Keny-ɑ ɑ́lïngi møgɑni yi Rɑ̈dh Kedhekiyɑ̀, ɑkɑge ógødhe yi rɑ̈ji pyëwe, kɑ orugø ki ocwɑ̈lø, ɑkedhe yij Kengi Jwøng-ɑ Ácwɑ̈ɑ̈j. Aöre Eliɑkim jɑngi gøldwøng geki Cebɑ̀ jɑlgwed, kí ókwërr-ɑ døngø yï Icɑyɑ̀ wɑ̈d Amodh, jɑltöng ge rug-ɑ ocwɑ̈llì thyew. Aköbbi ge gøn i rɑ̈dh okööbø kinni, “Cyɑ̈ɑ̈ng bɑ cyɑ̈ɑ̈ng orɑng, wɑ ceg kɑ cɑyø, o wɑ yɑ̈rø, wɑ nɑ ngɑn kømi pɑ̈dhi piny, de nyøødh, cøli dhɑnhø pɑ cuggi yïe. Rɑ̈nhdwøøng Acuur pëny-ɑ dwøng mi linye ɑ́öre be gwɑddi Jwøng-ɑ Ácwɑ̈ɑ̈j, Jwøng-ɑ Nëënø, wiy yɑ̈ddɑni lïngi yi Jwøng-ɑ Ácwɑ̈ɑ̈j, codhe o tyëng-ɑ yɑ̈dø cɑye. Kwɑjjí Jwøk kipe tyëng-ɑ döngø møg-ɑ nud.” Keny-ɑ ɑ́wɑ̈dhi bɑ̈nggi Rɑ̈dh Kedhekiyɑ̀ yï Icɑyɑ̀, ɑköbbe gïn kinni, “Köbbu wïi wun kinni, Jwøng-ɑ Ácwɑ̈ɑ̈j okööbø kinni, ‘Yï ko böggi yi rɑ̈nhdwøøng Acuur kí møg-ɑ kømme kinni yï pɑ yiel yi yɑn. Óödɑ ki wëy me wëggii lïngi kwøbbi pyed, o døøge pödhi gen, o óköllɑ nɑ̈gø kì kunɑni.’ ” Alïng pënyi liny Acuur kinni i rɑ̈nhdwøøng gen dhwödhø kì Lɑkic, o ceg-ɑ nyïɑ̈ggø ki kɑɑl Libnɑ̀, kɑɑl-ɑ cyɑ̈gi ki Lɑkic. Codhe, ɑdhwödhe e døøg-ɑ be pyëji rɑ̈nhɑni. Keny-ɑ ɑ́lïng rɑ̈nhdwøøng Acuur kinni Terɑ̈kɑ̀ rɑ̈ɑ̈dh Kuc bï-ɑ be nyɑɑg ki en, ɑöde Rɑ̈dh Kedhekiyɑ̀ ki ji këti kinni, “Jwøng-ɑ gɑ̈nni yi yïn yï ɑ́köbbe kinni Yerusɑlem koo cïbe cingɑ, de rií ko wëggí wënyø yi møgɑni. Gïg-ɑ ɑ́göggi pödhh-ɑ kyeelø yi rɑ̈nhdwøøng Acuur ɑ́lïngi yi yïn, kí kɑ ɑ́rënye gïn ki rënyi dwøng, dɑ́ yïn ɑ óbodh? Kɑ̈ddi Gödhɑn, kí Arɑn, kí Redhep ɑ́rënyi yi kweyyɑ, kɑ tyëng Bet Eden møg-ɑ ying Telɑsɑr nɑ̈g gen. Ge ɑ́di yielø yi jwöggi gen? Ágøne rɑ̈nhi kɑ̈ddi Amɑth, kí Arpɑd, kí Sepɑrbɑim, kí Ënɑ̀, kí Ibɑ̀?” Akwɑɑny wɑ̈nyɑni yi Rɑ̈dh Kedhekiyɑ̀ kì yï tyëng-ɑ ɑ́kɑ̈ɑ̈lii, kɑ gø rɑnge. Akedhe yij Kengi Jwøng-ɑ Ácwɑ̈ɑ̈j, ɑcïbe wɑ̈nyɑni bøli Jwøng-ɑ Ácwɑ̈ɑ̈j. Akwɑ̈jji Kedhekiyɑ̀ kì bøli Jwøng-ɑ Ácwɑ̈ɑ̈j kinni, “Yïn ɑ Jwøøg Isrɑil, Jwøng-ɑ Ácwɑ̈ɑ̈j, ɑ kwömø kì kɑɑm kerobb. Bene yï ketí ɑ bɑ Jwøk, yïn ɑ jɑɑg piny bëne. Yïn ɑ ɑ́cwɑ̈j mɑl kí piny. Kyën pɑ̈ddí, Yïn ɑ Jwøng-ɑ Ácwɑ̈ɑ̈j, kɑ yï lïng. Kɑ nyingí yieeb, Yïn ɑ Jwøng-ɑ Ácwɑ̈ɑ̈j, o yï nëën. Kɑ kwøbbi Senɑkerib møg-ɑ gwɑdde yïn, yï Jwøng-ɑ Nëënø lïngí. Kidyër, Yïn ɑ Jwøng-ɑ Ácwɑ̈ɑ̈j, rɑ̈nhdwøøng Acuur jurrì mø gïïr ɑ́rënye, geki pödhhi gen. Kɑ jwöggi gïn rɑ̈be, mɑ́ ge pɑth ki jwögg, de bɑ ngïjjì møg-ɑ ógwøgø ki yenh geki kïttì yøw, ge ɑ́gwøg-ɑ yi dhɑnhø ki cingge. Anɑn Yïn ɑ Jwøøg wøn, Jwøng-ɑ Ácwɑ̈ɑ̈j, yiel wøn kì cinggi tyëng Acuur, o yod yi kömi piny bëne kinni Yï Jwøng-ɑ Ácwɑ̈ɑ̈j, bene yï ketí ɑ bɑ Jwøk.” Codhe, ɑödi Icɑyɑ̀ wɑ̈d Amodh yï Rɑ̈dh Kedhekiyɑ̀, ki wöödø e løøg-ɑ kwɑ̈jji rɑ̈dh, kinni Jwøng-ɑ Ácwɑ̈ɑ̈j ɑ́kööb kinni, “Yï ceg kɑ gɑggø yi kɑɑldwøng Yerusɑlem, Senɑkerib, o yï ceg kɑ dhɑ̈ɑ̈lø yi en. Á men ɑ ɑ́gɑggi yi yïn, kɑ yɑnyyí? Yɑ Jwøøg Isrɑil, ɑ bɑ Kwërø, yɑ nuti wøør yïn! Kɑ yï tir-ɑ önø ki ji møg kööbø kinni, i yï kedhø ki yɑ̈thi linyí møg-ɑ gïïr, kɑ yï wɑ̈dh-ɑ wɑ̈thi kïtti Lubnɑn, kïtt-ɑ bɑ̈rrø. Kɑ köörí pwööd ce yenh-ɑ bɑ̈rrø, sɑndɑl geki ɑmedh ngøl yïn piny, kɑ yij thïmɑni tyëëg bëne; yï pwöd-ɑ köörí ce yï kunyø ki yïïth, kɑ yï omɑ̈dhø ki pïi pìny mø pɑth, kɑ pïi Kiir othwøwø yi tyelli yɑyí. “Yï nuti lïngø cøn, kinni yɑn ɑ ɑ́pyël møgɑni kɑ̈ge dööng? O møgɑni ɑ́gwøgɑ ɑnɑn cyee. Kɑ yï thödhɑ ki tegø men gwøøg kɑ̈dd-ɑ døngø gɑ thur. Tyëng kɑ̈ddɑni ɑ́bëëd yï gen bong tegø, ge ceg-ɑ böggø o ge yɑ̈rø. Ge ɑ́bëëd ge nɑ lum me twïyø kì wïj óthɑɑng ød, o keny-ɑ ɑ́köddi kömi gen yi yømi wɑɑng cyɑ̈ɑ̈ng mwøl, yøm-ɑ lyëdh kɑ ceg-ɑ thwøwø e nuti døngø. “De bëëdí ngɑ̈nyi yi yɑn, kí gïn-ɑ gwøg yi yïn, kí keny-ɑ kedhi yi yïn. O linyí ki yɑn ngɑ̈nyɑ. Kwøbbi linyí ki yɑn, ɑ́muuj yɑn, kɑ kwøbbi tɑ̈dí wɑ̈nh-ɑ yïɑ. Abɑdhɑ ngöönɑ’ órømí, kɑ ɑcebɑ gøødɑ dhøgí, o yï dwøøgɑ ki yuu-ɑ ɑ́bëën yi yïn.” Aköbbi Rɑ̈dh Akɑdhiyɑ̀ yi Icɑyɑ̀ kinni, “Men bene ngïji gïn-ɑ ócwöb kipere. Run men kí men-ɑ óbï, wu ócɑm-ɑ jɑmm-ɑ nyi twïy keti gen, de runn-ɑ óbï kì bɑng gen, wu ókɑ̈gø ki gemè, kɑ kɑj yi wun, o wu ópïdhø ki oløg kɑ nywøle cɑm yi wun. Tyëng-ɑ óbodh kì gøl Yeudɑ̀, ge ónyog ni yɑnh byerre niyeeng piny, o ree dɑ nywøl. Ódi ji kì Yerusɑlem, kí Kïti Dhɑyøn, møgɑni ópɑ̈dhi kɑ̈jji gen, mɑ́ e dwɑdd-ɑ yi Jwøng-ɑ Ácwɑ̈ɑ̈j. “Møg-ɑ ɑ́kwøb yi Jwøng-ɑ Ácwɑ̈ɑ̈j ek: ‘Rɑ̈nhdwøøng Acuur, pɑ pɑ̈nyi bëën kɑɑl, wɑlɑ̀ pɑ göjji yije ki weth, koo kɑ̈ni ki jølinye mø kɑ̈ddi ki ködd, wɑlɑ̀ kɑɑlɑni koo gëdde ki kɑ̈jji tyege gøn. Ódøøg ki yuu-ɑ ɑ́kɑ̈ɑ̈le, e pɑ kedhi kɑɑlɑni. Kɑɑlɑni ócwɑg yi yɑn kipe nyingɑ geki nyingi bɑ̈ngɑ Debïd.’ ” Kɑ wëywöni Jwøng-ɑ Ácwɑ̈ɑ̈j kedh-ɑ kɑɑl jøliny Acuur, ɑnɑ̈gge ki ɑ́lïp miyø kí pyɑ̈r ɑ́bïdɑ̈g wïdɑ́bïj kì kelli gen. Keny-ɑ ɑ́cyëëw gen kì mwøl, ji buud-ɑ piny ge thøø. Codhe, ɑdøg Senɑkerib rɑ̈nhdwøøng Acuur, kɑ kedh-ɑ Ninɑwɑ̀. Kɑ Senɑkerib nɑ̈g yi wɑ̈dde ɑ́ryew, Adrɑmelek geki Cɑredher ki pil, cyɑ̈ng megø e mɑll-ɑ Nisrök jwøge kì yij kenge. Kɑ ge pɑ̈ɑ̈r-ɑ piny Arɑrɑt. Arøøny Esɑrɑdön wɑ̈de keje ɑ́ rɑ̈nhdwøng. Kɑ Rɑ̈dh Kedhekiyɑ̀ dële orɑ̈mø ki menrɑj, e nënni ɑ́ thøø ɑ bï köme, kì yethi cyɑ̈nggɑni. Kɑ jɑltöng Icɑyɑ̀ wɑ̈d Amodh kedh-ɑ yïe, ɑköbbe gøn kinni, “Jwøng-ɑ Ácwɑ̈ɑ̈j okööbø i ceg gølí, mɑ́ yï ceg-ɑ thøø, yï pɑ bødh.” Kɑ Kedhekiyɑ̀ wïje løge ri dörø, ɑkwɑjje Jwøng-ɑ Ácwɑ̈ɑ̈j kinni, “Ngɑ̈nyi yi yïn, Yïn ɑ Jwøng-ɑ Ácwɑ̈ɑ̈j, kinni yɑ ɑ́bëëd ceth yɑ wør-ɑ yïn, o yɑ gɑ̈nn-ɑ yïn, o kwøbbí mïdhɑ’ mïdhø kì pyëwɑ, dhøgí nuti pyeem yɑn kinni tek, o yɑ nyi gwøg-ɑ gïn-ɑ dwɑddi yi yïn.” Kɑ óywöngø ki rɑ̈ɑ̈m pyëwe. Icɑyɑ̀ ɑ́dhwödh kì buti rɑ̈dh, de cem e bɑ̈ɑ̈n-ɑ ódɑ̈ri gøldwøng, ɑköbbii yi Jwøng-ɑ Ácwɑ̈ɑ̈j kinni, i døøge yï Kedhekiyɑ̀, jɑngi jii Jwøng-ɑ Ácwɑ̈ɑ̈j, kɑ gø köbbe kinni, “Kwɑ̈jjí ɑ́lïngɑ, o pïi nyingí ɑ́lidh yi yɑn, yɑ Jwøng-ɑ Ácwɑ̈ɑ̈j, Jwøøg Debïd kweyí. Yï óyiel yi yɑn ki rɑ̈ɑ̈m dëlí. Yï ókedhi Kengø kì bɑng cyɑ̈ng ɑ́dɑ̈g. Yï óbëëdø ki runn pyɑ̈rø wïdɑ́bïj. Yï óyiel yi yɑn, wuki kɑɑl men kì cingi rɑ̈nhdwøøng Acuur. Kɑɑl men ókor yi yɑn kipe wøri nyingɑ geki per Debïd bɑ̈ngɑ, kí møg-ɑ ɑ́köbbɑ en.” Kɑ tyëng-ɑ tuur rɑ̈dh köbbi yi Icɑyɑ̀ kinni, kɑ̈bbi gen ki ópuun nywøli ólɑm kɑ gø nyøng gen kɑ̈jj-ɑ twɑgø, o ge nøgi gen. Apëjji Rɑ̈dh Kedhekiyɑ̀ kinni, “Á ngø ɑ muuj ɑ́ ngïji men-ɑ nyodh kinni yɑ óyiel yi Jwøng-ɑ Ácwɑ̈ɑ̈j ceth ki rɑ̈ɑ̈m dëlɑ, kɑ yɑ kedh-ɑ Kengø kì dɑ̈ɑ̈g cyɑ̈ng?” Alöggi Icɑyɑ̀ kinni, “Yï ónyudhi yi Jwøng-ɑ Ácwɑ̈ɑ̈j ki ngïji me nyodh kinni dhøge ómïdhe. Yï dwɑdd-ɑ kinni tïbø men døøge cyɑ̈n, wɑlɑ̀ kedhe mɑl ki pɑ̈ltyel pyɑ̈rø?” Alöggi Kedhekiyɑ̀ kinni, “Cøøri tïbø mɑl ki pɑ̈ltyel pyɑ̈rø yööd! Wiy døøge cyɑ̈n ki pɑ̈ltyel pyɑ̈rø.” Akwɑjji Jwøng-ɑ Ácwɑ̈ɑ̈j yi Icɑyɑ̀, kɑ tïbø dwøøg cyɑ̈n yi Jwøng-ɑ Ácwɑ̈ɑ̈j ki pɑ̈ltyel pyɑ̈rø, kì kömi yïdhi men-ɑ ɑ́ger yi Rɑ̈dh Akɑɑdh ɑ́ men nyi røm cyɑ̈dhi cɑ̈ng. Wɑɑngɑni ɑ ɑ́öni rɑ̈ɑ̈dh Bɑbïlöniyɑ̀, Merodɑk Bɑlɑdɑn, wɑ̈d Bɑlɑdɑn ki jøg këëm Kedhekiyɑ̀ ki rɑ̈ɑ̈m dële, ge ókɑ̈ddø ki wɑ̈nyø geki gïn muujii. Kɑ Kedhekiyɑ̀ jøgɑni cwøøle gøle, kɑ gï nyudhe kɑ̈re bëne; gï ɑ́nyudhe ngyënyyi dhɑb kí ɑ́tegø, kí yenh geki mɑ̈th-ɑ yømi gen med bënn, kí jɑmmi liny bënn. Bong gïjø mɑ ɑ́döng gø nuti nyudh en gïn kì kɑ̈jj-ɑ mïdhi jɑmme bënn, kí gøldwøng, geki yij pödhe bëne. Codhe, ɑkedhi Icɑyɑ̀ jɑltöng yï Rɑ̈dh Kedhekiyɑ̀ kɑ gø pyëje kinni, “Jøgɑni ɑ́kɑ̈ɑ̈l-ɑ keny, o bɑ ngø ɑ ɑ́köbbí gen?” Alöggi Kedhekiyɑ̀ kinni, “Ge kɑ̈ɑ̈l-ɑ pödhø me lɑ̈wi, ge kɑ̈ɑ̈l-ɑ Bɑbïlöniyɑ̀.” Kɑ Icɑyɑ̀ ópëjjø kinni, “Á ngø ɑ ɑ́lidh yi gen kì gøldwøng?” Kɑ Kedhekiyɑ̀ ólöggø kinni, “Jɑmmì bënn ɑ́lidh yi gen, bong gïjø mɑ ɑ́döng e nuti nyudhi gen yi yɑn kì kɑ̈jj-ɑ kɑnni jɑmmì, kí gøldwøng.” Kɑ Kedhekiyɑ̀ köbbi yi Icɑyɑ̀ kinni, “Jwøng-ɑ Ácwɑ̈ɑ̈j ɑ́kööb kinni, Bøli keny megø óbï, obëën bøli kenyɑni, jɑmm-ɑ gølí bënn ótëër Bɑbïlöniyɑ̀, geki gïg-ɑ ɑ́congi yi kweyyí bënn gïti dicyɑ̈ngtïn. Bong gïjø me döng e pɑ kɑ̈l. Kwï kwɑrrí ókïdhi be gwøg gɑ órøj møg göögø kì gøl rɑ̈ɑ̈dh Bɑbïlöniyɑ̀.” Kɑ yod yi Rɑ̈dh Kedhekiyɑ̀ kinni møgɑni wɑng-ɑ kinni, ódi mër kì yethi runn-ɑ ónëëne, ɑlögge kinni, “Wöön-ɑ ɑ́muuj yɑn kì yï Jwøng-ɑ Ácwɑ̈ɑ̈j døøj.” Gïg-ɑ kyeelø møg-ɑ ɑ́gwøg yi Kedhekiyɑ̀ bënn, kí kwøbbi tegi pyëwe, kí kër-ɑ ɑ́gööge ki luy, kí kër-ɑ ɑ́kunye ki wøl me kɑ̈ɑ̈l pï kɑɑl, bɑ ɑgwed kì yij Wɑ̈nyi Rɑ̈nhi Yeudiyɑ̀. Kɑ Kedhekiyɑ̀ kedh-ɑ kun-ɑ di kweyye, ɑrøøny wɑ̈de Mɑnɑsè keje ɑ́ rɑ̈dh. Mɑnɑsè ɑ́røny ɑ́ rɑ̈ɑ̈dh Yeudiyɑ̀ e runne bɑ pyɑ̈rø wïdɑ́ryew, kɑ ojyɑ̈gø ki runn pyɑ̈r ɑ́bïj wïdɑ́bïj kì Yerusɑlem. Meye cwøl ɑ́ Ëpdhibɑ̀. Mɑnɑsè ɑ́røngi kì bøli Jwøng-ɑ Ácwɑ̈ɑ̈j ki orøng ni men-ɑ ɑ́gwøg yi jurr-ɑ ɑ́cyeddi yi Jwøng-ɑ Ácwɑ̈ɑ̈j kì bøli tyëng Isrɑil. Kɑ̈jji mɑ̈ddø møg-ɑ ɑ́dhur piny yi Kedhekiyɑ̀ wïye ɑ́døøge ki gerø, kɑ ogëdø ki kɑ̈jj-ɑ nyi lɑɑm Bɑɑl, kí ngïjji Aceerɑ̀. Ni gïn-ɑ ɑ́gwøg yi Akɑɑb rɑ̈ɑ̈dh Isrɑil, Mɑnɑsè kyelli mɑl ɑ́mɑlle. Mɑnɑsè ɑ́gëëd kì yij Kengi Jwøng-ɑ Ácwɑ̈ɑ̈j, ki kɑ̈jji mɑ̈ddø, eni keny-ɑ ɑ́kwøb yi Jwøng-ɑ Ácwɑ̈ɑ̈j kinni, “Nyingɑ ócïbɑ Yerusɑlem.” Kɑ ogëdø ki kɑ̈jji mɑ̈ddø mø jwöggɑni bënn kì yethi ódɑ̈rri Kengi Jwøng-ɑ Ácwɑ̈ɑ̈j ryeet. Wɑ̈de ɑ́rɑ̈be ɑ́ gëëdhi, kɑ nyii rɑ̈ngø ki ɑ́jwöggì, kɑ nyii pëëjø ki yɑdh. Mɑnɑsè ɑ́göög ki orøg me dwøng kì bøli Jwøng-ɑ Ácwɑ̈ɑ̈j, kɑ pyëw Jwøng-ɑ Ácwɑ̈ɑ̈j wëgge rënyø. Ngïji Aceerɑ̀ men-ɑ ɑ́gwøg yi Mɑnɑsè, gø ɑ́cïbe yij Kengi Jwøng-ɑ Ácwɑ̈ɑ̈j, Keng-ɑ ɑ́köbbi Debïd geki wɑ̈de Sølømøn yi Jwøng-ɑ Ácwɑ̈ɑ̈j kinni, “Kengø men, kì Yerusɑlem, en ɑ ɑ́myeg yi yɑn kì kelli pìnyi wɑ̈thi kɑ̈lli Isrɑil gɑ pyɑ̈rø wïdɑ́ryew, ɑ́ keny nyi mɑlli nyingɑ gïti ɑtheer. Tyëng Isrɑil pɑ wëggɑ cyeed wɑ̈g kì yij piny-ɑ ɑ́mëggɑ kweyyi gen, keløg ciggɑ ómïdhi yi gen kidøøj, kɑ cigg bënn møg-ɑ ɑ́mëggi gen yi Mosɑ̀ bɑ̈ngɑ mïdhi yi gen.” De tyëng Yeudiyɑ̀ Ciggi Jwøng-ɑ Ácwɑ̈ɑ̈j nuti mïdhi gen, kɑ ge peej yij orøg me dwøng yi Mɑnɑsè, orøg me lod orøng-ɑ ɑ́gwøg yi jurr-ɑ ɑ́cyeddi yi Jwøng-ɑ Ácwɑ̈ɑ̈j kì bøli tyëng Isrɑil. Jwøng-ɑ Ácwɑ̈ɑ̈j ɑ́kööb ki dhøggi bɑ̈ngge jøtöng kinni, “Mɑnɑsè rɑ̈ɑ̈dh Yeudiyɑ̀ ɑ́røngi ki orøng dwøng, kɑ ogöögø ki gïgrijjø mø lod møg-ɑ ɑ́gwøg yi tyëng Amör, kɑ tyëng Yeudiyɑ̀ peeje yij orøg, be mɑlli ngïjji jwögg-ɑ pɑth.” Codhe ɑkööb Jwøøg Isrɑil, Jwøng-ɑ Ácwɑ̈ɑ̈j kinni, “Yɑ ceg-ɑ kɑ̈ni kömi Yeudiyɑ̀ geki Yerusɑlem ki ryɑ̈g men-ɑ óbëëd ngɑn lïngi kwøbbɑni wïje cem-ɑ dïïng. Yerusɑlem cɑyɑ’ cɑyø ni kɑ ɑ́cɑyɑ Isrɑil kí Rɑ̈dh Akɑɑb geki gøle. Tyëng Yerusɑlem ókïdhɑ yïnø, Yerusɑlem óced yi yɑn ni kenyi ced tɑbø, kɑ döng-ɑ nøw, kɑ rum piny. Kwï tyëng-ɑ óbodh kì kelli jiɑ, óweddi yi yɑn, ge ócïbɑ cinggi tyëngmɑ̈ɑ̈nø, o ge yɑg, o ge rënyi yi tyëngɑni. Møgɑni ógöggɑ jiɑ, mɑ́ ge ɑ́göög ki gïgrijjø kì bølɑ, kɑ nyingɑ rënyi yi gen, cɑg kì bøli keny-ɑ ɑ́bëën kweyyi gen wɑ̈g kì Rïp pïd dicyɑ̈ngtïn.” Mɑnɑsè ɑ́nɑ̈ɑ̈g ki ji mø yï gen bɑ̈r, kɑ remø ómølø kì Yerusɑlem, kedh e peej-ɑ tyëng Yeudiyɑ̀ yij orøg, ɑdøøg gen be mɑlli jwögg mø pɑth. Gïg-ɑ kyeelø møg-ɑ ɑ́gwøg yi Mɑnɑsè, ki orøng-ɑ ɑ́gwøge, bɑ ɑgwed kì yij Wɑ̈nyi Rɑ̈nhi Yeudiyɑ̀. Akedhi Mɑnɑsè kun-ɑ di kweyye, kɑ koony yij bɑɑg gøldwøng, bɑɑg Udhɑ̀. Arøøny Amön wɑ̈de keje ɑ́ rɑ̈dh. Amön ɑ́røny runne bɑ pyɑ̈r ɑ́ryew wïdɑ́ryew, kɑ ojyɑ̈gø ki runn ɑ́ryew kì Yerusɑlem. Meye cwøl ɑ́ Meculemeth nyɑɑr Aɑrudh kì kɑɑl Yotbɑ̀. Amön ɑ́røngi kì bøli Jwøng-ɑ Ácwɑ̈ɑ̈j ki orøng ni men-ɑ ɑ́gwøg yi wïye Mɑnɑsè. Amön ɑ́cyɑ̈dh ɑ yij yuu-ɑ ɑ́cyɑ̈dhi yi wïye, jwögg-ɑ pɑth møg-ɑ ɑ́mɑlli yi wïye ɑ́mɑlle thyew, kɑ ree bøødhe piny kì bøli gïn. Amön Jwøøg kweyye, Jwøng-ɑ Ácwɑ̈ɑ̈j ɑ́wiye piny, kɑ ocögø e pɑ cyɑ̈dhi kì yuu Jwøng-ɑ Ácwɑ̈ɑ̈j. Kɑ Amön mol yi bɑ̈ngge, kɑ gø nɑ̈g gen kì gøldwøng. Codhe, ɑloony jøg-ɑ ɑ́nɑ̈g Amön ki nɑ̈gø yi tyëng Yeudiyɑ̀, kɑ Yöciyɑ̀ wɑ̈de røøny keje ɑ́ rɑ̈dh. Gïg-ɑ kyeelø møg-ɑ ɑ́gwøg yi Amön bɑ ɑgwed kì yij Wɑ̈nyi Rɑ̈nhi Yeudiyɑ̀. Akoony Amön kì yij bɑɑg Udhɑ̀, ɑkwɑɑny keje yi Yöciyɑ̀ wɑ̈de. Yöciyɑ̀ ɑ́bëëd runne bɑ ɑ́bïdɑ̈g keny-ɑ ɑ́gööge ɑ́ rɑ̈ɑ̈dh Yeudiyɑ̀, kɑ ojyɑ̈gø kì Yerusɑlem ki runn pyɑ̈r ɑ́dɑ̈g wïdɑ́kyel. Meye cwøl ɑ́ Yedidɑ̀ nyɑɑr Adɑiyɑ̀ kì Bodhkɑth. Yöciyɑ̀ ɑ́göög ki gïgdøj kì bøli Jwøng-ɑ Ácwɑ̈ɑ̈j, nuti pɑ̈nyi ruudø, o dhø Jwøng-ɑ Ácwɑ̈ɑ̈j nuti pɑ̈ny en ki pyemø, ɑ́bëëd ceth e nɑ kwɑn Debïd. Kì pyɑ̈rø wïdɑ́bïdɑ̈ɑ̈g runni Rɑ̈dh Yöciyɑ̀ kì yij lɑwø, ɑ ɑ́öre jɑlgwed, Cɑpɑn wɑ̈d Adhɑliyɑ̀, o bɑ kwɑɑr Meculɑm, gø öre’ Kengø, kɑ gø köbbe kinni, “Kedhí yï Kilkiyɑ̀, Ókwër-ɑ Dwøng. Kɑ pyëëj kiper ngyëny møg-ɑ nyi cøng yi ókwër-ɑ dhø Kengø kì yï teedø. Kɑ köbbí mëgge ngyënyyɑni jøg-ɑ kwølli tyëng-ɑ thïg Kengø. Wiy ri gïn nyi cudi gen, bödhhi yiedh ki yenh, kí bödhhi gyer geki bödhhi mön, kɑ ri gïn ngëëw gen ki pɑ̈m geki kïtt-ɑ thïg Kengø. Jøg-ɑ kwølli jøgwøg yethi gen bong ɑ́dud, ge pɑth ki møg pyëj ki kër-ɑ mïdhi ngyëny yi gen.” Kɑ Cɑpɑn jɑlgwed köbbi yi Kilkiyɑ̀ Ókwër-ɑ Dwøng kinni, “Wɑ̈nyi Cigg ɑ́yod yi yɑn kì Kengi Jwøng-ɑ Ácwɑ̈ɑ̈j.” Kɑ wɑ̈nyɑni mëgge Cɑpɑn, ɑrɑngii yi Cɑpɑn. Codhe, kɑ døøg-ɑ yï rɑ̈dh, ɑkööbe kinni, “Ngyëny møg-ɑ ying Kengø ɑ́kwɑny yi bɑ̈ngí, kɑ gï mëgge jøg-ɑ thïg Kengø.” Codhe ɑköbbe rɑ̈dh kinni, “Yïɑ dɑ wɑ̈nyø mɑ ɑ́mëggi yɑn yi Kilkiyɑ̀, wɑ̈nyɑni nud kì yïɑ kì keny.” Kɑ wɑ̈nyɑni rɑng yi Cɑpɑn kì bøli rɑ̈dh. Keny-ɑ ɑ́lïngi kwøbbi Wɑ̈nyi Cigg yi rɑ̈dh, ɑkɑge ógødhe yi rɑ̈ɑ̈m pyëwe, ɑköbbe ókwërø Kilkiyɑ̀, kí Akikɑm wɑ̈d Cɑpɑn, kí Akbör wɑ̈d Mikɑiyɑ̀, kí Cɑpɑn jɑlgwed, kí Asɑiyɑ̀ jɑngi gøldwøng kinni, “Kedhu Yeudiyɑ̀ bënn kipe gïg-ɑ pwönyi yi wɑ̈nyø men. Jwøng-ɑ Ácwɑ̈ɑ̈j pyëwe rɑɑj ki wɑ, mɑ́ gïg-ɑ kømmi yi wɑ̈nyø men nuti gwøgø yi kweyyee. Cigg-ɑ ɑ́cïb kömee nuti mïdhø yi wɑ.” Kɑ ókwërø Kilkiyɑ̀, kí Akikɑm, kí Akbör, kí Cɑpɑn, kí Asɑiyɑ̀ ge kedh-ɑ yï Kuldɑ̀ ngetitöng, cï Cɑlum wɑ̈d Tikbɑ̀ wɑ̈d Arkɑs jɑl-ɑ mïdhi ógudhi kwër. Ngɑnɑni ɑ́bëëd ɑ Yerusɑlem kì byëng-ɑ ɑ́cer gerø. Kɑ gø löbbi gen gïn-ɑ ɑ́cwöb. Kɑ gï köbbe kinni døøg gen yï rɑ̈dh, kɑ gø köbbi gen kinni, bene wöön-ɑ kɑ̈ɑ̈l yï Jwøng-ɑ Ácwɑ̈ɑ̈j èn: “Yerusɑlem óryɑ̈g yi yɑn geki jie bënn, ni kër-ɑ ógwedii kì yij wɑ̈nyø men-ɑ ɑ́rɑ̈ngi rɑ̈dh. Yɑ ɑ́bɑny yi gen, kɑ ge nëng-ɑ jwögg mø pɑth ki gëdhhì, kɑ pyëwɑ rënyi yi gen, kɑ yɑ mɑg yi liny kì bɑng gïg-ɑ ɑ́gwøg yi gen. Yɑ ɑ́mɑg yi liny ki Yerusɑlem, linyɑni pɑ cög. Kɑ rɑ̈ɑ̈dh Yeudiyɑ̀ ngɑn-ɑ ɑ́ör wun köbbu kinni, Jwøøg Isrɑil, Jwøng-ɑ Ácwɑ̈ɑ̈j okööbø kinni, ‘Yï ɑ́lïng ki møg-ɑ ɑ́rɑng kì yij wɑ̈nyø, kì bɑng kɑ ɑ́yewí, kɑ rií gwøøg mölø kì bølɑ, kɑ ógudhí pyëëd wɑ̈g yi rɑ̈ɑ̈m pyëwí, kɑ yï óywöngø, keny-ɑ ɑ́lïng kinni, kɑɑl Yerusɑlem óryɑ̈g yi yɑn geki jie, kɑ köme pɑ̈dhi yi cyën kɑ rënyi. De kwɑ̈jjí ɑ́lïngɑ. Cɑ́y-ɑ ɑ́kømmɑ pɑ kɑ̈ɑ̈lɑ kömi gen, gïti keny-ɑ óthøw. Yï ówiy yi yɑn, o yï thøw ki mër.” Kɑ kwøbbɑni muuj Rɑ̈dh Yöciyɑ̀ yi jøgɑni. Aöd Rɑ̈dh Yöciyɑ̀ kinni cöllii jøgdøngi Yeudiyɑ̀ kí Yerusɑlem bënn. Akedh rɑ̈dh geki jø Yeudiyɑ̀, kí ókwër, kí jøtöng, kí ji bënn, othønhø kí tyëngdøngø kí tyëngkɑ̈rì kí ɑbuur, ge ɑ́kedhi yij Kengi Jwøng-ɑ Ácwɑ̈ɑ̈j. Arɑ̈nggi gen kwøbb-ɑ yij Wɑ̈nyi Cigg bënn, eni wɑ̈ny-ɑ ɑ́yod kì yij Kengi Jwøng-ɑ Ácwɑ̈ɑ̈j yi rɑ̈dh, ge olïngø kidøøj. Kɑ rɑ̈dh ócungø kì ri lööj rɑ̈ɑ̈dhø, ɑkönge kì bøli Jwøng-ɑ Ácwɑ̈ɑ̈j kinni ócyɑ̈dhi kì bɑng Jwøng-ɑ Ácwɑ̈ɑ̈j, kɑ cigge geki kwönge mïdhe ki pyëwe, kí tege bëne. Kí kinni kwöng-ɑ ógwedø kì yij wɑ̈nyɑni ómïdhi yi en, kɑ ji oyïëyø ki mïdhi kwöngɑni. Codhe, ɑköbbe Kilkiyɑ̀ Ókwër-ɑ Dwøng geki ókwërr-ɑ kɑ̈lli bɑnge, kí jøg-ɑ nyi kor dhø Kengø kinni, kɑ̈ɑ̈l gen lööj Aceerɑ̀, kí jɑmm-ɑ ɑ́cwɑ̈jji Bɑɑl, bënn wɑ̈g kì yij Kengi Jwøng-ɑ Ácwɑ̈ɑ̈j. Arɑ̈ɑ̈b gen yi Yöciyɑ̀ kì wɑ̈g kì Yerusɑlem kì yij töör Kidrön, ɑtëër beli gen Betiil. Apɑ̈de ókwërri jwögg-ɑ pɑth møg-ɑ ɑ́røny yi rɑ̈nhi Yeudiyɑ̀, gen ɑ jøg-ɑ nyi rɑ̈bø ki bɑkur kì kɑ̈jji mɑ̈ddø møg-ɑ kɑ̈ddi Yeudiyɑ̀, kí myërr-ɑ cyɑ̈gi ki Yerusɑlem. Ókwërr-ɑ nyi rɑ̈bbi Bɑɑl, kí cɑ̈ng, kí dwɑ̈y, kí kyell, kí jɑmmi mɑl møg-ɑ kyeelø ki bɑkur bënn, ge ɑ́pɑ̈d yi Yöciyɑ̀. Akɑ̈ɑ̈le ngïji Aceerɑ̀ wɑ̈g kì yij Kengi Jwøng-ɑ Ácwɑ̈ɑ̈j, kɑ gø kïdhe wɑ̈g kì Yerusɑlem, ɑkïdhe gøn yij töör Kidrön, kɑ gø rɑ̈be kì kunɑni, ɑtøgii kɑ ogöögø ki búr, ɑweddi búrɑni wɑ̈thi rörri ji. Adhure uddi ɑ́mɑ̈jji keng møg-ɑ bɑdhhi Kengø piny. (Kɑ̈jjɑni ɑ nyi cwɑ̈ɑ̈j yi tyëng-ɑ mɑ̈nn ki bøjji lööj Aceerɑ̀.) Ókwërr-ɑ ɑ́ying yethi kɑ̈ddi Yeudiyɑ̀ bënn ɑ́kɑ̈ɑ̈le Yerusɑlem, ɑdhure kɑ̈jji mɑ̈ddø møg-ɑ nyi rɑ̈ɑ̈b ki gëdhhì geki bɑkur piny bënn, kì yij pödhø bëne. Kɑ këlli lɑm møg-ɑ ɑ́gërri wɑ̈li dyel kì dhø döri kɑɑl, dhøng-ɑ ɑ́ger yi Jöcwø, ɑ ɑ́bëëd ɑ́ jɑngi kɑɑlɑni, dhur piny yi Yöciyɑ̀. Këllɑni ɑ́ying-ɑ wïj kyëj kì dhøngɑni, e dhɑnhø kedh-ɑ kɑɑl. Ókwërrɑni pɑ nyi wɑ̈dhi buti këli Kengi Jwøng-ɑ Ácwɑ̈ɑ̈j kì Yerusɑlem, de ge nyii cyɑ̈mø ki ópùni kwër kì kelli ókwër, wɑddi gen. Abwööl Töpeth, kì yij Töör Kinöm yi Yöciyɑ̀, kipe kinni o bëëde e bong ngɑn rɑ̈b wɑ̈de wɑlɑ̀ nyɑre kì kenyɑni ɑ́ gënhi Mölek. Kɑ kyëny-ɑ ɑ́thyëyi jwøøg cɑ̈ng yi rɑ̈nhi Yeudiyɑ̀ nyiig yi Yöciyɑ̀, kɑ yɑ̈thi kyënyɑni rɑ̈be. (Ge ɑ ɑ́ying-ɑ dhø döri kɑɑl, dhøng-ɑ kedhi Kengi Jwøng-ɑ Ácwɑ̈ɑ̈j, kì buti ød jɑgø Nɑthɑn Melek.) Kɑ këli lɑm men-ɑ ɑ́ger yi rɑ̈nhi Yeudiyɑ̀ kì wïj óthɑɑng øn-ɑ ɑ́ger yi Akɑɑdh, geki këlli lɑm ɑ́ryew møg-ɑ ɑ́gwøg yi Mɑnɑsè kì ódɑ̈r-ɑ ri Kengi Jwøng-ɑ Ácwɑ̈ɑ̈j, dhur piny yi Yöciyɑ̀, kɑ gï tørre, kɑ lɑ̈bbi gïn wedde yij töör Kidrön. Kɑ këlli lɑm møg-ɑ ɑ́ger yi Sølømøn kì wɑɑng cyɑ̈ɑ̈ng mwøl kì Yerusɑlem, kì kuni wɑɑng wurlwɑl kì ri Kïti Dhetun, møg-ɑ ɑ́gërri jwögg-ɑ rijjø, ɑ løg Actöreth jwøøg tyëng Sïdön, kí Kemöc jwøøg tyëng Moɑb, kí Milköm jwøøg tyëng Amön, ge ɑ́bwöl yi Yöciyɑ̀. Kɑ löjji Aceerɑ̀ toore piny, kɑ kɑ̈jj-ɑ ɑ́di gen pɑ̈ɑ̈nge ki cu ji. Kɑ̈jji mɑ̈ddø møg-ɑ Betiil møg-ɑ ɑ́ger yi Yeroboɑm wɑ̈d Nebɑt, ngɑn-ɑ ɑ́kwøng Isrɑil ki peej yij orøg, ɑ́toor piny yi Yöciyɑ̀ thyew, kɑ gï tøge, pïd kɑ ɑ́göög gen ki ɑyejø, kɑ ngïji Aceerɑ̀ rɑ̈be. Aløg Yöciyɑ̀ ree, kɑ ólïdhø ki rörri ji kì wïj kït, ɑöde kɑ cu kɑ̈ɑ̈l wɑ̈g kì yethi rörrɑni, ɑrɑ̈be gïn kì wïj këli lɑm e bwöl-ɑ gøn, ni møg-ɑ ɑ́kwøb yi Jwøng-ɑ Ácwɑ̈ɑ̈j ki dhøg jɑltöng cøn. Codhe, ɑpëjji Yöciyɑ̀ kinni, “Á röri men ɑ nennɑ ɑcɑ̀?” Aköbbii yi jø Betiil kinni, “Bɑ röri jɑltöng-ɑ ɑ́kɑ̈ɑ̈l Yeudiyɑ̀, ɑ ɑ́töng møg-ɑ ɑ́göggí këlli lɑm men.” Akööb Yöciyɑ̀ kinni, “Wiyu en, cu jɑlɑni ko kɑ̈ɑ̈lu wɑ̈g.” Codhe ɑwiy gen cue, geki cu jɑltöng men-ɑ ɑ́kɑ̈ɑ̈l Sɑmɑriyɑ̀. Kɑ keng geki kɑ̈jji mɑ̈ddø bënn møg-ɑ ɑ́ying myërri Sɑmɑriyɑ̀, ɑ ɑ́ger yi rɑ̈nhi Isrɑil, ɑ bɑnge ɑ́rënyi pyëw Jwøng-ɑ Ácwɑ̈ɑ̈j, dhur piny yi Yöciyɑ̀. Gï ɑ́gögge gïn-ɑ ɑ́gwøge kì Betiil. Kɑ ókwërri jwögg-ɑ pɑth nɑ̈ge kì wɑ̈thi këlli lɑm. Kɑ këlli lɑm møgɑni, wɑ̈thi gïn rɑ̈be ki cu ji. Codhe ɑdwööge Yerusɑlem. Kɑ ji ceg yi Rɑ̈dh Yöciyɑ̀ kiper gwøgi Kwëër Ákɑɑdh, geki wøri Jwøøg gen, Jwøng-ɑ Ácwɑ̈ɑ̈j ni kɑ ógwedii kì yij wɑ̈nyi lwöbø. Bong Kwëër Ákɑɑdh mɑ ɑ́pɑ̈nyi ki gwøgø ni menɑni yi rɑ̈nhi Yeudiyɑ̀, kër-ɑ ɑ́jɑɑg pödhø yi Jɑgg. Anɑn kì cyɑ̈ɑ̈n piny cyee, ɑ ɑ́gwøøg Kwëër Ákɑɑdh yi Yöciyɑ̀ kì Yerusɑlem. Kɑ tyëdd geki ɑ́jwöggì, kí jwöggi kɑ̈llì, kí ngïjji jwögg geki ngïjji jwögg-ɑ pɑth bënn, kì Yerusɑlem geki Yeudiyɑ̀ bëne nyiig; gïgrijjø møgɑni bënn ɑ́weddi yi Yöciyɑ̀. Kipe kinni o kwøbbi Wɑ̈nyi Cigg men-ɑ ɑ́yod yi Kilkiyɑ̀ Ókwër-ɑ Dwøng kì Kengø, cïb kɑ̈jji gen. Bong rɑ̈dh mɑ ɑ́bëëd ni en cøn, mɑ ɑ́døøg kö Jwøng-ɑ Ácwɑ̈ɑ̈j ki pyëwe bëne, geki rumme kí tege bëne, e mïdh-ɑ Ciggi Mosɑ̀ bënn, o bong rɑ̈dh mɑ ɑ́göög ni en kì bɑnge. De pyëw Jwøng-ɑ Ácwɑ̈ɑ̈j ɑ́bëëd e nudd e rɑɑj ceth ki Yeudiyɑ̀, kì bɑng gööj orøng-ɑ ɑ́gwøg yi Rɑ̈dh Mɑnɑsè. Jwøng-ɑ Ácwɑ̈ɑ̈j okööbø kinni, “Yeudiyɑ̀ ógöggɑ gïn-ɑ ɑ́göggɑ Isrɑil. Tyëng Yeudiyɑ̀ ónyiigɑ kì bølɑ, Yerusɑlem óbɑny yi yɑn, eni men-ɑ́ kɑɑl-ɑ ɑ́myegɑ geki Kengø men-ɑ ɑ́kwøbɑ kinni yɑ ómɑlli kì yije.” Gïg-ɑ kyeelø bënn møg-ɑ ɑ́gwøg yi Rɑ̈dh Yöciyɑ̀, bɑ ɑgwed kì yij Wɑ̈nyi Rɑ̈nhi Yeudiyɑ̀. Kɑ Rɑ̈dh Nekö, rɑ̈ɑ̈dh Rïp bï-ɑ kömi Nɑm Porɑt e bï-ɑ be kønyi rɑ̈nhdwøøng Acuur, kɑ rødh yi Rɑ̈dh Yöciyɑ̀ kì Megidø. Kɑ Yöciyɑ̀ nɑ̈g kì kenyɑni. Acïbii yij yɑ̈y yi pëjji linye, kɑ kɑ̈ɑ̈l Yerusɑlem, ɑkonyii kì kej rörri gøl rɑ̈ɑ̈dhø. Kɑ Yöɑkɑdh wɑ̈de røny yi tyëng Yeudiyɑ̀ ɑ́ rɑ̈dh kì keje. Yöɑkɑdh ɑ́bëëd runne bɑ pyɑ̈r ɑ́ryew wïdɑ́dɑ̈g keny-ɑ ɑ́gööge ɑ́ rɑ̈dh, kɑ ojyɑ̈gø kì Yerusɑlem ki dwɑ̈tt ɑ́dɑ̈g. Meye cwøl ɑ́ Amutɑl nyɑɑr Jermɑyɑ̀ kì Libnɑ̀. Árøngi kì bøli Jwøng-ɑ Ácwɑ̈ɑ̈j ni orøng-ɑ ɑ́gwøg yi kweyye. Lɑwe ɑ́cög-ɑ keny-ɑ ɑ́mɑgii yi Nekö rɑ̈ɑ̈dh Rïp kì Riblɑ̀, kì piny Amɑth, kɑ Yeudiyɑ̀ köbbe col ki kïlli ngyëny ɑ́tegg ɑ́lïp ɑ́dɑ̈g, kí miy ɑ́ngwen, geki kïlli dhɑb pyɑ̈r ɑ́dɑ̈g wïdɑ́ngwen, gɑ gwɑ̈j. Kɑ Eliɑkim wɑ̈d Yöciyɑ̀ røny ɑ́ rɑ̈ɑ̈dh Yeudiyɑ̀ yi Rɑ̈dh Nekö, kì kej Yöɑkɑdh. Kɑ nyingi Eliɑkim wil yi Nekö ɑ́ Yöyɑkim. Kɑ Yöɑkɑdh kïdhi Rïp yi Rɑ̈dh Nekö ɑ́ ɑmɑg, kɑ othøø kì kunɑni. Rɑ̈dh Yöyɑkim gwɑ̈j nyi cøng yi en kì yï ji e bɑ̈ɑ̈n, gø nyi køøle kömi jɑmm-ɑ yï dhɑnhø, o gwɑ̈nyɑni bɑ men nyi culi Rïp. Yöyɑkim ɑ́bëëd runne bɑ pyɑ̈r ɑ́ryew wïdɑ́bïj keny-ɑ ɑ́gööge ɑ́ rɑ̈ɑ̈dh Yeudiyɑ̀, kɑ ojyɑ̈gø kì Yerusɑlem ki runn pyɑ̈rø wïdɑ́kyel. Meye cwøl ɑ́ Dhebïdɑ̀ nyɑɑr Pedɑiyɑ̀ kì Rumɑ̀. Yöyɑkim ɑ́røngi kì bøli Jwøng-ɑ Ácwɑ̈ɑ̈j ni kweyye. Nebukɑdnesɑr rɑ̈ɑ̈dh Bɑbïlöniyɑ̀ ɑ́bï be mɑgi piny Yeudiyɑ̀ ɑ́ Yöyɑkim ɑ bɑ rɑ̈dh, kɑ Yöyɑkim døøg-ɑ thɑ́ cigge ki runn ɑ́dɑ̈g, codhe ɑngɑ̈nye wɑ̈ye. Kɑ liny Bɑbïlöniyɑ̀, kí liny Arɑm, kí liny Moɑb, kí liny Amön ör kömi Yöyɑkim yi Jwøng-ɑ Ácwɑ̈ɑ̈j, be rënyi Yeudiyɑ̀, ni møg-ɑ ɑ́kwøb yi Jwøng-ɑ Ácwɑ̈ɑ̈j ki dhøggi bɑ̈ngge, jøtöng kinni gø ógwøge. Ryɑ̈ngɑni ɑ́bï kömi Yeudiyɑ̀ e ɑ́kwøb-ɑ yi Jwøng-ɑ Ácwɑ̈ɑ̈j kipe kinni o nyiige tyëng Yeudiyɑ̀ kì bøle, kiper orøng-ɑ ɑ́gwøg yi Rɑ̈dh Mɑnɑsè, kí per remmi tyëng-ɑ yï gen bɑ̈r møg-ɑ ɑ́nɑ̈ge thyew. Jwøng-ɑ Ácwɑ̈ɑ̈j pyëwe pɑ cuggi lɑ̈ɑ̈mø ki Mɑnɑsè kì bɑng orøngɑni. Gïg-ɑ kyeelø bënn møg-ɑ ɑ́gwøg yi Yöyɑkim bɑ ɑgwed kì yij Wɑ̈nyi Rɑ̈nhi Yeudiyɑ̀. Kɑ Yöyɑkim kedh-ɑ kun-ɑ di kweyye, ɑrøøny Yöyɑkin wɑ̈de keje ɑ́ rɑ̈dh. Yɑɑy Rïp nuti cigi bëën wɑ̈g kì pödhe, mɑ́ piny-ɑ ɑ́bëëd e jɑɑg-ɑ yi Rïp bëne, jɑɑg-ɑ yi rɑ̈ɑ̈dh Bɑbïlöniyɑ̀, cɑg kì Nɑm Porɑt gïti tøg Rïp. Yöyɑkin ɑ́bëëd runne bɑ pyɑ̈rø wïdɑ́bïdɑ̈g, keny-ɑ ɑ́gööge ɑ́ rɑ̈ɑ̈dh Yeudiyɑ̀. Kɑ ojyɑ̈gø ki dwɑ̈tt ɑ́dɑ̈g kì Yerusɑlem. Meye cwøl ɑ́ Nekuctɑ̀, nyɑɑr Elnɑthɑn kì Yerusɑlem. Kɑ Yöyɑkin ogöögø ki gïnrɑj kì bøli Jwøng-ɑ Ácwɑ̈ɑ̈j ni gïg-ɑ ɑ́gøggi yi wïye. Bøli keny-ɑ ɑ́jyɑ̈ɑ̈ge ɑ ɑ́bëën liny Bɑbïlöniyɑ̀ e kwøll-ɑ yi pëjji liny Nebukɑdnesɑr, kɑ kɑɑl Yerusɑlem tyeg yi linyɑni. Kɑ Rɑ̈dh Nebukɑdnesɑr bï-ɑ Yerusɑlem e kɑɑl bɑ ɑtyeg yi linye. Kì bïdɑ̈ɑ̈g runni Nebukɑdnesɑr kì yij lɑwø, ɑ ɑ́kɑ̈ɑ̈l Rɑ̈dh Yöyɑkin ɑ́ ɑmɑg. Kɑ Rɑ̈dh Yöyɑkin geki meye, kí wɑ̈dde, kí jyɑ̈gge, kí jɑggi gøldwøng, ge kïdhi Bɑbïl ge rum yömmi yï rɑ̈ɑ̈dh Bɑbïlöniyɑ̀. Kɑ kɑ̈r-ɑ ɑ́ying Kengø geki gøldwøng kïdhi Bɑbïl yi Nebukɑdnesɑr. Gïg-ɑ ɑ́gwøg yi Sølømøn ki dhɑb gɑ mø Kengø, ɑ́kɑ̈ɑ̈l wɑ̈g yi Rɑ̈dh Nebukɑdnesɑr kɑ gï kɑ̈ɑ̈le, ni møg-ɑ ɑ́kwøb yi Jwøng-ɑ Ácwɑ̈ɑ̈j. Kɑ tyëng Yerusɑlem kɑ̈l gɑ ɑmɑgg yi Nebukɑdnesɑr, kí nyiirɑ̈dh, kí jøg-ɑ bɑ pëjji bënn, kwɑnni ji-ɑ ɑ́køøl bɑ ɑ́lïp pyɑ̈rø. Bödhh-ɑ cinggi gen døj ɑ́kɑ̈ɑ̈le bënn, geki bödhhi thɑ̈dh. Tyëng-ɑ nyingi gen pëddi cɑnø ɑ ɑ́wiy kì Yeudiyɑ̀. Rɑ̈dh Yöyɑkin ɑ́kïdhi Bɑbïl ɑ́ ɑmɑg yi Nebukɑdnesɑr, en kí meye, kí mɑ̈nne, kí jyɑ̈gge geki pëjji Yeudiyɑ̀. Jöddi liny mø kwɑnni gen bɑ ɑ́lïp ɑ́bïryew, ɑ́kïdhi Bɑbïlöniyɑ̀ yi Rɑ̈dh Nebukɑdnesɑr. Kɑ bödhh-ɑ cinggi gen døj gɑ ɑ́lïp ɑ́kyel kɑ̈ɑ̈le, kí bödhhi thɑ̈dh kì kelli gen, ge bɑ jøg teg bënn, møg cuggi nyïɑ̈ggø ki liny. Kɑ Mɑtɑniyɑ̀, ómï wïyi Yöyɑkin røny ɑ́ rɑ̈ɑ̈dh Yeudiyɑ̀ yi Nebukɑdnesɑr, kɑ nyinge wile gøn ɑ́ Dhedekiyɑ̀. Dhedekiyɑ̀ ɑ́bëëd runne bɑ pyɑ̈r ɑ́ryew wïdɑ́kyel keny-ɑ ɑ́gööge ɑ́ rɑ̈ɑ̈dh Yeudiyɑ̀, kɑ ojyɑ̈gø kì Yerusɑlem ki runn pyɑ̈rø wïdɑ́kyel. Meye cwøl ɑ́ Amutɑl nyɑɑr Jermɑyɑ̀ kì Libnɑ̀. Dhedekiyɑ̀ ɑ́røngi kì bøli Jwøng-ɑ Ácwɑ̈ɑ̈j ni Yöyɑkim. Jwøng-ɑ Ácwɑ̈ɑ̈j pyëwe ɑ́ceg-ɑ rënyø ki tyëng Yerusɑlem geki Yeudiyɑ̀, ɑ nyiige gïn kì bøle. Kɑ Dhedekiyɑ̀ ngɑ̈ny-ɑ wɑ̈ye kì ri Rɑ̈dh Nebukɑdnesɑr, rɑ̈ɑ̈dh Bɑbïlöniyɑ̀, kɑ Nebukɑdnesɑr obëënø ki yɑɑy pödhe bëne, kì pyɑ̈ri cyɑ̈nggi pyɑ̈ri dwɑ̈tt, kì bïngween runni Dhedekiyɑ̀ kì yij lɑwø. Kɑ kɑɑl Yerusɑlem tyege, kɑ gø gële, o bëëd e bong ngɑn kedhi wɑ̈g kì kɑɑl. Kɑ kɑɑl obëëdø ɑ́ ɑtyeg kinøw gïti pyɑ̈rø wïdɑ́kyeel runni Dhedekiyɑ̀ kì yij lɑwø. Kì bïngween cyɑ̈nggi ngween dwɑ̈tt, keny-ɑ ɑ́tëngi kɑ̈j kɑ bong-ɑ gïncɑm, kɑ jøliny turr-ɑ wɑ̈g, ɑpɑ̈r gen bënn kì wɑ̈rɑni, ngö kɑɑl bɑ ɑtyeg yi yɑɑy Bɑbïlöniyɑ̀. Ge ɑ́kɑ̈l yuu bɑɑg rɑ̈dh, ge kɑ̈ll-ɑ kɑɑm dör, ge kedh-ɑ kuni Töör Urdun. De liny Bɑbïlöniyɑ̀ ɑ́rengi bɑng Rɑ̈dh Dhedekiyɑ̀, kɑ gø mɑɑg gen thwøri Yerikö, kɑ wɑ̈ɑ̈y yi jølinye. Kɑ Dhedekiyɑ̀ mɑg kɑ kïdhi yï Nebukɑdnesɑr, rɑ̈ɑ̈dh Bɑbïlöniyɑ̀ kì kɑɑl Riblɑ̀, kɑ gønye lidh kì kunɑni. Codhe, kɑ wɑ̈ddi Dhedekiyɑ̀ nɑ̈g gï nenne’ nennø, kɑ nyingi Dhedekiyɑ̀ tøy, kɑ mɑg ki ɑ́cwecwel, ɑkïdhii Bɑbïl. Kì bïryeew cyɑ̈nggi bïïj dwɑ̈tt, kì pyɑ̈rø wïdɑ́bïngween runni Nebukɑdnesɑr, rɑ̈ɑ̈dh Bɑbïlöniyɑ̀ kì yij lɑwø, ɑ ɑ́bëën Nebudhɑrɑdɑn jɑngi liny-ɑ kor gøldwøng, ɑ bɑ jɑngi tøg burø. Ábï Yerusɑlem, kɑ Kengø rɑ̈be geki gøldwøng, kí kɑ̈ll-ɑ døngø bënn kì Yerusɑlem. Kɑ döri Yerusɑlem cøør piny yi yɑye. Kɑ tyëng-ɑ ɑ́döng kì Yerusɑlem cøn, geki tyëng-ɑ ɑ́yömmi yï rɑ̈ɑ̈dh Bɑbïlöniyɑ̀, kí tyëng-ɑ kyeelø bënn, mɑg yi Nebudhɑrɑdɑn jɑngi liny-ɑ kor gøldwøng, kɑ gï køøle Bɑbïl. De kwï tyëng-ɑ nyingi gen pëddi cɑnø, kì yij pödhø, ɑ́wiye o ge pur gen bɑ̈ggi oløg geki pwödh. Kɑ löjji dilɑl kì dhø Kengø tørri yi liny Bɑbïlöniyɑ̀, kí yɑ̈thi dilɑl møg-ɑ ɑ́ying dhø Kengø, kí luy dilɑl, luy-ɑ dwøng. Kɑ dilɑlɑni bëne kïdhi gen Bɑbïl. Atöggi mɑc, kí ópɑ̈nni búr, kí dikɑ̈bbì, kí gïg-ɑ nyi nɑ̈ɑ̈g mɑc, kí óthɑ̈ggì, kí ópɑ̈nni bɑkur, geki gïg-ɑ kyeelø møg-ɑ ɑ́køny ki dilɑl, ɑ nyi göög bënn kì Kengø, ge ɑ́kɑ̈l bënn. Gïg-ɑ bɑ dhɑb kí ɑ́tegø bënn ɑ́kɑ̈l yi gen, cɑg kì ri óthɑ̈gg-ɑ thønhø geki ópɑ̈nn-ɑ nyi kɑ̈lli lelli mɑc. Gïg-ɑ ɑ́göggi Kengø yi Sølømøn ki dilɑl, ɑ løg löjji dilɑl ryeet, kí yɑ̈ɑ̈th geki luuy pï ge ɑ́dhɑ̈li rømø, mɑ́ ge peeg cɑrø. Löjjɑni ryeet ɑ́bëëd ge pɑ̈r, ɑ́kyel bɑ̈re bɑ mïtïr ɑ́bïdɑ̈g, kí yɑ̈ɑ̈r dilɑl kì wïje, e bɑ mïtïr ɑ́kyel kí sentimïtïr pyɑ̈r ɑ́dɑ̈g. Tøggi yɑ̈ɑ̈r dilɑl menɑni bɑ ɑwen ki nywøli yɑdh romɑn mø ógwøgø gɑ dilɑl. Kɑ Ókwër-ɑ Dwøng Serɑiyɑ̀, kí ókwër-ɑ bɑnge, Dhepɑniyɑ̀ geki jyɑ̈ggi Kengø ɑ́dɑ̈g, kɑ̈l yi Nebudhɑrɑdɑn pënyi liny Bɑbïl. Jɑl-ɑ ɑ́bëëd ɑ́ pënyi liny kì kɑɑl ɑ́kɑ̈ɑ̈le, kí jø tøg buri rɑ̈dh gɑ ɑ́bïj, kí jɑl-ɑ bɑng pënyi liny, ɑ ɑ́mïdhi wɑ̈jji nyingi jøliny, kí jöddi kɑɑlɑni gɑ pyɑ̈r ɑ́bïkyel. Ge ɑ́kɑ̈l yi Nebudhɑrɑdɑn, kɑ gï muuje rɑ̈ɑ̈dh Bɑbïlöniyɑ̀ kì Riblɑ̀, kì piny Amɑth, kɑ ge nɑ̈g yi rɑ̈ɑ̈dh Bɑbïlöniyɑ̀ kì Riblɑ̀. Codhe, kɑ tyëng Yeudiyɑ̀ óthumø ki kïdhi yïnø kinøw kì piny gen. Kɑ Gedɑliyɑ̀ wɑ̈d Akikɑm wɑ̈d Cɑpɑn gwøg ɑ́ jɑngi Yeudiyɑ̀ yi Nebukɑdnesɑr rɑ̈ɑ̈dh Bɑbïlöniyɑ̀, o jɑɑge ji-ɑ ɑ́döng ge nuti kïdhi yïnø kì Yeudiyɑ̀. Keny-ɑ ɑ́lïng pëjji liny geki jøliny møg-ɑ ɑ́cög ge nuti yömmø, kinni i Gedɑliyɑ̀ órønyø, ɑkedhi gen be rëbø ki Gedɑliyɑ̀ kì Midhpɑ̀. Pëjjì møgɑni bɑ, Icmɑil wɑ̈d Nethɑniyɑ̀, kí Yöɑnɑn wɑ̈d Kɑreɑ̀, kí Serɑiyɑ̀ wɑ̈d Tɑnumet kì Netöpɑ̀, kí Yedhɑniyɑ̀ jɑl Mɑɑkɑ̀. Kɑ ge köbbi yi Gedɑliyɑ̀ kinni, “Wu ko böggi yi pëjji liny Bɑbïlöniyɑ̀, pëggu pönhï, kɑ wu göggu rɑ̈ɑ̈dh Bɑbïlöniyɑ̀, yɑn ɑ köngi èn, bong gïjø me nywɑl wun.” De kì bïryeew dwɑ̈tt kì runɑni, Icmɑil wɑ̈d Nethɑniyɑ̀ wɑ̈d Elicɑmɑ̀, o bɑ wɑ̈d gøl rɑ̈ɑ̈dhø, ɑ́dhwödh kɑ kedh-ɑ Midhpɑ̀ geki jøg mø kwɑnni gen bɑ pyɑ̈rø. Kɑ Gedɑliyɑ̀ nɑ̈g gen. Tyëng Yeudiyɑ̀ kí tyëng Bɑbïl møg-ɑ ɑ́bëëd kì Midhpɑ̀ ɑ́nɑ̈g yi gen thyew. Codhe, kɑ ji odhwödhø bënn, tyëngkɑ̈rì kí tyëng-ɑ nyingi gen cɑn, kɑ ge kedh-ɑ Rïp, geki pëjji liny, mɑ́ ge ɑ́bwøg yi tyëng Bɑbïl. Kì bɑng keny me bɑ̈ɑ̈r, kì run-ɑ ɑ́göög Ebilmerodɑk ki rɑ̈ɑ̈dh Bɑbïlöniyɑ̀, pyëwe ɑ́lɑ̈ɑ̈m ki Yöyɑkin rɑ̈ɑ̈dh Yeudiyɑ̀ kɑ gø göönye wɑ̈g kì ød mɑg. Gø ɑ́gønye kì pyɑ̈rø wïdɑ́ryeew dwɑ̈tt, kì cyɑ̈nggi dwɑ̈y pyɑ̈r ɑ́ryew wïdɑ́bïryew, e runni Yöyɑkin göögø ki pyɑ̈r ɑ́dɑ̈g wïdɑ́bïryew ɑ́ ɑmɑg. Aköbbii yi Ebilmerodɑk ki kwøb mø døøj, kɑ gø cïbe mɑl kibøli rɑ̈nhh-ɑ ɑ́mɑɑg Bɑbïlöniyɑ̀ bënn. Kɑ ógudh-ɑ ɑ́rug yi Yöyɑkin kì ød mɑg wil, ɑruugii kɑ cwøøl be cɑm kì tɑɑw rɑ̈dh. Nyi cyɑ̈ɑ̈m ɑ tɑɑw rɑ̈dh ceth kɑ̈ng-ɑ nëëne. Gïg-ɑ dwɑddi yi en ɑ́bëëd ge nyi mëgg-ɑ en ceth gïti cyɑ̈ng-ɑ ɑ́thøwe. Adɑm bɑ wïyi Ceeth, Ceeth bɑ wïyi Enöc, Enöc bɑ wïyi Kenɑn, Kenɑn bɑ wïyi Mɑɑ̈lɑlel, Mɑɑ̈lɑlel bɑ wïyi Yɑred. Yɑred bɑ wïyi Enök, en ɑ bɑ wïyi Metucelɑ̀. Metucelɑ̀ bɑ wïyi Lɑmek, Lɑmek bɑ wïyi Nöö, Nöö yïe ɑ́dɑ wɑ̈dd ɑ́dɑ̈g: Cem, kí Kɑm, kí Yɑpeth. Wɑ̈ddi Yɑpeth bɑ Gömer, kí Mɑgög kí Mɑdɑy, kí Yɑbɑn, kí Tubɑl, kí Mecek, kí Tirɑs, ge bɑ kweyyi jurr-ɑ cwølli ki nyingi gen. Kwɑrri Gömer bɑ tyëng Ackenɑdh, kí Rïpɑth, kí Tögɑrmɑ̀. Kwɑrri Yɑbɑn bɑ tyëng gøl Elicɑɑ̀, kí Tɑrcic, kí Kïtïm, kí Dödɑnïm, Wɑ̈ddi Kɑm bɑ Kuc, kí Misrɑim, kí Put, kí Kɑnɑɑn, ge bɑ kweyyi tyëng-ɑ cwølli ki nyingi gen. Kwɑrri Kuc bɑ tyëng Sebɑ̀, kí Abïlɑ̀, kí Sɑbtɑ̀, kí Rɑmɑ̀ kí Sɑbtekɑ̀. Kwɑrri Rɑmɑ̀ ɑ bɑ tyëng Sebɑ̀ kí Dedɑn. (Kuc yïe ɑ́dɑ wɑ̈de me cwøl ɑ́ Nimröd, bɑ dhɑnhø mɑ ɑ́ying mɑɑl tyëng-ɑ ɑ́tyɑ̈ɑ̈m kì kömi piny bëne). Kwɑrri Misrɑim bɑ tyëng Lud, kí Anɑm, kí Leɑb, kí Nɑptu, kí Pɑthrus, kí Kɑslu, kí Kɑptör, (ɑ ri gen kɑ̈ɑ̈l yi tyëng Pelistiyɑ̀). Wɑ̈ddi Kɑnɑɑn, nyel-ɑ kɑyø bɑ Sïdön, kí Keth, ge bɑ kweyyi tyëng-ɑ cwølli ki nyingi gen. Kɑnɑɑn thyew bɑ kweyi tyëng Yebus, kí Amör, kí Girgɑc, kí Kib, kí Arkì, kí Sin, kí tyëng Arbɑd, kí tyëng Dhemɑr, kí tyëng Amɑth. Wɑ̈ddi Cem bɑ Elɑm, kí Acuur, kí Arpɑkcɑd, kí Lud, kí Arɑm, kí Udh, kí Uul, kí Gether, kí Mecek, ge bɑ kweyyi tyëng-ɑ cwølli ki nyingi gen. Arpɑkcɑd bɑ wïyi Celɑ̀, ɑ bɑ wïyi Eber. Eber yïe dɑ wɑ̈dd ɑ́ryew; ɑ́kyel bɑ Peleg, mɑ́ jii kömi piny ɑ́bëëd ri gen pɑ̈ngi gen kì bøli kenyɑni, o nyel-ɑ kyeelø bɑ Yoktɑn. Kwɑrri Yoktɑn bɑ tyëng Almödɑd, kí Celep, kí Adhɑrmɑbeth, kí Yerɑ̀, kí Adörɑm, kí Udhɑl, kí Diklɑ̀, kí Ebɑl, kí Abimɑil, kí Cebɑ̀, kí Opir, kí Abïlɑ̀, kí Yöbɑb. Jiɑni bënn bɑ kwɑrri Yoktɑn. Gøl Cem e køøl-ɑ mɑl ri Abrɑhɑm bɑ, Cem, Arpɑkcɑd, Celɑ̀, Eber, Peleg, Reu, Serug, Nɑor, Terɑ̀, kí Abrɑm (ɑ cwølli thyew ɑ́ Abrɑhɑm). Abrɑhɑm yïe ɑ́dɑ wɑ̈dd ɑ́ryew: Isɑɑk, kí Icmɑil. Wɑ̈ddi Icmɑil ɑ́göög ki wɑ̈thi kɑ̈llì pyɑ̈rø wïdɑ́ryew, (cɑg kì ri nyel-ɑ dwøng), Nebɑyoth, Kedɑr, Adbeel, Mibsɑm, Micmɑ̀, Dumɑ̀, Mɑsɑ̀, Adɑd, Temɑ̀, Yetur, Nɑpic kí Kedemɑ̀. Abrɑhɑm yïe ɑ́dɑ ɑkwɑny, me cwøl ɑ́ Keturɑ̀. Abrɑhɑm ɑ́nyöddi yi ngɑnɑni ki wɑ̈dd ɑ́bïkyel, nyingi gen bɑ: Dhimrɑn, Yokcɑn, Medɑn, Midyɑn, Icbɑk, kí Cuɑ̀. Yokcɑn yïe ɑ́dɑ wɑ̈dd ɑ́ryew: Cebɑ̀ kí Dedɑn O wɑ̈ddi Midyɑn bɑ ɑ́bïj: Epɑ̀, Eper, Aɑnök, Abïdɑ̀, kí Eldɑ̀. Møgɑni bënn bɑ kwɑrri Keturɑ̀. Isɑɑk wɑ̈d Abrɑhɑm yïe ɑ́dɑ wɑ̈dd ɑ́ryew: Isøø kí Yɑgob. Wɑ̈ddi Isøø bɑ Elipɑdh, kí Reuel, kí Yeuc, kí Yɑlɑm, kí Körɑ̀. Elipɑdh ɑ bɑ kweyi ji møg: Temɑn, Omɑr, Dhepì, Gɑtɑm, Kenɑdh, Timnɑ̀ kí Amɑlek, O Reuel, en ɑ bɑ kweyi tyëng Nɑɑ̈th, kí Dherɑ̀, kí Cɑmɑ̀, kí Midhɑ̀ Tyëng Edöm ɑ́bëëd ri gen pɑ̈ngi gen gɑ jurrì møg: Timnɑ̀, Albɑ̀, Yetheth, Olibɑmɑ̀, Elɑ̀, Pïnön, Kenɑdh, Temɑn, Mibdhɑr, Mɑgdiel, kí Irɑm. Yɑgob yïe ɑ́dɑ wɑ̈dd pyɑ̈rø wïdɑ́ryew: Ruben, Cimeøn, Leebì, Yeudɑ̀, Isɑkɑr, Dhebulun, Dɑn, Yosep, Ben Yɑmïn, Nɑptɑlì, Gɑd kí Aceer. Yeudɑ̀ yïe ɑ́dɑ wɑ̈dd ɑ́bïj møg-ɑ ɑ́nyöllii yi cyëge Bɑtcuɑ̀ nyɑɑr Kɑnɑɑn. Yïe ɑ́dɑ wɑ̈dd ɑ́dɑ̈g: Er, Onɑ̈n, kí Celɑ̀. Er, Wɑ̈d Yeudɑ̀ nyel-ɑ dwøng ɑ́bëëd e rɑj, kɑ nɑ̈g yi Jwøng-ɑ Ácwɑ̈ɑ̈j. Yeudɑ̀ ɑ́nyöddi ki wɑ̈dd ɑ́ryew, yi Tɑmɑr kwɑre, cï wɑ̈de: Peredh kí Dherɑ̀. Peredh yïe ɑ́dɑ wɑ̈dd ɑ́ryew: Ëdhrön kí Amul Dherɑ̀ ómï Peredh, yïe ɑ́dɑ wɑ̈dd ɑ́bïj: Dhimrì, Ethɑn, Ëmɑn, Kɑlköl, kí Dɑrdɑ̀. Akɑn wɑ̈d Kɑrmì, wɑ̈d Dhɑbedì, wɑ̈d Dherɑ̀ kì gøl Yeudɑ̀, ɑ́kɑ̈ni kömi tyëng Isrɑil ki göj kì bɑng kɑ ɑ́kɑ̈bbe kì ri jɑmm-ɑ ɑ́mɑg kì yij liny, gɑ møg thyëyi Jwøk. Ethɑn yïe ɑ́dɑ wɑ̈d ɑ́kyel, me cwøl ɑ́ Adhɑriyɑ̀. Ëdhrön yïe ɑ́dɑ wɑ̈dd ɑ́dɑ̈g: Yerɑmel, Rɑm, kí Kɑlib. Gølɑni cɑ̈g-ɑ́ɑ̀ ri Rɑm gïti ri Yesì kinnï: Rɑm, Aminɑdɑb, Nɑkcön (jɑldwøøng wïj gøl Yeudɑ̀), Sɑlmön, Boɑdh, Obed, kí Yesì. Yesì yïe ɑ́dɑ wɑ̈dd ɑ́bïryew, ge lwøøb-ɑ ri döng, ge bɑ Eliɑb, Abinɑdɑb, Cɑmɑ̀, Nethɑnel, Rɑdɑy, Odhem, kí Debïd. Yesì thyew yïe ɑ́dɑ nywøle ɑ́ryew: Dheruyɑ̀ kí Abigɑil. Nyɑɑr Yesì, Dheruyɑ̀ yïe ɑ́dɑ wɑ̈dd ɑ́dɑ̈g: Abicɑy, Yöɑb, kí Asɑiil. Nyɑre, Abigɑil ɑ́nywøm-ɑ yi Yether, kwɑɑr Icmɑil, kɑ ge onywølø wɑ̈d me cwøl ɑ́ Amɑsɑ̀. Ëdhrön yïe ɑ́dɑ wɑ̈d, me cwøl ɑ́ Kɑlib, ɑ ɑ́nywøm Adhubɑ̀, kɑ onywølø ki nyɑre me cwøl ɑ́ Yeriöth. Anywøl Yeriöth ki wɑ̈dd ɑ́dɑ̈g, ɑ løg Yecer, Cöbɑb kí Ardön. Kì bɑng thøwi Adhubɑ̀, ɑnywøøm Eprɑtɑ̀ yi Kɑlib, ɑnywøl gen ki wɑ̈d me cwøl ɑ́ Ur Urì bɑ wɑ̈d Ur, o kwɑre bɑ Bedhɑlel. Keny-ɑ ɑ́göög runni Ëdhrön ki pyɑ̈r ɑ́bïkyel, ɑnywøme nyɑɑr Mɑkir, nyimï Gilyɑd. Anywøl gen ki wɑ̈d me cwøl ɑ́ Segub. O Segub yïe ɑ́dɑ wɑ̈d me cwøl ɑ́ Yɑir. Yɑir ɑ́jɑɑg-ɑ kɑ̈dd pyɑ̈r ɑ́ryew wïdɑ́dɑ̈g kì myërri Gilyɑd. De rɑ̈nhi Gecur kí Arɑm ge ɑ́mɑ̈gi ki kɑ̈dd pyɑ̈r ɑ́bïkyel kì kunɑni, e reb-ɑ myërri Yɑir kí Kenɑth, kí kɑ̈dd-ɑ cyɑ̈gi ki gen. Ji-ɑ ɑ́bëëd kì kenyɑni bënn, bɑ kwɑrri Mɑkir wïyi Gilyɑd. Keny-ɑ ɑ́rum Ëdhrön ki thøø, ɑlɑɑg cyëge Abiyɑ̀ yi wɑ̈de Kɑlib. Ayïddi gen ki wɑ̈d me cwøl ɑ́ Ackur, en ɑ ɑ́cöb kɑɑl Tekoɑ̀. Yerɑmel, wɑ̈d Ëdhrön nyel-ɑ dwøng, yïe ɑ́dɑ wɑ̈dd ɑ́bïj: Rɑm ɑ dwøng, kí Bunɑ̀, Oren, Odhem kí Akiyɑ̀ Onɑm yïe ɑ́dɑ wɑ̈dd ɑ́ryew: Nɑdɑb ki Abicur. Abicur ɑ́nyömi ki ngɑn me cwøl ɑ́ Abikɑil, o yï gen ɑ́dɑ wɑ̈dd ɑ́ryew, Akbɑn, kí Mölïd. Nɑdɑb ómï Abicur yïe ɑ́dɑ wɑ̈dd ɑ́ryew: Seled kí Apɑim, de Seled ɑ́thøw e bong wɑ̈dde. Apɑim bɑ wïyi Icì, o Icì bɑ wïyi Cecɑn, o Cecɑn bɑ wïyi Alɑy. Yɑdɑ̀ ómï Cɑmɑ̀ yïe ɑ́dɑ wɑ̈dd ɑ́ryew: Yether kí Yönɑthɑn, de Yether ɑ́thøw e bong wɑ̈dde. Yönɑthɑn yïe ɑ́dɑ wɑ̈dd ɑ́ryew: Peleth kí Dhɑdhɑ̀. Ge bɑ kwɑrri Yerɑmel bënn. Cecɑn yïe bong wɑ̈dde, de ɑ́nywøl-ɑ mɑ̈nn keti gen. Yïe ɑ́dɑ wɑ̈d Rïp me bɑ bɑ̈ng nyinge cwøl ɑ́ Yɑrɑ̀. Cecɑn nyɑre ɑ́mëgge bɑ̈nge Yɑrɑ̀ ɑ́ dhɑjø, kɑ nyöddi yi nyɑnɑni ki wɑ̈d me cwøl ɑ́ Atɑy. Cɑ̈gi kɑl kì ri Atɑy gïti ri Elicɑmɑ̀ bɑ Atɑy, Nɑthɑn, Dhɑbɑd, Eplɑl, Obed, Yeeu, Adhɑriyɑ̀ Keledh, Eleɑsɑ̀, Sismɑy, Cɑlum, Yekɑmiyɑ̀, kí Elicɑmɑ̀. Wɑ̈d Kɑlib nyel-ɑ dwøng bɑ Yerɑmel, o yïe dɑ ómen me cwøl ɑ́ Mecɑ̀. Mecɑ̀ bɑ wïyi Dhïp ɑ bɑ wïyi Mɑrecɑ̀, ɑ bɑ wïyi Kibrön. Kibrön yïe ɑ́dɑ wɑ̈dd ɑ́ngwen: Körɑ̀, Tɑpuɑ̀, Rekem, kí Cemɑ̀. Cemɑ̀ ɑ ɑ́nywøl Rɑɑm, wïyi Yorkeɑm. Rekem bɑ ómï Cemɑ̀ ɑ løg wïyi Cɑmɑy, ɑ bɑ wïyi Mɑon, ɑ bɑ wïyi Betdhur. Kɑlib yïe ɑ́dɑ dhɑjø mɑ ɑ́kwɑnye, nyinge bɑ Epɑ̀, kɑ nyöddi yi ngɑnɑni ki wɑ̈dd ɑ́dɑ̈g: Arɑn, Mödhɑ̀ kí Gɑdhedh. Arɑn yïe ɑ́dɑ wɑ̈d me cwøl ɑ́ Gɑdhedh thyew. (Jɑl megø me cwøl ɑ́ Yɑdɑy yïe ɑ́dɑ wɑ̈dd ɑ́bïkyel: Regem, Yöthɑm, Gecɑn, Pelet, Epɑ̀, kí Cɑɑp.) Kɑlib yïe ɑ́dɑ ɑkwɑny megø me cwøl ɑ́ Mɑɑkɑ̀, mɑ ɑ́nyöddii ki wɑ̈dd ɑ́ryew: Ceber kí Tirɑnɑ̀. Kɑ cig-ɑ nywølø ki wɑ̈dd ɑ́ryew: Cɑɑp, ɑ ɑ́cöb Mɑdmɑnɑ̀, kí Cebɑ̀ ɑ ɑ́cöb Mɑcbenɑ̀ kí kɑɑl Gibeɑ̀. Thyew, Kɑlib yïe ɑ́dɑ nyɑre me cwøl ɑ́ Aksɑ̀. Møg bɑ kwɑrri Kɑlib: Ur bɑ wɑ̈d Kɑlib nyel-ɑ dwøng, o meye bɑ Eprɑtɑ̀. Cöbɑl wɑ̈d Ur bɑ en ɑ ɑ́cöb Kiriɑt Yeɑrïm. Sɑlmɑ̀ wɑ̈de, ɑ bɑng nyeldwøng ɑ ɑ́cöb Betleem, o Arep dɑ̈ɑ̈g wɑ̈dde ɑ ɑ́cöb Betgɑder. Cöbɑl, ɑ ɑ́cöb Kiriɑt Yeɑrïm, en ɑ bɑ kweyi tyëng Aroè, ɑ bɑ budi tyëng-ɑ bëëdø kì Menuöth, ge bɑ kwï kɑ̈ll-ɑ bëëdø kì Kiriɑt Yeɑrïm, ɑ løg tyëng Ithrì, Puthit, Cumɑth kí Micrɑit. (Tyëng Kɑ̈ddi Dhörɑ̀ kí Ectɑol ɑ́kɑ̈ɑ̈l-ɑ ri kɑ̈llɑni). Sɑlmɑ̀, ɑ ɑ́cöb Betleem bɑ kweyi tyëng Netöpɑ̀ mø Atröth Bet Yöɑb, kí tyëng Dhör ɑ ɑ́bëëd gɑ kɑl ɑ́kyel kì kelli kɑ̈llɑni ryeet kì Mɑnɑɑth. (Wɑ̈thi kɑ̈ll-ɑ bɑ bödhhi gwed ɑ́bëëd ɑ kɑɑl Yɑbedh, ɑ løg gøl Tirɑs, Cimeɑth, kí Sukɑth. Ge bɑ tyëng Ken møg-ɑ ɑ́nywøm ri gen ki tyëng Rekɑb). Yɑɑgɑni gɑ ɑ́bïkyel ge ɑ́nywøl-ɑ Kibrön, kun-ɑ ɑ́jyɑ̈ɑ̈g Debïd ki runn ɑ́bïryew kí dwɑ̈tt ɑ́bïkyel. Debïd ɑ́jyɑ̈ɑ̈g ɑ́ Rɑ̈dh kì Yerusɑlem ki runn pyɑ̈r ɑ́dɑ̈g wïdɑ́dɑ̈g, wɑ̈dde møg-ɑ ngenyø ɑ́nywøl-ɑ kunɑni. Debïd ɑ́nyöddi yi cyëge, Bɑtcebɑ̀ nyɑɑr Amiel, ki wɑ̈dd ɑ́ngwen, ɑ løg. Cimeɑ̀, Cöbɑb, Nɑthɑn, kí Sølømøn. Debïd yïe ɑ́dɑ wɑ̈dd møøgø gɑ ɑ́bïngwen, ɑ løg: Ibɑɑr, Elicuɑ̀, Elpelet, Nögɑ̀, Nepeg, Yɑpiyɑ̀, Elicɑmɑ̀, Eliɑdɑ̀, kí Elipelet. Debïd yïe ɑ́dɑ wɑ̈dd mɑ ɑ́nyöllii yi ɑkwɑnyye. Yïe ɑ́dɑ nyɑre thyew me cwøl ɑ́ Tɑmɑr. Men bɑ gøl Sølømøn, e myer ɑ́ dhɑnhø kí wɑ̈de: Sølømøn, Reöboɑm, Abiyɑ̀, Asɑ̀, Yöcɑpɑt, Yeörɑm, Akɑdhiyɑ̀, Yöɑc, Amɑdhiyɑ̀, Udhiyɑ̀, Yöthɑm, Akɑɑdh, Kedhekiyɑ̀, Mɑnɑsè. Amön kí Yöciyɑ̀. Yöciyɑ̀ yïe ɑ́dɑ wɑ̈dd ɑ́ngwen: Yöɑnɑn, Yöyɑkim, Dhedekiyɑ̀, kí Yöɑkɑdh. Yöyɑkim yïe ɑ́dɑ wɑ̈dd ɑ́ryew: Yöyɑkin kí Dhedekiyɑ̀. Møg bɑ kwɑrri Rɑ̈dh Yöyɑkin, ɑ ɑ́kɑ̈l ɑ́ ɑmɑg yi tyëng Bɑbïl. Yöyɑkin yïe ɑ́dɑ wɑ̈dd ɑ́bïryew: Ceɑltiel, Mɑlkirɑm, Pedɑiyɑ̀, Cenɑdhɑr, Yekɑmiyɑ̀, Öcɑmɑ̀, kí Nedɑbiyɑ̀, Pedɑiyɑ̀ yïe ɑ́dɑ wɑ̈dd ɑ́ryew: Dherubɑbïl, kí Cimeì. Dherubɑbïl bɑ wïyi yɑɑg ɑ́ryew: Meculɑm kí Anɑniyɑ̀ kí nyɑre ɑ́kyel me cwøl ɑ́ Celömith. Dherubɑbïl yïe ɑ́dɑ wɑ̈dd ɑ́bïj møøgø: Acubɑ̀, Oel, Berekiyɑ̀, Aɑsɑdiyɑ̀, kí Yucɑb Ësed. Anɑniyɑ̀ yïe ɑ́dɑ wɑ̈dd ɑ́ryew: Pelɑtiyɑ̀, kí Yecɑiyɑ̀. Yecɑiyɑ̀ bɑ wïyi Repɑiyɑ̀, ɑ bɑ wïyi Arnɑn, wïyi Obɑdiyɑ̀ wïyi Cekɑniyɑ̀. Cekɑniyɑ̀ yïe ɑ́dɑ wɑ̈d ɑ́kyel: Cemɑiyɑ̀, kí kwɑrre ɑ́bïj: Atuc, Igɑl, Bɑriyɑ̀, Neɑriyɑ̀, kí Cɑpɑt. Neɑriyɑ̀ yïe ɑ́dɑ wɑ̈dd ɑ́dɑ̈g: Eliönɑy, Kedhekiyɑ̀ kí Adhrikɑm. Eliönɑy yïe ɑ́dɑ wɑ̈dd ɑ́bïryew: Ödɑbiyɑ̀, Eliɑcïb, Pelɑiyɑ̀, Akkub, Yöɑnɑn, Delɑiyɑ̀, kí Anɑnì. Møg bɑ kwï kwɑrri Yeudɑ̀: Peredh, Ëdhrön, Kɑrmì, Ur, kí Cöbɑl. Cöbɑl bɑ wïyi Reɑiyɑ̀; en ɑ bɑ wïyi Yɑɑth, wïyi Akumɑy geki Lɑɑd; gen ɑ bɑ kweyyi tyëng-ɑ bëëdø kì Dhörɑ̀. Ackur, ɑ ɑ́cöb kɑɑl Tekoɑ̀, yïe ɑ́dɑ mɑ̈nn ɑ́ryew: Kelɑ̀, kí Nɑɑrɑ̀. Ackur geki Nɑɑrɑ̀ yï gen ɑ́dɑ wɑ̈dd ɑ́ngwen: Akudhɑm, Ëper, Temenì, ki Akɑctɑrì, O Ackur geki Kelɑ̀ yï gen ɑ́dɑ wɑ̈dd ɑ́dɑ̈g: Dhereth, Idhɑr, kí Ethnɑn. Ködh bɑ wïyi Anub kí Dhöbebɑ̀, gølɑni ɑ ree kɑ̈ɑ̈l yi Aɑrel wɑ̈d Aɑrum. Ádɑ jɑl me cwøl ɑ́ Yɑbedh, mɑ ɑ́bëëd e ceg kɑ wørø ki mendwøng yi tyëng gøl gen. Ácɑg-ɑ yi meye ɑ́ Yɑbedh, nyingɑni kɑ̈ɑ̈l-ɑ ri bɑng kɑ ɑ́bëëd pɑ̈dhe piny teeg. De Yɑbedh Jwøøg Isrɑil ɑ́kwɑjje kinni, “Gyëdh yɑn, yïn ɑ Jwøk, kɑ yɑ nëngí ki piny me lɑɑj. Korrí yɑn ki gïgrijjø møg-ɑ nyi kɑ̈ni ki orɑng.” Kɑ gïg-ɑ ɑ́kwɑjje mëggii yi Jwøk. Kɑlib ómï Cuɑ̀, yïe ɑ́dɑ wɑ̈d me cwøl ɑ́ Meir, Meir ɑ bɑ wïyi Ectön, Ectön yïe ɑ́dɑ wɑ̈dd ɑ́dɑ̈g: Betrɑpɑ̀, Pɑseɑ̀ kí Teinɑ̀. Teinɑ̀ ɑ ɑ́cöb Nɑkɑc. Kwɑrri jiɑni ɑ́bëëd ɑ Rekɑ̀. Kenɑdh yïe dɑ wɑ̈dd ɑ́ryew: Othniel kí Serɑiyɑ̀. Othniel thyew yïe ɑ́dɑ wɑ̈dd ɑ́ryew: Athɑth kí Meonöthɑy. Meonöthɑy ɑ bɑ wïyi Óprɑ̀. Serɑiyɑ̀ bɑ wïyi Yöɑb, ɑ ɑ́cöb Töör Bödhhì, kun-ɑ di bödhhi gïg nyi gøggi kí møg-ɑ thɑ̈dhhi bënn. Kɑlib wɑ̈d Yepunɑ̀ yïe ɑ́dɑ wɑ̈dd ɑ́dɑ̈g: Iru, Elɑ̀ kí Nɑɑm. Elɑ̀ ɑ bɑ wïyi Kenɑdh. Yeɑlelel yïe ɑ́dɑ wɑ̈dd ɑ́ngwen: Dhïp, Dhïpɑ̀, Tiriyɑ̀, kí Asɑrel. Ödiyɑ̀ ɑ́nywøm-ɑ nyimï Nɑɑm. Kwɑrri gen ɑ bɑ gøl Gɑrm, ɑ ɑ́bëëd kì Keilɑ̀, kí gøl Mɑɑkɑth ɑ ɑ́bëëd kì Ectemoɑ̀. Cimön yïe ɑ́dɑ wɑ̈dd ɑ́ngwen: Amnön, Rinɑ̀, Benɑnɑn kí Tïlön. Icì yïe ɑ́dɑ wɑ̈dd ɑ́ryew: Dhöketh kí Bendhöketh. Celɑ̀ bɑ ɑ́kyel kì kelli wɑ̈ddi Yeudɑ̀, kwɑrre bɑ Er ɑ ɑ́cöb Lekɑ̀, kí Lɑɑdɑ̀ ɑ ɑ́cöb Mɑrecɑ̀; kwɑrre ɑ bɑ bödhhi cwɑ̈j ki ógudhi kor-ɑ yöm, o ge ɑ́bëëd ɑ kɑɑl Bet Acbeɑ̀. Yökim kí ji-ɑ ɑ́bëëd kì kɑɑl Ködhebɑ̀, kí Yöɑc geki Sɑrɑp ɑ́nyömi ki nyɑɑr Moɑb, ge ɑ́pëggi Betleem. (Menɑni bɑ kwöng me kɑ̈ge dööng.) Ge ɑ́bëëd gɑ bödhhi lɑ̈b møg-ɑ nyi cwɑ̈jji rɑ̈dh, o ge ɑ́bëëd ɑ kɑ̈ddi Netɑim kí Gederɑ̀. Cimeøn yïe ɑ́dɑ wɑ̈dd ɑ́bïj: Nemuel, Yɑmïn, Yɑrïb, Dherɑ̀, kí Cɑul. Wɑ̈d Cɑul bɑ Cɑlum, kwɑre bɑ Mibsɑm, o wɑ̈d kwɑre bɑ Micmɑ̀. Kì bɑng møgɑni gøl Micmɑ̀ kɑ̈ɑ̈l-ɑ ri wɑ̈dde. Amuel, Dhɑkur kí Cimeì. Cimeì yïe ɑ́dɑ wɑ̈dd pyɑ̈rø wïdɑ́bïkyel, kí nyige womɑ̈nn ɑ́bïkyel. De tyëng gøl gen yï gen bong nywøl mø ngenyø, o gøl Cimeøn nuti døngø ni gøl Yeudɑ̀. Gïti bøli keny-ɑ ɑ́jɑ̈ggi Debïd, kwɑrri Cimeøn ɑ́bëëd ɑ kɑ̈dd møg: Bircebɑ̀, Mölɑdɑ̀ kí Adhɑr Cuɑl, Bilɑ̀, Edhem, Tölɑd. Bethuel, Órmɑ̀, Dhiklɑg, Bet Mɑrkɑböt, Adhɑr Susïm, Bet Birì, kí Cɑɑrɑim. Ge ɑ́bëëd thyew kì yethi kɑ̈dd ɑ́bïj møøgø: Etɑm, Ain, Rimön, Töcen, kí Acɑn. Kí myërr-ɑ cyɑ̈gi kì buti gen gïti kɑɑl Bɑɑlɑth. Møgɑk bene møg-ɑ ɑ́gweed piny kipe mïdhi lwömi kɑ̈lli gen kí kɑ̈jj-ɑ́ yethi gïn ɑ́bëëd yi gen. ɑtɑɑy gen kuni wɑɑng cyɑ̈ɑ̈ng böörø kɑ ge ócyɑ̈ngø ki Gerɑr, kɑ dyëgi gen kwɑɑy gen yij töör-ɑ tøge ógeer kɑɑlɑni kì kuni wɑɑng cyɑ̈ɑ̈ng mwøl. Ge ɑ́yïddi ki piny me lɑ̈be med, o lɑɑj. Kì yij pödhø me bëëdø ki mër. Bɑ kwɑrri Kɑm ɑ ɑ́kwöngi ki bëëdø kì pinyɑni. Kì bøli keny-ɑ ɑ́jyɑ̈ɑ̈g Kedhekiyɑ̀, kɑ̈ll-ɑ nyingi gen bɑ ɑgwed ɑ́kedhi Gerɑr, kɑ kemmì geki uddi tyëng-ɑ bëëdø kì pinyɑni rënyi yi gen. Kɑ ji cyeed gen wɑ̈g kì yije, codhe ɑpëggi gen kenyɑni, mɑ́ yije ɑ́dɑ lum me gïïr me cɑm yi dyëgi gen. Ji miy ɑ́bïj møøgø kì gøl Cimeøn ɑ́kedhi wɑɑng cyɑ̈ɑ̈ng mwøl kì Edöm. Ge ɑ́pej-ɑ yi wɑ̈ddi Icì: Pelɑtiyɑ̀, Neɑriyɑ̀, Repɑiyɑ̀ kí Udhiel. Kɑ tyëng Amɑlek møg-ɑ ɑ́ying pinyɑni nɑ̈g yi gen, kɑ ge obëëdø kì kenyɑni gïti dicyɑ̈ngtïn. Møg bɑ kwɑrri Ruben kɑyi Yɑgob. (Kej kɑyø ɑ́kwɑny kì yïe, kipe kɑ ɑ́kedhe yethi pënni wïye. Kɑ kej kɑyø mëggi wɑ̈ddi Yosep yi Yɑgob, bene ɑ bɑnge pɑ nyi kwɑnii ɑ́ wïj kɑl, cɑgg ɑ́ kɑ ɑ́kedhi nyingi Yeudɑ̀ mɑl kì bɑng kɑ ɑ́ying lɑwø gøle, bɑ Yosep ɑ ɑ́cungi ceth ɑ́ wïj kɑl), Ruben, wɑ̈d Yɑgob, nyel-ɑ kɑyø, yïe ɑ́dɑ wɑ̈dd ɑ́ngwen: Aɑnök, Pɑlu, Ëdhrön kí Kɑrmì. Pëjji gøl Ruben møg ógwedø kì yij wɑ̈nyi lwøbi kɑl bɑ: Yeiel, Dhekɑriyɑ̀, kí Belɑ̀ wɑ̈d Adhɑdh, wɑ̈d Cemɑ̀, wɑ̈d Yöiil. Gølɑni ɑ́bëëd ɑ Aröeer kí Nebö kí Bɑɑl Meon kì wɑɑng wuudø. Yï gen ɑ́dɑ dhög mø gïïr kì piny Gilyɑd, kɑ pinyɑni kwɑny yi gen gïti yij ryɑng kì wɑɑng cyɑ̈ɑ̈ng mwøl, e ködd-ɑ kömi Nɑm Porɑt. Keny-ɑ ɑ́bëëd ɑ́ Cɑul ɑ jyɑ̈gø, gøl Ruben ɑ́pɑ̈ɑ̈r kömi Ägerïm kɑ gï nɑ̈g gen, ɑkwɑny gen piny gen, eni piny-ɑ buti Gilyɑd kì wɑɑng cyɑ̈ɑ̈ng mwøl. Gøl Gɑd ɑ́bëëd ɑ buti piny gøl Ruben kì wɑɑng wuudø, kì piny Bɑcɑn, e wɑ̈dh-ɑ Sɑlekɑ̀ kì wɑɑng cyɑ̈ɑ̈ng mwøl. Kì piny Bɑcɑn, Yöiil ɑ ɑ́bëëd ɑ́ jɑngi kɑl, o Cɑpɑm bɑ jɑngi kɑl megø, o Yɑnɑy bɑ jɑngi wïj gøl-ɑ kyeelø. Kɑ̈llì ɑ́bïryew møg, bɑ kwï wïj gølɑni, ɑ løg gøl: Mikɑil, Meculɑm, Cebɑ̀, Yörɑy, Yɑkɑn, Dhiyɑ̀, kí Eber. Ge bɑ kwɑrri Abikɑil wɑ̈d Urì, kweyi gen døøg-ɑ cyɑ̈n ri ji møg: Abikɑil, Urì, Yɑroɑ̀, Gilyɑd, Mikɑil, Yecicɑy, Yɑɑdö kí Budh. Akì wɑ̈d Abdiel, wɑ̈d Gunì, en ɑ ɑ́bëëd ɑ́ jɑng-ɑ jɑɑg kɑ̈llɑni bënn. Ge ɑ́bëëd ɑ myërri Bɑcɑn geki Gilyɑd kí kɑ̈ddi gen, kí cɑ̈mmi dhög bëne kì piny Cɑrön. Lwöbø menɑni ɑ́gwed-ɑ ri Rɑ̈dh Yöthɑm, rɑ̈ɑ̈dh Yeudiyɑ̀ geki Rɑ̈dh Yeroboɑm wɑ̈d Yöɑc, rɑ̈ɑ̈dh Isrɑil. Gøl Ruben, kí gøl Gɑd, kí gøl Mɑnɑsè kì wɑɑng cyɑ̈ɑ̈ng mwøl, yï gen ɑ́dɑ jøliny ɑ́lïp pyɑ̈r ɑ́ngwen wïdɑ́ngwen, kí miy ɑ́bïryew kí pyɑ̈r ɑ́bïkyel, mø ngɑ̈ny nyɑɑg ki liny ködd, kí pil, kí wethh. Ge ɑ́nyïɑ̈ggi ki Kwɑrri Äjer ɑ løg tyëng Yetur, kí tyëng Nɑpic, kí tyëng Nödɑb. Ägerïm geki jurr-ɑ ɑ́køny gen ɑ́tyɑm yi gen, mɑ́ ge ɑ́gɑ̈nn-ɑ Jwøk kɑ gø kwɑjji gen kipe kønyø. Jɑmmi jurrɑni ɑ́kɑb: ɑmɑl ɑ́lïp pyɑ̈r ɑ́bïj; kí dyëg ɑ́lïp miy ɑ́ryew kí pyɑ̈r ɑ́bïj; kí ɑderr ɑ́lïp ɑ́ryew; kɑ ge ómɑ̈gø ki ji ɑ́lïp miyø. Ge ɑ́nɑ̈ɑ̈g ki ji mø gïïr kì kelli jølinyɑni. Kɑ ge pëgg-ɑ be bëëdø kì pinyɑni gïti kɑ ɑ́køøl gen yïnø. Tyëng gøl Mɑnɑsè kì wɑɑng cyɑ̈ɑ̈ng mwøl ɑ́bëëd ɑ piny Bɑcɑn e ködd-ɑ wɑɑng wuudø gïti Bɑɑl Kermön, kí Senïr, kí Kïti Kermön, kɑ kwɑnni gen óngënyø ki mendwøng. Møg bene jɑggi wɑ̈thi kɑ̈lli gen: Eper, Icì, Eliel, Adhriel, Jermɑyɑ̀, Ödɑbiyɑ̀, kí Yɑdiel. Jøgɑni ɑ́bëëd gɑ jɑgg mø teg, o ge wør yi kɑ̈lli gen. De tyëngɑni Jwøøg kweyyi gen ɑ́wiy yi gen, kì bɑng kɑ̀ bëëde e bong yïëyø, kɑ ge døøg-ɑ be kwɑjji jwöggi jurr-ɑ ɑ́cyeddi yi Jwøk kì pinyɑni. Codhe, ɑrënyi pyëw Jwøk, kɑ Pul rɑ̈nhdwøøng Acuur, ɑ cwøl ɑ́ Tiglɑth Pileser wiye o tyëng gøl Ruben, kí Gɑd, kí budi gøl Mɑnɑsè cyeede wɑ̈g kì pödhe, kɑ gï kïdhe Alɑ̀, kí Abör, kí Arɑ̀, geki myërr-ɑ kömi Nɑm Gödhɑn, kunɑni ɑ bëëd yi gen gïti dicyɑ̈ngtïn. Leebì yïe ɑ́dɑ wɑ̈dd ɑ́dɑ̈g: Gercön, Kɑ̈ɑ̈th kí Merɑrì. Kɑ̈ɑ̈th yïe ɑ́dɑ wɑ̈dd ɑ́ngwen: Amrɑm, Idhɑr, Kibrön kí Udhiel. Amrɑm yïe ɑ́dɑ wɑ̈dd ɑ́ryew: Aɑron, kí Mosɑ̀, kí nyɑre ɑ́kyel, Miryɑm. Aɑron yïe ɑ́dɑ wɑ̈dd ɑ́ngwen: Nɑdɑb, Abiu, Eliɑdhɑr, kí Ithɑmɑr. Møg bɑ kwɑrri Eliɑdhɑr cɑ̈gi kì ri rïny kí rïny: Pineɑs, Abicuɑ̀, Bukì, Udhì, Dherɑiyɑ̀, Merɑyöth, Amɑriyɑ̀, Akitub, Dhɑdök, Akimɑɑdh, Adhɑriyɑ̀, Yöɑnɑn Adhɑriyɑ̀, (ɑ ɑ́göög kì Keng-ɑ ɑ́ger yi Sølømøn kì Yerusɑlem). Amɑriyɑ̀, Akitub, Dhɑdök, Cɑlum, Kilkiyɑ̀, Adhɑriyɑ̀, Serɑiyɑ̀, Yödhɑdɑk. Rɑ̈dh Nebukɑdnesɑr, Yödhɑdɑk ɑ́køøle geki kwï ji-ɑ ɑ́kïdhi yïnø yi Jwøng-ɑ Ácwɑ̈ɑ̈j kì Yeudiyɑ̀ kí Yerusɑlem. Leebì yïe ɑ́dɑ wɑ̈dd ɑ́dɑ̈g: Gercön, Kɑ̈ɑ̈th kí Merɑrì. Yï gen ɑ́dɑ wɑ̈dd: Gercön bɑ wïyi Libnì kí Cimeì. Kɑ̈ɑ̈th bɑ wïyi Amrɑm, Idhɑr, Kibrön, kí Udhiel. O Merɑrì bɑ wïyi Mɑklì kí Mucì. Møg bɑ kwɑrri Gercön, cɑ̈gi kì ri rïny gïti rïny: Libnì, Yɑɑth kí Dhimɑ̀, Yöɑ̀, Idö, Dherɑ̀, kí Yeɑtherɑy. Møg bɑ kwɑrri Kɑ̈ɑ̈th, cɑ̈gi kì ri rïny gïti rïny: Aminɑdɑb, Körɑ̀, Asïïr, Elkɑnɑ̀, Abiyɑsɑp, Asïïr, Tɑɑth, Uriel, Udhiyɑ̀, Cɑul. Elkɑnɑ̀ yïe ɑ́dɑ wɑ̈dd ɑ́ryew: Amɑsɑy kí Akimöth. Møg bɑ kwɑrri Akimöth, cɑ̈gi kì ri rïny gïti rïny: Elkɑnɑ̀, Dhöpɑy, Nɑɑ̈th, Eliɑb, Yeroɑm kí Elkɑnɑ̀. Sɑmwel yïe ɑ́dɑ wɑ̈dd ɑ́ryew: Yöiil nyel-ɑ dwøng, kí Abiyɑ̀ ɑ thinh. Møg bɑ kwɑrri Merɑrì cɑ̈gi kì ri rïny gïti rïny: Mɑklì, Libnì, Cimeì, Udhɑ̀, Cimeɑ̀, Agiyɑ̀ kí Asɑiyɑ̀. Keny-ɑ ɑ́rum Sɑnduug Cigg ki kïdhi Yerusɑlem, ɑkɑ̈bbi Rɑ̈dh Debïd ki bödhhi thømi kej mɑ̈ddø. Ge nyi göögø ge luny-ɑ gwøg kì Kemi Kwër, kɑ̈ng-ɑ ɑ́bëëd Kengø nuti gerø yi Sølømøn. Tyëng-ɑ ɑ́jɑɑg jøgɑni bɑ: Kì gøl Kɑ̈ɑ̈th: Ëmɑn wɑ̈d Yöiil, wɑ̈d Sɑmwel, ɑ bɑ pënyi ɑkun-ɑ mɑl. Gøl gen kɑ̀ lwøbii e wɑ̈dh-ɑ ri Yɑgob èn: Ëmɑn, Yöiil, Sɑmwel, Elkɑnɑ̀, Yeroɑm, Eliel, Toɑ̀, Dhup, Elkɑnɑ̀, Mɑɑ̈th, Amɑsɑy, Elkɑnɑ̀, Yöiil, Adhɑriyɑ̀, Dhepɑniyɑ̀, Tɑɑth, Asïïr, Abiyɑsɑp, Körɑ̀, Idhɑr, Kɑ̈ɑ̈th, Leebì, kí Yɑgob. Asɑp ɑ ɑ́bëëd ɑ́ ryeew pëjji jøwör. Gøl gen kɑ̀ lwøbii e wɑ̈dh-ɑ ri Leebì èn: Asɑp, Berekiyɑ̀, Cimeɑ̀, Mikɑil, Bɑɑseiyɑ̀, Mɑlkiyɑ̀, Ethnì, Dherɑ̀, Adɑiyɑ̀, Ethɑn, Dhimɑ̀, Cimeì, Yɑɑth, Gercön kí Leebì. Ethɑn kɑ̈ɑ̈l-ɑ ri gøl Merɑrì, en ɑ ɑ́bëëd ɑ́ dɑ̈ɑ̈g pëjji jøwör. Gøl gen kɑ̀ lwøbii e wɑ̈dh-ɑ ri Leebì èn: Ethɑn, Kïcì, Abdì, Mɑluk, Acɑbiyɑ̀, Amɑdhiyɑ̀, Kilkiyɑ̀, Amdhì, Bɑnì, Cemer, Mɑklì, Mucì, Merɑrì, kí Leebì. Kwɑrri Leebì møg-ɑ kyeelø bënn ɑ́nëngi ki gwøg kì kej mɑ̈ddø. Gøl Aɑron ɑ nyi muuj gëdhhi bɑkur kí gëdhh-ɑ nyi rɑ̈b kì wïj këli lɑm. Gen ɑ mïdhi gëdhh-ɑ nyi muuj kì Kej Kwërdwøng, kí gëdhh-ɑ nyi muuj gɑ møg gøøm bøli tyëng Isrɑil. Møgɑni nyi gwøg yi gen ceth ge ködd-ɑ kömi cigg-ɑ ɑ́muuj yi Mosɑ̀, bɑ̈ng Jwøk. Møg bɑ jø gøl Aɑron gɑ ɑlwøb: Eliɑdhɑr, Pineɑs, Abicuɑ̀, Bukì, Udhì, Dhekɑriyɑ̀, Merɑyöth, Amɑriyɑ̀, Akitub, Dhɑdök, Akimɑɑdh. Men bɑ piny-ɑ ɑ́mëggi gøl Aɑron, møg-ɑ kɑ̈ɑ̈l ri Kɑ̈ɑ̈th. Gen ɑ ɑ́kwøng ki nëngø ki piny, kì gøl Leebì. Pinyɑni reb-ɑ Kibrön kì yij piny Yeudiyɑ̀, kí cɑ̈mmi dhög men-ɑ bɑdhhe. Kɑlib wɑ̈d Yepunɑ̀ ɑ́mëggi pwödh geki myërr-ɑ bɑdhhi kɑɑlɑni. Gøl Ben Yɑmïn ɑ́mëgg-ɑ kɑ̈dd møg kí cɑ̈mmi dhög møg-ɑ bɑdhhi gen: Gebɑ̀, Alemeth, kí Anɑthöth. Kɑ̈ddɑni bënn bɑ pyɑ̈rø wïdɑ́dɑ̈g, gɑ møg bëëd yi kɑ̈lli gen bënn. Kɑ̈dd pyɑ̈rø kì myërri Mɑnɑsè, kì kuni wɑɑng cyɑ̈ɑ̈ng mwøl, ɑ ɑ́mëggi gøl Kɑ̈ɑ̈th, e leng kɑ wél. Gøl Gercön, ɑ́mëgg-ɑ kɑ̈dd pyɑ̈rø wïdɑ́dɑ̈g, ge leng kɑ wél, kì piny Isɑkɑr, kí Aceer, kí Nɑptɑlì, kí ri piny gøl Mɑnɑsè kì myërri Bɑcɑn kì wɑɑng cyɑ̈ɑ̈ng mwøl. Gøl Merɑrì, ɑ́mëgg-ɑ kɑ̈dd pyɑ̈rø wïdɑ́ryew kì piny gøl Ruben, kí Gɑd, kí Dhebulun. Bene kër-ɑ ɑ́nëngi Kwɑrri Leebì yi tyëng Isrɑil ki piny men bëëd yi gen ɑnɑn. Reb ki cɑ̈mmi dhög møg-ɑ bɑdhhi kɑ̈ddɑni. (Kɑ̈dd-ɑ ɑ́muuj kì piny gøl Yeudɑ̀, kí gøl Cimeøn, kí gøl Ben Yɑmïn, ge ɑ́leng kɑ wél thyew). Kwï gøl Kɑ̈ɑ̈th ɑ́nëng ɑ ri piny gøl Eprɑim ki kɑ̈dd geki cɑ̈mmi dhög men-ɑ bɑdhhi gen, ɑ løg: Cekïm, ɑ bɑ ɑ́kyel kì kelli kɑ̈ddi yömmø, kì myërri kïtti Eprɑim, kí Gedher, Yokmeɑm kí cɑ̈mmi dhöge, Bet Örøn kí cɑ̈mmi dhöge, Ayɑlön kí cɑ̈mmi dhöge, Gɑth Rimön kí cɑ̈mmi dhöge. Kì piny Mɑnɑsè kì wɑɑng cyɑ̈ɑ̈ng böörø ge ɑ́mëgg-ɑ kɑ̈ddi Aner, kí Bileɑm, kí cɑ̈mmi dhög møg-ɑ bɑdhhi gen. Gøl Gercön ɑ́mëgg-ɑ kɑ̈dd møg, kí cɑ̈mmi dhög møg-ɑ bɑdhhi gen: Kì piny Mɑnɑsè kì wɑɑng cyɑ̈ɑ̈ng mwøl: Gölɑn kí Bɑcɑn, kí Actɑröth. Kì piny Isɑkɑr: Kedec, kí Dɑberɑth, Rɑmöth, kí Anem. Kì piny Aceer: Mɑcɑl, Abdön, Ukök, kí Reköb. Kì piny Nɑptɑlì: Kedec kì Gɑlelì, Amön, kí Kiriɑtɑim. Tyëng-ɑ ɑ́döng kì gøl Merɑrì ge ɑ́mëgg-ɑ kɑ̈dd møg geki cɑ̈mmi dhög møg-ɑ bɑdhhi gen: Kì piny gøl Dhebulun: Rimönö kí Tɑbör. Kì piny gøl Ruben kì løøg Nɑm Urdun kì wɑɑng cyɑ̈ɑ̈ng mwøl kì ngɑ̈ɑ̈j Yerikö, ge ɑ́mëgg-ɑ Bedher kì wïj kwøømø, kí Yɑɑdhɑ̀, kí Kedemöth kí Mepɑɑth. Kì piny gøl Gɑd: Rɑmöth kì Gilyɑd, kí Mɑɑ̈nɑim, kí Kicbön kí Yɑdher. Isɑkɑr yïe ɑ́dɑ wɑ̈dd ɑ́ngwen: Tölɑ̀, Puɑ̀, Yɑcub, kí Cimrön. Tölɑ̀ yïe ɑ́dɑ wɑ̈dd ɑ́bïkyel: Udhì, Repɑiyɑ̀, Yeriel, Yɑmɑy, Ibsɑm, kí Cemuel. Ge ɑ́bëëd gɑ jyɑ̈ggi wɑ̈thi kɑ̈lli gøl Tölɑ̀ møg-ɑ ngɑ̈nyi gɑ jøliny. Kwɑnni kwɑrri gen ɑ́wɑ̈dhi ri ɑ́lïp pyɑ̈r ɑ́ryew wïdɑ́ryew kí miy ɑ́bïkyel, e Debïd bɑ Rɑ̈dh. Udhì yïe ɑ́dɑ wɑ̈de ɑ́kyel: Idhrɑiyɑ̀. O Idhrɑiyɑ̀ yïe ɑ́dɑ wɑ̈dd ɑ́ngwen: Mikɑil, kí Obɑdiyɑ̀, kí Yöiil, kí Iciyɑ̀. O ge ɑ́bëëd gɑ jɑggi wɑ̈thi kɑ̈lli gen. Yï gen ɑ́dɑ mɑ̈nn mø gïïr, kí nywøl mø gïïr, kwɑnni jøg-ɑ cwøw møg-ɑ ɑ́göög gɑ jøliny, wɑ̈dh-ɑ ri ɑ́lïp pyɑ̈r ɑ́dɑ̈g wïdɑ́bïkyel. Kwɑnni jøliny møg-ɑ bɑ ɑgwedd kì gøl Isɑkɑr bɑ ɑ́lïp pyɑ̈r ɑ́bïdɑ̈g wïdɑ́bïryew. Ben Yɑmïn yïe ɑ́dɑ wɑ̈dd ɑ́dɑ̈g: Belɑ̀, Becer kí Yediyɑil. Belɑ̀ yïe ɑ́dɑ wɑ̈dd ɑ́bïj: Edhbön, Udhì, Udhiel, Yerimöth kí Irì. Ge bɑ jyɑ̈ggi wɑ̈thi kɑ̈lli gen, o ge bɑ jøliny mø teg. Kwɑnni kwɑrri gen ɑ́wɑ̈dhi ri ɑ́lïp pyɑ̈r ɑ́ryew wïdɑ́ryew kí pyɑ̈r ɑ́dɑ̈g wïdɑ́ngwen. Becer yïe ɑ́dɑ wɑ̈dd ɑ́bïngwen: Dhemirɑ̀, Yöɑc, Eliedher, Eliönɑy, Omrì, Yeremöth, Abiyɑ̀, Anɑthöth, kí Alemeth. Kwɑnni jø kɑ̈llɑni møg-ɑ bɑ ɑgwed gɑ jøliny bɑ ɑ́lïp pyɑ̈r ɑ́ryew kí miy ɑ́ryew. Yediyɑil yïe ɑ́dɑ wɑ̈d ɑ́kyel: Bilɑɑn. Bilɑɑn yïe ɑ́dɑ wɑ̈dd ɑ́bïryew: Yeuc, Ben Yɑmïn, Eud, Kenɑɑnɑ̀, Dhethɑn, Tɑrcic, kí Akicɑ̈ɑ̈r. Ge ɑ́bëëd gɑ jɑggi wɑ̈thi kɑ̈lli gen. Kwɑnni kwɑrri gen møg-ɑ bɑ ɑgwed gɑ jøliny bɑ ɑ́lïp pyɑ̈rø wïdɑ́bïryew kí miy ɑ́ryew. Cupïm kí Upïm kɑ̈ɑ̈l-ɑ ri gølɑni thyew. Dɑn yïe ɑ́dɑ wɑ̈d ɑ́kyel me cwøl ɑ́ Upïm. Nɑptɑlì yïe ɑ́dɑ wɑ̈dd ɑ́ngwen: Yɑdhiel, Gunì, Yedher kí Cɑlum. (Ge bɑ kwɑrri Bilɑ̀) Mɑnɑsè yïe ɑ́dɑ wɑ̈dd ɑ́ryew: Asriel, kí Mɑkir, ge ɑ́nywøl-ɑ yi ɑkwɑnye, ngeti Arɑm. Mɑkir ɑ bɑ wïyi Gilyɑd. Upïm geki Cupïm ɑ́nyömi yi Mɑkir. Nyimen nyinge bɑ Mɑɑkɑ̀. Dhelopekɑd wɑ̈d Mɑkir ɑ́nywøl-ɑ womɑ̈nn keti gen. Perec geki Cerec bɑ wɑ̈ddi Mɑkir møg-ɑ ɑ́nyöllii yi cyëge Mɑɑkɑ̀. Perec yïe ɑ́dɑ wɑ̈dd ɑ́ryew: Ulɑm kí Rɑkem. Ulɑm yïe ɑ́dɑ wɑ̈d me cwøl ɑ́ Bedɑn. Møg bënn, bɑ kwɑrri Gilyɑd, wɑ̈d Mɑkir wɑ̈d Mɑnɑsè: Amöleceth nyimï Gilyɑd yïe ɑ́dɑ wɑ̈dd ɑ́dɑ̈g: Icöd, Abiedher kí Mɑklɑ̀. (Cemïdɑ̀ yïe ɑ́dɑ wɑ̈dd ɑ́ngwen: Akiyɑn, Cekem, Lïkì kí Aniyɑm.) Møg bɑ kwɑrri Eprɑim cɑg kì ri rïny gïti rïny: Cuthelɑ̀, Bered, Tɑɑth, Eleɑdɑ̀, Tɑɑth, Dhɑbɑd, Cuthelɑ̀. Eprɑim yïe ɑ́dɑ wɑ̈dd ɑ́ryew: Edher kí Eleɑd. Ge ɑ́nɑ̈g keny-ɑ ɑ́kedhi gen be kwɑli dhögi tyëng Gɑth. Kɑ ge ywøg yi Eprɑim wïyi gen ki cyɑ̈ng mø gïïr, kɑ wɑdde kedh-ɑ be lugii. Codhe, ɑdøøge ød ki cyëge kɑ ngɑnɑni ongølø ki dhɑnhø, ɑnywøle ki wɑ̈d, kɑ gø cɑge ɑ́ Beriyɑ̀, kipe rɑjj-ɑ ɑ́bï kömi gøl gen. Eprɑim yïe ɑ́dɑ nyɑre me cwøl ɑ́ Cerɑ̀. En ɑ ɑ́ger myërri Bet Örøn møg-ɑ wïj kwøømø kí møg-ɑ yij tör, kí Udhen Cerɑ̀. Eprɑim yïe ɑ́dɑ wɑ̈d me cwøl ɑ́ Repɑ̀, møg bɑ kwɑrre: Recep, Telɑ̀, Tɑɑn, Lɑdɑn, Amiud, Elicɑmɑ̀, Nun, Jöcwø. Kɑ Betiil kí myërr-ɑ bute kwɑny yi gen gïti Nɑɑrɑn kì wɑɑng cyɑ̈ɑ̈ng mwøl, kɑ gït-ɑ Gedher kì wɑɑng cyɑ̈ɑ̈ng böörø geki myërr-ɑ bute. Cekem, kí Ayɑ̀ kí myërr-ɑ buti gen, ɑ́kwɑny yi gen thyew. Betcɑn, Tɑɑnɑk, Megidø, kì Dör kí myërr-ɑ buti gen, ge ɑ́kwɑny yi gøl Mɑnɑsè. Gøl Yosep wɑ̈d Yɑgob ɑ bëëdø kì kɑ̈ddɑni bënn. Møg bɑ kwɑrri Aceer. Yïe ɑ́dɑ wɑ̈dd ɑ́ngwen: Imnɑ̀, Icbɑ̀, Icbì, Beriyɑ̀, kí nyɑre ɑ́kyel, Serɑ̀. Beriyɑ̀ yïe ɑ́dɑ wɑ̈dd ɑ́ryew: Keber, kí Mɑlkiel (ɑ ɑ́cöb kɑɑl Birdhɑit.) Keber yïe ɑ́dɑ wɑ̈dd ɑ́dɑ̈g: Yɑplet, Cömer, Othɑm, kí nyɑre ɑ́kyel Cuɑ̀. Yɑplet yïe ɑ́dɑ wɑ̈dd ɑ́dɑ̈g thyew: Pɑsɑk, Bimɑ̈l, kí Acbɑth. Cömer ómen yïe ɑ́dɑ wɑ̈dd ɑ́dɑ̈g: Rögɑ̀, Yeubɑ̀, kí Arɑm. Othɑm ómen yïe ɑ́dɑ wɑ̈dd ɑ́ngwen: Dhöpɑ̀, Imnɑ̀, Celec, kí Amɑl. Kwɑrri Dhöpɑ̀ bɑ: Suɑ̀, Arneper, Cuɑɑl, Berì, Imrɑ̀ Bedher, Öd, Cɑmɑ̀, Cilcɑ̀, Ithrɑn, kí Beerɑ̀. Kwɑrri Yether bɑ: Yepunɑ̀, Pispɑ̀, kí Arɑ̀, o kwɑrri Ulɑ̀ bɑ Arɑ̀, Aniel, kí Ridhiyɑ̀. Jiɑni bënn bɑ kwɑrri Aceer. Ge ɑ́bëëd gɑ jɑggi wɑ̈thi kɑ̈lli gen, jɑgg mø teg, kwɑnni kwɑrri Aceer møg-ɑ bɑ jøliny bɑ 26,000. Ben Yɑmïn yïe ɑ́dɑ wɑ̈dd ɑ́bïj: Belɑ̀, Acbel, Akrɑk, Nöö, kí Rɑpɑ̀. Kwɑrri Belɑ̀ bɑ: Adɑr, Gerɑ̀, Abiud, Abicuɑ̀, Nɑɑmɑn, Akoɑ̀, Gerɑ̀, Cepupɑn, kí Urɑm. Yeudh, Sɑkiyɑ̀, kí Mirmɑ̀. Wɑ̈ddɑni bënn ɑ́bëëd gɑ wɑ̈thi kɑ̈lli gen. Yïe ɑ́dɑ wɑ̈dd ɑ́ryew møøgø mɑ ɑ́nyöllii yi Ucim: Abitub kí Elpɑɑl. Elpɑɑl yïe ɑ́dɑ wɑ̈dd ɑ́dɑ̈g: Eber, Micɑm, kí Cemed. Bɑ Cemed ɑ ɑ́cöb kɑɑl Önö kí Lod kí myërr-ɑ buti gen. Beriyɑ̀ kí Cemɑ̀ ge bɑ jø wɑ̈thi kɑ̈lli gen kì kɑɑl Ayɑlön. Gen ɑ ɑ́cyeddi tyëng-ɑ ɑ́bëëd kì Gɑth. Møg bɑ kwɑrri Beriyɑ̀ thyew: Akiyö, Cɑcɑk, Yeremöth, Dhebɑdiyɑ̀, Arɑd, Eder, Mikɑil, Icpɑ̀, kí Yöɑ̀. Kwɑrri Elpɑɑl bɑ Dhebɑdiyɑ̀, Meculɑm, Idhkì, Keber, Icmerɑy, Idhliyɑ̀, kí Yöbɑb. Kwɑrri Cimeì bɑ Yɑkim, Dhikrì, Dhɑbdì, Elienɑy, Dhilethɑy, Eliel, Adɑiyɑ̀, Berɑiyɑ̀, kí Cimrɑth. Kwɑrri Cɑcɑk bɑ Icpɑn, Eber, Eliel, Abdön, Dhikrì, Aɑnɑn, Anɑniyɑ̀, Elɑm, Anthöthiyɑ̀, Ipdeiyɑ̀, kí Penuel. Kwɑrri Yeroɑm bɑ Cɑmcerɑy, Ceɑriyɑ̀, kí Athɑliyɑ̀, Yɑɑreciyɑ̀, Eliyɑ̀, kí Dhikrì. Ge bɑ wɑ̈thi kɑ̈lli gen møg-ɑ ɑ́bëëd kì Yerusɑlem. Gibeon ɑ́cöb-ɑ yi Yeiel, kɑ pëgg-ɑ yije. Cyëge cwøl ɑ́ Mɑɑkɑ̀. Wɑ̈de nyel-ɑ kɑyø cwøl ɑ́ Abdön. Wɑ̈dde møg-ɑ kyeelø bɑ Dhur, Kïc, Bɑɑl, Ner, Nɑdɑb, Gedör, Akiyö, Dheker, kí Miklöth wïyi Cimeɑ̀. Kwɑrri gen ɑ́bëëd kì Yerusɑlem kì buti wɑddi gen. Ner wïyi Kïc. O Kïc bɑ wïyi Rɑ̈dh Cɑul. Cɑul yïe ɑ́dɑ wɑ̈dd ɑ́ngwen: Yönɑthɑn, Mɑlkicuɑ̀, Abinɑdɑb, kí Icböceth. Yönɑthɑn bɑ wïyi Mepiböceth, o Mepiböceth bɑ wïyi Miikɑ̀. Miikɑ̀ yïe ɑ́dɑ wɑ̈dd ɑ́ngwen: Pithön, Melek, Tɑreɑ̀, kí Akɑɑdh. Akɑɑdh bɑ wïyi Yeöɑdɑ̀. Yeöɑdɑ̀ yïe ɑ́dɑ wɑ̈dd ɑ́dɑ̈g: Alemeth, Adhmɑbeth, kí Dhimrì. Dhimrì bɑ wïyi Mödhɑ̀. Mödhɑ̀ bɑ wïyi Bineɑ̀. Kí wɑ̈de Rɑpɑ̀, kí wɑ̈de Eleɑsɑ̀, kí wɑ̈de Adhel. Adhel yïe ɑ́dɑ wɑ̈dd ɑ́bïkyel: Adhrikɑm, Bökeru, Icmɑil, Ceɑriyɑ̀, Obɑdiyɑ̀, kí Aɑnɑn. Ecek ómï Adhel yïe ɑ́dɑ wɑ̈dd ɑ́dɑ̈g: Ulɑm, Yeuc, kí Elipelet. Wɑ̈ddi Ulɑm ɑ́bëëd gɑ jøliny mø teg. Kwɑrri Ulɑm bënn bɑ miyø kí pyɑ̈r ɑ́bïj. Ji møgɑk bënn bɑ kwɑrri Ben Yɑmïn. Wɑ̈nyi Rɑ̈nhi Isrɑil en ɑ yije di kwøb møg-ɑ ógwedø kipe tyëng Isrɑil, kí kɑ̈lli gen bënn. Tyëng Yeudiyɑ̀ ɑ́cɑy yi Jwøk, kɑ ge kïdhi Bɑbïl, kì bɑng orøøg gen. Tyëng-ɑ ɑ́kwöngi ki dwöög pödhi Isrɑil, bɑ ókwër, kí Kwɑrri Leebì, kí ji-ɑ nyi göögø kì yij Kengø. Tyëng-ɑ ɑ́kedhi be bëëdø kì Yerusɑlem bɑ kɑ̈lli Yeudɑ̀, Ben Yɑmïn, kí Eprɑim, kí Mɑnɑsè. Wɑ̈thi ud 956 mø gølɑni ɑ ɑ́bëëd kì kunɑni, jøg-ɑ nyingi gen bɑ ɑgwed ɑnɑn bɑ jɑggi wɑ̈thi kɑ̈lli gen. Ókwërr-ɑ ɑ́bëëd gɑ wɑ̈thi kɑ̈lli gen, kwɑnni gen bɑ ɑ́lïp kí miy ɑ́bïryew kí pyɑ̈r ɑ́bïkyel. Gïg-ɑ gøggi kì Kengø bënn, ɑ́bëëd gwøgi gïn ngɑ̈nyi yi gen bënn. Møg bɑ nyingi jøkori Kengø møg-ɑ ɑ́bëëd kì Yerusɑlem: Cɑlum, Akub, Tɑlmön, kí Akimɑn. Cɑlum ɑ ɑ́bëëd ɑ́ jɑngi gen. Cɑ̈gi kì bøli kenyɑni gïti ɑnɑn, tyëng kɑ̈lli gen ɑ́bëëd ɑ Dhøg Rɑ̈dh, kì wɑɑng cyɑ̈ɑ̈ng mwøl. Gen ɑ ɑ́bëëd cøn ge kor-ɑ byëëg Kwɑrri Leebì, keny-ɑ ɑ́nudd ge bëëd ɑ yethi kemmì. Cɑlum wɑ̈d Körè, wɑ̈d Abiyɑsɑp, geki wɑdde tyëng gøl Körɑ̀, ɑ ɑ́bëëd ge kor-ɑ dhø Kemi Jwøng-ɑ Ácwɑ̈ɑ̈j, ni kɑ ɑ́bëëd kweyyi gen, ge kor-ɑ Kemi Jwøng-ɑ Ácwɑ̈ɑ̈j ceth. Pineɑs wɑ̈d Eliɑdhɑr, gøle ókorri yi Jwøng-ɑ Ácwɑ̈ɑ̈j! En ɑ ɑ́bëëd ɑ́ jɑngi gen cøn. Dhekɑriyɑ̀ wɑ̈d Mecelemiyɑ̀ ɑ́bëëd thyew e kor-ɑ dhø Kemi Jwøng-ɑ Ácwɑ̈ɑ̈j. Ji bënn møg-ɑ ɑ́kwɑny o ge korri gen dhøggi dörø bɑ miy ɑ́ryew kí pyɑ̈rø wïdɑ́ryew. Ge bɑ ɑgwedd kí myërr-ɑ bëëd yi gen. Ábëëd ɑ́ Rɑ̈dh Debïd geki jɑltöng Sɑmwel ɑ ɑ́kwɑny kweyyi gen gɑ jɑggi kɑ̈jjɑni. Gen kí kwɑrri gen, ge ɑ́cög gɑ tyëng dhø Kengø. Ádɑ dhøg møg nenni wɑ̈thi tùng bënn, dɑ men yïëbbi wɑɑng wuudø, kí wɑɑng wurlwɑl, kí wɑɑng cyɑ̈ɑ̈ng mwøl, kí wɑɑng cyɑ̈ɑ̈ng böörø, dhøggɑni bënn dɑ jɑggi jøkor. Jøkor møgɑni nyii kønyø yi tyëng kɑ̈lli gen, møg-ɑ bëëdø kì myërri gen. Kɑ ge nyii kurø ki cyɑ̈ng ɑ́bïryew, e ceg kɑ lunyø. Jɑggi jøkor ɑ́ngwen møgɑni bɑ Kwɑrri Leebì, yï gen ɑ́dɑ tegø. O yï gen ɑ́dɑ tegø kì kömi udd-ɑ yij Kengø kí jɑmmì bënn. Gøl Leebì nyi bëëd ɑ buti Kengø mɑ́ gwøøg gen bɑ kori Kengø kí yiebi dhøge kì mwøl yethi cyɑ̈ng. Gøl Leebì gwøøg gen bɑ mïdhi jɑmmi kej kwër. Kí rɑngi jɑmmɑni, kí kïdhi gen yij Kengø, kí dwøøgi gen kɑ̈jji gen kenyi rum gwøg. Kwï gen ɑ́bëëd gwøøg gen bɑ mïdhi jɑmmi kwër, ni møng-ɑ búr, kí byëlø, kí møgi oløg, kí bɑkur, kí yenh-ɑ yømi gen med. De ókwër gwøøg gen bɑ yöli yenh-ɑ yømi gen med. Kwɑɑr Leebì me cwøl ɑ́ Mɑtithiyɑ̀ wɑ̈d Cɑlum nyel-ɑ dwøng kì gøl Körɑ̀, en ɑ ɑ́mïdhi byël-ɑ bɑ ɑbulø. O ópùni kwër nyi pyël-ɑ yi gøl Kɑ̈ɑ̈th kì yethi cyɑ̈nggi Sɑbɑth bënn. Kwï tyëng gøl Leebì bɑ bödhhi thøm kì yij Kengø. O jɑggi kɑ̈llɑni nyi bëëd ɑ yethi udd-ɑ bɑdhhi Kengø, o yï gen bong gwøg megø, mɑ́ ge ceg-ɑ gwøg kì yij Kengø kì dicɑ̈ng kí wɑ̈r. Jøg-ɑ nyingi gen bɑ ɑgwed ɑgɑk, bɑ jɑggi kɑ̈lli Kwɑrri Leebì, ge ɑ́bëëd ɑ Yerusɑlem. Yeiel bene en ɑ ɑ́cöb Gibeon kɑ pëgg-ɑ yije. Cyëge cwøl ɑ́ Mɑɑkɑ̀. Wɑ̈de nyel-ɑ kɑyø, cwøl ɑ́ Abdön, o wɑ̈dde yɑɑg-ɑ kyeelø bɑ Dhur, Kïc, Bɑɑl, Ner, Nɑdɑb, Gedör, Akiyö, Dhekɑriyɑ̀, kí Miklöth, wïyi Cimeɑ̀. Gølɑni ɑ́bëëd ɑ Yerusɑlem kì buti wɑddi gen Kwɑrri Leebì møg-ɑ kyeelø. Ner bɑ wïyi Kïc, o Kïc bɑ wïyi Cɑul. Cɑul yïe ɑ́dɑ wɑ̈dd ɑ́ngwen. Yönɑthɑn, Mɑlkicuɑ̀, Abinɑdɑb, kí Icböceth. Yönɑthɑn bɑ wïyi Mepiböceth, o Mepiböceth bɑ wïyi Miikɑ̀. Miikɑ̀ yïe ɑ́dɑ wɑ̈dd ɑ́ngwen: Pithön, Melek, Tɑreɑ̀ kí Akɑɑdh. Akɑɑdh ɑ bɑ wïyi Yɑrɑ̀, o Yɑrɑ̀ yïe ɑ́dɑ wɑ̈dd ɑ́dɑ̈g: Alemeth, Adhmɑbeth, kí Dhimrì. Dhimrì bɑ wïyi Mödhɑ̀, Mödhɑ̀ bɑ wïyi Bineɑ̀, kí wɑ̈de Repɑiyɑ̀, kí wɑ̈de Eleɑsɑ̀, kí wɑ̈de Adhel. Adhel yïe ɑ́dɑ wɑ̈dd ɑ́bïkyel: Adhrikɑm, Bökeru, Icmɑil, Ceɑriyɑ̀, Obɑdiyɑ̀, kí Aɑnɑn. Tyëng Pelistiyɑ̀ ɑ́nyïɑ̈ggi ki tyëng Isrɑil kì wïj Kïti Gilboɑ̀. Kɑ tyëng Isrɑil mø gïïr nɑ̈g, kɑ Rɑ̈dh Cɑul cyeddi geki wɑ̈dde ki kwï yɑye. De ge ɑ́pïïd yi tyëng Pelistiyɑ̀, kɑ wɑ̈ddi Cɑul ɑ́dɑ̈g: Yönɑthɑn, Abinɑdɑb, kí Mɑlkicuɑ̀ nɑ̈g. Cɑul ɑ́tyeg yi liny, kɑ ree pɑ̈dhi yi nyɑɑr weth. Kedø menɑni ɑ́bëëd e teeg cɑrø kì ri Cɑul. Kɑ nyelɑwøb men-ɑ kɑ̈lli jɑmmi liny mø Cɑul, köbbe kinni, “Wöödh pilí wɑ̈g kì yij bøje, kɑ yɑ nɑ̈ɑ̈g, kipe yɑ ótuug yi tyëng Pelistiyɑ̀ møg-ɑ kwïj Jwøk.” De nyelɑni ɑ́bwøg ki nɑ̈ge. Codhe, kɑ Cɑul pile kwɑnye, kɑ ree møøde köme, ɑthøwe. Keny-ɑ ɑ́lïdhi wømɑni kinni Cɑul ɑ́thøw, ɑlonye ree ki møød kömi pile thyew, ɑthøwe. Cɑul ɑ́thøw geki wɑ̈dde gɑ ɑ́dɑ̈g bënn, o bong wɑ̈de mɑ ɑ́jɑ̈ggi kì bɑnge. Keny-ɑ ɑ́lïng tyëng Isrɑil møg-ɑ bëëdø kì Töör Yidhriil kinni i liny ócyeddø, kɑ Cɑul geki wɑ̈dde nɑ̈g bënn, ɑwiy gen kɑ̈ddi gen piny, kɑ ge órengø. Kɑ tyëng Pelistiyɑ̀ obëënø, ɑpëggi gen kɑ̈ddɑni. Dhuki, ɑkedhi tyëng Pelistiyɑ̀ be yɑgi ji-ɑ ɑ́thøw, kɑ Cɑul geki wɑ̈dde yod gen kì wïj Kïti Gilboɑ̀. Kɑ wïj Cɑul ngul wɑ̈g yi gen, kɑ ɑ́dhedheg linye luny gen wɑ̈g thyew kì ree, kɑ tyëng Pelistiyɑ̀ öd-ɑ myërri gen ki wööni tyɑ̈mø, ge ngɑ̈j-ɑ jwöggi gen geki jii gen. Kɑ jɑmmi liny mø Cɑul cïb gen yij kengi jwøøg gen, kɑ wïje ngɑɑb gen dhø kengi Dɑgön, jwøøg gen. Keny-ɑ ɑ́lïng tyëng Yɑbic kì Gilyɑd ki gïn-ɑ ɑ́göggi Cɑul yi tyëng Pelistiyɑ̀, ɑdhwödh yɑɑg-ɑ teg, kɑ ge kedh-ɑ be dwɑɑyii geki wɑ̈dde, kɑ gï kɑ̈ɑ̈l gen Yɑbic. Akoony gen thɑ óthurø, kɑ ge othuumø ki cyɑ̈ng ɑ́bïryew. Cɑul ɑ́thuw-ɑ bɑng kɑ̀ nuti mïdh en Ciggi Jwøng-ɑ Ácwɑ̈ɑ̈j. Ciggi Jwøng-ɑ Ácwɑ̈ɑ̈j ɑ́pyem yi en, kɑ døøg-ɑ be rɑng ki ɑ́jwöggì. Nuti pyëj-ɑ Jwøng-ɑ Ácwɑ̈ɑ̈j, de ɑ́öd-ɑ yï ɑ́jwöggì. Kɑ nɑ̈g yi Jwøng-ɑ Ácwɑ̈ɑ̈j, kɑ lɑwe mëgge Debïd wɑ̈d Yesì. Kɑ tyëng Isrɑil bënn kedh-ɑ yï Debïd kì Kibrön, kɑ köbbi yi gen kinni, “Wø bɑ dëlí geki remí. Kɑ̈ge dööng cɑgg ɑ́ kɑ ɑ́bëëd Cɑul ɑ́ rɑ̈dh, bɑ yïn ɑ ɑ́pyejji Isrɑil kì yij liny, kɑ yï köbbi yi Jwøgí, Jwøng-ɑ Ácwɑ̈ɑ̈j kinni jie ópyejj-ɑ yi yïn, yï óbëëdø yïn ɑ́ jɑngi gen.” Kɑ jɑggi Isrɑil kedh-ɑ yï Rɑ̈dh Debïd kì Kibrön. Areb gen kwøb kí Debïd, kɑ gø røny gen ɑ́ rɑ̈ɑ̈dh Isrɑil, ni kɑ ɑ́kwøbii yi Jwøng-ɑ Ácwɑ̈ɑ̈j ki dhøg Sɑmwel. Akedh Rɑ̈dh Debïd kí tyëng Isrɑil bënn, kɑ ge pɑ̈ɑ̈r-ɑ kömi kɑɑl Yerusɑlem. Yerusɑlem ɑ́bëëd e cwøl ɑ́ Yebus. O tyëng Yebus, ɑ bɑ tyëngpiny, ɑ́bëëd ge nudd ge obëëdø kì pinyɑni. Kɑ Debïd köbbi yi tyëng Yebus kinni pɑ cuggi wɑ̈dhi kɑɑl dörɑni kinni tek; de döri Dhɑyøn ɑ́mɑg yi Debïd, kɑ døøg-ɑ be cwøllø ɑ́ “Kɑɑl Debïd”. Debïd ɑ́ceg-ɑ kwøb kinni, “Ngɑn-ɑ ókwöngi ki nɑ̈ggø kì kelli tyëng Yebus, ógwøg ɑ́ pënyi liny!” Kɑ liny pej yi Yöɑb wɑ̈d Dheruyɑ̀, kɑ gwøg ɑ́ pënyi liny. Dörɑni ɑ́døøg be cwøllø ɑ́ Kɑɑl Debïd, kipe kɑ ɑ́pëggi Debïd be bëëdø kì yije. Kɑ kɑɑlɑni døøg ki gerø yi Debïd, cɑg kì ri tung-ɑ bɑ ɑthør kì ri kït, kì tung-ɑ wɑɑng cyɑ̈ɑ̈ng mwøl, kɑ bun-ɑ ɑ́döng tyëg ki gerø yi Yöɑb. Debïd ɑ́kedh e ótëngø mɑ́ e ɑ́køny yi Wïlɑ̈bø, Jwøng-ɑ Ácwɑ̈ɑ̈j. Møg bɑ nyingi jøliny Debïd yɑɑg-ɑ ti ki ngɑ̈nyø. Bɑ gen geki tyëng Isrɑil møg-ɑ kyeelø ɑ ɑ́gwøg Debïd ɑ́ rɑ̈dh ni kɑ ɑ́kwøbii yi Jwøng-ɑ Ácwɑ̈ɑ̈j, kɑ pödhø cïb gen piny kidøøj. Yɑcobeɑm kì gøl Acmön bɑ en ɑ mɑl, o en ɑ bɑ jɑngi pëjj-ɑ mɑl gɑ ɑ́dɑ̈g, møg-ɑ pëddi tegø. En ɑ ɑ́nyïɑ̈ggi ki ji miy ɑ́dɑ̈g kɑ gï nɑ̈ge ki ɑkebïdhe. Ryeew pëjj-ɑ mɑl gɑ ɑ́dɑ̈g, bɑ Eliɑdhɑr wɑ̈d Dödö kì gøl Ákö. En geki Debïd ɑ ɑ́nyïɑ̈ggi ki tyëng Pelistiyɑ̀ kì Pɑs Dɑmïm. O ɑ́bëëd e ying-ɑ yij pwödhi ceir keny-ɑ ɑ́cyeddi Isrɑil yi tyëng Pelistiyɑ̀, codhe, ɑcunge geki jøge kì dïpwödhø, ɑnyïɑ̈ggi gen ki tyëng Pelistiyɑ̀. Kɑ wëggi tyɑ̈mø yi Jwøng-ɑ Ácwɑ̈ɑ̈j. Cyɑ̈ng ɑ́kyel jøg ɑ́dɑ̈g kì kelli pëjji liny møg-ɑ mɑl gɑ pyɑ̈r ɑ́dɑ̈g, ɑ́kedhi keny-ɑ di nyɑ kït kun-ɑ bëëd yi Debïd kì buti órøngi kït kì Adulɑm, e jøliny tyëng Pelistiyɑ̀ nudd ge ying-ɑ Töör Repɑim. Betleem ɑ́mɑg yi liny Pelistiyɑ̀ kì bøli keny-ɑ ɑ́bëëd Debïd ying-ɑ be ywömi ree wïj nyɑ kït. Kɑ Debïd mɑg yi rummi døøg pɑc, ɑkööbe kinni, “Yɑ dwɑdd-ɑ mɑ̈dhø ki pïi yith men-ɑ ying dhø döri Betleem, dɑ́ men ɑ ómuuj yɑn!” Codhe, ɑbëën jøg teg ɑ́dɑ̈g wɑ̈g, kɑ ge cør-ɑ kɑɑl liny Pelistiyɑ̀, kɑ ge mïdd-ɑ wɑ̈g ki pï kì yij yith, kɑ pïgɑni muuj gen Debïd. De gï nuti mɑɑdh en, gï ɑ́kunye Jwøng-ɑ Ácwɑ̈ɑ̈j gɑ gëëdhi. Akööbe kinni, “Pïg pɑ mɑdh yi yɑn kinni tek, mɑ́ mɑdhi pïgɑni nɑ mɑdhi remmi jøg-ɑ ɑ́muuj wëyi gen!” Codhe, ɑbɑ̈nye ki mɑdhi pïgɑni. Møgɑni nyodh-ɑ tegi jøliny ɑ́dɑ̈g møg-ɑ ti ki ngɑ̈nyø. Abicɑy ómï Yöɑb ɑ ɑ́bëëd ɑ́ jɑngi jøliny møg-ɑ mɑl gɑ pyɑ̈r ɑ́dɑ̈g. Ányïɑ̈ggi e kete ki ji miy ɑ́dɑ̈g, kɑ gï cööbe ki ɑkebïdhe, kɑ gï nɑ̈ge bënn. Ngɑ̈nyi kì bɑng tege kì kelli jøliny pyɑ̈r ɑ́dɑ̈g møg-ɑ mɑl, kɑ ogöögø ɑ́ jɑngi gen, de pɑ ti ki ngɑ̈nyø kibøli ɑ́dɑ̈g-ɑ mɑl. Benɑiyɑ̀ wɑ̈d Yöyɑdɑ̀ kì Kɑbdhiil ɑ́bëëd e ngɑ̈nyi ki tegø, ɑ́göög ki jɑmmì mø teeg, jöddi liny ɑ́ryew kì kelli liny tyëng Moɑb ɑ́nɑ̈g yi en. Kɑ kedh-ɑ ød ngur cyɑ̈ng megø kì yij ɑ́piy, ɑnɑ̈ge ngur. Kɑ jɑl Rïp me bɑ̈ɑ̈r cɑrø, bɑ̈re pöödh-ɑ mïtïr ɑ́ryew, o ngëde dwøng gø nɑ̈ge, o yïe ɑ́dɑ ɑkebïdh me dwøng eni jɑl Rïp menɑni. Köme ɑ́pɑ̈ɑ̈r yi Benɑiyɑ̀ ki lodhe kɑ ɑkebïdhe gwɑre, kɑ gø nɑ̈ge ki ɑkebïnhɑni. Benɑiyɑ̀ bɑ dhɑnhø ɑ́kyel kì kelli jøliny pyɑ̈r ɑ́dɑ̈g. Møgɑk bënn bɑ gïg teg møg-ɑ ɑ́gwøg yi en. Ákwɑny yi Debïd ɑ́ jɑngi jøg-ɑ korii. Ábëëd nyinge ying-ɑ mɑl kì kelli jøliny møg-ɑ mɑl gɑ pyɑ̈r ɑ́dɑ̈g, de pɑ pɑ̈ɑ̈r ki ɑ́dɑ̈g-ɑ mɑl. Debïd ɑ́bëëd ɑ Dhiglɑg keny-ɑ ɑ́pɑ̈ɑ̈re yïnø kɑ ɑ́dwɑddii nɑ̈gø yi Cɑul wɑ̈d Kïc, dɑ jøliny mø ngɑ̈nyi yëthi liny, o ge pɑ nyi døøg cyɑ̈n mɑ ɑ́rëbi ki en. Jøgɑni bɑ yɑɑg gøl Ben Yɑmïn, ɑ ying gøl yɑɑ Cɑul. Ge pɑ nyi bɑ̈ɑ̈jø ki tøngg wɑlɑ̀ ki wethh, wɑlɑ̀ ki bɑ̈ddì, o ge bɑ nywɑnyy bënn. Møg bɑ nyingi jøliny møg-ɑ ɑ́ngɑ̈nyi yëthi liny kì gøl Gɑd, gen ɑ jøg-ɑ ɑ́kedhi kömi yɑɑy Debïd keny-ɑ ɑ́bëëde kì yij ønteg kì yij pɑ̈l. Ge ɑ́bëëd ge ngɑ̈ny nyɑɑg ki ködd kí tøngg, ge teg ni ngurrì kɑ̀ nënni gen, o ge yöd ni ɑ́køøny wïj kït, kɑ̀ rïngi gen. Kwï jø gøl Gɑd møgɑni ɑ́pyejj-ɑ ji ɑ́lïp, møøgø ɑ́pyejj-ɑ miyø. Kì dwɑ̈y Abib, e Nɑm Urdun pɑ̈ngø kɑ obeedhø, nɑmɑni ɑ́bɑ̈ɑ̈n gen, kɑ tyëng-ɑ ɑ́bëëd kì yij tör kedhhi gen kì wɑɑng cyɑ̈ɑ̈ng mwøl kí wɑɑng cyɑ̈ɑ̈ng böörø. Cyɑ̈ng ɑ́kyel Debïd yïe ɑ́bëën kì ønteg keny-ɑ ɑ́bëëde, yi jøg mø kɑ̈ɑ̈l gøl Ben Yɑmïn kí gøl Yeudɑ̀. Kɑ Debïd bï-ɑ wɑ̈g kì ød, be yïddø ki jøgɑni, kɑ gï köbbe kinni, “Keløg wu bï kɑ mër, wu dwɑdd-ɑ kønyi yɑn, døøj! De keløg wu dwɑdd-ɑ twɑ̈nyi yɑn tyëngmɑ̈ɑ̈nø, e bong gïnrɑj mɑ ɑ́göggɑ wun, møgɑni óbëëd ge ngɑ̈nyi yi Jwøøg kweyyee, o wu cɑye’ cɑyø.” Codhe, kɑ Amɑsɑy, ɑ ɑ́gwøg ɑ́ jɑngi jøliny møg-ɑ pyɑ̈r ɑ́dɑ̈g, köme bëën yi wëyi Jwøk, ɑkööbe kinni, “Debïd wɑ̈d Yesì, wø bɑ jií! Yï óbëëdø ki mër, wuki ji-ɑ køny yïn! Yï bɑ ɑkøny yi Jwøk.” Kɑ jøgɑni cwøl yi Debïd, kɑ gï gwøge gɑ pëjji linye. Kwï jøliny kì gøl Mɑnɑsè møg-ɑ ɑ́kedhi kömi Debïd keny-ɑ ɑ́rëbe ki tyëng Pelistiyɑ̀, kì bøli keny-ɑ ɑ́bëëd ge ónyïɑ̈ggø ki Cɑul. De Debïd ɑ́bɑny yi rɑ̈nhi Pelistiyɑ̀, kɑ köbbi kinni døøge pɑc, mɑ́ rɑ̈nhi Pelistiyɑ̀ ɑ́bëëd ge óböggø kinni Debïd ódøøg kömi Rɑ̈dh Cɑul, ɑdøøg Debïd Dhiglɑg. Møg bɑ jøliny kì gøl Mɑnɑsè møg-ɑ ɑ́kedhi kömi Debïd, keny-ɑ ɑ́kedhe Dhiglɑg: Adnɑɑ̀, Yödhɑbɑd, Yediyɑil, Mikɑil, Yödhɑbɑd, Elïu, kí Dhilethɑy. Ge ɑ́bëëd gɑ pëjji ɑ́lïp kì gøl Mɑnɑsè. Debïd ɑ́køny yi gen ki nyɑɑg ki tyëng-ɑ nyi röödhø, mɑ́ ge ɑ́bëëd gɑ pëjji liny mø teg. Jøliny Debïd ɑ́kedh ge óngënyø, mɑ́ e dɑ ji møg nyi bï kömi gen yethi cyɑ̈ng. Kɑ yɑyɑni ódøngø ki mendwøng. Jøliny møgɑni bënn ɑ́kedhi Kibrön be gwøgi Debïd ɑ́ rɑ̈ɑ̈dh Isrɑil bëne. Tyëng Isrɑil møg-ɑ kyeelø ɑ́dwɑdd-ɑ møgɑni ceth. Ge ɑ́bëëd ki cyɑ̈ng ɑ́dɑ̈g kì buti Debïd, ge cɑm-ɑ gïgcɑmm kí gïg mɑdh møg-ɑ ɑ́gwir yi tyëng Isrɑil kipe gen. Gøl Isɑkɑr, kí Dhebulun, kí Nɑptɑlì møg-ɑ ɑ́kɑ̈ɑ̈l wɑɑng wuudø kun lɑ̈wi, ge ɑ́kɑ̈ni ki gïgcɑmm, kí møng-ɑ búr, kí nywøli ólɑm møg thij, kí møg thwøwø, kí møgi oløg, kí møøw dhetun. Gï ɑ́kɑ̈ɑ̈l gen ɑ kömi ɑderr, kí ɑmɑl, kí ógɑll, kí wɑ̈dhh. Ge ɑ́kɑ̈ni thyew ki dhög kí dyëg. O ge nɑ̈g gɑ møg cɑm. Møg bënn nyodh-ɑ medi pëëth kì yij pödhø bëne. Rɑ̈dh Debïd ɑ́kööb ki pëjji liny bënn møg-ɑ ɑ́jɑɑg jøliny ɑ́lïp, kí pëjji miy. Codhe, kɑ tyëng Isrɑil bënn köbbe kinni, “Keløg wu oyïëyø, o bɑ gïn dwɑddi yi Jwøgee, Jwøng-ɑ Ácwɑ̈ɑ̈j, ödi wɑ yï wɑddee geki ókwër kí Kwɑrri Leebì kì kɑ̈dd-ɑ bëëd yi gen ki wöödø kinni bï gen, o wɑ cugi wɑ kì keny. Codhe, o wɑ kedhi wɑ be yɑɑbi Sɑnduug Ciggi Jwøk, ɑ ɑ́bëëd e ówøyø kɑ ɑ́jyɑ̈ɑ̈g Cɑul.” Kɑ ji pëthi gen ómïnø yi møgɑni, ɑyïëy gen. Acøng tyëng Isrɑil bënn yi Debïd, cɑg kì keew Rïp kì wɑɑng wurlwɑl, gïti Amɑth kì wɑɑng wuudø kipe kɑ̈ɑ̈li Sɑnduug Cigg kì Kiriɑt Yeɑrïm, e kɑ̈ɑ̈l-ɑ Yerusɑlem. Codhe, kɑ Debïd kedh-ɑ Bɑɑlɑ̀ geki teedø bëne, o Bɑɑlɑ̀ bene Kiriɑt Yeɑrïm, kì Yeudiyɑ̀, ge kedh-ɑ be dwɑɑyi Sɑnduug Ciggi Jwøk, ɑ cungi ɑ́ nyingi Jwøng-ɑ Ácwɑ̈ɑ̈j, ɑ kwömø kì kɑɑm kerobb. Akɑ̈ɑ̈l gen Sɑnduug Cigg wɑ̈g kì gøl Abinɑdɑb, kɑ gø cïb gen yij yɑ̈y me nyɑ̈n. Kɑ yɑ̈yɑni køøl yi Udhɑ̀ geki Akiyö. Debïd ɑ́bëëd e ceg-ɑ yëggø geki teedø ge lenh-ɑ Jwøk, ge owörø ki thøm kí kɑ̈ngì. Keny-ɑ ɑ́wɑ̈dhi gen rɑri pwödhi Kïdön, kɑ wɑ̈dhh ocyerø, Kɑ Udhɑ̀ cinge rïïje, kɑ Sɑnduug Cigg mɑge. Kɑ Jwøng-ɑ Ácwɑ̈ɑ̈j pyëwe órënyø, ɑnɑ̈ge Udhɑ̀ kipe kɑ ɑ́nywɑle Sɑnduug Cigg. Áthøw kì kenyɑni kì bøli Jwøng-ɑ Ácwɑ̈ɑ̈j, ɑcɑɑg kenyɑni ɑ́ Peredh Udhɑ̀, nyingɑni wɑng-ɑ “Cɑ́yi Udhɑ̀.” Kwøbbi nɑ̈gi Udhɑ̀ yi Jwøng-ɑ Ácwɑ̈ɑ̈j ɑ́bëëd e ledh kì yï Debïd. Codhe, ɑbwøg Debïd yi Jwøk, kɑ okööbø kinni, “Sɑnduug Cigg ókɑ̈l yi yɑn kidï ɑnɑn?” Acöge e nuti kïdhi Yerusɑlem yi Debïd. De ɑ́yöd gø cïbe’ gøl jɑl me cwøl ɑ́ Obed Edöm, jɑl Gɑth. Kɑ obëëdø kì gølɑni ki dwɑ̈tt ɑ́dɑ̈g, ɑgyëëdh gøl Obed Edöm yi Jwøng-ɑ Ácwɑ̈ɑ̈j kí jɑmme bënn. Kirɑm rɑ̈ɑ̈dh Suur ɑ́ödi yï Debïd ki jøngyew, kɑ ödi yi en ki yenh sɑndɑl, kí bödhhi tweg ki kïddi geki bödhhi pɑ̈mmì, møg gëddi Debïd ki ød. Kɑ yod yi Debïd kinni ɑ́rum ki kwɑnyø yi Jwøng-ɑ Ácwɑ̈ɑ̈j ɑ́ rɑ̈ɑ̈dh Isrɑil, kɑ lɑ̈ge gwøge e dwøng kipe jie. Kɑ Debïd ónyömø ki mɑ̈nn mø gïïr kì Yerusɑlem, kɑ nyöddi yi mɑ̈nnɑni ki wɑ̈dd geki womɑ̈nn mø gïïr. Møg bɑ nywøl møg-ɑ ɑ́nyöddii keny-ɑ ɑ́yinge Yerusɑlem: Cɑmuɑ̀, Cöbɑb, Nɑthɑn, Sølømøn, Ibɑɑr, Elicuɑ̀, kí Elpelet, Nögɑ̀, Nepeg, Yɑpiyɑ̀ Elicɑmɑ̀, Beelyɑdɑ̀, kí Elipelet. Keny-ɑ ɑ́lïng tyëng Pelistiyɑ̀ kinni Debïd ógwøgø ɑ́ rɑ̈ɑ̈dh Isrɑil bëne, ɑkedhi jøliny be mɑgii. Kɑ Debïd kedh-ɑ be tuumø ki gen. Keny-ɑ ɑ́wɑ̈nhi tyëng Pelistiyɑ̀ Töör Repɑim, ɑcɑ̈gi gen ki yɑg. Apyëëj Jwøk yi Debïd kinni, “Pɑ̈ɑ̈rɑ kömi tyëng Pelistiyɑ̀? Ge ówëggí tyɑmø yi yɑn?” Alöggi Jwøng-ɑ Ácwɑ̈ɑ̈j kinni, “Ngee, pɑ̈ɑ̈r kömi gen! Ge ówëggɑ tyɑmø yi yïn!” Codhe, ɑpɑ̈ɑ̈r Debïd kömi gen kì Bɑɑl Perɑdhïm, ɑtyɑme gïn. Kɑ Debïd okööbø kinni, “Yɑ ɑ́wëggi tyɑ̈mø yi Jwøk kɑ yɑ mödd-ɑ kelli tyëngmɑ̈ɑ̈nø ni bɑɑyø.” Acwølli kenyɑni ɑ́ Bɑɑl Perɑdhïm. De keny-ɑ ɑ́rengi tyëng Pelistiyɑ̀, ngïjji jwöggi gen ɑ́wiy gen piny, ɑkööb Debïd kinni i rɑ̈ɑ̈b ngïjji jwöggɑni. Acigi tyëng Pelistiyɑ̀ dwöög yij törɑni be yɑg. Apyëëj Jwøk yi Debïd, kɑ Jwøk ólöggø kinni, “Wu ko pɑ̈ɑ̈r kömi gen wu ying-ɑ tuung, de kɑ̈l wun ngɑ̈thi gen, kɑ wu pɑ̈ɑ̈r wun kömi gen wu kɑ̈ɑ̈l-ɑ tung-ɑ kyeelø, wu rwööm ki yenh bɑlsɑm. Keny-ɑ ólïng ki ywøøg tyel kì mɑl wɑ̈thi yenh, kɑ wu pɑ̈ɑ̈r wun kömi gen, mɑ́ yɑ ómøøl mɑl bøli wun, be nyɑɑg ki tyëng Pelistiyɑ̀, o ge tyɑm.” Kɑ Debïd møg-ɑ ɑ́köbbii yi Jwøk gwøge, ɑcyedde tyëng Pelistiyɑ̀, cɑg kì Gibeon gïti Gedher. Atɑɑy nyingi Debïd kömi piny bëne, kɑ pödhh bënn göjji böggi Debïd yi Jwøng-ɑ Ácwɑ̈ɑ̈j. Debïd ree ɑ́gëdde ki ød kì Yerusɑlem, kɑɑl-ɑ ɑ́mɑge kì yï tyëng Yebus, ɑ løg tyëngpinyɑni, ɑtyenye kej Sɑnduug Ciggi Jwøk thyew, kɑ gudd-ɑ piny ki kemɑ̀. Codhe, ɑkööbe kinni, “Sɑnduug Cigg óbyell-ɑ yi Kwɑrri Leebì keti gen, mɑ́ gen ɑ ɑ́yieny yi Jwøng-ɑ Ácwɑ̈ɑ̈j, o gø nyi byelli gen, o keje nyi tyeny yi gen, gïti ɑtheer.” Kɑ Debïd tyëng Isrɑil bënn cwøøle Yerusɑlem, o Sɑnduug Cigg kɑ̈ɑ̈l gen keny-ɑ ɑ́rum keje ki tyenyø yi en, kipere. Codhe, ɑöde yï Kwɑrri Aɑron geki Kwɑrri Leebì. Ji miyø kí pyɑ̈r ɑ́ryew ɑ ɑ́bï kì gøl Kɑ̈ɑ̈th, ge pyejj-ɑ yi Uriel. Ji miy ɑ́ryew kí pyɑ̈r ɑ́ryew ɑ ɑ́bï kì gøl Merɑrì, ge pyejj-ɑ yi Asɑiyɑ̀. Ji miyø kí pyɑ̈r ɑ́dɑ̈g ɑ ɑ́bï kì gøl Gercön, ge pyejj-ɑ yi Yöiil. Gøl Elidhɑpɑn ɑ́bï gɑ miy ɑ́ryew, ge pyejj-ɑ yi Cemɑiyɑ̀. Gøl Kibrön ɑ́bï gɑ pyɑ̈r ɑ́bïdɑ̈g, ge pyejj-ɑ yi Eliel. Gøl Udhiel ɑ́bï gɑ miyø kí pyɑ̈rø wïdɑ́ryew, ge pyejj-ɑ yi Aminɑdɑb. Kɑ ókwër ryeet, Dhɑdök kí Abiyɑthɑr cwøl yi Debïd, geki Kwɑrri Leebì ɑ́bïkyel, ɑ løg Uriel, Asɑiyɑ̀, Yöiil, Cemɑiyɑ̀, Eliel kí Aminɑdɑb. Aköbbe pëjji Kwɑrri Leebì kinni, “Wun ɑ bɑ jɑggi gøl Leebì. Kwëru ri wun, wuki Kwɑrri Leebì møg-ɑ kyeelø, o Sɑnduug Ciggi Jwøng-ɑ Ácwɑ̈ɑ̈j, Jwøøg Isrɑil kɑ̈ɑ̈l yi wun, o cïb keny-ɑ ɑ́gwir yi yɑn kipere. Wɑ ɑ́cɑy yi Jwøng-ɑ Ácwɑ̈ɑ̈j kɑ per kɑ ɑ́bëëd e pɑth ki wun ɑ ɑ́kɑ̈ɑ̈lii, o nuti kwërø kidøøj.” Codhe, kɑ ókwër geki Kwɑrri Leebì ri gen kwër gen kipe kɑ̈ɑ̈li Sɑnduug Ciggi Jwøng-ɑ Ácwɑ̈ɑ̈j, Jwøøg Isrɑil. Kɑ byëël yi Kwɑrri Leebì ki lødh, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j. Kɑ jɑggi gøl Leebì köbbi yi Debïd kinni kɑ̈bbi gen ki Kwɑrri Leebì møg wör ki thøm, ki medi pëëth. Kɑ Kenɑniyɑ̀ kwɑny ɑ́ jɑngi jø gøl Leebì møg-ɑ bɑ bödhhi thøm, mɑ́ en ɑ luudø kì kelli gen. Adhwödh Rɑ̈dh Debïd geki jɑggi Isrɑil, kí pëjji liny, kɑ ge kedh-ɑ gøl Obed Edöm be kɑ̈ɑ̈li Sɑnduug Cigg, kɑ ge otugø ki mendwøng. Kɑ ge ongɑ̈dø ki wɑ̈dhh ɑ́bïryew kí órömm ɑ́bïryew gɑ gëdhhì, kipe kinni o Kwɑrri Leebì møg-ɑ byelli Sɑnduug Cigg ókøny yi Jwøk. Debïd ɑ́bëëd e rug-ɑ ógødh men-ɑ ócwɑ̈jø ki kor-ɑ yöm geki bödhhi thøm, kí Kenɑniyɑ̀ jɑngi gen, geki Kwɑrri Leebì møg-ɑ byelli Sɑnduug Cigg. Debïd ɑ́bëëd e orugø thyew ki pɑri kwër men-ɑ ócwɑ̈jø ki kor-ɑ yöm. Akɑ̈ɑ̈l Sɑnduug Ciggi Jwøng-ɑ Ácwɑ̈ɑ̈j Yerusɑlem yi tyëng Isrɑil, ge óryeerø ki medi pëthi gen, kɑ̈ngì okodhø, bullì opwödø, o thøm othomø. Keny-ɑ ɑ́wɑ̈nhi Sɑnduug Jwøng-ɑ Ácwɑ̈ɑ̈j kɑɑl, kɑ Mikɑl nyɑɑr Cɑul ómëddø kì ɑwɑj, ɑlidhe Rɑ̈dh Debïd, e óyëggø pyëwe omedø, kɑ gø byenye ki pyëwe. Akïdhi gen Sɑnduug Cigg yij kem-ɑ ɑ́gurrii yi Debïd. Codhe ɑgeedh Jwøk ki gëdhh-ɑ nyi rɑ̈b geki gëdhhi mër. Keny-ɑ ɑ́rum Debïd ki muuji gëdhhì, ɑkwënge ji ki nyingi Jwøng-ɑ Ácwɑ̈ɑ̈j. Anënge teen-ɑ ɑ́ying kenyɑni; cwøw kí mɑ̈nn; ngɑn mëgg-ɑ ópun kí nyɑ ɑ́tungi rïngø ɑ́kyel, kí ópùni benø. Akɑ̈bbi Debïd ki kwï Kwɑrri Leebì møg nyi mɑlli Jwøng-ɑ Ácwɑ̈ɑ̈j, Jwøøg Isrɑil, kì bøli Sɑnduug Cigg ki wör, o gø nyi lejji gen. Akwɑɑny Asɑp ɑ́ jɑgø, kí Dhekɑriyɑ̀ ɑ́ ókwøme. O Yeiel, kí Cemirɑmöth, kí Yekiel, kí Mɑtithiyɑ̀, kí Eliɑb, kí Benɑiyɑ̀, kí Obed Edöm, kí Yeiel gen ɑ thom thøm, O kɑng-ɑ kwɑ̈ɑ̈n nyi kodh-ɑ yi Asɑp. O kɑ̈ngì nyi kodh-ɑ yi ókwër ɑ́ryew, ɑ løg Benɑiyɑ̀ geki Yɑɑdhiel kì bøli Sɑnduug Cigg. Cyɑ̈ngɑni ɑ ɑ́kwɑɑny Asɑp geki Kwɑrri Leebì møg-ɑ kyeelø, o ge nyi lenhi gen Jwøng-ɑ Ácwɑ̈ɑ̈j. Pøjju Jwøng-ɑ Ácwɑ̈ɑ̈j, kɑ dönge lejji wun köbbu pödhh bënn ki gïg-ɑ ɑ́gøgge. Wör wun wu lejj-ɑ en kwøbu gïïngɑ̈ngø møg-ɑ ɑ́gøgge. Med pëthi wun mɑ́ wɑ bɑ møge wiy pëthi tyëng-ɑ mɑllii mïni gen. Kedhu yï Jwøng-ɑ Ácwɑ̈ɑ̈j o wu kønye, kɑ nyi mɑlli wun ceth. Jwøng-ɑ Ácwɑ̈ɑ̈j bɑ Jwøgee, Cigge bɑ kipe kömi piny bëne. Wɑ̈thi wun ko wïl ki lwömi Jwøk, eni lwöm-ɑ ɑ́gwøge ɑ́ men gïti ɑtheer. Lwöm-ɑ ɑ́lwøbe geki Abrɑhɑm, gen ɑ møg-ɑ ɑ́könge Isɑɑk. Jwøng-ɑ Ácwɑ̈ɑ̈j ɑ́lwööb geki Yɑgob, ge ɑ́lwööb ki Isrɑil ki lwöm-ɑ gïti ɑtheer, Gø ɑ́köbbe kinni, “Yï ómëggɑ piny Kɑnɑɑn, pinyɑni óbëëd ɑ́ mií.” Kwɑnni jii Jwøk ɑ́bëëd ge nøg, ge ɑ́bëëd gɑ tyëngpɑth kì piny Kɑnɑɑn. Ge ɑ́wïïn kì yethi pödhh, ge nyii dhwödhø kì pönhï kí pönhï. De yïn ɑ Jwøk, nyingi gen ko wëggí guudø; kɑ rɑ̈nhì nyi ceg kinni kor ge gïn: “Tyëng-ɑ ɑ́yienyɑ gɑ bɑ̈nggɑ ko göggi wun ki gïgrijjø, tyëngtöng møgɑ ko nywɑl wun.” Lejjí Jwøng-ɑ Ácwɑ̈ɑ̈j ki wör, yïn ɑ kömi piny bëne! Kømmu kwøbbi yïëne yethi cyɑ̈ng bënn. Köbbu pödhh kwøbbi dhwɑ̈nge, kí gïgdøngø møg-ɑ ɑ́gögge jie! Mɑ́ Jwøng-ɑ Ácwɑ̈ɑ̈j dwøng, o ceg kɑ lenhø, o ceg kɑ wørø kibøli jwögg bënn. Jwöggi pödhh-ɑ kyeelø bënn bɑ ngïjji yøw, dɑ́ Jwøng-ɑ Ácwɑ̈ɑ̈j ɑ ɑ́gwøg mɑl. Dhwɑ̈ng geki döng ying-ɑ bɑdhhe, Kenge pɑ̈ngø yi tegø geki medi pyëw. Lejju Jwøng-ɑ Ácwɑ̈ɑ̈j, wun ɑ tyëng kömi piny bënn, lejju dönge geki tege. Lejju dhwɑ̈ɑ̈ng Jwøng-ɑ Ácwɑ̈ɑ̈j, kɑ̈ni wun ki gëdhhì, kɑ wu bïu bøle. Dwöög wun köthi wun piny, kì bøli Ákyel-ɑ bɑ Kwërø keny-ɑ ócwöbe. Kömi piny bëne, okïïrø kì bøle! Piny ɑ́cïbe keje e pɑ nhɑ̈nhø, o pɑ cuggi ki nyigø. Mïni pëthi wun, wun ɑ mɑl kí piny! Köbbu pödhh bënn kinni, “Jwøng-ɑ Ácwɑ̈ɑ̈j bɑ rɑ̈dh.” Wiy nɑɑm omelø ngɑ̈rre geki lɑ̈yy-ɑ yije bënn, mïni pyëw thïm geki gïg-ɑ yije bënn! Codhe o yenh kïïw gen kì yij thïm ki medi pëthi gen, keny-ɑ óbëën Jwøng-ɑ Ácwɑ̈ɑ̈j be jɑɑgi kömi piny. Pwøj wun Jwøng-ɑ Ácwɑ̈ɑ̈j, mɑ́ e døøj, mɑ̈ɑ̈dø mee gït-ɑ ɑtheer. Köbbu en kinni, “Yiel wøn, yïn ɑ Jwøk yïëni wøn, cøng wøn kej ɑ́kyel, kɑ wø yieel kì cinggi pödhh-ɑ kyeelø, o yï pwøj yi wøn, o nyingí kwërø lejji.” Lejju Jwøng-ɑ Ácwɑ̈ɑ̈j, Jwøøg Isrɑil! Lejju en ɑnɑn gïti ɑtheer! Kɑ ji bënn okööbø kinni, “Amen” kɑ Jwøng-ɑ Ácwɑ̈ɑ̈j lenhi gen. Acïb Asɑp geki wɑdde Kwɑrri Leebì yi Debïd gɑ tyëng-ɑ nyi lɑ̈mø kì bøli Sɑnduug Lwömi Jwøng-ɑ Ácwɑ̈ɑ̈j kì keny-ɑ ɑ́mïdhii. O gwøøg gen nyi gwøg yi gen yethi cyɑ̈ng. Ge nyi køny-ɑ yi Obed Edöm wɑ̈d Yeduthun geki jø gøl gen mø kwɑnni gen bɑ pyɑ̈r ɑ́bïkyel wïdɑ́bïdɑ̈g. Ösɑ̀ geki Obed Edöm ɑ ɑ́jɑɑg tyëng-ɑ kor dhøggi döri kɑɑl. Dhɑdök geki wɑdde ókwër ɑ nyi mɑlli Jwøng-ɑ Ácwɑ̈ɑ̈j kì kej mɑ̈ddø kì Gibeon. Kì yethi cyɑ̈ng kì mwøl kí böörø, ɑ nyi rɑ̈ɑ̈b gëdhhì bënn kì wïj këli lɑm ni kɑ ógwedii kì yethi cigg-ɑ ɑ́mëggi tyëng Isrɑil yi Jwøng-ɑ Ácwɑ̈ɑ̈j. Ëmɑn geki Yeduthun ɑ́bëëd ge nud geki ji-ɑ ɑ́kwɑny o ge nyi lejji gen Jwøng-ɑ Ácwɑ̈ɑ̈j ki wör, kipe mɑ̈ɑ̈dø mee men-ɑ gïti ɑtheer. Thyew Ëmɑn geki Yeduthun ɑ ɑ́jɑɑg thømi wörri lejji Jwøng-ɑ Ácwɑ̈ɑ̈j. Tyëng gøl yɑɑ Yeduthun ɑ ɑ́jɑɑg tyëng-ɑ korri dhøggi döri kɑɑl. Codhe, kɑ ji bënn kedh-ɑ pɑc, kɑ Debïd kedh-ɑ be kwëngi gøle. Rɑ̈dh Debïd ɑ́bëëd e ying-ɑ gøle, ɑöde yï jɑltöng Nɑthɑn. Keny-ɑ ɑ́bëëne ɑköbbe gøn kinni, “Yɑ bëëd ɑ ød mɑ ɑger ki sɑndɑl, yɑnh-ɑ myëër kì keny, de Sɑnduug Ciggi Jwøng-ɑ Ácwɑ̈ɑ̈j mïdh ɑ yij kemɑ̀!” Alöggi Nɑthɑn kinni, “Gwøg gïn-ɑ rømmi yi yïn, mɑ́ yï ókøny yi Jwøk.” De Nɑthɑn ɑ́köbbi yi Jwøk kì wɑ̈rɑni kinni, “Kedh kɑ kwøbbɑ köbbí Debïd bɑ̈ngɑ kinni, ‘Pɑth ki en ɑ ger Kengø men-ɑ yije bëëdɑ. Yɑ nuti bëëdø kì yij Kengø kinni tek, kër-ɑ ɑ́kɑ̈ɑ̈lɑ tyëng Isrɑil wɑ̈g kì Rïp gïti ɑnɑn. Yɑ nyi bëëd ɑ yethi kemmì, kɑ yɑ nyi cyɑ̈g-ɑ keny kí keny. Kì yij wɑ̈nh-ɑ ɑ́cɑɑdhɑ bëne kí tyëng Isrɑil, bong dhɑnhø mɑ ɑ́pɑ̈nyɑ pyëjø, kì kelli jɑgg-ɑ ɑ́kwɑny yi yɑn kinni, ɑ́ kipe ngø ɑ pɑ gëddí yɑn ki Kengø men-ɑ ógerø ki sɑndɑl yɑnh-ɑ myëër.’ “De köbbí bɑ̈ngɑ Debïd kinni, ‘Yɑn yɑ Wïlɑ̈bø, Jwøng-ɑ Ácwɑ̈ɑ̈j, bong gïn dhɑl yɑn kinni tek. Yï ɑ́kwɑny yi yɑn, yï kwɑy-ɑ dyëg kì pɑ̈l, kɑ yï kwɑnyɑ yïn ɑ́ jɑngi tyëng Isrɑil. Yɑ ɑ́bëëd yɑ nud kì butí, kì kɑ̈jj-ɑ ɑ́kedhí, kɑ tyëngmɑ̈ɑ̈nø bënn tyɑmɑ. Nyingí ɑ́tïngɑ mɑl ni nyingi tyëng-ɑ per gen teg, kí jɑgg-ɑ døngø kì kömi piny. Keny-ɑ óthumi cyɑ̈nggí kɑ yï kedh-ɑ kun-ɑ di kweyyí, dhɑnhø ɑ́kyel kì kelli wɑ̈ddí ógwøgɑ ɑ́ rɑ̈dh, o pödhø ómïdhi yi en e teeg. Bene en ɑ ógëddi yɑn ki Kengø, o rɑ̈ɑ̈dhø mee ómïdhi yi yɑn gïti ɑtheer. Yɑ óbëëd yɑn ɑ́ wïye, o óbëëd ɑ́ wɑ̈dɑ, pɑ wiy yi yɑn ki kønyø ni kɑ ɑ́wiyɑ Cɑul, ngɑn-ɑ ɑ́bɑny yi yɑn kɑ yï cïbɑ keje. Ócïb yi yɑn ɑ́ jɑngi jiɑ geki pödhɑ gïti ɑtheer, rɑ̈ɑ̈dhø mee óbong cöge gïti ɑtheer.’ ” Kɑ Debïd köbbi yi Nɑthɑn ki gïg-ɑ ɑ́köbbii yi Jwøk bënn. Codhe, ɑkedhi Rɑ̈dh Debïd yij Kemi Wë, ɑpëgge piny kì bøli Jwøng-ɑ Ácwɑ̈ɑ̈j, kɑ ókwɑ̈jjø kinni, “Yɑn ɑ́ men Yïn ɑ Jwøng-ɑ Ácwɑ̈ɑ̈j? O gøl wøn ɑ́ ngø, ɑ göggí yɑn ki gïndøj ni men? Anɑn yï nudd yï ogöögø ki mø gïïr, yï ɑ́kööb kipe kwɑrrɑ kì yethi runn møøgø møg-ɑ óbï, o yïn ɑ Jwøk, Jwøng-ɑ Ácwɑ̈ɑ̈j, yɑ ɑ́mïdhi yi yïn ni dhɑnhø me dwøng. Á ngø këti ɑ cuggi köbbi yïn yi yɑn! Yɑ ngɑ̈nyi yi yïn kidøøj, de yɑ ɑ́theg yi yïn ceth yɑn ɑ bɑ̈ngí. Bɑ gïn-ɑ ɑ́dwɑddi yi yïn ɑ ɑ́göggí yɑn, kɑ yɑ nyudhí møg-ɑ ócwöb kipe gølɑ dhuki megø. Yïn ɑ Jwøng-ɑ Ácwɑ̈ɑ̈j, bong ngɑn ni yïn, ngɑ̈nyi yi wøn kinni yï ketí ɑ bɑ Jwøk. Bong pödhø me ni Isrɑil kì kömi piny, mɑ́ ge ɑ́yiel yi yïn kì yij bɑ̈ɑ̈ngø kì Rïp, kɑ ge gwøg yi yïn gɑ jií. Kɑ nyingí tɑɑy-ɑ kömi piny bëne, kiper gïgdøngø kí gïïngɑ̈ngø møg-ɑ ɑ́göggí gen. Tyëng Isrɑil ɑ́gwøg yi yïn gɑ jií gïti ɑtheer, o yïn, yï Jwøng-ɑ Ácwɑ̈ɑ̈j ɑ bɑ Jwøøg gen. “Anɑn yïn ɑ Jwøng-ɑ Ácwɑ̈ɑ̈j, gwøg møg-ɑ ɑ́köbbí yɑn bënn kinni, ge ógöggí yɑn wøki kwɑrrɑ, kɑ wiy møg-ɑ ɑ́kwøb yi yïn pɑ̈dhi gen kɑ̈jji gen. Perí ólïngi, kɑ ji nyii kööbø kinni, ‘Áyïmø, Jwøng-ɑ Ácwɑ̈ɑ̈j bene Jwøøg Isrɑil.’ O lɑ̈gi gøl bɑ̈ngí Debïd ómïdhi yi yïn gïti ɑtheer. Pyëwɑ ɑ́ceg yi yɑn kɑ cwedø, ɑkwɑjjɑ møg kì bølí, yïn ɑ Jwøgɑ, mɑ́ yɑ ɑ́yɑ̈llí møgɑni bënn, yɑn ɑ bɑ̈ngí. Kɑ yɑ köbbí kinni kwɑrrɑ óbëëd gɑ rɑ̈nhì. Yïn ɑ Jwøng-ɑ Ácwɑ̈ɑ̈j, yï bɑ Jwøk kidyër, mɑ́ gïgdøj møgɑni ɑ́köbbí yɑn. Yɑ kwɑjj-ɑ yïn, gyëdh gølɑ, o ócöge e døj ceth. Ge ɑ́gyëdh yi yïn, yïn ɑ Jwøng-ɑ Ácwɑ̈ɑ̈j, o gyëdhhí møgɑni óbëëdø kì kömi gen ceth gïti ɑtheer.” Kì bɑng keny me nøg, kɑ Rɑ̈dh Debïd pɑ̈ɑ̈r-ɑ kömi tyëng Pelistiyɑ̀, kɑ gï tyɑme. Akwɑnye Gɑth geki myërr-ɑ bute kì cinggi tyëng Pelistiyɑ̀. Thyew, kɑ tyëng Moɑb tyɑme, kɑ gï jɑɑge, kɑ nyi cudi yi gen ki gwɑ̈j. Kɑ Debïd pɑ̈ɑ̈r-ɑ kömi Rɑ̈dh Adɑdedher rɑ̈ɑ̈dh Dhöbɑ̀ kì buti Amɑth, mɑ́ Adɑdedher ɑ́dwɑdd-ɑ mɑgi myërri kwøøm-ɑ kömi Nɑm Porɑt. Kɑ Debïd ómɑ̈gø ki yɑ̈thi liny gɑ ɑ́lïp, kí jøkyënyì gɑ ɑ́lïp ɑ́bïryew, kí jøliny tyel ɑ́lïp pyɑ̈r ɑ́ryew. Akɑ̈bbe ki kyënyì møg pyëjji ki yɑ̈ɑ̈th miyø, kɑ rɑ̈rri tyelli kyëny-ɑ ɑ́döng bënn kebbe. Keny-ɑ ɑ́öni tyëng Arɑm kì Dimɑceg ki jøliny mø køny Rɑ̈dh Adɑdedher, ɑpɑ̈ɑ̈r Debïd kömi linyɑni, kɑ ɑ́lïp pyɑ̈r ɑ́ryew wïdɑ́ryew nɑ̈ge, Codhe, ɑgud Debïd ki kɑɑl kì yij piny gen, kɑ gï jɑɑge kɑ cudi ki gwɑ̈j yi gen. Debïd ɑ́wëggi tyɑ̈mø yi Jwøng-ɑ Ácwɑ̈ɑ̈j kì kɑ̈jj-ɑ ɑ́nyïɑ̈gge bënn. Kɑ köddi dhɑb møg-ɑ ɑ́kɑ̈lli yi jøliny Adɑdedher mɑg yi Debïd, kɑ gï kïdhe Yerusɑlem. Thyew ɑ́kɑ̈bbi ki ngyënyø dilɑl me gïïr cɑrø kì Tibɑ̈ɑ̈th kí Kun, gen ɑ kɑ̈dd-ɑ døngø møg-ɑ ɑ́jɑɑg yi Adɑdedher. (Dilɑlɑni ɑ ɑ́göög yi Sølømøn ki luy dilɑl, kí löjj, kí jɑmm-ɑ ɑ́gwøg ki dilɑl gɑ mø Kengø.) Keny-ɑ ɑ́lïng Töì rɑ̈ɑ̈dh Amɑth kinni liny Adɑdedher bëne ótyɑmø yi Debïd, ɑöre wɑ̈de Yörɑm be mɑ̈dhi Rɑ̈dh Debïd, o gø pwøje kipe kɑ ɑ́tyɑme Adɑdedher. Adɑdedher ɑ́bëëd ge nyi ceg-ɑ nyïɑ̈ggø ki Töì tyel mø gïïr. Kɑ Debïd muuj yi Töì ki gïg møg-ɑ ógwøgø ki ɑ́tegø, kí dilɑl, kí dhɑb gɑ møg pwøje Debïd. Kɑ jɑmmɑni thyey yi Debïd gɑ mø kwër, geki ngyëny ɑ́tegg, kí dhɑb men-ɑ ɑ́kɑ̈ɑ̈le kì pödhh-ɑ ɑ́mɑge, ɑ løg Edöm, kí Moɑb, kí Amön, kí Pelistiyɑ̀, kí Amɑlek. Tyëng Edöm gɑ ɑ́lïp pyɑ̈rø wïdɑ́bïdɑ̈g ɑ́nɑ̈g yi Abicɑy wɑ̈d Dheruyɑ̀ kì Töör Omelø. Agudde yij piny Edöm, kɑ tyëng-ɑ pönhɑni ogöögø ki bɑ̈nggi Rɑ̈dh Debïd. Kɑ Debïd nyi wëggi tyɑ̈mø yi Jwøng-ɑ Ácwɑ̈ɑ̈j kì kɑ̈jj-ɑ nyi kedhe bënn. Codhe, kɑ Isrɑil bëne jɑɑg yi Debïd, jie ɑ́jɑɑge kidøøj. Yöɑb ómï Abicɑy ɑ bɑ pënyi liny, Yöcɑpɑt wɑ̈d Akilud ɑ bɑ 'mïdhi wɑ̈j, Dhɑdök wɑ̈d Akitub geki Akimelek wɑ̈d Abiyɑthɑr ɑ bɑ ókwër, Serɑiyɑ̀ ɑ́bëëd ɑ́ sikriter. Benɑiyɑ̀ wɑ̈d Yöyɑdɑ̀ ɑ ɑ́jɑɑg jøg-ɑ kor Debïd, o wɑ̈ddi Rɑ̈dh Debïd ɑ́mïdh-ɑ lɑ̈ww-ɑ døngø kì yij pödhø. Kì bɑng keny megø piny kɑ̈ɑ̈l kun, ɑthøw Nɑkɑc rɑ̈ɑ̈dh Amön, ɑrøøny Anun wɑ̈de ɑ́ rɑ̈dh. Akööb Rɑ̈dh Debïd kinni, “Yɑ dwɑdd-ɑ göggi Anun ki gïndøj ni kɑ ɑ́göggi yɑn yi wïye Nɑkɑc ki gïndøj.” Codhe, kɑ Debïd oödø ki tyëngwöödø møg kedhi be këëmii ki thøwi wïye. Kɑ tyëng-ɑ ɑ́ör yi Debïd wɑ̈dh-ɑ yï Rɑ̈dh Anun kì pödhi Amön, Aköbbi rɑ̈dh yi jɑggi tyëng Amön kinni, “Yï orumø kinni bɑ kipe wøri wïyí, ɑ ɑ́ör jøg be këëmi yïn yi Debïd? Pɑth! Gï ɑ́öre gɑ lyëwwì møg lyewwi piny, kipe kinni, o gø mɑge ki liny.” Kɑ tyëngwöödø mø Debïd mɑg yi Anun, kɑ yëyyi tïggi gïn lyele, kɑ ógudhi gïn ruude kì thɑ̈thi gen, kɑ gï öre yöö. Wɑ̈thi jøgɑni ɑ́lɑ̈ɑ̈y ki mendwøng, kɑ ge ódhɑ̈lø døøg myërri gen. Keny-ɑ ɑ́lïngi møgɑni yi Debïd, ɑöde yï gen kinni, bëëd gen kì Yerikö, kɑ ge ko dwöög gïti keny-ɑ ódøøg yëyyi tïggi gen ki døngø. Kɑ yod yi Rɑ̈dh Anun geki tyëng Amön kinni, Debïd ɑ́gwøge ɑ́ ngetimɑ̈ɑ̈nø. Codhe, kɑ ge ocudø ki ngyëny ɑ́tegg gɑ kïllì ɑ́lïp pyɑ̈r ɑ́dɑ̈g wïdɑ́ngwen, møg kïr yɑ̈ɑ̈th kí tyëng-ɑ kwølli gen kì Mesøpøtɑmiyɑ̀. Kí myërri Arɑm, ɑ løg Mɑɑkɑ̀, kí Dhöbɑ̀. Ge ɑ́kïr ki yɑ̈ɑ̈th ɑ́lïp pyɑ̈r ɑ́dɑ̈g wïdɑ́ryew, kɑ rɑ̈ɑ̈dh Mɑɑkɑ̀ kïr yi gen geki jølinye, kɑ ge obëënø, ɑguddi gen bøli Medebɑ̀. Kɑ tyëng Amön bï-ɑ wɑ̈g kì yethi kɑ̈ddi gen, kɑ ge kedh-ɑ be liny. Keny-ɑ ɑ́lïngi møgɑni yi Debïd, ɑöre Yöɑb geki linye bëne. Tyëng Amön ɑ́kedhi wɑ̈g, kɑ ge pëgg-ɑ dhø döri Rɑbɑ̀ kɑɑl gen, kɑ rɑ̈nhh-ɑ ɑ́bï be kunyø ki liny pëgg-ɑ kuni pɑ̈l. Keny-ɑ ɑ́lidhii yi Yöɑb kinni tyëngmɑ̈ɑ̈nø nud kì bøle kí ngɑ̈je, ɑyïënye ki jödd mø teg, kɑ gï cïbe tung-ɑ rwöm ki tyëng Arɑm. Kɑ jølinye møg-ɑ kyeelø mëgge ómen Abicɑy o gï pyejje, ɑcïbe gïn ge rwöm ki tyëng Amön. Aköbbii yi Yöɑb kinni, “Keløg e ólidh yi yïn kinni yɑ køm-ɑ tyɑmø yi tyëng Arɑm, kɑ yï bïí be kønyi yɑn, de keløg ɑ́ yïn ɑ ótyɑm yi tyëng Amön, yɑ óbï be kønyi yïn. Bëëd yï teeg kɑ yï ko böggi! Ti wɑ nyɑɑg ki menteg, kipe jiee, kí kɑ̈ddi Jwøgee. Kɑ wiy Jwøng-ɑ Ácwɑ̈ɑ̈j gwøge gïn-ɑ døj kì yïe.” Codhe, kɑ Yöɑb geki jøge kedh-ɑ be pɑ̈ɑ̈r kömi tyëng Arɑm. Kɑ tyëngɑni órengø Keny-ɑ ɑ́liidh tyëng Arɑm ge órengø yi tyëng Amön, ɑbwøg gen yi Abicɑy, kɑ ge reng-ɑ yij kɑɑl gen. Codhe kɑ Yöɑb døøg-ɑ Yerusɑlem. Áyod yi tyëng Arɑm kinni ge bɑ møg tyɑm yi tyëng Isrɑil. Codhe, ɑkɑ̈ni gen ki jøliny kì kɑ̈ddi tyëng Arɑm møg-ɑ wɑɑng cyɑ̈ɑ̈ng mwøl kì løøg Nɑm Porɑt, o ge pyejji yi Cöbɑk pënyi liny Adɑdedher rɑ̈ɑ̈dh Dhöbɑ̀. Keny-ɑ ɑ́lïngi møgɑni yi Debïd, ɑcønge jøliny Isrɑil, kɑ Nɑm Urdun bɑ̈ɑ̈n gen, ɑcïbe gïn ge rwöm ki tyëng Arɑm. Kɑ liny ócɑ̈gø, ɑnyɑɑn liny Arɑm cyɑ̈n yi liny Isrɑil, kɑ Debïd geki jøge ónɑ̈ggø ki jøliny yɑ̈ɑ̈th gɑ ɑ́lïp ɑ́bïryew, kí jøliny tyel gɑ ɑ́lïp pyɑ̈r ɑ́ngwen. Cöbɑk pënyi liny Arɑm, ɑ́nɑ̈g yi gen thyew. Keny-ɑ ɑ́lïdhi pödhh-ɑ jɑɑg yi Rɑ̈dh Adɑdedher, kinni ge ɑ́tyɑm yi Isrɑil, ɑgöög gen ge mër ki Debïd, kɑ ge ogöögø gɑ jie. Kɑ tyëng Arɑm døøg-ɑ be bɑ̈nyø ki kønyi tyëng Amön ki liny. Kì ri thumi run, bøli keny-ɑ nyi kedhi rɑ̈nhì be liny, kɑ liny peej be mɑgi piny Amön yi Yöɑb. De Rɑ̈dh Debïd, ɑ́bëëd ɑ Yerusɑlem. Atyeg gen kɑɑldwøng Rɑbɑ̀, kɑ Yöɑb pɑ̈ɑ̈r-ɑ köme, ɑmɑge gøn. Ngïji Mölek, jwøøg tyëng Amön yïe ɑ́dɑ yɑ̈ɑ̈r dhɑb, me pege bɑ gïn ni kïllì pyɑ̈r ɑ́dɑ̈g wïdɑ́ngwen, ree ɑ́dɑ tigø me pere teeg, ɑkwɑɑny tingɑni yi Debïd kɑ gø kïdhe ri yɑ̈ɑ̈r wïje. Ákɑ̈bbi thyew ki jɑmm-ɑ ɑ́kɑb mø gïïr kì kɑɑldwøng. Tyëng kɑɑldwøng ɑ́kwɑnye, kɑ gï mëgge gwøøg mocɑrr, kí kwërrì, kí dørrì. Gïg ni møgɑni ɑ́gögge tyëng kɑ̈ddi Amön møg-ɑ kyeelø bënn. Codhe, ɑdøøge Yerusɑlem geki jøge. Kì bɑng keny megø, kɑ liny døøg-ɑ mɑl ki tyëng Pelistiyɑ̀ kì Gedher. Kenyɑni ɑ ɑ́nɑ̈ɑ̈g jöd me cwøl ɑ́ Sipɑy yi Sibekɑy jɑl Ucɑ̀. Kɑ tyëng Pelistiyɑ̀ tyɑm. Kɑ kì yij liny-ɑ kyeelø ki tyëng Pelistiyɑ̀, linyɑni ɑ yije ɑ́nɑ̈ɑ̈g Lɑkmì ómï Gölyɑth jɑl Gɑth yi Elɑɑnɑn wɑ̈d Yɑir, jɑlɑni bööl ɑkebïdhe ngëde dwøøng nɑ leg. Liny-ɑ kyeelø ɑ́nyïɑ̈g ɑ Gɑth, ɑ́dɑ jöd me lweddi cingge bɑ ɑ́bïkyel, ɑ cingï kí cingï. O lweddi tyelle bɑ ɑ́bïkyel ɑ tyelï kí tyelï. Jɑlɑni bɑ kwɑɑr jödd-ɑ ócyɑ̈ɑ̈ngi. Tyëng Isrɑil ɑ́lɑrre, kɑ nɑ̈g yi Yönɑthɑn wɑ̈d Cɑmɑ̀ ómï Debïd. Jøg-ɑ ɑ́nɑ̈g gɑ ɑ́dɑ̈g yi Debïd geki jøge, ɑ́bëëd gɑ kwɑrri jödd kì Gɑth. Cethɑn ɑ́dwɑdd-ɑ kɑ̈ni kömi Isrɑil ki rɑj. Codhe, kɑ Debïd wëgge kwɑni tyëng Isrɑil. Amëggi cigg Yöɑb geki pëjji liny møg-ɑ kyeelø yi Debïd kinni, “Kedhu kelli Isrɑil, cɑg kì wïj tuung pödhø gïti wïj tung-ɑ kyeelø, kɑ ji kwɑn wun. Yɑ dwɑdd-ɑ yodi kwɑnni gen.” Alöggi Yöɑb kinni, “Wiy kwɑnni tyëng Isrɑil med yi Jwøng-ɑ Ácwɑ̈ɑ̈j ki tyel miy mø ngenyø, kibøli kwɑnni gen møg-ɑ nud ɑnɑn! Ge bɑ bɑ̈nggí bënn wuö. Á kipe ngø ɑ dwɑddí gwøg ki gïn ni men, o pödhø bëne wëggí bɑ̈jjø?” De rɑ̈dh ɑ́kööb ce lïngi cigge yi Yöɑb, ɑkedhe kɑ ócyɑ̈dhø e kwɑn-ɑ ji kì yij pödhi Isrɑil bëne. Codhe, ɑdwööge Yerusɑlem. Adwöggi møgɑni Rɑ̈dh Debïd kinni kwɑnni jøg-ɑ cuggi nyɑɑg ki liny kì Isrɑil bɑ mïlyön ɑ́kyel kí ɑ́lïp miyø (1,100,000). Kí ɑ́lïp miy ɑ́ngwen kí pyɑ̈r ɑ́bïryew (470,000) kì Yeudiyɑ̀. Mɑ́ ciggi rɑ̈dh nuti yïëyø yi Yöɑb, gøl Leebì geki gøl Ben Yɑmïn nuti kwɑɑn en. Jwøk ɑ́bëëd pyëwe pɑ med ki gïn-ɑ ɑ́gwøg. Codhe, ɑcɑye Isrɑil. Aköbbi Jwøk yi Debïd kinni, “Yɑ ɑ́bɑ̈jji ki bɑ̈jjø me dwøng kɑ ɑ́göögɑ ki gïn ni men! Wuö dwöög lɑɑwí piny kiperɑ, mɑ́ yɑ ɑ́göög-ɑ nøgi wïjɑ.” Aköbbi Gɑd jɑltööng Debïd yi Jwøng-ɑ Ácwɑ̈ɑ̈j kinni, “Kedh kɑ Debïd köbbí kinni ödɑ’ ödø ki jɑmmì ɑ́dɑ̈g møg kelli gen kɑ̈bbi yi en, men-ɑ ókwɑny yi en, ɑ ógöggɑ en.” Akedhi Gɑd yï Debïd, kɑ gø köbbe møg-ɑ ɑ́kwøb yi Jwøng-ɑ Ácwɑ̈ɑ̈j. Apëjje kinni, “Yï kwɑny-ɑ men-ɑ́? Runn ɑ́dɑ̈g mø kɑ̈j? Wɑlɑ̀ dwɑ̈tt ɑ́dɑ̈g wu ocyeddø yi liny tyëng-ɑ mɑ̈n ki wun? Wɑlɑ̀ cyɑ̈ng ɑ́dɑ̈g møg-ɑ pɑ̈ɑ̈r kömi wun yi Jwøng-ɑ Ácwɑ̈ɑ̈j, o yømø nɑ̈ɑ̈g gøøje kömi pödhi wun, keny-ɑ óöre wëywöne be kɑ̈ɑ̈li thøø kömi Isrɑil? Á ngø ɑ kwɑny yi yïn, o wöödø döggɑ Jwøng-ɑ Ácwɑ̈ɑ̈j?” Aløøg mø Gɑd yi Debïd kinni, “Yɑ ying-ɑ yij orɑng me teg! De yɑ pɑ dwɑddi cɑyø yi dhɑnhø, wiy bëëde ɑ́ Jwøng-ɑ Ácwɑ̈ɑ̈j kete ɑ cɑy yɑn, mɑ́ pyëwe nyii lɑ̈ɑ̈mø.” Codhe, kɑ Jwøng-ɑ Ácwɑ̈ɑ̈j yømø nɑ̈ɑ̈g gøøje kömi tyëng Isrɑil, ɑthøw ji ɑ́lïp pyɑ̈r ɑ́bïryew kì kelli gen. Kɑ Jwøk óönø ki wëywödø me nɑ̈g Yerusɑlem, de rumme ɑ́wile, ɑköbbe wëywönɑni kinni, “Árum! Møg gïïr!” Wëywöni Jwøng-ɑ Ácwɑ̈ɑ̈j ɑ́bëëd e ócungø kì buti rɑr-ɑ nyi pwööd gemè kì pwödhi Arɑunɑ̀, wɑ̈d Yebus. Wëywödø ɑ́lidh yi Debïd kì yij yømø, e ómïdhø ki pilø kì cinge, gø tiim en kipe nɑ̈gi Yerusɑlem. Codhe, kɑ Debïd geki jøgdøngø ge rug-ɑ ocwɑ̈llì, wɑ̈thi gen kuul gen piny e bøli gen nywɑll-ɑ lɑ̈bø. Akwɑ̈jji Debïd kinni, “Wuö Jwøk, bɑ yɑn ɑ ɑ́bɑ̈jji. Yɑn ɑ ɑ́kööb kinni kwɑɑn ji. Á ngø ɑ ɑ́gwøg yi tyëng-ɑ yï gen bɑ̈r ek? Yïn ɑ Jwøgɑ, Jwøng-ɑ Ácwɑ̈ɑ̈j, cɑy yɑn wøki gølɑ, kɑ jií wiy.” Aköbbi Gɑd yi wëywöni Jwøng-ɑ Ácwɑ̈ɑ̈j kinni, “Köbbí Debïd kinni, kedhe kɑ Jwøng-ɑ Ácwɑ̈ɑ̈j gëdde ki këli lɑm kì pwödhi Arɑunɑ̀ kì yij rɑr-ɑ nyi pwööd gemè.” Kwøbbi Jwøng-ɑ Ácwɑ̈ɑ̈j ɑ́lïngi yi Debïd, ɑkedhe ni kɑ ɑ́köbbii yi Gɑd. Arɑunɑ̀ ɑ́bëëd e opödø ki gemè geki wɑ̈dde ɑ́ngwen, kì rɑri pwödi gemè, keny-ɑ ɑ́lidh gen wëywödø, ɑrengi wɑ̈dde kɑ ge ópɑ̈nø. Keny-ɑ ɑ́liidh Rɑ̈dh Debïd e ócyɑ̈ngø yi Arɑunɑ̀, ɑnyege kì yij rɑrø, kɑ óbuddø yije rum en piny, e bøle nywɑll-ɑ lɑ̈bø. Aköbbii yi Debïd kinni, “Ngëwwí yɑn rɑrí, o Jwøng-ɑ Ácwɑ̈ɑ̈j gëddɑ ki këli lɑm kì yije, o yømø nɑ̈ɑ̈g cuunge. Gïn-ɑ ngeewii ómëggɑ yïn bëne.” Kɑ Arɑunɑ̀ okööbø kinni, “Kwɑɑny! Kɑ yï göög ki gïn-ɑ dwɑddi yi yïn. Kwɑny wɑ̈dhh thyew, kɑ ge ngɑɑl gɑ gëdhhì møg rɑ̈b kì wïj këli Jwøng-ɑ Ácwɑ̈ɑ̈j, kɑ lødhi pöd møg cwɑɑg gɑ yugg. Kɑ gemè men muuj ɑ́ gëëdhi, ge ɑ́mëggɑ yïn bënn.” Codhe, ɑlöggi rɑ̈dh kinni, “Pɑth, yï ómëggɑ gïn-ɑ ngeewii bëne. Gïí pɑ cuggi mëggi Jwøng-ɑ Ácwɑ̈ɑ̈j yi yɑn ɑ́ gëëdhi, mɑ́ keløg ɑ́ gïi ngɑn megø ɑ mëggɑ Jwøng-ɑ Ácwɑ̈ɑ̈j, ɑ́ ngø ɑ ɑ́muujɑ!” Acude Arɑunɑ̀ ki ngyënyyi dhɑb miy ɑ́bïkyel, gɑ møg ngeew rɑri gemè mee. Agëddi Jwøng-ɑ Ácwɑ̈ɑ̈j yi Debïd ki këli lɑm kì kenyɑni, ɑmuuje ki gënh-ɑ nyi rɑ̈b bëne, kí gënhi mër. Akwɑ̈jje, kɑ kwɑ̈jje yïëy yi Jwøng-ɑ Ácwɑ̈ɑ̈j, ɑöni Jwøng-ɑ Ácwɑ̈ɑ̈j ki mɑc kì mɑl, men rɑ̈b gëdhhì kì wïj këli lɑm. Aköbbi wëywödø yi Jwøng-ɑ Ácwɑ̈ɑ̈j kinni dwøøge pilø yij bøj. Kɑ gø dwøøge. Kɑ yod yi Debïd kinni kwɑ̈jje ɑ́løøg yi Jwøng-ɑ Ácwɑ̈ɑ̈j. Codhe, ɑmuuje ki gëdhhì kì wïj këli Jwøng-ɑ Ácwɑ̈ɑ̈j, kì rɑri gemè mi Arɑunɑ̀ jɑl Yebus. Kì bøli kenyɑni Kemi Kwër men-ɑ ɑ́gur yi Mosɑ̀ kì yij ryɑng, kí kël-ɑ wïje nyi rɑ̈ɑ̈b gëdhhì, ge ɑ́bëëd ge nudd ge ying-ɑ Gibeon. De Debïd nuti kedhi kunɑni be lɑm, mɑ́ e óböggø yi pili wëywöni Jwøng-ɑ Ácwɑ̈ɑ̈j. Codhe, ɑkööb Debïd kinni, “Kengi Jwøk, Jwøng-ɑ Ácwɑ̈ɑ̈j óying-ɑ keny. Men bene këlø men-ɑ wïje ómuuj gënh-ɑ nyi rɑ̈b bëne yi tyëng Isrɑil.” Kɑ tyëng-ɑ bɑ wëdhh kì Yerusɑlem köbbi yi Debïd kinni, cøng gen ri gen. Kɑ gï nënge ki gwøg. Kwï gen ɑ́tweg-ɑ ópɑddi kïttì møg geer Kengø. Amuuje ki ngyënyø dødø me thɑ̈ɑ̈dh ki gedd kí mɑ̈gi møg gur thïg, kí ngyënyø dilɑl me ngenyø, me bong ngɑn cuggi rømii. Tyëng Suur geki tyëng Sïdön ɑ́köbbe kinni kɑ̈ni gen ki yenh sɑndɑl mø ngenyø. Arum Debïd kinni, “Kengø men-ɑ ógërri Jwøng-ɑ Ácwɑ̈ɑ̈j yi wɑ̈dɑ Sølømøn óceg bëëdø e dwøng, o bɑ̈r. De bɑ othinh, o nuti dïdø, de yɑ ceg-ɑ jɑmm-ɑ gëëd ki gwirø.” Codhe, kɑ Debïd ocungø ki jɑmmì mø gïïr kɑ̈ng-ɑ́ nuti thøw en. Acwööle wɑ̈de Sølømøn, kɑ gø köbbe kinni, gëdde Jwøng-ɑ Ácwɑ̈ɑ̈j, Jwøøg Isrɑil ki kengø. Áköbbi yi Debïd kinni, “Wɑ̈dɑ, yɑ ɑ́dwɑdd-ɑ gyer ki kengø men pwøøj-ɑ Jwøng-ɑ Ácwɑ̈ɑ̈j, Jwøgɑ. De yɑ ɑ́köbbi yi Jwøng-ɑ Ácwɑ̈ɑ̈j kinni yɑ ɑ́nɑ̈ɑ̈g ki ji mø gïïr cɑrø, kɑ yɑ ónyïɑ̈ggø ki liny mø døngø. Bene bɑnge mɑ̈ɑ̈ne yɑn gyer ki kengø, mɑ́ cingɑ dɑ rem mø gïïr. Yɑ ɑ́köbbe kinni, ‘Yïí ódi wɑ̈d men-ɑ ójyɑ̈ɑ̈gø ki mër, mɑ́ e óthödhɑ ki mër ki tyëngmɑ̈ɑ̈nø bënn. Nyinge ócwøl ɑ́ Sølømøn, mɑ́ kì kɑɑm-ɑ ójyɑ̈ɑ̈ge bëne, Isrɑil óthödhɑ ki mër, o óbëëd e bong liny. Yɑ ógëdde ki kengø. Óbëëd ɑ́ wɑ̈dɑ, o yɑ óbëëdø yɑn ɑ́ wïye. Isrɑil ójɑɑg yi kwɑrre gïti ɑtheer.’ ” Kɑ Debïd okööbø kinni, “Wɑ̈dɑ, yï ókøny yi Jwøng-ɑ Ácwɑ̈ɑ̈j, Jwøgí, dhøge ómïdhe o yï cuggi ki gëddii ki kengø. O yï óthödhi yi Jwøng-ɑ Ácwɑ̈ɑ̈j, Jwøgí ki ngɑ̈nyi bëëdø, kí peli wïj men-ɑ ójɑɑg Isrɑil kì kömi cigge. Møgɑni ócuggi, keløg cigg-ɑ ɑ́mëggi Mosɑ̀ yi Jwøng-ɑ Ácwɑ̈ɑ̈j bënn ómïdhi yi yïn. Dyëëj, kɑ pyëwí bëëd e teeg, kɑ ko di gïn böggi yi yïn. De keløg ɑ́ per geri Kengø, yɑ ɑ́cïbi piny ki dhɑb me wɑ̈dhi ri tøn ɑ́lïp ɑ́dɑ̈g kí miy ɑ́ngwen, kí ɑ́tegø me wɑ̈dhi ri tøn ɑ́lïp pyɑ̈r ɑ́dɑ̈g wïdɑ́ngwen, reb ki dilɑl geki ngyënyø dødø mø bong cögi gen. Yïɑ dɑ pɑ̈mmi gyer kí kïttì, de yï ceg-ɑ yɑ̈bbi kömi gen ceth. Yïí dɑ jøgwøg mø gïïr, dɑ jøg mø twïgø ki kïtti gyer, kí bödhhi gyer, kí bödhhi yiedh ki pɑ̈mmì, kí bödhhi thɑ̈dh ki jɑmmì bënn, kí dhɑb, kí ɑ́tegø, kí dilɑl, kí dødø. Cɑ̈gí ki gwøg, yï ókøny yi Jwøng-ɑ Ácwɑ̈ɑ̈j.” Kɑ jyɑ̈ggi Isrɑil bënn ceg yi Debïd kinni køny gen Sølømøn. Gï ɑ́köbbe kinni, “Wu ókøny yi Jwøng-ɑ Ácwɑ̈ɑ̈j, Jwøøg wun, kɑ wu thödhe ki mër kì wɑ̈thi tùng bënn. Yɑ ɑ́wëgge mɑgi tyëng-ɑ ɑ́bëëd kì piny men bënn, ɑnɑn ge bɑ jii wun, o ge bɑ jii Jwøng-ɑ Ácwɑ̈ɑ̈j. Anɑn göggu Jwøng-ɑ Ácwɑ̈ɑ̈j, Jwøøg wun ki pëthi wun, kí wëyi wun. Kɑ wu cɑ̈gi wun ki geri Kengø, kipe kinni, o Sɑnduug Ciggi Jwøng-ɑ Ácwɑ̈ɑ̈j, kí jɑmmi kwër cïb yije.” Keny-ɑ ɑ́yöø Rɑ̈dh Debïd ki mendwøng, ɑgwøge wɑ̈de Sølømøn ɑ́ rɑ̈ɑ̈dh Isrɑil. Acøng jɑggi Isrɑil bënn, kí ókwër bënn, kí Kwɑrri Leebì yi Rɑ̈dh Debïd Akwɑne Kwɑrri Leebì møg-ɑ runni gen bɑ pyɑ̈r ɑ́dɑ̈g. Kwɑnni gen bɑ ɑ́lïp pyɑ̈r ɑ́dɑ̈g wïdɑ́bïdɑ̈g. Kɑ gwøøg kori kengø mëggi ji ɑ́lïp pyɑ̈r ɑ́ryew wïdɑ́ngwen yi rɑ̈dh, o ɑ́lïp ɑ́bïkyel nyi mïdhi gen wɑ̈j geki nenni gønyy. Kí ɑ́lïp ɑ́ngwen mø gwøøg gen bɑ kur, o ɑ́lïp ɑ́ngwen nyi lenhi gen Jwøng-ɑ Ácwɑ̈ɑ̈j ki wör ki thøm møg-ɑ ɑ́muuj yi rɑ̈dh kipe gwøngɑni. Kɑ Kwɑrri Leebì pɑ̈ngi yi Debïd gɑ ɑkudd ɑ́dɑ̈g, gɑ wɑ̈thi kɑ̈llì, gøl Gercön, kí gøl Kɑ̈ɑ̈th, kí gøl Merɑrì. Gercön wɑ̈dde ɑ́ryew, ɑ løg Lɑdɑn, kí Cimeì. Lɑdɑn wɑ̈dde bɑ ɑ́dɑ̈g, ɑ løg Yekiel, kí Dhethɑm, kí Yöiil, gen ɑ ɑ́bëëd gɑ jɑggi gøl Lɑdɑn. (Cimeì wɑ̈dde ɑ́dɑ̈g, ɑ løg Celömöth, kí Adhiel, kí Arɑn.) Wɑ̈ddi Kɑ̈ɑ̈th bɑ ɑ́ngwen, ɑ løg Amrɑm, kí Idhɑr, kí Kibrön, kí Udhiel. Wɑ̈de Amrɑm nyel-ɑ kɑyø ɑ bɑ wïyi Aɑron geki Mosɑ̀. (Aɑron geki kwɑrre ɑ́cïb wɑ̈yi gen gɑ jɑggi kwër, o ge nyi rɑ̈b gen bɑkur kenyi mɑlli Jwøng-ɑ Ácwɑ̈ɑ̈j, o ge göggi gen en, o ji nyi kwëng yi gen ki nyinge. De kwɑrri Mosɑ̀ jɑlkwøbbi Jwøk ɑ́kwɑɑn-ɑ kelli Kwɑrri Leebì.) Wɑ̈ddi Mosɑ̀ bɑ ɑ́ryew; Gercöm kí Eliedher. Nyel-ɑ bɑ jɑgø kì kelli wɑ̈ddi Gercöm bɑ Cebuel. Eliedher yïe ɑ́dɑ wɑ̈de ɑ́kyel me cwøl ɑ́ Reɑbiyɑ̀, de Reɑbiyɑ̀ kwɑrre gïïr. Kɑ̈ɑ̈th wɑ̈de nyel-ɑ bɑng kɑyø, Idhɑr yïe ɑ́dɑ wɑ̈de me cwøl ɑ́ Celömith, en bɑ jɑngi kɑl. Dɑ̈ɑ̈g wɑ̈ddi Kɑ̈ɑ̈th, ɑ cwøl ɑ́ Kibrön, yïe ɑ́dɑ wɑ̈dd ɑ́ngwen: Yeriyɑ̀, kí Amɑriyɑ̀, kí Yɑɑdhiel, kí Yekɑmeɑm, Ngween wɑ̈ddi Kɑ̈ɑ̈th bɑ Udhiel, o yïe ɑ́dɑ wɑ̈dd ɑ́ryew: Miikɑ̀ geki Iciyɑ̀. Wɑ̈ddi Merɑrì bɑ ɑ́ryew: Mɑklì kí Mucì. Thyew Mɑklì wɑ̈dde bɑ ɑ́ryew: Eliɑdhɑr kí Kïc, de Eliɑdhɑr ɑ́thøw e yïe bong wɑ̈dde, dɑ́ nywøle womɑ̈nn keti gen ɑ nud. Nywøle møgɑni ɑ́nywøm-ɑ yi nyiiwï gen, wɑ̈ddi Kïc. Ryeew wɑ̈ddi Merɑrì, Mucì, wɑ̈dde bɑ ɑ́dɑ̈g, ɑ løg Mɑklì, kí Eder, kí Yeremöth. Møgɑk bɑ Kwɑrri Leebì kí kɑ̈lli gen, gɑ wɑ̈thi kɑ̈llì, kí tyëng-ɑ ɑ́gwed nyingi gen, e ngɑn gwëëd-ɑ cwɑgge, ngɑn-ɑ wɑ̈dhi ri runn pyɑ̈r ɑ́ryew gïti mɑl, yïe dɑ gwøg me gwøg yi en kì yij Kengi Jwøng-ɑ Ácwɑ̈ɑ̈j. Akööb Debïd kinni, “Jwøng-ɑ Ácwɑ̈ɑ̈j, Jwøøg Isrɑil mër ɑ́mëgge jie, o en kiree óbëëdø kì Yerusɑlem gïti ɑtheer. De bong gïn pere ótyëddi Kemi Kwër geki jɑmm-ɑ nyi göög ki kwër bënn yi Kwɑrri Leebì.” Kì bɑng møg-ɑ ɑ́ceg yi Debïd, Kwɑrri Leebì bënn møg-ɑ runni gen wɑ̈dhi ri pyɑ̈r ɑ́ryew ɑ nyi gwed kipe gwøg. O gwøng-ɑ nyi mëggi gen bɑ, kønyi ókwër møg-ɑ kɑ̈ɑ̈l ri Aɑron ki gwøøg kwër kì Kengø, kí korri ódɑ̈rri Kengø geki udde, kí korri jɑmmi kwër bënn, o ge cög ge pɑ bwöl, o ge mïdhi gen ópùn-ɑ nyi mëggi Jwøk, kí møg-ɑ búr men-ɑ nyi muuj kí gëdhhì, kí ópùn-ɑ ri gen bong kɑmïrɑ̀, kí ópùn-ɑ bɑ ɑbul, kí møg-ɑ búr men-ɑ nyi nyöm ki møøw dhetun, o jɑmm-ɑ nyi kɑ̈ɑ̈l Kengø nyi røm yi gen, o ge nyi lenhi gen Jwøng-ɑ Ácwɑ̈ɑ̈j, o nyi lejji yi gen, o nyi pøjji yi gen yethi cyɑ̈ng kì mwøl kí böörø, o kenyi rɑ̈ɑ̈b gëdhhi Jwøng-ɑ Ácwɑ̈ɑ̈j kì cyɑ̈ɑ̈ng Sɑbɑth, kí cɑ̈gi dwɑ̈n-ɑ nyɑ̈n geki wööwø møg-ɑ kyeelø. Kɑ ge thödhi ki ciggi gwøngɑni, ki kwɑnni Kwɑrri Leebì møg-ɑ nyi cïb kipe gwøgi gwøngɑni, kí bøli keny-ɑ nyi gwøgii. Kwɑrri Leebì ɑ́mëggi gwøøg mɑlli Jwøng-ɑ Ácwɑ̈ɑ̈j kì yethi cyɑ̈ng bënn. Ge ɑ́mëggi gwøøg korri kemɑ̀ geki Kengi Jwøng-ɑ Ácwɑ̈ɑ̈j, kí kønyi wɑddi gen geki ókwër kwɑrri Aɑron ki gwøg kì Kengø. Møg bɑ ɑkuddi kwɑrri Aɑron: wɑ̈ddi Aɑron bɑ ɑ́ngwen, ɑ løg Nɑdɑb, kí Abiu, kí Eliɑdhɑr, kí Ithɑmɑr Nɑdɑb geki Abiu ɑ́kwöngi ki thøø kibøli wïyi gen, o ɑ́bong-ɑ kwɑrri gen mɑ ɑ́wiy yi gen. Codhe, ɑgöög nyiimï gen, Eliɑdhɑr geki Ithɑmɑr gɑ ókwër. Kɑ kwɑrri Aɑron pɑ̈ngi yi Rɑ̈dh Debïd gɑ ɑkudd e køøl-ɑ ri gwøng-ɑ nyi gwøg yi gen. Ákøny-ɑ yi Dhɑdök kwɑɑr Eliɑdhɑr geki Akimelek kwɑɑr Ithɑmɑr. Kwɑrri Eliɑdhɑr ɑ́pɑ̈ngi gɑ ɑkudd pyɑ̈rø wïdɑ́bïkyel, o kwɑrri Ithɑmɑr ɑ́pɑ̈ngi gɑ ɑkudd ɑ́bïdɑ̈g, mɑ́ wïj gøl Eliɑdhɑr dɑ cwøw mø gïïr. Gwøg ɑ́pɑ̈ngi e leng kɑ wél, mɑ́ e dɑ jɑggi dhø Kengø, kí tyëng kwër kì gøl Eliɑdhɑr geki Ithɑmɑr. Kwɑrri Eliɑdhɑr geki kwɑrri Ithɑmɑr wél ɑ́leng yi gen e ceg kɑ lunyø. Codhe, ɑgweed gen yi sikriter, Cemɑiyɑ̀ wɑ̈d Nethɑnel Kwɑɑr Leebì. Ge ɑ́gwed-ɑ bøli Rɑ̈dh ceth geki jyɑ̈gge, kí Ókwërø Dhɑdök, kí Akimelek wɑ̈d Abiyɑthɑr, kí jɑggi kɑ̈lli ókwër, kí jɑggi kɑ̈lli Kwɑrri Leebì. Nyingi jøg ɑ́gwed kɑ tïj men-ɑ bɑ gwøøg gen kì Kengø, kí gïg-ɑ ɑ́gwøg yi kweyyi gen kwɑrri Aɑron, ni kɑ ógwedii kì yethi Ciggi Jwøng-ɑ Ácwɑ̈ɑ̈j, Jwøøg Isrɑil. Møg bɑ nyingi jɑggi gøl Leebì møøgø: Yedeiyɑ̀, wɑ̈d Cebuel kì gøl Amrɑm. Iciyɑ̀, kì gøl Reɑbiyɑ̀. Kì gøl Idhɑr, Yɑɑth ɑ ɑ́jɑ̈ggi kì kelli wɑ̈ddi Celömith. Yeriyɑ̀, kí Amɑriyɑ̀, ki Yɑɑdhiel, ki Yekɑmeɑm. Kì gøl Udhiel: Cɑmïr, kí Iciyɑ̀ ómï Miikɑ̀; Dhekɑriyɑ̀ kì kelli wɑ̈ddi Iciyɑ̀ ómï Miikɑ̀. Gøl Merɑrì dɑ Mɑklì, kí Mucì, kí Yɑɑdhiyɑ̀. Wɑ̈ddi Yɑɑdhiyɑ̀ bɑ ɑ́dɑ̈g, ɑ løg Coɑm, kí Dhɑkur, kí Ibrì Mucì wɑ̈dde bɑ ɑ́dɑ̈g, ɑ løg Mɑklì, kí Eder, kí Yeremöth. Møgɑk bɑ jɑggi gøl Leebì. Jɑngi kɑl kí dhɑnhø ɑ́kyel kì kelli nyiimen møg-ɑ thønhø ɑ nyi kwɑny wéli tïïj gen, geki wɑddi gen, ɑ løg ókwër kwɑrri Aɑron. Møgɑni ɑ́gwøg-ɑ bøli Rɑ̈dh Debïd, kí Dhɑdök, kí Akimelek, kí jɑggi kɑ̈lli ókwër, kí Kwɑrri Leebì. Rɑ̈dh Debïd geki jɑggi Kwɑrri Leebì, ɑ́kɑ̈bbi ki jøg nyi wör kì Kengø. Jøg-ɑ ɑ́kwɑny bɑ Asɑp, kí Ëmɑn, kí Yeduthun, o ge nyi töng gen wööni Jwøk kenyi thoom thøm kɑ bullì pwöd. Møg bɑ nyingi ji-ɑ ɑ́kwɑny kipe gwøøg kwër kì kej mɑ̈ddø, ɑkuun ki gwøge, ɑkuun ki gwøge. Wɑ̈ddi Asɑp, Dhɑkur, kí Yosep, kí Nethɑniyɑ̀, kí Acɑrelɑ̀. Ge ɑ́jɑɑg-ɑ yi Asɑp, jɑl-ɑ nyi töng wööni Jwøk kì bøli rɑ̈dh. Wɑ̈ddi Yeduthun bɑ ɑ́bïkyel, ɑ løg Gedɑliyɑ̀, kí Dherì, kí Yecɑiyɑ̀, kì Cimeì, kí Acɑbiyɑ̀, kí Mɑtithiyɑ̀. Ge pyejj-ɑ yi wïyi gen, o ge nyii töngø ki wööni Jwøk kenyi thoom thøm kɑ bullì pwöd, ge owörø ge lenh-ɑ nyingi Jwøng-ɑ Ácwɑ̈ɑ̈j, o ge pøjj-ɑ en. Wɑ̈ddi Ëmɑn bɑ pyɑ̈rø wïdɑ́ngwen, ɑ løg Bukiyɑ̀, kí Mɑtɑniyɑ̀, kí Udhiel, kí Cebuel, kí Yerimöth, kí Aɑnɑniyɑ̀, kí Aɑnɑnì, kí Eliɑthɑ̀, kí Gidɑltì, kí Romɑmtì Edher, kí Yöcbekɑcɑ̀, kí Mɑlöthì, kí Othir, kí Mɑɑdhiöth. Ëmɑn, jɑltööng rɑ̈dh, ɑ́mëggi wɑ̈ddɑni gɑ pyɑ̈rø wïdɑ́ngwen, kí womɑ̈nn ɑ́dɑ̈g, yi Jwøk, kɑ per kinni o bëëde e teeg ni kɑ ɑ́kööbe kinni gø ógwøge e teeg. Wɑ̈dde bënn nyii pöödø ki bullì, o ge nyii thumø, ge pyejj-ɑ yi wïyi gen kì kej kwër. O Asɑp, kí Yeduthun, kí Ëmɑn ge nyi gwøg-ɑ møg-ɑ kwøb yi rɑ̈dh. Jøgɑni bënn gɑ pyɑ̈r ɑ́ryew wïdɑ́ngwen, geki wɑddi gen Kwɑrri Leebì, ɑ́bëëd ge dïdø kidøøj ki thøm. Kwɑnni jøgɑni bënn, ɑ́bëëd gɑ miy ɑ́ryew kí pyɑ̈r ɑ́bïdɑ̈g wïdɑ́bïdɑ̈g. Ge ɑ́bëëd ge nyi ceg kɑ lengø ki wél, gen ɑ tyëng-ɑ kedhi kej kwër, ge bënn, cɑg kì ri møg-ɑ thønhø, gïti ri møg-ɑ døngø, kí møg dïdø kidøøj kí møg cer cɑ̈gø. Møg bɑ gïg-ɑ gwøg yi Kwɑrri Leebì møg-ɑ kor Kengø. Gøl Körɑ̀ ɑ́dɑ Mecelemiyɑ̀ kì yij ɑkuud Asɑp Wɑ̈dde ɑ́bïryew, kɑ̀ myeer gen e kööl ɑ ri döng bɑ: Dhekɑriyɑ̀, kí Yediyɑil, kí Dhebɑdiyɑ̀, kí Yɑthniel, kí Elɑm, kí Yöɑnɑn, kí Eliönɑy. Thyew ɑ́dɑ Obed Edöm jɑl-ɑ ɑ́gyëdh yi Jwøk kɑ gø nënge ki wɑ̈dd ɑ́bïdɑ̈g, kɑ̀ myeer gen ge kööl ɑ ri döng, bɑ: Cemɑiyɑ̀ ɑ bɑ kɑyø, bɑnge dɑ Yödhɑbɑd, kí Yöɑ̀, kí Sɑkɑr, kí Nethɑnel, kí Amiel, kí Isɑkɑr, kí Peulethɑy ɑ bɑ bïdɑ̈ɑ̈g gen. Gøl Obed Edöm ɑ́muuj-ɑ ji pyɑ̈r ɑ́bïkyel wïdɑ́ryew, mø dïdø kidøøj. Gøl Mecelemiyɑ̀ ɑ́muuj-ɑ ji pyɑ̈rø wïdɑ́bïdɑ̈g mø dïdø. Gøl Merɑrì ɑ́dɑ Ösɑ̀, o yïe ɑ́dɑ wɑ̈dd ɑ́ngwen: Cimrì (en ɑ ɑ́gwøg yi wïye ɑ́ jɑgø ngö e pɑth ki nyel-ɑ dwøng), Kilkiyɑ̀ ɑ bɑ ryeew gen, bɑnge dɑ Tebɑliyɑ̀, kí Dhekɑriyɑ̀. Kwɑnni jø gøl Ösɑ̀ møg-ɑ ɑ́bëëd gɑ jøkori Kengø bɑ pyɑ̈rø wïdɑ́dɑ̈g bënn. Tyëng-ɑ nyi kor Kengø ɑ́pɑ̈ngi gɑ ɑkudd kì wɑ̈thi kɑ̈llì, ɑmëggi gen gwøøg kori Kengø, e gwøg ceg kɑ lunyø ni gwøøg Kwɑrri Leebì møg-ɑ kyeelø. Kɑl nyi kor-ɑ dhøng-ɑ wëële pɑ̈dhi ki en, cɑgg gølɑni kwɑnni jie nøg. Celemiyɑ̀ ɑ́pɑ̈dhi kɑ wëëli dhøng-ɑ wɑɑng cyɑ̈ɑ̈ng mwøl, kɑ wɑ̈de Dhekɑriyɑ̀ jɑlcïïjø, pɑ̈dhi kɑ wëëli dhøng-ɑ wɑɑng wuudø. Obed Edöm ɑ́pɑ̈dhi kɑ dhøng-ɑ wɑɑng wurlwɑl, o wɑ̈dde ɑ́pɑ̈dhi kɑ udd-ɑ nyi mïdhi jɑmmì. Cupïm geki Ösɑ̀ ɑ́pɑ̈dhi kɑ dhøng-ɑ wɑɑng cyɑ̈ɑ̈ng böörø, kí Dhøg Cɑleketh ɑ yïëbbi yuu-ɑ töngi kwøømø. Gwøøg jøkor ɑ́pɑ̈ngi ɑ́ kɑɑm, e ceg kɑ lunyø. Tung-ɑ wɑɑng cyɑ̈ɑ̈ng mwøl, ɑ́bëëd e nyi kor-ɑ yi ji ɑ́bïkyel ki cyɑ̈ng ɑ́kyel. Wɑɑng wuudø dɑ ji ɑ́ngwen, o wɑɑng wurlwɑl dɑ ji ɑ́ngwen, o dhøggi udd-ɑ mïdhi jɑmmì kor-ɑ yi ji ɑ́ngwen, ɑ́ryew kì dhø øn, kí ɑ́ryew kì dhø øn-ɑ kyeelø. Pɑb men-ɑ wɑɑng cyɑ̈ɑ̈ng böörø kor-ɑ yi ji ɑ́ngwen kì tøg yöö, kí ɑ́ryew kì yij pɑmɑni kiree. Bene kër-ɑ ɑ́pyëël gwøøg jøkor ɑnɑn, gen ɑ jø gøl Körɑ̀ kí gøl Merɑrì. Akiyɑ̀ Kwɑɑr Leebì ɑ ɑ́mïdhi kɑ̈nni Kengø, kí udd-ɑ nyi mïdhi jɑmmi pwøj møg-ɑ bɑ mø Jwøk. Lɑdɑn wɑ̈d Gercön yïe ɑ́dɑ kwɑrr mø gïïr, reb kí gøl wɑ̈de Yekiel. Wɑ̈ddi Lɑdɑn ɑ́ryew-ɑ kyeelø, ɑ løg Dhethɑm geki Yöiil, ɑ ɑ́mïdhi kɑ̈nni Kengø, kí udd-ɑ nyi mïdhi jɑmmì. Kwɑrri Amrɑm, kí kwɑrri Idhɑr, kí kwɑrri Kibrön, kí kwɑrri Udhiel ge ɑ́mëggi gwøøg gen thyew. Cebuel wɑ̈d Gercöm kì gøl Mosɑ̀ ɑ́bëëd ɑ́ jɑngi dwøng men-ɑ jɑɑg jɑmmi kɑ̈nni Kengø. Celömith bɑ wɑɑd gen kì ri Gercöm ómï Eliedher. Eliedher bɑ wïyi Reɑbiyɑ̀, Reɑbiyɑ̀ bɑ wïyi Yecɑiyɑ̀, Yecɑiyɑ̀ bɑ wïyi Yörɑm, Yörɑm bɑ wïyi Dhikrì, Dhikrì bɑ wïyi Celömith. Jɑmmi pwøj bënn møg-ɑ ɑ́thërri Jwøk yi Rɑ̈dh Debïd, kí jyɑ̈ggi wɑ̈thi kɑ̈llì, kí jøgdøngø, kí pëjji liny ge ɑ́mïdh-ɑ yi Celömith geki tyëng gøl gen. Akɑ̈bbi gen ki kwï jɑmm-ɑ ɑ́mɑg yi gen kì yij liny, kɑ gï kwër gen kipe kinni o ge göög kì yij Kengø. Jɑmm-ɑ bɑ ɑkwër bënn kipe gwøøg Kengø, kí jɑmmi pwøj møg-ɑ ɑ́kɑ̈ɑ̈l yi jɑltöng Sɑmwel, kí Rɑ̈dh Cɑul, kí Abner wɑ̈d Ner, kí Yöɑb wɑ̈d Dheruyɑ̀, ge ɑ́mïdh-ɑ yi Celömith geki tyëng gøl gen. Kì kelli kwɑrri Idhɑr, bɑ Kenɑniyɑ̀ geki wɑ̈dde ɑ ɑ́gwøg gɑ jɑggi gwøg, gen ɑ mïdhi wɑ̈j, o gen ɑ nenni gønyyi tyëng Isrɑil. Acɑbiyɑ̀ kì kelli kwɑrri Kibrön, kí tyëng gøl gen gɑ ɑ́lïp ɑ́kyel kí miy ɑ́bïryew, yɑɑg tir bënn, gen ɑ ɑ́gwøg gɑ jɑggi kwër bënn, kí nenni gønyyi teedø kì løøg Nɑm Urdun kì wɑɑng cyɑ̈ɑ̈ng böörø. Yeriyɑ̀ ɑ ɑ́bëëd ɑ́ jɑngi gøl Kibrön. Kì pyɑ̈r ɑ́ngween runni Rɑ̈dh Debïd kì yij lɑwø, thɑ lwömi gøl Kibrön ɑ́yɑb, kɑ ge óyïddø ki jöddi liny kì gølɑni, o ge ɑ́bëëd ɑ Yɑdher kì piny Gilyɑd. Rɑ̈dh Debïd ɑ́kɑ̈bbi ki jøg tir kì kelli jø gøl Yeriyɑ̀ gɑ ɑ́lïp ɑ́ryew kí miy ɑ́bïryew, kɑ gï gwøge gɑ jɑggi kwër, o ge nyi lidh gen gønyy kì myërri Isrɑil møg-ɑ løøg Urdun kì wɑɑng cyɑ̈ɑ̈ng mwøl, ɑ løg piny Ruben, kí Gɑd, kí budi gøl Mɑnɑsè. Møg bɑ jɑgg-ɑ døngø geki jɑgg-ɑ thønhø kì Isrɑil, kí jøgwøg møg-ɑ gwøg gwøøg pödhø. Kì yij dwɑ̈y ɑ́kyel kì yij run, pënyi liny ɑ́kyel ɑ nyi göögø, e pyejj-ɑ jøliny ɑ́lïp pyɑ̈r ɑ́ryew wïdɑ́ngwen, otyëge dwɑ̈nɑni o nyi ywöme geki jøge, o keje nyi kwɑny yi ngɑn-ɑ bɑnge. Rɑ̈dh Debïd kwɑnni ji møg-ɑ nuti wɑ̈dhi ri runn pyɑ̈r ɑ́ryew nuti gweed en, mɑ́ Jwøng-ɑ Ácwɑ̈ɑ̈j tyëng Isrɑil ɑ́kwënge kinni kwɑnni gen óngënyi ni kyelli mɑl. Acɑ̈gi Yöɑb wɑ̈d Dheruyɑ̀ ki gwedi kwɑnni ji, de nuti tyëëg en. Acɑɑy Isrɑil yi Jwøk kipe gwedi kwɑnni ji, de kwɑnn-ɑ ɑ́gwed kì cyɑ̈n bong gøn kì yethi wɑ̈jji Rɑ̈dh Debïd. Yönɑthɑn nɑ̈yi Rɑ̈dh Debïd ɑ́bëëd e ngɑ̈ny kwøb kidøøj, o ɑ́bëëd ɑ́ jɑlgwed. En geki Yekiel wɑ̈d Akimönì ɑ ɑ́bëëd gɑ jøpwönyi wɑ̈ddi rɑ̈dh. Akithöpel ɑ́bëëd ɑ́ jɑl tøg buri rɑ̈dh, o Kucɑy jɑl Arkì ɑ́bëëd ɑ́ mɑ̈ɑ̈dh rɑ̈dh. Bɑng Akithöpel, ɑ ɑ́bëën yi Yöyɑdɑ̀ wɑ̈d Benɑiyɑ̀, kí Abiyɑthɑr. Yöɑb ɑ́bëëd ɑ́ pënyi liny rɑ̈dh. Kɑ jyɑ̈ggi gøldwøng, kí jɑggi wɑ̈thi kɑ̈llì, kí pëjji liny, kí jɑgg-ɑ mïdhi jɑmmì, cwööl Yerusɑlem bënn yi Rɑ̈dh Debïd. Acungi Debïd kì bøli gen, kɑ gï köbbe kinni, “Nyiimïɑ, lïngu kwøbbɑ. Yɑ ɑ́dwɑdd-ɑ gëddi Sɑnduug Ciggi Jwøng-ɑ Ácwɑ̈ɑ̈j ki ød men bëëde, keny yije ywööm yi Jwøng-ɑ Ácwɑ̈ɑ̈j, Jwøgee. Yɑ ɑ́dwɑdd-ɑ gëddii ki Kengø men wørii, kɑ jɑmmi gyer pyëlɑ bënn. De yɑ ɑ́kyëdde kinni yɑ ko gëëd, mɑ́ yɑ bɑ jɑl-liny, o yɑ ɑ́nɑ̈ɑ̈g ki ji mø gïïr. Jwøng-ɑ Ácwɑ̈ɑ̈j, Jwøøg Isrɑil yɑ ɑ́kwɑnye wøki gølɑ, o yɑ jɑɑgɑ Isrɑil gïti ɑtheer. Gøl Yeudɑ̀ ɑ́kwɑnye ɑ́ gøl jyɑ̈gø, kɑ ød wïyɑ kwɑnye kì gøl Yeudɑ̀ bëne. Pyëwe ɑ́med kɑ yɑn kì gøl wïyɑ, ɑkwɑnye yɑn, yɑn ɑ́ rɑ̈dh men jɑɑg Isrɑil bëne. Kɑ yɑ nënge ki wɑ̈dd mø gïïr, kɑ kwɑny-ɑ Sølømøn kì kelli wɑ̈ddɑ bënn, o jɑɑge Isrɑil, pödhi Jwøng-ɑ Ácwɑ̈ɑ̈j. “Jwøng-ɑ Ácwɑ̈ɑ̈j yɑ ɑ́köbbe kinni, ‘Wɑ̈dí Sølømøn, bɑ en ɑ ógëddi yɑn ki kengø, ɑ́kwɑny yi yɑn ɑ́ wɑ̈dɑ, o yɑ bɑ wïye. Lɑ̈ge ówiy yi yɑn o bëëde gïti ɑtheer, keløg e óbëëd e mïdh-ɑ ciggɑ ni kɑ̀ bëëde ɑnɑn.’ “De ɑnɑn, wun ɑ wɑddɑ, kì bøli Jwøgee kí bøli Isrɑil bëne, wun ɑ jii Jwøng-ɑ Ácwɑ̈ɑ̈j, yɑ köbb-ɑ wun kinni mïdhu møg-ɑ ɑ́cïgi wɑ yi Jwøng-ɑ Ácwɑ̈ɑ̈j, Jwøgee, o piny-ɑ med men ócöge ɑ́ mi wun ceth, kì yethi rïjj bënn.” Aköbbe Sølømøn kinni, “Wɑ̈dɑ, wør Jwøøg wïyí kɑ göggí ki pyëwí bëne, kí rummí bënn. Rummee bënn kí gïg-ɑ tyer yi wɑ ngɑ̈nyi yi en. Keløg yï ywøøg-ɑ kööre, yï ókøny yi en, de keløg ngɑ̈jí ólugii, yï óbɑny yi en gïti ɑtheer. Bëëd yï ngɑ̈ny wøw kinni, yï ɑ́kwɑny yi Jwøng-ɑ Ácwɑ̈ɑ̈j, o yï ger Kengi kwëre. Gwøøg ceth ki tegi pyëwí.” Anyudhi Sølømøn yi Debïd ki kër-ɑ ógeer Kengø, kí uddi jɑmmì geki udd-ɑ kyeelø, kí Kej Kwërdwøng ɑ bɑ kej dwöögi lɑ́ɑ̀w piny. Kɑ gø nyudhe ki kër-ɑ ógeer ódɑ̈rri Kengø geki udd-ɑ buti gen, kí uddi mïdhi jɑmmì, kí jɑmmi Kengø, kí jɑmmi kwër møg-ɑ nyi muuj gɑ møg pwøøj Jwøng-ɑ Ácwɑ̈ɑ̈j. Anyudhii yi Debïd thyew ki yëth-ɑ ópyële gwøøg ókwër geki Kwɑrri Leebì, kí kër-ɑ ógwøg gen gwøøg gen, kí gwøgi gwøøg Kengø, kí nenni jɑmm-ɑ nyi göög bënn kì Kengø. Akwøbe këër dhɑb kí ɑ́tegø men-ɑ óthɑ̈ɑ̈dh jɑmm-ɑ ógöög kì Kengø, ɑ løg: men-ɑ óthɑ̈ɑ̈dh lɑ̈mbɑ̈ɑ̈ kí tegi lɑ̈mbɑ̈ɑ̈, kí men-ɑ gwøøg tɑrɑbeedh dhɑb ɑ́kyel, kì ri møg-ɑ kömi gen nyi cïb ópùn møg-ɑ nyi thyëyi Jwøk. Kɑ këër dhɑm dhïw men-ɑ óthɑ̈ɑ̈dh gɑ̈bbì, kí óthɑ̈ggì, kí puggì, kí tɑ̈mmì. Kí dhɑm dhïw men-ɑ óthɑ̈ɑ̈dh këli bɑkur, kí kerobb møg-ɑ peedh obërri gen kömi Sɑnduug Ciggi Jwøng-ɑ Ácwɑ̈ɑ̈j. Kɑ Rɑ̈dh Debïd okööbø kinni, “Møgɑni bënn ɑ́nyudhi yɑn yi Jwøng-ɑ Ácwɑ̈ɑ̈j kiree, gɑ møg gwøg.” Kɑ Rɑ̈dh Debïd wɑ̈de Sølømøn köbbe kinni, “Pyëwí ko lïngi, kɑ yï ko böggi, kɑ yï cɑ̈gí ki gwøg, kɑ ko di gïn cuung yïn. Jwøng-ɑ Ácwɑ̈ɑ̈j, yï ókøny yi en. Yï koo wiye piny, de yï ókøny yi en ceth gïti keny-ɑ óthumi gwøøg Kengø. Ókwër kí Kwɑrri Leebì gïg-ɑ gwøg yi gen kì Kengø ɑ́mëggi gen. Jøgwøg mø ngɑ̈ny gwøg ki jɑmmi mø gïïr nenn-ɑ kønyi yïn, ji bënn geki jyɑ̈ggi gen ying-ɑ thɑ́ ciggí.” Aköbbi burø bëne yi Rɑ̈dh Debïd kinni, “Wɑ̈dɑ Sølømøn bene ngɑn-ɑ ɑ́kwɑny yi Jwøk, de nudd e thiinh, o bong gïn ngɑ̈nye. Men bɑ gwøg me dwøng cɑrø, mɑ́ e pɑth ki ød dhɑnhø ɑ ger, den-ɑ́ Kengi Jwøk, Jwøng-ɑ Ácwɑ̈ɑ̈j. Yɑ ɑ́rum ki cøngi jɑmmi geri Kengø, jɑmmɑni bɑ dhɑb, kí ɑ́tegø kí dilɑl kí dødø, kí pɑ̈mmì, kí ópɑddi kïttì møg-ɑ mïllø, kí ópɑddi kïttì møg-ɑ ógwelø, kí ópɑddi kïtt-ɑ nyi tweg kì ri dörø yi bödhhi tweg. Kɑ yɑ omuujø thyew ki ɑ́tegø kí dhɑb kì ri jɑmm-ɑ bɑ møgɑ, kipe kɑ̀ mɑɑrɑ Kengi Jwøk. Yɑ ɑ́muuj ki dhɑm dhïw me ngenyø kibøli tøn miyø, kí ɑ́teng-ɑ dhïw ɑ́ men dhyɑɑw döri Kengø ɑ́ tøn pyɑ̈r ɑ́ngwen, kwëe ógöög ki gïg-ɑ ógwøg yi bödhhì, gïn-ɑ dwɑddi ɑ́ dhɑb gwøg ki dhɑb, o gïn dwɑddi ɑ́ ɑ́tegø gwøg ki ɑ́tegø. Anɑn, ɑ́ men ɑ dwɑddi thegi Jwøng-ɑ Ácwɑ̈ɑ̈j ki tɑri pyëwe?” Codhe, kɑ jɑggi wɑ̈thi kɑ̈llì geki jɑgg-ɑ thønhø, kí pëjji liny, kí jɑggi gøldwøng omuujø ki jɑmmì. Jɑmm-ɑ ɑ́muuj yi gen kipe gwøøg Kengø bɑ Dhɑb ɑ́ tøn miyø kí pyɑ̈r ɑ́bïryew, kí ɑ́tegø ɑ́ tøn miy ɑ́dɑ̈g kí pyɑ̈r ɑ́ngwen, kí dilɑl ɑ́ tøn miy ɑ́bïkyel kí pyɑ̈r ɑ́ryew, kí dødø ɑ́ tøn ɑ́lïp ɑ́dɑ̈g kí miy ɑ́ngwen. Tyëng-ɑ́ yï gen ɑ́di ópɑddi kïtt-ɑ mïllø ɑ́mëggi gen tyëng-ɑ mïdhi jɑmmi Kengø, ɑ jɑngi gen bɑ Yekiel Kwɑɑr Leebì kì gøl Gercön. Jwøng-ɑ Ácwɑ̈ɑ̈j ɑ́nëngi yi ji ki medi pëthi gen, ge ɑ́bëëd pëthi gen med ki muujø. Kɑ Rɑ̈dh Debïd pyëwe ómïnø ki mendwøng. Alenhi Jwøng-ɑ Ácwɑ̈ɑ̈j yi Rɑ̈dh Debïd kì bøli teedø. Akööbe kinni, “Yɑ lenh-ɑ yïn, yïn ɑ Jwøng-ɑ Ácwɑ̈ɑ̈j, Jwøøg kweyi wøn Yɑgob, yï ólejji gïti ɑtheer. Yï dwøng, o yï teeg cɑrø, yï bɑ mɑ̈r, yï døj. Gïg-ɑ mɑl kí møg-ɑ piny bɑ møgí bënn, o yï bɑ rɑ̈nh-ɑ jɑɑg jɑmmì bënn. Kɑ̈rì kí jɑmmì bënn kɑ̈ɑ̈l-ɑ yïí, jɑmmì bënn jɑɑg yi yïn kɑ döngí geki tegí, o ngɑn dwɑddi yi yïn ócuggø gwøgø yi yïn e dwøng o teeg. Anɑn, Jwøøg wøn, wø pwøj-ɑ yïn, o wø lenh-ɑ nyingí, nying-ɑ myëër ki lejjø. “Thyew, bong gïn ceg ki mëggi yïn yi yɑn wøki jiɑ, mɑ́ jɑmmì bënn kɑ̈ɑ̈l-ɑ yïí, o wø dögg-ɑ yïn jɑmmì mø ceg bëëdø gɑ møgí. Ngɑ̈nyi yi yïn, yïn ɑ Jwøng-ɑ Ácwɑ̈ɑ̈j kinni, wø ɑ́bëëd wø nɑ ji mø ying yïnø, o wø nɑ wëdhh. Cyɑ̈nggi wøn kì kömi piny nyi pödhø nɑ tïbø, o bong keny kyëëj wøn thøø. Yïn ɑ Jwøøg wøn, Jwøng-ɑ Ácwɑ̈ɑ̈j, jɑmm-ɑ ɑ́kɑ̈ɑ̈l yi wøn keny bënn, ge bɑ møg gëddi yïn ki Kengø, men lejji wøn nyingí kwërø, de jɑmmɑni bënn ɑ́kɑ̈ɑ̈l-ɑ yïí, o ge bɑ møgí bënn. Ngɑ̈nyi yi yɑn kinni pëthi ji bënn nyii rɑngø yi yïn, o pyëwí med kɑ tyëngtir. Gïg bënn mëggɑ’ yïn ki medi pyëwɑ, o ɑ́lidh yi yɑn kinni jií møg-ɑ keny bënn, ge ɑ́muuj-ɑ medi pëthi gen. Yïn ɑ Jwøøg kweyyi wøn Abrɑhɑm, kí Isɑɑk, kí Yɑgob mïdhí rummɑni kì pëthi jií, kɑ pëthi gen lugí yïn. Nëngí wɑ̈dɑ Sølømøn ki tegi pyëw, o ciggí ómïdhe bënn, o gïg-ɑ ɑ́pyëlɑ bënn kipe geri Kengø tyëg yi en ki gwøgø.” Codhe, kɑ ji köbbi yi Debïd kinni, “Lenhu Jwøng-ɑ Ácwɑ̈ɑ̈j, Jwøøg wun!” Kɑ Jwøng-ɑ Ácwɑ̈ɑ̈j lenhi yi ji bënn, kɑ Jwøøg kweyyi gen mɑl yi gen. Kɑ rɑ̈dh mɑl gen thyew. Dhuki cyɑ̈ng-ɑ kyeelø, kɑ ge ongɑ̈dø ki gëdhhì, kɑ Jwøng-ɑ Ácwɑ̈ɑ̈j rɑ̈bbi yi gen ki gënh-ɑ nyi rɑ̈b bëne. Codhe, ɑmëggi rïnggɑni ji o gï cɑm gen. Kɑ ge ongɑ̈dø thyew ki wɑ̈dhh ɑ́lïp, kí ónyögg ɑ́lïp, kí órömm ɑ́lïp møg-ɑ ɑ́rɑ̈b kì wïj këli lɑm. Kɑ ge ókɑ̈nø ki kunyi møgi oløg, Kɑ ge orïïjø pëthi gen omedø, mɑ́ ge ɑ́cyɑ̈ɑ̈m, kɑ ge omɑ̈dhø kì bøli Jwøng-ɑ Ácwɑ̈ɑ̈j. Kɑ Sølømøn cigi mɑlø yi gen ɑ́ rɑ̈dh. Arøøny Sølømøn ɑ́ rɑ̈dh ki nyingi Jwøng-ɑ Ácwɑ̈ɑ̈j, kɑ Dhɑdök røny ɑ́ ókwërø. Codhe, kɑ Sølømøn pëgg-ɑ wïj kwøm-ɑ ɑ́cöb yi Jwøng-ɑ Ácwɑ̈ɑ̈j, kɑ ójɑ̈ggø kì kej wïye Debïd, Sølømøn ɑ́bëëd ɑ́ rɑ̈dh me døøj, kɑ wør yi pödhi Isrɑil bëne. Ayïëy jøgdøngø geki pëjji liny, kí wɑ̈ddi Debïd møg-ɑ kyeelø kinni, Sølømøn ówør yi gen ɑ́ rɑ̈dh. Kɑ pödhø bëne göjji wøri Sølømøn yi Jwøng-ɑ Ácwɑ̈ɑ̈j, kɑ gø gwøge ɑ́ rɑ̈dh me pëddi döng, me lod rɑ̈nhh-ɑ ɑ́jyɑ̈ɑ̈g bënn kì Isrɑil. Isrɑil bëne ɑ́jɑɑg yi Debïd wɑ̈d Yesì ki runn pyɑ̈r ɑ́ngwen. Ájyɑ̈ɑ̈g kì Kibrön ki runn ɑ́bïryew, kɑ ojyɑ̈gø ki runn pyɑ̈r ɑ́dɑ̈g wïdɑ́dɑ̈g kì Yerusɑlem. Debïd ɑ́thøw kì yij kɑ̈r e yöø, o ceg kɑ wørø. Wɑ̈de Sølømøn ɑ ɑ́røøny keje ɑ́ rɑ̈dh. Gïg-ɑ ɑ́gøggi yi Rɑ̈dh Debïd kër-ɑ cɑ̈ge gïti thume, bɑ ɑgwed kì yethi wɑ̈jji jøtöng ɑ løg Sɑmwel, kí Nɑthɑn, kí Gɑd. Gïg-ɑ ógwedø nyodh-ɑ yëth-ɑ ɑ́jyɑ̈ɑ̈ge, kí tege, kí gïg-ɑ ɑ́cwöb kipere, kí per Isrɑil, kí pödhh-ɑ bute. Sølømøn wɑ̈d Rɑ̈dh Debïd, Isrɑil ɑ́jɑɑge kidøøj, ɑgyëdhii yi Jwøge, Jwøng-ɑ Ácwɑ̈ɑ̈j, ɑgwøge gøn e teeg cɑrø. Kɑ tyëng Isrɑil bënn, ɑ løg pëjji liny møg-ɑ kwølli ɑ́lïp, kí møg-ɑ kwølli miy, kí jyɑ̈ggi gøldwøng, kí jɑggi wɑ̈thi kɑ̈llì cwøl yi Rɑ̈dh Sølømøn, kinni kedhi gen Gibeon be mɑlli Jwøk kyeel kí en. Ge ɑ́kedh-ɑ kunɑni mɑ́ Kemi Kwër ying-ɑ kunɑni, eni kem-ɑ ɑ́gwøg kì yij pɑ̈l yi Mosɑ̀ bɑ̈ng Jwøng-ɑ Ácwɑ̈ɑ̈j. (De Sɑnduug Ciggi Jwøk ɑ́bëëd ɑ Yerusɑlem kì yij kemɑ̀ men-ɑ ɑ́gur piny yi Rɑ̈dh Debïd, keny-ɑ ɑ́kɑ̈ɑ̈l Sɑndungɑni kì Kiriɑt Yeɑrïm.) Këli dilɑl men-ɑ ɑ́gwøg yi Bedhɑlel, wɑ̈d Urì, wɑ̈d Ur ɑ́bëëd ɑ Gibeon kì bøli Kemi Jwøng-ɑ Ácwɑ̈ɑ̈j. Kɑ Jwøng-ɑ Ácwɑ̈ɑ̈j mɑlli kì kunɑni yi Rɑ̈dh Sølømøn geki ji bënn. Kɑ Jwøng-ɑ Ácwɑ̈ɑ̈j ngɑ̈ddi yi Sølømøn ki gëdhhì gɑ ɑ́lïp, kɑ gï rɑ̈be kì wïj këli dilɑl. Wɑ̈rɑni ɑ ɑ́cwöb Jwøk kì bøli Sølømøn, ɑpyëje gøn kinni, “Á ngø ɑ dwɑddi yi yïn, o mëggɑ yïn?” Alöggi Sølømøn kinni, “Wïyɑ Debïd ɑ́mɑɑr yi yïn ki mendwøng, kɑ yɑ cïb yi yïn keje yɑn ɑ́ rɑ̈dh. Yïn ɑ Jwøk, Jwøng-ɑ Ácwɑ̈ɑ̈j, gwøg møg-ɑ ɑ́köbbí wïyɑ. Yɑ ɑ́gwøg yi yïn, yɑn ɑ́ rɑ̈ɑ̈dh jií møg-ɑ gïïr cɑrø, o ge pɑ cuggi kwɑnø, de thödhí yɑn ki peli wïj geki dïdø men-ɑ dwɑddi yi yɑn, o jɑɑgɑ gen; ji-ɑ gïïr cɑrø ni møg ólwɑ̈ng yi yɑn ki jɑɑgø kidï!” Aløøg kwɑ̈jji Sølømøn yi Jwøk kinni, “Yï ɑ́kwɑny gïn-ɑ dyër. Mɑ́ yï nuti cwøl-ɑ kɑ̈r, kí jɑmmì, wɑlɑ̀ mɑ̈r, kí nɑ̈gi tyëngmɑ̈ɑ̈nø, o yï nuti cwøl-ɑ bëëdø ki keny me bɑ̈ɑ̈r, de yï ɑ́cwøl-ɑ peli wïj geki dïdø møg jɑɑg jiɑ møg-ɑ́ kömi gen ɑ́cïbɑ yïn, yïn ɑ́ rɑ̈dh. Yï ómëggɑ peli wïj geki dïdø. O yï óthödhɑ thyew ki kɑ̈r, kí jɑmmì, kí mɑ̈r me dwøng, me nuti yodø yi rɑ̈nhì møg-ɑ ɑ́ying bølí kì tyeli mɑl, o óbong-ɑ dhɑnhø me yïe ódi jɑmmì mø ni møgɑni kì bɑngí.” Codhe, ɑdhwödh Sølømøn kì Gibeon kun-ɑ di Kemi Jwøng-ɑ Ácwɑ̈ɑ̈j, kɑ døøg-ɑ Yerusɑlem kun-ɑ jɑɑge Isrɑil. Acønge yɑ̈th-ɑ nyi pyejji yi kyënyì gɑ ɑ́lïp kí miy ɑ́ngwen, kí jøliny kyënyì ɑ́lïp pyɑ̈rø wïdɑ́ryew. Kɑ kwï jøliny cïb Yerusɑlem, kɑ møg-ɑ ɑ́döng cïb kɑ̈dd-ɑ døngø. Kì yethi runn-ɑ ɑ́jyɑ̈ɑ̈g Rɑ̈dh Sølømøn, ngyënyø ɑ́tegø kí dhɑb ɑ́bëëd ge ngenyø ni lel kì Yerusɑlem. Kɑ sɑndɑl, yɑnh-ɑ myëër gwøge e gïïr ni ólɑm. Kyënyì nyi kɑ̈ɑ̈l ɑ Rïp kí Kilikiyɑ̀ yi jøngyew mø Rɑ̈dh Sølømøn, o yɑ̈thi kyënyì nyi ngew-ɑ Rïp yi gen. Kɑ yɑ̈ɑ̈th kí kyënyì nyi lony gen ki ngëwwi rɑ̈nhi tyëng Kit, kí tyëng Arɑm e yɑ̈y ngew kɑ ngyëny ɑ́tegg miy ɑ́bïkyel, o kyeny ngew kɑ ngyëny ɑ́tegg miyø kí pyɑ̈r ɑ́bïj. Akööb Rɑ̈dh Sølømøn kinni geer Kengø men yije mɑlli Jwøng-ɑ Ácwɑ̈ɑ̈j. O ree gëdde ki gøldwøng men yije bëëde. Akɑ̈bbe ki ji ɑ́lïp pyɑ̈r ɑ́bïryew møg yëg jɑmmi gyer, kí ji ɑ́lïp pyɑ̈r ɑ́bïdɑ̈g møg tweg kïttì. Ádɑ ji ɑ́lïp ɑ́dɑ̈g kí miy ɑ́bïkyel møg nenni gwøg. Aödi Sølømøn yï Kirɑm rɑ̈ɑ̈dh Suur ki wöödø kinni, “Køny wɑ riee ceth, ni kɑ ɑ́køny wun ri wun ki wïyɑ, Rɑ̈dh Debïd, kɑ ngëwwi yi yïn ki yenh sɑndɑl møg geer gøldwøng. Yɑ ger-ɑ Kengø me yije mɑllɑ Jwøng-ɑ Ácwɑ̈ɑ̈j, Jwøgɑ. Óbëëd ɑ́ kej kwër, keny yije mɑllii yi yɑn wøki jiɑ, ɑ rɑ̈bbii ki bɑkur, ɑ ngɑ̈ddii ki gëdhhì kì mwøl kí böörø, kí cyɑ̈nggi Sɑbɑth, kí cɑ̈gi dwɑ̈y, geki cyɑ̈nggi kwëër Jwøng-ɑ Ácwɑ̈ɑ̈j møg-ɑ kyeelø. Isrɑil ɑ́rum ki cegø yi en kinni nyi gwøøg møgɑni ceth, gïti ɑtheer. Yɑ dwɑdd-ɑ gyer ki Kengø me dwøng cɑrø, mɑ́ Jwøgee dwøng cɑrø kibøli Jwögg-ɑ kyeelø. Dɑ́ men ɑ cuggi gëddi Jwøk ki Kengø kidyër, e men-ɑ́ mɑl ki dönge bëne nøg kipere! Yɑ bɑ men, ɑ cuggɑ ki gëddii ki Kengø? Yɑ ger-ɑ keny rɑ̈bbii ki bɑkur yøw! Anɑn ödí yɑn ki bødhø me ngɑ̈ny gwøg ki dhɑb kí ɑ́tegø, kí dilɑl, kí dødø. O ngɑ̈ny gwøg ki ógudh møg-ɑ bɑ ówɑw kí ɑ́cwïcwïl kí møg kwɑrø. Bønhɑni ógöögø geki bödhhi Yeudiyɑ̀ kí Yerusɑlem, gen ɑ bödhh-ɑ ɑ́yieny yi wïyɑ Debïd. Ödí yɑn ki yenh sɑndɑl, kí ɑmedh, kí yenh sɑndɑl kì Lubnɑn. Jøgwøg møgɑ óörɑ yï wun, o ge ngud gen kyeel ki yenh geki jøgí, o ge pyël gen yenh-ɑ geer Kengø men-ɑ ger yi yɑn e dwøng, o myër. Yï óödɑ ki gemè ɑ́ tøn ɑ́lïp ɑ́ryew kí ceir ɑ́ tøn ɑ́lïp ɑ́ryew, kí møgi oløg ɑ́ tøn ɑ́lïp miy ɑ́bïdɑ̈g, kí møøw dhetun ɑ́ tøn ɑ́lïp miy ɑ́bïdɑ̈g.” Aløøg møgɑni yi Kirɑm ki wɑ̈ny-ɑ ɑ́gwëde Sølømøn kinni, “Mɑ́ Jwøng-ɑ Ácwɑ̈ɑ̈j jie mɑɑr yi en, yï ɑ́rønye yïn ɑ́ rɑ̈dh, Lenhi wɑ Jwøng-ɑ Ácwɑ̈ɑ̈j, Jwøøg Isrɑil, ɑ ɑ́cwɑ̈j mɑl kí piny! Rɑ̈dh Debïd ɑ́nënge ki wɑ̈d me wïje pel, me tir, me dïdø, me göögø ɑnɑn kì ri geri Kengi Jwøng-ɑ Ácwɑ̈ɑ̈j, kí gëddi ree ki gøldwøng. Yï örɑ’ bødhø me dwøng, me wïje pel, me dïdø, me cwøl ɑ́ Kurɑm. Meye bɑ nyɑɑr gøl Dɑn, o wïye bɑ jɑl Suur. Ngɑ̈ny gwøg ki jɑmmì ki dhɑb, kí ɑ́tegø kí dilɑl, kí dødø, kí kïttì, kí pɑ̈mmì, o ócuggø gwøg ki ógudh-ɑ bɑ ówɑw kí ɑ́cwïcwïl, kí møg kwɑrø. O ócuggø cwɑ̈j ki ógudhi kor-ɑ yöm. Ócuggø gwøg ki wɑ̈thi jɑmm-ɑ nyi tweg bënn, o gïn-ɑ köbbii nyii gwøgø yi en ceth. Wiy gööge geki bödhhí, kí bödhh-ɑ ɑ́göggi wïyí, Rɑ̈dh Debïd. De ɑnɑn örí wøn gemè, kí ceir, kí møgi oløg, kí møøw dhetun møg-ɑ ɑ́kwøb yi yïn. Wø ónguddi piny kì Lubnɑn, ki yenh sɑndɑl møg-ɑ dwɑddi yi yïn. Ge ógwøg kì Yɑpɑ̀ gɑ óthyɑg, o ge ókïdhi Yerusɑlem.” Kɑ tyëngpɑth bënn møg-ɑ bëëdø kì piny Isrɑil gwed yi Rɑ̈dh Sølømøn ni gwen-ɑ ɑ́kwøng ki gwedø yi wïye Debïd. Kɑ kwɑnni tyëngpɑth ogöögø ki ɑ́lïp miyø kí pyɑ̈r ɑ́bïj wïdɑ́dɑ̈g. Kɑ ɑ́lïp pyɑ̈rø wïdɑ́bïryew kì kelli gen mëgge gwøøg yëgi jɑmmi gyer, o ɑ́lïp pyɑ̈r ɑ́bïdɑ̈g tweg gen kïttì kì pɑ̈l. Kɑ ɑ́lïp ɑ́dɑ̈g kí miy ɑ́bïkyel kwɑnye gɑ jøg nenni gwøg. Codhe, ɑcɑ̈gi Rɑ̈dh Sølømøn ki geri Kengi Jwøng-ɑ Ácwɑ̈ɑ̈j, kì Yerusɑlem kì wïj Kïti Moriyɑ̀ keny-ɑ ɑ́cwööb yi Jwøng-ɑ Ácwɑ̈ɑ̈j kì bøli wïye Debïd, kì keny-ɑ ɑ́bëëd ɑ́ rɑri Arɑunɑ̀ jɑl Yebus. Kengø ɑ́cɑg ki gerø yi Rɑ̈dh Sølømøn kì ryeew dwɑ̈tt, kì ri ngween runne ɑ́ rɑ̈dh. Keng-ɑ ɑ́ger yi Rɑ̈dh Sølømøn bɑ̈re bɑ mïtïr pyɑ̈r ɑ́ryew wïdɑ́bïryew, o lɑ̈je bɑ mïtïr ɑ́bïngwen. Øn-ɑ yïëbbi Kengø bɑ̈re bɑ mïtïr ɑ́bïngwen ni lɑ̈ji Kengø, o döre bɑ mïtïr pyɑ̈r ɑ́bïj wïdɑ́ngwen. O yije bɑ ɑmwøn ki dhɑb. Yij øn-ɑ dwøng ótɑgø ki pɑ̈mmi sɑndɑl, o ógøjø ki dhɑm dhïw, kí ngïjji yenh benø geki ɑ́cwecwel. Kengø ɑ́dhyɑw yi rɑ̈dh ki kïtt-ɑ myër møg-ɑ ɑ́kɑ̈ɑ̈l kì piny Pɑrbɑim. Döri Kengø kí rïwwi ɑwɑjj geki thïggi Kengø gï ɑ́gøje ki dhɑb. Kɑ ri dörø gögge ki ngïjji kerobb. Kej Kwërdwøng bɑ̈re bɑ mïtïr ɑ́bïngwen, o lɑ̈je bɑ mïtïr ɑ́bïngwen e nɑ lɑ̈ji Kengø. Gedd ɑ́gwøg kɑ grɑmm mø dhɑb miy ɑ́bïj kí pyɑ̈r ɑ́bïryew, dörri udd-ɑ mɑl ɑ́gøj kɑ dhɑb thyew. Rɑ̈dh jøgwøg ɑ́köbbe kinni göög gen ki ngïjji kerobb ki dødø, kɑ ge gøj ki dhɑb, kɑ ge cïb Kej Kwërdwøng, Gëëng Kej Kwërdwøng ɑ́gwøg kɑ ógødh kor-ɑ yöm, e bɑ ɑgwel ki kïddì mø bɑ ówɑw kí ɑ́cwïcwïl kí møg kwɑrø, o ree ókwïnnø ki ngïjji kerobb. Rɑ̈dh ɑ́göög ki löjji dilɑl ɑ́ryew, ɑ́kyel bɑ̈re bɑ mïtïr pyɑ̈rø wïdɑ́bïj kí sentimïtïr pyɑ̈r ɑ́bïj, kɑ gï cïbe bøli Kengø, wɑ̈thi löjjɑni dɑ ɑtɑ̈nyy mø bɑ̈ri gen bɑ mïtïr ɑ́ryew kí sentimïtïr pyɑ̈r ɑ́ryew. Wɑ̈thi löjjɑni ryeet ódhyɑwø ki ɑ́cwecwel, kí ngïjji nywøli yɑdh romɑn møg-ɑ ógwøgø ki ngyënyø dilɑl gɑ miyø. Kɑ löjjɑni cïb dhø Kengø. Kɑ men-ɑ wɑɑng wurlwɑl cɑg ɑ́ Yɑkin, kɑ men-ɑ wɑɑng wuudø cɑg ɑ́ Boɑdh. Këli lɑm mi Rɑ̈dh Sølømøn ógerø kɑ dilɑl, bɑ̈re bɑ mïtïr ɑ́bïngwen ɑ́ óbɑr, o döre bɑ mïtïr ɑ́ngwen kí sentimïtïr pyɑ̈r ɑ́bïj. Kɑ ogöögø ki luy me bɑ ɑ́dulø ki dilɑl, men yije nyi kïdhi pï. Rïwi dööle bɑ mïtïr ɑ́ngwen kí sentimïtïr pyɑ̈r ɑ́ngwen, o döre bɑ mïtïr ɑ́ryew kí sentimïtïr pyɑ̈r ɑ́ryew, o bɑ̈ri dööle bɑ mïtïr pyɑ̈rø wïdɑ́dɑ̈g kí sentimïtïr pyɑ̈r ɑ́ryew. Wɑ̈thi tøggi luyɑni yiny-ɑ wɑ̈g bëne bɑ ɑdöl ki lwøbb ɑ́ryew mø ngïjjì, ɑ́kyel kì kömi men-ɑ kyeelø. Gïg-ɑ ógweed kömi luyɑni bɑ ngïjji wɑ̈dhh. Luyɑni ócïb-ɑ kömi wɑ̈dhhi dilɑl pyɑ̈rø wïdɑ́ryew, ge nenn-ɑ wɑ̈g, ɑ́dɑ̈g nenn-ɑ tung ɑ́kyel. Luyɑni bɑ dhïl ki mïlimïtïr pyɑ̈r ɑ́bïryew wïdɑ́bïj, nyɑ̈re nɑ nyɑ̈ri kubɑyɑ̀, ɑ́ ɑtɑ̈ny ni okøgg. Luyɑni yije røm-ɑ yi pï røthøl ɑ́lïp miyø kí pyɑ̈r ɑ́ryew. Agöög gen ki ɑ́tɑ̈yyì pyɑ̈rø, kɑ ɑ́bïj cïb wïj tuung Kengø kì wɑɑng wuudø, kɑ ɑ́bïj-ɑ kyeelø cïb wïj tuung Kengø kì wɑɑng wurlwɑl. Pïgɑni nyi lwøøg-ɑ rïngg-ɑ rɑ̈b gɑ gëdhhì. Pïg-ɑ yij luy dilɑl nyi löög-ɑ yi ókwër. Agëddi ókwër ki ódɑ̈rø kì yij Kengø, kí ódɑ̈rø megø kì yiny-ɑ wɑ̈g. Thïggi ódɑ̈rrɑni bɑ ɑmwøn ki dilɑl. Luuy dilɑl ɑ́cïb-ɑ tuung Kengø men-ɑ døøg wɑɑng wurlwɑl kì kuni wɑɑng cyɑ̈ɑ̈ng mwøl. Jɑmmɑni bënn ɑ́gwøg-ɑ thwør-ɑ kɑɑm Suköth geki Dhered kì kömi Nɑm Urdun ni kɑ ɑ́kwøbii yi rɑ̈dh. Jɑmmɑni bënn ɑ́gwøg yi Sølømøn ge gïïr, o pegi dilɑl nuti rømø mɑ́ e gïïr cɑrø. Rɑ̈dh Sølømøn ɑ́göög ki jɑmmi Kengø ki dhɑb, ɑ løg këli lɑm, kí tɑrɑbedhhi ópun men-ɑ nyi mëggi Jwøk, kí teggi lɑ̈mbɑ̈ɑ̈ geki lɑ̈mbɑ̈ɑ̈ mø dhɑm-ɑ dhïw møg-ɑ nyi lyel kì bøli Kej Kwërdwøng, ni kɑ ókwøbii ceth, kí ngïjji okøgg, kí lɑ̈mbɑ̈ɑ̈, ki dikɑ̈bbì; kí gïg-ɑ nyi nɑ̈ɑ̈g lɑ̈mbɑ̈ɑ̈, kí tɑ̈mmì, kí ópɑ̈nni bɑkur, kí ɑtöggi mɑc. Gïgɑni bënn ɑ́gwøg kɑ dhɑm dhïw. Thïggi dhø Kengø møg-ɑ yiny-ɑ wɑ̈g geki thïgi Kej Kwërdwøng bɑ ɑmwøn ki dhɑb. Keny-ɑ ɑ́rum Rɑ̈dh Sølømøn ki gwøøg Kengø bëne, ɑcïbe jɑmm-ɑ ɑ́thyëyi Jwøng-ɑ Ácwɑ̈ɑ̈j yi wïye Rɑ̈dh Debïd yije, ɑ løg ɑ́tegø, kí dhɑb, kí jɑmmì møøgø. Codhe, ɑcøng jøgdøngø, kí jɑggi wɑ̈thi kɑ̈llì, kí jɑgg-ɑ thønhø bënn yi Rɑ̈dh Sølømøn. Gï ɑ́cwööle Yerusɑlem be kïdhi Sɑnduug Ciggi Jwøng-ɑ Ácwɑ̈ɑ̈j Kengø, kì kɑɑl Debïd kì Dhɑyøn. Ge ɑ́cugi bøli rɑ̈dh bënn kì bøli kej Kwër Akɑnnì. Keny-ɑ ɑ́wɑ̈nhi pëjjì bënn, ɑtïng Sɑnduug Cigg yi Kwɑrri Leebì, kɑ gø kïdhi gen Kengø. Thyew kɑ Kemi Jwøng-ɑ Ácwɑ̈ɑ̈j ki jɑmme bënn tëër Kengø yi ókwër geki Kwɑrri Leebì. Kɑ Rɑ̈dh Sølømøn kí tyëng Isrɑil bënn ge ócugø kì bøli Sɑnduug Cigg, kɑ ongɑ̈dø ki gëdhhì mø ngenyø; dyëg, kí dhög. Codhe, kɑ Sɑnduug Cigg tïng yi ókwër kɑ gø cïb gen Kej Kwërdwøng, kì thɑ̈thi obërri kerobb. Sɑndug geki lødh-ɑ nyi byellii bɑ ɑgëng yi obërri gen møg-ɑ ópedhø. Wɑ̈thi lødh nenn-ɑ yi ngɑn cungi kì yij Kengø, e rwöm ki dhø Kej Kwërdwøng, de ge pɑ nënni kì wɑ̈g. (Ge nud kì kenyɑni gïti dicyɑ̈ngtïn.) Ábong-ɑ gïn nud kì yij Sɑnduug Cigg, den-ɑ́ ópɑ̈nni kït ɑ́ryew møg-ɑ ɑ́cïb yi Mosɑ̀ keny-ɑ ɑ́ying gen Kïti Sinɑy, keny-ɑ ɑ́lwööb Jwøng-ɑ Ácwɑ̈ɑ̈j kí tyëng Isrɑil ge kɑ̈ɑ̈l-ɑ Rïp. Codhe, ɑkwɑ̈jji Rɑ̈dh Sølømøn kinni, “Wuö Jwøng-ɑ Ácwɑ̈ɑ̈j, yï ɑ́myeg bëëdø kì yethi pøøl, kí bëëdø kì yij muudhø. Yï ɑ́gëddɑ ki Kengø ɑ́ keny bëëd yi yïn gïti ɑtheer.” Tyëng Isrɑil bënn ɑ́cung ɑ kenyɑni kɑ rɑ̈dh ree luge yï gen, ɑcwööle gyëdhhi Jwøk kömi gïn. Akööbe kinni, “Pwøju Jwøng-ɑ Ácwɑ̈ɑ̈j, Jwøøg Isrɑil! Kwøbb-ɑ ɑ́köbbe wïyɑ Rɑ̈dh Debïd ɑ́mïdhe, gen ɑ møg-ɑ ɑ́köbbe gøn kinni, ‘Kër-ɑ ɑ́kɑ̈ɑ̈lɑ jiɑ wɑ̈g kì Rïp gïti ɑnɑn, bong kɑɑl mɑ ɑ́myegɑ kì piny Isrɑil ɑ́ keny gëddi ki ød me yije ómɑlli yɑn, o ɑ́bong-ɑ ngɑn mɑ ɑ́yienyɑ ɑ́ ngɑn jɑɑg jiɑ, tyëng Isrɑil. De ɑnɑn Yerusɑlem ɑ́myegɑ ɑ́ keny mɑlli yɑn, kɑ yï kwɑnyɑ Debïd, yïn ɑ́ ngɑn jɑɑg jiɑ.’ ” Akööb Sølømøn kinni, “Wïyɑ Debïd ɑ́dwɑdd-ɑ geri Kengø ɑ́ men yije mɑlli Jwøng-ɑ Ácwɑ̈ɑ̈j, Jwøøg Isrɑil, de ɑ́köbbi yi Jwøng-ɑ Ácwɑ̈ɑ̈j kinni, ‘Yï ɑ́dwɑdd-ɑ gwøgi gïjø me døøj, kɑ ɑ́dwɑddí gëddi yɑn ki kengø, de koo ger-ɑ yi yïn, bɑ wɑ̈dí ceth ɑ óger Kengɑ.’ “Anɑn Jwøng-ɑ Ácwɑ̈ɑ̈j, kwøbbe ɑ́mïdhe, kej wïyɑ ɑ́kwɑnyɑ yɑn ɑ́ rɑ̈ɑ̈dh Isrɑil, ɑgerɑ Keng-ɑ yije mɑlli Jwøng-ɑ Ácwɑ̈ɑ̈j, Jwøøg Isrɑil. Sɑnduug Cigg men-ɑ yije di ópɑddi kïtti lwöm-ɑ ɑ́lwøb yi Jwøng-ɑ Ácwɑ̈ɑ̈j ki tyëng Isrɑil ɑ́cïbɑ yij Kengø.” Codhe, ɑcungi Sølømøn kì bøli këli lɑm mi Jwøng-ɑ Ácwɑ̈ɑ̈j, kì bøli tyëng Isrɑil bënn, kɑ cingge thɑɑnge mɑl. Sølømøn ɑ́bëëd e rum gwøg ki gyeem dilɑl. Gyemɑni bɑ óør, bɑ̈re bɑ mïtïr ɑ́ryew kí sentimïtïr pyɑ̈r ɑ́ryew, o döre bɑ mïtïr ɑ́kyel kí sentimïtïr pyɑ̈r ɑ́dɑ̈g, kɑ gø cïbe dïdyëri ódɑ̈rø. Ayedhe wïj gyemɑni, kɑ cønge rume piny e onennø yi ji bënn, kɑ cingge thɑɑnge mɑl. Akwɑ̈jje kinni, “Bong Jwøk me ni yïn kì mɑl kí piny bëne yïn ɑ Jwøng-ɑ Ácwɑ̈ɑ̈j, Jwøøg Isrɑil. Lwömí ki jií ɑ́mïdhí, kɑ mɑ̈ɑ̈dø mií nyudhí gen, kɑ̀ bëëd gen ge gɑ̈nn-ɑ yïn ki pëthi gen bënn. Møg-ɑ ɑ́köbbí wïyɑ Debïd ɑ́mïdhí ceth, møg-ɑ ɑ́kwøb yi yïn bënn ɑ́pɑ̈dhi kɑ̈jji gen dicyɑ̈ngtïn. Anɑn mïdhí kwøbbí møg-ɑ kyeelø, møg-ɑ ɑ́köbbí wïyɑ Debïd, yïn ɑ Jwøng-ɑ Ácwɑ̈ɑ̈j, Jwøøg Isrɑil, møg-ɑ ɑ́köbbii yi yïn kinni, rɑ̈nh-ɑ ójɑɑg Isrɑil kì yethi rïjj bënn, óbï e kɑ̈ɑ̈l-ɑ ri kwɑrre, keløg ciggí ómïdhi yi gen kidøøj ni kɑ ɑ́mïdhe gïn. De ɑnɑn wiy møg-ɑ ɑ́köbbí bɑ̈ngí Debïd pɑ̈dhi gen kɑ̈jji gen bënn, yïn ɑ Jwøng-ɑ Ácwɑ̈ɑ̈j, Jwøøg Isrɑil. “De yïn ɑ Jwøk, yï ócuggø bëëdø kì kömi piny kì kelli ji, e men-ɑ́ mɑl ki dönge bëne nøg kiperí? Yï røm-ɑ yij Keng-ɑ geer yɑn èn? Wuö Jwøgɑ, yɑ bɑ bɑ̈ngí. Lïngí kwɑ̈jjɑ, kɑ gïg-ɑ kwɑjjɑ mëggí yɑn. Kor Kengø men kì dicɑ̈ng kí wɑ̈r. Yï ɑ́kööb kinni, bene keny-ɑ yije ómɑlli yïn èn. Nyi lïngí kwøbbɑ kenyi kwɑ̈jjɑ wïjɑ lugi yɑn Kengø men. Lïngí kwɑ̈jjɑ kí kwɑ̈jji jií tyëng Isrɑil kenyi lugi gen ri gen keny, kɑ ge ókwɑ̈jjø, lïngí kwɑ̈jji wøn kɑ lɑɑwí dwöög piny kipe wøn kì pɑɑrí mɑl. “Keløg dhɑnhø óbɑ̈jjø ki wɑɑd gen, kɑ kɑ̈ɑ̈l wïj këli lɑm mií kì Kengø men, kipe kinni o könge kinni yïe bɑ̈r, lïngí kwøbbe kì pɑɑrí mɑl, yïn ɑ Jwøng-ɑ Ácwɑ̈ɑ̈j, kɑ gøøny gen liidh, cɑy ngɑn-ɑ ɑ́bɑ̈jji ki cɑ́y-ɑ kyëëw ki bɑ̈jje, kɑ ngɑn-ɑ yïe bɑ̈r wiy. “Keny-ɑ ótyɑɑm jií tyëng Isrɑil yi tyëngmɑ̈ɑ̈nø, mɑ́ ge ɑ́røngi kì bølí, kɑ ge dwöög-ɑ köörí, kɑ ge bï-ɑ yij Kengø men, ge yömm-ɑ yïí kipe dwöögi lɑɑwí piny, lïngí kwøbbi gen kì pɑɑrí mɑl, kɑ ge dwöög piny-ɑ ɑ́mëggí gen geki kweyyi gen. “Keny-ɑ ómɑ̈ɑ̈n kødh yi yïn, kipe kɑ ɑ́røngi jií kì bølí, kɑ ge óyewø, kɑ wɑ̈thi gen lugi gen Kengi men, ge kwɑjj-ɑ yïn ki möölø, lïngí kwøbbi gen kì pɑɑrí mɑl, yïn ɑ Jwøng-ɑ Ácwɑ̈ɑ̈j, kɑ lɑɑwí dwöög piny kipe orøøg bɑ̈nggí tyëng Isrɑil, kɑ ge pwönyí ki gwøgi gïn-ɑ bɑ dyër, kɑ kødh ör kömi piny men, eni piny-ɑ ɑ́mëggí jií ɑ́ mi gen gïti ɑtheer. “Keny-ɑ ónud kɑ̈j kì pödhø, wɑlɑ̀ yømø nɑ̈ɑ̈g, wɑlɑ̀ byel orënyø yi yømø me teg, wɑlɑ̀ ge cɑm-ɑ yi bɑ̈nyø, wɑlɑ̀ kenyi pɑ̈ɑ̈r kömi jií yi tyëngmɑ̈ɑ̈nø, wɑlɑ̀ rɑ̈ɑ̈m dëllì, lïngí kwɑ̈jji gen. Keløg jií, wɑlɑ̀ dhɑnhø ɑ́kyel kì kelli jií tyëng Isrɑil cingge tïnge’ mɑl e wïje lug en Kengø, e ókwɑ̈jjø ki rɑ̈ɑ̈m pyëwe, lïngí kwɑ̈jji gen, lïngí kwøbbi gen kì pɑɑrí mɑl, kɑ lɑɑwí dwöög piny kipe gen. Bɑ yï ketí ɑ ngɑ̈nyi rumm-ɑ ying pyëw dhɑnhø. Göggí dhɑnhø ki gïn-ɑ kyëëw ki en, kipe kinni o yï wør yi ji, o yï gɑ̈nni yi gen ceth, kɑ̀ bëëd gen kì piny-ɑ ɑ́mëggí kweyyi wøn. “Keløg perí olïngø yi tyëngpɑth kì kun lɑ̈wi, kinni yï dwøng o yï teg, o yï pɑ nyi cwööng ki kunyø, kɑ ge bï-ɑ be kwɑ̈jjø kì Kengø men, lïngí kwɑ̈jji gen. Lïngí kwɑ̈jji gen kì pɑɑrí mɑl, kɑ ge göggí gïn-ɑ kwɑjji yi gen, kipe kinni, o yï yod yi tyëng kömi piny, o yï gɑ̈n yi gen, ni kɑ̀ gɑ̈ɑ̈n yïn yi jií tyëng Isrɑil. O yod yi gen kinni Kengø men-ɑ geer yɑn èn, bene keny-ɑ mɑlli yïn. “Keny-ɑ óköbbí jií kinni nyïɑ̈ggi gen ki tyëngmɑ̈ɑ̈nø, kɑ yï kwɑjji yi gen, kì keny-ɑ ódi gen, e wɑ̈thi gen lug gen kɑɑldwøng, kɑɑl-ɑ ɑ́myeg yi yïn, kí Kengø men-ɑ ɑ́gërrɑ yïn, lïngí kwɑ̈jji gen. Lïngí kwøbbi gen kì pɑɑrí mɑl, kɑ ge wëggí tyɑ̈mø. “Keny-ɑ órøngi jií kì bølí, kɑ bong-ɑ ngɑn nuti røngø, keny-ɑ órënyi pyëwí kɑ ge wëggí tyɑmø yi tyëngmɑ̈ɑ̈nø, kɑ ge køøl pödhø megø gɑ ɑmɑgg, cɑgg pönhɑni lɑ̈wi, lïngí kwɑ̈jji jií. Keløg ge óyewø kì pönhɑni kɑ yï kwɑjji yi gen, ge yïëyø ki bɑ̈jji gen, lïngí kwɑ̈jji gen yïn ɑ Jwøng-ɑ Ácwɑ̈ɑ̈j. Keløg ge óyewø kì pönhɑni e bong wëënyø kì pëthi gen, kɑ yï kwɑjji yi gen e wɑ̈thi gen lug gen piny-ɑ ɑ́mëggí kweyyi wøn, kí kɑɑl-ɑ ɑ́myeg yi yïn èn, kí Keng-ɑ ɑ́gërrɑ yïn èn, lïngí kwɑ̈jji gen. Lïngí kwøbbi gen kì pɑɑrí mɑl, kɑ pyëwí lɑ̈ɑ̈me ki gen, kɑ lɑɑwí dwöög piny kipe orøøg jií bënn. “Anɑn yïn ɑ Jwøgɑ, lug thɑ̈wwí, kɑ kwɑny-ɑ kwɑjji yïn yi wøn kì keny lïngí. Dhwöödh ɑnɑn, yïn ɑ Jwøk, Jwøng-ɑ Ácwɑ̈ɑ̈j, kɑ yï kedhí yij Kengø, kɑ yï bëëd kì yije wuki Sɑnduug Cigg, ɑ bɑ ngïji tegí gïti ɑtheer. Nyi gëdhhí ókwërrí gïg-ɑ gøggi yi gen bënn, kɑ wiy pëthi jií bënn med gen kipe kor-ɑ koor gen. Rɑ̈nh-ɑ ɑ́myeg yi yïn ko bɑɑny yïn ɑ Jwøk, Jwøng-ɑ Ácwɑ̈ɑ̈j, pɑrrí mɑɑr-ɑ ɑ́mɑɑr bɑ̈ngí Debïd.” Keny-ɑ ɑ́rum Rɑ̈dh Sølømøn ki kwɑ̈jjø, ɑbëën mɑc piny e kɑ̈ɑ̈l-ɑ mɑl, kɑ gëdhh-ɑ ɑ́muuj rɑ̈be, ɑmeeny yij Kengø yi mɑ̈ɑ̈r Jwøng-ɑ Ácwɑ̈ɑ̈j. Ókwër ɑ́cög ge pɑ kedhi Kengø, mɑ́ Kengø ɑ́pɑ̈ng yi mɑ̈ɑ̈r Jwøng-ɑ Ácwɑ̈ɑ̈j. Keny-ɑ ɑ́liidh mɑc e ódëëmø kì mɑl yi tyëng Isrɑil, kɑ Kengø opɑ̈ngø yi cɑr, ɑbøødh gen ri gen piny wɑ̈thi gen ónywɑ̈ddø’ piny, ge mɑll-ɑ Jwøk, e olenhø yi gen kipe døøje, kí mɑ̈ɑ̈dø mee men-ɑ pɑ nyi lwënyi gïti ɑtheer. Codhe, ɑnëngi Jwøng-ɑ Ácwɑ̈ɑ̈j ki gëdhhì yi Sølømøn, geki ji bënn. Kɑ Rɑ̈dh Sølømøn ongɑ̈dø ki dhög ɑ́lïp pyɑ̈r ɑ́ryew wïdɑ́ryew, kí dyëg ɑ́lïp miyø kí pyɑ̈r ɑ́ryew gɑ gëdhhì. Kɑ Kengø thyey yi Sølømøn geki ji bënn. Ókwër ɑ́cung ɑ kɑ̈jji gen ge nenn-ɑ nyingi gen geki Kwɑrri Leebì. Kwɑrri Leebì lejj-ɑ Jwøng-ɑ Ácwɑ̈ɑ̈j ki jɑmmi wör møg-ɑ ɑ́mëggi gen yi Rɑ̈dh Debïd gɑ møg nyi lenhi Jwøng-ɑ Ácwɑ̈ɑ̈j ki wöri mɑ̈ddø kinni, Jwøng-ɑ Ácwɑ̈ɑ̈j mɑ̈ɑ̈dø mee bong cöge, ni kɑ ɑ́ceg gen yi Debïd. Akoodh kɑ̈ngì yi Kwɑrri Leebì, ji ócungø bënn. Athyeey ódɑ̈r-ɑ bøli Kengø yi Sølømøn, ɑmuuje kì kenyɑni ki gënh-ɑ nyi rɑ̈b bëne, kí byëlø, kí dwɑ̈li gënhi mër. Gï ɑ́gwøge kinøw, mɑ́ këli lɑm men-ɑ ɑ́gwøge ki dilɑl thiinh, gëdhhɑni bënn pɑ cuggi rømi wïje. Agwøøg Kwëër Akɑnnì ki cyɑ̈ng ɑ́bïryew yi Sølømøn geki tyëng Isrɑil bënn. Ádɑ ji mø kɑ̈ɑ̈l pödhh mø lɑ̈wi ge gïïr, ge kɑ̈ɑ̈l-ɑ Amɑth kì wɑɑng wuudø gïti wïj keew Rïp, kì wɑɑng wurlwɑl. Kì bïdɑ̈ɑ̈g cyɑ̈ng, kɑ ji bënn bï-ɑ be mɑlli Jwøng-ɑ Ácwɑ̈ɑ̈j, mɑ́ këli lɑm ɑ́thyey kɑ cyɑ̈ng ɑ́bïryew, o Kwëër Akɑnnì ɑ́tyëg-ɑ cyɑ̈ng ɑ́bïryew. Kì cyɑ̈ng pyɑ̈r ɑ́ryew wïdɑ́dɑ̈g, kì bïryeew dwɑ̈tt, ɑör ji myërri gen yi Sølømøn. Akedh gen pëthi gen med cɑrø kipe gïgdøj bënn møg-ɑ ɑ́göggi tyëng Isrɑil geki Debïd, kí Sølømøn yi Jwøng-ɑ Ácwɑ̈ɑ̈j. Kì bɑng kɑ ɑ́rum Kengø geki gøldwøng ki gerø yi Sølømøn, kɑ gïg-ɑ ɑ́rømme bënn kipe gïn tyëge ki tɑrø, ɑcigi Jwøng-ɑ Ácwɑ̈ɑ̈j cwöbø kì bøle kì wɑ̈r, ɑköbbe gøn kinni, “Kwɑ̈jjí ɑ́lïngɑ, Kengø men ɑ́yïëyɑ ɑ́ keny yije ómëggi yɑn gëdhhì. Keny-ɑ ómɑ̈ɑ̈nɑ kødh, kɑ bɑ̈nyø örɑ be cɑmi byel, wɑlɑ̀ kömi jiɑ örɑ’ yømø nɑ̈ɑ̈g, keløg yɑ okwɑjjø yi gen, kɑ ge óyewø ki orøg, kwøbbi gen ólïngɑ kì pɑɑrɑ mɑl, kɑ lɑɑwɑ dwöögɑ piny kipe orøøg gen, kɑ pödhi gen døøgɑ ki tyenyø. Kengø men ónennɑ, yïthhɑ óbëëd ge kyëën yɑn kipe lïngi gïg-ɑ ókwɑjji kì keny bënn. Mɑ́ Kengɑni ɑ́rum ki gerø, kɑ kwërɑ ɑ́ keny yije ómɑlli yɑn gïti ɑtheer, ónennɑ kɑ korɑ kì bøli kɑ̈jj bënn. Keløg yɑ ógöggi yi wun e yethi wun bong ɑ́dud ni kɑ ɑ́mïdhi ciggɑ yi Debïd, kɑ gïg-ɑ nyi köbbɑ wun nyi gwøg yi wun, dhøgɑ ómïdhɑ kɑ møg-ɑ ɑ́köbbɑ wïyí Debïd kinni Isrɑil óbëëd e jɑɑg-ɑ yi kwɑrre kì yethi rïjj bënn; gwøgɑ ceth. De keløg jií óbɑ̈nyi ki mïdhi ciggɑ geki kwøbb-ɑ mëgg-ɑ wun, kɑ ge døøg-ɑ be mɑlli jwögg mø pɑth, wu ónyiigɑ kì piny-ɑ ɑ́mëggɑ wun, kɑ Keng-ɑ ɑ́kwër yi yɑn kinni yije ómɑlli yɑn, wiyɑ piny thyew. Kɑ Kengɑni gɑggi yi ji, kɑ ogöögø e bong nyinge. “Dhwɑ̈ɑ̈ng Kengø dwøng ɑnɑn, de órënyi kɑ ji-ɑ nyi kɑ̈l bute nyi ceg-ɑ ngɑ̈ngø, kɑ ri gen nyi pyënyi gen kinni, ‘Ede pönhï geki Kengø men ɑ gwøøg gen kinni yi Jwøng-ɑ Ácwɑ̈ɑ̈j?’ Kɑ ji ólöggø kinni, ‘Bɑ kipe kɑ ɑ́wiy gen Jwøng-ɑ Ácwɑ̈ɑ̈j, Jwøøg gen, eni Jwøng-ɑ ɑ́kɑ̈ɑ̈l kweyyi gen wɑ̈g kì Rïp. Kɑ ge døøg-ɑ be mɑlli jwögg møøgø. Akɑ̈ni kömi gen ki ryɑ̈g yi Jwøng-ɑ Ácwɑ̈ɑ̈j.’ ” Geri Kengø geki gøldwøng yi Sølømøn ɑ́tyëg-ɑ runn pyɑ̈r ɑ́ryew. Kɑ kɑ̈dd-ɑ døngø møg-ɑ ɑ́mëggii yi Rɑ̈dh Kirɑm døøge ki gerø thyew, ɑöde ki tyëng Isrɑil møg bëëdø kì yethi kɑ̈ddɑni. Kɑ myërri Amɑth geki Dhöbɑ̀ mɑg yi Sølømøn, kɑ kɑɑl Pɑlmur kì yij ryɑng gëdde ki dörø me teg. Kɑ kɑ̈dd-ɑ døngø møg-ɑ myërri Amɑth bënn døøge ki gerø gɑ møg yethi gen nyi mïdhi jɑmmì. Møg bɑ kɑ̈dd-ɑ døngø møg-ɑ ɑ́døøg ki gerø thyew yi Sølømøn: Bet Örøn men-ɑ kwøømø, kí Bet Örøn men-ɑ yij tör (Kɑ̈ddɑni bɑ ɑwen ki dör mø teg, o dhøggi gen dɑ thïggi ngyënyø dødø), kí kɑɑl Bɑɑlɑth, geki kɑ̈dd-ɑ døngø bënn møg-ɑ yethi gen nyi mïdhi jɑmmì, kí kɑ̈dd-ɑ døngø møg-ɑ yethi gen bëëd yi kyënyì geki jøkyënyì. Kɑ̈jj-ɑ ɑ́dwɑdde gerø bënn, gï ɑ́gere, kì Yerusɑlem, kí Lubnɑn, kí myërr-ɑ ɑ́jɑɑg yi en bënn. Ji-ɑ ɑ́döng bënn kì ri jurr-ɑ kyeelø, ɑ løg tyëng Kit, kí tyëng Amör, kí tyëng Perïdh, kí tyëng Kib, kí tyëng Yebus, ɑ løg tyëngpiny møg-ɑ ɑ́döng ge nuti nɑ̈gø yi tyëng Isrɑil, ge ɑ́kwɑny yi Rɑ̈dh Sølømøn gɑ jøtïj gïti dicyɑ̈ngtïn. Tyëng Isrɑil nuti gwøgø gɑ jøtïj, de ge ɑ́kwɑny gɑ jøliny, kí pëjji liny, kí jøg kwølli yɑ̈th-ɑ pyejji yi kyënyì. Ji miy ɑ́ryew kí pyɑ̈r ɑ́bïj ɑ ɑ́kwɑny gɑ tyëng-ɑ nenni gwøøg gyer ki ud mø bɑ̈nni. Cï Sølømøn, nyɑɑr rɑ̈ɑ̈dh Rïp, gø ɑ́kɑ̈ɑ̈le kì kɑɑl Debïd, kɑ gø kïdhe øn-ɑ ɑ́gërre gøn. Akööbe kinni, “Ngɑnɑni pɑ cuggi bëëdø kì gøldwøng men-ɑ bɑ mi Debïd rɑ̈ɑ̈dh Isrɑil, mɑ́ keny-ɑ ɑ́bëëd yi Sɑnduug Jwøng-ɑ Ácwɑ̈ɑ̈j bɑ keny-ɑ ɑ́rum ki kwërø.” Sølømøn ɑ́muuj ki gëdhhì kì wïj këli lɑm men-ɑ ɑ́ger yi en kì bøli Kengø. Ámuuj ki gënh-ɑ nyi rɑ̈b bëne ni kɑ ókwøbii kì yethi Ciggi Mosɑ̀, kì yethi cyɑ̈nggi kwër bënn, ɑ løg Sɑbɑth, kí Kwëër Cɑ̈gi Dwɑ̈y, kí Kwëër Cɑ̈gi Run, kí Kwëër Olwëny, ki Kwëër Kɑj, kí Kwëër Akɑnnì. Møg bɑ cigg-ɑ ɑ́muuj yi Rɑ̈dh Debïd, wïyi Sølømøn, cigg-ɑ ɑ́pyëële gwøøg ókwër geki Kwɑrri Leebì møg-ɑ nyi køny ókwër ki wör, geki gwøøg gen kì yethi cyɑ̈ng bënn. Apyële jøg-ɑ nyi lunyi kori dhøggi Kengø kì yethi cyɑ̈ng bënn, ni kɑ ɑ́kwøbii yi Debïd bɑ̈ng Jwøk. Cigg-ɑ ɑ́muuj yi Debïd kipe gwøøg ókwër geki Kwɑrri Leebì, kí mïdhi jɑmmì bënn, nuti pyeem gen. Kɑ gïg-ɑ ɑ́dwɑddi gwøgø yi Sølømøn tyëge bënn, cɑg kì ri këëli tyeli ød Jwøng-ɑ Ácwɑ̈ɑ̈j piny, gïti kɑ ɑ́thumi gwøngɑni bëne. Codhe, ɑkedhi Sølømøn Edhïön Geber kí Elɑth, kì kömi Gøøli Agɑbɑ̀, kì piny Edöm. Sølømøn ɑ́ödi ki yɑ̈thi nɑm yi Rɑ̈dh Kirɑm, yɑ̈thɑni ɑ́kyeww-ɑ yi jøge, jøg-ɑ ngɑ̈ny këw, o nɑm ngɑ̈nyi yi gen. Ge ɑ́kedhi Opir geki jø Sølømøn. Kɑ Rɑ̈dh Sølømøn muuj gen ki dhɑb kïllì ɑ́lïp pyɑ̈rø wïdɑ́bïj. Kɑ per Sølømøn lïngi yi rɑ̈ɑ̈dh Cebɑ̀ rɑ̈nh-ɑ dhɑjø, ɑkedhe Yerusɑlem be rɑngii ki pyëj mø teg. Rɑ̈nhɑni ɑ́bï Yerusɑlem e lwøngg-ɑ yi ji mø ngenyø. Ge ɑ́kɑ̈ni ki ɑmɑl mø kömi gen di yenh-ɑ yømi gen med, kí tigg mø per gen teg, kí dhɑb me gïïr cɑrø. Keny-ɑ ɑ́wɑ̈dhi rɑ̈nh-ɑ dhɑjø menɑni buti Rɑ̈dh Sølømøn, kɑ gø pyënye ki pyëj møg-ɑ ɑ́rømmi yi en. Aløøg gen bënn yi Sølømøn, o bong gïjø mɑ ɑ́dhɑlii. Keny-ɑ ɑ́liidh peli wïj Sølømøn yi rɑ̈ɑ̈dh Cebɑ̀ rɑ̈nh-ɑ dhɑjø, kɑ gøldwøng men-ɑ ɑ́gere lidhe, kí gïgcɑmm-ɑ tɑwe, kí kɑ̈jj-ɑ bëëd yi jyɑ̈gge, kí kër-ɑ ópyëël gwøøg bɑ̈ngge, kí ógudh-ɑ rug yi gen, kí gëdhh-ɑ nyi muuje kì Kengø, kɑ pyëwe ceg-ɑ lɑ̈ɑ̈nyø. Aköbbe rɑ̈dh kinni, “Møg-ɑ ɑ́lïngi yi yɑn kì pödhɑ kiperí geki peli wïjí bɑ dyër. Yɑ ɑ́bëëd yɑ nuti yïëyø ki møg-ɑ ɑ́köbbi yɑn gïti kɑ ɑ́bëënɑ, ɑlïdhɑ ki wɑngɑ. Møg-ɑ ɑ́lïngɑ kì ri kwøbbi peli wïjí nøg kibøli møg-ɑ ɑ́yodɑ kì keny. Jií ri gen dɑ gyëdh, o jøgwøg møg-ɑ göggi yïn ri gen dɑ gyëdh, mɑ́ ge bëëd ɑ butí ge lïng-ɑ kwøbbi peli wïjí. Lenhí Jwøng-ɑ Ácwɑ̈ɑ̈j, Jwøgí! Kipe kɑ̀ med pyëwe ki yïn, kɑ yï gwøge yïn ɑ́ rɑ̈dh, o yï jyɑ̈ɑ̈g ki nyinge. Mɑ́ jie tyëng Isrɑil mɑɑr yi en, o ge okorø yi en ceth. Yï ɑ́gwøge yïn-ɑ́ rɑ̈ɑ̈dh gen kipe kinni o yï ómïdhí cigge geki gøggi dyër.” Kɑ Rɑ̈dh Sølømøn nëngi yi rɑ̈nh-ɑ dhɑjø ki kïlli dhɑb ɑ́lïp ɑ́ngwen, kí yenh-ɑ yømi gen med geki tigg-ɑ per gen teg mø ngenyø ki mendwøng. Bong yenh mø yømi gen med mø lod møg-ɑ ɑ́muuj Rɑ̈dh Sølømøn yi rɑ̈ɑ̈dh Cebɑ̀ rɑ̈nh-ɑ dhɑjø. Jø Rɑ̈dh Kirɑm geki jø Rɑ̈dh Sølømøn møg-ɑ ɑ́dwɑ̈ddi Opir ki dhɑb, ge ɑ́kɑ̈ni thyew ki yenh ɑ́lɑl kí tigg-ɑ per gen teg. Yenh ɑ́lɑl ɑ́göög yi Rɑ̈dh Sølømøn ki pɑ̈ltyel mø Kengø kí gøldwøng, kí thøm. Bong gïg ni møgɑni mɑ ɑ́pɑ̈nyi ki lidhø kì piny Yeudiyɑ̀. Rɑ̈ɑ̈dh Cebɑ̀ rɑ̈nh-ɑ dhɑjø ɑ́mëggi gïg-ɑ ɑ́cwøle bënn yi Rɑ̈dh Sølømøn. Møgɑni bɑ møg-ɑ ɑ́kïdhi kömi jɑmm-ɑ ɑ́wil ki møg-ɑ ɑ́muuje Rɑ̈dh Sølømøn. Codhe, ɑdøøge piny Cebɑ̀ ki yɑy-ɑ ɑ́lwöögii. Rɑ̈dh Sølømøn nyii yïddø kì run ɑ́kyel ki dhɑb mø bɑ kïllì ɑ́lïp pyɑ̈r ɑ́ryew wïdɑ́dɑ̈g, reb ki gwɑ̈ny-ɑ nyi kwɑny kì yï jøngyëwø. Rɑ̈dh Sølømøn ɑ́muuj thyew ki ɑ́tegø kí dhɑb yi rɑ̈nhi Árɑb geki jɑggi pödhi Isrɑil. Sølømøn ɑ́thɑ̈ɑ̈dh ki ködd miy ɑ́ryew mø døngø, kɑ kömi kwöd ɑ́kyel nyi mwøn ki dhɑb kïllì ɑ́bïryew, kɑ othɑ̈dhø ki ködd mø thønhø, kɑ kömi kwöd ɑ́kyel nyi mwøn ki dhɑb kïllì ɑ́dɑ̈g. Köddɑni bënn ɑ́cïbe yij øn-ɑ cwøl ɑ́ Wɑɑg Lubnɑn. Rɑ̈dh ɑ́göög thyew ki kwøøm lëji lyej me dwøng, kɑ gø mwøne ki dhɑm dhïw. Kwømɑni yïe dɑ pɑ̈ltyel ɑ́bïkyel møg nyi yedhi wïje, o ree dɑ thɑ̈nhi tyel, e ómwønø ki dhɑb. Dɑ kɑ̈jji bɑ̈dd kì wɑ̈thi tùngi kwøm, o dɑ ngïji ngur kì wɑ̈thi tùngi kwømɑni ryeet; ɑ́kyel kì tuung kí ɑ́kyel kì tuung. Dɑ ngïjji ngurrì pyɑ̈rø wïdɑ́ryew kì wɑ̈thi tøggi pɑ̈ltyel, pɑ̈ltyelø wïj tøge dɑ ngïjji ɑ́ryew, ɑ́kyel kì tuung kí ɑ́kyel kì tung-ɑ kyeelø. Bong kwøm me ni menɑni mɑ ɑ́bëëd e nud kì pödhø megø kinni tek. Óthɑ̈ggi Rɑ̈dh Sølømøn bënn ógwøgø kɑ dhɑb, o jɑmmì bënn møg-ɑ yij ød Wɑɑg Lubnɑn ógwøgø kɑ dhɑm dhïw. Átegø ɑ́bëëd e bong pere kì bøli keny-ɑ jyɑ̈ɑ̈g yi Rɑ̈dh Sølømøn. Rɑ̈dh Sølømøn yïe ɑ́dɑ yɑ̈thi nɑm møg-ɑ nyi kɑ̈ddi ki jɑmmi ngyew, jø Sølømøn nyii kønyø yi jø Kirɑm. Ge nyi kedh-ɑ Tɑrcic kɑ ge nyii dwöögø kì bɑng runn ɑ́dɑ̈g ge ókɑ̈ddø ki dhɑb kí ɑ́tegø, kí leggi lyej, kí ɑ́ywömmì, kí ɑtwɑg. Bong rɑ̈dh me lod Rɑ̈dh Sølømøn ki kɑ̈r geki peli wïj. Nyii pyëjø yi rɑ̈nhì bënn, o ge lïngi gen ki peli wïj men-ɑ ɑ́mëggii yi Jwøk. Kì yethi runn bënn, Rɑ̈dh Sølømøn nyii muujø yi rɑ̈nhhɑni ki jɑmmì møg-ɑ ógwøgø gɑ ɑ́tegø, kí dhɑb, kí ógudh, kí jɑmmi liny, kí yenh-ɑ yømi gen med, kí kyënyì, ki ógɑll. Sølømøn yïe ɑ́dɑ ɑ́lïp ɑ́ngwen gïg yethi gen nyi cyɑ̈ɑ̈m yi kyënyì møg-ɑ nyi pyejji yɑ̈the. Kí ɑ́lïp pyɑ̈rø wïdɑ́ryew jøg rïngi ki kyënyì. Kɑ gï pɑ̈nge kì yethi kɑ̈dd mø gïïr, kɑ kwï gen mïdhe kì Yerusɑlem. En ɑ ɑ́jɑɑg rɑ̈nhì bënn kì pödhh-ɑ cɑ̈gi kì kömi Nɑm Porɑt kí Pelistiyɑ̀ gïti keew Rïp. Keny-ɑ ɑ́jyɑ̈ɑ̈g Rɑ̈dh Sølømøn kì Yerusɑlem, ɑ́tegø ɑ́bëëd e nɑ tør, o yɑdh sɑndɑl ɑ́bëëd e pere bogøn ni ólɑ̈mm-ɑ ying wɑ̈thi kïtti Yeudiyɑ̀. Kyënyi Sølømøn ɑ́kɑ̈ɑ̈l ɑ Rïp kí pödhh-ɑ kyeelø. Wɑ́ji gïg-ɑ kyeelø møg-ɑ ɑ́gwøg yi Rɑ̈dh Sølømøn, cɑg kì ri cɑ̈gi jyɑ̈ge gïti thume, bɑ ɑgwed kì yij Wɑ̈nyi Nɑthɑn Jɑltöng, kí yethi Møg-ɑ Átöng yi Akiyɑ̀ kì Cilø, kí Møg-ɑ Ácɑ̈rri Idö Jɑltöng, ɑ kööbø thyew kì ri jyɑ̈gi Rɑ̈dh Yeroboɑm rɑ̈ɑ̈dh Isrɑil. Isrɑil bëne ɑ́jɑɑg yi Sølømøn ki runn pyɑ̈r ɑ́ngwen, e bëëd ɑ Yerusɑlem. Codhe, ɑkedhi Sølømøn kun-ɑ di kweyye, kɑ kony kì kɑɑl Debïd, ɑloony keje ki kwɑnyø yi Reöboɑm wɑ̈de. Akedhi Rɑ̈dh Reöboɑm Cekïm kun-ɑ ɑ́cøng tyëng Isrɑil møg-ɑ bëëdø kì wɑɑng wuudø be rønyii ɑ́ rɑ̈dh. Keny-ɑ ɑ́lïngi møgɑni yi Yeroboɑm wɑ̈d Nebɑt kì Rïp kun-ɑ ɑ́pɑ̈ɑ̈re kipe Rɑ̈dh Sølømøn, ɑdwööge pɑc. Aödi yïe yi tyëng myërri wɑɑng wuudø, ɑkedhi gen yï Reöboɑm, kɑ gø köbbi gen kinni, “Wø ɑ́thödhi yi wïyí ki gwøg me teeg cɑrø, me dhɑ̈li lwɑ̈ngø yi wøn. De keløg wø óthödhi yi yïn ki gwøg me yöd me lwɑ̈ng gwøgø yi wøn, me wëggi bëëdø yönø, wø óbëëdø wø bɑ ji mø göggi yïn.” Alöggi Reöboɑm kinni, “Wiyu yɑn ki cyɑ̈ng ɑ́dɑ̈g, o yɑ rumɑ kì ri møgɑni. Kɑ wu dwöög wun.” Codhe, ɑkedh teedø. Kɑ Reöboɑm jøgdøng-ɑ ɑ́ying tøg buri wïye Sølømøn pyëje kinni, “Á gïn ɑ kwøb yi wun, o köbbɑ ji møg?” Alöggi gen kinni, “Keløg bëëdí óbëëd e døøj ki ji møg, kɑ ge nyi göggi yi yïn ki gïn-ɑ dwɑddi yi gen, kɑ kwøbbi gen nyi løøg yi yïn ki yöö me døøj, yï ógöggi yi gen kì yethi cyɑ̈ng bënn.” De kwøbbi jøgdøngø ɑ́bɑny yi en, kɑ yöd e kedh-ɑ yï yɑɑg-ɑ ɑ́pïïdh gen møg-ɑ nyi kønyii ki kwøb. Gï ɑ́pyëje kinni, “Á gïn ɑ kwøb yi wun, o köbbɑ ji-ɑ ɑ́köbbi yɑn kinni, i løgɑ gwøng-ɑ ɑ́cïb kömi gen e peeg yi wïyɑ, ɑ́ gwøg me yööd?” Alöggi yɑɑgɑni kinni, “Köbbí gen kinni, ‘Ngëdi lwedɑ, lwen-ɑ ɑkïj, dwøng kibøli pyeer wïyɑ.’ Köbbí gen kinni, ‘Wu ɑ́mëgg-ɑ gwøg me teeg yi wïyɑ, o gwøngɑni köme kïdhɑ’ kïdhø o tie pëngø. Wu ɑ́pwöd yi wïyɑ kɑ wunn, de wu ópwöd yi yɑn kɑ dëllì!’ ” Kì dɑ̈ɑ̈g cyɑ̈ng, ɑdwöög Yeroboɑm geki ji bënn yï Rɑ̈dh Reöboɑm ni kɑ ɑ́köbbe gïn. Kwøbb-ɑ ɑ́köbbii yi jøgdøngi ɑ́wiye, kɑ kwøbbi teedø løøge ki yöö me rɑɑj, ni kɑ ɑ́köbbii yi yɑɑg-ɑ thønhø kinni, köbbe ji kinni, “Wu ɑ́mëgg-ɑ gwøg me teeg yi wïyɑ, o gwøngɑni köme kïdhɑ’ kïdhø o tie tëngø. Wu ɑ́pwöd yi wïyɑ kɑ wunn, de wu ópwöd yi yɑn kɑ dëllì!” Møgɑni ɑ́dwɑdd-ɑ yi Jwøk, Jwøng-ɑ Ácwɑ̈ɑ̈j ki pyëwe kinni o møg-ɑ ɑ́köbbe Rɑ̈dh Yeroboɑm wɑ̈d Nebɑt ki dhøg Akiyɑ̀ jɑltöng pɑ̈dhi gen kɑ̈jji gen. Keny-ɑ ɑ́lidhii yi ji kinni, kwøbbi gen nuti lïngø yi rɑ̈dh, ɑryeer gen kinni, “Á ngø ɑ yod yi wɑ kì bɑng Debïd! Bong gïn-ɑ ólɑg yi wɑ kì bɑng wɑ̈d Yesì? Isrɑil, kedhí myërrí! Debïd, dööng yï nenn-ɑ gølí!” Codhe, ɑngɑ̈nyi tyëng Isrɑil wɑ̈yi gen, Adöng Rɑ̈dh Reöboɑm ɑ́ rɑ̈ɑ̈dh tyëng-ɑ bëëdø kì Yeudiyɑ̀ keti gen. Codhe, ɑör Adönirɑm, jɑngi tïj, kinni kedhe yï tyëng Isrɑil, de ɑ́bɑ̈lli yi gen ki tuggi kïttì kɑ othøø. Ajwɑn Reöboɑm dhwödhø, ɑkɑdhe yij yɑ̈ɑ̈y kyenye kɑ reng-ɑ Yerusɑlem. Bøli kenyɑni ɑ ɑ́cɑ̈gi tyëng Isrɑil ki bɑnyi gøl Debïd, pïd dicyɑ̈ngtïn. Keny-ɑ ɑ́wɑ̈nhi Rɑ̈dh Reöboɑm Yerusɑlem, ɑcwøle jøliny møg-ɑ teg gɑ ɑ́lïp miy ɑ́bïdɑ̈g kì gøl Ben Yɑmïn geki gøl Yeudɑ̀. Reöboɑm ɑ́dwɑdd-ɑ kedhi be nyɑɑg ki tyëng Isrɑil o gø jɑɑge. De Cemɑiyɑ̀ jɑltöng ɑ́köbbi yi Jwøng-ɑ Ácwɑ̈ɑ̈j kinni köbbe Rɑ̈dh Reöboɑm kí tyëng gøl Yeudɑ̀ geki gøl Ben Yɑmïn kinni, “Wu ko kedhi be nyɑɑg ki wɑddi wun, tyëng Isrɑil. Døøg wun myërri wun bënn. Gïg-ɑ ɑ́cwöb ɑ́kɑ̈ɑ̈l-ɑ yïɑ.” Alïngi gen kwøbbi Jwøng-ɑ Ácwɑ̈ɑ̈j, kɑ ge ocögø ge pɑ kedhi be nyɑɑg ki Yeroboɑm. Reöboɑm ɑ́bëëd ɑ Yerusɑlem, kɑ kɑ̈dd-ɑ døngø kì Yeudiyɑ̀ geki Ben Yɑmïn gëdde ki dör. Kɑ̈ddɑni ek: Betleem, Etɑm, Tekoɑ̀, Betdhur, Sökö, Adulɑm, Gɑth, Mɑrecɑ̀, Dhïp, Adörɑim, Lɑkic, Adhekɑ̀, Dhorɑ̀, Ayɑlön kí Kibrön. Kɑ̈ddɑni ɑ́gëdde ki dör mø teg, kɑ yethi gïn cïbe ki pëjjì, kɑ gï thödhe ki gïgcɑmm, kí møøw dhetun, kí møgi oløg, Kɑ gï nënge ki ködd kí tøngg. Kɑ myërri Ben Yɑmïn geki myërri Yeudɑ̀ kore kidøøj ki yuu ni menɑni. Abëën ókwër geki Kwɑrri Leebì Yeudiyɑ̀ ge kɑ̈ɑ̈l-ɑ myërri Isrɑil bënn. Kwɑrri Leebì kɑ̈jj-ɑ nyi cyɑ̈ɑ̈m yi dhögi gen ɑ́wiy gen piny, kɑ ge kedh-ɑ Yeudiyɑ̀ geki Yerusɑlem, mɑ́ ge ɑ́mɑ̈ɑ̈n gwøg gɑ ókwërri Jwøng-ɑ Ácwɑ̈ɑ̈j yi Yeroboɑm geki wɑ̈dde. Kɑ Yeroboɑm orönyø ki ókwër møge, møg göögø kì kɑ̈jj-ɑ nyi mɑlli wëyrijjø mø bɑ ngïjji wɑ̈dhh. Tyëng Isrɑil møg-ɑ nyi mɑlli Jwøng-ɑ Ácwɑ̈ɑ̈j, Jwøøg Isrɑil yethi gen bong ɑ́dud, ge ɑ́løg bɑng Kwɑrri Leebì Yerusɑlem, o ge ngɑ̈ddi gen Jwøng-ɑ Ácwɑ̈ɑ̈j, Jwøøg kweyyi gen, ki gëdhhì. Yeudiyɑ̀ ɑ́yïddi ki tegø kì bɑng bëënɑni, kɑ Rɑ̈dh Reöboɑm wɑ̈d Sølømøn kwøbbe lïngi yi gen kì runn ɑ́dɑ̈g, kɑ ge obëëdø ni kɑ ɑ́jɑɑg gen yi Rɑ̈dh Debïd geki Rɑ̈dh Sølømøn. Reöboɑm ɑ́nywøm-ɑ Mɑɑ̈lɑt nyɑɑr Yerimöth wɑ̈d Debïd, ɑ meye cwøl ɑ́ Abikɑil, nyɑɑr Eliɑb wɑ̈d Yesì. Yï gen ɑ́dɑ wɑ̈dd ɑ́dɑ̈g, ɑ løg Yeuc, kí Cemɑriyɑ̀, kí Dhɑɑ̈m. Anywøme Mɑɑkɑ̀ nyɑɑr Abcɑlöm kì cyɑ̈n, kɑ ge óyïddø ki wɑ̈dd ɑ́ngwen, ɑ løg: Abiyɑ̀, kí Atɑy, kí Dhïdhɑ̀, kí Celömith. Mɑ̈nni Reöboɑm bënn bɑ pyɑ̈rø wïdɑ́bïdɑ̈g, o ɑkwɑnyy bɑ pyɑ̈r ɑ́bïkyel, o wɑ̈dde bɑ pyɑ̈r ɑ́ryew wïdɑ́bïdɑ̈g, o nywøle womɑ̈nn bɑ pyɑ̈r ɑ́bïkyel. Kì kelli mɑ̈nne geki ɑkwɑnyye bënn, Mɑɑkɑ̀ nyɑɑr Abcɑlöm ɑ ti yi en ki mɑɑrø. O kì kelli nyige bënn, Abiyɑ̀ wɑ̈d Mɑɑkɑ̀ ɑ ti yi en ki mɑɑrø. Abiyɑ̀ ɑ ɑ́kwɑny yi en ɑ́ ngɑn-ɑ órøny ɑ́ rɑ̈dh kì bɑnge. Reöboɑm ɑ́göög-ɑ peli wïje, kɑ wɑ̈dde nënge ki gwøg. Kɑ gï pɑ̈nge kì kelli myërri Yeudiyɑ̀ geki Ben Yɑmïn, kí kɑ̈ddi dör. Gï ɑ́nënge ki jɑmmì, kɑ gï nyöme ki mɑ̈nn. Keny-ɑ ɑ́rum Reöboɑm ki cïbi pödhe piny, kɑ Ciggi Jwøng-ɑ Ácwɑ̈ɑ̈j bɑny yi en geki jie bënn. Kɑ ge cɑy yi Jwøng-ɑ Ácwɑ̈ɑ̈j kì bïïj runni Reöboɑm kì yij lɑwø, kɑ Cicɑk rɑ̈ɑ̈dh Rïp pɑ̈ɑ̈r-ɑ kömi Yerusɑlem, ki yɑ̈thi kyënyì ɑ́lïp kí miy ɑ́ryew, kí jøkyënyì gɑ ɑ́lïp pyɑ̈r ɑ́bïkyel, kí jøliny tyel mø pɑ cuggi kwɑnø, reb ki jøliny Lïbiyɑ̀, kí jøliny Suk, kí jøliny Kuc. Kɑ kɑ̈ddi dör mɑge kì Yeudiyɑ̀, kɑ wɑ̈dh-ɑ Yerusɑlem. Codhe, ɑkedhi Cemɑiyɑ̀ jɑltöng yï Rɑ̈dh Reöboɑm geki jɑggi Yeudiyɑ̀ møg-ɑ ɑ́cøng ri gen Yerusɑlem keny-ɑ ɑ́rengi gen ge bwøg-ɑ Rɑ̈dh Cicɑk. Aköbbe gïn kinni, “Bene wöön-ɑ muuj wun yi Jwøng-ɑ Ácwɑ̈ɑ̈j èn: ‘Yɑ ɑ́wiy piny yi wun, o ɑnɑn wu ɑ́lonyɑ ki wiy cingi Cicɑk.’ ” Kɑ Rɑ̈dh oyïëyø geki jyɑ̈ggì kinni ge ɑ́røngi, kɑ ge okööbø kinni, “Gïn-ɑ ɑ́kwøb yi Jwøng-ɑ Ácwɑ̈ɑ̈j bɑ dyër ceth.” Keny-ɑ ɑ́liidh møgɑni yi Jwøng-ɑ Ácwɑ̈ɑ̈j, ɑköbbe Cemɑiyɑ̀ kinni, “Mɑ́ ge ɑ́yïëy ki orøøg gen, ge koo nɑ̈g yi yɑn. De keløg Cicɑk ópɑ̈ɑ̈r kömi gen, ge ócög ge pɑ thøw. Rënyi pyëwɑ ócög e pɑ yod yi tyëng Yerusɑlem. De ge ótyɑm yi Cicɑk, o gïn-ɑ bɑ̈ɑ̈n kì kɑɑm göggi yɑn kí göggi rɑ̈nhi kömi piny yod yi gen.” Codhe, ɑbëën Rɑ̈dh Cicɑk Yerusɑlem kɑ jɑmm-ɑ per gen teg kwɑnye kì yij Kengø, kí yij gøldwøng. Jɑmmì bënn ɑ́kwɑnye, geki köddi dhɑb møg-ɑ ɑ́gwøg yi Rɑ̈dh Sølømøn. Kɑ kɑ̈jji gen kïdhi yi Rɑ̈dh Reöboɑm ki ködd møg-ɑ ógwøgø ki ngyënyø dilɑl, kɑ gï mëgge pëjji liny-ɑ nyi kor dhø gøldwøng. Kenyi kedhi rɑ̈dh yij Kengø, jøg-ɑ kurø ködd nyi kɑ̈ɑ̈l ge’ wɑ̈g, kɑ gï nyi dwøøg gen øn-ɑ nyi koor gen. Reöboɑm ɑ́bëëd ree mëg en Jwøng-ɑ Ácwɑ̈ɑ̈j, ɑcöge e nuti nyɑ̈ɑ̈gø yi Jwøng-ɑ Ácwɑ̈ɑ̈j. Reöboɑm ɑ́jyɑ̈ɑ̈g ɑ Yerusɑlem, kɑ ókedhø e ótëngø keny-ɑ ɑ́ngënyi runne ɑ́ rɑ̈dh. Runne ɑ́bëëd gɑ pyɑ̈r ɑ́ngwen wïdɑ́kyel keny-ɑ ɑ́gööge ɑ́ rɑ̈dh. Kɑ ojyɑ̈gø ki runn pyɑ̈rø wïdɑ́bïryew kì Yerusɑlem, kɑɑl-ɑ ɑ́myeg yi Jwøng-ɑ Ácwɑ̈ɑ̈j kì kelli kɑ̈ddi Isrɑil bënn ɑ́ keny mɑllii. Meyi Reöboɑm bɑ Nɑɑmɑ̀ nyɑɑr Amön. Reöboɑm ɑ́göög ki gïnrɑj, mɑ́ pyëwe nuti cïb en ri yodi mø Jwøng-ɑ Ácwɑ̈ɑ̈j. Gïg-ɑ ɑ́gwøg yi Reöboɑm kì cɑ̈gi lɑwe gïti thume, geki mø tyëng gøle bɑ ɑgwed kì yij Wɑ̈nyi Kwøbbi Cemɑiyɑ̀ Jɑltöng, kí Wɑ̈nyi Idö Jɑltöng. Reöboɑm geki Yeroboɑm ɑ́bëëd ge ceg-ɑ nyɑɑg ceth ki ri gen. Akedhi Reöboɑm kun-ɑ di kweyye, kɑ koony rörri gøl rɑ̈ɑ̈dhø kì kɑɑl Debïd, kɑ Abiyɑ̀ wɑ̈de røøny keje ɑ́ rɑ̈dh. Kì pyɑ̈rø wïdɑ́bïdɑ̈ɑ̈g runni Yeroboɑm rɑ̈ɑ̈dh Isrɑil kì yij lɑwø, ɑ ɑ́røøny Abiyɑ̀ ɑ́ rɑ̈ɑ̈dh Yeudiyɑ̀, kɑ ojyɑ̈gø ki runn ɑ́dɑ̈g kì Yerusɑlem. Meye bɑ Mikɑiyɑ̀ nyɑɑr Uriel kì Gibeɑ̀. Kɑ liny ocwöbø kì kɑɑm Abiyɑ̀ geki Yeroboɑm. Jøliny Abiyɑ̀ ɑ́bëëd gɑ ɑ́lïp miy ɑ́ngwen, o jøliny Yeroboɑm møg-ɑ ɑ́kedhi be nyɑɑg ki liny Abiyɑ̀ bɑ ɑ́lïp miy ɑ́bïdɑ̈g. Linyɑni ɑ́røøm-ɑ myërri kïtti Eprɑim. Ayedhi Rɑ̈dh Abiyɑ̀ wïj Kïti Dhemɑrɑim, ɑryeere e köbb-ɑ Yeroboɑm geki tyëng Isrɑil kinni, “Lïngu kwøbbɑ! Jwøng-ɑ Ácwɑ̈ɑ̈j, Jwøøg Isrɑil kwïj yi wun kinni Debïd ɑ́köbbe ki kwøb mø pɑ cuggi pɑ̈dø keny-ɑ ɑ́gwøge gøn ɑ́ rɑ̈ɑ̈dh Isrɑil bëne, men jyɑ̈gø geki kwɑrre gïti ɑtheer? Yeroboɑm wɑ̈d Nebɑt ɑ́ceg-ɑ ngɑ̈nyi wɑ̈ye, e bɑny-ɑ Sølømøn rɑ̈dhe. Codhe, ɑcunge ki ji mø bong kɑ̈jji gen, kɑ kwøbbi Reöboɑm wɑ̈d Sølømøn pyem yi gen kì bɑng kɑ ɑ́bëëde e nudd ɑ́ nyelthinh, o bong gïn ngɑ̈nyi yi en. Anɑn, wu dwɑdd-ɑ nyɑɑg ki rɑ̈dh men-ɑ ɑ́mëggi kwɑrri Debïd yi Jwøng-ɑ Ácwɑ̈ɑ̈j. Yï wun dɑ liny me ngenyø ki mendwøng, o yï wun dɑ røjji dhɑb møg-ɑ ɑ́gwøg yi Yeroboɑm gɑ jwöggi wun. Ókwërri Jwøng-ɑ Ácwɑ̈ɑ̈j ɑ́cyeddi yi wun, gen ɑ kwɑrri Aɑron; Kwɑrri Leebì. Kɑ kɑ̈jji gen kïdhi wun ki ókwër ge kwɑny yi wun kɑ yuu-ɑ nyi göög yi pödhh-ɑ kyeelø. Kɑ ngɑn kɑ̈ni ki wɑdh wɑlɑ̀ dyëg ɑ́bïryew nyi røny ɑ́ ókwëri gïg-ɑ cwøl yi wun gɑ jwöggi wun. “De wø nudd wø mɑll-ɑ Jwøng-ɑ Ácwɑ̈ɑ̈j, Jwøøg wøn, o wø nuti wiy en piny. Ókwërr-ɑ bɑ kwɑrri Aɑron ɑ gwøg kwër, o ge okønyø yi Kwɑrri Leebì. Gen ɑ nyi rɑ̈bbi Jwøng-ɑ Ácwɑ̈ɑ̈j ki bɑkur kí gënh-ɑ nyi rɑ̈b bëne kì mwøl kí böörø. Gen ɑ nyi cïb ópuun byëlø me bɑ ɑkwër kömi tɑrɑbedhɑ̀, kɑ lɑ̈mbɑ̈ɑ̈ nyi cwiny yi gen kì wɑɑng thyënhø, kɑ gï nyi cïb gen wɑ̈thi teggi dhɑb. Wø nyi gwøg-ɑ gïn-ɑ dwɑddi yi Jwøng-ɑ Ácwɑ̈ɑ̈j. De Jwøng-ɑ Ácwɑ̈ɑ̈j ɑ́wiyu piny. Jwøk kiree ɑ pyejji wøn, o ókwërre nud kì keny ki kɑ̈ngì kì cinggi gen, okodh gen kɑ̈ngì, wø ceg-ɑ pödhi kömi wun. Tyëng Isrɑil, wu ko nyïɑ̈ggi ki Jwøng-ɑ Ácwɑ̈ɑ̈j, Jwøøg kweyyi wun! Wu pɑ cuggi tyɑ̈mø!” Yeroboɑm ödø ki kwï linye me pɑ̈ɑ̈r kömi liny Yeudiyɑ̀ kì ngɑ̈thi gen, kedh kwï linye kɑ̈ɑ̈l-ɑ bøli gen. Keny-ɑ ɑ́lidhii yi liny Yeudiyɑ̀ kinni ge ótyegø yi liny. Aywøøg gen kö Jwøng-ɑ Ácwɑ̈ɑ̈j, kɑ ókwër kɑ̈ngì kødh gen. Aryeer tyëng Yeudiyɑ̀ ki cwɑg mø døngø, ɑpeej liny yi Abiyɑ̀, ɑtyɑɑm liny Yeroboɑm geki Isrɑil yi Jwøk. Acyeddi liny Isrɑil yi liny Yeudiyɑ̀. Ge ɑ́cïb cingi Yeudiyɑ̀ yi Jwøk. Liny Isrɑil ɑ́tyɑm yi liny Abiyɑ̀ ki tyɑmø me rɑj, kɑ kelli gen nɑ̈gi ki jöddi liny ɑ́lïp miy ɑ́bïj. Codhe, ɑtyɑɑm tyëng Isrɑil yi tyëng Yeudiyɑ̀ mɑ́ ri gen jyɑ̈ɑ̈ng gen ri Jwøng-ɑ Ácwɑ̈ɑ̈j, Jwøk kweyyi gen. Liny Yeroboɑm ɑ́cyeddi yi Abiyɑ̀, kɑ kwï kɑ̈dde mɑg yi en, kí Betiil, kí Yecɑnɑ̀, kí Eprön geki myërr-ɑ buti gen. Yeroboɑm nuti døøgø tëngø kinni tek, kɑ̈ng-ɑ ɑ́bëëd Abiyɑ̀ e ojyɑ̈gø. Kì cyɑ̈n, ɑgøøj Yeroboɑm piny yi Jwøng-ɑ Ácwɑ̈ɑ̈j, kɑ othøø. Abiyɑ̀ ɑ́tëngi ki mendwøng. Yïe ɑ́dɑ mɑ̈nn pyɑ̈rø wïdɑ́ngwen, kí wɑ̈dd pyɑ̈r ɑ́ryew wïdɑ́ryew, kí nyige womɑ̈nn pyɑ̈rø wïdɑ́bïkyel. Kwï kwøbbi Abiyɑ̀, møg-ɑ ɑ́kwøb yi en, kí gïg-ɑ ɑ́gwøg yi en bɑ ɑgwed kì yij Wɑ̈nyi Kwøbbi Idö Jɑltöng. Akedhi Abiyɑ̀ kun-ɑ di kweyye, kɑ kony kì rörri rɑ̈nhì kì Yerusɑlem kɑɑl Debïd. Arøøny Asɑ̀ wɑ̈de ɑ́ rɑ̈dh. Kɑ piny obëëdø ki mër ki runn pyɑ̈rø keny-ɑ jyɑ̈ɑ̈g Asɑ̀. Jwøge, Jwøng-ɑ Ácwɑ̈ɑ̈j, ɑ́bëëd pyëwe med ki en kì bɑng kɑ ɑ́gøgge dyër geki gïgdøj Këlli lɑm mø jwögg-ɑ pɑth ɑ́dhure piny geki kɑ̈jj-ɑ nyi mɑlli gen, kɑ löjj geki ngïjji Aceerɑ̀ tørre. Aköbbe tyëng Yeudiyɑ̀ kinni, gwøg gen gïn-ɑ dwɑddi yi Jwøng-ɑ Ácwɑ̈ɑ̈j, Jwøøg kweyyi gen, kɑ kwönge geki cigge mïdhi gen. Piny ɑ́bëëd e dɑ mër kì bɑng kɑ ɑ́rënye kɑ̈jji mɑ̈ddø geki këlli bɑkur kì yethi kɑ̈ddi Yeudiyɑ̀ bënn. Kɑ kɑ̈ddi Yeudiyɑ̀ gëdde ki dör keny-ɑ ɑ́jyɑ̈ɑ̈ge, kɑ obëëdø e bong liny kì yethi runn mø ngenyø, mɑ́ e ɑ́thödhi yi Jwøng-ɑ Ácwɑ̈ɑ̈j ki mër. Aköbbe tyëng Yeudiyɑ̀ kinni, “Gëddi wɑ kɑ̈dd ki dör mø bɑ̈rrø, kí thïg mø cuggi cyëgø kɑ ge dëd. Piny ójɑɑg yi wɑ, mɑ́ gïn-ɑ dwɑddi yi Jwøng-ɑ Ácwɑ̈ɑ̈j, Jwøgee ɑ nyi gwøg yi wɑ. Wɑ okorø yi en, o wɑ ɑ́thödhe ki mër kì wɑ̈thi tùng bënn.” Codhe, ɑgëëd gen kɑ ge ókɑ̈rø. Rɑ̈dh Asɑ̀ yïe ɑ́dɑ jøliny ɑ́lïp miy ɑ́dɑ̈g kì Yeudiyɑ̀, o yï gen ɑ́dɑ ködd ki tøng, o kì myërri Ben Yɑmïn yïe ɑ́dɑ jøliny ɑ́lïp miy ɑ́ryew yï gen dɑ ködd kí wethh, jølinyɑni bënn ge bɑ jøg mø teg, o ge thøø yi pwönyø kidøøj. Jɑl Kuc me cwøl ɑ́ Dherɑ̀, ɑ́tëni kömi Yeudiyɑ̀ ki liny, kwɑnni jøge bɑ milyön, kí yɑ̈thi kyënyì miy ɑ́dɑ̈g, kɑ ge wɑ̈dh-ɑ Mɑrecɑ̀. Kɑ Asɑ̀ kedh-ɑ be nyɑɑg ki gøn. Kɑ liny ótuumø kì yij Töör Dhepɑthɑ̀ kì buti Mɑrecɑ̀. Kɑ Asɑ̀ Jwøge, Jwøng-ɑ Ácwɑ̈ɑ̈j kwɑjje kinni, “Yïn ɑ Jwøng-ɑ Ácwɑ̈ɑ̈j, kønyi liny-ɑ nyødh yöd kì yïí ni kønyi liny-ɑ teg. Køny wøn ɑnɑn, yïn ɑ Jwøng-ɑ Ácwɑ̈ɑ̈j, Jwøøg wøn, mɑ́ ri wøn jyɑ̈ɑ̈ng wøn rií, o wø kedhi wøn be nyɑɑg ki liny-ɑ ngenyø èn kɑ nyingí. Yïn ɑ Jwøng-ɑ Ácwɑ̈ɑ̈j, yï bɑ Jwøøg wøn, rií ko wëggí tyɑmø yi dhɑnhø yøw.” Kɑ liny Kuc tyɑm yi Jwøng-ɑ Ácwɑ̈ɑ̈j keny-ɑ ɑ́pɑ̈ɑ̈r Asɑ̀ kí liny Yeudiyɑ̀ kömi gen. Kɑ ge órengø. Kɑ ge wɑ̈dh-ɑ Gerɑr ge ocyeddø yi Asɑ̀ geki jølinye. Kɑ kelli tyëng Kuc nɑ̈ggi ki ji mø gïïr. Kɑ ge tyɑm yi Jwøng-ɑ Ácwɑ̈ɑ̈j ki menrɑj, kɑ bong-ɑ dhɑnhø mɑ ɑ́döng e onëënø. Jɑmmì mø gïïr cɑrø ɑ́kwɑny yi tyëng Yeudiyɑ̀ kì bɑng linyɑni. Codhe, kɑ kɑ̈dd-ɑ buti Gerɑr rënyi yi gen, mɑ́ tyëng kɑ̈ddɑni ɑ́bwøg yi Jwøng-ɑ Ácwɑ̈ɑ̈j. Kɑ kɑ̈ddɑni bënn yɑg yi liny Yeudiyɑ̀, kɑ ge okɑ̈dø ki jɑmmì mø gïïr cɑrø. Ge ɑ́pɑ̈ɑ̈r kömi jødyëg thyew, kɑ ge ómɑ̈gø ki dyëg mø gïïr kí ɑmɑl. Codhe, ɑdwöög gen Yerusɑlem. Kɑ wëyi Jwøk bï-ɑ kömi Adhɑriyɑ̀ wɑ̈d Oded. Akedhe be yïddø ki Rɑ̈dh Asɑ̀. Kɑ ócwöddø kinni, “Lïngu møgɑ Rɑ̈dh Asɑ̀, wuki tyëng Yeudiyɑ̀ kí gøl Ben Yɑmïn! Wu okorø yi Jwøng-ɑ Ácwɑ̈ɑ̈j kì bɑng kɑ̀ lïngu kwøbbe. Keløg e óyɑb yi wun, óyod yi wun ceth, de keløg e ówiy yi wun, wu ólony yi en ki wiyø. Tyëng Isrɑil ɑ́bëëd ki kɑɑm me bɑ̈ɑ̈r, yï gen bong Jwøng-ɑ dyër, o yï gen bong ókwër møg pwönyi gen ki cigg. De kenyi bëën ɑkørr kömi gen, ge nyi døøg-ɑ kö Jwøng-ɑ Ácwɑ̈ɑ̈j, Jwøøg Isrɑil. Nyii yɑbø yi gen kɑ nyi yod yi gen. Kì yethi cyɑ̈nggɑni, ɑ́bëëd e bong dhɑnhø me nyi weli, mɑ́ piny bëne ɑ́bëëd e ceg-ɑ böggø. Pödhh ɑ́bëëd ge mɑ̈n ki ri gen, kɑɑl guud-ɑ wɑɑng kɑɑl-ɑ kyeelø, mɑ́ kömi gen ɑ́göjji yi Jwøk ki ɑkørr mø ngenyø. De cwed wun pëthi wun, kɑ wu bëëd wu teeg, mɑ́ wu óyïddi ki köögi kipe gwøøg wun.” Kɑ Asɑ̀ pyëwe ótëngø yi møg-ɑ ɑ́kwøb yi jɑltöng, Adhɑriyɑ̀ wɑ̈d Oded, ɑkedhe kɑ ngïjji jwögg-ɑ rijjø kì yij piny Yeudiyɑ̀ geki Ben Yɑmïn, kí møg-ɑ ɑ́ying kɑ̈dd-ɑ ɑ́mɑg yi en kì myërri kïtti Eprɑim kɑ̈ɑ̈le wɑ̈g bënn. Kɑ këli lɑm men-ɑ bɑ mi Jwøng-ɑ Ácwɑ̈ɑ̈j, ɑ ying ódɑ̈ri Kengø thïge. Kɑ ji mø gïïr kì Eprɑim geki Mɑnɑsè døøg-ɑ tuung Asɑ̀. Kɑ gøl Cimeøn ɑ ɑ́bëëd e ying-ɑ kömi Isrɑil dwöög-ɑ yïe, mɑ́ e ɑ́yod yi gen kinni Jwøng-ɑ Ácwɑ̈ɑ̈j ying-ɑ köme. Kɑ pödhø ócugø bëne kì Yerusɑlem kì dɑ̈ɑ̈g dwɑ̈tt, kì pyɑ̈rø wïdɑ́bïïj runni Rɑ̈dh Asɑ̀ kì yij lɑwø. Kɑ Jwøng-ɑ Ácwɑ̈ɑ̈j ngɑ̈ddi yi gen ki gëdhhì kì cyɑ̈ngɑni, kì ri jɑmm-ɑ ɑ́kɑ̈ɑ̈l yi gen keny-ɑ ɑ́dwöög gen kì be liny. Ge ɑ́ngɑl-ɑ dhög miy ɑ́bïryew, kí dyëg ɑ́lïp ɑ́bïryew. Anywɑ̈ɑ̈g gen ki kwøb kinni, Jwøng-ɑ Ácwɑ̈ɑ̈j, Jwøøg kweyyi gen ómɑlli yi gen ki pëthi gen kí wëyi gen bënn. O ngɑn koo lïngi kwøbbi Jwøng-ɑ Ácwɑ̈ɑ̈j, Jwøøg Isrɑil, ying-ɑ́ othinh wɑlɑ̀ ngɑndwøng, jɑlø wɑlɑ̀ dhɑjø ceg kɑ nɑ̈gø. Aköngi gen ge óryeerø ki nyingi Jwøng-ɑ Ácwɑ̈ɑ̈j kinni, møg-ɑ ɑ́yïëy yi gen ómïdhi yi gen ceth. Codhe, kɑ kɑ̈ngì kodh. Tyëng Yeudiyɑ̀ ɑ́bëëd pëthi gen med, mɑ́ møgɑni ɑ́yïëy yi gen kɑ pëthi gen bënn. Kɑ pëthi gen løg-ɑ mø med ki mɑlli Jwøng-ɑ Ácwɑ̈ɑ̈j. Kɑ kwɑ̈jji gen yïëy yi Jwøng-ɑ Ácwɑ̈ɑ̈j, kɑ gï thödhe ki mër kì wɑ̈thi tùng bënn. Mɑɑkɑ̀ wøngi Rɑ̈dh Asɑ̀ ɑ́nyiige kì keny-ɑ ɑ́bëëde ɑ́ rɑ̈nh-ɑ dhɑjø, mɑ́ e ɑ́göög ki gïgrijjø, kɑ ogöögø ki ngïjji Aceerɑ̀ jwøng-ɑ dhɑjø. Angøl ngïjji jwøngɑni piny yi Rɑ̈dh Asɑ̀, kɑ gï rɑ̈be kì yij töör Kidrön. Cɑgg ɑ́ kɑ̀ nuti cøør kɑ̈jji mɑlli jwögg-ɑ pɑth piny bënn kì yij pödhø yi Asɑ̀, ɑ́cungi ceth kì kömi yïëy-ɑ ɑ́yïëye Jwøng-ɑ Ácwɑ̈ɑ̈j, kì yij bëëde bëne. Kɑ jɑmm-ɑ bɑ wïj könge bënn møg-ɑ ɑ́thyëye Jwøk, kí møg-ɑ ɑ́thyey yi wïye Abiyɑ̀ kïdhe yij Kengø, ɑ løg jɑmmi dhɑb kí ɑ́tegø. Ábëëd e bong liny mɑ ɑ́nyɑg gïti kɑ ɑ́göög runni Asɑ̀ ki pyɑ̈r ɑ́dɑ̈g wïdɑ́bïj kì yij lɑwø. Kì pyɑ̈r ɑ́dɑ̈g wïdɑ́bïkyeel runni Asɑ̀ rɑ̈ɑ̈dh Yeudiyɑ̀ kì yij lɑwø, kɑ Bɑcɑ̀ rɑ̈ɑ̈dh Isrɑil bï-ɑ kömi Yeudiyɑ̀ ki liny. Kɑ kɑɑl Rɑmɑ̀ gëdde ki dörø, e cyëëg-ɑ yuu-ɑ kedhi myërri Yeudiyɑ̀. Codhe, kɑ Rɑ̈dh Asɑ̀ ókɑ̈bbø ki ɑ́tegø kí dhɑb kì kɑ̈nni Kengø geki gøldwøng, kɑ gï öre Rɑ̈dh Benɑdɑd, rɑ̈ɑ̈dh Arɑm kì Dimɑceg, kɑ oödø ki wöödø kinni, “Rëbi wɑ ni kɑ ɑ́bëëd wëëgee. Kwɑny dhɑb kí ɑ́tegø møg-ɑ örɑ yïn èn. Pɑ̈d lwöm-ɑ kɑɑm wuki Bɑcɑ̀ rɑ̈ɑ̈dh Isrɑil, o dhwödhe kì pinyɑ.” Ayïëëy kwøbbi Asɑ̀ yi Benɑdɑd, kɑ pëjji linye öre be pɑ̈ɑ̈r kömi kɑ̈ddi Isrɑil. Amɑg gen Iyön, kí Dɑn, kí Abel Bet Mɑɑkɑ̀ geki kɑ̈ddi Nɑptɑlì bënn kɑ̈jj-ɑ nyi mïdhi gïgcɑmm. Keny-ɑ ɑ́lïng Rɑ̈dh Bɑcɑ̀ ki gïg-ɑ ɑ́cwöb, ɑwïye ki geri Rɑmɑ̀, kɑ gwøg cuunge. Codhe, ɑcøng jøg-ɑ cwøw kì yij Yeudiyɑ̀ bëne yi Rɑ̈dh Asɑ̀, kɑ gï öre be kɑ̈ɑ̈li kïttì geki yenh sɑndɑl møg-ɑ ɑ́gëëd yi Bɑcɑ̀. Codhe, ɑkɑ̈ɑ̈l gen kɑ gï geere Gebɑ̀ geki Midhpɑ̀. Kì bøli kenyɑni ɑ ɑ́kedhi Aɑnɑnì jɑltöng yï Rɑ̈dh Asɑ̀ kɑ gø köbbe kinni, “Mɑ́ yï ɑ́ngɑ̈dh-ɑ rɑ̈ɑ̈dh Arɑm, kibøli ke di ngɑ̈ɑ̈dh Jwøgí, Jwøng-ɑ Ácwɑ̈ɑ̈j, liny Arɑm ɑ́pɑ̈r kɑ yï wiye piny. Liny Kuc geki liny Lïbiyɑ̀ nuti bëëd ge gïïr, yï gen dɑ yɑ̈ɑ̈th kí kyënyì mø ngenyø? De ge nuti tyɑɑm yïn kì bɑng kɑ ɑ́gɑ̈nní Jwøng-ɑ Ácwɑ̈ɑ̈j? Jwøng-ɑ Ácwɑ̈ɑ̈j nenn-ɑ kömi piny bëne, o tyëng-ɑ pëthi gen tyerii nyii thödhø yi en ki tegø. Yï ɑ́göög-ɑ nøgi wïj, kɑ ɑ́rum bëëde kinøw, o cɑg ɑnɑn ceth, yï ceg-ɑ cögø yï ónyïɑ̈ggø liny.” Amɑɑg Asɑ̀ yi liny ki jɑltöng, kɑ gø twöje ki ɑ́cwecwel. Bøli kenyɑni ɑ ɑ́rënyi bëëdi Asɑ̀ ki ji. Gïg-ɑ ɑ́göög bënn kì ri cɑ̈gi jyɑ̈gi Asɑ̀ gïti cöge, bɑ ɑgwed kì yij Wɑ̈nyi Rɑ̈nhi Yeudiyɑ̀ geki Isrɑil. Kɑ Asɑ̀ dële ócɑ̈gø rɑ̈m, kì pyɑ̈r ɑ́dɑ̈g wïdɑ́bïngween runne kì yij lɑwø; tyele ɑ́kwöd ki menrɑj, de nuti ywøøg kö Jwøng-ɑ Ácwɑ̈ɑ̈j kipe yiele, de ɑ́yɑb-ɑ ɑkïmm. Akedhi Asɑ̀ kun-ɑ di kweyye, kì bɑng runn ɑ́ryew, (ɑ løg pyɑ̈r ɑ́ngwen wïdɑ́kyeel runne kì yij lɑwø). Kɑ koony yij órøngi kït men-ɑ ɑ́tweg yi en kì Yerusɑlem, kɑɑl Debïd. Kɑ gïny ki mɑ̈th-ɑ yømi gen med, ɑrubbii ki bwöri koodhø me dwøng. Kɑ Yöcɑpɑt røøny kej wïye ɑ́ rɑ̈dh, kɑ ree gwøge e teg kibøli Isrɑil. Kɑ yethi kɑ̈ddi dör kì piny Yeudiyɑ̀ bëne cïbe ki jøliny, gen ɑ kɑ̈dd-ɑ ɑ́mɑg yi Asɑ̀ kì piny Eprɑim. Yöcɑpɑt ɑ́gyëdh yi Jwøng-ɑ Ácwɑ̈ɑ̈j, mɑ́ e ɑ́cyɑ̈dh ɑ bɑng bëën-ɑ ɑ́beed yi kwɑn Debïd, o Bɑɑl nuti mɑllø yi en. Ámɑll-ɑ Jwøøg wïye, kɑ cigge nyi mïdhe, o nuti göögø ni rɑ̈nhi Isrɑil. Yöcɑpɑt ɑ́thödhi yi Jwøng-ɑ Ácwɑ̈ɑ̈j ki tegø men jɑɑge Yeudiyɑ̀, kɑ muuj yi ji bënn ki jɑmmì, codhe, kɑ óyïddø ki kɑ̈r geki dhwɑ̈ng. Göggi Jwøng-ɑ Ácwɑ̈ɑ̈j ɑ́cïbe mɑl kibøli jɑmmì bënn, kɑ kɑ̈jj-ɑ nyi mɑlli jwögg-ɑ pɑth rënye geki ngïjji Aceerɑ̀ jwøng-ɑ dhɑjø kì Yeudiyɑ̀. Kɑ öd-ɑ kɑ̈ddi Yeudiyɑ̀ ki jøpwönyø kì dɑ̈ɑ̈g runne kì yij lɑwø, møg pwönyi kì kɑ̈ddi Yeudiyɑ̀. Jøpwönyɑni bɑ Benkɑil, kí Obɑdiyɑ̀, kí Dhekɑriyɑ̀, kí Nethɑnel, kí Mikɑiyɑ̀. Ge ɑ́kedh kyeel kɑ Kwɑrri Leebì ɑ́bïngwen, nyingi gen bɑ: Cemɑiyɑ̀, kí Nethɑniyɑ̀, kí Dhebɑdiyɑ̀, kí Asɑiil, kí Cemirɑmöth, kí Yönɑthɑn, kí Adöniyɑ̀, kí Töbiyɑ̀, kí Töbɑdöniyɑ̀. Kí ókwër ɑ́ryew, nyingi gen bɑ: Elicɑmɑ̀, kí Yeörɑm. Wɑ̈nyi Ciggi Jwøng-ɑ Ácwɑ̈ɑ̈j ɑ́kɑ̈l yi gen, kɑ ge kɑ̈l-ɑ yethi myërri Yeudiyɑ̀ bënn, ge pwöny-ɑ ji. Pödhh-ɑ bɑdhhi Yeudiyɑ̀ ɑ́göjji böögø yi Jwøng-ɑ Ácwɑ̈ɑ̈j, o ge cög gen ge pɑ nyïɑ̈ggi ki Rɑ̈dh Yöcɑpɑt. Kɑ Yöcɑpɑt muuj yi kwï tyëng Pelistiyɑ̀ ki jɑmmì, kɑ gø muuj gen ki ɑ́tegø ɑ́ gwɑ̈j. Ámuuj yi kwï Árɑb thyew ki dyëg römm ɑ́lïp ɑ́bïryew kí miy ɑ́bïryew, kí dyëg ɑ́tegg ɑ́lïp ɑ́bïryew kí miy ɑ́bïryew. Codhe, kɑ Yöcɑpɑt ókedhø e ótëngø ki mendwøng. Kɑ Yeudiyɑ̀ bëne yije gëdde ki kɑ̈ddi dör, gɑ kɑ̈jj-ɑ nyi mïdhi jɑmmì geki gïgcɑmm. Kɑ cïb-ɑ Yerusɑlem ki jöddi liny mø pëddi tegø, ge kwɑny gɑ wɑ̈thi kɑ̈lli gen. Adnɑɑ̀ bɑ pënyi jø gøl Yeudɑ̀, ɑ́pyejj-ɑ jøliny ɑ́lïp miy ɑ́dɑ̈g. Bɑnge dɑ Yöɑnɑn e pyejj-ɑ ɑ́lïp miy ɑ́ryew kí pyɑ̈r ɑ́bïdɑ̈g, dɑ̈ɑ̈g gen bɑ Amɑsiyɑ̀ wɑ̈d Dhikrì, e pyejj-ɑ ɑ́lïp miy ɑ́ryew. (Amɑsiyɑ̀ ree ɑ́ceg yi en kɑ muujø, o gögge Jwøng-ɑ Ácwɑ̈ɑ̈j). Eliɑdɑ̀ ɑ ɑ́pyejji jø gøl Ben Yɑmïn, bɑ pënyi liny me pëddi, ɑ́pyejj-ɑ jøliny ɑ́lïp miy ɑ́ryew mø cinggi gen di ködd kí wethh. Bɑnge dɑ Yödhɑbɑd, e pyejj-ɑ ɑ́lïp miyø kí pyɑ̈r ɑ́bïdɑ̈g, mø cinggi gen di jɑmmi liny mø døj. Jøgɑni bënn, ge ɑ́ying-ɑ buti rɑ̈dh kì Yerusɑlem, o jøliny møøgø ɑ́bëëd ge ópɑ̈ngø kì kelli kɑ̈ddi Yeudiyɑ̀ møg-ɑ kyeelø. Keny-ɑ ɑ́kɑ̈ri Yöcɑpɑt rɑ̈ɑ̈dh Yeudiyɑ̀ kɑ nyinge tɑɑy-ɑ kömi piny bëne, kɑ ogöögø ki øri Akɑɑb rɑ̈ɑ̈dh Isrɑil. Kì bɑng keny megø, kɑ Yöcɑpɑt kedh-ɑ kɑɑl Sɑmɑriyɑ̀ be këëmi Akɑɑb. Kɑ Yöcɑpɑt geki ji-ɑ ɑ́cyɑ̈dhi ki en theg yi Akɑɑb ki dyëg kí dhög. Codhe, kɑ Yöcɑpɑt dyej yi Akɑɑb kinni, o ge kedhi gen be pɑ̈ɑ̈r kömi Rɑmöth kì Gilyɑd. Apyëje gøn kinni, “Wɑ ókedhi be pɑ̈ɑ̈r kömi Rɑmöth?” Alöggi Yöcɑpɑt kinni, “Yɑ ókedh keløg yï ókedhø, o jølinyɑ ókedh keløg jølinyí ókedhø. Wø óbï be rëbø kì yij liny.” Codhe, ɑlenge dhøge kinni, “De pyëj wɑ Jwøng-ɑ Ácwɑ̈ɑ̈j møti.” Codhe, ɑcwööl jøtöng gɑ miy ɑ́ngwen yi rɑ̈ɑ̈dh Isrɑil, ɑpyëje gïn kinni, “Kedhɑ be pɑ̈ɑ̈r kömi Rɑmöth wɑlɑ̀ yɑ ko kedh?” Alöggi gen kinni, “Kedh, ócïb cingi rɑ̈dh yi Jwøk.” Akööb Yöcɑpɑt kinni, “Bong jɑltöng megø kì keny, me cuggi pyëji Jwøng-ɑ Ácwɑ̈ɑ̈j?” Alöggi Akɑɑb kinni, “Dɑ jɑltöng me cwøl ɑ́ Mikɑiyɑ̀ wɑ̈d Yimlɑ̀. De mɑɑn yi yɑn, mɑ́ yɑ pɑ nyi tönge ki gïndøj, den-ɑ́ gïgrijjø ɑ nyi tönge yɑn.” Alöggi Yöcɑpɑt kinni, “Yï ko kööb kinøw!” Codhe, ɑcwøøl jɑngi tøg burø yi Rɑ̈dh Akɑɑb, kɑ gø köbbe kinni jwɑne be dwɑɑyi Mikɑiyɑ̀ wɑ̈d Yimlɑ̀. Rɑ̈nhhɑni ryeet, ge rugø ki ógudhi rɑ̈ɑ̈dhø, o ge pëggi piny kì wɑ̈thi kwømmi gen kì ódɑ̈ri dhø döri Sɑmɑriyɑ̀, o jøtöng otöngø kì bøli gen. Kɑ jɑltöng-ɑ cwøl ɑ́ Dhedekiyɑ̀ wɑ̈d Kenɑɑnɑ̀ ogöögø ki tùngi ngyënyø dødø, ɑkööbe kinni, “Jwøng-ɑ Ácwɑ̈ɑ̈j okööbø kinni, ‘Yï ónyïɑ̈ggi ki tyëng Arɑm ki gïg, kɑ ge tyëg yi yïn ki nɑ̈gø kinni tweet.’ ” Møg ni møgɑni ceth ɑ ɑ́kwøb yi jøtöng bënn, ge ɑ́kööb bënn kinni, “Kedhí be nyɑɑg ki Rɑmöth, ócïb cingí yi Jwøng-ɑ Ácwɑ̈ɑ̈j.” Kɑ Mikɑiyɑ̀ köbbi yi jɑngi tøg burø men-ɑ ɑ́dwɑɑyii kinni, “Jøtöng bënn ɑ́töng-ɑ kwøbbi tyɑ̈mi rɑ̈dh. Kööb ki møg ni møg-ɑ ɑ́kwøb yi gen thyew.” Alöggi Mikɑiyɑ̀ kinni, “Yɑn ɑ köngi èn ki nyingi Jwøng-ɑ Nëënø, Jwøng-ɑ Ácwɑ̈ɑ̈j. Gïn-ɑ óköbbi yɑn yi Jwøk bɑ en ɑ ókwøbɑ!” Keny-ɑ ɑ́cunge kì bøli Rɑ̈dh Akɑɑb, ɑpyëjii yi rɑ̈dh kinni, “Mikɑiyɑ̀, kedhɑ wøki Rɑ̈dh Yöcɑpɑt be pɑ̈ɑ̈r kömi Rɑmöth wɑlɑ̀ wø ko kedh?” Alöggi Mikɑiyɑ̀ kinni, “Pɑ̈ɑ̈r wun köme! Wu ótyɑ̈mø. Wu ówëggi tyɑ̈mø yi Jwøng-ɑ Ácwɑ̈ɑ̈j.” Akööb Akɑɑb kinni, “Yï óköbbi köngø kɑ tyel ɑ́dï, kinni nyi kømmi dyër kenyi köbbí yɑn ki nyingi Jwøng-ɑ Ácwɑ̈ɑ̈j?” Alöggi Mikɑiyɑ̀ kinni, “Liny Isrɑil nenni yi yɑn e tɑyø kì wɑ̈thi kïttì ni dyëg møg bong ngɑn kwɑy gen. Akööb Jwøng-ɑ Ácwɑ̈ɑ̈j kinni, ‘Jøgɑni yï gen bong pëëji, wiy ge døøg gen myërri gen ki mër.’ ” Aköbbi Yöcɑpɑt yi Akɑɑb kinni, “Yï nuti köbbø yi yɑn kinni bong gïndøj me nyi töng yi en kiperɑ kinni tek, den-ɑ́ gïgrijjø?” Akööb Mikɑiyɑ̀ kinni, “Anɑn lïngí møg-ɑ köbbi yïn yi Jwøng-ɑ Ácwɑ̈ɑ̈j! Jwøng-ɑ Ácwɑ̈ɑ̈j ɑ́lidh yi yɑn e obëëdø kì wïj kwøme kì pɑɑre mɑl, o wëywödde ócungø kì bute, møøgø ying-ɑ wïj kyëje, o møg-ɑ kyeelø ying-ɑ wïj cɑɑme. Akööb Jwøng-ɑ Ácwɑ̈ɑ̈j kinni, ‘Á men ɑ óthɑb Akɑɑb, o kedhe Rɑmöth kun nɑ̈ɑ̈gii?’ Kɑ dhøggi wëywöddɑni óbɑ̈nnø. Kɑ wëy megø obëënø, kɑ ócungø kì bøli Jwøng-ɑ Ácwɑ̈ɑ̈j, ɑkööbe kinni, ‘Óthɑb yi yɑn.’ Akööb Jwøng-ɑ Ácwɑ̈ɑ̈j kinni, ‘Óthɑb yi yïn, kidï?’ Alöggi wëyɑni kinni, ‘Yɑ ókedhi be gwøg ki wëyi pyed kì dhøggi jøtööng Akɑɑb bënn, o ge pëëd gen.’ Akööb Jwøng-ɑ Ácwɑ̈ɑ̈j kinni, ‘Kedhí be thɑbii! Ólwɑ̈ng yi yïn.’ ” Kɑ møgɑni ngøl yi Mikɑiyɑ̀ kinni, “Bene gïn-ɑ ɑ́cwöb ɑnɑn, møgɑni ɑ́gwøg yi Jwøng-ɑ Ácwɑ̈ɑ̈j, o yï köbbi gen kwøbbi pyed. De Jwøng-ɑ Ácwɑ̈ɑ̈j kiree ɑ́kööb kinni, i kömí óbëën yi ryɑ̈g!” Codhe, ɑkedhi jɑltöng, Dhedekiyɑ̀ wɑ̈d Kenɑɑnɑ̀ yï Mikɑiyɑ̀, kɑ gø gøje kì thɑ̈nge, ɑkööbe kinni, “Yɑ ɑ́wiy ɑ́wën yi wëyi Jwøng-ɑ Ácwɑ̈ɑ̈j, ɑ døøge be kwøb kì rií?” Akööb Mikɑiyɑ̀ kinni, “Óyod yi yïn keny-ɑ ókedhí be pɑ̈ni tɑtyeel.” Codhe, ɑköbbi ɑ́kyel kì kelli pëjji liny yi Rɑ̈dh Akɑɑb kinni, “Mɑg Mikɑiyɑ̀ kɑ kïdhí yï Amön jɑngi kɑɑl geki Yöɑc nyirɑ̈dh. Köbbí gen kinni i kïdhi jɑlɑni ød mɑg, kɑ nyi mëggi møgi pï gïti keny-ɑ ódwöögɑ kì mër.” Aköbbi Akɑɑb yi Mikɑiyɑ̀ kinni, “Keløg yï ódwöög ki mër, pɑth ki Jwøng-ɑ Ácwɑ̈ɑ̈j ɑ ɑ́kööb kì riɑ!” Alënge dhøge teedø kinni, “Lïngu møg-ɑ ɑ́kwøbɑ, wu bënn!” Kɑ Rɑ̈dh Akɑɑb geki Yöcɑpɑt rɑ̈ɑ̈dh Yeudiyɑ̀ kedh-ɑ be pɑ̈ɑ̈r kömi Rɑmöth Gilyɑd. Aköbbi Yöcɑpɑt yi Akɑɑb kinni, “Keny-ɑ ókedhi wɑ be liny, riɑ ólunyɑ ki ógudh møøgø o yɑ ódhɑ̈lɑ ki ngijø yi gen, de yïn, rug ógudhi rɑ̈ɑ̈dhø.” Codhe, ɑkedhi rɑ̈ɑ̈dh Isrɑil be liny e ree kɑɑng en. Rɑ̈ɑ̈dh Arɑm pëjji linye rumø ki köbbø yi en kinni bong dhɑnhø megø den-ɑ́ rɑ̈ɑ̈dh Isrɑil kete ɑ nyïɑ̈ggi ki gen. Codhe, keny-ɑ ɑ́lidh gen Rɑ̈dh Yöcɑpɑt, ɑrum gen i bɑ rɑ̈ɑ̈dh Isrɑil, kɑ gø tyeg gen. Aryeer Yöcɑpɑt, kɑ køny yi Jwøng-ɑ Ácwɑ̈ɑ̈j. Kɑ jøgɑni jog yi Jwøk, kɑ wɑ̈thi gen løg gen. Álidh yi pëjji liny kinni pɑth ki rɑ̈ɑ̈dh Isrɑil, codhe kɑ wiy yi gen ki cyeddø. De jɑl-liny ɑ́kyel kì kelli jøliny Arɑm, ɑ́wɑ̈dhi göjjø ki weth, kɑ köjji ɑ́dhedheg rɑ̈ɑ̈dh Isrɑil twïy yi nyɑɑr weth, kɑ pɑ̈dh-ɑ ri gøn. Aköbbe jɑl-ɑ kyewi yɑ̈ɑ̈y kyënye kinni, “Riɑ ɑ́kedhi yi kedø. Løg rií kɑ yɑ kïdhí wɑ̈g!” Kɑ liny ótëngø kì cyɑ̈ngɑni, de Rɑ̈dh Akɑɑb ɑ́cög e buud-ɑ yij yɑ̈ye, e nenn-ɑ kun-ɑ di liny Arɑm. Athøwe cɑ̈ng óbuddø. Kɑ Yöcɑpɑt rɑ̈ɑ̈dh Yeudiyɑ̀ døøg-ɑ gøldwøng kì Yerusɑlem ki mër. Kɑ jɑltöng, Yeeu wɑ̈d Aɑnɑnì kedh-ɑ be yïddø ki rɑ̈dh, ɑköbbe gøn kinni, “Yï orumø kinni bɑ gïndøj ɑ ɑ́gwøg yi yïn kɑ ɑ́køny tyëngrijjø, kɑ yï órëbø ki tyëng-ɑ mɑɑn Jwøng-ɑ Ácwɑ̈ɑ̈j? Pyëw Jwøng-ɑ Ácwɑ̈ɑ̈j ɑ́rënyi ki yïn kì bɑng gïn-ɑ ɑ́gwøg yi yïn. De cɑgg ɑ́ kinøw yï døøj. Ngïjji Aceerɑ̀ jwøng-ɑ dhɑjø men-ɑ ɑ́bëëd e omɑllø yi ji ɑ́nyiig yi yïn, kɑ yï døøg-ɑ be gwøgi gïn-ɑ dwɑddi yi Jwøk.” Yöcɑpɑt ɑ́bëëd ɑ Yerusɑlem, de nyii cyɑ̈dhø kì kelli ji, cɑg kì wïj tuung pödhø kì wɑɑng wurlwɑl gïti wïj tuung myërri kïtti Eprɑim kì wɑɑng wuudø. Nyi kedh-ɑ be köbbi ji kinni dwöög gen kö Jwøng-ɑ Ácwɑ̈ɑ̈j, Jwøøg kweyyi gen. Árööny ki jɑgg kì yethi kɑ̈ddi dör kì Yeudiyɑ̀ bëne. Aköbbe gïn kinni, “Nyi nennu gøny kidøøj, wu pɑ jyɑ̈ɑ̈g tegi dhɑnhø, den-ɑ́ tegi Wë ɑ jyɑ̈ɑ̈g yi wun, o nud kì buti wun kenyi løøgu gøny. Nyi wøru Jwøng-ɑ Ácwɑ̈ɑ̈j kidøøj kenyi nennu gøny, mɑ́ Jwøng-ɑ Ácwɑ̈ɑ̈j, Jwøgee kwïj guumø ki ruj, wɑlɑ̀ pɑ nyi gënyø, wɑlɑ̀ pɑ nyi yïëy ki kumi dhøg.” Yöcɑpɑt ɑ́rööny kì Yerusɑlem ki Kwɑrri Leebì, kí ókwër, kí kwï pëjjì gɑ jɑgg møg-ɑ nyi nenni gønyy-ɑ kɑ̈ɑ̈l ri pyemi Ciggi Jwøng-ɑ Ácwɑ̈ɑ̈j, kí kwøbb-ɑ nyi kømmi kì dïkɑɑl. Acege gïn kinni, “Wøru Jwøng-ɑ Ácwɑ̈ɑ̈j kɑ wu göög wun, e bong ɑ́dud kì pëthi wun, kɑ kwøbbe nyi lïngi wun. Keny-ɑ ókɑ̈ni wɑddi wun kì kɑ̈dd-ɑ døngø ki ngɑn nɑ̈ɑ̈g dhɑnhø, wɑlɑ̀ pyem-ɑ cigg, köbbu gen kidøøj ki yuu-ɑ óbëëd gen kì keny-ɑ ógøøny gøny, o ge cög ge pɑ røngi kì bøli Jwøng-ɑ Ácwɑ̈ɑ̈j, kɑ pyëwe órënyø ki wun, wuki nyigi wun. Amɑriyɑ̀ Ókwër-ɑ Dwøng ɑ jɑɑg wun, ɑ nyi løøg møg-ɑ kööbø kì ri Ciggi Jwøng-ɑ Ácwɑ̈ɑ̈j. O Dhebɑdiyɑ̀ wɑ̈d Icmɑil, ɑ jɑɑg Yeudiyɑ̀ en ɑ nenni ɑkørri gøldwøng. Ókøny yi Kwɑrri Leebì. Göög wun pëthi wun teeg, wu ókøny yi Jwøng-ɑ Ácwɑ̈ɑ̈j ki gøggi dyër!” Codhe, ɑcøng tyëng Moɑb, kí tyëng Amön ri gen geki tyëng-ɑ ying tuung gen, kipe mɑ̈nyi Yeudiyɑ̀. Kɑ jøg møøgø bï-ɑ yï Rɑ̈dh Yöcɑpɑt, ɑköbbii yi gen kinni, “Liny me dwøng obëënø e kɑ̈ɑ̈l-ɑ Edöm kì løøg Luuy Omelø, bï-ɑ be mɑ̈nyø. Ge ɑ́rum ki mɑgi kɑɑl Adhɑdhöt Tɑmɑr.” (Kɑɑlɑni ɑ cwøl ɑ́ Ein Gedì). Kɑ Yöcɑpɑt obwøgø, ɑkwɑjje Jwøng-ɑ Ácwɑ̈ɑ̈j. Codhe, kɑ ji köbbe kì yij pödhø bëne kinni, twöön gen ri gen ki gïncɑm. Ajwɑni tyëng kɑ̈ddi Yeudiyɑ̀ bënn Yerusɑlem be pyëji Jwøng-ɑ Ácwɑ̈ɑ̈j ki gïn-ɑ cuggi gwøgø, kɑ ri gen cøng gen ódɑ̈ri Kengø geki tyëng Yerusɑlem bënn. Kɑ Rɑ̈dh Yöcɑpɑt ókedhø kɑ ócungø kì bøli gïn, ɑkwɑ̈jje ki cwɑg mø døngø kinni, “Yïn ɑ Jwøng-ɑ Ácwɑ̈ɑ̈j, Jwøøg kweyyi wøn, piny bëne kí ji-ɑ yije jɑɑg yi yïn, yï ying-ɑ pɑɑrí mɑl. Yï teeg cɑrø, o bong dhɑnhø me tyɑm yïn. Yï bɑ Jwøøg wøn. Keny-ɑ ɑ́bëën tyëng Isrɑil yij piny men, ji-ɑ ɑ́bëëd kì piny keny ɑ́cyeed yi yïn wɑ̈g, kɑ pinyɑni mëggí kwɑrri Abrɑhɑm mɑ̈dhí, o bëëde ɑ́ mi gen gïti ɑtheer. Ge ɑ́bëëd kì keny, kɑ yï gëddi gen ki Kengø mɑ mi nyingí. O ge ngɑ̈ny wøw kinni, keløg e dɑ rɑj mø pɑ̈dhi kömi gen, wɑlɑ̀ liny, wɑlɑ̀ yømø nɑ̈ɑ̈g, wɑlɑ̀ kɑ̈j, ge óbï be cung kì bøli Kengø men, keny-ɑ nyi mɑlli yïn. Kɑ yï kwɑjji yi gen kɑ̀ ying gen yij orɑng, kɑ kwɑ̈jjø mi gen lïng yi yïn, kɑ ge yiel yi yïn. “Anɑn tyëng Amön geki tyëng Moɑb, kí tyëng Edöm ɑ́pɑ̈ɑ̈r kömi wøn. Keny-ɑ ɑ́bëën kweyyi wøn kì Rïp, ge nuti wëggi kedhi piny tyëngɑni yi yïn, de ge ɑ́ceg kɑ wenø yi kweyyi wøn, kɑ ge ocögø gï nuti nɑ̈ɑ̈g gen. O ɑnɑn wø yöd wø ceg kɑ cyeed wɑ̈g yi gen kì piny-ɑ ɑ́mëggí wøn. Yï bɑ Jwøøg wøn! Cɑy gen, mɑ́ linyɑni dwøng cɑrø, wø pɑ cuggi cung kì bøli gen. Bong gïn ngɑ̈nyi yi wøn me cuggi gwøgø yi wøn, de wø kwɑjj-ɑ yïn, køny wøn.” Tyëng Yeudiyɑ̀ bënn, jøg-ɑ cwøw kí tyëng-ɑ mɑ̈nn kí othønhø, ɑ́bëëd ge ócungø kì bøli Kengø. Abëën wëyi Jwøng-ɑ Ácwɑ̈ɑ̈j kömi Kwɑɑr Leebì mɑ ɑ́bëëd e ócungø kì kelli ji mø ngenyø. Nyingi Kwɑɑr Leebì menɑni bɑ Yɑɑdhiel wɑ̈d Dhekɑriyɑ̀, wɑ̈d Mɑtɑniyɑ̀, wɑ̈d Yeiel, wɑ̈d Benɑiyɑ̀ kì kelli kwɑrri Asɑp. Akööb Yɑɑdhiel kinni, “Yïn ɑ Rɑ̈dh Yöcɑpɑt wuki tyëng Yeudiyɑ̀ kí tyëng Yerusɑlem bënn, Jwøng-ɑ Ácwɑ̈ɑ̈j okööbø kinni i pëthi wun ko lïngi, wɑlɑ̀ wu ko böggi yi ngenyi linyɑni; bɑ Jwøk ɑ ónyɑg liny, de pɑth ki wun. Pɑ̈ɑ̈r wun kömi gen dhuki, keny-ɑ óbëën gen ge töng-ɑ mɑl kì Dhidh, wu órwööm ki gen kì cögi tör men-ɑ cyɑ̈gi ki thïm Yeruel. Pɑth ki wun ɑ ónyɑg linyɑni. Wɑ̈dhu pëggi kɑ̈jji wun, kɑ wu yïd wun, o lidh yi wun kinni, wu ówëggi tyɑ̈mø yi Jwøng-ɑ Ácwɑ̈ɑ̈j. Wun ɑ tyëng Yeudiyɑ̀ kí tyëng Yerusɑlem, wu ko lyebbi wɑlɑ̀ wu ko böggi. Kedhu be liny, wu ókøny yi Jwøng-ɑ Ácwɑ̈ɑ̈j!” Codhe, kɑ Rɑ̈dh Yöcɑpɑt wïje kuule piny geki ji bënn, kɑ Jwøng-ɑ Ácwɑ̈ɑ̈j mɑl yi gen. Adhwödhi Kwɑrri Leebì mɑl, ɑ løg tyëng gøl Kɑ̈ɑ̈th kí tyëng gøl Körɑ̀, kɑ Jwøng-ɑ Ácwɑ̈ɑ̈j, Jwøøg Isrɑil lenhi gen ki cwɑg mø døngø. Dhuki kì mwøl ɑmøøl liny yij pɑ̈l-ɑ buti Tekoɑ̀. Keny-ɑ ɑ́wɑ̈dhi gen, ɑköbbi gen yi Yöcɑpɑt kinni, “Wu tyëng Yeudiyɑ̀ kí tyëng Yerusɑlem ngɑ̈dhu Jwøng-ɑ Ácwɑ̈ɑ̈j, Jwøgee, o wu ócungi wun wu teg. Yïëyu møg-ɑ ɑ́köbbi wun yi jøtöng møge.” Kɑ ɑ́rume nywɑgi kwøb ki ji, ɑkɑ̈bbe ki ji møg wör ki wörri lenhi Jwøng-ɑ Ácwɑ̈ɑ̈j, o ge cyɑ̈dhi gen kì bøli yɑy, ge owörø kinni, “Lenhi wɑ Jwøng-ɑ Ácwɑ̈ɑ̈j, mɑ́ mɑ̈ɑ̈dø mee gït-ɑ ɑtheer.” Keny-ɑ ɑ́cɑ̈gi gen ki wör ceth, kɑ liny-ɑ ɑ́bï kömi Yeudiyɑ̀ bëne göjji otwɑ̈l yi Jwøng-ɑ Ácwɑ̈ɑ̈j Kɑ liny Amön geki Moɑb pɑ̈ɑ̈r-ɑ kömi liny Edöm, kɑ gï nɑ̈g gen kinni tweet. Keny-ɑ ɑ́rum gen ki nɑ̈gi tyëng Edöm, kɑ ge töng-ɑ ri gen, kɑ ri gen nɑ̈g gen. Keny-ɑ wɑ̈nhi liny Yeudiyɑ̀ ønbɑ̈r, ɑ́lïïdh gen kun-ɑ di tyëngmɑ̈ɑ̈nø, kɑ gï lidh gen ge buud-ɑ piny ge thøø. Bong dhɑnhø ɑ́kyel me bodhø. Kɑ Yöcɑpɑt kí linye kedh-ɑ be kwɑnyi jɑmm-ɑ ɑ́döng kì bɑng linyɑni, kɑ ge ókɑ̈nø ki dhög, kí gïgcɑmm, kí ógudh, kí jɑmmì mø ngewi gen teeg. Ge ɑ́tyëg-ɑ cyɑ̈ng ɑ́dɑ̈g ge ceg-ɑ cøng ki jɑmm-ɑ ɑ́döng kì bɑng linyɑni, de jɑmmɑni ɑ́dhɑ̈li kɑ̈ɑ̈lø yi gen bënn mɑ́ ge ngenyø. Kɑ kì ri ngween cyɑ̈ng, ɑcøng gen ri gen kì yij Töör Berɑkɑ̀, kɑ Jwøng-ɑ Ácwɑ̈ɑ̈j lejji gen kipe gïn-ɑ ɑ́gwøg yi en. Bene ɑ cwølli törɑni ɑ́ Berɑkɑ̀. Apeej liny Yerusɑlem yi Yöcɑpɑt ki medi pyëw me dwøng, mɑ́ tyëngmɑ̈ɑ̈nø ɑ́tyɑm yi Jwøng-ɑ Ácwɑ̈ɑ̈j. Keny-ɑ ɑ́wɑ̈nhi gen kɑɑldwøng, ɑkedhi gen yij Kengø, ge othumø ki thøm, o ge okudhø ki kɑ̈ngì. Keny-ɑ ɑ́lïng pödhh-ɑ kyeelø ki kër-ɑ ɑ́tyɑɑm tyëng-ɑ mɑɑn Isrɑil yi Jwøng-ɑ Ácwɑ̈ɑ̈j, kɑ ge ceg-ɑ bwøgø ki mendwøng. Codhe, ɑjyɑ̈ɑ̈g Yöcɑpɑt ki mër, kɑ thödhi yi Jwøk ki mër kì wɑ̈thi tùng bënn. Yöcɑpɑt ɑ́røny ɑ́ rɑ̈dh e runne bɑ pyɑ̈r ɑ́dɑ̈g wïdɑ́bïj, kɑ ojyɑ̈gø kì Yerusɑlem ki runn pyɑ̈r ɑ́ryew wïdɑ́bïj. Meye bɑ Adhubɑ̀ nyɑɑr Cilkì. Jyɑ̈gi Yöcɑpɑt pɑ̈r ki jyɑ̈gi Asɑ̀ wïye, ɑ́göög ki gïgdøj kì bøli Jwøng-ɑ Ácwɑ̈ɑ̈j. De kɑ̈jj-ɑ nyi mɑlli jwögg-ɑ pɑth nuti rëny en. Ji ɑ́bëëd ge nuti dwöög be mɑlli Jwøøg kweyyi gen ki pëthi gen bënn. Jɑmm-ɑ ɑ́gwøg bënn yi Yöcɑpɑt kì ri cɑ̈gi jyɑ̈ge gïti cöge, bɑ ɑgwed kì yij Wɑ̈nyi Yeeu wɑ̈d Aɑnɑnì, wɑ̈nyɑni bɑ budi Wɑ̈nyi Rɑ̈nhi Isrɑil. Kɑ Yöcɑpɑt órëbø kì bøli keny megø ki Akɑdhiyɑ̀ rɑ̈ɑ̈dh Isrɑil, jɑl-ɑ ɑ́göög ki gïgrijjø. Kɑ ge ogudø kì Edhïön Geber, ki yɑ̈thi nɑɑm omeli dwøng, møg nyi kedhi Tɑrcic. De jɑltöng, Eliedher wɑ̈d Dödɑbɑu kì Mɑrecɑ̀, Yöcɑpɑt ɑ́köbbe kinni, “Mɑ́ yï ɑ́rëbi ki Akɑdhiyɑ̀, yɑ̈th-ɑ ógur yi yïn ótørri yi Jwøng-ɑ Ácwɑ̈ɑ̈j kipe gïn-ɑ ɑ́gwøg yi yïn.” Kɑ yɑ̈ɑ̈th ótørrø, kɑ ge ocögø ge nuti kedhi Tɑrcic. Akedhi Yöcɑpɑt kun-ɑ di kweyye, kɑ kony kì kɑɑl Debïd kì rörri gøl rɑ̈ɑ̈dhø, kɑ wɑ̈de Yeörɑm røny ɑ́ rɑ̈dh kì keje. Yeörɑm wɑ̈d Yöcɑpɑt rɑ̈ɑ̈dh Yeudiyɑ̀ yïe ɑ́dɑ nyiimëëg ɑ́bïkyel: Adhɑriyɑ̀, Yekiel, Dhekɑriyɑ̀, Adhɑryɑu, Mikɑil, kí Cepɑtiyɑ̀. Ge ɑ́thödhi yi wïyi gen Yöcɑpɑt ki ɑ́tegø, kí dhɑb, kí jɑmmì mø ngewi gen teg, kí kɑ̈ddi dör kì Yeudiyɑ̀. De lɑwø ɑ́mëgge Yeörɑm, mɑ́ en ɑ bɑ nyeldwøng, ɑ ójɑ̈ggi kì bɑnge. Keny-ɑ ɑ́jyɑ̈ɑ̈g Yeörɑm ki tegø, nyiimen ɑ́nɑ̈ge bënn geki kwï pëjji Isrɑil thyew. Yeörɑm ɑ́røny ɑ́ rɑ̈dh e runne bɑ pyɑ̈r ɑ́dɑ̈g wïdɑ́ryew, kɑ ojyɑ̈gø kì Yerusɑlem ki runn ɑ́bïdɑ̈g. Ágöög ki gïgrijjø ni møg-ɑ ɑ́gwøg yi Rɑ̈dh Akɑɑb, kí kwï rɑ̈nhi Isrɑil møøgø, ɑ́røngi kì bøli Jwøng-ɑ Ácwɑ̈ɑ̈j kipe kɑ ɑ́nyöme kì kelli nyigi Rɑ̈dh Akɑɑb. Jwøng-ɑ Ácwɑ̈ɑ̈j nuti dwɑddi ryɑ̈gi gøl Debïd, mɑ́ e ɑ́köngi kinni kwɑrri Debïd ɑ ójyɑ̈ɑ̈gø kì yethi rïjj bënn. Kì ri jyɑ̈gi Yeörɑm, Edöm ɑ́ngɑ̈nyi wɑ̈ye kì ri Yeudiyɑ̀, kɑ ree rönye ki rɑ̈dh. Codhe, ɑkedh Yeörɑm geki pëjji linye, kí yɑ̈thi kyënyì kɑ ge pɑ̈ɑ̈r-ɑ kömi Edöm. Kɑ ge tyeg yi liny Edöm kì wɑ̈r, de ge ɑ́turri wɑ̈g kì wɑ̈rɑni ceth kɑ ge obodhø. Kɑ Edöm ódhɑ̈lø dwöög thɑ́ ciggi Yeudiyɑ̀. Kɑ kɑɑl Libnɑ̀ ngɑ̈ny-ɑ wɑ̈ye kì bøli kenyɑni thyew, mɑ́ Yeörɑm Jwøøg kweyyi gen, Jwøng-ɑ Ácwɑ̈ɑ̈j, ɑ́wiye piny. Kɑ ogëdø ki kɑ̈jji mɑ̈ddø møg nyi mɑlli jwögg-ɑ pɑth ki dyër, kɑ tyëng Yeudiyɑ̀ geki tyëng Yerusɑlem peeje be gwøg ki orøg kì bøli Jwøng-ɑ Ácwɑ̈ɑ̈j. Aödi Yeörɑm ki wɑ̈nyø yi Eliyɑ̀ jɑltöng, wɑ̈nyɑni okööbø kinni, “Yï ɑ́cɑy yi Jwøng-ɑ Ácwɑ̈ɑ̈j, Jwøøg kweyí Debïd, mɑ́ yï nuti bëëdø ni wïyí Rɑ̈dh Yöcɑpɑt, wɑlɑ̀ yï nuti bëëdø ni kweyí Rɑ̈dh Asɑ̀. De yï ɑ́yöd yï ngøy-ɑ bëëdi rɑ̈nhi Isrɑil, kɑ tyëng Yeudiyɑ̀ geki tyëng Yerusɑlem göjjí pyemi kwøbbi Jwøk, ni kɑ ɑ́göjji Isrɑil pyemi kwøbbi Jwøk yi Akɑɑb geki tyëng-ɑ ɑ́jɑ̈ggi kì bɑnge. Kɑ nyiimyëw møg-ɑ ɑ́bëëd ge døøj kibølí nɑ̈g yi yïn bënn. Kɑ ɑ́rum bëëde kinøw, jií kí nyigí, kí mɑ̈nní, ócɑy yi Jwøng-ɑ Ácwɑ̈ɑ̈j ki mendwøng, o jɑmmí órënyi yi en. Yï órɑngi yi rɑ̈ɑ̈m yijí ki menteg, o dëlí ókedh e órënyø yethi cyɑ̈ng.” Kɑ pëthi kwï tyëng Pelistiyɑ̀, kí Árɑb møg-ɑ bëëdø kì buti tyëng Kuc kì kömi nɑm, göjji rënyø ki Yeörɑm yi Jwøng-ɑ Ácwɑ̈ɑ̈j. Kɑ ge pɑ̈ɑ̈r-ɑ kömi Yeudiyɑ̀, kɑ gøldwøng yɑg gen, kɑ mɑ̈nni rɑ̈dh bënn geki wɑ̈dde kɑ̈l yi gen gɑ ɑmɑgg, den-ɑ́ Akɑdhiyɑ̀, nyel-ɑ thinh kete ɑ ɑ́wiy yi gen. Codhe, ɑgöjji rɑ̈dh rɑ̈ɑ̈m yij yi Jwøng-ɑ Ácwɑ̈ɑ̈j. Kɑ tyëg-ɑ runn ɑ́ryew e obuddø ki yije. Codhe, ɑthøwe; ɑ́nɑ̈g yi rɑ̈ɑ̈m yije. Nuti rubø ki bwöri koodhø ni kweyye. Yeörɑm ɑ́røny ɑ́ rɑ̈dh e runne bɑ pyɑ̈r ɑ́dɑ̈g wïdɑ́ryew, kɑ ojyɑ̈gø kì Yerusɑlem ki runn ɑ́bïdɑ̈g. Bong dhɑnhø mɑ ɑ́ywöngi keny-ɑ ɑ́thøwe. Akonyii kì kɑɑl Debïd, de nuti koony rörri gøl rɑ̈ɑ̈dhø. Tyëng Árɑb ɑ́kedhi be kɑbi jɑmmi Rɑ̈dh Yeörɑm, kɑ wɑ̈dde nɑ̈g yi gen, den-ɑ́ Akɑdhiyɑ̀ nyel-ɑ thinh ɑ ɑ́wiy yi gen kete. Codhe, ɑrøøny Akɑdhiyɑ̀ ɑ́ rɑ̈dh kì kej wïye yi tyëng Yerusɑlem. Akɑdhiyɑ̀ ɑ́bëëd runne bɑ pyɑ̈r ɑ́ryew wïdɑ́ryew keny-ɑ ɑ́gööge ɑ́ rɑ̈dh, kɑ ojyɑ̈gø ki run ɑ́kyel kì Yerusɑlem. Meye bɑ Athɑliyɑ̀, nyɑɑr Akɑɑb wɑ̈d Omrì rɑ̈ɑ̈dh Isrɑil. Akɑdhiyɑ̀ ɑ́bëëd ki bëëdi gøl Akɑɑb, mɑ́ meye ɑ́bëëd ɑ́ en nyi köbbii gwøg ki gïn-ɑ bɑ orøg. Árøngi kì bøli Jwøng-ɑ Ácwɑ̈ɑ̈j, mɑ́ kì bɑng thøwi wïye, tyëng gøl Akɑɑb ɑ ɑ́bëëd gɑ ji-ɑ nyi kønyii ki kwøb, kɑ órënyø kì bɑng kwøbbi jiɑni. Kɑ thɑb yi jiɑni, ɑrëbe kí Yörɑm rɑ̈ɑ̈dh Isrɑil, kɑ ge kedh-ɑ be nyɑɑg ki Asɑiil rɑ̈ɑ̈dh Arɑm. Kɑ linyɑni ótuumø kì Rɑmöth kì Gilyɑd, kɑ Yörɑm ree kedhi yi kedø kì yij linyɑni. Adwööge kɑɑl Yidhriil be tuuri kedde, ɑkedhi Akɑdhiyɑ̀ kunɑni be këëmii. Këëmi Yörɑm yi Akɑdhiyɑ̀ ɑ́gwøg yi Jwøk ɑ́ göj me tɑ̈ɑ̈yii piny. Mɑ́ kɑ̈ng-ɑ ɑ́yinge kunɑni geki Yörɑm, yï gen ɑ́bëën yi Yeeu wɑ̈d Nimcì, jɑl-ɑ ɑ́yieny yi Jwøng-ɑ Ácwɑ̈ɑ̈j ɑ́ ngɑn nɑ̈g tyëng gøl Akɑɑb bënn. Keny-ɑ ɑ́cɑ̈gi Yeeu ki nɑ̈gi tyëng gøl Akɑɑb, ni kɑ ɑ́kööb Jwøng-ɑ Ácwɑ̈ɑ̈j, ɑrøøme ki pëjji Yeudiyɑ̀ ge ócyɑ̈dhø ki wɑ̈ddi ómï Akɑdhiyɑ̀ kì kelli gen. Ge ɑ́bï-ɑ be lwöögi Akɑdhiyɑ̀ kɑ ɑ́kedhe be këëmø. Kɑ ge nɑ̈g yi Yeeu bënn. Ayɑbe Akɑdhiyɑ̀ kɑ gø yode e pɑ̈nø kì Sɑmɑriyɑ̀. Akɑ̈ɑ̈le gøn yï Yeeu, kɑ gø nɑ̈ge. De ɑ́kony, mɑ́ e ɑ́wør-ɑ kweye Yöcɑpɑt kipe gïgdøj møg-ɑ ɑ́gøgge kì bøli Jwøng-ɑ Ácwɑ̈ɑ̈j. Bong dhɑnhø mɑ ɑ́döng kì gøl Akɑdhiyɑ̀ me di kwɑny lɑwø. Keny-ɑ ɑ́lïng Athɑliyɑ̀ meyi Rɑ̈dh Akɑdhiyɑ̀ kinni wɑ̈de ónɑ̈gø, ɑkööbe kinni nɑ̈ɑ̈g tyëng gøl rɑ̈ɑ̈dhø kì Yeudiyɑ̀. Akɑdhiyɑ̀ yïe ɑ́dɑ nyiwɑ̈n me cwøl ɑ́ Yöcebɑ̀, o bɑ cï ókwërø Yöyɑdɑ̀. Kɑ nyel ɑ́kyel kì kelli wɑ̈ddi Akɑdhiyɑ̀ møg-ɑ dwɑddi nɑ̈gø, kwɑl yi Yöcebɑ̀. Kɑ gø kɑɑne øn nyi buud kì buti Kengø. Gø ɑ́yiele ki thøø kì cingi Athɑliyɑ̀. Kɑ obëëdø ɑ́ ɑkɑn kì Kengø ki runn ɑ́bïkyel, ɑ́ Athɑliyɑ̀ ɑ jyɑ̈gø ɑ́ rɑ̈nh-ɑ dhɑjø. Kì bɑng runn ɑ́bïryew, ɑkööb ókwërø Yöyɑdɑ̀ kinni, bøli keny-ɑ cɑ̈gi ɑ́wɑ̈nhi. Codhe, ɑnywɑge kwøb geki pëjji liny ɑ́bïj ɑ løg. Adhɑriyɑ̀ wɑ̈d Yeroɑm, kí Icmɑil wɑ̈d Yöɑnɑn, kí Adhɑriyɑ̀ wɑ̈d Obed, kí Mɑɑseiyɑ̀ wɑ̈d Adɑiyɑ̀, kí Elicɑpɑt wɑ̈d Dhikrì. Akedhi gen yethi kɑ̈ddi Yeudiyɑ̀ bënn kɑ Kwɑrri Leebì geki jyɑ̈ggi wɑ̈thi kɑ̈lli cwööl gen Yerusɑlem. Acøng gen ri gen bënn yij Kengø, kɑ ge onywɑ̈gø ki kwøb geki Yöɑc, wɑ̈d rɑ̈dh. Aköbbi gen yi Yöyɑdɑ̀ kinni, “Nyel bɑ wɑ̈d rɑ̈nh-ɑ ɑ́thøw! Røny ɑnɑn ɑ́ rɑ̈dh, ni kɑ ɑ́kwøbii yi Jwøng-ɑ Ácwɑ̈ɑ̈j kinni, kwɑrri Rɑ̈dh Debïd óbëëd ɑ́ gen ɑ jyɑ̈gø ceth. Gïn-ɑ ógwøg yi wøn èn: Keny-ɑ óbëën ókwër geki Kwɑrri Leebì be gwøg kì cyɑ̈ɑ̈ng Sɑbɑth, pɑ̈ngu ri wun, wun ɑ́ ɑkudd ɑ́dɑ̈g; ɑkud ɑ́kyel kore dhøggi Kengø, kɑ ɑkun-ɑ ryew kore gøldwøng, kɑ ɑkun-ɑ ɑ́döng kore Dhøg Wɑɑng Pï. Ji bënn ri gen ócøng gen ódɑ̈ri Kengø. Ko di dhɑnhø me kedhi Kengø den-ɑ́ ókwër geki Kwɑrri Leebì møg-ɑ göögø keti gen ɑ ókedhi Kengø, mɑ́ ge bɑ ɑkwër, de lïngi ji bënn kwøbbi Jwøng-ɑ Ácwɑ̈ɑ̈j, kɑ ge bëëd gen kì wɑ̈g. Kwɑrri Leebì møg-ɑ kurø, cungi gen kì bɑdhhi rɑ̈dh, ki pilli gen kì cinggi gen, kɑ ge nyi kedh gen ki rɑ̈dh kun-ɑ kedhe. Nɑ̈ɑ̈g ngɑn-ɑ ópɑ̈nyi kedhi yij Kengø.” Kwøbb-ɑ ɑ́kwøb yi Yöyɑdɑ̀ ɑ́yïëy yi Kwɑrri Leebì geki tyëng Yeudiyɑ̀, kɑ møgɑni gwøg gen ceth. Jøg-ɑ nyi rum ki gwøg pɑ nyi kedhi yethi kɑ̈lli gen kì cyɑ̈ɑ̈ng Sɑbɑth, de pëjjì bënn nyi bëëd ge nud, gen ɑ tyëng-ɑ göögø kí møg-ɑ di kedhi kɑ̈lli gen. Tønggi Debïd geki ködde møg-ɑ ɑ́ying yij Kengø, ɑ́mëggi pëjji liny yi Yöyɑdɑ̀. Jøg-ɑ cwøw ɑ́cïb bøli Kengø yi Yöyɑdɑ̀ ri gen wen gen, o pilli gen tiim gen, ge kor-ɑ rɑ̈dh. Codhe, ɑkɑ̈ɑ̈l Yöɑc wɑ̈g yi Yöyɑdɑ̀, ɑcïbe yɑ̈r wïje, ɑmëgge gøn wɑ̈nyi cigg-ɑ jyɑ̈ɑ̈g yi rɑ̈dh. Codhe, ɑrønyii ɑ́ rɑ̈dh. Yöɑc ɑ́røny yi ókwërø Yöyɑdɑ̀ geki wɑ̈dde, kɑ dhɑnhø bëne óryeerø kinni, “Rɑ̈dh ómïdhi yi Jwøk!” Alïngi ryeeri ji yi Athɑliyɑ̀. Codhe, ɑjwɑne Kengø, keny-ɑ cøng ji ri gen. Alidhe rɑ̈nh-ɑ nyɑ̈n e ócungø kì dhø Kengø, kì buti löjj møg-ɑ ɑ́cïb kipe rɑ̈nhì, e bɑ ɑwen yi pëjji liny, e kɑ̈ngì okodhø. Ji bënn ɑ́ryeer ki medi pëthi gen, ge okudhø ki kɑ̈ngì, ji owörø, thøm othomø. Kɑ Athɑliyɑ̀ ógødhe kɑge, ɑryeere kinni, “Amolpiny! Amolpiny!” Yöyɑdɑ̀ nuti dwɑddi nɑ̈gi Athɑliyɑ̀ kì dhø Kengø. Codhe, ɑcwøle pëjji liny kɑ gï köbbe kinni, “Kwɑnyu en kɑ kïdhu wɑ̈g kì kɑɑm ɑtødd ɑ́ryew møg korii, kɑ ngɑn-ɑ ódwɑddi yielii nɑ̈g wun.” Amɑg ge gøn, kɑ gø køøl gen gøldwøng, ɑnɑ̈g ge gøn kì Dhøg Kyënyì. Anywɑ̈ɑ̈g ókwërø Yöyɑdɑ̀ ki kwøb geki Rɑ̈dh Yöɑc kí ji bënn kinni, ge óbëëdø gɑ jii Jwøng-ɑ Ácwɑ̈ɑ̈j ceth. Codhe, ɑkedhi gen kengi Bɑɑl, kɑ gø cøør gen piny. Acøør gen këlli lɑm piny kɑ ngïjjì tørri gen, ɑnɑ̈g gen Mɑtɑn ókwëri Bɑɑl kì buti këlli lɑm. Akwɑɑny ókwër geki Kwɑrri Leebì yi Yöyɑdɑ̀, o ge kor gen gwøg kì yij Kengø. Gwøng-ɑ ɑ́mëggi gen yi Rɑ̈dh Debïd, o ge nyi rɑ̈b gen gënh-ɑ nyi mëggi Jwøng-ɑ Ácwɑ̈ɑ̈j ni kɑ ógwedii kì yethi Ciggi Mosɑ̀. Gen ɑ wör, ɑ thom thøm, ɑ gwøg kwër kì cyɑ̈nggi kwër. Dhø Kengø ɑ́cïbi yi Yöyɑdɑ̀ ki jøg mø kurø, kipe kinni o ngɑn pɑ dhïw nyi mɑ̈ɑ̈n kedhi yij Kengø. Abëën pëjji liny, kí jøgdøngø geki kwï ji bënn be rëbø ki Yöyɑdɑ̀, ɑkwɑny gen rɑ̈dh kì Kengø, kɑ gø kïdhi gen gøldwøng. Ákɑ̈l yi gen kɑ dhøng-ɑ dwøng, kɑ rɑ̈dh pëgg-ɑ wïj kwøøm rɑ̈ɑ̈dhø. Ji bënn ɑ́bëëd pëthi gen med, kɑ ɑ́rum Athɑliyɑ̀ ki nɑ̈gø, kɑ kɑɑl ókwöjø. Yöɑc ɑ́røny ɑ́ rɑ̈ɑ̈dh Yeudiyɑ̀ e runne bɑ ɑ́bïryew, kɑ ojyɑ̈gø ki runn pyɑ̈r ɑ́ngwen kì Yerusɑlem. Meye bɑ Dhibiyɑ̀ kì Bircebɑ̀. Yöɑc ɑ́göög ki gïgdøj kì bøli Jwøng-ɑ Ácwɑ̈ɑ̈j keny-ɑ ɑ́bëëd Yöyɑdɑ̀ nudd e onëënø Yöɑc ɑ́nyömmi ki mɑ̈nn ɑ́ryew yi ókwërø Yöyɑdɑ̀, kɑ Yöɑc nyöddi yi mɑ̈nnɑni ki wɑ̈dd geki womɑ̈nn. Kì bɑng kɑ ɑ́rum Yöɑc ki rønyø ɑ́ rɑ̈dh, ɑkööbe kinni dwɑdd-ɑ thïgi Kengø. Aköbbe ókwër geki Kwɑrri Leebì kinni, kedhi gen yethi kɑ̈ddi Yeudiyɑ̀, kɑ ge cung gen ki ngyëny mø gïïr kì yï ji, o ngyënyyɑni nyi thïg Kengø kì yethi runn. Kɑ okööbø kinni gwøøg møgɑni ceth. De Kwɑrri Leebì ɑ́buddi kì kömi kwøb. Codhe, ɑcwøle Yöyɑdɑ̀ jɑngi ókwër, kɑ gø pyëje kinni, “Á kipe ngø ɑ bɑɑny ókwër ki köbbø kinni kɑ̈ɑ̈l gen gwɑ̈j kì Yeudiyɑ̀ kí Yerusɑlem ni kɑ ɑ́kwøbii yi Mosɑ̀ bɑ̈ng Jwøng-ɑ Ácwɑ̈ɑ̈j, kinni nyi muuj ji ki gwɑ̈ɑ̈j Kemi Kwër?” Mɑ́ nyigi Athɑliyɑ̀, ngɑn-ɑ rɑj, ɑ́kedhi ød Jwøk, kɑ jɑmmi kwër kì ød Jwøng-ɑ Ácwɑ̈ɑ̈j kïdhi gen be mɑlli Bɑɑl. Aköbbi Kwɑrri Leebì yi rɑ̈dh kinni, göög gen ki Sɑndug kɑ cïb dhø Kengø. Aödi gen Yerusɑlem geki Yeudiyɑ̀ ki wöödø kinni kɑ̈ni dhɑnhø bëne ki gwɑ̈j men mëggi Jwøng-ɑ Ácwɑ̈ɑ̈j. Ni møg-ɑ ɑ́cøng kì tyeli mɑl kì yij ryɑng yi Mosɑ̀ bɑ̈ng Jwøng-ɑ Ácwɑ̈ɑ̈j. Kɑ ji pëthi gen ómïnø geki pëjji gen yi møgɑni, kɑ gwɑ̈ɑ̈j gen kɑ̈ɑ̈l gen, kɑ gø kïdhi gen yij sɑndungɑni, kɑ ceg-ɑ pɑ̈ngø. Sɑndungɑni nyi ceg kɑ muuj jɑngi gøldwøng yethi cyɑ̈ng yi Kwɑrri Leebì. O kenyi pɑ̈ng sɑndug yi ngyëny, ngyëny nyii kwɑnyø yi jɑngi gøldwøng geki Ókwër-ɑ Dwøng, kɑ Sɑndug nyi dwøøg keje yi gen. Kɑ ge ocungø ki ngyëny mø ngenyø ki mendwøng. Ngyëny nyi mëgg-ɑ jøg-ɑ thïg Kengø yi rɑ̈dh geki Yöyɑdɑ̀, kɑ ge okïrø ki jøg-ɑ nyi twïgø ki kïttì, kí bödhhi pɑ̈m, kí jøg-ɑ nyi thɑ̈dhø ki ngyëny, o ge thïg gen Kengø. Ge ɑ́göög bënn ki gwøg me teeg cɑrø, kɑ Kengø thïg gen, kɑ døøg-ɑ keje ni kɑ ɑ́bëëde e teg cøn. Keny-ɑ ɑ́rum jøg-ɑ thïg Kengø ki gwøg, ɑmëggi dhɑb kí ɑ́tegø men-ɑ ɑ́döng rɑ̈dh geki Yöyɑdɑ̀. Kɑ gï göög gen ki tɑ̈mmì kí jɑmmi Kengø møg-ɑ kyeelø. Kɑ̈ng-ɑ ɑ́bëëd Yöyɑdɑ̀ e onëënø, gëdhhì ɑ́bëëd ge nyii muujø kì yij Kengø kì bøli kej gen ceth, kì yethi cyɑ̈ng bënn. Yöyɑdɑ̀ ɑ́yöø ki mendwøng, kɑ runne ogöögø ki miyø kí pyɑ̈r ɑ́dɑ̈g, codhe ɑthøwe. Akoonyii kej rörri rorr kì kɑɑl Debïd, ɑ́ pwøj kipe gïgdøj møg-ɑ ɑ́gögge tyëng Isrɑil, kí Jwøk kí Kengø. De keny-ɑ ɑ́rum Yöyɑdɑ̀ ki thøø, ɑköbbi Rɑ̈dh Yöɑc yi pëjji Yeudiyɑ̀ ki gïg-ɑ dwɑddi gwøgø yi en, kɑ mø gen yïëy yi rɑ̈dh. Codhe, kɑ ji ówïyø ki mɑ̈ddø kì yij Kengi Jwøng-ɑ Ácwɑ̈ɑ̈j, Jwøøg kweyyi gen, kɑ ge døøg-ɑ be mɑlli ngïjji Aceerɑ̀ Jwøng-ɑ dhɑjø. Arënyi pyëw Jwøng-ɑ Ácwɑ̈ɑ̈j ki tyëng Yeudiyɑ̀ geki tyëng Yerusɑlem, kì bɑng kɑ ɑ́göög gen ki orøg. Aöd Jwøng-ɑ Ácwɑ̈ɑ̈j ki jøtöng møg köbbi gen kinni døøg gen kö Jwøng-ɑ Ácwɑ̈ɑ̈j. De ji ɑ́bɑ̈nyi lïngi møgɑni. Codhe, ɑbëën wëyi Jwøk kömi Dhekɑriyɑ̀ wɑ̈d ókwërø Yöyɑdɑ̀. Acunge kì keny me cugge nenni yi ji, kɑ okööbø kinni, “Jwøk, Jwøng-ɑ Ácwɑ̈ɑ̈j okööbø kinni gede kwøbbe ɑ pyeem gen yi wun, ɑ kɑ̈nu kömi wun ki ryɑ̈g! Mɑ́ e ɑ́wiy piny yi wun, wu lonye kɑ wiy piny!” Kɑ Dhekɑriyɑ̀ köme mënni ki kwøb. Amuuj rɑ̈dh ki cigg kɑ Dhekɑriyɑ̀ bɑ̈lli ki tuggi kïttì kì ódɑ̈ri Kengø, ɑthøwe. Wïj Rɑ̈dh Yöɑc ɑ́ceg-ɑ wïlø ki gïgdøj møg-ɑ ɑ́gwøg yi Yöyɑdɑ̀ wïyi Dhekɑriyɑ̀, ɑnɑ̈ge Dhekɑriyɑ̀. Keny-ɑ cyɑ̈ngi Dhekɑriyɑ̀ ki thøø, ɑkööbe kinni, “Jwøng-ɑ Ácwɑ̈ɑ̈j ólïdhi kɑ ócɑ̈yyø!” Kì ri thumi runɑni ceth, ɑpɑ̈ɑ̈r liny Arɑm kömi Yeudiyɑ̀ geki Yerusɑlem, kɑ pëjji liny bënn nɑ̈g, kɑ jɑmmì mø ngenyø kɑ̈l kɑ ge muuj rɑ̈ɑ̈dh Arɑm kì Dimɑceg. Liny Arɑm ɑ́bëëd e nøg cɑrø kibøli liny Yeudiyɑ̀, de liny Arɑm ɑ́wëggi tyɑmi liny Yeudiyɑ̀ yi Jwøng-ɑ Ácwɑ̈ɑ̈j, kì bɑng kɑ ɑ́wiy gen Jwøng-ɑ Ácwɑ̈ɑ̈j, Jwøøg kweyyi gen. Menɑni ɑ́bëëd ɑ́ cɑ́y kiper Rɑ̈dh Yöɑc. Keny-ɑ ɑ́døøg liny Arɑm, Yöɑc ɑ́döng e ree dɑ kedø me rɑɑj cɑrø, kɑ pëjji liny ɑ́ryew ri gen lugi ge gøn, kɑ gø nɑ̈g gen kì yij pyëne, ɑ́ kej cöngi wɑ̈d ókwërø Yöyɑdɑ̀. Akonyii kì kɑɑl Debïd, de nuti koony-ɑ kej rörri rorr. (Jøg-ɑ ɑ́nɑ̈g Yöɑc bɑ Dhɑbɑd wɑ̈d Cimeɑth jɑl Amön, kí Yödhɑbɑd wɑ̈d Cimrit ngeti Moɑb). Wɑ̈nyi Rɑ̈nhì yije dɑ wɑ́ji wɑ̈ddi Yöɑc, geki rɑjj-ɑ ɑ́töng kipere, kí møg-ɑ bɑ ɑgwed kì ri kër-ɑ ɑ́thïge Kengø. Arøøny Amɑdhiyɑ̀ wɑ̈de ɑ́ rɑ̈dh kì bɑnge. Amɑdhiyɑ̀ ɑ́røny ɑ́ rɑ̈dh e runne bɑ pyɑ̈r ɑ́ryew wïdɑ́bïj, kɑ ojyɑ̈gø kì Yerusɑlem ki runn pyɑ̈r ɑ́ryew wïdɑ́bïngwen. Meye bɑ Yöɑdïn kì Yerusɑlem. Ágöög ki gïgdøj kì bøli Jwøng-ɑ Ácwɑ̈ɑ̈j. De nuti göögø kɑ pyëwe bëne. Keny-ɑ ɑ́rume cïbi lɑwø piny ceth, ɑnɑ̈ge jøg-ɑ ɑ́nɑ̈g wïye. Nyigi jøgɑni nuti nɑ̈ɑ̈g en, de ɑ́göög ceth kì bɑng møg-ɑ ɑ́kwøb yi Jwøng-ɑ Ácwɑ̈ɑ̈j kì yethi Ciggi Mosɑ̀ kinni, “Wëëg geki mëëg ko nɑ̈g kiper orøng-ɑ gwøg yi nyigi gøn, o nywøl ko nɑ̈g kiper orøng-ɑ gwøg yi wëëg gen geki mëëg gen, de nyi nɑ̈ɑ̈g dhɑnhø kete kiper orøng-ɑ gwøg yi en.” Jøliny Yeudiyɑ̀ geki Ben Yɑmïn ɑ́cøng yi Rɑ̈dh Amɑdhiyɑ̀ kɑ gï cïmme gɑ køøm kì wɑ̈thi kɑ̈lli gen, kɑ kömi jøliny ɑ́lïp geki jøliny miyø cïbe ki pëjji gen. Jølinyɑni bënn kwɑnni gen bɑ ɑ́lïp miy ɑ́dɑ̈g, mø runni gen cɑ̈gi kì ri runn pyɑ̈r ɑ́ryew gïti mɑl. Ge bɑ jøliny møg-ɑ óyienyø kidøøj, ri gen tiim gen kiper liny, ge ngɑ̈ny këddø kí tøngg geki ködd. Kɑ kömi linyɑni kïrre ki ɑ́lïp miyø kì Isrɑil, ki ngyëny ɑ́tegg ɑ́lïp ɑ́dɑ̈g kí miy ɑ́ngwen. De jɑlkwøbbi Jwøk ɑ́kedhi yï rɑ̈dh kɑ gø köbbe kinni, “Jøliny Isrɑil ko kɑ̈ɑ̈l yi yïn. Jwøng-ɑ Ácwɑ̈ɑ̈j tøøk kì kelli liny-ɑ kɑ̈ɑ̈l Isrɑil. Yï orumø kinni, ce yï ógöögø yï teg yi gen kì yij liny, de bɑ Jwøk ɑ yïe di tegø me wëggi dhɑnhø tyɑ̈mø wɑlɑ̀ ɑ wëggi dhɑnhø tyɑmø yi tyëngmɑ̈ɑ̈nø.” Apyëëj jɑlkwøbbi Jwøk menɑni yi Amɑdhiyɑ̀ kinni, “De ngyëny ɑ́tegg møg-ɑ ɑ́mëggɑ gen gwøg-ɑ dï?” Alöggi jɑlkwøbbi Jwøk kinni, “Yï óthödhi yi Jwøng-ɑ Ácwɑ̈ɑ̈j ki mø ngenyø kibøli møgɑni!” Codhe, kɑ liny Isrɑil men-ɑ ɑ́kïr yi Rɑ̈dh Amɑdhiyɑ̀, gï köbbe kinni døøg gen myërri gen. Kɑ pëthi gen órënyø ki mendwøng ki tyëng Yeudiyɑ̀ keny-ɑ ɑ́köbbi gen kinni døøg wun yethi myërri wun. De Amɑdhiyɑ̀ pyëwe ɑ́cwede, kɑ linye peeje yij Töör Omelø. Anyïɑ̈ggi gen kì kunɑni, kɑ ge ónɑ̈ggø ki ɑ́lïp pyɑ̈rø kì kelli liny Edöm. Kɑ ɑ́lïp pyɑ̈rø møøgø mɑg yi gen. Akɑ̈ɑ̈l ɑmɑggɑni yi gen, kɑ gï kïdhi gen oledh Kïti Selɑ̀, kɑ gï dhur gen piny kì wïj kïnɑni. Kɑ ge othøø kì thɑ kït. Jøliny Isrɑil møg-ɑ ɑ́mɑ̈ɑ̈n kedhi be liny yi Amɑdhiyɑ̀, ge ɑ́pɑ̈ɑ̈r kömi kɑ̈ddi Yeudiyɑ̀ møg-ɑ kɑɑm Sɑmɑriyɑ̀ geki Bet Örøn, kɑ ji ɑ́lïp ɑ́dɑ̈g nɑ̈g yi gen, kɑ jɑmmì mø ngenyø ki mendwøng kɑ̈l yi gen. Keny-ɑ ɑ́dwöög Amɑdhiyɑ̀ kì be tyɑmi liny Edöm, kɑ ngïjji jwöggi Edöm kɑ̈ɑ̈le, kɑ gï gwøge gɑ jwögge, kɑ gï nyi rɑ̈bbe ki bɑkur kɑ gï mɑlle. Kɑ pyëw Jwøng-ɑ Ácwɑ̈ɑ̈j órënyø ki gïn-ɑ ɑ́gwøg yi en, ɑöde yï Amɑdhiyɑ̀ ki jɑltöng. Aköbbii yi jɑltöng kinni, “Á kipe ngø ɑ mɑllí jwögg-ɑ pɑth møg-ɑ ɑ́dhɑ̈li yieli jii gen kì cingí?” Kɑ kyëddi yi Amɑdhiyɑ̀ kinni, “Á ɑ́wën ɑ ɑ́gwøøg yïn, yïn ɑ́ jɑl tøg buri rɑ̈dh? Kud, ke pɑ kud yï ceg kɑ nɑ̈gø!” Akud jɑltöng, de ɑ́kööb kinni, “Ngɑ̈nyi yi yɑn kinni, Jwøk yï ɑ́rum ki nɑ̈gø yi en, kì bɑng kɑ ɑ́bɑɑny kwøbbɑ ki lïngø.” Amɑdhiyɑ̀ rɑ̈ɑ̈dh Yeudiyɑ̀ geki jøg-ɑ nyi kønyii ki kwøb, kwøb ɑ́nywɑg gen kinni ge kedh-ɑ be nyɑɑg ki Isrɑil. Codhe, ɑöde rɑ̈ɑ̈dh Isrɑil, Yeöɑc wɑ̈d Yöɑkɑdh, ki wöödø kinni bëe be nyɑɑg ki en. Aløøg kwøbbi Amɑdhiyɑ̀ yi Yeöɑc rɑ̈ɑ̈dh Isrɑil kinni, “Cyɑ̈ng ɑ́kyel, yɑdh sɑndɑl ɑ́ödi ki wöödø yi otwelø kì kïtti Lubnɑn kinni, muuj nyɑrí o nywøm yi wɑ̈dɑ. De dɑ lɑ̈ɑ̈y pɑ̈l me dwøng mɑ ɑ́kɑ̈ɑ̈l kenyɑni kɑ otwelø ywöönye piny. Anɑn, Amɑdhiyɑ̀ yï pwöd-ɑ köörí ce dɑ tyëng Edöm mø tyɑɑm yïn, de yɑ köbb-ɑ yïn kinni, bëëd kì kɑɑlí. Á kipe ngø ɑ yɑ̈ɑ̈b ki göj men-ɑ ókɑ̈ɑ̈l ryɑ̈g kömí wuki jií.” De Amɑdhiyɑ̀ ɑ́bɑ̈nyi lïngø. Ábëëd ɑ́ gïn-ɑ ɑ́dwɑddi yi Jwøk, eni tyɑmi Amɑdhiyɑ̀, mɑ́ e ɑ́døøg be mɑlli jwöggi Edöm. Codhe, ɑkedhi Yeöɑc rɑ̈ɑ̈dh Isrɑil be nyɑɑg ki Amɑdhiyɑ̀ rɑ̈ɑ̈dh Yeudiyɑ̀. Kɑ ge røøm-ɑ Bet Cemec kì Yeudiyɑ̀. Atyɑɑm liny Yeudiyɑ̀, kɑ jø Yeudiyɑ̀ reng-ɑ yethi myërri gen. Kɑ Rɑ̈dh Amɑdhiyɑ̀ mɑg yi Rɑ̈dh Yeöɑc kì Bet Cemec, kɑ gø kïdhe Yerusɑlem, kɑ budi döri Yerusɑlem cøøre piny, cɑg kì Dhøg Eprɑim gïti Dhøg Wïj Tung, kɑɑm-ɑ ɑ́dhure piny bɑ mïtïr miy ɑ́ryew. Akwɑnye dhɑb kí ɑ́tegø møg-ɑ ɑ́mïdhi yi Obed Edöm kì yij Kengø, kí jɑmmi Kengø bënn, kí jɑmmi gøldwøng møg-ɑ per gen teg, kɑ gï kïdhe Sɑmɑriyɑ̀. Ákɑ̈ɑ̈d thyew ki ɑmɑgg. Amɑdhiyɑ̀ rɑ̈ɑ̈dh Yeudiyɑ̀ ɑ́bëëd ki runn pyɑ̈rø wïdɑ́bïj kì bɑng thøwi Yeöɑc rɑ̈ɑ̈dh Isrɑil. Gïg-ɑ kyeelø bënn møg-ɑ ɑ́gwøg yi Rɑ̈dh Amɑdhiyɑ̀ cɑg kì ri jɑ̈gge gïti thume bɑ ɑgwed kì yij Wɑ̈nyi Rɑ̈nhi Isrɑil geki Yeudiyɑ̀. Cɑg kì bøli keny-ɑ ɑ́cɑ̈ge ki pyemi kwøbbi Jwøng-ɑ Ácwɑ̈ɑ̈j, Amɑdhiyɑ̀ ɑ́göggi ki ɑmolpiny kì Yerusɑlem kì cyɑ̈n, ɑpɑ̈ɑ̈re kɑɑl Lɑkic, de tyëngmɑ̈ɑ̈nø ɑ́løg bɑnge, kɑ gø nɑ̈g gen kì kunɑni. Akɑ̈ɑ̈lii Yerusɑlem kì kömi kyeny, kɑ kony kì kej rörri rorr, kì kɑɑl Debïd. Kɑ Udhiyɑ̀ wɑ̈d Amɑdhiyɑ̀ kwɑny yi tyëng Yeudiyɑ̀ bënn, e runne bɑ pyɑ̈rø wïdɑ́bïkyel, kɑ gø røøny gen kej wïye ɑ́ rɑ̈dh. Kì bɑng thøwi Amɑdhiyɑ̀ ɑ ɑ́mɑɑg Elɑth yi Udhiyɑ̀ kɑ gø døøge ki gerø. Udhiyɑ̀ ɑ́røny ɑ́ rɑ̈dh e runne bɑ pyɑ̈rø wïdɑ́bïkyel, kɑ ojyɑ̈gø kì Yerusɑlem ki runn pyɑ̈r ɑ́bïj wïdɑ́ryew. Meye bɑ Yekoliyɑ̀ kì Yerusɑlem. Udhiyɑ̀ ɑ́göög ki gïndøj kì bøli Jwøng-ɑ Ácwɑ̈ɑ̈j ni wïye. Ábëëd e nyi kedh-ɑ be lïngi kwøbbi Jwøk kì yï Dhekɑriyɑ̀. O keny-ɑ ɑ́tyer pyëwe Jwøng-ɑ Ácwɑ̈ɑ̈j, e yije bong ɑ́dud, ɑgyëdhii yi Jwøk. Udhiyɑ̀ ɑ́kedhi be nyɑɑg ki tyëng Pelistiyɑ̀. Kɑ dörri kɑ̈ddi Gɑth, kí Yɑmniyɑ̀, kí Acdöd cøøre piny, kɑ ogëdø ki kɑ̈ddi dör kì buti Acdöd, kí kɑ̈dd møøgø kì Pelistiyɑ̀. Ákøny yi Jwøk ki tyɑmi tyëng Pelistiyɑ̀, kí Árɑb møg-ɑ bëëdø kì Gurbɑɑl kí tyëng Meun. Udhiyɑ̀ ɑ́bëëd e nyii thödhø yi tyëng Amön ki gwɑ̈j, kɑ ceg-ɑ ti tëngø, kɑ pere wɑ̈dh-ɑ Rïp. Yerusɑlem ɑ́gwøg yi Udhiyɑ̀ e teg, kɑ gø gëdde ki dör mø bɑ̈rrø kì Dhøg Wïj Tung, kí Dhøg Tör, kí ɑ́duud dörø. Ágëëd thyew ki kɑ̈ddi dör mø bɑ̈rrø kì yij ryɑng, kɑ okunyø ki yïïth mø gïïr, mɑ́ yïe ɑ́dɑ dhög mø ngenyø ki mendwøng kì thɑ́ kïttì kì wɑɑng cyɑ̈ɑ̈ng böörø, kí piny-ɑ wïje pɑ̈r. Kì bɑng kɑ ɑ́bëëde e mɑɑr-ɑ pur, ji ɑ́cïje ki pïdhø ki bɑ̈ggi oløg kì myërri kelli kïttì, kɑ gï cïje kí puri piny-ɑ lɑ̈be med. Yïe ɑ́dɑ liny me dwøng me ree tiim en kipe nyɑɑg. Yeiel geki Mɑɑseiyɑ̀ ɑ bɑ pëjji linyɑni, ge jɑɑg-ɑ yi Anɑniyɑ̀, jɑl tøg buri rɑ̈dh. Linyɑni pyejj-ɑ yi pëjjì ɑ́lïp ɑ́ryew kí miy ɑ́bïkyel, kwɑnni jøliny-ɑ pyejji yi gen bɑ ɑ́lïp miy ɑ́dɑ̈g kí ɑ́bïryew, kí miy ɑ́bïj ge ócuggø nyɑɑg ki tyëng-ɑ mɑɑn rɑ̈dh. Jøliny ɑ́nëngi yi Rɑ̈dh Udhiyɑ̀ kí ködd, kí tøngg, kí ɑcudh, kí ɑ́dhedheg, kí wethh, kí nywøli wethh, kí lel mø bɑ̈ddì. Bödhhi thɑ̈dh ɑ́göög ki jɑmmì møg-ɑ nyi pööd ki wethh, kí møg-ɑ nyi bɑ̈ɑ̈d ki tuggi kïttì mø døngø kì wïj dörø, kì wɑ̈thi tùngi döri kɑɑl. Kɑ pere tɑɑy-ɑ kömi piny bëne, kɑ ótëngø ki mendwøng, kì bɑng kɑ ɑ́kønyii yi Jwøk. De keny-ɑ ɑ́tëngi Rɑ̈dh Udhiyɑ̀, ɑmɑgii yi ɑthwøg, bene ɑthwøngɑni ɑ ɑ́kɑ̈ɑ̈l pɑ̈ɑ̈nhe. Dhø Jwøk ɑ́pyem yi Udhiyɑ̀ kɑ kedh-ɑ yij Kengø be rɑ̈b ki bɑkur kì wïj këli bɑkur. Kɑ ókwërø Adhɑriyɑ̀ geki ókwër pyɑ̈r ɑ́bïdɑ̈g mø teg, løg-ɑ bɑng rɑ̈dh, be kyëddii, kɑ ge okööbø kinni, “Udhiyɑ̀! Jwøng-ɑ Ácwɑ̈ɑ̈j, pɑ rɑ̈bbi yi yïn ki bɑkur, den-ɑ́ ókwër keti gen. Ókwërr-ɑ bɑ kwɑrri Aɑron bɑ gen ɑ ɑ́kwër kipe gwøngɑni. Dhwöödh kì kej kwër keny. Pyëw Jwøk, Jwøng-ɑ Ácwɑ̈ɑ̈j ɑ́rënyi yi yïn, bong gyëdhe me yod yi yïn kinni tek.” Udhiyɑ̀ ɑ́bëëd e ócungø kì yij Kengø kì buti këli bɑkur, o ópɑni bɑkur omïdhø yi en kì cinge. Kɑ mɑg yi liny ki ókwër, kɑ bøle mɑg yi wɑɑny kì bøli kenyɑni ceth. Abwøg Adhɑriyɑ̀ geki ókwër keny-ɑ ɑ́lidh gen bøli rɑ̈dh, codhe ɑjwɑn ge gøn ki kïdhi wɑ̈g kì yij Kengø, mɑ́ e ɑ́rum ki cɑyø yi Jwøng-ɑ Ácwɑ̈ɑ̈j. Kwï runni Rɑ̈dh Udhiyɑ̀ ɑ́tyëg yi en e ywëdhø, kì bɑng kɑ ɑ́mɑgii yi wɑɑny, pɑ cuggi kedhi yij Kengø këti. Ábëëd ɑ gøle, e bong gwøg me gwøg yi en. Codhe, ɑkwɑɑny lɑwø yi wɑ̈de. Kwï jɑmm-ɑ ɑ́gwøg yi Rɑ̈dh Udhiyɑ̀ keny-ɑ ɑ́bëëde e ojyɑ̈gø, bɑ ɑgwed yi jɑltöng, Icɑyɑ̀ wɑ̈d Amodh. Akedhi Udhiyɑ̀ kun-ɑ di kweyye, de nuti koony rörri gøl rɑ̈ɑ̈dhø, kì bɑng wɑɑny men-ɑ ɑ́mɑgii. Yöthɑm wɑ̈de ɑ ɑ́røny ɑ́ rɑ̈dh kì bɑnge. Yöthɑm ɑ́göög ɑ́ rɑ̈dh e runne bɑ pyɑ̈r ɑ́ryew wïdɑ́bïj, kɑ ojyɑ̈gø kì Yerusɑlem ki runn pyɑ̈rø wïdɑ́bïkyel. Meye bɑ Yerucɑ̀, nyɑɑr Dhɑdök. Kɑ ogöögø ki gïgdøj kì bøli Jwøng-ɑ Ácwɑ̈ɑ̈j, ni gïg-ɑ ɑ́gwøg yi wïye, de nuti røngø ni wïye ɑ ɑ́rɑ̈ɑ̈b ki bɑkur kì yij Kengø. De ji ɑ́cög ge ogöögø ki orøg. Yöthɑm ɑ ɑ́ger Dhøg Wɑɑng Wuudø, dhøng-ɑ yïëbbi Kengø. Kɑ döri Yerusɑlem thïge kì keny-ɑ nyi cwøl ɑ́ Opel. Ágëëd ki kɑ̈dd kì wɑ̈thi kïtti Yeudiyɑ̀, kɑ ogëdø ki dör mø bɑ̈rrø møg-ɑ nyi kur. Ányïɑ̈ggi ki rɑ̈ɑ̈dh Amön, kɑ gø tyɑme geki linye. Codhe, kɑ tyëng Amön cir yi en o ge thödhi ge gøn ki gwɑ̈j kì yij run, ki runn ɑ́dɑ̈g. Gwɑ̈nyɑni kì run ɑ́kyel bɑ kïllì ɑ́lïp ɑ́dɑ̈g kí miy ɑ́ngwen møgi ɑ́tegø, kí tøn ɑ́lïp ɑ́kyel mø gemè, kí tøn ɑ́lïp ɑ́kyel mø ceir. Yöthɑm ɑ́göög e teg, mɑ́ e ɑ́mïdh-ɑ kwøbbi Jwøge, Jwøng-ɑ Ácwɑ̈ɑ̈j. Gïg-ɑ kyeelø møg-ɑ ɑ́cwöb kì ri jyɑ̈gi Yöthɑm, kí lìny-ɑ nyɑge, kí yëthi jyɑ̈ge bënn, bɑ ɑgwed kì yij Wɑ̈nyi Rɑ̈nhi Isrɑil geki Yeudiyɑ̀. Runni Yöthɑm ɑ́bëëd gɑ pyɑ̈r ɑ́ryew wïdɑ́bïj, keny-ɑ ɑ́gööge ɑ́ rɑ̈dh, kɑ ojyɑ̈gø kì Yerusɑlem ki runn pyɑ̈rø wïdɑ́bïkyel. Akedhi Yöthɑm kun-ɑ di kweyye, kɑ koony kɑɑl Debïd, kɑ Akɑɑdh wɑ̈de røny ɑ́ rɑ̈dh. Akɑɑdh ɑ́göög ɑ́ rɑ̈dh e runne bɑ pyɑ̈r ɑ́ryew, kɑ ojyɑ̈gø kì Yerusɑlem ki runn pyɑ̈rø wïdɑ́bïkyel. Nuti göögø ki gïgdøj kì bøli Jwøng-ɑ Ácwɑ̈ɑ̈j ni kweye Debïd. De ɑ́ngøy-ɑ bëëdi rɑ̈nhi Isrɑil. Yïe ɑ́dɑ ngïjji Bɑɑl møg-ɑ ógwøgø ki ngyënyø dødø, kɑ orɑ̈bø ki bɑkur kì Töör Kinöm, kɑ wɑ̈dde mëgge Bɑɑl gɑ gënh-ɑ nyi rɑ̈b bëne, e ngøy-ɑ gïgrijjø møg-ɑ ɑ́gwøg yi tyëng-ɑ cyeed wɑ̈g yi Jwøng-ɑ Ácwɑ̈ɑ̈j kì piny, keny-ɑ ɑ́wɑ̈nhi tyëng Isrɑil. Akɑɑdh ɑ́muuj ki gëdhhì, kɑ orɑ̈bø ki bɑkur kì kɑ̈jj-ɑ yethi gen nyi mɑlli jwögg-ɑ pɑth ki dyër, kí wɑ̈thi kïttì, kí thɑ́ yenh-ɑ di tïb. Kì bɑng kɑ ɑ́røngi Rɑ̈dh Akɑɑdh, ɑgöjjii tyɑmø yi Jwøng-ɑ Ácwɑ̈ɑ̈j. Átyɑm yi rɑ̈ɑ̈dh Arɑm, kɑ tyëng Yeudiyɑ̀ mø gïïr kïdhe Dimɑceg gɑ ɑmɑgg. Kɑ tyɑm thyew yi Pekɑ̀ wɑ̈d Remɑliyɑ̀, rɑ̈ɑ̈dh Isrɑil. Kɑ jöddi Yeudiyɑ̀ ɑ́lïp miyø kí pyɑ̈r ɑ́ryew nɑ̈g cyɑ̈ng ɑ́kyel yi Pekɑ̀ rɑ̈ɑ̈dh Isrɑil. Gïn ni menɑni, ɑ́wëggi cwöbø yi Jwøng-ɑ Ácwɑ̈ɑ̈j, Jwøøg kweyyi gen, mɑ́ e ɑ́wiy piny yi tyëng Yeudiyɑ̀. Kɑ Mɑɑseiyɑ̀ wɑ̈d Rɑ̈dh Akɑɑdh, kí Adhrikɑm jɑngi gøldwøng kí Elkɑnɑ̀ ókwøøm rɑ̈dh, ge nɑ̈g yi Dhikrì ge bënn. Ngö tyëng Yeudiyɑ̀ bɑ wɑdd ki tyëng Isrɑil, tyëng-ɑ mɑ̈nn kí othønhø mø bɑ cwøw kí mɑ̈nn, gɑ ɑ́lïp miy ɑ́ryew ɑ́mɑg yi tyëng Isrɑil, kɑ gï kïdhi gen Sɑmɑriyɑ̀, kyeel kí jɑmmì mø ngenyø. Ádɑ jɑltööng Jwøng-ɑ Ácwɑ̈ɑ̈j me cwøl ɑ́ Oded, kì Sɑmɑriyɑ̀. Árøøm dhø döri kɑɑl ki liny Isrɑil ge kwøll-ɑ tyëng Yeudiyɑ̀ møg-ɑ ɑ́mɑg yi gen. Akööbe kinni, “Jwøng-ɑ Ácwɑ̈ɑ̈j, Jwøøg kweyyi wun ɑ́bëëd pyëwe rɑɑj ki Yeudiyɑ̀, bene ɑ cïbe gïn cinggi wun, de ɑnɑn Jwøng-ɑ Ácwɑ̈ɑ̈j ɑ́lïng ki rɑ̈ji nɑ̈ng-ɑ ɑ́nɑ̈gu gen. O ɑnɑn wu dwɑdd-ɑ gwøgi cwøw kí mɑ̈nni Yerusɑlem geki Yeudiyɑ̀ gɑ bɑ̈nggi wun. Wu kwïj wøw thyew kinni wu ɑ́røngi ni gen kì bøli Jwøng-ɑ Ácwɑ̈ɑ̈j? Anɑn lïngu kwøbbɑ, kɑ wɑddi wun møg-ɑ ɑ́kɑ̈ɑ̈l yi wun gɑ ɑmɑgg, wiy ge døøg gen myërri gen. Ke pɑ wiyu gen, Jwøng-ɑ Ácwɑ̈ɑ̈j pyëwe órënyi, kɑ wu cɑy yi en.” Kɑ pëjji gøl Eprɑim ɑ́ngwen: Adhɑriyɑ̀ wɑ̈d Yöɑnɑn, kí Berekiyɑ̀ wɑ̈d Mecilemöth, kí Kedhekiyɑ̀ wɑ̈d Cɑlum, kí Amɑsɑ̀ wɑ̈d Adlɑy, óbɑ̈nyø thyew ki gïg-ɑ ɑ́gwøg yi liny Isrɑil. Akööb gen kinni, “Amɑggɑni ko kɑ̈ɑ̈l wun Sɑmɑriyɑ̀! Wɑ ɑ́rum ki orøg kì bøli Jwøng-ɑ Ácwɑ̈ɑ̈j, kɑ pyëwe órënyø ki men cugge cɑyi wɑ.” Codhe, kɑ ɑmɑgg geki jɑmm-ɑ ɑ́kɑ̈ɑ̈l kì Yeudiyɑ̀, mëggi teedø geki jɑggi gen yi liny Isrɑil. Kɑ jøgɑni gɑ ɑ́ngwen kwɑny o ge thödhi gen ɑmɑgg ki ógudh kì ri ógudh-ɑ ɑ́mɑ̈ɑ̈g. Kɑ ɑmɑgg thödhi gen ki ógudh, kí wɑr, kí gïgcɑmm, kí pï. Kɑ keddi gen gïny ki møøw dhetun. Ji-ɑ dhɑl yi cyɑ̈dhø ki tyelli gen, ɑ́cïb kömi ɑderr, kɑ ɑmɑgg bënn dwøøg Yerikö, kɑɑl benø kì piny Yeudiyɑ̀. Codhe, kɑ tyëng Isrɑil dwöög-ɑ Sɑmɑriyɑ̀. Kɑ tyëng Edöm pɑ̈ɑ̈r-ɑ kömi Yeudiyɑ̀, kɑ ji mø gïïr kɑ̈l yi gen gɑ ɑmɑgg. Kɑ Akɑɑdh öd-ɑ yï Tiglɑth Pileser, rɑ̈nhdwøøng Acuur, kinni o køny yi en. Kì bøli kenyɑni, tyëng Pelistiyɑ̀ ɑ́bëëd ge nyi mɑ̈ny-ɑ myërri thɑ́ kïttì kì wɑɑng cyɑ̈ɑ̈ng mwøl geki myërri Yeudiyɑ̀ kì wɑɑng wurlwɑl. Kɑ kɑ̈ddi Bet Cemec kí Ayɑlön, kí Gederöth geki kɑ̈ddi Sökö, kí Timnɑ̀, kí Gimdhö geki myërri gen mɑg yi gen, kɑ ge pëgg-ɑ be bëëdø kì kɑ̈ddɑni. Kömi Yeudiyɑ̀ ɑ́kïdhi yi Jwøng-ɑ Ácwɑ̈ɑ̈j ki ryɑ̈g, mɑ́ Rɑ̈dh Akɑɑdh jie nuti göggø yi en ki gïndøj, kɑ dhø Jwøng-ɑ Ácwɑ̈ɑ̈j pyeme. Rɑ̈nhdwøøng Acuur ɑ́bɑ̈nyi kønyi Rɑ̈dh Akɑɑdh, kɑ yöd gø gögge’ ryɑ̈g. Codhe, kɑ dhɑb kwɑny yi Rɑ̈dh Akɑɑdh kì yij Kengø, kí gøldwøng, kí kɑ̈lli jɑgg, kɑ gï mëgge rɑ̈nhdwøøng Acuur, de nuti kønyø yi rɑ̈nhdwøngɑni. Keny-ɑ ɑ́ti ɑkørr ngënyø kì kömi Akɑɑdh, kɑ ceg-ɑ pëddø ki orøg kì bøli Jwøng-ɑ Ácwɑ̈ɑ̈j. Jwöggi Arɑm møg-ɑ ɑ́tyɑmii, ɑ́nënge ki gëdhhì. Mɑ́ e ɑ́kööb kinni, “Rɑ̈nhi Arɑm ɑ́køny yi jwöggi Arɑm, o ke thödhɑ gen ki gëdhhì, yɑ ócuggø kønyø yi gen thyew.” Menɑni ɑ́kɑ̈ni köme ki rɑj geki pödhe. Jɑmmi Kengø ɑ́kwɑny yi Akɑɑdh kɑ gï tørre kinni tweet, kɑ dhø Kengø cyëëg yi en, kɑ ree gëdde ki këlli lɑm kì Yerusɑlem bëne. Akɑɑdh ɑ́gëëd ki keny nyi mɑlli jwögg-ɑ pɑth kì yethi kɑ̈ddi Yeudiyɑ̀ geki myërre bënn, kɑ̈jjɑni ɑ yethi gen nyi rɑ̈bbe gïn ki bɑkur, e rëny-ɑ pyëw Jwøng-ɑ Ácwɑ̈ɑ̈j, Jwøøg kweyyi gen. Jɑmm-ɑ kyeelø bënn cɑg kì ri cɑ̈gi jyɑ̈ge gïti thume, bɑ ɑgwed kì yij Wɑ̈jji Rɑ̈nhi Yeudiyɑ̀ geki Isrɑil. Akedhi Akɑɑdh kun-ɑ di kweyye, kɑ koony rörri gøl rɑ̈ɑ̈dhø. Arøøny Kedhekiyɑ̀ wɑ̈de ɑ́ rɑ̈dh. Kedhekiyɑ̀ ɑ́göög ɑ́ rɑ̈dh e runne bɑ pyɑ̈r ɑ́ryew wïdɑ́bïngwen. Meye bɑ Abiyɑ̀ nyɑɑr Dhekɑriyɑ̀. Ágöög ki gïgdøj kì bøli Jwøng-ɑ Ácwɑ̈ɑ̈j ni kweye Rɑ̈dh Debïd. Kì kyeel dwɑ̈tt kì yij run-ɑ ɑ́jɑ̈ggi Kedhekiyɑ̀, dhøggi Kengø ɑ́døøge ki yiebø, kɑ gï thïge. Ókwër geki Kwɑrri Leebì ɑ́cønge kej ɑ́kyel kì ódɑ̈ri Kengø kì wɑɑng cyɑ̈ɑ̈ng mwøl. Aköbbe gïn kinni, “Wun ɑ Kwɑrri Leebì, kwëru ri wun kɑ Kengi Jwøng-ɑ Ácwɑ̈ɑ̈j, Jwøøg kweyyi wun kwër wun thyew. Kɑ̈ɑ̈lu gïg-ɑ óywëëdh Kengø wɑ̈g. Jwøgee, Jwøng-ɑ Ácwɑ̈ɑ̈j dhøge ɑ́pyem yi kweyyee, kɑ ge ogöögø ki gïnrɑj kì bøle. Áwiy piny yi gen, kɑ ngɑ̈thi gen lugi gen keny-ɑ bëëde. Dhøggi Kengø ɑ́cyëëg gen, kɑ lɑ̈mbɑ̈ɑ̈ wëggi gen thøø, kɑ ge ówïyø rɑ̈b ki bɑkur geki gënh-ɑ nyi rɑ̈b bëne kì yij Kengi Jwøøg Isrɑil. Arënyi pyëw Jwøng-ɑ Ácwɑ̈ɑ̈j ki Yeudiyɑ̀ geki Yerusɑlem, ɑgöggi gen ki gïnrɑj yi Jwøng-ɑ Ácwɑ̈ɑ̈j, kɑ dhɑnhø bëne obwøgø, kì bɑng gïn-ɑ ɑ́göggi gen yi Jwøng-ɑ Ácwɑ̈ɑ̈j. Møgɑni ngɑ̈nyi yi wun kidøøj. Wëëgee ɑ́nɑ̈g kì yij liny, kɑ mɑ̈nnee kí nyigee kɑ̈l gɑ ɑmɑgg. “Anɑn, pyëwɑ dwɑdd-ɑ nywɑ̈g ki kwøb ki Jwøng-ɑ Ácwɑ̈ɑ̈j, Jwøøg Isrɑil, o gööge pyëwe pɑ rɑɑj ki wɑ. Wɑ̈ddɑ, piny ko wëggu pöödhø. Bɑ wun ɑ ɑ́yieny yi Jwøng-ɑ Ácwɑ̈ɑ̈j, o wu nyi rɑ̈bbu en ki bɑkur, o wu nyi peeju ji be mɑllii.” Kwɑrri Leebì møgɑni, wɑddi gen ɑ́cøng gen, kɑ ri gen kwër gen. Codhe, kɑ Kengø kwër yi gen ni kɑ ɑ́köbbi gen yi rɑ̈dh, ni kɑ ókwøbii kì yethi Ciggi Jwøng-ɑ Ácwɑ̈ɑ̈j. Akedhi ókwër yij Kengø be kwërii, kɑ gïg-ɑ ywëdhø bënn kɑ̈ɑ̈l gen wɑ̈g kì yij Kengø, kɑ gï cïb gen yij ódɑ̈ri gøl Kengø. Akwɑɑny gen yi Kwɑrri Leebì kì kenyɑni kɑ gï kïdhi gen yij töör Kidrön. Kwëri Kengø ɑ́cɑ̈g ɑ kyeel cyɑ̈nggi dwɑ̈n-ɑ mɑl, kɑ óthumø bëne kì bïdɑ̈ɑ̈g cyɑ̈ng. Kengi Jwøng-ɑ Ácwɑ̈ɑ̈j ɑ́kwër bëne kí øn-ɑ kedhi yij Kengø. Codhe, ɑdøøg gen ki gwøg ki cyɑ̈ng ɑ́bïdɑ̈g møøgø, kɑ ge gït-ɑ cyɑ̈nggi dwɑ̈y pyɑ̈rø wïdɑ́bïkyel, ge gwir-ɑ Kengø kipe mɑ̈ddø Akedhi Kwɑrri Leebì yï Rɑ̈dh Kedhekiyɑ̀ kɑ gø köbbi gen kinni, “Kengø bëne ɑ́rum ki kwërø yi wøn, geki kël-ɑ wïje nyi rɑ̈ɑ̈b gëdhhì, kí tɑrɑbeedh ópuun kwër, kí jɑmmi gen bënn. Kɑ jɑmm-ɑ ɑ́kɑ̈ɑ̈l wɑ̈g bënn yi Rɑ̈dh Akɑɑdh kì yethi runn-ɑ ɑ́pyeme dhø Jwøk dwöög yi wøn, kɑ ge døøg wøn ki kwërø. Jɑmmɑni bënn nud kì bøli këli lɑm mi Jwøng-ɑ Ácwɑ̈ɑ̈j.” Codhe ɑjwɑɑn pëjji kɑɑl ki cøngø yi Rɑ̈dh Kedhekiyɑ̀, kɑ ge kedh-ɑ yij Kengø bënn. Ge ɑ́kɑ̈ɑ̈d ki wɑ̈dhh ɑ́bïryew, kí órömm-ɑ døngø ɑ́bïryew, kí órömm-ɑ thønhø ɑ́bïryew, gɑ gëdhhi orøg, mø gøøm bøli rɑ̈dh kí tyëng Yeudiyɑ̀ geki kwëri Kengø. Aköbbi ókwër kwɑrri Aɑron yi rɑ̈dh kinni, ngɑl gen jɑmmɑni gɑ gëdhhì kì wïj këli lɑm. Wɑ̈dhh ɑ ɑ́kwøng ki ngɑlø yi ókwër, codhe ɑngɑl gen órömm-ɑ døngø, keny-ɑ ɑ́rume ɑngɑl gen órömm-ɑ thønhø. Kɑ remmi gëdhhɑni kiny gen ri këli lɑm. Kì cyɑ̈n, ɑmuuj gen ónyögg rɑ̈dh geki ji-ɑ mɑ̈ddi, kɑ cinggi gen thɑɑny gen kömi ónyöggɑni. Codhe, ɑngɑɑl ónyöggɑni yi ókwër kɑ remmi gen køny gen kömi këli lɑm, ɑ́ gëëdhi men gøøm orøøg ji bënn, mɑ́ rɑ̈dh ɑ́kööb kinni, i muuj gënh-ɑ nyi rɑ̈b bëne kí gënhi orøg kipe tyëng Isrɑil bënn. Kwøbb-ɑ ɑ́mëggi Rɑ̈dh Debïd yi Jwøng-ɑ Ácwɑ̈ɑ̈j ki dhøg jɑltöng Gɑd, kí jɑltöng Nɑthɑn, ge ɑ́mïdhi yi rɑ̈dh ceth. Kɑ Kwɑrri Leebì cïbe yij Kengø ki thøm. Thøm mø ni møgɑni ɑ ɑ́ying yï Rɑ̈dh Debïd, kɑ ókwër ócungø thyew ki kɑ̈ngì kì cinggi gen. Akööb Kedhekiyɑ̀ kinni, i muuj gënh-ɑ nyi rɑ̈b bëne. Kɑ̈ng-ɑ ɑ́muuj gëëdhi, ɑmɑlli Jwøng-ɑ Ácwɑ̈ɑ̈j ki wör yi ji, ki thøm kɑ kɑ̈ngì kodh. Ji ɑ́kedhi be mɑ̈ddø bënn, ge nuti wïyø wör, o thøm nuti ywömø gïti kɑ ɑ́rɑ̈bi gëdhhì bënn. Codhe, kɑ Rɑ̈dh Kedhekiyɑ̀ kí ji bënn ri gen bøødh gen piny kɑ Jwøk mɑl yi gen. Aköbbi Kwɑrri Leebì yi rɑ̈dh geki jɑggi pödhø kinni, i mɑlli gen Jwøng-ɑ Ácwɑ̈ɑ̈j ki wör møg-ɑ ɑ́gwed yi Rɑ̈dh Debïd geki Asɑp jɑltöng. Kɑ ji owörø bënn ki wör pëthi gen omedø, ri gen bøødh gen, ge mɑll-ɑ Jwøk. Aköbbi ji yi Kedhekiyɑ̀ kinni, “Anɑn wu ɑ́rum ki kwërø, o wu dhïw, kɑ̈ɑ̈lu gëdhhi pwøj mø Jwøng-ɑ Ácwɑ̈ɑ̈j.” Agwøg gen møgɑni, kɑ kwï gen ókɑ̈nø thyew ki jɑmmì møg ngɑl gɑ gënh-ɑ nyi rɑ̈b bëne, ngö ge nuti köbbø kinni kɑ̈ni gen. Ge ɑ́kɑ̈ni ki wɑ̈dhh pyɑ̈r ɑ́bïryew, kí ɑ́tegg miyø kí römm miy ɑ́ryew, gɑ gënh-ɑ nyi rɑ̈b bëne, men rɑ̈bbi Jwøng-ɑ Ácwɑ̈ɑ̈j, ge ɑ́kɑ̈ni thyew ki wɑ̈dhh miy ɑ́bïkyel, kí dyëg ɑ́lïp ɑ́dɑ̈g, gɑ gëdhhì mër. De kɑ ɑ́bëëde e bong ókwër mø ngenyø møg ngɑl jɑmmɑni, ɑkøny gen yi Kwɑrri Leebì gïti kɑ ɑ́rum gwøg. Kì bøli kenyɑni ókwër ɑ́bëëd ri gen kwëër gen, (Kwɑrri Leebì ókwër ɑ́lod gen ki gwøgi kwër). Ábëëd ɑ́ ókwër ɑ nyi rɑ̈b dwɑ̈li gëdhhi mër, kí gënh-ɑ nyi rɑ̈b bëne, o gen ɑ nyi køny møgi oløg men-ɑ nyi muuj kyeel ki gënh-ɑ nyi rɑ̈b bëne. Codhe, ɑcigi mɑ̈ddø cɑ̈gø kì Kengø. Rɑ̈dh Kedhekiyɑ̀ geki ji ɑ́bëëd pëthi gen med, mɑ́ ge ɑ́køny yi Jwøk, kɑ jɑmmɑni jwɑn ki gwøgø. Aödi tyëng Isrɑil geki tyëng Yeudiyɑ̀ ki wɑ̈nyø yi Rɑ̈dh Kedhekiyɑ̀, geki tyëng Eprɑim, kí tyëng Mɑnɑsè thyew, i bï gen Kengi Jwøng-ɑ Ácwɑ̈ɑ̈j, Jwøøg Isrɑil kì Yerusɑlem be gwøgi Kwëër Ákɑɑdh. Ayïëy rɑ̈dh geki pëjji tyëng Isrɑil kí Yerusɑlem kinni, Kwëër Ákɑɑdh ógwøg yi gen kì ryeew dwɑ̈tt. Kwëër Ákɑɑdh nuti gwøgø yi gen kì bøli keje, mɑ́ ókwër ɑ́bëëd ri gen nuti kwëër gen bënn, o ji ɑ́bëëd ri gen nuti cøng gen kì Yerusɑlem bënn. Rɑ̈dh geki ji ɑ́bëëd pëthi gen med ki møgɑni, codhe, ɑcwøøl tyëng Isrɑil bënn, cɑg kì Dɑn kì wɑɑng wuudø gïti Bircebɑ̀ kì wɑɑng wurlwɑl, i bï gen Yerusɑlem be gwøgi Kwëër Ákɑɑdh mi Jwøng-ɑ Ácwɑ̈ɑ̈j, Jwøøg Isrɑil, i bï gen kwɑnni gen gïïr kibøli møg-ɑ ɑ́bëëd ge nyii bëënø cøn. Akedhi jøwöödø be ngɑ̈ji ji ni kɑ ɑ́köbbi gen yi rɑ̈dh geki jɑgg, kinni kedhi gen be köbbi tyëng Yeudiyɑ̀ bënn geki Isrɑil kinni: “Wu tyëng Isrɑil, dwöög wun kö Jwøng-ɑ Ácwɑ̈ɑ̈j, Jwøøg Abrɑhɑm, kí Isɑɑk, kí Yɑgob, o ódwööge yï wun, wun ɑ tyëng-ɑ ɑ́bodh kì cinggi rɑ̈nhi Acuur. Wu ko bëëd ni kweyyi wun geki wɑddi wun tyëng Isrɑil, møg-ɑ ɑ́pyem dhø Jwøng-ɑ Ácwɑ̈ɑ̈j, Jwøøg wun. Ni kɑ̀ nennu en, gï ɑ́cɑye ki cɑ́y mø teeg cɑrø. Wu ko bëëd muddi wun teeg ni kɑ ɑ́bëëd gen, de lïngu kwøbbi Jwøng-ɑ Ácwɑ̈ɑ̈j. Bïu Kengø kì Yerusɑlem, eni keny-ɑ ɑ́gwøg yi Jwøøg wun, Jwøng-ɑ Ácwɑ̈ɑ̈j ɑ́ kej kwër gïti ɑtheer, kɑ mɑlli wun, o pyëwe lɑ̈ɑ̈me ki wun. Keløg wu dwöög-ɑ kö Jwøng-ɑ Ácwɑ̈ɑ̈j, tyëng-ɑ ɑ́kɑ̈l wɑddi wun gɑ ɑmɑgg yethi gen óywöngi ki gïn, ko gï wiy gen, o ge dwöög gen pönhï. Jwøng-ɑ Ácwɑ̈ɑ̈j, Jwøøg wun døj, o yije nyii ywöngø, keløg wu døøg-ɑ kööre, wu óyïëy yi en.” Akedhi jøwöödø yethi kɑ̈ddi Eprɑim geki Mɑnɑsè, gïti gøl Dhebulun kì wɑɑng wuudø, de ge ɑ́gɑggi kɑ ge gwɑddi yi ji. De ɑ́dɑ ɑ́kyëlli ji kì gøl Aceer, kí gøl Mɑnɑsè, kí gøl Dhebulun mɑ ɑ́dwøøg pëthi gen piny, kɑ ge bï-ɑ Yerusɑlem. Jwøk ɑ́bëëd e ogöögø thyew kì Yeudiyɑ̀, kɑ ji wëgge rebi dhøggi gen kipe møg-ɑ ɑ́yïëy yi gen kinni, kwøbbi Jwøng-ɑ Ácwɑ̈ɑ̈j ómïdhi yi gen kì bɑng møg-ɑ ɑ́köbbi gen yi rɑ̈dh geki jyɑ̈gge. Ji mø gïïr ri gen ɑ́cøng gen Yerusɑlem kì ryeew dwɑ̈tt, be gwøgi Kwëër Olwëny. Akwɑny gen këlli lɑm møg-ɑ ɑ́ying Yerusɑlem bënn, ɑ ɑ́bëëd wɑ̈thi gen nyii rɑ̈bø ki gëdhhì geki bɑkur, kɑ gï leeng gen yij töör Kidrön. Kɑ órömi Kwëër Ákɑɑdh ngɑl kì pyɑ̈rø wïdɑ́ngween cyɑ̈nggi ryeew dwɑ̈tt. Kɑ ókwër geki Kwɑrri Leebì møg-ɑ ɑ́bëëd ri gen nuti kwëër gen wɑ̈thi gen ólɑ̈ɑ̈yø. Codhe, ɑkwër gen ri gen kɑ ge kïdh-ɑ yij Kengø, bøli Jwøng-ɑ Ácwɑ̈ɑ̈j ki gënh-ɑ nyi rɑ̈b bëne. Kɑ ge kedh-ɑ kɑ̈jji gen kì yij Kengø ni kɑ ókwøbii kì yethi Ciggi Mosɑ̀, jɑlkwøbbi Jwøk. Kɑ ókwër gɑ̈mmi remmi gëdhhì yi Kwɑrri Leebì, kɑ gø kiny gen ri këli lɑm. Ji mø gïïr ɑ́bëëd ri gen nuti kwëër gen, o órömmi Kwëër Ákɑɑdh møg-ɑ ɑ́kɑ̈ɑ̈l yi gen, pɑ cuggi ngɑlø yi gen, codhe, ɑngɑ̈lli órömmɑni gen yi Kwɑrri Leebì, kɑ gï thyëyi gen Jwøng-ɑ Ácwɑ̈ɑ̈j. Ji mø gïïr kì myërri Eprɑim, kí Mɑnɑsè, kí Isɑkɑr, kí Dhebulun ɑ́bëëd ri gen nuti kwëër gen kɑ gwøgi Kwëër Ákɑɑdh yi gen ódhɑ̈lø pɑ̈dhi keje. Akwɑ̈jji Rɑ̈dh Kedhekiyɑ̀ kiper gen kinni, “Yïn ɑ Jwøng-ɑ Ácwɑ̈ɑ̈j, Jwøøg kweyyi wøn, yï døj, dwöög lɑɑwí piny kipe ji møg-ɑ mɑlli yïn ki pëthi gen bënn, cɑgg ge ywëdhø.” Aløøg kwɑ̈jji Rɑ̈dh Kedhekiyɑ̀ yi Jwøng-ɑ Ácwɑ̈ɑ̈j, kɑ lɑɑwe dwööge piny, ɑcöge gï nuti cɑɑy en. Tyëng-ɑ ɑ́cøng ri gen Yerusɑlem, Kwëër Olwëny ɑ́gwøg yi gen ki cyɑ̈ng ɑ́bïryew ki medi pyëw me dwøng. Kwɑrri Leebì geki ókwër, Jwøng-ɑ Ácwɑ̈ɑ̈j nyii lenhø yi gen kì yethi cyɑ̈nggɑni bënn ki tegi gen bëne. Kwɑrri Leebì ɑ́pwøj yi Kedhekiyɑ̀ kipe kɑ ɑ́mɑlli gen Jwøng-ɑ Ácwɑ̈ɑ̈j ki mɑll-ɑ dyër. Kì bɑng cyɑ̈ng ɑ́bïryew, ɑmuuj gen ki gëdhhì gɑ møg lenhi Jwøng-ɑ Ácwɑ̈ɑ̈j, Jwøøg kweyyi gen. Kɑ teedø oyïëyø kinni kwër ócigi gwøgø yi gen ki cyɑ̈ng ɑ́bïryew møøgø. Codhe, ɑcigi gen kwër gwøgø ki medi pëthi gen. Anëngi ji yi Rɑ̈dh Kedhekiyɑ̀ ki wɑ̈dhh ɑ́lïp, kí dyëg ɑ́lïp ɑ́bïryew møg nɑ̈g o ge cɑm, kɑ ge nëngi yi jɑgg ki wɑ̈dhh ɑ́lïp møøgø. Kɑ ókwër mø ngenyø ri gen thyey gen. Ji bënn ɑ́bëëd pëthi gen omedø, ɑ løg tyëng Yeudiyɑ̀, kí ókwër, kí Kwɑrri Leebì, kí ji-ɑ ɑ́bï ge kɑ̈ɑ̈l-ɑ piny Isrɑil, kí tyëngpɑth møg-ɑ bëëdø kì Isrɑil geki Yeudiyɑ̀. Ji ɑ́bëëd pëthi gen omedø kì Yerusɑlem, mɑ́ e bong gïn ni menɑni mɑ ɑ́cwöb, kër-ɑ ɑ́jyɑ̈ɑ̈g Rɑ̈dh Sølømøn wɑ̈d Debïd. Codhe, ɑdhwödh ókwër geki Kwɑrri Leebì kɑ teedø kwëng gen. Kɑ kwɑ̈jji gen lïngi yi Jwøk kì pɑɑre mɑl, kɑ gø yïëye. Keny-ɑ ɑ́rum kwër, kɑ tyëng Isrɑil kedh-ɑ yethi kɑ̈ddi Yeudiyɑ̀ bënn, kɑ löjj bënn geki ngïjji Aceerɑ̀ mød gen piny, kɑ këlli lɑm geki kɑ̈jji mɑ̈ddø kedhhi gen. Gïn ni menɑni ɑ́gwøg yi gen kì Yeudiyɑ̀ bëne, geki myërri gøl Ben Yɑmïn, kí Eprɑim, kí Mɑnɑsè. Codhe, ɑdøøg tyëng Isrɑil kɑ̈ddi gen. Rɑ̈dh Kedhekiyɑ̀ ókwër geki Kwɑrri Leebì ɑ́døøge ki pyëlø, kɑ ngɑn nyi mëgge gwøge. Gïg-ɑ gøggi bɑ gënh-ɑ nyi rɑ̈b bëne, kí gënhi mër, kí mɑ̈ddø kì yij Kengø, kí lenhi Jwøng-ɑ Ácwɑ̈ɑ̈j, kí pwøje. Kɑ omuujø kì kelli dhöge kí dyëge ki gëdhh-ɑ nyi rɑ̈b kì mwøl kí böörø, kí mø Sɑbɑth, kí møg-ɑ nyi muuj kì Kwëër Dwɑ̈n-ɑ Nyɑ̈n, kí gëdhhi cyɑ̈nggi kwër møg-ɑ kyeelø, ni kɑ ókwøbii kì yethi Ciggi Jwøng-ɑ Ácwɑ̈ɑ̈j. Kɑ tyëng Yerusɑlem köbbi yi rɑ̈dh kinni, kɑ̈ni gen ki jɑmm-ɑ nyi mëggi Kwɑrri Leebì, codhe, o ge muuj gen ri gen kipe gwøgi gwøngɑni, ni kɑ ókwøbii kì yethi Ciggi Jwøng-ɑ Ácwɑ̈ɑ̈j. Keny-ɑ ɑ́rum ji ki köbbø, ɑkɑ̈ni gen ki mwölli byel, kí møgi oløg, kí møøw dhetun, kí møøw kïc, kí jɑmm-ɑ kyeelø møg-ɑ cyeg kì yethi pwödhhi gen. Ge ɑ́kɑ̈ni thyew ki ɑ́kyeel pyɑ̈rri jɑmm-ɑ nud bënn kì yï gen. Ji-ɑ bëëdø kì kɑ̈ddi Yeudiyɑ̀ bënn ɑ́kɑ̈ni ki ɑ́kyeel pyɑ̈rri dhögi gen geki dyëgi gen, kɑ ge ókɑ̈nø thyew ki jɑmmì mø ngenyø ki mendwøng, kɑ gï thyëyi gen Jwøng-ɑ Ácwɑ̈ɑ̈j, Jwøøg kweyyi gen. Muunyi jɑmmì ɑ́cɑ̈g ɑ dɑ̈ɑ̈g dwɑ̈tt kɑ wɑ̈dh-ɑ bïryeew dwɑ̈tt ji nudd ge ókɑ̈ddø ki jɑmmì. Keny-ɑ ɑ́liidh ngenyi jɑmm-ɑ ɑ́muuj yi Rɑ̈dh Kedhekiyɑ̀ geki jyɑ̈gge, ɑmɑl gen Jwøng-ɑ Ácwɑ̈ɑ̈j, kɑ tyëng Isrɑil pwøj yi gen. Apyëëj ókwër geki Kwɑrri Leebì yi rɑ̈dh kipe møgɑni. Alöggi Ókwër-ɑ Dwøng, Adhɑriyɑ̀ kwɑɑr Dhɑdök kinni, “Kër-ɑ ɑ́cɑ̈gi ji ki kɑ̈ni yij Kengi Jwøng-ɑ Ácwɑ̈ɑ̈j ki jɑmm-ɑ ɑ́muuj yi gen, wø ɑ́cyɑ̈ɑ̈m, kɑ wø oyɑ̈ngø, kɑ møøgø odöngø kì ri jɑmmɑni bënn, mɑ́ Jwøng-ɑ Ácwɑ̈ɑ̈j jie ɑ́gyëdhe.” Kɑ ocïgø kinni gëëd teedø ki udd-ɑ ókïdhi jɑmmì kì buti Kengø, codhe ɑgëëd gen. Akïdhi jɑmm-ɑ ɑ́muuj, kí ɑ́kyeel pyɑ̈rri jɑmmì yethi uddɑni. Kɑ ge cïb cingi Könɑniyɑ̀ Kwɑɑr Leebì, o ómen Cimeì ɑ bɑ ókwøme. Kwɑrri Leebì pyɑ̈rø ɑ́kwɑny o ge køny ge gïn, jøgɑni bɑ: Yekiel, Adhɑdhiyɑ̀, Nɑɑ̈th, Asɑiil, Yerimöth, Yödhɑbɑd, Eliel, Ismɑkiyɑ̀, Mɑɑ̈th, kí Benɑiyɑ̀. Gïgɑni bënn ɑ́gwøg kì bɑng møg-ɑ ɑ́kwøb yi Rɑ̈dh Kedhekiyɑ̀ geki Adhɑriyɑ̀ Ókwër-ɑ Dwøng. Körè wɑ̈d Imnɑ̀, Kwɑɑr Leebì, en ɑ bɑ jɑgø men-ɑ kor Dhøg Wɑɑng Cyɑ̈ɑ̈ng Mwøl, dhøng-ɑ yïëbbi Kengø, en ɑ cinge nyi cïb jɑmm-ɑ muuj Jwøng-ɑ Ácwɑ̈ɑ̈j, o en ɑ nyi pɑ̈ngi gen. Kì kɑ̈dd-ɑ kyeelø Kwɑrri Leebì møg-ɑ nyi pɑ̈ngi jɑmmì yethi gen bong ɑ́dud, ge bɑ Eden, kí Miniɑmïn, kí Jöcwø, kí Cemɑiyɑ̀, kí Amɑriyɑ̀, kí Cekɑniyɑ̀. Gïncɑm nyi pɑ̈ngi yi gen kì kelli Kwɑrri Leebì wɑddi gen, e køøl-ɑ kömi gwøng-ɑ gwøg yi gen, o pɑ pɑ̈ngi ɑ́ wɑ̈thi kɑ̈llì. Cwøw bënn møg-ɑ runni gen bɑ pyɑ̈r ɑ́dɑ̈g gïti mɑl, dhɑnhø nyi mëgg-ɑ gïn-ɑ kyëëw ki gwøng-ɑ gwøg yi en kì yij Kengø. Ókwërø nyi mëggi gwøge e myer ɑ́ wɑ̈thi kɑ̈lli gen, o Kwɑrri Leebì cɑg kì ri ngɑn runne bɑ pyɑ̈r ɑ́ryew gïti mɑl, ge nyi mëggi gwøøg gen gɑ ɑkudd. Nyingi gen bɑ ɑgwed kì kej ɑ́kyel ki mɑ̈nni gen, kí nyigi gen, kí wɑddi gen møg-ɑ kyeelø, mɑ́ ge di dwɑddø kinni bëëd gen ri gen gwiir gen kipe gwøgi kwër kì bøli keje. Ókwërr-ɑ bëëdø kì kɑ̈dd-ɑ bɑ mø kwɑrri Aɑron, wɑlɑ̀ kì pìny-ɑ yethi gen cyɑ̈ɑ̈m yi dhögi kɑ̈ddɑni, dɑ jøg nyi pɑ̈ngi gïgcɑmm kì kelli kɑ̈lli gen geki kɑ̈lli Kwɑrri Leebì. Kì yij Yeudiyɑ̀ bëne, Rɑ̈dh Kedhekiyɑ̀ ɑ́göög ki gïgdøj mɑ ɑ́mïni pyëw Jwøng-ɑ Ácwɑ̈ɑ̈j. Gwøge ɑ́pɑ̈dhi keje, mɑ́ gïg-ɑ ɑ́gøgge kipe Kengø nyi gwøg yi en e ködd-ɑ kömi cigg. Ágöög thyew e gɑ̈nn-ɑ Jwøge, o yije bong ɑ́dud. Kì bɑng kɑ ɑ́rum gïg-ɑ dyër møg-ɑ ɑ́gøggi yi Rɑ̈dh Kedhekiyɑ̀ kipe nyingi Jwøng-ɑ Ácwɑ̈ɑ̈j, ɑbëën Rɑ̈nhdwøng Senɑkerib, rɑ̈nhdwøøng Acuur be mɑgi Yeudiyɑ̀. Kɑ kɑ̈ddi dör tyeg yi linye, kɑ jøge köbbe kinni, i dhur gen dör piny, kɑ ge kedhi gen yethi kɑ̈ddɑni. Keny-ɑ ɑ́lidhii yi Kedhekiyɑ̀ kinni, Senɑkerib dwɑdd-ɑ pɑ̈ɑ̈r kömi Yerusɑlem thyew, ɑnywɑ̈ge ki kwøb geki pëjji liny kinni rïg nyingi pï kì ngɑ̈ɑ̈j kɑɑl, o liny Acuur ójɑde ki pï keny-ɑ ócyɑ̈ngi gen ki Yerusɑlem. Acøng ji mø gïïr yi pëjjì, kɑ nyingi pï rïg gen. Pyëw rɑ̈dh ɑ́tëngi keny-ɑ ɑ́thïge döri kɑɑl, kɑ wïj dörø gëdde ki ud mø bɑ̈rrø, kɑ ngɑ̈ɑ̈j dör-ɑ weenø gëdde ki dörø megø. Kɑ othɑ̈dhø thyew ki tøngg mø ngenyø kí ködd. Kɑ orönyø ki pëjji liny, ɑcwøle teedø ódɑ̈ri kɑɑl. Kɑ gï köbbe kinni, “Cwed wun pëthi wun, kɑ wu ko böggi yi rɑ̈nhdwøøng Acuur. Wɑlɑ̀ wu ko bwøg yi liny-ɑ pyejji yi en. Yïee dɑ tegø me dwøng kì tungee, me lod teng-ɑ ying tuung gen. Yïe dɑ tegi dhɑnhø, de yïee dɑ Jwøng-ɑ Ácwɑ̈ɑ̈j, Jwøgee. Wɑ ókøny yi en, o ónyïɑ̈ggi kiperee.” Kɑ pëthi ji ótëngø yi møg-ɑ ɑ́kwøb yi rɑ̈ɑ̈dh gen. Kì bɑng kenyɑni, e Senɑkerib nudd e ying-ɑ Lɑkic geki linye, ɑöde Kedhekiyɑ̀ geki tyëng Yeudiyɑ̀ møg-ɑ bëëdø kì Yerusɑlem ki kwøb kinni, “Yɑ Rɑ̈nhdwøng Senɑkerib, rɑ̈nhdwøøng Acuur, ɑ pëjji kinni, ɑ́ gïn ɑ thödhi wun ki tegi pëëth, ɑ bëëd wun kì Yerusɑlem, e ótyegø yi liny. Kedhekiyɑ̀ ɑ ɑ́köbbi wun kinni wu óyiel yi Jwøng-ɑ Ácwɑ̈ɑ̈j, Jwøøg wun ki cinggi wøn! De wu ɑ́wëny yi Kedhekiyɑ̀, wu ónɑ̈g yi kɑ̈j geki röödhø. Pɑth ki Kedhekiyɑ̀ ɑ ɑ́rënyi kɑ̈jj-ɑ nyi mɑlli Jwøng-ɑ Ácwɑ̈ɑ̈j geki këlli lɑm. Kɑ tyëng Yeudiyɑ̀ geki tyëng Yerusɑlem köbbe kinni, i mɑ̈ddi gen kɑ ge rɑ̈ɑ̈b gen ki bɑkur kì wïj këli lɑm ɑ́kyel? Gïg-ɑ ɑ́göggi pödhh-ɑ kyeelø yi kweyyɑ, kí møg-ɑ ɑ́göggɑ gen kwïj yi wun? Dɑ jwøg mɑ ɑ́yiel gen kì cingi rɑ̈nhdwøøng Acuur? Á ɑ́wën ɑ ɑ́di pödhø mɑ ɑ́yiel yi jwøge kì cinggi wøn? Á gïn ɑ wëggi wun rumø kinni wu óyiel yi Jwøøg wun kì cingɑ? Ri wun ko wëggu wënyø yi Kedhekiyɑ̀, wɑlɑ̀ ri wun ko wëggu peej pɑ̈l yi en. Wu ko yïëy ki kwøbbe! Bong pödhø ɑ́kyel mɑ jie ɑ́yiel yi jwøøg gen kì cingi rɑ̈nhdwøøng Acuur. O bɑ dyër ceth, wu koo yiel yi Jwøøg wun!” Pëjji Acuur ɑ́kööb ki kwøb mø rijjø kì ri Jwøng-ɑ Ácwɑ̈ɑ̈j geki Kedhekiyɑ̀, bɑ̈ng Jwøng-ɑ Ácwɑ̈ɑ̈j. Wɑ̈nyø men-ɑ ɑ́gwed yi rɑ̈nhdwøng, nyingi Jwøng-ɑ Ácwɑ̈ɑ̈j, Jwøøg Isrɑil ɑ́bwöle. Wɑ̈nyɑni okööbø kinni, “Jwöggi pödhh-ɑ kyeelø jii gen nuti yieel gen kì cingɑ, o Jwøøg Kedhekiyɑ̀ jie koo yiele kì cingɑ!” Møgɑni ɑ́kwøb yi pëjjɑni ge óryeerø ki dhøg Ibru, kipe kinni o pëthi tyëng Yerusɑlem møg-ɑ ying wïj döri kɑɑl mɑg yi wɑ̈ɑ̈rø, codhe o mɑgi kɑɑl gööge e yööd. Ge ɑ́kööb kì ri Jwøøg Yerusɑlem ni kenyi kööb gen kì ri jwöggi pödhhi kömi piny, gen ɑ jwögg-ɑ bɑ ɑgwøg ki cinggi ji. Codhe, ɑkwɑjji Jwøk yi Rɑ̈dh Kedhekiyɑ̀ geki jɑltöng, Icɑyɑ̀ wɑ̈d Amodh, kɑ ge ywøøg-ɑ kööre kipe kinni o ge køny yi en. Aöni Jwøng-ɑ Ácwɑ̈ɑ̈j ki wëywödø me nɑ̈g jøliny geki pëjji liny Acuur, ɑdøøg rɑ̈nhdwøøng Acuur pödhe e yɑ̈rø. Kɑ kedh-ɑ yij kengi jwøge, ɑnɑ̈ɑ̈gii yij kengɑni yi men-ɑ́ dïl wɑ̈dde ki pilli gen. Men bene yuu-ɑ ɑ́yieel Rɑ̈dh Kedhekiyɑ̀ geki tyëng Yerusɑlem yi Jwøng-ɑ Ácwɑ̈ɑ̈j kì cingi Senɑkerib, rɑ̈nhdwøøng Acuur. Kɑ gï wëgge bëëdø ki mër geki tyëng pödhh-ɑ bɑdhhi gen bënn. Ji mø ngenyø ɑ́bï Yerusɑlem be muuji Jwøng-ɑ Ácwɑ̈ɑ̈j ki gëdhhì. Kɑ Kedhekiyɑ̀ muuj gen ki jɑmmì. Kɑ Kedhekiyɑ̀ pere ótëngø kì yï pödhh-ɑ kyeelø kì bɑng kenyɑni. Kɑ Rɑ̈dh Kedhekiyɑ̀ dële ócɑ̈gø rɑ̈m kì yethi cyɑ̈nggɑni, kɑ køm-ɑ thøø. Akwɑ̈jje, kɑ nëngi yi Jwøng-ɑ Ácwɑ̈ɑ̈j ki ngïji men nyodh kinni dële ódönyi. De Kedhekiyɑ̀ Jwøng-ɑ Ácwɑ̈ɑ̈j nuti pwøøj en kipe gïn-ɑ ɑ́göggii, kì bɑng kɑ̀ bëëde ɑ́ jɑlngöönø. Kɑ Yeudiyɑ̀ geki Yerusɑlem orɑngø kì bɑng bëëdø menɑni. Kɑ Kedhekiyɑ̀ geki tyëng Yerusɑlem ówïyø ngöönø kì cyɑ̈ɑ̈n piny, codhe ɑcög ji ge nuti cɑyø yi Jwøng-ɑ Ácwɑ̈ɑ̈j, gïti kɑ ɑ́thøw Kedhekiyɑ̀. Rɑ̈dh Kedhekiyɑ̀ ɑ́kɑ̈ri ki mendwøng, kɑ gɑ̈nni yi dhɑnhø bëne. Kɑ ogëdø ki kɑ̈jj-ɑ nyi mïdhi dhɑbe, kí ɑ́tegø, kí tigg-ɑ per gen teg, kí yenh-ɑ yømi gen med, kí ködd, kí jɑmm-ɑ ngewi gen teeg. Ágëëd thyew ki kɑ̈jj-ɑ nyi mïdhi byelle, kí møgi oløg, kí møøw dhetun, kí lwɑ̈ggi dhöge, geki dyëge. Áthödhi yi Jwøk thyew ki ngenyi dyel kí dhyɑng bëne, kí ngenyi gïïpiny bëne, kɑ ogëdø ki kɑ̈dd mø ngenyø. Kedhekiyɑ̀ ɑ ɑ́thør wɑɑng pïi Gïön, kɑ okunyø ki wøøl pïgɑni gø kɑ̈ɑ̈le’ thɑ döri Yerusɑlem, o pï töngi gen yij kɑɑl. Gïg-ɑ ɑ́gøggi bënn yi Kedhekiyɑ̀ ɑ́pɑ̈dhi kɑ̈jji gen ceth. Keny-ɑ ɑ́bëën tyëngwöödø møg kɑ̈ɑ̈l Bɑbïl, ge bï-ɑ be lidhi gïg-ɑ ɑ́cwöb kì yij pinyɑni, kɑ Kedhekiyɑ̀ wiy yi Jwøk o gwøge gïn-ɑ pyëwe, e rɑng-ɑ gøn. Gïg-ɑ kyeelø møg-ɑ ɑ́gwøg yi Kedhekiyɑ̀ bënn, kí kɑ ɑ́mëgge ree Jwøng-ɑ Ácwɑ̈ɑ̈j, bɑ ɑgwed kì yij Wɑ̈nyi Møg-ɑ Áyɑ̈lli Jɑltöng, Icɑyɑ̀ Wɑ̈d Amodh, kí Wɑ̈nyi Rɑ̈nhi Yeudiyɑ̀ geki Isrɑil. Akedhi Kedhekiyɑ̀ kun-ɑ di kweyye, kɑ koony rörri gøl rɑ̈ɑ̈dhø, kì tung-ɑ bɑ ótong. Kɑ ywøg yi tyëng Yeudiyɑ̀ geki tyëng Yerusɑlem bënn. Wɑ̈de Mɑnɑsè ɑ ɑ́røøny keje ɑ́ rɑ̈dh. Mɑnɑsè ɑ́røny ɑ́ rɑ̈ɑ̈dh Yeudiyɑ̀ e runne bɑ pyɑ̈rø wïdɑ́ryew, kɑ ojyɑ̈gø ki runn pyɑ̈r ɑ́bïj wïdɑ́bïj kì Yerusɑlem. Mɑnɑsè ɑ́røngi kì bøli Jwøng-ɑ Ácwɑ̈ɑ̈j ki orøng ni orøng-ɑ ɑ́gwøg yi jurr-ɑ ɑ́cyeed wɑ̈g yi Jwøng-ɑ Ácwɑ̈ɑ̈j kì bøli tyëng Isrɑil. Kɑ̈jj-ɑ nyi mɑlli jwögg-ɑ pɑth møg-ɑ ɑ́rënyi yi wïye Kedhekiyɑ̀ ɑ́døøge ki gerø. Ágëëd ki këlli lɑm møg-ɑ nyi mɑlli Bɑɑl, kɑ ogöögø ki ngïjji Aceerɑ̀ jwøng-ɑ dhɑjø, kɑ kyell mɑlle. Ágëëd ki këlli lɑm mø jwögg-ɑ pɑth kì yij Kengø, keny-ɑ ɑ́kwøb yi Jwøng-ɑ Ácwɑ̈ɑ̈j kinni bene keny-ɑ yije ómɑllii gïti ɑtheer. Ágëëd ki këlli lɑm møg nyi mɑlle kyell kì ódɑ̈rri Kengø ryeet. Wɑ̈dde ɑ́muuje gɑ gënh-ɑ nyi rɑ̈b kì yij Töör Kinöm, kɑ nyii rɑ̈ngø ki ɑ́jwöggì, kɑ nyii pëjjø ki yɑdh. Mɑnɑsè ɑ́göög ki orøng dwøng kì bøli Jwøng-ɑ Ácwɑ̈ɑ̈j, kɑ pyëw Jwøng-ɑ Ácwɑ̈ɑ̈j wëgge rënyø. Ngïjji jwögg-ɑ pɑth ɑ́cïbe yij Kengø, keny-ɑ ɑ́köbbi Debïd geki wɑ̈de Sølømøn yi Jwøk kinni, “Kengø men kì Yerusɑlem, bene keny-ɑ ɑ́yieny yi yɑn kì kelli pìnyi kɑ̈lli Isrɑil gɑ pyɑ̈rø wïdɑ́ryew, ɑ́ keny nyi mɑlli yɑn gïti ɑtheer. De keløg kwøbbɑ ómïdhi yi tyëng Isrɑil kɑ ciggɑ bënn møg-ɑ ɑ́mëggi gen yi bɑ̈ngɑ Mosɑ̀ mïdhi yi gen, ge koo wëggɑ cyeed wɑ̈g kì piny-ɑ ɑ́mëggɑ kweyyi gen.” Tyëng Yeudiyɑ̀ ɑ́peej yij orøng dwøng yi Mɑnɑsè; orøg me lod orøng-ɑ ɑ́gwøg yi pödhh-ɑ ɑ́cyeddi yi Jwøng-ɑ Ácwɑ̈ɑ̈j kì bøli gen. Mɑnɑsè geki jie ɑ́rum ki kyëddø yi Jwøng-ɑ Ácwɑ̈ɑ̈j kinni, wiy gen gwøg ki orøg, de ge ɑ́bɑ̈nyi lïngø. Codhe, kɑ pëjji liny Acuur kɑ̈ɑ̈l yi Jwøng-ɑ Ácwɑ̈ɑ̈j, ɑmɑg gen Yeudiyɑ̀. Kɑ Mɑnɑsè mɑg, kɑ ngön ki ɑ́bɑ̈dhh, kɑ peej Bɑbïl ɑ́ ɑtwöj ki ɑ́cwecwel. Ágöög ki mölø kì bɑng kɑ ɑ́rɑnge, kɑ ywøøg-ɑ kö Jwøng-ɑ Ácwɑ̈ɑ̈j, Jwøge, ɑkwɑ̈jje kipe kønyø. Kwɑ̈jji Mɑnɑsè ɑ́yïëy yi Jwøk, kɑ gø wiye døøge Yerusɑlem be jyɑ̈gø. Codhe, kɑ wïj döri kɑɑl Debïd kì wɑɑng cyɑ̈ng mwøl tïng yi Mɑnɑsè, o bɑ̈re, cɑg kì yij tör-ɑ cyɑ̈gi ki nyingi pïi Gïön kì wɑɑng wuudø, kì bøli Dhøg Rij, kí kɑɑl men-ɑ cwøl ɑ́ Opel. Kɑ yethi kɑ̈ddi dör kì Yeudiyɑ̀ kïdhe thyew ki pëjji liny. Ngïjji jwögg-ɑ pɑth møg-ɑ ɑ́cïb yi en yij Kengø ɑ́nyiige, ɑnyiige këlli lɑm mø jwögg-ɑ pɑth møg-ɑ ɑ́ying wïj kïn-ɑ köme ógeer Kengø kì Yerusɑlem. Gïgɑni bënn ɑ́kɑ̈ɑ̈le wɑ̈g kì kɑɑl, kɑ gï wedde. Kɑ këli lɑm men-ɑ wïje nyi rɑ̈bbi Jwøng-ɑ Ácwɑ̈ɑ̈j thïg yi en, kɑ omuujø ki gënhi mër, kí gëdhhi pwøj kì wïj këlɑni. Aköbbe tyëng Yeudiyɑ̀ bënn kinni mɑlli gen Jwøng-ɑ Ácwɑ̈ɑ̈j, Jwøøg Isrɑil. Ji ɑ́bëëd ge nyii muujø ki gëdhhì kì kɑ̈jj-ɑ kyeelø møg-ɑ yethi gen nyi mɑ̈ddi, ge nyi ngɑ̈dd-ɑ Jwøng-ɑ Ácwɑ̈ɑ̈j kete. Gïg-ɑ kyeelø møg-ɑ ɑ́gwøg yi Mɑnɑsè, ɑ løg kwɑ̈jjø men-ɑ ɑ́kwɑjje Jwøge, kí kwøbbi jøtöng møg-ɑ ɑ́köbbii ki nyingi Jwøng-ɑ Ácwɑ̈ɑ̈j, Jwøøg Isrɑil, ge bɑ ɑgwed bënn kì yij Wɑ̈nyi Rɑ̈nhi Isrɑil. Kwɑ̈jji rɑ̈dh, kí løøgi kwɑ̈nyɑni yi Jwøk, kí orøng-ɑ ɑ́gwøg yi en kɑ̈ng-ɑ́ nute yewø, kí rɑjj-ɑ ɑ́gwøge kì kɑ̈jj-ɑ yethi gen nyi mɑlli jwögg-ɑ pɑth, kí ngïjji Aceerɑ̀ jwøng-ɑ dhɑjø møg-ɑ ɑ́gwøg yi en, kí ngïjjì møg-ɑ nyi mɑlli yi en, ge bɑ ɑgwed bënn kì yij Wɑ̈nyi Kwøbbi Tyëngtöng. Akedhi Mɑnɑsè kun-ɑ di kweyye, kɑ kony kì gøldwøng. Arøøny Amön wɑ̈de keje ɑ́ rɑ̈dh. Amön ɑ́røny ɑ́ rɑ̈ɑ̈dh Yeudiyɑ̀ e runne bɑ pyɑ̈r ɑ́ryew wïdɑ́ryew, kɑ ojyɑ̈gø kì Yerusɑlem ki runn ɑ́ryew. Amön ɑ́røngi kì bøli Jwøng-ɑ Ácwɑ̈ɑ̈j, ni orøng-ɑ ɑ́gwøg yi Mɑnɑsè wïye. Kɑ ngïjji jwögg-ɑ pɑth møg-ɑ ɑ́mɑlli yi wïye gï mɑlle. De pɑ pɑ̈r ki wïye, nuti gwøg ki mölø, o nuti ywøøg kö Jwøng-ɑ Ácwɑ̈ɑ̈j, de ɑ́røngi ki orøg me dwøng kibøli men-ɑ ɑ́gwøg yi wïye. Kɑ Amön mol yi bɑ̈ngge, kɑ gø nɑ̈g gen kì gøldwøng. Aloony jøg-ɑ ɑ́nɑ̈g Amön ki nɑ̈gø yi tyëng Yeudiyɑ̀, kɑ Yöciyɑ̀ wɑ̈de røøny keje ɑ́ rɑ̈dh. Yöciyɑ̀ ɑ́bëëd runne bɑ ɑ́bïdɑ̈g keny-ɑ ɑ́gööge ɑ́ rɑ̈ɑ̈dh Yeudiyɑ̀, kɑ ojyɑ̈gø kì Yerusɑlem ki runn pyɑ̈r ɑ́dɑ̈g wïdɑ́kyel. Yöciyɑ̀ ɑ́göög ki gïgdøj kì bøli Jwøng-ɑ Ácwɑ̈ɑ̈j; ɑ́bëëd ceth e nɑ kwɑn Debïd; Ciggi Jwøk bënn ɑ́mïdhe ki menteg. Kì bïdɑ̈ɑ̈g runni Yöciyɑ̀ kì yij lɑwø, e nud ɑ́ nyelthinh, ɑcɑ̈ge ki mɑlli Jwøøg kweye Rɑ̈dh Debïd, kɑ kì bɑng runn ɑ́ngwen, ɑcɑ̈ge ki tørri kɑ̈jj-ɑ nyi mɑlli Jwögg-ɑ pɑth, kí ngïjji Aceerɑ̀ jwøng-ɑ dhɑjø, kí ngïjji jwögg-ɑ kyeelø bënn. Kɑ këlli lɑm møg-ɑ nyi mɑlli Bɑɑl toor piny yi jø Yöciyɑ̀, kɑ këlli bɑkur møg-ɑ ying buti gen toor piny. Ngïjji Aceerɑ̀ ɑ́mød gen piny kɑ ge ogöögø ki búr, kí ngïjji jwögg-ɑ kyeelø bënn. Codhe kɑ búr menɑni kedhhi gen kì wɑ̈thi rörri ji-ɑ ɑ́nëngi jwögg-ɑ pɑth ki gëdhhì. Kɑ cu ókwërri jwögg-ɑ pɑth rɑ̈b yi Yöciyɑ̀ kì wɑ̈thi këlli lɑm møg-ɑ nyi mɑ̈ddi yi gen. Yeudiyɑ̀ geki Yerusɑlem ɑ́göög ge dhïw kì bɑng gwøngɑni. Gïn ni menɑni ɑ́gwøg yi en kì yethi kɑ̈ddi Mɑnɑsè møg-ɑ ryɑ̈gø, kí kɑ̈ddi Eprɑim, kí kɑ̈ddi Cimeøn gïti Nɑptɑlì kì wɑɑng wuudø. Këlli lɑm bënn møg-ɑ ɑ́ying Isrɑil ɑ́toore piny, kɑ ngïjji Aceerɑ̀ møde kɑ ge ogöögø ki búr, kɑ këlli bɑkur kedhhe, codhe ɑdøøge Yerusɑlem. Kì pyɑ̈rø wïdɑ́bïdɑ̈ɑ̈g runni Yöciyɑ̀ kì yij lɑwø, keny-ɑ ɑ́rum piny ki kwërø geki Kengø, bene cögi mɑlli jwögg-ɑ pɑth, ɑöd Yöciyɑ̀ ki jøg ɑ́dɑ̈g møg thïg Kengi Jwøk, Jwøng-ɑ Ácwɑ̈ɑ̈j, ɑ løg Cɑpɑn wɑ̈d Adhɑliyɑ̀, kí Mɑɑseiyɑ̀ jɑngi Yerusɑlem, kí Yöɑ̀ wɑ̈d Ókwër-ɑ Dwøng Yöɑkɑdh. Ngyëny møg-ɑ ɑ́cøng kì yij Kengø yi ókwërr-ɑ nyi kor Kengø, ge ɑ́mëgg-ɑ Kilkiyɑ̀ Ókwër-ɑ Dwøng, ngyënyyɑni ɑ́cøng-ɑ yi gøl Eprɑim kí gøl Mɑnɑsè, kí kwï tyëng Isrɑil, kí tyëng Yeudiyɑ̀, kí gøl Ben Yɑmïn, kí tyëng Yerusɑlem. Codhe, ɑmëggi ngyënyyɑni jøg ɑ́dɑ̈g møg-ɑ thïg Kengø, kɑ gï lony gen, ki mëggi bödhhi yiedh ki pɑ̈mmì, geki bödhhi gyer, o ngëëw yi gen ki ópɑddi kïttì geki pɑ̈mm-ɑ thïg udd-ɑ ɑ́wëggi rënyø yi rɑ̈nhi Yeudiyɑ̀. Jøg-ɑ gëdø yethi gen bong ɑ́dud. Ge ɑ́kwøll-ɑ yi Kwɑrri Leebì ɑ́ngwen, ɑ løg Yɑɑth, kí Obɑdiyɑ̀ kì gøl Merɑrì, kí Dhekɑriyɑ̀, kí Meculɑm kì gøl Kɑ̈ɑ̈th. (Kwɑrri Leebì bënn ɑ́bëëd gɑ bödhhi thøm.) Kwɑrri Leebì møg-ɑ kyeelø ɑ́bëëd ge nenn-ɑ jɑmm-ɑ göög, o møøgø kwøll-ɑ jøgwøg, møøgø gwed-ɑ jɑmmì, møøgø ceg-ɑ kur. Keny-ɑ ɑ́dwɑɑy ngyëny øn-ɑ ɑ́mïdhi gen, ɑyood Wɑ̈nyi Ciggi Jwøng-ɑ Ácwɑ̈ɑ̈j yi Kilkiyɑ̀, eni wɑ̈nyi cigg-ɑ ɑ́mëggi Mosɑ̀ yi Jwøk. Aköbbi Cɑpɑn yi Kilkiyɑ̀ kinni, “Wɑ̈nyi Cigg ɑ́yod yi yɑn kì yij Kengø.” Wɑ̈nyɑni ɑ́mëggi Cɑpɑn yi Kilkiyɑ̀. Kɑ wɑ̈nyɑni muuj rɑ̈dh yi Cɑpɑn. Adwögge gøn møg-ɑ́ per gïn ɑ́öri gen kinni, “Jɑmm-ɑ ɑ́kwøb yi yïn bënn ɑ́gwøg yi wøn. Ngyënyy-ɑ ɑ́ying yij Kengø ɑ́mëggi wøn tyëng-ɑ göögø geki jøg-ɑ kwølli gen.” Codhe, ɑköbbe rɑ̈dh kinni, “Dɑ wɑ̈nyø mɑ ɑ́mëggi yɑn yi Kilkiyɑ̀, nud kì yïɑ kì keny.” Kɑ wɑ̈nyɑni rɑ̈ngi rɑ̈dh yi Cɑpɑn. Keny-ɑ ɑ́lïngi kwøbbi Wɑ̈nyi Cigg yi rɑ̈dh, ɑkɑge ógødhe yi rɑ̈ɑ̈m pyëwe, Kɑ Kilkiyɑ̀, kí Akikɑm wɑ̈d Cɑpɑn, kí Abdön wɑ̈d Mikɑiyɑ̀, kí Cɑpɑn jɑlgwed, kí Asɑiyɑ̀ jɑngi gøldwøng, köbbi yi rɑ̈dh kinni, “Kedhu be pyëji Jwøng-ɑ Ácwɑ̈ɑ̈j kiperɑ geki kiper ji møg-ɑ ɑ́döng kì Isrɑil geki Yeudiyɑ̀. Lidhu gïn-ɑ bɑ ɑgwed kì yij Wɑ̈nyi Cigg. Pyëw Jwøng-ɑ Ácwɑ̈ɑ̈j rɑɑj ki wɑ, mɑ́ Ciggi Jwøng-ɑ Ácwɑ̈ɑ̈j nuti mïdhø yi kweyyee, o gïn ógwedø kì yij Wɑ̈nyi Cigg kinni, gwøg yi gen nuti gwøøg gen.” Kɑ Kilkiyɑ̀ geki jøg-ɑ kyeelø kedh-ɑ be pyëji Kuldɑ̀ ngetitöng ni kɑ ɑ́köbbi gen yi rɑ̈dh. Ngɑnɑni ɑ́bëëd ɑ Yerusɑlem kì byëng-ɑ ɑ́cer gerø. (Nyingi jɑlgøle cwøl ɑ́ Cɑlum wɑ̈d Tikbɑ̀, wɑ̈d Arkɑs jɑl-ɑ mïdhi ógudhi kwër). Kɑ ngɑnɑni köbbi gen gïn-ɑ ɑ́cwöb, ɑköbbe jøgɑni i døøg gen kun-ɑ di rɑ̈dh, kɑ gø köbbi gen kinni, wöödø men-ɑ kɑ̈ɑ̈l yï Jwøng-ɑ Ácwɑ̈ɑ̈j bɑ kinni, “Cyënn-ɑ ógwedø kì yij wɑ̈ny-ɑ ɑ́rɑ̈ngi rɑ̈dh, kɑ̈ɑ̈lɑ’ kömi Yerusɑlem. Yɑ ɑ́bɑny yi gen, kɑ jwögg-ɑ pɑth nëngi gen ki gëdhhì, kɑ pyëwɑ rënyi yi gen ki gïg-ɑ ɑ́gwøg yi gen. Pyëwɑ ɑ́mɑg yi liny ki Yerusɑlem, o linyɑni pɑ cög. Keløg ɑ́ per rɑ̈dh kiree, møg-ɑ köbbɑ en, yɑ Jwøng-ɑ Ácwɑ̈ɑ̈j, Jwøøg Isrɑil bɑ kinni: møg-ɑ ɑ́rɑng kì yij wɑ̈nyɑni ɑ́lïngi yi yïn, kɑ yï óyewø, kɑ rií gwøøg mölø kì bølɑ, kɑ ógudhí pyëëd wɑ̈g kì bɑng rɑ̈ɑ̈m pyëwí, keny-ɑ ɑ́lïng kinni, Yerusɑlem bɑ men ryɑ̈gɑ geki jie. Kwɑ̈jjí ɑ́lïngɑ, o cɑ́y møg-ɑ ókɑ̈ɑ̈l kömi Yerusɑlem, pɑ bï ɑnɑn; ge óbï yï rum thøø. Yï ówiy yi yɑn o yï thøw ki mër.” Kɑ kwøbbɑni muuj Rɑ̈dh Yöciyɑ̀ yi jøgɑni. Aöd Rɑ̈dh Yöciyɑ̀, kɑ jøgdøngi Yeudiyɑ̀ geki Yerusɑlem cwööl. Kɑ rɑ̈dh geki ókwër, kí Kwɑrri Leebì, ki ji bënn tyëng-ɑ ɑbuur kí tyëngkɑ̈rì kedh-ɑ yij Kengø. Arɑ̈nggi gen kwøbb-ɑ yij Wɑ̈nyi Cigg, eni wɑ̈ny-ɑ ɑ́yod kì yij Kengø. Acungi rɑ̈dh kì ri lööj rɑ̈ɑ̈dhø, kɑ óköngø kì bøli Jwøng-ɑ Ácwɑ̈ɑ̈j kinni ócyɑ̈dhi kì bɑng Jwøng-ɑ Ácwɑ̈ɑ̈j, kɑ cigge geki kwönge mïdhe ki pyëwe, kí tege bëne, kí gøggi kwöng-ɑ ógwedø kì yij wɑ̈nyɑni. Kɑ tyëng gøl Ben Yɑmïn kí tyëng-ɑ nud kì Yerusɑlem köbbe köngø kinni Ciggɑni ómïdhi yi gen. Codhe, kɑ tyëng Yerusɑlem oyïëyø ki mïdhi kwøbb-ɑ ɑ́nywɑg yi gen ki Jwøøg kweyyi gen. Kɑ ngïjji jwögg-ɑ pɑth bënn dhur piny yi Yöciyɑ̀ kì yij pödhi Isrɑil, kɑ ji köbbe kinni göggi gen Jwøng-ɑ Ácwɑ̈ɑ̈j, Jwøøg kweyyi gen. Kwëër Ákɑɑdh ɑ́gwøg yi Yöciyɑ̀ kì Yerusɑlem kiper wøri Jwøng-ɑ Ácwɑ̈ɑ̈j, ɑ́gwøg yi en kì pyɑ̈rø wïdɑ́ngween cyɑ̈nggi kyeel dwɑ̈tt, kɑ ge ongɑ̈dø ki gëdhhì mø gïïr. Ókwër ɑ́thödhi yi en ki gwøøg gen kì yij Kengø, kɑ gï köbbe kinni gwøg gen gïgɑni kidøøj. Kɑ Kwɑrri Leebì geki jøpwönyi Isrɑil møg-ɑ ɑ́mëggi ri gen Jwøng-ɑ Ácwɑ̈ɑ̈j köbbe kinni, “Cïb Sɑnduug Cigg yij Kengø men-ɑ ɑ́ger yi Rɑ̈dh Sølømøn wɑ̈d Debïd. Sɑnduug Cigg ko rïïj e ocɑngø yi wun, de göggu Jwøng-ɑ Ácwɑ̈ɑ̈j, Jwøøg wun geki jie tyëng Isrɑil. Kwɑnyu kɑ̈jji wun kì yij Kengø wun ɑ́ wɑ̈thi kɑ̈llì, ni kɑ ɑ́pɑ̈ngi gwøøg wun yi Rɑ̈dh Debïd geki wɑ̈de Sølømøn, kɑ ri wun gwir wun, o wu nyi bëëd wun wu nud ceth, wu køny-ɑ tyëng Isrɑil bënn. Wu óngɑ̈dø ki órömm kí ónyöggi Kwëër Ákɑɑdh. De kwëru ri wun, o wu göög wun wu dhïw, kɑ gëdhhì gwir wun kipe nyiimï wun tyëng Isrɑil, ni kɑ ɑ́ceg Mosɑ̀ yi Jwøng-ɑ Ácwɑ̈ɑ̈j.” Kɑ ji nëngi yi Rɑ̈dh Yöciyɑ̀ ki jɑmmi Kwëër Ákɑɑdh; ɑ́muuj kì ri jɑmme ki dyëg ɑ́lïp pyɑ̈r ɑ́dɑ̈g mø bɑ órömm-ɑ døngø, kí órömm-ɑ thønhø, kí ónyögg. Kɑ omuujø ki wɑ̈dhh ɑ́lïp ɑ́dɑ̈g. Kɑ ji, kí ókwër, kí Kwɑrri Leebì thödhi ki jɑmmì yi jyɑ̈ggi rɑ̈dh. Kɑ ókwër nëngi yi jɑggi Kengø, ɑ løg Kilkiyɑ̀ Ókwër-ɑ Dwøng, kí Dhekɑriyɑ̀, kí Yekiel, ki dyëg ɑ́lïp ɑ́ryew kí miy ɑ́bïkyel, kí wɑ̈dhh miy ɑ́dɑ̈g møg ngɑl gɑ gëdhhì kì yethi cyɑ̈nggi kwër. Jɑggi Kwɑrri Leebì, Könɑniyɑ̀, kí Cemɑiyɑ̀ geki ómen Nethɑnel, kí Acɑbiyɑ̀, kí Yeiel, kí Yödhɑbɑd, ge ɑ́muuj ki órömm ɑ́lïp ɑ́bïj, kelli gen dɑ ónyögg-ɑ thønhø, kí wɑ̈dhh gɑ miy ɑ́bïj mø kelli gen di ónyögg, møg ngɑl gɑ gëdhhì yi Kwɑrri Leebì. Keny-ɑ ɑ́rum jɑmm-ɑ gwøøg Kwëër Ákɑɑdh ki gwirø bënn, ɑpëggi ókwër kɑ̈jji gen geki Kwɑrri Leebì, ni kɑ ɑ́kwøbii yi rɑ̈dh. Keny-ɑ ɑ́rum órömm geki ónyögg ki ngɑlø, ɑyeej gen yi Kwɑrri Leebì, kɑ ri këli lɑm wïddi ki rem yi ókwër. Apɑ̈ngi gëdhhì kì kelli teedø e pɑ̈ngi ɑ́ wɑ̈thi kɑ̈llì, o ge muuj gɑ gënh-ɑ nyi rɑ̈b bëne, ni kɑ ógwedii kì yethi Ciggi Mosɑ̀. Kɑ Kwɑrri Leebì obudø ki rïngø, kɑ kwëe thɑl kì yethi ɑ́tɑ̈yyì kí dɑ̈gg, ni kenyi gwøøg jɑmmi kwër ceth. Codhe, ɑpɑ̈ngi rïngø kì kelli teedø. Keny-ɑ ɑ́rum teedø ki nëngø cyee, ɑkɑ̈bbi Kwɑrri Leebì geki ókwër, kwɑrri Aɑron ki rïngø, mɑ́ ge ɑ́tyëg cɑ̈ng ge orɑ̈bø ki gënh-ɑ nyi rɑ̈b bëne geki dwɑ̈li gëdhhi mër. Bödhhi thøm møg, jø gøl Asɑp Kwɑɑr Leebì, ɑ́ying-ɑ kɑ̈jji gen, ni kɑ ɑ́pyëël møgɑni yi Rɑ̈dh Debïd cøn ge ómyerø; ɑkuud Asɑp, kí ɑkuud Ëmɑn, kí ɑkuud Yeduthun, ɑ bɑ jɑltöng mi rɑ̈dh. Jøg-ɑ kor dhøggi Kengø ɑ́ying-ɑ kɑ̈jji gen ceth, ge nuti pɑ̈nyi nyegø kì kɑ̈jji gen, mɑ́ ge ɑ́bëëd ge ceg kɑ kɑ̈llø kidøøj yi wɑddi gen, ɑ løg Kwɑrri Leebì. Kɑ møg-ɑ ɑ́kwøb yi Rɑ̈dh Yöciyɑ̀, órumø ki gwøgø kipe mɑlli Jwøng-ɑ Ácwɑ̈ɑ̈j, kí kwööng Kwëër Ákɑɑdh, kí muuji gënh-ɑ nyi rɑ̈b bëne kì wïj këli lɑm. Kwëër Ákɑɑdh, kí Kwëër Olwëny, ɑ́gwøg yi tyëng Isrɑil bënn møg-ɑ ɑ́bëëd ge nud kì yethi cyɑ̈nggɑni gɑ ɑ́bïryew. Kööl kì ri cyɑ̈nggi Sɑmwel jɑltöng, bong Kwëër Ákɑɑdh mɑ ɑ́gwøg ni menɑni kinni tek. Bong rɑ̈dh kì kelli rɑ̈nhh-ɑ ɑ́jyɑ̈ɑ̈g cøn, mɑ ɑ́göög ki Kwëër Ákɑɑdh ni men-ɑ ɑ́gwøg yi Rɑ̈dh Yöciyɑ̀, geki ókwër, kí tyëng Yeudiyɑ̀, kí tyëng Isrɑil, kí tyëng Yerusɑlem, kì pyɑ̈rø wïdɑ́bïdɑ̈ɑ̈g runni Yöciyɑ̀ kì yij lɑwø. Keny-ɑ ɑ́rum jɑmmi Kengø bënn ki gwøgø yi Rɑ̈dh Yöciyɑ̀, kɑ Rɑ̈dh Nekö rɑ̈ɑ̈dh Rïp liny pëëje be nyɑɑg ki Kɑrkemec kì kömi Nɑm Porɑt. Arødhii yi Rɑ̈dh Yöciyɑ̀. De Yöciyɑ̀ ɑ́ödi yi Nekö ki kwøb kinni, “Yïn ɑ rɑ̈ɑ̈dh Yeudiyɑ̀, yïɑ bɑ̈r ki yïn, pɑth ki wɑ ɑ nyïɑ̈ggi. De yɑ nyïɑ̈ggi kɑ tyëng-ɑ mɑ̈n ki yɑn, o Jwøk yɑ ɑ́köbbe kinni jwɑnɑ. Yɑ kɑ̈ll-ɑ yi Jwøk, de yï ko rïwwi kì bøli Jwøk, kipe yï ónɑ̈g yi en.” De Yöciyɑ̀ ɑ́bëëd pyëwe tyer-ɑ nyɑɑg. Kɑ óbɑ̈nyø ki lïngi møg-ɑ ɑ́kwøb yi Jwøk ki dhøg Rɑ̈dh Nekö. Codhe, kɑ ree kɑɑnge, ɑkedhe be nyɑɑg kì yij Töör Megidø. Keny-ɑ ɑ́nyïɑ̈ggi liny, kɑ Rɑ̈dh Yöciyɑ̀ ree pɑ̈dhi yi weth liny Rïp. Aköbbe bɑ̈ngge kinni, “Kɑ̈lu yɑn, riɑ dɑ kedø me rɑj!” Kɑ kɑ̈ɑ̈l piny yi bɑ̈ngge kì yij yɑ̈ye, kɑ gø cïb gen yij yɑ̈y megø. Kɑ gø kïdhi gen Yerusɑlem. Athøwe kì kunɑni, kɑ koony buti kweyye. Kɑ ywøg yi tyëng Yeudiyɑ̀ geki tyëng Yerusɑlem bënn. Jermɑyɑ̀ jɑltöng ɑ́cyɑ̈ɑ̈g ki wör møg ywøøge Yöciyɑ̀. Codhe, ɑgööge ki kwöng kì Isrɑil, kinni nyi wöör wörɑni kenyi wøøw Yöciyɑ̀. Wörɑni nud kì kelli wörri ywøg. Gïg-ɑ ɑ́gwøg yi Yöciyɑ̀, kí mëgge ree Jwøng-ɑ Ácwɑ̈ɑ̈j, geki mïdhi cigg yi en, kí wɑ́je kì ri cɑ̈gi gen gïti cögi gen, ge bɑ ɑgwed bënn kì yij Wɑ̈nyi Rɑ̈nhi Isrɑil geki Yeudiyɑ̀. Yöɑkɑdh wɑ̈d Yöciyɑ̀ ɑ́yieny yi tyëng Yeudiyɑ̀ kɑ gø røny gen ɑ́ rɑ̈dh kì Yerusɑlem. Yöɑkɑdh ɑ́bëëd runne bɑ pyɑ̈r ɑ́ryew wïdɑ́dɑ̈g keny-ɑ ɑ́gööge ɑ́ rɑ̈dh, kɑ ojyɑ̈gø kì Yerusɑlem ki dwɑ̈tt ɑ́dɑ̈g. Kɑ kɑ̈l yi Nekö rɑ̈ɑ̈dh Rïp ɑ́ ɑmɑg, kɑ Yeudiyɑ̀ köbbe col ki kïlli ɑ́tegø ɑ́lïp ɑ́dɑ̈g kí miy ɑ́ngwen, geki kïlli dhɑb pyɑ̈r ɑ́dɑ̈g wïdɑ́ngwen. Kɑ Eliɑkim ómï Yöɑkɑdh røny yi Nekö ɑ́ rɑ̈ɑ̈dh Yeudiyɑ̀ kɑ nyinge wile ɑ́ Yöyɑkim. Akïdhi Yöɑkɑdh Rïp yi Nekö. Yöyɑkim ɑ́bëëd runne bɑ pyɑ̈r ɑ́ryew wïdɑ́bïj keny-ɑ ɑ́gööge ɑ́ rɑ̈ɑ̈dh Yeudiyɑ̀, kɑ ojyɑ̈gø ki runn pyɑ̈rø wïdɑ́kyel kì Yerusɑlem, Yöyɑkim ɑ́røngi kì bøli Jwøng-ɑ Ácwɑ̈ɑ̈j, Jwøge. Nebukɑdnesɑr, rɑ̈ɑ̈dh Bɑbïlöniyɑ̀ ɑ́bï be mɑgi piny Yeudiyɑ̀, kɑ Yöyɑkim kïdhe Bɑbïlöniyɑ̀ ɑ́ ɑtwöj ki ɑ́cwecwel. Nebukɑdnesɑr jɑmmi Kengø ɑ́kwɑnye kɑ gï cïbe gøldwøng kì Bɑbïl. Gïg-ɑ kyeelø bënn møg-ɑ ɑ́gwøg yi Yöyɑkim, geki gïgrijjø møg ɑ́gwøg yi en, kí orøng-ɑ ɑ́gwøge, ge bɑ ɑgwed kì yij Wɑ̈nyi Rɑ̈nhi Yeudiyɑ̀. Arøøny wɑ̈de Yöyɑkin keje ɑ́ rɑ̈dh. Yöyɑkin ɑ́bëëd runne bɑ pyɑ̈rø wïdɑ́bïdɑ̈g keny-ɑ gööge ɑ́ rɑ̈ɑ̈dh Yeudiyɑ̀, kɑ ojyɑ̈gø ki dwɑ̈tt ɑ́dɑ̈g kí cyɑ̈ng pyɑ̈rø kì Yerusɑlem. Kɑ ogöögø thyew ki gïnrɑj kì bøli Jwøng-ɑ Ácwɑ̈ɑ̈j. Keny-ɑ ɑ́bëën dhødïng, ɑkïdhi Yöyɑkin Bɑbïlöniyɑ̀ ɑ́ ɑmɑg yi Nebukɑdnesɑr, kɑ kɑ̈r-ɑ ɑ́ying yij Kengø kɑ̈ɑ̈le. Kɑ Dhedekiyɑ̀ ómï wïyi Yöyɑkin røny ɑ́ rɑ̈ɑ̈dh Yeudiyɑ̀ geki Yerusɑlem yi Nebukɑdnesɑr. Dhedekiyɑ̀ ɑ́bëëd runne bɑ pyɑ̈r ɑ́ryew wïdɑ́kyel keny-ɑ ɑ́jɑ̈gge, kɑ ojyɑ̈gø ki runn pyɑ̈rø wïdɑ́kyel kì Yerusɑlem. Dhedekiyɑ̀ ɑ́göög ki gïnrɑj kì bøli Jwøng-ɑ Ácwɑ̈ɑ̈j, kɑ ódhɑ̈lø lïngi kwøbbi Jermɑyɑ̀ jɑltöng, ngɑn-ɑ kømmi kwøbbi Jwøng-ɑ Ácwɑ̈ɑ̈j. Kɑ Dhedekiyɑ̀ ngɑ̈ny-ɑ wɑ̈ye kì ri Rɑ̈dh Nebukɑdnesɑr ngɑn-ɑ ɑ́cïrii köngø ki nyingi Jwøk kinni, ce gø ówør yi en. Dhedekiyɑ̀ mune teeg, ɑ́bɑ̈nyi yewø, o di døøge kö Jwøng-ɑ Ácwɑ̈ɑ̈j, Jwøøg Isrɑil. Kɑ pëjji Yeudiyɑ̀, geki ókwër, kí ji bënn ogöögø ki gïgrijjø ni jurr-ɑ bɑdhhi gen, kɑ ge kedh-ɑ be mɑlli ngïjji jwögg-ɑ pɑth, kɑ Keng-ɑ ɑ́kwër yi Jwøng-ɑ Ácwɑ̈ɑ̈j bwöl yi gen. Jwøng-ɑ Ácwɑ̈ɑ̈j, Jwøøg kweyyi gen ɑ́bëëd e jie nyii ödø yi en ki jøtöng møg-ɑ nyi kyëddi gen, mɑ́ e ɑ́dwɑdd-ɑ kori jie geki Kenge. De jøwööni Jwøk nyi ceg kɑ gɑggø yi gen, kɑ kwøbbe bɑny yi gen, gïti kɑ ɑ́rënyi pyëw Jwøng-ɑ Ácwɑ̈ɑ̈j ki jie ki mendwøng. Codhe, kɑ rɑ̈ɑ̈dh Bɑbïlöniyɑ̀ kɑ̈ɑ̈l yi Jwøng-ɑ Ácwɑ̈ɑ̈j. Kɑ yɑnythønhø nɑ̈g yi rɑ̈ɑ̈dh Bɑbïlöniyɑ̀ kì yij Kengø. Yije nuti ywøg kipe dhɑnhø bëne, ying-ɑ́ nyelthinh, wɑlɑ̀ yu, jɑlø wɑlɑ̀ dhɑjø, ngɑn dële rɑ̈mø wɑlɑ̀ ngɑn dële yöd. Ji bënn ɑ́cïb cingi rɑ̈ɑ̈dh Bɑbïlöniyɑ̀ yi Jwøk. Kɑ jɑmmi Kengø bënn kwɑny yi rɑ̈ɑ̈dh Bɑbïlöniyɑ̀, kí kɑ̈ɑ̈r Kengø, kí jɑmmi gøldwøng geki jɑmmi jyɑ̈gge, kɑ gïgɑni bënn kïdhi Bɑbïl. Kɑ Kengø, kí kɑɑl geki udde kí jɑmmì bënn rɑ̈b yi liny Bɑbïlöniyɑ̀, kɑ döri kɑɑl dhur gen piny. Kɑ ji-ɑ ɑ́bødh ki nɑ̈gø kïdhe Bɑbïl, kun-ɑ ɑ́göög gen ki bɑ̈ngge kí bɑ̈nggi wɑ̈dde, gïti kɑ ɑ́døøg rɑ̈ɑ̈dhø Pɑres. Møg-ɑ ɑ́kwøb yi Jwøng-ɑ Ácwɑ̈ɑ̈j ki dhøg Jermɑyɑ̀ jɑltöng ɑ́pɑ̈dhi kɑ̈jji gen, kinni, “Piny ódöng e bong gïn ying yije, o óbëëdø kinøw ki runn pyɑ̈r ɑ́bïryew, o piny ree ywöme.” Kì kyeel runni Körec rɑ̈nhdwøøng Pɑres kì yij lɑwø, møg-ɑ ɑ́kwøb yi Jwøng-ɑ Ácwɑ̈ɑ̈j ki dhøg Jermɑyɑ̀ jɑltöng ɑ́pɑ̈dhi kɑ̈jji gen. Kɑ pyëw Rɑ̈nhdwøng Körec yiebe, kɑ tyëng pödhe gwëde kwøb møg kinni, “Møg bɑ kwøbbi Körec rɑ̈nhdwøøng Pɑres. Yɑ ɑ́gwøg yi Jwøng-ɑ Ácwɑ̈ɑ̈j, Jwøøg mɑl, yɑn ɑ́ jɑngi kömi piny bëne, kɑ yɑ köbbe kinni, i gerɑ Kenge kì Yerusɑlem kì Yeudiyɑ̀. Anɑn, wu jii Jwøk bënn, kedhu kunɑni, wu ókøny yi Jwøng-ɑ Ácwɑ̈ɑ̈j, Jwøøg wun.” Kì kyeel runni jyɑ̈gi Körec jɑl Pɑres ɑ́ rɑ̈nhdwøng, ɑ ɑ́wiy møg-ɑ ɑ́mɑ̈ɑ̈g ki töngø yi Jwøng-ɑ Ácwɑ̈ɑ̈j ki dhøg Jermɑyɑ̀ jɑltönge, o ge pɑ̈dhi gen kɑ̈jji gen. Körec ɑ́kölli muujø ki cigg yi Jwøng-ɑ Ácwɑ̈ɑ̈j kì yij pödhe bëne, ciggɑni ɑ́gwede, kɑ gï öre wɑ̈g, o ge rɑ̈ngi ji bënn ki cwɑg mø døngø, kì yethi pödhh-ɑ jɑɑg yi rɑ̈nhdwøng. “Møg bene gen ciggi Körec, rɑ̈nhdwøøng Pɑres: Jwøng-ɑ Ácwɑ̈ɑ̈j, Jwøøg mɑl, yɑ ɑ́mëgge lɑ̈gi piny bëne, kɑ yɑ köbbe kinni gëddɑ en ki Kengø kì Yerusɑlem, kì Yeudiyɑ̀. Wiy wu ómïdhi yi Jwøk, wun ɑ jie bënn, kɑ wu wëgge døøg Yerusɑlem, kì Yeudiyɑ̀, kɑ Kengi Jwøng-ɑ Ácwɑ̈ɑ̈j, Jwøøg Isrɑil ger yi wun. Bene en Jwøng-ɑ ying Yerusɑlem. Tyëng-ɑ døøg, køny gen yi wɑddi gen ki dhɑb kí ɑ́tegø, kí lɑ̈yy-ɑ tyëddi ki jɑmmì, kí gëdhhì møg-ɑ óthyer kì Kengi Jwøk kì Yerusɑlem.” Codhe, ɑdhwödh jyɑ̈ggi wɑ̈thi kɑ̈lli Yeudɑ̀ geki Ben Yɑmïn, kí ókwër, kí Kwɑrri Leebì, kí ji bënn møg-ɑ ɑ́cïj yi wëyi Jwøk, ge kedh-ɑ be geri Kengi Jwøng-ɑ Ácwɑ̈ɑ̈j kì Yerusɑlem. Ge ɑ́køny yi tyëng-ɑ buti gen bënn ki ngyëny ɑ́tegg, kí dhɑb, kí dhög geki dyëg, kí lɑ̈yy-ɑ kɑ̈ddi ki jɑmmì ki gïg-ɑ per gen teg, gïgɑni ɑ́muuj yi tyëngɑni kɑ medi pëthi gen. Jɑmm-ɑ ɑ́kɑ̈l yi Nebukɑdnesɑr kì Yerusɑlem kì yij Kengø, kɑ gï cïbe yij kengi jwøge, ge ɑ́dwöög yi Körec. Gï ɑ́mëgge Mithredɑth jɑl-ɑ nyi mïdhi jɑmmì, o gï kwɑ̈nne Cecbɑdhɑr, jɑng-ɑ mïdhi jɑmmi gøldwøng kì Yeudiyɑ̀. Kwɑnni jɑmmi dhɑb geki jɑmmi ɑ́tegø bënn bɑ ɑ́lïp ɑ́bïj kí miy ɑ́ngwen. Bene jɑmm-ɑ ɑ́kɑ̈ɑ̈l yi Cecbɑdhɑr keny-ɑ ɑ́kɑ̈ɑ̈le tyëng-ɑ ɑ́ying yïnø kì Bɑbïl e gï kïdhe’ Yerusɑlem. Møg bene tyëng-ɑ ɑ́dwöög kì Bɑbïlöniyɑ̀, kun-ɑ ɑ́køøl gen gɑ ɑmɑgg yi Nebukɑdnesɑr, rɑ̈ɑ̈dh Bɑbïlöniyɑ̀, ge dwöög-ɑ Yerusɑlem kì Yeudiyɑ̀, ngɑn nyi døøg-ɑ pɑɑ gen. Ge ɑ́dwöög kɑ pëjji gen, Dherubɑbïl, kí Jöcwø, kí Nëmɑyɑ̀, kí Serɑiyɑ̀, kí Reelɑiyɑ̀, kí Mordekɑy, kí Bilcɑn, kí Mispɑr, kí Bigbɑy, kí Reum, kí Bɑnɑ̀. Møg bɑ nyingi wɑ̈thi kɑ̈lli Isrɑil møg-ɑ ɑ́dwöög, jɑngi kɑl kí kwɑnni jie: Kwɑnni kwɑrri tyëng-ɑ ɑ́göög kì Kengø bënn geki kwɑrri bɑ̈nggi Sølømøn ɑ́bëëd gɑ 392. Akyeer gen yi jɑgø ki cɑm ki jɑmmi kwër, pïd keny-ɑ ódi ókwërø men-ɑ ópyëj Jwøng-ɑ Ácwɑ̈ɑ̈j ki Urïm geki Thumïm. Kwï wɑ̈thi kɑ̈lli Isrɑil keny-ɑ ɑ́wɑ̈dhi gen Kengi Jwøng-ɑ Ácwɑ̈ɑ̈j, men-ɑ Yerusɑlem, ɑmuuj gen ki gëdhhì kipe Kengi Jwøk, kipe kinni o døøge keje. Ge ɑ́muuj ki gïn-ɑ ɑ́cuggi muujø yi gen ceth kipe gwøg, kɑ kwɑnni jɑmmɑni bënn wɑ̈dh-ɑ ri kïllì 500 mø dhɑb, kí kïllì 2,800 mø ɑ́tegø, kí ɑ́ywödhh-ɑ thønhø mø ókwër 100. Ókwër, kí Kwɑrri Leebì, kí kwï tyëng Isrɑil ɑ́pëggi Yerusɑlem, kɑ kwï gen pëgg-ɑ buti Yerusɑlem. Bödhhi wör ki thøm, kí tyëng-ɑ nyi kor Kengø, kí tyëng-ɑ nyi göögø kì yij Kengø, ɑ́pëggi myërr-ɑ cyɑ̈gi, kɑ kwï tyëng Isrɑil møg-ɑ kyeelø pëgg-ɑ yethi kɑ̈dd-ɑ ɑ́bëëd yi kweyyi gen. Kì bïryeew dwɑ̈tt e tyëng Isrɑil rum pëggi yethi myërri gen bënn, ɑcugi ji kì Yerusɑlem. Codhe, ɑdhwödh Jöcwø wɑ̈d Yödhɑdɑk, kí ókwërr-ɑ kyeelø, kí Dherubɑbïl wɑ̈d Ceɑltiel, ɑger gen këli lɑm mi Jwøøg Isrɑil, kinni o wïje nyi rɑ̈b gen gëdhhì ni kɑ ógwedii kì yij Wɑ̈nyi Ciggi Mosɑ̀ jɑlkwøbbi Jwøk. Cɑgg ɑ́ kɑ ɑ́bëëd ge óböggø yi tyëng-ɑ bëëdø kì pönhɑni, këli lɑm ɑ́døøg gen ki geer keje cøn, kɑ ge døøg-ɑ be rɑ̈b ki gëdhhi mwøl geki gënhi böörø. Kɑ Kwëër Akɑnnì gwøg yi gen ni kɑ ɑ́cegii ceth, kɑ gëdhhì møg-ɑ dwɑddi nyi gwøg yi gen yethi cyɑ̈ng ceth. Kɑ ge nyii muujø ki gëdhh-ɑ nyi rɑ̈b kì bøli kɑ̈jji gen ceth, kí gëdhhi cɑ̈gi dwɑ̈y, geki gëdhhi kwëër Jwøng-ɑ Ácwɑ̈ɑ̈j møg-ɑ per gen nyi cugi yi ji bënn, kí jwödhø møg-ɑ nyi muuj yi ji. Kì kyeel cyɑ̈nggi bïryeew dwɑ̈tt, ɑcɑ̈gi gen ki nëngi Jwøng-ɑ Ácwɑ̈ɑ̈j ki gënh-ɑ nyi rɑ̈b bëne, kí gëdhh-ɑ kyeelø bënn, ngö tyelli Kengi Jwøng-ɑ Ácwɑ̈ɑ̈j ɑ́bëëd ge nuti këël piny. Amuuj ji ki ngyëny, ge thödh-ɑ jøg-ɑ nyi twïgø ki kïttì, kí jøg-ɑ nyi yïëdhø ki pɑ̈mmì, kɑ ge omuujø ki gïgcɑmm, kí møw, kí gïgmɑdh, gɑ møg ör kɑ̈ddi Suur geki Sïdön, o ge wil ki yenh sɑndɑl kì Lubnɑn, o yenhɑni kɑ̈ɑ̈l Yɑpɑ̀ ki nɑm. Møgɑni bënn ɑ́gwøg ge rumø ki yïëyø yi Körec, rɑ̈nhdwøøng Pɑres. Codhe, kì ri ryeew dwɑ̈tt kì yij run, ɑkedhi gen kej Kengø kì Yerusɑlem, ɑcɑ̈gi gen ki gwøg. Dherubɑbïl, kí Jöcwø, kí jø pödhi gen bënn, kí ókwër, kí Kwɑrri Leebì, kí tyëng-ɑ ɑ́dwöög Yerusɑlem bënn, ge ɑ́mɑ̈gi ki gwøg. Kwɑrri Leebì bënn møg-ɑ runni gen bɑ pyɑ̈r ɑ́ryew gïti mɑl, gen ɑ́ cinggi gen ɑ́cïb gwøg døøgi Kengø ki gerø. Jöcwø geki wɑ̈dde, kí Kɑdmiel geki wɑ̈dde, kí wɑddi gøn, kí Binuy, kí Ödɑbiyɑ̀, ge bënn ɑ ɑ́nenni gwøøg Kengø, kyeel geki wɑ̈ddi Ënɑdɑd, ɑ løg Kwɑrri Leebì bënn, geki wɑ̈ddi gen, kí wɑddi gen. Ge ɑ́kwɑny-ɑ nenni gwøøg geri ød Jwøk. Keny-ɑ ɑ́cɑ̈gi jøg-ɑ gëdø ki geri Kengi Jwøng-ɑ Ácwɑ̈ɑ̈j, ɑbëën ókwër mɑl ki ógudhi kwër kì ri gen, kí kɑ̈ngì kì cinggi gen. Kɑ Kwɑrri Leebì mø wïj gøl Asɑp ki thømi gen bï-ɑ be lejji Jwøng-ɑ Ácwɑ̈ɑ̈j ni kɑ ɑ́cïg Debïd, rɑ̈ɑ̈dh Isrɑil. Awör gen ge lejj-ɑ Jwøng-ɑ Ácwɑ̈ɑ̈j, o ge pøjj-ɑ en kinni, “Jwøng-ɑ Ácwɑ̈ɑ̈j døøj, o Isrɑil mɑɑr yi en gïti ɑtheer.” Kɑ ji óryeerø, ngɑn ryeer kɑ döngi cwɑgge bëne, e lejj-ɑ Jwøng-ɑ Ácwɑ̈ɑ̈j kipe kɑ ɑ́cɑ̈gi gwøøg geri Kengi Jwøng-ɑ Ácwɑ̈ɑ̈j. Ókwër mø gïïr, kí Kwɑrri Leebì, kí jyɑ̈ggi wɑ̈thi kɑ̈llì, møg-ɑ ɑ́lidh Kengi tyeli mɑl, keny-ɑ ɑ́lidh gen tyelli Kengø ge këël-ɑ piny, ɑywöngi gen ki ywøng dwøng. De tyëng-ɑ kyeelø møg-ɑ ɑ́ying kenyɑni kïïw-ɑ medi pëthi gen. Kɑ bong-ɑ ngɑn cuggi yodi ryeeri medi pyëw kí men-ɑ töngi ɑ́ ywøg, mɑ́ cwɑggi ji ɑ́wɑ̈dhi mɑl kidøøj, kɑ ge lïngi kì kun lɑ̈wi. Alïng tyëngmɑ̈ɑ̈nø kì Yeudiyɑ̀ geki Ben Yɑmïn kinni i tyëng-ɑ ɑ́dwöög ceg-ɑ døøgø ki gyer ki Kengi Jwøng-ɑ Ácwɑ̈ɑ̈j, Jwøøg Isrɑil. Abëën gen yï Dherubɑbïl geki jyɑ̈ggi wɑ̈thi kɑ̈llì, ɑköbbi ge gïn kinni, “Wiy wu køny yi wøn ki geri Kengø. Wø nyi mɑll-ɑ Jwøng-ɑ nyi mɑlli yi wun thyew, kɑ nyi nëngi yi wøn ki gëdhhì kër-ɑ ɑ́ör wøn be bëëdø keny yi Esɑrɑdön, rɑ̈nhdwøøng Acuur.” Kɑ Dherubɑbïl geki Jöcwø, kí jɑggi wɑ̈thi kɑ̈llì ólöggø kinni, “Wø pɑ dwɑddi kønyø yi wun ki geri Kengi Jwøng-ɑ Ácwɑ̈ɑ̈j, Jwøøg wøn, de Jwøng-ɑ Ácwɑ̈ɑ̈j, Jwøøg Isrɑil, gëdd-ɑ yi wøn keti wøn, ni kɑ ɑ́ceg wøn yi Körec, rɑ̈nhdwøøng Pɑres.” Codhe, ɑlunyi tyëng-ɑ ɑ́yood piny ki bɑ̈nni wɑ̈thi tyëng Yeudiyɑ̀, kɑ gï nyi nɑ̈ni gen kinni, o ge bwøg gen ki gyer. Kɑ tyëng Pɑres møg-ɑ døngø kì kɑ̈jji gwøg, kwɑjji yi gen ki ngyëny, kipe kinni o gwøg cung yi gen. Ge ɑ́bëëd ge göög ɑ nøw ceth kì ri jyɑ̈gi Körec gïti kɑ ɑ́jɑ̈ggi Dɑryøs. Kì ri cɑ̈gi jyɑ̈gi Rɑ̈nhdwøng Kerkes, ɑ ɑ́gwëëd tyëngmɑ̈ɑ̈nø møgɑni ki wɑ̈nyø, ge gøøny-ɑ tyëng Yeudiyɑ̀ geki tyëng Yerusɑlem. Kì yethi cyɑ̈nggi Rɑ̈nhdwøng Artɑkerkes ɑ ɑ́gwëëd Biclɑm, kí Mithredɑth, kí Tɑbiil, kí kwï jø gen møg-ɑ kyeelø ki wɑ̈nyø, ge gwëd-ɑ Artɑkerkes, rɑ̈nhdwøøng Pɑres, wɑ̈nyɑni bɑ ɑgwed ki dhøg tyëng Arɑm, o óceg kɑ løgø keny-ɑ órɑngii. Thyew jɑgø Reum, kí Cimcɑy jɑlgwed, ge ɑ́gwëdi yï Artɑkerkes ki wɑ̈nyø me gøøny gen tyëng Yerusɑlem. Gø ɑ́gwed gen kinni, “Wɑ̈nyø men kɑ̈ɑ̈l-ɑ yï jɑgø Reum, geki Cimcɑy jɑlgwed, kí kwï jø gen møg-ɑ kyeelø, ɑ løg jyɑ̈ggi gøny, kí jɑggi gwøg møg-ɑ ɑ́kɑ̈ɑ̈l Erek, kí Bɑbïl, kí Susɑ̀, kì Elɑm, kí kwï tyëng-ɑ kyeelø møg-ɑ ɑ́kɑ̈ɑ̈l yi jɑldwøng, jɑlteg Acuurbɑnibɑl, kɑ gï cïbe kɑ̈ddi Sɑmɑriyɑ̀, kí kwï myërri løøg Nɑm Porɑt kì wɑɑng cyɑ̈ɑ̈ng böörø.” Bene møg-ɑ ógweed yij wɑ̈nyɑni ek: “Wɑ̈nyø gwëd-ɑ Rɑ̈nhdwøng Artɑkerkes yi bɑ̈ngge, jø myërri løøg Nɑm Porɑt kì wɑɑng cyɑ̈ɑ̈ng böörø. “Wø ngɑ̈j-ɑ yïn wuö kinni, tyëng Yeudiyɑ̀ møg-ɑ ɑ́kɑ̈ɑ̈l kun-ɑ di wun, ɑ ɑ́bï Yerusɑlem, ge ceg-ɑ døøgø ki geri kɑɑlɑni, kɑɑl orøg, kɑɑl-ɑ mune teg. Ge køm-ɑ rumø ki geri dörø. Keny-ɑ órum kɑɑlɑni ki døøgø gerø, kɑ döre ger, tyëngɑni pɑ cudø ki gwɑ̈j këti, o ngyënyyi gøldwøng ceg-ɑ nungø. Mɑ́ wø bɑ jií, wø pɑ dwɑddi kinni o gïn ni menɑni cwöbe, bene ɑödi wøn yïí ki wöödø men, kinni muuj ki cigg kinni yɑɑb yethi wɑ̈jj-ɑ ɑ́mïdhi yi kweyyí, o yod yi yïn kinni kɑɑlɑni ɑ́bëëd e mune teg, kɑ rɑ̈nhì nyi gögge ki rɑj. Bene ɑ bɑnge ɑ́dhur kɑɑlɑni piny. Bene ɑ dwɑddi wøn nyudhi yïn kinni keløg e odøøgø ki gerø, kɑ döre ócungø, myërri løøg Nɑm Porɑt kì wɑɑng cyɑ̈ɑ̈ng böörø, pɑ cuggi jɑɑgø yi yïn këti.” Codhe, ɑlöggi rɑ̈nhdwøng kinni, “Yɑ gwëd-ɑ jɑgø Reum, kí Cimcɑy jɑlgwed, kí jø gen møg-ɑ bëëdø kì Sɑmɑriyɑ̀, kí myërri løøg Nɑm Porɑt kì wɑɑng cyɑ̈ɑ̈ng böörø, yɑ mɑ̈dh-ɑ wun. “Wɑ̈ny-ɑ ɑ́ör yi wun ɑ́løg, kɑ rɑ̈ngi yɑn. Kɑ yɑ omuujø ki cigg kinni yɑɑb yethi wɑ̈j. Kɑ yod ceth kinni Yerusɑlem ɑ́bëëd ɑ́ kɑɑl me mune teg, kwøbbi rɑ̈nhì nyii pyemø yi en, tyëngɑni muddi gen teg o ge bɑ jii göj. Ájɑɑg-ɑ yi rɑ̈nhì mø teg, kɑ modïri løøg Nɑm Porɑt kì wɑɑng cyɑ̈ɑ̈ng böörø, jɑɑg yi rɑ̈nhhɑni thyew kɑ ge nyii kɑ̈bbø ki gwɑ̈j kí jɑmmì møøgø. Kɑ ɑ́rum bëëde kinøw, muuj wun ki cigg kinni cuung gyer yi jøgɑni, gïti keny-ɑ ómuujɑ ki cigg møøgø. Jwɑɑn møgɑni ki gwøgø, o óbëëd e bong rɑj møg cwöb kì yij pödhɑ.” Keny-ɑ ɑ́rɑ̈ngi wɑ̈nyi Rɑ̈dh Artɑkerkes, Reum, kí Cimcɑy jɑlgwed, kí jø gen, ɑjwɑni gen yï tyëng Yeudiyɑ̀ kì Yerusɑlem, kɑ gï cïrri gen cuungi gwøg. Gwøøg geri Kengø ɑ́bëëd e rum cung kì bøli kenyɑni, kɑ ocögø e bong gyer gïti ri ryeew runni Dɑryøs, rɑ̈nhdwøøng Pɑres kì yij lɑwø. Bøli kenyɑni ɑ ɑ́cɑ̈gi jøtöng ɑ́ryew, ɑ løg Agɑy, kí Dhekɑriyɑ̀ wɑ̈d Idö ki kwøb ki nyingi Jwøøg Isrɑil, ge köbb-ɑ Yeud møg-ɑ bëëdø kì Yeudiyɑ̀ geki Yerusɑlem. Codhe, ɑdhwödh Dherubɑbïl wɑ̈d Ceɑltiel geki Jöcwø wɑ̈d Yödhɑdɑk keny-ɑ ɑ́lïngi gen mø jøtöng, kɑ ge ódøøgø ki cɑ̈gø ki gyer ki Kengø kì Yerusɑlem, kɑ ge køny yi jøtöngɑni ryeet. Bøli kenyɑni ceth ɑ ɑ́bëën Tɑtenɑy, jɑngi myërri løøg Nɑm Porɑt kì wɑɑng cyɑ̈ɑ̈ng böörø, geki Cethɑr Bodhenɑy, kí jø gen, ge bï-ɑ yï jøg-ɑ gëdø, kɑ ge okööbø kinni, “Á men ɑ ɑ́köbbi wun kinni gëëd wun, ɑ tyëgu dörø men?” Jøgɑni ɑ́pëjji thyew ki nyingi ji møg-ɑ ɑ́kunyi ki geri Kengø bënn. De jøgdøngi Yeud ɑ́bëëd ge okorø yi Jwøøg gen, o bong gïjø mɑ ɑ́gwøg yi jɑggi Pɑres, ge ɑ́yïd-ɑ møg-ɑ óløøg yi rɑ̈nhdwøng. Men bene wɑ̈ny-ɑ ɑ́öri rɑ̈nhdwøng yi gen. “Wø öd-ɑ yï Rɑ̈nhdwøng Dɑryøs. Yï ójyɑ̈ɑ̈gø ki mër. “Wiy yod yi rɑ̈nhdwøng kinni, wø ɑ́kedhi Yeudiyɑ̀, kɑ yod yi wøn kinni Kengi Jwøng-ɑ dwøng ceg kɑ gerø ki kïttì mø døngø, e pɑ̈mmì cïb-ɑ ri döre. Gyerɑni nënni e pödh-ɑ bøle kidøøj. “Jøgdøngi tyëngɑni ɑ́pyëj yi wøn, ki ngɑn-ɑ muujø ki cigg kinni døøg Kengø men ki gerø. Kɑ ge pyëj yi wøn ki nyingi gen thyew, kipe kinni o nyingi pëjji gen gwëdi wøn yïn. “Alöggi gen kinni, ‘Wø bɑ bɑ̈nggi Jwøøg mɑl kí piny, o wø døøg-ɑ Keng-ɑ ɑ́ger yi rɑ̈nh teg, rɑ̈ɑ̈dh Isrɑil kɑ̈ge dööng ki gerø. De keny-ɑ ɑ́wëggi pyëw Jwøøg mɑl rënyø yi kweyyi wøn, ɑcïbe gïn cingi Nebukɑdnesɑr, rɑ̈ɑ̈dh Bɑbïlöniyɑ̀, jɑl Kildɑn, ɑdhure Kengø men piny, ɑkïdhe ji yïnø, Bɑbïlöniyɑ̀. Kì kyeel runni Körec rɑ̈nhdwøøng Bɑbïlöniyɑ̀ kì yij lɑwø, ɑ ɑ́muuje ki cigg kinni døøg Kengi Jwøk ki gerø. Cɑgg ɑ́ jɑmmi Kengi Jwøk, ɑ løg dhɑb kí ɑ́tegø møg-ɑ ɑ́kɑ̈l yi Nebukɑdnesɑr kì Kengi Yerusɑlem, kɑ gï kïdhe kengi Bɑbïl, ge ɑ́mëggi Cecbɑdhɑr yi Körec, kɑ gï mëgge jɑngi Yeudiyɑ̀. Aköbbe gøn kinni, kwɑnye jɑmmɑni, kɑ ge dwøøg kɑ̈jji gen kì yij Kengø kì Yerusɑlem. Kɑ Kengi Jwøk døøg ki geer keje ceth. Codhe, ɑbëën Cecbɑdhɑr kɑ tyelli Kengø këële piny, ɑcɑ̈gi gyer kì bøli kenyɑni ceth, de Kengø nuti thumø.’ “Anɑn, keløg pyëwí med, wiy yɑb kì yethi wɑ̈jji gøldwøng kì Bɑbïl, keløg e dɑ ciggi døøgi Kengi Yerusɑlem ki gerø møg-ɑ ómuujø yi Körec, kɑ wiy wø lïngi wøn löggi rɑ̈dh kì ri kwøbbɑni.” Codhe, kɑ Rɑ̈nhdwøng Dɑryøs omuujø ki cigg kinni i yɑɑb wɑ̈jji gøldwøng møg-ɑ nud kì Bɑbïl. De wɑ̈ny-ɑ nyi bɑn ɑ́yod-ɑ kɑɑldwøng Ekbɑtɑnɑ̀, kì Modïri Mɑdɑy, e yije dɑ møg-ɑ ógwedø kinni: “Rɑ̈nhdwøng Körec ɑ́muuj ki cigg, kì kyeel runne kì yij lɑwø kinni i døøg Kengø ki gerø kì Yerusɑlem ɑ́ keny nyi muuj gëdhhì, ɑ yije nyi rɑ̈ɑ̈b gëdhhì. Geer Kengø döre bɑ mïtïr pyɑ̈r ɑ́ryew wïdɑ́bïryew, o lɑ̈je bɑ mïtïr pyɑ̈r ɑ́ryew wïdɑ́bïryew. Geer dörø e cïmmi ɑ́ lwøøb ópɑddi kïttì ɑ́dɑ̈g, kömi gen cïb-ɑ lwøøb yenh ɑ́kyel. Jɑmm-ɑ gëëd bënn ngew kɑ ngyënyyi gøldwøng. Kɑ jɑmmi dhɑb kí ɑ́tegø møg-ɑ ɑ́kɑ̈ɑ̈l Bɑbïl yi Rɑ̈dh Nebukɑdnesɑr kì Kengø kì Yerusɑlem, dwøøg kɑ̈jji gen kì yij Kengi Yerusɑlem.” Codhe, ɑöd Dɑryøs ki wɑ̈nyø kinni, “Yɑ gwëd-ɑ Tɑtenɑy, jɑngi myërri løøg Nɑm Porɑt, kì wɑɑng cyɑ̈ɑ̈ng böörø. “Lɑ̈ɑ̈w wun ri wun ki Kengø, wuki Cethɑr Bodhenɑy, kí jø wun. Wu ko ludhi yethi kwøbbi geri Kengi Jwøk. Wiy jyɑ̈ggì geki tyëngdøngi Yeud døøg gen Kengi Jwøk ki gerø kì keje ceth. Thyew yɑ köbb-ɑ wun kipe gïn-ɑ ógwøg yi wun kipe Yeud møg-ɑ døøg Kengi Jwøk ki gerø, gïg-ɑ dwɑddi kipe gyer jwɑnu gen ki muujø. Colu gen bënn kì ri ngyënyyi gøldwøng, geki gwɑ̈ɑ̈j modïri løøg Nɑm Porɑt kì wɑɑng cyɑ̈ɑ̈ng böörø. Gïg-ɑ dwɑddi, ying gɑ dyëg-ɑ römm, wɑlɑ̀ wɑ̈dhh, wɑlɑ̀ órömm-ɑ thønhø møg rɑ̈bbi Jwøøg mɑl, wɑlɑ̀ gemè, wɑlɑ̀ omelø, wɑlɑ̀ møgi oløg, wɑlɑ̀ møøw dhetun møg-ɑ dwɑddi yi ókwëri Yerusɑlem, nyi mëggi gï gen ceth yethi cyɑ̈ng. Kipe o ge nyi muuj gen ki gëdhh-ɑ dwɑddi yi pyëw Jwøøg mɑl, o ge kwɑ̈jji gen kiperɑ wøki wɑ̈ddɑ. Cigg møg-ɑ muujɑ thyew, bɑ kinni ngɑn-ɑ ópyem ciggɑni yɑdh ówöödh wɑ̈g kì ri øde, o dhø yɑnhɑni tyeng e bedh, o ngɑnɑni cwøb ki yɑnhɑni, o twïye wɑ̈g kì ree, codhe o gøle gwøg ɑ́ thur. Wiy Jwøng-ɑ ɑ́myeg Yerusɑlem ɑ́ keny nyi mɑllii nɑ̈ge rɑ̈nh-ɑ ópëmø, wɑlɑ̀ pönh-ɑ ópyem ciggɑni, wɑlɑ̀ ngɑn-ɑ ódwɑddi dhuri Kengi Jwøk men-ɑ Yerusɑlem piny. Yɑn yɑ Dɑryøs ɑ ɑ́muuj cigg møg, mïdhi gen ceth.” Kɑ cigg-ɑ ɑ́öri Tɑtenɑy, jɑngi myërri løøg Nɑm Porɑt kì wɑɑng cyɑ̈ɑ̈ng böörø, geki Cethɑr Bodhenɑy, kí jø gen yi Rɑ̈nhdwøng Dɑryøs, yïëy yi gen ni kɑ ɑ́ceg gen ceth. Kɑ geri Kengø yi pëjji Yeud, pödh-ɑ bøle kidøøj, ge ocïjø yi jøtöng ryeet, ɑ løg Agɑy geki Dhekɑriyɑ̀. Kengø ɑ́tyëg yi gen ni kɑ ɑ́ceg gen yi Jwøøg Isrɑil, kí Körec, geki Dɑryøs, kí Artɑkerkes rɑ̈nhi Pɑres. Atyëg gen geri Kengø kì dɑ̈ɑ̈g cyɑ̈nggi dwɑ̈y Adɑr, kì bïkyeel runni Rɑ̈nhdwøng Dɑryøs kì yij lɑwø. Codhe, ɑthyeey Kengi Jwøk ki medi pëëth yi ókwër, kí Kwɑrri Leebì, kí ji bënn møg-ɑ ɑ́dwöög kì yïnø. Kì ri thyeyi Kengi Jwøk, ge ɑ́muuj-ɑ wɑ̈dhh 100, kí dyëg 200, kí órömm 400 gɑ gëdhhì, kí ónyögg 12 gɑ gëdhhi orøg, dyel ɑ́kyel kipe wïj kɑl ɑ́kyel kì kelli kɑ̈lli Isrɑil. Kɑ ge orönyø ki ókwërø, kí Kwɑrri Leebì, kɑ ge pɑ̈ngi gɑ ɑkudd, kipe gwøøg Kengø kì Yerusɑlem ni kɑ ógweedii yij Wɑ̈nyi Ciggi Mosɑ̀. Agwøøg Kwëër Ákɑɑdh yi tyëng Isrɑil møg-ɑ ɑ́dwöög kì yïnø, kì pyɑ̈rø wïdɑ́ngween cyɑ̈nggi kyeel dwɑ̈tt. Mɑ́ ókwër geki Kwɑrri Leebì, ri gen ɑ́rum ki kwërø yi gen, o ge dhïwi gen. Gëdhhì ɑ́cɑm-ɑ yi tyëng Isrɑil møg-ɑ ɑ́dwöög kì yïnø bënn. Kɑ Kwëër Ákɑɑdh gwøg yi gen ki medi pëëth, ge cɑm-ɑ olwëny ki cyɑ̈ng ɑ́bïryew, mɑ́ pëthi gen ɑ́wëggi mïnø yi Jwøng-ɑ Ácwɑ̈ɑ̈j, kɑ pyëw rɑ̈nhdwøøng Acuur luge gïn, kɑ gï thödhe ki tegø men tyëg gen gwøøg geri Kengi Jwøøg Isrɑil. Anɑn kì bɑng runn mø gïïr, kì bøli keny-ɑ ɑ́bëëd Artɑkerkes bɑ rɑ̈nhdwøøng Pɑres, ɑ́dɑ jɑl me cwøl ɑ́ Edhrɑ̀ me kɑ̈ɑ̈l thɑ gøl Aɑron Ókwër-ɑ Dwøng. Edhrɑ̀ bɑ wɑ̈d Serɑiyɑ̀, wɑ̈d Adhɑriyɑ̀, wɑ̈d Kilkiyɑ̀, wɑ̈d Cɑlum, wɑ̈d Dhɑdök, wɑ̈d Akitub, wɑ̈d Amɑriyɑ̀, wɑ̈d Adhɑriyɑ̀, wɑ̈d Merɑyöth, wɑ̈d Dherɑiyɑ̀, wɑ̈d Udhì, wɑ̈d Bukì, wɑ̈d Abicuɑ̀, wɑ̈d Pineɑs, wɑ̈d Eliɑdhɑr, wɑ̈d Aɑron. Edhrɑ̀ ɑ́bëëd ɑ́ jɑl me dïdø, me ngɑ̈nyi Ciggi Jwøng-ɑ Ácwɑ̈ɑ̈j, Jwøøg Isrɑil, møg-ɑ ɑ́mëgge Mosɑ̀. Edhrɑ̀ ɑ́bëëd ɑ́ ɑgyëdh yi Jwøng-ɑ Ácwɑ̈ɑ̈j, kɑ gïg-ɑ ɑ́dwɑdde bënn mëggii yi rɑ̈nhdwøng, ɑkedhe kì Bɑbïlöniyɑ̀. Akedh tyëng Isrɑil kyeel ki gøn, gen ɑ ókwër, kí Kwɑrri Leebì, kí jøwör, kí jøkor, kí jøgwøøg Kengø. Ge ɑ́kedhi Yerusɑlem, kì bïryeew runni Artɑkerkes kì yij lɑwø. Edhrɑ̀ ɑ́bëëd pyëwe cïb en ri rɑngi Ciggi Jwøng-ɑ Ácwɑ̈ɑ̈j, kí gwøgi gïn-ɑ dwɑddi yi ciggɑni, kí pwönyi tyëng Isrɑil ki ciggɑni bënn. Møg bɑ wɑ̈jj-ɑ ɑ́mëggi ókwërø Edhrɑ̀, jɑl-ɑ nyi gwëdi Ciggi Jwøng-ɑ Ácwɑ̈ɑ̈j tyëng Isrɑil, men-ɑ ɑ́mëggii yi Artɑkerkes, ógwedø kinni: “Rɑ̈nhdwøng Artɑkerkes gwëd-ɑ ókwërø Edhrɑ̀, jɑl-ɑ nyi gwed ciggi Jwøøg mɑl. “Yɑn ɑ muujø ki cigg èn, ngɑn-ɑ dwɑddi døøg Yerusɑlem kì kelli tyëng Isrɑil, kì yij pödhɑ, kí ókwër, geki Kwɑrri Leebì wiy døg gen. Yï ör-ɑ yi yɑn wøki jø tøg burø gɑ ɑ́bïryew, kipe kinni o yï lidh bëën-ɑ bëëd ji kì Yeudiyɑ̀ geki Yerusɑlem, mɑ mïdhi ciggi Jwøgí yi teedø, o yï kɑ̈l dhɑb kí ɑ́tegø møg-ɑ ɑ́muuj yi rɑ̈dh geki jø tøg bure, ge nëng-ɑ Jwøøg Isrɑil, ɑ Kenge ying Yerusɑlem. Átegø kí dhɑb møg-ɑ ɑ́yod yi yïn kì kɑɑl Bɑbïl bëne geki myërre, kí gëdhh-ɑ ɑ́muuj yi tyëng Isrɑil, geki ókwër gɑ mø Kengi Jwøøg gen kì Yerusɑlem, ókɑ̈l yi yïn thyew. “Mïdhí ngyënyyɑni kidøøj, o ge óngëëw yi yïn ki wɑ̈dhh, kí órömm-ɑ døngø, kí órömm-ɑ thønhø, kí gemè, kí møgi oløg, møg muuj gɑ gëdhhì kì wïj këli lɑm, kì Kengi Jwøgí men-ɑ Yerusɑlem. Átegø kí dhɑm-ɑ döng ócuggø gwøøg yi wun ki gïn-ɑ ódwɑddi yi wun ki gwøgø, ɑ́ gïjø me cyɑ̈dhi kì yuu Jwøk. Jɑmm-ɑ ɑ́mëggi wun bënn gɑ møg göög kì Kengi Jwøøg wun, thërru gen Jwøk kì Yerusɑlem. O keløg e dɑ gïg møøgø møg-ɑ ódwɑddi yi yïn kipe Kengø, kwɑnyu gen kì ri jɑmmi gøldwøng. “Yɑ ceg-ɑ jɑgg-ɑ mïdhi ngyëny kì myërri løøg Nɑm Porɑt, kì wɑɑng cyɑ̈ɑ̈ng böörø kinni, nyi mëggi gen Edhrɑ̀, jɑl-ɑ nyi gwed ciggi Jwøøg Mɑl, gïn-ɑ nyi cwøl yi en ceth, gïti keny-ɑ ógööge ki kïllì ɑ́lïp ɑ́dɑ̈g kí miy ɑ́ngwen mø ɑ́tegø, kí kïllì ɑ́lïp pyɑ̈rø mø gemè, kí møgi oløg ɑ́ røthøl ɑ́lïp ɑ́ngwen, kí møøw dhetun ɑ́ røthøl ɑ́lïp ɑ́ngwen, kí omelø men-ɑ ódwɑddi. Nyi muuj gïn-ɑ dwɑddi yi Jwøøg Mɑl kipe Kenge ceth, o cöge e pyëwe pɑ rënyi ki yɑn, wøki tyëng-ɑ ójyɑ̈ɑ̈gø kì bɑngɑ. Wu pɑth ki ɑyïëy ki kɑ̈bbø ki gwɑ̈j kì yï ókwër geki Kwɑrri Leebì, kí jøwör, ki jøkor, kí jøgwøg, kí jøg-ɑ nyi göögø kì yij Kengø. “Yïn, Edhrɑ̀, ki peli wïj men-ɑ ɑ́mëggi yïn yi Jwøgí, kɑ̈bbí ki jɑggi kɑ̈dd geki jɑggi myërr, kì myërri løøg Nɑm Porɑt kì wɑɑng cyɑ̈ɑ̈ng böörø, gɑ tyëng-ɑ ngɑ̈nyi ciggi Jwøgí bënn, kɑ tyëng-ɑ kwïj ciggɑni, pwönyi yi gen. Ngɑn-ɑ ócög e pɑ kɑ̈lli bɑng ciggi Jwøgí, wɑlɑ̀ bɑng ciggi pödhø, cɑy ki thøø, wɑlɑ̀ ör yïnø, wɑlɑ̀ cude ki ngyëny, wɑlɑ̀ mɑg.” Akööb Edhrɑ̀ kinni, “Pwøj wɑ Jwøng-ɑ Ácwɑ̈ɑ̈j, Jwøøg kweyyee, mɑ́ pyëw rɑ̈dh ɑ́wëgge okøn kipe thyeyi Kengi Jwøng-ɑ Ácwɑ̈ɑ̈j men-ɑ Yerusɑlem. Jwøng-ɑ Ácwɑ̈ɑ̈j mɑɑr-ɑ mɑɑre yɑn ɑ́nyodhe kì bøli rɑ̈nhdwøng geki jø tøg bure, kɑ pyëwɑ wëgge tëngø, ɑcøngɑ pëjji Isrɑil, o wø dwöög wøn ki gen.” Møg bɑ nyingi jɑggi wɑ̈thi kɑ̈llì, møg-ɑ ɑ́dwöög Yerusɑlem geki Edhrɑ̀, ge dwöög ɑ yïnø kì Bɑbïlöniyɑ̀, kì bøli keny-ɑ ɑ́jyɑ̈ɑ̈g Rɑ̈nhdwøng Artɑkerkes. Kɑ ji cøngɑ bënn, kì kömi nɑm-ɑ rengi kɑɑl Aɑbɑ̀, ɑbëëd wøn kì kunɑni ki cyɑ̈ng ɑ́dɑ̈g. Kɑ yodɑ kinni dɑ ókwër kì kelli ji, de bong Kwɑrri Leebì. Aödɑ be cwööli Eliedher, kí Ariel, kí Cemɑiyɑ̀, kí Elnɑthɑn, kí Yöyɑrïb, kí Elnɑthɑn, kí Nɑthɑn, kí Dhekɑriyɑ̀, kí Meculɑm. Kɑ yɑ öd-ɑ be cwööli jøpwönyø ɑ́ryew, ɑ løg Yöyɑrïb geki Elnɑthɑn. Aörɑ gen yï Idö, jɑngi Kɑsipiyɑ̀, kɑ ge köbbɑ møg-ɑ óköbbi Kɑsipiyɑ̀ geki jøge yi gen, ɑ løg bɑ̈nggi Kengø kì Kɑsipiyɑ̀, kinni ödi wøn yi gen ki ji møg göögø kì yij Kengø Jwøgee. Wø ɑ́køny yi Jwøk, kɑ wø öri gen Cerebiyɑ̀ Kwɑɑr Leebì, jɑl me cuggi gwøg, o bɑ jɑl wïj gøl Mɑklì, ɑ́bï kɑ wɑ̈dde geki myiimen, gɑ pyɑ̈rø wïdɑ́bïdɑ̈g. Acɑbiyɑ̀ geki Yecɑiyɑ̀, jø wïj gøl Merɑrì ɑ́ör yi gen thyew geki wɑddi gen gɑ 20. Thyew ɑ́dɑ bɑ̈nggi Kengø 220, møg-ɑ́ kweyyi gen ɑ́cïb wɑ̈yi gen yi Debïd geki jyɑ̈gge, o ge køny gen Kwɑrri Leebì. Ge bɑ ɑgwed ki nyingi gen bënn. Acïgɑ kinni thuum ji bënn kì kömi Nɑm Aɑbɑ̀, o ri wøn dwöög wøn piny kì bøli Jwøgee, wø kwɑjj-ɑ en kinni, kore wøn, wøki nyigi wøn, kí jɑmmì bënn, o wø kɑ̈l yi en ki tɑrø. Wïjɑ ɑ́ceg-ɑ lɑ̈ɑ̈yø ki cwöd kì yï rɑ̈nhdwøng, ki jøliny møg cyɑ̈dhi tyelli gen kí møg-ɑ cyɑ̈dhi kì kömi kyënyì, gɑ møg di kor wøn ki tyëngmɑ̈ɑ̈nø kì kö yöö, mɑ́ rɑ̈nhdwøng ɑ́köbbi yi wøn kinni, “Jwøøg wøn nyi gyëdh-ɑ ngɑn-ɑ gɑ̈nii, de pyëwe pɑ nyi med ki ngɑn-ɑ nyi wiyii piny.” Codhe, ɑthuum wøn, kɑ møgɑni kwɑjji wøn kì yï Jwøgee, ɑ løøge kwɑ̈jji wøn. Codhe, ɑkɑ̈bbɑ kì kelli pëjji ókwër ki pyɑ̈rø wïdɑ́ryew, ɑ løg, Cerebiyɑ̀, kí Acɑbiyɑ̀, kí pyɑ̈rø kì kelli wɑddi gen. Kɑ ge rumɑ ɑ́tegø, kí dhɑb, kí jɑmmì møg-ɑ ɑ́muuj yi rɑ̈nhdwøng, geki jø tøg bure, kí jyɑ̈gge, kí tyëng Isrɑil bënn gɑ møg göög kì Kengi Jwøgee. Kɑ ge mëggɑ ókwër. Aköbbɑ gen kinni, “Wu bɑ ɑkwër wun ɑ́ mø Jwøng-ɑ Ácwɑ̈ɑ̈j, Jwøøg kweyyi wun, o jɑmmì møg bɑ ɑkwër thyew, o dhɑb kí ɑ́tegø, bɑ møg-ɑ ɑ́muuj ge mëgg-ɑ Jwøng-ɑ Ácwɑ̈ɑ̈j, Jwøøg kweyyi wun. Koru gen kidøøj gïti keny-ɑ órøm wun gen kì bøli ókwërr-ɑ døngø geki Kwɑrri Leebì, kí jyɑ̈ggi wɑ̈thi kɑ̈lli Isrɑil, keny-ɑ ówɑ̈dhi wɑ Yerusɑlem. Ge órøm kì yij kɑ̈ni Kengi Jwøng-ɑ Ácwɑ̈ɑ̈j.” Codhe, ɑkwɑɑny ɑ́tegø, kí dhɑb, kí jɑmm-ɑ kyeelø yi ókwër geki Kwɑrri Leebì, kinni o gï kɑ̈ɑ̈l gen Kengi Jwøgee, kì Yerusɑlem. Adhwödh wøn kì kömi Nɑm Aɑbɑ̀ kì pyɑ̈rø wïdɑ́ryeew cyɑ̈nggi kyeel dwɑ̈tt, wø kedh-ɑ Yerusɑlem. Wø ɑ́kwɑy yi Jwøng-ɑ Ácwɑ̈ɑ̈j, kɑ wø korre ki tyëngmɑ̈ɑ̈nø, kí ji-ɑ di cuggi buddø kì yethi yëthi wøn thyew, kì yij weel wøn. Keny-ɑ ɑ́wɑ̈dhi wøn Yerusɑlem, ɑywöm wøn ri wøn ki cyɑ̈ng ɑ́dɑ̈g. Kì ngween cyɑ̈ng, ɑrøm wøn ɑ́tegø, kí dhɑb, kí jɑmm-ɑ kyeelø kì Kengi Jwøgee. Kɑ ge mëggi wøn ókwërø Meremöth wɑ̈d Uriyɑ̀ geki Eliɑdhɑr wɑ̈d Pineɑs, kí Kwɑrri Leebì ɑ́ryew, ɑ løg Yödhɑbɑd wɑ̈d Jöcwø geki Noɑdiyɑ̀ wɑ̈d Binuy. Jɑmmì bënn ɑ́kwɑn kɑ ge røm. Codhe, ɑgweed møgɑni bënn kì bøli kenyɑni ceth. Kɑ tyëng-ɑ ɑ́dwöög kì yïnø bënn omuujø ki gëdhhì møg rɑ̈bbi Jwøøg Isrɑil. Ge ɑ́muuj-ɑ wɑ̈dhh pyɑ̈rø wïdɑ́ryew kipe Isrɑil bëne, kí órömm-ɑ døngø pyɑ̈r ɑ́bïngwen wïdɑ́bïkyel, kí órömm-ɑ thønhø pyɑ̈r ɑ́bïryew wïdɑ́bïryew, kí ónyögg pyɑ̈rø wïdɑ́ryew gɑ gëdhhi orøg. Møgɑni bënn ge ɑ́rɑ̈bbi Jwøng-ɑ Ácwɑ̈ɑ̈j gɑ gëdhhì. Wɑ̈jj-ɑ ɑ́gwed yi Rɑ̈nhdwøng Artɑkerkes, e gwëd-ɑ jyɑ̈ggi rɑ̈dh, kí jøg-ɑ jyɑ̈gø kì yij mïïrì, kí jɑggi myërri løøg Nɑm Porɑt kì wɑɑng cyɑ̈ɑ̈ng böörø, ɑ́muuj gen. Kɑ ge køny yi tyëngɑni, ki gwøøg Kengi Jwøk, ni kɑ ɑ́cïg rɑ̈nhdwøng. Keny-ɑ ɑ́rum jɑmmɑni ki gwøgø bënn, kɑ kwï jɑggi tyëng Isrɑil bï-ɑ yïɑ, ɑkööb gen kinni, “Tyëng Isrɑil, kí ókwër, kí Kwɑrri Leebì ɑ́bëëd ri gen nuti dɑ̈ɑ̈ng gen ki tyëng-ɑ bëëdø kì piny men geki rɑjji gen, ɑ løg tyëng Amön, kí Moɑb, kí Rïp, kí Kɑnɑɑn, kí Kit, kí Perïdh, kí Yebus, kí Amör. Ge ɑ́bëëd ge gøgg-ɑ gïgrijjø møg-ɑ ɑ́gøggi yi jiɑni. Tyëng Isrɑil ɑ́nyömi ki nyigi jurr-ɑ kyeelø, kɑ jii Jwøk møg-ɑ ɑ́kwër oywëdhø, bɑ pëjjì geki jyɑ̈ggi mïïri ɑ ɑ́cɑg møgɑni.” Keny-ɑ ɑ́lïngɑ møgɑni ɑkɑgɑ ógudhɑ, kɑ yëyyi wïjɑ geki yëyyi tïgɑ pyedɑ, ɑpëggɑ piny yɑ juudø yi rɑ̈ɑ̈m pyëwɑ. Abëën tyëng-ɑ ɑ́bwøg yi kwøbbi Jwøøg Isrɑil, kí gïgrijjø møg-ɑ ɑ́gwøg yi tyëng-ɑ ɑ́dwöög kì yïnø, kɑ ri gen cøng gen butɑ, yɑ obëëdø kì piny yɑ juudø gïti bøli kej gënhi böörø. Keny-ɑ ɑ́wɑ̈nhi bøli kej gënhi böörø, ɑdhwödhɑ mɑl kì keny-ɑ ɑ́bëëdɑ yɑ juudø, kí ógudh møg-ɑ kɑgø kì riɑ, ɑbøødhɑ riɑ piny, kɑ cinggɑ thɑ̈ngɑ Jwøng-ɑ Ácwɑ̈ɑ̈j, Jwøgɑ, Akööbɑ kinni, “Yïn ɑ Jwøk, wïjɑ ólɑ̈yyø, yɑ óböggø ki tïngi wïjɑ mɑl kì bøli, mɑ́ orøøg wøn dwøng cɑrø, wɑ̈thi wøn pöödh en. Wø ɑ́røngi ki orøg me dwøng, cɑg kì ri kweyyi wøn, pïd dicyɑ̈ngtïn. Kì bɑng orøøg wøn, wøki rɑ̈nhi wøn, kí ókwërri wøn, ɑ ɑ́pɑ̈dhi wøn cinggi rɑ̈nhì mø pɑth, o wø nɑ̈g yi gen, o wø køøl yïnø, o jɑmmi wøn kɑb yi gen, o wø göggi ki ɑyɑ̈r yi gen, ni gïg-ɑ nudd ge ogøggø yi wøn gïti dicyɑ̈ngtïn. De ɑnɑn, yïn ɑ Jwøng-ɑ Ácwɑ̈ɑ̈j, Jwøøg wøn, wø ɑ́göggí ki gïndøj kɑ keny me thiinh, yï ɑ́wïyi ki kwï ji møg döng ge nuti kïdhi yïnø, kɑ wø wëggí bëëdø kì kej kwër, e bong gïn böggi yi wøn. Wø ɑ́gøny yi yïn kì yij bɑ̈ɑ̈ngø, kɑ wø nëngí ki nënnì mø nyɑ̈n. Wø ɑ́bëëd wø bɑ bɑ̈ngg, de wø nuti wëggi yïn cöög yij bɑ̈ɑ̈ngø. Wø ɑ́wëggí wørø yi rɑ̈nhi Pɑres, ɑwëggi wøn bëëdø kì pönhï yi gen, o Kengí, Keng-ɑ ɑ́bëëd e rënyø ger yi wøn, o wø bëëd wøn wø pɑ böggi kì Yeudiyɑ̀ geki Yerusɑlem. “Anɑn yïn ɑ Jwøk, ɑ́ ngø ɑ ókwøb yi wøn kì bɑng møg? Ciggí ɑ́pyem yi wøn. Cigg-ɑ ɑ́mëggí wøn ki cinggi bɑ̈nggí, tyëngtöng kinni, piny-ɑ yije kedhi yi wøn, ɑ́ men kwɑny yi wøn, bɑ piny me rɑj; pinyɑni bëne ɑ́rum ki rënyø yi ji-ɑ bëëdø kì yije, ki gïgrijjø møg-ɑ ɑ́gøggi yi gen. Wø ɑ́kyëddi yi gen kinni, wɑ̈ddi wøn ko nyömi ki nyigi tyëngɑni, kɑ nyigi wøn ko nywøm yi wɑ̈ddi gen. I wø ko wöl rumø kì ri kwøbbi mër kí gïndøj ki per gen. Kipe kinni o wø óbëëd wøn wø teg, o gïgdøj mø pinyɑni ócɑm yi wøn, o pinyɑni óbëëde ɑ́ mi kwɑrri wøn gïti ɑtheer. Gïg-ɑ ɑ́bï kömi wøn bënn bɑ gööj orøng-ɑ ɑ́gwøg yi wøn, orøng-ɑ ɑ́gwøg yi wøn, ngɑ̈nyi yi wøn kinni yï bɑ Jwøøg wøn, ɑ nyi cɑy wøn ki cɑ́y mø nøg kibøli orøøg wøn, wø nuti nɑ̈ɑ̈g yïn. Ciggí ɑ́døøg ki pyemø yi wøn kidï këti, ɑnyömi wøn ki nyigi jurr-ɑ rijjø ni møg? Ngɑ̈nyi yi wøn kinni keløg wø ogöögø ki gïn ni menɑni, pyëwí órënyi, kɑ wø nɑ̈g yi yïn wø bënn, e bong ngɑn wiy yi yïn e onëënø. Jwøng-ɑ Ácwɑ̈ɑ̈j, Jwøøg Isrɑil, bene yïn ɑ døj, mɑ́ wø ɑ́wiy yi yïn wø onëënø, wøn ɑ bølí ek ki orøøg wøn, wø pɑ døøj ki cung kì bølí.” Kɑ̈ng-ɑ ɑ́bëëd Edhrɑ̀ ree bøødh en piny kì bøli Kengi Jwøk, e óywöngø e gøny-ɑ orøngɑni, ɑbëën tyëng Isrɑil mø gïïr yïe. Tyëngɑni kelli gen dɑ jøg-ɑ cwøw, kí tyëng-ɑ mɑ̈nn, kí othønhø, mɑ́ ji ɑ́ywöngi ki ywøg me teeg. Aköbbi Edhrɑ̀ yi Cekɑniyɑ̀ wɑ̈d Yekiel, wɑ̈d Elɑm kinni, “Yïëyø mi wøn ki Jwøk ɑ́wiy yi wøn keny-ɑ ɑ́nyömi wøn ki nyigi jurr-ɑ kyeelø, de cɑgg ɑ́ kinøw, Isrɑil nudd yïe dɑ ngɑ̈ɑ̈dhø. Wø ceg-ɑ köngø kì bøli Jwøgee kinni, mɑ̈nn-ɑ pɑth møgɑni ge ceg kɑ tɑ̈ngø yi wøn, ge ócyeddi yi wøn, geki nyigi gen. Gïn-ɑ óköbbí wøn wuki tyëng-ɑ böggi Jwøk ógwøg yi wøn, gen ɑ møg-ɑ kømmi yi Ciggi Jwøk. Edhrɑ̀, gwøg ying-ɑ cingí, göög yï ókøny yi wøn.” Codhe, kɑ pëjjì kí ókwër geki Kwɑrri Leebì, kí kwï tyëng-ɑ kyeelø bënn, köbbi köngø yi Edhrɑ̀ kinni møg-ɑ ɑ́kwøb yi Cekɑniyɑ̀ ógwøg yi gen ceth. Adhwödh Edhrɑ̀ kì bøli Kengi Jwøk, kɑ kedh-ɑ keny-ɑ nyi bëëd yi Yöɑnɑn wɑ̈d Eliɑcïb, ɑlɑnge wɑ̈r pyëwe orɑ̈mø yi gïnrɑj men-ɑ ɑ́gwøg yi tyëng-ɑ ɑ́dwöög kì yïnø. Edhrɑ̀ nuti cyɑ̈mø wɑlɑ̀ nuti mɑ̈dhø ki gïïpiny. Aör wöödø Yerusɑlem geki Yeudiyɑ̀ bënn kinni, tyëng-ɑ ɑ́dwöög kì yïnø bënn cøng gen ri gen Yerusɑlem. Ngɑn-ɑ pɑ bï kì yethi cyɑ̈ng ɑ́dɑ̈g ni kɑ ɑ́kwøbii yi pëjjì, jɑmme bënn ceg kɑ kwɑnyø, o en kiree, pɑ bëëdø ɑ́ dhɑnhø ɑ́kyel kì kelli teen-ɑ ɑ́dwöög kì yïnø. Codhe, kɑ jøg-ɑ bëëdø kì piny Ben Yɑmïn geki Yeudɑ̀ bënn ri gen cøng gen, kì yethi cyɑ̈ng ɑ́dɑ̈g, kì bïngween dwɑ̈tt, kì cyɑ̈nggi dwɑ̈y pyɑ̈r ɑ́ryew. Ge ɑ́cug ɑ Yerusɑlem kì bøli Kengi Jwøk, dëlli gen okïïrø yi tegi kødh geki tegi kwøbb-ɑ́ per gen ɑ́cugi. Adhwödhi ókwërø Edhrɑ̀ mɑl, kɑ gï köbbe kinni, “Cigg nuti mïdhø yi wun keny-ɑ ɑ́nyömi wun ki nyigi jurr-ɑ kyeelø, kɑ bɑ̈jji Isrɑil med yi wun. Anɑn yewi wun ki orøøg wun kì bøli Jwøng-ɑ Ácwɑ̈ɑ̈j, Jwøøg kweyyi wun. Kɑ wu nyi gwøgu gïg-ɑ dwɑddi yi en, kɑ ri wun lɑ̈ɑ̈w wun ki tyëngpɑth møg-ɑ bëëdø kì pinyee, kɑ mɑ̈nni wun, ɑ løg nyigi jurr-ɑ kyeelø tɑ̈ng wun.” Alöggi ji bënn ge óryeerø kinni, “Møg-ɑ ɑ́köbbí wøn, ógwøg yi wøn ceth.” Akööb gen kinni, “Kødh dwøng, o ji pɑ cuggi cung kì wɑ̈g. Gwøg men pɑ cuggi tyëgø ki cyɑ̈ng ɑ́kyel wɑlɑ̀ ɑ́ryew, mɑ́ ji mø gïïr kì kelli wøn ɑ ɑ́røngi. Wiy jɑggi wøn bëëd gen kì Yerusɑlem, ge nenn-ɑ møgɑni. O jøg-ɑ yï gen di nyigi jurr-ɑ kyeelø bï gen kì bøli keny-ɑ ókwøb geki jøgdøngø kí jɑgg. Codhe, o cɑ́yi Jwøgee bï gen wɑ̈g kì kömee.” Bong ngɑn mɑ ɑ́bɑny møgɑni, den-ɑ́ Yönɑthɑn wɑ̈d Asɑiil geki Yɑɑdheiyɑ̀ wɑ̈d Tikbɑ̀ keti gen, kɑ mø gen yïëy yi Meculɑm geki Cɑbethɑy Kwɑrri Leebì. Møgɑni ɑ́yïëy yi tyëng-ɑ ɑ́dwöög kì yïnø, ɑyïëy ókwërø Edhrɑ̀ kɑ ókɑ̈bbø ki jɑggi wɑ̈thi kɑ̈llì, mø gwed nyingi gïn. Ge ɑ́cɑ̈g ɑ kyeel cyɑ̈nggi pyɑ̈ri dwɑ̈tt, ɑpëggi gen piny be yɑbi thɑ́ møgɑni. Kɑ tyëng-ɑ nyömø ki nyigi jurr-ɑ kyeelø óthumø ki yodø kì cyɑ̈ng-ɑ mɑl kì kyeel dwɑ̈tt. Møg bene gen nyingi jøg-ɑ yï gen ɑ́di nyigi jurr-ɑ kyeelø: Wïj gøl Jöcwø geki kɑ̈lli nyiimen yɑɑg-ɑ cwøw, wɑ̈ddi Yödhɑdɑk. Mɑɑseiyɑ̀, kí Eliedher, kí Yɑrïb kí Gedɑliyɑ̀. Ge ɑ́yïëy kinni mɑ̈nni gen ótɑ̈ng yi gen ceth, kɑ ge omuujø ki dyel ɑ́ gënhi orøøg gen. Gøl Imer: Aɑnɑnì geki Dhebɑdiyɑ̀. Gøl Arïm: Mɑɑseiyɑ̀, Eliyɑ̀, Cemɑiyɑ̀, Yekiel, kí Udhiyɑ̀. Gøl Pɑcur: Eliönɑy, Mɑɑseiyɑ̀, Icmɑil, Nethɑnel, Yödhɑbɑd, kí Elɑsɑ̀. Yödhɑbɑd, Cimeì, Kelɑiyɑ̀ (ɑ cwøl ɑ́ Kelitɑ̀), Pethɑiyɑ̀, Yeudɑ̀, kí Eliedher. bɑ Eliɑcïb Cɑlum, Telem, kí Urì. Gøl Pɑröc: Rɑmiyɑ̀, Idhiyɑ̀, Mɑlkiyɑ̀, Miyɑmïn, Eliɑdhɑr, kí Mɑlkiyɑ̀, kí Benɑiyɑ̀. Gøl Elɑm: Mɑtɑniyɑ̀, Dhekɑriyɑ̀, Yekiel, Abdì, Yeremöth, kí Eliyɑ̀ Gøl Dhɑtu: Eliönɑy, Eliɑcïb, Mɑtɑniyɑ̀, Yeremöth, Dhɑbɑd, kí Adhïdhɑ̀. Gøl Bebɑy: Yöɑnɑn, Aɑnɑniyɑ̀, Dhɑbɑy, kí Athlɑy. Gøl Bɑnì: Meculɑm, Mɑluk, Adɑiyɑ̀, Yɑcub, Ceɑl kí Yeremöth. Gøl Pɑkɑth Moɑb: Adnɑ̀, Kelɑl, Benɑiyɑ̀, Mɑɑseiyɑ̀, Mɑtɑniyɑ̀, Bedhɑlel, Binuy, kí Mɑnɑsè. Gøl Acum: Mɑtenɑy, Mɑtɑtɑ̀, Dhɑbɑd, Elipelet, Yeremɑy, Mɑnɑsè, kí Cimeì. Gøl Nebö: Yeiel, Mɑtithiyɑ̀, Dhɑbɑd, Dhebïnɑ̀, Yɑdɑy, Yöiil, kí Benɑiyɑ̀. Jøgɑni bënn ge ɑ́nywøm-ɑ nyigi jurrì møøgø, kɑ mɑ̈nnɑni ryem gen bënn geki nyigi gen. Møg bene gïg-ɑ ɑ́gwøg yi Nëmɑyɑ̀ wɑ̈d Akɑliyɑ̀. Kì dwɑ̈y Kisleb, e Artɑkerkes, rɑ̈nhdwøøng Pɑres yïe dɑ runn pyɑ̈r ɑ́ryew kì yij lɑwø, yɑn yɑ Nëmɑyɑ̀, yɑ ɑ́bëëd yɑ ying-ɑ Susɑ̀ kɑɑldwøng. Kɑ Aɑnɑnì ómïɑ obëënø, e kɑ̈ɑ̈l-ɑ Yeudiyɑ̀ geki ji møøgø. Kɑ pyëjɑ kiper Yerusɑlem, kí wɑddi wøn, Yeud møg-ɑ ɑ́bodh kɑ ge odøøgø kì Bɑbïlöniyɑ̀ kun-ɑ ɑ́kïdhi gen. Kɑ yɑ köbbi yi gen kinni i tyëng-ɑ ɑ́wɑ̈dhi pödhi wøn ying-ɑ yij orɑng me teg, kì bɑng kɑ̀ bëëd ge óyɑ̈ɑ̈rø yi tyëngpɑth. Yɑ ɑ́köbbi yi gen thyew i döri Yerusɑlem nudd e pɑ̈ɑ̈dhø, o thïggi döre bɑ ɑrɑ̈b. Keny-ɑ ɑ́lïngɑ møgɑni bënn, ɑpëggɑ piny kɑ yɑ óywöngø. Yɑ ɑ́mɑ̈gi ki cyɑ̈ng mø gïïr yɑ okïïmø, o yɑ nuti cyɑ̈mø. Kɑ Jwøk kwɑjjɑ kinni, “Wuö Jwøøg Mɑl! Yï dwøng, o wø óböggø yi yïn. Møg-ɑ ɑ́yïëy yi yïn nyii mïdhø yi yïn kidøøj, kipe tyëng-ɑ mɑɑr yïn ge mïdh-ɑ ciggí. Lugí thɑ̈wwí yɑn, yïn ɑ Jwøng-ɑ Ácwɑ̈ɑ̈j, kɑ kwɑ̈jjɑ lïngí, kenyi kwɑ̈jjɑ kì wɑ̈r kí dicɑ̈ng kipe bɑ̈nggí, ɑ løg tyëng Isrɑil. Yɑ ɑ́yïëy kinni, wø ɑ́røngi, wø tyëng Isrɑil, wø ɑ́røngi wøki kweyyi wøn. Wø ɑ́göög ki gïjø me rɑj kì bølí, o wø nuti gwøg ki møg-ɑ ɑ́cïgi wøn, ciggí møg-ɑ ɑ́mëggi wøn yi bɑ̈ngí Mosɑ̀ nuti mïdhø yi wøn. Anɑn pɑr møg-ɑ ɑ́köbbí Mosɑ̀ kinni, ‘Wu tyëng Isrɑil, keløg ciggɑ koo mïdhi yi wun, wu kedhhɑ’ kedhhø kì kelli pödhh. De keløg wu dwöög-ɑ köörɑ, kɑ møg-ɑ ɑ́köbbɑ wun gwøg yi wun, wu dwöögɑ’ keny-ɑ ɑ́myeg yi yɑn ɑ́ keny nyi mɑlli yɑn, cɑgg wu tɑɑy kömi piny.’ “Wuö, møg bɑ bɑ̈nggí, jií ceth. Ge ɑ́yiel-ɑ yi yïn ki tegí, teng-ɑ dwøng. Lïngí kwɑ̈jjɑ kí kwɑ̈jji bɑ̈nggí møg-ɑ wør yïn bënn. Wiy yɑ yodɑ gïn-ɑ dwɑddɑ dicyɑ̈ngtïn, kɑ wiy rɑ̈nhdwøng pyëwe lɑ̈ɑ̈me ki yɑn.” Ábëëd ɑ́ yɑn ɑ nyi kɑ̈lli møgi oløg mi rɑ̈nhdwøng kì yethi cyɑ̈nggɑni. Cyɑ̈ng ɑ́kyel kì bɑng dwɑ̈tt ɑ́ngwen, e Rɑ̈nhdwøng Artɑkerkes ocyɑ̈mø, ɑmuujɑ en ki møgi oløg. Yɑ nuti liidh en cyɑ̈ng ɑ́kyel e pyëwɑ nënne e pɑ med. Codhe, ɑpyëje yɑn kinni, “Yïde ɑ nënní yï juudø, o dëlí pɑ rɑ̈mø? Men bɑ rɑ̈ɑ̈m pyëw.” Kɑ yɑ obwøgø, ɑlöggɑ kinni, “Yï ómïdhi yi Jwøk wuö gïti ɑtheer, yɑ óbëëdø pyëwɑ med kidï, e kɑɑl-ɑ́ yije ɑ́koony kweyyi wøn ótørrø, o thïgge órɑ̈bø ki mɑc?” Apëjji rɑ̈nhdwøng kinni, “Á gïn ɑ dwɑddi yi yïn?” Kɑ Jwøøg Mɑl kwɑjjɑ. Codhe, ɑköbbɑ rɑ̈nhdwøng kinni, “Keløg pyëwí med ki yɑn wuö, o yï dwɑdd-ɑ muuji gïn-ɑ kwɑjjɑ, ör yɑn Yeudiyɑ̀, kɑɑl-ɑ ɑ́koony kweyyɑ, o døøgɑ ki gerø.” Aköbbi yɑn yi rɑ̈nhdwøng, (e bɑ̈rɑ̈dh obëëdø kì bute) kinni, “Yï ótyëg-ɑ keny me bëëdø kidï yï tøøk, o yï ódwöög kì wɑɑng?” Kɑ köbbɑ. Akwɑjjɑ en kinni gwëde yɑn ki wɑ̈j møg muujɑ jɑggi myërri løøg Nɑm Porɑt kì wɑɑng cyɑ̈ɑ̈ng böörø, møg köbbi gen kinni wiy gen yɑn, o yɑ kedhɑ Yeudiyɑ̀. Yɑ ɑ́cwöddi thyew ki wɑ̈nyø men mëggɑ Asɑp, jɑl-ɑ mïdhi thïm rɑ̈nhdwøng, o yɑ nënge ki yenh møg gwøøg thïggi ønteg men-ɑ nyi koor Kengø, kí thïggi dhøggi döri kɑɑl, kí thïggi gøl-ɑ óbëëdɑ. Kɑ yɑ mëggi gïg-ɑ ɑ́cwøl yi yɑn bënn yi rɑ̈nhdwøng, mɑ́ yɑ ɑ́ceg kɑ kønyø yi Jwøk. Rɑ̈nhdwøng ɑ́muuj ki pëjji jøliny tyel, kí jøkyënyì møg lwøøg wøn. Kɑ yɑ kedh-ɑ myërri løøg Nɑm Porɑt kì wɑɑng cyɑ̈ɑ̈ng böörø. Kɑ wɑ̈jj-ɑ ɑ́gwëdi jɑggi myërrɑni yi rɑ̈nhdwøng mëggɑ gen. De Sɑnbɑlɑt jɑl kɑɑl Bet Örøn geki Töbiyɑ̀ jɑl myërri Amön, pëthi gen ɑ́ceg rënyø keny-ɑ ɑ́lïng gen kinni i dɑ dhɑnhø me bëën be göggi tyëng Isrɑil ki gïndøj. Yɑ ɑ́kedhi Yerusɑlem, kɑ yɑ obëëdø ki cyɑ̈ng ɑ́dɑ̈g, e bong dhɑnhø mɑ ɑ́köbbɑ møg-ɑ ɑ́nyudhi yɑn yi Jwøk gɑ møg göggɑ Yerusɑlem. Kɑ yɑ odhwödhø kì dïwɑ̈r, yɑ ɑ́cwøl-ɑ ji mø nøg kì kelli jøgɑ. Aderø kete ɑ ɑ́kɑ̈l yi wøn, ɑ́ men köme cyɑ̈dhɑ. Yɑ ɑ́kedhi wɑ̈g kì wɑ̈r, kɑ yɑ kɑ̈l-ɑ Dhøg Tör kì wɑɑng cyɑ̈ɑ̈ng böörø, kɑ wø yöd-ɑ wɑɑng wurlwɑl, kɑ wø kɑ̈l-ɑ buti Wɑɑng Pï, wø pödh-ɑ Dhøg Thur. Yɑ ɑ́cyɑ̈dhi yɑ nenn-ɑ döri kɑɑl keny-ɑ ótørrii, kí thïgge keny-ɑ ɑ́rɑ̈ɑ̈b gen ki mɑc. Codhe, ɑkedhɑ Dhøg Wɑɑng Pï, geki Luuy Rɑ̈dh kì tung-ɑ wɑɑng wuudø. Kɑ ɑder-ɑ köme cyɑ̈dhɑ ojɑdø ki keny kɑ̈ɑ̈le yi tuggì, ɑdøøgɑ yɑ kɑ̈ll-ɑ yij töör Kidrön, yɑ nenn-ɑ dörø. Codhe, ɑløgɑ riɑ yuu-ɑ ɑ́kɑ̈ɑ̈lɑ, kɑ yɑ døøg-ɑ kɑɑl yɑ kɑ̈l-ɑ Dhøg Tör. Bong dhɑnhø kì kelli jɑggi kɑɑlɑni mɑ ɑ́yod kun-ɑ ɑ́kedhɑ, wɑlɑ̀ gïn-ɑ ɑ́gwøgɑ, thyew ɑ́bëëd e bong gïjø mɑ ɑ́köbbɑ wɑddi wøn Yeud, ɑ løg ókwër, kí jɑgg, kí pëjjì, kí tyëng-ɑ ɑ́kunyi ki gwøg bënn. Aköbbɑ gen kinni, “Wu onëënø ki rɑj møg-ɑ yethi gen di wɑ, kí bëëdi Yerusɑlem e rënyø, thïgge bɑ ɑrɑ̈b ki mɑc. Ger wɑ döri Yerusɑlem, o ɑyɑ̈r men-ɑ kömee lɑ̈ɑ̈nye.” Kɑ ge köbbɑ ki kër-ɑ ɑ́køny yɑn yi Jwøk, kí møg-ɑ ɑ́köbbi yɑn yi rɑ̈nhdwøng. Alöggi gen kinni, “Cɑ̈gi wɑ ki gyer!” Kɑ pëthi gen cwïddi gen gwøg. Keny-ɑ ɑ́lïngi møgɑni yi Sɑnbɑlɑt, geki Töbiyɑ̀, kí wɑ̈d Árɑb me cwøl ɑ́ Gecem, ɑgɑ̈ɑ̈g gen ge okööbø kinni, “Wu orumø kinni wu gwøg-ɑ ngø? Wu pɑ pyem-ɑ kwøbbi rɑ̈nhdwøng?” Alöggɑ kinni, “Wø ókøny yi Jwøøg Mɑl, kɑ gwøngɑni tyëg yi wøn. Wø bɑ bɑ̈ngge, o wø ceg-ɑ cɑ̈gø ki gyer ceth. De bong gïi wun kì Yerusɑlem, o bong kwööng wun kì yije.” Møg bɑ kwøbbi kër-ɑ ɑ́døøg döri kɑɑldwøng ki gerø. Eliɑcïb, Ókwër-ɑ Dwøng geki ókwër, ge ɑ́ger-ɑ tung-ɑ Dhøg Dyëg, kɑ thïgge cïb gen, kɑ gø thyey gen. Dörø ɑ́thyey yi gen gïti Ønbɑ̈r mi Miyø, ki Ønbɑ̈r mi Anɑnel. Kɑ bun-ɑ bɑnge ger yi jø Yerikö. Kɑ bun-ɑ bɑnge ger yi Dhɑkur wɑ̈d Imrì. Gøl Asenɑ̀ ɑ́ger-ɑ tung-ɑ Dhøg Rij. Kɑ win geki thïg cïb gen kɑ̈jji gen, kɑ rïwwi geki ɑdëdd cïb gen. Meremöth wɑ̈d Uriyɑ̀, wɑ̈d Aködh, ɑ ɑ́ger bun-ɑ bɑnge. Meculɑm wɑ̈d Berekiyɑ̀, wɑ̈d Mecedhɑbel, ɑ ɑ́ger bun-ɑ bɑnge. Bɑnge ɑ ɑ́gëëd yi Dhɑdök wɑ̈d Bɑɑnɑ̀. Bun-ɑ bɑnge ɑ́ger-ɑ yi jø Tekoɑ̀, de jɑggi kɑɑlɑni ɑ́bɑ̈nyi geri keny-ɑ ɑ́mëggi gen yi jyɑ̈ggi gwøg. Yöyɑdɑ̀ wɑ̈d Pɑseɑ̀ geki Meculɑm wɑ̈d Besodeiyɑ̀, ɑ ɑ́ger tung-ɑ Dhøg Yecɑnɑ̀. Kɑ win geki thïg cïb gen kɑ̈jji gen, kɑ rïwwi geki ɑdëdd cïb gen. Melɑtiyɑ̀ jɑl Gibeon, kí Yɑdön jɑl Merönöth, kí jø Gibeon kí Midhpɑ̀, gen ɑ ɑ́ger bun-ɑ bɑnge gïti gøl jɑngi myërri løøg Nɑm Porɑt kì wɑɑng cyɑ̈ɑ̈ng böörø. Udhiel wɑ̈d Kɑrɑiyɑ̀, ɑ bɑ bødhi dhɑb, ɑ ɑ́ger bun-ɑ bɑnge. Aɑnɑniyɑ̀, jɑlgwøg ki mɑ̈th-ɑ yømi gen med, ɑ ɑ́ger bun-ɑ bɑnge gïti Dör-ɑ bɑ Dhïl. Repɑiyɑ̀ wɑ̈d Ur jɑngi budi Mɑrkɑdh Yerusɑlem, ɑ ɑ́ger bun-ɑ bɑnge. Yedɑiyɑ̀ wɑ̈d Arumɑp, ɑ ɑ́ger bun-ɑ bɑnge, o bunɑni ɑ́ying-ɑ buti gøle. Atuc wɑ̈d Aɑcɑbneiyɑ̀, ɑ ɑ́ger bun-ɑ bɑnge. Mɑlkiyɑ̀ wɑ̈d Arïm geki Acub wɑ̈d Pɑkɑth Moɑb, ɑ ɑ́ger bun-ɑ bɑnge geki Ønbɑ̈r mi Purun. Cɑlum wɑ̈d Alöec jɑngi budi Mɑrkɑdh Yerusɑlem bun-ɑ kyeelø, ɑ ɑ́ger bun-ɑ bɑnge. (Ákøny-ɑ yi nyige, womɑ̈nn ki gwøg.) Anun geki ji møg-ɑ bëëdø kì kɑɑl Dhɑnoɑ̀ ɑ ɑ́ger tung-ɑ Dhøg Tör. Kɑ win geki thïg cïb gen kɑ̈jji gen, kɑ rïwwi geki ɑ́dëdd cïb gen, kɑ dörø thïg yi gen, e bɑ̈re bɑ mïtïr miy ɑ́ngwen kí pyɑ̈r ɑ́ngwen, e gït-ɑ buti Dhøg Thur. Mɑlkiyɑ̀ wɑ̈d Rekɑb, jɑngi Bet Akerem, ɑ ɑ́thïg dör-ɑ tung-ɑ Dhøg Thur, kɑ thïgge cïbe, kɑ ɑdëdde, kí rïwwe cïbe. Cɑlum wɑ̈d Kölödhè, jɑngi Midhpɑ̀, ɑ ɑ́ger Dhøg Wɑɑng Pï. Kí yuu-ɑ kedhi dhøngɑni, kɑ thïgge cïbe, kí ɑdëdde, kí rïwwe. Kɑ dör-ɑ buti bɑɑg gøldwøng men-ɑ nyi cwøl ɑ́ Luuy Celɑ̀ gere gïti buti yuu-ɑ nyi yethi pɑ Debïd. Nëmɑyɑ̀ wɑ̈d Adhbuk jɑl-ɑ jɑɑg budi kɑɑl Betdhur, ɑ ɑ́ger bun-ɑ bɑnge, e gït-ɑ röri Debïd, kí luy, kí kɑ̈jj-ɑ nyi bëëd yi jøliny. Kɑ kwï dörø men-ɑ ɑ́döng ger yi Kwɑrri Leebì møg: Reum wɑ̈d Bɑnì, ɑ ɑ́ger bun-ɑ bɑnge, Ageer bun-ɑ bɑnge yi Acɑbiyɑ̀, jɑngi budi kɑɑl Keilɑ̀, e ger-ɑ kej kɑɑl gen. Bɑbɑy wɑ̈d Ënɑdɑd jɑl-ɑ jɑɑg budi Keilɑ̀ bun-ɑ kyeelø, ɑ ɑ́ger bun-ɑ bɑnge. Edher wɑ̈d Yëcuɑ̀, jɑngi Midhpɑ̀, ɑ ɑ́ger bun-ɑ cɑ̈gi kì ri ød jɑmmi liny gïti ɑ́duud dörø. Bɑruk wɑ̈d Dhɑbɑy ɑ ɑ́ger bun-ɑ bɑnge, cɑg kì ri ɑ́dunɑni gïti gøl Eliɑcïb, Ókwër-ɑ Dwøng. Meremöth wɑ̈d Uriyɑ̀ wɑ̈d Aködh ɑ ɑ́ger bun-ɑ bɑnge gïti cögi gøl Eliɑcïb. Budi dörø men-ɑ bɑnge, ɑ́ger-ɑ yi ókwër møg: Ókwërr-ɑ bëëdø kì myërr-ɑ buti Yerusɑlem, ɑ ɑ́ger bun-ɑ bɑnge. Ben Yɑmïn geki Acub, ɑ ɑ́ger bun-ɑ buti kɑ̈lli gen. O Adhɑriyɑ̀ wɑ̈d Mɑɑseiyɑ̀, wɑ̈d Anɑniyɑ̀, ɑ́ger-ɑ dör-ɑ buti gøle. Binuy wɑ̈d Ënɑdɑd, ɑ ɑ́ger bun-ɑ bɑnge, cɑg kì buti gøl Adhɑriyɑ̀, gïti ɑ́duud dörø. Jø Tekoɑ̀, ɑ ɑ́ger bun-ɑ bɑnge, e reb kɑ bun-ɑ ɑ́kwøng yi gen ki gerø, cɑg kì ønbɑ̈r men-ɑ dwøng, ɑ koor Kengø, e pïd-ɑ ri ønbɑ̈r men-ɑ buti Opel. Kɑ bun-ɑ kedhi kuni Dhøg Kyënyì ger yi ókwër, e ngɑn ger-ɑ keny-ɑ røøm ki gøle. Dhɑdök wɑ̈d Imer, ɑ ɑ́ger bun-ɑ bɑnge, o bunɑni røøm kɑ gøle. Cemɑiyɑ̀ wɑ̈d Cekɑniyɑ̀, jɑl-ɑ kor Dhøg Wɑɑng Cyɑ̈ɑ̈ng Mwøl, en ɑ ɑ́ger bun-ɑ bɑnge. Aɑnɑniyɑ̀ wɑ̈d Celemiyɑ̀ geki Anun, ɑ løg bïkyeel wɑ̈ddi Dhɑlɑp, gen ɑ ɑ́ger bun-ɑ bɑnge, o bɑ ryeew gyer kì yï gen. Meculɑm wɑ̈d Berekiyɑ̀, ɑ ɑ́ger bun-ɑ bɑnge, bunɑni røøm ki gøle. Mɑlkiyɑ̀ bødhi dhɑb, ɑ ɑ́ger bun-ɑ bɑnge, gïti buti øn-ɑ bɑ kej ngyew yi tyëng-ɑ nyi göögø kì Kengø, kì buti Dhøg Mipkɑd, kì buti øn-ɑ kömi wïj tøg dörø, kì wɑɑng wuudø kì kuni wɑɑng cyɑ̈ɑ̈ng mwøl. Bun-ɑ cyɑ̈n ɑ́ger-ɑ yi bödhhi dhɑb geki jøngyew, cɑg kì ɑ́duud dörø gïti Dhøg Dyëg. Keny-ɑ ɑ́lïng Sɑnbɑlɑt kinni wø Yeud, wø cɑ̈gø ki gyer ki dörø, ɑrënyi pyëwe ki mendwøng, kɑ ócɑ̈gø ki benyi wøn. Akööbe kì bøli mɑ̈dhhe geki jøliny kì Sɑmɑriyɑ̀ kinni, “Á ngø ɑ ceg ki dwɑddi gwøgø yi Yeud, ge nyødh ni møg? Ge dwɑdd-ɑ døøgi kɑɑlɑni ki gerø? Ge orumø kinni ke muuj gen ki gëdhhì, kɑɑlɑni ogerø yi gen ki cyɑ̈ng ɑ́kyel? Ópɑddi kïtt-ɑ ɑ́ying ri dörø ócuggø dwøøg be gyer yi gen ge rɑ̈bbø rɑ̈bbø?” Töbiyɑ̀ ɑ́bëëd e ócungø kì bute, ɑkööbe kinni, “Á dörø me ni ngø ɑ ger yi gen? Cɑgg ɑ́ ógwøgø, ke yedhe wïj dörɑni, gø pɑ dhure piny!” Akwɑjjɑ Jwøk kinni, “Wuö, Jwøk! Wiy byënyi gen døøge wɑ̈thi gen, wiy jɑmmi gen kɑb bënn, kɑ wiy ge kïdhi pödhh møøgø gɑ ɑmɑgg. Lɑɑwí ko dwöög piny kipe gïgrijjø møg-ɑ ɑ́gwøg yi gen, kɑ wïjí ko wïl ki orøøg gen, mɑ́ wø ɑ́gwɑddi yi gen wøn ɑ tyëng-ɑ gëdø.” Kɑ wø ogëdø ki dörø. Kɑ dörø wɑ̈dh-ɑ kööre kì bɑng keny me thiinh, mɑ́ pëthi ji dɑ gwøg. De Sɑnbɑlɑt, kí Töbiyɑ̀, kí Árɑb, kí tyëng Amön, kí tyëng Acdöd keny-ɑ ɑ́lïng gen kinni döri Yerusɑlem ɑ́cyɑ̈ngi ki rumø ki gerø yi wøn, o kɑ̈jj-ɑ pɑ̈ɑ̈dhø kì ri dörø ɑ́rum ki thïgø, kɑ pëthi gen ceg-ɑ rënyø ki mendwøng. Kɑ ge oyɑ̈bø ki yuu-ɑ ópɑ̈ɑ̈r gen kömi Yerusɑlem, o gwøg rënyi yi gen, de Jwøøg wøn ɑ́kwɑjji yi wøn, kɑ wø ókɑ̈bbø ki ji møg kurø kì wɑ̈r kí dicɑ̈ng. Tyëng Yeudiyɑ̀ yï gen ɑ́dɑ wör mø kööbø kinni, “Wø ɑ́nyönhi yi tyëddø ki gïgpeg, Dɑ börri kïttì møg dwɑddi yëëg pɑ̈l. Dörø óger yi wøn kidï dicyɑ̈ngtïn?” Tyëng-ɑ mɑɑn wøn ɑ́rum kinni i ge pɑ nenni yi wøn, wɑlɑ̀ ce gïg-ɑ gøggi yi gen kwïj yi wøn, gïti ke di wɑ̈nhi gen kömi wøn, o wø di nɑ̈g yi gen, o gwøøg wøn di cung yi gen. De Yeud møg-ɑ bëëdø kì kelli tyëngmɑ̈ɑ̈nø, nyi bï-ɑ be köbbi wøn, ki gïn-ɑ dwɑddi göggi wøn yi tyëngmɑ̈ɑ̈nø. Codhe, ɑcïbɑ cinggi ji ki pil, kí tøngg, kí wethh, kɑ ge cïmmɑ gɑ dhøggi kɑ̈llì kì ngɑ̈ɑ̈j dörø, kí kɑ̈jj-ɑ nuti thumø ki gerø. Kɑ ɑ́lïdhɑ kinni ji ɑ́bwøg, ɑköbbɑ gen, geki tyëngdøngø kí jøgwøg kinni, “Wu ko böggi yi tyëng-ɑ mɑɑn wɑ, pɑr wun Jwøge kí dönge, kí gïïngɑ̈ngø møg-ɑ nyi gwøge, kɑ wu nyïɑ̈ggi wun, kipe nyigi wun geki mɑ̈nni wun, kí kɑ̈lli wun thyew.” Kɑ yod yi tyëng-ɑ mɑɑn wøn kinni gïn-ɑ ɑ́dwɑddi gwøgø yi gen yood wøn, kɑ yod yi gen thyew kinni rummi gen ɑ́nɑ̈g yi Jwøk. Codhe, kɑ wø døøg-ɑ be gyer ki dörø wø bënn. Cɑ̈gi kì bøli kenyɑni, jøgɑ ɑ́pɑ̈ngɑ gɑ bud ɑ́ryew, kɑ̀ gëëd budø ɑ́kyel, bun-ɑ kyeelø ceg-ɑ kur, ge orugø ki ɑ́dhedheg, kí tøngg, kí ködd, kí wethh kì cinggi gen. Kɑ ji cïj yi jɑggi gen kidøøj. Ji møg-ɑ gëdø, kí ji møg-ɑ kɑ̈lli jɑmm-ɑ gëëd, dhɑnhø ɑ́göög-ɑ cingø ɑ́kyel, o cing-ɑ kyeelø mïdhe’ jɑmmi liny, kí pile gø twööj en pyere. Jɑl-ɑ ókodh kɑng ɑ́ying-ɑ butɑ. Kɑ jøgdøngø geki jɑgg kí ji bënn köbbɑ kinni, “Wɑ göögø kellee lɑ̈wi, o riee wɑɑd wɑ kö dörø. Keny-ɑ ólïngi wun ywøøg kɑng, kɑ ri wun cung wun butɑ, Jwøgee ónyïɑ̈ggi kiperee.” Kì yethi cyɑ̈ng bënn, wø nyi cɑ̈gi ki gwøg piny bɑ bɑ̈ɑ̈rø, kɑ wø nyii rïïjø wø ogöögø gïti kenyi yuudh wøw kɑ kyell ónënnø, budi ji ceg-ɑ gyer ki dörø, o bun-ɑ kyeelø ceg-ɑ kur kí tøngg kì cinggi gen. Aköbbɑ jøg-ɑ cinggi gen di gwøg, geki jøg-ɑ nyi køny gen kinni, nyi bëëd gen kì Yerusɑlem kì wɑ̈r, ge okurø, o gwøg nyi gwøg kì dicɑ̈ng. Ógudhɑ pɑ nyi kɑ̈ɑ̈l-ɑ wɑ̈g, cɑgg ɑ́ kì wɑ̈r, jøg-ɑ göög wøn, kí jøg-ɑ kurø, ógudhi gen pɑ nyi luny gen wɑ̈g thyew. Jɑmmi liny mø wøn pɑ nyi cïb wøn piny. Kì bɑng keny me thiinh, ɑcɑ̈gi ji mø gïïr ki køør, cwøw kí mɑ̈nn kì ri gïg-ɑ göggi gen yi wɑddi gen Yeud. Kwï gen ɑ́kööb kinni, “Kwɑnni wøn gïïr kì yethi kɑ̈lli wøn, wø dwɑdd-ɑ byel møg cɑm yi wøn kipe wø óywɑj yi kɑ̈j.” Kɑ møøgø okööbø kinni, “Wø ɑ́muuj ki pwödh, kí bɑ̈ggi oløg, kí kɑ̈lli wøn, ge ɑ́mëggi wøn tyëngmøøgø, kipe kinni o wø yïddi wøn ki byel møg cɑ̈mmi kɑ̈j yi wøn.” Kɑ kwï møøgø okööbø kinni, “Wø ɑ́ceg-ɑ wïdhø ki ngyëny møg col wøn gwɑ̈ɑ̈j rɑ̈dh men-ɑ ɑ́cïb kipe pwödhhi wøn, kí bɑ̈ggi oløg thyew. Wø bɑ Yeud ni gen, nyigi wøn pɑ pɑ̈r ki nyigi gen? De nyigi wøn ce ɑ́di rumø ki ngëwwi gen yi wøn gɑ bɑ̈ngg? Bong gïn cuggi ki gwøgø yi wøn, mɑ́ pwödhhi wøn kí bɑ̈ggi oløg ɑ́rum ki kwɑnyø kì cinggi wøn yi tyëng-ɑ́ ngyënyyi gen ɑ́widh yi wøn.” Arënyi pyëwɑ keny-ɑ ɑ́lïngɑ gøøny gen, kɑ yɑ okööbø kinni møgɑni ólidh yi yɑn. Kɑ jøgdøngø cɑyɑ geki jyɑ̈ggì bënn, kɑ ge köbbɑ kinni, “Wude ɑ guud wun nyingi nyiimï wun, Yeud?” Kɑ yɑ ócwöddø ki burø me dwøng kipe ɑkørrɑni. Kɑ yɑ okööbø kinni, “Wɑ ɑ́dwöög-ɑ nyiimïee wɑ̈g kì yij bɑ̈ɑ̈ngø kì cinggi tyëngpɑth møg-ɑ ɑ́ngew gen. De wude ɑ yöd wu dwɑdd-ɑ kinni o nyiimïee ri gen ngëwwi gen wun?” Kɑ jɑgg okudø, ge ɑ́jɑd ki gïn kwøb yi gen. Aköbbɑ gen kinni, “Gïn-ɑ gwøg yi wun rɑɑj! Yïëy wun Jwøk kɑ wu gwøg wun gïndøj. Kɑ tyëngmɑ̈ɑ̈nø, ɑ bɑ tyëngpɑth ko wëggi wun ki yöö men benyi gen wɑ. Ji møøgø ɑ́wïdhɑ ki ngyëny kí byel, kɑ ji møøgø ówïdhø kì yï mɑ̈dhhɑ. Kɑ tyëng-ɑ göögø ki yɑn, ji møøgø wïdhi gen ki ngyëny kí byel. Anɑn wiy wɑ møg-ɑ di culi wɑ bënn. Wiyu møg-ɑ ɑ́wïdhu ji bënn; ngyëny, kí byel, kí møgi oløg, kí møøw dhetun. Kɑ pwödhhi gen döggu gen, kí bɑ̈ggi gen, kí yenh dhetun, kí uddi gen bënn, ɑnɑn ceth!” Kɑ jɑgg ólöggø kinni, “Møg-ɑ ɑ́kwøb yi yïn ógwøg yi wøn. Jɑmmì ódöggi wøn wëëg gen, o jɑmm-ɑ ɑ́widh ócög ge pɑ culi wøn.” Acwöölɑ ókwër, kɑ jɑgg köbbɑ o ge köngi gen kì bøli ókwërrɑni, kinni møg-ɑ ɑ́kwøb yi gen ómïdhi yi gen ceth. Codhe, kɑ ɑcwɑdø men-ɑ ɑ́bëëd e twööj yɑn yijɑ pɑ̈ɑ̈dɑ wɑ̈g kɑ bɑ̈ɑ̈dɑ. Aköbbɑ gen kinni, “Men bene gïn-ɑ ógöggi dhɑnhø men-ɑ koo mïdhi møgɑni kì kelli wun yi Jwøk èn. Jwøk uddi wun kí jɑmmi wun ókwɑny yi en kì yï wun, kɑ wu wiye ki cinggi wun.” Akööb ji-ɑ ɑ́bëëd ge nud bënn kinni, “Amen.” Kɑ Jwøng-ɑ Ácwɑ̈ɑ̈j lenhi yi gen. Kɑ jyɑ̈ggì köngi gen mïdhi gen ceth. Ki kër-ɑ ɑ́kwɑɑny yɑn, yɑn ɑ́ jɑngi Yeudiyɑ̀, cɑg kì pyɑ̈r ɑ́ryeew runni Rɑ̈nhdwøng Artɑkerkes, gïti pyɑ̈r ɑ́dɑ̈g wïdɑ́ryeew runne kì yij lɑwø, yɑ nuti kɑ̈bbø kì yï ji ki gwɑ̈ny-ɑ nyi kwɑny ɑ́ mi gïgcɑmmi jɑgø, men di cɑm yi yɑn wøki jyɑ̈ggɑ, jøg-ɑ ɑ́kwöngi ki jyɑ̈gø kì bølɑ bënn, ge ɑ́bëëd ji orɑngø kì cinggi gen. Ge nyi cwøl-ɑ ngyëny ɑ́tegg pyɑ̈r ɑ́ngwen cyɑ̈ng ɑ́kyel, gɑ møg ngeew gïncɑm kí møgi oløg. Cɑgg ɑ́ bɑ̈nggi gen, nyingi ji ɑ́guud yi gen. De yɑ ɑ́bɑ̈ɑ̈n ki gen, mɑ́ yɑ wør-ɑ Jwøk. Tegɑ kí rummɑ ɑ́cïbɑ kömi geri dörø, ɑcögɑ e bong kɑ̈r mɑ ɑ́yodɑ. Kɑ jøgɑ bënn pëgg-ɑ be gwøg. Tɑwɑ nyi cyɑ̈ɑ̈m-ɑ yi Yeud mø kwɑnni gen bɑ miyø kí pyɑ̈r ɑ́bïj geki pëjji gen, kí tyëng-ɑ nyi kɑ̈ɑ̈l pödhh-ɑ buti wøn kì yethi cyɑ̈ng bënn. Yɑ nyi ngɑl-ɑ wɑdh, kí römm-ɑ cwɑɑdhø ɑ́bïkyel, kí gyen mø gïïr cyɑ̈ng ɑ́kyel. Kɑ yɑ nyii muujø ki møgi oløg me nyɑ̈n, kì bɑng cyɑ̈ng pyɑ̈rø. De gïg-ɑ peg kì kömi ji ngɑ̈nyi yi yɑn, bene ɑ cögɑ yɑ nuti cwöddø ki jɑmm-ɑ nyi mëggi ngɑn-ɑ bɑ jɑgø. Yɑ kwɑjj-ɑ yïn, yïn ɑ Jwøk, nyi pɑr yɑn kipe gïndøj men-ɑ ɑ́göggɑ ji møg. Kɑ Sɑnbɑlɑt geki Töbiyɑ̀ kí Gecem, kí tyëngmɑ̈ɑ̈nø møøgø, olïngø kinni i dörø rumø ki gerø, o bong kɑɑm mɑ ɑ́döng kì ree, ngö thïggi dhøggi dörø nuti cïb kɑ̈jji gen. Codhe, kɑ Sɑnbɑlɑt kí Gecem ön-ɑ yïɑ ki wöödø kinni, “Bïí o wɑ yïddi wɑ kì myërri Thwøri Önö.” Menɑni ɑ́bëëd ɑ́ wëënyø, kipe kinni o yɑ göggi gen ki gïnrɑj. Kɑ ge ödɑ ki ji møg köbbi gen kinni, “Yɑ gwøg-ɑ gwøg me pere teg, yɑ pɑ cuggi kedhi kunɑni. Gwøg pɑ cung yi yɑn kipe kinni, o yɑ bïɑ kun-ɑ di wun.” Kɑ yɑ ödi gen ki wöödø me ni menɑni tyel ɑ́ngwen, kɑ ge nyi løøgɑ ni menɑni. Kɑ Sɑnbɑlɑt ön-ɑ yïɑ ki bïïj wööd, wɑ̈nyɑni ɑ́kɑ̈ɑ̈l-ɑ yi ɑ́kyel kì kelli bɑ̈ngge, e wɑ̈nyø bɑ ɑyieb. Keny-ɑ ɑ́rɑngɑ wɑ̈nyɑni, møg-ɑ ógwedø bɑ kinni, “Dɑ wöödø me cyɑ̈dhi kì yethi pödhh bënn, kɑ kwøb yi Gecem thyew kinni møgɑni bɑ dyër, i yï dwɑdd-ɑ ngɑ̈nyi wɑ̈yí wuki Yeud, bene ɑ bɑnge døøg wun dörø ki gerø. Ákööb thyew i rií dwɑddí gwøgø yïn ɑ́ rɑ̈dh. O yï ɑ́rum ki kɑ̈bbø jøtöng møg töngø kì Yerusɑlem kinni, i yï bɑ rɑ̈ɑ̈dh Yeudiyɑ̀. Kwøbbɑni koo bɑ̈jji ki lïngø yi rɑ̈dh. De bïí o wɑ lwööb wɑ kì ri møgɑni kì kej ɑ́kyel.” Aløøgɑ møge kinni, “Kwøbb-ɑ kømmi yi yïn pɑth ki dyër. Bɑ yï ketí ɑ ɑ́cwɑ̈j møgɑni.” Ge ɑ́ceg-ɑ ri gen ki pɑ̈nyø lwɑ̈ggi wøn o wø di bwøg wøn, o gwøg di wiy yi wøn. Kɑ yɑ ókwɑ̈jjø kinni, “De ɑnɑn, yïn ɑ Jwøk, wiy cingɑ tënge.” Bøli kenyɑni ɑ ɑ́kedhɑ be këëmi Cemɑiyɑ̀ wɑ̈d Delɑiyɑ̀, wɑ̈d Meëtɑbel, o ɑ́bëëd e pɑ nyi cyɑ̈dhi. Kɑ yɑ köbbe kinni, “Wɑ ceg-ɑ kedhi be pɑ̈ni kej kwër kì yij Kengø. O thïgø cyëëg wɑ kömee, mɑ́ ge bɑ møg-ɑ óbï be nɑ̈gi yïn ceth e piny bɑ wɑ̈r.” Alöggɑ kinni, “Pɑth ki ngɑn ni yɑn ɑ cuggi rengø kɑ pɑ̈n-ɑ yij Kengø. Gïn ni menɑni pɑ cuggi gwøgø yi yɑn.” Keny-ɑ ɑ́tiɑ rumø kì ri møgɑni, kɑ yodɑ kinni Cemɑiyɑ̀ nuti köbb-ɑ yi Jwøk, de bɑ Töbiyɑ̀ geki Sɑnbɑlɑt ɑ kwɑjjii ki ngyëny kipe kinni, o yɑ köbbe kinøw. Cemɑiyɑ̀ ɑ́kïr gen ki ngyëny kɑ per kinni, o yɑ göjje böggø, o yɑ di göögɑ ki orøg, codhe, o yɑ di gɑggi yi teedø. Akwɑ̈jjɑ kinni, “Yïn ɑ Jwøk, pɑr gïn-ɑ ɑ́gwøg yi Töbiyɑ̀ geki Sɑnbɑlɑt, kɑ ge cɑɑy. Pɑr ngɑndhɑjø men-ɑ cwøl ɑ́ Noɑdiyɑ̀, kí tyëngtöng møg-ɑ ɑ́pɑ̈nyi ri gen ki göjji yɑn wɑ̈ɑ̈rø.” Kɑ dörø óthumø ki gerø, kì bɑng cyɑ̈ng pyɑ̈r ɑ́bïj wïdɑ́ryew, kì cyɑ̈nggi dwɑ̈y Elul, pyɑ̈r ɑ́ryew wïdɑ́bïj. Keny-ɑ ɑ́lïngi møgɑni yi tyëngmɑ̈ɑ̈nø, kì pödhh-ɑ cyɑ̈gi ki wøn, kɑ ge obwøgø, mɑ́ gø ɑ́yod gen kinni, gwøngɑni ógwøgø kɑ kunyi Jwøk. Kì bøli kenyɑni, jøgdøngi Yeud ɑ́bëëd ge okööbø ki Töbiyɑ̀. Ji mø gïïr ɑ́ying-ɑ tunge, mɑ́ øre Cekɑniyɑ̀ wɑ̈d Arɑ̀ bɑ ngeti Yeud. Thyew wɑ̈de Yöɑnɑn ɑ́nywøm-ɑ nyɑɑr Meculɑm wɑ̈d Berekiyɑ̀. Ji nyii kööbø kì bølɑ ki gïgdøj møg-ɑ ɑ́gwøg yi Töbiyɑ̀, kɑ gïg-ɑ kømmɑ bënn nyi köbbii, kɑ yɑ nyi öde ki wɑ̈j møg pɑ̈nye yɑn, kinni o yɑ di bwøgɑ. Anɑn dörø ɑ́rum ki gerø, kɑ thïggi dhøge tïng mɑl, kɑ jøg-ɑ kor dhøggi dörø, kí jøwör, kí Kwɑrri Leebì møg-ɑ kyeelø, órumø ki mëggi gwögg-ɑ gwøg yi gen. Kɑ yɑ ókɑ̈bbø ki jøg ɑ́ryew, o ge jɑɑg gen kɑɑldwøng Yerusɑlem, ɑ løg ómïɑ Aɑnɑnì geki Aɑnɑniyɑ̀, pënyi liny-ɑ kor kɑɑl. Aɑnɑniyɑ̀ bɑ jɑl nyi gøggi dyër, o Jwøk böggi yi en ki mendwøng. Kɑ ge köbbɑ kinni, thïggi dhøggi döri Yerusɑlem ko nyi yieb yi wun, gïti kenyi tuul cɑ̈ng, kɑ ge nyi cyëëg e jøkor nuti kedhi kɑ̈lli gen. Kɑ ge köbbɑ thyew kinni kwɑny gen tyëng-ɑ nyi kurø kì kelli tyëng-ɑ bëëdø kì Yerusɑlem, kɑ ngɑn nyi cïb keny-ɑ kor yi en, o møg-ɑ kyeelø kor gen kɑ̈lli gen. Yerusɑlem bɑ kɑɑl me yije lɑɑj, de tyëng-ɑ bëëdø kì yije kwɑnni gen nøg, o bong ud møg-ɑ ógerø ge gïïr. Aköbbi yɑn yi Jwøk kinni cøngɑ ji, kí jøgdøngi pödhø, kí jɑgg geki jyɑ̈ggi mïïri, kɑ ge gwed ki kɑ̈lli gen. Kɑ wɑ̈nyø men-ɑ yije ógweed kɑ̈ll-ɑ ɑ́kwöngi ki dwöögø kì yïnø yodɑ, møg-ɑ ógweed yije ek: Tyëng-ɑ ɑ́dwöög kì yïnø ge bï-ɑ Yerusɑlem geki Yeudiyɑ̀, ge ɑ́bï ge kɑ̈ɑ̈l-ɑ Bɑbïlöniyɑ̀, kër-ɑ ɑ́kɑ̈ɑ̈l gen gɑ ɑmɑgg yi Rɑ̈dh Nebukɑdnesɑr. Ngɑn ɑ́bï e døøg-ɑ kɑɑl gen. Jɑggi gen bɑ: Dherubɑbïl, kí Jöcwø, kí Nëmɑyɑ̀, kí Adhɑriyɑ̀, kí Rɑɑmiyɑ̀, kí Nɑɑ̈mɑnì, kí Mordekɑy, kí Bilcɑn, kí Mispereth, kí Bigbɑy, kí Neum, kí Bɑɑnɑ̀. Kwɑnni kɑ̈lli bɑ̈nggi Kengø geki bɑ̈nggi Sølømøn møg-ɑ ɑ́dwöög kì yïnø, bɑ 392. Kɑ ge kyëddi yi jɑng-ɑ bɑ ngeti Yeud kinni, ge pɑ cuggi cɑm ki jɑmm-ɑ mëggi Jwøk, gïti keny-ɑ ódi ókwërø men-ɑ óyod thɑ́ gen ki Urïm geki Thumïm: Ókwër, kí Kwɑrri Leebì, kí tyëng-ɑ nyi kor Kengø, kí tyëng-ɑ nyi wör ki thøm, kí tyëng-ɑ bɑ ji yøw, kí tyëng-ɑ nyi göögø kì yij Kengø, gen ɑ tyëng Isrɑil bënn, ge ɑ́pëggi yethi kɑ̈ddi Yeudiyɑ̀. Kì bïryeew dwɑ̈tt, tyëng Isrɑil ɑ́bëëd ge rum pëggi piny kì yethi kɑ̈ddi gen. Kɑ ji bënn ócugø kì Yerusɑlem kì ódɑ̈ri Dhøg Pï, kì cyɑ̈ng-ɑ mɑl kì yij dwɑ̈yɑni. Kɑ ókwërø Edhrɑ̀ jɑl-ɑ mïdhi wɑ̈nyi cigg-ɑ ɑ́mëggi Isrɑil yi Jwøng-ɑ Ácwɑ̈ɑ̈j ki cingi Mosɑ̀, köbbi yi gen kinni dwɑɑye wɑ̈nyi Cigg. Codhe, kɑ Edhrɑ̀ wɑ̈nyi Cigg kɑ̈ɑ̈le bøli teedø, cwøw, kí mɑ̈nn, kí othønhø møg-ɑ cuggi ki lïngø, cyɑ̈ngɑni ɑ́bëëd ɑ́ cyɑ̈ng-ɑ mɑl kì bïryeew dwɑ̈tt. Kɑ wɑ̈nyɑni rɑnge kì ódɑ̈r-ɑ Dhøg Pï, kì bøli teenɑni bëne, ɑ́cɑ̈g ɑ mwøl ki rɑng kɑ gït-ɑ dicɑ̈ng, teedø olïngø bënn. Edhrɑ̀ ɑ́cung ɑ wïj gyeem pɑ̈m men-ɑ ógurø kipe gwøngɑni. Jøg-ɑ ɑ́cungi kì wïj cingi kyëje bɑ: Mɑtithiyɑ̀, kí Cemɑ̀, kí Anɑiyɑ̀, kí Uriyɑ̀, kí Kilkiyɑ̀ geki Mɑɑseiyɑ̀. O wïj cingi cɑɑme cung-ɑ yi Pedɑiyɑ̀, kí Micɑil, kí Mɑlkiyɑ̀, kí Acum, kí Acbɑdɑnɑ̀, kí Dhekɑriyɑ̀, kí Meculɑm. Keny-ɑ ɑ́cungi Edhrɑ̀ kì wïj gyeem pɑ̈m-ɑ ɑ́gwøg e bɑ̈r, kɑ wïje kɑ̈ɑ̈l-ɑ mɑl kì kelli ji, kɑ teedø nenn-ɑ yïe bënn, kɑ teedø dhwödh-ɑ mɑl bënn keny-ɑ ɑ́yiebe wɑ̈nyø. Akööb Edhrɑ̀ kinni, “Lenhi wɑ Jwøng-ɑ Ácwɑ̈ɑ̈j, Jwøng-ɑ dwøng.” Kɑ ji bënn cinggi gen thɑɑng gen mɑl, ɑkööb gen kinni, “Amen! Amen!” Kɑ ri gen bøødh gen piny ge mɑl-ɑ Jwøk wɑ̈thi gen kuul gen piny. Adhwödhi gen mɑl kɑ ge ócungø kì kɑ̈jji gen, kɑ cigg löbbi gen yi Kwɑrri Leebì møg: Jöcwø, kí Bɑnì, kí Cerebiyɑ̀, kí Yɑmïn, kí Akkub, kí Cɑbethɑy, kí Ödiyɑ̀, kí Mɑɑseiyɑ̀, kí Kelitɑ̀, kí Adhɑriyɑ̀, kí Yödhɑbɑd, kí Aɑnɑn, kí Pelɑiyɑ̀. Ciggi Jwøk ɑ́rɑng gï löbb-ɑ gen, o møg-ɑ rɑng lïngi yi gen kidøøj. Kɑ jɑgø Nëmɑyɑ̀, kí ókwërø Edhrɑ̀ o bɑ jɑlgwed ki Cigg, kí Kwɑrri Leebì møg-ɑ ɑ́pwönyi, ji köbbi gen kinni, “Cyɑ̈ngtïn bɑ cyɑ̈ɑ̈ng kwëër Jwøng-ɑ Ácwɑ̈ɑ̈j, Jwøøg wun, wu ko kïïm wɑlɑ̀ wu ko ywöngi.” Mɑ́ ji ɑ́ywöngi keny-ɑ ɑ́lïngi gen Cigg. Aköbbi ge gïn kinni, “Kedhu myërri wun, kɑ wu cyɑ̈ɑ̈m wun, kɑ wu yɑ̈ng wun, kɑ wu mɑ̈ɑ̈dh wun ki mugg-ɑ med, kɑ tyëng-ɑ jɑdø nëngi wun, mɑ́ cyɑ̈ngtïn bɑ cyɑ̈ɑ̈ng kwëër Jwøgee; de wu ko kïïm, mɑ́ medi pyëw-ɑ ɑ́muuj yi Jwøng-ɑ Ácwɑ̈ɑ̈j, bene tegi wun.” Kɑ Kwɑrri Leebì kedh-ɑ kelli ji be cïji gen, o pëthi gen dwöög gen. Aköbbi ge gïn kinni, “Pëthi wun ko bëëd ge rijjø, mɑ́ cyɑ̈ngtïn bɑ cyɑ̈ɑ̈ng kwër.” Codhe, kɑ ji bënn kedh-ɑ yethi myërri gen, kɑ ge ocyɑ̈mø, kɑ ge omɑ̈dhø, e pëthi gen omedø, kɑ ge onywɑ̈gø ki ji-ɑ bong gïg nud kì yï gen, mɑ́ møg-ɑ ɑ́rɑ̈ngi gen ɑ́lïngi yi gen. Kì cyɑ̈ng-ɑ kyeelø, kɑ jøgdøngø kí jyɑ̈ggi wɑ̈thi kɑ̈llì, kí ókwër, kí Kwɑrri Leebì kedh-ɑ yï Edhrɑ̀ o gï pwönye ki Cigg. Ayod ge gøn kinni cigg-ɑ ɑ́muuj yi Jwøng-ɑ Ácwɑ̈ɑ̈j ki cingi Mosɑ̀, ceg-ɑ tyëng Isrɑil kinni nyi bëëd gen kì thɑ̈thi ɑkɑnnì kì yethi cyɑ̈nggi Kwëër Akɑnnì. Codhe, ɑceg gen ji bënn, kì Yerusɑlem, kí kɑ̈dd-ɑ døngø kinni, “Kedhu wɑ̈thi kïttì, kɑ wu kɑ̈ni wun ki bɑ̈ddi dhetun, kí sɑnober, kí ówɑwwi benø geki yenh-ɑ mɑr, kɑ wu gëëd wun ki ɑkɑnnì, ni kɑ ógwedii kì yethi cigg.” Codhe, ɑkɑ̈ni ji ki bɑ̈ddi yenh, kɑ ge ogëdø ki ɑkɑnnì kì óthɑɑng wɑ̈thi uddi gen, kí ódɑ̈ri Kengø, kí ódɑ̈rri kɑɑl, kí ódɑ̈ri Dhøg Pï, kí ódɑ̈ri Dhøg Eprɑim. Ji bënn møg-ɑ ɑ́bï ge kɑ̈ɑ̈l-ɑ yïnø, ɑ́gëëd ki ɑkɑnnì, kɑ ge obëëdø kì yethi ɑkɑnnɑni. Men bene kwøngi kwërɑni ki gwøgø, kër-ɑ ɑ́gwøøgii keny-ɑ ɑ́jyɑ̈ɑ̈g Jöcwø wɑ̈d Nun. Ji bënn ɑ́bëëd pëthi gen med cɑrø. Cɑg kì cyɑ̈ng-ɑ ɑ́cɑ̈gi Kwëër Akɑnnì, gïti cyɑ̈ng-ɑ ɑ́thume, ge ɑ́bëëd ge ceg-ɑ rɑng kì ri wɑ̈nyi Jwøk yethi cyɑ̈ng. Ge ɑ́tug ki cyɑ̈ng ɑ́bïryew, kɑ ge cug-ɑ be mɑ̈ddø kì bïdɑ̈ɑ̈g cyɑ̈ng, ni kɑ ógwedii kì yethi Cigg. Kɑ ge rɑ̈ngi Ciggi Jwøng-ɑ Ácwɑ̈ɑ̈j, Jwøøg gen ki sɑɑ̀ ɑ́dɑ̈g. Kɑ sɑɑ̀ ɑ́dɑ̈g møøgø tyëg gen ge töng-ɑ orøøg gen, kɑ Jwøng-ɑ Ácwɑ̈ɑ̈j, Jwøøg gen mɑlli gen. Dɑ ótong mɑ ɑ́thør ɑ́ kej Kwɑrri Leebì, kɑ Jöcwø ócungø kì wïj ótongɑni, geki Bɑnì, kí Kɑdmiel, kí Cebɑniyɑ̀, kí Bunì, kí Cerebiyɑ̀, kí Bɑnì, kí Kenɑnì. Kɑ Jwøng-ɑ Ácwɑ̈ɑ̈j Jwøøg gen, kwɑjji gen ge óryeerø. Codhe, kɑ ji löggi yi Kwɑrri Leebì: Jöcwø, Kɑdmiel, Bɑnì, Aɑcɑbneiyɑ̀, Cerebiyɑ̀, Ödiyɑ̀, Cebɑniyɑ̀, kí Pethɑiyɑ̀, ge ɑ́kööb kinni, “Dhwödhu mɑl, kɑ Jwøng-ɑ Ácwɑ̈ɑ̈j, Jwøøg wun lenhi wun! Lenhu en gïti ɑtheer! Wiy nyinge kwërø lenhi yi ji bënn, cɑgg pwøjj-ɑ pwøjii yi ji pɑ kyëëw ki dönge.” Codhe, kɑ tyëng Isrɑil ókwɑ̈jjø kinni, “Wuö, yï ketí ɑ bɑ Jwøng-ɑ Ácwɑ̈ɑ̈j, yïn ɑ ɑ́cwɑ̈j mɑl, kí kyelli mɑl. Yïn ɑ ɑ́cwɑ̈j piny kí nɑɑm omelø kí jɑmm-ɑ yethi gen bënn. Kɑ ge thödhí bënn ki wëy. Gïg-ɑ teg kì mɑl ri gen nyi bøødh ge’ piny kɑ yï mɑlli yi gen. Kɑ Abrɑm myeg yi yïn, yïn ɑ Jwøk, Jwøng-ɑ Ácwɑ̈ɑ̈j, kɑ kɑ̈ɑ̈l yi yïn wɑ̈g kì Ur kì Bɑbïlöniyɑ̀, kɑ nyinge wil yi yïn gɑ Abrɑhɑm. Kɑ yod yi yïn kinni mïdh-ɑ kwøbbí kɑ wu olwöbø ki en. Kɑ köbbí kinni, ómëggí piny tyëng Kɑnɑɑn, kí piny tyëng Kit, kí piny tyëng Amör, kí piny tyëng Perïdh, kí piny tyëng Yebus, kí piny tyëng Girgɑc, o bëëde ɑ́ piny-ɑ óbëëd yi kwɑrre. Kɑ kwøbbí mïdhi yi yïn ceth, mɑ́ yï tir. “Orɑɑng kweyyi wøn kì Rïp ɑ́lidh yi yïn, kɑ kwɑ̈jji gen kipe yielø lïngí kì Nɑɑm Omeli Kwɑrø. Rɑ̈ɑ̈dh Rïp geki bɑ̈ngge, kí tyëng pödhe ge ɑ́göggí ki ngïjjì kí gïïngɑ̈ngø, mɑ́ kër-ɑ ɑ́guude nyingi jií ngɑ̈nyi yi yïn. Kɑ nyingi gen tïng yi yïn mɑl gïti dicyɑ̈ngtïn. Kɑ jií yïëbbí ki yöö kì nɑɑm omelø kɑ ge kɑ̈l-ɑ yij pyëën nɑm e thwøwø. Kɑ tyëng-ɑ ɑ́rïngi kì bɑng gen, omudø kì nɑm, ge ɑ́biil piny ni tungi kït, kɑ ɑpɑgø ceg-ɑ ì bɑɑw kì kömi gen. Ge ɑ́pyejji yi yïn kɑ pøølø kì dicɑ̈ng, kɑ yuu gen nyi meny yi yïn ki mɑc kì wɑ̈r. Yï ɑ́bï piny, yï kɑ̈ɑ̈l-ɑ mɑl kì wïj Kïti Sinɑy, kɑ yï okööbø ki jií, kɑ ge thödhí ki cigg-ɑ dyër, kí pwöny-ɑ dyër. Ge ɑ́pwönyí ki mïdhi Sɑbɑth ɑ́ cyɑ̈ɑ̈ng kwër, kɑ ciggí mëggí gen ki cingi Mosɑ̀ bɑngí. “Keny-ɑ ɑ́bëëd ri gen dɑ kɑ̈j, ge ɑ́thödhí ki gïncɑm me kɑ̈ɑ̈l mɑl, kɑ yï kɑ̈n-ɑ wɑ̈g ki pï kì yij kït, keny-ɑ ɑ́di ri gen röödhø. Ge ɑ́köbbí kinni kwɑny gen pinyɑni; eni piny-ɑ ɑ́kwöng yi yïn kinni ómëggí gen. De kweyyi wøn ɑ́thwøg kɑ muddi gen ótëngø, kɑ ge óbɑ̈nyø ki mïdhi ciggí. Ge ɑ́bɑ̈nyi wuödø, wɑ̈thi gen ɑ́wïl, ki gïg-ɑ ɑ́gwøg yi yïn bënn, wɑ̈thi gen ɑ́wïl ki gïïngɑ̈ngø møg-ɑ ɑ́gwøg yi yïn. Kɑ ge ókɑ̈bbø ki pëëji, men dwøøg gen Rïp yij bɑ̈ɑ̈ngø. De yï bɑ Jwøng pyëwí nyi lɑ̈ɑ̈m, yï døj o yï pëddi mɑ̈ɑ̈dø, o yï pɑ nyi jwɑn ki mɑgø yi liny. Lɑɑwí ɑ́dwøøg piny, ge nuti cɑɑy yïn. Ge ɑ́göög ki ngïji wɑdh, kɑ ge okööbø kinni, i bene jwøng-ɑ ɑ́pëëj gen wɑ̈g kì Rïp. Kɑ ge ogöögø ki ɑyɑ̈r me dwøng. De ge nuti wiy yïn piny kì yij ryɑng, mɑ́ lɑ̈mpyëwí bong cöge. Lööj pøølø geki mɑc nuti mɑ̈ɑ̈n yïn gen, gen ɑ gïg-ɑ nyi nyudhi gen yöö kì dicɑ̈ng, kí wɑ̈r. Kì bɑng døøjí, ge ɑ́köbbí gïn-ɑ ógwøg yi gen, ge ɑ́mëggí mɑnɑ̀ ɑ́ men cɑm yi gen, kɑ ge nëngí ki pïg mɑdh yi gen. Kì yethi runn pyɑ̈r ɑ́ngwen kì yij ryɑng, ge ɑ́thödhí ki gïg-ɑ ɑ́dwɑddi yi gen bënn, ógudhi gen nuti wöl kɑggø, o tyelli gen nuti kwödø yi wɑ̈dh. “Ge ɑ́wëggí tyɑmi pödhh møg jɑɑg yi rɑ̈nhì, eni pìny-ɑ ɑ́cïb gen kew. Piny Sïön rɑ̈ɑ̈dh Kicbön ɑ́mɑg gen, geki piny Og rɑ̈ɑ̈dh Bɑcɑn. Ge ɑ́nëngí ki nywøl mø gïïr ni kyelli mɑl, kɑ ge thödhí ki tegø men-ɑ ɑ́tyɑ̈ɑ̈m gen, kɑ ge cïb piny-ɑ ɑ́köbbi kweyyi gen kinni gø ómëggí gen. Piny Kɑnɑɑn ɑ́kɑb yi gen, kɑ tyëng-ɑ ɑ́bëëd kì yije tyɑm yi yïn. Jií ɑ́thödhí ki tegø men cuggi gen ki gwøgi gïn dwɑddi yi gen gø göggi ge’ tyëng Kɑnɑɑn kí rɑ̈nhi gen. Kɑ̈dd-ɑ ógerø ki dör ɑ́mɑg yi jií, kɑ piny-ɑ lɑ̈be med, kí udd-ɑ pɑ̈ng yi jɑmmì kwɑny gen, kí ɑwölli pï mø rumø ki konyø, kí yenh dhetun, kí yenhi nywøl, kí bɑ̈ggi oløg. Ge ɑ́cyɑ̈ɑ̈m kɑ ge oyɑ̈ngø, kɑ ge ócwïyø. Pëthi gen ɑ́mïni yi gïgdøj møg-ɑ ɑ́mëggí gen. “De jií ɑ́ngɑ̈nyi wɑ̈yi gen, kɑ kwøbbí pyem yi gen; ngɑ̈thi gen ɑ́lugi gen ciggí. Kɑ jøtöng møg-ɑ ɑ́kyëddi gen nɑ̈g gen. tyëng-ɑ ɑ́köbbi gen kinni dwöög gen köörí ɑ́nɑ̈g yi gen. Kɑ yï nyi gwɑddi yi gen. Codhe, ɑwëggí gen tyɑmø yi tyëngmɑ̈ɑ̈nø, o gï jɑɑg gen. Kɑ ge orɑngø kì cinggi tyëngɑni, ɑywøøg gen köörí, kɑ kwɑ̈jji gen løøg yi yïn, yï ying-ɑ pɑɑrí mɑl. Pyëwí ɑ́lɑ̈ɑ̈m ki gen kɑ ge ödí ki pëjjì, møg yiel gen kì cinggi tyëngmɑ̈ɑ̈nø. Keny-ɑ ɑ́dwöög mër, kɑ ge døøg-ɑ be orøg, ɑcigí gen wëggi tyɑmø yi tyëngmɑ̈ɑ̈nø. De kenyi yewi gen kɑ ge ywøøg-ɑ köörí, kwɑ̈jji gen nyii lïngø yi yïn kì pɑɑrí mɑl, kɑ ge nyi yiel yi yïn. Ge nyii cegø yi yïn kinni mïdhi gen ciggí, de ge nyii thwøgø, kɑ ciggí bɑny yi gen, ngö mïdhi ciggí bɑ nënnì. Muddi gen teeg, o ge ɑ́bɑ̈nyi lïngi møgí. Ge nyi kyëddí kyëddø yethi runn bënn, yï pɑ ngïr yi gen. Jøtöng møgí nyi nyudhí gïn-ɑ kwøb yi gen, de jií nuti lïngø, codhe, ɑwëggí gen tyɑmø yi pödhh møøgø. “De lɑ̈mpyëwí pɑ nyi thumi ge nuti wiy piny yi yïn, wɑlɑ̀ ge nuti nɑ̈ɑ̈g yïn, Mɑ́ yï bɑ Jwøng pyëwí yöd. “Wuö Jwøk, Jwøøg wøn, bong gïn lod yïn ki döng! Yï ceg kɑ böggø mɑ́ yï teg. Lwömí ɑ́mïdhí ki tɑri pyëwí. Cɑg kì bøli keny-ɑ ɑ́guud nyingi wøn yi rɑ̈nhi Acuur, cɑgg ɑ́ ɑnɑn, wø nudd wø ceg-ɑ orɑng! Wøkí rɑ̈nhi wøn, kí jɑggi wøn, kí ókwërri wøn, kí jøtöng mø wøn, kí kweyyi wøn, kí jii wøn bënn. Pɑr orɑng-ɑ ɑ́rɑngi wøn bëne! Yï ɑ́gwøg-ɑ dyër kɑ ɑ́cɑɑy wøn, yï ɑ́bëëd pyëwí tɑr, cɑgg ɑ́ kɑ ɑ́røngi wøn. Kweyyi wøn, kí rɑ̈nhi wøn, kí jɑggi wøn, kí ókwërri wøn, ciggí nuti mïdhi gen. O møg-ɑ nyi köbbí gen pɑ nyi lïngi yi gen. Jií jɑɑg yi rɑ̈nhì kɑ gyëdhhí, kì yij piny-ɑ ɑ́mëggí gen; piny-ɑ lɑɑj, ɑ lɑ̈be med; de yï nuti göggi gen ki pyëw ɑ́kyel, o ge nuti wïyø ki orøg. Anɑn, wø bɑ bɑ̈ngg kì yij piny-ɑ ɑ́mëggí kweyyi wøn, eni piny-ɑ lɑ̈be med, ɑ di thödhi wøn ki gïncɑm. Byell-ɑ cyeg kì pinyɑni nyi cɑm-ɑ yi rɑ̈nhì møg-ɑ ɑ́cïb yi yïn kömi wøn, kì bɑng orøøg wøn. O rɑ̈nhhɑni wø nyi göggi ge’ gïg-ɑ dwɑddi yi gen, wøki jɑmmi wøn, wø ying-ɑ yij ɑbɑɑrø me dwøng!” Kì bɑng møg-ɑ ɑ́cwöb bënn, wø tyëng Isrɑil, wø gweed-ɑ lwömi wøn piny wøki jɑggi wøn, kí Kwɑrri Leebì, kí ókwërri wøn, cinggi wøn thɑɑny wø’ kömi lwöm-ɑ ɑ́yïëy yi wøn èn. Tyëng-ɑ ɑ́kwøng nyingi gen ki gwedø bɑ, jɑgø Nëmɑyɑ̀ wɑ̈d Akɑliyɑ̀, kí Dhedekiyɑ̀. Ji møg thyew nyingi gen ɑ́gwed gen: Wø tyëng Isrɑil, kí ókwër, kí Kwɑrri Leebì, kí tyëng-ɑ kor dhøggi döri kɑɑl, kí tyëng-ɑ kor Kengø, kí tyëng-ɑ nyi wör kì Kengø, kí tyëng-ɑ göögø kì Kengø, kí tyëng-ɑ mïdhi Ciggi Jwøk; wøn ɑ tyëng-ɑ ɑ́lɑ̈ɑ̈w ri wøn ki tyëngpɑth møg-ɑ bëëdø kì piny wøn, kí mɑ̈nni wøn, geki nyigi wøn bënn, møg-ɑ ɑ́døngi, ɑ cuggi ki lïngø, dhøggi wøn bënn èn: wø ɑ́köngi kinni Ciggi Jwøk ómïdhi yi wøn, gen ɑ cigg-ɑ ɑ́mëggí Mosɑ̀ bɑ̈ngí, o gïg-ɑ nyi kwøb yi Jwøng-ɑ Ácwɑ̈ɑ̈j, Jwøøg wøn, kí kwönge ógwøg yi wøn, geki gïg-ɑ dwɑddi yi en bënn. Ri wøn koo nywøm yi wøn ki tyëngpɑth møg-ɑ bëëdø kì piny wøn. Keløg tyëngpɑth ókɑ̈nø ki byel wɑlɑ̀ gïjø me ngew yi wøn cyɑ̈ɑ̈ng Sɑbɑth, wɑlɑ̀ kì cyɑ̈ɑ̈ng kwër megø, ge pɑ ngew yi wøn kì yï gen. Piny koo pur yi wøn kì bïryeew runn, o körri wøn bënn møg-ɑ cwɑggi ji, ówiy yi wøn. Wø ómuujø ki ngyëny ɑ́tegg ɑ́bïj møg-ɑ bɑ ɑcïb gɑ gwɑ̈ɑ̈j Kengø kì yij run. Wø ókïdhi Kengø ki ópuun kwër, kí byëlø, kí gëdhh-ɑ nyi ngɑl yethi cyɑ̈ng, geki cyɑ̈nggi Sɑbɑth, kí cɑ̈gi dwɑ̈y, kí cyɑ̈nggi kwër møg-ɑ kyeelø. Wø ómuujø thyew ki gëdhh-ɑ kyeelø bënn geki gëdhhi orøg, kí gïg-ɑ ódwɑddi kipe Kengø. Wø ólëngø ki wél kì kelli ókwër, kí Kwɑrri Leebì, kí ji bënn kipe kwɑnyi tyëng-ɑ nyi kɑ̈ni ød Jwøng-ɑ Ácwɑ̈ɑ̈j, Jwøgee ki yugg, e leng ɑ́ wɑ̈thi kɑ̈llì kì runï kí runï, ni kɑ ógwedii kì yethi Cigg. Wø ókïdhi yij Kengø ki mwölli gïg-ɑ cyeg kì piny wøn, kí mwölli nywøli yenh kì yethi runn bënn. Wɑ̈ddi wøn møg-ɑ bɑ kɑyyì bënn, kí kɑyyi dhögi wøn geki dyëgi wøn møg-ɑ nywøl gɑ cwøw, ge ómuuj wøn ókwër-ɑ göögø kì ød Jwøgee ni kɑ ógwedii kì yethi Cigg. Kì yij run, wø ómuujø ki ɑwɑɑj byell-ɑ kwøng ki kɑjø kì yethi pwödhhi wøn, kí møgi oløg, kí møøw dhetun, kí nywøli yenh, gïgɑni bënn ómuuj wøn ókwër kì ød Jwøgee. Kwɑrri Leebì ómuuj ki ɑ́kyeel pyɑ̈rri jɑmm-ɑ cyeg kì yethi pwödh, O ókwër, møg-ɑ bɑ kwɑrri Aɑron, bëëd ge nud keny-ɑ óthyeer ɑ́kyeel pyɑ̈r yi Kwɑrri Leebì, orum gen ki cungø kì yï teedø, codhe, o ge kïdhi kɑ̈nni Kengø. Jɑmm-ɑ ógwɑj; ɑ løg byel, kí møgi oløg, kí møøw dhetun ókïdh-ɑ yethi udd-ɑ nyi mïdhi jɑmmì yi tyëng Isrɑil geki Kwɑrri Leebì, kì keny-ɑ nyi di jɑmmi thɑl mø Kengø, kí keny-ɑ nyi bëëd yi ókwërr-ɑ göögø, kí jøg-ɑ kor Kengø, kí jøwör. Ød Jwøøg wøn pɑ cuggi wøyø yi wøn. Codhe, kɑ jɑggi Isrɑil dɑ̈g-ɑ Yerusɑlem, de tyëng-ɑ kyeelø ɑ́ceg-ɑ leng ki wél, o ji pyɑ̈rø kelli gen nyi kwɑɑny dhɑnhø ɑ́kyel, ɑ́ men bëëdø kì Yerusɑlem kɑɑl kwër, o møg-ɑ kyeelø bëëd gen kì yethi myërr. Kɑ jøg-ɑ ɑ́yïëy bëëdø kì Yerusɑlem kwëng yi teedø bëne. Tyëng Isrɑil, kí ókwër, kí Kwɑrri Leebì, kí jøgwøøg Kengø, kí kwɑrri bɑ̈nggi Sølømøn ge ɑ́bëëd ɑ pìnyi gen kì myërri gen kí kɑ̈ddi gen. Møg bɑ nyingi jɑggi Yeudiyɑ̀ møg-ɑ ɑ́bëëd kì Yerusɑlem. Athɑiyɑ̀ wɑ̈d Udhiyɑ̀ wɑ̈d Dhekɑriyɑ̀, wɑ̈d Amɑriyɑ̀, wɑ̈d Cepɑtiyɑ̀, wɑ̈d Mɑɑ̈lɑlel, wɑ̈d Peredh, wɑ̈d Yeudɑ̀. Mɑɑseiyɑ̀ wɑ̈d Bɑruk, wɑ̈d Kölödhè, wɑ̈d Adhɑiyɑ̀, wɑ̈d Adɑiyɑ̀, wɑ̈d Yöyɑrïb, wɑ̈d Dhekɑriyɑ̀, wɑ̈d Celɑ̀, wɑ̈d Yeudɑ̀. Jøg-ɑ bɑ kwɑrri Peredh, møg-ɑ ɑ́bëëd kì Yerusɑlem, kwɑnni gen bɑ miy ɑ́ngwen kí pyɑ̈r ɑ́bïkyel wïdɑ́bïdɑ̈g. Sɑlu wɑ̈d Meculɑm, wɑ̈d Yöiid, wɑ̈d Pedɑiyɑ̀, wɑ̈d Kolɑiyɑ̀, wɑ̈d Mɑɑseiyɑ̀, wɑ̈d Ithiel, wɑ̈d Yecɑiyɑ̀. Bɑng gen dɑ wɑddi Gɑbɑy kí Sɑlɑy. Kwɑnni gen bɑ miy ɑ́bïngwen kí pyɑ̈r ɑ́ryew wïdɑ́bïdɑ̈g. Pënyi gen ɑ́bëëd ɑ́ Yöiil wɑ̈d Dhikrì, o ókwøme bɑ Yeudɑ̀ wɑ̈d Asenuɑ̀ kì Yerusɑlem. Yedɑiyɑ̀ wɑ̈d Yöyɑrïb, wɑ̈d Yɑcin, kí Serɑiyɑ̀ wɑ̈d Kilkiyɑ̀, wɑ̈d Meculɑm, wɑ̈d Dhɑdök, wɑ̈d Merɑyöth, wɑ̈d Akitub ɑ ɑ́bëëd ɑ́ Ókwër-ɑ Dwøng. Kwɑrri gen møg-ɑ ɑ́göög kì Kengø kwɑnni gen bɑ miy ɑ́bïdɑ̈g kí pyɑ̈r ɑ́ryew wïdɑ́ryew, Adɑiyɑ̀ wɑ̈d Yeroɑm, wɑ̈d Pelɑliyɑ̀, wɑ̈d Amdhì, wɑ̈d Dhekɑriyɑ̀, wɑ̈d Pɑcur, wɑ̈d Mɑlkiyɑ̀. Kwɑnni gen bënn, bɑ miy ɑ́ryew kí pyɑ̈r ɑ́ngwen wïdɑ́ryew, ge ɑ́bëëd gɑ jɑggi wɑ̈thi kɑ̈llì. Amɑcsɑy wɑ̈d Adhɑrel, wɑ̈d Adhɑy, wɑ̈d Mecilemöth, wɑ̈d Imer. Gølɑni yije ɑ́dɑ jøg mø teg ki liny, kwɑnni gen bɑ miyø kí pyɑ̈r ɑ́ryew wïdɑ́bïdɑ̈g, pënyi gen bɑ Dhɑbdiel wɑ̈d Agɑdölïm. Cemɑiyɑ̀ wɑ̈d Acub, wɑ̈d Adhrikɑm, wɑ̈d Acɑbiyɑ̀, wɑ̈d Bunì. Cɑbethɑy, geki Yödhɑbɑd ge bɑ pëjji Kwɑrri Leebì, o gen ɑ nenni gwøøg thïgi Kengø kì yiny-ɑ wɑ̈g. Mɑtɑniyɑ̀ wɑ̈d Miikɑ̀, wɑ̈d Dhebedì, wɑ̈d Asɑp, en ɑ nyi kwɑn wörri pwøj. Bɑkbukiyɑ̀ ɑ ɑ́køny Mɑtɑniyɑ̀, kí Abdɑ̀ wɑ̈d Cɑmuɑ̀, wɑ̈d Gɑlɑl, wɑ̈d Yeduthun. Kwɑrri Leebì møg-ɑ ɑ́bëëd kì Yerusɑlem kɑɑl kwër, kwɑnni gen bënn bɑ miy ɑ́ryew kí pyɑ̈r ɑ́bïdɑ̈g wïdɑ́ngwen. Akkub, kí Tɑlmön, kí wɑddi gen møg-ɑ kurø bënn, kwɑnni gen bɑ miyø kí pyɑ̈r ɑ́bïryew wïdɑ́ryew. Tyëng Isrɑil, kí ókwër, kí Kwɑrri Leebì, møg-ɑ ngenyø ɑ́bëëd ɑ kɑ̈jji gen kì yethi kɑ̈dd, kí yethi myërri Yeudiyɑ̀. Tyëng-ɑ nyi göögø kì Kengø, ɑ́bëëd ɑ byëng-ɑ cwøl ɑ́ Opel kì Yerusɑlem, o ge ɑ́jɑɑg-ɑ yi Dhïɑ̀ geki Gicpɑ̀. Jɑl-ɑ kwølli Kwɑrri Leebì kì Yerusɑlem ɑ́bëëd ɑ́ Udhì wɑ̈d Bɑnì, wɑ̈d Acɑbiyɑ̀, wɑ̈d Mɑtɑniyɑ̀, wɑ̈d Miikɑ̀, kì gøl Asɑp, gen ɑ nyi wör ki thøm kì Kengø. Rɑ̈dh ɑ́cïg kiper gen kinni, i nyi wil gen tyëng-ɑ wör kì Kengø yethi cyɑ̈ng, e ceg kɑ lunyø. Pethɑiyɑ̀ wɑ̈d Mecedhɑbel, kì gøl Dherɑ̀ wɑ̈d Yeudɑ̀, en ɑ ɑ́bëëd ɑ́ kej wɑɑng tyëng Isrɑil kì tøg buri Pɑres. Ji mø gïïr ɑ́bëëd ɑ yethi kɑ̈ddi gen kì buti pwödhhi gen. Tyëng Yeudiyɑ̀ ɑ́bëëd ɑ Kiriɑt Arbɑ̀ geki myërre, kí Dïbön kí myërre, kí Yekɑbdhiil geki myërre, kí Yëcuɑ̀, kí Mölɑdɑ̀, kí Betpelet, kí Adhɑr Cuɑl, kí Bircebɑ̀ geki myërre, kí Dhiklɑg, kí Mekönɑ̀ geki myërre, kí Enrimön, kí Dhörɑ̀, kí Yɑrmuth, kí Dhɑnoɑ̀, kí Adulɑm geki myërri gen. Kí Lɑkic kí pwödhhe møg-ɑ́ yethi gen ɑ́dɑ̈ggi, kí Adhekɑ̀ kí myërre. Menɑni wɑng-ɑ kinni tyëng Yeudiyɑ̀ ɑ́bëëd ɑ piny-ɑ kɑɑm Bircebɑ̀ kì wɑɑng wurlwɑl, gïti Töör Kinöm kì wɑɑng wuudø. Tyëng gøl Ben Yɑmïn ɑ́bëëd ɑ Gebɑ̀, Mikmɑc, Aɑy, Betiil myërri gen, Anɑthöth, Nöb, Anɑniyɑ̀, Adhör, Rɑmɑ̀, Gitɑim, Adid, Dheböïm, Nebɑlɑt, Löd, Önö, kí yij Töör Bödhhì. Kwï Kwɑrri Leebì møg-ɑ ɑ́bëëd kì piny Yeudiyɑ̀, ɑ́cïb-ɑ kelli gøl Ben Yɑmïn. Ókwër geki Kwɑrri Leebì møg-ɑ ɑ́dwöög kì yïnø, kyeel kí Dherubɑbïl wɑ̈d Ceɑltiel, kí Jöcwø Ókwër-ɑ Dwøng bɑ: Jøg bɑ gen ɑ nyi kwɑn wörri pwøj: Jöcwø, kí Binuy, kí Kɑdmiel, kí Cerebiyɑ̀, kí Yeudɑ̀, kí Mɑtɑniyɑ̀. Tyëng-ɑ nyi wör bɑ: Bɑkbukiyɑ̀, kí Unö, kí wɑddi gen Kwɑrri Leebì. Jöcwø bɑ wïyi Yöyɑkim, Yöyɑkim bɑ wïyi Eliɑcïb, Eliɑcïb bɑ wïyi Yöyɑdɑ̀, Yöyɑdɑ̀ bɑ wïyi Yönɑthɑn, Yönɑthɑn bɑ wïyi Yɑduɑ̀. Wɑ̈nyi nyingi kɑ̈lli ókwër geki Kwɑrri Leebì keny-ɑ ɑ́bëëd ókwërr-ɑ døngø møg onëënø bɑ Eliɑcïb, kí Yöyɑdɑ̀, kí Yönɑthɑn, kí Yɑduɑ̀. Gwedi wɑ̈nyɑni ɑ́thum ɑ keny-ɑ ɑ́bëëd Dɑryøs ɑ́ rɑ̈nhdwøøng Pɑres. Jɑggi wɑ̈thi kɑ̈lli Kwɑrri Leebì ɑ́gweed yij Wɑ̈nyi Kwøbbi Cyɑ̈ngg-ɑ ɑ́jyɑ̈ɑ̈g Yönɑthɑn wɑ̈d Eliɑcïb. Jɑggi Kwɑrri Leebì ɑ́bëëd gɑ: Acɑbiyɑ̀, kí Cerebiyɑ̀, kí Jöcwø, kí Binuy, kí Kɑdmiel. Ge ɑ́bëëd ri gen pɑ̈ngi gen gɑ ɑkudd, ɑkudd ɑ́ryew ɑ nyi lenhi Jwøk wïj ɑ́kyel ge lømm-ɑ dhøggi gen, o Jwøk nyi pwøj yi gen, ni kɑ ɑ́cïg Rɑ̈dh Debïd, jɑlkwøbbi Jwøk. Jøkori Kengø, møg-ɑ nyi kor udd-ɑ mïdhi jɑmmì, kì buti Kengø bɑ: Mɑtɑniyɑ̀, kí Bɑkbukiyɑ̀, kí Obɑdiyɑ̀, kí Meculɑm, kí Tɑlmön, kí Akkub. Jøgɑni ɑ́göög ɑ bøli keny-ɑ ɑ́jyɑ̈ɑ̈g Yöyɑkim Ókwër-ɑ Dwøng, wɑ̈d Jöcwø, wɑ̈d Yödhɑdɑk, kì bøli keny-ɑ ɑ́bëëd Nëmɑyɑ̀ ɑ́ jɑgø, o Edhrɑ̀ ɑ bɑ jɑlgwed ki Cigg. Keny-ɑ ɑ́thyeey döri Yerusɑlem, ɑcwööl Kwɑrri Leebì kì kɑ̈jj-ɑ di gen bënn, o ge thyey gen döri Yerusɑlem ki wörri pwøj, kí kɑ̈ngì geki thøm, kí bullì (ki jɑmmi wör møg-ɑ kyeelø.) Kɑ Kwɑrri Leebì møg-ɑ nyi wör ri gen cung gen kì kɑ̈jj-ɑ bëëd yi gen kì bɑdhhi Yerusɑlem, kí myërr-ɑ bɑdhhi Netöpɑ̀, kí Bet Gilgɑl, kí Gebɑ̀, kí Adhmɑbeth. Ókwër geki Kwɑrri Leebì ri gen ɑ́kwër gen, kɑ ji kwër gen, kí dhøggi dörø, kí dörø. Kɑ jɑggi Yeudiyɑ̀ cøngɑ wïj dörø mɑl, kɑ ge cïbɑ bøli ɑkudd ɑ́ryew, o ge cyɑ̈dhi gen ge wen-ɑ döri kɑɑldwøng, ge pwøj-ɑ Jwøk. Akun-ɑ mɑl ɑ́kɑ̈l-ɑ tuung kyëj kì wïj dörø ge kedh-ɑ Dhøg Thur. Öcɑiyɑ̀ ɑ́cyɑ̈dh ɑ bɑng jøwör, kí jɑggi Yeudiyɑ̀ kì bɑng gen. Kí jø gøl gen møg kì bɑnge, ɑ løg; Cemɑiyɑ̀, kí Adhɑrel, kí Milɑlɑy, kí Gilɑlɑy, kí Mɑɑy, kí Nethɑnel, kí Yeudɑ̀, kí Aɑnɑnì. Jøgɑni bënn cinggi gen ɑ́dɑ thøm mø ni thoom Debïd, bɑ̈ng Jwøk. Akunɑni ɑ́pyejj-ɑ yi Edhrɑ̀ jɑlgwed ki Cigg. Kɑ ge ókedhø kì Dhøg Wɑɑng Pï, ge yedh-ɑ mɑl kɑɑl Debïd, kɑ gøldwøng pöödh gen, kedh ge døøg-ɑ kuni Dhøg Wɑɑng Pï kì wɑɑng cyɑ̈ɑ̈ng mwøl. Kɑ ɑkuud pwøj men-ɑ kyeelø kɑ̈l-ɑ tuung cɑɑm, ge kɑ̈l-ɑ wïj dörø, kɑ yɑ løg-ɑ bɑng gen wøki kwï ji-ɑ ɑ́döng. Wø ɑ́kɑ̈l wïj dörø, kɑ wø ókedhø wø pöödh-ɑ Ønbɑ̈r mi Purun, wø kedh-ɑ kuni dör-ɑ peg, kɑ wø ókedhø wø pöödh-ɑ Dhøg Eprɑim, kí Dhøng-ɑ Weenø, kí Dhøg Rij kí Ønbɑ̈r men-ɑ cölli Anɑnel, kí Ønbɑ̈r mi Miyø, kɑ wø wɑ̈dh-ɑ Dhøg Dyëg. Acungi wøn kì dhøng-ɑ yïëbbi Kengø. Codhe, kɑ ɑkudd-ɑ ɑ́pwøj Jwøk ryeet, wɑ̈dh-ɑ dhø Kengø. Kɑ ge órëbø ki wøki jøg-ɑ ɑ́cyɑ̈dhi wøn. Akun-ɑ ɑ́cyɑ̈dhi ki yɑn yije ɑ́dɑ ókwër mø kudhø ki kɑ̈ngì, ɑ løg, Eliɑkim, kí Mɑɑseiyɑ̀, kí Miniɑmïn, kí Mikɑiyɑ̀, kí Eliönɑy, kí Dhekɑriyɑ̀, kí Aɑnɑniyɑ̀, bɑng gen ɑ́dɑ Mɑɑseiyɑ̀, kí Cemɑiyɑ̀, kí Eliɑdhɑr, kí Udhì, kí Yöɑnɑn, kí Mɑlkiyɑ̀, kí Elɑm, kí Edher. Jøwör møg-ɑ ɑ́pyejji yi Yedhrɑiyɑ̀, ɑ́wör ge óryeerø. Dicyɑ̈ngɑni, gëdhhì mø gïïr ɑ́muuj, kɑ ge otugø ki medi pëthi gen, mɑ́ ge ɑ́thödhi yi Jwøk ki medi pyëw me dwøng. Kɑ tyëng-ɑ mɑ̈nn bï-ɑ be tugø geki othønhø, kɑ cwɑggi ji wɑ̈dh-ɑ kun lɑ̈wi cɑrø. Kì bøli kenyɑni, ɑ́dɑ jøg mɑ ɑ́kwɑny gɑ jɑggi udd-ɑ mïdhi jɑmm-ɑ nyi kɑ̈ɑ̈l gɑ gwɑ̈ɑ̈j Kengø, kí ɑ́kyeel pyɑ̈rri byel, kí mwölli nywøli yenh møg-ɑ nyi kwöngi ki cyegø kì yij run. Jøgɑni ɑ́bëëd gɑ jøg-ɑ nyi cøng gwɑ̈j kì yethi pwödh, kí kɑ̈dd, kipe ókwër geki Kwɑrri Leebì, ni kɑ ógwedii kì yethi Cigg. Tyëng Yeudiyɑ̀ bënn ɑ́bëëd pëthi med ki ókwër geki Kwɑrri Leebì, mɑ́ gen ɑ nyi göggi Jwøøg gen, kí guöög dhïwi dëllì. Jøwör, kí jøg-ɑ kurø kì dhø Kengø, ɑ́bëëd ge gwøg-ɑ gwøøg gen ni kɑ ɑ́cïg Debïd geki wɑ̈de Sølømøn. Cɑ̈gi kì ri Rɑ̈dh Debïd kí bødhi thom Asɑp cøn, Jwøk nyii lejjø yi gen, kɑ nyi pwøj yi gen ki wör. Thyew kì ri Dherubɑbïl, kí Nëmɑyɑ̀, bödhhi thøm geki tyëng-ɑ kor Kengø, ge ɑ́bëëd ge nyi mëgg-ɑ gïgcɑmmi gen yethi cyɑ̈ng yi tyëng Isrɑil bënn. Kwɑrri Leebì ɑ nyi mëggi jɑmmi kwër, kɑ ókwër nyi mëggi budi gen yi Kwɑrri Leebì. Kɑ̈ng-ɑ ɑ́bëëd Wɑ̈nyi Ciggi Mosɑ̀ orɑngø, ɑyood keny-ɑ kööbø kinni, tyëng Amön, kí tyëng Moɑb ko rëbi ki jii Jwøk gïti ɑtheer, mɑ́ tyëng Isrɑil nuti pɑɑr gen ki gïgcɑmm geki pï keny-ɑ ɑ́bëën gen wɑ̈g kì Rïp, de ge ɑ́yöd ge kïr-ɑ Bɑlɑɑm, kinni o gï lɑ̈mme cyën, kɑ cyën løg ɑ́ gyëdh yi Jwøgee. Keny-ɑ ɑ́lïngi ciggɑni yi Isrɑil, kɑ tyëngpɑth bënn kɑ̈ɑ̈l gen wɑ̈g kì kelli gen. Ókwërø Eliɑcïb, ɑ ɑ́mïdhi jɑmmi Kengø, ɑ́bëëd e mër ki Töbiyɑ̀. Kɑ gø wiye o bëëde kì ød me yije lɑɑj, men-ɑ ɑ́ger ɑ́ men yije nyi mïdhi byëlø, kí bɑkur, kí jɑmm-ɑ nyi göög kì Kengø, kí gïg-ɑ nyi mëggi ókwër, kí ɑ́kyeel pyɑ̈ri byel, kí møgi oløg, kí møøw Dhetun møg-ɑ nyi mëggi Kwɑrri Leebì kí jøwör, kí jøg-ɑ kor Kengø. Gïgɑni ɑ́cwöb yɑ tøøk kì Yerusɑlem. Kì bøli kenyɑni Artɑkerkes rɑ̈nhdwøøng Bɑbïlöniyɑ̀ runne bɑ pyɑ̈r ɑ́dɑ̈g wïdɑ́ryew kì yij lɑwø, o yɑ ɑ́kedh-ɑ be dwöggii gïg-ɑ ɑ́gwøg. Kɑ ngɑ̈jɑ kinni yɑ dwɑdd-ɑ døøgø. Codhe, ɑdwöögɑ Yerusɑlem, kɑ yɑ ongɑ̈ngø, keny-ɑ ɑ́yodɑ en kinni, Eliɑcïb Töbiyɑ̀ nëng en ki ød kì buti Kengø. Arënyi pyëwɑ ki mendwøng, kɑ jɑmmi Töbiyɑ̀ bënn leengɑ wɑ̈g kì ønɑni. Codhe, ɑmuujɑ ki cigg kinni, lɑɑw yethi ud, kɑ jɑmmi Kengø, kí byëlø, kí bɑkur dwøøg kɑ̈jji gen. Kɑ yodɑ thyew kinni, kwï Kwɑrri Leebì kí jøwör dhwödhø kì Yerusɑlem, kɑ ge døøg-ɑ myërri gen, mɑ́ ge pɑ nyi nëngi yi teedø ki gïgcɑmm. Awërɑ ki jɑggi gwøg, kɑ ge pyëjɑ kinni, “Á kipe ngø ɑ wøy wun Kengø?” Acwöölɑ Kwɑrri Leebì geki jøwör kɑ ge dwøøgɑ kɑ̈jji gen. Kɑ tyëng Isrɑil bënn døøg-ɑ be kïdhi yethi udd-ɑ mïdhi jɑmmì ki ɑ́kyel pyɑ̈r mø gemè, kí møgi oløg, kí møøw dhetun. Codhe, ɑkwɑnyɑ ókwërø Celemiyɑ̀, kí Dhɑdök jɑlgwed ki Cigg, kí Pedɑiyɑ̀ Kwɑɑr Leebì gɑ jɑggi udd-ɑ mïdhi jɑmmì. Kɑ Aɑnɑn wɑ̈d Dhɑkur wɑ̈d Mɑtɑniyɑ̀ kwɑnyɑ thyew ɑ́ ngɑn nyi køny gen, mɑ́ yɑ ɑ́bëëd yɑ ngɑ̈ny wøw kinni jøgɑni ócuggø ngɑ̈dhø ceth, o gïgcɑmm ópɑ̈ngi yi gen kì kelli wɑddi gen e yethi gen bong ɑ́dud. Yïn ɑ Jwøgɑ, pɑrrí gïg-ɑ ɑ́gwøgɑ kipe Kengí kí mɑlli yïn. Kì bøli kenyɑni, kɑ ji lidhɑ kì Yeudiyɑ̀ ge obïïjø ki oløg kì cyɑ̈ɑ̈ng Sɑbɑth. O ji møøgø cïb-ɑ kömi ɑderri gen ki byel, kí møgi oløg, kí oløg, kí nywøli ólɑm, kí jɑmmì møøgø ge kïdh-ɑ Yerusɑlem; kɑ ge kyëddɑ kinni ge ko nyi ngyëwi kì cyɑ̈ɑ̈ng Sɑbɑth. Kwï tyëng Suur møg-ɑ bëëdø kì Yerusɑlem, ge ɑ́kɑ̈ni ki rij kí jɑmmì mø ngew, kɑ gï ngëwwi gen tyëng Yeudiyɑ̀ kì cyɑ̈ɑ̈ng Sɑbɑth. Kɑ jɑggi Yeudiyɑ̀ deddɑ, ɑpyëjɑ gen kinni, “Á gïn ɑ gwøg yi wun ɑ rɑj ni men? Wude ɑ bwöl wun cyɑ̈ɑ̈ng Sɑbɑth? Pɑth ki gïg ni møgɑni ɑ́ per gen ɑ́cɑɑy kweyyi wun yi Jwøk, ɑbëën ryɑ̈g kömi kɑɑl men? O ɑnɑn wu dwɑdd-ɑ kɑ̈ni kömi Isrɑil ki göj me wëggi pyëw Jwøk rënyø, kɑ̀ bwöl wun cyɑ̈ɑ̈ng Sɑbɑth?” Kɑ yɑ omuujø ki cigg kinni, nyi cyëëg dhøggi döri Yerusɑlem, kenyi cɑ̈gi cyɑ̈ɑ̈ng Sɑbɑth (kì ri buddi cɑ̈ng,) kɑ ge ko nyi yieb gïti kenyi thumi cyɑ̈ɑ̈ng Sɑbɑth. Kɑ kwï jøgɑ cïbɑ dhøggi dörø, o ge mɑ̈ɑ̈n gen kɑ̈ɑ̈li jɑmmì kɑɑl kì cyɑ̈ɑ̈ng Sɑbɑth. Kɑ jøngyëwø nïnn-ɑ wɑ̈g kì Yerusɑlem, tyelø ɑ́kyel, wɑlɑ̀ tyel ɑ́ryew. Kɑ ge köbbɑ kinni, “Wude ɑ buddi wun kì dhø döri kɑɑl? Keløg wu ócigi buddø kì kenyɑni, wu mɑgɑ’ mɑgø.” Cɑg kì bøli kenyɑni, ge nuti dwöögø cyɑ̈ɑ̈ng Sɑbɑth. Kɑ Kwɑrri Leebì cegɑ kinni, kwër gen ri gen, o ge bï gen be kori dhøggi dörø kipe kinni o cyɑ̈ɑ̈ng Sɑbɑth mïdhi ɑ́ cyɑ̈ɑ̈ng kwër ceth. Yïn ɑ Jwøk, pɑr yɑn kipe møg thyew, kɑ yɑ korrí, mɑ́ mɑ̈ɑ̈dø mií dwøng cɑrø. Kɑ yodɑ kì yethi runnɑni thyew, kinni Yeud nyömø ki nyigi tyëng Acdöd, kí Amön, kí Moɑb, o budi nyigi gen 'kööb-ɑ dhøg Acdöd, o ge pɑ cuggi kwøb ki dhøg wøn, de ge 'kööb-ɑ dhøggi ji møøgø. Kɑ ge deddɑ, kɑ ge lɑ̈mmɑ cyën, kɑ kwï gen pwödɑ, kɑ yëyyi gen pyedɑ. Codhe, kɑ ge köbbɑ köngø ki nyingi Jwøk, kinni ri gen koo nywøm yi gen ki jurrɑni. Kɑ ge köbbɑ kinni, “Bɑ mɑ̈nni Sølømøn, møg-ɑ bɑ nyigi jurr-ɑ kyeelø ɑ ɑ́peejii yij orøg. Ngö e ɑ́bong-ɑ rɑ̈dh me ni en kì yethi pödhh bënn, o ɑ́bëëd e mɑɑr yi Jwøge, kɑ gwøg yi Jwøk ɑ́ rɑ̈ɑ̈dh Isrɑil bëne, de nuti peej yij orøg yi mɑ̈nne, nyigi jurr-ɑ kyeelø? Ngøy wøn gwøøg wun, o kwøbbi Jwøgee pyem yi wɑ kɑ̀ nyömi wɑ ki nyigi jurr-ɑ pɑth?” Nyel ɑ́kyel kì kelli wɑ̈ddi Yöyɑdɑ̀, wɑ̈d Eliɑcïb Ókwër-ɑ Dwøng, nywøøm-ɑ nyɑɑr Sɑnbɑlɑt jɑl kɑɑl Bet Örøn. Kɑ Yöyɑdɑ̀ köbbɑ dhwödhe kì Yerusɑlem. Yïn ɑ Jwøk, pɑrrí kër-ɑ ɑ́ywëëdh lɑwi ókwërø yi jiɑni, kɑ møg-ɑ ɑ́ceg yi yïn kipe ókwër geki Kwɑrri Leebì pɑ̈d yi gen. Kɑ ji kwërɑ kipe gïg-ɑ pɑth bënn, kɑ gwøøg ókwër geki Kwɑrri Leebì pyëlɑ kidøøj, kɑ ngɑn mëggɑ gwøge, kɑ yɑ nyii muujø, ki yugg møg nyi rɑ̈ɑ̈b gëdhhì geki mwölli gïg-ɑ nyi cyeg, kì bøli kɑ̈jj-ɑ dwɑddi gen. Yïn ɑ Jwøk, nyi pɑ̈r yɑn kipe møgɑni bënn, kɑ yɑ thödhí ki dhwɑ̈ng. Kì dɑ̈ɑ̈g runni Kerkes kì yij lɑwø, ɑ ɑ́gööge ki thyëg me dwøng, e ryej-ɑ jɑggi mïïre geki pëjji liny. Jøliny Pɑres kí Mɑdɑy, kí jøgdøngø geki jyɑ̈ggì bënn ɑ́bëëd ge nud thyew. Átyëg-ɑ dwɑ̈tt ɑ́bïkyel e nyodh-ɑ kɑ̈re, kí dhwɑ̈nge, kí tege. Kì bɑng ryëj menɑni ɑlunyi rɑ̈nhɑni ki ryeji tyëng kɑɑldwøng Susɑ̀. Áryej-ɑ ji bënn; tyëngkɑ̈rì kí ɑbuur. Ryënyɑni ɑ́tyëg-ɑ cyɑ̈ng ɑ́bïryew, ji otugø kì yethi bɑ̈ggi gøldwøng. Kɑ ódɑ̈ri gøldwøng cørri ki sitɑrr mø kïddi gen bɑ ówɑw kí óbøw møg-ɑ ócwɑ̈jø ki kor-ɑ yöm, ge ómɑɑg ri löjji kïtt-ɑ myër ki yëlli ɑ́tegg, kí thølli kor-ɑ yöm mø kïddi gen bɑ ɑ́cwïcwïl. Kɑ ódɑ̈rɑni cïbi ki kwømm møg-ɑ ógwøgø ki dhɑb kí ɑ́tegø, o piny ótɑgø kɑ ópɑddi kïtt-ɑ myër e kïddi gen bɑ̈nni, ge ógwelø ki tigg mø per gen teg, mø ceg orɑ̈ng. Møgø ɑ́mɑdh kɑ óthɑ̈ggi dhɑb mø bëëdi gen bɑ̈nni; bong ɑ́ryew mø pɑ̈r kinni tek. Møgø ɑ́gwøg kì gøldwøng e gïïr cɑrø. Gïg mɑdh ɑ́bëëd ge gïïr ki mendwøng, mɑ́ rɑ̈dh bɑ̈ngge ɑ́cege kinni gwøøg jɑmmì ge gïïr, o bëëd e bong ngɑn pɑ yɑ̈ng. Bɑ̈rɑ̈dh Bɑctì tyëng-ɑ mɑ̈nn ɑ́ryeje thyew kì gøldwøng, kì bøli kenyɑni. Kì bïryeew cyɑ̈nggi ryëj, Rɑ̈nhdwøng Kerkes ɑ́bëëd e omɑ̈dhø, kɑ pyëwe ómïnø ki mendwøng, kɑ jøg-ɑ bɑ órøj møg-ɑ göögø kì gøldwøng gɑ ɑ́bïryew gï cwööle. Jøgɑni nyingi gen bɑ: Meumɑn, Bidhthɑ̀, Arbönɑ̀, Bigthɑ̀, Abɑgthɑ̀, Dhethɑr kí Kɑrkɑs. Kɑ bɑ̈nggɑni köbbi yi rɑ̈dh kinni i kɑ̈ɑ̈l gen Bɑ̈rɑ̈dh Bɑctì, e orugø ki ógudhi rɑ̈ɑ̈dhø, kí yɑ̈r kì wïje. Bɑ̈rɑ̈dh menɑni ɑ́bëëd e myëër cɑrø, o rɑ̈dh ɑ́dwɑdd-ɑ nyudhi jyɑ̈gge bënn ki myëri Bɑ̈rɑ̈dh Bɑctì. De kɑ ɑ́köbbi Bɑ̈rɑ̈dh Bɑctì yi bɑ̈ngg ki møg-ɑ ɑ́ceg yi rɑ̈dh, ɑbɑ̈nye ki bëën yï rɑ̈dh. Kɑ rɑ̈dh pyëwe órënyø ki mendwøng. Codhe, kɑ jøgdøngø møg-ɑ ngɑ̈nyi cigg pyëj yi rɑ̈dh, mɑ́ e ɑ́bëëd ɑ́ kwöng ceth kinni rɑ̈dh nyii pëjjø ki tyëng-ɑ ngɑ̈ny wøw kidøøj. O jøg-ɑ ɑ́bëëd ge nud kì kenyɑni bɑ Kɑrcenɑ̀, Cethɑr, Admɑthɑ̀, Tɑrcic, Meres, Mɑrsenɑ̀ kí Memukɑn. Bene gen jɑgg-ɑ døngø gɑ ɑ́bïryew kì Mɑdɑy geki Pɑres. Kɑ jøgɑni köbbe kinni, “Yɑ Rɑ̈dh Kerkes, bɑ̈nggɑ ɑ́örɑ be cwööli Bɑ̈rɑ̈dh Bɑctì, de ngɑnɑni ɑ́bɑ̈nyi lïngi kwøbbɑ! Cigg okööbø kinni i göggi ngø?” Kɑ Memukɑn ólöggø kinni, “Bɑ̈rɑ̈dh Bɑctì nuti bɑɑny-ɑ kwøbbi rɑ̈dh kete; dɑ́ rɑ̈dh kí jyɑ̈gge, kí ji-ɑ yethi pödhh-ɑ jɑɑg yi rɑ̈dh bënn ɑ ɑ́bɑny yi en. Tyëng-ɑ mɑ̈nn møg-ɑ yethi pödhh-ɑ jɑɑg yi rɑ̈nhdwøng bënn, ceg-ɑ døøg be pëmø ki kwøbbi gen, keny-ɑ ólïngi gen gïn-ɑ ɑ́gwøg yi bɑ̈rɑ̈dh. Ge ókööbø kinni, ‘Bɑ̈rɑ̈dh Bɑctì ɑ́cwøl yi Rɑ̈dh Kerkes kɑ óbɑ̈nyø ki kedhi yïe.’ Keny-ɑ ólïng mɑ̈nni jɑggi Pɑres geki Mɑdɑy ki gïn-ɑ ɑ́gwøg yi bɑ̈rɑ̈dh, ge ódøøg be pëmø ki kwøbbi jyɑ̈ggi rɑ̈dh, o bong keny-ɑ ócöög yi linyɑni! Keløg e døøj kì yïí wuö, gwëdí piny ki cigg kinni Bɑ̈rɑ̈dh Bɑctì pɑ cigi bëën bøli rɑ̈dh. Kɑ møgɑni gweed piny gɑ ciggi Pɑres kí Mɑdɑy, o ge cög ge pɑ wil. Kɑ kej Bɑ̈rɑ̈dh Bɑctì mëggi ngɑndhɑjø megø me lɑ̈w kibøle. Keny-ɑ óyood ciggɑni yi pödhh-ɑ jɑɑg yi rɑ̈nhdwøng bënn, tyëng-ɑ mɑ̈nn cwøwi gen ówør yi gen ki mendwøng, cɑgg cwøwɑni kɑ̈rø wɑlɑ̀ ge jɑdø.” Kɑ møg-ɑ ɑ́kwøb yi Memukɑn yïëy yi rɑ̈dh geki jyɑ̈ggì bënn. Kɑ pödhh-ɑ jɑɑg yi rɑ̈nhdwøng gwëdi ki wɑ̈j bënn, men gwëdi kɑ dhøge, kinni jɑlø bɑ en ɑ bɑ jɑgø kì gøle, o en ɑ kwøbbe lïngi. Rɑ̈dh ɑ́bëëd e nudd e orumø kì ri gïn-ɑ ɑ́gwøg yi Bɑ̈rɑ̈dh Bɑctì, kí cigg-ɑ ɑ́gweede piny, cɑgg ɑ́ kɑ ɑ́døøg linye piny. Codhe, ɑköbbi rɑ̈dh yi jø tøg bure kinni, “Yïde ɑ pɑ yɑ̈ɑ̈b ki womɑ̈nn mø myëër, mø nuti pɑ̈nyø’ nywɑlø yi cwøw? Ödí yethi pödhh-ɑ jɑɑg yi rɑ̈nhdwøng ki ji møg yɑ̈bø ki womɑ̈nn mø myër, kɑ ge kɑ̈ɑ̈l Susɑ̀ keny, kɑ ge cïb cingi Ëgɑy, órøny-ɑ jɑɑg gøldwøng, o ge temmi. Orum gen ki temmø kidøøj, o yï kɑ̈bbí kì kelli gen ki nyɑn cïb kej Bɑ̈rɑ̈dh Bɑctì.” Møgɑni ɑ́yïëy yi rɑ̈dh, kɑ ogöögø ni kɑ ɑ́köbbii. Ádɑ jɑl mɑ Yeudì kì Susɑ̀, me cwøl ɑ́ Mordekɑy wɑ̈d Yɑir, wɑ̈d Cimeì, wɑ̈d Kïc kì gøl Ben Yɑmïn. Mordekɑy ɑ́kïdhi Bɑbïlöniyɑ̀ cøn kyeel kɑ Rɑ̈dh Yöyɑkin rɑ̈ɑ̈dh Yeudiyɑ̀ yi Nebukɑdnesɑr, rɑ̈ɑ̈dh Bɑbïl, kí ji-ɑ ɑ́mɑg bënn. Mordekɑy yïe ɑ́dɑ nyiwɑ̈n mɑ kïj, mɑ ɑ́pidh yi en. Nyɑnɑni bɑ Ester, o cwøl ɑ́ Adɑsɑ̀ ki dhøg Ibru. Bɑ nyɑn me myëër, o dële døøj. Ester ɑ́kïdhi kelli womɑ̈nn møg-ɑ ɑ́kɑ̈ɑ̈l Susɑ̀, kì bɑng ciggi rɑ̈dh. Kɑ cïb cingi Ëgɑy kì gøldwøng. Ëgɑy pyëwe ɑ́bëëd e med ki Ester, kɑ gø jwɑne ki yɑ̈bbø ki keny me døøj kì gøldwøng, kí womɑ̈nn ɑ́bïryew møg kɑ̈llii, o ge temmi gen dële. Ester nuti kwøb kinni bɑ nyɑɑr Yeud, mɑ́ e rumø ki cegø yi Mordekɑy kinni ree ko nyodhe. Mordekɑy ɑ́bëëd e nyii cyɑ̈dhø e bɑ̈nn-ɑ dhøg ódɑ̈ri gøldwøng, tung-ɑ mïdhi womɑ̈nn, kipe kinni o nyi lidhe Ester mɑ bëëde kidï. Kɑ dëlli womɑ̈nn møgɑni tyëg-ɑ run ge otemmø; ge ɑ́demmi ki ryɑ̈ mor, møw-ɑ yøme med ki dwɑ̈tt ɑ́bïkyel. Kɑ ge lony ki demmø ki bɑlsɑm møw-ɑ yøme med ki dwɑ̈tt ɑ́bïkyel møøgø. Codhe cyee, kɑ womɑ̈nn møgɑni cɑg ki muuj Rɑ̈dh Kerkes, e nyi kɑ̈l ɑ́ ɑ́kyel. Kɑ̀ kɑ̈ɑ̈l nyɑnɑjur e kïdh-ɑ yï rɑ̈dh, bɑ ɑyïëy kinni ruge ki ógønh-ɑ dwɑddi yi pyëwe. Nyɑn-ɑ kɑ̈l, nyi kɑ̈l ɑ böörø, o dwööge dhuki kì mwøl. De keny-ɑ ódwööge, kïdh-ɑ tung-ɑ jɑɑg yi órøny-ɑ cwøl ɑ́ Cɑɑcgɑdh, jɑl-ɑ mïdhi ɑkwɑnyyi rɑ̈dh. Nyɑnɑni pɑ døøg yï rɑ̈dh, keløg e pɑ ceg ki cwølø yi rɑ̈dh ki nyinge. Keny-ɑ ɑ́wɑ̈nhi bøli kej nyiwï Mordekɑy, nyɑn-ɑ ɑ́pidh yi en e nɑ nyɑre; eni Ester nyɑɑr Abikɑil; keny-ɑ ɑ́wɑ̈nhi bøli kej kïdhe yï rɑ̈dh, ɑ́løny-ɑ ógudh-ɑ ɑ́köbbii yi Ëgɑy, jɑl-ɑ cinge di gen. Ester ɑ́bëëd e mɑɑr yi teenɑni bëne. Ester ɑ́kïdhi yï Rɑ̈dh Kerkes kì gøldwøng, kì dwɑ̈y Tebet, e Rɑ̈dh Kerkes runne bɑ ɑ́bïryew kì yij lɑwø. Ester ɑ́mɑɑr yi rɑ̈dh ki mendwøng kibøli tyëng-ɑ mɑ̈nn bënn. Kɑ pyëwe kwɑny yi Ester. Acïbe yɑ̈ɑ̈r rɑ̈ɑ̈dhø wïj Ester, kɑ gø kwɑnye ɑ́ kej Bɑ̈rɑ̈dh Bɑctì. Kɑ rɑ̈dh ogöögø ki thyëg me dwøng kiper Ester, kɑ jyɑ̈gge ryeje bënn. Kɑ cyɑ̈ngɑni gwøge ɑ́ cyɑ̈ɑ̈ng ywömø kì yethi pödhh-ɑ jɑɑg yi en bënn, kɑ omuujø ki jɑmmì mø kyëëw ki rɑ̈ɑ̈dhø. Mordekɑy ɑ́bëëd e rumø ki rønyø ɑ́ jɑgø kì gøldwøng yi rɑ̈dh. De Ester ɑ́bëëd ree nuti nyoodh en kinni bɑ nyɑɑr Yeud, mɑ́ e ɑ́köbbi yi Mordekɑy kinni ko di ngɑn köbbi yi en. Kwøbbi Mordekɑy ɑ́bëëd gï nyi lïnge’ lïngø ceth, kër-ɑ ɑ́wöne e thiinh. Keny-ɑ ɑ́bëëd Mordekɑy e nenn-ɑ gwøg kì gøldwøng, kɑ Bigthɑnɑ̀ geki Terec, órøjj-ɑ nyi kor dhøng-ɑ nyi kɑ̈ɑ̈l yi rɑ̈dh kì gøldwøng, ogöögø ki møg mɑɑn Rɑ̈dh Kerkes, kɑ ge onywɑ̈gø ki kwøbbi nɑ̈gi rɑ̈dh. Møgɑni óyodø yi Mordekɑy, kɑ Bɑ̈rɑ̈dh Ester köbbe, ɑloony rɑ̈dh ki köbbø yi Ester. Keny-ɑ ɑ́yɑɑb thɑ́ møgɑni, kɑ ge yod gɑ dyër, ɑngɑɑb jøgɑni ryeet wɑ̈thi bɑ̈rr-ɑ nyi ngɑ̈bbi. Kɑ rɑ̈dh okööbø kinni i gweed kwøbbɑni yij wɑ̈nyi pödhh-ɑ jɑɑg yi rɑ̈nhdwøng. Kì bɑng keny megø, kɑ jɑl me cwøl ɑ́ Ämɑn røny yi Rɑ̈dh Kerkes ɑ́ jɑng-ɑ dwøng. Ämɑn bɑ wɑ̈d jɑl me cwøl ɑ́ Amedɑthɑ̀, kwɑɑr Agɑg rɑ̈ɑ̈dh Amɑlek. Kɑ jø tøg burø bënn, köbbi yi rɑ̈dh kinni i mɑl gen Ämɑn, kɑ wɑ̈thi gen kuul gen piny kì bøli Ämɑn. Kɑ jøgɑni oyïëyø bënn, de ciggɑni ɑ́bɑny yi Mordekɑy. Apyëëj Mordekɑy yi jyɑ̈ggi rɑ̈dh kinni, “Yïde ɑ bɑɑny ciggi rɑ̈dh?” Kɑ jøgɑni pëgg-ɑ be kwɑjji Mordekɑy yethi cyɑ̈ng kinni yïëye ki ciggi rɑ̈dh. De kwøbbi gen pɑ nyi yïëy yi Mordekɑy. Kɑ gï nyi kyëdde kinni, “Yɑ bɑ Yeudì, o Ämɑn pɑ cuggi mɑlø yi yɑn.” Akedh gen kɑ møgɑni köbbi gen Ämɑn. Ge ɑ́dwɑdd-ɑ yodi kinni kwøbbi Mordekɑy óløøg ɑ dï yi Ämɑn. Ämɑn ɑ́bëëd pyëwe rɑɑj cɑrø keny-ɑ ɑ́yode kinni Mordekɑy bɑ̈nyø ki bɑ̈nyi dwøng ki mɑlii geki kuuli wïje piny kì bøle. De kɑ ɑ́yode gøn kinni Mordekɑy bɑ Yeudì, ɑyɑ̈be ki yöö men nɑ̈ge Mordekɑy kí wɑdde bënn; ɑ løg Yeud bënn, møg-ɑ yethi pödhh-ɑ jɑɑg yi Kerkes. Kì dwɑ̈n-ɑ mɑl (Nisɑn) kì yij runn, kì pyɑ̈rø wïdɑ́ryeew runni Kerkes kì yij lɑwø, ɑ ɑ́kööb Ämɑn kinni leeng wél (ɑ cwøl ɑ́ purïm) o dwɑ̈y geki cyɑ̈ng-ɑ ógögge Yeud ki gïnrɑj yod. Codhe, ɑ leeng wél, kɑ ge pɑ̈dhi kɑ pyɑ̈rø wïdɑ́dɑ̈ɑ̈g cyɑ̈nggi pyɑ̈rø wïdɑ́ryeew dwɑ̈tt (Adɑr). Aköbbi rɑ̈dh yi Ämɑn kinni, “Dɑ jur me tɑɑy yij pödhí, ge nud kì yethi pödhh-ɑ jɑɑg yi yïn bënn, ge mïdh-ɑ kwöng me bɑ̈ɑ̈n ki köngi ji bënn. O ge pɑ nyi yïëy ki ciggi pödhí. Yï ko kud kì kömi møgɑni. Keløg e ócuggø wuö, muuj ki cigg kinni nɑ̈ɑ̈g gen bënn. Keløg ge ónɑ̈g yi yïn, yɑ ómuujø ki ngyëny ɑ́tegg gɑ kïllì ɑ́lïp miy ɑ́dɑ̈g kí pyɑ̈r ɑ́ngwen møg kïdhi kömi ngyënyyi gøldwøng.” Kɑ rɑ̈dh gweli lwede, men-ɑ bɑ kitim budhe wɑ̈g, kɑ gø mëgge ngɑn-ɑ mɑɑn Yeud; ɑ løg Ämɑn wɑ̈d Amedɑthɑ̀, kwɑɑr Agɑg. Kɑ Ämɑn köbbi yi rɑ̈dh kinni, “Jiɑni bɑ møgí geki ngyënyyi gen bënn; göggí gen gïn-ɑ dwɑddi yi yïn.” Kì pyɑ̈rø wïdɑ́dɑ̈ɑ̈g cyɑ̈nggi kyeel dwɑ̈tt, ɑ ɑ́cwøøl jøgwed mø rɑ̈dh yi Ämɑn, kɑ gï köbbe kinni gwed gen ciggɑni, kɑ ge løg ki dhøggi pödhh-ɑ jɑɑg yi rɑ̈nhdwøng, kɑ ge ör yethi pödhh bënn. Ciggɑni ɑ́ör kɑ nyingi rɑ̈dh, o wɑ̈nyɑni bɑ ɑthɑny ki kitim mi Rɑ̈dh Kerkes. Ciggɑni ɑ́kɑ̈l-ɑ yi jøg-ɑ nyi rïngi kì yethi pödhh-ɑ jɑɑg yi rɑ̈nhdwøng bënn. Ciggɑni bɑ kinni, kì yij cyɑ̈ng ɑ́kyel, ɑ bɑ cyɑ̈nggi dwɑ̈y (Adɑr) pyɑ̈rø wïdɑ́dɑ̈g, nɑ̈ɑ̈g Yeud bënn; othønhø kí tyëngdøngø, tyëng-ɑ mɑ̈nn kí møg-ɑ dhødh. Ko di ngɑn pyëwe lɑ̈ɑ̈m ki gen; ngɑlli gen bënn, kɑ jɑmmi gen kwɑny. Ngɑ̈ɑ̈j ciggɑni kì yethi pödhh bënn, o ji óbëëd ri gen gwiir gen kipe cyɑ̈ngɑni. Kɑ ciggɑni ngɑ̈jji teedø bëne kì Susɑ̀ ni kɑ ɑ́kwøbii yi rɑ̈dh. Kɑ wɑ̈nyi ciggɑni kïdhi yethi pödhh bënn yi jøngwej. Kɑ Rɑ̈dh pëgg-ɑ be mɑdh ki møgø geki Ämɑn, de ji wɑ̈thi gen ɑ́muum kì Susɑ̀. Mordekɑy, keny-ɑ ɑ́yode gïg-ɑ ógwøgø bënn, kɑ ógudhe pyëde yi rɑ̈ji pyëwe. Kɑ ree lunye ki ocwɑ̈lø, kɑ wïje buge ki belø, kɑ ókedhø e bɑ̈ɑ̈n-ɑ kɑɑl e óywöngø ki rɑ̈ji pyëwe, gïti kɑ ɑ́wɑ̈dhe dhø gøldwøng, de ɑ́cög e nuti kedhi gølɑni, mɑ́ e pɑ wëggi kedhi kɑl, e rug-ɑ ocwɑ̈lø. Wöönɑni ɑ́wɑ̈dhi yethi pödhh bënn, o kenyi lïngi ciggɑni yi Yeud, ge nyi ceg-ɑ ywøg. Kɑ ri gen twöön gen ki gïncɑm, ge óywöngø, ge okïïwø. Kɑ mø gïïr kì kelli gen orugø ki ocwɑ̈llì, kɑ ge obuddø kì yij belø. Kɑ Ester köbbi yi mɑ̈nn geki órøjj-ɑ gøldwøng ki gïn-ɑ ɑ́gwøg yi Mordekɑy. Kɑ pyëwe ceg-ɑ rënyø, ɑöde ki ógudh møg løny ri Mordekɑy, de ógudhɑni ɑ́bɑny yi Mordekɑy. Kɑ órøj me cwøl ɑ́ Athɑk cwøl yi Ester, ɑköbbe gøn kinni kedhe yï Mordekɑy, o yode gïn-ɑ cwöbø. Kɑ Athɑk kedh-ɑ yï Mordekɑy kì dhø gøldwøng. Aköbbii yi Mordekɑy ki gïg-ɑ göögø, kí kwɑnni ngyënyy-ɑ ómuuj yi Ämɑn gɑ møg kïdhi kömi ngyënyyi gøldwøng, keløg Yeud ónɑ̈g bënn. Kɑ Athɑk mëgge wɑ̈nyi ciggɑni, eni men-ɑ ɑ́ngɑ̈ɑ̈j ji kì Susɑ̀ kinni nɑ̈ɑ̈g Yeud. Kɑ köbbi yi Mordekɑy kinni mëgge gøn Ester, kɑ gø nyudhe ki gïg-ɑ göögø bënn. Orume, kɑ Ester kedhe yï rɑ̈dh be kwɑjjii, o lɑɑwe dwööge piny kipe wɑdde, Yeud. Kɑ møgɑni gwøg yi Athɑk. Kɑ Athɑk ör yï Mordekɑy yi Ester, o gø köbbe kinni, “Keløg e dɑ dhɑnhø, ying-ɑ́ jɑlø wɑlɑ̀ dhɑjø, men kedhi gøldwøng yï rɑ̈dh, kì ódɑ̈r-ɑ yij gøldwøng e nuti cwølø, ngɑnɑni nyi ceg kɑ nɑ̈gø. Ciggɑni ngɑ̈nyi yi jyɑ̈ggi rɑ̈dh kí ji bënn. Ngɑn bødh ki nɑ̈gø kì bɑng ciggɑni, bɑ ngɑn tïngi loodh dhɑb yi rɑ̈dh. De ɑ́göög ki dwɑ̈y ɑnɑn kër-ɑ ɑ́cwøøl yɑn yi rɑ̈dh.” Kɑ ɑ́yood wööni Ester yi Mordekɑy, ɑöde gøn ki kwøb kinni, “Yï ko rum kinni yï óyiel yi kɑ̀ bëëd yï ying-ɑ gøldwøng, dɑ́ Yeud møg-ɑ kyeelø ɑ ónɑ̈g. Keløg yï okudø kì bøli keny ni men, ngɑn-ɑ óyiel Yeud óbï e kɑ̈ɑ̈l-ɑ mɑl, de yï ceg-ɑ thøø, o wïj gøl wïyí ceg-ɑ pɑ̈ɑ̈dhø. Dɑ́ men ɑ ngɑ̈nyii, ying-ɑ́ per bøli keny ni men, ɑ ógwøøg yïn, yïn ɑ́ bɑ̈rɑ̈dh!” Aløøg mø Mordekɑy yi Ester kinni, “Kedh, kɑ Yeud cøng bënn kì Susɑ̀, thuum wun kɑ wu kwɑ̈jji wun kiperɑ; wu ko cyɑ̈ɑ̈m wɑlɑ̀ wu ko mɑ̈ɑ̈dh ki gïïpiny ki cyɑ̈ng ɑ́dɑ̈g, kí wɑ̈rr ɑ́dɑ̈g. Yɑ óthuumø wøki wo-ɑ butɑ, o wø ókwɑ̈jji thyew. Othumi cyɑ̈nggɑni, yɑ ókedhi yï rɑ̈dh, cɑgg møgɑni bɑ ɑkerø yi cigg. Keløg yɑ othøø kipe kɑ̀ göögɑ kinøw, wiy yɑ thøwɑ.” Adhwödh Mordekɑy, kɑ kedh-ɑ be gwøgi møg-ɑ ɑ́köbbii yi Ester. Kì dɑ̈ɑ̈g cyɑ̈nggi thuumi Ester, kɑ ógudhi rɑ̈ɑ̈dhø møge lønye ree, ɑkedhe kɑ ócungø kì ódɑ̈ri gøldwøng kì tuung rɑ̈dh, e nenn-ɑ øn-ɑ di kwøøm jyɑ̈gø. Rɑ̈dh ɑ́bëëd e nud kì ønɑni e obëëdø kì wïj kwøm e nenn-ɑ dhøng-ɑ yïëbbi ódɑ̈rɑni. Kɑ ɑ́liidh Bɑ̈rɑ̈dh Ester yi rɑ̈dh e ócungø kì wɑ̈g, ɑtyerii yi pyëwe, kɑ loodh dhɑb tïnge, ɑkedh Ester kɑ wïj lodh nywɑle. Kɑ pyëj yi rɑ̈dh kinni, “Á gïn Bɑ̈rɑ̈dh Ester? Köbbí yɑn gïn-ɑ dwɑddi yi yïn, cɑgg ɑ́ budi pödhɑ, mëgg-ɑ yïn.” Alöggi Ester kinni, “Keløg e ócuggø wuö, yɑ dwɑdd-ɑ kinni rɑ̈dh geki Ämɑn bï gen gølɑ keny-ɑ ryejɑ wun tïn kì thyënhø.” Kɑ Rɑ̈dh öd-ɑ yï Ämɑn kinni jwɑne bëënø, o ge kedhi gen kej ryëëj Ester. Codhe, kɑ rɑ̈dh kedh-ɑ kej ryëëj Ester geki Ämɑn. Kɑ̈ng-ɑ ɑ́mɑ̈ɑ̈dh gen ki møgø, ɑpyëëj ngɑnɑni yi rɑ̈dh kinni, “Köbbí yɑn gïn-ɑ dwɑddi yi yïn, o mëgg-ɑ yïn ceth. Gïn-ɑ dwɑddi yi yïn mëggɑ’ yïn, cɑgg ɑ́ men-ɑ́ budi pödhɑ.” Alöggi Ester kinni, “Gïn-ɑ kwɑjjɑ; ɑ yɑb yi yɑn bɑ kinni, keløg pyëwí med ki yɑn wuö, yɑ dwɑdd-ɑ døøgi yïn ki ryejø dhuki wuki Ämɑn. Yï óköbbɑ gïn-ɑ dwɑddɑ kì bøli kenyɑni.” Ämɑn ɑ́dhwödh kì kej ryëj e pyëwe ceg-ɑ medø ki mendwøng. De kɑ ɑ́lidhe Mordekɑy kì dhø gøldwøng, kɑ Mordekɑy ocögø e pɑ dhwödhi mɑl kipere, wɑlɑ̀ wïje nuti kuul en piny e wør-ɑ gøn, kɑ Ämɑn pyëwe ceg-ɑ rënyø ki mendwøng ki en. De pyëwe ɑ́mɑge kɑ kedh-ɑ gøle. Kɑ mɑ̈dhhe cwøøle gøle, kɑ cyëge me cwøl ɑ́ Dherec, cwøle o bëëde kì buti gen. Kɑ othwøgø kì bøli gïn kipe kɑ̈re, kí ngenyi wɑ̈dde, kí kër-ɑ ɑ́tïngii mɑl yi rɑ̈dh, kɑ røny ɑ́ jɑngi dwøng. Kí kinni pere teeg kibøli jyɑ̈ggi rɑ̈dh møg-ɑ kyeelø. Kɑ okööbø kinni, “Cɑgg ɑ́ men-ɑ́ Bɑ̈rɑ̈dh Ester, bong ngɑn mɑ ɑ́ryeje geki rɑ̈dh, den-ɑ́ yɑ ketɑ. O wø ócige ryejø dhuki. De bong gïn wɑngi yi møgɑni bënn, mɑ́ pyëwɑ pɑ med kenyi nennɑ Mordekɑy wɑ̈d Yeud, e obëëdø kì dhø gøldwøng.” Kɑ köbbi yi cyëge Dherec geki mɑ̈dhhe bënn kinni, “Yïde ɑ pɑ cwödhí piny ki gïn-ɑ nyi ngɑɑb ji, me bɑ̈re bɑ mïtïr pyɑ̈r ɑ́ryew wïdɑ́ryew? O Rɑ̈dh köbbi yi yïn dhuki kì mwøl, kinni ngɑɑb Mordekɑy wïje. Codhe, o yï kedhí kej ryëj pyëwí omedø.” Kɑ Ämɑn pyëwe ómïnø yi kwøbbɑni, ɑcwödhhe piny ki gïn-ɑ ree nyi ngɑ̈bbi. Rɑ̈dh ɑ́dhɑ̈li nenø kì wɑ̈rɑni. Aköbbe jøgwøg kinni kɑ̈ɑ̈l gen wɑ̈ny-ɑ nyi gweed kwøbb-ɑ per gen teg kì yij pödhø, kɑ rɑ̈ngii. Bun-ɑ ɑ́rɑng kööb ɑ ri møg-ɑ ɑ́gwøg yi Mordekɑy, kɑ ɑ́nyodhe kwøbbi dwɑddi rɑ̈dh ki nɑ̈gø yi órøjj-ɑ kor gøldwøng, ɑ løg Bigthɑnɑ̀ geki Terec. Apëjji rɑ̈dh kinni, “Mordekɑy ɑ́pwøj yi wɑ kɑ ngø?” Aløøg møgɑni yi bɑ̈ngge kinni, “Bong gïjø mɑ ɑ́göggii.” Apëjji rɑ̈dh kinni, “Dɑ jøgdøngø mø nud kì gøldwøng?” Kedh Ämɑn wɑ̈nh-ɑ ódɑ̈ri gøldwøng, kì bøli kenyɑni ceth. Ábï-ɑ be kwɑjji rɑ̈dh kipe ngɑɑbi Mordekɑy wïj gï ngɑb, men-ɑ ɑ́rum ki cwöödh piny yi en. Alöggi bɑ̈nggɑni kinni, “Ämɑn nud kì keny. Dwɑdd-ɑ yïddø ki yïn.” Akööb rɑ̈dh kinni, “Wiy bëe ød.” Kɑ Ämɑn bï-ɑ ød. Kɑ köbbi yi rɑ̈dh kinni, “Dɑ dhɑnhø me dwɑddɑ pwøjø ki mendwøng. Á ngø ɑ cuggi gwøgø yi yɑn, kipe jɑl ni menɑni?” Kɑ Ämɑn okööbø ki pyëwe kinni, “Anɑn, ɑ́ men ɑ cuggi dwɑddø yi rɑ̈dh ki pwøjø? Bɑ yɑn ceth.” Kɑ yï kɑ̈bbí ki dhɑnhø kì kelli jyɑ̈gg-ɑ døngø, o ruuge jɑlɑni. Codhe, o kyeny pyejje kì kelli kɑɑl, e jɑl-ɑ pwøj obëëdø kì kömi kyeny. Kɑ wiy jɑldwøng-ɑ pyejji kyeny cyɑ̈dhe e óryeerø e köbb-ɑ ji kinni, ‘Lidhu kër-ɑ nyi pwøøj dhɑnhø yi rɑ̈dh!’ ” Aköbbi Ämɑn yi Rɑ̈dh kinni, “Jwɑní kɑ ógudh kɑ̈ɑ̈l geki kyeny, kɑ pwøj møgɑni göggí Mordekɑy wɑ̈d Yeud. Göggí gïg-ɑ ɑ́kwøb yi yïn bënn. Óyuud yi yïn e obëëdø kì dhø gøldwøng.” Akɑ̈ɑ̈l ógudh kí kyeny yi Ämɑn, kɑ Mordekɑy ruuge, kɑ gø cïbe kömi kyeny. Kɑ kyeny pyejji yi Ämɑn kì kelli kɑɑl, e óryeerø e köbb-ɑ ji kinni, “Lidhu kër-ɑ nyi pwøøj dhɑnhø yi rɑ̈dh.” Codhe, ɑdøøg Mordekɑy dhø gøldwøng, kɑ Ämɑn jwɑn-ɑ gøle e kwiiwø wïje kum en. Kɑ cyëge geki mɑ̈dhhe bënn köbbe ki gïg-ɑ ɑ́cwöb kipere. Aköbbii yi cyëge geki mɑ̈dhhe ki kwøbbi peli wïj kinni, “Keløg Mordekɑy men-ɑ cɑ̈gi ki tyɑmi yïn èn bɑ Yeudì kidyër, yï pɑ cuggi cung kì bøle; yï bɑ men tɑ̈ɑ̈ye piny ceth.” Kɑ̈ng-ɑ́ nud ge okööbø, kɑ órøjji gøldwøng ówɑ̈nhø, ge dwɑ̈ɑ̈y-ɑ Ämɑn, kinni o kedhe kun-ɑ rëëj yi Ester. Akedh rɑ̈dh geki Ämɑn, ge kedh-ɑ be ryëëj Bɑ̈rɑ̈dh Ester. Kì ryeew cyɑ̈ng, kɑ̈ng-ɑ́ nudd ge omɑ̈dhø ki møgø, ɑpyëëj Ester yi rɑ̈dh kinni, “Bɑ̈rɑ̈dh Ester, ɑ́ gïn ɑ dwɑddi yi yïn? Köbbí yɑn, o mëggi yïn ceth, cɑgg ɑ́ budi pödhɑ.” Aløøg møge yi Bɑ̈rɑ̈dh Ester kinni, “Keløg e di dwɑddø yi yïn wuö, o pyëwí med ki yɑn, wiy yɑ nëënɑ, kɑ wiy wɑddɑ nëën gen. Yɑ ɑ́rum ki ngewø wøki wɑddi wøn, wøn ɑ́ møg ngɑl. Ke di cɑɑg wøn ki ngewø wøn ɑ́ bɑ̈ngg, yï pɑ di jud yi yɑn, de wø ceg kɑ dwɑddi nɑ̈gø kinni tweet!” Apyëëj Bɑ̈rɑ̈dh Ester yi Rɑ̈dh Kerkes kinni, “Á men ɑ dwɑddi gwøgi gïn ni men? Jɑlɑni ying-ɑ keny?” Alöggi Ester kinni, “Ngɑn-ɑ mɑɑn wøn, ɑ dwɑddi wøn nɑ̈gø bɑ jɑl-ɑ rɑj èn, Ämɑn!” Kɑ Ämɑn nyinge otøngø yi wɑ̈ɑ̈rø, e nenn-ɑ yï rɑ̈dh geki bɑ̈rɑ̈dh, Kɑ rɑ̈dh dhwödh-ɑ mɑl pyëwe rɑɑj ki mendwøng, kɑ kedh-ɑ wɑ̈g kì ød, ɑkedhe yij bɑɑg gøldwøng. Kɑ yod yi Ämɑn kinni, rɑ̈dh dwɑdd-ɑ cɑyii kipe møgɑni, codhe ɑdönge e kwɑjj-ɑ Bɑ̈rɑ̈dh Ester kipe kinni o wëye yiel. Keny-ɑ ɑ́dwöög rɑ̈dh kì yij bɑg, Ämɑn ɑ́yuude e obuddø kì wïj pyën-ɑ bëëd yi Ester e kwɑjj-ɑ gøn kinni o wiy. Kɑ ɑ́lïdhi rɑ̈dh, ɑryeere kinni, “Jɑɑl dwɑdd-ɑ mødi bɑ̈rɑ̈dh kì butɑ; kì men-ɑ́ gøldwøng?” E rɑ̈dh nudd e ceg-ɑ kwøb ceth, kɑ nyingi Ämɑn kum yi órøjji gøldwøng. Kɑ ɑ́kyel kì kelli gen, me cwøl ɑ́ Arbönɑ̀ okööbø kinni, “Pɑth ki møg keti gen, de men-ɑ́ Ämɑn ɑ́rum ki cwödhi piny ki gïn-ɑ wïje nyi ngɑ̈ɑ̈b, ɑ́ men ngɑɑb Mordekɑy, jɑl-ɑ ɑ́yiel wëyí wuö. Bɑ̈ri ngɑ̈ɑ̈bi menɑni bɑ mïtïr pyɑ̈r ɑ́ryew wïdɑ́ryew.” Amuuj rɑ̈dh ki cigg kinni, “Ngɑɑb Ämɑn wïj gïnɑni.” Codhe, ɑngɑɑb Ämɑn wïj ngɑ̈ɑ̈bi men-ɑ ɑ́cwöödhe piny ɑ́ men di ngɑɑb Mordekɑy. Kɑ liny rɑ̈dh ókwöjø. Kɑ jɑmmi Ämɑn jɑl-ɑ ɑ́mɑn Yeud mëggi Bɑ̈rɑ̈dh Ester yi Rɑ̈dh Kerkes kì cyɑ̈ngɑni ceth. Aköbbi rɑ̈dh yi Ester kinni Mordekɑy bɑ wɑɑd gen. Kɑ Mordekɑy yïëy kinni nyi kedhe bøli rɑ̈dh. Kɑ gwelø men-ɑ bɑ kitim rɑ̈dh budhe wɑ̈g kì lwede (gwelɑni ɑ́cer-ɑ kwɑnyø kì yï Ämɑn) kɑ gø mëgge Mordekɑy. Kɑ jɑmm-ɑ ɑ́bëëd gɑ møgi Ämɑn, cïb cingi Mordekɑy yi Ester. Acigi Ester kwøb ki rɑ̈dh. Kɑ ree leenge dhøggi tyelli rɑ̈dh e óywöngø. Kɑ rɑ̈dh kwɑjje kinni kyere gïnrɑj men-ɑ ɑ́dwɑddi göggi Yeud yi Ämɑn, kwɑɑr Agɑg. Kɑ rɑ̈dh loodh dhɑb tïnge Ester, kɑ Ester dhwödh-ɑ mɑl, ɑkööbe kinni, “Keløg e di dwɑddø yi yïn wuö, o keløg perɑ teeg kì yïí, muuj ki cigg møg kyer gïg-ɑ ɑ́dwɑddi gwøgø yi Ämɑn; gen ɑ cigg-ɑ ɑ́muuj yi wɑ̈d Amedɑthɑ̀ kwɑɑr Agɑg kinni i nɑ̈ɑ̈g Yeud bënn kì yij pödhø bëne. Møgɑni óngin yi yɑn kidï, keløg gïnrɑj menɑni bï-ɑ kömi wɑddɑ kɑ ge nɑ̈g!” Aköbbi Bɑ̈rɑ̈dh Ester geki Mordekɑy yi Rɑ̈dh Kerkes kinni, “Ämɑn ɑ́ngɑb yi yɑn kɑ per gïnrɑj men-ɑ ɑ́dwɑdde göggi Yeud, kɑ jɑmme mëggɑ Ester. De cigg møg-ɑ nyi gwed ki nyingi rɑ̈dh, kɑ wɑ̈nyɑni thɑny ki kitim rɑ̈dh, pɑ cuggi wilø. Wu ócuggø gwëdi Yeud ki gïn-ɑ dwɑddi yi wun, kɑ gwed ki nyingɑ, kɑ thɑny ki kitim rɑ̈dh.” Møgɑni ɑ́cwöb-ɑ pyɑ̈r ɑ́ryew wïdɑ́dɑ̈ɑ̈g cyɑ̈nggi dɑ̈ɑ̈g dwɑ̈tt (Sibɑn). Kɑ jøgweed rɑ̈dh bënn cwøl yi Mordekɑy, kɑ gï köbbe kinni gwëdi gen Yeud kí jyɑ̈ggi pödhh-ɑ jɑɑg yi rɑ̈nhdwøng gɑ miyø kí pyɑ̈r ɑ́ryew wïdɑ́bïryew, ki wɑ̈j; cɑ̈gi kì Ïndì gïti Kuc. Kɑ wɑ̈j gwed ki dhøg bënn, ki yëth-ɑ nyi gwëëd yi pödhhɑni; men gwëdi kɑ dhøge. Kɑ Yeud gwëdi ki dhøg gen thyew, ki yëth-ɑ nyi gwëëd gen. Mordekɑy, ɑ́kööb kinni gweed wɑ̈j bënn ki nyingi Rɑ̈dh Kerkes, kɑ wɑ̈jjɑni thɑnye ki kitim rɑ̈dh, men-ɑ yïe. Kɑ wɑ̈jjɑni kɑ̈l yi jøg mø cyɑ̈dhi kì kömi kyënyi gøldwøng, møg-ɑ pëddi ngwej. Wɑ̈jjɑni ógwedø kinni, Yeud kì yethi myërr bënn ge ɑ́wiy yi rɑ̈dh, o ri gen cøng yi gen, kipe kinni o ge nyɑg gen ri gen keny-ɑ ódwɑddi gen nɑ̈gø. Keløg e dɑ ji mø pɑ̈ɑ̈r kömi Yeud, cwøw kí mɑ̈nn, kì pönh-ɑ bëëd yi gen, nyïɑ̈ggi Yeud kɑ tyëng-ɑ pɑ̈ɑ̈r kömi gen nɑ̈g gen, ko di ngɑn wiy yi gen. Kɑ jɑmmi gïn kwɑny gen. Ciggɑni bɑ møg-ɑ ócɑ̈gi ki gwøg kì cyɑ̈ng-ɑ ɑ́cïb ɑ́ men yije ónɑ̈ɑ̈g Yeud bënn, kì yethi pödhh-ɑ jɑɑg yi Rɑ̈nhdwøng Kerkes, kì pyɑ̈rø wïdɑ́dɑ̈ɑ̈g cyɑ̈nggi pyɑ̈rø wïdɑ́ryeew dwɑ̈tt (Adɑr). Ngɑ̈ɑ̈j ciggɑni kì yethi pödhh-ɑ jɑɑg yi rɑ̈nhdwøng bënn, kipe kinni o Yeud óbëëd ri gen gwiir gen, kipe coli kɑ̈jji gen keny-ɑ óbëën cyɑ̈ngɑni, kɑ kömi gen pɑ̈ɑ̈r. Kì bɑng kwøbbi rɑ̈dh ceth, kɑ jøg-ɑ ɑ́ör pɑ̈ɑ̈r-ɑ kömi kyënyì, ɑkedh gen ge órïngø ki ngweny rɑj. Kɑ ciggɑni köbbi ji bënn kì kɑɑl Susɑ̀ thyew. Mordekɑy ɑ́bï wɑ̈g kì gøldwøng e rug-ɑ ógudhi rɑ̈ɑ̈dhø, mø kïddi gen bɑ ówɑw kí óbøw, kí ógønhdwøng me bɑ ɑ́cwïcwïl, men-ɑ ócwɑ̈jø ki kor-ɑ yöm, kí yɑ̈ɑ̈r dhɑb me myër kì wïje. Kɑ ɑyoy ceg-ɑ ì pɑɑt kì Susɑ̀, teedø ceg-ɑ ryeerø ki medi pëthi gen. Mɑ́ Yeud pëthi gen ɑ́mïni, kinni ge ɑ́tyɑ̈ɑ̈m. Kì yethi pödhh bënn, kenyi rɑɑng ciggi rɑ̈dh, Yeud nyi ceg-ɑ ywömø cyɑ̈ngɑni, kɑ ge otugø ki medi pëthi gen. Kidyër, men-ɑ́ kwï ji møøgø ɑ́göög ki Yeud, mɑ́ ge ɑ́bwøg. Kì pyɑ̈rø wïdɑ́dɑ̈ɑ̈g cyɑ̈nggi pyɑ̈rø wïdɑ́ryeew dwɑ̈tt (Adɑr), ɑ bɑ bøli keny-ɑ ɑ́cïb ɑ́ men yije di nɑ̈ɑ̈g Yeud, ni kɑ ɑ́gwedii kì yethi ciggi rɑ̈dh; eni cyɑ̈ng-ɑ ɑ́rømmi yi tyëng-ɑ mɑɑn Yeud kinni o gï di mød yi gen, de ɑ́yöd ɑ́ gen ɑ tyɑm yi Yeud. Yeud ri gen ɑ́cøng gen kì kɑ̈jj-ɑ ɑ́bëëd yi gen, kì yethi pödhh-ɑ jɑɑg yi rɑ̈nhdwøng bënn. Kipe kinni o ri gen ónyɑg yi gen, ke di ji mø pɑ̈ɑ̈r kömi gen. De ji ɑ́bwøg yi Yeud kì kɑ̈jj bënn. Kɑ bong-ɑ ngɑn mɑ ɑ́cungi kì bøli gen. Kidyër, jɑggi pödhh, kí jɑggi yethi myërr, kí jɑgg-ɑ thønhø bënn, ge ɑ́cwɑg-ɑ Yeud, mɑ́ ge ɑ́bëëd ge óböggø yi Mordekɑy. Ábëëd e ngɑ̈nyi kì yethi pödhh-ɑ jɑɑg yi rɑ̈nhdwøng kinni Mordekɑy bɑ en ɑ yïe di tegø kì gøldwøng, o kedh e ceg-ɑ tëngø thyew. Kɑ Yeud pɑ̈ɑ̈r-ɑ kömi tyëng-ɑ mɑɑn gen ki pil kì cinggi gen, kɑ gï nɑ̈g gen. Yeud ɑ́nɑ̈gi ki ji miy ɑ́bïj kì kɑɑl Susɑ̀. Kɑ kwɑnni ji-ɑ ɑ́nɑ̈g kì Susɑ̀ köbbi rɑ̈dh, kì cyɑ̈ngɑni ceth. Aköbbi Bɑ̈rɑ̈dh Ester yi rɑ̈dh kinni, “Ji miy ɑ́bïj ɑ ɑ́nɑ̈g yi Yeud kì Susɑ̀ kete, kelli gen dɑ wɑ̈ddi Ämɑn pyɑ̈rø. Óbëëd ɑ́ ngø ɑ ógwøgø yi gen kì yethi pödhh-ɑ kyeelø? Á ngø ɑ dwɑddi yi yïn ɑnɑn, o mëggi yïn? Kwøb gïn-ɑ dwɑddi yi yïn, o göggi yïn!” Aløøg møge yi Ester kinni, “Keløg e di dwɑddø yi yïn, wiy Yeud møg-ɑ bëëdø kì Susɑ̀ göög gen dhuki ki gïn ni men-ɑ ɑ́gwøg yi gen dicyɑ̈ngtïn. Kɑ yï muuj ki cigg, o dëlli wɑ̈ddi Ämɑn gɑ pyɑ̈rø, ngɑɑb wïj gïn-ɑ nyi ngɑ̈ɑ̈b ki ji.” Kɑ rɑ̈dh omuujø ki cigg kinni gwøøg møgɑni. Kɑ ciggɑni ngɑ̈j kì Susɑ̀. Kɑ dëlli wɑ̈ddi Ämɑn gɑ pyɑ̈rø ngɑb. Kɑ Yeud ri gen cigi gen cøngø kì Susɑ̀, kì pyɑ̈rø wïdɑ́ngween cyɑ̈nggi dwɑ̈y Adɑr, kɑ ge ónɑ̈ggø ki ji miy ɑ́dɑ̈g, de ge nuti kɑ̈bbø ki jɑmmì thyew. Yeud ri gen ɑ́cøng gen kì yethi pödhh, kɑ ge ónɑ̈gø ki ji ɑ́lïp pyɑ̈r ɑ́bïryew wïdɑ́bïj kì kelli tyëng-ɑ mɑɑn gen. De ge nuti kɑ̈bbø ki jɑmmì. Menɑni ɑ́bëëd ɑ́ cyɑ̈nggi dwɑ̈y Adɑr pyɑ̈rø wïdɑ́dɑ̈g. Ábong-ɑ nɑ̈g kì cyɑ̈nggi dwɑ̈y pyɑ̈rø wïdɑ́ngwen; de gø ɑ́gwøg gen ɑ́ cyɑ̈ɑ̈ng tugø. Yeud mø Susɑ̀ cyɑ̈nggi dwɑ̈y pyɑ̈rø wïdɑ́bïj ɑ́gwøg yi gen ɑ cyɑ̈ɑ̈ng ywömø, mɑ́ tyëngmɑ̈ɑ̈nø ɑ́ngɑlli gen kì cyɑ̈nggi dwɑ̈y pyɑ̈rø wïdɑ́dɑ̈g kí cyɑ̈nggi dwɑ̈y pyɑ̈rø wïdɑ́ngwen, ɑcungi gen kì cyɑ̈nggi dwɑ̈y pyɑ̈rø wïdɑ́bïj. Bɑ bɑng menɑni ɑ nyi bëëd Yeud møg-ɑ bëëdø kì myërr-ɑ thønhø mïdh-ɑ pyɑ̈rø wïdɑ́ngween cyɑ̈nggi Adɑr, ɑ́ cyɑ̈ɑ̈ng medi pëëth, cyɑ̈ɑ̈ng ywömø, men yije tuug, kí muujø ki gïgcɑmm. Mordekɑy møgɑni bënn ɑ́kwøbe kinni gweed gen piny, kɑ wɑ̈nyɑni öri Yeud; møg-ɑ cyɑ̈gi kí møg-ɑ lɑ̈wi kì yethi pödhh-ɑ jɑɑg yi rɑ̈nhdwøøng Pɑres bënn. Møg-ɑ ɑ́gwed bɑ kinni, pyɑ̈rø wïdɑ́ngwen kí pyɑ̈rø wïdɑ́bïïj cyɑ̈nggi dwɑ̈y Adɑr bɑ cyɑ̈nggi ywömø, kì yethi runn bënn. Bene cyɑ̈ngg-ɑ ɑ́tyɑɑm tyëngmɑ̈ɑ̈nø yi Yeud. Men bene dwɑ̈y-ɑ ɑ́løg kïïmø ree medi pëëth kì yï Yeud. Ge ɑ́köbbi kinni mïdhi gen cyɑ̈nggɑni gɑ cyɑ̈nggi tugø, kí muujø ki gïgcɑmm, kí kønyi ji-ɑ jɑdø. Møg-ɑ ɑ́kwøb yi Mordekɑy ɑ́yïëy yi Yeud, kɑ tungɑni ogöögø ɑ́ kwöng, me nyi gwøg kì yethi runn bënn. Ämɑn wɑ̈d Amedɑthɑ̀ kwɑɑr Agɑg, ngɑn-ɑ ɑ́mɑn Yeud ɑ́ceg-ɑ leng ki wél (ɑ cwøl ɑ́ Purïm) kipe kinni o yode cyɑ̈ng-ɑ ónɑ̈ge Yeud kinni tweet. De Ester ɑ́kedhi yï rɑ̈dh, kɑ rɑ̈dh ogwëdø ki cigg mɑ ɑ́kɑ̈ɑ̈l thøwi Ämɑn, ngɑn-ɑ ɑ́dwɑddi nɑ̈gi Yeud. Kɑ ngɑb geki wɑ̈dde. Bene ɑ bɑnge cwølli cyɑ̈ɑ̈ng ywömø menɑni ɑ́ Purïm, kipe wɑ̈ny-ɑ ɑ́gwed yi Mordekɑy, kí gïg-ɑ ɑ́cwöb bënn. Møgɑni ɑ́gwøg yi Yeud kipe gen, kí kwɑrri gen, kí ji-ɑ ógöögø ki Yeud, kinni kì bøli keny-ɑni kì yij run, dɑ cyɑ̈ng ɑ́ryew mø ywömø mɑ ɑ́ceg yi Mordekɑy. Ágweed piny kinni mïdhi cyɑ̈nggi Purïm kì yethi rïjj bënn yi Yeud møg-ɑ yethi myërr, kí kɑ̈dd bënn, kì yethi pödhh-ɑ jɑɑg yi rɑ̈nhdwøøng Pɑres bënn. Kì bɑng menɑni, ɑgwëëd Bɑ̈rɑ̈dh Ester nyɑɑr Abikɑil geki Mordekɑy, ki wɑ̈nyø me nyodh yïëyø kí gïg-ɑ ɑ́gwøg yi Mordekɑy kipe cyɑ̈ɑ̈ng Purïm. Wɑ̈nyø menɑni ɑ́gwëd-ɑ Yeud bënn, kɑ surɑ̀ mi wɑ̈nyɑni ör yethi pödhh-ɑ jɑɑg yi rɑ̈nhdwøøng Pɑres gɑ miyø kí pyɑ̈r ɑ́ryew wïdɑ́bïryew. Kɑ cïb ɑ́ kwöng kinni mïdhi cyɑ̈nggi Purïm kì bøli kej gen ceth, ni kɑ̀ mïdhi cigg-ɑ kööbø kì ri thuumø geki ywøg. Møgɑni ɑ́ceg-ɑ yi Mordekɑy geki Bɑ̈rɑ̈dh Ester. Kɑ møg-ɑ ɑ́ceg yi Ester kipe cyɑ̈nggi Purïm gweed yij wɑ̈ny-ɑ nyi bɑn. Rɑ̈dh Kerkes, tyëng pödhe ɑ́cïre gwøg, geki tyëng myërri kömi nɑ̈mmì. Gïgdøngø møg-ɑ ɑ́gwøge bënn, kí lwøbi kër-ɑ ɑ́rønye Mordekɑy, ge bɑ ɑgwed kì yij wɑ̈nyi gwøøg rɑ̈nhi Pɑres geki Mɑdɑy. Mordekɑy wɑ̈d Yeud, en ɑ ɑ́bëëd ɑ́ ókwøøm Rɑ̈dh Kerkes kiree. Ábëëd e ceg kɑ wørø yi wɑdde, Yeud. Ábëëd per wɑdde teeg kì yïe, o gï ɑ́korre ki mendwøng. Ágöög ki gïgdøj kipe wɑdde, geki nyigi gen kì yethi rïjj-ɑ óbï. Ádɑ jɑl me cwøl ɑ́ Ayub, bɑ jɑl Udh, ɑ́bëëd e nyi mɑll-ɑ Jwøk ki pyëwe bëne, Ciggi Jwøk di mïdhø yi en kidøøj, o pɑ nyi göögø ki gïnrɑj. Yïe ɑ́dɑ wɑ̈dd ɑ́bïryew ki womɑ̈nn ɑ́dɑ̈g. Yïe ɑ́dɑ dyëg ɑ́lïp ɑ́bïryew, kí ɑmɑl ɑ́lïp ɑ́dɑ̈g, kí dhög ɑ́lïp ɑ́kyel, kí ɑderr miy ɑ́bïj. Ábëëd yïe dɑ bɑ̈ngg mø ngenyø thyew, ɑ́bëëd ɑ́ en ɑ kɑ̈rø ki mendwøng kì pödhh-ɑ wɑɑng cyɑ̈ɑ̈ng mwøl. Wɑ̈ddi Ayub ɑ́bëëd ge nyii göögø ki ryëj kì gøl nyel ɑ́kyel kì kelli gen, gø lunyi ge’ lunyø. Nyiimï gen, womɑ̈nn gɑ ɑ́dɑ̈g, nyii cwølø yi gen o ge nywɑ̈ɑ̈g gen. Kenyi thumi cyɑ̈nggi ryëj, Ayub nyii dhwödhø kì mwøl, kɑ ongɑ̈dø ki gëdhhì møg rɑ̈bbe Jwøk, kipe nyige bënn. Ayub nyi rømm-ɑ kinni nyige óbëëd ge göögø ki orøg, wɑlɑ̀ Jwøk yɑɑny gen, ge kwïj wøw mɑwɑnø. Keny-ɑ ɑ́wɑ̈nhi cyɑ̈ɑ̈ng bëëni nyigi Jwøk, ɑbëën gen bøli Jwøng-ɑ Ácwɑ̈ɑ̈j, o Cethɑn ɑ́bëëd e nud kì kenyɑni thyew. Apyëëj Cethɑn yi Jwøng-ɑ Ácwɑ̈ɑ̈j kinni, “Yï kɑ̈ɑ̈l-ɑ keny?” Alöggi Cethɑn kinni, “Yɑ kɑ̈ɑ̈l-ɑ be wïïnø’ piny.” Kɑ Cethɑn pyëj yi Jwøng-ɑ Ácwɑ̈ɑ̈j kinni, “Pyëwí ɑ́di cïb yi yïn kömi Ayub bɑ̈ngɑ? Bong dhɑnhø me døj, me mïdhi cigg ni en kì kömi piny. Yɑ nyii mɑllø yi en, o pɑ nyi göögø ki gïnrɑj.” Alöggi Cethɑn kinni, “Yï di wɑ̈dh-ɑ mɑllø yi Ayub, keløg e bong gïn nyi yod yi en kì yïí? Pɑth kipe kenyi korrií geki gøle, kí jɑmme bënn? Kɑ gïg-ɑ nyi gwøg yi en bënn nyi gyëdh yi yïn, kɑ thödhí ki jɑmmì mø gïïr mø pɑ̈ng yij pödhø bëne. De ke cïb cingí ri jɑmme, yï otøønyø yi en ki yɑnyø!” Aköbbi Cethɑn yi Jwøng-ɑ Ácwɑ̈ɑ̈j kinni, “Døj, jɑmm-ɑ yïe bënn ɑ́wïyɑ yïn, de Ayub kiree, ko pɑ̈nyí nyïɑ̈gø.” Codhe, ɑkedh Cethɑn kì bøli Jwøng-ɑ Ácwɑ̈ɑ̈j. Cyɑ̈ng ɑ́kyel, keny-ɑ ɑ́ying nyigi Ayub gøl ómï gen nyel-ɑ dwøng, ge ocyɑ̈mø, o ge omɑ̈dhø ki møgi oløg, Abëën jɑlwöödø yï Ayub kì gøle, ɑkööbe kinni, “Wø ɑ́bëëd wø opurø ki pwödhø ki kwërr-ɑ nyi ywɑjji yi wɑ̈dhh, o ɑderr ocyɑ̈mø kì keny me cyɑ̈gi. Codhe, kɑ tyëng Cebɑ̀, møg-ɑ nyi wïïnø kì pɑ̈l, ɑ nyi kɑ̈ɑ̈bø ki jɑmmi ji, pɑ̈ɑ̈r-ɑ kömi wøn, kɑ bɑ̈ngg nɑ̈g yi gen, kɑ jɑmmì kɑ̈l yi gen. Yɑ ketɑ ɑ ɑ́bodh, ɑbëënɑ be köbbi yïn èn.” E ngeti wööni tyeli mɑl nudd e okööbø, ɑbëën bɑ̈ng megø, kɑ okööbø kinni, “Dyëg geki kwɑ̈yyi dyëg ɑ́gøj yi mɑl, ge ɑ́thøw bënn, den-ɑ́ yɑ ketɑ ɑ ɑ́bodh, ɑbëënɑ be köbbi yïn èn.” E ngeti ryeew wööd nudd e okööbø, ɑbëën bɑ̈ng megø, kɑ okööbø kinni, “Akudd ɑ́dɑ̈g mø tyëng Kildɑn møg-ɑ nyi kɑ̈ɑ̈bø ɑ́pɑ̈ɑ̈r kömi wøn. Kɑ bɑ̈ngg bënn nɑ̈g yi gen, kɑ ɑmɑl kɑ̈l yi gen. Yɑ ketɑ ɑ ɑ́bodh, ɑbëënɑ be köbbi yïn èn.” E jɑlɑni nudd e okööbø, ɑbëën bɑ̈ng megø thyew, kɑ okööbø kinni, “Nyigí ɑ́bëëd ge ocyɑ̈mø, o ge omɑ̈dhø ki møgi oløg kì gøl ómï gen nyel-ɑ dwøng. Kɑ ɑtunø ókönø kì yij ryɑng, ɑdhure ød kömi nyigí, kɑ ge othøø bënn. Yɑ ketɑ ɑ ɑ́bodh, ɑbëënɑ be köbbi yïn èn.” Codhe, ɑdhwödhi Ayub mɑl, kɑ ógødhe kɑge, yi ywøøg yije. Kɑ wïje lyele, kɑ ree leenge piny bøle këële’ piny. Akööbe kinni, “Yɑ ɑ́nywøl yïɑ bong gïïpiny, o yɑ óthøw yïɑ bong gïïpiny. Jwøng-ɑ Ácwɑ̈ɑ̈j ɑ ɑ́muuj, o en ɑ ɑ́kɑ̈ɑ̈d ɑnɑn. Wiy nyingi Jwøng-ɑ Ácwɑ̈ɑ̈j lejji!” Kì ri jɑmm-ɑ ɑ́cwöb bënn, Ayub nuti pɑ̈nyi gwøg ki orøg, e cɑy-ɑ Jwøk kipe møgɑni. Keny-ɑ ɑ́døøg wëywöddi Jwøk ki cugø cyɑ̈ng-ɑ kyeelø, Cethɑn ɑ́bëëd e nud kì kelli gen thyew. Apyëjii yi Jwøng-ɑ Ácwɑ̈ɑ̈j kinni, “Yï kɑ̈ɑ̈l-ɑ keny?” Alögge kinni, “Yɑ kɑ̈ɑ̈l-ɑ be wïïnø’ piny.” Apëjji Jwøng-ɑ Ácwɑ̈ɑ̈j kinni, “Pyëwí ɑ́di cïb yi yïn ri Ayub bɑ̈ngɑ? Bong dhɑnhø me døj, me mïdhi ciggɑ ni en kì kömi piny. Yɑ nyii mɑllø yi en, o pɑ nyi göögø ki gïnrɑj. Yɑ ɑ́kwɑjji yi yïn kinni o Ayub göggí ki rɑj, e bong gïjø mɑ ɑ́rënye yøw. De cɑgg ɑ́ kinøw, Ayub cigg nudd gï mïdhe’ mïdhø ceth.” Alöggi Cethɑn kinni, “Dhɑnhø jɑmme bënn ócuggø muujø yi en kipe kinni o nëëne. De keløg dële onywɑlø yi yïn, yï otøønyø yi en ki yɑnyø.” Aköbbi Cethɑn yi Jwøng-ɑ Ácwɑ̈ɑ̈j kinni, “Døj, göggí ki gïn-ɑ dwɑddi yi yïn, de wëye ko pɑ̈nyí ki nywɑlø.” Codhe, ɑkedh Cethɑn kì bøli Jwøng-ɑ Ácwɑ̈ɑ̈j, ɑgöjje dëël Ayub bëne mɑgø yi gwønyø me rɑj. Akedh Ayub, kɑ pëgg-ɑ yij búr, kɑ ókɑ̈bbø ki ɑ́bɑlthɑgø me gwønye kɑ̈jj-ɑ ledh kì dële. Aköbbi Ayub yi cyëge kinni, “Yï nudd yï mïdh-ɑ cigg ceth? Yɑny Jwøk o yï thøw.” Alöggi Ayub kinni, “Yï dwøngg-ɑ yɑnggì! Gïgdøj møg-ɑ nyi kɑ̈ɑ̈l yi Jwøk bene gen ɑ nyi yïëy? Wɑde ɑ nyi gööny wɑ kenyi bëëd e dɑ rɑj?” Kì yij orɑngɑni bëne, Ayub bong gïnrɑj mɑ ɑ́kwøbe kì ri Jwøk. Keny-ɑ ɑ́lïng mɑ̈dhhi Ayub gɑ ɑ́dɑ̈g ki rɑj møg-ɑ ɑ́bï köme, ɑcøng gen ri gen, Jøgɑni bɑ Elipɑdh jɑl Temɑn, kí Bildɑd jɑl Cuɑ̀, kí Dhöpɑr jɑl Nɑɑmɑ̀. Kɑ ri gen köbbi gen kinni, o ge kedhi gen be lugii. Kɑ Ayub lidh yi gen ge nudd ge lɑ̈wi, de gø nuti ngij gen. Keny-ɑ ɑ́ngij ge gøn, ɑywöngi gen, ge okïïwø. Akɑg gen ógudhi gen, kɑ tør kwøør gen wɑ̈thi gen, kì bɑng rɑ̈ɑ̈m pëthi gen kipe Ayub. Abëëd gen kì buti Ayub ki cyɑ̈ng ɑ́bïryew, kí wɑ̈rr ɑ́bïryew, e bong dhɑnhø me löggi, mɑ́ gø ɑ́lidh yi gen kinni orɑɑng Ayub dwøng cɑrø. Codhe, ɑtug Ayub dhøge, ɑyɑnye cyɑ̈ng-ɑ ɑ́nywølii. Yïn ɑ Jwøk, wiy cyɑ̈ng-ɑ ɑ́nywøøl yɑn gööge ɑ́ muudhø. Cyɑ̈ngɑni koo pɑrrí këti, wiy bëëd e bong cɑr me mënyø kì yije këti. Wiy kɑb yi muudhø geki muudhi thøø, wiy rïm yi pøøl, kɑ cyɑ̈nge gëëng. Kɑ̈ɑ̈l wɑ̈rɑni wɑ̈g kì yij run, kɑ ko wëggí kwɑɑn kelli cyɑ̈ng geki dwɑ̈tti run, wiy bëëd e bong dhɑnhø me cigi yodø kì wɑ̈rɑni këti, o bong medi pëëth kì yije. Wiy cyɑ̈ngɑni thyëdh yi jøyenh, tyëng-ɑ dïdø ki tunggi Lebiyɑthɑn Mɑ̈ɑ̈n kyeli ru wøw meny kì yije, wiy wɑ̈rɑni cöge wøwe pɑ ru. Göjjí wɑ̈rɑni cyën, kipe kɑ ɑ́wëgge yɑn nywølø yi meyɑ, kɑ yɑ göjje ryɑ̈g ki ywøøg yij. Yɑde ɑ ɑ́bɑnyɑ thøø kì yij meyɑ? Yɑde ɑ ɑ́bɑnyɑ thøø kì bøli keny-ɑ ɑ́pɑ̈dhi yɑn piny ceth? Á kipe ngø, ɑ ɑ́mïdhi yɑn yi meyɑ kì kööre? Á kipe ngø, ɑ ɑ́dhwødhe yɑn ki thïnhe? Ti riɑ ywööm yɑn ke di thøwɑ, ti yɑ buud nɑ rorr geki jɑgg møg-ɑ ɑ́gëëd ki kɑ̈ll-ɑ døngø kɑ̈ge dööng. Yɑ di buud nɑ nyiirɑ̈dhh møg-ɑ ɑ́pɑ̈ng kɑ̈lli gen ki dhɑb kí ɑ́tegø cøn, wɑlɑ̀ ti yɑ buud nɑ dhɑnhø men-ɑ ónywølø e thøø. Tyëngrijjø pɑ nyi røngø kì yij rörø, o tyëng-ɑ pïdø yi gwøg, nyii ywömø kenyi thøw gen. Cɑgg ɑ́ ɑmɑgg, ge nyii yïddø ki mër, mɑ́ e bong jɑnggø kí cigg mø teg. Ji bënn, tyëng-ɑ bong per gen, kí tyëng-ɑ per gen teg pɑ̈r, bong dhɑnhø me bɑ bɑ̈ng ngɑn megø. Á kipe ngø ɑ thödhi dhɑnhø me ying yij orɑng ki cɑr? Á kipe ngø ɑ thödhi tyëng-ɑ pëthi gen pɑ med ki nënnì. Tyëng-ɑ cwølli thøø, de pɑ bï. Ge dwɑdd-ɑ thøø kibøli kɑ̈r. Pëthi gen nyi mïn-ɑ́ɑ̀ kenyi rum gen ki thøø; Gïn-ɑ óbï kömi gen dhuki megø, bɑ ɑkɑn yi Jwøk; yëthi gen bɑ ɑcyëg yi Jwøk kì wɑ̈thi tùng bënn. Yɑ pɑ cuggi cɑm yi rɑ̈ɑ̈m pyëwɑ geki mïïdø. Mïïdø men-ɑ pyëwɑ pɑ thumi. Gïn-ɑ nyi böggi yi yɑn ki mendwøng nyi bï ɑ́ dyër. Yïɑ bong mër kí ywömø, o ɑkørrɑ pɑ thumi. Ji mø gïïr ɑ́pwönyi yi yïn, tyëng-ɑ pëthi gen nyøødh ɑ́cïj yi yïn. Kwøbbí, ngɑn thɑ̈mmi ɑ́nyudhi yi gen ki yöö, kɑ ótëngø kɑ ɑ́cïïjii yi yïn. Anɑn bɑ yïn ɑ lunyi yïddø ki ɑkørr; pyëwí ede ɑ nyönhe keny-ɑ ɑ́bëën rɑj kömí? Yï nyi kwɑjj-ɑ Jwøk, o bëëdí døøj. Adɑ́ bëëd yïí dɑ yïëyø geki ngɑ̈ɑ̈dhø. Kwøb ngɑndøj mɑ ɑ́wöl ki nɑ̈gø, wɑlɑ̀ ngɑntir me wïje pɑ̈ɑ̈dhø. Áyod yi yɑn kinni tyëng-ɑ nyi kɑ̈g rɑj, bɑ rɑj ɑ nyi kɑj yi gen; ɑnɑn ge kɑj-ɑ gïgrijjø geki rɑj. Jwøk kenyi rënyi pyëwe, nyi ködd-ɑ kömi gen ni ɑtunø, kɑ gï nɑ̈ge. Tyëngrijjø nyi ngɑ̈rri nɑ ngurrì, de dhøggi gen nyii mijø yi Jwøk, kɑ leggi gïn nyi tørre. Ngur, ɑ teg nyii thøø kenyi bëëd e bong lɑ̈y me mɑg yi en, mɑɑdh ngur nywøle nyii tɑyø yi kɑ̈j. Cyɑ̈ng ɑ́kyel wöödø ɑ́kwɑ̈ɑ̈l yïɑ mɑ̈ɑ̈dh, møg-ɑ ɑ́möngi ɑ́lïngɑ, ge nɑ lɑ̈ggi wɑ̈r, Yɑ nyi tyëg wɑ̈r yɑ ceg-ɑ pɑ̈yyø, kɑ wɑ̈ɑ̈rø me dwøng bï-ɑ kömɑ, kɑ dëlɑ nyii kïïrø bëne. Yømø ɑ́göjji yethi nyingɑ, kɑ dëlɑ ceg-ɑ ì dïïng. Kɑ yɑ ólïdhø ki gïïpiny me cungi kì bølɑ, de nuti ngij yɑn mɑ løge’ ngø. Codhe, ɑlïngɑ ki cwɑg mø kööbø kinni, “Dɑ dhɑnhø me tir kibøli Jwøk? Dɑ dhɑnhø me døøj kibøli Ngɑn-ɑ ɑ́cwɑ̈jii? Jwøk nyii yïddø ki bɑ̈jjø kì ri bɑ̈ngge kì mɑl, cɑgg ɑ́ kì ri wëywödde thyew. Yï orumø kinni bene tyëng-ɑ ɑ́cwɑ̈j ki lɑ̈bø ɑ óngɑ̈dh yi en, gen ɑ tyëng-ɑ bɑ lɑ̈bø me cuggi nyøngø ni ɑ́cungø? Dhɑnhø ócuggø bëëdø e nud kì mwøl, kɑ othøø kì böörø e kwïj, kɑ ólɑ̈ɑ̈nyø gïti ɑtheer. Kɑ jɑmme bënn kwɑny, ɑ́thøw e peli wïj men-ɑ nyi kɑ̈ɑ̈l yï Jwøk, nuti yood en.” Pɑ̈nyí cwöd ɑnɑn Ayub, men-ɑ ódi ngɑn-ɑ ólöggi, dɑ wëywödd mø yï gen óyömmi yi yïn? Mɑngø yi liny nyi nɑ̈g-ɑ ngɑn wïje nøg, o good nyi nɑ̈g-ɑ ngɑn-ɑ pyëwe nøg. Yɑ ɑ́lïdhi ki ngɑn wïje nøg me pëggi piny kidøøj, de cyën nyi jwɑn-ɑ bëën köme. Kɑ nywøle nyi wiye piny, e bong ngɑn køny gen ki gøny kì burø. Kɑ jɑmme cɑm yi tyëng-ɑ ri gen di kɑ̈j, cɑgg ɑ́ byell-ɑ twïyø kì kelli koodh, kɑ kɑ̈re mod yi tyëng-ɑ pëthi gen døngø. Rɑj pɑ nyi twïy kì yij lɑ̈bø, wɑlɑ̀ ɑkørr pɑ nyi twïy kì piny. De dhɑnhø nyi nyöll-ɑ orɑng, ni lebbi mɑc ɑ nyi töngi mɑl. Keløg yɑ bɑ yïn, yɑ di døøg-ɑ kö Jwøk, kɑ møgɑ gönyɑ en. Gïgdøngø møg-ɑ nyi gwøg yi en, pɑ nyi gɑm yi wɑ̈thee, gïïngɑ̈ngø møge pɑ cuggi kwɑnø. Piny nyi nënge’ nëngø ki kødh, kɑ pwödh nënge ki pï. Tyëng-ɑ bɑ mööl nyi tïnge’ mɑl, kɑ tyëng-ɑ kïïmø nyi thödhe ki medi pëëth. Ge thɑ̈m-ɑ́ɑ̀ yij muudhø, cɑgg piny bɑ dicɑ̈ng. De tyëng-ɑ nyingi gen cɑn nyii yielø yi Jwøk kì yij thøø, kɑ gï nyi yiele kenyi guud nyingi gen. Tyëng-ɑ jɑdø nyi wëgge’ ngɑ̈ɑ̈dhø, kɑ dhøggi tyëngrijjø mije. Ngɑn-ɑ nyi tyeny yi Jwøk ree dɑ gyëdh! Yï ko bɑny cegø yi Áyïmø. Jwøk, kedd-ɑ nyi muuje, nyi kode kodø. Nyii kɑ̈nø ki kedø, kɑ gø nyi wëgge nøggø. Yï órïïj yï yiele yielø kì yethi rɑj. Yï óyiel yi en ki thøø kì yij kɑ̈j, kɑ yï yiele ki thøø kì yij liny. Yï óyiel yi en ki gööj lebbi ji møøgø, kɑ yï yiele kenyi bëën ryɑ̈g. Yï óngedhi kì yij kɑ̈j kí yij ryɑ̈g, yï koo böggi yi lɑ̈yyi pɑ̈l. Pwödhí óbong mødø kì yije, kömí koo pɑ̈ɑ̈r yi lɑ̈yyi pɑ̈l. Yï óbëëdø ki mër, bong dyelí men-ɑ óyɑb yi yïn e tøøk. Kwɑnni nyigí óbëëd ge gïïr ni yïthhi lum kì pɑ̈l. Yï ókony yï yöø, ni kenyi cyeg gemè bøli kej nyɑre ceth. Ayub, møgɑni thɑ́ gen ɑ́yɑb yi wøn kɑ keny me bɑ̈r. Ge bɑ dyër; yïëy gen ɑnɑn. ge di bëëd ge peeg kibøli ɑyejø kì thɑ̈ngi nɑɑm omelø, wu ko ngɑ̈ng yi rɑ̈ji kwøbbɑ. Áyïmø yɑ ɑ́gøje ki weth, kɑ yɑ kuug yi nyɑɑr weth. Jwøk yɑ ɑ́kölle böggø yi rɑjj-ɑ nyi kɑ̈ɑ̈le kömɑ. Aderø pɑ nyi ywöngi kenyi di lum me cɑm yi en, wɑlɑ̀ dhyɑng pɑ nyi ywöngi e ocyɑ̈mø ki lum. Gïn bɑd ócuggø’ cɑmø ree bong omelø? Wɑlɑ̀ dɑ medø kì ri ólɑmi tøng gyenø? Gïgcɑmm-ɑ ni møgɑni pɑ kønø kì pyëwɑ, pyëwɑ ceg-ɑ lɑ̈mmø yi gen. Ede Jwøk ɑ pɑ mëgge yɑn gïn-ɑ cwøllɑ? Ede kwɑ̈jjɑ ɑ pɑ løøge gøn? Keløg e ócuggø, pödhe bøle, kɑ yɑ nɑ̈ge! Keløg e ngɑ̈nyi yi yɑn kinni yɑ ónɑ̈g yi en, yɑ di pɑ̈rri yi medi pyëw, cɑgg dëlɑ rɑ̈mø ni ngø. Ngɑ̈nyi yi yɑn kinni Jwøk bɑ kwërø, o kwøbbe nuti pyeem yɑn. Dɑ tegø me nudd e mïdh-ɑ yɑn yɑ onëënø? Á kipe ngø ɑ nudd yɑ onëënø, e bong gïn ngɑ̈dh yi yɑn? Dëlɑ teg nɑ kït wɑlɑ̀ bɑ ngyënyø? Bong tegø kì yïɑ men yieelɑ riɑ, bong keny yömmɑ kipe kinni o yɑ køny. Kì yethi rɑj mø ni møg, yɑ dwɑdd-ɑ mɑ̈dhh mø døøj, cɑgg Áyïmø wiy yɑn piny wɑlɑ̀ nuti. De yɑ ɑ́wëny yi wun mɑ̈dhhɑ, ni nɑ̈mmì møg-ɑ nyi dwön kenyi bëëd e bong kødh. Nɑ̈mm-ɑ nyi pɑ̈ng kì cwir, de kenyi lënhi piny, pï nyii lɑ̈ɑ̈nyø, kɑ yij pyëën nɑm odöngø e thwøwø, e bong gïn ying yije. Kɑ wëll-ɑ yɑ̈bø ki pï wɑ̈nyy-ɑ pɑ̈l, kɑ ge othøø. Kwï wëllɑni kɑ̈ɑ̈l-ɑ Cebɑ̀ kí Temɑ̀, ge oyɑ̈bø ki pï, de wɑ̈thi gen ɑ́muum keny-ɑ ɑ́yuud gen nɑ̈mmì ge thwøwø. Kì yïɑ, wu nɑ nɑ̈mmɑni ceth, keny-ɑ ɑ́lidh wun orɑngɑ, wu ɑ́yöd wu ceg-ɑ bwøgø. Yɑ ɑ́di kwøb kinni thödhu yɑn ki gïïpiny? Wɑlɑ̀ kinni kwɑjji wun ngɑn megø ki ngyëny kiperɑ? Wɑlɑ̀ kinni yielu yɑn kì cingi ngetimɑ̈ɑ̈nø, wɑlɑ̀ ngɑn teg kibølɑ? Døj, pwönyu yɑn, nyudhu yɑn bɑ̈jjɑ, o yɑ kudɑ. Kwøbb-ɑ yethi gen bong ɑ́dud, yï gen dɑ tegø, dɑ́ ngø ɑ ógwøg yi cɑ́y-ɑ cɑyyu yɑn? Wu orumø kinni yɑ dwøngg-ɑ yɑnggì yøw, dɑ́ kipe ngø ɑ nyi løøg wun kwøbbɑ, yɑ ngɑn-ɑ́ wïjɑ ɑ́muum? Wu bɑ ji mø cuggi leng ki wél, kipe mɑgi kïjj gɑ bɑ̈ngg, o mɑ̈dhhi wun ócuggø’ ngeew wɑ̈g yi wun! De ɑnɑn nennu yïɑ kidøøj, yɑ koo pëëdø kì bøli wun. Wu ɑ́pɑg ki menteg! Wiyu gøggi gïg-ɑ pɑth ki dyër. Yɑ ko cɑy yi wun, møgɑ bɑ dyër. Wu orumø kinni yɑ ceg-ɑ pyed, wɑlɑ̀ gïn-ɑ bɑ dyër ki gïn-ɑ pɑth ki dyër, pɑ cuggi yodø yi yɑn? Nënni dhɑnhø kì kömi piny, nɑ gwøng teg, nɑ gwøøg ngɑn nyi kïr. Nɑ kenyi dwɑddi bɑ̈ng kedhi yij tïbø, nɑ kenyi dwɑddi ngeti gwøg köönge. Yɑ ɑ́kölli dwɑ̈tt mø bong gïndøj kì yethi gen, kí wɑ̈rr mø yethi gen pɑ̈ng yi orɑng. Kenyi buddɑ, wøw nyii dhɑ̈lø ruø kɑ wɑ̈r nyi tyëgɑ yɑ løgg-ɑ riɑ. Dëlɑ bëne pɑ̈ngø yi kunnì, dëlɑ bëne pɑ̈ng yi bør; o túd ceg-ɑ lolø kì yethi børɑ. Cyɑ̈ng ceg-ɑ jwɑnø, kɑ ge nyii thumø, e bong ngɑ̈ɑ̈dhø kipe dönyɑ. Ngɑ̈nyi yi yïn, yïn ɑ Jwøk kinni, nënnɑ nɑ kudhø ki yømø, medi pyëwɑ ɑ́kedh, o koo dwöög këti. Ngɑn-ɑ nenni yɑn ɑnɑn, yɑ koo lidh yi en këti, keny-ɑ ódwɑdde lidhi yɑn. Pɑth! Yɑ pɑ kudø! Mɑ́ yɑ 'kööb-ɑ rɑ̈ɑ̈m pyëwɑ; yɑ ceg-ɑ kwøb ceth. Yɑ bɑ nɑm, wɑlɑ̀ yɑ bɑ lɑ̈y-ɑ böggi kì nɑɑm omelø, ɑ pëggí be kori yɑn? Yɑ nyii buddø kì piny, yɑ dwɑdd-ɑ ywömi riɑ ki rɑ̈ɑ̈m dëlɑ. De yɑ nyi köllí böggø yi lɑ̈g, geki gïg-ɑ nyi cɑ̈rri yɑn. Lɑ̈w twiji cwɑggɑ, kibøli kɑ̀ bëëdɑ kì yij orɑng ni men. Nënnɑ ɑ́mɑn yi yɑn, yɑ koo bëëdø gïti ɑtheer. Wiy yɑn, mɑ́ nënnɑ nɑ kudhø ki yømø. Á kipe ngø ɑ bëëd per dhɑnhø teeg kì yïí? Yïde ɑ cïb pyëwí ri gïg-ɑ gøggi yi en? Kɑ nyi lyewwí yethi cyɑ̈ng, kɑ nyii rïïjø e otïmø yi yïn? Yï gït-ɑ wɑɑng wïjí pɑ løg yi yïn kì riɑ, yɑ pɑ wiy yi yïn, o lɑɑwɑ mwønyɑ? Keløg yɑ bɑ̈jjø, ɑ́ ngø ɑ ɑ́göggɑ yïn, jɑlmɑg ki ji? Yɑde ɑ pwööd yɑn ki weth, Jwøk? Dɑ gïn judɑ yïn? Yïde ɑ pɑ lɑ̈ɑ̈m pyëwí ki orøgɑ? Pyëwí pɑ dwöög kipe bɑ̈jjɑ? Yɑ óying-ɑ yij rörɑ kì bɑng keny me nøg, keny-ɑ óyɑɑb yɑn, yɑ óbëëd yɑ tøøk. Jwøk pɑ nyi rujø, Áyïmø pɑ nyi wïyi ki gøggi dyër. Keløg nyigí göögø ki orøg kì bøli Jwøk, bɑ kipe orøøg gen ɑ cɑye gïn. De døøg kö Jwøk Áyïmø kɑ kwɑjjí. Keløg yï kømm-ɑ dyër, e bong orøg kì pyëwí, Jwøk óbï kɑ yï kønye, kɑ yï dwøøge kejí. Kɑ̈r-ɑ ɑ́lɑ̈ɑ̈ny kì yïí ólod yi kɑ̈r-ɑ ócigi mëggi yïn yi Jwøk. Lidh peli wïj men-ɑ weenø, lidh gïg-ɑ dyër møg-ɑ ɑ́dïd yi kweyyee. Kipe wɑ bɑ jii ɑ́wɑ̈ɑ̈ èn, cyɑ̈nggee kì kömi piny ceggø nɑ tïbø. De wiy yï dïd kì yï tyëng-ɑ wɑ̈thi gen pel møg-ɑ ócyɑ̈ɑ̈ngi, lïngí gïg-ɑ ɑ́kwøb yi gen. Ókud ócuggø twïyø kì keny-ɑ pɑth ki toj? Obej ócuggø twïyø kì keny-ɑ bong pï? Keløg pï othwøwø, bɑ gen ɑ nyi kwöngi ki nɑ̈rø ge nudd ge mɑr, ge pɑ cuggi tööng piny, mɑ́ ge nuti cyegø. Yuu tyëng-ɑ wɑ̈thi gen nyi wïl ki Jwøk nɑ menɑni, ngɑ̈dhø mi tyëng-ɑ bɑny Jwøk ówɑ̈ɑ̈ny. Ge ngɑ̈dh-ɑ nyɑ korø me nyødh – men-ɑ́ bøøy órɑb yøw. Keløg ri gen jyɑ̈ɑ̈g ge’ ri bøøy órɑb, ge ócuggø cung? Keløg ge mɑg-ɑ kore, ge okønyø yi en ki cung? Tyëngrijjø nɑ lum ɑ nyi jwɑn twïyø kì yij cɑ̈ng, nɑ lum-ɑ nyi twïy kì yij pwödhø bëne. Byerre nyi myeene’ ri kïttì, kɑ ge nyii mɑ̈gø kì ri tuggi kïttì. De kɑ̀ puth gen wɑ̈g, bong ngɑn-ɑ óngïjji kinni ge ying-ɑ kenyɑni cøn. Bene medi pëthi tyëngrijjø ɑnɑn ceth, ji møøgø óbï kɑ kɑ̈jji gïn kwɑny yi gen. De ngɑntir pɑ wöl ki wiyø yi Jwøk, wɑlɑ̀ ngɑnrɑj pɑ køny yi en. Yï ówëgge ngedhø, kɑ yï óryeerø yi medi pyëwí, de tyëng-ɑ mɑɑn yïn óyɑ̈r yi en, kɑ̈lli tyëngrijjø ópɑ̈ɑ̈dh. Dhɑnhø gööny ɑ dï ki Jwøk? Jwøk ócuggø pëjjø ki pyëj ɑ́lïp mø bong ngɑn cuggi løøgi gen. Jwøk wïje pel, o teeg, bong ngɑn cuggi bëëdø e mune teeg ki Jwøk. Ngɑn-ɑ nyi nyiig kïttì kì kɑ̈jji gen, e pɑ ngɑ̈jji, kɑ gï nyi rënye kenyi rënyi pyëwe. Ngɑn-ɑ nyi wëggi piny onhɑ̈nh, kɑ tyelli piny okïïrø. Ngɑn-ɑ cuggi mɑ̈ɑ̈ni cɑ̈ng tuulø, kɑ kyell mɑ̈ɑ̈ne meny kì wɑ̈r. Ngɑn-ɑ ɑ́cïb mɑl keje e kete, kɑ ɑpɑgi nɑɑm omelø nyi cuunge. Ngɑn-ɑ ɑ́gwøg Ábɑnyy, kí Nyiimɑ̈nn, kí Ádɑ̈gg, kí Curø. Ngɑn-ɑ nyi göögø ki gïgdøngø mø pɑ gɑm yi wïj dhɑnhø, kí gïïngɑ̈ngø mø pɑ cög. Jwøk kɑ̈l-ɑ butɑ e pɑ lidh yi yɑn, gïn-ɑ dwɑdde, nyi kɑ̈ɑ̈le’ kɑ̈ɑ̈lø e bong ngɑn jogii; Á men ɑ ópyëjjii kinni, “Á ngø ɑ gwøg yi yïn?” Jwøk pyëwe koo lɑ̈ɑ̈m. Tyëng-ɑ mɑɑnii ónɑ̈g yi en, gen ɑ tyëng-ɑ ɑ́køny Lebiyɑthɑn lɑ̈ɑ̈y nɑɑm omelø, lɑ̈y-ɑ ɑ́pyem dhøge. Yɑ ócug-ɑ́ɑ̀ dï ki løøgi mø Jwøk? Cɑgg ɑ́ kɑ̀ nuti bɑ̈jji yɑn, yɑ ókwɑjj-ɑ lɑ̈mpyëw kì yï Jwøk ngɑn-ɑ ólidh gønyɑ. Cɑgg yɑ wëgge kwøb, yɑ pɑ yïëy kinni kwøbbɑ ólïnge. Nyii önø ki ɑtunø me pwöd yɑn, kɑ riɑ kïdhe ki kedd, e bong gïjø mɑ ɑ́rënyɑ yøw. Yɑ ɑ́mɑ̈ɑ̈ne ywömø, kɑ yɑ göjje rɑ̈ɑ̈m pyëw. Keløg ɑ́ tegø, ɑ́ men ɑ teeg ki Jwøk? Keløg ɑ́ gøggi dyër, ɑ́ men ɑ cɑy Jwøk? Ke rømmɑ riɑ yɑ døøj, yɑ bɑ men cɑy yi lebɑ, cɑgg yɑ tir, yɑ bɑ ngɑnrɑj kì yïe. Kenyi jwɑn thøø bëën kömi tyëng-ɑ yï gen bɑ̈r, Jwøk nyii ngedhø. Jwøk piny ɑ́cïbe cinggi tyëngrijjø. Nyingi jyɑ̈ggi gøny ɑ́kume. Keløg e pɑth ki Jwøk ɑ ɑ́göög kinøw, óløg-ɑ men? Cyɑ̈nggɑ ceg-ɑ rïngø, bong gïndøj me kɑ̈ɑ̈l yi gen. Cyɑ̈nggɑ rïngi nɑ yɑ̈y me yöd kì nɑm, o ge nɑ cor kenyi cwøøye kömi gïn cɑme. Á kipe ngø ɑ pïdɑ riɑ yøw, o yɑ nenne yɑ bɑ̈jjø? Bong sɑbon me cuggi lwöög orøgɑ wɑ̈g. yɑ nyi leeng-ɑ yij bur me ywëdhø yi Jwøk, kɑ yɑ bɑny yi ógudhɑ, mɑ́ e pɑth ki dhɑnhø ni yɑn men-ɑ óløøgɑ kwøbbe, kɑ wø ogönyø ki en. Bong ngɑn cuggi bëën kelli wøki en, bong ngɑn bøle ógööny yi wøki Jwøk. Wiy yɑn ki pwödø, Jwøk, lɑ̈ɑ̈w böögø mií ki yɑn, codhe o yɑ kööbɑ yɑ pɑ böggi, mɑ́ yɑ nuti bɑ̈jjø. Yɑ ɑ́dhɑ̈ɑ̈r yi bëëdø kinnï. Lïngí gøny-ɑ gønyɑ ki rɑ̈ɑ̈m pyëw. Jwøk, yɑ ko cɑɑy. Köbbí yɑn gïn-ɑ ɑ́bɑjɑ. Myëër kì yïí kinni, o yï mud, kɑ gïn-ɑ ɑ́cwɑ̈j yi yïn byeeny, kɑ yï tyer-ɑ gïg-ɑ gøggi yi tyëngrijjø? Yï nyi nëënø kɑ nënni dhɑnhø? Cyɑ̈ngg-ɑ nëën nøg ni mø dhɑnhø? Dɑ́ kipe ngø ɑ yɑɑb yodi orøgɑ, kí gïgrijjø møg-ɑ nyi gwøg yi yɑn? Ngɑ̈nyi yi yïn kinni yɑ nuti bɑ̈jjø, o bong ngɑn cuggi yïëdø kì cingí. Cinggí ɑ ɑ́cwɑ̈ɑ̈j yɑn, o gen ɑ ɑ́pyël yɑn, de ɑnɑn yï ónɑ̈g ngɑn-ɑ ɑ́cwɑ̈j yi yïn? Pɑr kinni yɑ ɑ́cwɑ̈j yi yïn kɑ lɑ̈bø, yɑ ko døøg ki nyøng yij lɑ̈mɑni këti. Yïn ɑ ɑ́thödhi wïyɑ ki teng-ɑ ɑ́yode yɑn, kɑ yɑ wëggí kuunø kì yij meyɑ. Cuɑ ɑ́kwøøj kej ɑ́kyel ki rɑ̈r, kɑ ge booj ki dël. Yɑ ɑ́thödhí ki nënnì kɑ yɑ mɑɑr yi yïn ki mendwøng, kɑ wëyɑ kor yi yïn kì bɑng døøjí. De ɑnɑn ɑ́yod yi yɑn kinni møgɑni ɑ́kɑnní kì pyëwí, kɑ per rënyi yɑn. Yï nenn-ɑ yɑn ceth, kinni keløg yɑ órøngi, o pyëwí cöge e pɑ lɑ̈ɑ̈m ki yɑn. Keny-ɑ ówölɑ bɑ̈jjø, yɑ ying-ɑ yethi rɑj kì yïí, de kɑ̀ gwøgɑ gïndøj, bong pwøj mø yodɑ. Yɑ yɑ̈rø, o yɑ ying-ɑ yij orɑng me dwøng. Keløg gwøgɑ pɑ̈dh-ɑ keje, yɑ dwɑr yi yïn ni kenyi dwɑ̈ɑ̈r ngur, kɑ yï nyii göögø ki gïïngɑ̈ngø kipe rënyi yɑn. Yï pɑ wïyi ki gøønyi yɑn, rɑ̈ji pyëwí ki yɑn, kedh e ceg-ɑ kɑ̈ɑ̈dhø, kɑ yï nyi ön-ɑ kömɑ ki liny me nyɑ̈n. Á kipe ngø Jwøk, ɑ ɑ́wëggí yɑn nywølø? Lɑ̈w ke di thøwɑ e bong ngɑn mɑ ɑ́lidh yɑn. Di bëëd e lɑ̈w, ke di cɑɑg yɑn ki pödhi yij rörø, kì ri nywølɑ ceth. Cyɑ̈nggɑ ɑ́döng ge nøg, yɑde ɑ pɑ wiy yɑn yøw, o yɑ kɑlɑ yïddø ki ywömø. Kɑ̈ng-ɑ nuti kedhi yɑn pödhi muunh-ɑ dwøng, kun-ɑ koo dwöögɑ, pödhi muudhø, kun-ɑ bëëd jɑmmì pɑth ki ɑgwir, kun-ɑ bëëd cɑr kiree e nɑ muudhø. Ayub, wø ódi cögø kwøbbí pɑ løøg yi wøn? Wø ódi kudø yi kwøbbi gɑg møgí? Yï okööbø kinni møg-ɑ kømmi yi yïn bɑ dyër, ce yï døj kibøli Jwøk. De møgí ce di ceg kɑ løøgø yi Jwøk! O yï di köbbe kinni peli wïj yethe ngenyø, yije dɑ gïg mø teeg kipe rummi dhɑnhø. Cɑ́yi Jwøk møg nøg kibøli orøgí. Cögi döngi Jwøk geki tege ócuggø yodø yi yïn? Tegi Jwøk geki dönge ngɑ̈nyi yi yïn? Mɑl dɑ cöge kì yï Jwøk, de mɑl pɑ cuggi pïïdø yi yïn. Pödhi thøø ngɑ̈nyi yi Jwøk, de kwïj yi yïn. Jwøk dwøng kibøli piny, o lɑɑj kibøli nɑɑm omelø. Keløg yï omɑgø yi Jwøk, kɑ yï cɑye, ɑ́ men ɑ ókyëddii? Mɑ́ wëëny ngɑ̈nyi yi en, o gïgrijjø møg-ɑ gøggi yi gen nenne’ nennø. De tyëng-ɑ wɑ̈thi gen nøg, óyïddi ki peli wïj, keny-ɑ ónywøøl odyerø kì pɑc. Tyeny rummí Ayub, kɑ cinggí thɑ̈ngí Jwøk. Kɑ̈ɑ̈l orøg geki rɑj wɑ̈g kì gølí. Codhe, o yï ócyɑ̈dhi yï törr-ɑ wïjí, yï pɑ böggi. orɑngí ówïl kì wïjí, o pɑ pɑɑr yi yïn këti kinni tek. Kɑ bëëdí ogöögø e tɑr ni dicɑ̈ng, kɑ muudhe ogöögø e nɑ mwøl. Pyëwí koo lïngø, o yïí ódi ngɑ̈ɑ̈dhø, kɑ yï kor yi Jwøk, kɑ yï nënge ki ywömø. Yï óbëëdø yï pɑ böggi yi tyëngmɑ̈ɑ̈nø, ji mø gïïr óbï be kønyø yi yïn. De nyingi tyëngrijjø óthwøri, ge ójɑ̈ddi ki yöö men pɑ̈r gen. Yï gen óbong ngɑ̈ɑ̈dhø, den-ɑ́ thøø. De yɑ ngɑ̈ny wøw ni wun cyee, yɑ pɑ ying cyɑ̈n kibøli wun, bong ngɑn kwïj møg-ɑ ɑ́kwøb yi wun. Anɑn yɑ ɑ́göög yɑn ɑ́ ngɑn gɑggi yi mɑ̈dhhɑ, yɑ ɑ́ngedhi yi gen ngö yɑ bɑ ngɑntir, o bong gïn-ɑ ɑ́bɑjɑ, ngö kwɑ̈jjɑ ɑ́bëëd e nyii løøgø yi Jwøk cøn. Cɑyi ngɑn ceg orɑng yööd yi tyëng-ɑ bong gïn tɑg yi gen. Kurrì geki tyëng-ɑ kwïj Jwøk bëëdø kɑ mër, cɑgg ɑ́ kɑ̀ bëëd jwøøg gen bɑ tegi gen Cɑgg ɑ́ lɑ̈yy geki winy, yï gen dɑ møg pwönyi gen wun; wɑlɑ̀ kwɑjju jɑmmi kömi piny kí mø nɑm, o peli wɑ̈thi gen nyudhi gen wun. Ge ngɑ̈ny wøw bënn kinni, ge ɑ́cwɑ̈j-ɑ yi cinggi Jwøng-ɑ Ácwɑ̈ɑ̈j Wëyi gïg-ɑ nëënø bënn, ying-ɑ cingi Jwøk, kí wëyi dhɑnhø bëne. Kwøb pɑ nyi ti-ɑ yi yïth ki lïngø, ni kenyi bel gïncɑm yi leb? Kenyi dhuri Jwøk piny, bong ngɑn cuggi døøgø’ gyer, keløg dhɑnhø omɑgø yi en, bong ngɑn gønyii. Ke mɑ̈ɑ̈ne kødh, mel ceg-ɑ bëën piny, ke lwɑ̈ngge pï, bɑɑyø ceg-ɑ bëën piny. Jwøk yïe dɑ tegø geki peli wïj, tyëng-ɑ wëny geki tyëng-ɑ wënyø ying-ɑ cinge bënn. Peli wɑ̈thi jɑgg nyi kwɑnye kwɑnyø, kɑ wɑ̈thi pëjjì wëgge nungø. Rɑ̈nhì nyi pɑ̈de pɑ̈dø, kɑ gï mɑge; Ókwër geki jödd nyi dwööge’ piny. Tyëng-ɑ ngɑ̈dh nyi mɑ̈ɑ̈ne’ kwøb, kɑ tïïdø ki tyelli kwøb men-ɑ yï ywödhh gø kwɑnye. Tyëng-ɑ jyɑ̈gø nyii yɑ̈rø yi en, kɑ tegi jɑgg nyi kwɑnye. Kɑ̈jj-ɑ di muudhi thøø, nyii pɑ̈ɑ̈ngø yi en ki cɑr. Pödhh nyi wëgge’ tëngø kɑ ge ódøngø, de gï nyii rënyø yi en. Pëjji gen nyi wëgge’ muumø, kɑ gï nyi göjje meemø, ge thɑ̈m-ɑ́ɑ̀ yij muudhø, o ge cyerri nɑ tyëng-ɑ ónɑ̈gø yi møgø. Yɑ pɑ gönyø kɑ wun, de yɑ gönyø kɑ Áyïmø, yɑ dwɑdd-ɑ nyudhi gønyɑ en. Wu kum-ɑ kwïji wøw mi wun ki kwøbbi pyed, wu nɑ ɑkïmm mø pɑ cuggi yïëdø. Kud wun, o wu órømmi i wɑ̈thi wun pel! Lïngu gønyɑ. Wude ɑ pëëd wun? Wu orumø kinni dɑ gïndøj men-ɑ óyod yi Jwøk kì bɑng pyeed wun? Wu dwɑdd-ɑ cwɑgi Jwøk? Wu dwɑdd-ɑ nyɑgi pere kì burø? Keløg yethi rummi wun ti kɑ yɑbø yi Jwøk, óyïddø ki gïndøj? Wu orumø kinni Jwøk ócuggø wënyø yi wun ni ji? Wu ceg yi en kɑ köbbø ceth, cɑgg muud wun kɑnni yi wun. Wu óbwøg yi dönge! Kɑ bööge pɑ̈dh-ɑ kömi wun. Gɑ́ji wun bong per gen ni belø, gøøny wun nɑ lɑ̈bø. Kud wun, o yɑ kööbɑ, kɑ wiy gïn cwöb cwöbe. Yɑ ɑ́rum ki böyø muuji wëyɑ. Bong gïn ngɑ̈dhɑ, o pɑth ki cwɑg, cɑgg yɑ nɑ̈g yi Jwøk. Gønyɑ ócïbɑ bøli Jwøk ceth. Yɑ óyiel yi tegi pyëwɑ mɑwɑnø, mɑ́ ngɑnrɑj pɑ nyi böyi ki cung kì bøli Jwøk. Tiu kwøbb-ɑ köbbɑ wun ki lïngø. Gønyɑ ócuggø gønyø yi yɑn, mɑ́ yɑ ngɑ̈ny wøw kinni yɑ nuti bɑ̈jjø. Keløg yɑ óyod yi Jwøk yɑ bɑ̈jjø, yɑ ówïyi ki gøny, o yɑ thøwɑ. Jɑmmì ɑ́ryew ɑ dwɑddɑ kì yï wun, yɑ koo pɑ̈nyi pɑ̈nø kì yï wun, wiyu yɑn ki cɑyyø, kɑ yɑ ko nɑ̈g wun ki böögø. Kööb møti yïn ɑ Jwøk, o yɑ ólöggɑ. wɑlɑ̀ wiy yɑ kööbɑ, o yï löggí. Nyudhí yɑn orøgɑ, ɑ́ ngø ɑ ɑ́bɑj yi yɑn? Á rɑj mɑ ngø ɑ ɑ́gwøg yi yɑn? Yïde ɑ kɑnní rií kiperɑ, yɑde ɑ pɑ̈ɑ̈r yɑn ki ngetimɑ̈ɑ̈nø? Yïde ɑ nɑ̈ní yɑn o yɑ bwøgɑ? O yɑ nɑ pɑ̈di yɑdh yøw, yï rïng-ɑ́ɑ̀ bɑng lum me thwøwø. Kömɑ ɑ́kïdhí ki kwøb mø rijjø, cɑgg ɑ́ møg-ɑ ɑ́gwøgɑ yɑ thinh. Tyellɑ ɑ́twöj yi yïn ki ɑ́cwecwel, o yï nenn-ɑ yëth-ɑ kɑ̈llɑ, cɑgg ɑ́ pɑ̈ltyellɑ, ge rɑnggí rɑnggø. Kɑ yɑ ceg-ɑ gwøg yɑ nɑ yɑnh-ɑ ócɑmø yi tyemtuk, o yɑ nɑ ógønh-ɑ ócɑmø yi rob. Wɑ tyëng-ɑ ɑ́nywøl bënn, wɑ onyødhø. Nënnee cyeeg, o bɑ orɑng. Wɑ nyii døngø, kɑ wɑ jwɑn-ɑ nɑ̈ɑ̈rø ni okøgg; wɑ nyii lɑ̈ɑ̈nyø ni tïbbì. Yï ódi nenni riɑ, Jwøk, wɑlɑ̀ yɑ ódi pɑ̈nyø yi yïn, ki gøøny burø? Á men ɑ ócuggi kɑ̈ni wɑ̈g ki gïjø me dhïw, kì ri gïn ywëdhø? Bong gøn. Cyɑ̈nggi gen bɑ ɑkwɑn, o gwedde bɑ ɑgwed yi yïn, kí kwɑnni dwɑ̈tti gen kì kömi piny. Ge ɑ́rum ki cïbø yi yïn, o ge pɑ cuggi wilø. Løg wïjí kì ree, kɑ wiy pyëwe mïne kì yij bëëdi orɑnge yøw Dɑ ngɑ̈ɑ̈dhø kì yï yɑdh, keløg e ngøl-ɑ piny; ócigi ludhø, kɑ ɑnɑ̈bbe otwïyø. Cɑgg byerre yöø, kɑ tyele othøø kì piny, kenyi kïdhii ki pï, nyi ceg-ɑ ludhø. De dhɑnhø kenyi thøwe, menɑni bene cöge, yod-ɑ keny këti? Ágöög e nɑ nɑ̈mm-ɑ thew gen cungø, ɑ́göög e nɑ nɑɑm thwøwø, ji nyii thøø, o ge pɑ nyi cigi dhwödhø; ge pɑ dhwödh e men-ɑ́ mɑl nud kì keje, ge óbuud ceth ri gen pɑ løg yi en. Yɑ ce di kɑɑn-ɑ pödhi tyëngthøø, wiy yɑ kɑɑn kunɑni pïd keny-ɑ ówɑ̈ɑ̈ny linyí, o yɑ di yïddɑ ki keny pɑɑr yɑn yi yïn. Keløg ji othøø, ge ócuggø døøgø ki gwøg ge onëënø? De yɑ óyïd-ɑ bøli keny-ɑ lɑ̈w, yɑ óyïdø pïd keny-ɑ óthumi cyɑ̈nggi rɑj. Codhe, o yï ócwöddí, o yɑ ólöggɑ, o pyëwí ómïne ki ngɑn-ɑ ɑ́cwɑ̈j yi yïn. O yɑ ókor yi yïn kì kɑ̈jj-ɑ nyi kedhɑ, de orøgɑ koo nenni yi yïn. Pyëwí ólɑ̈ɑ̈m ki orøgɑ, kɑ wiy yi yïn, gïg-ɑ ɑ́bɑjɑ bënn órɑ̈ɑ̈j yi yïn wɑ̈g. Dɑ bøli keny nyi pɑ̈ɑ̈dh kïtt-ɑ døngø, kɑ kïtt-ɑ thønhø ónyɑnø kì kɑ̈jji gen, ni kenyi wøøj tuggi kïtt-ɑ thønhø yi pï, kɑ ɑyejø wøj yi kønh dwøng, nɑ kenyi rënyi ngɑ̈ɑ̈dhø mi dhɑnhø kipe nënnì. Dhɑnhø nyii tyɑmø yi yïn, kɑ nyii thøø gïti ɑtheer, bøle nyii wilø yi yïn, kɑ othøø. Wɑ̈dde nyii yïddø dhwɑ̈ng, de møgɑni kwïje, wɑlɑ̀ pɑ nyi köbbi kenyi yɑ̈r gen. Nyi rømm-ɑ rɑ̈ɑ̈m dële, nyi ywøg-ɑ ree kete. Kɑ pëgg-ɑ be gøny ki kwøbb-ɑ yɑnggì yøw, wɑlɑ̀ kwøbb-ɑ bong gïndøj me yode kì bɑng gïn? De böggi Jwøk ɑ́wiy yi yïn, o yï ɑ́wïyi ki kwɑjje. Orøgí nyodh-ɑ yi kwøbbí, yï 'kööb-ɑ wëënyø. Yï cɑy-ɑ yi lebí, de pɑth ki yɑn, dhøgí ɑ cɑy yïn. Yï orumø kinni, bene yïn ɑ ɑ́kwøng ki nywølø? Wɑlɑ̀ yï ɑ́bëëd yï nud keny-ɑ ɑ́cwɑ̈ɑ̈j kïttì yi Jwøk? Yï ɑ́di lïngø ki gïg-ɑ ɑ́gwir yi Jwøk kì mɑl? Yï orumø kinni bene yï ketí, ɑ wïjí pel? Á ngø ɑ ngɑ̈nyi yi yïn, ɑ kwïj yi wøn? Kelli wøn dɑ ji mø wɑ̈thi gen di wɑ́r, geki ywödhh mø døngø kibøli wïyí. Lung-ɑ lug yïn yi Jwøk kiree, ceg-ɑ nøg kì yïí? Kí kwøbb-ɑ köbbe yïn mɑ̈ɑ̈dh? Pyëwí ede ɑ bëëd e dɑ liny ki wøn? Yï ɑ́ceg kɑ mɑgø yi liny ki Jwøk, ɑbɑɑny kwøbbe. Dhɑnhø ócuggø bëëdø e døj? Dɑ dhɑnhø me tir kibøli Jwøk? Cɑgg ɑ́ wëywöddi Jwøk, gï pɑ ngɑ̈dhe; o gï pɑ nenne ge dhïw. O gøggi rɑj mɑdh nɑ pï yi ji; ngee, ge rijjø, o bong gïn døj kì ri gen. Lïng ɑnɑn Ayub, o yï nyudhɑ ki gïn-ɑ ngɑ̈nyɑ. Yɑ ɑ́pwönyi kidyër yi ji mø wɑ̈thi gen pel, eni dyër men-ɑ ɑ́pwönyi gen yi kweyyi gen; o bong gïjø mɑ ɑ́kɑn yi gen. Ábëëd e bong wëdhh kì piny gen; ɑ́bëëd e bong ngɑn thɑɑb gen wɑ̈yi gen kì buti Jwøk. Tyëngrijjø órɑngø kì yij bëëdi gen, kì kömi piny bëne. Cwɑg mø böggi óywöngi kì yïthhi gen. Kɑ kömi gen nyi pɑ̈ɑ̈r yi tyëngkɑ̈b, kì bøli kej mër. Ge pɑ ngɑ̈dhø kinni ge ódwöög wɑ̈g, kì yij muudhø, mɑ́ pilø nenn-ɑ nɑ̈gi gen ceth. O cor nenn-ɑ cɑmi gen. Ngɑ̈nyi yi gen kinni bøli gen dhuki megø, óbëëd ɑ́ muudhø. Ryɑ̈g me ni rɑ̈dh me teg, nenn-ɑ pɑ̈ɑ̈r kömi gen. Bene gïn-ɑ ópɑ̈dhi kömi tyëng-ɑ nyi cemmi Jwøk ki lweddi gen. ge tyëdd-ɑ Áyïmø. Bɑ gen ɑ ɑ́mɑngi kɑ̈dd; kɑ udd-ɑ́ wëëg gen ɑ́cyeddi yi liny kwɑny gen, de kɑ̈ddɑni geki uddɑni órënyi yi liny. Ge koo cög ge kɑ̈rø, jɑmmi gen koo bëëdø ki keny me bɑ̈ɑ̈r. Cɑgg ɑ́ tïbbi gen ólɑ̈ɑ̈ny. Ge ócög ge bëëd ɑ yij muudhø ceth. Ge óbëëd ge nɑ yɑdh me bɑ̈dde órɑ̈bø yi mɑc, o okøgge ókøølø yi yømø. Ge wëny-ɑ ri gen kɑ̀ ngɑ̈dh gen rɑj. Rɑj ɑ óbëëd ɑ́ köögi mi gen. Ge ónɑ̈r e bøli kej gen nuti thumø, ge ónɑ̈r ni bɑ̈ddi yɑdh, o ge pɑ ludhi këti. Ge óni oløg me nywøle nyi dyëm ge nuti cyegø. Ge óni dhetun ɑ okøgge nyi dyëm. Tyëng-ɑ kwïj Jwøk yï gen óbong kwɑrr. O kɑ̈ll-ɑ ɑ́ger ki ngyënyyi kumi dhøg, órɑ̈b yi mɑc. Tyëng-ɑ nyi rømmi rɑj geki gøggi rɑj, pëthi gen pɑ̈ng yi wëënyø. Wu gït-ɑ wɑɑng wu okööbø? Á ngø ɑ wëggi wun pëggi be kwøb? Ke di cïb yɑn kɑ̈jji wun, kɑ wu di cïb kejɑ, yɑ di kwøb-ɑ møg-ɑ kømmi yi wun ceth. Wïjɑ di lëggɑ ki wun, kɑ wu mudɑ ki kwøb. Wu di cïjɑ, o pëthi wun tëngi gen, pëthi wun di cwed yi kwøbbɑ. De bong gïn kwøbɑ me cuggi yïëdø, o pyëwɑ pɑ kwööj yi kudø. Jwøk, yɑ ɑ́wedde, kɑ gølɑ bëne wëgge nɑ̈gø. Yɑ ɑ́wëgge gwɑ̈ɑ̈lø kí nyødhø, Yɑ bɑ cu kí pyën yøw o menɑni rømmi yi teedø i nyodh-ɑ orøgɑ. Yɑ ɑ́kɑgge ki rɑ̈ji pyëwe, wɑnge ɑ́cuul ki yɑn kɑ yɑ mɑɑne. Yɑ ceg kɑ gɑggø yi ji, yɑ ɑ́tyeg yi gen, o yɑ ceg kɑ pwödø yi gen kì yethi nyingɑ. Jwøk, yɑ ɑ́cïbe cinggi tyëngrijjø. Yɑ ɑ́bëëd ɑ yij mër, de Jwøk yɑ ɑ́mɑge kì ótölɑ, yɑ ɑ́pwöde, kɑ yɑ nyønge kì piny. Bɑ yɑn ɑ ceg yi en ki neddø ceth. Yɑ pwöde kɑ nywøli weth kì wɑ̈thi tùng bënn, riɑ ɑ́kïdhe ki kedd, cɑgg ɑ́ kinøw, pyëwe pɑ lɑ̈ɑ̈m ki yɑn. Yɑ rïïj riɑ kïdhe’ kïdhø ki kedd, nyi pɑ̈ɑ̈r-ɑ kömɑ ni jɑl-liny me pyëwe pɑ̈ngø yi mɑ̈ɑ̈nø. Yɑ ceg-ɑ kïïmø, o yɑ rug-ɑ ocwɑ̈llì, yɑ bëëd ɑ yij belø, yɑ bɑ ɑtyɑm. Nyingɑ ɑ́kwɑ̈rri yi ywøg, nyingɑ ɑ́kwöd, kɑ ge tyeg yi tïbbì. Ngö e bong ngɑn mɑ ɑ́rujɑ, o kwɑ̈jjɑ bɑ dyër ceth. Yïn ɑ piny, rɑjj-ɑ ɑ́göggi yɑn ko kɑɑn, tyëng-ɑ ruj yɑn ko kum. Dɑ ngɑn-ɑ ócwɑg yɑn kì mɑl, men-ɑ ócungi kiperɑ. De mɑ̈dhhɑ yɑ ceg kɑ gɑggø yi gen, bene ɑ dyëm pïi nyingɑ kì bøli Jwøk. De yɑ dwɑdd-ɑ ngɑn cwɑg yɑn kì bøli Jwøk, ni kenyi cwɑɑg dhɑnhø yi mɑ̈dhe. Mɑ́ kì bɑng runn mø nøg, yɑ ókedhi yuu-ɑ koo dwöögɑ këti. Cögi cyɑ̈nggɑ ɑ́cyɑ̈ngi, bong gïn ngɑ̈dhɑ këti, ɑ́döng ɑ́ bur kiperɑ. Yɑ nenn-ɑ gɑng-ɑ gɑggi yɑn yi teedø bëne. Yɑ kømm-ɑ dyër, Jwøk yïëy møgɑ, bong ngɑn yïëy kinni møgɑ bɑ dyër, den-ɑ́ yïn. Wɑ̈thi gen ɑ́mɑ̈ɑ̈n yi yïn gɑm ki kwøb, yɑ ko wëggí tyɑmø yi gen. Ngɑn nyi ngeew mɑ̈dhhe kipe ngyëny, nyige nyii rënyø kì bɑng gwøngɑni. Yɑ ɑ́gwøge yɑn ɑ́ ngɑn gɑggi yi ji, kɑ nyingɑ nyi nguddi ki lɑ́ɑ̀w. Nyingɑ ɑ́cøør yi mïïdø, bɑ̈ddɑ geki tyellɑ ɑ́lew ni wél. Tyëng-ɑ rumø ce ge tir ɑ́ngɑ̈ng yi møgɑni, mɑ́ ge okööbø kinni i Jwøk kwïj yi yɑn. Cɑgg ɑ́ kinøw, tyëngtir mïdh-ɑ yuu gen ceth, ngɑn cingge tɑr, ókedh e ótëngø. De ke cuung gen kì bølɑ bënn, bong ɑ́kyel kì kelli gen me yod yi yɑn wïje pel. Cyɑ̈nggɑ ɑ́thumi, gïg-ɑ ɑ́rømmɑ ɑ́bɑ̈jji, gïn-ɑ ɑ́ngɑ̈dhɑ ɑ́lɑ̈ɑ̈ny. De mɑ̈dhhɑ wɑ̈r nyi løg ge’ dicɑ̈ng, ge nyii kööbø i cɑr cyɑ̈ngø, de yɑ ngɑ̈ny wøw kinni, yɑ cöög-ɑ yij muudhø. Lɑ̈w ke kedhɑ pödhi tyëngthøø, kun-ɑ óbuudɑ kì yij muudhø, Rörø ócwøllɑ ɑ́ wïyɑ, o kun-ɑ ócɑm yɑn ge ócwøllɑ gɑ meyɑ ki nyiimïɑ womɑ̈nn. De ngɑ̈ɑ̈dhø miɑ óying keny? Á men ɑ óyod ngɑ̈ɑ̈dhø miɑ? Ngɑ̈ɑ̈dhø ódi kedhi piny kyeel ki yɑn? Ódi kedhi yij lɑ̈bø kyeel ki yɑn? Á ngø ɑ wëggi yïn rumø kinni wɑ̈thi wøn nøg ni wɑ̈thi lɑ̈yy? Yïn ɑ nɑ̈g ri ki liny èn, piny ódi wiyø kipe kɑ rɑj pyëwí? Wɑlɑ̀ cɑɑg kïttì kì kɑ̈jji gen yi Jwøk, o pyëwí mïne? Mɑɑc ngɑn rɑj ónɑ̈g ceth, o pɑ lyel këti. Cɑɑr lɑ̈mbɑ̈ ree óløge muudhø kì yij keme. Ódøøg be lyebbø, kɑ nyi tɑ̈ɑ̈y piny yi rumme kete. Nyi kedh-ɑ yethi ɑ́kɑ̈llì, kɑ tyelle mɑg yi ɑ́kɑ̈llɑni. Tyelle nyii mɑgø yi ɑ́kɑ̈llì, kɑ ge ódhɑ̈lø kedhø. Ákɑ̈llì bɑ ɑkɑn kì piny kipere, ge bɑ ɑceg kì yij yuue. Bɑ ɑtyeg yi gïg böggi, ge lug-ɑ́ɑ̀ bɑng tyelle ceth. Ábëëd e kɑ̈rø, de ɑ́mɑg yi kɑ̈j, ryɑ̈g ying-ɑ köme. Dële, kí cingge geki tyelle ɑ́wɑdhi piny. kɑ bɑ̈dde geki tyelle okwɑ̈gø. Ákɑ̈ɑ̈l wɑ̈g kì gøle, gøl-ɑ ɑ́gɑ̈nne, ɑ́peej be thøø. Gøle ɑ́cwiny ki mɑc, kɑ ogöögø ɑ́ búr. Byerri gen ɑ́kwɑ̈g geki bɑ̈ddi gen kɑ ge othwøwø. Pere ɑ́lɑ̈ɑ̈ny kì kömi piny, bong ngɑn pɑrii këti. Áryeem yij muudhø, ɑ́cyeed wɑ̈g kì kömi piny. Yïe óbong kwɑrr, o bong wɑdde mø nëënø. Tyëng-ɑ ólïngi ryɑ̈ge kì wɑɑng cyɑ̈ɑ̈ng mwøl, kí wɑɑng cyɑ̈ɑ̈ng böörø, dëlli gen ókïrrø yi wɑ̈ɑ̈rø. Bene bëëdi kɑ̈lli tyëngrijjø ɑnɑn, bene bëëdi ngɑn kwïj Jwøk ɑnɑn. Yɑ ɑ́pïd ki gɑwwø yi wun, o wɑ̈thi wun pɑ lɑ̈ɑ̈y ki yɑnyyi yɑn. Cɑgg yɑ bɑ̈ɑ̈nø cøn, bɑ̈jjø menɑni pɑth ki miɑ? Keløg wu thwøg kɑ yɑn kidyër, wu orumø kinni rɑjjɑ nyodh-ɑ bɑ̈jjɑ? Ngɑ̈nyu wøw kinni, Jwøk ɑ ɑ́gwøg møgɑni, en ɑ ɑ́ceg yɑn ki ɑ́kɑ̈llì. Yɑ óryeerø yɑ kwɑjj-ɑ kønyø, de bong ngɑn løøg møgɑ, yɑ ócwöddø, de bong ngɑn gwøg dyër. Jwøk yuuɑ ɑ́bɑge, o yɑ cöögɑ yɑ pɑ kedh, yuuɑ ɑ́cyëëge ki muudhø. Dhwɑ̈ngɑ ɑ́kwɑnye, yɑ̈ɑ̈r wïjɑ ɑ́kɑ̈ɑ̈le wɑ̈g. Yɑ ɑ́dhure piny kì wɑ̈thi tùng bënn. Ngɑ̈ɑ̈dhø miɑ ɑ́puthe kɑ yɑ wëgge nøyø o yɑ thøwɑ. Jwøk pyëwe ɑ́rënyi ki yɑn, kɑ ree luge yɑn, ɑ́göög e mɑ̈n ki yɑn. Linye ɑ́öre yïɑ, be pɑ̈ɑ̈r kömɑ. Gølɑ ɑ́tyeg yi gen. Jwøk, yɑ ɑ́wëgge wiy piny yi nyiimïɑ, yɑ ɑ́göög ki ngɑnpɑth kì yï tyëng-ɑ ɑ́ngɑ̈nyi yɑn; yɑ ɑ́wiy piny yi wɑddɑ kí mɑ̈dhhɑ. Yɑ ɑ́wïl kì wɑ̈thi wëll-ɑ ɑ́ying gølɑ, yɑ ɑ́göög ki wëdh kì yï ngɑn-ɑ ɑ́bëëd ɑ́ bɑ̈ngɑ. Kɑ̀ cwølɑ bɑ̈ngɑ, møgɑ pɑ løøge, cɑgg e kwɑjjɑ. Cyëgɑ pɑ yïëy ki ngwɑ̈jji yømɑ, men-ɑ́ nyiimïɑ pɑ nyi wɑ̈nhi butɑ. Yɑ ceg kɑ benyø yi othønhø kenyi lidh ge yɑn. Mɑ̈dhhɑ, mɑ̈dhh-ɑ ɑ́nywɑ̈ɑ̈g wøn, yɑ ɑ́døøg be mɑɑnø yi gen ɑnɑn; tyëng-ɑ ɑ́mɑɑrɑ, ngɑ̈thi gen ɑ́lugi gen yɑn. Yɑ ɑ́döng yɑ bɑ cu, o wëyɑ ɑ́döng ge mïdh-ɑ yi nyɑwinø ɑ́kyel. Lɑ̈ɑ̈m pëthi wun ki yɑn mɑ̈dhhɑ, mɑ́ Jwøk yɑ ɑ́dhure piny. Wude ɑ guud wun wɑngɑ thyew ni Jwøk, ɑ guud wɑngɑ? Wude ɑ pɑ yɑ̈ng wun yi rïngɑ? Gønyɑ ce di ceg kɑ gweed piny, ce di ceg kɑ gweed yij wɑ̈nyø. Gønyɑ ce di tweg-ɑ ri kït ki twööng, o bëëde gït-ɑ ɑtheer. De yɑ ngɑ̈ny wøw kinni yïënɑ nud kì mɑl, óbï kì cyɑ̈ɑ̈n piny, kɑ yɑ cwɑge. Cɑgg ɑ́ kɑ̀ thumi dëlɑ ki wɑdhhi piny ni men, Jwøk ólidh yi yɑn. Ólidh yi yɑn ki wɑngɑ ceth, koo bëëd e nɑ ngɑnpɑth. De pyëwɑ ɑ́nyönhi, mɑ́ wu ɑ́kööb kinni, “Ayub wɑnge óti yi wɑ ki guudø kidï?” Wu ɑ́yɑb-ɑ yëth-ɑ wëggu yɑn orɑng. De wun ki ri wun böggi wun ki pilø, pil-ɑ nyi kɑ̈ɑ̈l yi liny Jwøk ki gööj orøg, kipe kinni o yod yi wun kinni, dɑ ngɑn nyi lidh gønyy. Møg-ɑ ɑ́kwøb yi yïn bɑ yɑ̈d, de yuu-ɑ løøgɑ møgí ngɑ̈nyi yi yɑn. Ngɑ̈nyi yi yïn kinni, cɑg kɑ̈ge dööng, keny-ɑ ɑ́cïb dhɑnhø kömi piny men, kinni medi pyëw ngɑnrɑj nyi mɑg-ɑ keny me thiinh. Cɑgg ɑthwøge wɑ̈dhi mɑl, e törr-ɑ wïje, ókøøl yi yømø ni tør. Tyëng-ɑ ngɑ̈nyii, ri gen ópyënyi gen ki kun-ɑ kedh en. Ólɑ̈ɑ̈ny ni lɑ̈g, ni møg-ɑ nyi cɑ̈rri dhɑnhø kì wɑ̈r, koo cigi lidhø. Koo cigi lidhø yi tyëng-ɑ ɑ́ngɑ̈nyii, kì keny-ɑ ɑ́di en cøn. Jɑmm-ɑ ɑ́kwɑl yi en kì yï tyëng-ɑ ɑbuur, óculli gen ɑ yi nywøle. Cɑgg ɑ́ kɑ̀ nudd e bɑ wøb, o dële nudd e teg, ceg-ɑ thøø kɑ kony. De kì yije, gïncɑme nyii kënyø nyi ceg-ɑ kënyø ni kenø. Ngɑnrɑj kɑ̈r-ɑ ɑ́kwɑle nyi ngööge’ wɑ̈g, nyi dwöög-ɑ wɑ̈g yi Jwøk kì yije. Gïn mwøøny yi tyëngrijjø nɑ kugø, ge nyii nɑ̈gø yi gøn ni kugi thwöl me rɑj. Ge koo bëëdø kɑ nɑ̈mm-ɑ rïngi lidh yi gen, cɑgg ɑ́ nɑ̈mm-ɑ mulli yi cɑg geki møøw kïc. Jɑmm-ɑ ɑ́gwøge e pïdø pïdø, ge ódwøøg kì yïe gï pɑ cɑme, mɑ́ e guud-ɑ nyingi tyëng-ɑ ɑbuur, kɑ uddi ji møøgø nyi kwɑnye. Mɑ́ döngi pyëwe kwïj yɑ̈ngø. Kɑ̀ cyɑ̈me bong gïn döng, de ɑnɑn døøje ɑ́thumi. Nudd e ying-ɑ yij orɑng ceth, kì yij ngenyi jɑmme menɑni, ryɑ̈ng dwøng óbï köme. Wiy pɑ̈nge yije ki gïg-ɑ dwɑdde! Ócɑy yi Jwøk kì yij linye, liny teg. Keny-ɑ óbɑjii yi pilø dødø, ógøj yi weth dilɑl. Ótwïy wɑ̈g kì ree, e dhøng-ɑ mïllø kɑ̈ɑ̈l-ɑ yij ócunye, kɑ wɑ̈ɑ̈rø bï-ɑ köme. Jɑmme ɑ́rënyi bënn, ge ɑ́rɑ̈b yi mɑc me nuti cwiny-ɑ yi dhɑnhø, jɑmme órɑ̈bi geki gøle bëne. Orøge ónyudhii yi mɑl, kɑ rɑ̈je kwøb yi piny. Kɑ̈re bëne órënyi, órɑ̈b kì cyɑ̈ɑ̈ng liny Jwøk. Bene gïn-ɑ ɑ́pɑ̈dhi kömi tyëngrijjø ɑnɑn, eni ryɑ̈ng-ɑ ɑ́cïb yi Jwøk ɑ́ men bï kömi gen. Kɑlu yɑn ki nginø, o yɑ kööbɑ, keny-ɑ órumɑ ki kwøb, kɑ yɑ gɑɑg wun. Yɑ gönyø kɑ dhɑnhø cøn? Me bëëd pyëwɑ pɑ jwɑ̈ddi? Lidhu yɑn, dɑ gïn lod men, dhøggi wun pɑ di ceg ngɑmø? Kenyi rummɑ kì ri møgɑni, yɑ nyii mɑgø yi wɑ̈ɑ̈rø, kɑ dëlɑ nyii kïrrø. Á kipe ngø ɑ nyi bëëd tyëngrijjø, kɑ ge oyöø ge kedh ge ódönyø? Kɑ ge óyïddø ki kwɑrri gen, kɑ ge ódøngø, gï nenni ge’ nennø? E bong ryɑ̈g me kɑ̈ɑ̈l kömi kɑ̈lli gen yi Jwøk, wɑlɑ̀ bong gïn böggi yi gen? Dhögi gen ceg-ɑ wɑ̈dhi nywølø yøw, bong rɑj mø cwöb kiper gen. Nywøli gen rïngi nɑ nywøli römm, kenyi tuug gen. Ge ceg-ɑ wör, ge ocöngø, ge opödø ki thøm geki bullì. Ge bëëdø pëthi gen omedø, o ge thøw ge pɑ rɑngø. Kɑ Jwøk nyi köbbi gen kinni, “Nyɑní kì buti wun! Yëthi ngɑ̈nyi wøw møgí pɑ dwɑddi yi wøn!” Ge okööbø kinni, “Jwøk ɑ́ men ɑ göggii yi wøn? Á ngø ɑ óyod yi wøn keløg e okwɑjjø yi wøn?” De døøji gen pɑ ying cinggi gen, o yuu-ɑ nyi rum yi gen, pɑ yïëy yi yɑn. Á tyel ɑ́dï ɑ nyi thøw cɑɑr tyëngrijjø? Á tyel ɑ́dï ɑ nyi bëën rɑj kömi gen? Ge ɑ́di cɑyø yi Jwøk ki rɑ̈ji pyëwe, kɑ gï koodhe yïnø ni wél, wɑlɑ̀ ni cong kenyi køøl gen yi ɑtunø? Wu okööbø kinni i Jwøk kwöör orøøg ngɑnrɑj nyi coole’ ri nywøle. Pɑth! Wiy Jwøk cɑye ngɑn-ɑ ɑ́røngi ceth, o yod yi en kinni ɑ́cɑy kɑ per orøge. Wiy cɑ́ye pɑ̈dhi gen köme, o liny Áyïmø yod yi en. Kɑ̀ thumi bøli kej dhɑnhø, dɑ gïn nyi rømmi yi en kipe nywøle këti? Dɑ dhɑnhø me nyi pwönyi Jwøk, eni Jwøk ɑ nyi cɑy tyëng mɑl kiri gen? Megø nyii thøø kì yij rɑ̈ɑ̈m pyëw, e bong medi pyëw mɑ ɑ́yode. De ge nyii thøø, kɑ ge kony ge pɑ̈r, kɑ ge cɑm yi bï kyeel. De rummi wun ngɑ̈nyi yi yɑn; wu dwɑdd-ɑ cɑyi yɑn. Mɑ́ wu opëjø kinni, “Ágøne gøl jɑldwøng ɑnɑn, eni jɑl-ɑ ɑ́gøggi rɑj?” Tyëng-ɑ ɑ́cyɑ̈dhi kì pödhh mø lɑ̈wi nuti pyëëj wun, kwøbb-ɑ ɑ́kwøb yi gen pɑ yïëy yi wun kinni, tyëngrijjø ɑ nyi bodh cyɑ̈ng-ɑ nyi rënyi pyëw Jwøk, kɑ ji cɑye. Bong ngɑn nyi töngi ngɑnrɑj kì bøle, o bong ngɑn nyi cɑyii kipe rɑjj-ɑ ɑ́gwøge. Kɑ̀ tëërii be konyø, röre ceg kɑ korrø. Ji mø gïïr nyi kedh-ɑ be konyii, kɑ lɑ̈bø óbuddø kì köme mɑ̈ɑ̈dh. O men-ɑ́ wun, wu pɑ̈ny-ɑ cïji yɑn ki yɑnggì yøw! Löggi wun bënn bɑ pyed. Bëëdí yï tir dɑ medi pyëw me mëgge Jwøk? Wɑlɑ̀ dɑ gïn kønyii yi bëëdí yï døøj? Bɑ kipe kɑ ɑ́böggí Jwøk ɑ ɑ́cɑye yïn, kɑ yï rɑnge? Pɑth, den-ɑ́ kipe döngi orøgí, bɑ kipe rɑj bënn, møg-ɑ nyi gwøg yi yïn. Kwör-ɑ yï ómyëw ɑ́bëëd e nyii piirø yi yïn, kɑ ógudhe kwɑny yi yïn, kɑ wiy yi yïn e cyɑ̈dh-ɑ nøw. Tyëng-ɑ pïdø ɑ́mɑ̈ɑ̈n yi yïn ki pïg mɑ̈ɑ̈dh gen, kɑ tyëng-ɑ ri gen di kɑ̈j, mɑ̈ɑ̈n yi yïn ki gïncɑm. Piny bëne ɑ́kɑb yi yïn ki tegí; piny bëne ɑ́kwɑny yi yïn. Yï nuti bɑɑny-ɑ kønyi thwömm keti gen, de kïjj ɑ́ruj yi yïn thyew. Bene ɑ tyeeg yïn yi orɑng, kɑ yï liib piny yi böögø. Piny ɑ́lunyi, o yï pɑ cuggi nënnø, yï ɑ́mud yi pïi bɑɑyø. Jwøk, pɑ bëëd ɑ mɑɑl dwøng, e nenn-ɑ piny kömi kyell, cɑgg ɑ́ kɑ ying gen mɑl? Cɑgg ɑ́ kinøw, yï ópëjjø kinni, “Á ngø ɑ ngɑ̈nyi yi Jwøk? Cɑ̈y-ɑ́ɑ̀ dï e ógëngø yi pøøl?” Yï orumø i Jwøk mɑ̈ɑ̈n-ɑ nënnø yi pøll-ɑ bɑ dhïl, kɑ̀ cyɑ̈dhe kì yij pyëën mɑl? Yï nudd yï tyer-ɑ cyɑ̈dhø, kì yëth-ɑ nyi tyer yi tyëngrijjø? Ge ɑ́wøj yi bɑɑyø, e bøli kej gen nuti thumø. Tyëngrijjø Jwøk ɑ́bɑny yi gen, ge okööbø ce bong gïn cuggi göggi gen yi Áyïmø. Cɑgg ɑ́ kinøw, bɑ Jwøk ɑ ɑ́wëggi gen dönyø, de rummi tyëngrijjø pɑ gɑm yi wïjɑ. Tyëngtir pëthi gen omedø, o tyëng-ɑ yï gen bɑ̈r ceg-ɑ ngedhø, keny-ɑ ɑ́lidh gen tyëngrijjø ge ocɑyø. Jɑmmi tyëngrijjø ɑ́rënyi bënn, kɑ møg-ɑ ɑ́döng bënn, rɑ̈b yi mɑc. Anɑn, Ayub døøg kö Jwøk, mërrí ki en, kɑ ko mïdhí ɑ́ ngetimɑ̈ɑ̈nø. ogöög kinøw, yï ógyëdh yi en. Yïëëy ki Ciggi Jwøk, kɑ kwøbbe mïdhí kì pyëwí. Göög ki mölø; kɑ yï døøg kö Jwøk kɑ yï wïyi ki gwøg ki rɑj, kɑ gïgrijjø kɑ̈ɑ̈l wɑ̈g kì gølí. Weddí dhɑbí; weddí dhɑm-ɑ dhïw yij pyëën nɑm. Kɑ wiy Áyïmø bëëde ɑ́ dhɑbí, kɑ wiy bëëde ɑ́ ɑ́tegø me röör yïn piny. Codhe, o yï óngɑ̈dh Áyïmø, o yod yi yïn kinni medi pyëwí kɑ̈ɑ̈l-ɑ yïe. Keny-ɑ ókwɑjjii yi yïn, kwɑ̈jjí ólïnge, kɑ møg-ɑ ɑ́kwöng yi yïn mïdhí. Jɑmm-ɑ gøggí ópɑ̈dhi kɑ̈jji gen, kɑ cɑr omënyø kì yij yuuí. Mɑ́ tyëngɑthwøg nyi wiy-ɑ piny yi Jwøk, kɑ mööl gï yiele. Yï óyiel yi Jwøk, keløg yïí bɑ̈r; yï óyiele keløg yï gøgg-ɑ dyër. Ce di bëëd keny-ɑ bëëde ngɑ̈nyi yi yɑn, o riɑ di bøødhɑ piny kì bøle, o dhøgɑ di thöörɑ, o gønyɑ di thërr-ɑ en. O lögge di yodɑ, o møg-ɑ köbbe yɑn di lïngɑ. Yɑ ódi nyønø yi en ki tege? Pɑth, møg-ɑ kømmɑ di lïnge. Yɑ kømm-ɑ dyër, o yɑ ócuggø lwöbø ki en, o yod yi en kinni yïɑ bɑ̈r. Jwøk ɑ́yɑbɑ kì wɑɑng cyɑ̈ɑ̈ng mwøl, de tøøk, ɑ́yɑbɑ kì wɑɑng cyɑ̈ɑ̈ng böörø, de nuti yood yɑn. Ogöögø kì wïj cingi cɑɑm, de nuti yood yɑn, o nud e ogöögø kì wïj cingi kyëj, de nuti liidh yɑn. De yuu-ɑ cyɑ̈dhɑ ngɑ̈nyi yi en, ke rɑnge yɑn, yɑ oyodø yi en, yɑ døøj. Yɑ cyɑ̈dh-ɑ́ɑ̀ yij yuue ceth, yɑ nuti pɑ̈nyi këjji keny megø. Kwøbbi dhøge nuti pɑ̈nyi yɑn ki pyemø, yɑ nyi gwøg-ɑ gïn-ɑ dwɑddi yi en, de pɑth ki gïn-ɑ dwɑddɑ. Ree pɑ nyi wil yi en, o bong ngɑn cuggi rïwwi bøle. Gïg-ɑ rømmi yi en kiperɑ, ótyëg yi en, o gïgɑni nudd ge gïïr. Dëlɑ ceg-ɑ kïïrø yi wɑ̈ɑ̈rø kì bøle. Ede bøli kej cɑ́y ɑ bɑnyii ki cïbø yi Jwøk, ede cyɑ̈ɑ̈ng cɑ́ye ɑ pɑ lidhii yi tyëng-ɑ ngɑ̈dhii? Kew nyii nyigø yi ji o piny gen dønge, dyëgi ji møøgø nyii kɑbø yi gen, kɑ gï kïdhi gen kelli dyëgi gen. Aderi kïj nyii kwɑnyø yi gen, kɑ wɑɑdh thwöm mïdhi gen pïd kenyi cole kwör-ɑ köme. Abuur nyi mɑ̈ɑ̈n ge’ jɑmm-ɑ bɑ mø gen, kɑ tyëng-ɑ jɑdø bënn göjji gen pɑ̈nnø. Kɑ ɑbuur ogöögø ni odyerø; ge ɑ́døøg be yɑb ki gïgcɑmmi gen kì pɑ̈l; mɑ́ e bong keny yïddi gen ki gïn cɑm yi nyigi gen. Kɑ ge døøg-ɑ be gwøg kì yethi pwödh mø pɑth, ge lem-ɑ nywøli oløg kì bɑ̈ggi tyëngrijjø. Bong gïn nyi kum gen ri gen kì wɑ̈r, bong gïn kum gen ri gen kipe kööjø. Ge nyi ceg-ɑ nebø yi kødh kì wɑ̈thi kïttì ge pɑ̈n-ɑ́ɑ̀ gøddi kïttì, gïn-ɑ́ uddi gen. Tyëngrijjø kïjj nyi pun ge’ wɑ̈g kì dhø thïnhø, kɑ nyigi ɑbuur kɑ̈l yi gen gɑ kɑ̈jji körri gen. Abuur cyɑ̈dhi e bong ógudh kì ri gen, ge nyɑr-ɑ gemè e ri gen dɑ kɑ̈j. Abuur bij-ɑ møøw dhetun, kí møgi oløg e ri gen dɑ röödhø. Ywøøg ji-ɑ kømi thøø yi kedd kɑ̈ɑ̈l-ɑ yethi kɑ̈dd, de kwɑ̈jji gen pɑ løøg yi Jwøk. Dɑ ji mø nyi bɑ̈nyi ki cɑr, yuu cɑr kwïj yi gen, wɑlɑ̀ ge pɑ cyɑ̈dhi kì yije. Nɑ̈ɑ̈g nyi dhwödh piny nudd e looj, kinni o nɑ̈ge ɑbuur, o nyi kwɑ̈ɑ̈de kì wɑ̈r. Jɑlyɑb ki mɑ̈nn nyi yïd-ɑ yuudhi wøw, kɑ wïje nyi kume, o cöge e pɑ ngij. Ød nyi tor-ɑ wɑ̈r yi kurrì, de ge nyii pɑ̈nø ki dicɑ̈ng, ge kyëj-ɑ cɑr. Mɑ́ muunh-ɑ dwøng bɑ mwøl kì yï gen, o ge bɑ mɑ̈dhh ki gïg-ɑ nyi böggi yi ji kì yij muudhø. Tyëngrijjø ɑ́mud yi pïi bɑɑyø piny gen ɑ́göjji cyën yi Jwøk, ge pɑ nyi kedhi be gwøg yethi pwödhhi gen këti. Tyëngorøg ókɑ̈l kì yij piny tyëngnëënø ni kenyi kɑ̈ɑ̈l pï yi mel geki lëdhi piny. Tyëngrijjø ówïl kì wɑ̈thi ji, ge ócɑm yi bïy ni yenh mø pɑ̈ɑ̈dhø. Kipe kenyi guud gen nyingi thwömm, o bong gïndøj me nyi göggi gen thwömm. Jwøk tyëngteg nyii nɑ̈gø yi en ki tege; kenyi tïnge cinge, ge nyi ceg-ɑ thøø. Tyëngrijjø nyii wiyø yi Jwøk, o ge bëëd gen e bong gïn böggi yi gen, de gï nenne’ nennø yethi cyɑ̈ng. Tyëngrijjø nyi dönyi kɑ keny me thinh, de ge nyii nɑ̈rø ni lum, kɑ ge othøø ni byell-ɑ ókeb piny. Dɑ ngɑn cuggi pëmø kinni møgɑni pɑth ki dyër? Dɑ ngɑn cuggi nyudhø kinni yɑ pɑ kømmi dyër? Dɑ dhɑnhø me cuggi kwɑnni wëywödd-ɑ göggii? Dɑ keny pɑ mëëny yi cɑɑr Jwøk? Dɑ dhɑnhø me tir, wɑlɑ̀ me dhïw kibøli Jwøk? Kì yï Jwøk, dwɑ̈y pɑ tɑr, o kyell pɑ gwellø. De óbëëd ɑ dï ki dhɑnhø, ɑ ni twöngø yøw? Dɑ per nënni dhɑnhø kì yï Jwøk? Yɑ ɑ́cïj yi wun kidøøj, kɑ dïdi wun nywɑg wun ki yɑn, e yɑ bɑ dhëg yøw! Wu orumø kinni ɑ́ men ɑ ólïngi kwøbbi wun? Á men ɑ ɑ́nyudhi wun kwøbb-ɑ døj møg-ɑ kømmi yi wun ek? Tïbbi tyëngthøø nyi kïïrø kì yethi pï kì thɑ piny. Pödhi tyëngthøø bɑ ɑyieb kì bøli Jwøk, bong gïn gëngii, kɑ ódhɑ̈lø nennø yi en. Jwøk, mɑl kì tung-ɑ wɑɑng wuudø ɑ́cïbe keje, kɑ piny wëgge ryërø kì yij kɑɑm me bɑ wɑ̈w. Bɑ Jwøk ɑ nyi pɑ̈ng pøøl ki pï de pøøl pɑ nyi pyëëd yi pegi pï. Kwøme nyii gëngø yi en ki pøølø. Muudhø ɑ́dɑ̈ɑ̈nge ki cɑr, gï ɑ́dɑ̈ɑ̈nge ki kew mɑ ɑ́dulø kì wɑ̈thi pï. Kenyi rënyi pyëwe ki löjj-ɑ mïdhi mɑl, ge nyii nhɑ̈nhø kɑ ge okïïrø yi wɑ̈ɑ̈rø. Tyelli mɑl nyii pɑ̈yø, kɑ ge nyii kïïrø kenyi jɑwwe. Mɑl ɑ́gwøg e tɑr yi yømi dhøge, kɑ lɑ̈ɑ̈y nɑm, lɑ̈y-ɑ dwøng nɑ̈ge ki cinge. Møg-ɑ ɑ́kwøbɑ bënn kì ri tegi Jwøk, bɑ budø me thinh kì ri gïgdøngø møg-ɑ nyi gwøge. Á men ɑ ngɑ̈nyi döngi Jwøk kidyër? kɑ̈ng-ɑ nudd yɑ onëënø, e wëyi Jwøk nud kì riɑ, bong gïnrɑj men-ɑ ókwøbɑ, o bong kwøbbi wëënyø møg-ɑ ókɑ̈ɑ̈l dhøgɑ. Yɑ pɑ yïëy kinni wu kømm-ɑ dyër kinni tek o bëëdɑ, bëëndøj pɑ wil yi yɑn pïd thøø. Bëëdɑ, bëëntir pɑ pɑ̈nyɑ’ wiyø, mɑ́ bong gïn pere cɑyyɑ riɑ. Wiy tyëngmɑ̈ɑ̈nø geki tyëng-ɑ rïwwi bølɑ, cɑy ni tyëngrijjø geki tyëng-ɑ pɑth ki tyëngtir. Á ngɑ̈ɑ̈dhø mɑ ngø, ɑ óying yï tyëng-ɑ kwïj Jwøk keny-ɑ ódwɑ̈ɑ̈ye wëyi gïn? Ywøøg gen ódi lïngø yi Jwøk, keny-ɑ óbëën rɑj kömi gen? Pëthi gen di ceg-ɑ med ki Áyïmø, ge di ceg bëëdø ge mɑll-ɑ en. Wiy wu nyudhɑ yëthi tegi Jwøk, o gïg-ɑ ɑ́gwir yi Áyïmø löbbɑ wun. O ge ɑ́rum ki lidhø yi wun bënn, de wude ɑ kømmu yɑnggì? Bene kër-ɑ nyi cɑɑy tyëngrijjø geki ɑ́muddi ji yi Jwøk ɑnɑn. Cɑgg nyigi gen gïïr, ge nyii nɑ̈gø kì yij liny, nyigi gen nyii ywɑjø yi kɑ̈j. Møg-ɑ bødh kì yij liny, nyii nɑ̈gø yi rɑ̈ɑ̈m dëllì. o ge pɑ ywøg yi mɑ̈nni gen. Cɑgg ngyëny ɑ́tegg röör gen piny ni ɑyejø kɑ ógudh röör gen piny ni lɑ̈bø, ógudhɑni órug-ɑ yi tyëng-ɑ nyi gøggi dyër, o ngyënyyɑni ókwɑny-ɑ yi tyëng-ɑ pëthi gen tɑr. Udd-ɑ ɑ́ger yi gen nɑ bøøy órɑb, o nɑ ɑkɑni bɑ̈ng me kurø ki pwödhø. Ge kedh-ɑ be buddø ge kɑ̈rø de keny-ɑ ócyëëw gen kɑ̈rɑni lɑ̈ɑ̈nyø. Ge ómɑg yi wɑ̈ɑ̈rø ni mulli bɑɑyø, kɑ ge køøl yi yømø kì wɑ̈r. Ge ókøøl wɑ̈g kì kɑ̈lli gen yi yømi wɑɑng cyɑ̈ɑ̈ng mwøl. Óköddi kömi gen ki menrɑj, cɑgg ge di dwɑddi pɑ̈ɑ̈rø ki yïe, ge pɑ bodh. Yømø óköddi kömi gen, kɑ gï göjje böögø. Kidyër, dɑ kɑ̈jj-ɑ nyi koony ngyënyø ɑ́tegø. O dɑ kɑ̈jj-ɑ nyi leeny dhɑb o dhïwe. Ngyënyø dødø nyi kɑ̈ɑ̈l wɑ̈g ɑ piny. O ngyënyø dilɑl nyi lëëny wɑ̈g ɑ ri tuggi kïttì. Ji nyi kïdh-ɑ yethi burr-ɑ nyi kuuny ngyëny wɑ̈g ki lɑ̈mbɑ̈ɑ̈. Ge nyii kunyø kɑ ge wɑ̈dh-ɑ piny. Kɑ tuggì ɑ̈lli gen kì yij muudhø, kun lɑ̈wi lɑ̈wi ki keny-ɑ bëëd yi ji, keny nuti pɑ̈nyø këël tyelø yi dhɑnhø. Ge nyii kunyø ki bur me ludhø ludhø, kɑ ge ogöögø kì kunɑni kì yij muudhø, ge ryër-ɑ́ɑ̀ ri thøll kì yethi burrì. Gïncɑm nyi twïy-ɑ piny, de kì thɑ pinyɑni kiree, jɑmmì óyöllø, o ge ómødø. Ji nyii yïddø ki gïg per gen teg kì ri tuggi piny, o ri lɑ̈be dɑ dhɑb. Yuu burrɑni kwïj yi ótïngø, o bong cor mɑ ɑ́pɑ̈nyi pɑ̈ɑ̈r kunɑni. Bong ngur wɑlɑ̀ lɑ̈yy-ɑ nyi böggi mɑ ɑ́pɑ̈nyi kɑ̈l yuuɑni; yuu-ɑ lïïwø. Ji kony-ɑ tuggi kïttì mø teg ge ɑ̈ll-ɑ kïttì kì thɑ piny. Ge ɑ́kuny ki kɑ̈jj-ɑ kɑ̈lli kì ri kïttì, kɑ kïtti tigg-ɑ per gen teg yod gen kì kunɑni. Ge ɑ́kuny kɑ ge wɑ̈dh-ɑ tyelli nɑ̈mmì kɑ gïg-ɑ ókɑɑn kunɑni kɑ̈ɑ̈l gen yij cɑr. De peli wïj óyod ɑ keny? O kej dïdø ying-ɑ keny? Peli wïj pɑ cuggi yodø kì kelli ji yøw, tegi pere pɑ cuggi yodø yi dhɑnhø. Tyelli nɑ̈mmi omeli døngø geki nɑ̈mmi omeli thønhø okööbø ce peli wïj bong gøn kì yï gen. Peli wïj pɑ cuggi ngewø ki ɑ́tegø wɑlɑ̀ dhɑb. Peli wïj pɑ cuggi pɑ̈ɑ̈rø ki dhɑm dhïw geki tigg-ɑ per gen teg. Peli wïj pere teeg kibøli dhɑb, lod-ɑ dhɑm dhïw kí ɑdhɑ̈nh pere teg. Peli wïj pere teg kibøli wɑ̈thi tigg-ɑ per gen teg bënn. Kïti tigg óbwörø kí dhɑm-ɑ dhïw pɑ pɑ̈ɑ̈r ki peli wïj. Á keny ɑ kɑ̈ɑ̈l yi peli wïj? Á keny ɑ cuggi wɑ ki dïdø? Bɑ ɑkɑn kipe gïg-ɑ nëënø bënn o pɑ cuggi lidhø yi winyø me pɑ̈rri kì mɑl. Cɑgg ɑ́ thøø geki ryɑ̈g, pɑ yod yi gen. Jwøk kete ɑ ngɑ̈nyi yuu peli wïj, kí keny-ɑ di en. Mɑ́ en ɑ nenni cögi piny, o en ɑ nenni jɑmm-ɑ kömi piny bënn. Keny-ɑ ɑ́thödhe yømø ki pege, kɑ pï gï røme; keny-ɑ ɑ́nënge kødh ki cigg mø korrii, kɑ ogwel mɑl geki pööde gögge ki yëëth; bene bøli kenyɑni ɑ ɑ́lidhe peli wïj, kɑ døøji gøn rɑnge. Acïbe gøn keje. Kɑ dhɑnhø köbbi yi Jwøk kinni, “Keløg yï dwɑdd-ɑ bëëdø wïjí pel, wør Jwøk møti, o keløg yï dwɑdd-ɑ dïdø ki yodi thɑ́ kwøb, wïyí ki gøggi rɑj.” Acigi Ayub døøgø ki kwøb këti. Yɑ ce di døøg-ɑ yij bëëdɑ cøn, kì yethi cyɑ̈ngg-ɑ ɑ́bëëd yɑ okorø yi Jwøk. Keny-ɑ ɑ́bëëd Jwøk e ying-ɑ kömɑ, kɑ yɑ nyi thödhe ki cɑr kenyi cyɑ̈dhɑ kì yij muudhø. Yɑ ɑ́bëëd yɑ nudd yɑ døøj kì yethi cyɑ̈nggɑni o gølɑ ɑ́bëëd e okorø yi Jwøk. Keny-ɑ ɑ́bëëd Áyïmø ying-ɑ kömɑ, o nyigɑ ying-ɑ bɑdhhɑ. Keny-ɑ ɑ́bëëd dhögɑ geki dyëgɑ köthi gen dɑ cɑg mø gïïr cɑrø, o yenhɑ, yenhi dhetun nyi twïy-ɑ kelli kïttì. Kenyi cugi jøgdøngi kɑɑl, kɑ yɑ nyi pëgg-ɑ kejɑ kì kelli gen. Yɑɑg-ɑ wøbb nyii këjjø kenyi lidh gen yɑn, o jøgdøngø nyi dhwödh-ɑ mɑl, ge wør-ɑ yɑn. Pëjjì nyii kudø, kɑ dhøggi gen mij gen, cɑgg ɑ́ tyëng-ɑ per gen teg, lebbi gen nyii jogø yi gen. Ngɑn liidh yɑn, wɑlɑ̀ lïng-ɑ perɑ, gïg-ɑ gøggɑ nyii pwøjø yi en. Mɑ́ tyëng-ɑ ɑbuur nyii kønyø yi yɑn, kenyi ywöngi gen, kïjj-ɑ bong ngɑn køny gen, nyii kønyø yi yɑn thyew. Yɑ ɑ́lenhi yi tyëng-ɑ ɑ́rɑngi, kɑ thwöm pyëwe nyii mïnø kɑ̀ korrɑ en. Yɑ ɑ́bëëd kɑ bëëntir, yɑ gøgg-ɑ dyër ceth. Yɑ ɑ́bëëd yɑn ɑ́ kej wɑng kì yï cwør, kɑ yɑ løg-ɑ kej tyelø kì yï ngwøl. Yɑ ɑ́bëëd yɑ nɑ wïy kì yï tyëng-ɑ jɑdø, kɑ wëdhh nyi cwɑgɑ kì yethi ɑkørri gen. Leggi tyëng-ɑ yethi gen wöny ɑ́tørrɑ, kɑ tyëng-ɑ ɑ́rɑngi kì cinggi gen yielɑ. Yɑ nyii rumø kinni yɑ óthøw ɑ gølɑ, o runnɑ óbëëd ge gïïr ni tør. Yɑ ɑ́bëëd yɑ nɑ yɑnh byerre ying yethi pï, o bɑ̈dde thij yi thöjj. Yɑ ɑ́bëëd yɑ nyi ceg kɑ pøjjø yi ji bënn, o tegɑ pɑ nyi lɑ̈ɑ̈ny. Kenyi cïjɑ ji, yïthhi gen nyii kyënø yi gen, kɑ møg-ɑ kømmɑ lïngi yi gen kidøøj. Ge pɑ nyi cigi kwøb kenyi rumɑ ki kwøb. De kwøbbɑ nyi reng-ɑ pëthi gen, ni kødh kenyi renge piny. Kwøbbɑ nyii yïdø yi ji, ni kenyi yïd kødh yi jɑlpur. Ge nyii cïjø yi bønyɑ, kɑ pëthi gen nyii tëngø yi tɑri bølɑ. Ge nyii nyudhø yi yɑn ki yöö ni kenyi nyuudh pënyi liny, o yɑ nɑ rɑ̈dh kì kelli gen; kɑ ge nyi cïjɑ kenyi kïïm gen. De ɑnɑn yɑ ɑ́døøg be gɑggø yi ji mø thønhø kibølɑ! Men-ɑ́ ji mø wëëg gen ɑ́bëëd ge bong kɑ̈jji gen, kɑ ge nyi mɑ̈ɑ̈nɑ kønyi gwöggɑ ki kori dyëgɑ. Ge bɑ ji møg-ɑ ódhɑlø yi ri gen, bong gïndøj me cuggi göggi yɑn yi gen. Nyingi gen ocɑnø, o ri gen dɑ kɑ̈j, ge nyi nyɑm-ɑ byerri yenh mø thwøwø kì pɑ̈l, kì wɑ̈r kì kɑ̈jj-ɑ bong ji. Ge nyi puth-ɑ lum kì pɑ̈l, o gø cɑm gen, cɑgg ɑ́ byerri ɑ́lɑl ɑ pɑ med, nyii cɑmø yi gen! Ge nyi ceg-ɑ rengø kɑ̀ kiiw gen. ni kenyi cyeddi kur. Ge ɑ́bëëd ɑ yethi órøggi kïttì, geki yethi burrì. Ge ɑ́bëëd ɑ pɑ̈l ni lɑ̈yy, ri gen congi yi gen ɑ thɑ̈thi yenh. Ge bɑ ji mø pëthi gen nøg, o bong kɑ̈jji gen! Ge ɑ́cyeed wɑ̈g kì yij pödhø. Anɑn, yɑ ɑ́døøg be ngedhø yi gen, yɑ ceg kɑ gɑggø yi gen. Yɑ ceg kɑ gɑwwø yi gen, ge orumø ce ge døøj kibølɑ, kɑ ge nyi tir-ɑ nguddi nyingɑ ki lɑ́ɑ̀w. Mɑ́ Jwøk yɑ ɑ́göjje nyönhø, kɑ yɑ ódhɑ̈lø nyɑgi riɑ, ri gen ɑ́lugi gen yɑn ki tegi gen bëne. Kömɑ ɑ́pɑ̈ɑ̈r yi yɑɑy gen, kɑ yɑ cyeddi gen. Yëthɑ bɑ ɑcyëg yi gen, o ge dwɑdd-ɑ nɑ̈gi yɑn, o bong ngɑn kyëddi gen. Dör-ɑ ɑ́kor yɑn ɑ́dhur gen piny kɑ ge pönh-ɑ kömɑ. Kömɑ ɑ́bëën yi wɑ̈ɑ̈rø, dhwɑ̈ngɑ ɑ́køøl yi yømø, o døøjɑ ɑ́wɑ̈ɑ̈ny ni pøølø. Anɑn yɑ bɑ men thøw, bong gïn yiel yɑn ki orɑngɑ. Cuɑ nyi ceg-ɑ okïw kì wɑ̈r, o rɑ̈ɑ̈m dëlɑ men-ɑ rɑngɑ pɑ thumi. Jwøk ógødhɑ ɑ́pɑ̈rre kì munɑ kɑ gø twije cwɑggɑ. Yɑ ɑ́leenge piny yij lɑ̈bø, kɑ yɑ ópɑ̈ɑ̈rø ki lɑ̈mɑni. Yɑ ywøøg-ɑ köörí yïn ɑ Jwøk, de yï nuti pɑ̈nyi löggø, o kwøbbɑ nuti lïngø yi yïn keny-ɑ ɑ́kwɑjjɑ yïn. Yɑ mïdhi yi yïn kɑ rɑ̈ji pyëwí, wɑngɑ ɑ́guud yi yïn ki tegí. Yɑ ɑ́wëggí køølø yi yømø, kɑ yɑ wëggí wøjjø yi ɑtunø. Áyod yi yɑn kinni, yɑ kïdhí be thøø, kun-ɑ nyi kedhi yi gïg-ɑ nënnø bënn. De yïde ki ngɑn rum rënyø, eni ngɑn bong gïn gwøge, de thɑngg-ɑ cingge yøw. Yɑ nuti bëëdø yɑ nyii ywöngø kipe ji-ɑ yethi ɑkørr kɑ yijɑ nyii ywöngø kipe tyëng nyingi gen cɑn? De ɑnɑn kɑ̀ dwɑddɑ gïndøj, nyi yöd ɑ́ rɑj ɑ bï, kɑ̀ dwɑddɑ cɑr, yöd ɑ́ muudhø ɑ bï. Yijɑ ɑ́bɑɑr yi rummì geki rɑ̈ɑ̈m dël, cyɑ̈nggi orɑngɑ pɑ cög. Yɑ ying-ɑ yij kïïmø e bong cïïjø me yodɑ, yɑ ókwɑ̈jjø kì bøli teedø kinni o yɑ køny. Cwɑggɑ ɑ́mer yi ywøg, ge ɑ́göög ni ywøøg ógwøgø geki wudø. Dëlɑ ree ɑ́cïle, kɑ cuɑ órɑ̈bbø yi lëdhi dëlɑ. Keny-ɑ́ yije ɑ́bëëdɑ yɑ nyi lïngɑ wör mø med, yije ɑ́døøg e lïngɑ’ wörri ywøg ɑnɑn. Yɑ ɑ́rum ki köngø kinni, pyëwɑ pɑ pɑ̈nyi okøn ki nyɑndhɑjø. Á ngø ɑ ógöggi yɑn yi Jwøk Áyïmø? Kööngɑ óbëëd ɑ́ ngø kì yïe? Orɑng pɑth ki mi tyëngrijjø? O ryɑ̈g pɑth ki mi tyëngorøg? Gïg-ɑ gøggɑ bënn ngɑ̈nyi yi Jwøk. Yɑ onennø yi en kɑ̀ cyɑ̈dhɑ. Keløg e dɑ rɑj mø gwøøg yɑn, wɑlɑ̀ dɑ ji mø ruj yɑn, wiy yɑ røm ki rumi men-ɑ dyër, o yɑ óyod yi en ceth e yïɑ bɑ̈r. Keløg yɑ kedhi wɑ̈g kì yij yuu-ɑ dyër, wɑlɑ̀ riɑ wëggi yɑn thɑɑb yethi rɑj, keløg riɑ ywëëdh yɑn ki orøg, wiy byellɑ rënyi gen wɑlɑ̀ wiy gïg-ɑ ɑ́purɑ cɑm yi ji møøgø. Keløg pyëwɑ kønø ki cï wɑɑd wøn, kɑ yɑ ópɑ̈nø yɑ oyïdø kì dhø gøle, wiy cyëgɑ ótɑ̈dde jɑlø megø, kɑ wiy budde kì yij pyëën jɑlø megø. Mɑ́ cɑ́yi orøng ni menɑni bɑ thøø. Orøngɑni nɑ mɑny-ɑ nyi rënyi dhɑnhø, jɑmmɑ bënn bɑ møg rɑ̈b yi en. Kenyi gööny bɑ̈nggɑ ki yɑn gøøny gen ɑ́bëëd e nyii løøgø yi yɑn kidøøj. Keløg ge nyi ruj yɑn, yɑ ókedhi bøli Jwøk kidï? Yɑ ókwøb-ɑ ngø keny-ɑ óbëën Jwøk be lidhi gønyɑ? Mɑ́ Jwøng-ɑ ɑ́cwɑ̈j yɑn, en ɑ ɑ́cwɑ̈j bɑ̈nggɑ thyew. Tyëng-ɑ ɑbuur nuti mɑ̈ɑ̈n yɑn ki gïn-ɑ ɑ́dwɑddi yi gen, o thwömm nuti bëëdø ge orɑngø kì butɑ, wɑlɑ̀ yɑ nuti pɑ̈nyi cɑm kì buti kïj e ree dɑ kɑ̈j. Ge ɑ́bëëd per gen teeg kì yïɑ ge bënn. Kenyi lïdhɑ ki dhɑnhø me jɑdø, o bong gïn ngëëwe ki ógødh, nyi mëggɑ’ ógødh men-ɑ ócwɑ̈jø ki yëyyi dyëgɑ; eni men-ɑ́ ógødh dïl yëyyi dyëgɑ. Kɑ yɑ nyi pwøje ki pyëwe bëne. Keløg e dɑ kïj me ruj yɑn, yɑ ngɑ̈ny wøw kinni yɑ ócwɑg kì burø, wiy bɑ̈ddɑ tørri gen, wiy ge puth wɑ̈g kì kɑ̈jji gen. Yɑ óböggø ki cɑ́yi Jwøk, gïg ni møgɑni pɑ cuggi gwøgø yi yɑn. Yɑ nuti ngɑ̈dh-ɑ kɑ̈rɑ wɑlɑ̀ yɑ nuti thwøgø kipe kɑ̈rɑni cøn. Cɑ̈ng kenyi yeere nuti pɑ̈nyi yɑn ki mɑlø, wɑlɑ̀ tɑri dwɑ̈y nuti mɑɑl yɑn thyew. Yɑ nuti pɑ̈nyø thɑɑb be mɑlli gen kì gød, cingɑ nuti nuum yɑn yɑ wør-ɑ gen. Orøng ni menɑni cɑ́ye bɑ thøø, mɑ́ e bɑny-ɑ Áyïmø. Pyëwɑ nuti pɑ̈nyi mïnø ki orɑɑng tyëngmɑ̈ɑ̈nø wɑlɑ̀ pyëwɑ nuti mïnø keny-ɑ ɑ́bëën kömi gen yi ryɑ̈g. Lebɑ nuti wëggi yɑn bɑ̈jjø, kɑ ge lɑ̈mmɑ thøø. Tyëng gølɑ ngɑ̈ny wøw bënn kinni wëll-ɑ pɑth nyi cwøølɑ’ gølɑ. Bong wëlø me nyi buddi kì tøg yöö, ge nyi cwöölɑ’ gølɑ bënn. Ji møøgø orøøg gen nyii kɑnø yi gen, de orøgɑ nuti pɑ̈nyi yɑn ki kɑnø. Yɑ pɑ nyi böggi yi kwøbbi ji, yɑ pɑ nyi kudø wɑlɑ̀, yɑ pɑ nyi cöög gølɑ, mɑ́ yɑ pɑ böggi yi kwøbbi ji. Bong ngɑn lïngi møgɑ? Yɑ ceg-ɑ köngø kinni møg-ɑ kømmɑ bënn bɑ dyër. Wiy møgɑ løøg yi Jwøk Áyïmø. Keløg møg-ɑ gøøny yɑn yi tyëng-ɑ pëëm wøn gweed-ɑ yij wɑ̈nyø kɑ ge lidhɑ, kwøbbɑni di rugɑ kì mɑl wɑ̈thi tøggɑ, o ge di rugɑ kì wïjɑ ni yɑ̈r, o ge di lidh. Gïg-ɑ ɑ́gwøgɑ bënn di köbbɑ Jwøk kɑ wïjɑ di tïngɑ mɑl kì bøle. Keløg piny-ɑ ɑ́pur yi yɑn cɑɑg yɑn kɑ kɑbø kì yï wëëg gen, keløg jɑmm-ɑ ɑ́cyeg kì yije cɑɑm yɑn, kɑ tyëng-ɑ ɑ́göög wëggɑ ywɑjø yi kɑ̈j, wiy koodh twïy gen kì kej gemè, kɑ lum twïye kì kej ceir. Kwøbbi Ayub ɑ́thumi. Codhe, ɑwïyi jøgɑni gɑ ɑ́dɑ̈g ki løøgi møgi Ayub, mɑ́ ree nenni yi en yïe bɑ̈r. Codhe, ɑmɑɑg Elïu, wɑ̈d Bɑrɑkel, kwɑɑr Budh, kì gøl Rɑm yi liny ki Ayub, kipe kɑ̀ cwølle ree ɑ́ ngɑntir kì bøli Jwøk. Elïu ɑ́mɑg yi liny ki mɑ̈dhhi Ayub gɑ ɑ́dɑ̈g thyew, mɑ́ kwøbbi Ayub ɑ́dhɑ̈li løøgø yi gen, cɑgg ɑ́ kɑ ɑ́cɑy ge gøn. Elïu ɑ́wëgg-ɑ jøgɑni kinni o ge kööb gen ki Ayub, mɑ́ ge døngø kibøle, bene ɑ ɑ́kude cøn. De keny-ɑ ɑ́lidhii yi Elïu kinni jøgɑni bong gïndøj me løøg yi gen, ɑmɑgii yi liny. Acɑ̈ge ki kwøb. Yɑ thinh kibøli wun, bene ɑ böggɑ ki köbbi wun gïn-ɑ ɑ́rømmi yi yɑn. Riɑ ɑ́köbbɑ kinni, wiy tyëngdøngø kööb gen ki peli rummi döng. De bɑ wëyi Jwøk Áyïmø ɑ nyi bï kömi ji o gï thödhe ki peli wɑ̈ɑ̈th. Pɑth ki döng ɑ nyi wëggi wɑ̈thi ji pïlø, wɑlɑ̀ ɑ nyi køny gen ki yodi dyër. Adɑ́ lïngu møgɑ, wiy wu köbbɑ møg-ɑ rømmɑ thyew. Yɑ ɑ́lïng kidøøj keny-ɑ ɑ́kööb wun, kɑ yïthhɑ kyënɑ, kɑ ɑ́yɑb wun thɑ́ kwøbbi peli wïj. Yɑ ɑ́lïng kidøøj, de wu ɑ́dhɑl yi löggø; bong ngɑn mɑ ɑ́nyudhi Ayub kinni ɑ́bɑ̈jji, Wude ɑ kööb wun kinni wu yïddø ki peli wïj? Kwøbbi Ayub óceg ki løøg-ɑ yi Jwøk, mɑ́ wu ɑ́dhɑl yi gen. Ayub ɑ́kööb kɑ wun, pɑth ki yɑn, de yɑ pɑ löggi ki löggi wun. Ayub, mɑ̈dhhí ɑ́dhɑl yi kwøb; møgí ɑ́dhɑ̈li løøgø yi gen. Kudɑ thyew, kɑ yɑ pëgg-ɑ be yïd, mɑ́ ge ɑ́dhɑ̈li löggø? Pɑth, yɑ ólöggi, o gïn-ɑ rømmɑ kwøbɑ. Pyëwɑ pɑ̈ng yi kwøb, ge pɑ cuggi kudø yi yɑn. Keløg yɑ pɑ kööbø, pyëwɑ bɑ men pyëëd, Yɑ dwɑdd-ɑ kwøb ceth, o pyëwɑ kwöje. Bong ngɑn cwɑg yi yɑn, wɑlɑ̀ bong ngɑn wëny yi yɑn ki dhøng med. Yɑ kwïj medi dhøg, Jwøk yɑ ójwɑne ki cɑyø keløg yɑ obëëdø kinøw. De ɑnɑn lïngí møgɑ Ayub, ti gen ki lïngø kidøøj. Yɑ kwøb-ɑ møg-ɑ pyëwɑ. Yɑ kööbø yijɑ bong ɑ́dud, o yɑ kømm-ɑ kwøbb-ɑ dyër. Yɑ ɑ́gwøg-ɑ yi wëyi Jwøk; kɑ yɑ thödhe ki nënnì. Gwir rummí kidøøj, kɑ møgɑ løøg. Wɑ pɑ̈r kì bøli Jwøk, wɑ ɑ́cwɑ̈j kɑ lɑ̈bø bënn. Bong gïn böggí kì riɑ, yïɑ bong tegø me lod tegí. Kidyër, yï ɑ́kööb ɑ butɑ kinni, “Yɑ nuti røngø, bong gïn-ɑ ɑ́bɑjɑ yïɑ bɑ̈r, bong orøg mɑ ɑ́gwøgɑ. De Jwøk bene en ɑ nyi yɑ̈bø ki gïg per gen pɑ̈ɑ̈re kömɑ, o yɑ mïdhe yɑ bɑ ngɑn mɑ̈n ki en. Tyellɑ ɑ́twöje ki ɑ́cwecwel, o yëthɑ bënn ceg kɑ nennø yi en.” De yï ɑ́bɑ̈jji kì ri møgɑni Ayub, Jwøk dwøng kibøli ji bënn. Yïde ɑ wëër ki Jwøk yï okööbø kinni møgí nuti løøg en? Jwøk nyii kööbø tyel mø ngenyø, de bong ngɑn nyi lïngi møg-ɑ kømme. Nyii kööbø kì wɑ̈r ji onenø kì yethi lɑ̈g geki møg-ɑ nyi cɑ̈rri dhɑnhø. Ji nyi wëgge’ lïngi møg-ɑ kømme, kɑ ge nyii bwøgø kenyi kyëdde gïn. Jwøk nyi kööbø kɑ per kinni, o orøg wiy yi ji o gï mɑ̈ɑ̈ne thwøgø. Gï pɑ wëgge thøø, ge nyii yielø yi en ki thøø kiree. Ji nyii tyenyø yi Jwøk kenyi göjje gïn rɑ̈ɑ̈m dëllì kí kenyi göjje dëlli gen okïw. Kɑ gïncɑm ocögø e pɑ kønø ki pëthi gen cɑgg ɑ́ gïncɑm me med, pɑ nyi kønø kinni tek. Kɑ dëlli gen órënyø ki mendwøng, kɑ ge nyii döngø gɑ cu. Kɑ ge nyii cyɑ̈ngø ki thøø. Keløg tyëng-ɑ buud dɑ wëywödø me bï be kønyi gen, kì kelli wëywöddi Jwøk møg-ɑ kwɑnni gen bɑ ɑ́lïp mø ngenyø, ge ócuggø yielø yi en ying gɑ tyëngtir. Pyëwe ólɑ̈ɑ̈mø ki gen, kɑ okööbø kinni, “Døm gen Wuö! Ge ko wëggí kedhi piny, pödhi tyëngthøø. Yɑ ɑ́yïddi ki gïn gøøm bøli gen.” Kɑ dëlli gen ódönyø, kɑ ge døøg-ɑ ri wööbø. Kwøbbi gen óløøg yi Jwøk keny-ɑ ókwɑ̈jji gen, kɑ Jwøk mɑlli yi gen ki medi pëëth, kɑ jɑmmi gen dwøøg kɑ̈jji gen yi Jwøk. Ngɑn-ɑ ɑ́yiel ókööbø kì bøli ji kinni, “Yɑ ɑ́røngi, yɑ nuti gøggi dyër, de yɑ ɑ́wiy yi Jwøk. Jwøk yɑ ɑ́mɑ̈ɑ̈ne kedhi piny, pödhi tyëngthøø, ɑ nudd yɑ onëënø èn.” Gïgɑni bënn nyii gwøgø yi Jwøk, kɑ gï nyi cige jølø. Wëyi dhɑnhø nyi yiele’ yielø, kɑ gø thödhe ki medi pyëw. Anɑn Ayub, lïngí møgɑ, kud kɑ wiy yɑ kööbɑ. De keløg yïí dɑ gïn dwɑddí kwøbø, kwøøb! Yɑ óyïëy ceth kinni yï wɑng-ɑ dyër. De ke bongii gïn kwøb yi yïn, kud kɑ yï lïngí møgɑ, o yï pwönyɑ peli wïj. Wu ngɑ̈ny-ɑ yodi døøji gïncɑm, kenyi bel wun en, de wu nyii dhɑlø yi yodi døøji kwøb kenyi lïngu gen. Kwɑny wɑ møg-ɑ dyër, o løøg wɑ dyër. Ayub okööbø kinni cem e yïe bɑ̈r, den-ɑ́ Jwøk ɑ nuti göggii dyër. Okööbø kinni, “Yɑ pëëd ɑ dï, ɑ kööbɑ kinni yɑ ɑ́bɑ̈jji? Yɑ ɑ́yïddi ki kedø me dwøng, e bong orøg mɑ ɑ́gwøgɑ.” Dɑ dhɑnhø me ni Ayub? Jwøk nuti pɑ̈ny en ki wørø. Ayub mɑɑr-ɑ cyɑ̈dhø ki tyëngrijjø, o 'lwööb kɑ tyëngorøg. Ayub okööbø kinni i bong gïndøj me yod kɑ̀ bëëd dhɑnhø ki bëën-ɑ dwɑddi yi Jwøk. De lïngu møgɑ, wun ɑ wɑ̈thi wun gɑ̈ɑ̈mø ki kwøb! Áyïmø ócuggø bɑ̈jjø? Dhɑnhø nyi mëgge’ köögi men-ɑ kyëëw ki gwøge, o gø nyi gögge’ gïn-ɑ røøm ki bëëde ceth. Jwøk pɑ nyi göögø ki rɑj, o bong ngɑn nyi ruj yi Áyïmø. Á men ɑ ɑ́mëggi piny Jwøk? Dɑ ngɑn mɑ ɑ́thödhii ki tegø kì kömi piny? Keløg Jwøk wëye owɑrø yi en, ji ceg-ɑ thøø bënn, kɑ ge døøg-ɑ yij lɑ̈bø. Anɑn lïngu møgɑ, keløg wɑ̈thi wun pel. Yï cɑy-ɑ Jwøng-ɑ tir? Yï orumø kinni gøggi dyër mɑɑn yi en? Jwøk rɑ̈dh nyii köbbø yi en kinni, pere bong gøn, kɑ nyiirɑ̈dh nyi köbbe kinni wu rijjø. Jwøk pɑ nyi cwɑg-ɑ tyëng-ɑ jyɑ̈gø, wɑlɑ̀ tyëngkɑ̈rì kibøli tyëng-ɑ nyingi gen cɑn, mɑ́ en ɑ ɑ́cwɑ̈j dhɑnhø bëne. Dhɑnhø ócuggø gwɑrø yi thøø kì wɑ̈r. Ji nyi gøøj-ɑ piny yi Jwøk, kɑ ge othøø, jödd nyi nɑ̈ge’ nɑ̈gø e bong nyingi gen yøw. Yëthi ji bënn onennø yi Jwøk. Bong gïn cuggi gwøgø yi ngetorøg e pɑ nenni yi en, cɑgg e göögø kì yij muudhø. Mɑ́ Jwøk bong bøli keny megø mɑ ɑ́cïb yi en gøn-ɑ́ men yije ócwööle ji bøle be gøny. Jɑgg nyi pɑ̈de’ pɑ̈dø e pɑ ngɑ̈ji, kɑ kɑ̈jji gïn cïbe ki ji møøgø. Mɑ́ gïg-ɑ gøggi yi gen ngɑ̈nyi yi en, gï nyi leenge’ piny, kɑ gï nyøne kì wɑ̈r ɑ́kyel yøw. Tyëngorøg nyi cɑy en ɑ bøli ji bënn, mɑ́ ge ɑ́töngi wɑ̈g kì yij yuue, kɑ cigge wiy yi gen. Ywøøg tyëng-ɑ nyingi gen bɑɑr ɑ́wɑ̈dhi yï Jwøk kɑ ywøøg gen kipe yielø lïnge. Keløg Jwøk ogöögø ki gïïpiny, ɑ́ men ɑ cuggi cɑyii? Keløg ree okɑnø yi en, ɑ́ men ɑ ólidhii? Kipe kinni o tyëng-ɑ kwïj Jwøk jyɑ̈ɑ̈g gen geki ɑ́muddi ji. Ayub, orøgí ɑ́di töngi Jwøk yi yïn? Kɑ yï okööbø kinni yï pɑ røngø këti? Jwøk ɑ́di kwɑjjø yi yïn, kinni nyudhe yïn bɑ̈jjí? O yï ɑ́di yïëyø ki wïyø ki orøg? O yï ɑ́bɑny-ɑ gïn-ɑ ɑ́gwøg yi Jwøk, yï orumø gïn-ɑ dwɑddi yi yïn ógwøg yi en? Yïn ɑ kööbø, de pɑth ki yɑn, köbbí wøn gïn-ɑ rømmi yi yïn. Ngɑn di pyëwe óyïëy ceth, o ngɑn wïje pel men lïngi kwøbbɑ ókööbø kinni, Ayub 'kööb-ɑ kwïji wøw, o gïg-ɑ kømme, bong gïn wɑngi yi gen. Ayub ce di ceg kɑ kïdhi burø, o cɑ́ye bënn mëggii, mɑ́ e 'kööb-ɑ tegi wïj ki Jwøk. Mɑ́ e pëmø kɑ Jwøk, ni kenyi pëëm tyëngrijjø. Kɑ yï tir-ɑ pëjjø kinni, “Á ngø ɑ døj kiperɑ? Á gïndøj mɑ ngø, ɑ óyodɑ kì bɑng kɑ̀ nuti røngi yɑn?” Yɑn ɑ óløøg møgí kí mø mɑ̈dhhí thyew. Lïïdh mɑl! Lidh pøøl kɑ̀ bëëd ge lɑ̈wi! Keløg yï orøngø, dɑ gïn göggi Jwøk yi rɑjjɑni? Keløg yï óbɑ̈jjø kɑ yï nyi cig-ɑ bɑ̈jjø, dɑ gïn göggi Jwøk yi orøngɑni? Cɑgg yï tir, ɑ́ ngø ɑ óyod yi Jwøk kì bɑng bëëdí yï tir? Bong gïn dwɑddi yi Jwøk kì yïí. Ji mø ni yïn ɑ rɑngø kì bɑng orøgí. o bëëdí yï tir køny-ɑ ji møøgø. Kenyi nyøøn ji, ge nyi ceg-ɑ currø, o ge nyi ceg-ɑ kïïwø ge ywøg-ɑ kønyø. De ge pɑ nyi døøg kö Jwøk, ngɑn-ɑ ɑ́cwɑ̈j gen, ngɑn-ɑ nyi thödhi gen ki ngɑ̈ɑ̈dhø kì yethi rɑj. Ge pɑ nyi døøg kö Jwøk, ngɑn-ɑ ɑ́thödhi wɑ ki peli wïj ɑ bëëd wɑ pel kibøli lɑ̈yy geki winy. Kenyi ywöngi gen kipe kønyø, Jwøk pɑ nyi löggi mɑ́ ge bɑ tyëngɑthwøg, o ge rijjø. Bong gïn pere ywøøg gen kö Jwøk, mɑ́ ge pɑ nenni yi Áyïmø, o kwøbbi gïn pɑ lïnge. Ayub, yï okööbø kinni Jwøk pɑ nenni yi yïn, de yïd, mɑ́ gønyí ying-ɑ bøle. Yï orumø kinni Jwøk pɑ nyi cɑ̈yi, o pɑ nyi rumø kì ri orøg? Ayub, yï ko wɑ̈dhi pëggi be dwøg yøw, e nënni yï kømm-ɑ gïg kwïj yi yïn. Dïdɑ dwøng, yɑ ókööbø kì ri møg-ɑ ngɑ̈nyi yi yɑn, yɑ nyodh-ɑ kinni Jwøk, ngɑn-ɑ ɑ́cwɑ̈j yɑn, nyi gøgg-ɑ dyër. Yɑ kømm-ɑ dyër ceth, mɑ́ jɑl me wïje pel kidyër ɑ nenni yi yïn èn. Jwøk teeg cɑrø, de bong ngɑn nyi byeny yi en, o jɑmmì bënn ngɑ̈nyi yi en. Tyëngrijjø pɑ nyi wëgge bëëdø ge onëënø, o tyëng-ɑ nyingi gen cɑn nyi gögge’ dyër. Tyëngtir nyii korø yi en, gï nyi wëgge’ jyɑ̈gø ni rɑ̈nhì, kɑ gï wëgge wørø gïti ɑtheer. De keløg ge bɑ ɑtwöj ki ɑ́cwecwel o ge ceg-ɑ orɑng kiper gïn bɑɑj gen, ge nyi nyudh-ɑ orøøg gen kí ɑthwøøg gen yi Jwøk. Gï nyi wëgge’ lïngi møge kenyi kyëdde gïn kinni wiy gen orøg. Keløg kwøbbi Jwøk omïdhø yi gen, kɑ wør gen, ge óbëëdø kì yij mër kí kɑ̈r. De keløg kwøbbi Jwøk ópyem yi gen, ge óthøw ge kwïj wøw ceth. Tyëng-ɑ kwïj Jwøk nyi tyer-ɑ liny, cɑgg ge cɑy yi Jwøk, ge pɑ nyi ywøøg kööre kipe kønyø. Ge nyi thøw ge nudd gɑ wøbb wɑlɑ̀ jùr, kì bɑng bëëdi ɑyɑ̈r. De ji nyi pwönyi yi Jwøk kɑ orɑng, kɑ nyingi gïn nyi yiebe ki rɑj. Jwøk yï ɑ́kɑ̈ɑ̈le wɑ̈g kì yethi rɑj, o yï bëëd ki mër e pyëwí med, kɑ yï thödhe ki gïgcɑmm-ɑ døj mø ngenyø. De ɑnɑn yï cɑy kɑ per orøgí ceth. Yï ko yïëy ki kwɑjjø ki ngyëny, kipe yï órënyi, wɑlɑ̀ rií ko wëggí wɑ̈ɑ̈nyø yi kɑ̈r. Yï ócuggø kønyø yi kɑ̈rí geki tegí kɑ yï ocögø yï pɑ pɑ̈dhi yethi rɑj? Pyëwí ko tyer bëëni wɑ̈r bøli keny-ɑ nyi jwɑn ji wɑ̈ɑ̈nyø. Kor rií, rií ko løg be gwøg ki rɑj, mɑ́ orɑngí ɑ́ör kɑ per wiyi rɑj. Jwøk nyi lenhi kɑ per dönge, ɑ́ men ɑ bɑ jɑlpwönyø ni en? Bong ngɑn cuggi köbbi Jwøk kinni gwøge gïn-ɑni, wɑlɑ̀ bong ngɑn cuggi cɑyii. Wïjí ko wïl ki lenhi gwøge, gwøng-ɑ pere lejjii yi ji. Gïg-ɑ ɑ́gwøge ɑ́lidh yi ji bënn, de wɑ nëënø wɑ lɑ̈wi. Jwøk dwøng, o këër dönge pɑ cuggi yodø yi wɑ, runne pɑ cuggi kwɑnø yi wɑ. Pï nyi cønge’ mɑl, kɑ gï løge kødh. Kødh nyii kunyø yi en kì mɑl, gø kunye’ kömi ji. Bong ngɑn ngɑ̈ny wøw ki kër-ɑ cyɑ̈dhi pøøl, kí yëth-ɑ nyi mɑ̈rri mɑl cwɑgge böödh-ɑ yij mɑl kun-ɑ bëëd yi Jwøk. Mɑl nyi wëgge’ ogwel bëne, de tyeli nɑɑm omelø nudd ɑ́ muudhø. Bene kër-ɑ cɑɑme kömi piny ɑnɑn, kɑ gï nyi nënge ki gïgcɑmm mø ngenyø. Ogwel mɑl nyii mɑgø yi en ki cingge, kɑ gø köbbe göjji keny-ɑ dwɑdde. Pööd mɑl nyi nyodh-ɑ bëëni ɑtunø, kɑ nyi yod yi dhög thyew kinni ɑtunø obëënø. Pyëwɑ nyi wëgg-ɑ olïng yi ɑtunø ki mendwøng. Wu bënn, lïngu cwɑggi Jwøk, lïngu ruuri cwɑgge. Mɑl bëne nyi wëgge’ ogwel, kɑ orɑ̈ɑ̈dø kì kömi piny bëne. Codhe, kɑ ngɑ̈rre lïngi, kí cwɑgg-ɑ døngø kɑ̀ pööd mɑl, e mɑl kedh e ogwelø, kɑ̀ lïngi cwɑgge. Kenyi kööb Jwøk, gïïngɑ̈ngø nyii cwöbø, gïïngɑ̈ngø mø pɑ cuggi gɑmø yi wɑ̈thi ji. Ápiy nyii köbbø yi en kɑ dyëëm-ɑ piny, kɑ kønh nøg köbbe kɑ óngënyø. Gwøøg ji nyi wëgge’ cungø, kipe kinni, o tege yod yi ji-ɑ ɑ́cwɑ̈je. Kɑ lɑ̈yyi pɑ̈l cyeed yethi kɑ̈jji gen yi ɑtunø. Atunø nyi kɑ̈ɑ̈l-ɑ wɑɑng wurlwɑl, o yøm-ɑ lïb nyi kɑ̈ɑ̈l-ɑ wɑɑng wuudø. Pï nyii lïmø yi yëngi Jwøk, kɑ gï løge gïwi, gï nyi løge’ ɑ́piy me teeg. Pøøl nyii pɑ̈ngø yi en ki thöjj, kɑ gï wëgge ogwel. Kɑ gï wëgge cyɑ̈dhø kì yuu-ɑ ɑ́dwɑdde. Ge cyɑ̈dhi ge gwøg-ɑ gïn-ɑ dwɑddi yi Jwøk, kì keny-ɑ dwɑdde kì kömi piny bëne. Kødh nyi öre’ be cɑwi piny ki pï ócuggø örø yi en kömee ɑ́ cɑ́y, o gø nyi öre’ örø ɑ́ gyëdh. Ayub, kud kɑ yï lïng, kɑ yï rum kidøøj kì ri gïïngɑ̈ngø møg-ɑ nyi gwøg yi Jwøk. Ngɑ̈nyi yi yïn ki kër-ɑ nyi kööb Jwøk, kɑ pøøl wëgge ogwel? Ngɑ̈nyi yi yïn ki kër-ɑ cyɑ̈dhi pøøl kì mɑl? Gïg-ɑ nyi gwøg yi Jwøk bɑ gïïngɑ̈ngø. Kenyi köni yømø wurlwɑl, ógudh nyii lënhø, kɑ ji orɑngø yi lëdhi gen. Jwøk ócuggø kønyø yi yïn ki pedhi mɑl, kɑ ogöögø e teeg ni ngyënyø men-ɑ óyojø? Nyudhí wøn gïn-ɑ köbbi Jwøk yi wøn, mɑ́ e bong gïn ngɑ̈nyi yi wøn men köbbi wøn en. Jwøk pɑ köbbɑ kinni, yɑ dwɑdd-ɑ kwøb ki en, ɑ́ kipe ngø, ɑ wëggɑ en ki keny nɑ̈ge yɑn? Bong ngɑn cuggi nenni cɑr kenyi gwelle kì mɑl, e mɑl döngø e tɑr, e pøøl rumø’ køølø yi yømø. Jwøk nyi kɑ̈ɑ̈l-ɑ yij cɑr me ni dhɑb kì wɑɑng wuudø, kɑ wɑ nyii böggø yi dönge. Áyïmø dwøng cɑrø, wɑ pɑ cuggi nyegi bute, mɑ́ e tir, o nyi gøgg-ɑ dyër, o ji pɑ nyi ruje. Bene ɑ bɑnge böggii yi ji bënn, o tyëng-ɑ nyi rumø ce wɑ̈thi gen pel, bong nyingi gen kì yïe. Codhe, ɑløøg møgi Ayub yi Jwøng-ɑ Ácwɑ̈ɑ̈j, e lög-ɑ́ɑ̀ yij yømø ɑ́kødɑkødø. Yïn ɑ́ men ɑ pyënyí kwøbbi peli wïjɑ, o yï 'kööb-ɑ nøgi wïjí, o yï kømm-ɑ yɑnggì? Tyeny rií ni jɑlø, kɑ møg-ɑ pëjjɑ yïn løøg. Yï ɑ́bëëd yï nud keny-ɑ ɑ́cwɑ̈jɑ piny? Keløg yi ngɑ̈ny wøw, köbbí yɑn kër-ɑ ɑ́cwɑ̈jii. Á men ɑ ɑ́kwøb kinni, gwøøg piny e dwøng? Á men ɑ ɑ́rømii ki thøl? Keløg e ngɑ̈nyi yi yïn, löggí. Á ngø ɑ mïdhi tyelli piny? Á men ɑ ɑ́këël tyelle piny? Kyell ɑ́wör kì bɑ̈ɑ̈rø cyɑ̈ngɑni, kɑ wëywödd óryeerø ki medi pëthi gen. Á men ɑ ɑ́gël nɑɑm omelø keny-ɑ ɑ́mwööje wɑ̈g kì piny? Bɑ yɑn ɑ ɑ́kum nɑɑm omelø ki pøøl, kɑ gwøgɑ ɑ́ muudhø. Nɑɑm omelø ɑ́göggɑ ki kew, kɑ mɑ̈ɑ̈nɑ mudi piny. Kɑ köbbɑ kinni, “Bene cögí ɑnɑn! Ko pöödh! Bene keny-ɑ cöög yi ɑpɑgí ɑnɑn.” Ayub, ki kër-ɑ ɑ́bëëd wøw ɑ́pɑ̈nyí köbbø kinni rue? Ru wøw ɑ́di köbbø yi yïn kinni mɑge piny, o tyëngrijjø rengi gen be pɑ̈nø? Cɑr kì dicɑ̈ng kïttì geki törr nyi wëgge’ nënnø kidøøj ni jwenggi ógødh, wɑlɑ̀ ni kɑ̈jji kitim kì ri lɑ̈bø. Cɑɑr dicɑ̈ng tyëngrijjø nyii böggø yi en kɑ gï nyi mɑ̈ɑ̈ne gwøg ki gwøng rɑj. Yï ɑ́di kedhi be lidhi nyingi pï kì tyeli nɑɑm omelø? Yï ɑ́di cyɑ̈dhø kì tyeli nɑɑm omeli dwøng? Dɑ ngɑn mɑ ɑ́nyudhi yïn dhø yöö men-ɑ kedhi pödhi muudhi thøø? Këër döngi piny ngɑ̈nyi yi yïn? Köbbí yɑn keløg e ngɑ̈nyi yi yïn. Kun-ɑ kɑ̈ɑ̈l yi cɑr geki kun-ɑ kɑ̈ɑ̈l yi muudhø ngɑ̈nyi yi yïn? Ge ócuggø nyudhø yi yïn ki kun-ɑ ówɑ̈dhi yi gen kɑ ge köbbí kinni døøg gen kɑ̈jji gen? Ge ócuggø bëëdø ge ngɑ̈nyi yi yïn kidyër, mɑ yï yöø, o yï ɑ́bëëd yï nud keny-ɑ ɑ́cwɑ̈ɑ̈j piny! Yï ɑ́di pɑ̈nyi kedhi yethi ud møg-ɑ yethi gen mïdhɑ ɑ́piy geki ɑtunø? Ge mïdhɑ kɑ per cyɑ̈ɑ̈ng rɑj, kí cyɑ̈ɑ̈ng liny geki nyɑɑg. Yï ɑ́di kedhi kun-ɑ nyi kɑ̈ɑ̈l yi cɑ̈ng, wɑlɑ̀ kun-ɑ nyi köni yi yømi wɑɑng cyɑ̈ɑ̈ng mwøl? Á men ɑ ɑ́kony wøl-ɑ yije nyi rïngi yi kødh kɑ yuu-ɑ yije kɑ̈lli yi pööd mɑl lɑnye? Á men ɑ nyi wëggi kødh mɑ̈gø kì keny-ɑ bong ji? Á men ɑ nyi cɑw piny-ɑ thwøwø kɑ gø wëgge twïyø ki lum? Kødh geki thöjj dɑ wïyi gen? Á men ɑ bɑ meyi ɑ́piy geki kööjø, ɑ nyi løg pï tuggì, kɑ nɑɑm omelø nyi løge ɑ́piy? Kyell-ɑ nyiimɑ̈nn ócuggø twööj kej ɑ́kyel yi yïn, kɑ Ádɑ̈gg pɑ̈d yi yïn? Kyell ócuggø wëggi nënnø yi yïn kì bøli kɑ̈jji gen, wɑlɑ̀ gyenø geki nywøle ócuggø nyudhi yöö yi yïn? Cigg-ɑ mïdhi mɑl ngɑ̈nyi yi yïn, o ciggɑni ócuggø kɑ̈ɑ̈lø yi yïn, kɑ ge göög kì piny? Pøøl ócuggø köbbø yi yïn, kɑ yï neb gen ki kødh? O keløg ogwel mɑl dwɑddí ör be ogwel, bï-ɑ yïí kɑ okööbø kinni, “Yɑn èn, ör yɑn?” Á men ɑ nyi köbbi ogwørø bøli kej beedhi Kiir, wɑlɑ̀ ɑ nyi köbbi óthwønh kinni kødh ómɑ̈gi? Á men ɑ wïje pel, ɑ cuggi kwɑni pøøl, kɑ gï wiire kun me kunyi gen piny ki kødh, kødh ɑ nyi gwøg tør ɑ́ tuggi dødø? Ngur ócuggø mɑ̈ggø yi yïn ki lɑ̈y men cɑme, kɑ ngur oyɑ̈ngø geki nywøle, kenyi pɑ̈ni gen kì yethi órøggi kïttì wɑlɑ̀ ge buud-ɑ yethi uddi gen? Á men ɑ nyi thödhi ɑ́gɑ̈ggì ki gïncɑm, kenyi wïïn gen ri gen dɑ kɑ̈j, kenyi ywöög nyigi gen köörɑ, ge kwɑjj-ɑ gïncɑm? Bøli keny-ɑ nyi nywøl dyëgi wɑ̈thi kïttì kì pɑ̈l ngɑ̈nyi yi yïn? Tenø ɑ́di nennø yi yïn e onywølø? Dwɑ̈tt-ɑ nyi mɑg yi nywøli gen kì yij ngɑ̈nyi yi yïn? Bøli keny-ɑ nyi nywøl gen ngɑ̈nyi yi yïn? Kenyi buddi gen kì piny kɑ ge onywølø, kɑ rɑ̈ɑ̈m nyöödø óthumø, ngɑ̈nyi yi yïn? Nywøli gen nyii døngø kì yij pɑ̈l, kɑ ge ókedhø, ge pɑ dwöög. Á men ɑ ɑ́gøny odyerø kɑ gø wëgge wïïnø? Yɑn ɑ ɑ́mëggi pɑ̈l gen ɑ́ keny bëëd yi gen, kɑ ge wëggɑ bëëdø kì yij töör omelø. Odyerø lɑ̈wi ki ɑwøøw kɑ̈dd, bong ngɑn cuggi cïrrii gwøg. Wɑ̈thi kïttì bene töör-ɑ yije cyɑ̈ɑ̈m yi gen, kɑ̈jjɑni ɑ yɑ̈ɑ̈b gen ki gïgmɑr møg-ɑ cɑm yi gen. Thwøønh ógïïg pɑ̈l ócuggø yïëyø ki göggi yïn? Ócuggø nïnni lwɑgí? Ócuggø mɑgø yi yïn ki wunø, kɑ wëggí gwøg kì yij pwödhí? Yï ócuggø gɑ̈nni tege, kɑ yï orumø kinni tïjí ógwøge? Yï orumø kinni byellí ócuggø cøng yi en yij rɑrø, wɑlɑ̀ gï ócuggø yëëg pɑc yi en? Obërri wudø nyi ceg-ɑ kwɑdh ge oyödø! De wudø pɑ nyi pɑ̈rri ni ówɑngø. Wudø nywøle nyi wiye’ piny, o ge murri gen yi lëdhi piny. Wïje ɑ́wïl kinni ge ócuggø ywönyø, wɑlɑ̀ ge ótøy yi lɑ̈ɑ̈y pɑ̈l. Nyige nyi wiye’ piny gɑ tøngg, dhɑ̈y gï ce pɑth ki møge, yïe bɑ̈r ki pïn-ɑ ɑ́pïde cøn. Yɑn ɑ ɑ́gwøgii wïje nøg, o nuti thödhi yɑn ki peli wïj. De kenyi renge, nyi yöm-ɑ kyeny geki ngɑn-ɑ köme. Bɑ yïn Ayub, ɑ ɑ́gwøg kyënyì ge teg, kɑ ge göggí ki yɑ̈ɑ̈r muddi gen? Yïn ɑ ɑ́wëggi gen pɑ̈rrø ni bɑ̈nyy, kɑ ji göjjí böggø yi ywøøg gen? Piny nyii nyøngø yi tyelli gen kì yij tör, kɑ ge reng-ɑ yij liny ki tegi gen bëne. Ge kwïj gïn-ɑ cwøl ɑ́ wɑ̈ɑ̈rø, o bong pilø me cuggi wëggi gen døøg cyɑ̈n. Jɑmmi liny møg-ɑ yï tyëng-ɑ kömi gen ceg-ɑ ogwel kì yij cɑ̈ng. Ge pɑ cuggi cung kì kɑ̈jji gen o kɑ̀ koodh kɑng ge ceg-ɑ pödhi yij liny. Ge nyi ceg-ɑ ywøg kenyi koodh kɑng liny nyi ngwɑ̈j yi gen e nudd e lɑ̈wi, o cwɑggi pëjji liny ngɑ̈nyi yi gen. Ólidh nyi dïd-ɑ yïí ki pɑ̈rrø, kenyi meeje obërre o pɑ̈ɑ̈re wɑɑng wurlwɑl? Bɑ yïn ɑ ɑ́köbbi ótïngø kinni gëdde mɑl wɑ̈thi kïttì ki øde? Øde nyi geere’ wɑ̈thi kïtt-ɑ bɑ̈rrø wɑ̈thi kïttɑni bene gen dör-ɑ korrii. Nyi nëënø e ying-ɑ mɑl kunɑni ki gïg-ɑ nyi cɑm yi en. Keny-ɑ di gïnthøø en ɑ nyi cugi yi cor, nywøli cor nyi mɑdh-ɑ rem. Yɑ ɑ́rum ki kwøb, o yɑ pɑ cigi judø. Codhe, ɑcigi Jwøng-ɑ Ácwɑ̈ɑ̈j kwøb ki Ayub kì yij yømø ɑ́kødɑkødø. Dhwöödh cungí kì mɑl ni jɑlø, kɑ pyëjjɑ løøg. Yï dwɑdd-ɑ kwøb kinni yï ɑ́rujɑ, kinni yɑ ɑ́bɑ̈jji, dɑ́ yïn ɑ kømmi dyër? Yïí dɑ tegø me ni tegɑ? Wɑlɑ̀ yïí dɑ cwɑg mø pɑ̈r ki pööd mɑl ni yɑn? Keløg ɑ́ kinøw, nyodh dhwɑ̈ngí geki döngí. ruug rií ki döng geki mɑ̈r. Lidh tyëngɑthwøg, kɑ linyí nyudhí gen, o ge dwöög piny. Lidh tyëng-ɑ ɑ́tïng ri gen bënn kɑ ge dwöög piny, kɑ tyëngrijjø nyøøn kì kɑ̈jji gen. Gööl gen piny bënn, twööj gen pödhi tyëngthøø. Codhe, o yɑ yïëyɑ cyee kinni yïí dɑ tegø men cuggí tyɑ̈mø. Lidh lɑ̈y-ɑ dwøng, Bëmöth yɑn ɑ ɑ́cwɑ̈jii, o yɑn ɑ ɑ́cwɑ̈j yïn. Nyi cɑm-ɑ lum ni dhyɑng, de teeg ki mendwøng, o rɑ̈rre teeg cɑrø! Yëbe bɑ óthyej ni yɑdh sɑndɑl, o rɑ̈rri tyelle teeg. Cue teeg ni yëël dilɑl, o tyelle teeg ni loodh ngyënyø dødø. En ɑ bɑ gïïngɑ̈ngø kì kelli gïg-ɑ ɑ́cwɑ̈j bënn. Bɑ Ngɑn-ɑ ɑ́cwɑ̈jii kete ɑ cuggi tyɑmii. Lum-ɑ nyi cɑm yi en nyi twïy-ɑ kwøømø, keny-ɑ nyi tuug yi lɑ̈yyi pɑ̈l. Nyi buud-ɑ piny kì yij thïm, o nyi pɑ̈n-ɑ kelli obej. Thïm-ɑ tøg nɑm bene tïm-ɑ nyi gëngii, bëëd ɑ kelli wijø. Pɑ nyi böggi yi thew-ɑ teeg kì nɑm, pyëwe pɑ nyi lïngø, cɑgg pïi Nɑm Urdun ceg ì bɑɑw kì órømme. Á men ɑ cuggi göjjii cøørø kɑ gø mɑge? Wɑlɑ̀ ɑ́ men ɑ cuggi ngönii kì órøme ki ɑbɑdh? Lebiyɑthɑn ócuggø mɑgø yi yïn ki ɑbɑdh wɑlɑ̀ lebe ócuggø twöjø yi yïn ki thøl? Órøme ócuggø robø yi yïn ki thøl wɑlɑ̀ ócuggø ngönø yi yïn kì tïge ki ɑbɑdh? Yï ódi kwɑjjø yi en kipe kinni o wiy kedhe? Yï ódi kwɑjjø yi en kipe kinni o pyëwí lɑ̈ɑ̈me ki gøn? Wu ódi lwöbø ki gøn kinni o bëëde ɑ́ bɑ̈ngí gïti ɑtheer? Ódi mɑgø yi yïn ni winyø, wɑlɑ̀ ódi mɑgø yi yïn ki thøl, o tuug yi bɑ̈ngí bɑ̈ng-ɑ dhɑjø? Köme ódi pëmø yi jømɑy, wɑlɑ̀ ódi pɑ̈ngø yi gen kì kelli gen? Ócuggø këllø yi yïn ki bïthì wɑlɑ̀ wïje ódi pyëdø yi yïn ki linyø? Ke pɑ̈nyí ki nywɑlø ki cingí, linye pɑ wïl kì wïjí këti kinni tek! Ngɑn lidh Lebiyɑthɑn ceg-ɑ pɑ̈ɑ̈dhø yi wɑ̈ɑ̈rø. Rɑj kɑ̀ kølii, bong ngɑn cuggi cung kì bøle. Á men ɑ cuggi tøønyii ki liny kɑ obødhø? Bong dhɑnhø kì kömi piny me cuggi tøønyii. Wiy yï köbbɑ bëëdi tyelli Lebiyɑthɑn, o yï nyudhɑ kër-ɑ dwønge kí kër-ɑ tege. Bong ngɑn cuggi yöödi pyëne wɑ̈g kì köme wɑlɑ̀ gïn këëlii pɑ cuggi niyeeng köme. Á men ɑ cuggi ngɑmi dhøge, ji ceg-ɑ böggø yi legge? Dëël köme teeg nɑ kwöd; o gɑ̈ngge ri gen mɑɑg gen, ge teeg ni kïttì. Gɑ̈ngge ri gen mɑɑg gen, o bong yømø me kɑ̈ɑ̈li kelli gen. Ge ódij kej ɑ́kyel o bong gïn pyëëd gen. Jere kɑ̈ɑ̈l-ɑ mɑc me mënyø, o nyinge kwɑrø ni tuuli cɑ̈ng. Dhøge lyel ɑ́ mɑc, opelli mɑc ceg-ɑ pɑ̈rrø ge kɑ̈ɑ̈l-ɑ dhøge. Órømme kɑ̈ɑ̈l-ɑ yi yïrø me ni yïrø me kɑ̈ɑ̈l thɑ dɑg me cwɑɑg ki wél. Yënge kɑ̈ɑ̈l-ɑ mɑc. lebbi mɑc mø døngø ɑ kɑ̈ɑ̈l dhøge. Mune teeg cɑrø, o ngɑn rwööm ki en ceg-ɑ bwøgø. Dële teeg ni ngyënyø dødø, bong keny me nyødh kì ree. Pyëwe bɑ kït, yije bong böögø, yije teeg ni yij kïn-ɑ nyi gur. Kɑ̀ dhwödhe mɑl, cɑgg ɑ́ tyëngteg ge nyi ceg-ɑ bwøgø. Bong pilø me cuggi kïdhi ree ki kedø, o bong tøng, wɑlɑ̀ weth me nieeng ree. Ngyënyø dødø nɑ wél kì yïe, o ngyënyø dilɑl nɑ yɑnh kwɑ̈gø kì yïe. Pɑ cuggi cyeddø ki weth, o tugg-ɑ bɑ̈llii nɑ wél kì yïe. Lodh nɑ wëëlø kì yïe, o nyi ceg-ɑ gɑ̈ɑ̈gø kɑ̀ këllii yi ji ki tøngg. Yije dɑ gɑ̈ngg mø bedh ni ópɑ̈nni pung-ɑ thøø, kɑ̀ ywɑjje yije kì yij lɑ̈bø, dɑ̈re ceg-ɑ döngø e ónënnø. Tyeli nɑm nyi wëgge’ twɑge ni dɑg, kɑ nɑm wëgge bwølø ni dɑɑg møw. Dɑ̈re nyii döngø e ónënnø, kɑ pï nyi løge óböy. Bong gïn pɑ̈ɑ̈r gen kì kömi piny, mɑ́ e ɑ́cwɑ̈j e bong wɑ̈ɑ̈rø kì pyëwe. Lɑ̈yy-ɑ tɑ̈dø bënn wɑ̈thi gen nyi dwööge’ dwöögø, o bɑ rɑ̈ɑ̈dh lɑ̈yyi pɑ̈l. Codhe, ɑløøg mø Jwøng-ɑ Ácwɑ̈ɑ̈j yi Ayub. Ngɑ̈nyi yi yɑn, yïn ɑ Jwøng-ɑ Ácwɑ̈ɑ̈j kinni yï teeg cɑrø o gïn dwɑddí gwøgø nyi ceg-ɑ cuggø ceth. Yï pyëj-ɑ yɑn kinni yɑde ɑ pyënyɑ peli wïjí, e bong gïn ngɑ̈nyɑ. Yɑ kømm-ɑ gïg pɑ cuggi gɑmø yi wïjɑ ge bɑ gïïngɑ̈ngø mø døngø ki mendwøng kiperɑ. Yɑ ɑ́köbbí kinni lïngɑ keny-ɑ ɑ́kööb, kipe kinni o yɑ pɑ̈nyɑ løøgi pyëjjí. Ábëëd ɑ́ kwøbbí ɑ nyi lïngɑ cøn, de ɑnɑn yï ɑ́lidhɑ ki wɑngɑ cyee. Kɑ wïjɑ ólɑ̈ɑ̈yø yi møg-ɑ ɑ́kwøbɑ o yɑ óyewi yɑ buud-ɑ yij búr. Keny-ɑ ɑ́rum Jwøng-ɑ Ácwɑ̈ɑ̈j ki kwøb ki Ayub, ɑköbbe Elipɑdh, jɑl Temɑn kinni, “Pyëwɑ dɑ liny ki wun, wuki mɑ̈dhhí ryeet, mɑ́ møg-ɑ ɑ́kømmi yi wun kì riɑ pɑth ki dyër, ge pɑ ni kwøbbi bɑ̈ngɑ Ayub. Anɑn kɑ̈bbi wun ki wɑ̈dhh ɑ́bïryew, kí órömm ɑ́bïryew, kɑ ge muuj wun bɑ̈ngɑ Ayub gɑ gëdhhì, muuj wun gen gɑ gënh-ɑ nyi rɑ̈b bëne, o Ayub kwɑ̈jje kiper wun, o kwɑ̈jje óyïëy yi yɑn, o lɑɑwɑ dwöögɑ piny kiper wun, o wu cög wu pɑ cɑyɑ kipe orøøg wun. Mɑ́ wu nuti kømm-ɑ dyër kì riɑ ni bɑ̈ngɑ Ayub.” Codhe, ɑkedh Elipɑdh, kí Bildɑd, kí Dhöpɑr. Kɑ møg-ɑ ɑ́kwøb yi Jwøng-ɑ Ácwɑ̈ɑ̈j gwøg gen. Kɑ kwɑ̈jji Ayub yïëy yi Jwøng-ɑ Ácwɑ̈ɑ̈j. Keny-ɑ ɑ́rum Ayub ki kwɑ̈jjø kipe mɑ̈dhhe gɑ ɑ́dɑ̈g, ɑwëggii døøgø ki dönyø yi Jwøng-ɑ Ácwɑ̈ɑ̈j, ɑthödhe gøn ki jɑmmì mø ni jɑmm-ɑ ɑ́ying yïe cøn, ki tyel ɑ́ryew. Codhe, ɑbëën nyiimï Ayub yïe; cwøw kí mɑ̈nn bënn, kí tyëng-ɑ ɑ́ngɑ̈nyii cøn. Kɑ ge ocyɑ̈mø kì gøl Ayub. Kɑ yethi gen óywöngø kipere, kɑ gø cïj gen ki rɑjj-ɑ ɑ́kɑ̈ɑ̈l köme yi Jwøng-ɑ Ácwɑ̈ɑ̈j, kɑ gø thödhi gen bënn ki ngyëny kí gwelli dhɑb. Adøøg Ayub ki gyëdhø yi Jwøng-ɑ Ácwɑ̈ɑ̈j kì cyɑ̈n ki gyëdh mø lod mø tyeli mɑl. Ayïddi Ayub ki dyëg ɑ́lïp pyɑ̈rø wïdɑ́ngwen, kí ɑmɑl ɑ́lïp ɑ́bïkyel, kí dhög ɑ́lïp ɑ́ryew, ki ɑderr ɑ́lïp. Kɑ onywølø ki wɑ̈dd ɑ́bïryew, kí womɑ̈nn ɑ́dɑ̈g. Kɑ nyɑn-ɑ dwøng cɑge ɑ́ Yɑmïmɑ̀, kɑ ryeew gen cɑge ɑ́ Kedhiyɑ̀, kɑ nyɑn-ɑ thinh cɑge ɑ́ Keren Apuk. Bong womɑ̈nn kì yij piny bëne, mɑ ɑ́bëëd ge myër ni nyigi Ayub, kɑ gï wëgge lɑ̈gø ki jɑmme kyeel ki nyiimï gen yɑɑg-ɑ cwøw. Acigi Ayub bëëdø ki runn miyø kí pyɑ̈r ɑ́ngwen, kɑ kwɑrre, kí kwɑrri nyige lidhe. Athøwe cyee e yöø yöø. Ngɑn-ɑ pɑ nyi lïngø ki kwøbbi tyëngrijjø ree dɑ gyëdh, ɑ pɑ nyi bëëdø kì kej ɑ́kyel ki tyëngorøg, ɑ pɑ nyi göögø ki gïg-ɑ gøggi yi tyëngrijjø. Mɑɑr-ɑ pwönyi Jwøng-ɑ Ácwɑ̈ɑ̈j, nyi rum ɑ ree kì dicɑ̈ng kí wɑ̈r. Gïg-ɑ gøgge bënn nyi pɑ̈dh-ɑ kɑ̈jji gen. Teeg ni yɑnh-ɑ ópiidh tøg nɑm, eni yɑnh-ɑ nyi nywøl kì bøli keje ceth. Yïthhe pɑ nyi dyëm kì lew. De tyëngrijjø pɑ bëëdø kinøw. Ge nɑ wél, ɑ nyi køøl yi yømø. Tyëngrijjø ge ócɑy yi Jwøk ge pɑ cuggi rëbø ki jii Jwøk, mɑ́ Jwøng-ɑ Ácwɑ̈ɑ̈j tyëngtir korre’ korrø, de tyëngorøg cyɑ̈dh-ɑ́ɑ̀ yuu thøø. Jurrì gede ɑ dwɑddi gen liny ki Jwøk geki jie? Gede ɑ pïd gen ri gen ki liny me pɑ lwɑ̈ng yi gen? Rɑ̈nhi kömi lɑ̈bø gøgg-ɑ liny, ge nywɑgg-ɑ dhøggi gen, kipe Jwøng-ɑ Ácwɑ̈ɑ̈j geki rɑ̈nh-ɑ ɑ́yienye. Ge kømm-ɑ kinni, “Wɑ ko yïëy ki jɑɑgø yi gen. Wɑ ko yïëy ki jɑɑgø yi Jwøng-ɑ Ácwɑ̈ɑ̈j geki rɑ̈nh-ɑ ɑ́rønye.” Jwøng-ɑ Ácwɑ̈ɑ̈j ɑ́ngedhi kì wïj kwøme kì pɑɑre mɑl. Gï ɑ́gɑgge kipe ɑremmi gen. Codhe, ɑcyɑ̈re gïn ki rɑ̈ji pyëwe kɑ ge obwøgø yi loji bøle, ɑkööbe kinni, “Yɑ ɑ́rum ki røny ki rɑ̈dhɑ, o jyɑ̈ge kì Yerusɑlem, wïj Kïti Kwërɑ.” Rɑ̈dh okööbø kinni, “Wu ótöngɑ møg-ɑ ɑ́kwøb yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j yɑ ɑ́köbbe kinni, ‘Yï bɑ wɑ̈dɑ, yɑ ɑ́göög ki wïyí dicyɑ̈ngtïn. Cwöddí kì yïɑ, yï ómëggɑ pödhh bënn, piny bëne óbëëd ɑ́ mií. Ge ótøg yi yïn ki loodh ngyënyø dødø, ge ótøg yi yïn, kɑ ri gen mød gen ni puggi lɑ̈bø.’ ” Kyën wun yïthhi wun, wun ɑ rɑ̈nhì, pɑrri wun møg, wun ɑ jɑggi kömi piny. Böggu Jwøng-ɑ Ácwɑ̈ɑ̈j, kɑ kwøbbe lïngi wun; kïrri dëlli wun kɑ wɑ̈thi wun kuul wun piny kì bøle kipe pyëwe ójwɑn rënyø kɑ wu jwɑn-ɑ thøø. Tyëng-ɑ nyi yömmi kö Jwøng-ɑ Ácwɑ̈ɑ̈j, ri gen dɑ gyëdh. Jwøng-ɑ Ácwɑ̈ɑ̈j, tyëng-ɑ mɑɑn yɑn ngenyø, ji mø gïïr ri gen ɑ́lugi gen yɑn! Ge kømm-ɑ yɑn kinni, “Koo køny yi Jwøk!” Den-ɑ́ yïn Jwøng-ɑ Ácwɑ̈ɑ̈j, ɑ bɑ kwödɑ, yïn ɑ nyi wëggi yɑn tyɑ̈mø, kɑ yɑ nyi cïj yi yïn. Yɑ kwɑjj-ɑ Jwøng-ɑ Ácwɑ̈ɑ̈j kinni kønye yɑn, kwøbbɑ óløøge e ying-ɑ wïj kïti kwëre. Yɑ óbuddi yɑ pɑ böggi, kɑ yɑ ónenø, yɑ okorrø yi Jwøng-ɑ Ácwɑ̈ɑ̈j kì yij wɑ̈r bëne. Yɑ pɑ böggi yi tyëngmɑ̈ɑ̈nø ɑ́lïp pyɑ̈rø, møg-ɑ ɑ́tyeg yɑn kì wɑ̈thi tùng bënn. Bïí yiel yɑn yïn ɑ Jwøgɑ, Jwøng-ɑ Ácwɑ̈ɑ̈j! Mɑ́ yïn ɑ nyi cɑy tyëngmɑ̈ɑ̈nø, kɑ ge ónyönhø, kɑ leggi tyëngmɑ̈ɑ̈nø nyi tørri yi yïn. Yï ketí ɑ nyi kɑ̈ni ki tyɑ̈mø, yïn ɑ Jwøng-ɑ Ácwɑ̈ɑ̈j, Gyëdhhí ying-ɑ kömi jií. Nyi løøg møgɑ, kɑ kwɑ̈jjɑ lïngí, yïn ɑ Jwøk cwɑ̈gɑ! Yɑ ɑ́køny yi yïn keny-ɑ ɑ́yingɑ yethi rɑj. Anɑn ywöngi yijí kiperɑ, løøg kwɑ̈jjɑ Wun ɑ ji, wu gït-ɑ wɑɑng, wu gwɑdd-ɑ yɑn? Wu gït-ɑ wɑɑng wu mɑɑr-ɑ yɑnggì, o wu lug-ɑ́ɑ̀ bɑng gïg-ɑ pɑth ki dyër? De ngɑ̈nyu wøw kinni, Jwøng-ɑ Ácwɑ̈ɑ̈j tyëngtir ɑ́yienye gïn-ɑ́ møge, o nyii lïngø kenyi cwølɑ en. Kïrri dëlli wun yi wɑ̈ɑ̈rø, kɑ wu ko røngi, nyi rum wun kì ri møgɑni kidøøj, kenyi buddi wun, wu okudø kì yethi pënni wun. Nëngu Jwøng-ɑ Ácwɑ̈ɑ̈j ki gëdhh-ɑ dyër, kɑ gɑ̈nni wun. Ji mø gïïr ókwɑ̈jjø kinni, “Thödhí wøn ki gyëdh mø ngenyø, yïn ɑ Jwøng-ɑ Ácwɑ̈ɑ̈j, wiy døøjí mëënye kì kelli wøn!” De yɑ ɑ́thödhí ki medi pyëw me dwøng, kibøli medi pyëw men-ɑ óyod yi gen, cɑgg yï gen di byel kí møgi oløg. Yɑ nyii buddø, kɑ yɑ ónenø ki mër, mɑ́ yï ketí ɑ kor yɑn, yïn ɑ Jwøng-ɑ Ácwɑ̈ɑ̈j. Lïngí kwøbbɑ, yïn ɑ Jwøng-ɑ Ácwɑ̈ɑ̈j, lïngí gengɑ. Lïngí ywøgɑ kipe kønyø, yïn ɑ Jwøgɑ, kɑ yï løg-ɑ rɑ̈dhɑ! Yɑ kwɑjj-ɑ yïn, yïn ɑ Jwøng-ɑ Ácwɑ̈ɑ̈j, Cwɑggɑ nyii lïngø yi yïn kì mwøl; yï ɑ́kwɑjjɑ kì ri tuuli cɑ̈ng; o yɑ yïd-ɑ löggí. Yï bɑ Jwøng pyëwí pɑ nyi med ki rɑj, rɑj pɑ nyi wëggí gøggø kì butí. Tyëngɑthwøg pɑ nyi cungi kì bølí, tyëngrijjø mɑɑn yi yïn bënn. Tyëngpyed nyii nɑ̈gø yi yïn, o tyëng-ɑ cinggi gen di cu geki wëëny, ge mɑɑn yi yïn. De kì bɑng döngi mɑ̈ɑ̈dø mií, yɑ ócuggø bëën ødí; yɑ ócuggø kwɑ̈jjø kì Kengí, Kengi Kwër, kɑ riɑ bøødhɑ piny yɑ mɑll-ɑ yïn. Jwøng-ɑ Ácwɑ̈ɑ̈j, nyudhí yɑn yuu gwøngdøj mií, kenyi tuum wøn ki tyëngmɑ̈ɑ̈nø, kɑ yuuí nyi yïëbbí yɑn ɑ́ óbödh. Tyëngmɑ̈ɑ̈nø pɑ nyi kømmi dyër, ge dwɑdd-ɑ nɑ̈g kete. Kwøbbi gen omedø, de yethi gen pɑ̈ng yi wëënyø me bɑ nɑ̈ɑ̈g. Cɑy gen, yïn ɑ Jwøk wiy ge mɑg yi ɑ́kɑ̈lli gen. Cyeddí gen kì butí, kipe ngenyi orøøg gen, geki tegi muddi gen. De tyëng-ɑ nyi yömmi yïí bënn, pëthi gen ómïni, ge ówör ki wörri medi pëëth. Kor tyëng-ɑ mɑɑr yi yïn, o tyëng-ɑ mɑɑr yïn pëthi gen mïni gen. Yïn, yï Jwøng-ɑ Ácwɑ̈ɑ̈j ɑ nyi gyëdh tyëngtir, o mɑ̈ɑ̈dø mií bɑ kwöd me kor gen. Jwøng-ɑ Ácwɑ̈ɑ̈j, yɑ ko cɑ̈wwí kɑ yɑ ko cɑɑy ki rɑ̈ji pyëwí! Jwøng-ɑ Ácwɑ̈ɑ̈j, ywöngi yijí kiperɑ, mɑ́ yɑ onyødhø, Thödhí yɑn ki tegø, mɑ́ yɑ ɑ́dhɑ̈ɑ̈r. Yɑ ying-ɑ yij orɑng me dwøng. Yï ko cwööng ki kønyi yɑn, yïn ɑ Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j, bïí yiel yɑn, ki mɑ̈ɑ̈dø mií, yiel yɑn ki thøø. Bong ngɑn nyi pɑr yïn, o bong ngɑn nyi lenhi yïn, kì pödhi tyëngthøø. Yɑ ɑ́dhɑ̈ɑ̈r yi kïïmø, pyënɑ geki thɑ̈nhɑ nyii thïnyø kì wɑ̈r, mɑ́ ge nyi ceg-ɑ nebø yi pïi nyingɑ. Nyingɑ ceg-ɑ dhïïdhø nyingɑ ɑ́kwöd yi ywøg, yi gööj gïg-ɑ göggi yɑn yi tyëngmɑ̈ɑ̈nø. Nyegi wun kì butɑ, wun ɑ tyëngrijjø, mɑ́ ywøgɑ olïngø yi Jwøng-ɑ Ácwɑ̈ɑ̈j. Nyii lïngø kenyi kwɑ̈jjɑ kipe kønyø, o kwɑ̈jjɑ óløøge. Ayɑ̈ɑ̈r tyɑmø ólidh yi tyëngmɑ̈ɑ̈nø, ge ócyeddi ceth, kɑ wɑ̈thi gen omuumø. Yɑ yömm-ɑ yïí Jwøgɑ, Jwøng-ɑ Ácwɑ̈ɑ̈j, yiel yɑn ki tyëng-ɑ cyeddi yɑn bënn, kipe yɑ ókɑ̈l yi gen ni kɑ̈ɑ̈l ngur, kɑ yɑ kïdhi gen kun bong ngɑn yiel yɑn, o yɑ kɑggi gen kì kunɑni. wiy yɑ mɑg yi tyëngmɑ̈ɑ̈nø, keny-ɑ ócyeddi yɑn yi gen, wiy yɑ dhur piny yi gen, o yɑ nɑ̈g yi gen, kɑ wiy yɑ wiy piny yi gen, yɑ thøø! Jwøng-ɑ Ácwɑ̈ɑ̈j, dhwödhí mɑl pyëwí dɑ liny! Kɑ liny tyëngmɑ̈ɑ̈nø dyëël. Dhwöödh kɑ yɑ køny, mɑ́ yï nyi tyer-ɑ gøggi dyër, codhe, kɑ ji bënn cøng butí, kɑ ge jɑɑg yï ying-ɑ mɑl. Yïn ɑ ólidh gøøny dhɑnhø bëne, cwɑg yɑn, yïn ɑ Jwøng-ɑ Ácwɑ̈ɑ̈j, cwɑg yɑn, mɑ́ yï ngɑ̈ny wøw kinni yïɑ bɑ̈r. Yï bɑ Jwøngtir, o rummi ji geki gïg-ɑ pëthi gen, ngɑ̈nyi yi yïn. Cung rɑjj-ɑ gøggi yi tyëngrijjø. Kɑ tyëngdøj thödhí ki köggì. Jwøk ɑ bɑ kwödɑ, en ɑ nyi yiel tyëng-ɑ lïngi cigge. Jwøk bɑ jɑng-ɑ dyër, nyi cɑy-ɑ tyëngrijjø. Keløg ge pɑ yewi, Jwøk pile pɑge’ pɑgø. Wethe tënne’ tënnø e nenn-ɑ göjjø, gïg-ɑ nyi nɑ̈ɑ̈g møge kwɑnye’ kwɑnyø, kɑ nywøli wethe møg-ɑ lyel ni mɑc, cïmme gïn. Lidh tyëngrijjø kɑ̀ rum gen kì ri rɑj, ge rømm-ɑ gøggi rɑj geki wëënyø, kí pyed. De ɑ́kɑ̈ll-ɑ ɑ́ceg gen ji møøgø, nyi yöd ge mɑg-ɑ gen. Cɑ́y nyi pɑ̈dh-ɑ kömi gen kì bɑng gøggi rɑj, kɑ rɑjji gen nyi døøg-ɑ ri gen. Yɑ pwøj-ɑ Jwøng-ɑ Ácwɑ̈ɑ̈j kipe døøje! Jwøng-ɑ Ácwɑ̈ɑ̈j Jwøng-ɑ Pëddi Döng, lenhɑ’ lenhø ki wör. Jwøng-ɑ Ácwɑ̈ɑ̈j, Wïi wøn, yïn ɑ dwøng kì yij piny bëne, dhwɑ̈ngí ɑ́wëggí nënnø kì mɑl. Yï lenh-ɑ yi othønhø, geki møg-ɑ dhødh. Yï pɑ böggi yi tyëngmɑ̈ɑ̈nø, tyëngmɑ̈ɑ̈nø nyii dyëlø yi yïn. Kenyi lidhɑ mɑl men-ɑ ɑ́cwɑ̈j yi yïn, kí dwɑ̈y geki kyell-ɑ ɑ́cïb yi yïn kɑ̈jji gen, dhɑnhø ɑ́ gïn me rum kipere, me bëëde pere teeg kì yïí? Ácwɑ̈j yi yïn e ying-ɑ cyɑ̈n nyɑ me thiinh kibøli, kɑ thödhí ki dhwɑ̈ng, o pere teeg kì yïí. Ácïb yi yïn ɑ́ jɑgø, kì kömi gïg-ɑ nëënø, geki gïg-ɑ ɑ́cwɑ̈j yi yïn bënn, gen ɑ dyëg geki dhög, kí lɑ̈yyi pɑ̈l thyew, kí winyyi mɑl geki rijji nɑm, kí gïg-ɑ nëënø bënn kì yethi nɑ̈mmi omelø. Yïn ɑ Wïi wøn, Jwøng-ɑ Ácwɑ̈ɑ̈j, bɑ yïn ɑ dwøng kì yij piny bëne! Jwøng-ɑ Ácwɑ̈ɑ̈j, yï ólenhɑ ki pyëwɑ bëne, gïg-ɑ pëddi døøjø møg-ɑ ɑ́gwøg yi yïn, per gen ókømmɑ. Yï ólenhɑ ki wör ki medi pyëwɑ, Yï ólenhɑ ki wör, yïn ɑ Jwøk Áyïmø. Tyëngmɑ̈ɑ̈nø nyi døøg-ɑ cyɑ̈n, kenyi lidh gen yïn, ge nyii pɑ̈ɑ̈dhø kɑ ge othøø. Yɑ ɑ́cwɑg yi yïn, kɑ gønyɑ cïb keje, mɑ́ yï nyi gøgg-ɑ dyër ceth. Pödhh-ɑ kyeelø ɑ́cɑy yi yïn, kɑ tyëngrijjø nɑ̈g yi yïn, ge pɑ cigi pɑrø. Tyëngmɑ̈ɑ̈nø ɑ́nɑ̈g yi yïn kinni tweet, kɑ̈ddi gen ɑ́rënyí, nyingi gen ɑ́wïl. Den-ɑ́ Jwøng-ɑ Ácwɑ̈ɑ̈j ɑ jyɑ̈gø gïti ɑtheer, kwøme ɑ́cïbe kipe lidhi gønyy. Piny jɑɑg yi en kɑ gøggi dyër, o gønyy nyi cïbe’ kɑ̈jji gen. Jwøng-ɑ Ácwɑ̈ɑ̈j, en ɑ yïe nyi yömmi yi tyëng-ɑ ruj. En ɑ yïe nyi yömmi kenyi di rɑj. Tyëng-ɑ ngɑ̈nyi yïn, ógɑ̈nn-ɑ yïn, yïn ɑ Jwøng-ɑ Ácwɑ̈ɑ̈j, mɑ́ ngɑn-ɑ nyi bï yïí, wïje pɑ nyi lɑ̈ɑ̈y yi yïn. Lenhu Jwøng-ɑ Ácwɑ̈ɑ̈j, ɑ jyɑ̈gø kì Dhɑyøn, lenhu en ki wör! Köbbu gïg-ɑ ɑ́gwøge pödhh bënn. Tyëng-ɑ rɑngø nyii pɑrrø yi Jwøk, ywøøg gen pɑ nyi wïl kì yïe, o tyëng-ɑ göggi gen ki rɑj nyi cɑye’ cɑyø. Jwøng-ɑ Ácwɑ̈ɑ̈j, lɑ̈ɑ̈m pyëwí ki yɑn! Lidh orɑng-ɑ rɑngɑ kì cinggi tyëngmɑ̈ɑ̈nø! Jwøng-ɑ Ácwɑ̈ɑ̈j, yiel yɑn ki thøø, o yɑ ócungɑ kì bølí tyëng Yerusɑlem, yɑ köbb-ɑ gen gïg-ɑ ɑ́gwøg yi yïn bënn, ɑ pere lenhɑ yïn. Pyëwɑ med kipe kɑ ɑ́yieel yɑn. Pödhh-ɑ kyeelø, ɑ́pɑ̈dhi yethi burr-ɑ ɑ́kony yi gen, ge ɑ́mɑg yi ɑ́kɑ̈ll-ɑ ɑ́ceg yi gen. Jwøng-ɑ Ácwɑ̈ɑ̈j ree ɑ́nyodhe kì ri nenni gønyy kidøøj, kɑ tyëngrijjø wëgge mɑgø yi ɑ́kɑ̈lli gen. Tyëngrijjø óthumi ki thøø, tyëng-ɑ bɑny Jwøk óthøw ceth. Jwøk wïje pɑ nyi wïl ki tyëng-ɑ jɑdø, gï pɑ nyi wiye piny, mɑ́ ge ngɑ̈dh-ɑ en. Jwøng-ɑ Ácwɑ̈ɑ̈j, bïí yïëëd! Pödhh-ɑ kyeelø ko wëggí tyɑ̈mø, kɑ̈ɑ̈l gen bølí, kɑ gønyyi gen liidh. Jwøng-ɑ Ácwɑ̈ɑ̈j, kölli gen böögø, wiy yod yi gen kinni, ge bɑ ji yøw. Yïde ɑ bëëd yï lɑ̈wi Jwøng-ɑ Ácwɑ̈ɑ̈j? Yïde ɑ pɑ̈ní, wø ceg-ɑ orɑng? Tyëngrijjø ɑ́tɑ̈d yi kɑ̈r, ge guud-ɑ nyingi ɑbuur. Mɑg gen ki ɑ́kɑ̈lli gen, yïn ɑ Jwøng-ɑ Ácwɑ̈ɑ̈j. Ngɑnrɑj pwöd-ɑ kööre, kipe gïgrijjø møg-ɑ gøgge. Jɑl-ɑ pyëwe dwøng, bwöl-ɑ nyingi Jwøk. Jɑl-ɑ rɑj, Jwøng-ɑ Ácwɑ̈ɑ̈j pɑ gɑ̈nne. Pwöd-ɑ kööre, e rømm-ɑ kinni, Jwøk bong pere. Gïg-ɑ gøggi yi tyëngrijjø, nyi pɑ̈dh-ɑ kɑ̈jji gen ceth. De cɑ́yi Jwøk pɑ cuggi gɑmø yi wɑ̈thi gen. Ge törr-ɑ wɑ̈thi gen ki tyëng-ɑ mɑ̈n ki gen. Tyëngrijjø nyii kööbø, ce bong gïn dhɑl gen, o bong gïn kɑl gen ki nywɑlø. Kwøbbi gen bënn bɑ lɑm, kí pyed kí cyɑ̈r, ge pɑ nyi cwöng ki kwøb ki kwøb mø rijjø. Ge pɑ̈n-ɑ́ɑ̀ kelli myërr, ge lebb-ɑ tyëng-ɑ yï gen bɑ̈r. Ge nenn-ɑ bɑng tyëng-ɑ kwïj nyɑgi ri gen. Ge buud-ɑ keny-ɑ lïïb gen ni ngur, ge lebb-ɑ tyëng-ɑ nyingi gen cɑn, ngɑn yïe bɑ̈r nyii mɑgø yi gen kɑ gø ywɑj gen ki bøøy gen. Ngɑn kwïj nyɑgi ree buud ree mød en, ɑ́tyɑm yi tegi liny ngɑnrɑj. Ngɑnrɑj okööbø kinni, ‘Jwøk bong gïn gwøge, Jwøk nyinge ɑ́kume, bong gïn nenne.’ Jwøng-ɑ Ácwɑ̈ɑ̈j, cɑy jøgrijjø møgɑni. De kor tyëng-ɑ nyingi gen guud. Ede Jwøk ɑ bwölii yi ngɑnrɑj! Kɑ tir-ɑ kwøb cem e pɑ cɑy yi Jwøk! De yïn ɑ Jwøk, yï onëënø ki orɑɑng ji, o yï ókunyi ceth. Ngɑn wɑnge cɑn ree leenge’ köörí, kïjj nyi køny-ɑ yi yïn ceth. Tørrí bɑ̈ddi tyëngorøg geki tyëngrijjø; cɑy gen kipe orøng-ɑ ɑ́gwøg yi gen o ge cög ge pɑ cigi orøg. Jwøng-ɑ Ácwɑ̈ɑ̈j bɑ rɑ̈dh gïti ɑtheer, Tyëng-ɑ mɑlli jwögg-ɑ kyeelø ge ólɑ̈ɑ̈ny kì yij pinye. Yï ólïngø yïn ɑ Jwøng-ɑ Ácwɑ̈ɑ̈j, ki kwɑ̈jji tyëng-ɑ mööl, yï ólïngø kɑ pëthi gen wëggí tëngø. Tyëng-ɑ nyingi gen guud geki kïjj, kwɑ̈jji gen ólïngi yi yïn, ge ócwɑg yi yïn, bong ngɑn-ɑ óböggi këti. Yɑ nyi yömm-ɑ yï Jwøng-ɑ Ácwɑ̈ɑ̈j, wɑ̈thi wun nøg kɑ̀ köbbu yɑn kinni, “Rengí wïj kït ni winyø, mɑ́ tyëngrijjø wethhi gen, ɑ́rum ki tënnø yi gen, gɑ møg gøøj tyëngdøj, ge göj-ɑ́ɑ̀ yij muudhø. Keløg e bong cigg, møg kömi gen bëëd, ɑ́ ngø ɑ cuggi gwøgø yi tyëngtir.” Jwøng-ɑ Ácwɑ̈ɑ̈j ying-ɑ Kengi Kwëre, kwøme ying-ɑ mɑl. Ji nenne’ nennø kì kɑ̈jj bënn, o gïg-ɑ gøggi yi gen ngɑ̈nye. Jwøng-ɑ Ácwɑ̈ɑ̈j ɑ nyi lidh gønyyi tyëngtir, geki gønyyi tyëngrijjø. Tyëng-ɑ mɑɑr ruj, mɑɑn yi en. Kömi tyëngrijjø óödi yi Jwøng-ɑ Ácwɑ̈ɑ̈j ki mɑc me lyel, kɑ kömi gïn göjje ki yømø me lëëdh. Jwøng-ɑ Ácwɑ̈ɑ̈j tir, o nyi mɑɑr-ɑ gwøngdøj. Tyëngdøj óbëëdø kì keny-ɑ di Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j, køny wøn, mɑ́ tyëng-ɑ böggi Jwøk bong gïn mø nud këti. Tyëng-ɑ nyi kømmi dyër bong gïn kì kelli ji. Ji kømm-ɑ pyed bënn, ge wëny-ɑ ri gen ki medi dhøg, Jwøng-ɑ Ácwɑ̈ɑ̈j, ngøl lebbi tyëngpyed møgɑni, ngøl lebbi tyëngɑthwøg, møg-ɑ nyi kööbø kinni, “Gïg-ɑ dwɑddi yi wøn, ócuggø yodø yi wøn ki kwøbbi dhøggi wøn, wø ócuggø kwøb ki kwøbb-ɑ dwɑddi yi wøn, o bong ngɑn kyëddi wøn.” Jwøng-ɑ Ácwɑ̈ɑ̈j okööbø kinni, “De yɑ obëënø ɑnɑn, mɑ́ tyëng-ɑ nyingi gen cɑn ceg kɑ rujø, o tyëng-ɑ nyingi gen guud ceg-ɑ orɑng, tyëngɑni bënn óyiel yi yɑn kì yij orɑɑng gen.” Kwøbb-ɑ nyi kwøb yi Jwøk bɑ dyër, ge dhïw nɑ ɑ́tegø men-ɑ ólenyø, kì yij purun me lëëdh cɑrø. Yï pïd-ɑ wɑɑng yɑ wïlø kì yïí, yïn ɑ Jwøng-ɑ Ácwɑ̈ɑ̈j? Yï gït-ɑ ɑtheer? Yï pïd-ɑ wɑɑng yï ópɑ̈nnø kiperɑ? Yɑ tyëg-ɑ runn yɑ órïngø cøn? Yɑ tyëg-ɑ piny yɑ okïïmø, minɑ cödø? Tyëngmɑ̈ɑ̈nø cög ge cyedd-ɑ yɑn? Yɑ kwɑjj-ɑ yïn Wuö, lug thɑ̈wwí kɑ yɑ køny, ke wiy yɑ piny yɑ othøø, cor bï-ɑ kömɑ. Yɑ ko wëggí ngedhø yi tyëngmɑ̈ɑ̈nø, kinni yɑ tyɑɑm gen. Yɑ ko wëggí pɑ̈ɑ̈dhø, o yɑ gɑggi gen. Yɑ nyi gɑ̈n-ɑ yïn, yïn ɑ wɑ̈ɑ, yɑ ókøny yi yïn, mɑ́ lɑ̈mpyëwí pɑ nyi thumi. Yɑ ówör kì bølí yïn ɑ Wɑ̈ɑ, yɑ wör pyëwɑ med, mɑ́ yɑ ɑ́køny yi yïn. Dhëgg nyi köbb-ɑ ri gen kinni, “Bong Jwøk!” Ge rijjø bënn, ge gøgg-ɑ gïgrijjø cɑrø, bong ngɑn me gøggi dyër. Jwøng-ɑ Ácwɑ̈ɑ̈j ying-ɑ mɑl, e nenn-ɑ kömi ji kì piny, o lïdhe mɑ́ di ji mø wɑ̈thi gen pel, møg nyi mɑllii. De ge ɑ́bɑ̈jji bënn, ge rijjø bënn, bong dhɑnhø ɑ́kyel kì kelli gen, me gøggi dyër, bong dhɑnhø ɑ́kyel kinni tek. Jwøng-ɑ Ácwɑ̈ɑ̈j ɑ́pëjji kinni, “Ge kwïj wøw; tyëng-ɑ orøg møgɑni wɑ̈thi gen nøg? Ge cɑm-ɑ jɑmm-ɑ kɑbbi yi gen kì yï jiɑ, yɑ pɑ nyi mɑlli yi gen.” De ge ókölli böögø, mɑ́ Jwøk ying-ɑ kelli tyëng-ɑ lïngi kwøbbe. Tyëngrijjø nyi tyer-ɑ bɑ̈nni wɑ̈thi tyëng-ɑ bɑ mööl, de mööl nyii korø yi Jwøng-ɑ Ácwɑ̈ɑ̈j. Yɑ ókwɑ̈jjø kipe tyɑ̈mi Isrɑil kinni bï tyɑ̈mɑni e kɑ̈ɑ̈l-ɑ Dhɑyøn. Jii Jwøng-ɑ Ácwɑ̈ɑ̈j óbëëdø pëthi gen med cɑrø, keny-ɑ ówëggi gen døøgø ki dönyø yi Jwøng-ɑ Ácwɑ̈ɑ̈j! Wuö, ɑ́ men ɑ óbëëdø kì yij Kengí? Á men ɑ ómɑlli yïn, kì Dhɑyøn Kïti Kwërí? Bɑ tyëng-ɑ nyi mïdhi Ciggi Jwøk kidøøj, ɑ nyi gøggi gïg-ɑ bɑ dyër, ɑ nyi kømmi kwøbb-ɑ dyër ceth. ɑ pɑ nyi myen ji møøgø, ɑ pɑ nyi göggi wɑɑd gen ki rɑj, ɑ pɑ nyi tïngi kömi wɑɑd gen ki kwøb møg rijjø. Ge nyi bɑny-ɑ tyëng-ɑ bɑny yi Jwøk, dɑ́ tyëng-ɑ böggi Jwøng-ɑ Ácwɑ̈ɑ̈j ɑ nyi wør yi gen. Gïn-ɑ kwøb yi gen, nyii gwøgø yi gen ceth, cɑgg e teeg kiper gen ni ngø. Ge pɑ nyi kɑ̈bbi ki ngyëny mø ngenyø kibøli ngyënyy-ɑ wïdhi gen ji, o ge pɑ nyi yïëy kwɑjjø ki ngyëny, kipe gøønyi ngɑn yïe bɑ̈r yøw. Ngɑn nyi gwøg gïgɑni, koo pɑ̈nyi onhɑ̈nh gïti ɑtheer. Korrí yɑn, yïn ɑ Jwøk, mɑ́ yïí ɑ nyi yömmɑ. Jwøng-ɑ Ácwɑ̈ɑ̈j ɑ́köbbɑ kinni, “Yïn ɑ bɑ Wɑ̈ɑ, gïgdøj møg-ɑ yïɑ bënn, kɑ̈ɑ̈l-ɑ yïí.” Tyëng kwër mø Jwøng-ɑ Ácwɑ̈ɑ̈j døj nɑ ngø! Pyëwɑ med cɑrø ki bëëdø kì kelli gen. Tyëng-ɑ nyi kedhi bɑng jwögg-ɑ pɑth, ge nyi kɑ̈ɑ̈l-ɑ ɑkørr mø ngenyø kömi gen. De men-ɑ́ yɑn, jwöggɑni pɑ nëngɑ ki gëdhhì, o nyingi gen pɑ tïngɑ dhøgɑ. Bɑ yï ketí Wuö, ɑ bɑ Jwøgɑ, o bɑ yïn ɑ nyi mëggi yɑn jɑmm-ɑ dwɑddɑ bënn. gïg-ɑ óyod yi yɑn dhuki megø ying-ɑ cingí. Gïg-ɑ nyi mëggí yɑn myëër cɑrø, ge pëddi døøjø! Yɑ lenh-ɑ Jwøng-ɑ Ácwɑ̈ɑ̈j, mɑ́ en ɑ kwɑy yɑn o kì wɑ̈r yɑ nyi nyudh-ɑ yi pyëwɑ, ki yuu-ɑ kɑ̈ɑ̈lɑ. Jwøng-ɑ Ácwɑ̈ɑ̈j ɑ nyi mïdhɑ kì bølɑ ceth, bong gïn rungi yɑn, mɑ́ e ying-ɑ butɑ. Bene ɑ mïni pyëwɑ, ki mendwøng, o bong gïn böggɑ kinni tek, mɑ́ yïn ɑ kor yɑn ki thøø. Yï ɑ́göggɑ yijɑ bong ɑ́dud, o yɑ koo wiy yi yïn pödhi tyëngthøø. Yɑ ónyudhi yi yïn ki yuu nënnì. Pyëwɑ nyii kwöjø yi bëëdí yï cyɑ̈gi, o pyëwɑ nyii mïnø cɑrø yi nudí. Jwøng-ɑ Ácwɑ̈ɑ̈j, lïngí kwɑ̈jjɑ, yɑ kwɑ̈jji kɑ per gøggi dyër. Lïngí ywøgɑ, yɑ ywøg-ɑ kønyø! Lïngí kwɑ̈jjɑ, yɑ kwɑ̈jji yijɑ bong wëënyø. Yɑ ócwɑg yi yïn ceth, mɑ́ gïn-ɑ bɑ dyër ngɑ̈nyi yi yïn. Ke yɑɑb yij pyëwɑ ke bëën yïɑ kì wɑ̈r, ke rɑɑng yɑn, bong rɑj møg yod yi yïn kì yïɑ. Yɑ pɑ nyi kööbø ki gïgrijjø, ni ji møøgø. Yɑ mïdh-ɑ ciggí ceth, o yɑ nuti cyɑ̈dhø kì yëthi ruj. Yɑ nyi cyɑ̈dh-ɑ́ɑ̀ yuuí ceth, o yɑ nuti pɑ̈nyi töngi wɑ̈g kì yije. Yïn ɑ kwɑjjɑ, yïn ɑ Jwøk, mɑ́ møgɑ nyii løøgø yi yïn, lug thɑ̈wwí, kɑ kwøbbɑ lïngí. Nyodh mɑ̈ɑ̈dø mií, mɑ̈ɑ̈n-ɑ dwøng, kɑ yɑ yieel, yï ngɑn-ɑ nyi yiel tyëng-ɑ nyi yömmi yïí, kì cinggi tyëng-ɑ cyeddi gen. Kor yɑn ni ke di koor wɑngí, kɑɑn yɑn thɑ̈thi obërrí, kipe tyëngrijjø møg-ɑ nyi pɑ̈ɑ̈r kömɑ, Yɑ ótyegø yi tyëngmɑ̈ɑ̈nø; pëthi gen pɑ nyi lɑ̈ɑ̈m, o ge 'kööb-ɑ tɑ̈dø. Yɑ ɑ́tyeg yi gen kì wɑ̈thi tùng bënn, o ge dwɑdd-ɑ dhuri yɑn piny ceth. Ge nɑ ngurrì, o ge lebb-ɑ yɑn, ge dwɑdd-ɑ kɑggi yɑn. Dhwöödh, Jwøng-ɑ Ácwɑ̈ɑ̈j, cyëëg yuu tyëngmɑ̈ɑ̈nø, kɑ ge tyɑɑm! Yiel yɑn ki tegí kì cinggi gen, Yiel yɑn kì cinggi tyëng-ɑ yï gen di gïg-ɑ dwɑddi yi gen bënn, kì kömi piny men. Cɑy gen ki cɑ́y-ɑ ɑ́cïb yi yïn kiper gen; cɑy gen geki nyigi gen bënn nɑ̈g gen kì kömi piny, wiy nyingi gen lɑ̈ɑ̈ny gen kì kelli ji! De yɑ ówɑ̈nhi bølí ceth, mɑ́ e bong gïnrɑj mɑ ɑ́gwøgɑ, o keny-ɑ ócyëëwɑ pyëwɑ ómïni, kipe bëëdí yï cyɑ̈gi kì butɑ. Yï mɑɑr yi yɑn ki mendwøng, yïn ɑ Jwøng-ɑ Ácwɑ̈ɑ̈j! Yïn ɑ nyi nyïɑ̈ggi kiperɑ. Jwøng-ɑ Ácwɑ̈ɑ̈j ɑ nyi kor yɑn, en ɑ bɑ kwödɑ. Jwøgɑ ɑ korri yɑn, o bong gïn böggɑ kɑ̀ nude kì butɑ. En ɑ korri yɑn, o bɑ kwödɑ, perɑ nyi nyɑg-ɑ yi en, o bong gïn böggɑ. Yɑ nyi cwøl-ɑ nyingi Jwøng-ɑ Ácwɑ̈ɑ̈j, kɑ yɑ nyi yiele ki tyëngmɑ̈ɑ̈nø. Lenhu Jwøng-ɑ Ácwɑ̈ɑ̈j! Yɑ ɑ́mɑg yi ɑ́kɑ̈lli thøø, yɑ omudø yi ɑpɑgø. Yɑ ɑ́twij yi thølli thøø, rörø yɑ mwønye’ mwønyø. Jwøng-ɑ Ácwɑ̈ɑ̈j ɑ́cwølɑ keny-ɑ ɑ́rɑngɑ, Jwøgɑ ɑ́cwølɑ o yɑ kønye. Alïnge cwɑggɑ kì yij Kenge, ywøgɑ kipe kønyø, ɑ́lïng yi en. Akïïr piny kɑ onhɑ̈nhø, kɑ tyelli kïttì okïïrø thyew, mɑ́ Jwøk pyëwe ɑ́ceg-ɑ rënyø. Órømme ceg-ɑ dungø ki yïrø, o dhøge ceg-ɑ lyelø ki mɑc. Mɑl ɑ́pyëde kɑ bï-ɑ piny, ki pøølø me looj kì thɑ́ tyelle. Kɑ̈ll-ɑ yi kerobb mø yöd, e pɑ̈r-ɑ́ɑ̀ yij yømø. Ree kum en ki pøølø me looj, ówenø yi pøølø me bɑ pï. Atuni ɑ́piy ɑ́köni dhøge dɑ mɑc e kɑ̈ɑ̈l-ɑ ri mɑny-ɑ lyel kì bøle kɑ pøll-ɑ lojø pyëde. Jwøng-ɑ Ácwɑ̈ɑ̈j ɑ́kööb kì mɑl e cwɑgge nɑ pööd mɑl, cwɑggi Ngɑn-ɑ Pëddi Döng ɑ́lïngi, Wethe ɑ́gøøje kelli tyëngmɑ̈ɑ̈nø, kɑ gï kedhhe, ge ɑ́cyeddi yi ogwel nywøli wethe. Tyeli nɑɑm omeli dwøng ɑ́döng nøw, kɑ tyelli piny yɑl, keny-ɑ ɑ́cyɑ̈ɑ̈r tyëngmɑ̈ɑ̈nø, yïn ɑ Jwøng-ɑ Ácwɑ̈ɑ̈j, kɑ yï ngɑ̈ɑ̈r-ɑ kömi gen. Jwøng-ɑ Ácwɑ̈ɑ̈j ɑ́wɑ̈nhi piny e kɑ̈ɑ̈l-ɑ mɑl, kɑ yɑ gwɑ̈ɑ̈re wɑ̈g kì nɑm me pɑ̈ng. Yɑ ɑ́yiele ki tyëngmɑ̈ɑ̈nø møg-ɑ teg, geki tyëng-ɑ mɑɑn yɑn, ngö ge ɑ́bëëd ge teeg kibølɑ. Ge ɑ́pɑ̈ɑ̈r kömɑ yɑ ying-ɑ yethi rɑj, de yɑ ɑ́kor yi Jwøng-ɑ Ácwɑ̈ɑ̈j. Yɑ ɑ́yïëële wɑ̈g kì yethi rɑj, yɑ ɑ́yiele, mɑ́ pyëwe med ki yɑn. Yɑ nyi køøg yi Jwøng-ɑ Ácwɑ̈ɑ̈j kɑ per bëëdɑ yɑ tir, yɑ nyi gyëdh yi en kɑ per bëëdɑ yïɑ bɑ̈r. Ciggi Jwøng-ɑ Ácwɑ̈ɑ̈j ɑ́mïdhɑ ceth, o ngɑ̈jɑ nuti lugi yɑn Jwøgɑ. Cigge bënn mïdhɑ’ mïdhø, o ge nuti pyeem yɑn. Ngɑ̈nyi yi en kinni yɑ nuti bɑ̈jjø, o riɑ korrɑ’ korrø ki orøg. Bene ɑ pere nyi køøg yɑn yi Jwøng-ɑ Ácwɑ̈ɑ̈j, kì bɑng bëëdɑ yɑ tir, geki bëëdɑ yïɑ bɑ̈r. Yïn ɑ Jwøng-ɑ Ácwɑ̈ɑ̈j, yijí nyii ywöngø kiper tyëng-ɑ gɑ̈nni yïn, tyëngdøj nyi göggí gïgdøj. Tyëng-ɑ pëthi gen tɑr nyi göggí gïgdøj, de tyëngɑdud nyi mëggí cɑ́y. Tyëng-ɑ bɑ mööl nyii yielø yi yïn, de tyëngɑthwøg nyi dwöögí piny. Yïn ɑ Jwøng-ɑ Ácwɑ̈ɑ̈j, yɑ ɑ́thödhi yi yïn ki cɑr, kɑ muudhø cyeddi yi yïn kì riɑ. Yɑ ɑ́thödhi yi yïn ki tegø, men pɑ̈ɑ̈rɑ kömi tyëngmɑ̈ɑ̈nø, kí tegø men cøørɑ dörri gen piny. Gïg-ɑ gøggi yi Jwøøng, pëddi døøjø! Møg-ɑ kwøbe nyi bï gɑ dyër ceth! Bɑ kwöd, kì yï tyëng-ɑ nyi yömmi yïe. Jwøng-ɑ Ácwɑ̈ɑ̈j kete ɑ bɑ Jwøk. Jwøk kete ɑ bɑ kwödee. Bene Jwøng-ɑ nyi thödhi yɑn ki tegø, kɑ rɑj nyi nyiige kì yij yuuɑ. Yɑ nyi wëgge’ ngwej ni tenø, kɑ yɑ nyi korre kì wɑ̈thi kïttì. Yɑ ɑ́pwönye ki liny, o wenh-ɑ teg cugge tënnø yi yɑn. Yïn ɑ Jwøng-ɑ Ácwɑ̈ɑ̈j, bɑ yïn ɑ ɑ́korri yɑn, kɑ yɑ yiel yi yïn, perɑ ɑ́tëngi kì bɑng kɑ ɑ́køny yɑn, kɑ yɑ yiel yi yïn ki tegí. Yuuɑ ɑ́gwej yi yïn, o tyellɑ cög ge pɑ cwɑnyyɑ. Tyëngmɑ̈ɑ̈nø ɑ́cyeddɑ kɑ ge pïïdɑ, yɑ nuti dwöögø pïd kɑ ɑ́nɑ̈gɑ gen. Ge ɑ́gøøjɑ piny, kɑ ge ódhɑ̈lø dhwödhø, ge ɑ́nyønɑ ki tyellɑ. Bɑ yïn ɑ nyi thödhi yɑn ki teng-ɑ nyïɑ̈ggɑ, kɑ yɑ wëggí tyɑmi tyëngmɑ̈ɑ̈nø. Yɑ ɑ́wëggí cyeddi tyëngmɑ̈ɑ̈nø, kɑ tyëng-ɑ mɑɑn yɑn nɑ̈gɑ. Ge nyii ywöngø kipe kønyø, de bong ngɑn yiel gen, ge nyi ywøøg-ɑ kö Jwøng-ɑ Ácwɑ̈ɑ̈j, de pɑ nyi löggi. Ge ɑ́nyøngɑ, ge ɑ́göög ge nɑ tør ɑ nyi køøl yi yømø. Ge ɑ́nyønɑ ni lɑ̈bø kì yethi yëëth. Yɑ ɑ́yieel ki liny tyëng-ɑ muddi gen teeg, kɑ yɑ gwøg yi yïn yɑn ɑ́ jɑngi jiɑni, yɑ ɑ́døøg be jɑɑgi ji mɑ ɑ́bëëd ge kwïjɑ. Tyëngpɑth ri gen ɑ́bøødh gen piny kì bølɑ, kwøbbɑ ceg kɑ lïngø yi gen ceth. Pëthi gen ɑ́nyönhi, ge ɑ́bï wɑ̈g kì kɑ̈jj-ɑ ɑ́pɑ̈nni gen, e dëlli gen ceg-ɑ kïïrø. Jwøng-ɑ Ácwɑ̈ɑ̈j onëënø! Lenhi ngɑn-ɑ korri yɑn! Lenhi döngi Jwøng-ɑ nyi yïëdø. En ɑ nyi wëggi yɑn tyɑmi tyëngmɑ̈ɑ̈nø, kɑ pödhh nyi cïbe thɑ́ tyellɑ, en ɑ nyi yiel yɑn ki tyëngmɑ̈ɑ̈nø. Yïn ɑ Jwøng-ɑ Ácwɑ̈ɑ̈j, bɑ yïn ɑ nyi wëggi yɑn tyɑmi tyëngmɑ̈ɑ̈nø, kɑ yɑ kor yi yïn ki tyëng-ɑ bɑ ɑ́muddi ji. Bene ɑ lejjɑ yïn kì kelli pödhh, ɑ wörɑ yɑ lenh-ɑ nyingí. Jwøk ɑ nyi wëggi rɑ̈dhe tyɑ̈mø, en ɑ nyi nyudhi mɑ̈ɑ̈dø mee ngɑn-ɑ ɑ́yienye, ɑ løg Debïd geki kwɑrre gïti ɑtheer. Mɑl nyodh-ɑ dhwɑ̈ɑ̈ng Jwøk, gïgdøngø møg-ɑ ɑ́gwøge ónënnø kì mɑl. Cyɑ̈ɑ̈ng, kí cyɑ̈ɑ̈ng dɑ kwøbbe, o wɑ̈ɑ̈r, kí wɑ̈ɑ̈r dɑ gïg nyodhe. Mɑl geki piny pɑ kööbø, o bong cwɑggi gen mø lïngi, de cɑgg ɑ́ kinøw, wöödø men-ɑ kɑ̈lli yi gen, ɑ́wɑ̈dhi yij piny bëne. kɑ lïngi kì cögi piny. Jwøk cɑ̈ng ɑ́gögge ki øde kì mɑl, cɑ̈ng nyi bï wɑ̈g kì mwøl, e nɑ nyɑdhey nywöm, o nɑ jɑlngwej me kedhi be rɑɑdø. Cɑ̈g-ɑ́ɑ̀ cögi mɑl, o kedhe e cør-ɑ yij mɑl, gïti tung-ɑ kyeelø. Bong gïn pɑ̈ni kɑ ocögø e pɑ pïïd yi lëdhe. Ciggi Jwøng-ɑ Ácwɑ̈ɑ̈j bɑ óbödh, ge nyi thödh-ɑ dhɑnhø ki bëëdø me nyɑ̈n. Ciggi Jwøng-ɑ Ácwɑ̈ɑ̈j ócuggø gɑ̈nnø yi dhɑnhø ceth, ge nyi wëgg-ɑ wïj dhɑnhø pïlø. Ciggi Jwøng-ɑ Ácwɑ̈ɑ̈j bɑ dyër, tyëng-ɑ nyi mïdhi gen pëthi gen med. Ciggi Jwøng-ɑ Ácwɑ̈ɑ̈j dhïw, ge nyi wëgg-ɑ dhɑnhø dïdø. Böggi Jwøng-ɑ Ácwɑ̈ɑ̈j døj, nyii bëëdø gïti ɑtheer. Ciggi Jwøng-ɑ Ácwɑ̈ɑ̈j bɑ óbödh, o ge bɑ dyër bënn. Gen ɑ tyer kibøli dhɑm-ɑ dhïw cɑrø, ge med kibøli møøw kïc me dhïw. Yɑ bɑ̈ngí, yɑ nyii thödhø yi gen ki dïdø, kɑ yɑ nyii yïddø ki köögi, kipe kɑ̀ mïdhɑ gen. Dɑ́ men ɑ ngɑ̈nyi bɑ̈jje? Yiel yɑn Wuö ki orøng-ɑ pɑ nënni. Yiel yɑn ki orøng-ɑ nyi tøøny ki gwøgø, yɑ ko wëggí tyɑmø yi gen. Codhe, o yɑ bëëdɑ yɑ tir, yïɑ bɑ̈r ki orøng rɑj. Yïn ɑ Jwøng-ɑ Ácwɑ̈ɑ̈j, wiy kwøbbɑ geki rummɑ, bëëd gen gɑ ɑyïëy yi yïn, Yï bɑ kwödɑ, kɑ yï løg-ɑ yïënɑ. Wiy kwøbbí løøg yi Jwøng-ɑ Ácwɑ̈ɑ̈j, kenyi ying yethi rɑj! Wiy yï kor yi Jwøng-ɑ Ácwɑ̈ɑ̈j, Jwøøg Yɑgob! Wiy bëe be kønyi yïn, e kɑ̈ɑ̈l-ɑ Kenge kì Kïti Dhɑyøn. Wiy gëdhh-ɑ ɑ́muuj yi yïn yïëye, o pyëwe mïne ki gëdhhí. Wiy yï mëgge gïg-ɑ dwɑddi yi yïn bënn, o gïg-ɑ dwɑddí gwøgø ópɑ̈dhi gen ceth. O wɑ ówör wɑ ki wörri tyɑ̈mø, o berree tïng wɑ mɑl ki nyingi Jwøgee! Wiy kwɑ̈jjí nyi løøg yi Jwøng-ɑ Ácwɑ̈ɑ̈j ceth! Anɑn ɑ́yod yi yɑn kinni, Jwøng-ɑ Ácwɑ̈ɑ̈j rɑ̈nh-ɑ ɑ́yienye nyi wëgge’ tyɑ̈mø, kwɑ̈jje nyi løøge’ løøgø, kì mɑl kej kwëre, kɑ gø nyi thödhe ki teng-ɑ tyɑ̈ɑ̈me. Ji møøgø gɑ̈nn-ɑ yɑ̈thi liny, o møg-ɑ kyeelø gɑ̈nn-ɑ kyënyì, de wø gɑ̈nn-ɑ Jwøng-ɑ Ácwɑ̈ɑ̈j Jwøøg wøn. Tyëngɑni tyelli gen ócwɑny yi gen, kɑ ge ópɑ̈ɑ̈dhø, de wø ódhwödh, kɑ wø ócungø ceth. Jwøng-ɑ Ácwɑ̈ɑ̈j, wëggí rɑ̈dh tyɑ̈mø! Løøg kwøbbi wøn kenyi kwɑ̈jji wøn. Jwøng-ɑ Ácwɑ̈ɑ̈j, rɑ̈dh pyëwe ɑ́mïni, pyëwe med kipe kɑ ɑ́thödhií ki teng-ɑ ɑ́tyɑ̈ɑ̈me. Gïn-ɑ ɑ́dwɑddi yi pyëwe ɑ́mëggií, gïn-ɑ ɑ́kwɑjje ɑ́mëggií. Yïn ɑ Jwøk, rɑ̈dh ɑ́thödhí ki gyëdh mø døngø, kɑ wïje kïdhí ki yɑ̈ɑ̈r dhɑb. Ákwɑjj-ɑ wëy kì yïí, kɑ mëggií, ɑ́thödhí ki cyɑ̈ng mø ngenyø mø gïti ɑtheer. Dhwɑ̈nge ɑ́døngi kì bɑng kunyí, pere ɑ́wëggí tëngø, kɑ thödhí ki mër. Áthödhí ki gyëdh gïti ɑtheer, o pyëwe med, mɑ́ yï cyɑ̈gi ki en. Rɑ̈dh ngɑ̈dh-ɑ Jwøk Áyïmø; mɑ́ mɑ̈ɑ̈dø mee pɑ nyi lwënyi bong gïn-ɑ óböggi yi en. Tyëngmɑ̈ɑ̈nø ómɑg yi en bënn, tyëng-ɑ mɑɑnii ómɑg yi en. Óbï e nɑ mɑc me lyel, kɑ gï rɑ̈be bënn. Gï ónɑ̈ge ki rɑ̈ji pyëwe. Bong kwɑrri gen møg-ɑ ódöng, kì kömi piny, ge ónɑ̈g yi rɑ̈dh bënn. Ge ɑ́yɑ̈ɑ̈b ki yëëth møg myen gen rɑ̈dh, de møgɑni koo cuggi. Ge ópwöd yi en ki wethe, kɑ gï cyedde. Wø lejj-ɑ yïn Wuö, kipe tegí teng-ɑ dwøng! Wø lenh-ɑ yïn ki wör. Jwøgɑ! Jwøgɑ! Yɑde ɑ wiy yɑn piny? Yɑ ɑ́ywöög köörí, de yɑ nuti køny yïn. Jwøgɑ! Yï ɑ́cwølɑ kì dicɑ̈ng, de yï nuti wöl löggø. Yï ɑ́cwølɑ kì wɑ̈r, de yɑ pɑ yïddi ki ywömø. O bene yïn Kwërø, ngɑn-ɑ nyi lenhi yi Isrɑil. Kweyyi wøn ɑ́gɑ̈nn-ɑ yïn, kɑ ge yiel yi yïn. Ge ɑ́ywøøg köörí, kɑ ge yiel yi yïn ki rɑj. Ge ɑ́gɑ̈nn-ɑ yïn, o wɑ̈thi gen nuti lɑ̈ɑ̈y yïn. Yɑ bɑ twöngø yøw, yɑ pɑth ki dhɑnhø, yɑ ceg kɑ benyø, yɑ bɑ ɑbɑny yi gen! Yɑ nyi ceg kɑ gɑggø yi ngɑn lidh yɑn, teedø thönyy-ɑ dhøggi gen, ge törr-ɑ wɑ̈thi gen kenyi lidh gen yɑn. Ge okööbø kinni, “Yï ɑ́gɑ̈nn-ɑ Jwøng-ɑ Ácwɑ̈ɑ̈j, de ede ɑ pɑ yiele yïn? Keløg pyëw Jwøng-ɑ Ácwɑ̈ɑ̈j med ki yïn, ede ɑ pɑ yiele yïn?” Yïn ɑ ɑ́kor yɑn kì yij meyɑ, kɑ yɑ kor yi yïn kì kɑ̈w. Yɑ gɑ̈nn-ɑ yïn kër-ɑ ɑ́nywøøl yɑn, bene yïn ɑ bɑ Jwøgɑ ceth. Rií ko lɑ̈ɑ̈w ki yɑn, mɑ́ ɑkørr cyɑ̈gi, o bong ngɑn kunyi. Yɑ ɑ́tyeg yi tyëngmɑ̈ɑ̈nø ni tyëëg wɑ̈dhh, kì wɑ̈thi tùng bënn, ge nɑ wɑ̈dhhi Bɑcɑn, wɑ̈dhh-ɑ teg. Dhøggi gen ngɑɑm gen ni ngurrì, ge ɑ́bï yïɑ ge óngɑ̈rrø ge bï-ɑ be cɑmi yɑn. Bong tegø kì riɑ, tegɑ ɑ́kedh ni pïg-ɑ ókøny piny. Cuɑ ɑ́dɑ̈ngi, pyëwɑ ɑ́leny ni cemɑ̀. Cwɑggɑ ɑ́thwøw ni ɑyejø, lebɑ ɑ́mɑ̈gi kì yethi dɑnnɑ. Yɑ ɑ́wëggí thøw yij lɑ̈bø. Yɑ ɑ́tyeg yi ɑkuud tyëngrijjø, yɑ ɑ́tyeg gen ni tyëëg gwögg, cinggɑ geki tyellɑ ɑ́twïy yi gen. Cuɑ bënn ceg-ɑ wiigø. Yɑ ceg kɑ ywørø yi tyëngmɑ̈ɑ̈nø. Ge leng-ɑ wél kipe ógudhɑ, kɑ gï pɑ̈ngi gen kì kelli gen. Yïn ɑ Jwøng-ɑ Ácwɑ̈ɑ̈j, rií ko lɑ̈ɑ̈w, bïí jwɑn yɑn ki yielø! Yiel yɑn ki pilø, yɑ ko wëggí cɑmø yi gwöggɑni. Yiel yɑn kì dhøggi ngurrɑni, yiel wëyɑ ki tùngi wɑ̈dhhi Bɑcɑn, wɑ̈dhh-ɑ rijjø! Wɑddɑ óköbbɑ gïg-ɑ ɑ́gwøg yi yïn, yï ólenhɑ kì bøli gen kinni, “Lenhu Jwøng-ɑ Ácwɑ̈ɑ̈j, wun ɑ bɑ̈ngge! Lejju en, wun ɑ kwɑrri Yɑgob! Mɑllu en, wun ɑ tyëng Isrɑil! Jwøng-ɑ Ácwɑ̈ɑ̈j, tyëng-ɑ nyingi gen cɑn pɑ nyi byeny yi en, ɑbuur pɑ nyi wøy yi en, o tyëng-ɑ rɑngi, gï pɑ nyi luge ngɑ̈je, de nyii löggø kenyi ywøøg gen kööre.” Yï ólenhɑ kì bøli teedø, kipe gïg-ɑ ɑ́gwøg yi yïn kiperɑ; yï ólenhɑ kì bøli tyëng-ɑ mɑlli yïn. Gëdhh-ɑ ɑ́kwøbɑ kinni ge ómëggɑ yïn, ge ómëggɑ yïn kì bøli tyëng-ɑ nyi mɑlli yïn. Tyëng-ɑ nyingi gen cɑn ócyɑ̈mø, kɑ ge oyɑ̈ngø. Jwøng-ɑ Ácwɑ̈ɑ̈j ólenhi yi tyëng-ɑ nyi bï yïe. Ge ódönyi gïti ɑtheer! Jwøng-ɑ Ácwɑ̈ɑ̈j, ópɑrri yi pödhh bënn; Kɑ ge dwöög-ɑ yïe, ge kɑ̈ɑ̈l-ɑ kömi piny bëne; kɑ mɑlli yi jurrì bënn. Jwøng-ɑ Ácwɑ̈ɑ̈j ɑ bɑ rɑ̈dh, jɑɑg-ɑ pödhh bënn. Tyëngɑthwøg bënn, ri gen óbøødh gen piny kì bøle; tyëng-ɑ nyi thøw bënn, ri gen óbøødh gen piny kì bøle. Rïny-ɑ óbï Jwøng-ɑ Ácwɑ̈ɑ̈j ógöggi yi en, rïny-ɑ óbï óköbbi per Jwøng-ɑ Ácwɑ̈ɑ̈j. Tyëng-ɑ nuti nywølø óköbbi kinni, “Jwøng-ɑ Ácwɑ̈ɑ̈j jie ɑ́yiele cøn.” Yɑ kwɑy-ɑ yi Jwøng-ɑ Ácwɑ̈ɑ̈j, o yɑ pɑ jɑd. Yɑ nyi wëgge’ ywömø, kì yij lum-ɑ mɑr, kɑ yɑ nyi peeje kömi pïg kwïlø. Yɑ nyii thödhø yi en ki tegø me nyɑ̈n, Yɑ nyi peeje’ yuu-ɑ døj ni kɑ ɑ́kööbe ceth. Cɑgg yɑ cyɑ̈dhi kì yij muudhø me dwøng, yɑ pɑ böggi, mɑ́ yï ying-ɑ butɑ, yïn ɑ Jwøng-ɑ Ácwɑ̈ɑ̈j, Yɑ okorø yi yïn ki rɑj bënn. Yɑ nyii thegø yi yïn, kì keny cuggi tyëngmɑ̈ɑ̈nø ki nenni yɑn, yɑ ɑ́theg yi yïn ki mendwøng, lwølɑ ɑ́pɑ̈ɑ̈ng yi yïn. Døøjí geki mɑ̈ɑ̈dø mií, ge cyɑ̈dhi kɑ yɑn ceth. Yɑ óbëëdø kì yij ød Jwøng-ɑ Ácwɑ̈ɑ̈j kì yethi cyɑ̈ngg-ɑ ónëënɑ bënn. Piny bëne kí jɑmm-ɑ yije, bɑ mi Jwøng-ɑ Ácwɑ̈ɑ̈j. Ji bënn møg-ɑ köme bɑ møge thyew, mɑ́ Jwøng-ɑ Ácwɑ̈ɑ̈j ɑ ɑ́tɑ̈g tyelli piny, kɑ gï cïbe thɑ́ pï keny lɑ̈wi. Á men ɑ yïe di dyër, ɑ cuggi yedhi wïj Kïti Jwøng-ɑ Ácwɑ̈ɑ̈j? Á men cuggi kedhi Kenge, kej kwër? Tyëngtir, kwøbbi gen geki gïg-ɑ gøggi yi gen tir, ɑ pɑ nyi kwɑjji jwögg-ɑ ótyengø gɑ yenh, ɑ pɑ nyi köngi ki pyed. Ge óyiel yi Jwøng-ɑ Ácwɑ̈ɑ̈j, kɑ gï gyëdhe, ge ópwøj yi Jwøng-ɑ Ácwɑ̈ɑ̈j, kinni yï gen bɑ̈r. Ji-ɑ ni møgɑni, gen ɑ ówɑ̈dhi Kengi Jwøk; gen ɑ óbï bøli Jwøøg Yɑgob. Yieb wun thïggi dör, yieb wun dörr-ɑ weenø, o rɑ̈nh-ɑ dwøng bëe pɑc. Rɑ̈nh-ɑ dwøng bɑ men? Bɑ Jwøng-ɑ Ácwɑ̈ɑ̈j, ngɑn-ɑ teg, ɑ bong gïn dhɑlii, bene Jwøng-ɑ Ácwɑ̈ɑ̈j ɑ nyi tyɑm liny. Yieb wun thïggi dör, yieb wun dörr-ɑ weenø, o rɑ̈nh-ɑ dwøng bëe pɑc. Rɑ̈nh-ɑ dwøng bɑ men? Wïlɑ̈bø, Jwøng-ɑ Ácwɑ̈ɑ̈j ɑ bɑ Rɑ̈nh-ɑ Dwøng! Yïn ɑ Jwøng-ɑ Ácwɑ̈ɑ̈j, bɑ yïn ɑ mɑllɑ, Jwøgɑ, bene yïn ɑ gɑ̈nnɑ. Wïjɑ ko wëggí lɑ̈ɑ̈yø, yɑ ko wëggí gɑggø yi tyëngmɑ̈ɑ̈nø! Tyëng-ɑ gɑ̈nni yïn koo tyɑm, de tyëng-ɑ pemmi dhøgí ótyɑm. Nyudhí yɑn yëthí, Wuö, wiy ge yodɑ. Peej yɑn yuuí yuu-ɑ dyër, mɑ́ yïn ɑ bɑ Jwøgɑ, o bɑ yïn ɑ nyi yiel yɑn. Yɑ nyi gɑ̈nn-ɑ yïn ceth. Yïn ɑ Jwøng-ɑ Ácwɑ̈ɑ̈j, pɑr yɑn kì bɑng døøjí, geki mɑ̈ɑ̈dø mií, møg-ɑ ɑ́nyodh yi yïn cøn. Wïl wïjí ki orøgɑ, orøøg wööbø. Pɑr yɑn kì bɑng døøjí geki mɑ̈ɑ̈dø mií, pɑr yɑn, yïn ɑ Jwøng-ɑ Ácwɑ̈ɑ̈j! Jwøng-ɑ Ácwɑ̈ɑ̈j tir o døøj, bene ɑ pere nyi nyudhe tyëngorøg ki yöö. Tyëng-ɑ bɑ mööl nyi peeje’ yuu-ɑ dyër, kɑ gï nyudhe gïg-ɑ dwɑdde. Yëthi Jwøng-ɑ Ácwɑ̈ɑ̈j bënn bɑ mɑ̈ɑ̈dø geki dyër, kipe tyëng-ɑ nyi mïdhi kwönge geki cigge. Mïdhí kwöngí yïn ɑ Jwøng-ɑ Ácwɑ̈ɑ̈j, kɑ pyëwí lɑ̈ɑ̈me kipe orøgɑ, mɑ́ orøgɑ gïïr. Tyëng-ɑ nyi mïdhi Ciggi Jwøng-ɑ Ácwɑ̈ɑ̈j, gï ónyudhe yuu-ɑ cyɑ̈dhi gen. Ge óbëëdø ki døøjø, kɑ piny løg-ɑ mi nyigi gen. Jwøng-ɑ Ácwɑ̈ɑ̈j bɑ mɑ̈ɑ̈dh tyëng-ɑ nyi mïdhi cigge, kɑ lwöme nyi mïdhe ki gïn. Yɑ nyi nenn-ɑ yï Jwøng-ɑ Ácwɑ̈ɑ̈j kipe kønyɑ ceth, mɑ́ en ɑ nyi yiel yɑn ki rɑj. Yïn ɑ Jwøng-ɑ Ácwɑ̈ɑ̈j, lug thɑ̈wwí, kɑ pyëwí lɑ̈ɑ̈me ki yɑn, mɑ́ yɑ ɑ́döng ketɑ, o yɑ ɑ́nyönhi. Yiel yɑn ki rummì, kɑ yɑ kɑ̈ɑ̈l wɑ̈g kì yethi ɑkørr. Lidh orɑngɑ geki pïn-ɑ pïd yɑn, kɑ pyëwí lɑ̈ɑ̈me ki orøgɑ bëne. Lidh ngenyi tyëngmɑ̈ɑ̈nø, kɑ mɑɑn-ɑ mɑɑn yɑn yi gen liidh. Kor wëyɑ, kɑ yɑ yieel, wïjɑ ko wëggí lɑ̈ɑ̈yø, mɑ́ yɑ nyi yömm-ɑ yïí. Wiy yɑ yiel kì bɑng døøjɑ kí kenyi kømmɑ dyër ceth, mɑ́ yɑ gɑ̈nn-ɑ yïn. Yïn ɑ Jwøk, yïëëd ki ɑkørr, yiel jií tyëng Isrɑil! Yïn ɑ Jwøng-ɑ Ácwɑ̈ɑ̈j, cwɑg yɑn, mɑ́ e bong gïjø mɑ ɑ́rënyɑ, o yɑ gɑ̈nn-ɑ yïn ceth. Yïn ɑ Jwøng-ɑ Ácwɑ̈ɑ̈j, pɑ̈nyí yɑn, kɑ rummɑ rɑɑng geki gïg-ɑ dwɑddɑ. Yɑ cyɑ̈dh-ɑ́ɑ̀ kömi mɑ̈ɑ̈dø mií ceth, o kwøbbí møg-ɑ ɑ́yïëyɑ mïdhɑ’ mïdhø ceth. Yɑ pɑ nyi bëëdø kì kej ɑ́kyel ki tyëngrijjø, wɑlɑ̀ yɑ pɑ nyi kedhi kelli tyëngwëënyø. Tyëngrijjø mɑɑn yi yɑn, o ge këëjɑ’ këëjø. Yïn ɑ Jwøng-ɑ Ácwɑ̈ɑ̈j, cinggɑ tɑr, o yɑ nyi kedh-ɑ keny-ɑ nyi mɑlli yïn. Yï nyii pøjjø yi yɑn ki wör, kɑ gïïngɑ̈ngø møgí nyi nyudhɑ ji. Yïn ɑ Jwøng-ɑ Ácwɑ̈ɑ̈j, ødí keny-ɑ di dhwɑ̈ngí, ɑ yije bëëd yi yïn, mɑɑr yi yɑn. Wëyɑ ko kwɑɑny kyeel ki wëyi tyëngorøg, wɑlɑ̀ yɑ ko nɑ̈ɑ̈g kyeel ki tyëngnɑ̈g ki ji, gen ɑ tyëng-ɑ nyi göggi ji ki rɑj, ɑ nyi yïëy kwɑjjø ki ngyëny. De yɑn, yɑ ógwøg gïn-ɑ bɑ dyër ceth, lɑ̈ɑ̈m pyëwí kɑ yɑ yieel! Yɑ ɑ́yiel ki rɑj bënn, Jwøng-ɑ Ácwɑ̈ɑ̈j ómɑllɑ kì kelli jie. Jwøng-ɑ Ácwɑ̈ɑ̈j bɑ cɑr kì yïɑ, o bɑ yïënɑ, bong ngɑn böggɑ, Jwøng-ɑ Ácwɑ̈ɑ̈j ɑ korri yɑn ki rɑj, yɑ pɑ wöl böggø. Kenyi pɑ̈ɑ̈r tyëngrijjø kömɑ, ge dwɑdd-ɑ nɑ̈gi yɑn, tyelli gen nyii cwɑnyyø yi gen kɑ ge ópɑ̈nhø. Cɑgg yɑ tyeg yi liny, yɑ pɑ pɑ̈nyi böggø, cɑgg tyëngmɑ̈ɑ̈nø pɑ̈ɑ̈r kömɑ, yɑ gɑ̈nn-ɑ Jwøk ceth. Yɑ ɑ́cwøl-ɑ gïjø ɑ́kyel kì yï Wuö, gïjø ɑ́kyel yøw ɑ dwɑdd-ɑ, kinni, o yɑ bëëdɑ kì ød Jwøng-ɑ Ácwɑ̈ɑ̈j kɑ̈ng-ɑ nëënɑ, o yɑ nennɑ døøji Jwøng-ɑ Ácwɑ̈ɑ̈j, o yɑ nyi kwɑ̈jjɑ kì yij Kenge. Yɑ nyii kɑnø yi en kì cyɑ̈ɑ̈ng rɑj, yɑ ókor yi en kì yij Kenge, yɑ ókïdhe be bëëdø kì wïj kït me bɑ̈r. Codhe, o wɑ̈thi tyëngmɑ̈ɑ̈nø, tyëng-ɑ ɑ́tyeg yɑn, ywöönyɑ’ piny. O yɑ muujɑ ki gëdhhì kì yij Kenge, o yɑ wörɑ yɑ lenh-ɑ Jwøng-ɑ Ácwɑ̈ɑ̈j. Lïngí ywøgɑ Wuö, lɑ̈ɑ̈m pyëwí, kɑ møgɑ løøg! Keny-ɑ ɑ́kööb kinni, “Bïí mɑllí yɑn!” Yɑ ɑ́löggi kinni, “Yɑ óbï Wuö! Rií ko kɑ̈nní yɑn!” Pyëwí ko rënyi ki yɑn, bɑ̈ngí ko weddí. Yïn ɑ nyi køny yɑn yɑ ko wiy piny. yïn ɑ Jwøk, yïënɑ! Yɑ ócuggø wiy piny yi wïyɑ geki meyɑ, de yɑ ómïdhi yi Jwøng-ɑ Ácwɑ̈ɑ̈j ceth. Wuö, pwönyí yɑn ki gïn-ɑ dwɑddi yi yïn o gwøgɑ kɑ yɑ pyejjí kì yuu-ɑ døj mɑ́ tyëng-ɑ mɑɑn yɑn gïïr. Yɑ ko wïyí tyëngmɑ̈ɑ̈nø, mɑ́ yɑ ɑ́myen yi gen, ge dwɑdd-ɑ ruji yɑn. Yɑ ngɑ̈ny wøw kinni, døøji Jwøng-ɑ Ácwɑ̈ɑ̈j ólidh yi yɑn ceth, yɑ nudd yɑ onëënø. Gɑ̈nní Jwøng-ɑ Ácwɑ̈ɑ̈j! Bëëd yïí dɑ yïëyø! Pyëwí ko wëggí nyönhø! Gɑ̈nní Jwøng-ɑ Ácwɑ̈ɑ̈j ceth! Yïn ɑ Jwøng-ɑ Ácwɑ̈ɑ̈j, bɑ yïn ɑ korri yɑn, yɑ ywøøg-ɑ köörí. Lïngí ywøgɑ! Ke pɑ løøg møgɑ, yɑ ópɑ̈ɑ̈r ki tyëng-ɑ nyi kedhi pödhi tyëngthøø. Lïngí ywøgɑ kɑ yɑ køny, kenyi tïngɑ cinggɑ mɑl, yɑ nenn-ɑ kuni kej kwërí, yɑ ókwɑ̈jjø. Yɑ ko cɑɑy kyeel ki tyëngrijjø, kì bɑng gïg-ɑ nyi gøggi yi gen. Ge kööbø dhøggi gen omedø, de pëthi gen pɑ̈ng yi mɑ̈ɑ̈nø. Cɑy gen kipe gïn-ɑ ɑ́gwøg yi gen; cɑy gen kipe rɑjj-ɑ ɑ́gwøg yi gen. Cɑy gen kipe gïg-ɑ ɑ́gøggi yi gen bënn; mëggí gen cɑ́y-ɑ kyëëw ki gen. Mɑ́ gwøøg Jwøng-ɑ Ácwɑ̈ɑ̈j geki gïg-ɑ ɑ́cwɑ̈je, nuti rømmø yi gen; gïg-ɑ ɑ́cwɑ̈je bong nyingi gïn kì yï gen. Gï ócɑye kipe møgɑni; kɑ gï rënye gïti ɑtheer. Lenhi wɑ Jwøng-ɑ Ácwɑ̈ɑ̈j, mɑ́ kwɑ̈jjɑ ɑ́løøge. Jwøng-ɑ Ácwɑ̈ɑ̈j ɑ korri yɑn, o en ɑ bɑ cwɑ̈gɑ. En ɑ gɑ̈nnɑ ceth. Yɑ nyi wëgge’ tyɑ̈mø, kɑ pyëwɑ nyii mïnø, Jwøng-ɑ Ácwɑ̈ɑ̈j lenhɑ’ lenhø ki wör. Jwøng-ɑ Ácwɑ̈ɑ̈j jie nyi korre’ korrø, rɑ̈nh-ɑ ɑ́yienye nyi cwɑge’ cwɑgø, kɑ gø yiele. Yiel jií kɑ ge gyëëdh, yïn ɑ Jwøng-ɑ Ácwɑ̈ɑ̈j. kɑ ji-ɑ bɑ møgí gyëëdh. Kwɑy gen, korrí gen gïti ɑtheer. Lejju Jwøng-ɑ Ácwɑ̈ɑ̈j wun ɑ tyëng mɑl! Lejju mɑ̈re kí tege. Lejju nyingi Jwøng-ɑ Ácwɑ̈ɑ̈j, ɑ yïe di mɑ̈r, bøødh wun ri wun piny kì bøli Jwøng-ɑ Ácwɑ̈ɑ̈j, ɑ bɑ Kwërø Cwɑggi Jwøng-ɑ Ácwɑ̈ɑ̈j ɑ́bï ge böödh-ɑ yethi nɑ̈mmi omelø, Jwøng-ɑ bɑ mɑ̈r, ɑ́göjji ni mɑl. Kɑ ɑ́lɑngi cwɑgge böödh-ɑ yij nɑɑm omeli dwøng. Cwɑggi Jwøng-ɑ Ácwɑ̈ɑ̈j olïngø, tege ɑ́nënni geki dönge. Cwɑggi Jwøng-ɑ Ácwɑ̈ɑ̈j tørr-ɑ óthur, cɑgg ɑ́ óthurr-ɑ døngø kì Lubnɑn. Kïtti Lubnɑn ɑ́wëgge pɑ̈rrø ni røjj. Kɑ Kïti Kermön ópɑ̈rrø ni nyɑwɑdh. Mɑl nyii gwellø yi cwɑggi Jwøng-ɑ Ácwɑ̈ɑ̈j. Yij pɑ̈l bëne nyii nhɑ̈nhø yi cwɑgge. Thwøri Gɑdic ɑ́nhɑ̈nhi yi cwɑgge. Cwɑggi Jwøng-ɑ Ácwɑ̈ɑ̈j nyi nïng-ɑ óthur, kɑ yïthhi yenh nyii dyëmø kì yij thïm, e tyëng-ɑ yij Kengø óryeerø kinni, “Mɑ̈r bɑ mi Jwøk!” Nɑ̈mm-ɑ pɑ̈ng bënn, jɑɑg-ɑ yi Jwøng-ɑ Ácwɑ̈ɑ̈j, jyɑ̈gø ɑ́ rɑ̈dh gïti ɑtheer. Jwøng-ɑ Ácwɑ̈ɑ̈j jie nyi thödhe’ thödhø ki tegø, kɑ gï nyi gëdhhe mër. Yɑ lejj-ɑ yïn Wuö, mɑ́ yɑ ɑ́yiel yi yïn, kɑ tyëngmɑ̈ɑ̈nø, mɑ̈ɑ̈n tunggi yɑn. Yï ɑ́kwɑjjɑ yɑ obuddø ki rɑ̈ɑ̈m dël, yïn ɑ Jwøgɑ, kɑ dëlɑ wëggí yönø. Yɑ ɑ́kor yi yïn ki thøø, yɑ ɑ́bëëd yɑ bɑ men di kedhi yij bur. De wëyɑ ɑ́dwöög yi yïn. Wör wun wu lejj-ɑ Jwøk, wun ɑ jie møg-ɑ wørii! Nyi pɑru gïg-ɑ ɑ́gwøg yi Ngɑn-ɑ bɑ Kwërø, kɑ nyi pwøj wun. Linye pɑ nyi mɑ̈gi ki keny me bɑ̈ɑ̈r, døøje nyi tyëng-ɑ piny. Cɑgg pïi nying mulli kì wɑ̈r, medi pyëw nyii yodø kì mwøl. Yɑ ɑ́kööb yɑ pɑ böggi kinni, “Yɑ pɑ cuggi tyɑmø!” Yɑ ɑ́göggí ki gïgdøj, Wuö, Yɑ ɑ́kor yi yïn, yï bɑ kwödɑ. De keny-ɑ ɑ́lugí ngɑ̈jí yɑn, ɑdøøgɑ be böggø. Yɑ cwøll-ɑ yïn, yïn ɑ Jwøng-ɑ Ácwɑ̈ɑ̈j. Yɑ kwɑjj-ɑ yïn, bïí køny yɑn. “Á ngø ɑ óyod yi yïn kì bɑng thøwɑ? Dɑ gïndøj men-ɑ ónywøl yi kedhɑ yij rörø? Tyëngthøø ócuggø lejji yïn? Wöddi døøjí ócuggø kɑ̈llø yi gen? Lïngí kwøbbɑ Wuö, kɑ pyëwí lɑ̈ɑ̈me ki yɑn. Jwøng-ɑ Ácwɑ̈ɑ̈j, køny yɑn!” Rɑ̈ji pyëwɑ ɑ́løg medi pyëw yi yïn, kɑ yɑ ocöngø. Gïn-ɑ ɑ́rɑ̈ɑ̈m kì pyëwɑ ɑ́kɑ̈ɑ̈l yi yïn wɑ̈g, kɑ keje kïdhí ki medi pyëw, ɑcögɑ yɑ pɑ kudø, yɑ ówör yɑ lejj-ɑ yïn ceth! Jwøng-ɑ Ácwɑ̈ɑ̈j, yï bɑ Jwøgɑ! Yï ópøjjɑ gïti ɑtheer. Yɑ yömm-ɑ yïí, Wuö, yɑ ko wëggí tyɑmø. Yï bɑ Jwøng nyi gøggi dyër, yɑ kwɑjj-ɑ yïn, yiel yɑn! Kyën pɑ̈ddí, Jwøngtir, yiel yɑn! Jwɑn yɑn ki yielø! Bëëd yï bɑ kwödɑ men-ɑ nyi korri yɑn. Bene yïn kwödɑ men-ɑ nyi korri yɑn, Nyudhí yɑn yöö, kɑ yɑ pyejjí ni kɑ ɑ́kööb. Yiel yɑn ki ɑ́kɑ̈ll-ɑ ɑ́ceg yɑn, mɑ́ yïn ɑ nyi yiel yɑn ki rɑj. Wëyɑ ɑ́cïbɑ cingí, yɑ óyiel yi yïn, yïn ɑ Jwøng-ɑ Ácwɑ̈ɑ̈j, bene yïn Jwøng-ɑ dyër. Tyëng-ɑ nyi mɑlli jwögg-ɑ pɑth mɑɑn yi yïn, de yɑ gɑ̈nn-ɑ yïn. Pyëwɑ ómïni ki mendwøng kipe mɑ̈ɑ̈dø mií men-ɑ pɑ nyi lwënyi, mɑ́ yïn ɑ nyi lidh orɑngɑ, yïn ɑ ngɑ̈nyi ɑkørr-ɑ kömɑ. Yɑ nuti wëggi yïn mɑgø yi tyëngmɑ̈ɑ̈nø, yɑ ɑ́wëggí kedhi keny-ɑ dwɑddɑ. Lɑ̈ɑ̈m pyëwí ki yɑn, Wuö, mɑ́ yɑ ying-ɑ yethi rɑj, nyingɑ ɑ́dhëg yi ywøng-ɑ gïïr, yɑ ɑ́dhɑ̈ɑ̈r ki mendwøng. Yɑ ɑ́dhɑ̈ɑ̈r yi kïïmø, yɑ ɑ́nyönhi yi ywøg. Yɑ ɑ́nyönhi yi ɑkørr cɑgg ɑ́ men-ɑ́ cuɑ, ge ceg-ɑ nøyø. Yɑ ɑ́døøg be gɑggø yi tyëngmɑ̈ɑ̈nø, geki wɑddɑ thyew! Ge ɑ́døøg be gɑggi yɑn. Yɑ ɑ́døøg be këëjø yi tyëng-ɑ ngɑ̈nyi yɑn, kenyi lidh gen yɑn kì yöö, ge nyi ceg-ɑ rengø. Wɑ̈thi ji bënn ɑ́wïl ki yɑn, de yɑ nɑ ngɑnthøø. Yɑ nɑ gïn-ɑ óweddi pɑ̈l. Yɑ lïngɑ tyëngmɑ̈ɑ̈nø ge ómöngø, yɑ ɑ́tyeg yi böögø. Ge nyi tyëg piny ge gøgg-ɑ ɑmolpiny, ge kømm-ɑ kwøbbi nɑ̈gi yɑn. Den-ɑ́ yïn ɑ gɑ̈nnɑ, Wuö, yï bɑ Jwøgɑ. Yïn ɑ nyi konggi yɑn ceth, yiel yɑn ki tyëngmɑ̈ɑ̈nø, tyëng-ɑ guud wɑngɑ! Ywöngi yijí kipe bɑ̈ngí, yiel yɑn kì bɑng mɑ̈ɑ̈dø mií. Yɑ cwøll-ɑ yïn, yïn ɑ Jwøng-ɑ Ácwɑ̈ɑ̈j; wïjɑ ko wëggí lɑ̈ɑ̈yø. Wiy wɑ̈thi tyëngrijjø lɑ̈ɑ̈y gen, wiy ge kedhi gen piny, pödhi tyëngthøø ge kudø kudø. Mij dhøggi tyëngpyed møgɑni, gen ɑ tyëngɑthwøg, møg-ɑ nyi kööbø ki rɑj kì ri tyëngtir. Gïg mø døøj cɑrø ki mendwøng, ɑ mïdhi yi yïn kipe tyëng-ɑ wør yïn! Døøjí ngɑ̈nyi yi ji bënn, kí kër-ɑ nyi konggí tyëng-ɑ gɑ̈nni yïn. Ge nyi kɑɑní butí, kipe tyëngrijjø; ge nyi kɑɑní keny pɑ yood gen ge nyii korrø yi yïn ki lebbi tyëngmɑ̈ɑ̈nø. Lenhi wɑ Jwøng-ɑ Ácwɑ̈ɑ̈j! Kipe kɑ ɑ́nyudhe mɑ̈ɑ̈dø mee yɑn, ki yöö mɑ ngɑ̈ngø, keny-ɑ ɑ́tyeeg yɑn, kɑ kömɑ pɑ̈ɑ̈r! Yɑ ɑ́bwøg, kɑ yɑ okööbø kinni, “Yɑ ɑ́cyedde kì bute.” De ywøgɑ ɑ́lïnge, keny-ɑ ɑ́ywøøgɑ kööre kipe kønyø. Mɑɑru Jwøng-ɑ Ácwɑ̈ɑ̈j, wu tyëng-ɑ böggii bënn. Jwøng-ɑ Ácwɑ̈ɑ̈j, tyëng-ɑ mïdhi cigge nyi korre’ korrø, de tyëngrijjø nyi cɑye’ cɑyø. Wu tyëng-ɑ gɑ̈n Jwøng-ɑ Ácwɑ̈ɑ̈j bënn, bëëd wun wu teeg, wu tyëng-ɑ gɑ̈nni Jwøng-ɑ Ácwɑ̈ɑ̈j cwed wun pëthi wun. Ri gen dɑ gyëdh gen ɑ tyëng-ɑ́ pyëw Jwøk ɑ́lɑ̈ɑ̈m ki gen kɑ orøøg gïn lɑ̈ɑ̈nye. Ngɑn-ɑ orøge pɑ kwɑ̈nnii yi Jwøng-ɑ Ácwɑ̈ɑ̈j, geki ngɑn-ɑ pyëwe bong wëënyø, ri gen dɑ gyëdh. Yɑ ɑ́thøw yi ywøg kɑ ɑ́cögɑ orøgɑ nuti tööng yɑn, yɑ nyi tyëg-ɑ cɑ̈ng yɑ óywöngø. Yɑ ɑ́cɑy yi yïn kì wɑ̈r geki dicɑ̈ng, yïn ɑ Jwøng-ɑ Ácwɑ̈ɑ̈j, kɑ yɑ ónyönhø ki mendwøng; ni kenyi nɑ̈r lum yi lëdhi piny. Codhe, ɑtöngɑ orøgɑ yïn, bɑ̈jjɑ nuti kɑɑn yɑn, ɑ́töngɑ yïn bëne, kɑ pyëwí ólɑ̈ɑ̈mø kipe orøgɑ bëne. Tyëng-ɑ mïdhi kwøbbí, yï ókwɑjji yi gen kenyi di rɑj, keny-ɑ óbëën rɑj ni bɑɑyø, pɑ pɑ̈nyi wɑ̈dhi yï gen. Yï bɑ keny nyi pɑ̈nɑ, mɑ́ yïn ɑ nyi yiel yɑn ki ɑkørr. Yɑ óryeer yɑ owörø, mɑ́ yɑ okorrø yi yïn. Jwøng-ɑ Ácwɑ̈ɑ̈j okööbø kinni, “Yï ónyudhɑ yuu-ɑ kɑ̈ɑ̈l yi yïn, yï óköbbɑ, kɑ yï cegɑ. Yï ko bëëd wïjí nøg ni kyeny, wɑlɑ̀ ógɑlø ɑ dhøge nyi göddi ki yël, o yïëye ki kïdhi yuu-ɑ dwɑddii.” Orɑɑng tyëngrijjø gïïr, de tyëng-ɑ gɑ̈nni Jwøng-ɑ Ácwɑ̈ɑ̈j, nyii korø yi mɑ̈ɑ̈dø mee. Wun ɑ tyëngtir, mïni pëthi wun, kipe gïg-ɑ ɑ́gwøg yi Jwøng-ɑ Ácwɑ̈ɑ̈j! Wu tyëng-ɑ mïdhi Ciggi Jwøng-ɑ Ácwɑ̈ɑ̈j, ryeer wun ki medi pëëth! Wun ɑ tyëngtir bënn, ryeer wun ki medi pëëth, kipe gïg-ɑ ɑ́gwøg yi Jwøng-ɑ Ácwɑ̈ɑ̈j. Lenhu en, wun ɑ tyëng-ɑ mïdhi cigge. Lenhu Jwøng-ɑ Ácwɑ̈ɑ̈j ki thøm, wör wun ki thøm wu lenh-ɑ en. Wör wun ki wör møg nyɑ̈n wu lenh-ɑ en, thom wun thøm kidøøj, kɑ wu ryeer wun ki medi pëëth. Kwøbbi Jwøng-ɑ Ácwɑ̈ɑ̈j bënn bɑ dyër, o gïg-ɑ ɑ́gwøge bënn bɑ óbödh. Jwøng-ɑ Ácwɑ̈ɑ̈j nenn-ɑ bëëntir geki gøggi dyër. Piny pɑ̈ngø yi mɑ̈ɑ̈dø mi Jwøng-ɑ Ácwɑ̈ɑ̈j. Mɑl ɑ́cwɑ̈j yi Jwøng-ɑ Ácwɑ̈ɑ̈j kɑ kwøbb-ɑ ɑ́kwøbe, cɑ̈ng geki dwɑ̈y kí kyell, ɑ́cwɑ̈j yi en kɑ kwøbbi dhøge. Pïi nɑ̈mmi omelø nyi cønge’ kej ɑ́kyel, tyelli nɑɑm omeli dwøng nyi cyëge’ yethi ud. Wiy Jwøng-ɑ Ácwɑ̈ɑ̈j mɑlli yi piny bëne, wiy wør yi jii kömi piny bënn! Keny-ɑ ɑ́kööbe ɑ ɑ́cwɑ̈ɑ̈j piny, jɑmmì bënn ɑ́cwöb keny-ɑ ɑ́kööbe. Gïg-ɑ ɑ́rømmi yi pödhh ɑ́cung yi Jwøng-ɑ Ácwɑ̈ɑ̈j, gïg-ɑ ɑ́dwɑddi gwøgø yi gen ɑ́rënye. De gïg-ɑ nyi rømmi yi Jwøng-ɑ Ácwɑ̈ɑ̈j kipe gwøgø, nyii bëëdø kì yethi rïjj bënn, gïti ɑtheer. Pönh-ɑ Jwøge bɑ Jwøng-ɑ Ácwɑ̈ɑ̈j, ree dɑ gyëdh, tyëng-ɑ ɑ́yienye gïn-ɑ́ jie, ri gen dɑ gyëdh. Jwøng-ɑ Ácwɑ̈ɑ̈j ɑ́lïïdh piny kì mɑl, kɑ ji bënn lidhe, ɑ́lïïdh piny kì keny-ɑ di kwøme, ɑ́lïïdh kömi ji-ɑ bëëdø kì piny bënn. En ɑ ɑ́cïb rumm-ɑ pëthi gen bënn, o gïg-ɑ gøggi yi gen bënn, ngɑ̈nyi yi en. Rɑ̈dh pɑ nyi tyɑ̈mø kɑ ngenyi yɑye. Jɑl-liny pɑ nyi tyɑ̈mø kɑ tege. Kyënyi liny bong per gen kipe tyɑ̈mø, tegi gen teng-ɑ dwøng pɑ cuggi yïëdø. Jwøng-ɑ Ácwɑ̈ɑ̈j nenn-ɑ kömi tyëng-ɑ böggii, gen ɑ tyëng-ɑ gɑ̈nni mɑ̈ɑ̈dø mee. Gï nyii yielø yi en ki thøø, o gï nyii yielø yi en ki kɑ̈j. Ngɑ̈dh wɑ Jwøng-ɑ Ácwɑ̈ɑ̈j, wɑ ókøny yi en, kɑ wɑ kore. Pëthee med kɑ pere, o wɑ gɑ̈nn-ɑ nyinge kwërø. Wiy mɑ̈ɑ̈dø mií men-ɑ pɑ nyi lwënyi bëëde kì kömi wøn, yïn ɑ Jwøng-ɑ Ácwɑ̈ɑ̈j, ni kɑ̀ gɑ̈ɑ̈n yïn yi wøn ceth. Jwøng-ɑ Ácwɑ̈ɑ̈j nyi pwøjɑ’ pwøjø yethi cyɑ̈ng, yɑ pɑ wïyi ki lenhii. Yɑ lenh-ɑ Jwøng-ɑ Ácwɑ̈ɑ̈j kipe gïg-ɑ ɑ́gwøge! Wiy tyëng-ɑ nyingi gen guud lïng gen, o pëthi gen mïni gen! Lejji wɑ döngi Jwøng-ɑ Ácwɑ̈ɑ̈j, kɑ nyinge lenhi wɑ! Jwøng-ɑ Ácwɑ̈ɑ̈j ɑ́kwɑjjɑ, kɑ møgɑ løøge, yɑ ɑ́yiele ki rɑj bënn. Tyëng-ɑ nyi gɑ̈nni Jwøng-ɑ Ácwɑ̈ɑ̈j, pëthi gen nyii mïnø, wɑ̈thi gen koo pɑ̈nyi lɑ̈ɑ̈yø. Tyëng-ɑ nyingi gen cɑn nyi cwøl-ɑ Jwøng-ɑ Ácwɑ̈ɑ̈j, kɑ nyii löggø, kɑ gï nyi yiele ki rɑj bënn. Tyëng-ɑ böggi Jwøng-ɑ Ácwɑ̈ɑ̈j, nyii korø yi wëywöne, kɑ gï yiele ki rɑj. Yodu en wu keti wun, kinni Jwøng-ɑ Ácwɑ̈ɑ̈j døøj! Tyëng-ɑ nyi yömmi yïe, ri gen dɑ gyëdh. Mɑllu Jwøng-ɑ Ácwɑ̈ɑ̈j, wun ɑ jie bënn, mɑ́ tyëng-ɑ nyi böggii pɑ nyi jɑd! Ngur nyii jɑdø, kɑ nɑ̈g yi kɑ̈j, de tyëng-ɑ mïdhi kwøbbi Jwøng-ɑ Ácwɑ̈ɑ̈j, bong gïn nyi jɑ̈ddi gen. Bï wun othønhø, lïngu kwøbbɑ, o wu pwönyɑ ki böggi Jwøng-ɑ Ácwɑ̈ɑ̈j. Wu dwɑdd-ɑ nënnì kí døøjø? Wu dwɑdd-ɑ bëëdø ki runn mø ngenyø, kí medi pëëth? Døj, wiyu kwøbb-ɑ rijjø, geki kwøbbi pyed. Wiy wun gøggi rɑj, kɑ wu gøggu gïgdøj, yɑb wun mër ki pëthi wun bënn. Tyëngtir nyii nennø yi Jwøng-ɑ Ácwɑ̈ɑ̈j, ywøøg gïn nyi lïnge’ lïngø. De ngɑ̈je nyi luge’ tyëngrijjø, kɑ ge nyi jwɑn-ɑ wïlø kenyi thøw gen. Tyëng-ɑ nyingi gen cɑn nyi cwøl-ɑ Jwøng-ɑ Ácwɑ̈ɑ̈j, kɑ nyii löggø, kɑ gï nyi yiele ki rɑj. Jwøng-ɑ Ácwɑ̈ɑ̈j cyɑ̈gi ki tyëng-ɑ yethi gen bɑɑrø, tyëng-ɑ bong gïn gɑ̈n yi gen, gï nyi yiele yielø. Tyëngtir nyii yïddø ki orɑng tyel mø gïïr, de ge nyii yielø yi Jwøng-ɑ Ácwɑ̈ɑ̈j ki orɑngɑni bëne. Ge nyii konggø yi Jwøng-ɑ Ácwɑ̈ɑ̈j, o tyelli gen pɑ nyi cwɑny yi gen kinni tek! Tyëngrijjø nyii nɑ̈gø yi rɑjji gen, tyëng-ɑ mɑɑn tyëngtir ócɑy. Jwøng-ɑ Ácwɑ̈ɑ̈j jie óyiele, o tyëng-ɑ gɑ̈nnii koo cɑy. Mɑɑn tyëng-ɑ mɑɑn yɑn, Wuö Jwøng-ɑ Ácwɑ̈ɑ̈j, kɑ yï nyïɑ̈ggí ki tyëng-ɑ nyïɑ̈ggi ki yɑn! Kwɑny kwödí geki tønggí, kɑ yï bïí be dømi yɑn. Løg tøngí geki dørí kɑ ge cïmmí tyëng-ɑ cyeddi yɑn. Kööb kinni yɑ óyiel yi yïn ceth. Wiy tyëng-ɑ dwɑddi nɑ̈gi yɑn tyɑm, o ge yɑ̈r gen! Wiy ge cyeddi, o wɑ̈thi gen muum gen! Wiy ge bëëd ge nɑ wél, mø wøjji yi yømø, keny-ɑ ócyeddi gen yi wëywöní, Wuö! Wiy yuu gen bëëde ɑ́ muudhø, e opønhø o ge pwööd piny yi wëywöní Jwøng-ɑ Ácwɑ̈ɑ̈j. Yɑ ɑ́ceg yi gen ki ɑ́kɑ̈llì e bong gïn rënyi yɑn, kɑ yuuɑ kunyi yi gen ki bur. De ge óliib piny yi rɑj! Ge ómɑg yi ɑ́kɑ̈lli gen, kɑ ge pɑ̈dh-ɑ yethi rɑjji gen! Codhe, o pyëwɑ mïne, kì bɑng kɑ ɑ́yieel yɑn yi Jwøng-ɑ Ácwɑ̈ɑ̈j. O Jwøng-ɑ Ácwɑ̈ɑ̈j köbbɑ ki pyëwɑ bëne kinni, “Bong ngɑn pɑ̈ɑ̈r ki yïn. Ngɑn nyødh ɑ́yiel yi yïn kì cingi ngɑn teg, kɑ ngɑn wɑnge cɑn yiel yi yïn, kì cingi ngɑn-ɑ guud wɑnge.” Tyëngrijjø nyi gøøny-ɑ yɑn ki pyed, kɑ yɑ nyi myen gen ki gïg kwïjɑ. Yɑ ɑ́göggi gen ki rɑj, kipe gïgdøj møg-ɑ ɑ́göggɑ gen, ɑdöngɑ yɑ okïïmø. De kenyi rɑ̈ɑ̈m dëlli gen, yɑ nyii kïïmø, kɑ riɑ nyi twöönɑ ki gïncɑm, yɑ nyii kwɑ̈jjø kiper gen, wïjɑ kuul yɑn piny, ni kenyi kwɑ̈jjɑ kiper wɑɑd wøn wɑlɑ̀ mɑ̈dhɑ. Yɑ nyi cyɑ̈dhi wïjɑ kuul yɑn piny yɑ óywöngø, ni ngɑn ywøg meye. De kenyi pɑ̈dhɑ yethi rɑj, pëthi gen nyi ceg-ɑ mïnø, kɑ yɑ tyeg gen, ge gɑgg-ɑ yɑn. Tyëngpɑth ɑ́pëggi be pwödi yɑn, ge ɑ́dhɑ̈li wïyø ki pwödi yɑn. Ge ɑ́rëbi kömɑ ge gwɑdd-ɑ yɑn, de yɑ ce nɑ dhɑnhø me bɑ bøøl. Wuö, yï gït-ɑ wɑɑng yï oywödø? Yiel yɑn kì cinggi gen, yiel wëyɑ ki ngurrɑni! O yï pwøjɑ kì buri jií, o yï lenhɑ kì bøli gen bënn. Tyëngmɑ̈ɑ̈nø; tyëngpyed møgɑni, pëthi gen ko wëggí mïnø ki tyɑmɑ. Tyëng-ɑ wɑ̈dhi yɑn ki mɑɑnø, pëthi gen ko wëggí mïnø, yi bëëdɑ yɑ okïïmø. Bong mër me nyi yɑb yi gen, de ge nyi menn-ɑ tyëng-ɑ mɑɑr mër. Ge menn-ɑ yɑn, ge ceg-ɑ ryeerø kinni, “Ngee, gïn-ɑ ɑ́gwøøg ɑ́lidh yi wøn ki nyingi wøn!” De møgɑni ɑ́rum ki lidhø yi yïn, yïn ɑ Jwøng-ɑ Ácwɑ̈ɑ̈j, kɑ yï ko cög yï okudø, Wuö; Rií ko lɑ̈ɑ̈w, yïn ɑ Jwøng-ɑ Ácwɑ̈ɑ̈j! Dhwöödh Wuö, kɑ yɑ cwɑɑg, lïngí gønyɑ yïn ɑ Jwøgɑ, Jwøng-ɑ Ácwɑ̈ɑ̈j! Yï tir Wuö, nyuudh kinni yïɑ bɑ̈r pëthi gen ko wëggí mïnø yi orɑngɑ. Ge ko wëggí kwøb kinni, “Bene gïn-ɑ ɑ́dwɑddi yi wøn ɑnɑn! Wɑ̈thi wøn ɑ́kwööj!” Wiy tyëng-ɑ pëthi gen med ki orɑngɑ tyɑm, wiy wɑ̈thi gen muum gen. Wiy tyëng-ɑ kööbø ce ge lɑ̈w kibølɑ yɑ̈r gen, o wɑ̈thi gen lɑ̈ɑ̈y gen. Wiy tyëng-ɑ nyi dwɑddi gïndøj kiperɑ, ryeer gen ki medi pëëth, o ge nyi cigi gen ryeerø kinni, “Jwøng-ɑ Ácwɑ̈ɑ̈j dwøng nɑ ngø! Pyëwe nyii mïnø yi døøji bɑ̈ngge!” Codhe, o bëëdí yï tir töngɑ, o yɑ nyi rïïjɑ, yɑ lenh-ɑ yïn. Tyëngrijjø nyi rømm-ɑ gwøgi orøg ceth, Jwøk ɑ́bɑny yi gen, pɑ wør yi gen. Mɑ́ ri gen tïng gen mɑl cɑrø, ge orumø kinni orøøg gen koo yod yi Jwøk, kɑ gï cɑye. Ge kømm-ɑ kwøb mø rijjø, geki kwøbbi wëënyø, bong gïi peli wïj, wɑlɑ̀ dïdø me gøggi yi gen. Ge rømm-ɑ gøggi rɑj, kenyi ying gen yethi pënni gen, bong gïndøj me nyi gwøg yi gen, ge pɑ nyi wöl bɑ̈nyø ki gïgrijjø. Yïn ɑ Jwøng-ɑ Ácwɑ̈ɑ̈j, mɑ̈ɑ̈dø mií wɑ̈dh-ɑ mɑl, o møg-ɑ kwøb yi yïn, nyi mïdhí mïdhø ceth. Døøjí wɑ̈dh-ɑ mɑl ni kïttì, o gøggi dyër yi yïn, lɑ̈wi nɑ tyeli nɑɑm omelø. Yïn ɑ korri ji geki lɑ̈yy. Mɑ̈ɑ̈dø mií pere teg, yïn ɑ Jwøk! Wø nyi yömm-ɑ thɑ̈thi obërrí. Wø nyi thödh-ɑ yi yïn ki gïgcɑmm-ɑ ngenyø, wø ɑ́mëggí dhwɑ̈ng me dwøng. Yïn ɑ nyi muuj wëy, wø ɑ́lïdhi ki cɑr kì bɑng cɑrí. Mɑɑr tyëng-ɑ mɑɑr yïn, kɑ tyëngtir nyi göggí gïgdøj. Tyëngɑthwøg ko wëggí pɑ̈ɑ̈r kömɑ, wɑlɑ̀ yɑ ko wëggí cyeddø yi tyëngrijjø. Lidh tyëngrijjø kɑ ɑ́pɑ̈ɑ̈dh gen. Ge ɑ́cöög kenyɑni, ge ɑ́dhɑ̈li dhwödhø. Pyëwí ko lïngi kipe tyëngrijjø, tyëngorøg ko mood. Ge ójwɑn lɑ̈ɑ̈nyø ni lum ɑ nyi thwøw, ge óni lum-ɑ mɑr, ɑ nyi nɑ̈r kɑ othøø. Gɑ̈nní Jwøng-ɑ Ácwɑ̈ɑ̈j kɑ yï gøggi gïgdøj, o yï bëëd kì pinyí, e bong gïn böggi yi yïn. Bëëd pyëwí med ki Jwøng-ɑ Ácwɑ̈ɑ̈j, o yï thödhe ki gïg-ɑ dwɑddi yi pyëwí. Mëggí rií Jwøng-ɑ Ácwɑ̈ɑ̈j, gɑ̈nní o yï ókøny yi en. Døøjí geki gøggí dyër ócïbe kɑ̈jji gïn, o ge mëëny gen ni cɑɑr dicɑ̈ng. Yïd Jwøng-ɑ Ácwɑ̈ɑ̈j, kɑ yï ngïïn, pyëwí ko ngɑɑm kipe jɑmmi tyëng-ɑ dönyi, geki tyëng-ɑ nyi gwir gwøgi gïgrijjø kɑ gï nyi lwɑ̈ng gen. Rií ko wëggí tyɑmø yi rummì geki ɑkørr! Kipe møgɑni nyi nywøl-ɑ rɑj yøw. Tyëng-ɑ gɑ̈nni Jwøng-ɑ Ácwɑ̈ɑ̈j, piny óløg mi gen, de tyëngrijjø ócyeed wɑ̈g. Tyëngrijjø ólɑ̈ɑ̈ny bɑng keny me thinh, ge óyɑb yi yïn, de ge koo yod yi yïn. De piny ókwɑny yi mööl, kɑ ge obëëdø ki døøjø, kí medi pëëth kí mër. Tyëngrijjø rømm-ɑ göggi tyëngdøj ki rɑj, gï gɑwwi yi gen kɑ mɑ̈ɑ̈nø. De tyëngrijjø ceg kɑ gɑggø yi Jwøng-ɑ Ácwɑ̈ɑ̈j, mɑ́ e ngɑ̈ny wøw kinni cyɑ̈ɑ̈ng gen ɑ́cyɑ̈ngi. Tyëngrijjø pilli gen ɑ́wöödh gen wɑ̈g, wethhi gen ɑ́rum ki tënnø, kipe nɑ̈gi tyëngjɑdø møg-ɑ nyingi gen cɑn, geki tyëng-ɑ nyi gøggi dyër. De ge ónɑ̈g yi pilli gen keti gen, kɑ wethhi gen ótørrø. Gïg-ɑ nøg møg-ɑ yï tyëngtir, lɑ̈w kibøli kɑ̈r-ɑ ngenyø kì yï tyëngrijjø, mɑ́ teng-ɑ yï tyëngrijjø ókwɑny yi Jwøng-ɑ Ácwɑ̈ɑ̈j, de tyëng-ɑ døj ókorre. Jwøng-ɑ Ácwɑ̈ɑ̈j tyëng-ɑ mïdhi cigge nyi korre’ korrø, o piny óbëëd ɑ́ mi gen gïti ɑtheer. Wɑ̈thi gen koo lɑ̈ɑ̈y kì cyɑ̈ɑ̈ng rɑj, ge óyɑ̈ng kì yij kɑ̈j. De tyëngrijjø óthøw, tyëng-ɑ mɑɑn Jwøng-ɑ Ácwɑ̈ɑ̈j ótwer ni lum, ge ówɑ̈ɑ̈ny ni yïrø. Tyëngrijjø nyii wïdhø, o ge pɑ nyi cudø, de tyëngdøj nyi wɑ̈dh-ɑ muujø yøw. Tyëng-ɑ ɑ́gyëdh yi Jwøng-ɑ Ácwɑ̈ɑ̈j, bene gen ɑ ókwɑny piny. Jwøng-ɑ Ácwɑ̈ɑ̈j dhɑnhø nyi nyudhe’ nyudhø ki yuu-ɑ døj, o tyëng-ɑ pyëwe med ki gïn nyi korre’ korrø. Ge pɑ nyi cöög piny kenyi pɑ̈ɑ̈dh gen, mɑ́ ge nyi tïng-ɑ mɑl yi Jwøng-ɑ Ácwɑ̈ɑ̈j. Anɑn yɑ ɑ́døngi, yɑ ɑ́bëëd ki keny me bɑ̈ɑ̈r yɑ nuti lïdhø ki ngɑndøj mɑ ɑ́wiy piny yi Jwøng-ɑ Ácwɑ̈ɑ̈j, wɑlɑ̀ me nyige ɑ́kwɑ̈jji ki gïncɑm. Nyi wɑ̈dh-ɑ muujø yøw, kɑ ji møøgø nyi wïdhe, o nyige bɑ ɑgyëdh. Bɑny rɑj, kɑ yï gøggí gïgdøj, o kwɑrrí óbëëd gen gïti ɑtheer, mɑ́ Jwøng-ɑ Ácwɑ̈ɑ̈j nyi mɑɑr-ɑ gøggi dyër, o tyëng-ɑ nyi mïdhi yïëyø mi gen, gï pɑ nyi wiye piny. Gï nyi korre’ korrø gïti ɑtheer, de kwɑrri tyëngrijjø ócyeed wɑ̈g. Tyëngtir piny ókwɑny yi gen, kɑ ge obëëdø kì yije gïti ɑtheer. Kwøbbi ngɑntir bɑ kwøbbi peli wïj, o nyi gøgg-ɑ dyër ceth. Ciggi Jwøge nyi mïdhe’ mïdhø ki pyëwe, o gï pɑ nyi pɑ̈nye ki wiyø. Ngɑnrɑj lebb-ɑ ngɑntir, gø dwɑdde’ nɑ̈gø, de pɑ wëggi pɑ̈dhi cinge yi Jwøng-ɑ Ácwɑ̈ɑ̈j, wɑlɑ̀ gø koo wëgge cɑyø keny-ɑ ógøønyii. Gɑ̈nní Jwøng-ɑ Ácwɑ̈ɑ̈j, kɑ cigge mïdhí, o yï ótïnge mɑl, kɑ yï wëgge kwɑnyi piny, kɑ tyëngrijjø lidh yi yïn ge cyeed-ɑ wɑ̈g. Yɑ ɑ́lïdhi ki ngɑnrɑj, me yije wöny, ɑ́lidhɑ e wɑ̈dhi mɑl, ni yɑdh sɑndɑl Lubnɑn, de ɑ́lidhɑ e tøøk keny-ɑ ɑ́cigɑ kɑ̈li kenyɑni, kɑ yɑbɑ, de nuti yood yɑn. Lidh ngɑndøj, geki ngɑntir, ngɑn bëëde døøj nyii yïddø ki kwɑrr, de tyëngrijjø nyii nɑ̈gø kinni tweet, kɑ wɑ̈thi kɑ̈lli gen ópɑ̈ɑ̈dhø. Tyëngtir nyii korø yi Jwøng-ɑ Ácwɑ̈ɑ̈j, kɑ gï yiele ki rɑj. Ge nyii kønyø yi Jwøng-ɑ Ácwɑ̈ɑ̈j, kɑ gï døme, gï nyii yielø yi en kì cinggi tyëngrijjø, mɑ́ ge nyi yömm-ɑ yïe. Jwøng-ɑ Ácwɑ̈ɑ̈j, yɑ ko cɑɑy, e pyëwí dɑ liny! Mɑ́ riɑ ɑ́kïdhí ki kedd ki wethí, yɑ ɑ́gøøj piny yi yïn. Yɑ ceg-ɑ orɑng kì bɑng kɑ̀ di pyëwí liny, dëlɑ bëne ceg-ɑ rɑ̈m kì bɑng orøgɑ. Orøgɑ wïjɑ ɑ́pöödhe, yɑ ɑ́mude, yɑ ɑ́tor yi pege, dhɑ̈li tyëddø. Kedd-ɑ riɑ ɑ́göög gɑ ɑ́wudd kì bɑng dhëëgɑ. Riɑ ɑ́cwønyɑ, o yɑ ɑ́nyøng, yɑ nyi tyëg-ɑ cɑ̈ng yɑ óywöngø. Dëlɑ bɑ mɑc, yɑ ɑ́cyɑ̈ngi ki thøø. Yɑ ɑ́dhɑ̈ɑ̈r, yijɑ ɑ́pɑ̈d, yɑ ceg-ɑ currø yi rɑ̈ɑ̈m dëlɑ. Jwøng-ɑ Ácwɑ̈ɑ̈j, gïn-ɑ dwɑddɑ ngɑ̈nyi yi yïn, gønyɑ olïngø yi yïn. Pyëwɑ ceg-ɑ pöd, dëlɑ ɑ́nyönhi, nyingɑ ɑ́dhïïdh yi ywøg. Mɑ̈dhhɑ geki wɑddɑ pɑ cyɑ̈ngi kì butɑ, kipe kɑ̈jj-ɑ ledh ki riɑ, cɑgg ɑ́ tyëng gøl wøn, ge cungi ge lɑ̈wi. Yɑ ɑ́ceg ki ɑ́kɑ̈llì yi tyëng-ɑ dwɑddi nɑ̈gi yɑn. O tyëng-ɑ dwɑddi göggi yɑn ki rɑj, lwɑ̈gg-ɑ yɑn ki kwøbbi nɑ̈gɑ, ge pɑ wöl wïyø ki rømmi göggi yɑn ki rɑj. Yɑ pɑ lïngø, yɑ nɑ ming. Yɑ pɑ kööbø, yɑ nɑ ngɑn ójwɑngi lebe bɑ ɑtwöj. Yɑ nɑ tyëng-ɑ pɑ cuggi löggø, mɑ́ ge pɑ lïngø. Den-ɑ́ yïn ɑ gɑ̈nnɑ, yïn ɑ Jwøng-ɑ Ácwɑ̈ɑ̈j, yïn ɑ óløøg kwøbbɑ yïn ɑ Jwøgɑ, Jwøng-ɑ Ácwɑ̈ɑ̈j. Pëthi tyëngmɑ̈ɑ̈nø ko wëggí mïnø yi orɑngɑ, ge ko wëggí thwøgø kipe pɑ̈ɑ̈nhɑ. Yɑ køm-ɑ pɑ̈ɑ̈dhø, o dëlɑ ceg-ɑ rɑ̈m. Yɑ töng-ɑ orøgɑ, mɑ́ yɑ ɑ́göjje olïng pyëw. Tyëngmɑ̈ɑ̈nø dëlli gen yöd, o ge teeg, yɑ wɑ̈dhi kɑ mɑɑnø yi ji mø gïïr yøw. Tyëng-ɑ nyi göggi yɑn ki rɑj ngö ge nyi göggɑ’ gïndøj, ge mɑɑn-ɑ yɑn kipe kenyi gøggɑ dyër. Yɑ ko wiy piny, Wuö, yï ko bëëd yï lɑ̈wi ki yɑn, Jwøgɑ! Jwɑn yɑn ki yielø, Wuö, yïënɑ! Yɑ ɑ́kööb kinni, “Riɑ ókorrɑ ki gïg-ɑ nyi gøggɑ, o lebɑ koo wëggɑ kɑ̈nø ki orøg, Bong gïjø men-ɑ ókwøbɑ kenyi bëëd tyëngrijjø cyɑ̈gi.” Yɑ ɑ́bëëd yɑn nɑ ming, yɑ kudø kudø, bong gïjø mɑ ɑ́kwøbɑ cɑgg ɑ́ gïndøj! De orɑngɑ ɑ́yöd e ceg-ɑ pëddø, kɑ yijɑ opɑ̈dø yi rummì. Kenyi pëddɑ ki rumø, yɑ nyi ceg-ɑ pëddø ki orɑng. Yɑ pɑ cuggi cögø yɑ pɑ pëjji kinni, “Jwøng-ɑ Ácwɑ̈ɑ̈j, yɑ ócög yɑ obëëdø kì kömi piny? Yɑ óthøw ɑ wɑɑng? Köbbí yɑn kinni yɑ ójwɑn thøø!” Cyɑ̈nggɑ ɑ́gwøg yi yïn ge nøg kì kömi piny! Kì yïí, bong gïn wɑngi yi gen. Dhɑnhø bëne nɑ kudhø ki yømø, nɑ tïbø me thiinh yøw. Gïg-ɑ ɑ́gøggi yi gen bënn bong per gen. Ge nyii cungø ki kɑ̈r, de ngɑn-ɑ ókwɑny kɑ̈rɑni kwïj yi gen. Anɑn, Wuö, ɑ́ ngø ɑ yïd yi yɑn? Yïn ɑ ngɑ̈dhɑ. Yiel yɑn ki orøgɑ bëne, kɑ yɑ ko wëggí gɑggø yi dhëgg. Yɑ ceg-ɑ kudø, bong gïn kwøbɑ, mɑ́ yïn ɑ ɑ́wëggi yɑn orɑng ni men. Yɑ ko gøøj këti! Yɑ køm-ɑ nɑ̈gø yi ɑluddí. Dhɑnhø nyii cɑyø yi yïn kiper orøge, kɑ jɑmm-ɑ mɑɑre nyi rënyi yi yïn, ni kenyi cyɑ̈ɑ̈m thoth. Kidyër, dhɑnhø nɑ kudhø ki yømø yøw. Lïngí kwɑ̈jjɑ Wuö, kɑ ywøgɑ lïngí, yï ko nyi kud kenyi ywöngɑ, mɑ́ yɑ nɑ kɑ ɑ́bëëd kweyyɑ bënn ceth, yɑ bɑ wëlí kiper keny me thiinh. Wiy yɑ kɑlɑ yïddø ki medi pyëw, kɑ̈ng-ɑ nuti kedh yɑn, o yɑ lɑ̈ɑ̈nyɑ. Yɑ ɑ́ngïïn yɑ yïd-ɑ kunyi Jwøng-ɑ Ácwɑ̈ɑ̈j, ɑkyëne pɑ̈dde, kɑ ywøgɑ lïnge. Yɑ ɑ́ywɑ̈ɑ̈je wɑ̈g kì yij buur thøø geki ɑ́bubudh; yɑ ɑ́yiel ki ɑyejø me möggi. Kɑ tyellɑ cïbe kömi kït me teeg, o yɑ cögɑ yɑ pɑ ryeny. Yɑ ɑ́pwönye ki wör mø nyɑ̈n, gɑ wörri lenhi Jwøgee. Ji mø gïïr ólïdhi, kɑ ge obwøgø, kɑ Jwøng-ɑ Ácwɑ̈ɑ̈j gɑ̈nni yi gen. Tyëng-ɑ gɑ̈nni Jwøng-ɑ Ácwɑ̈ɑ̈j, ri gen dɑ gyëdh! Tyëng-ɑ pɑ nyi kedhi bɑng jwögg-ɑ pɑth, wɑlɑ̀ ɑ pɑ nyi rëbi ki tyëng-ɑ mɑlli jwöggɑni, ri gen dɑ gyëdh! Wø ɑ́göggi yi yïn ki gïg mø ngenyø, yïn ɑ Jwøøg wøn, Jwøng-ɑ Ácwɑ̈ɑ̈j, bong ngɑn pɑ̈ɑ̈r ki yïn! Yï ɑ́göög ki gïïngɑ̈ngø mø gïïr kiper wøn. Ge gïïr cɑrø, ge pɑ cuggi kwøbø yi yɑn, kwɑnni gen gïïr cɑrø. Yï pɑ dwɑddi gëdhhì geki jɑmm-ɑ nyi muuj, lɑ̈yy-ɑ nyi rɑ̈b kì wïj këli lɑm, wɑlɑ̀ gëdhhi orøg, pɑth ki gen ɑ dwɑddi yi yïn. De wø ɑ́nëngi yi yïn ki yïthh, møg lïngi wøn kwøbbí. Codhe, ɑlöggɑ kinni, “Yɑn èn. Pwönyí bɑ ɑgwed kì yij wɑ̈nyi Cigg. Pyëwɑ med ki gwøgi gïn-ɑ dwɑddi yi yïn, yïn ɑ Jwøgɑ. Ciggí ying-ɑ pyëwɑ.” Bɑ kì bøli jií bënn, yïn ɑ Jwøng-ɑ Ácwɑ̈ɑ̈j, ɑ ɑ́kwøbɑ kër-ɑ ɑ́yieel wøn. Ngɑ̈nyi yi yïn kinni yɑ pɑ wïyi ki kømmi møgɑni. Kwøbbi yiel-ɑ ɑ́yieel yɑn nuti kɑɑn yɑn, eni kwøbbi mɑ̈ɑ̈dø mií geki dyër, kí kunyí. Yɑ nuti kudø kì bøli jií bënn; ki kømmi kwøbbi døøjí, kí mɑ̈ɑ̈dø mií. Yïn ɑ Jwøng-ɑ Ácwɑ̈ɑ̈j, ngɑ̈nyi yi yɑn kinni lɑ̈ɑ̈m pyëwí kiperɑ pɑ thumi. Yɑ ómïdhi yi mɑ̈ɑ̈dø mií geki gøggí dyër! Yɑ ɑ́tyeg yi rɑj mø gïïr, mø pɑ cuggi kwɑnø! Yɑ ɑ́mɑg yi orøgɑ, nyingɑ pɑ nëënø, orøgɑ gïïr kibøli yëyyi wïjɑ, o minɑ ɑ́cöd. Yïn ɑ Jwøng-ɑ Ácwɑ̈ɑ̈j, yiel yɑn, jwɑn yɑn ki kønyø! Wiy tyëng-ɑ ɑ́dwɑddi nɑ̈gi yɑn, wɑ̈thi gen muum gen, o ge tyɑm. Wiy tyëng-ɑ pëthi gen med ki kɑ ɑ́yïddɑ ki rɑj, døøg gen cyɑ̈n, ge yɑ̈rø. Wiy tyëng-ɑ gɑggi yɑn, yɑ̈r gen keny-ɑ ótyɑɑm gen. De wiy tyëng-ɑ nyi bï yïí, bëëd gen pëthi gen med. Wiy tyëng-ɑ mɑɑr yïëdø mií, nyi kööb gen kinni, “Jwøng-ɑ Ácwɑ̈ɑ̈j dwøng nɑ ngø!” Yïn ɑ Jwøng-ɑ Ácwɑ̈ɑ̈j, yɑ nyødh o wɑngɑ cɑn, de wïjí nuti wïlø ki yɑn. Yïn ɑ bɑ Yïënɑ, o yïn ɑ bɑ Jwøgɑ, jwɑ̈ní be kønyi yɑn! Tyëng-ɑ nyi rumø kiper tyëng-ɑ nyingi gen cɑn, ri gen dɑ gyëdh, ge óyiel yi Jwøng-ɑ Ácwɑ̈ɑ̈j kì yethi rɑj. Ge ókorri yi Jwøng-ɑ Ácwɑ̈ɑ̈j, kɑ gï mïdhe ge onëënø, ge óbëëdø ki medi pëëth kì yij piny, gï koo wiye cinggi tyëngmɑ̈ɑ̈nø. Ge ókøny yi Jwøng-ɑ Ácwɑ̈ɑ̈j kì yij rɑ̈ɑ̈m dëlli gen, kɑ dëlli gïn wëgge yönø. Yɑ ɑ́kööb kinni, “Jwøng-ɑ Ácwɑ̈ɑ̈j, yɑ ɑ́røngi kì bølí, lɑ̈ɑ̈m pyëwí kɑ yɑ yieel ki rɑ̈ɑ̈m dëlɑ.” Tyëngmɑ̈ɑ̈nø kømm-ɑ rɑj kì riɑ. Ge dwɑdd-ɑ kinni o yɑ thøwɑ, o nyingɑ wïl gen. Tyëng-ɑ nyi bï be këëmi yɑn kømm-ɑ møøgø, ge yɑb-ɑ kwøbb-ɑ rijjø kì riɑ, o gï ókømmi gen kì yij piny bëne keny-ɑ ókedhi gen wɑ̈g. Tyëng-ɑ mɑɑn yɑn bënn ceg-ɑ möngø, ge kømm-ɑ kwøb mø rijjø kì riɑ. Ge okööbø kinni, “Köme ɑ́pɑ̈dhi yi gïnrɑj, pɑ dhwödhi mɑl kì yij pyëne këti.” Cɑgg ɑ́ mɑ̈dhhɑ, mɑ̈dhh-ɑ gɑ̈nnɑ, ɑ nywɑ̈ɑ̈g wøn ki gïncɑm, ri gen ɑ́lugi gen yɑn. De yïn ɑ Jwøng-ɑ Ácwɑ̈ɑ̈j, lɑ̈ɑ̈m pyëwí ki yɑn, kɑ yɑ tïng mɑl, o kejɑ colɑ kì tyëngmɑ̈ɑ̈nø. Yɑ ko wëggí tyɑmø yi gen, o yod yi yɑn kinni pyëwí med ki yɑn. Yɑ ókøny yi yïn, mɑ́ yɑ nyi gøgg-ɑ dyër. Lenhu Jwøng-ɑ Ácwɑ̈ɑ̈j, Jwøøg Isrɑil! Lenhu en ɑnɑn gïti ɑtheer! Amen! Amen! Yï okønø kì pyëwɑ, yïn ɑ Jwøng-ɑ Ácwɑ̈ɑ̈j, ni kenyi køni pyëw tenø ki pïg ngij. Riɑ dɑ röödhø kiperí, yïn ɑ Jwøng-ɑ Nëënø, ɑ́ kì wɑɑng ɑ óbëënɑ be mɑ̈ddø bølí? Yɑ cɑm-ɑ pïi nyingɑ kì wɑ̈r kí dicɑ̈ng, tyëngmɑ̈ɑ̈nø rïïj ge pyëny-ɑ yɑn kinni, “Ágøne Jwøgí?” Pyëwɑ nyii rɑ̈mø kenyi pɑrɑ gïg-ɑ ɑ́pöödh, kenyi kedhɑ ød Jwøk kyeel kí ji mø gïïr, ge pyejj-ɑ yi yɑn, o ge óryeerø pëthi gen med, ge lenh-ɑ Jwøk. Á kipe ngø ɑ bëëd pyëwɑ rɑɑj kinnï? Á kipe ngø ɑ di kömɑ ɑkørr? Yɑ óngɑ̈dh Jwøk, Jwøk ólenhɑ këti, Jwøng-ɑ bɑ yïënɑ ólenhɑ. Wiy Jwøng-ɑ Ácwɑ̈ɑ̈j nyodhe mɑ̈ɑ̈dø mee kì dicɑ̈ng, o yɑ ówörɑ kì wɑ̈r, yɑ kwɑjj-ɑ Jwøgɑ, yɑ kwɑjj-ɑ Jwøgɑ kipe wëyɑ. Yɑ köbb-ɑ Jwøk, ngɑn-ɑ korri yɑn kinni, “Á kipe ngø ɑ wïl wïjí ki yɑn? Á kipe ngø ɑ rɑngɑ kì cinggi tyëngmɑ̈ɑ̈nø kinnï?” Yɑ ɑ́nyönhi yi yɑ̈ddi gen, kenyi rïïj ge pyëny-ɑ yɑn kinni, “Ágøne Jwøgí?” Á kipe ngø ɑ bëëd pyëwɑ rɑɑj kinnï? Yɑde ɑ rɑngɑ kinnï? Yɑ óngɑ̈dh Jwøk, Jwøk ólenhɑ këti, eni yïënɑ, o bɑ Jwøgɑ. Yïn ɑ Jwøk, nyodh kinni yïɑ bɑ̈r, kɑ yɑ cwɑɑg ki ji-ɑ kwïj Jwøk, yiel yɑn ki tyëngpyed; tyëngrijjø! Yïn ɑ nyi kor yɑn, yɑde ɑ wiy yɑn piny? Á kipe ngø ɑ rɑngɑ kì cinggi tyëngmɑ̈ɑ̈nø kinnï? Ör cɑrí geki dyërí, wiy yɑ pyejji yi gen, wiy yɑ kɑ̈ɑ̈l gen Dhɑyøn Kïti Kwërí, geki Kengí keny-ɑ yije bëëd yi yïn. Codhe, o yɑ kedhɑ këli lɑɑm Jwøk, Jwøng-ɑ nyi thödhi yɑn ki medi pyëw. O thømɑ pwödɑ, o yɑ wörɑ yɑ lenh-ɑ yïn, yïn ɑ Jwøk, yïn ɑ Jwøgɑ. Á kipe ngø ɑ bëëd pyëwɑ rɑɑj kinnï? Yɑde ɑ rɑngɑ kinnï? Yɑ óngɑ̈dh Jwøk, Jwøk ólenhɑ këti, eni ngɑn-ɑ køny yɑn, o bɑ Jwøgɑ. Álïngi yi wøn ki yïthhi wøn yïn ɑ Jwøk, wø ɑ́köbbi yi kweyyi wøn ki gïgdøngø møg-ɑ ɑ́gwøg yi yïn kì bøli kej gen, kì yethi cyɑ̈ngg-ɑ ɑ́pöödh kɑ̈ge dööng, kí kër-ɑ ɑ́cyeddí tyëngrijjø, kɑ jií cïb piny gen, kí kër-ɑ ɑ́cɑɑy pödhh-ɑ kyeelø kɑ jií kej gen tyeeny kidøøj. Jií piny nuti mɑɑg gen kɑ tøngg, nuti kwɑɑny gen kɑ tegi gen, bɑ yïn ɑ ɑ́thödhi gen ki tegø keny-ɑ ɑ́bëëd yï nud kì kelli gen. menɑni nyodh-ɑ kinni, ge ɑ́bëëd ge mɑɑr yi yïn. Yï bɑ rɑ̈dhɑ, o yï bɑ Jwøgɑ yïn ɑ nyi wëggi jií tyɑ̈mø, kɑ tyëngmɑ̈ɑ̈nø nyi tyɑm yi wøn ki tegí. Yɑ pɑ gɑ̈nni tøng-ɑ cingɑ wɑlɑ̀ pil-ɑ kɑ̈llɑ, kinni yɑ óyiel yi gen. De wø ɑ́yiel-ɑ yi yïn ki tyëngmɑ̈ɑ̈nø kɑ tyëng-ɑ mɑɑn wøn tyɑm yi yïn. Wø ócög wø lejj-ɑ yïn o yï pøjji yi wøn gïti ɑtheer. De ɑnɑn wø ɑ́bɑny yi yïn, kɑ wø wëggí tyɑmø Yï ɑ́wïyi ki kedhi kej liny kyeel ki yɑɑy wøn. Wø ɑ́wëggí cyeddø yi tyëngmɑ̈ɑ̈nø kɑ jɑmmi wøn kɑb yi gen. Wø ɑ́wëggí ngɑllø ni dyëg, wø ɑ́kedhhi yi yïn kì yethi pödhh-ɑ pɑth. Jií ɑ́ngeew yi yïn wɑ̈g ki gïjø me bong pere de ge ce bong-ɑ per gen. Gïn-ɑ ɑ́göggi wøn yi yïn ɑ́lidh yi pödhh-ɑ buti wøn, kɑ ge døøg-ɑ be gɑggi wøn. Wø ɑ́wëggí tugø yi pödhh-ɑ kyeelø ge pödd-ɑ bullì kì bɑng kɑ ɑ́tyɑɑm wøn yi gen. Yɑ cyɑ̈dhi riɑ biidh yɑn yɑ cyɑ̈dhi yɑ yɑ̈rø, kɑ ɑ́lïngɑ gwɑnn-ɑ gwɑddi yɑn, yi tyëngmɑ̈ɑ̈nø geki tyëng-ɑ mɑɑn yɑn. Møgɑni bënn ɑ́pɑ̈dhi kömi wøn, ngö yï nuti wïlø kì wɑ̈thi wøn, wɑlɑ̀ lwöm-ɑ kɑɑmee nuti bɑɑny wøn. Yï nuti lugi wøn ngɑ̈thi wøn, o ciggí nuti pyeem wøn. De wø ɑ́yöd wø wiyí kelli óthönhi pɑ̈l, wø ɑ́wiy yi yïn yij muudhi thøø. Ke di wiy wøn mɑlli Jwøøg wøn, kɑ wø ókwɑ̈jjø ki jwögg møøgø, møgɑni di yod yi yïn, yïn ɑ Jwøk, mɑ́ gïg-ɑ kɑnni kì pëëth ngɑ̈nyi yi yïn. De bɑ kiperí yïn ɑ Jwøng-ɑ Ácwɑ̈ɑ̈j, ɑ rïïj wø ceg kɑ nɑ̈gø, ɑ mïdhi wøn ni dyëg møg kïdhi be ngɑlø. Dhwöödh Wuö, yïde ɑ cɑɑg nenø? Dhwödhí mɑl! Wø ko bɑɑny gïti ɑtheer. Yïde ɑ pɑ̈ní, ɑ lugi wøn ngɑ̈jí? Wïjí ko wëggí wïlø ki orɑɑng wøn. Wø ɑ́pɑ̈ɑ̈dh, wø ɑ́nyøn kì piny Wø ɑ́tyɑm, wø ɑ́dhɑ̈li dhwödhø! Dhwödhí mɑl, bïí køny wøn! Køny wøn ceth, mɑ́ wø mɑɑr yi yïn! Wïjɑ ɑ́pɑ̈ng yi kwøbbi myëërø keny-ɑ ɑ́cɑɑgɑ rɑ̈dh ki wör møg. Lebɑ nɑ gɑlɑɑm ngɑn ngɑ̈ny gwed kidøøj, lebɑ ɑ́yöni yi cɑɑg. Yïn ɑ myër kì kelli cwøw bënn, yï ngɑ̈ny kwøb kidøøj, bene ɑ gyëëdh yïn yi Jwøk gïti ɑtheer. Kwɑny pilí yïn ɑ rɑ̈nh teg, yï dwøng o yï bɑ ɑdhwɑ̈ng. Pödhí bølí kɑ yï tyɑ̈ɑ̈m, yï nyɑg-ɑ per gøggi dyër! Yï ótyɑ̈mø ceth kì bɑng tegí! Nywøli wethí bedh, ge twïyy-ɑ minni tyëngmɑ̈ɑ̈nø, pödhh ceg-ɑ pɑ̈nhhø kì bølí. Kwøm-ɑ ɑ́mëggi yïn yi Jwøk, óbëëdø gïti ɑtheer. Jií jɑɑg yi yïn kɑ gøggi dyër. Yï mɑɑr-ɑ gïn-ɑ bɑ dyër, o rɑj mɑɑn yi yïn. Bene ɑ yieeny yïn yi Jwøk. Jwøk yï ɑ́thödhe ki medi pyëw kibøli rɑ̈nhh-ɑ kyeelø. Yømi ógudhí ngwɑ̈ɑ̈j ɑ́ ryɑ̈ mor geki lubɑn, pyëwí nyii mïnø kenyi thoom thom kì gøldwøng men-ɑ bɑ ɑdhyɑw ki leggi lyej. Kwï mɑ̈nní kelli gen dɑ nyiirɑ̈dhh o bɑ̈rɑ̈dh ying-ɑ wïj kyëjí e thøø yi ruugø ki dhɑb me myëër. Nyɑn-ɑ nywøm yi rɑ̈dh, lïngí kwøbbɑ. Wïl wïjí ki tyëng pödhi wun geki wɑddi wun bënn. Yï ótyer yi rɑ̈dh kipe myërí, en ɑ bɑ wöw, lïngí kwøbbe. Yï ómuuj ki jɑmmì yi tyëng Suur tyëng-ɑ kɑ̈rø. Nyirɑ̈nh-ɑ dhɑjø ying-ɑ gøldwøng, e pëddi myëërø! Ógødhe ócwɑ̈jø kɑ kori dhɑb. Kɑ nyirɑ̈nhɑni muuj rɑ̈dh e ree dɑ ógødh kïdø, kí bɑ̈ngge møg-ɑ lwønggii kì bɑnge, woɑni muuj-ɑ en thyew. Ge ɑ́bï pëthi gen omedø, ge ɑ́kedhi gøldwøng. Yïn ɑ rɑ̈dhɑ, yï óyïddi ki wɑ̈dd mø gïïr, møg-ɑ ólunyi ki jɑ̈ggø gɑ rɑ̈nhì kì bɑngí, ge ógwøg yi yïn gɑ jyɑ̈ggì kì yij piny bëne. Nyingí ómïdhi yi wörɑ kì yethi rïjj bënn, o yï ólenhi yi ji bënn gïti ɑtheer. Wɑ nyi yömm-ɑ yï Jwøk, o en ɑ bɑ tegee, en ɑ nyi kunyi ceth kenyi bëën rɑj. Bene ɑ bëëd wɑ pɑ böggi, cɑgg piny ceg onhɑ̈nh kɑ kïttì pɑ̈dh-ɑ nɑɑm omeli dwøng, cɑgg nɑ̈mmi omelø ruur, kɑ ge ogöögø ki óböy kɑ kïtt-ɑ thønhø okïïrø. Dɑ nɑm me nyi muuj kɑɑldwøng, kɑɑl Jwøk ki medi pyëw, geki ød kwëër Ngɑn-ɑ Pëddi Döng. Jwøk nud kì kɑɑlɑni, o kɑɑlɑni pɑ cuggi rënyø, Jwøk ómööl be kønyii. Pödhh bënn óböggø, rɑ̈nhì ceg-ɑ kïïrø. Jwøk ɑ́göjji ni mɑl, kɑ piny olenyø. Wɑ ómïdhi yi Wïlɑ̈bø, Jwøng-ɑ Ácwɑ̈ɑ̈j, wɑ nyi yömm-ɑ yï Jwøøg Yɑgob. Bïu lidhu gïg-ɑ ɑ́gwøg yi Jwøng-ɑ Ácwɑ̈ɑ̈j. Lidhu gïïngɑ̈ngø møg-ɑ ɑ́gwøge kì kömi piny. Liny ɑ́cuunge kì yij piny bëne, wethh kí tøngg gï ɑ́tørre, kɑ ködd rɑ̈be ki mɑc! Okööbø kinni, “Cungu liny, o yod yi wun kinni, yɑn ɑ bɑ Jwøk. ngɑn-ɑ dwøng kì kömi pödhh bënn. ɑ dwøng kì kömi piny bëne.” Wɑ ómïdhi yi Wïlɑ̈bø, Jwøng-ɑ Ácwɑ̈ɑ̈j, wɑ nyi yömm-ɑ yï Jwøøg Yɑgob. Wun ɑ teedø bëne, pɑmu cinggi wun ki medi pëëth! Wör wun wu lenh-ɑ Jwøk! Mɑ́ Jwøng-ɑ Ácwɑ̈ɑ̈j, Ngɑn-ɑ Pëddi Döng, ceg kɑ böggø, en ɑ bɑ rɑ̈nhdwøng, ɑ jɑɑg lɑ̈bø bëne. Wɑ ɑ́wëgge tyɑmi ji-ɑ kyeelø, wɑ ɑ́wëgge jɑɑgi pödhh-ɑ kyeelø. Wɑ ɑ́yïënyye ki piny me bëëd yi wɑ, piny me pere thwøg wɑ, wɑ gøl-ɑ mɑɑr yi en. Jwøk kedh-ɑ mɑl wïj kwøme. Dɑ cwɑggi medi pëëth, kí kɑ̈ngì møg kødhhi kɑ̀ kedhi Jwøng-ɑ Ácwɑ̈ɑ̈j mɑl. Wör wun wu lenh-ɑ Jwøk, lenhu rɑ̈dhee ki wör! Jwøk ɑ bɑ rɑ̈ɑ̈dh lɑ̈bø bëne, wör wun wu lenh-ɑ en! Jwøk kwërø bëëd ɑ wïj kwøme, en ɑ jɑɑg pödhh bënn. Jɑggi pödhh-ɑ kyeelø ri gen ɑ́cøng gen, ge ɑ́rëbi ki jii Jwøøg Abrɑhɑm, Jwøng-ɑ Pëddi Döng, o teeg cɑrø kibøli jøliny bënn! En ɑ dwøng, ɑ jyɑ̈gø. Jwøng-ɑ Ácwɑ̈ɑ̈j ɑ dwøng, o en ɑ lenhi ki mendwøng, kì kɑɑl Jwøgee, kì Kïti Dhɑyøn kïti kwëre! Dhɑyøn, Kïti Jwøk bɑ̈r e myër, kɑɑl rɑ̈nhdwøng thödh-ɑ lɑ̈bø ki medi pëëth. Jwøk ɑ́nyuudh kinni bong gïn böggi kɑ̀ nude, kì yij döri kɑɑle. Rɑ̈nhì ɑ́rëbi, kɑ ge bï-ɑ be pɑ̈ɑ̈r kömi Kïti Dhɑyøn. De ge ɑ́ngɑ̈ng keny-ɑ ɑ́lidh ge gøn, ɑbwøg gen kɑ ge órengø. Ge ɑ́mɑg yi wɑ̈ɑ̈rø bënn, ni ngɑn pɑ̈dhi piny ki dhɑnhø. Ge nɑ sɑpïnɑ̀ me wøjji yi ɑpɑgø. Gïg-ɑ ɑ́gwøg cøn yi Jwøng-ɑ Ácwɑ̈ɑ̈j ɑ́lïngi yi wɑ, o ɑ́lidh yi wɑ ɑnɑn kì kɑɑl Wïlɑ̈bø Jwøgee, Jwøng-ɑ Ácwɑ̈ɑ̈j kinni, kɑɑlɑni ókorri yi en gïti ɑtheer. Yïn ɑ Jwøk, mɑ̈ɑ̈dø mií ɑ́pɑr yi wøn wø órumø kì ree, wø ying-ɑ Kengí. Nyingí olenhø kì yij piny bëne, kɑ perí wɑ̈dh-ɑ kömi piny bëne. Yï jyɑ̈gø yï gøgg-ɑ dyër, wiy pëthi tyëng Dhɑyøn mïni gen! Gønyy nyi cïbí kɑ̈jji gen ceth, wiy bëëd e dɑ medi pëëth kì kɑ̈ddi Yeudiyɑ̀. Wun ɑ jii Jwøk, wen wun Kɑɑl Dhɑyøn, kɑ udd-ɑ bɑ̈rrø kwɑn wun. Kɑ dörre dörr-ɑ teg lidh wun, kɑ dörr-ɑ thøø yi gerø nenni wun kidøøj. O rïny-ɑ óbï óköbbi yi wun kinni, “Jwøng bene Jwøgee ceth, en ɑ ópyejji wɑ ceth gïti ɑtheer.” Lïngu møg wu bënn! Lïng wun, wun ɑ tyëng-ɑ kömi piny bënn, tyëng-ɑ døngø kí møg-ɑ thønhø, kí tyëng-ɑ kɑ̈rø geki tyëng-ɑ nyingi gen cɑn. Rummɑ døøj, o yɑ kømm-ɑ kwøbbi peli wïj. Yïthhɑ ókënnɑ gɑ́j, o gïn-ɑ wɑngi yi gen lwøbɑ yɑ thom-ɑ thom. Yɑ pɑ böggi ki cyɑ̈ɑ̈ng rɑj, kenyi tyeeg yɑn yi tyëng-ɑ guud wɑngɑ, ni tyëng-ɑ ɑ́gɑ̈nni kɑ̈rri gen ge thwøgø thwøgø. Bong ngɑn cuggi yieli ree kete, bong gïn mëgge Jwøk ɑ́ kej wëye, mɑ́ gøømi wëyi dhɑnhø teeg cɑrø. Gïn-ɑ col pɑ kyëëw ki wëyi dhɑnhø, o cöge e pɑ thøw, o nëëne gïti ɑtheer. Ngɑ̈nyi yi ji bënn kinni ngɑn wïje pel nyii thøø thyew, o dhëg geki ngɑn wïje nøg ceg-ɑ thøø bënn. kɑ̈rri gen nyi döng-ɑ yï ji møøgø. Rörri gen bene kɑ̈lli gen gïti ɑtheer, ge ócög ge bëëd ɑ kunɑni; ngö ge ɑ́bëëd yï gen dɑ pìnyi gen cøn. Dhɑnhø pɑ cuggi yielø ki thøø yi dönge, de ceg-ɑ thøø ceth ni lɑ̈y. Lidh gïn-ɑ nyi bï kömi tyëng-ɑ nyi gɑ̈nni ri gen, lidh ryɑ̈ng-ɑ nyi pɑ̈dhi kömi tyëng-ɑ ngɑ̈dh kɑ̈rri gen, ge óthøw ni dyëg, o ge ókwɑy-ɑ yi thøø. Ge ótyɑm yi tyëngtir, dëlli gen ójwɑn kwɑ̈gø ge ólɑ̈nyyi pödhi tyëngthøø. De yɑ ódøm yi Jwøk, yɑ ómɑ̈ɑ̈ne thøø. Pyëwí ko nyi rënyi kenyi kɑ̈ri ngɑn megø, kɑ kɑ̈re ti-ɑ ngënyø, mɑ́ kɑ̈rɑni koo kɑ̈l yi en keny-ɑ óthøwe, pɑ kedhi yij rörø kyeel kí kɑ̈re. Cɑgg pyëwe med ki bëëde, kɑ pøjji kipe kɑ ɑ́yïdde ki døøjø, óthøw ceth, kɑ kedh-ɑ bɑng kweyye, kun-ɑ bɑ muudhø gïti ɑtheer. Dhɑnhø pɑ cuggi yielø ki thøø yi dönge, de ceg-ɑ thøø ceth ni lɑ̈y. Jwøk, Jwøng-ɑ Ácwɑ̈ɑ̈j ɑ kööbø, cwøll-ɑ kömi piny bëne, cɑg kì wɑɑng cyɑ̈ɑ̈ng mwøl gïti wɑɑng cyɑ̈ɑ̈ng böörø. Jwøk mëëny ɑ Dhɑyøn, kɑɑl-ɑ myëër cɑrø. Jwøgee obëënø, de pɑ bï e okudø, mɑc me pɑ̈mmø ɑ cyɑ̈dhi kì bøle, o cyɑ̈dh-ɑ́ɑ̀ yij ɑtunø me teeg. Mɑl geki piny ɑ́cwøle o ge lidh gen cɑy-ɑ cɑye jie. Okööbø kinni, “Cøngu tyëng-ɑ mïdhi ciggɑ, gen ɑ tyëng-ɑ ɑ́lwööb wøn, ɑ nyi nëngi yɑn ki gëdhhì.” Mɑl nyodh-ɑ bëëdi Jwøk e tir, kinni en kiree ɑ bɑ jɑngi burø. “Lïng wun, wun ɑ jiɑ, o yɑ kööbɑ, yɑ nyodh-ɑ bɑ̈jjí, yïn ɑ Isrɑil. Yɑ bɑ Jwøk, yɑ Jwøgí. Yï pɑ cɑ̈wwɑ kɑ per gëdhhí, gen ɑ gëdhh-ɑ rɑ̈b møg-ɑ nyi muuj yɑn yethi cyɑ̈ng. O cɑgg ɑ́ kinøw, yɑ pɑ dwɑddi wɑ̈dhhi lwɑgí, wɑlɑ̀ bong dyel me dwɑddɑ kì kelli dyëgí, Lɑ̈yyi pɑ̈l bënn bɑ møgɑ geki lɑ̈yyi wɑ̈thi kïttì. Winy bënn bɑ møgɑ, geki gïg-ɑ nëënø kì pɑ̈l bënn. “Ke di riɑ kɑ̈j, yɑ pɑ di cwöddi ki gïncɑm kì yïí, mɑ́ piny bɑ miɑ geki gïg-ɑ yije bënn. Yɑ nyii cyɑ̈mø ki rïnggi wɑ̈dhh? Wɑlɑ̀ yɑ nyii mɑ̈dhø ki remmi dyëg? Wiy pwøj bëëd gen gɑ gëdhh-ɑ mëggí Jwøk, kɑ Jwøng-ɑ Pëddi Döng nyi göggí gïn-ɑ ɑ́köngii ceth. Nyi cwølu nyingɑ cyɑ̈ɑ̈ng rɑj, o wu yielɑ, codhe, o yɑ lenhi yi wun.” De tyëngrijjø ɑ́köbbi yi Jwøk kinni, “Gede ciggɑ ɑ nyi tïngu gen dhøggi wun? Wude ɑ nyi kööb wun kì ri lwömɑ? Wu ɑ́bɑ̈nyi tyenyø yi yɑn, ciggɑ ɑ́bɑny yi wun. Kenyi lidhu kur, kɑ nyi gwøg wun ɑ́ mɑ̈ɑ̈dh wun, kɑ wu órëbø ki cwøw-ɑ nyi yɑ̈bø ki mɑ̈nn geki mɑ̈nn-ɑ nyi yɑ̈bø ki cwøw. “Wu nyi dwøngg-ɑ rɑj ceth, wu pɑ böggi ki pyed. Wu nyi tyer-ɑ gøønyi wɑddi wun ceth kɑ ge nyi göjji wun cwɑnyyi tyelli gen. Yɑ ɑ́kud keny-ɑ ɑ́gwøg wun møgɑni bënn bene ɑ rum wun kinni yɑ nɑ wun, De wu ɑ́cɑ̈wwɑ ɑnɑn, o cɑ́yi wun cïbɑ’ kömi wun ceth. “Lïngu møg, wu tyëng-ɑ wɑ̈thi wun wïlø ki yɑn, kipe wu ókɑggɑ, o bong ngɑn yiel wun! Pwøji yɑn bene gëëdhi men-ɑ nyi thödhi yɑn ki dhwɑ̈ng o tyëng-ɑ mïdhi ciggɑ bënn, ge óyielɑ ceth.” Lɑ̈ɑ̈m pyëwí ki yɑn, yïn ɑ Jwøk, kì bɑng mɑ̈ɑ̈dø mií. Rɑ̈ɑ̈j orøgɑ wɑ̈g, mɑ́ lɑ̈mpyëwí pɑ nyi thumi! Lwöög rɑjjɑ wɑ̈g bënn kɑ orøgɑ rɑ̈ɑ̈j wɑ̈g, o yɑ göögɑ yɑ tïl! Bɑ̈jjɑ ɑ́yodɑ, orøgɑ ying-ɑ bølɑ yethi cyɑ̈ng. Yɑ ɑ́røngi kì bølí; bɑ bølí ketí ɑ ɑ́røngɑ bølí ɑ ɑ́göögɑ ki orøg. O yï nuti bɑ̈jjø kɑ ɑ́cɑɑy yɑn. Yï ɑ́gwøg-ɑ dyër kɑ ɑ́cɑɑy yɑn. Yɑ ɑ́nywøl yɑ rɑɑj ceth, yɑ bɑ ngetorøg kër-ɑ ɑ́yood yɑn. Thödhí yɑn ki peli wïj mɑ́ yï dwɑdd-ɑ kinni gøggi dhɑnhø dyër e yije bong ɑ́dud. Nyiig orøgɑ, o yɑ dhïwɑ, lwøg yɑn, o yɑ lodɑ korø ki tɑrø. Wiy yɑ lïngɑ kwøbbi medi pyëw, mɑ́ cɑgg yɑ nyøng yïn, kɑ yɑ tørri yi yïn, pyëwɑ ócigi mïnø këti. Mïjjí nyingí orøgɑ, kɑ rɑjjɑ bënn rɑ̈ɑ̈j wɑ̈g. Cwɑ̈jjí yɑn ki minø me tɑr, yïn ɑ Jwøk, wëggí pyëwɑ tëngø, kɑ yɑ thödhi ki bëëntir. Yɑ ko ryeem kì butí; wëyí kwërø, ko wɑɑr kì yïɑ. Døøg yɑn ki thödhø ki medi pyëw men-ɑ nyi kɑ̈ɑ̈l yi yïëdø mií, kɑ wiy kwøbbí nyi lïngɑ ceth. Codhe, o tyëngorøg pwönyɑ ki ciggí o ge dwöög gen yïí. Yiel wëyɑ, yïn ɑ Jwøk kɑ yɑ yieel o døøjí töngɑ ki medi pyëwɑ. Wuö, yieb dhøgɑ, o yï lenhɑ. Yï di muujɑ ki gëdhhì, ge di rɑ̈bbɑ yïn, de pyëwí pɑ med ki gënh-ɑ nyi rɑ̈b bëne. Gënh-ɑ mëggɑ yïn, yïn ɑ Jwøk, bɑ möölø, ngɑn løg ree mölø, kɑ óyewø ki orøge pɑ bɑny yi yïn. Yïn ɑ Jwøk, lɑ̈ɑ̈m pyëwí ki Dhɑyøn, kɑ yï kunyí, ki døøgi dörri Yerusɑlem ki gerø. Codhe, o pyëwí mïne ki gëdhh-ɑ dyër, geki gëdhh-ɑ nyi rɑ̈b o wɑ̈dhh muuj gɑ gëdhhì kì wïj këli lɑm mií. Jɑlteg! Yïde ɑ thwøøg kipe rɑjjí? Døøji Jwøk bong cöge. Yï rum ɑ ri rënyi ji møøgø, lebí bedh nɑ nyɑtɑg. Yï rïïj yï kømm-ɑ pyed. Yï mɑɑr-ɑ rɑj geki pyed, o yï bɑny-ɑ døøjø geki dyër. Yï mɑɑr-ɑ cööbi ji ki kwøbbí, yïn ɑ ngeti pyed. De yï órënyi yi Jwøk gïti ɑtheer, yï ógwɑ̈ɑ̈re wɑ̈g kì gølí kɑ yï nyiige kì pödhi tyëngnëënø. Gïgɑni ólidh yi tyëngtir kɑ ge obwøgø, codhe, o yï gɑggi yi gen kinni, “Lidhu jɑl-ɑ nuti gɑ̈nni kinni óyiel-ɑ yi Jwøk, de ɑ́gɑ̈nn-ɑ döngi kɑ̈re, ɑ́rum cem e ókor yi rɑ̈je.” De yɑ nɑ yɑdh dhetun me twïyø kì ød Jwøk, yɑ gɑ̈nn-ɑ lɑ̈mpyëwe gïti ɑtheer. Yïn ɑ Jwøk, yɑ órïïj yɑ pøjj-ɑ yïn, kipe gïg-ɑ ɑ́gwøg yi yïn, yɑ ókööbø kì bøli jií; ge óköbbɑ kinni yï døj. Dhëgg okööbø ki pëthi gen kinni, “Bong Jwøk.” Ge rijjø bënn, ge gøgg-ɑ gïgrijjø, bong ngɑn göögø ki gïndøj. Jwøk ɑ́lïïdh piny kömi ji e ying-ɑ mɑl, o lïdhe mɑ́ di ngɑn wïje pel, kí mɑ di ngɑn nyi mɑllii. De ji ɑ́töngi pɑ̈l bënn, ge pɑ̈r bënn; ge rijjø. Bong dhɑnhø ɑ́kyel me göögø ki gïndøj, bong dhɑnhø ɑ́kyel kinni tek! Apëjji Jwøk kinni, “Ge kwïj wøw? Tyëngrijjø møg bënn kwïj wøw? Ge cɑm-ɑ jiɑ ni cɑmi gïncɑm o yɑ pɑ kwɑjji yi gen.” De ge ókölli böögø, me nuti pɑ̈nyi gen ki lidhø cøn, mɑ́ Jwøk cu tyëng-ɑ mɑ̈n ki jie gï ókedhhe. Ge ótyɑm yi Isrɑil ki menteg, mɑ́ ge ɑ́bɑny yi Jwøk. Yɑ ókwɑ̈jjø kinni o tyɑ̈mi Isrɑil bëe e kɑ̈ɑ̈l-ɑ Dhɑyøn. Pëthi tyëng Isrɑil ómïni ki mendwøng, keny-ɑ ówëggi gen døøgø ki dönyø yi Jwøk! Yïn ɑ Jwøk, yiel yɑn ki tegí. Pɑ̈d yɑn ki tegí kì yethi töjjì! Yïn ɑ Jwøk, lïngí kwɑ̈jjɑ, kɑ kwøbbɑ lïngí! Tyëngɑthwøg bï-ɑ be pɑ̈ɑ̈r kömɑ, tyëng-ɑ yethi gen wöny dwɑdd-ɑ nɑ̈gi yɑn, gen ɑ tyëng-ɑ nuti cïb kwøbbi Jwøk pëthi gen. De Jwøk bene en ɑ ókøny yɑn, en ɑ ócwɑg yɑn. Wiy rɑjji gen dwøøg ri gen yi Jwøk, gï órënye kipe rɑjj-ɑ ɑ́gøggi gen. Yï ónëngɑ ki gëdhhì, yïn ɑ Jwøng-ɑ Ácwɑ̈ɑ̈j, yï ópwøj yi yɑn; mɑ́ yï døj. Yɑ ɑ́yiel yi yïn ki ɑkørrɑ kɑ tyëngmɑ̈ɑ̈nø lidhɑ gɑ ɑtyɑm. Yïn ɑ Jwøk lïngí kwɑ̈jjɑ, yɑ ko lugí ngɑ̈jí kɑ̀ kwɑjjɑ yïn! Lïngí kwøbbɑ, kɑ ge løøg, köörɑ ɑ́buudh yi rɑj. Yɑ ɑ́kölli böögø yi rɑ̈ji tyëngmɑ̈ɑ̈nø, yɑ ɑ́dhɑ̈ɑ̈r yi guun-ɑ guud wɑngɑ yi tyëngrijjø. Ge nyi kɑ̈n-ɑ kömɑ ki rɑj, pëthi gen dɑ liny ki yɑn, o yɑ mɑɑn yi gen. Minɑ ɑ́cöd, o yɑ ɑ́dhɑ̈ɑ̈r yi böggi thøø. Yɑ ɑ́mɑg yi wɑ̈ɑ̈rø, dëlɑ ceg-ɑ kïïrø, yɑ ɑ́nɑ̈g yi wɑ̈ɑ̈rø. Ke di yïɑ obërr ni ɑkur yɑ di pɑ̈r, o yɑ di yïddɑ ki keny ywöömɑ. Yɑ di pɑ̈ɑ̈r kun lɑ̈wi, o yɑ di bëëdɑ kì pɑ̈l. Yɑ di yïddi ki keny pɑ̈nɑ kipe ɑtunø geki yøm-ɑ lëëdh. Bɑ̈nní dhøggi tyëngmɑ̈ɑ̈nø, yïn ɑ Jwøng-ɑ Ácwɑ̈ɑ̈j! Yɑ ɑ́lïdhi ki ruj geki wëërø kì kɑɑlɑni, e gø tyeeg gen kì dicɑ̈ng kí wɑ̈r, o yije pɑ̈ng yi ɑkørr. Rɑj ɑ gøggi kì yije; yethi yëëth pɑ̈ng yi ruj kí gwem. Ke di løge ngetimɑ̈ɑ̈nø ɑ gɑggi yɑn, yɑ di ngïïn, ke di løge ngetimɑ̈ɑ̈nø ɑ pwöd kööre ki yɑn, yɑ di pɑ̈ni. Dɑ́ men-ɑ́ yïn, yï wɑɑd wøn; yï ngɑn-ɑ bëëdø kì butɑ, o yï bɑ mɑ̈dhɑ. Wɑ nyii wɑ̈ɑ̈jø cøn kɑ wɑ nyii mɑ̈ddø kyeel kì Kengø. Wiy tyëngmɑ̈ɑ̈nø jwɑn gen thøø, wiy ge rengi gen piny ge nudd ge onëënø! Mɑ́ kɑ̈lli gen geki pëthi gen pɑ̈ng yi rɑj. De yɑ ywøøg-ɑ kö Jwøk o yɑ kønye, o yɑ óyiele ceth. Yɑ nyi ywøøg-ɑ kööre ceth kì mwøl, kí dicɑ̈ng kí wɑ̈r, o cwɑggɑ ólïnge ceth. Yɑ ódwöög yi en ki tɑrø kì yij liny-ɑ nyɑɑgɑ ki tyëngmɑ̈ɑ̈nø mø ngenyø. Jwøk ɑ ɑ́wöni e ojyɑ̈gø cøn, cwɑggɑ ólïnge kɑ gï tyɑme, mɑ́ ge ɑ́bɑ̈nyi yewø, o Jwøk pɑ böggi yi gen. Ngɑn-ɑ ɑ́bëëd ɑ́ wɑɑd wøn ɑ́pɑ̈ɑ̈r kömi mɑ̈dhhe, lwöbø ɑ́pɑ̈ɑ̈de. Dhøge ɑ́bëëd e yöm ni møw de pyëwe dɑ mɑ̈ɑ̈nø kwøbbe ceg-ɑ medø, de ge bɑ pilø me nɑ̈gø. Wïyí ɑkørrí Jwøng-ɑ Ácwɑ̈ɑ̈j, o yï ócwɑg yi en, tyëngtir pɑ nyi wëgge tyɑmø De bɑ yïn ɑ Jwøk, ɑ óleeng tyëngnɑ̈g geki tyëngpyed piny, e budi cyɑ̈nggi gen nuti thumø. De men-ɑ́ yɑn, yɑ ógɑ̈nn-ɑ yïn. Yïn ɑ Jwøk, lɑ̈ɑ̈m pyëwí ki yɑn mɑ́ yɑ ceg kɑ cyeddø, yɑ bɑ men nɑ̈g, yɑ rïïj wɑngɑ oguudø yi tyëngmɑ̈ɑ̈nø. Yɑ rïïj yɑ ceg kɑ nyønø yi tyëngmɑ̈ɑ̈nø ji mø gïïr dwɑdd-ɑ nyɑɑg ki yɑn. Kenyi bëëdɑ yɑ óböggø, yɑ nyi gɑ̈nn-ɑ yïn. Yɑ gɑ̈nn-ɑ Jwøk, o yɑ pɑ böggi ólenhɑ kipe gïg-ɑ ɑ́kwøbe kinni gï ógwøge. Á ngø ɑ cuggi göggi yɑn yi dhɑnhø yøw? Tyëngmɑ̈ɑ̈nø rïïj ge gögg-ɑ yɑn ki rɑj, ge rømm-ɑ kwøbbi göggi yɑn ki rɑj! Ge cong-ɑ ri gen kì gødd, ge lebb-ɑ yɑn ceth, ge dwɑdd-ɑ nɑ̈gi yɑn. Cɑy gen yïn ɑ Jwøk, kipe rɑ̈ji gen, tyɑm gen ki rɑ̈ji pyëwí! Kër-ɑ rɑngɑ ngɑ̈nyi yi yïn pïi nyingɑ ngɑ̈nyi yi yïn. Ge tøøk kì yij wɑ̈nyí? Cyɑ̈ng-ɑ ócwølɑ nyingí, tyëngmɑ̈ɑ̈nø ódøøg ngɑ̈thi gen. Yɑ ngɑ̈ny wøw kinni, Jwøk ying-ɑ tungɑ, Jwøng-ɑ Ácwɑ̈ɑ̈j ɑ kwøbbe lenhɑ. En ɑ gɑ̈nnɑ, o yɑ pɑ böggi. Á ngø ɑ cuggi göggi yɑn yi dhɑnhø yøw? Gïg-ɑ ɑ́köngɑ yïn ógwøgɑ, yïn ɑ Jwøk, yï ónëngɑ ki gëdhhi pwøj, mɑ́ yɑ ɑ́yiel yi yïn ki thøø, kɑ yɑ ocögø yɑ pɑ tyɑm. O yɑ ócyɑ̈dhi kì bøli Jwøk, kì yij cɑɑr nënnì. Lɑ̈ɑ̈m pyëwí ki yɑn yïn ɑ Jwøk mɑ́ yɑ ɑ́yömm-ɑ yïí. Yɑ pɑ̈n-ɑ thɑ̈thi obërrí gïti keny-ɑ ókwööj ɑtunø. Yɑ ywøøg-ɑ kö Jwøk, Ngɑn-ɑ Pëddi Döng, ɑ nyi mëggi yɑn gïg-ɑ dwɑddɑ bënn. Ólöggi kì mɑl, kɑ yɑ yiele, tyëng-ɑ guud wɑngɑ ótyɑm yi en. Dyër geki mɑ̈ɑ̈dø mee ónyudhe yɑn. Yɑ ɑ́tyeg yi tyëngmɑ̈ɑ̈nø mø ni ngurrì; mø ri gen di kɑ̈yi rïngi dhɑnhø. Leggi gen nɑ tøngg kí wethh lebbi gen nɑ pil mø bedh. Nyodh döngí kì mɑl, yïn ɑ Jwøk wiy dhwɑ̈ngí nënne kì yij piny bëne. Yɑ ɑ́ceg yi tyëngmɑ̈ɑ̈nø ki bøy, pyëwɑ ɑ́nyönhi. Yuuɑ ɑ́kunyi yi gen ki bur de ɑ́yöd ɑ́ gen ɑ pɑ̈dhi yije. Jwøk ɑ gɑ̈nnɑ ceth, lenhɑ’ lenhø ki wör! Riɑ ótyenyɑ, o yɑ wörɑ! O thømɑ pwödɑ! Yɑ ócyëëw kì bɑ̈ɑ̈rø. Yï ólenhɑ kì kelli pödhh, yïn ɑ Jwøng-ɑ Ácwɑ̈ɑ̈j yï ólenhɑ kì kelli ji. Mɑ̈ɑ̈dø mií wɑ̈dh-ɑ mɑl, dyërí gït-ɑ wɑ̈thi pøøl. Nyodh döngí kì mɑl, yïn ɑ Jwøk, wiy dhwɑ̈ngí nënne kì yij piny bëne. Wun ɑ jyɑ̈ggì, kwøb nyi cïb wu’ kɑ̈jji gen? Gønyyi ji bënn nyi ti kɑ cïb kɑ̈jji gen yi wun? Pɑth, bɑ rɑj ɑ rømmi yi wun yøw, o wu ruj-ɑ ji kì yij pödhø. Tyëngrijjø pɑ nyi cuggi tyenyø, ge ɑ́nywøl ge opëdø. Yethi gen pɑ̈ng yi kugø ni thöllì, ge nɑ byɑr ɑ nyi pedh gyegge, ɑ pɑ nyi yïëy thɑbø yi jɑlyɑdh, wɑlɑ̀ pɑ nyi cuggi wënyø yi ɑjwøgø. Tørrí leggi ngurrɑni, yïn ɑ Jwøng-ɑ Ácwɑ̈ɑ̈j! Wiy ge lɑ̈ɑ̈ny gen ni kenyi dwön pï, wiy ge nyøøn piny o ge thøw gen ni luum yij yöö. Wiy ge nøy gen ni ócömø ɑ nyi løg ree jïr; wiy ge bëëd ge nɑ dhɑnhø me cɑɑg dwöög wɑ̈g; cɑɑr cɑ̈ng nuti lidh en. Ge óni lum kenyi ngølii piny, ge ókoodh yïnø yi Jwøng-ɑ Ácwɑ̈ɑ̈j ge nudd ge onëënø. Tyëngtir pëthi gen ómïni keny-ɑ ólidh gen cɑ́yi tyëngorøg, ge ólwöddi kì yethi remmi tyëngrijjø. Ji ókööbø kinni, “Kidyër, dɑ köögi kipe tyëngtir, dɑ Jwøk me nyi cɑy kömi piny.” Yïn ɑ Jwøgɑ, yiel yɑn ki tyëngmɑ̈ɑ̈nø, korrí yɑn ki tyëng-ɑ nyi pɑ̈ɑ̈r kömɑ! Yiel yɑn ki tyëng-ɑ gøggi rɑj, geki tyëngnɑ̈g ki ji! Lïdhí! Ge pɑ̈nni kɑ per nɑ̈gi yɑn, gen ɑ jøg-ɑ yethi gen wöny, ge congi ri gen kɑ perɑ. Pɑth kiper orøgɑ wɑlɑ̀ bɑ̈jjɑ, mɑ́ e bong gïn-ɑ ɑ́bɑjɑ, yïn ɑ Jwøng-ɑ Ácwɑ̈ɑ̈j, me pere rïngi gen kì bɑngɑ, ge dwɑdd-ɑ nɑ̈gi yɑn. Dhwöödh yïn ɑ Wïlɑ̈bø, Jwøng-ɑ Ácwɑ̈ɑ̈j, bïí køny yɑn; bïí lïdhí, yïn ɑ Jwøøg Isrɑil! Dhwödhí be cɑyi pödhh-ɑ kyeelø, pyëwí ko lɑ̈ɑ̈m ki tyëngrijjø møgɑni! Ge nyi dwöög kì böörø ge gwɑ̈yø nɑ gwögg-ɑ wïïnø kì tøggi kɑɑl. Lidh gen kɑ̀ cɑ̈rri gen ji ki lebbi gen, lebbi gen bedh ni pil, ge orumø kinni bong ngɑn lïngi møg-ɑ kømmi yi gen. De ge ngedhí ngedhø, yïn ɑ Jwøng-ɑ Ácwɑ̈ɑ̈j. Pödhh-ɑ kyeelø bënn gɑggí gɑggø. Yɑ gɑ̈nn-ɑ tegí, yïn ɑ yïí nyi yömmɑ, yïn ɑ Jwøk. Yɑ mɑɑr yi Jwøgɑ, óbï be kønyi yɑn, yɑ ówëgge lidhi tyɑmi tyëngmɑ̈ɑ̈nø. Ge ko nɑ̈ɑ̈g Jwøgɑ, kipe wɑ̈thi jiɑ ówïl. Kedhhí gen ki tegí, kɑ ge tyɑɑm. Wuö bene yïn ngɑn-ɑ korri wøn. Dhøggi gen dɑ orøg, kwøbbi gen bënn bɑ kwøbbi orøg. Wiy ge mɑg yi orøøg gen, mɑ́ ge ceg-ɑ gwɑ̈dø o ge ceg-ɑ pyed, nɑ̈g gen ki rɑ̈ji pyëwí, nɑ̈g gen kinni tweet. O yod yi dhɑnhø bëne kinni bɑ Jwøk ɑ jyɑ̈gø kì Isrɑil, o lɑ̈ge tyëg-ɑ kömi piny bëne. Tyëngmɑ̈ɑ̈nø nyi dwöög-ɑ́ɑ̀ böörø, ge gwɑ̈yø nɑ gwögg, kɑ̀ wïïn gen kì tøggi kɑɑl, ge nɑ gwögg møg yɑ̈bø ki gïncɑm, ge nyi ceg-ɑ ngɑ̈rrø ke nøg gïncɑmɑni. De yɑn, yɑ ówör yɑ lejj-ɑ tegí, yɑ ówör yɑ óryeerø yethi cyɑ̈ng kipe kɑ̀ mɑɑr yɑn. Bɑ yïn ɑ yïí nyi yömmɑ, yï bɑ kwödɑ kì cyɑ̈ɑ̈ng rɑj. Yï ólenhɑ, yïn ɑ nyi korri yɑn. Jwøk ɑ yïe nyi yömmɑ, yɑ nyi yömm-ɑ yï Jwøng-ɑ mɑɑr yɑn. Wø ɑ́bɑny yi yïn, yïn ɑ Jwøk, pyëwí ɑ́rënyi ki wøn, de ɑnɑn, dwöög yï wøn. Piny ɑ́wëggí onhɑ̈nh, kɑ wëggí kɑggø, ɑnɑn wiy cige tëngø, kɑ burre cyëëg. Jií ɑ́köllí orɑng me dwøng, me cyerri gen ni tyëng-ɑ ónɑ̈gø yi møgø. Tyëng-ɑ böggi yïn ɑ́mɑ̈ɑ̈g ki nyudhø o rɑj kyëj gen. Yiel wøn ki tegí, løøg kwɑ̈jji wøn, o tyëng-ɑ mɑɑr yïn yiel. Jwøk ɑ́kööb kì kej kwëre kinni, “Cekïm ópɑ̈ng yi yɑn ki tegɑ, kɑ Töör Suköth pɑ̈ngɑ kì kelli jiɑ. Gilyɑd geki Mɑnɑsè bɑ møgɑ, Eprɑim bɑ ɑcudh wïjɑ. o Yeudɑ̀ bɑ lodhɑ. Moɑb bɑ luy-ɑ nyi lwøggɑ, Edöm bɑ miɑ, wɑrrɑ óleengɑ yije, yɑ nyodh-ɑ kinni bɑ miɑ. Pelistiyɑ̀ ótyɑmɑ kɑ yɑ otwɑyø kì yije.” Yïn ɑ Jwøk, ɑ́ men ókïdhi yɑn kɑɑl-ɑ thøø yi gerø? Á men ɑ ópeej yɑn Edöm? Wø ɑ́ceg kɑ bɑnyø yi yïn kidyër? Yï ókedhi be kønyi wøn ki liny? Køny wøn ki liny ki tyëngmɑ̈ɑ̈nø, mɑ́ kunyi dhɑnhø bong døøje. Wø ótyɑ̈mø, mɑ́ Jwøk ying-ɑ tuung wøn, bɑ en ɑ ótyɑm tyëngmɑ̈ɑ̈nø. Yïn ɑ Jwøk lïngí ywøgɑ. Lïngí kwɑ̈jjɑ! Kì yij pɑ̈l, e minɑ cödø, ɑ ɑ́cwølɑ yïn! Yieel yɑn keny døj, mɑ́ yïn ɑ nyi korri yɑn, yïn ɑ korri yɑn kipe tyëngmɑ̈ɑ̈nø. Wiy yɑ bëëdɑ kì kej kwërí, kì yethi cyɑ̈ngg-ɑ ónëënɑ bënn, wiy yɑ nyi pɑ̈nɑ thɑ̈thi obërrí. Köngɑ ɑ́lïngí, yïn ɑ Jwøk, kɑ yɑ thödhí ki gïg-ɑ nyi mëggí tyëng-ɑ böggi yïn. Med runni rɑ̈dh o ge ngënyi gen wiy lɑ̈ge wɑ̈dhe ri kwɑrre! Wiy jyɑ̈ge kì bølí gïti ɑtheer, Korrí ki mɑ̈ɑ̈dø mií geki dyër møgí Nyingí ólenhɑ ki wör gïti ɑtheer, kenyi mëggɑ yïn gïg-ɑ ɑ́köngɑ yïn yethi cyɑ̈ng. Yɑ yïd-ɑ Jwøk, yɑ okudø, mɑ́ e kete ɑ óyiel yɑn. E kete ɑ korri yɑn, yɑ óyiele, en ɑ nyi cwɑg yɑn o yɑ koo tyɑm kinni tek. Wu gït-ɑ wɑɑng wu cyedd-ɑ dhɑnhø me ni dörø me pɑ̈ɑ̈dhø? Wu dwɑdd-ɑ cøørii piny kì kej dhwɑ̈nge, wu mɑɑr-ɑ pyed, wu kømm-ɑ gyëdh ki dhøggi wun, de wu lɑmm-ɑ cyën ki pëthi wun. Yɑ yïd-ɑ Jwøk yɑ okudø mɑ́ e kete ɑ ngɑ̈dhɑ. E kete ɑ korri yɑn, yɑ óyiele en ɑ nyi cwɑg yɑn, o yɑ koo tyɑm kinni tek. Yɑ óyiel-ɑ yi Jwøk, dhwɑ̈ngɑ nyi kɑ̈ɑ̈l-ɑ yïe, en ɑ nyi korri yɑn kidøøj, en ɑ yïe nyi yömmɑ. Gɑ̈nnu Jwøk yethi cyɑ̈ng, wun ɑ teedø. Kïdhu rɑjji wun bënn bøle, mɑ́ en ɑ yïe nyi yömmi. Dhɑnhø bëne nɑ kudhø ki yømø, møg-ɑ døngø ki møg-ɑ thønhø, pɑ̈r bënn. Ke røm gen ki rumi, ge yööd kibøli kudhø ki yømø. Wu ko gɑ̈nni tegi wun, wu ko ngɑ̈dh kɑ̈b, pëthi wun ko cïb wun kömi kɑ̈rì cɑgg ge ngenyø ni ngø. Jwøk ɑ́lïngɑ e okööbø tyel mø gïïr kinni, tegø bɑ mee, o mɑ̈ɑ̈dø mee bong cöge. Men-ɑ́ yïn kirií, yïn ɑ Jwøng-ɑ Ácwɑ̈ɑ̈j, dhɑnhø bëne nyi mëggí köggi gwøge ceth. Yïn ɑ Jwøk, bene yïn Jwøgɑ, yïn ɑ kønø kì pyëwɑ. Dëlɑ bëne dwɑdd-ɑ yïn, pyëwɑ bëne kønø kɑ perí, ni piny-ɑ thwøwø kenyi dwɑdde pï. Wiy tegí lidhɑ geki dhwɑ̈ngí, wiy yï lidhɑ kì kej kwërí. Mɑ̈ɑ̈dø mií lɑ̈w kibøli nënnì kiree, o yï ólenhɑ kì bɑng døøjí. Yï ópøjjɑ kì kɑɑm-ɑ nëënɑ bëne, cinggɑ ótïngɑ mɑl, yɑ kwɑjj-ɑ yïn. Pyëwɑ óyɑ̈ng kɑ bong-ɑ gïn cɑ̈nnii yï ólenhɑ ki wörri medi pyëw. Yï nyii pɑrø yi yɑn kenyi buddɑ, yɑ nyi tyëg wɑ̈r bëne yɑ rømm-ɑ yïn, mɑ́ yïn ɑ nyi køny yɑn ceth. Yɑ nyii wörø ki medi pyëwɑ kì tïbí. Pyëwɑ ying-ɑ rií, o yɑ korri yi yïn kɑ tegí. De tyëng-ɑ dwɑddi nɑ̈gi yɑn, ge ókedhi piny pödhi tyëngthøø. Ge ónɑ̈g kì yij liny, kɑ ge cɑm yi óthönhì. De rɑ̈dh pyëwe ówëggi mïnø yi Jwøk, kipe kɑ ɑ́wëgge gøn tyɑ̈mø. Jwøk ólenhi yi tyëng-ɑ nyi köngi ki nyinge, de tyëngpyed dhøggi gen ócyëëg. Lïngí cwɑggɑ yïn ɑ Jwøk; yɑ ying-ɑ yethi rɑj! Yɑ bögg-ɑ tyëngmɑ̈ɑ̈nø, yiel wëyɑ! Korrí yɑn ki rɑjj-ɑ dwɑddi göggi yɑn yi tyëngrijjø. Lebbi gen ɑ́pɑg gen ni pil, kwøbbi gen rijjø ni wethh. Ge nyi tuumø ge pɑ böggi ki ɑyɑ̈r; ge nyi tyer-ɑ rënyi tyëngdøj ki kwøbbi pyed. Ge cïjj-ɑ ri gen ki gøggi rɑj, ge kømm-ɑ kwøbbi cegi ji ki ɑ́kɑ̈lli gen ge okööbø kinni, “Bong ngɑn lidh ɑ́kɑ̈llɑni.” Ge rømm-ɑ gøggi rɑj, ge okööbø kinni, “Gwøgi rɑjjɑni ɑ́pyël yi wɑ kidøøj.” Rumm-ɑ pyëw dhɑnhø pɑ cuggi yodø. De ge ópwöd ki weth yi Jwøk, kɑ ge jwɑn-ɑ yïddø ki kedd. Gï órënye kì bɑng rɑ̈ji lebbi gen, tyëng-ɑ ólidh gen bënn, wɑ̈thi gen óken yi gen. Codhe, o ji bënn bwøg gen, o ge rum gen kì ri gïg-ɑ ɑ́gwøg yi Jwøk, o gï nyi köbbi gen ji. Wiy pëthi tyëngtir mïni gen, kipe gïg-ɑ ɑ́gwøg yi Jwøng-ɑ Ácwɑ̈ɑ̈j, Ge óyömmi yïe, ólenhi yi tyëngdøj bënn. Yïn ɑ Jwøk, yï myëër ki lenhø yi wøn kì Dhɑyøn, wø mïdh-ɑ köngi wøn kiperí, mɑ́ yïn ɑ nyi løøg kwɑ̈jji wøn! Ji óbï yïí ge kɑ̈ɑ̈l-ɑ kɑ̈jj bënn kipe lɑ̈ɑ̈nyi orøøg gen, Wø nyii tyɑmø yi orøøg wøn, de lɑɑwí nyi dwöögí piny kiper wøn. Tyëng-ɑ ɑ́yieny yi yïn ri gen dɑ gyëdh, gen ɑ tyëng-ɑ ɑ́kɑ̈ɑ̈l yi yïn be bëëdø kì kej kwërí. Wø óyɑ̈ng yi gïgdøj mø ødí, wø óyɑ̈ng yi gyëdhhi Kengí kwërø. Kwɑ̈jji wøn nyi løøg yi yïn kɑ wëggi wøn tyɑ̈mø, kɑ yï nyii göögø ki gïïngɑ̈ngø kipe yieli wøn. Ji kì kömi piny bëne, kí tyëng-ɑ løøg nɑ̈mmi omelø møg-ɑ lɑ̈wi ge gɑ̈nn-ɑ yïn. Kïttì ɑ́cïb-ɑ yi yïn kɑ̈jji gen ki tegí, yï nyodh-ɑ tegí, teng-ɑ dwøng. Apɑgi nɑ̈mmi omelø nyii cuungø yi yïn, kɑ ge nyi ceg-ɑ ì lïïw, kɑ tyëng pödhh-ɑ kyeelø nyi göjjí kudø. Lɑ̈bø bëne óböggø yi gïïngɑ̈ngø møg-ɑ gøggi yi yïn. Gïg-ɑ nyi gwøg yi yïn, ge nyi kɑ̈ɑ̈l-ɑ medi pëëth kì yij piny bëne. Piny ɑ́këëm yi yïn kɑ nëngí ki kødh, kɑ gwøg yi yïn ɑ́ piny me lɑ̈be med. Nɑ̈mmì ɑ́pɑ̈ng yi yïn ki pï, kɑ piny thödhí ki byel. Bene kër-ɑ nyi gwøgí ɑnɑn. Pwödh ɑ́ödí ki kødh me ngenyø, kɑ ge wëggí cung ki pï, lɑ̈bø ɑ́wëggí nyönhø yi kødh, kɑ byel wëggí twïyø. Piny ɑ́thödhí ki byel mø ngenyø ki mendwøng mø twɑ̈li kì yij piny bëne. Cɑ̈mmi dhög ɑ́mɑ̈rri yi lum, tyëng thɑ̈thi kïttì pëthi gen ɑ́mïni. Tör pɑ̈ng yi dyëg, pwödh pɑ̈ng yi gemè. Jɑmmì bënn ceg-ɑ wör pëthi gen omedø. Lenhu Jwøk ki wöri medi pyëw, wun ɑ ji bënn! Lenhu dönge ki wör, lenhu döngi dhwɑ̈nge! Köbbu Jwøk kinni, “Yï nyi gøgg-ɑ gïg mø pëddi döng, Tegí dwøng cɑrø nyi wëgg-ɑ tyëngmɑ̈ɑ̈nø bøødhi ri gen piny kì bølí. Dhɑnhø bëne kì kömi piny mɑll-ɑ yïn, ge lenh-ɑ yïn ki wör, ge lenh-ɑ nyingí ki wör!” Bïu lidhu gïg-ɑ ɑ́gwøg yi Jwøk, lidhu gïïngɑ̈ngø møg-ɑ ɑ́gwøge kipe dhɑnhø. Nɑɑm omelø ɑ́løge keny thwøwø, nɑm ɑ́bɑ̈ɑ̈n yi kweyyee ki tyelli gen. Pëthee ɑ́mïni kì kunɑni kipe gïn-ɑ ɑ́gwøge. Jyɑ̈ɑ̈g-ɑ tege e gïti ɑtheer kɑ pödhh bënn nyi nenne ceth. Wiy bëëd e bong ji mø muddi gen tëngi ki en. Lenhu Jwøgee, wun ɑ pödhh bënn, wiy cwɑgg-ɑ lenhii lïngi. Wɑ ɑ́mïdhe wɑ onëënø, wɑ nuti mëggi thøø yi en. Wø ɑ́rɑng yi yïn, yïn ɑ Jwøk, ni kenyi leeny ɑ́tegø ki mɑc, o dhïwe, wø ɑ́rɑng yi yïn ni menɑni. Wø ɑ́kïdhí yethi ɑ́kɑ̈llì kɑ wø tor yi yïn ki tyëddi gïg mø peeg. Wø ɑ́wëggí nyønø yi tyëngmɑ̈ɑ̈nø, kɑ wø wëggí twïy wɑ̈g kì yij mɑc geki pï, codhe ɑkɑ̈ɑ̈l wøn yij piny-ɑ lɑ̈be med. Yɑ ókɑ̈ni ødí ki gëdhh-ɑ nyi rɑ̈b, kɑ köngɑ nyi mïdhɑ ceth. Gïg-ɑ ɑ́kwøbɑ kinni ge ógwøgɑ keny-ɑ ɑ́yingɑ yethi rɑj, ge ógöggɑ yïn ceth. Yï ónëngɑ ki dyëg mø rɑ̈b kì wïj këli lɑm, kɑ yï ngɑ̈dd-ɑ ki dyëg geki dhög gɑ gëdhhì kɑ tol wɑ̈dh-ɑ mɑl. Bïu lïng wun, wu tyëng-ɑ böggi Jwøk bënn, o wu köbbɑ gïg-ɑ ɑ́gögge yɑn. Yɑ ɑ́ywøøg kööre kinni kønye yɑn, kɑ lenhɑ ki wör. Keløg orøgɑ di kɑn yi yɑn, cwɑggɑ pɑ di lïngi yi Jwøng-ɑ Ácwɑ̈ɑ̈j. De cwɑggɑ ɑ́lïngi yi Jwøk kidyër, kɑ kwɑ̈jjɑ lïnge. Yɑ lenh-ɑ Jwøk, mɑ́ kwɑ̈jjɑ nuti bɑɑny en, pyëwe ɑ́lɑ̈ɑ̈m ceth ki yɑn. Lɑ̈ɑ̈m pyëwí ki wøn yïn ɑ Jwøk kɑ wø gyëëdh, lug thɑ̈wwí, kɑ pyëwí lɑ̈ɑ̈me ki wøn, o gïn-ɑ dwɑddi yi yïn yod yi lɑ̈bø bëne, o yïëdø mií yod yi pödhh bënn. Wiy yï lenhi yi dhɑnhø bëne, yïn ɑ Jwøk, wiy yï lenhi yi ji bënn! Wiy ji bënn lejji gen yïn ki medi pëëth, mɑ́ ji jɑɑg yi yïn kɑ gøggi dyër yïn ɑ bɑ pënyi ji bënn kì kömi piny. Wiy yï lenhi yi dhɑnhø bëne, yïn ɑ Jwøk, wiy yï lenhi yi ji bënn. Byel ɑ́cyeg kì yij piny bëne, Jwøk wɑ ɑ́gyëdhe; wɑ ɑ́gyëdh yi Jwøgee. Wɑ ɑ́gyëdh yi Jwøk, wiy wør yi ji bënn kì kömi piny bëne. Jwøk ɑ́dhwödhi mɑl kɑ tyëngmɑ̈ɑ̈nø kedhhe. Tyëng-ɑ mɑɑnii ɑ́tyɑme kɑ ge órengø. Ge nyi lɑ̈ɑ̈ny nɑ yïrø kenyi køølii yi yømø, tyëngrijjø pɑ nyi cungi kì bøli Jwøk ge nyi nøy nɑ kenyi leeny cemɑ̀ yi mɑc. De tyëngtir pëthi gen nyii mïnø kɑ ge otugø kì bøle. Lenhu nyingi Jwøk ki wör, tyenyu yuu ngɑn-ɑ kɑ̈lli yethi pøøl nyinge bɑ Jwøng-ɑ Ácwɑ̈ɑ̈j, med pëthi wun kì bøle! Ngɑn-ɑ bëëdø kì kej kwëre, en ɑ konggi kïjj geki thwömm. Tyëng-ɑ bong wɑddi gen nyi nënge’ nëngø ki kɑ̈jj-ɑ bëëd gen, ɑmɑgg nyi göönye’ wɑ̈g, kɑ pëthi gen nyii mïnø yi kɑ ɑ́gøøny gen, de tyëng-ɑ muddi gen teeg, óbëëd ɑ yij piny me lïïwø. Yïn ɑ Jwøk, keny-ɑ ɑ́pyejji jií, keny-ɑ ɑ́cør yij ryɑng, piny ɑ́kïïr, kɑ kødh me dwøng ómɑ̈gø, keny-ɑ ɑ́bëën Jwøøg Sinɑy; møgɑni ɑ́cwöb kì ri bëëni Jwøøg Isrɑil. Yï ɑ́muuj ki kødh me ngenyø, kɑ pinyí, piny-ɑ ɑ́rënyi døøg ki tyenyø. Kɑ jií pëgg-ɑ yij pinyɑni, kɑ ge thödhí ki gïncɑm kì bɑng døøjí. Jwøng-ɑ Ácwɑ̈ɑ̈j ɑ ɑ́muuj cigg, kɑ kwøbbɑni kɑ̈lli yi tyëng-ɑ mɑ̈nn mø gïïr kinni, “Rɑ̈nhì ɑ́rengi geki yɑ̈yyi gen!” Kɑ jɑmm-ɑ ɑ́kɑb pɑ̈ngi yi tyëng-ɑ mɑ̈nn kì pɑc. wu óni ɑkur men-ɑ ódhyɑɑwø ki ɑ́tegø o obërre ógidø ki dhɑb me rɑ̈nggø. (Gede kwï wun ɑ ɑ́pëggi gen yethi lwɑ̈ggi dyëg kì cyɑ̈ɑ̈ng liny?) Keny-ɑ ɑ́kedhhi rɑ̈nhì yi Áyïmø kì Kïti Dhɑlmön, ɑ́piy ɑ́göjje dyëëm piny kì kenyɑni. Kïti Bɑcɑn, yï bɑ kït me teg, me oledhhe gïïr. Yïde ɑ nëën yï ceg-ɑ byënyø kipe kɑ̀ bëëd yï bɑ̈r? Yïde ɑ benyi kïn-ɑ ɑ́myeg yi Jwøk ɑ́ keny bëëde? Jwøng-ɑ Ácwɑ̈ɑ̈j óbëëdø kì wïje gïti ɑtheer! Jwøng-ɑ Ácwɑ̈ɑ̈j bï-ɑ kej kwëre, e kɑ̈ɑ̈l-ɑ Sinɑy e kɑ̈l-ɑ yɑ̈thi liny mø gïïr mø teg. Kedhi Kïti Dhɑyøn e ókɑ̈dø ki ɑmɑgg, ɑ́thödhi ki jɑmmì yi ji-ɑ muddi gen teg. Jwøk, Jwøng-ɑ Ácwɑ̈ɑ̈j óbëëdø kì kunɑni. Lenhu Wë ngɑn-ɑ tyëddi ɑkørree yethi cyɑ̈ng, en ɑ bɑ Jwøng-ɑ nyi yiel wɑ. Jwøgee bɑ Jwøng nyi yïëdø bene Wë, Jwøng-ɑ Ácwɑ̈ɑ̈j, en ɑ nyi yiel wɑ ki thøø. Jwøk wɑ̈thi tyëngmɑ̈ɑ̈nø ómøde ceth, gen ɑ tyëng-ɑ tyer yuu orøg. Jwøng-ɑ Ácwɑ̈ɑ̈j okööbø kinni, “Tyëng-ɑ mɑɑn wun ódwöögɑ kì Bɑcɑn, ge ódwöögɑ kì tyeli nɑɑm omeli dwøng, o wu lwöddi wun kì yethi remmi gen, o ge cɑm yi gwöggi wun pïd keny-ɑ óyɑ̈ng gen.” Yïn ɑ Jwøk, tyɑ̈mí ɑ́lidh yi dhɑnhø bëne, eni kedhi Jwøk, rɑ̈dhɑ kej kwëre. Jøwör ɑ mɑl, o bödhhi thøm ɑ cyɑ̈n, womɑ̈nn ying-ɑ dïdyër, ge pwöd-ɑ bull-ɑ thønhø, ge owörø kinni, “Lenhu Jwøk kì yij buri jie, lenhu Jwøng-ɑ Ácwɑ̈ɑ̈j, wun ɑ kwɑrri Yɑgob bënn!” Gøl Ben Yɑmïn, gøl-ɑ nøg, ɑ kwöngi ki bëënø codhe o pëjji Yeudiyɑ̀ geki jii gen lunyi gen ki bëënø, o bɑng gen bëën yi pëjji Dhebulun geki Nɑptɑlì. Nyodh tegí yïn ɑ Jwøk, teng-ɑ ɑ́gwøøg kipe wøn, kì Kengí kì Yerusɑlem, kun-ɑ muuj yïn ki jɑmmì yi rɑ̈nhì. Cɑ̈wwí Rïp, eni lɑ̈y-ɑ ying kelli ókud, cɑ̈wwí pödhh-ɑ teg ɑ ni wɑ̈dhh, gïti keny-ɑ óbøødh gen ri gen piny kì bølí, kɑ yï muuj gen ki ɑ́tegø. Kedhhí tyëng-ɑ pëthi gen med ki liny! Ji óbï ge kɑ̈ɑ̈l-ɑ Rïp, tyëng Kuc, cinggi gen tïng gen mɑl ge kwɑjj-ɑ Jwøk. Wör wun wu lenh-ɑ Jwøk, wun ɑ pödhh-ɑ jɑɑg yi rɑ̈nhì kì kömi piny, lenhu Wë ki wör, eni ngɑn-ɑ kɑ̈lli mɑl mɑl, ngɑn-ɑ kɑ̈lli mɑl-ɑ weenø. Lïngu en kɑ̀ kööbe cwɑgge teeg. Töng wun kwøbbi tegi Jwøk, geki dönge kì Isrɑil, kí tege kì mɑl. Jwøk böggi nɑ ngø kenyi bëëne kì kej kwëre! Jwøøg Isrɑil! Jie nyi thödhe’ thödhø ki tegø. Lenhu Jwøk! Yiel yɑn, yïn ɑ Jwøk! Mɑ́ pï ɑ́wɑ̈nhi munɑ. Yɑ ɑ́ludhi yij ɑ́bubudh, bong keny këëlɑ tyelɑ, Yɑ ying-ɑ yij lol, o yɑ køm-ɑ mudø yi ɑpɑgø. Yɑ ɑ́dhɑ̈ɑ̈r yi ywøg, cwɑggɑ ɑ́thwøw. Nyingɑ ɑ́töd, ge ɑ́dhëg yi yɑbi kunyí, yïn ɑ Jwøgɑ. Tyëng-ɑ wɑ̈dhi yɑn ki mɑɑnø, kwɑnni gen gïïr kibøli yëyyi wïjɑ, Tyëngmɑ̈ɑ̈nø kømm-ɑ yɑn ki pyed, ge teeg, o ge dwɑdd-ɑ nɑ̈gi yɑn. Yɑ ɑ́cïri gen col ki jɑmmì mø nuti kwɑɑl-ɑ yi yɑn. Orøgɑ pɑ cuggi kɑ̈nni yïn, dhëëgɑ ngɑ̈nyi yi yïn, yïn ɑ Jwøk. Tyëng-ɑ gɑ̈nni yïn ko wëggí yɑ̈rø kì bɑngɑ, yïn ɑ Wɑ̈ɑ, Jwøk, Wïlɑ̈bø; wiy tyëng-ɑ mɑlli yïn cög ge pɑ yɑ̈r kì bɑngɑ, yïn ɑ Jwøøg Isrɑil! Yɑ gwɑddi kɑ perí, ɑyɑ̈rɑ ni men. Yɑ ɑ́göög yɑ nɑ ngɑnpɑth kì yï wɑddi wøn, Yɑ nɑ ngɑnpɑth kì yï tyëng gøl wøn. Mɑɑr-ɑ mɑɑrɑ Kengí, lyel nɑ mɑc kì pyëwɑ, gwɑnn-ɑ gwɑddi yïn, pɑ̈dh-ɑ kömɑ. Riɑ nyi dwöögɑ’ piny, kɑ riɑ nyi twönɑ ki gïncɑm, kɑ yɑ nyi gɑggi yi ji. Yɑ ɑ́gɑggi yi gen kipe kɑ̀ rugɑ kwɑ̈llì, mɑ́ yɑ kïïm-ɑ thøø. Yɑ ceg kɑ kømmø yi gen kì yethi yëëth, yɑ ɑ́cɑg ki wör yi tyëng-ɑ mɑdhhi møgø. De yɑ kwɑjj-ɑ yïn, yïn ɑ Jwøng-ɑ Ácwɑ̈ɑ̈j, løøg kwɑ̈jjɑ kì bøli keny-ɑ dwɑddí, yïn ɑ Jwøk. Løøg kwɑ̈jjɑ kì bɑng döngi mɑ̈ɑ̈dø mií, yiel yɑn, mɑ́ ciggí mïdhɑ’ mïdhø. Yiel yɑn ki ɑ́bubudh, kor yɑn ki tyëngmɑ̈ɑ̈nø, yiel yɑn ki lol. Yɑ ko wëggí mudø yi bɑɑyø, yɑ ko wëggí mwønyø yi pïi lol, wɑlɑ̀, yɑ ko wëggí ludhi yij bur. Løøg kwɑ̈jjɑ, yïn ɑ Jwøng-ɑ Ácwɑ̈ɑ̈j, mɑ́ mɑ̈ɑ̈dø mií dwøng, Lïïdh yïɑ kì bɑng ngenyi lɑ̈mpyëwí. Rií ko kɑ̈nní bɑ̈ngí, yɑ ying-ɑ yethi rɑj, løøg kwɑ̈jjɑ ɑnɑn! Bïí kɑ yɑ yieel, yiel yɑn ki tyëngmɑ̈ɑ̈nø. Gwɑnn-ɑ ɑ́gwɑddi yɑn ngɑ̈nyi yi yïn, kí kër-ɑ ɑ́yɑ̈ɑ̈r yɑn, tyëngmɑ̈ɑ̈nø bënn onennø yi yïn. Minɑ ɑ́cöd yi gwɑddø, yɑ ɑ́dhɑ̈ɑ̈r. Yɑ yɑb-ɑ ngɑn yije ywöngi kiperɑ, de bong dhɑnhø, wɑlɑ̀ ngɑn lug yɑn, de bong ngɑn yodɑ. Kenyi di riɑ kɑ̈j, yɑ nyi mëgg-ɑ gïncɑm me lwɑɑng yɑn; o yɑ nyi mëgg-ɑ møgi oløg me wɑj. Wiy ge rënyi yi gïgcɑmm-ɑ rëëj gen, wiy ge wëggi pɑ̈ɑ̈dhø yi jɑmmi kwër møg-ɑ cɑmmi yi gen. Wiy nyingi gen lunyi gen, o ge dhɑ̈li gen ki nënnø! Wiy kömi gen ri gen cwøny gen, yi nyødhi gen! Pwöög linyí kömi gen, wiy ge pïïd yi keji linyí. Wiy kɑ̈dd-ɑ ɑ́gur yi gen döng gen gɑ ryɑng, wiy bëëd e bong dhɑnhø ɑ́kyel me döng e onëënø kì yethi kɑ̈ddɑni. Mɑ́ ge guud-ɑ nyingi tyëng-ɑ ɑ́cɑy yi yïn, ge kømm-ɑ kwøbbi orɑɑng tyëng-ɑ ɑ́thödhi yi yïn ki kedd. Gweed orøøg gen piny bëne, kɑ ge ko yieel. Wiy nyingi gen rɑ̈ɑ̈j wɑ̈g kì yij wɑ̈nyi nënnì, wiy ge cög ge pɑ kwɑɑn kelli jií. De yɑ ying-ɑ yij orɑng, o wɑngɑ ɑ́cyɑ̈ni, tïng yɑn mɑl kɑ yɑ yieel, yïn ɑ Jwøk. Nyingi Jwøk ólenhɑ ki wör, dönge ónyodhɑ kɑ̀ pwøjɑ en. Pyëwe ómïni ki menɑni kibøli ke di mëggii dhyɑng wɑlɑ̀ kibøli ke di ngɑ̈llii wɑdh me dwøng. Keny-ɑ óliidh møgɑni yi tyëng-ɑ nyingi gen nyi guud, pëthi gen ómïni, tyëng-ɑ nyi mɑlli Jwøk pëthi gen ótëngi. Mɑ́ kwɑ̈jji tyëng-ɑ nyingi gen cɑn nyii lïngø yi Jwøng-ɑ Ácwɑ̈ɑ̈j, o jie møg-ɑ bɑ ɑmɑgg pɑ nyi wïl kì wïje. Lenhu Jwøk wun ɑ mɑl kí piny, kí nɑ̈mmi omelø, kí gïg-ɑ nëënø bënn kì yethi gen. Mɑ́ Yerusɑlem ɑ́yiele, kɑ kɑ̈ddi Yeudiyɑ̀ døøge ki gerø. Jie óbëëdø kì kunɑni, kɑ piny kwɑny yi gen, pinyɑni ólɑg yi kwɑrri bɑ̈ngge, kɑ tyëng-ɑ mɑɑrii óbëëdø kì pinyɑni. Yïn ɑ Jwøk, yiel yɑn, yïn ɑ Jwøng-ɑ Ácwɑ̈ɑ̈j, jwɑn yɑn ki kønyø! Wiy tyëng-ɑ dwɑddi nɑ̈gi yɑn tyɑm o wɑ̈thi gen muum gen. Wiy tyëng-ɑ pëthi gen med kɑ ɑ́yïddɑ ki rɑj, døøg gen cyɑ̈n, o ge yɑ̈r gen. Wiy tyëng-ɑ gɑggi yɑn yɑ̈r gen, kì bɑng kɑ̀ tyɑɑm gen. De wiy tyëng-ɑ nyi bï yïí, bëëd gen pëthi gen med. Wiy tyëng-ɑ mɑɑr yïëdø mií, nyi kööb gen kinni, “Jwøk dwøng nɑ ngø!” Yïn ɑ Jwøk, yɑ nyødh, o wɑngɑ cɑn, jwɑn bëën yïɑ, yïn ɑ Jwøk. Yïn ɑ Jwøng-ɑ Ácwɑ̈ɑ̈j, yïn ɑ bɑ yïënɑ bïí jwɑ̈ní be kønyi yɑn! Yïn ɑ yïí nyi yömmɑ, yïn ɑ Jwøng-ɑ Ácwɑ̈ɑ̈j, yɑ ko wëggí tyɑmø kinni tek! Køny yɑn ki døøjí, kɑ yɑ yieel. Kënní pɑ̈ddí yɑn, kɑ yɑ yieel! Bëëd ɑ́ yïn ɑ kor yɑn; bëëd yïn ɑ́ dörɑ, dör-ɑ teg; bɑ yïn ɑ yïí nyi yömmɑ, o bɑ yïn ɑ kor yɑn. Yïn ɑ Jwøgɑ, yiel yɑn kì cinggi tyëngrijjø, yiel yɑn ki rɑjji tyëngrijjø geki ɑ́muddi ji. Mɑ́ yɑ ngɑ̈dh-ɑ yïn Wuö, yɑ gɑ̈nn-ɑ yïn, yïn ɑ Jwøng-ɑ Ácwɑ̈ɑ̈j, kër-ɑ ɑ́wönɑ yɑ thiinh. Riɑ jyɑ̈ɑ̈ng yɑn rií kër-ɑ ɑ́nywøøl yɑn. Yɑ ɑ́korrí kër-ɑ ɑ́yingɑ yij meyɑ. Yï ólenhɑ yethi cyɑ̈ng bënn. Bëëdɑ ɑ́kwɑny yi ji mø gïïr ɑ́ nyudhi, kì bɑng kɑ̀ korrí yɑn ki korrø me dwøng. Yɑ órïïjø yɑ lenh-ɑ yïn, yɑ töng-ɑ dhwɑ̈ngí. Yɑ ko bɑɑny kɑ̀ yöø yɑn ni men, yɑ ko wiy piny kɑ̀ nyönhɑ kinnï. Tyëngmɑ̈ɑ̈nø dwɑdd-ɑ nɑ̈gi yɑn, yɑ ɑ́thub yi tyëng-ɑ dwɑddi nɑ̈gi yɑn. Ge okööbø kinni, “Áwiy piny yi Jwøk, kedh wɑ o mɑg yi wɑ, bong ngɑn-ɑ ódømii.” Rií ko lɑ̈ɑ̈w ki yɑn cɑrø, yïn ɑ Jwøk, jwɑn yɑn ki kønyø, Jwøgɑ! Wiy tyëng-ɑ dwɑddi gøønyi yɑn yɑ̈r gen, wiy ge thøw gen. Wiy tyëng-ɑ dwɑddi rënyi yɑn yɑ̈r gen, o wɑ̈thi gen lɑ̈ɑ̈y gen. De yɑ órïïjø yɑ ngɑ̈dh-ɑ yïn, yɑ ópëddi ki lenhi yïn. Døøjí ólenhɑ, yɑ órïïj yɑ okööbø kì ri yïëdø mií, cɑgg ɑ́ kɑ̀ bëëd e dhɑ̈li gɑmø yi wïjɑ. Tegí ólejjɑ yïn ɑ Jwøk, Jwøng-ɑ Ácwɑ̈ɑ̈j, yɑ ólenh-ɑ døøjí kete. Yɑ ɑ́pwönyi yi yïn yɑ nudd yɑ thiinh, o gïti ɑnɑn yɑ nudd yɑ kømmɑ gïïngɑ̈ngø møgí. Anɑn yɑ ɑ́yöø kɑ wïjɑ mɑg yi wɑ́r, yɑ ko wiy piny, yïn ɑ Jwøk! Mïdhí yɑn, kɑ̈ng-ɑ kømmɑ kwøbbi tegí; kwøbbɑni óköbbɑ rïjj-ɑ óbï bënn. Døøjí gït-ɑ mɑl, Jwøk, yï ɑ́göög ki gïgdøngø, bong ngɑn pɑ̈ɑ̈r ki yïn. Kömɑ ɑ́ödí ki rɑj geki orɑng, de yɑ ówëggí døøgø ki tëngø, kɑ yɑ yiel yi yïn ki thøø. Perɑ ówëggí tëngø kibøli mi tyeli mɑl, kɑ yɑ døøg yi yïn ki cïjø. Yï ólenhɑ ki thøm, døøjí ólenhɑ, yïn ɑ Jwøgɑ, Yï ólenhɑ ki wör ki thømɑ, yïn ɑ Kwërø mi Isrɑil. Yï ólenhɑ, yɑ kwɑjj-ɑ yïn ki medi pyëwɑ bëne; yɑ ówör ki tegɑ bëne, mɑ́ yɑ ɑ́yiel yi yïn. Yɑ órïïj yɑ ókööbø kì ri døøjí, mɑ́ tyëng-ɑ ɑ́dwɑddi rënyi yɑn, ge ɑ́tyɑm, kɑ ge oyɑ̈rø. Pwönyí rɑ̈dh ki nenni gønyy kidøøj, yïn ɑ Jwøk, kɑ nyudhí ki gøggi dyër kì bɑng døøjí, o jií jɑɑge ki gøggi dyër, o tyëng-ɑ nyingi gen guud jɑɑge kidøøj. Wiy piny dönye, wiy yïdde ki mër. Wiy rɑ̈dh gønyyi tyëng-ɑ nyingi gen cɑn nyi cïbe kɑ̈jji gen, wiy tyëng-ɑ jɑdø nyi kønye, wiy tyëngruj mɑ̈ɑ̈ne ruj. Wiy yï mɑlli yi jií kɑ̈ng-ɑ mëëny cɑ̈ng, kí kɑ̈ng-ɑ mëëny dwɑ̈y, kì yethi rïjj bënn. Wiy rɑ̈dh bëëde e nɑ mɑ̈gi kødh kì yethi pwödh, wiy bëëd e nɑ mɑ̈gi kødh kì piny! Kì yij jyɑ̈ge, wiy piny pɑ̈nge yi døøjø, wiy bëëd e dɑ mër ceth. Wiy lɑ̈ge cɑ̈ge ki nɑɑm omelï, gïti nɑɑm omel-ɑ kyeelø, wiy cɑ̈ge kì Porɑt gïti cögi piny. Wiy tyëng ryɑng ri gen bøødh gen piny kì bøle, wiy tyëngmɑ̈ɑ̈nø ri gen leeng gen piny. Ómuuj ki jɑmmì yi rɑ̈nhi Tɑrcic geki rɑ̈nhi muj, wiy muuj ki jɑmmì yi rɑ̈nhi Cebɑ̀ geki rɑ̈nhi Kuc. Rɑ̈nhì bënn ri gen óbøødh gen piny kì bøle, o ómɑlli yi pödhh bënn. Ngɑn wɑnge cɑn men-ɑ nyi yömmi yïe, nyi yiele’ yielø, geki tyëng-ɑ jɑdø, kí møg-ɑ bong ngɑn køny gen. Yije nyii ywöngø kipe tyëng-ɑ nyødh geki tyëng-ɑ jɑdø. Kɑ tyëng-ɑ jɑdø nyi yiele. Gï nyi yiele’ yielø kenyi guud nyingi gen, kí kenyi ruj gen, per gen teeg kì yïe. Wiy rɑ̈dh nëëne! Wiy muuj ki dhɑb kì Cebɑ̀, wiy pere nyi kwɑjji yethi cyɑ̈ng, wiy gyëdhhi Jwøk ying gen köme ceth! Wiy byel cyeg gen kì yij piny bëne, wiy wɑ̈thi kïttì pɑ̈ng gen yi byel, ni kenyi cyeg gen kì Lubnɑn. Wiy kɑ̈dd-ɑ døngø pɑ̈ng gen yi ji ni kenyi pɑ̈ng pwödh yi lum. Wiy nyingi rɑ̈dh cög ge pɑ wïl, wiy pere bëëde e nud ni kɑ̀ nud cɑ̈ng ceth. Wiy nyi kwɑ̈jji gyëdh yi pödhh bënn kì yï Jwøk, wiy cwølli yi pödhh bënn ɑ́ ɑgyëdh. Lenhi wɑ Jwøng-ɑ Ácwɑ̈ɑ̈j, Jwøøg Isrɑil! Mɑ́ e kete ɑ nyi göögø ki gïïngɑ̈ngø. Lenhu nyinge, nying-ɑ di mɑ̈r gïti ɑtheer! Wiy yij piny bëne pɑ̈ng yi dhwɑ̈nge. Amen! Amen! Men bene cögi kwɑ̈jji Debïd, wɑ̈d Yesì. Kidyër Jwøøg Isrɑil døøj, tyëng-ɑ pëthi gen tir korre’ korrø. De men-ɑ́ yɑn, pyëwɑ ɑ́cyɑ̈ngi ki nyönhø, yïëyø køm-ɑ lɑ̈ɑ̈nyø kì pyëwɑ, kì bɑng kɑ ɑ́modɑ tyëngɑthwøg, keny-ɑ ɑ́lidhɑ dönyi tyëngrijjø. Ge pɑ rɑngø, o dëlli gen pɑ rɑ̈mø, dëlli gen yööd. Ge pɑ rɑngø ni tyëng-ɑ kyeelø, ge pɑ nyi yïddi ki rɑj ni tyëng-ɑ kyeelø. Bene ɑ rug gen ɑthwøg e nɑ tigø kì muddi gen, o ruj rug yi gen e nɑ ógødh. Nyingi gen kwödø yi cwɑɑdhø, o pëthi gen rømm-ɑ gøggi rɑj ceth. Tyëng-ɑ kyeelø ceg kɑ gɑggø yi gen, ge kööb ɑ ri gøggi gïgrijjø, ge ceg-ɑ thwøgø, ge rømm-ɑ ruji tyëng-ɑ kyeelø. Ge nyi kømm-ɑ kwøb mø rijjø kì ri Jwøk kì mɑl, kɑ ji nyi cir gen kì piny, bene ɑ nyi døøg jii Jwøk yï gen kɑ ge nyii yïëyø ki kwøbbi gen. Ge okööbø kinni, “Møgɑni koo yod yi Jwøk, Ngɑn-ɑ Pëddi Döng kwïj wøw.” Bene bëëdi tyëngrijjø ɑnɑn. Ge pëggi piny kidøøj, o kɑ̈rri gen kedh ge óngënyø. Bong gïn pere ómïdhɑ pyëwɑ e tir, o cinggɑ tɑr e yïɑ bɑ̈r. Mɑ́ yïn ɑ Jwøk, yɑ rïïj yɑ mëggí orɑng, yɑ ceg kɑ cɑyyø yi yïn yethi cyɑ̈ng. Keløg yɑ di kööb ki gïg ni møgɑni, yɑ pɑ di göög ni dhɑnhø ɑ́kyel kì kelli jií. Yɑ ɑ́rum kì ri kwøbbɑni, de ge ɑ́dhɑ̈li gɑmø yi wïjɑ, pïd kɑ ɑ́kedhɑ yij Kengí. Codhe, cyee ɑyodɑ gïn-ɑ óbï kömi tyëngrijjø kì cyɑ̈n. Ge ócïb yi yïn keny me pødh, o ge renyyi gen, o ge pɑ̈nhhi gen! Ge nyi jwɑn-ɑ thøø, ge nyii thøø ki thøø me rɑj. Ge nɑ lɑ̈g ɑ nyi lɑ̈ɑ̈ny kì mwøl, kenyi dhwödhí mɑl, Wuö, ge nyi ceg-ɑ lɑ̈ɑ̈nyø. Keny-ɑ ɑ́bëëd yijɑ orɑ̈mø, o pyëwɑ keej, yɑ ɑ́bëëd rummɑ nøg ni rummi lɑ̈y, kɑ kwøbbí ódhɑ̈lø gɑmø yi wïjɑ. Cɑgg ɑ́ kinøw, yɑ ɑ́bëëd yɑ cyɑ̈gi ki yïn, kɑ yɑ nyi mïdhi yi yïn kì cingɑ. Yɑ nyi nyudh-ɑ yuu-ɑ døj yi ciggí, o yɑ óthödhi yi yïn ceth ki kej dhwɑ̈ng kì cyɑ̈ɑ̈n piny. Yïɑ bong gïn dwɑddɑ kì mɑl den-ɑ́ yïn! O bong gïn dwɑddɑ kì piny mɑ́ yï ying-ɑ butɑ. Rummɑ ɑ́cungi, o dëlɑ ɑ́nyönhi, de Jwøk bene tegɑ; E kete ɑ dwɑddɑ. Tyëng-ɑ ɑ́wiy yïn piny óthøw ceth, tyëng-ɑ pɑ mïdhi kwøbbí, gen ɑ ónɑ̈g yi yïn. De yɑ myër kɑ bëëdø yɑ cyɑ̈gi ki Jwøk, Wɑ̈ɑ Jwøk, ɑ yïe nyi yömmɑ, o yɑ lejj-ɑ gïg-ɑ ɑ́gwøge! Wøde ɑ wiy wøn piny kinni, yïn ɑ Jwøk? Pyëwí ɑ́rënyi ki jií gïti ɑtheer? Pɑr jií møg-ɑ ɑ́yieny yi yïn cøn, kɑ ge kɑ̈ɑ̈l wɑ̈g kì yij bɑ̈ɑ̈ngø kipe kinni o ge bëëd gɑ jií ceth. Pɑr Kïti Dhɑyøn keny-ɑ ɑ́bëëd cøn. Dhwöödh, lidh gïg-ɑ ɑ́rënyi bënn, jɑmmi Kengø bënn ɑ́rënyi yi tyëngmɑ̈ɑ̈nø ki menrɑj! Tyëngmɑ̈ɑ̈nø kïïw ɑ kej kwërí, berri gen ɑ́tïng gen mɑl ɑ́ ngïjji tyɑ̈mi gen. Pɑ̈mmi Kengø ɑ́ngølli yi gen ki dørri gen de ge nɑ ji mø ngøl thïm piny. Jɑmm-ɑ ódhyɑɑw pɑ̈mmì bënn, gï ɑ́tørri gen ki dørrì kí ɑ́bɑ̈nyì. Kengí ɑ́rɑ̈b yi gen ki mɑc, kej kwërí ɑ́bwöl yi gen. Ge ɑ́dwɑdd-ɑ nɑ̈gi wøn kinni tweet, kɑ̈jji kwër bënn kì yij pödhø ɑ́rɑ̈b yi gen. Ngïjji kwër mø wøn bënn ɑ́lɑ̈ɑ̈ny, bong jɑltöng mɑ ɑ́döng, o bong ngɑn ngɑ̈ny wøw kinni gïgɑni ógït-ɑ wɑɑng. Wø gït-ɑ wɑɑng wø ogɑggø, yi tyëng-ɑ mɑɑn yïn, yïn ɑ Jwøk? Nyingí ógwɑddi yi gen gïti ɑtheer? Cinggí gede ɑ dwööd gen ngɑ̈jí? Yïde ɑ bɑ̈nyí ki kønyi wøn? Á yïn ɑ ɑ́bëëd yïn ɑ rɑ̈ɑ̈dh wøn cøn, yïn ɑ Jwøk, wø ɑ́yiel yi yïn tyel mø gïïr. Nɑɑm omelø ɑ́pyëëd yi yïn ki tegí, kɑ wɑ̈thi lɑ̈yy-ɑ døngø kì nɑm mød yi yïn. Wïj Lebiyɑthɑn lɑ̈y-ɑ rɑj ɑ́mød yi yïn, kɑ wëggí cɑmø yi lɑ̈yyi pɑ̈l. Yïn ɑ ɑ́yieb kɑ̈jj-ɑ ɑ́mulli pï wɑ̈g kì piny, geki nyingi pï, kɑ nɑ̈mmì wëggí thwøwø. Yïn ɑ ɑ́gwøg dicɑ̈ng geki wɑ̈r, kɑ cɑ̈ng geki dwɑ̈y cïb yi yïn kɑ̈jji gen. Yïn ɑ ɑ́cïb kyelli mɑl, kɑ lew geki wuudø gwøøg. De pɑ̈ddí, yïn ɑ Jwøng-ɑ Ácwɑ̈ɑ̈j, kinni tyëngmɑ̈ɑ̈nø gɑgg-ɑ yïn, ge bɑ ji mø kwïj wøw, o ge bwöl-ɑ nyingí. Jií nyødh, ge ko wïyí tyëngmɑ̈ɑ̈nø møg-ɑ yethi gen wöny, wïjí ko wïl ki jií møg-ɑ nyingi gen guud! Pɑr lwömí wuki gen, mɑ́ e dɑ mød kì gødd-ɑ looj kì yij piny bëne. Wɑ̈thi tyëng-ɑ nyingi gen guud koo lɑ̈ɑ̈y, wiy yï lenhi yi tyëng-ɑ jɑdø geki tyëng-ɑ nyingi gen cɑn. Dhwödhí mɑl yïn ɑ Jwøk, løøg kwøbbi tyëngmɑ̈ɑ̈nø! Pɑr kër-ɑ rïïj yï ogɑggø yi tyëng-ɑ kwïj wøw! Wïjí ko wïl ki ɑkyeew tyëngmɑ̈ɑ̈nø kenyi bëën gen ki liny, tyëngmɑ̈ɑ̈nø nyi rïïj ge owøwø. Wø pwøj-ɑ yïn, yïn ɑ Jwøk, wø pwøj-ɑ yïn! Wø wøw-ɑ döngí geki gïïngɑ̈ngø møg-ɑ ɑ́gwøøg. Jwøk okööbø kinni, “Bøli kej gøny ɑ́cïbɑ, o gønyy ócïbɑ kɑ̈jji gen kidøøj. Cɑgg piny kïïr geki gïg-ɑ yije bënn, kɑ piny bëne rungi, tyelle ómïdhɑ kì kɑ̈jji gen ceth. Tyëngrijjø ɑ́köbbɑ kinni, ge ko tɑ̈d, ge ɑ́köbbɑ kinni, wiy gen thwøgø.” Cɑ́y koo kɑ̈ɑ̈l-ɑ wɑɑng cyɑ̈ɑ̈ng mwøl, wɑlɑ̀ wɑɑng cyɑ̈ɑ̈ng böörø, wɑlɑ̀ wɑɑng wuudø, wɑlɑ̀ wɑɑng wurlwɑl. Den-ɑ́ Jwøk kiree ɑ ólidh gønyy, men ógøøje piny kɑ men tïnge mɑl. Jwøng-ɑ Ácwɑ̈ɑ̈j cinge dɑ óthɑ̈gi, me pɑ̈ng yi møgi linye me teg, Gø ókunye wɑ̈g, o mɑdh yi tyëngrijjø bënn, ómɑdh yi gen kí ɑnïre bëne. De yɑ pɑ wïyi ki kwøb kì ri Jwøøg Yɑgob, ólenhɑ ki wör. Tegi tyëngrijjø órënye, de tegi tyëngtir ómed yi en. Per Jwøk ngɑ̈nyi kì Yeudiyɑ̀, nyinge nyii lenhø kì Isrɑil! Kej bëëde ying-ɑ Yerusɑlem, bëëd ɑ Kïti Dhɑyøn. Kunɑni ɑ ɑ́tørre wethhi tyëngmɑ̈ɑ̈nø, geki köddi gen, kí pilli gen, kí jɑmmi liny mø gen bënn. Yï rɑ̈ɑ̈dø nɑ ngø, yïn ɑ Jwøk! Yï dwøng nɑ ngø, kɑ ɑ́dwöög kì wɑ̈thi kïttì, kun-ɑ ɑ́tyɑɑm tyëngmɑ̈ɑ̈nø. Jøliny gen, jøg-ɑ teg jɑmmi gen bënn ɑ́kɑb, ge buud kì piny ge thøø, ge ɑ́dhɑ̈li yielø yi tegi gen. Jøkyënyì geki kyënyi gen ɑ́pɑ̈ɑ̈dh ge thøø, keny-ɑ ɑ́cɑ̈wwí gen, yïn ɑ Jwøøg Yɑgob. De yï ceg kɑ böggø ki mendwøng, yïn ɑ Jwøng-ɑ Ácwɑ̈ɑ̈j! Bong ngɑn cuggi cung kì bølí kenyi rënyi pyëwí. Cɑ́yí ɑ́kwøøb, yï kööb ɑ mɑl pɑɑrí, kɑ piny obwøgø, kɑ ceg-ɑ ì dïw, keny-ɑ dhwödhí be muuji cɑ́y, kipe yieli tyëng-ɑ nyingi gen guud kì kömi piny. Rɑ̈ji pyëw dhɑnhø nyi nywøl-ɑ lenhi yïn; tyëng-ɑ óbødh kì yethi lìny, yï ómɑlli yi gen. Mëggu Jwøøg wun, Jwøng-ɑ Ácwɑ̈ɑ̈j gïg-ɑ ɑ́kwöng yi wun, kinni ge ómëggu en, muuj wun en ki jɑmmì, wun ɑ pödhh-ɑ cyɑ̈gi bënn. Jwøk ji bënn nyi göjje’ böögø; nyiirɑ̈dhh nyi dwööge’ piny, kɑ rɑ̈nhh-ɑ døngø göjje böögø. Yɑ ɑ́ywøøg kö Jwøk, yɑ óryeerø, kɑ cwɑggɑ lïnge. Yɑ nyi kwɑjj-ɑ Jwøk kenyi yingɑ yethi rɑj; yɑ nyi lɑng-ɑ wɑ̈r yɑ tïnggɑ cinggɑ, yɑ ókwɑ̈jjø, de pyëwɑ ɑ́dhɑ̈li kwöjø. Kenyi rummɑ kì ri Jwøk, yɑ nyii kïïmø, kɑ pyëwɑ nyii nyönhø. Yɑ ɑ́mɑ̈ɑ̈ne nenø kì yij wɑ̈r bëne, yɑ ying-ɑ yethi rɑj, bene ɑ pɑ cuggɑ ki kwøb. Yɑ rum ɑ ri cyɑ̈ngg-ɑ ɑ́pöödh kɑ̈ge dööng, yɑ pɑrr-ɑ runn-ɑ ɑ́pöödh kɑ̈ge dööng. Kɑ wɑ̈r nyi tyëgɑ yɑ ceg-ɑ rumø ki pyëwɑ, kɑ riɑ nyi pyëjɑ kinni, “Wɑ órïïj wɑ obɑnyø yi Wë? Pyëwe pɑ cigi mïnø ki wɑ? Mɑ̈ɑ̈dø mee ɑ́lɑ̈ɑ̈ny gïti ɑtheer? Könge ɑ́ceg kɑ pɑ̈dø yi en? Jwøk wïje ɑ́wïl ki konggi wɑ? Kej lɑ̈mpyëwe ɑ́ceg kɑ kwɑnyø yi rënyi pyëw?” Codhe ɑkööbɑ kinni, “Gïn-ɑ rɑ̈mø ki pyëwɑ cɑrø bɑ kinni tegi Jwøk ɑ́lɑ̈ɑ̈ny.” Gïgdøngø møg-ɑ ɑ́gwøøg cøn ópɑrrɑ, yïn ɑ Jwøng-ɑ Ácwɑ̈ɑ̈j, gïïngɑ̈ngø møg-ɑ ɑ́gwøg yi yïn cøn ópɑrrɑ. Yɑ órumø kì ri gïg-ɑ ɑ́gwøøg bënn, geki gïg teg møgí bënn. Gïg-ɑ nyi gøggí bënn bɑ ɑkwër, yïn ɑ Jwøk, bong Jwøk me dwøng ni yïn. Yï bɑ Jwøk men-ɑ nyi göögø ki gïïngɑ̈ngø; tegí ɑ́nyodh yi yïn kì kelli pödhh. Jií ɑ́yieel ki tegí, ɑ løg kwɑrri Yɑgob geki kwɑrri Yosep. Pï ɑ́bwøg keny-ɑ ɑ́lidh gen yïn, yïn ɑ Jwøk, kɑ tyeli nɑɑm omelø okïïrø. Pøøl ɑ́kunyi piny ki kødh, mɑl ɑ́pööd, kɑ ogwelø, kì wɑ̈thi tùng bënn. Piny ɑ́nhɑ̈nhi yi pööd mɑl, kɑ piny ótɑ̈rø yi ogwel mɑl, kɑ piny okïïrø kɑ onhɑ̈nhø. Yï ɑ́cyɑ̈dhi kì kömi ɑpɑgø, kɑ nɑɑm omelø ɑ pɑ̈ng nyi bɑ̈ɑ̈n, de pɑ̈ltyellí pɑ nënni. Jií ɑ́kwɑɑy ni kenyi kwɑ̈ɑ̈y jɑldyëg, ge pyejj-ɑ yi Mosɑ̀ geki Aɑron. Lïngu pwönyɑ, wun ɑ jiɑ, kënnu yïthhi wun kwøbbɑ! Dhøgɑ ótug yi yɑn kɑ gɑ́j, o kwøbb-ɑ peg møg-ɑ weenø ólwøbɑ, gen ɑ gïg-ɑ ɑ́lïngi yi wɑ kɑ ge yod wɑ, gïg-ɑ ɑ́köbbi wɑ yi wëëgee. Kwøbbɑni koo kɑ̈nni wøn nyigi wøn; rïny-ɑ óbï óköbbi wøn kwøbbi tegi Jwøng-ɑ Ácwɑ̈ɑ̈j kí mɑ̈re geki gïïngɑ̈ngø møg-ɑ ɑ́gwøge. Tyëng Isrɑil ɑ́thödhe ki kwöng, kɑ kwɑrri Yɑgob nënge ki cigg. Kweyyee ɑ́cege kinni, pwönyi gen nyigi gen ki ciggɑni. o ge dïd yi rïny-ɑ óbï, o nyigi gen ólony yi gen ki pwönyø, o ge gɑ̈nni gen Jwøk, o wɑ̈thi gen cög ge pɑ wïl ki gïg-ɑ ɑ́gwøge, de ge órïïj ge mïdh-ɑ cigge ceth. Ge koo bëëdø ge nɑ kweyyi gen, ɑ ɑ́bëëd muddi gen teeg, o kwøbbi Jwøk nuti lïngi gen, pëthi gen nuti cïb gen ri kwøbbɑni, o Jwøk nuti gɑ̈nni gen ceth. Liny gøl Eprɑim møg-ɑ yï gen di wethh ki nywøli wethh ɑ́cyeddi cyɑ̈ɑ̈ng liny. Lwöm-ɑ kɑɑm gen ki Jwøk nuti mïdhi gen, ge ɑ́bɑ̈nyi mïdhi cigge. Wɑ̈thi gen ɑ́wïl ki gïg-ɑ ɑ́gwøge, kí gïïngɑ̈ngø møg-ɑ ɑ́nyudhe gïn. Ágöög ki gïïngɑ̈ngø kì bøli kweyyi gen kì thwøri Dhoɑn kì piny Rïp. Nɑɑm omelø ɑ́yiebe kɑ gï kɑ̈ɑ̈le yije, pï ɑ́cuunge ni dör. Gï ɑ́pyejje kɑ pøølø kì dicɑ̈ng kɑ gï pyejje ki mɑc kì wɑ̈r bëne. Kït ɑ́yiebe kì yij ryɑng, kɑ gï nënge ki pï mø töngi kì piny. Pï ɑ́wëgge rïngi wɑ̈g kì yij kït, ge rïngi nɑ pïi nɑm. De ge ɑ́døøg be pëmø ki kwøbbe, muddi gen ɑ́tëngi ki Jwøng-ɑ Pëddi Döng kì yij ryɑng. Jwøk ɑ́ceg kɑ rɑngø yi gen, keny-ɑ ɑ́cwöddi gen ki gïncɑm-ɑ ɑ́dwɑddi yi gen. Ge ɑ́kööb kì ri Jwøk kinni, “Jwøk ócuggø muujø ki gïncɑm kì yij ryɑng? Kidyër kït ɑ́gøj yi en, kɑ pï mwööj-ɑ wɑ̈g kì yije, kɑ tör opɑ̈ngø, de wø ócuggø thödhø ki gïncɑm, kɑ jie thödhe ki rïngø?” Arënyi pyëw Jwøng-ɑ Ácwɑ̈ɑ̈j keny-ɑ ɑ́lïnge møgɑni, ɑwëgge mɑc lyelø kì kömi jie, pyëwe ɑ́ti rënyø ki gen, mɑ́ kwøbbe nuti yïëyø yi gen, o ge nuti yïëyø kinni gï óyiele, de mɑl ɑ́köbbe, kɑ dhøge yiebe, kɑ gï muuje ki gïncɑm kì mɑl; mɑnɑ̀ ɑ́öre piny ɑ́ men cɑm yi gen. Codhe, ɑcyɑ̈ɑ̈m gen ki gïncɑɑm wëywödd, kɑ gï thödhe ki gïg-ɑ dwɑddi yi gen bënn. Agööje yømi wɑɑng cyɑ̈ɑ̈ng mwøl, kɑ yømi wɑɑng wurlwɑl wëgge könø ki tege, kɑ jie öde ki winyø me ngenyø ni ɑyejø kì thɑ̈ngi nɑɑm omelø, gï ɑ́wëgge dyëëm dïkɑɑl gen geki bɑdhhi kemmì bënn. Codhe, ɑcyɑ̈ɑ̈m ji kɑ ge oyɑ̈ngø, ge ɑ́thödhi yi Jwøk ki gïncɑm-ɑ ɑ́dwɑddi yi gen. De ge nuti yɑ̈ngø; ge nuti wïyø ki cɑm kɑ ɑ́yɑ̈ng gen, ɑrënyi pyëw Jwøk ki gen, ɑnɑ̈ge jøg-ɑ teg kì kelli gen geki wøbb-ɑ døj kì Isrɑil. Cɑgg ɑ́ kinøw, ji nudd ge ceg-ɑ orøg, nuti gɑ̈nni gen, cɑgg ɑ́ kɑ ɑ́gööge ki gïïngɑ̈ngø. Codhe, ɑngøle cyɑ̈nggi gïn ni yëgø kɑ nënni gïn ngøle ki ryɑ̈g. Kenyi nɑ̈ge kwï gïn, møg-ɑ döng nyii døøg-ɑ kööre, ge nyii yewø kɑ gø kwɑjji gen ki kwɑnyi dwøng. Kɑ ge ópɑ̈dø kinni Jwøk bene ɑ korri gen, Ngɑn-ɑ Pëddi Döng ɑ bɑ dumi mi gen. De kwøbbi gen bënn bɑ pyed, bong dyër kì yethi gen. Pëthi gen nuti ying-ɑ köme, lwöm-ɑ ɑ́ying kɑɑm gen nuti mïdhi gen. De Jwøk yije nyii ywöngø kipe jie, kɑ lɑɑwe nyi dwööge piny kipe orøøg gen gï pɑ nyi nɑ̈g yi en. Pyëwe nyii mɑgø yi en tyel mø gïïr, linye pɑ nyi ngööge wɑ̈g bëne. Nyii pɑ̈dø kinni ge bɑ ji-ɑ nyi thøw yøw, ge nɑ yømø ɑ nyi köni e opödhø e pɑ dwöög. Á tyel ɑ́dï ɑ ɑ́pyem gen kwøbbe kì yij ryɑng? Á tyel ɑ́dï ɑ ɑ́wëggi gen pyëwe rënyø! Jwøk ɑ́pɑ̈nyi yi gen, kɑ gø nyi cigi gen pɑ̈nyø, kɑ pyëw kwërø, Jwøøg Isrɑil nyii rɑ̈mø. Wɑ̈thi gen ɑ́wïl ki tege, kí cyɑ̈ng-ɑ ɑ́yiele gïn kì cinggi tyëngmɑ̈ɑ̈nø, ɑ ɑ́gööge ki gïïngɑ̈ngø mø døngø kì thwøri Dhoɑn kì piny Rïp. Nɑ̈mmì ɑ́løge remø, kɑ tyëng Rïp ojɑdø ki pïg mɑ̈ɑ̈dh gen. Gï ɑ́öde ki bɑ̈yø bëne kɑ ge kɑ̈ɑ̈j yi gen, kí ógwɑ̈llì mø rënyi piny gen. Gï ɑ́öde ki bɑ̈nyø me cɑm byelli gen, kɑ pwödhhi gen órënyø. Bɑ̈ggi oløøg gen ɑ́nɑ̈ge ki ɑtunø, kɑ ólɑ̈mmi gen nɑ̈ge ki ɑ́piy. Dhögi gen ɑ́nɑ̈ge ki yømø, kɑ dyëgi gen nɑ̈ge ki ogwel mɑl. Gï ɑ́göjje rɑj mø døngø, kɑ ɑ́kønye linye kömi gen ki rɑ̈ji pyëwe, linyɑni ɑ́bï e nɑ ngɑn kɑ̈lli wöddi thøø. Linye nuti joog gen, gï nuti wiy en ge pɑ thøw, de gï ɑ́kölle ryɑ̈ng nɑ̈g gen. Kɑyy-ɑ cwøw bënn ɑ́nɑ̈ge kì yethi kɑ̈lli Rïp bënn. Jie ɑ́kööle wɑ̈g, ni kwöddi jɑldyëg, kɑ gï pyejje kì yij ryɑng. Gï ɑ́pyejje kidøøj ge pɑ böggi, de pï ɑ́ceg ì bɑɑw kì kömi tyëngmɑ̈ɑ̈nø. Ge ɑ́kïdhe piny kwëre, gï ɑ́kïdhe wɑ̈thi kïtt-ɑ ɑ́kwɑnye. Pödhh-ɑ ɑ́bëëd kì pinyɑni ɑ́cyedde kì bøli gïn. Piny gen ɑ́pɑ̈nge kì kelli kɑ̈lli Isrɑil, kɑ uddi gïn mëgge jie. De Jwøng-ɑ Pëddi Döng ɑ́bɑny yi gen, kɑ dhøge pyem gen. Cigge ɑ́bɑny yi gen ki mïdhø, muddi gen ɑ́tëngi kɑ cigge pyem gen ni men-ɑ ɑ́gwøg yi kweyyi gen, ge ɑ́göög ni nyɑɑr weth me bɑ ódwøl. Pyëwe ɑ́wëggi rënyø yi gen ki kɑ̈jji mɑ̈ddø møg-ɑ pɑth kidyër, kí ngïjji jwögg-ɑ pɑth møg-ɑ mɑɑn yi en. Jwøk pyëwe ɑ́rënyi keny-ɑ ɑ́lidhe gïgɑni, bene ɑ bɑnye jie ki bɑnyi teg. Awiye Keme piny kì Cilø, keny-ɑ ɑ́bëëde kì kellee. Awëgge Sɑnduug Cigg kwɑnyø yi tyëngmɑ̈ɑ̈nø, eni ngïji tege geki dhwɑ̈nge. Pyëwe ɑ́rënyi ki jie, kɑ gï wëgge nɑ̈gø yi tyëngmɑ̈ɑ̈nø. Yɑɑg-ɑ wøbb ɑ́nɑ̈g kì yij liny, kɑ wojur ojɑdø ki cwøw møg nywøm gen. Ókwër ɑ́nɑ̈g ki pilø, kɑ mɑ̈nni gen mɑ̈ɑ̈n ywøgi gen. Kì cyɑ̈ɑ̈n piny, ɑdhwödh Wë, e ce cyëëw ɑ́ jɑlteg men-ɑ ónɑ̈gø yi møgø, ɑdyële tyëngmɑ̈ɑ̈nø kɑ ge órengø, ge ɑ́rengi ge yɑ̈rø yi kɑ ɑ́tyɑɑm gen. De gøl Yosep ɑ́bɑnye, gøl Eprɑim nuti myeeg en. De ɑ́myeg-ɑ gøl Yeudɑ̀, kí Kïti Dhɑyøn men-ɑ mɑɑr yi en. Kenyɑni ɑ ɑ́gere Kenge e nɑ pɑɑre kì mɑl, ɑ́gwøge e teg ni piny kiree, e pɑ nhɑ̈nhø gïti ɑtheer. Ayienye bɑ̈nge Debïd, gø ɑ́kɑ̈ɑ̈le kì bɑng dyëg, kun-ɑ ɑ́kwɑ̈ɑ̈ye ki dyëge, ɑgwøge gøn ɑ́ rɑ̈ɑ̈dh Isrɑil, jɑl-ɑ kwɑy jii Jwøk. Amïdhi gen yi Debïd ki pyëw ɑ́kyel, gï ɑ́pyejje kɑ yuu-ɑ døj. Pinyí ɑ́kɑb yi pödhh mø pɑth, yïn ɑ Jwøk. Kengí kwërø ɑ́bwöl yi gen kɑ Yerusɑlem rënyi gen. Bɑ̈nggí ɑ́wëggi gen cɑmø yi cor, jií ɑ́wïyi gen cɑmø yi lɑ̈yyi pɑ̈l. Remmi jií ɑ́wëggi gen mullø ni pï; remø ɑ́mulli ni pï kì yij Yerusɑlem bëne, o bong dhɑnhø mɑ ɑ́wiy o konye tyëng-ɑ ɑ́nɑ̈g. Wø ɑ́yɑ̈r yi pödhh-ɑ buti wøn, wø ceg kɑ ngedhø, wø ogɑggø yi gen. Jwøng-ɑ Ácwɑ̈ɑ̈j, yï gït-ɑ wɑɑng pyëwí rɑɑj ki wøn? Linyí gït-ɑ wɑɑng e lyel nɑ mɑc? Ngøøg linyí kömi pödhh-ɑ kwïj yïn, ɑ pɑ mɑlli yïn. Mɑ́ jií ɑ́nɑ̈g yi gen; kɑ pödhí rënyi gen. Wø ko cɑ̈yyí orøøg kweyyi wøn, de lɑ̈ɑ̈m pyëwí ki wøn ɑnɑn, mɑ́ pëthi wøn ɑ́nyönhi. Køny wøn, yïn ɑ Jwøk kɑ wø yieel, yiel wøn kɑ lɑɑwí dwöög piny kipe orøøg wøn, o nyingí ólenhi. Á kipe ngø ɑ köbbi wøn yi pödhh-ɑ kyeelø kinni, “Ágøne Jwøøg wun?” Wiy yï lidh yi wøn yï cɑy-ɑ pödhh-ɑ kyeelø, kipe kɑ ɑ́nɑ̈g gen bɑ̈nggí. Wiy ywøøg tyëng-ɑ bɑ ɑmɑgg wɑ̈dhe bølí, kɑ tyëng-ɑ bɑ ɑcɑy ki thøø døm ki tegí. Wuö, cɑy pödhh-ɑ kyeelø tyel ɑ́bïryew kipe gwɑnn-ɑ ɑ́gwɑddi yïn yi gen. Codhe o wøn ɑ bɑ jií, dyëgi kɑɑlí, yï pøjji yi wøn gïti ɑtheer, o yï lenhi yi wøn kì yethi cyɑ̈ngg-ɑ bøli wøn bënn. Lïngí kwɑ̈jji wøn, yïn ɑ Jɑl-ɑ kwɑy Isrɑil; lïngí cwɑggi wøn, yï ngɑn-ɑ kwølli dyëg. Yï bëëd ɑ wïj kwømí kì kömi kerobb, nyudhí ri gøl Eprɑim geki gøl Ben Yɑmïn kí gøl Mɑnɑsè. Nyudhí wøn tegí, bïí kɑ wø yieel! Dwöög wøn yïn ɑ Jwøk! Ywöngi yijí kiper wøn, o wø óyiel! Yïn ɑ Wïlɑ̈bø, Jwøng-ɑ Ácwɑ̈ɑ̈j, yï gït-ɑ wɑɑng pyëwí rɑɑj ki kwɑ̈jji jií? Ge ɑ́wëggí cɑmi pïi nyingi gen ge mɑdh-ɑ pïi nyingi gen ni pï. Pödhh-ɑ cyɑ̈gi ki wøn ɑ́wëggí nyɑɑg kì kömi piny wøn, wø ɑ́wëggí gɑggø yi tyëngmɑ̈ɑ̈nø. Dwöög wøn yïn ɑ Jwøk! Ywöngi yijí kiper wøn, o wø yiel! Oløg ɑ́kɑ̈ɑ̈l wɑ̈g kì Rïp, pödhh-ɑ kyeelø ɑ́cyeddí, kɑ piidh piny gen. Keje ɑ́tyeny yi yïn kipe kinni o dønge, kɑ byerre niyeeng-ɑ piny, kɑ ódøngø kɑ piny bëne kɑbe. Kɑ wɑ̈thi kïttì kume ki tïbe, kɑ yenh sɑndɑl, yenh-ɑ døngø rïm yi bɑ̈dde. Bɑ̈dde ɑ́wɑ̈dhi Nɑɑm Omeli Tɑr, kɑ bɑ̈dde wɑ̈dh-ɑ Nɑm Porɑt. Á kipe ngø ɑ dhur kyel-ɑ ɑ́bɑɑgí piny? Anɑn nywøle ceg kɑ kwɑllø yi tyëng-ɑ kɑ̈lli yöö, o ceg kɑ nyønø yi kul, o ceg kɑ cɑmø yi lɑ̈yyi pɑ̈l. Lugí thɑ̈wwí wøn, yïn ɑ Jwøk, Wïlɑ̈bø! Lïïdh piny kì mɑl, kɑ yï bïí be yieli jií! Bïí yiel oløng-ɑ ɑ́pidh yi yïn ki cingí, kɑ wëggí døngø, o tënge! Árɑ̈b yi tyëngmɑ̈ɑ̈nø ki mɑc, kɑ gø ngøl gen piny, lïïdh yï gen ki rɑ̈ji pyëwí, kɑ ge nɑ̈ɑ̈g! De mïdhí ji-ɑ ɑ́yieeny, kɑ ge koor, eni pönh-ɑ ɑ́gwøg yi yïn e teg. Wø pɑ cigi døøg cyɑ̈n, thödhí wøn ki nënnì, o yï ólenhi yi wøn. Dwöög wøn, yïn ɑ Wïlɑ̈bø, Jwøng-ɑ Ácwɑ̈ɑ̈j. Ywöngi yijí kiper wøn, kɑ wø yieel. Ryeer wun, wu lejj-ɑ Jwøk ngɑn-ɑ nyɑg peree, wör wun, wu lenh-ɑ Jwøøg Yɑgob! Thomu thøm, pwödu bullì, wör wun ki medi pëëth. Koodh kɑng kì ri pɑ̈ri dwɑ̈y, kɑ kodh kì ri rɑ̈we cyɑ̈ɑ̈ng wööwø. Menɑni bɑ cigg kì Isrɑil, ciggi Jwøøg Yɑgob. Ciggɑni ɑ́mëgge’ tyëng Isrɑil, keny-ɑ ɑ́pɑ̈ɑ̈re kömi piny Rïp. Yɑ ɑ́lïng ki cwɑg mø kwïjɑ, ge okööbø kinni; “Wu ɑ́yielɑ ki tyëddi gïg peg, wu ɑ́yielɑ ki tyëddi thob. Keny-ɑ ɑ́ying wun yethi rɑj, yɑ ɑ́cwøl yi wun, kɑ wu yielɑ, yɑ ying-ɑ keny-ɑ ɑ́pɑ̈nɑ kì yij ɑtunø. Wu ɑ́rɑngɑ kì wɑɑng pïi Merïbɑ̀. Lïng wun, wun ɑ jiɑ kɑ̀ kyëddɑ wun, Isrɑil, yɑ dwɑdd-ɑ kinni lïngí kwøbbɑ! Yï ko wöl kwɑ̈jjø kì yï jwøg megø. Bene yɑn Jwøgí, Jwøng-ɑ Ácwɑ̈ɑ̈j, ɑ ɑ́kɑ̈ɑ̈l yïn wɑ̈g kì Rïp. Ngɑm dhøgí o kïdhɑ ki gïncɑm. “De kwøbbɑ pɑ lïngi yi jiɑ. Ciggɑ pɑ mïdhi yi Isrɑil. Awiyɑ gen, o ge kedh gen ki tegi wɑ̈thi gen, o ge gwøg gen gïg-ɑ dwɑddi yi gen. Di bëëd e døøj ke di lïngi gen kwøbbɑ, yɑ ɑ́dwɑdd-ɑ kinni o ciggɑ di mïdhi gen! Tyëngmɑ̈ɑ̈nø di jwɑnɑ ki tyɑmø, kɑ tyëng-ɑ mɑɑn gen di mɑgɑ bënn. Tyëng-ɑ mɑɑn yɑn ri gen di bøødh gen bølɑ ki böögø, cɑ́yi gen di gïti ɑtheer. De wu di cɑɑm yi yɑn ki gemè men-ɑ døøj cɑrø, kɑ wu di yɑ̈ɑ̈ngɑ ki møøw kïc.” Jwøk ɑ́pëggi wïj kwøme kì buri mɑl, cɑ́ye ɑ́kwøbe kì buri jwögg kinni, “Wu gït-ɑ wɑɑng wu orujø, wu cwɑngg-ɑ tyëngrijjø? Nyɑgu per tyëng nyingi gen cɑn geki kïjj, pyël wun gønyyi tyëng-ɑ jɑdø geki tyëng-ɑ yï gen bong tegø. Yiel wun gen kì cinggi tyëngrijjø. “Wu kwïj wøw! Wɑ̈thi wun nøg! Piny ɑ́rënyi yi wun, kɑ dyër ólɑ̈ɑ̈nyø kì kömi piny. Yɑ ɑ́kööb kinni, ‘Wu bɑ jwögg, wu bɑ nyigi Ngɑn-ɑ Pëddi Döng.’ De wu ceg-ɑ thøø ni ji yøw, wu óthøw ni nyiirɑ̈dh.” Bïí, yïn ɑ Jwøk, jɑɑg kömi piny; pödhh bënn bɑ møgí. Yï ko kud yïn ɑ Jwøk, yï ko pëggi piny, rií ko dhïïg! Lidh tyëngmɑ̈ɑ̈nø ɑ́dhwödh, ge ceg-ɑ wøwø wɑ̈thi gen ɑ́tëngi. Ge rum ɑ ri göggi jií ki rɑj, ge dwɑdd-ɑ nɑ̈gi ji-ɑ korri yi yïn. Ge okööbø kinni, “Bïu nɑ̈g wɑ pönhɑni, o Isrɑil wïle gïti ɑtheer.” Ri gen ɑ́löggi gen, ge ɑ́rëbi kömí. tyëng Edöm geki kwɑrri Icmɑil, kí tyëng Moɑb geki Ägerïm, kí tyëng Gibɑl geki Amön, kí Amɑlek, geki Pelistiyɑ̀ kí Suur. Tyëng Acuur ɑ́rëbi ki gen, ge køny-ɑ ri gen ki kwɑrri Amön, kí kwɑrri Moɑb, ɑ løg Kwɑrri Lot. Göggí gen ki gïg-ɑ ɑ́göggí Midyɑn, geki Siserɑ̀, kí Yɑbïn kì kömi Nɑm Kicön. Ge ɑ́tyɑm yi yïn kì Ein Dör, kɑ ge kwɑ̈ɑ̈g-ɑ piny. Gwøg pëjji gen ni Oreb geki Dhiib, tyɑm jyɑ̈gi gen bënn ni kɑ ɑ́tyɑɑm Dhebɑ̀ geki Dhɑlmunɑ̀, ɑ ɑ́kööb kinni, “Kwɑny wɑ en ɑ́ miee, eni piny-ɑ bɑ mi Jwøk.” Kedhhí gen ni tør yïn ɑ Jwøk, kedhhí gen ni kedhhi wél yi yømø. Rɑ̈b gen ni rɑ̈bi thïm, ni rɑ̈bi wɑ̈thi kïttì, cyeddí gen ki ɑtuní, göjjí gen böggø yi yømí, yøm-ɑ teg. Wiy wɑ̈thi gen lɑ̈ɑ̈y gen, yïn ɑ Jwøng-ɑ Ácwɑ̈ɑ̈j, kɑ wiy tegí lidh yi gen. Wiy ge bëëd gɑ ɑtyɑm gïti ɑtheer, wiy ge thøw gen ki ɑyɑ̈r. Wiy yod yi gen kinni nyingí bɑ Jwøng-ɑ Ácwɑ̈ɑ̈j, o bɑ yï ketí ɑ dwøng kì kömi piny bëne. Kengí mɑɑr yi yɑn ki mendwøng, yïn ɑ Wïlɑ̈bø Jwøng-ɑ Ácwɑ̈ɑ̈j! Yɑ tyer-ɑ bëëdø kì Kengí! Yɑ tyer-ɑ bëëdø kì Kengi Jwøng-ɑ Ácwɑ̈ɑ̈j. Yɑ wör kɑ medi pyëwɑ, kì bøli Jwøng-ɑ Nëënø. Cɑgg ɑ́ ɑdhëg ɑ́gëëd ki ød; o nyɑwɑ̈nyø yïe dɑ keny bëëde; nyigi gen mïdhi yi gen ɑ buti këlli lɑm møgí; Wïlɑ̈bø, Jwøng-ɑ Ácwɑ̈ɑ̈j; yï bɑ rɑ̈dhɑ, o yï bɑ Jwøgɑ. Tyëng-ɑ bëëdø kì bɑdhhi Kengí ri gen dɑ gyëdh, ge nyi rïïj ge owörø ge lejj-ɑ yïn. Tyëng-ɑ tegi gen nyi kɑ̈ɑ̈l yïí, ri gen dɑ gyëdh, gen ɑ tyëng-ɑ tyer weli Kïti Dhɑyøn. Kɑ̀ kɑ̈l gen bɑ̈ɑ̈j Bɑcɑ̀ ree nyi løge’ keny mulli yi pï nyii pɑ̈ɑ̈ngø yi kødh cwir ki luyyi pï. Ji nyi kedh ge ótëngø kɑ̀ cyɑ̈dhi gen, kɑ dhɑnhø bëne nyi wɑ̈dh-ɑ bøli Jwøøg jwögg kì Dhɑyøn. Yïn ɑ Wïlɑ̈bø, Jwøng-ɑ Ácwɑ̈ɑ̈j, lïngí kwɑ̈jjɑ, Yïn ɑ Jwøøg Yɑgob, lïngí møgɑ. Yïn ɑ Jwøk, gyëdh rɑ̈ɑ̈dh wøn, eni rɑ̈nh-ɑ ɑ́yieny yi yïn. Tyëgi cyɑ̈ng ɑ́kyel e dhɑnhø ying-ɑ yij Kengí, lɑ̈w kibøli cyɑ̈ng ɑ́lïp møg tyëg yi dhɑnhø e ying-ɑ keny megø. Lɑ̈w ke bëëdɑ kì wɑ̈g kì dhø ød Jwøgɑ, kibøli ke di bëëdɑ kì kɑ̈lli tyëngrijjø. Jwøng-ɑ Ácwɑ̈ɑ̈j ɑ bɑ rɑ̈dhee, en ɑ kor wɑ; wɑ ɑ́gëdhhe døøjø kí dhwɑ̈ng, Gïndøj pɑ nyi mɑ̈ɑ̈ne tyëng-ɑ nyi gøggi gïgdøj, pɑ nyi mɑ̈ɑ̈ne. Yïn ɑ Wïlɑ̈bø, Jwøng-ɑ Ácwɑ̈ɑ̈j; tyëng-ɑ gɑ̈nni yïn ri gen dɑ gyëdh! Yïn ɑ Jwøng-ɑ Ácwɑ̈ɑ̈j, pyëwí nyii lɑ̈ɑ̈mø ki pinyí; Isrɑil ɑ́gwøg yi yïn kɑ ódönyø. Pyëwí ɑ́lɑ̈ɑ̈m, kɑ orøøg jií lɑ̈ɑ̈ny; orøøg gen bëne ɑ́rɑ̈ɑ̈j wɑ̈g yi yïn. Linyí ki gen ɑ́mwøøny yi yïn, pyëwí ɑ́dwöög ki gen. Dwöög wøn köörí, yïn ɑ Jwøk yïëni wøn, kɑ pyëwí koo rɑj ki wøn këti! Yï ógïti ɑtheer pyëwí rɑj ki wøn? Linyí ki wøn pɑ cög? Wëggí wøn tëngø këti, o yï lenhi yi jií. Nyudhí wøn mɑ̈ɑ̈dø mií, mɑ̈ɑ̈n-ɑ pɑ nyi lwënyi, Yïn ɑ Jwøng-ɑ Ácwɑ̈ɑ̈j, kɑ wø yieel. Kwøbbi Jwøk, Jwøng-ɑ Ácwɑ̈ɑ̈j lïngɑ’ lïngø, okööbø kinni wɑ jie, wɑ óthödhe ki mër, keløg wɑ pɑ døøg ri bëëdi nøgi wɑ̈ɑ̈th. Tyëng-ɑ böggii nyi jwɑne kɑ yielø ceth, o gyëdhhe geki dhwɑ̈nge óbëëdø ceth kì kömi pinyee. Mɑ̈ɑ̈dø ɑ́røøm geki dyër, døøjø geki mër ri gen ɑ́döb gen. Dyër ótwïy kì piny, kɑ kedh-ɑ mɑl, kɑ bëëntir mi Jwøk kì mɑl, lïïdh-ɑ piny. Jwøng-ɑ Ácwɑ̈ɑ̈j wɑ ówëgge dönyø kɑ byëlø ocyegø kì pinyee. Døøjø ócyɑ̈dhi kì bøli Jwøng-ɑ Ácwɑ̈ɑ̈j, kɑ yuue tyenye. Kënní pɑ̈ddí yɑn, yïn ɑ Jwøng-ɑ Ácwɑ̈ɑ̈j, kɑ kwɑ̈jjɑ løøg, mɑ́ yɑ nyøødh o wɑngɑ ocɑnø. Yiel yɑn ki thøø, mɑ́ yɑ mïdh-ɑ kwøbbí, yiel yɑn mɑ́ yɑ bɑ bɑ̈ngí men-ɑ gɑ̈nni yïn. Yï bɑ Jwøgɑ, lɑ̈ɑ̈m pyëwí ki yɑn mɑ́ yɑ nyi rïïj yɑ kwɑjj-ɑ yïn. Wiy pyëw bɑ̈ngí mïne, yïn ɑ Jwøng-ɑ Ácwɑ̈ɑ̈j, mɑ́ kwɑ̈jjɑ nyi bï-ɑ yïí mɑl. Yï døøj, o lɑɑwí nyi dwöögí piny kiper wøn, o tyëng-ɑ nyi kwɑjji yïn bënn mɑɑr yi yïn. Lïngí kwɑ̈jjɑ, yïn ɑ Jwøng-ɑ Ácwɑ̈ɑ̈j, lïngí ywøgɑ kɑ̀ kwɑjjɑ kønyø. Yɑ nyi cwøl-ɑ yïn kì cyɑ̈ɑ̈ng rɑj, mɑ́ kwɑ̈jjɑ nyii løøgø yi yïn. Bong Jwøk me ni yïn, yïn ɑ Jwøng-ɑ Ácwɑ̈ɑ̈j, bong Jwøk mɑ ɑ́pɑ̈nyi gwøg ki gïg-ɑ ɑ́gwøøg. Pödhh-ɑ ɑ́cöb yi yïn bënn, óbï kɑ yï mɑl yi gen, kɑ döngí lenhi yi gen, mɑ́ yïn ɑ teg, o yï nyii göögø ki gïgdøngø, bene yï ketí ɑ bɑ Jwøk. Pwönyí yɑn gïn-ɑ dwɑddi yi yïn, o gwøøgɑ, yïn ɑ Jwøng-ɑ Ácwɑ̈ɑ̈j, o møg-ɑ pwönyí yɑn ógwøg yi yɑn ceth, pwönyí yɑn ki göggi yïn ki pyëw ɑ́kyel. Yï ólenhɑ ki pyëwɑ bëne, yïn ɑ Jwøgɑ, Jwøng-ɑ Ácwɑ̈ɑ̈j, döngí ólenhɑ gïti ɑtheer. Yɑ mɑɑr yi yïn ki mendwøng, wëyɑ ɑ́yïëël yi yïn wɑ̈g kì pödhi tyëngthøø. Tyëngɑthwøg ɑ́bï kömɑ, yïn ɑ Jwøk, ɑkuud tyëng-ɑ yethi gen wöny dwɑdd-ɑ nɑ̈gi yɑn, gen ɑ tyëng-ɑ pɑ gɑ̈nni yïn. De yïn ɑ Jwøng-ɑ Ácwɑ̈ɑ̈j, yï bɑ Jwøng mɑɑr ji, Jwøng pyëwe nyi lɑ̈ɑ̈m, o mɑ̈ɑ̈dø mií dwøng. Lïïdh yïɑ kɑ pyëwí lɑ̈ɑ̈me ki yɑn, thödhí yɑn ki tegø kɑ yɑ yieel, mɑ́ yɑ gögg-ɑ yïn ni kɑ ɑ́göggi yïn yi meyɑ. Nyudhí yɑn døøjí, yïn ɑ Jwøng-ɑ Ácwɑ̈ɑ̈j, o tyëng-ɑ mɑɑn yɑn, wɑ̈thi gen ólɑ̈ɑ̈y gen, keny-ɑ ólïdhi gen kinni yɑ ɑ́lug yi yïn, kɑ yɑ køny yi yïn. Jwøng-ɑ Ácwɑ̈ɑ̈j kɑɑle ɑ́geere wïj kïti kwër, Yerusɑlem mɑɑr yi en, kibøli kɑ̈dd-ɑ kyeelø kì Isrɑil. Lïng, yïn ɑ kɑɑl Jwøk, ki gïgdøj møg-ɑ kømme kì rií kinni: “Rïp geki Bɑbïlöniyɑ̀, ókwɑɑnɑ kelli pödhh-ɑ ngɑ̈nyi yɑn, kí Pelistiyɑ̀ geki Suur, kí Kuc, jii gen óreb ki tyëng Yerusɑlem.” Dhɑyøn ókwøb kinni, i pödhh bënn kɑ̈ɑ̈l-ɑ yije, mɑ́ e ówëggi tëngø yi Ngɑn-ɑ Pëddi Döng. Nyingi jii pödhh bënn ógwed yi Jwøng-ɑ Ácwɑ̈ɑ̈j, o gï órebe bënn ki tyëng Yerusɑlem. Ge cöngø ge owörø kinni, “Gyëdhhee bënn, kɑ̈ɑ̈l-ɑ Dhɑyøn.” Jwøgɑ, Jwøng-ɑ Ácwɑ̈ɑ̈j, yïënɑ, yɑ rïïj yɑ kwɑjj-ɑ yïn kì dicɑ̈ng, o yɑ nyi bï-ɑ bølí kì wɑ̈r. Lïngí kwɑ̈jjɑ, lïngí cwɑggɑ, kɑ̀ ywöngɑ kipe kønyø. Kömɑ ɑ́pɑ̈dhi yi rɑj mø ngenyø, yɑ ɑ́cyɑ̈ngi ki thøø. Yɑ ɑ́göög ni tyëng-ɑ kømi thøø, bong tegø mɑ ɑ́döng kì riɑ. Yɑ ɑ́wiy kelli tyëngthøø, yɑ nɑ ji møg rumø nɑ̈gø, o ge buud-ɑ yethi burri gen, jiɑni rum wïlø kì wïjí ge pɑ cuggi kønyø yi yïn këti. yɑ ɑ́leeng yij rörø me ludhø cɑrø, me bɑ muunhi dwøng. Linyí ɑ́pɑ̈dhi kömɑ ki mendwøng, yɑ ɑ́mud yi ɑpɑgi linyí. Mɑ̈dhhɑ ɑ́nyiig yi yïn kì butɑ, yɑ ɑ́wëggí böggø yi gen. Yɑ ɑ́cyëëg ød, o yɑ cögɑ yɑ pɑ pɑ̈r. nyingɑ ɑ́lunyi yi orɑng. Yɑ kwɑjj-ɑ yïn yethi cyɑ̈ng, yïn ɑ Jwøng-ɑ Ácwɑ̈ɑ̈j, e cinggɑ thɑ̈ngi yɑn yïn. Tyëngthøø nyii göggø yi yïn ki gïïngɑ̈ngø? Ge ódi dhwödhø o yï lenhi yi gen? Mɑ̈ɑ̈dø mií men-ɑ dwøng pere nyii kømmø kì yij rörø? Wɑlɑ̀ døøjí pere nyii kømmø kì kej thøø? Gïïngɑ̈ngø møgí ngɑ̈nyi kì kej muudhø? Wɑlɑ̀ døøjí ngɑ̈nyi kì piny tyëng-ɑ ɑ́wïl? Yɑ nyi ywøøg-ɑ köörí yïn ɑ Jwøng-ɑ Ácwɑ̈ɑ̈j kinni køny yɑn, yï nyi kwɑjjɑ’ kwɑjjø kì mwøl yethi cyɑ̈ng bënn. Yɑde ɑ bɑɑny yɑn, Wuö? Yɑde ɑ lugí yɑn ngɑ̈jí? Yɑ ɑ́bëëd yɑ orɑngø kër-ɑ ɑ́wönɑ yɑ thiinh, kɑ yɑ nyii cyɑ̈ngø ki thøø, yɑ ɑ́nyönhi yi cɑ́y-ɑ ɑ́cɑɑy yɑn yi yïn. Yɑ ɑ́nyøng yi linyí, yɑ ɑ́nɑ̈g yi yïn ki linyí. Yɑ ɑ́köllí rïïjø yɑ ótyegø yi böögø, kì wɑ̈thi tùng bënn ni tyëëg bɑɑyø. Mɑ̈dhhɑ, mɑ̈dhh-ɑ døngø ɑ́lɑ̈ɑ̈w yi yïn ki yɑn, yɑ ɑ́döng wø 'lwööb kɑ muudhø. Wuö Jwøng-ɑ Ácwɑ̈ɑ̈j, yɑ ócög yɑ wör-ɑ wörri mɑ̈ɑ̈dø mií. yï ólejjɑ gïti ɑtheer. Yɑ ngɑ̈ny wøw kinni, mɑ̈ɑ̈dø mií bong cöge, ying-ɑ keje gïti ɑtheer, døøjí ying-ɑ keje ceth, ni kɑ̀ bëëd mɑl kì keje. Yï ɑ́kööb kinni, “Yɑ ɑ́lwööb wøki jɑl-ɑ ɑ́yienyɑ; Debïd bɑ̈ngɑ ɑ́köbbɑ kinni, ‘Ócög e dɑ kwɑrí me bɑ rɑ̈dh, kwømí ócïbɑ keje gïti ɑtheer.’ ” Mɑl wör e lejj-ɑ gïg-ɑ pëddi myëërø møg-ɑ ɑ́gwøg yi yïn, per døøjí wör-ɑ yi tyëng kwërø, yïn ɑ Jwøng-ɑ Ácwɑ̈ɑ̈j. Bong ngɑn pɑ̈ɑ̈r ki yïn kì mɑl, yïn ɑ Jwøng-ɑ Ácwɑ̈ɑ̈j, bong ngɑn pɑ̈ɑ̈r ki yïn kì kelli tyëng mɑl. Yï ceg kɑ böggø kì buri tyëng kwërø, ge ceg-ɑ kïïrø bënn kì bølí. Yïn ɑ Wïlɑ̈bø, Jwøng-ɑ Ácwɑ̈ɑ̈j, bong ngɑn dwøng ni yïn, bong ngɑn gøggi dyër ni yïn, yïn ɑ Jwøng-ɑ Ácwɑ̈ɑ̈j. Yïn ɑ jɑɑg nɑɑm omelø ɑ rɑj, yïn ɑ nyi wëggi tegi ɑpɑge kwöjø. Lebiyɑthɑn nyii nyøngø yi yïn kɑ nɑ̈ɑ̈g, tyëngmɑ̈ɑ̈nø nyii tyɑmø yi yïn ki tegí. Mɑl geki piny bɑ møgí, yïn ɑ ɑ́cwɑ̈j piny geki gïg-ɑ yije bënn! Yïn ɑ ɑ́cwɑ̈j wɑɑng wuudø geki wɑɑng wurlwɑl. Kïti Tɑbör geki Kïti Kermön lenh-ɑ yïn ki wörri medi pëëth. Yï teg nɑ ngø! O tegí dwøng nɑ ngø! Døøjø geki dyër bene tyelli kwømí o mɑ̈ɑ̈dø geki gøggi dyër ónënnø kì ri gwøgí bëne. Tyëng-ɑ nyi mɑlli yïn ki wör ri gen dɑ gyëdh, gen ɑ tyëng-ɑ bëëdø kì yij cɑɑr døøjí! Ge nyi rïïj ge lenh-ɑ nyingí ki medi pëëth, kɑ yï nyi lenhi gen kipe døøjí. Wø nyi wëggí tyɑ̈mø, kɑ wɑ̈thi wøn tïng yi yïn mɑl, mɑ́ wø mɑɑr yi yïn. Mɑ́ yïn ɑ Jwøng-ɑ Ácwɑ̈ɑ̈j, ɑ myeg ngɑn-ɑ korri wøn, yï kwërø, Jwøøg Isrɑil, ɑ ɑ́thödhi wøn ki rɑ̈dh. Bɑ̈ngg-ɑ ɑ́böggi yïn ɑ́cɑ̈rrí cøn kinni, “Jɑl-liny men-ɑ teg ɑ́kønyɑ, kwøøm jyɑ̈gø ɑ́mëggɑ ngɑn-ɑ ɑ́yienyɑ kì kelli jiɑ. Bɑ̈ngɑ Debïd ɑ́rønyɑ ɑ́ rɑ̈dh, ɑ́gïnyɑ ki møøw kwër. Tegɑ óbëëd e ying-ɑ köme yethi cyɑ̈ng bënn, ótëngi yi tegɑ. Koo pɑ̈nyi ki lodø yi tyëngmɑ̈ɑ̈nø, koo tyɑm yi tyëngrijjø. Tyëng-ɑ mɑɑnii ónyøng yi yɑn o tyëng-ɑ yethi gen di ɑter ki en, ónɑ̈g yi yɑn bënn. Mɑ̈ɑ̈dø miɑ geki døøjɑ óbëëdø kì köme, ówëggɑ tyɑ̈mø ceth. Pödhe ólɑny yi yɑn e cɑ̈g-ɑ́ɑ̀ kömi Nɑɑm Omeli Tɑr gïti kömi Nɑm Porɑt. Óywøøg yïɑ kinni, ‘Yï bɑ wïyɑ, o yï bɑ Jwøgɑ yïn ɑ korri yɑn, o yïn ɑ nyi yiel yɑn.’ Ógwøgɑ ɑ́ wɑ̈dɑ, wɑ̈n-ɑ kɑyø, e ying-ɑ mɑl kibøli rɑ̈nhi kömi piny bënn. Møg-ɑ ɑ́kwöngɑ kipere ómïdhɑ ceth, lwömɑ ki en ógïti ɑtheer. Kwøme óbëëdø kì keje ceth ni mɑl, o bëëd e dɑ kwɑre me bɑ rɑ̈dh ceth. “De keløg ciggɑ ówiy piny yi kwɑrre, kɑ ge pɑ bëëdø kì kömi ciggɑ; keløg ciggɑ ópyem yi gen, kɑ ge ocögø gï pɑ mïdhi gen, ge ócɑyɑ kipe orøøg gen, ge ówëggɑ orɑng kipe bɑ̈jji gen. De yɑ pɑ wïyi ki mɑɑri Debïd o møg-ɑ ɑ́köngɑ en pɑ pɑ̈d yi yɑn. Lwömi wøn ki en pɑ pɑ̈d yi yɑn, o møg-ɑ ɑ́kwøbɑ kinni gï ógöggɑ en, pɑ wil yi yɑn. “Yɑ ɑ́rum ki köngø ki nyingɑ kwërø kinni, Debïd pɑ köbbɑ pyed. Yïe ódi kwɑrr ceth, lɑ̈ge ókorɑ ceth ni nudi cɑ̈ng kì mɑl. Ócïbɑ keje ceth ni dwɑ̈y kì mɑl; ni dwɑ̈y ɑ bɑ cwɑ̈gɑ kì yij mɑl.” De pyëwí ɑ́rënyi ki rɑ̈nh-ɑ ɑ́yieny yi yïn; ɑwiyií piny kɑ bɑɑny. Lwömí ki bɑ̈ngí ɑ́pɑ̈ɑ̈d, yɑ̈re ɑ́leeng yij tør. Döri kɑɑle ɑ́dhur piny, kɑ dörre döng gɑ thur. Jɑmme bënn ɑ́yɑg yi tyëng-ɑ nyi bï ge opödhø, ceg kɑ gɑggø yi tyëng-ɑ cyɑ̈gi ki en. Tyëngmɑ̈ɑ̈nø ɑ́wëggí tyɑ̈mø, pëthi gen ɑ́wëggí mïnø. Jɑmmi liny møge ɑ́tørrí, kɑ wëggí tyɑmø kì yij liny. Rɑ̈ɑ̈dhø mee ɑ́rënyí, kɑ kwøme tɑ̈ɑ̈y piny. Áwëggí jwɑn yöø, kɑ wëggí yɑ̈rø Jwøng-ɑ Ácwɑ̈ɑ̈j, yï gït-ɑ wɑɑng yï kɑnn-ɑ rií? Linyí gït-ɑ wɑɑng e lyel nɑ mɑc? Jwøng-ɑ Ácwɑ̈ɑ̈j, ngɑ̈nyi yi yïn kinni wø pɑ nyi ti bëëdø kì kömi piny o wø ɑ́cwɑ̈j yi yïn, wøn ɑ́ ji mø nyi thøw! Á men ɑ cuggi bëëdø e pɑ thøw? Á men ɑ cuggi yieli wëye ki thøø? Wuö, ɑ́gøne mɑ̈ɑ̈dø mií cøn? Ágøne møg-ɑ ɑ́köngí Debïd? Pɑr, gwɑnn-ɑ gwɑddi yɑn, yɑ bɑ̈ngí Wuö, kí yëth-ɑ nginɑ yɑ̈ddi tyëng pödhh-ɑ kyeelø. Rɑ̈nh-ɑ ɑ́yieny yi yïn ceg kɑ gwɑddø yi tyëng-ɑ mɑɑn yïn! Ceg kɑ gɑggø yi gen kì keny-ɑ kedhe. Lenhu Jwøng-ɑ Ácwɑ̈ɑ̈j gïti ɑtheer! Amen! Amen! Wuö, bɑ yïn ɑ yïí nyi yömmi kì yethi rïjj bënn. Yï ɑ́wöni yï nud e men-ɑ́ kïttì nuti cwɑ̈ɑ̈j yïn, o lɑ̈bø nuti cwɑ̈ɑ̈j yïn, yï ɑ́bëëd yïn ɑ́ Jwøk ceth o yï gïti ɑtheer yïn ɑ́ Jwøk. Wø nyi dwøøgí ri gïn-ɑ ɑ́kɑ̈ɑ̈l wøn wø nyi dwøøgí ri lɑ̈bø. Runn ɑ́lïp nɑ cyɑ̈ng ɑ́kyel kì yïí, ge nɑ ɑ́wɑ̈ɑ̈ kì yïí, ge ɑ́pöödh, nɑ sɑɑ̀ me cyeeg kì wɑ̈r. Wø ɑ́wøj yi yïn ni wöjji bɑɑyø, wø ɑ́kedh wø nɑ lɑ̈g, wø nɑ lum-ɑ nyi lidh e twïyø kì mwøl, lum-ɑ nyi jwɑn døngø, kɑ nyi jwɑn-ɑ thwøwø kɑ nyii thøø kì böörø. Wø ɑ́rënyi yi rɑ̈ji pyëwí, wø ɑ́bwøg yi linyí. Orøøg wøn ɑ́cïb yi yïn bølí, keny nenní orøng-ɑ gwøøg wøn kì gød. Runn-ɑ nëën wøn nyii ngølø ge cyeg yi linyí, nyi kedh e nɑ möngø. Runni wøn bɑ pyɑ̈r ɑ́bïryew yøw, wɑlɑ̀ pyɑ̈r ɑ́bïdɑ̈g keløg dëlli wøn teeg, de cɑgg ɑ́ kinøw, ge beed yi wøn kɑ orɑng geki kïïmø, ge nyi jwɑn-ɑ thumø, kɑ wø ókedhø. Á men ɑ ɑ́yod tegi linyí? Á men ɑ ngɑ̈nyi wɑ̈ɑ̈rø men-ɑ nyi kɑ̈ɑ̈l yi linyí? Nyudhí wøn kinni runni wøn ceggø, o wø göög wøn wɑ̈thi wøn pel. Linyí gït-ɑ wɑɑng? Yïn ɑ Jwøng-ɑ Ácwɑ̈ɑ̈j, lɑ̈ɑ̈m pyëwí ki bɑ̈nggí! Pɑ̈ng wøn ki mɑ̈ɑ̈dø mií, o wø wör wøn pëthi wøn omedø kì yij bëëdi wøn bëne. Thödhí wøn ki medi pyëw me ni rɑ̈ji pyëw men-ɑ ɑ́mëggí wøn kì yethi runn-ɑ ɑ́kïïm wøn bënn. Wiy gïgdøngø møg-ɑ ɑ́gwøg yi yïn yod yi wøn, wøn ɑ bɑ̈nggí, wiy dhwɑ̈ngí geki tegí lidh yi kwɑrri wøn. Yïn ɑ Jwøøg wøn, Jwøng-ɑ Ácwɑ̈ɑ̈j, gyëdh wøn. Wiy gïg-ɑ gøggi yi wøn bënn nyi pɑ̈dhi gen kɑ̈jji gen! Ngɑn-ɑ yömmi yï Jwøng-ɑ Ácwɑ̈ɑ̈j, ngɑn-ɑ korri yi Áyïmø, ócuggø köbbii kinni, “Bene yïn cwɑ̈gɑ, o yïn ɑ korri yɑn. Yïn ɑ bɑ Jwøgɑ, yïn ɑ gɑ̈nnɑ.” Yï óyiele ki gïgrijjø møg-ɑ kwïj yi yïn kɑ yï korre ki rɑ̈ɑ̈m dëllì. Yï ókume ki obërre, yï ókonge ceth, døøje bɑ kwödí, en ɑ nyi yiel yïn. Bong gïn böggí kì wɑ̈r, o bong gïn pɑ̈ɑ̈r kömí kì dicɑ̈ng, wɑlɑ̀ bong yømø nɑ̈ɑ̈g me göjji kì yij muudhø, wɑlɑ̀ rɑjj-ɑ nyi nɑ̈gi kì dicɑ̈ng. Ji ɑ́lïp ócuggø pɑ̈ɑ̈dhø ge thøø kì butí, kí ɑ́lïp pyɑ̈rø møg tyeeg yïn, de bong gïnrɑj men-ɑ ónywɑl yïn. Yï ólïdhi ki wɑngí, ki kër-ɑ cɑɑy tyëngrijjø. Jwøng-ɑ Ácwɑ̈ɑ̈j ɑ́gwøg yi yïn ɑ́ ngɑn nyi cwɑg yïn, Ngɑn-ɑ Pëddi Döng ɑ korri yïn. Bene ɑ bëëd e bong rɑj mø bï kömí, bong ngɑnrɑj me cyɑ̈ngi ki gølí, mɑ́ Jwøk wëywödde óöre yïí be kori yïn kì keny-ɑ kedhí. Yï ókwɑg yi gen ki cinggi gen, o tyellí cög ge pɑ pög yi tuggi kïttì. Ngurrì mø rijjø geki thöllì mɑ nɑ̈ɑ̈g, ge óyööny yi yïn ki tyellí. Jwøk okööbø kinni, “Tyëng-ɑ mɑɑr yɑn, ge óyielɑ, o tyëng-ɑ ngɑ̈nyi yɑn, yɑn ɑ́ Jwøng-ɑ Ácwɑ̈ɑ̈j, ge ókongɑ. Kwøbbi gen óløøgɑ keny-ɑ ócwøøl yɑn yi gen, ge óyiel yi yɑn keny-ɑ óbëën kömi gen yi ɑkørr, ge ódøm yi yɑn kɑ ge nëngɑ ki dhwɑ̈ng. Ge ówëggɑ bëëdø ki runn mø gïïr, ge óyielɑ.” Pwøjí døøj cɑrø, yïn ɑ Jwøng-ɑ Ácwɑ̈ɑ̈j, lenhi yïn ki wör døøj, yïn Jwøng-ɑ Pëddi Döng, kí lejji mɑ̈ɑ̈dø mií kì mwøl, kí pøjji døøjí kì wɑ̈r, kí wörri thømi pujj geki oten kɑng. Pyëwɑ nyii mïnø yi gïgdøngø møg-ɑ ɑ́gwøg yi yïn, yïn ɑ Jwøng-ɑ Ácwɑ̈ɑ̈j, yɑ nyii wörø ki medi pyëwɑ, kì bɑng gïg-ɑ nyi gwøg yi yïn. Gïg-ɑ nyi gwøg yi yïn døngø cɑrø! Rummí dhɑ̈li pïïdø. De møgɑni pɑ cuggi yodø yi dhëg, ge pɑ gɑm yi wïj ngɑn rumme nøg kinni, tyëngrijjø ócuggø jwɑn døngø ni lum, tyëng-ɑ gøggi rɑj ócuggø dönyø; de cɑgg ɑ́ kinøw, ge ónɑ̈g kinni tweet. Dɑ́ yïn, yï Jwøng-ɑ Ácwɑ̈ɑ̈j, ɑ óbëëdø yï dwøng gïti ɑtheer. Ngɑ̈nyi yi wøn kinni tyëng-ɑ mɑɑn yïn óthøw, o tyëngrijjø bënn ótyɑm. Yɑ ɑ́wëggí tëngø ni wɑdh, yɑ ɑ́gyëdh yi yïn ki medi pyëw! Tyɑmi tyëngmɑ̈ɑ̈nø ɑ́lidhɑ ki wɑngɑ, ywøøg tyëngrijjø ɑ́lïngɑ ki yïthhɑ. Tyëngtir ódönyi ni yenh benø, kɑ ge ódøngø ni yenh sɑndɑl mø Lubnɑn. Ge nɑ yenh-ɑ ópiidhø kì ød Jwøng-ɑ Ácwɑ̈ɑ̈j, ɑ nyi døngi kì Kengi Jwøgee, ge nyii yöø ge nudd ge onywølø, ge nyi cög ge mɑr, o ge teeg. Menɑni nyodh-ɑ kinni Jwøng-ɑ Ácwɑ̈ɑ̈j nyi gøgg-ɑ dyër, o bong ruj kì yij ngɑn-ɑ kor yɑn. Jwøng-ɑ Ácwɑ̈ɑ̈j bɑ rɑ̈dh. Rug-ɑ döng geki tegø. Piny ɑ́cïb keje kidøøj, o pɑ cuggi lëggø. Yïn ɑ Jwøng-ɑ Ácwɑ̈ɑ̈j, kwømí ying-ɑ keje ceth kër-ɑ ɑ́cɑɑg piny, o yï nud keny-ɑ́ nudd e bong piny. Cwɑggi nɑ̈mmi omel-ɑ døngø ɑ́wɑ̈dhi mɑl, yïn ɑ Jwøng-ɑ Ácwɑ̈ɑ̈j, cwɑggi gen ɑ́tïng gen, ge ceg-ɑ ruurø. Jwøng-ɑ Ácwɑ̈ɑ̈j jyɑ̈gø ɑ́ ngɑndwøng kì pɑɑre mɑl, dwøng kibøli ruuri cwɑggi nɑɑm omeli dwøng, teeg cɑrø kibøli ɑpɑgi nɑɑm omelø. Ciggí gït-ɑ ɑtheer, yïn ɑ Jwøng-ɑ Ácwɑ̈ɑ̈j, o Kengí bɑ kej kwër me dwøng, e gïti ɑtheer. Jwøng-ɑ Ácwɑ̈ɑ̈j, yï bɑ Jwøng nyii cudø ki gøølø, nyodh linyí! Yïn ɑ jɑɑg ji bënn, dhwöödh cɑy tyëngɑthwøg ki cɑ́y-ɑ kyëëw ki gen! Tyëngrijjø gït-ɑ wɑɑng pëthi gen omedø? Ge gït-ɑ wɑɑng pëthi gen omedø, yïn ɑ Jwøng-ɑ Ácwɑ̈ɑ̈j? Tyëngorøg gït-ɑ wɑɑng ge othwøgø ge pwöd-ɑ köthi gen kipe gøggi rɑj? Jií ceg kɑ nyønø yi gen, yïn ɑ Jwøng-ɑ Ácwɑ̈ɑ̈j, ge guud-ɑ nyingi ji-ɑ bɑ møgí. Ge nɑ̈g-ɑ thwömm geki kïjj, ge luj-ɑ tyëngpɑth kì yij pödhø. Ge okööbø kinni, “Wɑ pɑ nenni yi Jwøng-ɑ Ácwɑ̈ɑ̈j, Jwøøg Isrɑil bong gïn lidhe.” Jiɑ, wude ɑ bëëd wɑ̈thi wun nøg, o wu bɑ dhëgg? Wu ódïd-ɑ wɑɑng? Jwøk ɑ ɑ́cwɑ̈j yïthhee, ódhɑ̈lø lïngø? En ɑ ɑ́cwɑ̈j nyingee, ódhɑ̈lø nënnø? En ɑ nyi ceg pödhh, gï ócög gï pɑ cɑye? En ɑ nyi pwönyi ji, óbëëd e kwïj wøw? Nøgi rummi ji ngɑ̈nyi yi Jwøng-ɑ Ácwɑ̈ɑ̈j, ngɑ̈nyi yi en kinni dëlli gen pɑ nyi juur, o ge kwïj yɑbi thɑ́ kwøb. Tyëng-ɑ nyi ceg yi yïn ri gen dɑ gyëdh, yïn ɑ Jwøng-ɑ Ácwɑ̈ɑ̈j, gen ɑ tyëng-ɑ nyi pwönyí ki ciggí! Ge ɑ́wëggí ywömi ri gen kì cyɑ̈nggi rɑj, gïti keny-ɑ ókunyyi tyëngrijjø ki bur men yije pɑ̈dhi yi gen. Jwøng-ɑ Ácwɑ̈ɑ̈j jie koo bɑny yi en, ji-ɑ bɑ møge koo wiye piny. Gønyy ódøøg be cïb kɑ̈jji gen ki burø, møgɑni ógwøg yi tyëngtir. Á men ɑ ɑ́cwɑg yɑn keny-ɑ ɑ́nyïɑ̈ggɑ ki tyëngrijjø møgɑni? Á men ɑ ɑ́ying tungɑ keny-ɑ ɑ́byëddɑ ki tyëng-ɑ gøggi rɑj? Keløg yɑ pɑ di køny yi Jwøng-ɑ Ácwɑ̈ɑ̈j, wëyɑ di jwɑni pödhi tyëngthøø. Yɑ ɑ́kööb kinni, “Yɑ bɑ men pɑ̈ɑ̈dh,” de yɑ ɑ́tïng mɑl yi mɑ̈ɑ̈dø mií, yïn ɑ Jwøng-ɑ Ácwɑ̈ɑ̈j. Kenyi lïngi pyëwɑ kɑ yɑ orɑngø, yɑ nyii lugø yi yïn kɑ pyëwɑ nyii mïnø. Yï pɑ cuggi rëbø ki jɑggi burø møg-ɑ rijjø, gen ɑ tyëng-ɑ nyi gwøg ruj e nɑ cigg, ɑ nyi rømmi göggi tyëngdøj ki rɑj, kɑ ngɑn yïe bɑ̈r nyi cɑy gen ki thøø. Den-ɑ́ Jwøng-ɑ Ácwɑ̈ɑ̈j ɑ nyɑg perɑ, Jwøgɑ ɑ korri yɑn. Gï ócɑye kì bɑng rɑ̈ji gen, kɑ gï nɑ̈ge kì bɑng orøøg gen, ge ónɑ̈g yi Jwøgee, Jwøng-ɑ Ácwɑ̈ɑ̈j. Bïu lenhi wɑ Jwøng-ɑ Ácwɑ̈ɑ̈j ki wör! Wör wɑ ki medi pëëth kì bøli ngɑn-ɑ ɑ́yiel wɑ! Kedhi wɑ bøle ki wörri pwøj wɑ lenh-ɑ en ki wörri medi pëëth. Mɑ́ Jwøng-ɑ Ácwɑ̈ɑ̈j bɑ Jwøng teg, en ɑ teg kibøli jwögg bënn. En ɑ jɑɑg piny bëne, cɑg kì thɑ piny gïti wɑ̈thi kïtt-ɑ bɑ̈rrø cɑrø. En ɑ ɑ́cwɑ̈j nɑɑm omelø, o jɑɑg-ɑ yi en, o piny-ɑ thwøwø ɑ́cwɑ̈j-ɑ yi en thyew. Bïu bøødh wɑ riee piny kɑ mɑlli wɑ, rum wɑ cøngee piny kì bøli Jwøng-ɑ Ácwɑ̈ɑ̈j, ngɑn-ɑ ɑ́cwɑ̈j wɑ! En ɑ bɑ Jwøgee, bene wɑ ji-ɑ konggi yi en, bene wɑ dyëg-ɑ kwɑye. Lïngu møg-ɑ kwøbe dicyɑ̈ngtïn, okööbø kinni, “Muddi wun ko tëngi ni kweyyi wun kì Merïbɑ̀, ni gïn-ɑ ɑ́gwøg yi gen kì yij pɑ̈l kì Mɑɑsɑ̀. Yɑ ɑ́tïm yi kweyyi wun kì kunɑni, ngö gïg-ɑ ɑ́gwøgɑ kiper gen rumø’ lidhø yi gen. Yɑ ɑ́tyëg-ɑ runn pyɑ̈r ɑ́ngwen köörɑ buudhø yi rïnyɑni Akööbɑ kinni, ‘Á ji kidï ɑ bong pëthi gen kinøw! Ge ɑ́bɑ̈nyi mïdhi ciggɑ.’ Bene ɑ köngɑ ki rɑ̈ji pyëwɑ kinni, ‘Wu pɑ pɑ̈nyi kedhi yij pinyɑni kun-ɑ di nëngɑ wun ki ywömø.’ ” Wör wun kì bøli Jwøng-ɑ Ácwɑ̈ɑ̈j ki wörø me nyɑ̈n, Wöör kì bøli Jwøng-ɑ Ácwɑ̈ɑ̈j, yïn ɑ piny bëne. Wör wun kì bøli Jwøng-ɑ Ácwɑ̈ɑ̈j, wu lenh-ɑ en, kømmu kwøbbi dönge kì yethi cyɑ̈ng bënn. Ngɑ̈j wun kwøbbi dönge kì yethi pödhh bënn, kɑ gïïngɑ̈ngø møg-ɑ ɑ́gwøge köbbi wun dhɑnhø bëne. Mɑ́ Jwøng-ɑ Ácwɑ̈ɑ̈j dwøng, o ceg kɑ lenhø ki mendwøng, wør ki mendwøng kibøli jwögg bënn. Mɑ́ jwöggi pödhh-ɑ kyeelø bënn bɑ ngïjjì, den-ɑ́ Jwøng-ɑ Ácwɑ̈ɑ̈j, ɑ ɑ́cwɑ̈j mɑl. Ótyegø yi mɑ̈r geki dhwɑ̈ng, o Kenge pɑ̈ng yi tegø geki myëërø. Lenhu Jwøng-ɑ Ácwɑ̈ɑ̈j, wun ɑ tyëng kömi piny bënn. lenhu mɑ̈re geki tege. Lenhu mɑ̈ɑ̈r Jwøng-ɑ Ácwɑ̈ɑ̈j kɑ nyinge lejji, muuj wun en ki gëdhhì, kɑ wu bïu Kenge. Bøødhu ri wun piny kì bøli ngɑn-ɑ bɑ Kwërø, kïrri dëlí kì bøle, yïn ɑ piny bëne! Köbbu pödhh bënn kinni, “Jwøng-ɑ Ácwɑ̈ɑ̈j bɑ rɑ̈dh! Piny ɑ́cïb keje, o pɑ nhɑ̈nhø, gønyyi ji nyi cïbe’ kɑ̈jji gen.” Mïni pëthi wun, wun ɑ mɑl kí piny! Ruur yïn ɑ nɑɑm omelø wuki gïg-ɑ yijí bënn, mïni pëthi wun, wun ɑ pwödh wuki gïg-ɑ yethi wun bënn! Yenh óryeer ki medi pëthi gen kì yij thïm, keny-ɑ óbëën Jwøng-ɑ Ácwɑ̈ɑ̈j be jɑɑgi piny bëne. Jii kömi piny ójɑɑg yi en kɑ gøggi dyër geki bongi geny. Jwøng-ɑ Ácwɑ̈ɑ̈j bɑ rɑ̈dh, wiy piny bëne pyëwe mïne, wiy mujji nɑ̈mmi omelø pëthi gen mïni gen! Órïïmø yi pøøl geki muudhø, kwøme bëëd ɑ kömi døøjø geki gøggi dyër. Mɑc ócyɑ̈dhø kì bøle kɑ tyëngmɑ̈ɑ̈nø nyi rɑ̈b yi mɑnyɑni. Piny ɑ́meny yi ogwele, piny ɑ́lïdhi kɑ okïïrø. Kïttì ɑ́leny kì bøli Jwøng-ɑ Ácwɑ̈ɑ̈j ni cemɑ̀, ge ɑ́leny kì bøli Wïi piny bëne. Mɑl nyodh-ɑ gøgge dyër, dhwɑ̈nge ɑ́lidh yi pödhh bënn. Tyëng-ɑ nyi mɑlli ngïjjì ɑ́yɑ̈r bënn, jwögg bënn ri gen ɑ́bøødh gen piny kì bøli Jwøng-ɑ Ácwɑ̈ɑ̈j. Tyëng Dhɑyøn pëthi gen ɑ́mïni, kɑ pëthi kɑ̈ddi Yeudiyɑ̀ ómïnø, kipe cɑ̈yí, yïn ɑ Jwøng-ɑ Ácwɑ̈ɑ̈j. Yïn ɑ Wïlɑ̈bø, Jwøng-ɑ Ácwɑ̈ɑ̈j, bene yïn ɑ jɑɑg kömi piny bëne, yï ying-ɑ mɑl kibøli jwögg bënn. Mɑɑnu rɑj, wu tyëng-ɑ mɑɑr yi Jwøng-ɑ Ácwɑ̈ɑ̈j, wëyi jie nyi korre’ korrø, gï nyi yiele yielø kì cinggi tyëngrijjø. Cɑr nyii mënyø kì kömi tyëngtir, pëthi tyëngdøj nyii mïnø. Med pëthi wun, wun ɑ tyëngtir, kipe gïg-ɑ ɑ́gwøg yi Jwøng-ɑ Ácwɑ̈ɑ̈j! Pɑru gïg-ɑ ɑ́gwøg yi Jwøk kwërø, kɑ pwøj wun. Wör wun ki wörø me nyɑ̈n kì bøli Jwøng-ɑ Ácwɑ̈ɑ̈j, mɑ́ e ɑ́göög ki gïg mø myër! Átyɑ̈ɑ̈m ki mendwøng kì yij liny, kì bɑng kɑ̀ tege, o bɑ kwërø. Jwøng-ɑ Ácwɑ̈ɑ̈j, tyɑ̈me ɑ́nyodhe, teng-ɑ yïëde ɑ́nyudhe pödhh-ɑ kyeelø. Møg-ɑ ɑ́könge Isrɑil gï mïdhe’ mïdhø geki døøje kí mɑ̈ɑ̈dø mee. Tyɑ̈mi Jwøgee ɑ́lidh yi ji bënn. Wöör kì bøli Jwøng-ɑ Ácwɑ̈ɑ̈j yï lenh-ɑ en, yïn ɑ piny bëne, lenhu en ki wörri medi pëëth! Lenhu Jwøng-ɑ Ácwɑ̈ɑ̈j ki wör! Thum wun ki thøm! Kodhu kɑ̈ngì geki tùng, kɑ wu ryeer wun ki medi pëëth kì bøli rɑ̈dhee, Jwøng-ɑ Ácwɑ̈ɑ̈j. Ruur yïn ɑ nɑɑm omelø wuki gïg-ɑ yijí bënn, wöör yïn ɑ piny geki gïg-ɑ bëëdø kì kömí bënn! Teng wun cinggi wun, wun ɑ nɑ̈mmì, wun ɑ kïttì, wör wun bënn ki medi pëëth kì bøli Jwøng-ɑ Ácwɑ̈ɑ̈j, mɑ́ e bï-ɑ be jɑɑgi piny. Jii kömi piny ójɑɑg yi en kɑ gøggi dyër geki bongi geny. Jwøng-ɑ Ácwɑ̈ɑ̈j bɑ rɑ̈dh, dëlli ji ceg-ɑ kïïrø kì bøle. Kwööm ɑ kömi kerobb, o piny ceg-ɑ kïïrø. Jwøng-ɑ Ácwɑ̈ɑ̈j ɑ dwøng kì Dhɑyøn, en ɑ jɑɑg ji bënn. Nyinge geki dönge ólenhi yi ji bënn, Bɑ kwërø! Yï rɑ̈nh teg, yï mɑɑr-ɑ dyër, gøggi dyër ɑ́cïb yi yïn piny kì Isrɑil, yï ɑ́kɑ̈ni ki døøjø geki bongi geny. Lenhu Jwøgee, Jwøng-ɑ Ácwɑ̈ɑ̈j. Mɑ̈ddi wun kì bøli kwøme! Bɑ kwërø! Mosɑ̀ geki Aɑron ɑ́bëëd gɑ ókwërre, o Sɑmwel ɑ́kwɑjj-ɑ en, Jwøng-ɑ Ácwɑ̈ɑ̈j ɑ́bëëd e nyii kwɑjjø yi gen, kɑ kwøbbi gïn nyi løøge. Ákööb ki gïn kì yij lööj pøølø. Cigg geki kwøbb-ɑ ɑ́köbbe gïn, ɑ́mïdhi yi gen. Yïn ɑ Jwøøg wøn, Jwøng-ɑ Ácwɑ̈ɑ̈j, kwøbbi jií nyi løøgí løøgø, pyëwí ɑ́bëëd e nyii lɑ̈ɑ̈mø ki gen, cɑgg ɑ́ kenyi cɑɑy gen kipe orøøg gen. Lenhu Jwøgee, Jwøng-ɑ Ácwɑ̈ɑ̈j, kɑ wu mɑ̈ddi wun kì kïti kwëre. Jwøgee, Jwøng-ɑ Ácwɑ̈ɑ̈j bɑ kwërø. Wöör kì bøli Jwøng-ɑ Ácwɑ̈ɑ̈j yïn ɑ lɑ̈bø bëne! Mɑllu Jwøng-ɑ Ácwɑ̈ɑ̈j ki medi pëëth, bïu bøle ki wörri medi pyëw! Ngɑ̈ny wun wøw kinni bene Wë, ɑ bɑ Jwøk. En ɑ ɑ́cwɑ̈j wɑ, o wɑ bɑ møge, wɑ bɑ jie, o wɑ bɑ dyëge. Bïu yij Kenge wu kɑ̈ll-ɑ pwøj, bïu bøle e lenhu lenhø. Pwøj wun en kɑ lenhi wun. Jwøng-ɑ Ácwɑ̈ɑ̈j døøj, mɑ̈ɑ̈dø mee gït-ɑ ɑtheer, o lwöme ki jie, koo pɑ̈d yi en gïti ɑtheer. Yɑ wör-ɑ wöri tɑri pyëw geki gøggi dyër, yɑ wör-ɑ bølí yïn ɑ Jwøng-ɑ Ácwɑ̈ɑ̈j. Yɑ ócyɑ̈dhi kì yuu-ɑ døj ceth. Yï óbï yïɑ kì wɑɑng? Yɑ óbëëdø ki tɑri pyëw kì gølɑ, o yɑ ko yïëy ki gïgrijjø kinni tek. Gïg-ɑ gøggi yi tyëng-ɑ nyi lugi ngɑ̈thi gen Jwøk mɑɑn yi yɑn, bong gïn reb yɑn ki gen. Yɑ óbëëdø ceth yijɑ bong ɑ́dud, o yɑ koo rëbi ki tyëngrijjø. Ngɑn-ɑ nyi tummi wɑɑd gen ónɑ̈g yi yɑn; eni ngɑn-ɑ nyi kwɑ̈dhhi ngɑn megø. Ngeti ɑthwøg, men-ɑ tɑ̈dø bëëde koo ngin yi yɑn. Tyëng-ɑ yethi gen bong ɑ́dud ki Jwøk ónennɑ, ge ówëggɑ bëëdø kì gøldwøng. Tyëng-ɑ nyi cyɑ̈dhi kì yuu-ɑ døj, ówëggɑ göggi yɑn. Bong ngeti pyed men-ɑ ówëggɑ bëëdø kì gøldwøng, bong ngeti pyed men-ɑ ówëggɑ bëëdø kì butɑ. Tyëngrijjø kì yij pödhø órïïj ge nɑ̈gɑ’ nɑ̈gø, tyëng-ɑ rijjø ónɑ̈gɑ kì piny men. Tyëng-ɑ gøggi rɑj ócyeedɑ yïnø kì kɑɑl Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j, lïngí kwɑ̈jjɑ, kɑ ywøgɑ kipe kønyø lïngí! Ngɑ̈jí ko lugí yɑn kɑ̀ yingɑ yethi rɑj! Kënní pɑ̈ddí yɑn kɑ̀ cwöddɑ, jwɑn kwøbbɑ ki løøgø kɑ̀ cwöddɑ! Wëyɑ ceg-ɑ lɑ̈ɑ̈nyø ni yïrø, dëlɑ lyel nɑ mɑc. Yɑ ɑ́pwööd piny ni lum me thwøwø, gïncɑm pɑ kønø kì pyëwɑ. Yɑ ceg-ɑ currø, yɑ ɑ́döng yɑn ɑ́ cögø yøw. Yɑ ɑ́göög ni winyi pɑ̈l, yɑ nɑ tulø kì ød me wɑ̈n dɑ̈ɑ̈gø. Yɑ buud yɑ onëënø, yɑ nɑ winyø me bëëdø e kete kì wïj ød. Yɑ rïïj yɑ ceg kɑ gwɑddø yi tyëngmɑ̈ɑ̈nø, tyëng-ɑ nyi gɑggi yɑn ceg-ɑ yethi gen ki kejjø kiperɑ. Wëyɑ nɑ tïbi böörø, ɑ pɑ nyi cwööng ki lɑ̈ɑ̈nyø, yɑ ɑ́thwøw ni lum. De yïn ɑ Jwøng-ɑ Ácwɑ̈ɑ̈j, bɑ yïn ɑ kwömø gïti ɑtheer, yï ópɑrri yi rïjj bënn. Yï ódhwödh kɑ pyëwí ólɑ̈ɑ̈mø ki Dhɑyøn, bøli keny-ɑ ywöngi yijí kipere ɑ́wɑ̈nhi, bene bøli kenyɑni èn ceth, mɑ́ e mɑɑr yi bɑ̈nggí, cɑgg ɑ́ kɑ̀ rëny en, yethi gen óywöngø kipere, cɑgg ɑ́ kɑ̀ bëëde ɑ́ thur. O Jwøng-ɑ Ácwɑ̈ɑ̈j böggi yi pödhh-ɑ kyeelø, o tege böggi yi rɑ̈nhi piny bënn. Dhwɑ̈ɑ̈ng Jwøng-ɑ Ácwɑ̈ɑ̈j ónyodhe, keny-ɑ ódøøge Dhɑyøn ki gerø. Cwɑggi jie, ji-ɑ nyingi gen bɑɑrø ólïnge, odhɑɑm gïn koo bɑny yi en. Gwëdu rïny-ɑ óbï møg-ɑ ɑ́gwøg yi Jwøng-ɑ Ácwɑ̈ɑ̈j, o ólenhi yi tyëng-ɑ nuti nywølø ɑnɑn. Jwøng-ɑ Ácwɑ̈ɑ̈j ɑ́lïïdh piny kì kej kwëre, keny-ɑ mɑldwøng, ɑ́lïïdh kömi piny e ying-ɑ mɑl. Kɑ ywøøg ɑmɑgg lïnge kɑ tyëng-ɑ ɑ́kuum ki thøø göönye wɑ̈g. Codhe, o nyinge wøw kì Dhɑyøn, o ólenhi kì Yerusɑlem, keny-ɑ ócugi pödhh bënn, kɑ Jwøng-ɑ Ácwɑ̈ɑ̈j mɑlli yi gen. Yɑ ɑ́gwøg yɑ nyøødh yi Jwøng-ɑ Ácwɑ̈ɑ̈j yɑ nudd yɑ thiinh, runnɑ ɑ́gwøge ge nøg. Yɑ ko kɑ̈ɑ̈l ɑnɑn yïn ɑ Jwøk, yɑ nuti yöø. Jwøng-ɑ Ácwɑ̈ɑ̈j, bɑ yïn ɑ bëëdø gïti ɑtheer, Yïn ɑ ɑ́cwɑ̈j piny cøn, o mɑl ɑ́gwøg-ɑ yi yïn ki cinggí. Ge ólɑ̈ɑ̈ny, dɑ́ yïn ɑ óbëëdø, ge órënyi ni ógødh, Ge óweddí ni ógudh mø rënyø kɑ ge ólɑ̈ɑ̈nyø. De yï nɑ kërí ceth, o runní bong cögi gen. Nyigi wøn óbëëdø ki mër, ge ókorri yi yïn, kwɑrri gen óbëëdø ki tɑrø. Lenhí Jwøng-ɑ Ácwɑ̈ɑ̈j, yïn ɑ pyëwɑ! Lenhí Jwøng-ɑ Ácwɑ̈ɑ̈j, yïn ɑ bëëdɑ bëne! Lenhí Jwøng-ɑ Ácwɑ̈ɑ̈j, yïn ɑ pyëwɑ, kɑ døøje ko wïl kì wïjí. Lɑɑwe nyi dwøøge’ piny kipe orøgɑ, kɑ yɑ nyi yiele ki rɑ̈ɑ̈m dëlɑ. Wëyɑ nyi yiele’ yielø ki thøø, kɑ yɑ gëdhhe mɑ̈ɑ̈dø geki lɑ̈mpyëw. Yɑ nyi yɑ̈ɑ̈nge’ yɑ̈ɑ̈ngø ki gïgdøj kì yij bëëdɑ bëne, o yɑ bëëdɑ yɑ nɑ wøb; yɑ teg ni ógɑngi cor. Jwøng-ɑ Ácwɑ̈ɑ̈j nyi cwɑg-ɑ tyëng-ɑ ruj, o jɑmmi gen nyi dögge’ gïn. Yëthe ɑ́nyudhe Mosɑ̀, kɑ gïgdøngø møge wëgge lidhø yi tyëng Isrɑil. Jwøng-ɑ Ácwɑ̈ɑ̈j yije nyii ywöngø, o bɑ ɑdhwɑ̈ng, pyëwe pɑ nyi jwɑn rënyø, o mɑ̈ɑ̈dø mee pɑ nyi lwënyi. Pɑ nyi rïïj e ócɑ̈ɑ̈yø, o linye pɑ nyi gïti ɑtheer. Cɑ́y-ɑ nyii cɑɑye wɑ pɑ kyëëw ki orøgee, o wɑ pɑ nyi cule gïn rwööm ki orøgee. Mɑɑr-ɑ mɑɑre tyëng-ɑ böggii bong cöge nɑ lɑ̈wi kɑɑm mɑl geki piny. Orøgee nyi lɑ̈ɑ̈we’ lɑ̈ɑ̈wø ki wɑ, ni lɑ̈wi wɑɑng cyɑ̈ɑ̈ng mwøl geki wɑɑng cyɑ̈ɑ̈ng böörø. Døøji Jwøng-ɑ Ácwɑ̈ɑ̈j ki tyëng-ɑ nyi böggii nɑ døøji wïy ki nyige. Ngɑ̈ny wøw kinni wɑ ócwɑ̈jø kɑ ngø, pɑ wïl kì wïje kinni wɑ bɑ lɑ̈bø. De dhɑnhø nɑ lum; nyi twïy nɑ okøøg lum kì pɑ̈l, kɑ nyii lɑ̈ɑ̈nyø kɑ̀ köddi köme yi yømø; bong ngɑn cigii lidhø. De tyëng-ɑ wør Jwøng-ɑ Ácwɑ̈ɑ̈j, gï mɑɑr yi en gït-ɑ ɑtheer, o døøje nyi tyëg-ɑ rïjj bënn, ki tyëng-ɑ mïdhi lwöme, geki cigge ki mïnh-ɑ dyër. Jwøng-ɑ Ácwɑ̈ɑ̈j kwøme ɑ́cïbe mɑl, en ɑ bɑ rɑ̈ɑ̈dh ji bënn. Lenhu Jwøng-ɑ Ácwɑ̈ɑ̈j, wun ɑ wëywödd møg-ɑ teg, ɑ cyɑ̈dhi kì bɑng cigge, ɑ nyi lïngi møge ceth. Lenhu Jwøng-ɑ Ácwɑ̈ɑ̈j wun ɑ yɑy-ɑ teg kì mɑl, wun ɑ bɑ̈ngge, bɑ̈ngg-ɑ nyi gwøg gwøge ceth. Lenhu Jwøng-ɑ Ácwɑ̈ɑ̈j, wun ɑ gïg-ɑ ɑ́gwøge bënn, kì kɑ̈jj-ɑ jyɑ̈ge bënn Lenhí Jwøng-ɑ Ácwɑ̈ɑ̈j, yïn ɑ pyëwɑ! Pyëwɑ, lenhí Jwøng-ɑ Ácwɑ̈ɑ̈j! Jwøgɑ, Jwøng-ɑ Ácwɑ̈ɑ̈j yï dwøng nɑ ngø! Yï órïïmø yi dhwɑ̈ng geki mɑ̈r, rií ɑ́bɑɑn yij cɑr e nɑ ógødh. Mɑl ɑ́peedh ni kemɑ̀, pɑɑrí ɑ́geer kömi pïi mɑl. Pøøl ɑ́gwøøg gɑ yɑ̈thi liny møgí, o yï cyɑ̈dh-ɑ́ɑ̀ kömi obërri yømø. Yømø ɑ bɑ tyëngwöddí, ogwel mɑl ɑ bɑ bɑ̈nggí. Yïn ɑ ɑ́cïb tyelli piny kɑ̈jji gen ceth, o cöge e pɑ nhɑ̈nhø gïti ɑtheer. Kɑ kum yi yïn ki nɑɑm omeli dwøng ni ógødh, o kïttì bɑ ɑkum yi pï. Pï ɑ́rengi kɑ ɑ́cɑ̈wwí gen, ge nyii rengø kenyi ryeer, yï köbb-ɑ gen. Ge nyii rengø ge kɑ̈ll-ɑ wɑ̈thi kïttì, kɑ ge pɑ̈dh-ɑ kɑ̈jj-ɑ bɑ törr, gen ɑ kɑ̈jj-ɑ ɑ́gwøg yi yïn kiper gen. Pï ɑ́cïbí ki kew me pɑ cuggi kɑdhø yi gen, o piny cöge e pɑ kum yi gen këti. Nyingi pï ɑ́wëggí ngwej kì yij tör, kɑ nɑ̈mmì órïngø kì kɑɑm kïtt-ɑ thønhø. Lɑ̈yyi pɑ̈l nyi mɑ̈ɑ̈dh ɑ kɑ̈jjɑni, odyerø rönhe nyi nɑ̈ɑ̈ge’ kɑ̈jjɑni. Winy nyi gëdd-ɑ wɑ̈thi yenh-ɑ cyɑ̈gi ki uddi gen, kɑ ge nyii wörø kì bɑ̈ddi yenhɑni. Wɑ̈thi kïttì nyi ödí ödø ki kødh kì mɑl, kɑ piny pɑ̈ng yi yïn ki gyëdhhí. Luum dhög nyi wëggí twïyø, geki lum-ɑ nyi cɑm yi ji, kipe kinni o ge nyi pïïdh gen ki byelli gen. kɑ ge nyii göögø ki møgi oløg men mïni pëthi gen; geki møøw dhetun, men nyi mïni bëëdi gen, kí møg-ɑ nyi göög ki gïncɑm, men thödhi gen ki tegø. Yenhi Jwøng-ɑ Ácwɑ̈ɑ̈j nyii yïddø ki pï mø ngenyø ɑ løg yenh sɑndɑl Lubnɑn møg-ɑ ɑ́pidhe. Ákej nyi gëdd-ɑ bɑ̈ddi yenhɑni o ówɑngø nyii gëdø ki øde kì wɑ̈thi gen thyew. Tenø bëëd ɑ wɑ̈thi kïtt-ɑ bɑ̈rrø o kunikït bëëd ɑ yethi órøggi kïttì. Dwɑ̈y ɑ́cwɑ̈ɑ̈j o ree nyi kwɑɑn dwɑ̈tt, kí cɑ̈ng o ree nyi kwɑɑn cyɑ̈ng. Wɑ̈r ɑ́gwøøg, o kì yij muudhø, lɑ̈yyi pɑ̈l bënn nyi bï gen wɑ̈g. Nywøli ngurrì nyii ngɑ̈rrø kɑ̀ dwɑ̈ɑ̈r gen, ge yɑb-ɑ gïncɑm-ɑ mëggi gen yi Jwøk. Ge nyi døøg-ɑ yethi uddi gen kenyi tuul cɑ̈ng, kɑ ge óbuddø kì yethi uddi gen. Codhe, o ji kedhi gen be gwøøg gen o ge göög gen pïd böörø. Jwøng-ɑ Ácwɑ̈ɑ̈j, yï ɑ́göög ki gïg mø døngø cɑrø! Ge ɑ́gwøg yi yïn bënn kɑ peli wïjí! Kömi piny pɑ̈ng yi gïg-ɑ ɑ́cwɑ̈j yi yïn. Keny dɑ nɑɑm omeli dwøng; e dwøng o lɑɑj, gïg-ɑ bëëdø kì yije pɑ kwɑn, møg døngø kí møg thønhø bënn. Yɑ̈th-ɑ døngø kɑ̈ll-ɑ yije, o Lebiyɑthɑn bëëd ɑ yije, eni lɑ̈y-ɑ ɑ́cwɑ̈ɑ̈j e dwøng dwøng. Ge bëëd ɑ rií bënn, yïn ɑ nyi thödhi gen ki gïgcɑmm-ɑ dwɑddi yi gen. Yïn ɑ nyi thödhi gen, o ge cyɑ̈ɑ̈m gen, yïn ɑ nyi thödhi gen ki gïncɑm, kɑ ge oyɑ̈ngø. Kenyi lugí ngɑ̈jí gen, ge nyii böggø, kenyi kwɑɑny wëyi gen, ge nyii thøø kɑ ge døøg-ɑ ri lɑ̈m-ɑ ɑ́cwɑ̈ɑ̈j gen. De kenyi muuj ki wëy, dhɑnhø nyi nywølø, kɑ gïg nyɑ̈n nywøl kì kömi piny. Dhwɑ̈ng bɑ mi Jwøng-ɑ Ácwɑ̈ɑ̈j gïti ɑtheer! Wiy pyëwe mede ki gïg-ɑ ɑ́gwøge! En ɑ nyi lïïdh piny, kɑ piny okïïrø, kenyi nywɑle kïttì, ge nyi ceg-ɑ dungø ki yïrø. Jwøng-ɑ Ácwɑ̈ɑ̈j ólenhɑ ki wör kì yethi cyɑ̈ngg-ɑ ónëënɑ bënn, Jwøk ólenhɑ ki wör kɑ̈ng-ɑ nudɑ. Wiy pyëwe mede ki wörɑ, mɑ́ medi pyëwɑ nyi kɑ̈ɑ̈l-ɑ yïe. Wiy tyëngorøg nɑ̈g kì kömi piny, wiy bëëd e bong tyëngrijjø këti. Pyëwɑ, lenhí Jwøng-ɑ Ácwɑ̈ɑ̈j! Lenhu Jwøng-ɑ Ácwɑ̈ɑ̈j! Pwøju Jwøng-ɑ Ácwɑ̈ɑ̈j, wøw wun dönge, nyudhu pödhh-ɑ kyeelø gïg-ɑ ɑ́gwøge. Lenhu Jwøng-ɑ Ácwɑ̈ɑ̈j ki wör, kømmu gïg myër møg-ɑ ɑ́gwøge. Thödhu kwërø ki dhwɑ̈ng, wiy pëthi tyëng-ɑ nyi mɑllii bënn, mïni gen. Yɑbu Jwøng-ɑ Ácwɑ̈ɑ̈j geki tege, kɑ nyi mɑlli wun ceth. Jwøng-ɑ Ácwɑ̈ɑ̈j ɑ bɑ Jwøgee, cigge bɑ kiper kömi piny bëne. Lwöme ómïdhe gïti ɑtheer kwönge gït-ɑ ri rïjj ɑ́lïp. Lwöbø mi gen kí Abrɑhɑm mïdhe’ mïdhø geki møg-ɑ ɑ́könge Isɑɑk. Jwøng-ɑ Ácwɑ̈ɑ̈j ɑ́lwööb geki Yɑgob cøn lwömɑni gït-ɑ ɑtheer. Ákööb kinni, “Yï ómëggɑ piny Kɑnɑɑn, óbëëd ɑ́ mií.” Jii Jwøk ɑ́bëëd kwɑnni gen nøg yøw, ge ɑ́bëëd gɑ tyëngpɑth kì piny Kɑnɑɑn. Ge ɑ́twɑ̈l ɑ yethi pödhh, ge nyi dɑ̈g-ɑ pönhï kí pönhï. De ge ɑ́mɑ̈ɑ̈n mødø yi Jwøk; nyingi rɑ̈nhì ɑ́ceme kiper gïn. Ákööb kinni, “Bɑ̈nggɑ, bɑ̈ngg-ɑ ɑ́yienyɑ ko nywɑl wun, tyëngtöng møgɑ ko nywɑl wun.” Pödhi gen ɑ́kölli kɑ̈j yi Jwøng-ɑ Ácwɑ̈ɑ̈j, kɑ gïgcɑmm bënn wëgge thumø. De bøli gïn ɑ́öde ki dhɑnhø, eni Yosep, ɑ ɑ́ngeew wɑ̈g ɑ́ bɑ̈ng. Tyelle ɑ́twöj ki ɑ́cwecwel, kɑ mune mɑg ki yëël dødø, gïti kɑ ɑ́pɑ̈dhi møg-ɑ ɑ́kwøbe kɑ̈jji gen. Kwøbbi Jwøng-ɑ Ácwɑ̈ɑ̈j ɑ́bï gɑ dyër. Kɑ gøny yi rɑ̈ɑ̈dh Rïp, ɑ́gøny yi jɑngi pödhh bënn. Acïbe gøn ɑ́ jɑngi mïïre, o jɑɑge piny bëne, gø ɑ́thödhe ki tegø kì kömi jyɑ̈ggi bɑnge, geki jøgdøng-ɑ nyi kønyii ki kwøb. Codhe, ɑkedhi Yɑgob Rïp, ɑpëgge pönhɑni. Kɑ Jwøng-ɑ Ácwɑ̈ɑ̈j jie nënge ki nywøl mø ngenyø kɑ gï wëgge tëngø kibøli tyëngmɑ̈ɑ̈nø. Tyëng Rïp ɑ́göjje mɑɑni jie, o gï mïdhi gen ki yuu wëënyø. Codhe, ɑöre Mosɑ̀ bɑ̈nge geki Aɑron ngɑn-ɑ ɑ́yienye. Agöög gen ki gïgdøngø kì ri tegi Jwøk, kɑ ge ogöögø ki gïïngɑ̈ngø kì Rïp. Muudhø ɑ́öre kömi pönhɑni, de dhøge ɑ́pyem yi tyëng Rïp. Nɑ̈mmi gen ɑ́løge remø, kɑ rijji gïn nɑ̈ge. Piny gen ɑ́pɑ̈ng yi ógwɑ̈llì, cɑgg ɑ́ gøldwøng, ɑ́pɑ̈ng yi gen. Jwøk ɑ́kööb, kɑ pödhø bëne opɑ̈ngø yi lwɑngì geki bɑ̈y. Gï ɑ́göjje ɑtuni ɑ́piy, ɑ́piy ɑ́bï piny ɑ́ kej kødh, bɑ̈ggi oløøg gen ɑ́rënye geki ólɑ̈mmi gen, kɑ yenh bënn toore piny. Ákööb, kɑ bɑ̈nyø obëënø, e nɑ tør, kɑ gïg-ɑ mɑr kì yij pödhø bënn cɑme, kɑ byel cɑme bënn. Kɑyy-ɑ cwøw ɑ́nɑ̈ge, kì yethi kɑ̈lli Rïp bënn. Codhe, ɑpeeje tyëng Isrɑil wɑ̈g, kɑ dhɑb kí ɑ́tegø kɑ̈l gen, ge ɑ́bëëd dëlli gen yöd, o ge teeg bënn. Pëthi tyëng Rïp ɑ́mïni keny-ɑ ɑ́kedh gen, mɑ́ ge ɑ́bwøg yi gïn. Jwøk jie ɑ́rïïme ki pøølø, kɑ gï nënge ki mɑc men thödhi gen ki cɑr kì wɑ̈r. Ge ɑ́cwöddi ki rïngø, kɑ gï öde ki ɑkɑrø, ɑthödhe gïn ki gïncɑɑm mɑl, kɑ ge oyɑ̈ngø. Kït ɑ́yiebe kɑ pï rïng-ɑ wɑ̈g kì yije, pï ɑ́mulli kì yij ryɑng ni nɑm. Apɑre könge kwërø, møg-ɑ ɑ́könge Abrɑhɑm bɑ̈nge. Kɑ jie møg-ɑ ɑ́yienye peeje wɑ̈g, ge owörø, ge óryeerø ki medi pëthi gen. Gï ɑ́mëgge pìnyi ji møøgø, kɑ pwödhhi gïn wëgge kwɑnyø yi gen, kipe kinni o kwøbbe ólïngi yi jie o cigge bënn mïdhi yi gen. Lenhu Jwøng-ɑ Ácwɑ̈ɑ̈j! Lenhu Jwøng-ɑ Ácwɑ̈ɑ̈j! Pwøj wun Jwøng-ɑ Ácwɑ̈ɑ̈j, mɑ́ e døøj; mɑ̈ɑ̈dø mee gït-ɑ ɑtheer. Á men ɑ cuggi kwøbi gïgdøngø møg-ɑ ɑ́gwøg yi Jwøng-ɑ Ácwɑ̈ɑ̈j? Á men ɑ cuggi lenhii kidøøj? Ree dɑ gyëdh eni ngɑn-ɑ nyi mïdhi cigge, ɑ gøggi dyër ceth. Pɑr yɑn, yïn ɑ Jwøng-ɑ Ácwɑ̈ɑ̈j, keny-ɑ ókøny jií, yiel yɑn kyeel ki gen. Wiy døøji jií lidhɑ wiy pyëwɑ mïne kyeel ki gen, o yï ólenhɑ kyeel ki jií keny-ɑ ómïni pëthi gen. Wø ɑ́røngi ni kweyyi wøn, wø ɑ́røngi kɑ wø óbɑ̈jjø. Gïïngɑ̈ngø møg-ɑ ɑ́gwøge kì Rïp nuti gɑmø yi wɑ̈thi kweyyee; mɑ̈ɑ̈dø mee ɑ́dhɑ̈li pɑrø yi gen, kɑ muddi gen ótëngø ki Áyïmø kì kömi Nɑɑm Omeli Kwɑrø. De gï ɑ́yiele ni kɑ ɑ́kööbe ceth kipe kinni o nyodhe tege, teng-ɑ dwøng. Nɑɑm Omeli Kwɑrø ɑ́cɑ̈wwe, kɑ ceg-ɑ thwøwø, kɑ gï kɑ̈ɑ̈le yij piny thwøwø kì tyeli nɑm. Gï ɑ́yiele kì cinggi tyëng-ɑ mɑɑn gen, gï ɑ́døme ki tyëngmɑ̈ɑ̈nø. Tyëngmɑ̈ɑ̈nø ɑ́mud yi pï, bong dhɑnhø ɑ́kyel mɑ ɑ́döng kì kelli gen. Codhe, ɑyïëy jie ki kwøbbe, ɑlenhii yi gen. De wɑ̈thi gen ɑ́jwɑn wïlø ki gïg-ɑ ɑ́gwøge kɑ ge døøg-ɑ be gwøg ki wɑ̈thi gen. Pëthi gen ɑ́døngi kipe gïgcɑmm kì yij ryɑng, kɑ Jwøk pɑ̈nyi yi gen, codhe ɑmëgge gïn, gïn-ɑ ɑ́cwøl yi gen de gï ɑ́thödhe ki rɑ̈ɑ̈m dëllì mø teg. Ge ɑ́nɑ̈g yi mud kipe Mosɑ̀ geki Aɑron kì yij ryɑng, ɑ løg bɑ̈nggi Jwøng-ɑ Ácwɑ̈ɑ̈j, møg-ɑ ɑ́kwër. Codhe, ɑyieb piny ree, kɑ Dɑthɑn gø mwønye, kɑ Abirɑm rïge piny geki gøle; mɑc ɑ́bï piny kömi mɑ̈dhhi gen kɑ tyëngrijjø møgɑni rɑ̈b yi mɑc. Ge ɑ́göög ki rønyi dhɑb kì Sinɑy kɑ ngïji jwøg menɑni mɑlli gen, dhwɑ̈ɑ̈ng Jwøk ɑ́wil gen ki ngïji dhyɑng, gïn nyi cɑm lum. Wɑ̈thi gen ɑ́wïl ki Jwøng-ɑ ɑ́yiel gen, ɑ ɑ́göög ki gïgdøngø kì Rïp. Pɑth ki gïïngɑ̈ngø mø døngø ɑ ɑ́gwøge kì Rïp! Bɑ gïgdøngø mø ni ngø, ɑ ɑ́gwøge kì Nɑɑm Omeli Kwɑrø! Keny-ɑ ɑ́kööb Jwøk cem jie nɑ̈ge nɑ̈gø, ɑcungi Mosɑ̀ bɑ̈nge, bɑ̈ng-ɑ ɑ́yienye kì bøle ɑkwɑjje gøn kinni o linye wiye, o gï cöge, gï pɑ nɑ̈g yi en. Codhe, ɑbɑny gen piny-ɑ døj, mɑ́ møg-ɑ ɑ́kwøb yi Jwøk kinni gï ógwøge, nuti yïëyø yi gen. Ge ɑ́pëggi be ngunø kì yethi kemmi gen, kɑ ge óbɑ̈nyø ki lïngi kwøbbi Jwøng-ɑ Ácwɑ̈ɑ̈j. Codhe, ɑkööbe ki rɑ̈ji pyëwe, kinni gï ónɑ̈g yi en kì yij pɑ̈l, o kwɑrri gïn ókedhhe kì kelli pödhh-ɑ kyeelø, o ge thøw gen yethi pödhh mø pɑth. Codhe, kɑ jii Jwøk kedh-ɑ be mɑlli Bɑɑl kì Peor, kɑ ge ocyɑ̈mø ki gëdhh-ɑ ɑ́ngɑ̈lli jwögg-ɑ thøø. Pyëw Jwøng-ɑ Ácwɑ̈ɑ̈j ɑ́wëggi gen rënyø yi gïg-ɑ ɑ́gøggi gen, kɑ gï göjje yømø nɑ̈ɑ̈g. Codhe, ɑdhwödh Pineɑs, kɑ tyëng-ɑ ɑ́bɑ̈jji cɑye, kɑ yømɑni ówïyø nɑ̈g. Gïndøj men-ɑ ɑ́gwøg yi en ɑ́pwøj o ócög e opɑrrø kì yethi rïjj bënn gïti ɑtheer. Pyëw Jwøng-ɑ Ácwɑ̈ɑ̈j ɑ́wëggi gen rënyø kì buti nyingi pïi Merïbɑ̀, kɑ Mosɑ̀ óyïddø ki rɑj kì bɑng gen. Pyëw Mosɑ̀ ɑ́wëggi gen rënyø cɑrø, kɑ okööbø ki kwøbbi nøgi wïj. Pödhh-ɑ kyeelø nuti nɑ̈ɑ̈g gen, ni kɑ ɑ́köbbi gen yi Jwøng-ɑ Ácwɑ̈ɑ̈j, de ge ɑ́yöd ge nywøm-ɑ ri gen kí gïn, kɑ ge óngöyø ki gwøøg gen. Ngïjji jwögg ɑ́mɑlli gen, kɑ ge pɑ̈dh-ɑ yethi rɑj kì bɑng møgɑni. Wɑ̈ddi gen geki nyigi gen ɑ́muuj yi gen, gï ɑ́ngɑ̈lli gen ngïjji jwöggi Kɑnɑɑn gɑ gëdhhì. Othønhø mø yï gen bɑ̈r ɑ́ngɑl, kɑ piny cödh gen ki remø. Ri gen ɑ́cödh gen ki gïg-ɑ ɑ́gøggi yi gen, O Ciggi Jwøk nuti mïdhø yi gen. Codhe, ɑrënyi pyëw Jwøng-ɑ Ácwɑ̈ɑ̈j ki jie; ɑ́bëëd pyëwe køm-ɑ lɑ̈mmø yi gen. Gï ɑ́wiye cinggi tyëng pödhh-ɑ kyeelø, o ge jɑɑg yi tyëng-ɑ mɑɑn gen. Nyingi gen ɑ́guud yi tyëng-ɑ ɑ́mɑn gen, kɑ gï nyøn gen. Tyel mø gïïr, Jwøng-ɑ Ácwɑ̈ɑ̈j jie nyi yiele yielø, de muddi gen nyi cig-ɑ tëngø ki gøn, kɑ ge nyi pɑ̈dh-ɑ yij orøg. Cɑgg ɑ́ kinøw cwɑggi gen nyii lïngø yi Jwøng-ɑ Ácwɑ̈ɑ̈j kenyi ywöngi gen, kɑ gï nyi yiele ki rɑjji gen; møg-ɑ ɑ́kwøbe kinni gï ógwøge kiper gen nyii pɑrø yi en, kɑ pyëwe nyii lɑ̈ɑ̈mø ki gïn. Tyëng-ɑ nyi guud nyingi gen, yethi gen ɑ́wëgge ywøg kiper gïn. Yiel wøn, yïn ɑ Jwøøg wøn, Jwøng-ɑ Ácwɑ̈ɑ̈j, kɑ wø cung kì kelli pödhh-ɑ kyeelø, o yï pwøj yi wøn, o nyingí kwërø lenhi yi wøn. Lenhu Jwøng-ɑ Ácwɑ̈ɑ̈j, Jwøøg Isrɑil, lenhu en ɑnɑn gïti ɑtheer! Wiy ji bënn kööb gen kinni, “Amen!” Lenhu Jwøng-ɑ Ácwɑ̈ɑ̈j! “Pwøj wun Jwøng-ɑ Ácwɑ̈ɑ̈j, mɑ́ e døøj; mɑ̈ɑ̈dø mee gït-ɑ ɑtheer!” Nyi kwøbu møgɑni wu lenh-ɑ Jwøng-ɑ Ácwɑ̈ɑ̈j wun ɑ ji-ɑ ɑ́yiele. Wu ɑ́døme ki tyëngmɑ̈ɑ̈nø. kɑ wu dwööge kì pödhh-ɑ pɑth, kì wɑɑng cyɑ̈ɑ̈ng mwøl geki wɑɑng cyɑ̈ɑ̈ng böörø, kí wɑɑng wurlwɑl geki wɑɑng wuudø. Møøgø ɑ́wïïn ɑ yij pɑ̈l yøw, e yuu pɑc pɑ yod yi gen. Ge ɑ́nɑ̈g yi kɑ̈j kí röödhø, kɑ pëthi gen ónyönhø. Codhe, ɑywøøg gen kö Jwøng-ɑ Ácwɑ̈ɑ̈j ki rɑjji gen, kɑ gï yiele ki rɑjjɑni, Kɑ gï kïdhe kɑɑl-ɑ óbëëd gen ki yöö mɑ óbödh. Pwøj gen Jwøng-ɑ Ácwɑ̈ɑ̈j kipe mɑ̈ɑ̈dø mee, kí gïïngɑ̈ngø møg-ɑ nyi gwøge kipe ji. Tyëng-ɑ ri gen di röödhø ɑ́nënge ki pï, kɑ tyëng-ɑ ri gen di kɑ̈j wëgge yɑ̈ngø. Møøgø ɑ́bëëd ɑ yij muudhi thøø, gɑ ɑmɑgg mø bɑ ɑtwöj ki ɑ́cwecwel, mɑ́ muddi gen ɑ́tëngi ki Jwøk, kɑ cigge pyem gen. Ge ɑ́dhɑ̈ɑ̈r yi gwøng teg; kɑ ɑ́pɑ̈ɑ̈dh gen, bong ngɑn mɑ ɑ́køny gen. Codhe, ɑywøøg gen kö Jwøng-ɑ Ácwɑ̈ɑ̈j ki rɑjji gen, kɑ gï yiele ki rɑjjɑni. Gï ɑ́kɑ̈ɑ̈le wɑ̈g kì yij muudhø kí orɑng, kɑ ɑ́cwecwell-ɑ ótwööj gen gööde wɑ̈g. Pwøj gen Jwøng-ɑ Ácwɑ̈ɑ̈j kipe mɑ̈ɑ̈dø mee, kí gïïngɑ̈ngø møg-ɑ nyi gwøge kipe ji. Mɑ́ dörr-ɑ ógerø ki dilɑl nyi toore’ piny, kɑ didëddi ngyënyø dødø nyi tørre. Møg-ɑ bɑ dhëgg, ge rɑng ɑ bɑng orøøg gen kí bɑng rɑ̈ji gen; gïncɑm nuti kønø kì pëthi gen, kɑ ge køm-ɑ thøø. Codhe, ɑywøøg gen kö Jwøng-ɑ Ácwɑ̈ɑ̈j ki rɑjji gen, kɑ gï yiele ki rɑjjɑni. Ákööb, kɑ ge yiel ki rɑ̈ɑ̈m dëllì, kɑ gï yiele ki thøø. Pwøj gen Jwøng-ɑ Ácwɑ̈ɑ̈j kipe mɑ̈ɑ̈dø mee, kí gïïngɑ̈ngø møg-ɑ nyi gwøge kipe ji. Wiy pwøj yi gen ki gëdhhì, kí wörri medi pëëth mø nyudhi teedø gïg-ɑ ɑ́gwøge. Møøgø weli kɑ yɑ̈thi nɑɑm omeli dwøng gïncɑɑm gen yood ge’ nɑ̈mmi omelø. Gïg-ɑ cuggi gwøgø yi Jwøng-ɑ Ácwɑ̈ɑ̈j ɑ́lidh yi gen, gen ɑ gïïngɑ̈ngø møg-ɑ gøgge kì nɑ̈mmi omelø. Ákööb, kɑ yømø me dwøng ocödø, kɑ ɑpɑgø odhwödhø. Yɑ̈ɑ̈th nyi leeng-ɑ mɑl yij yømø yi ɑpɑgø kɑ gï nyi dwööge piny; kɑ pëthi jøgɑni ónyönhø yi orɑng menɑni, kɑ ge óthɑ̈mmø ge cwɑnyy-ɑ tyelli gen, ni ngɑn-ɑ ónɑ̈gø yi møgø, kɑ peli wɑ̈thi gen ólɑ̈ɑ̈nyø. Codhe, ɑywøøg gen kö Jwøng-ɑ Ácwɑ̈ɑ̈j ki rɑjji gen, kɑ gï yiele ki rɑjjɑni. Yømø ɑ́cuunge, kɑ ɑpɑgø ócungø. Codhe, kɑ pëthi gen ómïnø, kɑ gï wëgge wɑ̈dhø ki tɑrø. Pwøj gen Jwøng-ɑ Ácwɑ̈ɑ̈j kipe mɑ̈ɑ̈dø mee, kí gïïngɑ̈ngø møg-ɑ nyi gwøge kipe ji. Wøw gen dönge kì kelli teedø, kɑ gø lenhi gen kì buri jɑgg. Nɑ̈mmì nyi wëgg-ɑ thwøwø yi Jwøng-ɑ Ácwɑ̈ɑ̈j kɑ pï mɑ̈ɑ̈ne rïngi wɑ̈g, kì nyingi pï. Kɑ piny-ɑ lɑ̈be med nyi løge ɑ́ omelø kì bɑng rɑ̈ji tyëng-ɑ bëëdø yije. Ryɑngg nyi løge’ luyyi pï, piny-ɑ thwøwø nyi wëgge’ ngwej ki pï. Kɑ tyëng-ɑ ri gen di kɑ̈j wëgge bëëdø kì kenyɑni, kɑ ge ogëdø kì kɑɑl kì yije. Kɑ ge ogöögø ki bɑ̈gg, kɑ ge opïdhø ki oløg kɑ jɑmmɑni onywølø ki mendwøng. Jie nyi gyëdhe’ gyëdhø, kɑ ge onywølø ki nywøl mø ngenyø, o dhögi gïn pɑ nyi wëgge nungø. Keny-ɑ ɑ́tyɑɑm jii Jwøk, kɑ nyingi gen guud, yi tyëngrijjø kɑ ge orɑngø, tyëng-ɑ ɑ́guud nyingi gïn ɑ́nyudhe ki gïnrɑj, kɑ gï wëgge twɑ̈lø kì yij ryɑng. De tyëng-ɑ jɑdø nyi yiele’ yiele ki rɑjji gen, kɑ kɑ̈lli gïn nyi wëgge ngënyø ni dɑɑg dyëg. Tyëngtir pëthi gen nyii mïnø kenyi lidh gen møgɑni, de dhøggi tyëngrijjø nyii mijø. Wiy tyëng-ɑ wɑ̈thi gen pel mïdhi gen møgɑni, wiy ge nyi rømmi gen mɑ̈ɑ̈dø mi Jwøng-ɑ Ácwɑ̈ɑ̈j. Jwøk, yɑ gɑ̈nn-ɑ yïn ceth, yï ólenhɑ ki wör! Dhwöödh yïn ɑ pyëwɑ! Dhwödh wun, wun ɑ thømɑ bënn! Cɑ̈ng ótugɑ mɑl. Yï ólenhɑ kì kelli pödhh, yïn ɑ Jwøng-ɑ Ácwɑ̈ɑ̈j, yï ólenhɑ kì kelli ji. Mɑ̈ɑ̈dø mií wɑ̈dh-ɑ mɑl, døøjí nywɑll-ɑ mɑl. Nyodh döngí kì mɑl, yïn ɑ Jwøk, wiy dhwɑ̈ngí yinge piny bëne. Yiel wøn ki tegí, lïngí kwɑ̈jjɑ, o tyëng-ɑ mɑɑr yi yïn ódøm. Jwøk ɑ́kööb kì kej kwëre kinni, “Cekïm ópɑ̈ngi yi yɑn ki tegɑ, kɑ Töör Suköth pɑ̈ngɑ kì kelli jiɑ. Gilyɑd geki Mɑnɑsè bɑ møgɑ thyew, Eprɑim bɑ ɑcudh wïjɑ, o Yeudɑ̀ bɑ lodhɑ. Moɑb bɑ luy-ɑ nyi lwøggɑ, o wɑrrɑ óleengɑ Edöm, ɑ́ nyudhi kinni bɑ pɑɑrɑ. Pelistiyɑ̀ ótyɑmɑ, kɑ yɑ óryeerø kì köme.” Yïn ɑ Jwøk, ɑ́ men ɑ ókïdhi yɑn kɑɑl-ɑ thøø yi gerø? Á men ɑ ópeej yɑn Edöm? Wø ɑ́ceg kɑ bɑnyø yi yïn kidyër? Yï pɑ kedhi be liny kyeel ki wøn? Køny wøn ki rɑj, kunyi dhɑnhø bong døøje. Wø ótyɑ̈mø kɑ̀ ying Jwøk tuung wøn, tyëngmɑ̈ɑ̈nø ótyɑm yi en. Yɑ lenh-ɑ yïn, yïn ɑ Jwøk, yï ko kud! Riɑ ɑ́töngi yi tyëngrijjø geki tyëngpyed, ge kømm-ɑ yɑn ki pyed yøw, o ge kømm-ɑ gïgrijjø kì riɑ, ge wɑ̈dh-ɑ yɑb ki nyɑɑg ki yɑn. Ge mɑɑn-ɑ yɑn ngö ge mɑɑr yi yɑn kɑ yɑ nyii kwɑ̈jjø kiper gen. Kɑ̀ göggɑ gen ki gïgdøj, yɑ göggi ge’ rɑj, kɑ̀ mɑɑrɑ gen, yɑ nyi ceg kɑ mɑɑnø yi gen. Cïb gøøny ngetimɑ̈ɑ̈nø cingi ngɑnrɑj, kɑ wiy gøøny yi ngɑn mɑɑnii. Wiy gønye lidh, o yod e bɑ̈jjø, wiy kwɑ̈jje kwɑ̈nnii ɑ́ bɑ̈jjø! Wiy runne cög ge nøg, wiy gwøge kwɑny yi ngɑn megø. Wiy nyige döng gen gɑ kïjj, o cyëge dönge yïe bong jɑlø! Wiy nyige twɑ̈li gen, ge ceg-ɑ kwɑ̈jjø, o ge cyeed wɑ̈g kì yij ɑrung-ɑ bëëd yi gen! Wiy jɑmme bënn kwɑny yi tyëng-ɑ yï gïn ɑ́wïdhe, wiy jɑmmi kwɑ̈ge bënn kwɑny yi tyëngpɑth. Wiy bëëd e bong ngɑn yije ywöngi kipere, wiy bëëd e bong ngɑn korri kïjj-ɑ ódöng kì bɑnge. Wiy kwɑrre thøw gen bënn, wiy nyinge lɑ̈ɑ̈ny gen kì yij rïny-ɑ óbï. Wiy Jwøng-ɑ Ácwɑ̈ɑ̈j cöge pyëwe pɑ lɑ̈ɑ̈m ki orøøg kweyye. kɑ orøøg meye cöge e pɑ lɑ̈ɑ̈ny. Wiy orøøg gen rïïj e opɑrrø yi Jwøng-ɑ Ácwɑ̈ɑ̈j, de wiy nyingi gen wïl gen. Mɑ́ e ɑ́bëëd yije pɑ nyi ywöngi; ɑ́bëëd e guud-ɑ nyingi ji, tyëng-ɑ jɑdø, kí tyëng-ɑ yethi gen bɑɑrø gï nyi nɑ̈ge nɑ̈gø. Wiy cyen, mɑ́ e ɑ́bëëd e nyi mɑɑr-ɑ lɑ̈mmi ji cyën! Ábëëd e mɑɑn-ɑ lɑ̈mmi ji gyëdh, wiy gyëdh lɑ̈wi gen ki en! Lɑ̈mmi ji cyën rug yi en nɑ ógødh, wiy cyënne rengi gen dële ni pï, o ge rengi gen yethi cue ni møw! Wiy kum yi cyën ni ógødh, wiy rïïje ɑ́ ɑwen yi cyën ni wëëni! Cɑy tyëng-ɑ mɑɑn yɑn kinøw, yïn ɑ Jwøng-ɑ Ácwɑ̈ɑ̈j, gen ɑ tyëng-ɑ nyi kømmi rɑj kì riɑ. De ɑnɑn Wuö, Jwøng-ɑ Ácwɑ̈ɑ̈j, køny yɑn ni kɑ ɑ́köngí, kɑ yɑ yieel ki døøji mɑ̈ɑ̈dø mií. Wɑngɑ ocɑnø, o yɑ jɑdø, o pyëwɑ ceg-ɑ rɑ̈m. Yɑ bɑ me lɑ̈ɑ̈ny ni tïbi böörø, yɑ ɑ́køøl yi yømø ni twöngø. Cøngɑ ɑ́nyönhi yi twöni riɑ ki gïncɑm, yɑ ɑ́döng yɑ bɑ cögø yøw. Yɑ ceg kɑ gɑggø yi ji kenyi lidh gen yɑn, ge kenn-ɑ wɑ̈thi gen. Køny yɑn, yïn ɑ Jwøgɑ, Jwøng-ɑ Ácwɑ̈ɑ̈j, yiel yɑn ki mɑ̈ɑ̈dø mií! Wiy yod yi tyëngmɑ̈ɑ̈nø kinni yïn ɑ nyi yiel yɑn. Ge nyi lɑ̈mm-ɑ yɑn cyën, den-ɑ́ yïn ɑ nyi gyëdh yɑn. Wiy tyëng-ɑ guud wɑngɑ tyɑm, de wiy pyëwɑ mïne yɑn ɑ bɑ̈ngí. Wiy ɑyɑ̈r pɑ̈dhe kömi tyëngmɑ̈ɑ̈nø, wiy gø rug yi gen ni ógødh. Jwøng-ɑ Ácwɑ̈ɑ̈j ópwøjɑ ki pwøj mø døngø, ólenhɑ kì kelli ji, mɑ́ tyëng-ɑ nyingi gen cɑn, nyi cwɑge cwɑgø, kɑ gï yiele ki tyëng-ɑ kuum gen ki thøø. Jwøng-ɑ Ácwɑ̈ɑ̈j, wɑ̈ɑ rɑ̈dh ɑ́köbbe kinni, “Bëëd kì wïj kyëjɑ, gïti keny-ɑ ócïbɑ tyëng-ɑ mɑɑn yïn thɑ́ tyellí.” Tegí óör yi Jwøng-ɑ Ácwɑ̈ɑ̈j kì Dhɑyøn. Ákööb kinni, “Jɑɑg tyëngmɑ̈ɑ̈nø.” Cyɑ̈ng-ɑ ónyïɑ̈ggí ki tyëngmɑ̈ɑ̈nø, jií ri gen ómuuj gen. Yɑɑg-ɑ wøbb ómööl yïí; ge óbï yïí kì wïj kïti kwër. Jwøng-ɑ Ácwɑ̈ɑ̈j ɑ́köngi ki mendwøng, o könge pɑ pɑ̈d yi en; ɑ́köngi kinni, “Yï bɑ ókwërø gïti ɑtheer, kì yij lɑwi ókwërø Melkidhedek.” Jwøng-ɑ Ácwɑ̈ɑ̈j ɑ bɑ tegí. Keny-ɑ órënyi pyëwe, rɑ̈nhì ótyɑme. Pödhh-ɑ kyeelø ócɑye, wïj kër ópɑ̈ng yi en ki tyëngthøø, rɑ̈nhi kömi piny bënn ótyɑme. Rɑ̈dh ómɑ̈ɑ̈dhø kì nɑm-ɑ cyɑ̈gi ki yöö, o tënge, o tyɑ̈mø. Jwøng-ɑ Ácwɑ̈ɑ̈j ólenhɑ kì kelli jie ki pyëwɑ bëne. Gïg-ɑ gøggi yi Jwøng-ɑ Ácwɑ̈ɑ̈j myëër cɑrø! Tyëng-ɑ pëthi gen med ki jɑmmɑni dwɑdd-ɑ yodi gen. Gïg-ɑ nyi gøgge bënn, nyodh-ɑ dhwɑ̈nge geki dönge, o dyëre gït-ɑ ɑtheer. Jwøng-ɑ Ácwɑ̈ɑ̈j, gïg myëër møg-ɑ ɑ́gwøge ɑ́wëgge pɑrrø yi wɑ, døøj o pyëwe nyii lɑ̈ɑ̈mø. Tyëng-ɑ wørii nyi thödhe’ thödhø ki gïgcɑmm, lwöme nyi mïdhe’ mïdhø gïti ɑtheer. Tege ɑ́nyudhe jie keny-ɑ ɑ́mëgge gïn pìnyi tyëngpɑth. Jwøng-ɑ Ácwɑ̈ɑ̈j nyi gøgg-ɑ dyër ceth, o yije bong ɑ́dud. Gïg gwøge nyi gït-ɑ ɑtheer, mɑ́ e bɑ dyër geki døøjø. Jie ɑ́yiele, o lwöme ki gïn ógïti ɑtheer. Jwøng-ɑ Ácwɑ̈ɑ̈j bɑ kwërø, o teg! Cɑ̈gi peli wïj bɑ böggi Jwøng-ɑ Ácwɑ̈ɑ̈j, mïdhi cigge bɑ dïdø. Lenhi ceth gïti ɑtheer. Lenhu Jwøng-ɑ Ácwɑ̈ɑ̈j! Ngɑn-ɑ böggi Jwøng-ɑ Ácwɑ̈ɑ̈j ree dɑ gyëdh, eni ngɑn-ɑ pyëwe med ki mïdhi cigge. Nywøli ngɑndøj óbëëdø ge teeg kì yij piny, kwɑrre ógyëdh. Gøle óbëëd e kɑ̈rø óbëëdø ki døøjø gïti ɑtheer. Cɑr nyii mënyø kì kömi tyëngdøj kì yij muudhø, Jwøng-ɑ Ácwɑ̈ɑ̈j tir, o pyëwe nyii lɑ̈ɑ̈mø. Ngɑn-ɑ nyi wïdhi ji møøgø ree dɑ gyëdh, o nyi gøgg-ɑ dyër. Ngɑndøj koo nhɑ̈nhø gïti ɑtheer, órïïj e opɑrrø. Pɑ böggi ki wööni rɑj, mɑ́ yïëye teeg, o gɑ̈nn-ɑ Jwøng-ɑ Ácwɑ̈ɑ̈j ceth. Pyëwe pɑ lïngø, o pɑ böggi, ngɑ̈ny wøw kinni tyëngmɑ̈ɑ̈nø ótyɑme ceth. Tyëng-ɑ jɑdø nyi thödhe’ thödhø, tir gïti ɑtheer, óbëëd e teeg, e ceg kɑ wørø. Tyëngrijjø pëthi gen nyii rënyø kenyi lidh gen møgɑni, ge nëënø kɑ nënni mɑ̈ɑ̈nø, kɑ ge nyii lɑ̈ɑ̈nyø, gïg-ɑ kønø kì pëthi gen nyii lɑ̈ɑ̈nyø gïti ɑtheer. Lenhu Jwøng-ɑ Ácwɑ̈ɑ̈j! Wun ɑ bɑ̈nggi Jwøng-ɑ Ácwɑ̈ɑ̈j, lenhu nyinge! Wiy Jwøng-ɑ Ácwɑ̈ɑ̈j lenhi, cɑg ɑnɑn gïti ɑtheer. Cɑg kì wɑɑng cyɑ̈ɑ̈ng mwøl gïti wɑɑng cyɑ̈ɑ̈ng böörø, lenhi nyingi Jwøng-ɑ Ácwɑ̈ɑ̈j! Jwøng-ɑ Ácwɑ̈ɑ̈j ɑ jɑɑg pödhh bënn; dhwɑ̈nge ying-ɑ mɑl cɑrø. Bong ngɑn pɑ̈ɑ̈r ki Jwøgee, Jwøng-ɑ Ácwɑ̈ɑ̈j. Bëëd ɑ mɑldwøng, de nyii mëddø, o lidhe mɑl kí piny. Tyëng-ɑ nyingi gen cɑn nyi tïnge’ mɑl kì yij tør, kɑ tyëng-ɑ jɑdø tïnge kì yij orɑng, kɑ gï pɑ̈ɑ̈re ki nyiirɑ̈dh, geki ji møg-ɑ per gen teg. Bwøj nyi thödhe’ thödhø ki dhwɑ̈ng; pyëwe nyii mïnø kenyi thödhe gøn ki nywøl. Lenhu Jwøng-ɑ Ácwɑ̈ɑ̈j! Keny-ɑ ɑ́bëën tyëng Isrɑil wɑ̈g kì Rïp, keny-ɑ ɑ́dhwödh kwɑrri Yɑgob kì piny-ɑ pɑth, Yeudiyɑ̀ ɑ́göög ki jii Jwøng-ɑ Ácwɑ̈ɑ̈j mø bɑ ɑkwër, tyëng Isrɑil ɑ́göög gɑ møge. Nɑɑm Omeli Kwɑrø ɑ́lïdhi kɑ obwøgø, kɑ pïi Nɑm Urdun ócungø. Kïtt-ɑ døngø ɑ́pɑ̈rri ni dyëg ɑ́tegg, kɑ kïtt-ɑ thønhø óbeddø ni nywøli römm. Á gïn ɑ ɑ́wëggi yïn thwøwø, Nɑɑm Omeli Kwɑrø? O ɑ́ gïn ɑ ɑ́wëggi yïn cung, Nɑm Urdun? Kïtt-ɑ døngø, ɑ́ kipe ngø ɑ ɑ́pɑ̈rri wun ni dyëg ɑ́tegg? Kïtt-ɑ thønhø, ɑ́ kipe ngø ɑ ɑ́beddi wun ni nywøli römm? Piny, kïrrí kì ri bëëni Jwøng-ɑ Ácwɑ̈ɑ̈j, kïrrí kì bøli Jwøøg Yɑgob, ngɑn-ɑ nyi løg kïtt-ɑ thønhø luyyi pï, kɑ kïtt-ɑ teg løge kɑ̈jj-ɑ rïngi yi pï. Yï ketí ɑ lejji, yïn ɑ Jwøng-ɑ Ácwɑ̈ɑ̈j, yïn ɑ yïí di mɑ̈r, de pɑth ki wøn, mɑ́ mɑ̈ɑ̈dø mií pɑ nyi lwënyi, o dhøgí pɑ nyi wil yi yïn. Á kipe ngø ɑ pyënyi wøn yi pödhh-ɑ kyeelø kinni, “Ágøne Jwøøg wun?” Jwøøg wøn ying-ɑ mɑl, gïn-ɑ dwɑdde nyi gwøge’ gwøgø. Jwöggi gen bɑ ngïjji dhɑb kí ɑ́tegø, ge ɑ́gwøg-ɑ yi ji yøw. Yï gen dɑ dhøg, de ge pɑ kööbø, yï gen dɑ nying, o ge pɑ nëënø, yï gen dɑ yïthh, de ge pɑ lïngø, yï gen dɑ órøm, de ge pɑ ngwɑ̈jø. Yï gen dɑ cing, de ge pɑ nywɑ̈ddi, o yï gen dɑ tyel, de ge pɑ cyɑ̈dhi, bong cwɑggi gen mø lïngi. Wiy tyëng-ɑ ɑ́gwøg gen, ɑ gɑ̈nni gen göög gen ge pɑ̈r ki gïn. Gɑ̈nnu Jwøng-ɑ Ácwɑ̈ɑ̈j, wun ɑ tyëng Isrɑil. En ɑ nyi køny wun, kɑ wu korre. Gɑ̈nnu Jwøng-ɑ Ácwɑ̈ɑ̈j, wun ɑ ókwërri Jwøk. En ɑ nyi køny wun, kɑ wu korre. Gɑ̈nnu Jwøng-ɑ Ácwɑ̈ɑ̈j, wun ɑ tyëng-ɑ nyi mɑllii. En ɑ nyi køny wun, kɑ wu korre. Wɑ opɑrrø yi Jwøng-ɑ Ácwɑ̈ɑ̈j, o wɑ ógyëdhe, tyëng Isrɑil ógyëdhe geki ókwërri Jwøk bënn. Tyëng-ɑ wørii bënn ógyëdhe, gen ɑ tyëngdøngø geki othønhø bënn. Wiy yï med yi Jwøng-ɑ Ácwɑ̈ɑ̈j, wiy kwɑrrí mede thyew! Wiy wu gyëdh yi Jwøng-ɑ Ácwɑ̈ɑ̈j, ngɑn-ɑ ɑ́cwɑ̈j mɑl kí piny! Mɑl bɑ mi Jwøng-ɑ Ácwɑ̈ɑ̈j, de piny ɑ́mëgge ji. Jwøng-ɑ Ácwɑ̈ɑ̈j pɑ nyi lenhi yi tyëngthøø, pɑ nyi lenhi kì pödhi tyëngthøø. De nyii pøjjø yi wɑ, wɑ tyëng-ɑ nëënø. Cɑg ɑnɑn gïti ɑtheer. Lenhu Jwøng-ɑ Ácwɑ̈ɑ̈j! Jwøng-ɑ Ácwɑ̈ɑ̈j ɑ́mɑɑrɑ kipe kenyi lïnge cwɑggɑ, kwɑ̈jjɑ nyi lïnge’ lïngø. Pɑ̈dde nyi kënne’ yɑn, kenyi cwølɑ en ceth. Yɑ ɑ́tyeg yi thøø kì wɑ̈thi tùng bënn, yɑ ɑ́kum piny yi wɑ̈ri thøø, yɑ ɑ́tyeg yi ɑkørr geki kïïmø. Codhe, ɑcwølɑ Jwøng-ɑ Ácwɑ̈ɑ̈j kinni, “Yɑ kwɑjj-ɑ yïn, yïn ɑ Jwøng-ɑ Ácwɑ̈ɑ̈j, yiel yɑn!” Jwøng-ɑ Ácwɑ̈ɑ̈j pyëwe nyii lɑ̈ɑ̈mø, o døøj. Jwøgee yije nyii ywöngø. Jwøng-ɑ Ácwɑ̈ɑ̈j ɑ korri tyëng-ɑ nyødh, yɑ ɑ́yiele ki rɑj keny-ɑ ɑ́cyɑ̈ngɑ ki thøø. Bëëd yï teeg, yïn ɑ pyëwɑ, mɑ́ yɑ ɑ́thödhi ki døøjø yi Jwøng-ɑ Ácwɑ̈ɑ̈j. Yɑ ɑ́yiel yi Jwøng-ɑ Ácwɑ̈ɑ̈j kì yij thøø, pïi nyingɑ ɑ́poje kɑ yɑ mɑ̈ɑ̈ne tyɑmø. Yɑ ócyɑ̈dhi kì bøli Jwøng-ɑ Ácwɑ̈ɑ̈j kì yij piny-ɑ bëëd yi tyëngnëënø. Yïëyø nud kì pyëwɑ ceth, cɑgg ɑ́ kɑ ɑ́kööbɑ kinni, “Yɑ ɑ́nyönhi ki mendwøng.” Cɑgg ɑ́ kɑ ɑ́böggɑ kɑ yɑ okööbø kinni, “Bong dhɑnhø me cuggi gɑ̈nnø.” Á gïn ɑ mëggɑ Jwøng-ɑ Ácwɑ̈ɑ̈j kipe gïgdøj møg-ɑ ɑ́gögge yɑn? Jwøng-ɑ Ácwɑ̈ɑ̈j ómuujɑ ki møgi oløg, ɑ́ pwøjji kɑ ɑ́yiele yɑn. Gïn-ɑ ɑ́kwøbɑ kinni ómuujɑ, ómuujɑ ceth kì bøli jie. Pyëw Jwøng-ɑ Ácwɑ̈ɑ̈j nyii rɑ̈mø kenyi thøw jie! Yɑ bɑ bɑ̈ngí, yïn ɑ Jwøng-ɑ Ácwɑ̈ɑ̈j, yɑ göggɑ yïn ni kɑ ɑ́göggi yïn yi meyɑ. Yɑ ɑ́yiel yi yïn kì yij thøø. Yï ónëngɑ ki gënhi pwøj, o yɑ ókwɑjj-ɑ yïn ceth. Lenhu Jwøng-ɑ Ácwɑ̈ɑ̈j, wun ɑ pödhh bënn! Lenhu en wun ɑ ji bënn! Wɑ mɑɑr yi en ki menteg, o dhøge pɑ nyi wile gït-ɑ ɑtheer. Lenhu Jwøng-ɑ Ácwɑ̈ɑ̈j! Pwøj wun Jwøng-ɑ Ácwɑ̈ɑ̈j, mɑ́ e døøj; o mɑ̈ɑ̈dø mee gït-ɑ ɑtheer. Wiy tyëng Isrɑil kööb gen kinni, “Mɑ̈ɑ̈dø mee gït-ɑ ɑtheer.” Wiy ókwërri Jwøk kööb gen kinni, “Mɑ̈ɑ̈dø mee gït-ɑ ɑtheer.” Wiy tyëng-ɑ mɑllii bënn kööb gen kinni, “Mɑ̈ɑ̈dø mee gït-ɑ ɑtheer.” Yɑ ɑ́ywøøg kö Jwøng-ɑ Ácwɑ̈ɑ̈j ki rɑjjɑ, kwøbbɑ ɑ́løøge kɑ yɑ yiele. Yɑ omïdhø yi Jwøng-ɑ Ácwɑ̈ɑ̈j, o yɑ pɑ böggi, ɑ́ ngø ɑ cuggi göggi yɑn yi dhɑnhø yøw? Jwøng-ɑ Ácwɑ̈ɑ̈j ɑ nyi køny yɑn, o tyëngmɑ̈ɑ̈nø ólidhɑ ge ótyɑmø. Lɑ̈w-ɑ́ gɑ̈nni Jwøng-ɑ Ácwɑ̈ɑ̈j kibøli gɑ̈nni dhɑnhø yøw. Lɑ̈w-ɑ́ gɑ̈nni Jwøng-ɑ Ácwɑ̈ɑ̈j, kibøli gɑ̈nni jyɑ̈ggì. Yɑ ɑ́tyeg yi tyëngmɑ̈ɑ̈nø, de ge ɑ́nɑ̈gɑ ki tegi Jwøng-ɑ Ácwɑ̈ɑ̈j! Yɑ ɑ́bëëd yɑ tyeeg gen kì wɑ̈thi tùng bënn, de ge ɑ́tyɑmɑ ki tegi Jwøng-ɑ Ácwɑ̈ɑ̈j! Ge ɑ́ruur kömɑ ni kïc, de ge ɑ́jwɑn rɑ̈bbø, ni kenyi rɑ̈ɑ̈b koodh yi mɑc, ge ɑ́nɑ̈gɑ ki tegi Jwøng-ɑ Ácwɑ̈ɑ̈j. Kömɑ ɑ́pɑ̈ɑ̈r kɑ yɑ kømi tyɑmø, de yɑ ɑ́køny yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j yɑ ɑ́wëgge tëngø, yɑ ɑ́yiele. Lïngu ɑkyeew tyɑ̈mø geki medi pëëth kì kɑɑl jii Jwøk. Møgɑni ɑ́gwøg yi Jwøng-ɑ Ácwɑ̈ɑ̈j ki tege! Wɑ ɑ́thödhi ki tyɑ̈mø yi tege, Wɑ ɑ́tyɑ̈ɑ̈m kì yij liny ki tege! Yɑ pɑ thøw, de yɑ ónëënø, o yɑ töngɑ gïg-ɑ ɑ́gwøg yi Jwøng-ɑ Ácwɑ̈ɑ̈j. Yɑ ɑ́cege ki cengi dwøng, de yɑ nuti wëggi thøø yi en. Yïëbbu yɑn Kengø, o yɑ kedhɑ yije, o Jwøng-ɑ Ácwɑ̈ɑ̈j pwøjɑ! Men bɑ dhøng-ɑ nyi kɑ̈ɑ̈l yi Jwøng-ɑ Ácwɑ̈ɑ̈j, tyëngtir keti gen ɑ cuggi kɑ̈l kenyɑni. Yɑ lenh-ɑ yïn, yïn ɑ Jwøng-ɑ Ácwɑ̈ɑ̈j, mɑ́ kwɑ̈jjɑ ɑ́lïngí, kɑ yɑ wëggí tyɑ̈mø. Kïn-ɑ ɑ́bɑny yi bödhhi gyer i bong pere, ɑ́yöd ɑ́ en ɑ pere teg kibøli kïttì bënn. Jwøng-ɑ Ácwɑ̈ɑ̈j ɑ ɑ́gwøg møgɑni, ge bɑ gïg mø myëër ki nennø! Men bɑ cyɑ̈ng-ɑ ɑ́gwøg yi Jwøng-ɑ Ácwɑ̈ɑ̈j, mïni pëthee, kɑ wɑ tug wɑ kì yije! Yiel wøn, yïn ɑ Jwøng-ɑ Ácwɑ̈ɑ̈j, yiel wøn! Wiy gïg-ɑ gøggi yi wøn nyi pɑ̈dhi gen kɑ̈jji gen, yïn ɑ Jwøng-ɑ Ácwɑ̈ɑ̈j! Ngɑn-ɑ bï ki nyingi Jwøng-ɑ Ácwɑ̈ɑ̈j, bɑ ɑgyëdh! Gyëdh kɑ̈ɑ̈l-ɑ Kengi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j døøj, wɑ nyi gögge’ gïgdøj. Tug wun kì bɑdhhi këli lɑm, e cinggi wun dɑ ɑnɑ̈bbi yenh. kɑ wu wïïn wun kì bɑdhhi këli lɑm. Yï bɑ Jwøgɑ, yï ópøjjɑ, döngí ówøwɑ. Pøjju Jwøng-ɑ Ácwɑ̈ɑ̈j, mɑ́ e døøj, mɑ̈ɑ̈dø mee gït-ɑ ɑtheer. Tyëng-ɑ bëëdi gen tir ri gen dɑ gyëdh, gen ɑ tyëng-ɑ nyi mïdhi Ciggi Jwøng-ɑ Ácwɑ̈ɑ̈j. Tyëng-ɑ nyi cyɑ̈dhi kì kömi cigge ri gen dɑ gyëdh, gen ɑ tyëng-ɑ nyi mïdhi cigge ki pëthi gen bënn, Ge pɑ nyi røngø, de ge nyi cyɑ̈dh-ɑ́ɑ̀ yuu Jwøng-ɑ Ácwɑ̈ɑ̈j ceth. Yïn ɑ Jwøng-ɑ Ácwɑ̈ɑ̈j, ciggí ɑ́mëggí wøn, kɑ wø köbbí kinni mïdhi wøn gen kidøøj. Yɑ dwɑdd-ɑ mïdhi gen kidøøj ceth, o yɑ ócögɑ yɑ pɑ yɑ̈r. Keløg ciggí bënn ómïdhɑ ceth, wïjɑ koo lɑ̈ɑ̈y. Keny-ɑ ódïdɑ ciggí, cigg-ɑ dyër, yï ólenhɑ ki pyëw-ɑ dyër. Yɑ mïdh-ɑ ciggí ceth, yɑ ko wiy piny Wøbb óbëëdø ki bëëntir kidï? Ge óbëëd ge tir, keny-ɑ ómïdhi gen ciggí. Yï ógöggɑ ki pyëwɑ bëne. Yɑ ko wëggí pyemi ciggí. Ciggí mïdhɑ’ mïdhø kì pyëwɑ, o yɑ cögɑ yɑ pɑ røngø. Yɑ lenh-ɑ yïn, yïn ɑ Jwøng-ɑ Ácwɑ̈ɑ̈j, nyudhí yɑn yëthí. Yɑ ócigi ryeerø, yɑ kwøb-ɑ cigg-ɑ ɑ́muuj yi yïn bënn. Pyëwɑ med ki cyɑ̈dhø kì bɑng ciggí, kibøli ke kɑ̈rɑ ki kɑ̈ri dwøng. Yɑ ɑ́rum kì ri ciggí, pwönyí ɑ́rɑngɑ. Pyëwɑ med ki ciggí, kwøbbí pɑ wïl kì wïjɑ. Korrí yɑn kidøøj, yɑn ɑ bɑ̈ngí, o yɑ óbëëdɑ yɑ mïdh-ɑ ciggí. Yieb nyingɑ, o yɑ nëënɑ, o døøji kwøbbí lidhɑ. Yɑ bëëdø kì kömi piny kɑ keny me nøg yøw, ciggí ko kɑ̈nní yɑn. Pyëwɑ kønø kɑ per yodi ciggí yethi cyɑ̈ng bënn. Tyëngɑthwøg ɑ́cɑ̈wwí, tyëng-ɑ pɑ nyi mïdhi ciggí ri gen dɑ cyën. Yɑ ko wëggí gwɑddø kí gɑggø, mɑ́ yɑ mïdh-ɑ ciggí ceth. Yɑ ɑ́nywɑ̈ggi dhøg yi jyɑ̈ggì, de yɑ mïdh-ɑ pwönyí. Ciggí nyi thödh-ɑ yɑn ki medi pyëw, wïjɑ nyii pïlø yi gen. Yɑ ɑ́tyɑm, yɑ buud-ɑ yij tør, tïng yɑn mɑl ni kɑ ɑ́köngí. Gïg-ɑ ɑ́gwøgɑ bënn ɑ́töngɑ, løøg kwɑ̈jjɑ kɑ yɑ pwönyí ki yëthí. Køny yɑn ki mïdhi ciggí, o yɑ rummɑ kì ri pwönyí; pwöny-ɑ døj. Yɑ ɑ́dhɑ̈ɑ̈r yi kïïmø, wëggí yɑn tëngø ni kɑ ɑ́köngí. Lɑ̈ɑ̈w yɑn ki yuu pyed, kɑ yɑ pwönyí ki ciggí mɑ́ yï døøj. Yɑ ɑ́kwɑny yuu dyër, pyëwɑ ɑ́cïbɑ kömi ciggí. Yɑ cyɑ̈dh-ɑ́ɑ̀ bɑng ciggí ceth, yïn ɑ Jwøng-ɑ Ácwɑ̈ɑ̈j, wïjɑ ko wëggí lɑ̈ɑ̈yø. Ciggí ómïdhɑ ceth, mɑ́ yɑ ówëggí dïdø kidøøj. Yïn ɑ Jwøng-ɑ Ácwɑ̈ɑ̈j, pwönyí yɑn ki ngɑ̈nyi yuu ciggí, o ge ómïdhɑ ceth. Löbbí gen yɑn, o ge yodɑ, o ge mïdhɑ ki pyëwɑ bëne. Pwönyí yɑn ki mïdhi ciggí, mɑ́ pyëwɑ med ki gen. Cïb pyëwɑ kömi ciggí, kɑ ko cïb ri yodi kɑ̈r. Yɑ ko wëggí rømmi gïg bong per gen, korri yɑn kidøøj, ni kɑ ɑ́köngí ceth. Göggí yɑn, yɑn ɑ bɑ̈ngí ki gïg-ɑ ɑ́kwøb yi yïn kinni ge ógöggí tyëng-ɑ böggi yïn. Yiel yɑn ki ɑyɑ̈r-ɑ böggɑ mɑ́ ciggí døøj. Yɑ dwɑdd-ɑ mïdhi ciggí, thödhí yɑn ki bëëdø me nyɑ̈n, mɑ́ yï tir. Nyudhí yɑn mɑ̈ɑ̈dø mií yïn ɑ Jwøng-ɑ Ácwɑ̈ɑ̈j, kɑ yɑ yieel ni kɑ ɑ́köngí. O kwøbbi tyëng-ɑ gwɑddi yɑn cuggi gen ki løøgø yi yɑn, mɑ́ yɑ gɑ̈nn-ɑ yïn ceth. Wëggí yɑn kømmi dyër yethi cyɑ̈ng, mɑ́ yɑ rum yïëyø ceth kinni gønyy ócïb yi yïn kɑ̈jji gen. Ciggí ómïdhɑ ceth, gïti ɑtheer. Yɑ ócyɑ̈dhi yɑ pɑ böggi yi tyëngmɑ̈ɑ̈nø, mɑ́ yɑ mïdh-ɑ ciggí ceth. Ciggí ótöngɑ rɑ̈nhì, o wïjɑ koo lɑ̈y. Pyëwɑ med ki mïdhi ciggí, ge mɑɑr yi yɑn. Ciggí wør yi yɑn, o ge mɑɑr yi yɑn, yɑ óbëëdø yɑ rum ɑ ri gen. Pɑr bɑ̈ngí, kí møg-ɑ ɑ́köngii, thödhí yɑn ki ngɑ̈ɑ̈dhø. Cɑgg ɑ́ kɑ̀ rɑngɑ, pyëwɑ teeg, mɑ́ yɑ nyii thödhø ki nënnì yi kwöngí. Yɑ rïïj yɑ ogɑggø yi tyëngɑthwøg, de ciggí nuti wiy yɑn. Yuu-ɑ nyi liidh gønyy cøn nyii pɑrø yi yɑn, kɑ pyëwɑ nyii tëngø, yïn ɑ Jwøng-ɑ Ácwɑ̈ɑ̈j. Yɑ nyii mɑgø yi liny kenyi pyeem ciggí yi tyëngrijjø. Kì kɑɑm-ɑ óbëëdɑ kì kömi piny, ciggí ócɑ̈ggɑ ki wör. Yï ópɑrrɑ kì wɑ̈r Yïn ɑ Jwøng-ɑ Ácwɑ̈ɑ̈j, ciggí ómïdhɑ. Yɑ ɑ́yïddi ki gyëdh, mɑ́ yɑ mïdh-ɑ ciggí. Yïn ɑ dwɑddɑ, yïn ɑ Jwøng-ɑ Ácwɑ̈ɑ̈j, yɑ ɑ́köngi kinni ciggí ómïdhɑ. Yɑ kwɑjj-ɑ yïn ki pyëwɑ bëne, lɑ̈ɑ̈m pyëwí ki yɑn ni kɑ ɑ́kööb. Yɑ ɑ́rum kì ri bëëdɑ, o yɑ ɑ́köngi kinni ciggí ómïdhɑ. Ciggí ɑ́jwɑnɑ ki yïëyø ceth, o yɑ nuti pɑ̈nyi cwöngø. Yɑ ɑ́ceg ki ɑ́kɑ̈llì yi tyëngrijjø, de ciggí nuti wïlø kì wïjɑ. Yɑ nyi dhwödh-ɑ mɑl be lenhi yïn kì dïwɑ̈r, kɑ yï nyi lenhɑ kipe kenyi liidh gønyy kidøøj. Yɑ bɑ mɑ̈ɑ̈dh tyëng-ɑ böggi yïn bënn, geki tyëng-ɑ mïdhi ciggí. Piny ɑ́pɑ̈ng yi mɑ̈ɑ̈dø mií yïn ɑ Jwøng-ɑ Ácwɑ̈ɑ̈j, pwönyí yɑn ki ciggí. Dhøgí ɑ́mïdhí, yïn ɑ Jwøng-ɑ Ácwɑ̈ɑ̈j, kɑ yɑ korrí kidøøj, yɑn ɑ bɑ̈ngí. Thödhí yɑn ki peli wïj geki dïdø, mɑ́ yɑ gɑ̈nn-ɑ ciggí. Yɑ ɑ́bëëd yɑ nyii bɑ̈jjø kɑ̈ng-ɑ́ nuti cɑɑy yïn yɑn, de ɑnɑn yɑ mïdh-ɑ kwøbbí ceth. Yï døøj o yï nyi gøgg-ɑ gïgdøj, pwönyí yɑn ki ciggí. Yɑ ɑ́myen yi tyëngɑthwøg, de yɑ mïdh-ɑ ciggí ki pyëwɑ bëne. Ciggí pɑ nyi lïngi yi tyëngɑni, de pyëwɑ med ki ciggí. Lɑ̈w kɑ ɑ́cɑɑy yɑn, mɑ́ yɑ ɑ́wëggi dïdi ciggí yi cɑ́yɑni. Ciggí per gen teg kì yïɑ kibøli dhɑb kí ɑ́tegø mø gïïr. Yïn ɑ ɑ́cwɑ̈j yɑn, o yïn ɑ korri yɑn, pwönyí yɑn ki ngɑ̈nyi ciggí. Tyëng-ɑ böggi yïn pëthi gen ómïni, keny-ɑ ólidh gen yɑn, mɑ́ yɑ ngɑ̈dh-ɑ kwøbbí. Yɑ ngɑ̈ny wøw kinni ciggí bɑ dyër, yïn ɑ Jwøng-ɑ Ácwɑ̈ɑ̈j, o yɑ ɑ́cɑy yi yïn kɑ dyër ceth. Wiy yɑ lug yi mɑ̈ɑ̈dø mií, ni kɑ ɑ́köbbí bɑ̈ngí ceth. Lɑ̈ɑ̈m pyëwí ki yɑn o yɑ nëënɑ, mɑ́ pyëwɑ med ki ciggí. Wiy wɑ̈thi tyëngɑthwøg lɑ̈ɑ̈y gen, kipe kɑ ɑ́wɑ̈dhi yɑn ki myenø yi gen, de yɑ óyiel-ɑ yi mïdhi ciggí. Wiy tyëng-ɑ böggi yïn bï gen yïɑ, ɑ løg jií, tyëng-ɑ ngɑ̈nyi ciggí. Wiy pyëwɑ bëne cïbɑ kömi ciggí, o wïjɑ ócöge e pɑ lɑ̈ɑ̈y. Yïn ɑ Jwøng-ɑ Ácwɑ̈ɑ̈j, yɑ ɑ́dhɑ̈ɑ̈r yi yïd kinni o yɑ yiel yi yïn, yɑ ngɑ̈dh-ɑ kwøbbí. Nyingɑ ɑ́töd yi nenni møg-ɑ ɑ́kwøb yi yïn kinni ge ógöggí yɑn, ɑpëjjɑ kinni, “Á kì wɑɑng ɑ ókøny yɑn?” Yɑ ɑ́göög ni ɑtheeb møgi oløg men-ɑ óweddø, cɑgg ɑ́ kinøw wïjɑ nuti wïlø ki ciggí. Yɑ gït-ɑ wɑɑng yɑ oyïdø? Á kì wɑɑng ɑ ócɑɑy tyëng-ɑ guud wɑngɑ? Tyëngɑthwøg, ɑ pɑ mïdhi ciggí, ge ɑ́kuny ki bur me ceg gen yɑn. Ciggí bënn ceg kɑ gɑ̈nnø, wɑngɑ wɑ̈dhi kɑ guudø yøw, køny yɑn. Ádöng ɑ́ nyɑ keny me thiinh kinni o yɑ di nɑ̈g yi gen, de ciggí nuti wiy yɑn. Wiy yɑ nëënɑ kì bɑng mɑ̈ɑ̈dø mií, o ciggí mïdhɑ. Kwøbbí óbëëdø gïti ɑtheer yïn ɑ Jwøng-ɑ Ácwɑ̈ɑ̈j, ge ying-ɑ mɑl gïti ɑtheer. Yijí bong ɑ́dud ki jií kì yethi rïjj bënn, yïn ɑ ɑ́cïb piny keje, o bëëdø ceth. Jɑmmì bënn nudd ge ying-ɑ kɑ̈jji gen gïti dicyɑ̈ngtïn kì bɑng ciggí, mɑ́ ge bɑ bɑ̈nggí bënn. Keløg e pɑth ki ciggí ɑ ɑ́thödhi yɑn ki medi pyëw, yɑ di nɑ̈g yi orɑng. Ciggí pɑ wïl kì wïjɑ, mɑ́ ri gen ɑ ɑ́thödhí yɑn ki wëy. Yɑ bɑ mií, yiel yɑn! Mɑ́ yɑ yɑb-ɑ mïdhi ciggí. Tyëngrijjø dwɑdd-ɑ nɑ̈gi yɑn, de yɑ rum ɑ ri ciggí. Álidh yi yɑn kinni jɑmmì bënn ri gen dɑ kɑ̈jj mø dɑ̈ɑ̈dø, de ciggí ying-ɑ kej gen ceth. Ciggí mɑɑr yi yɑn ki mendwøng! Yɑ rïïj yɑ rum ɑ ri gen. Wïjɑ ɑ́pïli kibøli tyëngmɑ̈ɑ̈nø, mɑ́ ciggí pɑ nyi lɑ̈wi kì butɑ. Yɑ dïdø kibøli jøpwönyø møgɑ, mɑ́ yɑ rum ɑ ri ciggí ceth. Wïjɑ pel kibøli ywödhh, mɑ́ yɑ mïdh-ɑ ciggí. Gïgrijjø nyi këëjɑ’ këëjø, mɑ́ yɑ mïdh-ɑ kwøbbí. Yɑ nuti këjjø kì yuu ciggí, mɑ́ yɑ ɑ́pwönyi yi yïn. Ciggí med nɑ ngø kì yïɑ, ge med kibøli møøw kïc! Yɑ ɑ́thödhi yi ciggí ki peli wïj, bene ɑ mɑɑnɑ bëënrɑj. Kwøbbí bɑ lɑ̈mbɑ̈, o gen ɑ bɑng gen cyɑ̈dhɑ o ge bɑ cɑr men-ɑ meny yuuɑ. Yɑ ɑ́köngi kinni ciggí, cigg-ɑ døj, ge ómïdhɑ ceth. Yɑ ɑ́dhɑ̈ɑ̈r yi orɑng, yïn ɑ Jwøng-ɑ Ácwɑ̈ɑ̈j, thödhí yɑn ki nënnì ni kɑ ɑ́kööb. Yïëy kwɑ̈jjɑ yɑ pwøjjɑ yïn, yïn ɑ Jwøng-ɑ Ácwɑ̈ɑ̈j, kɑ ciggí pwönyí yɑn. Yɑ nyii cyɑ̈ngø ki thøø, de ciggí nuti wïlø kì wïjɑ. Yɑ ɑ́ceg ki ɑ́kɑ̈llì yi tyëngrijjø, de ciggí nuti pyeem yɑn. Ciggí bɑ møgɑ gïti ɑtheer, mɑ́ yɑ nyii thödhø yi gen ki medi pyëw. Pyëwɑ ɑ́cïbɑ ri mïdhi ciggí gïti cyɑ̈ng-ɑ óthøwɑ. Tyëng-ɑ yethi gen di ɑ́dud mɑɑn yi yɑn, de yɑ mɑɑr-ɑ ciggí. Yïn ɑ yïí nyi yömmɑ, o yïn ɑ bɑ kwödɑ, kwøbbí ɑ ngɑ̈dhɑ. Nyegi wun kì butɑ wun ɑ tyëngrijjø, o yɑ mïdh-ɑ ciggi Jwøgɑ. Thödhí yɑn ki tegø ni kɑ ɑ́kööb, o yɑ nëënɑ, wïjɑ ko wëggí lɑ̈ɑ̈yø, wiy yɑ ngɑ̈dhɑ ceth. Tïng yɑn mɑl, o yɑ bødhɑ, o yɑ órïïj yɑ mïdh-ɑ ciggí ceth. Tyëng-ɑ pemmi ciggí ɑ́bɑny yi yïn, bong gïndøj kì ri wëënyø mi gen. Tyëngrijjø bënn bong nyingi gen kì yïí bene ɑ mɑɑrɑ ciggí. Dëlɑ nyii kïïrø yi böggi yïn, yɑ nyii nɑ̈gø yi wɑ̈ɑ̈rø kipe cɑ́yí. Yɑ ɑ́gwøg-ɑ gïndøj geki gïn-ɑ bɑ dyër, yɑ ko wiy cinggi tyëng-ɑ ruj yɑn. Køny bɑ̈ngí ceth kɑ yieel, yɑ ko wëggí rujø yi tyëngtɑ̈dø! Nyingɑ ɑ́töd yi nenni yuu-ɑ kɑ̈ɑ̈l yi yïëdø mií, kí yïdi gïgdøj møg-ɑ ɑ́kwøøb kinni ge ógöggí yɑn. Mïdhí yɑn ki mɑ̈ɑ̈dø mií, kɑ yɑ pwönyí ki ciggí. Yɑ bɑ bɑ̈ngí, thödhí yɑn ki dïdø, kipe kinni o ciggí yodɑ. Yïn ɑ Jwøng-ɑ Ácwɑ̈ɑ̈j, bene bøli kej cɑ̈yí èn, mɑ́ ciggí ɑ́pyem yi ji. Bene ɑ mɑɑrɑ ciggí kibøli dhɑb, ge mɑɑr yi yɑn kibøli dhɑm-ɑ dhïw. Bene ɑ mïdhɑ ciggí bënn, yëth-ɑ rijjø bënn mɑɑn yi yɑn. Ciggí myëër cɑrø, bene ɑ mïdhɑ gen ki pyëwɑ bëne. Yodi ciggí yi ji nyi thödh-ɑ gen ki cɑr, tyëng-ɑ kwïj wøw nyii thödhø yi gen ki peli wïj. Kɑ̀ køni pyëwɑ ki ciggí, dhøgɑ nyi ceg-ɑ ngɑmø kɑ yɑ opirø ki kwɑ̈g. Lugí thɑ̈wwí yɑn, kɑ pyëwí lɑ̈ɑ̈me ki yɑn, ni kenyi göggí tyëng-ɑ mɑɑr yïn bënn. Yɑ ko wëggí pɑ̈ɑ̈dhø, yɑ ko wëggí tyɑmø yi rɑj. Yiel yɑn kì cinggi tyëng-ɑ nyi ruj yɑn, o ciggí ómïdhɑ. Thödhí yɑn ki gyëdh, kɑ ciggí pwönyí yɑn. Pïi nyingɑ rïngi nɑ nɑm, kipe kɑ̀ pɑ mïdhi ciggí yi ji. Yï tir, yïn ɑ Jwøng-ɑ Ácwɑ̈ɑ̈j, o ciggí bɑ dyër. Cigg-ɑ ɑ́muuj yi yïn døøj, o ge bɑ dyër ceth. Yɑ ɑ́mɑg yi tyiel me ni mɑc, mɑ́ tyëngmɑ̈ɑ̈nø ciggí pɑ gɑ̈nni yi gen. Kwøbb-ɑ ɑ́köbbí yɑn bɑ dyër ceth, ge mɑɑr yi yɑn. Bong perɑ, o yɑ ceg kɑ benyø, de ciggí pɑ nyi wïl kì wïjɑ. Bëëdí yï tir gït-ɑ ɑtheer, o ciggí bɑ dyër ceth. Yɑ ying-ɑ yethi rɑj kí orɑng, de yɑ nyii thödhø ki medi pyëw yi ciggí. Ciggí tir gïti ɑtheer, thödhí yɑn ki ngɑ̈nyi wøw, o yɑ nëënɑ. Yɑ ywøøg-ɑ köörí ki pyëwɑ bëne, løøg kwøbbɑ, yïn ɑ Jwøng-ɑ Ácwɑ̈ɑ̈j, o ciggí ómïdhɑ! Yɑ ywøøg-ɑ köörí, yiel yɑn, o ciggí ómïdhɑ! Yɑ nyi dhwödh-ɑ bɑ̈ɑ̈rø, o yɑ ywöngɑ kipe kønyø, yɑ ngɑ̈dh-ɑ møg-ɑ ɑ́kwøb yi yïn kinni ge ógöggí yɑn. Yɑ nyi lɑng-ɑ wɑ̈r yɑ onëënø, yɑ rømm-ɑ ciggí. Lïngí cwɑggɑ kì bɑng mɑ̈ɑ̈dø mií, yïn ɑ Jwøng-ɑ Ácwɑ̈ɑ̈j, lɑ̈ɑ̈m pyëwí ki yɑn kɑ yɑ yieel. Tyëng-ɑ yethi gen wöny, ɑ guud wɑngɑ ɑ́cyɑ̈ngi ki yɑn, gen ɑ tyëng-ɑ pɑ mïdhi ciggí. De yï ying-ɑ butɑ, yïn ɑ Jwøng-ɑ Ácwɑ̈ɑ̈j, o ciggí bënn bɑ dyër. Ciggí ɑ́dïd yi yɑn kɑ̈ge dööng, ge ɑ́cïb yi yïn gɑ møg bëëdø gïti ɑtheer. Lidh orɑngɑ, kɑ yɑ yieel, mɑ́ ciggí nuti wïlø kì wïjɑ. Lïngí gønyɑ kɑ yɑ yieel, ni kɑ ɑ́kööb ceth. Tyëngrijjø koo yiel, mɑ́ ciggí pɑ mïdhi yi gen. De pyëwí nyii lɑ̈ɑ̈mø ceth, yïn ɑ Jwøng-ɑ Ácwɑ̈ɑ̈j, ywöngi yijí kiperɑ, kɑ yɑ yieel! Tyëng-ɑ mɑɑn yɑn geki møg-ɑ guud wɑngɑ gïïr, de ciggí mïdhɑ’ mïdhø ceth. Pyëwɑ nyii rënyø kenyi lidhɑ tyëngɑdud, mɑ́ ciggí pɑ mïdhi yi gen. Lidh mɑɑr-ɑ mɑɑrɑ ciggí, yïn ɑ Jwøng-ɑ Ácwɑ̈ɑ̈j. Yiel wëyɑ, mɑ́ yï bɑ ngɑn pyëwí nyi lɑ̈ɑ̈m. Tyeli ciggí bɑ dyër, o kwøbbí bënn tir gïti ɑtheer. Wɑngɑ wɑ̈dhi kɑ guudø yi jyɑ̈ggì yøw, de pyëwɑ ying-ɑ kömi ciggí. Pyëwɑ med ki mendwøng ki kwöngí, kwöngí med kì pyëw ni yodi kɑ̈r me dwøng. Pyed mɑɑn yi yɑn, den-ɑ́ ciggí ɑ mɑɑrɑ. Yï nyii pwøjø yi yɑn tyel mø gïïr yethi cyɑ̈ng, mɑ́ ciggí tir. Tyëng-ɑ mɑɑr ciggí yï gen dɑ mër mɑ dyër, o bong gïn wëggi gen cwɑnyyi tyelli gen. Yɑ ngɑ̈dh-ɑ yïëdø mií, yïn ɑ Jwøng-ɑ Ácwɑ̈ɑ̈j, o yɑ göög ɑ ri ciggí ceth. Pyëwɑ ying-ɑ kömi ciggí, ge mɑɑr yi yɑn ki pyëwɑ bëne. Kwøbbí olïngø yi yɑn, o ciggí mïdhɑ’ mïdhø, gïg-ɑ gøggɑ bënn di nennø yi yïn. Wiy kwɑ̈jjɑ kipe kønyø wɑ̈nhe yïí, yïn ɑ Jwøng-ɑ Ácwɑ̈ɑ̈j. Thödhí yɑn ki dïdø ni kɑ ɑ́kööb. Lïngí kwɑ̈jjɑ, kɑ yɑ yieel, ni kɑ ɑ́kööb. Yɑ órïïj yɑ lenh-ɑ yïn, mɑ́ yïn ɑ pwönyi yɑn ki ciggí. Ciggí ówörɑ, mɑ́ ciggí bënn bɑ dyër. Nyi køny yɑn ceth, mɑ́ yɑ ɑ́mïdh-ɑ ciggí ceth. Pyëwɑ kønø kɑ per yielø yi yïn, yïn ɑ Jwøng-ɑ Ácwɑ̈ɑ̈j, o ciggí bene gen ɑ med kì pyëwɑ. Thödhí yɑn ki wëy, o yï lenhɑ, wiy yɑ køny yi ciggí. Yɑ ɑ́wɑ̈nyyi pɑ̈l ni dyel, bïí kɑ yɑ yɑɑb, yɑn ɑ bɑ̈ngí, mɑ́ ciggí nuti wøøy yɑn. Keny-ɑ ɑ́yingɑ yethi rɑj, yɑ ɑ́ywøøg kö Jwøng-ɑ Ácwɑ̈ɑ̈j, kɑ møgɑ løøge. Yiel yɑn, yïn ɑ Jwøng-ɑ Ácwɑ̈ɑ̈j, yiel yɑn ki tyëngpyed geki wëëny. Á ngø ɑ ógöggi wun yi Jwøk, wun ɑ tyëngpyed? Wu ócɑy yi en ɑ dï? Wu ócɑy yi en kɑ weth jɑl-liny, wenh-ɑ bedh, kí mɑɑc cug, mɑny-ɑ lëëdh! Bëëdø kì kelli wun rɑj nɑ bëëdø kì Mecek, o nɑ bëëdø kì kelli tyëng Kedɑr! Kɑ̈gɑ ɑ́døngi ki mendwøng yɑ bëëd ɑ kelli tyëng-ɑ mɑɑn mër! Kenyi kööbɑ kiper mër, ge nyi yɑb-ɑ liny. Yɑ nenn-ɑ wɑ̈thi kïttì, ɑ́ kun-ɑ ókɑ̈ɑ̈l yi ngɑn-ɑ køny yɑn? Ngɑn-ɑ køny yɑn ókɑ̈ɑ̈l-ɑ yï Jwøng-ɑ Ácwɑ̈ɑ̈j, ngɑn-ɑ ɑ́cwɑ̈j mɑl kí piny. Yï koo wëgge pɑ̈ɑ̈dhø, ngɑn-ɑ kor yïn pɑ nyi neni. Ngɑn-ɑ kor Isrɑil, pɑ nyi nwɑyyi, o pɑ nyi neni. Yï ókorri yi Jwøng-ɑ Ácwɑ̈ɑ̈j, ying-ɑ butí ceth, yï korre’ korrø. Cɑ̈ng, yï koo gögge ki gïnrɑj kì dicɑ̈ng, o dwɑ̈y, yï koo gögge ki gïnrɑj kì wɑ̈r. Yï ókorri yi Jwøng-ɑ Ácwɑ̈ɑ̈j ki rɑj bënn, yï ómïdhe ki tɑrø. Yï ókorre kenyi kedhí wɑ̈g, kí kenyi dwöög, cɑg ɑnɑn gïti ɑtheer. Pyëwɑ med ki tyëng-ɑ nyi köbbi yɑn kinni, “Kedhi wɑ ød Jwøng-ɑ Ácwɑ̈ɑ̈j.” Anɑn wøn ek, wø cung-ɑ́ɑ̀ yij döri Yerusɑlem! Yerusɑlem ɑ́ger ɑ́ kɑɑldwøng, me myëër ki myëërø ɑ́kyel. Keny-ɑ yije nyi bëën yi kɑ̈lli Isrɑil, be pwøji Jwøng-ɑ Ácwɑ̈ɑ̈j ni kɑ ɑ́köbbe gïn. Kunɑni ɑ bëëd yi kwøøm jyɑ̈gø, kwøøm gøl Debïd. Kwɑ̈jji wun kiper mër kì Yerusɑlem kinni, “Wiy tyëng-ɑ mɑɑr yïn yïddi gen ki ywömø. Wiy bëëd e dɑ mër kì yethi dörrí, kí ywömø kì yethi kɑ̈llí, kɑ̈ll-ɑ døngø.” Kipe wɑddɑ geki mɑ̈dhhɑ, Yerusɑlem köbbɑ’ kinni, “Yï óbëëdø ki mër!” Kipe ød Jwøøg wøn, Jwøng-ɑ Ácwɑ̈ɑ̈j men-ɑ yijí. Yerusɑlem, yɑ ókwɑ̈jji kinni o yï yïddí ki døøjø. Yïn ɑ Jwøng-ɑ Ácwɑ̈ɑ̈j, yɑ nenn-ɑ mɑl yïí, yɑ nenn-ɑ mɑl kun-ɑ jyɑ̈ɑ̈g yi yïn. Ni bɑ̈ng kenyi nenne yï wɑ̈n, o ni bɑ̈ng-ɑ dhɑjø kenyi nenne yï wɑ̈n, nɑ menɑni ceth, wø nenn-ɑ yïí ceth, yïn ɑ Jwøøg wøn, Jwøng-ɑ Ácwɑ̈ɑ̈j, gïti keny-ɑ ólɑ̈ɑ̈m pyëwí ki wøn. Lɑ̈ɑ̈m pyëwí ki wøn, yïn ɑ Jwøng-ɑ Ácwɑ̈ɑ̈j, lɑ̈ɑ̈m pyëwí ki wøn, mɑ́ wø ɑ́dhɑ̈ɑ̈r yi tugø yi ji. Kɑ̈gi wøn ɑ́døngi, wø ceg kɑ gɑggø yi tyëngkɑ̈rì, wø ceg kɑ benyø yi tyëngɑthwøg møg-ɑ guud nyingi wøn. Di bëëd ɑ dï keløg Jwøk pɑ di ying tungee? Löggí yïn ɑ Isrɑil! “Ke di bëëd Jwøng-ɑ Ácwɑ̈ɑ̈j pɑ ying tungee, keny-ɑ ɑ́pɑ̈ɑ̈r kömee yi tyëngmɑ̈ɑ̈nø, wɑ di ceg kɑ mwønyø yi gen wɑ onëënø, kipe kɑ̀ rɑj pëthi gen ki wɑ. Wɑ di køøl yi gen ni pïi bɑɑyø wɑ di biil thɑ́ pïgɑni. Wɑ di mud yi gen ni nɑm me thewe teeg, nɑm-ɑ yije tulli pï ri gen.” Pwøj wɑ Jwøng-ɑ Ácwɑ̈ɑ̈j, ngɑn-ɑ ɑ́mɑ̈ɑ̈n wɑ nɑ̈gø yi tyëngmɑ̈ɑ̈nø. Wɑ ɑ́pɑ̈r ni winyø kì dhøggi ɑ́kɑ̈llì, ɑ́kɑ̈llì ɑ́cöd, wɑ ceg-ɑ tɑ̈bbø. Wɑ køny-ɑ yi Jwøng-ɑ Ácwɑ̈ɑ̈j, ɑ ɑ́cwɑ̈j mɑl kí piny Tyëng-ɑ gɑ̈nni Jwøng-ɑ Ácwɑ̈ɑ̈j, nɑ Kïti Dhɑyøn ɑ pɑ nhɑ̈nhø gïti ɑtheer. Ni kɑ̀ ówen Yerusɑlem yi kïttì, Jwøng-ɑ Ácwɑ̈ɑ̈j jie wen en thyew, cɑg ɑnɑn gïti ɑtheer. Piny tyëngtir koo cög e ojɑɑgø yi tyëngrijjø, ke jɑɑgii yi tyëngrijjø, tyëngtir ceg-ɑ rënyø. Yïn ɑ Jwøng-ɑ Ácwɑ̈ɑ̈j, göggí tyëngdøj ki gïgdøj, göggí tyëng-ɑ mïdhi ciggí ki gïgdøj. De keny-ɑ ócɑɑy tyëngrijjø, kɑ tyëng-ɑ ɑ́bɑny ciggí cɑɑy thyew. Isrɑil óbëëdø ki mër! Keny-ɑ ɑ́dwöög wɑ Yerusɑlem yi Jwøng-ɑ Ácwɑ̈ɑ̈j, menɑni ɑ́bëëd e nɑ lɑ̈g. Wɑ ɑ́thøw yi ngyerø, kɑ wɑ owörø ki medi pëëth! Akømmi wɑ yi pödhh-ɑ kyeelø kinni, “Ge ɑ́göggi ki gïgdøngø yi Jwøng-ɑ Ácwɑ̈ɑ̈j.” Wɑ ɑ́gögge ki gïgdøngø kidyër, pëthee ɑ́bëëd ge med ki mendwøng! Yïn ɑ Jwøng-ɑ Ácwɑ̈ɑ̈j, wiy wø døøg wøn ki dönyø, ni kødh kenyi kɑ̈ne tyeli nɑm-ɑ thwøwø ki pï. Wiy tyëng-ɑ ɑ́kɑ̈ɑ̈g pïi nyingi gen odyëmø, kɑ̈ɑ̈j gen ge owörø. Wiy tyëng-ɑ ɑ́kedhi be kɑ̈g ge óywöngø, dwöög gen pɑc ki medi pëëth, kɑ̀ dwöög gen ge kɑ̈ll-ɑ byel. Keløg ød pɑ ger yi Jwøng-ɑ Ácwɑ̈ɑ̈j, tyëng-ɑ gëdø pïd-ɑ ri gen yøw, keløg kɑɑl pɑ korri yi Jwøng-ɑ Ácwɑ̈ɑ̈j, bong gïn gwøg yi tyëng-ɑ lɑng wɑ̈r ge okurø. Bong gïndøj kì ri pïdi dhɑnhø ree ki gwøg kipe gïncɑm, ɑ nyi dhwödhe piny looj, o nyi budde e cwöngø. Mɑ́ Jwøng-ɑ Ácwɑ̈ɑ̈j tyëng-ɑ mɑɑr yi en nyi muuje’ muujø ki gïncɑm, ge ceg-ɑ nenø. Jwøng-ɑ Ácwɑ̈ɑ̈j ɑ nyi muuj nywøl, ge bɑ gyëdhh-ɑ dyër. Wɑ̈dd-ɑ nywøl e dhɑnhø bɑ wøb, nɑ nywøli weth kì cingi jɑl-liny. Jɑl-ɑ yïe ngeeny gen ree dɑ gyëdh. Koo wöl ki tyɑmø, keny-ɑ ótuume ki tyëngmɑ̈ɑ̈nø kì dïpɑc. Tyëng-ɑ nyi mïdhi Ciggi Jwøng-ɑ Ácwɑ̈ɑ̈j, ri gen dɑ gyëdh, gen ɑ tyëng-ɑ nyi bëëdø kì kömi cigge. Yï óyïddi kì bɑng gwøøg cingí, rií ódi gyëdh, o yï óbëëdø ki døøjø. Cyëgí kì gølí, óni oløg me kööre di nywøl, o nyigí óni yenh dhetun møg thønhø kì wïj tɑwí. Jɑl-ɑ nyi lïngi kwøbbi Jwøng-ɑ Ácwɑ̈ɑ̈j, ógyëdh kinøw ceth. Yï ógyëdh yi Jwøng-ɑ Ácwɑ̈ɑ̈j kì Dhɑyøn! Dönyi Yerusɑlem ónenni yi yïn kì yethi runn-ɑ ónëën bënn! Kwɑrrí ólidh yi yïn! Isrɑil óbëëdø ki mër! Isrɑil, köbbí wøn kër-ɑ ɑ́guud wɑngí yi pödhh-ɑ mɑɑn yïn, kër-ɑ ɑ́wöní yï thiinh. “Kër-ɑ ɑ́wönɑ yɑ thiinh, wɑngɑ ɑ́guud yi tyëngmɑ̈ɑ̈nø møg-ɑ yethi gen wöny, de yɑ nuti tyɑɑm gen. Kömɑ ɑ́kɑggi gen, kɑ gø gwøg gen e nɑ pwönh-ɑ ókøøgø. De Jwøng-ɑ Ácwɑ̈ɑ̈j, ngɑn-ɑ tir, yɑ ɑ́göönye wɑ̈g kì yij bɑ̈ɑ̈ngø.” Tyëng-ɑ mɑɑn Dhɑyøn ótyɑm, kɑ ge tɑɑr-ɑ cyɑ̈n. Ge óni lum-ɑ nyi twïy kì wïj óthɑɑng ød, ɑ pɑ nyi cuggi gwenø ɑ́ yugg, mɑ́ e nyi thwøw e nuti døngø, bong ngɑn gwenii, wɑlɑ̀ ngɑn twöjii ɑ́ wɑ̈ɑ̈th. Bong ji mø kɑ̈lli yöö møg-ɑ ókööbø kinni, “Wu ógyëdh yi Jwøng-ɑ Ácwɑ̈ɑ̈j! Wø kwëng-ɑ wun ki nyingi Jwøng-ɑ Ácwɑ̈ɑ̈j.” Yï cwøl yi yɑn minɑ cödø, yïn ɑ Jwøng-ɑ Ácwɑ̈ɑ̈j, Wuö, lïngí ywøgɑ, lïngí cwɑggɑ kɑ̀ cwöölɑ yïn be kønyi yɑn! Keløg orøøg ji nyii mïdhø yi yïn, ɑ́ men ɑ cög e pɑ cɑy Wuö? De pyëwí nyii lɑ̈ɑ̈mø ki wøn, kipe kinni o yï nyi böggi yi wøn. Yɑ yïd-ɑ kunyí ceth, yïn ɑ Jwøng-ɑ Ácwɑ̈ɑ̈j, o yɑ gɑ̈nn-ɑ kwøbbí ceth. Yɑ yïd-ɑ Jwøng-ɑ Ácwɑ̈ɑ̈j, yïn-ɑ yïdɑ, lod-ɑ yïd jɑlkor kenyi yïde ru wøw. Isrɑil, gɑ̈nní Jwøng-ɑ Ácwɑ̈ɑ̈j, mɑ́ mɑ̈ɑ̈dø me pɑ nyi lwënyi, o nyi tyer-ɑ yïëdø ceth. Tyëng Isrɑil óyiel yi en ki orøøg gen bëne. Yïn ɑ Jwøng-ɑ Ácwɑ̈ɑ̈j, yɑ ɑ́wïyi ki thwøgø, o tɑ̈dø ɑ́wiy yi yɑn. Yɑ pɑ rumø kì ri gïgdøngø wɑlɑ̀ kì ri møg-ɑ dhɑl yɑn. De pyëwɑ cïb yɑn piny. Yɑ ókudø; pyëwɑ ómɑɑgɑ piny, yɑ óbëëdø ni kenyi kud nyɑ gïnthinh kì kö meye. Isrɑil, gɑ̈nní Jwøng-ɑ Ácwɑ̈ɑ̈j, cɑg ɑnɑn gïti ɑtheer! Yïn ɑ Jwøng-ɑ Ácwɑ̈ɑ̈j, Debïd ko wïl kì wïjí kí rɑjj-ɑ ɑ́ngine bënn. Pɑr møg-ɑ ɑ́köbbe yïn, yïn ɑ Jwøng-ɑ Ácwɑ̈ɑ̈j, møg-ɑ ɑ́könge Jwøng-ɑ teg, Jwøøg Yɑgob kinni, “Yɑ pɑ kedhi pɑc, o yɑ pɑ buddi, Yɑ pɑ ywömø, o yɑ pɑ neni, gïti keny-ɑ óyïddɑ ki kej bëëdø me yije bëëd yi Jwøng-ɑ teg, Jwøøg Yɑgob.” Kwøbbi Sɑnduug Cigg ɑ́lïngi yi wøn kì Betleem, kɑ yood wøn yethi pwödhhi Yeɑrïm. Akööb wøn kinni, “Kedhi wɑ ød Jwøng-ɑ Ácwɑ̈ɑ̈j, kɑ riee bøødh wɑ piny kì bøli kwøme.” Bïí yij Kengø, yïn ɑ Jwøng-ɑ Ácwɑ̈ɑ̈j, bïí kyeel ki Sɑnduug Cigg, ɑ bɑ ngïji tegí, kɑ yï bëëd kì keny gïti ɑtheer. Wiy ókwërrí nyi gwøg gen gïn-ɑ bɑ dyër ceth, wiy jií ryeer gen ki medi pëëth! Yï ɑ́köngi kipe bɑ̈ngí Debïd; rɑ̈nh-ɑ ɑ́yieny yi yïn ko bɑɑny, yïn ɑ Jwøng-ɑ Ácwɑ̈ɑ̈j. Debïd ɑ́köngí ki köngø me pɑ cuggi pɑ̈dø kinni, “Ákyel kì kelli wɑ̈ddí ógwøgɑ ɑ́ rɑ̈dh, o ójɑ̈gge kì bɑngí. Keløg lwöbø ómïdhi yi wɑ̈ddí kidyër, kɑ cigg-ɑ mëggɑ gen mïdhi gen, wɑ̈ddí gen ɑ ójyɑ̈ɑ̈gø kì bɑngí thyew gïti ɑtheer.” Dhɑyøn ɑ ɑ́myeg yi Jwøng-ɑ Ácwɑ̈ɑ̈j ɑ́ kej bëëde, kɑ okööbø kinni, “Bene keny-ɑ óbëëdɑ èn gïti ɑtheer, bene keny-ɑ dwɑdd-ɑ jyɑ̈gø èn. Dhɑyøn óthödhɑ ki gïg-ɑ dwɑdde bënn, tyëng-ɑ jɑdø kì yije, óyɑ̈ɑ̈ngɑ ki gïgcɑmm. Ókwërre ógyëdhɑ, kɑ gïg-ɑ gøggi yi gen bënn nyi pɑ̈dh-ɑ kɑ̈jji gen, jie ówör ge óryeerø ki medi pëëth. Kwɑɑr Debïd ógwøgɑ ɑ́ rɑ̈dh me dwøng, lɑwi rɑ̈nh-ɑ ɑ́yienyɑ ómïdhɑ kì keny. Tyëngmɑ̈ɑ̈nø wɑ̈thi gen ólɑ̈ɑ̈y yi yɑn, de pödhe ódönyi kɑ ódøngø.” Myër nɑ ngø, o med nɑ ngø, eni bëëdi jii Jwøk mɑ̈ɑ̈dh kì kej ɑ́kyel! Nɑ møøw röny, møøw ɑ pere teg, kenyi rïnge piny kì wïj Aɑron kí yëyyi tïge, e reng-ɑ ri muni ɑ́ywödhe. Nɑ thöjj kì kömi Kïti Kermön, ge dyëëm-ɑ kömi kïtt-ɑ thønhø kì Dhɑyøn. Mɑ́ Dhɑyøn ɑ ɑ́kwøb yi Jwøng-ɑ Ácwɑ̈ɑ̈j kinni bene keny-ɑ yije nyi muuje gyëdh geki nënn-ɑ ɑtheer. Bïu lenhu Jwøng-ɑ Ácwɑ̈ɑ̈j, wun ɑ bɑ̈ngge bënn, wun ɑ tyëng-ɑ nyi cungi kì Kenge kì wɑ̈r. Tïng wun cinggi wun mɑl, wu ókwɑ̈jjø kì yij Kengø kɑ Jwøng-ɑ Ácwɑ̈ɑ̈j lenhi wun! Yï ógyëdh yi Jwøng-ɑ Ácwɑ̈ɑ̈j, ngɑn-ɑ ɑ́cwɑ̈j mɑl kí piny, gyëdhhe óbï ge kɑ̈ɑ̈l-ɑ Dhɑyøn! Lenhu Jwøng-ɑ Ácwɑ̈ɑ̈j! Lenhu nyinge, wun ɑ bɑ̈ngge, møg-ɑ nyi cungi kì ød Jwøng-ɑ Ácwɑ̈ɑ̈j, ɑ bɑ Kengi Jwøgee. Lenhu Jwøng-ɑ Ácwɑ̈ɑ̈j mɑ́ e døøj, lenhu nyinge, mɑ́ pyëwe yöd. Jwøng-ɑ Ácwɑ̈ɑ̈j Yɑgob ɑ́myege ɑ́ mee, o tyëng Isrɑil bɑ møge. Yɑ ngɑ̈ny wøw kinni Jwøng-ɑ Ácwɑ̈ɑ̈j dwøng, dwøng kibøli jwögg bënn. Gïn-ɑ dwɑdde gwøgø, kì mɑl kí piny kí yethi nɑ̈mmi omelø, kí thɑ piny. gø nyi gwøge’ gwøgø. Pølli ɑtunø nyi kɑ̈ɑ̈le’ kɑ̈ɑ̈lø kì cögi piny, kɑ mɑl wëgge ogwel kɑ̀ mɑ̈gi kødh, kɑ ɑtunø nyi kɑ̈ɑ̈le wɑ̈g kì yethi udd-ɑ mïdhii. Kɑyyi Rïp ɑ́nɑ̈ge bënn, cɑg kì ri kɑyyi ji gïti lɑ̈yy bënn. Agööge ki gïïngɑ̈ngø kí ngïjjì, e cɑy-ɑ rɑ̈ɑ̈dh Rïp geki bɑ̈ngge bënn. Pödhh-ɑ kyeelø mø ngenyø ɑ́nɑ̈ge, kɑ rɑ̈nhì mø teg nɑ̈ge, ɑ løg Sïön rɑ̈ɑ̈dh tyëng Amör, kí Og rɑ̈ɑ̈dh Bɑcɑn, kí rɑ̈nhi Kɑnɑɑn bënn. Pìnyi gïn ɑ́mëgge jie, gï ɑ́mëgge Isrɑil. Yïn ɑ Jwøng-ɑ Ácwɑ̈ɑ̈j, yïn ɑ ómïdhi yïn ɑ́ Jwøk ceth, yï ópɑrri yi rïjj bënn. Jwøng-ɑ Ácwɑ̈ɑ̈j ɑ ócwɑg jie, yije óywöngi kipe bɑ̈ngge. Jwöggi pödhh-ɑ kyeelø bɑ ɑgwøg ki dhɑb kí ɑ́tegø, ge ɑ́cwɑ̈j-ɑ yi ji yøw. Yï gen dɑ dhøg, de ge pɑ kööbø, yï gen dɑ nying, de ge pɑ nëënø. Yï gen dɑ yïthh, de ge pɑ lïngø, ge pɑ cuggi yëgø thyew. Wiy tyëng-ɑ ɑ́cwɑ̈j gen, kí tyëng-ɑ gɑ̈nni jwöggɑni bënn pɑ̈ɑ̈r gen ki gïn. Lenhu Jwøng-ɑ Ácwɑ̈ɑ̈j, wun ɑ tyëng Isrɑil, lenhu en, wun ɑ ókwërri Jwøk! Lenhu Jwøng-ɑ Ácwɑ̈ɑ̈j, wun ɑ Kwɑrri Leebì, lenhu en, wun ɑ tyëng-ɑ mɑllii bënn! Lenhu Jwøng-ɑ Ácwɑ̈ɑ̈j kì Dhɑyøn, kì Yerusɑlem pɑɑre. Lenhu Jwøng-ɑ Ácwɑ̈ɑ̈j! Pwøj wun Jwøng-ɑ Ácwɑ̈ɑ̈j, mɑ́ e døøj; mɑ̈ɑ̈dø mee gït-ɑ ɑtheer. Pwøj wun Jwøng-ɑ Pëddi Döng kibøli jwögg bënn, mɑ̈ɑ̈dø mee gït-ɑ ɑtheer. Pwøj wun ngɑn-ɑ teg kibøli tyëng-ɑ jyɑ̈gø bënn, mɑ̈ɑ̈dø mee gït-ɑ ɑtheer. E kete ɑ nyi göögø ki gïïngɑ̈ngø mø døngø, mɑ̈ɑ̈dø mee gït-ɑ ɑtheer. Mɑl ɑ́gwøge kɑ peli wïje, mɑ̈ɑ̈dø mee gït-ɑ ɑtheer. Piny ɑ́cïbe kömi pï mø gïïr; mɑ̈ɑ̈dø mee gït-ɑ ɑtheer. Cɑ̈ng geki dwɑ̈y ɑ́gwøge, mɑ̈ɑ̈dø mee gït-ɑ ɑtheer. O cɑ̈ng jɑɑge dicɑ̈ng, mɑ̈ɑ̈dø mee gït-ɑ ɑtheer. O dwɑ̈y geki kyell jyɑ̈ɑ̈g gen kì wɑ̈r, mɑ̈ɑ̈dø mee gït-ɑ ɑtheer. Kɑyyi Rïp, møg-ɑ bɑ cwøw ɑ́nɑ̈ge, mɑ̈ɑ̈dø mee gït-ɑ ɑtheer. Tyëng Isrɑil ɑ́kɑ̈ɑ̈le wɑ̈g kì Rïp; mɑ̈ɑ̈dø mee gït-ɑ ɑtheer, ki tege teng-ɑ dwøng, mɑ̈ɑ̈dø mee gït-ɑ ɑtheer. Nɑɑm Omeli Kwɑrø ɑ́pɑ̈nge; mɑ̈ɑ̈dø mee gït-ɑ ɑtheer, jie ɑ́wëgge cøri yij nɑmɑni, mɑ̈ɑ̈dø mee gït-ɑ ɑtheer, de rɑ̈ɑ̈dh Rïp ɑ́mude geki jølinye, mɑ̈ɑ̈dø mee gït-ɑ ɑtheer. Jie ɑ́kɑ̈lle kì yij ryɑng, mɑ̈ɑ̈dø mee gït-ɑ ɑtheer. Rɑ̈nhì mø teg ɑ́nɑ̈ge, mɑ̈ɑ̈dø mee gït-ɑ ɑtheer, Rɑ̈nhì mø per gen teg ɑ́nɑ̈ge; mɑ̈ɑ̈dø mee gït-ɑ ɑtheer. Sïön, rɑ̈ɑ̈dh tyëng Amör; mɑ̈ɑ̈dø mee gït-ɑ ɑtheer, kí Og rɑ̈ɑ̈dh Bɑcɑn; mɑ̈ɑ̈dø mee gït-ɑ ɑtheer. Pìnyi gïn ɑ́mëgge jie; mɑ̈ɑ̈dø mee gït-ɑ ɑtheer, gï ɑ́mëgge Isrɑil, bɑ̈nge, mɑ̈ɑ̈dø mee gït-ɑ ɑtheer. Wïje nuti wïlø ki wøn keny-ɑ ɑ́tyɑɑm wøn, mɑ̈ɑ̈dø mee gït-ɑ ɑtheer. Wø ɑ́yiele ki tyëngmɑ̈ɑ̈nø, mɑ̈ɑ̈dø mee gït-ɑ ɑtheer. En ɑ nyi thödhi ji bënn ki gïncɑm, mɑ̈ɑ̈dø mee gït-ɑ ɑtheer. Pwøj wun Jwøøg mɑl; mɑ̈ɑ̈dø me gït-ɑ ɑtheer. Wø ɑ́pëggi kömi nɑ̈mmi Bɑbïl, ɑywöngi wøn kì kunɑni keny-ɑ ɑ́pɑr wøn Dhɑyøn. Aleeng wøn thømi wøn kelli wijø kì tøg nɑm. Mɑ́ wø ɑ́köbbi yi tyëng-ɑ ɑ́mɑg wøn i wör wøn, o pëthi gen mïni gen; ge ɑ́kööb kinni, “Wör wun kì bøli wøn ki wörri Dhɑyøn.” Wörri Jwøng-ɑ Ácwɑ̈ɑ̈j ówör yi wøn kidï kì piny me pɑth? Keløg wïjɑ owïlø ki Yerusɑlem, wiy yɑ cögɑ yɑ pɑ thumø ki thom këti! Wiy yɑ cögɑ yɑ pɑ cuggi wör këti, keløg yï pɑ pɑr yi yɑn, keløg Yerusɑlem pɑ cïbɑ, ɑ́ en ɑ med kì pyëwɑ ki mendwøng! Yïn ɑ Jwøng-ɑ Ácwɑ̈ɑ̈j, pɑr gïn-ɑ ɑ́gwøg yi tyëng Edöm, kì dicyɑ̈ng-ɑ ɑ́mɑɑg Yerusɑlem. Pɑr møg-ɑ ɑ́kømmi yi gen kinni, “Cøøru en piny bëne!” Bɑbïl, yï órënyi. Tyëng-ɑ órënyi yïn ri gen dɑ gyëdh; gen ɑ tyëng-ɑ órënyi yïn kipe gïn-ɑ ɑ́göggí wøn, gen ɑ tyëng-ɑ ókwɑny othønh-ɑ dhødh kì köörí kɑ gï gøøj gen ri kït. Jwøng-ɑ Ácwɑ̈ɑ̈j, yɑ pwøjɑ yïn ki pyëwɑ bëne, yɑ lenh-ɑ yïn ki wör kì bøli jwögg bënn. Wïjɑ ɑ́løgɑ tung-ɑ di Kengí kwërø, kɑ riɑ bøødhɑ piny yɑ lenh-ɑ nyingí. Nyingí geki ciggí ying-ɑ mɑl kibøli jɑmmì bënn. mɑ́ mɑ̈ɑ̈dø mií pɑ nyi lwënyi, o dhøgí pɑ nyi wil yi yïn, Møgɑ ɑ́løøg yi yïn cyɑ̈ng-ɑ ɑ́cwølɑ yïn, kɑ yɑ wëggí tëngø kì bɑng tegí. Yï ólenhi yi rɑ̈nhi piny bënn, yïn ɑ Jwøng-ɑ Ácwɑ̈ɑ̈j mɑ́ kwøbbí ɑ́lïngi yi gen. Ge ówör kì ri gïg-ɑ ɑ́gwøøg mɑ́ dhwɑ̈ngí dwøng. Cɑgg ɑ́ kɑ̀ ying mɑldwøng, tyëng-ɑ bɑ mööl nyi korrí korrø, o wɑngí pɑ nyi wïd yi tyëngɑthwøg. Yɑ nyii yielø yi yïn ki rɑjj-ɑ tyeeg yɑn. Kɑ yɑ nyi yiel yi yïn ki tegí ki liny tyëngmɑ̈ɑ̈nø. Møg-ɑ ɑ́kwøb yi yïn ógwøg yi yïn bënn, yïn ɑ Jwøng-ɑ Ácwɑ̈ɑ̈j, mɑ́ mɑ̈ɑ̈dø mií gït-ɑ ɑtheer. Tyëg gwøng-ɑ ɑ́cɑg yi yïn. Jwøng-ɑ Ácwɑ̈ɑ̈j, yɑ ɑ́rɑng yi yïn, kɑ yɑ yood. Gïg-ɑ gøggɑ bënn ngɑ̈nyi yi yïn, o gïg-ɑ rømmɑ bënn ngɑ̈nyi yi yïn! Yɑ nenní nennø, ying yɑ ceg-ɑ gwøg wɑlɑ̀ yɑ wɑ̈dh-ɑ bëëdø, gïg-ɑ gøggɑ bënn ngɑ̈nyi yi yïn. Møg-ɑ nyi dwɑddɑ kwøbø, ge nyi bëëd ge ngɑ̈nyi yi yïn kɑ̈ng-ɑ nuti kwøøb yɑn gen. Yï ying-ɑ butɑ kì wɑ̈thi tùng bënn, yɑ okorø yi yïn ki tegí. Yɑ ngɑ̈nyi yi yïn kidøøj, ki yöö me pɑ cuggi gɑmø yi wïjɑ. Á keny ɑ ópɑ̈ɑ̈rɑ, o riɑ lɑ̈ɑ̈wɑ ki yïn? Á keny-ɑ ópɑ̈nɑ, ɑ yije koo yood yɑn? Keløg yɑ kedh-ɑ mɑl, yï nud kì kunɑni, ce yɑ kedh-ɑ piny, yï nud kì kunɑni thyew. Ke pɑ̈ɑ̈rɑ yɑ kedh-ɑ wɑɑng cyɑ̈ɑ̈ng mwøl, wɑlɑ̀ ke bëëdɑ kì wɑɑng cyɑ̈ɑ̈ng böörø kun lɑ̈wi, yï óbëëd yï ying-ɑ kunɑni, o yï nyudhí yɑn, o yï køny yɑn. Yɑ ócuggø köbbi muudhø o yɑ kume, wɑlɑ̀ cɑr-ɑ meny yɑn o ree løge wɑ̈r, de cɑgg ɑ́ muudhø pɑth ki muudhø kì yïí, o wɑ̈r tɑr nɑ dicɑ̈ng. Muudhø geki cɑr pɑ̈r kì yïí. Yïn ɑ ɑ́cwɑ̈j yɑn bënɑ, kɑ dëlɑ kwøøj kej ɑ́kyel kì yij meyɑ. Yɑ lenh-ɑ yïn, mɑ́ yëth-ɑ ɑ́cwɑ̈ɑ̈j yɑn bɑ ngɑ̈ngø, o gïg-ɑ ɑ́cwɑ̈j yi yïn bënn bɑ ngɑ̈ngø. Møgɑni bënn ngɑ̈nyi yi yɑn ki pyëwɑ bëne. Keny-ɑ ɑ́cwɑ̈ɑ̈j cuɑ, ge ɑ́pyël yi yïn kidøøj kì yij meyɑ. Keny-ɑ ɑ́kuunɑ kì gød, bɑ yïn ɑ ngɑ̈nyi nudɑ. yɑ ɑ́lidh yi yïn yɑ nuti nywølø. Cyɑ̈ngg-ɑ ɑ́mëggí yɑn, bɑ ɑgwed bënn kì yij wɑ̈nyí, ge nuti cɑ̈gø. Yïn ɑ Jwøk, yodi rummí teeg kiperɑ, ge ngenyø nɑ ngø! Rummí pɑ cuggi kwɑnø yi yɑn, mɑ́ ge gïïr kibøli nyingi ɑyejø. Yɑ nyi cyëw, yɑ nudd yɑ omïdhø yi yïn ceth. Yïn ɑ Jwøk lɑ̈w ke nɑ̈ɑ̈g tyëngrijjø! Kɑ ɑ́muddi ji lɑ̈ɑ̈w ki yɑn! Nyingí ɑ́rënyi yi gen, ge kømm-ɑ gïgrijjø kì rií. Jwøng-ɑ Ácwɑ̈ɑ̈j, tyëng-ɑ mɑɑn yïn, mɑɑn yi yɑn nɑ ngø! Tyëng-ɑ pemmi ciggí mɑɑn yi yɑn! Ge mɑɑn yi yɑn ki mendwøng, ge ɑ́göög ni tyëngmɑ̈ɑ̈nø kì yïɑ. Rɑng yɑn yïn ɑ Jwøk, kɑ pyëwɑ yood, pɑ̈nyí yɑn, kɑ rummɑ yood. Lidh gïn-ɑ rɑj kì riɑ, kɑ yɑ peej yuu nënn-ɑ ɑtheer. Yïn ɑ Jwøng-ɑ Ácwɑ̈ɑ̈j, yiel yɑn ki tyëngrijjø, korrí yɑn ki ɑ́muddi ji. Ge rïïj ge rum ɑ ri rɑj, ge yɑb-ɑ liny ceth. Lebbi gen nɑ thwöl mɑ nɑ̈ɑ̈g, kwøbbi gen nɑ kugi ɑbøgø. Korrí yɑn ki tyëngrijjø, yïn ɑ Jwøng-ɑ Ácwɑ̈ɑ̈j, korrí yɑn ki ɑ́muddi ji møg-ɑ dwɑddi cøøri yɑn piny. Tyëngɑthwøg yuuɑ ɑ́cïgi gen ki ɑ́kɑ̈llì, wunni gen ɑ́ceg gen, yij yöö bëne ɑ́cïbi gen ki ɑ́kɑ̈llì møg mɑɑg yɑn. Aköbbɑ Jwøng-ɑ Ácwɑ̈ɑ̈j kinni, “Yï bɑ Jwøgɑ.” Lïngí kwɑ̈jjɑ, kɑ yɑ køny, yïn ɑ Jwøng-ɑ Ácwɑ̈ɑ̈j. Yïn ɑ Wɑ̈ɑ, Jwøng-ɑ Ácwɑ̈ɑ̈j, yï teg, o yïn ɑ nyi cwɑg yɑn kì yij liny. Yïn ɑ Jwøng-ɑ Ácwɑ̈ɑ̈j, tyëngrijjø ko mëggí gïg-ɑ dwɑddi yi gen, wiy rɑjj-ɑ rømmi yi gen nyi cög ge pɑ pɑ̈dhi. Tyëngmɑ̈ɑ̈nø ko wëggí tyɑ̈mø, wiy rɑjj-ɑ dwɑddi yi gen kiperɑ, døøg gen ri gen. Wiy lelli mɑc dyëëm gen kömi gen, wiy ge pɑ̈dhi gen yij bur, o ge cög ge pɑ dhwödh këti. Wiy tyëng-ɑ nyi gøøny ji ki pyed dhɑl yi gïg-ɑ gøggi yi gen, wiy ɑ́muddi ji kömi gen pɑ̈dhi yi rɑj, o ge thøw gen. Yïn ɑ Jwøng-ɑ Ácwɑ̈ɑ̈j, ngɑ̈nyi yi yɑn kinni, yïn ɑ nyi cwɑg tyëng-ɑ nyingi gen cɑn, o yïn ɑ nyi nyodh dyër mi tyëng-ɑ jɑdø. Yï ólenhi yi tyëngtir kidyër, ge óbëëdø kì butí. Yɑ ywøøg-ɑ köörí, yïn ɑ Jwøng-ɑ Ácwɑ̈ɑ̈j, køny yɑn ɑnɑn! Lïngí cwɑggɑ kɑ̀ cwøllɑ yïn. Wiy kwɑ̈jjɑ bëëde e nɑ bɑkur kì bølí, o tïngi cinggɑ bëëd ge nɑ gënhi böörø. Yïn ɑ Jwøng-ɑ Ácwɑ̈ɑ̈j, kor dhøgɑ cïbí dhøgɑ ki ngɑn korii. Korri yɑn, yɑ ko wëggí gwøg ki rɑj, kɑ yɑ ko wëggí rëbø ki tyëngrijjø. Kɑ yɑ ko wëggí cɑm ki jɑmm-ɑ rëëj gen. Tyëngdøj, yɑ ócuggø cɑyø yi gen, kɑ yɑ cɑ̈wwi gen ki tɑri pyëw, de yɑ pɑ yïëy ki wør-ɑ wøør yɑn yi tyëngrijjø, mɑ́ yɑ nyi rïïj yɑ ókwɑ̈jjø kiper lɑ̈ɑ̈wi rɑjji gen ki yɑn. Keny-ɑ óleeng jɑggi gen piny kì wïj kït, ji óyïëy kinni kwøbbɑ ɑ́bëëd gɑ dyër. Cu gen óbëëd ge kedhhø kì tøggi burrì, ni yenh ɑkɑgg møg-ɑ óngøllø gɑ ɑ́tug. De yɑ ógɑ̈nn-ɑ yïn ceth, yïn ɑ Wɑ̈ɑ, Jwøng-ɑ Ácwɑ̈ɑ̈j, yɑ yömm-ɑ yïí, yɑ ko wëggí thøø! Korrí yɑn ki ɑ́kɑ̈ll-ɑ ɑ́ceg yɑn yi gen, korrí yɑn ki ɑ́kɑ̈ll-ɑ ɑ́ceg yɑn yi tyëngrijjø. Wiy tyëngrijjø mɑg yi ɑ́kɑ̈lli gen, kɑ wiy yɑ kedhɑ ki tɑrø. Yɑ ywøøg-ɑ kö Jwøng-ɑ Ácwɑ̈ɑ̈j, o yɑ kønye, yɑ ceg-ɑ odhɑm kì bøle. Gønyɑ bëne ɑ́kɑ̈ɑ̈lɑ bøle, rɑjjɑ bënn ɑ́köbbɑ en. Kenyi nyönhi pyëwɑ, en ɑ nyi ngɑ̈nyi gïn-ɑ cuggi gwøgø yi yɑn. Kì yij yuu-ɑ cyɑ̈dhɑ, yɑ ɑ́ceg ki ɑ́kɑ̈llì yi tyëngmɑ̈ɑ̈nø. Kenyi lïdhɑ butɑ, bong ngɑn cuggi kønyi yɑn mɑ ɑ́lidhɑ, bong ngɑn korri yɑn. Bong ngɑn rumø kiperɑ. Yɑ ywøøg-ɑ köörí, yïn ɑ Jwøng-ɑ Ácwɑ̈ɑ̈j, bɑ yïn ɑ korri yɑn yïn ɑ Jwøng-ɑ Ácwɑ̈ɑ̈j, yï ketí ɑ dwɑddɑ ceth. Lïngí ywøgɑ, mɑ́ yɑ ɑ́dhɑ̈ɑ̈r. Yiel yɑn ki tyëngmɑ̈ɑ̈nø, ge teeg cɑrø kibølɑ. Gøny yɑn kì yethi töjji orɑng, o yï mɑllɑ kì bøli jií, kipe kɑ̀ mïdhí yɑn kidøøj. Yïn ɑ Jwøng-ɑ Ácwɑ̈ɑ̈j, lïngí kwɑ̈jjɑ! Lïngí kwɑ̈jjɑ kì bɑng døøjí, løøg møgɑ mɑ́ yï nyi gøgg-ɑ dyër. Yɑ bɑ bɑ̈ngí, yɑ ko rɑɑng; mɑ́ bong dhɑnhø me døj kì bølí. Tyëngmɑ̈ɑ̈nø cyedd-ɑ yɑn, o yɑ ɑ́tyɑm yi gen ki mendwøng. Yɑ ɑ́leeng ød mɑg me bɑ muudhø, yɑ nɑ tyëng-ɑ ɑ́thøw kɑ̈ge döng. Pyëwɑ ɑ́nyönhi, o yɑ ɑ́dhɑ̈ɑ̈r. Cyɑ̈ngg-ɑ ɑ́pöödh ɑ́pɑrɑ, yɑ rømm-ɑ gïg-ɑ ɑ́gwøg yi yïn bënn, yɑ nudd yɑ rømm-ɑ gïg-ɑ ɑ́gwøg yi yïn bënn. Atïngɑ cinggɑ yɑ kwɑjj-ɑ yïn, pyëwɑ dwɑdd-ɑ yïn, ni kenyi dwɑddi pï yi piny-ɑ thwøwø. Løøg møgɑ ɑnɑn, yïn ɑ Jwøng-ɑ Ácwɑ̈ɑ̈j, pyëwɑ ɑ́nyönhi. Rií ko kɑ̈nní yɑn, kipe yɑ ópɑ̈ɑ̈r ki tyëng-ɑ ɑ́kedhi piny pödhi tyëngthøø. Nyi pɑ̈ddí yɑn yethi cyɑ̈ng ki mɑ̈ɑ̈dø mií, mɑ́ yïn ɑ gɑ̈nnɑ. Nyudhí yɑn yuu-ɑ kɑ̈ɑ̈lɑ, mɑ́ yïn ɑ nyi mɑllɑ. Yɑ yömm-ɑ yïí, yïn ɑ Jwøng-ɑ Ácwɑ̈ɑ̈j, yiel yɑn ki tyëngmɑ̈ɑ̈nø. Yïn ɑ bɑ Jwøgɑ, pwönyí yɑn ki gwøgi gïn-ɑ dwɑddi yi yïn. Wiy yɑ peej yuu-ɑ dyër yi døøjí. Døm yɑn, yïn ɑ Jwøng-ɑ Ácwɑ̈ɑ̈j, ni kɑ ɑ́kööb, yiel yɑn ki ɑkørr, mɑ́ yï døøj! Nɑ̈g tyëngmɑ̈ɑ̈nø, mɑ́ yɑ mɑɑr yi yïn, kɑ tyëng-ɑ guud wɑngɑ bënn nɑ̈ɑ̈g, mɑ́ yɑ bɑ bɑ̈ngí. Lenhu Jwøng-ɑ Ácwɑ̈ɑ̈j, ngɑn-ɑ korri yɑn! Yɑ ɑ́pwönye ki liny kɑ yɑ gwire kipe liny. En ɑ nyi korri yɑn, o en ɑ bɑ cwɑ̈gɑ, bɑ kwödɑ o bɑ yïënɑ, en ɑ yïe nyi yömmɑ. Pödhh-ɑ kyeelø nyi tyɑme tyɑmø, kɑ gï wëgge jɑɑgø yi yɑn. Jwøng-ɑ Ácwɑ̈ɑ̈j, dhɑnhø ɑ́ ngø, ɑ bëëd e dɑ pere ki yïí? Á kipe ngø ɑ tɑɑg per dhɑnhø ɑ nyi thøw yøw? Ge nɑ kudhø ki yømø, o cyɑ̈nggi gen nyi pödhø nɑ tïbø. Jwøng-ɑ Ácwɑ̈ɑ̈j, pyëëd mɑl kɑ yï bïí piny, nywɑl kïttì, o ge dung gen ki yïrø. Wëggí mɑl ogwel, kɑ tyëngmɑ̈ɑ̈nø kedhhí, gøj wethí kɑ ge cyeddí. Mej cingí kì mɑl, døm yɑn, kɑ yɑ tïng wɑ̈g kì yij nɑm-ɑ pɑ̈ng, yiel yɑn ki tyëngmɑ̈ɑ̈nø møg-ɑ bɑ tyëngpɑth, tyëng-ɑ pɑ nyi kømmi dyër, kɑ ge nyii köngø ki pyed. Yɑ ówör ki wör mø nyɑ̈n, yïn ɑ Jwøk, Yɑ ówör ki thøm kì bølí. Yïn ɑ nyi wëggi rɑ̈nhì tyɑ̈mø kɑ bɑ̈ngí Debïd nyi døm yi yïn. Yiel yɑn ki tyëngmɑ̈ɑ̈nø, møg-ɑ yethi gen wöny, yiel yɑn kì cinggi tyëngpɑth, møg-ɑ pɑ nyi kømmi dyër, kɑ ge nyii köngø ki pyed. Wiy wɑ̈ddi wøn møg-ɑ bɑ wøbb, bëëd ge nɑ yenh møg døngi ge teeg. Wiy nyigi wøn bëëd ge nɑ löjj, møg-ɑ ódhyɑɑw gøddi gøldwøng. Wiy óköddi wøn bëëd ge pɑ̈ng, yi wɑ̈thi jɑmmì bënn. Wiy dyëg-ɑ cyɑ̈mø kì töör wøn, nywøl gen kɑ ɑ́lïp mø ngenyø. Wiy dhögi wøn nywøl gen ki mø ngenyø, ge pɑ bwöör wɑ̈g. Wiy bëëde e bong ywøg kí orɑng kì yethi yëthi pödhi wøn. Pönh-ɑ bëëdø kinøw, ree dɑ gyëdh; tyëng-ɑ Jwøøg gen bɑ Jwøng-ɑ Ácwɑ̈ɑ̈j, ri gen dɑ gyëdh! Döngí ówøw yi yɑn, yïn ɑ Jwøgɑ, kɑ yï løg-ɑ rɑ̈dhɑ, yï ópøjjɑ gïti ɑtheer. Yï ópøjjɑ yethi cyɑ̈ng bënn, yï ólenhɑ gïti ɑtheer. Jwøng-ɑ Ácwɑ̈ɑ̈j ɑ dwøng, o ceg kɑ lenhø ki mendwøng, dönge pɑ cuggi gɑmø yi wïj dhɑnhø. Gïg-ɑ ɑ́gwøg yi yïn ólenhi kì yethi rïjj bënn, gwøng teg men-ɑ ɑ́gwøg yi yïn ówøw yi gen. Dhwɑ̈ngí geki döngí ówøw yi gen, kɑ ge orumø kì ri gïgdøngø møg-ɑ ɑ́gwøg yi yïn. Ji ókööbø kì ri gïgdøngø møg-ɑ ɑ́gwøg yi yïn, o döngí ówøw yi yɑn. Døøjí ówøw yi gen, gøggí dyër ówör yi gen. Jwøng-ɑ Ácwɑ̈ɑ̈j bɑ Jwøøg mɑ̈ɑ̈dø, o pyëwe nyii lɑ̈ɑ̈mø, pyëwe pɑ nyi jwɑn rënyø, o pyëwe pɑ̈ng yi mɑ̈ɑ̈dø. Jwøng-ɑ Ácwɑ̈ɑ̈j ji bënn mïdhe’ mïdhø kidøøj, o yije nyii ywöngø kipe gïg-ɑ ɑ́cwɑ̈je bënn. Yïn ɑ Jwøng-ɑ Ácwɑ̈ɑ̈j, yï ólenhi yi gïg-ɑ ɑ́cwɑ̈j yi yïn bënn, kɑ yï pøjji yi jií bënn. Ge ókööbø kì ri dhwɑ̈ɑ̈ng rɑ̈ɑ̈dhø mií, kɑ ge okööbø kì ri tegí. o gïg-ɑ ɑ́gwøg yi yïn ki tegí lidh yi teedø, o dhwɑ̈ngí yod yi dhɑnhø bëne. Jyɑ̈gí pɑ cög yï bɑ rɑ̈dh gït-ɑ ɑtheer. Köngi Jwøng-ɑ Ácwɑ̈ɑ̈j nyi mïdhe’ mïdhø ceth, o pyëwe nyii lɑ̈ɑ̈mø kì ri gïg-ɑ nyi gwøge bënn. Tyëng-ɑ ying yethi rɑj nyi kønye’ kønyø, tyëng-ɑ pɑ̈ɑ̈dh nyi tïnge’ mɑl. Gïg-ɑ nëënø bënn gɑ̈nn-ɑ yïn ceth, kɑ ge nyi thödhí ki gïgcɑmm kenyi dwɑddii yi gen. Ge nyi thödhí thödhø, kɑ ge nyii yɑ̈ngø bënn. Jwøng-ɑ Ácwɑ̈ɑ̈j døøj kì ri gïg-ɑ gøgge bënn, pyëwe nyii lɑ̈ɑ̈mø kì ri gïg-ɑ nyi gwøge bënn. Jwøng-ɑ Ácwɑ̈ɑ̈j cyɑ̈gi ki tyëng-ɑ nyi cwølii, gen ɑ tyëng-ɑ nyi cwølii yethi gen pɑ pyëër. Tyëng-ɑ wørii nyi thödhe’ thödhø ki gïg-ɑ dwɑddi yi gen bënn, ywøøg gïn nyi lïnge’ lïngø, kɑ gï nyi yiele. Tyëng-ɑ mɑɑrii nyi korre’ korrø, de tyëngrijjø nyi nɑ̈ge’ nɑ̈gø. Jwøng-ɑ Ácwɑ̈ɑ̈j ólenhɑ ceth, wiy nyi lenhi yi gïg-ɑ ɑ́cwɑ̈je bënn gïti ɑtheer. Lenhí Jwøng-ɑ Ácwɑ̈ɑ̈j, yïn ɑ pyëwɑ! Ólenhɑ kɑ̈ng-ɑ nëënɑ, yɑ ówör kì bøli Jwøgɑ kì yethi cyɑ̈ngg-ɑ ónëënɑ bënn. Wu ko gɑ̈nni jyɑ̈gg-ɑ bɑ ji, bong dhɑnhø me cuggi yieli wun. Ge nyi døøg-ɑ yij lɑ̈bø kɑ̀ thøw gen, rummi gen nyii cungø kì dicyɑ̈ngɑni ceth. Tyëng-ɑ køny yi Jwøøg Yɑgob, ri gen dɑ gyëdh, kí tyëng-ɑ gɑ̈n Jwøøg gen, Jwøng-ɑ Ácwɑ̈ɑ̈j, ngɑn-ɑ ɑ́cwɑ̈j mɑl kí piny, kí gïg-ɑ yethi gen bënn. Könge nyi mïdhe’ mïdhø ceth, tyëng-ɑ mød nyi cwɑge cwɑgø, kɑ tyëng-ɑ ri gen di kɑ̈j nyi thödhe ki gïncɑm. Jwøng-ɑ Ácwɑ̈ɑ̈j ɑmɑgg nyi gønye’ gønyø. Kɑ cörr wëgge nënnø. Tyëng-ɑ ɑ́pɑ̈ɑ̈dh nyi tïnge’ mɑl, tyëngtir mɑɑr yi en. Jwøng-ɑ Ácwɑ̈ɑ̈j tyëngpɑth nyi korre korrø, thwömm geki kïjj nyi kønye’ kønyø, de tyëngrijjø nyi göjje’ ryɑ̈ɑ̈gø. Jwøng-ɑ Ácwɑ̈ɑ̈j ójyɑ̈ɑ̈gø gïti ɑtheer. Dhɑyøn, Jwøgí ójyɑ̈ɑ̈gø gïti ɑtheer. Lenhu Jwøng-ɑ Ácwɑ̈ɑ̈j! Lenhu Jwøng-ɑ Ácwɑ̈ɑ̈j! Mɑ́ lenhi Jwøgee ki wör døøj, lenhe med kidyër. Yerusɑlem dwøøg-ɑ keje yi Jwøng-ɑ Ácwɑ̈ɑ̈j, tyëng-ɑ yïnø ódwööge. Tyëng-ɑ minni gen cödø óyiele, kɑ keddi gïn wëgge nøggø. En ɑ ɑ́cïb kwɑnni kyell kɑ men nyi cwøle ki nyinge. Jwøng-ɑ Ácwɑ̈ɑ̈j dwøng, o tege dwøng, peli wïje pɑ cuggi rømø. Mööl nyi tïnge’ mɑl, kɑ tyëngrijjø nyi dhure piny. Lenhu Jwøng-ɑ Ácwɑ̈ɑ̈j ki wör, wör wun ki thøm kì bøli Jwøgee. En ɑ ɑ́peedh pøøl mɑl, kɑ piny nyi nënge ki kødh kɑ lum wëgge twïyø kì wɑ̈thi kïttì. En ɑ nyi thödhi lɑ̈yy ki gïncɑm, kɑ nywøli ɑ́gɑ̈ggì nyi thödhe ki gïncɑm kenyi ywöngi gen. Medi pyëw Jwøng-ɑ Ácwɑ̈ɑ̈j pɑ ying ri tegi kyënyì, wɑlɑ̀ pɑ ying ri tegi jøliny, de pyëwe med kɑ tyëng-ɑ wørii, gen ɑ tyëng-ɑ gɑ̈nni mɑ̈ɑ̈dø mee ceth. Yerusɑlem, lenhí Jwøng-ɑ Ácwɑ̈ɑ̈j, Dhɑyøn, lenhí Jwøgí! Mɑ́ en ɑ mïdhi thïggi dörí ge teeg, kɑ jií nyi gyëdhe. En ɑ nyi korri kewí, kɑ yï nyi yɑ̈ɑ̈nge ki gemè me døj. Piny nyi köbbe’ köbbø, kɑ gïn-ɑ kwøbe nyi jwɑn ki gwøgø ceth. Ápiy nyi pedhe’ pedhø ni ógødh, kɑ ɑ́piy-ɑ dyëm nyi wiiwe ni tør. Ápiy nyi gööje’ gööjø ni lel, bong ngɑn cuggi cung kì bøli lïbi yømø men-ɑ nyi kɑ̈ɑ̈le! Codhe, kɑ ɑ́piyɑni onøyø, kɑ yømø gööje, kɑ pï ómullø. Jie nyi thödhe’ thödhø ki wöödø, cigge nyi mëgge’ Isrɑil. Pödhh-ɑ kyeelø nuti göggø yi en kinøw, cigge kwïj yi pödhhɑni. Lenhu Jwøng-ɑ Ácwɑ̈ɑ̈j! Lenhu Jwøng-ɑ Ácwɑ̈ɑ̈j! Mɑllu en kì mɑl wun ɑ gïg-ɑ bëëdø kì mɑl. Lenhu en wun ɑ wëywödde bënn, lenhu en wun ɑ yɑ̈yyi mɑl bënn. Lenhu en wun ɑ cɑ̈ng kí dwɑ̈y, lenhu en wun ɑ kyell-ɑ mënyø. Lenhí, yïn ɑ mɑldwøng, wuki pïg-ɑ ying kömi mɑl. Wiy Jwøng-ɑ Ácwɑ̈ɑ̈j lenhi yi gen bënn, mɑ́ en ɑ ɑ́kööb, ɑcwɑ̈ɑ̈j gen. Bɑ en ɑ ɑ́cïb gen kɑ̈jji gen gïti ɑtheer o ge pɑ cuggi nyigø. Lenhu Jwøng-ɑ Ácwɑ̈ɑ̈j kì piny, wun ɑ lɑ̈yy-ɑ døngø bënn, kì nɑ̈mmi omelø, kí tyeli nɑɑm omeli dwøng, kí ogwel mɑl, kí yømø, kí ɑ́piy kí pøøl, kí ɑtunø ɑ nyi lïngi kwøbbe. Lenhu en wun ɑ kïtt-ɑ thønhø kí kïtt-ɑ døngø, wuki yenhi nywøl kí yenhi thïm, kí lɑ̈yy-ɑ pɑc geki lɑ̈yyi pɑ̈l bënn, kí gïg-ɑ mulli geki winy-ɑ pɑ̈rri kì mɑl. Lenhu en wun ɑ rɑ̈nhì kí ji bënn, kí nyiirɑ̈dhh kí jyɑ̈ggì bënn, kí wojur geki wøbb, kí ywödhh geki othønhø thyew. Wiy nyingi Jwøng-ɑ Ácwɑ̈ɑ̈j lenhi yi gen bënn! Mɑ́ nyinge ɑ ying mɑl keti gen, dhwɑ̈nge ying-ɑ mɑl kibøli piny geki mɑl. Pödhe ɑ́gwøge e teeg, o ólenhi yi jie bënn, ɑ løg tyëng Isrɑil, tyëng-ɑ per gen teeg kì yïe. Lenhu Jwøng-ɑ Ácwɑ̈ɑ̈j! Lenhu Jwøng-ɑ Ácwɑ̈ɑ̈j! Wör wun ki wörø me nyɑ̈n kì bøli Jwøng-ɑ Ácwɑ̈ɑ̈j, lenhu en kì buri ji-ɑ böggii! Isrɑil, mïni pyëwí ki Ngɑn-ɑ ɑ́cwɑ̈j yïn, mïni pëthi wun, wun ɑ tyëng Dhɑyøn ki rɑ̈ɑ̈dh wun! Lenhu nyinge wu ocöngø, lenhu en ki bullì geki thøm. Pyëw Jwøng-ɑ Ácwɑ̈ɑ̈j med kɑ jie, tyëng-ɑ bɑ mööl nyi wëgge’ tyɑ̈mø. Wiy pëthi jii Jwøk med gen ki tyɑ̈mi gen, wiy ge lɑng gen wɑ̈r ge owörø ki medi pëthi gen. Wiy ge wör gen ge óryeerø, ge lenh-ɑ Jwøk, kí pil mø bedh kì cinggi gen. Wiy ge tyɑm gen pödhh-ɑ kyeelø, o ji cɑy yi gen, o rɑ̈nhi gen twöj ki ɑ́cwecwel, o pëjji gen twöj ki ɑ́cwecwelli ngyënyø dødø, o pödhh-ɑ kyeelø cɑy yi gen ni kɑ ɑ́kööb Jwøk. Menɑni bene tyɑ̈mi jii Jwøk. Lenhu Jwøng-ɑ Ácwɑ̈ɑ̈j! Lenhu Jwøng-ɑ Ácwɑ̈ɑ̈j! Lenhu Jwøk kì yij Kenge! Lenhu tege kì mɑl! Lenhu en kipe gïgdøngø møg-ɑ ɑ́gwøge. Lenhu dönge. Lenhu en ki kɑ̈ngì, lenhu en ki thøm-ɑ cwɑggi gen bɑ̈nni. Lenhu en wu ocöngø ki bullì. Lenhu en ki thøm. Lenhu en ki wɑ̈thi thøm bënn, lenhu en ki thøm-ɑ cwɑggi gen døngø. Lenhu Jwøng-ɑ Ácwɑ̈ɑ̈j, wun ɑ gïg-ɑ nëënø bënn! Lenhu Jwøng-ɑ Ácwɑ̈ɑ̈j! Gɑ́ji rɑ̈ɑ̈dh Isrɑil, Sølømøn wɑ̈d Debïd. Møg bɑ gɑ́j mø køny yïn ki dïdø ki peli wïj, geki yodi cïïjø men-ɑ dyër, kí bëëndøj. Yï ócuggø pwönyø yi gen ki bëëndøj kí ngenyi rummì. kí bongi ruj geki gøggi dyër. Ngɑn wïje nøg ogwøgø yi gen ɑ́ ngɑn wïje pel, o yɑɑg-ɑ thønhø opwönyø yi gɑ́jɑni ki myegi gwøgi gïndøj. Wu tyëng-ɑ wɑ̈thi wun pel, lïngu gɑ́jɑni thyew, o wɑ̈thi wun pëddi gen ki pïlø. O gɑ́jɑni nyudh-ɑ wun, wu tyëng-ɑ dïdø ki yëthi peli wïj mø gïïr, o wu yod wun gïg-ɑ yethi gɑ́jɑni geki ɑkørr-ɑ tenyi yi tyëng-ɑ wɑ̈thi gen pel. Keløg yï dwɑdd-ɑ dïdø, wør Jwøng-ɑ Ácwɑ̈ɑ̈j møti. De yï bɑ dhëg keløg yï bɑny-ɑ cïïjø men-ɑ muujø ki peli wïj geki bëëndøj. Wɑ̈dɑ, lïngí kwøbb-ɑ pwönyi yïn yi wïyí geki meyí, kɑ kwøbbɑni ko wøy yi yïn. Tyer pwöny-ɑ pwönyi yïn yi wïyí geki meyí ni yɑ̈ɑ̈r röny geki tigø ɑ́gør. Wɑ̈dɑ, keløg yï óthɑb yi tyëngrijjø, yï ko yïëy ki kwøbbi gen. Keny-ɑ óköbbi gen yïn kinni, “Bïí kelli wøn, o wɑ kedhi wɑ be lïbbø kì yöö, o wɑ nɑ̈ɑ̈g wɑ ki ji cɑgg e bong gïjø me órënyø yi gen. Cɑgg ge teeg o dëlli gen yööd ɑnɑn, ge bɑ møg jwɑn yi wɑ ki gwɑɑr piny! Wɑ óyïddi ki kɑ̈r bëne, o uddee pɑ̈ng gen yi jɑmmi tyëng-ɑ nɑ̈g yi wɑ! Bïí rëbí ki wøn, jɑmm-ɑ ókwɑlli yi wɑ ópɑ̈ngi yi wɑ.” Yï ko kedh ki ji-ɑ ni møgɑni wɑ̈dɑ. Lɑ̈ɑ̈w rií ki gen, mɑ́ ge pɑ nyi cwööng ki nɑ̈ggø, ge nyi tyer-ɑ gwøg ki gïgrijjø. Ákɑ̈llì pɑ nyi ceg ge onennø yi winyy-ɑ dwɑddi ki mɑgø, de ji møg-ɑ nyi buddi kì yëthi ji møøgø cïg-ɑ ri gen ki ɑ́kɑ̈llì, ɑ́kɑ̈llɑni ɑ yethi gen óthøw gen. Kur nyi thuw-ɑ kör, tyëng-ɑ nɑ̈nggi ji kipe kwɑnyi jɑmmi gen ólony ki nɑ̈gø. Lïng wun! Peli wïj ócwöddø kì yethi yëëth geki kɑ̈jji ngyew, ócwöddø ki cwɑg mø døngø kì dïpɑc geki kɑ̈jj bënn møg-ɑ cugi yi ji kinni, “Wun ɑ dhëgg! Wu gït-ɑ wɑɑng wu tyer-ɑ dhëëgø? Wu gït-ɑ wɑɑng wu bɑny-ɑ dïdø? Wu pɑ cuggi dïdø? Nyi lïng wun kenyi cɑyɑ wun, wu ócïj yi yɑn ki kwøb mø døøj, kɑ wu odïdø kì yïɑ. Wu ɑ́cwöölɑ yïɑ cingɑ rïjji yɑn wun, o wu ɑ́bɑ̈nyi kønyø yi yɑn. De mɑ́ cwöddɑ ɑ́bɑny yi wun, kɑ wu ódhɑ̈lø tyenyø yi yɑn, wu óngedhi yi yɑn kɑ wu gɑggɑ keny-ɑ óbëën rɑj kömi wun. Yɑ óngedhi ceth keny-ɑ ópɑ̈dhi rɑj kömi wun, kɑ wu ryɑ̈g yi gen ni geew kɑɑl kenyi kedhhii yi ɑtunø. Yɑ óyɑb yi wun kì bøli kenyɑni, kipe kinni o yɑ kønyɑ wun. De cɑgg wu yɑ̈bø kì keny wɑlɑ̀ keny, yɑ pɑ yod yi wun. Wu ɑ́ceg-ɑ bɑ̈nyø dïdø kì yïɑ, kɑ wu óbɑ̈nyø ki wøri Jwøng-ɑ Ácwɑ̈ɑ̈j. Wu ɑ́bɑ̈nyi thyew ki cïjø yi yɑn, kɑ wu ódhɑ̈lø tyenyø. Mɑ́ wu ɑ́kwɑny kɑ̈lli yuu-ɑ rɑj, körri gïg-ɑ ɑ́gwøg yi wun pɑ̈dh-ɑ kömi wun. Bɑ dyër, tyëng-ɑ wɑ̈thi gen nøg, ónɑ̈g yi ɑwøøyi gen, o kwøbbi peli wïj tøøk kì pëthi gen. De ngɑn-ɑ ólïngi kwøbbɑ, bong gïjø me nywɑlii! Bong gïjø men-ɑ óböggi yi en.” Dïd ki kwøbb-ɑ pwönyɑ yïn wɑ̈dɑ, kɑ wïjí ko wïl ki gwøgi gïg-ɑ köbbɑ yïn. Lïng kidøøj ki kwøbbi peli wïj, kɑ rií pɑ̈nyí ki yodi gïn-ɑ wɑngi yi gen. Yɑb dïdø geki tïïdø ki tyelli kwøb. Yɑb peli wïj ni yɑbi yëël ɑ́tegø, kɑ yɑɑb ni gïn pere teg me keny-ɑ ókɑɑnii lɑ̈ɑ̈nyø. Keløg gïg-ɑ ɑ́köbbɑ yïn ogwøgø yi yïn, yï odïdø kidøøj ki gïn-ɑ wɑngi yi wøri Jwøng-ɑ Ácwɑ̈ɑ̈j geki dïdi møg-ɑ kømmi yi Jwøk. Bɑ Jwøng-ɑ Ácwɑ̈ɑ̈j ɑ nyi muuj peli wïj, peli wïj yod yi yïn ɑ ri kwøbbe. Tyëngtir ɑ pɑ nyi wënyø nyi kønye kønyø kɑ gï korre. Tyëng-ɑ pɑ nyi mudø ki ji, nyi kore korø, kɑ tyëngtir nyi kongge. Keløg kwøbbɑ olïngø yi yïn, gïn-ɑ dyër ceg yi yïn kɑ yodø, geki døøjø. Wïjí ópïllø kɑ yï thödhi yi dïdí ki medi pyëw. Yï ókorri yi dïdí. Yï ókor yi peli wïjí, kɑ yï mɑ̈ɑ̈ne gwøg ki gïnrɑj, yï óyiel yi en kì cinggi tyëngrijjø møg-ɑ nyi kømmi pyed. Ji møgɑni ɑ́wïyi ki gøggi dyër, kɑ ge kwɑny-ɑ bëëdi orøg, dɑ́ gwøgi orøg geki wëënyø ɑ med kì yï gen. Ji-ɑ ni møgɑni pɑ cuggi gɑ̈nø. Keløg wïjí pel, yï pɑ cuggi wënyø yi ngɑndhɑjø me dhøge med, ngɑn-ɑ wiy jɑl-ɑ ɑ́nywømii e bɑ jùr, kɑ møg-ɑ ɑ́kwönge cyɑ̈ɑ̈ng nywöm kì bøli Jwøk wiy yi en. Tyëng-ɑ kedhi gøle kedh-ɑ be thøø. Bong dhɑnhø mɑ ɑ́kedhi gøle be buddø ki en kɑ ódwöögø. Ngɑn kedhi gøle pɑ nyi dwöög yuu nënnì. De men-ɑ́ yïn, ngøy bëëdi tyëngdøj kɑ yï bëëd yï tir. Mɑ́ tyëngtir bɑ gen ɑ ódöng kì pönhï. De tyëngrijjø pɑ wiy yi Jwøk o ge bëëd gen kì pönhï, tyëngrijjø ógwɑɑr yi en wɑ̈g ni kenyi puth lum wɑ̈g kì piny. Wɑ̈dɑ, lïngí møg-ɑ pwönyɑ yïn, kɑ wïjí ko nyi wïl ki gwøgi møg-ɑ köbbɑ yïn. Yï óthödhi yi pwönyɑ ki døøjø, kɑ runní óngënyø kì kömi piny. Nyi mïdhí mɑ̈ɑ̈dø geki ngɑ̈ɑ̈dhø, møg-ɑ ɑ́yïëy yi yïn. De nyi mïdhí gen kì pyëwí ceth. Ke mïdhí bëëdø menɑni, Jwøk pyëwe obëëdø e med ki yïn, kɑ ji pëthi gen løg-ɑ mø med ki yïn thyew. Gɑ̈nní Jwøng-ɑ Ácwɑ̈ɑ̈j ki pyëwí bëne, kɑ yï ko nyi gɑ̈n dïdí. Nyi pɑr cwøli Jwøng-ɑ Ácwɑ̈ɑ̈j kì ri jɑmm-ɑ nyi gwøg yi yïn bënn, o yï nyudhe yuu-ɑ bɑ dyër. Yï ko nyi rum ce wïjí pel ki mendwøng, de nyi wør Jwøng-ɑ Ácwɑ̈ɑ̈j, kɑ yï nyi bɑ̈nyí ki gwøg ki gïnrɑj. Keløg yï ógöögø kinøw, dëlí óbëëd e yöd, kɑ yï óyïddø ki tegø. Theg Jwøng-ɑ Ácwɑ̈ɑ̈j kì ri kɑ̈rí, nyi muuj byëli Jwøng-ɑ Ácwɑ̈ɑ̈j kì ri mwölli byellí. Keløg yï ógöögø kinøw, óköddí ópɑ̈ng kɑ ge rɑɑr-ɑ piny, kɑ møgi oløg ceg-ɑ twɑ̈lø kì yïí. Wɑ̈dɑ, bëëndøj men-ɑ pwönyi yïn yi Jwøng-ɑ Ácwɑ̈ɑ̈j ko bɑɑny, kɑ yï nyi lïng kenyi cɑye yïn. Mɑ́ Jwøng-ɑ Ácwɑ̈ɑ̈j tyëng-ɑ mɑɑre nyii cɑyø yi en, ni dhɑnhø kenyi cïrre wɑ̈de wɑ̈n-ɑ med kì pyëwe bëëdø ki bëëndøj. Rií dɑ gyëdh ke yood peli wïj geki dïdø. Mɑ́ yodi peli wïj yi dhɑnhø lod-ɑ yodi yëël ɑ́tegø, o kɑ̈r-ɑ nyi muuj yi en lod-ɑ dhɑb. Bong gïn cuggi tyerø yi yïn me lod peli wïj ki døøjø. Yï óthödhi yi peli wïj ki kɑ̈r geki dhwɑ̈ng, kɑ runní óngënyø kì kömi piny. Kömi piny løg-ɑ me med kì yïí keløg wïjí pel, yï ónënni pyëwí pɑ lïngø. Tyëng-ɑ yïddi ki peli wïj ri gen dɑ gyëdh, mɑ́ peli wïj nɑ yɑdh me thödhi ngɑn cɑm nywøle ki wëy. Tyelli mɑl ɑ́cïb yi Jwøng-ɑ Ácwɑ̈ɑ̈j, kɑ piny cwɑ̈je ki peli wïje. Peli wïj ɑ ɑ́göjji nɑ̈mmì mullø ki pï, o en ɑ ɑ́göjji pøøl kɑ̈ni piny ki kødh. Wɑ̈dɑ, mïdhí tïïdø ki tyelli kwøb geki rumm-ɑ døj, wɑngí ko wëggí wïddø yi gen. Yï óthödhi yi gen ki wëy geki medi pyëw. Yï ócyɑ̈dhi ki tɑrø, tyelí pɑ cwɑny yi yïn. Keny-ɑ ókedhí be buddø, yï pɑ böggi; wɑ̈r tyëg yi yïn yï ceg-ɑ nenø yøw. Yï pɑ pɑ̈nyi böggø ki ryɑ̈ng bï be rënyi tyëngrijjø, mɑ́ yï ókor yi Jwøng-ɑ Ácwɑ̈ɑ̈j. Yï ókorri yi Jwøng-ɑ Ácwɑ̈ɑ̈j. Yï pɑ wëgge pɑ̈dhi yethi ɑ́kɑ̈llì. Keløg e dɑ ngɑn kwɑ̈jji kì yïí ki gïïpiny, thödhí ceth, ke nud gïn-ɑ yɑb yi en kì yïí. Wɑɑd wun ko nyi köbbí kinni, “Bïí dhuki!” Keløg e ócuggø kønyø yi yïn ɑnɑn. Tyëng-ɑ bëëdø kì butí, yï ogɑ̈nø yi gen, ge ko nyi yɑ̈bbí ki göj men rënyi gen. Dhɑnhø ko nyi wɑ̈dhi ki myenø e bong gïjø me rëny en. Ámuddi ji ko nyi mod yi yïn, kɑ gwøøg gen ko nyi ngøøy, mɑ́ tyëngrijjø mɑɑn yi Jwøng-ɑ Ácwɑ̈ɑ̈j, dɑ́ tyëngdøj ɑ nyi konggi yi en. Jwøng-ɑ Ácwɑ̈ɑ̈j, kɑ̈lli tyëngrijjø nyi ryɑ̈ge ryɑ̈gø, dɑ́ kɑ̈lli tyëngdøj ɑ nyi thödhi yi en ki gyëdh. Tyëng-ɑ lɑrri Jwøk, óryɑ̈g yi Jwøk, o tyëng-ɑ bɑ mööl óthödhe ki gyëdh. Tyëng-ɑ wɑ̈thi gen pel ólenhi, de tyëng-ɑ wɑ̈thi gen nøg óyɑ̈r. Lïngu møg-ɑ pwönyi wun yi wïyi wun, wɑ̈ddɑ. Kɑ yïthhi wun kyën wun, o dïdø yod yi wun. Gïg-ɑ pwönyɑ wun døøj, kɑ ge mïdhi wun ceth kì pëthi wun. Keny-ɑ ɑ́wönɑ yɑ thiinh, ɑ́ yɑ ketɑ ɑ bɑ wɑ̈d kì yï meyɑ geki wïyɑ, yɑ ɑ́bëëd yɑ nyii pwönyø yi wïyɑ, kɑ nyii kööbø kinni, “Lïngí møg-ɑ köbbɑ yïn, kɑ ge ko wëggí wïlø. Gwøg gïg-ɑ köbbɑ yïn, o yï yïddí ki wëy. Tyer peli wïj geki tïïdø ki kwøb! Wïjí ko wïl ki møg-ɑ kømmi yi yɑn, wɑlɑ̀ ge ko wøøy. Peli wïj ko wiy, yï ókor yi en. Mɑɑr peli wïj, yï óyiel yi en. Yodi peli wïj bɑ en ɑ pere pëddi tegø kibøli gïg-ɑ kyeelø bënn, møg-ɑ gøggi yi yïn. Mɑɑr peli wïj, perí ótëngi kì bɑnge. Dööb köörí, yï óthödhe ki dhwɑ̈ng. Peli wïj óbëëd e nɑ yɑ̈ɑ̈r röny kì wïjí.” Lïngí kwøbbɑ wɑ̈dɑ. Mïdhí gen per gen teeg, o runní ngënyi gen kì kömi piny. Yï ɑ́rum ki pwönyø yi yɑn ki peli wïj geki bëëndøj. Keløg yï ócyɑ̈dhi ki peli wïjí, tyelí pɑ cwɑny yi yïn. Ke rengí, yï pɑ pɑ̈ɑ̈dh. Nyi rømmí møg-ɑ ɑ́dïd yi yïn ceth, kɑ ge korrí kidøøj, mɑ́ dïdí bene wëyí. Yï ko cyɑ̈dhi ki tyëngrijjø. Kɑ bëëdi gen ko ngøøy. Yï ko göög ki gïg-ɑ gøggi yi gen. Këjjí gen. Lugí gen ngɑ̈jí. Tyëngrijjø pɑ nyi buddi ge nuti göögø ki gïnrɑj. Ge pɑ nyi neni e bong dhɑnhø me nyïɑ̈ɑ̈g gen. Gøggi gïgrijjø pɑ̈ɑ̈r yi gen kɑ cɑmi gïncɑm geki gïnmɑdh. Yuu-ɑ cyɑ̈dhi yi tyëngdøj nɑ tuuli cɑ̈ng, ɑ nyi tɑ̈ri kedh e ti-ɑ tɑ̈rø, gïti keny-ɑ ógöög piny ki dicɑ̈ng. De yuu-ɑ cyɑ̈dhi yi tyëngrijjø looj nɑ wɑ̈r. Ge pɑ̈nhhi e gïg-ɑ cwɑnyyi tyelli gen kwïj yi gen. Kyën yïthhí wɑ̈dɑ. Lïngí kwøbbɑ. Mïdhí gen kì wïjí, kɑ wïjí ko wïl ki gen, mɑ́ tyëng-ɑ lïngi gen óthödhi yi gen ki wëy geki yödi dël. Nyi rum ki rummì mø døøj, mɑ́ gïg-ɑ gøggi yi yïn bënn nyi kɑ̈ɑ̈l-ɑ ri rummi pyëwí. Yï ko nyi kööb ki kwøbbi pyed, kɑ yï ko nyi wëëny ki ji. Nyi göög ki gwøngdøj ceth, wïjí ko wëggí bɑ̈nnø. Nyi rum kidøøj kì ri gïn-ɑ gwøg yi yïn, o gïn-ɑ gwøg yi yïn nyi pɑ̈dhe keje. Këjjí gïgrijjø, kɑ gwøng døj ko nyi wiy kinni tek. Kyën yïthhí wɑ̈dɑ, kɑ yï lïng ki kwøbbi peli wïj geki dïdø møg-ɑ köbbɑ yïn. O yï óbëëd ki bëëdø me døøj, o dïdí nënne kì ri kwøbbí. Mɑ́ ngɑn nyi yɑ̈bø ki cwøw dhøge med nɑ møøw kïc, cwɑgge yööm nɑ møw. De nyi yöd e ceg-ɑ kënyø kì dhøgí ni kenø, kenyi yïëëy kwøbbe yi yïn, yï nyi wïye’ kedø me ni ngɑ̈ddi tøng. Yuu-ɑ cyɑ̈dhe bɑ yuu thøø; yï kïdhe’ be thøø. Ngɑn ni menɑni nuti pɑ̈nyi rumø kì ri kɑ̈li yuu wëy; yëthe bɑ ɑ́dud. De kwïj wøw kinni cyɑ̈dh-ɑ́ɑ̀ yuu thøø. Lïngí kwøbbɑ ɑnɑn wɑ̈dɑ, kɑ wïjí ko wïl ki møg-ɑ kømmi yi yɑn. Lɑ̈ɑ̈w rií ki ngɑn ni menɑni! Yï ko pɑ̈nyi kɑ̈l dhø gøle. Dëlí ko nyïɑ̈ɑ̈g, kɑ̈rí ko rënyí ki ngɑn ni menɑni, kipe yï ócög yï pɑ wør yi ji. Kɑ̈rí ko wëggí kedhi yï tyëngpɑth. Jɑmmí ko wëggí cɑmø yi kɑ̈llì mø pɑth. O keny-ɑ óbëën thøø, yï thøw yï ócurrø dëlí thumø thumø. Yï óbëëdø yï cem-ɑ, “Á kiper ngø ɑ ɑ́bɑ̈nyɑ ki dïdø? Yɑde ɑ ɑ́bɑ̈nyɑ ki tyenyø? Kwøbbi jøpwönyø nuti lïngi yɑn, kɑ yɑ óbɑ̈nyø ki cegø. Ayɑ̈rɑ èn, kì bøli teedø ni men!” Cöög ri cyëgí kete kete, ni ngɑn mɑdh pïi ɑwöle. Yïde ɑ nyïɑ̈ɑ̈g rií nyel? Á kipe ngø ɑ tyëëg nyigí pɑ̈l? Yï ko nywøl wuki dhɑjø me pɑth ki cyëgí, mɑ́ nywøl-ɑ nywøøl pɑ̈l yï koo køny yi gen. Wiy bëëde ɑ́ cyëgí kete ɑ nyöddi yïn ki nywøl. Kɑ pyëwí nyi mede ceth ki cyëgí nyɑn-ɑ ɑ́nywøm yi yïn, yï bɑ wøb. Wiy cöge e myëër ceth kì yethi nyingí, kɑ mɑɑr ceth. Á kipe ngø ɑ mɑɑr dhɑjø me pɑth, wɑ̈dɑ? Ede cï jɑlø megø ɑ dööbií köörí? Gïg-ɑ gøggi yi yïn bënn onennø yi Jwøng-ɑ Ácwɑ̈ɑ̈j. Yï nenne’ nennø kì keny-ɑ kedhi yi yïn. Men-ɑ́ ngetorøg nyii mɑgø yi orøge. Orøge nɑ ɑ́kɑ̈llì møg nyi jwɑnii ki mɑgø. Thuw-ɑ nøgi wïje, mɑ́ e ɑ́dhɑ̈li dïdø ki bëëndøj. Wɑ̈dɑ, yï ɑ́di kwøb kinni kwör-ɑ cwɑggi ngɑnpɑth ócol yi yïn? Yï ɑ́di mɑgø yi lebí? Døj, wɑ̈dɑ, keløg yï ómɑgø yi lebí, jwɑní yï ngɑnɑni, kɑ kwɑjjí o yï wiy yi en. Yï ko pɑ̈nyi budø, wɑlɑ̀ yï ko ywööm. Jwɑn pɑ̈ɑ̈r wɑ̈g kì ri møgɑni, ni winyø kenyi bodhe kì yethi ɑ́kɑ̈llì, wɑlɑ̀ ni ɑ́køny kenyi bodhe kì ri wunni jɑldwɑr. Gede tyëng-ɑ bɑ rɑj ɑ pɑ dïd gen kì yï ókyël? Ókyël yïe bong jɑnge, yïe bong pëëji, yïe bong ngɑn nyi cïrrii gwøg. De gïncɑme nyi leme lemø kì dhøg ɑryɑ̀; pɑ nyi mɑg yi kɑ̈j. Yïn, rɑnyø, yï gït-ɑ wɑɑng yï buud-ɑ piny? Yï ócyëëw-ɑ́ɑ̀ wɑɑng? Rɑnyø okööbø kinni, “Wiy nyingɑ kɑl gen gɑ̈bbø, wiy riɑ kɑlɑ ki ywömø nyɑ me thiinh.” De kɑ̈ng-ɑ ócɑɑge nenø, kɑ̈j pɑ̈ɑ̈r-ɑ köme ni kur-ɑ nyi kɑ̈bø. Ngeti göj nyii cyɑ̈dhø kì kelli ji e okööbø ki kwøbbi pyed. E negg-ɑ wɑnge e wëny-ɑ ji. Nyi rømm-ɑ gwøgi gïnrɑj, kí cwɑ̈ɑ̈gi ji yethi cyɑ̈ng. Kipe kenyi gööge kinøw, óliib piny yi rɑj, kɑ oryɑ̈gø ki ryɑ̈gø me pɑ cugge yielø. Wɑ̈dɑ, mïdhí møg-ɑ ceg yïn yi wïyí geki meyí, kɑ wïjí ko wïl ki gïg-ɑ pwönyi yïn yi gen. Mïdhí gen kì pyëwí, kɑ ge nyi rømmí kì keny-ɑ kedhi yi yïn ceth. Pwöny-ɑ ɑ́pwönyi yïn yi wïyí geki meyí, yï ónyudhe yöö keny-ɑ ówelí, kɑ yï kore kenyi buddí kì wɑ̈r, kɑ yï cïje kì dicɑ̈ng. Ciggi gen bɑ cɑr kiperí. Pwönyi gen nyudh-ɑ yïn yëthi bëëdø. Yï ókor yi gen ki tyëng-ɑ mɑ̈nn møg-ɑ rijjø, ɑ løg mɑ̈nni cwøw møøgø, møg-ɑ nyi thɑbbi ji ki dhøng med. Rií ko wëggí thɑbø yi myëri gen, kɑ pyëwí ko wëggí kɑ̈ɑ̈lø yi neng-ɑ neggi gen nyingi gen. Ngɑn nyi niin ki köögi ócuggø køøgø yi jɑlø ki ngyëny mø nøg, de men-ɑ́ cï jɑlø megø men-ɑ nyi yɑ̈bø ki cwøw, kɑ̈l-ɑ gïg-ɑ yï dhɑnhø bënn. Mɑc ócuggø kwɑggø yi dhɑnhø kì kööre, kɑ ógudhe ocögø gï pɑ rɑ̈b yi en? Wɑlɑ̀ lelli mɑc ócuggø yönyø yi dhɑnhø, kɑ tyelle ocögø ge pɑ wɑng? Kedhi ri cï jɑlø megø nɑ menɑni ceth, jɑl kedhi ri cï ngɑn megø pɑ cuggi cöögø e pɑ cɑy kinni tek. Ngɑn kwɑ̈ddi kɑ̈j pɑ nyi ti ki cɑyø yi ji. De keløg e omɑgø, gïn-ɑ ɑ́kwɑl yi en cole’ colø ɑ́ tyel ɑ́bïryew, cɑgg e muuj jɑmmi gøle bënn. Jɑl-ɑ nyi kedhi ri mɑ̈nn mø pɑth, pyëwe nøg, mɑ́ e rëny-ɑ ree. Ópwöd kɑ oyɑ̈rø. Ayɑ̈re pɑ lɑ̈ɑ̈ny. Liny-ɑ gwøg yi jɑldhɑjø nyi ceg-ɑ pëddø yi tyiel. Atere pɑ nyi lɑ̈ɑ̈ny gïti keny-ɑ ócole gøøle. Cɑgg kwör-ɑ ɑ́cullii dwøng ni ngø, ɑterɑni pɑ wiy yi en. Dïd ki kwøbb-ɑ pwönyɑ yïn wɑ̈dɑ, kɑ wïjí ko wïl ki gwøgi gïg-ɑ köbbɑ yïn. Mïdhí ciggɑ, o yï yïddí ki wëy, mïdhí gen per gen teeg ni wɑngí. Mïdhí gen kì pyëwí ceth, kɑ ge nyi rømmí kidøøj yethi cyɑ̈ng bënn. Mïdhí peli wïj e nɑ nyimyëw, kɑ dïdø mïdhí ni wɑɑd wun, wɑn-ɑ pere teg. Yï ókøny yi gen ki këëji mɑ̈nni cwøw møøgø, mɑ̈nn-ɑ nyi yɑ̈bø ki cwøw, ge thɑbb-ɑ ji ki dhøng med. Cyɑ̈ng ɑ́kyel, yɑ ɑ́bëëd yɑ nenn-ɑ wɑ̈g kì ɑwɑɑj ødɑ. Alïdhɑ ki yɑɑg thønhø mø rummi gen nøg, de ɑ́kyel kì kelli gen nënni ɑ́ dhëg. Ábëëd e cyɑ̈dh-ɑ́ɑ̀ yij yöö, kɑ kɑ̈l-ɑ ɑ́duud yöö, keny-ɑ di kɑl me bëëd yi ngɑndhɑjø megø, ɑ́kedh e kɑ̈l-ɑ buti gølɑni, kì ɑ́dïggi wøw piny kedh e ólunyø. Arødhii yi ngɑn me nënni kì ri cyɑ̈dhe geki ruge, e nɑ ngɑn nyi niin ki köögi, e ngɑnɑni kɑ̈ɑ̈l-ɑ kɑl. Kwïj ɑyɑ̈r, kööbø e óryeerø ni tyëng-ɑ nyi wɑ̈dhi wïïnø kì yethi yëëth, ɑ nyi cungi kì ɑ́duddi yëëth, dɑ kɑ̀ röödh gen kì yethi yëëth geki kɑ̈jji ngyew. Kɑ ngɑnɑni ceg-ɑ pödhi yï nyelɑni, kɑ gø dööbe kööre, kɑ gø nuume, kɑ nenn-ɑ ød wɑnge, ɑkööbe kinni, “Yɑ ɑ́ngɑ̈ɑ̈d ki gëdhhi wïj köngø dicyɑ̈ngtïn, rïngø nud kì gølɑ. De yɑ ɑ́bï-ɑ be yɑbi yïn. Yɑ ɑ́dwɑdd-ɑ yïn ceth, o ɑnɑn yï ɑ́yodɑ! Pyënɑ ɑ́pëdhɑ ki ógødh me kïdde myëër, me bɑ ɑcwɑ̈j kì Rïp. Kɑ yije kïnyɑ ki ryɑ̈ɑ̈ mø yømi gen med. Nyingi ryɑ̈ɑ̈ møgɑni bɑ, ryɑ̈ mor, kí ryɑ̈ lubɑn, kí ryɑ̈ sinɑmön. Bïí o wɑ buddi wɑ, o wɑ pïïd yi ru wøw wɑ thøø yi mɑ̈ɑ̈dø. Jɑlgølɑ tøøk kì kɑl, ɑ́weli kun me lɑ̈wi. Ákɑ̈ɑ̈d ki ngyëny mø gïïr, o ótyëg-ɑ budi dwɑ̈y e tøøk.” Kɑ nyelɑni thɑbe ki myëre geki medi dhøge. Kɑ ceg-ɑ ì pɑt kì bɑnge ni wɑnh kïdhi be ngɑlø. Ákedh ni ɑ́køny me cïmi yethi wunn, kun pyëëd mine yi tøng. Nyelɑni ɑ́kedh ni winyø me kedhi yethi ɑ́kɑ̈llì, kwïj wøw kinni kedh-ɑ be thøø. Anɑn kyënu yïthhi wun wɑ̈ddɑ, kɑ kwøbbɑ lïngi wun. Pyëwí ko wëggí kɑ̈ɑ̈lø yi ngɑn ni menɑni. Yï ko pɑ̈nyi wɑ̈dhi bute. Cwøw mø gïïr ɑ́rënye. Jödd mø kwɑnni gen ngenyø ɑ́thøw kì ree. Keløg yï kedh-ɑ gøle, yï kedh-ɑ be thøø yøw. Lïng wun, peli wïj ócwöddø. Peli wïj cwøll-ɑ ji kì kɑ̈jj bënn. Ócwöddø kì wɑ̈thi ótøng kí tøggi yëëth, ócungø e ócwöddø kì ɑ́kɑrri yëëth. Ócwöddø kì dïpɑc, ócwöddø kì dhøggi kɑ̈llì. Kì kɑ̈jj-ɑ cwödde bënn, nyii kööbø kinni, “Yɑ cwøll-ɑ wun, wu bënn. Yɑ cwøll-ɑ dhɑnhø bëne kì kömi piny. Wun ɑ wɑ̈thi wun nøg, yod wun tyelli kwøb. Wu tyëng-ɑ bɑ dhëgg, dïd wun. Lïngu kwøbbɑ, kwøbb-ɑ pëddi døøjø, møg-ɑ kømmɑ bënn bong bɑ̈jjø kì ri gen. Møg-ɑ kømmɑ bɑ dyër, kwøbbi pyed mɑɑn yi yɑn. Gïg-ɑ kømmɑ bënn bɑ dyër, bong pyed wɑlɑ̀ wëënyø kì ri gen. Ge bɑ óbödhh kì yï tyëng-ɑ nyi yɑ̈bø ki tyelli kwøb. Ge yöd kì yï tyëng-ɑ wɑ̈thi gen nyi gɑ̈ɑ̈mø ki kwøb. Kwɑny ciggɑ kibøli ke di kwɑɑny yëël ɑ́tegø, kwɑny dïdø kibøli dhɑm-ɑ dhïw. “Yɑn, yɑ peli wïj, yɑ døøj kibøli tigø ɑ́gør. Bong gïn dwɑddi yi yïn, me pɑ̈ɑ̈r ki yɑn. Yɑn, yɑ peli wïj, yɑ ngɑ̈ny tïïdø ki kwøb. Yɑ dïdø, o yɑ ngɑ̈ny löggø kidøøj. Mɑɑni gïnrɑj bɑ wøri Jwøng-ɑ Ácwɑ̈ɑ̈j. Tɑ̈di wïj geki ɑthwøg mɑɑn yi yɑn, bëënrɑj geki pyed mɑɑn yi yɑn. Gwøg nyi gwir yi yɑn kɑ rummɑ, o yïɑ dɑ dïdø ki tegø. Rɑ̈nhì køny-ɑ yi yɑn ki jyɑ̈gø, tyëng-ɑ jyɑ̈gø nyi køny-ɑ yi yɑn ki muujø ki cigg-ɑ døøj. Ngɑn-ɑ jyɑ̈gø bëne kì kömi piny, køny-ɑ yi yɑn ki jyɑ̈gø. Yɑ mɑɑr-ɑ tyëng-ɑ mɑɑr yɑn. Ngɑn yɑb yɑn, yɑ yode yodø. Kɑ̈r geki dhwɑ̈ng bɑ møgɑ, kí døøjø geki teng-ɑ lwɑ̈ɑ̈ng gwøg. Gïn-ɑ yod yi yïn kì yïɑ lod-ɑ dhɑm-ɑ rɑw, o lod-ɑ ɑ́teng-ɑ dhïw ki døøjø. Yɑ bɑ tirø. Yɑ bɑ dyër. Tyëng-ɑ mɑɑr yɑn nyi thödhɑ’ thödhø ki kɑ̈r, uddi gen nyi pɑ̈ngɑ’ pɑ̈ngø ki gïndøj bëne. “Yɑn ɑ ɑ́kwøng ki cwɑ̈jø yi Jwøng-ɑ Ácwɑ̈ɑ̈j, e mɑl kí piny nuti cwɑ̈jø. Yɑn ɑ ɑ́kwøng ki cwɑ̈jø kibøli gïg-ɑ ɑ́cwɑ̈j yi Jwøng-ɑ Ácwɑ̈ɑ̈j bënn. Yɑn ɑ ɑ́kwøng ki cwɑ̈jø kibøli jɑmmì bënn, e mɑl geki piny nuti cwɑ̈jø. Yɑ ɑ́bëëd yɑ nud, e nɑ̈mmi omelø møg-ɑ døngø nuti cwɑ̈jø. Yɑ ɑ́bëëd yɑ nud e nɑ̈mm-ɑ rïngi nuti gwøgø. Yɑ ɑ́bëëd yɑ nud keny-ɑ́ nuti cwɑ̈ɑ̈j kïtt-ɑ døngø, kí keny-ɑ́ nuti cïb kïtt-ɑ thønhø kɑ̈jji gen. Yɑ ɑ́bëëd yɑ nud keny-ɑ́ nuti cwɑ̈ɑ̈j piny geki thïm, e bong lɑ̈bø me pɑ̈ng cingø ɑ́kyel me nud. Yɑ ɑ́bëëd yɑ nud keny-ɑ ɑ́cïb tyelli mɑl, kɑ kew cïb kɑɑm pïg-ɑ mɑl ki møg-ɑ piny. Yɑ ɑ́bëëd yɑ nud keny-ɑ ɑ́cïbe pøøl mɑl. Kɑ nyingi pï yiebe kì thɑ nɑɑm omeli dwøng. Kɑ pïi nɑɑm omelø köbbe kinni kew-ɑ ɑ́cïbe gïn ko pöödh gen. Yɑ ɑ́ying-ɑ kunɑni, keny-ɑ ɑ́cïbe tyelli piny. Yɑ ɑ́bëëd yɑn ɑ́ bødhø me kønyii, medi pyëwe nyi kɑ̈ɑ̈l-ɑ yi yɑn yethi cyɑ̈ng, pyëwɑ nyi rïïjø e med kì bute. Pyëwɑ med ki mɑl geki piny, ki dhɑnhø men-ɑ ɑ́cwɑ̈je. “Anɑn nyigɑ, lïngu kwøbbɑ, gwøg wun gïg-ɑ kwøb yi yɑn, o pëthi wun ómed gen. Lïngu gïg-ɑ pwönyi wun. Møgɑni ko wøy wun, bëëd wɑ̈thi wun ge pel. Tyëng-ɑ nyi lïngi kwøbbɑ, óyïddi ki medi pyëw, gen ɑ tyëng-ɑ nyi bëëdø kì dhø gølɑ yethi cyɑ̈ng; ɑ nyi rïïjø ge nenn-ɑ dhø ødɑ. Ngɑn yod yɑn, yod-ɑ wëy, o Jwøng-ɑ Ácwɑ̈ɑ̈j pyëwe løg-ɑ me med ki en. De ngɑn pɑ yod yɑn, nyïɑ̈g-ɑ ree, ngɑn mɑɑn yɑn, yɑb-ɑ thøø.” Ngɑn-ɑ cwøl ɑ́ peli wïj øde ɑ́gere, kɑ gø gögge ki ɑ́yɑryømø me mïdhi yi löjj ɑ́bïryew. Kɑ ongɑ̈dø ki wɑdh, kɑ gïncɑme gwøge, e møgi oløg thøø yi bijø, o jɑmmì rumø ki pyëlø. Aöre womɑ̈nni gøle be cwööli ji, ge cung-ɑ́ɑ̀ keny-ɑ bɑ ótong kì kɑɑl, ge ócwöddø kinni, “Bï wun, wun ɑ tyëng-ɑ wɑ̈thi wun nøg! Bïu cyɑ̈ɑ̈m wun ki gïncɑmɑ, o wu mɑ̈ɑ̈dh wun ki møng-ɑ ɑ́gwøgɑ, wiy wun bëëdi dhëëgø, kɑ wu kwɑny wun bëëdi dïdø.” Ke kyëddí ngɑn bong pyëwe, yï gɑgge’ gɑggø. Ke cɑɑy ngɑnrɑj, yï ɑ́yɑb göny rënyi yïn. Tyëng-ɑ bong pëthi gen ko nyi cɑɑy, yï ógöögø ki ngɑn mɑɑn yi gen. De keløg yï cɑy-ɑ ngɑn wïje pel, yï wøre’ wørø. Tyëng-ɑ wɑ̈thi gen pel, nyi ceg-ɑ pëddø ki pïlø kenyi cɑɑy gen. Gïn köbbi ngɑntir, med-ɑ dïde. Keløg yï dwɑdd-ɑ dïdø, wør Jwøng-ɑ Ácwɑ̈ɑ̈j møti. Pyëwí nud ke wøør Jwøng-ɑ Ácwɑ̈ɑ̈j Kwërø. Ngɑn wïje pel, runne nyii ngënyø kì kömi piny. Keløg wïjí pel, yï óyïddø ki døøjø kì bɑng peli wïjí, de keløg pyëwí bong gøn, yï ketí ɑ órɑngø kì bɑng bongi pyëwí. Dhëëgø nɑ ngɑndhɑjø me kwïj bëëdø, nyi kööbø e óryeerø, o kwïj ɑyɑ̈r. Nyi bëëd ɑ dhø gøle, wɑlɑ̀ kì wïj kwøm kì keny-ɑ bɑ ótong kì kɑɑl, e cwøll-ɑ tyëng-ɑ kɑ̈lli kenyɑni e cem-ɑ, De tyëng-ɑ kedhi gøle kwïj wøw kinni gøle bɑ kej thøø, tyëng-ɑ ɑ́kedhi gøle bënn ɑ́thøw yije. Møg bɑ gɑ́ji Sølømøn: Wɑ̈n-ɑ wïje pel, wïye nyi thödhe’ thödhø ki medi pyëw, de wɑ̈n-ɑ wïje nøg meye nyii thödhø yi en ki rɑ̈ɑ̈m pyëw. Kɑ̈r-ɑ yod ki yuu rɑj bɑnge dɑ thøø, de yï ócuggø yielø yi bëëntir. Jwøng-ɑ Ácwɑ̈ɑ̈j tyëngtir pɑ nyi wëgge ywɑjø yi kɑ̈j, de tyëngrijjø gïg-ɑ dwɑddi gwøgø yi gen nyi mɑ̈ɑ̈ne’ gwøgø. Bëëdí yïn ɑ́ rɑnyø yï gwøøge’ ngɑn wɑnge cɑn, de gwøng teg yï gwøøge’ ngetikɑ̈r. Ngɑn wïje nud byelle nyi kɑje’ kɑjø kì bøli kej gen, de ngɑn ceg nenø kì bøli kej kɑj, bɑ ngɑn yɑ̈rø. Gyëdh ying-ɑ kömi tyëngtir kipe døøji kwøbbi gen, de tyëngrijjø kwøbbi gen kum ge’ rɑjji gen. Tyëngtir bɑ ɑgyëdh; ge nyi pɑ̈rr-ɑ døøji gen; de tyëngrijjø nyi pɑ̈rr-ɑ rɑj. Ngɑn pyëwe nud nyii yïëyø ki cegø; de dhëng-ɑ nyi dwønggi yɑnggì órënyi. Ngɑn yije bong ɑ́dud pyëwe pɑ nyi lïngø, de ngeti ɑ́dud møge nyii yodø. Ngeti wëënyø nyi kɑ̈ɑ̈l-ɑ rɑj, de ngeti tyëny nyi kɑ̈ɑ̈l-ɑ mër. Kwøbbi ngɑntir nyi yiel-ɑ wëy, de kwøbbi ngɑnrɑj yethi gen pɑ̈ng yi rɑj. Mɑ̈ɑ̈nø nyii kɑ̈nø ki wëërø, de mɑ̈ɑ̈dø pɑ nyi mïdhi ki kwøbb-ɑ rijjø. Peli wïj yod-ɑ ri kwøbbi ngɑntir, de kwøbbi dhëg nyi muuj-ɑ en ki göj. Tyëng-ɑ wɑ̈thi gen pel cong-ɑ dïdø ni kɑ̈r, de kwøbbi tyëng-ɑ wɑ̈thi gen nøg nyi kɑ̈ɑ̈l-ɑ göj. Ngetikɑ̈r nyii korrø yi kɑ̈re, de ngɑn jɑdø nyii rënyø yi cɑni wɑnge. Gwøøg ngɑntir nyi nywøl-ɑ wëy, de gwøøg ngɑnrɑj nyi nywøl-ɑ rɑj. Ngɑn nyi yïëy cegø cyɑ̈dh-ɑ́ɑ̀ yuu wëy, de ngɑn bɑny cegø nyii lɑ̈ɑ̈nyø. Ngɑn nyi kɑnni mɑ̈ɑ̈nø bɑ ngeti pyed, ngɑn nyi kwɑ̈dhhi wɑɑd gen, wïje nøg. Kenyi ngënyi kwøb, orøg nyii bëënø, de ngɑn nyi mïdhi lebe wïje pel. Kwøbbi tyëngtir per gen teeg ni yëël ɑ́tegø, de rummi tyëngrijjø bong gïn døj kì ri gen. Kwøbbi tyëngtir, ji mø gïïr nyii yɑ̈ngø yi gen, de tyëng-ɑ wɑ̈thi gen nøg nyii mɑgø yi lebbi gen. Gyëdhhi Jwøng-ɑ Ácwɑ̈ɑ̈j ɑ nyi muuj kɑ̈r, de yï ko kööb ce yï kɑ̈r-ɑ yi tegí. Gøggi gïgrijjø med kì yï dhëg, de ngɑn wïje nud pyëwe med kɑ peli wïj. Gïn-ɑ nyi böggi yi ngɑnrɑj nyi bï-ɑ köme, de gïn-ɑ tyer yi ngɑntir nyi mëgg-ɑ en. Kenyi kɑ̈ɑ̈l ryɑ̈g yi Jwøk, tyëngrijjø nyi kɑ̈ɑ̈le’ wïje, de tyëngtir nyii bëëdø gïti ɑtheer. Öri rɑnyø rɑɑj kì yï ngɑn-ɑ örii, ni nyɑmi byel ri gen dɑ lel, o nɑ yïrø kì nyinge. Böggi Jwøng-ɑ Ácwɑ̈ɑ̈j nyi muuj-ɑ wëy, de runni tyëngrijjø ócög ge nøg. Gïn-ɑ nyi dwɑddi yi pëthi tyëngtir nyii kɑ̈nø ki medi pyëw, de gïg-ɑ nyi dwɑddi yi pëthi tyëngrijjø pɑ nyi pɑ̈dhi. Tyëngtir nyii korrø yi mïdhi yuu Jwøng-ɑ Ácwɑ̈ɑ̈j, de bɑ ryɑ̈g kipe tyëngrijjø. Tyëngtir óbëëdø kì piny gen gïti ɑtheer, de tyëngrijjø koo bëëdø. Kwøbbi ngɑntir nyi kɑ̈ɑ̈l-ɑ peli wïj, de ngeti pyed dhøge óthøw. Tyëngtir ngɑ̈ny kwøb, de tyëngrijjø ngɑ̈ny-ɑ wëënyø kete. Gwem mɑɑn yi Jwøng-ɑ Ácwɑ̈ɑ̈j, dɑ ngyew-ɑ yije bong gwem ɑ mɑɑr yi en. Tɑ̈dø nyii kɑ̈nø ki ɑyɑ̈r, de möölø nyi kɑ̈ɑ̈l-ɑ peli wïj. Ngɑntir nyii korø yi døøje, de ngɑnrɑj ónɑ̈g yi ɑ́dude. Wëyí koo yiel yi kɑ̈rí cyɑ̈ng-ɑ óbëën thøø, de wëyí ócuggø yielø yi bëëntir. Ngɑntir nyii tyenyø yi døøje, de ngɑnrɑj nyi tɑ̈ɑ̈y-ɑ piny yi rɑ̈je. Ngɑntir nyii yielø yi døøje, de wëëny nyii mɑgø yi ɑ́kɑ̈lli gen. Kenyi thøw tyëngrijjø, gïg-ɑ ɑ́ngɑ̈dh yi gen nyi thøw kɑ gen. Ngɑ̈dhi kɑ̈r bong gïn nyi nywøle. Ngɑntir nyii yielø ki rɑj, rɑjjɑni nyi yöd ge pɑ̈dh-ɑ kömi ngɑnrɑj. Ngɑn kwïj Jwøk nyi rëny-ɑ wɑɑd gen ki lebe, de ngɑntir nyii yielø yi dïde. Kenyi dönyi tyëngtir, pɑc pyëwe nyii mïnø, o pëthi ji nyii mïnø kenyi thøw tyëngrijjø. Pɑc nyii gyëdhø yi Jwøk kì bɑng tyëngtir; de nyii rënyø kì bɑng kwøbbi tyëngrijjø. Ngɑn nyi kwɑ̈dhhi wɑɑd gen, pyëwe nøg, de ngɑn pyëwe nud nyi cög e okudø. Ngeti ɑtum pɑ nyi kɑ̈nni ki kwøb, de nyi gɑ̈nn-ɑ́ ngɑn nyi mïdhi lebe. Pödhø nyii pɑ̈ɑ̈dhø kenyi bëëd e bong tyëngdøngø møg cïjii, de nyii yielø yi ngenyi tyëngdøngø møg-ɑ cïjø. Ngɑn nyi kööbø ce kwöör ngɑnpɑth ócole ópɑ̈di, de ngɑn pɑ kwɑny kwöör ngɑnpɑth bong gïn nywɑlii. Ngɑndhɑjø men-ɑ pyëwe tɑr nyii wørø. De cwøw-ɑ kwïj wuödø, nyi yod-ɑ kɑ̈r yøw. Dhɑnhø nyii dönyø yi bëëndøj, de rɑ̈ji bëëdø nyi rëny-ɑ dhɑnhø. Ngɑnrɑj jɑmm-ɑ nyi yod yi en ki wëënyø nyii lɑ̈ɑ̈nyø, de ngɑn nyi göögø ki gïgdøj, nyii yïddø ki köögi me pɑ lɑ̈ɑ̈ny. Ngɑn gøggi dyër ómïdhi yi Jwøk, de ngɑn gøggi rɑj óthøw. Tyëng-ɑ yethi gen di ɑ́dud mɑɑn yi Jwøng-ɑ Ácwɑ̈ɑ̈j, de pyëwe med ki tyëng-ɑ bëëdi gen døj. Tyëngrijjø pɑ bødh ki cɑyø kinni tek, de tyëngtir koo cɑy. Ngɑndhɑjø men-ɑ myëër de pyëwe nøg, nɑ gweli dhɑb kì órøm kundhøngø. Ngɑntir nyi tyer-ɑ gïgdøj, kɑ gï nyi yode, de gïgrijjø møg-ɑ nyi tyer yi tyëngrijjø nyi kɑ̈ɑ̈l-ɑ rënyi pyëw Jwøk. Ngɑn megø omuujø, de jɑmme kedh ge óngënyø, o ngɑn-ɑ kyeelø bɑ kenyø, o jɑmme kedh ge ónungø. Jwödhø ókɑ̈ri, ngɑn nyi kunyi ókøny. Tyëngngyëwø møg-ɑ nyi kɑn byel kipe kinni o ge óngew ki ngyëny mø gïïr kenyi tëngi kɑ̈j, ge nyi lɑ̈mm-ɑ cyën; de ngɑn nyi ngëwi ji nyii pøjjø. Ngɑn nyi gøggi gïgdøj yɑb-ɑ dhwɑ̈ng; de ngɑn yɑb göj nyii yïddø ki rɑj. Ngɑn nyi ngɑ̈dh kɑ̈re ópɑ̈ɑ̈dh; de ngɑntir ópïïdh ni yɑdh. Ngɑn muuj gøl gen ki göj, bong gïn-ɑ ólɑg yi en. Dhëng-ɑ ni menɑni ógöögø ɑ́ bɑ̈ng ngɑn wïje pel. Bëëntir nyi kɑ̈ɑ̈l-ɑ wëy, de liny nyi kɑ̈ɑ̈l-ɑ thøø. Keløg tyëngtir nyii yïddø ki cɑ́y kì kömi piny, tyëngrijjø ódi bødhø ki cɑyø? Ngɑn-ɑ nyi yïëy cegø mɑɑr-ɑ dïdø, de ngɑn nyi mɑɑn cegø wïje nøg. Ngɑndøj nyii yïddø ki gyëdh kì yï Jwøng-ɑ Ácwɑ̈ɑ̈j, de ngeti ɑ́dud nyii cɑyø yi en ki rɑ̈ji pyëwe. Dhɑnhø pɑ nyi dönyi yi bëënrɑj, de ngɑntir nyii dönyø. Dhɑjø men-ɑ bëëde døøj, nɑ yɑ̈r kì wïj jɑlgøle, de dhɑjø men-ɑ nyi yɑ̈r jɑlgøle, nɑ bɑjij ɑ nyi ngyed cögø. Ngɑntir nyi rømm-ɑ gøggi dyër, de ngɑnrɑj nyi rømm-ɑ gøggi gïgrijjø. Tyëngrijjø nyi kømm-ɑ kwøb mø kɑ̈ɑ̈l thøø, de kwøbbi tyëngtir nyi kɑ̈ɑ̈l-ɑ wëy. Tyëngrijjø wɑ̈thi kɑ̈lli gen nyii pɑ̈ɑ̈dhø, de kɑ̈lli tyëngtir óbëëdø. Ngɑn wïje pel nyii lenhø yi ji, de ngeti ɑ́dud nyii benyø. Lɑ̈w ngɑn göögø kipe yodi gïncɑme, kibøli ngɑn wɑ̈dhi ngwønø e bong gïncɑm kì gøle. Jɑltir dhöge geki jɑmme møg-ɑ kyeelø nyi kongge’ konggø, de jɑlrɑj cɑgg ɑ́ gïn-ɑ rømme ce gø gögge dhöge, geki jɑmme møg-ɑ kyeelø e pëddi døøjø, rɑɑj. Ngɑn-ɑ nyi pur pwödhe nyii yïddø ki gïgcɑmm mø gïïr, de ngɑn-ɑ nyi wïïnø kì cwir wïje nøg. Tyëngrijjø nyi mod-ɑ jɑmmi tyëngrijjø møg-ɑ kyeelø, de tyëngtir nyi køny-ɑ ri gen. Tyëngrijjø nyii mɑgø yi lebbi gen, de ngɑntir nyii yielø yi lebe. Dhɑnhø nyii yɑ̈ngø kì bɑng døøji dhøge, mɑ́ dhɑnhø nyi yod-ɑ kööngi gwøge ceth. Dhëg nyii rumø ce møg-ɑ gøgge bënn bɑ dyër; de ngɑn wïje pel nyii yïëyø ki cegø. Ngɑn wïje nøg pɑ nyi cwööng ki mɑgø yi liny; de ngɑn wïje nud nyii guumø ki yɑ̈d. Keløg yï kømm-ɑ dyër kì burø, gønyí ópɑ̈dhi keje; de pyed nyi rëny-ɑ gøny. Kwøbb-ɑ wɑ̈dhi ki lenggø, nyi ngɑ̈ddi nɑ tøng, de møg-ɑ kwøb ki peli wïj, nyi wëgg-ɑ kedø nøggø. Kwøbb-ɑ dyër nyii bëëdø gïti ɑtheer, de kwøbbi pyed pɑ nyi cwööng ki lɑ̈ɑ̈nyø. Tyëng-ɑ nyi rømmi gøggi rɑj, pëthi gen dɑ wëënyø, de tyëng-ɑ nyi göögø ki mër, pëthi gen bɑ møw yøw. Tyëngtir bong rɑj møg nyi bï kömi gen gɑ cɑ́y, de tyëngrijjø ɑkørri gen ngenyø. Tyëngpyed mɑɑn yi Jwøng-ɑ Ácwɑ̈ɑ̈j, de pyëwe med ki tyëng-ɑ nyi kømmi dyër. Ngɑn wïje nud nyi kööbø e orumø, de ngɑn wïje nøg, nyi wɑ̈dh-ɑ twɑgø yøw. Ngɑn nyi göögø ki gwøng teg, ójyɑ̈ɑ̈gø, de rɑnyø ógöögø ki bɑ̈ng. Dhɑnhø nyii torø yi ɑkørr-ɑ köme, de pyëwe nyii mïnø yi kwøbb-ɑ med. Ngɑntir mɑ̈dhhe nyi nyudhe’ yuu-ɑ dyër, de ngɑnrɑj mɑ̈dhhe nyi nyudhe’ yuu-ɑ rɑj. Rɑnyø nyii dhɑlø yi buddi ree ki rïngi lɑ̈y-ɑ ɑ́nɑ̈ɑ̈ge, de jɑltïj gwøge nyi tyëge tyëgø. Bëëntir nyi kɑ̈ɑ̈l-ɑ wëy, de bëënrɑj nyi kɑ̈ɑ̈l-ɑ thøø. Wɑ̈n-ɑ wïje pel nyi lïng-ɑ ciggi wïye, de wɑ̈n-ɑ tɑ̈dø pɑ nyi lïngø kenyi cɑ̈wwii yi wïye. Dhɑnhø nyii yïddø ki gïndøj kì bɑng døøji bëëde, de ngɑnrɑj nyi tyer-ɑ liny. Ngɑn korri lebe, korr-ɑ wëye, de ngɑn nyi wɑ̈dhi kwøb yøw rëny-ɑ ree. Rɑnyø pyëwe nyii tyëëdø ki gïïpiny, de bong gïn nyi yode. Pyed mɑɑn yi ngɑntir, de ngɑnrɑj óyɑ̈r yi pyede. Ngɑn yïe bɑ̈r nyii korø yi gïgdøj møg-ɑ gøgge, de ngɑnrɑj nyii rënyø yi gïgrijjø møg-ɑ gøgge. Ngɑn megø okööbø kinni cem e kɑ̈rø, o bong gïn nud kì yïe, ngɑn-ɑ kyeelø kɑ̈rø, de bëëd-ɑ bëëdi ngɑn wɑnge cɑn. Jɑlkɑ̈r wëye ócuggø gøømø yi jɑmme, de pyëwe nyi bëëd e olïngø kipe jɑmmɑni. O ngɑn jɑdø bong gïn tɑg yi en. Cɑɑr ngɑntir nyii mënyø kidøøj, de cɑɑr ngɑnrɑj óthøw. Athwøg nyi kɑ̈ɑ̈l-ɑ liny, de ngɑn nyi yɑb kønyø ki kwøb wïje pel. Kɑ̈r-ɑ yod ki yuu orøg nyi jwɑn-ɑ lɑ̈ɑ̈nyø, de kɑ̈r-ɑ lem mɑ̈ɑ̈dh nyii ngënyø. Pyëw dhɑnhø nyii nyönhø, kenyi cög gïn-ɑ tyer yi pyëwe pɑ cere yodø, de dële nyii yönø kenyi yode gøn. Ngɑn bɑny cegø kɑ̈n-ɑ köme ki ryɑ̈g, de ngɑn nyi yïëy cegø nyii yïddø ki köögi. Böggi Jwøng-ɑ Ácwɑ̈ɑ̈j nyi muuj-ɑ wëy, kɑ dhɑnhø nyi wëgge këëji ɑ́kɑ̈lli thøø. Ngɑn wïje pel nyii wørø yi ji, de ngeti ɑ́dud nyii yïddø ki rɑj. Gwøøg ngɑn wïje pel nyi nyodh-ɑ dïde, de dhëëgi ngɑn wïje nøg pɑ nyi pɑ̈ni. Keløg wöödø kɑ̈ll-ɑ yi ngɑnrɑj, nyii kɑ̈nø ki ɑkørr, de keløg wöödø kɑ̈ll-ɑ yi ngɑndøj nyi kɑ̈ɑ̈l-ɑ mër. Rɑ̈jø geki ɑyɑ̈r nyi bï-ɑ kömi ngɑn bɑny cegø, de ngɑn nyi yïëy cegø nyii wørø. Pyëw dhɑnhø nyii mïnø kenyi yode gïndøj men-ɑ tyer yi en, de dhëg pɑ nyi dwɑddi wïyø ki gøggi rɑj. Keløg yï ó'lwööb ki tyëng-ɑ wɑ̈thi gen pel, wïjí ópïlli, de ngɑn nyi 'lwööb ki tyëng-ɑ wɑ̈thi gen nøg nyii rënyø. Akørr rïng-ɑ́ɑ̀ bɑng tyëngrijjø, de kööngi tyëngtir bɑ døøjø. Ngɑntir jɑmme ólɑg yi nyige, de jɑmmi ngɑnrɑj nyi lɑg-ɑ yi tyëngtir. Ngɑn wɑnge cɑn pwödhe ócuggø cyegø kidøøj, de byelle ócuggø kɑbø yi ɑ́muddi ji. Ke pɑ ceg wɑ̈dí, ceg yi yïn kɑ mɑɑnø, de ngɑn mɑɑr wɑ̈de, gø nyi cege cegø. Tyëngtir nyii cyɑ̈mø kɑ ge oyɑ̈ngø, de tyëngrijjø bëëd-ɑ kɑ̈j. Kɑl nyii gwøgø yi ngɑndhɑjø men-ɑ wïje pel, de men-ɑ wïje nøg gøle nyi rënye’ rënyø. Ngɑn bëëde bɑ óbödh wør-ɑ Jwøng-ɑ Ácwɑ̈ɑ̈j, de ngeti ɑwendwöd bɑny-ɑ Jwøng-ɑ Ácwɑ̈ɑ̈j. Kwøbbi dhëg nyi kɑ̈ɑ̈l-ɑ cɑye, de ngɑn wïje pel nyii korrø yi lebe. Keny-ɑ bong wɑ̈dhh mø køøg pwödhø, nyi bong-ɑ gïn ying yij thebø. De keløg dhɑnhø yïe dɑ wɑdh me teg, ceg-ɑ yïddø ki byëlø bëne. Ngɑn nyi lïdhi ɑ́ ngɑndøj, nyi kwøb-ɑ dyër kì burø, de ngɑn nyi lïdhi ɑ́ ngɑnrɑj nyi kwøb-ɑ pyed. Ngɑn wïje nøg yɑb-ɑ peli wïj, o gø pɑ yode; de ngɑn wïje nud dïdø nyi yode yodø. Lɑ̈ɑ̈w rií ki tyëng-ɑ wɑ̈thi gen nøg, mɑ́ e bong gïn-ɑ ódïd yi yïn kì yï gen. Ngɑn wïje pel yuue nyii yodø yi en kì bɑng peli wïje, de dhëg nyii wɑ̈ɑ̈nyø yi nøgi wïje. Dhëgg pëthi gen pɑ nyi lïngø kipe orøøg gen, de tyëngtir nyi dwɑdd-ɑ kinni o lɑ́ɑ̀w dwöög piny kipe orøøg gen. Rɑ̈ji pyëw dhɑnhø ngɑ̈ny-ɑ yi en, o men-ɑ́ medi pyëwe kwïj yi ngɑn-ɑ kyeelø. Kɑ̈lli tyëngrijjø órënyi, de kɑ̈lli tyëngtir ódönyi. Dɑ yöö me nyi nenni yi dhɑnhø e døøj, de cöge bɑ thøø. Dhɑnhø nyii ngedhø cɑgg pyëwe rɑɑj, de kenyi rum ngyerø, rɑ̈ji pyëw nyii dööngø kì keje. Peli wïj bɑ dhwɑ̈ng kì yï ngɑn wïje pel, de dhëëgø bɑ dhwɑ̈ng kì yï ngɑn wïje nøg. Ngɑn wïje nøg nyi wɑ̈dh-ɑ yïëyø ki kwøb bënn; de ngɑn wïje pel nyi ceg-ɑ rumø kì ri kwøb kidøøj. Ngɑn wïje pel nyi bëëdø rumme gwiir en, kɑ rɑj nyi këëje; de dhëg nyi wɑ̈dh-ɑ göggi bøle yøw. Ngɑn nyi jwɑn ki mɑgø yi liny nyi göög-ɑ dhëëgø; de ngɑn pyëwe nud nyii guumø ki kwøb. Ngɑn wïje nøg nyi yod-ɑ dhëëgø yøw; de ngɑn wïje pel nyi yod-ɑ dïdø. Tyëngrijjø ri gen óbøødh gen piny kì bøli tyëngdøj, ge ótwɑ̈rø kì dhøggi kɑ̈lli tyëngdøj. Tyëng-ɑ nyingi gen cɑn nyii benyø yi ji møøgø, kí wɑddi gen thyew, de tyëngkɑ̈rì mɑ̈dhhi gen gïïr. Ngɑn nyi benyi wɑɑd gen ceg-ɑ orøg, de ngɑn køny ngɑn jɑdø ree dɑ gyëdh. Pɑth ki tyëng-ɑ nyi rømmi gøggi rɑj ɑ nyi wɑ̈ɑ̈ny ki yuu-ɑ dyër? Tyëng-ɑ nyi rømmi gøggi gïgdøj nyii mɑɑrø, kɑ kwøbbi gen nyi yïëy. Gwøng teg nyi nywøl-ɑ gïndøj, de lwɑ̈y nyi kɑ̈ɑ̈l-ɑ jɑdø. Tyëng-ɑ wɑ̈thi gen pel, nyii køøgø ki kɑ̈r, de tyëng-ɑ wɑ̈thi gen nøg, kööngi gen bɑ dhëëgø yøw. Ngɑn nyi kømmi dyër, ngɑn-ɑ ɑ́myen nyi yiele yielø, de ngɑn pɑ nyi kwøb dyër, nyi wëny-ɑ burø. Ngɑn böggi Jwøng-ɑ Ácwɑ̈ɑ̈j pyëwe pɑ nyi lïngø, o nyige nyii korrø yi Jwøng-ɑ Ácwɑ̈ɑ̈j. Böggi Jwøng-ɑ Ácwɑ̈ɑ̈j nyi muuj-ɑ wëy, kɑ dhɑnhø nyi wëgge këëji ɑ́kɑ̈lli thøø. Döngi rɑ̈dh bɑ ngenyi yɑy, de rɑ̈dh bong pere, keløg yïe bong yɑy. Ngɑn pɑ nyi jwɑn ki mɑgø yi liny wïje pel, de ngɑn nyi jwɑn ki mɑgø yi liny göög-ɑ dhëëgø. Gøji pyëw nyi muuj-ɑ yödi dël, de mud nyi muuj-ɑ rɑ̈ɑ̈m dël. Ngɑn guud nyingi tyëng-ɑ ɑbuur, bɑny-ɑ Jwøk, de ngɑn bëëdø ki ɑbuur ki bëëndøj, wør-ɑ Jwøk. Tyëngrijjø nyi tɑ̈ɑ̈y-ɑ piny yi rɑ̈ji gen, de tyëngtir nyii yielø kì yij thøø. Peli wïj ying-ɑ yï ngɑn dïdø, de bong gøn kì yï dhëg. Bëëntir nyi tïng-ɑ pödhø mɑl, de orøg nyi rëny-ɑ pödhø. Rɑ̈dh nyi bëëd pyëwe med ki bɑ̈ng-ɑ wïje pel, de bɑ̈ng-ɑ wïje nøg nyi cɑye’ cɑyø. Lögg-ɑ med nyi jog-ɑ liny, de lögg-ɑ rijjø nyi coodh-ɑ liny. Kwøbbi ngɑn wïje pel nyi muuj-ɑ dïdø, de dhëgg nyi dwøngg-ɑ yɑnggì yøw. Gïg-ɑ piny bënn di nennø yi Jwøng-ɑ Ácwɑ̈ɑ̈j; gïgrijjø ki gïgdøj nenne’ nennø. Kwøbb-ɑ døøj nyii kɑ̈nø ki wëy, de kwøbb-ɑ rijjø nyi cöd-ɑ minø. Ngɑn bɑny cegø yi wïye bɑ dhëg, de ngɑn yïëy cegø wïje pel. Tyëngtir jɑmmi gen nyi thödh-ɑ gen ki medi pyëw, de tyëngrijjø cɑgg kɑ̈lli gen pɑ̈ng yi kɑ̈r, kɑ̈rɑni nyi kɑ̈ɑ̈l-ɑ ywøøg yij yøw. Kwøbbi tyëng-ɑ wɑ̈thi gen pel nyi muuj-ɑ dïdø, de dhëgg bong dïdø kì yï gen. Gëdhhi tyëngrijjø mɑɑn yi Jwøng-ɑ Ácwɑ̈ɑ̈j ki mendwøng, de pyëwe med ki bëëndøj. Bëënrɑj mɑɑn yi Jwøng-ɑ Ácwɑ̈ɑ̈j ki mendwøng, de pyëwe med ki bëëndøj. Ngɑn nyi göögø ki orøg nyii cɑyø ki menteg, ngɑn bɑny tyenyø óthøw. Keløg pödhi tyëngthøø di nennø yi Jwøng-ɑ Ácwɑ̈ɑ̈j, pëthi ji ódhɑ̈lø nennø yi en? Ngetigɑg pɑ nyi dwɑddi tyenyø, o pɑ nyi kedhi yï tyëng-ɑ wɑ̈thi gen pel, be kønyø ki kwøb. Bøli dhɑnhø nyii tɑ̈rø yi medi pyëw, o dhɑnhø nyii nyönhø yi ɑkørr. Ngɑn wïje pel nyi yɑb-ɑ dïdø, de dhëg nyi mɑɑr-ɑ dhëëgø. Ngɑn jɑdø nyi tyëg piny e orɑngø, de pyëw-ɑ døj nyi tyëg piny e med. Lɑ̈w bëëdi dhɑnhø wɑnge cɑn e bögg-ɑ Jwøng-ɑ Ácwɑ̈ɑ̈j, kibøli bëëde e kɑ̈rø o ying-ɑ yethi ɑkørr. Gøl cɑɑm lum e yije dɑ mër, lɑ̈w kibøli gøl cɑɑm wɑdh me cwiy, e yije bong mër. Ngɑn nyi jwɑn ki mɑgø yi liny nyii kɑ̈nø ki göj, de liny nyii yielø yi ngɑn pɑ nyi jwɑn ki mɑgø yi liny. Rɑnyø órɑngi ni ngɑn cyɑ̈dhi kì yöö me pɑ̈ng yi koodh, de ngɑntir yuue óbëëd e tɑr. Wɑ̈n-ɑ wïje pel wïye nyii thödhø yi en ki medi pyëw, bɑ dhëgg ɑ nyi bɑny mëëg gen. Dhëëgø bɑ medi pyëw kì yï ngɑn wïje nøg, de ngɑn pyëwe nud nyi kømm-ɑ kwøbbi dïdø. Gïg-ɑ dwɑddi gwøgø pɑ nyi pɑ̈dhi kɑ̈jji gen kenyi bëëd e bong cïïjø, de ge nyii pɑ̈dhø yi ngenyi tyëng-ɑ cïjø. Lögg-ɑ døj nyi kɑ̈ɑ̈l-ɑ medi pyëw, kwøbi kwøb kì bøli kej gen, døøj. Tyëng-ɑ wɑ̈thi gen pel kɑ̈ll-ɑ yij yuu nënnì, de pɑth ki yuu-ɑ kedhi piny kej thøø. Kɑ̈lli tyëngɑthwøg ódhur piny yi Jwøng-ɑ Ácwɑ̈ɑ̈j, de kɑ̈lli thwömm ómïdhi yi en. Rummi tyëngrijjø mɑɑn yi Jwøng-ɑ Ácwɑ̈ɑ̈j ki mendwøng, de pyëwe med ki kwøbb-ɑ døj. Ngɑn pyëwe dwøng gøle nyi muuje’ cyën; de ngɑn mɑɑn kwɑjjø ki gïïpiny, gøle óyïddi ki gyëdh. Ngɑntir nyi rømm-ɑ yëth-ɑ ólögge, de ngɑnrɑj nyi jwɑn-ɑ löggø, o löggɑni nyi kɑ̈ɑ̈l-ɑ göj. Jwøng-ɑ Ácwɑ̈ɑ̈j ngɑ̈je nyi luge’ tyëngrijjø, de kwɑ̈jji tyëngtir nyi lïnge’ lïngø. Tɑri bølø nyi wëgg-ɑ pyëw ngɑn-ɑ kyeelø mïnø, o pyëw nyii mïnø yi wöön-ɑ døj. Ngɑn nyi yïëy tyenyø, ówɑ̈dhi kelli tyëng-ɑ wɑ̈thi gen pel. Keløg yï bɑny-ɑ dïdø, yï rëny-ɑ rií, keløg yï óyïëy ki tyenyø wïjí ti-ɑ pïlø. Böggi Jwøng-ɑ Ácwɑ̈ɑ̈j nyi kɑ̈ɑ̈l-ɑ peli wïj, bëëd yï bɑ mölø o yï ówør. Dhɑnhø nyi dwɑdd-ɑ gwøgi gïïpiny, den-ɑ́ møg-ɑ nyi yïëy yi Jwøng-ɑ Ácwɑ̈ɑ̈j ɑ nyi pɑ̈dhi kɑ̈jji gen. Gïg-ɑ gøggi yi dhɑnhø nyi nenne gï døøj, de bɑ Jwøng-ɑ Ácwɑ̈ɑ̈j ɑ nyi ngɑ̈nyi gïg-ɑ pyëw dhɑnhø bënn. Cïb gïg-ɑ dwɑddí gwøgø bënn cingi Jwøng-ɑ Ácwɑ̈ɑ̈j, o ge bɑ møg-ɑ ómëgge yïn ceth! Jɑmmì bënn, dɑ gïjø mɑ pere ɑ́gwøøg gen yi Jwøng-ɑ Ácwɑ̈ɑ̈j, cɑgg ɑ́ tyëngrijjø, ge ɑ́gwøg kɑ per cyɑ̈ɑ̈ng cɑ́y. Tyëng-ɑ tɑ̈dø mɑɑn yi Jwøng-ɑ Ácwɑ̈ɑ̈j ki mendwøng, ge pɑ bødh ki cɑyø kinni tek. Yïëëy, kɑ yïëyí mïdhí, o orøgí lɑ̈ɑ̈ny yi Jwøk. Mïdhí Ciggi Jwøng-ɑ Ácwɑ̈ɑ̈j, o bëëd e bong gïnrɑj me nywɑl yïn. Kenyi med pyëw Jwøng-ɑ Ácwɑ̈ɑ̈j ki dhɑnhø, tyëngmɑ̈ɑ̈nø nyi wëgge’ mërø ki en. Lɑ̈w yodi gïn nøg ki bëëntir, kibøli kɑ̈r-ɑ yod ki ruj. Dhɑnhø nyi dwɑdd-ɑ gwøgi gïïpiny, den-ɑ́ møg-ɑ nyi yïëy yi Jwøng-ɑ Ácwɑ̈ɑ̈j ɑ nyi pɑ̈dhi kɑ̈jji gen. Rɑ̈dh 'kööb-ɑ tegø me kɑ̈ɑ̈l yï Jwøng-ɑ Ácwɑ̈ɑ̈j, bene ɑ bɑnge nyi kømme dyër. Jwøng-ɑ Ácwɑ̈ɑ̈j dwɑdd-ɑ kinni o gïg-ɑ nyi rum kì yij ngyew bëëd e bong wëënyø kì ri gen, mɑ́ ruj mɑɑn yi en. Rɑ̈dh pɑ nyi yïëy gwøg ki gïnrɑj, mɑ́ kwøme mïdh-ɑ yi gøggi dyër. Rɑ̈nhì nyi bëëd pëthi gen med ki tyëng-ɑ nyi kømmi dyër; ngɑn nyi kømmi dyër nyi bëëd pere teeg yi gen. Liny rɑ̈dh nyii kɑ̈nø ki thøø, de pyëwe nyii dwöögø yi ngɑn wïje pel. Tɑri bøli rɑ̈dh bɑ wëy, medi pyëwe nɑ kødh mel. Lɑ̈w-ɑ́ yodi peli wïj kibøli dhɑb kí ɑ́tegø. Ngɑntir, rɑj nyi këëje’ këëjø; ngɑn nenni yuue kidøøj, wëye nyi yiele yielø. Tɑ̈dø nyi kɑ̈ɑ̈l-ɑ rënyi dhɑnhø. Möölø lɑ̈w kibøli pɑ̈ggø ki jɑmm-ɑ kɑbbi yi tyëngɑthwøg. Ngɑn-ɑ nyi lïngi ciggi Jwøng-ɑ Ácwɑ̈ɑ̈j ódönyi, o ngɑn gɑ̈n Jwøng-ɑ Ácwɑ̈ɑ̈j ree dɑ gyëdh. Tyëng-ɑ wɑ̈thi gen pel nyi yod-ɑ ri kwøbbi gen, o keløg wïjí pel, kwøbbí oyïëyø yi ji. Peli wïj nɑ pï ɑ nyi mïdhi wëy, de dhëg nyi cɑ̈yy-ɑ nøgi wïje. Ngɑn wïje pel nyi kømm-ɑ gïjø me ngɑ̈nyi yi en, kɑ kwøbbe nyi yïëy. Kwøbb-ɑ døj med nɑ møøw kïc, pëthi tyëng-ɑ lïngi gen nyii mïnø, kɑ dëlli gen ótëngø. Dɑ yöö me nyi nenni yi dhɑnhø e døøj, de cöge bɑ thøø. Tyeri cɑm, dhɑnhø nyi cïrre’ gwøg, mɑ́ e dwɑdd-ɑ nɑ̈gi kɑ̈ny-ɑ ree. Ngɑnrɑj nyi rømm-ɑ gwøgi gïnrɑj, lebe lyel nɑ mɑc. Ngɑnrɑj nyi cwɑ̈ɑ̈g-ɑ ji, o ngeti ɑtum nyi dɑ̈ɑ̈ng-ɑ wɑdd. Jɑl-liny wɑɑd gen nyi thɑɑbe’ be gwøgi gïnrɑj, gø nyi peeje’ yuu-ɑ rɑj. Ngɑn nyi neggi nyinge, ɑ nyi kɑ̈ɑ̈j dhøge, nyi rømm-ɑ gwøgi gïnrɑj. Ngɑntir nyii yöø, kɑ wør kipe wɑ́r-ɑ wïje. Ngɑn pyëwe pɑ nyi jwɑn rënyø, lɑ̈w kibøli jöd me teg, o ngɑn nyi mɑg pyëwe, lɑ̈w kibøli ngɑn mɑg kɑɑl. Kenyi leeng wél, bɑ Jwøng-ɑ Ácwɑ̈ɑ̈j ɑ nyi kɑ̈bbi ki wëëlø. Gøl cɑɑm pï e yije bong køør, lɑ̈w kibøli gøl yije cɑɑm møw e dɑ ɑkørr. Bɑ̈ng-ɑ wïje pel, wɑ̈n-ɑ wïje nøg ójɑɑg yi en, kɑ ólɑ̈gø ki jɑmmi kɑl kyeel geki wɑ̈ddi gølɑni. Døøji pëthi ji nyii rɑngø yi Jwøng-ɑ Ácwɑ̈ɑ̈j, ni kenyi rɑɑng dhɑb kí ɑ́tegø ki mɑc. Ngɑnrɑj nyi tyer-ɑ lïngi kwøbb-ɑ rijjø, o ngeti pyed nyi tyer-ɑ lïngi kwøbbi pyed. Ngɑn benyi tyëng-ɑ ɑbuur, beny-ɑ Jwøk ngɑn-ɑ ɑ́cwɑ̈j gen, ngɑn pyëwe med ki ryɑ̈ng-ɑ pɑ̈dhi kömi wɑɑd gen, ócɑy yi Jwøk. Kwɑrr bɑ dhwɑ̈ng kì yï tyëng-ɑ ɑ́døngi, o othønhø nyii bëëdø ge tɑ̈dø kipe wëëg gen. Kwøbb-ɑ døj pɑ nyi kyëëw ki dhëg, ni jɑgø ɑ pɑ nyi kyëëw ki pyed. Ngɑn nyi kumø ki dhøggi ji, nyii rumø kinni menɑni bɑ wɑ̈lø me ree dönye. Ke lɑ̈ɑ̈m pyëwí ki wɑɑd wun, yï mïdh-ɑ mɑ̈ɑ̈dø, de ngɑn-ɑ nyi rïïjø e dwøngg-ɑ gïn-ɑ ɑ́bɑ̈jji, nyii mɑ̈nø ki wɑɑd gen. Ke cɑɑy dhɑnhø kɑ olïngø wïje nud, de cɑgg dhëg pwöd ki ɑlud miyø, pɑ dönyi. Ngɑnrɑj, ɑ bɑ ngeti pëëmø, köme nyii ödø ki ngɑn cɑyii. Rwöömø ki mɑɑdh ngur me nyige ókɑ̈ɑ̈lø, lɑ̈w kibøli dhëng-ɑ dwønggi yɑnggì. Ngɑn nyi col gwøng-ɑ døj ki rɑj, gøle pɑ wiy yi rɑj. Cɑ̈gi wëërø nyi nɑ pïg tin kì ri ótïngø, ke pɑ jwɑɑnii ki rïgø, piny omudø. Nyi mɑ̈ɑ̈g ri ki bodhø kɑ̈ng-ɑ nuti cɑ̈gi liny. Wiyi ngɑn-ɑ ɑ́bɑ̈jji e pɑ cɑy, geki cɑyi ngɑn nuti bɑ̈jjø, mɑɑn yi Jwøng-ɑ Ácwɑ̈ɑ̈j ryeet. Bong gïndøj me yod yi dhëg, ke cude ki ngyëny kipe kinni o dïde, mɑ́ pyëwe bong gøn. Mɑ̈dh, yï nyii mɑɑrø yi en yethi cyɑ̈ng, de ómyëw yï ókøny yi en kì cyɑ̈ɑ̈ng rɑj. Ngɑn-ɑ nyi kööbø, ce kwöör ngɑnpɑth ócole, ke pɑ cugge colø yi en wïje nøg. Ngɑn mɑɑr wëërø mɑɑr-ɑ orøg; ngɑn nyi pwöd kööre yɑ̈bb-ɑ ree ki ɑkørr. Ngɑn yije looj pɑ nyi dönyi, ngɑn nyi kømmi kwøb ki wëënyø, nyii yïddø ki ɑkørr. Jɑl yïe di wɑ̈d me wïje nøg, nyii yïddø ki rɑ̈ɑ̈m pyëw; pyëwe pɑ nyi bëëdø e med. Medi pyëw bɑ yɑdh me dönyi dëël dhɑnhø, de rumm-ɑ gïïr nyi rëny-ɑ dëël dhɑnhø. Jɑng-ɑ rɑj nyii yïëyø ki gïn-ɑ mëggii kì gød, kipe kinni o gøny rënye. Ngɑn wïje nud nyi tyer-ɑ yuu dïdø, de dhëg nyi wɑ̈dh-ɑ thɑ̈mmø yøw. Wɑ̈n-ɑ wïje nøg wïye nyii thödhø yi en ki rɑ̈ɑ̈m pyëw me dwøng. Cɑyi ngɑn yïe bɑ̈r geki ngɑndøj rɑj, o bɑ bɑ̈jjø. Ngɑn dïdø, o wïje pel nyi kööbø e orumø, o pɑ nyi jwɑn ki mɑgø yi liny. Cɑgg ɑ́ men-ɑ́ dhëg, nyii rømmø ɑ́ ngɑn wïje pel, ke bëëde e okudø. Ngɑnrɑj nyi wɑ̈dh-ɑ rengø, e bong ngɑn cyeddii, de ngɑntir nyi cungi kì keje, e nɑ ngur ɑ pɑ nyi rengi. Ngɑn wïje nøg bong dïdø me dwɑdde, de nyi dwɑdd-ɑ kinni o kwøbbe lïngi ɑ́ gen. Keløg yï nyi gøgg-ɑ rɑj, yï pɑ wør yi ji, yï óyɑnyyi kɑ yï oyɑ̈rø. Kwøbbi peli wïj møg-ɑ kɑ̈ɑ̈l dhø dhɑnhø, døøj nɑ yiinh pïge nyi muuj wëy. Cwɑgi ngɑnrɑj geki ruji ngɑntir, rɑɑj. Leeb dhëg nyi muuj-ɑ en ki göj, kɑ pwöd ki gööj lebe. Dhëg nyi rëny-ɑ yi lebe, dhøge bɑ ɑ́kɑ̈llì møg mɑgii. Möngi ngeti ɑtum, mɑɑr nɑ gïncɑm me med. Ngɑn nyi wøy gwøg, pɑ̈r ki ngɑn nyi rënyi gwøg. Jwøng-ɑ Ácwɑ̈ɑ̈j nɑ ønbɑ̈r, men-ɑ yije nyi yömmi yi tyëngtir. Tyëngkɑ̈rì nyii rumø ce ge okorrø yi kɑ̈rri gen, ni kenyi korri kɑɑl yi dör-ɑ teg men-ɑ ówenii. Ngɑn tɑ̈dø órënyi, de mölø ówør. Ngɑn nyi löggi tyelli kwøb nuti yood en, bɑ dhëg, o nyii yɑ̈rø. Ngɑn dële rɑ̈mø ke rumme kinni óbødh, dële ceg-ɑ yönø, de bong gïn yiel kì ri ngɑn yïe bong ngɑ̈ɑ̈dhø. Tyëng-ɑ wɑ̈thi gen pel nyi mɑɑr-ɑ dïdø; o kwøbbi ngɑ̈nyi wøw per gen teeg. Gïn-ɑ nyi muuj yi dhɑnhø nyi yieb-ɑ yuue, kɑ nyi wɑ̈dh-ɑ bøli tyëngdøngø. Ngɑn nyi kwöngi ki gøny kì burø, nyi nënni kwøbbe nɑ dyër, gïti keny-ɑ ócɑ̈gi ngɑn-ɑ gööny gen ki pyënyii. Kenyi dhɑ̈li gøny kì burø, nyi yiel kɑ lɑm. Kenyi cɑɑg wɑd piny, døøg kej ɑ́kyel nyi bëëd e teeg, ni kedhi be nyɑɑg ki kɑɑl me thøø yi gerø ki dörø me teg. Dhɑnhø nyii yïddø ki köögi kì bɑng lebe. Leb ócuggø kɑ̈nø ki wëy, o ócuggø kɑ̈nø ki thøø, de lɑ̈w kori dhɑnhø lebe. Jɑl-ɑ ɑ́yïddi ki dhɑjø me nywøm yi en, ɑ́gyëdh yi Jwøng-ɑ Ácwɑ̈ɑ̈j, mɑ́ dhɑjø døøj. Ngɑn wɑnge cɑn kwɑjj-ɑ lɑ̈mpyëw, de ngɑn kɑ̈rø kööbø e tɑ̈dø. Ngɑn mɑ̈dhhe gïïr nyii rënyø, de dɑ mɑ̈dh me pëddi mɑɑri yïn kibøli ómyëw. Lɑ̈w dhɑnhø me jɑdø e köme bong cɑ́y kibøli dhëng-ɑ kømmi pyed. Bëëdi dhɑnhø e nuti dïdø rɑɑj, o ngɑn nyi pɑ̈rri kì kömi kwøb nyii bɑ̈jjø. Dhɑnhø kenyi rënyii yi dhëëgø, nyi yöd e mɑg yi liny kɑ Jwøng-ɑ Ácwɑ̈ɑ̈j. Kɑ̈r nyii kɑ̈nø ki mɑ̈dhh mø ngenyø, de kenyi jɑd dhɑnhø, nyi wiy-ɑ piny yi mɑ̈dhhe. Ngɑn nyi kømmi pyed kì burø, pɑ nyi bødh ki cɑyø. Ji mø gïïr nyi kwɑjj-ɑ ri gen kì ri jɑgø, ji bënn bɑ mɑ̈dhh ki ngɑn nyi muujø. Ngɑn jɑdø bɑny yi wɑdde bënn, o nyi døøg-ɑ be këëjø yi mɑ̈dhhe, cɑgg gï kwɑjje, gï pɑ yode. Ngɑn mɑɑr peli wïj geki dïdø mɑɑr-ɑ ree, o ódönyi. Ngɑn nyi kømmi pyed kì burø, pɑ nyi kedh e nuti cɑyø, ngɑn ni menɑni óthøw. Bëëdi bɑ̈ng ɑ́ jɑngi nyiirɑ̈dh rɑɑj, nɑ bëëdi ngɑn wïje nøg e kɑ̈rø. Ngɑn wïje pel, pyëwe nyii mɑgø yi en, o ngɑn-ɑ pyëwe nyi lɑ̈ɑ̈m ki ngɑn-ɑ ɑ́göggii ki rɑj, nyii lenhø. Jɑwwi rɑ̈dh nɑ ngɑ̈ɑ̈ri ngur, de medi pyëwe nɑ thöjj kì ri lum. Wɑ̈n-ɑ dhëg wïye nyi rënye’ rënyø, o dhɑjø men-ɑ bɑ nyɑdhey køør nɑ pï mø kyër, kinni twɑg, twɑg, twɑg. Ud geki ngyëny nyii lɑgø kì yï wëëg geki mëëg, de dhɑjø men-ɑ wïje pel nyi muuj-ɑ yi Jwøng-ɑ Ácwɑ̈ɑ̈j. Ledhi dël ki gwøg nyi kɑ̈ɑ̈l-ɑ nenø, o nenø nyi kɑ̈ɑ̈l-ɑ kɑ̈j. Ngɑn mïdhi Ciggi Jwøng-ɑ Ácwɑ̈ɑ̈j mïdh-ɑ wëye, de ngɑn bɑny ciggɑni óthøw. Ngɑn nyi thödhi tyëng-ɑ jɑdø thödh-ɑ Jwøk, o ókøøg yi Jwøk ceth kipe gïn-ɑ ɑ́gwøge. Ceg wɑ̈dí kɑ̈ng-ɑ nudd e thiinh, ke pɑ cegií, ceg yi yïn kɑ nyïɑ̈ɑ̈gø. Wiy ngeti liny nyi yode cɑ́ye, mɑ́ cɑgg e køny yi yïn, nyii døøgø ki kɑ̈nø ki liny megø. Keløg yï oyïëyø ki tyenyø geki pwönyø, wïjí ópïllø. Gïg-ɑ nyi dwɑddi gwøgø yi dhɑnhø gïïr, den-ɑ́ møg-ɑ dwɑddi yi Jwøng-ɑ Ácwɑ̈ɑ̈j ɑ nyi pɑ̈dhi. Gïn-ɑ pere teg bɑ kømmi dyër, ngɑn wɑnge cɑn lɑ̈w kibøli ngetikɑ̈r me nyi kømmi pyed. Mïdhí Ciggi Jwøng-ɑ Ácwɑ̈ɑ̈j, o runní óngënyi gen kì kömi piny, o yï bëëd pyëwí pɑ lïngø, o bëëd e bong gïnrɑj me nywɑl yïn. Rɑnyø cinge ɑ́cïbe yij tɑbø, de ɑ́dhɑl yi tïngii dhøge. Gøj ngetigɑg, o ngɑn bong pyëwe dïde. Keløg wïjí pel, yï ódïd keny-ɑ ótyeeny yïn. Ngɑn bëëde rɑɑj ki wïye, kɑ meye cyedde, bɑ ngɑn yɑ̈rø kì bøli teedø. Wɑ̈dɑ, keløg yï óbɑ̈nyi tyenyø, yï ówɑ̈ɑ̈ny ki yuu peli wïj. Ngɑn nyi kømmi pyed kì burø, gwɑdd-ɑ tyëng-ɑ gøggi dyër, tyëngrijjø pëthi gen nyi med kɑ tyëng-ɑ gøggi rɑj. Jøgɑg ócɑy, o dhëg ópwöd. Nɑ̈gø yi møgø nyi wëgg-ɑ dhɑnhø ngedhø ni dhëg, ngɑn nɑ̈g yi møgø wïje nøg. Jɑwwi rɑ̈dh nɑ ngɑ̈ɑ̈ri ngur, ngɑn wëggi pyëwe rënyø muuj-ɑ wëye. Lɑ̈ɑ̈wi dhɑnhø ree ki kej liny bɑ dhwɑ̈ng, de dhëg nyi mɑɑr-ɑ liny. Rɑnyø pwödhe nuti puur en kì cwir, keny-ɑ ɑ́bëën kɑji byel, bong gïjø mɑ ɑ́yode. Rumm-ɑ pyëw dhɑnhø yodi gen teeg, de ge ócuggø kɑ̈ɑ̈l wɑ̈g yi ngɑn wïje pel. Ji mø gïïr rømmi ri gen ce ge nyi kømm-ɑ dyër, dɑ́ men ɑ óyod ngɑn nyi kømmi dyër ceth? Ngɑntir, ɑ bëëdø ki bëëndøj, wɑ̈dde ógyëdh kì bɑnge. Rɑ̈dh tyelli kwøb nyii tidø yi en kidøøj, kɑ dyër dɑ̈ɑ̈nge ki pyed, ni kenyi dɑ̈ɑ̈ng byel ki cong. Á men ɑ cuggi thwøgø kinni, “Yijɑ bong orøg?” Tyëng-ɑ nyi gwëmø, ɑ nyi wil rumi mɑɑn yi Jwøng-ɑ Ácwɑ̈ɑ̈j. Cɑgg ɑ́ men-ɑ́ othinh, bëëde nyi yod-ɑ ri gïg-ɑ gøgge, ying e døøj o ngɑ̈ny bëëdø. Wɑ ɑ́thödhi yi Jwøng-ɑ Ácwɑ̈ɑ̈j ki yïthh gɑ møg lïng, kí nying gɑ møg nëën. Yï ko mɑɑr nenø kipe yï ójɑd, bëëd yï ogöögø, gïncɑm ótwɑ̈li kì yïí. Ngɑn dwɑddi ngewi gïïpiny nyi kømm-ɑ kinni, “Gïn-ɑni rɑɑj!” De kenyi rume ki ngewe, nyi kedh e pwöd-ɑ kööre. Ngɑ̈nyi kwøb lɑ̈w kibøli dhɑb ki ɑ́tegø. Wïjí nøg keløg yï oyïëyø kinni wïdhi ngɑnpɑth, mɑ́ yïn ɑ ódöng ki kwörɑni. Gïn-ɑ yod yi dhɑnhø ki wëënyø omedø, de kì cyɑ̈n ree nyi løge’ ɑyejø kì dhøge. Lïngí cïïjø men-ɑ cïïj yïn, yï nuti kedhi kej liny, o yï ótyɑ̈ɑ̈m. Ngeti ɑtum pɑ nyi mïdhi ki kwøb kì pyëwe, këjjí tyënglwɑ̈y. Ngɑn gwɑddi wïye kí meye, óthøw ni lɑ̈mbɑ̈ kì yij muudhø. Kɑ̈r-ɑ nyi wɑ̈dhi ki yodø yøw, bɑnge dɑ cyën. Yï ko nyi kööb kinni, “Kejɑ ócol yi yɑn.” De gɑ̈nní Jwøng-ɑ Ácwɑ̈ɑ̈j; møgɑni ólidh-ɑ yi en. Gwem geki gïg-ɑ nyi rum ge pɑth ki dyër, mɑɑn yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j, ɑ ɑ́cïb gïg-ɑ göögø bënn kipe dhɑnhø, de yuu dhɑnhø óyod yi en kete kidï? Rum kidøøj, yï nuti köngø kinni, “Gïn-ɑni ómëggɑ Jwøk” kipe yï ópɑ̈di kì cyɑ̈n. Rɑ̈nh wïje pel, tyëngrijjø nyi gweene’ wɑ̈yi gen, kɑ gï nyi cɑye pyëwe pɑ lɑ̈ɑ̈m. Gïg-ɑ yij dhɑnhø bënn, nyii menyø yi cɑɑr Jwøng-ɑ Ácwɑ̈ɑ̈j. Rɑ̈nh-ɑ jyɑ̈gø yije bong ɑ́dud, o gøgg-ɑ dyër e pɑ gënyø, nyii jyɑ̈gø ki keny me bɑ̈ɑ̈r. Dhwɑ̈ɑ̈ng wøbb bɑ tegi gen, o dhwɑ̈ɑ̈ng tyëngdøngø bɑ wɑ́ri wɑ̈thi gen. Pwödi dhɑnhø tyel møøgø, nyi wëgg-ɑ en wili bëëde. Pyëw rɑ̈dh ying-ɑ cingi Jwøng-ɑ Ácwɑ̈ɑ̈j, gø nyi løge’ løgø ni wøøl pï ɑ nyi koony tung-ɑ dwɑddii yi dhɑnhø. Gïg-ɑ gøggi yi dhɑnhø nyi nenne gï døøj, de bɑ Jwøng-ɑ Ácwɑ̈ɑ̈j ɑ ngɑ̈nyi gïg-ɑ pyëw dhɑnhø bënn. Gøggi dyër geki kømmi dyër døøj kì yï Jwøng-ɑ Ácwɑ̈ɑ̈j kibøli gëdhhì. Bëëdi tɑ̈dø geki ɑthwøg ɑ nyi tyer yi tyëngrijjø, o bɑ orøg. Ngeti tïj gwøge nyi gwire gwirø, kɑ óyïddø ki gïndøj, de ngeti otwɑ̈l pɑ nyi cwööng ki jɑdø. Kɑ̈r-ɑ nyi yod ki wëënyø, nyi jwɑn-ɑ lɑ̈ɑ̈nyø ni por, o bɑ ɑ́kɑ̈lli thøø. Tyëngrijjø møg-ɑ nyi göggi ji møøgø ki rɑj órënyi, mɑ́ ge bɑ̈nyi ki gøggi gïg-ɑ bɑ dyër. Ngɑnrɑj nyi gøgg-ɑ rɑj ceth, de ngɑntir nyi gøgg-ɑ dyër. Lɑ̈w bëëdí kì ød me dhing yï nuti nyömø, kibøli bëëdí kì kɑl me lɑɑj wuki cyëgí mɑ nyɑdhey køør. Ngɑnrɑj nyi tyer-ɑ gøggi rɑj, pyëwe pɑ nyi lɑ̈ɑ̈m ki wɑɑd gen. Gøj ngetigɑg, o ngɑn bong pyëwe dïde, keløg wïjí pel, yï ódïd keny-ɑ ótyeeny yïn. Kɑ̈lli tyëngrijjø órënyi, ge onennø yi tyëngdøj. Ngɑn pɑ nyi lïngi ywøøg ngɑn jɑdø, bong ngɑn-ɑ ólïngi cwɑgge keny-ɑ ólunye ki ywøg. Liny nyii kwööjø yi gïn-ɑ muuj kì gød. Kenyi gwøøg dyër, tyëngtir pëthi gen nyii mïnø, de tyëngrijjø nyi ceg-ɑ bwøgø. Ngɑn bɑny yuu dïdø, yɑb-ɑ thøwe. Ngɑn-ɑ nyi mɑɑr cɑm ki gïg med, wɑnge nyii cɑ̈nnø; o ngɑn nyi mɑɑr mɑdh ki møgø pɑ nyi kɑ̈ri kinni tek. Tyëngrijjø ógøøm bøli tyëngtir. Lɑ̈w bëëdí kì pɑ̈l yï nuti nyömø, kibøli bëëdø kì kɑl ki nyɑdhey køør. Ngɑn wïje pel jɑmme nyi mïdhe’ mïdhø kidøøj, de dhëg jɑmme nyi wɑ̈dhe’ tugø yøw. Ngɑn nyi mïdhi bëëntir geki bëëndøj, nyii yïddø ki nënnì, kí dhwɑ̈ng geki døøjø. Jɑl-ɑ wïje pel, kɑɑl jödd me thøø yi gerø nyi tyɑme tyɑmø. Ngɑn nyi kor lebe, kor-ɑ ree ki ɑkørr. Ngɑn nyi tïng ree mɑl, nyi cwøl ɑ́ ngeti ɑthwøg. Rɑnyø ónɑ̈g yi rɑ̈jø, mɑ́ e bɑ̈nyi ki gwøg. Tyëngrijjø nyi rïïj ge rum ɑ ri gïg-ɑ kønø kì pëthi gen, de ngɑntir nyi wɑ̈dh-ɑ muujø e pɑ kyëdø. Gënh-ɑ muuj yi ngɑnrɑj mɑɑn yi Jwøng-ɑ Ácwɑ̈ɑ̈j ki mendwøng, de bëëd ɑ dï keny-ɑ ómuuje gøn ki rummì mø rijjø kì pyëwe? Ngɑn nyi kømmi pyed kì burø óthøw, de ngɑn nyi lïngi thɑ́ kwøb kidøøj, ócuggø kwøb. Ngɑnrɑj nyi wëny-ɑ ji cem e døøj, de ngɑntir nyi ceg-ɑ rumø kidøøj kì ri gïn-ɑ dwɑdde gwøgø. Bong peli wïj, bong dïdø, wɑlɑ̀ cɑgg dhɑnhø køny ki rummì yi tyëngmøøgø, Jwøng-ɑ Ácwɑ̈ɑ̈j pɑ tyɑm yi en. Kyënyì ogwirø kipe liny, de tyɑ̈ɑ̈mø muuj-ɑ yi Jwøng-ɑ Ácwɑ̈ɑ̈j. Bëëdi dhɑnhø keje nud, e owørø, lɑ̈w kibøli kɑ̈r, kí dhɑb kí ɑ́tegø. Abuur geki tyëngkɑ̈rì bɑ ɑ́kyel, ge ɑ́cwɑ̈j-ɑ yi Jwøng-ɑ Ácwɑ̈ɑ̈j ge bënn. Ngɑn wïje nud, ɑkørr nyi këëje’ këëjø; de dhëg nyi wɑ̈dh-ɑ pödhi mɑc. Ngɑn-ɑ bɑ mölø, ɑ nyi böggi Jwøng-ɑ Ácwɑ̈ɑ̈j, óyïddi ki nënnì, kí dhwɑ̈ng geki kɑ̈r. Yuu tyëngrijjø pɑ̈ng yi koodh geki ɑ́kɑ̈llì, ngɑn kor wëye pɑ nyi kɑ̈lli yije. Pwönyí othønhø ki bëëndøj, bëënɑni koo wiy yi gen keny-ɑ ódøngi gen. Ngetikɑ̈r bɑ jɑngi ngɑn jɑdø; o ngɑn widh gïïpiny, bɑ bɑ̈ng ngɑn-ɑ ɑ́wïdhii. Ngɑn nyi gøggi gïgrijjø, óyïddi ki ɑkørr, tege ólɑ̈ɑ̈ny. Ngɑn nyi thödhi ngɑn jɑdø, ógyëdh yi Jwøk, kipe kɑ̀ nywɑ̈ge ki tyëng-ɑ jɑdø. Ryem ngetigɑg, o bëëd e bong yɑ̈d kí wëërø geki liny. Tyëng-ɑ pëthi gen tɑr, ɑ nyi kømmi kwøbb-ɑ døj, gen ɑ nyi kwɑny yi rɑ̈dh gɑ mɑ̈dhhe. Kwøbb-ɑ dyër nyi mïdhi yi Jwøng-ɑ Ácwɑ̈ɑ̈j, kɑ bɑnyi kwøbbi tyëngpyed. Tyëng-ɑ bɑ rɑj nyi rïïj ɑ pɑc, ge okööbø kinni ce ge ócɑm yi ngur keløg ge ókedhi wɑg. Medi dhøg ɑ́dheycwøw, nɑ bur me ludhø, jɑl-ɑ pyëw Jwøng-ɑ Ácwɑ̈ɑ̈j rɑj ki en, ɑ nyi pɑ̈dhi yije. Othinh nyi røngø pyëwe tøøk, de pyëwe nyi dwöög-ɑ yi thyɑng-ɑ cegii. Ngɑn nyi ruj tyëng-ɑ nyingi gen cɑn kipe kinni o kɑ̈re ngënye, wɑlɑ̀ ngɑn nyi thödhi tyëngkɑ̈rì, wɑnge ócɑ̈nni. Kyën yïthhí, kɑ kwøbbi tyëng-ɑ wɑ̈thi gen pel tií ki lïngø. Pyëwí ómïni keny-ɑ óyood gen kɑ ge nyi kømmí, kwøbbɑni ɑ́nyudhɑ yïn, kɑ per kinni o yï óngɑ̈dh Jwøng-ɑ Ácwɑ̈ɑ̈j. Yï ɑ́gwëdɑ ki kwøbbi peli wïj gɑ pyɑ̈r ɑ́dɑ̈g, o yï dïd ki dyër geki gïgdøj. Kipe kinni o yï nyudhɑ ki gïn-ɑ bɑ dyër, o ngɑn-ɑ nyi ör yïn nyi döggí kwøb mø bɑ dyër ceth. Jɑmmi ɑbuur ko nyi kɑɑb, kipe kɑ̀ nyødh gen, kɑ ngɑn jɑdø ko nyøøn. Ge ócwɑg yi Jwøng-ɑ Ácwɑ̈ɑ̈j, kɑ jɑmmí kɑbe kì yïí. Yï ko nyi 'lwööb ki ngɑn pyëwe keej, wɑlɑ̀ yï ko nyi cyɑ̈dhi ki ngɑn nyi jwɑn ki mɑgø yi liny, kipe yï ódïd ki bëëde, kɑ yï óyïddø ki göj. Yï ko köngi kinni kwöör ngɑn megø ócol yi yïn, mɑ́ keløg yï pɑ cuggi col, cɑgg ɑ́ men-ɑ́ pyëní bɑ men kwɑny. Kew-ɑ ɑ́cïb yi kweyí cøn ko cɑɑg kì keje. Nyudhí yɑn ki ngɑn göögø ki gwøg me døøj, yï ónyudhɑ ki ngɑn me døøj kibøli ji mø gïïr; ngɑn me myëër ki bëëdø kì kelli rɑ̈nhì. Keny-ɑ óryeej yïn yi jɑgø, wïjí ko wïl ki ngɑn-ɑ bøle di yïn. Pyëwí ko døngi ki gïgcɑmme møg-ɑ med, kipe óbëëd e thɑb-ɑ yïn mɑwɑnø. Rií ko pïd ki yɑbi kɑ̈rø; mɑg pyëwí, mɑ́ ngyëny nyi jwɑn-ɑ lɑ̈ɑ̈nyø; obërri gen nyi jwɑn-ɑ twïyø, kɑ ge opɑ̈ɑ̈rø ni cor. Yï ko cyɑ̈ɑ̈m ki gïncɑɑm kenyø, pyëwí ko køni ki gïgcɑmme, cɑgg ge med. Cɑgg yï köbbe kinni, “Cyɑ̈ɑ̈m! Mɑ̈ɑ̈dh!” Kwøbbɑni pɑ kɑ̈ɑ̈l pyëwe, mɑ́ e bɑ ngɑn nyi kwɑnni jɑmme, o rømm-ɑ pere kete. Keløg yï ocyɑ̈mø, yï ópɑ̈dø yi kwøbbe, kɑ pyëwí tyer-ɑ ngöögi gïncɑmɑni wɑ̈g. Dhëg pɑ nyi yïëy ki kwøbbi peli wïj, rií ko pïd ki kwøb ki en. Kew ko cɑɑg, wɑlɑ̀ pwödhi kïj ko kɑɑb. Mɑ́ kïj ócwɑg yi Jwøk, o Jwøk teg. Cïb Ciggi Jwøk pyëwí, kɑ yï dïd ki bëëndøj. Othinh ko böggí ki gøjø, mɑ́ ke gøøjií ki thyɑngø, pɑ thøw, pwöde ki thyɑngø bɑ yieli wëye. Wɑ̈dɑ, keløg wïjí pel, pyëwɑ óbëëd e med, pyëwɑ ómïni keny-ɑ ólïngɑ yïn, yï kømm-ɑ kwøbbi peli wïj. Tyëngorøg ko mood, de nyi böggi Jwøng-ɑ Ácwɑ̈ɑ̈j ceth, mɑ́ yï óyïddi ki köögi dhuki megø, o ngɑ̈ɑ̈dhø mií pɑ gɑ̈g. Lïng wɑ̈dɑ, bëëd wïjí pel, kɑ yï bëëd ki bëëndøj. Yï ko nyi 'lwööb ki tyëngmɑdh ki møgø geki rɑj, kí cɑ̈mmì. Mɑ́ tyëngmøgø geki cɑ̈mmì nyingi gen nyii cɑ̈nnø. Keløg yï pëgg-ɑ be cɑm yøw, o yï nyi buddí, wɑngí ceg-ɑ cɑ̈nnø, kɑ yï døøg-ɑ be rug ki kwɑ̈llì. Lïngí kwøbbi wïyí ngɑn-ɑ ɑ́nywøl yïn, kɑ meyí ko byeeny keny-ɑ óyöe. Ngew dyër geki peli wïj, kɑ ge mïdhí, ge ko ngeew wɑ̈g kinni tek. Jɑl yïe di wɑ̈d me tir, nyii yïddø ki medi pyëw me dwøng; ngɑn yïe di wɑ̈d me wïje pel, pyëwe med. Bëëd yï tir o pyëw wïyí geki meyí bëëd ge med. Wiy meyí ngɑn-ɑ ɑ́nywøl yïn bëëde ki medi pyëw. Wɑ̈dɑ, tií kwøbbɑ ki lïngø, kɑ yï bëëd ki bëëdɑ. Mɑ́ ngɑndhɑjø men-ɑ nyi niin ki köögi geki cï jɑlø men-ɑ nyi yɑ̈bø ki cwøw møøgø, ge nɑ bur me ludhø. Ge nyi ceg-ɑ lïïbø ki ji ni kur, ɑ nyi röödhø kì yöö, cwøw mø gïïr ɑ́rënyi yi gen. Á men ɑ ɑkørre pɑ thumi? Á men ɑ ying yij orɑng? Á men ɑ nyi yɑ̈bø ki liny? Á men ɑ nyi rïïjø e ogönyø? Á men ɑ nyi wɑ̈dhi yïddø ki kedd? Á men ɑ nyinge kwɑɑr? Tyëng-ɑ nyi rïïjø kì kömi møgø, geki tyëng-ɑ nyi rïbø ki muggì, bɑ gen ɑ nyi bëëdø kinøw. Yï ko dir yi møgø kɑ̀ bëëde wïje pɑ̈ng yi óböy, kí kɑ̀ kɑ̈ɑ̈le yethi cwɑggí e yööm, kì cyɑ̈n, nɑ̈gi møgø nyi nɑ kɑ̈ji thwöl. Gïg møøgø nyii nënnø kì yethi nyingí, kɑ yï døøg-ɑ be dhyɑ̈mø, kɑ̀ buddí kì yij pyëní, pyën lëgg-ɑ ree ni yɑ̈y me lëggi yi ɑpɑgø. Kɑ yï okööbø kinni, “Yɑ ócɑɑg kɑ pwödø mɑwɑnø, de wïjɑ cɑɑg-ɑ wïlø. Yɑde ɑ dhɑ̈lɑ ki dhwödhi mɑl? Yɑ døøg-ɑ be mɑ̈dhø.” Tyëngrijjø ko mood, yï ko tyer bëëdø kì kelli gen, mɑ́ pëthi gen nyi rømm-ɑ gwøgi gïnrɑj, o ge nyi kømm-ɑ kwøb mø nyi kɑ̈ni ki ɑkørr. Kɑl nyi ger kɑ peli wïj, o nyi mïdhi kɑ dïdø. Ød nyi pɑ̈ng-ɑ yi dïdø ki kɑ̈r geki jɑmm-ɑ per gen teg. Peli wïj lɑ̈w kibøli tegø. Jɑl wïje pel o teeg lɑ̈w, kibøli jɑl-ɑ wɑ̈dhi bëëdø e teeg. Liny nyi nyɑg kɑ rummì, o ngenyi tyëng-ɑ cïjø nyii kɑ̈nø ki tyɑ̈mø. Peli wïj pɑ cuggi yodø yi dhëg, o dhëg pɑ nyi löggi kì dïpɑc. Ngɑn nyi rømmi gøggi rɑj, nyi cwøl ɑ́ ngetigöj. Dhëgg nyi rømm-ɑ gøggi rɑj ceth, o jøgɑg mɑɑn yi ji. Keløg pyëwí wëggí nyönhø kì cyɑ̈ɑ̈ng rɑj, yï nyøødh kidyër. Yiel ji-ɑ kïdhi be nɑ̈gø e bong gïn bɑɑj gen. Ge ko wëggí nɑ̈gø. Keløg yï okööbø kinni, “Gïn-ɑni ɑ́bëëd e kwïj yi yɑn.” Møgɑni ódi bëëdø ge kwïj yi Jwøk, ngɑn-ɑ nyi nenni gïg-ɑ yethi pëëth, ɑ mïdhi wëy, ɑ nyi cɑy dhɑnhø kipe gïn-ɑ ɑ́bɑje? Wɑ̈dɑ cyɑ̈ɑ̈m ki møøw kïc mɑ́ e døøj. Møw-ɑ dyëm kì ri ɑdhudhhi kïc med kì dhøgí, o peli wïj nɑ menɑni kiperí; ke yodií, ngɑ̈ɑ̈dhø mií pɑ lɑ̈ɑ̈ny; yod peli wïj, yï óyïddi ki gïgdøj. Yï ko bëëd ni ngɑnrɑj men-ɑ nyi dwɑddi rënyi gøl ngɑntir, mɑ́ ngɑntir cɑgg e pɑ̈ɑ̈dh ki tyel mø gïïr, nyi dhwödh-ɑ mɑl, de tyëngrijjø nyii tyɑmø yi ɑkørr. Pyëwí ko nyi mïni, kenyi pɑ̈dhi ngetimɑ̈ɑ̈nø yethi rɑj, kipe medi pyëwí ólidh yi Jwøng-ɑ Ácwɑ̈ɑ̈j, kɑ pyëwe órënyø yi møgɑni, kɑ ngɑnɑni wiye gø pɑ cɑye. Pyëwí ko wëggí døngø kipe jɑmmi tyëngrijjø, kɑ ge ko mood, mɑ́ e bong gïndøj men-ɑ óyod yi gen dhuki megø, o mɑɑc gen óthøw. Wɑ̈dɑ, böggí Jwøng-ɑ Ácwɑ̈ɑ̈j kɑ rɑ̈dh wøør, kɑ yï ko rëbi ki tyëngpëëmø, Ji-ɑ ni møgɑni pɑ nyi cwööng ki rënyø, ɑ́ men ɑ ngɑ̈nyi ryɑ̈ng-ɑ cuggi kɑ̈ɑ̈lø yi rɑ̈dh wɑlɑ̀ yi Jwøng-ɑ Ácwɑ̈ɑ̈j? Møg thyew bɑ kwøbbi tyëng-ɑ wɑ̈thi gen pel. Jɑngi burø pɑ døøj ki geny. Jɑng-ɑ köbbi ngɑn bɑ̈jjø kinni, “Yïí bɑ̈r,” ólɑ̈mmi cyën yi teedø, kɑ mɑɑn yi pödhø bëne. De tyëng-ɑ nyi cɑy ngɑn bɑ̈jjø ri gen dɑ gyëdh mø døngø. Mɑ̈nh-ɑ dyër nyi löggi yije bong ɑ́dud. Ngud ki pwödhø kɑ gweej møti. Orume kɑ yï gëëd ki ød cyee. Wɑɑd wun ko wɑ̈dhi ki gøønyø e bong gïn rëny en, burø ko wëëny. Yï ko nyi kööb kinni, “Ngeti göggɑ’ gïnrɑj ni men-ɑ ɑ́gögge yɑn.” Yɑ ɑ́kɑ̈l buti bɑg geki pwödhi rɑnyø me pyëwe nøg, bɑge bɑ koodhø kete, o pwödhe bɑ lum yøw. O döri kït men-ɑ ógeer bɑge rum pɑ̈ɑ̈dhø. Pyëwɑ ɑ́cïbɑ ri møg-ɑ ɑ́lidhɑ, ɑdïdɑ kì ri gen kinni, nwɑyyí kɑ yï není ki nyɑ keny me thiinh; bøødh cinggí rií kɑ yï kɑl ywömø, de kɑ̈ng-ɑ óbëëd yï ceg-ɑ nenø, cɑni wɑng geki jɑdø pɑ̈ɑ̈r-ɑ kömí, ni ngeti kɑ̈b. Møg thyew bɑ kwï gɑ́ji Sølømøn, møg-ɑ ɑ́kwɑny kì ri gɑ́ji tyeli mɑl. Ge ɑ́gwed-ɑ yi jø tøg buri Kedhekiyɑ̀, rɑ̈ɑ̈dh Yeudiyɑ̀. Jwøk nyi wør-ɑ kenyi mïdhe møg-ɑ ɑ́kɑnn, o rɑ̈nhì nyi wør-ɑ kenyi yod gen møg-ɑ ɑ́kɑnn. Rummi rɑ̈dh pɑ yod, ge nɑ mɑl kí piny, ɑ cögi gen pɑ pïïd. Kɑ̈ɑ̈l gïgrijjø wɑ̈g kì ri ɑ́tegø, o bødhø cugge gwøg ki gïjø me myëër. Kɑ̈ɑ̈l tyëngrijjø wɑ̈g kì buri rɑ̈dh, o lɑwø mølle. Rií ko tïng mɑl kì buti rɑ̈dh; rií ko riij kelli tyëngdøngø. Lɑ̈w keløg ɑ́ ngɑndwøng ɑ köbbi yïn kinni “Bïí butɑ keny,” kibøli ke di yɑ̈ɑ̈r kì bøli teedø. Yï ko jwɑni be gøny kipe gïn-ɑ lidh yi yïn ki wɑngí! Yï koo yɑ̈r keny-ɑ ónyoodh tyelli kwøb? Ke di yï wun gøny wuki wɑɑd wun, kømmu gen wu bɑ ɑ́ryew, kɑ ko di ngɑn megø me köbbí møg-ɑ ɑkɑnn, kipe yï óyɑ̈r yi ngɑn-ɑ ɑ́köbbi yi yïn, kɑ yï gwøøge ngeti ɑtum. Kwøbb-ɑ nyi cïb kɑ̈jji gen myëër, nɑ ɑywɑg kenyi pɑ̈dhe ki böltøng. Lïngi kwøbb-ɑ tyeeny dhɑnhø yi ngɑn wïje pel, pere teeg nɑ gweli yïth mɑ dhɑb. Ngɑn nyi kɑ̈lli wöön-ɑ dyër, pyëw ngɑn-ɑ ɑ́örii nyii kwöjø kì bɑnge, ni kenyi kwööj pyëw yi mɑdhi pïg ngij kì yij lëdhi piny. Pøøl geki yømø men-ɑ pɑ nyi kɑ̈ni ki kødh, pɑ̈r ki ngɑn nyi thwøg kinni, ómuujø ki gïïpiny, e gø koo muuje. Lem-ɑ yöm nyi tor-ɑ cögø, o jɑgø nyii nyøgø yi dhøng-ɑ med. Ke yood møøw kïc, cɑm men-ɑ cuggi cɑmø yi yïn, mɑ́ ke yɑ̈ɑ̈ng rií, bɑ men ngöög wɑ̈g. Yï ko nyi rïïj yï ócyɑ̈dhø kì gøl wɑɑd wun, kipe ge óngïr yi wɑ̈ɑ̈dhí, kɑ yï mɑɑn yi gen. Ngɑn gøøny wɑɑd gen e bong gïn rëny en, bɑ nɑ̈ɑ̈g ni lodh ólelø, o nɑ pilø, wɑlɑ̀ weth. Ngɑ̈dhi ngɑn pɑ nyi cungi kì kömi dhøge kenyi bëën ɑkørr, nɑ ke nyɑ̈ɑ̈m dhɑnhø ki lëjø me ledh, o nɑ cyɑ̈dhø ki tyelø me torø. Ngɑn wör kì buti ngɑn kïïmø, nɑ ngɑn kɑ̈l ógødh dhɑnhø e yømø lïb, wɑlɑ̀ nɑ ngɑn kïdhi kenyledh ki omelø. Keløg ngetimɑ̈ɑ̈nø ree dɑ kɑ̈j, thödhí ki gïncɑm. Ke di ree röödhø, thödhí ki pï, mɑ́ ngɑnɑni óyɑ̈r kɑ yï køøg yi Jwøng-ɑ Ácwɑ̈ɑ̈j. Atum nyi kɑ̈ɑ̈l-ɑ wëërø, ni yømø wurlwɑl ɑ nyi kɑ̈ɑ̈l kødh. Lɑ̈w bëëdø kì ød me thinh yï nuti nyömø, kibøli bëëdø kì kɑl me lɑɑj wuki cyëgí mɑ nyɑdhey køør. Wöödø me med men kɑ̈ɑ̈l kun lɑ̈wi, nɑ pïg ngij kì yï ngɑn ree di röödhø. Ngɑntir men-ɑ pɑ kyëddi tyëngrijjø, nɑ yith me pïge gwiy. Pɑ̈ngi yij ki møøw kïc rɑɑj, nɑ lejji rɑw. Ngɑn pɑ nyi mɑg pyëwe, nɑ kɑɑl-ɑ bong dörø me korii. Dhëg pɑ myëër ki wørø, mɑ́ e nɑ kønh mɑ̈gi ji okɑ̈jø ki byel. Cɑgg yï lɑ̈mmi cyën bong gïn kedhi rií, keløg e bong gïn-ɑ órënyø yi yïn. Ge ceg-ɑ gwøg ni winy møg wïïnø kì mɑl ge pɑ pëggi piny. Ni kenyi pwööd ɑderø ki dël, kɑ kyeny dhøge göddí ki yël; kwɑ̈nyyí dhëg lodh, o dwööge yöö. Kwøbb-ɑ pyëj ki dhëëgø ko løøg, kipe yï ópɑ̈ɑ̈r ki dhëng-ɑ ɑ́pëjji. Løøg kwøbbi dhëg ki yuu dhëëgø men-ɑ ɑ́pëjje, kipe órumø ce wïje pel. Öri wöödø e kɑ̈ll-ɑ yi dhëg rɑj, nɑ ngøli dhɑnhø tyele, wɑlɑ̀ mɑdhi sïm. Gɑ́j kì dhø dhëg, nɑ tyeli pudh ɑ pɑ cuggi cyɑ̈dhø. Wøri dhëg nɑ twööji lelø yij bɑ̈ɑ̈di. Kwøbi gɑ́j yi dhëg, nɑ ngɑn wïje di møgø, me dwɑddi køli koodhø kì cinge. Ngɑn kïr dhëg, wɑlɑ̀ ngɑn kïr wëli yöö, nɑ ngɑn wɑ̈dhi pöddi kelli ji ki weth. Dhëg pɑ nyi wïyi ki gwøøg dhëëgø; nɑ gwög ɑ nyi døøg be cɑmi ngwøgge. Dhëg lɑ̈w kibøli ngɑn rømmi ree ce wïje pel, ngö wïje pɑ pel kidyër. Rɑnyø ɑ́bɑ̈nyi kedhi pwödhø, okööbø kinni i dɑ ngur me rɑj me rödhø kì kö yöö. Rɑnyø løgg-ɑ ree kì yij pyën ni thïgø kì ri didëd. Rɑnyø cinge ɑ́cïbe yij tɑbø, de ɑ́dhɑl yi tïngii dhøge. Rɑnyø orumø ce wïje pel kibøli jøg ɑ́bïryew møg nyi cïjø. Ngɑn ludhi yij liny me pɑth ki mee, pɑ̈r ki ngɑn mɑg yïthhi gwög me pɑth. Liny nyii lɑ̈ɑ̈nyø ke bëëd e bong ɑtum, ni kenyi thøw mɑc ke bëëd e bong yugg. Ni kenyi lënhi mɑc yi cug geki yugg, liny nyii coodhø yi ngetigöj. Möngi ngeti ɑtum mɑɑr nɑ gïncɑm me med. Medi dhøg, e yij dɑ ɑ́dud, nɑ pug me myëër kì köme de yije cödhø. Wëny nyi kum-ɑ mɑ̈ɑ̈nø mee ki medi dhøge, e yije dɑ thɑb, cɑgg e kööbø dhøge omedø, yï ko lïng ki kwøbbe, mɑ́ yije pɑ̈ng yi mɑ̈ɑ̈nø. Cɑgg mɑ̈ɑ̈nø men-ɑ pyëwe kɑn yi en, rɑ̈je ónyodh kì kelli ji. Ngɑn kunyi wɑɑd gen ki bur, ópɑ̈dhi yij burɑni, ngɑn muuj ngɑn megø ki göj, gönyɑni døøg-ɑ ree. Ngɑn wëny yïn ki dhøng med, mɑɑn-ɑ yïn; rëny-ɑ yïn kɑ̀ lenhe yïn. Yï ko nyi thwøg kipe gïn-ɑ ógwøg yi yïn dhuki, mɑ́ gïn-ɑ ócwöb dhuki kwïj yi yïn. Rií ko lejjí yï ketí, wiy yï lejji yi ji møøgø geki tyëngpɑth. Göj men-ɑ kɑ̈ɑ̈l yi dhëëgø, peeg kibøli ɑyejø geki kïttì. Liny geki rönyi yij rijjø, de men-ɑ́ mud pëddi rɑ̈jø. Ngɑn cɑy yïn kì bølí, lɑ̈w kibøli ngɑn mɑɑr yïn, e mɑɑr-ɑ mɑɑre yïn pɑ nyudhe yïn. Mɑ̈dh men-ɑ cɑ̈wwi yïn ócuggø ngɑ̈dhø, de ngetimɑ̈ɑ̈nø, yï nyi lenhi yi en kɑ pyed yøw. Keløg yï yɑ̈ngø, møøw kïc obɑnyø yi yïn, de ke di rií kɑ̈j, cɑgg ɑ́ gïncɑm me keej, ocɑmø yi yïn. Jɑl wiy gøle piny, nɑ winyø men dhwödh kì øde. Pyëw dhɑnhø nyii mïnø yi mɑ̈th-ɑ yømi gen med, de pyëw dhɑnhø nyii cödø yi ɑkørr. Mɑ̈dhí wɑlɑ̀ mɑ̈ɑ̈dh wïyí ko wiy piny, yï koo kedhi yï ómyëw men-ɑ lɑ̈wi keny-ɑ ómɑɑg yïn yi ɑkørr, yï ókøny-ɑ yi mɑ̈dh men-ɑ cyɑ̈gi kì butí. Bëëd wïjí pel wɑ̈dɑ, o pyëwɑ ómede, o yɑ ókööbɑ wïjɑ ying-ɑ mɑl kì kelli teedø. Rɑj nyii këëjø yi ngɑn wïje pel, de dhëg nyi pödh-ɑ mɑc. Wïjí nøg keløg yï oyïëyø kinni wïdhi ngɑnpɑth, mɑ́ yïn ɑ ódöng ki kwörɑni. Keløg yï nyi tungg-ɑ ji, yï mɑ̈dhh-ɑ gen kì mwøl, menɑni nyi nɑ gwɑ̈dø kì yï tyëng-ɑ lïngø. Dhɑjø men-ɑ bɑ nyɑdhey køør nɑ øn kyër. Ókyëddi yi yïn kidï? Yømø ɑ́pɑ̈nyi yi yïn ki jogø, wɑlɑ̀ møw ócuggø ki mij cingí? Dhɑnhø nyii dïdø kì yï ngɑn-ɑ 'lwööb gen, ni kenyi pɑɑg tøng ki tøng megø. Ke korrí ólɑm kidøøj, yï óyïddø ki nywøli ólɑm møg cɑm yi yïn; bɑ̈ngg-ɑ nyi korri jɑmmi wïi gen nyii wørø. Rummi dhɑnhø nyi nyodh-ɑ yi bøle, ni kenyi nënni tïbi dhɑnhø kì yethi pï. Wɑɑng dhɑnhø pɑ nyi yɑ̈ng, ni kɑ̀ pɑ nyi yɑ̈ng thøø geki ryɑ̈g. Dhɑb kí ɑ́tegø nyi rɑng kɑ mɑc, o døøji dhɑnhø nyi yod-ɑ ri lenh-ɑ lenhii. Byell-ɑ ri gen di cong nyii cøgø kì pɑny kɑ cong bï-ɑ wɑ̈g kì ri gen, de men-ɑ́ dhëg, cɑgg e cøg ni cong, dhëëgø pɑ bï wɑ̈g kì ree. Korrí dyëgí geki dhögí kidøøj, mɑ́ jɑmmì nyii rënyø, o lɑ̈gø nyii cöögø. Keløg jɑmmí nyi kwɑɑyí keny-ɑ di lum me døøj, yï ódönyø kì bɑng gen, kɑ yï óyïddø ki ógødh men rug yi yïn. Kɑ yï ongëwø ki piny ki ngyënyyi dyëgí. Dyëgí óngënyø, kɑ gølí omɑ̈dhø ki cɑg, kɑ bɑ̈nggí, bɑ̈ngg-ɑ mɑ̈nn omɑ̈dhø ki cɑg thyew. Ngɑnrɑj nyii rengø cɑgg e bong ngɑn cyeddii, de ngɑntir teg nɑ ngur. Kenyi røngi pödhø, jɑgge pɑ nyi bëëdø ki keny me bɑ̈ɑ̈r. De pödhø nyi pëgg-ɑ piny kɑ ótëngø, kenyi bëëd jɑgge wɑ̈thi gen pel. Jɑgø men guud nyingi tyëng-ɑ ɑbuur, nɑ kønh dwøng ɑ nyi nɑ̈g byel. Tyëng-ɑ bɑny cigg pøjj-ɑ tyëng-ɑ gøggi rɑj, de tyëng-ɑ mïdhi cigg mɑɑn-ɑ tyëngrijjø. Tyëngrijjø gøggi dyër pɑ nyi gɑm yi wɑ̈thi gen, de nyii gɑmø kidøøj yi wɑ̈thi tyëng-ɑ wør Jwøng-ɑ Ácwɑ̈ɑ̈j. Lɑ̈w dhɑnhø me jɑdø e köme bong cɑ́y, kibøli ngɑn kɑ̈rø me nyi rujø ki ji. Ngɑn mïdhi cigg wïje pel, de ngɑn cyɑ̈dhi ki cɑ̈mmì yɑ̈r-ɑ wïye. Ngɑn nyi dwɑddi kɑ̈rø kì bɑng kɑ̀ nyi kɑ̈bbe ki ngyëny mø ngenyø kibøli møg-ɑ ɑ́wïdhe dhɑnhø, kɑ̈re ókwɑny kɑ mëggi tyëng-ɑ nyingi gen cɑn. Ngɑn pɑ nyi mïdhi Ciggi Jwøk, kwɑ̈jje nyii bɑnyø yi Jwøng-ɑ Ácwɑ̈ɑ̈j. Ngɑn nyi thɑɑb ngɑndøj yij yöö me rɑj, nyii mɑgø yi ɑ́kɑ̈lle. De ngɑndøj nyii yïddø ki köögi. Tyëng-ɑ kɑ̈rø nyii rumø ce wɑ̈thi gen pel, de ɑbuur-ɑ nyi tïïdø ki kwøb ngɑ̈ny wøw kibøle. Kenyi jyɑ̈ɑ̈g tyëngtir, ji pëthi gen nyi bëëd ge med, de kenyi jɑ̈ggi ngɑnrɑj, ji nyi bëëd ge ópɑ̈nnø. Ngɑn nyi kɑnni orøge koo dönyi, de ngɑn nyi töng orøge, kɑ ówïyø ki orøg, Jwøk pyëwe ólɑ̈ɑ̈m ki en. Ngɑn nyi böggi Jwøng-ɑ Ácwɑ̈ɑ̈j ceth ree dɑ gyëdh, de ngɑn bɑny Ciggi Jwøng-ɑ Ácwɑ̈ɑ̈j óyïddi ki ɑkørr. Ngɑnrɑj kenyi jɑɑge ji mø nyingi gen cɑn, nyi nɑ ngur me ngɑ̈rri. Jɑng-ɑ yïe bong dïdø, bɑ ɑ́muddi ji me pyëwe bong gøn, de jɑng-ɑ mɑɑn kɑ̈b, mɑ̈re nyii døngø. Ngɑn kɑ̈lli yi cyënni nɑ̈gi dhɑnhø, wiy twɑ̈le gïti thøwe; ko køny. Ngɑn mïdhi bëëndøj óyiel, de ngeti ɑ́dud óceg ì rɑy kì piny. Ngɑn pur pwödhe, gïncɑm ótwɑ̈li kì yïe, de ngɑn pëggi be lwɑ̈y wɑnge ócɑ̈nni. Ngɑn pɑ dwɑddi kɑ̈rø ki yuu orøg runne óngënyi, de ngɑn kɑ̈ri ki orøg, pɑ bødh ki cɑyø. Geny pɑ døøj, de cɑgg ɑ́ kinøw dhɑnhø nyii göögø ki gïnrɑj, kipe gïncɑm me thiinh yøw. Kenyø tyer-ɑ kɑ̈rø, de kwïj wøw kinni rɑ̈jø bï-ɑ köme. Ngɑn cɑy dhɑnhø kì bøle, ómɑɑr yi ngɑnɑni kì cyɑ̈n, kibøli ngɑn lenhii ki pyed. Ngɑn kwɑ̈ddø kì yï wïye, o kööbe kinni i bong gïnrɑj, bɑ wɑdd ki ngɑn nɑ̈g dhɑnhø. Ngɑn pyëwe dwøng nyi yɑb-ɑ liny, de ngɑn gɑ̈n Jwøng-ɑ Ácwɑ̈ɑ̈j ódönyi. Ngɑn nyi ngɑ̈dh peli wïje kete bɑ dhëg, de ngɑn nyi lïngø ki pwönyi tyëng-ɑ wɑ̈thi gen pel óbødh. Ngɑn thödhi ngɑn jɑdø koo jɑ̈ddi, de ngɑn pɑ nyi køny ɑbuur ócyen. Kenyi jɑ̈ggi ngɑnrɑj, ji nyi bëëd ge ópɑ̈nnø, de kenyi thøw jɑng-ɑ rɑj tyëngtir nyii cwöbø. Ngɑn nyi ceg e pɑ lïngø, órënyi ceth, o pɑ dönyi këti. Kenyi jyɑ̈ɑ̈g tyëngtir, ji pëthi gen nyii mïnø, o kenyi jɑ̈ggi ngɑnrɑj, ji nyi bëëd ge óngunø. Keløg yï mɑɑr-ɑ peli wïj, wïyí óbëëdø pyëwe med. Yɑb ki tyëng-ɑ nyi niin ki köögi, bɑ rënyi jɑmmì. Pödhø nyi cïb-ɑ piny yi rɑ̈nh-ɑ gøggi dyër, de nyi tɑ̈ɑ̈y-ɑ piny yi rɑ̈nh-ɑ dhøge nyi yïëy kumø. Ngɑn lenhi wɑɑd gen ki pyed, kïdh-ɑ gøn yethi ɑ́kɑ̈llì. Ngɑnrɑj ɑ́mɑg yi ɑ́kɑ̈lli orøge, de ngɑntir wɑ̈dh-ɑ ngedhø pyëwe omedø. Tyëngtir pëthi gen nyii lïngø, kipe kønyi tyëng-ɑ nyingi gen cɑn kidyër, de pɑth ki cwɑggi tyëngrijjø. Ngɑn wïje nøg nyi cwɑ̈ɑ̈g-ɑ pödhø, de liny nyii yielø yi tyëng-ɑ wɑ̈thi gen pel. Keløg ngɑn wïje pel ogönyø geki dhëg, dhëngɑni nyi pëgg-ɑ be ryeerø e owërø, o bong mër me yod. Ngɑn-ɑ ɑ́wɑ̈dh ki nɑ̈g, tyëng-ɑ gøggi dyër mɑɑn yi en, gï nyi dwɑdde’ nɑ̈gø. Dhëg linye pɑ nyi kɑnne, de ngɑn wïje pel linye nyi kɑnne’ kɑnnø. Keløg rɑ̈dh nyii lïngø ki kwøbbi pyed, jyɑ̈gge bënn nyii göögø ki tyëngpyed. Abuur pɑ̈r ki ngɑn-ɑ guud wɑnge, bɑ Jwøng-ɑ Ácwɑ̈ɑ̈j ɑ ɑ́thödhi gen bënn ki wëy. Keløg gønyyi tyëng-ɑ nyingi gen cɑn nyii løøgø yi rɑ̈dh kidøøj, rɑ̈nhɑni mɑ̈re nyii døngø. Thyɑng-ɑ pwööd othinh nyi thödh-ɑ en ki peli wïj, de othinh men-ɑ pɑ ceg, nyi thödh-ɑ meye ki ɑyɑ̈r. Kenyi jyɑ̈ɑ̈g tyëngrijjø, orøg nyii ngënyø, de ge nyi pɑ̈ɑ̈dh ge onennø yi tyëngtir. Ke ceg wɑ̈dí, yï pɑ muuje ki göj, yï óthödhe ki medi pyëw. Kenyi bëëd e bong tyëng kwøbbi Jwøk, pödhø nyii rënyø, de tyëng-ɑ nyi mïdhi Ciggi Jwøk ri gen dɑ gyëdh. Bɑ̈ng pɑ nyi lwɑ̈ng ki cegø ki dhøg yøw, mɑ́ cɑgg e lïngø, møg-ɑ köbbii pɑ gwøge. Dhëg lɑ̈w kibøli ngɑn nyi pɑ̈rri kì kömi kwøb. Keløg bɑ̈ng owiyø o gööge wïje, menɑni nyi kɑ̈ɑ̈l-ɑ ywøøg yij kì cyɑ̈ɑ̈n piny. Ngeti liny nyi cwɑ̈ɑ̈g-ɑ ji, o nyii kɑ̈nø ki orøg. Dhɑnhø nyi leeng-ɑ piny yi ɑthwøge, de möölø nyi wëgg-ɑ dhɑnhø wørø. Ngɑn nyi 'lwööb ki kur kïdh-ɑ ree yij yuu orøg, mɑ́ ke kwøbe dyër kì burø, ceg kɑ cɑyø yi burɑni, o ke pɑ kwøbe dyër, ocɑyø yi Jwøk. Ngɑn nyi böggi ji ómɑg yi ɑ́kɑ̈llì, de ngɑn nyi gɑ̈n Jwøng-ɑ Ácwɑ̈ɑ̈j bong gïn nywɑlii. Ji mø gïïr nyi göny-ɑ yï jɑgø, de bɑ Jwøng-ɑ Ácwɑ̈ɑ̈j ɑ nyi mëggi dhɑnhø gëe. Tyëngtir geki tyëngrijjø mɑɑn-ɑ ri gen. Møg bɑ kwøbb-ɑ døngø møg-ɑ ɑ́kwøb yi Agur wɑ̈d Yɑkè, jɑl Mɑɑsɑ̀. Jɑlɑni ɑ́kööb kinni, “Jwøk lɑ̈wi ki yɑn, Jwøk lɑ̈wi ki yɑn, o bong ngɑn køny yɑn.” Yɑ pɑth ki dhɑnhø, yɑ bɑ dhëg, dïdø men-ɑ yï dhɑnhø bong gøn kì yïɑ. Yɑ nuti dïdø ki peli wïj, o këër bëëdi Jwøk kwïj yi yɑn. Á men ɑ ɑ́kedhi mɑl kɑ dwöög-ɑ piny? Á men ɑ ɑ́mij yømø cinge? Á men ɑ ɑ́cøng pï bënn yij ógødhe? Á men ɑ ɑ́cïb tyelli piny? Nyinge bɑ men, o nyingi wɑ̈de bɑ men keløg e ngɑ̈nyi yi yïn? “Kwøbbi Jwøk bënn bɑ dyër, Jwøk bɑ kwöd kì yï tyëng-ɑ nyi yömmi yïe. Yï ko kïdhi kömi kwøbbi Jwøk kipe yï ócɑy, kɑ yï yod yïn ɑ́ ngeti pyed.” Jɑmmì ɑ́ryew ɑ kwɑjjɑ kì yïí yïn ɑ Jwøk, mëggí gen yɑn kɑ̈ng-ɑ nuti thøw yɑn. Yɑ ko wëggí pyed, kɑ yɑ ko thödhí ki kɑ̈r, wɑlɑ̀ wɑngɑ ko wëggí cɑ̈nnø. Mëggí yɑn gïn-ɑ dwɑddɑ kete, kipe yɑ óyɑ̈ng, kɑ yɑ okööbø kinni yï pɑ dwɑddɑ. De keløg yɑ ójɑd, yɑ bɑ men kwɑ̈ddi kɑ nyingi Jwøgɑ bwölɑ. Bɑ̈ng ko gøøny yi yïn yï wɑ̈n ki pyed, kipe yï ólɑ̈mmi cyën yi bɑ̈ngɑni, kɑ cyën bï-ɑ kömí. Dɑ ji møg nyi gwɑddi wëëg gen, o mëëg gen pɑ wør yi gen. Dɑ ji møg rømmi ri gen ce ge dhïw, ngö ge cödhø yi orøg. Dɑ ji møg törri wɑ̈thi gen ce døj ɑ́ gen. Dɑ ji møg yethi gen wöny, møg nyi kɑbbi jɑmmi tyëng-ɑ nyingi gen cɑn, o bene yëth-ɑ cyɑ̈ɑ̈m yi gen. Cwiyø yïe dɑ dhøg ɑ́ryew, nyingi gen ryeet cwøl ɑ́ “Nëngí yɑn!” O dɑ jɑmmì ɑ́ngwen mø pɑ nyi yɑ̈ng: pödhi tyëngthøø, kí ngɑndhɑjø men-ɑ bɑ bwøj, kí piny-ɑ yije bong kødh, kí mɑc me göjji yij lum. Ngɑn gwɑddi wïye, o kwøbbi meye pɑ lïnge, óthøw pɑ̈l kɑ wɑnge göl yi ɑ́gɑg, kɑ cɑm yi cor. Dɑ jɑmmì ɑ́ngwen mø bɑ ngɑ̈ngø, o ge pɑ cuggi gɑmø yi wïjɑ: Yuu-ɑ pɑ̈rri yi cor kì mɑl, kí yuu-ɑ mulli yi thwöl kì kömi kït, kí yuu yɑ̈y kì nɑɑm omelø, kí yuu-ɑ nyi døngi mɑ̈ɑ̈dø kì kɑɑm wøb geki nyɑnɑjur. Bene bëëdi cï jɑlø men-ɑ nyi yɑ̈bø ki cwøw èn; kenyi rume ki orøg, o nyi jwɑne be lwøggø, o nyi kööbe ce bong gïnrɑj me gwøøg en. Dɑ jɑmmì ɑ́ngwen møg nyi wëggi piny otɑ̈r: bɑ̈ng kenyi gööge ɑ́ rɑ̈dh, kí dhëg kenyi yɑ̈nge, kí nyɑn-ɑ keje pöödhø kenyi yïdde ki jɑlø me nywømii, kí bɑ̈ng-ɑ kwɑny jɑlgøl wɑ̈n. Dɑ jɑmmì ɑ́ngwen kì kömi piny mø thønhø, de wɑ̈thi gen pel ki mendwøng: ókyël nënni e nyøødh, de gïncɑme nyi cønge’ piny kì ɑryɑ̀, kunikït bɑ lɑ̈y me nënni e nyøødh, de nyi bëëd ɑ kɑggi kïttì, bɑ̈nyø yïe bong rɑ̈dh, de nyi cyɑ̈dhi ree pyëël en, lëw ócuggø mɑgø ki cingø, de nyii bëëdø kì gøldwøng. Dɑ jɑmmì ɑ́ngwen møg nyi cyɑ̈dhi ge óngwønø: ngur, ɑ teg kì kelli lɑ̈yy bënn o pɑ nyi bwøg, kí ónywøg, kí ɑtwɑg kí rɑ̈dh kenyi ngwøne kì bøli yɑye. Keløg yï bɑ dhëg me pëddi ki ɑthwøg, wɑlɑ̀ yï nyi bëëdø yï gøgg-ɑ rɑj, kud kɑ yï rum! Ke pwööj cɑg, ge kɑ̈ɑ̈l-ɑ møøw bwöbø, o ke dij órøm, ge kɑ̈ɑ̈l-ɑ remø, o yɑb ki liny nyi kɑ̈ɑ̈l-ɑ nyɑɑg. Kwøbbi Lɑmuel rɑ̈ɑ̈dh Mɑɑsɑ̀ møg-ɑ ɑ́pwönyii yi meye. “Yeki wɑ̈dɑ, wɑ̈n-ɑ ɑ́kwɑjjɑ kì yï Jwøk, yï köbbɑ’ ngø? Rií ko nyɑ̈ggí tyëng-ɑ mɑ̈nn; tyëng-ɑ ni møgɑni ge ɑ́rëny-ɑ rɑ̈nhì. Nɑ̈gi rɑ̈nhì geki jɑgg yi møgø, rɑɑj, kipe wɑ̈thi gen ówïl ki Ciggi Jwøk, kɑ ge ówïyø kønyi tyëng-ɑ ruj. Wïyu møgø tyëng-ɑ kømi thøø geki tyëng-ɑ ying yij orɑng. Wiy ge mɑ̈ɑ̈dh gen, o wɑ̈thi gen wïl gen ki orɑɑng gen. “Nyi cwɑg tyëng-ɑ pɑ cuggi kwøb kipe ri gen. Korrí tyëng-ɑ nyødh, ge ko nyi wëggí rujø. Kööb kiper gen, kɑ yï jyɑ̈ɑ̈g kidøøj. Korrí tyëng-ɑ nyingi gen cɑn geki tyëng-ɑ jɑdø.” Dhɑjø men-ɑ døj, ɑ́ men ɑ yodii? Pere teeg cɑrø kibøli tigg-ɑ per gen teg. Ngɑ̈dh yi jɑlgøle ki mendwøng, bong gïndøj me jɑ̈ddi jɑlgøle. Jɑlgøle pɑ nyi gögge ki gïnrɑj kinni tek, de gø nyi gögge’ gïndøj ceth. Ngɑnɑni, tyëng gøle nyi cwɑ̈jje’ cwɑ̈jjø ki ógudh ki cingge. Nɑ yɑ̈thi jøngyew; ɑ nyi kɑ̈ni ki gïgcɑmm kì kun lɑ̈wi. Nyi dhwödh-ɑ bɑ̈ɑ̈rø piny nudd e looj. Gøle nyii yɑ̈bbø yi en ki gïgcɑmm, o bɑ̈ngge, bɑ̈ngg-ɑ mɑ̈nn nyi cege cegø kipe gwøøg gen. Pwödhø nyi rɑngge’ rɑnggø kidøøj, kɑ gø ngewe, kɑ yij bɑge nyi pïdhe ki jɑmmi ngyënyy-ɑ ɑ́lem yi en. Nyii göögø ki gwøg me teeg, o cinge yöd. Nyi gït-ɑ wɑ̈r e ogöögø. Kenyi ngëwwe wɑ̈g, jɑmme nyi ceg-ɑ nywølø, o kenyi ngewe gïïpiny, pɑ nyi yïëy gwemø. Nyi ceg-ɑ lɑ̈ɑ̈dhø ki kor-ɑ cwɑ̈ɑ̈je. Yije tɑr, tyëng-ɑ jɑdø nyii kønyø yi en. Pyëwe pɑ nyi lïngø kenyi lïmmi yømø, mɑ́ tyëng gøle bënn ruug en ki ógudhi yømø. Nyii cwɑ̈jø ki ógudh-ɑ nyi peedhe wïj pyëne, o nyi rug-ɑ ógudh mø myëër cɑrø. Jɑlgøle owørø kì dïpɑc, keny-ɑ nyi kööb yi jøgdøngi pödhø. Nyii cwɑ̈jø ki ógudh, kɑ gï nyi ngeewe wɑ̈g, kɑ jøngyew nyi gögge ki wënnì. Bɑ dhɑjø me teg, o kööre pɑ lïngø kipe dhuki megø. Nyi 'kööb-ɑ peli wïj, o nyi cïjø yije bong ɑ́dud. Pɑth ki rɑnyø, gøle nenne’ nennø kidøøj. Owørø yi nyige, o nyii lenhø yi jɑlgøle. Kɑ nyii kööbø kinni, “Dɑ mɑ̈nn mø døøj kidyër, de ge ɑ́lod yi yïn ge bënn.” Døøji dël, dhɑnhø nyii thɑbø yi en, myëërø nyii kedhø. De bɑ dhɑjø men-ɑ wør Jwøng-ɑ Ácwɑ̈ɑ̈j, ɑ nyi lenhi. Pøjju en kipe gïg-ɑ gøgge bënn, kɑ wør yi teedø bëne. Møg bɑ kwøbbi Tïddi kwøb, rɑ̈ɑ̈dh Yerusɑlem, ɑ løg wɑ̈d Debïd. Tïddi kwøb ɑ́kööb kinni, i bong gïndøj kì ri bëëdø kì kömi piny, bong gïndøj kì ree, bong gïndøj kì ree kinni tek! Dhɑnhø tyëg-ɑ piny e pïdø yi gwøg kì kömi piny, ɑ́ ngø ɑ óyod yi dhɑnhø kì bɑng gwøngɑni? Rïny nyii kedhø, kɑ rïny nyii bëënø, de piny nudd e nɑ keje ceth. Cɑ̈ng nyii tuulø, kɑ nyii buddø, nyi jwɑn-ɑ keny-ɑ ɑ́tuule ceth, yømø nyii könø kì wɑɑng wurlwɑl, kɑ ree nyi løge wɑɑng wuudø, ree nyi wene’ wenø gïti kenyi døøge keje. Nɑ̈mm-ɑ thønhø nyi reng-ɑ yethi nɑ̈mmi omelø, de nɑ̈mmi omelø pɑ pɑ̈ng, codhe kɑ pï nyi døøg-ɑ keny-ɑ ɑ́kɑ̈ɑ̈l yi gen cøn, o ge dɑ̈ri gen piny këti. Jɑmmì bënn nyi kɑ̈ɑ̈l-ɑ pïdø; pïdø me dhɑ̈li tïng dhøg. Wɑng pɑ nyi yɑ̈ng yi nënnø, o yïth pɑ nyi wïyi ki lïngø. Gïg-ɑ ɑ́cwöb cøn bɑ møg-ɑ ócigi cwöbø. Gïg-ɑ ɑ́gøggi cøn, bɑ møg-ɑ ógøggi këti. Bong gïjø me nyɑ̈n kì kömi piny bëne. Dɑ gïjø me cuggi kwøbø kinni, “Lidh, gïn nyɑ̈n?” Bong gøn, gïgɑni bënn ɑ́kwøng ki gwøgø cøn, wɑ nuti nywølø. Bong ngɑn rømmi gïg-ɑ ɑ́pöödh, wɑlɑ̀ gïg-ɑ óbï; bong ngɑn-ɑ órømmi gen kì kelli tyëng-ɑ óbï kì bɑngee. Yɑn yɑ Tïddi kwøb, yɑ ɑ́bëëd yɑn ɑ́ rɑ̈ɑ̈dh Isrɑil kì Yerusɑlem. Pyëwɑ ɑ́cïbɑ ri yodi jɑmm-ɑ ɑ́gøggi kì kömi piny bënn. Jwøk kömee ɑ́cïbe ki orɑng me dwøng. Gïg-ɑ ɑ́gøggi kì kömi piny bënn ɑ́lidhɑ, bong gïndøj kì ri gen. Ge nɑ ngwej kì bɑng yømø. Gïn-ɑ bɑ ódwøl pɑ cuggi tyenyø, o gïn-ɑ bong gøn pɑ cuggi kwɑnø. Aköbbɑ riɑ kinni, yɑ ɑ́göög ki jɑl me perɑ teg, wïjɑ ɑ́göög e pel kibøli tyëng-ɑ ɑ́jyɑ̈ɑ̈g kì Yerusɑlem kì bølɑ bënn. Gïn-ɑ ceg ki wɑngø yi peli wïj geki dïdø ngɑ̈nyɑ bënn. Pyëwɑ ɑ́cïbɑ ri yodi gïn-ɑ bɑ̈ɑ̈n kì kelli ngɑ̈nyi wøw geki dhëëgø, kí peli wïj geki ɑ́nɑ̈gø. De ɑ́yod yi yɑn kinni menɑni nɑ ngwej kì bɑng yømø thyew, mɑ́ ngënyi peli wïj nyi kɑ̈ɑ̈l-ɑ ɑkørr, o ngënyi dïdø nyi med-ɑ kïïmø. Riɑ ɑ́wëggɑ bëëdi medi pyëw, kipe kinni o yɑ yodɑ gïn-ɑ cwøl ɑ́ medi pyëw. De ɑ́yodɑ kinni bong døøje thyew. Áyodɑ kinni ngyerø bɑ dhëëgø, o medi pyëw bong gïndøj me nyi gögge dhɑnhø. Kì bɑng kɑ ɑ́yɑbɑ wïjɑ, kipe kinni o pyëwɑ di mïne, ɑkööbɑ kinni yɑ ceg-ɑ mɑdh ki møgø o pyëwɑ mïne. Yɑ ɑ́rum kinni bene yuu-ɑ døj kipe dhɑnhø kì yij bëën-ɑ cyeeg men-ɑ nyi bëëd kì kömi piny. Yɑ ɑ́göög ki gïgdøngø. Riɑ ɑ́gëddɑ ki ød, geki bɑ̈ggi oløg. Riɑ ɑ́göggɑ ki bɑ̈ggi wɑ̈thi yenh bënn. Kɑ yɑ okunyø ki luyyi pï, møg nyi cɑwɑ gen. Yɑ ɑ́ngëw ki bɑ̈ngg mø gïïr. Dɑ bɑ̈ngg mɑ ɑ́nywøl kì gølɑ. Yïɑ ɑ́dɑ dhög mø gïïr kibøli tyëng-ɑ ɑ́kwöngi ki bëëdø kì Yerusɑlem bënn. Riɑ ɑ́cungɑ ki ngyëny ɑ́tegg geki dhɑb kì ri kɑ̈ɑ̈r pìny-ɑ ɑ́jɑɑgɑ. Yïɑ ɑ́dɑ cwøw kí mɑ̈nn møg nyi wör kipe kinni o pyëwɑ bëëde e omedø, yïɑ ɑ́dɑ mɑ̈nn kí ɑkwɑnyy mø gïïr ni kɑ ɑ́dwɑddɑ en. Perɑ ɑ́bëëd e teeg cɑrø kibøli ji-ɑ ɑ́bëëd bënn kì Yerusɑlem, o peli wïjɑ ɑ́bëëd kɑ yɑn ceth. Riɑ nuti mɑ̈ɑ̈n yɑn jɑmm-ɑ ɑ́køni kì pyëwɑ bënn. Gïn-ɑ ni gïn-ɑ ɑ́dwɑddɑ, ɑ́yodɑ ceth. Pyëwɑ ɑ́bëëd e omedø, mɑ́ gïg-ɑ ɑ́yodɑ bɑ kööngi pïdɑ. Arumɑ kì ri pïn-ɑ ɑ́pïdɑ ki gwøg bëne, ɑyodɑ en kinni bong døøji gen bënn, menɑni nɑ ngwej kì bɑng yømø, bong gïndøj kì ree kinni tek. Rɑ̈dh nyi gwøg-ɑ gïg mɑ ɑ́rum ki gwøgø yi rɑ̈nh-ɑ ɑ́kwöngi jyɑ̈gø kì bøle. Acɑ̈gɑ ki rumø kì ri peli wïj, geki nøgi wïj kì dhëëgø. Áyod yi yɑn kinni peli wïj lɑ̈w kibøli dhëëgø, ni kɑ̀ lɑ̈w cɑr kibøli muudhø. Ngɑn wïje pel keny-ɑ kedhe nyii lidhø yi en, de dhëg nyi cyɑ̈dh-ɑ́ɑ̀ yij muudhø. De ɑ́yodɑ thyew kinni gïg-ɑ nyi bï kömi gen bënn kì cyɑ̈n pɑ̈r. Arumɑ kinni, gïg-ɑ nyi bï kömi dhëgg bɑ møg-ɑ óbï kömɑ thyew, kì bɑng menɑni, ɑ́ ngø ɑ yodɑ kì bɑng peli wïjɑ? Bong gøn! Bong ngɑn-ɑ ópɑrri ngɑn wïje pel, o bong ngɑn-ɑ ópɑrri dhëg kì bøli keny megø, wɑ ówïl bënn. Wɑ ceg-ɑ thøø bënn, eni ngɑn wïje pel ki ngɑn-ɑ bɑ dhëg. Bene ɑ bɑnge rummɑ kinni, nënnì kì kömi piny bong pere, mɑ́ bong gïndøj mɑ ɑ́yodɑ kì yije, den-ɑ́ ɑkørr. Menɑni nɑ ngwej kì bɑng yømø yøw. Bong gïjø me pere teg kì yïɑ kì kelli jɑmm-ɑ ɑ́lemɑ, mɑ́ ge bɑ møg-ɑ ólɑg yi ngɑn-ɑ ókwɑny kejɑ, o bong ngɑn ngɑ̈ny wøw ying ngɑnɑni óbëëdø ɑ́ ngɑn wïje pel wɑlɑ̀ dhëg. De cɑgg ɑ́ kinøw, gïg-ɑ ɑ́yod yi yɑn kì bɑng peli wïjɑ kì kömi piny keny, bɑ møg lɑg yi en ceth. Bong gïndøj kinni tek. Kɑ yɑ ópɑ̈dø kipe gwøng teg men-ɑ ɑ́gwøgɑ bëne. Keløg dhɑnhø jɑmm-ɑ ɑ́gwøge ki peli wïje geki dïde, e pïdø pïdø, ge nyii döngø ki ngɑn me bong gïn-ɑ gwøøg en yøw. Bɑ gïjø me rɑɑj cɑrø o bong gïndøj kì ree. Kɑ̀ bëëde kinøw, ɑ́ ngø ɑ døj kì ri pïdi dhɑnhø kì kömi piny? Bëëdi dhɑnhø bëne bɑ orɑng, kí pïdø, kí olïng pyëw, cɑgg ɑ́ kì wɑ̈r dhɑnhø ceg-ɑ rumø. Bong gïndøj kì ri møgɑni thyew. Lɑ̈w ɑ́ kinni o dhɑnhø cyɑ̈me, o mɑ̈dhe, o bëëde pyëwe omedø ki jɑmm-ɑ ɑ́yode. Áyodɑ kinni møgɑni thyew nyi kɑ̈ɑ̈l-ɑ yï Jwøk. Keløg e pɑth ki Jwøk, dhɑnhø di yïd ɑ keny ki gïncɑm geki medi pyëw? Mɑ́ Jwøk nyi thödh-ɑ tyëng-ɑ pyëwe med ki gïn ki peli wïj geki dïdø, kí medi pyëw. De ngetorøg nyi wëgge’ gwøg ki pïdø, o jɑmmɑni nyi lɑg-ɑ yi tyëng-ɑ pyëw Jwøk med ki gen. Menɑni thyew nɑ ngwej kì bɑng yømø, bong gïndøj kì ree. Gïg-ɑ nyi cwöb bënn kì kömi piny bɑ ɑcïb yi Jwøk ceth. En ɑ nyi cïb bøli kej nywølø geki bøli kej thøø, kí bøli kej pïdhø geki bøli kej puthi wɑ̈g. Bøli kej nɑ̈g geki bøli kej yieli ji ki rɑ̈ɑ̈m dëllì, bøli kej dhuri piny geki bøli kej gyer. En ɑ cïb bøli kej ywøg geki bøli kej medi pëëth, bøli kej kïïmø geki bøli kej cøng, bøli kej mɑ̈ɑ̈dø geki bøli keny-ɑ pɑ mɑ̈ɑ̈d, bøli kej döbbi rek, kí bøli keny-ɑ pɑ döbbi rek. Bøli kej yïddø ki gïïpiny geki bøli kej lɑ̈ɑ̈nyi gïïpiny, bøli kej mïdhi jɑmmì, kí bøli kej wïddø, Bøli kej kɑggi ógødh geki bøli kej røde, kí bøli kej kudø geki bøli kej kwøb. En ɑ ɑ́cïb bøli kej mɑ̈ɑ̈dø geki bøli kej mɑ̈ɑ̈nø, kí bøli kej liny geki bøli kej mër. Á ngø ɑ óyod yi dhɑnhø kì bɑng gwøge bëne? Pïdø men-ɑ ɑ́cïb kömi ji yi Jwøk ɑ́yodɑ thyew. Jɑmmì bënn gï ɑ́cïbe kì bøli kɑ̈jji gen ceth. Pëthee ɑ́cïbe ki tyeri yodi møg-ɑ ócwöb dhuki megø, de cɑgg ɑ́ kinøw ceth, gïg-ɑ ɑ́gwøg yi Jwøk kër-ɑ ɑ́cɑ̈gi piny gïti ɑnɑn, kwïj yi wɑ. Áyodɑ kinni bong gïn tyɑm bëëdee pëthee omedø, o wɑ gwøg wɑ gïndøj men-ɑ cuggi, kɑ̈ng-ɑ nëën wɑ. Gïn-ɑ ɑ́gwøg yi Jwøk kipe dhɑnhø, bɑ kinni o cyɑ̈me, o mɑ̈dhe, o pyëwe mede ki jɑmm-ɑ ɑ́gwøge ki pïde. Áyodɑ kinni gïn-ɑ nyi gwøg yi Jwøk nyii bëëdø gïti ɑtheer, e bong gïn meedii wɑlɑ̀ gïn kɑ̈ɑ̈l wɑ̈g kì ree. Møgɑni ɑ́gwøg yi Jwøk kɑ per kinni o böggi yi ji. Gïg-ɑ nud ɑnɑn bɑ gïg mɑ ɑ́bëëd ge nud cøn. Gïg-ɑ ɑ́göög nyi cig-ɑ jølø yi Jwøk këti. Áyodɑ thyew kinni kì kömi piny, keny di gøggi dyër yije cɑɑg-ɑ ruj, o yije bong gøggi dyër den-ɑ́ rɑj. Aköbbɑ riɑ kinni, tyëngdøj geki tyëngrijjø gønyyi gen ólidh yi Jwøk kyeel, mɑ́ jɑmmì kí gïg-ɑ gøggi bënn yï gen dɑ bøli kɑ̈jji gen. Ayodɑ en ki pyëwɑ kinni, Jwøk pɑ̈ny-ɑ ji, o gï nyudhe kinni ge pɑ lɑ̈w kibøli lɑ̈yy. Mɑ́ rɑj nyii cwöbø kiper gen bënn, ge nyii thøø bënn. Lɑ̈yy kí ji bɑ gïg mø pɑ̈r bënn, bong gïn pere bëëd dhɑnhø e lɑ̈w kibøli lɑ̈y, mɑ́ e bong gïndøj kì ri nënnì kiper gen ryeet. Ge nyi kedh-ɑ kej ɑ́kyel bënn, ge kɑ̈ɑ̈l-ɑ ri lɑ̈bø bënn, o ge nyi døøg-ɑ ri lɑ̈bø bënn thyew. Á men ɑ ngɑ̈nyii kidyër kinni, wëyi dhɑnhø nyi kedh-ɑ mɑl, de wëyi lɑ̈y nyi kedh-ɑ piny yij lɑ̈bø? Codhe, ɑyodɑ en kinni lɑ̈w bëëdi dhɑnhø pyëwe med ki gïg-ɑ ɑ́gwøge ki kwɑ̈ge. Mɑ́ e bong gïjø me cuggi gwøgø yi dhɑnhø, bong yöö men cuggi wɑ ki yodi gïg-ɑ ócwöb kì bɑng keny-ɑ óthøw wɑ. Codhe, ɑcigɑ lïïdh ri runy-ɑ ruj ji kì kömi piny bëne. Ge ceg-ɑ ywøg, de bong ngɑn lug gen, mɑ́ tyëng-ɑ ruj gen teg. Aköbbɑ riɑ kinni, yɑ ɑ́mɑg yi mud ki tyëng-ɑ ɑ́thøw, mɑ́ ge lɑ̈w kibøli tyëng-ɑ nëënø. De tyëng-ɑ nuti nywølø cøn lɑ̈w kibøli ji-ɑ kyeelø, mɑ́ rɑjj-ɑ gøggi kì kömi piny nuti liidh gen. Ayodɑ en thyew kinni ji nɑ̈g-ɑ ri gen ki gwøg kipe kɑ̀ mod gen tyëng-ɑ kyeelø, menɑni bong gïndøj kì ree. Nɑ ngwej kì bɑng yømø. Dhëg cingge nyi bøødhe’ ree, kɑ ree wëgge ywɑjø yi kɑ̈j. Cɑgg ɑ́ kinøw, gïncɑm-ɑ cɑm ki mër e nøg, lɑ̈w kibøli gïncɑm-ɑ ngenyø, e yod-ɑ ri nɑ̈gi dhɑnhø ree ki gwøg. Menɑni nɑ ngwej kì bɑng yømø. Yɑ ɑ́yïddi thyew ki gïjø me bong gïndøj kì ree kì kömi piny. Dɑ dhɑnhø me bëëdø kete, e bong wɑ̈de, de nɑ̈g-ɑ ree ki gwøg, o pɑ kööbø kinni ɑ́ men ɑ ólɑg jɑmm-ɑ per gen mɑ̈ɑ̈nɑ riɑ medi pyëw? Menɑni bong gïndøj kì ree thyew, o bɑ yuu bëëdø me rɑj. Ji ɑ́ryew lɑ̈w kibøli dhɑnhø ɑ́kyel, mɑ́ ge ócuggø rëbø kì kömi gwøg, kɑ gwøngɑni obëënø e døøj. Mɑ́ ke pɑ̈ɑ̈dh ngɑn, tïng-ɑ mɑl yi ngɑn-ɑ kyeelø. De rɑɑj ke pɑ̈ɑ̈dh ngɑn-ɑ bɑ ɑ́kyel, mɑ́ e bong ngɑn-ɑ ótïngii mɑl keny-ɑ ópɑ̈ɑ̈dhe. Kenyi buddi ji ɑ́ryew kì kej ɑ́kyel, dëlli gen nyii lënhø, de nget ɑ́kyel dële ólënh-ɑ́ɑ̀ dï? Ji ɑ́ryew ócuggø tyɑmi ngɑn pɑ di lwɑ̈ng ki tyɑmø yi dhɑnhø ɑ́kyel. Thøl-ɑ yethe bɑ ɑ́dɑ̈g cöde teeg. Nyelɑwøb me wïje pel, cɑgg wɑnge cɑn, lɑ̈w kibøli rɑ̈nh-ɑ yöø, o wïje nøg, e pɑ yïëy köbbø, mɑ́ ócuggø bëën wɑ̈g kì ød mɑg, e pödh-ɑ wïj kwøm, cɑgg e ónywøøl ɑ kɑl me wɑnge cɑn kì kelli kɑ̈lli rɑ̈ɑ̈dhø. Kɑ yɑ orumø kì ri ji-ɑ bëëdø kì kömi piny keny, kɑ yodɑ kinni kelli gen dɑ nyelɑwøb men-ɑ ókwɑny kwøøm rɑ̈ɑ̈dhø. Tyëng-ɑ jɑɑge ócuggø bëëdø ge pɑ cuggi kwɑnø, de keny-ɑ óthøwe, bong ngɑn-ɑ ópøjjii këti. Menɑni bong gïndøj kì ree. Nɑ ngwej kì bɑng yømø. Nyi kedhí yij Kengø. Lɑ̈w kedhi be lïngø, kibøli muujø ki gëdhhì ni tyëng-ɑ wɑ̈thi gen nøg møg-ɑ kwïj wøw kinni ge gøgg-ɑ rɑj. Lebí ko nyi jwɑni, wɑlɑ̀ yï ko nyi köngi ki pyëwí kì bøli Jwøk, ki gïn pɑ cuggi gwøgø yi yïn. Mɑ́ Jwøk ying-ɑ mɑl, o yï ying-ɑ piny, wiy kwøbbí nyi bëëd ge nøg. Rumm-ɑ gïïr nyii kɑ̈nø ki lɑ̈g mø rijjø, o kwøbb-ɑ gïïr nyi wëgg-ɑ dhɑnhø kwøb ki kwøbbi dhëëgø. Keløg e dɑ gïn könggí Jwøk, jwɑɑn ki gwøgø ceth, mɑ́ pyëwe pɑ nyi med ki dhëëgø. Lɑ̈w ke cöög yï pɑ köngi kibøli ke köngí ki gïn pɑ cuggi gwøgø yi yïn. Rií ko wëggí kïdhi yij orøg yi lebí, o yï cöög yï pɑ kööbø kì bøli ókwëri Jwøk kinni, yï ɑ́wɑ̈dh-ɑ kwøb yøw. Ede Jwøk ɑ wëggí mɑgø yi liny ki yïn, o gwøgí bëne gø rënye? Bong dyër kì ri ngenyi lɑ̈g geki ngenyi dwøg, ceg Jwøk ki böggø. Keløg ngɑn wɑnge cɑn ólidh yi yïn e orujø yi ngɑn-ɑ jyɑ̈gø, o bong dyër geki gøggi dyër, yï ko ngɑ̈ng yi møgɑni, mɑ́ ngɑn-ɑ dwøng ojɑɑgø yi ngɑn megø me dwøng kibøle, o dɑ ngɑn megø me dwøng kibøli gen bënn. Cɑgg ɑ́ rɑ̈dh, nyi yiel-ɑ yi gïg-ɑ cyeg kì pinye. Ngɑn mɑɑr ngyëny, pɑ nyi yɑ̈ng yi ngyëny, nɑ ngɑn mɑɑr dhög ceth, o menɑni bong gïndøj kì ree thyew. Ke ngënyi kɑ̈rí, tyëng-ɑ cyɑ̈mø ceg-ɑ ngënyø thyew. Gïn-ɑ yod yi yïn, bɑ ngɑ̈nyí wøw kinni yïí dɑ kɑ̈r. Ngeti gwøg nyii nenø ki neni dwøng, cɑgg e yɑ̈ngø wɑlɑ̀ nuti. De tyëngkɑ̈rì pɑ nyi neni yi rummi jɑmmi gen. Yɑ ɑ́lïdhi ki gïnrɑj kì kömi piny, kinni ji nyi cung-ɑ piny ki ngyëny møg-ɑ ógwøg gen gïn-ɑ ódwɑddi yi gen kì bøli keny megø, kɑ ngyënyyɑni nyii lɑ̈ɑ̈nyø, kɑ dhɑnhø nyii döngø ki cingge, kɑ ojɑdø ki gïn lɑg yi wɑ̈de kì bɑnge. Dhɑnhø nyi døg e nɑ kɑ ɑ́bëëne wɑ̈g kì yij meye; nyi døg e cyɑ̈dh-ɑ nøw, bong gïn nyi kɑ̈l yi en kì kömi piny kì ri jɑmm-ɑ ɑ́lem yi en. Nënni e bong gïndøj me yod yi dhɑnhø kì bɑng gwøge, den-ɑ́ yømø yøw, nyi kedh nɑ kɑ ɑ́bëëne ceth. Bong gïn kɑ̈l yi en kì ri gïg-ɑ ɑ́gwøge. Bëëdee bëne kì kömi piny thumi ɑ́ muudhø, kí kïïmø, kí liny geki rɑ̈ɑ̈m dëllì. Gïn-ɑ ɑ́yodɑ bɑ kinni: gïn-ɑ døj bɑ kinni, o dhɑnhø cyɑ̈me, o mɑ̈dhe, o pyëwe mede ki gwøng-ɑ ɑ́mëggii yi Jwøk, kì yethi cyɑ̈ngg-ɑ nøg møg-ɑ bëëde kì kömi piny, mɑ́ menɑni bene köögi miee. Ngɑn-ɑ ɑ́thödhi yi Jwøk ki kɑ̈r, kɑ gø wëgge tɑ̈bbø kì yij kɑ̈rɑni, o pyëwe mede ki pïde, bëëde pyëwe med ceth, mɑ́ menɑni bɑ muunyi Jwøk. Wiy bëëd e bong gïn rømme kì ri nøgi runne kì kömi piny, mɑ́ e ɑ́thödhi yi Jwøk ki medi pyëw. Dɑ rɑj møøgø mɑ ɑ́lidhɑ thyew kì kömi piny, rɑj mø wëggi ji mø gïïr orɑng. Dɑ dhɑnhø me thödhi yi Jwøk ki kɑ̈r me dwøng. Bong gïn cɑ̈nnii. De ɑ́cög e pɑ thödhi yi Jwøk ki medi pyëw me di tɑ̈bbe kì yij kɑ̈rɑni, de yöd e cɑm-ɑ yi ngɑnpɑth. Menɑni bɑ gïjø me rɑɑj cɑrø. Cɑgg dhɑnhø nyige bɑ miyø, kɑ obëëdø kì kömi piny ki runn mø gïïr, de bong medi pyëw kì yïe ki jɑmm-ɑ døøj kì kömi piny, wɑlɑ̀ kɑ ocögø e pɑ kony ki dhwɑ̈ng, yɑ orumø kinni dhɑnhø men-ɑ ɑ́nywøl e thøø lɑ̈w kibøle. Bong gïndøj kipe dhɑnhø men-ɑ nywøl e thøø, mɑ́ e kedh-ɑ yij muudhø kun wïle. Bëëdi kömi piny nuti yood en, o bong gïjø mɑ ɑ́lidhe kì yije, de cɑgg ɑ́ kinøw, ɑ́yïddi ki ywömø kibøli jɑlkɑ̈rɑni. Cɑgg e di bëëd kì kömi piny ki runn ɑ́lïp ɑ́ryew, e bong medi pyëw me yode, bong gïn wɑnge, mɑ́ ge kedh-ɑ kej ɑ́kyel ryeet. Wɑ pïd yi gwøg kɑ per kinni o wɑ yïddi wɑ ki gïncɑm, de wɑ pɑ wïyi ki dwɑddi gïg-ɑ dwɑddi yi wɑ. Døøji ngɑn wïje pel bɑ ngø kibøli dhëg? O ɑ́ ngø ɑ nyi yod yi ngɑn jɑdø, men-ɑ ngɑ̈ny bëëdø ki bëëndøj? Menɑni bong gïndøj kì ree, nɑ ngwej kì bɑng yømø. Lɑ̈w ke med pyëw dhɑnhø ki gïn-ɑ nud kì yïe, kibøli ke tyer pyëwe gïjø megø yøw. Gïg-ɑ cwöb bënn, ɑ́cïb kɑ̈ge dööng, o ngɑ̈nyi yi wɑ kinni dhɑnhø pɑ cuggi gøny ki ngɑn teg kibøle. Kɑ̀ mɑ̈gí ki keny me bɑ̈ɑ̈r yï ogönyø ki en, ceg-ɑ kedhø e órënyø, o bong gïn med me yod yi yïn. Á men ɑ ngɑ̈nyi gïn-ɑ døj kipe dhɑnhø ki bëën-ɑ nøg, men-ɑ nyi wɑ̈ɑ̈ny ni tïbø? Á men ɑ cuggi kwøbi gïn-ɑ ócwöb kipere kì bɑng keny-ɑ óthøwe? Døøji bëëdø lɑ̈w kibøli møw-ɑ yøme med, men-ɑ ngewe teeg; cyɑ̈ng-ɑ thøw dhɑnhø lɑ̈w kibøli cyɑ̈ng-ɑ ɑ́nywøølii. Lɑ̈w kedhi gøl-ɑ di thøø kibøli kedhi kej ryëj, mɑ́ wɑ óthøw bënn, rømmi wɑ møgɑni kidøøj. Kïïmø lɑ̈w kibøli ngyerø, mɑ́ kïïmø nyi pwöny-ɑ wɑ ki gïg mø per gen teg. Tyëng-ɑ wɑ̈thi gen pel nyii rumø kì ri thøø, de dhëgg nyi rømm-ɑ bëëdi medi pëëth yøw. Köbbi yïn bɑ̈jjí yi ngɑn wïje pel, lɑ̈w kibøli lenhi yïn ki wör yi dhëgg. Ngedhi dhëg nɑ cwɑggi koodh mø rɑ̈b yi mɑc, bong gïn wɑngi yi en. Ruj nyi wëgg-ɑ rummi ngɑn wïje pel nungø, kwɑjji dhɑnhø ki ngyëny nyi rëny-ɑ nyinge. Cögi gïïpiny døøj kibøli cɑ̈ge. Ngïïnø lɑ̈w kibøli thwøgø. Rií ko nyi wëggí jwɑnø ki mɑgø yi liny, mɑ́ mɑngø yi liny bɑ nøgi wïj. Yï ko kööb kinni cyɑ̈ngg-ɑ ɑ́pöödh gede ɑ døøj gen kibøli cyɑ̈nggi ɑnɑn. Kipe pyëjjɑni bong peli wïj kì ri gen. Tyëng-ɑ wɑ̈thi gen pel pɑ nyi pëëjø kinøw. Peli wïj døj nɑ gïn lɑg, bɑ døøjø, o wëy nyi mïdhe’ mïdhø, o yï korre’ korrø ni ke di korri yïn yi ngyëny. Yï nyii korrø yi peli wïj, bene ɑ bɑnge døøje. Rum kì ri gïg-ɑ ɑ́gwøg yi Jwøk; gïn-ɑ ɑ́gwøg yi Jwøk ɑ́ ódwøl ócuggø tyenyø yi yïn? Nyi bëëd pyëwí e med cyɑ̈ng-ɑ bëëd jɑmmì døøj, kɑ kenyi bëën rɑj nyi pɑr kinni, døøjø geki ɑkørr nyi ör-ɑ yi Jwøk; o gïn-ɑ ólunyi cwöbø kì bɑng gen, kwïj yi yïn. Jɑmmì bënn ɑ́lidhɑ, dɑ tyëngtir møg nyi thøw ki døøji gen, o dɑ tyëngrijjø møg runni gen ngënyi ge rijjø ceth. Yï ko bëëd yï døøj ki mendwøng, wɑlɑ̀ peli wïjí ko pɑg, ɑ́ kipe ngø ɑ nɑ̈ɑ̈g rií? Yï ko göög ki rɑj ki menrɑj, wɑlɑ̀ yï ko bëëd wïjí nøg cɑrø, ɑ́ kipe ngø ɑ thøw e bøli kejí nuti? Lɑ̈w ke mïdhí gen ryeet, mɑ́ keløg Jwøk owørø yi yïn, bong gïn dhɑl yïn. Peli wïj, dhɑnhø nyi thödhe’ thödhø ki tegø me lod tegi kɑɑl me jɑɑg yi jyɑ̈ggì pyɑ̈rø. Bong ngɑntir kì kömi piny, me cuggi gwøg ki gïndøj e pɑ røngi. Yï ko pëggi be bidh ki møg-ɑ kømmi yi teedø, kipe yï ólïngø kinni, i yï ógwɑddø yi bɑ̈ngí. Mɑ́ e ngɑ̈nyi yi yïn ki pyëwí kinni dɑ ji møøgø mɑ ɑ́gwɑddi yi yïn tyel mø gïïr. Gïgɑni bënn ɑ́rɑngɑ ki peli wïj, kɑ yɑ okööbø kinni, wïjɑ ópïlli, de yɑ ɑ́dhɑl yi riɑ. Gïg-ɑ göögø bënn kì kömi piny dhɑ̈li gɑmø yi wïj dhɑnhø. Á men ɑ cuggi yodi gen bënn? Acïbɑ pyëwɑ ri kwøbbi ngɑ̈nyi wøw geki yɑb ki thɑ́ kwøb, yɑ ɑ́dwɑdd-ɑ yodi peli wïj kí løøgi møg-ɑ pyënyɑ riɑ, o yɑ yodɑ kinni gøggi rɑj bɑ dhëëgø, o nøgi wïj bɑ ɑ́nɑ̈gø. Ayïddɑ ki gïjø me rɑɑj kibøli thøø, ɑ løg ngɑndhɑjø men-ɑ pɑ̈r ki ɑ́kɑ̈llì. Mine bɑ ɑbyëg kí bøy, cingge bɑ digïddì, bɑ ngɑn mɑɑr yi Jwøk ɑ óbodh kì cinge, de jɑlorøg nyi mɑge’ mɑgø. Bene møg-ɑ ɑ́yodɑ kì bɑng kɑ ɑ́yɑbɑ thɑ́ kwøb mɑ̈ɑ̈dh. Thɑ́ kwøb møøgø ɑ́yɑbɑ thyew, de ge nuti yood yɑn. Yɑ ɑ́yïddi ki jɑlø ɑ́kyel kì kelli jøg-ɑ cwøw ɑ́lïp, men cuggi wørø, de bong ngɑndhɑjø mɑ ɑ́yodɑ. Gïn-ɑ ɑ́yodɑ kete bɑ kinni, ji ɑ́cwɑ̈j yi Jwøk ge døøj, de ge ɑ́yɑ̈ɑ̈b ki yëëth møøgø. Ngɑn wïje pel bene en ɑ ngɑ̈nyi lwøbi thɑ́ kwøb, o nyi wëgg-ɑ bønyø yi peli wïj, kɑ loji bøle nyii lɑ̈ɑ̈nyø. Nyi gwøg gïn-ɑ kwøb yi rɑ̈dh, kɑ yï ko nyi wɑ̈dhi köngø ki nyingi Jwøk kinni gïn-ɑni ógwøg yi yïn. Yï ko nyi jwɑn kedhø kì buti rɑ̈dh, yï nuti ti rumø kì ri gïn-ɑ gwøg yi yïn, mɑ́ yï ócuggø göggø yi en ki gïn-ɑ dwɑdde göggi yïn. Rɑ̈dh yïe dɑ tegø, o bong ngɑn cuggi tyëddii men kew kwøbbe. Kenyi mïdhi cigg yi dhɑnhø, nyi bong-ɑ rɑj mø bï köme. Ngɑn wïje pel ngɑ̈ny wøw ki bøli keny-ɑ døøj ki gwøgi gïn-ɑ dwɑdde gwøgø. Jɑmmì bënn dɑ bøli kej gwøgi gen, de bong gïn ngɑ̈nyi yi wɑ. Wɑ kwïj wøw ki gïn-ɑ ócwöb dhuki, o bong ngɑn köbbi wɑ. Bong ngɑn cuggi cungi thøwe, o bong ngɑn cuggi yienyi bøli keny-ɑ óthøwe. Møg bënn ɑ́yodɑ keny-ɑ ɑ́rumɑ kì ri gïg-ɑ gøggi kì kömi piny men, keny-ɑ bëëd ji møøgø yï gen dɑ tegø kì kömi tyëng-ɑ kyeelø, o tyëngɑni rɑngi gen kì cinggi gen. Ngee, yɑ ɑ́lïdhi ki tyëngrijjø ge okonyø, de keny-ɑ ɑ́dwöög ji kì be kony, ge ɑ́dwöög ge pøjj-ɑ tyëngrijjø møgɑni, ge ɑ́tir ki pøjjø kì kɑɑl-ɑ́ yije ɑ́göög gen ki rɑj. Menɑni bong gïndøj kì ree. Tyëng-ɑ gøggi rɑj pɑ nyi jwɑn ki cɑyø, bene ɑ bëëd pëthi ji mɑɑr-ɑ gwøg ki rɑj. Ngetorøg nyii røngø tyel miyø, kɑ ocögø e pɑ thøw. Gïn-ɑ nyi kømmi yi gen ngɑ̈nyi yi yɑn; ge nyii kööbø kinni, i yï ócuggø bëëdø ki tɑrø ke lïngí kwøbbi Jwøk, de tyëngrijjø pɑ nyi yïddi ki døøjø. Bëëdi gen kì kömi piny nyi jwɑn-ɑ lɑ̈ɑ̈nyø ni tïbø, o ge óthøw ge thønhø, mɑ́ Jwøk pɑ böggi yi gen. De menɑni bong gïndøj kì ree. Dɑ gïjø megø kì kömi piny keny, me pɑ cuggi gɑmø yi wïj dhɑnhø, cyɑ̈ng møøgø cɑ́yi tyëngrijjø nyi pɑ̈dh-ɑ kömi tyëngtir. Kɑ tyëngrijjø óyïddø ki köögi, de ge nɑ tyëngtir. Menɑni bong gïndøj kì ree. Kɑ̀ bëëd møgɑni kinøw, lɑ̈w bëëdi dhɑnhø pyëwe omedø kì kömi piny. Mɑ́ cɑm geki mɑdh, kí medi pyëw, bene gen ɑ pëddi døøjø kì kömi piny. Bene gïn-ɑ cuggi yodø yi dhɑnhø kì bɑng pïde, kì yethi cyɑ̈ng møg-ɑ ɑ́mëggii yi Jwøk, gɑ møg bëëde kì kömi piny. Kenyi yɑbɑ wïjɑ kipe yodi peli wïj, kí yodi gïg-ɑ gøggi yi ji kì kömi piny, kɑ yodɑ kinni dhɑnhø ócuggø bëëdø e pɑ neni kì wɑ̈r kí dicɑ̈ng, de gïg-ɑ gøggi yi Jwøk pɑ cuggi gɑmø yi wïje. Cɑgg ree pɑ̈nye kidï, pɑ yod yi en kinni tek. Tyëng-ɑ wɑ̈thi gen pel okööbø ce ge ngɑ̈ny wøw, de ge kwïj wøw. Yɑ ɑ́rum kì ri møgɑni bënn, kɑ yodɑ kinni tyëngtir geki tyëng-ɑ wɑ̈thi gen pel, gïg-ɑ gøggi yi gen bënn, ying-ɑ cingi Jwøk. Bong ngɑn ngɑ̈nyi gïn-ɑ ócwöb dhuki, cɑgg ɑ́ ri gïg-ɑ mɑɑr yi en, kí gïg-ɑ mɑɑn yi en. Bong gïn bɑ̈ɑ̈n, gïg-ɑ óbï kömi tyëngtir geki tyëngrijjø, kí tyëngdøj geki tyëngrijjø, kí tyëng kwøbbi Jwøk geki tyëng-ɑ kyeelø, kí tyëng-ɑ nyi muujø ki gëdhhì geki tyëng-ɑ pɑ nyi muujø. Bong gïn bëëd ngɑndøj e lɑ̈w kibøli ngɑnrɑj; ngɑn-ɑ nyi köngi pɑ lɑ̈w kibøli ngɑn-ɑ nyi böggi ki köngø. Gïn-ɑ pëddi rɑ̈jø kì kömi piny bɑ kinni, gïg-ɑ óbï kömi ji bënn dhuki megø pɑ̈r. O pëthi ji pɑ̈ng yi rɑj geki dhëëgø, codhe o ge nyi pɑ̈ɑ̈y piny yi thøø. De tyëng-ɑ nëënø yï gen dɑ ngɑ̈ɑ̈dhø; gwöng nëënø lɑ̈w kibøli ngur men-ɑ thøø. Mɑ́ tyëng-ɑ nëënø ngɑ̈ny wøw kinni ge óthøw, de tyëngthøø bong gïn ngɑ̈nyi yi gen, bong köögi me nud kiper gen këti, ge ɑ́wïl ki mendwøng. Mɑ̈ɑ̈dø kí mɑ̈ɑ̈nø geki tyiel møg-ɑ ɑ́ying pëthi gen ɑ́lɑ̈ɑ̈ny gïti ɑtheer. Bong gïn-ɑ ógwøg yi gen kì kelli gïg-ɑ gøggi kì kömi piny këti. Kɑ ɑ́rum bëëde kinøw, cɑm gïncɑmí kɑ møgi oløgí mɑɑdh ki medi pyëwí, mɑ́ bene gïn-ɑ dwɑddi yi Jwøk kiperí. Bëëd ógudhí ge tɑr yethi cyɑ̈ng, kɑ wïjí nyi kunyi ki møw-ɑ yøme med. Bëëd pyëwí med yethi cyɑ̈ng bënn ki cyëgí men-ɑ mɑɑr yi yïn, ɑ ɑ́mëggi yïn yi Jwøk, mɑ́ e bɑ gïn-ɑ ɑ́mëggi yïn yi Jwøk kì yij bëëdi orɑngí kì kömi piny. Gwøng-ɑ yod yi yïn, gwøøg ki tegí bëne, mɑ́ e bong gwøg wɑlɑ̀ rummì wɑlɑ̀ dïdø, wɑlɑ̀ peli wïj kì piny kun-ɑ ókedhi yi yïn. Kɑ yodɑ këti kinni, kì kömi piny, pɑth ki ngɑn-ɑ nyi rïngi kidøøj ɑ nyi tyɑ̈mø. Pɑth ki liny-ɑ teg ɑ nyi tyɑ̈mø. Pɑth ki tyëng-ɑ wɑ̈thi gen pel ɑ nyi yïddi ki gïncɑm. Pɑth ki tyëng-ɑ ngɑ̈ny wøw ɑ nyi kɑ̈ri. Pɑth ki tyëng-ɑ cuggi gwøg, ɑ nyi wɑ̈dhi mɑl. De rɑj nyii cwöbø kipe ji bënn. Mɑ́ e bong ngɑn ngɑ̈nyi bøli keje. Nyi nɑ mɑgi winyø yi ɑ́kɑ̈llì, kɑ nɑ mɑgi rëjø yi bøy, dhɑnhø nyi liib-ɑ piny yi thøø, kì bøli keny me nuti rømmø yi en. Dɑ gïjø mɑ ɑ́lidhɑ thyew, ɑ løg tegi per peli wïj kì kömi piny. Ádɑ kɑɑl me thiinh mɑ ɑ́tyeg yi rɑ̈dh me teg kinni, o di pɑ̈ɑ̈re kömi kɑɑlɑni, o döre di dhure piny. Ádɑ jɑl me wïje pel me wɑnge cɑn kì kɑɑlɑni, me di yiel kɑɑl ki peli wïje. De bong ngɑn mɑ ɑ́pɑr jɑlɑni. De yɑ ɑ́kööb kinni, peli wïj lɑ̈w kibøli tegø, cɑgg ɑ́ kɑ̀ bëëd e bong ngɑn mɑ ɑ́pɑr peli wïj jɑl-ɑ wɑnge cɑn, o bong ngɑn mɑ ɑ́lïngi kwøbbe. Lɑ̈w lïngi kwøbbi ngɑn wïje pel, kibøli lïngi ryeeri jɑgø kì bøli ji mø wɑ̈thi gen nøg. Peli wïj døøj kibøli jɑmmi liny, de ngetorøg ɑ́kyel gïgdøj mø ngenyø nyi rënye’ rënyø. Møw-ɑ yøme med nyii pënnø yi lwɑngg-ɑ thøw yije, nɑ menɑni ceth, dhëëgø me nøg nyi rëny-ɑ peli wïj me dwøng. Pyëw ngɑn wïje pel nyi tyer-ɑ gøggi dyër, de pyëw dhëg nyi yɑb-ɑ gøggi rɑj. Dhëg cɑgg e ceg cyɑ̈dhø kì yij yöö, nøgi pyëwe ceg-ɑ nënnø ceth, dhëëgø mee nyi nyudhe’ ji. Keløg jɑngí omɑgø yi liny ki yïn, yï ko kon ki gwøgí, cɑgg yï bɑ̈jjø, pyëwe ócuggø lɑ̈ɑ̈mø ki yïn ke cöög yï okudø. Dɑ gïnrɑj mɑ ɑ́lidhɑ kì kömi piny, ɑ løg møn-ɑ mød ji yi tyëng-ɑ jyɑ̈gø. Tyëng-ɑ wɑ̈thi gen nøg nyi mëgg-ɑ lɑ̈ww-ɑ døngø, o tyëngkɑ̈rì kwɑny gen kɑ̈jj-ɑ bong per gen. Bɑ̈ngg ɑ́lidhɑ ge cyɑ̈dh-ɑ kyënyì, o nyiirɑ̈dhh cyɑ̈dh-ɑ tyelli gen ni bɑ̈ngg. Ngɑn-ɑ nyi kony bur nyi pɑ̈dh-ɑ yije, o ngɑn-ɑ nyi dhur dörø piny, nyii kɑjø yi thwöl. Ngɑn-ɑ nyi tweg kït nyii yïddø ki kedø, o ngɑn kɑg yenh nyii yïddø ki kedø thyew. Keløg dørí gug, o nuti pɑɑg yïn, göög yi yïn kɑ tegø me dwøng. De peli wïj gwøge nyi pɑ̈dh-ɑ keje ceth. Kër-ɑ gwøøg gwøg nyi gwir e gwøngɑni nuti cɑ̈gø. Ngɑ̈nyi tuuri dhø thwöl bong døøje keløg thwöl rum kɑ̈jjø. Kwøbbi ngɑn wïje pel nyi kɑ̈ɑ̈l-ɑ wøre, de kwøbbi dhëg nyi rëny-ɑ en. Kwøbbi dhëg nyi cɑ̈gi kɑ dhëëgø, o nyi cög kɑ ɑ́nɑ̈gø me rɑj. Dhëg kwøbbe pɑ nyi thumi. Bong ngɑn ngɑ̈nyi gïn-ɑ ócwöb dhuki, bong ngɑn köbbi wɑ gïn-ɑ ócwöb kì bɑng keny-ɑ óthøw wɑ. Dhëg nyi ceg-ɑ pïdø yi gwøg, kɑ ówɑ̈ɑ̈nyø ki yuu pɑc. Pödhø nyii rënyø keløg rɑ̈dhe bɑ nyelthinh, o wøw nyi ru e pëjje ceg-ɑ cɑm. De pödhø ree nyi dɑ gyëdh keløg rɑ̈dhe ngɑ̈ny löggø, o pëjje nyi cyɑ̈ɑ̈m ɑ bøli kej cɑm ceth, o ri gen pɑ nyi wëggi gen nɑ̈gø yi møgø. Keløg dhɑnhø dële ledh, kɑ ódhɑ̈lø thïgi øde, ønɑni nyii pɑ̈ɑ̈dhø. Cɑm geki mɑdh ki møgi oløg nyi kɑ̈ɑ̈l-ɑ medi pyëw, de ge pɑ yod yi yïn e yïí bong ngyëny. Rɑ̈dh ko yɑɑny cɑgg ɑ́ ki pyëwí, o ngetikɑ̈r ko yɑɑny cɑgg yï ying ødí yï ketí. Mɑ́ kwøbbí ócuggø kɑ̈ɑ̈lø yi winyø, kɑ gï muuje gïn. Nyi muuj, mɑ́ yï óyïddi ki köögi kì bøli keny megø. Nyi cïb jɑmmí kɑ̈jj mø gïïr, mɑ́ rɑjj-ɑ óbï kömí kwïj yi yïn. Yɑdh nyi cöög-ɑ tung-ɑ ɑ́pɑ̈dhe ceth. Kenyi lunyi pøøl, kødh nyi ceg-ɑ mɑ̈gø ceth. Keløg yï yïd-ɑ yømø o cunge, o piny kwöje, yï pɑ kɑ̈gø, o bong byel møg-ɑ ókɑj yi yïn. Jɑmmì bënn ɑ́gwøg-ɑ yi Jwøk, o gïn-ɑ gwøg yi en, pɑ cuggi gɑmø yi wïjí, kwïj yi yïn kër-ɑ nyi gwøøg cu dhɑnhø kì yij meye. Nyi kɑ̈ɑ̈g kì mwøl kí böörø, mɑ́ e kwïj yi yïn keløg ɑ́ møg-ɑ ɑ́wën ɑ ótwïy kì kelli gen, wɑlɑ̀ ɑ ócyeg kidøøj. Bëëdi dhɑnhø e onëënø bɑ gïjø me myër, nenni cɑ̈ng myëër cɑrø. Bëëd pyëwí med yethi cyɑ̈ng, mɑ́ thøø óbï, o thøø bɑ̈r kibøli nënnì. Bong gïndøj me cuggi ngɑ̈dhø. Yɑɑg thønhø, med pëthi wun ki bëëdi wööbø geki jurø. Gwøgu gïg-ɑ dwɑddi yi pëthi wun, ɑ nenni yi wun. De ngɑ̈nyu wøw kinni, kwøbbi wun ólidh yi Jwøk e ködd-ɑ kömi gïgɑni bënn. Yï ko nyi kïïm, kɑ pyëwí ko nyi rɑ̈ɑ̈m, mɑ́ yï koo cög yï thiinh. Wïjí ko wïl ki Ngɑn-ɑ ɑ́cwɑ̈j yïn kɑ̈ng-ɑ nudd yï thiinh, kɑ̈ng-ɑ nuti bëën cyɑ̈ngg-ɑ rijjø, bøli keny-ɑ ókööb kinni, “Bong medi pyëw me nud kiperɑ këti.” Bene bøli keny-ɑ ólunyi cɑɑr cɑ̈ng geki dwɑ̈y kí kyell kì nyingí, o pølli kødh koo wɑ̈ɑ̈ny. Codhe kɑ cinggí, cingg-ɑ ɑ́korri yïn døøg-ɑ be okïr, kɑ tyellí tyell-ɑ teg ɑnɑn ónyönhø, kɑ leggí ódhɑ̈lø nyɑm, kɑ nyingí ódhɑ̈lø nënnø kidøøj. Yïthhí ópëngi, kɑ yï ódhɑ̈lø lïngi cwɑggi tyëng-ɑ wör kì yöö. O cwɑggi tyëng-ɑ mɑ̈nn møg-ɑ wïj pɑny ódhɑ̈li ki lïngi yi yïn. De cɑgg ɑ́ ywøøg ɑ́kej, yï ceg kɑ cyëëwø yi en. Yï ódøøg be böggø yi kɑ̈jj-ɑ bɑ ótøng, kɑ yï óböggø ki cyɑ̈dhø. Yëyyi wïjí ri gen óløg gen wɑ́r, kɑ yï døøg-ɑ be yɑ̈jjø kì piny, bong gïn-ɑ ótyer yi pyëwí këti. Wɑ kedh-ɑ kej ywömee, keny-ɑ óbëëd yi wɑ gïti ɑtheer. Codhe, o ji ywöngi gen kì yethi yëëth. Kì bɑng keny me nøg, wëy ócöd ni ɑ́cwecwelli ɑ́tegø, wɑlɑ̀ ni tørri tɑbi dhɑb, thøl ócöd kɑ ɑtöög pï ree møde. O lɑ̈bø døøge piny keje, o wëy døøg gen yï Jwøk, ngɑn-ɑ ɑ́mëggi gen wɑ. Tïddi Kwøb ɑ́kööb kinni i bong gïndøj kinni tek, møgɑni bënn bong gïndøj kì ri gen. Kì bɑng peli wïj Tïddi kwøb, ji ɑ́pwönye ki gïg-ɑ ngɑ̈nyi yi en. Thɑ́ gɑ́j ɑ́ti yi en ki yɑbø kidøøj, kipe yodi dyër kì ri gen. Tïddi kwøb ɑ́dwɑdd-ɑ yodi kwøbbi døøjø, de kwøbb-ɑ bɑ dyër ceth ɑ́gwed yi en. Kwøbbi tyëng-ɑ wɑ̈thi gen pel bedh nɑ ɑthiyø, men-ɑ nyi cørri dyëg. Ge nɑ musmɑ̈rr møg thøø yi gurø, ge ɑ́muuj-ɑ yi Jwøk, ngɑn-ɑ kwɑy wɑ bënn. Wɑ̈dɑ, dɑ gïjø me dwɑddi tidø yi yïn kidøøj. Gwed ki wɑ̈j bong cöge, o rɑng-ɑ gïïr nyi pïd-ɑ dhɑnhø. Kì bɑng møg bënn, dɑ gïjø ɑ́kyel me dwɑdd-ɑ kwøbø, böggí Jwøk, kɑ gïn-ɑ kwøbe nyi gwøøg ceth, mɑ́ bene gïn-ɑ́ pere ɑ́cwɑ̈ɑ̈j dhɑnhø. Gïg-ɑ gøggi yi wɑ bënn ólidh-ɑ yi Jwøk, ying ge døøj wɑlɑ̀ ge rijjø, gï ólidhe bënn cɑgg ɑ́ møg-ɑ ógwøgø kì gødd. Wörr-ɑ pëddi døøjø, wörri Sølømøn. Nuum yɑn, kɑ yɑ nyi døøg ki nuumø, mɑ́ mɑ̈ɑ̈dø mií med kibøli møgi oløg. Yømí med cɑrø, kɑ̀ cwøøl nyingí, møw-ɑ yøme med nyi ceg kɑ pɑrø, bene ɑ pere mɑɑr yïn yi mɑ̈nn bënn. Kɑ̈l yɑn, o wɑ pɑ̈r wɑ, bëëd yïn ɑ́ rɑ̈dhɑ, kɑ yɑ kïdhí ødí. O wɑ bëëd wɑ pëthee omedø, o wɑ thøw wɑ yi mɑ̈ɑ̈dø; mɑ̈ɑ̈dø mií med kibøli møgi oløg, bene ɑ pere mɑɑr yïn yi mɑ̈nn. Nywøli Yerusɑlem, yɑ looj, de yɑ myëër, yɑ looj ni kemmi Kedɑr, de yɑ myëër ni ógønh-ɑ bɑ gëëng gøldwøøng Sølømøn. Yɑ ko benyi wun kipe kïdɑ, mɑ́ yɑ ɑ́luny-ɑ yi cɑ̈ng. Nyiimïɑ yɑɑg-ɑ cwøw ɑ́mɑg yi liny ki yɑn, kɑ yɑ cïrri gen gwøg kì bɑɑg oløg, ɑjɑdɑ ki keny korɑ dëlɑ. Köbbí yɑn, ɑ́mɑɑrɑ, yï ókwɑ̈yy-ɑ keny ki dyëgí dicyɑ̈ɑ̈ng? Yï óywöm ɑ keny dicyɑ̈ɑ̈ng? Á kipe ngø ɑ yɑbɑ yïn kì kelli kwɑ̈yyi dyëg møg-ɑ kyeelø? Kenyɑni kwïj yi yïn, nyɑn-ɑ mɑɑr kì kelli mɑ̈nn bënn? Kedh kɑ yï lugí kì bɑng dyëg, yɑ̈bbí dyëgí ki kej lum-ɑ døj, kì buti kemmi kwɑ̈yyi dyëg. Ámɑɑrɑ, yï dir-ɑ cwøw, ni kenyi diir kyeny yi yɑ̈thi rɑ̈ɑ̈dh Rïp. Yï ɑ́pëddi myëërø yi gïi yïthh, geki gïi yedhí men-ɑ bɑ ɑ́tegø. De yï ógöggi yi wøn ki ɑ́cwecwelli dhɑb kí jɑmmi dhwɑ̈ng møg-ɑ ódhyɑwø ki ɑ́tegø. Rɑ̈dhɑ buud-ɑ wïj pyëne, kɑ piny bëne kwɑny yi yømi møwɑ. Ámɑɑrɑ yøme omedø ni ryɑ̈ mor kenyi buude kì köörɑ. Ámɑɑrɑ nɑ okøgg møg-ɑ nyi twïy kì bɑ̈ggi Ein Gedì. Yï myëër cɑrø, ɑ́mɑɑrɑ, nyingí yööm ni nyingi ɑkur! Yï myëër cɑrø, yeki ɑ́mɑɑrɑ, pyëwɑ nyii mïnø yi nenni yïn! Lum-ɑ mɑr óbëëd ɑ́ pyënee, o yenh sɑndɑl óbëëdø gɑ mɑ̈ggi tɑni ødee, o yenh ɑmedh ɑ ótɑɑg tɑnø. Yɑ bɑ okøøg pɑ̈l me twïyø kì Cɑrön, okøg me ying yij tör. Ámɑɑrɑ kì kelli mɑ̈nn nɑ okøg kì kelli koodh. Ámɑɑrɑ kì kelli cwøw, nɑ yɑdh tupɑɑ̀ kì kelli yenhi wɑg, Yɑ nyi mɑɑr-ɑ bëëdø kì tïbe, yɑnhɑni nywøle omedø kì dhøgɑ. Yɑ ɑ́kɑ̈ɑ̈le kej ryëje, ji ɑ́nyudhe kër-ɑ mɑɑre yɑn. Thödhí yɑn ki ópuun nywøli yenh, o dëlɑ tënge, kɑ yɑ thödhí ki tupɑɑ̀! Yɑ ɑ́nyönhi yi mɑ̈ɑ̈dø. Wïjɑ mïdhe kɑ cingi cɑɑme, o yɑ ɑ́dööbe kööre ki cingi kyëje Nywøli Yerusɑlem, yɑ kwɑjj-ɑ wun, köngi wun ki nyingi ɑ́køny geki tenø kinni, mɑ̈ɑ̈dø mi wøn koo rënyi yi wun gïti keny-ɑ órum wøn. Cwɑggi ɑ́mɑɑrɑ ɑ́lïngɑ. Bï e órïngø kì wɑ̈thi kïtt-ɑ døngø, o kïtt-ɑ thønhø kɑ̈dhhe’ kɑ̈dhhø. Ámɑɑrɑ nɑ ɑ́køny, o nɑ tenø. En ɑ cungi kì ngɑ̈ɑ̈j kɑl ɑnɑn. Ámëddi kì ɑwɑj wɑnge kɑ̈ɑ̈l-ɑ kelli sitɑrɑ̀. Ámɑɑrɑ kööbø kɑ yɑn. Bïí ɑ́mɑɑrɑ, nyɑn-ɑ myër, bïí kedh wɑ. Cwir ɑ́thumi, kødh ɑ́tem. Piny ɑ́pɑ̈ng yi okøgg. Bene bøli kej wör èn, cwɑggi ɑkur lïngɑ’ lïngø kì yij piny bëne Ólɑm ɑ́cɑ̈gi ki cyegø, yømi piny ceg-ɑ medø yi okøggi oløg. Bïí ɑ́mɑɑrɑ, bïí kedh wɑ. Akurɑ, yï lɑ̈wi, yï ying-ɑ yij órøngi kït. Wiy yɑ lidhɑ myëri bølí, wiy yɑ lïngɑ medi cwɑggí. Mɑgu nywøli ógwøgg møg-ɑ keny-ɑn, kipe bɑɑg oløøg wøn órënyi yi gen, e oløg ceg-ɑ køøg. Ámɑɑrɑ bɑ miɑ, o yɑ bɑ mee, dyëge nyi kwɑɑye’ kelli okøgg, pïd kenyi pyëëd piny, kɑ muudhø ólɑ̈ɑ̈nyø. Døøg ɑ́mɑɑrɑ, jwɑní ni ɑ́køny geki tenø kì wɑ̈thi kïtti Bedher. Kenyi buudɑ kì yij pyënɑ kì wɑ̈r, yɑ nyi lɑ̈g-ɑ jɑl-ɑ mɑɑr yi pyëwɑ, yɑ ɑ́yɑb-ɑ en, de nuti yood yɑn. Áyɑbɑ kì yij kɑɑl bëne, kí yethi yëëth. Yɑ ɑ́yɑb-ɑ jɑl-ɑ mɑɑr yi pyëwɑ, ɑ́yɑbɑ de nuti yood yɑn. Kɑ yɑ yod yi jøg-ɑ kor kɑɑl. Apyëjɑ gen kinni, “Jɑl-ɑ mɑɑr yi pyëwɑ ɑ́di lidhø yi wun?” Keny-ɑ ɑ́pöödhɑ gen ceth, ɑyodɑ en. Amɑgɑ en kɑ mɑ̈ɑ̈nɑ kedhø, gïti kɑ ɑ́kïdhɑ en ød meyɑ, øn-ɑ́ yije ɑ́nywøøl yɑn. Nywøli Yerusɑlem, yɑ kwɑjj-ɑ wun, köngi wun ki nyingi ɑ́køny geki tenø kinni, mɑ̈ɑ̈dø mi wøn koo rënyi yi wun gïti keny-ɑ órum wøn. Á men ɑ kɑ̈ɑ̈l yij ryɑng e nɑ yïrø ɑcɑ̀, e yøme omedø ni yømi ryɑ̈ mor geki bɑkur, kí mɑ̈th-ɑ yømi gen med bënn, møg-ɑ nyi kɑ̈lli yi jøngyew? Sølømøn ɑ kɑ̈ɑ̈l e otyëddø kì wïj kwøme, kor-ɑ yi jödd pyɑ̈r ɑ́bïkyel, kor-ɑ yi jödd-ɑ pëddi tegø kì Isrɑil. Jöddɑni thøø yi pwönyø ki nyɑɑg ki pilø, ge pëddi ki liny. Pilli gen ryër-ɑ́ɑ̀ nyingi ngëddi gen, ge nenn-ɑ liny-ɑ óbï kì wɑ̈r. Rɑ̈dh Sølømøn tyëd ɑ wïj kwøm men-ɑ ógwøgø ki yenh mø myër. Tyelli kwømɑni bɑ ɑ́tegø, men-ɑ ógøjø ki dhɑb, ógødh yije thøø yi gwelø ki dhɑb. Thɑ̈nhhe óbojø kɑ ógødh me bɑ ɑ́cwïcwïl, men-ɑ ócwɑ̈jø e myëër yi nywøli Yerusɑlem. Nywøli Dhɑyøn, bïu lidhu Rɑ̈dh Sølømøn. Rug-ɑ yɑ̈r-ɑ ɑ́cïb wïje yi meye, kì cyɑ̈ɑ̈ng nywöme; cyɑ̈ɑ̈ng medi pyëwe. Yï myëër cɑrø ɑ́mɑɑrɑ! Nyingí yöm ni nyingi ɑkur, ge kɑ̈ɑ̈l-ɑ kelli thɑrɑ̀ men-ɑ kum yïn wïjí. Yëyyí looj ge nɑ dɑɑg dyëg, me yïnhi piny kì wïj Kïti Gilyɑd. Leggí tɑr nɑ cɑg, wɑ̈thi gen pɑ̈r kinni tïp. Bong men tøøk kì kelli gen, ge myëër bënn. Dhøgí, dhø mɑl kí piny bɑ ɑcwïl, ge nyi nënni ge myëër kenyi kööb Pïnní ceg-ɑ omïl, ge kɑ̈ɑ̈l-ɑ kelli thɑrɑ̀. Muní bɑ̈r nɑ ønbɑ̈r men-ɑ koor kɑɑl Debïd, bɑ ɑ́dulø e lwiy gïï yïthhí nɑ ködd ɑ́lïp møg-ɑ óngɑɑb ri dörɑni. Thïnhhí nɑ ɑ́kønyy, ge nɑ ɑcweggi ɑ́køny, møg cyɑ̈mø kì kelli okøgg. Yɑ óbëëdø kì wïj kwøømi ryɑ̈ mor, kí wïj kwøømi bɑkur, gïti keny-ɑ ópyëëd piny kɑ muudhø ólɑ̈ɑ̈nyø. Yï myëër cɑrø ɑ́mɑɑrɑ, bong keny me gwɑ̈ɑ̈d kì rií! Bïí kedh wɑ ɑ́mɑɑrɑ kì wɑ̈thi kïtti Lubnɑn, bïí kedh wɑ kì Lubnɑn. Bïí piny kì wïj Kïti Amɑnɑ̀, kì Kïti Senïr geki Kïti Kermön, kun-ɑ bëëd yi ngurrì geki kwɑ̈nyì. Nënn-ɑ nëën yi yïn yeki ɑ́mɑɑrɑ, nyɑn-ɑ nywømɑ, geki gïi yedh men-ɑ rug yi yïn, pyëwɑ ɑ́kwɑny yi gen. Mɑ̈ɑ̈dø mií omedø kì yïɑ, yeki ɑ́mɑɑrɑ. Med cɑrø kibøli møgi oløg, yømí omedø kibøli gïg-ɑ yømi gen med bënn. Ámɑɑrɑ, dhøgí med nɑ møøw kïc. lebí nɑ cɑg kí møøw kïc kì dhøgɑ. Yømi ógudhí med nɑ yømi Lubnɑn. Nyimïɑ, yï bɑ bɑg men-ɑ ógeer keny kwïj, yï nɑ bɑg men-ɑ ówenø ki dörø, yï nɑ wɑɑng pïi wɑ̈n kete, keny-ɑ yije nyi cyeg yenh kidøøj. Bɑng-ɑ pɑ̈ng yi yenh-ɑ med, o bong wïj yɑdh me tøøk kì yije. Bong gïn tøøk kì yije: inɑ̀ geki nɑrd, kí sɑprön, kɑlɑmus, kí sinɑmön kí yenh-ɑ yømi gen med bënn. Mor kí ɑløy nyi twïy-ɑ kunɑni kí ryɑ̈ɑ̈ møg-ɑ yømi gen pëddi medø kí nyingi pï mø cɑw bɑg, kí wøll mø rïngi yi pï, kí dhøg me rïngi piny kì wɑ̈thi kïtti Lubnɑn. Cyëëw wuudø! Köní yij bɑgɑ, wurlwɑl, wiy yømi piny mïne. Wiy ɑ́mɑɑrɑ bëe yij bɑge, o cɑme nywøli yenh-ɑ døj. Yɑ ɑ́bï bɑgɑ nyimïɑ, yeki ɑ́mɑɑrɑ nyɑn-ɑ nywømɑ. Yɑ cong-ɑ yenh-ɑ yømi gen med geki ryɑ̈ mor, yɑ cɑm-ɑ møøw kïc kì ri ɑdhudhhi kïc yɑ mɑdh-ɑ møgi oløgɑ geki cɑgɑ. Tyëngmɑ̈ɑ̈dø, cyɑ̈ɑ̈m wun, kɑ wu mɑ̈ɑ̈dh wun, pïd keny-ɑ óthøw wun yi mɑ̈ɑ̈dø! Yɑ ɑ́neni pyëwɑ onëënø. Yɑ ɑ́lɑ̈g-ɑ ɑ́mɑɑrɑ e ócwöddø kì dhø ød. Yïëbbí yɑn ød nyimïɑ, ɑ́mɑɑrɑ, ɑkurɑ nyɑn-ɑ myër. Wïjɑ ɑ́thïnyi yi thöjj, o yëyyɑ ɑ́göög ge teeg yi lwij. Yɑ ɑ́rum ki lunyi wɑ̈g ki ógudhɑ, ɑ́ kiper ngø ɑ døøgɑ gen ki løny riɑ? Yɑ ɑ́rum ki lwøgi tyellɑ, ɑ́ kiper ngø ɑ cödhɑ gen këti? Ámɑɑrɑ cinge ɑ́cïbe ri thïgø, ɑpɑ̈ɑ̈r pyëwɑ mɑl yi kɑ ɑ́cyɑ̈nge. Adhwödhɑ be yïëbbii ød. Cinggɑ ɑ́bëëd gɑ ɑgïny ki ryɑ̈ mor, lweddɑ lɑɑj-ɑ piny ki ryɑ̈ mor, ɑmɑgɑ thïgø. Kɑ ød yïëbbɑ ɑ́mɑɑrɑ, de ɑ́mɑɑrɑ rum kedhø. Pyëwɑ ɑ́tyer-ɑ lïngi cwɑgge! Ayɑbɑ en, de nuti yood yɑn, ɑcwøllɑ en, de nuti löggø. Ayood yɑn yi jøg-ɑ kor kɑɑl, ɑpwööd yɑn yi gen, kɑ riɑ kïdhi gen ki kedd, kɑ thɑrɑ̀ mi wïjɑ kɑ̈ɑ̈l gen wɑ̈g. Köngi wun nywøli Yerusɑlem, kinni, keny-ɑ óyod wun ɑ́mɑɑrɑ, óköbbi yi wun kinni yɑ ɑ́nyönhi yi mɑ̈ɑ̈dø. Nyɑn-ɑ myër kì kelli mɑ̈nn, tyëng-ɑ kyeelø lod kɑ ngø yi ɑ́mɑɑrí? Á ngø ɑ døj kì ree, ɑ pere köbbí wøn köngø? Ámɑɑrɑ myër o teg, pëddi ki myëërø kì kelli cwøw ɑ́lïp pyɑ̈rø. Wïje nɑ dhɑm myër, yëyye ri gen nyølli gen, ge looj nɑ ɑ́gɑng-ɑ cwɑ̈yø. Nyinge nɑ ɑkùr ɑ́ryew kì tøg nɑm me rïngi yi thew, ge ce ólwøgø kɑ cɑg, o ge thøø yi pyëlø. Pïnne myëër ni bɑg, yømi gen med nɑ bɑɑg yenh-ɑ med. Dhøge nɑ okøgg møg-ɑ ócɑwø ki ryɑ̈ mor. Cingge ópyëlø kidøøj, cingge dɑ yëlli dhɑb mø ri gen di tiggi dhɑbɑrjɑd. Dële lïw nɑ lëji lyej men-ɑ ódhyɑwø ki yɑgut. Tyelle nɑ kïtti ɑ́gør mø lïw, møg-ɑ ócïb yij ɑwööl dhɑb. Bɑ ócɑw ni Kïtti Lubnɑn geki yenh sɑndɑl møg-ɑ bɑ̈rrø kì wɑ̈thi gen. Dhøge omedø kɑ̀ nuumii, o ceg-ɑ okøn kì pyëw. Bene bëëdi ɑ́mɑɑrɑ ɑnɑn, wun ɑ nywøli Yerusɑlem. Nyɑn-ɑ myër kì kelli mɑ̈nn, ɑ́mɑɑrí ɑ́kedh-ɑ keny? Köbbí wøn yuu-ɑ ɑ́kɑ̈ɑ̈l yi ɑ́mɑɑrí, o yï køny yi wøn ki yɑbii. Ámɑɑrɑ ɑ́kedhi yij bɑge, keny-ɑ twïy yenh bɑlsɑm. Kwɑy-ɑ dyëge kì yij bɑngɑni, o opunø ki okøgg. Ámɑɑrɑ bɑ miɑ, o yɑ bɑ mee, dyëge nyi kwɑɑye’ kelli okøgg. Ámɑɑrɑ, yï myëër ni Yerusɑlem, yï mɑɑr yi yɑn nɑ Tirdhɑ̀, pyëwɑ ɑ́kwɑny yi yïn ni kɑ̈ddɑni ryeet. Løg wïjí, yï ko nenni yïɑ mɑ́ pyëwɑ ɑ́kwɑny yi nenn-ɑ nennɑ nyingí. Yëyyí looj ge nɑ dɑɑg dyëg, me yïnhi piny kì wïj kwøømi Gilyɑd. Leggí tɑr nɑ dɑɑg dyëg, me kɑ̈ɑ̈l kì be lwøgø, Bong ɑ́kyel me tøøk kì kelli gen, wɑ̈thi gen pɑ̈r kinni tïp. Pïnní ceg-ɑ omïl kì kelli thɑrɑ̀ men-ɑ kum yïn wïjí. Bɑ̈nggi rɑ̈dh bɑ pyɑ̈r ɑ́bïkyel, kí ɑkwɑnyy pyɑ̈r ɑ́bïdɑ̈g, o møg-ɑ nudd gɑ wojur pɑ cuggi kwɑnø. De yɑ mɑɑr-ɑ ɑ́kyel kete, o myëër ni ɑkur. E kete ɑ bɑ dhɑjø kì kelli nyiimen, ti ki mɑɑrø yi meye ki mendwøng. Álidh yi tyëng-ɑ mɑ̈nn bënn kɑ gø lenhi gen, ɑ́lenhi ki wör yi bɑ̈nggi rɑ̈dh geki ɑkwɑnyyi rɑ̈dh. Ge okööbø kinni, “Á men ɑ bï ni ru wøw ɑcɑ̀? Myëër o rɑw, myëër nɑ dwɑ̈y, o ce tuul ɑ́ cɑ̈ng.” Yɑ ɑ́bï kelli yenh ɑkemel be lidhi yenh-ɑ thønhø kì yij tör, o yɑ lidhɑ oløg geki romɑn mɑ twïy yïthhi gen, kí mɑ köög gen. Dëlɑ ceg-ɑ kïïrø, pyëwɑ ɑ́wëggí okøn ki mɑ̈ɑ̈dø ni okøn pyëw jɑl-ɑ kyewi yɑ̈thi liny. Cööng, cööng nyɑɑr Culɑm, Wiy yï lidh yi wøn kɑ̀ cööng. Á kipe ngø ɑ dwɑddu nenni yɑn, kɑ̀ cöngɑ kì kɑɑm ɑtøddi ɑnënnì ɑ́ryew? Yï bɑ dhɑjø me myëër cɑrø! Tyellí myër nɑ ngø kì yethi wɑr! Rɑ̈mmí bɑ ɑ́dul, ge ce ógwøg-ɑ yi bødhø me cinge døj. Gudí nɑ tɑbø mɑ ɑ́dulø, me pɑ̈ng yi møgø me thøø yi gwøgø, yijí bɑ ɑ́dulø e nɑ gemè men-ɑ óröör piny, e tøgge dɑ okøgg. Thïnhhí nɑ ɑ́kønyy ɑ́ryew, mø cyɑ̈mø kì kelli okøgg. Muní bɑ ɑwel e lïw ni lëji lyej. Nyingí nɑ luyyi Kicbön ryeet, kì buti dhø döri kɑɑldwøng menɑni. Órømmí nɑ ønbɑ̈r kì Lubnɑn, kì dhø dörø, dhøng-ɑ nenni Dimɑceg. Wïjí ying-ɑ mɑl ni Kïti Kɑrmel, Akɑ̈ddi wïjí ceg-ɑ orɑ̈ng Myëri gen dir-ɑ pyëw rɑ̈dh. Ámɑɑrɑ, yï myëër cɑrø! Bong keny pɑ myër kì rií. Yï bɑ ɑ́nɑyø ni yɑdh benø, o thïnhhí nɑ cyɑ̈lli benø. Yɑ óyedhi wïj benø, o nywøle pønɑ. Thïnhhí nɑ cyɑ̈ɑ̈l oløg, yøm-ɑ kɑ̈ɑ̈l órømmí kɑ̀ yëëg, med nɑ yømi tupɑɑ̀, o nuumí med kì dhøgɑ, ni møgi oløg me pëddi døøjø. Wiy møgi oløg renge dhøg ɑ́mɑɑrɑ, ree bɑɑwe’ kömi dhøge geki legge. Yɑ bɑ mií ɑ́mɑɑrɑ, o yɑ tyer yi en. Bïí ɑ́mɑɑrɑ, bïí kedhi wɑ yethi myërr, o wɑ nïnni wɑ pɑc. Wɑ ómøøl be lidhi bɑ̈ggi oløg mɑ twïy oløg kì yethi gen, kí mɑ cɑ̈gi gen ki køøg, kí mɑ köög yenh romɑn. Mɑ̈ɑ̈dø miɑ ómëggɑ yïn kì kunɑni. Yømi okøggi mɑ̈ɑ̈dø óngwɑ̈j yi yïn, o nywøli yenh-ɑ med bënn ying-ɑ dhø gølee. Ámɑɑrɑ, mɑ̈ɑ̈dø miɑ ɑ́mïdhi yi yɑn kɑ perí, jɑmmɑ møg-ɑ nyɑ̈n kí møg-ɑ kɑ̈gi gen dööng ɑ́mïdhɑ kɑ perí! Yï ce di bëëd yï bɑ ómïɑ, yï dhøødh-ɑ thïnhhi meyɑ. O yï di nuumɑ ke di røøm wɑ kì yij yöö, yï di nuumɑ e bong ngɑn cɑy yɑn. Yï di kɑ̈ɑ̈lɑ, kɑ yï kïdhɑ ød meyɑ, ngɑn-ɑ ɑ́pwönyi yɑn ki mɑ̈ɑ̈dø. Yï di thödhɑ ki møgi oløg me med møng-ɑ ɑ́gwøgɑ ki romɑn. Wïjɑ thɑ̈ɑ̈nh yɑn ki cingi cɑɑmí, o yɑ dööb yïn ki cingi kyëjí! Nywøli Yerusɑlem, yɑ kwɑjj-ɑ wun kinni mɑ̈ɑ̈dø mi wøn ko rënyi wun. Á men ɑ kɑ̈ɑ̈l yij ryɑng ɑcɑ̀, ge kwɑgg-ɑ ri gen geki ɑ́mɑɑre? Yï ɑ́tugɑ kì thɑ yɑdh tupɑɑ̀, kì keny-ɑ ɑ́nywøøl yïn. Wiy bëëde ɑ́ mɑ̈ɑ̈dø miɑ ɑ ying pyëwí kete, ko di ngɑn dööb yi yïn köörí den-ɑ́ yɑ ketɑ. Mɑ̈ɑ̈dø teg nɑ thøø, o tyëëdø nɑ ölø me ludhø ludhø. Nyi cɑ̈gi e nɑ opelø kɑ nyi ceg-ɑ ì pyɑɑt ɑ́ mɑc me ceg rɑ̈b. Bong pï møg cuggi cɑwi mɑ̈ɑ̈dø, bong bɑɑyø me cuggi mudii. Cɑgg dhɑnhø muuj kɑ̈re bëne kiper mɑ̈ɑ̈dø, nudd ɑ́ men byeny ceth. Yï wøn dɑ nyimï wøn me thiinh, thïnhhe nudd ge ceg-ɑ twïyø. Á ngø ɑ ógöggii yi wøn, kì cyɑ̈ng-ɑ óbëën jɑl-ɑ myegii? Keløg e bɑ dhø dörø, ógëddi yi wøn ki ønbɑ̈r, me bɑ ngyëny ɑ́tegg men-ɑ koorii. De keløg e bɑ dhø döri kɑɑl, ógöggi yi wøn ki ɑdëddi yenh sɑndɑl møg korrii. Yɑ bɑ dörø, o thïnhhɑ bɑ udd-ɑ bɑ̈rrø møg-ɑ koorii. Bene ɑ ɑ́yodii yi ɑ́mɑɑrɑ kinni yɑ ɑ́døngi. Sølømøn yïe ɑ́dɑ bɑɑg oløg kì Bɑɑl Amön. Akïrre gøn jøpur, nget ɑ́kyel nyi cul-ɑ ngyëny ɑ́tegg ɑ́lïp. Ngyëny ɑ́lïp bɑ mø Sølømøn, o miy ɑ́ryew mëggi jøpur. Yïɑ dɑ bɑɑg oløg, me bɑ miɑ yɑ ketɑ! Ámɑɑrɑ, wiy cwɑggí lïngɑ yï ying-ɑ yij bɑg, tyëng-ɑ cyɑ̈dhi wøn yïd-ɑ lïngi cwɑggí, yï okööbø, ɑ́mɑɑrɑ. Bïí yïɑ, ni ɑ́køny, ɑ́mɑɑrɑ, bïí yï nɑ tenø kì wɑ̈thi kïttì, kun-ɑ nyi twïy yi yenh-ɑ yømi gen med. Wɑ̈nyø men bɑ wööd kì ri Yeudiyɑ̀ kí Yerusɑlem, wöddɑni ɑ́cɑ̈rr-ɑ Icɑyɑ̀ wɑ̈d Amodh yi Jwøk kì runn-ɑ ɑ́jyɑ̈ɑ̈g Udhiyɑ̀, kí Yöthɑm, kí Akɑɑdh, kí Kedhekiyɑ̀ gɑ rɑ̈nhi Yeudiyɑ̀. Jwøng-ɑ Ácwɑ̈ɑ̈j okööbø kinni, “Lïng wun, wun ɑ mɑl kí piny! Lïngu møg-ɑ kwøbɑ! Othønhø møg-ɑ ɑ́kɑ̈ɑ̈lɑ kì Rïp ɑ́døøg cwɑggɑ. Dhög wëëg gen ngɑ̈nyi yi gen, o ɑderr keny-ɑ nyi kɑ̈nni yi wïi gen ki gïncɑɑm gen, ngɑ̈nyi yi gen. De Isrɑil kwïj wøw; jiɑ bong gïn gɑm yi wɑ̈thi gen.” Yï pödhi orøg, yï ɑ́gɑ̈g. Yïn, yï pödhi orøg! Wu tɑ̈ɑ̈y-ɑ piny yi orøøg wun. Wu ɑ́bɑny-ɑ Jwøng-ɑ Ácwɑ̈ɑ̈j kwërø. Eni men-ɑ́ Jwøøg Isrɑil, kɑ ngɑ̈thi wun lugu en. Wude ɑ rïïj wu opëmø? Wu ócuggi cɑyø kidï? Yïn ɑ Isrɑil, wïjí pɑ̈ng yi kɑ̈jjiledh, o miní kí ngedhí ge ceg-ɑ rɑ̈m. Bong keny døj kì rií, cɑg kì ri wïjí gïti tyelí. Dëlí pɑ̈ng yi kɑ̈jjiledh; kɑ̈jjiledh møg-ɑ rií nuti pɑ̈nyø lwøgø, wɑlɑ̀ ge nuti koodø. Ge nuti kïdhø ki yɑdh. Pödhi wun ɑ́döng nøw kɑ̈ddi wun ɑ́rɑ̈b ki mɑc. Piny wun okwɑnyø yi tyëngpɑth, o jɑmmì bënn orënyø yi gen, wu onëënø yøw. Yerusɑlem ɑ́döng kete, e bɑ ɑtyeg, o bong gïn korrii ni ød tyëng-ɑ nyi kor bɑɑg oløg, wɑlɑ̀ ɑkɑnø kì yij bɑɑg cwir. Ke di bëëd e pɑth ki Jwøng-ɑ Ácwɑ̈ɑ̈j, Jwøng teg, ɑ ɑ́wïyi ki kwï ji, Yerusɑlem di nɑ̈g bëne ni Sødømɑ̀ geki Gømørɑ̀. Yerusɑlem, jií nɑ tyëng Sødømɑ̀ kí Gømørɑ̀ ceth. Lïngí gïn-ɑ köbbi yïn yi Jwøng-ɑ Ácwɑ̈ɑ̈j. Kyën yïthhí kɑ gïn-ɑ pwönyi yïn yi Jwøgee lïngí. Okööbø kinni, “Yï orumø kinni gëdhh-ɑ nyi rïïj ge mëggí yɑn ɑnɑn di dwɑddø yi yɑn? Yɑ ɑ́ngïr yi órömm-ɑ nyi rɑ̈bbí yɑn gɑ gëdhhì, kí dwɑ̈lli dhögí. Pyëwɑ pɑ med ki remmi dhögi wun geki dyëgi wun. Á men ɑ ɑ́köbbi wun kinni nyi nyøn wun Kengɑ, kenyi bëën wun be mɑlli yɑn? Á men ɑ ɑ́köbbi wun kinni nyønu Kengɑ? Bong gïn gwøg yi kɑ̈nø ki gëdhhì. Pyëwɑ nyii lɑ̈mmø yi yømi bɑkur men-ɑ nyi rɑ̈b yi wun. Pyëwɑ pɑ med ki tugi kwëër dwɑ̈n nyɑ̈n geki Sɑbɑth, kí kwërr-ɑ kyeelø; ge ɑ́rënyi yi orøøg wun. Kwëër cɑ̈gi dwɑ̈n-ɑ nyɑ̈n geki cyɑ̈nggi kwër mø wun mɑɑn yi yɑn; yɑ ɑ́ngïr yi gen. “Keny-ɑ ótïng wun cinggi wun mɑl wu ómɑ̈ddø, yɑ pɑ lïïdh yï wun. Cɑgg wu kwɑ̈jji kidï, kwɑ̈jji wun pɑ lïngɑ, mɑ́ cinggi wun dɑ rem. Lɑw wun ri wun o wu dhïwi wun. Wiyu gïgrijjø møg-ɑ nennɑ ge ogøggø yi wun ɑnɑn. Wiy wun gwøg ki gïgrijjø, kɑ wu dïd wun ki gøggi dyër. Gwøøg dyër ceth; kønyu tyëng-ɑ nyingi gen guud, kɑ jɑmmi kïjj mëggu gen, kɑ thwömm-ɑ mɑ̈nn nyi cwɑg wun.” Jwøng-ɑ Ácwɑ̈ɑ̈j okööbø kinni, “Tyëg wɑ kwøbbɑni. Cɑgg ɑ́ kɑ̀ bëëd wu kwɑɑr yi orøg, wu ólwøg yi yɑn kɑ wu ótɑ̈rø ni ɑ́piy. Cɑgg ɑ́ kɑ̀ bëëd orøøg wun kwɑrø, ógöögø e pɑ̈r ki yëyyi dyëg mø tɑr cɑrø. Keløg kwøbbɑ olïngø yi wun, wu ócyɑ̈mø ki jɑmm-ɑ døj møg-ɑ cyeg kì piny men. De keløg yɑ óbɑny yi wun, kɑ wu tyeer-ɑ wɑ̈yi wun, wu bɑ møg thøw. Yɑn, yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Kɑɑl-ɑ ɑ́bëëd e mïdh-ɑ yïëyø, ɑ́göög e nɑ ngɑn nyi niin ki köögi! Ábëëd yije pɑ̈ng yi tyëngtir kì bøli keny megø, de ɑ́döng ɑ́ tyëngnɑ̈g ki ji kì yije. Yerusɑlem, kɑ̈ge dööng yï ɑ́bëëd yï nɑ ɑ́tegø ɑ pere teg, de ɑnɑn yï ɑ́göög yï bong perí; yï ɑ́bëëd yï nɑ møgi oløg me døj, de ɑnɑn yï bɑ pï yøw. Jɑggí bɑ tyëngpëëmø, o ge bɑ mɑ̈dhh ki kurrì. Ge nyi rïïj ge yïëy-ɑ gïg-ɑ mëggi gen kɑ dhøggi gen nyi kum ki ngyëny. Kïj pere pɑ nyi nyɑg yi gen kì burø, o thwöm gønye pɑ nyi lïngi yi gen. Anɑn lïngu møg-ɑ ɑ́kwøb yi Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil, Jwøng-ɑ teg, okööbø kinni, “Gøølɑ ócolɑ kì wun, wu tyëngmɑ̈ɑ̈nø, o yɑ koo jud yi wun këti. Wu ógöggɑ gïi wun, wu óliilɑ ni kenyi liil ngyënyø, o gïg-ɑ ywëëdh wun bënn kɑ̈ɑ̈lɑ wɑ̈g. Wu óthödhɑ ki jɑgg kí tïddi kwøb, mø ni møg-ɑ ɑ́ying yï wun kɑ̈ge dööng. O Yerusɑlem døøgɑ be cwølø ɑ́ kɑɑltir, kɑɑl-ɑ mïdhi yïëye.” Mɑ́ Jwøng-ɑ Ácwɑ̈ɑ̈j tir, Yerusɑlem óyiel yi en, geki tyëng-ɑ óyewi. De ngɑn-ɑ órøngi kɑ opëmø ónyøn yi en. Ngɑn-ɑ ówiyii piny ónɑ̈g yi en. Wu ópɑ̈di kì bɑng kɑ ɑ́kwɑjji wun yenh, kɑ bɑ̈ggi wun yulli wun jwögg møøgø. Wu ówøw ni yɑdh, wu ógöögø ni bɑg me yije bong pï. Tyëng-ɑ teg óthøw; ge óni lum ɑ nyi rɑ̈b yi opeli mɑc, bong ngɑn-ɑ óyiel gen. Men bene wöön-ɑ ɑ́mëggi Icɑyɑ̀ wɑ̈d Amodh yi Jwøk kiper Yeudiyɑ̀ kí Yerusɑlem. Kì cyɑ̈ɑ̈n piny, kïn-ɑ köme cungi yi Kengø ógöögø e bɑ̈r kibøli kïttì bënn; wïje ókɑ̈ɑ̈l mɑl kì kelli kïttì. Pödhh mø ngenyø óceg ì buk kì wïje, ge okööbø kinni, “Yedhi wɑ wïj kwøømi Jwøng-ɑ Ácwɑ̈ɑ̈j, kedhi wɑ Kengi Jwøøg Isrɑil. Wɑ ópwönye ki gïn-ɑ dwɑdde kinni gwøg yi wɑ, wɑ ókɑ̈lli yëth-ɑ ɑ́myege. Mɑ́ pwönyi Jwøng-ɑ Ácwɑ̈ɑ̈j kɑ̈ɑ̈l-ɑ Yerusɑlem; kööbø ki jie e ying-ɑ Dhɑyøn.” Liny jurrì mø døngø óyiele. Pilli gen óthɑ̈dh yi gen gɑ kwërri pur, o tønggi gen løg gen pɑlli kɑj ki byel. Pödhh pɑ cigi kedhi be liny, ri gen koo gwir yi gen kipe liny. Anɑn yïn ɑ gøl Yɑgob, bïu cyɑ̈dhi wɑ kì yij cɑr-ɑ mëggi wɑ yi Jwøng-ɑ Ácwɑ̈ɑ̈j. Jií, kwɑrri Yɑgob ɑ́wiy yi yïn piny yïn ɑ Jwøk! Piny ceg-ɑ thyëdh bëne, cɑg kì wɑɑng cyɑ̈ɑ̈ng mwøl, kɑ ókönø kì Pelistiyɑ̀. Ji mïdh-ɑ kwöng me pɑth. Piny gen pɑ̈ng yi ɑ́tegø kí dhɑb, o kɑ̈r bong cöge kì yï gen. Piny gen pɑ̈ng yi kyënyì, o yɑ̈thi gen bong cögi gen. Piny gen pɑ̈ng yi ngïjji jwögg, o ge mɑll-ɑ gïg gwøøg gen ki cinggi gen. Ji wɑ̈thi gen ódwöög cyɑ̈n, kɑ ge oyɑ̈rø. Pyëwí ko lɑ̈ɑ̈m ki gen, Jwøng-ɑ Ácwɑ̈ɑ̈j! Ge ópɑ̈nni kì yethi órøggi kïttì, wɑlɑ̀ ge ókunyø ki burrì møg yethi gen pɑ̈nni yi gen, keny-ɑ órënyi pyëw Jwøng-ɑ Ácwɑ̈ɑ̈j ki gen, keny-ɑ órënyi pyëwe ki menteg! Cyɑ̈ng-ɑ ódwöög wïj dhɑnhø cyɑ̈n, kɑ mune pɑ cigi tëngø këti, ɑ́cyɑ̈ngi. Codhe, o Jwøng-ɑ Ácwɑ̈ɑ̈j lenhi kete. Ngɑn teg wïje dwöög-ɑ cyɑ̈n yi Wïlɑ̈bø, Jwøng-ɑ Ácwɑ̈ɑ̈j, kì cyɑ̈ngɑni geki ngɑn wïje tɑ̈dø men bong gïn gɑ̈nne. Yenh sɑndɑl møg-ɑ bɑ̈rrø kì Lubnɑn ódhure piny, geki óthurr-ɑ Bɑcɑn bënn. Kïtt-ɑ døngø geki møg-ɑ thønhø ónyɑɑge piny, kɑ wɑ̈thi gen ópɑ̈ɑ̈rø ki piny, kí udd-ɑ teg møg-ɑ wɑ̈thi gen nyi kur bënn. Sɑpïnnì ómud yi en cɑgg ɑ́ møg-ɑ døngø ɑ myër. Ji ópɑ̈nni kì yethi órøggi kïttì, wɑlɑ̀ ge ókunyø ki burrì møg yethi gen pɑ̈nni yi gen, keny-ɑ órënyi pyëw Jwøng-ɑ Ácwɑ̈ɑ̈j ki gen, kɑ bï-ɑ yï gen ki mɑ̈r geki tegø, keny-ɑ óbëëne be rungi piny. Keny-ɑ óbëën cyɑ̈ngɑni, ngïjji jwögg-ɑ bɑ dhɑb kí ɑ́tegø møg-ɑ ɑ́gwøg yi gen óweddi yi gen, kɑ gï wïyi gen yëjj geki ɑlïlït. Keny-ɑ óbëën Jwøng-ɑ Ácwɑ̈ɑ̈j be rungi piny, ji ópɑ̈ni yethi órøggi kïttì geki burrì, ge reng-ɑ yi rënyi pyëw Jwøng-ɑ Ácwɑ̈ɑ̈j; ge ceg-ɑ rengø yi tege geki mɑ̈re. Ji møg-ɑ óthøw ko ngɑ̈dh yi yïn, døøjø mi gen bɑ ngø? Anɑn Wë, Wïlɑ̈bø, Jwøng-ɑ Ácwɑ̈ɑ̈j, jɑmm-ɑ ri gen bëëd yi ji kì Yeudiyɑ̀ kí Yerusɑlem gï kɑ̈ɑ̈le kɑ̈ɑ̈lø. Gïncɑm geki pï ókɑ̈l yi en, kí yɑ̈thi kyënyi gen, kí ɑlɑthker, kí jɑggi burri gen geki jøtöng, kí ɑ́jwöggi gen, kí jöddi pödhø, kí pëjji liny, kí jɑggi pödhø, kí tyëngken ki kwøb geki bɑ̈nyy. Jwøng-ɑ Ácwɑ̈ɑ̈j ji ówëgge jɑɑgø yi yɑɑg thønhø mø rummi gen nuti cyegø. Ji nyingi gen óguud yi gen, ngɑn guud-ɑ wɑɑng wɑɑd gen. Jøgdøngø koo wør yi yɑɑg thønhø, o jödd-ɑ per gen teg koo wør yi tyëng-ɑ bong per gen. Bøli keny megø óbï, men-ɑ óköbbi dhɑnhø yi wɑddi gen kinni, “Yïn ɑ yïí di gïjø me rug yi yïn, bëëd yï bɑ jɑngi wøn kì piny-ɑ rɑɑj èn.” De ólöggi kinni, “Pɑth, wu pɑ cuggi jɑɑgø yi yɑn. Yïɑ bong gïncɑm, wɑlɑ̀ yïɑ bong ógudh thyew. Yɑ ko gwøg wun yɑn ɑ́ jɑgø.” Yerusɑlem ceg-ɑ thɑ̈mmø! Yeudiyɑ̀ ɑ́pɑ̈ɑ̈dh! Mɑ́ ge gwɑdd-ɑ Jwøng-ɑ Ácwɑ̈ɑ̈j ki gïg-ɑ gøggi yi gen, kí møg-ɑ kømmi yi gen. Men-ɑ́ Jwøk kiree nyii tøønyø ki yɑnyø yi gen. Ge rëny-ɑ yi rɑ̈ji buri gen, ge nɑ tyëng Sødømɑ̀, orøøg gen pɑ kɑnni yi gen. Ge ógɑ̈g mɑ́ gen ɑ ɑ́kɑ̈ɑ̈l rɑj kömi gen! Tyëngtir óbëëdø pëthi gen med; bong gïjø men-ɑ ócɑ̈nni gen. Gïg-ɑ gwøg yi gen ócɑm yi gen. De tyëngrijjø ɑ́gɑ̈g, gïg-ɑ ɑ́göggi tyëngmøøgø yi gen, ólony ki göggi gen. Tyëng-ɑ yï gen nyi wïdhi ki ngyëny guud-ɑ nyingi jiɑ, o ge nyi ceg kɑ rujø yi tyëng-ɑ nyi kɑ̈nni yi gen ki ngyëny. Wun ɑ jiɑ, wu ɑ́peej pɑ̈l yi jɑggi wun, wɑ̈thi wun ɑ́bɑ̈nni yi gen kɑ wu ódhɑ̈lø yïddø yöö. Jwøng-ɑ Ácwɑ̈ɑ̈j bøli keny-ɑ ógønye gønye ɑ́wɑ̈nhi. Bøli keny-ɑ ólidhe gøøny jie ɑ́wɑ̈nhi. Jwøng-ɑ Ácwɑ̈ɑ̈j, jøgdøngø geki pëjji jie kɑ̈ɑ̈le’ burø be gøønyø kinni, “Bɑ̈gg mø pɑth ɑ́yɑy yi wun, o kɑ̈lli wun pɑ̈ng yi gïg-ɑ ɑ́kwɑny yi wun kì yï ɑbuur. Wude ɑ mød wun jiɑ, ɑ kɑbbi wun jɑmmi tyëng-ɑ dhɑl yi kwøb. Yɑn yɑ Wïlɑ̈bø Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Lidh mɑ̈nni Yerusɑlem dhɑ̈ɑ̈w ɑ dï! Ge cyɑ̈dhi ge törr-ɑ wɑ̈thi gen, ge negg-ɑ nyingi gen, ge pwöd-ɑ tyelli gen kì piny, de tyel ceg-ɑ jiingø yi yëll. Ge ócɑy yi yɑn, wɑ̈thi gen ólyel yi yɑn, o ge döng gen ge lïw.” Cyɑ̈ng-ɑ ókwɑɑny jɑmm-ɑ per gen dhɑ̈ɑ̈w mɑ̈nni Yerusɑlem yi Jwøng-ɑ Ácwɑ̈ɑ̈j obëënø, gen ɑ yëll-ɑ rug yi gen kì tyelli gen, kí gïg-ɑ dhyɑɑw gen wɑ̈thi gen geki muddi gen, kí møg-ɑ rug yi gen kì ngɑ̈thi gen. Acwɑddi wɑ̈thi gen ókwɑny yi en, kí thɑ̈ggi wɑ̈thi gen, kí wënni gen, kí gyelli gen, kí gwell-ɑ rug yi gen kì lweddi gen kí órømmi gen, kí ógudhi gen bënn; ɑ́ywödhh kí lɑ̈nì, kí pødhì, kí ógudh-ɑ reb, kí mɑndïll, kí ceridhh, kí thɑrr-ɑ nyi rug yi gen kì wɑ̈thi gen. Ge ópënni kibøli ke di gïïny gen ki mɑ̈th-ɑ yømi gen med; yëyy-ɑ myëër ólɑ̈ɑ̈ny kì wɑ̈thi gen, kɑ wɑ̈thi gen odöngø ge budhø. Ge órug thøll mø gwɑy gɑ wënnì. Ge órug ocwɑ́llì gɑ kɑ̈jji ógudh-ɑ yöm ɑnɑn; myëërø mi gen óløg ɑyɑ̈r! Jøg-ɑ cwøwi kɑɑl, cɑgg ɑ́ yɑɑg teg, ónɑ̈g kì yij liny. Thïggi dhøggi döri kɑɑl, ókïïmø kɑ ge óywöngø, o men-ɑ́ kɑɑl kiree, óni ngɑndhɑjø me bëëdø kì piny e cyɑ̈dh-ɑ nøw. Keny-ɑ óbëën bøli kenyɑni, tyëng-ɑ mɑ̈nn ɑ́bïryew ómɑ̈gi kì ri jɑlø ɑ́kyel ge okööbø kinni, “Wø óyɑ̈bø ki gïgcɑmmi wøn, kí ógudhi wøn, de wø kwɑjj-ɑ yïn yøw, wiy yï bëëd yïn ɑ́ jɑlwøn, kipe wø óbëëd wø yɑ̈rø yi kɑ̀ nuti nywøøm wøn.” Bøli keny-ɑ ówëggi yenh bënn døngø yi Jwøng-ɑ Ácwɑ̈ɑ̈j, kɑ ge ómyërrø ɑ́cyɑ̈ngi. Tyëng Isrɑil møg-ɑ óbodh bënn, óyïddi ki medi pyëw, kɑ ge døøg-ɑ be ngwønø, kì bɑng jɑmmì møg-ɑ ócyeg kì yij piny. Ngɑn-ɑ ódöng kì Yerusɑlem, ɑ ówëggi bodhø yi Jwøk, ócwøl ɑ́ ngeti kwërø. Kwøbbi pödhø óløøg yi Wë, kɑ remm-ɑ ɑ́dëëm piny kì Yerusɑlem lwööge wɑ̈g, o gïg-ɑ ywëëdh tyëng Isrɑil ólwøge kɑ dëlli gen ótɑ̈rø. Codhe, o Jwøng-ɑ Ácwɑ̈ɑ̈j öne ki pøølø kì dicɑ̈ng, kí yïrø geki mɑc me tɑr kì wɑ̈r, møg korri Kïti Dhɑyøn geki ji-ɑ cugø kì kenyɑni. Mɑ̈ɑ̈r Jwøk óying kömi kɑɑlɑni bëne kɑ gø korre. Kɑɑl ógëng yi Jwøng-ɑ Ácwɑ̈ɑ̈j ki mɑ̈re kì dicɑ̈ng, kɑ gø gwøøge keny yije bong olïng pëëth, kɑ gø gënge kipe kødh kí ɑtunø. Lïng wun ki wör-ɑ wör yi yɑn èn, wöri mɑ̈dhɑ geki bɑɑg oløge. Mɑ̈dhɑ yïe ɑ́dɑ bɑɑg oløg kì wïj kwøømø me lɑ̈be med. Kej bɑngɑni ɑ́køge kɑ kïttì yëëge wɑ̈g kì yije. Kɑ gø pïdhe ki oløg me pëddi døøjø. Kɑ ogëdø kí ønbɑ̈r me koor bɑngɑni, ɑkunye ki keny nyi biij oløg. Kɑ pëgg-ɑ be yïddi cyegi oløg, de oløg bëne ɑ́göög e owɑjø. Codhe, ɑkööb mɑ̈dhɑ kinni, “Wu tyëng-ɑ bëëdø kì Yerusɑlem kí Yeudiyɑ̀, løøg wun gønyɑ wøki bɑɑg oløgɑ. Á gïn ɑ nuti göggi yɑn en? De ede ɑ nywøle oløg me wɑj? Ede ɑ bɑnye nywølø ki nywøli oløg mø døøj, ni kɑ ɑ́dwɑddɑ en? “Wiy wu köbbɑ gïn-ɑ ógöggɑ bɑɑg oløgɑ; kyel-ɑ óbɑgii óputh yi yɑn, kɑ dör-ɑ korrii cøørɑ piny, kɑ wiyɑ o cɑm yi lɑ̈yyi pɑ̈l, o gø nyøøn gen piny. Ówiy yi yɑn, o yije twïy yi lum bëne. Pɑ cigɑ purø, wɑlɑ̀ oløge pɑ teb yi yɑn, ówiy yi yɑn o yije kɑb yi okurø geki koodh. Pøøl óköbbɑ kinni yije ko dëëm yi kødh.” Isrɑil bene bɑɑg oløøg Wïlɑ̈bø, Jwøng-ɑ Ácwɑ̈ɑ̈j. Tyëng Yeudiyɑ̀ bene gen oløg men-ɑ ɑ́pidh yi en. Gï ɑ́dwɑdde kinni o ge di göög gen ki gïgdøj, de ge ɑ́yöd ge nɑ̈g-ɑ ji. Gï ɑ́dwɑdde kinni o ge di gøggi gen dyër, de ji ɑ́yöd ge ceg-ɑ ywøg yi gïg-ɑ gøggi yi gen. Wu ɑ́gɑ̈g! Wun ɑ nyi ngëwø ki ud geki pwödh møg kïdhu kömi møg-ɑ nud kì yï wun. O ji-ɑ kyeelø ójɑd gen ki keny bëëd yi gen kì bɑng keny me thinh, o ódöng ɑ́ wu keti wun ɑ bëëdø kì pinyɑni. Wïlɑ̈bø, Jwøng-ɑ Ácwɑ̈ɑ̈j ɑ́lïngɑ e okööbø kinni, “Udd-ɑ døngø, ɑ myëër ɑnɑn bënn, ódöng nøw ge rënyø. Bɑ̈gg-ɑ døngø, ɑ lɑjjø yethi gen bɑ pedɑnn pyɑ̈rø, ókɑ̈ɑ̈l-ɑ røthøl pyɑ̈rø wïdɑ́bïkyel mø møgi oløg. Köödh møg pidh gɑ røthøl miy ɑ́dɑ̈g kí pyɑ̈r ɑ́bïkyel, ókɑ̈ɑ̈l-ɑ røthøl pyɑ̈r ɑ́dɑ̈g wïdɑ́bïkyel mø byel.” Wu ɑ́gɑ̈g! Wun ɑ nyi møøl be mɑdh ki møgi oløg kì mwøl, kɑ wu wɑ̈dh-ɑ wɑ̈r wu omɑ̈dhø. Wu pwöd-ɑ bullì kí thøm, wu kødhh-ɑ kɑ̈ngì kì cyɑ̈ɑ̈ng tugø, wu mɑdh-ɑ møgi oløg. De gïn-ɑ gwøg yi Jwøng-ɑ Ácwɑ̈ɑ̈j pɑ gɑm yi wɑ̈thi wun, bene ɑ bɑnge ókøøl wun yïnø wu bɑ ɑmɑgg. Jɑggi wun ónɑ̈g-ɑ yi kɑ̈j, o teen-ɑ kyeelø ónɑ̈g-ɑ yi röödhø. Pödhi tyëngthøø pyëwe ongɑɑmø kipe gen, dhøge yieeb en. Gøl rɑ̈ɑ̈dhø mwønye’ mwønyø geki ji-ɑ kyeelø bënn. Dhɑnhø bëne óyɑ̈r, tyëng-ɑ tɑ̈dø ogöögø ki mööl. De Wïlɑ̈bø, Jwøng-ɑ Ácwɑ̈ɑ̈j dönge ónyodh yi en kɑ gøggi dyër. O bëëde kwërø nyodh yi en kɑ lidhi gøøny jie. Wɑ̈thi kɑ̈dd ócyɑ̈ɑ̈m-ɑ yi dyëg ki lum, nywøli dyëg ɑ́tegg óyïddi lum kì wɑ̈thi kɑ̈dd. Wu ɑ́gɑ̈g! Wu pɑ cuggi pɑ̈di ri wun kì yethi töjji orøg. Wu okööbø kinni, “Wiy Jwøng-ɑ Ácwɑ̈ɑ̈j pyewe ki gwøgi gïn-ɑ ɑ́kwøbe ce gø ógwøge, o lidh yi wɑ. Wiy Jwøøg Isrɑil, Jwøng-ɑ bɑ kwërø gwøge gïg-ɑ ɑ́rum ki pyëlø yi en; wiy gïn-ɑ rømme yod yi wɑ.” Wu ɑ́gɑ̈g! Wu cwøll-ɑ gïnrɑj ɑ́ gïndøj, o gïndøj cwølli yi wun ɑ́ gïnrɑj! Wu nyi løg-ɑ muudhø cɑr, kɑ cɑr nyi løgu muudhø! Gïn-ɑ kej nyi gwøøgu men med, kɑ gïn med nyi gwøøgu men kej. Wu ɑ́gɑ̈g! Wu orumø ce wɑ̈thi wun pel ki mendwøng. Wu ɑ́gɑ̈g! Wu yɑɑg-ɑ teg ki mɑdhi møgi ɑdhɑ̈dh! Wu teg kɑ mɑdh ki muggì yøw! De wu nyi wiy-ɑ men-ɑ́ ngɑn bɑ̈jjø e pɑ cɑy yi wun kipe kɑ ɑ́muuje ki gïn kum dhøggi wun! Kɑ gïi ngɑn yïe bɑ̈r nyi ti wun ki lɑ̈ɑ̈nyø! Kì bɑng menɑni, ni kenyi cɑɑm lum-ɑ thwøwø yi mɑc, kɑ gø gøøje piny, nɑ menɑni ceth, byerri wun ókwɑ̈g, kɑ okøggi wun køøl yi yømø ni búr mɑc, mɑ́ ciggi Wïlɑ̈bø, Jwøng-ɑ Ácwɑ̈ɑ̈j, ɑ́bɑny yi wun, gen ɑ cigg-ɑ ɑ́pwönyi wɑ yi Jwøøg Isrɑil. Jwøng-ɑ Ácwɑ̈ɑ̈j pyëwe rɑɑj ki jie, cinge ɑ́tïnge e dwɑdd-ɑ cɑyi gen. Kïttì ónhɑ̈nhi, o tyëng-ɑ ónɑ̈g óbëëd ge buud-ɑ yethi yëëth, ni gïg-ɑ nyi weddi. De cɑgg møgɑni cwöb, pyëw Jwøng-ɑ Ácwɑ̈ɑ̈j óbëëd e nudd e rɑɑj, o cinge ónudd ɑ́ ɑtïng e cɑy-ɑ gen. Ber ótïngi pödhh-ɑ lɑ̈wi yi Jwøng-ɑ Ácwɑ̈ɑ̈j, pödhh-ɑ cögi piny ókudhe kɑng, kɑ ge obëënø ge ójwɑnø! Bong ngɑn pïd wɑlɑ̀ bong ngɑn cyerri kì kelli gen, bong ngɑn dhɑ̈ɑ̈r kɑ ónenø. Bong wëëni me pɑ̈d, wɑlɑ̀ bong wɑrø me cöd. Nywøli wethhi gen bedh, o men-ɑ́ wethhi gen tënni gen. Tyelli kyënyi gen teeg cɑrø; o tyelli yɑ̈thi gen wïïnø nɑ yømø ɑ́kødɑkødø. Jøliny gen ngɑ̈rri nɑ ngurrì mø mɑɑg lɑ̈y, o bong ngɑn kɑ̈bbi kì cinggi gen. Keny-ɑ óbëën cyɑ̈ngɑni, ge óruur kömi Isrɑil ni ɑpɑgi nɑɑm omelø. Lidh, pönhï ógöögø ɑ́ muudhø me rɑj, cɑre ree óløge muudhø. Wë ɑ́lidhɑ kì run-ɑ ɑ́thøw Rɑ̈dh Udhiyɑ̀. Álidhɑ e bëëd ɑ wïj kwøme; kwøm me bɑ̈r, me myër o Kengø bëne ópɑ̈ɑ̈ngø yi ógødhe, ógønhdwøng, kí Serɑpïm mø cungi kì bute kì tuung kí tuung, ɑ́kyel yïe dɑ obërr ɑ́bïkyel; obërr ɑ́ryew møg kume nyinge, o ɑ́ryew kume tyelle, o ɑ́ryew pɑ̈rre. Ge ɑ́bëëd ge óryeerø ge köbb-ɑ ri gen kinni, “Kwërø, kwërø, kwërø! Wïlɑ̈bø, Jwøng-ɑ Ácwɑ̈ɑ̈j, bɑ kwërø, piny bëne pɑ̈ngø yi mɑ̈re.” Kɑ Kengø ceg-ɑ onhɑ̈nh yi cwɑggi gen, kɑ Kengø opɑ̈ngø yi yïrø. Akööbɑ kinni, “Bong gïn yiel yɑn! Mɑ́ møg-ɑ nyi kɑ̈ɑ̈l dhøgɑ bënn bɑ kwøbbi orøg, o kwøbbi tyëng-ɑ kelli gen bëëdɑ bɑ kwøbbi orøg. O men-ɑ́ Rɑ̈dh, Wïlɑ̈bø, Jwøng-ɑ Ácwɑ̈ɑ̈j, ɑ́lidhɑ, yɑ ɑ́gɑ̈g!” Codhe, kɑ Serɑp ɑ́kyel bï-ɑ yïɑ e ópɑ̈rrø, e ókɑ̈ddø ki leli mɑc mɑ ɑ́kwɑnye ki dikɑ̈bbì kì wïj këli lɑm. Kɑ dhøgɑ nywɑle ki leli mɑc menɑni, ɑkööbe kinni, “Dhøgí ɑ́rum ki nywɑlø yi gïn, ɑnɑn orøgí ɑ́rum ki lɑ̈ɑ̈nyø, o lɑ́ɑ̀w ɑ́dwöög piny kipe orøgí.” Codhe, ɑlïngɑ Wë e okööbø kinni, “Wɑ ör-ɑ men? Á men ɑ ógöögø ɑ́ jɑlwöönee?” Alöggɑ kinni, “Yɑ èn! Ör yɑn!” Aköbbe yɑn kinni, “Kedh, kɑ ji köbbí kinni, cɑgg wu lïngø kidï, møg-ɑ lïngi yi wun pɑ gɑm yi wɑ̈thi wun. Cɑgg wu nëënø kidï, gïn-ɑ göögø pɑ ngij yi wun.” Codhe ɑköbbe yɑn kinni, “Gwøg wɑ̈thi jiɑni ge gug, kɑ yïthhi gen meng, kɑ nyingi gen cøør, kipe kinni o ge cög ge pɑ lïngø, o ge pɑ nëënø, o bëëd e bong gïjø me gɑm yi wɑ̈thi gen. O ge cög ge pɑ ywöög köörɑ, mɑ́ pyëwɑ di lɑ̈ɑ̈m ki gen, kɑ ge di tuurɑ.” Apëjjɑ kinni, “Møgɑni ógïti wɑɑng ge bëëd ɑ nøw Wuö?” Alögge kinni, “Gïti keny-ɑ órënyi kɑ̈dd, kɑ ge döng-ɑ nøw. O piny kiree cöge e pɑ bëëd. Ji ókïdhɑ kun me lɑ̈wi, kɑ piny döng-ɑ nøw bëne. Cɑgg dhɑnhø ɑ́kyel döng kì ri ji pyɑ̈rø e obëëdø kì yij piny, óbëëd e rënyø ni yɑdh óthurø men-ɑ óngøl piny.” (Otug yɑnhɑni cungi ɑ́ cɑ̈gi bëëdø men-ɑ nyɑ̈n kì yï jii Jwøk.) Keny-ɑ ɑ́bëëd ɑ́ Rɑ̈dh Akɑɑdh wɑ̈d Yöthɑm wɑ̈d Udhiyɑ̀ ɑ jyɑ̈gø, Redhïn rɑ̈ɑ̈dh Arɑm kí Pekɑ̀ wɑ̈d Remɑliyɑ̀ rɑ̈ɑ̈dh Isrɑil, ge ɑ́bï be nyɑɑg ki Yeudiyɑ̀, de gø nuti tyɑɑm gen. Keny-ɑ ɑ́lïng rɑ̈ɑ̈dh Yeudiyɑ̀ kinni i Arɑm rëbø ki Isrɑil, kɑ obwøgø geki jie bënn, kɑ dëlli gen ceg-ɑ okïr yi wɑ̈ɑ̈rø ni kenyi wøjji bɑ̈ddi yenh yi ɑtunø. Kɑ Icɑyɑ̀ köbbi yi Jwøng-ɑ Ácwɑ̈ɑ̈j kinni, “Kedhí yï Rɑ̈dh Akɑɑdh, wuki Ceɑr Yɑcub wɑ̈dí Óyuud yi wun tøg dhøng-ɑ kɑ̈ɑ̈l yij luy-ɑ kwøømø, kì yuu-ɑ kedhi kej bödhhi cwɑ̈j kí ógudh. Kɑ köbbí kinni, bëëde ree gwiir en, e opɑ̈we dwøøg en piny, kɑ ko böggi wɑlɑ̀ ko twɑ̈lli. Liny Rɑ̈dh Redhïn rɑ̈ɑ̈dh Arɑm geki Rɑ̈dh Pekɑ̀ bong gïn gwøg yi gen, linyɑni nɑ yïrø me dung kì ri okewwi yenh ɑ́ryew yøw. Arɑm ɑ́rëbi ki Isrɑil. Ge dwɑdd-ɑ mɑgi Yeudiyɑ̀, ge dwɑdd-ɑ kinni o ji bwøg gen, o ge døøg gen tuung gen, o wɑ̈d Tɑbiil cïb wïj kwøm. “De yɑn, yɑ Jwøng-ɑ Ácwɑ̈ɑ̈j, yɑ kwøb-ɑ kinni gïn ni menɑni pɑ cwöb. Mɑ́ Arɑm pɑ teeg kibøli Dimɑceg kɑɑl-ɑ jɑɑgii, o Dimɑceg pɑ teeg kibøli Rɑ̈dh Redhïn. De keløg ɑ́ per Isrɑil, Isrɑil ókedhhi, pɑ bëëdø ɑ́ pödhø këti kì bɑng runn pyɑ̈r ɑ́bïkyel wïdɑ́bïj. Isrɑil pɑ teeg kibøli Sɑmɑriyɑ̀ kɑɑl-ɑ jɑɑgii, o Sɑmɑriyɑ̀ pɑ teeg kibøli Rɑ̈dh Pekɑ̀. “Keløg yïëyí pɑ teeg, yï pɑ cuggi ngïnø.” Acigi Akɑɑdh ödø ki wöödø yi Jwøng-ɑ Ácwɑ̈ɑ̈j kinni, “Cwöddi ki ngïji kì yï Jwøgí, Jwøng-ɑ Ácwɑ̈ɑ̈j, ócuggø bëëdø e ying-ɑ piny kì pödhi tyëngthøø, wɑlɑ̀ ying-ɑ mɑl kun lɑ̈wi.” Alöggi Akɑɑdh kinni, “Yɑ pɑ cwöddi ki ngïji; Jwøng-ɑ Ácwɑ̈ɑ̈j pɑ rɑng yi yɑn.” Aløøg møgɑni yi Icɑyɑ̀ kinni, “Adɑ́ lïng wun, wu tyëng gøl Debïd! Wu ɑ́bëëd wu jud-ɑ ji ceth, de ɑnɑn wu dwɑdd-ɑ judi Jwøk thyew? Døj, men-ɑ́ Wë kiree ɑ óthödhi wun ki ngïji; nyɑnɑjur me nuti pɑ̈nyø nywɑlø yi jɑlø, óngøl ki dhɑnhø, kɑ pɑ̈dh-ɑ piny ki wɑ̈d, o nyinge ócɑg yi en ɑ́ Imɑnwel. Kì bøli keny-ɑ ódønge kɑ odïdø ki tyelli kwøb, ji óbëëd ge omɑ̈dhø ki cɑg, ge ocyɑ̈mø ki møøw kïc. De cɑgg bøli kenyɑni nuti wɑ̈nhø, pìnyi rɑ̈nhh-ɑ böggi yi yïn ryeet ódöng nøw. “Jwøng-ɑ Ácwɑ̈ɑ̈j ókɑ̈ni kömí ki ryɑ̈g wuki jií, kí gøl rɑ̈ɑ̈dhø bëne; ryɑ̈g me dwøng me nuti pɑ̈nyi cwöbø kër-ɑ ɑ́dɑ̈ngi Isrɑil kí Yeudiyɑ̀; rɑ̈ɑ̈dh Acuur kɑ̈ɑ̈le’ kɑ̈ɑ̈lø. “Keny-ɑ óbëën bøli kenyɑni, tyëng Rïp ólwij yi Jwøng-ɑ Ácwɑ̈ɑ̈j, o ge bï gen ge nɑ lwɑngì ge kɑ̈ɑ̈l-ɑ kö Kiir. Kɑ tyëng Acuur lwije, o ge bï gen kì pödhi gen, ge nɑ dɑɑg kïc. Törr ópɑ̈ng yi gen, kí órøggi kïttì; yenh geki lum óbëëd ge pɑ nënni yi gen. “Keny-ɑ óbëën bøli kenyɑni, Wë ókïrø ki ngɑn lëëdø, men-ɑ óbï e kɑ̈ɑ̈l-ɑ Porɑt, men-ɑ ólyëël yëyyi wun wɑ̈g kì tïggi wun, kí yëyyi wɑ̈thi wun kí dëlli wun. Ngɑnɑni bɑ rɑ̈nhdwøøng Acuur. “Keny-ɑ óbëën bøli kenyɑni, cɑgg dhɑnhø yïe ódööng-ɑ yi dhyɑng kí dyëg ɑ́ryew, cɑg óbëëd ge gïïr. Ngee, ji-ɑ óbodh kwɑnni gen nøg kì piny men, ge ócɑmm-ɑ cɑg kí møøw kïc. “Keny-ɑ óbëën bøli kenyɑni, bɑ̈ggi oløg mø myër, me ɑ́kyel, kì kelli gen yije di oløg ɑ́lïp, óngew kɑ ngyëny ɑ́tegg ɑ́lïp, yethi gen óbëëd ge pɑ̈ng yi koodh kí okurø. Jøg-ɑ cwøw ókedhi kunɑni ge kɑ̈ll-ɑ wethh, mɑ́ pinyɑni bëne óbëëd e pɑ̈ng yi koodh kí okurø. Wïj kwøømø men-ɑ ɑ́bëëd ɑ́ pwödhø, bong dhɑnhø men-ɑ ókedhi yije, mɑ́ óbëëd e pɑ̈ng yi koodh kí okurø. Ógöögø ɑ́ keny cyɑ̈ɑ̈m yi dhög kí dyëg.” Kɑ yɑ köbbi yi Jwøng-ɑ Ácwɑ̈ɑ̈j kinni, “Kɑ̈bbí ki ópɑn-ɑ köme nyi gwëëd, kɑ gweed ki gwedd mø ngëddi gen døngø kinni, ‘Jwɑn ki mɑnyø, yɑg.’ Kɑ̈bbí ki jøg nyi cungi kì kömi dhøggi gen gɑ ɑ́ryew, kwɑny ókwërø Uriyɑ̀ geki Dhekɑriyɑ̀ wɑ̈d Yeberekiyɑ̀, o ge bëëd gɑ tyëng-ɑ ɑ́lïdhi.” Kɑ cyëgɑ ongølø ki dhɑnhø kì bøli keny megø. Keny-ɑ ɑ́pɑ̈dhe piny ki wɑ̈d, ɑköbbi yɑn yi Jwøng-ɑ Ácwɑ̈ɑ̈j kinni, “Cɑɑg ɑ́ ‘Jwɑn ki mɑnyø, yɑg.’ E nyelɑni dhøge nuti twïyø kɑ ócwöddø kinni, ‘Wïyø! Meyø!’ Kɑ̈ɑ̈r Dimɑceg kí jɑmm-ɑ ókïdhi Sɑmɑriyɑ̀ cøn, ge ókɑ̈l bënn yi rɑ̈nhdwøøng Acuur.” Kɑ Jwøng-ɑ Ácwɑ̈ɑ̈j cig-ɑ kwøb ki yɑn. Yɑ ɑ́köbbe kinni, “Mɑ́ tyëngɑni ɑ́bɑny-ɑ pïi Cilöɑ̀, pïg-ɑ mulli mɑ̈ɑ̈dh, kɑ ge nɑ̈g yi wɑ̈ɑ̈rø ge bögg-ɑ Rɑ̈dh Redhïn kí Rɑ̈dh Pekɑ̀, yɑn, yɑ Wïi wun, rɑ̈nhdwøøng Acuur kɑ̈ɑ̈lɑ’ kɑ̈ɑ̈lø kí yɑye bëne, o pɑ̈ɑ̈re kömi Yeudiyɑ̀. Ge óbï ni bɑɑyø me kɑ̈ɑ̈l Nɑm Porɑt, e ceg-ɑ beedhø. Yeudiyɑ̀ ówøj yi pïgɑni, pï ólwøddi ge ying-ɑ wɑ̈thi tøg.” “Wɑ ókøny yi Jwøk! Pinyee ókorri yi obërre møg-ɑ peedh en!” Wun ɑ pödhh, congu ri wun yi wɑ̈ɑ̈rø! Wu kɑ̈jj-ɑ lɑ̈wi kì kömi piny, lïng wun. Congu ri wun kipe liny, de böggi wun! Ngee, gwiru ri wun, de böggi wun! Gwiru gïg-ɑ dwɑddu gwøgø! De møgɑni pɑ lwɑ̈ng yi wun ki gwøgø! Kööb wun ni kɑ̀ dwɑddu en! De bong gïjø me gwøg yi kwøbbɑni, mɑ́ Jwøk ying-ɑ kelli wøn. Yɑ ɑ́kyëddi yi Jwøng-ɑ Ácwɑ̈ɑ̈j ki tege kinni i yɑ ko kedhi yij yuu-ɑ cyɑ̈dhi yi jiɑni. Ákööb kinni, “Yï ko kedhi be gwøg ki gïg-ɑ gøggi yi jiɑni, kɑ yï ko böggi yi gïg-ɑ böggi yi gen. Wïjí ko wïl kinni yɑn, yɑ Wïlɑ̈bø, Jwøng-ɑ Ácwɑ̈ɑ̈j, yɑ bɑ kwërø, bɑ yɑn ɑ böggi yi wun. Yɑ nɑ tungi kït men köme pɑ̈nhhi yi ji, kipe kɑ̀ böggi bëëdɑ yɑn ɑ́ kwërø, yɑ nɑ ɑ́kɑ̈llì møg mɑ̈gø ki tyëng myërri Yeudiyɑ̀ kí Isrɑil, kí Yerusɑlem. Ji mø gïïr ócyerri; ge ópɑ̈ɑ̈dh kɑ ge mød piny. Ge ómɑg yi ɑ́kɑ̈llì.” Wun, wu jøbɑngɑ, korru Ciggi Jwøk geki wödde møg-ɑ ɑ́mëgge yɑn. Jwøng-ɑ Ácwɑ̈ɑ̈j ɑ́pɑ̈ni, o cöge e pɑ yod yi jie, de ongɑ̈dhø yi yɑn. Yɑn èn, wøki othønh-ɑ ɑ́mëggi yɑn yi Jwøng-ɑ Ácwɑ̈ɑ̈j. Wø ɑ́öri tyëng Isrɑil yi Wïlɑ̈bø, Jwøng-ɑ Ácwɑ̈ɑ̈j, ɑ kwøme ying wïj Kïti Dhɑyøn, wøn ɑ́ wöödø me nëënø. De wu óköbbi yi jiɑni kinni i rɑ̈ɑ̈ng wun ki ɑ́jwöggì, kɑ wu pëjji wun ki yenh-ɑ nyi giidh, ɑ nyi luul. Ge ókööbø kinni, “Ji, jwöggi gen ko pyëj yi gen? Ji ko pëëj ki wɑddi gen tyëngthøø?” Løøg wun kwøbbi gen kinni, “Lïngu møg-ɑ pwönyi wun yi Jwøng-ɑ Ácwɑ̈ɑ̈j! Wu ko lïngi kwøbbi ɑ́jwöggì. Akørr pɑ cuggi jogø yi møg-ɑ kwøb yi gen.” Ji óbëëd ge owïïnø kì yij piny, wɑ̈thi gen cungø, o ri gen dɑ kɑ̈j. Rɑ̈ɑ̈dh gen geki Jwøøg gen óyɑny yi gen, kì bɑng kɑ̈ny-ɑ ri gen geki rɑ̈ji pëthi gen. Ge ólïïdh mɑl, kɑ ge lïïdh-ɑ piny, de ge ólidh-ɑ ɑkørr kí muudhø me böggi, eni muunh-ɑ yije ókïdhi gen. Bong yöö men-ɑ óyieel gen kì bøli kej ɑkørrɑni. Piny gøl Dhebulun geki Nɑptɑlì ɑ́bëëd e yɑ̈rø kì bøli keny megø, de dhwɑ̈nge óbï dhuki megø, eni piny-ɑ cɑ̈gi kì kömi Nɑɑm Omeli Tɑr kì wɑɑng cyɑ̈ɑ̈ng böörø, e yöd-ɑ kuni wɑɑng cyɑ̈ɑ̈ng mwøl, gïti piny-ɑ løøg Nɑm Urdun, e wɑ̈dh-ɑ men-ɑ́ Gɑlelì kiree, piny-ɑ bëëd yi jurr-ɑ pɑth. Tyëng-ɑ ɑ́cyɑ̈dhi kì yij muudhø ɑ́lïdhi ki cɑr me dwøng. Ge ɑ́bëëd ɑ piny tïbbì de ɑnɑn cɑr omënyø kì kömi gen. Ge ɑ́thödhi yi yïn ki medi pyëw me dwøng, yïn ɑ Jwøng-ɑ Ácwɑ̈ɑ̈j, pëthi gen ɑ́løg mø med yi yïn. Pëthi gen ɑ́mïni yi gïn-ɑ ɑ́gwøg yi yïn, ni kenyi mïni pëthi ji kɑ̀ kɑj gen byelli gen, wɑlɑ̀ kenyi pɑ̈ngi gen jɑmm-ɑ ɑ́mɑg yi gen kì yij liny. Mɑ́ ɑ́cebø men-ɑ ɑ́bëëd ge torø ɑ́tørri yi yïn, kyeel ki lonh-ɑ ɑ́pwööd gen. Pönhɑni ɑ́tyɑm yi yïn eni pönh-ɑ ɑ́guud nyingi jií, ni kɑ ɑ́tyɑɑm yɑɑy Midyɑn kɑ̈ge dööng. Wɑrri liny-ɑ mɑ̈nyi, kí ógudhi gen møg-ɑ cödhø yi remø, ge órɑ̈b bënn ki mɑc. Wɑ ɑ́nyöddi ki dhɑnhø! Wɑ ɑ́nëngi ki wɑ̈d! O ógöögø ɑ́ jɑngee. Ócwølli ɑ́ “Ngɑn wïje pel, Jɑlcïïjø”, “Jwøng Teg”, “Wïy ɑ gïti Atheer” “Nyirɑ̈ɑ̈dh Mër”. Rɑ̈ɑ̈dhø mee ókedh e ódøngø, pödhe ócög e bëëd ɑ yij mër. Óbëëdø kì wïj kwøøm kwɑn Debïd, ki bëëntir kí gøggi dyër cɑg ɑnɑn gïti thumi piny. Jwøng-ɑ Ácwɑ̈ɑ̈j dwɑdd-ɑ gwøgi gïgɑni bënn ceth. Cɑ́yi pödhi Isrɑil ɑ́kwøb yi Wë; cɑ́yi kwɑrri Yɑgob ɑ́kwøb. Óyod yi tyëng Isrɑil, kí tyëng Sɑmɑriyɑ̀, kinni møgɑni ɑ́gwøge. Anɑn ge ceg-ɑ ngwønø ge tɑ̈dø, o ge cem-ɑ, “Uddi thob ɑ́pɑ̈ɑ̈dh, de kej gen ógëddi wøn ki uddi kïtt-ɑ nyi tweg. Kwɑ̈rr-ɑ bɑ ólɑm ɑ́tørri, de kej gen ócïbi yi wøn ki yenh sɑndɑl.” Tyëng-ɑ mɑɑn Isrɑil ɑ́tug yi Jwøng-ɑ Ácwɑ̈ɑ̈j, o ge pɑ̈ɑ̈r gen köme. Arɑm kì kuni wɑɑng cyɑ̈ɑ̈ng mwøl, kí Pelistiyɑ̀ kì kuni wɑɑng cyɑ̈ɑ̈ng böörø dhøggi gen yieeb gen, ge dwɑdd-ɑ mwønyi Isrɑil. De cɑgg ɑ́ kinøw ceth, Jwøng-ɑ Ácwɑ̈ɑ̈j cinge nudd gø tïng en, e dwɑdd-ɑ cɑ̈yø. Tyëng Isrɑil nuti yewø, cɑgg ɑ́ kɑ ɑ́cɑɑy gen yi Wïlɑ̈bø, Jwøng-ɑ Ácwɑ̈ɑ̈j, ge nuti døøg kööre. Jɑggi Isrɑil geki tyëng Isrɑil ócɑy yi Jwøng-ɑ Ácwɑ̈ɑ̈j kì cyɑ̈ng ɑ́kyel. Gï óngøle piny, eni wïj geki yëb. Jøgdøngø geki jödd-ɑ wør bene gen ɑ bɑ wïj, o yëb bɑ jøtöng møg-ɑ kɑ̈lli wöddi pyed! Ji ɑ́thɑɑb yïnø yi tyëng-ɑ bɑ pëjji gen, kɑ wɑ̈thi gen muum yi pëjjɑni. Kì bɑng menɑni, bong yɑɑg thønhø møg-ɑ óbodh, o pyëwe koo lɑ̈ɑ̈m ki thwömm geki kïjj, mɑ́ ji bënn kømm-ɑ pyed, o ge gøgg-ɑ gïgrijjø. De cɑgg ɑ́ kinøw, pyëw Jwøng-ɑ Ácwɑ̈ɑ̈j koo lɑ̈ɑ̈m, Jwøng-ɑ Ácwɑ̈ɑ̈j cinge nudd gø tïng en e dwɑdd-ɑ cɑ̈yø. Orøøg ji lyel nɑ mɑc men rɑ̈b thïm me yije pɑ̈ng yi koodhø bëne kí okurø. Nɑ mɑc men rɑ̈b thïm e yïrø töng-ɑ mɑl ni löjj. Mɑ́ Wïlɑ̈bø, Jwøng-ɑ Ácwɑ̈ɑ̈j, pyëwe rɑɑj, cɑ́ye lyel nɑ mɑc kì yij pödhø bëne, ji rɑ̈be’ rɑ̈bø; ngɑn óngellø kɑ ongele. Ji óbëëd ge gwɑrr-ɑ gïgcɑmm kì yij pödhø bëne, de kɑ̈j pɑ lɑ̈ɑ̈ny kì ri gen. Men-ɑ́ nyigi gen ócɑm yi gen! Gøl Mɑnɑsè kí gøl Eprɑim ri gen ónɑ̈g yi gen, kɑ ge nyi rëb-ɑ kömi Yeudiyɑ̀. De cɑgg ɑ́ kinøw, pyëw Jwøng-ɑ Ácwɑ̈ɑ̈j koo lɑ̈ɑ̈m, Jwøng-ɑ Ácwɑ̈ɑ̈j cinge nudd gø tïng en e dwɑdd-ɑ cɑ̈yø. Wu ɑ́gɑ̈g! Wun ɑ nyi muuj cigg-ɑ guud wun nyingi jiɑ. Wu mɑ̈ɑ̈n-ɑ tyëng-ɑ nyingi gen cɑn jɑmmi gen, o bong dyër me göggi gen yi wun, kɑ jɑmmi thwömm geki kïjj nyi kwɑny wun. Wu ógöög ɑ dï keny-ɑ ócɑɑy wun yi Jwøk? Wu ógöög ɑ dï, keny-ɑ ókɑ̈ɑ̈le ryɑ̈g kömi wun, gø ör yi en ɑ pödhø me lɑ̈wi? Wu óreng-ɑ keny, ɑ óyïddi wun ki ngɑn kunyi? Kɑ̈ɑ̈r wun ókɑɑnu’ keny? Wu ónɑ̈g kì yij liny, wɑlɑ̀ wu ókɑ̈l wun ɑ́ ɑmɑgg. De cɑgg ɑ́ kinøw, Jwøng-ɑ Ácwɑ̈ɑ̈j pyëwe koo lɑ̈ɑ̈m, Jwøng-ɑ Ácwɑ̈ɑ̈j cinge nudd gø tïng en e dwɑdd-ɑ cɑ̈yø. Kɑ Jwøng-ɑ Ácwɑ̈ɑ̈j okööbø kinni, “Acuur ɑ bɑ lodh men-ɑ pwöödɑ tyëng-ɑ pyëwɑ rɑɑj ki gen. Acuur ɑ örɑ pönh-ɑ pɑ wør Jwøk, pödhi tyëng-ɑ ɑ́wëggi pyëwɑ rënyø, o jɑmmi gen kwɑny, o ge nyøn ni tuggi ki yethi yëëth.” Rɑ̈nhdwøøng Acuur kiree yïe dɑ rummì mø teg. Dwɑdd-ɑ tɑ̈ɑ̈yi pödhh mø gïïr piny. Kööre nyi pwöde pwödø e cem-ɑ, “Pëjji linyɑ bɑ rɑ̈nhì ge bënn! Kɑ̈ddi Kɑlnö, kí Kɑrkemec, kí Amɑth, kí Arpɑd ge ɑ́mɑgɑ. Sɑmɑriyɑ̀ ɑ́mɑgɑ geki Dimɑceg. Cingɑ ɑ́tïngɑ kɑ pödhh-ɑ kwɑjji ngïjji jwögg-ɑ pɑth ki dyër cɑyɑ, ge bɑ ngïjji jwögg mø ngenyø kibøli møg-ɑ Yerusɑlem geki Sɑmɑriyɑ̀. Sɑmɑriyɑ̀ ɑ́tɑ̈ɑ̈yɑ piny geki ngïjji jwögge, gïn ni menɑni ɑ ógöggɑ Yerusɑlem geki ngïjj-ɑ mɑlli kì yije.” De Jwøng-ɑ Ácwɑ̈ɑ̈j okööbø kinni, “Keny-ɑ ótyëgɑ gïg-ɑ gwøg yi yɑn kì Kïti Dhɑyøn, geki Yerusɑlem, rɑ̈nhdwøøng Acuur ócɑy yi yɑn kipe kɑ ɑ́tɑ̈d wïje kɑ døøg-ɑ be pwödi kööre.” Rɑ̈nhdwøng Acuur pwöd-ɑ kööre e cem-ɑ, “Ge ɑ́gwøgɑ bënn kɑ tegɑ; yɑ teg, wïjɑ pel, o rummɑ gïïr. Yɑ nyi pödhh-ɑ kömi pödhh ni wɑnh-ɑ thwønh kɑ jɑmmi gen kwɑnyɑ, kí piny gen bëne. Pödhhi kömi piny nɑ uddi winy kì yïɑ, kɑ̈rri gen ɑ́lemɑ ni kenyi lem nywøli winy; ge ɑ́lemɑ e bong ywøøg obërø me lïngɑ, wɑlɑ̀ bong gïn ryeer kì wïjɑ e mɑ̈ɑ̈n-ɑ yɑn kwɑnyi gen!” De Jwøng-ɑ Ácwɑ̈ɑ̈j okööbø kinni, “Dørø ócuggø kwøb kinni pere teg kibøli ngɑn-ɑ nguddii? Mocɑr pere teg kibøli ngɑn-ɑ nguddii? Pɑth ki lodh ɑ nyi kwɑny dhɑnhø, de bɑ dhɑnhø ɑ nyi kwɑny lodh.” Jwøng-ɑ Ácwɑ̈ɑ̈j óöni ki rɑ̈ɑ̈m dëllì mø cɑɑye tyëng-ɑ cɑmmi gïgdøj ɑnɑn. Ódi mɑc me lyel kì dëlli gen. Jwøk, ɑ løg cɑɑr Isrɑil ógöögø ɑ́ mɑc. Jwøøg Isrɑil ɑ bɑ kwërø ólyel cyɑ̈ng ɑ́kyel, kɑ jɑmmì bënn rɑ̈be kì cyɑ̈ngɑni geki koodh kí okurø bënn. Thïm-ɑ døj geki pwödh órɑ̈bbi kinni tweet, ni kenyi keg dhɑnhø kɑ othøø kì cyɑ̈ng ɑ́kyel yøw. Ódöng ɑ́ yenh møg cuggi kwɑnø yi othinh. Bøli keny-ɑ ówïyi tyëng-ɑ ɑ́bodh kì Isrɑil ki bëëdø kì ri tyëng-ɑ ɑ́rënyi gen ɑ́cyɑ̈ngi. Ge óngɑ̈dh-ɑ Jwøng-ɑ Ácwɑ̈ɑ̈j kwërø, ɑ bɑ Jwøøg Isrɑil kidyër. Mø nøg kì kelli tyëng Isrɑil ódwöög kö Jwøøg gen, Jwøng teg. Cɑgg ɑ́ kɑ̀ bëëd tyëng Isrɑil ge nɑ tør ɑnɑn, bɑ mø nøg yøw ɑ ódwöög. Ryɑ̈g ɑ́rum ki kwøbø kinni obëënø, ryɑ̈g obëënø e nɑ bɑɑyø. Ngee, Wïlɑ̈bø Wë, Jwøng-ɑ Ácwɑ̈ɑ̈j, ókɑ̈ni yij pödhø bëne ki ryɑ̈g ni kɑ ɑ́kööbe. Wïlɑ̈bø, Jwøng-ɑ Ácwɑ̈ɑ̈j, köbb-ɑ jie møg-ɑ bëëdø kì Dhɑyøn kinni, “Wu ko böggi yi Acuur, cɑgg nyingi wun guud yi gen ni kɑ ɑ́guud nyingi wun yi tyëng Rïp cøn. Yɑ órum ki cɑyi wun kì bɑng nyɑ keny me thiinh, codhe, o ge nɑ̈gɑ. Ge ópwöd yi yɑn, yɑ Wïlɑ̈bø, Jwøng-ɑ Ácwɑ̈ɑ̈j; ge ópwöd yi yɑn ki dël ni kɑ ɑ́pwödɑ tyëng Midyɑn kì Kïti Örëb. Acuur ócɑy yi yɑn ni kɑ ɑ́cɑyɑ Rïp. Obëën bøli kenyɑni, wu ógøny yi yɑn kì cingi Acuur. Acebbi gen óbï wɑ̈g kì muddi wun.” Kɑɑl Aɑy ɑ́mɑg yi jøliny tyëngmɑ̈ɑ̈nø! Migrön ɑ́pöödh yi gen! Jɑmmi gen ɑ́wiy gen Mikmɑc! Kew ɑ́bɑ̈ɑ̈n yi gen, o ge ónïn-ɑ Gebɑ̀! Tyëng Rɑmɑ̀ ɑ́nɑ̈g yi wɑ̈ɑ̈rø, o tyëng Gibeɑ̀ kɑɑl Cɑul ɑ́rengi. Kïïw wun tyëng Gɑlïm! Lïng wun tyëng Lɑkic! Löggi wun tyëng Anɑthöth! Tyëng Mɑdmenɑ̀ geki tyëng Gebïm rïngi ge yiel-ɑ wëyi gen. Tyëngmɑ̈ɑ̈nø ying-ɑ Nöb dicyɑ̈ɑ̈ng, ge tïngg-ɑ cinggi gen, ge nenn-ɑ kuni Kïti Dhɑyøn, Kɑɑl Yerusɑlem. Ge ókɑ̈ɑ̈l yi Jwøng-ɑ Ácwɑ̈ɑ̈j gï møde’ piny ni bɑɑd yɑdh kenyi dëëme, kɑ̀ ngølii. Men-ɑ tɑ̈dø, ɑ pëddi bɑ̈r kì kelli gen, óngøl kɑ ceg-ɑ ì rɑɑp kì piny e yɑ̈rø. Ge óngøl piny yi Jwøng-ɑ Ácwɑ̈ɑ̈j ni yenh kì dïdyëri thïm, kɑ̀ nyi ngøl gen ki dørø, ni men-ɑ́ yenh-ɑ døngø kì Lubnɑn. Rɑ̈ɑ̈dhø mi gøl Rɑ̈dh Debïd nɑ yɑdh men-ɑ óngøl piny, de ni kɑ̀ nyi twïy bɑ̈dd mø nyɑ̈n kì ri otug yɑdh, rɑ̈dh me nyɑ̈n ócwöb kì kelli kwɑrri Debïd. Ónëngi ki peli wïj yi wëyi Jwøng-ɑ Ácwɑ̈ɑ̈j, kí dïdø kí ngɑ̈nyi wøw me jɑɑge jie, gïn-ɑ dwɑddi yi Jwøng-ɑ Ácwɑ̈ɑ̈j óbëëd gø ngɑ̈nye, o gø ówøre, óyïddi ki medi pyëw kì ri mïdhi Ciggi Jwøng-ɑ Ácwɑ̈ɑ̈j. Koo cwɑ̈ggi kɑ per døøji dëël dhɑnhø wɑlɑ̀ møg-ɑ kømmi kì ri ngɑnɑni, gøøny ɑbuur ólidhe kidøøj, ngɑn nyødh ómëgge gëe. Ji ócɑy-ɑ keny-ɑ ókööbe o tyëngrijjø ceg-ɑ thøø. Jie ójɑɑg yi en kɑ gøggi dyër geki tɑri pyëw. Óthönhì geki dyëg óbëëdø kì kej ɑ́kyel ki mër, kwɑ̈nyì óbuud kì kej ɑ́kyel geki nywøli dyëg. Røjj ócyɑ̈mø kì kej ɑ́kyel geki nywøli ngur, ge kwɑy-ɑ yi othinh. Dhög ócyɑ̈mø kì kej ɑ́kyel geki ngurrì, nyigi gen óbuud kì kej ɑ́kyel ki mër. Ngurrì ócɑm lum ni dhög. Othinh me dhødh ótuug kì buti ød thwöl, kɑ othinh-ɑ pønø cinge cøde ød thwöl de bong gïn kedhi ree. Bong gïjø men-ɑ óbëëd e rɑj kì Dhɑyøn kïti kwëër Jwøk, bong gïnrɑj men-ɑ óböggi. Piny óbëëd e dïdø ki pwönyø mi Jwøng-ɑ Ácwɑ̈ɑ̈j, ni kɑ̀ bëëd nɑ̈mmi omelø ge pɑ̈ng yi pï. Bøli keny-ɑ ógöög rɑ̈nh-ɑ kɑ̈ɑ̈l thɑ gøl Debïd ki ngïji kipe pödhh ɑ́cyɑ̈ngi. Ri gen ócøng gen kɑɑl-ɑ jyɑ̈ɑ̈ge ge ywöör-ɑ dönge. Keny-ɑ óbëën cyɑ̈ngɑni, Wë jie møg-ɑ ɑ́kïdhi yïnø ódwööge; gen ɑ møg-ɑ ɑ́kïdhi Acuur kí Rïp, kí møg-ɑ ɑ́kïdhi pìnyi Pɑthrös geki Kuc, kí møg-ɑ ɑ́kïdhi Elɑm, kí Bɑbïlöniyɑ̀, kí Amɑth, kí piny-ɑ kömi nɑɑm omelø geki yethi mujji nɑ̈mmi omelø. Jwøng-ɑ Ácwɑ̈ɑ̈j ótïngi mɑl ki ber, e nyudh-ɑ pödhh bënn kinni jie møg-ɑ tɑɑy wɑ̈thi tùngi piny gɑ ɑ́ngwen gï cønge’ cøngø; tyëng Isrɑil geki tyëng Yeudiyɑ̀ dwööge’ dwöögø. Isrɑil pɑ cigi mɑgø yi tyiel ki Yeudiyɑ̀ këti, o Yeudiyɑ̀ koo bëëd ge mɑ̈n ki Isrɑil. Ge órëbi kömi tyëng Pelistiyɑ̀ kì kuni wɑɑng cyɑ̈ɑ̈ng böörø, kɑ tyëng myërr-ɑ wɑɑng cyɑ̈ɑ̈ng mwøl yɑg yi gen. Piny Edöm geki Moɑb ómɑg yi gen, o kwøbbi gen ólïngi yi tyëng Amön. Gøøli Siwes ógöjji dwönø yi Jwøng-ɑ Ácwɑ̈ɑ̈j; ókɑ̈ni ki yømø me lëëdh men-ɑ ódwön Nɑm Porɑt, kɑ óngøllø ɑ́ kɑ̈jj ɑ́bïryew møg yethi gen kɑ̈ɑ̈l yi ji. Tyëng-ɑ óbodh møg-ɑ ódwöög kì Acuur, yuu gen óceg ngedhø, ɑ́ yöö me dwøng, ni yuu-ɑ ɑ́bëën wɑ̈g kì Rïp yi kweyyi gen kɑ̈ge dööng. Ácyɑ̈ngi eni bøli keny-ɑ ówör ji kinni, “Yɑ lenh-ɑ yïn Jwøng-ɑ Ácwɑ̈ɑ̈j! Yï ɑ́bëëd pyëwí rɑɑj ki yɑn, de ɑnɑn yɑ ɑ́yiel yi yïn, pyëwí pɑ rɑɑj ki yɑn këti. Jwøk, en ɑ bɑ yïënɑ; óngɑ̈dhɑ, o yɑ koo böggi. Jwøng-ɑ Ácwɑ̈ɑ̈j ɑ thödhi yɑn ki tegø, en ɑ bɑ yïënɑ. Jii Jwøk pëthi gen nyii mïnø kenyi yiele gïn, ni kenyi mïni pyëw ngɑn ree di röödhø kenyi mɑ̈dhe ki pï.” Ácyɑ̈ngi eni bøli keny-ɑ ókööb ji kinni, “Pwøj wun Jwøng-ɑ Ácwɑ̈ɑ̈j! Cwøl wun en o wu køny yi en! Köbbu pödhh bënn ki gïn-ɑ ɑ́gwøg yi Jwøng-ɑ Ácwɑ̈ɑ̈j! Köbbu gen kinni Jwøng-ɑ Ácwɑ̈ɑ̈j dwøng! Lenhu Jwøng-ɑ Ácwɑ̈ɑ̈j ki wör, kipe gïgdøngø møg-ɑ ɑ́gwøge bënn. Wiy wöönɑni lïngi yi lɑ̈bø bëne. Wör tyëng-ɑ bëëdø kì Dhɑyøn bënn ge óryeerø! Jwøøg Isrɑil bɑ kwërø, o pëddi döng, o bëëd ɑ kelli jie.” Men bene wöön-ɑ ɑ́ör yi Jwøk gø öre’ Icɑyɑ̀ wɑ̈d Amodh kipe Bɑbïl. Tïng wun beer liny mɑl kì wïj kït! Kiw wun liny wun, kɑ kɑng kodh, o wu pɑ̈ɑ̈r wun kömi kɑɑl-ɑ tɑ̈dø. Jwøng-ɑ Ácwɑ̈ɑ̈j linye, liny-ɑ tɑ̈dø ɑ́kiwe o ge nyɑg gen linye kwërø. Lïngu cwɑgg-ɑ kɑ̈ɑ̈l wïj kït, bɑ cwɑggi pödhh kɑ̀ cøng gen ri gen. Jwøng-ɑ Ácwɑ̈ɑ̈j yɑye ɑ́kiwe kipe liny. Ge kɑ̈ɑ̈l-ɑ pödhh mø lɑ̈wi kì cögi piny. Pönhɑni bëne órënyi yi Jwøng-ɑ Ácwɑ̈ɑ̈j ki rɑ̈ji pyëwe. Ywöngi wun, mɑ́ cyɑ̈ɑ̈ng Jwøng-ɑ Ácwɑ̈ɑ̈j ɑ́cyɑ̈ngi, eni cyɑ̈ng-ɑ ókɑ̈ne ki ryɑ̈g. Cinggi ji óceg ì lwɑj kì piny, kɑ pëthi ji ongɑɑnyø. Ge órɑngi ni ngɑndhɑjø men pɑ̈dhi piny. Ge ónenni nyingi gen ki wɑ̈ɑ̈rø, ge nënni ge yɑ̈ɑ̈rø. Cyɑ̈ɑ̈ng Jwøng-ɑ Ácwɑ̈ɑ̈j obëënø; eni cyɑ̈ng-ɑ bëëd pyëwe e rɑɑj. Kì cyɑ̈ngɑni piny ódöng nøw, o tyëngorøg ónɑ̈g bënn. Kyelli mɑl bënn koo mënyø, cɑ̈ng ólunyi keny-ɑ ótuule, kɑ dwɑ̈y ogöögø e bong cɑre. Jwøng-ɑ Ácwɑ̈ɑ̈j okööbø kinni, “Ryɑ̈g ókɑ̈ɑ̈lɑ kömi piny, kɑ tyëngorøg cɑyɑ bënn kipe orøøg gen. Tyëng-ɑ wɑ̈thi gen tɑ̈dø ódwøøgɑ cyɑ̈n, kɑ tyëngɑthwøg cɑyɑ. Tyëng-ɑ óbodh óbëëd kwɑnni gen nøg, o yodi gen óbëëd e teeg ni dhɑb. Mɑl ógöjjɑ onhɑ̈nh, o piny órungi kì keje dicyɑ̈ngɑni, keny-ɑ ónyodhɑ rɑ̈ji pyëwɑ, yɑ Jwøng-ɑ Ácwɑ̈ɑ̈j. “Wëdhh møg-ɑ Bɑbïl órengi pödhhi gen ge tɑɑyø, ni ɑ́køny kenyi cyeddii yi jødwɑr, o ge óni dyëg mø bong ngɑn kwɑy gen. Ngɑn mɑg ceg kɑ cööbø kɑ othøø. Nyigi gen ónɑ̈g gï onennø yi gen, kɑ mɑ̈nni gen mød kì bøli gen, kɑ kɑ̈lli gen yɑg.” Jwøng-ɑ Ácwɑ̈ɑ̈j okööbø kinni, “Liny Mɑdɑy ótug yi yɑn, o kedhe be pɑ̈ɑ̈r kömi Bɑbïl; tyëngɑni yï gen bɑ̈r ki ɑ́tegø, o dhɑb pɑ kønø kì pëthi gen. Yɑɑg-ɑ wøbb ónɑ̈g yi gen ki wethhi gen. Pëthi gen koo lɑ̈ɑ̈m ki møg-ɑ dhødh wɑlɑ̀ ki othønhø. Bɑbïlöniyɑ̀ bene pönh-ɑ pëddi myëërø, tyëng pönhɑni thwøgø thwøgø. De Bɑbïl ócøørɑ piny, yɑ Jwøng-ɑ Ácwɑ̈ɑ̈j ni Sødømɑ̀ geki Gømørɑ̀! Bong dhɑnhø men-ɑ óbëëdø kì kenyɑni. Árɑb koo gudø ki kɑɑl kì wïj Bɑbïl, o bong tyëng-ɑ ókwɑ̈yø kì kenyɑni ki dyëg. Óbëëd ɑ́ keny cyɑ̈ɑ̈m yi lɑ̈yyi pɑ̈l, o tulø ógëdø ki udde kì kenyɑni. O wudø óbëëdø kì kenyɑni, tenø ópɑ̈rri kì wïj kɑɑlɑni. Uddi kɑ̈ll-ɑ døngø yethi gen óywöngi yi óthönhì geki ógwøgg. Bøli kej Bɑbïl ɑ́bï; cyɑ̈ngge ɑ́thumi.” Jwøng-ɑ Ácwɑ̈ɑ̈j pyëwe ócigi lɑ̈ɑ̈mø ki tyëng Isrɑil, kɑ gï myege gɑ jie. Ge ówiy yi en o ge døøg gen be bëëdø kì piny gen. Tyëngpɑth óbï be bëëdø kì kelli gen. Isrɑil ókøny yi pödhh mø gïïr ki døøg pinye, piny-ɑ ɑ́mëggii yi Jwøng-ɑ Ácwɑ̈ɑ̈j. O Isrɑil ógöggi yi pödhh-ɑ kyeelø gɑ bɑ̈ngge. Tyëng-ɑ ɑ́mɑg Isrɑil cøn, ólony ki mɑgø yi Isrɑil, o tyëng-ɑ ɑ́guud wɑɑng Isrɑil ójɑɑg yi Isrɑil. Tyëng Isrɑil óyiel yi Jwøng-ɑ Ácwɑ̈ɑ̈j ki orɑɑng gen geki gwøng teg men-ɑ ɑ́cïri gen. Keny-ɑ ógwøge møgɑni, rɑ̈ɑ̈dh Bɑbïlöniyɑ̀ ógɑggi yi tyëng Isrɑil kinni, “Rɑ̈nh-ɑ yije wöny ɑ́pɑ̈ɑ̈dh! Tegi jɑgg-ɑ rijjø ɑ́cuung yi Jwøng-ɑ Ácwɑ̈ɑ̈j, gen ɑ tyëng-ɑ ɑ́guud nyingi ji-ɑ ɑ́mɑg yi gen. De ɑnɑn piny bëne bëëdø kɑ mër; dhɑnhø bëne wör pyëwe omedø. Cɑgg ɑ́ men-ɑ́ ɑmedh geki sɑndɑl mø Lubnɑn, ge ókööbø kinni, ‘Yï ɑ́pɑ̈ɑ̈dh, bong ngɑn-ɑ ócigi wøn ngøl piny!’ “Pödhi tyëngthøø dhwödh-ɑ be pɑ̈ɑ̈ri yïn, yïn ɑ rɑ̈ɑ̈dh Bɑbïlöniyɑ̀. Rorr-ɑ ɑ́jɑɑg kömi piny cøn, gï ɑ́tuge o ge pɑɑr gen yïn. Ge okööbø ge bënn kinni, ‘Anɑn yï ɑ́göög yi nyøødh ni wøn! Yï ɑ́göög ni wøn! Yï ɑ́bëëd yï nyi mɑ̈dh kɑ kɑng, de ɑnɑn yï pɑ ying pödhi tyëngthøø? Yï buud-ɑ kömi kunnì, o kömí mull-ɑ yi twöng.’ “Rɑ̈ɑ̈dh Bɑbïlöniyɑ̀, yï ce ɑ́bëëd yï nɑ kyeli ru wøw, de yï ɑ́pɑ̈ɑ̈dh ɑ dï? Yï ɑ́bëëd yï mɑng-ɑ pödhh cøn, de yï nuti leeng piny ɑnɑn? Yï ce ɑ́bëëd yï dwɑdd-ɑ kedhi mɑl, o kwømí di cïb kömi kyell-ɑ lɑ̈wi cɑrø? Yï nuti dwɑdd-ɑ kedhi wïj kïn-ɑ wɑɑng cyɑ̈ɑ̈ng mwøl, o yï di pëggí kelli jwögg. Yï ɑ́kööb ce yï dwɑdd-ɑ kedhi wɑ̈thi pøøl o yï di pɑ̈ɑ̈r ki Áyïmø! De yï ce ɑ́yöd yï kïdh-ɑ piny pödhi tyëngthøø? “Tyëng-ɑ thøø óceg dɑɑyø ge nenn-ɑ yïn, kɑ ge okööbø kinni, ‘Bene jɑl-ɑ ɑ́rungi piny èn, ɑ ɑ́bëëd pödhh ceg-ɑ kïïrø kì yïe? Bene jɑl-ɑ ɑ́rënyi kɑ̈dd èn, ɑ ɑ́gwøg kömi piny ɑ́ ryɑng? Bene jɑl-ɑ ɑ́bëëd ɑmɑgge pɑ nyi gønye, o gï pɑ nyi wëgge kedhi kɑ̈lli gen? Rɑ̈nhi kömi piny bënn buud-ɑ yethi kenggi gen, kengg-ɑ́ yethi gïn ɑ́koony gen, de yïí bong deebø, yï ɑ́ceg kɑ weddø o yï kwɑ̈ɑ̈g. Kömí óröör-ɑ ɑ́lɑthkerr møg-ɑ ónɑ̈gø yi liny, wu ɑ́leeng-ɑ yij luy me tyele bɑ kït, o wu nyɑɑj piny. Mɑ́ pödhí ɑ́rënyi yi yïn, kɑ jií nɑ̈ɑ̈g, yï pɑ kony ki konyi rɑ̈nhì. Bong dhɑnhø men-ɑ ódöng e onëënø kì gølí gøl-ɑ rɑj. Wiy jɑl-ɑ nɑ̈gø cɑ̈ge ki nɑ̈g! Wɑ̈ddi rɑ̈dh ceg-ɑ thøø ki gööj orøng-ɑ ɑ́gwøg yi kweyyi gen. Bong ngɑn-ɑ ójɑɑg piny kì kelli gen, o bong ngɑn-ɑ ópɑ̈ng piny ki kɑ̈dd.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Yɑ ópɑ̈ɑ̈r kömi Bɑbïl, kɑ rënyɑ. Bong gïjø men-ɑ ówiyɑ, bong othinh me wiyɑ; bong dhɑnhø men-ɑ ówiyɑ kinni tek. Yɑn, yɑ Jwøng-ɑ Ácwɑ̈ɑ̈j, yɑ ɑ́rum ki kwøb. Bɑbïl óløgɑ bɑ̈j, o wïje óbëëd-ɑ yi tulø. Bɑbïl óyej yi yɑn ki ókwɑngø, bong gïjø men-ɑ ódöng kì keje, e nuti yeej wɑ̈g. Yɑn, yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Wïlɑ̈bø, Jwøng-ɑ Ácwɑ̈ɑ̈j ɑ́köngi kinni, “Gïn-ɑ ɑ́rum ki gwirø yi yɑn ócwöb ceth. Gïn-ɑ ɑ́kwøb yi yɑn kinni ógwøgɑ, gwøgɑ’ gwøgø. Tyëng Acuur ónɑ̈g yi yɑn kì pinyɑ, piny Isrɑil, kɑ ge nyønɑ kì wɑ̈thi kïttɑ. Jiɑ ópɑ̈ɑ̈dɑ wɑ̈g kì yethi ɑcebbi tyëng Acuur, geki gïg-ɑ bëëd ge torø torø. Bene gïn-ɑ dwɑddɑ gwøgø kì kömi piny, o cingɑ tïng yɑn, yɑ cɑy-ɑ pödhhi kömi piny.” Wïlɑ̈bø, Jwøng-ɑ Ácwɑ̈ɑ̈j, dwɑdd-ɑ gwøgi møgɑni ceth, cinge ɑ́tïnge e dwɑdd-ɑ cɑ̈yø, o bong ngɑn-ɑ ójogii. Men bene wöödø men-ɑ ɑ́kɑ̈lli kì run-ɑ ɑ́thøw Rɑ̈dh Akɑɑdh. Wu tyëng Pelistiyɑ̀, lonh-ɑ ɑ́pwöd wun ɑ́tor, de wɑ̈de óbëëd e pëddi rɑ̈jø kiper wun! Wɑ̈de óbëëd ɑ́ nɑ̈ɑ̈g. Jwøng-ɑ Ácwɑ̈ɑ̈j ɑbuur kì kelli jie ókorre, kɑ gï wëgge bëëdø ki mër, de wu ógöjje kɑ̈j me rɑj, wun ɑ tyëng Pelistiyɑ̀, bong ngɑn-ɑ óbødh kì kelli wun e pɑ nɑ̈g yi kɑ̈nyɑni. Kïïw wun wu kwɑjj-ɑ kønyø wun ɑ kɑ̈ddi Pelistiyɑ̀ bënn! Bwøg wun bënn! Dɑ tør me bï e kɑ̈ɑ̈l-ɑ wɑɑng wuudø, bɑ liny me kelle bong wɑ̈rrì. Kwøbbi tyëng-ɑ óör yi Pelistiyɑ̀ óløøg yi wɑ kidï? Ge óköbbi yi wɑ kinni Jwøng-ɑ Ácwɑ̈ɑ̈j Dhɑyøn ɑ́geere keje, o jie møg-ɑ rɑngø óthödhe ki mër kì kunɑni. Men bene wöön-ɑ ɑ́kwøb kipe Moɑb. Kɑ̈ddi Aɑr kí Kïr ɑ́rënyi kì wɑ̈r ɑ́kyel, kɑ piny Moɑb ceg-ɑ lïïwø. Tyëng Dïbön yedh-ɑ wïj kït be ywøgi kengø. Tyëng Moɑb ywøg-ɑ kɑ̈ddi Nebö kí Medebɑ̀, yëyyi wɑ̈thi gen ɑ́lyel gen geki yëyyi tïggi gen, ge ceg-ɑ ywøg. Ji cyɑ̈dhi kì yöö ge rug-ɑ ocwɑ̈llì. Kì kɑɑl, ji ywöngi ge okïïwø kì wɑ̈thi ud. Tyëng kɑ̈ddi Kicbön kí Eleɑlè ceg-ɑ kïïwø, cwɑggi gen lïng ɑ Yɑ̈ɑ̈dh kun lɑ̈wi. Cɑgg ɑ́ men-ɑ́ jöddi liny, ge ceg-ɑ kïïrø, pëthi gen ɑ́nyönhi. Yijɑ óywöngø kipe Moɑb! Ji ɑ́rengi Dhoɑr, kí Eglɑth Celiciyɑ̀. Kwï gen reng-ɑ mɑl yuu Lukith, ge cyɑ̈dhi ge óywöngø, møøgø ɑ́pɑ̈ɑ̈r Örønɑim, ge ceg-ɑ kïïwø ki ywøg. Dhøg Nïmrïm ɑ́dwön, lum ɑ́thwøw kì tøgge, bong gïn mɑr me nud. Ji ɑ́kedh ge bɑ̈ɑ̈n-ɑ Töör Wijø, ge tyëdd-ɑ jɑmmi gen; ge ceg-ɑ pɑ̈ɑ̈rø. Akyew di lïngø kì bɑdhhi Moɑb. Akyew kɑ̈ɑ̈l-ɑ kɑ̈ddi Eglɑim kí Biir Elïm. Nɑm ɑ́kwɑ̈rri yi remø kì bøli Dïbön, o Jwøk thyew yïe dɑ gïgrijjø møg-ɑ ógögge teedø kì myërrɑni. Ngee, ji ónɑ̈g ki menrɑj, gen ɑ tyëng-ɑ ódöng kì Moɑb. Tyëng Moɑb óödø ki órömm kì Selɑ̀, gï öri ge’ ngɑn-ɑ jyɑ̈gø kì Yerusɑlem. Nywøli Moɑb yïd ɑ kömi Nɑm Arnön ge owïïnø; ge nyi kedh-ɑ tuung kí tuung ni winyy-ɑ ócyeddø kì uddi gen. Tyëng Yeudiyɑ̀ ɑ́köbbi gen kinni, “Nyudhu wøn gïn-ɑ gwøg yi wøn. Wiy wø bï wøn tïbi wun, kɑ wiy tïbi wun løge me ngij kì cyɑ̈ng-ɑ bëëd piny lëëdh. Wø ceg-ɑ yömmø, kɑɑnu wøn keny pɑ yood wøn. Wiy wø bëëd wøn kì piny wun. Koru wøn ki tyëng-ɑ dwɑddi nɑ̈gi wøn.” (Guun-ɑ guud nyingi wun ócungi, kɑ ryɑ̈g ókedhø, o tyëng-ɑ yɑg pödhø ókedh. O ɑ́kyel kì kelli kwɑrri Debïd gööge’ rɑ̈dh, o ji jɑɑge e mïdh-ɑ yïëyø geki mɑ̈ɑ̈dø. Ójwɑn gwøg ki gïn-ɑ bɑ dyër, o ódwɑdd-ɑ kinni gøggi dyër ceth.) Tyëng Yeudiyɑ̀ okööbø kinni, “Wø ɑ́lïng kinni i tyëng Moɑb tɑ̈dø ki mendwøng. Ge ngɑ̈nyi yi wøn kinni ge bɑ tyëngɑthwøg, o ge nyi wɑ̈dh-ɑ tøllø yøw, de møg-ɑ kømmi yi gen pɑth ki dyër.” Tyëng Moɑb óywöngi yi ɑkørr-ɑ ópɑ̈dhi kömi gen. Ge óywöngi keny-ɑ ópɑr gen gïncɑm-ɑ døøj, men-ɑ ɑ́bëëd gø ocɑmø yi gen kì Kïr Ëres. Yethi gen óbɑɑr. Pwödhh-ɑ buti Kicbön kí bɑ̈ggi oløg møg-ɑ Sibmɑ̀ ɑ́rënyi, gen ɑ bɑ̈gg-ɑ́ yethi gen nyi kɑ̈ɑ̈l møgi oløg, men-ɑ nyi nɑ̈g jɑggi pödhh. Bɑ̈ggɑni ɑ́bëëd ge lɑjjø ge pïd-ɑ Yɑdher, kɑ ge pïd-ɑ yij ryɑng kì wɑɑng cyɑ̈ɑ̈ng mwøl. Kɑ ge pïd-ɑ Luuy Omelø kì wɑɑng cyɑ̈ɑ̈ng böörø. Yɑ ywøg-ɑ bɑ̈ggi oløg mø Sibmɑ̀, yɑ ywøg-ɑ Yɑdher. Pïi nyingɑ ɑ́dëëm kipe Kicbön geki Eleɑlè, mɑ́ e bong byel mɑ ɑ́cyeg møg wëggi pëthi ji mïnø. Bong dhɑnhø me pyëwe med kì yethi pwödhh-ɑ lɑ̈bi gen med. Bong ngɑn ryeer wɑlɑ̀ bong ngɑn wör kì yethi bɑ̈ggi oløg. Bong ngɑn bïjø ki oløg o gööge ki møgø; ryeer-ɑ nyi ryeer ki medi pëëth ɑ́cungi. Yɑ óywöngø yi rɑ̈ɑ̈m pyëwɑ kipe Moɑb, yɑ okïïmø kipe Kïr Ëres. Tyëng Moɑb pïd-ɑ ri gen ki kedhi yethi kenggi gen møg-ɑ wɑ̈thi kïttì, kí yethi kengg-ɑ kyeelø be mɑ̈ddø, de bong døøjø men-ɑ óyod yi gen. Bene wöön-ɑ ɑ́kwøb cøn yi Jwøng-ɑ Ácwɑ̈ɑ̈j kipe Moɑb èn. O ɑnɑn Jwøng-ɑ Ácwɑ̈ɑ̈j okööbø kinni, “Kɑ̈ɑ̈r Moɑb ólɑ̈ɑ̈ny kì bɑng runn ɑ́dɑ̈g. Ódöng ɑ́ mø nøg kì kelli jie møg-ɑ gïïr ɑnɑn, o ge óbëëdø ge nyøødh.” Jwøng-ɑ Ácwɑ̈ɑ̈j okööbø kinni, “Dimɑceg koo bëëdø ɑ́ kɑɑldwøng këti, ódöng ɑ́ tuggì ɑ keje. Kɑ̈dd-ɑ døngø kì Arɑm ócög yethi gen pɑ bëëd gïti ɑtheer. Wɑ̈thi kɑ̈ddɑni ócyɑ̈ɑ̈m-ɑ yi dhög geki dyëg; bong ngɑn-ɑ ókøøl gen wɑ̈g kì kenyɑni. Isrɑil bong gïn-ɑ ókorii, o Dimɑceg ójɑɑg yi pödhø megø. Tyëng-ɑ ódöng ge onëënø kì Arɑm, ge óbëëdø ge yɑ̈ɑ̈rø ni tyëng Isrɑil. Yɑn yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Cyɑ̈ng-ɑ ókedh døøji Isrɑil ɑ́cyɑ̈ngi, o kej kɑ̈r lunyi yi kɑ̈j. Isrɑil ódöng e nɑ pwödhø me byelle ótööng piny, ge rumø’ kɑjø; ógöögø e nɑ pwödhø me byelle óputh piny kì Töör Repɑim. Óbodh ɑ́ ji mø nøg, o Isrɑil ódöng e nɑ oløg me nywøle ópønø, o döngø ɑ́ nywøl ɑ́ryew wɑlɑ̀ ɑ́dɑ̈g kì kööre mɑl, wɑlɑ̀ mø nøg mø döngø kì ri bɑ̈dd-ɑ piny. Yɑn yɑ Jwøøg Isrɑil, Jwøng-ɑ Ácwɑ̈ɑ̈j, yɑ ɑ́rum ki kwøb.” Keny-ɑ ɑ́bëën cyɑ̈ngɑni, ji óywøøg kö ngɑn-ɑ ɑ́cwɑ̈j gen, ɑ løg kwërø, Jwøøg Isrɑil. Ge koo ngɑ̈dh këlli lɑm møg-ɑ ɑ́ger yi gen ki cinggi gen këti, wɑlɑ̀ ge koo ngɑ̈dh ngïjji Aceerɑ̀, wɑlɑ̀ këlli bɑkur. Keny-ɑ óbëën cyɑ̈ngɑni, kɑ̈dd-ɑ teg, ji ódhwödh kì yethi gen, kɑ ge wiy piny ge rënyø ni kɑ̈ddi tyëng Kib kí Amör ɑ ɑ́wiy gen piny kɑ ge órengø ge bwøg-ɑ yi tyëng Isrɑil. Yïn ɑ Isrɑil, wïjí ɑ́wïl ki Jwøng-ɑ ɑ́yiel yïn, kɑ yï korre, eni kïn-ɑ teg, ɑ gøde ɑ́pɑ̈nni yi yïn. Kɑ yï yöd yï pïdh-ɑ jwögg-ɑ pɑth ki bɑ̈gg-ɑ yethi gen nyi mɑllí gen. De cɑgg yenhɑni døngi dicyɑ̈ng-ɑ pidhu gen, kɑ ge ókɑ̈nø ki okøgg, bong nywøli gen møg-ɑ ópøn thyew. De óbëëd ɑ́ ɑkørr ɑ nud geki rɑ̈ɑ̈m dëllì møg pɑ yiel ki yɑdh. Pödhh-ɑ døngø, ɑ teg ceg-ɑ wöörø, cwɑggi gen lïngi e nɑ ɑpɑgi nɑɑm omelø, ge bɑ̈bb-ɑ piny ni ɑpɑgø. Pödhhɑni ɑ́bï ge nɑ ɑpɑgø ge bɑ̈bb-ɑ piny, de ge ɑ́cɑ̈wwi yi Jwøk kɑ ge døøg-ɑ ngɑ̈thi gen, ni ɑyeny-ɑ nyi køøl yi ɑtunø kì buti kït me thinh, ni wél kenyi kwølli gen yi ɑ́kødɑkødø. Ji ɑ́bëëd ge óböggø yi gen kì böörø, de ge ɑ́yod ge rum kedhø keny-ɑ ɑ́bëën mwøl. Bene gïn-ɑ ópɑ̈dhi kömi ngɑn yɑg pinyee ɑnɑn. Piny-ɑ yije lïngi ywøøg obërr; eni piny-ɑ ócørrø yi nɑ̈mmì; Kuc wɑnge óbɑɑr. Tyëngwöödø mø kyewi óthyɑggi obej, óbï ge kɑ̈ɑ̈l-ɑ pönhɑni. Døøg wun pönh-ɑ ócørrø yi nɑ̈mmì, wun ɑ tyëngwöödø møg-ɑ yöd, døøg wun pönh-ɑ jie bɑ̈rrø, ji-ɑ teg, ɑ dëlli gen lwiy, gen ɑ tyëng-ɑ böggi yi kömi piny bëne. Lïng dhɑnhø bëne kì kömi piny! Ber ótïng kì wïj kït, kɑ wu olïngø ki ywøøg kɑng. Yɑ ɑ́köbbi yi Jwøng-ɑ Ácwɑ̈ɑ̈j kinni, “Yɑ ólïïdh piny mɑ̈ɑ̈dh, yɑ ying-ɑ pɑɑrɑ mɑl; mɑ̈ɑ̈dh ni cɑ̈ng kenyi wɑ̈dhe dïmɑl, o ni pølli ɑyɑr ɑ nyi cyɑ̈dhi mɑ̈ɑ̈dh kenyi bëëd piny lëëdh.” Tyëng Kuc ónɑ̈g yi tyëng-ɑ mɑ̈n ki gen, kɑ ge odhoongø kì piny, ni bɑ̈ddi oløg møg-ɑ ócel piny ki pɑlø, e nywøle køm-ɑ cyegø. Tyëng Kuc ócɑm yi cor kì lew, o ge ócɑm-ɑ yi lɑ̈yyi pɑ̈l kì wuudø. Obëën bøli kenyɑni, tyëng-ɑ bɑ̈rrø, ɑ dëlli gen lwiy, ɑ ceg ki böggø yi kömi piny bëne mɑ́ ge teg; ge óbï Kïti Dhɑyøn, ge kɑ̈ɑ̈l-ɑ pödhi gen, pönh-ɑ ócørrø yi nɑ̈mmì. Kɑ Wïlɑ̈bø, Jwøng-ɑ Ácwɑ̈ɑ̈j, muuj gen ki jɑmmi jwödhø kì keny-ɑ mɑllii. Men bɑ wöödø kipe Rïp, Jwøng-ɑ Ácwɑ̈ɑ̈j bï-ɑ Rïp e cyɑ̈dh-ɑ́ɑ̀ kömi pøølø me jwɑni ki mendwøng. Ngïjji jwöggi Rïp ceg-ɑ kïïrø kì bøle, kɑ tyëng Rïp obwøgø ki mendwøng. Jwøng-ɑ Ácwɑ̈ɑ̈j okööbø kinni, “Ji ócwɑ̈ɑ̈gɑ kì Rïp, kɑ ge ónyïɑ̈ggø ki ri gen; dhɑnhø ónyïɑ̈ggi ki ómen, kɑ tyëng byëg ɑ́kyel ónyïɑ̈ggø keti gen. Kɑɑl ónyïɑ̈ggi ki kɑɑl-ɑ kyeelø, kɑ rɑ̈nhì ónyïɑ̈ggø kipe lɑwø. Gïg-ɑ dwɑddi gwøgø yi teedø kì Rïp ódöddɑ, kɑ pëthi gen wëggɑ nyönhø. Ngïjji jwöggi Rïp ókwɑjji yi gen kipe kønyi gen, kɑ ge kedh-ɑ be rɑng kí ɑ́jwöggì, kí be pyëj ki yɑdh, kipe kinni o ge nyudhi gïn-ɑ gwøg. Rïp ówëggɑ jɑɑgø yi ngɑnrɑj; ócïbɑ cingi rɑ̈dh me yije wöny. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Pï ónungi kì yij Kiir, kɑ nɑm odwönø. Luyy-ɑ tøggi nɑm yømi gen ópënni kɑ̀ kedh pï ge odwönø. Obej óthøw geki møødø, kɑ jɑmm-ɑ ópiidhø kì tøggi nɑm othwøwø, kɑ ge køøl yi yømø, kɑ ge ólɑ̈ɑ̈nyø. Óyïnnì geki tyëng-ɑ nyi mɑ̈yø wɑ̈thi gen ócungi, bong gïn-ɑ ógwøg ki bøyyi gen geki ɑ́bɑ̈dhhi gen. Tyëng-ɑ nyi cwɑ̈jø kí ógudhi kor-ɑ yöm ólëngi piny; tyëng-ɑ nyi cwɑ̈jø kí ógudh, ɑ cinggi gen døøj, bong gïjø men-ɑ óngɑ̈dh yi gen, wɑlɑ̀ bong gïn-ɑ ókwɑny yi gen. Pëjji Dhoɑn, kɑɑl-ɑ dwøng bɑ dhëgg! Tyëng-ɑ wɑ̈thi gen pel kì Rïp cïïj-ɑ dhëëgø! Gede ɑ köbbi gen Rɑ̈dh kinni bɑ gen ɑ kwɑɑny kɑ̈jji tyëng-ɑ dïdø møg-ɑ ócyɑ̈ɑ̈ngi, geki kɑ̈jji rorr? Rɑ̈ɑ̈dh Rïp! Tyëngcïïjø møgí, jøg-ɑ rummi gen ngenyø ying-ɑ keny? Yï pɑ cuggi köbbø yi gen mɑwɑnø ki gïn-ɑ dwɑddi göggi Rïp yi Wïlɑ̈bø, Jwøng-ɑ Ácwɑ̈ɑ̈j? Pëjji Dhoɑn kí pëjji Mɑmpis bɑ dhëgg. Gen ɑ di pyejji pödhø kidøøj, de pödhø ɑ́yöd gø peej ge’ pɑ̈l. Wɑ̈thi gen ɑ́bɑ̈nni yi Jwøng-ɑ Ácwɑ̈ɑ̈j, kɑ ge ódhɑ̈lø löggø kidøøj. Bene ɑ bɑnge nyi bɑ̈jji gïg-ɑ gøggi yi Rïp. O Rïp ceg-ɑ thɑ̈mmø ni ngɑn wïje di møgø, me renyyi kì yethi ngwøgge. Bong dhɑnhø kì Rïp, cɑgg e bɑ ngetikɑ̈r, wɑlɑ̀ ngɑn wɑnge cɑn, wɑlɑ̀ ngɑn pere teg, wɑlɑ̀ ngɑn kwïj, me cuggi kunyø. Obëën cyɑ̈ngɑni, cwøwi Rïp ógöögø ni mɑ̈nn, dëlli gen ókïrrø yi wɑ̈ɑ̈rø, keny-ɑ ólïdhi gen kinni Wïlɑ̈bø, Jwøng-ɑ Ácwɑ̈ɑ̈j cinge tïng en, e dwɑdd-ɑ cɑyi gen. Tyëng Rïp óbëëd ge óböggø yi Yeudiyɑ̀, kenyi lïngi gen kwøbbi ryɑ̈g men-ɑ nyi dwɑddi kɑ̈ɑ̈l kömi gen yi Wïlɑ̈bø, Jwøng-ɑ Ácwɑ̈ɑ̈j. Keny-ɑ óbëën bøli kenyɑni, dhøg Ibru ókööb kì kɑ̈dd ɑ́bïj kì Rïp, teedø óköngi kɑ nyingi Jwøng-ɑ Ácwɑ̈ɑ̈j kì yethi kɑ̈ddɑni. Ákyel kì kelli kɑ̈ddɑni ócwølli ɑ́ “Kɑɑldwøng, Kɑɑl Cɑ̈ng.” Obëën bøli kenyɑni, ódi këli lɑm mi Jwøng-ɑ Ácwɑ̈ɑ̈j kì piny Rïp, o ódi lööj pɑrre men-ɑ ócwöödh piny kì wïj keew Rïp. Gïgɑni ónyodh-ɑ bëëdi Wïlɑ̈bø, Jwøng-ɑ Ácwɑ̈ɑ̈j e nud kì Rïp. Keny-ɑ óguud nyingi ji kì kunɑni, kɑ ge ywøøg-ɑ kö Jwøng-ɑ Ácwɑ̈ɑ̈j, gï óöde ki ngɑn yiel gen. Jwøng-ɑ Ácwɑ̈ɑ̈j ree ónyudhe tyëng Rïp, o óyod yi gen ceth, kɑ gø mɑlli gen, kɑ gø muuj gen ki gëdhhì geki jwödhø. Kɑ ge óköngø ki kwöng kì bøle, kɑ gïn-ɑ kwöng yi gen kinni gø ógwøg yi gen, nyi gwøg gen. Rïp ócɑy yi Jwøng-ɑ Ácwɑ̈ɑ̈j, de gø óyiele kì cyɑ̈ɑ̈n piny; ge ódwöög kööre ge ókwɑ̈jjø, kɑ gï yiele. Keny-ɑ óbëën bøli kenyɑni, ódi yuu wëll kì kɑɑm Rïp geki Acuur men reb gen, o tyëng pödhhɑni ryeet ómɑ̈ddi kì kej ɑ́kyel. Keny-ɑ óbëën bøli kenyɑni, Isrɑil kí Rïp geki Acuur ópɑ̈ɑ̈r, kɑ ge løg-ɑ gyëdh kipe kömi piny bëne. O ge ógyëdh yi Jwøng-ɑ Ácwɑ̈ɑ̈j, o ókööbe kinni, “Wu jiɑ, wun ɑ tyëng Rïp, wu ógyëdh yi yɑn, wuki Acuur ji-ɑ ɑ́cwɑ̈jɑ, kí Isrɑil, ji-ɑ ɑ́myegɑ.” Kì wɑɑngɑni, kɑ Sɑrjön pënyi liny Acuur ör yi rɑ̈nhdwøøng Acuur kinni bëe be mɑgi Acdöd kì Pelistiyɑ̀. Icɑyɑ̀ wɑ̈d Amodh ɑ́bëëd e rumø ki köbbø yi Jwøng-ɑ Ácwɑ̈ɑ̈j kì runn ɑ́dɑ̈g møg-ɑ ɑ́pöödh kinni, i kɑ̈ɑ̈le wɑrre wɑ̈g kì tyelle, kɑ ocwɑ̈l-ɑ ɑ́rug yi en lunye wɑ̈g. Kɑ Icɑyɑ̀ oyïëyø, kɑ pëgg-ɑ be wïïnø e cyɑ̈dh-ɑ nøw, o tyelle bong wɑr. Keny-ɑ ɑ́mɑɑg Acdöd, ɑkööb Jwøng-ɑ Ácwɑ̈ɑ̈j kinni, “Icɑyɑ̀ bɑ̈ngɑ ɑ́bëëd e cyɑ̈dh-ɑ nøw, o tyelle bong wɑr ki runn ɑ́dɑ̈g. Menɑni bɑ ngïji kipe gïn-ɑ ópɑ̈dhi kömi Rïp geki Kuc. Tyëng-ɑ ómɑg yi rɑ̈nhdwøøng Acuur kì pödhhɑni ryeet, ókøøl yi en gɑ ɑmɑgg ge cyɑ̈dh-ɑ nøw, o tyelli gen bong wɑr, e rwödhhi gen ónënnø; menɑni óbëëd ɑ́ ngïji ɑyɑ̈ɑ̈r Rïp. Tyëng-ɑ ɑ́ngɑ̈dh Kuc, kí møg-ɑ ɑ́tɑ̈d kì bɑng Rïp, wɑ̈thi gen ólɑ̈ɑ̈y o bong gïn-ɑ óngɑ̈dh yi gen. Keny-ɑ óbëën bøli kenyɑni, tyëng-ɑ bëëdø kì kömi nɑɑm omelø kì Pelistiyɑ̀ ókööbø kinni, ‘Lidhu gïn-ɑ ɑ́pɑ̈dhi kömi tyëng-ɑ ɑ́rømmi yi wɑ kinni wɑ ókor yi gen kipe rɑ̈nhdwøøng Acuur! De wɑ óbødh kidï?’ ” Men bɑ wöödø me kööbø kì ri Bɑbïl. Ryɑ̈g óbï e kɑ̈ɑ̈l-ɑ pödhø me böggi, óbï e nɑ yømø ɑ́kødɑkødø me nwɑjji piny kì yij ryɑng. Yɑ ɑ́cyɑ̈rri ki gïg mø cwöb ge rijjø, ɑ løg twɑnyi rek geki ryɑ̈g. Liny Elɑm, pɑ̈ɑ̈r kömi gen! Liny Mɑdɑy, mɑg kɑ̈dd! Orɑng-ɑ ɑ́göjji ji yi Bɑbïl ócuung yi Jwøk. Gïg-ɑ ɑ́lidhɑ, kí møg-ɑ ɑ́lïngɑ kì yij cyɑ̈rø menɑni, yɑ ɑ́thödhi yi gen ki wɑ̈ɑ̈rø me dwøng geki rɑ̈ɑ̈m pyëw me dhøge ledh ni pɑ̈dhi ngɑndhɑjø piny ki dhɑnhø. Wïjɑ ɑ́ceg wïïnø, kɑ dëlɑ okïrrø yi wɑ̈ɑ̈rø. Yɑ ɑ́bëëd yɑ yïd-ɑ bëëni wɑ̈r de ɑ́yöd e muuj-ɑ yɑn wɑ̈ɑ̈rø kete. Kì yij cɑ̈rrø menɑni, yɑ ɑ́lidh-ɑ gïgcɑmmi ryëj ge thøø yi gwirø, kwømm-ɑ pëggi yi wëll ócïb kɑ̈jji gen, o ge ɑ́pëggi piny ge ocyɑ̈mø o ge omɑ̈dhø. Kɑ teedø pɑ̈ɑ̈y piny yi cigg kinni, “Wun ɑ pëjji liny, pyël wun ködd!” Codhe, kɑ yɑ köbbi yi Wë kinni, “Kedh kɑ yï kɑ̈bbí ki ngɑn nenni yöö, kɑ köbbí kinni nyi kwøbe gïn-ɑ lidh yi en ceth; ólïdhi ki jøg mø bï ge ying-ɑ kömi kyënyì, ge cyɑ̈dhi gɑ ɑ́ryew ɑ́ryew, o ólïdhi ki jøg mø ying kömi ɑderr kí ɑmɑl.” Kɑ jɑl-ɑ kurø okööbø kinni, “Jɑldwøng, yɑ ɑ́bëëd yɑ okurø kì keny kì wɑ̈r kí dicɑ̈ng.” Ge ɑ́ceg ì rïïd kì keny! Ge ɑ́bï ge ying-ɑ kömi kyënyì, ge cyɑ̈dhi gɑ ɑ́ryew ɑ́ryew. Kɑ jɑl-ɑ kurø omuujø ki wöödø kinni, “Bɑbïl ɑ́pɑ̈ɑ̈dh! Ngïjji jwögg-ɑ ɑ́kwɑjje buud-ɑ piny ge ótørrø.” Wun ɑ tyëng pödhi wøn, wu tyëng Isrɑil, wu ɑ́bëëd wu ceg kɑ nyønø, de ɑnɑn wu ɑ́muujɑ wöödø men-ɑ ɑ́lïngɑ kì yï Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil, o bɑ wöödø me døøj. Wöön-ɑ kööbø kì ri Edöm èn: Ngɑn me kɑ̈ɑ̈l Edöm opëjø kinni, “Jɑl-ɑ kurø, wøw óru kì wɑɑng? Köbbí yɑn, wɑ̈r óthumi kì wɑɑng?” Alöggɑ kinni, “Mwøl obëënø, de wɑ̈r ócigi dwöögø. Keløg yï dwɑdd-ɑ pëjjø këti, kedh kɑ yï ódwöög be pëjjø.” Wöön-ɑ kööbø kì ri pödhi Árɑb èn: Wun, wu tyëng Dedɑn, wun ɑ nyi guddø ki kɑ̈dd kì yij ryɑng, kì pödhi Árɑb, thödhu tyëng-ɑ bï yï wun ri gen dɑ röödhø ki pï. Wu tyëng Temɑ̀, thödhu tyëng-ɑ yömmi yï wun ki gïncɑm. Ji reng-ɑ kun yömmi yi gen, ge bögg-ɑ pil møg-ɑ dwɑddi nɑ̈gi gen, geki wethh møg-ɑ dwɑddi göjø; ge bögg-ɑ liny. Codhe, ɑköbbi yɑn yi Wë kinni, “Döng geki tegi jur-ɑ cwøl ɑ́ Kedɑr ócög kì bɑng run ɑ́kyel. Jøg-ɑ nyi pöödø ki wethh bene gen ɑ teg kì Kedɑr, de ge ódöng ge nøg. Yɑn yɑ Jwøøg Isrɑil, Jwøng-ɑ Ácwɑ̈ɑ̈j, yɑ ɑ́rum ki kwøb.” Men bɑ wöödø me kööbø kì ri Töör Cyɑ̈ɑ̈rø. Á ngø ɑ ɑ́cwöb? Ede tyëng kɑɑl ɑ tuug gen ge ying-ɑ wɑ̈thi óthɑɑng ud? Kɑɑl bëne ceg-ɑ wøwø, pyëwe omedø. Jii wun møg-ɑ ɑ́thøw nuti nɑ̈ɑ̈g-ɑ yij liny. Pëjji wun bënn ɑ́rengi, kɑ ge mɑg ge nuti pɑ̈nyi göjjø ki nyɑɑr weth ɑ́kyel. Wiyu yɑn, o yɑ ywöngɑ ki rɑ̈ɑ̈m pyëwɑ, yɑ ywøg-ɑ jiɑ møg-ɑ ɑ́thøw. Yɑ ko pɑ̈nyi wun ki lugø. Menɑni óbëëd ɑ́ bøli kej pɑ̈yyø kí tummi wɑ̈ɑ̈th, kí tyɑmø kì yij töör cyɑ̈ɑ̈rø. Bɑ Wïlɑ̈bø, Jwøng-ɑ Ácwɑ̈ɑ̈j, ɑ kɑ̈ɑ̈l ryɑ̈ngɑni kömee. Döri kɑɑlee ɑ́cøør piny kɑ ɑ́lɑngi cwɑggi ji kɑ̀ kïïw gen gɑmmi yi kïttì. Yɑɑy Elɑm ɑ́bï e ying-ɑ kömi kyënyì, ge kɑ̈ll-ɑ wethh mø ngenyø. Yɑɑy Kïr ɑ́bï cinggi gen dɑ ködd. Töör Yeudiyɑ̀, tör-ɑ lɑ̈be med ɑ́pɑ̈ng yi yɑ̈thi kyënyì. Alɑthker mø ying kömi kyënyì ócungø kì dhø döri Yerusɑlem. Gïg-ɑ ɑ́kor Yeudiyɑ̀ ɑ́pɑ̈ɑ̈dh. Kɑ wu reng-ɑ øn-ɑ mïdhi jɑmmi liny be yɑɑbi jɑmmɑni. wu ɑ́gëëd ki ótïngø me gëël pïi luy-ɑ kɑ̈ge dööng, o pï cög ge pɑ rengi wɑ̈g. De wɑ̈thi wun ɑ́wïl ki Jwøk ngɑn-ɑ ɑ́pyël møgɑni kɑ gï wëgge cwöbø. Kì cyɑ̈ngɑni, wu ɑ́cwøl yi Wïlɑ̈bø, Jwøng-ɑ Ácwɑ̈ɑ̈j, kɑ wu köbbe kinni i ywöngi wun, kɑ wu kïïm wun, kɑ wɑ̈thi wun lyel wun ɑ́ ngïji ywøg, kɑ wu rug wun kí ocwɑ̈llì. De wu ɑ́yöd wu óngedhø, kɑ wu otugø. Kɑ wu ongɑ̈dø ki dyëg, kí dhög, kɑ wu omɑ̈dhø ki møgi oløg. Wu ɑ́kööb kinni, “Lɑ̈w ke cyɑ̈ɑ̈m wɑ, o wɑ mɑ̈ɑ̈dh wɑ, mɑ́ wɑ óbëëd wɑ thøø dhuki.” Wïlɑ̈bø, Jwøng-ɑ Ácwɑ̈ɑ̈j, kiree, yɑ ɑ́köbbe kinni, “Pyëwɑ pɑ cuggi lɑ̈ɑ̈mø kí orøng ni men, ki runn-ɑ óbëëd gen kì kömi piny. Yɑn, yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Yɑ ɑ́köbbi yi Wë, Wïlɑ̈bø, Jwøng-ɑ Ácwɑ̈ɑ̈j, kinni i kedhɑ yï Cebnɑ̀ jɑngi gøldwøng, kɑ köbbɑ kinni, “Yï orumø ce yïn ɑ́ men, ɑ twïgí rií ki rörø kì ri kït kì ngɑ̈ɑ̈j kɑɑl? Yï ócuggø bëëdø perí teeg, de yï ókwɑny yi Jwøng-ɑ Ácwɑ̈ɑ̈j kɑ yï wedde pɑ̈l. Yï ókwɑny yi en ni kurɑ̀, kɑ yï leenge yij pödhø me lɑɑj. Yï óthøw kunɑni kì buti yɑ̈thi kyëny-ɑ per gen ɑ́bëëd yï ótøllø. Gøl wöw óyɑ̈r kì bɑngí. Lɑwí ópɑ̈d yi Jwøng-ɑ Ácwɑ̈ɑ̈j, kɑ yï dwööge cyɑ̈n.” Cebnɑ̀ ɑ́köbbi yi Jwøng-ɑ Ácwɑ̈ɑ̈j kinni, “Keny-ɑ ócwöb møgɑni, bɑ̈ngɑ Eliɑkim wɑ̈d Kilkiyɑ̀ ócwöölɑ. Kɑ lɑwí geki wëní kïdhɑ ree, kɑ teng-ɑ ɑ́ying yïí bëne mëggɑ en. Óbëëd e bɑ wïyi tyëng Yerusɑlem geki Yeudiyɑ̀. Óthödhɑ ki tegø me jyɑ̈ɑ̈ge ɑ́ rɑ̈dh kì gøl Debïd, en ɑ yïe ódi muptɑɑ̀; bong ngɑn yieb gïn-ɑ cyëge, o bong ngɑn cyëëg gïn yiebe. Ócwöödhɑ piny kidøøj ni gɑrø, kɑ gøl gen bëne óyïddø ki dhwɑ̈ng kì bɑnge. “De kööre óbuudh yi tyëng gøl gen, ge ómɑ̈gi kì ree ni löd geki ɑ́dɑ̈lì møg-ɑ óngɑɑb ri gɑrø! Keny-ɑ ócwöb møgɑni, gɑrø men-ɑ ɑ́bëëd e teeg kì piny óör kɑ ópɑ̈dhø, kɑ jɑmm-ɑ ɑ́ying ree othøø.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Men bɑ wöödø me kööbø kì ri Suur. Ywöngi wun, wu tyëng-ɑ weli ki yɑ̈thi Tɑrcic møg-ɑ yij nɑɑm omeli dwøng! Suur kɑɑl wun, kɑɑl-ɑ kömi nɑɑm omelø ɑ́rënyi; udde ɑ́cøør piny. Wöönɑni ólïngi yi wun, wu dwöög-ɑ’ Kobros. Ywöngi wun, wu jøngyew kì Sïdön! Wu nyii ödø ki ji møg bɑ̈nni nɑ̈mmi omelø, kɑ ge nyii ngëwø ki byelli Rïp, kɑ ge nyii kedhø ge óngyëwø kì yethi pödhh bënn. Kɑɑl Sïdön, yï ɑ́yɑ̈r! Mɑ́ yï ɑ́bɑny yi nɑɑm omelø, kɑ okööbø kinni, “Yïɑ bong nyigɑ. Yɑ nuti pɑ̈nyi pïdhø ki wɑ̈dd wɑlɑ̀ womɑ̈nn.” Cɑgg ɑ́ tyëng Rïp, ge óbwøg ki mendwøng keny-ɑ ólïng gen kinni i Suur órënyø. Ywöngi wun, wu tyëng Pinikiyɑ̀, pɑ̈nyu ri wun ki pɑ̈ɑ̈r Tɑrcic! Men bene Suur, kɑɑl-ɑ ɑ́ger kɑ̈ge dööng? Bene kɑɑl-ɑ́ yije ɑ́dhwödh ji èn, kɑ ge kedh-ɑ be gyer ki pödhh kì kun lɑ̈wi? Á men ɑ ɑ́cɑg møg-ɑ pɑ̈dhi kömi Suur kɑɑl-ɑ dwøng, ɑ jøngyew møge ɑ́bëëd ge owørø yi ji bënn kì kömi piny? Møgɑni ɑ́gwir-ɑ yi Wïlɑ̈bø, Jwøng-ɑ Ácwɑ̈ɑ̈j. Gï ɑ́gwir yi en kɑ per dwöögi wɑ̈thi gen cyɑ̈n, mɑ́ ge tɑ̈dø, o ge göög gen gɑ mööl. Ceg wu døøg be pur, wun ɑ tyëng Tɑrcic, mɑ́ dhøwɑnh-ɑ nyi mɑɑg yɑ̈thi wun ɑ́rënyi. Jwøng-ɑ Ácwɑ̈ɑ̈j cinge ɑ́tïnge kömi nɑɑm omelø, kɑ pödhh-ɑ jɑɑg yi rɑ̈nhì tɑ̈ɑ̈ye piny. En ɑ ɑ́kööb kinni i cøør kɑɑl ngyew mi Pinikiyɑ̀ piny. Yïn ɑ kɑɑl Sïdön, medi pyëwí ɑ́cög; jií nyingi gen ɑ́guud. Cɑgg ge ópɑ̈ɑ̈r Kobros, ge pɑ bødh thyew. Bɑ tyëng Bɑbïl, de pɑth ki tyëng Acuur ɑ ɑ́wëggi lɑ̈yyi pɑ̈l bëën Suur. Bɑ tyëng Bɑbïl ɑ ɑ́tyeg Suur, kɑ ge ogëdø ki ótøng møg koor kɑɑlɑni, kɑ dörre cøør gen piny, ɑwiy ge gøn e rënyø. Ywöngi wun, wu tyëng-ɑ kyëwi ki yɑ̈ɑ̈th kì nɑɑm omeli dwøng! Kɑɑl-ɑ́ ree ɑ́teeg yi wun ɑ́rënyi! Bøli keny-ɑ ówïl Suur kì wɑ̈ɑ̈th ki runn pyɑ̈r ɑ́bïryew ɑ́wɑ̈nhi, kwɑnni runni rɑ̈dh ɑ́kyel. Keny-ɑ óthumi runn pyɑ̈r ɑ́bïryew møgɑni, Suur óni ngɑn nyi niin ki köögi, men-ɑ ɑ́cɑg ki wör kinni, “Kwɑny thomí, kɑ kɑɑl wen yï othumø, yïn ɑ ngɑn nyi niin ki köögi! Thum ki thom kɑ yï wöör këti o yïí ódwöög yi cwøw.” Keny-ɑ óthumi runn pyɑ̈r ɑ́bïryew møgɑni, Suur ówëggi døøg keje cøn yi Jwøng-ɑ Ácwɑ̈ɑ̈j, kɑ ree kïrre pödhhi kömi piny bënn. Ngyënyy-ɑ ónywøl yi jɑmm-ɑ ngyewe óthyëyyi Jwøng-ɑ Ácwɑ̈ɑ̈j. Ngyënyyɑni koo kɑnne, de ge óngëëw-ɑ yi tyëng-ɑ mɑlli Jwøng-ɑ Ácwɑ̈ɑ̈j ki gïncɑm kí ógudh møg-ɑ dwɑddi yi gen. Piny ótwer yi Jwøng-ɑ Ácwɑ̈ɑ̈j kɑ döng-ɑ nøw. Bëëdi piny ówil yi en, kɑ tyëng-ɑ bëëdø yij piny kedhhe, Gïjø ɑ́kyel ɑ ópɑ̈dhi kömi dhɑnhø bëne, ɑ løg ókwër kí tyëng-ɑ pɑth ki ókwër, bɑ̈ngg kí wëëg gen; tyëng-ɑ ngyëwi kí tyëng-ɑ ngëwø; tyëng-ɑ yï gen wïdhi kí tyëng-ɑ ceg ki wïdhø, kí tyëngkɑ̈rì geki ɑbuur. Piny ókedhhi kɑ rënyi bëne, mɑ́ møgɑni ɑ́kwøb-ɑ yi Jwøng-ɑ Ácwɑ̈ɑ̈j. Piny óthwøw kɑ othøø; kömi piny ónyönhi kɑ othøø; pëjj-ɑ teg kì yij piny men ónyönhi. Piny ɑ́rënyi yi ji, kì bɑng kɑ ɑ́pyem gen Ciggi Jwøk, kɑ lwöm-ɑ kɑɑm geki Jwøk, lwöm-ɑ di bëëd gïti ɑtheer pɑ̈d yi gen. Bene ɑ bɑnge göjji piny cyën yi Jwøk, o ji rɑngi gen yi gööj orøøg gen, o döng ɑ́ ji mø nøg ge onëënø. Bɑ̈ggi oløg ɑ́thøw, o møgi oløg ɑ́kedh e ónungø. Tyëng-ɑ ɑ́bëëd pëthi gen med, ɑ́göög pëthi gen pɑ med, o thømi gen geki bulli gen ɑ́ceg ì lïïw. Bong ji mø wör pëthi gen omedø kì kömi møgø këti. Kɑɑldwøng, ɑ ɑ́bëëd e owøwø ɑ́ceg ì lïïw; kɑ̈llì ɑ́cyëëg. Ji ceg-ɑ kïïwø kì yethi yëëth, mɑ́ møgi oløg bong gøn. Medi pyëw ɑ́kedh gïti ɑtheer, medi pyëw ɑ́lɑ̈ɑ̈ny kì yij piny. Kɑɑldwøng ɑ́rënyi; thïggi dhøggi döre buud-ɑ piny ge tørrø. Bene gïn-ɑ ócwöb kì kɑ̈ddi kömi piny bënn. Óni kenyi rum oløg ki lemø geki ólɑm kɑ bong-ɑ nywøl kì köthi gen. Tyëng-ɑ óbodh ówör ki medi pëthi gen. Tyëng-ɑ wɑɑng cyɑ̈ɑ̈ng böörø ówör ge lejj-ɑ döngi Jwøng-ɑ Ácwɑ̈ɑ̈j, Kɑ lenhi yi tyëng-ɑ wɑɑng cyɑ̈ɑ̈ng mwøl. Jwøng-ɑ Ácwɑ̈ɑ̈j, Jwøøg Isrɑil ólenhi yi tyëng myërri kömi nɑɑm omelø. Wöri lenhi Isrɑil, pönh-ɑ tir ólïngi yi wɑ kì pödhh mø lɑ̈wi lɑ̈wi. De bong gïn yiel kì riɑ! Yɑ ceg-ɑ thøø! Yɑ ceg-ɑ thøø! Tyëngɑmolpiny ri gen ɑ́lugi gen yɑn! Lïngu kwøbbɑ wu bënn! Dɑ wɑ̈ɑ̈rø, dɑ burrì kí ɑ́kɑ̈llì mɑ ɑ́ceg wun. Ngɑn rengi yi wɑ̈ɑ̈rø, pɑ̈dh-ɑ bur, o ngɑn bodh yi bur pɑ̈dh-ɑ yethi ɑ́kɑ̈llì. Kødh me dwøng cɑrø ódëëm kɑ piny onhɑ̈nhø. Piny ókɑggi kɑ ókedhhø. Piny ócyerri ni ngɑn thɑ̈mmi yi møgø, kɑ ópɑ̈ɑ̈dhø ni ød me tɑɑr piny yi yømø. Kömi piny onɑ̈gø yi orøge, o pɑ ciggi dhwödhø këti. Bøli keny-ɑ ócɑɑy gïg-ɑ teg kì mɑl geki jɑggi piny yi Wë ɑ́cyɑ̈ngi. Rɑ̈nhì óröör kej ɑ́kyel kì yij bur ni ɑmɑgg yi Jwøng-ɑ Ácwɑ̈ɑ̈j. Gï ócyëëge ød mɑg gïti keny-ɑ óbëën bøli kej cɑyi gen. Dwɑ̈y óluuj o cɑ̈ng pɑ cigi cyɑ̈rø, mɑ́ Wïlɑ̈bø, Jwøng-ɑ Ácwɑ̈ɑ̈j óbëëd ɑ́ rɑ̈dh. Ójyɑ̈ɑ̈gø kì Yerusɑlem kì Kïti Dhɑyøn, o mɑ̈re ólidh yi jɑggi pödhh bënn. Jwøng-ɑ Ácwɑ̈ɑ̈j, yï bɑ Jwøgɑ yï ólenhɑ kɑ nyingí lejjɑ. Yï ɑ́göög ki gïïngɑ̈ngø mø døngø; møg-ɑ ɑ́gwir yi yïn cøn kidøøj ɑ́gwøg yi yïn bënn. Kɑ̈dd ɑ́gwøg gɑ thur yi yïn, kɑ dörr-ɑ korri gen rënyi yi yïn. Kɑ̈ll-ɑ døngø møg-ɑ ɑ́ger yi tyëng-ɑ mɑ̈n ki wøn ge ɑ́lɑ̈ɑ̈ny gïti ɑtheer. Yï ólenhi yi tyëng pödhh-ɑ teg, yï óböggi yi pödhh-ɑ yethi gen wöny. Tyëng-ɑ nyingi gen cɑn geki tyëng-ɑ bong ngɑn køny gen, ɑ́rïngi yïí; kɑ ge obødhø kì cyɑ̈ɑ̈ng rɑj. Ge ɑ́gëng yi yïn kipe ɑtunø kɑ ge nëngí ki tïbø kì yij lëdhi cɑ̈ng. Mɑ́ tyëng-ɑ yethi gen wöny nɑ ɑtunø kenyi göjje ri dörø, o nɑ mel kì yij piny-ɑ thwøwø. De tyëng-ɑ mɑɑn wøn ɑ́göjjí kudø; yïn ɑ Jwøng-ɑ Ácwɑ̈ɑ̈j ɑkyeew tyëng-ɑ yethi gen wöny ɑ́cung yi yïn, ni pøølø kenyi wëgge piny kwöjø. Wïlɑ̈bø, Jwøng-ɑ Ácwɑ̈ɑ̈j órëëjø kì wïj Kïti Dhɑyøn, e ryej-ɑ pödhhi kömi piny; ryënyɑni óbëëd yije cɑɑm-ɑ gïg mø døøj cɑrø, kí møgi oløg me pëddi døøjø. Pøøli ywøøg yij men-ɑ ɑ́gëng pödhh bënn ójwɑne ki nyiigø. Thøø ónɑ̈g yi Wïlɑ̈bø, Jwøng-ɑ Ácwɑ̈ɑ̈j gïti ɑtheer! Pï ópoj yi en kì nyingi ji bënn; ɑyɑ̈r ókɑ̈ɑ̈le wɑ̈g kì kömi ji-ɑ rɑngø kì kömi piny bëne. Bɑ Jwøng-ɑ Ácwɑ̈ɑ̈j kiree ɑ ɑ́kööb! Keny-ɑ ócwöb møgɑni, teedø bëne ókööbø kinni, “Bɑ Jwøgee! En ɑ ɑ́ngɑ̈dh yi wɑ, o wɑ ɑ́døme. Bɑ Jwøng-ɑ Ácwɑ̈ɑ̈j, wɑ ɑ́gɑ̈nn-ɑ en, o ɑnɑn pëthee omedø kipe kɑ ɑ́yiele wɑ.” Kïti Dhɑyøn ókorri yi Jwøng-ɑ Ácwɑ̈ɑ̈j, de tyëng Moɑb ónyøøn piny, ni kenyi nyøøn wél-ɑ nywøøb lɑ̈bø. Cinggi gen órïj yi gen dhɑ̈y ge ce ceg-ɑ kwɑng, de ge óyɑ̈r yi Jwøk kɑ cinggi gen ceg-ɑ ì lɑ̈b. Dörr-ɑ bɑ̈rrø møg-ɑ korri Moɑb ócøøre piny. Kì cyɑ̈ngɑni, wör møg ówör kì piny Yeudiyɑ̀: Kɑɑl wøn teeg! Dörre korr-ɑ yi Jwøk kiree! Yiebu dhøggi döri kɑɑl, kɑ wiy pönh-ɑ mïdhi yïëyø kedhe yije, eni pönh-ɑ jie nyi gøggi dyër. Ngɑn-ɑ́ pyëwe ɑ́cïbe kömí, yïn ɑ Jwøng-ɑ Ácwɑ̈ɑ̈j ɑ́nëngí ki mër-ɑ dyër, mɑ́ e ngɑ̈dh-ɑ yïn. Gɑ̈nnu Jwøng-ɑ Ácwɑ̈ɑ̈j gïti ɑtheer; wɑ ókorre yethi cyɑ̈ng bënn. Tyëng-ɑ ɑ́bëëd ge tɑ̈dø ɑ́gwøge gɑ mööl, kɑɑl-ɑ teg, ɑ yije ɑ́bëëd yi gen ɑ́rënye, kɑ dörre møde piny. Tyëng-ɑ́ nyingi gen ɑ́guud cyɑ̈dh-ɑ́ɑ̀ köme, ɑ́nyøn yi tyëng-ɑ ɑbuur. Jwøng-ɑ Ácwɑ̈ɑ̈j, yuu tyëng-ɑ døj ɑ́gwøg yi yïn yije bong gøngì, yuu-ɑ cyɑ̈dhi yi gen wïje pɑ̈r. Gïn-ɑ dwɑddi yi yïn ɑ nyi gwøg yi wøn, yï ketí ɑ tyer yi pëthi wøn. Yï nyii tyerø yi yɑn ki pyëwɑ kì wɑ̈r; keny-ɑ óliidh gøøny lɑ̈bø geki jie, ge ódïd ki gøggi dyër. Cɑgg ɑ́ kenyi lɑ̈ɑ̈m pyëwí ki tyëngrijjø, ge ɑ́dhɑ̈li dïdø ki gøggi dyër. Cɑgg ɑ́ kì piny tyëngtir keny, döngí ɑ́dhɑ̈li gɑmø yi wɑ̈thi gen. Kwïj yi tyëng-ɑ mɑɑn yïn kinni ge ócɑy yi yïn. Wiy ge yɑ̈r gen, yïn ɑ Jwøng-ɑ Ácwɑ̈ɑ̈j, kɑ wiy ge rɑngi gen, wiy ge pɑ̈dhi gen yij orɑng-ɑ ɑ́cïb yi yïn kiper gen. Nyudhí gen kër-ɑ mɑɑr jií. Wø óthödhi yi yïn ki døøjø, yïn ɑ Jwøng-ɑ Ácwɑ̈ɑ̈j gïn-ɑ nyi cuggi gwøgø yi wøn nyi gwøg yi wøn kɑ kunyí. Yïn ɑ Jwøøg wøn, Jwøng-ɑ Ácwɑ̈ɑ̈j, wø ɑ́jɑɑg-ɑ yi ji møøgø, de bɑ yï ketí ɑ bɑ Wïi wøn. Ge ɑ́thøw ɑnɑn, o ge koo dwöög be nënni këti, tïbbi gen koo dhwödh, mɑ́ ge ɑ́cɑy yi yïn kɑ ge nɑ̈ɑ̈g. Bong ngɑn pɑrri gen këti. De pödhi wøn ɑ́wëggí døngø, yïn ɑ Jwøng-ɑ Ácwɑ̈ɑ̈j; pinye ɑ́lɑny yi yïn kì wɑ̈thi tùng bënn, ɑ bɑnge lejji yïn. Jií ɑ́cɑɑy, yïn ɑ Jwøng-ɑ Ácwɑ̈ɑ̈j, kɑ ge ywøøg-ɑ köörí kì yij orɑɑng gen. Wø ɑ́göjjí ywøg, yïn ɑ Jwøng-ɑ Ácwɑ̈ɑ̈j, ni ngɑndhɑjø kenyi ryeere yi ledhi dhøg pɑ̈dhi piny. Wø ɑ́bëëd wø orɑngø ni ngɑndhɑjø men pɑ̈dhi piny, de bong dhɑnhø mɑ ɑ́nywøl. Pödhi wøn nuti yieel wøn, o tyëng kömi piny nuti pɑ̈ɑ̈dhø. Jií møg-ɑ ɑ́thøw ódwöög be nënnì! Ge ódhwödh ki dëlli gen. Tyëng-ɑ buud bënn kì yethi burrì ódhwödh ge owörø ki medi pëthi gen. Ge ótug mɑl yi Jwøng-ɑ Ácwɑ̈ɑ̈j ni lum kenyi dhwödhe yi thöjj. Kedhu yethi uddi wun jiɑ, kɑ ud cyëëg wun kömi wun. Kɑlu ri wun ki kɑnø gïti keny-ɑ ólɑ̈ɑ̈ny liny Jwøk. Jwøng-ɑ Ácwɑ̈ɑ̈j bï-ɑ piny kì keny-ɑ bëëde kì mɑl, bï-ɑ be cɑyi jii kömi piny kipe orøøg gen. Ji-ɑ ɑ́nɑ̈g ónyodh yi lɑ̈bø gï pɑ cige kumø këti. Kì cyɑ̈ngɑni Lebiyɑthɑn lɑ̈y-ɑ nyi pɑ̈rri, e døjj-ɑ ree, ɑ bëëdø kì nɑɑm omelø, ónɑ̈g yi Jwøng-ɑ Ácwɑ̈ɑ̈j ki pile, pil-ɑ dwøng ɑ pɑ nyi bøm. Kì cyɑ̈ngɑni Jwøng-ɑ Ácwɑ̈ɑ̈j bɑɑg oløge ókømme kinni, “Ákor yi yɑn kɑ nyi cɑwwɑ. Ákorrɑ kì wɑ̈r kí dicɑ̈ng, o bëëd e bong ngɑn rënyii. Pyëwɑ pɑ nudd e rɑɑj ki bɑngɑni. Ke di bëëde ɑ́ koodh geki okurø ɑ nyïɑ̈ggi ki yɑn, yɑ di pɑ̈ɑ̈r kömi gen kɑ ge rɑ̈bɑ kì kej ɑ́kyel. De keløg tyëng-ɑ mɑ̈n ki jiɑ dwɑdd-ɑ korrø yi yɑn, kwɑ̈ɑ̈j gen mër yïɑ, o kwøbbi mër nywɑgɑ wøki gen.” Kì yethi cyɑ̈ngg-ɑ óbï, tyëng Isrɑil, kwɑrri Yɑgob byerri gen óniyeeng piny ni byerri yɑdh, kɑ bɑ̈ddi gen okɑrø, kɑ piny bëne pɑ̈ɑ̈ng yi gen ki nywøl. Isrɑil nuti cɑyø ki mendwøng yi Jwøng-ɑ Ácwɑ̈ɑ̈j, ni tyëng-ɑ mɑ̈n ki en, wɑlɑ̀ tyëng-ɑ kyeelø. Jwøng-ɑ Ácwɑ̈ɑ̈j jie ɑ́cɑy yi en kɑ kïdhi gen yïnø. Gï ɑ́wøøje wɑ̈g kɑ yømø me yije wöny. De orøøg Isrɑil ólɑ̈ɑ̈ny keny-ɑ óguur kïtti këlli lɑm mø jwögg-ɑ pɑth, kɑ ge ogöögø ki búr, kɑ bong-ɑ këlli bɑkur geki ngïjji Aceerɑ̀, jwøng-ɑ dhɑjø mø nud. Kɑ̈dd-ɑ døngø, møg-ɑ ɑ́bëëd gɑ ɑger ki dör ɑ́döng gɑ tuggì, o bong ji mø bëëdø kì yethi gen; ɑ́döng e nɑ pɑ̈l. Ágöög ɑ́ cɑ̈mmi dhög kí keny nyi ywööm gen. Bɑ̈ddi yenh ɑ́nɑ̈r kɑ ge owøwø, kɑ ge mød yi tyëng-ɑ mɑ̈nn gɑ yugg, mɑ́ ji bong pëthi gen, Jwøk ɑ ɑ́cwɑ̈j gen pyëwe koo lɑ̈ɑ̈m ki gen. Kì cyɑ̈ngɑni Jwøng-ɑ Ácwɑ̈ɑ̈j jie ógwëëne kì kömi Nɑm Porɑt geki keew Rïp ni kenyi gween byel kì kelli cong. Keny-ɑ óbëën cyɑ̈ngɑni, kɑng men-ɑ cwööl ji kì Acuur geki Rïp ókodh, e cwööl-ɑ tyëng Isrɑil møg-ɑ yïnø kì pödhhɑni. Ge óbï kɑ Jwøng-ɑ Ácwɑ̈ɑ̈j mɑlli yi gen kì Yerusɑlem, kì wïj kïti kwëre. Pödhi Isrɑil ɑ́gɑ̈g! Døøje ɑ́kedh e onɑ̈rø ni yɑ̈ɑ̈r okøgg kì wɑ̈thi pëjji mø thøø yi møgø; wɑ̈thi gen, wɑ̈th-ɑ tɑ̈dø ógïnyø ki mɑ̈ɑ̈th mø yømi gen med, de ge buud-ɑ piny ge thøø yi møgø. Wë yïe dɑ ngɑn me teg, ngɑn me bï ni ɑtunø me wöjji ni bɑɑyø, gïïpiny bëne ócøøre piny ki tegø. Yɑ̈rri wɑ̈thi jɑgg-ɑ thøø yi møgø møgɑni ónyøn ki tyel. Leny-ɑ lejji pëjjɑni, pëjj-ɑ wɑ̈thi gen tɑ̈dø ólɑ̈ɑ̈ny ni nywøli ólɑm møg-ɑ nyi kwöngi ki cyegø, ɑ nyi pøn kɑ ge cɑm kì ri cyegi gen ceth. Cyɑ̈ng-ɑ óbëëd Wïlɑ̈bø Jwøng-ɑ Ácwɑ̈ɑ̈j e nɑ yɑ̈ɑ̈r dhwɑ̈ng men-ɑ ógwøgø ɑ́ okøgg kì wɑ̈thi jie møg-ɑ óbodh ɑ́cyɑ̈ngi. Jɑggi burø ówëgge gøggi dyër, kɑ tyëng-ɑ kor kɑɑldwøng thödhe ki tegi pyëw, keny-ɑ óbëën liny. Cɑgg ɑ́ jøtöng geki ókwër ge ócyerø yi møgø. Ge ɑ́mɑ̈ɑ̈dh ki møgi oløg geki mugg-ɑ teg mø gïïr. Jøtöng ɑ́dhɑ̈li yodi møg-ɑ nyi cɑ̈rri gen yi Jwøk kì bɑng kɑ bëëd wɑ̈thi gen dɑ møgø, o ókwër ɑ́dhɑl yi løøgi gønyy-ɑ nyi kïdhi bøli gen ki gööj møgø. Wɑ̈thi tɑrɑbedhh møg-ɑ nyi gwëëd yi gen kì burø pɑ̈ng yi ngwøg, bong keny me döngø e nuti cödhø. Ge köörø kì riɑ ge okööbø kinni, “Jɑlɑni orumø kinni pwöny-ɑ men? Á men ɑ dwɑddi kwøbb-ɑ kɑ̈lle? Kwøbbɑni døøj kɑ per othønh-ɑ ócer pønø! Dwɑdd-ɑ pwönyi wɑ gwedø kí gwedø, ɑtød kí ɑtød, pwönyø kí pwönyø.” Keløg kwøbbɑ pɑ lïngi yi wun, Jwøk óöni ki tyëngpɑth, mø dhøggi gen nywɑnggø møg pwönyi wun. Wu ɑ́mëgge ywömø wu bënn, de wu ɑ́bɑ̈nyi lïngi kwøbbe. Bene ɑ bɑnge dwɑddi wun pwönyø yi Jwøng-ɑ Ácwɑ̈ɑ̈j, gwedø kí gwedø, ɑtød kí ɑtød, pwönyø kí pwönyø. Codhe, o wu thɑ̈mmi wun. Wu óyïddi ki kedd, kɑ wu mɑg ki ɑ́kɑ̈llì, kɑ wu kɑ̈l wu bɑ ɑmɑgg. Anɑn wu tyëngɑthwøg møg-ɑ jɑɑg ji møg kì Yerusɑlem, lïngu møg-ɑ kømmi yi Jwøng-ɑ Ácwɑ̈ɑ̈j, Wu okööbø kinni ce wu rum nywɑ̈g ki kwøb wuki thøø, kɑ wu olwöbø wuki pödhi tyëngthøø. Wu okööbø ce wu ówiy yi ryɑ̈g keny-ɑ óbëëne, mɑ́ wu ngɑ̈dh-ɑ pyed geki wëënyø kinni wu óyiel-ɑ yi gen. Bene møg-ɑ kwøb ɑnɑn yi Jwøng-ɑ Ácwɑ̈ɑ̈j ek, “Yɑ cïb-ɑ Dhɑyøn ki kït me teeg, me köme gëddi kì Dhɑyøn, Kït me köme ógwëdø ki kwøb møg: ‘Yïëyø men-ɑ teeg bɑ ngïïnø thyew.’ Gøggi dyër en ɑ óbëëd ɑ́ rumi men-ɑ røm kïn-ɑ köme gëddi menɑni, o bongi yij ɑ́dud en ɑ órøm bëëde e pɑ ol.” Pyed men-ɑ ree bëëd yi wun ɑnɑn ókøøl yi ɑtunø, o kɑ̈jji bëëdi wun órënyi yi bɑɑyø. Kwøbb-ɑ ɑ́nywɑg yi wun, wuki thøø ówiy, o lwömí wuki pödhi tyëngthøø ópɑ̈d. Keny-ɑ óbëën bɑɑyø, wu óbɑɑbe piny. Wu ógøøje piny kɑ wu cige gøøj piny, dhuki kí dhung-ɑ kyeelø. Ryɑ̈ngɑni óying kömi wun kì dicɑ̈ng kí wɑ̈r. Wöön-ɑ bï e kɑ̈ɑ̈l-ɑ yï Jwøk, nyi kɑ̈ɑ̈l-ɑ wɑ̈ɑ̈rø! Mɑ́ pyën cyeeg, tyel pɑ cuggi rïïjø kì yije, o ógødh cyeeg pɑ rømi ki kum. Jwøng-ɑ Ácwɑ̈ɑ̈j ónyïɑ̈ggi ni kɑ ɑ́nyïɑ̈gge kì Kïti Perɑdhïm, kí kɑ ɑ́nyïɑ̈gge kì Töör Gibeon, kipe kinni o gwøge gïn-ɑ dwɑdde gwøgø, cɑgg gïg-ɑ gøgge ónënni gɑ ngɑ̈ngø. Gwøge ótyëge, eni gwøng-ɑ bɑ ngɑ̈ngø. Wu ko ngedhi yi møg-ɑ köbbɑ wun! Keløg wu óngedhi, rengi kun bodh wun óbëëd e teeg. Møg-ɑ ɑ́kwøb yi Wë Wïlɑ̈bø, Jwøng-ɑ Ácwɑ̈ɑ̈j kinni pödhø rënye’ rënyø ɑ́lïngɑ. Kyënu yïthhi wun kɑ møg-ɑ köbbɑ wun lïngi wun. Bong ngɑn nyi cög e køg-ɑ pwödhe. De kɑ̀ rume ki køg, nyi ceg-ɑ wïïwø ki nɑnɑɑ̀ kɑ owïïwø ki gemè kì yethi lwøbbe, kí ceir kì keje, kɑ tøggi pwödhø kɑ̈ge ki gɑthɑnì. Yëth-ɑ gwøøge gwøge ngɑ̈nye, mɑ́ e ɑ́pwönyi yi Jwøk. Pɑ nyi pööd-ɑ lodh me peeg ki ceir, de gø nyi pwöd en kɑ lodh me yööd. Gemè pɑ nyi rënye kenyi pwödii; nyingi gemè pɑ nyi ngɑg yi gïn-ɑ ywɑjji kì köme. Peli wïnyɑni bëne kɑ̈ɑ̈l-ɑ yï Wïlɑ̈bø, Jwøng-ɑ Ácwɑ̈ɑ̈j. Gïg-ɑ nyi gwir yi Jwøk gɑ møg-ɑ ógwøg, nyi pɑ̈dh-ɑ kɑ̈jji gen ceth! Këli lɑm mi Jwøk kiree, ɑ løg Yerusɑlem ɑ́gɑ̈g! Kɑɑldwøng men-ɑ ɑ́gud yi Debïd ɑ́gɑ̈g! Wiy run ɑ́kyel wɑlɑ̀ runn ɑ́ryew bï gen, o ge pöödh gen ki kwëër gen geki tungi gen, codhe o Jwøk kɑ̈ne kömi kɑɑldwøng menɑni ki ryɑ̈g, eni kɑɑl-ɑ cwøl ɑ́ “Këli lɑm mi Jwøk.” Kenyɑni ódi ywøg geki ɑkyew, o kɑɑldwøng óni këli lɑm me cödhø yi remø. Jwøk ópɑ̈ɑ̈r kömi kɑɑldwøng, kɑ gø tyege, kɑ gø mɑge. Yerusɑlem óni ngɑnthøø me pɑ̈nyi ree ki kwøb kì thɑ lɑ̈bø; cwɑg mø werø ɑ kɑ̈ɑ̈l thɑ lɑ̈bø. Yerusɑlem, tyëngpɑth bënn møg-ɑ ópɑ̈ɑ̈r kömí, ówøøj pɑ̈l ni tør yi ɑtunø, kɑ jøliny gen køøl ni wél yi yømø. Møgɑni bënn óceg-ɑ ji ki pɑ̈ɑ̈y piny. Wu óyiel yi Wïlɑ̈bø, Jwøng-ɑ Ácwɑ̈ɑ̈j kɑ tegø, kí pööd mɑl geki onhɑ̈ɑ̈nh piny, kí ɑgwɑg me dwøng, kí ɑtunø, kí mɑc me pɑ̈mmø e cɑ̈mm-ɑ bøle, codhe o liny-ɑ pɑ̈ɑ̈r kömi kɑɑl këli Jwøk, kí jɑmmi linye bënn, lɑ̈ɑ̈nye ni lɑ̈g, ni gïn-ɑ nyi lɑ̈gi kì wɑ̈r. Pödhh-ɑ ɑ́cung ri gen be mɑgi Yerusɑlem, óni ngɑn ree di kɑ̈j me lɑ̈gi e ceg-ɑ cɑm; de kɑ ɑ́cyëëwe, nudd ree dɑ kɑ̈j. O óni ngɑn ree di röödhø me lɑ̈gi e ceg-ɑ mɑdh ki pï; de kɑ ɑ́cyëëwe, cwɑgge nudd ge thwøwø. Adɑ́ cög wun wu bɑ dhëgg! Cög wun wu bɑ cörr! Pëggu ri mɑdh ki muggì! Cyerri wun wu nuti bïddø ki møgø! Wu ɑ́wëggi nwɑyyø yi Jwøng-ɑ Ácwɑ̈ɑ̈j, wu køm-ɑ nenø ki neni dwøng. Bɑ jøtöng ɑ di bëëd gɑ kɑ̈jji nyingi ji, de ge ɑ́göjji cøørø yi Jwøk. Gïg-ɑ wɑngi yi møg-ɑ cɑ̈rri jɑltöng ɑ́kɑ̈nni wun, óni wɑ̈nyø men-ɑ ómuulø; ke mëggii ngɑn ngɑ̈ny rɑng kinni o gø rɑnge, ceg-ɑ kyëdø kinni pɑ cuggi rɑngø yi en, mɑ́ e bɑ ɑmul. Wë ɑ́kööb kinni, “Ji møg okööbø ce ge mɑll-ɑ yɑn, de bong gïn wɑngi yi kwøbbi gen, o pëthi gen ying-ɑ kun megø. Mɑ̈ddø mi gen bɑ kwööng ji yøw, o bɑ møg-ɑ ɑ́dïd yi gen. Kɑ ɑ́rum bëëde kinøw, yɑ pɑ wïyi ki göggi ji møgɑni ki gïg cungi wɑ̈thi gen, peli wïj ólɑ̈ɑ̈ny kì yï tyëng-ɑ wɑ̈thi gen pel, bong gïn-ɑ ógwøg yi peli wɑ̈thi gen.” Tyëng-ɑ nyi kɑ̈nni Jwøng-ɑ Ácwɑ̈ɑ̈j gïg-ɑ dwɑddi gwøgø yi gen, ri gen dɑ cyën! Ge göög ɑ gød, ge orumø ce bong ngɑn nenni gen, wɑlɑ̀ bong ngɑn ngɑ̈nyi gïn-ɑ gwøg yi gen. Jɑmmì bënn ɑ́lung yi gen. Á men ɑ pere teg, lɑ̈bø wɑlɑ̀ bønh-ɑ cwɑ̈j lɑ̈bø? Dɑ gïjø me köbbi ngɑn-ɑ ɑ́cwɑ̈jii kinni, “Yɑ nuti cwɑ̈ɑ̈j-ɑ yi yïn?” Wɑlɑ̀ kinni, “Gïn-ɑ gwøg yi yïn kwïj yi yïn?” Kì bɑng keny me nøg, thïm ógöögø ki pwödhø, kɑ pwödhø ree løge thïm. Obëën bøli kenyɑni, ming ólïngø ki wɑ̈nyø kɑ̀ rɑngii cwɑg ying-ɑ mɑl, kɑ cörr møg-ɑ ɑ́bëëd kì yij muudhø nyingi gen yieb gen kɑ ge onëënø. Abuur geki mööl ócigi yïddø ki medi pyëw men-ɑ muuj yi Jwøng-ɑ Ácwɑ̈ɑ̈j, Jwøøg Isrɑil, Jwøng-ɑ bɑ kwërø. Menɑni ókɑ̈ɑ̈l-ɑ thumi tyëng-ɑ guud nying ji, geki tyëng-ɑ benyi Jwøk. Tyëngorøg ónɑ̈g bënn. Tyëng-ɑ nyi mënni kömi ji ki kwøb, ɑ nyi mɑ̈ɑ̈n tyëng-ɑ ɑ́bɑ̈jji cɑyø, kí tyëng-ɑ nyi kømmi pyed kipe kinni o ngɑndøj mɑ̈ɑ̈n gëe, ge ócɑy yi Jwøk bënn. Anɑn Jwøng-ɑ Ácwɑ̈ɑ̈j, Jwøøg Isrɑil, ɑ ɑ́yiel Abrɑhɑm ki ɑkørr, okööbø kinni, “Jiɑ, wu pɑ bëëdø wu yɑ̈ɑ̈rø këti, wu pɑ cigi cyɑ̈dhø wu kull-ɑ wɑ̈thi wun kì piny yi ɑyɑ̈r. Keny-ɑ ólidh wun nyig-ɑ ómëggɑ wun, óyod yi wun kinni, yɑ bene kwërø, Jwøøg Isrɑil. Yɑ ówør yi wun, kɑ yɑ böggi yi wun. Tyëng-ɑ wɑ̈thi gen nøg ódïd ki yodi kwøb, o tyëng-ɑ ɑ́bëëd ge ceg-ɑ køør pëthi gen ómïni kɑ ge yïëy-ɑ pwönyø.” Jwøng-ɑ Ácwɑ̈ɑ̈j ɑ́kööb kinni, “Tyëng-ɑ jyɑ̈gø kì Yeudiyɑ̀ ri gen dɑ cyën, mɑ́ dhøgɑ ɑ́pyem yi gen. Ge nyi gøgg-ɑ gïg nuti dwɑdd-ɑ yi yɑn, kɑ ge onywɑ̈gø kwøb ki pödhh møøgø e møgɑni nuti tyeer-ɑ yi yɑn, kɑ orøøng nyi kïdhi kömi orøøng. Ge kedh-ɑ Rïp be kwɑjjii kinni o ge køny. Ge dwɑdd-ɑ kønyø yi Rïp, mɑ́ ge ngɑ̈dh-ɑ rɑ̈ɑ̈dh Rïp. De rɑ̈nhɑni yïe óbong tegø men-ɑ ókunye, o wu óyöd wu ceg-ɑ yɑ̈ɑ̈rø. Cɑgg ɑ́ kɑ ɑ́rum ji-ɑ ɑ́ör yi tyëng Yeudiyɑ̀ ki wɑ̈dhi kɑɑl Dhoɑn geki kɑɑl Anes kì Rïp, ge nudd gɑ møg-ɑ ópɑ̈di kì bɑng kɑ ɑ́ngɑ̈dh gen pönh-ɑ pɑ cuggi ngɑ̈dhø; pönh-ɑ ólɑ̈ɑ̈y wɑ̈thi gen, ngö gø ɑ́ngɑ̈dh gen kinni ókunyi.” Bene møg-ɑ ɑ́kwøb yi Jwøk ek, kipe lɑ̈yyi Yeudiyɑ̀ kì tung-ɑ døøg kuni wɑɑng wurlwɑl. “Ji ɑ́ör ge kɑ̈l-ɑ yij pɑ̈l me rɑj, pɑ̈l-ɑ di ngurrì, kí thöll-ɑ bɑ nɑ̈ɑ̈g, geki thöll-ɑ nyi pɑ̈rri. Kömi ɑderri gen kí ɑmɑlli gen pɑ̈ɑ̈ng gen ki jɑmmì mø ngewi gen teeg, gï muuj ge’ pödhø me pɑ cuggi kønyi gen. Kuny-ɑ kunyi yi Rïp bong gïn gwøge. Bene ɑ bɑnge cɑ̈ggɑ Rïp ki nyingi ɑngøl kinni, ‘Nɑ̈ɑ̈ynyɑng-ɑ bɑ Abɑ̈ng.’ ” Yɑ ɑ́köbbi yi Jwøk i gweedɑ bëën-ɑ beed yi ji yij wɑ̈nyø, o bëëd e dɑ gïjø me bɑ ɑgwed ceth men nyodh rɑ̈ji jiɑni. Ge cög ge opëmø ki dhøg Jwøk; ge ceg-ɑ pyed; ge bɑ̈nyi ki lïngi møg-ɑ pwönyi gen yi Jwøng-ɑ Ácwɑ̈ɑ̈j. Kɑ tyëngcyɑ̈rø nyi köbbi gen kinni, “Wø ko nyi köbbu møg-ɑ dyër. Köbbu wøn møg-ɑ med ki lïngø yi wøn, nyi cɑ̈rru wøn møg-ɑ nënni ge døøj kì yï wøn. Nyegi wun kì yuu wøn, wø ko jog wun. Wiyu wøn ki köbbø kì ri kwërø, Jwøøg Isrɑil.” De bene møg-ɑ kwøb yi kwërø. Jwøøg Isrɑil ek, “Møg-ɑ köbbɑ wun nyi ceg kɑ wøyø yi wun, kɑ wu døøg-ɑ be ngɑ̈dhi tegi wun geki wëënyø. Wu ɑ́røngi. Wu nɑ dörø me bɑ̈ɑ̈r, me kɑgø kì mɑl e gït-ɑ piny, wu óceg ì tungdur kì piny. Wu ókedhhi ni pug kenyi dëëme kɑ ókedhhø e bong ópɑdø me döng kì ree me cuggi kɑ̈ddø ki mɑc, wɑlɑ̀ men cuggi tömø ki pï.” Wïlɑ̈bø, Jwøng-ɑ Ácwɑ̈ɑ̈j; Kwërø Jwøøg Isrɑil köbb-ɑ ji kinni, “Dwöögu köörɑ kɑ yɑ gɑ̈n wun. O wu óbëëd wu teg e bong gïjø me böggi yi wun.” De wu ceg-ɑ bɑ̈nyø ki gwøgi møgɑni! Wu okööbø ce wu órengi ki kyënyì. Wu órengi ceth, de tyëng-ɑ cyeddi wun óbëëd ge pëddi ngwej. Ji ɑ́lïp kì kelli wun ceg-ɑ rengø, keny-ɑ ólidh gen ngetimɑ̈ɑ̈nø ɑ́kyel. O yɑɑy wun bëne ceg-ɑ rengø bëne keny-ɑ ólïdhe ki tyëngmɑ̈ɑ̈nø ɑ́bïj. Ódöng ɑ́ lööj ber kì wïj kwøømø kì bɑng wun. De cɑgg ɑ́ kinøw, Jwøng-ɑ Ácwɑ̈ɑ̈j pyëwe ólɑ̈ɑ̈m ki wun. Mɑ́ Jwøng-ɑ Ácwɑ̈ɑ̈j bɑ Jwøng nyi gøggi dyër; tyëng-ɑ gɑ̈nnii ri gen dɑ gyëdh. Wu tyëng-ɑ bëëdø kì Yerusɑlem, wu koo ywöngi këti. Jwøng-ɑ Ácwɑ̈ɑ̈j bɑ ngɑn pyëwe nyi lɑ̈ɑ̈m; keny-ɑ óywøøg wun kööre, kwɑ̈jji wun óløøg yi en. Cɑgg wu thödhi yi Wë ki orɑng, koo pɑ̈ni këti; óbëëd e nud o wu pwönye, o koo cigi yɑbø yi wun e tøøk. Keløg yöö obɑjø yi wun, kɑ wu rud-ɑ wïj kyëj wɑlɑ̀ wïj cɑm, cwɑgge ólïngi yi wun kì ngɑ̈thi wun, e köbb-ɑ wun kinni, “Yöö èn, kɑ̈lli wun yije.” Ngïjji jwögg-ɑ pɑth mø wun møg-ɑ ómwønø ki dhɑb kí ɑ́tegø ókwɑny yi wun kɑ ge weddu pɑ̈l ni gïg cödhø, wu okööbø kinni, “Kedh wun!” Kenyi kɑ̈ɑ̈g byellí, Jwøng-ɑ Ácwɑ̈ɑ̈j ókɑ̈ni ki kødh, kɑ byellí nyii cyegø kidøøj, o dhögí yï gen ódi lum me gïïr men cɑm yi gen. Wɑ̈dhhí geki ɑderr-ɑ nyi køøg pwödhhí, yï gen ódi lum me pëddi døøjø. Wɑ̈thi kïtt-ɑ døngø geki kïtt-ɑ thønhø ótwïy yi nyingi pï, cyɑ̈ng-ɑ ópɑ̈ɑ̈dh kɑ̈ddi tyëngmɑ̈ɑ̈nø. Dwɑ̈y ógöögø e omënyø ni cɑ̈ng, o cɑ̈ng ópëddi meny ki tyel ɑ́bïryew, e nɑ cɑɑr cyɑ̈ng ɑ́bïryew ɑ óreb ri cɑ̈ng ɑ́kyel. Møgɑni ócwöb keny-ɑ ókood kedd, kɑ ge wëggi nøggø yi Jwøng-ɑ Ácwɑ̈ɑ̈j; gen ɑ kedd-ɑ ɑ́mëgge jie. Tegi Jwøng-ɑ Ácwɑ̈ɑ̈j geki mɑ̈re nyii nennø kì kun me lɑ̈wi. Mɑc geki yïrø nyodh-ɑ liny-ɑ pyëwe. Kɑ̀ kööbe, kwøbbe lyel nɑ mɑc me rɑ̈ɑ̈bø. Atunø nyi öre’ bøle ni pïi bɑɑyø ɑ nyi køøl jɑmmì. Pödhh-ɑ kyeelø óbɑɑbe piny kɑ gïgrijjø møg-ɑ ɑ́dwɑddi gwøgø yi gen ocögø. De wun ɑ jii Jwøk, wu óbëëd pëthi wun med, o wu ceg-ɑ wör ni kenyi bëëd ji kì wɑ̈r-ɑ nyi ngɑɑl jɑmmi kwër. Wu óbëëd pëthi wun med ni ji mø cyɑ̈dhi e kɑ̈ngì okodhø, ge kedh-ɑ Kengi Jwøng-ɑ Ácwɑ̈ɑ̈j ngɑn-ɑ korri Isrɑil. Jwøng-ɑ Ácwɑ̈ɑ̈j cwɑgge ówëgge lïngø, kɑ tegi linye yod yi dhɑnhø bëne. Ódi mɑc me lyel, kí pøøl, kí lelli ɑ́piy, kí kødh me dwøng. Tyëng Acuur óbwøg ki mendwøng keny-ɑ ólïngi gen cwɑggi Jwøng-ɑ Ácwɑ̈ɑ̈j, kɑ tegi cɑ́ye yod yi gen. Ge ópwööd piny yi Jwøng-ɑ Ácwɑ̈ɑ̈j e jie pwöd-ɑ bullì kí thøm; Jwøk kiree ɑ ónyïɑ̈ggi ki tyëng Acuur. Keny-ɑ yije órɑ̈ɑ̈b rɑ̈nhdwøøng Acuur ɑ́rum ki gwirø kɑ̈ge dööng; kenyɑni ludhø, o lɑɑj, órörø ki yugg. Jwøng-ɑ Ácwɑ̈ɑ̈j ókudhi kömi yuggɑni ki mɑc men rɑ̈b gen. Tyëng-ɑ kedhi Rïp kipe kønyø ɑ́gɑ̈g! Ge ngɑ̈dh-ɑ yɑɑy Rïp kí tege geki kyënye, kí yɑ̈the, kí ɑlɑthkerre, de ge pɑ ngɑ̈dh Jwøng-ɑ Ácwɑ̈ɑ̈j, kwërø Jwøøg Isrɑil, o kwɑjji yi gen o kunye. Gïn-ɑ gwøge ngɑ̈nye! Nyii önø ki ryɑ̈g. Ócɑ̈yyi ni kɑ ɑ́kööbe; tyëngrijjø ócɑye geki tyëng-ɑ køny gen. Tyëng Rïp pɑth ki jwögg, ge bɑ ji yøw. O kyënyi gen bɑ kyënyì yøw, ge pɑth ki jwögg. Keny-ɑ ótïng Jwøng-ɑ Ácwɑ̈ɑ̈j cinge, ngɑn-ɑ kunyi ócyer, kɑ ngɑn-ɑ køny ópɑ̈ɑ̈dhø kɑ ge othøø kyeel. Yɑ ɑ́köbbi yi Jwøng-ɑ Ácwɑ̈ɑ̈j kinni, “Cɑgg tyëngkwɑ̈yø ryeer wɑlɑ̀ ge kïïwø, ngur pɑ bwøg, o gïn-ɑ mɑɑg en pɑ wiye piny. Nɑ menɑni ceth, yɑn yɑ Wïlɑ̈bø, Jwøng-ɑ Ácwɑ̈ɑ̈j, bong gïn mɑ̈ɑ̈n yɑn kori Kïti Dhɑyøn. Dhɑyøn ókor yi yɑn, yɑ Wïlɑ̈bø Jwøng-ɑ Ácwɑ̈ɑ̈j kɑ yɑ ónyïɑ̈ggø kipere, ni winyø ɑ nyi wïïnø kì mɑl kömi øde, e korr-ɑ nywøle.” Jwøng-ɑ Ácwɑ̈ɑ̈j okööbø kinni, “Wu tyëng Isrɑil, wu ɑ́røngi kɑ kwøbbɑ pyem yi wun. De dwöög wun yïɑ ɑnɑn! Bøli keny-ɑ óweddi ngïjji orøg møg-ɑ ɑ́gwøg yi wun gɑ dhɑb kí ɑ́tegø obëënø. Acuur órënyi yi liny, de pɑth ki tegi dhɑnhø. Acuur ócyeddi yi liny kɑ wɑ̈dde mɑg gɑ bɑ̈ngg. Rɑ̈nhdwøøng gen órengi yi wɑ̈ɑ̈rø. Jɑggi gen óbwøg kɑ ge órengø berri gen wiy ge’ piny.” Bene gen møg-ɑ ɑ́kwøb yi Jwøng-ɑ Ácwɑ̈ɑ̈j, ɑ mɑc mee lyel kì Dhɑyøn, o kële ying-ɑ Yerusɑlem. Rɑ̈nh tir men-ɑ ójyɑ̈ɑ̈gø ki jyɑ̈ng-ɑ dyër óbï geki jyɑ̈gge møg bëëdi gen bɑ óbödh. Ge óbëëd ge nɑ ɑryëg men nyi gëng yømø, o bɑ keny pɑ̈ni kenyi bëën ɑtunø. Ge óni nɑm men mulli kì yij ryɑng, kɑ ge nɑ tïbi kït me dwøng cɑrø kì yij ryɑng thwøwø. Codhe, o Isrɑil wɑnge yiebe, o Jwøge lidhe. O Jwøk cwɑgge lïngi yi jie. Ge ówïyi ki jwɑ̈ɑ̈nø, o ge ógøgg-ɑ gïg ngɑ̈nyi yi gen. Ngetigɑg koo cwølli këti ɑ́ jöd, wɑlɑ̀ wëny koo cwølli ɑ ngɑndøj. Dhëg nyi 'kööb-ɑ dhëëgø e rømm-ɑ gïgrijjø møg-ɑ dwɑdde gwøgø. Gwɑdd-ɑ Jwøng-ɑ Ácwɑ̈ɑ̈j ki gïg-ɑ gøgge bënn, o ngɑn ree di kɑ̈j pɑ thödhe ki gïncɑm wɑlɑ̀ ngɑn ree di röödhø pɑ nënge ki pï. Ngɑn wïje nøg, nyi gøgg-ɑ gïgrijjø, e rømm-ɑ gwøgi gïg rënye tyëng-ɑ nyingi gen cɑn, kɑ gï nyi mɑ̈ɑ̈ne yodi jɑmm-ɑ bɑ mø gen. De ngɑntir pɑ nyi göögø ki wëënyø; nyi cung-ɑ́ɑ̀ kömi dyër ceth. Wu tyëng-ɑ mɑ̈nn møg-ɑ yɑ̈ngø, ɑ bong gïn tɑg yi wun, lïngu kwøbbɑ. Cɑgg ɑ́ kɑ̀ bëëd wu yɑ̈ngø ɑnɑn, wɑ̈thi wun ócungi kì run-ɑ óbï piny nɑ men, mɑ́ e bong oløg men-ɑ ólem yi wun. Wu ɑ́bëëd wu yɑ̈ngø e bong gïn tɑg yi wun, de ɑnɑn kïrri dëlli wun yi wɑ̈ɑ̈rø! Pyëëd wun ógudhi wun wɑ̈g kì ri wun, kɑ wu rug wun ki kwɑ̈llì. Pwödu ri wun wu ceg-ɑ ywøg, mɑ́ pwödh ɑ́rënyi geki bɑ̈ggi oløg, koodh geki okurø ì dut kì pwödhhi jiɑ. Ywøg wun udd-ɑ døngø møg-ɑ́ yethi gen ɑ́bëëd yi ji pëthi gen omedø, kɑ kɑɑl-ɑ ɑ́bëëd e pɑ̈ng yi ji ywøg wun. Cɑgg ɑ́ gøldwøng, ji ódhwödh kì yije, kɑ kɑɑldwøng döng-ɑ nøw. Ud geki kɑ̈llì ódöng ge rënyø gïti ɑtheer. Odyerø ówïïnø kì wïj kɑɑlɑni, kɑ wïje cyɑ̈ɑ̈m yi dyëg. De Jwøk wɑ óöre wëye. Piny ódøøg ki mïnø, kɑ pwödh ocyëgø kidøøj. Ji ógøgg-ɑ dyër kì yij piny bëne. Mɑ́ dhɑnhø bëne ógøgg-ɑ dyër, ódi mër kɑ bong-ɑ liny gïti ɑtheer. Jii Jwøk bong gïjø men-ɑ ótɑg yi gen, o kɑ̈lli gen óbëëdø ki tɑrø geki mër. Cɑgg thïm ótoor piny yi ɑtunø, kɑ kɑɑldwøng mød piny, wu ógöögø ki tyëng-ɑ ɑ́gyëdh, wu ókɑ̈gø ki byelli wun kì bøli kej kɑ̈g, dhögi wun kí ɑderri wun óbëëd ge yɑ̈ngø yi lum. Tyëng-ɑ mɑ̈n ki wɑ ɑ́gɑ̈g! Ge ɑ́kɑ̈ɑ̈b kɑ ge otwɑ̈nyø ki ji, e bong ngɑn mɑ ɑ́kɑb jɑmmi gen, wɑlɑ̀ bong ngɑn mɑ ɑ́twɑny gen. Keny-ɑ órum gen ki kɑ̈b geki twɑ̈nyø ɑ́wɑ̈nhi; jɑmmi gen ólony ki kɑbbø kɑ ge lony ki twɑnyø. Jwøng-ɑ Ácwɑ̈ɑ̈j, lɑ̈ɑ̈m pyëwí ki wøn. Wø gɑ̈nn-ɑ yïn. Korrí wøn yethi cyɑ̈ng bënn, kɑ wø yieel kí ɑkørr. Kenyi nyïɑ̈ggí kiper wøn, pödhh-ɑ kyeelø nyii rengø kɑ̀ lïngi gen cwɑggi liny. Kɑ jɑmmi gen mɑg yi liny wøn. Jwøng-ɑ Ácwɑ̈ɑ̈j dwøng kidï! En ɑ jɑɑg gïïpiny bëne; Yerusɑlem ójɑɑg yi en ki tirø geki gøggi dyër, kɑ pödhø cïbe piny ki mër. Jie nyi korre’ korrø kɑ gï thödhe ki peli wïj geki dïdø. Wøri Jwøng-ɑ Ácwɑ̈ɑ̈j, bɑ en ɑ pere teg kì yï jie. Yɑɑg teg ceg-ɑ kïïwø ge dwɑdd-ɑ kønyø. Jøg-ɑ ɑ́ör be kwøbbi mër ceg-ɑ ywøg ki menteg. Yëthi wëll ceg kɑ böggø, bong ngɑn weli e kɑ̈ll-ɑ yethi gen. Kwøbb-ɑ ɑ́nywɑg ɑ́pɑ̈d, kɑ lwöbø wiy. Bong ngɑn wør këti. Piny wɑ̈dh-ɑ bëëdø; ji ɑ́dɑ̈ɑ̈g kì yije. Thïm Lubnɑn ɑ́cur. Töör Cɑrön ɑ́döng ɑ́ ryɑng. O yïthhi yenh ceg-ɑ wewi piny kì Bɑcɑn geki wïj Kïti Kɑrmel. Pödhh-ɑ kyeelø di köbbø yi Jwøng-ɑ Ácwɑ̈ɑ̈j kinni, “Yɑ ócɑ̈gi ɑnɑn. Tegɑ nyodhɑ’ nyodhø. Gïg-ɑ rømmi yi wun kinni ge ógwøg yi wun, bong gïjø me cuggi kì ri gen. Wëyɑ bɑ mɑc men rɑ̈b wun. Wu ómøy ni kïtt-ɑ nyi rɑ̈b gɑ møg gwøøg jïr, kɑ nɑ koodh møg rɑ̈b kɑ ge ogöögø ki búr. Wiy dhɑnhø bëne men-ɑ cyɑ̈gi ki men lɑ̈wi lidhe tegɑ.” Tyëngorøg møg-ɑ bëëdø kì Dhɑyøn dëlli ceg-ɑ okïr yi wɑ̈ɑ̈rø, ge okööbø kinni, “Cɑ́yi Jwøk lyel nɑ mɑc me gïti ɑtheer e olyelø. Dɑ ngɑn cuggi bodhø kì kellee e pɑ rɑ̈b yi mɑc menɑni?” Wu ócuggø bodhø keløg wu kømm-ɑ dyër, o wu gøgg-ɑ dyër. Jɑmmi tyëng-ɑ nyingi gen cɑn ko kɑbbi wun ki tegø, kɑ wu ko nyi yïëy kwɑjjø ki ngyëny kipe løgi gøny. Wu ko rëbi ki tyëng-ɑ nyi rømmi kwøbbi nɑ̈g ki ji, wɑlɑ̀ ji-ɑ nyi gøggi gïgrijjø møøgø. Obëëd wun kinøw, wu óbodh, kɑ bong-ɑ gïn nywɑl wun, ni tyëng-ɑ bëëdø kì øn döre teg. Wu óbëëd yï wun dɑ gïncɑm kí pïg mɑdh. Wu ócigi yïddø ki rɑ̈dh men-ɑ ójyɑ̈ɑ̈gø ki dhwɑ̈ng kì yij piny-ɑ ólɑ̈nyi kì wɑ̈thi tùng bënn. Wu ódöng wu pyëny-ɑ ri wun kinni, “Ágøne jøgwɑ̈j mø pödhh-ɑ kyeelø møg-ɑ ɑ́buudh köthee?” Wu pɑ cigi lïdhø këti ki ji mø tɑ̈dø, møg dhum dhøg megø; dhøng pɑ lïngi yi wun. Lidhu Dhɑyøn keny-ɑ nyi göög yi wɑ ki kwëër Jwøgee. Lidhu Yerusɑlem! Óbëëd ɑ́ keny bëëd pëëth pɑ lïngø! Óbëëd e nɑ kemɑ̀ me pɑ cuggi rungø; pijje pɑ cuggi örø, o thølle pɑ cuggi cöddø. Jwøng-ɑ Ácwɑ̈ɑ̈j, wɑ ónyudhe dönge. Wɑ óbëëdø kì kömi nɑ̈mmì mø lɑjjø, o wɑ koo jud yi yɑ̈thi tyëngrijjø møg-ɑ ócyɑ̈dhi kì nɑ̈mmɑni. Mɑ́ Wë ɑ ólidh gønyyee, Wë en ɑ bɑ jɑngee, Wë ɑ óbëëd ɑ́ rɑ̈dhee; wɑ ójɑɑg yi en. De opëër morkɑb ree ɑ́lwɑɑje piny; ɑ́dhɑ̈li ki peri ree. Jɑmmi tyëngmɑ̈ɑ̈nø, jɑmm-ɑ ngenyø, ómɑg yi wɑ kɑ ge pɑ̈ngi. Cɑgg ɑ́ men-ɑ́ ngöll ceg-ɑ yïddø kì ri gen. Bong dhɑnhø me dële órɑ̈mø kì pinyee, o orøg ókɑ̈ɑ̈l wɑ̈g kì kelli ji. Lïng wun, wu tyëng pödhh bënn! Cung wun ri wun, kɑ wu lïng wun. Wiy piny ki dhɑnh-ɑ yije bëne bëe kɑ lïnge. Jwøng-ɑ Ácwɑ̈ɑ̈j pyëwe rɑɑj ki pödhh-ɑ kyeelø bënn geki yɑ̈yyi gen. Gï göjje’ ryɑ̈g. Ji koo kony, de ge ókwɑ̈ɑ̈g-ɑ piny, o kïttì óbëëd ge kwɑɑr yi remø. Cɑ̈ng kí dwɑ̈y geki kyell ri gen óløg gen búr. Mɑl ólɑ̈ɑ̈ny de ce óbɑnø ɑ́ wɑ̈nyø, o kyell ódyëm ni yïthhi oløg wɑlɑ̀ yïthhi ólɑm. Jwøng-ɑ Ácwɑ̈ɑ̈j pile ɑ́tïnge kì mɑl e dwɑdd-ɑ göjjø, Edöm gøje’ gøjø, gen ɑ tyëng-ɑ ɑ́göjje ryɑ̈g. Pile óbëëd e cödhø bëne yi remmi gen geki dwɑ̈li gen; óni remmi órömm kí ónyögg møg nyi ngɑl gɑ gëdhhì. Gëëdhi menɑni ómuuj yi Jwøng-ɑ Ácwɑ̈ɑ̈j kì kɑɑldwøng Bodhrɑ̀, nɑ̈ng ni menɑni ɑ ónɑ̈ɑ̈ge kì Edöm. Ji ópɑ̈nhi ni ógïgg, kɑ piny ogöögø e kwɑɑr yi remø, o pɑ̈ng yi dwɑ̈lø. Bøli kenyɑni ɑ óyieel Dhɑyøn yi Jwøng-ɑ Ácwɑ̈ɑ̈j, o gøølø cole ki tyëngmɑ̈ɑ̈nø. Nɑ̈mmi Edöm ri gen óløg gen dök, kɑ lɑ̈bi gen ree løge kïbrït. Pönhɑni bëne órɑ̈bbi ni dök. Ótyëg wɑ̈r kí dicɑ̈ng e órɑ̈bbø, e yïrø töng-ɑ mɑl kì ree gïti ɑtheer. Pinyɑni ódöng nøw kì yij rïny kí rïny. Óbong ngɑn-ɑ óweli e bɑ̈ɑ̈n-ɑ yije. Pinyɑni ólɑg-ɑ yi tulø geki ɑ́gɑ̈ggì. Ówiy e dööng kinøw yi Jwøng-ɑ Ácwɑ̈ɑ̈j, e bong gïn ying yije ni kɑ ɑ́bëëd piny nuti cwɑ̈jø. Bong rɑ̈dh men-ɑ ójɑɑg pönhɑni, o jɑɑg óbëëd ge thumø bënn. Koodh geki okurø óbëëd ge ì dut kì yethi kɑ̈ll-ɑ døngø kì kɑ̈dd-ɑ ówenø ki dör, yethi gen óbëëd yi ógwøgg geki tulø. Lɑ̈yyi pɑ̈l ówïïnø kì yije, kɑ wɑ̈l ri gen cwølli gen kì kenyɑni. Wɑ̈li wɑ̈r ówïïnø kì yije e yɑb-ɑ keny ywööme. Tulø ógëdø kì yije, kɑ onywølø, kɑ nywøle tøge, kɑ ge ódøngø kì kenyɑni. Cør ri gen ócøng gen kenyɑni. Yɑb wun yij wɑ̈nyi Jwøng-ɑ Ácwɑ̈ɑ̈j kɑ wu rɑ̈ɑ̈ng wun ki møg-ɑ kømme kì ri lɑ̈yyɑni. Bong ɑ́kyel kì kelli gïgɑni men-ɑ óløg me tøøk. O bong ɑ́kyel men-ɑ ójɑ̈ddi ki mɑdhe wɑlɑ̀ thwønhe, mɑ́ møgɑni ɑ́kwøb-ɑ yi en, o bɑ en ɑ ócøng gen kej ɑ́kyel Bɑ Jwøng-ɑ Ácwɑ̈ɑ̈j ɑ ópɑ̈ngi pinyɑni kì kɑɑm gen, o men mëgge mee. Ge óbëëdø kì pinyɑni kì yij rïny kí rïny, o óbëëd ɑ́ mi gen gïti ɑtheer. Ryɑng pyëwe ómïni, kɑ ókøgg odhɑ̈yø kì yij pɑ̈l. Ryɑng ówör kɑ óryeerø yi medi pyëw; ógöögø e myëër ni Kïtti Lubnɑn, kɑ ómɑ̈rø ni pwödhhi Kɑrmel geki Cɑrön. Dhwɑ̈ɑ̈ng Jwøng-ɑ Ácwɑ̈ɑ̈j ólidh yi dhɑnhø bëne; döngi Jwøng-ɑ Ácwɑ̈ɑ̈j ólidh geki tege. Wiy cingg-ɑ dhɑ̈rø tëngi gen kɑ wiy cøng-ɑ kïrrø tëngi gen. Köbbu tyëng-ɑ pëthi gen nyönhø kinni, “Cwed wun ri wun, wu ko böggi! Jwøk bï-ɑ be yieli wun, bï-ɑ be cɑyi tyëng-ɑ mɑ̈n ki wun.” Cwør ócuggi nënnø kɑ ming olïngø. Pudh órujji kɑ ocöngø, o tyëng-ɑ pɑ nyi kööbø ge óryeer yi medi pëëth. Nɑ̈mmì ómulli kì yij ryɑng, ɑyeny-ɑ ɑ́bëëd e lëëdh, ógöögø ki luuy pï, o piny-ɑ thwøwø ópɑ̈ng yi nyingi pï. Keny-ɑ ɑ́bëëd yi ógwøgg, ógöögø ki bɑ̈j me yije twïy yi lum geki obej. Ódi yuu wëll kì kunɑni, ócwøl ɑ́ “Yuu Kwër.” Bong ngetorøg men-ɑ ókɑ̈lli yuuɑni, dhëg koo lɑ̈ɑ̈ny kì yij yuuɑni. Bong ngurrì kì yuuɑni; bong lɑ̈y me rɑj men-ɑ ókɑ̈l yije. Tyëng-ɑ ɑ́døm yi Wë, bɑ gen ɑ ódwöög pɑc ki yuuɑni. Ge ówɑ̈nhi Yerusɑlem ki medi pëëth, ge wör ge óryeerø yi medi pëëth. Ge ócög pëthi gen omedø gïti ɑtheer, ge pɑ mïïdø wɑlɑ̀ ge pɑ kïïmø. Senɑkerib, rɑ̈nhdwøøng Acuur ɑ́pɑ̈ɑ̈r kömi kɑ̈ddi Yeudiyɑ̀ kɑ̈dd-ɑ ówenø ki dör kɑ gï mɑge, kì pyɑ̈rø wïdɑ́ngween runni Rɑ̈dh Kedhekiyɑ̀ rɑ̈ɑ̈dh Yeudiyɑ̀ kì yij lɑwø. Kɑ jɑngi linye öre kì Lɑkic gø öre’ Yerusɑlem e ókwöddø ki liny me dwøng, o köbbe Rɑ̈dh Kedhekiyɑ̀ kinni yömme. Kɑ pënyi linyɑni pëgg-ɑ yuu tyëng-ɑ nyi göögø ki ógudh, kì buti wøl-ɑ nyi kɑ̈ɑ̈l pï kì luy-ɑ kwøømø. Kɑ yïe kedhi yi jø Yeudiyɑ̀, ɑ løg Eliɑkim wɑ̈d Kilkiyɑ̀ jɑl-ɑ bɑ jɑngi gøldwøng, kí Cebnɑ̀ jɑl-ɑ bɑ jɑlgwed kì burø, kí Yöɑ̀ wɑ̈d Asɑp jɑl-ɑ nyi gwed kwøbbi cyɑ̈ng, Kɑ ge köbbi yi jɑngi liny Acuur kinni, i rɑ̈nhdwøng dwɑdd-ɑ yodi gïn-ɑ ngɑ̈dh yi Rɑ̈dh Kedhekiyɑ̀ ɑ mɑ̈ɑ̈n pyëwe olïng. Ápëjji kinni, “Wu orumø kwøbbi dhøg yøw ócuggø pɑ̈ɑ̈rø ki yɑy-ɑ teg? Wu orumø kinni ɑ́ men ɑ ókøny wun ɑ pere pëëm wun ki kwøbbi Rɑ̈ɑ̈dh Acuur? Wu orumø kinni wu ókøny yi Rïp, o men-ɑ́ rɑ̈ɑ̈dh Rïp nɑ obej ɑ nyi tor kɑ yöd e ngɑl-ɑ cingi ngɑn-ɑ kwömii ɑ́ keemø. Rɑ̈ɑ̈dh Rïp pɑth ki ngɑn ngɑ̈dh!” Kɑ jɑngi liny Acuur cig-ɑ kwøb kinni, “Wɑlɑ̀ wu orumø kinni wu ngɑ̈dh-ɑ Wë, Jwøøg wun? Pɑth ki debbe geki këlli lɑm møge ɑ ɑ́rënyi yi Kedhekiyɑ̀ keny-ɑ ɑ́köbbe tyëng Yeudiyɑ̀ geki tyëng Yerusɑlem kinni i ngɑ̈ɑ̈d gen kì wïj këli lɑm ɑ́kyel kete? Yɑ ógöögø ki gwøøg ngyew ki nyingi rɑ̈nhdwøng. Wu óthödhi yi yɑn ki kyënyì gɑ ɑ́lïp ɑ́ryew men-ɑ óyïddi wun ki ji mø kɑdhi kömi gen. Yɑɑy wun pɑ pɑ̈ɑ̈r ki yɑy-ɑ kwølli yi pëny-ɑ thinh kì yij liny Acuur; ɑ ngɑ̈dhu Rïp kinni wu óöde ki yɑ̈th-ɑ nyi pyejji yi kyënyì geki jøg nyïɑ̈ggi ki kyënyì. Wu orumø yɑ nuti køny-ɑ yi Jwøng-ɑ Ácwɑ̈ɑ̈j, ɑ ɑ́pɑ̈ɑ̈rɑ kömi kɑ̈ddi wun kɑ ge mɑgɑ? Bɑ Jwøng-ɑ Ácwɑ̈ɑ̈j kiree, ɑ ɑ́köbbi yɑn kinni pɑ̈ɑ̈rɑ kömi gen kɑ ge nɑ̈gɑ.” Codhe, ɑköbbi jɑngi linyɑni yi Eliɑkim geki Cebnɑ̀ kí Yöɑ̀ kinni, “'Kööb ki dhøg tyëng Arɑm, yï ko kööb ki wøn ki dhøg tyëng Ibru; tyëng-ɑ wïj dörø bënn olïngø.” Alögge kinni, “Wu orumø kinni bɑ wuki rɑ̈dh keti wun ɑ́ yï wun ɑ́ör yɑn yi rɑ̈nhdwøng kinni o wu köbbɑ møgɑni? Pɑth, yɑ köbb-ɑ tyëng-ɑ bëëdø kì wïj dörø ki møgɑni thyew, mɑ́ ge ócyɑ̈mø ki cyedhhi gen, kɑ ge omɑ̈dhø ki lɑ́ji gen ni wun ceth.” Codhe, ɑdhwödhi jɑngi linyɑni mɑl, kɑ óryeerø ki dhøg Ibru kinni, “Lïngu møg-ɑ köbbi wun yi rɑ̈nhdwøøng Acuur. Kyëdd-ɑ wun kinni ri wun ko wëggu wënyø yi Kedhekiyɑ̀. Wu pɑ yiel yi Kedhekiyɑ̀. Kɑ ri wun ko wëggu thɑbø yi en, kinni ngɑ̈dhu Jwøng-ɑ Ácwɑ̈ɑ̈j. Wu ko rum kinni wu óyiel yi Jwøng-ɑ Ácwɑ̈ɑ̈j, kɑ liny Acuur mɑ̈ɑ̈ne mɑgi kɑɑldwøng mi wun. Kwøbbi Kedhekiyɑ̀ ko lïngi wun! Rɑ̈nhdwøøng Acuur köbb-ɑ wun kinni, bïu wɑ̈g kì kɑɑl, kɑ wu yömmi wun. Wu ówiy o wu cyɑ̈ɑ̈m wun ki nywøli oløøg wun, geki nywøli ólɑ̈mmi wun, o wu mɑdh wun pïi yïïthi wun, gïti keny-ɑ ócïb wun yij pödhø me pɑ̈r ki pödhi wun yi rɑ̈nhdwøng, kun di oløg men göög ki møgø, geki byel møg cɑm. Ri wun ko wëggu wënyø yi Kedhekiyɑ̀, kɑ wu orumø kinni Jwøng-ɑ Ácwɑ̈ɑ̈j óbï be yieli wun. Pödhh-ɑ kyeelø ɑ́di yielø yi jwöggi gen kì cingi rɑ̈nhdwøøng Acuur? Ge ying-ɑ keny ɑnɑn, gen ɑ jwöggi Amɑth kí Arpɑd? Ágøne jwöggi Sepɑrbɑim? Dɑ ngɑn mɑ ɑ́yiel Sɑmɑriyɑ̀? Á men kì kelli jwöggi pödhhɑni ɑ ɑ́yiel pödhe kì cingi rɑ̈ɑ̈dh wøn? O bɑ ngø ɑ wëggi wun rumø kinni Yerusɑlem ócuggø yielø yi Jwøng-ɑ Ácwɑ̈ɑ̈j?” Teedø ɑ́cög ge okudø ni kɑ ɑ́köbbi gen yi Kedhekiyɑ̀, ge nuti pɑ̈nyi löggø. Codhe, kɑ Eliɑkim geki Cebnɑ̀ kí Yöɑ̀ ógudhi gen kɑg gen yi rɑ̈ɑ̈m pyëw, ɑkedhi gen be dwöggi rɑ̈dh ki møg-ɑ ɑ́kwøb yi jɑngi liny. Rɑ̈dh Kedhekiyɑ̀, keny-ɑ ɑ́lïnge møg-ɑ ɑ́dwøg yi gen, kɑ ógødhe kɑge yi rɑ̈ji pyëwe kí ywøøg yij, ɑlunye ree ki ocwɑ̈lø, kɑ kedh-ɑ Kengi Jwøng-ɑ Ácwɑ̈ɑ̈j. Kɑ Eliɑkim jɑngi gøldwøng, geki Cebnɑ̀, jɑl-ɑ nyi gwëdø kì burø, kí ókwërr-ɑ døngø öre yi Icɑyɑ̀ wɑ̈d Amodh. Ge ɑ́bëëd ge rug-ɑ ocwɑ̈llì thyew. Aköbbi Icɑyɑ̀ yi gen kinni, “Kedhekiyɑ̀ okööbø kinni: dicyɑ̈ɑ̈ng bɑ cyɑ̈ɑ̈ng orɑng; wɑ ceg kɑ cɑyø, o wɑ yɑ̈rø yɑ̈rø. Wɑ nɑ nyɑndhɑjø men-ɑ ópïïdø yi pɑ̈dhi piny, de ɑ́dhɑl yi dële. Rɑ̈nhdwøøng Acuur, jɑngi linye ɑ́öre be gwɑddi Jwøk. Yɑ̈ddɑni óbëëd ge ólïngø yi Jwøng-ɑ Ácwɑ̈ɑ̈j mɑwɑnø, o tyëng-ɑ ɑ́gwɑ̈ɑ̈d cɑye. De kwɑjjí Jwøk kipe jiee møg-ɑ ɑ́döng ge onëënø.” Keny-ɑ ɑ́lïng Icɑyɑ̀ ki wöödø men-ɑ ɑ́örii yi Kedhekiyɑ̀, ɑløøge møge ki wöödø men, “Jwøng-ɑ Ácwɑ̈ɑ̈j okööbø kinni: yï ko bwøg yi kwøbb-ɑ lwɑ̈ggi yïn yi tyëng Acuur, kinni yi pɑ yiel yi en. Rɑ̈nhɑni ówëggi lïngø yi Jwøng-ɑ Ácwɑ̈ɑ̈j ki kwøb møg-ɑ ódwøøgii pödhe, o ógöjji nɑ̈gø yi Jwøng-ɑ Ácwɑ̈ɑ̈j kì kunɑni.” Kɑ jɑngi liny Acuur olïngø i rɑ̈nhdwøng dhwödhø kì Lɑkic, o ónyïɑ̈ggø ki kɑɑl me cyɑ̈gi me cwøl ɑ́ Libnɑ̀, codhe ɑkedhi jɑngɑni kunɑni be pyëji rɑ̈nhdwøng. Kɑ wöödø megø lïngi yi tyëng Acuur kinni i liny Rïp obëënø e pyejj-ɑ yi Rɑ̈dh Terɑ̈kɑ̀, rɑ̈ɑ̈dh Kuc, e bï-ɑ be pɑ̈ɑ̈r kömi gen. Keny-ɑ ɑ́lïngi møgɑni yi rɑ̈nhdwøøng Acuur, ɑöde Rɑ̈dh Kedhekiyɑ̀, rɑ̈ɑ̈dh Yeudiyɑ̀ ki wɑ̈nyø me kööbø kinni, “Yï ɑ́köbbi yi jwøng-ɑ gɑ̈n yi yïn, kinni yï pɑ pɑ̈dhi cingɑ, de rií ko wëggí thɑbø yi møgɑni. Yï ɑ́lïng ki gïn-ɑ nyi gwøg yi rɑ̈nhdwøøng Acuur kenyi rënye pönh-ɑ dwɑdde rënyø. Yï orumø kinni yï óbodh? Kɑ̈ddi Gödhɑn, kí Arɑn, kí Redhep ɑ́cøør piny yi kweyyɑ, kɑ tyëng Bet Eden møg-ɑ ɑ́bëëd kì Telɑsɑr nɑ̈g yi gen, e bong jwøg mɑ ɑ́yiel gen kì kelli jwöggi gen. Rɑ̈nhi kɑ̈ddi Amɑth, Arpɑd, Sepɑrbɑim, Ënɑ̀ kí Ibɑ̀ ge ying-ɑ keny?” Wɑ̈nyɑni ɑ́kwɑny yi Rɑ̈dh Kedhekiyɑ̀ kɑ gø rɑnge. Codhe ɑkedhe Kengø, kɑ wɑ̈nyɑni cïbe bøli Jwøng-ɑ Ácwɑ̈ɑ̈j, ɑkwɑ̈jje kinni, “Jwøng-ɑ Ácwɑ̈ɑ̈j, Wïlɑ̈bø Jwøøg Isrɑil, ɑ kwömø kì kɑɑm kerobb. Yï ketí ɑ bɑ Jwøk, o yïn ɑ jyɑ̈gø yïn ɑ́ Rɑ̈dh kì kömi pödhhi kömi lɑ̈bø bënn. Yïn ɑ ɑ́cwɑ̈j mɑl kí piny. Anɑn yïn ɑ Jwøng-ɑ Ácwɑ̈ɑ̈j, lïngí odhɑɑm wøn kɑ wø yieel ki gïn-ɑ bï kömi wøn èn. Lïngí gïg-ɑ kømmi yi Senɑkerib e gwɑdd-ɑ yïn, yï Jwøng-ɑ Nëënø. Ngɑ̈nyi yi wøn, yïn ɑ Jwøng-ɑ Ácwɑ̈ɑ̈j kinni rɑ̈nhdwøøng Acuur pödhh mø gïïr ɑ́tɑ̈ɑ̈ye piny kɑ pìnyi gen döng-ɑ nøw, kɑ jwöggi gen rɑ̈be, de jwöggɑni pɑth ki jwögg-ɑ dyër kinni tek, ge bɑ ngïjji yøw mø bɑ yɑdh kí kït, o ge ɑ́gwøg-ɑ yi dhɑnhø ki cinge. Anɑn yïn ɑ Jwøng-ɑ Ácwɑ̈ɑ̈j Jwøøg wøn, yiel wøn kì cinggi tyëng Acuur, o yod yi pödhhi kömi piny bënn kinni bɑ yï ketí ɑ bɑ Jwøk.” Codhe, ɑödi Icɑyɑ̀ wɑ̈d Amodh yï Rɑ̈dh Kedhekiyɑ̀ ki wöödø kinni, Jwøng-ɑ Ácwɑ̈ɑ̈j Jwøøg Isrɑil okööbø kinni, “Yï ceg kɑ gɑggø yi kɑɑldwøng kɑɑl Yerusɑlem, yïn ɑ Senɑkerib, o yï cedhe cedhø. Yï orumø kinni yï ɑ́gwɑdd-ɑ men? Wɑlɑ̀ ɑ́ men ɑ nyinge ɑ́bwöl yi yïn? Yɑ nuti wørø yi yïn, yɑ kwërø Jwøøg Isrɑil. Kɑ bɑ̈nggí ör be gwɑddi yɑn, yï pwöd-ɑ köörí ce kïtti Lubnɑn kïtt-ɑ bɑ̈rrø mɑɑg yïn kɑ yɑ̈thí. Kɑ köörí pwööd ce yenh sɑndɑl, yenh-ɑ bɑ̈rrø geki ɑmenh-ɑ dhïw ngøl yïn piny, kɑ yï wɑ̈dh-ɑ yij thïm. Köörí ɑ́pwööd ce yï kunyø ki yïïth, kɑ yï omɑ̈dhø ki pïi piny me pɑth, kɑ Kiir odwönø yi tyelli yɑyí. “Kwïj yi yïn kinni møgɑni ɑ́gwir-ɑ yi yɑn kɑ̈ge dööng gɑ møg-ɑ ócwöb? O bɑ gen ɑ gwøg yi yɑn ɑnɑn, ɑnëngɑ yïn ki tegø men cøør kɑ̈dd-ɑ ówenø ki dör piny, o kɑ̈jji gen dööng yi tuggì. Tyëng-ɑ ɑ́bëëd kì kɑ̈jjɑni nyødh, o ge ɑ́bwøg ki menteg, ge nyøødh ni wél, ni lum kì wïj ød kenyi wøjjii yi yømø. “De bong gïn kwïjɑ kì rií, gïn-ɑ gwøg yi yïn, kì keny-ɑ kedhi yi yïn ngɑ̈nyɑ. Rɑ̈ji pyëwí ki yɑn ngɑ̈nyɑ. Kwøbbi linyɑni geki ɑthwøgí ɑ́wɑ̈nhi yïɑ. Anɑn órømí ógöddɑ kí ɑbɑdh, kɑ dhøgí göddɑ ki yël, o yï dwøøgɑ ki yuu-ɑ ɑ́kɑ̈ɑ̈l yi yïn.” Kɑ Rɑ̈dh Kedhekiyɑ̀ köbbi yi Icɑyɑ̀ kinni, “O men óbëëd ɑ́ ngïji kiperí, wu ócɑm-ɑ lum kì run men geki run-ɑ óbï, de wu ókɑ̈ɑ̈gø kì run-ɑ ócigi bëënø ki byel geki oløg, kɑ ge kɑj yi wun kɑ ge cɑm yi wun. Tyëng-ɑ ódöng ge onëënø kì Yeudiyɑ̀ ónyog ni yenh, kɑ byerri gen niyeeng-ɑ piny, kɑ ge ókɑ̈nø ki nywøl mø ngenyø. Óyïddi ki ji møg bodh kì Yerusɑlem geki Kïti Dhɑyøn, mɑ́ møgɑni dwɑdd-ɑ yi Wïlɑ̈bø, Jwøng-ɑ Ácwɑ̈ɑ̈j kinni o ge cwöb gen. “Bene møg-ɑ ɑ́kwøb yi Jwøng-ɑ Ácwɑ̈ɑ̈j kipe rɑ̈nhdwøøng Acuur ek: ‘Pɑ pɑ̈nyi wɑ̈nhi kɑɑldwøng kinni tek, wɑlɑ̀ pɑ pɑ̈nyi göjji kɑɑldwøng ki nyɑr weth ɑ́kyel kinni tek. Bong ɑlɑthkerr mø cinggi gen di ködd møg-ɑ ówɑ̈nhi buti kɑɑldwøng, wɑlɑ̀ bong dörr-ɑ nyi koor kɑɑl kɑ̀ dwɑddii mɑgø møg-ɑ óger kì bɑdhhe. Ódøg kɑ yuu-ɑ ɑ́bëëne, e tyele nuti ywööny kɑɑl men. Kɑɑl men ókor yi yɑn, kipe kinni o yɑ wør, thyew kipe møg-ɑ ɑ́köbbɑ Debïd bɑ̈ngɑ.’ ” Kɑ wëywöni Jwøng-ɑ Ácwɑ̈ɑ̈j kedh-ɑ kɑɑl tyëng Acuur, kɑ ɑlɑthkerr ɑ́lïp miyø kí pyɑ̈r ɑ́bïdɑ̈g wïdɑ́bïj nɑ̈ge. Ge ɑ́yod ge thøø bënn keny-ɑ ɑ́ru wøw dhuki! Codhe, ɑdhwödh Senɑkerib, rɑ̈nhdwøøng Acuur, kɑ døøg-ɑ Ninɑwɑ̀. Cyɑ̈ng ɑ́kyel e ómɑ̈ddø, kì kengi Nisrök jwøge, kɑ wɑ̈dde ɑ́ryew, Adrɑmelek geki Cɑredher kedh-ɑ köme kɑ gø nɑ̈g gen ki pil kɑ ge pɑ̈ɑ̈r-ɑ piny Arɑrɑt. Kɑ lɑwe kwɑny yi wɑ̈de me cwøl ɑ́ Esɑrɑdön, ɑ́ rɑ̈nhdwøng. Kɑ Rɑ̈dh Kedhekiyɑ̀ mɑg yi rɑ̈ɑ̈m dële kì bøli kenyɑni, kɑ ócyɑ̈ngø ki thøø. Kɑ jɑltöng Icɑyɑ̀ wɑ̈d Amodh kedh-ɑ yïe kɑ gø köbbe kinni, “Jwøng-ɑ Ácwɑ̈ɑ̈j okööbø i ceg gølí mɑ́ yï bɑ men thøw ceth; gwir rií.” Kɑ Kedhekiyɑ̀ wïje løge ri dörø, ɑkwɑ̈jje kinni, “Wïjí ko wïl yïn ɑ Jwøng-ɑ Ácwɑ̈ɑ̈j, kinni yɑ ɑ́bëëd ceth yɑ mïdh-ɑ kwøbbí ki pyëwɑ bëne, yɑ nyi gwøg-ɑ gïn-ɑ dwɑddi yi yïn.” Kɑ óywöngø ki menteg. Codhe, kɑ Icɑyɑ̀ köbbi yi Jwøng-ɑ Ácwɑ̈ɑ̈j kinni, døøge yï Kedhekiyɑ̀ kɑ gø köbbe kinni, “Kwɑ̈jjí ɑ́lïngɑ, yɑ Jwøng-ɑ Ácwɑ̈ɑ̈j, Jwøøg kweyí Debïd, kɑ pïi nyingí lidhɑ, yï ówiy yi yɑn, kɑ kömi runní kïdhɑ ki runn pyɑ̈rø wïdɑ́bïj. Yï óyiel yi yɑn wuki kɑɑl men; Yerusɑlem kì cingi rɑ̈nhdwøøng Acuur, o wu ókorrɑ ceth wuki kɑɑl men.” Alöggi Icɑyɑ̀ kinni, “Yï óthödhi yi Jwøng-ɑ Ácwɑ̈ɑ̈j ki ngïji me nyodh kinni møg-ɑ ɑ́kwøbe ógwøg yi en. Tïbø ówëggi døøg cyɑ̈n yi Jwøng-ɑ Ácwɑ̈ɑ̈j kì kömi pɑ̈ltyel møg-ɑ ɑ́gwøg yi Rɑ̈dh Akɑɑdh ki yethi pɑ̈ltyel pyɑ̈rø.” Kɑ tïbø døøg-ɑ cyɑ̈n ki yethi pɑ̈ltyel pyɑ̈rø. Keny-ɑ ɑ́yöni dëël Kedhekiyɑ̀, ɑgwede wöri pwøj men; Yɑ ɑ́rum kinni yɑ óthøw kì yethi runn-ɑ pëddi døøjø kì yïɑ, kɑ yɑ kedh-ɑ pödhi tyëngthøø kun-ɑ pɑ nyi dwöög. Yɑ ɑ́rum kinni Jwøng-ɑ Ácwɑ̈ɑ̈j pɑ cigɑ lidhø kì piny tyëng-ɑ nëënø, ji pɑ cigɑ lidhø këti kì kömi piny. Wëyɑ ɑ́ngøl; ge ɑ́thumi, ni kemɑ̀ kenyi pɑ̈ɑ̈dii, ni ógødh kenyi ngɑ̈ɑ̈bii wɑ̈g kì wïj kɑɑdi. Yɑ ɑ́rum kinni wëyɑ ɑ́cuung yi Jwøng-ɑ Ácwɑ̈ɑ̈j. Yɑ nyi tyëg wɑ̈r yɑ óywöngø yi rɑ̈ɑ̈m dël, de nɑ ngur ɑ tørri cuɑ. Yɑ ɑ́rum kinni wëyɑ ɑ́kɑ̈l yi Jwøng-ɑ Ácwɑ̈ɑ̈j. Cwɑggɑ ɑ́dhɑ̈li töngi wɑ̈g kidøøj. Yɑ minni nɑ ɑkur. Nyingɑ ɑ́töd yi nenni mɑl Wuö, yiel yɑn ki rɑj møg. Yɑ kwøb-ɑ ngø? Bɑ Jwøng-ɑ Ácwɑ̈ɑ̈j ɑ ɑ́gwøg møgɑni. Pyëwɑ orɑ̈mø, o yɑ dhɑ̈li nenø. Jwøng-ɑ Ácwɑ̈ɑ̈j, yɑ óbëëdø kɑ nyingí yï ketí; Yiel yɑn ki rɑ̈ɑ̈m dëlɑ kɑ wiy yɑ nëënɑ. Rɑ̈ɑ̈m pyëwɑ ree óløge medi pyëw. Yɑ ɑ́yiel yi yïn ki rɑj bënn. Orøgɑ bëne ɑ́lɑ̈ɑ̈ny yi yïn. Bong ngɑn cuggi lenhi yïn kì pödhi tyëngthøø; yï pɑ cuggi ngɑ̈dhø yi tyëngthøø, kɑ yï gɑ̈nni yi gen. Bɑ tyëng-ɑ nëënø ɑ lenhi yïn, Nɑ kɑ̀ lenhɑ yïn ɑnɑn. Wëëg ɑ nyi köbbi nyigi gen kinni yï bɑ Jwøng tir. Jwøng-ɑ Ácwɑ̈ɑ̈j, yɑ ɑ́tur yi yïn. Wø óthumø ki thøm wø lenh-ɑ yïn ki wör. Wø ówör kì Kengí wø lenh-ɑ yïn ki runn-ɑ ónëën wøn bënn. Kɑ rɑ̈dh köbbi yi Icɑyɑ̀ kinni wødhe keny-ɑ ledh ki nywøli ólɑm, o nøgge. Codhe, ɑpëjji Rɑ̈dh Kedhekiyɑ̀ kinni, “Ngïji bɑ ngø kinni, yɑ ócuggø kedhi Kengø?” Kì bøli kenyɑni, kɑ rɑ̈ɑ̈dh Bɑbïlöniyɑ̀, Merodɑk Bɑlɑdɑn, wɑ̈d Bɑlɑdɑn olïngø kinni i Rɑ̈dh Kedhekiyɑ̀ dële bëëdø e orɑ̈mø kɑ ódönyø. Codhe, kɑ gø öde ki wɑ̈nyø geki jɑmmì. Kɑ Kedhekiyɑ̀ pyëwe løg-ɑ me mïni yi wëli gen, kɑ gï nyudhe kɑ̈re, ɑ løg dhɑbe kí ɑ́tenge, kí yenh-ɑ yømi gen med, kí mɑ̈th-ɑ yømi gen med, geki jɑmmi linye bënn. Bong gïjø mɑ ɑ́döng gø nuti nyudh en wëllɑni kì kɑ̈nni jɑmme kì yij pödhe bëne. Codhe, kɑ Icɑyɑ̀ jɑltöng kedh-ɑ yï Rɑ̈dh Kedhekiyɑ̀, ɑpyëje gøn kinni, “Ge kɑ̈ɑ̈l-ɑ keny? O yï ɑ́köbb-ɑ ngø yi gen?” Alöggi Kedhekiyɑ̀ kinni, “Ge kɑ̈ɑ̈l-ɑ pödhø me lɑ̈wi, ge kɑ̈ɑ̈l-ɑ Bɑbïlöniyɑ̀.” Apëjji Icɑyɑ̀ kinni “Á ngø ɑ ɑ́lidh yi gen kì gøldwøng?” Alöggi Kedhekiyɑ̀ kinni, “Jɑmmì bënn ɑ́lidh yi gen. Bong gïjø mɑ ɑ́döng kì kɑ̈nni jɑmmì gø nuti nyudhi gen yi yɑn.” Codhe, ɑköbbi rɑ̈dh yi Icɑyɑ̀ kinni, “Wïlɑ̈bø, Jwøng-ɑ Ácwɑ̈ɑ̈j okööbø kinni i bøli keny megø obëënø, obëën bøli kenyɑni, jɑmmì møg-ɑ gølí bënn kí jɑmm-ɑ ɑ́congi yi kweyyí, ge bɑ møg-ɑ ókïdhi Bɑbïlöniyɑ̀ ge bënn. Bong gïjø men-ɑ ówiy. Kwï wɑ̈ddí møg-ɑ ɑ́nywøl yi yïn ókɑ̈l kɑ ge gwøøg órøj møg göögø kì gøl rɑ̈ɑ̈dh Bɑbïlöniyɑ̀.” Kɑ Kedhekiyɑ̀ köbbi yi Icɑyɑ̀ kinni, “Kwøbbi Jwøng-ɑ Ácwɑ̈ɑ̈j møg-ɑ ɑ́kwøb yi yïn døøj.” Møgɑni ɑ́løøge mɑ́ gø ɑ́yode kinni ódi mër kì runn-ɑ ónudd e onëënø. Jwøgee okööbø kinni, “Lug jiɑ! Dwöög pëthi gen! Cïj tyëng Yerusɑlem. Köbbí gen kinni ge ɑ́rum ki orɑng ki keny me bɑ̈ɑ̈r, o orøøg gen ɑ́rum ki lɑ̈ɑ̈nyø ɑnɑn. Ge ɑ́rum ceth ki cɑyø yi yɑn kipe orøøg gen.” Cwɑg møøgø ócwöddø kì yij pɑ̈l kinni, “Gwiru yuu Jwøng-ɑ Ácwɑ̈ɑ̈j kì yij pɑ̈l. Göggu Wë ki yöö me bɑ óbödh kì yij pɑ̈l! Thør yij tör; pɑ̈ɑ̈r wɑ̈thi kïttì. Ótøng ógöögø ki thwørø, kɑ piny-ɑ bɑ gøngì ogöögø e lïw. Codhe, o mɑ̈ɑ̈r Jwøng-ɑ Ácwɑ̈ɑ̈j nyodh, o lidh yi dhɑnhø bëne. Møgɑni ɑ́kwøb-ɑ yi Jwøng-ɑ Ácwɑ̈ɑ̈j kiree.” Kɑ cwɑg møøgø óryeerø kinni, “Kööb ki wöödø!” Apëjjɑ kinni, “Á wöödø mɑ ngø ɑ kwøb yi yɑn?” Alöggi cwɑggɑni kinni, “Kööb kinni ji bënn ge nɑ lum; ge pɑ nyi bëëdø ki keny me bɑ̈ɑ̈r kibøli okøggi lum kì pɑ̈l. Lum nyii thøø kɑ okøgg onɑ̈rø, kenyi köddi kömi gen yi Jwøng-ɑ Ácwɑ̈ɑ̈j ki yømø. Ji pɑ teeg kibøli lum. Ngee, lum nyii thøø kɑ othwøwø, de kwøbbi Jwøgee nyi bëëd ge teeg gïti ɑtheer.” Yerusɑlem, yedhí mɑl wïj kït kɑ wöön-ɑ døj menɑni kwøøb! Dhɑyøn, ryeer ki cwɑg mø døngø; töng kwøbbi wöndøj menɑni! Köbbí wɑ̈g; yï ko böggi. Köbbí kɑ̈ddi Yeudiyɑ̀, kinni Jwøøg gen obëënø! Wë Áyïmø bï-ɑ be jyɑ̈gø ki tegø, ji-ɑ ɑ́yiele ókwööge keny-ɑ óbëëne. Dyëge ókorre ni jɑldyëg ceth, nywøli römm ócønge kej ɑ́kyel, kɑ gï kwɑ̈gge mëëg gen mëëg gen ókwølle mɑ̈ɑ̈dh. Á men ɑ ɑ́røm nɑɑm omeli dwøng ki yij cinge, wɑlɑ̀ ɑ́ men ɑ ɑ́røm mɑl ki lweddi cinge? Lɑ̈bi piny bëne ócuggø rømø ki ködh yi dhɑnhø, wɑlɑ̀ kïttì ócuggø rømø ki midhɑn? Jwøng-ɑ Ácwɑ̈ɑ̈j ócuggø köbbø yi dhɑnhø ki gïn gwøge? Á men ɑ cuggi pwönyii wɑlɑ̀ ɑ cuggi tyenyii? Jwøk nyi køny-ɑ yi men ki rummì, o yode thɑ́ møg-ɑ dhɑ̈li gɑmø wïje, o yode yëth-ɑ nyi gwøøg jɑmmì? Pödhh bënn pɑth ki gïïpiny yi Jwøng-ɑ Ácwɑ̈ɑ̈j ge nɑ nyɑ wɑɑng pïngø yøw, mujj-ɑ lɑ̈wi nɑ nyɑ tør me thinh kì yïe. Lɑ̈yy-ɑ wɑɑg Lubnɑn bënn, nøg yi gëdhh-ɑ nyi muuj Jwøgee, o yenhi thïme bënn nøg yi yugge. Pödhh bënn bong nyingi gen kì yïe. Jwøk pɑ̈ɑ̈r kɑ men? Bëëde ópɑ̈ɑ̈r yi yïn kɑ ngø? Pɑ pɑ̈r ki ngïny-ɑ nyi gwøg yi bødhø, eni ngïny-ɑ nyi gwøg ki ngyënyø dødø, kɑ dhyɑw ki dhɑb, kɑ gïn-ɑ köme cunge gwøg ɑ́ ɑ́tegø. Ngɑn-ɑ pɑ cuggi ngewi dhɑb wɑlɑ̀ ɑ́tegø, kwɑny-ɑ yɑnh-ɑ pɑ nyi kwɑ̈g. O yɑ̈ɑ̈be ki bødhø me cinge døøj men göggii ki ngïji me pɑ pɑ̈nhhi. Kwïj yi wun? Wu nuti lïngø cøn? Wu nuti lïngø kinni piny cɑ̈g ɑ dï? Piny ɑ́gwøg-ɑ yi ngɑn-ɑ bëëdø kì wïj kwøme e lɑ̈wi ki piny kì ngɑ̈ɑ̈j mɑl; ji nenne kì kömi piny ge nɑ ɑ́cungì. Mɑl ɑ́pedhe e nɑ sitɑrɑ̀, kɑ gø gure piny ni kemɑ̀ men yije bëëd. Jɑgg-ɑ teg nyi dwööge’ piny, kɑ gï løge møg bong per gen. Ge nɑ lum me cer twïyø, byerri gen nuti niyeeng piny. Kenyi gööj yømø yi Jwøng-ɑ Ácwɑ̈ɑ̈j, ge nyi ceg-ɑ thwøwø, kɑ ge køøl yi yømø ni wél. Jwøng-ɑ bɑ kwërø pɑ̈ɑ̈r kɑ men? Dɑ ngɑn ni en? Lïïdh wun mɑl! Á men ɑ ɑ́cwɑ̈j kyell-ɑ nenni yi wun ek? Eni ngɑn-ɑ nyi pyejji gen ni yɑy, kwɑnni gïn ngɑ̈nye; o gï cwølle kɑ nyingi gen! Tege dwøng cɑrø, bong men lɑ̈ɑ̈ny kì kelli kyellɑni! De yïn ɑ Isrɑil, yïde ɑ gööny, kinni ɑkørrí kwïj yi Jwøng-ɑ Ácwɑ̈ɑ̈j, wɑlɑ̀ perí pɑ nyi rømme, keny bëën kömí yi ɑkørr? Kwïj yi yïn? Yï nuti lïngø? Jwøng-ɑ Ácwɑ̈ɑ̈j bene Jwøng-ɑ nud gïti ɑtheer; Lɑ̈bø bëne ɑ́cwɑ̈j-ɑ yi en. Pɑ nyi pïd wɑlɑ̀ pɑ nyi dhɑ̈ɑ̈r. Bong ngɑn yod rumme. Tyëng-ɑ pïdø, ɑ dhɑ̈ɑ̈rø nyii thödhi yi en ki tegø. Cɑgg ɑ́ møg-ɑ thønhø ge nyii nyönhø; yɑɑg-ɑ wøbb nyii dhɑ̈ɑ̈rø, kɑ ge ópɑ̈ɑ̈dhø. De tyëng-ɑ nyi gɑ̈n kønyø yi Jwøng-ɑ Ácwɑ̈ɑ̈j, dëlli gen nyi cig-ɑ tëngø. Ge nyii pɑ̈rrø kì yij yømø ni cor, ge nyii rïngø ge pɑ pïd; ge nyii cyɑ̈dhø ge pɑ dhɑ̈ɑ̈r. Jwøk okööbø kinni, “Wun ɑ pödhh-ɑ lɑ̈wi, kud wun kɑ møgɑ lïngi wun! Gwiru ri wun kipe kïdhi gøny burø, wu ówëggi löggø. Pëggi wɑ piny kì kej ɑ́kyel o ngɑn-ɑ kømmi dyër yod yi wɑ. “Á men ɑ ɑ́kɑ̈ɑ̈l ngɑn-ɑ ɑ́tyɑ̈ɑ̈m kì wɑɑng cyɑ̈ɑ̈ng mwøl, kɑ gø wëgge tyɑ̈mø kì kɑ̈jj-ɑ kedhe? Á men ɑ nyi wëggii tyɑmi rɑ̈nhì geki pödhh? Ge nyi pwööd-ɑ piny yi pile ni kenyi teeng tør piny. Ge nyii kedhhø yi nywøli wethe ni kenyi kedhhi wél yi yømø. Gï nyi cyedde’ cyeddø e bong gïn nywɑlii, rïngi e yöd dhɑ̈y tyelle pɑ nywɑ̈ddi ki piny! Á men ɑ ɑ́wëggi gïgɑni cwöbø? Á men ɑ ɑ́mɑ̈ɑ̈g møgɑni ki gwirø kipe kinni o ge ócwöb gen? Yɑn yɑ Jwøng-ɑ Ácwɑ̈ɑ̈j, yɑ ɑ́bëëd yɑ nud kì ri cɑ̈gi gen, o yɑn yɑ Jwøng-ɑ Ácwɑ̈ɑ̈j, yɑ óbëëd yɑ nud kì cyɑ̈ɑ̈n gen. “Gïn-ɑ ɑ́gwøg yi yɑn ɑ́lidh yi pödhh-ɑ lɑ̈wi; ge ɑ́bwøg kɑ dëlli gen ceg-ɑ okïr yi wɑ̈ɑ̈rø. Codhe ɑcøng gen ri gen kɑ ge obëënø. Bödhhì nyi cïj-ɑ ri gen, kɑ ri gen nyi køny yi gen. Kɑ bødhi dhɑb nyi köbbi yi bødhi pɑ̈mmì kinni, ‘Ágwøg yi yïn kidøøj.’ Ngɑn-ɑ nyi tøg ngïji o lïwe, nyi cïj-ɑ bødhø men-ɑ gurii kej ɑ́kyel. Ge nyi kømm-ɑ kinni, ‘Bɑ ɑkøny kidøøj,’ codhe kɑ gø nyi gur gen keje ki gedd. “De yïn ɑ Isrɑil bɑ̈ngɑ, bene wun ji-ɑ ɑ́myegɑ, wun ɑ kwɑrri Abrɑhɑm mɑ̈dhɑ. Yï ɑ́kɑ̈ɑ̈lɑ kì cögi piny; yï ɑ́cwöölɑ kì gøddi piny kun lɑ̈wi, kɑ yï köbbɑ kinni, ‘Yï bɑ bɑ̈ngɑ.’ Yï nuti bɑɑny yɑn, de yï ɑ́cɑɑgɑ kɑ myegø. Yï ko böggi. Yɑ nud kì butí! Yɑ bɑ Jwøgí. Ko di gïn böggi yi yïn! Yï ógwøøgɑ yï teg kɑ yï kønyɑ, yï ókorrɑ kɑ yï yielɑ. “Tyëng-ɑ pëthi gen rijjø ki yïn, ɑyɑ̈ɑ̈r tyɑmø óyod yi gen. Tyëng-ɑ nyïɑ̈ggi ki yïn óthøw, kɑ ge ólɑ̈ɑ̈nyø kì kömi piny. Bene yɑn Wöw Jwøgí; Yï ɑ́nëngɑ ki tegø, kɑ yï köbbɑ kinni, ‘Yï ko böggi; yï ókøny yi yɑn.’ ” Jwøng-ɑ Ácwɑ̈ɑ̈j okööbø kinni, “Cɑgg ɑ́ kɑ̀ bëëd yï thiinh o yï nyøødh, yïn ɑ Isrɑil, yï ko böggi, yï ókøny yi yɑn. Yɑn, yɑ kwërø jwøøg Isrɑil, bɑ yɑn ɑ óyiel yïn. Yï ógwøøgɑ yï nɑ pɑ̈m-ɑ nyi nyøng byel kì rɑrø me ree di leg mø nyɑ̈n, o ge bedh; Kïtt-ɑ døngø ónyøng yi yïn, kɑ ge mød piny, kïtt-ɑ thønhø ómød kɑ ge ogöögø ki búr. Ge ókwøør mɑl yi yïn, kɑ ge køøl yi yømø, kɑ ge kedhhi yi ɑtunø. Codhe o pyëwí mïne, mɑ́ yɑ bɑ Jwøgí, yɑ ólenhi yi yïn, yɑ kwërø Jwøøg Isrɑil. “Keny-ɑ óyɑ̈ɑ̈b jiɑ ki pï; othwøw cwɑggi gen yi röödhø, kwɑ̈jji gen óløøg yi yɑn, yɑ Jwøng-ɑ Ácwɑ̈ɑ̈j; ge pɑ wiyɑ piny, yɑ Jwøøg Isrɑil. Nɑ̈mmì ówëggɑ möddi wɑ̈thi kïtt-ɑ thønhø møg-ɑ bɑ ryɑng, kɑ pï ótöngø kì piny, kɑ ge mull-ɑ yethi törr. Ryɑng óløgɑ luyyi pï kɑ piny-ɑ thwøwø yije løgɑ men töngi wɑ̈g yi pï. Yɑ ópïdhi yij ryɑng ki yenh sɑndɑl, geki ɑ́lwiy kí bɑlsɑm, kí dhetun. Piny-ɑ bɑ ryɑng ótwïy yi thïm; thïm sɑru, kí sendiyɑn, kí ɑmedh. Møgɑni ólidh yi ji kɑ gø yod gen kinni bɑ yɑn, yɑ Jwøng-ɑ Ácwɑ̈ɑ̈j ɑ ɑ́gwøgii. Óyod yi gen kinni bɑ kwërø Jwøøg Isrɑil ɑ ɑ́wëggi gïgɑni cwöbø.” Møg-ɑ kwøb yi Jwøng-ɑ Ácwɑ̈ɑ̈j rɑ̈ɑ̈dh Isrɑil ek: “Wu jwöggi pödhh-ɑ kyeelø, nyodh wun gøøny wun, kwøb wun gøny-ɑ med ki gønyø yi wun! Bɑg wun gïn-ɑ ócwöb, o yod yi wɑ eni bøli keny-ɑ ócwöbe. Nyodhu møg-ɑ ɑ́cwöb cøn, kɑ tyelli gen lwøb wun. Kɑ gïn-ɑ wɑngi yi gen nyodh wun. Köbbu wøn møg-ɑ ócwöb dhuki megø, o yod yi wøn cyee kinni wu bɑ jwögg! Göög wun ki gïndøj wɑlɑ̀ kɑ̈ni wun ki ryɑ̈g, wëggu wøn bwøgø o wø thøw wøn yi wɑ̈ɑ̈rø! Wu bong per wun, wuki gïg-ɑ gøggi yi wun bënn, pyëw nyi ceg-ɑ lɑ̈mmø yi ji-ɑ mɑlli wun! “Yɑ ómëggi ki jɑl me bëëdø kì kuni wɑɑng cyɑ̈ɑ̈ng mwøl, ókɑ̈ɑ̈l yi yɑn o pɑ̈ɑ̈re kömi kɑɑl ki liny e töng-ɑ́ɑ̀ wɑɑng wuudø. Tyëng-ɑ jyɑ̈ɑ̈gø ónyøn yi en ni tuggì kì piny, ni bødhi lɑ̈b kenyi cyɑ̈ɑ̈be lɑ̈bø. Á men ɑ ɑ́bɑ̈ggi kì kelli wun kinni møgɑni ócwöb, o wø kööb wøn kinni wu kømm-ɑ dyër? Bong ngɑn mɑ ɑ́kööb kì ree kì kelli wun; bong ngɑn mɑ ɑ́lïng ki gïjø mɑ ɑ́kwøb yi wun. Yɑn, yɑ Jwøng-ɑ Ácwɑ̈ɑ̈j, ɑ ɑ́kwøng Dhɑyøn ki köbbi wöönɑni, Yɑ ɑ́ödi Yerusɑlem ki jɑlwöödø me kööbø kinni, ‘Jií obëënø! Ge bï-ɑ pɑc!’ Keny-ɑ ɑ́lïïdhɑ kelli jwögg, bong men di gïn kwøbe, bong ɑ́kyel kì kelli gen mɑ ɑ́løøg pyëjjɑ. Jwögg møg bënn bong per gen; bong gïjø me cuggi gwøgø yi gen ngïjjɑni nyøødh, o bong tegø kì yï gen.” Jwøng-ɑ Ácwɑ̈ɑ̈j okööbø kinni, “Bɑ̈ngɑ èn, ngɑn-ɑ ɑ́thödhɑ ki tegø, ngɑn-ɑ ɑ́myegɑ, o pyëwɑ med ki en. Ápɑ̈ɑ̈ngɑ ki wëyɑ, o pödhh bënn ówëgge gøggi dyër. Koo ryeer wɑlɑ̀ cwɑgge koo tïnge, wɑlɑ̀ koo kööbø e óryeerø kì yethi yëëth. Koo turri ki obej me bøømø wɑlɑ̀ mɑɑc lɑ̈mbɑ̈ e køm-ɑ thøø pɑ nɑ̈ge. Ji bënn ówëgge gøggi dyër men pɑ cög. Koo wïyi ki ngɑ̈dhø, wɑlɑ̀ pyëwe koo nyönhi, gøggi dyër me pɑ cög ókɑ̈ɑ̈le kömi piny. Pödhh-ɑ lɑ̈wi nenn-ɑ bëëni pwönye.” Jwøk ɑ ɑ́cwɑ̈j mɑl kɑ gø pedhe, piny ɑ́gwøg-ɑ yi en geki jɑmm-ɑ bëëdø kì yije bënn. Kɑ jii piny bënn thödhe ki nënnì geki wëy. O ɑnɑn Jwøk, Jwøng-ɑ Ácwɑ̈ɑ̈j, köbb-ɑ bɑ̈nge kinni, “Yï ɑ́cwøl-ɑ yi yɑn, yɑ Jwøng-ɑ Ácwɑ̈ɑ̈j kɑ yï thödhɑ ki tegø, tegø me nenní kinni, dyër ogøggø kì kömi piny. Wø ónywɑ̈gø ki kwøb wøki ji bënn kì rií; pödhh bënn óthödhɑ ki cɑr kì rií. Nyingi cörr óyieb yi yïn, kɑ ɑmɑgg-ɑ ying uddi mɑg møg-ɑ bɑ muudhø gööny yi yïn wɑ̈g. “Yɑn, yɑ ketɑ ɑ bɑ wöw Jwøgí. Bong jwøg ɑ́kyel men nywɑg wøn dhwɑ̈ngɑ, ngïjji jwögg koo wëggɑ lenhø kyeel ki yɑn. Gïg-ɑ ɑ́mɑ̈ɑ̈gɑ ki kwøbø cøn kinni ge ócwöb, ge ɑ́cwöb kidyër. Anɑn wu köbbɑ’ köbbø ki gïg mø nyɑ̈n; ge köbbɑ’ wun ge nuti cwöbø.” Wör wun ki wörø me nyɑ̈n wu lenh-ɑ Jwøng-ɑ Ácwɑ̈ɑ̈j; wöör yï lenh-ɑ en, yïn ɑ piny bëne! Wiy nɑɑm omelø ruure geki gïg-ɑ yije bënn, kí myërr-ɑ kömi nɑɑm omelø geki ji-ɑ yethi gen bënn! Wiy ryɑng geki tyëng-ɑ yije lenhi gen Jwøk, wiy lenhi yi tyëng Kedɑr! Wiy tyëng-ɑ bëëdø kì Selɑ̀ ryeer gen ki medi pëthi gen kì wɑ̈thi kïtti! Wiy tyëng-ɑ bëëdø kì pìny-ɑ lɑ̈wi lenhi gen Jwøng-ɑ Ácwɑ̈ɑ̈j gø lejji ge lejjø! Jwøng-ɑ Ácwɑ̈ɑ̈j nyi kedh-ɑ be liny e nɑ jɑl-liny, me ree gwiir en, pyëwe tyer-ɑ liny. Liny nyi kiwe kiwø, e pödh-ɑ kömi tyëngmɑ̈ɑ̈nø. Jwøk okööbø kinni, “Yɑ ɑ́kud kì keny me bɑ̈ɑ̈r, e jiɑ kwɑ̈jji gen nuti løøg yɑn. De bøli kej løøgi kwøbbi gen ɑ́bï ɑnɑn, yɑ ryeer nɑ ngɑndhɑjø me pɑ̈dhi piny. Kïttì bënn møg døngø kí møg thønhø ókedhhɑ, kɑ lum geki yenh göjjɑ thwøwø. Törr møg-ɑ mulli yi nɑ̈mmì óløgɑ ryɑng, kɑ luyyì wëggɑ thwøwø. “Jiɑ ji-ɑ bɑ cörr ópyejjɑ ge ókɑ̈ɑ̈l-ɑ yöö me yije nuti pɑ̈nyi gen ki kɑ̈ɑ̈lø. Muudhi gen óløgɑ cɑr kɑ piny-ɑ bɑ tuggi gwøøgɑ e lïw kiper gen. Bene møg-ɑ kwøb yi yɑn ɑgɑk kinni ge ógwøgɑ, o ge ógwøgɑ ceth; dhøgɑ pɑ wilɑ. Tyëng-ɑ ngɑ̈dh ngïjjì, ɑ cwølli ngïjjì gɑ jwöggi gen ge ódøøg cyɑ̈n kɑ wɑ̈thi gen ólɑ̈ɑ̈yø.” Jwøng-ɑ Ácwɑ̈ɑ̈j okööbø kinni, “Lïng wun, wun ɑ mïng! Lïdhi wun kidøøj, wun ɑ cörr! Dɑ ngɑn lod bɑ̈ngɑ ki cøørø! Dɑ ngɑn lod ngɑn-ɑ ɑ́ör yi yɑn ki mïngø? Isrɑil, yï ɑ́lïdhi ki gïg mø gïïr, de ge ɑ́wɑng-ɑ ngø kì yïí? Yïí dɑ yïthh møg lïng, de yï ɑ́lïng-ɑ ngø?” Jwøng-ɑ Ácwɑ̈ɑ̈j bene Jwøng-ɑ pyëwe med ki yïëdø, cigge geki pwönye ɑ́gwøøge per gen teeg, o ge di dwɑddø yi en kinni wøør gen yi jie. De ɑnɑn jie ɑ́yɑg; ge bɑ ɑmɑgg, ge ócyëëg uddi piny. Ge ɑ́yɑg kɑ jɑmmi gen kwɑny, e bong ngɑn døm gen. Dɑ ngɑn ólïngi møgɑni kì kelli wun? Cɑg ɑnɑn gïti dhuki megø, møgɑni ólïngi yi wun? Á men ɑ ɑ́cïb Isrɑil cinggi tyëng-ɑ ɑ́yɑgii? Bɑ Jwøng-ɑ Ácwɑ̈ɑ̈j kì ree, ngɑn-ɑ́ bøle ɑ́røngi yi wɑ! Wɑ nuti bëëdø ki bëëdø men-ɑ dwɑddi yi en, o cigg-ɑ ɑ́pwönye wɑ nuti mïdhø yi wɑ. Codhe ɑwëgge wɑ lidhi tegi linye o wɑ rɑngi wɑ yi nyɑɑg. Rɑ̈ji pyëwe ɑ́lyel ni mɑc kì kömi Isrɑil bëne, de gïn-ɑ cwöb ɑ́bëëd e nuti yodø yi wɑ; bong gïjø mɑ ɑ́dïd yi wɑ̈thee kì bɑnge kinni tek. Yïn ɑ Isrɑil, Jwøng-ɑ ɑ́cwɑ̈j yïn okööbø kinni, “Yï ko böggi, yï óyiel yi yɑn. Yï ɑ́cwøl yi yɑn kɑ nyingí, yï bɑ miɑ. Keny-ɑ óbɑ̈ɑ̈n nɑm e pɑ̈ng, yɑ óying butí; yï pɑ mud. Cɑgg yï kɑ̈l yij mɑc, yï pɑ rɑ̈bbi, wɑlɑ̀ yï pɑ gwɑr yi mɑc. Bene yɑn Jwøgí, Jwøng-ɑ Ácwɑ̈ɑ̈j; Jwøøg Isrɑil, Jwøng-ɑ bɑ kwërø ɑ yiel yïn. Rïp ógøømɑ bølí, Kuc geki Sebɑ̀ ócoolɑ kejí. Pödhh bënn ówiy yi yɑn kipe yieli wëyí, mɑ́ perí teeg kì yïɑ; yï mɑɑr yi yɑn, o yï owørø yi yɑn. Yï ko böggi, yɑ nud kì buti! “Jií ódwöögɑ kì wɑɑng cyɑ̈ɑ̈ng mwøl kí kun lɑ̈wi kì wɑɑng cyɑ̈ɑ̈ng böörø. Wɑɑng wuudø óköbbɑ o gï wëgge dwöögø, o wɑɑng wurlwɑl köbbɑ kinni ge ko mɑ̈ɑ̈ne døøgø. Wiy jiɑ dwöög gen kì pìny-ɑ lɑ̈wi; wiy ge dwöög gen kì kɑ̈jj-ɑ ɑ́tɑɑy yi gen kì kömi piny. Ge bɑ dïl jiɑ, ge ɑ́cwɑ̈jɑ kɑ per kinni o döngɑ nënne.” Jwøk okööbø kinni, “Gøønyu jiɑ kì burø. Yï gen dɑ nying, de ge bɑ cörr, yï gen dɑ yïthh, de ge bɑ mïng! Gøøny pödhh-ɑ kyeelø kì burø. Á jwøng-ɑ́ kì kelli jwöggi gen, ɑ cuggi kwøbi gïn-ɑ ócwöb dhuki megø? Á jwøng-ɑ́ kì kelli gen ɑ ɑ́mɑ̈ɑ̈g gïg-ɑ ɑ́cwöb ɑnɑn ki kwøbø cøn? Wiy jwöggɑni kɑ̈ni gen ki cwɑ̈ggi gen, o gø nyodh gen kinni ge kømm-ɑ dyër, o kwøbbi gen nyodh yi cwɑ̈ggɑni kinni ge bɑ dyër. “Wu tyëng Isrɑil, wu bɑ cwɑ̈ggɑ; Yïn ɑ Isrɑil, yï ókwɑnyɑ yïn ɑ́ bɑ̈ngɑ, kipe kinni o bëëdɑ yod yi yïn, o yï yïëëy ki yɑn, o gɑm yi wïjí kinni bɑ yɑ ketɑ ɑ bɑ Jwøk. Bong jwøg mɑ ɑ́ying me nud kì bølɑ, o koo di men-ɑ óying me nud kì bɑngɑ. “Yɑ ketɑ, yɑ Jwøng-ɑ Ácwɑ̈ɑ̈j, ɑ cuggi yieli yïn. Gïn-ɑ ócwöb ɑ́rum ki kwøbø yi yɑn, codhe ɑbëënɑ be yieli yïn. Bong jwøg mɑ ɑ́pɑ̈nyi gwøg ki gïn ni menɑni; wu bɑ cwɑ̈ggɑ. Yɑ bɑ Jwøk, o yɑ ócög yɑn ɑ́ Jwøk ceth. Bong ngɑn yïëdø kì cingɑ; bong ngɑn cuggi wili gïn-ɑ gwøg yi yɑn.” Jwøøg Isrɑil, Jwøng-ɑ bɑ kwërø, Jwøng-ɑ Ácwɑ̈ɑ̈j, ɑ ɑ́yiel yïn okööbø kinni, “Yɑ óödi kömi Bɑbïl ki liny, o yï yielɑ, thïggi dhøggi döri kɑɑlɑni ótoorɑ piny, kɑ ɑkyeew jie ree løge ywøg. Bene yɑn Jwøng-ɑ Ácwɑ̈ɑ̈j; yɑ Jwøgí kwërø. Yï ɑ́cwɑ̈j-ɑ yi yɑn, yïn ɑ Isrɑil, o yɑ bɑ rɑ̈dhí.” Jwøng-ɑ Ácwɑ̈ɑ̈j ɑ́göög ki yöö kì nɑɑm omelø kɑ̈ge dööng, ɑ́göög ki yöö kì dïdyëri pï mø tulli ri gen. Yɑy me teg, yɑɑy ryɑ̈g ɑ́peje, eni yɑɑy yɑ̈ɑ̈th kí kyënyì. Ge ɑ́pɑ̈ɑ̈dh ge pɑ cigi dhwödhø; ge ɑ́kodh kɑ ge ceg-ɑ ì mïj ni mɑɑc lɑ̈mbɑ̈! De Jwøng-ɑ Ácwɑ̈ɑ̈j okööbø kinni, “Wu ko mɑ̈gi kì ri gïg-ɑ ɑ́pöödh, wɑlɑ̀ wu ko cöög ri gïg-ɑ ɑ́cwöb kɑ̈ge dööng. Lïdhi wun, yɑ dwɑdd-ɑ gwøg ki gïjø me nyɑ̈n. Gïnɑni ɑ́cɑ̈gi ki cwöbø; onennø yi wun ɑnɑn! Yɑ ógöögø ki yöö kì yij pɑ̈l, kɑ wu thödhɑ ki nɑ̈mmì kì kunɑni. Cɑgg ɑ́ lɑ̈yyi pɑ̈l, yɑ ówør yi gen; yɑ ólenhi yi ógwøgg geki wudø keny-ɑ ógöögɑ ki nɑ̈mmì mø rïngi kì yij pɑ̈l; nɑ̈mmì møg nëngi jiɑ, ji-ɑ ɑ́myegɑ ki pï. Ge bɑ ji-ɑ ɑ́göggɑ riɑ, o ge ówör gen ge lenh-ɑ yɑn!” Jwøng-ɑ Ácwɑ̈ɑ̈j okööbø kinni, “De yï ce ɑ́di ngïrø yi yɑn, Isrɑil; kɑ yɑ ocögø yɑ pɑ mɑlli yi yïn. Yɑ nuti muuj yïn ki órömm-ɑ nyi mëggí yɑn gɑ gënh-ɑ nyi rɑ̈b bëne, yɑ nuti wøør yïn ki gëdhhí. Yï nuti jud yɑn ki cwöd ki gëdhhì, wɑlɑ̀ yï nuti pïd yɑn ki cwølli bɑkur. Yɑ nuti ngëwwi yïn ki bɑkur wɑlɑ̀ pyëwɑ nuti wëggi yïn mïnø yi dwɑ̈li dyëgí. De yɑ ɑ́yöd yɑ ceg kɑ torø yi yïn ki orøgí; yɑ ɑ́jud yi yïn kɑ̀ nyi rïïj yï óbɑ̈jjø. De cɑgg ɑ́ kinøw, yɑ bene Jwøng-ɑ lɑ̈ɑ̈ny orøgí, o menɑni gwøg yi yɑn kɑ per kɑ bëëdɑ yɑn ɑ́ Jwøk. Orøgí pɑ mïdhi yi yɑn ɑ́ cɑ́y kì kömí. “Kedhi wɑ burø; kɑ̈ɑ̈l gønyí! Nyodh gønyí kinni bɑ dyër! Kweyyí ɑ́røngi kɑ̈ge dööng; jɑggí ɑ́røngi kì bølɑ, o kej kwërɑ ɑ́bwöl yi pëjji wun. Codhe ɑkɑ̈ɑ̈lɑ ryɑ̈g kömi Isrɑil, kɑ jiɑ göjjɑ gwɑddø.” Jwøng-ɑ Ácwɑ̈ɑ̈j okööbø kinni, “Lïng ɑnɑn, yïn ɑ Isrɑil bɑ̈ngɑ wu jiɑ møg-ɑ ɑ́yienyɑ, kwɑrri Yɑgob. Bene yɑn Jwøng-ɑ Ácwɑ̈ɑ̈j, ɑ ɑ́cwɑ̈j yïn, yï ɑ́wöni yï okønyø yi yɑn kër-ɑ ɑ́nywøøl yïn. Yï ko böggi, yï bɑ bɑ̈ngɑ, jiɑ møg-ɑ ɑ́yienyɑ, ɑ mɑɑr yi yɑn. “Piny-ɑ thøø yi röödhø óthödhɑ ki pï kɑ nɑ̈mmì wëggɑ mullø kì piny-ɑ thwøwø. Wëyɑ ókønyɑ kömi nyigi wun kɑ gyëdhhɑ kønyɑ kömi kwɑrri wun. Ge ónyog ni lum me thɑre di pï, kɑ ge nɑ wijø kì tøggi nɑm. “Ngɑn ókööbø kinni, ‘Yɑ bɑ mi Jwøng-ɑ Ácwɑ̈ɑ̈j.’ Ge óbï be rëbø ki tyëng Isrɑil. Nyingi Jwøng-ɑ Ácwɑ̈ɑ̈j ógweed yi gen bɑ̈ddi gen, kɑ ri gen cwølli gen gɑ wɑddi jii Jwøk.” Jwøng-ɑ Ácwɑ̈ɑ̈j ɑ jɑɑg Isrɑil gø korre korrø, Wïlɑ̈bø, Jwøng-ɑ Ácwɑ̈ɑ̈j okööbø kinni, “Yɑn ɑ mɑl, o yɑn ɑ cyɑ̈n, yɑ ketɑ ɑ bɑ Jwøk; bong jwøg megø den-ɑ́ yɑ ketɑ. Dɑ ngɑn di cuggi gwøgi gïg-ɑ ɑ́gwøgɑ? Á men ɑ di mɑ̈ɑ̈g gïg-ɑ ócwöb ki kwøbø, cɑg kì ri cɑ̈gi piny gïti thumi piny? Jiɑ wu ko böggi! Ngɑ̈nyi yi wun kinni, kër-ɑ ɑ́wöne kɑ̈ge dööng gïti ɑnɑn gïg-ɑ ócwöb bënn ɑ́mɑ̈ɑ̈gɑ ki kwøbø, o wu bɑ cwɑ̈ggɑ. Dɑ jwøg megø? Dɑ jwøg me teg me pere nuti lïngi yɑn?” Tyëng-ɑ gøggi ngïjji jwögg per gen bong gïn, o jwögg-ɑ rømmi yi gen per gen teg, bong per gen. Tyëng-ɑ mɑlli jwöggɑni bɑ cörr, o ge kwïj wøw, ge óyɑ̈r. Gwøg ki ngïji mɑ ngyënyø me kwɑjji ɑ́ jwøg bong gïjø me døøj kì ree! Ngɑn kwɑjjii óyɑ̈r. Tyëng-ɑ göögø ki ngïjji jwögg bɑ ji yøw. Bï gen o gøøny gen lidh, ge órɑngi kɑ ge oyɑ̈rø. Bødhø kenyi kwɑnye ngyënyø gø nyi kïdhe’ mɑc. Codhe, o gø tøge ki ɑ́bɑny ki cinge, cing-ɑ teeg gø gwøøge ngïji. Kɑ̀ gööge nyii mɑgø yi kɑ̈j kí röödhø, kɑ nyii pïdø. Bødhi tyeng, yɑdh nyi kwɑnye kwɑnyø kɑ gø gedde ki cugø, kɑ gø tyenge ɑ́ ngïji dhɑnhø me myëër, o gø cïbe øde. Ócuggø ngøl ki yɑdh sɑndɑl, wɑlɑ̀ óthurø, wɑlɑ̀ ɑmedh kì wɑg. Yɑdh sɑndɑl nyi pidhe’ pidhø, o dønge yi kødh. Dhɑnhø kwï yɑnhɑni nyi cwɑge’ cwɑgø ki mɑc, o kwëe tyeng ɑ́ ngïji! Kɑ kwëe gwøøge yugg møg röjje ki mɑc, o kwëe tɑ̈ɑ̈de ki gïncɑm, o kwëe gwøøge jwøg men mɑlle. Kwï yɑnhɑni ɑ́gwøøge yugg møg thɑle gïncɑm kɑ obudø ki rïngø kɑ ocyɑ̈mø, kɑ oyɑ̈ngø. Kɑ oröjø ki mɑc, kɑ dële ólënhø, o nyi kööbe kinni, “Dëlɑ ɑ́murri! Mɑc døøj!” O kwï yɑnhɑni men-ɑ ɑ́döng gø gwøøge ɑ́ ngïji, codhe o ree bøødhe, o gø mɑlle, gø kwɑjje’ kwɑjjø kinni, “Yï bɑ jwøgɑ, yiel yɑn!” Tyëng-ɑ ni møgɑni wɑ̈thi gen nøg cɑrø, gïn-ɑ gwøg yi gen kwïj yi gen, mɑ́ nyingi gen bɑ ɑkum; ge pɑ nëënø. O wɑ̈thi gen ódijø; bong gïn gɑm yi wɑ̈thi gen. Ngɑn-ɑ göögø ki ngïjjì ree nuti pɑ̈nyø pyëjø yi en kinni, “Kwï yɑnhɑni ce ɑ́di rɑ̈bø yi yɑn. Kɑ kwëe bulɑ ópun geki rïngø men cɑm yi yɑn. Agwøgɑ men-ɑ ɑ́döng ɑ́ ngïji, ɑnɑn yɑ pɑ mɑll-ɑ duli yɑdh!” Menɑni wɑɑd ki ngɑn nøm búr. Átööng pɑ̈l yi nøgi rumme, o pɑ cuggi yielø. Ádhɑ̈li gɑmø yi wïje kinni ngïji men-ɑ mïdhe kì cinge pɑth ki jwøg kinni tek. Jwøng-ɑ Ácwɑ̈ɑ̈j okööbø kinni, “Pɑrrí møg, yïn ɑ Isrɑil, pɑrrí kinni yï bɑ bɑ̈ngɑ. Yï ɑ́cwɑ̈j yi yɑn kɑ per kinni, o yï bëëd yïn ɑ́ bɑ̈ngɑ, o yï pɑ wïl kì wïjɑ. Orøgí ɑ́wøøjɑ wɑ̈g ni pøølø. Dwöög yïɑ; bɑ yɑn ɑ yiel yïn.” Ryeer ki medi pyëw yïn ɑ mɑl. Ryeer wun, wu kɑ̈jj-ɑ ludhø kì piny. Ryeer wun ki medi pëëth wun ɑ kïttì, kí yɑnh-ɑ pɑ̈l bëne! Jwøng-ɑ Ácwɑ̈ɑ̈j dönge ɑ́nyodhe kɑ yieli jie tyëng Isrɑil. “Bene yɑn Jwøng-ɑ Ácwɑ̈ɑ̈j yïëní, Bɑ yɑn ɑ ɑ́cwɑ̈j yïn. Bene yɑn Jwøng-ɑ Ácwɑ̈ɑ̈j, ɑ ɑ́cwɑ̈j jɑmmì bënn, yɑ ketɑ ɑ ɑ́pedh mɑl, bong ngɑn mɑ ɑ́køny yɑn keny-ɑ ɑ́gwøgɑ piny. Tyëng-ɑ nyi bɑ̈gø ki gïg-ɑ ócwöb nyi gwøøgɑ’ dhëgg kɑ tyëng-ɑ nyi rɑ̈ngø ki kyell wɑ̈thi gen nyi cuungɑ. Bɑ̈jji tyëng-ɑ wɑ̈thi gen pel nyi nyodhɑ’ nyodhø, kɑ ge nyi nyudhɑ kinni peli wɑ̈thi gen bɑ dhëëgø. De kenyi kööb bɑ̈ngɑ ki gïn-ɑ ócwöb; kenyi örɑ bɑ̈ngɑ be nyodhi møg-ɑ ɑ́gwirɑ, møgɑni nyi wëggɑ’ pɑ̈dhi kɑ̈jji gen. Yɑ köbb-ɑ Yerusɑlem kinni, ji ódøøg be bëëdø kì yije kɑ myërri Yeudiyɑ̀ köbbɑ kinni ge ódøøg ki gerø; kɑ̈ddɑni ódhwödh, cɑgg ɑ́ kɑ̀ dööng gen gɑ tuggì. Nɑɑm omeli dwøng nyii dwönø kɑ̀ kööbɑ. Kɑ Körec köbbɑ kinni, ‘Yïn ɑ ójyɑ̈ɑ̈gø yïn ɑ́ kejɑ; yï gwøg-ɑ gïn-ɑ dwɑddi yi yɑn kinni o gwøg, yïn ɑ ókööbø kinni døøg Yerusɑlem ki gerø, kí kinni këël tyelli Kengø piny.’ ” Körec ɑ́røny yi Jwøng-ɑ Ácwɑ̈ɑ̈j o bëëde ɑ́ rɑ̈dh! Árønye o tyɑme pödhh; ɑ́öre’ be pɑ̈di rɑ̈nhì; óyïëbbi dhøggi dörri kɑ̈dd yi Jwøng-ɑ Ácwɑ̈ɑ̈j. Körec di köbbø yi Jwøng-ɑ Ácwɑ̈ɑ̈j kinni, “Yɑn kiriɑ ɑ ógwir yuuí, kïttì ónyɑɑgɑ piny geki ótøng. Thïggi dörri kɑ̈dd møg-ɑ bɑ ngyënyø dilɑl toorɑ’ piny, kɑ rïwwi gen møg-ɑ bɑ ngyënyø dødø tørrɑ. Yï ómuujɑ ki kɑ̈r, e kɑ̈ɑ̈l yi yɑn ɑ kɑ̈nø me yije bɑ muudhø, o yod yi yïn kinni yɑn ɑ bɑ Jwøng-ɑ Ácwɑ̈ɑ̈j, kí kinni yï ɑ́cwööl kɑ nyingí yi Jwøøg Isrɑil. Yï ɑ́kwɑnyɑ o yï køny bɑ̈ngɑ Isrɑil, gen ɑ ji-ɑ ɑ́myeg yi yɑn. Yï ɑ́thödhɑ ki dhwɑ̈ng me dwøng, ngö yɑ kwïj yi yïn. “Bene yɑn Jwøng-ɑ Ácwɑ̈ɑ̈j, bong jwøg megø. Yï óthödhɑ ki tegø, o bëëd e bong gïn dhɑl yïn. Gïn ni menɑni gwøg yi yɑn kɑ per kinni, o yod yi piny bëne kinni yɑ ketɑ ɑ bɑ Jwøng-ɑ Ácwɑ̈ɑ̈j; o bong jwøg megø. Yɑn ɑ nyi kɑ̈ɑ̈l cɑr geki muudhø; yɑn ɑ nyi kɑ̈ɑ̈l gyëdh geki cyën. Yɑn yɑ Jwøng-ɑ Ácwɑ̈ɑ̈j ɑ nyi gwøg gïgɑni bënn. Tyɑ̈mø örɑ’ örø kì mɑl ni kødh; piny ree óyiebe o gø gɑme, kɑ piny ótɑ̈bbø kɑ yije gøggi dyër. gïgɑni ówëggɑ cwöbø ceth, yɑ Jwøng-ɑ Ácwɑ̈ɑ̈j.” Gïn-ɑ ócwɑ̈jø ɑ́ lɑ̈bø ócuggø pëëmø geki ngɑn-ɑ ɑ́cwɑ̈jii, eni pung-ɑ pɑ̈r ki pugg-ɑ kyeelø? Lɑ̈bø, bødhi lɑ̈b nyii pyëjø yi en kinni gwøg-ɑ ngø? Pug nyii göönyø kinni ngɑn-ɑ cwɑ̈jii cinge rɑɑj? Dɑ ngɑn pɑ̈nyi wïye geki meye ki köbbø kinni, “Á kipe ngø ɑ gwøgu yɑn kinnï?” Jwøng-ɑ Ácwɑ̈ɑ̈j, kwërø, Jwøøg Isrɑil, ngɑn-ɑ pyël gïg-ɑ ócwöb dhuki megø okööbø kinni, “Yɑ pɑth ki ngɑn pyënyi yi wun kipe nyigɑ, wɑlɑ̀ yɑ pɑ köbbi yi wun ki gïn-ɑ gwøgɑ! Bɑ yɑn ɑ ɑ́gwøg piny, ɑcwɑ̈jɑ ji kipe kinni o ge bëëd gen kì yije. Mɑl ɑ́pedhɑ ki tegɑ; yɑn ɑ mïdhi cɑ̈ng kí dwɑ̈y kí kyell. Yɑn kiriɑ ɑ ɑ́tug Körec, o gwøge gïn-ɑ dwɑddɑ, o jɑmmì tyenye. Yëth-ɑ cyɑ̈dhe bënn ógwøgɑ gɑ óbödh. Yerusɑlem, kɑɑlɑ ódøøg yi en ki gerø, kɑ jiɑ gønye kì yethi töjjì. Bong ngɑn mɑ ɑ́kïrii wɑlɑ̀ mɑ ɑ́ngewii kipe gwøgi gïnɑni.” Wïlɑ̈bø, Jwøng-ɑ Ácwɑ̈ɑ̈j ɑ́rum ki kwøb. Isrɑil ɑ köbbi yi Jwøng-ɑ Ácwɑ̈ɑ̈j kinni, “Kɑ̈ɑ̈r Rïp, kí kɑ̈ɑ̈r Kuc óbëëd gɑ møgí; o jøg-ɑ bɑ̈rrø kì Sebɑ̀ óbëëd gɑ bɑ̈nggí; ge ólugi kì bɑngí gɑ ɑtwöj ki ɑ́cwecwel. Ri gen óbøødh gen bølí, kɑ ge oyïëyø kinni, ‘Yï wun dɑ Jwøk kidyër, e kete ɑ bɑ Jwøk. Jwøøg Isrɑil ɑ nyi yiel jie, bɑ Jwøng-ɑ nyi kɑn ree. Tyëng-ɑ göögø ki ngïjjì óyɑ̈r bënn; óbong dhwɑ̈ng kì yï gen bënn. De Isrɑil bɑ ɑyiel yi Jwøng-ɑ Ácwɑ̈ɑ̈j; ócög e otyɑ̈mø gïti ɑtheer; tyëng Isrɑil koo jɑ̈ddi ki dhwɑ̈ng.’ ” Jwøng-ɑ Ácwɑ̈ɑ̈j ɑ ɑ́cwɑ̈j mɑl; bene en ɑ bɑ Jwøk! En ɑ ɑ́cwɑ̈j piny ki bëën-ɑ bëëde, gø ɑ́gwøge e teeg o pɑ rënyi. Gø nuti gwøøg en e wɑ̈dh-ɑ bëëdø yøw, de gø ɑ́gwøge ɑ́ keny bëëd yi ji. En ɑ kööbø kinni, “Bene yɑn Jwøng-ɑ Ácwɑ̈ɑ̈j, o bong jwøg megø. Yɑ nuti kööb ɑ gød, wɑlɑ̀ møgɑ nuti kɑnnø yi yɑn. Tyëng Isrɑil nuti köbbø yi yɑn kinni yɑb gen yɑn kì yij pɑ̈l me bong ji. Yɑ bɑ Jwøng-ɑ Ácwɑ̈ɑ̈j, o yɑ nyi kømm-ɑ dyër, gïn-ɑ dyër nyi wëggɑ’ yodø.” Jwøng-ɑ Ácwɑ̈ɑ̈j okööbø kinni, “Bïu cøng wun ri wun, wu tyëng pödhh-ɑ kyeelø; wun ɑ ɑ́bodh kì bɑng pɑ̈ɑ̈dhi pönh-ɑ dwøng; bï wun o gøøny wun lidh! Tyëng-ɑ kɑ̈lli ngïjj-ɑ ógwøgø gɑ yɑdh, o ge mɑll-ɑ jwögg-ɑ pɑ cuggi yieli gen, ge bɑ ji mø bong gïn ngɑ̈nyi yi gen kinni tek. Bïu kɑ̈ɑ̈l wun gønyyi wun burø; wiy tyëng-ɑ cwɑg ri gen kööb gen keti gen. Á men ɑ ɑ́mɑ̈ɑ̈g ki kwøbbi cwöbi gïgɑni cøn? Pɑth ki yɑn, yɑ Jwøng-ɑ Ácwɑ̈ɑ̈j, Jwøng-ɑ nyi yiel jie? Bong jwøg megø. “Dwöög wun yïɑ ɑnɑn, o wu bødh wun, wun ɑ tyëng kömi piny bënn. Bene yɑn Jwøng-ɑ nud yɑ ketɑ. Møg-ɑ ɑ́kwøbɑ kinni ge ógwøgɑ bɑ dyër, o pɑ cuggi wilø. Yɑ ɑ́köngi ki riɑ kinni; dhɑnhø bëne óbï kɑ ree bøødhe bølɑ, kɑ ge óköngø kinni møgɑ ómïdhi yi gen. “Ge ókööbø kinni bɑ kì riɑ yɑ ketɑ ɑ cuggi tyɑ̈mø geki tegø ki yodø, de tyëng-ɑ mɑɑn yɑn bënn, ge óyɑ̈r ki mendwøng. Kwɑrri Yɑgob óyielɑ bënn, yɑ Jwøng-ɑ Ácwɑ̈ɑ̈j; o yɑ ólenhi yi gen. “Men bene rumi jwöggi Bɑbïl! Bel geki Nebö ɑ́bëëd ge omɑllø cøn, de ɑnɑn ge ɑ́cïb kömi ɑderr, ge ɑ́göög ki møg toor lɑ̈yy-ɑ pïdø. Ngïjjɑni ri gen pɑ yiel yi gen, ge ɑ́mɑg kɑ ge tëër kun megø. Men bene rumi jwöggi Bɑbïl! “Lïngu møgɑ wu kwɑrri Yɑgob, wu tyëng-ɑ ɑ́döng kì kelli jiɑ. Wu ɑ́korrɑ ki kër-ɑ ɑ́nywøøl wun. Yɑ bɑ jwøøg wun, o wu ókorri yi yɑn, gïti keny-ɑ ódøngi wun kɑ wɑ̈thi wun mɑg yi wɑ́r. Wu ɑ́cwɑ̈j-ɑ yi yɑn, o wu ókor yi yɑn, wu ókøny yi yɑn kɑ wu dømɑ. “Yɑ ópɑ̈ɑ̈r yi wun kɑ men? Dɑ ngɑn pɑ̈r ki yɑn? Teedø pødhhi gen nyii yiebø yi gen kɑ ge kuny-ɑ wɑ̈g ki dhɑb; kɑ dhɑmɑni røm ki midhɑn. Kɑ ge okïrø ki bødhø men thɑ̈dhø ki jwøg, codhe o ri gen bøødh gen piny kì bøli jwøngɑni o gø mɑl gen! Nyii byelø yi gen, kɑ gø kɑ̈l gen, kɑ nyi cöög-ɑ keny-ɑ cïbii yi gen, o pɑ cuggi nyegø kete kì kenyɑni. Ke kwɑjjii yi dhɑnhø pɑ löggi, o pɑ cuggi yïëdø ki rɑj. “Nyi pɑrri wun møg wun ɑ tyëngorøg, nennu gïg-ɑ ɑ́gwøg yi yɑn. Pɑrri wun gïg-ɑ ɑ́cwöb cøn; kɑ wu yïëy wun kinni bene yɑ ketɑ ɑ bɑ Jwøk o bong jwøg me ni yɑn. Gïg-ɑ óbï ɑ́mɑ̈ɑ̈gɑ ki kwøbø kɑ̈ge dööng, gïg-ɑ ócwöb ɑ́kwøbɑ cøn. Yɑ ɑ́kööb kinni gïg-ɑ dwɑddɑ gwøgø pɑ nyi bɑ̈jji, gïg-ɑ dwɑddɑ gwøgø nyi gwøgɑ’ gwøgø ceth. Yɑ cwøll-ɑ jɑl megø kì kuni wɑɑng cyɑ̈ɑ̈ng mwøl; ócwøøy piny ni ótïngø o gïg-ɑ ɑ́gwirɑ gɑ møg gwøg, gwøge. Yɑ ɑ́rum ki kwøb, o ge bɑ møg gwøg ceth. “Lïngu møgɑ, wu tyëng-ɑ muddi wun teeg, wu tyëng-ɑ rumø i tyɑ̈mø nudd e lɑ̈wi. Cyɑ̈ɑ̈ng tyɑ̈mø ɑ́nyïïg yi yɑn pɑ lɑ̈wi kinni tek. Medi pyëw-ɑ kɑ̈ɑ̈l yi tyɑ̈m-ɑ muujɑ pɑ cwööng. Yerusɑlem óyiel yi yɑn, kɑ mɑ̈rɑ cïbɑ Isrɑil.” Jwøng-ɑ Ácwɑ̈ɑ̈j okööbø kinni, “Bïí piny kì wïj kwømí, Bɑbïl, kɑ yï pëggí piny yij tør. Yï ɑ́bëëd yï nɑ nyɑnɑjur me nuti nywɑlø yi jɑlø; kɑɑl me nuti mɑgø, de dëlí pɑ nudd e yööm! Anɑn yï bɑ bɑ̈ng! Kwɑny pil! Gur ɑwɑj! Yɑl thɑrɑ̀ kì wïjí! Luny ógudh-ɑ myëër ek wɑ̈g! Yøy ócyëní o nɑm lwød yi yïn! Yï ólidh yi ji yï cyɑ̈dh-ɑ nøw, yï ólidh yi gen wïjí lɑ̈ɑ̈yø, o yï yɑ̈rø. Gøølɑ ócolɑ, o bong ngɑn-ɑ ójog yɑn.” Wɑ døm-ɑ yi kwërø Jwøøg Isrɑil, nyinge bɑ Jwøng-ɑ Ácwɑ̈ɑ̈j, ɑ bɑ Wïlɑ̈bø. Jwøng-ɑ Ácwɑ̈ɑ̈j köbb-ɑ Bɑbïl kinni, “Pëggí piny yï okudø kì yij muudhø; yï pɑ cigi cwøllø këti yïn ɑ́ nyirɑ̈ɑ̈dh pödhh! Yɑ ɑ́bëëd pyëwɑ rɑɑj ki jiɑ, kɑ ge mïdhɑ de ge ce pɑth kɑ jiɑ. Ge ɑ́cïbɑ cingí, o pyëwí nuti lɑ̈ɑ̈mø ki gen, cɑgg ɑ́ tyëng-ɑ bɑ ywödhh, ge nuti wøør yïn. Yï ɑ́rum ce yï ócög yïn ɑ́ nyirɑ̈dh ceth, o møgɑni nuti gɑmø yi pyëwí, wɑlɑ̀ yï nuti rumø kinni ge ócög kidï. “Lïng ɑnɑn, yï ngɑn-ɑ mɑɑr medi pyëw, yï orumø ce kejí døøj, o bong gïn nywɑl yïn. Yï okööbø ce yï dwøng ni Jwøk, o bong ngɑn pɑ̈r ki yïn. Yï ɑ́rum ce yï koo göögø ki thwöm, o nyigí koo thøw. De yï ópɑ̈ɑ̈y piny yi gïgɑni ryeet ge ócwöb kì cyɑ̈ng ɑ́kyel. Cɑgg yï thëdhø, jɑlgølí óthøw ceth geki nyigí. “Yï ɑ́pëgg-ɑ be gøggi rɑjjí; wïjí ɑ́kïïdh yï okööbø ce bong ngɑn nenni yi yïn. Yï ɑ́tööng pɑ̈l yi peli wïjí geki dïdí, kɑ rií ti ki köbbø kinni, ‘Yɑ bɑ Jwøk, bong ngɑn pɑ̈r ki yɑn.’ Ryɑ̈g óbï kömí, o yï pɑ yiel yi thyëdh. Rɑ̈jø óceg ì buk kì kömí, kɑ yï órënyø ki rënyø me nuti rømmø yi yïn! Mïdhí yɑdhí kí wɑ̈llí; ge ɑ́bëëd ge ogöögø yi yïn kër-ɑ ɑ́wöní yï thiinh. Yï ókøny yi gen mɑwɑnø, kɑ tyëng-ɑ mɑɑn yïn obwøgø yi yïn. Bong gïn lwɑ̈ng yi yïn ki gwøgø cɑgg ɑ́ kɑ̀ cïïj yïn. Wiy yï yiel yi ɑ́jwöggí møg-ɑ nyi rɑ̈ngø ki kyell, gen ɑ tyëng-ɑ nyi nenni bëëdi kyell kɑ yij mɑl nyi rɑnggi gen, kɑ yï nyi köbbi gen kì dwɑ̈ɑ̈n kí dwɑ̈ɑ̈n ki gïn-ɑ ócwöb kiperí. “Ge óbëëd ge nɑ wél, ge órɑ̈b yi mɑc! Ri gen koo yiel yi gen; mɑnyɑni óbëëd e lëëdh cɑrø, pɑ pɑ̈r ki mɑny-ɑ nyi wöj. Bene gïndøj men-ɑ ógöggi yïn, yi tyëng-ɑ nyi rɑ̈ngø ki ngïjji piny kì yethi kyell, ji-ɑ ɑ́wöni ge gögg-ɑ yïn. Yï ówiy gen piny kɑ men ókedhø ki yuue, o bong ɑ́kyel men-ɑ ódöng, o yï di yiele.” Lïngu møg wu tyëng Isrɑil, wun ɑ bɑ kwɑrri Yeudɑ̀; wun ɑ nyi köngi ki nyingi Jwøng-ɑ Ácwɑ̈ɑ̈j, o wu okööbø ce wu mɑll-ɑ Jwøøg Isrɑil, de møgɑni pɑ kɑ̈ɑ̈l pëthi wun, o wu pɑ kømmi dyër. O men-ɑ́ wun, wu tɑ̈dø, wu pwöd-ɑ köthi wun ce wu bɑ tyëng kɑɑl kwër, kí kinni wu kor-ɑ yi Jwøøg Isrɑil ɑ nyinge bɑ Wïlɑ̈bø, Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j köbb-ɑ Isrɑil kinni, “Gïg-ɑ ócwöb ɑ́rum ki kwøbø yi yɑn kɑ̈ge dööng; codhe ɑwëggɑ gen cwöbø. Ábëëd e ngɑ̈nyi yi yɑn kinni muní ótëngi ni ngyënyø dødø, kɑ wïjí ótëngø ni dilɑl. Bene ɑ bɑnge ɑ́kwøbɑ gïg-ɑ ócwöb kiperí gïg-ɑ ɑ́cwöb ɑ́kwøbɑ e bøli kej cwöbi gen nuti bëënø, kipe yï ókööbø kinni i bɑ ngïjji jwöggí ɑ wëggi gen cwöbø. “Gïg-ɑ ɑ́kwøbɑ bënn ɑ́cwöb ɑnɑn; yïëëy ceth kinni møg-ɑ ɑ́mɑ̈ɑ̈gɑ ki kwøbø ɑ́bï gɑ dyër. Anɑn yï óköbbɑ ki møg nyɑ̈n møg-ɑ óbï, gïg mø nuti yɑɑl yɑn cøn. Ge wëggɑ’ cwöbø ɑnɑn kete, bong gïn ni menɑni mɑ ɑ́cwöb kɑ̈ge dööng. Ke di bëëd e dɑ gïn ni menɑni mø cwöbø cøn, yï di kööb kinni ngɑ̈nyi yi yïn. Ngɑ̈nyi yi yɑn kinni yï pɑth ki ngɑn ngɑ̈dh, yï ngɑ̈nyɑ ceth yïn ɑ́ ngeti pëëmø. Bene ɑ bɑnge cöög møgɑni nuti lïngø yi yïn kinni tek, ɑ bëëd e bong gïjø mɑ ɑ́lïngi yi yïn kì ri gen. “De linyɑ ónwöngɑ, kɑ pyëwɑ mɑgɑ, kipe kinni o yɑ ólenhi yi ji. Yï ɑ́rɑng yi yɑn kɑ mɑc, ni kenyi leeny ɑ́tegø ki mɑc. De yï ɑ́yodɑ yï bong perí. Gïn-ɑ gwøg yi yɑn gwøgɑ kɑ per kwöngɑ. Nyingɑ pɑ wëggɑ rënyø, wɑlɑ̀ bong ngɑn nywɑg wøn mɑ̈rɑ; mɑ̈rɑni bɑ mi nyingɑ yɑ ketɑ.” Jwøng-ɑ Ácwɑ̈ɑ̈j okööbø kinni, “Lïngí møgɑ yïn ɑ Isrɑil, wun ɑ ji-ɑ ɑ́cwöölɑ! Yɑ bɑ Jwøk, Jwøng-ɑ mɑl, ɑ cyɑ̈n, ɑ bɑ Jwøk kete! Cinggɑ ɑ ɑ́gwøg tyelli piny, kɑ mɑl pedhɑ. Kɑ̀ cwöölɑ mɑl geki piny, ge ceg-ɑ bëën bølɑ ceth. “Cung wun ri wun, kɑ wu lïng wun bënn! Á men kì kelli ngïjji jwöggɑni ɑ ɑ́kööb kinni jɑl-ɑ ɑ́myeg yi yɑn ópɑ̈ɑ̈r kömi Bɑbïl, kɑ gïn-ɑ dwɑddɑ gwøg yi en. Bɑ yɑn ɑ ɑ́kööb; yɑn ɑ ɑ́cwöölii, kɑ peejɑ be tyɑ̈mø. “Nyïngu butɑ, lïngu møg. Yɑ ɑ́kööb e bong gïn kɑn yi yɑn kì ri cɑ̈gø ceth, kɑ kwøbbɑ nyi wëggɑ bëënø gɑ dyër ceth.” (Anɑn yɑ ɑ́thödhi yi Wë, Jwøng-ɑ Ácwɑ̈ɑ̈j ki tege, kɑ yɑ öre.) Kwërø Jwøøg Isrɑil, Jwøng-ɑ Ácwɑ̈ɑ̈j ɑ yiel yïn okööbø kinni, “Bene yɑn Jwøgí, Jwøng-ɑ Ácwɑ̈ɑ̈j, ngɑn-ɑ dwɑddi pwönyi yïn o yï dönyí, o yï nyudhe yuu-ɑ kedh yi yïn. “Keløg ciggɑ di lïngi yi yïn yøw! Gyëdh di mulli kömí ni nɑm men pɑ dwön! Yï di bɑ̈bbi piny kɑ yï otyɑ̈mø ni ɑpɑng-ɑ nyi göjji wɑ̈g. Kwɑrrí di bëëd ge nɑ tør, o bong gïn di ryɑ̈g gen.” Kedhu wɑ̈g kì Bɑbïl, kedh wun wu ótɑ̈bbø! Kɑ̈llu wöödø wu óryeerø kì yethi kɑ̈jj bënn kinni, “Jwøng-ɑ Ácwɑ̈ɑ̈j, bɑ̈nge Isrɑil ɑ́yiele!” Jwøng-ɑ Ácwɑ̈ɑ̈j keny-ɑ ɑ́kɑ̈lle jie kì yij ryɑng-ɑ lëëdh, ɑ thwøwø thwøwø, bong röödhø mɑ ɑ́mɑg gen. Pï ɑ́wëgge bëën wɑ̈g kì yij kït kiper gen; kït ɑ́kɑge kɑ pï rïng-ɑ wɑ̈g kì yije. Jwøng-ɑ Ácwɑ̈ɑ̈j okööbø kinni, “Bong gïn yiel tyëngorøg.” Lïngu møgɑ, wu pödhh-ɑ lɑ̈wi, wu ji-ɑ bëëdø kì kun lɑ̈wi! Yɑ ɑ́myeg yi Jwøng-ɑ Ácwɑ̈ɑ̈j yɑ nuti nywølø, kɑ yɑ kwɑnye yɑn ɑ́ bɑ̈nge. Kɑ kwøbbi dhøgɑ løge møg bedh ni pilø, kɑ yɑ kongge. Yɑ gwøge yɑ nɑ nyɑɑr weth, me bedh, o nenn-ɑ göjjø. Yɑ ɑ́köbbe kinni, “Isrɑil, yï bɑ bɑ̈ngɑ, yɑ ólenhi yi ji kiperí.” Yɑ ɑ́kööb kinni, “Yɑ ɑ́göög, dɑ́ ngø ɑ ɑ́yodɑ kì bɑng gwøngɑni! Yɑ ɑ́göög ki tegɑ, de bong gïjø mɑ ɑ́lwɑ̈ngɑ ki gwøgø.” De Jwøng-ɑ Ácwɑ̈ɑ̈j ógɑ̈nnɑ kinni perɑ ónyɑge; yɑ ókøøg yi en kipe gïn-ɑ gwøgɑ. Yɑ ɑ́kwɑny yi Jwøng-ɑ Ácwɑ̈ɑ̈j yɑ nudd yɑ ying-ɑ yij; yɑ ɑ́kwɑnye yɑn ɑ́ bɑ̈nge, o yɑ dwöögɑ jie, o yɑ dwöögɑ tyëng Isrɑil møg-ɑ tɑɑyø. Yɑ ɑ́nëngi yi Jwøng-ɑ Ácwɑ̈ɑ̈j ki dhwɑ̈ng, kɑ yɑ thödhe ki tegø. Yɑ ɑ́köbbi yi Jwøng-ɑ Ácwɑ̈ɑ̈j kinni, “Dɑ tïj men mëggɑ yïn, bɑ̈ngɑ. Yï koo dwöög-ɑ dhwɑ̈ɑ̈ng Isrɑil kete, kí tyëng Isrɑil møg-ɑ ɑ́bodh; de yï ɑ́gwøøgɑ yïn ɑ́ cɑr kipe pödhh-ɑ kyeelø; kipe kinni o kömi piny yiel bëne.” Jwøk kwërø, yïëni Isrɑil köbb-ɑ ngɑn-ɑ cedh ki menteg, ɑ mɑɑn yi pödhh, o bɑ bɑ̈ng jɑgg, kinni, “Yï ólidh yi rɑ̈nhì yï bɑ ɑgøny; rɑ̈nhì óbï kɑ ri gen bøødh gen piny kì bølí; gïn-ɑ ɑ́gwøg yi gen ólidh yi nyiirɑ̈dhh, kɑ ri gen bøødh gen bølí thyew.” Møgɑni ócwöb mɑ́ Jwøng-ɑ Ácwɑ̈ɑ̈j bɑ̈nge ɑ́myege, kwërø Jwøøg Isrɑil, gïn-ɑ ɑ́kwøbe nyi gwøge’ gwøgø. Jwøng-ɑ Ácwɑ̈ɑ̈j köbb-ɑ jie kinni, “Keny-ɑ óbëën bøli kej yieli wun, mø wun ólïngɑ o kwɑ̈jji wun ólïngɑ kɑ wu yielɑ. Wu ókorrɑ kɑ wu konggɑ, kɑ wø olwöbø ki pödhh-ɑ kyeelø kì rií. Yï ówëggɑ døøgø ki pëggi pinyí, eni piny-ɑ dööng nøw ɑnɑn. Amɑgg óköbbɑ kinni, ‘Kedh wun, wu ɑ́gøny!’ Kɑ tyëng-ɑ yij muudhø köbbɑ kinni, ‘Bï wun wɑ̈g yij cɑr!’ Ge óni dyëg møg cyɑ̈mø kì wïj kwøømø, ge koo mɑg yi kɑ̈j wɑlɑ̀ röödhø. Ge koo nɑ̈g yi lëdhi cɑ̈ng geki lëdhi ryɑng, mɑ́ ge ópyejj-ɑ yi ngɑn mɑɑr gen. Gï ópeeje kömi nɑ̈mmì møg rïngi yi pï. “Yɑ ógöögø ki yuu wëll me bɑ̈ɑ̈n kïttì, kɑ yɑ ogöögø ki yöö men yije cyɑ̈dhi yi jiɑ. Jiɑ óbï ge kɑ̈ɑ̈l-ɑ kun me lɑ̈wi, kwï gen kɑ̈ɑ̈l-ɑ wɑɑng wuudø, kí wɑɑng cyɑ̈ɑ̈ng böörø, møøgø kɑ̈ɑ̈l-ɑ Aswɑn, kì wɑɑng wurlwɑl.” Wöör yïn ɑ mɑl! Ryeer yi medi pyëw yïn ɑ piny! Wiy kïttì gönyi gen ki wör! Jwøng-ɑ Ácwɑ̈ɑ̈j jie ókøny yi en; pyëwe ólɑ̈ɑ̈m ki jie møg-ɑ rɑngø. De tyëng Yerusɑlem ɑ́kööb kinni, “Wɑ ɑ́wiy piny yi Jwøng-ɑ Ácwɑ̈ɑ̈j! Wɑ ɑ́wïl kì wïje!” Codhe, ɑlöggi Jwøng-ɑ Ácwɑ̈ɑ̈j kinni, “Ányödø nyɑre ócuggø wïlø kì wïje kɑ nyɑɑr yije ocögø gø pɑ mɑɑre? Cɑgg ɑ́nyödø wïje wïl ki nyɑre, wu pɑ wïl kì wïjɑ. Wïjɑ pɑ wïl ki yïn, Yerusɑlem! Nyingí ɑ́gweedɑ yethi cinggɑ. “Tyëng-ɑ ódøøg yïn ki gerø ɑ́cyɑ̈ngi ki bëënø, o tyëng-ɑ ɑ́rënyi yïn ókedh. Lïïdh bɑdhhí kɑ gïn-ɑ cwöb liidh! Jií cong-ɑ ri gen; ge ceg-ɑ bëën yïí! Yɑn ɑ köngi èn, yɑ Jwøng-ɑ Nëënø, yï óbëëd yï ótøllø kipe jií, ni kenyi tølli nyɑdhɑy nywöm kipe tigge. “Isrɑil, pödhí ɑ́rënyi kɑ döng-ɑ nøw, de ógöögø e dhiing ɑnɑn; yi ji-ɑ dwöög be bëëdø kì yije. O tyëng-ɑ ɑ́rënyi yïn ge ókïdhi kun me lɑ̈wi. Jií møg-ɑ dwöög kì yïnø, yï óköbbi yi gen cyɑ̈ng megø kinni, ‘Piny men thiinh cɑrø, wø dwɑdd-ɑ keny lɑj me bëëd yi wøn!’ Codhe, o rií köbbí kinni, ‘Á men ɑ ɑ́nyölli yɑn nywøl møg bënn? Nyigɑ ɑ́lɑ̈ɑ̈ny kɑ yɑ odöngø yïɑ bong nywøl. Yɑ ɑ́kïdhi yïnø; ɑ́ men ɑ ɑ́pidh nywøl møg? Yɑ ɑ́wiy yɑ ketɑ, nywøl møg ɑ́kɑ̈ɑ̈l-ɑ keny?’ ” Wïlɑ̈bø, Jwøng-ɑ Ácwɑ̈ɑ̈j köbb-ɑ jie kinni, “Cingɑ ótïngɑ pödhh-ɑ kyeelø, o nyigi wun dwöög pɑc yi gen. Rɑ̈nhì óbëëd ge nɑ wëëg kì yï wun; kɑ bɑ̈nggi rɑ̈nhì nɑ mëëg kì yi wun. Ri gen óbøødh gen bøli wun kɑ wu wør yi gen, ge ógöögø ni mööl yi kɑ wør gen wun. Codhe o yod yi wun kinni bene yɑn Jwøng-ɑ Ácwɑ̈ɑ̈j, ngɑn nenni kønyø yi yɑn, wïje pɑ nyi lɑ̈ɑ̈y.” Jɑmm-ɑ ɑ́mɑg yi jöd kì yij liny ócuggø kwɑnyø? Amɑgg ócuggø kwɑnyø kì cingi jɑgø mɑ ɑ́muddi ji? Jwøng-ɑ Ácwɑ̈ɑ̈j ólöggi kinni, “Bene gïn-ɑ ócwöb ɑnɑn ceth. Tyëng-ɑ ɑ́mɑg kì yij liny ókɑ̈l, o jɑmm-ɑ ɑ́mɑg yi jɑng-ɑ bɑ ɑ́muddi ji ókwɑny kì yïe. Yɑ ónyïɑ̈ggi ki ngɑn-ɑ ónyïɑ̈ggi ki yïn, o nyigí óyiel yi yɑn kì cinggi tyëngmɑ̈ɑ̈nø. Tyëng-ɑ guud wɑngí ógöjjɑ nɑ̈gi ri gen, wɑ̈thi gen ówïïnø yi rem. Codhe o yod yi dhɑnhø bëne kinni bene yɑn Jwøng-ɑ Ácwɑ̈ɑ̈j, ngɑn-ɑ yiel wun, en ɑ gööny wun wɑ̈g kì yethi töjjì. Óyod yi gen kinni bene yɑn Jwøøg Isrɑil, Jwøng-ɑ teg.” Jwøng-ɑ Ácwɑ̈ɑ̈j okööbø kinni, “Wu orumø kinni jiɑ ryeem yɑn ni kenyi tɑ̈ɑ̈ng nyɑndhɑjø yi jɑlø? De wɑ̈nyi tɑ̈ng ying-ɑ keny? Wu orumø kinni wu ɑ́ceg yi yɑn kɑ ngeew wɑ̈g, ni jɑl me ngeew nyige gɑ bɑ̈ngg? Pɑth, wu ɑ́kɑ̈l wu bɑ ɑmɑgg kɑ gööj orøøg wun. Wu ɑ́køøl yïnø kɑ per rɑjj-ɑ ɑ́gøggi yi wun. “Á kipe ngø ɑ bɑɑny yɑn ki ywöörø yi jiɑ keny-ɑ ɑ́bëënɑ be yieli gen? Gede ɑ ɑ́bɑny gen yïëyø keny-ɑ ɑ́cwølɑ gen? Yɑ ceg-ɑ nyøødhø ge pɑ cuggi yielø yi yɑn? Nɑɑm omelø ócuggø thwøwø yi kwøbbi dhøgɑ, kɑ nɑ̈mm-ɑ rïngi løgɑ ryɑng, kɑ rij othøø kì yethi gen yi kɑ̀ bëëde e bong pï. Mɑl ócuggø gwøgø yi yɑn e looj e ce ywøg-ɑ thøø.” Yɑ ɑ́pwönyi yi Wë Jwøng-ɑ Ácwɑ̈ɑ̈j ki møg-ɑ ókwøbɑ, kipe kinni o yɑ cïjɑ ngɑn köme di ɑkørr. Pyëwɑ nyi wëgge’ okøn kì mwøl yethi cyɑ̈ng ki lïngi møg-ɑ pwönye yɑn. Yɑ ɑ́thödhi yi Jwøng-ɑ Ácwɑ̈ɑ̈j ki dïdø, o yɑ nuti pëmø, wɑlɑ̀ ngɑ̈jɑ nuti lugi yɑn en. Kömɑ ɑ́yɑ̈llɑ tyëng-ɑ pwöd yɑn, ge nuti kyëddi yɑn keny-ɑ ɑ́gwɑddi yɑn yi gen, yɑ nuti löggø keny-ɑ ɑ́punhi yëyyi tïgɑ yi gen, kɑ ge ngudd-ɑ nyingɑ ki lɑ́ɑ̀w. De pyëwɑ nuti rënyø yi ɑgwɑddi gen, mɑ́ yɑ ɑ́køny yi Wë Jwøng-ɑ Ácwɑ̈ɑ̈j. Kɑ yɑ ocögø yɑ pɑ wïyi ki dyëjø, mɑ́ yɑ ngɑ̈ny wøw kinni yɑ koo yɑ̈r, mɑ́ Jwøk cyɑ̈gi kì butɑ, o ónyodh yi en kinni yïɑ bɑ̈r. Dɑ ngɑn cuggi gøønyi yɑn? Wiy wø kedhi wøn burø ki en, kɑ wiy kwøbe gønye! Wë Jwøng-ɑ Ácwɑ̈ɑ̈j kiree ɑ ɑ́cwɑg yɑn, ɑ́ men ɑ cuggi nyodhi kinni yɑ bɑ̈jjø? Tyëng-ɑ ɑ́gøøny yɑn ólɑ̈ɑ̈ny bënn, ge órënyi ni ógønh-ɑ ócɑmø yi rob. Wu tyëng-ɑ wør Jwøng-ɑ Ácwɑ̈ɑ̈j bënn, lïngu kwøbbi bɑ̈nge. Yuu-ɑ yije kɑ̈lli yi wun ócuggø bëëdø ɑ́ muudhø kidyër, de ngɑ̈dhu Jwøng-ɑ Ácwɑ̈ɑ̈j, mɑ̈gi wun kì ri Jwøøg wun. Wu tyëng-ɑ tuumø kipe rënyi tyëngmøøgø, wu óryɑ̈g-ɑ yi gïg-ɑ rømmi yi wun kipe göggi tyëngɑni. Møgɑni ówëggi cwöbø yi Jwøng-ɑ Ácwɑ̈ɑ̈j kiree; wu óthøw wu orɑngø. Jwøng-ɑ Ácwɑ̈ɑ̈j okööbø kinni, “Lïngu møgɑ, wu tyëng-ɑ dwɑddi yielø, wu tyëng-ɑ bï yïɑ be kønyø. Rømmu kït men-ɑ́ ree ɑ́kɑ̈ɑ̈l wun, eni bur men-ɑ́ yije ɑ́kuuny wun kì yij kït. Rømmu kweyi wun, Abrɑhɑm, kí Sɑrɑ̀ ɑ́ ree ɑ́kɑ̈ɑ̈l yi wun. Abrɑhɑm ɑ́bëëd yïe bong nyir keny-ɑ ɑ́cwølɑ en, de ɑ́gyëdhɑ kɑ nëngɑ ki nywøl, kɑ kwɑrre gwøgɑ ge gïïr. “Pyëwɑ ólɑ̈ɑ̈m ki Yerusɑlem, kí tyëng-ɑ bëëdø kì yethi ɑruggì kì yije piny bɑ ryɑng. Cɑgg ɑ́ kɑ̀ göög pinye ɑ́ ryɑng, ógwøg yi yɑn ɑ́ bɑg, óbëëd e nɑ bɑng-ɑ ɑ́pidhɑ kì Eden. Medi pyëw óløg me nud kì yije, kɑ yɑ pøjji yɑ olenhø ki wör. “Lïngu kwøbbɑ, wun ɑ jiɑ, lïngu møg-ɑ kwøbɑ; mɑ́ pödhh ceg-ɑ yi yɑn, ge ónëngi ki cɑr yi ciggɑ. Yɑ ójwɑn bëën be yieli gen, bøli keny-ɑ tyɑ̈ɑ̈mɑ ɑ́cyɑ̈ngi. Yɑn kiriɑ ɑ ójɑɑg pödhh. Pödhh-ɑ lɑ̈wi nenn-ɑ bëënɑ, ge yïdø ge ongɑ̈dhø kinni ge óyiel yi yɑn ceth. Lidh wun mɑl, kɑ piny lidh wun; mɑl ólɑ̈ɑ̈ny ni yïrø, piny órënyi ni ógødh kenyi døngi kɑ̈ge, o jie óthøw bënn ni lwɑngì. De yïëdø men-ɑ kɑ̈ɑ̈l yïɑ gït-ɑ ɑtheer. “Lïngu møg, wu tyëng-ɑ ngɑ̈nyi dyër, wu tyëng-ɑ ciggɑ ócïb yethi pëthi gen. Pëthi wun ko nyi lïngi kenyi dhɑ̈ɑ̈l wun kɑ wu gwɑddi yi teedø, mɑ́ ge ócɑm yi rob ni ógødh, kɑ ge cɑm yi lyedø ni yëyy. De yïënɑ gït-ɑ ɑtheer, o tyɑ̈mɑ tyëg-ɑ rïj bënn.” Dhwöödh Jwøng-ɑ Ácwɑ̈ɑ̈j, kɑ wø køny! Göög tegí, kɑ wø yieel, göög ki tengɑni ni kɑ ɑ́göögí kɑ̈ge dööng cøn. Bɑ yïn ɑ ɑ́kebbi Lebiyɑthɑn lɑ̈y-ɑ ditïngdïr. Bɑ yïn thyew ɑ ɑ́wëggi nɑɑm omelø dwönø, kɑ yï ogöögø ki yöö men bɑ̈ɑ̈n pï, o ji-ɑ yiel yi yïn kɑ̈l gen yij yuuɑni. Ji-ɑ ɑ́yiel yi yïn ódøøg Yerusɑlem pëthi gen omedø, ge owörø, ge óryeerø yi medi pëëth. Ge óbëëd pëthi gen med; ge pɑ ywöngi o ge pɑ kïïmø gïti ɑtheer. Jwøng-ɑ Ácwɑ̈ɑ̈j okööbø kinni, “Bɑ yɑn ɑ ɑ́nëngi wun ki tegø. Á kipe ngø ɑ böggu dhɑnhø ɑ nyi thøw, e nɑ lum ɑ pɑ nyi cwööng ki thøø? Wɑ̈thi wun ɑ́ceg-ɑ wïlø ki Jwøk ɑ ɑ́cwɑ̈j wun? Eni ngɑn-ɑ ɑ́pedh mɑl, kɑ tyelli piny tɑ̈ɑ̈ge? Á kipe ngø ɑ cög wu óböggø yi tyëng-ɑ guud nyingi wun? Wu bögg-ɑ rɑ̈ji gen ki tegi gen? Tyëng-ɑ bɑ ɑmɑgg ɑ́cyɑ̈ngi ki gønyø, ge óbëëdø kì kömi piny ki keny me bɑ̈ɑ̈r, o bong gïncɑm men-ɑ ójɑ̈ddi gen. “Mɑ́ bene yɑn Jwøøg wun, Jwøng-ɑ Ácwɑ̈ɑ̈j yɑn ɑ nyi öjji nɑɑm omelø, kɑ ɑpɑge nyi wëggɑ ruurø. Nyingɑ bɑ Wïlɑ̈bø, Jwøng-ɑ Ácwɑ̈ɑ̈j! Yɑn ɑ ɑ́pedh mɑl kɑ tyelli piny tɑ̈ɑ̈gɑ. Yɑ köbb-ɑ tyëng Yerusɑlem kinni, ‘Wu bɑ jiɑ! Kwøbbɑ ɑ́pwönyɑ wun kɑ wu korrɑ ki cinggɑ.’ ” Yerusɑlem, cyëëw! Mej rií kɑ yï dhwödhí mɑl! Yï ɑ́rum ki mɑ̈dhø kì yij óthɑ̈ngi cɑ́y men-ɑ ɑ́mëggi yïn yi Jwøng-ɑ Ácwɑ̈ɑ̈j ki rɑ̈ji pyëwe kinni mɑɑdh; ɑ́mɑdh yi yïn kɑ yï wëgge cyerrø. Bong ngɑn pyejji yïn, bong dhɑnhø kì kelli jií men mɑg cingí kɑ yï pyejje. Ryɑ̈g me dwøng ɑ́rum ki pɑ̈dhi kömí; pinyí ɑ́rënyi yi liny, kɑ jií ywɑj yi kɑ̈j. Bong ngɑn mɑ pyëwe ɑ́lɑ̈ɑ̈m ki yïn. Nyigí ɑ́dhɑ̈ɑ̈r, ge ceg-ɑ pɑ̈nhhø kì yethi yëëth bënn, ge nɑ ɑ́køny men-ɑ ómɑgø yi wunn. Tegi rɑ̈ji pyëw Jwøng-ɑ Ácwɑ̈ɑ̈j ɑ́lidh yi gen. Wu tyëng-ɑ rɑngø kì Yerusɑlem, wu cyerri nɑ tyëng-ɑ ónɑ̈gø yi møgø. Wu ócwɑg yi Jwøng-ɑ Ácwɑ̈ɑ̈j, ókööbø kinni, “Óthɑ̈ng-ɑ ɑ́mëggɑ yïn ki rɑ̈ji pyëwɑ kwɑnyɑ’ kwɑnyø kì yïí. Yï koo cigi mɑ̈dhø ki møng-ɑ nyi wëggi yïn cyerrø. Óthɑ̈ngɑni ómëggɑ tyëng-ɑ ɑ́guud wɑngí; mëggɑ’ tyëng-ɑ ɑ́göjji yïn buddø kì piny kì yethi yëëth, kɑ yï nyøn gen, de yï nɑ tuggì.” Yerusɑlem, dhwöödh! Dhwöödh! Løny ógødhí, ógønh-ɑ myër rií! Ji-ɑ kwïj Jwøk pɑ kedhi yij dörí këti. Gøny rií kì yethi töjjì, Yerusɑlem! Dhwöödh kì yij tør, kɑ yï pëggí wïj kwømí. Pɑ̈ɑ̈d wun ɑcebbì wɑ̈g kì muddi wun, wu tyëng Dhɑyøn møg-ɑ bɑ ɑmɑgg! Wë Jwøng-ɑ Ácwɑ̈ɑ̈j köbb-ɑ jie kinni, “Keny-ɑ ɑ́göög wun ki bɑ̈ngg, bong gïjø mɑ ɑ́ngeew wun; bong gïjø men-ɑ ócol thyew ɑ́ men gøøny wun. Keny-ɑ ɑ́kedhu Rïp be bëëdø wun ɑ́ wëdhh, wu ɑ́kedh kɑ wɑ̈thi wun. Wu ɑ́kɑ̈l kɑ tegø thyew yi tyëng Acuur, o bong gïjø mɑ ɑ́col yi gen. Gïn ni menɑni ɑ ɑ́cwöb ɑnɑn kì Bɑbïlöniyɑ̀, wu bɑ ɑmɑgg, o bong gïjø mɑ ɑ́col yi gen kiper wun. Tyëng-ɑ jɑɑg wun törr-ɑ wɑ̈thi gen ki ɑjyedh, o ge beny-ɑ yɑn yethi cyɑ̈ng. Óyod yi wun kì bøli keny megø kinni bene yɑn Jwøk, o yɑ ɑ́rum ki kwøb ki wun.” Døøj nɑ ngø, eni lidhi jɑlwöödø, e kɑ̈ɑ̈l-ɑ kelli kïtti, e kɑ̈ll-ɑ wöödø me med, wööni mër! Bï-ɑ be köbbi Dhɑyøn kinni, “Jwøgí bɑ rɑ̈dh!” Tyëng-ɑ kor kɑɑldwøng óryeerø, ge ryeer-ɑ́ɑ̀ wïj ɑ́kyel ki medi pëëth! Jwøng-ɑ Ácwɑ̈ɑ̈j onennø yi gen ki nyingi gen kɑ̀ dwööge Dhɑyøn! Ryeer wun ki medi pëëth, wun ɑ ɑruggi Yerusɑlem! Jwøng-ɑ Ácwɑ̈ɑ̈j kɑɑle, kɑɑldwøng ódøme kɑ jie wëgge ywömø. Jwøng-ɑ Ácwɑ̈ɑ̈j ógöög-ɑ tege kwërø; jie óyiel yi en, kɑ kömi piny bëne ólïdhø. Dhwödh wun! Dhwödh wun kì Bɑbïlöniyɑ̀, wu tyëng-ɑ kɑ̈lli jɑmmi kwër mø kengø! Wu ko nywɑ̈ddi ki gïn ywëdhø, kwër wun ri wun kɑ wu kedh wun ceth. Wu koo yöllø kipe wɑ̈dh, mɑ́ wu pɑ ceg pɑ̈ɑ̈rø. Wu ópyejj-ɑ yi Jwøng-ɑ Ácwɑ̈ɑ̈j Jwøøg wun, o wu ókorre kì wɑ̈thi tùng bënn. Jwøng-ɑ Ácwɑ̈ɑ̈j okööbø kinni, “Bɑ̈ngɑ tïje ɑ́tyëge kidøøj, kɑ wør ki mendwøng. Ji mø gïïr dëlli gen ɑ́juur keny-ɑ ɑ́lidh ge gøn cøn, mɑ́ e ɑ́bëëd e ce pɑ nënni ɑ́ dhɑnhø yi kɑ órënyi bøle. De ɑnɑn pödhh mø gïïr óngɑ̈ng keny-ɑ ólidhii yi gen, rɑ̈nhì dhøggi gen óngɑm, keny-ɑ ólïdhi gen ki gïjø me nuti pɑ̈nyø’ köbbi gen, kɑ gïjø me nuti pɑ̈nyø lïngø yi gen gɑm yi wɑ̈thi gen.” Kɑ teedø ólöggø kinni, “Á men ɑ yïëy møg-ɑ dwøg yi wøn ek? Á men ɑ cuggi lidhi kej cingi Jwøng-ɑ Ácwɑ̈ɑ̈j kì ri møgɑni? Bɑ gïn-ɑ ɑ́dwɑddi yi Jwøng-ɑ Ácwɑ̈ɑ̈j kinni, o bɑ̈nge dønge ni yɑdh me byerre niyeeng piny. Yïe ɑ́bong-ɑ døøjø kí dhwɑ̈ng, mø per gen di wør wɑ en. Bong gïjø me pere di tyeerii bong gïjø mɑ ɑ́wëggi wɑ tyeri nyegi bute. Ábɑny yi ji kɑ benyi yi gen; ɑ́rɑngi kɑ okïïmø e ceg-ɑ ngïnø. Bong dhɑnhø mɑ ɑ́pɑ̈nyi lïïdh yïe, ɑ́wøy yi ji de ce bong-ɑ keje. “De orɑngɑni ɑ́ngine, eni orɑng-ɑ di rɑngi wɑ. Wɑ ɑ́rum kinni orɑng-ɑ rɑnge bɑ cɑ́y mø kɑ̈ɑ̈l yï Jwøk. De bɑ gööj orøgee ɑ ɑ́yïdde ki kedø, ɑ́pwöd kɑ per rɑj møg-ɑ ɑ́gwøg yi wɑ. Wɑ ɑ́bødh kì bɑng cɑ́y-ɑ ɑ́ngine, dëllee ɑ́yöni kì bɑng pwön-ɑ ɑ́pwöödii. Wɑ bënn, wɑ ɑ́bëëd wɑ nɑ dyëg møg lɑ̈ɑ̈nyø, men twɑ̈l-ɑ́ɑ̀ wɑ̈ye. De cɑ́y ɑ́gøøj köme yi Jwøng-ɑ Ácwɑ̈ɑ̈j, eni cɑ́y-ɑ di bëëd gɑ møgee. “Ágöggi gïjø me rɑj, de gø ɑ́ngine ki möölø, dhøge nuti pɑ̈ny en ki tugø. Ábëëd e nɑ órömø men kïdhi be ngɑlø, nɑ dyel rømø kì bøli ngɑn nyɑr yëyye, nuti pɑ̈nyi löggø. Ámɑg kɑ cɑy ki thøø, kɑ kïdhi be nɑ̈gø, o bong ngɑn mɑ ɑ́nyɑg keje. Ánɑ̈g kɑ per orøøg jiee. Röre ɑ́cïb kelli rörri tyëngrijjø, ɑ́koony kelli tyëng kɑ̈rì, ngö e bong gïnrɑj mɑ ɑ́gwøøge, o bong pyed mɑ ɑ́kɑ̈ɑ̈l dhøge.” Jwøng-ɑ Ácwɑ̈ɑ̈j okööbø kinni, “Ádwɑdd-ɑ yi yɑn kinni rɑnge, thøw ɑ́ gëëdhi men gøøm orøøg tyëng-ɑ kyeelø. Óbëëdø ki døøjø kɑ kwɑrre lidhe; óbëëdø kì kömi piny ki keny me bɑ̈ɑ̈r o gïn-ɑ dwɑddɑ, gwøgɑ kì ree. Ódøøg ki yïddø ki medi pyëw kì bɑng orɑng-ɑ ɑ́rɑnge, o óyod yi en kinni orɑnge dɑ gïjø mɑ ɑ́nywøle. Bɑ̈ngɑ, bɑ̈ng-ɑ dyër, ngɑn-ɑ pyëwɑ med ki en; óngïnø kipe ji mø gïïr, o pyëwɑ ólɑ̈ɑ̈m ki gen kipere. Ócïbɑ keny wørii, kì kelli tyëng-ɑ døngø, ɑ yï gen di tegø. Wëye ɑ́muuje kɑ kwɑɑn kelli tyëngrijjø. Ree ɑ́gøøme bøli tyëngorøg mø ngenyø, kɑ ókwɑ̈jjø o lɑ́ɑ̀w dwöög piny kiper gen.” Yerusɑlem, yï ɑ́bëëd yï nɑ ngɑndhɑjø me kööre bong nywøl, de ɑnɑn yï ócuggø wör pyëwí omedø. Anɑn yïí ódi nywøl mø ngenyø kibøli ngɑndhɑjø me nuti pɑ̈nyø wiy piny yi jɑlgøle! Lɑny kemɑ̀ men-ɑ yije bëëd yi yïn, gwøg thølle ge bɑ̈rrø, kɑ pijje gwøøg ge teeg. Kewí ócøør cyɑ̈n yi yïn kì wɑ̈thi tùng bënn; Jií pìnyi gen ódøøg yi gen ki kwɑnyø kì yï tyëng-ɑ kwɑɑny gen ɑnɑn. Kɑ̈dd-ɑ døngø møg-ɑ wɑ̈dhi bëëdø ɑnɑn, ópɑ̈ng yi ji. Yï ko böggi, yï pɑ cigi yɑ̈rø, yï pɑ thɑɑny piny këti. Bëën-ɑ ɑ́kwïj bëëdø yï cer-ɑ dɑ̈ngø ówïl kì wïjí, geki muum-ɑ ɑ́muum, e yïí bong jɑlø. Ngɑn-ɑ ɑ́cwɑ̈j yïn óbëëd ɑ́ jɑlgølí nyinge bɑ Wïlɑ̈bø, Jwøng-ɑ Ácwɑ̈ɑ̈j. Yï óyiel yi kwërø Jwøøg Isrɑil, en ɑ jɑɑg kömi piny bëne. Isrɑil, yï nɑ ngɑn cer dɑ̈ngø men-ɑ ówiy piny yije bɑɑrø yi jɑlgøle. De Jwøng-ɑ Ácwɑ̈ɑ̈j yï ɑ́cwööle yïe, ɑ́kööb kinni, “Yï ɑ́wiyɑ kɑ nyɑ kɑɑm me nøg, yï dwöögɑ’ dwöögø ki mɑ̈ɑ̈dø me dwøng. Ngɑ̈jɑ ɑ́løgɑ pyëwɑ rɑɑj, kɑ nyɑ keny me nøg yøw, de ɑnɑn yï mɑɑrɑ’ mɑɑrø gïti ɑtheer.” Bene møg-ɑ ɑ́kwøb yi Jwøng-ɑ Ácwɑ̈ɑ̈j, ngɑn-ɑ døm yïn. “Yɑ ɑ́kyëëd kì ri Nöö kinni piny pɑ cigɑ mudø ki bɑɑyø këti. Anɑn yɑ ɑ́kyëëd kinni pyëwɑ pɑ cigi rënyø ki yïn; yï pɑ cyɑ̈r yi yɑn, wɑlɑ̀ yï pɑ cɑy yi yɑn. Kïtt-ɑ døngø kí møg-ɑ thønhø ri gen ómød yi gen, de mɑɑr-ɑ mɑɑrɑ yïn pɑ thumi; mër-ɑ ɑ́kwøbɑ kiperí ómïdhɑ ceth.” Bene gen møg-ɑ ɑ́kwøb yi Jwøng-ɑ Ácwɑ̈ɑ̈j ngɑn-ɑ mɑɑr yïn. Jwøng-ɑ Ácwɑ̈ɑ̈j okööbø kinni, “Yerusɑlem, yï kɑɑldwøng, yïn ɑ wïjí cungø yi orɑng, e bong ngɑn lug yïn, yï ódøøgɑ ki gerø ki kïttì møg per gen teg. Dörr-ɑ bɑ̈rrø møg-ɑ kur ógërrɑ yïn ki kïttì mø rɑ̈nggø, dhøggi dörí óger yi yɑn ki kïttì mø rɑ̈ɑ̈dø ni mɑc, o dör-ɑ wen yïn gerɑ ki tigg-ɑ per gen teg. “Yɑn kiriɑ ɑ ópwönyi jií, o ge óthödhɑ ki døøjø kí mër. Yï ótëngi yi bëëntir, wɑngí koo guud, wɑlɑ̀ bong gïn-ɑ óböggi yi yïn. Ngɑn bï be pɑ̈ɑ̈r kömí, pɑth ki yɑn ɑ örii, ngɑn nyïɑ̈ggi ki yïn ceg-ɑ pɑ̈ɑ̈dhø. “Yɑn ɑ ɑ́cwɑ̈j bødhi ngyënyø, ɑ nyi kudhø ki mɑc kɑ othɑ̈dhø ki jɑmmi liny, yɑn ɑ ɑ́cwɑ̈j jɑl-liny thyew, jɑl-ɑ nɑ̈gø ki ji ki jɑmmi liny møgɑni. De bong gïi liny men-ɑ ónyïɑ̈g yïn, ngɑn gøøny yïn, yï óyïddi ki møg løøg kwøbbe. Yɑ ónyïɑ̈ggi kiper bɑ̈nggɑ, kɑ ge wëggɑ tyɑ̈mø.” Jwøng-ɑ Ácwɑ̈ɑ̈j ɑ́rum ki kwøb. Jwøng-ɑ Ácwɑ̈ɑ̈j okööbø kinni, “Bï wun, wu tyëng-ɑ ri wun di röödhø bënn, pï ɑ keny èn! Bï wun, wu tyëng-ɑ yï wun bong ngyëny, ngëëw wun ki byel kɑ wu cyɑ̈ɑ̈m wun! Bï wun, kɑ wu ngëëw wun ki møgi oløg geki cɑg, bong gïn kɑ̈l yi gen kì yï wun! Á kipe ngø ɑ ngew wun ngyëny gïg-ɑ pɑ yɑ̈ng wun? Ede ngyënyyi gwøøg wun ɑ ngëëw wun gen ki gïncɑm, o wu nudd ri wun dɑ kɑ̈j? Lïngu møgɑ, kɑ gïn-ɑ köbbɑ wun gwøg wun, o wu óyɑ̈ng wun yi gïgcɑmm møg døj. “Lïng wun jiɑ, kɑ wu bïu yïɑ; bïu yïɑ o wu yïddi wun ki nënnì! Wɑ ólwöbø ki lwöbø men gïti ɑtheer, kɑ wu mëggɑ gyëdhh-ɑ ɑ́kwøbɑ kinni ge ómëggɑ Debïd. Ágwøg yi yɑn ɑ́ jɑgø men pyejji pödhh, kɑ ge nyudhɑ tegɑ kì ree. Anɑn yï cwøll-ɑ pödhh mø kwïj yi yïn, o yï ɑ́bëëd yï kwïj yi gen, de ge óbï yïí ge órïngø ɑnɑn. Yɑn yɑ Jwøgí, Jwøng-ɑ Ácwɑ̈ɑ̈j, kwërø Jwøøg Isrɑil, gïgɑni ówëggɑ cwöbø; yï ónëngɑ ki dhwɑ̈ng geki mɑ̈r.” Døøg wun kö Jwøng-ɑ Ácwɑ̈ɑ̈j, kɑ mɑlli wun, kɑ̀ bëëde e cyɑ̈gi ɑnɑn. Wiy bëënrɑj wiy yi tyëngrijjø, kɑ rummi gen wil gen. Døøg gen kö Jwøng-ɑ Ácwɑ̈ɑ̈j Jwøgee, pyëwe yöd, pyëwe nyi jwɑn-ɑ lɑ̈ɑ̈mø. Jwøng-ɑ Ácwɑ̈ɑ̈j okööbø kinni, “Rummɑ pɑ pɑ̈r ki rummi wun, o yëth-ɑ göögɑ bɑ̈ɑ̈n ki yëth-ɑ göög yi wun. Rummɑ ying-ɑ mɑl kibøli rummi wun, ni kɑɑm mɑl kí piny. “Kwøbbɑ nɑ ɑ́piy kí kødh ɑ nyi bï ge kɑ̈ɑ̈l-ɑ mɑl, kɑ piny cɑw yi gen. Kɑ byel otwïyø yi gen, kɑ gïncɑm yod kí köödh møg-ɑ ókɑ̈g. Kwøbbɑ bëëd ɑ nøw ceth; gïn-ɑ dwɑddɑ kipere pɑ nyi bɑ̈jji, gïn-ɑ pere örɑ en nyi gwøge’ gwøgø ceth. “Wu ódhwödh kì Bɑbïl ki medi pëëth, wu ówëggi kedhi wɑ̈g kì kɑɑlɑni ki mër, Kïtt-ɑ døngø kí kïtt-ɑ thønhø ócɑ̈gi ki wör kɑ yenh owörø ge óryeerø ki medi pëthi gen. Thïm-ɑ bɑ ɑ́lɑl, ɑ yije pɑ̈ng yi koodh ɑnɑn, keje ótwïy yi yenh sɑndɑl geki óthurø. Menɑni óbëëd ɑ́ ngïji me gïti ɑtheer, ngïji me pɑ̈ddi ji ki gïn-ɑ ɑ́gwøg yi yɑn, yɑ Jwøng-ɑ Ácwɑ̈ɑ̈j.” Jwøng-ɑ Ácwɑ̈ɑ̈j köbb-ɑ jie kinni, “Bëëd wun wu gøgg-ɑ dyër, mɑ́ yɑ ɑ́cyɑ̈ngi ki yïëdø, o yɑ nyodhɑ bëëdɑ yɑ gøgg-ɑ dyër. Tyëng-ɑ nyi mïdhi Sɑbɑth kidøøj ri gen dɑ gyëdh. Tyëng-ɑ pɑ nyi göögø ki gïgrijjø ógyëdh yi yɑn.” Ngɑn-ɑ ɑ́rëbi ki jii Jwøng-ɑ Ácwɑ̈ɑ̈j koo kööbø kinni, “Jwøng-ɑ Ácwɑ̈ɑ̈j yɑ koo wëgge mɑ̈ddø kyeel ki jie.” Jɑl-ɑ bɑ órøj koo pɑ̈nyi rumø kinni, mɑ́ e pɑ cuggi nywølø, pɑ cuggi ying kelli jii Jwøk. Jɑl-ɑ ni menɑni di köbbø yi Jwøng-ɑ Ácwɑ̈ɑ̈j kinni, “Keløg yɑ owørø yi yïn ki mïdhi Sɑbɑth, o keløg yï gøgg-ɑ gïg med kì pyëwɑ kɑ ciggɑ mïdhi yi yïn kidøøj, nyingí ópɑrri kì Kengɑ geki kelli jiɑ ki keny me bɑ̈ɑ̈r, kibøli ke di bëëd yïí dɑ wɑ̈ddí kí nyigí. Yï pɑ pɑ̈nyi wïlø.” O Jwøng-ɑ Ácwɑ̈ɑ̈j köbb-ɑ tyëngpɑth møg-ɑ rëbi ki jie, kɑ mɑɑr yi gen kɑ göggi yi gen, kɑ ciggi Sɑbɑth geki lwöbø mïdhi yi gen; gï köbbe’ köbbø kinni, “Wu ókɑ̈ɑ̈lɑ Dhɑyøn kïti kwërɑ, wu ónëngɑ ki medi pyëw kì øn-ɑ mɑlli yɑn; o gëdhh-ɑ muuj yi wun kì wïj këli lɑm miɑ óyïëy yi yɑn. Kengɑ ócwøl ɑ́ ød mɑ̈ddø, men yije mɑ̈ddi yi jii pödhh bënn.” Wë Jwøng-ɑ Ácwɑ̈ɑ̈j, ɑ ɑ́dwöög jie tyëng Isrɑil kì yïnø, ɑ́kööb kinni ókɑ̈ni kömi gen ki ji møøgø møg rëbi ki gen. Jwøng-ɑ Ácwɑ̈ɑ̈j jie ɑ́rum ki köbbø yi en kinni, óöni kömi jie ki pödhh møøgø møg cɑm gen ni kenyi cyɑ̈ɑ̈m lɑ̈yyi pɑ̈l. Okööbø kinni, “Pëjjì bënn møg-ɑ di kyëddi jiɑ ge bɑ cörr! Bong gïjø me ngɑ̈nyi yi gen. Ge nɑ gwögg møg kurø, de ge pɑ nyi gwɑ̈yø, ge wɑ̈dh-ɑ buddø kì piny ge ceg-ɑ lɑ̈g. Ge nyi mɑɑr-ɑ nenø! Ge nɑ gwögg møg yethi gen lɑw. Pëjjɑni wɑ̈thi gen bong gïn. Ge bëëdø, men gøgg-ɑ gïg-ɑ døj kipere kì wɑ̈ye. Jømøgø møgɑni kømm-ɑ kinni, “Dwɑ̈ddi wɑ ki møgi oløg men mɑdh yi wɑ, møng-ɑ óyod yi wɑ, ómɑdh yi wɑ bëne! Dhuki óbëëd e lɑ̈w kibøli dicyɑ̈ngtïn!” Tyëngdøj nyii thøø kɑ nyi bong-ɑ ngɑn cïb møgɑni pyëwe. De kenyi thøw gen bong ryɑ̈g me nyi bï kömi gen. Tyëng-ɑ nyi mɑɑr gøggi gïgdøj, nyii yïddø ki mër geki ywömø kì yij thøø. Wu tyëngorøg, bïu keny, o kwøbbi wun løøg! Wu pɑ lɑ̈w kibøli ɑ́jwöggì geki tyëng-ɑ yɑ̈bø ki mɑ̈nni tyëngmøøgø geki mɑ̈nn-ɑ nyi yɑ̈ɑ̈bø cwøwi tyëngmøøgø, kí tyëng-ɑ niin ki köögi. Wu gɑgg-ɑ men? Á men ɑ benyi yi wun? Wu kwɑjj-ɑ jwöggi nyöödø wu niin-ɑ ri wun kì thɑ̈thi yenh. Kɑ nyigi wun nyi muuj wun gɑ gëdhhì kì órøggi kïttì geki tyelli nɑ̈mm-ɑ dwönø. Kɑ wu nyii kɑ̈bbø ki kïtt-ɑ lïw kì tyelli nɑ̈mmɑni gɑ møg mɑlli yi wun gɑ jwögg. Kɑ ge nyi kunyi wun ki møgi oløg, kɑ ge nyi muuj wun ki gïncɑm. Wu orumø kinni pyëwɑ med ki møgɑni bënn? Kɑ wu nyi kedh-ɑ wɑ̈thi kïtt-ɑ bɑ̈rrø be muujø ki gëdhhì, kɑ ri wun nyi niin wun kì kunɑni. Ngïjji jwöggi wun ɑ́cïb wun yethi uddi wun, kɑ yɑ wiy yi wun, kɑ wɑrri wun luny wun wɑ̈g o wu kedhu yethi pënni ki tyëng-ɑ mɑɑr wun ri wun, ge ceg kɑ cudø ki ngyëny, o wu niin yi gen. Kɑ wu ogïnyø ki mɑ̈th-ɑ yømi gen med, kɑ wu kedh-ɑ be mɑlli jwøng-ɑ cwøl ɑ́ Mölek. Kɑ wu öd-ɑ kun lɑ̈wi, cɑgg ɑ́ men-ɑ́ pödhi tyëngthøø, ki ji møg yɑ̈bbi wun ki jwögg mø mɑlli yi wun. Wu ɑ́pïd yi yɑb ki jwögg møg mɑlli yi wun, de wu ɑ́dhɑ̈li wïyø. Wu ɑ́rum kinni wu óthödhi ki tegø yi ngïjji jwöggi wun, bene ɑ dhɑ̈li wun ki pïdø. Jwøng-ɑ Ácwɑ̈ɑ̈j okööbø kinni, “Jwögg-ɑ böggi yi wun bɑ møg, ɑ wïl wɑ̈thi wun ki yɑn? Yɑ ɑ́wiy yi wun ki wørø kipe kɑ ɑ́kudɑ ki keny me bɑ̈ɑ̈r? Wu orumø ce gïg-ɑ gøggi yi wun bɑ dyër, de bëëdi wun ónyodh yi yɑn, o wu koo køny yi ngïjji jwöggi wun. Keny-ɑ óywøg wun kønyø, wiy wu køny yi jwöggɑni! Ge ókøøl yi yømø! De tyëng-ɑ óngɑ̈dh yɑn, ge óbëëdø kì piny men, kɑ yɑ mɑlli yi gen kì Kengɑ.” Jwøng-ɑ Ácwɑ̈ɑ̈j okööbø kinni, “Wiy jiɑ dwöög gen yïɑ. Yïëbbu gen yöö! Gweej yöö o bëëde e døøj! “Yɑn ɑ mɑl, yɑ bɑ Jwøk kwërø, ɑ bëëdø gïti ɑtheer. Yɑ bëëd ɑ mɑl kej kwër, de yɑ obëëdø thyew kì kelli ji-ɑ bɑ mööl, ɑ nyi yewi, kipe kinni o pëthi gen nyi dwöögɑ, o ge nyi yïddi gen ki ngɑ̈dhø. Jiɑ ónëngɑ ki wëy, o ge pɑ cög ge ocɑyyø yi yɑn, wɑlɑ̀ pyëwɑ pɑ cög e rɑɑj ki gen gïti ɑtheer. Yɑ ɑ́bëëd pyëwɑ rɑɑj ki gen kì bɑng orøøg gen, geki döngi pëthi gen, bene ɑ bɑnge cɑyɑ gen kɑ ge wiyɑ piny. De ge ɑ́bëëd muddi gen teeg, ge tyeer-ɑ wɑ̈yi gen. “Kër-ɑ ɑ́göög gen ɑ́lidh yi yɑn, de ge ɑ́yiel yi yɑn. Ge ópyejji yi yɑn kɑ ge kønyɑ, kɑ pëthi tyëng-ɑ kïïmø rïn yi yɑn. Ji-ɑ lɑ̈wi kí møg-ɑ cyɑ̈gi nyi nëngɑ’ nëngø ki mër! Jiɑ óyiel yi yɑn. De tyëngorøg nɑ nɑɑm omelø me ɑpɑge pɑ døøg piny, e göjj-ɑ nɑm ki gïg cödhø geki lɑ̈bø. Bong keny yömmi yi tyëngrijjø.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Jwøng-ɑ Ácwɑ̈ɑ̈j okööbø kinni, “Ryeer ki ryeeri dwøng! Köbbí jiɑ, tyëng Isrɑil, köbbí gen orøøg gen! Yɑ omɑllø yi gen yethi cyɑ̈ng, ge okööbø ce ge tyer-ɑ lïngi kwøbbɑ geki mïdhi ciggɑ. Ge okööbø ce thödhɑ gen ki cigg-ɑ dyër o pëthi gen med gen ki mɑlli yɑn.” Ji opëjø kinni, “Á kipe ngø ɑ twöön wɑ riee, keløg møgɑni pɑ ywøør yi Jwøng-ɑ Ácwɑ̈ɑ̈j? Á kipe ngø ɑ twöön wɑ riee ki gïncɑm, keløg cwɑgge bong gøn ki wɑ?” Ge oköbbø yi Jwøng-ɑ Ácwɑ̈ɑ̈j kinni, “Kenyi twöön wun ri wun, wu nudd wu rïng-ɑ́ɑ̀ bɑng gïg-ɑ tyer yi wun; wu guud-ɑ nyingi tyëng-ɑ göögø kì cinggi wun. Kenyi twöön wun ri wun ki gïncɑm, wu nyi gøgg-ɑ liny, kɑ wu ónyïɑ̈ggø. Wu orumø kinni thuumø me ni menɑni pyëwɑ ócuggø mïnø yi en, kɑ kwɑ̈jji wun lïngi yi yɑn? Kenyi thuum wun, ri wun nyi wëggi wu’ nennø yi teedø wu orɑngø. Kɑ wɑ̈thi wun nyi wëggu noor piny ni yïthhi lum, kɑ wu pëdh-ɑ piny ki ocwɑ̈llì møg yethi gen bëëd yi wun, wu bugø ki belø. Bene gïn-ɑ cwølli yi wun ɑ́ thuumø? Wu orumø kinni pyëwɑ óbëëd e med ki møgɑni? “Thuum-ɑ dwɑddɑ èn: Pɑ̈ɑ̈d töjjì, kɑ ɑcebbì pɑ̈ɑ̈d wɑ̈g kì muddi tyëng-ɑ nyingi gen guud, kɑ ge wiy kedh gen kì wɑ̈yi gen. Nywɑg wun gïgcɑmm wuki tyëng-ɑ nyingi gen cɑn, kɑ tyëng-ɑ bong keny bëëd yi gen cwööl wun kɑ̈lli wun. Nëngu tyëng-ɑ cyɑ̈dhi nøw ki ógudh, kɑ wɑddi wun nyi køny wun. “Codhe, o dhwɑ̈ngɑ mëënye kì kömi wun ni cyɑ̈ɑ̈ng mwøl, o keddi wun jwɑn ki tuurø, o ge ónøggi gen. Yɑ óbëëdø kì kelli wun, o wu nyi yielɑ; wu ókorri yi bëëdɑ yɑ nud kì wɑ̈thi tùng bënn. Kenyi kwɑ̈jji wun, kwɑ̈jji wun óløøg yi yɑn. Yɑ óyïëy keny-ɑ ócwøl wun nyingɑ. “Keløg wu ówïyø ki guudi nyingi ji, kɑ wu ówïyø ki ɑthwøg geki kwøbb-ɑ rijjø, ke thödhu tyëng-ɑ ri gen di kɑ̈j kɑ ge oyɑ̈ngø, muudhø men-ɑ yije di wun ree løge’ cɑɑr dicɑ̈ng. Wu pyejjɑ’ pyejjø yethi cyɑ̈ng, kɑ wu yɑ̈ɑ̈ngɑ ki gïgdøj bënn. Wu mïdhɑ’ mïdhø wu teg, o dëlli wun yöd. Wu óbëëdø wu nɑ bɑg me cɑwwi, kɑ wu nɑ wɑɑng pï me pïge pɑ nyi dwön. Udd-ɑ ɑ́pɑ̈ɑ̈dh cøn ódøøg ki gerø, ge geer-ɑ wɑ̈thi udd-ɑ weenø. Kɑ wu cwølli wun ɑ́ tyëng-ɑ nyi døøg dör ki tïngø, ɑ nyi døøg udd-ɑ pɑ̈ɑ̈dhø ki gerø.” Jwøng-ɑ Ácwɑ̈ɑ̈j okööbø kinni, “Keløg Sɑbɑth ómïdhi yi wun kidøøj ɑ́ cyɑ̈ɑ̈ng kwër, kɑ wu ocögø wu pɑ rïngi kì bɑng gïg-ɑ tyer yi pëthi wun kì cyɑ̈ngɑni; keløg cyɑ̈ɑ̈ng kwërɑ ómïdhi yi wun ɑ́ ɑkwër, kɑ wu ocögø wu pɑ weli, o wu pɑ göögø, o wu pɑ kømmi óbɑɑd kì cyɑ̈ngɑni, medi pyëw men-ɑ kɑ̈ɑ̈l yi göggi yɑn oyodø yi wun. Wu wëggɑ’ wørø yi kömi piny bëne, kɑ wu obëëdø ki medi pëëth kì yij piny-ɑ ɑ́mëggɑ Yɑgob kweyi wun. Yɑn, yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Wu ko rum kinni Jwøng-ɑ Ácwɑ̈ɑ̈j nyøødh, wu pɑ cuggi yielø yi en! Wɑlɑ̀ wu ko rum kinni bɑ ming, kwɑ̈jji wun pɑ lïngi yi en; kɑ̀ kwɑ̈jji wun kipe kønyø! Bɑ gööj orøng-ɑ gøggi yi wun ɑ mɑ̈ɑ̈nii lïngø. Bɑ orøøg wun ɑ dɑ̈ɑ̈ng wun ki Jwøk kenyi pɑ̈nyi wun mɑllii. Kömi wun dɑ kerri pyed, kí mød ki ji geki nɑ̈g. Wu ɑ́kedhi burø kɑ wu ocögø wu pɑ cwɑg. Wu gööny-ɑ pyed kipe kinni o wu cwɑg. Wu nyi rømm-ɑ göggi tyëng-ɑ kyeelø ki rɑj. Wu nyi rïïj wu rømm-ɑ gøggi gïgrijjø, o wu pɑ nyi cwööng ki gwøgi gïgɑni. Wu pɑ nyi cwööng ki nɑ̈gi tyëng-ɑ yï gen bɑ̈r. Keny-ɑ kedhi yi wun nyi döng e rɑɑj, o bong ngɑn bødh kì keny-ɑ nud yi wun. Gïg-ɑ gøggi yi wun bënn pɑth ki dyër. Yëth-ɑ cyɑ̈dhi yi wun bɑ ɑ́dud, o bong ngɑn kɑ̈l yuuɑni kɑ obødhø. Teedø okööbø kinni, “Gïn-ɑ pere pɑ yieel wøn yi Jwøk kì cinggi tyëng-ɑ guud nyingi wøn, ɑ́yod yi wøn ɑnɑn. Wø ngɑ̈dh-ɑ kinni wø ócyɑ̈dhi kì yij cɑr, de bɑ muudhø ɑ nud kete. Kɑ wø ceg-ɑ thɑ̈mmø ni cörr. Wø ɑ́thɑ̈mmi kì dicɑ̈ng de piny nɑ muudhø kì pödhi tyëngthøø. Wø ɑ́bwøg kɑ wɑ̈thi wøn ócungø. Wø yïd-ɑ Jwøk, o wø yiel yi en ki guun-ɑ guud nyingi wøn, de bong yielø. “Jwøng-ɑ Ácwɑ̈ɑ̈j, bɑ̈jjø men-ɑ ɑ́göggi yïn yi wøn dwøng. Orøøg wøn cung-ɑ́ɑ̀ bøli wøn; ngɑ̈nyi yi wøn kidøøj. Ciggí ɑ́pyem yi wøn kɑ yï bɑny yi wøn, kɑ wø óbɑ̈nyø ki lugø kì bɑngí. Tyëng-ɑ kyeelø nyingi gen ɑ́guud yi wøn, kɑ ngɑ̈thi wøn lugi wøn yïn. Wø pɑ rømmi dyër, o wø nyi kømm-ɑ pyed. Gøggi dyër ɑ́wiy, o dyër pɑ cyɑ̈ngi. Bong dyër me gøggi kì burø, o bong ngɑn kømmi dyër. Bong dyër, cɑgg ɑ́ tyëng-ɑ wïyi ki gøggi orøg, nyi yöd ɑ́ gen ɑ göggi gïnrɑj.” Møgɑni ɑ́lidh yi Jwøng-ɑ Ácwɑ̈ɑ̈j, kɑ pyëwe órënyø kipe kɑ̀ pɑ gøggi dyër. Ángɑ̈ng yi kɑ̀ bëëd e bong ngɑn køny tyëng-ɑ nyingi gen guud. Ge ceg kɑ yielø yi en ki tege, o ge tyɑ̈ɑ̈m gen. Dyër rug yi en e nɑ ɑ́dhedheg, o teng-ɑ yïëdø rug yi en e nɑ ɑcudh. Jɑmmì bënn ótyenye, kɑ kɑ̈jji ji-ɑ rɑngø cole. Tyëng-ɑ mɑɑnii ócɑy yi en kɑ cɑ́y mø kyëëw ki bɑ̈jji gen; gï ócɑye ceth cɑgg ɑ́ møg-ɑ bëëdø kì pìny mø lɑ̈wi. Cɑg kì wɑɑng cyɑ̈ɑ̈ng mwøl gïti wɑɑng cyɑ̈ɑ̈ng böörø, ji ceg-ɑ böggø yi tege. Óbï e nɑ nɑm me thewe teg, o nɑ ɑtunø me teg. Jwøng-ɑ Ácwɑ̈ɑ̈j köbb-ɑ jie kinni, “Yɑ óbï Yerusɑlem be nyɑgi per wun, o yɑ yielɑ tyëng-ɑ ɑ́wïyi ki orøg kì kelli wun. O wɑ lwööb wɑ, o wɑ nywɑ̈ɑ̈g wɑ ki kwøb; wu ɑ́mëggɑ tegɑ geki ciggɑ, o ge bëëd gen gɑ mø wun gïti ɑtheer. Cɑg ɑnɑn ceth, lïngu kwøbbɑ, kɑ nyigi wun kí kwɑrri wun pwönyi wun ki mïdhi ciggɑ kì yethi rïj bënn, gïti ɑtheer.” Dhwöödh, Yerusɑlem kɑ yï mëëny ni cɑ̈ng mɑ̈ɑ̈r Jwøng-ɑ Ácwɑ̈ɑ̈j omënyø kì kömí! Pödhh-ɑ kyeelø ókum yi muudhø, de kömí ómëëny yi cɑɑr Jwøng-ɑ Ácwɑ̈ɑ̈j. Bëëdi cɑre e nud kì butí, ónënni kì kömí. Pödhh-ɑ kyeelø ótëël yi cɑrí, kɑ rɑ̈nhì tëël yi tuuli cyɑ̈ngí. Lïdhí bɑdhhí kɑ gïn-ɑ cwöb liidh, Jií cong-ɑ ri gen ge dwɑdd-ɑ dwöög pɑc! Wɑ̈ddí óbï ge kɑ̈ɑ̈l-ɑ kun me lɑ̈wi. Nyigí womɑ̈nn óceg kɑ kwömmø ni othønhø. Møgɑni ólidh yi yïn, kɑ pyëwí ómïnø ki mendwøng, mɑ́ kɑ̈ɑ̈r pödhh-ɑ kyeelø bënn ómuuj yïn, kɑ̈rì óbï ge kɑ̈ɑ̈l-ɑ løøg nɑɑm omelø. Amɑl mø gïïr óbï ge kɑ̈ɑ̈l-ɑ Midyɑn geki Epɑ̀, ge ókɑ̈ddø ki jɑmmì. Møøgø óbï ge kɑ̈ɑ̈l-ɑ Cebɑ̀, ge ókɑ̈ddø ki dhɑb geki bɑkur. Wöddi gïgdøj møg-ɑ ɑ́gwøg yi Jwøng-ɑ Ácwɑ̈ɑ̈j ókɑ̈lli yi teedø! Dyëg-ɑ römm mø Kedɑr geki Nebɑyoth, ómuuj yïn gɑ gëdhhì, kɑ ge muuj kì këli lɑm gɑ møg mïni pyëw Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j mɑ̈ɑ̈r Kenge ówëgge døngø ki men lod döngi cøn. Á yɑ̈thi ngø ɑ bï ge nɑ pøøl kinnï, ɑ ni gen ɑkùr møg dwöög pɑc? Ge bɑ yɑ̈thi nɑm møg kɑ̈ɑ̈l kun lɑ̈wi Ge kɑ̈ɑ̈l-ɑ jii Jwøk pödhi gen. Ge bï ge ókɑ̈ddø ki ɑ́tegø kí dhɑb møg wøør Jwøng-ɑ Ácwɑ̈ɑ̈j, Jwøng-ɑ bɑ kwërø, Jwøøg Isrɑil, Jwøng-ɑ ɑ́göjji pödhh-ɑ kyeelø wøri jie. Jwøng-ɑ Ácwɑ̈ɑ̈j köbb-ɑ Yerusɑlem kinni, “Dörrí óger-ɑ yi tyëngpɑth, O yï ógöggi yi rɑ̈nhi tyëngɑni. Wu ɑ́cɑyɑ kɑ rɑ̈ji pyëwɑ. De ɑnɑn pyëwɑ ólɑ̈ɑ̈m ki wun. Dhøggi döri kɑɑl wun óbëëdø gɑ ɑyieb kì dicɑ̈ng kí wɑ̈r. O yï muuj ki kɑ̈r yi rɑ̈nhi pödhh-ɑ kyeelø. De pödhh-ɑ koo göggi yïn ónɑ̈g kinni tweet. “Yenh-ɑ døj kì Lubnɑn, ɑ løg ɑkemel kí ɑ́lɑl, kí ɑmedh, yenh-ɑ pëddi døøjø kì wɑɑg Lubnɑn, ge ókɑ̈ɑ̈l be geri yïn, yïn ɑ Yerusɑlem, o Kengɑ myërre, o kɑɑlɑ dönye. Kwɑrri tyëng-ɑ ɑ́guud wɑngí óbï, kɑ ri gen bøødh gen piny kì bølí, yï ómɑl yi tyëng-ɑ ɑ́tuug yïn cøn yï ócwølli yi gen yïn ɑ́ ‘Kɑɑldwøng! Kɑɑl Jwøng-ɑ Ácwɑ̈ɑ̈j,’ ‘Dhɑyøn kɑɑldwøng, kɑɑl kwërø, Jwøøg Isrɑil.’ “Yï koo wiy piny, o yï koo mɑɑn këti, yï kɑɑl-ɑ jie dhwödhø kɑ döng-ɑ nøw, yï ógwøgɑ yï dwøng, o yï myëër, yïn ɑ́ keny yije di medi pyëw-ɑ pɑ thumi. Yï ókorri yi pödhh geki rɑ̈nhì mø ngenyø, yï ókorri yi gen ni kenyi korri othinh yi meye. O yod yi yïn kinni yï ɑ́yiel-ɑ yi yɑn; Jwøøg Isrɑil Jwøng-ɑ teg ɑ ɑ́gøny yïn kì yethi töjjì. “Yï ómuujɑ ki dhɑb ɑ́ kej dilɑl kí ɑ́tegø geki dilɑl gɑ kej yenh, kí ngyënyø dødø ɑ́ kej kïttì. Wɑngí pɑ guud yi jɑggí këti. Ge ówëggɑ jyɑ̈gø ge gøgg-ɑ dyër kí mër. Kwøbbi mød koo lïngi këti; pödhí pɑ cigi rënyø. Yï ókorrɑ ni kenyi korri dörø, o yɑ ónyïɑ̈ggi kiperí. Yɑ ólenhi yi yïn kipe kɑ ɑ́yielɑ yïn. “Pɑth ki cɑ̈ng ɑ ócɑr yïn kì dicɑ̈ng, wɑlɑ̀ pɑth ki dwɑ̈y ɑ óbëëd ɑ́ cɑrí kì wɑ̈r, men-ɑ́ yɑn yɑ Jwøng-ɑ Ácwɑ̈ɑ̈j ɑ óbëëdø yɑn ɑ́ cɑrí gïti ɑtheer. Yï ómeny yi cɑɑr mɑ̈rɑ. Yï koo cigi kïïmø Jwøng-ɑ Ácwɑ̈ɑ̈j ɑ óbëëd ɑ́ cɑrí gïti ɑtheer. Cɑre pɑ thumi; o lod-ɑ cɑɑr cɑ̈ng geki dwɑ̈y. Jií bënn óbëëd ge gøgg-ɑ dyër. Piny ókwɑny yi gen gïti ɑtheer. Bene gen yɑnh-ɑ ɑ́pidhɑ, ɑ́gwøgɑ ki cinggɑ ɑ́ men nyodhɑ döngɑ. Gøl-ɑ thiinh ódøngi kɑ kwɑnne ogöögø ki ɑ́lïp, kɑ gøl-ɑ nyødh ogöögø ki pödhø me teg. Obëën bøli kenyɑni, gïgɑni ówëggɑ jwɑn cwöbø Bene yɑn Jwøng-ɑ Ácwɑ̈ɑ̈j!” Wëyi Wë Jwøng-ɑ Ácwɑ̈ɑ̈j ying-ɑ kömɑ. Yɑ ɑ́myege o yɑ öre be muuji wöndøj ɑbuur. O yɑ yielɑ tyëng-ɑ minni gen cödø o ɑmɑggi liny köbbɑ kinni ge ɑ́gøny. O tyëng-ɑ ød mɑg köbb-ɑ kinni ge ɑ́gööny wɑ̈g. Yɑ ɑ́öre be kwøbi kinni bøli keny-ɑ ólɑ̈ɑ̈m pyëw Jwøng-ɑ Ácwɑ̈ɑ̈j ɑ́wɑ̈nhi, Jwøng-ɑ Ácwɑ̈ɑ̈j jie yiele’ yielø. Tyëngmɑ̈ɑ̈nø ótyɑm yi en. Yɑ ɑ́öre’ be rïni pëthi tyëng-ɑ kïïmø bënn. O tyëng-ɑ kïïmø kì Dhɑyøn nëngɑ ki medi pyëw, o ge wör gen ki medi pëëth. Ge óni yenh møg-ɑ ópidh-ɑ yi Jwøng-ɑ Ácwɑ̈ɑ̈j kiree. Ge óbëëd ge gøgg-ɑ dyër ge bënn, o Jwøk ólenhi kipe gïn-ɑ ɑ́gwøge. Kɑ̈dd-ɑ døngø møg-ɑ pɑ̈ɑ̈dhø kɑ̈ge dööng, ócigi gerø yi gen. Jiɑ, wu ógöggi yi tyëngpɑth Dhögi wun kí dyëgi wun ókwɑy yi gen. Kɑ pwödhhi wun, kí bɑ̈ggi wun pur yi gen. O wu ócwølli wun ɑ́ ókwërri Jwøng-ɑ Ácwɑ̈ɑ̈j, Bɑ̈nggi Jwøgee. Wu ótɑ̈bbi kì yethi kɑ̈rri pödhh-ɑ kyeelø, kɑ köthi wun pwöd wun kinni kɑ̈rrɑni bɑ mø wun. Ayɑ̈ɑ̈r wun geki lɑ̈ɑ̈yi wɑ̈thi wun ge ɑ́thumi. Wu óbëëdø kì piny-ɑ bɑ mi wun kɑ̈ɑ̈r wun ómed tyel ɑ́ryew; medi pëthi wun gït-ɑ ɑtheer. Jwøng-ɑ Ácwɑ̈ɑ̈j okööbø kinni, “Yɑ mɑɑr-ɑ gøggi dyër, o guudi nying geki gøggi rɑj mɑɑn yi yɑn. Jiɑ ókøøg yi yɑn kidøøj, kɑ wø olwöbø ki lwöbø me pɑ pɑ̈d ki gen. Ge óbëëd ge ngɑ̈nyi yi pödhh bënn. O yod yi ngɑn lidh gen kinni, ge bɑ ji-ɑ ɑ́gyëdh yi yɑn.” Yerusɑlem pyëwe ɑ́mïni yi gïn-ɑ ɑ́gwøg yi Jwøng-ɑ Ácwɑ̈ɑ̈j, nɑ nyɑdhey nywöm me thøø yi ruugø. Áruug yi Jwøk ki yielø geki tyɑ̈mø. Mɑ́ ni kɑ̀ pɑ nyi bɑ̈jji köödh ki twïyø, Wë Jwøng-ɑ Ácwɑ̈ɑ̈j jie óyiele kɑ lenhi yi pödhh bënn. Yɑ pɑ kudø kiper Yerusɑlem, o yɑ pɑ ywöömø gïti keny-ɑ óyielii kɑ otyɑ̈mø, kɑ omënyø ni ɑ́menyø kì wɑ̈r. Yerusɑlem, yï ólidh yï otyɑ̈mø yi pödhh-ɑ kyeelø! Mɑ̈rí ólidh yi rɑ̈nhi gen bënn, yï ócwølli kɑ nying møg nyɑ̈n, nyingɑni ócɑg-ɑ yi Jwøng-ɑ Ácwɑ̈ɑ̈j kiree. Yï ógöögø yïn ɑ́ yɑ̈r me myëër kì yï Jwøng-ɑ Ácwɑ̈ɑ̈j. Yï koo cigi cwølli këti yïn ɑ́ ngɑn-ɑ ɑ́wiy piny yi jɑlgøle. Wɑlɑ̀ yï koo cwølli këti yïn ɑ́ pönh-ɑ órënyø. Nyingí nying-ɑ nyɑ̈n ócwøl ɑ́ “Ngɑn-ɑ pyëw Jwøk med ki en.” Pinyí ócwøl ɑ́ “Anywøm ki nywöm-ɑ døj.” Mɑ́ Jwøng-ɑ Ácwɑ̈ɑ̈j pyëwe med ki yïn, o óbëëd e nɑ jɑlgøl pinyí. Yï ónywøm yi ngɑn-ɑ ɑ́cwɑ̈j yïn ni nyel me nywøm nyɑn nuti nywɑlø yi jɑlø, Jwøk pyëwe ómed ki yïn ni kenyi med pyëw nyelɑwøb ki nyɑn-ɑ nywøme. Yerusɑlem, wïj dörí ɑ́cïbɑ ki ji mø kurø. Ge koo pɑ̈nyi kudø kì wɑ̈r kí dicɑ̈ng. Ge bɑ møg pɑ̈ddi Jwøng-ɑ Ácwɑ̈ɑ̈j ki gïg-ɑ ɑ́kwøbe kinni gï ógwøge, wïje koo wëggi wïlø yi gen. Koo wëggi ywömø yi gen gïti keny-ɑ ódwøøge Yerusɑlem keje. Kɑ gø gwøge ɑ́ kɑɑldwøng me lenhi yi kömi piny bëne. Jwøng-ɑ Ácwɑ̈ɑ̈j ɑ́köngi kinni møgɑni ógwøg yi en ki tege; o okööbø kinni, “Byellí koo cɑm-ɑ yi ji mø mɑ̈n ki yïn këti. Møgi oløgí koo mɑdh-ɑ yi tyëngpɑth këti. Dɑ́ yïn, yï ngɑn-ɑ ɑ́kɑ̈g byel kɑ ge kɑj yi yïn, yïn ɑ ócɑm byellɑni, o Jwøng-ɑ Ácwɑ̈ɑ̈j lenhi yi yïn. Yïn ɑ ɑ́pidh oløg kɑ lem yi yïn, bɑ yïn ɑ ómɑdh møgi oløngɑni kì yij gøl Kengɑ.” Wu tyëng-ɑ bëëdø kì Yerusɑlem, bïu kedhu be gweji yöö men-ɑ yije kɑ̈ɑ̈l yi jii wun møg-ɑ dwöög pɑc. Gwej wun yöö kɑ tuggi kɑ̈ɑ̈l wun wɑ̈g kì yije! Kɑ wu guddu piny ki ngïjji yöö, møg-ɑ ónenni yi tyëng pödhh-ɑ kyeelø. Jwøng-ɑ Ácwɑ̈ɑ̈j ngɑ̈j-ɑ piny bëne kinni, “Köbbu tyëng Yerusɑlem kinni, Jwøng-ɑ Ácwɑ̈ɑ̈j bï-ɑ be yieli wun, Bï e kɑ̈ll-ɑ ji-ɑ ɑ́døme.” Wu ócwølli wun ɑ́ “Jii Jwøk kwërø,” “Ji-ɑ ɑ́yiel yi Jwøng-ɑ Ácwɑ̈ɑ̈j.” Yerusɑlem ócwøl ɑ́ “Kɑɑldwøng men-ɑ mɑɑr yi Jwøk,” “Kɑɑldwøng men-ɑ nuti wiy piny yi Jwøk.” “Á men ɑ bï e kɑ̈ɑ̈l-ɑ Bodhrɑ̀ kì Edöm? Á men ɑ thøø yi rugø ki ógudh-ɑ kwɑrø èn, ɑ cyɑ̈dhi ki tegø kinnï?” “Bɑ Jwøng-ɑ Ácwɑ̈ɑ̈j, ɑ bï be yïëdø ki tegø, e kɑ̈ll-ɑ wööni tyɑ̈me.” “Ede ɑ cyɑ̈dhe e kwɑɑr ni ngɑn nyøn oløg e bij-ɑ møgi oløg?” Jwøng-ɑ Ácwɑ̈ɑ̈j ólöggø kinni, “Pödhh-ɑ kyeelø ɑ́nyønɑ ni oløg, o bong ngɑn mɑ ɑ́bï be kønyi yɑn, ge ɑ́nyønɑ ki rɑ̈ji pyëwɑ kɑ ógudhɑ cödh yi remmi gen. Yɑ ɑ́kööb kinni bøli kej yieli jiɑ ɑ́bï, o bɑ bøli kenyɑni ɑ cɑɑy tyëng-ɑ mɑ̈n ki gen. Yɑ ɑ́ngɑ̈ng kɑ ɑ́lïdhɑ kinni bong ngɑn bï be kønyi yɑn. De yɑ ɑ́tëngi yi liny-ɑ pyëwɑ kɑ ge tyɑmɑ yɑ ketɑ. Pödhh-ɑ kyeelø ɑ́nyønɑ ki rɑ̈ji pyëwɑ, kɑ ge kedhhɑ bënn. Remmi gen ɑ bɑ wëyi gen ɑ́bɑɑwɑ piny.” Mɑ̈ɑ̈dø mi Jwøng-ɑ Ácwɑ̈ɑ̈j, ɑ pɑ nyi lwënyi møge ówɑjjɑ; ólejjɑ kipe gïg-ɑ ɑ́gögge wɑ bënn. Tyëng Isrɑil ɑ́gyëdh ki kɑ̈r bëne, kì bɑng lɑ̈mpyëwe geki mɑ̈ɑ̈dø mee men-ɑ pɑ nyi lwënyi. Kɑ Jwøng-ɑ Ácwɑ̈ɑ̈j okööbø kinni, “Ge bɑ jiɑ, yɑ pɑ wëny yi gen.” Codhe ɑyiele gïn kì yij orɑng-ɑ ɑ́rɑngi gen. Pɑth ki wëywödø, den-ɑ́ Jwøng-ɑ Ácwɑ̈ɑ̈j kiree ɑ ɑ́yiel gen. Gï ɑ́døme kì bɑng mɑɑr-ɑ mɑɑre gïn, kɑ pyëwe ólɑ̈ɑ̈mø ki gen. Ge ɑ́bëëd ge okorrø yi en ceth kɑ̈ge dööng, de dhøge ɑ́pyem yi gen, kɑ pyëw wëye kwërø wëggi rënyø yi gen. Codhe ɑløg Jwøng-ɑ Ácwɑ̈ɑ̈j ree ngɑn mɑ̈n ki gen, kɑ yöd-ɑ be nyɑɑg ki gen. Codhe, ɑpɑr gen mø kɑ̈ge dööng; gen ɑ cyɑ̈ngg-ɑ ɑ́bëëd Mosɑ̀ bɑ̈ng Jwøng-ɑ Ácwɑ̈ɑ̈j nud. Apëjji gen kinni, “Jwøng-ɑ Ácwɑ̈ɑ̈j, ɑ ɑ́yiel jie kì nɑɑm omelø ying-ɑ keny ɑnɑn? Jwøng-ɑ Ácwɑ̈ɑ̈j ɑ ɑ́mëggi wëye Mosɑ̀ ying-ɑ keny? Ge ɑ́korri yi Jwøng-ɑ Ácwɑ̈ɑ̈j kidøøj ni dhög-ɑ nyi køøl yij tör. Jie ɑ́pyejje kidøøj kɑ wør. Lidh wøn Jwøng-ɑ Ácwɑ̈ɑ̈j, yï lïdh-ɑ́ɑ̀ pɑɑrí mɑl, kej kwërí geki mɑ̈rí. Ágøne tegi per wøn kì yïí? Ágøne tegí? Lɑ̈mpyëwí geki mɑ̈ɑ̈dø mií ying-ɑ keny? Wø ko wøøy. Yï bɑ wïyi wøn. Kweyyi wøn, Abrɑhɑm geki Yɑgob wø pɑ pɑr yi gen, de bɑ yï Jwøng-ɑ Ácwɑ̈ɑ̈j ɑ bɑ wïyi wøn, yïn ɑ ngɑn nyi døm wøn. Wøde ɑ wëggí wøn kedhi wɑ̈g kì yij yuuí? Ede muddi wøn ɑ wëggí gen tëngø kɑ ngɑ̈thi wøn lugi wøn yïn? Dwöög kipe ji-ɑ göggi yïn, dwöög kipe ji-ɑ ɑ́bëëd gɑ møgí ceth. Wøn, wø jií, wø ɑ́cyeddi yi tyëngmɑ̈ɑ̈nø, kɑ Kengí bwöl yi gen. Á kipe ngø ɑ gwøøg wøn kinøw, de yï ce nuti bëëdø yïn ɑ́ jɑngi wøn, dhɑ̈y wø ce nuti pɑ̈nyi bëëdø wøn ɑ́ jií! Ede mɑl ɑ pɑ pyëëdií kɑ yï bï piny? Yï ólidh yi kïttì kɑ ge okïïrø yi wɑ̈ɑ̈rø. Ge ókïrrø ni pïg twɑg yi mɑc me lëëdh. Bïí nyudhí tegí tyëng-ɑ mɑɑn yïn; wiy pödhh-ɑ kyeelø kïïr gen kì bølí! Dɑ bøli keny mɑ ɑ́bëën yi yïn kɑ yï ogöögø ki gïgdøngø møg böggi, kɑ kïttì okïïrø yi wɑ̈ɑ̈rø keny-ɑ ɑ́lidh gen yïn. Bong ngɑn mɑ ɑ́lïng wɑlɑ̀ mɑ ɑ́lïdhi ki Jwøk me ni yïn, Jwøng-ɑ göögø ki gïg ni møg kipe ji-ɑ gɑ̈nii. Tyëng-ɑ pëthi gen nyi tyer gøggi dyër nyii gɑmø yi yïn, gen ɑ tyëng-ɑ wɑ̈thi gen pɑ nyi wïl ki bëëdø ki bëën-ɑ dwɑddi yi yïn. Yï ɑ́bëëd pyëwí rɑɑj ki wøn, de wø nuti wïyø ki orøg. Wø nuti wïyø ki orøg ki kër-ɑ ɑ́wën, ngö e ngɑ̈nyi yi wøn eni rɑ̈ji pyëwí. Wø ɑ́wöni ceth wø pëddi ki orøg, cɑgg gïg-ɑ gøggi yi wøn ge orømmø yi wøn ge døj, ge rijjø. Wø ɑ́göög wø nɑ yïthhi yɑdh møg thwøwø; wø ɑ́køøl yi yømø kì bɑng orøøg wøn. Bong ngɑn nyi mɑlli yïn, bong ngɑn nyi kwɑjji yïn kipe kønyø, mɑ́ rií ɑ́kɑn yi yïn, kɑ wø wiy piny kì bɑng orøøg wøn. Dɑ́ yïn ɑ bɑ wïyi wøn, Jwøng-ɑ Ácwɑ̈ɑ̈j. Wø nɑ lɑ̈bø, o yï nɑ bødhi lɑ̈b. Wø ɑ́cwɑ̈j-ɑ yi yïn, pyëwí ko ti rënyø ki wøn, wɑlɑ̀ orøøg wøn ko cög e kwɑ̈nnií wøn gïti ɑtheer. Wø bɑ jií, lɑ̈ɑ̈m pyëwí ki wøn. Kɑ̈ddi kwërí ɑ́göög ki ryɑng, Yerusɑlem ɑ́döng nøw e rënyø, o ød kwëër wøn øn-ɑ́ yije ɑ́lenhi yïn yi kweyyi wøn, ɑ́rum ki cɑmø yi mɑc. Kɑ̈jj-ɑ ɑ́mɑɑr yi wøn bënn ɑ́rënyi. Jwøng-ɑ Ácwɑ̈ɑ̈j, pyëwí pɑ rɑ̈ɑ̈mø yi møgɑni bënn? Bong gïn gwøg yi yïn, wø wïyí orɑng-ɑ pɑ lwɑ̈ng yi wøn ki nginø kinnï? Jwøng-ɑ Ácwɑ̈ɑ̈j ɑ́kööb kinni, “Yɑ ɑ́bëëd yɑ yïd-ɑ kwɑ̈jji ji o di løøgɑ, de ge nuti kwɑ̈jjø. Yɑ ɑ́dwɑdd-ɑ kinni o yɑ di yod yi gen, de yɑ nuti pɑ̈nyø yɑbø yi gen. Yɑ nuti kwɑjjø yi pönhï, ngö kwɑ̈jje bɑ men di løøgɑ ceth kinni, ‘Yɑn èn; yï ókøny yi yɑn.’ Yɑ ɑ́bëëd ceth yɑ nenn-ɑ pɑɑri jiɑ, ji-ɑ nyi rïïj ge gøgg-ɑ bɑ̈jjø, o ge tyeer-ɑ wɑ̈yi gen muddi gen teeg. Ge cög ge gøgg-ɑ gïg rënyi pyëwɑ; ge ngɑ̈dd-ɑ jwögg-ɑ pɑth ki gëdhhì kì yethi bɑ̈gg, ge rɑ̈mm-ɑ bɑkur kì kömi kïttì, Ge nyi kedh-ɑ yethi órøggi kïttì geki yethi debb, be pyëj ki yɑdh kì wɑ̈r. Ge cɑm-ɑ rïngi kundhøngø o ge wedh-ɑ cwɑyi gëdhhi jwögg-ɑ pɑth. Orume, o tyëng-ɑ kyeelø nyi tøny gen ki köbbø kinni, ‘Nyegi wun kì buti wøn, wø ko nywɑl wun, wø bɑ tyëng kwër!’ Pyëwɑ pɑ mɑg yi yɑn kipe ji møgɑni, rɑ̈ji pyëwɑ ki gen nɑ mɑc men pɑ yïëy nɑ̈gø. “Yɑ ɑ́rum ki kwøbi cɑ́yi gen, cɑ́yɑni ɑ́rum ki gweed piny. Ge cɑyɑ’ cɑyø ceth kipe gïn-ɑ ɑ́gwøg yi gen; ge cɑ̈yy-ɑ orøøg gen, kí orøøg kweyyi gen. Ge ɑ́rɑ̈ɑ̈b ki bɑkur kì debbi jwögg-ɑ pɑth, kɑ ge okööbø kì riɑ ki kwøb mø rijjø. Ge bɑ møg cɑy yi yɑn ceth kipe orøng-ɑ ɑ́gwøg yi gen.” Jwøng-ɑ Ácwɑ̈ɑ̈j okööbø kinni, “Bong ngɑn nyi rënyi oløg men-ɑ døj, de oløngɑni nyi gwøg ɑ́ møgø. Cɑgg ɑ́ yɑn thyew, jiɑ pɑ nɑ̈g yi yɑn ge bënn, tyëng-ɑ göggi yɑn óyiel yi yɑn. Tyëng Isrɑil møg-ɑ bɑ gøl Yeudɑ̀ ógyëdh yi yɑn, o pödhɑ, pödhi kïttì ólɑg yi kwɑrri gen. Jiɑ møg-ɑ göggi yɑn óbëëdø kì pinyɑni. Yɑ ómɑlli yi gen, kɑ dhögi gen nyi køøl gen be cɑm kì Töör Cɑrön kì wɑɑng wurlwɑl geki Töör Akørr kì wɑɑng cyɑ̈ɑ̈ng mwøl. “De wu tyëng-ɑ ɑ́bɑny yɑn, ɑ ɑ́wøy Dhɑyøn kïti kwërɑ; wu óthøw ki thøø me rɑj, mɑ́ wu nuti yïëyø keny-ɑ ɑ́cwølɑ wun, wɑlɑ̀ wu nuti lïngø keny-ɑ ɑ́kööbɑ. Wu ɑ́bɑ̈nyi lïngi kwøbbɑ; kɑ wu pëgg-ɑ be gøggi rɑj. Yɑ köbb-ɑ wun kinni tyëng-ɑ mɑlli yɑn, ɑ mïdhi ciggɑ, yï gen ódi gïgcɑmm kí gïg mɑdh mø gïïr. De wu ómɑg yi kɑ̈j geki röödhø. Ge óbëëd pëthi gen med, de wu óbëëd wu yɑ̈rø. Ge óbëëd ge owörø ki medi pëëth, de wu óbëëd wu óywöngø minni wun cödø. Nyingi wun ópɑ̈rr-ɑ cyën yi jiɑ møg-ɑ ɑ́yienyɑ. Wu ónɑ̈g-ɑ yi yɑn, yɑ Wïlɑ̈bø, Jwøng-ɑ Ácwɑ̈ɑ̈j. De tyëng-ɑ mïdhi ciggɑ ócɑ̈ggɑ ki nying møg nyɑ̈n. Ngɑn-ɑ ókwɑjji gyëdh kì pinyɑni, ókwɑ̈jji kɑ nyingi Jwøng-ɑ nyi mïdhi dhøge. Ngɑn köngi, köngi kɑ nyingi Jwøng-ɑ nyi mïdhi dhøge. Akørr-ɑ weenø ókedh kɑ ge owïlø.” Jwøng-ɑ Ácwɑ̈ɑ̈j okööbø kinni, “Yɑ ceg-ɑ cwɑ̈j ki piny me nyɑ̈n, kí mɑl me nyɑ̈n. Gïg-ɑ ɑ́cwöb cøn ceg-ɑ wïlø bënn. Mïni pëthi wun kɑ wu bëëd wun ki medi pëëth gïti ɑtheer, kipe gïg-ɑ ɑ́cwɑ̈j yi yɑn. Yerusɑlem men nyɑ̈n men-ɑ cwɑ̈j yi yɑn, óbëëd e pɑ̈ng yi medi pyëw, o tyëng-ɑ yije óbëëd pëthi gen omedø. Men-ɑ́ yɑn kiriɑ, yɑ óbëëd pyëwɑ med kipe Yerusɑlem geki ji-ɑ yije. Óbëëd e bong ywøg kì yije wɑlɑ̀ bong cwöd kipe kønyø. Othønhø koo thøw ge odhødhø këti, o ji bënn ceg-ɑ døngø kɑ ge oyöø. Møg-ɑ runni gen wɑ̈dhi ri miyø ócwølli ge nudd ge thønhø. Tyëng-ɑ thøw runni gen nuti wɑ̈dhi kenyɑni, wɑng-ɑ kinni ge bɑ ɑcɑy yi yɑn. Gwøng-ɑ gwøg yi gen ópɑ̈dhi keje, o bong ryɑ̈g men-ɑ óbï kömi nyigi gen. Ge ógyëdh yi yɑn geki kwɑrri gen gïti ɑtheer. Kwɑ̈jji gen óløøg yi yɑn ge nudd ge ókwɑ̈jjø ceth. Óthönhì geki dyëg römm ócyɑ̈mø kì kej ɑ́kyel. Ngurrì ócyɑ̈mø ki lum ni dhög, o thöllì koo bëëdø gɑ nɑ̈ɑ̈g këti. Bong gïjø mɑ nɑ̈ɑ̈g wɑlɑ̀ gïnrɑj men-ɑ óying Dhɑyøn kì wïj kïti kwërɑ.” Jwøng-ɑ Ácwɑ̈ɑ̈j okööbø kinni, “Mɑl bɑ kwømɑ, o piny bɑ thɑ̈nhi tyellɑ. Á ød mɑ ngø ɑ cuggi gëri yɑn yi wun ɑ́ men yije bëëdɑ? Yɑn kiriɑ ɑ ɑ́cwɑ̈j lɑ̈bø bëne! Pyëwɑ med ki tyëng-ɑ bɑ mööl, ɑ nyi yewi ki orøøg gen; gen ɑ tyëng-ɑ wør yɑn, ɑ lïngi kwøbbɑ. “Ji ɑ́døøg ge gøgg-ɑ gïg-ɑ med kì pëthi gen. Pɑ̈r kì yï gen cɑgg dhɑnhø ngɑl wɑdh ɑ́ gëëdhi wɑlɑ̀ ngɑl dhɑnhø ɑ́ gëëdhi, pɑ̈r thyew cɑgg dhɑnhø gëëdh dyel wɑlɑ̀ tor muni gwög, cɑgg ge gëëdh byëlø wɑlɑ̀ remi kundhøngø, wɑlɑ̀ ge muuj bɑkur wɑlɑ̀ ge mɑll-ɑ ngïji jwøg, pëthi gen med kɑ yëthi mɑ̈ddø møg-ɑ rijjø. Kì bɑng gwøng ni menɑni, kömi gen ógöjjɑ ki ryɑ̈g, ge ógöjjɑ gïg-ɑ böggi yi gen, mɑ́ e bong ngɑn mɑ ɑ́yïëy keny-ɑ ɑ́cwöddɑ, o bong ngɑn mɑ ɑ́lïng keny-ɑ ɑ́kööbɑ. Ge ɑ́bɑny-ɑ yɑn, kɑ ge kwɑny-ɑ gwøg ki rɑj.” Lïngu møg-ɑ kømmi yi Wë, wu tyëng-ɑ böggii kɑ kwøbbe nyi lïngi yi gen. Wë okööbø kinni, “Wu mɑɑn yi teedø kɑ per kɑ mïdhu kwøbbɑ. Agwɑddi wun yi gen ge okööbø kinni, ‘Wë nyodhe tege, kɑ wiy wu yiel yi en, o wu lidh yi wøn pëthi wun omedø.’ Dɑ́ gen kiri gen ɑ ɑ́yɑ̈r! Lïngu cwɑgg-ɑ kɑ̈ɑ̈l mɑl ge døngø kì kɑɑldwøng, lïngu cwɑgg-ɑ kɑ̈ɑ̈l Kengø. Bɑ Jwøng-ɑ Ácwɑ̈ɑ̈j ɑ cɑy tyëng-ɑ mɑɑnii! “Kɑɑl kwër nɑ ngɑn ngog yi pɑ̈dhi piny, e pyere nuti rɑ̈mø. Dɑ ngɑn mɑ ɑ́pɑ̈nyi lïngø ki gïg ni møgɑni? Dɑ pödhø mɑ ɑ́nywøl kì cyɑ̈ng ɑ́kyel? Dhɑyøn koo rɑngø ki keny me bɑ̈ɑ̈r e pödhø nuti nywølø. Wu ko rum kinni jiɑ ókɑ̈ɑ̈lɑ bøli kej pɑ̈dhi piny, kɑ ge mɑ̈ɑ̈nɑ nywølø.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Mïni pëthi wun kyeel ki Yerusɑlem, wu tyëng-ɑ mɑɑr kɑɑlɑni! Mïni pëthi wun kyeel ki en ɑnɑn, wu tyëng-ɑ ɑ́ywöngi cøn kyeel ki en! Pëthi wun ómïni yi døøje, ni kenyi med pyëw othinh kì kö meye. Jwøng-ɑ Ácwɑ̈ɑ̈j okööbø kinni, “Yï ónëngɑ ki døøjø me pɑ thumi, kɑ̈ɑ̈r pödhh bënn ómulli yïí ni nɑm me pɑ nyi dwön. Yï óni othinh me dhødh kì kö meye, e di mɑɑrø. Wu ónëngɑ ki medi pyëw kì Yerusɑlem, ni othinh kenyi med pyëwe kì kö meye. Keny-ɑ ólidh wun møgɑni, pëthi wun ómïni, kɑ wu ótëngø, kɑ dëlli wun óyönø. Codhe, o yod yi wun kinni, yɑn yɑ Jwøng-ɑ Ácwɑ̈ɑ̈j, ngɑn lïngi kwøbbɑ nyi kønyɑ’ kønyø, o tyëng-ɑ mɑɑn yɑn nyi cɑyɑ’ cɑyø ki rɑ̈ji pyëwɑ.” Jwøng-ɑ Ácwɑ̈ɑ̈j óbï kɑ mɑc, óbï e kɑ̈ll-ɑ yij ɑtunø, e bï-ɑ be cɑyi tyëng-ɑ pyëwe rɑj ki gïn. Ji ócɑy yi en kì kömi piny kɑ pilø kí mɑc; tyëng-ɑ óyode ge røngø, gï nɑ̈ge’ nɑ̈gø. Jwøng-ɑ Ácwɑ̈ɑ̈j okööbø kinni, “Tyëng-ɑ nyi gwir ri gen kipe mɑlli jwögg-ɑ pɑth, bøli kej gen ɑ́thumi; gen ɑ tyëng-ɑ nyi myeer ri gen yethi bɑ̈gg, kɑ ge ocyɑ̈mø ki kundhøngø kí yëjj, gïg-ɑ nyi kømi pyëw lɑ̈mmø. Gïg-ɑ rømmi yi gen kí gïg-ɑ gøggi yi gen ngɑ̈nyi yi yɑn. Yɑ bï-ɑ be cøngi jii pödhh-ɑ kyeelø bënn, o ge bï gen, o gïn-ɑ nyi gwøg yi tegɑ lidh yi gen, o yod yi gen kinni bɑ yɑn ɑ cɑy gen. “De kwï gen ówiy yi yɑn, o ge örɑ pödhh-ɑ lɑ̈wi; pödhh-ɑ nuti pɑ̈nyi perɑ ki lïngø, wɑlɑ̀ gïgdøngø møg-ɑ nyi gwøg yi yɑn nuti liidh gen, ge óörɑ Tɑrcic, kí Lïbiyɑ̀, kí Lud; pödhhi tyëng-ɑ pëddi pöd ki weth. Møøgø óörɑ Tubɑl kí Yönɑn. Kwøbbi döngɑ ókømmi yi gen kì pödhhɑni. Wɑddi wun, tyëng Isrɑil ódwöög yi gen kì yethi pödhh-ɑ kyeelø; gï muuj ge’ yɑn. Gï ómuuj gen yɑn kì wïj kïti kwër kì Yerusɑlem, ge cyɑ̈dh-ɑ kyënyì, kí ógɑll, kí ɑmɑl, kí uddi kömi ɑmɑl, kí yɑ̈th-ɑ nyi pyejji yi kyënyì, ni kenyi kɑ̈ni tyëng Isrɑil yij Kengø ki gemè kì yethi yɑ̈ɑ̈th møg bɑ ɑkwër kidøøj. Kwï gen ógwøøgɑ gɑ ókwër, kɑ møøgø gwøøgɑ gɑ Kwɑrri Leebì. “Kwɑrri wun óbëëdø nyingi gen pɑ lɑ̈ɑ̈ny, ni kɑ̀ nud piny-ɑ nyɑ̈n geki mɑl-ɑ nyɑ̈n møg-ɑ ɑ́cwɑ̈jɑ ki tegɑ. Jii pödhh-ɑ kyeelø bënn óbï Yerusɑlem keny be wøwi yɑn kì wïj tuung dwɑ̈y geki cyɑ̈ɑ̈ng Sɑbɑth. Keny-ɑ ókedh gen ge døøg-ɑ pödhhi gen, tyëng-ɑ ɑ́pyem ciggɑ ólidh yi gen ge thøø. Kunn-ɑ cɑm gen pɑ thøw, o mɑny-ɑ rɑ̈b gen pɑ thøw, pëthi ji bënn ceg-ɑ lɑ̈mmø yi gen.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Wɑ̈nyø men bɑ møg-ɑ ɑ́kwøb yi Jermɑyɑ̀ wɑ̈d Kilkiyɑ̀, jɑl mɑ ɑ́bëëd ɑ́ ókwërø kì Anɑthöth kì myërri gøl Ben Yɑmïn. Jwøng-ɑ Ácwɑ̈ɑ̈j ɑ́kööb geki Jermɑyɑ̀ keny-ɑ ɑ́bëëd Yöciyɑ̀ wɑ̈d Amön bɑ rɑ̈ɑ̈dh Yeudiyɑ̀ e runne bɑ pyɑ̈rø wïdɑ́dɑ̈g kì yij lɑwø. Kɑ Jwøng-ɑ Ácwɑ̈ɑ̈j cig-ɑ kwøb ki en keny-ɑ ɑ́bëëd Yöciyɑ̀ wɑ̈d Yöyɑkim bɑ rɑ̈dh. Kì bɑng kenyɑni, kɑ Jwøng-ɑ Ácwɑ̈ɑ̈j nyii kööbø ki en tyel mø gïïr, gïti kɑ ɑ́göög runni Dhedekiyɑ̀ wɑ̈d Yöciyɑ̀ ki pyɑ̈rø wïdɑ́kyel kì yij lɑwø. Wɑɑngɑni kì bïïj dwɑ̈tt ɑ ɑ́kïdhi tyëng Yeudiyɑ̀ yïnø. Yɑ ɑ́köbbi yi Jwøng-ɑ Ácwɑ̈ɑ̈j kinni, “Yï ɑ́myegɑ cøn, yï nuti nëngø yi yɑn ki wëy, kɑ yï yieenyɑ wɑ̈yí, yï nuti nywølø, kipe kinni o yï gwøøgɑ yïn ɑ́ jɑltöng kì kömi pödhh bënn.” Alöggɑ kinni, “Jwøng-ɑ Ácwɑ̈ɑ̈j Jwøk, yɑ bɑ othinh, yɑ kwïj kwøb.” De Jwøng-ɑ Ácwɑ̈ɑ̈j yɑ ɑ́köbbe kinni, “Yï ko kööb kinni yï bɑ othinh, de kedhí yï tyëng-ɑ yï gen örɑ yïn, kɑ ge köbbí møg-ɑ cïgɑ yïn bënn. Yï ko böggi yi gen, mɑ́ yɑ ócyɑ̈dhi ki yïn, yɑ kor-ɑ yïn.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk! Codhe, kɑ Jwøng-ɑ Ácwɑ̈ɑ̈j cönge rïïje, ɑnywɑle dhøgɑ, kɑ yɑ köbbe kinni, “Lïng! Kwøbb-ɑ ókømmi yi yïn ɑ cïbɑ dhøgí èn. Yï ɑ́thödhɑ ki tegø dicyɑ̈ngtïn kì kömi pödhh bënn; tegø men puthí wɑ̈g, kɑ yï cöd-ɑ piny, kí tegø men gëëd kɑ yï mïn-ɑ piny.” Kɑ yɑ köbbi yi Jwøng-ɑ Ácwɑ̈ɑ̈j kinni, “Jermɑyɑ̀, yï nenn-ɑ ngø?” Alöggɑ kinni, “Bɑɑd yɑdh ɑkemel.” Kɑ Jwøng-ɑ Ácwɑ̈ɑ̈j okööbø kinni, “Yï ɑ́lidh dyër, o yɑ yïd-ɑ kinni o kwøbbɑ bï gen gɑ dyër.” Codhe, ɑcigi yɑn köbbø yi Jwøng-ɑ Ácwɑ̈ɑ̈j kinni, “Á ngø këti ɑ nenni yi yïn?” Alöggɑ kinni, “Yɑ nenn-ɑ dɑg me twɑg kì wɑɑng wuudø e wuul-ɑ tuung.” Kɑ yɑ köbbi yi Jwøng-ɑ Ácwɑ̈ɑ̈j kinni, “Ryɑ̈g ótwɑɑg kömi tyëng-ɑ piny men, e kɑ̈ɑ̈l-ɑ wɑɑng wuudø, mɑ́ yɑ cwööl-ɑ tyëng wɑɑng wuudø bënn kinni bï gen keny. Rɑ̈nhi pödhhɑni kwømmi gen ócïb dhøggi döri Yerusɑlem kí bɑdhhi döre, geki bɑdhhi kɑ̈ddi Yeudiyɑ̀ møg-ɑ kyeelø. Jiɑ cɑyɑ’ cɑyø mɑ́ ge ɑ́røngi, yɑ ɑ́wiy gen piny kɑ ge kedh-ɑ be mɑlli jwögg møøgø, kɑ gï ngɑ̈ddi gen ki gëdhhì. Ge ɑ́göög ki ngïjji jwögg møg mɑlli yi gen. Anɑn dhwöödh Jermɑyɑ̀, kɑ yï kedhí be köbbi gen møg-ɑ cïgɑ yïn bënn, yï ko böggi yi gen, kipe yï ógöjjɑ wɑ̈ɑ̈rø kì bøli gen. Kɑ yɑ köbbi yi Jwøng-ɑ Ácwɑ̈ɑ̈j kinni, i kedhɑ kɑ tyëng Yerusɑlem köbbɑ bënn kinni, Jwøng-ɑ Ácwɑ̈ɑ̈j okööbø kinni, “Bëën-ɑ ɑ́bëëd yï thiinh yï mïdh-ɑ kwøb, nudd e opɑrrø yi yɑn, kí kër-ɑ ɑ́mɑɑr yɑn keny-ɑ ɑ́cerɑ yïn nywømø, yï ɑ́lugi kì bɑngɑ kì yij ryɑng, yï kɑ̈ll-ɑ yij piny me nuti pɑ̈nyø purø. Isrɑil, yï bɑ miɑ yɑ ketɑ, yï ɑ́bëëd yï bɑ ɑkwër yïn ɑ́ miɑ, kɑ tyëng-ɑ ɑ́göggi yïn ki rɑj kömi gen ödɑ ki orɑng geki ryɑ̈g. Yɑn, yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Yïn ɑ gøl Yɑgob, lïngí wööni Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j okööbø kinni, “Á ngø ɑ ɑ́yod yi kweyyi wun e rɑɑj kì riɑ, ɑ wiy yɑn piny yi gen? Gede ɑ kedhi gen be mɑlli ngïjji jwögg møg bong per gen, ɑ bɑnge göög gen thyew ge bong per gen? Gede ɑ pɑ pɑ̈nyi gen kwøb kinni, ‘Ágøne Jwøng-ɑ ɑ́yïëël wɑ wɑ̈g kì Rïp, ɑ ɑ́pyejji wɑ kì yij ryɑng men-ɑ pɑ̈ng yi ɑyejø kí burrì, piny-ɑ yije bong pï, ɑ bɑ muudhø, piny-ɑ bong ngɑn nyi kɑ̈l yije, piny-ɑ bong ngɑn bëëdø kì yije?’ Kɑ wu kɑ̈ɑ̈lɑ piny-ɑ yije pɑ̈ng yi gïïpiny bëne, o wu cyɑ̈ɑ̈m wun ki gïg-ɑ døøj kì yije. De pinyɑ ɑ́yöd e ceg kɑ rënyø yi wun; piny-ɑ ɑ́mëggɑ wun, ɑ́bwöl yi wun. Ókwër nuti pɑ̈nyi pëjjø kinni, ‘Jwøng-ɑ Ácwɑ̈ɑ̈j ying-ɑ keny?’ Yɑ kwïj yi ókwërɑ. Yɑ ɑ́bɑny yi tyëng-ɑ jyɑ̈ɑ̈gø. Jøtöng tööngø kɑ nyingi Bɑɑl, o ge mɑll-ɑ ngïjji jwögg møg bong per gen. “O yɑn, yɑ Áyïmø, yɑ nudd yɑ ogönyø ki wun, o yɑ ógönyø ki kwɑrri wun. Bɑ̈ɑ̈nu nɑm, kedhu Kobros, kɑ wu lïdhi wun, kɑ wu ödu Kedɑr kì wɑɑng cyɑ̈ɑ̈ng mwøl ki dhɑnhø. O yod yi wun kinni bong gïn ni men mɑ ɑ́cwöb cøn. Bong pödhø mɑ ɑ́wil jwögge, ngö ge pɑth ki jwögg kidyër. De jiɑ yɑ ɑ́wil gen ki jwögg møøgø. Jwøng-ɑ ɑ́thödhi gen ki dhwɑ̈ng ɑ́wil gen ki jwögg møg bong per gen. Aköbbɑ mɑl kinni nhɑ̈nhe yi böögø, o ngɑ̈nge, o wïje cunge, mɑ́ jiɑ ɑ́göög ki orøg tyel ɑ́ryew, yɑ ɑ́wiy gen piny, yɑ bɑ wɑɑng pïg-ɑ tïl, kɑ ge okunyø ki ɑwöll, ɑwöll mø kɑggø ge pɑ cuggi mïdhø ki pï kinni tek. “Isrɑil pɑth ki bɑ̈ng-ɑ ɑngew, nuti nywøøl-ɑ yij bɑ̈ɑ̈ngø. De ede bɑnge ɑ rïngii yi tyëngmɑ̈ɑ̈nø? Ge ɑ́ngɑ̈rrì kì köme ni ngur, pinye ɑ́gwøg ɑ́ ryɑng yi gen, kɑ kɑ̈dde cøør piny kɑ ji odɑ̈gø kì yethi kɑ̈ddɑni. Yɑ̈ɑ̈r wïjí ɑ́kɑ̈ɑ̈l wɑ̈g yi tyëng kɑɑl Mɑmpis geki tyëng Tɑpɑnes, Isrɑil, yïn ɑ ɑ́kɑ̈ɑ̈l gïgɑni kömí kì bɑng kɑ ɑ́wiy yɑn piny, yɑ Wöw Jwøgí, yɑ pyejj-ɑ yïn kì yöö. Yï orumø kinni ɑ́ ngø ɑ óyod yi yïn keny-ɑ ókedhi Rïp be mɑdh ki pïi Kiir? Á ngø ɑ óyod yi yïn, keny-ɑ ókedhi Acuur yï kedh-ɑ be mɑdh ki pïi Porɑt? Yï ócɑy-ɑ yi rɑ̈jí, yï ócɑy yi wiy-ɑ ɑ́wiy yɑn piny. Rɑ̈ji wiyí yɑn piny, yɑ Áyïmø Jwøgí, óyod yi yïn ki keny-ɑ keje, kì bɑng kɑ ɑ́wïyí ki mïdhi kwøbbɑ.” Møg-ɑ ɑ́kwøb yi Wë Wïlɑ̈bø, Jwøng-ɑ Ácwɑ̈ɑ̈j ɑgɑk. Wë Jwøng-ɑ Ácwɑ̈ɑ̈j okööbø kinni, “Isrɑil, yï ɑ́bɑ̈nyi jɑɑgø yi yɑn kɑ̈ge dööng ceth, yï ɑ́bɑ̈nyi gwøgi gïn-ɑ ɑ́köbbɑ yïn, kɑ yï óbɑ̈nyø mɑlli yɑn. Yï ɑ́pëggi be mɑlli jwöggi nyöödø kì wɑ̈thi ótøng geki thɑ̈thi yenh-ɑ mɑr. Yï ɑ́pidhɑ yïn ɑ́ oløg me pëddi døøjø, yï ɑ́pidhɑ yïn ɑ́ köödhø me døj cɑrø. De lidh, rií ɑ́løg ngø! Yï pɑ̈r ki oløg me kwɑ̈gø. Cɑgg yï di lwøg ki sɑbon me teg, kɑ̈jj-ɑ ɑ́cödh yi orøgí di bëëd ge nudd ge onennø yi yɑn. Yï kyëëd ɑ dï, kinni rií nuti bwööl yïn, kí kinni Bɑɑl nuti mɑllø yi yïn? Yï ɑ́røng ɑ dï kì yij tör, lidh gïn-ɑ ɑ́gwøg yi yïn. Yï nɑ ɑmɑlø ɑ nyi tummi wïje kenyi bëën bøli kej tige. Yï nɑ mɑɑdh ɑderø ɑ nyi rengi pɑ̈l kenyi bëën bøli kej tige, ɑ́ men ɑ cuggi mɑɑgii piny? Bong thwønh me pïd ree ki yɑbii, mɑ́ e nyi bëëd e nud ceth kì bøli kej tïg. Isrɑil, tyellí ko pïd, cwɑggí ko wëggí thwøwø yi rïngø kì bɑng jwögg møg pɑth. De yï okööbø kinni, ‘Pɑth, yɑ pɑ døøg cyɑ̈n. Yɑ kedh-ɑ bɑng jwögg-ɑ mɑɑr yi yɑn ceth.’ ” Jwøng-ɑ Ácwɑ̈ɑ̈j okööbø kinni, “Yï óyɑ̈r yï gøl Isrɑil, ni kenyi yɑ̈r kur kenyi mɑgii, yï óyɑ̈r wuki rɑ̈nhí, kí jɑggí, kí ókwërí, kí jøtöng møgí. Yï óyɑ̈r yï bëní, mɑ́ yï okööbø ce wïyí bɑ yɑdh, o kït bɑ meyí. Yɑ ɑ́lugí ngɑ̈jí, de kenyi bëën rɑj kömí, o yï nyi dwöög yïɑ yï kwɑjj-ɑ yɑn kinni yielɑ yïn. “Ágøne jwögg-ɑ ɑ́göggu ri wun? Wiy wu yiel yi gen kenyi bëën rɑj kömi wun, keløg ge ócuggø yïëdø! Yeudiyɑ̀, ɑ́ ngø kwɑnni jwöggí nɑ kwɑnni kɑ̈ddí? Wude ɑ gönyu yɑn, yɑ ɑ́rum ki bɑnyø yi wun? Wu ɑ́cɑyɑ, de bong gïndøj mɑ ɑ́bï, wu ɑ́bɑ̈nyi tyenyø yi yɑn. Yïn ɑ gøl Isrɑil, jøtöng møgí ɑ́cɑm yi pilí ni kenyi cyɑ̈ɑ̈m ngur. Wu tyëng Isrɑil, lïngu møg-ɑ köbbɑ wun. Yɑ ɑ́bëëd yɑ nɑ ryɑng kì yï wun, wɑlɑ̀ yɑ nɑ piny me rɑj, me bɑ muudhø. De wude ɑ kööb wun kinni wu ógöögø ki wɑ̈thi wun ni kɑ̀ dwɑddu en, o wu pɑ dwöög köörɑ? Nyɑnɑjur wïje nyii wïlø ki tigge? Nyɑndhɑjø wïje ówïl ki ógødh cyɑ̈ɑ̈ng nywöme? De jiɑ yɑ ɑ́wiy piny yi gen, ki cyɑ̈ng mø pɑ yïëy kwɑnø. Yï Isrɑil, yï nɑ ngɑn ngɑ̈ny rïngø kì bɑng cwøw, cɑgg ɑ́ tyëng-ɑ mɑ̈nn møg-ɑ rijjø ge ócuggø pwönyø yi yïn ki yɑb ki cwøw. Ógudhí cödhø yi remmi tyëng-ɑ ɑbuur geki tyëng-ɑ yï gen bɑ̈r, gen ɑ tyëng-ɑ nuti mɑgø ge kɑb-ɑ gïïpiny. “De møgɑni bënn ɑ́kyer yi yïn, yï okööbø kinni, ‘Yïɑ bɑ̈r, Jwøng-ɑ Ácwɑ̈ɑ̈j pyëwe pɑ nudd e rɑɑj ki yɑn.’ De yï bɑ men cɑy yi yɑn ceth, mɑ́ yï ɑ́kyëëd ce yï nuti røngø. Yï ɑ́yöni kì bɑng kɑ ɑ́rengí bɑng jwöggi pödhh-ɑ kyeelø. Yï óyɑ̈ɑ̈r yi Rïp ni kɑ ɑ́yɑ̈ɑ̈r yïn yi Acuur. Yï órengi yi Rïp yï yɑ̈ɑ̈rø. Tyëng-ɑ ngɑ̈dh yi yïn ɑ́rum ki bɑnyø yi yɑn, yɑ Áyïmø; bong gïjø men-ɑ óyod yi yïn kì bɑng gen.” Jwøng-ɑ Ácwɑ̈ɑ̈j okööbø kinni, “Keløg dhɑnhø cyëge otɑ̈ngø yi en, kɑ ókedhø kɑ ogöögø ki cï jɑlø megø, pɑ cige dwöög yïe. Piny bɑ men bwöl yi gïn ni menɑni. De yïn yï Isrɑil, cwøwí gïïr, o ɑnɑn yï dwɑddí dwöög yïɑ! Lïïdh wɑ̈thi ótøng, dɑ keny mɑ ɑ́döng kì kelli gen yï nuti göögø ki ngɑn niin ki köögi kì yije? Yï nyi yïd-ɑ cwøw kì tøggi yëëth ni kenyi lïïb kur kì yöö ki ji mø rødh yi gen. Piny ɑ́bwöl yi yïn kì bɑng gwøøgí yïn ɑ́ ngɑn niin ki köögi. Bene ɑ bɑnge mɑ̈ɑ̈n kødh, kɑ bong-ɑ onywiyì. O men-ɑ́ yï nënni yïn ɑ́ ngɑn nyi niin ki köögi ceth; yï kwïj ɑyɑ̈r. “O yï ti kwøb ɑnɑn kinni, ‘Yï bɑ wïyɑ, o yɑ ɑ́wöni yɑ omɑɑrø yi yïn ceth kër-ɑ ɑ́wönɑ yɑ thiinh. Yï ócög pyëwí rɑɑj ki yɑn? Linyí ógïti ɑtheer?’ Isrɑil, bene gen møg-ɑ ɑ́kwøb yi yïn, de yï ɑ́göög ki gïgrijjø ni kɑ ɑ́dwɑddí.” Kɑ yɑ köbbi yi Jwøng-ɑ Ácwɑ̈ɑ̈j, kì bøli keny-ɑ ɑ́bëëd ɑ́ Yöciyɑ̀ ɑ bɑ rɑ̈dh, kinni, “Gïn-ɑ ɑ́gwøg yi ngɑndhɑjø men-ɑ kwïj bëëdø, Isrɑil, ɑ́lidh yi yïn? Ngɑ̈je ɑ́luge yɑn kɑ ogöögø ki ngɑn niin ki köögi kì wɑ̈thi ótøng geki thɑ̈thi yenh-ɑ mɑr bënn. Yɑ ɑ́rum ceth kinni kɑ ɑ́rume gwøgi møgɑni bënn, bɑ men dwöög yïɑ. De nuti dwöögø. Gwøngɑni ɑ́lidh yi Yeudiyɑ̀ nyimen nyɑn-ɑ kwïj bëëdø. Álidh yi Yeudiyɑ̀ kinni Isrɑil ɑ́tɑ̈ng yi yɑn, de nuti bwøgø. Áyöd e ceg-ɑ gwøg ki ngɑn nyi niin ki köögi thyew, wïje nuti pɑ̈nyi lɑ̈ɑ̈yø. Piny ɑ́bwöl yi en; ɑ́røngi kì bɑng kɑ ɑ́mɑlle kïttì kí yenh. O kì bɑng møgɑni bënn, Yeudiyɑ̀ nyimï Isrɑil kööbe cem e dwöög-ɑ yïɑ, de yije dɑ ɑ́dud. Yɑn, yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Kɑ Jwøng-ɑ Ácwɑ̈ɑ̈j yɑ cige köbbø kinni, i cɑgg ɑ́ kɑ ɑ́wiyii piny yi Isrɑil, Isrɑil óløg me lɑ̈w kibøli Yeudiyɑ̀. Yɑ ɑ́köbbe i lïïdhɑ wɑɑng wuudø, kɑ yɑ ryeerɑ kinni, “Isrɑil cɑgg dhøgí pɑ nyi mïdhi yi yïn, dwöög yïɑ, mɑ́ pyëwɑ nyii lɑ̈ɑ̈mø, o yɑ koo bëëdø pyëwe dɑ liny. Yɑ pɑ cög pyëwɑ dɑ liny ki yïn gïti ɑtheer. Yïëëy yøw kinni yï ɑ́bɑ̈jji, kɑ kwøbbɑ pyem yi yïn, yɑ Jwøgí Jwøng-ɑ Ácwɑ̈ɑ̈j. Kɑ yï yïëëy kinni yï ɑ́røngi kì thɑ̈thi yenh-ɑ mɑr bënn, kɑ yï ómɑ̈ddø kì bøli jwögg mø pɑth, o kwøbbɑ nuti lïngø yi yïn. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. “Wu tyëng-ɑ kwïj bëëdø, dwöög wun yïɑ, wu bɑ møgɑ, yɑ ókɑ̈bbi ki dhɑnhø ɑ́kyel kì yethi kɑ̈ddi wun, kɑ yɑ ókɑ̈bbø ki ji ɑ́ryew kì wïj kɑl, kɑ wu dwöög-ɑ Kïti Dhɑyøn. Wu óthödhɑ ki jɑgg møg-ɑ ólïngi kwøbbɑ, o wu ókwɑy yi gen ki peli wïj geki dïdø. Codhe, keny-ɑ óngënyi wun kì pinyɑni, ji koo kööbø këti kì ri Sɑnduug Cigg men-ɑ bɑ miɑ, ji koo rumø kì ree, wɑlɑ̀ koo pɑrri yi gen, koo dwɑddi yi gen thyew, wɑlɑ̀ ge koo göögø ki megø. Keny-ɑ óbëën bøli kenyɑni, Yerusɑlem, ócwøl ɑ́ ‘Kwøøm Jwøng-ɑ Ácwɑ̈ɑ̈j,’ o pödhh bënn ócugi yije be mɑlli yɑn. Ge koo bëëdø ge gwøg-ɑ gïgrijjø møg-ɑ tyer yi pëthi gen ki tegi wɑ̈ɑ̈th këti. Kì yethi cyɑ̈nggɑni, Isrɑil órëbi ki Yeudiyɑ̀, kɑ ge ódwöögø kì yïnø kyeel, ge kɑ̈ɑ̈l-ɑ pödhø me ying wɑɑng cyɑ̈ɑ̈ng mwøl, kɑ ge dwöög-ɑ piny-ɑ ɑ́mëggɑ kweyyi gen ɑ́ mi gen gïti ɑtheer.” Jwøng-ɑ Ácwɑ̈ɑ̈j okööbø kinni, “Isrɑil, yï ɑ́dwɑddɑ’ kwɑnyø yïn ɑ́ nyɑrɑ. Kɑ yï nëngɑ ki piny me døj, piny me pëddi døøjø kì kömi piny bëne. Yɑ ɑ́dwɑdd-ɑ kinni o yɑ cwølli yi yïn yɑn ɑ́ wïyí. O ngɑ̈jí pɑ lugí yɑn këti. De yï nuti bëëdø kidøøj kì bølɑ, yï ɑ́göög ki dhɑjø me rɑj. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Cwɑg olïngø ge kɑ̈ɑ̈l-ɑ wɑ̈thi kïttì, bɑ cwɑggi tyëng Isrɑil, ge ceg-ɑ kïïwø, ge odhɑmmø mɑ́ ge ɑ́bëëd ge orøngø kɑ wɑ̈thi gen owïlø ki Jwøøg gen, Jwøng-ɑ Ácwɑ̈ɑ̈j. Dwöög wun, wu tyëng-ɑ ɑ́lugi ngɑ̈thi wun Jwøng-ɑ Ácwɑ̈ɑ̈j wu ótuure kɑ wu wëgge mïdhi kwøbbe. Wu okööbø kinni, “Awøø, wø kedh-ɑ yï Jwøng-ɑ Ácwɑ̈ɑ̈j, mɑ́ e bɑ Jwøøg wøn. Wø nuti yielø yi mɑlli jwögg-ɑ pɑth kì wɑ̈thi kïttì. Kønyi Isrɑil kɑ̈ɑ̈l-ɑ yï Jwøgee, Jwøng-ɑ Ácwɑ̈ɑ̈j kete. De mɑlli Bɑɑl wø ɑ́göjje’ ɑyɑ̈r, kí lɑ̈ɑ̈nyi dhög kí dyëg, kí nyigi wøn geki wɑ̈ddi wøn, kí gïg-ɑ ɑ́lem yi kweyyi wøn cøn, Wø ɑ́yɑ̈r ki yɑ̈rø me dwøng. Wø ɑ́wöni wø orøngø ceth wøki kweyyi wøn, kì bøli Jwøøg wøn, Jwøng-ɑ Ácwɑ̈ɑ̈j; cigge nuti pɑ̈nyø lïngø yi wøn.” Jwøng-ɑ Ácwɑ̈ɑ̈j okööbø kinni, “Wu tyëng Isrɑil, keløg wu dwɑdd-ɑ dwöögø, dwöög wun yïɑ; keløg kwøbbɑ olïngø yi wun kɑ ngïjj-ɑ mɑɑn yi yɑn weddi yi wun, wu ócuggø köngø ki nyingɑ kidyër. Kɑ yɑ kwɑjji yi pödhh bënn o ge gyëdh yi yɑn, o yɑ lenhi yi gen.” Jwøng-ɑ Ácwɑ̈ɑ̈j köbb-ɑ tyëng Yeudiyɑ̀ geki tyëng Yerusɑlem kinni, “Gweju pwödhhi wun møg-ɑ nuti gwejø, byel ko kɑ̈ɑ̈g wun kelli koodh. Mïdhu lwömi wun ki yɑn, yɑ Wïi wun, kɑ ri wun thyëyu yɑn, wun ɑ tyëng Yerusɑlem kí Yeudiyɑ̀. Ke pɑ göög wun kinøw, rɑ̈ji pyëwɑ ólyel ni mɑc kipe gïgrijjø møg-ɑ ɑ́gwøg yi wun. Olyel mɑnyɑni, bong ngɑn-ɑ ólwɑ̈ngii ki nɑ̈gø.” Koodh kɑ̈ngì kì yij piny bëne! Kiiw ɑkyew! Köbbi Yeudiyɑ̀ kí Yerusɑlem kinni rengi gen kɑ̈dd-ɑ ówenø ki dör. Nyoodh yuu Dhɑyøn! Rengí, yieel wëyí kunɑni! Yï ko cwööng! Jwøng-ɑ Ácwɑ̈ɑ̈j ókɑ̈nø ki ryɑ̈ng-ɑ rënyi piny, gø kɑ̈ɑ̈l en ɑ wɑɑng wuudø. Ngɑn-ɑ bï be rënyi piny ɑ́bï ni ngur me kɑ̈ɑ̈l keny-ɑ pɑ̈n en. Bï-ɑ be rënyi Yeudiyɑ̀. Kɑ̈ddi Yeudiyɑ̀ ódöng ge rënyø, o bong dhɑnhø men-ɑ óbëëdø kì yethi gen. Lunyu ri wun ki ocwɑ̈llì kɑ wu ywöngi wun, kɑ wu kïïw wun, mɑ́ Jwøng-ɑ Ácwɑ̈ɑ̈j pyëwe nudd e rɑɑj ki mendwøng ki Yeudiyɑ̀. Jwøng-ɑ Ácwɑ̈ɑ̈j okööbø kinni, “Rɑ̈nhì geki jɑgg óbwøg dicyɑ̈ngɑni, ókwër wɑ̈thi gen ómuum, kɑ jøtöng ongɑ̈ngø ki menteg.” Codhe ɑkööbɑ kinni, “Wuö, Jwøng-ɑ Ácwɑ̈ɑ̈j, tyëng Yerusɑlem ɑ́wëny yi yïn bënn! Yï ɑ́kööb kinni i ódi mër, de yöd ɑ́ pilø ɑ muddi gen.” Bøli keny-ɑ óköbbi tyëng Yerusɑlem kinni ɑtunø me lëëdh obëënø, ɑ́wɑ̈nhi, óköni kömi gen e kɑ̈ɑ̈l-ɑ yij ryɑng. Koo bï ɑ́ yømø me nøg, men køøl cong keti gen. Atun-ɑ bï e gööj-ɑ yi Jwøng-ɑ Ácwɑ̈ɑ̈j óbëëd e teg ki mendwøng! Bɑ Jwøng-ɑ Ácwɑ̈ɑ̈j kiree ɑ ɑ́kwøb kwøbbi cɑyi jie. Lidh tyëngmɑ̈ɑ̈nø ɑ́bï ge nɑ pøøl, yɑ̈thi liny mø gen nɑ ɑtunø, kyënyi gen yöd kibøli cør. Wɑ ɑ́cyen! Wɑ ɑ́gɑ̈g! Yerusɑlem, lwöög orøg wɑ̈g kì miní, o yï yiel. Yï gït-ɑ wɑɑng yï rømm-ɑ rummì mø rijjø? Tyëngwöödø møg kɑ̈ɑ̈l Dɑn kí myërri kïtti Eprɑim ɑ́kɑ̈ni ki wöödø me rɑɑj. Ge ɑ́bï-ɑ be köbbi pödhh geki Yerusɑlem kinni tyëngmɑ̈ɑ̈nø obëënø ge kɑ̈ɑ̈l-ɑ pödhø me lɑ̈wi. Tyëngmɑ̈ɑ̈nø møgɑni ówøøw kömi kɑ̈ddi Yeudiyɑ̀, o Yerusɑlem tyeg yi gen ni tyëng-ɑ nyi kor pwödhø, mɑ́ jie ɑ́pyem-ɑ dhø Jwøng-ɑ Ácwɑ̈ɑ̈j. Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Yeudiyɑ̀, yï ketí ɑ ɑ́kɑ̈ɑ̈l ryɑ̈ngɑni kömí ki bëëdí geki gïg-ɑ gøggi yi yïn, orøgí ɑ ɑ́kɑ̈ni kömí ki orɑng menɑni bëne, miní ɑ́pyëde ki tøng. Minɑ ɑ́cöd! Pyëwɑ ceg-ɑ pöd, Yɑ ceg-ɑ orɑng Yɑ nyi cem-ɑ jwɑ̈y kì mɑl kenyi lïngɑ ywøøg kɑ̈ngi liny. Ryɑ̈ɑ̈ng bɑnge dɑ megø, pödhø bëne ɑ́döng e ryɑ̈gø. Kemmi wøn ɑ́jwɑn ki ywɑɑd piny, sitɑrri gen ɑ́döng gɑ thullì. Yɑ gït-ɑ wɑɑng yɑ nenn-ɑ liny e ónyïɑ̈ggø, e kɑ̈ngì okodhø? Jwøng-ɑ Ácwɑ̈ɑ̈j okööbø kinni, “Ji møgɑ wɑ̈thi gen nøg, yɑ kwïj yi gen. Ge nɑ othønhø mø bɑ dhëgg; bong gïn ngɑ̈nyi yi wɑ̈thi gen. Ge ngɑ̈ny-ɑ gwøgi gïnrɑj, de ge nyii dhɑlø yi gwøgi gïndøj.” Yɑ ɑ́lïïdh kömi piny kɑ lidhɑ e bɑ ryɑng, kɑ yɑ lïïdh-ɑ mɑl, bong cɑr kì mɑl. Kɑ kïtt-ɑ døngø lidhɑ ge onhɑ̈nhø, o kïtt-ɑ thønhø nïng-ɑ ri gen. Bong ji mɑ ɑ́lidhɑ, cɑgg ɑ́ men-ɑ́ winy, ge pɑ̈ɑ̈rø. Piny-ɑ lɑ̈be med göögø ki ryɑng; kɑ̈dde rum rënyø, kì bɑng kɑ̀ rɑj pyëw Jwøng-ɑ Ácwɑ̈ɑ̈j ki mendwøng. Jwøng-ɑ Ácwɑ̈ɑ̈j ɑ́kööb kinni i piny bëne ódöng nøw, kɑ ogöögø ki ryɑng. De gø koo rënye ki rënyi dwøng. Piny óywöngi ki ywøøg thøø, kɑ mɑl ogöögø e looj. Jwøng-ɑ Ácwɑ̈ɑ̈j ɑ́rum ki kwøb, o dhøge pɑ wile. Gïn-ɑ dwɑdde gwøgø ɑ́kwøbe, o pɑ døøg cyɑ̈n. Oliidh jøkyënyì geki jøg-ɑ nyi pöödø ki weth, ji órengi. Møøgø órengi yij thïm, møøgø óyedhi wɑ̈thi kïttì. Kɑ̈dd bënn ódöng nøw, o bong ngɑn-ɑ óbëëdø kì yethi gen këti. Yerusɑlem yï ɑ́gɑ̈g! Yïde ɑ rug ki ɑ́cwïcwïl? Yïde ɑ rug ki tigg, kɑ nyingí giid? Bong gïn pere göög yi yïn ki dhwɑ̈ng! Yï ɑ́bɑny yi cwøwí, o ge dwɑdd-ɑ nɑ̈gi yïn. Yɑ ɑ́lïng ki cwɑg mø ni ywøøg ngɑn pɑ̈dhi piny, nɑ ywøøg ngɑn ceg kɑɑyø. Bɑ ywøøg Yerusɑlem, e opɑ̈we køm-ɑ cung, o cinge rïïj en, e okööbø kinni, “Yɑ ɑ́gɑ̈g! Ge bï-ɑ be nɑ̈gi yɑn!” Tyëng Yerusɑlem, rïngi wun, wu tumm-ɑ wɑ̈thi wun kì yethi yëëth, yɑ̈ɑ̈b wun kì kɑ̈jji ngyew! Wu ócuggø yïddø dhɑnhø, men gøggi dyër, men pɑ̈nyi ree ki mïdhi kwøbbi Jwøk? Ke yïddi wun, Jwøng-ɑ Ácwɑ̈ɑ̈j pyëwe ólɑ̈ɑ̈mø ki Yerusɑlem. Cɑgg wu kööbø ce wu mɑll-ɑ Jwøng-ɑ Ácwɑ̈ɑ̈j, wu kømm-ɑ gïn pɑ gwøg yi wun. Jwøng-ɑ Ácwɑ̈ɑ̈j nyi yɑb-ɑ ji-ɑ gøggi dyër ceth. Wu ɑ́gøj yi en, de gönyɑni nuti ywöör yi dëlli wun, wu ɑ́nyønge, de wu ɑ́dhɑ̈li dïdø. Wu ɑ́bëëd muddi wun teeg, kɑ wu ódhɑ̈lø wïyø ki orøg. Codhe ɑrumɑ kinni, “Møg bɑ ji mø nyingi gen cɑn yøw, o ge kwïj wøw. Ge göög-ɑ nøgi wɑ̈thi gen; gïn-ɑ dwɑddi yi Jwøøg gen kwïj yi gen, men-ɑ́ gïn-ɑ dwɑddi yi Jwøng-ɑ Ácwɑ̈ɑ̈j kinni o gwøg yi gen, kwïj yi gen. Yɑ ókedhi yï tyëng-ɑ jyɑ̈gø, kɑ wø okööbø ki gen. Gïn-ɑ dwɑddi yi Jwøøg gen óbëëdø gø ngɑ̈nyi yi gen ceth, eni gïn-ɑ dwɑddi yi Jwøng-ɑ Ácwɑ̈ɑ̈j kinni o gwøg yi gen.” De ge ɑ́bɑ̈nyi bënn ki jyɑ̈gi Jwøng-ɑ Ácwɑ̈ɑ̈j, kɑ ge óbɑ̈nyø ki lïngi kwøbbe. Bene ɑ bɑnge óbëën ngurrì kì pɑ̈l be nɑ̈gi gen, ge ókɑggi yi óthönhì møg kɑ̈ɑ̈l yij pɑ̈l, o kwɑ̈nyì ócyɑ̈dhi ge olïïbø kì yethi kɑ̈ddi gen. Ngɑn kedhi wɑ̈g bɑ men cɑm, mɑ́ orøøg gen dwøng, o ge nyi cög ge lug-ɑ ngɑ̈thi gen Jwøøg gen. Jwøng-ɑ Ácwɑ̈ɑ̈j ɑ́pëjji kinni, “Pyëwɑ ólɑ̈ɑ̈m ki jiɑ kɑ per ngø? Yɑ ɑ́wiy gen piny, kɑ ge kedh-ɑ be mɑlli jwögg møg pɑth ki dyër. Jiɑ ɑ́cɑɑmɑ kɑ ge oyɑ̈ngø, de ge ɑ́yöd ge kedh-ɑ be orøg, kɑ ge ocögø ge bëëdø kɑ tyëng-ɑ nyi niin ki köögi. Ge ɑ́bëëd ge nɑ thönhi kyënyì mø cwɑɑdhø; men nɑ̈g-ɑ yi ngööng cï wɑɑd gen. Ge ko cɑy yi yɑn kipe gïg ni møgɑni? Gøølɑ ko colɑ ki pönh-ɑ ni men? Yɑ óöni ki tyëngmɑ̈ɑ̈nø møg keb bɑ̈ggi jiɑ piny, de gï koo rënyi yi gen ki mendwøng. Ge óköbbɑ kinni celli gen bɑ̈dd, mɑ́ bɑ̈ddɑni pɑth ki møgɑ. Yɑ ɑ́twɑny yi tyëng Isrɑil geki tyëng Yeudiyɑ̀ ki mendwøng. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j ɑ́bɑny yi jie, kɑ ge okööbø kinni, “Bong gïn cuggi gwøgø yi en kidyër. Bong orɑng o bong liny, wɑlɑ̀ kɑ̈j men-ɑ ómɑg wɑ.” Ge okööbø i kwøbbi jøtöng bɑ yømø yøw, o bong wöödø mɑ ɑ́kɑ̈ɑ̈l yi gen kì yï Jwøk. Yɑ ɑ́köbbi yi Wïlɑ̈bø, Jwøng-ɑ Ácwɑ̈ɑ̈j kinni, “Jermɑyɑ̀, mɑ́ ji møgɑni kømm-ɑ gïg ni møg, kwøbbɑ ógwøøgɑ ge nɑ mɑc kì dhøgí. Ji óni yugg, o ge órɑ̈b yi mɑnyɑni.” Tyëng Isrɑil, Jwøng-ɑ Ácwɑ̈ɑ̈j ókɑ̈nø ki pödhø megø kì kun lɑ̈wi e kɑ̈ɑ̈l-ɑ be pɑ̈ɑ̈r kömí. Bɑ pödhø me teg, o kɑ̈ge dööng, o dhøg gen kwïj yi wun. Jøge, jøg-ɑ nyi pöödø ki wethh bɑ yɑɑg teg, o ge nyi nɑ̈gø pëthi gen pɑ lɑ̈ɑ̈m. Byelli wun ócɑm yi gen geki gïgcɑmmi wun bënn; wɑ̈ddi wun ónɑ̈g yi gen geki nyigi wun. Jɑmmi wun óngɑlli yi gen, kɑ oløggi wun geki ólɑ̈mmi wun rënyi yi gen. Kɑ̈ddi wun kɑ̈dd-ɑ ógerø ki dör, møg-ɑ ngɑ̈dh yi wun ócøør piny yi liny gen. Jwøng-ɑ Ácwɑ̈ɑ̈j okööbø kinni, “De cɑgg ɑ́ kì yethi cyɑ̈nggɑni, jiɑ pɑ tyëg ki nɑ̈gø yi yɑn. Keny-ɑ ópëjji gen kinni ɑ́ kipe ngø ɑ ɑ́gwøgɑ gïgɑni bënn, köbbí gen Jermɑyɑ̀, kinni ni kɑ ɑ́lugi gen ngɑ̈thi gen yɑn kì piny gen, kɑ ge kedh-ɑ be mɑlli jwögg møøgø, ge bɑ møg kïdhi be göggi tyëngpɑth, kì piny me pɑth ki mi gen.” Kɑ Jwøng-ɑ Ácwɑ̈ɑ̈j okööbø kinni, “Köbbu kwɑrri Yɑgob, köbbu tyëng Yeudiyɑ̀ kinni, Yiebu nyingi wun, wu ji-ɑ bɑ dhëgg, o pëthi wun bong gïn. Yï wun dɑ nying de wu pɑ nëënø, o yï wun dɑ yïthh de wu pɑ lïngø. Á kipe ngø ɑ pɑ böggu yɑn, yɑ bɑ Wïi wun? Á kipe ngø ɑ pɑ kïrri dëlli wun kì bølɑ? Ayejø ɑ́cïbɑ ɑ́ keew nɑɑm omelø; bɑ kew men gïti ɑtheer gø pɑ bɑ̈ɑ̈ne. Nɑɑm omelø ócuggø lenggi ree, de kewɑni pɑ bɑ̈ɑ̈ne, kɑ ɑpɑgø óngɑ̈rrø, o kewɑni pɑ pöödhe. De men-ɑ́ wun ɑ bɑ ji, muddi wun teeg, o wu bɑ tyëngpëëmø. Wu ɑ́këjji wɑ̈yi wun, kɑ yɑ wiyu piny. Yɑ nuti pɑ̈nyø wørø yi wun, ngö wu nyi ödɑ’ ödø ki kødh kì cwir geki ɑyɑr, kɑ wu nyi thödhɑ ki byel yethi runn bënn. De wu ɑ́yöd wu mɑ̈ɑ̈n-ɑ gïgɑni bënn yi orøøg wun. “Tyëng-ɑ nyi gøggi gïgrijjø obëëdø kì kelli jiɑ, ge nëënø nɑ ji mø kor ɑ́kɑ̈llì, de pɑth ki winy ɑ ceg yi gen den-ɑ́ ji. Uddi gen ɑ́pɑ̈ng gen ki gïg-ɑ kɑbbi yi gen, ni jɑlceg ki ɑ́kɑ̈lli kenyi pɑ̈ɑ̈nge dhönge ki winy. Bene ɑ bɑnge kɑ̈ri gen kɑ ge ótëngø, ɑ bëëd ge cwiy cwiy, o ge yɑ̈ngø yɑ̈ngø. Gïgrijjø møg-ɑ gøggi yi gen bong cögi gen. Jɑmmi kïjj ɑ́mɑ̈ɑ̈n ge gïn, o ge pɑ gøggi dyër kipe tyëng-ɑ nyingi gen guud. “Dɑ́ yɑn, yɑ Jwøng-ɑ Ácwɑ̈ɑ̈j ɑ ócɑy gen kipe møgɑni, gøølɑ ócolɑ ki pönhï. Gïjø me böggi, me kïïr dëllì ɑ́cwöb kì piny men, jøtöng kømm-ɑ kwøbbi pyed, ókwër jyɑ̈ɑ̈g-ɑ møg-ɑ kømmi yi jøtöng, o møgɑni pɑ bɑny yi jiɑ. De ge ógöög ɑ dï kì bɑng keny-ɑ órum møgɑni?” Wu tyëng gøl Ben Yɑmïn, rengi wun, yiel wun wëyi wun! Rengi wun kì Yerusɑlem! Kodhu kɑ̈ngì kì Tekoɑ̀, kɑ wu rub wun ki mɑny-ɑ ólidh kì Bet Akerem. Pöli rek obëënø geki ryɑ̈g, ge bï ge kɑ̈ɑ̈l-ɑ wɑɑng wuudø. Yerusɑlem myëër, de órënyi, ji møøgø óköni ki jɑmmi gen, kɑ ge gudd-ɑ bɑdhhi kɑɑl, ngɑn gudd-ɑ keny-ɑ dwɑdde, kɑ byelli wun cɑm gen. Ge ókööbø kinni, “Gwiru ri wun kipe pɑ̈ɑ̈r kömi Yerusɑlem! Gwiru ri wun! Wɑ ópɑ̈ɑ̈r köme cɑ̈ng gudø ki löj!” De obëën bøli kenyɑni ge ókööbø kinni, “Piny ɑ́pöödh, tïbbì ɑ́pɑ̈ɑ̈dh. Wɑ ópɑ̈ɑ̈r köme kì wɑ̈r, o dörr-ɑ korri kɑɑldwøng cøør wɑ piny.” Áyïmø, Jwøng-ɑ Ácwɑ̈ɑ̈j ɑ ɑ́köbbi jiɑni kinni i ngøl gen yenh piny, o ge göög ki rïwwì møg tyeeg kɑɑldwøng. Ákööb kinni, “Yerusɑlem ócɑy yi yɑn mɑ́ yije guud-ɑ nyingi ji. Yerusɑlem mïdh-ɑ gïgrijjø ni yith ɑ nyi mïdhi pï. Yɑ lïng-ɑ orɑng kí ryɑ̈g kì kɑɑldwøng. Rɑ̈ɑ̈m dëllì kí kedd ɑ nennɑ keti gen. Wu tyëng Yerusɑlem, wiy wu wëggi yewø yi ɑkørrɑni, de ke pɑ yewi wun, wu wiyɑ’ piny, kɑ kɑɑldwøng mi wun løgɑ ryɑng me yije pɑ cuggi bëëdø.” Kɑ yɑ köbbi yi Áyïmø Jwøng-ɑ Ácwɑ̈ɑ̈j kinni, “Isrɑil óyɑy kɑ nɑ oløg men nywøle rumø ki pønø. Yɑ̈ɑ̈b kì kelli oløg kɑ bɑ̈dde yɑllí, men-ɑ óbëëd e dɑ nywøl mø döngø.” Alöggɑ kinni, “Á men ɑ ólïngi kwøbbɑ ke kyëddɑ gen? Muddi gen teeg, o ge ɑ́bɑ̈nyi lïngi kwøbbí, kwøbbí pɑ dwɑddi yi gen. Liny-ɑ ɑ́mɑg yïn nud kì pyëwɑ thyew, o pyëwɑ pɑ cuggi mɑgø yi yɑn këti.” Codhe ɑköbbi yɑn yi Jwøng-ɑ Ácwɑ̈ɑ̈j kinni, “Køny linyɑ kömi othønhø geki yɑɑg-ɑ wøbb kì yethi yëëth. Cwøw ókïdhi yïnø geki mɑ̈nn, cɑgg ɑ́ ywödhh, ge koo wiy thyew. Uddi gen ómëggi tyëngmøøgø geki pwödhhi gen kí mɑ̈nni gen. Tyëngpiny men cɑyɑ’ cɑyø. Ji bënn; tyëngdøngø kí othønhø ge wëny-ɑ ji kipe ngyëny, cɑgg ɑ́ jøtöng geki ókwër ge wëny-ɑ ji. Kedd-ɑ døngø kì ri jiɑ nenni yi gen ge nɑ kɑ̈jj mø bøllø yøw. Ge okööbø kinni, ‘Bong gïnrɑj,’ e dɑ rɑj. Wɑ̈thi gen pɑ lɑ̈ɑ̈y yi gïgrijjø møg-ɑ gøggi yi gen? Bong gøn, wɑ̈thi gen nuti lɑ̈ɑ̈yø, ge kwïj lɑ̈ɑ̈yi wïj! O ge ópɑ̈ɑ̈dh ni ji-ɑ ɑ́kwöngi ki pɑ̈ɑ̈dhø; keny-ɑ ócɑyɑ gen, menɑni óbëëd ɑ́ thumi gen. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j jie ɑ́köbbe kinni, “Cungi wun kì ɑ́kɑrri yëëth, kɑ wu lïdhi wun. Pyëju yëth-ɑ kɑ̈gi gen dööng, ki yuu-ɑ pëddi døøjø, kɑ wu kɑ̈llu yije, o wu óbëëd wun ki mër.” De ge ɑ́kwøb-ɑ kinni, “Pɑth, wø ɑ́bɑ̈nyi!” Codhe, ɑkɑ̈bbi Jwøng-ɑ Ácwɑ̈ɑ̈j ki ngɑn nenni kodhi kɑng ki köögø. De ge ɑ́kööb kinni, “Wø koo lïngø.” Codhe, ɑkööb Jwøng-ɑ Ácwɑ̈ɑ̈j kinni, “Lïng wun, wun ɑ pödhh, kɑ gïn-ɑ ócwöb kipe jiɑ lidh wun. Lïng yïn ɑ piny! Ryɑ̈g kɑ̈ɑ̈lɑ’ kömi ji møg, kipe rɑjj-ɑ gøggi yi gen, kí kipe kɑ ɑ́bɑny gen pwönyɑ, kɑ ge óbɑ̈nyø ki lïngi ciggɑ. Cwɑggɑ ɑ́ ngø ki bɑkur men-ɑ kɑ̈ɑ̈l yi gen kì Cebɑ̀, wɑlɑ̀ ki yenh-ɑ yømi gen med møg-ɑ nyi kɑ̈ɑ̈l kì kun lɑ̈wi? Yɑ koo yïëy ki gïg-ɑ muuj yi gen, wɑlɑ̀ pyëwɑ koo med ki gëdhhi gen. Ji møg ówëggɑ cyerrø kɑ ge ópɑ̈ɑ̈dhø. Ji óthøw kyeel ki nyigi gen, kɑ mɑ̈dhh othøø kyeel geki tyëng byëëg gen.” Jwøng-ɑ Ácwɑ̈ɑ̈j okööbø kinni, “Ji obëënø ge kɑ̈ɑ̈l-ɑ pödhø me ying wɑɑng wuudø, pödhø me teg kì wɑɑng wuudø kun lɑ̈wi ree ɑ́gwire kipe liny. Wethhi gen ɑ́kwɑny gen geki pilli gen, ge bɑ ji mø rijjø, o pëthi gen kwïj lɑ̈ɑ̈mø. Ywøøg tyelli kyënyì kí cwɑggi gen, lïngi e nɑ ruuri nɑɑm omelø. Ri gen gwiir gen kipe nyɑɑg ki Yerusɑlem.” Tyëng Yerusɑlem okööbø kinni, “Wöödø menɑni ɑ́lïngi wøn, kɑ dëlli wøn ceg-ɑ ì lɑ̈b, wø ɑ́mɑg yi wɑ̈ɑ̈rø, kɑ wø orɑngø ni ngɑndhɑjø me pɑ̈dhi piny. Wø pɑ nyi kedhi yethi pwödh, wø pɑ nyi cyɑ̈dhi kì yethi yëëth, mɑ́ wø bɑ ɑtyeg yi tyëngmɑ̈ɑ̈nø cinggi gen dɑ pil; dɑ böögø me dwøng.” Jwøng-ɑ Ácwɑ̈ɑ̈j jie ɑ́köbbe kinni, “Lunyu ri wun ki ocwɑ̈llì, kɑ ri wun ngyelli wun kì yij belø. Ywöngi wun ki pïi nyingi wun, wu ce ywøg-ɑ wɑ̈d wun wɑ̈dkyel, mɑ́ ngɑn-ɑ ópɑ̈ɑ̈r kömi wun óceg-ɑ pɑ̈yyi piny. Jermɑyɑ̀, rɑng jiɑ, yï ce rɑng-ɑ ngyënyø dødø, kɑ ge yood mɑ bëëd gen kidï. Ge bɑ tyëngpëëmø mø muddi gen teeg ge bënn, muddi gen teeg ni ngyënyø dilɑl geki dødø. Ge rënyø ge bënn, mɑ́ ge wïïnø ge kɑ̈ll-ɑ ɑtum. Mɑc lëëdh cɑrø kì purun, de ngyënyø dhɑ̈li lenyø, cyedhhe ɑ́dhɑ̈li bëën wɑ̈g. Jiɑ ɑ́dhɑ̈li; tyëngrijjø ɑ́dhɑ̈li kɑ̈ɑ̈l wɑ̈g kì kelli gen. Ge ócwølli gɑ ji mø bong per gen, mɑ ge ɑ́bɑny yi yɑn, yɑ Jwøng-ɑ Ácwɑ̈ɑ̈j.” Wu ko yïëy këti ki kwøbb-ɑ wëëny wun kinni, ‘Bong gïn nywɑl wɑ! Men bɑ Kengi Wë! Men bɑ Kengi Wë! Men bɑ Kengi Wë!’ “Wil wun yëth-ɑ bëëd wun, kɑ gïg-ɑ gøggi yi wun ɑnɑn wiy wun. Nyi göggu ri wun gïgdøj. Kɑ cɑmmi jɑmmi kïjj geki thwömm, wiy wun. Kɑ nɑ̈nggi ji-ɑ yï gen bɑ̈r kì piny men, wiy wun. Kɑ kwɑjji jwögg møøgø, wiy wun; mɑ́ wu órënyi yi gïn ni menɑni. Ke wil wun bëëdi wun, wu owiyø yi yɑn, o wu bëëd wun kì piny-ɑ ɑ́mëggɑ kweyyi wun, ɑ́ mi gen gïti ɑtheer. “Wu ko ngɑ̈dh kwøbb-ɑ wëëny wun. Wu nudd wu okwɑ̈dø, o wu onɑ̈gø ki ji, wu nudd wu oniin ki tyëng-ɑ nuti nywøøm wun ri wun, wu nyii köngø ki pyed, o wu ngɑ̈dd-ɑ Bɑɑl ki gëdhhì, kɑ jwögg mɑ ɑ́bëëd ge kwïj yi wun cøn mɑlli wun. Wu gøgg-ɑ gïg-ɑ mɑɑn yi yɑn, o wu nyi bï wun be cung kì bølɑ, kì Kengø wu okööbø kinni, ‘Bong gïn nywɑl wɑ!’ Wu orumø kinni Kengɑ bɑ keny nyi pɑ̈nni yi kurrì? Gïg-ɑ gøggi yi wun ɑ́rum ki lidhø yi yɑn. Kedhu Cilø keny-ɑ ɑ́kwøngɑ ki myegø ɑ́ keny mɑlli yɑn, kɑ gïn-ɑ ɑ́göggɑ en kipe orøøg jiɑ tyëng Isrɑil lidh wun. Orøngɑni bëne ɑ́gwøg yi wun, o wu ɑ́bɑ̈nyi lïngi kwøbbɑ, ngö yɑ nyii kööbø, kɑ yɑ nyi cig-ɑ kwøb. Wu nuti yïëyø keny-ɑ ɑ́cwølɑ wun. Gïn-ɑ ɑ́göggɑ Cilø göggɑ’ Kengø men, eni keny-ɑ ngɑ̈dh yi wun. Gïn-ɑ ɑ́göggɑ Cilø gwøgɑ’ gwøgø kì keny, eni keny-ɑ ɑ́mëggɑ kweyyi wun geki wun. Wu cyeddɑ’ cyeddø kì butɑ, ni kɑ ɑ́cyeddɑ wɑddi wun, tyëng Isrɑil. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Kɑ Jwøng-ɑ Ácwɑ̈ɑ̈j okööbø kinni, “Jermɑyɑ̀, yï ko kwɑ̈jji kipe jiɑni. Ge ko ywøøg, wɑlɑ̀ kɑ̈jji gen ko kwɑjjí; rií ko pïd ki odhɑm kì bølɑ, mɑ́ yɑ koo yïëy ki lïngi kwøbbí. Gïg-ɑ gøggi yi gen kì kɑ̈dd-ɑ døngø kì Yeudiyɑ̀ geki Yerusɑlem pɑ nenni yi yïn? Yɑnythønhø gwen-ɑ yugg, o wëëg cwɑg gen mɑc, o tyëng-ɑ mɑ̈nn nyöm gen ɑwɑj men bul ɑ́ kɑɑk, ge bud-ɑ jwøng-ɑ dhɑjø men-ɑ cwøl ɑ́ Rɑ̈ɑ̈dh Mɑl. Ge nyi kuny-ɑ jwögg mø pɑth ki møgi oløg, ge dwɑdd-ɑ göggi yɑn ki gïnrɑj. De bɑ yɑn ɑ göggi yi gen ki gïnrɑj kidyër? Pɑth ki yɑn, ge gögg-ɑ ri gen ki gïnrɑj, o ge kɑ̈ɑ̈l-ɑ ɑyɑ̈r kömi gen. O yɑn yɑ Wïlɑ̈bø, Jwøng-ɑ Ácwɑ̈ɑ̈j, linyɑ liny-ɑ rɑj kønyɑ’ kömi gen geki Kengø men. Linyɑ kønyɑ’ kömi ji geki lɑ̈yy, kí men-ɑ́ yenh geki byel. Linyɑ óni mɑc me bong ngɑn lwɑ̈ngii ki nɑ̈gø. “Wun ɑ jiɑ, dɑ gënh-ɑ nyi rɑ̈b bëne kì wïj këli lɑm, o dɑ gëdhhì møg rïnggi gen bɑ ɑyïëy ki cɑmø yi wun. De gïn-ɑ kwøb yi yɑn, yɑ Jwøng-ɑ Ácwɑ̈ɑ̈j bɑ kinni, gëdhhɑni ryeet ócuggø cɑmø yi wun. Mɑ́ kweyyi wun nuti cïgi yɑn kwøbbi gënh-ɑ nyi rɑ̈b bëne geki gëdhh-ɑ kyeelø cyɑ̈ng-ɑ ɑ́kɑ̈ɑ̈lɑ gen wɑ̈g kì Rïp. De ge ɑ́cïgɑ’ kinni, lïngi gen kwøbbɑ, o yɑ óbëëdɑ yɑn ɑ́ Jwøøg gen, o ge óbëëd gen gɑ jiɑ. De kwøbbɑ nuti lïngø yi gen, wɑlɑ̀ gï nuti ywøør gen. Ge ɑ́yöd ge gøgg-ɑ gïg-ɑ tyer yi gen ki tegi muddi gen, kɑ ge yöd ge ceg-ɑ rënyø kibøli ke di dönyi gen. Wu nyi ödɑ’ ödø ki bɑ̈nggɑ jøtöng këër cyɑ̈ng-ɑ ɑ́kɑ̈ɑ̈lɑ kweyyi wun wɑ̈g kì Rïp. Bong ngɑn mɑ ɑ́lïng wɑlɑ̀ mɑ ɑ́ywøør kwøbbi gen thyew. De wu yöd muddi wun ceg-ɑ tëngø, kɑ wu ópëddø pëëmø kibøli kweyyi wun. “Jermɑyɑ̀, köbbí kwøbbɑni bënn jiɑ, de kwøbbí koo lïngi yi gen ceth, ge ócwøl yi yïn de ge koo yïëy. Ge óköbbi yi yïn kinni kwøbbɑ pɑ lïngi yi pödhi gen, yɑn ɑ Jwøøg gen, Jwøng-ɑ Ácwɑ̈ɑ̈j, wɑlɑ̀ ge pɑ dïd kì bɑng cɑ́y-ɑ nyi cɑɑy gen. Pëthi gen ɑ́thøw. Bong mïdhi dhøg me nud wɑlɑ̀ bong ngɑn kööbø kì ree. “Ywöngi wun, wu tyëng Yerusɑlem, pyëëdu yëyyi wɑ̈thi wun wɑ̈g, kɑ ge weddi wun. Wör wun ki wörri ywøg kì wɑ̈thi ótøng, mɑ́ yɑn yɑ Jwøng-ɑ Ácwɑ̈ɑ̈j, pyëwɑ rɑɑj, o jiɑ ɑ́bɑnyɑ. “Tyëng Yeudiyɑ̀ ɑ́göög ki gïnrɑj, ngïjji jwöggi gen, gïg-ɑ mɑɑn yi yɑn ɑ́cïb gen yij Kengɑ, kɑ gø bwöl gen. Kɑ ge ogëdø kì Töör Kinöm ki këli lɑm me cwøl ɑ́ Töpeth, men köme nyi rɑ̈b gen wɑ̈ddi gen ki nyigi gen womɑ̈nn gɑ gëdhhì. Ge nuti köbbø yi yɑn kinni göög gen ki gïn ni menɑni, rumm-ɑ ni møgɑni nuti pɑ̈nyi bëën wïjɑ. Bøli keny megø óbï men koo cwøllii ɑ́ Töpeth wɑlɑ̀ Töör Kinöm, de ódøøg be cwøllø ɑ́ Töör Ngɑl. Ge ókuny-ɑ kunɑni ki ji, mɑ́ e bong keny megø men-ɑ ókoony gen. Ji ócɑm-ɑ yi winy geki lɑ̈yyi pɑ̈l, o bong ngɑn-ɑ óryem gen kì kömi ji. Piny ógöögø ki ryɑng, mɑ́ medi pyëw geki tugø, kí medi pëëth kí nywöm, ge ócuung yi yɑn kì Yerusɑlem geki kɑ̈ddi Yeudiyɑ̀ møg-ɑ kyeelø. “Obëën bøli kenyɑni, cu rɑ̈nhi Yeudiyɑ̀, kí cu jɑgge, kí cu ókwër geki cu tyëng-ɑ ɑ́bëëd kì Yerusɑlem bënn ógööl wɑ̈g kì yethi rörri gen. Ge koo døøg ki cøngø kɑ ge kony, de ge óceg kɑ wiyø ge odhoongø kì piny ni cyedh. Cu jiɑni óbëëd ge tɑyø kì piny, o ge nenni yi cɑ̈ng geki dwɑ̈y kí kyell. Mɑ́ teenɑni ɑ́mɑɑr-ɑ cɑ̈ng kí dwɑ̈y kí kyell kɑ gï göggi gen, kɑ gï nyi kwɑjji gen, kɑ gï mɑlli gen. O tyëng pönh-ɑ rɑj èn møg-ɑ ɑ́döng ge onëënø kì yïnø, kun-ɑ ɑ́kedhhɑ gen, ge ócwøl thøø kibøli nënnì. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Kɑ yɑ köbbi yi Jwøng-ɑ Ácwɑ̈ɑ̈j i köbbɑ jie kinni, “Kenyi pɑ̈ɑ̈dh dhɑnhø, pɑ nyi dhwödh këti? Keløg dhɑnhø ówɑ̈ɑ̈nyø ki yöö, pɑ nyi døøg ngɑ̈je? De wude jiɑ, ɑ wiyu yɑn piny, kɑ wu ódhɑ̈lø dwöög yïɑ? Wude ɑ mɑ̈gi wun kì ri ngïjji jwöggi wun, kɑ wu óbɑ̈nyø ki dwöög yïɑ? Yïthhɑ ɑ́kyënɑ kidøøj, de bong dyër mɑ ɑ́kwøb yi wun. Bong ngɑn mɑ ɑ́yïëy rɑ̈je, bong ngɑn mɑ ɑ́pëjji kì kelli wun kinni, ‘Á ngø ɑ ɑ́gwøgɑ e rɑj?’ De ngɑn cyɑ̈dh-ɑ́ɑ̀ yuue ni kyeny men pödhhi yij liny. Cɑgg ɑ́ men-ɑ́ ɑ́mɑ̈dh bøli kej dwöönge ngɑ̈nyi yi en. O ɑkur, kí nyɑwɑ̈nyø, kí ɑ́kej, bøli kej bëëni gen ngɑ̈nyi yi gen. De men-ɑ́ wun jiɑ, cigg-ɑ jɑɑgɑ wun kwïj yi wun. Wude ɑ kööb wun kinni wɑ̈thi wun pel, o ciggɑ ngɑ̈nyi yi wun? Lidhu ciggɑ kɑ ɑ́wiil gen yi bödhhi gwed. Jø wun jøg-ɑ wɑ̈thi gen pel ɑ́yɑ̈r, wɑ̈thi gen ɑ́muum kɑ ge pɑ̈dh-ɑ yethi ɑ́kɑ̈llì. De ɑ́gøne peli wïj men-ɑ ɑ́yod yi gen kɑ ɑ́bɑny gen yɑn? Kì bɑng menɑni, pwödhhi gen ómëggɑ tyëngmøøgø, kɑ mɑ̈nni gen mëggɑ cwøw møøgø. Mɑ́ teedø bëne; ngɑndwøng kí othinh yɑb-ɑ kɑ̈rø ki wëënyø. Cɑgg ɑ́ men-ɑ́ jøtöng geki ókwër ge wëny-ɑ ji. Kedd-ɑ ri jiɑ nenni yi gen, ge nɑ kɑ̈jj møg pöggø yøw. Ge okööbø kinni, ‘Piny døøj!’ Ngö e bong gïndøj. Jiɑ, wɑ̈thi wun ɑ́di lɑ̈ɑ̈yø keny-ɑ ɑ́gwøg wun gïgɑni, gen ɑ gïg-ɑ kømi pyëw lɑ̈mmø? Bong gøn, wɑ̈thi wun nuti lɑ̈ɑ̈yø kinni tek, men-ɑ́ lɑ̈ɑ̈yi wïj kwïj yi wun! Kì bɑng menɑni, wu ópɑ̈ɑ̈dh ni tyëng-ɑ ɑ́kwöngi ki pɑ̈ɑ̈dhø, wu óceg ì rɑy kì piny keny-ɑ ócɑyɑ wun. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. “Yɑ ɑ́dwɑdd-ɑ congi jiɑ ni kenyi congi dhɑnhø byelli pwödhe, de ge nɑ oløg me kööre bong nywøl, o ge nɑ ólɑm me ree bong nywøl, o yïthhe wewø wewø. Bene ɑ bɑnge wëggɑ pinyɑni kwɑnyø yi tyëngpɑth.” Jii Jwøk okööbø kinni, “Á kipe ngø ɑ nudd wɑ obëëdø kì piny? Bïu rengi wɑ kɑ̈dd-ɑ bɑ ɑger ki dör, o wɑ thøw wɑ kì kunɑni. Jwøng-ɑ Ácwɑ̈ɑ̈j, Jwøgee wɑ ɑ́cɑye ki thøø, wɑ ɑ́wëgge mɑdhi sïm, mɑ́ wɑ ɑ́røngi kì bøle. Wɑ ɑ́kwɑjj-ɑ mër, o keddee di tuur, de ɑ́yöd kömee pɑ̈dh-ɑ yi böögø me dwøng. Tyëngmɑ̈ɑ̈nø ɑ́wɑ̈nhi Dɑn, cwɑggi kyënyi gen olïngø yi wɑ. Piny bëne ceg-ɑ onhɑ̈nh kɑ̀ ywöngi kyënyi gen. Tyëngmɑ̈ɑ̈nø ɑ́bï be rënyi pinyee, kí jɑmm-ɑ yije bënn, kí kɑ̈llee geki jie bënn.” Jwøng-ɑ Ácwɑ̈ɑ̈j okööbø kinni, “Nennu yöö kidøøj, kelli wun ödɑ’ ödø ki thöllì mø bɑ nɑ̈ɑ̈g, møg pɑ cuggi thyëdhø, o wu bɑ møg kɑ̈ɑ̈j yi gen ceth.” “Rɑ̈ɑ̈m pyëwɑ bong gïn lɑ̈ɑ̈nyii; minɑ ɑ́cöd. Lïng wun! Kì yij pödhø bëne yɑ lïng-ɑ jiɑ ge óywöngø kinni, ‘Jwøng-ɑ Ácwɑ̈ɑ̈j tøøk kì Dhɑyøn! Rɑ̈ɑ̈dh Dhɑyøn ceg bëëdø e tøøk!’ Jwøng-ɑ Ácwɑ̈ɑ̈j rɑ̈ɑ̈dh gen ólöggi kinni, “Ede pyëwɑ ɑ wëggu en rënyø kì bɑng kɑ ɑ́mɑllu ngïjji jwögg? Kí kɑ ɑ́bøødh wun ri wun bøli jwöggi wun jwögg-ɑ pɑth?” Ji óywöngø kinni, “Kødh ɑ́teem! Byel ɑ́rum ki kɑjø, de wɑ nuti yielø.” Minɑ ɑ́cöd, mɑ́ jiɑ ɑ́mød piny, yɑ ceg-ɑ ywøg, wïjɑ ɑ́muum. Bong yɑdh me yïëdø kì Gilyɑd? Bong ɑkïmm kì kunɑni? De jiɑ gede ɑ cög gen ge pɑ yiel ki rɑ̈ɑ̈m dëllì! Wïjɑ ce di bëëd ɑ́ yiith pï, o nyingɑ ce di bëëd gɑ wøl me rïngi wɑ̈g e kɑ̈ɑ̈l-ɑ wɑɑng pï, o yɑ di pëggɑ be ywøg kì dicɑ̈ng kí wɑ̈r, yɑ ywøg-ɑ jiɑ møg-ɑ ɑ́nɑ̈g. Ce di bëëd e dɑ keny bëëdɑ kì yij pɑ̈l, kun lɑ̈ɑ̈wɑ riɑ ki jiɑ. Ge pɑ nyi cungi kì kömi dhøggi gen, ge bɑ tyëngpyed bënn. Ge nyi kømm-ɑ pyed yøw, bëëdi ɑ́dud ɑ ceg ki beedø kì pönhï. Jwøng-ɑ Ácwɑ̈ɑ̈j okööbø kinni, “Jiɑ gøgg-ɑ rɑj o yɑ ɑ́dhɑ̈li yïëyø yi gen yɑn ɑ́ Jwøøg gen.” Dhɑnhø tid-ɑ ree ki mɑ̈dhe, o bong ngɑn ngɑ̈dh ómen, mɑ́ nyiimïee bënn ɑ́göög ki wëëny ni Yɑgob, o dhɑnhø bëne kwɑ̈dhh-ɑ mɑ̈dhhe. Bene ɑ pere kööb Wïlɑ̈bø, Jwøng-ɑ Ácwɑ̈ɑ̈j kinni, “Jiɑ óleny yi yɑn ni ngyënyø, o ge orɑng yi yɑn. Jiɑ ɑ́göög ki gïnrɑj, ge gwøøgɑ’ ngø këti? Lebbi gen nɑ nywøli weth mø bɑ nɑ̈ɑ̈g, ge cög ge kømm-ɑ pyed. Ji bënn nënni, ngɑɑn kööb ɑ mɑ̈ɑ̈dh ki mɑ̈dhe, de kedh e ceg-ɑ mɑ̈dhe ki ɑ́kɑ̈llì møg mɑgii. Ge pɑ cɑy yi yɑn kipe møgɑni? Gøølɑ pɑ colɑ ki pönh-ɑ ni men! Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Yɑ ɑ́kööb kinni, “Yɑ óywöngi kipe kïttì, yɑ ókïïmø kipe cɑ̈mmi dhög, mɑ́ ge ɑ́thwøw, o bong ngɑn nyi weli e kɑ̈ll-ɑ kɑ̈jjɑni. Ywøøg dhög pɑ nyi lïngi këti, winy ɑ́dɑ̈ɑ̈g geki lɑ̈yy.” Jwøng-ɑ Ácwɑ̈ɑ̈j okööbø kinni, “Yerusɑlem ógwøgɑ ɑ́ thuur tuggì, ógwøg yi yɑn ɑ́ keny bëëd yi ógwøgg, kɑ̈ddi Yeudiyɑ̀ ógöögø ki ryɑng, keny yije pɑ cuggi bëëdø.” Kɑ Jwøng-ɑ Ácwɑ̈ɑ̈j pyëjɑ kinni, “Ede piny ɑ döönge nøw, e thwøwø ni ryɑng, o bong ngɑn nyi weli e kɑ̈ll-ɑ yije? Á men ɑ wïje pel ɑ cuggi yodi thɑ́ møgɑni? Møgɑni ɑ́löbbí men, o gï ólonye ki köbbi wøn?” Alöggi Jwøng-ɑ Ácwɑ̈ɑ̈j kinni, “Gïn ni menɑni ɑ́cwöb kɑ per kɑ ɑ́wiy cigg-ɑ ɑ́mëggɑ jiɑ yi gen. Kwøbbɑ nuti lïngi gen, o gïg-ɑ ɑ́köbbɑ gen nuti gwøøg gen. De ge ɑ́yöd muddi gen ceg-ɑ tëngø, kɑ ge kedh-ɑ be mɑlli ngïji Bɑɑl ni kɑ ɑ́pwönyi gen yi kweyyi gen. Adɑ́ lïng ɑnɑn ki gïn-ɑ ógwøg yi yɑn, yɑ Wïlɑ̈bø, Jwøøg Isrɑil, Jwøng-ɑ Ácwɑ̈ɑ̈j; jiɑ ómëggɑ lum ɑ́ kej gïncɑm, o ge ómëggɑ sïm, o mɑdh yi gen ɑ́ kej pï. Ge ókedhhɑ kì pödhh møg per gen nuti pɑ̈nyø lïngø yi gen, wɑlɑ̀ yi kweyyi gen, o kömi gen óödɑ ki liny gïti keny-ɑ ótyëgɑ gen ki nɑ̈gø.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Rum wun kì ri gïg-ɑ ócwöb! Cwöddi wun ki tyëng-ɑ mɑ̈nn møg ywöngi ki thøø.” Kɑ ji okööbø kinni, “Köbbu gen jwɑn gen bëën be wör ki wörri ywøg, gïti keny-ɑ óywöngi wøn, kɑ nyingi wøn opɑ̈ngø yi pï, kɑ yëyyi nyingi wøn onebø yi pïi nying.” Lïng ki ywøg kì Dhɑyøn kinni, “Wø ɑ́gɑ̈g! Wø ɑ́yɑ̈r ki mendwøng! Wø ceg-ɑ dhwödhø kì pinyee. Myërree ɑ́rum ki cøør piny.” Kɑ yɑ okööbø kinni, “Wu tyëng-ɑ mɑ̈nn, lïngu kwøbbi Jwøng-ɑ Ácwɑ̈ɑ̈j, kɑ møg-ɑ kømme lïngi wun kidøøj. Pwönyu nyigi wun ki ywøg, kɑ mɑ̈dhhi wun pwönyi wun ki wörri ywøg. Thøø ɑ́bï yethi uddee e kɑ̈ll-ɑ ɑwɑjj, kɑ kedh-ɑ kɑ̈jj-ɑ bëëd yi wɑ. Othønhø ɑ́pwööde piny kì yethi yëëth, kɑ wøbb pwööde piny kì kɑ̈jji ngyew. Tyëngthøø buud-ɑ piny kì kɑ̈jj bënn, ge twɑ̈li kì piny ge nɑ cyedh, ge buud nɑ byell-ɑ ókɑɑj piny e bong ngɑn cøng gen. Bene møg-ɑ ɑ́köbbi yɑn yi Jwøng-ɑ Ácwɑ̈ɑ̈j i kwøbɑ gen ɑgɑk.” Jwøng-ɑ Ácwɑ̈ɑ̈j okööbø kinni, “Tyëng-ɑ wɑ̈thi gen pel, köthi gen ko pwöd gen, wɑlɑ̀ tyëng-ɑ teg ri gen ko lejji gen, kɑ tyëngkɑ̈rì ko thwøg kipe kɑ̈rri gen. Ke di ngɑn dwɑddi pwödi kööre, pwöde kööre kinni yɑ ngɑ̈nyi yi en, o møgɑ yood en, mɑ́ mɑ̈ɑ̈dø miɑ pɑ nyi lwënyi, o yɑ nyi gøgg-ɑ dyër. Bene gen møg-ɑ med kì pyëwɑ ɑgɑk. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Wu tyëng Isrɑil, lïngu wöön-ɑ öri wun yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j okööbø kinni, “Bëëdi pödhh-ɑ kyeelø ko ngøy wun, wu ko böggi yi ngïjj-ɑ nyi nënni gɑ gïïngɑ̈ngø kì mɑl, cɑgg pödhh-ɑ kyeelø böggi. Kwøbbi jwöggi jiɑni bong per gen. Bɑ yɑdh ɑ ɑ́ngul kì wɑg, o tyeng ki døøji cingø yi bødhø, o gø dhyɑwe ki dhɑb kí ɑ́tegø. Bɑ ɑgur kì piny ki gedd kipe kinni o cöge e pɑ pɑ̈ɑ̈dh. Ngïjji jwöggɑni nɑ óryëmmi kì yij bɑɑg ócøyø, ge pɑ kööbø; ge nyi ceg kɑ tyëddø, mɑ́ ge pɑ cuggi cyɑ̈dhø. Wu ko böggi yi gen; bong gïnrɑj me cuggi göggi wun yi gen, o bong gïndøj me cuggi göggi wun yi gen thyew.” Jwøng-ɑ Ácwɑ̈ɑ̈j, bong ngɑn pɑ̈r ki yïn, yï teeg cɑrø ki mendwøng, o perí teeg ki mendwøng. Á men ɑ pɑ wør yïn; yïn ɑ́ rɑ̈ɑ̈dh pödhh bënn? Yï døøj ki wørø. Bong ngɑn pɑ̈r ki yïn, kì kelli tyëng-ɑ wɑ̈thi gen pel kì yethi pödhh bënn, wɑlɑ̀ kì kelli rɑ̈nhi gen. Ge bɑ ɑbɑ̈ngg o ge bɑ dhëgg bënn. Ge dïd-ɑ ngø kì yï ngïjj-ɑ ótyengø gɑ yenh? Ngïjj-ɑ ógøjø ki ɑ́tegø men-ɑ ókɑ̈ɑ̈lø kì Tɑrcic, kí dhɑb men-ɑ ókɑ̈ɑ̈lø kì Upɑdh, o bɑ gwøøg bødhø yøw. Ge bɑ ɑruug ki ógudh møg kïddi gen bɑ ówɑw kí ɑ́cwïcwïl, møg-ɑ ócwɑ̈jø yi bødhø me cinge døøj. De yï Jwøng-ɑ Ácwɑ̈ɑ̈j, bene yïn Jwøng-ɑ dyër. Bene yïn Jwøng-ɑ Nëënø yï rɑ̈nh-ɑ rɑ̈ɑ̈dhø mee gïti ɑtheer. Kömi piny bëne nyi ceg-ɑ onhɑ̈nh kenyi bëëd pyëwí rɑɑj; rɑ̈ji pyëwí pɑ cuggi nginø yi pödhh. (Köbbu gen kinni jwögg-ɑ nuti cwɑ̈ɑ̈j piny geki mɑl órënyi kɑ nyingi gen owïlø. Bong keny-ɑ óbëëd yi gen kì kömi piny.) Piny ɑ́cwɑ̈j yi Jwøng-ɑ Ácwɑ̈ɑ̈j kɑ tege, lɑ̈bø ɑ́cwɑ̈j yi en kɑ peli wïje, kɑ mɑl pedhe. Pï nyi ceg-ɑ ruurø kì mɑl kɑ̀ kööbe, pøøl nyii kɑ̈ɑ̈lø yi en kì cögi piny. Mɑl nyi wëgge’ ogwel kì yij kødh, kɑ yømø nyi öre kì keny-ɑ mïdhii. Ji nyii muumø yi møgɑni kɑ wɑ̈thi gen ócungø, tyëng-ɑ nyi göögø ki ngïjjì ceg-ɑ meemø, mɑ́ jwögg-ɑ nyi gwøg yi gen pɑth ki jwögg-ɑ dyër o ri gen bong wëy. Bong gïn gwøøg gen, o ge døøj ki bɑnyø ceth. Ge ótørri keny-ɑ óbëën Jwøng-ɑ Ácwɑ̈ɑ̈j be lidhi kwøbbi gen. Jwøøg Yɑgob pɑ pɑ̈r ki gen, bene Jwøng-ɑ ɑ́cwɑ̈j jɑmmì bënn, Isrɑil ɑ́myege o bëëde ɑ́ dïl jie, nyinge bɑ Wïlɑ̈bø, Jwøng-ɑ Ácwɑ̈ɑ̈j. Wu tyëng Yerusɑlem, wu bɑ ɑtyeg! Cøng wun jɑmmi wun. Wu leeng-ɑ wɑ̈g kì piny men yi Jwøng-ɑ Ácwɑ̈ɑ̈j, wu møde’ piny, bong dhɑnhø ɑ́kyel men-ɑ ódöng. Jwøng-ɑ Ácwɑ̈ɑ̈j ɑ́rum ki kwøb. Tyëng Yerusɑlem okïïwø kinni, “Wɑ ɑ́nyïɑ̈g! Keddee pɑ nøggi. Wɑ ɑ́rømm-ɑ kinni møgɑni ócuggø nginø yi wɑ! Kemmee ɑ́rënyi; thøll-ɑ ɑ́mïdhi gen ɑ́cöddi. Nyigee ɑ́kedh ge bënn; bong ngɑn mɑ ɑ́döng men-ɑ ótïng kemmee këti; bong ngɑn ngɑb sitɑrri kemmì.” Alöggɑ kinni, “Jɑggee wɑ̈thi gen nøg; Jwøng-ɑ Ácwɑ̈ɑ̈j pɑ nyi kwɑjji yi gen, o gï di nyudhe. Bene ɑ dhɑ̈li gen ki gwøg, kɑ jie kedhhi. Lïng wun! Wöödø ɑ́bï! Dɑ ɑgwɑg me dwøng kì pödhø me ying wɑɑng wuudø, kɑ̈ddi Yeudiyɑ̀ óløg ryɑng yi liny pönhɑni, ge ódöng ge bëëd-ɑ yi ógwøgg.” Ngɑ̈nyi yi yɑn, yïn ɑ Jwøng-ɑ Ácwɑ̈ɑ̈j kinni dhɑnhø yuue kwïje, bong ngɑn wëye ying cinge. Cɑy jií yïn ɑ Jwøng-ɑ Ácwɑ̈ɑ̈j, mɑ́ yï tyeny-ɑ gen, de wø ko tií ki twijø, wɑlɑ̀ wø ko nyi cɑɑy e pyëwí rɑɑj, mɑ́ ke cɑɑy wøn e pyëwí rɑɑj; wø bɑ møg thumi. Wiy pyëwí bëëd e rɑɑj ki pödhh-ɑ pɑ mɑlli yïn, geki tyëng-ɑ bɑny yïn. Jií ɑ́nɑ̈g yi gen; wø ɑ́rënyi yi gen ki mendwøng, kɑ pödhi wøn odöngø e ryɑ̈gø. Kɑ yɑ köbbi yi Jwøng-ɑ Ácwɑ̈ɑ̈j kinni, “Lïngí møg-ɑ ying yij lwöbø. Köbbí tyëng Yeudiyɑ̀ kí tyëng Yerusɑlem kinni, yɑn, yɑ Jwøøg Isrɑil, Jwøng-ɑ Ácwɑ̈ɑ̈j, yɑ ɑ́cïbi kömi tyëng-ɑ pɑ mïdhi møg-ɑ ying yij lwöbø ki cyën. Bene lwöbø men-ɑ ɑ́lwøb yi yɑn wøki kweyyi gen keny-ɑ ɑ́kɑ̈ɑ̈lɑ gen wɑ̈g kì Rïp, piny-ɑ́ yije ɑ́bëëd gen, ge ce bëëd ɑ yij purun me yije lyeel yi mɑc. Ge ɑ́köbbɑ kinni lïngi gen kwøbbɑ, kɑ gïn-ɑ köbbɑ gen nyi gwøg gen. Kɑ ge köbbɑ kinni, keløg møgɑni ógwøg yi gen, ge óbëëdø gɑ jiɑ, o yɑ óbëëdø yɑn ɑ́ Jwøøg gen. Codhe, o yɑ gwøgɑ møg-ɑ ɑ́köngɑ kweyyi gen kinni, ge óthödhɑ ki piny me yije mulli yi cɑg geki møøw kïc, o bene pinyɑni ɑ yije di gen ɑnɑn.” Kɑ yɑ okööbø kinni, “Gen ɑgɑk, Jwøng-ɑ Ácwɑ̈ɑ̈j.” Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Kedhí yethi kɑ̈dd-ɑ døngø kì Yeudiyɑ̀, kí yethi yëthi Yerusɑlem. Kɑ teedø köbbí kinni, lïngi gen møg-ɑ yij lwöbø, kɑ gïg-ɑ kømme gwøg gen. Keny-ɑ ɑ́kɑ̈ɑ̈lɑ kweyyi gen wɑ̈g kì Rïp, ge ɑ́cegɑ ki menteg kinni, mïdhi gen ciggɑ, o yɑ nuti wïyø ki pɑ̈ddi wɑ̈thi gen gïti dicyɑ̈ngtïn. De ge nuti lïngø, wɑlɑ̀ møg-ɑ nyi köbbɑ gen pɑ nyi gwøg yi gen. De ge ɑ́yöd muddi gen ceg-ɑ tëngø, kɑ ge ópëddø gwøg ki gïgrijjø. Ge ɑ́köbbɑ kinni mïdhi gen cigg de ge ɑ́bɑ̈nyi. Codhe ɑkɑ̈ɑ̈lɑ cɑ́y-ɑ bɑ ɑgwed kì yij lwömɑni kömi gen.” Kɑ yɑ köbbi yi Jwøng-ɑ Ácwɑ̈ɑ̈j kinni, “Tyëng Yeudiyɑ̀ geki tyëng Yerusɑlem gøgg-ɑ ɑmolpiny ki perɑ. Ge ɑ́døøg be gwøg ki orøng-ɑ ɑ́gøggi yi kweyyi gen cøn, ɑ ɑ́bɑ̈nyi gen ki gwøgi møg-ɑ ɑ́köbbɑ gen, kɑ ge kedh-ɑ be mɑlli jwögg møøgø. Isrɑil geki Yeudiyɑ̀, lwöbø ɑ́pɑ̈d yi gen ryeet, eni lwöm-ɑ ɑ́lwøb yi yɑn wøki kweyyi gen. Anɑn yɑn, yɑ Jwøng-ɑ Ácwɑ̈ɑ̈j, yɑ mɑ̈ɑ̈g-ɑ gen ki köbbø kinni, ryɑ̈g kɑ̈ɑ̈lɑ’ kömi gen, o ge pɑ bodh. O keny-ɑ óywöög gen köörɑ ge kwɑjj-ɑ kønyø, kwøbbi gen pɑ lïngɑ, Codhe, o tyëng Yeudiyɑ̀ geki tyëng Yerusɑlem kedhi gen yï jwögg-ɑ nyi thödhi yi gen ki gëdhhì, gï ókwɑjji yi gen kinni, kunyi gen. De ge koo yiel yi jwöggɑni, keny-ɑ óbëën ryɑ̈g kömi gen. Kwɑnni jwöggi tyëng Yeudiyɑ̀ nɑ kwɑnni kɑ̈ddi gen kɑ̈dd-ɑ døngø. O tyëng Yerusɑlem gëdø ki këlli lɑm kì yethi yëëth bënn kì kɑɑlɑni, møg nyi gedh gen Bɑɑl, jwøng-ɑ kømi pyëw lɑ̈mmø. Jermɑyɑ̀, yɑ ko kwɑjjí, wɑlɑ̀ yï ko dhɑmmi kì bølɑ kipe jiɑni, mɑ́ pyëwɑ koo lɑ̈ɑ̈m ki gen. Keny-ɑ órɑngi gen yi ɑkørr kɑ ge ywöög-ɑ köörɑ, kwøbbi gen koo lïngɑ.” Jwøng-ɑ Ácwɑ̈ɑ̈j okööbø kinni, “Ji-ɑ mɑɑr yi yɑn gøgg-ɑ gïgrijjø. Yï gen dɑ dyër o ge bëëd gen kì Kengɑ? Ge ceg-ɑ rumø kinni ryɑ̈ng-ɑ bï kömi gen ócuggø jogø yi møg-ɑ nyi kwöng yi gen, geki gëdhh-ɑ nyi muuj yi gen? Pëthi gen ceg-ɑ medø ki gïgɑni? Ge ɑ́cwøllɑ cøn gɑ ólɑm me nyogø, me kööre pɑ̈ng yi nywøl mø myëër, de ɑnɑn yïthhe ógöjjɑ kedhhø yi mɑc me ce pöödø ɑ́ mɑl, kɑ bɑ̈dde ngøllɑ. “Yɑn, yɑ Wïlɑ̈bø, Jwøng-ɑ Ácwɑ̈ɑ̈j, ɑ ɑ́göjji Isrɑil ryɑ̈g. Gen ɑ ɑ́kɑ̈ɑ̈l ryɑ̈ngɑni kömi gen, mɑ́ ge ɑ́göög ki bɑ̈jjø; pyëwɑ ɑ́wëggi rënyø yi gen, kì bɑng kɑ ɑ́ngɑ̈ddi Bɑɑl yi gen ki gëdhhì.” Yɑ ɑ́köbbi yi Jwøng-ɑ Ácwɑ̈ɑ̈j ki kwøbbi ɑmolpiny men-ɑ gøggi yi tyëngmɑ̈ɑ̈nø kipe nɑ̈gi yɑn. Yɑ ɑ́bëëd yɑ bong gïn lïngø kì pyëwɑ, ni órömø me kïdhi be nɑ̈gø, ɑ́bëëd e kwïj yi yɑn kinni bɑ yɑn ɑ göggi yi gen ki gïnrɑj ni menɑni. Ge ɑ́bëëd ge okööbø kinni, “Ngøl wɑ yɑnhɑni piny kɑ̈ng-ɑ nudd e mɑr, nɑ̈g wɑ en o óbëëd e bong ngɑn pɑrii këti.” Codhe ɑkwɑ̈jjɑ kinni, “Yïn ɑ Wïlɑ̈bø, Jwøng-ɑ Ácwɑ̈ɑ̈j, yï bɑ jɑgø me ngɑ̈ny löggø, rummi ji kí bëëdi gen nyii nennø yi yïn. Gønyɑ ɑ́cïbɑ cingí, wiy gøølɑ lidhɑ e ocolø yi yïn, ki jiɑni.” Tyëng Anɑthöth ɑ́dwɑdd-ɑ kinni o yɑ nɑ̈g, o yɑ ɑ́köbbi yi gen kinni yɑ ónɑ̈g yi gen keløg yɑ nudd yɑ kɑ̈ll-ɑ wööni Jwøng-ɑ Ácwɑ̈ɑ̈j. Codhe, ɑ́kööb Wïlɑ̈bø, Jwøng-ɑ Ácwɑ̈ɑ̈j kinni, “Ge ócɑy yi yɑn! Wɑ̈ddi gen ónɑ̈g kì yij liny, nyigi gen óywɑj yi kɑ̈j. Bøli keny-ɑ ógöjjɑ Anɑthöth ryɑ̈g ɑ́rum ki cïbø yi yɑn; keny-ɑ óbëën bøli kenyɑni, bong ngɑn bødh kì kelli gen.” “Jwøng-ɑ Ácwɑ̈ɑ̈j, ke göönyɑ ki yïn, ceg kɑ yodø kinni bɑ yïn ɑ gøggi dyër. De yï pyëjɑ’ pyëjø ceth kipe gøggi dyër. Gede tyëngrijjø ɑ di yï gen gïgdøj? Gede gïg-ɑ nyi gwøg yi tyëngrijjø ɑ nyi pɑ̈dhi gen? Ge ɑ́miin piny yi yïn kɑ byerri gen otwïyø, ge ɑ́døngi kɑ ge onywølø. Ge nyi kømm-ɑ kwøb mø døøj kì rií, de yï tøøk kì pëthi gen kidyër. De yɑ ngɑ̈nyi yi yïn, yïn ɑ Jwøng-ɑ Ácwɑ̈ɑ̈j, gïn-ɑ gwøg yi yɑn onennø yi yïn, o kër-ɑ mɑɑrɑ yïn ngɑ̈nyi yi yïn. Ji-ɑ rijjø møgɑni ywɑj gen ni dyëg møg kïdhi be ngɑlø; kɑ ge korrí gïti keny-ɑ óbëën bøli kej ngɑli gen. Piny wøn gït-ɑ wɑɑng e thwøwø thwøwø, e lum thøø kì yethi pwödh bënn? Lɑ̈yy ɑ́thøw geki winy kì bɑng gööj rɑ̈ji jii wøn, gen ɑ ji-ɑ nyi kööbø kinni, ‘Gïg-ɑ gøggi yi wɑ pɑ nenni yi Jwøk.’ ” Kɑ Jwøng-ɑ Ácwɑ̈ɑ̈j ólöggø kinni, “Jermɑyɑ̀, keløg yï pïdø yi rɑɑdø ki ji, yï órɑɑd kidï ki kyënyì? Keløg yï pɑ̈nh-ɑ́ɑ̀ keny-ɑ tɑr, óbëëd ɑ dï keny-ɑ óying yij thïm kì kömi Nɑm Urdun? Cɑgg ɑ́ wɑddí, yï ótwɑny yi gen, kɑ ge órëbø ki tyëng-ɑ nyïɑ̈ggi ki yïn. Ge ko ngɑ̈ɑ̈dh kinni tek, cɑgg ge kööbø ki kwøb mø døøj.” Jwøng-ɑ Ácwɑ̈ɑ̈j okööbø kinni, “Isrɑil ɑ́wiyɑ piny, pönh-ɑ ɑ́myegɑ ɑ́bɑnyɑ. Ji-ɑ ɑ́mɑɑr yi yɑn ge ɑ́cïbɑ cinggi tyëng-ɑ mɑ̈n ki gen. Jiɑ møg-ɑ ɑ́yienyɑ ɑ́døøg cwɑggɑ, ge ɑ́ngɑ̈ɑ̈r cwɑggɑ ni ngur; kenyi ngɑ̈ɑ̈re kì yij thïm, bene ɑ bɑnge mɑɑnɑ gen. Jiɑ nɑ winyø me yïe pödhi yi ótïngø ɑ́ngwen ge kɑ̈ɑ̈l-ɑ wɑ̈thi tùng bënn. Cwööl lɑ̈yyi pɑ̈l o ge cyɑ̈ɑ̈m gen! Jyɑ̈ggi pödhh-ɑ pɑth mø gïïr, bɑɑg oløgɑ ɑ́rënyi yi gen; pwödhɑ ɑ́nyøn yi gen; pinyɑ, piny-ɑ ɑ́mɑɑrɑ ɑ́gwøg gen ɑ́ ryɑng. Piny bëne ɑ́göög ki pɑ̈l; piny ɑ́döng nøw, nennɑ ɑ́ ryɑng; piny bëne ɑ́göög ki ryɑng; de bong ngɑn pyëwe rɑ̈mø kipere. Tyëng-ɑ yɑ̈gø ɑ́bï ge ge böödh-ɑ wɑ̈thi ótøng kì yij ryɑng. Yɑ ɑ́kɑ̈ni ki liny men rënyi pödhø bëne, bong dhɑnhø men-ɑ óbëëdø ki mër. Jiɑ kɑ̈g-ɑ gemè, de ge nyɑr-ɑ lum, ge ɑ́pur ki menteg, de bong gïjø mɑ ɑ́yod yi gen. Gïg-ɑ ɑ́kɑ̈g yi gen nuti cyegø, kipe kɑ̀ bëëd pyëwɑ rɑɑj.” Jwøng-ɑ Ácwɑ̈ɑ̈j okööbø kinni, “Dɑ gïn kwøbɑ kipe pödhh-ɑ buti Isrɑil, gen ɑ pödhh-ɑ órënyi piny-ɑ ɑ́mëggɑ jiɑ, tyëng Isrɑil. Tyëngɑni ókɑ̈ɑ̈lɑ wɑ̈g kì pödhhɑni, ni kenyi dhwööy yɑdh wɑ̈g ki byerre, kɑ Yeudiyɑ̀ yielɑ kì cinggi gen. De keny-ɑ órum gen ki kïdhi wɑ̈g yi yɑn, pyëwɑ ólɑ̈ɑ̈m; kɑ jiɑni dwöögɑ yethi pìnyi gen kì yethi pödhhi gen. Keløg ge órëbø ki jiɑ, kɑ kwøbbi Jwøøg jiɑ yïëy yi gen, kɑ dïd yi gen kɑ ge nyii köngø kinni, ‘Ki nyingi Jwøng-ɑ Ácwɑ̈ɑ̈j ɑ Nëënø,’ ni kɑ ɑ́pwönyi jiɑ yi gen cøn, kɑ ge nyii köngø ki nyingi Bɑɑl, ge ceg-ɑ gwøg ki ɑ́kyel ki jiɑ, kɑ ge ódönyø. De keløg e ódi pödhø men pëmø, pönhɑni dhwööyɑ’ wɑ̈g kɑ nɑ̈gɑ. Yɑn, yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Yɑ ɑ́köbbi yi Jwøng-ɑ Ácwɑ̈ɑ̈j i kedhɑ kɑ yɑ ngëwɑ ki ɑkööj kor-ɑ yöm, kɑ lønyɑ ngɑ̈jɑ, i de ko wëggɑ kedhø yi pï. Codhe, ɑngewɑ en kɑ lønyɑ ngɑ̈jɑ. Kɑ Jwøng-ɑ Ácwɑ̈ɑ̈j cig-ɑ kwøb ki yɑn, ɑkööbe kinni, “Kedhí kömi Nɑm Porɑt, kɑ ɑkönyɑni kɑɑn yij órøngi kït.” Codhe, ɑkedhɑ kɑ ɑkönyɑni kɑɑnɑ yij órøngi kït kì kömi Nɑm Porɑt. Dhungi piny kɑ̈ɑ̈l kun, ɑköbbi yɑn yi Jwøng-ɑ Ácwɑ̈ɑ̈j i dwɑɑyɑ ɑkönyɑni. Codhe, ɑdøøgɑ be yɑɑbii keny-ɑ ɑ́kɑɑnɑ en, kɑ yuudɑ e rënyø, o pɑ cuggi rugø. Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Bene kër-ɑ ólɑ̈ɑ̈nyɑ tɑ̈dø mi Yeudiyɑ̀ geki Yerusɑlem ɑnɑn. Tyëngrijjø møgɑni ɑ́bɑ̈nyi lïngi kwøbbɑ. Ge nudd muddi gen teeg ni kɑ ɑ́wöni gen, ge ɑ́kedhi be göggi jwögg møøgø, kɑ gï mɑlli gen. Ge ceg-ɑ gwøg ceth ge nɑ ɑkönyɑni ɑ bong gïn gwøøgii. Yɑ ɑ́dwɑdd-ɑ kinni tyëng Isrɑil geki Yeudiyɑ̀ yɑ di bëëd yɑ bɑ ɑtwij yi gen ni ɑköj kenyi twije kì rɑw, o ge di bëëd gen gɑ jiɑ, o yɑ di lenhi yi gen, o yɑ di wør yi gen, de ge ɑ́bɑ̈nyi lïngi kwøbbɑ.” Kɑ yɑ köbbi yi Jwøk, Jwøng-ɑ Ácwɑ̈ɑ̈j kinni, “Jermɑyɑ̀, köbbí tyëng Isrɑil kinni pɑ̈ɑ̈ng puggì bënn ki møgi oløg! Ge ólöggi bënn kinni ngɑ̈nyi yi gen kinni puggi bënn di dwɑddø o ge bëëd ge pɑ̈ng yi møgi oløg. Codhe, kɑ ge köbbí kinni, yɑn yɑ Jwøng-ɑ Ácwɑ̈ɑ̈j, tyëng pönhï yethi gen pɑ̈ngɑ’ pɑ̈ngø ki møgi oløg, gïti keny-ɑ ónɑ̈ɑ̈g gen yi møgø, ge bënn. Rɑ̈nhì ɑ løg kwɑrri Debïd, kí ókwër, kí jøtöng, kí tyëng Yerusɑlem bënn, ge ónɑ̈g yi møgø bënn. Codhe, o ge gøøjɑ kej ɑ́kyel, o ri gen mød yi gen, gen ɑ jøgdøngø geki yɑnythønhø bënn. Ge nɑ̈gɑ’ nɑ̈gø, pyëwɑ pɑ lɑ̈ɑ̈m ki gen.” Wu tyëng Isrɑil, Jwøng-ɑ Ácwɑ̈ɑ̈j ɑ́rum ki kwøb! Bëëd wun wu bɑ mööl kɑ kwøbbe lïngi wun. Wør wun Jwøng-ɑ Ácwɑ̈ɑ̈j, Jwøøg wun, kɑ̈ng-ɑ nuti kɑ̈ni en ki muudhø men wëggi wun cyerrø kì wɑ̈thi kïttì; kɑ̈ng-ɑ nuti løg en cɑr ɑ́ muudhø eni cɑr men-ɑ ngɑ̈dh yi wun. Keløg wu pɑ lïngø, yɑ óywöngi kì gød yi gööj tɑ̈dø mi wun. Yɑ óywöngi ki menteg, kɑ pï nyingɑ ómullø, kipe kɑ ɑ́køøl jii Jwøng-ɑ Ácwɑ̈ɑ̈j gɑ ɑmɑgg. Kɑ yɑ köbbi yi Jwøng-ɑ Ácwɑ̈ɑ̈j kinni, “Köbbí rɑ̈dh geki meye kinni dhwödh gen kì wɑ̈thi kwømmi gen, mɑ́ yɑ̈rri gen møg-ɑ myëër ɑ́dëëm piny kì wɑ̈thi gen. Kɑ̈ddi Yeudiyɑ̀, kɑ̈dd-ɑ wɑɑng wurlwɑl bɑ ɑtyeg, bong ngɑn cuggi kedhi yethi gen. Tyëng Yeudiyɑ̀ bënn ɑ́kïdhi yïnø.” Lïdhí Yerusɑlem! Tyëngmɑ̈ɑ̈nø obëënø ge kɑ̈ɑ̈l-ɑ wɑɑng wuudø! Ágøne ji-ɑ ɑ́korri yi yïn, gen ɑ ji-ɑ per gen ɑ́bëëd yï tɑ̈dø? Yï ókööb ɑ dï, keny-ɑ óbëën ji-ɑ ɑ́rømmi yi yïn kinni ge bɑ mɑ̈dhhí, kɑ yï mɑg gen, kɑ yï jɑɑg gen? Yï koo rɑngø ni ngɑndhɑjø me pɑ̈dhi piny? Keløg yï ópëjjø kinni gede gïgɑni ɑ pɑ̈dhi gen kömí, ɑ pyëëd ógudhí wɑ̈g kì rií kɑ yï mød! Bɑ kinni møgɑni ɑ́pɑ̈dhi kömí kɑ per kɑ̀ bëëd orøgí dwøng, o pëddi rɑ̈jø. Wɑ̈d Kuc kïde ócuggø wilø yi en? Wɑlɑ̀ kwej kïdd-ɑ ócwinyyii ócuggø kɑ̈ɑ̈l wɑ̈g yi en? Yï nɑ gen ceth Yerusɑlem! Rií pɑ cuggi wilø yi yïn, kɑ yï døøg-ɑ be gwøg ki gïgdøj, mɑ́ yï ɑ́wɑ̈dh ki gwøg ki gïgrijjø. Wu ókedhhi yi Jwøng-ɑ Ácwɑ̈ɑ̈j ni wél kenyi kedhhi gen yi yømø me köni kì yij ryɑng. Árum ki kwøb kinni møgɑni óbï kömi wun ceth. Bene gïn-ɑ ɑ́kwøbe kinni gø gögge’ wun, mɑ́ e ɑ́wïl kì wɑ̈thi wun, kɑ wu ngɑ̈dh-ɑ jwögg mø pɑth ki dyër. Jwøng-ɑ Ácwɑ̈ɑ̈j kiree ɑ ópyëëd ógudhi wun wɑ̈g kì ri wun kɑ wu göjje ɑyɑ̈r. Wu ɑ́lidhe wu gøgg-ɑ gïg-ɑ mɑɑn yi en. Wu ɑ́lidhe wu kedh-ɑ wɑ̈thi kïttì kí yethi pwödh, wu kedh-ɑ be mɑlli jwögg-ɑ pɑth ki dyër, ni jɑl me nɑ̈g yi ngööng cï gøl-ɑ bute, wɑlɑ̀ ni ógɑl-ɑ thwønh kenyi rïnge kì bɑng ógɑl-ɑ dhɑjø. Tyëng Yerusɑlem, wu ɑ́gɑ̈g! Wu ókɑl dhïwø kì wɑɑng? Yɑ ɑ́köbbi yi Jwøng-ɑ Ácwɑ̈ɑ̈j ki kwøbbi mel kinni, “Yeudiyɑ̀ ceg-ɑ ywøg kɑ̈dde ceg-ɑ thøø jie buud-ɑ piny yethi gen bɑɑrø, o Yerusɑlem ywøg-ɑ kønyø. Tyëngkɑ̈rì ör-ɑ bɑ̈nggi gen be dwɑ̈ddø ki pï, ge ɑ́kedhi wïj yith de ge pɑ yïddi ki pï, ge dwöög e bong gïn ying yethi puggi gen. Pëthi gen ɑ́nyönhi kɑ ge omuumø, ɑkum gen wɑ̈thi gen. Kì bɑng kɑ̀ bongii kødh o piny thwøwø thwøwø Tyëngpwödh wɑ̈thi gen ɑ́cungi ge kull-ɑ wɑ̈thi gen kì piny. Tenø kì wɑg nyɑre ɑ́wiye piny yi kɑ̀ bëëd e bong lum. Aderr cung-ɑ́ɑ̀ wïj kwøømø kì pɑ̈l, ge yëgø nɑ ógwøgg; nyingi gen ceg-ɑ dhïïdhø mɑ́ e bong gïn cɑm yi gen. Jiɑ ywöög-ɑ köörɑ ge okööbø kinni, ‘Cɑgg wø gøøny yi orøøg wøn, køny wøn, yïn ɑ Jwøng-ɑ Ácwɑ̈ɑ̈j ni kɑ ɑ́kööb. Ngɑ̈thi wøn ɑ́lugi wøn yïn tyel mø gïïr; wø ɑ́røngi kì bølí. Yï ketí ɑ gɑ̈n yi Isrɑil, yïn ɑ yiel wøn ki ryɑ̈g. Yïde ɑ bëëd yï nɑ wëlø kì piny wøn; ɑ bëëd yï nɑ wël-ɑ ninø ki wɑ̈r ɑ́kyel? Yïde ɑ bëëd yï nɑ ngɑn-ɑ ópɑ̈ɑ̈y piny, ɑ bëëd yï nɑ jɑl-liny me dhɑ̈ɑ̈rø? Ngɑ̈nyi yi wøn, yïn ɑ Jwøng-ɑ Ácwɑ̈ɑ̈j kinni yï nud kì kelli wøn! Wø bɑ jií, wø ko wiy piny.’ ” Jwøng-ɑ Ácwɑ̈ɑ̈j ɑ́kööb kì ri jiɑni kinni, “Ge nyi mɑɑr-ɑ rengø kì butɑ, o ge dhɑ̈li bëëdø kì butɑ. Bene ɑ bëëdɑ pyëwɑ rɑj ki gen. Orøøg gen pɑ wïl kì wïjɑ, o ge bɑ møg-ɑ ócɑy yi yɑn ceth.” Yɑ ɑ́köbbi yi Jwøng-ɑ Ácwɑ̈ɑ̈j kinni, “Yï ko kwɑ̈jji kinni kønyɑ jiɑni. Cɑgg ri gen twöön yi gen ki gïncɑm, kwɑ̈jji gen pɑ lïngɑ, o ge pɑ kønyɑ; o cɑgg yɑ muuj yi gen ki gëdhh-ɑ nyi rɑ̈b geki byëlø, pyëwɑ pɑ mïni ki gen. Ge óyöd ge ceg yi yɑn kɑ nɑ̈gø ki liny, kí kɑ̈j geki rɑ̈ɑ̈m dëllì.” Codhe ɑkööbɑ kinni, “Wuö, Jwøng-ɑ Ácwɑ̈ɑ̈j, ngɑ̈nyi yi yïn kinni jøtöng köbb-ɑ ji kinni i óbong liny kí kɑ̈j, mɑ́ yï ɑ́kööb kinøw, ge okööbø i bɑ mër kete ɑ óying yij piny.” De Jwøng-ɑ Ácwɑ̈ɑ̈j ɑ́löggi kinni, “Jøtöng kømm-ɑ pyed ki nyingɑ, ge nuti ör-ɑ yi yɑn, o ge nuti köbbø yi yɑn kinni kööb gen. Cyɑ̈r-ɑ kømmi yi gen nuti kedh ɑ yïɑ. Gïg-ɑ nyi bɑg yi gen kɑ̈ɑ̈l-ɑ wɑ̈thi gen. Yï di köbbø yi yɑn, yɑ Jwøng-ɑ Ácwɑ̈ɑ̈j; yï köbbɑ’ gïn-ɑ ógöggɑ jøtöng møg-ɑ kööbø ki nyingɑ, o ge nuti ör-ɑ yi yɑn, ɑ kööb gen kinni bong liny wɑlɑ̀ bong kɑ̈j men-ɑ ónɑ̈gø kì piny men. Ge ónɑ̈g yi yɑn kì yij liny kí kɑ̈j. Ji-ɑ ɑ́köbbi møgɑni yi gen ge ónɑ̈g ni gen ceth. Ge óbuud kì piny ge thøø kì yethi yëthi Yerusɑlem; bong ngɑn-ɑ ókony gen, ge bënn kí mɑ̈nni gen, kí wɑ̈ddi gen, kí nyigi gen womɑ̈nn. Ge ócɑy yi yɑn ceth.” Kɑ yɑ köbbi yi Jwøng-ɑ Ácwɑ̈ɑ̈j kinni i köbbɑ ji ki møg-ɑ rɑ̈mø kì pyëwɑ, i kööbɑ kinni, “Wiy nyingɑ rïngi gen ki pï kì dicɑ̈ng kí wɑ̈r, wiy yɑ cöögɑ yɑ pɑ wïyi ki ywøg, mɑ́ ken-ɑ ri jiɑ bɑ kedø me dwøng. Kenyi kedhɑ pɑ̈l, yɑ nyi lidh-ɑ jøg-ɑ ónɑ̈gø yi liny. Kenyi bëënɑ kɑɑl, yɑ nyi lidh-ɑ ji ge oywɑjø yi kɑ̈j. Jøtöng geki ókwër göög-ɑ cwɑggi gen, de gïn-ɑ gwøg yi gen kwïj yi gen.” Jwøng-ɑ Ácwɑ̈ɑ̈j, Yeudiyɑ̀ ɑ́ceg yi yïn kɑ bɑnyø ki mendwøng? Tyëng Dhɑyøn mɑɑn yi yïn? Wøde ɑ nyïɑ̈ɑ̈g wøn ki menrɑj kinnï, ɑ thödhi wøn ki kedø me pɑ nøggi? Wø kwɑjj-ɑ mër de bong gïndøj me cwöb, wø ngɑ̈dh-ɑ kinni wø ótuur, de yöd ɑ́ böögø ɑ bï. Rɑ̈ji wøn ngɑ̈nyi yi wøn, yïn ɑ Jwøng-ɑ Ácwɑ̈ɑ̈j; kerri orøøg kweyyi wøn ying-ɑ kömi wøn, mɑ́ wø ɑ́røngi kì bølí. Pɑr møg-ɑ ɑ́kwöng yi yïn cøn, kɑ wø ko bɑɑny; Yerusɑlem ko yɑ̈ɑ̈r; kej kwøøm dhwɑ̈ngí ko yɑ̈ɑ̈r. Lwöm-ɑ ɑ́lwøb yi wɑ ko pɑ̈ɑ̈d. Ngïjji jwöggi pödhh-ɑ kyeelø, bong men kɑ̈ni ki kødh kì kelli gen, mɑl pɑ cuggi lëngi piny ki kødh kete. Wø ngɑ̈dh-ɑ yïn, yïn ɑ Jwøng-ɑ Ácwɑ̈ɑ̈j, Jwøøg wøn, mɑ́ e bɑ yïn ɑ nyi gwøg gïgɑni bënn. Codhe, ɑ köbbi yɑn yi Jwøng-ɑ Ácwɑ̈ɑ̈j kinni, “Cɑgg e di bëëd ɑ́ Mosɑ̀ geki Sɑmwel ɑ cungi kì bølɑ ge odhɑmmø kipe ji møg, pyëwɑ pɑ lɑ̈ɑ̈m ki jiɑni. Wiy ge kedh gen, wiy ge nyegi gen kì bølɑ. Opyëj ge yïn kinni ge kedh-ɑ keny? Köbbí gen kinni yɑ ɑ́kööb kinni, “Møøgø nɑ̈g-ɑ yi rɑ̈ɑ̈m dëllì; bene kun-ɑ ókedhi yi gen! Møøgø ónɑ̈g-ɑ yi pilø, bene kun-ɑ ókedhi yi gen! Møøgø nɑ̈g-ɑ yi kɑ̈j, bene kun-ɑ ókedhi yi gen! Møøgø kïdh-ɑ yïnø gɑ ɑmɑgg, bene kun-ɑ ókedhi yi gen! Yɑn yɑ Jwøng-ɑ Ácwɑ̈ɑ̈j, yɑ ɑ́rum ki cïb ki gïg pëddi rɑ̈jø gɑ ɑ́ngwen møg pɑ̈dhi kömi gen; ge ónɑ̈g kì yij liny, kɑ ge ywɑjji ge thøø yi gwögg, ge ócɑm yi winy geki lɑ̈yyi pɑ̈l. Jii kömi piny bënn ógöjjɑ böggø yi gïgrijjø møg-ɑ ógöggɑ gen, kipe orøng-ɑ ɑ́gwøg yi Mɑnɑsè wɑ̈d Kedhekiyɑ̀ kì Yerusɑlem keny-ɑ ɑ́bëëde ɑ́ rɑ̈dh.” Jwøng-ɑ Ácwɑ̈ɑ̈j okööbø kinni, “Á men ɑ yije óywöngi kipe wun, wun ɑ tyëng Yerusɑlem, ɑ́ men ɑ ókïïmø kiper wun? Á men ɑ ócungi, kɑ per wun pyëje? Yɑ ɑ́bɑny yi wun, ngɑ̈thi wun ɑ́lugi wun yɑn. Bene ɑ bɑnge rïjjɑ cingɑ wun kɑ wu nyøngɑ, mɑ́ yɑ ɑ́pïd yi ngïïnø. Wu ɑ́kwøørɑ wɑ̈g ni wél kì yethi kɑ̈ddi pödhø bënn, wu ɑ́nɑ̈gɑ jiɑ, nyigi wun ɑ́nɑ̈gɑ, mɑ́ wu ɑ́dhɑ̈li wïyø gøggi rɑj. Thwömm-ɑ mɑ̈nn ngenyø kì yij piny wun ge nɑ ɑyejø kì thɑ̈ngi nɑɑm omelø. Wøbbi pödhø ɑ́nɑ̈gɑ, kɑ mëëg gen göjjɑ orɑng. Ge ɑ́gwɑɑrɑ piny kɑ ge göjjɑ orɑng kí wɑ̈ɑ̈rø. Ngɑndhɑjø mɑ nyige ɑ́nɑ̈g gɑ ɑ́bïryew ɑ́pɑ̈ɑ̈dh mine cödø, e ceg-ɑ gɑm ki yëgø. Dicɑ̈ng ree ɑ́løge wɑ̈r kì nyinge, dële ɑ́ceg ì ywɑd, o wïje ɑ́muum. Tyëng-ɑ nudd ge onëënø kì kelli wun ógöjjɑ nɑ̈gø yi tyëng-ɑ mɑ̈n ki wun. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Yɑ bɑ dhɑnhø me pyëwe pɑ med! Yɑde ɑ ɑ́kɑ̈ɑ̈l yɑn kömi piny yi meyɑ? Yɑ ceg-ɑ wërø wø gönyø kɑ dhɑnhø bëne kì yij pödhø. Bong ngɑn mɑ ɑ́wïdhɑ ki ngyëny, wɑlɑ̀ bong ngɑn yïe ɑ́wïdhɑ, de yɑ wɑ̈dh-ɑ lɑ̈mmi cyën yi ji yøw. Jwøng-ɑ Ácwɑ̈ɑ̈j, wiy cyënnɑni pɑ̈dhi gen kömɑ keløg yï nuti göggø yi yɑn kidøøj, kí keløg yɑ nuti dhɑmmø kì bølí kipe tyëng-ɑ mɑɑn yɑn keny-ɑ ɑ́rɑngi gen yi ɑkørr. (Bong ngɑn cuggi tori winø, pɑ tor kinni tek, ke bëëde e bɑ dødø, e bɑ ɑyöl ki dilɑl.) Yɑ ɑ́köbbi yi Jwøng-ɑ Ácwɑ̈ɑ̈j kinni, “Yɑ óöni ki tyëngmɑ̈ɑ̈nø møg kɑ̈l jɑmmi jiɑ geki kɑ̈rri gen, e bɑ cɑ́y kipe orøng-ɑ ɑ́gwøg yi gen kì yij pödhø bëne. Ge ógöjjɑ göggi tyëngmɑ̈ɑ̈nø kì yij piny me kwïj yi gen, mɑ́ linyɑ nɑ mɑc, o ceg-ɑ lyelø gïti ɑtheer.” Codhe, ɑkööbɑ kinni, “Jwøng-ɑ Ácwɑ̈ɑ̈j, yï ngɑ̈ny wøw. Wïjí ko wïl ki yɑn, køny yɑn. Wiy gøølɑ colɑ ki tyëng-ɑ mɑɑn yɑn. Yɑ ko wëggi nɑ̈gø yi gen, pyëwí ko lɑ̈ɑ̈m ki gen. Yɑ gwɑddi kɑ perí. Yɑ ɑ́köbbi yi yïn, kɑ kwøbbí lïngɑ bënn. Yɑ bɑ mií, yïn ɑ Wïlɑ̈bø, Jwøk, Jwøng-ɑ Ácwɑ̈ɑ̈j, o pyëwɑ med cɑrø yi kwøbbí. Yɑ nuti pëggi be ngedhø kì kelli ji, e pyëwɑ med. Yɑ ɑ́bëëd yɑ lïngɑ kwøbbí, o yɑ nyi bëëd ɑ wɑ̈yɑ pyëwɑ pɑ med. Yɑde ɑ cögɑ yɑ orɑngø? Gede keddɑ ɑ pɑ nøggi gen? Yï óni nɑm me pïge dwönø, kɑ yï nɑ wɑɑng pï me cungø?” Aløøg møgɑni yi Jwøng-ɑ Ácwɑ̈ɑ̈j kinni, “Keløg yï ódwögø, yï kwɑnyɑ’ kwɑnyø, kɑ yï cigɑ gwøgø yïn ɑ́ bɑ̈ngɑ. Óbëëd e døøj keløg yï kɑ̈ll-ɑ wöönɑ kì kelli ji, kibøli kɑ̀ pëggí be kømmi yɑnggì. Ji di bï-ɑ yïí, pɑth ki yïn ɑ di kedhi yï gen. Yï ógwøgɑ yï teg kibøli gen, yï óni döri ngyënyø dilɑl. Ge ónyïɑ̈ggi ki yïn, de yï pɑ tyɑm yi gen. Yï ókorri yi yɑn, bong gïn-ɑ ónywɑl yïn. Yï óyiel yi yɑn kì cinggi tyëngrijjø møg-ɑ yethi gen wöny. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Acigi wøn kwøb ki Jwøng-ɑ Ácwɑ̈ɑ̈j, kɑ okööbø kinni, “Yï ko nyömi wɑlɑ̀ yï ko bëëd yïí dɑ nyigí kì piny-ɑ ni men, Yï óköbbɑ gïn-ɑ óbï kömi othønh-ɑ nywøl kì piny men geki wëëg gen kí mëëg gen. Ge ónɑ̈g yi rɑ̈ɑ̈m dëllì mø rijjø, o bong ngɑn-ɑ óywøg gen, wɑlɑ̀ bong ngɑn-ɑ ókony gen. Ge ótwɑ̈li ni cyedh kì piny ge thøø. Ge ónɑ̈g kì yij liny, o ge óywɑj yi kɑ̈j, o ge ócɑm yi winyyi mɑl geki lɑ̈yyi pɑ̈l. “Yï ko kedhi kɑl me yije ywøøg dhɑnhø. Ko di ngɑnthøø me ywøg yi yïn. Jiɑ pɑ gëdhhɑ mër këti; ge pɑ mɑɑrɑ wɑlɑ̀ pyëwɑ pɑ lɑ̈ɑ̈m ki gen. Tyëngkɑ̈rì geki tyëng-ɑ ɑbuur óthøw bënn kì piny men, de bong ngɑn-ɑ ókony gen wɑlɑ̀ bong ngɑn ywøg gen. Bong ngɑn-ɑ ókɑggi dële wɑlɑ̀ bong ngɑn-ɑ ólyel wïje e ywøg-ɑ thøø. Bong ngɑn-ɑ ókëëm ngɑn wɑɑd gen thøø, kɑ ge ocyɑ̈mø ki gøn. Bong ngɑn yije óywöngi ki ngɑn megø, cɑgg ɑ́ wïye wɑlɑ̀ meye ɑ thøø. “Yï ko kedhi kɑl me yije di thyëg. Yï ko pëggi kelli gen be cɑm kí mɑdh. Lïngí gïn-ɑ kømmɑ, yɑ Wïlɑ̈bø, Jwøøg Isrɑil, Jwøng-ɑ Ácwɑ̈ɑ̈j. Wörri medi pyëw kí tugø mi nywöm, ócuung yi yɑn. Gïgɑni ólidh ge ocwöbø ceth yi tyëng-ɑ bëëdø kì pönhï. “Keny-ɑ óköbbí gen møgɑni, yï ópyëj yi gen kinni, ɑ́ per ngø ɑ cɑyɑ gen ki cɑ́y-ɑ døngø ni møg. Ge ópëjji kinni ɑ́ gïjø mɑ ngø ɑ ɑ́bɑj yi gen, wɑlɑ̀ ɑ́ orøg me bëëdø dï, ɑ gwøøg gen kì bøli Jwøng-ɑ Ácwɑ̈ɑ̈j, Jwøøg gen. Codhe, kɑ ge köbbí kinni Jwøng-ɑ Ácwɑ̈ɑ̈j okööbø kinni, ‘Yɑ ɑ́wiy yi kweyyi wun kɑ ge kedh-ɑ be mɑlli jwögg møøgø, ge gögg-ɑ jwöggɑni. Yɑ ɑ́wiy gen piny kɑ ge óbɑ̈nyø ki mïdhi ciggɑ. De wu ɑ́gwøg-ɑ gïg mø pëddi rɑ̈jø kibøli møg-ɑ ɑ́gwøg yi kweyyi wun. Wu bënn, wɑ̈thi wun teeg, o wu rijjø, o kwøbbɑ pɑ lïngi yi wun. Kì bɑng gïn ni menɑni, wu leengɑ’ wɑ̈g kì yij piny men, wu óleengɑ yij pödhø me kwïj yi wun, wuki kweyyi wun. Wu ópëggi be göggi jwögg mø pɑth kì kunɑni, kì dicɑ̈ng kí wɑ̈r, o pyëwɑ koo lɑ̈ɑ̈m ki wun.’ ” Jwøng-ɑ Ácwɑ̈ɑ̈j okööbø kinni, “Bøli keny-ɑ ówiy nyingɑ ki kwöngø, yɑn ɑ́ Jwøng-ɑ Nëënø, ɑ ɑ́kɑ̈ɑ̈l tyëng Isrɑil wɑ̈g kì piny Rïp ɑ́cyɑ̈ngi. De ge óköngi ki nyingɑ, yɑn ɑ́ Jwøng-ɑ Nëënø ɑ ɑ́kɑ̈ɑ̈l tyëng Isrɑil wɑ̈g kì yethi pödhh-ɑ kyeelø bënn, ɑ løg yethi pödhh-ɑ ɑ́kedhh-ɑ gen. Ge ódwöögɑ pödhi gen, piny-ɑ ɑ́mëggɑ kweyyi ge cøn. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Yɑ óöni ki jømɑy møg mɑg ji møg. Codhe, o yɑ önɑ ki jødwɑr møg dwɑr gen kì wɑ̈thi kïttì, kí yethi órøggi kïttì. Gïg-ɑ gøggi yi gen bënn nennɑ’ nennø. Orøøg gen nennɑ’ nennø ceth; bong gïn cuggi kɑnø kɑ ocögø e pɑ lidhɑ. Gøøli orøøg gen colɑ’ colø bëne, mɑ́ pinyɑ ɑ́bwöl yi gen ki ngïjji jwögg-ɑ ni tyëngthøø; piny ɑ́pɑ̈ɑ̈ng yi gen ki jwögg-ɑ pɑth ki dyër.” Jwøng-ɑ Ácwɑ̈ɑ̈j, yïn ɑ korri yɑn, yïn ɑ nyi thödhi yɑn ki tegø, yïn ɑ nyi yiel yɑn ki ɑkørr. Pödhh møøgø óbï yïí ge kɑ̈ɑ̈l-ɑ cögi piny kɑ ge okööbø kinni, “Bɑ jwögg møg bong per gen ɑ ɑ́ying yï kweyyi wøn; ngïjjì møg bong per gen. Ji ócuggø gwøg ki jwöggi gen? Bong gøn, ke göög gen, jwöggɑni pɑth ki dyër.” Kɑ Jwøng-ɑ Ácwɑ̈ɑ̈j okööbø kinni, “Tyëng-ɑ göögø ki ngïjji jwögg ónyudhi yi yɑn. Ge ónyudhɑ mɑ̈rɑ kí tegɑ. O yod yi gen kinni yɑ bɑ Jwøng-ɑ Ácwɑ̈ɑ̈j.” Jwøng-ɑ Ácwɑ̈ɑ̈j okööbø kinni, “Wu tyëng Yeudiyɑ̀, orøøg wun bɑ ɑgwed ki gɑlɑm mɑ winø dødø; orøøg wun bɑ ɑtweg ki gïjø me bedh kì kömi minni wun, minn-ɑ bɑ kït; orøøg wun bɑ ɑgwed kì tøggi këlli lɑm mø wun. Wu mɑll-ɑ ngïjji Aceerɑ̀ møg-ɑ ócïb thɑ̈thi yenh-ɑ mɑr geki wɑ̈thi ótøng, geki wɑ̈thi kïttì kì yij pödhø bëne. Piny wun omuujø yi yɑn, eni piny-ɑ ɑ́mëggɑ wun; wu ógöjjɑ göggi tyëng-ɑ mɑ̈n ki wun kì yij piny me kwïj yi wun, mɑ́ rɑ̈ji pyëwɑ nɑ mɑc, o ceg-ɑ lyelø gïti ɑtheer.” Jwøng-ɑ Ácwɑ̈ɑ̈j okööbø kinni, “Tyëng-ɑ ɑ́lugi ngɑ̈thi gen yɑn ge ócɑyɑ, kɑ ge göjjɑ ngɑ̈dhi ji, ge óngɑ̈dh-ɑ tegi ji ɑ nyi thøw. Ge óni ɑ́lɑ̈llì møg twïyø kì yij ryɑng, kì yij piny me bɑ omelø, o bong gïn twïy kì yije. Bong gïndøj men-ɑ ócwöb kiper gen. “De tyëng-ɑ gɑ̈n yɑn ge ógyëdhɑ. Ge óni yenh mø twïyø kì tøg nɑm, byerri gen wɑ̈dhi yethi pï. Ge pɑ böggi kenyi bëëd piny e lëëdh, mɑ́ yïthhi gen nyi cög ge mɑr ceth; pëthi gen pɑ lïngø yi kɑ̀ bëëde e bong kødh; ge nyi ceg-ɑ nywølø ceth. “Á men ɑ cuggi yodi gïn-ɑ pyëw dhɑnhø? Bong gïjø me lod pyëw ki wëënyø; pɑ cuggi gwøgø kɑ ódönyø. Yɑ Jwøng-ɑ Ácwɑ̈ɑ̈j, pyëw dhɑnhø yije nyi yɑbɑ’ yɑbø, kɑ rummi dhɑnhø nyi yɑbɑ, kɑ pyëwe rɑngɑ. Gïg-ɑ nyi göggɑ dhɑnhø nyi køølɑ’ ri bëëde, e kyëëw kɑ gïg-ɑ gøgge.” Ngɑn kwɑny ngyëny ki wëënyø, nɑ winyø me bob nywøl mø nuti nywøl-ɑ yi en. Wiy-ɑ piny yi ngyënyyɑni e nuti yöø; ceg-ɑ gwøg ki dhëg keny-ɑ ócyɑ̈ngi thøwe. Kengɑ nɑ kwøøm lejø, ɑ́wön ɑ weenø e cung-ɑ́ɑ̀ kömi kït me bɑ̈r. Yïn ɑ Jwøng-ɑ Ácwɑ̈ɑ̈j, bɑ yïn ɑ gɑ̈nni yi Isrɑil, tyëng-ɑ wiy yïn piny óyɑ̈r ge bënn. Ge ólɑ̈ɑ̈ny ni nying-ɑ ógweed kömi tør, mɑ́ yï ɑ́wiy piny yi gen, yïn ɑ Jwøng-ɑ Ácwɑ̈ɑ̈j, yï ceg bëëdø yïn ɑ́ wɑɑng pï men-ɑ yije mulli wɑ̈g yi pïg tïl. Jwøng-ɑ Ácwɑ̈ɑ̈j, gwøg dëlɑ o yöne, yiel yɑn, o bëëd e bong gïn nywɑl yɑn. Bene yïn ɑ lenhɑ! Yɑ nyii köbbø yi ji kinni, “Ágøne rɑjj-ɑ ɑ́kwøb yi Jwøng-ɑ Ácwɑ̈ɑ̈j i ge óbï kömi wøn? Gwøge gïg-ɑ ɑ́kømme ɑnɑn!” De yï pɑ cuggi jwɑɑnø yi yɑn kinni kɑ̈ɑ̈l ryɑ̈ngɑni kömi gen, yïn ɑ Jwøng-ɑ Ácwɑ̈ɑ̈j; yɑ nuti lɑ̈mø kinni bï rɑj kömi gen. Møg-ɑ ɑ́kwøb yi yɑn ngɑ̈nyi yi yïn. Yɑ ko wëggí böggø yi yïn, bene yïn keny-ɑ nyi yömmi yi yɑn kenyi bëën rɑj. Wiy tyëng-ɑ guud wɑngɑ yɑ̈r gen, de wiy yɑn, yïn ɑ Jwøng-ɑ Ácwɑ̈ɑ̈j. Wiy ge böggi gen ki mendwøng, de yɑ ko wëggí böggø. Kɑ̈ɑ̈l ryɑ̈g kömi gen kɑ ge kedhhí. Kɑ yɑ köbbi yi Jwøng-ɑ Ácwɑ̈ɑ̈j kinni, “Kedh Jermɑyɑ̀, kɑ wöönɑ kïdhí Dhøg Teedø, dhøng-ɑ nyi kɑ̈ɑ̈l yi rɑ̈nhi Yeudiyɑ̀, kɑ yï kedhí dhøggi dörri Yerusɑlem møg-ɑ kyeelø. Köbbí rɑ̈nhì, geki teedø bëne kì Yeudiyɑ̀ kí tyëng-ɑ bëëdø kì Yerusɑlem, kí ngɑn bï yije, kinni lïngi gen møg-ɑ kømmɑ. Köbbí gen kinni keløg wëyi gen omɑɑrø yi gen, ge ko tyëddi ki gïjø me peeg kì cyɑ̈ɑ̈ng Sɑbɑth; ko di gïjø me peeg me bɑ̈ɑ̈n dhøggi döri Yerusɑlem; ko di gïn tïng wɑ̈g kì yethi ud kì cyɑ̈ɑ̈ng Sɑbɑth. Ge ko göög kì cyɑ̈ɑ̈ng Sɑbɑth, mïdhi ge gøn ceth ɑ́ cyɑ̈ɑ̈ng kwër, ni kɑ ɑ́cegɑ kweyyi gen. Kwøbbɑ nuti lïngø yi kweyyi gen, wɑlɑ̀ gï nuti ywöör gen. De ge ɑ́yöd muddi gen ceg-ɑ tëngø; gïg-ɑ ɑ́köbbɑ gen nuti gwøøg gen, wɑlɑ̀ ge nuti dïdø kì yïɑ. “Köbbí ji bënn kinni lïngi gen kwøbbɑ. Ge ko tyëddi ki gïg mø peeg ge bɑ̈ɑ̈n-ɑ dhø döri kɑɑldwøng kì cyɑ̈ɑ̈ng Sɑbɑth. Mïdhi gen Sɑbɑth ɑ́ cyɑ̈ɑ̈ng kwër, kɑ ko di gïn gwøg kì cyɑ̈ngɑni. Codhe, o rɑ̈nhi gen geki jɑggi gen nyi kedhi gen dhø dörø ge ngwøni kɑ ngwøni rɑ̈ɑ̈dhø kí teng-ɑ ɑ́ying yï Debïd. Ge ócyɑ̈dhi ki yɑ̈ɑ̈th kí kyënyì geki tyëng Yeudiyɑ̀ kí Yerusɑlem, o kɑɑldwøng Yerusɑlem óbëëdø ceth e pɑ̈ng yi ji. Ji óbï ge kɑ̈ɑ̈l-ɑ kɑ̈ddi Yeudiyɑ̀ geki myërr-ɑ bɑdhhi Yerusɑlem, møøgø óbï ge kɑ̈ɑ̈l-ɑ myërri gøl Ben Yɑmïn, møøgø kɑ̈ɑ̈l-ɑ thɑ̈thi kïttì, geki wɑ̈thi kïttì, kí myërr-ɑ wɑɑng wurlwɑl kì Yeudiyɑ̀. Ge ókɑ̈ni Kengɑ ki gënh-ɑ nyi rɑ̈b bëne, kí gënhi mër, kí byëlø kí bɑkur kí gëdhhi pwøj. De gwøg gen gïn-ɑ kømmi yi yɑn, kɑ Sɑbɑth mïdhi gen ɑ́ cyɑ̈ɑ̈ng kwër, ge ko tyëddi ki gïjø me peeg ge bɑ̈ɑ̈n-ɑ dhø döri kɑɑldwøng kì cyɑ̈ngɑni, de keløg møgɑ pɑ gwøg yi gen, thïggi döri Yerusɑlem rɑ̈bɑ’ rɑ̈bø ki mɑc. Udd-ɑ døngø kì Yerusɑlem órɑ̈b yi mɑc, o bong ngɑn-ɑ ócuggi nɑ̈gi mɑnyɑni.” Kɑ yɑ köbbi yi Jwøng-ɑ Ácwɑ̈ɑ̈j kinni, “Kedhí gøl bødhi lɑ̈b, yï óköbbɑ kì kunɑni.” Codhe, ɑkedhɑ kunɑni, kɑ bønhɑni yuudɑ e ogöögø. Kenyi dhɑ̈li gïn-ɑ dwɑdde cwɑ̈jø ki pɑ̈dhø, lɑ̈mɑni nyi cwɑ̈ɑ̈je gïjø megø. Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Yïɑ bong dyër, o tyëng Isrɑil göggɑ gïn-ɑ nyi göggi lɑ̈bø yi bødhi lɑ̈b? Wu nɑ lɑ̈bø kì cingɑ ceth ni lɑ̈bø kì cingi bødhi lɑ̈b. Keløg yɑ okööbø kinni kɑɑl-ɑni wɑlɑ̀ pönh-ɑni ódhwøy yi yɑn, wɑlɑ̀ kinni toorɑ’ piny, wɑlɑ̀ rënyɑ’ rënyø, kɑ pönhɑni ówïyø ki orøge, gïn-ɑ ɑ́kwøbɑ kinni ógwøgɑ pɑ gwøgɑ. Ke kööbɑ thyew kinni yɑ dwɑdd-ɑ pïdhø, wɑlɑ̀ kinni yɑ dwɑdd-ɑ gyer, wɑlɑ̀ kinni pönh-ɑni dwɑddɑ’ gerø, de kwøbbɑ opyemø yi pönhɑni, kɑ ogöögø ki gïnrɑj, gïn-ɑ ɑ́dwɑddɑ gwøgø pɑ gwøg yi yɑn. Köbbí tyëng Yeudiyɑ̀ geki tyëng Yerusɑlem ɑnɑn kinni, dɑ gïnrɑj me dwɑddɑ göggi gen; riɑ gwirɑ’ gwirø kipe cɑyi gen. Köbbí gen kinni wiy gen bëënrɑj, kɑ bëëdi gen ki gïg-ɑ gøggi yi gen wil gen. Ge ólöggi kinni, ‘Á kipe ngø? Wø ceg-ɑ bëëdø muddi wøn teeg ceth; wø gøgg-ɑ rɑj ni kɑ̀ dwɑddii yi wøn.’ ” Jwøng-ɑ Ácwɑ̈ɑ̈j okööbø kinni, “Pyëj wun pödhh-ɑ kyeelø ying gïn ni men pɑ̈nyi cwöbø. Tyëng Isrɑil ɑ́göög ki gïjø me rɑɑj! Wɑ̈thi kïtti Lubnɑn ɑ́pɑ̈nyi bëëdø ge bong ɑ́piy? Nɑ̈mm-ɑ pïi gen lïb møg-ɑ rïngi piny kì wɑ̈thi gen ɑ́pɑ̈nyi dwönø? De men-ɑ́ jiɑ wɑ̈thi gen ɑ́wïl ki yɑn, ge rɑ̈bb-ɑ ngïjji jwögg-ɑ pɑth ki dyër ki bɑkur. yöö ɑ́bɑj yi gen, ge ɑ́wïyi ki kɑ̈lli yethi yëth-ɑ weenø, ge kɑ̈ll-ɑ yethi yëëth mø bong ngïjji yöö. Piny ɑ́rënyi yi gen ki menrɑj, piny gen ócög e yɑ̈rø gïti ɑtheer; tyëng-ɑ ókɑ̈lli yij pinyɑni, ge ócyɑ̈dhi ge óböggø. Jiɑ ókedhhɑ kì bøli tyëngmɑ̈ɑ̈nø ni tør kenyi kwøørii yi yømi wɑɑng cyɑ̈ɑ̈ng mwøl. Ngɑ̈jɑ ólugɑ gen; ge koo køny yi yɑn keny-ɑ óbëën ryɑ̈g kömi gen.” Codhe, ɑkööb ji kinni, “Göggi wɑ Jermɑyɑ̀ ki gïïpiny! Óbëëdø ceth e dɑ ókwër møg nyi nyudhi wɑ, kí ji mø wɑ̈thi gen pel møg nyi thödhi wɑ ki rummì, kí jøtöng møg nyi kɑ̈lli wööni Jwøk. Gøøny wɑ Jermɑyɑ̀ wɑ bɑny-ɑ kwøbbe, kɑ møg-ɑ kømme ko yïëy wɑ.” Codhe, ɑkwɑ̈jjɑ kinni, “Lïngí møgɑ, yïn ɑ Jwøng-ɑ Ácwɑ̈ɑ̈j, kɑ kwøbb-ɑ kømmi kì riɑ yi tyëngmɑ̈ɑ̈nø lïngí. Gïndøj nyi col kɑ gïnrɑj? Ge ɑ́yöd ge kuny-ɑ yɑn ki bur men yije pɑ̈dhɑ. Pɑr kɑ ɑ́kööbɑ ki yïn, yɑ nyɑ̈gg-ɑ kömi gen, ɑ ɑ́kwɑjjɑ yïn kinni ge ko cɑɑy ki rɑ̈ji pyëwí. De ɑnɑn yïn ɑ Jwøng-ɑ Ácwɑ̈ɑ̈j, wiy nyigi gen ywɑj yi kɑ̈j, wiy jøgdøngø thøw gen yi rɑ̈ɑ̈m dëllì, kɑ wiy yɑɑg-ɑ wøbb nɑ̈g kì yij liny. Ödí kömi gen ki yɑy men pɑ̈ɑ̈y gen piny, o uddi gen yɑg yi yɑyɑni. Kɑ wiy ge kïïw gen yi wɑ̈ɑ̈rø. Mɑ́ yɑ ɑ́kunyi gen ki bur me yije pɑ̈dhɑ, kɑ yɑ ceg yi gen ki ɑ́kɑ̈llì. De gïg-ɑ dwɑddi gwøgø yi gen kipe nɑ̈gɑ ngɑ̈nyi yi yïn, yïn ɑ Jwøng-ɑ Ácwɑ̈ɑ̈j. Pyëwí ko lɑ̈ɑ̈m kipe rɑj geki orøng-ɑ ɑ́gwøg yi gen; de cɑy gen ki rɑ̈ji pyëwí.” Kɑ yɑ köbbi yi Jwøng-ɑ Ácwɑ̈ɑ̈j i ngëwɑ ki pug me nyɑ̈n. Yɑ ɑ́köbbe thyew i kɑ̈ɑ̈dɑ ki jøgdøngø kí ókwër mø yöø. Kɑ wø kɑ̈l wøn Dhøg Ópɑdø, wø kedh-ɑ Töör Kinöm. Møg-ɑ óköbbe yɑn ótöng yi yɑn kì kunɑni. Kɑ yɑ köbbi yi Jwøng-ɑ Ácwɑ̈ɑ̈j i kööbɑ kinni, “Wu rɑ̈nhi Yeudiyɑ̀ kí tyëng-ɑ bëëdø kì Yerusɑlem, lïngu møg-ɑ kwøbɑ, yɑ Jwøng-ɑ Ácwɑ̈ɑ̈j, Jwøøg Isrɑil; yɑ kɑ̈n-ɑ keny ki ryɑ̈g men-ɑ óbëëd yïthhi tyëng-ɑ ólïngi pere cem-ɑ pëëw. Gïnɑni ógwøgɑ ceth, mɑ́ yɑ ɑ́wiy piny yi ji, kɑ ge ogöögø ki gïnrɑj kì keny, kɑ gø bwöl gen ki gëdhh-ɑ nyi mëggi gen jwögg mɑ ɑ́bëëd ge kwïj yi kweyyi gen geki rɑ̈nhi Yeudiyɑ̀ cøn, kɑ piny pɑ̈ng yi gen ki remmi ji mø yï gen bɑ̈r. Kɑ Bɑɑl gëddi yi gen ki këlli lɑm møg kömi gen nyi rɑ̈b gen nyigi gen gɑ gëdhhì. Ge nuti köbbø yi yɑn kinni göög gen kinøw, yɑ nuti pɑ̈nyi rumø kì ri gïn ni menɑni. Bøli keny-ɑ ówiy Töör men ki cwøl ɑ́ Töpeth, wɑlɑ̀ Töör Kinöm óbï, kɑ døøg-ɑ be cwøllø ɑ́ Töör Ngɑl. Gïg-ɑ dwɑddi gwøgø yi tyëng Yeudiyɑ̀ kí tyëng-ɑ bëëdø kì Yerusɑlem kì kenyɑni ge órënyɑ. Ge ówëggɑ tyɑmø yi tyëng-ɑ mɑ̈n ki gen, kɑ ge nɑ̈g kì yij liny. Ge ówëggɑ cɑmø yi lɑ̈yy geki winy. Ryɑ̈ng-ɑ rɑj ni menɑni kɑ̈ɑ̈lɑ’ kömi kɑɑl men ceth. Ji óbëëd ge óböggø kenyi bëën gen ge kɑ̈ll-ɑ kenyɑni. Kɑɑl ótyeg yi tyëngmɑ̈ɑ̈nø, ge dwɑdd-ɑ nɑ̈gi jie. Tyëg menɑni óbëëd e rɑɑj cɑrø, kɑ tyëng-ɑ kɑɑl døøg-ɑ be cɑmi ri gen, cɑgg ɑ́ nyɑɑr dhɑnhø gø cɑme’ cɑmø.” Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Nɑ̈g pungɑni kì bøli jøg-ɑ ɑ́bëën wun, kɑ ge köbbí kinni Jwøng-ɑ Ácwɑ̈ɑ̈j okööbø kinni, “Ji møg geki kɑɑl men ri gen ómød yi gen ni pug men, eni pung-ɑ pɑ cuggi cemø këti. Ji-ɑ thøø ójɑ̈ddi ki keny-ɑ ókoony gen, kɑ ge koony men-ɑ́ yij Töpeth. Møg-ɑ kwøbɑ bɑ kinni kɑɑldwøng Yerusɑlem geki jie, ge ógwøg yi yɑn ge nɑ Töpeth. Ud bënn kì Yerusɑlem, kí uddi rɑ̈nhi Yeudiyɑ̀, kí udd-ɑ bɑ óthɑɑng, gen ɑ udd-ɑ́ wɑ̈thi gen ɑ́rɑ̈ɑ̈b ki bɑkur e rɑ̈bb-ɑ kyell, kɑ jwögg-ɑ kyeelø kunyi ki møgi oløg, ge ceg-ɑ ywëdhø bënn ni Töpeth.” Codhe, ɑkedhɑ kì Töpeth kun-ɑ ɑ́ör yɑn yi Jwøng-ɑ Ácwɑ̈ɑ̈j, be kwøbi wöönɑni. Yɑ ɑ́kedh kɑ yɑ ócungø kì ódɑ̈ri Kengø, ɑköbbɑ ji bënn kinni, Wïlɑ̈bø, Jwøøg Isrɑil, Jwøng-ɑ Ácwɑ̈ɑ̈j okööbø kinni, “Cɑ́y-ɑ ɑ́kømmɑ kɑ̈ɑ̈lɑ’ kömi kɑɑldwøng men geki myërr-ɑ bɑdhhe, mɑ́ muddi wun teeg, o wu pɑ dwɑddi lïngi kwøbbɑ.” Keny-ɑ ɑ́lïngi yɑn yɑ töng-ɑ møgɑni yi Pɑcur wɑ̈d Imer, ɑ ɑ́bëëd ɑ́ jɑng-ɑ dwøng kì dhø Kengø, ɑkööbe kinni i pwööd yɑn, kɑ yɑ cïb buti Dhøg Ben Yɑmïn kì ódɑ̈ri Kengø yɑ ótwöjø. Dhuki keny-ɑ ɑ́rumɑ ki pɑ̈dø yi Pɑcur kì yethi töjjì, ɑköbbɑ en kinni, “Yï nuti cɑgø yi Jwøng-ɑ Ácwɑ̈ɑ̈j yïn ɑ́ Pɑcur. Nying-ɑ ɑ́cɑ̈gge yïn bɑ ‘Böögø Kì Kɑ̈jj Bënn.’ Jwøng-ɑ Ácwɑ̈ɑ̈j kiree ɑ ɑ́kööb kinni, ‘Yï ógwøg yi yɑn yïn ɑ́ men böggi rií, kɑ yï løgɑ men böggi yi mɑ̈dhhí, o ge ólidh yi yïn ge bɑ ɑnɑ̈g yi tyëngmɑ̈ɑ̈nø. Tyëng Yeudiyɑ̀ bënn cïbɑ’ cingi rɑ̈ɑ̈dh Bɑbïlöniyɑ̀, møøgø ókïdhe pödhe gɑ ɑmɑgg, o møøgø ónɑ̈g yi en. Ge ówëggɑ yɑgø, kɑ jɑmmi gen kɑ̈l bënn, eni kɑ̈ɑ̈r kɑɑldwøng, cɑgg ɑ́ kɑ̈ɑ̈r rɑ̈nhi Yeudiyɑ̀, ge kïdh-ɑ Bɑbïlöniyɑ̀ bënn. O men-ɑ́ yïn, yï Pɑcur, yï kïdh-ɑ Bɑbïlöniyɑ̀ yï bɑ ɑmɑg wuki gølí bëne. Yï óthøw kunɑni, kɑ yï koony kej ɑ́kyel wuki mɑ̈dhhí møg-ɑ ɑ́köbbí kwøbbi pyed.’ ” Jwøng-ɑ Ácwɑ̈ɑ̈j, yɑ ɑ́wëny yi yïn, kɑ yɑ yïëy-ɑ wënyø, yï teg kibølɑ, o yɑ ɑ́tyɑm yi yïn. Ji bënn bøli gen looj ki yɑn, ge tyëg cɑ̈ng ge gwɑdd-ɑ yɑn. Kenyi kööbɑ, yɑ nyi ceg-ɑ ryeerø yɑ okïïwø kinni, “Liny! Ryɑ̈g!” Jwøng-ɑ Ácwɑ̈ɑ̈j, yɑ bɑ ɑbiw yi teedø, o yɑ ceg kɑ benyø yethi cyɑ̈ng bënn, kipe kɑ kɑ̈llɑ wööní. De kenyi kööbɑ kinni, “Wïjɑ ówïl ki Jwøng-ɑ Ácwɑ̈ɑ̈j, o yɑ pɑ cigi kwøb ki nyinge,” kɑ wööní nyi ceg-ɑ gwøg e nɑ mɑc me lyel kì yijɑ kɑ nyi pɑ̈nyɑ ki dij piny, de nyi ceg-ɑ dhɑ̈lø ki dij piny. Ji lïngɑ’ lïngø ge okööbø kinni, “Böögø ying-ɑ kɑ̈jj bënn! Gøøny wɑ en yï tyëng-ɑ jyɑ̈gø!” Cɑgg ɑ́ mɑ̈dhhɑ, ge dwɑdd-ɑ kinni o yɑ pɑ̈dhɑ. Ge okööbø kinni, “Ócuggø wënyø mɑwɑnø, codhe o mɑg yi wɑ, o göggi wɑ gwøge.” De yï nud kì butɑ, yïn ɑ Jwøng-ɑ Ácwɑ̈ɑ̈j ki tegí bëne, o tyëng-ɑ guud wɑngɑ bɑ møg-ɑ ópɑ̈ɑ̈dh. Ge óbëëd ge yɑ̈rø gïti ɑtheer, mɑ́ gïg-ɑ dwɑddi gen gwøgø pɑ lwɑ̈ng yi gen. Ayɑ̈ɑ̈r gen pɑ wɑj. De yïn, yïn ɑ Wïlɑ̈bø, Jwøng-ɑ Ácwɑ̈ɑ̈j, ji nyi rɑng yi yïn kɑ dyër, gïg-ɑ pëthi gen kí møg-ɑ rømmi yi gen ngɑ̈nyi yi yïn. Wiy yï lidhɑ yï ocudø ki gøølø kì ri gen, mɑ́ yï ɑ́rum ki gönyø yi yɑn. Wör wun kì bøli Jwøng-ɑ Ácwɑ̈ɑ̈j! Lenhu Jwøng-ɑ Ácwɑ̈ɑ̈j! Ngɑn-ɑ wɑnge guud nyi yiele’ yielø kì cinggi tyëngrijjø. Cyɑ̈ng-ɑ ɑ́nywøøl yɑn bɑ cyɑ̈ɑ̈ng cyën! Wiy cyɑ̈ng-ɑ ɑ́nywøøl yɑn yi meyɑ wïle! Gøøj cyën kömi ngɑn-ɑ ɑ́wëggi pyëw wïyɑ mïnø eni ngɑn-ɑ ɑ́köbbii kinni, “Bɑ nyel-ɑ jɑlø! Mïni pyëwí!” Wiy jɑlɑni bëëde e nɑ kɑ̈dd-ɑ ɑ́rënyi yi Jwøng-ɑ Ácwɑ̈ɑ̈j ki rɑ̈ji pyëwe. Wiy e ólïnge ywøg kì mwøl, o lïnge ɑkyew kì dɑ̈ri cɑ̈ng, kipe kɑ̀ nuti nɑ̈ɑ̈g en yɑn kì yij, o yij meyɑ di bëëde ɑ́ rörɑ. Yɑ ɑ́nywøl kɑ per ngø? Yɑ ɑ́nyöll-ɑ órɑng kí rɑ̈ɑ̈m yij, o yɑ thøwɑ ki ɑyɑ̈r? Kɑ Pɑcur wɑ̈d Mɑlkiyɑ̀ geki Dhepɑniyɑ̀ wɑ̈d Mɑɑseiyɑ̀ ör yïɑ yi Rɑ̈dh Dhedekiyɑ̀ rɑ̈ɑ̈dh Yeudiyɑ̀, o yɑ kwɑjji yi gen kinni, “Kwɑjjí Jwøng-ɑ Ácwɑ̈ɑ̈j kiper wøn, mɑ́ Rɑ̈dh Nebukɑdnesɑr rɑ̈ɑ̈dh Bɑbïlöniyɑ̀ kɑɑldwøng ɑ́tyege ki yɑye. Jwøng-ɑ Ácwɑ̈ɑ̈j ógöögø ki gïïngɑ̈ngø møge mɑwɑnø kɑ Nebukɑdnesɑr göjje døøgø.” Codhe, ɑkööb wøn ki Jwøng-ɑ Ácwɑ̈ɑ̈j, kɑ jøg-ɑ ɑ́ör yïɑ köbbɑ, kinni köbbi gen Dhedekiyɑ̀ ki møg-ɑ ɑ́kwøb yi Jwøng-ɑ Ácwɑ̈ɑ̈j, Jwøøg Isrɑil kinni, “Dhedekiyɑ̀, linyí, liny-ɑ nyïɑ̈ggí ki rɑ̈ɑ̈dh Bɑbïlöniyɑ̀ geki yɑye ótyɑm yi yɑn. Jɑmmi liny mø yɑyí óröörɑ piny kì dïkɑɑl. Yɑ ónyïɑ̈ggi ki yïn ki tegɑ bëne, kí rɑ̈ji pyëw geki liny me pëddi. Ji-ɑ bëëdø kì kɑɑl men ónɑ̈g yi yɑn, gen ɑ ji kí lɑ̈yy-ɑ ying kɑɑldwøng, ge óthøw ki thøø me rɑj. De men-ɑ́ yïn, wuki jyɑ̈ggí, kí ji-ɑ óbødh kì dhø liny geki kɑ̈j kí rɑ̈ɑ̈m dëllì bënn, ge ówëggɑ mɑgø yi Nebukɑdnesɑr, en geki tyëngmɑ̈ɑ̈nø møg-ɑ dwɑddi nɑ̈gi wun. Wu ónɑ̈g yi Nebukɑdnesɑr; bong dhɑnhø men-ɑ ówiy yi en, wɑlɑ̀ pyëwe koo lɑ̈ɑ̈m ki wun. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Codhe, ɑköbbi yɑn yi Jwøng-ɑ Ácwɑ̈ɑ̈j i köbbɑ ji kinni, “Lïng wun! Bøli wun cïbɑ’ jɑmmì ɑ́ryew, yuu-ɑ kedhi yï wëy ki yuu-ɑ kedhi yï thøø. Tyëng-ɑ óbëëdø kì kɑɑldwøng ónɑ̈g-ɑ yi kɑ̈j, wɑlɑ̀ yi rɑ̈ɑ̈m dëllì. De tyëng-ɑ ókedhi be yömmi yï tyëng Bɑbïlöniyɑ̀ møg-ɑ tyeeg kɑɑldwøng pɑ thøw, ge óbodh. Kɑɑl men pɑ wiy yi yɑn; rënyɑ’ rënyø ceth. Kɑɑldwøng mëggɑ’ rɑ̈ɑ̈dh Bɑbïlöniyɑ̀ o gø rɑ̈be kinni tweet. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Yerusɑlem, yï cungi kì kömi tör de yï nɑ kït kì thwørø. Yï okööbø ce bong ngɑn tyɑm yïn wɑlɑ̀ bong ngɑn cuggi wɑ̈nhi kelli linyí. De yï ócɑy yi yɑn kipe gïn-ɑ ɑ́gwøg yi yïn; keny-ɑ bëëd yi yïn ócwiny ki mɑc, kɑ jɑmm-ɑ yije órɑ̈bbø bënn. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” “Yɑ Jwøng-ɑ Ácwɑ̈ɑ̈j, yɑ ceg-ɑ yïn kinni gøggí dyër; nyi cwɑg ngɑn-ɑ ruj kɑ nyingi wëdhh ko guud geki kïjj kí thwömm, kɑ ngɑn yïe bɑ̈r ko nyi nɑ̈g kì keny. Keløg møg-ɑ kømmi yi yɑn ógwøg yi wun, kwɑrri Debïd ójyɑ̈ɑ̈gø ceth gɑ rɑ̈nhì. Kɑ ge nyi ngøøn-ɑ wɑ̈g kì keny geki jyɑ̈ggi gen kì kömi kyënyì geki yɑ̈th-ɑ pyejji. De keløg ciggɑ pɑ mïdhi yi wun, yɑn ɑ köngi èn, gøldwøng ceg-ɑ pɑ̈ɑ̈dhø! Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Gøldwøng kì Yeudiyɑ̀ nenni yi yɑn e myëër nɑ piny Gilyɑd, o nɑ Kïtti Lubnɑn, de bɑ men göjjɑ dööng nøw, e bong ngɑn bëëdø kì yije. Yɑ ókɑ̈ni ki ji møg rënyii. Ge óbï ge ókɑ̈ddø ki dørrì, kɑ löjje møg-ɑ bɑ yɑdh sɑndɑl ngøl gen piny, kɑ gï leeng gen mɑc. “Orume, tyëngpɑth mø ngenyø ri gen ópyënyi yi gen kinni, ɑ́ kipe ngø ɑ göggɑ kɑɑldwøng ki gïn ni menɑni.” Mø gen óløøg yi yɑn kinni, “Bɑ kipe kɑ ɑ́pɑ̈d wun lwöbø ki yɑn, yɑ Jwøøg wun, kɑ wu kedh-ɑ be mɑlli jwögg møøgø.” Wu tyëng Yeudiyɑ̀, wu ko ywøg Rɑ̈dh Yöciyɑ̀, mɑ́ e ɑ́rum ki thøø. De ywøg wun wɑ̈de Rɑ̈dh Yöɑkɑdh, ngɑn-ɑ ókïdhi yïnø kun koo dwööge; piny-ɑ́ yije ɑ́nywøølii koo cige lidhø. Møg-ɑ ɑ́kwøb yi Jwøng-ɑ Ácwɑ̈ɑ̈j kipe Rɑ̈dh Yöɑkɑdh wɑ̈d Yöciyɑ̀ bɑ kinni, “Ákedh e pɑ dwöög. Óthøw-ɑ pönh-ɑ ɑ́kïdhii, o piny men pɑ cige lidhø.” Ree dɑ cyën eni ngɑn-ɑ ger øde ki ruj, kɑ gø lɑnye ki jɑmmi wëënyø; eni ngɑn-ɑ nyi pïd tyëng pödhe ki gwøg, e gï pɑ nyi mëgge köggi gen. Ree dɑ cyën eni ngɑn-ɑ kööbø kinni, “Riɑ ógëddɑ ki øndwøng ɑ́dörri ryew, e dör-ɑ mɑl yethi udde lɑjjø.” Kɑ ri udde kïdhe ki ɑwɑjj mø lɑjjø, o tøggi gen dhyɑw ki yɑdh sɑndɑl, o ge gøj ki kïdø men kwɑrø. Yï løg-ɑ me lɑ̈w kibøli rɑ̈nhh-ɑ kyeelø keløg rií ogëdø yi yïn ki ød yɑdh sɑndɑl, me lod uddi tyëng-ɑ kyeelø? Wïyí ɑ́bëëd kɑ bëëdø me døøj, o nyi gøgg-ɑ dyër, kɑ ódönyø kɑ jɑmme óngënyø. Tyëng-ɑ ɑbuur gønyyi gen nyi lidhe’ lidhø kidøøj, kɑ piny ókedhø e døøj kì yïe. Bene gïn-ɑ wɑngi yi ngɑ̈nyi Jwøng-ɑ Ácwɑ̈ɑ̈j ɑnɑn. De yï gögg-ɑ rií ketí; yï nyi nɑ̈g-ɑ ngɑn yïe bɑ̈r, o yï guud-ɑ nyingi jií. Jwøng-ɑ Ácwɑ̈ɑ̈j ɑ́rum ki kwøb. Kɑ ɑ́rum bëëde kinøw, møg-ɑ kwøb yi Jwøng-ɑ Ácwɑ̈ɑ̈j kì ri Rɑ̈dh Yöyɑkim, rɑ̈ɑ̈dh Yeudiyɑ̀ bɑ kinni, “Bong ngɑn-ɑ óywøg thøwe, wɑlɑ̀ bong ngɑn-ɑ ókööbø kinni, ‘Yeki wɑɑd wøn ø!’ Bong ngɑn-ɑ óywöngi kipere wɑlɑ̀ bong ngɑn-ɑ ókööbø kinni, ‘Yeki rɑ̈dhɑ yø!’ Óywɑɑj pɑ̈l ni ɑderø keny-ɑ óthøwe, kɑ weddi ngɑ̈ɑ̈j Yerusɑlem.” Wu tyëng Yerusɑlem, kedhu Lubnɑn kɑ wu kïïw wun, kedhu piny Bɑcɑn kɑ wu ywöngi wun, kïïw wun kì wïj Kïti Abɑrïm, mɑ́ cwɑ̈ggi wun ɑ́tyɑm. Jwøng-ɑ Ácwɑ̈ɑ̈j ɑ́kööb ki wun keny-ɑ ɑ́bëëd kej wun døøj, de wu ɑ́bɑ̈nyi lïngi møge. Bene kër-ɑ bëëd wun ceth ɑnɑn, gïn-ɑ kwøb yi Jwøng-ɑ Ácwɑ̈ɑ̈j pɑ nyi gwøg yi wun. Pëjji wun ókøøl yi yømø, cwɑ̈ggi wun ókɑ̈l gɑ ɑmɑggi liny. Kɑɑl wun órënyi kɑ odöngø e yɑ̈rø, ki gööj rɑj møg-ɑ ɑ́gwøg yi wun. Wu buud wu otɑrø kì kelli yenh sɑndɑl møg-ɑ ɑ́kɑ̈ɑ̈l kì Lubnɑn, de nyingi wun koo bɑɑr keny-ɑ óbëën orɑng kömi wun? Wu koo bëëd wu orɑngø ni ngɑndhɑjø me pɑ̈dhi piny? Kɑ rɑ̈ɑ̈dh Yeudiyɑ̀, Rɑ̈dh Yöyɑkin, wɑ̈d Rɑ̈dh Yöyɑkim, köbbi yi Jwøng-ɑ Ácwɑ̈ɑ̈j kinni, “Yɑn ɑ köngi èn, yɑ Jwøng-ɑ Nëënø, kinni cɑgg yï di bëëd yï nɑ gwelø kì lwedi cingi kyëjɑ, yï di budhɑ wɑ̈g, kɑ yï mëggɑ tyëng-ɑ böggi yi yïn, gen ɑ ji-ɑ dwɑddi nɑ̈gi yïn. Yï mëggɑ’ Nebukɑdnesɑr rɑ̈ɑ̈dh Bɑbïlöniyɑ̀ geki linye. Yï cøørɑ’ yïnø wuki meyí. Wu kedh-ɑ pödhø me bong ngɑn mɑ ɑ́nywøl kì yije kì kelli wun, o wu óthøw kunɑni ryeet. Pyëwí ókønø ki dwöög piny men, de yï koo dwöög.” Kɑ yɑ okööbø kinni, “Yöyɑkin ɑ́ceg-ɑ gwøg e nɑ pug me thøø? Bene ɑ kïdhi nywøle yïnø piny-ɑ kwïj yi gen?” Piny, piny, piny! Lïngí møg-ɑ ɑ́kwøb yi Jwøng-ɑ Ácwɑ̈ɑ̈j! “Jɑlɑni óni thwöm, o bong gïjø men-ɑ ólwɑ̈ng yi en ki gwøgø. Óbong kwɑrre møg-ɑ ójɑ̈ggi kì Yeudiyɑ̀, kì wïj kwøøm Debïd. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jɑgg-ɑ rënyi ji, ɑ kedhhi gen ri gen dɑ cyën, ge ócɑy yi Jwøng-ɑ Ácwɑ̈ɑ̈j ki menrɑj! Bene møg-ɑ kwøb yi Jwøng-ɑ Ácwɑ̈ɑ̈j, Jwøøg Isrɑil kipe tyëng-ɑ jɑɑg Isrɑil kinni, “Jiɑ nuti koor wun, ge ɑ́kedhhi yi wun, kɑ ge cyeed wun pɑ̈l. Anɑn wu cɑyɑ’ cɑyø kipe rɑjj-ɑ ɑ́gwøg yi wun. Jiɑ ócungɑ kì pödhh-ɑ ɑ́kedhhɑ gen, o ge dwöögɑ pödhi gen. Ge ónywøl kɑ kwɑnni gen óngënyø. Yɑ órönyø ki jɑgg møg jɑɑg gen. Jiɑ pɑ cigi böggø, wɑlɑ̀ pëthi gen koo lïngø, o ge pɑ cigɑ cɑyø. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Ácyɑ̈ngi eni bøli keny-ɑ ókɑ̈bbɑ ki rɑ̈dh men tir kì kelli kwɑrri Debïd. Rɑ̈nhɑni ójyɑ̈ɑ̈gø ki peli wïj, o ógøgg-ɑ dyër kì pönhï bëne. Bong gïjø men-ɑ ónywɑl tyëng Yeudiyɑ̀ keny-ɑ óbëëde ɑ́ rɑ̈dh, o tyëng Isrɑil óbëëdø ki mër. Ócwølli ɑ́ ‘Wë Yïënee?’ ” Jwøng-ɑ Ácwɑ̈ɑ̈j okööbø kinni, “Bøli keny-ɑ ówiy nyingɑ ki kwöngø, yɑn ɑ́ Jwøng-ɑ Nëënø, ɑ ɑ́kɑ̈ɑ̈l jii Isrɑil wɑ̈g kì Rïp obëënø. Ge ódøøg be köngø ki nyingɑ yɑn ɑ́ Jwøng-ɑ Nëënø, ɑ ɑ́dwöög jii Isrɑil wɑ̈g kì pönh-ɑ wɑɑng wuudø geki pödhh-ɑ́ yethi gen ɑ́kedhhɑ gen. Codhe, o ge bëëd gen kì piny-ɑ bɑ mi gen.” Minɑ ɑ́cöd, dëlɑ ceg-ɑ okïr, kipe Jwøng-ɑ Ácwɑ̈ɑ̈j, kipe kwøbbe kwërø. Yɑ nɑ jɑl-ɑ ónɑ̈gø yi møgø yɑ nɑ ngɑn pɑ̈ɑ̈ng yije ki møgi oløg. Piny pɑ̈ng yi tyëng-ɑ pɑ mïdhi kwøbbi Jwøng-ɑ Ácwɑ̈ɑ̈j, jiɑni bëëd-ɑ bëëdø me rɑɑj, o ge ceg-ɑ mød ki ji. Piny óywöngø bëne, bong lum me cɑm yi dhög, mɑ́ piny ɑ́göjji cyën yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j okööbø kinni, “Jøtöng geki ókwër, Jwøk pɑ böggi yi gen. Ge ɑ́yodɑ ge gøgg-ɑ gïgrijjø kì yij Kengø. Ge cyɑ̈dh-ɑ́ɑ̀ yethi yëëth mø looj, ge ówëggɑ cyerrø o ge pɑ̈nhhi gen. Yɑ ógöjji kömi gen ki ryɑ̈g, bøli kej cɑyi gen ɑ́wɑ̈nhi. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. Orøøg jøtöng kì Sɑmɑriyɑ̀ ɑ́lidhɑ, ge ɑ́tööng ki nyingi Bɑɑl kɑ jiɑ peej gen pɑ̈l. De gïg-ɑ gøggi yi ji kì Yerusɑlem pëddi rɑ̈jø, ge oniin ki tyëng nuti nywøøm gen ri gen, o ge ceg-ɑ pyed, ge nyudh-ɑ ji ki gwøg ki rɑj o bong ngɑn köbbi ji wïyø ki gøggi rɑj. Ge nennɑ ge rijjø bënn ni tyëng Sødømɑ̀ kí Gømørɑ̀. “Yɑ Wïlɑ̈bø Jwøng-ɑ Ácwɑ̈ɑ̈j, gïn-ɑ kwøbɑ kipe jøtöng kì Yerusɑlem bɑ kinni: ge ómëggɑ lùm møg kej ɑ́ gïn cɑm yi gen, o ge mëggɑ sïm ɑ́ gïn mɑdh yi gen, mɑ́ ji ɑ́göjji gen orøg kì yij pödhø bëne.” Wïlɑ̈bø, Jwøng-ɑ Ácwɑ̈ɑ̈j köbb-ɑ tyëng Yerusɑlem kinni, “Møg-ɑ kømmi yi jøtöng ko lïngi wun, ge pɑ̈ng-ɑ yïthhi wun ki kwøbbi ngɑ̈dhi gïn koo bï. Wu nyi köbbi ge’ møg-ɑ rømmi yi gen, de pɑth ki møg-ɑ ɑ́kwøb yi yɑn. Tyëng-ɑ pɑ dwɑddi lïngi kwøbbɑ nyii köbbø yi gen kinni, i bong rɑj men-ɑ óbï kömi gen. Kɑ tyëng-ɑ muddi gen teeg nyi köbbi gen kinni, i bong ryɑ̈g men-ɑ ópɑ̈nyi bëën kömi gen.” Kɑ yɑ okööbø kinni, “Bong dhɑnhø ɑ́kyel kì kelli jøtöng møgɑni, me ngɑ̈nyi rumm-ɑ bɑ ɑkɑnn gɑ mø Jwøng-ɑ Ácwɑ̈ɑ̈j. Bong, ngɑn-ɑ ɑ́lïng, wɑlɑ̀ mɑ ɑ́yod gïn-ɑ wɑngi yi wööne, o bong ngɑn mɑ ɑ́lïng, wɑlɑ̀ mɑ ɑ́ywøør møg-ɑ kømme. Rɑ̈ji pyëwe bɑ ɑtunø me teeg cɑrø, óceg ì dut kì wɑ̈thi tyëngrijjø, o pɑ cungi gïti keny-ɑ órume ki gwøgi gïn-ɑ dwɑdde gwøgø. Møgɑni óyod yi jie kidøøj kì yethi cyɑ̈ng-ɑ óbï.” Jwøng-ɑ Ácwɑ̈ɑ̈j ɑ́kööb kinni, “Jøtöng møgɑni nuti ör-ɑ yi yɑn, de ge ɑ́rengi ge kɑ̈ll-ɑ wöddi gen, o ge yöd ge 'kööb-ɑ nyingɑ. Keløg ge di bëëd rummɑ møg-ɑ ɑ́kɑnn ngɑ̈nyi yi gen, wöönɑ di muuj jiɑ yi gen, kɑ ji di wïyi ki bëëdi orøg geki gøggi gïgrijjø. “Yɑ bɑ Jwøk me nud kì kɑ̈jj bënn, de yɑ pɑ ying kej ɑ́kyel. Bong ngɑn cuggi pɑ̈ni keny me pɑ nennɑ en. Kwïj yi wun kinni yɑ ying-ɑ kɑ̈jj bënn kì mɑl kí piny? Gïg-ɑ ɑ́kømmi yi jøtöng møgɑni ngɑ̈nyi yi yɑn, gen ɑ gïg-ɑ kømmi yi gen ge ceg-ɑ pyed ki nyingɑ, ge okööbø ce ge nyii köbb-ɑ yi yɑn kì yethi lɑ̈g. Jøtöng møgɑni gït-ɑ wɑɑng, ge rëny-ɑ wɑ̈thi jiɑ ki kwøbbi pyed møg-ɑ nyi myen yi gen? Ge orumø kinni jiɑ wɑ̈thi gen ówïl ki yɑn kì bɑng lɑ̈gg-ɑ kømmi yi gen, ni kɑ ɑ́wïl wɑ̈thi kweyyi gen ki yɑn cøn, kɑ ge kedh-ɑ be mɑlli Bɑɑl. Jøtöng møg-ɑ nyi lɑ̈gi, kööb gen kinni møgɑni bɑ lɑ̈g yøw, de jɑltöng men-ɑ ólïngi wöönɑ, kwøbe gøn ceth. Dɑ gïn reb lum ki gemè? Wöönɑ nɑ mɑc, o nɑ ɑ́bɑny ɑ nyi tørri kït. Yɑ ceg-ɑ wërø ki jøtöng møg-ɑ nyi kwɑlli kwøbbi gen keti gen, o ge nyi kööb gen i bɑ wöönɑ. Yɑ ceg-ɑ wërø thyew ki jøtöng møg-ɑ nyi kɑ̈lli kwøbbi gen ge okööbø i kwøbbɑni kɑ̈ɑ̈l-ɑ yïɑ. Lïngu møg-ɑ kømmɑ yɑ Jwøng-ɑ Ácwɑ̈ɑ̈j! Pyëwɑ rɑɑj ki jøtöng møg-ɑ kømmi lɑ̈ggi gen, ge kømm-ɑ pyed. Ge dwøngg-ɑ lɑ̈ggɑni, ge peej-ɑ jiɑ pɑ̈l ki pyed geki pwödi kööth. Ge nuti ör-ɑ yi yɑn wɑlɑ̀ ge nuti köbbø yi yɑn kinni kedh gen; ji pɑ køny yi gen. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Kɑ yɑ köbbi yi Jwøng-ɑ Ácwɑ̈ɑ̈j kinni, “Jermɑyɑ̀, keny-ɑ ópyëëj yïn yi ji wɑlɑ̀ yi jøtöng wɑlɑ̀ yi ókwër kinni, ‘Wööni Jwøng-ɑ Ácwɑ̈ɑ̈j bɑ ngø?’ Köbbí gen kinni, ‘Jwøng-ɑ Ácwɑ̈ɑ̈j torø yi wun, o wu dwɑdde’ yeej piny.’ Keløg e dɑ ngɑn kööbø kì ri, ‘Tori Jwøng-ɑ Ácwɑ̈ɑ̈j’, kì kelli jiɑ, ying-ɑ́ jɑltöng, wɑlɑ̀ ókwërø, ngɑnɑni cɑyɑ’ cɑyø geki gøle bëne. De wiy ge nyi pyënyi gen ri gen geki mɑ̈dhhi gen kinni, ‘Jwøng-ɑ Ácwɑ̈ɑ̈j ɑ́løøg-ɑ ngø? Jwøng-ɑ Ácwɑ̈ɑ̈j ɑ́kwøb-ɑ ngø?’ Ge ko kööb këti kinni, ‘Jwøng-ɑ Ácwɑ̈ɑ̈j ɑ́tor’, ko pɑ̈nyi ki kwøbø yi dhɑnhø, kipe wöönɑ óløgɑ me peeg kì kömi gen. Ji kwøbbi Jwøøg gen, Wïlɑ̈bø Jwøng-ɑ Ácwɑ̈ɑ̈j, Jwøng-ɑ Nëënø, ɑ́wil yi gen. Jermɑyɑ̀, pyëj jøtöng kinni, ‘Mø wun ɑ́løøg ɑ dï yi Jwøng-ɑ Ácwɑ̈ɑ̈j? Jwøng-ɑ Ácwɑ̈ɑ̈j ɑ́kwøb-ɑ ngø?’ O keløg kwøbbɑ ópyem yi gen, kɑ kwøbbi ‘tori Jwøng-ɑ Ácwɑ̈ɑ̈j’ pɑ̈nyi ki kwøbø yi gen, köbbí gen kinni, Ge kwɑnyɑ’ kwɑnyø kɑ ge leengɑ kun me lɑ̈wi, ge weddɑ’ weddø bënn geki kɑɑldwøng kɑɑl-ɑ ɑ́mëggɑ gen geki kweyyi gen. Ge óthödhɑ ki ɑyɑ̈r me pɑ wɑj.” Kɑ yɑ nyudhi yi Jwøng-ɑ Ácwɑ̈ɑ̈j ki dhöng ɑ́ryew mø yethi gen di nywøli ólɑm ge ócïb dhø Kengø (kì bøli kenyɑni, Rɑ̈dh Yöyɑkin wɑ̈d Yöyɑkim rumø ki kïdhi Bɑbïlöniyɑ̀ yi Rɑ̈dh Nebukɑdnesɑr, ɑ́kɑ̈l-ɑ kyeel geki bödhhì, kí tyëng-ɑ cinggi gen døøj ki gwøg.) Dhöngø ɑ́kyel yije dɑ nywøli ólɑm mø døøj, møg-ɑ kwöngø ki cyegø, o dhöng-ɑ kyeelø yije dɑ nywøli ólɑm mø rijjø, ge pɑ cuggi cɑmø yi rɑ̈ji gen. Codhe ɑköbbi yɑn yi Jwøng-ɑ Ácwɑ̈ɑ̈j kinni, “Jermɑyɑ̀, yï nenn-ɑ ngø?” Alöggɑ kinni, “Nywøli ólɑm, møg-ɑ døøj, døøj cɑrø, o møg-ɑ rijjø, rijjø ki mendwøng, ge pɑ cuggi cɑmø yi rɑ̈ji gen.” Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Yɑ Jwøng-ɑ Ácwɑ̈ɑ̈j, Jwøøg Isrɑil, kì yïɑ tyëng-ɑ ɑ́kïdhi Bɑbïlöniyɑ̀, ge nɑ nywøli ólɑm møg-ɑ døøj, o ge ómïdhɑ kidøøj. Ge ókor yi yɑn kɑ ge dwöögɑ piny men. Ge ótyeny yi yɑn, ge pɑ tɑ̈ɑ̈yɑ piny. Ge ówëggɑ tyeri yɑn, yɑ Jwøng-ɑ Ácwɑ̈ɑ̈j. Codhe, o ge bëëd gen gɑ jiɑ, o yɑ óbëëdø yɑ bɑ Jwøøg gen, mɑ́ ge ódwöög yïɑ ki pëthi gen bënn. “De Rɑ̈dh Dhedekiyɑ̀ kí jyɑ̈gge kí teen-ɑ kyeelø, kí tyëng-ɑ ɑ́kedhi Rïp, kì yïɑ yɑ Jwøng-ɑ Ácwɑ̈ɑ̈j, ge nɑ nywøli ólɑm møg-ɑ rijjø, ɑ pɑ cuggi cɑmø yi rɑ̈ji gen. Kömi gen ókɑ̈ni yi yɑn ki ryɑ̈g men-ɑ óbëëd pödhh bënn ge óböggø. Ge ógwɑddi kɑ ge gɑggi yi ji kì kɑ̈jj bënn, o nyingi gen nyi pɑ̈rri cyën kì kɑ̈jj-ɑ ókïdhɑ gen bënn. Ge ógöjjɑ nɑ̈gø yi liny kí kɑ̈j, kí rɑ̈ɑ̈m dëllì, gïti keny-ɑ óthumi gen bënn, kɑ bong-ɑ dhɑnhø kì kelli gen me döng kì piny-ɑ ɑ́mëggɑ gen geki kweyyi gen.” Yɑ ɑ́ödi ki wöödø me kööbø kì ri Yeudiyɑ̀ geki tyëng Yerusɑlem yi Jwøng-ɑ Ácwɑ̈ɑ̈j, e runni Yöyɑkim wɑ̈d Yöciyɑ̀ bɑ ɑ́ngwen kì yij lɑwø. (Runi Nebukɑdnesɑr rɑ̈ɑ̈dh Bɑbïlöniyɑ̀ bɑ ɑ́kyel kì yij lɑwø wɑɑngɑni.) Tyëng Yeudiyɑ̀ bënn geki tyëng Yerusɑlem ɑ köbbɑ kinni, “Yɑ ɑ́tyëg-ɑ runn pyɑ̈r ɑ́ryew wïdɑ́dɑ̈g yɑ okööbø ki wun, cɑg kì pyɑ̈rø wïdɑ́dɑ̈ɑ̈g runni Rɑ̈dh Yöciyɑ̀ wɑ̈d Amön kì yij lɑwø ɑ́ rɑ̈ɑ̈dh Yeudiyɑ̀ gïti dicyɑ̈ngtïn, yɑ nyii köbbø yi Jwøng-ɑ Ácwɑ̈ɑ̈j, kɑ møgɑni nyi köbbɑ wun ceth. De wu nuti lïngø. Wu nuti pɑ̈nyi lïngø, ngö Jwøng-ɑ Ácwɑ̈ɑ̈j ɑ́bëëd wu nyi öde’ ödø ki bɑ̈ngge, ɑ løg jøtöng. Wu nyi köbbi ge’ köbbø kinni wiyu bëënrɑj; kɑ gøggi rɑj wiy wun; o wu ócög wun wu óbëëdø kì piny-ɑ ɑ́mëggi wun yi Jwøng-ɑ Ácwɑ̈ɑ̈j, wuki kweyyi wun ɑ́ mi wun gïti ɑtheer. Wu ɑ́köbbi yi gen kinni wu ko kedhi be mɑlli jwögg møøgø; Jwøng-ɑ Ácwɑ̈ɑ̈j pyëwe ko wëggu rënyø kɑ̀ mɑllu jwögg-ɑ gwøg yi wun. Keløg kwøbbi Jwøng-ɑ Ácwɑ̈ɑ̈j di lïngi yi wun, wu pɑ di cɑy yi en. Dɑ́ men-ɑ́ Jwøng-ɑ Ácwɑ̈ɑ̈j kiree ɑ ɑ́kööb kinni wu ɑ́bɑ̈nyi lïngi kwøbbe. Kɑ wu yöd wu rëny-ɑ pyëwe ki ngïjji jwögg, ɑ bɑnge kɑ̈ne kömi wun ki cɑ́y. “O kì bɑng kɑ̀ nuti lïngu kwøbbe, Wïlɑ̈bø, Jwøng-ɑ Ácwɑ̈ɑ̈j okööbø kinni, ‘Yɑ öd-ɑ be cwööli tyëng-ɑ wɑɑng wuudø bënn, kí bɑ̈ngɑ Nebukɑdnesɑr, rɑ̈ɑ̈dh Bɑbïlöniyɑ̀. Ge kɑ̈ɑ̈lɑ’ be nyɑɑg ki Yeudiyɑ̀ kí pinye bëne, kí pödhh-ɑ kyeelø møg-ɑ ying bɑdhhe. Pönhï rënyɑ’ rënyø geki pödhh-ɑ bɑdhhe bënn, o ge ówëggɑ rënyø gïti ɑtheer, ki rɑ̈jø men-ɑ óbëëd ji óböggø. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. Ge ówëggɑ kudø, ge pɑ cigi ryeerø këti wɑlɑ̀ pëthi gen koo ying mø med, o óbong thyëëg nywöm men-ɑ ógwøg. Ge ójɑd ki møw men lyel kì yethi lɑ̈mbɑ̈ɑ̈ mø gen, o yï gen óbong byel. Piny men ódöng nøw bëne, ji óbëëd ge óböggø yi rëny-ɑ órënye, o pödhh-ɑ bɑdhhi Isrɑil óbëëd gɑ bɑ̈nggi rɑ̈ɑ̈dh Bɑbïlöniyɑ̀ ki runn pyɑ̈r ɑ́bïryew. Othumi runnɑni, tyëng Bɑbïlöniyɑ̀ ólony yi yɑn ki cɑyø kipe orøøg gen. Pönhɑni órënyi yi yɑn, kɑ wiy yi yɑn e rënyø gïti ɑtheer. Bɑbïlöniyɑ̀ ógöjjɑ ryɑ̈ng-ɑ ɑ́kwøbɑ bëne kinni óbï kömi pödhh, ge ɑ́köbbɑ Jermɑyɑ̀, gen ɑ ryɑ̈gg-ɑ bɑ ɑgwed bënn kì yij wɑ̈nyø men. Bɑbïlöniyɑ̀ ógöggɑ gïg-ɑ ɑ́gögge pödhh-ɑ kyeelø bënn. O ge ógwøg gɑ bɑ̈ngg yi pödhh møøgø geki rɑ̈nhh-ɑ teg.’ ” Kɑ yɑ köbbi yi Jwøng-ɑ Ácwɑ̈ɑ̈j, Jwøøg Isrɑil kinni, “Kwɑny óthɑ̈ngi møgi oløg men-ɑ pɑ̈ng yi linyɑ èn, kɑ muuj pödhh-ɑ yï gen óörɑ yïn, kɑ wiy ge mɑ̈dhi gen kì yije. Keny-ɑ ómɑ̈dhi gen kì yije, ge ócyerri kɑ wɑ̈thi gen omuumø yi kwøbbi liny men-ɑ óörɑ kömi gen.” Codhe, ɑkwɑnyɑ óthɑ̈ngɑni kì cingi Wë, kɑ muujɑ pödhh-ɑ́ yï gen ɑ́öre yɑn, ɑwëggɑ gen mɑ̈dhø kì yije. Yerusɑlem geki myërri Yeudiyɑ̀ bënn ómɑ̈dhi kì yije, kí rɑ̈nhe geki jɑgge, o ge ógöög gen ki ryɑng me rɑj, o nyingi gen ócög ge pɑ̈rr-ɑ cyën yi ji, ni kenyi kømmii ɑnɑn. Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Köbbí teedø kinni, Jwøng-ɑ Ácwɑ̈ɑ̈j, Jwøøg Isrɑil okööbø kinni, i mɑ̈ɑ̈dh gen, kɑ ge nɑ̈g yi møgø, kɑ ge ngwøggi gen, kɑ ge pɑ̈nhhi gen, o ge dhɑ̈li gen ki dhwödhø, ki gööj liny men-ɑ örɑ kömi gen. O keløg ge óbɑ̈nyi ki mɑ̈dhø kì yije, Wïlɑ̈bø, Jwøng-ɑ Ácwɑ̈ɑ̈j nudd e okööbø i ge bɑ møg mɑ̈dhi ceth kì yije. Yɑ bï-ɑ be gwøg ki rɑ̈ji pyëwɑ o kɑɑlɑ rënyɑ, wu orumø kinni wu óbødh ki cɑyø? Pɑth, wu pɑ bødh ki cɑyø, mɑ́ liny örɑ’ kömi piny bëne. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Kɑ Jwøng-ɑ Ácwɑ̈ɑ̈j okööbø kinni, “Yïn, Jermɑyɑ̀, nyi töng møg-ɑ köbbɑ yïn ceth. Köbbí ji møgɑni ceth kinni, Jwøng-ɑ Ácwɑ̈ɑ̈j óngɑ̈ɑ̈r kì pɑɑre mɑl, kɑ opödø ni mɑl. Óngɑ̈ɑ̈r kömi jie; óryeer ni ji mø bij oløg ki tyelli gen. Cwɑgge ólïngi yi dhɑnhø bëne kì kömi piny, kɑ ɑ́lɑngi cwɑgge wɑ̈dh-ɑ cögi piny. Jwøng-ɑ Ácwɑ̈ɑ̈j yïe dɑ gøny kí pödhh bënn. Ji bënn ókïdhe burø, kɑ tyëngrijjø nɑ̈ge.’ ” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Wïlɑ̈bø, Jwøng-ɑ Ácwɑ̈ɑ̈j, okööbø kinni i ryɑ̈g bï-ɑ kömi pödhh bënn, óbï ɑ́ ɑtunø me dwøng, e cɑ̈g-ɑ́ɑ̀ wïj tuung piny e nyi gøj-ɑ pönhï kí pönhï gïti keny-ɑ ótyëge pödhh bënn. Tyëng-ɑ ónɑ̈g yi ryɑ̈ngɑni óbëëdø piny bëne pɑ̈ngø yi gen, bong ngɑn-ɑ óywøg gen, o bong ngɑn kony gen; ji óbëëdø ge odhoongø kì piny ni cyedh. Ywöngi wun, wun ɑ jɑgg; ywöngi wun wu tyëng-ɑ kwɑy jiɑ. Ywöngi wun wu óryeerø kɑ ri wun ngyelli wun kì piny. Bøli kej nɑ̈gi wun ɑ́wɑ̈nhi, o wu bɑ møg ngɑlli ni órömm. Wu pɑ yïddi ki keny pɑ̈ɑ̈r yi wun. Jwøng-ɑ Ácwɑ̈ɑ̈j jie ɑ́wiye piny, ni ngur men wiy órøngi kït men-ɑ́ yije ɑ́bëëde. Piny ɑ́gwøg ɑ́ ryɑng yi böögø geki liny-ɑ ɑ́ör yi Jwøng-ɑ Ácwɑ̈ɑ̈j ki rɑ̈ji pyëwe. Bɑng gwøøg Yöyɑkim wɑ̈d Yöciyɑ̀ ɑ́ rɑ̈ɑ̈dh Yeudiyɑ̀ ceth, ɑ ɑ́köbbi yɑn yi Jwøng-ɑ Ácwɑ̈ɑ̈j kinni, “Cungí kì ódɑ̈ri Kengø, kɑ møg-ɑ ɑ́köbbɑ yïn kinni köbbí gen ji kwøøb bënn, köbbí gen tyëng myërri Yeudiyɑ̀ møg-ɑ bï be mɑ̈ddø. Ko di gïjø me wiy yi yïn, kwøb gen ceth, kɑ ko di gïn wiy yi yïn wɑ̈g. Ji ólïngø mɑwɑnø, kɑ ge ówïyø ki gøggi rɑj. Keløg ge óyewi, pyëwɑ ólɑ̈ɑ̈m kɑ ryɑ̈g men-ɑ ɑ́kwøb yi yɑn kinni ógöjjɑ gen kipe rɑjj-ɑ gøggi yi gen, ocögø e pɑ göjjɑ gen.” Yɑ ɑ́köbbi yi Jwøng-ɑ Ácwɑ̈ɑ̈j i köbbɑ ji kinni, “Yɑn yɑ Jwøng-ɑ Ácwɑ̈ɑ̈j, yɑ ɑ́rum ki kwøb kinni lïngu kwøbbɑ, kɑ gïn-ɑ köbbɑ wun nyi gwøg wun. Kɑ kwøbbi bɑ̈nggɑ, ɑ løg jøtöng nyi lïngi wun. De kenyi örɑ gen wun kwøbbi gen nuti pɑ̈nyø lïngø yi wun. Keløg wu óbëëdø wu nudd wu pɑ lïngø ki kwøbbi gen, Kengø men göggɑ’ gïn-ɑ ɑ́göggɑ Cilø, kɑ nyingi kɑɑl men ogöögø e nyi pɑ̈rr-ɑ cyën.” Kɑ yɑ lïngi yɑ kømm-ɑ møgɑni yi ókwër geki jøtöng, kí teedø. Kɑ ɑ́rumɑ ki kwøbi møg-ɑ ɑ́cïgi yɑn yi Jwøng-ɑ Ácwɑ̈ɑ̈j ceth, ɑmɑɑg yɑn yi teenɑni, kɑ ge óryeerø kinni, “Yï ceg-ɑ thøø! Yïde ɑ ɑ́kööb ki nyingi Jwøng-ɑ Ácwɑ̈ɑ̈j kinni Kengø ógöögø ni Cilø, kí kinni kɑɑl men órënyi, o bong dhɑnhø men-ɑ óbëëdø kì yije?” Codhe, ɑtyeeg yɑn kej ɑ́kyel yi teedø. Keny-ɑ ɑ́lïngi gïn-ɑ ɑ́cwöb yi jɑggi Yeudiyɑ̀, ɑjwɑni gen Kengø ge kɑ̈ɑ̈l-ɑ gøldwøng, kɑ ge pëgg-ɑ kɑ̈jji gen kì ódɑ̈r-ɑ nyɑ̈n. Codhe, ɑköbbi jɑggɑni yi ókwër geki jøtöng kinni, “Jɑɑl, ceg kɑ nɑ̈gø, mɑ́ e ɑ́kööb i ódi gïgrijjø møg-ɑ ópɑ̈dhi kömi kɑɑlee. O møge ɑ́lïngi yi wun ki yïthhi wun.” Codhe ɑkööbɑ kinni, “Yɑ ɑ́ör-ɑ be kwøbi møg-ɑ ɑ́lïngi yi wun kipe Kengø geki kɑɑl men yi Jwøng-ɑ Ácwɑ̈ɑ̈j. Wiy wun bëën-ɑ bëëd wun ɑnɑn, kɑ wu lïngu møg-ɑ kømmi yi Jwøng-ɑ Ácwɑ̈ɑ̈j. Keløg wu óyewi, pyëwe ólɑ̈ɑ̈m, kɑ ryɑ̈ng-ɑ ɑ́kwøbe kinni óbï ocögø e pɑ bï. De keløg ɑ́ perɑ, göggu yɑn gïn-ɑ dwɑddi yi wun, yɑn ɑ cinggi wun èn! Ngɑ̈nyu wøw kinni, keløg yɑ onɑ̈gø yi wun, wu ɑ́nɑ̈g dhɑnhø me yïe bɑ̈r, mɑ́ yɑ ɑ́ör-ɑ yi Jwøng-ɑ Ácwɑ̈ɑ̈j kinni i muujɑ wun wöödø menɑni.” Codhe, ɑköbbi ókwër geki jøtöng yi jɑgg ki teedø bëne kinni, “Jɑɑl, wɑ ɑ́köbbe’ kwøbbi Jwøng-ɑ Ácwɑ̈ɑ̈j Jwøge, ko nɑ̈g.” Adhwödhi kwï jøgdøngø mɑl, kɑ teedø köbbi gen kinni, “Keny-ɑ ɑ́bëëd Kedhekiyɑ̀ ɑ́ rɑ̈ɑ̈dh Yeudiyɑ̀, ji bënn ɑ́köbbi yi jɑltöng Miikɑ̀, jɑl Möreceth i Wïlɑ̈bø, Jwøng-ɑ Ácwɑ̈ɑ̈j okööbø kinni, ‘Dhɑyøn ókøøg ni pwödhø, uddi Yerusɑlem ódhong kì piny, o kïn-ɑ köme ógeer Kengø ógöögø ki thïm.’ Miikɑ̀ nuti nɑ̈gø yi Rɑ̈dh Kedhekiyɑ̀ geki tyëng Yeudiyɑ̀, de Kedhekiyɑ̀ ɑ́bwøg yi Jwøng-ɑ Ácwɑ̈ɑ̈j, kɑ døøg-ɑ kö Jwøng-ɑ Ácwɑ̈ɑ̈j. Kɑ Jwøng-ɑ Ácwɑ̈ɑ̈j pyëwe ólɑ̈ɑ̈mø, ɑcöge ryɑ̈g pɑ kɑ̈ɑ̈le kömi gïn. Anɑn, nënni wɑ dwɑdd-ɑ kɑ̈ni kömee ki ryɑ̈g me rɑj!” (Ádɑ jɑl megø me cwøl ɑ́ Uriyɑ̀ wɑ̈d Cemɑiyɑ̀, kì Kiriɑt Yeɑrïm, jɑlɑni ɑ́kööb ki nyingi Jwøng-ɑ Ácwɑ̈ɑ̈j, i dɑ rɑj møg bï kömi kɑɑl men geki pödhø, ni kɑ ɑ́kööb Jermɑyɑ̀ ceth. Keny-ɑ ɑ́lïngi møg-ɑ ɑ́kwøb yi Uriyɑ̀ yi Rɑ̈dh Yöyɑkim geki jyɑ̈gge, kɑ Uriyɑ̀ dwɑddi nɑ̈gø yi rɑ̈dh. De møgɑni ɑ́lïngi yi Uriyɑ̀, kɑ pɑ̈ɑ̈r-ɑ Rïp. Kɑ Elnɑthɑn wɑ̈d Akbör ör Rïp geki jøg møøgø be yɑɑbi Uriyɑ̀ yi Rɑ̈dh Yöyɑkim, Kɑ gø dwöög gen yï Rɑ̈dh Yöyɑkim, kɑ nɑ̈g, kɑ leeng wɑ̈thi lɑ̈bbi ji.) De yɑ ɑ́cög yɑ nuti cïb en cinggi teedø, o yɑ di nɑ̈g, mɑ́ yɑ ɑ́cwɑg yi Akikɑm wɑ̈d Cɑpɑn. Ri rumi Yöciyɑ̀ wɑ̈d Dhedekiyɑ̀ ki rønyø ɑ́ rɑ̈ɑ̈dh Yeudiyɑ̀ ceth, ɑköbbi yɑn yi Jwøng-ɑ Ácwɑ̈ɑ̈j kinni, i göögɑ ki ɑcebø, e gwøg kɑ dëllì geki rïwwi yenh, kɑ ge twööjɑ munɑ. Codhe, ɑköbbi yɑn yi Jwøng-ɑ Ácwɑ̈ɑ̈j i ödɑ yï rɑ̈ɑ̈dh Edöm, kí rɑ̈ɑ̈dh Moɑb, kí rɑ̈ɑ̈dh Amön, kí rɑ̈ɑ̈dh Suur, kí rɑ̈ɑ̈dh Sïdön ki wöödø; i kɑ̈ɑ̈l wöönɑni yi tyëng-ɑ óör kì pödhhɑni ge bï-ɑ be këëmi Rɑ̈dh Dhedekiyɑ̀. Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil, yɑ ɑ́köbbe kinni i köbbɑ jii rɑ̈nhhɑni kinni Jwøng-ɑ Ácwɑ̈ɑ̈j ɑ́kööb kinni, “Lɑ̈bø ɑ́cwɑ̈j yi yɑn kɑ tegɑ, geki ji kí lɑ̈yy-ɑ bëëdø kì kömi piny, o mëggɑ’ ngɑn mëggɑ en. Yɑn ɑ ɑ́cïb pödhhɑni bënn cingi bɑ̈ngɑ Nebukɑdnesɑr rɑ̈ɑ̈dh Bɑbïlöniyɑ̀, o gï kwɑnye ki tegø, kɑ men-ɑ́ lɑ̈yyi pɑ̈l wëggɑ göggii. Ógöggi yi pödhh bënn, en geki wɑ̈de, kí kwɑre gïti keny-ɑ óbëën bøli kej pɑ̈ɑ̈dhi pödhe. Codhe, o pödhe gööge ki men göggi pödhh-ɑ kyeelø geki rɑ̈nhh-ɑ døngø. “De keløg e dɑ pödhø men-ɑ óbɑ̈nyi ki jɑɑgø yi en, pönhɑni cɑyɑ’ cɑyø ki liny geki kɑ̈j, kí rɑ̈ɑ̈m dëllì, gïti keny-ɑ ówëggɑ en rënyø yi Nebukɑdnesɑr kinni tweet. Wu ko lïng ki kwøbbi jøtöng, geki ɑ́jwöggì møg-ɑ nyi rɑ̈ngø, kí møg-ɑ nyi pëëjø ki rorr, geki tyëng-ɑ nyi ceg lɑ̈g, ge okööbø i wu ko yïëy jɑɑgø yi rɑ̈ɑ̈dh Bɑbïlöniyɑ̀. Ge ceg-ɑ wun ki wënyø, o ge bɑ møg kɑ̈ni kömi wun ki göj men bɑnge ókɑ̈ɑ̈l wun kì pödhi wun. Wu ókøølɑ wɑ̈g kɑ wu nɑ̈g. De pönh-ɑ óyïëy jɑɑgø yi rɑ̈ɑ̈dh Bɑbïlöniyɑ̀, ówiy yi yɑn kì pinye, o gø pure, o bëëde kì yije. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Møgɑni ɑ́köbbɑ Dhedekiyɑ̀ rɑ̈ɑ̈dh Yeudiyɑ̀, kinni, “Yïëy jɑɑgø yi rɑ̈ɑ̈dh Bɑbïlöniyɑ̀. Göggí wuki jií bënn, o wu bødh wun. Wude ɑ wëggu ri wun nɑ̈gø yi liny kí kɑ̈j geki rɑ̈ɑ̈m dëllì? Mɑ́ bene gen gïg-ɑ ɑ́kwøb yi Jwøng-ɑ Ácwɑ̈ɑ̈j kinni, ge ópɑ̈dhi kömi pönh-ɑ óbɑ̈nyi ki jɑɑgø yi rɑ̈ɑ̈dh Bɑbïlöniyɑ̀. Wu ko yïëy ki kwøbbi jøtöng møg-ɑ kööbø i bɑ̈nyi wun ki jɑɑgø yi rɑ̈ɑ̈dh Bɑbïlöniyɑ̀. Wu ceg kɑ wënyø yi gen. Jwøng-ɑ Ácwɑ̈ɑ̈j kiree ɑ ɑ́kööb kinni ge nuti ör-ɑ yi en, o ge ceg-ɑ wun ki wënyø ki nyinge. O wu ókøøle wɑ̈g ceth, kɑ wu nɑ̈g wuki jøtöng møgɑni, gen ɑ tyëng-ɑ nyi köbbi wun pyed.” Codhe, ɑköbbɑ ókwër geki teedø bëne kinni Jwøng-ɑ Ácwɑ̈ɑ̈j ɑ́kööb kinni, “Wu ko yïëy ki møg-ɑ kømmi yi jøtöng kinni i jɑmm-ɑ ɑ́kɑ̈l kì yij Kengø ójwɑn ki dwöögø kì Bɑbïlöniyɑ̀. Ge wëny-ɑ wun. Kwøbbi gen ko lïngi wun! Yïëy wun jɑɑgø yi rɑ̈ɑ̈dh Bɑbïlöniyɑ̀, o wu bødh wun! Á kipe ngø ɑ wëggu kɑɑl men rënyø. Keløg ge bɑ jøtöng kidyër, wɑlɑ̀ keløg ɑ́ wöönɑ ɑ kɑ̈lli yi gen, wiy yɑ kwɑjji yi gen, yɑ Wïlɑ̈bø, Jwøng-ɑ Ácwɑ̈ɑ̈j kipe kinni jɑmm-ɑ ɑ́döng kì yij Kengø, kí møg-ɑ gøldwøng cög gen ge pɑ kïdhi Bɑbïlöniyɑ̀.” “Lïngu møg-ɑ kømmɑ yɑ Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil, kipe jɑmm-ɑ ɑ́döng kì Kengø, kí jɑmm-ɑ ɑ́döng kì gøldwøng. Ge ókïdhi Bɑbïlöniyɑ̀, o ge óbëëdø kì kunɑni gïti keny-ɑ óløøgɑ kwøbbi gen. Codhe, o ge dwöögɑ, o ge cïbɑ kɑ̈jji gen kì keny. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Kì runɑni ceth, kì bïïj dwɑ̈tt e runni Rɑ̈dh Dhedekiyɑ̀ bɑ ɑ́ngwen kì yij lɑwø, ɑ ɑ́kööb Anɑniyɑ̀ wɑ̈d Adhur, ɑ bɑ jɑltöng e kɑ̈ɑ̈l-ɑ Gibeon, yɑ ɑ́köbbe kì Kengø kì bøli ókwër geki teedø bëne, i Jwøng-ɑ Ácwɑ̈ɑ̈j Jwøøg Isrɑil kööbø kinni, “Acebø men-ɑ ɑ́twööj muni Yeudiyɑ̀ yi Rɑ̈ɑ̈dh Bɑbïlöniyɑ̀, ɑ́tor yi yɑn. Jɑmm-ɑ ɑ́kɑ̈l yi Nebukɑdnesɑr rɑ̈ɑ̈dh Bɑbïlöniyɑ̀ kì Kengø, ódwöög yi yɑn kì bɑng runn ɑ́ryew. Yöyɑkin wɑ̈d Yöyɑkim, rɑ̈ɑ̈dh Yeudiyɑ̀ ódwöögɑ thyew geki tyëng Yeudiyɑ̀ bënn møg-ɑ ɑ́kïdhi yïnø kì Bɑbïlöniyɑ̀, mɑ́ ɑcebi rɑ̈ɑ̈dh Bɑbïlöniyɑ̀ men-ɑ ɑ́twööje muni Yeudiyɑ̀ torɑ’ torø. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Codhe, ɑköbbɑ Anɑniyɑ̀ kì bøli ókwër geki teedø bënn møg-ɑ ɑ́bëëd ge nud kì ódɑ̈ri Kengø kinni, “Pëddi døøjø! Døøj keløg gïn ni menɑni ogwøgø yi Jwøng-ɑ Ácwɑ̈ɑ̈j. Yɑ dwɑdd-ɑ kinni o møg-ɑ ɑ́töng yi yïn bï gen gɑ dyër, kɑ ji dwööge kì Bɑbïlöniyɑ̀ geki jɑmmi Kengø bënn. De lïngí gïn-ɑ köbbɑ yïn, wuki teedø bënn. Jøtöng møg-ɑ ɑ́kwöngi ki töng kì bølee, ge ɑ́kööb kinni i liny, kí kɑ̈j kí rɑ̈ɑ̈m dëllì bɑ møg-ɑ ópɑ̈dhi kömi pödhh bënn geki pödhh-ɑ jɑɑg yi rɑ̈nhh-ɑ teg. De jɑltöng men-ɑ ɑ́kømmi dyër, óyod kinni óör-ɑ yi Jwøng-ɑ Ácwɑ̈ɑ̈j kidyër, keny-ɑ ópɑ̈dhi møgɑni.” Codhe, ɑkɑ̈ɑ̈l ɑcebø wɑ̈g kì munɑ yi Anɑniyɑ̀, kɑ gø tørre, Akööbe kì bøli ji bënn kinni, “Jwøng-ɑ Ácwɑ̈ɑ̈j ɑ́kööb kinni, bene kër-ɑ ótørre ɑcebb-ɑ ɑ́cïb muddi pödhh bënn yi Rɑ̈dh Nebukɑdnesɑr ɑnɑn, o møgɑni ógwøg yi en kì bɑng runn ɑ́ryew.” Codhe ɑkedhɑ. Kì bɑng keny megø e ɑcebø rumø ki tørrø yi Anɑniyɑ̀, ɑköbbi yɑn yi Jwøng-ɑ Ácwɑ̈ɑ̈j, i kedhɑ be köbbi Anɑniyɑ̀ kinni, “Jwøng-ɑ Ácwɑ̈ɑ̈j okööbø i yï ócuggø tørri ɑcebø mɑ yɑdh, de gø wile’ wilø ki ɑcebø me bɑ ngyënyø dødø. Wïlɑ̈bø, Jwøøg Isrɑil, Jwøng-ɑ Ácwɑ̈ɑ̈j okööbø kinni, muddi pödhh-ɑ kyeelø bënn ótöjje ki ɑcebbì mø bɑ ngyënyø dødø, o ge ógögg-ɑ Nebukɑdnesɑr rɑ̈ɑ̈dh Bɑbïlöniyɑ̀. Jwøng-ɑ Ácwɑ̈ɑ̈j ɑ́kööb kinni i cɑgg ɑ́ lɑ̈yyi pɑ̈l, ge bɑ møg-ɑ ówëgge göggi Nebukɑdnesɑr, rɑ̈ɑ̈dh Bɑbïlöniyɑ̀.” Codhe, ɑköbbɑ møgɑni Anɑniyɑ̀, kɑ köbbɑ thyew kinni, “Lïng Anɑniyɑ̀! Yï nuti örø yi Jwøng-ɑ Ácwɑ̈ɑ̈j, o yï dwɑdd-ɑ kinni o ji møg yïëy gen ki kwøbbi pyed. Bene ɑ bɑnge kööb Jwøng-ɑ Ácwɑ̈ɑ̈j kinni yï dwɑdde’ nyiigø. Yï óthøw e run men nuti thumø, mɑ́ ji ɑ́köbbi yi yïn kinni bɑny gen kwøbbi Jwøng-ɑ Ácwɑ̈ɑ̈j.” Kɑ Anɑniyɑ̀ othøø kì wɑɑngɑni ceth, kì bïryeew dwɑ̈tt. Kɑ yɑ gwëd-ɑ yï ókwër geki jøtöng kí jɑgg, kí tyëng-ɑ kyeelø møg-ɑ ɑ́kïdhi Bɑbïlöniyɑ̀ yi Nebukɑdnesɑr gɑ ɑmɑgg, ge kɑ̈l-ɑ Yerusɑlem. Wɑ̈nyɑni ɑ́gwed yi yɑn, e Rɑ̈dh Yöyɑkin geki meye kí jɑggi tøg burø, kí jɑggi Yeudiyɑ̀ kí Yerusɑlem, kí bödhhì geki tyëng-ɑ cinggi gen døj ki gwøg rumø ki kïdhi yïnø. Wɑ̈nyɑni ɑ́mëggɑ’ Elɑsɑ̀ wɑ̈d Cɑpɑn geki Gemɑriyɑ̀ wɑ̈d Kilkiyɑ̀, keny-ɑ ɑ́ör gen Bɑbïlöniyɑ̀ yï Rɑ̈dh Nebukɑdnesɑr yi Rɑ̈dh Dhedekiyɑ̀, rɑ̈ɑ̈dh Yeudiyɑ̀, wɑ̈nyɑni okööbø kinni, “Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil köbb-ɑ tyëng-ɑ ɑ́wëgge kɑ̈ɑ̈lø yi Nebukɑdnesɑr kì Yerusɑlem, kɑ gï kïdhe Bɑbïlöniyɑ̀ kinni, ‘Gëëd wun ki ud kɑ wu pëggu piny. Pur wun kɑ wu pïïdh wun ki yenh kɑ nywøli gen cɑm wun. Nyömi wun kɑ wu nywøl wun. Kɑ wɑ̈ddi wun nyömi gen, kɑ nyigi wun nywøm, kɑ ge nywøl gen. Ngënyi kwɑnni wun kɑ ge ko wëggi nungø. Göggu kɑ̈dd-ɑ yethi gen ɑ́kïdhɑ wun ki gïgdøj. Nyi kwɑjji wun yɑn kiper kɑ̈ddɑni, mɑ́ døøji wun ókɑ̈ɑ̈l-ɑ ri døøji gen. Yɑ Jwøng-ɑ Ácwɑ̈ɑ̈j, Jwøøg Isrɑil, yɑ kyëdd-ɑ wun kinni ri wun ko wëggu wënyø yi jøtöng møg-ɑ bëëdø kì kelli wun, geki tyëng-ɑ nyi kööbø ce gïn-ɑ óbï ngɑ̈nyi yi gen. Lɑ̈gg-ɑ nyi lɑ̈gi yi gen ko nyi yïëy wun. Bɑ pyed ɑ köbbi wun yi gen ki nyingɑ. Ge nuti örø yi yɑn. Yɑn yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.’ ” Jwøng-ɑ Ácwɑ̈ɑ̈j ɑ́kööb kinni, “Keny-ɑ óthumi runni Bɑbïlöniyɑ̀ gɑ pyɑ̈r ɑ́bïryew, kwøbbi wun ólidh yi yɑn, o møg-ɑ ɑ́kwøb yi yɑn kinni wu ódwöögɑ pödhi wun, ge ómïdhi yi yɑn. Bɑ yɑn, yɑ ketɑ ɑ ngɑ̈nyi gïg-ɑ dwɑddɑ göggi wun, o bɑ døøjø de pɑth ki ryɑ̈g, o gïg-ɑ ngɑ̈dh yi wun yod yi wun. Codhe, o yɑ mɑlli yi wun, gïn-ɑ kwɑjji yi wun ómëggɑ wun. Yɑ óyɑb yi wun kɑ yɑ yod yi wun, mɑ́ yɑ óyɑb yi wun kɑ pëthi wun bënn. Ngee, yɑ óyod yi wun, kɑ wu dwøøgɑ piny wun. Wu ócung yi yɑn kì pödhh geki kɑ̈jj-ɑ ɑ́kïdhɑ wun bënn, kɑ wu dwöögɑ piny-ɑ́ yije ɑ́kɑ̈ɑ̈lɑ wun, wu kïdhɑ’ yïnø. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil okööbø kinni, “Wu okööbø ce wu ónëngø yi Jwøng-ɑ Ácwɑ̈ɑ̈j ki jøtöng kì Bɑbïlöniyɑ̀. Adɑ́ lïngu møg-ɑ ɑ́kwøb yi Jwøng-ɑ Ácwɑ̈ɑ̈j kipe rɑ̈nh-ɑ jyɑ̈gø kì piny-ɑ ɑ́jɑɑg yi Debïd, kí møg-ɑ ɑ́kwøbe kipe ji-ɑ bëëdø kì kɑɑlɑni, ɑ løg wɑddi wun møg-ɑ ɑ́cög ge nuti kïdhi yïnø gɑ ɑmɑgg. Wïlɑ̈bø, Jwøng-ɑ Ácwɑ̈ɑ̈j ɑ́kööb kinni, ‘Ge göjjɑ’ liny, kí kɑ̈j, kí rɑ̈ɑ̈m dëllì, kɑ ge gwøgɑ ge nɑ nywøli ólɑm møg kwɑ̈gø, møg pɑ cuggi cɑmø yi rɑ̈ji gen. Yɑ órïngi kì bɑng gen, yɑ kɑ̈ll-ɑ liny, kí kɑ̈j geki rɑ̈ɑ̈m dëllì, o pödhhi kömi piny bënn óbwøg keny-ɑ ólidh ge gïn. Ji bënn óbwøg yi gïgrijjø møg-ɑ ógöggɑ gen, kì kɑ̈jj-ɑ ɑ́kïdhi gen, ge ócwølli gɑ ɑcyen yi ji bënn. Gïgɑni pɑ̈dh-ɑ kömi gen ceth, kipe kɑ̀ nuti lïngi gen kwøbbɑ møg-ɑ ɑ́bëëd gï nyi örɑ’ gen ki bɑ̈nggɑ jøtöng. Ge ɑ́ceg-ɑ bɑ̈nyø ki lïngø. Wu tyëng-ɑ ɑ́kïdhɑ Bɑbïlöniyɑ̀ bënn, lïngu møg-ɑ kømmi yi yɑn, yɑ Jwøng-ɑ Ácwɑ̈ɑ̈j.’ “Lïngu møg-ɑ kwøb yi Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil kipe Akɑɑb wɑ̈d Kolɑiyɑ̀, kí Dhedekiyɑ̀ wɑ̈d Mɑɑseiyɑ̀, jøg-ɑ nyi köbbi wun kwøbbi pyed ki nyinge. Ákööb kinni gï ócïbe cingi Nebukɑdnesɑr rɑ̈ɑ̈dh Bɑbïlöniyɑ̀, o gï nɑ̈g yi en ceth kì bøli wun ge onennø yi wun. Tyëng-ɑ ɑ́køøl kì Yerusɑlem kɑ ge kïdhi Bɑbïlöniyɑ̀, keløg dhɑnhø dwɑdd-ɑ lɑ̈mmi cyën yi gen, ge ókööbø kinni, ‘Yï ógwøg yi Jwøng-ɑ Ácwɑ̈ɑ̈j ni Akɑɑb geki Dhedekiyɑ̀, ɑ ɑ́bul yi rɑ̈ɑ̈dh Bɑbïlöniyɑ̀ ge onëënø!’ Menɑni óbëëd ɑ́ cɑ́yi gen, mɑ́ ge ɑ́røngi ki orøg me rɑj. Mɑ̈nni ji møøgø ɑ́niin yi gen, ge ɑ́kööb thyew ki kwøbbi pyed ce ge óör-ɑ yi yɑn, o ge nuti ör yɑn, ge gönyø kɑ yɑn ceth.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. “Yï ɑ́gwøg yi Jwøng-ɑ Ácwɑ̈ɑ̈j yï bɑ ókwërø kì kej Yöyɑdɑ̀, o ɑnɑn yï bɑ jɑngi Kengø, jɑng-ɑ dwøng. Yï ócuggø mɑgi ngɑn wïje di ɑ́nɑ̈gø men kööbø cem e bɑ jɑltöng. Dij tyelle ri digïddì, kɑ mɑɑg kì mune ki ɑ́cwecwel. Ede gïn ni menɑni ɑ pɑ göggí Jermɑyɑ̀ jɑl Anɑthöth, eni jɑl-ɑ nyi kööbø ki ji de nɑ jɑltöng? Mɑɑg jɑlɑni kipe kɑ ɑ́köbbe tyëng-ɑ Bɑbïlöniyɑ̀ kinni i ge óbëëdø kì kunɑni ki keny me bɑ̈ɑ̈r, i gëëd gen ki ud, kɑ ge pur gen, kɑ ge pïïdh gen ki yenh, kɑ ge cyɑ̈ɑ̈m gen ki gïg-ɑ cyeg kì yethi pwödhhi gen geki bɑ̈ggi gen.” Wɑ̈nyɑni ɑ́rɑ̈ngi yɑn yi Dhepɑniyɑ̀, ɑköbbi yɑn yi Jwøng-ɑ Ácwɑ̈ɑ̈j kinni, Jwøng-ɑ Ácwɑ̈ɑ̈j Jwøøg Isrɑil, yɑ ɑ́köbbe kinni, “Gweed møg-ɑ ɑ́köbbɑ yïn bënn yij wɑ̈nyø, mɑ́ bøli keny-ɑ ódwøøgɑ jiɑ, ɑ løg Isrɑil geki Yeudiyɑ̀ kej gen obëënø. Ge ódwøøgɑ piny-ɑ ɑ́mëggɑ kweyyi gen, kɑ gø kwɑny gen këti. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Møg-ɑ ɑ́köbbi Isrɑil geki Yeudiyɑ̀ yi Jwøng-ɑ Ácwɑ̈ɑ̈j ek: “Yɑ ɑ́lïng ki ɑkyew; bɑ böögø me dwøng o bong gïn yïëdø. Anɑn rum wun kidøøj! Jɑlø ócuggø pɑ̈dhi piny ki dhɑnhø! De gede cwøw ɑ nennɑ gen cinggi gen cïb gen yethi gen, ni ngɑn kømi pɑ̈dhi piny? Ede dhɑnhø bëne ɑ juud en? Cyɑ̈ng me rɑj obëënø, bong cyɑ̈ng megø men-ɑ ópɑ̈ɑ̈r ki en. Bɑ bøli keny-ɑ ómuum wɑ̈thi jiɑ, de ge óbodh.” Jwøng-ɑ Ácwɑ̈ɑ̈j okööbø kinni, “Keny-ɑ óbëën cyɑ̈ngɑni, ɑcebb-ɑ muddi gen ógöönyɑ wɑ̈g, o ge pɑ cigi bëëdø gɑ bɑ̈nggi tyëngpɑth. De ge ógögg-ɑ yɑn yɑ Wïi gen, Jwøøg gen wøki kwɑɑr Debïd men-ɑ ómyeg yi yɑn ɑ́ rɑ̈dh. Wu ko böggi jiɑ; tyëng Isrɑil, wu ko nɑ̈g yi wɑ̈ɑ̈rø wu óyïëël yi yɑn kì piny-ɑ lɑ̈wi, wu ódwöögɑ kì kun-ɑ ɑ́mɑɑg wun. Wu ódwöög pödhi wun, kɑ wu óbëëdø ki mër, bong gïn-ɑ ónywɑl wun, o bong ngɑn wëggi wun böggø. Yɑ óbï yï wun kɑ wu yielɑ. Pödhh bënn órënyɑ; pödhh-ɑ́ yethi gen ɑ́kedhhɑ wun órënyɑ ge bënn, de wu koo rënyɑ. Wu pɑ bødh ki cɑyø yi yɑn, de pyëwɑ ólɑ̈ɑ̈m ki wun keny-ɑ ócɑyɑ wun. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j köbb-ɑ jie kinni, “Keddi wun pɑ cuggi tuurø, kɑ̈jj-ɑ ledh kì ri wun pɑ cuggi nøggø. Bong ngɑn me tuur wun, bong gïn yiel kì ri kɑ̈jj-ɑ lol kì ri wun, bong yɑdh me yïëdø. Wu ɑ́wïl kì wɑ̈thi tyëng-ɑ ɑ́mɑɑr wun, cwɑggi gen bong gøn ki wun. Yɑ ɑ́pɑ̈ɑ̈r kömi wun ni ngetimɑ̈ɑ̈nø, cɑ́y-ɑ ɑ́cɑɑy wun ɑ́bëëd ge teeg, mɑ́ orøøg wun dwøng, o rɑjj-ɑ gøggi yi wun døngø. Wu ko gööny kipe kedd-ɑ ri wun, bong gïn yiel wun ki gen, wu ɑ́cɑy yi yɑn kinøw kɑ per kɑ̀ bëëd orøøg wun dwøng, o rɑjj-ɑ gøggi yi wun døngø. De ɑnɑn ngɑn-ɑ ɑ́cɑm wun lony kɑ cɑmø o tyëng-ɑ mɑ̈n ki wun ókɑ̈l gɑ ɑmɑgg. Tyëng-ɑ ɑ́guud nyingi wun bënn, nyingi gen óguud, kɑ tyëng-ɑ ɑ́yɑg wun yɑg. Kej wun ótyeny yi yɑn këti, keddi wun ótuur yi yɑn, cɑgg tyëng-ɑ mɑɑn wun kømm-ɑ kinni, ‘Dhɑyøn bɑ ngɑn-ɑ ɑ́cyeed pɑ̈l, bong ngɑn di cwɑgge ki en.’ Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Jiɑ ódwøøgɑ piny gen pyëwɑ ólɑ̈ɑ̈m ki kɑ̈llɑni bënn Yerusɑlem ódøøg ki gerø, kɑ gøldwøng cigi gerø kì yije. Tyëng-ɑ yije ówör ki medi pëëth, ge óryeer ki medi pëthi gen. Ge ógyëdh kɑ kwɑnni gen óngënyø, ge ówëggi wørø kì bɑng gyëdhɑ. Pödhø ógwøg yi yɑn e teg, ni kɑ ɑ́bëëde cøn, kɑ cïbɑ piny kidøøj. Tyëng-ɑ guud nyingi gen, ócɑyɑ ge bënn. Jwøng-ɑ Ácwɑ̈ɑ̈j ɑ́kööb kinni, “Bøli keny-ɑ ógöögɑ yɑn ɑ́ Jwøøg wɑ̈thi kɑ̈lli Isrɑil obëënø, kɑ ge ogöögø ki jiɑ. Tyëng-ɑ ɑ́bodh kì dhø thøø, pyëwɑ ɑ́lɑ̈ɑ̈m ki gen kì yij ryɑng. Keny-ɑ ɑ́dwɑddi tyëng Isrɑil ywömø, yɑ ɑ́cwöb kì bøli gen yɑ lɑ̈wi. Wu tyëng Isrɑil, wu ɑ́wöni wu omɑɑrø yi yɑn, o mɑ̈ɑ̈dø men-ɑ mɑɑrɑ wun pɑ lwënyi. Yï ódøøgɑ ki gerø. Bullí ódøøg yi yïn ki pwödø kɑ yï ocöngø ki medi pyëwí. Yï ódøøg be pïïdhø ki bɑ̈ggi oløg kì wɑ̈thi kïtti Sɑmɑriyɑ̀, o tyëng-ɑ ɑ́pïïdh, gen ɑ ócɑm nywøli oløngɑni. Ngee, obëënø eni bøli keny-ɑ óryeer jɑl-ɑ kurø kì wɑ̈thi kïtti Eprɑim kinni, ‘Kedhi wɑ Dhɑyøn, yï Jwøng-ɑ Ácwɑ̈ɑ̈j, Jwøgee.’ ” Jwøng-ɑ Ácwɑ̈ɑ̈j okööbø kinni, “Wör wun ki medi pëëth kipe Isrɑil, jɑngi pödhh bënn. Wör wun ki wörri dhwøm kinni, ‘Jwøng-ɑ Ácwɑ̈ɑ̈j jie ɑ́yiele, tyëng-ɑ ɑ́bodh ɑ́døme.’ Ge ódwöögɑ kì tung-ɑ wɑɑng wuudø, kɑ ge cungɑ kì wɑ̈thi tùngi piny. Cörr geki ngöll ódwöög kyeel ki gen, kí ɑ́yɑjj; cɑgg ɑ́ møg-ɑ cyɑ̈ngø ki pɑ̈dhi piny. Ge ódwöög gɑ pödhø me dwøng. Jiɑ ódwöög ge óywöngø; ge ócyɑ̈dhi ge ómɑ̈ddø kɑ̀ pëëjɑ gen. Ge ópeejɑ kömi nɑm ki yöö me bɑ óbödh me yije bong tuggì møg cwɑnyyi tyel. Yɑ nɑ wïyi Isrɑil o Eprɑim ɑ bɑ wɑ̈dɑ, nyeldwøng.” Jwøng-ɑ Ácwɑ̈ɑ̈j okööbø kinni, “Wun ɑ pödhh bënn, lïngu kwøbbɑ, kɑ ge kɑ̈lli wun kì kömi nɑ̈mmì møg-ɑ lɑ̈wi. Jiɑ ɑ́kedhhɑ, de ge ócøngɑ kɑ ge korrɑ ni jɑlkwɑ̈yø kenyi korre dyëge. Tyëng Isrɑil ógöönyɑ wɑ̈g kì yethi töjji, kɑ ge dɑ̈ɑ̈dɑ wɑ̈g kì cinggi pödhh mø teg. Ge óbï kɑ ge owörø ki wörri medi pëëth kì Dhɑyøn, kɑ pëthi gen løg-ɑ mø med ki gïg-ɑ muujɑ, ge ómëggɑ byel, kí møgi oløg, kí møøw dhetun, kí dyëg geki dhög. Ge óni bɑg men-ɑ ócɑwø kidøøj, gïg-ɑ dwɑddi yi gen bënn óyod yi gen. Kɑ wojur ocöngø ki medi pëëth, kɑ wøbb pëthi gen ómïnø geki jøgdøngø bënn. Ge ólug yi yɑn, kɑ ywøng-ɑ ywøg yi gen løgɑ medi pyëw. Kɑ kïïmø løgɑ omøy. Ókwër óyɑ̈ɑ̈ngɑ ki gïgcɑmm-ɑ døj, kɑ jɑmm-ɑ dwɑddi yi jiɑ bënn mëggɑ gen. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Cwɑg olïngø kì Rɑmɑ̀, cwɑggɑni bɑ ywøg me teg. Rɑceel ywøg-ɑ nyige, nyige ɑ́lɑ̈ɑ̈ny, o ɑ́bɑ̈nyi lugø. “Yï ko ywöngi, poj pïi nyingí. Gwøng-ɑ ɑ́gwøg yi yïn bëne kipe nyigí, yï ókøøg kipere; nyigí ódwöög kì pödhi tyëngmɑ̈ɑ̈nø. Døøjø óbï dhuki megø, nyigí ódwöög pödhi gen. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. “Tyëng Isrɑil lïngɑ’ lïngø ge okööbø ki rɑ̈ji pëthi gen kinni, ‘Jwøng-ɑ Ácwɑ̈ɑ̈j, wø ɑ́bëëd wø nɑ lɑ̈yyi pɑ̈l, de wø ɑ́pwönyi yi yïn ki lïngi kwøbbí. Dwöög wøn yïí; wø dwɑdd-ɑ dwöög köörí, yïn ɑ Jwøng-ɑ Ácwɑ̈ɑ̈j, Jwøøg wøn. Yï ɑ́wiy piny yi wøn, de wø dwɑdd-ɑ jwɑn dwöög yïí. Keny-ɑ ɑ́rum wøn ki pwödø yi yïn, wɑ̈thi wøn ɑ́kuul wøn piny kɑ wø óyewø. Wø ɑ́yɑ̈r kɑ wɑ̈thi wøn ólɑ̈ɑ̈yø kì bɑng orøng-ɑ ɑ́gwøg yi wøn, keny-ɑ ɑ́bëëd wø thønhø.’ “Isrɑil, yï bɑ wɑ̈n-ɑ pere teg kì yïɑ; wɑ̈n-ɑ mɑɑr yi yɑn ki mendwøng. Kenyi kwøbɑ nyingí, yï nyi ti kɑ tyerø yi pyëwɑ. Pyëwɑ tyer-ɑ yïn ceth, pyëwɑ ólɑ̈ɑ̈m ki yïn. Cwödhu piny ki ngïjjì møg nyodh yöö, wu kwøbb-ɑ yöö men-ɑ́ yije ɑ́køøl wun yïnø. Dwöög wun, tyëng Isrɑil, dwöög wun kɑ̈ddi wun; kɑ̈dd-ɑ ɑ́wiyu piny cøn. wu gït-ɑ wɑɑng wu ólyebbø? Yɑ ɑ́göög ki gïjø me nyɑ̈n, me bɑ̈ɑ̈n ki jɑmmì bënn, ni ke di bëëde ɑ́ dhɑjø ɑ korri jɑlø.” Jwøng-ɑ Ácwɑ̈ɑ̈j Jwøøg Isrɑil okööbø kinni, “Keny-ɑ ódwöögɑ ji piny gen, ge ódøøg be kwøb kì piny Yeudiyɑ̀ geki kɑ̈dde kinni, ‘Wiy Yerusɑlem kïti kwër gyëdh yi Jwøng-ɑ Ácwɑ̈ɑ̈j, eni kej kwër, keny-ɑ yije bëëde.’ Ji óbëëdø kì Yeudiyɑ̀ kí kɑ̈dde, kɑ ge opurø ki pwödh kɑ yï gen dɑ dyëg kí dhög. Tyëng-ɑ pïdø óthödhɑ ki ywömø, kɑ møg-ɑ nyönhø yi kɑ̈j thödhɑ ki gïncɑm. Codhe, o ji ókööb gen kì bøli kenyɑni kinni, ‘Yɑ ɑ́kedhi be buddø, kɑ yɑ ócyëwø dëlɑ yööd.’ “Yɑ Jwøng-ɑ Ácwɑ̈ɑ̈j, yɑ kwøb-ɑ kinni, bøli keny-ɑ ópɑ̈ɑ̈ngɑ piny Yeudiyɑ̀ kí Isrɑil ki ji, kí dhög obëënø. Óni kɑ ɑ́puthɑ gen wɑ̈g kì piny, kɑ ge weddɑ, kɑ ge rënyɑ, kɑ wɑ̈thi gen tɑ̈ɑ̈yɑ piny, ge ódøøgɑ ki miin piny kɑ ge tyenyɑ. Keny-ɑ óbëën bøli kenyɑni, ji koo cigi kwøb kinni, ‘Oløng-ɑ wɑj ɑ́cɑm-ɑ yi tyëngdøngø, kɑ yöd ɑ́ othønhø ɑ dhøggi gen wɑ̈nyyi.’ De ngɑn-ɑ ócyɑ̈mø ki oløg me wɑj, bɑ legge ɑ óywɑ̈ɑ̈yø, o dhɑnhø óthøw kɑ gööj orøge.” Jwøng-ɑ Ácwɑ̈ɑ̈j okööbø kinni, “Bøli keny-ɑ ólwööb wøn ki lwöbø me nyɑ̈n wøki tyëng Isrɑil ki tyëng Yeudiyɑ̀ obëënø. Koo bëëdø e nɑ lwömi tyeli mɑl keny-ɑ ɑ́kɑ̈ɑ̈lɑ gen wɑ̈g kì Rïp ge pyejjɑ’ pyejjø kì cinggi gen. Lwömɑni nuti mïdhø yi gen, ngö yɑ ɑ́bëëd yɑ nɑ cwøør gen. Lwöm-ɑ nyɑ̈n men-ɑ ólwøb yi wøki tyëng Isrɑil, óni men: Ciggɑ ócïbɑ ri gen, kɑ gweedɑ kömi minni gen. Yɑ óbëëdø yɑn ɑ́ Jwøøg gen, o ge óbëëdø gɑ jiɑ. Bong ngɑn-ɑ ónyudhi Jwøng-ɑ Ácwɑ̈ɑ̈j wɑɑd gen, mɑ́ yɑ óbëëdø yɑ ngɑ̈nyi yi ji bënn, cɑg kì ri men-ɑ thinh gïti ri ngɑndwøng. Pyëwɑ ólɑ̈ɑ̈m ki orøøg gen, o gïg-ɑ bɑjji yi gen koo pɑrri yi yɑn. Yɑ Jwøng-ɑ Ácwɑ̈ɑ̈j yɑ ɑ́rum ki kwøb.” Jwøng-ɑ Ácwɑ̈ɑ̈j cɑ̈ng ɑ́gwøge ɑ́ men muujø ki cɑr kì dicɑ̈ng, kɑ dwɑ̈y geki kyell gwøge gɑ møg mënyø kì wɑ̈r. Nɑɑm omelø nyi pwöje pwöjø kɑ ɑpɑge oruurø, nyinge bɑ Wïlɑ̈bø Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j okööbø kinni, i kɑ̀ nud gïgɑni bënn kì kɑ̈jji gen, Isrɑil óbëëd e nud ceth ɑ́ pödhø. Cyɑ̈ng-ɑ órøm mɑl, kɑ tyelli piny thɑ́ gen yod, bene bøli keny-ɑ óbɑnyɑ tyëng Isrɑil mɑwɑnø, kipe gïg-ɑ ɑ́gwøg yi gen bënn. Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Jwøng-ɑ Ácwɑ̈ɑ̈j okööbø kinni, “Bøli keny-ɑ ódøøg Yerusɑlem kɑɑlɑ ki gerø obëënø, cɑg kì ri Ønbɑ̈r mi Anɑnel gïti Dhøg Wïj Tung. O kew cige kedhø kì kenyɑni gïti Kïti Gɑreb kì wɑɑng cyɑ̈ɑ̈ng böörø, gø wene’ wenø e gït-ɑ Goɑ̀ Tör bëne, kí wɑ̈thi rörri ji geki wïj thur, gïti Dhøg Kyënyì kì wɑɑng cyɑ̈ɑ̈ng mwøl ógöögø ɑ kej kwër. Kɑɑlɑni koo cigi cøør piny, wɑlɑ̀ koo rënyi.” Kɑ wø okööbø ki Jwøng-ɑ Ácwɑ̈ɑ̈j, kì ri pyɑ̈ri runni Dhedekiyɑ̀ ɑ́ rɑ̈ɑ̈dh Yeudiyɑ̀, ɑ løg wɑɑng-ɑ ɑ́bëëd runni Nebukɑdnesɑr rɑ̈ɑ̈dh Bɑbïlöniyɑ̀ bɑ pyɑ̈rø wïdɑ́bïkyel kì yij lɑwø. Kì bøli kenyɑni, Yerusɑlem ɑ́bëëd ɑ́ ɑtyeg yi liny Bɑbïlöniyɑ̀, o yɑ ɑ́bëëd yɑ bɑ ɑmɑg kì gøldwøng, ød ódij kömɑ. Yɑ ɑ́mɑg yi Rɑ̈dh Dhedekiyɑ̀ kɑ per kɑ ɑ́köbbii i yɑ kööbø kinni, i Jwøng-ɑ Ácwɑ̈ɑ̈j okööbø kinni, “Kɑɑldwøng men ówëggɑ mɑgø yi rɑ̈ɑ̈dh Bɑbïlöniyɑ̀, o Rɑ̈dh Dhedekiyɑ̀ pɑ bodh. Ómɑg kɑ muuj rɑ̈ɑ̈dh Bɑbïlöniyɑ̀; gø ólidhe ceth kɑ ge okööbø. Dhedekiyɑ̀ ókïdhi Bɑbïlöniyɑ̀, o óbëëdø kì kunɑni gïti keny-ɑ óløøgɑ kwøbbe. Cɑgg e ónyïɑ̈ggi ki tyëng Bɑbïlöniyɑ̀, linyɑni koo lwɑ̈ng yi en. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Kɑ yɑ köbbi yi Jwøng-ɑ Ácwɑ̈ɑ̈j kinni, “Anɑnel wɑ̈d Cɑlöm, Cɑlöm ómï wïyí obëënø e dwɑdd-ɑ ngëwwi yïn pwödhe, pwönh-ɑ ying Anɑthöth kì myërri Ben Yɑmïn, mɑ́ yïn ɑ bɑ wɑɑd nyöödø kì yïe.” Codhe, kɑ Anɑnel bï-ɑ yïɑ, kɑ yɑ yuude kej jøg-ɑ nyi kurø, ni kɑ ɑ́kwøbii yi Jwøng-ɑ Ácwɑ̈ɑ̈j. Kɑ yɑ köbbe kinni, “Ngew pwödhɑ, pwönh-ɑ ying Anɑthöth kì myërri gøl Ben Yɑmïn, mɑ́ yïn ɑ ngewii kipe e ókedhi wɑ̈g kì kɑl, ngeew ceth.” Kɑ yodɑ ceth kinni kwøbbɑni kɑ̈ɑ̈l-ɑ yi Jwøng-ɑ Ácwɑ̈ɑ̈j. Codhe, ɑngewɑ pwönhɑni kì yï Anɑnel, kɑ ngyëny mëggɑ en, ngyënyyɑni bɑ ɑ́tegg pyɑ̈rø wïdɑ́bïryew. Kɑ wɑ̈nyi ngyew thɑnyɑ ki kitim men-ɑ köme di nyingɑ geki mø tyëng-ɑ buti gen ɑ́ngëëw, Codhe, ɑkwɑnyɑ wɑ̈ny-ɑ ɑ́cyëëg kí men-ɑ bɑ ɑyieb kí lwöm-ɑ yije bëne, ɑmëggɑ gen Bɑruk wɑ̈d Neriyɑ̀ wɑ̈d Mɑɑseiyɑ̀. Ge ɑ́muujɑ ceth kì bøli Anɑnel geki tyëng-ɑ buti gen ɑ́ngëëw, jøg-ɑ ɑ́gøj wɑ̈nyø ki kitim mø nyingi gen, kí jøg-ɑ ɑ́ying keny-ɑ ɑ́kømmi kwøb. Aköbbɑ Bɑruk kì bøli gen bënn kinni, “Wïlɑ̈bø, Jwøøg Isrɑil, Jwøng-ɑ Ácwɑ̈ɑ̈j ɑ́kööb i kwɑny wɑ̈jji ngyew møg ryeet, men-ɑ bɑ ɑcyëg ki men-ɑ bɑ ɑyieb, kɑ ge muul yij pug kipe kinni o ge bëëd gen ge pɑ rënyi ki keny me bɑ̈ɑ̈r. Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil ɑ́kööb kinni i pwödh geki bɑ̈gg ódøøg be ngyewø kì piny Isrɑil.” Keny-ɑ ɑ́rumɑ ki mëggi wɑ̈nyi ngyew Bɑruk, ɑkwɑ̈jjɑ kinni, “Wuö Jwøng-ɑ Ácwɑ̈ɑ̈j, yïn ɑ ɑ́cwɑ̈j mɑl kí piny ki tegí, teng-ɑ dwøng, bong gïn dhɑ̈li gwøgø yi yïn. Ji mø kwɑnni gen bɑ ɑ́lïp mø ngenyø ɑ́mɑɑr yi yïn ki mɑ̈ɑ̈dø me pɑ lwënyi, de ji møøgø thyew ɑ́cɑy yi yïn kipe orøøg kweyyi gen. Yï bɑ Jwøk me dwøng me pëddi tegø, bene yïn Wïlɑ̈bø, Jwøng-ɑ Ácwɑ̈ɑ̈j. Gïg-ɑ dwɑddi gwøgø yi yïn nyii gwirø yi yïn kidøøj, kɑ yï nyii göögø ki gïg mø døngø. Gïg-ɑ gøggi yi ji bënn onennø yi yïn, kɑ ngɑn nyi mëggi köggi gwøge. Yï ɑ́göög ki gïïngɑ̈ngø kì Rïp kɑ̈ge dööng, o yï nudd yï ogöögø ki gïg ni møgɑni pïd dicyɑ̈ngtïn, kì pödhi Isrɑil geki pödhh-ɑ kyeelø, kipe kinni o perí bëëde e ngɑ̈nyi kì kɑ̈jj bënn. Jií ɑ́kɑ̈ɑ̈l yi yïn wɑ̈g kì Rïp kɑ tegø me dwøng, kí gïïngɑ̈ngø mø døngø, kɑ tyëng Rïp göjjí wɑ̈ɑ̈rø. Kɑ jií mëggí piny men, ni kɑ ɑ́köngí kì bøli kweyyi gen, kinni gø ómëggí gen, eni piny-ɑ yije mulli yi cɑg geki møøw kïc. De keny-ɑ ɑ́rum gen ki kwɑnyi piny, ciggí ɑ́cög gï pɑ mïdhi yi gen, o ge nuti bëëdø ki bëën-ɑ dwɑddi yi yïn; ge ɑ́göög-ɑ wɑ̈thi gen, bene ɑ bɑ̈nge göjjí gen ryɑ̈g. “Kɑɑldwøng ótyeg yi tyëng Bɑbïlöniyɑ̀, o ge óthurø ki kɑ̈jj møg nenni gen kɑɑl, ge dwɑdd-ɑ mɑgii. Kɑɑl bɑ men pɑ̈ɑ̈dh ceth yi liny kí kɑ̈j, kí rɑ̈ɑ̈m dëllì. Møg-ɑ ɑ́kwøb yi yïn ɑ́bï gɑ dyër. De bɑ yïn Jwøng-ɑ Ácwɑ̈ɑ̈j ɑ ɑ́köbbi yɑn i ngewɑ piny kì bøli ji, cɑgg kɑɑldwøng nënni ɑ́ men tɑ̈ɑ̈y piny yi tyëng Bɑbïlöniyɑ̀.” Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Bene yɑn Jwøng-ɑ Ácwɑ̈ɑ̈j, Jwøøg dhɑnhø bëne. Bong gïn dhɑ̈li gwøgø yi yɑn. Kɑɑl men mëggɑ’ Nebukɑdnesɑr rɑ̈ɑ̈dh Bɑbïlöniyɑ̀ geki linye, o bɑ men mɑg yi en ceth, kɑ rɑ̈b yi gen ki mɑc. Kɑɑl órɑ̈b kɑ ópɑ̈ɑ̈dhø kí udde, udd-ɑ́ yethi gen ɑ́rɑ̈bbi gen Bɑɑl ki bɑkur, kɑ yethi gen kunyi gen jwögg møøgø ki møgi oløg. Tyëng Isrɑil geki Yeudiyɑ̀ ɑ́wöni ge gøgg-ɑ gïg nyi rënyi pyëwɑ. Tyëng kɑɑl men ɑ́wöni kër-ɑ ɑ́gerii ge gøgg-ɑ gïg nyi rënyi pyëwɑ ki mendwøng. Ceg yi yɑn kɑ rënyø ceth, kipe gïgrijjø møg-ɑ ɑ́wöni ge ogøggø yi tyëng Yeudiyɑ̀ geki Yerusɑlem geki rɑ̈nhi gen, kí jɑggi gen, kí ókwër, geki jøtöng. Ngɑ̈thi gen ɑ́lugi gen yɑn, ge ɑ́pwönyɑ de ge ɑ́dhɑ̈li dïdø. Kɑ ge tir-ɑ kïdhi yij Keng-ɑ ɑ́ger ɑ́ keny mɑlli yɑn ki ngïjji gen gïg-ɑ kømi pyëw lɑ̈mmø, kɑ gø bwöl gen. Kɑ Bɑɑl gëddi gen ki këlli lɑm kì Töör Kinöm, gɑ møg kömi gen nyi rɑ̈b gen nyigi gen womɑ̈nn, kí wɑ̈ddi gen gɑ gëdhhì møg mëggi jwøng-ɑ cwøl ɑ́ Mölek. Ge nuti köbbø yi yɑn kinni göög gen kinøw, wɑlɑ̀ møgɑni nuti pɑ̈nyi bëën wïjɑ, kinni ge ógöögø kinøw, kɑ tyëng Yeudiyɑ̀ göjji orøg.” Kɑ yɑ köbbi yi Jwøng-ɑ Ácwɑ̈ɑ̈j Jwøøg Isrɑil kinni, “Jermɑyɑ̀, kɑɑl men ópɑ̈dhi cingi Nebukɑdnesɑr yi gööj liny, kí kɑ̈j geki rɑ̈ɑ̈m dëllì. Anɑn lïng, yïɑ dɑ møøgø møg dwɑddɑ kwøbø. Ji ódøøgɑ ki cungø kì pödhh-ɑ ókedhhɑ gen ki rɑ̈ji pyëwɑ, kɑ ge dwöögɑ piny men kɑ ge obëëdø’ yije e bong gïn böggi yi gen. Codhe, o ge bëëd gen gɑ jiɑ, o yɑ óbëëdɑ yɑn ɑ́ Jwøøg gen. Pyëwɑ ócög e med ki göggi gen ki gïgdøj, o ge ócïbɑ piny kidøøj kì piny men. Wø ólwöbø ki gen ki lwöbø me gïti ɑtheer. Yɑ pɑ wïyi ki göggi gen ki gïgdøj, o ge ógöjjɑ wøri yɑn ki pëthi gen bënn, o ngɑ̈thi gen koo lugi gen yɑn këti. Pyëwɑ ócög e med ki göggi gen ki gïgdøj, o ge ócïbɑ piny kidøøj kì piny men. “Gïgdøj møg-ɑ ɑ́kwøb yi yɑn kinni ómëggɑ gen muujɑ’ muujø ni kɑ ɑ́kwøbɑ bëëni ryɑ̈g ceth, kɑ kɑ̈ɑ̈lɑ kömi gen. Ji okööbø i piny men ógöögø e nɑ ryɑng, keny bong dhɑnhø wɑlɑ̀ lɑ̈ɑ̈y pɑ̈l men bëëdø kì yije. Kí kinni ómëggi tyëng Bɑbïlöniyɑ̀. De pwödh bɑ møg-ɑ ódøøg be ngewø kì pönhï. Ji óngëwø ki pwödh ceth, kɑ wɑ̈jji ngyew nyi gwed, kɑ ge nyi thɑny ki nyingi tyëng-ɑ bøli gen ngëëw. Gïn ni menɑni ógwøg kì myërri gøl Ben Yɑmïn kí myërr-ɑ bɑdhhi Yerusɑlem, kí kɑ̈ddi Yeudiyɑ̀, kí kɑ̈ddi myërri kelli kïttì, geki myërri kelli kïttì. Ji ódwøøgɑ piny gen. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Keny-ɑ ɑ́bëëdɑ yɑ nudd yɑ bɑ ɑmɑg kì ódɑ̈ri burø, ɑ ɑ́bëën wööni Jwøng-ɑ Ácwɑ̈ɑ̈j yïɑ këti. Jwøng-ɑ Ácwɑ̈ɑ̈j ngɑn-ɑ ɑ́cwɑ̈j piny kɑ gø cïbe keje, ɑ́kööb ki yɑn. Ngɑn-ɑ nyinge cwøl ɑ́ Jwøng-ɑ Ácwɑ̈ɑ̈j, yɑ ɑ́köbbe kinni, “Cwøl nyingɑ, kwøbbí óløøgɑ, yï óköbbɑ ki gïg mø pëddi døøjø; møg nuti bëëdø ge ngɑ̈nyi yi yïn cøn. Yɑ Jwøng-ɑ Ácwɑ̈ɑ̈j, Jwøøg Isrɑil, yɑ kwøb-ɑ kinni, Yerusɑlem geki gøldwøng kì Yeudiyɑ̀ cøør-ɑ piny yi tyëg. Dɑ ji møg-ɑ ónyïɑ̈ggi ki tyëng Bɑbïlöniyɑ̀, o ge ógöjjɑ nɑ̈gø yi tyëng Bɑbïlöniyɑ̀ mɑ pyëwɑ rɑɑj ki gen, kɑ piny opɑ̈ngø yi tyëngthøø. Ngɑ̈jɑ ólugɑ kɑɑl men kipe gïgrijjø møg-ɑ ɑ́gwøg yi jie. De kɑɑl men ótuur yi yɑn kɑ døøg-ɑ keje. Ge óthödhɑ ki mër kɑ bong-ɑ ólïng pëëth kì yï gen. Yeudiyɑ̀ geki Isrɑil ómëggɑ døøjø, kɑ ge døøgɑ ki gerø ni kɑ ɑ́bëëd gen cøn. Orøng-ɑ ɑ́göggi yɑn yi gen órɑ̈ɑ̈jɑ wɑ̈g, kɑ pyëwɑ ólɑ̈ɑ̈mø ki gen, kɑ ge gwøgɑ ge dhïw. Yerusɑlem ógöögø ki kej medi pyëw kí dhwɑ̈ng geki ngöönø, o pödhh-ɑ kyeelø kì kömi piny ge óbwøg keny-ɑ ólïngi gen gïgdøj møg-ɑ ógöggɑ tyëng Yerusɑlem geki dhwɑ̈ng men-ɑ ómëggɑ kɑɑlɑni.” Jwøng-ɑ Ácwɑ̈ɑ̈j ɑ́kööb kinni, “Teedø okööbø i kenyɑni döngø ɑ́ ryɑng, i bong ji wɑlɑ̀ bong lɑ̈yy møg bëëdø kì yije. O ge kømm-ɑ dyër; kɑ̈ddi Yeudiyɑ̀ geki Yerusɑlem dööng nøw, bong ji wɑlɑ̀ bong lɑ̈yy møg bëëdø kì yethi gen. De cwɑg ódøøg be lïngø kì kɑ̈jjɑni, men-ɑ́ cwɑggi ji mø cöngø ki medi pëëth, kí cwɑggi tyëng nywöm ódøøg be lïngø. Ji ólïngi, ge cyɑ̈dhi ge owörø ge kɑ̈ɑ̈l-ɑ gëdhhi pwøj yij Kengɑ, ge cem-ɑ, ‘Pwøj wun Wïlɑ̈bø, Jwøng-ɑ Ácwɑ̈ɑ̈j, mɑ́ e døøj, o mɑ̈ɑ̈dø mee gït-ɑ ɑtheer.’ Piny men ówëggɑ dönyø kɑ døøg-ɑ keje cøn. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Wïlɑ̈bø, Jwøng-ɑ Ácwɑ̈ɑ̈j ɑ́kööb kinni, “Piny-ɑ döngø ɑ́ ryɑng èn, ɑ yije bong dhɑnhø wɑlɑ̀ bong lɑ̈y, lume ótwïy kɑ yije døøg be kwɑ̈yø ki dyëg. Tyëngdyëg ódøøg be kwɑnni dyëgi gen kì yethi kɑ̈ddi wɑ̈thi kïttì, kí kɑ̈ddi thɑ̈thi kïttì, kí myërri gøl Ben Yɑmïn, kí myërri Yeudiyɑ̀ kì kuni wɑɑng wurlwɑl, kí myërr-ɑ bɑdhhi Yerusɑlem, kí myërri Yeudiyɑ̀. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Kɑ Jwøng-ɑ Ácwɑ̈ɑ̈j okööbø kinni, “Bøli keny-ɑ ógwøøg møg-ɑ ɑ́köbbɑ tyëng Isrɑil geki tyëng Yeudiyɑ̀, obëënø. Keny-ɑ ówɑ̈nhi bøli kenyɑni, yɑ órönyø ki ngɑntir ɑ́ rɑ̈dh, kì kelli kwɑrri Debïd. Rɑ̈nhɑni óbëëd e gøgg-ɑ dyër kì yij pödhø bëne. Tyëng Yeudiyɑ̀ kí tyëng Yerusɑlem ódøm, kɑ ge óbëëdø e bong gïn lïngø kì pëthi gen. Kɑɑlɑni ócwølli ɑ́ ‘Wë Yïënee.’ Yɑn yɑ Jwøng-ɑ Ácwɑ̈ɑ̈j, yɑ ɑ́kööb kinni, óbëëd e dɑ kwɑɑr Debïd men-ɑ óbëëdø ceth ɑ́ rɑ̈ɑ̈dh Isrɑil, o óbëëd e dɑ Kwɑrri Leebì møg-ɑ óbëëdø ceth gɑ ókwër ge gögg-ɑ yɑn, o ge nyi nëngi gen yɑn ki gënh-ɑ nyi rɑ̈b bëne, kí byëlø, kí gëdhh-ɑ kyeelø.” Yɑ ɑ́köbbi yi Jwøng-ɑ Ácwɑ̈ɑ̈j kinni, “Wø ɑ́nywɑ̈ɑ̈g ki kwøb wøki dicɑ̈ng geki wɑ̈r kinni nyi bï gen kì bøli kɑ̈jji bëëni gen ceth, o kwøbbɑni pɑ cuggi pɑ̈dø. Ki yuu-ɑ ni menɑni ceth, wø ɑ́nywɑ̈ɑ̈g ki kwøb wøki bɑ̈ngɑ Debïd, kinni óbëëd e dɑ kwɑre ceth men-ɑ óbëëd ɑ́ rɑ̈dh. O wø ɑ́nywɑ̈ɑ̈g ki kwøb wøki ókwër, Kwɑrri Leebì kinni ge óbëëdø gɑ bɑ̈nggɑ, o lwöbø menɑni bëne pɑ cuggi pɑ̈dø. Kwɑnni kwɑrri Debïd geki Kwɑrri Leebì ómed yi yɑn, kɑ ge ódhɑ̈lø kwɑnø yi ngenyi gen, ni kɑ̀ pɑ cuggi kyell geki ɑyejø kì thɑ̈ngi nɑɑm omelø ki kwɑnø.” Yɑ ɑ́köbbi yi Jwøng-ɑ Ácwɑ̈ɑ̈j kinni, “Nuti yood wun kinni ji okööbø i dɑ Isrɑil me wiy yɑn geki Yeudiyɑ̀, gen ɑ kɑ̈ll-ɑ ɑ́myeg yi yɑn ryeet? Codhe ɑdøøg gen be buyyi jiɑ, kɑ gï wiy gen ki ngɑ̈dhø gɑ pödhø. De yɑn, yɑ Jwøng-ɑ Ácwɑ̈ɑ̈j, yï wøn dɑ lwöbø wøki dicɑ̈ng geki wɑ̈r, o yɑ ɑ́rum ki muujø ki cigg møg-ɑ mïdhi mɑl geki piny. O ni kɑ̀ mïdhɑ møgɑk bënn, lwömɑ ki kwɑrri Yɑgob ómïdhi yi yɑn ceth, geki lwöm-ɑ kɑɑm wøn ki bɑ̈ngɑ Debïd. Yɑ ókɑ̈bbi kì gøl Debïd ki ngɑn-ɑ ójɑɑg kwɑrri Abrɑhɑm geki kwɑrri Isɑɑk kí Yɑgob. Pyëwɑ ólɑ̈ɑ̈m ki jiɑ, kɑ ge wëggɑ dönyø këti.” Jwøng-ɑ Ácwɑ̈ɑ̈j ɑ́kööb ki yɑn keny-ɑ ɑ́bëëd Yerusɑlem geki kɑ̈dd-ɑ bɑdhhe bɑ ɑtyeg yi liny Nebukɑdnesɑr rɑ̈ɑ̈dh Bɑbïlöniyɑ̀ geki lìnyi pödhh-ɑ jɑɑg yi en bënn. Kɑ yɑ köbbi yi Jwøng-ɑ Ácwɑ̈ɑ̈j Jwøøg Isrɑil i kedhɑ kɑ Dhedekiyɑ̀ rɑ̈ɑ̈dh Yeudiyɑ̀ köbbɑ kinni, “Yɑ Jwøng-ɑ Ácwɑ̈ɑ̈j, kɑɑldwøng men mëggɑ’ rɑ̈ɑ̈dh Bɑbïlöniyɑ̀, o gø rɑ̈be kinni tweet. Yï koo bodh; yï ómɑg kɑ yï muujii. Ólidh yi yïn ki wɑngí, kɑ wu okööbø ki en. Codhe, o yï kedhi Bɑbïlöniyɑ̀. Dhedekiyɑ̀ lïngí møg-ɑ kwøb yi yɑn kiperí, yï ko mɑg yi liny. Yï óthøw kɑ mër, o nɑ kɑ ɑ́rɑ̈bbi kweyyí ki bɑkur keny-ɑ ɑ́koony gen gɑ rɑ̈nhì, yï ókony-ɑ nøw ceth, kɑ yï rɑ̈bbi ki bɑkur. Yï óywøg yi gen ge cem-ɑ, ‘Rɑ̈ɑ̈dh wøn ɑ́thøw!’ Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Codhe, ɑmuujɑ wöödø Rɑ̈dh Dhedekiyɑ̀ kì Yerusɑlem, e Yerusɑlem bɑ ɑtyeg yi liny Bɑbïlöniyɑ̀. Lɑkic geki Adhekɑ̀, ɑ́bëëd gɑ ɑtyeg geki kɑ̈ddi dör møg-ɑ kyeelø kì Yeudiyɑ̀. Rɑ̈dh Dhedekiyɑ̀ ɑ́nywɑ̈ɑ̈g ki kwøb geki tyëng Yerusɑlem bënn, kinni gøøny bɑ̈ngg møg-ɑ bɑ tyëng Isrɑil ying gɑ cwøw wɑlɑ̀ mɑ̈nn, o bëëd e bong ngeti Isrɑil me yïe di bɑ̈ng mɑ ngeti Isrɑil. Kɑ ji oyïëyø bënn geki jɑggi gen kinni gøøny bɑ̈ngg-ɑ bɑ tyëng Isrɑil bënn, kɑ ge ko cigi dwøøg yij bɑ̈ɑ̈ngø. Ge ɑ́gøny gen kidyër, de rummi gen ɑ́wil yi gen këti, kɑ bɑ̈nggɑni dwøøg gen yij bɑ̈ɑ̈ngø. Codhe, kɑ Jwøng-ɑ Ácwɑ̈ɑ̈j, Jwøøg Isrɑil yɑ köbbe kinni i köbbɑ tyëng Isrɑil kinni, “Wø ɑ́lwööb ki kweyyi wun keny-ɑ ɑ́kɑ̈ɑ̈lɑ gen wɑ̈g kì Rïp, kɑ ge göönyɑ wɑ̈g kì yij bɑ̈ɑ̈ngø. Ge ɑ́köbbɑ kinni, nyi gøøny bɑ̈ng-ɑ bɑ ngeti Isrɑil men-ɑ ɑ́rum ki gwøg ki gwøøg bɑ̈ɑ̈ngø kì bïryeew runn, e rum gwøg ki runn ɑ́bïkyel. De kwøbbɑ nuti ywöörø yi kweyyi wun, wɑlɑ̀ møg-ɑ ɑ́kwøbɑ nuti lïngi gen. Dɑ́ yethi cyɑ̈ngg-ɑ ɑ́pöödh ɑ ɑ́wil wun rummi wun, kɑ wu ogöögø ki gïjø mɑ ɑ́mïni pyëwɑ. Wu ɑ́yïëy wu bënn ki gønyi wɑddi wun, tyëng Isrɑil kì yij bɑ̈ɑ̈ngø. Møgɑni ɑ́nywɑg yi wun kì bølɑ, kì yij Keng-ɑ mɑlli yɑn. De rummi wun ɑ́cigi wilø yi wun, kɑ yɑ ocögø yɑ pɑ wør yi wun. Bɑ̈ngg-ɑ ɑ́gøny yi wun bënn, ge ɑ́dwøøg wun yij bɑ̈ɑ̈ngø. Anɑn yɑ ceg-ɑ kwøb kinni dhøgɑ ɑ́pyem yi wun, yɑ Jwøng-ɑ Ácwɑ̈ɑ̈j, kɑ wɑddi wun, tyëng Isrɑil bɑny yi wun ki gööny wɑ̈g kì yij bɑ̈ɑ̈ngø. Døj, wu mëggɑ nɑ̈gø yi liny, kí rɑ̈ɑ̈m dëllì kí kɑ̈j, jurri kömi piny óbëëd wɑ̈thi gen otïgø yi gïn-ɑ ógöggɑ wun. Ge cïbɑ’ cinggi tyëngmɑ̈ɑ̈nø, møg-ɑ dwɑddi nɑ̈gi gen, ge ónɑ̈g kɑ ge cɑm yi winy geki lɑ̈yyi pɑ̈l. Rɑ̈dh Dhedekiyɑ̀, rɑ̈ɑ̈dh Yeudiyɑ̀ geki jyɑ̈gge, ge mëggɑ’ tyëng-ɑ dwɑddi nɑ̈gi gen thyew. Ge ócïbɑ cingi liny Bɑbïlöniyɑ̀, eni tyëg men-ɑ ɑ́wiy wun ki tyegø. Ge ódøøgɑ’ cwölø, o ge dwöög gen kɑɑl men. Ótyeg yi gen, o gø mɑg gen, o gø rɑ̈b gen ki mɑc kinni tweet. Kɑ̈ddi Yeudiyɑ̀ ógwøg yi yɑn ge nɑ ryɑng, keny yije pɑ bëëd. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Yɑ ɑ́köbbi yi Jwøng-ɑ Ácwɑ̈ɑ̈j kì bøli keny-ɑ ɑ́bëëd Yöyɑkim wɑ̈d Yöciyɑ̀ bɑ rɑ̈ɑ̈dh Yeudiyɑ̀ kinni, “Kedhí be kwøb ki tyëng gøl Rekɑb. Kɑ ge kɑ̈ɑ̈l ød ɑ́kyel kì kelli udd-ɑ bɑdhhi Kengø, kɑ ge thödhí ki møgi oløg.” Codhe, ɑ́kwɑnyɑ jø gøl Rekɑb, ɑ løg Yɑdhɑniyɑ̀ wɑ̈d Abɑdhiniyɑ̀, en kí nyiimen kí wɑ̈ddi gen. Kɑ ge kɑ̈ɑ̈lɑ Kengø. Kɑ ge kïdhɑ øn-ɑ yije nyi bëëd yi jøbɑng jɑltöng Aɑnɑn wɑ̈d Igdɑliyɑ̀. Ønɑnì ying-ɑ mɑl kì kömi øn-ɑ yije bëëd yi Mɑɑseiyɑ̀ wɑ̈d Cɑlum, jɑlɑni bɑ jɑgø me pere teg kì Kengø, o ønɑni cyɑ̈gi ki uddi jɑgg-ɑ kyeelø. Codhe, kɑ gøl Rekɑb muujɑ ki møgi oløg kì yethi löd, kɑ ge muujɑ ki ɑ́ludhhì, ɑköbbɑ gen kinni, “Mɑ̈dhi wun ki møgi oløg.” De ge ɑ́löggi kinni, “Kweyi wøn, Yönɑdɑb wɑ̈d Rekɑb, ɑ́kyëëd i wø ko mɑ̈ɑ̈dh wøki kwɑrri wøn ki møgi oløg. Wø ɑ́kyëdde thyew kinni i wø ko gëëd ki ud, wɑlɑ̀ wø ko pur ki pwödh, kɑ wø ko pïïdh ki bɑ̈ggi oløg, kɑ wø ko ngëëw ki gen. Wø ɑ́ceg yi en thyew i bëëd wøn kì yethi kemmì ceth, kipe kinni o wø óbëëd wøn kì piny men, wø nɑ wëdhh. Cigg-ɑ ɑ́mëggi wøn yi Yönɑdɑb bënn omïdhø yi wøn. Wø nuti pɑ̈nyi mɑ̈dhø ki møgi oløg wøki mɑ̈nni wøn, kí wɑ̈ddi wøn kí nyigi wøn. Dɑ́ keny-ɑ ɑ́bëën Rɑ̈dh Nebukɑdnesɑr be mɑgi pödhø, ɑ ɑ́bëën wøn be bëëdø kì Yerusɑlem, wø bwøg-ɑ liny Bɑbïlöniyɑ̀ geki liny Arɑm. Bene ɑ bɑnge bëëd wøn kì Yerusɑlem.” Yönɑdɑb cigge omïdhø yi kwɑrre, o ge ɑ́cög ge pɑ mɑ̈dhø ki møgi oløg, bong ngɑn mɑ ɑ́pɑ̈nyi mɑ̈dhø ki møgi oløg kì kelli gen gïti dicyɑ̈ngtïn. De yɑ ceg-ɑ kwøb ki wun ki dhøggi bɑ̈nggɑ jøtöng, o kwøbbɑ nuti lïngi wun. Yɑ nuti wïyø ki ödi wun ki bɑ̈nggɑ jøtöng, o wu nyii köbbø yi gen kinni wiyu bëën-ɑ rɑj, kɑ wu døøg wun be gøggi dyër. Wu ɑ́kyëddi yi gen kinni wu ko nyi kedhi be mɑlli jwögg møøgø, kipe kinni o wu óbëëd wun ceth kì yij piny-ɑ ɑ́mëggɑ wun, wuki kweyyi wun. De kwøbbɑ nuti lïngi wun, wɑlɑ̀ møg-ɑ cïgɑ wun pɑ lïngi yi wun. Kwɑrri Yönɑdɑb ciggi kweyi gen ɑ́mïdhi yi gen; de men-ɑ́ wun, kwøbbɑ nuti lïngi wun, O ɑnɑn wu tyëng Yeudiyɑ̀ kí tyëng-ɑ bëëdø kì Yerusɑlem, ryɑ̈ng-ɑ ɑ́kwøb yi yɑn, yɑ Jwøng-ɑ Ácwɑ̈ɑ̈j, Jwøøg Isrɑil kɑ̈ɑ̈lɑ’ kömi wun. Møgɑni gwøgɑ’ gwøgø, mɑ́ wu nuti lïngø, keny-ɑ ɑ́köbbɑ wun, o wu nuti yïëyø keny-ɑ ɑ́cwølɑ wun.” Codhe, ɑköbbɑ jø gøl Rekɑb kinni, Jwøng-ɑ Ácwɑ̈ɑ̈j, Jwøøg Isrɑil ɑ́kööb kinni, “Wu ɑ́mïdh-ɑ møgɑ ɑ́cïgi wun yi Yönɑdɑb kweyi wun, kɑ gïg-ɑ ɑ́cïge wun mïdhi yi wun kidøøj. Kì bɑng menɑni, yɑn yɑ Jwøng-ɑ Ácwɑ̈ɑ̈j, Jwøøg Isrɑil, yɑ kwøb-ɑ kinni, Yönɑdɑb wɑ̈d Rekɑb yïe ócög e dɑ kwɑre mɑ jɑlø men göggi yɑn ceth.” Kì ngween runni Rɑ̈dh Yöyɑkim kì yij lɑwø, ɑ ɑ́köbbi yɑn yi Jwøng-ɑ Ácwɑ̈ɑ̈j kinni, “Yɑ̈ɑ̈b ki wɑ̈nyø, kɑ møg-ɑ ɑ́köbbɑ yïn bënn kì ri Isrɑil kí Yeudiyɑ̀ geki pödhh-ɑ kyeelø gweed yije. Gwed møg-ɑ ɑ́köbbɑ yïn bënn kër-ɑ ɑ́cɑ̈gɑ ki kwøb ki yïn, keny-ɑ ɑ́bëëde ɑ́ Yöciyɑ̀ ɑ bɑ rɑ̈dh gïti dicyɑ̈ngtïn. Men-ɑ ólïng tyëng Yeudiyɑ̀ ki kwøbbi ryɑ̈ng-ɑ dwɑddɑ kɑ̈ɑ̈l kömi gen, kɑ ge óyewø, kɑ ge ówïyø gwøg ki rɑj. Codhe o pyëwɑ ólɑ̈ɑ̈me ki gen, o orøøg gen lɑ̈ɑ̈ny yi yɑn.” Codhe, ɑcwølɑ Bɑruk wɑ̈d Neriyɑ̀, kɑ köbbɑ kinni gwede møg-ɑ ɑ́köbbi yɑn yi Jwøng-ɑ Ácwɑ̈ɑ̈j ge bënn. Codhe, ɑgweed gen yij wɑ̈nyø yi Bɑruk. Acegɑ Bɑruk kinni, “Yɑ pɑth ki ɑyïëy këti ki kedhi yij Kengø. De yɑ dwɑdd-ɑ yïn o yï ókedhi Kengø kì cyɑ̈ɑ̈ng twöni rek ki gïncɑm. Kɑ wɑ̈nyɑni rɑɑng ki cwɑg mø døngø, o møg-ɑ ɑ́köbbi yɑn yi Jwøng-ɑ Ácwɑ̈ɑ̈j, ɑ ɑ́gweed yij wɑ̈nyɑni yi yïn, lïngi yi gen. Rɑɑng kì keny me lïngi møgɑni yi teedø bëne geki tyëng-ɑ kɑ̈ɑ̈l kɑ̈ddi Yeudiyɑ̀ møg-ɑ kyeelø. Men-ɑ ólïngi gen kwøbbi Jwøng-ɑ Ácwɑ̈ɑ̈j, kɑ ge ówïyø bëën-ɑ rɑj, kɑ ge ywøøg-ɑ kö Jwøng-ɑ Ácwɑ̈ɑ̈j, mɑ́ Jwøng-ɑ Ácwɑ̈ɑ̈j ɑ́kööb kinni gï ócɑye ki rɑ̈ji pyëwe.” Codhe, kɑ kwøbbi Jwøng-ɑ Ácwɑ̈ɑ̈j rɑng yi Bɑruk kì Kengø ni kɑ ɑ́köbbɑ en ceth. Kì bïngween dwɑ̈tt, kì bïïj runni Rɑ̈dh Yöyɑkim rɑ̈ɑ̈dh Yeudiyɑ̀ kì yij lɑwø, teedø ri gen ɑ́twöön gen ki gïncɑm, men-ɑ ólɑ̈ɑ̈m pyëw Jwøng-ɑ Ácwɑ̈ɑ̈j. Tyëng-ɑ bëëdø kì Yerusɑlem bënn geki tyëng-ɑ ɑ́kɑ̈ɑ̈l kɑ̈ddi Yeudiyɑ̀ møg-ɑ kyeelø Kɑ møg-ɑ ɑ́kwøb yi yɑn rɑng yi Bɑruk, teedø olïngø bënn. Árɑ̈ɑ̈ng e ying-ɑ Kengø kì øn-ɑ bëëd yi Gemɑriyɑ̀ wɑ̈d Cɑpɑn, jɑngi burø, øde ying-ɑ mɑl e nenn-ɑ dhø Kengø dhøng-ɑ nyɑ̈n. Mikɑiyɑ̀ wɑ̈d Gemɑriyɑ̀ wɑ̈d Cɑpɑn kwøbbi Jwøng-ɑ Ácwɑ̈ɑ̈j ɑ́lïnge kì yij wɑ̈nyɑni. Codhe, ɑkedhe gøldwøng, kɑ pödh-ɑ ódɑ̈ri burø keny-ɑ cugi yi jɑgg bënn. Jɑng-ɑ dwøng Elicɑmɑ̀ ɑ́bëëd e nud kì kenyɑni geki jɑgg-ɑ kyeelø, ɑ løg Delɑiyɑ̀ wɑ̈d Cemɑiyɑ̀, kí Elnɑthɑn wɑ̈d Akbör, kí Gemɑriyɑ̀ wɑ̈d Cɑpɑn, kí Dhedekiyɑ̀ wɑ̈d Anɑniyɑ̀, kí pëjj-ɑ kyeelø bënn møg-ɑ ɑ́bëëd ge nud kì kenyɑni. Ge ɑ́köbbi yi Mikɑiyɑ̀ ki møg-ɑ ɑ́lïnge bënn, ge rɑ̈ng-ɑ ji yi Bɑruk. Codhe, ɑör Yeudì (wɑ̈d Nethɑniyɑ̀ wɑ̈d Celemiyɑ̀, wɑ̈d Kuc) be köbbi Bɑruk kinni kɑ̈ɑ̈le wɑ̈ny-ɑ ɑ́rɑ̈nge teedø. Kɑ wɑ̈nyɑni kɑ̈ɑ̈l yi Bɑruk. Kɑ Bɑruk köbbi yi jɑgg kinni, “Pëggí piny, kɑ wɑ̈nyɑni rɑ̈ngí wøn.” Codhe, ɑrɑ̈ngii gen yi Bɑruk. Keny-ɑ ɑ́rume rɑ̈ngi gen yi Bɑruk, ɑlïïdh gen nyingi gen, kɑ ge okööbø kinni, “Møg ceg kɑ köbbi rɑ̈dh yi wɑ.” Apyëjii yi gen kinni, “Köbbí wøn, gïg bënn ɑ́gwed-ɑ dï yi yïn? Yï ɑ́köbb-ɑ yi Jermɑyɑ̀?” Alöggi Bɑruk kinni, “Jermɑyɑ̀ nyi ceg-ɑ kwøb, o gïn-ɑ kwøb yi en nyi gweedɑ yij wɑ̈nyø.” Codhe ɑköbbii yi gen kinni, “Kedhu be pɑ̈nnø wuki Jermɑyɑ̀. Kɑ kej wun ko wëggu yodø yi dhɑnhø megø.” Kɑ wɑ̈nyɑni cïb ød Elicɑmɑ̀ jɑngi buri jɑgg, codhe ɑkedhi gen buri rɑ̈dh, kɑ møgɑni dwøg yi gen bënn. Codhe, ɑör Yeudì be dwɑɑyi wɑ̈nyɑni yi rɑ̈dh. Akwɑɑny wɑ̈nyɑni kì ød Elicɑmɑ̀ yi Yeudì kɑ gø rɑ̈nge rɑ̈dh geki jɑgg-ɑ bute. Piny ɑ́bëëd ɑ́ wuudø, o rɑ̈dh bëëd ɑ øn-ɑ nyi bëëde kì wuudø e oröjø ki mɑc. Ri rumi Yeudì ki rɑngi lwøbb ɑ́dɑ̈g wɑlɑ̀ ɑ́ngwen kinni ceth, kɑ lwøbbɑni ngøl yi rɑ̈dh ki pɑlø, kɑ gï leenge mɑc. Kɑ nyi cig-ɑ ngudø ki lwøbb-ɑ nyi rum ki rɑngø, gïti kɑ ɑ́tyëge wɑ̈nyø ki rɑ̈bø. De rɑ̈dh geki jyɑ̈ggì dëlli gen nuti juurø yi møg-ɑ ɑ́rɑng. Rɑ̈dh ɑ́kwɑjji yi Elnɑthɑn, kí Delɑiyɑ̀, kí Gemɑriyɑ̀ kinni wɑ̈nyɑni ko rɑ̈b yi en, de rɑ̈dh nuti yïëyø. Codhe, ɑköbbi nyirɑ̈dh Yerɑmel kí Serɑiyɑ̀ wɑ̈d Adhriel, kí Celemiyɑ̀ wɑ̈d Abdiil i mɑg gen yɑn wøki Bɑruk. De wø ɑ́kɑn yi Jwøng-ɑ Ácwɑ̈ɑ̈j. Keny-ɑ ɑ́rum wɑ̈ny-ɑ ɑ́köbbɑ Bɑruk o gø gweede dhøgɑ ki rɑ̈bø yi Rɑ̈dh Yöyɑkim, ɑköbbi yɑn yi Jwøng-ɑ Ácwɑ̈ɑ̈j kinni, i kɑ̈bbɑ ki wɑ̈nyø megø, kɑ møg-ɑ ɑ́ying yij wɑ̈nyi tyeli mɑl gweedɑ yije bënn. Yɑ ɑ́köbbi yi Jwøng-ɑ Ácwɑ̈ɑ̈j i köbbɑ rɑ̈dh kinni, “Wɑ̈nyø ɑ́rɑ̈b yi yïn, yi okööbø i ede Jermɑyɑ̀ ɑ gwëde kinni rɑ̈ɑ̈dh Bɑbïlöniyɑ̀ óbï kɑ pönhï rënye, kɑ ji geki lɑ̈yy nɑ̈ge. O ɑnɑn yɑn yɑ Jwøng-ɑ Ácwɑ̈ɑ̈j, yɑ köbb-ɑ yïn, yïn ɑ Yöyɑkim kinni, bong kwɑrí men-ɑ ópëggi wïj kwøøm Debïd, keny-ɑ óthøw yï óceg kɑ ywɑɑj pɑ̈l, o kömí ryeer yi cɑ̈ng kì dicɑ̈ng, o kömí nyi dëëm yi ɑ́piy kì wɑ̈r. Yï ócɑy yi yɑn wuki kwɑrrí kí jyɑ̈ggí kipe orøng-ɑ ɑ́gwøg yi wun. Møg-ɑ ɑ́köbbɑ wun, wuki tyëng Yerusɑlem kí tyëng Yeudiyɑ̀ bënn nuti lïngø yi wun. Ryɑ̈ng-ɑ ɑ́kwøb yi yɑn bï-ɑ kömi wun ceth, mɑ́ møg-ɑ ɑ́köbbɑ wun nuti lïngi wun.” Codhe ɑkɑ̈bbɑ ki wɑ̈nyø megø, kɑ mëggɑ Bɑruk bødhi gwed, kɑ møg-ɑ ɑ́köbbɑ en kì yij wɑ̈nyi tyeli mɑl bënn gweede yij wɑ̈nyɑni ge pɑ̈r ceth. Kɑ Dhedekiyɑ̀ wɑ̈d Yöciyɑ̀ gwøg ɑ́ rɑ̈dh yi Rɑ̈dh Nebukɑdnesɑr, rɑ̈ɑ̈dh Bɑbïlöniyɑ̀, o jɑɑge Yeudiyɑ̀ e røøny-ɑ kej Yöyɑkin wɑ̈d Yöyɑkim. De wööni Jwøng-ɑ Ácwɑ̈ɑ̈j men-ɑ ɑ́muujɑ nuti lïngø yi Dhedekiyɑ̀, geki jyɑ̈gge kí teedø. Kɑ yɑ öri Yökɑl wɑ̈d Celemiyɑ̀ geki ókwërø Dhepɑniyɑ̀ wɑ̈d Mɑɑseiyɑ̀ yi Rɑ̈dh Dhedekiyɑ̀, kinni o yɑ kwɑjji yi gen, kinni kwɑjjɑ Jwøng-ɑ Ácwɑ̈ɑ̈j kipe pödhi wøn. Yɑ ɑ́bëëd yɑ nuti kïdhi ød mɑg kì bøli kenyɑni, o yɑ ɑ́bëëd yɑ ócyɑ̈dhø kì kelli ji. Yerusɑlem ɑ́bëëd ɑ́ ɑtyeg yi liny Bɑbïlöniyɑ̀, de keny-ɑ ɑ́lïng gen kinni i liny Rïp obëënø, ɑwiy gen kɑɑl, kɑ ge odøøgø. Codhe, ɑköbbi yɑn yi Jwøng-ɑ Ácwɑ̈ɑ̈j, Jwøøg Isrɑil kinni, i köbbɑ Dhedekiyɑ̀ kinni, “Liny Rïp bï-ɑ be kønyi yïn, de ódøøg pödhe. Kɑ tyëng Bɑbïlöniyɑ̀ ódwöögø, kɑ kɑɑl tyeg yi gen, kɑ gø mɑg gen, kɑ gø rɑ̈b gen. Yɑ Jwøng-ɑ Ácwɑ̈ɑ̈j, yɑ köbb-ɑ wun kinni wu ko rum kinni tyëng Bɑbïlöniyɑ̀ pɑ dwöög, mɑ́ ge ódwöög ceth. Cɑgg liny Bɑbïlöniyɑ̀ tyɑm yi wun bëne, kɑ̀ bødh ji-ɑ ri gen di kedd, ge obuddø kì yethi kemmi gen, jøgɑni bɑ møg dhwödh ceth, kɑ kɑɑl men rɑ̈b yi gen kinni tweet.” Liny Bɑbïlöniyɑ̀ ɑ́døøg kì Yerusɑlem, mɑ́ liny Rïp obëënø. Codhe, ɑdhwödhɑ kì Yerusɑlem, yɑ kedh-ɑ myërri gøl Ben Yɑmïn, be kwɑnyi gïg-ɑ bɑ møgɑ kì ri jɑmmi gøl wøn. De keny-ɑ ɑ́wɑ̈dhɑ Dhøg Ben Yɑmïn, ɑjoog yɑn yi pënyi liny men-ɑ kor dhøngɑni me nyinge cwøl ɑ́ Iriyɑ̀ wɑ̈d Celemiyɑ̀ wɑ̈d Anɑniyɑ̀; ɑ́kööb kinni, “Yï kedh-ɑ be rëbø ki tyëng Bɑbïlöniyɑ̀!” Alöggɑ kinni, “Pɑth! Yɑ pɑ kedhi be rëbø ki gen!” De kwøbbɑ nuti yïëyø yi Iriyɑ̀, ɑmɑge yɑn kɑ yɑ muuje jɑgg. Kɑ pëthi gen órënyø ki mendwøng ki yɑn, ɑkööb gen i pwööd yɑn, kɑ yɑ dij ød kì gøl Yönɑthɑn, jɑngi burø, e gøle rumø’ løg ød mɑg. Yɑ ɑ́kïdhi ød piny, kɑ yɑ mïdhi kì yije ki keny me bɑ̈ɑ̈r. Kɑ yɑ cwööl gøldwøng yi Rɑ̈dh Dhedekiyɑ̀ e piny kɑ̈ɑ̈l kun, ɑpyëje yɑn kì gød kinni, “Dɑ wöödø me kɑ̈ɑ̈l yï Jwøng-ɑ Ácwɑ̈ɑ̈j?” Alöggɑ kinni, “Ngee nud!” Kedh yɑ okööbø kinni, “Yï ómɑg, kɑ yï muuj rɑ̈ɑ̈dh Bɑbïlöniyɑ̀?” Kɑ pyëjɑ kinni, “Á ngø ɑ rɑj, ɑ ɑ́göggɑ yïn, wuki jyɑ̈ggí kí tyëng pönhï, ɑ pere mɑɑg yɑn? Á ngø ɑ ɑ́cwöb kipe jøtöng møgí, møg-ɑ ɑ́köbbi yïn i rɑ̈ɑ̈dh Bɑbïlöniyɑ̀ koo bï be nyɑɑg ki yïn, wɑlɑ̀ ge koo bï pönhï? O ɑnɑn, yɑ kwɑjj-ɑ yïn wuö, kɑ gïn-ɑ kwɑjj-ɑ göggi yɑn. Yɑ ko dwøøg ød mɑg men-ɑ gøl Yönɑthɑn. Ke dwøøg yɑn, yɑ bɑ men thøw kì kunɑni!” Codhe, ɑmuuj Rɑ̈dh Dhedekiyɑ̀ ki cigg kinni i dij yɑn yij ódɑ̈ri gøldwøng. Yɑ ɑ́bëëd kì kenyɑni, kɑ yɑ nyi muuj ki ópun men nyi cɑm yi yɑn yethi cyɑ̈ng, gïti kɑ ɑ́thumi gïgcɑmm kì kɑɑldwøng. Kɑ Cepɑtiyɑ̀ wɑ̈d Mɑtɑn, geki Gedɑliyɑ̀ wɑ̈d Pɑcur, kí Yökɑl wɑ̈d Celemiyɑ̀, kí Pɑcur wɑ̈d Mɑlkiyɑ̀ ge olïngø i ji köbbi yɑn kinni, Jwøng-ɑ Ácwɑ̈ɑ̈j ɑ́kööb kinni, “Ngɑn-ɑ óbëëdø kì kɑɑl keny ónɑ̈g yi liny, wɑlɑ̀ óthøw yi kɑ̈j, wɑlɑ̀ ónɑ̈g yi rɑ̈ɑ̈m dël. De tyëng-ɑ ókedhi be yömmi yï tyëng Bɑbïlöniyɑ̀ wëyi gen óyiel yi gen.” Yɑ ɑ́bëëd yɑ köbb-ɑ gen kinni, Jwøng-ɑ Ácwɑ̈ɑ̈j ɑ́kööb kinni, “Kɑɑl men mëgg-ɑ tyëng Bɑbïlöniyɑ̀, o gø mɑg gen.” Codhe, ɑkedhi jɑggɑni yï rɑ̈dh kɑ gø köbbi gen kinni, “Nɑ̈ɑ̈g jɑlɑni. Jøliny pëthi gen ceg-ɑ nyönhø yi møg-ɑ kømmi yi en, o tyëng-ɑ bëëdø kì kɑɑl keny nyi köbbe’ møgɑni. Pɑ dwɑddi cïji ji, de dwɑdd-ɑ kinni o pëthi gen nyönhi gen.’ ” Alöggi Rɑ̈dh Dhedekiyɑ̀ kinni, “Døj, kwɑny wun en, kɑ göggu gïn-ɑ dwɑddi yi wun. Wu pɑ cuggi jogø yi yɑn.” Codhe, ɑkwɑny gen yɑn, kɑ yɑ luudh gen yij yith me dwönø ki thøll. Yiinhɑni bɑ mi Nyirɑ̈dh Mɑlkiyɑ̀, ying-ɑ ódɑ̈ri burø. Bong pï kì yije, kɑ yɑ ceg-ɑ niyeeng yij ɑ́bubudh. Kɑ Ebedmelek, jɑl Kuc, ɑ bɑ órøny-ɑ göögø kì gøldwøng olïngø kinni i yɑ óluudh yij yith. Rɑ̈dh ɑ́bëëd e ying-ɑ burø kì Dhøg Ben Yɑmïn. Kɑ Ebedmelek kedh-ɑ kunɑni, ɑköbbe rɑ̈dh kinni, “Jøgɑni ɑ́göög ki gïjø me rɑɑj wuö. Jermɑyɑ̀ ɑ́luudh gen yij yith kun thøwe yi kɑ̈j, e men-ɑ́ bong gïgcɑmm kì kɑɑl.” Aköbbi Ebedmelek yi rɑ̈dh kinni kɑ̈bbe ki jøg ɑ́dɑ̈g, kɑ yɑ mïïd gen wɑ̈g kì yij yith kɑ̈ng-ɑ nuti thøw yɑn. Codhe, ɑkedh Ebedmelek geki jøg ɑ́dɑ̈g, kɑ ge kedh-ɑ øn-ɑ nyi mïdhi jɑmmì kì gøldwøng, kɑ ge ókɑ̈bbø ki kwɑ̈lli ógudh. Kɑ gï luudh gen piny ki thøl. Kɑ yɑ köbbe i cïbɑ ógudhɑni nyingi ywödhhɑ, kipe yɑ óbwödh yi thøll. Kɑ ge cïbɑ, ɑmïïd gen yɑn wɑ̈g kì yij yiinhɑni. Codhe, ɑmïdhi yɑn kì ódɑ̈ri burø. Kɑ rɑ̈dh oödø, ɑkɑ̈ɑ̈l Jermɑyɑ̀ yïe, e bëëd ɑ dɑ̈ɑ̈g dhøggi gøl Kengø, e kete. Aköbbi Jermɑyɑ̀ yi rɑ̈dh kinni, “Yɑ pyëj-ɑ yïn, kɑ ko di gïn kɑ̈nní yɑn.” Alöggɑ kinni, “Ke köbbɑ yïn dyër, yɑ ceg kɑ nɑ̈gø yi yïn. O ke köbbɑ yïn gïn-ɑ dwɑddi gwøgø, pɑ gwøg yi yïn.” Codhe, kɑ yɑ köbbi yi Rɑ̈dh Dhedekiyɑ̀ kì gød kinni, “Yɑn ɑ köngi èn ki nyingi Jwøng-ɑ Nëënø, Jwøng-ɑ thödhi wɑ ki wëy, kinni yï pɑ nɑ̈g yi yɑn, wɑlɑ̀ yï pɑ cïbɑ cinggi tyëng-ɑ dwɑddi nɑ̈gi yïn.” Codhe, ɑköbbɑ Dhedekiyɑ̀ kinni, Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil ɑ́kööb kinni, “Keløg yï yömm-ɑ yï jɑggi liny Bɑbïlöniyɑ̀, wëyí óyiel, kɑ kɑɑl men ocögø e pɑ rɑ̈b. Yï óyiel wuki gølí. De keløg yï pɑ yömmi, kɑɑl men cïb-ɑ cinggi tyëng Bɑbïlöniyɑ̀, o gø rɑ̈b gen, o yï pɑ bodh kì cinggi gen.” De rɑ̈dh ɑ́löggi kinni, “Yɑ óböggø yï tyëng pödhee møg-ɑ ɑ́yömmi yï tyëng Bɑbïlöniyɑ̀. Yɑ ócuggø cïb cinggi gen, kɑ yɑ göggi gen ki gïnrɑj.” Akööbɑ kinni, “Yï pɑ cïb cinggi gen. Yɑ kwɑjj-ɑ yïn, yïëy wööni Jwøk, o óbëëd e bong gïn nywɑl yïn, o yï bødh. De yɑ ɑ́nyudhi yi Jwøng-ɑ Ácwɑ̈ɑ̈j ki gïn-ɑ ócwöb e nɑ lɑ̈g, keløg yï óbɑ̈nyi ki yömmø. Kì yethi møgɑni, yɑ ɑ́lidh-ɑ tyëng-ɑ mɑ̈nn ge bï-ɑ wɑ̈g kì gøldwøng, ge okwøllø yi jɑggi liny Bɑbïlöniyɑ̀. Lïngí møg-ɑ ɑ́kømmi yi gen; ge ɑ́cyɑ̈dhi ge okööbø kinni, ‘Rɑ̈dh ɑ́wëny yi mɑ̈dhhe, kɑ rumme wil yi gen. De ɑ́wiy piny yi gen kɑ ɑ́niyeeng tyelle yij ɑ́bubudh.’ ” Codhe, ɑköbbɑ en thyew kinni, “Mɑ̈nní ókɑ̈l geki nyigí bënn, kɑ ge muuj tyëng Bɑbïlöniyɑ̀, o men-ɑ́ yï pɑ bodh kì cinggi gen. Yï ókɑ̈l yï bɑ ɑmɑg yi rɑ̈ɑ̈dh Bɑbïlöniyɑ̀, o kɑɑl men órɑ̈b ki mɑc kinni tweet.” Alöggi Dhedekiyɑ̀ kinni, “Møg-ɑ kømmi yi wɑ ek, ko wëggí yodø yi dhɑnhø megø, o yï cöög yi pɑ thøw. Keløg jɑggi liny olïngø kinni i wɑ kööbø, ge ceg-ɑ bëën be pyëji yïn ki møg-ɑ ɑ́kømmi yi wɑ. Kɑ yï köbbi yi gen kinni yï pɑ nɑ̈g yi gen keløg ge óköbbí dyër. Köbbí gen kinni yï ɑ́kwɑjj-ɑ yɑn kinni yï ko dwøøg ød mɑg kun thøw yi yïn.” Codhe, kɑ jɑggi liny bënn bï-ɑ yïɑ kɑ yɑ pyënyi gen, ɑköbbɑ gen møg-ɑ ɑ́kwøb yi rɑ̈dh i kwøbɑ gen. Bong gïjø mɑ ɑ́gwøg yi gen, kipe bong ngɑn megø mɑ ɑ́lïngi møg-ɑ ɑ́kømmi yi wøki rɑ̈dh. Kɑ yɑ mïdhi yɑn ɑ́ ɑmɑg kì ódɑ̈ri gøldwøng gïti kɑ ɑ́mɑɑg kɑɑldwøng, Yerusɑlem. Kɑ Rɑ̈dh Nebukɑdnesɑr, rɑ̈ɑ̈dh Bɑbïlöniyɑ̀ obëënø ki linye bëne, kɑ Yerusɑlem tyege, kì pyɑ̈ri dwɑ̈tt, e runni Dhedekiyɑ̀ rɑ̈ɑ̈dh Yeudiyɑ̀ bɑ ɑ́bïngwen kì yij lɑwø. Kɑ ge turr-ɑ kɑɑl, kì bïngween cyɑ̈nggi ngween dwɑ̈tt, e runni Dhedekiyɑ̀ bɑ pyɑ̈rø wïdɑ́kyel kì yij lɑwø. (Keny-ɑ ɑ́mɑɑg Yerusɑlem, jɑggi liny Bɑbïlöniyɑ̀ jɑgg-ɑ døngø gɑ ɑ́ngwen, ge ɑ́kedh kɑ ge pëgg-ɑ Dhøg Dïdyër; pëjjɑni bɑ Nergɑl kí Sɑredher, kí Cɑmgɑr Nebö, kí Sɑrsekïm, kí Nergɑl megø.) Rɑ̈dh Dhedekiyɑ̀ geki linye, keny-ɑ ɑ́lidh gen gïn-ɑ ɑ́cwöb, kɑ ge opɑ̈ɑ̈rø kì wɑ̈r. Ge ɑ́kɑ̈l-ɑ yij bɑɑg gøldwøng, ge kɑ̈l-ɑ dhøng-ɑ kɑɑm dör, ge kedh-ɑ kuni Töör Urdun. De jøliny Bɑbïlöniyɑ̀ ɑ́rengi bɑng gen, kɑ ge mɑg kì thwør-ɑ buti Yerikö. Codhe, ɑkïdhii bøli Nebukɑdnesɑr, e ying-ɑ Riblɑ̀ kì myërri Amɑth. Kɑ cɑ́ye kwøb yi Nebukɑdnesɑr kì kunɑni. Wɑ̈ddi Dhedekiyɑ̀ ɑ́nɑ̈ge ge onennø yi Dhedekiyɑ̀, kɑ jɑggi Yeudiyɑ̀ nɑ̈ge thyew. Atøy nyingi Dhedekiyɑ̀ kɑ twöj ki ɑ́cwecwel, o køøl Bɑbïlöniyɑ̀. Kɑ gøldwøng rɑ̈b yi tyëng Bɑbïlöniyɑ̀, kí uddi teedø kɑ döri Yerusɑlem cøør piny. Codhe cyee, ɑkøøl tyëng-ɑ ɑ́döng kì Yerusɑlem geki tyëng-ɑ ɑ́yömmi yï Nebudhɑrɑdɑn gï køøle’ Bɑbïlöniyɑ̀. Áwïy ki tyëng-ɑ nyingi gen cɑn kì Yeudiyɑ̀, kɑ gï thödhe ki bɑ̈ggi oløg, kí pwödh. Kɑ Nebudhɑrɑdɑn, ɑ løg pënyi liny Bɑbïlöniyɑ̀ ceg yi Rɑ̈dh Nebukɑdnesɑr kinni, “Kedh, yɑb Jermɑyɑ̀, kɑ ko göggí ki gïjø me rɑɑj, de göggi gïn-ɑ ódwɑddi yi en.” Codhe, kɑ Nebudhɑrɑdɑn geki jɑgg-ɑ døngø ɑ løg Nebucɑdhbɑn, kí Nergɑl Sɑredher geki jyɑ̈ggi rɑ̈ɑ̈dh Bɑbïlöniyɑ̀ møøgø obëënø, kɑ yɑ kɑ̈ɑ̈l wɑ̈g yi gen kì ódɑ̈ri gøldwøng. Kɑ yɑ cïb gen cingi Gedɑliyɑ̀ wɑ̈d Akikɑm wɑ̈d Cɑpɑn, o yɑ køny yi en ki kwøbbi kedhi pɑɑ wøn. Codhe, ɑkedhɑ kɑ yɑ obëëdø kì kelli wɑddi wøn. Yɑ ɑ́köbbi yi Jwøng-ɑ Ácwɑ̈ɑ̈j keny-ɑ ɑ́nudd yɑ bɑ ɑmɑg kì ódɑ̈ri gøldwøng, i köbbɑ Ebedmelek jɑl Kuc kinni, Jwøng-ɑ Ácwɑ̈ɑ̈j, Jwøøg Isrɑil okööbø kinni, “Yɑ kɑ̈n-ɑ kömi kɑɑl men ki ryɑ̈g ni kɑ ɑ́kööbɑ ceth, pɑth ki døøjø ɑ kɑ̈ɑ̈lɑ, o møgɑni ólidh yi yïn ki wɑngí keny-ɑ ócwöb gen. De yï ókorri yi yɑn, yɑ Jwøng-ɑ Ácwɑ̈ɑ̈j, o yï koo cïb cinggi tyëng-ɑ böggi yi yïn Yï ómïdhɑ ki tɑrø, o yï pɑ nɑ̈g. Yï óbodh kɑ wëyí yiel, mɑ́ yɑ ɑ́gɑ̈nni yi yïn. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j ɑ́kööb ki yɑn keny-ɑ ɑ́rumɑ ki gønyø kì Rɑmɑ̀ yi Nebudhɑrɑdɑn pënyi liny Bɑbïlöniyɑ̀. Yɑ ɑ́kïdhi Rɑmɑ̀ cinggɑ bɑ ɑtwöj ki ɑ́cwecwel wøki tyëngmøøgø møg-ɑ ɑ́kɑ̈l kì Yerusɑlem geki Yeudiyɑ̀, ge kïdh-ɑ Bɑbïlöniyɑ̀ gɑ ɑmɑgg. Kɑ yɑ cwøøl wɑ̈yɑ yi pënyi liny, kɑ yɑ köbbe kinni, “Jwøng-ɑ Ácwɑ̈ɑ̈j Jwøgí, piny men ɑ́göjje ryɑ̈g. O ɑnɑn møgɑni ɑ́gwøg yi en. Gïgɑni ɑ́cwöb kɑ per kɑ ɑ́røngi ji kì bøli Jwøng-ɑ Ácwɑ̈ɑ̈j, kɑ kwøbbe ocögø gï pɑ lïngi yi gen. Yï ceg yi yɑn kɑ gønyø ɑnɑn, ɑ́cwecwel pɑ̈ɑ̈dɑ’ wɑ̈g kì cinggí. Keløg yï dwɑdd-ɑ kedhi Bɑbïlöniyɑ̀, wɑ ceg-ɑ kedhø, o yï ókor yi yɑn. De yï ceg-ɑ bëëdø keløg yï pɑ dwɑddi kedhø. Yï ócuggø bëëdø kì pönhï ni kɑ̀ dwɑddií.” Kɑ yɑ ocögø yɑ okudø, ɑkööb Nebudhɑrɑdɑn kinni, “Døøg yï Gedɑliyɑ̀ wɑ̈d Akikɑm, wɑ̈d Cɑpɑn jɑl-ɑ ɑ́gwøg ɑ́ jɑngi kɑ̈ddi Yeudiyɑ̀ yi rɑ̈ɑ̈dh Bɑbïlöniyɑ̀. Yï ócuggø bëëdø kì bute kì kelli ji wɑlɑ̀ yï ócuggø kedhi keny-ɑ dwɑddi yi yïn.” Codhe, kɑ yɑ thödhe ki gïi pwøj, kí gïgcɑmm, codhe ɑkedhɑ kì wɑ̈yɑ. Kɑ yɑ kedh-ɑ yï Gedɑliyɑ̀ kì Midhpɑ̀, ɑbëëdɑ kì bute kì kelli tyëng-ɑ ɑ́döng kì yij piny. Kɑ pëjji liny geki jøliny møg-ɑ ɑ́cög ge nuti yömmø, olïngø kinni i Gedɑliyɑ̀ ógwøgø ɑ́ jɑngi Yeudiyɑ̀ yi rɑ̈ɑ̈dh Bɑbïlöniyɑ̀, o jɑɑge ji-ɑ ɑ́döng ge nuti kïdhi Bɑbïlöniyɑ̀, ɑ løg tyëng-ɑ ɑbuur. Codhe, kɑ Icmɑil wɑ̈d Nethɑniyɑ̀, kí Yöɑnɑn wɑ̈d Kɑreɑ̀, kí Serɑiyɑ̀ wɑ̈d Tɑnumet, kí wɑ̈ddi Epɑy kì Netöpɑ̀, kí Yedhɑniyɑ̀ kì Mɑɑkɑ̀, ge kedh-ɑ yï Gedɑliyɑ̀ kì Midhpɑ̀ geki jø gen. Kɑ ge köbbi yi Gedɑliyɑ̀ kinni, “Wu ceg yi yɑn kɑ köbbø kinni wu ko böggi ki yömmi yï tyëng Bɑbïlöniyɑ̀. Pëggu piny kì pönhï, kɑ wu göggi wun rɑ̈ɑ̈dh Bɑbïlöniyɑ̀, o bëëd e bong gïn nywɑl wun. Yɑn kiriɑ, yɑ óbëëdø kì Midhpɑ̀, o yɑ óbëëdø yɑn ɑ́ kej dhøggi wun keny-ɑ óbëën tyëng Bɑbïlöniyɑ̀. O wu ócuggø lem ki nywøli oløg, kɑ wu ogöögø ki møgø, kɑ wu olïmø ki nywøli yenh, kí dhetun, kɑ wu obëëdø kì yethi myërr-ɑ ɑ́pëggi yi wun.” Kì bøli kenyɑni, kɑ tyëng Isrɑil møg-ɑ ɑ́ying Moɑb, kí Amön, kí Edöm olïngø kì pödhhɑni kinni, i Gedɑliyɑ̀ ógwøgø ɑ́ jɑngi tyëng-ɑ ɑ́wiy kì piny yi rɑ̈ɑ̈dh Bɑbïlöniyɑ̀ kì Yeudiyɑ̀. Kɑ ge odhwödhø kì kɑ̈jj-ɑ ɑ́tɑɑy yi gen, kɑ ge dwöög-ɑ Yeudiyɑ̀. Kɑ ge bï-ɑ yï Gedɑliyɑ̀ kì Midhpɑ̀ ge ókɑ̈ddø ki møgi oløg kí nywøli yenh mø gïïr. Codhe, kɑ Yöɑnɑn geki pëjji liny møg-ɑ ɑ́cög ge nuti yömmø, bï-ɑ yï Gedɑliyɑ̀ kì Midhpɑ̀. Kɑ gø köbbi gen kinni, “Kwïj yi yïn kinni Icmɑil ɑ́ör-ɑ be nɑ̈gi yïn yi Bɑɑlis rɑ̈ɑ̈dh Amön?” De Gedɑliyɑ̀ ɑ́cög møgɑni nuti yïëëy en. Codhe, ɑköbbii yi Yöɑnɑn ge ying-ɑ wɑ̈yi gen kinni, “Wiy yɑ kedh-ɑ be nɑ̈gi Icmɑil, o bong ngɑn-ɑ óyod ngɑn-ɑ nɑ̈ɑ̈gii. Á kipe ngø, ɑ wëggií nɑ̈gi yïn? Keløg yï onɑ̈gø, ji-ɑ ɑ́cugi kì butí pɑ ceg kedhhø bënn? O gïn ni menɑni pɑ kɑ̈ni kömi tyëng Yeudiyɑ̀ bënn ki ryɑ̈g?” De Gedɑliyɑ̀ ɑ́löggi kinni, “Ko nɑ̈ɑ̈g! Møg-ɑ kømmi yi yïn kì ree bɑ kwøbbi pyed!” Kì runɑni ceth, kì bïryeew dwɑ̈tt, kɑ Icmɑil wɑ̈d Nethɑniyɑ̀ wɑ̈d Elicɑmɑ̀, kì gøl rɑ̈ɑ̈dhø, o bɑ pënyi liny, kedh-ɑ Midhpɑ̀ be këëmi Gedɑliyɑ̀, e cyɑ̈dhi kɑ jøg mø kwɑnni gen bɑ pyɑ̈rø. Kɑ̈ng-ɑ ɑ́bëëd ge ocyɑ̈mø kì kej ɑ́kyel, kɑ Icmɑil geki jøge gɑ pyɑ̈rø, pilli gen wöödh gen wɑ̈g, kɑ Gedɑliyɑ̀ nɑ̈g gen. Tyëng Isrɑil møg-ɑ ɑ́bëëd kì Midhpɑ̀ kì buti Gedɑliyɑ̀, kí kwï jøliny Bɑbïlöniyɑ̀, ge ɑ́nɑ̈g bënn yi Icmɑil. Dhuki ji nuti lïngø ki kwøbbi nɑ̈gi Gedɑliyɑ̀, kɑ jøg mø kwɑnni gen bɑ pyɑ̈r ɑ́bïdɑ̈g obëënø ge kɑ̈ɑ̈l-ɑ Cekïm, kí Cilø, kí Sɑmɑriyɑ̀. Yëyyi tïggi gen lyeel gen, o ógudhi gen kɑggi gen, o dëlli gen kɑggi gen. Ge ɑ́kedh ge ókɑ̈ddø ki byel, kí bɑkur møg kïdhi Kengø. Codhe, kɑ ge rødh yi Icmɑil kì Midhpɑ̀, e cyɑ̈dhi e óywöngø. Kɑ gï köbbe kinni, “Yɑ kwɑjj-ɑ wun, bïu lidh wun Gedɑliyɑ̀.” Keny-ɑ ɑ́wɑ̈dhi gen kɑɑl ceth, ɑnɑ̈ɑ̈g gen yi Icmɑil geki jøge, kɑ gï leenge yij yith me thwøwø. De dɑ jøg mø kwɑnni gen bɑ pyɑ̈rø kì kelli gen mɑ ɑ́köbbi Icmɑil kinni, “Wø kwɑjj-ɑ yïn, wø ko nɑ̈ɑ̈g! Yï wøn dɑ gemè, kí ceir, kí møøw dhetun, kí møøw kïc mø bɑ ɑkɑnn kì yethi pwödh.” Kɑ gï wiye. Yiinh-ɑ́ yije ɑ́leeng tyëng-ɑ ɑ́nɑ̈g yi Icmɑil bɑ yith me yije lɑɑj, yiinhɑni ɑ́kony-ɑ yi Rɑ̈dh Asɑ̀ keny-ɑ ɑ́bëëd e bɑ ɑtyeg yi Bɑcɑ̀ rɑ̈ɑ̈dh Isrɑil. Yiinhɑni ɑ́pɑ̈ɑ̈ng yi Icmɑil ki tyëng-ɑ ɑ́nɑ̈g. Codhe, kɑ nyiirɑ̈dh kí tyëng-ɑ ɑ́wiy Midhpɑ̀ bënn yi Nebudhɑrɑdɑn, kì buti Gedɑliyɑ̀ mɑg yi Icmɑil. Kɑ gï køøle gɑ ɑmɑgg, gï køøle’ kuni myërri Amön. Kɑ Yöɑnɑn olïngø geki pëjji liny møg-ɑ cyɑ̈dhi ki en, ki orøng-ɑ ɑ́gwøg yi Icmɑil. Codhe, ɑrengi gen bɑnge, kɑ gø pïïd gen buti luy me dwøng kì Gibeon. Kɑ tyëng-ɑ bɑ ɑmɑgg pëthi gen ómïnø keny-ɑ ɑ́lidh gen Yöɑnɑn geki pëjji liny møg-ɑ cyɑ̈dhi ki en. Kɑ ri gen løg gen bënn, ɑrengi gen yï Yöɑnɑn geki jøg-ɑ cyɑ̈dhi ki en. De Icmɑil ki jøg mø kwɑnni gen bɑ ɑ́bïdɑ̈g, ge ɑ́bodh, kɑ ge wɑ̈dh-ɑ piny Amön. Kɑ ji-ɑ ɑ́kɑ̈ɑ̈l yi Icmɑil kì Midhpɑ̀ gɑ ɑmɑgg keny-ɑ ɑ́rume nɑ̈gi Gedɑliyɑ̀, kwɑny yi Yöɑnɑn geki pëjji liny møg-ɑ cyɑ̈dhi ki en, jiɑni bɑ jøliny, kí tyëng-ɑ mɑ̈nn, kí othønhø, kí órøj. Kɑ yïɑ bëën yi pëjji liny bënn kí Yöɑnɑn wɑ̈d Kɑreɑ̀ kì kelli gen, kí Adhɑriyɑ̀ wɑ̈d Kecɑiyɑ̀, kí wïj dhɑnhø bëne, ge ɑ́bï yïɑ, kɑ yɑ köbbi gen kinni, “Wø kwɑjj-ɑ yïn, kwɑjjí Jwøng-ɑ Ácwɑ̈ɑ̈j, Jwøgee kiper wøn, wø tyëng-ɑ döngø èn bënn. Wø ɑ́bëëd wø gïïr, o ɑnɑn lidh wø ɑ́döng wø nøg. Kwɑjjí Jwøng-ɑ Ácwɑ̈ɑ̈j Jwøgee, o wø nyudhe yuu-ɑ kedhi yi wøn, kí gïn-ɑ ógwøg yi wøn.” Alöggɑ kinni, “Døj, Jwøng-ɑ Ácwɑ̈ɑ̈j, Jwøgee ókwɑjjɑ kiper wun, o wu óköbbɑ møg-ɑ ókwøb yi en. Bong gïjø men-ɑ ókɑ̈nnɑ wun.” Kɑ yɑ köbbi gen kinni, “Møgɑni ónenn-ɑ yi Jwøk, mɑ́ wø ólïng-ɑ møg-ɑ ókwøb yi en, møg-ɑ ómëggi yïn yi Jwøng-ɑ Ácwɑ̈ɑ̈j, gen ɑ ógwøg. Møg-ɑ ókwøb yi Jwøng-ɑ Ácwɑ̈ɑ̈j ógwøg yi wøn ceth, cɑgg ge døøj kì yï wøn wɑlɑ̀ ge rijjø, oløøge kwɑ̈jjø menɑni. Bong gïn-ɑ ónywɑl wøn keløg kwøbbi Jwøng-ɑ Ácwɑ̈ɑ̈j olïngø yi wøn.” Kɑ Jwøng-ɑ Ácwɑ̈ɑ̈j okööbø ki yɑn kì bɑng cyɑ̈ng pyɑ̈rø, codhe ɑcwølɑ Yöɑnɑn geki pëjji liny møg-ɑ kyeelø bënn, gen ɑ jøg-ɑ ɑ́ying bute geki ji bënn. Kɑ ge köbbɑ kinni, “Jwøng-ɑ Ácwɑ̈ɑ̈j Jwøøg Isrɑil, ɑ yïe ɑ́ör wun yɑn, ɑ́kööb kinni, ‘Keløg wu ócög wu óbëëdø kì piny men, wu ókøny yi yɑn, wu pɑ wiyɑ piny; wu ógurɑ piny, wu pɑ puthɑ wɑ̈g. Yijɑ ɑ́ywöngi ki mendwøng kì bɑng ryɑ̈g men-ɑ ɑ́kɑ̈ɑ̈lɑ kömi wun. Wu ko böggi yi rɑ̈ɑ̈dh Bɑbïlöniyɑ̀, wu ókøny yi yɑn, kɑ wu yielɑ kì cinge. Pyëwe ówëggɑ lɑ̈ɑ̈mø ki wun, kɑ wu dwøøge piny wun, mɑ́ pyëwɑ nyii lɑ̈ɑ̈mø. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.’ ” wu ópïïd yi liny-ɑ böggi yi wun, o kɑ̈ny-ɑ ti ki böggø yi wun lug-ɑ́ɑ̀ bɑng wun; wu thøw-ɑ Rïp. Tyëng-ɑ dwɑddi kedhi be bëëdø kì Rïp bënn, ónɑ̈g yi liny, wɑlɑ̀ yi kɑ̈j, wɑlɑ̀ yi rɑ̈ɑ̈m dëllì. Bong ɑ́kyel men-ɑ óbodh kì kelli gen kì dhøg ryɑ̈ng-ɑ örɑ kömi gen.” Jwøng-ɑ Ácwɑ̈ɑ̈j Jwøøg Isrɑil okööbø kinni, “Linyɑ kønyɑ’ kömi tyëng-ɑ kedhi Rïp, ni kɑ ɑ́kønyɑ en kömi tyëng Yerusɑlem. Ge óbëëd ge pɑ nëënø yi rɑ̈jø kì nyingi ji; ge óbenyi kɑ gɑ cwølli gɑ tyëngcyën. O pönhï pɑ cigi lidhø yi gen.” Kɑ ge köbbɑ kinni, “Wu tyëng-ɑ ɑ́döng kì Yeudiyɑ̀, wu ɑ́kyëddi yi Jwøng-ɑ Ácwɑ̈ɑ̈j kinni wu ko kedhi Rïp. Wu ɑ́rum ki kyëddø yi yɑn dicyɑ̈ngtïn, mɑ́ yɑ ɑ́kwɑjj-ɑ yi wun kinni kwɑjjɑ Jwøng-ɑ Ácwɑ̈ɑ̈j Jwøgee, kɑ wu okööbø ce gïn-ɑ ókwøb yi en ógwøg yi wun. O ɑnɑn wu ɑ́köbbɑ, de wu ceg-ɑ bɑ̈nyø ki lïngi møg-ɑ ɑ́kwøb yi Jwøng-ɑ Ácwɑ̈ɑ̈j, Jwøgee kinni i köbbɑ gen wun. De wɑ̈thi wun ko wïl kinni wu kedh-ɑ be nɑ̈gø yi liny, wɑlɑ̀ yi kɑ̈j, wɑlɑ̀ yi rɑ̈ɑ̈m dëllì kì piny-ɑ yije kedhi yi wun.” Kɑ yɑ órumø ki köbbi teedø møg-ɑ ɑ́kwøb bënn yi Jwøng-ɑ Ácwɑ̈ɑ̈j, Jwøøg gen. Codhe, ɑköbbi yɑn yi Adhɑriyɑ̀ wɑ̈d Öcɑiyɑ̀, geki Yöɑnɑn wɑ̈d Kɑreɑ̀, kí jøg-ɑ wɑ̈thi gen teeg bënn kinni, “Yï ceg-ɑ pyed. Yï nuti köbbø yi Jwøng-ɑ Ácwɑ̈ɑ̈j Jwøgee kinni, i bïí be köbbi wøn kinni wø ko kedhi be bëëdø kì Rïp. Yï ɑ́ceg kɑ cörri wøn yi Bɑruk wɑ̈d Neriyɑ̀, o wø göjjí mɑgø yi tyëng Bɑbïlöniyɑ̀, o wø nɑ̈g yi gen, wɑlɑ̀ o wø kïdhi Bɑbïlöniyɑ̀ yi gen wø bɑ ɑmɑgg.” Kɑ dhø Jwøng-ɑ Ácwɑ̈ɑ̈j pyem yi Yöɑnɑn geki pëjji liny, kí teedø bëne, ɑbɑ̈nyi gen ki bëëdø kì piny Yeudiyɑ̀. Dhø Jwøng-ɑ Ácwɑ̈ɑ̈j ɑ́pyem yi gen, kɑ ge kedh-ɑ be bëëdø kì Rïp kì Tɑpɑnes. Kɑ yɑ köbbi kì kunɑni yi Jwøng-ɑ Ácwɑ̈ɑ̈j kinni, “Kɑ̈bbí ki ɑ́tuggi kïttì mø døngø, kɑ ge koony dhøg ød mïïri kì kɑɑl keny, kɑ wiy yï lidh yi kwï tyëng Isrɑil yi koony-ɑ gen piny. Kɑ ge köbbí kinni, yɑn, yɑ Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil, bɑ̈ngɑ Nebukɑdnesɑr, rɑ̈ɑ̈dh Bɑbïlöniyɑ̀ ókɑ̈ɑ̈lɑ keny, kɑ kwøme cïbe kömi kïtt-ɑ koony piny yi yïn ɑnɑn, kɑ kemɑ̀ mi rɑ̈ɑ̈dhø cwöödhe kömi gen. Nebukɑdnesɑr óbï kɑ Rïp tyɑm yi en. Tyëng-ɑ ɑ́cïb gɑ møg nɑ̈g yi rɑ̈ɑ̈m dëllì ónɑ̈g-ɑ yi rɑ̈ɑ̈m dëllì ceth, o tyëng-ɑ ɑ́cïb gɑ møg køøl gɑ ɑmɑgg, ge ókøøl ceth, o møg-ɑ ɑ́cïb gɑ møg nɑ̈g yi liny, ge ónɑ̈g ceth. Kenggi jwöggi Rïp órɑ̈b yi yɑn; jwöggɑni órɑ̈b yi rɑ̈ɑ̈dh Bɑbïlöniyɑ̀, wɑlɑ̀ gï ókɑ̈l yi en. Jɑmmi piny Rïp ógwen yi rɑ̈ɑ̈dh Bɑbïlöniyɑ̀ ni kenyi pøn nywögg kì ri ógødh, kɑ odøøgø e rum tyɑ̈mø. Ngïjji kwër møg-ɑ bɑ kïttì órënyi yi en, kì Ëliyøpøløs kì Rïp kɑ kenggi jwöggi Rïp rɑ̈be.” Kɑ Jwøng-ɑ Ácwɑ̈ɑ̈j okööbø kí yɑn kipe tyëng Isrɑil bënn møg-ɑ bëëdø kì Rïp kì kɑ̈ddi Migdöl kí Tɑpɑnes, kí Mempis geki myërr-ɑ kuni wɑɑng wurlwɑl. Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil ɑ́kööb kinni, “Álidh yi wun kiri wun, eni ryɑ̈ng-ɑ ɑ́kɑ̈ɑ̈lɑ kömi Yerusɑlem geki kɑ̈ddi Yeudiyɑ̀ møg-ɑ kyeelø. Ge nudd ge bɑ thur ɑnɑn, o bong ngɑn bëëdø kì yethi gen, mɑ́ jii kɑ̈ddɑni ɑ́göög ki rɑj kɑ pyëwɑ rënyi yi gen. Jwögg mø pɑth ɑ́ngɑ̈ddi yi gen ki gëdhhì kɑ gï mɑlli gen, gen ɑ jwögg-ɑ ɑ́bëëd ge nuti mɑllø yi wun, wɑlɑ̀ yi gen, wɑlɑ̀ yi kweyyi wun. Kɑ wu nyi ödɑ ki jøtöng bɑ̈nggɑ, o ge nyi kyëddi gen wun kinni wu ko göög ki gïnrɑj ni menɑni, mɑ́ e mɑɑn yi yɑn, De wu nuti lïngø, wɑlɑ̀ kwøbbɑ nuti ywöör wun. Gïnrɑj men-ɑ nyi gwøg yi wun, ɑ nyi mɑlli wun jwögg-ɑ pɑth nuti wiyø yi wun. Arënyi pyëwɑ ki mendwøng kɑ Yerusɑlem geki kɑ̈ddi Yeudiyɑ̀ rɑ̈b yi yɑn ki mɑc, ɑ nudd ge odhoongø kì piny ɑnɑn. “O ɑnɑn yɑ Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil, yɑ ceg-ɑ pëjjø kinni, ɑ́ kipe ngø, ɑ göggi wun ri wun ki gïnrɑj ni menɑni. Wu dwɑdd-ɑ kɑ̈ni kömi ji cwøw, kí mɑ̈nn, kí othønhø ki ryɑ̈g, o bëëd e bong ngɑn döng e onëënø kì kelli jii wun? Á kipe ngø ɑ wëggu pyëwɑ rënyø, ɑ mɑlli wun ngïjji jwögg geki jwögg-ɑ pɑth kì Rïp keny? Wu dwɑdd-ɑ rënyi ri wun, o wu gɑggi yi pödhh-ɑ kyeelø, kinni ri wun dɑ cyën? Wɑ̈thi wun ɑ́ceg-ɑ wïlø ki gïgrijjø møg-ɑ ɑ́gwøg kì kɑ̈ddi Yeudiyɑ̀ geki yethi yëthi Yerusɑlem yi kweyyi wun, geki rɑ̈nhi Yeudiyɑ̀, kí wun, wuki mɑ̈nni wun? De wu ɑ́cög muddi wun teeg. Yɑ nuti wørø yi wun, wɑlɑ̀ kwöngɑ geki ciggɑ nuti mïdhø wun, wuki kweyyi wun. “Kɑ ɑ́rum bëëde kinøw, Yeudiyɑ̀ rënyɑ’ rënyø yɑ Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil. O tyëng Yeudiyɑ̀ møg-ɑ dwɑddi bëën be bëëdø kì Rïp, ge nɑ̈gɑ’ nɑ̈gø bënn. Ge thøw-ɑ Rïp bënn; ge ónɑ̈g yi liny, wɑlɑ̀ yi kɑ̈j, ge bënn, møg per gen teg kí møg-ɑ per gen bong gøn. Wu ógɑggi yi pödhh-ɑ kyeelø kinni ri gen dɑ cyën. Tyëng-ɑ bëëdø kì Rïp ócɑy yi yɑn ni kɑ ɑ́cɑyɑ Yerusɑlem ki nɑ̈gø yi liny, kí kɑ̈j geki rɑ̈ɑ̈m dëllì. Bong dhɑnhø kì kelli tyëng Yeudiyɑ̀ møg-ɑ ɑ́bï Rïp men-ɑ óbodh, wɑlɑ̀ men-ɑ ódöng e onëënø. Bong ngɑn-ɑ ódøøg Yeudiyɑ̀ kì kelli gen cɑgg pëthi gen ódwɑddi døøgø, dɑ́ mø nøg cɑrø ɑ óbodh kɑ ge odøøgø.” Kɑ yɑ köbbi yi jøg-ɑ́ mɑ̈nni gen ɑ́bëëd ge nyi rɑ̈bb-ɑ jwögg-ɑ pɑth ki bɑkur geki tyëng-ɑ ɑ́bëëd ge ócungø kì kenyɑni, kí tyëng-ɑ bëëdø kì kuni wɑɑng wurlwɑl kì Rïp; yɑ ɑ́köbbi yi gen kinni, “Cwɑggi wøn ɑ́ ngø, cɑgg yï kööbø ki nyingi Wë? Wø pɑ dwɑddi lïngø! Møg-ɑ ɑ́kwøb yi wøn kinni ge ógwøg yi wøn ceg kɑ gwøgø ceth yi wøn. Jwøøg wøn; Rɑ̈ɑ̈dh Mɑl Rɑ̈nh-ɑ dhɑjø ceg yi wøn kɑ rɑ̈bbø ki bɑkur, o ceg kɑ kunyø yi wøn ki møgi oløg, ni kenyi kunyii yi kweyyi wøn geki rɑ̈nhi wøn kì kɑ̈ddi Yeudiyɑ̀, kí yethi yëthi Yerusɑlem. O wø ɑ́ceg dönyø kɑ gïgcɑmm ceg-ɑ twɑ̈lø. De kër-ɑ ɑ́wiy wøn rɑ̈bbi Rɑ̈ɑ̈dh Mɑl rɑ̈nh-ɑ dhɑjø ki bɑkur, kɑ wø ówïyø kunyii ki møgi oløg, wø nuti jɑdø, kɑ jii wøn nɑ̈g yi liny kí kɑ̈j?” Kɑ tyëng-ɑ mɑ̈nn møgɑni okööbø thyew kinni, “Keny-ɑ ɑ́bëëd wøn wø nyii budø ki kɑɑk men-ɑ ógwøgø ɑ́ ngïjji Rɑ̈ɑ̈dh Mɑl rɑ̈nh-ɑ dhɑjø, kɑ nyi nëngi yi wøn ki gëdhhì, kɑ nyi kunyi yi wøn ki møgi oløg, cwøwi wøn ɑ́bëëd ge yïëyø ki møgɑni.” Codhe, kɑ jøg-ɑ cwøw geki tyëng-ɑ mɑ̈nn møg-ɑ ɑ́løøg kwøbbɑ kinøw köbbɑ kinni, “Keløg ɑ́ per gëdhh-ɑ ɑ́bëëd ge nyii muujø yi kweyyi wun, kí rɑ̈nhi wun, kí jyɑ̈ggi wun, kí ji bënn kì yij piny Yeudiyɑ̀ kí yethi yëthi Yerusɑlem, wu orumø kinni ge ɑ́bëëd ge kwïj yi Jwøng-ɑ Ácwɑ̈ɑ̈j, wɑlɑ̀ ge ɑ́ceg-ɑ wïlø kì wïje? Piny wun nuti dööng nøw, dɑ ngɑn bëëdø kì yije dicyɑ̈ngtïn? Pinyɑni ɑ́döng e rɑɑj cɑrø, cwøl ɑ́ ɑcyen, mɑ́ pyëwe ɑ́ceg-ɑ rënyø yi gïgrijjø møg-ɑ ɑ́gwøg yi wun. Ryɑ̈ngɑni ɑ́pɑ̈dhi kömi wun kɑ per kɑ ɑ́mɑlli wun jwögg mø pɑth, kɑ wu orøngø kì bøli Jwøng-ɑ Ácwɑ̈ɑ̈j, kɑ wu óbɑ̈nyø ki mïdhi cigge.” De lïngi wun møg-ɑ kwöng yi yɑn, yɑ Jwøng-ɑ Ácwɑ̈ɑ̈j, yɑ ɑ́köngi kinni wun wu tyëng Yeudiyɑ̀ møg-ɑ bëëdø kì Rïp, wu pɑ cigɑ wëggi köngø ki nyingɑ kinni, ‘Yɑn ɑ köngi èn ki nyingi Wë Jwøng-ɑ Ácwɑ̈ɑ̈j!’ Wu pɑ wëggɑ dönyø, de wu ceg-ɑ rënyø. Wu óthøw wu bënn ying wu nɑ̈g-ɑ yi liny, wɑlɑ̀ rɑ̈ɑ̈m dëllì, gïti keny-ɑ óthumi wun. De óyïddi ki mø nøg kì kelli wun møg-ɑ óbodh kɑ ge døøg-ɑ Yeudiyɑ̀. Codhe, o yod yi tyëng-ɑ óbodh kinni bɑ kwøbbi men ɑ ɑ́pɑ̈dhi kɑ̈jji gen; kwøbbɑ wɑlɑ̀ kwøbbi gen? Ónyodh yi yɑn, yɑ Jwøng-ɑ Ácwɑ̈ɑ̈j kinni kwøbbɑ pɑ̈dh-ɑ kɑ̈jji gen keny-ɑ ócɑyɑ wun kì pönhï, kɑ kömi wun göjj-ɑ ki ryɑ̈g, o yod yi wun kinni yɑ kømm-ɑ dyër, Rɑ̈dh Óprɑ̀ ɑ jɑɑg Rïp, ócïbɑ cinggi tyëng-ɑ mɑ̈n ki en, møg-ɑ dwɑddii nɑ̈gø, ni kɑ ɑ́cïbɑ Rɑ̈dh Dhedekiyɑ̀ rɑ̈ɑ̈dh Yeudiyɑ̀ cingi Rɑ̈dh Nebukɑdnesɑr, rɑ̈ɑ̈dh Bɑbïlöniyɑ̀, ɑ ɑ́bëëd e mɑ̈n ki en.” Kì ngween runni Yöyɑkim wɑ̈d Yöciyɑ̀ rɑ̈ɑ̈dh Yeudiyɑ̀ kì yij lɑwø, ɑ ɑ́gweed møg-ɑ ɑ́kwøb yi yɑn yij wɑ̈nyø yi Bɑruk. Codhe, ɑköbbɑ en kinni Jwøng-ɑ Ácwɑ̈ɑ̈j Jwøøg Isrɑil ɑ́kööb kinni Bɑruk, yï cem-ɑ ‘Yɑ ɑ́pïd! Jwøng-ɑ Ácwɑ̈ɑ̈j kömi ɑkørrɑ ɑ́kïdhe ki kïïmø, yɑ ɑ́pïd yi minnø, yɑ ɑ́jɑd ki ywömø!’ “De yɑn, yɑ Jwøng-ɑ Ácwɑ̈ɑ̈j, yɑ ceg-ɑ cödi piny ki gïn-ɑ ɑ́ger yi yɑn, o gïn-ɑ ɑ́miinɑ piny puthɑ’ wɑ̈g, pinyɑni bëne gwøgɑ’ gwøgø kinøw. Yï dwɑdd-ɑ kinni mïdhɑ yïn, yï bɑ̈n ki tyëng-ɑ kyeelø? Møgɑni ko pɑ̈nyí ki kwøbø. Yɑ kɑ̈n-ɑ kömi dhɑnhø bëne ki ryɑ̈g, de yïn kirií, yï óbodh kì keny-ɑ ókedhi yi yïn! Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Yɑ ɑ́köbbi yi Jwøng-ɑ Ácwɑ̈ɑ̈j ki kwøbbi pödhh-ɑ kyeelø, e cɑ̈gi kɑ Rïp. Møg-ɑ ɑ́kwøbe kì ri liny Nekö rɑ̈ɑ̈dh Rïp, ɑ ɑ́tyɑm yi Nebukɑdnesɑr, rɑ̈ɑ̈dh Bɑbïlöniyɑ̀ kì ngween runni Yöyɑkim rɑ̈ɑ̈dh Yeudiyɑ̀ kì yij lɑwø, bɑ kinni, “Jɑggi Rïp okïïwø kinni, ‘Kwɑnyu köddi wun kɑ wu kedhu be liny! Ruug wun kyënyì kɑ wu kɑdhu kömi gen! Wɑɑd wun ri wun yöö, kɑ ɑcudhhi wun cïb wun wɑ̈thi wun. Pɑg wun tønggi wun! Kɑ ɑ́dhedheg kïdhi wun ri wun!” Jwøng-ɑ Ácwɑ̈ɑ̈j ópëjjø kinni, “De gede ɑ nennɑ gen ge órïngø? Ge ceg-ɑ dwöögø ge órïngø yi wɑ̈ɑ̈rø. Liny gen ɑ́cyëëd, ge rïngi ge yömm-ɑ ri gen, ge pɑ lïïdh ngɑ̈thi gen yi wɑ̈ɑ̈rø. Dëër ɑ́dhɑ̈li bodhø; jøliny ɑ́pïïd, tyelli gen ɑ́cwɑnyyi gen kɑ ge ópɑ̈nhø, kì kömi Nɑm Porɑt kì wɑɑng wuudø. Á men ɑ beedhø ni Kiir èn, ɑ ni nɑm me pïge möddi wɑ̈g? Bɑ Rïp ɑ beedhø ni Kiir, ɑ ni nɑm me pïge möddi wɑ̈g. Rïp ɑ́kööb kinni, ‘Yɑ óbeedh kɑ kömi piny bëne mudɑ, kɑ̈dd ócøørɑ piny kɑ tyëng-ɑ yethi gen nɑ̈gɑ. Gøøj wun kyënyì yöö, kɑ yɑ̈ɑ̈th pej! Ör wun jøliny yöö, öru jø Kuc kí Lïbiyɑ̀ ki ködd kì cinggi gen, kí jø Lud, jøg-ɑ pɑ nyi bɑ̈ɑ̈jø ki wethh.’ ” Men bɑ Cyɑ̈ɑ̈ng Wë, Jwøng-ɑ Ácwɑ̈ɑ̈j; kej gøøle cole’ colø dicyɑ̈ngtïn; tyëngmɑ̈ɑ̈nø cɑye’ cɑyø dicyɑ̈ngtïn. Ge ócɑm yi pile kɑ pile ceg-ɑ yɑ̈ngø, kɑ remmi gen mɑdhe kɑ rönhe ówɑ̈ɑ̈nyø. Jiɑni ógëëdh yi Jwøng-ɑ Ácwɑ̈ɑ̈j dicyɑ̈ngtïn, kì kömi Nɑm Porɑt kì wɑɑng wuudø. Wu tyëng Rïp kedhu Gilyɑd be yɑb ki yɑdh! Yenh-ɑ yï wun pɑ yïëdø; bong gïn tuur wun. Ayɑ̈ɑ̈r wun ɑ́lïngi yi pödhh; ywøøg wun ɑ́lïngi yi dhɑnhø bëne. Jɑl-liny pɑ̈dh-ɑ kömi megø, kɑ ge ópɑ̈ɑ̈dhø ryeet. Keny-ɑ ɑ́bëën Nebukɑdnesɑr rɑ̈ɑ̈dh Bɑbïlöniyɑ̀ be pɑ̈ɑ̈r kömi Rïp, yɑ ɑ́köbbi yi Jwøng-ɑ Ácwɑ̈ɑ̈j kinni, “Ngɑ̈j møgɑni kì kɑ̈ddi Rïp ngɑ̈j gen kì Migdöl, kí Mempis kí Tɑpɑnes kinni; ‘Nyɑgu ri wun! Jɑmmi wun órënyi yi liny! Ede Apis jwøøg wun, jwøng-ɑ teg ɑ ɑ́pɑ̈ɑ̈dhe? Ágøøj piny yi Jwøng-ɑ Ácwɑ̈ɑ̈j!’ Jøliny wun ɑ́cyerri kɑ ge ópɑ̈nhø, kɑ ri gen köbbi gen kinni, ‘Jwɑni wɑ pödhee yï jiee, o wɑ bødh wɑ kì dhø pili ngetimɑ̈ɑ̈nø!’ Døøg rɑ̈ɑ̈dh Rïp ki cɑgø, cɑg ɑ́ ‘Ngeti Awøw-ɑ Ápöödh yi piny.’ Yɑn, yɑ Wïlɑ̈bø, Jwøng-ɑ Ácwɑ̈ɑ̈j, yɑ bɑ rɑ̈dh. Bene yɑn Jwøng-ɑ Nëënø. Yɑ nɑ Kïti Tɑbör ɑ pöödh wɑ̈thi kïttì bënn kɑ yɑ nɑ Kïti Kɑrmel ɑ cungi e bɑ̈ɑ̈r kì kömi nɑɑm omelø, yɑ óbëëdø yɑn ɑ́ tegø men tyɑm wun tyëng-ɑ pɑ̈ɑ̈r kömi wun. Wu tyëng Rïp, gwir wun ri wun, wu ɑ́cyɑ̈ngi ki køølø wu bɑ ɑmɑgg! Mempis ógöögø ɑ́ ryɑng, óbëëd ɑ́ thur, bong ngɑn-ɑ óbëëdø kì yije. Rïp óni dhyɑng me dwøng me kɑ̈ɑ̈j yi ngurø me kɑ̈ɑ̈l wɑɑng wuudø. Cɑgg ɑ́ jøliny møg-ɑ ɑ́kïre, ge cungi nɑ røjj. Ge pɑ kunyi ki liny; ngɑ̈thi gen ɑ́løg gen, kɑ ge órengø. Cyɑ̈ɑ̈ng ryɑ̈g ɑ́wɑ̈nhi kömi gen, bøli kej thøwi gen ɑ́wɑ̈nhi. Rïp rïngi yije oyieyø ni yij thwöl, kɑ̀ cyeddii yi tyëngmɑ̈ɑ̈nø. Rïp ɑ́keb piny ni kenyi ngøl yenh ki dørø, kɑ thïm óthumø. Jøliny pɑ cuggi kwɑnø; kwɑnni bɑ̈nyø nøg yi gen. Tyëng Rïp ɑ́yɑ̈r; ge ɑ́mɑg yi tyëng wɑɑng wuudø. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil okööbø kinni, “Amun, jwøøg Thibɑ̀ cɑyɑ’ cɑyø, geki Rïp bëne, kí jwögge, kí rɑ̈nhe. Rɑ̈ɑ̈dh Rïp kɑ̈ɑ̈lɑ’ kɑ̈ɑ̈lø geki tyëng-ɑ ngɑ̈dhii bënn. Ge muujɑ’ Nebukɑdnesɑr, rɑ̈ɑ̈dh Bɑbïlöniyɑ̀ geki linye, gen ɑ tyëng-ɑ dwɑddi nɑ̈gii. De ji bɑ møg-ɑ ódøøg be bëëdø kì Rïp, ni kɑ ɑ́wöne cøn. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” “Wu ko böggi jiɑ; pëthi wun ko lïngi wu tyëng Isrɑil, Wu óyïëëlɑ kì piny-ɑ lɑ̈wi ni menɑni; piny-ɑ kïdhi wun, wu bɑ ɑmɑgg. Wu ódwöög pɑc kɑ wu obëëdø ki mër, wu óbëëdø ki tɑrø, o bong ngɑn-ɑ óböggi yi wun. Yɑ óbï kɑ wu yielɑ; pödhh bënn møg-ɑ́ yethi gen ɑ́kedhhɑ wun, ge órënyɑ, de wu koo nyïɑ̈g yi yɑn. Wu pɑ bødh ki cɑyø yi yɑn, de pyëwɑ ólɑ̈ɑ̈m ki wun keny-ɑ ócɑyɑ wun. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Yɑ ɑ́löbbi yi Jwøng-ɑ Ácwɑ̈ɑ̈j kì ri Pelistiyɑ̀, e rɑ̈ɑ̈dh Rïp nuti pɑ̈ɑ̈r kömi Gɑdhɑ̀. Ákööb kinni, “Pï ɑ ngënyi ɑnɑn kì wɑɑng wuudø. Pïgɑni ómöddi ɑ́ bɑɑyø. Piny kí jɑmm-ɑ yije ómud yi gen, kí kɑ̈dd kí ji-ɑ yethi gen. Ji óbëëd ge okïïwø kinni yieel gen; dhɑnhø bëne óywöngi ki menteg. Ywøøg tyelli kyënyì, kí ruuri yɑ̈thi liny, kí odun tyelli yɑ̈ɑ̈th ólïngi yi gen. Ji koo lïïdh cyɑ̈n yï nyigi gen; ge ódhɑ̈ɑ̈r kɑ cinggi gen ceg-ɑ ì lwɑj kì piny. Bøli kej rënyi Pelistiyɑ̀ ɑ́cyɑ̈ngi kɑ̈ddi Suur kí Sïdön órënyi, ge koo cigi kønyø, yɑ Jwøng-ɑ Ácwɑ̈ɑ̈j ɑ ónɑ̈g tyëng Pelistiyɑ̀, gen ɑ tyëng-ɑ ɑ́kɑ̈ɑ̈l Kɑptör kì kömi nɑ̈mmi Kirit. Ryɑ̈g me dwøng pɑ̈dh-ɑ kömi tyëng Gɑdhɑ̀ Ackelön óceg ì lïïw. Pelistiyɑ̀ gït-ɑ wɑɑng e óywöngø? Wu ókïïwø kinni, ‘Pili Jwøng-ɑ Ácwɑ̈ɑ̈j! Yï pïd-ɑ wɑɑng yï orɑ̈ɑ̈dø? Døøg yij bøjí, kɑ rií ywööm!’ De pilɑni óywömø kidï, e ɑ́rum ki thödhø ki gwøg yi yɑn? Árum ki köbbø yi yɑn kinni pɑ̈ɑ̈re kömi Ackelön, kí kömi tyëng-ɑ bëëdø kì kömi nɑɑm omelø.” Bene møg-ɑ ɑ́kwøb yi Jwøng-ɑ Ácwɑ̈ɑ̈j kì ri Moɑb ek: “Ywøg wun tyëng Nebö kɑɑl gen ɑ́rënyi! Kiriɑtɑim ɑ́mɑg, uddi dörr-ɑ teg ɑ́cøør piny, jie ɑ́yɑ̈r, døøji Moɑb ɑ́kedh. Kicbön ɑ́mɑg yi tyëngmɑ̈ɑ̈nø o ge dwɑdd-ɑ rënyi pödhi Moɑb Kɑɑl tyëngɑnɑ̈gø ódöng e lïïwø, liny me dwøng óbï köme. Tyëng Örønɑim óywöngø ge cem-ɑ ‘Liny me rɑɑj! Piny ɑ́rënyi!’ “Moɑb ɑ́rënyi! Lïngu ywøøg othønhø, ge bødh-ɑ yuu Lukith ge óywöngø, ge kømm-ɑ kwøbbi ryɑ̈ngɑni, ge óywöngi yethi gen bɑɑrø, ge kedh-ɑ Örønɑim. Ge okööbø kinni, ‘Rengi wɑ! Yieel wɑ riee yij pɑ̈l!’ “Moɑb, yï ɑ́ngɑ̈dh-ɑ tegí geki kɑ̈rí, de yï otyɑmø ɑnɑn, Kemöc jwøgí kedh-ɑ yïnø, geki nyiirɑ̈dhh kí ókwër. Bong kɑɑl men-ɑ ódöng kì dhø ryɑ̈ngɑni, myërri thwørø kí myërri tör órënyi. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. Kony wun röri Moɑb, bɑ men jwɑn ki rënyø. Kɑ̈dde ódöng gɑ thur, o bong ngɑn-ɑ óbëëdø kì kɑ̈jjɑni këti.” (Ngɑn-ɑ gwøg gwøøg Jwøng-ɑ Ácwɑ̈ɑ̈j yije dɑ ɑ́dud, ree dɑ cyën! Ngɑn-ɑ koo nɑ̈gø ki pile ree dɑ cyën!) Jwøng-ɑ Ácwɑ̈ɑ̈j ɑ́kööb kinni, “Moɑb ɑ́bëëd e bong gïn bögge, o nuti pɑ̈nyø kïdhi yïnø. Moɑb ɑ́bëëd e nuti pɑ̈nyø ki køøl yïnø, nudd e med ceth, nɑ møgø me nuti ool yij pug megø. “Anɑn bøli keny-ɑ önɑ ki ji møg kuny Moɑb wɑ̈g ni møgi oløg kì yij pug ɑ́cyɑ̈ngi. Møgi oløge ókuny wɑ̈g kì yethi pugge, kɑ puggɑni nɑ̈g, kɑ ge mød. Codhe, o tyëng Moɑb wɑ̈thi gen lɑ̈ɑ̈y gen ki Kemöc jwøøg gen, ni kɑ ɑ́lɑ̈ɑ̈y wɑ̈thi tyëng Isrɑil ki jwøøg Betiil, jwøng-ɑ ɑ́ngɑ̈dh yi gen. “Wu jø Moɑb, wude ɑ kööb wun ce wun ɑ́ jödd; ce wu ngɑ̈ny nyɑɑg? Moɑb ɑ́rënyi geki kɑ̈dde; wøbbe, wøbb-ɑ dhïw ɑ́nɑ̈g. Bene yɑ rɑ̈dh, yɑ Wïlɑ̈bø, Jwøng-ɑ Ácwɑ̈ɑ̈j, o yɑ ɑ́rum ki kwøb. Cyënni Moɑb obëënø; ryɑ̈ge ówɑ̈nhi köme kì bɑng nyɑ keny me thiinh. “Ywøgu pönhɑni wu tyëng-ɑ cyɑ̈gi ki en, ywøgu en, wu tyëng-ɑ ngɑ̈nyi døøny-ɑ døøje. Kööb wun kinni, ‘Átyɑm-ɑ dï ki teng-ɑ tege? Tege geki mɑ̈re ɑ́kedh!’ Yï ngɑn-ɑ bëëdø kì Dïbön, bïí piny kì wïj kwømí kɑ yï pëggí piny yij tør. Ngɑn-ɑ rënyi Moɑb ɑ keny èn, dörri Moɑb ɑ́wiye gɑ thur. Yï ngɑn-ɑ bëëdø kì Aröeer, cungí kì tøg yöö kɑ yï nëën, kɑ tyëng-ɑ rengi pyëëj, mɑ løge’ ngø ɑ cwöbø. Ge ólöggi kinni, ‘Moɑb ɑ́pɑ̈ɑ̈dh, ywöngí kipere mɑ́ e ɑ́rënyi, ɑ́yɑ̈r. Ngɑ̈ju møgɑni kì kömi Nɑm Arnön kinni Moɑb ɑ́rënyi!’ “Cɑ́y ɑ́bï kömi myërri kwøømø; ɑ løg, Kölön, Yɑɑdhɑ̀, kí Mepɑth kí Dïbön, kí Nebö, kí Bet Diblɑtɑim, kí Kiriɑtɑim, kí Betgɑmul, kí Betmeon, kí Keryöth, kí Bodhrɑ̀. Cɑ́y ɑ́bï kömi kɑ̈ddi Moɑb bënn, møg-ɑ lɑ̈wi kí møg-ɑ cyɑ̈gi. Tùngi Moɑb ɑ́tørri, bong tegø kì yïe këti! Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j ɑ́kööb kinni, “Wëggi Moɑb nɑ̈gø yi møgø, mɑ́ kwøbbɑ ɑ́bɑny yi en. Moɑb óbuud kì kömi ngwøgge, kɑ gɑggi yi ji. Moɑb, pɑrrí cyɑ̈ng-ɑ ɑ́gɑggí tyëng Isrɑil. Ge ɑ́gɑggi yi yïn de ge nɑ ji møg-ɑ ómɑgø ge rødhh-ɑ ji kì yethi yëëth. “Wu tyëng Moɑb, dhwödh wun kì yethi kɑ̈ddi wun! Kedh wun, kɑ wu bëëd wun kì wɑ̈thi kïttì! Bëëd wun ni ɑkur ɑ nyi gëddi kömi nɑm ki øde. Moɑb tɑ̈dø ki mendwøng! Kwøbbi tɑ̈de kí ɑthwøge, kí tølle kì kömi ji ɑ́lïngɑ, kí kër-ɑ rømmi gen ri gen. Athwøøg gen ngɑ̈nyi yi yɑn, yɑ Jwøng-ɑ Ácwɑ̈ɑ̈j. Bong gïn kɑ̈ɑ̈l yi tølli gen, o jɑmm-ɑ gøggi yi gen koo tyëg piny ge nud. Yɑ óywøg-ɑ tyëng-ɑ Moɑb bënn geki tyëng Kïr Ëres. Yɑ óywöngi kipe tyëng Sibmɑ̀ ki mendwøng kibøli ywøng-ɑ óywøøgɑ tyëng Yɑdher. Kɑɑl Sibmɑ̀, yï nɑ oløg; bɑ̈ddí ɑ́mølli kɑ ge wɑ̈dh-ɑ kömi Luuy Omelø, kɑ ge wɑ̈dh-ɑ Yɑdher. De ɑnɑn nywølí møg-ɑ ɑ́nywøl kì cwir, ge ɑ́rënyi. Medi pyëw geki medi bëëdø ɑ́kɑ̈ɑ̈l wɑ̈g kì Moɑb, piny-ɑ lɑ̈be med. Møgi oløg ɑ́cuung yi yɑn, pɑ mulli këti kì keny-ɑ́ yije nyi bijii, bong ngɑn göögø ki møgi oløg, kɑ óryeerø yi medi pyëwe. “Ywøng-ɑ ywøg kì Kicbön di lïngø kì Eleɑlè geki Yɑɑ̈dh, di lïngø kì Dhoɑr, o di lïngø kì Örønɑim geki Eglɑth Celiciyɑ̀, mɑ́ dhøg Nïmrïm ɑ́dwön thyew. Tyëng Moɑb ómɑ̈ɑ̈nɑ rɑ̈bbi jwöggi gen ki gëdhhì kì kɑ̈jji mɑ̈ddø. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. “Yijɑ ɑ́ywöngi ki mendwøng kipe Moɑb geki tyëng Kïr Ëres, ni ngɑn wör e óywöngø, mɑ́ jɑmm-ɑ ɑ́ying yï gen bënn ɑ́lɑ̈ɑ̈ny. Wɑ̈thi gen ɑ́lyel gen bënn, kɑ yëyyi tïggi gen pyëëd gen wɑ̈g kì ri gen ɑ́ ngïjji ywøg. Kɑ ri gen kɑggi gen ki pɑll, o ge rug-ɑ ocwɑ̈llì bënn. Teedø okïïwø kì wɑ̈thi ud geki yethi yëëth kì Moɑb, bong gïn lïngi den-ɑ́ ywøg kete, mɑ́ Moɑb ɑ́tøgɑ ni pug me bong ngɑn dwɑddii. Moɑb ɑ́kedhhi! Ywöngi wun! Moɑb ɑ́yɑ̈r. Ágöög ki thur, o ceg kɑ gɑggø yi pödhh-ɑ kyeelø bënn. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j ɑ́kööb kinni, i pödhø megø ócwøøy kömi Moɑb ni cor, obërre peedh en, o kɑ̈ddi dör ómɑg geki dörr-ɑ koor gen. Jøliny Moɑb ómɑg yi wɑ̈ɑ̈rø dicyɑ̈ngɑni. Moɑb ópɑ̈ɑ̈dh, pɑ cigi bëëdø ɑ́ pödhø këti, mɑ́ dhøgɑ ɑ́pyem yi en. Böögø, kí burr-ɑ ludhø, kí ɑ́kɑ̈llì yïd-ɑ tyëng Moɑb. Jwøng-ɑ Ácwɑ̈ɑ̈j, ɑ́rum ki kwøb. Ngɑn bwøg, kɑ órengø kɑ pɑ̈dh-ɑ bur, kɑ mull-ɑ wɑ̈g kì yij bur, ómɑg yi ɑ́kɑ̈llì, mɑ́ bøli kej rënyi Moɑb ɑ́rum ki cïbø yi Jwøng-ɑ Ácwɑ̈ɑ̈j. Ji ri gen ópɑ̈nyi yi gen ki rengi be yömmi Kicbön, kɑɑl-ɑ ɑ́jyɑ̈ɑ̈g yi Sïön kɑ̈ge dööng, de kɑɑlɑni ceg-ɑ lyelø ɑ́ mɑc. Dör geki kïttì ocɑmø yi mɑc, eni piny tyëng Moɑb, tyëng-ɑ mɑɑr liny! Tyëng Moɑb ɑ́gɑ̈g, gen ɑ tyëng-ɑ ɑ́mɑlli Kemöc, nyigi gen køøl-ɑ yïnø gɑ ɑmɑgg. De Moɑb ócigi wëggi dönyø yi Jwøng-ɑ Ácwɑ̈ɑ̈j kì bɑng keny megø. Møgɑk bënn bene gen, møg-ɑ ɑ́kwøb yi Jwøng-ɑ Ácwɑ̈ɑ̈j, o ge ópɑ̈dhi kɑ̈jji gen ceth. Bene møg-ɑ ɑ́kwøb yi Jwøng-ɑ Ácwɑ̈ɑ̈j kì ri Amön ek: Jwøng-ɑ Ácwɑ̈ɑ̈j ɑ́kööb kinni, “Jø Isrɑil ying-ɑ keny? Bong dhɑnhø ɑ́kyel yøw me nyɑg per piny gen? Á kipe ngø ɑ wëggi gen tyëng-ɑ mɑlli Mölek mɑgi piny Gɑd, kɑ ge pëgg-ɑ yij pinyɑni? De bøli keny-ɑ ówëggɑ tyëng Rɑbɑ̀ kɑɑldwøng lïngø ki cwɑggi liny ɑ́cyɑ̈ngi. Kɑɑl Rɑbɑ̀ ódöng ɑ́ thur kɑ myërre rɑ̈b. Codhe, o piny Isrɑil døøg yi gen ki kwɑnyø kì yï tyëng-ɑ ɑ́kwɑnyii. Wu tyëng Kicbön, ywöngi wun! Aɑy ɑ́rënyi! Kïïw wun mɑ̈nni Rɑbɑ̀! Rug wun ki ocwɑ̈llì, kɑ wu ywöngi wun, wu órïngø wu tumm-ɑ wɑ̈thi wun. Mölek jwøøg wun kïdh-ɑ yïnø, geki ókwërre, kí jɑgge. Á kipe ngø ɑ pwöd wun köthi wun ki tɑ̈dø, wu okööbø ce bong ngɑn cuggi pɑ̈ɑ̈r kömi wun? Kwïj yi wun kinni tegi wun ɑ́kedh? Wu ógöjjɑ wɑ̈ɑ̈rø me kɑ̈ɑ̈l wɑ̈thi tùng bënn. Kɑ wu órengø wu bënn. Megø órengi e yiel-ɑ wëye; o bong ngɑn-ɑ ólwɑ̈ng liny wun ki cøngø këti. “De Amön ówëggɑ døøgø ki dönyø kì cyɑ̈ɑ̈n piny. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Bene møg-ɑ ɑ́kwøb yi Wïlɑ̈bø, Jwøng-ɑ Ácwɑ̈ɑ̈j, kì ri Edöm ek: Jwøng-ɑ Ácwɑ̈ɑ̈j ɑ́kööb kinni, “Tyëng Edöm wɑ̈thi gen ɑ́ceg-ɑ nungø? Bong gïn gwøg yi gen? Wu tyëng Dedɑn, løg wun ri wun. Rengi wun! Pɑ̈ni wun! Kwɑrri Isøø nyïɑ̈gɑ’ nyïɑ̈gø, mɑ́ bøli kej cɑyi gen ɑ́wɑ̈nhi. Kenyi pøn nywøli oløg nyii yïddø ki møg bodh, o kenyi kedhi kurrì kɑl kì wɑ̈r ge nyi kwɑny-ɑ gïg-ɑ dwɑddi yi gen keti gen. De gøl Isøø ɑ́yɑgɑ bëne, kɑ kɑ̈jj-ɑ pɑ̈nni yi gen nyodhɑ, o ge cög ge pɑ pɑ̈ni këti. Tyëng Edöm ɑ́nɑ̈g bënn; bong ɑ́kyel mɑ ɑ́döng kì kelli gen. Wïyu kïjji wun yɑn, ge ókuun yi yɑn. Mɑ̈nn-ɑ́ cwøwi gen ɑ́nɑ̈g ókorri yi yɑn thyew. “Cɑgg ɑ́ ji mø pɑ di cɑy, ge bɑ møg mɑ̈dhi ceth kì yij óthɑ̈ngi orɑng; wu orumø kinni wu ócög wu pɑ cɑy? Pɑth, wu ceg-ɑ mɑ̈dhø kì yij óthɑ̈ngɑni ceth! Yɑ ɑ́rum ki köngø kinni kɑɑl Bodhrɑ̀, ódöng ɑ́ thur; ógöögø ki ryɑng. Ji wɑ̈thi gen óbëëd ge otïgø, kɑ kɑɑlɑni nyi pɑ̈rri cyën. Myërr-ɑ cyɑ̈gi ócög ge rënyø gïti ɑtheer. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Yɑ ɑ́kööb kinni, “Edöm, yɑ ɑ́lïng ki wöödø kì yï Jwøng-ɑ Ácwɑ̈ɑ̈j. Áöni ki wöödø kinni i cøng pödhh bënn lìnyi gen, kɑ ge pɑ̈ɑ̈r gen kömí. Yï ówëggi nyönhø yi Jwøng-ɑ Ácwɑ̈ɑ̈j, o bong ngɑn-ɑ ówør yïn, Yï ɑ́thɑɑb mɑl yi wëënyí. Bong ngɑn böggi yi yïn ni kɑ̀ rømmí. Yï bëëd ɑ wïj kït kì mɑl, de cɑgg yï bëëdø kì mɑl ni cor, yï dwöög-ɑ piny yi Jwøng-ɑ Ácwɑ̈ɑ̈j ceth. Jwøng-ɑ Ácwɑ̈ɑ̈j ɑ́rum ki kwøb.” Jwøng-ɑ Ácwɑ̈ɑ̈j ɑ́kööb kinni, “Ryɑ̈ng-ɑ óbï kömi Edöm, ryɑ̈ngɑni óbëëd e dwøng cɑrø, men-ɑ óbëëd tyëng-ɑ ókɑ̈lli bute ge óböggø ki mendwøng. Gïn-ɑ óbï kömi Edöm óbëëd e nɑ men-ɑ ɑ́bï kömi Sødømɑ̀ geki Gømørɑ̀. Bong dhɑnhø men-ɑ ócigi bëëdø kì kenyɑni. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. Yɑ óni ngur me bï wɑ̈g kì yij thïm Urdun, e böödh-ɑ yij tör, yɑ óbï kɑ tyëng Edöm órengø yi wɑ̈ɑ̈rø, pödhi gen wiy ge’ piny. Codhe, o jɑng-ɑ ómyeg yi yɑn, jɑɑge pödhø. Á men ɑ pɑ̈ɑ̈r ki yɑn? Á men ɑ cuggi tøønyi yɑn? Á jɑng-ɑ́, ɑ cuggi cung kì bølɑ? Lïngu gïg-ɑ dwɑddɑ göggi tyëng Edöm, kí møg-ɑ dwɑddɑ göggi tyëng Temɑn. Cɑgg ɑ́ men-ɑ́ nyigi gen, ge óywɑɑj yïnø, kɑ dhɑnhø bëne ceg-ɑ bwøgø. Piny bëne óceg onhɑ̈nh keny-ɑ ópɑ̈ɑ̈dh Edöm, kɑ cwɑggi pɑ̈ɑ̈dhe lïngi kì Gøøli Agɑbɑ̀. Tyëngmɑ̈ɑ̈nø óbï kömi Bodhrɑ̀ ni cor kenyi cwøøye piny e obërre peer en. Jøliny kì Edöm óbëëd ge okïïrø yi wɑ̈ɑ̈rø ni nyɑndhɑjø me pɑ̈dhi piny.” Bene møg-ɑ ɑ́kwøb yi Jwøng-ɑ Ácwɑ̈ɑ̈j kì ri Dimɑceg ek: Jwøng-ɑ Ácwɑ̈ɑ̈j ɑ́kööb kinni, “Ji pëthi gen ceg-ɑ olïng, o ge ceg-ɑ böggø kì kɑ̈ddi Amɑth geki Arpɑd, mɑ́ ge ɑ́lïng ki wöödø me rɑɑj. Pëthi gen ceg-ɑ olïng ki mendwøng, ge dhɑ̈li nenø. Tyëng Dimɑceg nyøødh, ge ɑ́rengi yi wɑ̈ɑ̈rø, ge ceg-ɑ orɑng ni nyɑndhɑjø me ceg pɑ̈dhi piny. Kɑɑl-ɑ ɑ́bëëd pyëwe med, ɑ́wiy piny kɑ döng-ɑ nøw. Wøbbe ónɑ̈g kì yethi yëëth, kɑ jølinye nɑ̈g bënn kì cyɑ̈ngɑni. Döri Dimɑceg órɑ̈b yi yɑn ki mɑc, kɑ gøl Rɑ̈dh Benɑdɑd rɑ̈bɑ. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Bene møg-ɑ ɑ́kwøb yi Jwøng-ɑ Ácwɑ̈ɑ̈j kì ri jur-ɑ cwøl ɑ́ Kedɑr, geki myërr-ɑ ɑ́jɑɑg kì Adhör, kɑɑl-ɑ ɑ́mɑg yi Nebukɑdnesɑr, rɑ̈ɑ̈dh Bɑbïlöniyɑ̀ ek: “Pɑ̈ɑ̈r wun kömi tyëng Kedɑr, kɑ jur-ɑ bëëdø kì wɑɑng cyɑ̈ɑ̈ng mwøl nɑ̈g wun. Mɑg wun kemmi gen kí jɑmm-ɑ yethi gen, kí sitɑrr, geki dhögi gen, kí kyënyi gen. Kwɑny wun ɑmɑlli gen, kɑ ji köbbi wun kinni, ‘Böögø ying-ɑ kɑ̈jj bënn kì bɑdhhi wun!’ “Yɑ Jwøng-ɑ Ácwɑ̈ɑ̈j, yɑ köbb-ɑ wun, wu tyëng Adhör kinni, rengi wun pɑ̈l kɑ wu pɑ̈ni wun. Kwøbbi wun ɑ́rum ki kømmø yi Rɑ̈dh Nebukɑdnesɑr, rɑ̈ɑ̈dh Bɑbïlöniyɑ̀, okööbø kinni, ‘Bïu! Kedhi wɑ be pɑ̈ɑ̈r kömi tyëng-ɑ bëëdø wɑ̈thi gen kïïdhø! Döri kɑɑl gen dhøge bong thïgø, pɑ nyi dij, bong gïn korii.’ “Kwɑny wun ɑmɑlli gen kí dhögi gen bënn! Ji-ɑ nyi teb yëyyi wɑ̈thi gen, yɑ ókɑ̈ni kömi gen ki ryɑ̈g, ge ókedhhɑ kì wɑ̈thi tùng bënn. Adhör ócög ɑ́ ryɑng gïti ɑtheer, óbëëd ɑ́ keny yije bëëd yi ógwøgg. Bong dhɑnhø men-ɑ ócigi bëëdø kì kenyɑni. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Keny-ɑ ɑ́rum Dhedekiyɑ̀ ki rønyø ɑ́ rɑ̈ɑ̈dh Yeudiyɑ̀ ceth, ɑköbbi yɑn møg-ɑ óbï kömi Elɑm yi Jwøng-ɑ Ácwɑ̈ɑ̈j. Wïlɑ̈bø, Jwøng-ɑ Ácwɑ̈ɑ̈j, ɑ́kööb kinni, “Jøliny wethh møg-ɑ ri gen bëëd yi Elɑm e teeg, ge ónɑ̈g yi yɑn. Elɑm ógöjjɑ yømø kì wɑ̈thi tùng bënn, ókedhhɑ kɑ jie tɑɑy-ɑ kɑ̈jj bënn, gïti keny-ɑ ówɑ̈dhi gen yethi pödhh bënn. Tyëng Elɑm ógöjjɑ böggø yi tyëngmɑ̈ɑ̈nø, møg-ɑ dwɑddi nɑ̈gi gen. Ge óryɑ̈g yi yɑn ki rɑ̈ji pyëwɑ, kɑ kömi gen nyi ödɑ ki liny gïti keny-ɑ óthumi gen. Rɑ̈nhi gen geki jɑggi gen ónɑ̈g yi yɑn, kɑ kwømɑ cïbɑ kenyɑni. De tyëng Elɑm ódwøøgɑ kej gen kì cyɑ̈ɑ̈n piny, kɑ ge thödhɑ ki døøjø këti. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Bene wöödø men-ɑ ɑ́köbbi yɑn yi Jwøng-ɑ Ácwɑ̈ɑ̈j kipe Bɑbïl geki jie èn: “Muuju wöödø pödhh bënn! Ngɑ̈ju møgɑni! Tïngu cinggi wun kɑ wöödø kwøb wun! Møgɑni ko kɑnni wun! Bɑbïl ɑ́pɑ̈ɑ̈dh! Mɑrduk jwøge ɑ́tørri! Ngïjji jwöggi Bɑbïl ɑ́yɑ̈r, ngïjje møg-ɑ kømi pyëw lɑ̈mmø ɑ́mød piny! “Ngetimɑ̈ɑ̈nø me kɑ̈ɑ̈l wɑɑng wuudø ɑ́bï kɑ pɑ̈ɑ̈r-ɑ kömi Bɑbïlöniyɑ̀, o gø gwøge’ gwøgø ɑ́ ryɑng. Ji órengi pɑ̈l geki lɑ̈yy, o bong dhɑnhø men-ɑ óbëëdø kì pönhɑni këti.” Jwøng-ɑ Ácwɑ̈ɑ̈j okööbø kinni, “Obëën bøli kenyɑni, yɑ óyɑb yi tyëng Isrɑil geki tyëng Yeudiyɑ̀; ge óbï ge óywöngø ge yɑb-ɑ yɑn, yɑ Jwøøg gen. Yuu-ɑ kedhi Dhɑyøn ópyënyi yi gen, kɑ ge cïm-ɑ tung-ɑ ónyudhi gen. Ge ólwöbø ki yɑn ki lwöbø men gïti ɑtheer, me pɑ pɑ̈nyi ki pɑ̈dø. “Jiɑ nɑ dyëg møg-ɑ ówëggi wɑ̈ɑ̈nyø kì kelli kïttì yi tyëng-ɑ ɑ́kwɑy gen. Ge ɑ́wïïn ɑ kelli kïttì ni dyëg, kɑ wɑ̈thi gen owïlø ki yuu pɑc. Kömi gen nyi wɑ̈dh-ɑ pɑ̈ɑ̈rø yi tyëng-ɑ yod gen. Tyëng-ɑ mɑɑn gen okööbø kinni, ‘Gïn-ɑ ɑ́gwøg yi wɑ pɑth ki bɑ̈jjø, mɑ́ ge ɑ́ceg-ɑ orøg kì bøli Jwøng-ɑ Ácwɑ̈ɑ̈j; ge di ceg-ɑ bëëdø ni kweyyi gen ɑ ɑ́gɑ̈n Jwøng-ɑ Ácwɑ̈ɑ̈j.’ “Wu tyëng Isrɑil, rengi wun kì Bɑbïlöniyɑ̀! Dhwödh wun, kì pönhɑni! Kwöngi wun ki dhwödhø! Pödhh mø teg, kì wɑɑng wuudø, ge ótug yi yɑn, o ge köllɑ pɑ̈ɑ̈r kömi Bɑbïlöniyɑ̀. Ri gen ójɑɑj gen kömi Bɑbïlöniyɑ̀, kɑ gø mɑg gen. Ge bɑ jøliny wethh møg pɑ nyi bɑ̈ɑ̈jø, nyɑ keny-ɑ dwɑddi gøjø yi gen kì ri gïïpiny pɑ nyi bɑj yi gen. Bɑbïlöniyɑ̀ óyɑg, kɑ jɑmm-ɑ yije bënn kɑ̈l yi tyëng-ɑ mɑnyii. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Wu tyëng Bɑbïlöniyɑ̀, pödhɑ ɑ́yɑg yi wun pëthi wun omedø, wu ceg-ɑ ngwønø ni wɑdh, wɑlɑ̀ kyeny, de men-ɑ́ kɑɑl wun, kɑɑldwøng bɑ men wïje dwøøg cyɑ̈n kɑ oyɑ̈rø. Bɑbïlöniyɑ̀ ógöögø ɑ́ pönh-ɑ bong pere kì kelli pödhh bënn, ógöögø ɑ́ ryɑng me yije bong pï. Bong dhɑnhø men-ɑ óbëëdø kì Bɑbïl kì bɑng kɑ ɑ́rënyi pyëwɑ, ódöng ɑ́ thur, o tyëng-ɑ ókɑ̈l keny-ɑ ɑ́di en dëlli gen óceg juurø yi ryɑ̈ng-ɑ ryɑ̈ɑ̈g en. “Bɑbïl ɑ́tyeg yi liny. Pwööd wun nywøli wethhi wun bënn kömi Bɑbïl, mɑ́ e ɑ́røngi kì bølɑ, yɑ Jwøng-ɑ Ácwɑ̈ɑ̈j. Kiiw ɑkyew kì bɑdhhi Kɑɑldwøng! Bɑbïl ɑ́dhɑl yi liny. Döre ɑ́cøør piny. Yɑ col-ɑ gøølɑ ki tyëng Bɑbïlöniyɑ̀. Colu kɑ̈jji wun, kɑ ge göggu gïn-ɑ ɑ́göggi tyëng-ɑ kyeelø yi gen. Byel ko wëggu kɑ̈gø kì pinyɑni, wɑlɑ̀ ko di byel møg kɑj. Wëdhh bënn møg-ɑ bëëdø kì pönhɑni óbwøg yi liny, kɑ ge døøg-ɑ pödhhi gen.” Jwøng-ɑ Ácwɑ̈ɑ̈j okööbø kinni, “Tyëng Isrɑil nɑ dyëg møg cyeddi yi ngur. Kömi gen ɑ́kwøng ki pɑ̈ɑ̈rø yi rɑ̈nhdwøøng Acuur, ɑnyøøn gen yi Nebukɑdnesɑr, rɑ̈ɑ̈dh Bɑbïlöniyɑ̀. Kipe møgɑni bënn, yɑn yɑ Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil, Rɑ̈dh Nebukɑdnesɑr cɑyɑ’ cɑyø geki pödhe, ni kɑ ɑ́cɑyɑ rɑ̈nhdwøøng Acuur. Tyëng Isrɑil ódwøøgɑ piny gen. Ge ócyɑ̈mø ki gïg-ɑ cyeg kì Kïti Kɑrmel, geki myërri Bɑcɑn, kɑ ge ocyɑ̈mø ki gïg-ɑ dwɑddi yi gen kì ri jɑmm-ɑ cyeg kì myërri Eprɑim geki Gilyɑd. Obëën bøli kenyɑni óbëëd e bong orøg kì Isrɑil, o bong rɑj kì Yeudiyɑ̀, mɑ́ pyëwɑ ólɑ̈ɑ̈m ki tyëng-ɑ́ wëyi gen ɑ́mïdhi yi yɑn. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Pɑ̈ɑ̈ru kömi Merɑtɑim geki Peköd. Nɑ̈gu gen kɑ piny gen rënyi wun. Gwøgu gïg-ɑ köbbɑ wun bënn. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. Cwɑggi liny olïngø kì pinyɑni, dɑ ryɑ̈g me dwøng. Pödhhi kömi piny bënn ɑ́tøg yi Bɑbïlöniyɑ̀ cøn, o ɑnɑn ɑ́bɑnyɑni ɑ́lony ki tøgø! Ji óbëëd ge ngɑ̈ngø yi ryɑ̈ng-ɑ ɑ́pɑ̈dhi kömi Bɑbïlöniyɑ̀. Bɑbïlöniyɑ̀! Yï ɑ́nyïɑ̈ggi kɑ yɑn, o yï ɑ́mɑg yi ɑ́kɑ̈ll-ɑ ɑ́ceg yi yɑn, cɑgg e bëëdø e kwïj yi yïn kinni yï nyïɑ̈ggi kɑ yɑn. Keny-ɑ ɑ́kɑnnɑ jɑmmi liny møgɑ, ɑ́yieb yi yɑn, kì bɑng kɑ ɑ́rënyi pyëwɑ. Yɑ Wïlɑ̈bø, Jwøng-ɑ Ácwɑ̈ɑ̈j, yïɑ dɑ gwøg me gwøgɑ kì Bɑbïlöniyɑ̀. Pɑ̈ɑ̈ru köme kì wɑ̈thi tùng bënn, kɑ kɑ̈jj-ɑ kɑnne byelle yɑb wun! Röör wun jɑmm-ɑ ɑ́yɑg yi wun piny! Rënyu pönhɑni! Ko di gïjø me wiy yi wun kinni tek! Nɑ̈gu jølinye bënn! Ngɑllu gen! Tyëng Bɑbïlöniyɑ̀ ɑ́gɑ̈g! Bøli kej cɑyi gen ɑ́wɑ̈nhi!” (Tyëng-ɑ ɑ́kïdhi yïnø, ódwöög kì Bɑbïlöniyɑ̀ ge dwöög-ɑ Yerusɑlem, o kër-ɑ ɑ́cool gøøli gen ókwøb yi gen; eni cɑ́y-ɑ ɑ́cɑɑy tyëng Bɑbïlöniyɑ̀ yi Jwøgee, Jwøng-ɑ Ácwɑ̈ɑ̈j kipe kɑ ɑ́rënyi gen Kenge.) “Köbbu jøliny møg-ɑ pɑ nyi bɑ̈ɑ̈jø ki wethh kinni, pɑ̈ɑ̈r gen kömi Bɑbïl. Tyeeg, kɑɑlɑni, kɑ ko di ngɑn wëggi bodhø. Cool wïj gïn-ɑ ɑ́gwøge cøn, kɑ göggu gïn-ɑ ɑ́gögge tyëng-ɑ kyeelø, mɑ́ e ɑ́göög-ɑ tɑ̈dø kì bølɑ, yɑ kwërø Jwøøg Isrɑil! Wøbbe ónɑ̈g kì yethi yëëth, o jølinye ónɑ̈g bënn kì cyɑ̈ngɑni. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. “Bɑbïlöniyɑ̀, yï tɑ̈dø ki mendwøng, bene ɑ bɑnge mɑɑnɑ yïn, yɑ Wïlɑ̈bø, Jwøng-ɑ Ácwɑ̈ɑ̈j! Bøli keny-ɑ cɑyɑ yïn ɑ́wɑ̈nhi. Yï tɑ̈dø, de yï ócyer kɑ yï ópɑ̈ɑ̈dhø, o bong ngɑn-ɑ ókøny yïn ki dhwödhi mɑl. Kɑ̈ddí órɑ̈b yi yɑn ki mɑc, kɑ jɑmmí rënyɑ bënn.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Tyëng Isrɑil geki tyëng Yeudiyɑ̀ nyingi gen ɑ́guud. Ge ceg kɑ nennø yi tyëng-ɑ ɑ́mɑg gen, o ge pɑ cuggi wëggi kedhø. De ngɑn-ɑ óbï be yieli gen teg. Nyinge bɑ Wïlɑ̈bø, Jwøng-ɑ Ácwɑ̈ɑ̈j. En kiree ɑ ónyïɑ̈ggi ki per gen, o piny bëne óthödhe ki mër, de ryɑ̈g pɑ̈dh-ɑ kömi Bɑbïlöniyɑ̀.” Jwøng-ɑ Ácwɑ̈ɑ̈j okööbø kinni, Bɑbïlöniyɑ̀ othøø! Jie othøø! Jɑgge kí tyëng-ɑ wɑ̈thi gen pel othøø. Jøtöng møg-ɑ nyi pëëdø ceg-ɑ thøø, wɑ̈thi gen pɑ nøg? Jølinye ceg-ɑ thøø. lidh bwøng-ɑ ɑ́bwøg gen! Nɑ̈gu kyënye, kɑ yɑ̈thi linye tørri wun! Jølinye møg-ɑ kïr nyøødh, o ge ceg-ɑ thøø! Rënyu kɑ̈re, yɑgu en kɑ jɑmme kwɑny wun! Wiy pinye mɑg yi mel kɑ wiy nɑ̈mme dwön gen. Bɑbïlöniyɑ̀ pɑ̈ng yi ngïjj-ɑ rijjø, ngïjj-ɑ ɑ́göjji tyëng pönhɑni dhëëgø. “O Bɑbïl yije óbëëd-ɑ yi óthönhì geki tulø, bong ji møg-ɑ ócigi bëëdø kì yije gïti ɑtheer. Gïn ni men-ɑ ɑ́pɑ̈dhi kömi Sødømɑ̀ kí Gømørɑ̀ keny-ɑ ɑ́nɑ̈gɑ gen geki myërr-ɑ buti gen, bɑ en ɑ óbï kömi Bɑbïl. Bong dhɑnhø men-ɑ óbëëdø kì kenyɑni këti. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” “Ji obëënø ge kɑ̈ɑ̈l-ɑ pödhø megø kì wɑɑng wuudø, ge kɑ̈ɑ̈l-ɑ pödhø me teg, o lɑ̈wi, rɑ̈nhì mø gïïr gwir-ɑ ri gen kipe liny. Wethhi gen geki pilli gen ɑ́kwɑny gen. Yethi gen wöny, o pëthi gen pɑ nyi lɑ̈ɑ̈m. Ge ruur nɑ nɑɑm omelø, kɑ̀ rïngi gen ki kyënyi gen. Ge bɑ møg nyïɑ̈ggi ki Bɑbïlöniyɑ̀. Rɑ̈ɑ̈dh Bɑbïlöniyɑ̀ ɑ́lïng ki wööni gen. Kɑ cingge ceg-ɑ ì lɑ̈b, kɑ ceg-ɑ órɑng ni ngɑndhɑjø me pɑ̈dhi piny. “Yɑ óceg ì wɑj kì wɑ̈g ni ngur kì yij thïm kömi Nɑm Urdun, e dwɑdd-ɑ cɑ̈mmø ki dyel; yɑ óceg ì nyɑn kì kömi Bɑbïl, yɑ Jwøng-ɑ Ácwɑ̈ɑ̈j, kɑ tyëng Bɑbïl ceg-ɑ ì dïr ki ngwej. Codhe, o jɑng-ɑ ómyegɑ jɑɑge pönhɑni. Á men ɑ pɑ̈ɑ̈r ki yɑn. Á men ɑ cuggi pyemi kwøbbɑ? Dɑ jɑgø me cuggi tïngi cinge yɑn ki liny? Lïngu møg-ɑ ɑ́gwir kipe pɑ̈ɑ̈dhi Bɑbïl, kí gïn-ɑ dwɑddɑ göggi jie. Cɑgg ɑ́ men-ɑ́ nyigi gen ge ceg kɑ ywɑɑj pɑ̈l, o dhɑnhø bëne óceg bwøgø. Piny bëne óceg onhɑ̈nh keny-ɑ ópɑ̈ɑ̈dh Bɑbïl, kɑ ywøge lïngi yi pödhh bënn.” Jwøng-ɑ Ácwɑ̈ɑ̈j okööbø kinni, “Yɑ kɑ̈n-ɑ kömi Bɑbïlöniyɑ̀ geki tyëng-ɑ bëëde kì yije ki ryɑ̈g. Yɑ ókɑ̈ni ki ji møg rënyi Bɑbïlöniyɑ̀, jiɑni óni yømø ɑ nyi kwør wél. Keny-ɑ óbëën cyɑ̈ɑ̈ng ryɑ̈ngɑni, piny ódöng ɑ́ ryɑng, o linyɑni ótöngi kì wɑ̈thi tùng bënn. Jølinye ko wëggi göjjø ki weth, wɑlɑ̀ ge ko wëggi lønyi ɑ́dhedheg ri gen. Yɑɑg-ɑ wøbb ko wiy wun! Nɑ̈gu jøliny bënn! Ri gen ókedhi yi kedd, kɑ ge thøw-ɑ yethi yëëth kì kɑ̈ddi gen. Isrɑil geki Yeudiyɑ̀ nuti wiy yɑn piny, yɑ Wïlɑ̈bø, Jwøøg gen, cɑgg ɑ́ kɑ ɑ́røngi gen kì bølɑ, yɑ Kwërø Jwøøg Isrɑil! Rengi wun wɑ̈g kì Bɑbïlöniyɑ̀, yieel wun wëyi wun wɑ̈g! Ri wun ko wëggu thøø kì gööj orøøg Bɑbïlöniyɑ̀. Yɑ col-ɑ gøølɑ, o yɑ cɑy-ɑ en kipe orøng-ɑ ɑ́gwøge. Bɑbïlöniyɑ̀ ɑ́bëëd e nɑ óthɑ̈ngi dhɑb kì cingɑ, kömi piny bëne ɑ́mɑ̈dhi kì yij óthɑ̈ngɑni ki møgø, kɑ ge nɑ̈g yi møgø. Møgi óthɑ̈ngɑni ɑ́mɑdh yi pödhh bënn, kɑ wɑ̈thi gen órënyø. Bɑbïlöniyɑ̀ ɑ́ceg ì rup kì piny kɑ ree møde! Ywøg wun en! Yɑ̈bbu kedde ki yɑdh men-ɑ ónøgi gen. Tyëngpɑth møg-ɑ yije ókööbø kinni, ‘Wɑ ɑ́dwɑdd-ɑ yieli Bɑbïlöniyɑ̀, de ɑ́dhɑ̈li yielø. Wiy wɑ en, kɑ wɑ døøg wɑ pödhhee. Bɑbïlöniyɑ̀ ɑ́cɑy yi Jwøk ki rɑ̈ji pyëwe kɑ gø ryɑ̈ge ki menteg.’ ” Jwøng-ɑ Ácwɑ̈ɑ̈j okööbø kinni, “Jiɑ kööbø ge óryeerø kinni, ‘Ányodh yi Jwøng-ɑ Ácwɑ̈ɑ̈j kinni wɑ gøgg-ɑ dyër. Kedh wɑ o tyëng-ɑ Yerusɑlem köbbi yi wɑ gïn-ɑ ɑ́gwøg yi Jwøng-ɑ Ácwɑ̈ɑ̈j.’ ” Rɑ̈nhi Mɑdɑy ɑ́tug yi Jwøng-ɑ Ácwɑ̈ɑ̈j, mɑ́ e dwɑdd-ɑ ryɑ̈gi Bɑbïlöniyɑ̀. Bene kër-ɑ ócole gøøle wïj kɑ ɑ́rënyi Kenge. Pëjji liny-ɑ pɑ̈ɑ̈r köme ceg-ɑ ryeerø kinni, “Pɑg wun nywøli wethhi wun! Kwɑnyu ködd! Tugu yɑy kömi Bɑbïlöniyɑ̀! Tyegu en! Cïmmi liny! Kɑ̈bbi wun ki tyëng-ɑ buddi kì yöö!” Gïn-ɑ ɑ́kwøb yi Jwøng-ɑ Ácwɑ̈ɑ̈j kinni gø ógögge tyëng Bɑbïlöniyɑ̀ ɑ́gwøge. Pönhɑni yïe dɑ nɑ̈mmì kí kɑ̈r bëne, de bøli keje ɑ́thumi, o ceg-ɑ thøø ceth. Wïlɑ̈bø, Jwøng-ɑ Ácwɑ̈ɑ̈j ɑ́köngi kiree kinni bɑ men kɑ̈ni kömi Bɑbïlöniyɑ̀ ki liny me ngenyø ni bɑ̈nyø, men wøøw köme, o gø tyɑme. Piny ɑ́cwɑ̈j yi Jwøk kɑ tege, Lɑ̈bø ɑ́cwɑ̈j yi en kɑ peli wïje kɑ mɑl peedhe keje. Kɑ̀ köbbe pïg-ɑ mɑl, ge nyi ceg-ɑ ruurø, kɑ pøøl nyi kɑ̈ɑ̈le kì cögi piny. Mɑl nyi wëgge’ ogwel kì yij kødh Kɑ yømø nyi öre kì keny-ɑ mïdhe gøn. Ji wɑ̈thi gen nyi ceg-ɑ cung kenyi lidh gen møgɑni, tyëng-ɑ nyi göögø ki ngïjji wɑ̈thi gen nøg, mɑ́ jwögg-ɑ nyi gwøg yi gen pɑth ki jwögg-ɑ dyër, o ri gen bong wëy. Ge bong per gen, o ge ceg kɑ gɑggø yi teedø. Ge bɑ møg-ɑ órënyi keny-ɑ óbëën Jwøng-ɑ Ácwɑ̈ɑ̈j be lidhi kwøbbi gen. Jwøøg Yɑgob pɑ ni gen; bɑ en ɑ ɑ́gwøg jɑmmì bënn, o tyëng Isrɑil ɑ́myege gɑ jie Nyinge bɑ Wïlɑ̈bø, Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j okööbø kinni, “Bɑbïlöniyɑ̀, yï bɑ ólelɑ. Bene yïn ólel-ɑ ɑ́tøgɑ pödhh-ɑ kyeelø. Yïn ɑ ɑ́cyeddɑ kyënyì geki tyëng-ɑ kömi gen. Kɑ yɑ̈ɑ̈th cyeddɑ geki tyëng-ɑ kwølli kyëny-ɑ pyejji gen. Yïn ɑ ɑ́nɑ̈ɑ̈gɑ cwøw kí mɑ̈nn, kí jøgdøngø, kí wøbb kí othønh-ɑ cwøw kí mɑ̈nn. Yïn ɑ ɑ́nɑ̈ɑ̈gɑ tyëngdyëg geki dyëgi gen; yïn ɑ ɑ́nɑ̈ɑ̈gɑ tyëng-ɑ köögø ki pwödh geki kyëny-ɑ ywɑjji kwërri køøg. Yïn ɑ ɑ́nɑ̈ɑ̈gɑ jɑgg geki yɑ̈yyi gen.” Jwøng-ɑ Ácwɑ̈ɑ̈j okööbø kinni, “Ólidh yi wun, eni kër-ɑ ócɑyɑ Bɑbïlöniyɑ̀ kí tyëng-ɑ bëëdø kì Kildɑn, kipe gïnrɑj men-ɑ ɑ́gögge Yerusɑlem. Yï Bɑbïlöniyɑ̀, yï nɑ kït men-ɑ ɑ́mød pödhhi kömi piny bënn. De yɑn yɑ Jwøng-ɑ Ácwɑ̈ɑ̈j, yɑ mɑ̈n ki yïn. Yï ókwɑny yi yɑn kɑ yï mødɑ piny, kɑ yï gwøgɑ yïn ɑ́ belø. Bong kït ɑ́kyel kì kelli kïtt-ɑ ɑ́geer yïn men-ɑ ócigi gyer këti. Yï ógöögø ki ryɑng, o yi ócög kinøw gïti ɑtheer. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Tïngu ber! Kodhu kɑng, o pödhh bënn lïng gen! Wiy pödhh bënn ri gen cøng gen be nyɑɑg ki Bɑbïlöniyɑ̀! Köbbu pödhi Arɑrɑt, kí pödhi Mïnì, kí pödhi Ackenɑdh; köbbu gen kinni pɑ̈ɑ̈r gen kömi Bɑbïlöniyɑ̀. Kɑ̈bbi wun ki ngɑn pyejji liny. Kɑ̈ɑ̈lu kyënyì ge ngenyø ni bɑ̈nyø. Gwiru pödhh bënn o ge kedhi gen be liny ki Bɑbïlöniyɑ̀. Cwöölu rɑ̈ɑ̈dh Mɑdɑy geki pëjji linye, kí lìnyi pödhh-ɑ jɑɑg yi en bënn. Piny ceg-ɑ kïïrø, o ceg-ɑ ónhɑ̈nh, mɑ́ Jwøng-ɑ Ácwɑ̈ɑ̈j dwɑdd-ɑ gwøgi gïg-ɑ ɑ́kwøbe kinni gï ógögge Bɑbïlöniyɑ̀, o gø gwøge ɑ́ ryɑng me yije pɑ bëëd yi dhɑnhø. Jøliny Bɑbïlöniyɑ̀ ɑ́wïyi ki nyɑɑg kɑ ge cöög-ɑ kɑ̈jji gen. Ge ɑ́nyönhi ni tyëng-ɑ mɑ̈nn. Thïggi kɑɑldwøng ɑ́tørri, ud ceg-ɑ rɑ̈bø. Tyëngwöödø nyi cig-ɑ rengi be köbbi rɑ̈ɑ̈dh Bɑbïlöniyɑ̀ kinni kɑɑldwøng yije ɑ́turri kì wɑ̈thi tùng bënn. Dhøggi wɑ̈dhh ɑ́mɑg yi tyëngmɑ̈ɑ̈nø, kɑ udd-ɑ teg møg-ɑ koor kɑɑl rɑ̈b bënn. Jøliny Bɑbïl ceg-ɑ myëlø. Ge ópwööd piny yi tyëngmɑ̈ɑ̈nø bɑng nyɑ keny me thiinh, kɑ ge nyøn ni kenyi nyøøn byel kì yij rɑrø. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Rɑ̈ɑ̈dh Bɑbïlöniyɑ̀ Yerusɑlem ɑ́ngølle kɑ gø cɑme. Kɑɑlɑni ɑ́döng nøw ni pug me jɑmm-ɑ yije ókøny piny. Gø ɑ́mwønye ni kenyi mwönyi ngwɑ̈l. Jɑmm-ɑ dwɑdde ɑ́cöög yije, kɑ møg-ɑ pɑ dwɑdde ngööge wɑ̈g. Wiy tyëng Dhɑyøn kööb gen kinni, “Gïgrijjø møg-ɑ ɑ́göggi wøn bënn bɑ gööj Bɑbïlöniyɑ̀!” Wiy tyëng Yerusɑlem kööb gen kinni, “Orɑng-ɑ ɑ́rɑngi wøn bɑ gööj Bɑbïlöniyɑ̀!” Codhe, ɑköbbi tyëng Isrɑil yi Jwøng-ɑ Ácwɑ̈ɑ̈j kinni, “Wu ócwɑg yi yɑn, o Bɑbïlöniyɑ̀ ócɑy yi yɑn ceth. Nɑ̈mmi Bɑbïlöniyɑ̀ ówëggɑ thwøwø, o nyingi pïi gen ówëggɑ cung. Wïj Bɑbïlöniyɑ̀ ódöng ɑ́ thur, yije óbëëd-ɑ yi lɑ̈yyi pɑ̈l. Ógöögø e pɑ nëënø yi rɑ̈jø, bong dhɑnhø men-ɑ óbëëdø kì yije, o ngɑn lidhii óceg bwøgø. Tyëng Bɑbïlöniyɑ̀ ngɑ̈rri nɑ ngurrì, o ge ce wöör ɑ́ nywøli ngur. Ge ɑ́nɑ̈g yi kɑ̈j! Ge óyɑ̈bbɑ ki gïn yɑ̈ng gen kɑ ge thödhɑ ki møgi oløg men nɑ̈g wɑ̈thi gen. Ge ókedhi be buddø, kɑ ge ónenø, o ge koo cyëëw. Ge ókïdhɑ be ngɑlø ni órömm kí ónyögg. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j ɑ́kööb kì ri Bɑbïl kinni, “Kɑɑl-ɑ ɑ́lenhi yi kömi piny bëne ɑ́mɑg! Ji nuti bwøgø yi gïn-ɑ ɑ́pɑ̈dhi kömi Bɑbïl? Nɑɑm omelø ɑ́möddi kömi Bɑbïl, kɑ gø mudde piny, ki ɑpɑgø me dwøng. Kɑ̈dd ɑ́rënyi kɑ ge ógöögø ki ryɑng, keny yije pɑ bëëd, o bong ngɑn weli e kɑ̈l-ɑ yije. Bel, jwøøg Bɑbïlöniyɑ̀ cɑyɑ’ cɑyø. Gïg-ɑ ɑ́kwɑle bënn ómuuj yi en, o pɑ cigi mɑllø yi pödhh bënn. “Döri Bɑbïl ɑ́pɑ̈ɑ̈dh. Wu tyëng Isrɑil rengu wɑ̈g kì kenyɑni! Pyëwɑ ɑ́rënyi ki mendwøng ki kɑɑlɑni, de yieel wun wëyi wun wɑ̈g kì yije. Pëthi wun ko nyönhi, mɑ́ wööd mø pɑth ki dyër ɑ́tɑɑy yij pödhø, de wu ko bwøg. Run men nyi bï kɑ wödde; i dɑ liny, i dɑ rɑ̈nh-ɑni me nyïɑ̈ggi ki rɑ̈nh-ɑni. Bøli keny-ɑ óløøgɑ kwøbbi ngïjji jwöggi Bɑbïlöniyɑ̀ obëënø; pinye óyɑ̈r bëne, kɑ jie nɑ̈g bënn. Gïg-ɑ piny kí møg-ɑ mɑl pëthi gen ómïni bënn, keny-ɑ ópɑ̈dhi Bɑbïlöniyɑ̀ cinggi tyëng-ɑ óbï ge kɑ̈ɑ̈l-ɑ wɑɑng cyɑ̈ɑ̈ng mwøl, ge bï-ɑ be dhurii piny. Bɑbïlöniyɑ̀ ceg-ɑ thøø kipe kɑ ɑ́nɑ̈ge ki ji mø gïïr kì kömi piny, kɑ ji mø gïïr nɑ̈ge kì Isrɑil. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j köbb-ɑ jie møg-ɑ Bɑbïlöniyɑ̀ kinni, “Wu ɑ́bødh ki thøø! Dhwödh wun, kedh wun, ko di gïn yïd yi wun! Cɑgg ɑ́ kɑ̀ bëëd wu lɑ̈wi ki pödhi wun, pɑr wun yɑn, yɑ Jwøng-ɑ Ácwɑ̈ɑ̈j, kɑ Yerusɑlem pɑr wun Á ngø wu nyii kööbø kinni, ‘Dhwɑ̈ɑ̈ng wøn ɑ́lɑ̈ɑ̈ny, wø ɑ́yɑ̈r, bong gïn yiel yi wøn, mɑ́ Kengø kej kwër kì Yerusɑlem ɑ́kwɑny yi tyëngpɑth.’ De yɑ köbb-ɑ wun kinni, bøli keny-ɑ óløøgɑ kwøbbi jwöggi Bɑbïl obëënø, o ji óbëëd ge okïïwø kì pönhɑni bëne. Cɑgg Bɑbïl kedhi men-ɑ́ mɑl, kɑ ree gëdde ki dörø kì kunɑni, yɑ ceg-ɑ ör ki ji møg rënyii. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Lïngu ywøng-ɑ ywöngi kì Bɑbïl. Bɑ ryɑ̈ɑ̈g pinyɑni ɑ ywøg. Bɑbïl rënyɑ’ rënyø; ócɑg ì lïïw. Liny ɑ́ruur kömi Bɑbïl ni ɑpɑgø ki ɑkyew me dwøng. Ge bï-ɑ be rënyi Bɑbïl. Jøliny Bɑbïl ómɑg kɑ wethhi gen tørri. Yɑ bɑ Jwøk men nyi cɑ̈yi kipe gïnrɑj men-ɑ gwøg, o Bɑbïl mëggɑ cɑ́y-ɑ kyëëw ki orøge. Jɑggi Bɑbïl geki tyëng-ɑ wɑ̈thi gen pel kí pëjji liny, ge ógöjjɑ nɑ̈gø yi møgø. Ge ókedhi be buddø, kɑ ge ocögø ge pɑ cyëw. Kwøbbɑ ɑgɑk, yɑ rɑ̈dh. Bene yɑn Wïlɑ̈bø, Jwøng-ɑ Ácwɑ̈ɑ̈j. Dörri Bɑbïl, dörr-ɑ teg, ge ócøør piny, kɑ thïggi döre, thïg-ɑ bɑ̈rrø rɑ̈b ki mɑc. Gïg-ɑ ɑ́gwøg yi pödhh bënn ɑ́gɑ̈g, ge bɑ møg cɑm yi mɑc. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Serɑiyɑ̀ wɑ̈d Nëriyɑ̀ wɑ̈d Mɑɑseiyɑ̀ ɑ ɑ́bëëd ɑ́ ókwøøm Rɑ̈dh Dhedekiyɑ̀, ɑ́weli Bɑbïlöniyɑ̀ e lwøøg-ɑ Dhedekiyɑ̀ kì ngween runni Dhedekiyɑ̀ kì yij lɑwø. Kɑ Serɑiyɑ̀ köbbɑ gïn-ɑ ógwøge. Kwøbbi ryɑ̈ng-ɑ óbï kömi Bɑbïlöniyɑ̀, ɑ́gweedɑ yij wɑ̈nyø, kí gïg-ɑ kööbø kì ri Bɑbïlöniyɑ̀. Kɑ Serɑiyɑ̀ köbbɑ kinni, “Keny-ɑ ówɑ̈dhí Bɑbïl, kɑ wɑ̈nyø men rɑ̈ngí ji bënn, o møg-ɑ yije lïngi yi gen. Orume kɑ yï kwɑ̈jjí kinni, ‘Yïn ɑ Jwøng-ɑ Ácwɑ̈ɑ̈j, yï ɑ́kööb kinni, keny órënyi yi yïn, o cöge yije pɑ bëëd yi ji geki lɑ̈yy, o óbëëd ɑ́ ryɑng gïti ɑtheer.’ Serɑiyɑ̀, keny-ɑ órum ki rɑ̈ngi wɑ̈nyø men teedø, töjji ree ki kït, kɑ leeng Nɑm Porɑt, kɑ yï kööb kinni, ‘Bene gïn-ɑ óbï kömi Bɑbïlöniyɑ̀ èn; óbïïl, o pɑ cigi thwørø këti, kì bɑng ryɑ̈ng-ɑ ógöggii yi Jwøng-ɑ Ácwɑ̈ɑ̈j.’ ” Kwøbbi Jermɑyɑ̀ ɑ́thumi. Dhedekiyɑ̀ ɑ́bëëd runne bɑ pyɑ̈r ɑ́ryew wïdɑ́kyel keny-ɑ ɑ́gööge ɑ́ rɑ̈ɑ̈dh Yeudiyɑ̀, ɑjyɑ̈ɑ̈ge kì Yerusɑlem ki runn pyɑ̈rø wïdɑ́kyel. Nyingi Meye cwøl ɑ́ Amutɑl nyɑɑr Jermɑyɑ̀ jɑl-ɑ ɑ́bëëd kì Libnɑ̀. Dhedekiyɑ̀ ɑ́røngi kì bøli Jwøng-ɑ Ácwɑ̈ɑ̈j ki orøng ni men-ɑ ɑ́gwøg yi Rɑ̈dh Yöyɑkim. Kɑ Jwøng-ɑ Ácwɑ̈ɑ̈j pyëwe órënyø ki tyëng Yeudiyɑ̀ geki kɑɑldwøng Yerusɑlem, kɑ gï nyige kì bute. Dhedekiyɑ̀ ɑ́ngɑ̈nyi wɑ̈ye kì ri Rɑ̈dh Nebukɑdnesɑr, rɑ̈ɑ̈dh Bɑbïlöniyɑ̀, codhe ɑbëën Nebukɑdnesɑr ki linye bëne, kɑ Yerusɑlem tyege, kì pyɑ̈ri cyɑ̈nggi pyɑ̈ri dwɑ̈tt, e runni Dhedekiyɑ̀ bɑ ɑ́bïngwen kì yij lɑwø. Ge ɑ́bï kɑ ge gudd-ɑ ngɑ̈ɑ̈j Yerusɑlem, kɑ ge othurø ki óthør møg nenni gen kɑɑl, kɑ Yerusɑlem obëëdø ɑ́ ɑtyeg gïti kɑ ɑ́göög runni Dhedekiyɑ̀ ki pyɑ̈rø wïdɑ́kyel kì yij lɑwø. Kì bïngween cyɑ̈nggi ngween dwɑ̈tt kì yij run, kì wɑɑngɑni ceth, keny-ɑ ɑ́thumi gïgcɑmm kɑ ji ónyönhø yi kɑ̈j, ɑtoor döri kɑɑldwøng piny. Jøliny bënn ɑ́thumi ki pɑ̈ɑ̈rø, ngö kɑɑldwøng ɑ́bëëd e bɑ ɑtyeg yi liny Bɑbïl. Ge nyi pɑ̈ɑ̈r piny bɑ wɑ̈r, ge kɑ̈l-ɑ yij bɑɑg gøldwøng, kì dhøng-ɑ kɑɑm dör, ge töng-ɑ Töör Urdun. De liny Bɑbïl ɑ́rengi bɑng Rɑ̈dh Dhedekiyɑ̀, kɑ gø mɑg gen kì thwøri Yerikö, kɑ wiy piny yi jølinye bënn. Kɑ Dhedekiyɑ̀ kïdhi bøli Nebukɑdnesɑr kì kɑɑl Riblɑ̀ kì myërri Amɑth, ɑløøg kwøbbe yi Nebukɑdnesɑr. Kɑ wɑ̈ddi Dhedekiyɑ̀ nɑ̈g yi Nebukɑdnesɑr kì bøli wïyi gen, kɑ jɑggi Yeudiyɑ̀ nɑ̈g thyew kì kenyɑni ceth. Codhe, ɑtøy nyingi Dhedekiyɑ̀, kɑ cingge twöj ki ɑ́cwecwel, kɑ kïdhi Bɑbïl. Kɑ Dhedekiyɑ̀ obëëdø ɑ́ ɑmɑg kì Bɑbïl gïti kɑ ɑ́thøwe. Kì bïryeew cyɑ̈nggi bïïj dwɑ̈tt kì pyɑ̈rø wïdɑ́bïngween runni Nebukɑdnesɑr, rɑ̈ɑ̈dh Bɑbïlöniyɑ̀ kì yij lɑwø, ɑ ɑ́bëën Nebudhɑrɑdɑn jɑngi gøldwøng kì Bɑbïl, o en ɑ bɑ pënyi liny, kɑ kedh-ɑ Yerusɑlem. Kɑ Kengø rɑ̈be geki gøldwøng, kí kɑ̈ll-ɑ døngø bënn kì Yerusɑlem. Kɑ döri kɑɑldwøng cøør piny yi jølinye. Kɑ tyëng-ɑ ɑ́döng kì Yerusɑlem cøn, geki tyëng-ɑ ɑ́yömmi yï Rɑ̈ɑ̈dh Bɑbïlöniyɑ̀, kí tyëng-ɑ kyeelø bënn møg-ɑ bɑ bödhhì mɑg yi Nebudhɑrɑdɑn, kɑ gï køøle Bɑbïlöniyɑ̀. De tyëng-ɑ nyingi gen cɑn ɑ́wiy yi en kì Yeudiyɑ̀, o ge pur gen bɑ̈gg geki pwödh. Kɑ löjji dilɑl møg-ɑ dhø Kengø tørri yi tyëng Bɑbïlöniyɑ̀, geki yɑ̈thi dilɑl, kí luy dilɑl, kɑ dilɑlɑni bëne kïdhi Bɑbïl. Kɑ ɑtöggi mɑc, kí ópɑ̈nni búr kí dikɑ̈bbì, kí gïg-ɑ nyi nɑ̈ɑ̈g mɑc, kí óthɑ̈ggì, kí ópɑ̈nni bɑkur, kí gïg-ɑ kyeelø møg-ɑ bɑ ɑkøny gɑ dilɑl, møg-ɑ nyi göög bënn kì yij Kengø kɑ̈l yi gen. Gïg-ɑ bɑ dhɑb kí ɑ́tegø ɑ́kɑ̈l yi gen bënn, cɑg kì ri óthɑ̈gg-ɑ thønhø geki ópɑ̈nn-ɑ nyi kɑ̈lli lelli mɑc, kí tɑ̈mm-ɑ nyi kïdhi remmi gëdhhì, kí ópɑ̈nni búr kí teggi lɑ̈mbɑ̈ɑ̈, kí ópɑ̈nni bɑkur, kí óthɑ̈ggi møgi oløg. Gïg-ɑ ɑ́göggi Kengø yi Sølømøn, ɑ løg löjji dilɑl ryeet, kí yɑ̈ɑ̈th, kí luy dilɑl geki wɑ̈dhh-ɑ kömi gen cungi yi en, ge ɑ́bëëd ge peeg cɑrø, ge nuti rømø. Wɑ̈thi gen dɑ ɑtɑ̈ny me bɑ̈r, tøge bɑ ɑwen ki nywøli yɑdh romɑn møg-ɑ ógwøgø ki dilɑl, kwɑnni gen bɑ miyø, o pyɑ̈r ɑ́bïngwen wïdɑ́bïkyel kì ri gen, ɑ́bëëd ge ónënnø e dhɑnhø cung-ɑ́ɑ̀ piny. Kɑ Ókwër-ɑ Dwøng, ɑ løg Serɑiyɑ̀, kí Dhepɑniyɑ̀, ókwër-ɑ bɑnge, kí jɑggi Kengø ɑ́dɑ̈g, kɑ̈l yi Nebudhɑrɑdɑn, pënyi liny Bɑbïlöniyɑ̀. Jɑl-ɑ ɑ́bëëd ɑ́ pënyi liny kì kɑɑldwøng kí jø tøg buri rɑ̈dh ɑ́bïj, kí jɑl-ɑ bɑng pënyi liny, ɑ mïdhi wɑ̈jji liny, kí jöddi kɑɑlɑni gɑ pyɑ̈r ɑ́bïkyel, gï ɑ́kɑ̈ɑ̈le. Kɑ ge muuj rɑ̈ɑ̈dh Bɑbïlöniyɑ̀ kì Riblɑ̀ kì myërri Amɑth yi Nebudhɑrɑdɑn, kɑ rɑ̈dh omuujø ki cigg kinni i nɑ̈ɑ̈g gen, kɑ ge nɑ̈g. Tyëng Yeudiyɑ̀ ɑ́kïdhi wɑ̈g kì piny gen, kɑ ge køøl yïnø. Møg bene kwɑnni ji-ɑ ɑ́kɑ̈l gɑ ɑmɑgg yi Nebukɑdnesɑr, kì bïryeew runne kì yij lɑwø, ɑ́kɑ̈ɑ̈d ki ji ɑ́lïp ɑ́dɑ̈g kí pyɑ̈r ɑ́ryew wïdɑ́dɑ̈g, kɑ okɑ̈dø ki ji miy ɑ́bïdɑ̈g kí pyɑ̈r ɑ́dɑ̈g wïdɑ́ryew kì Yerusɑlem kì pyɑ̈rø wïdɑ́bïdɑ̈ɑ̈g runne kì yij lɑwø, kɑ okɑ̈dø kì pyɑ̈r ɑ́ryew wïdɑ́dɑ̈ɑ̈g runne kì yij lɑwø ki ji miy ɑ́bïryew kí pyɑ̈r ɑ́ngwen wïdɑ́bïj. Kwɑnni ji-ɑ ɑ́kɑ̈l bënn bɑ ɑ́lïp ɑ́ngwen kí miy ɑ́bïj kɑ̀ reb gen. Kì run-ɑ ɑ́göög Abilmerodɑk ki rɑ̈ɑ̈dh Bɑbïlöniyɑ̀, pyëwe ɑ́lɑ̈ɑ̈m ki Yöyɑkin rɑ̈ɑ̈dh Yeudiyɑ̀, kɑ gø göönye wɑ̈g kì ød mɑg. Gø ɑ́gønye kì pyɑ̈rø wïdɑ́ryeew dwɑ̈tt, kì cyɑ̈nggi dwɑ̈y pyɑ̈r ɑ́ryew wïdɑ́bïj, e runni Yöyɑkin göögø ki pyɑ̈r ɑ́dɑ̈g wïdɑ́bïryew kì ød mɑg. Áköbbi yi Abilmerodɑk ki kwøb mø døøj, kɑ gø cïbe mɑl kibøli rɑ̈nhh-ɑ ɑ́mɑɑg Bɑbïlöniyɑ̀ bënn, kɑ gø ruuge kidøøj kibøli rɑ̈nhh-ɑ kyeelø. Kɑ ógudh-ɑ ɑ́rug yi Yöyɑkin kì ød mɑg wil ki møøgø mø myëër, kɑ døøg-ɑ be cɑm kì tɑɑw rɑ̈dh ki cyɑ̈ngg-ɑ ɑ́bëëde kì kunɑni bënn. Gïg-ɑ dwɑddi yi en bënn ɑ́bëëd ge nyi mëgg-ɑ en ceth. Kɑɑl-ɑ ɑ́bëëd e pɑ̈ng yi dhɑnhø bëne, ɑ́döng e lïïwø. Kɑɑl-ɑ ɑ́bëëd e owørø yi kömi piny bëne, ɑ́döng e nɑ thwöm! Ábëëd e nɑ nyirɑ̈dh cøn, de ɑnɑn ɑ́mëggi gwøøg bɑ̈ɑ̈ngø! Nyi lɑng wɑ̈r e óywöngø, pï rɑɑr-ɑ piny kì nyinge. Bong dhɑnhø ɑ́kyel mɑ ɑ́döng kì kelli cwøwe me lugii. Ámol kì piny yi tyëng-ɑ ɑ́nywɑ̈ɑ̈g gen ki kwøb; ge ɑ́yöd ge ómɑ̈nø ki en. Tyëng Yeudiyɑ̀ bong gïn yiel gen kì yij bɑ̈ɑ̈ngø; ge ɑ́ciir wɑ̈g kì yij pödhi gen. Ge bëëd ɑ piny megø, e bong piny men cölli nyingi gen. Ge bɑ ɑtyeg yi tyëngmɑ̈ɑ̈nø, bong yöö men pɑ̈r yi gen. Bong ngɑn nyi kedhi Kengø be mɑ̈ddø kì cyɑ̈nggi kwër. Mɑ̈nn-ɑ thønhø møg-ɑ ɑ́bëëd ge nyii wörø ceg-ɑ orɑng, o ókwër ceg-ɑ ngunø yøw. Dhøggi dörø wɑ̈dh-ɑ bëëdø yøw, o Dhɑyøn ceg-ɑ orɑng. Átyɑm ki tegø yi tyëngmɑ̈ɑ̈nø. Áwëggi orɑng yi Jwøng-ɑ Ácwɑ̈ɑ̈j, kipe ngenyi orøge. Nyige ɑ́mɑg kɑ ge kïdhi yïnø. Dhwɑ̈ɑ̈ng Yerusɑlem ɑ́kedh. Jøgdøngø ɑ́göög ge nɑ tenø me nyönhø yi kɑ̈j, ge ɑ́dhɑ̈ɑ̈r yi cyeddø yi jødwɑr. Yerusɑlem ópɑrr-ɑ dhwɑ̈nge men-ɑ weenø, de bong gïn yiel. Bong ngɑn mɑ ɑ́yielii, keny-ɑ ɑ́pɑ̈dhe cingi ngetimɑ̈ɑ̈nø; ɑ́ceg kɑ gɑggø yi tyëng-ɑ ɑ́tɑ̈ɑ̈yii piny. Dhwɑ̈ɑ̈ng Yerusɑlem ɑ́kedh, ɑ́döng e cyɑ̈dh-ɑ nøw. Ceg-ɑ ywøg e kull-ɑ wïje kì piny yi ɑyɑ̈r. Yerusɑlem ree ɑ́cödhe ki orøg Ceg nënnø e cödhø, de rɑ̈je pɑ rømme. Ápɑ̈ɑ̈dh ki pɑ̈ɑ̈dhø me rɑj, o bong ngɑn lugii. Átyɑm yi tyëngmɑ̈ɑ̈nø, o ceg-ɑ ywøøg kö Jwøng-ɑ Ácwɑ̈ɑ̈j, e kwɑjj-ɑ lɑ̈mpyëw. Kɑ̈re ɑ́kɑ̈l bëne yi tyëngmɑ̈ɑ̈nø. Gï ɑ́lidhe ge kedh-ɑ men-ɑ́ yij Kengø kiree, eni keny-ɑ ɑ́kyer yi Jwøng-ɑ Ácwɑ̈ɑ̈j kinni ko kedhi yi jurr-ɑ kyeelø. Tyëng Yerusɑlem cyɑ̈dhi ge óywöngø kɑ̀ yɑ̈ɑ̈b gen ki gïncɑm. Ge nyi wil-ɑ jɑmmi gen ki gïncɑm kipe ge óywɑj yi kɑ̈j. Kɑɑl ceg-ɑ ywøg kinni, “Lidh orɑngɑ yïn ɑ Jwøng-ɑ Ácwɑ̈ɑ̈j.” Kɑ ngɑn kɑ̈l yöö nyi köbbe kinni, “Lidh orɑngɑ! Bong ngɑn mɑ ɑ́rɑngi ni yɑn! Yɑ ɑ́rɑngi yi ryɑ̈ng-ɑ ɑ́kɑ̈ɑ̈l kömɑ yi Jwøng-ɑ Ácwɑ̈ɑ̈j ki rɑ̈ji pyëwe. “Áöni ki mɑc kì mɑl, mɑnyɑni ceg-ɑ lyelø kì yijɑ. Yɑ ɑ́cege ki ɑ́kɑ̈lli, kɑ yɑ tɑ̈ɑ̈ye piny. Kɑ yɑ wiye kì yij orɑng me bong cöge. “Orøgɑ ɑ́lidhe bënn, kɑ gï twööje kej ɑ́kyel. Gï ɑ́ngɑɑbe munɑ, o yɑ ceg-ɑ noor piny yi pegi gen. Yɑ ɑ́cïb cinggi tyëngmɑ̈ɑ̈nø yi Jwøng-ɑ Ácwɑ̈ɑ̈j, kɑ yɑ tyɑm yi gen. “Yɑɑg linyɑ, yɑɑg-ɑ wøbb ɑ́bɑny yi Jwøng-ɑ Ácwɑ̈ɑ̈j, ɑ́öni ki liny men nɑ̈g wøbbɑ. Jiɑ ɑ́nyøne ni kenyi nyøøn nywøli oløg kenyi biij gen. “Bene ɑ bɑnge lol nyingɑ ki pï. Bong ngɑn lug yɑn, bong ngɑn cïj yɑn. Yɑ ɑ́mɑg yi tyëngmɑ̈ɑ̈nø; jiɑ ɑ́döng ki cinggi gen “Cinggɑ ɑ́thɑngɑ, de bong ngɑn mɑ ɑ́køny yɑn. Kömɑ ɑ́cwøøl tyëngmɑ̈ɑ̈nø yi Jwøng-ɑ Ácwɑ̈ɑ̈j kì wɑ̈thi tùng bënn, yɑ nenni yi gen yɑ nɑ gïn cödhø. “De Jwøng-ɑ Ácwɑ̈ɑ̈j ɑ́gwøg-ɑ dyër, mɑ́ yɑn ɑ ɑ́pyem dhøge. Lïngu kwøbbɑ wun ɑ teedø bëne, lidhu yɑn kɑ̀ rɑngɑ. Wøbbɑ geki wojur ɑ́kïdhi yïnø gɑ ɑmɑgg. “Tyëng-ɑ ɑ́nywɑ̈ɑ̈g wøn ki kwøb ɑ́cwöölɑ be kønyi yɑn, de ge ɑ́bɑ̈nyi. Ókwër geki jɑgg ge ɑ́thøw-ɑ yethi yëëth kì kɑɑldwøng, ge pɑ̈nhhi ge yɑb-ɑ gïncɑm yi gen kipe ge óywɑj yi kɑ̈j. “Lidh orɑng-ɑ rɑngɑ yïn ɑ Jwøng-ɑ Ácwɑ̈ɑ̈j, e pyëwɑ cödø! Minɑ ɑ́cöd yi ywøg kipe orøng-ɑ ɑ́gwøgɑ. Ji ceg kɑ nɑ̈gø kì yethi yëëth, møøgø thøw-ɑ yethi ud. “Lïngí ywøgɑ, bong ngɑn lug yɑn, Tyëngmɑ̈ɑ̈nø pëthi gen med kipe kɑ ɑ́kɑ̈ɑ̈l ryɑ̈g kömɑ. Wiy cyɑ̈ng-ɑ ɑ́kwøb yi yïn bëe; kɑ wiy tyëngmɑ̈ɑ̈nø rɑngi gen ni yɑn. “Cɑy gen kipe orøng-ɑ ɑ́gwøg yi gen. Cɑy gen ni kɑ ɑ́cɑɑy yɑn kipe orøgɑ. Yɑ ywöngi yɑ ceg-ɑ orɑng; minɑ ɑ́cöd.” Jwøng-ɑ Ácwɑ̈ɑ̈j keny-ɑ ɑ́rënyi pyëwe ki Dhɑyøn, ɑrïïme gøn ki muudhø. Dhwɑ̈nge dhwɑ̈ng-ɑ ɑ́kɑ̈ɑ̈l mɑl ɑ́løge thur. Cɑgg ɑ́ men-ɑ́ Kenge, gø ɑ́wiye piny keny-ɑ ɑ́rënyi pyëwe. Myërri Yeudiyɑ̀ bënn ɑ́rënyi yi Jwøng-ɑ Ácwɑ̈ɑ̈j ki rɑ̈ji pyëwe; kɑ dörr-ɑ ɑ́korri pödhø dhure piny. Ayɑ̈r ɑ́kɑ̈ɑ̈le kömi pödhø geki jɑgge. Isrɑil ɑ́kedhhe keny-ɑ ɑ́rënyi pyëwe ki menteg. Ábɑ̈nyi kønyi wɑ keny-ɑ ɑ́bëën tyëngmɑ̈ɑ̈nø. Ábï kömee e nɑ mɑc, gïn-ɑ bøle bëne rɑ̈be rɑ̈bø. Nywøli wethe ɑ́cïme wɑ, de nɑ ngetimɑ̈ɑ̈nø. Tyëng-ɑ bëëdi gen med kì pëthee ɑ́nɑ̈ge bënn. Rɑ̈ji pyëwe ɑ́lidh yi wɑ, wɑ tyëng-ɑ bëëdø kì Yerusɑlem. Isrɑil ɑ́rënyi yi Jwøng-ɑ Ácwɑ̈ɑ̈j, de nɑ ngetimɑ̈ɑ̈nø, dörr-ɑ ɑ́korrii geki kɑ̈ll-ɑ døngø ɑ́wiye, gɑ thur. Ákɑ̈ni kömi tyëng Yeudiyɑ̀ ki ywøøg yij me pɑ thumi. Keng-ɑ yije ɑ́mɑlli wɑ en ɑ́møde piny. Cyɑ̈nggi kwër geki cyɑ̈nggi Sɑbɑth ɑ́wiye. Rɑ̈ji pyëwe ɑ́lidh yi rɑ̈dh geki ókwër. Jwøng-ɑ Ácwɑ̈ɑ̈j këli lɑme ɑ́bɑnye, kɑ Kengi kwër wiye piny. Tyëngmɑ̈ɑ̈nø ɑ́wëgge cøøri dörre piny. Ge ɑ́wör ki wörri tyɑmi wɑ kì keny-ɑ́ yije nyi mɑ̈ddi yi wɑ e pëthee omedø kɑ̈ge dööng. Ádwɑdd-ɑ yi Jwøng-ɑ Ácwɑ̈ɑ̈j kinni cøør döri Dhɑyøn piny; gø ɑ́røme, o këër dönge yode, codhe o gø rënye bëne. Uddi kur kí dör-ɑ ɑ́bëëd e wen-ɑ gøn, ge buud-ɑ piny bënn ɑnɑn gɑ thur. Thïg buud-ɑ piny ge tørrø, dëddi gen ri gen mød gen. Rɑ̈dh geki jø kɑ̈ll-ɑ døngø ying-ɑ yïnø. Cigg pɑ pwönyi këti, o bong gïn nyi cɑ̈rri jøtöng yi Jwøng-ɑ Ácwɑ̈ɑ̈j. Jøgdøngi Yerusɑlem ɑ́pëggi piny ge okudø, wɑ̈thi gen dɑ belø, ge rug-ɑ ocwɑ̈llì. Mɑ̈nn-ɑ thønhø kull-ɑ wɑ̈thi gen kì piny. Nyingɑ ɑ́dhëg yi ywøg, yɑ ceg-ɑ orɑng. Pyëwɑ orɑ̈mø, kɑ̀ nennɑ wɑddi wøn ge onɑ̈gø. Othønhø, kí møg-ɑ dhødh ceg-ɑ thøø kì yethi yëëth. Ge ywøg-ɑ kɑ̈j kí röödhø, de bong gïn kwɑ̈nyyi gen yi mëëg gen. Ge pɑ̈nhhi kì yethi yëëth ge nɑ ji mø ri gen di kedd, kɑ ge nyi thøw-ɑ köthi mëëg gen. Á ngø ɑ cuggi kwøbø yi yɑn, yïn ɑ Yerusɑlem? Yï ólug yi yɑn kidï? Bong ngɑn mɑ ɑ́pɑ̈nyi orɑng ni yïn, ki orɑng-ɑ ni men. Ryɑ̈ng-ɑ ɑ́pɑ̈dhi kömí bong cöge; nɑ nɑɑm omeli dwøng. Jøtöng møgí yï nyi köbbi ge’ pyed kete, yï ɑ́wëny yi pwönyø mi gen, kì bɑng kɑ̀ pɑ nyi nyudhi gen yïn orøgí. Yï ɑ́wëggi rumø yi gen kinni bong yewø men dwɑddi kì yïí. Tyëng-ɑ kɑ̈lli bøli kɑɑldwøng ceg-ɑ gɑ̈ɑ̈gø. Wɑ̈thi gen nyi ceg kɑ kenø yi gen kenyi lidh gen Yerusɑlem ɑ́ thur, ge okööbø kinni, “Bene kɑɑl-ɑ bɑ ɑ́mɑɑrø èn? Bene kɑɑl-ɑ ɑ́pëddi døøjø kì kömi piny èn?” Yï ceg kɑ lɑrrø yi tyëngmɑ̈ɑ̈nø, kɑ̀ nenni yïn yi gen; ge kööbø ge thönyy-ɑ dhøggi gen, ge cem-ɑ, “Árënyi yi wøn! Ápɑ̈ɑ̈dh dicyɑ̈ngtïn, ɑ́lidh yi wøn! O bene pɑ̈ɑ̈dhe ɑ ɑ́yïd yi wøn!” Jwøng-ɑ Ácwɑ̈ɑ̈j møg-ɑ ɑ́kwøbe kinni gï ógwøge, ɑ́gwøge cyee, wɑ ɑ́nɑ̈ge e pyëwe pɑ lɑ̈ɑ̈m, ni kɑ ɑ́köbbe wɑ ceth kɑ̈ge dööng. Tyëngmɑ̈ɑ̈nø ɑ́thödhe ki tegø me tyɑɑm wɑ yi gen, o pëthi gen med gen kɑ̀ pɑ̈ɑ̈dh wɑ. Yerusɑlem, wiy dörrí ywøøg gen kö Jwøng-ɑ Ácwɑ̈ɑ̈j! Wiy pïi nyingí rïngi gen ni nɑ̈mmì kì wɑ̈r kí dicɑ̈ng. Wiy yï thøw yi ywøg geki kïïmø. Nyi dhwödhí mɑl kì wɑ̈r kɑ yï nyi ywøøg kö Jwøng-ɑ Ácwɑ̈ɑ̈j. Køny yijí piny ki ywøg yï ókwɑ̈jjø kipe nyigí. Othønhø ceg-ɑ thøø yi kɑ̈j kì tøggi yëëth! Á kipe ngø ɑ cɑɑy wøn kinnï, yïn ɑ Jwøng-ɑ Ácwɑ̈ɑ̈j? Tyëng-ɑ mɑ̈nn, nyigi gen, nyig-ɑ mɑɑr yi gen, ceg kɑ cɑmø yi gen! Ókwër geki jøtöng ceg kɑ nɑ̈gø kì yij Kengø kiree! Tyëngdøngø kí othønhø buud ge thøø kì yethi yëëth! Wojur kí wøbb ɑ́nɑ̈g yi tyëngmɑ̈ɑ̈nø! Ge ɑ́nɑ̈g-ɑ yi yïn keny-ɑ ɑ́rënyi pyëwí. Tyëngmɑ̈ɑ̈nø ɑ́cwööl-ɑ yi yïn, o ge rujji gen kì kömɑ; bong ngɑn bødh kì cyɑ̈ɑ̈ng rɑ̈ji pyëwí. Nyigɑ, nyig-ɑ ɑ́pidhɑ ge mɑɑrɑ’ mɑɑrø ɑ́nɑ̈g yi gen. Bɑ yɑn ɑ ngɑ̈nyi ledhi dhøggi cɑ́yi Jwøk. Yɑ ɑ́kïdhe piny piny, yij muudhø. Kɑ yɑ pwöde pyëwe pɑ lɑ̈ɑ̈m. Kɑ yɑ wiye dëlɑ kɑggø, o cuɑ tørrø. Yɑ ɑ́cyëëge ød mɑg keny-ɑ rɑj, keny yije rɑngɑ. Yɑ ɑ́göjje bëëdø kì yij muudhi thøø. Yɑ ɑ́twöje ki ɑ́cwecwel, yɑ bɑ ɑmɑg men pɑ cuggi pɑ̈ɑ̈rø. Yɑ ywöngi, yɑ odhɑmmø, de Jwøk ɑ́bɑ̈nyi kønyi yɑn; yɑ cyɑ̈dhi yɑ ócyerø, kɑ yuuɑ nyi cyëëg yi tuggi kïttì mø døngø, kì tung-ɑ nyi løgɑ wïjɑ. Buud-ɑ yuuɑ ni lɑ̈y dub; ɑ́pɑ̈ɑ̈r kömɑ ni ngur. Yɑ ɑ́ywɑɑje wɑ̈g kì yij yöö, ɑkɑgge yɑn kɑ yɑ wiye kì kenyɑni. Wethe ɑ́kwɑnye, kɑ nywøli wethe tyëëge riɑ. Nywøli wethe ɑ́ì cød kì riɑ. Teedø rïïjø ge gɑgg-ɑ yɑn, yɑ nuti thödhø yi en ki gïncɑm, den-ɑ́ orɑng ɑ ɑ́mëgge yɑn ɑ́ kej gïncɑm geki pï. Bølɑ ɑ́nyønge kì piny kɑ leggɑ ótørrø yi lel. Yödi dël, geki mër kí medi pyëw, ge ɑ́wïl kì wïjɑ. Yɑ pɑ nëënø këti, bong gïn ngɑ̈dhɑ kì yï Jwøng-ɑ Ácwɑ̈ɑ̈j. Ledhi dhøg orɑng geki bëëdɑ yïɑ bong keny pëggɑ, bong gïn pɑ̈ɑ̈rɑ ki en. Yɑ rïïjø yɑ rømm-ɑ gen, minɑ cödø cödø. De pyëwɑ nyii dwöögø kenyi pɑ̈ddɑ riɑ kinni: Mɑ̈ɑ̈dø mi Jwøng-ɑ Ácwɑ̈ɑ̈j pɑ nyi thumi geki lɑ̈mpyëwe; ge nudd ge nud, ge nud ceth ni wøw ɑ pɑ nyi bɑ̈jji ki ruø, kɑ nɑ cɑ̈ng ɑ pɑ nyi bɑ̈jji ki tuulø. Yɑ ngɑ̈ny-ɑ Jwøng-ɑ Ácwɑ̈ɑ̈j kete, e kete ɑ ngɑ̈dhɑ. Jwøng-ɑ Ácwɑ̈ɑ̈j, tyëng-ɑ gɑ̈nnii bënn nyi gögge’ gïndøj. O lɑ̈w keløg wɑ nenn-ɑ yïe, mɑ́ wɑ bɑ møg-ɑ ɑ́yiel yi en. O lɑ̈w keløg wɑ odïdø ki ngïïnø, wɑ nudd wɑ bɑ wøbb. Lɑ̈w keløg wɑ pëgg-ɑ piny wɑ okudø, kenyi rɑngi wɑ; lɑ̈w ke kuul wɑ wɑ̈thee piny, cɑ́yee yïëëy wɑ, mɑ́ yïee dɑ ngɑ̈ɑ̈dhø. Yïëy wɑ møgɑni bënn cɑgg wɑ gwɑddi kɑ wɑ pwöd. Jwøng-ɑ Ácwɑ̈ɑ̈j, pyëwe nyii lɑ̈ɑ̈mø, wɑ koo bɑny yi en gïti ɑtheer. Wɑ ócuggø thödhi yi en ki rɑ̈ɑ̈m yij, de wɑ mɑɑr yi en ceth ki mendwøng. Pyëwe pɑ med ki wëggi wɑ orɑng geki kïïmø. Ngɑ̈nyi yi Jwøng-ɑ Ácwɑ̈ɑ̈j, eni bøli keny-ɑ nyi bëëd wëyee gɑ ɑmɑgg, o ge torø torø. Ngɑ̈nyi yi en kenyi twöön wɑ ki gïg-ɑ ɑ́mëgge wɑ. Ngɑ̈nyi yi en kenyi di ruj kì burø. Gïn-ɑ dwɑddi yi Jwøng-ɑ Ácwɑ̈ɑ̈j, bɑ en ɑ nyi gwøg ceth. Bɑ en ɑ nyi wëggi gïgrijjø kí gïgdøj cwöbø. Á kipe ngø ɑ gööny wɑ, wɑ ɑ́cɑy kɑ per orøgee? Wil wɑ bëëdee, kɑ wɑ døøg wɑ kö Jwøng-ɑ Ácwɑ̈ɑ̈j. Yïëbbi wɑ pëthee Jwøk, ɑ ying mɑl, kɑ wɑ kwɑ̈jji wɑ kinni, “Wø ɑ́røngi; dhøgí ɑ́pyem yi wøn, o pyëwí nuti lɑ̈ɑ̈mø ki wøn, yïn ɑ Jwøng-ɑ Ácwɑ̈ɑ̈j. “Wø ɑ́cyeddi yi yïn kɑ wø nɑ̈g yi yïn, kɑ lɑ̈mpyëwí mɑ̈ɑ̈n yi rɑ̈ji pyëwí. Rɑ̈ji pyëwí nɑ pøølø me dwøng men mɑ̈ɑ̈n kwɑ̈jji wøn wɑ̈nhi yïí. Wø ɑ́wëggí gwøgø wøn ɑ́ thur yi pödhh bënn. “Wø ceg kɑ yɑnyyø, o wø ceg kɑ gwɑddø yi tyëngmɑ̈ɑ̈nø. wø ɑ́ryɑ̈g, o wø bëëd ɑ yij böögø. Nyingɑ ceg-ɑ lolø ki pï ni nɑm, kɑ̀ nennɑ ryɑ̈ng-ɑ ɑ́pɑ̈dhi kömi wɑddi wøn. “Pïi nyingɑ ceg-ɑ mullø ge pɑ cungi, gïti keny-ɑ ólug Jwøng-ɑ Ácwɑ̈ɑ̈j thɑ̈wwe, kɑ ólïdhø e ying-ɑ pɑɑre mɑl, pyëwɑ nyi ceg-ɑ rɑ̈m kenyi lidhɑ orɑɑng mɑ̈nni kɑɑldwøng. “Yɑ ɑ́ceg ki ɑ́kɑ̈llì ni winyø yi tyëngmɑ̈ɑ̈nø, mø bong gïn pere mɑɑn yɑn yi gen. Yɑ ɑ́luudh yij yith yi gen, kɑ dhø yith ngyëdi gen ki tungi kït. Kɑ pï ócɑ̈gø ki mudi yɑn, ɑrumɑ kinni thøø ɑ́cyɑ̈ngi. “Kɑ yɑ ywøøg-ɑ köörí, yïn ɑ Jwøng-ɑ Ácwɑ̈ɑ̈j, yɑ ying-ɑ tyeli yith, ɑkwɑjjɑ yïn, kɑ kwɑ̈jjɑ lïngi yi yïn. Kwɑ̈jjɑ ɑ́løøg yi yïn, ɑköbbí yɑn kinni yɑ ko böggi. “Yï ɑ́bï be dømi yɑn, yïn ɑ Jwøng-ɑ Ácwɑ̈ɑ̈j, kɑ wëyɑ yiel yi yïn. Cwɑg yɑn, mɑ́ gïgrijjø møg-ɑ ɑ́göggi yɑn, ngɑ̈nyi yi yïn bënn. Mɑɑn-ɑ mɑɑn yɑn yi tyëngmɑ̈ɑ̈nø ngɑ̈nyi yi yïn, o rɑjj-ɑ dwɑddi gen göggi yɑn ngɑ̈nyi yi yïn bënn. “Ge ɑ́lïngi yi yïn ge gwɑdd-ɑ yɑn; ɑmolpiny mi gen bëne ngɑ̈nyi yi yïn, yïn ɑ Jwøng-ɑ Ácwɑ̈ɑ̈j. Ge nyi tyëg cɑ̈ng ge kømm-ɑ yɑn, ge dwøngg-ɑ gïg-ɑ dwɑddi gwøgø yi gen. Yɑ ceg kɑ kwøllø ki nennø yi gen kì wɑ̈r kí dicɑ̈ng. “Cɑy gen kipe gïn-ɑ ɑ́gwøg yi gen, yïn ɑ Jwøng-ɑ Ácwɑ̈ɑ̈j. Göjjí gen cyën, kɑ wiy yethi gen bɑɑr gen! Dwɑr gen, kɑ nyingi gen rɑ̈ɑ̈j wɑ̈g kì kömi piny!” Dhɑb men-ɑ ɑ́bëëd e orɑ̈ɑ̈dø, ɑ́luuj; kïtt-ɑ ɑ́geer Kengø buud ge kedhhø kì yethi yëëth. Wøbbi Dhɑyøn ɑ́bëëd per gen teg kì yï wøn ni dhɑb, de ɑnɑn ge ɑ́døøg ge nɑ tɑ̈mmi lɑ̈b yøw. Cɑgg ɑ́ gøøl, nyige nyi korre’ korrø, de jiɑ nɑ wudø ɑ nyi tönggi nyige. Nyigi gen ɑ́wëggi gen nɑ̈gø yi kɑ̈j geki röödhø; othønhø ceg-ɑ kwɑ̈jjø ki gïgcɑmm, de bong ngɑn thödhi gen. Tyëng-ɑ ɑ́bëëd ge cɑmm-ɑ gïg-ɑ pëddi døøjø, ɑ́göög ge ceg-ɑ pɑ̈nhhø yi kɑ̈j kì yethi yëëth. Tyëng-ɑ ɑ́tɑ̈bbi kì yij kɑ̈r, ɑ́døøg be gwen. Jiɑ ɑ́cɑy ki cɑ́y mø døngø kibøli cɑ́yi Sødømɑ̀, møg-ɑ ɑ́gwɑɑr piny yi cingi Jwøng-ɑ Ácwɑ̈ɑ̈j. Nyiirɑ̈nhi wøn ɑ́bëëd ge dhïw ni ɑ́piy, ge ceg-ɑ ngwønø, dëlli gen lwiy. Anɑn kɑ̈jj-ɑ buud yi gen kwïj kì yethi yëëth, ge nënni ge nɑ tyëngthøø, ge bɑ cu, o ge wɑ̈ɑ̈jø; dëlli gen pöggø. Tyëng-ɑ ɑ́thøw kì yij liny lɑ̈w kibøli møg-ɑ ɑ́thøw kì cyɑ̈n, gen ɑ tyëng-ɑ ɑ́ywɑj yi kɑ̈j kì yethi yëëth. Ryɑ̈ng-ɑ ɑ́pɑ̈dhi kömi jiɑ, ɑ́kɑ̈ni ki böögø me dwøng, mëëg, nyigi gen møg-ɑ ɑ́mɑɑr yi gen ɑ́thɑl yi gen kɑ gï cɑm gen. Jwøng-ɑ Ácwɑ̈ɑ̈j linye ɑ́ngøøge piny kömi Dhɑyøn ɑ́ mɑc, kɑ gø rɑ̈be kinni tweet. Bong ngɑn mɑ ɑ́rum, cɑgg ɑ́ kì kelli jɑggi pödhh-ɑ kyeelø kinni dɑ ngɑn cuggi turri yij Yerusɑlem ki liny. De møgɑni ɑ́cwöb kipe kɑ ɑ́røngi jøtöng møge, kɑ ji mø yï gen bɑ̈r, othøø ki gööj kerri orøøg ókwër. Pëjje ɑ́bëëd ge óthɑ̈mmø kì yethi yëëth ni cörr, ge cödhø cödhø yi remø, kɑ bong-ɑ ngɑn mɑ ɑ́nywɑl gen. Kɑ ge nyi cyɑ̈r yi ji kinni, “Kedh wun! Wu cödhø! Yɑ ko nywɑl wun!” Codhe, ɑpëggi gen be wïïnø kì yethi pödhh-ɑ kyeelø, e bong ngɑn cwøøl gen gøle. Jwøng-ɑ Ácwɑ̈ɑ̈j cwɑgge tøøk ki gïn, bɑ en kiree ɑ ɑ́kedhhi gen. Ókwërree geki pëjjee bong per gen kì yï Jwøng-ɑ Ácwɑ̈ɑ̈j. Wɑ ɑ́pïd yi nënnì, e bong ngɑn bï be kunyø. Wɑ ɑ́rømm-ɑ kinni wɑ ókøny yi pödhø me bong gïn kunye. Wɑ ɑ́bëëd wɑ ceg kɑ korø yi tyëngmɑ̈ɑ̈nø; wɑ pɑ cuggi cyɑ̈dhø kì yethi yëëth. Bong gïjø mɑ ɑ́döng, thøø ɑ́bï. Kɑ ge cwøøy-ɑ kömee ni cor. Kɑ wɑ dwɑr yi gen kì kelli kïttì, kɑ wɑ pɑ̈ɑ̈y gen piny kì yij pɑ̈l. Ngɑn-ɑ́ ree ɑ́bëëd yi wɑ ɑ́mɑg yi gen, eni rɑ̈nh-ɑ ɑ́yieny yi Jwøng-ɑ Ácwɑ̈ɑ̈j, en ɑ ɑ́rømmi yi wɑ kinni wɑ ókor yi en ki ngɑn bï be mɑ̈nyø. Gɑ̈ɑ̈g wun, wu tyëng Edöm kí Udh, med pëthi wun. Ryɑ̈ɑ̈g wun obëënø thyew; wu ócyerri wu cyɑ̈dh-ɑ nøw, wu yɑ̈ɑ̈rø. Dhɑyøn ɑ́rum ki coli kej bɑ̈jje, wø pɑ cigi mïdhø kì yïnø yi Jwøng-ɑ Ácwɑ̈ɑ̈j këti. De yïn, Edöm, yï ócɑy yi Jwøng-ɑ Ácwɑ̈ɑ̈j, rɑjj-ɑ ɑ́gwøg yi yïn ónyodhe. Lidh gïn-ɑ ɑ́pɑ̈dhi kömi wøn, yïn ɑ Jwøng-ɑ Ácwɑ̈ɑ̈j? Lidh wøn, wø ɑ́yɑ̈r. Jɑmmi wøn ying-ɑ cinggi tyëngpɑth, kɑ̈lli wøn bëëd-ɑ yi tyëngpɑth. Wëëg wøn ɑ́nɑ̈g yi tyëngmɑ̈ɑ̈nø, mëëg ɑ́döng gɑ kïjj. Wø ceg-ɑ ngyew ki pïg-ɑ mɑdh yi wøn wø ceg-ɑ ngyew ki yugg-ɑ tɑ̈ɑ̈d yi wøn. Wø pïdø ni ɑderr geki ɑmɑl; wø pɑ nyi wëggi ywömø. Gïncɑm-ɑ yiel wøn ki kɑ̈j, nyi kwɑɑj wø’ Rïp geki Acuur. Kweyyi wøn ɑ ɑ́røngi, de ɑnɑn ge ɑ́rum ki kedhø, ɑdöng wøn wø orɑngø yi gööj orøng-ɑ ɑ́gwøg yi gen. Wø jɑɑg-ɑ yi ji møg pɑ̈r ki bɑ̈ngg, o bong ngɑn yiel wøn kì cinggi gen. Tyëng-ɑ nɑ̈gø ki ji wïïn ɑ bɑdhhi myërr, de wø nyi bøy-ɑ thøø kenyi kedhi wøn be yɑb ki gïncɑm. Kwɑ̈g ceg-ɑ olwɑny kì ri wøn yi kɑ̈j, o dëlli wøn ceg-ɑ lyelø ni mɑc. Mɑ̈nni wøn ɑ́mød kì men-ɑ́ wïj Kïti Dhɑyøn kiree, o wojur ceg kɑ mødø kì kɑ̈ddi Yeudiyɑ̀ møg-ɑ kyeelø. Jɑggi wøn ɑ́kɑ̈l kɑ ge ngɑb, jøgdøngi wøn pɑ wør. Wøbbi wøn ɑ́cïri rɑ̈ɑ̈gø ki byel ni bɑ̈ngg, yɑnythønhø cyɑ̈dhi ge ócyerrø yi pegi yugg-ɑ tyëddi yi gen. Jøgdøngø ɑ́wïyi ki bëëdø kì dïpɑc, o yɑɑg-ɑ wøbb ɑ́wïyi ki thom ki thøm. Bong medi pyëw me nud këti kì yï wøn, den-ɑ́ kïïmø ceth ɑ nud. Jɑmm-ɑ́ per gen ɑ́pwöd wøn köthi wøn ɑ́lɑ̈ɑ̈ny, wø ɑ́røngi, o ɑnɑn wø ɑ́gɑ̈g. Minni wøn ɑ́cöd, o nyingi wøn ɑ́cøør yi ywøg. Mɑ́ Kïti Dhɑyøn ɑ́döng kete, ji ɑ́dɑ̈ɑ̈g, bɑ ógwøgg ɑ ɑ́döng ge óywöngø kì yije. De yïn, yïn ɑ Jwøng-ɑ Ácwɑ̈ɑ̈j, yï bɑ rɑ̈dh gïti ɑtheer, o yï ójyɑ̈ɑ̈gø ceth gïti thumi piny. Á kipe ngø ɑ wiy wøn piny ki kɑɑm-ɑ bɑ̈ɑ̈r ni men? Wø ócigi pɑrø yi yïn këti? Dwøøg wøn köörí, yïn ɑ Jwøng-ɑ Ácwɑ̈ɑ̈j! Dwøøg wøn köörí! Dwøøg dhwɑ̈ɑ̈ng wøn keje ni kɑ ɑ́bëëde cøn. Wɑlɑ̀ wø ɑ́ceg kɑ bɑnyø yi yïn gïti ɑtheer? Rɑ̈ji pyëwí bong cöge? Kì pyɑ̈r ɑ́dɑ̈ɑ̈g runn, kì bïïj cyɑ̈nggi ngween dwɑ̈tt, e yɑn, yɑ ókwërø Idhkiel, wɑ̈d Budhì, yɑ obëëdø kì kelli Yeud kì yïnø, kì kömi Nɑm Kebɑr kì Bɑbïl. Mɑl ree ɑ́yiebe, kɑ yɑ cɑ̈rri yi Jwøk. Ábëëd ɑ́ bïïj runni Rɑ̈dh Yöyɑkin kì yïnø. Kì Bɑbïlöniyɑ̀ kì kömi Nɑm Kebɑr, ɑ ɑ́lïngɑ cwɑggi Jwøng-ɑ Ácwɑ̈ɑ̈j e okööbø ki yɑn, yɑ Idhkiel wɑ̈d Budhì, kɑ tege yodɑ. Alïïdhɑ mɑl, kɑ ɑtunø lidh-ɑ e kɑ̈ɑ̈l-ɑ wɑɑng wuudø, o mɑl ogwelø kì yij pøølø me dwøng, e tøge omënyø, o dyëre dɑ gïjø me rɑ̈nggø ni ngyënyø dilɑl. Kɑ yɑ ólïdhø kì dïdyër ɑtunɑni ki gïg mø ni kerobb ɑ́ngwen, o ge nënni ge nɑ ji, de yï gen bënn dɑ bøll ɑ́ngwen kí obërr ɑ́ngwen. Tyelli gen bɑ ócimø, o dɑddi gen nɑ dɑddi wɑdh, o ge ceg-ɑ omïl ni ngyënyø dilɑl me thøø yi yojø. O yï gen bënn dɑ cing mø ni cinggi dhɑnhø, gɑ ɑ́ngwen, cingø ɑ́kyel kì thɑ obërø ɑ́kyel. Obërr ɑ́ryew kì ri kerob ɑ́kyel bɑ ɑper, o ge tuum gen ki obëri kerom-ɑ kyeelø, kɑ̀ cyɑ̈dhi gen, ge cyɑ̈dh-ɑ́ɑ̀ kej ɑ́kyel e bong ngɑn løg ree. Kerob ɑ́kyel yïe dɑ bøll ɑ́ngwen. Bøli dhɑnhø ɑ bøle, kí bøli ngur kì wïj tuung kyëj, kí bøli wɑdh kí wïj tuung cɑɑm, o bøli cor ɑ ying ngɑ̈je. Obërr ɑ́ryew bɑ ɑper, o ge rwööm gen ki obërri kerom-ɑ kyeelø, obërr ɑ́ryew-ɑ kyeelø bøødh gen ri gen. Ge cungi ge rwöm ceth, o ge ócuggø kedhi tung-ɑ dwɑddi kedhø yi gen, e ri gen pɑ løg yi gen. Kelli kerobbɑni dɑ gïjø me mënyø ni ɑ́menyø, e ceg-ɑ cyɑ̈dhø kì kelli gen, o ceg-ɑ ogwel e pödh-ɑ mɑl. Kerobbɑni ceg-ɑ cyɑ̈dhø; ge nyi kedh-ɑ mɑl, kɑ ge nyi dwöög-ɑ cyɑ̈n, ge jwɑni nɑ ogwel mɑl. Alïdhɑ ki tyelli yɑ̈ɑ̈th ɑ́ngwen, ge nywɑll-ɑ piny; tyelø ɑ́kyel ying-ɑ buti kerob ɑ́kyel. Tyelli yɑ̈thɑni gɑ ɑ́ngwen pɑ̈r, ge ceg-ɑ ogwel ni tigg-ɑ per gen teg, o tyelø ɑ́kyel yïe dɑ tyelø megø me twïyø kì ɑ́dude, kipe kinni o tyellɑni cuggi gen ki kedhi wɑ̈thi tùng ɑ́ngwen bënn. Tøggi tyelli yɑ̈thɑni gɑ ɑ́ngwen pɑ̈ng yi nying. Kɑ̀ cyɑ̈dhi kerobbɑni kì piny, tyell-ɑ wïnnø møgɑni ceg-ɑ cyɑ̈dhø kyeel ki gen; kɑ̀ kedhi kerobbɑni mɑl, tyel ceg-ɑ kedhi mɑl thyew. Gïn-ɑ gwøg yi kerobbɑni, en ceth ɑ gwøg yi tyel, mɑ́ tyel mïdh-ɑ yi kerobbɑni. Keløg Kerobbɑni ócungø, tyel ceg-ɑ cung, keløg ge kedh-ɑ mɑl yij yømø, tyel ceg-ɑ kedhi mɑl thyew. Wɑ̈thi kerobbɑni dɑ gïjø me ree rïïm en mɑl, me tïl o ceg-ɑ orɑ̈ng. Kerobbɑni ying-ɑ thɑ gïnɑni, e kerob obërre ɑ́ryew rïïj en, o ge rwööm gen ki obërri kerom-ɑ kyeelø, o ɑ́ryew-ɑ kyeelø kum en ree. Alïngɑ cwɑggi obërri gen kɑ̀ pɑ̈rri gen, ge ruur nɑ cwɑggi nɑɑm omelø, o nɑ cwɑggi jøliny mø gïïr cɑrø, o ge nɑ cwɑggi Áyïmø. Keny-ɑ ɑ́wïyi gen ki pɑ̈rrø, kɑ obërri gen bidh gen, de dɑ cwɑg mø kɑ̈ɑ̈l kömi gïn-ɑ rïïm wɑ̈thi gen kì mɑl. Kömi gïn-ɑ wɑ̈thi kerobbɑni dɑ gïjø me ni kwøm, men-ɑ ógwøgø ki tigg-ɑ per gen teg me tïl, o kïde bɑ ówɑw, o dɑ gïjø me bëëdø kì wïj kwøm me ni dhɑnhø. Gïnɑni nënni e nɑ ngyënyø dilɑl, me ying yij mɑc, o kì piny nënni e nɑ mɑc me mënyø ki cɑr me tɑr, me ree di kïddi órøngø bënn. Bene cɑr menɑni ɑ nyodh kinni Jwøng-ɑ Ácwɑ̈ɑ̈j nud. Keny-ɑ ɑ́lidhɑ mɑ̈ɑ̈r Jwøng-ɑ Ácwɑ̈ɑ̈j, ɑpɑ̈ɑ̈dhɑ wïjɑ këëlɑ’ piny. Alïngɑ ki cwɑg mø kööbø kinni, “Wɑ̈d dhɑnhø, dhwödhí mɑl. Yɑ dwɑdd-ɑ kwøb ki yïn.” Kɑ̈ng-ɑ ɑ́kööb cwɑggɑni, ɑkedhi wëyi Jwøk riɑ, kɑ yɑ tïng gen kömi tyellɑ, ɑlïngɑ cwɑggɑni ge okööbø kinni, “Wɑ̈d dhɑnhø, yï örɑ’ yï tyëng Isrɑil, pönh-ɑ mune teeg, ɑ ɑ́pyem kwøbbɑ ni kɑ ɑ́pyeem gen yi kweyyi gen cøn. Muddi gen teeg, o yɑ pɑ wør yi gen, o yï örɑ’ yï gen, o ge köbbí gïg-ɑ köbbɑ yïn yɑ Wïlɑ̈bø, Jwøng-ɑ Ácwɑ̈ɑ̈j. Cɑgg kwøbbí lïngi yi tyëngpëëmø møgɑni, wɑlɑ̀ gï pɑ lïngi yi gen, óyod yi gen kinni kelli gen dɑ jɑltöng. “De yïn, wɑ̈d dhɑnhø, yï ko böggi yi gen, wɑlɑ̀ yi kwøbbi gen. Yï ógwɑddi yi gen, kɑ kwøbbí bɑny yi gen; yï óbëëd, yï ce ying-ɑ kelli ïïdh. De cɑgg ɑ́ kinøw, yï ko bwøg yi kwøbbi tyëngpëëmø møgɑni. Gïn-ɑ óköbbɑ yïn, óköbbí gen, cɑgg gø lïngi gen, wɑlɑ̀ koo lïngi gen. Bëëd yï ngɑ̈ny wøw ceth kinni ge bɑ tyëngpëëmø. “Wɑ̈d dhɑnhø, lïngí kwøbb-ɑ köbbɑ yïn. Yï ko pëëm ni gen. Yieb dhøgí kɑ gïn-ɑ mëggɑ yïn cɑɑm.” Alïdhɑ ki cingø me órïïj yïɑ, e ómïdhø ki wɑ̈nyø. Ayiebe wɑ̈nyɑni, kɑ lidhɑ e ógwedø kì yije geki köme kinni, ‘Ywøg geki kïïmø kí ɑkiw.’ Codhe, ɑköbbi yɑn yi Jwøk kinni, “Wɑ̈d dhɑnhø, nyɑm wɑ̈nyø men, o yï kedhí be köbbi tyëng Isrɑil.” Codhe, ɑngɑmɑ dhøgɑ kɑ wɑ̈nyɑni kïdhe dhøgɑ. Aköbbe yɑn kinni, “Wɑ̈d dhɑnhø, cɑm wɑ̈ny-ɑ mëggɑ yïn èn, pɑ̈ng yijí ki gøn.” Acɑmɑ en, kɑ ogöögø e ceg-ɑ lwïyø ni møøw kïc kì dhøgɑ. Codhe, ɑköbbe yɑn kinni, “Wɑ̈d dhɑnhø kedhí yï tyëng Isrɑil, kɑ ge köbbí kwøbb-ɑ óköbbɑ yïn bënn; mɑ́ yï pɑ örɑ’ yï ji mø 'kööb dhøg me pɑth, den-ɑ́ yï tyëng Isrɑil. Keløg yï di örɑ’ yï ji mø 'kööb dhøg me teeg, me pɑ lïngi yi yïn, kwøbbí di lïngi yi gen. De kwøbbí koo lïngi yi tyëng Isrɑil, cɑgg ɑ́ kwøbbɑ gï koo lïngi yi gen thyew. Mɑ́ tyëng Isrɑil muddi gen teeg, o ge bɑ tyëngpëëmø. Yï ógwøgɑ muní teeg ni gen. Yï ówëggɑ tëngø ni kït geki mɑs, yï ko böggi yi ji-ɑ muddi gen teeg møgɑni.” Aköbbi yɑn yi Jwøk kinni, “Wɑ̈d dhɑnhø, ti møg ki lïngø, kɑ ge rømmi kidøøj. Codhe kɑ yï kedhí yï jø pödhi wun møg-ɑ yïnø, kɑ ge köbbí møg-ɑ köbbɑ gen, yɑ Wïlɑ̈bø, Jwøng-ɑ Ácwɑ̈ɑ̈j; kööb ceth, cɑgg kwøbbí lïngi yi gen wɑlɑ̀ pɑ lïngi yi gen.” Codhe, ɑtïng yɑn mɑl yi wëyi Jwøk, ɑlïngɑ ki cwɑg mø ngɑ̈rri ge óryeerø kì ngɑ̈jɑ kinni, “Lenhi dhwɑ̈ng Jwøng-ɑ Ácwɑ̈ɑ̈j kì mɑl!” Alïngɑ cwɑggi obërri kerobb kɑ̀ pwöd gen ri gen kì yij yømø, kí cwɑggi tyelli yɑ̈ɑ̈th, ge nɑ onhɑ̈ɑ̈nh piny. Abëën tegi Jwøng-ɑ Ácwɑ̈ɑ̈j kömɑ ki menteg, ɑkɑ̈ɑ̈l yɑn yi wëye, e pyëwɑ rɑɑj. Codhe, ɑbëënɑ Tel Abib kì kömi Nɑm Kebɑr, kun-ɑ bëëd yi tyëng-ɑ ɑ́kɑ̈ɑ̈l yïnø, ɑbëëdɑ ki cyɑ̈ng ɑ́bïryew e wïjɑ cungø yi gïg-ɑ ɑ́lidhɑ kí møg-ɑ ɑ́lïngɑ. Kì bɑng cyɑ̈ng ɑ́bïryew, ɑköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, yï ɑ́kwɑnyɑ yïn ɑ́ jɑl-ɑ kor Isrɑil. Kwɑny kwøbbɑ kɑ ge kyëddí yïn ɑ́ kejɑ. Keløg yɑ okööbø kinni ngetorøg ceg-ɑ thøø, kɑ ocögø e pɑ kyëddi yi yïn kinni wïye ki orøg, o wëye yiele; ceg-ɑ thøw yij orøge ceth, de cyënne ócïbɑ kömí. Keløg e ókyëddi yi yïn de pɑ wïyi ki orøg, óthøw kì yij orøge, de wëyí óbødh. “Keløg ngɑntir døøg-ɑ be orøg, kɑ cïbɑ yij orɑng, ceg-ɑ thøø keløg e pɑ kyëddi yi yïn, o thuw-ɑ orøge, o gïgdøj møg-ɑ ɑ́gwøge pɑ pɑr yi yɑn. O cyënne cïbɑ’ kömí. Keløg ngɑntir okyëddø yi yïn kinni ko røngi, kɑ olïngø kɑ ocögø e pɑ røngi, ónëënø, o wëyí óyiel thyew.” Abëën tegi Jwøng-ɑ Ácwɑ̈ɑ̈j kömɑ, kɑ yɑ köbbe kinni, “Dhwödhí mɑl kɑ yï kedhí yij tör, yï óköbbɑ kì kunɑni.” Codhe, ɑkedhɑ yij tör, ɑlidhɑ dhwɑ̈ɑ̈ng Jwøng-ɑ Ácwɑ̈ɑ̈j kì kunɑni ni kɑ ɑ́lidhɑ en kì kömi Nɑm Kebɑr. Abøødhɑ riɑ e wïjɑ kuul yɑn piny, de wëyi Jwøk ɑ́bï kömɑ, ɑtïng gen yɑn mɑl kömi tyellɑ. Aköbbi yɑn yi Jwøng-ɑ Ácwɑ̈ɑ̈j kinni, “Kedhí pɑc kɑ ødí cyëëg kömí. Yï ótwöj ki thøll wɑ̈d dhɑnhø, o yï ódhɑ̈li ki kedhi kelli ji. Lebí ótwöj yi yɑn, o yï dhɑ̈lí ki kyëddi ji-ɑ muddi gen teeg møgɑni. Codhe, o keny-ɑ ótugɑ dhøgí, ge óköbbí møg-ɑ ókwøbɑ, yɑ Wïlɑ̈bø, Jwøng-ɑ Ácwɑ̈ɑ̈j. Kwï gen ólïngø, de møøgø óbɑ̈nyi, mɑ́ ge bɑ pödhi pëëmø.” Aköbbi yɑn yi Jwøk kinni, “Wɑ̈d dhɑnhø kɑ̈ní ki thob ɑ́kyel kɑ cïb bølí, kɑ Yerusɑlem suur kì köme. Codhe, kɑ suur e ótyegø yi tyëngmɑ̈ɑ̈nø ki óthør mø bɑ̈rrø, kí burr-ɑ yethi gen nyi pɑ̈ni, kí gënggi ngyënyø møg gëng gen ri gen. Kɑ̈bbí ki ngyënyø dødø mɑ ópɑdø, kɑ cïb ɑ́ dörø kì kɑɑm wun ki kɑɑlɑni; kɑɑl bɑ ɑtyeg, o bɑ yïn ɑ tyegii. Menɑni bɑ nyuudhi kipe pödhi Isrɑil. Keny-ɑ órum cɑ́yɑni, kɑ rií løg wïj cingi kyëjí, o yï rɑngi ki cyɑ̈ng 40, kipe bɑ̈jji Yeudiyɑ̀, cyɑ̈ng ɑ́kyel bɑ kej run ɑ́kyel mi cɑ́yi gen. “Lugí rií kɑɑlɑni kɑ cïmmí cingí, kɑ ryɑ̈ge tööng. Yï twöjɑ’ twöjø, o yï cöög rií pɑ løg yi yïn, pïd keny-ɑ óthumi cyɑ̈nggi tyegi kɑɑlɑni. “Kɑ̈bbí ki gemè, kí ceir, kí ngöör, kí ɑ́dɑs, kí rɑw. Yöl gen gɑ møg cɑm yi yïn ki cyɑ̈ng miy ɑ́dɑ̈g kí pyɑ̈r ɑ́bïngwen møg-ɑ óbuud kì wïj cingi cɑɑmí. Yï ómëgg-ɑ ópun me pege bɑ grɑmm miy ɑ́ryew kí pyɑ̈r ɑ́dɑ̈g kì cyɑ̈ng ɑ́kyel, o yï ócigi nëng ɑ dhuki. Yï ómɑdh-ɑ pï mø nøg; ɑ́ludhhì ɑ́ryew cyɑ̈ng ɑ́kyel. Yï óbud-ɑ cyedh ki ópun, o ócɑm yi yïn kì bøli ji.” Akööb Jwøng-ɑ Ácwɑ̈ɑ̈j kinni, “Menɑni nyodh-ɑ kër-ɑ ócyɑ̈ɑ̈m tyëng Isrɑil ki gïgcɑmm-ɑ bɑ ɑkerø, keny-ɑ ókedhhɑ gen kì yethi pödhh mø pɑth.” De yɑ ɑ́löggi kinni, “Pɑth ki kinøw, yïn ɑ Wɑ̈ɑ Jwøng-ɑ Ácwɑ̈ɑ̈j! Riɑ nuti pɑ̈nyi yɑn ki bwölø ki kër-ɑ́ thiinhɑ, pïd ɑnɑn yɑ nuti pɑ̈nyi cɑm ki gïnthøø, wɑlɑ̀ yɑ nuti cyɑ̈mø ki kwɑ̈ɑ̈l. Yɑ nuti pɑ̈nyi cɑm ki gïn ywëdhø.” Codhe, ɑkööb Jwøk kinni, “Døj, yï ómëggɑ wɑ̈r gɑ kej cyedh, o ge bul ópuní.” Aköbbe yɑn kinni, “Wɑ̈d dhɑnhø gïgcɑmm ɑ́cungɑ kipe Yerusɑlem. Ji órɑngø yi kɑ̀ cɑɑg gïgcɑmm geki pï ki rømø. Ge ójɑ̈ddi ki gïgcɑmm kí pï, wɑ̈thi gen ómuum kɑ ge othøø yi gööj orøøg gen.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, kɑ̈bbí ki pilø me bedh, kɑ yëyyi wïjí geki yëyyi tïgí teb ki gøn. Codhe, kɑ yëyyɑni røm ki midhɑn, kɑ ge pɑ̈ngí gɑ kɑ̈jj ɑ́dɑ̈g. Rɑ̈b kyeel ɑ́dɑ̈gɑni kì kɑɑl keny-ɑ óthumi cyɑ̈nggi tyege. Kɑ ryeew ɑ́dɑ̈gɑni pwööd ki pilø, yï kedh-ɑ wɑ̈g kì kɑɑl. Kɑ dɑ̈ɑ̈g ɑ́dɑ̈gɑni kedhhí kì yij yømø, o yɑ rengɑ bɑnge ki pilɑ. Kɑ yï kɑ̈bbí ki yëyy mø nøg, kɑ ge twööj bɑɑd ógødhí. Codhe, kɑ yï cigí kɑ̈bbø ki mø nøg kì ri gen, kɑ ge leeng mɑc, o ge rɑ̈bbi gen. Mɑc óköödø kì ri gen, kɑ tɑɑy-ɑ yij pödhi Isrɑil bëne.” Akööb Wïlɑ̈bø Jwøng-ɑ Ácwɑ̈ɑ̈j kinni, “Lidh Yerusɑlem, ɑ́cïbɑ dïdyëri pödhh-ɑ kyeelø, o tyeeg dïdyërø yi pödhhɑni. De Yerusɑlem ciggɑ ɑ́pyeme, e nyudh-ɑ rɑ̈je pödhh-ɑ kyeelø, kinni pëddi pëëmø kibøli pödhhɑni; o mune pëddi tegø kibøli gen. Yerusɑlem ɑ́bɑ̈nyi mïdhi ciggɑ, kɑ óbɑ̈nyø ki gwøgi gïn-ɑ köbbɑ en. Anɑn Yerusɑlem, lïngí møg-ɑ kwøb yi yɑn, yɑ Wïlɑ̈bø, Jwøng-ɑ Ácwɑ̈ɑ̈j kinni, kɑ̀ bɑɑny ciggɑ ki mïdhø, gööjí ceg-ɑ døngø kibøli pödhh-ɑ kyeelø, mɑ́ yï ɑ́kwɑny-ɑ kwööng pödhhɑni. Kɑ ɑ́rum bëëde kinøw, yï köbbɑ’ köbbø kinni, yɑ Wïlɑ̈bø, Jwøng-ɑ Ácwɑ̈ɑ̈j, yɑ bɑ ngɑn mɑ̈n ki yïn. Yï cɑyɑ’ cɑyø kì bøli pödhh bënn. Yï ócɑyɑ kì bɑng kɑ ɑ́göög ki gïg-ɑ mɑɑn yi yɑn. Yerusɑlem ócɑyɑ ki cɑ́y mø nuti pɑ̈nyø cɑ̈yø yi yɑn cøn, o ge pɑ cigɑ cɑ̈yø. Wëëg geki mëëg nyigi gen ócɑm yi gen kì Yerusɑlem, kɑ wëëg kí mëëg cɑm yi nywøl. Yï ócɑyɑ kɑ jií møg-ɑ ɑ́bødh kedhhɑ kì wɑ̈thi tùngi piny bënn. “Kɑ̀ bëëdɑ yɑn ɑ́ Jwøng-ɑ Nëënø, yɑ Wïlɑ̈bø, Jwøng-ɑ Ácwɑ̈ɑ̈j, yɑ köbb-ɑ yïn kinni, mɑ́ Kengɑ ɑ́bwöl yi yïn ki gïgrijjø møg-ɑ gøggi yi yïn, yï dhurɑ’ piny e pyëwɑ pɑ lɑ̈ɑ̈m. Ákyeel ɑ́dɑ̈ɑ̈g jií ónɑ̈g yi rɑ̈ɑ̈m dëllì geki kɑ̈j, o ɑ́kyeel ɑ́dɑ̈g men-ɑ kyeelø ónɑ̈g yi liny, o ɑ́kyeel ɑ́dɑ̈g-ɑ ɑ́döng ókedhhɑ kì wɑ̈thi tùngi piny, o yɑ órïngi kì bɑng gen ki pilø. “Rɑ̈ji pyëwɑ óti ki yodø yi yïn, pïd keny-ɑ ókwööj pyëwɑ. Keny-ɑ ócwöb gïgɑni bënn, o yod yi yïn kinni bene yɑn Jwøng-ɑ Ácwɑ̈ɑ̈j, o pyëwɑ ɑ́ceg-ɑ rënyø kì bɑng kɑ̀ pɑ lïngí kwøbbɑ. Yï ógɑggi yi tyëng-ɑ cyɑ̈dhi kì yöö, o ge ócungi ge lɑ̈wi. “Keny-ɑ órënyi pyëwɑ kɑ yï cɑyɑ, pödhh-ɑ butí bënn óbwøg. Yï óbenyi kɑ yï gɑggi yi gen. Yï ómɑ̈ɑ̈nɑ ki gïgcɑmm, o yï nɑ̈g yi kɑ̈j; kɑ̈j órɑ̈mø ki rií ni rɑ̈ɑ̈m nywøli weth møg-ɑ bedh, ɑ nyi nɑ̈g dhɑnhø. Yï óörɑ kɑ̈j geki lɑ̈yy-ɑ nyi cyɑ̈mø, o nyigí nɑ̈g yi gen. Yï ógöjjɑ rɑ̈ɑ̈m dëllì geki nɑ̈gø yi tyëngmɑ̈ɑ̈nø. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, lïïdh kuni kïtti Isrɑil, kɑ wöönɑ köbbí gen kinni, lïngu kwøbbi Wïlɑ̈bø, Jwøng-ɑ Ácwɑ̈ɑ̈j wun ɑ kïttì, kí ótøng, kí órøggi kïttì kí töör kinni, yɑ óöni kömi kɑ̈jj-ɑ nyi mɑlli jwögg-ɑ pɑth ki liny me rënyi gen. Këlli lɑm geki kɑ̈jji bɑkur ótoor piny. Tyëng-ɑ kɑ̈jjɑni bënn ónɑ̈g kì bøli ngïjji jwöggi gen. Tyëngthøø ókedhhɑ kì Isrɑil; cu gen ókedhhɑ kì tøggi këlli lɑm. Kɑ̈ddi Isrɑil bënn órënyi, o jwögg-ɑ pɑth mø gen geki këlli lɑm mø gen bënn tørri; këlli bɑkur mø gen ókedhhi, kɑ gïg-ɑ ɑ́gwøg yi gen bënn órënyø. Ji ónɑ̈g kì kɑ̈jj mø gïïr, o óyod yi tyëng-ɑ óbodh kinni bene yɑn Jwøng-ɑ Ácwɑ̈ɑ̈j. “Kwï ji ówëggɑ bødhø, ge ótɑɑy kelli pödhh-ɑ kyeelø, kun-ɑ óbëëd gen kì yïnø. Yɑ ópɑr yi gen kì kunɑni, o óyod yi gen kinni bɑ yɑn ɑ ɑ́cɑy gen, kɑ ge yɑ̈rɑ, mɑ́ yɑ ɑ́bɑny yi gen, kɑ ge kedh-ɑ be mɑlli jwögg-ɑ pɑth. Pëthi gen órënyi ki ri gen kì bɑng gïgrijjø møg-ɑ ɑ́gwøg yi gen. Óyod yi gen kinni bene yɑn Jwøng-ɑ Ácwɑ̈ɑ̈j, o yɑ nuti cɑɑg-ɑ nɑ̈n keny-ɑ ɑ́kyëddɑ gen.” Wïlɑ̈bø, Jwøng-ɑ Ácwɑ̈ɑ̈j ɑ́kööb kinni, “Teng cinggí! Pwöd tyellí kì piny! Kɑ yï ywöngí kipe orøøg tyëng Isrɑil bënn, mɑ́ ge ónɑ̈g yi liny kí kɑ̈j. Tyëng-ɑ lɑ̈wi ónɑ̈g yi rɑ̈ɑ̈m dëllì, o tyëng-ɑ cyɑ̈gi ónɑ̈g yi liny; tyëng-ɑ óbodh ónɑ̈g yi kɑ̈j. Tyëngthøø ókedhhi kì kelli jwögg-ɑ pɑth kì tøggi këlli lɑm, ge ókedhhi kì wɑ̈thi ótøng, kí wɑ̈thi kïttì bënn, kí thɑ̈thi yenh-ɑ mɑr geki thɑ̈thi óthurr-ɑ døngø, kí kɑ̈jj-ɑ nyi rɑ̈bbi gen jwögg-ɑ pɑth mø gen ki gëdhhì. Codhe, o yod yi dhɑnhø bëne kinni yɑn ɑ bɑ Jwøng-ɑ Ácwɑ̈ɑ̈j. Cingɑ órïj yi yɑn, kɑ Isrɑil rënyɑ. Ódöng nøw, cɑg kì ryɑng wɑɑng wurlwɑl gïti Riblɑ̀ kì wɑɑng wuudø, bong keny-ɑ ówiy yi yɑn kì kɑ̈jj-ɑ bëëd gen bënn. Codhe, o yod yi dhɑnhø bëne kinni yɑn ɑ bɑ Jwøng-ɑ Ácwɑ̈ɑ̈j.” Aköbbi yɑn yi Wïlɑ̈bø, Jwøng-ɑ Ácwɑ̈ɑ̈j kinni, “Wɑ̈d dhɑnhø, bene møg-ɑ köbbɑ Isrɑil ek: yɑn yɑ Wïlɑ̈bø, Jwøng-ɑ Ácwɑ̈ɑ̈j bɑ kinni, rënyi piny Isrɑil bëne ɑ́cyɑ̈ngi! “Isrɑil, cögí ɑ́wɑ̈nhi, rɑ̈ji pyëwɑ ólidh yi yïn, mɑ́ yï cɑyɑ’ cɑyø kipe gïg-ɑ ɑ́gwøøg; gøøli rɑjj-ɑ ɑ́gwøg yi yïn colɑ’ colø. Yï pɑ wiy yi yɑn, pyëwɑ pɑ lɑ̈ɑ̈m ki yïn. Yï cɑyɑ’ cɑyø kipe rɑjj-ɑ ɑ́gwøg yi yïn. Codhe o yod yi yïn kinni bene yɑn ɑ bɑ Jwøng-ɑ Ácwɑ̈ɑ̈j.” Wïlɑ̈bø Jwøng-ɑ Ácwɑ̈ɑ̈j okööbø kinni, “Rɑj mø bong cögi gen bï-ɑ kömí. Kwøb ɑ́thumi. Men bene cögí, yï ɑ́rum. Cögi tyëng-ɑ bëëdø kì pönhï obëënø. Bøli kenyɑni ɑ́cyɑ̈ngi; cyɑ̈ɑ̈ng tummi wɑ̈ɑ̈th ɑ́cyɑ̈ngi, bong cwɑggi tugø men-ɑ ólïngi këti kì kenggi wɑ̈thi kïttì. “Rɑ̈ji pyëwɑ ɑ́cyɑ̈ngi ki lidhø yi yïn. Yï cɑyɑ’ cɑyø kipe rɑjj-ɑ ɑ́gwøøg. Gøøli rɑjj-ɑ ɑ́gwøg yi yïn colɑ’ colø. Yï pɑ wiy yi yɑn, o pyëwɑ pɑ lɑ̈ɑ̈m ki yïn. Yï cɑyɑ’ cɑyø kipe rɑjj-ɑ ɑ́gwøøg, codhe o yod yi yïn kinni bene yɑn ɑ bɑ Jwøng-ɑ Ácwɑ̈ɑ̈j, o bɑ yɑn ɑ cɑy yïn.” Cyɑ̈ɑ̈ng rënyi Isrɑil ɑ́cyɑ̈ngi; cɑ́y bï-ɑ köme kipe møn-ɑ ɑ́møde ji ki tɑ̈dø. Ruj nyi nywøl-ɑ rɑj mø ngenyø. Bong jɑmmì møg-ɑ ódöng, wɑlɑ̀ kɑ̈r; bong dhɑnhø men-ɑ ódöng me ywøg yïn. Bøli kenyɑni ɑ́bï, cyɑ̈ngɑni ɑ́cyɑ̈ngi; ngɑn-ɑ ngëwø pyëwe pɑ mïni, o ngɑn-ɑ ngëwwi pyëwe pɑ rënyi, mɑ́ rɑ̈ji pyëw Jwøng-ɑ Ácwɑ̈ɑ̈j bï-ɑ kömi ji bënn. Bong ngeti ngyew men-ɑ óbëëdø pïd keny-ɑ ódøøge gïg-ɑ ɑ́wɑ̈ɑ̈ny kì yïe ki yodø, mɑ́ rɑ̈ji pyëw Jwøk ying-ɑ kömi ji bënn. Tyëngrijjø koo bodh. Keny-ɑ ókoodh kɑng, ji ri gen ótyeny yi gen. De bong ngɑn kedhi be liny, mɑ́ rɑ̈ji pyëw Jwøk bï-ɑ kömi ji bënn. “Yethi yëëth dɑ liny, o yethi kɑ̈llì dɑ rɑ̈ɑ̈m dëllì geki kɑ̈j. Ngɑn-ɑ wɑ̈g ónɑ̈g yi liny, o ngɑn-ɑ yij kɑɑl ónɑ̈g yi kɑ̈j geki rɑ̈ɑ̈m dël. Møøgø óbodh, kɑ ge reng-ɑ wɑ̈thi kïttì ni ɑkùr møg bwøg kì yij tör, e ngɑn ywøg-ɑ orøge. Cinggi ji ónyönhi kɑ cøngi gen okïïrø. Ge órugø ki ocwɑ̈llì; dëlli gen okïïrø. Wɑ̈thi gen ólyel, kɑ ge oyɑ̈rø. Dhɑb kí ɑ́tegø mø gen óweddi gen yethi yëëth, mɑ́ ge pɑ cuggi yielø yi gïn kì cyɑ̈ɑ̈ng liny Jwøng-ɑ Ácwɑ̈ɑ̈j. Ge pɑ yɑ̈ng yi gen, wɑlɑ̀ yethi gen pɑ pɑ̈ng yi gen, mɑ́ e bɑ dhɑb kí ɑ́tegø ɑ ɑ́peej gen yij orøg. Ge ɑ́tɑ̈d kì bɑng jɑmmɑni, ɑ nyi göög gen ki jwögg-ɑ rijjø kì ri gïn. Bene ɑ bɑnge ɑ́pɑ̈dhi gen yij orøg. “Jɑmmi Isrɑil ówëggɑ kɑbø yi tyëngpɑth; kɑ̈re bëne ókwɑny yi tyëngrijjø, kɑ gø bwöl gen. Yɑ koo löggi keny-ɑ óturri kurrì Kengɑ, Keng-ɑ pere teg, kɑ gø bwöl gen. “Göggi wun jiɑ ki yëll, mɑ́ piny yije ɑ́pɑ̈ng yi nɑ̈g, o ji ceg kɑ mødø kì yethi kɑ̈dd. Pödhh-ɑ pëddi rɑ̈jø ókɑ̈ɑ̈lɑ kömi wun, o kɑ̈lli wun kwɑny yi gen. Jöddi wun pëthi gen ónyönhi, keny-ɑ óbwööl kɑ̈jji mɑ̈ddø mø wun yi pödhhɑni. Böögø obëënø; mër óyɑb yi wun, de pɑ yod yi wun. Ryɑ̈g óbï e myer-ɑ ree, o wöddi rɑj pɑ cög. Jøtöng ókwɑjji yi wun, o wu nyudhi gen gïg-ɑ ɑ́mɑ̈ɑ̈g ki lidhø yi gen. Bong gïn-ɑ ópwönyi ji yi ókwër, o bong gïn-ɑ ócïïj ji yi tyëngdøngø. Rɑ̈dh ókïïmø, kɑ jɑgø wïje omuumø, kɑ dëlli ji okïïrø yi wɑ̈ɑ̈rø. Wu ócɑyɑ kipe rɑjj-ɑ ɑ́gwøg yi wun bënn, kí kipe kɑ ɑ́cɑy wun ji møøgø. Codhe, o yod yi wun kinni bene yɑn ɑ bɑ Jwøng-ɑ Ácwɑ̈ɑ̈j.” Kì bïkyeel runn, kì bïïj cyɑ̈nggi bïkyeel dwɑ̈tt, yɑ ɑ́ying-ɑ gølɑ wøki pëjji Yeudiyɑ̀ kì yïnø. Abëën tegi Jwøng-ɑ Ácwɑ̈ɑ̈j kömɑ. Alïïdhɑ mɑl, kɑ yɑ ólïdhø ki dhɑnhø me bɑ mɑc; cɑg kì pyere gïti piny bɑ mɑc, o cɑg kì pyere gïti mɑl rɑ̈ɑ̈dø nɑ ngyënyø dilɑl. Arïïje gïjø me ni cingø. Kɑ yɑ mɑge kì ri yëyyɑ. Codhe, ɑtïng yɑn mɑl yij yømø yi wëyi Jwøk, kɑ yɑ kïdhe Yerusɑlem. Yɑ ɑ́kïdhe dhøg Kengø, dhøng-ɑ yiny-ɑ ød kì wɑɑng wuudø, keny-ɑ di ngïji men-ɑ mɑɑn yi Jwøng-ɑ Ácwɑ̈ɑ̈j. Alidhɑ cɑr men-ɑ nyodh nudi Jwøng-ɑ Ácwɑ̈ɑ̈j, Jwøøg Isrɑil kì kenyɑni, e nɑ men-ɑ ɑ́lidhɑ kì yij tör. Aköbbi yɑn yi Jwøk kinni, “Wɑ̈d dhɑnhø, lïïdh wɑɑng wuudø.” Alidhɑ ngïji jwøng-ɑ pɑth men-ɑ nyi rënyi pyëw Jwøng-ɑ Ácwɑ̈ɑ̈j, e ying-ɑ buti këli lɑm, kì dhøg Kengø kì wɑɑng wuudø. Aköbbi yɑn yi Jwøk kinni, “Wɑ̈d dhɑnhø, gïg-ɑ gøggi yi gen ɑ́lidh yi yïn? Bene gen gïgrijjø møg-ɑ ɑ́cyeed gen yɑn pɑ̈l kì kej kwërɑ. O yï ólïdhi ki gïgrijjø mø lod møg.” Akïdhe yɑn dhøg döri Kengø men-ɑ yiny-ɑ wɑ̈g, ɑnyudhe yɑn keny me twïyø kì ri döre. Aköbbe yɑn kinni, “Wɑ̈d dhɑnhø, kedhí wɑ̈g ki keny-ɑ twïyø kì ri dörø.” Codhe ɑkɑ̈ɑ̈lɑ kenyɑni, kɑ yɑ óyïddø ki dhøg megø. Aköbbe yɑn kinni, “Kedhí ød, kɑ gïgrijjø møg-ɑ gøggi kì kenyɑni liidh.” Akedhɑ yiny-ɑ ød, kɑ yɑ ólïdhø ki ngïjji thöllì kí lɑ̈yy-ɑ ywëdhø møg-ɑ kyeelø bënn, kí ngïjji gïg-ɑ nyii mɑllø yi tyëng Isrɑil. Pëjji Isrɑil pyɑ̈r ɑ́bïryew, kí Yɑɑdhɑniyɑ̀ wɑ̈d Cɑpɑn kì kelli gen, ge ɑ́yodɑ kì kunɑni, cinggi gen bënn dɑ ópɑ̈nni bɑkur, de yïrø töng-ɑ mɑl. Kɑ yɑ pyëj yi Jwøk kinni, “Wɑ̈d dhɑnhø, gïg-ɑ gøggi yi pëjji Isrɑil kì gød, ɑ́lidh yi yïn? Ge mɑ̈d-ɑ́ɑ̀ ød me pɑ̈ng yi ngïjjì. Mɑ́ ge okööbø kinni, ‘Wɑ pɑ nenni yi Jwøng-ɑ Ácwɑ̈ɑ̈j! Ákedh kɑ pödhee wiye piny.’ ” Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Ge ólidh yi yïn ge ogöögø ki gïg mø lod møg ki rɑ̈jø.” Akïdhe yɑn dhøg Kengø kì tung-ɑ wɑɑng wuudø, kɑ yɑ nyudhe tyëng-ɑ mɑ̈nn møg ywøg thøwi jwøg Tɑmudh. Aköbbe yɑn kinni, “Wɑ̈d dhɑnhø, gïgrijjø møgɑni ɑ́lidh yi yïn? Yï ólïdhi ki mø rijjø kibøli møg.” Akïdhe yɑn ódɑ̈ri yiny-ɑ kɑl kì Kengø. Kì kenyɑni kì buti dhø kej kwër, kì kɑɑm gen ki këli lɑm, ɑ́dɑ jøg-ɑ cwøw pyɑ̈r ɑ́ryew wïdɑ́bïj mø ngɑ̈thi gen lugi gen Kengi Jwøng-ɑ Ácwɑ̈ɑ̈j, o ri gen bøødh gen piny, ge nenn-ɑ wɑɑng cyɑ̈ɑ̈ng mwøl, ge mɑll-ɑ cɑ̈ng kɑ̀ tuule. Apyëëj yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, gïgrijjø møg-ɑ gwøg yi gen ɑ́lidh yi yïn? Pɑth ki gïjø me rɑj ɑ gwøg yi gøl Yeudɑ̀ kì keny? Piny ɑ́rënyi yi gen, o ge ɑ́kɑ̈ni yij Kengɑ ki gïg rënyi pyëwɑ. Rɑ̈ji pyëwɑ ólidh yi gen. Ge pɑ wiy yi yɑn, o pyëwɑ pɑ lɑ̈ɑ̈m ki gen. Ge óryeer ge kwɑjj-ɑ yɑn, de kwɑ̈jji gen koo lïngɑ.” Alïngɑ ki cwɑg mø ryeer kinni, “Bïu keny, wu jøg-ɑ kedhi be cɑyi kɑɑl. Kɑ̈ɑ̈lu jɑmmi liny mø wun.” Abëën jøg ɑ́bïkyel ge kɑ̈ɑ̈l-ɑ dhøg Kengø kì wɑɑng wuudø, e ngɑn ókɑ̈ddø ki jɑmmi liny. O kelli gen dɑ jɑl me rug ógødh kor-ɑ yöm, e ókɑ̈ddø ki gïn gwëde. Abëën gen bënn, kɑ ge ócungø kì buti këli lɑm-ɑ bɑ ngyënyø dilɑl. Codhe, ɑdhwödh cɑɑr Jwøøg Isrɑil, eni cɑr-ɑ mënyø kì buti kerobb kì keny-ɑ ɑ́bëëde, ɑkedhe dhøg Kengø. Acwøøl jɑl-ɑ rug ógudhi kor-ɑ yöm yi Jwøng-ɑ Ácwɑ̈ɑ̈j, kɑ gø köbbe kinni, “Kedhí yij Yerusɑlem bëne, kɑ bøli tyëng-ɑ pëthi gen rɑ̈mø yi rɑjj-ɑ gøggi kì yij kɑɑlɑni bënn, kïdhí ki ngïjjì.” Alïngɑ Jwøk e köbb-ɑ jøg-ɑ kyeelø kinni, “Kedhu bɑnge kɑ ji nɑ̈g wun. Ko di ngɑn wiy yi wun, pëthi wun ko lɑ̈ɑ̈m. Nɑ̈g wun jøgdøngø, kí wøbb, kí wojur, kí mëëg, kí othønhø. De tyëng-ɑ bølli gen di ngïjjì bënn ko nywɑl wun. Cɑ̈gi wun kì yij Kengɑ.” Aköbbe gïn kinni, “Bwölu Kengø. Pɑ̈ngu ódɑ̈rre ki tyëngthøø. Cɑ̈gi wun ki gwøg!” Codhe, ɑcɑ̈gi gen ki nɑ̈g ki ji kì kɑɑlɑni. Kɑ yɑ odöngø yɑ ketɑ kì kɑɑm-ɑ ɑ́bëëd ji onɑ̈gø. Abøødhɑ riɑ e wïjɑ kuul yɑn piny, kɑ yɑ óryeerø kinni, “Wuö Jwøng-ɑ Ácwɑ̈ɑ̈j, tyëng-ɑ ɑ́döng kì Isrɑil ceg kɑ nɑ̈gø yi yïn bënn, kipe kɑ̀ rɑj pyëwí ki Yerusɑlem?” Aköbbe yɑn kinni, “Tyëng Isrɑil geki tyëng Yeudiyɑ̀ ɑ́røngi ki orøng dwøng. Ge ceg-ɑ nɑ̈g kì ji kì yij pödhø bëne, piny ɑ́pɑ̈ng yi remø geki ruj. Ge okööbø ce pödhi gen wiy yɑn piny, yɑ Jwøng-ɑ Ácwɑ̈ɑ̈j, ge pɑ nennɑ. O pyëwɑ pɑ lɑ̈ɑ̈m ki gen thyew, ge göggɑ’ gïg-ɑ ɑ́göggi ji møøgø yi gen.” Kɑ jɑl-ɑ rugø ki ógødh kor-ɑ yöm døøg-ɑ yï Jwøng-ɑ Ácwɑ̈ɑ̈j, ɑköbbe gøn kinni, “Møg-ɑ ɑ́kwøb yi yïn ɑ́gwøgɑ.” Codhe, ɑlïïdhɑ mɑl ri gïn-ɑ rïïm wɑ̈thi kerobb, ɑlïdhɑ ki gïjø me ni kwøm men-ɑ ógwøgø ki sɑpir, kïn-ɑ pere teg. Aköbbi jɑl-ɑ rug ógudhi kor-ɑ yöm yi Jwøk kinni, “Kedhí thɑ́ tyelli yɑ̈thi kerobb kɑ cingí pɑ̈ɑ̈ng ki mɑɑc cug. Kɑ ge wiiw yij kɑɑl.” Akedhe e nennɑ’ nennø. Kerobbɑni ɑ́bëëd ge cung-ɑ́ɑ̀ wɑɑng wurlwɑl kì ri Kengø, keny-ɑ ɑ́kedhe ódɑ̈r-ɑ yij Kengø, kɑ ódɑ̈rɑni opɑ̈ngø yi pøølø. Adhwödh mɑ̈ɑ̈r Jwøng-ɑ Ácwɑ̈ɑ̈j, eni cɑr-ɑ mënyø kì keny-ɑ ɑ́di kerobb, kɑ kedh-ɑ dhøg Kengø, codhe ɑpɑ̈ng Kengø yi pøølø, kɑ mɑ̈r omënyø kì ódɑ̈rø. Ywøøg obërri kerobb ɑ́bëëd e olïngø kì ódɑ̈r-ɑ yiny-ɑ wɑ̈g, e lïngi nɑ cwɑggi Jwøk Áyïmø kenyi kööbe. Keny-ɑ ɑ́köbbi jɑl-ɑ rug ógudhi kor-ɑ yöm yi Jwøng-ɑ Ácwɑ̈ɑ̈j kinni kɑ̈bbe ki mɑɑc cug kì kɑɑm tyelli yɑ̈ɑ̈th, ɑkedhe kɑ ócungø kì buti tyelø ɑ́kyel kì kelli tyelli yɑ̈ɑ̈th. Ákyel kì kelli kerobb cinge ɑ́rïïje, ɑkɑ̈bbe ki mɑɑc cug men-ɑ dïdyëri gen, kɑ gø cïbe cingi jɑl-ɑ rug ógudhi kor-ɑ yöm. Akwɑnye mɑɑc cug kɑ ókedhø. Kɑ kerobbɑni bënn lidhɑ yï gen dɑ gïjø me ni cingi dhɑnhø kì thɑ́ obërri gen, Kerobbɑni nyii cuggø kedhi tung-ɑ dwɑddi kedhø yi gen, e ri gen pɑ gir yi gen. Dëlli gen, kí kömmi gen, kí cinggi gen kí tyelli yɑ̈ɑ̈th pɑ̈ng yi nying. Alïngɑ ki cwɑg mø cwöddi kinni, “Tyell-ɑ Wïnnø.” Kerobbɑni bënn yï gen dɑ bøll ɑ́ngwen, bølø ɑ́kyel bɑ bøli wɑdh, o ryeew bøll bɑ bøli dhɑnhø, o dɑ̈ɑ̈g bøll bɑ bøli ngur, o ngween bøll bɑ bøli cor. (Ge bɑ kerobb-ɑ ɑ́lidhɑ kì kömi Nɑm Kebɑr.) Kɑ̀ dhwödh kerobbɑni kì mɑl yij yømø, kɑ ge ókedhø, tyellɑni ceg-ɑ kedhø kyeel ki gen. Kenyi per gen, obërri gen kinni o ge pɑ̈r gen, tyel nyi ceg-ɑ kedhø ki gen thyew. Kɑ̀ cungi kerobb, tyel ceg-ɑ cung, o kɑ̀ pɑ̈r gen, tyel ceg-ɑ pɑ̈rø thyew, mɑ́ tyel mïdh-ɑ yi kerobbɑni. Codhe, ɑdhwödh cɑɑr Jwøng-ɑ Ácwɑ̈ɑ̈j men-ɑ mënyø kì dhø Kengø kɑ ócungø kì wɑ̈thi kerobb. Kɑ kerobb obërri gen per gen, kɑ ge opɑ̈ɑ̈rø, ge nennɑ’ nënnø, kɑ tyell-ɑ wïnnø ókedhø ki gen, ɑkɑl gen cung kì dhø Kengø kì wɑɑng cyɑ̈ɑ̈ng mwøl e mɑ̈ɑ̈r Jwøøg Isrɑil omënyø kì wɑ̈thi gen. Kɑ ngijɑ kinni bɑ kerobbɑni ɑ ɑ́lidhɑ kì kömi Nɑm Kebɑr e Jwøøg Isrɑil ying-ɑ kömi gen. Yï gen bënn dɑ bøll ɑ́ngwen kí obërr, kí gïjø me ni cingi dhɑnhø ki thɑ̈thi obërri gen bënn. Bølli gen bɑ bølli gïg-ɑ ɑ́lidhɑ kì kömi Nɑm Kebɑr. Men cɑ̈dhh-ɑ bøle. Codhe, ɑtïng yɑn mɑl yi wëyi Jwøk, kɑ yɑ kïdhi gen dhøg Kengø kì wɑɑng cyɑ̈ɑ̈ng mwøl. Alïdhɑ ki jøg-ɑ cwøw pyɑ̈r ɑ́ryew wïdɑ́bïj kì buti dhøg Kengø kenyɑni kí Yɑɑdhɑniyɑ̀ wɑ̈d Adhur geki Pelɑtiyɑ̀ wɑ̈d Benɑiyɑ̀ kì kelli gen, o jøg ɑ́ryew møgɑni bɑ pëjji pödhø. Aköbbi yɑn yi Jwøk kinni, “Wɑ̈d dhɑnhø bene gen jøg-ɑ thɑɑb ji be gwøg ki gïgrijjø kì kɑɑl men. Ge okööbø kinni, ‘Bøli kej gyer ki ud kì yij kɑɑl men nuti bëënø; kɑɑl men bɑ dɑg, o wøn ɑ bɑ rïngø.’ Anɑn töng rɑjj-ɑ óbï kömi gen; töngí gen wɑ̈d dhɑnhø.” Abëën wëyi Jwøng-ɑ Ácwɑ̈ɑ̈j kömɑ, ɑköbbi yɑn yi Jwøng-ɑ Ácwɑ̈ɑ̈j kinni i köbbɑ ji kinni, “Wu tyëng Isrɑil, kwøbb-ɑ kømmi yi wun geki rumm-ɑ rømmi yi wun ngɑ̈nyi yi yɑn. Wu ɑ́nɑ̈ɑ̈g ki ji mø gïïr kì yij kɑɑl, yethi yëëth ɑ́pɑ̈ng wun ki tyëngthøø. “Bene møg-ɑ köbbɑ wun, yɑ Wïlɑ̈bø ek: Kɑɑl men bɑ dɑg kidyër, o tyëng-ɑ ɑ́nɑ̈g yi wun ɑ bɑ rïngø, de wu bɑ møg kɑ̈ɑ̈l wɑ̈g kì yije! Wu óböggø yi pilø? Pilø kɑ̈ɑ̈lɑ’ kömi wun. Wu ókɑ̈ɑ̈lɑ wɑ̈g kì kɑɑlɑni, kɑ wu cïbɑ cinggi tyëngpɑth. Wu ɑ́cɑyɑ ki thøø. Wu ceg kɑ nɑ̈gø kì yij liny kì pödhi wun, o yod yi ji bënn kinni bene yɑn, ɑ bɑ Jwøng-ɑ Ácwɑ̈ɑ̈j. Kɑɑl men wu koo kore, ni dɑg kenyi kore rïng-ɑ yije. Wu ócɑyɑ kì keny-ɑ di wun kì yij piny Isrɑil bëne. Codhe, o yod yi wun kinni yɑn ɑ bɑ Jwøng-ɑ Ácwɑ̈ɑ̈j, o ke mïdhi wun ciggi pödhh-ɑ buti wun, bɑ ciggɑ ɑ pyem yi wun, o wu nuti cyɑ̈dhø kì bɑng gen.” Keny-ɑ ɑ́töngɑ kwøbbɑni, ɑpɑ̈ɑ̈dh Pelɑtiyɑ̀ wɑ̈d Benɑiyɑ̀ kɑ othøø. Aleengɑ riɑ piny, wïjɑ këël yɑn piny, ɑryeerɑ kinni, “Wuö, tyëng-ɑ ɑ́döng kì Isrɑil ceg kɑ nɑ̈gø yi yïn bënn?” Akööb Jwøng-ɑ Ácwɑ̈ɑ̈j ki yɑn kinni, “Wɑ̈d dhɑnhø, tyëng-ɑ bëëdø kì Yerusɑlem kööb ɑ rií wuki tyëng Isrɑil møg-ɑ yïnø. Ge okööbø kinni, ‘Ge ɑ́lɑ̈wi ki Jwøng-ɑ Ácwɑ̈ɑ̈j, o piny men ɑ́mëgge wɑ ɑ́ miee.’ “Anɑn köbbí møg-ɑ kwøb yi yɑn ek, tyëng-ɑ bëëd wun kì yïnø. Bɑ yɑn ɑ ɑ́kïdhi gen be bëëdø kì pödhh-ɑ lɑ̈wi, kɑ ge kedhhɑ kì kelli pödhh møøgø, de cɑgg ɑ́ kinøw, yɑ óbëëdø kì kelli gen kì yethi pödhh-ɑ bëëd yi gen kɑ̈ng-ɑ tïni. “Köbbí gen kinni yɑ Wïlɑ̈bø, Jwøng-ɑ Ácwɑ̈ɑ̈j, yɑ okööbø kinni, ge ódøøgɑ ki cungø kì yethi pödhh-ɑ ɑ́kedhhɑ gen, kɑ piny Isrɑil döggɑ gen. Keny-ɑ ódwöög gen, weddi gen jwögg-ɑ pɑth møg-ɑ cödhø, ɑ kømi pyëw lɑ̈mmø. Ge óthödhɑ ki minø me nyɑ̈n kí rummì nyɑ̈n; min-ɑ bɑ kït men-ɑ teeg ókɑ̈ɑ̈lɑ wɑ̈g kì ri gen, kɑ ge nëngɑ ki minø me bɑ rïngø. Codhe, o ciggɑ mïdhi yi gen, o ge ógöög gen kì bɑng ciggɑni. Ge óbëëdø gɑ jiɑ, o yɑ óbëëdø yɑn ɑ́ Jwøøg gen. De tyëng-ɑ mɑɑr mɑlli jwögg-ɑ pɑth, jwögg-ɑ cödhø, ge cɑyɑ’ cɑyø kipe gïn-ɑ ɑ́gwøg yi gen.” Møg-ɑ ɑ́kwøb yi Wïlɑ̈bø, Jwøng-ɑ Ácwɑ̈ɑ̈j ɑgɑk. Codhe, ɑpɑ̈r kerobb, kɑ tyell-ɑ wïnnø ókedhø ki gen, geki mɑ̈ɑ̈r Jwøøg Isrɑil kì mɑl wɑ̈thi gen. Kɑ cɑr-ɑ nyi mënyø odhwödhø kì kɑɑl, ɑcunge kì wïj kït kì wɑɑng cyɑ̈ɑ̈ng mwøl. Atïng yɑn mɑl yi wëyi Jwøk kì yij cyɑ̈rø, kɑ yɑ dwøøg gen yïnø Bɑbïlöniyɑ̀ pödhi tyëng Kildɑn. Codhe ɑwɑ̈ɑ̈ny cyɑ̈rɑni. Kɑ tyëng-ɑ yïnø köbbɑ møg-ɑ ɑ́nyudhi yɑn yi Jwøng-ɑ Ácwɑ̈ɑ̈j bënn. Kɑ yɑ köbbi yi Jwøng-ɑ Ácwɑ̈ɑ̈j kinni, “Wɑ̈d dhɑnhø, yï bëëd ɑ kelli tyëngpëëmø, mø yï gen di nyingi gen, de ge pɑ nëënø, yï gen dɑ yïthh, de ge pɑ lïngø, mɑ́ ge bɑ tyëngpëëmø. “Anɑn, wɑ̈d dhɑnhø, gwir jɑmmí ni ngɑn kedhi be bëëdø pödhø me pɑth. Kɑ yï dhwöödh kì dicɑ̈ng, kì bøli gen, yï kedh-ɑ be bëëdø pödhø megø, men-ɑ óyodii yi gen kinni ge bɑ tyëngpëëmø. Kɑ jɑmmí, jɑmmi wel kɑ̈ɑ̈l wɑ̈g kì dicɑ̈ng, e gï nenni ge’ nennø, kɑ wiy yï lidh yi gen yï odhwödhø kì böörø ni kenyi kedh ngɑn töngi yïnø ceth. Twïy döri ødí kì bøli gen, kɑ yï kɑ̈l keny-ɑ ótwïy yi yïn. Kɑ jɑmmí kwɑɑny ge onëënø, kɑ ge byeel kì yij muudhø; kɑ nyingí kum kipe kinni, o piny cöge e pɑ nenni yi yïn, mɑ́ yï ɑ́gwøgɑ yï bɑ ngïji kipe gøl Isrɑil.” Agwøgɑ gïg-ɑ ɑ́köbbi yɑn yi Jwøng-ɑ Ácwɑ̈ɑ̈j; jɑmmì ɑ́twöjɑ kì dicɑ̈ng ni ngɑn töngi yïnø, kì böörø e piny køm-ɑ lunyø, ɑtwïyɑ dörø ki cinggɑ, ɑkɑ̈ɑ̈lɑ keny-ɑ ɑ́twïyɑ. Abyeelɑ jɑmmɑ wïj tøgɑ, kɑ yɑ ókedhø yɑ onennø yi ji bënn. Dhuki kì mwøl, ɑköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, ɑnɑn mɑ́ tyëng Isrɑil bɑ tyëngpëëmø, o ge pyëny-ɑ yïn kinni, ‘Yï gwøg-ɑ ngø?’ Köbbí gen gïn-ɑ kwøbɑ kinni, yɑ Wïlɑ̈bø, Jwøng-ɑ Ácwɑ̈ɑ̈j, yɑ köbb-ɑ gen kinni: Wöödø men bɑ men muuj nyirɑ̈nh-ɑ jyɑ̈gø kì Yerusɑlem geki tyëng-ɑ bëëdø kì kɑɑlɑni. Köbbí gen kinni gïn-ɑ ɑ́gwøg yi yïn bɑ ngïji mi gïn-ɑ óbï kömi gen. Ge ógöögø gɑ wëdhh kí ɑmɑgg. Nyirɑ̈nh-ɑ jɑɑg gen jɑmme ótër yi en kì wïj tøge kì yij muudhø, ókɑ̈l keny-ɑ ótwïy yi gen kipere kì ri dörø, nyinge ókum yi en o cöge piny pɑ nenne. De bøyɑ óleengɑ köme kɑ mɑgɑ ki gøn. Codhe, o kïdhɑ Bɑbïl, kun-ɑ óthøwe e gø pɑ lidhe. Jø tøg bure kí jøg-ɑ nyi köbbii, kí jøg-ɑ nyi korrii, ge ókedhhɑ kì wɑ̈thi tùngi piny bënn, ge óyɑb yi ji ge dwɑdd-ɑ nɑ̈gø yi jiɑni. “Keny-ɑ ókedhhɑ gen kì yethi pödhh-ɑ pɑth, kí kelli tyëngpɑth, óyod yi gen kinni bene yɑn ɑ bɑ Jwøng-ɑ Ácwɑ̈ɑ̈j. Kwï mø nøg kì kelli gen ówiy yi yɑn kì bɑng liny geki kɑ̈j, kí rɑ̈ɑ̈m dëllì, o ge ókööb gen kì kelli pödhh-ɑ ókedhi yi gen, kinni ɑ́yod yi gen kinni ge ɑ́gøgg-ɑ gïgrijjø; o yod yi gen kinni bene yɑn ɑ bɑ Jwøng-ɑ Ácwɑ̈ɑ̈j.” Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, nyi kïrri dëlí yi wɑ̈ɑ̈rø kɑ̀ cyɑ̈ɑ̈m kí kɑ̀ mɑ̈ɑ̈dh ki pï. Köbbí pödhø bëne wöödø men kinni bene møg-ɑ ɑ́kømmi yi Wïlɑ̈bø Jwøng-ɑ Ácwɑ̈ɑ̈j, e köbb-ɑ tyëng Yerusɑlem, møg-ɑ nudd ge obëëdø kì pìnyi gen ek: Dëlli gen ókïrrø yi wɑ̈ɑ̈rø kɑ̀ cyɑ̈ɑ̈m gen, kí kɑ̀ mɑ̈ɑ̈dh gen ki pï. Piny gen órënyi kɑ döng-ɑ nøw, mɑ́ tyëng-ɑ bëëdø kì yije ceg-ɑ mød ki ji. Kɑ̈dd-ɑ pɑ̈ng yi ji ɑnɑn órënyi; pödhø ódöng ɑ́ ryɑng, codhe o yod yi gen kinni bene yɑn ɑ bɑ Jwøng-ɑ Ácwɑ̈ɑ̈j.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, ɑ́ kipe ngø ɑ rïïj gɑ́j møg okømmø yi tyëng Isrɑil kinni, ‘Piny ceg-ɑ pödhø e møg-ɑ ɑ́töng nuti pɑ̈dhi kɑ̈jji gen?’ Köbbí gen kinni Wïlɑ̈bø Jwøng-ɑ Ácwɑ̈ɑ̈j okööbø kinni gɑ́jɑni cuungɑ’ cuungø; ge pɑ cigi kømmø kì Isrɑil kinni tek. Köbbí gen kinni bøli keny-ɑ ópɑ̈dhi kwøb kɑ̈jji gen ɑ́wɑ̈nhi! “Kipe bong møg-ɑ ótöng, o bong møg-ɑ ócɑr mø bï gɑ pyed kì Isrɑil këti. Ge óköbbɑ, o møg-ɑ ɑ́kwøbɑ ópɑ̈dhi kɑ̈jji gen ceth. Ge koo cwööng; ge ócwöb kì yethi cyɑ̈nggi wun, wu tyëngpëëmø; møg-ɑ ɑ́kwøbɑ ógwøgɑ kì bøli kɑ̈jji gen ceth.” Møg-ɑ kwøb yi Jwøng-ɑ Ácwɑ̈ɑ̈j ɑgɑk. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, tyëng Isrɑil orumø kinni i møg-ɑ ɑ́cɑ̈rrí gen geki møg-ɑ ɑ́töng yi yïn ɑ́mɑ̈gi ki keny me lɑɑj, ge pɑ pɑ̈dhi kɑ̈jji gen. De köbbí gen kinni Wïlɑ̈bø Jwøng-ɑ Ácwɑ̈ɑ̈j okööbø kinni, ge pɑ cwööng këti. Møg-ɑ ɑ́kwøbɑ bënn ceg kɑ gwøgø. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb!” Kɑ yɑ köbbi yi Jwøng-ɑ Ácwɑ̈ɑ̈j kinni, “Wɑ̈d dhɑnhø, töngí jøtöng mø pyed kì Isrɑil, gen ɑ jøg-ɑ nyi töng møg-ɑ rømmi yi gen. Köbbí gen kinni lïngi gen mø Jwøng-ɑ Ácwɑ̈ɑ̈j.” Wïlɑ̈bø Jwøng-ɑ Ácwɑ̈ɑ̈j okööbø kinni, “Jøtöng mø pyed ri gen dɑ cyën! Ge nyi töng-ɑ møg-ɑ rømmi yi gen keti gen, de pɑth ki møg-ɑ cɑ̈rri gen. Isrɑil, jøtöng møgí nɑ ógwøgg mø bëëdø kì wïj thur. Kɑ̈jj-ɑ pɑ̈ɑ̈dhø kì ri dörø pɑ kor yi gen, o döri Isrɑil nuti døøg gen ki gerø, o di cugge cung e teeg keny-ɑ óbëën liny kì cyɑ̈ɑ̈ng Jwøng-ɑ Ácwɑ̈ɑ̈j. Gïg-ɑ cɑr yi gen geki gïg-ɑ rɑng yi gen bɑ pyed. Ge okööbø ce ge kømm-ɑ wöönɑ, de pɑth ki yɑn ɑ ɑ́ör gen. O cɑgg ɑ́ kinøw, ge orumø kinni møgɑni ópɑ̈dhi kɑ̈jji gen! Ge köbbɑ’ köbbø kinni: Møg-ɑ cɑrri yi wun pɑth kidyër, o møg-ɑ rømmi yi wun bɑ pyed. Wu okööbø kinni bɑ yɑn ɑ ɑ́köbbi wun, de wu nuti köbbi yɑn!” Bene ɑ köbbi gen yi Wïlɑ̈bø Jwøng-ɑ Ácwɑ̈ɑ̈j kinni, “Kwøbbi wun pɑth ki dyër, o møg-ɑ ɑ́cɑr yi wun bɑ pyed, kì bɑng menɑni riɑ lugɑ’ wun. Wu cɑyɑ’ cɑyø, wu jøtöng møg-ɑ cɑr kwøbb-ɑ pɑth ki dyër, ɑ rɑng kwøbbi pyed. Wu pɑ cuggi bëëdø kì kelli jiɑ; nyingi wun pɑ gweed kelli tyëng Isrɑil, wu pɑ kedhi yij piny Isrɑil. Codhe, o yod yi wun kinni yɑn ɑ bɑ Jwøng-ɑ Ácwɑ̈ɑ̈j. “Jiɑ ɑ́buudh yi jøtöng kɑ̀ kööb gen i dɑ mër, o mër bong gøn! Jiɑ ɑ́gëëd ki dörø ki tuggi kïtti mø lɑngø kì kɑ̈jji gen, kɑ gøj yi jøtöng ki jïr. Köbbí jøtöng møgɑni kinni dörø mi gen ópɑ̈ɑ̈dh. Yɑ óöni ki kødh me teg, o pï ódyëm, kɑ ɑtunø kön-ɑ ri dörɑni. Dörɑni ópɑ̈ɑ̈dh kɑ ji ópëjjø kinni, ɑ́gøne gïn-ɑ ɑ́gwøg yi jïr-ɑ ɑ́gøjii?” Møg-ɑ kømmi yi Wïlɑ̈bø Jwøng-ɑ Ácwɑ̈ɑ̈j ek: “Yɑ ókɑ̈ni ki yømø me teeg, kí ɑ́piy, kí kødh me teeg ki rɑ̈ji pyëwɑ, o ge dhur gen dörɑni piny. Dör-ɑ ɑ́gøj yi gen ki jïr dhurɑ’ piny, o wïje pɑ̈ɑ̈re ki piny, o tuggi kïtt-ɑ ɑ́cɑɑg tyele döng gen ge ónënnø. Ópɑ̈ɑ̈dh kɑ wu nɑ̈ge bënn. Codhe, o yod yi ji bënn kinni bene yɑn ɑ bɑ Jwøng-ɑ Ácwɑ̈ɑ̈j. “O tegɑ yod yi dörɑni geki tyëng-ɑ ɑ́gøjii ki jïr. Codhe, o wu köbbɑ kinni dörø ɑ́wɑ̈ɑ̈ny geki tyëng-ɑ ɑ́gøjii ki jïr, ɑ løg tyëng-ɑ ɑ́köbbi Yerusɑlem kinni i dɑ mër e bong mër yøw!” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Akööb Jwøng-ɑ Ácwɑ̈ɑ̈j kinni, “Anɑn, wɑ̈d dhɑnhø, lidh nyigi pödhi wun møg-ɑ nyi töng kwøbb-ɑ rømmi yi gen, kɑ ge köbbí kinni: Áyïmø, Jwøng-ɑ Ácwɑ̈ɑ̈j okööbø kinni; Ri wun dɑ cyën, wu tyëng-ɑ köjji ji ki wɑ̈jji bɑ̈dd geki wënni wɑ̈ɑ̈th, kipe kinni o wu bëëd wun, yï wun dɑ tegø kì kömi wëyi gen. Wu yɑb-ɑ wëyi jiɑ, o wu dwɑddu yieli wëyi wun. Kɑ yɑ nyi bwöl wun kì bøli jiɑ kipe kinni o wu yïddi wun ki ceir geki ópùn mø nøg yøw. Wu nɑ̈g-ɑ tyëng-ɑ pɑ dwɑddi kinni o ge thøw gen, o wu wiy wun tyëng-ɑ dwɑddi kinni o ge thøw gen; kí kenyi köbbu jiɑ ki pyed, kɑ gø nyi yïëy gen.” Anɑn Wïlɑ̈bø Jwøng-ɑ Ácwɑ̈ɑ̈j okööbø kinni, “Wɑ̈jj-ɑ nyi gwøg yi wun gɑ møg mïdhi wun wëyi ji, mɑɑn yi yɑn; ge ócöödɑ wɑ̈g kì bɑ̈ddi wun, kɑ jiɑ pɑ̈ɑ̈dɑ wɑ̈g kì cinggi wun. Ge pɑ cigi mïdhø yi wun; codhe o yod yi wun kinni bene yɑn ɑ bɑ Jwøng-ɑ Ácwɑ̈ɑ̈j. “Pëthi tyëngdøj ɑ́wëggu nyönhø yi kwøbb-ɑ kømmi yi wun, e pɑth ki yɑn ɑ ɑ́dwɑddii kinøw. Kɑ tyëngrijjø cwɑg wun, o ge cög ge pɑ wïyi ki yëth-ɑ rijjø mø gen, o ge di yiel. Kì bɑng menɑni, cyɑ̈ri pyed geki rɑɑng wun, kej gen ɑ́pöödh. Jiɑ yielɑ’ yielø kì cinggi wun, codhe o yod yi wun kinni bene yɑn ɑ bɑ Jwøng-ɑ Ácwɑ̈ɑ̈j.” Abëën jøgdøngi Isrɑil møøgø be pyëji yɑn ki gïn-ɑ dwɑddi yi Jwøng-ɑ Ácwɑ̈ɑ̈j. Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, jøg pëthi gen ɑ́mëggi gen ngïjji jwögg, o ri gen ɑ́wëggi gen peej yij orøg yi jwöggɑni. Ge orumø kinni pyëjji gen óløøg yi yɑn? “Anɑn köbbí gen møg-ɑ köbbɑ gen, yɑ Wïlɑ̈bø Jwøng-ɑ Ácwɑ̈ɑ̈j kinni: ngeti Isrɑil men-ɑ́ pyëwe ɑ́mëgge ngïjji jwögg, kɑ ree wëgge peej yij orøg yi gïn, kɑ bï-ɑ be pëjjø ki jɑltöng, møge óløøgɑ, de ge óløøgɑ kɑ møg-ɑ di løøgɑ kwøbbi ngïjji jwögge! Ngïjji jwöggɑni tyëng Isrɑil ɑ́peej gen pɑ̈l kì yij yuuɑ, de pëthi gen ódwöög yij yuuɑ yi møg-ɑ óløøg yi yɑn. “Anɑn, köbbí tyëng Isrɑil kinni, Wïlɑ̈bø Jwøng-ɑ Ácwɑ̈ɑ̈j okööbø kinni: Dwöög wun kɑ ngïjji jwögg-ɑ rijjø mø wun, wiy wun. “Dhɑnhø bëne kì kelli tyëng Isrɑil, wɑlɑ̀ tyëng-ɑ bëëdø kì kelli gen men-ɑ ólugi ngɑ̈je yɑn, kɑ mɑll-ɑ jwögg-ɑ pɑth, kɑ kedh-ɑ be pëjjø ki jɑltöng, yɑn yɑ Jwøng-ɑ Ácwɑ̈ɑ̈j ɑ óløøg møge! Riɑ ólugɑ en kɑ gwøgɑ ɑ́ nyuudhi kipe ji, ókɑ̈ɑ̈lɑ wɑ̈g kì kelli jiɑ, codhe o yod yi wun kinni bene yɑn ɑ bɑ Jwøng-ɑ Ácwɑ̈ɑ̈j. “Keløg jɑltöng óthɑb kɑ otöngø ki kwøb mø pɑth ki dyër, bɑ yɑn ɑ ɑ́thɑbii. Cingɑ órïjjɑ en, kɑ nɑ̈gɑ kì kelli jiɑ tyëng Isrɑil. Jɑltöng geki jɑl-ɑ ɑ́pyëjjii, cɑ́y-ɑ ócɑɑy gen bɑ ɑ́kyel. Møgɑni ógwøg yi yɑn, kipe kinni o bëëd e bong ngɑn ywëdh ree ki orøg. Ge óbëëdø gɑ jiɑ, o yɑ óbëëdø yɑn ɑ́ Jwøøg gen.” Møg-ɑ ɑ́kwøb yi Wïlɑ̈bø, Jwøng-ɑ Ácwɑ̈ɑ̈j ɑgɑk. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, keløg pödhø ógöögø ki orøg kɑ ciggɑ ocögø gï pɑ mïdhe, cingɑ órïïjɑ kɑ gïgcɑmmi gen rënyɑ. Yɑ óöni ki kɑ̈j kɑ ji nɑ̈gɑ kyeel geki lɑ̈yy. Cɑgg jøg ɑ́dɑ̈g møg di bëëd ge nud kì kelli gen, ɑ løg Nöö, kí Dɑniel, kí Ayub, døøji gen di yiel-ɑ wëyi gen keti gen.” Møg-ɑ ɑ́kwøb yi Wïlɑ̈bø, Jwøng-ɑ Ácwɑ̈ɑ̈j ɑgɑk. Kɑ Jwøng-ɑ Ácwɑ̈ɑ̈j okööbø kinni, “Wɑlɑ̀ yɑ ócuggø önø ki lɑ̈yy-ɑ nyi cyɑ̈mø, kɑ piny rënyi gen, kɑ bong-ɑ ji mø weli kì yij pödhø, cɑgg jøgɑni gɑ ɑ́dɑ̈g di bëëd ge nud, yɑn ɑ kööbø, yɑ Wïlɑ̈bø Jwøng-ɑ Ácwɑ̈ɑ̈j, bene yɑn Jwøng-ɑ Nëënø, nyigi gen pɑ di cuggi yielø yi gen; ge di yiel-ɑ ri gen keti gen, kɑ piny di döng ɑ́ ryɑng. “Wɑlɑ̀ yɑ di kɑ̈ni yij pödhø ki liny me nɑ̈g ji kyeel geki lɑ̈yy, o cɑgg jøgɑni gɑ ɑ́dɑ̈g di løg-ɑ mø nud kì pönhɑni, yɑ Wïlɑ̈bø Jwøng-ɑ Ácwɑ̈ɑ̈j, bene yɑn Jwøng-ɑ Nëënø, nyigi gen pɑ di cuggi yielø yi gen; ge di yiel-ɑ ri gen keti gen. “Keløg yɑ di ör-ɑ yømø nɑ̈ɑ̈g yij pödhø, kɑ ji mø gïïr nɑ̈gɑ ki rɑ̈ji pyëwɑ, kí lɑ̈yy thyew, cɑgg Nöö, kí Dɑniel, kí Ayub di bëëd ɑ pönhɑni, yɑ Wïlɑ̈bø Jwøng-ɑ Ácwɑ̈ɑ̈j, bene yɑn Jwøng-ɑ Nëënø; ge pɑ di cuggi yieli nyigi gen; døøji gen di yiel-ɑ wëyi gen keti gen.” Wïlɑ̈bø Jwøng-ɑ Ácwɑ̈ɑ̈j okööbø kinni, “Cɑ́yɑ, cɑ́y-ɑ pëddi rɑ̈jø gɑ ɑ́ngwen, ge óörɑ kömi Yerusɑlem, ɑ løg liny, kí kɑ̈j kí lɑ̈yy-ɑ nyi cyɑ̈mø, kí rɑ̈ɑ̈m dëllì, o ji nɑ̈g yi gen kyeel geki jɑmmi gen. Keløg e ódi dhɑnhø men-ɑ óbodh, kɑ nyige yiele, ge ólidh yi wun keny-ɑ óbëën gen yï wun, o óyod yi wun kinni cɑ́y-ɑ kɑ̈ɑ̈lɑ kömi Yerusɑlem bɑ dyër ceth, codhe o yod yi wun kinni ge nuti wɑ̈dhi yɑn kɑ cɑyø yøw.” Møg-ɑ ɑ́kwøb yi Wïlɑ̈bø, Jwøng-ɑ Ácwɑ̈ɑ̈j ɑgɑk. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, ɑ́ ngø ɑ pɑ̈ɑ̈r oløg geki yɑdh? Á ngø ɑ døøj kì ri bɑ̈ddi oløg, ɑ cuggi gen ki pɑ̈rø ki yenhi wɑg? Dɑ gïn cuggi gwøgø ki bɑɑd oløg? Yï ócuggø gwøg ki gɑrø me ree nyi ngɑ̈bbi ki jɑmmì ki bɑɑd oløg? Døøj kɑ cwɑgi mɑc yøw. O kɑ̀ rum bɑ̈dde geki tyele ki rɑ̈bø kɑ ogöögø ɑ́ belø, dɑ gïn døj me gwøgii? Ábëëd e bong gïndøj kì ree ceth e nuti rɑ̈bø. Anɑn kɑ ɑ́rume rɑ̈bø kɑ ogöögø ɑ́ belø, ɑ́ti gwøg e bong pere.” Anɑn Wïlɑ̈bø Jwøng-ɑ Ácwɑ̈ɑ̈j okööbø kinni, “Ni kenyi kɑ̈ɑ̈l oløg kì wɑg kɑ rɑ̈b, tyëng-ɑ bëëdø kì Yerusɑlem ókwɑny yi yɑn, kɑ ge cɑyɑ. Ge ɑ́bodh kì dhø mɑc, o ge ceg kɑ cɑmø ceth yi mɑny-ɑ kyeelø. Óyod yi wun keny-ɑ ócɑyɑ gen, kinni yɑn ɑ bɑ Jwøng-ɑ Ácwɑ̈ɑ̈j. Pönhï ówiy yi yɑn e dööng nøw, mɑ́ ciggɑ nuti mïdhø yi gen.” Møg-ɑ ɑ́kwøb yi Wïlɑ̈bø, Jwøng-ɑ Ácwɑ̈ɑ̈j ɑgɑk. Aköbbi yɑn yi Jwøng-ɑ Ácwɑ̈ɑ̈j këti kinni, “Wɑ̈d dhɑnhø, nyudhí Yerusɑlem rɑjj-ɑ ɑ́gwøge. Köbbí Yerusɑlem kinni, Wïlɑ̈bø Jwøng-ɑ Ácwɑ̈ɑ̈j okööbø kinni, “Yï ɑ́nywøl-ɑ piny Kɑnɑɑn. Wïyí bɑ kwɑɑr Amör, o meyí bɑ kwɑɑr Kit. Keny-ɑ ɑ́nywøøl yïn, bong ngɑn mɑ ɑ́ngøl gudí, o bong ngɑn mɑ ɑ́kwër yïn kinni o dëlí di dhïwe, bong ngɑn mɑ ɑ́nyøng yïn ki omelø, o bong ngɑn mɑ ɑ́kum yïn ki ógødh. Bong ngɑn mɑ yije ɑ́ywöngi kiperí, kɑ yï gögge jɑmmɑni. Keny-ɑ ɑ́nywøøl yïn, bong ngɑn mɑ ɑ́mɑɑr yïn. Yï ɑ́wedd-ɑ pɑ̈l. “Codhe ɑbëënɑ yɑ cyɑ̈dhi kɑ wɑ̈dhɑ, ɑlidhɑ yïn yï owɑnyyø kì yij remí. Yï ɑ́bëëd yï cödhø yi remø, de yï nuti wiy yɑn, o yï thøw. Kɑ yï wëggɑ piidhø ni yɑdh. Agöög yï pëddi myëërø. Yï ɑ́døngi kɑ yï ójurrø. Thïnhhí ɑ́twïy kɑ yëyyí óbɑ̈rø, de yï cyɑ̈dh-ɑ nøw ri bong ógødh. “Keny-ɑ ɑ́cigɑ dwöögø, ɑlidhɑ en kinni bøli kej mɑ̈ɑ̈dø ɑ́bï kì yïí. Akumɑ yïn ki ógødhɑ kipe kɑ̀ cyɑ̈dhí nøw. Codhe, ɑköngɑ kinni yï ónywømɑ, ɑgöög yïn ɑ́ miɑ.” Bene gen møg-ɑ kwøb yi Wïlɑ̈bø, Jwøng-ɑ Ácwɑ̈ɑ̈j ɑgɑk. “Codhe ɑkɑ̈bbɑ ki pï, kɑ remɑni lwöögɑ wɑ̈g kì rií. Agïnyɑ yïn ki møøw dhetun. Kɑ yï ruugɑ ki ógødh me thøø yi kwenø, kɑ yï nëngɑ ki wɑrri dël mø myëër, kí thɑrɑ̀ men-ɑ ócwɑ̈jø ki kor-ɑ yöm, kí ɑ́ywödh me bɑ ɑrir. Kɑ cinggí geki yedhí ruugɑ ki tigg-ɑ per gen teg. Kɑ yï nëngɑ ki gweli órøm geki gïi yïthh, kí bɑrukɑ̀ me myëër. Kɑ yï nëngɑ ki jɑmmi dhɑb kí ɑ́tegø, o yï nyi rug-ɑ ógudh mø myëër mø thøø yi cwɑ̈jø ki kor-ɑ yöm, kí ɑrir. Yï ɑ́cɑm-ɑ ɑwɑj me pëddi døøjø, kí møøw kïc geki møøw dhetun. Kɑ yï ómyërrø; de yï ceg-ɑ ogwel ni bɑ̈rɑ̈dh. Kɑ per myërí lïngi kì yethi pödhh bënn, mɑ́ yɑn ɑ ɑ́gwøg yïn yï myëër cɑrø kinøw.” Bene gen møg-ɑ kwøb yi Wïlɑ̈bø Jwøng-ɑ Ácwɑ̈ɑ̈j ɑgɑk. “De myërí geki ngɑ̈nyi perí ɑ́göög gɑ møg yɑ̈ɑ̈b ki cwøw; kɑ yï nyi wɑ̈dhi niin yi jɑl bï e cyɑ̈dhi ɑ́ wëli yöö. Kɑ kɑ̈jji mɑ̈ddø pëdhí ki ógudhí, o ge myërri gen. Kɑ yï ogöögø yïn ɑ́ ngɑn nyi niin ki köögi, ki yöö me nuti pɑ̈nyø lidhø, wɑlɑ̀ me koo døøg lidhø këti. Kɑ jɑmmi dhɑb kí ɑ́tegø møg-ɑ ɑ́mëggɑ yïn göög ki ngïjji cwøw, kɑ yï niin yi gen. Kɑ ógudh-ɑ thøø yi rødø møg-ɑ ɑ́mëggɑ yïn kwɑɑny, kɑ ge kum ngïjjɑni, kɑ møøw dhetun geki bɑkur cïb bøli gen. Kɑ gïncɑm-ɑ døj, kí møøw dhetun, ki møøw kïc møg-ɑ ɑ́mëggɑ yïn mëggí gen gɑ gëdhhì mø mïni pëthi gen.” Bene gen møg-ɑ kwøb yi Wïlɑ̈bø Jwøng-ɑ Ácwɑ̈ɑ̈j ɑgɑk. “Codhe, kɑ nywøl-ɑ ɑ́nyöllí yɑn gɑ cwøw kí mɑ̈nn ngɑ̈llí ngïjjɑni gɑ gëdhhì. Yï orumø kinni yɑɑbí ki cwøw kì bølɑ bɑ gïjø me lweny? Kɑ nyigɑ tiir ki ngɑ̈lli ngïjjì! Ki bëën-ɑ bëëd yi yïn, yïn ɑ́ ngɑn nyi niin ki köögi ɑnɑn, yï nuti wöl pɑ̈dø ki bëën-ɑ ɑ́bëëd e yïí bong ógødh, yï wɑnyy-ɑ yij remí.” Jwøng-ɑ Ácwɑ̈ɑ̈j okööbø kinni, “Rií dɑ cyën! Yï ɑ́göög ki rɑj mø døngø, Yï ɑ́gëëd ki kɑ̈jj-ɑ mɑlli ngïjji jwögg-ɑ pɑth kì tøggi yëëth, kɑ yï ogöögø ki ngɑn nyi niin ki köögi. Myërí ɑ́rënyi, kɑ rií nyi mëggí cwøw møg-ɑ nyi bï bënn yethi cyɑ̈ng, ngɑn nyi niin ki köögi ɑ́lod yi yïn. Yï ɑ́niin yi jø Rïp pönh-ɑ butí, jøg-ɑ ngëti gen døngø, kɑ pyëwɑ wëggi rënyø yi orøgí. “Anɑn cingɑ ɑ́tïngɑ mɑl kipe cɑyi yïn, kí kwɑnyi gyëdh kì yïí. Kì bɑng rɑ̈ji bëëdí, yï ɑ́cïbɑ cinggi tyëng Pelistiyɑ̀, tyëng-ɑ mɑɑn yïn. “Yï ɑ́niin yi jøgi Acuur, mɑ́ yijí nuti kwöjø yi møg-ɑ kyeelø, de pyëwí nuti kwöjø thyew. Yï ɑ́niin yi jø Bɑbïl jøngyew, de yijí nuti kwöjø yi gen thyew.” Wïlɑ̈bø Jwøng-ɑ Ácwɑ̈ɑ̈j okööbø kinni, “Á pyëw me cödhø ni ngø ɑ yïí, ɑgöög ki rɑj mø ni møg, yï bɑ ngɑn nyi niin ki köögi me wïje pɑ nyi lɑ̈ɑ̈y! Yï ɑ́gëëd ki kɑ̈jji mɑlli ngïjjì kì tøggi yëëth, kɑ yï ogöögø ki ngɑn nyi niin ki köögi. De yï pɑ yɑb ngyëny ni tyëng-ɑ nyi niin ki köögi møg-ɑ kyeelø. Yï nɑ ngɑn nyi niin yi cwøw møøgø kibøli ke di mɑɑre jɑlgøle. Ngɑn nyi niin ki köögi bɑ en ɑ nyi thödhi ki ngyëny yi cwøw, de yöd ɑ́ yïn ɑ nyi thödhi cwøwí ki jɑmmì, o ge bï gen be niin ki yïn kì wɑ̈thi ótøng bënn. Yï bɑ ngɑn nyi niin ki köögi me bɑ̈ɑ̈n ki møg-ɑ kyeelø. Bong ngɑn-ɑ ɑ́cïri yïn bëëdø yïn ɑ́ ngɑn nyi niin ki köögi. O yï pɑ nyi køøg, dɑ́ yïn ɑ cudi gen! Yï bɑ̈ɑ̈n ki ngɑn nyi niin ki köögi.” Anɑn, Yerusɑlem, ngɑn nyi niin ki köögi! Lïngi møg-ɑ kwøb yi Jwøng-ɑ Ácwɑ̈ɑ̈j. Wïlɑ̈bø Jwøng-ɑ Ácwɑ̈ɑ̈j okööbø kinni, “Ógudhí ɑ́pyëëd wɑ̈g ni ngɑn nyi niin ki köögi, kɑ rií mëggí cwøwí geki ngïjjí, ngïjj-ɑ cödhø, kɑ nyigí ngɑ̈lli gen gɑ gëdhhì. Kipe møgɑni bënn, cwøwí ócungɑ; cwøw-ɑ mɑɑr yi yïn geki møg-ɑ mɑɑn yi yïn. Yï ówëggɑ tyeeg dïdyërø yi gen, o ógudhí pyëëdɑ wɑ̈g, o yï lidh yi gen yï cyɑ̈dh-ɑ nøw. Yï cɑyɑ’ cɑyø kipe yɑb ki cwøw geki nɑ̈g ki ji, yï cɑy yi yɑn kɑ thøø, o pyëwɑ pɑ lɑ̈ɑ̈m. Yï cïbɑ’ cinggi gen, o kɑ̈jji mɑ̈ddø møgí dhur gen piny, kɑ̈jj-ɑ ɑ́yɑ̈ɑ̈b ki cwøw, ɑ yethi gen ɑ́mɑlli ngïjjì. Jɑmmi dhwɑ̈ngí geki ógudhí ókwɑny yi gen, kɑ yï odöngø yï cyɑ̈dh-ɑ nøw. “Yï ókölli gen ji, o yï bɑ̈lli ki tuggi kïttì, o yï ngølli yi gen ki pil. Kɑ̈llí órɑ̈b yi gen ki mɑc, kɑ cɑ́yí wëggi gen lidhø yi tyëng-ɑ mɑ̈nn bënn. Yɑɑbí ki cwøw ócuungɑ; o yï ómɑ̈ɑ̈nɑ thödhi cwøwí ki jɑmmì geki ngyëny. O pyëwɑ kwöje, o yɑ cögɑ yɑ pɑ mɑg yi liny geki tyiel këti. Kì bɑng kɑ ɑ́wiil wïjí, ki gïg-ɑ ɑ́göggɑ yïn keny-ɑ ɑ́bëëd yï thinh, kɑ pyëwɑ wëggí rënyø yi gïgrijjø møg-ɑ ɑ́gwøg yi yïn. Bene ɑ wëggɑ yïn coli møgɑni ki orɑng. Á kipe ngø ɑ ɑ́kedhí be yɑb ki cwøw kì kömi rɑjj-ɑ ɑ́gwøøg bënn?” Møg-ɑ ɑ́kwøb yi Wïlɑ̈bø Jwøng-ɑ Ácwɑ̈ɑ̈j ɑgɑk. Jwøng-ɑ Ácwɑ̈ɑ̈j okööbø kinni, “Yï ógɑj yi ji ki gɑ́j møg: Yerusɑlem, ‘Nyɑn-ɑ bɑ cyɑ̈ni meye.’ Yï bɑ nyɑɑr meyí kidyër. Jɑlgøle geki nyige mɑɑn yi en. Yï nɑ nyiimyëw womɑ̈nn-ɑ mɑɑn cwøwi gen geki nyigi gen. Yïn, wuki kɑ̈dd-ɑ butí, meyi wun bɑ kwɑɑr Kit, o wïyi wun bɑ kwɑɑr Amör. “Nyimyëw nyɑndwøng bɑ Sɑmɑriyɑ̀ geki myërre kì wɑɑng wuudø. Nyimyëw nyɑnthinh bɑ Sødømɑ̀ geki myërre kì wɑɑng wurlwɑl. Yï ɑ́dwɑdd-ɑ ngøyi rɑj møg-ɑ ɑ́gwøg yi gen? Mø gen nøg, mií ɑ́pëddi rɑ̈jø.” Wïlɑ̈bø Jwøng-ɑ Ácwɑ̈ɑ̈j, okööbø kinni, “Yɑ Wïlɑ̈bø Jwøng-ɑ Ácwɑ̈ɑ̈j, bene yɑn Jwøng-ɑ Nëënø; yɑ kwøb-ɑ kinni nyimyëw Sødømɑ̀ geki myërre nuti göögø ki rɑjj-ɑ ɑ́gwøg yi yïn. Sødømɑ̀ geki nywøle ɑ́bëëd ge ceg-ɑ thwøgø mɑ́ yï gen ɑ́dɑ gïgcɑmm mø ngenyø, o ge ɑ́ying-ɑ yij mër, e bong gïn böggi yi gen, de ge nuti rumø kiper tyëng-ɑ nyingi gen cɑn geki tyëng-ɑ jɑdø. Ge ɑ́thwøg kɑ muddi gen ótëngø, ɑgöög gen ki gïg-ɑ mɑɑn yi yɑn, codhe ɑrënyɑ gen ni kɑ̀ ngɑ̈nyií. “Sɑmɑriyɑ̀ nuti göögø ki budi orøgí. Rií ɑ́cöödh kibøli gen. Kɑ̀ pɑ̈ɑ̈r yïn ki gen, ge nënni e dhɑ̈y ce bong rɑj mø gwøøg gen. Anɑn tyëddí ɑyɑ̈rí. Orøgí dwøng cɑrø kibøli orøøg nyiimyëw, ge nënni yï gen bɑ̈r kibølí; tyëddí ɑyɑ̈rí mɑ́ nyiimyëw nënni ge dhïw.” Yerusɑlem ɑ́köbbi yi Jwøng-ɑ Ácwɑ̈ɑ̈j kinni, “Ge ówëggɑ dönyø këti, eni Sødømɑ̀ geki myërre, kí Sɑmɑriyɑ̀ geki myërre. O yï ódwøøgɑ kejí thyew. Yï óyɑ̈r, o ɑyɑ̈rí bɑ en ɑ ónyodh døøji nyiimyëw. Ge ódøøg ki dönyø geki myërri gen, kí yïn, wuki myërrí thyew. Sødømɑ̀ nuti gɑggø yi yïn kì bøli keny-ɑ ɑ́thwøøg; kɑ̈ng-ɑ ɑ́bëëd rɑjj-ɑ ɑ́gwøøg nuti nyodhø? Anɑn yï ɑ́pɑ̈ɑ̈r ki en, yï ceg kɑ gɑggø yi tyëng Edöm geki tyëng Pelistiyɑ̀, kí pödhh-ɑ cyɑ̈gi, ɑ mɑɑn yïn. Wiy yï rɑngí kì bɑng gïgrijjø møg-ɑ ɑ́gwøg yi yïn.” Møg-ɑ ɑ́kwøb yi Wïlɑ̈bø Jwøng-ɑ Ácwɑ̈ɑ̈j, ɑgɑk. Wïlɑ̈bø Jwøng-ɑ Ácwɑ̈ɑ̈j okööbø kinni, “Yï göggɑ’ gïg ni gïg-ɑ ɑ́gwøg yi yïn, mɑ́ lwöbø ɑ́pɑ̈d yi yïn kɑ cigg pyem yi yïn. De lwöm-ɑ kɑɑmee ómïdhɑ; eni lwöm-ɑ ɑ́lwøb yi wɑ yï nudd yï thiinh, o ócïb yi yɑn ceth ɑ́ lwöm-ɑ ógïti ɑtheer. Codhe, o rɑjj-ɑ ɑ́gwøøg pɑɑr, o wïjí lɑ̈ɑ̈ye keny-ɑ ódøøg nyiimyëw kɑ̈jji gen, eni nyɑndwøng geki nyɑnthinh. Ge ówëggɑ bëëdø ni nyigí, cɑgg ɑ́ kɑ̀ nuti lwøøb wɑ møgɑni. Lwöbø miee ódwøøg wɑ keje, o yod yi yïn kinni yɑn ɑ bɑ Jwøng-ɑ Ácwɑ̈ɑ̈j. Lɑɑwɑ ódwöögɑ piny kipe bɑ̈jjí, de ge ópɑɑr yi yïn kɑ dhøgí ódhɑ̈lø yiebø kì bɑng ɑyɑ̈rí.” Møg-ɑ ɑ́kwøb yi Wïlɑ̈bø Jwøng-ɑ Ácwɑ̈ɑ̈j ɑgɑk. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, köbbí gɑ́j møg tyëng Isrɑil, o gïn-ɑ köbbɑ gen, yɑ Wïlɑ̈bø Jwøng-ɑ Ácwɑ̈ɑ̈j yod yi gen. Ádɑ cor me dwøng, me óköne myëër, o obërre dɑdɑɑr. Obërre ɑ́pere, kɑ pɑ̈ɑ̈r-ɑ Kïtti Lubnɑn ɑkɑ̈bbe ki bɑɑd yɑdh sɑndɑl, kɑ gø kïdhe piny Kɑnɑɑn, pödhi tyëng ngyew. Codhe, ɑkɑ̈bbe ki okewi oløg kì piny Isrɑil, ɑmiine gøn yij lɑ̈bø me med, me yije di pï mø gïïr. Kɑ okewɑni onyogø, kɑ ogöögø ɑ́ oløg me mulli. Bɑ̈dde ɑ́mølli wɑ̈thi gen nenn-ɑ mɑl kun-ɑ di cor, kɑ byerre otwïyø ge töng-ɑ piny. Kɑ tyeli oløngɑni kum yi bɑ̈dd geki yïthh. “Ádɑ cor megø me dwøng thyew, me obërre dɑdɑɑr, o óköne gïïr. Codhe, kɑ oløngɑni byerre geki yïthhe løge o ge nenni gen tuung corɑni, e orumø cem e ónëngi yi corɑni ki pï mø ngenyø kibøli møg-ɑ ying yij bɑng-ɑ ɑ́twïye. De oløngɑni ɑ́rum ki pidhø kì yij lɑ̈m-ɑ med, ɑ pɑ̈ng yi pï kipe kinni o yïthhe twïy gen, o kɑ̈ne ki nywøl, o bëëde ɑ́ oløg me myër. “Codhe, ɑpëjjɑ yɑ Wïlɑ̈bø, Jwøng-ɑ Ácwɑ̈ɑ̈j kinni: oløngɑni óbëëdø kɑ ódøngø? Ócög e pɑ puth wɑ̈g yi coor tyeli mɑl, kɑ nywøle pune wɑ̈g, kɑ bɑ̈dde ngølle o thwøwe? Puthe óbëëd e yööd; koo dwɑddi pödhø me teg wɑlɑ̀ tegø me dwøng. Bɑ ɑpidh kidyër, de óbëëdø kɑ ódøngø? Koo thwøw keny-ɑ óköddi köme yi yømi wɑɑng cyɑ̈ɑ̈ng mwøl? Koo thwøøw keje?” Aköbbi yɑn yi Jwøng-ɑ Ácwɑ̈ɑ̈j kinni, “Pyëj gøl pëëmø menɑni, keløg gïn-ɑ wɑngi yi gɑ́jɑni yood gen. Köbbí gen kinni rɑ̈ɑ̈dh Bɑbïlöniyɑ̀ ɑ́bï Yerusɑlem, kɑ rɑ̈dh geki jyɑ̈gge kïdhe Bɑbïlöniyɑ̀. Kɑ ge olwöbø ki kɑl ɑ́kyel kì kelli kɑ̈lli rɑ̈dh, kɑ gø köbbe köngø kinni lwömɑni ómïdhi yi en. Kɑ okɑ̈dø ki jøg per gen teg gɑ ɑmɑgg, Kipe kinni o pödhø cöge e pɑ dhwödhi mɑl këti, o köngɑni mïdhi ceth. De rɑ̈ɑ̈dh Yeudiyɑ̀ ɑ́ngɑ̈nyi wɑ̈ye, kɑ öd-ɑ Rïp ki ji kinni o thödhi ki kyënyì kí jøliny. Møge ópɑ̈dhi? Ódi twïy wɑ̈g? Lwöbø ópɑ̈d yi en kɑ obodhø e pɑ cɑy? “Yɑ Wïlɑ̈bø Jwøng-ɑ Ácwɑ̈ɑ̈j, bene yɑn Jwøng-ɑ Nëënø; Rɑ̈nhɑni thøw-ɑ Bɑbïlöniyɑ̀, mɑ́ lwöbø men-ɑ ɑ́ying kɑɑm gen ki rɑ̈ɑ̈dh Bɑbïlöniyɑ̀, ɑ ɑ́rønyii, ɑ́pɑ̈d yi en. Cɑgg ɑ́ liny-ɑ dwøng, liny rɑ̈ɑ̈dh Rïp pɑ cuggi kønyii ki nyɑɑg ki rɑ̈ɑ̈dh Bɑbïlöniyɑ̀ keny-ɑ ókuny gen ki kɑ̈jj-ɑ pɑ̈nni, kɑ ge othurø ki óthørr-ɑ nenni kɑɑl, kipe kinni o ge nɑ̈ɑ̈g gen ki ji mø gïïr. Ápɑ̈d-ɑ könge geki lwöbø. Gïgɑni bënn ɑ́gwøge, o pɑ pɑ̈nyi bødhø.” Wïlɑ̈bø Jwøng-ɑ Ácwɑ̈ɑ̈j okööbø kinni, “Yɑ Wïlɑ̈bø Jwøng-ɑ Ácwɑ̈ɑ̈j, bene yɑn Jwøng-ɑ Nëënø; cɑyɑ’ cɑyø kipe kɑ ɑ́pɑ̈de lwöm-ɑ́ ree ɑ́könge ki nyingɑ ce gø ómïdhe. Bøyɑ leengɑ’ köme, o mɑg yi gøn; kïdhɑ’ Bɑbïlöniyɑ̀, o cɑyɑ kì kunɑni, mɑ́ ciggɑ nuti mïdhø yi en. Jølinye ónɑ̈g kì yij liny, møg-ɑ óbodh ótɑɑy wɑ̈thi tùngi piny bënn. Yɑn, yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Wïlɑ̈bø Jwøng-ɑ Ácwɑ̈ɑ̈j okööbø kinni, “Yɑ ókɑ̈bbi kì ri yɑdh sɑndɑl me bɑ̈r kì oledhe yɑ ótor men-ɑ yöm; o piidhɑ wïj kït me bɑ̈r. Ópiidhɑ wïj kïn-ɑ bɑ̈r kì Isrɑil. Bɑ̈dde ótwïy kɑ onywølø kɑ ogöögø ɑ́ yɑdh sɑndɑl me dwøng. Winy bënn óbëëdø kì wïje ge óywömø kì tïbe. Óyod yi yenh-ɑ pinyɑni bënn kinni yɑn ɑ bɑ Jwøng-ɑ Ácwɑ̈ɑ̈j. Yenh-ɑ bɑ̈rrø nyi ngølɑ’ piny kɑ yenh-ɑ thønhø wëggɑ døngø. Yenh-ɑ mɑr nyi göjjɑ’ wøwø kɑ yenh-ɑ wøwø wëggɑ mɑ̈rø. Yɑn yɑ Jwøng-ɑ Ácwɑ̈ɑ̈j, yɑ ɑ́rum ki kwøb. Gïg-ɑ ɑ́kwøbɑ ógwøgɑ ceth.” Aköbbi yɑn yi Jwøng-ɑ Ácwɑ̈ɑ̈j kinni, “Wude ɑ cög wu kømm-ɑ gɑ́j møg kì yij piny Isrɑil? ‘Oløng-ɑ wɑj ɑ́cɑm-ɑ yi tyëngdøngø, kɑ yöd ɑ́ othønhø ɑ dhøggi gen wɑ̈nyyi.’ “Yɑ Wïlɑ̈bø, Jwøng-ɑ Ácwɑ̈ɑ̈j, bene yɑn Jwøng-ɑ Nëënø; gɑ́jɑni koo kømmi kì Isrɑil këti. Wëyi ji bënn ying-ɑ cingɑ, wëyi wëëg geki mëëg, kí wëyi nywøl. Ngɑn-ɑ órøngø, en ɑ óthøw. “Keløg dhɑnhø tir, o gøgg-ɑ dyër ceth; o ngïjji jwöggi Isrɑil pɑ nyi mɑlli yi en, wɑlɑ̀ pɑ nyi cyɑ̈mø ki gëdhh-ɑ nyi ngɑ̈lli ngïjji jwöggɑni kì yethi kenggi gen; o cï jɑlø megø pɑ nyi nywɑl yi en, wɑlɑ̀ pɑ nyi buddi ki ngɑn kwër dwɑ̈ye; o pɑ nyi rujø, o pɑ nyi kɑ̈bbi ki gïi ngɑn megø; de gïn-ɑ wïdhii nyi dögge’ wɑ̈n, o ngɑn ree di kɑ̈j nyii thödhø yi en ki gïncɑm, kɑ ngɑn cyɑ̈dhi nøw nyi nënge ki ógødh; o gïn-ɑ ɑ́wïdhe dhɑnhø pɑ nyi col e nywølø, o pɑ nyi yïëy ki gwøg ki rɑj, o nyi gøgg-ɑ dyër kì kelli ji, o ciggɑ mïdhe’ mïdhø ceth; bene ngɑntir o nyi gøgg-ɑ dyër, ngɑnɑni ónëënø.” Møg-ɑ kwøb yi Wïlɑ̈bø Jwøng-ɑ Ácwɑ̈ɑ̈j ɑgɑk. “Ke nywøle ki wɑ̈d me rujø o ceg-ɑ nɑ̈g, o ogöögø ki gïgrijjø bënn, møg-ɑ nuti gwøgø yi wïye, o ocyɑ̈mø ki gëdhh-ɑ nyi ngɑ̈lli ngïjji jwögg kì yethi kenggi gen, o nyi kedh-ɑ ri mɑ̈nni ji møøgø, o tyëng-ɑ nyingi gen cɑn nyii rujø yi en, kɑ jɑmmi gïn nyi kɑbe; o gïn-ɑ ɑ́mɑ̈ggii pɑ nyi dögge wɑ̈n; nyi kedh-ɑ yethi kenggi jwögg-ɑ pɑth kɑ gï nyi mɑlle, o gïn-ɑ ɑ́wïdhe dhɑnhø nyi col e nywølø; ngɑnɑni koo nëënø, mɑ́ e ɑ́göög ki rɑj; ceg-ɑ thøø, o cyënne óying-ɑ köme. “Ke nywøle ki wɑ̈de kɑ orøng-ɑ ɑ́gwøg yi wïye bëne lidhe, de nuti ngöyø ki orɑngɑni, o nuti mɑlli ngïjji jwöggi Isrɑil, o nuti cɑm ki gëdhh-ɑ nyi ngɑ̈lli gen kì yethi kenggi gen; o bong cï jɑlø megø mɑ ɑ́nywɑle; wɑlɑ̀ bong ngɑn mɑ ɑ́ruje, o gïn-ɑ mɑ̈ggii nyi dwøøge’ dwøøgø; o ngɑn ree di kɑ̈j nyii nëngø yi en ki gïncɑm, kɑ ngɑn cyɑ̈dhi nøw nënge ki ógødh; o nyii bɑ̈nyø ki gwøg ki rɑj, o gïn-ɑ wïdhe dhɑnhø pɑ nyi col e nywølø; o ciggɑ nyi mïdhe’ mïdhø ceth; pɑ thøw kipe orøøg wïye de ónëënø ceth. De wïye, mɑ́ e ɑ́ruj kɑ okɑ̈ɑ̈bø, kɑ ogöögø ki rɑj kì kelli ji, en ɑ óthøw kì bɑng orøge. “De wu okööbø kinni, ‘Ede wɑ̈d ɑ pɑ thuwe orøøg wïye?’ Wɑ̈d ɑ́gøgg-ɑ dyër; ciggɑ ɑ́mïdhe bënn, kɑ ócyɑ̈dhø kì bɑng gïn, bene ɑ bɑnge nëëne ceth. Ngɑn-ɑ ɑ́røngi en ɑ óthøw, wɑ̈d pɑ thuw orøøg wïye, o wïy pɑ thuw orøøg wɑ̈de. Ngɑntir ókøøg kipe døøje, o ngɑnrɑj ócɑy kì bɑng rɑ̈je. “Keløg ngetorøg ówïyø ki orøg, kɑ døøg-ɑ be gwøg ki gïgdøj, kɑ ciggɑ mïdhe kɑ ócyɑ̈dhø kì bɑng gïn, ngɑnɑni ónëënø ceth. Lɑ́ɑ̀w ódwöög piny kipe orøge bëne, kɑ onëënø mɑ́ e ɑ́göög ki gïgdøj.” Jwøng-ɑ Ácwɑ̈ɑ̈j pyëj-ɑ wun kinni, “Wu orumø kinni pyëwɑ med ki lidhi ngɑn rɑj e othøø? Pɑth, lɑ̈w-ɑ́ ke lidhɑ en e óyewø kipe kinni o nëëne. “De keløg ngɑntir ówïyø ki gøggi gïgdøj, kɑ døøg-ɑ be gøggi rɑj, ónëënø? Pɑth! Pɑ nëënø, bong ngɑn ópɑrri gïgdøj møg-ɑ ɑ́gwøge, mɑ́ e ɑ́wïyi ki mïdhi yïëye, kɑ døøg-ɑ be orøg. “De wu okööbø kinni i gïn-ɑ gwøg yi Jwøk pɑth ki dyër. Adɑ́ lïngu kwøbbɑ wun ɑ tyëng Isrɑil, gïg-ɑ gøggɑ ɑ pɑth ki dyër, wɑlɑ̀ gïg-ɑ gøggi yi wun ɑ pɑth ki dyër? Keløg ngɑntir ówïyø gwøg ki gwøngdøj, kɑ døøg-ɑ be gwøg ki orøg kɑ othøø, thuw-ɑ orøge. Keløg ngɑnrɑj ówïyø ki orøg, kɑ døøg-ɑ be gwøg ki gïgdøj, wëye ɑ́yiele. Orøge ɑ́yode, ɑwiye gøn, bene ɑ koo thøwe, de ónëënø ceth. De wun, wu tyëng Isrɑil wu okööbø i Jwøng-ɑ Ácwɑ̈ɑ̈j pɑ gøggi dyër. Yɑn ɑ pɑ gøggi dyër, wɑlɑ̀ wun ɑ pɑ gøggi dyër? “Anɑn, yɑ Wïlɑ̈bø, Jwøng-ɑ Ácwɑ̈ɑ̈j, wu cɑyɑ’ cɑyø, wu tyëng Isrɑil. De yewi wun, kɑ orøg wiy wun; o wu cög wu pɑ thøw. Wiyu orøng-ɑ ɑ́gøggi yi wun bëne, kɑ ri wun göggi wun ki pëëth mø nyɑ̈n, wude ɑ dwɑddu thøø, wun ɑ tyëng Isrɑil? Pyëwɑ pɑ med ki thøwi dhɑnhø. Wiy wun orøg, o wu nëën wun.” Møg-ɑ kwøb yi Wïlɑ̈bø Jwøng-ɑ Ácwɑ̈ɑ̈j ɑgɑk. Yɑ ɑ́köbbi yi Jwøng-ɑ Ácwɑ̈ɑ̈j i wörɑ wör møg, yɑ ywøg-ɑ nyiirɑ̈dhhi Isrɑil ɑ́ryew. Meyí ɑ́bëëd ɑ́ mɑɑdh ngur me ni ngø! Nyige ɑ́pidhe kì kelli ngurrì. Ákyel ɑ́pidhe kɑ gø pwönye ki dwɑr, kɑ odïdø ki cɑm ki ji. keny-ɑ ɑ́lïngi pere yi pödhh, kɑ gø kunyi gen ki bur. Apeej ge gøn Rïp ki odöbb. Kɑ opïdø yi yïd geki ngɑ̈ɑ̈dhø. Codhe ɑpwönye megø kì kelli nyige, kɑ ogöögø ɑ́ ngur me rɑj. keny-ɑ ɑ́dønge nyi cyɑ̈dhi kɑ ngurrì møøgø. Adïde ki dwɑr, kí cɑm ki ji thyew. Adhure ud piny kɑ kɑ̈dd rënye Jii pinyɑni nyi ceg-ɑ bwøgø kenyi ngɑ̈ɑ̈re. Acugi pödhh bënn be nyɑɑg ki gøn, ji ɑ́bï kì yij piny bëne. Aceg ge gøn ki ɑ́kɑ̈lli, kɑ gø mɑg gen. Akïdhi ge gøn yij ød me bɑ win, kɑ gø muuj gen rɑ̈ɑ̈dh Bɑbïlöniyɑ̀. Ámïdhi e ceg kɑ korø, o ngɑ̈re cöge e pɑ lïngi këti, kì wɑ̈thi kïtti Isrɑil. Meyí ɑ́bëëd e nɑ oløg men-ɑ ópiidh tøg nɑm Yïthhe geki nywøle ɑ́bëëd ge ngenyø mɑ́ pï ɑ́bëëd ge gïïr. Bɑ̈dde ɑ́bëëd ge teeg, ge ócuggø gwøgø gɑ loodh rɑ̈dh. Oløngɑni ɑ́bɑ̈ri kɑ wɑ̈dh-ɑ yij pøølø, kɑ ngenyi yïthhe geki bɑ̈re lidh yi ji bënn. De ɑ́puth ki rɑ̈ji pëëth, kɑ leeng piny. Nywøle ɑ́thwøw yi yømi wɑɑng cyɑ̈ɑ̈ng mwøl Bɑ̈dde ɑ́tørri, kɑ ge othwøwø, kɑ ge rɑ̈b. Ópiidh-ɑ yij ryɑng ɑnɑn, yij piny-ɑ thwøwø, ɑ bong pï. Bɑ̈dde ɑ́gɑ̈mmi ki mɑc, kɑ yïthhe geki nywøle órɑ̈bø. Bɑ̈dde pɑ cigi tëngø, ge pɑ cuggi gwøgø gɑ loodh rɑ̈dh këti. Bene wöri ywøøg yij èn, nyi ceg kɑ wörø kɑ nyi cigi wörø. Kì pyɑ̈ri cyɑ̈nggi bïïj dwɑ̈tt, kì bïryeew runni wøn kì yïnø, ɑ ɑ́bëën kwï pëjji Isrɑil be pyëji yɑn ki gïn-ɑ dwɑddi yi Jwøng-ɑ Ácwɑ̈ɑ̈j, kɑ ge pëgg-ɑ piny kì bølɑ. Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, köbbí pëjji Isrɑil kinni Wïlɑ̈bø Jwøng-ɑ Ácwɑ̈ɑ̈j okööbø kinni: wu ɑ́bï-ɑ be pyëji yɑn? Yɑ Jwøng-ɑ Nëënø, wu pɑ wëggɑ pyëji yɑn kipe gïïpiny. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb. “Wɑ̈d dhɑnhø, ge ócuggø cɑyø yi yïn? Cɑy gen. Nyudhí gen rɑjj-ɑ ɑ́gwøg yi kweyyi gen. Köbbí gen kinni yɑ Jwøng-ɑ Ácwɑ̈ɑ̈j, Jwøøg wun, yɑ okööbø kinni, keny-ɑ ɑ́myegɑ Isrɑil, yɑ ɑ́köngi kipere. Kɑ riɑ nyudhɑ gen kì Rïp, kɑ ge köbbɑ kinni bene yɑn Jwøng-ɑ Ácwɑ̈ɑ̈j, Jwøøg gen. Bɑ bøli kenyɑni, ɑ ɑ́köngɑ kinni ge ókɑ̈ɑ̈lɑ wɑ̈g kì Rïp, o ge kïdhɑ yij piny-ɑ ɑ́myegɑ kiper gen; piny-ɑ yij mulli yi cɑg geki møøw kïc, piny-ɑ pëddi døøjø kì kelli piny bënn. Aköbbɑ gen kinni weddi gen ngïjji jwögg-ɑ pɑth, kɑ ri gen ko bwöl gen ki gïn, mɑ́ bene yɑn Jwøng-ɑ Ácwɑ̈ɑ̈j, Jwøøg gen. De muddi gen ɑ́tëngi kɑ kwøbbɑ bɑny yi gen. Ngïjji gen nuti weddi gen, o jwöggi Rïp nuti bɑɑny gen. Yɑ ɑ́dwɑdd-ɑ cɑyi gen ki rɑ̈ji pyëwɑ kì Rïp. De ge nuti cɑɑy yɑn kipe nyingɑ ócödh kì yï tyëng-ɑ buti gïn bëëd yi gen. Anyudhɑ riɑ tyëngɑni keny-ɑ ɑ́kɑ̈ɑ̈lɑ gen wɑ̈g kì Rïp. “Codhe, ɑpëëjɑ gen wɑ̈g kì Rïp, kɑ ge kïdhɑ yij pɑ̈l. Aköbbɑ gen kwöngɑ kɑ ciggɑ pwönyɑ gen, gen ɑ cigg-ɑ nyi thödhi ngɑn-ɑ nyi mïdhi gen ki nënnì. Amëggɑ gen Sɑbɑth ɑ́ ngïji kì kɑɑm wøn, men nyi pɑ̈ddi gen kinni, bene yɑ Jwøng-ɑ Ácwɑ̈ɑ̈j, o bɑ yɑn ɑ kwër gen. De tyëng Isrɑil muddi gen ɑ́tëngi ki yɑn kì yij ryɑng, ciggɑ ɑ́pyem gen, kɑ ge óbɑ̈nyø ki mïdhi kwöngɑ, eni kwöng-ɑ nyi thödhi ngɑn-ɑ mïdhii ki nënnì. Sɑbɑth ɑ́bwöl yi gen. Akööbɑ kinni rɑ̈ji pyëwɑ nyudhɑ’ gen, o ge nɑ̈gɑ kì yij ryɑng. De ge ɑ́wiy yi yɑn kipe nyingɑ ócödh kì kelli pödhh-ɑ ɑ́lidh gen, keny-ɑ ɑ́kɑ̈ɑ̈lɑ gen wɑ̈g kì Rïp. Codhe, ɑköngɑ kì yij ryɑng kinni ge pɑ kïdhɑ piny-ɑ ɑ́mëggɑ gen; piny-ɑ yije mulli yi cɑg geki møøw kïc, piny-ɑ pëddi døøjø kì kelli pìny bënn, mɑ́ ge ɑ́bɑ̈nyi mïdhi ciggɑ, kɑ Sɑbɑth bwöl yi gen, mɑ́ pëthi gen ɑ́kedhi bɑng ngïjji jwöggi gen. “De pyëwɑ ɑ́lɑ̈ɑ̈m ki gen, kɑ ge ocögø ge pɑ nɑ̈g yi yɑn kì yij ryɑng. Aköbbɑ nyigi gen kinni: wu ko cyɑ̈dhi kì bɑng kwööng kweyyi wun, kɑ ciggi gen ko mïdhi wun, kɑ ri wun ko bwöl wun ki ngïjji jwöggi gen. Bene yɑ Jwøng-ɑ Ácwɑ̈ɑ̈j, Jwøøg wun, nyi gwøg wun kwöngɑ kɑ ciggɑ mïdhi wun. Mïdhu Sɑbɑth ɑ́ cyɑ̈ɑ̈ng kwër, o bëëde ɑ́ ngïji kì kɑɑmee, o nyi pɑ̈dde wun kinni, bene yɑ Jwøng-ɑ Ácwɑ̈ɑ̈j, Jwøøg wun. “De yɑ ɑ́bwöl yi rïnyɑni thyew. Ge ɑ́bɑ̈nyi mïdhi ciggɑ, gen ɑ cigg-ɑ nyi thödhi ngɑn-ɑ mïdhi gen ki nënnì. Sɑbɑth ɑ́bwöl gen. Akööbɑ kinni, rɑ̈ji pyëwɑ nyudhɑ’ gen, o ge di nɑ̈gɑ kì yij ryɑng. De ge ɑ́wiy yi yɑn kipe nyingɑ ócödh kì kelli pödhh-ɑ ɑ́lidh gen, keny-ɑ ɑ́kɑ̈ɑ̈lɑ gen wɑ̈g kì Rïp. Aköngɑ kì yij ryɑng kinni ge ókedhhɑ kì kömi piny bëne, mɑ́ ge ɑ́bɑ̈nyi mïdhi kwöngɑ, o ciggɑ ɑ́pyem yi gen. Kɑ Sɑbɑth bwöl gen, kɑ ngïjji jwögg-ɑ pɑth mɑlli gen ni kweyyi gen. “Codhe, ɑthödhɑ gen ki kwöng me pɑ døøj, kí cigg mø pɑ thödhi ngɑn-ɑ mïdhi gen ki nënnì. Awëggɑ gen ywëdhi ri gen ki gëdhhi gen, kɑ ge wëggɑ rɑ̈bi kɑyyi gen kɑyy-ɑ cwøw gɑ gëdhhì. Menɑni bɑ cɑ́yi gen kipe kinni o yod yi gen kinni yɑ bɑ Jwøng-ɑ Ácwɑ̈ɑ̈j. “Anɑn wɑ̈d dhɑnhø, köbbí tyëng Isrɑil kinni Wïlɑ̈bø Jwøng-ɑ Ácwɑ̈ɑ̈j okööbø kinni, men bɑ yöö megø men-ɑ ɑ́bwööl yɑn yi kweyyi wun, kɑ yɑ wiy gen piny ni ngɑn wiy jɑlgøle piny. Ge ɑ́kɑ̈ɑ̈lɑ yij piny-ɑ ɑ́kwøbɑ kinni ómëggɑ gen. De keny-ɑ ɑ́lidh gen kïttì geki yenh-ɑ mɑr, ge ɑ́ngɑ̈ɑ̈d ki gëdhhì kì thɑ̈thi gen bënn. Pyëwɑ ɑ́wëggi gen rënyø ki gëdhh-ɑ ɑ́rɑ̈b yi gen e yømi gen med geki kunyi møgi oløg. Apyëjɑ gen kinni; Á wɑ̈thi ótøng ɑ́, ɑ nyi kedhi yi wun? Codhe, ɑcwølli gen gɑ ótøng, këër bøli kenyɑni. Anɑn köbbí tyëng Isrɑil kinni yɑ Wïlɑ̈bø Jwøng-ɑ Ácwɑ̈ɑ̈j yɑ okööbø kinni, ri wun ɑ́bwöl wun ni kweyyi wun, kɑ wu reng-ɑ bɑng ngïjji jwöggi gen. Kɑ wu omuujø ki gëdhhì, kɑ ri wun ywëdh wun ki rɑ̈bbi nyigi wun ngïjjɑni gɑ gëdhhì. O wu nudd wu bï-ɑ be pyëji gïn-ɑ dwɑddi yi yɑn! Yɑn ɑ nëënø, yɑ Wïlɑ̈bø yɑ Jwøng-ɑ Ácwɑ̈ɑ̈j, yɑ pɑ yïëy ki pyëjø yi wun ki gïïpiny. Rumm-ɑ rømmi yi wun kinni wu ópɑ̈ɑ̈r ki pödhh-ɑ kyeelø, o wu nɑ jurri kömi piny, ɑ mɑlli yenh geki kïttì. De møgɑni koo cwöb. “Yɑ Wïlɑ̈bø Jwøng-ɑ Ácwɑ̈ɑ̈j, yɑ bene Jwøng-ɑ Nëënø. O yɑ köbb-ɑ wun kinni, wu jɑɑgɑ’ jɑɑgø ki rɑ̈ji pyëwɑ geki tegi cingɑ kí tegɑ bëne. Tegɑ geki rɑ̈ji pyëwɑ ónyudhɑ wun, keny-ɑ ódwöögɑ wun kì yethi pödhh-ɑ ɑ́tɑɑy wun bënn. Wu ókɑ̈ɑ̈lɑ yij “Ryɑɑng pödhh” o wu cɑyɑ kì kunɑni wɑ nenn-ɑ nyingee ceth. Wu cɑyɑ’ cɑyø ɑnɑn, ni kɑ ɑ́cɑyɑ kweyyi wun kì yij Ryɑɑng Sinɑy.” Møg-ɑ kwøb yi Wïlɑ̈bø Jwøng-ɑ Ácwɑ̈ɑ̈j ɑgɑk. “Wu ókwøllɑ ki lodh, kɑ wu wëggɑ lïngi ciggɑ. Tyëngpëëmø geki tyëngorøg ókɑ̈ɑ̈lɑ wɑ̈g kì kelli wun. Ge ókɑ̈ɑ̈lɑ wɑ̈g kì yij piny-ɑ yije bëëd yi gen ɑnɑn, de ge koo wëggɑ døøg piny Isrɑil, codhe o yod yi gen kinni bene yɑn Jwøng-ɑ Ácwɑ̈ɑ̈j.” Wïlɑ̈bø Jwøng-ɑ Ácwɑ̈ɑ̈j okööbø kinni, “Wun, wu tyëng Isrɑil, kedhi ngɑn be mɑlli ngïjji jwögge! De yɑ köbb-ɑ wun kinni, keny-ɑ órum møgɑni, ciggɑ bɑ møg-ɑ ómïdhi yi wun ceth, o nyingɑ kwërø koo ywëdh yi wun ki gëdhh-ɑ nyi mëggu ngïjji jwöggi wun. Kì yij pödhø kì kunɑni, kì kïti kwërɑ, kïti Isrɑil kïn-ɑ bɑ̈r, yɑ ómɑl yi tyëng Isrɑil bënn, pyëwɑ ómïni ki gen, kɑ yɑ ócwöddø ki gëdhhì, kɑ gëdhhɑni geki gïgdøj møg-ɑ nyi muuj yi wun, kí jɑmmi kwër yïëyɑ. Keny-ɑ órumɑ ki dwöögi wun kì pödhh-ɑ ɑ́kedhhɑ wun, kɑ wu cøngɑ kej ɑ́kyel, gëdhh-ɑ nyi rɑ̈b yi wun óyïëyɑ, o ólidh yi pödhh-ɑ kyeelø kinni yɑ bɑ kwërø. Óyod yi wun kinni yɑn ɑ bɑ Jwøng-ɑ Ácwɑ̈ɑ̈j, keny-ɑ ókɑ̈ɑ̈lɑ wun piny Isrɑil; piny-ɑ ɑ́köngɑ kweyyi wun kinni ómëggɑ gen. Codhe, o gïgrijjø møg-ɑ ɑ́gøggi yi wun pɑr yi wun, gen ɑ gïg-ɑ ɑ́ywëdh wun ri wun. Pëthi wun órënyi ki ri wun, kì bɑng rɑj møg-ɑ ɑ́gwøg yi wun. Keny-ɑ ógöggɑ wun ki gïïpiny kipe nyingɑ, de pɑth kipe yëth-ɑ rijjø kí gïgrijjø mø wun, o yod yi wun, wun ɑ tyëng Isrɑil kinni yɑ bɑ Jwøng-ɑ Ácwɑ̈ɑ̈j.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, lïïdh wɑɑng wurlwɑl kɑ yï tööng ki rɑjj-ɑ óbï köme geki thïm-ɑ wɑɑng wurlwɑl. Köbbí thïm-ɑ wɑɑng wurlwɑl kinni lïnge kwøbb-ɑ kwøb yi Wïlɑ̈bø Jwøng-ɑ Ácwɑ̈ɑ̈j kinni, yɑ kɑ̈n-ɑ kömí ki mɑc, yenh-ɑ yijí bënn rɑ̈bɑ’ rɑ̈bø; gen ɑ yenh-ɑ mɑr geki yenh-ɑ wøwø bënn. Bong gïn cuggi nɑ̈gii. Óköni kì wɑɑng wurlwɑl gïti wɑɑng wuudø, o lëdhe óyod yi dhɑnhø bëne. O yod yi ji bënn kinni yɑn, yɑ Jwøng-ɑ Ácwɑ̈ɑ̈j ɑ ɑ́kɑ̈ni ki mɑnyɑni, o bong gïn cuggi nɑ̈gii.” De yɑ ɑ́kyëëd kinni, “Wuö Jwøk yɑ ko mëggi gwøg kinøw! Ji ceg-ɑ gøny i yɑ nyii ceg-ɑ gɑ́j.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, lïïdh Yerusɑlem kɑ yï tööng ki rɑjj-ɑ óbï köme geki kɑ̈jji kwëre, kí piny Isrɑil. Köbbí piny Isrɑil kinni Jwøng-ɑ Ácwɑ̈ɑ̈j okööbø kinni: Yɑ bɑ ngɑn mɑ̈n ki yïn. Pilø wöödhɑ’ wɑ̈g kì yij bøje, o wu nɑ̈gɑ bënn, tyëngdøj geki tyëngrijjø bënn. Ji bënn nɑ̈gɑ’ nɑ̈gø ki pilɑ, cɑg kì wɑɑng wurlwɑl gïti wɑɑng wuudø. O yod yi ji bënn kinni yɑn, yɑ Jwøng-ɑ Ácwɑ̈ɑ̈j, pilɑ ɑ́wöödhɑ wɑ̈g, o pɑ dwøøgɑ yij bøj. “Wɑ̈d dhɑnhø, gööny ki rɑ̈ɑ̈m pyëwí. Gööny ki rɑ̈ɑ̈m pyëwí kì bøli ji bënn. Keløg yï ópyëj yi gen kinni, ‘Yïde ɑ gööny?’ Köbbí gen kinni yɑ gönyø kɑ per wöön-ɑ óbï; keny-ɑ óbëëne pëthi gen ópɑ̈ng yi wɑ̈ɑ̈rø, Cinggi gen ónyönhi kɑ pëthi gen ónyönhø thyew, cøngi gen ókïïr. Bøli kenyɑni ɑ́bï, ɑ́wɑ̈nhi.” Wïlɑ̈bø Jwøng-ɑ Ácwɑ̈ɑ̈j ɑ́rum ki kwøb. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø tööng; köbbí ji kinni Jwøng-ɑ Ácwɑ̈ɑ̈j okööbø kinni: Pilø, pilø opɑgø, ocodhø. Opɑgø ɑ́ men nɑ̈ɑ̈g, ocodhø o gwele ni mɑl. Bong medi pëëth, mɑ́ jiɑ ɑ́dhɑ̈li kyëddø, o cɑ́y bong per gen kì yï gen. Pilø ceg kɑ codhø ɑ́ men nɑ̈ɑ̈g. Ápɑg kɑ codh ɑ́ men cïb cingi nɑ̈ɑ̈g. Ywöngí kɑ yï kïïw, wɑ̈d dhɑnhø, pilɑni bɑ men nɑ̈ɑ̈g jiɑ geki pëjji Isrɑil bënn. Ge ceg kɑ nɑ̈gø geki ji-ɑ kyeelø bënn. Bong gïn ngɑ̈dh yi wun këti! Yɑ rɑng-ɑ jiɑ, o keløg ge pɑ yewi, rɑjjɑni bënn pɑ̈dh-ɑ kömi gen. “Anɑn wɑ̈d dhɑnhø, tööng. Teng cinggí, o pilø nyi cige göjjø. Bɑ pilø me nɑ̈gø, o ceg kɑ böggø. Jiɑ ɑ́göjje böggø kɑ ge okïïrø. Kɑɑl gen göjjɑ’ böggø yi pilø, me rɑ̈ɑ̈dø ni mɑl, o bɑ mi nɑ̈g. Kïbí kì tuung cɑɑm geki tuung kyëj, yïn ɑ pil-ɑ bedh! Kïb kì wɑ̈thi tùng-ɑ løg rií bënn. Cinggɑ ópɑmɑ thyew, o pyëwɑ kwöje. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, gwëëj ki yëëth ɑ́ryew møg yethi gen ókɑ̈ɑ̈l yi rɑ̈ɑ̈dh Bɑbïlöniyɑ̀ e kɑ̈ll-ɑ pile. Yëthɑni ryeet cɑ̈g-ɑ́ɑ̀ kej ɑ́kyel. Kɑ yï göög ki ngïji kì tøg yuu-ɑ kedhi kɑɑl. Yöö ɑ́kyel kedh-ɑ Rɑbɑ̀ kɑɑl tyëng Amön, o men-ɑ kyeelø kedhe Yeudiyɑ̀, e kedh-ɑ Yerusɑlem, kɑɑl dörø. Rɑ̈ɑ̈dh Bɑbïlöniyɑ̀ ócungø kì ɑ́kɑrri yëëth, e dwɑdd-ɑ yodi yuu-ɑ kedhe, ceg-ɑ tïm ki nywøli weth, o ceg-ɑ pyëj ki ngïjji jwögge, ceg-ɑ rɑng kì ri ócuny gënh-ɑ ɑ́ngɑle. Nywøli weth møg-ɑ cingi kyëje ɑ́nyudh-ɑ kuni Yerusɑlem, ge köbb-ɑ gøn kinni kedhe Yerusɑlem be liny. Kɑ linye kiwe, o kunye ki kɑ̈jj-ɑ nyi pɑ̈ni, o ge cïbi gen piny ki gënggi ngyënyø møg gëng gen ri gen, kì bøli thïggi dörø. Tyëng Yerusɑlem koo yïëy ki møgɑni, mɑ́ ge ɑ́ceg-ɑ lwöm-ɑ ɑ́lwøb yi gen ki pɑ̈dø. De bɑ kipe pɑ̈ddi gen ki orøøg gen, kí kinni ge ómɑg. Bene møg-ɑ kwøb yi yɑn, yɑ Wïlɑ̈bø Jwøng-ɑ Ácwɑ̈ɑ̈j ek: Orøøg wun ɑ́nyodh. Bɑ̈jji wun ngɑ̈nyi yi ji bënn. Orøøg wun ónënnø kì ri gwøøg wun. Wu ɑ́rum ki cɑyø, o wu cïbɑ’ cinggi tyëng-ɑ mɑ̈n ki wun. “Yïn, yï jɑngi Isrɑil, jɑng-ɑ cödhø, ɑ rɑj, cyɑ̈ng-ɑ cɑɑy yïn obëënø. Yɑ Wïlɑ̈bø Jwøng-ɑ Ácwɑ̈ɑ̈j, yɑ ɑ́rum ki kwøb. Kɑ̈ɑ̈l wëni wïjí wɑ̈g geki yɑ̈ɑ̈r wïjí. Jɑmmì koo ni kɑ ɑ́bëëd gen. Tïng tyëng-ɑ cyɑ̈n mɑl! Kɑ tyëng-ɑ jyɑ̈gø dwöög cyɑ̈n! Rɑj, rɑj! Kɑɑlɑni rënyɑ’ rënyø. De gïgɑni ógwøg-ɑ keny-ɑ óbëën ngɑn-ɑ ɑ́yienyɑ kipe cɑyi kɑɑlɑni. Codhe, o gø mëggɑ en. “Yïn, wɑ̈d dhɑnhø, töng møg-ɑ kømmɑ, yɑ Wïlɑ̈bø Jwøng-ɑ Ácwɑ̈ɑ̈j, töng møg-ɑ köbbɑ tyëng Amön, tyëng-ɑ gwɑddi Isrɑil. Köbbí gen kinni, ‘Pilø, pilø rumø ki kɑ̈ɑ̈l wɑ̈g; ɑ́ men nɑ̈ɑ̈g; ócodhø ɑ́ men nɑ̈ɑ̈g, o gwelle ni mɑl. Gïg-ɑ nenni yi wun pɑth ki dyër, o gïg-ɑ rømmi yi wun bɑ pyed. Wu rijjø, o cyɑ̈ɑ̈ng cɑyi wun obëënø. Pilø pɑ̈dh-ɑ muddi wun. “ ‘Cïb pilø piny! Yï cɑyɑ’ cɑyø kì keny-ɑ ɑ́cwɑ̈ɑ̈j yïn, kì yij piny-ɑ ɑ́nywøøl yïn. Rɑ̈ji pyëwɑ óngøøgɑ kömí e lyel nɑ mɑc. Yï ócïbɑ cinggi jøg mø yethi gen wöny, mø pëddi nɑ̈g. Remí ómulli kì yij pödhi wun. Yï órɑ̈b ki mɑc, o bong ngɑn-ɑ ópɑr yïn këti.’ ” Jwøng-ɑ Ácwɑ̈ɑ̈j ɑ́rum ki kwøb. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, rií gwiir yïn kipe cɑyi kɑɑl remø men? Nyudhí gïgrijjø bënn møg-ɑ ɑ́gwøge. Köbbí kinni Wïlɑ̈bø Jwøng-ɑ Ácwɑ̈ɑ̈j okööbø kinni: Mɑ́ ji mø gïïr ɑ́nɑ̈g yi yïn, kɑ rií bwööl kɑ ɑ́mɑlli ngïjji jwögg-ɑ pɑth, bøli kejí ɑ́bï. Yï ɑ́bɑ̈jji kɑ ɑ́nɑ̈ɑ̈g ki ji, kɑ rií bwööl kɑ ɑ́mɑlli ngïjji jwögg-ɑ pɑth, kiper kinøw cyɑ̈ngí ɑ́cyɑ̈ngi, bøli kejí ɑ́wɑ̈nhi! Bene ɑ wëggɑ yïn gɑggø yi pödhh-ɑ kyeelø geki kömi piny bëne. Yï ceg kɑ gɑggø yi pödhh-ɑ cyɑ̈gi geki pödhh-ɑ lɑ̈wi, kì bɑng kɑ̀ pɑ mïdhí cigg kí kɑ ɑ́ywëëdh rií. Pëjji Isrɑil bënn ngɑ̈dh-ɑ tegi gen, o ge ceg-ɑ nɑ̈g ki ji. Wëëg tyëng kɑɑlɑni geki mëëg gen pɑ wør yi gen. Wëdhh nyi ceg kɑ rujø yi gen, kɑ thwömm geki kïjj nyingi gïn guud gen. Kɑ̈jji kwër pɑ wør yi gen, o cyɑ̈ɑ̈ng Sɑbɑth pɑ nyi mïdhi yi gen. Kwï wun ji møøgø nyi wɑ̈dhi ge’ gønyø ki pyed kipe kinni o ge nɑ̈g. Møøgø nyii cyɑ̈mø ki gëdhh-ɑ óngɑ̈lli ngïjji jwögg-ɑ pɑth, o møøgø gøgg-ɑ rɑjj-ɑ kønø kì pëthi gen. Møøgø niin-ɑ mɑ̈nni wëëg gen. Møøgø mød-ɑ ngɑndhɑjø e ree dɑ kwër. Megø kedh-ɑ ri cï wɑɑd gen, megø niin-ɑ cï wɑ̈de, o megø niin-ɑ nyiwɑ̈n nyɑɑr wïye. Møøgø nɑ̈g ji ge kïr kɑ ngyëny, møøgø ngyënyyi gen nyi col ge nywølø yi wɑddi gen tyëng Isrɑil, kipe kinni o ge kɑ̈ri gen ki yëth-ɑ rijjø ni møgɑni. Yɑ ɑ́wïl kì wɑ̈thi gen.” Wïlɑ̈bø Jwøng-ɑ Ácwɑ̈ɑ̈j ɑ́rum ki kwøb. “Cingɑ gøøjɑ’ kömi kɑ̈m-ɑ kɑ̈ɑ̈b yi yïn, geki nɑ̈ng-ɑ nɑ̈ɑ̈g yi wun ki ji. Wu orumø kinni wu óyïddi ki tegi pëëth, me tïng wun cinggi wun keny-ɑ ógöggɑ wun ki gïn ni menɑni? Yɑ Jwøng-ɑ Ácwɑ̈ɑ̈j, yɑ ɑ́rum ki kwøb, o dhøgɑ pɑ nyi wil yi yɑn. Jií kedhhɑ’ kedhhø kì yethi pödhh bënn, kipe kinni o yɑ cuungɑ gïgrijjø møg-ɑ gøggi yi wun. Codhe, o wu cög wun, wu pɑ wør yi pödhh-ɑ kyeelø, de óyod yi wun kinni yɑn ɑ bɑ Jwøng-ɑ Ácwɑ̈ɑ̈j.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, tyëng Isrɑil ɑ́göög ge bong kɑ̈jji gen kì yïɑ. Ge ɑ́göög ni ngyëny-ɑ cyedhhe nudd ge ying-ɑ ree, ni dilɑl, kí dhïngkì, kí dødø geki ɑ́yömø; ge nɑ cyedhh-ɑ nyi döngi piny kì ri ɑ́tegø kenyi rume ki lenyø. Anɑn yɑn, yɑ Wïlɑ̈bø Jwøng-ɑ Ácwɑ̈ɑ̈j, ɑ köbbi gen kinni ge ɑ́göög kɑ̈jji gen bogïn kì yïɑ; de ge cøngɑ’ Yerusɑlem. Ni kenyi kïdhi dilɑl, kí dhïngkì, kí dødø geki ɑ́yömø yij purun, o ge leny yi yɑn ki rɑ̈ji pyëwɑ. Ge cøngɑ’ Yerusɑlem o kömi gen kɑ̈n-ɑ ki mɑc ki rɑ̈ji pyëwɑ, o ge leny gen. Ge óleny kì Yerusɑlem ni kenyi leeny ɑ́tegø kì yij purun, codhe o yod yi gen kinni bene yɑ Jwøng-ɑ Ácwɑ̈ɑ̈j ɑ ɑ́ngøøg linyɑ kömi gen.” Aköbbi yɑn yi Jwøng-ɑ Ácwɑ̈ɑ̈j këti kinni, “Wɑ̈d dhɑnhø, köbbí tyëng Isrɑil kinni piny gen pɑth ki ɑkwër, kì bɑng menɑni ge cɑyɑ’ cɑyø ki rɑ̈ji pyëwɑ. Pëjji Isrɑil ngɑ̈rri nɑ ngurrì kì kömi lɑ̈yy-ɑ ɑ́nɑ̈g yi gen. Ge ceg-ɑ nɑ̈g ki ji, o jɑmmi ji geki ngyëny nyi kwɑny yi gen, ji mø gïïr ɑ́göög ki thwömm kì bɑng gen. Ciggɑ ɑ́pyem yi ókwër, o gïg-ɑ bɑ ɑkwër pɑ wør yi gen. Ge pɑ pwönyi kì ri gïg-ɑ bɑ ɑkwër geki gïg-ɑ ywëdhø. Sɑbɑth miɑ bong pere kì yï gen. Bene ɑ pɑ wøør yɑn yi tyëng Isrɑil. Jɑggi Isrɑil nɑ óthönhì, kenyi kɑggi gen lɑ̈yy-ɑ ɑ́nɑ̈g yi gen. Ge ceg-ɑ nɑ̈g kipe kinni o ge kɑ̈ri gen. Jøtöng, orøøg tyëng Isrɑil ɑ́kum yi gen ni kenyi gøøj dörø ki jïr. Ge ceg-ɑ pyed, ge okööbø kinni ge töng-ɑ møg-ɑ ɑ́kwøb yi Wïlɑ̈bø Jwøng-ɑ Ácwɑ̈ɑ̈j, de ge nuti köbbø yi yɑn. Tyëngkɑ̈rì ceg-ɑ kɑ̈b. Tyëng-ɑ nyingi gen cɑn geki tyëngpɑth ɑ́ruj yi gen. Yɑ ɑ́yɑ̈ɑ̈b ki ngɑn di ger dörø, o di kore kɑ̈jj-ɑ pɑ̈ɑ̈dhø, o di nyïɑ̈gge kipe piny keny-ɑ órënyi pyëwɑ, de bong dhɑnhø ɑ́kyel mɑ ɑ́yodɑ. Kɑ ɑ́rum bëëde kinøw, linyɑ óngøøgɑ kömi gen ni mɑc. O ge nɑ̈gɑ kipe rɑjj-ɑ ɑ́gwøg yi gen.” Wïlɑ̈bø Jwøng-ɑ Ácwɑ̈ɑ̈j ɑ́rum ki kwøb. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, ɑ́dɑ nyiimëëg ɑ́ryew. Ge ɑ́bëëd ge yɑb-ɑ cwøw kì Rïp, ge bɑ wojur, ri gen ɑ́rënyi gen, kɑ ge ogöögø ki tyëng nyi niin ki köögi. Nyɑndwøng cwøl ɑ́ Ölɑ̀, o nyɑnthinh cwøl ɑ́ Ölibɑ̀ Ge ɑ́nywømɑ ryeet, kɑ ge onywølø ki nywøl. Ölɑ̀ ɑ́cög ɑ́ ngɑn nyi niin ki köögi kër-ɑ ɑ́nywømɑ en, pyëwe nyii kønø cɑrø ki cwøw; jøgi Acuur. Ge ɑ́bëëd gɑ jøliny, ge rug-ɑ ógudh mø bɑ ówɑw mø pɑ̈r, ge bɑ pëjji liny, ge myër bënn, ge bɑ wøbb, o ge bɑ jøkyënyì. Ábëëd ɑ́ ngɑn nyi niin ki köögi yi pëjji liny Acuur, kɑ thɑb yi okøn pyëwe, ɑwëgge ree kedhi be mɑlli ngïjji jwöggi tyëng Acuur. Yɑbe ki cwøw ni men-ɑ ɑ́gøgge kì Rïp nuti wiy en, mɑ́ e ɑ́bëëd ɑ́ ngɑn nyi niin ki köögi ɑ́ jùr, ɑrënyi jurø mee, mɑ́ e ɑ́niin yi cwøw e thiinh. Codhe, ɑmëggɑ en pëjji liny Acuur møg-ɑ ɑ́mɑɑre cɑrø. Codhe, ɑpyëëd gen ógudhe wɑ̈g, kɑ odöngø e cyɑ̈dh-ɑ nøw, kɑ nyige kɑ̈l gen, kɑ nɑ̈g yi gen ki pilø. Agööge ɑ́ kwøbbe ɑ nyi wɑjji yi tyëng-ɑ mɑ̈nn, gen ɑ kwøbb-ɑ ɑ́cɑɑyii. “Gïgɑni bënn ɑ́lidh yi Ölibɑ̀ nyimen, de ɑ́yöd e ceg-ɑ pëddø ki yɑb ki cwøw. En thyew yïe ɑ́dɑ okøn pyëw me dwøng kipe pëjji liny Acuur, møg-ɑ rug ógudh-ɑ bɑ ówɑw, jøkyënyì, jøg-ɑ myër. Kɑ lidhɑ kinni yɑbe ki cwøw ɑ́pëddi; ge rijjø bënn, geki nyimen nyɑndwøng. Pyëwe ɑ́køni kipe gen keny-ɑ ɑ́lidhe gïn. Codhe, ɑöde yï gen ki ji kì Bɑbïl, piny Kildɑn. Abëën jø Bɑbïlöniyɑ̀, ɑniinii yi gen kɑ gø ywëdh gen, ɑlɑ̈mmi pyëwe ki gen kì cyɑ̈n. Kɑ ceg ki yodø yi ji bënn, kinni bɑ ngɑn nyi niin ki köögi. Codhe, ɑlɑ̈mmi pyëwɑ ki en, ni kɑ ɑ́lɑ̈mmi pyëwɑ ki nyimen. Áti pëddø gwøg ki ngɑn nyi niin ki köögi; ɑ́göög ni kɑ ɑ́bëëde ɑ́ ngɑn nyi niin ki köögi ki Rïp e nudd ɑ́ jùr. Pyëwe nyi ceg-ɑ okøn ki niin yi jøg-ɑ bɑ ɑ́mɑ̈jj, ni ɑderr geki kyënyì.” (Ölibɑ̀, yï ɑ́dwɑdd-ɑ yɑb ki cwøw ni kɑ ɑ́bëëd yïn ɑ́ jùr kì Rïp, ɑ nyi tuug yïn yi cwøw kɑ yï órënyø.) “Anɑn Ölibɑ̀, bene møg-ɑ köbbɑ yïn, yɑ Wïlɑ̈bø Jwøng-ɑ Ácwɑ̈ɑ̈j ek: Yï cwɑ̈ɑ̈gɑ’ cwɑ̈ɑ̈gø wuki cwøwí, cwøw-ɑ́ pyëwí ɑ́lɑ̈mmi yi gen, o yï tyeg yi gen. Jø Kildɑn geki jø Bɑbïlöniyɑ̀ bënn kɑ̈ɑ̈lɑ’ kɑ̈ɑ̈lø kì Peköd, kí Cöɑ̀, kí Köɑ̀, kí jøgi Acuur bënn. Jøg-ɑ myër møgɑni cøngɑ’ cøngø bënn. Nyiirɑ̈dhh kí pëjji liny, jøg-ɑ per gen teg, kí jøkyënyì. Ge ópɑ̈ɑ̈r kömí ge kɑ̈ɑ̈l-ɑ wɑɑng wuudø ki yɑ̈thi liny, kí yɑ̈thi kɑ̈ddø ki jɑmmi liny mø gïïr cɑrø. Yï gen dɑ ködd kí ɑcudh; yï ótyeg yi gen. Yï ówïyɑ gen, o yï cɑy yi gen ki ciggi gen. Mɑ́ pyëwɑ rɑɑj ki yïn, yï wïyɑ’ gen, o yï nyudhi gen ki liny. Órømmí óngøl yi gen geki yïthhí, kɑ nyigí tøy yi gen. Wɑ̈ddí geki nyigí ókwɑny yi gen, kɑ gï rɑ̈b gen ge onëënø. Ógudhí óyööd gen wɑ̈g kì rií, kɑ jɑmmi dhwɑ̈ngí kwɑny yi gen. Yï ómɑ̈ɑ̈nɑ yɑb ki cwøw geki okøn pyëw ki cwøw, møg-ɑ ɑ́gøggi yi yïn kì Rïp. Yï koo nenni ri ngïjji jwögg këti, wɑlɑ̀ yï koo rumø kì ri Rïp këti.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Yï ómëggɑ tyëng-ɑ mɑɑn yi yïn, ɑ pyëwí kømi lɑ̈mmø yi gen. Kipe kɑ̀ mɑɑn yïn yi gen, jɑmmí bënn møg-ɑ ɑ́gwøg yi yïn ki kwɑ̈gí ókɑ̈l yi gen; yï ówiy yi gen yï cyɑ̈dh-ɑ nøw, o orøgí nënne geki rɑjj-ɑ gøggí bënn. Kì bɑng okøn pyëwí ki cwøw, geki yɑbi cwøw, rií ɑ́tuug kɑ pödhh, kɑ rií ywëëdh ki ngïjji jwögg. Yï ɑ́kɑ̈l bɑng nyimyëw; bene ɑ cɑyɑ yïn ki cɑ́y-ɑ ɑ́cɑɑyɑ en.” Wïlɑ̈bø Jwøng-ɑ Ácwɑ̈ɑ̈j okööbø kinni, “Yï ómɑ̈ɑ̈dhø kì yij óthɑ̈ngi nyimyëw; óthɑ̈ngɑni dwøng o yije ludhø. Yï ógɑggi yi ji bënn; mɑ́ óthɑ̈ngɑni pɑ̈ng. Yï ónɑ̈g yi møgø geki kïïmø óthɑ̈ngɑni bɑ óthɑ̈ngi wɑ̈ɑ̈rø geki ryɑ̈g, eni óthɑ̈ngi nyimyëw Sɑmɑriyɑ̀. Ómɑdh yi yïn kɑ tyëg yi yïn kinni liiw kɑ ópɑ̈nne kwɑɑny, kɑ ge kɑggí ɑ́ngɑní. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Møg-ɑ kwøb yi Wïlɑ̈bø, Jwøng-ɑ Ácwɑ̈ɑ̈j ek: “Mɑ́ yɑ ɑ́wïl kì wïjí, kɑ ngɑ̈jí lugí yɑn, yï órɑngø kì bɑng okøn pyëwí ki cwøw geki yɑbí ki cwøw.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, Ölɑ̀ geki Ölibɑ̀ ócɑy yi yïn? Töng cɑ́yi gen kipe rɑjj-ɑ ɑ́gwøg yi gen. Mɑ́ ge ɑ́røngi ki cwøw, kɑ ge onɑ̈gø ki ji; ge ɑ́røngi kɑ ngïjji jwögg, o wɑ̈ddɑ, wɑ̈dd-ɑ ɑ́nywøl yi gen ɑ́nɑ̈g yi gen. Wɑ̈ddɑ ɑ́ngɑ̈lli gen ngïjji jwöggi gen. Ge nuti cög-ɑ møgɑni keti gen; de men-ɑ́ Kengɑ ɑ́bwöl yi gen, kɑ cigg-ɑ ɑ́muujɑ gɑ ciggi Sɑbɑth pyem gen! Cyɑ̈ng-ɑ ɑ́ngɑ̈lli nyigɑ ngïjji jwögg yi gen, ge ɑ́bï yij Kengɑ kɑ gø bwöl gen! “Cwøw nyii ödø yi gen ki ji møg cwööl gen kì kun lɑ̈wi. Keny-ɑ óbëën gen, o nyiimëëgɑni ryeet lwøg gen, o nyingi gen gid gen, o ge ruggi gen ki jɑmmi dhwɑ̈ng møg-ɑ per gen teg. O ge pëggi gen wïj pyën me myër, kí tɑrɑbedhɑ̀ me pɑ̈ng yi jɑmm-ɑ døøj kì bøli gen, kí bɑkur geki møøw dhetun møg-ɑ ɑ́mëggɑ gen. Cwɑggi tyëng-ɑ nyi wɑ̈dhi wøwø yøw ɑ́lïngi, ge bɑ ɑkuud jøg-ɑ ókɑ̈ɑ̈lø kì pɑ̈l. Kɑ cinggi nyiimëëgɑni budhi gen ki yëll, kɑ wɑ̈thi gen kïdhi gen ki bɑrukì mø myër. Aköbbɑ riɑ kinni, jøg ɑ́røngi kɑ̀ bëëd gen ki tyëng-ɑ nyi niin ki köögi. Ge nyi kedh-ɑ yï tyëng-ɑ nyi niin ki köögi møgɑni tyel mø gïïr; ge nyi kedh-ɑ yï Ölɑ̀ geki Ölibɑ̀, mɑ̈nn-ɑ rijjø. Ge ócɑy yi jøgtir kipe yɑb ki cwøw geki nɑ̈g ki ji.” Møg-ɑ kwøb yi Wïlɑ̈bø, Jwøng-ɑ Ácwɑ̈ɑ̈j ek: “Kömi gen ókönɑ ki yɑy, o ge bwøg gen, o jɑmmi gen kɑb. O ge bɑ̈lli, o kömi gen pɑ̈ɑ̈r ki pilø, o nyigi gen nɑ̈g, o uddi gen rɑ̈b. Yɑb ki cwøw cuungɑ’ cuungø kì yij pödhø, o bëëd e bong ngɑndhɑjø me yɑ̈bø ki cwøw ni gen. Wu cɑyɑ’ cɑyø kì bɑng bëënrɑj mi wun geki mɑlli ngïjji jwögg. Codhe, o yod yi wun kinni bene yɑn ɑ bɑ Wïlɑ̈bø, Jwøng-ɑ Ácwɑ̈ɑ̈j.” Kì pyɑ̈ri cyɑ̈ɑ̈ng pyɑ̈ri dwɑ̈tt, kì bïngween runni wøn kì yïnø, ɑ ɑ́köbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, gweed cyɑ̈nggi dwɑ̈y dicyɑ̈ɑ̈ng piny mɑ́ bene cyɑ̈ng-ɑ cɑ̈gi rɑ̈ɑ̈dh Bɑbïlöniyɑ̀ ki tyegi Yerusɑlem. Köbbí jiɑ, tyëngpëëmø gɑ́j-ɑ köbbɑ gen ek; yɑ Wïlɑ̈bø, Jwøng-ɑ Ácwɑ̈ɑ̈j kinni: Cïb dɑg wɑ̈thi tugø kɑ pɑ̈ɑ̈ng ki pï. Kïdhí yije ki rïng-ɑ døj, kwɑny bɑ̈dd geki rɑ̈mm kɑ pɑ̈ɑ̈ng ki cu-ɑ døj Kɑ̈bbí ki rïnggi dyëg-ɑ myër kɑ yugg röör thɑ dɑg. Wiy dɑg twɑge; thɑl cu geki rïngø.” Møg-ɑ kømmi yi Wïlɑ̈bø Jwøng-ɑ Ácwɑ̈ɑ̈j ek: “Kɑɑl nɑ̈g ree dɑ cyën! Nɑ dɑg me rënyø; me yije óyɑɑy rïngø; bong ɑ́kyel mɑ ɑ́döng. Ji ɑ́nɑ̈g kì kɑɑlɑni, de remø nuti dëëm-ɑ piny, o di kum yi ɑyejø, de ɑ́dëëm-ɑ kömi kït. Yɑn ɑ ɑ́wiy remø kì keny-ɑ pɑ cugge kɑnø, kipe kinni o pïïde ki coli gøølø.” Møg-ɑ kømmi yi Wïlɑ̈bø, Jwøng-ɑ Ácwɑ̈ɑ̈j ek: “Kɑɑl nɑ̈g ree dɑ cyën! Yɑn kiriɑ ɑ órööri piny ki yugg. Kɑ̈ní ki yugg mø gïïr! Kwɑdh mɑc! Thɑl rïngø, køny cwɑyø! Rɑ̈b cu! Anɑn cïb dɑng-ɑ bɑ ngyënyø dilɑl men-ɑ bong gïn ying yije kömi mɑɑc cug, kɑ wiy kwɑ̈rre. Codhe, o døøge ki dhïwø keny-ɑ óbëën nyɑllì wɑ̈g kì ree, cɑgg nyɑllɑni koo bï wɑ̈g bënn. Yerusɑlem, yï ɑ́bwöl yi bëënrɑj mií cɑgg ɑ́ kɑ ɑ́pɑ̈nyɑ riɑ ki gwøgi yïn yï dhïw, yï nudd yï ywëdhø ceth gïti keny-ɑ óyood tegi linyɑ. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb. Bøli keny-ɑ ógwøgɑ gïn-ɑ dwɑddɑ ɑ́wɑ̈nhi, orøgí pɑ wiy yi yɑn; yijɑ pɑ ywöngi kiperí, o pyëwɑ pɑ lɑ̈ɑ̈m ki yïn. Yï ócɑy kipe gïn-ɑ ɑ́gwøg yi yïn.” Wïlɑ̈bø Jwøng-ɑ Ácwɑ̈ɑ̈j, ɑ́rum ki kwøb. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, ngɑn-ɑ mɑɑr yi yïn ki mendwøng kɑ̈ɑ̈lɑ’ kɑ̈ɑ̈lø. Yï ko gööny, yï ko ywöngi, wɑlɑ̀ pï wɑngí ko dëëm. Gengí ko wëggí lïngø, yï ko cyɑ̈dhi e bong wɑr ki tyellí, wɑlɑ̀ e bong gïn kum yïn wïjí, o yï ko cyɑ̈ɑ̈m kì kej ywøg.” Kɑ teedø köbbɑ kì mwøl, kɑ cyëgɑ othøø kì böörø. Dhuki kì mwøl ɑgwøgɑ møg-ɑ ɑ́köbbi yɑn. Apyëëj yɑn yi ji kinni, “Á ngø ɑ gwøg yi yïn kinnï?” Alöggɑ kinni, “Wë yɑ ɑ́köbbe i köbbɑ wöödø men tyëng Isrɑil kinni: Wu thwøg kɑ per tegi Kengø. Wu nyi mɑɑr-ɑ nenne geki këëmii, de bɑ men bwöl yi Jwøng-ɑ Ácwɑ̈ɑ̈j. O wɑ̈ddi wun geki nyigi wun møg-ɑ ɑ́wiy wun kunɑni ge ónɑ̈g kì yij liny. Codhe, o wu ógwøg wun gïn-ɑ ɑ́gwøgɑ. Wɑ̈thi wun pɑ kum yi wun, o wu pɑ cyɑ̈mø kì kej ywøg. Wu koo cyɑ̈dhi tyelli wun bong wɑr, o wu koo kïïmø, o wu pɑ ywöngi. Wu óthuw orøøg wun, o wu ónguni ki ri wun. O yɑ ógöögɑ yɑn ɑ́ nyuudhi kiper wun; gïg-ɑ ɑ́gwøgɑ bënn ógwøg yi wun. Jwøng-ɑ Ácwɑ̈ɑ̈j okööbø kinni; óyod yi wun keny-ɑ ócwöb møgɑni, kinni en ɑ bɑ Wïlɑ̈bø, Jwøng-ɑ Ácwɑ̈ɑ̈j.” Akööb Jwøng-ɑ Ácwɑ̈ɑ̈j kinni, “Anɑn wɑ̈d dhɑnhø, Keng-ɑ́ pere ɑ́thwøg gen, ɑ mɑɑr yi gen ki nennø, kwɑnyɑ’ kwɑnyø kì yï gen. O wɑ̈ddi gen kí nyigi gen kwɑnyɑ’ kwɑnyø thyew. Kì cyɑ̈ng-ɑ ógwøgɑ møgɑni, ngɑn megø óbodh kɑ bï-ɑ be köbbi wun ki møgɑni. Kì dicyɑ̈ngɑni, wu ódøøg be kwøb, kɑ wu okööbø ki ngɑnɑni kì ri møgɑni; wu óbëëd wun ɑ́ nyuudhi kipe ji, o óyod yi gen kinni, yɑn ɑ bɑ Jwøng-ɑ Ácwɑ̈ɑ̈j.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, töng cɑ́yi pödhi Amön. Köbbí gen kinni lïngu kwøbbi Wïlɑ̈bø Jwøng-ɑ Ácwɑ̈ɑ̈j. Mɑ́ pëthi wun ɑ́mïni keny-ɑ ɑ́bwööl Kengɑ, kí kɑ ɑ́rënyi piny Isrɑil, kí kɑ ɑ́kïdhi tyëng Yeudiyɑ̀ yïnø, wu cïbɑ’ cinggi pödhhi yij ryɑng møg-ɑ wɑɑng cyɑ̈ɑ̈ng mwøl, o wu tyɑm yi gen. Nywøli yenhi wun ócɑm yi gen, kɑ cɑg mɑdh gen. Kɑɑl Rɑbɑ̀ óløgɑ keny nyi buud yi ɑmɑl, kɑ pödhi Amön bëne løgɑ keny nyi kwɑɑy dyëg, codhe o yod yi wun kinni, yɑn ɑ bɑ Jwøng-ɑ Ácwɑ̈ɑ̈j. “Wïlɑ̈bø Jwøng-ɑ Ácwɑ̈ɑ̈j okööbø kinni: Cinggí ɑ́teeng kɑ yï órujjø yi medi pyëw, kɑ pyëwí ómïnø kipe rɑjj-ɑ ɑ́pɑ̈dhi kömi Isrɑil. Kipe kɑ ɑ́göög kinøw, yï cïbɑ’ cinggi pödhh-ɑ kyeelø, o yï yɑg yi gen, o jɑmmí kɑb yi gen. Jií nɑ̈gɑ’ nɑ̈gø kì yij pödhø bëne, o yï cöög yï pɑ kwɑn yïn ɑ́ pödhø, o bëëd e bong pödhí me nud. Codhe, o yod yi yïn kinni, yɑn ɑ bɑ Jwøng-ɑ Ácwɑ̈ɑ̈j.” Wïlɑ̈bø Jwøng-ɑ Ácwɑ̈ɑ̈j okööbø kinni, “Mɑ́ Moɑb okööbø i Yeudiyɑ̀ nɑ pödhh-ɑ kyeelø bënn. Kɑ̈dd-ɑ nyi koor keew Moɑb kömi gen ówëggɑ pɑ̈ɑ̈rø, cɑgg ɑ́ kɑ̈dd-ɑ pëddi myëërø, ɑ løg Bet Yecimöth, kí Bɑɑl Meon, kí Kiriɑtɑim. Moɑb geki Amön ówëggɑ tyɑmø yi pödhhi ryɑɑng wɑɑng cyɑ̈ɑ̈ng mwøl, o Moɑb gööge e pɑth ki pödhø këti. Moɑb ócɑyɑ, o yod yi gen kinni, yɑn ɑ bɑ Jwøng-ɑ Ácwɑ̈ɑ̈j.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Kipe kɑ ɑ́cud tyëng Edöm ki gøølø kì ri Yeudiyɑ̀, kɑ gø göggi gen ki rɑj, tyëng Edöm cɑyɑ’ cɑyø; ji bënn kí lɑ̈yy bënn ge nɑ̈gɑ’ nɑ̈gø; ódöng ɑ́ ryɑng, cɑg kì Temɑn gïti Dedɑn, o ji ónɑ̈g kì yij liny. Jiɑ, tyëng Isrɑil kejɑ ócol yi gen kì ri Edöm, linyɑ óyod yi Edöm kì ri gen. Codhe o yod yi Edöm kinni, yɑn ɑ bɑ Jwøng-ɑ Ácwɑ̈ɑ̈j.” Wïlɑ̈bø Jwøng-ɑ Ácwɑ̈ɑ̈j okööbø kinni, “Tyëng Pelistiyɑ̀ gøøli gen ɑ́col gen ki tyëng-ɑ mɑɑn gen, kɑ gï nɑ̈g gen, bene ɑ kööb Wïlɑ̈bø, Jwøng-ɑ Ácwɑ̈ɑ̈j kinni: Tyëng Pelistiyɑ̀ nɑ̈gɑ’ nɑ̈gø; o tyëng-ɑ ɑ́döng ge onëënø kì thwøri Pelistiyɑ̀ nɑ̈gɑ’ nɑ̈gø bënn. Gøølɑ ócolɑ kì ri gen ki rɑ̈ji pyëwɑ. Codhe o yod yi gen kinni, yɑn ɑ bɑ Jwøng-ɑ Ácwɑ̈ɑ̈j.” Kì pyɑ̈rø wïdɑ́kyeel runni wøn kì yïnø, kì kyeel cyɑ̈nggi dwɑ̈y, ɑ ɑ́köbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, mɑ́ Suur pyëwe ɑ́mïni ki rënyi Yerusɑlem, kɑ óryeerø kinni ‘Yerusɑlem ɑ́kedhhi! Ngyew men-ɑ nyi ngëëw kì yije ɑ́rënyi! Nyingi wøn pɑ tyëëm yi wøn ki en këti!’ “Anɑn bene møg-ɑ kwøb yi yɑn yɑ Wïlɑ̈bø, Jwøng-ɑ Ácwɑ̈ɑ̈j ek: Suur, yɑ bɑ ngetimɑ̈ɑ̈nø ki yïn, pödhh mø gïïr ókɑ̈ɑ̈lɑ be pɑ̈ɑ̈r kömí; ge óbï ge nɑ ɑpɑgi nɑɑm omelø. Dörri kɑ̈ddí ódhur gen piny, kɑ udd-ɑ koor gen toor gen piny. Codhe, o lɑ̈bø bëne yeejɑ wɑ̈g, o dönge ɑ́ kïttì keti gen. Jømɑy, bøyyi gen ómɑ̈j yi gen kì yije, kì keny-ɑ bëëde kì dïnɑɑm omelø, mɑ́ yɑ ɑ́rum ki kwøb, yɑ Wïlɑ̈bø, Jwøng-ɑ Ácwɑ̈ɑ̈j. Suur órënyi yi pödhh-ɑ kyeelø, Tyëng-ɑ bëëdø kì yije ónɑ̈g ki pilø. Codhe, o yod yi Suur kinni, yɑn ɑ bɑ Jwøng-ɑ Ácwɑ̈ɑ̈j.” Wïlɑ̈bø Jwøng-ɑ Ácwɑ̈ɑ̈j okööbø kinni, “Nebukɑdnesɑr, rɑ̈ɑ̈dh Bɑbïlöniyɑ̀ wëggɑ’ pɑ̈ɑ̈r kömi Suur. Óbï e kɑ̈ɑ̈l-ɑ wɑɑng wuudø ki liny me dwøng, kí kyënyì, kí yɑ̈thi liny. Tyëng-ɑ ying yethi kɑ̈dd kì yij pödhø ónɑ̈g kì yij linyɑni. Tyëngmɑ̈ɑ̈nø ókunyø ki burrì, kɑ ge ógöögø ki óthør møg nenni kɑɑl, kɑ köddi gen ogöögø ki dörø mɑ gëng. Dörí ówööl yij yi gen ki gënggi ngyënyø, kɑ ud, udd-ɑ bɑ̈rrø pwööd gen piny ki lødhi ngyënyø dødø. Yï ólɑ̈nyyi yij tør tyelli kyënye, dörrí ónhɑ̈nhi yi cwɑggi jøkyënyì geki yɑ̈thi liny keny-ɑ ókɑ̈ɑ̈l gen dhøggi dörí møg-ɑ pɑ̈ɑ̈dhø. Yëthí bënn ónyøn yi dɑddi kyënye, ji ónɑ̈g yi gen ki pilø. Kɑ löjjí löjj-ɑ teg tørri. Kɑ̈rí geki jɑmm-ɑ nyi ngew ókɑb yi gen. Dörrí ócøør gen piny, kɑ uddí udd-ɑ myër dhur piny. Tuggi kïttí geki pɑ̈mmí, kí lɑ̈bbí ócøør gen nɑɑm omelø. Wörrí ócuung yi yɑn, o cwɑggi thømí koo lïngi këti. Yï ógwøgɑ yïn ɑ́ kït me wïje nyi mɑ̈ɑ̈j bøyy yi jømɑy. Yï koo cigi gerø, mɑ́ yɑ ɑ́rum ki kwøb, yɑ Wïlɑ̈bø Jwøng-ɑ Ácwɑ̈ɑ̈j.” Wïlɑ̈bø Jwøng-ɑ Ácwɑ̈ɑ̈j, Suur ɑ́köbbe kinni, “Pödhh-ɑ kömi nɑɑm omelø óbwøg yi ywøøg tyëng-ɑ óngɑl keny-ɑ ópɑ̈ɑ̈dh. Rɑ̈nhi pödhhɑni bënn óbï piny kì wɑ̈thi kwømmi gen, ógudhi gen ógudh-ɑ thøø yi rødø óluny gen wɑ̈g, kɑ ge pëgg-ɑ piny dëlli gen okïïrø. Ge óbwøg yi rɑjj-ɑ ɑ́pɑ̈dhi kömí, kɑ ge ongɑ̈ngø yi møgɑni. O yï óywøg yi gen ki wöri ywøg kinni: Kɑɑl-ɑ pere teg ɑ́rënyi! Yɑ̈the ɑ́køøl yi yømø kì nɑɑm omelø. Jii kɑɑlɑni ɑ́bëëd nɑ̈mmi omelø jɑɑg-ɑ yi gen. o tyëng-ɑ bëëdø kì kömi nɑm bënn ɑ́bögg-ɑ gen. Anɑn, keny-ɑ ɑ́pɑ̈ɑ̈dhe, kɑggì ceg-ɑ kïïrø. O tyëng-ɑ bëëdø kì kɑggɑni ɑ́bwøg kɑ ɑ́rënyi gen.” Wïlɑ̈bø Jwøng-ɑ Ácwɑ̈ɑ̈j okööbø kinni, “Yï ógwøgɑ ni kɑ̈dd-ɑ ɑ́rënyi, kɑ ge odöngø gɑ ryɑng. Yï ómud yi yɑn ki pï mø gïïr. Yï ókïdhɑ piny pödhi tyëngthøø, o yï rëbí ki tyëng-ɑ ócyɑ̈ɑ̈ngi. Yï ócïbɑ be bëëdø kì kunɑni, kì kelli gïg-ɑ ɑ́rënyi gïti ɑtheer, o yijí cöge e pɑ bëëd këti, o bëëd e bong kejí kì pödhi tyëngnëënø. Ji ówëggɑ böggø kenyi lïngi gen kwøbbi rɑjj-ɑ ɑ́bï kömí, o menɑni óbëëd ɑ́ cögí. Yï óyɑb yi ji, de yï koo yod yi gen.” Møg-ɑ kwøb yi Wïlɑ̈bø, Jwøng-ɑ Ácwɑ̈ɑ̈j ɑgɑk. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, ywøg Suur ki wöri ywøg, eni kɑɑl-ɑ ying kömi nɑɑm omelø, ɑ nyi ngëwwi pödhh-ɑ kyeelø møg-ɑ kömi nɑɑm omelø ki jɑmmì. Köbbí gïg-ɑ kømmi yi Wïlɑ̈bø Jwøng-ɑ Ácwɑ̈ɑ̈j kinni: Suur, yïn ɑ thwøg kipe myërí. Myërrí ying-ɑ dïnɑɑm omelø uddí ɑ́ger yi yïn ge nɑ sɑpïnɑ̀ me myëër. Ge ɑ́gur kɑ pɑ̈mmi ɑkemel men-ɑ ɑ́kɑ̈ɑ̈l kì Kïti Kermön, kɑ cure gur ki sɑndɑl men-ɑ ɑ́kɑ̈ɑ̈l kì Lubnɑn. Lɑwwi yɑ̈y ɑ́tyeng kɑ óthurri Bɑcɑn, kɑ pyëën yije gwøg ki ɑmedh mø Kobros, kɑ dhyɑw ki leggi lyej kì yiny-ɑ ød. Opërri yɑ̈thí bɑ ógudhi kor-ɑ yöm Ge thøø yi kwenø kì Rïp, ge nyi ceg kɑ ngijø ge nudd ge lɑ̈wi. Ógudh-ɑ nyi kum kwømmí bɑ ógudh mø myër, o ge bɑ ɑ́cwïcwïl, ge ɑ́kɑ̈ɑ̈l ɑ muji Kobros. Yɑ̈thí nyi kyew-ɑ yi jø kɑ̈ddi Sïdön kí Arbɑd. Yɑ̈thí ɑ́bëëd ge kyew-ɑ yi jøg mø pëddi këw. Jøg-ɑ nyi guddø ki yɑ̈ɑ̈th, ge ɑ́bëëd gɑ jø Bïbløs mø thøø yi pwönyø. Jøg mø ngɑ̈ny këw kì yethi nɑ̈mmi omelø bënn ɑ ɑ́ngyewi jɑmmí kì kɑ̈jji ngyew. “Jø Pɑres kí Lud, kí Lïbiyɑ̀ ɑ́bëëd gɑ jøliny, köddi gen geki ɑcudhhi gen nyi ngɑɑb ge’ ri kɑ̈ddi jølinyí. Gen ɑ ɑ́thödhi yïn ki dhwɑ̈ng, Jøliny Arbɑd ɑ́bëëd ɑ́ gen ɑ nyi kor dörrí, o dörr-ɑ bɑ̈rrø møgí ɑ́bëëd ge nyi korr-ɑ yi jø Gɑmɑd. Köddi gen nyi ngɑɑb ge’ ri dörrí. Gen ɑ ɑ́gwøg yïn yï myëër. “Tɑrcic ɑ́ngëëw ki jɑmmì kì yïí kɑ yï óyïddø ki ɑ́tegø, kí dødø, kí dhïngkì, kí ɑ́yömø. Yï ɑ́ngyëwi ki jɑmmí kì kɑ̈ddi Yönɑn, kí kɑ̈ddi Tubɑl, kí Mecec, kɑ jɑmmí nyi ngëëw ki bɑ̈ngg, kí jɑmmì mø bɑ ngyënyø dilɑl. Bet Tögɑrmɑ̀ ɑ́kɑ̈ni yïí ki yɑ̈thi kyënyì, kí kyënyi liny, kí ógɑll mø ngew ki jɑmm-ɑ kyeelø. Tyëng Dedɑn yï gen ɑ́dɑ ngyew ki tyëng-ɑ kömi nɑɑm omelø mø gïïr, ge nyi wil-ɑ leggi lyej geki nyɑj ki jɑmm-ɑ kyeelø. Ádɑ ngyew kì kɑɑm wun, wuki Arɑm, kipe jɑmmí møg-ɑ ngenyø; ge nyii kɑ̈nø ki ógudh-ɑ myër geki tigg-ɑ per gen teg, møg wil ki kyënyi liny. Yeudiyɑ̀ geki Isrɑil nyi kɑ̈ɑ̈l-ɑ gemè, kí møøw dhetun, kí møøw kïc, kí yenh-ɑ yømi gen med mø wil ki jɑmmí. Dedɑn nyi wil-ɑ sïrïj ki jɑmmí. Árɑb geki jɑggi Kedɑr, jɑmmí nyi wil yi gen kɑ dyëg römm kí ɑ́tegg. Jøngyeew Cebɑ̀ geki Rɑmɑ̀, jɑmmí nyi wil yi gen kɑ tigg-ɑ per gen teg geki dhɑb, kí yenh-ɑ yømi gen med cɑrø. Kɑ̈ddi Arɑn, kí Kɑnè, kí Eden, kí jøngyew mø Cebɑ̀ kí Acuur kí Kilmɑd ɑ́bëëd yï wun dɑ ngyew ki gen. Ge ɑ́bëëd ge nyi ngëww-ɑ yïn ógudh-ɑ ngewi gen teeg, kí ógudh-ɑ thøø yi rødø, kí gïg-ɑ nyi peedh piny kì yethi ud, ɑ kïddi gen myëër, kí thøll-ɑ ógwøgø ge myëër. Jɑmm-ɑ nyi ngew kì yïí ɑ́bëëd ge nyi kɑ̈l-ɑ yethi sɑpïnnì mø døngø. Yï ɑ́bëëd yï nɑ sɑpïnɑ̀ kì nɑɑm omelø; sɑpïnɑ̀ me yije ópɑ̈ngø ki jɑmmì. Keny-ɑ ɑ́kyëëw yïn wɑ̈g yi jøgí kì nɑɑm omelø, Yï ɑ́kɑggi yi yømi wɑɑng cyɑ̈ɑ̈ng mwøl kì dïnɑm. Kɑ̈rí, kɑ̈r-ɑ nyi ngyewí, kí jøg-ɑ nyi kyewi yɑ̈thí bënn, kí jøg-ɑ nyi guddø ki yɑ̈ɑ̈th, geki jøngyew, kí jøliny bënn møg-ɑ ɑ́ying yij sɑpïnɑ̀, ge ɑ́lɑ̈nyyi nɑɑm omelø bënn, keny-ɑ ɑ́kɑggi sɑpïnɑ̀. Álɑngi cwɑggi jøkëw møg-ɑ ɑ́mud ɑ́lïngi kì kömi nɑɑm omelø. “Yɑ̈th-ɑ døngø ɑ́wiy bënn, jøkëw bënn ɑ́kedhi wɑ̈g. Yï ceg kɑ ywøgø yi gen bënn ki rɑ̈ɑ̈m pëëth. Ge ywöngi wɑ̈thi gen kïdhi gen ki belø, ge ngyell-ɑ ri gen kì yij tør. Wɑ̈thi gen ɑ́lyel gen kiperí o ge rug-ɑ ocwɑ̈llì. Ge ywøg-ɑ yïn ki ywøøg rɑ̈ɑ̈m pëëth. Ge ywøg-ɑ yïn ki wörri ywøg kinni, ‘Á men ɑ pɑ̈ɑ̈r ki yïn Suur, ɑ bëëdø e kudø kì nɑɑm omelø? Kenyi kɑ̈ɑ̈l jɑmmi ngyew møgí løøg nɑɑm omelø, Pödhh bënn nyii yɑ̈ngø yi kɑ̈rí. Kɑ rɑ̈nhì ókɑ̈rø yi kɑ̈r-ɑ kɑ̈ɑ̈l yi jɑmm-ɑ ngyewi yi yïn. Anɑn rií ɑ́mød kì nɑɑm omelø; yï ɑ́bïïl tyeli nɑɑm omeli dwøng. Jɑmmí kí tyëng-ɑ ɑ́göggi yïn bënn ge ɑ́bïïl tyeli nɑɑm omelø.’ “Tyëng-ɑ bëëdø kì kömi nɑm bënn ɑ́bwøg yi rɑjj-ɑ ɑ́bï kömí. Cɑgg ɑ́ rɑ̈nhi gen ɑ́bwøg thyew, wɑ̈ɑ̈rø ceg-ɑ nënnø kì nyingi gen. Yï ɑ́lɑ̈ɑ̈ny gïti ɑtheer. Jøngyew kì kömi piny bëne ɑ́bwøg, kinni kömi gen óbëën yi rɑjj-ɑ ɑ́bï kömí.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, köbbí jɑngi Suur møg-ɑ köbbɑ en yɑ Wïlɑ̈bø, Jwøng-ɑ Ácwɑ̈ɑ̈j kinni: Yï ceg-ɑ thwøgø ce yï bɑ jwøg. Yï okööbø ce yï bëëd ɑ wïj kwøm ni jwøg, yï ótyegø yi nɑm. De yï bɑ dhɑnhø yøw, yï pɑth ki jwøg. Yï orumø ce wïjí pel kibøli Dɑniel; ce bong gïn cuggi kɑnø kɑ ocögø e pɑ yod yi yïn! Yï okööbø cem ɑ́ peli wïjí ɑ mëggi yïn kɑ̈ɑ̈r dhɑb kí ɑ́tegø. Kì bɑng kɑ ɑ́ngeew peli wïj, yï ɑ́yïddi ki kɑ̈r me dwøng. Yï ceg-ɑ thwøgø kipe kɑ̈rí! “Møg-ɑ köbbɑ yïn, yɑ Wïlɑ̈bø, Jwøng-ɑ Ácwɑ̈ɑ̈j bɑ kinni: Mɑ́ yï orumø ce wïjí pel ni jwøg, Yɑ ceg-ɑ kɑ̈ni kömí ki tyëngmɑ̈ɑ̈nø mø rijjø. Jɑmm-ɑ myëër møgí bënn órënyi yi gen, gen ɑ jɑmm-ɑ ɑ́yɑb yi yïn ki peli wïjí geki dïdí. Yï ónɑ̈g kɑ yï othøø ki thøwi ji-ɑ ɑ́thøw nɑm. Yï ónudd yï okööbø ce yï bɑ jwøg? Kì bøli tyëng-ɑ nɑ̈g yïn, yï óbëëd yïn ɑ́ dhɑnhø yøw, o yï pɑth ki jwøg. Yï ónɑ̈g ki nɑ̈gi gwög yi tyëngpɑth. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Aköbbi yɑn yi Jwøng-ɑ Ácwɑ̈ɑ̈j këti kinni, “Wɑ̈d dhɑnhø, ywöngí kipe rɑjj-ɑ óbï kömi rɑ̈ɑ̈dh Suur, köbbí møg-ɑ köbbɑ en ek: Yɑn yɑ Wïlɑ̈bø, Jwøng-ɑ Ácwɑ̈ɑ̈j, yɑ okööbø kinni: Yï ɑ́bëëd yï pëddi myëërø, e wïjí pel ki mendwøng! Yï ɑ́bëëd ɑ yij bɑɑg Eden, bɑɑg Jwøk, yï rug-ɑ tigg-ɑ per gen teg mø kïddi gen bɑ̈nni, kí mɑs, kí dhebɑrjed, kí yedhè, kí yeceb, kí bɑrmɑn, kí dhemred. Yï ɑ́dɑ jɑmmi dhwɑ̈ng mø bɑ dhɑb. Ge ɑ́gwøg kɑ perí dicyɑ̈ng-ɑ ɑ́cwɑ̈ɑ̈j yïn. Yï ɑ́cïbɑ yïn ɑ́ kerob me kor kïti kwëër Jwøk. Yï ɑ́bëëd kì kïti kwërɑ kɑ yï ócyɑ̈dhø kì kɑɑm tuggi kïtt-ɑ mëënyø. Yï ɑ́bëëd yï døøj këër cyɑ̈ng-ɑ ɑ́cwɑ̈ɑ̈j yïn pïd keny-ɑ ɑ́cɑ̈gí ki gwøg ki rɑj. Kì bɑng kɑ ɑ́cïb rummí ri ngyew, yijí ɑ́pɑ̈ng yi ruj, kɑ yï óbɑ̈jjø, ɑcyeddɑ yïn kì kïti kwërɑ, kɑ yï cyeed wɑ̈g kì kelli tuggi kïtt-ɑ mëënyø yi wëywön-ɑ ɑ́kor yïn. Yï ɑ́ceg-ɑ thwøgø kipe myërí. Kɑ yï gwøøg dhëg yi peli wïjí. Bene ɑ bɑnge leengɑ yïn piny, o yï óbëëd yïn ɑ́ nyuudhi kipe rɑ̈nhh-ɑ kyeelø. Kɑ̈jji mɑ̈ddø møgí ɑ́ywëdh yi gïg-ɑ gwøg yi yïn kì yij gwøøg ngyew. Codhe, ɑkɑ̈nɑ kömi kɑɑl ki mɑc kɑ rɑ̈bɑ, ɑgwøgɑ en ɑ́ búr. Tyëng-ɑ ngɑ̈nyi yïn bënn wɑ̈thi gen ómuum yi rëny-ɑ ɑ́rënyí, o yï koo yod këti gïti ɑtheer.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, töng cɑ́yi Sïdön. Köbbí tyëng pönhɑni møg-ɑ kwøb yi yɑn, yɑ Wïlɑ̈bø Jwøng-ɑ Ácwɑ̈ɑ̈j kinni: Yɑ mɑ̈n ki yïn Sïdön, yɑ ólenhi kì bɑng gïn-ɑ ógöggɑ yïn. Óyod yi ji kinni bene yɑn ɑ bɑ Jwøng-ɑ Ácwɑ̈ɑ̈j, keny-ɑ ónyodhɑ bëëdɑ yɑn ɑ́ kwërø, ki cɑyi ji-ɑ bëëdø kì yijí. Kömí ókɑ̈ni yi yɑn ki rɑ̈ɑ̈m dëllì, kɑ remø wëggɑ mullø kì yethi yëthí. Kömí ópɑ̈ɑ̈r kì wɑ̈thi tùng bënn. Codhe, o yod yi yïn kinni bene yɑn ɑ bɑ Jwøng-ɑ Ácwɑ̈ɑ̈j.” Akööb Jwøng-ɑ Ácwɑ̈ɑ̈j kinni, “Bong pödhø kì kelli pödhh-ɑ ɑ́guud wɑɑng Isrɑil men-ɑ óni wëëlø me cwög wɑnge, wɑlɑ̀ koodhø men-ɑ ónɑ̈gii këti. O yod yi gen kinni yɑn ɑ bɑ Wïlɑ̈bø, Jwøng-ɑ Ácwɑ̈ɑ̈j.” Akööb Wïlɑ̈bø, Jwøng-ɑ Ácwɑ̈ɑ̈j kinni, “Tyëng Isrɑil ódwöögɑ kì yethi pödhh-ɑ ɑ́kedhhɑ gen, o yod yi pödhh-ɑ kyeelø kinni yɑ bɑ kwërø. Tyëng Isrɑil óbëëdø kì yij piny gen, piny-ɑ ɑ́mëggɑ bɑ̈ngɑ Yɑgob. Ge óbëëd e bong gïn böggi yi gen; ge ógëdø ki ud, kɑ ge opïdhø ki bɑ̈ggi oløg. Pödhh-ɑ buti gen møg-ɑ ɑ́mɑn gen ócɑy yi yɑn, de Isrɑil óbëëdø ki tɑrø. Codhe, o yod yi gen kinni yɑn ɑ bɑ Jwøng-ɑ Ácwɑ̈ɑ̈j, Jwøøg gen.” Kì pyɑ̈rø wïdɑ́ryeew cyɑ̈nggi pyɑ̈ri dwɑ̈tt, kì pyɑ̈ri runni wøn kì yïnø, ɑ ɑ́köbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, töng cɑ́yi rɑ̈ɑ̈dh Rïp; cɑ́y-ɑ ócɑɑyii geki Rïp bëne. Köbbí kinni Wïlɑ̈bø, Jwøng-ɑ Ácwɑ̈ɑ̈j okööbø kinni: Yɑ bɑ ngɑn mɑ̈n ki yïn, yïn ɑ rɑ̈ɑ̈dh Rïp. Yï nyɑng-ɑ dwøng, ɑ buud kì nɑm. Yï okööbø ce Kiir bɑ mií, cem ɑ́ yïn ɑ gwøgii. Yï ngönɑ’ ngönø ki ɑbɑdh kì yethi cwɑggí, o rijji nɑm wëggɑ mɑ̈gø kì ri gɑ̈nggí, o yï ywɑ̈ɑ̈jɑ wɑ̈g kì nɑm e rij bënn mɑ̈gø kì rií. O yï leengɑ yij ryɑng wuki rijji nɑm bënn. Yï ódöng kì kenyɑni; bong ngɑn-ɑ ókony yïn. Yï ócɑm-ɑ yi lɑ̈yy geki winy. Codhe, o yod yi tyëng Rïp kinni, bene yɑn ɑ bɑ Jwøng-ɑ Ácwɑ̈ɑ̈j.” Jwøng-ɑ Ácwɑ̈ɑ̈j okööbø kinni, “Isrɑil ɑ́rum cem e ókøny-ɑ yi yïn, de yï bɑ obej yøw. Ke jyɑ̈ɑ̈ng gen ri gen rií, yï ceg-ɑ torø, kɑ nyingi ywödhhi gen cööb yi yïn, kɑ ge pɑ̈dh-ɑ kömi thɑ̈thi gen, kɑ përri gen ótørrø. Anɑn, yɑ Wïlɑ̈bø, Jwøng-ɑ Ácwɑ̈ɑ̈j, yɑ köbb-ɑ yïn kinni, yɑ óöni ki jøliny mø cinggi gen di pil, kɑ jií kí lɑ̈yyí nɑ̈g yi gen. Rïp ódöng ɑ́ ryɑng. Codhe, o yod yi wun kinni, yɑn ɑ bɑ Jwøng-ɑ Ácwɑ̈ɑ̈j. “Mɑ́ yï ɑ́kööb ce Kiir bɑ mií, cem ɑ́ yïn ɑ gwøgii, yɑ bɑ ngɑn mɑ̈n ki yïn, o yɑ mɑ̈n ki Kiir thyew. Rïp bëne gwøgɑ’ gwøgø ɑ́ ryɑng, cɑg kì Migdöl kì wɑɑng wuudø, gïti Aswɑn kì wɑɑng wurlwɑl, e wɑ̈dh-ɑ keew Kuc. Bong dhɑnhø wɑlɑ̀ lɑ̈y men-ɑ ókɑ̈l kenyɑni. Yije koo bëëd ki runn pyɑ̈r ɑ́ngwen. Rïp ógwøgɑ ɑ́ ryɑng-ɑ pëddi döng kì kömi piny bëne. Kɑ̈dde óbëëd gɑ ryɑng ki runn pyɑ̈r ɑ́ngwen, ge óbëëd gɑ thur kibøli kɑ̈dd-ɑ kyeelø bënn. Tyëng Rïp ókedhhɑ kì kelli pödhh-ɑ kyeelø; ge ówëggɑ rengi yethi pödhh møøgø.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Kì bɑng runn pyɑ̈r ɑ́ngwen møgɑni, tyëng Rïp ódwöögɑ kì yethi pödhh-ɑ ɑ́kedhhɑ gen, kɑ ge cïbɑ wɑɑng wurlwɑl kì Rïp, eni keny-ɑ ceg bëëdø ɑ́ piny gen. Ge óbëëdø gɑ pödhø me bong pere. Óbëëd ɑ́ pönh-ɑ nyødh kì kelli pödhh bënn; bong pödhø men-ɑ ópɑ̈nyi ki cirø yi en. Ge ógwøgɑ ge bong kɑ̈jji gen kì kelli pödhh. Isrɑil koo køny yi gen këti. Rɑjj-ɑ óbï kömi Rïp, Isrɑil ópɑ̈ddi yi gen kinni ɑ́bëëd ɑ́ bɑ̈jjø kɑ ɑ́gɑ̈nne Rïp. Codhe, o yod yi Isrɑil kinni, bene yɑn ɑ bɑ Jwøng-ɑ Ácwɑ̈ɑ̈j.” Kì kyeel cyɑ̈nggi kyeel dwɑ̈tt, kì pyɑ̈r ɑ́ryew wïdɑ́bïryeew runni wøn kì yïnø, ɑ ɑ́köbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, liny Nebukɑdnesɑr, rɑ̈ɑ̈dh Bɑbïlöniyɑ̀ ɑ́pɑ̈ɑ̈r kömi Suur, wɑ̈thi gen ɑ́budh kɑ wɑ̈thi tøggi gen obwödhø yi byëddø ki jɑmmì, de bong gïjø mɑ ɑ́yod yi rɑ̈dh wɑlɑ̀ linye kipe gwøngɑni. Møg-ɑ kwøb yi yɑn yɑ Wïlɑ̈bø, Jwøng-ɑ Ácwɑ̈ɑ̈j ek: Rïp mëggɑ’ Rɑ̈dh Nebukɑdnesɑr, o gø yɑge, o kɑ̈re kɑ̈ɑ̈le ɑ́ köögi mi jølinye. Rïp mëggɑ’ en ɑ́ köögi, mɑ́ jølinye ɑ́gögg-ɑ yɑn, yɑ Wïlɑ̈bø Jwøng-ɑ Ácwɑ̈ɑ̈j, yɑ ɑ́rum ki kwøb. “Keny-ɑ ócwöb møgɑni, Isrɑil ówëggɑ tëngø, o yïn Idhkiel, kedh kɑ yï kööb kì bøli gen bënn. Codhe, o yod yi gen kinni, yɑn ɑ bɑ Jwøng-ɑ Ácwɑ̈ɑ̈j.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, töng møg-ɑ kwøb yi yɑn, yɑ Wïlɑ̈bø Jwøng-ɑ Ácwɑ̈ɑ̈j; kwøb gen, yï óryeerø kinni: Cyɑ̈ɑ̈ng rɑj ɑ́cyɑ̈ngi! Cyɑ̈ngɑni ɑ́cyɑ̈ngi; cyɑ̈ng-ɑ ólöggi Jwøng-ɑ Ácwɑ̈ɑ̈j ɑ́cyɑ̈ngi, cyɑ̈ɑ̈ng pøøl geki muudhø, cyɑ̈ɑ̈ng cyën kipe pödhh. Ódi liny kì Rïp, kí wɑ̈ɑ̈rø me dwøng kì Kuc. Ji mø gïïr ónɑ̈g kì Rïp, Rïp óyɑg kɑ kɑ̈re kɑ̈l kɑ wiy ɑ́ thur. “Jøliny møg-ɑ ɑ́kïr kì Kuc, kí Lud, kí Put, kí pödhi Árɑb, kí Kub, cɑgg ɑ́ kì kelli jiɑ, ge ónɑ̈g kì yij linyɑni.” Jwøng-ɑ Ácwɑ̈ɑ̈j okööbø kinni, “Tyëng-ɑ nyi cwɑg Rïp bënn ónɑ̈g, cɑg kì Migdöl kì wɑɑng wuudø gïti Aswɑn kì wɑɑng wurlwɑl kì Rïp, o jølinye jøg-ɑ tɑ̈dø ónɑ̈g. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. Rïp ógöögø ɑ́ ryɑng-ɑ pëddi rɑ̈jø kì kömi piny bëne; o kɑ̈dde ódöng gɑ thur. Keny-ɑ órɑ̈bɑ Rïp, kɑ tyëng-ɑ cwɑgii bënn nɑ̈g, bene keny-ɑ óyodii yi gen kinni, yɑn ɑ bɑ Jwøng-ɑ Ácwɑ̈ɑ̈j. “Keny-ɑ óbëën cyɑ̈ngɑni kɑ Rïp nɑ̈g, yɑ óödø ki tyëngwöödø kì yethi yɑ̈thi nɑm, ge kɑ̈ll-ɑ wöödø men-ɑ ówëggi tyëng Kuc; tyëng-ɑ wɑ̈thi gen kïïdhø bwøgø. Mɑ́ cyɑ̈ɑ̈ng gen obëënø thyew!” Wïlɑ̈bø, Jwøng-ɑ Ácwɑ̈ɑ̈j okööbø kinni, “Nebukɑdnesɑr rɑ̈ɑ̈dh Bɑbïlöniyɑ̀ ókɑ̈ɑ̈lɑ be rënyi kɑ̈ɑ̈r Rïp. En geki jøge jøg-ɑ böggi yi kömi piny bëne, ge bï-ɑ be rënyi piny. Ge pɑ̈ɑ̈r-ɑ kömi Rïp ki pil, o piny pɑ̈ng gen ki tyëngthøø. Kiir göjjɑ’ thwøwø, o piny Rïp cïbɑ’ cinggi tyëngrijjø. Pinyɑni órënyi yi tyëngpɑth. Yɑn, yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Ngïjji jwögg-ɑ pɑth kì Mempis órënyɑ. Bong ngɑn-ɑ ójɑɑg Rïp; piny ógöjjɑ wɑ̈ɑ̈rø. Wɑɑng wurlwɑl kì pödhi Rïp ógwøgɑ ɑ́ ryɑng, kɑ Dhoɑn kɑɑl-ɑ wɑɑng wuudø köme ödɑ ki mɑc, kɑɑldwøng No ócɑyɑ. Kɑɑl Sin, kɑɑl-ɑ teg kì Rïp, keji linyɑ óyod yi en. Kɑ̈ɑ̈r kɑɑldwøng No órënyɑ. Rïp köme óödɑ ki mɑc, kɑ Sin orɑngø, o döri No dhur piny, o kɑɑlɑni mude. Wøbbi kɑ̈ddi On geki Pïbestɑ̀ ónɑ̈g kì yij liny, o møøgø ókøøl gɑ ɑmɑgg. Muudhø ópɑ̈dhi kömi Tɑpɑnes keny-ɑ ótorɑ tegi Rïp, kɑ ɑthwøge ocögø. Rïp órïm yi pøølø, kɑ jii kɑ̈dde bënn køøl gɑ ɑmɑgg. Keny-ɑ ócɑyɑ Rïp kinøw, óyod yi gen kinni, yɑn ɑ bɑ Jwøng-ɑ Ácwɑ̈ɑ̈j.” Kì bïryeew cyɑ̈nggi kyeel dwɑ̈tt kì pyɑ̈rø wïdɑ́kyeel runni wøn kì yïnø, ɑ ɑ́köbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, cingi rɑ̈ɑ̈dh Rïp ɑ́rum ki torø yi yɑn. Bong ngɑn mɑ ɑ́pyëdhii o di nøgge; o di cugge mɑgi pilø. Anɑn yɑ Wïlɑ̈bø, Jwøng-ɑ Ácwɑ̈ɑ̈j, møg-ɑ kwøbɑ bɑ kinni: Yɑ bɑ ngɑn mɑ̈n ki rɑ̈ɑ̈dh Rïp. Cingge tørrɑ’ tørrø bënn, eni cing-ɑ døj geki men-ɑ torø, o pilø dëëme kì cinge. Tyëng Rïp ókedhhɑ kì kelli pödhh kì kömi piny bëne. Codhe, o cinggi Rɑ̈ɑ̈dh Bɑbïlöniyɑ̀ wëggɑ tëngø, o pilɑ cïbɑ cinge. De rɑ̈ɑ̈dh Rïp cingge ótørrɑ, o ócurri kɑ othøø kì bøli ngɑn-ɑ mɑ̈n ki en. Rɑ̈ɑ̈dh Bɑbïlöniyɑ̀ ówëggɑ tëngø ceth, keny-ɑ ómëggɑ en pilɑ, kɑ gø ceme Rïp, o yod yi ji bënn kinni, yɑn ɑ bɑ Jwøng-ɑ Ácwɑ̈ɑ̈j. Tyëng Rïp ókedhhɑ kì kömi piny bëne. Codhe, o yod yi gen kinni, yɑn ɑ bɑ Jwøng-ɑ Ácwɑ̈ɑ̈j.” Kì kyeel cyɑ̈nggi dɑ̈ɑ̈g dwɑ̈tt, kì pyɑ̈rø wïdɑ́kyeel runni wøn kì yïnø, ɑ ɑ́köbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, köbbí rɑ̈ɑ̈dh Rïp geki yɑye kinni: Yï teg nɑ ngø! Yï pɑ̈ɑ̈rɑ kɑ ngø? Yï nɑ yɑdh sɑndɑl kì Lubnɑn Me yïthhe myër gɑ dïng, Yɑdh me bɑ̈r cɑrø e wɑ̈dh-ɑ yethi pøøl. Ádɑ pï mø pidhii Kɑ wëggi bɑ̈rrø yi pïi piny. Pï nud kì kej yɑnhɑni O pïgɑni pödd-ɑ yï yenhi wɑg bënn Ádøngi kibøli yenh-ɑ kyeelø mɑ́ pïge gïïr. Bɑ̈dde bɑ dhïl, ge bɑ̈rrø Winy bënn ɑ́gëëd ki uddi gen kì bɑ̈dde, Lɑ̈yyi pɑ̈l nyi nywøl-ɑ tïbe, pödhhi kömi piny ɑ́ywööm ɑ tïbe. Yɑnhɑni myëër cɑrø o bɑ̈dde bɑ̈rrø, mɑ́ byerre wɑ̈dhi piny, keny-ɑ di pïg-ɑ ngenyø. Yɑdh sɑndɑl men-ɑ yij bɑɑg Jwøk pɑ rwööm ki gøn. Bong yɑdh ɑkemel me bɑ̈dde pɑ̈r ki bɑ̈dde Bong yɑdh tugø me lodii Bong yɑdh me myër ni en kì yij bɑɑg Jwøk. Ágwøgɑ e myëër bɑ̈dde peedh en. Ceg kɑ modø yi yenh bënn kì Eden, bɑɑg Jwøk. “Anɑn yɑ Wïlɑ̈bø Jwøng-ɑ Ácwɑ̈ɑ̈j, yɑ kwøb-ɑ kinni: Gïn-ɑ ócwöb kipe yɑnh-ɑ ɑ́bɑ̈ri kɑ wɑ̈dh-ɑ yethi pøøl kwøbɑ’ kwøbø, mɑ́ e ɑ́tɑ̈d keny-ɑ ɑ́kedhe e óbɑ̈rø; ɑ́bɑnyɑ, o ómëggɑ jɑgø me pɑth. Ógöggi yi jɑngɑni ki gïn-ɑ kyëëw ki rɑjj-ɑ ɑ́gwøge. Óngøl piny yi tyëngpɑth; tyëng-ɑ yethi gen wöny, kɑ gø wiy gen piny. Bɑ̈dde ótørri kɑ ge odyëmø, kɑ ge pɑ̈dh-ɑ wɑ̈thi kïttì bënn, kí yethi törr bënn kì yij pödhø. Pödhh-ɑ ɑ́bëëd kì tïbe ódhwödh, kɑ ge ókedhø. Anɑ̈bbe óputh yi winy, kɑ lɑ̈yyi pɑ̈l ócyɑ̈dhø kì kömi bɑ̈dde. O óbëëd e bong yɑdh men-ɑ ócigi døngø ni en, kɑ wɑ̈dh-ɑ yethi pøøl, cɑgg keje di pï mø ngenyø. Ge ceg-ɑ thøø bënn ni møg-ɑ kyeelø, o ge kedhi gen piny pödhi tyëngthøø.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Cyɑ̈ng-ɑ ókedhi yɑnhɑni pödhi tyëngthøø, nɑ̈mmì ówëggɑ ywøg kipere, kɑ kumɑ ki pïi thɑ lɑ̈bø. Nɑ̈mmì ógöjjɑ cung, kɑ pïg-ɑ ngenyø ówïyø ngwej. Kömi Lubnɑn ókɑ̈nɑ ki muudhø kɑ yenhi wɑg göjjɑ nɑ̈rø. Pödhh óbwøg kɑ ge okïïrø yi cwɑggi pɑ̈ɑ̈dhe, keny-ɑ ókedhe piny pödhi tyëngthøø. Yenhi Eden bënn, kí yenh-ɑ ɑ́yieny kì Lubnɑn; gen ɑ yenh-ɑ byerri gen ɑ́ying yethi pï, gen ɑ yenh-ɑ ɑ́kedhi pödhi tyëngthøø; pëthi gen ómïni keny-ɑ ópɑ̈ɑ̈dhe. Ge ókedhi pödhi tyëngthøø kyeel ki gøn; o ge kedhi gen kömi møg-ɑ ɑ́kwöngi ki pɑ̈ɑ̈dhø. O pödhh-ɑ ɑ́bëëd kì tïbe bënn ókedhhi kì kelli pödhh. “Yɑnhɑni bɑ rɑ̈ɑ̈dh Rïp geki yɑye bëne. Bong yenhi Eden mɑ ɑ́bëëd ge bɑ̈rrø kinøw, de ókedhi piny pödhi tyëngthøø, o rëbe ki tyëng-ɑ kwïj Jwøk møg-ɑ ɑ́nɑ̈g kì yij liny. Yɑ ɑ́rum ki kwøb.” Møg-ɑ kwøb yi Wïlɑ̈bø, Jwøng-ɑ Ácwɑ̈ɑ̈j ɑgɑk. Kì cyɑ̈ng-ɑ mɑl kì pyɑ̈rø wïdɑ́ryeew dwɑ̈tt, kì pyɑ̈rø wïdɑ́ryeew runni wøn kì yïnø, ɑ ɑ́köbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, kyëddí rɑ̈ɑ̈dh Rïp ki kyëni dwøng. Köbbí wöödø men kinni: Rií ɑ́gwøøg yï nɑ ngur kì kelli pödhh, de yï ceg bëëdø yï nɑ nyɑng me pwöj pï kì nɑm. Pï ɑ́dub yi yïn ki lɑ̈bø ki tyellí, kɑ nɑm cöödh. Bøyɑ óleengɑ kömí, kɑ yï wëggɑ ywɑ̈ɑ̈j wɑ̈g yi pödhh keny-ɑ ócugi gen. Yï óleengɑ wɑ̈g, kɑ winy geki lɑ̈yyi kömi piny bënn kɑ̈ɑ̈lɑ be cɑmi yïn. Rïngí, rïng-ɑ kwɑ̈gø ópɑ̈ɑ̈ngɑ wɑ̈thi kïttì kí yethi törr. Remí ókønyɑ piny, kɑ wɑ̈dh-ɑ wɑ̈thi kïttì kɑ nɑ̈mmì opɑ̈ngø yi en. Keny-ɑ ónɑ̈gɑ yïn, mɑl ókum yi yɑn kɑ kyell ólunyø. Cɑ̈ng ópɑ̈nni ngɑ̈thi pøøl, o cɑɑr dwɑ̈y koo mënyø. Gïg-ɑ mënyø kì mɑl bënn ówëggɑ lunyø, kɑ piny løgɑ muudhø. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb. “Pödhh óbëëd ge óböggø keny-ɑ óköbbɑ gen rëny-ɑ ɑ́rënyɑ yïn; gen ɑ pödhh-ɑ per gen nuti pɑ̈nyø lïngø yi yïn cøn. Pödhh mø gïïr óbwøg yi gïn-ɑ ógöggɑ yïn. Rɑ̈nhì dëlli gen ókïrrø yi wɑ̈ɑ̈rø keny-ɑ ótïngɑ pilɑ. Ge ókïïr yi wɑ̈ɑ̈rø, ge tɑg-ɑ ri gen, kì cyɑ̈ng-ɑ ópɑ̈ɑ̈dh.” Wïlɑ̈bø Jwøng-ɑ Ácwɑ̈ɑ̈j, rɑ̈ɑ̈dh Rïp ɑ́köbbe kinni, “Wu ceg-ɑ tumø ki pili rɑ̈ɑ̈dh Bɑbïlöniyɑ̀. Yɑ ókɑ̈ni kömí ki liny pödhh-ɑ yethi gen wöny, o jií bënn nɑ̈g yi gen. Jií ónɑ̈g kɑ jɑmm-ɑ per gen thwøøg rënyi. Dhögí, dhög-ɑ nyi cyɑ̈mø kì kömi nɑm ónɑ̈g yi yɑn. Bong dhɑnhø wɑlɑ̀ dhyɑng men-ɑ ócödh pï ki lɑ̈bø këti. Pïgí ówëggɑ nïërø, kɑ ge ogöögø ge tïl, kɑ nɑ̈mmí wëggɑ ngwej mɑ̈ɑ̈dh. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb. Keny-ɑ ógwøgɑ Rïp ɑ́ thur, kɑ tyëng-ɑ yije bënn nɑ̈gɑ, bene ɑ óyodii yi gen kinni yɑn ɑ bɑ Jwøng-ɑ Ácwɑ̈ɑ̈j. Kyëdø men ógöögø ɑ́ wöri ywøg. Ówör yi nyigi pödhh bënn ɑ́ men ywøg gen Rïp kí jie bënn. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Kì pyɑ̈rø wïdɑ́bïïj cyɑ̈nggi kyeel dwɑ̈tt, kì pyɑ̈rø wïdɑ́ryeew runni wøn kì yïnø, ɑ ɑ́köbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, ywöngí kipe tyëng Rïp. Ör gen piny pödhi tyëngthøø geki pödhh-ɑ teg møg-ɑ kyeelø. Köbbí Rïp kinni, ‘Yï orumø kinni yï pëddi myëërø kibøli pödhh bënn? Yï ókedhi piny pödhi tyëngthøø kɑ yï obuddø kì kelli tyëng-ɑ kwïj Jwøk.’ “Tyëng Rïp ópɑ̈ɑ̈dh geki tyëng-ɑ ɑ́nɑ̈g kì yij liny. Pilø nenn-ɑ nɑ̈gi gen bënn. Jödd-ɑ teg geki tyëng-ɑ ɑ́køny gen ki nyɑɑg; tyëng Rïp ɑ́cwøøl gen pödhi tyëngthøø, ge ceg-ɑ ryeerø kinni tyëng-ɑ kwïj Jwøk møg-ɑ ɑ́nɑ̈g kì yij liny ɑ́bï keny, gen ɑ buud kì keny ek! “Acuur nud kì kunɑni e ótyegø yi rörri jølinye. Ge ɑ́nɑ̈g-ɑ yij liny bënn, o rörri gen ying-ɑ piny piny kì pödhi tyëngthøø. Jølinye bënn ɑ́nɑ̈g-ɑ yij liny, o röre bɑ ɑtyeg yi rörri gen. Bene gen tyëng-ɑ ɑ́bëëd ge ceg kɑ böggø kì piny tyëngnëënø. “Elɑm nud kì kunɑni e röre ótyegø yi rörri jølinye; ge ɑ́nɑ̈g-ɑ yij liny bënn, ɑkedhi gen piny pödhi tyëngthøø, ge nuti ngølø. Keny-ɑ ɑ́nëën gen ge ɑ́ceg kɑ böggø, de ɑnɑn ge buud ge thøø ge yɑ̈rø. Elɑm buud-ɑ piny kelli tyëng-ɑ ɑ́nɑ̈g kì yij liny, ótyegø yi rörri jølinye. Ge pɑth ki ɑngøl bënn, ge ɑ́nɑ̈g-ɑ yij liny. Ge ɑ́bëëd ge ceg kɑ böggø kì kömi piny, de ɑnɑn ge buud ge yɑ̈rø ni tyëng-ɑ kyeelø møg-ɑ ɑ́nɑ̈g kì yij liny. “Mecek geki Tubɑl nud kì kunɑni thyew, ge ótyegø yi rörri jøliny mø gen. Ge pɑth ki ɑngøl bënn, ge ɑ́nɑ̈g-ɑ yij liny bënn, ngö ge ɑ́bëëd ge ceg kɑ böggø yi ji cøn. Ge nuti konyø kɑ dhwɑ̈ng ni jöddi liny mø kɑ̈ge dööng; ge nuti kumø ki ködd, ngö ge ɑ́bëëd ge ceg kɑ böggø yi ji cøn. “Bene kër-ɑ óbuud Rïp e ónyøngø ɑnɑn, kì kelli jøg-ɑ nuti ngølø møg-ɑ ɑ́nɑ̈g kì yij liny. “Edöm nud kì kunɑni geki rɑ̈dhe, kí jɑgge. Ge ɑ́bëëd gɑ jøg mø teg, de ɑnɑn ge buud-ɑ pödhi tyëngthøø geki tyëng-ɑ ɑ́nɑ̈g kì yij liny. “Nyiirɑ̈dhhi wɑɑng wuudø bënn nud kì kunɑni geki tyëng Sïdön. Ge ɑ́bëëd ge ceg kɑ böggø yi ji, de ɑnɑn ge ɑ́kedhi piny ki ɑyɑ̈r kyeel ki tyëng-ɑ pɑth ki ɑngøl møg-ɑ ɑ́nɑ̈g kì yij liny. Ge ɑ́kɑ̈bbi ki ɑyɑ̈ɑ̈r tyëng-ɑ ɑ́kedhi piny pödhi tyëngthøø. “Keny-ɑ óliidh tyëng-ɑ ɑ́nɑ̈g kì yij liny yi rɑ̈ɑ̈dh Rïp, pyëwe ótëngi geki yɑye.” Møg-ɑ kwøb yi Wïlɑ̈bø, Jwøng-ɑ Ácwɑ̈ɑ̈j ɑgɑk. “Ji ɑ́wëggɑ böggø yi rɑ̈ɑ̈dh Rïp, de ónɑ̈g geki jølinye bënn, kɑ ge obuddø kì kelli tyëng-ɑ pɑth ki ɑngøl møg-ɑ ɑ́nɑ̈g kì yij liny.” Wïlɑ̈bø Jwøng-ɑ Ácwɑ̈ɑ̈j, ɑ́rum ki kwøb. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, köbbí jií gïg-ɑ ócwöb keny-ɑ ókɑ̈nɑ kömi pödhø ki liny. Ji ókɑ̈bbi ki dhɑnhø ɑ́kyel me göögø ɑ́ jɑlkor. Kenyi lidhe ngetimɑ̈ɑ̈nø e obëënø, o kɑng nyi kodhe ɑ́ men köbbi ji. Ngɑn-ɑ ólïngi ywøøg kɑng, de gø pɑ ywööre, owɑ̈nhi ngetimɑ̈ɑ̈nø kɑ nɑ̈g, cyënne óying köme kete. Thøw-ɑ bɑng bɑ̈jje, mɑ́ ke di lïnge, di bødh. Cyënne ying-ɑ köme. De keløg jɑlkor ngetimɑ̈ɑ̈nø ólidh yi en e obëënø, kɑ ocögø e kɑng pɑ kodh yi en, kɑ tyëngorøg møgɑni nɑ̈g yi ngetimɑ̈ɑ̈nø, cyënni gen cïbɑ’ kömi jɑlkor menɑni. “Anɑn wɑ̈d dhɑnhø, yï ɑ́gwøgɑ yïn ɑ́ jɑlkor, o ge nyi kyëddi yi yïn. Keløg ngetorøg óköbbɑ kinni ceg-ɑ thøø, kɑ ocögø e pɑ kyëddi yi yïn kinni wïye ki orøge, kɑ othøø kì yij orøg, cyënne cïbɑ’ kömí. Keløg ngetorøg okyëddø yi yïn kɑ óbɑ̈nyø ki wïyø ki orøg, ceg-ɑ thøø kì yij orøg, de yïn wëyí óyiel.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, köbbí tyëng Isrɑil kinni wu rïïj wu okööbø kinni, ‘Orøøg wøn ying-ɑ kömi wøn, wø othøø, wø óbëëdø kidï?’ Köbbí gen kinni yɑn yɑ Wïlɑ̈bø Jwøng-ɑ Ácwɑ̈ɑ̈j, yɑ Jwøng-ɑ Nëënø, pyëwɑ pɑ med ki thøwi dhɑnhø kì yij orøge, dɑ́ kinni yewe ki orøge, o bødhe. Isrɑil, wïyí ki orøg. Á kipe ngø ɑ dwɑddí thøø? “Anɑn wɑ̈d dhɑnhø, köbbí Isrɑil kinni, keløg ngɑndøj ócɑ̈gø ki orøg, pɑ yiel yi gïgtir møg-ɑ ɑ́gwøge cøn. Keløg ngetorøg ówïyø ki orøg pɑ cɑy këti, o keløg ngɑntir ócɑ̈gø ki orøg wëye pɑ yiel. Keløg ngɑntir oköbbø yi yɑn kinni yï ónëënø, kɑ ócɑ̈gø ki orøg, gïgdøj møg-ɑ ɑ́gwøge cøn pɑ pɑr yi yɑn këti. Ceg-ɑ thøø kipe orøng-ɑ ɑ́gwøge. Keløg ngetorøg oköbbø yi yɑn kinni ceg-ɑ thøø. Kɑ ówïyø ki orøg, kɑ døøg-ɑ be gøggi dyër geki gïgdøj, ni keløg gïg-ɑ ɑ́mɑg yi en, kí gïg-ɑ ɑ́kwɑle gï dögge’ wëëg gen, kɑ ówïyø ki orøg, kɑ døøg-ɑ be mïdhi cigg-ɑ nyi muujø ki nënnì, ceg-ɑ nënnø; pɑ thøw. Orøge ólɑ̈ɑ̈ny yi yɑn, o ónëënø, mɑ́ e ɑ́göög ki gwøng tir. “Jií okööbø i yɑ pɑ gøggi dyër! Pɑth, bɑ gen ɑ pɑ gøggi dyër. Ke wïyi ngɑntir ki gwøg ki gwøng tir, kɑ ócɑ̈gø gwøg ki orøg, thuw-ɑ orøge. Ke wïyi ngetorøg ki gwøg ki orøg, kɑ døøg-ɑ be gøggi dyër geki gwøng tir, wëye ɑ́yiele. De yïn Isrɑil, yï okööbø i yɑ pɑ gøggi dyër. Yï ócɑy yi yɑn kɑ per gïg-ɑ gøggi yi yïn.” Kì bïïj cyɑ̈nggi pyɑ̈ri dwɑ̈tt, kì pyɑ̈rø wïdɑ́ryeew runni wøn kì yïnø, ɑ ɑ́bëën ngɑn me pɑ̈ɑ̈rø kì Yerusɑlem, kɑ yɑ köbbe kinni, i kɑɑlɑni pɑ̈ɑ̈dhø. Kömɑ ɑ́bëën yi wëyi Jwøng-ɑ Ácwɑ̈ɑ̈j kì böörø, e jɑlɑni nuti bëënø. Keny-ɑ ɑ́wɑ̈nhi jɑlɑni kì mwøl, ɑwiy yɑn o yɑ døøgɑ be kwøb yi Jwøng-ɑ Ácwɑ̈ɑ̈j. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, tyëng-ɑ bëëdø kì kɑ̈ddi Isrɑil, kɑ̈dd-ɑ rënyø okööbø kinni, ‘Abrɑhɑm ɑ́bëëd ɑ́ jɑl ɑ́kyel, kɑ piny bëne mëggii. Anɑn wø gïïr; piny bɑ mi wøn.’ “Köbbí gen møg-ɑ kwøb yi yɑn, yɑ Wïlɑ̈bø, Jwøng-ɑ Ácwɑ̈ɑ̈j kinni: Wu cɑm-ɑ rïngø ki remø kì ree. Wu mɑll-ɑ ngïjji jwögg-ɑ pɑth. Wu ceg-ɑ nɑ̈g ki ji. Á ngø ɑ wëggi wun rumø kinni piny bɑ mi wun? Wu bëëd ɑ ri pilli wun. Wu gøgg-ɑ rɑj, ngɑn nyi kwɑny-ɑ cï wɑɑd gen. Piny óbëëd ɑ́ mi wun? “Köbbí gen kinni, Wïlɑ̈bø Jwøng-ɑ Ácwɑ̈ɑ̈j okööbø kinni: Yɑn ɑ Nëënø, tyëng-ɑ bëëdø kì kɑ̈dd-ɑ rënyø ónɑ̈g. Tyëng-ɑ bëëdø kì pɑ̈l ócɑm yi lɑ̈yy. Tyëng-ɑ pɑ̈nni kì yethi órøggi kïttì ónɑ̈g yi rɑ̈ɑ̈m dëllì. Pödhø ógwøgɑ ɑ́ ryɑng, kɑ tegø men-ɑ pere thwøg gen cuungɑ. Kïtti Isrɑil ri gen óløg gen pɑ̈l me bong wëll møg kɑ̈lli yethi gen. Keny-ɑ ócɑyɑ ji kì bɑng orøøg gen, kɑ pödhø odöngø ɑ́ ryɑng, óyod yi gen kinni yɑn ɑ bɑ Jwøng-ɑ Ácwɑ̈ɑ̈j.” Akööb Jwøng-ɑ Ácwɑ̈ɑ̈j kinni, “Wɑ̈d dhɑnhø, tyëng pödhi wun kööb ɑ rií kenyi rwööm gen kì dhøggi dörri kɑɑl geki dhøggi kɑ̈lli gen, ge okööbø kinni, ‘Anɑn, kedhi wɑ be lïngi møg-ɑ ɑ́kwøb yi Jwøng-ɑ Ácwɑ̈ɑ̈j.’ Codhe, o jiɑ bï gen yïí, o ge lïngi gen kwøbbí, de gïn-ɑ köbbí gen pɑ gwøg yi gïn. Dhøggi gen wɑ̈dh-ɑ bëëdø ge med yøw, de döngi pëëth pɑ wiy yi gen. Yï nenni yi gen yï nɑ ngɑn wör wöri mɑ̈ɑ̈dø yøw; ngɑn cwɑgge med me thumø ki thom. Kwøbbí nyii lïngø yi gen, de bong gïjø ɑ́kyel men nyi gwøg yi gen kì ri gïn. De keny-ɑ ópɑ̈dhi kwøbbí bënn kɑ̈jji gen; o ge ópɑ̈dhi kɑ̈jji gen ceth, codhe o yod yi gen kinni ɑ́dɑ jɑltöng kì kelli gen.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, töngí jøg-ɑ kwɑy Isrɑil, köbbí gen kinni Wïlɑ̈bø, Jwøng-ɑ Ácwɑ̈ɑ̈j okööbø kinni i wun, wu kwɑ̈yyi Isrɑil, ri wun dɑ cyën! Wu kor-ɑ ri wun, de dyëg pɑ kor yi wun. Wu cɑm-ɑ dyëg-ɑ cwɑɑdhø, o wu rug-ɑ ógudhi yëyyi dyëg, o wu mɑdhh-ɑ cɑg, de dyëg pɑ kwɑy yi wun. Møg-ɑ dëlli gen rɑ̈mø nuti tuur wun, o møg-ɑ ri gen di kedd, keddi gen nuti kood wun, møg-ɑ torø nuti pyëëdh wun, o møg-ɑ ɑ́töngi pɑ̈l nuti dwöög wun. Møg-ɑ ɑ́wɑ̈ɑ̈ny nuti yɑɑb wun, de ge mïdhi yi wun kɑ yuu-ɑ rɑj. Kɑ dyëg otɑyø kì bɑng kɑ̀ bëëde e bong jɑlkwɑ̈yø; ɑcɑɑm gen yi lɑ̈yyi pɑ̈l. Codhe, ɑtɑɑy dyëgɑ kelli kïttì geki kömi piny bëne, e bong ngɑn nenni gen wɑlɑ̀ ngɑn yɑb gen. “Anɑn, wu jøkwɑ̈yø, lïngu møg-ɑ köbb-ɑ wun, yɑ Jwøng-ɑ Ácwɑ̈ɑ̈j. Bene yɑn Jwøng-ɑ Nëënø, lɑ̈w ke di lïngu kwøbbɑ. Dyëgɑ kömi gen ɑ́pɑ̈ɑ̈r yi lɑ̈yyi pɑ̈l kɑ gï cɑm gen, kì bɑng kɑ̀ bëëde e bong jɑlkwɑ̈yø. Jøkwɑ̈yø møgɑ dyëg nuti yɑbø yi gen. Ge kor-ɑ ri gen, de dyëg pɑ kwɑy yi gen. Kɑ ɑ́rum bëëde kinøw, lïngu kwøbbɑ wun ɑ jøkwɑ̈yø. Yɑ Wïlɑ̈bø Jwøng-ɑ Ácwɑ̈ɑ̈j. Yɑ bɑ ngɑn mɑ̈n ki wun. Dyëg kwɑnyɑ’ kwɑnyø kì yï wun. Wu pɑ cigɑ gwøgø wun ɑ́ jøkwɑ̈yø mø gen. Wu pɑ wëggɑ korri ri wun këti. Dyëgɑ óyielɑ kì cinggi wun, o ge cög gen ge pɑ cɑm yi wun. “Wu köbbɑ’ köbbø, yɑ Wïlɑ̈bø, Jwøng-ɑ Ácwɑ̈ɑ̈j kinni, yɑn kiriɑ ɑ ónenni dyëgɑ o ge ókorɑ, ni kenyi yɑb jɑlkwɑ̈yø dyëge møg-ɑ ɑ́tɑy, kɑ gï dwööge kej ɑ́kyel. Ge ódwöögɑ kì kɑ̈jj-ɑ looj møg-ɑ ɑ́tɑɑy yi gen bënn. Ge ókɑ̈ɑ̈lɑ wɑ̈g kì pödhh-ɑ pɑth, kɑ ge cøngɑ, o ge dwöögɑ piny gen. Ge ókwɑyɑ kì wɑ̈thi kïttì geki yethi törr, kì yij piny Isrɑil bëne. Ge ókwɑyɑ kì kɑ̈jj-ɑ di lum-ɑ døøj, geki wɑ̈thi kïtti Isrɑil, kïtt-ɑ bɑ̈rrø e bong gïn böggi yi gen. Ge ócyɑ̈mø kì yij tör-ɑ mɑr kì yij piny Isrɑil. Yɑn kiriɑ ɑ ókwɑy dyëgɑ, o ge óyɑ̈bbɑ ki keny ywööm gen. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb. “Møg-ɑ ɑ́lɑ̈ɑ̈ny óyɑɑbɑ, o møg-ɑ ɑ́tɑy óbïïdhɑ, o møg-ɑ ɑ́tor ópyëdhɑ, o møg-ɑ ri gen di kedd, keddi gen ókodɑ. De møg-ɑ cwɑɑdhø, ɑ teg nɑ̈gɑ’ nɑ̈gø, mɑ́ yɑ bɑ jɑlkwɑ̈yø men-ɑ dyër. “Anɑn, wun ɑ dyëgɑ, wu cɑyɑ’ cɑyø; møg døj dɑ̈ɑ̈ngɑ’ dɑ̈ɑ̈ngø ki møg rijjø, o ɑ́tegg ódɑ̈ɑ̈ngɑ ki römm. Kwï wun pɑ yɑ̈ng yi cɑm ki lum-ɑ døøj, o men-ɑ pɑ cɑm yi wun yöd e nyøøn wu’ piny! Wu mɑdh-ɑ pïg-ɑ tïl, o møg-ɑ pɑ mɑdh yi wun, nyi cödh yi wun! O dyëgɑ møg-ɑ kyeelø cɑm gen lum-ɑ ɑ́nyøn yi wun, o ge mɑdh gen pïg-ɑ ɑ́cödh yi wun. “Kɑ ɑ́rum bëëde kinøw, wun ɑ köbbɑ yɑ Wïlɑ̈bø, Jwøng-ɑ Ácwɑ̈ɑ̈j kinni, yɑn ɑ ólidh gøøny dyëg-ɑ cwɑɑdhø geki dyëg-ɑ gwɑ̈lø. Mɑ́ dyëg-ɑ gwɑ̈lø ɑ́dhur wun wɑ̈g ki wɑ̈thi tøggi wun; ge ɑ́cööb wun, kɑ ge cyeed wun wɑ̈yi gen. De dyëgɑ óyiel yi yɑn; ge koo wëggɑ mïdhø ki mïnh-ɑ rɑj këti. Yɑn ɑ ócɑy men kí men, o møg-ɑ døj ódɑ̈ɑ̈ngɑ ki møg-ɑ rijjø. Ge óthödhɑ ki rɑ̈dh me ni bɑ̈ngɑ Debïd, o bëëde ɑ́ en ɑ bɑ kwɑ̈yi gen kete; en ɑ ókorri gen. Yɑ Jwøng-ɑ Ácwɑ̈ɑ̈j ɑ óbëëdø yɑn ɑ Jwøøg gen, o rɑ̈nh-ɑ ni bɑ̈ngɑ Debïd bene rɑ̈ɑ̈dh gen. Yɑ ɑ́rum ki kwøb. Wø ólwöbø ki lwömi mër ki gen, kɑ lɑ̈yy-ɑ rijjø kɑ̈l kì yij piny, o dyëg bëëd gen ge bong gïn böggi yi gen, cɑgg ge buddi kì yethi pwödh, wɑlɑ̀ ge buud-ɑ wɑg. “Ge ógyëdhɑ, kɑ ge wëggɑ bëëdø kì bɑdhhi kïti kwërɑ. Ge ónëngɑ ki kødh kì bøli keje ceth, e bɑ kødh gyëdh. Yenh ónywøl kɑ pwödh ocyegø. Ge óbëëdø kì piny gen e bong gïn böggi yi gen. Keny-ɑ ógöönyɑ gen wɑ̈g kì yij bɑ̈ɑ̈ngø, kɑ ge yielɑ kì cinggi tyëng-ɑ mïdhi gen gɑ bɑ̈ngg, óyod yi gen kinni, yɑn ɑ bɑ Jwøng-ɑ Ácwɑ̈ɑ̈j. Jɑmmi gen koo kɑbbi yi pödhh-ɑ kyeelø, wɑlɑ̀ ge pɑ cɑm yi lɑ̈yyi pɑ̈l. Ge óbëëdø ki mër e bong gïn böggi yi gen. Pwödhhi gen ówëggɑ cyegø, o óbëëd e bong kɑ̈j kì yij pödhø. Ge koo gwɑddi yi pödhh-ɑ kyeelø këti. O yod yi dhɑnhø bëne kinni Isrɑil bɑ miɑ, o korr-ɑ yi yɑn. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb. “Wu bɑ dyëgɑ, dyëg-ɑ nyi kwɑy yi yɑn, wu bɑ jiɑ, o yɑ bɑ Jwøøg wun.” Møg-ɑ kwøb yi Wïlɑ̈bø Jwøng-ɑ Ácwɑ̈ɑ̈j ɑgɑk. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, töngí pödhi Edöm cɑ́ye. Köbbí gen møg-ɑ kømmi yi yɑn, yɑ Wïlɑ̈bø, Jwøng-ɑ Ácwɑ̈ɑ̈j kinni: Yɑ mɑ̈n ki wun, wun ɑ kïtti Edöm! Wu gwøgɑ’ gwøgø wun ɑ́ ryɑng. Kɑ̈ddí órënyɑ kɑ ge gwøgɑ gɑ thur. O pinyí dönge ɑ́ ryɑng; codhe o yod yi yïn kinni, yɑn ɑ bɑ Jwøng-ɑ Ácwɑ̈ɑ̈j. “Yï ɑ́mɑn-ɑ Isrɑil kɑ wëggí nɑ̈gø keny-ɑ ɑ́yinge yethi rɑj, kɑ ɑ́cɑɑyii ki cɑ́y-ɑ cyɑ̈n kipe orøge. Yɑn yɑ Wïlɑ̈bø, Jwøng-ɑ Ácwɑ̈ɑ̈j, bene yɑn ɑ bɑ Jwøng-ɑ Nëënø, yï pɑ wiy yi thøø kinni tek, mɑ́ yï ɑ́ceg-ɑ nɑ̈g, thøø ólugi kì bɑngí. Kïtti Edöm ógwøgɑ gɑ ryɑng, o tyëng-ɑ ókɑ̈lli kɑ̈jjɑni ónɑ̈gɑ bënn. Wɑ̈thi kïttì ópɑ̈ng yi yɑn ki tyëngthøø, kɑ yethi törr pɑ̈ngɑ ki tyëng-ɑ ónɑ̈g kì yij liny. Yï ógwøgɑ yïn ɑ́ ryɑng gïti ɑtheer, yethi kɑ̈ddí pɑ bëëd këti. Codhe o yod yi yïn kinni, yɑn ɑ bɑ Jwøng-ɑ Ácwɑ̈ɑ̈j. “Yï okööbø kinni Yeudiyɑ̀ geki Isrɑil, kí pìnyi gen bɑ møgí, ce ge ókwɑny yi yïn cɑgg ɑ́ kɑ̀ bëëdɑ yɑ Jwøng-ɑ Ácwɑ̈ɑ̈j, yɑ bɑ Jwøøg gen. Kì bɑng kwøbbɑni, yɑn yɑ Wïlɑ̈bø, Jwøng-ɑ Ácwɑ̈ɑ̈j, bene yɑn Jwøng-ɑ Nëënø, yï ócɑyɑ kipe liny geki mud, kí mɑ̈ɑ̈nø møg-ɑ ɑ́göggí jiɑ. O yod yi gen kinni yï cɑy yi yɑn kɑ per gïn-ɑ ɑ́göggí gen. Codhe o yod yi yïn kinni gïg-ɑ ɑ́kømmí kinni, kïtti Isrɑil ɑ́döng nøw, o ge bɑ møg kwɑny yi yïn, ge ɑ́lïngɑ yɑ Jwøng-ɑ Ácwɑ̈ɑ̈j. Kwøbbi rɑjj-ɑ ɑ́kømmi yi wun kì riɑ geki ɑthwøøg wun, ge ɑ́lïngɑ.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Yï ógwøgɑ yïn ɑ́ ryɑng, o kömi piny bëne pyëwe mïne kipe gïn-ɑ ógöggɑ yïn, ni kɑ ɑ́mïni pyëwí ki rënyi Isrɑil, ɑ ceg bëëdø ɑ́ miɑ. Kïtti Seir, kì piny Edöm bëne ceg-ɑ döng nøw. Codhe, o yod yi dhɑnhø bëne kinni bene yɑn ɑ bɑ Jwøng-ɑ Ácwɑ̈ɑ̈j.” Akööb Jwøng-ɑ Ácwɑ̈ɑ̈j kinni, “Wɑ̈d dhɑnhø, töngí kïtti Isrɑil, köbbí gen kinni lïngi gen wöön-ɑ köbbɑ gen, yɑ Wïlɑ̈bø, Jwøng-ɑ Ácwɑ̈ɑ̈j kinni, tyëngmɑ̈ɑ̈nø okööbø kinni, ‘Kïtt-ɑ weenø ɑ́göög gɑ møgee!’ “Mɑ́ ge okööbø kinøw, köbbí gen møg-ɑ kømmɑ, yɑ Wïlɑ̈bø, Jwøng-ɑ Ácwɑ̈ɑ̈j kinni: Keny-ɑ ɑ́rënyi Isrɑil yi pödhh-ɑ kyeelø kɑ gø mɑg gen, Isrɑil ɑ́yɑnyyi yi gen ge bënn. Kì bɑng menɑni, lïngu møg-ɑ kømmi yi Wïlɑ̈bø, Jwøng-ɑ Ácwɑ̈ɑ̈j, wun ɑ kïtti Isrɑil, kí dhøg, kí törr, kí kɑ̈dd-ɑ ɑ́rënyi, ɑ ɑ́yɑg kɑ ge odöngø gɑ thur, kɑ ge gɑggi yi pödhh-ɑ buti wun bënn. “Yɑn, yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́kööb kinni pyëwɑ ɑ́rënyi ki pödhh-ɑ butí bënn, o pyëwɑ pëddi rɑ̈jø kɑ tyëng Edöm, kipe kɑ ɑ́kwɑny gen pinyɑ ɑ́ mi gen, kí törre bënn, de pëthi gen ceg-ɑ medø. “Kì bɑng menɑni töngí Isrɑil; köbbí kïtt-ɑ døngø, kí kïtt-ɑ thønhø, kí dhøg, kí törr kinni, yɑ Wïlɑ̈bø Jwøng-ɑ Ácwɑ̈ɑ̈j, yɑ 'kööb-ɑ rɑ̈ɑ̈m pyëwɑ, o pyëwɑ rɑɑj kipe kɑ ɑ́yɑnyyi gen yi pödhh-ɑ kyeelø, kɑ ge yɑ̈r yi pödhhɑni. Yɑ ɑ́köngi yɑ Wïlɑ̈bø, Jwøng-ɑ Ácwɑ̈ɑ̈j kinni pödhh-ɑ buti wun óyɑ̈r. De yenh ócigi twïyø kɑ ge onywølø kì wɑ̈thi kïttì Isrɑil, gɑ mø wun wu jiɑ tyëng Isrɑil. Wu bɑ møg jwɑn dwöög pödhi wun. Yɑ ying-ɑ kömi wun, yɑ dwɑdd-ɑ lidhi piny wun e okɑ̈gø, o köödh opidhø. Kwɑnni wun ówëggɑ ngënyø. Wu óbëëdø kì yethi kɑ̈dd kɑ kɑ̈jj-ɑ ɑ́rënyi bënn ger yi wun. Ji geki dhög ówëggɑ ngënyø. Wu óngënyi kibøli men-ɑ ɑ́bëëd wun cøn; nyigi wun óngënyi. Wu ówëggɑ bëëdø ni kɑ ɑ́bëëd wun cøn, kɑ wu wëggɑ dönyø kibøli men-ɑ ɑ́bëëd wun. Codhe, o yod yi wun kinni yɑn ɑ bɑ Jwøng-ɑ Ácwɑ̈ɑ̈j. Jiɑ, tyëng Isrɑil ókɑ̈ɑ̈lɑ pödhi gen, o ge bëëd gen kì yije. Pinyɑni óbëëd ɑ́ mi gen, o nyigi gen koo wëggɑ nɑ̈gø yi kɑ̈j këti. “Yɑ okööbø yɑ Wïlɑ̈bø, Jwøng-ɑ Ácwɑ̈ɑ̈j kinni: Bɑ dyër ɑ nyi kømmi yi ji kinni piny ceg-ɑ cɑm ki ji, kɑ nyigi pödhø nyi kɑbe. De cɑg ɑnɑn, koo cyɑ̈mø ki ji, o nyigi wun koo kɑbe. Yɑ Wïlɑ̈bø Jwøng-ɑ Ácwɑ̈ɑ̈j, yɑ ɑ́rum ki kwøb. Wu koo wëggɑ lïngø ki gɑɑg pödhh-ɑ kyeelø këti, wɑlɑ̀ wu koo yɑnyyi yi gen. Nywøli wun koo kɑb yi piny këti. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, keny-ɑ ɑ́bëëd tyëng Isrɑil kì yij piny gen, gø ɑ́ywëdh gen ki yëth-ɑ ɑ́bëëd gen. Bëëdi gen ge ywëdhø pɑ̈ɑ̈r yi yɑn kɑ kenyi bëëd ngɑndhɑjø ree dɑ kwëër dwɑ̈ye. Akønyɑ linyɑ kömi gen, kipe ji-ɑ ɑ́nɑ̈g yi gen kì yij pinyɑni, kí ngïjji jwögg-ɑ pɑth møg-ɑ ɑ́ywëdh gen piny. Acɑyɑ gen kì bɑng bëën-ɑ ɑ́bëëd gen, ɑkedhhɑ gen kì yethi pödhh-ɑ pɑth. Kì kɑ̈jj-ɑ ɑ́kedhi yi gen, nyingɑ kwërø ɑ́yɑ̈r yi gen, mɑ́ ji nyii kööbø kinni, ‘Møg bɑ jii Jwøng-ɑ Ácwɑ̈ɑ̈j, de cɑgg ɑ́ kinøw ge ɑ́bï wɑ̈g kì yij pinyɑni.’ Bene ɑ lɑ̈ɑ̈m pyëwɑ kipe nyingɑ kwërø óyɑ̈r yi tyëng Isrɑil, kì kɑ̈jj-ɑ ɑ́kedhi yi gen. “O ɑnɑn köbbí gøl Isrɑil kinni: Wïlɑ̈bø Jwøng-ɑ Ácwɑ̈ɑ̈j okööbø kinni, gïn-ɑ dwɑddɑ gwøgø pɑth kiper wun, wu tyëng Isrɑil, den-ɑ́ kipe nyingɑ kwërø; nyingɑ ɑ́yɑ̈r yi wun, kì yethi pödhh-ɑ ɑ́kedhi yi wun. Keny-ɑ ónyudhɑ pödhh-ɑ kyeelø bëëdi nyingɑ gɑ kwërø, eni nying-ɑ ɑ́yɑ̈r yi wun kì kelli gen, óyod yi gen kinni yɑn ɑ bɑ Jwøng-ɑ Ácwɑ̈ɑ̈j. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb. Ge ónyudhɑ kì ri wun, kinni yɑ bɑ kwërø. Wu ókwɑnyɑ kì pödhhɑni bënn; wu ócøngɑ, kɑ wu kɑ̈ɑ̈lɑ pödhi wun. Ri wun ówïddɑ ki pïg dhïw, o wu dhïwi wun ki gïgrijjø møg-ɑ ɑ́gwøg yi wun geki ngïjji jwögg-ɑ pɑth bënn. Wu ónëngɑ ki pëëth mø nyɑ̈n geki rummì mø nyɑ̈n. Minni wun møg-ɑ teg ni tuggi kïttì ókɑ̈ɑ̈lɑ wɑ̈g, kɑ wu nëngɑ ki min møøgø mø bɑ rïngø. Wëyɑ ócïbɑ ri wun, kɑ wu wëggɑ mïdhi ciggɑ, kɑ møg-ɑ ɑ́cïgɑ wun bënn mïdhi yi wun. Codhe o wu óbëëd wun kì yij piny-ɑ ɑ́mëggɑ kweyyi wun. O wu bëëd wun, wun ɑ́ jiɑ, o yɑ óbëëdɑ yɑn ɑ́ Jwøøg wun. Wu óyielɑ ki jɑmm-ɑ nyi ywëdh wun, kɑ gemè wëggɑ cyegø, o bëëd e bong kɑ̈j men-ɑ ómɑg wun këti. Nywøli yenh ówëggɑ ngënyø kɑ jɑmmì wëggɑ cyegø, o bëëd e bong kɑ̈j men-ɑ óyɑ̈r wun këti kì kelli pödhh-ɑ kyeelø. O yëth-ɑ rijjø møg-ɑ ɑ́gwøg yi wun nyi pɑr yi wun geki rɑjj-ɑ ɑ́gøggi yi wun, o pëthi wun nyi rënyi gen ki ri wun, kì bɑng orøøg wun. Wu tyëng Isrɑil, yɑ dwɑdd-ɑ kinni, o yod yi wun kinni pɑth ki kiper wun ɑ gwøgɑ møgɑni bënn. Dɑ́ kipe kinni o wɑ̈thi wun lɑ̈ɑ̈y gen kì bɑng rɑjj-ɑ gøggi yi wun. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Keny-ɑ ólɑ̈ɑ̈nyɑ orøøg wun, kɑ wu gwøgɑ wu dhïw, wu ówëggɑ bëëdø kì yethi kɑ̈ddi wun, kɑ kɑ̈jj-ɑ ɑ́rënyi ger yi wun. Piny-ɑ ɑ́bëëd ɑ́ ryɑng ópur këti. Ji bënn ókööbø kinni piny-ɑ ɑ́bëëd ɑ́ pɑ̈l ɑ́göög ni bɑɑg Eden. O kɑ̈dd-ɑ ɑ́bëëd gɑ ryɑng ɑ́ger ki dör, o yethi gen obëëdø yi ji. Codhe, o yod yi pödhh-ɑ buti wun, møg-ɑ ɑ́döng kinni, yɑn yɑ Jwøng-ɑ Ácwɑ̈ɑ̈j ɑ ɑ́ger kɑ̈dd-ɑ ɑ́rënyi, kɑ pwödh døøgɑ ki pidhø. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb, o møgɑni gwøgɑ’ gwøgø.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Isrɑil ócigɑ wëggi kwɑjji yɑn kipe kønye, kwɑnni gen ówëggɑ ngënyø ni kwɑnni dyëg. Kɑ̈dd-ɑ rënyø ɑnɑn, ópɑ̈ng yi ji ni kɑ ɑ́bëëd Yerusɑlem, e pɑ̈ng yi dyëg-ɑ nyi muuj gɑ gëdhhi kwër. Codhe, o yod yi gen kinni yɑn ɑ bɑ Jwøng-ɑ Ácwɑ̈ɑ̈j.” Tegi Jwøng-ɑ Ácwɑ̈ɑ̈j ɑ́ying-ɑ kömɑ kɑ yɑ kɑ̈l yi wëye, ɑcïb gen yɑn piny kì yij tör me pɑ̈ng yi cu. Kɑ yɑ kɑ̈lle kì kelli gïn, ɑlidhɑ cu ge gïïr cɑrø, o ge thwøwø kinni gɑng. Aköbbe yɑn kinni, “Wɑ̈d dhɑnhø, cu møg ócuggø døøg be nënnø?” Alöggɑ kinni, “Yï ketí ɑ ngɑ̈nyi møgɑni, yïn ɑ Jwøng-ɑ Ácwɑ̈ɑ̈j!” Aköbbe yɑn kinni, “Töngí gen. Köbbí cu-ɑ thwøwø møgɑni kinni lïngi gen kwøbbi Jwøng-ɑ Ácwɑ̈ɑ̈j Töngí gen møg-ɑ köbbɑ gen, yɑ Wïlɑ̈bø Jwøng-ɑ Ácwɑ̈ɑ̈j kinni: Wu thödhɑ’ thödhø ki wëy, o wu døøg wun be nënnø. Wu óthödhɑ ki rɑ̈r geki rïng, o kömi gen kumɑ ki dël. Wu óthödhɑ ki wëy, o wu døøg wun be nënnø. Codhe, o yod yi wun kinni yɑn ɑ bɑ Jwøng-ɑ Ácwɑ̈ɑ̈j.” Codhe, ɑtöngɑ møg-ɑ ɑ́köbbi yɑn. Kɑ̈ng-ɑ ɑ́nudd yɑ okööbø, ɑlïngɑ ki cwɑg mø ywöngi kinni røk røk, kɑ cu ri gen cøng gen kej ɑ́kyel. Kɑ cu kum yi rɑ̈r geki rïngø, yɑ nudd yɑ onëënø, ɑkum gen yi dël. De bong wëy kì ri gen. Aköbbi yɑn yi Jwøk kinni, “Wɑ̈d dhɑnhø, töngí yømø kinni, Wïlɑ̈bø, Jwøng-ɑ Ácwɑ̈ɑ̈j okööbø kinni yømø, köní kì wɑ̈thi tùngi piny gɑ ɑ́ngwen, kɑ yï köddí ri tyëng-ɑ thøø ɑnɑn, o ge cɑ̈r gen.” Codhe, ɑtöngɑ møg-ɑ ɑ́köbbi yɑn. Akedhi wëy ri gen, ɑcɑ̈r gen, kɑ ge dhwödh-ɑ mɑl kömi tyelli gen. Ge bɑ yɑy me dwøng cɑrø. Codhe, ɑköbbi yɑn yi Jwøk kinni, “Wɑ̈d dhɑnhø, tyëng Isrɑil nɑ cuɑni. Ge okööbø ce ge thwøwø, o bong gïn ngɑ̈dh yi gen kipe dhuki megø. De köbbí jiɑ tyëng Isrɑil kinni, ge ókɑ̈ɑ̈lɑ wɑ̈g kì yethi rörri gen, kɑ ge kɑ̈ɑ̈lɑ piny Isrɑil. Keny-ɑ óyiebɑ rörri gen kɑ ge kɑ̈ɑ̈lɑ wɑ̈g, óyod yi gen kinni yɑn ɑ bɑ Jwøng-ɑ Ácwɑ̈ɑ̈j. Wëyɑ ókoodhɑ ri gen, o ge cɑ̈r gen, o ge ówëggɑ bëëdø kì yij piny gen. Codhe, o yod yi gen kinni yɑn ɑ bɑ Jwøng-ɑ Ácwɑ̈ɑ̈j. Møgɑni ɑ́kwøbɑ, o ge gwøgɑ’ gwøgø. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Aköbbi yɑn yi Jwøng-ɑ Ácwɑ̈ɑ̈j këti kinni, “Wɑ̈d dhɑnhø, kɑ̈bbí ki lodh kɑ köme gweed kinni, ‘Pödhi Rɑ̈ɑ̈dh Yeudiyɑ̀.’ Kɑ yï kɑ̈bbí ki lodh megø, kɑ köme gweed kinni, ‘Pödhi Rɑ̈ɑ̈dh Isrɑil.’ Kɑ lødhɑni ryeet mɑɑg e wɑ̈thi gen pɑ̈r, o ge nënni gen ge nɑ lodh ɑ́kyel. Keny-ɑ ópyëëj yïn yi tyëng pödhi wun ki gïn-ɑ wɑngi yi møgɑni, kɑ ge köbbí kinni: Wïlɑ̈bø Jwøng-ɑ Ácwɑ̈ɑ̈j okööbø kinni, loodh pödhi Isrɑil óreb yi yɑn geki loodh Yeudiyɑ̀. Ge ógwøgɑ gɑ lodh ɑ́kyel, o mïdhɑ kì cingɑ. “Mɑg lødhɑni ryeet kì cingí, kɑ wiy ge lidh yi ji. Codhe, kɑ ge köbbí kinni, Wïlɑ̈bø Jwøng-ɑ Ácwɑ̈ɑ̈j okööbø kinni: Jiɑ bënn kɑ̈ɑ̈lɑ’ wɑ̈g kì yethi pödhh-ɑ ɑ́kedhi yi gen, ge ócungɑ kì wɑ̈thi tùngi piny bënn, o ge kɑ̈ɑ̈lɑ piny gen. Ge ógwøgɑ gɑ pödhø ɑ́kyel kì wɑ̈thi kïtti Isrɑil. Ge ójɑɑg yi rɑ̈dh ɑ́kyel, ri gen koo cigi gen pɑ̈ngø gɑ pödhh ɑ́ryew. Ri gen koo bwöl yi gen ki ngïjji jwögg-ɑ pɑth; ngïjj-ɑ rijjø këti. Ge óyielɑ kì yij orøng-ɑ ɑ́gwøg yi gen. Ge ówëggɑ dhïwø. Ge óbëëdø gɑ jiɑ, o yɑ óbëëdø yɑn ɑ́ Jwøøg gen. Rɑ̈ɑ̈dh gen óni Debïd bɑ̈ngɑ. Ge óreb yi jɑgø ɑ́kyel, kɑ ciggɑ mïdhi yi gen kidøøj. Ge óbëëdø kì yij piny-ɑ ɑ́mëggɑ bɑ̈ngɑ Yɑgob; eni piny-ɑ ɑ́bëëd yi kweyyi gen cøn. Ge óbëëdø kì yije gïti ɑtheer geki nyigi gen kí kwɑrri gen thyew. Ge ójɑɑg yi rɑ̈dh me ni Debïd bɑ̈ngɑ gïti ɑtheer. Ge ónëngɑ ki mër gïti ɑtheer. Ge ócïbɑ piny kɑ kwɑnni gen wëggɑ ngënyø. Kengɑ ócïbɑ piny gen gïti ɑtheer. Yɑ óbëëdø kì kelli gen; yɑ óbëëdø yɑn ɑ́ Jwøøg gen, o ge óbëëdø gɑ jiɑ. Keny-ɑ ócïbɑ Kengø kelli gen gïti ɑtheer, óyod yi pödhh-ɑ kyeelø kinni, yɑ Jwøng-ɑ Ácwɑ̈ɑ̈j, Isrɑil ɑ́myegɑ gɑ jiɑ.” Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, töngí Gög, jɑngi Mecec geki Tubɑl kì pödhi Mɑgög. Töngí, kɑ köbbí kinni, yɑn yɑ Wïlɑ̈bø, Jwøng-ɑ Ácwɑ̈ɑ̈j, yɑ bɑ ngɑn mɑ̈n ki en. Ówinnɑ, kɑ órøme ngönɑ ki ɑbɑdh, kɑ dhurɑ wɑ̈g geki linye bëne. Linye geki kyënyi gen, kí jøkyënyì møg-ɑ rugø ki ógudh-ɑ myër ge ngenyø ki mendwøng, ge kɑ̈ll-ɑ ködd bënn kí pil. Jø Pɑres, kí jø Kuc, kí jø Put cyɑ̈dhi kɑ gøn, yï gen bënn dɑ ködd kí ɑcudh kì wɑ̈thi gen. Kí liny Gömer bëne geki Bet Tögɑrmɑ̀ kì wɑɑng wuudø, ge cyɑ̈dhi kɑ gøn, kí tyëng pödhh møøgø mø gïïr. Köbbí tyenye ree geki linye bëne. Kì bɑng runn mø gïïr, óköbbɑ mɑgi pönh-ɑ ɑ́kɑ̈ɑ̈l ji-ɑ ɑ́dwöög kì pödhh-ɑ kyeelø, o ge óbëëd ge bong liny me böggi yi gen. Kïtti Isrɑil ómɑg yi en; gen ɑ kïtt-ɑ ɑ́bëëd gɑ ryɑng ki keny me bɑ̈ɑ̈r, ɑ wɑ̈thi gen bëëd ɑnɑn e bong böögø. En geki linye kí tyëng pödhh-ɑ kyeelø bënn møg-ɑ cyɑ̈dhi ki en, ge ópɑ̈ɑ̈r kömi pönhɑni ni ɑtunø kɑ piny kum gen ni pøølø.” Møg-ɑ köbbi Gög yi Wïlɑ̈bø, Jwøng-ɑ Ácwɑ̈ɑ̈j ek: Keny-ɑ óbëën bøli kenyɑni, wïjí óbëën yi rummì mø rijjø. Yï ókööbø kinni yï kedh-ɑ be pɑ̈ɑ̈r kömi pödhø me bëëdø kì yij mër, e bong gïn böggi yi en; o bëëd ɑ yethi kɑ̈dd-ɑ nuti wenø ki dör, o bong gïn kor gen. Tyëng-ɑ bëëdø kì yethi kɑ̈dd-ɑ ɑ́bëëd gɑ ryɑng óyɑg yi yïn, kɑ jɑmmi gen kɑɑb. Ge ɑ́cungɑ kì kelli pödhh, o ɑnɑn yï gen dɑ dhög kí jɑmmì, o ge bëëd ɑ kì ɑ́kɑrri yëthi piny. Yï ópyëj yi tyëng Cebɑ̀, kí Dedɑn, kí jøngyew mø pödhi Tɑrcic kinni, ‘Yï ɑ́bï-ɑ be yɑg geki kɑ̈b? Yï ɑ́bï-ɑ be kɑ̈l ki ɑ́tegø kí dhɑb, kí dhög geki jɑmmì mø ngenyø?’ ” Codhe, ɑör yɑn yi Wïlɑ̈bø Jwøng-ɑ Ácwɑ̈ɑ̈j, be köbbi Gög kinni, “Kedh ɑnɑn kɑ̀ bëëd jiɑ, tyëng Isrɑil wɑ̈thi gen kïïdhø, kɑ̈l wɑɑng wuudø kun-ɑ lɑ̈wi, yï kwøll-ɑ liny me dwøng, liny teg, mɑ ɑ́cung kì kelli pödhh bënn, ge cyɑ̈dh-ɑ kyënyì bënn. Kɑ yï pɑ̈ɑ̈r kömi jiɑ tyëng Isrɑil, ni ɑtunø me köni yij piny. Keny-ɑ óbëën bøli kenyɑni yï ówëggɑ yɑgi pinyɑ, o yɑ óyod yi pödhh, o bëëdɑ yɑn ɑ́ kwërø nyodhɑ kì rií. Bene yïn ɑ ɑ́kømmɑ cøn, keny-ɑ ɑ́töngɑ møgɑni ki dhøggi bɑ̈nggɑ, jøtöng mø Isrɑil kinni, kì yethi cyɑ̈ngg-ɑ óbï, yɑ ókɑ̈ni ki dhɑnhø me pɑ̈ɑ̈r kömi Isrɑil.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Wïlɑ̈bø, Jwøng-ɑ Ácwɑ̈ɑ̈j okööbø kinni, “Kì cyɑ̈ng-ɑ óbëën Gög be yɑgi Isrɑil, yɑ ómɑg yi liny. Yɑ 'kööb-ɑ rɑ̈ji pyëwɑ kinni, kì cyɑ̈ngɑni piny ónhɑ̈nhi ki menrɑj kì Isrɑil. Rij bënn kí winy, kí lɑ̈yy-ɑ døngø geki møg-ɑ thønhø, kí dhɑnhø bëne kì wïj piny, ge ókïïr kì bølɑ. Kïttì ópɑ̈ɑ̈dh, kɑ gëlli kïttì ri gen møy gen, kɑ dör ópɑ̈nhø. Rɑj bënn ókɑ̈ɑ̈lɑ kömi Gög, ji ri gen ónɑ̈nggi yi gen. Ócɑyɑ ki rɑ̈ɑ̈m dël geki nɑ̈gi rek, kí kønh teg, kí ɑ́piy geki ɑtunø, kí mɑc geki kïbrït; ge ókønyɑ köme geki linye kí pödhh-ɑ ngenyø møg-ɑ ying tunge bënn. Bene yuu-ɑ ónyudhɑ döngɑ geki bëëdɑ yɑn ɑ́ kwërø pödhh-ɑ kyeelø. Codhe, o yod yi gen kinni yɑn ɑ bɑ Jwøng-ɑ Ácwɑ̈ɑ̈j.” Aköbbi yɑn yi Wïlɑ̈bø Jwøng-ɑ Ácwɑ̈ɑ̈j kinni, “Wɑ̈d dhɑnhø, töngí Gög, jɑngi Mecec geki Tubɑl, köbbí kinni yɑ bɑ ngɑn mɑ̈n ki en. Ódwøøgɑ e kɑ̈ɑ̈lɑ’ tung megø, kɑ kɑ̈ɑ̈lɑ kì wɑɑng wuudø kun-ɑ lɑ̈wi, kɑ kïdhɑ kïtti Isrɑil. Wethe ógøøjɑ piny kì cingi cɑɑme, kɑ nywøli wethe gøøjɑ piny kì cingi kyëje. Gög geki linye, kí tyëng-ɑ ying tunge bënn, ge ópɑ̈ɑ̈dh ge thøø kì wɑ̈thi kïttì Isrɑil, kɑ ge göjjɑ cɑmø yi winy geki lɑ̈yyi pɑ̈l. Ge ópɑ̈dhi pɑ̈l. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb. Yɑ óödi kömi piny Mɑgög ki mɑc, geki kömi tyëng-ɑ bëëdø kì kömi nɑ̈mmì e bong gïn tunggi gen, o óyod yi dhɑnhø bëne kinni yɑn ɑ bɑ Jwøng-ɑ Ácwɑ̈ɑ̈j. Nyingɑ kwërø ówëggɑ bëëdø ge ngɑ̈nyi kì Isrɑil, o nyingɑ kwërø koo wëggɑ bwölø këti. Codhe, o yod yi pödhh-ɑ kyeelø kinni yɑn yɑ Jwøng-ɑ Ácwɑ̈ɑ̈j, yɑ bɑ kwërø, Jwøøg Isrɑil.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Cyɑ̈ng-ɑ ɑ́kømmɑ óbï ceth. Tyëng-ɑ bëëdø kì kɑ̈ddi Isrɑil, ókedhi be gwen ki jɑmmi liny møg-ɑ döngø kì piny gɑ yugg. Ge ócwɑ̈gø ki mɑc ki ködd geki weth, ki nywøli weth, kí tøngg, kí lødh; gï ócwɑg yi gen ki runn ɑ́bïryew. Ge koo gwënø ki yugg, o ge koo ngudø ki yenh, mɑ́ yï gen ódi jɑmmi liny mø gïïr møg cwɑg yi gen. Tyëng-ɑ ɑ́yɑg gen kɑ jɑmmi gen kɑb gen, ólony yi gen ki yɑgø kɑ jɑmmi gïn kɑb gen.” Wïlɑ̈bø Jwøng-ɑ Ácwɑ̈ɑ̈j, ɑ́rum ki kwøb. Kɑ Jwøng-ɑ Ácwɑ̈ɑ̈j okööbø kinni, “Keny-ɑ ócwöb møgɑni bënn, Gög óthödhɑ ki keny konyii kì Isrɑil, kì yij Töör Wëll, kì wɑɑng cyɑ̈ɑ̈ng mwøl kì buti Luuy Omelø. Gög geki linye bëne ókony-ɑ kunɑni. Codhe o törɑni cɑg ɑ́ “Töör Yɑɑy Gög.” Isrɑil ótyëg-ɑ dwɑ̈tt ɑ́bïryew e okunyø ki ji, o piny dönye cyee. Tyëng pödhø bënn ókunyø; óbëëd ɑ́ cyɑ̈ɑ̈ng dhwɑ̈ɑ̈ng tyɑ̈mi Isrɑil; cyɑ̈ng-ɑ ónyodhɑ dhwɑ̈ngɑ.” Møg-ɑ ɑ́kwøb yi Wïlɑ̈bø, Jwøng-ɑ Ácwɑ̈ɑ̈j, ɑgɑk. Kì bɑng dwɑ̈tt ɑ́bïryew, ódi jøg-ɑ óyieny, o ge cyɑ̈dhi gen kì yij pödhø, ge yɑb-ɑ tyëng-ɑ döngø ge nuti konyø, o ge kony, o piny dönye. Ge ócyɑ̈dhi kì yij pödhø, o kenyi lidh gen cu dhɑnhø, o ge nyi cïbi gen bute ki ngïji, codhe o kunyì nyi bï gen, o cuɑni nyi koony yi gen Töör Yɑɑy Gög. Ódi kɑɑl me cyɑ̈gi men-ɑ ócɑ̈ggi nyingi linyɑni, codhe o piny døøge ki dönyø.” Yɑ ɑ́köbbi yi Wïlɑ̈bø, Jwøng-ɑ Ácwɑ̈ɑ̈j kinni, “Wɑ̈d dhɑnhø, köbbí winy bënn geki lɑ̈yyi pɑ̈l bënn kinni bï gen be cɑm ki gëdhhì møg-ɑ ɑ́ngɑ̈llɑ gen. Bɑ ryëj me dwøng kì wɑ̈thi kïttì Isrɑil, o ge cyɑ̈ɑ̈m gen ki rïngø, o ge mɑ̈ɑ̈dh gen ki remø. Ge cɑm-ɑ jøliny, o ge mɑdh-ɑ remmi jɑggi kömi piny, møg-ɑ ónɑ̈g bënn ni römm wɑlɑ̀ dyëg kí wɑ̈dhh-ɑ cwɑɑdhø. Keny-ɑ ónɑ̈gɑ ji ni kenyi ngɑɑl gëdhhì, winy geki lɑ̈yyi pɑ̈l ócyɑ̈mø ki rïng-ɑ rørø, kɑ ge oyɑ̈ngø; ge ómɑ̈ɑ̈dhø ki remø, kɑ wɑ̈thi gen owïïnø yi gøn. Ge ócyɑ̈mø kì tɑwɑ ki kyënyì, kí jøkyënyì, kí jøliny, kɑ ge oyɑ̈ngø. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j ɑ́kööb kinni, “Dhwɑ̈ngɑ ónyudhɑ pödhh-ɑ kyeelø, kɑ ge wëggɑ lidhi tegɑ geki cɑ́yɑ møg-ɑ bɑ dyër. O yod yi Isrɑil kinni yɑn ɑ bɑ Jwøng-ɑ Ácwɑ̈ɑ̈j, Jwøøg gen; cɑg kì cyɑ̈ngɑni gïti dhuki megø. O yod yi pödhh-ɑ kyeelø kinni tyëng Isrɑil ɑ́kïdhi yïnø kɑ per orøng-ɑ ɑ́gwøg yi gen kì bølɑ. Alugɑ ngɑ̈jɑ gen, ɑwëggɑ gen tyɑmø yi tyëng-ɑ mɑ̈n ki gen, kɑ ge nɑ̈g kì yij liny. Bɑ kì bɑng rɑ̈ji gen geki cödhi gen, ɑ ɑ́göggɑ gen gïn ni menɑni, ɑlugɑ ngɑ̈jɑ gen.” Akööb Wïlɑ̈bø Jwøng-ɑ Ácwɑ̈ɑ̈j kinni, “De ɑnɑn yijɑ óywöngi kipe kwɑrri Yɑgob; tyëng Isrɑil, ówëggɑ dönyø këti. Nyingɑ kwërø ókorrɑ. Keny-ɑ ópëggi gen yij piny gen e bong gïn-ɑ óböggi yi gen, o bong ngɑn tunggi gen, wɑ̈thi gen ówïl ki ɑyɑ̈r-ɑ ɑ́wiy gen yɑn piny. Kipe nyudhi pödhh-ɑ kyeelø kinni yɑ bɑ kwërø, jiɑ ódwöögɑ kì pödhhi tyëng-ɑ mɑ̈n ki gen. Codhe, o yod yi jiɑ kinni yɑn ɑ bɑ Jwøng-ɑ Ácwɑ̈ɑ̈j, Jwøøg gen; mɑ́ ge ɑ́kïdhɑ pödhh-ɑ kyeelø, o ɑnɑn ge cøngɑ’ cøngø kipe kinni o ge dwöögɑ piny gen, e bong dhɑnhø ɑ́kyel kì kelli gen, me döngi yïnø. Wëyɑ ókønyɑ kömi tyëng Isrɑil, o ge pɑ lugɑ ngɑ̈jɑ këti. Yɑ Wïlɑ̈bø, Jwøng-ɑ Ácwɑ̈ɑ̈j, yɑ ɑ́rum ki kwøb.” Kì pyɑ̈r ɑ́ryew wïdɑ́bïïj runni wøn kì yïnø, kì cyɑ̈nggi runn-ɑ nyɑ̈n pyɑ̈rø, o bɑ pyɑ̈rø wïdɑ́ngween runn kì bɑng mɑgi Yerusɑlem; cyɑ̈ngɑni ɑ ɑ́bëën tegi Jwøng-ɑ Ácwɑ̈ɑ̈j kömɑ. Akïdhi yɑn piny Isrɑil yi Jwøk, kɑ yɑ cïbe wïj kït me bɑ̈ɑ̈r, ɑlïdhɑ ki ud mø ni kɑɑl kì bølɑ. Keny-ɑ ɑ́nyiige yɑn buti kɑɑlɑni, ɑlidhɑ jɑl me rɑ̈nggø ni ngyënyø dilɑl, o cinge dɑ kor-ɑ yöm me bɑ ɑlɑdh, kí lonh-ɑ nyi rum; jɑlɑni cung-ɑ́ɑ̀ dhø döri kɑɑl. Aköbbi yɑn yi jɑlɑni kinni, “Wɑ̈d dhɑnhø, lïng kidøøj kɑ pyëwí cïb ri møg-ɑ nyudhɑ yïn bënn, kipe bene per gen ɑ ɑ́kɑ̈ɑ̈l yïn keny. Yïn ɑ óköbbi tyëng Isrɑil gïg-ɑ ólidh yi yïn bënn.” Alidhɑ Kengø e ówenø ki dörø. Kɑ lonh-ɑ nyi rum kwɑny jɑlɑni, lonhɑni bɑ̈re bɑ mïtïr ɑ́dɑ̈g, ɑrøme dörø. Ayode gøn e döre bɑ mïtïr ɑ́dɑ̈g, o pege bɑ mïtïr ɑ́dɑ̈g, Codhe, ɑbëëne dhøng-ɑ nenni wɑɑng cyɑ̈ɑ̈ng mwøl, kɑ yedh-ɑ mɑl, ɑrøme dhøngɑni kì mɑl; bɑ mïtïr ɑ́dɑ̈g eni bɑ̈re e rïng-ɑ piny. Ngɑ̈je ɑ́dɑ udd-ɑ nyi kur ɑ́dɑ̈g kì tuung kí ɑ́dɑ̈g kì tuung, uddɑni bɑ óør, o bɑ̈ri ngëdø ɑ́kyel bɑ mïtïr ɑ́dɑ̈g; o dör-ɑ kɑɑm gen bɑ mïtïr ɑ́ryew kí budi mïtïr. Kɑ̀ pöödh uddɑni dɑ kɑɑm me kedhi yiny-ɑ ød, e rwöm ki Kengø; bɑ̈ri kɑɑmɑni bɑ mïtïr ɑ́dɑ̈g. (Udd-ɑ nyi kur møg-ɑ ying tøggi kɑɑm-ɑ nyi kɑ̈ɑ̈l, lɑ̈ji yethi gen pɑ̈r bënn, o pegi dörr-ɑ kɑɑm gen pɑ̈r bënn thyew.) Codhe, ɑrøm lɑ̈ji yij kɑɑm-ɑ nyi kɑ̈ɑ̈l yi jɑlɑni, ɑyode gøn ɑ́ mïtïr ɑ́bïkyel kí budi mïtïr, o kɑɑm dhøng-ɑ kedhi wɑ̈g bɑ mïtïr ɑ́bïj. Kì bøli udd-ɑ nyi kur bënn dɑ dörø me cyeg, me bɑ̈re bɑ sentimïtïr pyɑ̈r ɑ́bïj, o pege bɑ sentimïtïr pyɑ̈r ɑ́bïj thyew, (lɑ̈ji yethi uddi kur møgɑni bɑ mïtïr ɑ́dɑ̈g.) Codhe, ɑrøme kɑɑm-ɑ cɑ̈gi kì ri dör-ɑ cyɑ̈n kì ri uddɑni e cør-ɑ dïdyëri kɑɑm-ɑ nyi kɑ̈ɑ̈l, ɑyode gøn ɑ́ mïtïr pyɑ̈rø wïdɑ́ryew kí budi mïtïr. Arøme øn-ɑ cyɑ̈n kì yuu-ɑ kedhi wɑ̈g, ɑyode lɑ̈ji yije ɑ́ mïtïr pyɑ̈rø. Bɑ̈ri kö yuu dhøng-ɑ kɑ̈ɑ̈l wɑ̈g bëne, cɑg kì ri dör-ɑ wɑ̈g kì ri dhøg, pïd øn-ɑ cyɑ̈n bɑ mïtïr pyɑ̈r ɑ́ryew wïdɑ́bïj. Dɑ ɑwɑjj kì ri dörr-ɑ wɑ̈g kì ri uddɑni bënn geki ri dörr-ɑ ying kɑɑm uddɑni kì yiny-ɑ ød. Dɑ ngïjji yenh benø møg-ɑ ótwegø kì ri dörr-ɑ yiny-ɑ ød, ɑ nenni kɑɑm-ɑ nyi kɑ̈ɑ̈l. Akïdhi yɑn ódɑ̈rø yi jɑlɑni wø kɑ̈l-ɑ dhøng-ɑ kedhi wɑ̈g. Dɑ ud pyɑ̈r ɑ́dɑ̈g møg-ɑ ógerø ni dörr-ɑ yiny-ɑ wɑ̈g, bøli gen dɑ keny me di ópɑddi kïttì me pödhø e wen-ɑ ódɑ̈rø. Ódɑ̈ri yiny-ɑ wɑ̈g bɑ mɑ̈ɑ̈dø kì bøli ódɑ̈ri yiny-ɑ ød. Ádɑ dhøg me ying kuni mɑl me kedhi ódɑ̈ri yiny-ɑ ød. Kɑ kɑɑm dhøggɑni gɑ ɑ́ryew røm yi jɑlɑni, ɑyode gøn ɑ́ mïtïr pyɑ̈r ɑ́bïj. Codhe, ɑrøm dhøg yuu-ɑ wɑɑng wuudø men-ɑ kedhi ódɑ̈r-ɑ yiny-ɑ wɑ̈g yi jɑlɑni. Kí ud ɑ́dɑ̈g møg-ɑ tøggi kɑɑm-ɑ nyi kɑ̈ɑ̈l gɑ ɑ́ryew, kí dörr-ɑ kɑɑm gen, kí øn-ɑ yije nyi kɑ̈ɑ̈l. Ayode gïn ge pɑ̈r ki udd-ɑ wɑɑng cyɑ̈ɑ̈ng mwøl bënn. Bɑ̈ri dhø kɑl bɑ mïtïr pyɑ̈r ɑ́ryew wïdɑ́bïj, o lɑ̈ji yije bɑ mïtïr pyɑ̈rø wïdɑ́ryew kí budi mïtïr. Øn-ɑ yije nyi kɑ̈ɑ̈l, kí ɑwɑjj, kí ngïjji yenh benø møg-ɑ ótwegø nɑ møg-ɑ ying dhøg wɑɑng cyɑ̈ɑ̈ng mwøl. Dɑ pɑ̈ltyel møg nyi yedhi mɑl gɑ ɑ́bïryew, møg kedhi dhøg dörø, o øn-ɑ yije nyi kɑ̈ɑ̈l ying-ɑ cyɑ̈n, e nenn-ɑ ódɑ̈rø. Kì kɑɑm-ɑ bɑ̈ɑ̈n ódɑ̈rɑni kì dhøg wɑɑng wuudø, dɑ dhøg megø me kedhi ódɑ̈r-ɑ yiny-ɑ ød, ni men-ɑ dhøg wɑɑng cyɑ̈ɑ̈ng mwøl ceth. Arøm kɑɑm dhøggɑni gɑ ɑ́ryew yi jɑlɑni, ɑyode gøn ɑ́ mïtïr pyɑ̈r ɑ́bïj. Codhe, ɑkïdhi yɑn tung-ɑ wɑɑng wurlwɑl yi jɑlɑni, ɑlïdhɑ ki dhøg megø kì kunɑni, ɑrøme dörr-ɑ yiny-ɑ ød, geki øn-ɑ ri dhøg. Ayode gïn ge nɑ møg-ɑ kyeelø ceth. Dɑ ɑwɑjj kì ri ud ni møg-ɑ kyeelø. Bɑ̈ri kɑɑm-ɑ nyi kɑ̈ɑ̈l bëne bɑ mïtïr pyɑ̈r ɑ́ryew wïdɑ́bïj; o lɑ̈je bɑ mïtïr pyɑ̈rø wïdɑ́ryew kí budi mïtïr. Dɑ pɑ̈ltyel møg nyi yedhi mɑl gɑ ɑ́bïryew, møg kedhi dhøg ódɑ̈rø thyew. Dɑ ngïjji yenh benø møg-ɑ ótwegø kì ri dörr-ɑ yiny-ɑ ød, mø nenni yuu-ɑ yije nyi kɑ̈ɑ̈l. Dɑ yöö thyew me kedhi dhøg ódɑ̈ri yiny-ɑ ød. Arøm kɑɑm dhøggɑni, ɑyode gøn ɑ́ mïtïr pyɑ̈r ɑ́bïj. Akïdhi yɑn yiny-ɑ ød yi jɑlɑni, yɑ kɑ̈ɑ̈le’ dhøg wɑɑng wurlwɑl. Arøme yij yuuɑni, o yode gøn e pɑ̈r ki yuu-ɑ ying dhøng-ɑ yiny-ɑ wɑ̈g. Øn-ɑ yije nyi kɑ̈ɑ̈l nenn-ɑ ódɑ̈r-ɑ kyeelø. Dɑ ngïjji yenh benø møg-ɑ ótwegø kì ri dörri kɑɑm-ɑ nyi kɑ̈ɑ̈l; pɑ̈ltyel møg-ɑ yedhi dhøngɑni bɑ ɑ́bïdɑ̈g. Akïdhi yɑn ódɑ̈ri yiny-ɑ ød yi jɑlɑni, yɑ kɑ̈ɑ̈l-ɑ dhøg wɑɑng cyɑ̈ɑ̈ng mwøl. Arøme dhøngɑni, ɑyode gøn e pɑ̈r ki møg-ɑ kyeelø. Udd-ɑ nyi kur, kí øn-ɑ yije nyi kɑ̈ɑ̈l, kí dörr-ɑ yiny-ɑ ød, pɑ̈r ki møg-ɑ ying dhøgg-ɑ kyeelø. Øn-ɑ yije nyi kɑ̈ɑ̈l ówenø yi ɑwɑjj. Bɑ̈ri dhøng-ɑ yiny-ɑ ød kì wɑɑng cyɑ̈ɑ̈ng mwøl, bɑ mïtïr pyɑ̈r ɑ́ryew wïdɑ́bïj, o lɑ̈ji yije bɑ mïtïr pyɑ̈rø wïdɑ́ryew kí budi mïtïr. Øn-ɑ yije nyi kɑ̈ɑ̈l nenn-ɑ ódɑ̈ri yiny-ɑ wɑ̈g. Dɑ ngïjji yenh benø møg-ɑ ótwegø kì ri dörri kɑɑm-ɑ nyi kɑ̈ɑ̈l; pɑ̈ltyel møg-ɑ nyi yedhi dhøngɑni bɑ ɑ́bïdɑ̈g. Akïdhi yɑn dhøng-ɑ wɑɑng wuudø yi jɑlɑni. Arøme gøn, ɑyode gøn e pɑ̈r ki møg-ɑ kyeelø. Pɑ̈r ki gen; yije dɑ ud, kí dörr-ɑ yiny-ɑ ød, kí kɑɑm-ɑ nyi kɑ̈ɑ̈l. Bɑ̈re bëne bɑ mïtïr pyɑ̈r ɑ́ryew wïdɑ́bïj, o lɑ̈ji yije bɑ mïtïr pyɑ̈rø wïdɑ́ryew kí budi mïtïr. Øn-ɑ yije nyi kɑ̈ɑ̈l nenn-ɑ ódɑ̈ri yiny-ɑ wɑ̈g. Dɑ ngïjji yenh benø møg-ɑ ótwegø kì ri dörri kɑɑm-ɑ nyi kɑ̈ɑ̈l; pɑ̈ltyel møg-ɑ nyi yedhi dhøngɑni bɑ ɑ́bïdɑ̈g. Kì ódɑ̈r-ɑ wɑ̈g, dɑ ød me ying ri dhøng-ɑ wɑɑng wuudø. Øn-ɑ yije nyi kɑ̈ɑ̈l, nenn-ɑ ódɑ̈rɑni, o bɑ yije ɑ nyi lwøøg lɑ̈yy-ɑ nyi rɑ̈b bënn gɑ gëdhhì. Yij øn-ɑ nyi kɑ̈ɑ̈l menɑni dɑ tɑrɑbedhh ɑ́ngwen, ɑ́ryew kì tuung, kí ɑ́ryew kì tuung. Lɑ̈yy-ɑ muuj gɑ gëdhhì nyi nɑ̈g-ɑ wɑ̈thi tɑrɑdhhɑni, ying gɑ gënh-ɑ nyi rɑ̈b bëne, wɑlɑ̀ gëdhhi orøg, wɑlɑ̀ gëdhhi bɑ̈jjø. Dɑ tɑrɑbedhh ɑ́ngwen mø ni mø tyeli mɑl kì wɑ̈g, ɑ́ryew kì tuung kí ɑ́ryew kì tuung kì ri yuu-ɑ nyi kɑ̈ɑ̈l kì dhøng-ɑ wɑɑng wuudø. Tɑrɑbedhh-ɑ wɑ̈thi gen nyi ngɑɑl lɑ̈yy-ɑ nyi muuj gɑ gëdhhi bënn, bɑ ɑ́bïdɑ̈g; ɑ́ngwen ɑ ying ød, o ɑ́ngwen ɑ ying wɑ̈g kì ódɑ̈rø. Tɑrɑbedhh ɑ́ngwen møg-ɑ ød, bɑ møg kömi gen nyi gwiir gënh-ɑ rɑ̈b bëne, tɑrɑbedhhɑni bɑ ɑngøl kì ri kït. Bɑ̈ri gen bɑ sentimïtïr pyɑ̈r ɑ́bïj, o lɑ̈ji wɑ̈thi gen bɑ sentimïtïr pyɑ̈r ɑ́bïryew wïdɑ́bïj. Gïg-ɑ nyi ngɑɑl lɑ̈yyɑni bënn nyi ying-ɑ wɑ̈thi tɑrɑbedhhɑni. Dɑ odöbb mø lɑ̈ji yethi gen bɑ mïlimïtïr pyɑ̈r ɑ́bïryew wïdɑ́bïj, møg-ɑ ówen tøggi tɑrɑbedhhɑni. Rïng-ɑ dwɑddi muujø ɑ́ gëëdhi nyi cïb-ɑ wɑ̈thi tɑrɑbedhhɑni. Codhe, ɑkɑ̈ɑ̈le yɑn ódɑ̈r-ɑ yiny-ɑ ød. Dɑ ud ɑ́ryew kì kenyɑni, ɑ́kyel nenn-ɑ wɑɑng wurlwɑl kì buti dhøg wɑɑng wuudø, o men-ɑ kyeelø nenn-ɑ wɑɑng wuudø kì buti dhø wɑɑng wurlwɑl. Aköbbi yɑn yi jɑlɑni kinni i øn-ɑ nenni wɑɑng wurlwɑl bɑ mi ókwërr-ɑ nyi göögø kì yij Kengø. O øn-ɑ nenni wɑɑng wuudø bɑ mi ókwërr-ɑ nyi göögø kì wïj këli lɑm. Ókwërrɑni bënn bɑ kwɑrri Dhɑdök, bene gen jø gøl Leebì møg-ɑ bɑ ɑyïëy ki kedhi be gwøg kì bøli Jwøng-ɑ Ácwɑ̈ɑ̈j. Arøm ódɑ̈ri yiny-ɑ ød yi jɑlɑni, ɑyode lɑ̈ji yije ɑ́ mïtïr pyɑ̈r ɑ́ryew wïdɑ́bïj. Kengø ying-ɑ wɑɑng cyɑ̈ɑ̈ng böörø, o këli lɑm ying-ɑ bøle. Akïdhe yɑn øn-ɑ yije nyi kɑ̈ɑ̈l ji kedh-ɑ Kengø, ɑrøme gøn, ɑyode gøn e ludhø ki mïtïr ɑ́ryew kí budi mïtïr, o lɑ̈je bɑ mïtïr ɑ́bïryew, o pegi dörre bɑ mïtïr kí budi mïtïr kì wɑ̈thi tùnge gɑ ɑ́ryew. Dɑ pɑ̈ltyel møg-ɑ kedhi ønɑni; lɑ̈ji ønɑni bɑ mïtïr pyɑ̈rø, o bɑ̈re bɑ mïtïr ɑ́bïkyel e reng-ɑ piny. Dɑ löjj ɑ́ryew kì dhø ønɑni; ɑ́kyel kì tuung kí ɑ́kyel kì tuung. Codhe, ɑkïdhi yɑn øn-ɑ dïdyër, ɑ bɑ Kej Kwërdwøng, yi jɑlɑni. Arøme yuu-ɑ kedhi ønɑni, ɑyode bɑ̈re ɑ́ mïtïr ɑ́dɑ̈g, o lɑ̈je bɑ mïtïr ɑ́bïj, o pegi döre bɑ mïtïr ɑ́ryew kí budi mïtïr, kì wɑ̈thi tùnge ryeet. Kɑ ønɑni røme, kɑ bɑ̈re yode ɑ́ mïtïr pyɑ̈r ɑ́ryew, o lɑ̈je bɑ mïtïr pyɑ̈rø. Codhe ɑkedhe ønɑni, kɑ kɑɑm-ɑ kedhi yije røme; ludhø ki mïtïr ɑ́kyel, o lɑ̈je bɑ mïtïr ɑ́dɑ̈g, o pegi döre kì wɑ̈thi tùnge ryeet bɑ mïtïr ɑ́dɑ̈g kí budi mïtïr. Arøme ød, kɑ gø yode ɑ́ óør, bɑ̈re bɑ mïtïr pyɑ̈rø. Ønɑni ying-ɑ ngɑ̈ɑ̈j øn-ɑ dïdyër. Codhe, ɑköbbe yɑn kinni, “Øn, bene Kej Kwërdwøng.” Arøm pegi döri Kengø kì yiny-ɑ ød yi jɑlɑni, ɑyode gøn ɑ́ mïtïr ɑ́dɑ̈g. Dörɑni bëne ówenø ki ud møg-ɑ ómyerø, lɑ̈ji ød ɑ́kyel bɑ mïtïr ɑ́ryew. Uddɑni ógerø gɑ ɑtødd ɑ́dɑ̈g, ge ómyeer mɑl, o ɑtød ɑ́kyel yije dɑ ud pyɑ̈r ɑ́dɑ̈g. Döri Kengø men-ɑ ying ɑtøn-ɑ mɑl reeb kibøli men-ɑ wïje di en, kipe kinni o ud ying gen kömi nyïɑ̈rø, ge pɑth ki ɑmin kì ri döri Kengø. Kɑ̀ liidh döri Kengø kì yiny-ɑ wɑ̈g, nënni pege pɑ̈r cɑg kì piny gïti mɑl. Dɑ pɑ̈ltyel møg nyi yedhi mɑl gɑ ɑ́ryew kì nyingi ngëddi Kengø gɑ mø nyi kedhi ɑtøød udd-ɑ dïdyër geki ɑtøn-ɑ mɑl. Kì cögi dörɑni kì wɑɑng cyɑ̈ɑ̈ng böörø kì ri Kengø dɑ ød men-ɑ ógerø, bɑ̈re bɑ mïtïr pyɑ̈r ɑ́ngwen, o lɑ̈je bɑ mïtïr pyɑ̈r ɑ́dɑ̈g wïdɑ́bïj, o döre bëne pege bɑ mïtïr ɑ́ryew kí budi mïtïr. Arøm Kengø kì yiny-ɑ wɑ̈g yi jɑlɑni, ɑyode bɑ̈re ɑ́ mïtïr pyɑ̈r ɑ́bïj. O cɑg kì ngɑ̈ɑ̈j Kengø, e cør-ɑ ódɑ̈rø gïti cögi Kengø kì wɑɑng cyɑ̈ɑ̈ng böörø, bɑ mïtïr pyɑ̈r ɑ́bïj thyew. Keny-ɑ kɑ̈l bøli Kengø reb ki kɑ̈jj-ɑ bɑ ɑyieb kì nyingi ngëdde, bɑ mïtïr pyɑ̈r ɑ́bïj thyew. Arøme keny-ɑ ógerø kì wɑɑng cyɑ̈ɑ̈ng böörø, reb ki kɑ̈jj-ɑ bɑ ɑyieb kì wɑ̈thi tùnge ryeet, ɑyode gøn ɑ́ mïtïr pyɑ̈r ɑ́bïj thyew. Øn-ɑ yije nyi kedhi Kengø geki kej kwër, kí Kej Kwërdwøng ge bɑ ɑtɑg ki yenh kì wɑ̈thi tùng bënn, cɑg kì piny gïti ri ɑwɑjj. Döri Kengø kì yiny-ɑ ød bëne, e wɑ̈dh-ɑ wïj dhø ød, ótwïggø bëne ki ngïjji yenh benø geki kerobb, ge ómyerø; ngïji yɑdh benø kí ngïji kerob. Kerob ɑ́kyel yïe dɑ bøll ɑ́ryew; yïe dɑ bøli dhɑnhø me nenni yï yɑdh benø kì tuung, kí bøli ngur me nenni yï yɑdh benø kì tung-ɑ kyeelø. Dörø ówenø kinøw bëne, cɑg kì piny gïti wɑ̈thi dhøggi ud kì mɑl. Wɑ̈thi tùngi rïwwi dhø Kej Kwërdwøng gɑ ɑ́ngwen pɑ̈r. Bøli dhøng-ɑ kedhi Kej Kwërdwøng, dɑ gïjø me ni këli lɑm me bɑ pɑ̈m. Bɑ̈re bɑ mïtïr ɑ́kyel kí budi mïtïr, o lɑ̈je bɑ mïtïr ɑ́kyel. Wɑ̈thi tùnge, kí thɑre geki tøgge bënn bɑ pɑ̈m. Aköbbi yɑn yi jɑlɑni kinni, “Men bene tɑrɑbenh-ɑ nyi ying bøli Jwøng-ɑ Ácwɑ̈ɑ̈j.” Kì cɑ̈gi kɑɑm-ɑ nyi kɑ̈ɑ̈l, dɑ dhøg me kedhi Kej Kwër, kí dhøg me kedhi Kej Kwërdwøng. Thïggi dhøggɑni ryeet bɑ ɑ́buddiryew, e yïëbb-ɑ tuung kí tuung. Dɑ ngïjji yenh benø kí kerobb møg-ɑ ótwegø kì kömi thïgi Kej Kwërdwøng, ni møg-ɑ ri dörø. O dɑ gëng mɑ pɑ̈m kì wɑ̈g kì bøli dhøg øn-ɑ yije nyi kɑ̈ɑ̈l. Dɑ ɑwɑjj kì nyingi ngëddi ønɑni, o dörø bëne ótwïggø ki ngïjji yenh benø. Codhe, ɑkïdhi yɑn ódɑ̈ri yiny-ɑ wɑ̈g yi jɑlɑni, kɑ yɑ kïdhe øn-ɑ wɑɑng wuudø kì buti Kengø, ønɑni pɑ lɑ̈wi ki øn-ɑ cögi Kengø kì wɑɑng cyɑ̈ɑ̈ng böörø. Bɑ̈ri ønɑni bɑ mïtïr pyɑ̈r ɑ́bïj, o lɑ̈je bɑ mïtïr pyɑ̈r ɑ́ryew wïdɑ́bïj. Kì tung megø ønɑni nenn-ɑ ódɑ̈rø me bɑ̈re bɑ mïtïr pyɑ̈rø, me kɑ̈l ri Kengø, o kì yiny-ɑ wɑ̈g nenn-ɑ yuu ódɑ̈ri wɑ̈g. Bɑ ɑger ɑ́ ɑtødd ɑ́dɑ̈g, o ge kedh-ɑ mɑl, ɑtøn-ɑ mɑl cɑ̈mm-ɑ cyɑ̈n kibøli men-ɑ wïje di en. Kì wɑɑng wuudø kì ri ønɑni dɑ keny nyi kɑ̈ɑ̈l me bɑ̈re bɑ mïtïr ɑ́bïj, o lɑ̈je bɑ mïtïr pyɑ̈r ɑ́bïj, o dhøge yïëbb-ɑ tungɑni. Udd-ɑ mɑl yethi gen nøg kibøli mø dïdyër geki møg-ɑ piny, mɑ́ møgɑni cɑ̈mm-ɑ ri gen. Udd-ɑ mɑl mïdh-ɑ yi møg-ɑ ying piny, bene ɑ bëëd møg-ɑ ying ɑtøn-ɑ dïdyër geki møg-ɑ ying ɑtøn-ɑ mɑl bong löjj mø mïdhi gen ni udd-ɑ ying ódɑ̈rø. Bøli uddɑni, ɑ́dɑ kɑɑm-ɑ nyi kɑ̈ɑ̈l me pɑ̈r ki men-ɑ wɑɑng wuudø; lɑ̈ji gen pɑ̈r, geri gen pɑ̈r, o dhøggi gen pɑ̈r thyew. Ádɑ dhøg kì thɑ́ uddɑni kì wɑɑng wurlwɑl kì kuni wɑɑng cyɑ̈ɑ̈ng mwøl keny-ɑ cɑ̈gi yi dörɑni. Aköbbi yɑn yi jɑlɑni kinni, “Ud møg bënn bɑ uddi kwër. Yethi gen ɑ nyi cɑɑm jɑmm-ɑ ɑ́muuj gɑ mø kwër yi ókwërr-ɑ nyi kedhi be gwøg kì bøli Jwøng-ɑ Ácwɑ̈ɑ̈j. Kì bɑng kɑ̀ bëëd uddɑni gɑ kɑ̈jji kwër, jɑmmi kwëër dwøng nyi cïb-ɑ yethi gen yi ókwër, ɑ løg. Byel geki gëdhh-ɑ nyi muuj gɑ mø orøg geki mø bɑ̈jjø. Kenyi dwɑddi ókwër bëën wɑ̈g kì Kengø, ógudhi kwër møg-ɑ ɑ́göög yi gen kì bøli Jwøng-ɑ Ácwɑ̈ɑ̈j, nyi wiy-ɑ uddi kwër yi gen. Ri gen nyi ceg kɑ kïdhø yi gen ki ógudh møøgø, codhe o ge kedhi gen keny-ɑ di ji.” Keny-ɑ ɑ́rum jɑlɑni ki rømi kej Kengø kì yiny-ɑ ød, ɑkɑ̈ɑ̈le yɑn wɑ̈g ki dhøng-ɑ wɑɑng cyɑ̈ɑ̈ng mwøl, codhe ɑrøme kej Kengø kì yiny-ɑ wɑ̈g. Akwɑnye rumi kɑ tung-ɑ wɑɑng cyɑ̈ɑ̈ng mwøl røme, ɑyode gøn ɑ́ mïtïr miy ɑ́ryew kí pyɑ̈r ɑ́bïj Kipe kinni o tùnge bënn gɑ ɑ́ngwen bëëd ge pɑ̈r gɑ mïtïr miy ɑ́ryew kí pyɑ̈r ɑ́bïj. Dörø bɑ en ɑ dɑ̈ɑ̈ng kej kwër geki keny-ɑ pɑth ki kej kwër. Akïdhi yɑn dhøng-ɑ nenni wɑɑng cyɑ̈ɑ̈ng mwøl yi jɑlɑni, mɑ̈ɑ̈r Jwøøg Isrɑil ɑ́bëëd e omënyø e kɑ̈ɑ̈l-ɑ tungɑni. Cwɑggi Jwøk nɑ ɑpɑgi nɑɑm omelø, kɑ piny meny yi cɑrɑni. Møg-ɑ ɑ́cɑ̈rri yɑn kì keny nɑ møg-ɑ ɑ́lidhɑ keny-ɑ ɑ́bëën Jwøk be rënyi Yerusɑlem, geki møg-ɑ ɑ́lidhɑ kì kömi Nɑm Kebɑr. Codhe, ɑleengɑ riɑ piny e wïjɑ këël yɑn piny. Abëën cɑɑr Jwøng-ɑ Ácwɑ̈ɑ̈j yij Kengø ki dhøng-ɑ wɑɑng cyɑ̈ɑ̈ng mwøl. Kɑ yɑ tïng mɑl yi wëyi Jwøng-ɑ Ácwɑ̈ɑ̈j, kɑ yɑ kïdhi gen ódɑ̈r-ɑ yiny-ɑ ød, ɑlidhɑ Kengø e pɑ̈ngø yi mɑ̈ɑ̈r Jwøng-ɑ Ácwɑ̈ɑ̈j. Acungi jɑlɑni kì butɑ, ɑlïngɑ Wë e kööbø kɑ yɑn kì yij Kengø kinni, “Wɑ̈d dhɑnhø, men bene kwømɑ, keny-ɑ óbëëdɑ kì kelli tyëng Isrɑil, o ge jɑɑgɑ gïti ɑtheer. Nyingɑ kwërø koo bwöl yi tyëng Isrɑil këti ki mɑlli jwögg-ɑ pɑth geki konyi rɑ̈nhi gen kì kɑ̈jji mɑlli jwöggɑni. Kí kɑ ɑ́geer gen tëddi uddi gen ri tëëd ødɑ, o rïwwi uddi gen ying-ɑ ri rïwwi ødɑ, o bɑ dörø ɑ kɑɑm wøn, ɑbwöl gen nyingɑ kwërø, ɑ bɑnge nɑ̈gɑ gen ki rɑ̈ji pyëwɑ. Wïyi gen ɑnɑn ceth ki mɑlli jwögg-ɑ pɑth, kɑ rɑ̈nhi gen møg-ɑ ɑ́thøw nyiing gen, o yɑ bëëdɑ kì kelli gen gïti ɑtheer. “Yïn wɑ̈d dhɑnhø, ceg tyëng Isrɑil kipe Kengø, o këër gwiri gwøge yod yi gen. O wɑ̈thi gen lɑ̈ɑ̈y gen kì bɑng orøøg gen. Keny-ɑ ólɑ̈ɑ̈y wɑ̈thi gen yi gïg-ɑ ɑ́gwøg yi gen, kɑ ge nyudhí kër-ɑ ógeer Kengø; ɑ løg yëth-ɑ ógwiirii, kí dhøgg-ɑ nyi kedhi yije geki dhøgg-ɑ nyi dwöög wɑ̈g, kí bëëde bëne, kí pyëli jɑmmì bënn, kí cigge bënn. Gwëdí møgɑni gen bënn, o gï yod gen; gen ɑ yëth-ɑ nyi gwøøg gen, o møg-ɑ ɑ́ceg bënn cuggi gen ki gwøgø yi gen. Ciggi Kengø ek: Keny-ɑ bɑdhhe bëne kì wïj kït bɑ kej kwër.” Bëëdi këli lɑm èn: kɑ̀ rømii ki rum-ɑ ɑ́røm Kengø; yije ludhø ki sentimïtïr pyɑ̈r ɑ́bïj, o lɑ̈je bɑ sentimïtïr pyɑ̈r ɑ́bïj, o nyɑ̈re kì tøgge yiny-ɑ wɑ̈g bɑ sentimïtïr pyɑ̈r ɑ́ryew wïdɑ́bïj. Kɑɑm cɑ̈gi këli lɑm kì piny kì thɑw-ɑ mɑl, bɑ̈re bɑ mïtïr ɑ́kyel. Bun-ɑ kyeelø cöd-ɑ cyɑ̈n kì tøgge bënn ki sentimïtïr pyɑ̈r ɑ́bïj, o bɑ̈re bɑ mïtïr ɑ́ryew. O bun-ɑ bɑnge cöd-ɑ cyɑ̈n thyew kì tøgge bënn ki sentimïtïr pyɑ̈r ɑ́bïj. Tung-ɑ mɑl, ɑ wïje nyi rɑ̈ɑ̈b gëdhhì, bɑ̈re bɑ mïtïr ɑ́ryew, wɑ̈thi tøgge gɑ ɑ́ngwen dɑ tùng mø töngi mɑl. Wïj këlø bɑ óør, bɑ̈re bɑ mïtïr ɑ́bïkyel kì wɑ̈thi tùnge bënn. Dïdyëre kì mɑl bɑ óør thyew, bɑ̈re bɑ mïtïr ɑ́bïryew, o lɑ̈je nɑ menɑni, o nyɑ̈rø kì yiny-ɑ wɑ̈g bɑ sentimïtïr pyɑ̈r ɑ́ryew wïdɑ́bïj. (Lɑ̈ji nyɑ̈re bɑ sentimïtïr pyɑ̈r ɑ́ryew wïdɑ́bïj,) o pɑ̈ltyell-ɑ nyi yedhi mɑl kì ri këli lɑm ying-ɑ wɑɑng cyɑ̈ɑ̈ng mwøl. Aköbbi yɑn yi Wïlɑ̈bø, Jwøng-ɑ Ácwɑ̈ɑ̈j kinni, “Wɑ̈d dhɑnhø, lïngí møg-ɑ köbbɑ yïn. Keny-ɑ ógeer këli lɑm kɑ ókwëër, yï rɑ̈b-ɑ gëëdhi kì wïje, kɑ ree wïddí ki remi gëëdhi. Ókwërr-ɑ bɑ wɑ̈ddi gøl Leebì, ɑ bɑ kwɑrri Dhɑdök keti gen ɑ bɑ ɑyïëy ki bëën bølɑ be gwøg. Yɑ Wïlɑ̈bø, Jwøng-ɑ Ácwɑ̈ɑ̈j, ɑ ɑ́kwøb møgɑni. Kɑ ge nëngí ki wɑdh ówöb me muuj ɑ́ gënhi orøg. Kɑ yï kɑ̈bbí ki kwï reme, kɑ gɑ̈ɑ̈j ri tøggi këlø, kì wɑ̈thi tùnge bënn, kí wɑ̈thi tùngi yiny-ɑ ludhø, geki tøggi këlø bënn. Bene kër-ɑ ókwëër këlø ɑnɑn, kipe kinni o dhïwe. Kɑ wɑdh kwɑɑny kɑ rɑ̈ɑ̈b kì keny-ɑ ɑ́gwøg kipe gwøngɑni kì wɑ̈g. Dhuki kɑ yï kɑ̈bbí ki ónywøg me bong gïnrɑj kì ree, kɑ muuj ɑ́ gënhi orøg, o këlø dhïwe ni kɑ ɑ́gwøøg wɑdh. Keny-ɑ órum ki gwøgi gwøngɑni bëne, kɑ yï kɑ̈bbí ki wɑdh kí órömø mø bɑ ówöbb e bong gïnrɑj kì ri gen, kɑ ge muuj yɑn. Ri gen ókïnyi ki omelø yi ókwër, o gï rɑ̈bbi gen yɑn gɑ gëdhhì. Nyi muuj ki wɑdh kí órömø, mø bong gïnrɑj kì ri gen, yethi cyɑ̈ng bënn, ki cyɑ̈ng ɑ́bïryew; gɑ gëdhhi orøg. Kwëër këli lɑm yi ókwër ki cyɑ̈ng ɑ́bïryew, o cugge gwøg cyee. Keny-ɑ óthumi cyɑ̈ng ɑ́bïryew, kɑ ókwër cɑ̈gi gen ki rɑ̈b kì wïje kì bïdɑ̈ɑ̈g cyɑ̈ng ki gënh-ɑ rɑ̈b bëne geki gënhi mër møg-ɑ nyi kɑ̈ɑ̈l yi ji. Codhe, o pyëwɑ mïne ki wun bënn. Yɑ Wïlɑ̈bø Jwøng-ɑ Ácwɑ̈ɑ̈j, yɑ ɑ́rum ki kwøb.” Adwøøg yɑn dhøng-ɑ yiny-ɑ wɑ̈g yi jɑlɑni kì wɑɑng cyɑ̈ɑ̈ng mwøl kì ri Kengø. Dhøngɑni bɑ ɑcyëg, ɑköbbi yɑn yi Jwøng-ɑ Ácwɑ̈ɑ̈j kinni, “Dhøng ócög ɑ́ ɑcyëg ceth, koo wöl ki yiebø. Bong dhɑnhø men-ɑ ówiy o nyi kɑ̈lle kenyɑni, mɑ́ e ɑ́kɑ̈ɑ̈l-ɑ yi yɑn, yɑ Jwøng-ɑ Ácwɑ̈ɑ̈j, Jwøøg Isrɑil, keny-ɑ ɑ́bëënɑ Kengø. Bëëde ɑ́ ɑcyëg ceth. De jɑng-ɑ jyɑ̈gø ócuggø kedhi kenyɑni be cɑm ki jɑmmi kwër kì bølɑ, nyi kɑ̈ɑ̈le yuu øn-ɑ yije nyi kɑ̈ɑ̈l kì cyɑ̈n, kɑ nyi dwööge wɑ̈g ki yuuɑni.” Codhe, ɑkïdhi yɑn bøli Kengø yi jɑlɑni, yɑ kɑ̈ɑ̈le’ dhøg wɑɑng wuudø. Keny-ɑ ɑ́tïngɑ wïjɑ, ɑlidhɑ Kengø e pɑ̈ngø yi mɑ̈ɑ̈r Jwøng-ɑ Ácwɑ̈ɑ̈j. Aleengɑ riɑ piny, wïjɑ këël yɑn piny. Aköbbi yɑn yi Jwøng-ɑ Ácwɑ̈ɑ̈j kinni, “Wɑ̈d dhɑnhø, cïb pyëwí ri gïg-ɑ ólïngí geki gïg-ɑ nenni yi yïn; yï köbbɑ’ ciggi Kengø geki kwönge. Cïb pyëwí ri tyëng-ɑ cuggi bëën Kengø geki tyëng-ɑ pɑ cuggi. “Köbbí tyëng gøl Isrɑil, tyëngpëëmø, kinni Wïlɑ̈bø Jwøng-ɑ Ácwɑ̈ɑ̈j kwøb-ɑ kinni; pyëwɑ pɑ mɑg yi yɑn këti ki rɑjj-ɑ ɑ́gøggi yi wun. Kengɑ ɑ́bwöl yi wun keny-ɑ ɑ́wëggu tyëng-ɑ nuti ngølø; ɑ pɑ wør yɑn, bëën yije e dwɑ̈lø geki remmi gëdhhì mëgg-ɑ yɑn. Kɑ ciggɑ pyem yi jiɑ ki rɑj møg-ɑ gøggi yi gen. Jɑmmi kwër møgɑ nuti gwøg-ɑ yi gen, de gï ɑ́wïyi gen tyëngpɑth. “Yɑn, yɑ Wïlɑ̈bø Jwøng-ɑ Ácwɑ̈ɑ̈j, yɑ ɑ́kyëëd kinni, ko di ngɑnpɑth me nuti ngølø, me pɑ wør yɑn, me bï yij Kengɑ, cɑgg ɑ́ tyëngpɑth møg-ɑ bëëdø kì kelli wun.” Aköbbi yɑn yi Jwøng-ɑ Ácwɑ̈ɑ̈j kinni, “Kwɑrri Leebì møg, cɑyɑ’ cɑyø kyeel ki tyëng Isrɑil, mɑ́ yɑ ɑ́wiy gen piny, kɑ ge kedh-ɑ be mɑlli jwögg-ɑ pɑth. Ge ócuggø gwøg kì yij Kengø, ge kor-ɑ dhøggi Kengø. Ge ócuggø ngɑl ki gëdhh-ɑ nyi muuj yi ji gɑ gënh-ɑ nyi rɑ̈b bëne geki gëdhh-ɑ kyeelø, o bɑ gen ɑ ógöggi ji. De mɑ́ ge ɑ́göög kì ngïjji jwögg-ɑ pɑth, kɑ ji peej gen yij orøg, yɑ ceg-ɑ köngø ki köngi dwøng; yɑ Wïlɑ̈bø, Jwøng-ɑ Ácwɑ̈ɑ̈j kinni, ge cɑyɑ’ cɑyø ceth. Yɑ koo göggi yi gen gɑ ókwërrɑ, wɑlɑ̀ ge koo cyɑ̈ngi kì ri jɑmmi kwër møgɑ, wɑlɑ̀ ge koo wɑ̈nhi Kej Kwërdwøng. Menɑni bɑ cɑ́y kipe rɑj møg-ɑ ɑ́gwøg yi gen. Ge mëggɑ’ korri Kengø geki gwøng-ɑ nyi gwøg bëne kì yije.” Akööb Wïlɑ̈bø Jwøng-ɑ Ácwɑ̈ɑ̈j kinni, “Ókwërri wïj gøl Leebì, møg-ɑ bɑ kwɑrri Dhɑdök, bɑ gen ɑ ɑ́bëëd ge gögg-ɑ yɑn kì yij Kengø, ki pëthi gen bënn, keny-ɑ ɑ́wiy yɑn piny yi tyëng Isrɑil møg-ɑ kyeelø. O ɑnɑn bɑ gen ɑ ógöggi yɑn; gen ɑ óbï bølɑ be mëggi yɑn dwɑ̈lø geki remmi gëdhhi. Ge keti gen ɑ óbï yij Kengɑ, ɑ ógöögø kì wïj këli lɑmɑ, o gen ɑ ólɑ̈mø kì yij Kengø. Kenyi wɑ̈nhi gen dhø Kengø, dhøng-ɑ yiny-ɑ ød, nyi rug gen ki ógudhi kor-ɑ yöm. Ge ko rug ki gïn-ɑ ógwøgø ki yëyyi dyëg kɑ̀ bëëd ge ogöögø kì ódɑ̈r-ɑ yiny-ɑ ød, wɑlɑ̀ kì yij Kengø. Kipe ge ópir ki kwɑ̈g, rug gen ki wënni wɑ̈ɑ̈th, kí ɑköjji kor-ɑ yöm, de yethi gen ko wen ki wënnì. Nyi luny gen ógudh-ɑ ɑ́rug yi gen kì yij Kengø wɑ̈g, kɑ gï nyi wiy gen yethi uddi kwër. Nyi rug gen ógudh møøgø kenyi kedhi gen kun-ɑ di ji, kipe ji ódoy yi ógudhi kwër. “Yëyyi wɑ̈thi ókwër ko nyi lyel yi gen, wɑlɑ̀ ge ko nyi wëggi bɑ̈rrø, de nyi mïdhi gen ge døøj ceth. Ókwërø ko nyi mɑ̈ɑ̈dh ki møgi oløg e kedh-ɑ ódɑ̈r-ɑ yiny-ɑ ød. Ko di ókwërø me nyömi ki ɑtɑ̈ng; nywøme nyɑɑr Isrɑil ɑ́ jùr, wɑlɑ̀ cï ókwërø me jɑlgøle thøø. “Ókwër pwönyi gen jiɑ ki gïg-ɑ bɑ̈ɑ̈n kì kelli gïn-ɑ bɑ gï kwër geki gïn-ɑ pɑth ki gï kwër, kí gïn-ɑ bɑ̈ɑ̈n kì kelli gïn-ɑ ywëdhø geki gïn-ɑ dhïw. Keløg e ódi wëërø, bɑ gen ɑ ólidh gøny, cɑ́y ómuuj yi gen, ge ködd-ɑ kömi ciggɑ. Gen ɑ ómïdhi cyɑ̈nggi kwër ni kɑ̀ yinge yethi cigg; o gen ɑ ómïdhi cyɑ̈nggi Sɑbɑth gɑ cyɑ̈nggi kwër. “Ókwërø ree ko ywëdh yi en ki cølø, de ócuggø kedhi kömi ngɑnthøø ke bëëde ɑ́ wïye, wɑlɑ̀ meye, wɑlɑ̀ wɑ̈de, wɑlɑ̀ nyɑre wɑlɑ̀ ómen, wɑlɑ̀ nyimen me nuti nywømø. Kɑ bëëde ki cyɑ̈ng ɑ́bïryew kì bɑng keny-ɑ ódhïwe, codhe kɑ kedhe yij Kengø be muujø ki gëëdhi mi dhïwe, o rume cyee, o døøge be gwøg kì Kengø. Yɑ Wïlɑ̈bø Jwøng-ɑ Ácwɑ̈ɑ̈j, yɑ ɑ́rum ki kwøb. “Ókwër gwøøg gen bɑ gwøøg kwër, kì ri gïg-ɑ ɑ́mëggɑ Isrɑil gɑ møg lɑg yi rïny kí rïny. Bong gïjø mɑ mi gen kì Isrɑil, bene yɑn ɑ bɑ mi gen. Gen ɑ nyi cɑm byël-ɑ nyi muuj, kí gëdhhi orøg, kí gëdhhi bɑ̈jjø. Gïg-ɑ ɑ́cïb wɑ̈yi gen bënn gɑ mø kwër kì Isrɑil bɑ mø gen. Gïgdøj møg-ɑ nyi kwøng ki kɑjø bënn bɑ mø ókwër. Ópun-ɑ nyi kwøng ki bulø, nyi mëgg-ɑ ókwër ɑ́ gëdhhì, o gyëdhhɑ óying gen kɑ̈lli wun. Ókwër ko cyɑ̈ɑ̈m ki winyø wɑlɑ̀ lɑ̈y men thøw kete, wɑlɑ̀ men-ɑ ónɑ̈gø yi lɑ̈y megø.” Keny-ɑ ópɑ̈ngu piny kì kelli kɑ̈lli Isrɑil, nëngu Jwøng-ɑ Ácwɑ̈ɑ̈j ki keny me kwër ɑ́ mee, e bɑ̈re bɑ kïlomïtïr pyɑ̈rø wïdɑ́ryew kí budi kïlomïtïr, o lɑ̈je bɑ kïlomïtïr pyɑ̈rø. Pinyɑni bëne bɑ ɑkwër. Kì yij pinyɑni, ódi kej Kengø me bɑ óør, bɑ̈re bɑ mïtïr miy ɑ́ryew kí pyɑ̈r ɑ́bïj, e ówenø bëne yi keny me wɑ̈dhi bëëdø me lɑ̈je bɑ mïtïr pyɑ̈r ɑ́ryew wïdɑ́bïj. Budi pinyɑni, ɑ løg kïlomïtïr pyɑ̈rø wïdɑ́ryew kí budi kïlomïtïr, o lɑ̈je bɑ kïlomïtïr ɑ́bïj, en ɑ bɑ Kengø, ɑ løg Kej Kwërdwøng. En ɑ óbëëd ɑ́ mi ókwër møg-ɑ nyi göögø ki gwøøg Jwøng-ɑ Ácwɑ̈ɑ̈j kì yij Kengø. Óbëëd ɑ́ kej uddi gen geki Kengø. Bun-ɑ ɑ́döng bɑ mi Kwɑrri Leebì møg-ɑ nyi göögø kì yij Kengø, óbëëd ɑ́ kej uddi gen. Kì buti kej kwër, dɑ piny me bɑ̈re bɑ kïlomïtïr pyɑ̈rø wïdɑ́ryew, o lɑ̈je bɑ kïlomïtïr ɑ́ryew kí budi kïlomïtïr, me cïb wɑ̈ye ɑ́ men bëëd yi tyëng Isrɑil bënn. Bëëde e dɑ piny me cïb wɑ̈ye ɑ́ mi rɑ̈nh-ɑ jyɑ̈gø. Cɑg kì keew kej kwër kì wɑɑng cyɑ̈ɑ̈ng böörø e kedh-ɑ wɑɑng cyɑ̈ɑ̈ng böörø kì ri Nɑɑm Omeli Tɑr, kí wɑɑng cyɑ̈ɑ̈ng mwøl e gït-ɑ wïj keew pödhø kì wɑɑng cyɑ̈ɑ̈ng mwøl. O bɑ̈re bëëde e pɑ̈r ki bɑ̈ri piny-ɑ ɑ́mëggi tyëng Isrɑil. Bene piny rɑ̈nh-ɑ jyɑ̈gø ɑnɑn kì ri piny Isrɑil, kipe o cöge gï pɑ mode wɑlɑ̀ gï pɑ ruje, o piny-ɑ ɑ́döng bëëde ɑ́ mi wɑ̈thi kɑ̈lli Isrɑil. Akööb Wë Jwøng-ɑ Ácwɑ̈ɑ̈j kinni, “Wu ɑ́røngi ki keny me bɑ̈ɑ̈r, wu rɑ̈nhi Isrɑil! Wiy wun mød geki ruj. Gøggu gïgdøj geki dyër. Jiɑ ko cyeed wun wɑ̈g kì yij piny gen këti. Yɑn ɑ köbbi wun, yɑ Wïlɑ̈bø Jwøng-ɑ Ácwɑ̈ɑ̈j. “Göög ji bënn ki rummì møg-ɑ pɑ ruj ki ji. “Bëëd Epɑ̀ ɑ́ men-ɑ bɑ dyër, kɑ bɑth bëëde ɑ́ men-ɑ bɑ dyër, kɑ omer bëëde ɑ́ men-ɑ bɑ dyër. “Bëëd rummi wun ge nɑ møg: gerɑ̀ 20 pɑ̈r ki cekel ɑ́kyel cekel 60 pɑ̈r ki minɑ̀ ɑ́kyel “Muuj gëdhhɑni rɑ̈nh-ɑ jyɑ̈gø yi tyëng Isrɑil bënn. Bɑ en ɑ ómuuj gëdhh-ɑ nyi rɑ̈b, kí byëlø, kí kunyi møgi oløg mø pödhi Isrɑil bëne, kenyi liidh dwɑ̈y, kí yethi cyɑ̈nggi kwër, kí yethi cyɑ̈nggi Sɑbɑth. En ɑ ómuujø ki gëdhhì, kí byëlø, kí gënh-ɑ nyi rɑ̈b bëne, kí gëdhhi mër, kipe kinni o orøøg tyëng Isrɑil lɑ̈ɑ̈ny.” Wïlɑ̈bø Jwøng-ɑ Ácwɑ̈ɑ̈j okööbø kinni, “Kì kyeel cyɑ̈nggi dwɑ̈n-ɑ nyɑ̈n, kɑ yï kɑ̈bbí ki wɑdh me bong gïnrɑj kì ree, kɑ Kengø kwëër o dhïwe. O ókwërø kɑ̈bbe ki remi gënhi orøg menɑni, o gø gɑ̈ɑ̈je ri dhø Kengø kì mɑl, kí wɑ̈thi tùngi këli lɑm gɑ ɑ́ngwen, kí ri dhøg ódɑ̈ri yiny-ɑ ød. Kì bïryeew cyɑ̈nggi dwɑ̈yɑni, døøg wun ki muujø ki gëdhhì kipe ngɑn bɑ̈jjø e kwïj wøw wɑlɑ̀ ceg-ɑ gwɑ̈nyø. Bene ɑ óbëëd Kengø e bɑ ɑkwër. “Cyɑ̈nggi dwɑ̈yɑni pyɑ̈rø wïdɑ́ngwen, bene cɑ̈gi Kwëër Ákɑɑdh. Ji bënn cɑm-ɑ olwëny ki cyɑ̈ng ɑ́bïryew. Kì kyeel cyɑ̈nggi Kwëër Ákɑɑdh, muuj nyirɑ̈nh-ɑ jyɑ̈gø ki wɑdh ɑ́ gënhi orøge kí orøøg ji bënn. Kì yethi cyɑ̈ng ɑ́bïryew mø Kwëër Ákɑɑdh bënn, nyi muuj wun ki wɑ̈dhh ɑ́bïryew, kí órömm ɑ́bïryew mø bong gïnrɑj kì ri gen, gɑ gënh-ɑ nyi rɑ̈b bëne kì yethi cyɑ̈nggɑni bënn. Kí ónywøg ɑ́kyel kì yethi cyɑ̈nggɑni bënn ɑ́ gënhi orøg. Wɑdh ɑ́kyel kí órömø ɑ́kyel møg-ɑ muuj gɑ gënh-ɑ nyi rɑ̈b bëne, ɑ́kyel kɑ̈l kɑ røthøl pyɑ̈r ɑ́dɑ̈g wïdɑ́bïj mø gemè, kí røthøl ɑ́bïkyel mø møøw dhetun. “Kipe Kwëër Akɑnnì, ɑ nyi cɑ̈gi kì pyɑ̈rø wïdɑ́bïïj cyɑ̈nggi bïryeew dwɑ̈tt, nyirɑ̈dh ceg-ɑ muujø yethi cyɑ̈ng bënn, ki cyɑ̈ng ɑ́bïryew, kí gëdhhi orøg, kí gënh-ɑ nyi rɑ̈b bëne, kí byëlø, kí møøw dhetun mø ni mø Kwëër Ákɑɑdh.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Dhøng-ɑ kedhi ódɑ̈ri yiny-ɑ ød kì wɑɑng cyɑ̈ɑ̈ng mwøl bëëde ɑ́ ɑcyëg kì yethi cyɑ̈nggi gwøg gɑ ɑ́bïkyel, de nyi yieb kì cyɑ̈ɑ̈ng Sɑbɑth geki kyeel cyɑ̈nggi dwɑ̈y. O nyirɑ̈nh-ɑ jyɑ̈gø bëe e kɑ̈ɑ̈l-ɑ ódɑ̈ri yiny-ɑ wɑ̈g, e bɑ̈ɑ̈n-ɑ yij øn-ɑ nyi kɑ̈ɑ̈l, o cunge kì ri löjji dhøngɑni e gëdhhi møge møg-ɑ nyi rɑ̈b bëne orɑ̈bø yi ókwër, o gëdhhi mër møge muuj yi gen. O mɑ̈dde kì kenyɑni, codhe o døøge wɑ̈g. Dhøngɑni ko cyëëg gïti böörø. Nyi mɑ̈ddi ji kì bøli Jwøng-ɑ Ácwɑ̈ɑ̈j kì cyɑ̈nggi Sɑbɑth geki cɑ̈gi dwɑ̈y, kì ódɑ̈r-ɑ dhø döri kɑɑl. “Nyi kɑ̈ni rɑ̈dh kì cyɑ̈ɑ̈ng Sɑbɑth ki gënh-ɑ nyi rɑ̈b bëne men mëggi Jwøng-ɑ Ácwɑ̈ɑ̈j; kɑ̈ɑ̈le gøn ɑ́ órömm ɑ́bïkyel mø bong gïnrɑj kì ri gen. Órömø ɑ́kyel kɑ̈ɑ̈l kɑ lïtïr pyɑ̈rø wïdɑ́bïryew kí budi lïtïr mø møng-ɑ búr, kɑ muuje kyeel ki órömø kí gïn-ɑ dwɑdde muujø ki pyëwe. Byëlø menɑni kɑ̈ɑ̈l kɑ lïtïr ɑ́dɑ̈g mø møøw dhetun. Kipe Kwëër Cɑ̈gi Dwɑ̈y, nyi muuje ki wɑdh, kí órömm ɑ́bïkyel, kí nyɑ órömø me thiinh. Wɑdh kí órömø kɑ̈ɑ̈l kɑ lïtïr pyɑ̈rø wïdɑ́bïryew kí budi lïtïr mø møng-ɑ búr, de ócuggø muujø ki men-ɑ dwɑdde muujø ki óröm-ɑ thinh. Møng-ɑ búrɑni nyi muuj kɑ lïtïr ɑ́dɑ̈g mø møøw dhetun. Nyirɑ̈nh-ɑ jyɑ̈gø, nyi døøge wɑ̈g ki dhøng-ɑ ɑ́bëëne ceth. “Keny-ɑ óbëën ji be mɑlli Jwøng-ɑ Ácwɑ̈ɑ̈j, kì bøli kej wööwø, tyëng-ɑ óbï kì dhøng-ɑ wɑɑng wuudø, ókedh kɑ dhøng-ɑ wɑɑng wurlwɑl. Ko di ngɑn kedhi wɑ̈g ki dhøng-ɑ ɑ́bëëne. Bï nyirɑ̈dh ji rum bëënø, kɑ kedhe ge rum kedhø. Kì yethi cyɑ̈nggi wööwø geki cyɑ̈nggi kwër, møng-ɑ búr nyi muuj ɑ́ lïtïr pyɑ̈rø wïdɑ́bïryew kí budi lïtïr, kipe wɑdh ɑ́kyel kí órömø ɑ́kyel, kí gïn-ɑ dwɑddi muujø yi dhɑnhø ki pyëwe kyeel ki órömø ɑ́kyel. Møng-ɑ búrɑni nyi muuj kɑ lïtïr ɑ́dɑ̈g mø møøw dhetun. “Keløg nyirɑ̈dh dwɑdd-ɑ thödhi Jwøng-ɑ Ácwɑ̈ɑ̈j ki gïïpiny ki pyëwe, ying-ɑ́ gënh-ɑ nyi rɑ̈b bëne, wɑlɑ̀ gënhi mër, yïëbbi dhøng-ɑ kedhi ódɑ̈r-ɑ yiny-ɑ ød kì wɑɑng cyɑ̈ɑ̈ng mwøl. O gënhɑni gwøg yi en ni mi cyɑ̈ɑ̈ng Sɑbɑth. Codhe, o dhøngɑni cyëëg keny-ɑ órume ki døøg wɑ̈g.” Jwøng-ɑ Ácwɑ̈ɑ̈j okööbø kinni, “Kì yethi cyɑ̈ng kì mwøl, órömø me bong gïnrɑj kì ree nyi rɑ̈bbi Jwøng-ɑ Ácwɑ̈ɑ̈j bëne, kì yethi cyɑ̈ng bënn ceth. Nyi muuj kɑ møng-ɑ búr me bɑ kïllì ɑ́ryew, kí lïtïr ɑ́kyel mi møøw dhetun, me yöl ki møng-ɑ búrɑni. Mïdhi ciggi gëëdhi gïti ɑtheer. Órömø, kí møng-ɑ búr, kí møøw dhetun, bɑ møg nyi mëggi Jwøng-ɑ Ácwɑ̈ɑ̈j yethi cyɑ̈ng bënn kì mwøl gïti ɑtheer.” Wïlɑ̈bø Jwøng-ɑ Ácwɑ̈ɑ̈j ɑ́cïg kinni, “Keløg nyirɑ̈nh-ɑ jyɑ̈gø wɑ̈de onëngø yi en kì ri pinye, pinyɑni óbëëd ɑ́ mi nyelɑni, e bɑ mi gøl gen. De keløg rɑ̈dh nëng-ɑ dhɑnhø kì kelli bɑ̈ngge, pinyɑni ceg-ɑ døøg yï nyirɑ̈nh-ɑ jyɑ̈gø kì Runi Dwöggø, mɑ́ wɑ̈dde bene gen ɑ cuggi lɑgi pinyɑni. Rɑ̈dh koo kɑ̈bbi ki piny ji. Nënge wɑ̈dde kì ri pinye, o cöge ji pɑ ruje ki kwɑnyi pìnyi gen.” Codhe, ɑkɑ̈ɑ̈l yɑn yi jɑlɑni kɑ yɑ kïdhe yiny-ɑ di uddi ókwër kì wɑɑng wuudø kì ódɑ̈ri yiny-ɑ ød. Anyudhe yɑn keny me ying wɑɑng cyɑ̈ɑ̈ng böörø kì ri uddɑni, kɑ yɑ köbbe kinni, “Bene keny-ɑ nyi thɑɑl rïnggi gëdhhì yi ókwër èn, gen ɑ rïnggi gëdhhi orøg geki gëdhhi bɑ̈jjø, kí ópun, o ge cög ge pɑ kïdhi yiny-ɑ wɑ̈g kipe ji ódoy yi jɑmmi kwër.” Ge bɑ ɑwen ki dörri kïtti bënn, o këlli mɑc mø gen ógeer-ɑ ri dörø. Aköbbi yɑn yi jɑlɑni kinni, “Gëdhh-ɑ nyi muuj yi ji, nyi thɑl-ɑ yethi uddɑni yi bɑ̈nggi Kengø.” Adwøøg yɑn dhøg Kengø yi jɑlɑni. Alïdhɑ ki pï mø rengi piny kì dhøg Kengø, ge reng-ɑ wɑɑng cyɑ̈ɑ̈ng mwøl, mɑ́ Kengø nenn-ɑ tungɑni. Pï rïngi ge kɑ̈l-ɑ wïj kyëëj Kengø, ge kɑ̈l-ɑ wɑɑng wurlwɑl kì ri këli lɑm. Codhe, ɑkïdhi yɑn wɑ̈g yi jɑlɑni ki dhøg wɑɑng wuudø, ɑwene yɑn dhøg wɑɑng cyɑ̈ɑ̈ng mwøl. Alïdhɑ ki nyɑ nɑm me rïngi wɑ̈g kì wɑɑng wurlwɑl kì ri dhøg Kengø. Arøme nyɑ nɑmɑni ɑ́ mïtïr miy ɑ́bïj e reng-ɑ piny kì wɑɑng cyɑ̈ɑ̈ng mwøl, ɑköbbe yɑn kinni lwødɑ nyɑ nɑmɑni. Pï ɑ́ying-ɑ nyɑjɑ̈nggi tyellɑ. Adøøge ki røm ki mïtïr miy ɑ́bïj møøgø. Kɑ pï wɑ̈dh-ɑ ri cøngɑ. Kɑ cig-ɑ røm ki mïtïr miy ɑ́bïj, ɑwɑ̈nhi pï pyerɑ. Adøøge ki røm ki mïtïr miy ɑ́bïj møøgø, ɑngënyi pï kɑ yɑ ódhɑ̈lø lödø, kɑ yɑ ceg-ɑ kwɑng. Aköbbe yɑn kinni, “Wɑ̈d dhɑnhø ti gen ki rømmø kidøøj.” Codhe, ɑdwøøg yɑn kömi nɑmɑni yi jɑlɑni, Alïdhɑ ki yenh mø gïïr cɑrø kì kömi nɑm tuung kí tuung. Aköbbe yɑn kinni, “Pï cør-ɑ yij piny, ge reng-ɑ Töör Urdun kì wɑɑng cyɑ̈ɑ̈ng mwøl, o ge kedhi gen Luuy Omelø. Keny-ɑ ówɑ̈dhi gen Luuy Omelø, pïge óløg gen pï mø døøj, mø pɑth ki pïi omelø. Keny-ɑ rengi yi nɑmɑni, ódi wïj rëjø bëne kí wïj lɑ̈y bëne. Nyɑ nɑmɑni pïi Luuy Omelø ówëgge mïnø, o nyi muuj-ɑ wëy kì keny-ɑ renge. Cɑg kì nyingi pïi Ein Gedì gïti nyingi pïi Eglɑim, ódi jømɑy kì kömi nɑɑm omelø; bøyyi gen ómɑ̈j yi gen kì kenyɑni. Ódi wïj rëjø bëne kì kenyɑni, mø ni møg-ɑ ying Nɑɑm Omeli Tɑr. De pïg-ɑ ying yij tör geki yethi luyyì pɑ gwøg o ge dönyi gen. Ge ócög gɑ omelø. Wɑ̈thi yenh bënn ótwïy gɑ møg cɑm, kì kömi nɑm kì tuung kí tuung. Yïthhi gen koo thwøw, o ge ceg-ɑ nywølø kì yethi dwɑ̈tt bënn, mɑ́ ge cɑw-ɑ yi nɑm-ɑ rïngi e kɑ̈ɑ̈l-ɑ Kengø. Yenhɑni óbëëdø gɑ gïncɑm, o yïthhi gen bɑ yɑnh tuur ki ji.” Akööb Wïlɑ̈bø Jwøng-ɑ Ácwɑ̈ɑ̈j kinni, “Møg bene gen kewwi piny-ɑ ópɑ̈ngi kì kelli wɑ̈thi kɑ̈lli Isrɑil gɑ pyɑ̈rø wïdɑ́ryew, e wïj gøl Yosep mëgg-ɑ mi kɑ̈llì ɑ́ryew. Yɑ ɑ́köngi kinni pinyɑni ómëggɑ kweyyi wun, ɑnɑn pɑ̈ngu en kì kelli wun e pɑ̈r. “Keew pinyɑni kì wɑɑng wuudø, cɑ̈gi kì Nɑɑm Omeli Tɑr e reng-ɑ wɑɑng cyɑ̈ɑ̈ng mwøl gïti Ëthlön gïti Amɑth, e gït-ɑ Dhedɑd, gïti kɑ̈ddi Beröthɑ̀ geki Sibriɑm (ge ying-ɑ piny Dimɑceg geki piny Amɑth,) e gït-ɑ Tikön (ɑ ying wïj keew myërri Aurɑn). Keew wɑɑng wuudø, cɑ̈g-ɑ́ɑ̀ Nɑɑm Omeli Tɑr e gït-ɑ Enön, kì wɑɑng cyɑ̈ɑ̈ng mwøl, e pödh-ɑ keew piny Dimɑceg geki Amɑth kì wɑɑng wuudø. “Keew wɑɑng cyɑ̈ɑ̈ng mwøl, reng-ɑ wɑɑng wurlwɑl kì kɑɑm piny Dimɑceg geki Aurɑn, kí Nɑm Urdun, e gwøg-ɑ kew kì kɑɑm piny Isrɑil kì wɑɑng cyɑ̈ɑ̈ng böörø geki Gilyɑd kì wɑɑng cyɑ̈ɑ̈ng mwøl gïti Tɑmɑr kì kömi Luuy Omelø. “Keew wɑɑng wurlwɑl reng-ɑ wɑɑng wurlwɑl kì kuni wɑɑng cyɑ̈ɑ̈ng böörø cɑg kì Tɑmɑr gïti luuy Kɑdic Merïbɑ̀, gïti keew Rïp kì kömi Nɑɑm Omeli Tɑr, kì wɑɑng wuudø kì kuni wɑɑng cyɑ̈ɑ̈ng böörø. “Kew wɑɑng cyɑ̈ɑ̈ng böörø bɑ Nɑɑm Omeli Tɑr e reng-ɑ wɑɑng wuudø gïti wɑɑng cyɑ̈ɑ̈ng böörø kì ri Ókømi Amɑth. “Pɑ̈ngu pinyɑni kì kelli wɑ̈thi kɑ̈lli Isrɑil. Pinyɑni ócög ɑ́ mi wun ceth. Kɑ tyëngpɑth møg-ɑ bëëdø kì kelli wun, møg-ɑ yï gen di nyigi gen møg-ɑ ɑ́nywøl kì kelli wun, nëngi wun kì ri pinyɑni. Lëëng gen ki wél, o ge yïddi gen ki piny ni tyëng Isrɑil ceth. Ngɑnpɑth yïd-ɑ́ɑ̀ ri piny wïj gøl-ɑ kelle bëëde. Yɑ Wïlɑ̈bø Jwøng-ɑ Ácwɑ̈ɑ̈j, yɑ ɑ́rum ki kwøb.” Cïb kwï piny wɑ̈ye kì dïdyër; bëëde ɑ́ kïlomïtïr pyɑ̈rø wïdɑ́ryew kí budi kïlomïtïr; eni lɑ̈je, cɑg kì wɑɑng wuudø e ködd-ɑ wɑɑng wurlwɑl, o bɑ̈re nɑ menɑni thyew, cɑg kì wɑɑng cyɑ̈ɑ̈ng mwøl e ködd-ɑ wɑɑng cyɑ̈ɑ̈ng böörø kì ri piny-ɑ mëggi wɑ̈thi kɑ̈llì; pinyɑni ɑ yije ógeer Kengø. Kì dïdyëri pinyɑni, wiy keny megø, me bɑ̈re bɑ kïlomïtïr pyɑ̈rø wïdɑ́ryew, o lɑ̈je bɑ kïlomïtïr pyɑ̈rø ɑ́ men mëggi Jwøng-ɑ Ácwɑ̈ɑ̈j. Nëngi ókwër kì ri piny kwër menɑni. Wiy pinyɑni ɑ́ kïlomïtïr pyɑ̈rø wïdɑ́ryew kí budi kïlomïtïr, cɑg kì wɑɑng cyɑ̈ɑ̈ng mwøl e ködd-ɑ wɑɑng cyɑ̈ɑ̈ng böörø, o kì wɑɑng wuudø e ködd-ɑ wɑɑng wurlwɑl, bɑ kïlomïtïr ɑ́bïj. Kengi Jwøng-ɑ Ácwɑ̈ɑ̈j ógeer-ɑ dïdyëri pinyɑni. Kej kwër bɑ mi ókwërr-ɑ bɑ kwɑrri Dhɑdök, mɑ́ yɑ ɑ́göggi yi gen yethi gen bong ɑ́dud, o ge nuti gwøg ki orøng-ɑ ɑ́gwøg yi kwï tyëng Isrɑil geki Kwɑrri Leebì. Kɑ Kwɑrri Leebì nëngi ki piny gen, kì buti ókwër kì wɑɑng wurlwɑl, pinyɑni ɑ bɑ Kej Kwërdwøng. Wïyi Kwɑrri Leebì ki piny me cïb wɑ̈ye, me ying wɑɑng wurlwɑl kì ri piny ókwër. Bëëd bɑ̈re bɑ kïlomïtïr pyɑ̈rø wïdɑ́ryew kí budi kïlomïtïr, cɑg kì wɑɑng cyɑ̈ɑ̈ng mwøl e ködd-ɑ wɑɑng cyɑ̈ɑ̈ng böörø, o lɑ̈je bɑ kïlomïtïr ɑ́bïj, cɑg kì wɑɑng wurlwɑl e ködd-ɑ wɑɑng wuudø. Piny-ɑ ɑ́mëggi wɑ yi Jwøng-ɑ Ácwɑ̈ɑ̈j bene piny-ɑ pëddi døøjø kì yij pinyɑni bëne, ko di men ngeew wɑ̈g kì ree, wɑlɑ̀ men wil ki ngɑn megø. Bɑ piny kwër, o bɑ mi Jwøng-ɑ Ácwɑ̈ɑ̈j. Men-ɑ ódöng kì ri piny-ɑ ɑ́cïb wɑ̈ye, ɑ bɑ̈re bɑ kïlomïtïr pyɑ̈rø wïdɑ́ryew kí budi kïlomïtïr, o lɑ̈je bɑ kïlomïtïr ɑ́ryew kí budi kïlomïtïr, pɑth ki kej kwër, de ócuggø kwɑnyø yi ji ɑ́ men yije bëëd. Kɑɑl óying-ɑ dïdyëri kenyɑni, óbëëd ɑ́ óør, e bɑ̈ri tunge ɑ́kyel bɑ mïtïr ɑ́lïp ɑ́ryew kí miy ɑ́ryew kí pyɑ̈r ɑ́bïj. Ódi kɑɑm men-ɑ ówiy kì wɑ̈thi tùngi kɑɑl gɑ ɑ́ngwen me lɑ̈je bɑ mïtïr miyø kí pyɑ̈r ɑ́ryew wïdɑ́bïj. Piny-ɑ ódöng keny-ɑ órum kɑɑl ki gerø, ɑ ying wɑɑng wurlwɑl kì ri piny kwër, ɑ bɑ̈re bɑ kïlomïtïr ɑ́bïj kì wɑɑng cyɑ̈ɑ̈ng mwøl, o lɑ̈je bɑ kïlomïtïr ɑ́ryew kí budø, kì wɑɑng cyɑ̈ɑ̈ng böörø, óbëëd ɑ́ pwödhhi ji. Ji bënn møg-ɑ bëëdø kì kɑɑlɑni, ɑ løg tyëng wɑ̈thi kɑ̈llì bënn, ge ócuggø kɑ̈g kì yij pinyɑni. Piny-ɑ ɑ́cïb wɑ̈ye kì dïdyër; ɑ bɑ óør, ɑ bɑ̈re bɑ kïlomïtïr pyɑ̈rø wïdɑ́ryew kí budi kïlomïtïr kì wɑ̈thi tùnge bënn, bɑ en ɑ yije di kɑɑlɑni. Kì wɑɑng wurlwɑl kì ri piny gøl Gɑd, kew reng-ɑ wɑɑng wurlwɑl kì kuni wɑɑng cyɑ̈ɑ̈ng böörø, cɑg kì Tɑmɑr e ködd-ɑ luuy Kɑdic, o kì wɑɑng wuudø kì kuni wɑɑng cyɑ̈ɑ̈ng böörø kɑ̈l-ɑ ri keew Rïp e ködd-ɑ Nɑɑm Omeli Tɑr. Wïlɑ̈bø Jwøng-ɑ Ácwɑ̈ɑ̈j ɑ́kööb kinni, “Bene kër-ɑ ópɑ̈ngi piny kì kelli wɑ̈thi kɑ̈lli Isrɑil ɑnɑn.” Bɑ̈ri dörø bëne kì wɑ̈thi tùngi kɑɑl gɑ ɑ́ngwen bɑ mïtïr ɑ́lïp ɑ́bïngwen. Nyingi kɑɑlɑni cɑg ki cwøllø ɑnɑn ceth ɑ́ “Jwøng-ɑ Ácwɑ̈ɑ̈j Nud kì Keny!” Kì dɑ̈ɑ̈g runni Yöyɑkim rɑ̈ɑ̈dh Yeudiyɑ̀ kì yij lɑwø, ɑ ɑ́bëën Nebukɑdnesɑr rɑ̈ɑ̈dh Bɑbïlöniyɑ̀, kɑ Yerusɑlem tyege. Kɑ wëggi mɑgi Rɑ̈dh Yöyɑkim yi Jwøng-ɑ Ácwɑ̈ɑ̈j, kɑ kwï jɑmmi Kengø kwɑnye. Ákɑ̈ɑ̈d ki ɑmɑgg møg kïdhe kengi jwögge kì Bɑbïl, kɑ kɑ̈r-ɑ ɑ́kwɑnye cïbe yethi kɑ̈nni kengɑni. Kɑ Acpenɑdh, jɑng-ɑ dwøng kì kelli jyɑ̈ggi rɑ̈dh köbbe kinni, i yïënye kì kelli yɑɑg-ɑ ɑ́kɑ̈ɑ̈l kì Isrɑil, kì gøl rɑ̈ɑ̈dhø geki kwï kɑ̈ll-ɑ døngø. Bëëd gen gɑ yɑɑg mø myër, wɑ̈thi gen pel, o ge dïdø, møg cuggi pwönyø kɑ ge jwɑn-ɑ dïdø, o ge ócuggø jwɑn dïdø ki dhøg tyëng Bɑbïl, o dëlli gen døøj, gɑ møg cuggi gwøg kì gøldwøng. Rɑ̈dh ɑ́kööb thyew kinni i kɑ ge nyi thödhi ki gïncɑm geki møgi oløg mø pɑ̈r ki gïgcɑmm-ɑ nyi mëggi tyëng-ɑ gøldwøng. Orum gen ki pwönyø ki runn ɑ́dɑ̈g, o ge kïdhi bøli rɑ̈dh. Dɑniel, Anɑniyɑ̀, Micɑil kí Adhɑriyɑ̀ ge nud kì kelli yɑɑg-ɑ ɑ́yieny kì kelli wɑ̈ddi Yeudɑ̀. Kɑ ge cɑ̈ggi ki nying mø nyɑ̈n yi jɑng-ɑ dwøng; Dɑniel ɑ́cɑge ɑ́ Beltecɑdhɑr, kɑ Anɑniyɑ̀ cɑge ɑ́ Cɑdrɑk, kɑ Micɑil cɑge ɑ́ Micɑk, kɑ Adhɑriyɑ̀ cɑge ɑ́ Abednegö. Dɑniel ɑ́bɑ̈nyi bwöli ree ki gïgcɑmm geki møgi oløøg gøldwøng. Kɑ jɑng-ɑ dwøng kwɑjje kipe kinni ko wëggi bwöli ree, kɑ pyëw Acpenɑdh wëggi medø ki Dɑniel yi Jwøk. Acpenɑdh ɑ́bëëd e óböggø yi rɑ̈dh, ɑköbbe Dɑniel kinni, “Rɑ̈dh ɑ ɑ́kwøb gïn-ɑ cɑm yi wun geki gïn-ɑ mɑdh yi wun, o keløg wu ónënni wu gwɑ̈lø kibøli yɑɑg-ɑ kyeelø, yɑ bɑ men nɑ̈g yi en.” Codhe, kɑ Dɑniel kedh-ɑ yï jɑl-ɑ ɑ́cïb yi Acpenɑdh, ɑ́ ngɑn nyi kɑ̈lli gïgcɑmmi gen geki mɑ̈dhhe, kɑ gø köbbe kinni, “Pɑ̈nyí wøn ki cyɑ̈ng pyɑ̈rø, wø cɑm-ɑ lùm, o wø mɑdh-ɑ pïg tïl. Codhe, othumi cyɑ̈nggɑni kɑ wø pɑ̈ɑ̈r ki yɑɑg-ɑ cyɑ̈mø ki gïgcɑmmi gøldwøng, kɑ wø liidh men-ɑ óbëëd wøn kidï, o yï óngɑ̈ɑ̈ny löggø.” Ayïëy jɑlɑni ki kwøbbi gen, kɑ gï pɑ̈nye ki cyɑ̈ng pyɑ̈rø. Keny-ɑ ɑ́thumi cyɑ̈nggɑni, yɑɑgɑni ɑ́nënni dëlli gen døøj, o ge teg kibøli yɑɑg-ɑ cyɑ̈mø ki gïgcɑmmi gøldwøng. Codhe, kɑ ge ocögø ge nyi muuj-ɑ lùm yi jɑl-ɑ kɑ̈lli gïgcɑmmi gen. Yɑɑgɑni gɑ ɑ́ngwen, ge ɑ́thödhi yi Jwøk ki dïdø geki peli wïj, kí ngɑ̈nyi kwøb. Kɑ Dɑniel thödhi yi Jwøk ki dïdø kí nyodhi gïg-ɑ kømmi yi lɑ̈g, geki cyɑ̈rø kí gïg-ɑ óbï dhuki megø. Keny-ɑ ɑ́thumi runn ɑ́dɑ̈g møg-ɑ ɑ́kwøb yi rɑ̈dh, ɑkïdhi yɑɑgɑni bënn bøli Nebukɑdnesɑr yi Acpenɑdh. Kɑ rɑ̈dh okööbø ki gen bënn. Kɑ møg-ɑ kømmi yi Dɑniel, kí Anɑniyɑ̀, kí Micɑil kí Adhɑriyɑ̀ reng-ɑ pyëw rɑ̈dh, kibøli møg-ɑ ɑ́kømmi yi yɑɑg-ɑ kyeelø bënn. Codhe, kɑ ge gwøg gɑ jø tøg buri rɑ̈dh. Cɑgg rɑ̈dh pyëj ngø wɑlɑ̀ ngø, nyi yod e ngɑ̈nyi yi yɑɑgɑni gɑ ɑ́ngwen; ge lod-ɑ ɑ́jwögg-ɑ rɑ̈ngø kí møg-ɑ bɑ̈gø kì yethi pödhh-ɑ jɑɑg yi rɑ̈nhɑni bënn. Dɑniel ɑ́cög e ying-ɑ tøg burø gïti run-ɑ ɑ́mɑɑg Bɑbïlöniyɑ̀ yi Körec, rɑ̈nhdwøøng Pɑres. Rɑ̈dh Nebukɑdnesɑr ɑ́lɑ̈gi kì ryeew runne kì yij lɑwø. Kɑ wïje ceg-ɑ cung yi lɑ̈ggɑni, kɑ ódhɑ̈lø nenø. Aöde be cwööli tyëngbɑg, kí ɑ́jwöggì, kí tyëdd, kí jøyenh, o ge bï gen be köbbii gïn-ɑ wɑngi yi lɑ̈ggɑni. Abëën gen kɑ ge ócungø kì bøli rɑ̈dh. Kɑ ge köbbi yi rɑ̈dh kinni, “Yɑ ɑ́lɑ̈gi ki lɑ̈g mɑ ɑ́cuung wïjɑ, o yɑ dwɑdd-ɑ yodi gïn-ɑ wɑngi yi gen.” Aløøg kwøbbi rɑ̈dh yi gen ki dhøg Arɑm kinni, “Yï ómïdhi yi Jwøk wuö, köbbí wøn lɑ̈ggí, o yï köbbi wøn gïn-ɑ wɑngi yi gen.” Aløøg mø gen yi rɑ̈dh kinni, “Kwøbbɑ ceth bɑ kinni: Keløg yɑ pɑ köbbu lɑ̈ggɑni geki gïn-ɑ wɑngi yi gen, wu ceg kɑ ngøllø wun ɑ́ gullì, o uddi wun ceg kɑ cøør piny. De keløg yɑ köbbu’ lɑ̈ggɑni geki gïn-ɑ wɑngi yi gen, wu óthödhi ki jɑmmi pwøj, kɑ wu theg yi yɑn ki mendwøng. Anɑn köbbu yɑn lɑ̈ggɑni geki gïn-ɑ wɑngi yi gen.” Acigi kwøbbe løøgø yi gen kinni, “Ke köbbí wøn lɑ̈ggɑni wuö, gïn-ɑ wɑngi yi gen köbbi wø’ yïn.” Kɑ rɑ̈dh ólöggø kinni, “Pɑth ki gïn-ɑ ɑ́rømmɑ ceth! Wu dwɑdd-ɑ cöngi kwøb, mɑ́ e ɑ́lidh yi wun kinni wïjɑ cyëëg yɑn, kinni, wu cɑy yi yɑn kɑ gïjø ɑ́kyel wu bënn; keløg yɑ pɑ köbbu lɑ̈ggɑni. Dhøggi wun ɑ́ceg yi wun kɑ rebø kinni o yɑ köbbu kwøbbi pyed o piny kedhe e ócyɑ̈dhø, o jɑmmì ri gen wil yi gen. Köbbu yɑn lɑ̈ggɑni møti, o yod yi yɑn cyee kinni gïn-ɑ wɑngi yi gen ócuggø yodø yi wun thyew.” Kɑ jøgɑni ólöggø kinni, “Bong dhɑnhø kì kömi piny, me cuggi köbbi yïn møg-ɑ dwɑddí yodø èn wuö. Bong rɑ̈dh ɑ́kyel, cɑgg ɑ́ rɑ̈nh teg kidï, mɑ ɑ́köbbi tyëngbɑg, kí ɑ́jwöggì, kí tyëdd geki jøyenh kinni göög gen ki gïn ni men. Møg-ɑ pyëj yi yïn ɑnɑn wuö, peeg cɑrø ki mendwøng, møgɑni løøg-ɑ yi jwögg, pɑ lwɑ̈ng yi dhɑnhø, o jwögg pɑ nyi bëëdø kì kelli ji.” Keny-ɑ ɑ́lïngi møgɑni yi rɑ̈dh, kɑ ceg ki mɑgø yi liny ki menrɑj, ɑkööbe kinni i nɑ̈ɑ̈g jø tøg buri rɑ̈dh kì Bɑbïl, ge bënn. Codhe, kɑ cigg muuj kinni i nɑ̈ɑ̈g tyëng-ɑ wɑ̈thi gen pel bënn, kí Dɑniel geki mɑ̈dhhe thyew. Codhe, kɑ Dɑniel kedh-ɑ yï Aryök, jɑngi ɑlɑthker men-ɑ ɑ́köbbi nɑ̈gi jø tøg buri rɑ̈dh kì Bɑbïl, ki dhøg me med, ɑpyëje Aryök mɑ løge per ngø ɑ kɑ̈ni rɑ̈dh ki kwøbb-ɑ peeg ni møgɑni. Aköbbi Dɑniel yi Aryök ki gïn-ɑ ɑ́cwöb. Codhe, kɑ Dɑniel jwɑn-ɑ be kwɑjji rɑ̈dh kinni thödhi ki nyɑ keny me thiinh, o lɑ̈ggi rɑ̈dh kí gïn-ɑ wɑngi yi gen óköbbii yi en. Kɑ Dɑniel kedh-ɑ gøle, ɑ köbbe gïn-ɑ ɑ́cwöb mɑ̈dhhe, ɑ løg Anɑniyɑ̀, kí Micɑil, kí Adhɑriyɑ̀. Kɑ gï köbbe kinni kwɑjji gen Jwøøg Mɑl o pyëwe ólɑ̈ɑ̈me, kɑ kwɑjji gen o gïg-ɑ ókɑnø yɑ̈lle gen, o ge cög ge pɑ nɑ̈g kyeel kí jø tøg buri rɑ̈dh kì Bɑbïl. Kwøbb-ɑ ɑkɑnn møgɑni ɑ́nyudhi Dɑniel kì wɑ̈rɑni yi Jwøøg Mɑl e dhɑ̈y nɑ lɑ̈g. Kɑ Jwøk lejje kinni, “Wiy nyingi Jwøk lenhi gïti ɑtheer, mɑ́ peli wïj geki tegø bɑ møge. En ɑ nyi wil bëëdi piny. A nyi nyiig rɑ̈ɑ̈nh kɑ rɑ̈ɑ̈nh cïbe keje, En ɑ nyi muuj peli wïj geki ngɑ̈nyi wøw. Jɑmm-ɑ piny møg-ɑ bɑ ɑkɑnn nyi yɑle yɑlø, gïn-ɑ yij muudhø ngɑ̈nyi yi en, o bëëd ɑ dïdyëri cɑr. Yɑ ngɑ̈ny-ɑ yïn, o yɑ lenh-ɑ yïn, yïn ɑ Jwøøg kweyyɑ. Yïn ɑ ɑ́thödhi yɑn ki peli wïj kí tegø, kwɑ̈jjɑ ɑ́lïngi yi yïn, kɑ yɑ nyudhí gïn-ɑ óköbbi wøn rɑ̈dh.” Kɑ Dɑniel kedh-ɑ yï Aryök jɑng-ɑ ɑ́köbbi nɑ̈gi jø tøg buri rɑ̈dh kì Bɑbïl. Kɑ gø köbbe kinni, “Ge ko nɑ̈ɑ̈g. Kïdhí yɑn bøli rɑ̈dh, gïn-ɑ wɑngi yi lɑ̈ggɑni óköbbɑ en.” Kɑ Dɑniel kïdhi bøli Rɑ̈dh Nebukɑdnesɑr yi Aryök kì bøli kenyɑni ceth, ɑköbbe rɑ̈dh kinni, “Yɑ ɑ́yïddi kì kelli ji-ɑ ɑ́kɑ̈ɑ̈l kì Yeudiyɑ̀ ki ngɑn cuggi nyudhi gïn-ɑ wɑngi yi lɑ̈ggí yïn wuö.” Apyëëj Dɑniel, ɑ cwøl ɑ́ Beltecɑdhɑr yi rɑ̈dh kinni, “Yɑ ócuggø köbbi lɑ̈ggɑ yi yïn geki gïn-ɑ wɑngi yi gen?” Alöggi Dɑniel kinni, “Wuö, bong jɑlyɑdh, wɑlɑ̀ ɑjwøgø, wɑlɑ̀ ngɑn nyi bɑ̈gø, cɑgg ɑ́ ngɑn nyi nenni ngïjji piny kì ri kyelli mɑl me cuggi köbbi yïn møgɑni. De dɑ Jwøk kì mɑl; en ɑ nyi nyodh gïg-ɑ ɑkɑnn. Yï ɑ́ceg yi en kɑ köbbø wuö, ki gïg-ɑ ócwöb dhuki megø. Anɑn yï óköbbɑ gïg-ɑ ɑ́lidh yi yïn kì yethi lɑ̈ggɑni. “Keny-ɑ ɑ́bëëd yï onenø wuö, yï ɑ́lɑ̈gi ki kwøbb-ɑ ócwöb dhuki megø, o Jwøk ngɑn nyi kwøb ɑkɑnn, yï ɑ́nyudhe gïn-ɑ ócwöb. Møgɑni nuti nyudhi yɑn kɑ per kinni, wïjɑ pel kibøli ji-ɑ kyeelø, dɑ́ kipe kinni o gïn-ɑ wɑngi yi lɑ̈ggɑni yod yi yïn wuö, o rumm-ɑ ɑ́bï yïí gɑm yi wïjí. “Wuö, keny-ɑ ɑ́bëëd yï onenø, yï ɑ́lidh-ɑ ngïji me dwøng cɑrø, e ócungø kì bølí, e ceg-ɑ orɑ̈ng, ree dɑ cɑr, dhɑnhø óböggø ki nenni yïe. Wïje ógwøgø kɑ dhɑm dhïw, kööre geki bɑ̈dde ógwøgø kɑ ɑ́tegø, pyere geki rwödhhe ógwøgø kɑ dilɑl, twel tyelle bɑ ngyënyø dødø, o cɑ̈dhhi tyelle kɑ̈jj møøgø kì ri gen bɑ ngyënyø dødø, o kɑ̈jj-ɑ kyeelø bɑ lɑ̈bø. Kɑ̈ng-ɑ ɑ́nudd yï nenn-ɑ ree, kɑ tungi kït me dwøng rïng-ɑ piny kì mɑl wïj kït e bong gïjø mɑ ɑ́nywɑlii, ɑgume tyell-ɑ bɑ ngyënyø dødø geki lɑ̈bø kì ri ngïji menɑni, kɑ gï kedhhe. Codhe, kɑ ngyënyø dødø, kí lɑ̈bø, kí dilɑl, kí dhɑb kí ɑ́tegø ri gen mød gen, kedh ge ogöögø ni puni byel kì yij rɑrø, kɑ ge køøl yi yømø kinni tweet, kɑ kenyɑni döng-ɑ nøw. De tungi kït men-ɑ ɑ́gum ngïji menɑni ɑ́døngi kɑ piny pɑ̈nge bëne. “Bene gen lɑ̈ggɑni ɑgɑk. Anɑn yï óköbbɑ wuö, ki gïn-ɑ wɑngi yi gen. Wuö, bɑ yïn ɑ dwøng kibøli rɑ̈nhì bënn. Jwøøg Mɑl yï ɑ́gwøge yïn ɑ́ rɑ̈nhdwøng, kɑ yï thödhe ki tegø, geki döng, kí mɑ̈r. Yï ɑ́gwøge yïn ɑ́ jɑngi piny bëne, o yï jɑɑg-ɑ lɑ̈yy kí winy. Yïn ɑ bɑ wïj dhɑb. Bɑngí ódhwöödh yi pödhø megø, koo bëëdø e teg ni pödhí; bɑnge ódhwöödh yi dɑ̈ɑ̈g pödhh, lɑ̈ge ɑ bɑ dilɑl, kömi piny bëne ójɑɑg yi en. Ngween pödhh óbëëd e teg ni ngyënyø dødø, men-ɑ ómød gïïpiny bëne kɑ kedhhe. Ni kedhhi gïïpiny bëne yi ngyënyø dødø, pödhh-ɑ ɑ́yuude ókedhhe bënn. Álidh yi yïn thyew kinni tyel geki lwedd kwï gen bɑ ngyënyø dødø kwï gen bɑ lɑ̈bø. Menɑni nyodh-ɑ kinni pönhɑni óbëëd ree pɑ̈ng en. Yïe ódi tegi ngyënyø dødø, mɑ́ e dɑ ngyënyø dødø me ree yööl en ki lɑ̈bø. Bëëdi kɑ̈jj møøgø bɑ dødø, o møøgø bɑ lɑ̈bø kì ri lwedd, wɑng-ɑ kinni, budi pönhɑni óbëëd e teeg, o bun-ɑ kyeelø nyøødh. Álidh yi yïn thyew kinni ngyënyø dødø ree yööl en ki lɑ̈bø. Menɑni wɑng-ɑ kinni, rɑ̈nhh-ɑ ójɑɑg pödhhɑni ri gen ópɑ̈nyi yi gen rebø kɑ nywømi kɑ̈lli gen ri gen, de ri gen ko mɑg yi gen ni ngyënyø dødø ɑ pɑ nyi mɑ̈gi kì ri lɑ̈bø. Kɑ̈ng-ɑ ónud pödhhɑni, Jwøøg Mɑl ótïngø ki pödhø me pɑ cuggi tyɑmø, o lɑ̈ge pɑ cög, de pödhh-ɑ kyeelø bënn ótyɑm yi en kɑ gï tɑ̈ɑ̈ye piny, o en kiree, óbëëdø gïti ɑtheer. Álidh yi yïn ki kër-ɑ ɑ́rïngi tungi kït piny kì mɑl e bong gïjø mɑ ɑ́nywɑlii, kɑ ngïji møde, eni ngïny-ɑ ógwøgø ki ngyënyø dødø, kí dilɑl, kí lɑ̈bø, kí dhɑb kí ɑ́tegø. Jwøng-ɑ Dwøng köbb-ɑ yïn gïn-ɑ ócwöb dhuki megø wuö. Møg-ɑ ɑ́lɑ̈gi yi yïn ɑ́köbbɑ yïn ki këër gen ceth, o gïn-ɑ wɑngi yi gen kidyër ɑ́nyudhɑ yïn.” Codhe, kɑ Rɑ̈dh Nebukɑdnesɑr ree bøødhe piny, kɑ Dɑniel mɑle. Akööbe i thödhi Dɑniel ki gëëdhi kɑ rɑ̈bbi ki bɑkur. Aköbbi Dɑniel yi rɑ̈dh kinni, “Kidyër Jwøøg wun bene en ɑ bɑ Jwøøg jwögg, en ɑ bɑ wïi rɑ̈nhì, en ɑ nyi yɑl møg-ɑ bɑ ɑkɑnn, mɑ́ ɑkɑnn møg ɑ́lwɑ̈ng yi yïn ki nyodhø.” Codhe, kɑ Dɑniel thödhi yi rɑ̈dh ki lɑwø me dwøng, kɑ thödhi kí gïg mø ngenyø, kɑ gø gwøge ɑ́ jɑngi Bɑbïl; gø ɑ́gwøge thyew ɑ́ jɑngi tyëng-ɑ wɑ̈thi gen pel. Kɑ rɑ̈dh kwɑjji yi Dɑniel, ɑgwøøg Cɑdrɑk, kí Micɑil, kí Abednegö gɑ tyëng-ɑ nyi nenni gïg-ɑ gøggi kì Bɑbïl. De Dɑniel ɑ́cög e bëëd ɑ buri rɑ̈dh. Rɑ̈dh Nebukɑdnesɑr ɑ́göög ki ngïji dhɑb bɑ̈re bɑ mïtïr pyɑ̈r ɑ́ryew wïdɑ́bïryew, o lɑ̈je bɑ mïtïr ɑ́dɑ̈g, kɑ cwöödh piny kì thwøri Durɑ̀ kì Modïri Bɑbïl. Codhe, kɑ rɑ̈dh ocïgø kinni i cugi ji bënn; nyiirɑ̈dhh, kí jɑgg-ɑ døngø, ki jøg-ɑ bɑng jɑgg-ɑ døngø, kí wɑkïll, kí jøg-ɑ mïdhi ngyëny, kí jɑggi burø, kí ómdɑɑ̀, kí tyëng-ɑ göögø kì yij mïïri kì yethi pödhh-ɑ jɑɑg yi rɑ̈nhdwøng bënn. Ge ɑ́cwööl bënn i bï gen be thyeyi ngïji dhɑb men-ɑ ɑ́gwøg kɑ cwöödh piny yi Rɑ̈dh Nebukɑdnesɑr. Keny-ɑ ɑ́wɑ̈nhi teenɑni bëne, kɑ ngeti ngɑ̈j óryeerø ki cwɑg mø døngø kinni, “Wun ɑ tyëng pödhh bënn, kí jurrì; jur ki dhøge. Keny-ɑ ólïngi wun ywøøg kɑ̈ngì kí thøm geki cwɑggi gïg-ɑ nyi kødhhi bënn, kɑ ri wun bøødh wun piny, kɑ ngïji dhɑb men-ɑ ɑ́cwöödh piny yi Rɑ̈dh Nebukɑdnesɑr mɑl wun. Ngɑn-ɑ ócög ree pɑ bøødhe piny kɑ ngïji mɑle, leeng-ɑ yij purun me yije di mɑc me lëëdh cɑrø kì bøli kenyɑni ceth.” Codhe, keny-ɑ ɑ́lïngi ywøøg thøm ceth, kɑ dhɑnhø bëne ki pödhhe, kí jurre, ree bøødhe piny ge mɑl-ɑ ngïji dhɑb men-ɑ ɑ́cwöödh piny yi Rɑ̈dh Nebukɑdnesɑr. Kì bøli kenyɑni, kwï tyëng Bɑbïl ɑ́kedh kɑ Yeud gøøny gen. Rɑ̈dh Nebukɑdnesɑr ɑ́köbbi gen kinni, “Wuö rɑ̈dh, yï ómïdhi yi Jwøk gïti ɑtheer. Yï ɑ́muuj ki cigg kinni keny-ɑ óywöngi thøm ceth, kɑ dhɑnhø bëne ree bøødhe piny ge mɑl-ɑ ngïji dhɑb, kí kinni i ngɑn-ɑ ócög ree pɑ bøødhe piny kɑ gø mɑle, leeng-ɑ yij purun me mɑc mee lëëdh cɑrø. Dɑ kwï Yeud mɑ ɑ́cïb yi yïn gɑ møg nenni gïg-ɑ gøggi kì Bɑbïl, ɑ løg Cɑdrɑk, kí Micɑk kí Abednegö, cigg-ɑ ɑ́muuj yi yïn ɑ́pyem gen. Jwøgí pɑ mɑlli yi gen, wɑlɑ̀ ri gen nuti bøødh gen piny kì bøli ngïji dhɑb men-ɑ ɑ́cwöödh piny yi yïn.” Kɑ rɑ̈dh ójɑwwø ki menteg, ɑöde kinni i kɑ̈ɑ̈l yɑɑgɑni bøle. Kɑ ge pyëj yi rɑ̈dh kinni, “Bɑ dyër, Cɑdrɑk, kí Micɑk, kí Abednegö, kinni wu bɑ̈nyø ki mɑlli jwøgɑ, kɑ wu ocögø ri wun nuti bøødh wun piny kì bøli ngïji dhɑb men-ɑ ɑ́cwöödhɑ piny? Adɑ́ ɑnɑn keny-ɑ ólïngu ywøøg kɑ̈ngì kí thøm geki cwɑggi gïg-ɑ nyi kødhhi bënn, bøødhu ri wun piny kɑ ngïji dhɑb mɑl wun. Keløg e pɑ mɑl yi wun, wu leeng-ɑ yij purun me lyel ki mɑc. Wu orumø kinni dɑ jwøg men-ɑ óyiel wun?” Alöggi Cɑdrɑk, kí Micɑk, kí Abednegö kinni, “Wuö, per wøn pɑ nyɑg yi wøn. Keløg wø ócuggø yielø yi Jwøng-ɑ nyi mɑlli yi wøn ki purun-ɑ lyel geki cingí, wø oyielø yi en. De cɑgg wø pɑ yiel yi en, ngɑ̈nyi yi wøn ceth kinni jwøgí pɑ mɑl yi wøn, wɑlɑ̀ ri wøn pɑ bøødh wøn piny kì bøli ngïji dhɑb men-ɑ ɑ́cwöödh piny yi yïn.” Kɑ Nebukɑdnesɑr mɑg yi liny ki menrɑj, kɑ nyinge ókwɑ̈rrø ki Cɑdrɑk, kí Micɑk, kí Abednegö, ɑkööbe i ti purun ki cwɑgø o lënhe ki mendwøng. Kɑ jøg ɑ́dɑ̈g, jøg-ɑ pëddi tegø kì kelli jølinye köbbe twöj gen yɑɑgɑni gɑ ɑ́dɑ̈g. Kɑ gï leeng gen mɑɑc purun e ceg-ɑ lyelø. Codhe, ɑtwööj gen ki ógudhi gen kì ri gen; ɑ́ywödhh-ɑ thønhø, kí ɑ́ywödhh-ɑ døngø, kí thɑ̈ggì kí ógudh-ɑ kyeelø bënn. Kɑ ge leeng yij mɑɑc purun e olyelø. Mɑɑc purun ɑ́ceg kɑ rubø ki menrɑj, mɑ́ e bɑ rɑ̈dh ɑ ɑ́kööb i rub kinøw. Kɑ jøliny møg-ɑ ɑ́leeng yɑɑgɑni yij purun gwɑr yi leeb mɑc kɑ ge órɑ̈bbø. Codhe, kɑ Cɑdrɑk, kí Micɑk, kí Abednegö pɑ̈dh-ɑ dïdyëri purun e olyelø, ge nudd gɑ ɑtwöj. Kɑ Nebukɑdnesɑr ongɑ̈ngø kɑ pɑ̈ɑ̈r-ɑ mɑl kì wïj kwøm, ɑpyëje jyɑ̈gge kinni, “Pɑth ki jøg ɑ́dɑ̈g ɑ ɑ́twöj yi wɑ, kɑ ge leeng wɑ yij purun-ɑ lyel?” Alöggi gen kinni, “Awøø, wuö.” Apëjje kinni, “De yɑ ce nenn-ɑ jøg ɑ́ngwen ge ócyɑ̈dhø kì yij mɑc? Ge pɑth ki ɑtwöj, o bong gïn nywɑɑl gen, o ngween gen nënni e nɑ wëywödø!” Codhe, kɑ Nebukɑdnesɑr kedh-ɑ dhø purun, ɑcwödde kinni, “Cɑdrɑk! Micɑk! Abednegö! Bɑ̈nggi Jwøng-ɑ Pëddi Döng! Bïu wɑ̈g!” Kɑ ge bï-ɑ wɑ̈g. Kɑ nyiirɑ̈dhh bënn, kí jɑgg-ɑ døngø, kí jɑgg-ɑ bɑng jɑgg-ɑ døngø, geki jyɑ̈ggi rɑ̈dh møg-ɑ kyeelø kedh-ɑ be lidhi jøg ɑ́dɑ̈gɑni, jøg-ɑ ɑ́dhɑ̈li rɑ̈bø yi mɑc; wɑ̈thi yëyyi gen nuti gwɑrø yi mɑc, ógudhi gen nuti rɑ̈bbø, o bong yømi yïrø men ngwɑ̈ɑ̈j kì ri gen. Kɑ rɑ̈dh okööbø kinni, “Lenhi Jwøøg Cɑdrɑk, kí Micɑk, kí Abednegö, ɑ ɑ́ör wëywöne be yieli tyëng-ɑ gɑ̈nnii. Ciggi rɑ̈dh ɑ́pyem gen, kɑ ge bøy-ɑ thøø kibøli ke di bøødh gen ri gen piny, kɑ jwøg me pɑth ki jwøøg gen di mɑl yi gen. “Yɑn ɑ muujø ki cigg èn kinni, ke di dhɑnhø me kööbø ki kwøb mø rijjø kì ri Jwøøg Cɑdrɑk, kí Micɑk, kí Abednegö kì yij pödhø, wɑlɑ̀ kì yij jur, wɑlɑ̀ ji mø 'kööb dhøng-ɑ́, bɑ men ngølli ɑ́ gullì, kɑ gøle cøør piny. Bong jwøg megø me cuggi yïëdø ni men.” Codhe, kɑ Cɑdrɑk, kí Micɑk, kí Abednegö tïng mɑl yi rɑ̈dh kì modïri Bɑbïl. Wɑ̈nyi wöödø men ɑ́ör yi Rɑ̈dh Nebukɑdnesɑr e öd-ɑ pödhh bënn, kí jurrì bënn; jur ki dhøge kì kömi Lɑ̈bø. “Mɑ̈dhu ri wun! Lïng wun ki ngïjjì geki gïïngɑ̈ngø møg-ɑ ɑ́nyudhi yɑn yi Jwøng-ɑ Dwøng. “Bɑ ngïjjì ki gïïngɑ̈ngø mø døngø ɑ nyi gwøg yi Jwøk! Jwøk ɑ bɑ rɑ̈dh, en ɑ jyɑ̈gø gïti ɑtheer. “Yɑ ɑ́bëëd pyëwɑ omedø kì gølɑ, nyingɑ pɑ̈ng yi kɑ̈r bëne. De men-ɑ́ yɑ ɑ́ceg lɑ̈gø kì wɑ̈r, ki lɑ̈g mø peg, kɑ yɑ obwøgø ki menrɑj. Kɑ jøg-ɑ bɑ tïddì kì Bɑbïl cwöölɑ bënn, o yɑ nyudhi gen gïn-ɑ wɑngi yi lɑ̈ggɑni. Codhe, kɑ tyëng-ɑ nyi bɑ̈gø, kí ɑ́jwöggì, kí jøyenh, kí tyëdd kɑ̈ɑ̈l bølɑ. Kɑ ge köbbɑ lɑ̈ggɑ, de gïn-ɑ wɑngi yi lɑ̈ggɑni ɑ́dhɑ̈li nyudhi yɑn yi gen. Codhe, ɑbëën Dɑniel. (Cwølli thyew ɑ́ Beltecɑdhɑr ni nyingi jwøgɑ.) Ree dɑ wëyi jwögg kwërø, ɑnyodhe møg-ɑ ɑ́lɑ̈gi yi yɑn. Áköbbɑ kinni: Beltecɑdhɑr, jɑngi tyëngbɑg, ngɑ̈nyi yi yɑn kinni wëyi jwögg kwërø ying-ɑ rií, o kwøbb-ɑ ɑkɑnn bënn ngɑ̈nyi yi yïn. Lɑ̈ggɑ ek; köbbí yɑn gïn-ɑ wɑngi yi gen. “Yɑ ɑ́lɑ̈gi, yɑ lɑ̈g-ɑ yɑdh me dwøng cɑrø me cungi kì dïdyëri piny. Kɑ yɑnhɑni ókedhø e ceg-ɑ pëddø døngø, gïti kɑ ɑ́wɑ̈dhe mɑl, kɑ nenni yi dhɑnhø bëne kì kömi piny. Yïthhi yɑnhɑni myëër, o kööre pɑ̈ng yi ɑnyøddø bëne, mø cɑm yi ji bënn kì kömi piny. Lɑ̈yyi pɑ̈l buud-ɑ tïbe, o winy bëëd ɑ bɑ̈dde, jɑmmi kömi piny bëne cyɑ̈ɑ̈m ɑ ri nywøle. “Kɑ̈ng-ɑ ɑ́nudd yɑ orumø kì ri møgɑni, ɑlïdhɑ ki wëywödø me kɑ̈ɑ̈l mɑl e otïïdø kidøøj. Akööbe ki cwɑg mø døngø kinni, ‘Ngølu yɑnhɑni piny kɑ bɑ̈dde kebbi wun, rodhu yïthhe kɑ nywøle kedhhi wun, cyeed wun lɑ̈yy wɑ̈g kì thɑre geki winy kì bɑ̈dde. De wiy wun tyele kì piny ɑ́ ɑkod ki ɑ́cwecwelli ngyënyø dødø geki ɑ́cwecwelli dilɑl. Wiy bëëde kì pɑ̈l kinøw kì kelli lum. “ ‘Wiy köme bëën yi thöjji mɑl, kɑ wiy bëëde kì kelli lɑ̈yy geki lum. Koo rumø ki rummi dhɑnhø den-ɑ́ rummi lɑ̈y ɑ órømme ki runn ɑ́bïryew. Møg bene gen møg-ɑ ɑ́kwøb yi wëywödd møg-ɑ nyi tïïdø kidøøj. Wiy yod yi dhɑnhø bëne kì kɑ̈jj bënn kinni Jwøng-ɑ Dwøng yïe dɑ tegø kì kömi pödhh bënn, o pödhhɑni nyi mëgge’ ngɑn-ɑ dwɑdde; cɑgg gï mëgge ji mø per gen pɑ ti teg.’ “Bene gen lɑ̈ggɑ ɑgɑk. Anɑn yïn ɑ Beltecɑdhɑr, köbbí yɑn gïn-ɑ wɑngi yi gen. Jø tøg burɑ ɑ́dhɑl yi köbbi yɑn gïn-ɑ wɑngi yi lɑ̈ggɑni, de ócuggø kwøbø yi yïn, mɑ́ rií dɑ wëyi jwögg kwërø.” Keny-ɑ ɑ́lïngi møgɑni yi Dɑniel, ɑ cwøl ɑ́ Beltecɑdhɑr, kɑ ceg-ɑ thengø; ɑ́dhɑ̈li kwøb. Aköbbii yi rɑ̈dh kinni, “Beltecɑdhɑr, yï ko theng yi lɑ̈ggɑni geki nyodhi gen.” Alöggi Beltecɑdhɑr kinni, “Wuö, lɑ̈ggɑni ke di töngi gen kömi tyëng-ɑ mɑɑn yïn, di bëëd e døøj! Yɑnh-ɑ ɑ́lidh yi yïn e wɑ̈dhi mɑl, e ócuggø nennø yi dhɑnhø bëne kì kömi piny. Yïthhe ɑ́bëëd ge myëër, o kööre dɑ ɑnyøddø bëne, me cɑm yi kömi piny bëne. Lɑ̈yyi pɑ̈l ɑ́ywööm kì tïbe, kɑ winy ogëdø ki ud kì bɑ̈dde. “Bene yïn ɑ bɑ yɑnhɑni wuö, yɑnh-ɑ bɑ̈r, ɑ teg. Yï ɑ́døngi ki mendwøng kɑ yï wɑ̈dh-ɑ mɑl, kɑ lɑ̈gí wɑ̈dh-ɑ cögi piny. Kɑ̈ng-ɑ ɑ́nudd yï onëënø wuö, wëywödø ɑ́bï e kɑ̈ɑ̈l-ɑ mɑl, ɑkööbe kinni, ‘Ngølu yɑdh piny, kɑ bɑ̈dde kebbi wun, kɑ tyele wiy wun kì piny, kɑ wiy bëëde kì pɑ̈l kì kelli lum, e ókodø ki ɑ́cwecwelli ngyënyø dødø geki dilɑl. Wiy thöjj dyëëm gen köme, kɑ wiy bëëde kì pɑ̈lɑni geki lɑ̈yy ki runn ɑ́bïryew.’ “O gïn-ɑ wɑngi yi lɑ̈ggɑni èn wuö, gen ɑ møg-ɑ ɑ́nyodh yi Jwøng-ɑ Dwøng kinni i ge óbï kömí. Yï ócyeed wɑ̈g kì kelli ji, kɑ yï obëëdø kì pɑ̈l wuki lɑ̈yy. Yï ócɑm lum ni wɑdh, kɑ yï onebø yi thöjj, ki runn ɑ́bïryew; gïti keny-ɑ óyodií kinni Jwøng-ɑ Dwøng, bɑ en ɑ jɑɑg pödhh-ɑ kömi piny bënn, o gï nyi mëgge’ ngɑn-ɑ dwɑddi yi en. Wëywödø ɑ́kööb i wiy tyeli yɑdh kì piny. Menɑni wɑng-ɑ kinni, lɑwí ódöggi yïn keny-ɑ óyïëëy kinni bɑ Jwøk ɑ jɑɑg kömi piny bëne. Adɑ́ lïngí kwøbbɑ cyee wuö, wïyí ki gwøg ki orøg, gøggí dyër, kɑ pyëwí nyi lɑ̈ɑ̈me ki ngɑn jɑdø, o yï ókedh yï ódönyø.” Gïgɑni bënn ɑ́cwöb kɑ ge pɑ̈dh-ɑ kömi rɑ̈dh Nebukɑdnesɑr. Keny-ɑ ɑ́thumi dwɑ̈tt pyɑ̈rø wïdɑ́ryew, rɑ̈dh ɑ́bëëd e ócyɑ̈dhø kì wïj óthɑɑng ød kì gøldwøng kì Bɑbïl, ɑkööbe kinni, “Lidh, Bɑbïl bëëd ɑ dï! Eni kɑɑldwøng kɑɑl-ɑ geer yɑn ki tegɑ ɑ́ kɑɑl jyɑ̈gø, keny nënni döngi rɑ̈ɑ̈dhø miɑ geki tegɑ.” Kɑ cwɑg obëënø ge kɑ̈ɑ̈l-ɑ mɑl e nudd e okööbø ceth; cwɑggɑni okööbø kinni, “Rɑ̈dh Nebukɑdnesɑr, lïng! Lɑwi rɑ̈ɑ̈dhø mií ɑ́kɑ̈ɑ̈l wɑ̈g kì rií. O yï ócyeed wɑ̈g kì kelli ji, yï óbëëdø kɑ lɑ̈yyi pɑ̈l, yï cɑm-ɑ lum ni wɑdh, ki runn ɑ́bïryew, gïti keny-ɑ óyïëëy kinni Jwøng-ɑ Dwøng yïe dɑ tegø kì kömi pödhhi kömi piny bënn, o gï ócuggø mëggi yi en ngɑn-ɑ dwɑdde.” Møgɑni ɑ́bï gɑ dyër ceth, Nebukɑdnesɑr ɑ́cyeed wɑ̈g kì kelli ji, kɑ cɑm-ɑ lum ni wɑdh. Köme ɑ́dyëëm yi thöjj, kɑ yëyye óbɑ̈rø ni obërri cor, kɑ könggi lwedde ogöögø ni lweddi winyø. “Keny-ɑ ɑ́thumi runn ɑ́bïryew, ɑtïngɑ wïjɑ kɑ yɑ lïïdh-ɑ mɑl, kɑ rummɑ ódwöögø. Kɑ Jwøng-ɑ Dwøng lejjɑ; eni ngɑn-ɑ bëëdø gïti ɑtheer; ɑ́lejjɑ kɑ lenhɑ kinni, “Ójyɑ̈ɑ̈gø gïti ɑtheer, Lɑ̈ge pɑ cög. Ji nenni yi en kì piny ge bong per gen, Wëywödd kì mɑl geki ji kì piny jɑɑg-ɑ yi en, bong ngɑn cuggi jogii. Bong ngɑn mɑ̈ɑ̈nii gïn dwɑdde gwøgø wɑlɑ̀ bong ngɑn pëjjii gïn-ɑ gwøge “Keny-ɑ ɑ́dwöög rummɑ, kɑ dhwɑ̈ngɑ dwöög-ɑ yïɑ kí rɑ̈ɑ̈dhø geki lɑ̈gɑ, kí mɑ̈rɑ geki pödhɑ. Kɑ yɑ yɑb yi jyɑ̈ggɑ geki jø tøg burɑ, kɑ yɑ cïb wïj kwømɑ, kɑ lɑwɑ döggi yɑn ki dhwɑ̈ng me lod men-ɑ ɑ́bëëde cøn. “O ɑnɑn, yɑ Nebukɑdnesɑr, yɑ lenh-ɑ Jwøng-ɑ Dwøng, o yɑ lejj-ɑ en. Gïg-ɑ gøgge bënn pɑ nyi bɑ̈jji, o ge bɑ dyër, o ngɑn tɑ̈dø wïje nyi dwööge’ cyɑ̈n.” Tyelø ɑ́kyel kì thyënhø Rɑ̈dh Belcɑdhɑr jyɑ̈gge ɑ́ryeje kwɑnni gen bɑ ɑ́lïp, kɑ ge omɑ̈dhø ki møgi oløg kì kej ɑ́kyel. Kɑ̈ng-ɑ ɑ́nudd ge omɑ̈dhø, kɑ Belcɑdhɑr omuujø ki cigg kinni i kɑ̈ɑ̈l óthɑ̈ggi dhɑb kí ɑ́tegø kí tɑ̈mmì møg-ɑ ɑ́kɑ̈ɑ̈l yi wïye Nebukɑdnesɑr kì Kengi Yerusɑlem, o yethi gïn mɑ̈ɑ̈dh yi rɑ̈dh geki jyɑ̈gge, kí mɑ̈nne geki ɑkwɑnyye. Kɑ óthɑ̈ggɑni kɑ̈ɑ̈l kì bøli kenyɑni ceth, kɑ ge omɑ̈dhø bënn ki møgi oløg kì yethi gen, kɑ jwögg-ɑ ógwøgø gɑ dhɑb, kí jwöggi ɑ́tegø, kí jwöggi dilɑl kí ngyënyø dødø, kí jwöggi yɑdh kí jwöggi kït mɑlli yi gen. Kɑ cingi dhɑnhø ocwöbø, ɑcɑ̈ge ki gwed kì kö döri gøldwøng, kì keny-ɑ ti ki cɑrø yi mɑc. Kɑ cingɑni lidh yi rɑ̈dh e ogwëdø. Kɑ rɑ̈dh obwøgø ki mendwøng, kɑ dële okïïrø, kɑ cønge odennø yi wɑ̈ɑ̈rø. Kɑ ócwöddø e óryeerø ki ngɑn rengi be cwööli ɑ́jwöggì, kí jøyenh geki tyëdd. Keny-ɑ ɑ́wɑ̈nhi gen, ɑköbbi gen yi rɑ̈dh kinni, “Ngɑn-ɑ órɑng gwedd møg, kɑ yɑ köbbe gïn-ɑ wɑngi yi gweddɑni, óruug ki ógudh ɑ́cwïcwïlli rɑ̈ɑ̈dhø, kɑ ruug ki ɑ́cwecwelli dhɑb mø dhwɑ̈ng, o gwøg ɑ́ jɑl-ɑ bɑng ókwøm.” Kɑ tïddi rɑ̈dh nyeg-ɑ kenyɑni, de bong ngɑn mɑ ɑ́lwɑ̈ng gweddɑni ki rɑngø, wɑlɑ̀ bong ngɑn mɑ ɑ́köbbi rɑ̈dh gïn-ɑ wɑngi yi gen. Kɑ Rɑ̈dh Belcɑdhɑr obwøgø ki mendwøng, kɑ dële ójuurø, kɑ dëlli jyɑ̈gge ójuurø. Cwɑggi rɑ̈dh geki jyɑ̈gge ɑ́lïngi yi meyi rɑ̈dh, kɑ kedh-ɑ ódɑ̈r-ɑ di jøg-ɑ ɑ́ryej. Kɑ okööbø kinni, “Yï ómïdhi yi Jwøk gïti ɑtheer wuö! Yï ko bwøg kɑ dëlí ko juur. Dɑ jɑl megø kì pödhí me ree di wëyi jwögg kwërø. Keny-ɑ ɑ́bëëd wïyí ɑ́ rɑ̈dh, jɑlɑni ɑ́nyuudh ki peli wïj me ni peli wɑ̈thi jwögg. Kɑ gwøg yi Rɑ̈dh Nebukɑdnesɑr ɑ́ jɑngi tyëngbɑg, geki ɑ́jwöggì, kí jøyenh geki tyëdd. Yïe dɑ tegø megø kì wɑ̈ye, o wïje pel, ngɑ̈ny gïn-ɑ nyi wɑngi yi lɑ̈g, ngɑ̈ny bɑg ki kwøbb-ɑ teg, o kwøbb-ɑ ɑkɑnn ngɑ̈nye, öd kɑ jɑl-ɑ cwøl ɑ́ Dɑniel cwööl, en ɑ ɑ́cɑg yi rɑ̈dh ɑ́ Beltecɑdhɑr, yï óköbbe gïn-ɑ wɑngi yi møgɑk bënn.” Kɑ Dɑniel jwɑn ki kïdhi bøli rɑ̈dh, ɑköbbii yi rɑ̈dh kinni, “Bene yïn Dɑniel wɑ̈d Yeud men-ɑ ɑ́kɑ̈ɑ̈l yi wïyɑ rɑ̈dh kì Yeudiyɑ̀? Yɑ ɑ́lïng i wëyi jwögg kwërø ying-ɑ rií, o yï ngɑ̈ny kwøb, o wïjí pel. Tyëdd geki ɑ́jwöggì ɑ́cwööl keny kipe kinni o gwedd møg rɑng yi gen, o yɑ köbbi gen gïn-ɑ wɑngi yi gweddɑni. De ge ɑ́dhɑl yi yodi gïn-ɑ wɑngi yi gweddɑni. Yɑ ɑ́lïng ɑnɑn kinni i yï ócuggø nyudhø ki kwøbb-ɑ ɑkɑnn geki møg teg. Keløg yï ócuggø rɑngi gweddï, kɑ yɑ köbbí gïn-ɑ wɑngi yi gen, yï óruug ki ógudh ɑ́cwïcwïlli rɑ̈ɑ̈dhø, kí ɑ́cwecwelli dhɑb mø dhwɑ̈ng kì yedhí, o yï ógöögø ki jɑl-ɑ bɑng ókwøm.” Alöggi Dɑniel kinni, “Mïdhí jɑmmí, wɑlɑ̀ mëggí gen ngɑn megø. Yï órɑ̈ngɑ gïg-ɑ ógwedø, o yï ónyudhɑ gïn-ɑ wɑngi yi gen. “Jwøng-ɑ Dwøng wïyí Nebukɑdnesɑr ɑ́gwøge ɑ́ rɑ̈dh me dwøng, kɑ gø thödhe ki dhwɑ̈ng geki mɑ̈r. Ábëëd e dwøng cɑrø kɑ ji bënn, kí pödhh, kí jurrì bënn óböggø yi en. Kenyi di ngɑn dwɑdde nɑ̈gø, gø nyi nɑ̈ge nɑ̈gø, ke di ngɑn dwɑdde wiyø, gø nyi wiye wiyø. De keny-ɑ ɑ́tɑ̈de kɑ wïje ótëngø, kɑ yije órönyø, ɑkɑ̈ɑ̈lii wɑ̈g kì yij dhwɑ̈nge. Ácyeed wɑ̈g kì kelli ji, kɑ rumme ogöögø ni rummi lɑ̈y. Ábëëd ɑ kelli ɑderri pɑ̈l, e cɑm-ɑ lum ni wɑdh, nyi buud-ɑ tɑngdɑɑr piny e bong gïjø me kume ree kiper thöjj. Ayïëye kì cyɑ̈ɑ̈n piny cyee kinni Jwøng-ɑ Dwøng en ɑ mïdhi pödhh bënn, o gï nyi mëgge’ ngɑn-ɑ dwɑddi yi en. “De men-ɑ́ yïn ɑ wɑ̈de, wïjí nuti dwöög yïn cyɑ̈n, ngö møgɑni bënn ngɑ̈nyi yi yïn. Yï ɑ́göög ki gïnrɑj kì bøli wïi mɑl, óthɑ̈ggì geki tɑ̈mmi dhɑb møg-ɑ ɑ́kɑ̈ɑ̈l kì Kenge ɑ́kɑ̈ɑ̈l yi yïn. Kɑ yï omɑ̈dhø ki møgi oløg kì yethi gen wuki jyɑ̈ggí, kí mɑ̈nní, geki ɑkwɑnyyí, kɑ jwöggi dhɑb, kí jwöggi ɑ́tegø, kí jwöggi dilɑl, kí jwöggi ngyënyø dødø, kí jwöggi yenh, kí jwöggi kïttì mɑlli yi wun. Eni jwögg-ɑ pɑ nëënø, o ge pɑ lïngø, o bong gïjø me ngɑ̈nyi yi gen. De men-ɑ́ wïjí ɑ́wïl ki Jwøng-ɑ cinge di wëyí, kí gïg-ɑ gøggi yi yïn bënn. Bene ɑ bɑnge ɑ́ör cingɑni yi Jwøk, o gwede kwøb møg. “Møg-ɑ ɑ́gwed ek: ‘Kwɑn, kwɑn, røm, pɑ̈g.’ O gïn-ɑ wɑngi yi gen ek: kwɑn; cyɑ̈nggi jyɑ̈gí ɑ́kwɑn yi Jwøk kɑ ge óthumø, røm: yï ɑ́røm ki midhɑn kɑ yï yod yï oyödø, pɑ̈g: pödhí ɑ́pɑ̈ngi kɑ mëggi tyëng Pɑres geki Mɑdɑy.” Kɑ Belcɑdhɑr omuujø’ cigg kì bøli kenyɑni ceth, i ruug Dɑniel ki ógudh ɑ́cwïcwïlli rɑ̈ɑ̈dhø, kɑ yedhe kïdhi ki ɑ́cwecwelli dhɑb mø dhwɑ̈ng. Kɑ gø gwøge ɑ́ jɑl-ɑ bɑng ókwøm. Rɑ̈dh Belcɑdhɑr, rɑ̈ɑ̈dh Bɑbïlöniyɑ̀ ɑ́nɑ̈g kì wɑ̈rɑni ceth. Kɑ lɑwø kwɑny yi Dɑryøs jɑl Mɑdɑy e runne bɑ pyɑ̈r ɑ́bïkyel wïdɑ́ryew. Dɑryøs ɑ́rööny ki jyɑ̈ggì miyø kí pyɑ̈r ɑ́ryew kì yij pödhe, ɑrönye ki jɑgg ɑ́dɑ̈g møg jɑɑg jyɑ̈ggɑni, o ge nenni gen gwøøg rɑ̈dh, Dɑniel bɑ ɑ́kyel kì kelli jɑggɑni. Kɑ Dɑniel oluudø kì kelli jɑggɑni geki jyɑ̈gg-ɑ kyeelø, mɑ́ gwøge ɑ́tyëëm ki døøjø, kɑ rɑ̈dh orumø kinni, o di gwøg ɑ́ jɑngi pödhø bëne. Codhe, kɑ jyɑ̈gg-ɑ døngø geki jɑgg-ɑ kyeelø oyɑ̈bø ki gïn ree di gøøny Dɑniel kì ri yëth-ɑ jɑɑge pödhø, de ge ɑ́jɑ̈ddi, mɑ́ Dɑniel gwøge døøj, o pɑ nyi bɑ̈jji, o yije bong wëënyø. Codhe, kɑ jøgɑni ri gen köbbi gen kinni, “Bong gïjø me pere gøøny wɑ en kì ri gwøge, den-ɑ́ ri ciggi Jwøge ɑ cuggi wɑ ki yodii.” Kɑ ge kedh-ɑ yï rɑ̈dh, ɑköbbi ge gøn kinni, “Rɑ̈dh Dɑryøs, yï ómïdhi yi Jwøk gïti ɑtheer! Wøn, wø jɑgg-ɑ døngø, kí jɑggi yethi myërr geki jɑggi bɑnggi gen, kí jɑgg-ɑ kyeelø bënn, dhøggi wøn ɑ́reb yi wøn kinni, gwëëd rɑ̈dh ki cigg gɑ cigg møg mïdhi ki menteg. Muuj ki cigg kinni, ko di dhɑnhø me kwɑ̈jji kì yï jwøg megø, wɑlɑ̀ kì yï dhɑnhø megø ki gïïpiny, ki cyɑ̈ng pyɑ̈r ɑ́dɑ̈g, den-ɑ́ kì yïí ketí wuö. Ngɑn-ɑ ópyem ciggɑni leeng-ɑ yij buur ngurrì. Gwed wɑ̈nyi ciggɑni kɑ nyingí thɑɑny yije, o göög ceth ɑ́ ciggi Mɑdɑy geki Pɑres, cigg-ɑ pɑ nyi wil.” Codhe, kɑ Rɑ̈dh Dɑryøs nyinge thɑɑnye yij wɑ̈nyi ciggɑni. Keny-ɑ ɑ́yodii yi Dɑniel kinni wɑ̈nyø ɑ́rum ki thɑnyø, ɑkedhe gøle. Yïe dɑ ɑwɑj kì ød mɑl kì gøle, ɑwɑnyɑni yïëbb-ɑ tung-ɑ døøg kuni Yerusɑlem, kɑ cønge rume piny kì kenyɑni ni kenyi gööge kì cyɑ̈ɑ̈ng, ɑ nyi mɑlle Jwøk ki tyel ɑ́dɑ̈g cyɑ̈ng ɑ́kyel. Kɑ jøgɑni dhøggi gen nywɑg gen, kɑ ge ókedhø, ɑyuud gen Dɑniel cønge rum en piny e kwɑjj-ɑ Jwøge, ɑkedhi gen be gøønyi Dɑniel yï rɑ̈dh, ɑkööb gen kinni, “Wuö, nyingí ɑ́thɑɑny yij wɑ̈nyi cigg-ɑ kööbø kinni ko di ngɑn kwɑ̈jji ki gïïpiny kì yï jwøg megø, wɑlɑ̀ kì yï dhɑnhø den-ɑ́ yïí ketí, ki cyɑ̈ng pyɑ̈r ɑ́dɑ̈g, o ngɑn-ɑ ko mïdhi ciggɑni leeng-ɑ buur ngurrì.” Alöggi rɑ̈dh kinni, “Ngee, ge bɑ cigg mø teg, ciggi Mɑdɑy geki Pɑres, cigg-ɑ pɑ nyi wil.” Codhe, ɑköbbi rɑ̈dh yi gen kinni, “Dɑniel, jɑl ɑ́kyel kì kelli tyëng-ɑ ɑ́kɑ̈ɑ̈l kì Yeudiyɑ̀, yï pɑ wør yi en, o cigg-ɑ ɑ́muuj yi yïn ɑ́pyeme. Nyi ceg-ɑ kwɑ̈jjø tyel ɑ́dɑ̈g cyɑ̈ng ɑ́kyel.” Kɑ rɑ̈dh pyëwe ceg-ɑ rënyø keny-ɑ ɑ́lïnge møgɑni, ɑyɑ̈be ki yöö men yiele Dɑniel; ree ɑ́pɑ̈nye ceth gïti kɑ ɑ́wɑ̈dhi cɑ̈ng piny. Kɑ jøg-ɑ mɑɑn Dɑniel døøg-ɑ yï rɑ̈dh, ɑkööb gen kinni, “Ngɑ̈nyi yi yïn wuö, kì ri ciggi Mɑdɑy geki Pɑres, kinni cigg-ɑ nyi muuj yi rɑ̈dh pɑ nyi wil.” Codhe, kɑ rɑ̈dh omuujø ki cigg kinni i mɑɑg Dɑniel, kɑ leeng yij buur ngurrì. Dɑniel ɑ́köbbi yi rɑ̈dh kinni, “Wiy yï óyiel yi Jwøgí, Jwøng-ɑ nyi rïïj e omɑllø yi yïn.” Kɑ dhø bur cïbi ki kït. Kɑ kitim mi rɑ̈dh geki mø jyɑ̈gge thɑɑny ri kïnɑni, kinni o óbëëd e bong ngɑn yiel Dɑniel. Codhe, kɑ rɑ̈dh døøg-ɑ gøldwøng, ɑbɑ̈nye ki gïncɑm wɑlɑ̀ gïn mɑdh, kɑ wɑ̈r tyëge e nuti nenø. Dhuki kì ri tɑ̈ri piny ceth, kɑ rɑ̈dh jwɑn-ɑ buur ngurrì. Keny-ɑ ɑ́wɑ̈dhe buti bur men-ɑ ɑ́leeng Dɑniel, ɑryeere mine cödø e cwøll-ɑ Dɑniel kinni, “Dɑniel, bɑ̈ng Jwøng-ɑ Nëënø! Jwøng-ɑ nyi rïïj e omɑllø yi yïn, yï ɑ́yiele kì dhøggi ngurrì?” Alöggi Dɑniel kinni, “Yï ómïdhi yi Jwøk wuö gïti ɑtheer! Jwøgɑ wëywöne ɑ́öre be cyëgi dhøggi ngurrì, kipe yɑ ónyïɑ̈g yi gen, mɑ́ yɑ ɑ́yod yi Jwøk yïɑ bong cɑ́y kì bøle, geki bølí thyew wuö rɑ̈dh. Bong gïnrɑj mɑ ɑ́gwøgɑ.” Kɑ rɑ̈dh pyëwe ómïnø ki mendwøng, ɑmuuje cigg kinni i mïïd Dɑniel wɑ̈g kì yij burɑni. Codhe ɑmïïdii wɑ̈g, bong gïn nywɑɑlii mɑ́ e ɑ́gɑ̈nn-ɑ Jwøk. Kɑ rɑ̈dh omuujø ki cigg kinni mɑɑg jøg-ɑ ɑ́gøøny Dɑniel bënn, kɑ ge leeng yij bur me pɑ̈ng yi ngurrì, geki mɑ̈nni gen kí nyigi gen. Kɑ ge ceg ki gɑmmø yi ngurrì ge nuti wɑ̈dhi tyeli burɑni, kɑ cu gen mwöd yi ngurrì. Kɑ Rɑ̈dh Dɑryøs gwëd-ɑ yï pödhh bënn, kí jurrì bënn, kí dhøg bënn, kì kömi piny kinni, “Mɑ̈dhu ri wun! Yɑn ɑ muujø ki cigg èn, kinni dhɑnhø bëne kì yij pödhɑ bögge, kɑ wøre Jwøøg Dɑniel. “Bɑ Jwøk me nëënø, o ójyɑ̈ɑ̈gø gïti ɑtheer. Lɑ̈ge pɑ cuggi tɑ̈ɑ̈y piny, o jyɑ̈ge pɑ cög. Nyii yïëdø, kɑ nyii dumø; nyii göögø ki ngïjjì geki gïïngɑ̈ngø, kì mɑl kí piny. En ɑ ɑ́yiel Dɑniel kì dhøggi ngurrì.” Kɑ Dɑniel pere ceg-ɑ pëddø tëngø kì kɑɑm-ɑ ɑ́jyɑ̈ɑ̈g Dɑryøs geki kɑɑm-ɑ ɑ́jyɑ̈ɑ̈g Körec jɑl Pɑres. Yɑ ɑ́lɑ̈gi kì kyeel runni Belcɑdhɑr rɑ̈ɑ̈dh Bɑbïlöniyɑ̀ kì yij lɑwø. Yɑ ɑ́lɑ̈g ɑ wɑ̈r, kɑ lɑ̈ggɑni gweedɑ yij wɑ̈nyø, gweddɑni ek: ge bɑ wɑ́ji gïg-ɑ ɑ́lɑ̈gɑ kì wɑ̈rɑni. Yɑ ɑ́lɑ̈g-ɑ yømø e ókwöddø kì wɑ̈thi tùng bënn, kɑ nɑɑm omeli dwøng pwöje. Kɑ lɑ̈yy ɑ́ngwen bï-ɑ wɑ̈g kì nɑmɑni, ge bɑ lɑ̈yy mø døngø mø bɑ̈ɑ̈n. Men-ɑ kyeel gen nënni e nɑ ngur, de yïe dɑ obërr ni cor. Kɑ̈ng-ɑ ɑ́nudd yɑ nenn-ɑ kenyɑni, kɑ obërre puth wɑ̈g. Kɑ lɑ̈yɑni tïng mɑl o cunge kì kömi tyelli cyɑ̈n ni dhɑnhø, kɑ thödhi ki rummi dhɑnhø. Ryeew lɑ̈yyɑni nënni e nɑ lɑ̈y dub, e ócungø kì kömi tyelli cyɑ̈n. Dhøge dɑ ngëd ɑ́dɑ̈g gï mïdhe’ mïdhø ki legge. Kɑ köbbi yi cwɑg møøgø kinni, “Göggí bølí, cyɑ̈ɑ̈m ki rïngø me gïïr!” Kɑ̈ng-ɑ ɑ́nudd yɑ nenn-ɑ kenyɑni, kɑ lɑ̈y me ni kwej obëënø, de köme dɑ obërr ɑ́ngwen mø ni obërri winyø, o yïe dɑ wɑ̈ɑ̈th ɑ́ngwen, kɑ thödhi ki lɑwø. Kɑ̈ng-ɑ ɑ́nudd yɑ nenn-ɑ kenyɑni, kɑ ngween lɑ̈yyɑni obëënø, bɑ lɑ̈y me dwøng o teeg cɑrø, o legge bɑ ngyënyø dødø ge døngø cɑrø, ceg kɑ böggø ki mendwøng. Kɑ lɑ̈yy-ɑ kyeelø nyøne gï mwöde mwödø ki legge, leggi ngyënyø dødø møg-ɑ pëddi tegø. Bëëde bɑ̈ɑ̈n ki lɑ̈yy-ɑ ɑ́bï kì bøle, yïe dɑ tùng pyɑ̈rø. Kɑ̈ng-ɑ ɑ́nudd yɑ nenn-ɑ ri tùngɑni, kɑ tung me thinh lidhɑ e otwïyø kì kelli tùngɑni. Kɑ tùng ɑ́dɑ̈g puthe wɑ̈g kì kelli tùng-ɑ ɑ́yuude kenyɑni. Tung-ɑ ɑ́twïy kì cyɑ̈n yïe dɑ nyingi dhɑnhø, kí dhøg me tïnggi ki kwøb mø døngø. Kɑ kwømm cïb piny, yɑ nudd yɑ onëënø. Kɑ ngɑn-ɑ ɑ́wöni weenø e onëënø pëgg-ɑ wïj kwøm ɑ́kyel. Ógudhe tɑr nɑ ɑ́piy, o yëyye dhïw. Tyelli kwøme bɑ mɑc me lyel, mɑc opɑ̈mmø kì ri gen. Dɑ ji ɑ́lïp mø ngenyø møg kɑ̈llii, o møg-ɑ cungi kì bøle pɑ yïëy kwɑnø, ge bɑ ɑ́lïp pyɑ̈r mø ngenyø. Kɑ burø ócɑ̈gø, kɑ wɑ̈j yieb. Yɑ ɑ́nudd yɑ ócungø yɑ lïng-ɑ kwøbb-ɑ døngø møg-ɑ kømmi yi tung-ɑ thinh. Kɑ ngween lɑ̈yy nɑ̈g yɑ nudd yɑ onëënø, kɑ leeng mɑc o rɑ̈bbe. Lɑ̈yy-ɑ kyeelø lɑwø ɑ́kwɑny kì cinggi gen, de ge ɑ́wiy bëëd gen ki keny me nøg. Kì yethi lɑ̈ggɑni kì wɑ̈r, yɑ ɑ́lïdhi ki gïjø me nënni e nɑ dhɑnhø. Kɑ bï-ɑ yïɑ e cyɑ̈dh-ɑ́ɑ̀ yethi pølli mɑl, kɑ kedh-ɑ yï ngɑn-ɑ ɑ́wöni weenø e onëënø, ɑkïdhii bøle. Kɑ thödhi ki tegø, kí dhwɑ̈ng, kí lɑ̈gø, o tyëng pödhh bënn, kí jurrì bënn, jur ki dhøge mɑlli gen en. Jyɑ̈ge gïti ɑtheer, o lɑ̈ge pɑ thumi. Yɑ ɑ́tyɑj yi lɑ̈gg-ɑ ɑ́lɑ̈gɑ, kɑ wïjɑ ócungø ki mendwøng. Kɑ yɑ kedh-ɑ yï jɑl ɑ́kyel kì kelli jøg-ɑ cungi kì kenyɑni, ɑpyëjɑ en ki gïn-ɑ wɑngi yi møgɑni bënn. Kɑ yɑ nyudhe gïn-ɑ wɑngi yi møgɑni. Ákööb kinni, “Lɑ̈yy-ɑ døngø ɑ́ngwen møgɑni bɑ pödhh ɑ́ngwen mø døngø møg-ɑ ódhwödh kì kömi piny. De lɑ̈gø ókwɑny yi jii Jwøng-ɑ Dwøng, kɑ gø mïdhi gen gïti ɑtheer.” Yɑ ɑ́dwɑdd-ɑ yodi dyër kì ri ngween lɑ̈yy, ɑ ɑ́bëëd e bɑ̈ɑ̈n ki møg-ɑ kyeelø, lɑ̈y-ɑ dwøng, ɑ teeg cɑrø, ɑ legge bɑ ngyënyø dødø, o lwedde bɑ ngyënyø dilɑl, ɑ ɑ́mød lɑ̈yy-ɑ kyeelø bënn kɑ gï nyøne. Thyew yɑ ɑ́dwɑdd-ɑ yodi dyër kì ri tùng-ɑ bɑ pyɑ̈rø kì wïje, geki tung-ɑ ɑ́twïy kɑ tùng ɑ́dɑ̈g dhööye wɑ̈g. Yïe ɑ́dɑ nying kí dhøg me tïnggi ki kwøb mø døngø. Ábëëd e dwøng cɑrø kibøli lɑ̈yy-ɑ kyeelø. Kɑ̈ng-ɑ ɑ́nudd yɑ nenn-ɑ kenyɑni kɑ tungɑni ónyïɑ̈ggø ki jii Jwøk, kɑ gï tyɑme. Codhe, kɑ ngɑn-ɑ ɑ́wöni weenø e onëënø gøny lidhe, ɑcwɑge jii Jwøng-ɑ Dwøng, kɑ bøli keny-ɑ kwɑɑny lɑ̈gø yi jii Jwøk ówɑ̈nhø. Bene møg-ɑ ɑ́köbbe yɑn ek: “Ngween lɑ̈yy, bɑ ngween pödhh-ɑ døngø møg-ɑ ódhwödh kì kömi piny, o óbëëd e bɑ̈ɑ̈n ki pödhh-ɑ kyeelø bënn. Pödhh-ɑ kyeelø ómøde bënn kì kömi piny, kɑ gï nyøne. Tùng-ɑ bɑ pyɑ̈rø, bɑ rɑ̈nhì pyɑ̈rø møg-ɑ ójɑɑg pönhɑni. Codhe, o rɑ̈dh megø cwöbe. Rɑ̈nhɑni óbëëd e bɑ̈ɑ̈n cɑrø ki rɑ̈nhh-ɑ kyeelø, kɑ rɑ̈nhì ɑ́dɑ̈g kì kelli gen tɑ̈ɑ̈ye piny. Ókööbø ki kwøb mø rijjø kì ri Jwøng-ɑ Dwøng, kɑ jii Jwøk jude. Ree ópɑ̈nye ki wili ciggi Jwøøg gen geki kwëër gen, kɑ jii Jwøk jɑɑge ki runn ɑ́dɑ̈g kí budi run. De burø ópëggi piny be lidhi gøny, kɑ lɑwe pɑ̈d; lɑ̈ge óbong nyinge gïti ɑtheer. Lɑ̈gø bëne, kí dhwɑ̈ng mëgg-ɑ jii Jwøk kì yethi pödhh bënn kì kömi piny. Lɑ̈gi gen pɑ cög, o ge ógöggi yi pödhh bënn kɑ kwøbbi gen lïngi yi pödhhɑni.” Codhi møgɑni ɑnɑn. Yɑ ɑ́bwøg ki mendwøng kɑ dëlɑ ceg-ɑ juurø, de møgɑni ɑ́mïdhɑ kì wïje. Kì dɑ̈ɑ̈g runni Rɑ̈dh Belcɑdhɑr kì yij lɑwø, ɑ ɑ́lɑ̈gɑ ki ryeew lɑ̈g. Kì yethi lɑ̈ggɑni, yɑ ɑ́wɑ̈dh-ɑ riɑ ki yodø kì yij Susɑ̀, kì modïri Elɑm. Yɑ ɑ́bëëd yɑ ócungø kì kömi dhøg Ulɑy. Kɑ wïjɑ tïngɑ, ɑlïdhɑ ki órömø me tùnge bɑ̈rrø, tung ɑ́kyel bɑ̈ɑ̈r e cer-ɑ twïyø. Kɑ órömɑni lidhɑ e cöbb-ɑ wɑɑng wuudø, geki wɑɑng wurlwɑl ki tùnge. Bong lɑ̈y me cuggi lwɑ̈ngi linye, wɑlɑ̀ me cuggi cung kì bøle. Göög-ɑ wïje ki gïg-ɑ dwɑdde, kɑ ceg-ɑ pëddø tëngø. Kɑ̈ng-ɑ ɑ́nudd yɑ orumø kì ri møgɑni, kɑ ónywøg me dwøng obëënø e kɑ̈ɑ̈l-ɑ wɑɑng cyɑ̈ɑ̈ng böörø, e ceg-ɑ ngwej ki menteg dhɑ̈y tyelle ce pɑ nywɑ̈ddi ki piny. Yïe dɑ tung me nënni kì ɑ́kɑrri nyinge. Kɑ pödh-ɑ yï órömø men-ɑ ɑ́lidhɑ e ócungø kì kömi dhøg, e pyëwe rɑɑj. Kɑ pödh-ɑ kömi órömɑni, kɑ tùnge ryeet tore. Órömø ɑ́dhɑl yi linye; ɑ́cøør piny kɑ nyøn, bong ngɑn mɑ ɑ́yielii. Kɑ ónywøngɑni ókedhø e ceg-ɑ tɑ̈dø, codhe kɑ tunge otorø. Kɑ keje twïy yi tùng ɑ́ngwen, men nyudh-ɑ tung megø kì wɑ̈ye. Kɑ tung me thinh otwïyø kì ri ɑ́kyel kì kelli tùngɑni, kɑ lɑ̈ge wɑ̈dh-ɑ kuni wɑɑng wurlwɑl, kí kuni wɑɑng cyɑ̈ɑ̈ng mwøl geki Piny-ɑ Ámuuj cøn. Átëngi ki mendwøng, kɑ ónyïɑ̈ggø ki yɑɑy mɑl, men-ɑ́ kyell kì ri gen, kɑ kwï gen lëënge piny kɑ gï nyøne. Kɑ wɑ̈dh-ɑ yï nyirɑ̈ɑ̈dh yɑɑy mɑl. Kɑ gëdhh-ɑ nyi muujii yethi cyɑ̈ng bënn cuunge, kɑ Kengø bwöle. Kɑ ji orøngø, ɑcög gen ge pɑ muujø ki gëdhhì, kɑ kwøbbi Jwøk weddi piny. Kɑ gïn-ɑ gwøg yi tungɑni nyi lwɑ̈nge ceth. Kɑ wëywödø ɑ́kyel lïngɑ e pyëj-ɑ wëywödø megø kinni, “Gïg-ɑ yethi lɑ̈g ek gït-ɑ wɑɑng ge nud? Orøng-ɑ rɑj ni men pïd-ɑ wɑɑng e ócungø kì kej gëdhhì; yɑɑy mɑl geki Kengø pïd-ɑ wɑɑng ge onyønø?” Kɑ wëywön-ɑ kyeelø lïngɑ e ólöggø kinni, “Gïgɑni ótyëg-ɑ wɑ̈rr kí dicɑ̈ngg gɑ ɑ́lïp ɑ́ryew kí miy ɑ́dɑ̈g, bong gëëdhi men-ɑ ómuuj kì yethi cyɑ̈nggɑni. Othumi cyɑ̈nggɑni cyee, o Kengø dwøøg keje.” Yɑ ɑ́bëëd yɑ orumø kì ri gïn-ɑ wɑngi yi lɑ̈ggɑni, kɑ ngɑn megø wɑ̈dhɑ ki lidhø e ócungø kì butɑ. Alïngɑ cwɑggi dhɑnhø ge kɑ̈ɑ̈l-ɑ løøg dhøg Ulɑy e okööbø kinni, “Gɑbriel, löbbí gïn-ɑ wɑngi yi møg-ɑ ɑ́lidhe.” Codhe, kɑ Gɑbriel nyïng-ɑ keny-ɑ cungɑ, kɑ yɑ obwøgø keny-ɑ ɑ́wɑ̈nhe butɑ, kɑ yɑ ópɑ̈ɑ̈dhø. Aköbbe yɑn kinni, “Jɑl, yï bɑ dhɑnhø yøw, de ngɑ̈nyí wøw kinni gïg-ɑ ɑ́lidh yi yïn kööb ɑ ri cögi piny.” Yɑ ɑ́pɑ̈ɑ̈dh keny-ɑ ɑ́kööbe e dëlɑ ì ywɑd. De yɑ ɑ́mɑge kɑ yɑ tïnge wɑ̈thi tyellɑ, Kɑ okööbø kinni, “Yɑ nyudh-ɑ yïn gïn-ɑ nyi kɑ̈ɑ̈l yi rɑ̈ji pyëw Jwøk. Lɑ̈ggɑni kööb ɑ ri cögi piny. “Órömø men-ɑ ɑ́lidh yi yïn wïje dɑ tùng ɑ́ryew, bɑ Mɑdɑy geki Pɑres. Ónywøg bɑ Yönɑn, o tung-ɑ nënni kì ɑ́kɑrri nyinge bɑ rɑ̈nh-ɑ mɑl kì yij pönhɑni. Tùng ɑ́ngwen møg-ɑ ɑ́twïy keny-ɑ ɑ́tor tungɑni, bɑ pödhh møg-ɑ ódhwödh keny-ɑ ópɑ̈ngi pönhɑni ree ɑ́ ɑ́ngwen. Pödhhɑni koo bëëd ge teg ni pönh-ɑ ɑ́pɑ̈ngi ree. “Keny-ɑ ócyɑ̈ngi cögi pödhhɑni, ge rum rënyø yi orøg, kɑ kej cɑyi gen obëënø, ódi rɑ̈dh me wïje teg, me bɑ ɑtɑ̈d, o bɑ wëny. Rɑ̈nhɑni ótëngi ki mendwøng, de koo bëëdø ɑ́ tege kete. Piny órënye ki menrɑj, kɑ gïg-ɑ gwøge nyi lwɑ̈nge bënn. Yɑɑg teg ótyɑm yi en, kɑ jii Jwøk tyɑme. Gïg-ɑ gøgge ki yëthi wëënyø ólwɑ̈ng yi en mɑ́ e bɑ jɑlpel, óbëëd e ceg-ɑ tøllø, kɑ ji nyi pɑ̈ɑ̈ye piny ki ryɑ̈g. Cinge ótïnge rɑ̈nh-ɑ dwøng thyew, de koo tyɑm kɑ tegi dhɑnhø. Møg-ɑ ɑ́nyodh kì ri gëdhhi mwøl geki gëdhhi böörø, óbï gɑ dyër. De mïdhí gen gɑ ɑkɑnn ɑnɑn, mɑ́ bøli kej cwöbi gen nudd e lɑ̈wi.” Yɑ ɑ́jud kɑ yɑ obuddø ki rɑ̈ɑ̈m dël ki cyɑ̈ng mø gïïr. Codhe ɑdhwödhɑ, kɑ yɑ kedh-ɑ be gwøg ki gwøng-ɑ ɑ́mëggi yɑn yi rɑ̈dh, de yɑ ɑ́bëëd wïjɑ cungø yi lɑ̈ggɑni ceth, o ge ɑ́dhɑ̈li gɑmø yi wïjɑ. Bɑbïlöniyɑ̀ ɑ́jɑɑg yi Dɑryøs wɑ̈d Kerkes jɑl Mɑdɑy. Kì kyeel runne kì yij lɑwø, yɑ ɑ́bëëd yɑ orɑ̈ngø ki wɑ̈jji kwërø, yɑ orumø kì ri Yerusɑlem kɑ ɑ́mɑ̈ge ki runn pyɑ̈r ɑ́bïryew e pɑ̈ɑ̈dhø, ni møg-ɑ ɑ́köbbi Jermɑyɑ̀ jɑltöng yi Jwøng-ɑ Ácwɑ̈ɑ̈j. Kɑ Wë Jwøk kwɑjjɑ ki menteg, yɑ ogönyø ki en, e riɑ twöön yɑn ki gïncɑm, yɑ rug-ɑ ocwɑ̈llì, o yɑ bëëd ɑ yij belø. Jwøng-ɑ Ácwɑ̈ɑ̈j Jwøgɑ ɑ́kwɑjjɑ, kɑ orøøg jiɑ gönyɑ en. Yɑ ɑ́kööb kinni, “Wuö Jwøk, yï dwøng, wø wør-ɑ yïn. Lwömí pɑ nyi wil yi yïn, pyëwí med ki tyëng-ɑ mɑɑr yïn, gen ɑ tyëng-ɑ mïdhi ciggí. “Wø ɑ́røngi, wø ɑ́göög ki gïnrɑj, wø ɑ́bɑ̈jji. Wø ɑ́bɑ̈nyi gwøgi møg-ɑ ɑ́cïgí wøn, kɑ ngɑ̈thi wøn lugi wøn møg-ɑ ɑ́nyudhí wøn gɑ dyër. Kwøbbi bɑ̈nggí jøtöng; jøg-ɑ ɑ́kööb ki nyingí, nuti lïngø yi rɑ̈nhi wøn, kí jɑggi wøn, kí kweyyi wøn geki pödhi wøn bëne. Yï nyi gøgg-ɑ dyër ceth wuö, dɑ́ wøn ɑ nyi kɑ̈ɑ̈l ɑyɑ̈r kömi wøn. Bɑ dyër, wø ɑ́røngi bënn, tyëng-ɑ bëëdø kì Yeudiyɑ̀ kí Yerusɑlem, kí tyëng Isrɑil bënn møg-ɑ tɑyø kì kɑ̈jj-ɑ cyɑ̈gi geki kɑ̈jj-ɑ lɑ̈wi bënn kì yïnø kun-ɑ ɑ́kïdhi gen, mɑ́ ge ɑ́dhɑ̈li mïdhi kwøbbí. Rɑ̈nhi wøn, kí jɑggi wøn, ge ɑ́göög ki ɑyɑ̈r, kɑ ge orøngø kì bølí, yïn ɑ Jwøng-ɑ Ácwɑ̈ɑ̈j. Pyëwí pɑ nyi cwööng ki lɑ̈ɑ̈mø, o bɑ̈jji wøn nyii wiyø yi yïn cɑgg wø nyi røngø kì bølí. Kwøbbí nuti lïngø yi wøn, Wuö Jwøøg wøn, keny-ɑ ɑ́köbbí wøn kinni mïdhi wøn møg-ɑ ɑ́muuj yi yïn ki dhøggi jøtöng, bɑ̈nggí. Ciggí ɑ́pyem yi tyëng Isrɑil bënn, kɑ ge óbɑ̈nyø ki lïngi kwøbbí. Wø ɑ́røngi kì bølí, bene ɑ bɑnge kɑ̈ɑ̈l cyënn-ɑ bɑ ɑgwed kì yethi ciggi bɑ̈ngí Mosɑ̀ kömi wøn. Gïn-ɑ ɑ́kwøb yi yïn kinni ógöggí wøn, wøki jɑggi wøn, en ɑ ɑ́gwøg yi yïn. Yerusɑlem ɑ́cɑy yi yïn ki cɑ́y mø døngø kibøli cɑ́yi kɑ̈dd-ɑ kyeelø bënn kì kömi piny, wø ɑ́mëggí cɑ́y-ɑ bɑ ɑgwed bënn, kì yethi Ciggi Mosɑ̀. De cɑgg ɑ́ ɑnɑn, Wuö Jwøøg wøn, wø nuti pɑ̈nyi gwøg ki gïn mïni pyëwí, wɑlɑ̀ wø nuti wïyø ki orøg, kɑ wø dwöög-ɑ köörí. Yï ɑ́dwɑdd-ɑ cɑyi wøn, Wuö Jwøøg wøn, kɑ wø cɑy yi yïn ceth, mɑ́ yï nyi gøgg-ɑ dyër, o kwøbbí nuti mïdhø yi wøn. “Wuö Jwøøg wøn, tegí ɑ́nyodh yi yïn keny-ɑ ɑ́kɑ̈ɑ̈l jií wɑ̈g kì Rïp, o tegí nudd e opɑrrø. Wø ɑ́røngi, wø ɑ́göög ki bɑ̈jjø. Wø ɑ́korri yi yïn kɑ̈ge dööng kidyër, de pyëwí ko nudd e rɑɑj ki Yerusɑlem këti. Bɑ kɑɑlí, kïti kwërí. Pödhh-ɑ buti wøn bënn beny-ɑ Yerusɑlem kí jii wøn kipe orøøg wøn geki gïgrijjø møg-ɑ ɑ́gøggi yi kweyyi wøn. Yïn ɑ Jwøk, lïngí kwɑ̈jjɑ geki odhɑmɑ. Dwøøg Kengí keje, eni Keng-ɑ ɑ́rënyi, o yod yi dhɑnhø bëne kinni yï bɑ Jwøk. Lïngí kwɑ̈jji wøn yïn ɑ Jwøk, kɑ ɑkørri wøn kí orɑng-ɑ rɑngi kɑɑl-ɑ cölli nyingí liidh. Wø kwɑjj-ɑ yïn mɑ́ pyëwí pɑ nyi cwööng ki lɑ̈ɑ̈mø, de pɑth ki kinni wø gøgg-ɑ dyër. Lïngí kwɑ̈jji wøn Wuö, lɑ̈ɑ̈m pyëwí ki wøn Wuö, kɑ wø køny! O yod yi dhɑnhø bëne kinni yï bɑ Jwøk. Yï ko cwööng! Kɑɑlɑni geki jiɑni bɑ møgí.” Kɑ̈ng-ɑ ɑ́nudd yɑ ókwɑ̈jjø, yɑ töng-ɑ orøgɑ geki orøøg jiɑ, tyëng Isrɑil, yɑ odhɑmmø kì bøli Jwøng-ɑ Ácwɑ̈ɑ̈j Jwøgɑ, kipe kinni o Kengø dwøøge keje, kɑ Gɑbriel ngɑn-ɑ ɑ́kwøng yi yɑn ki lidhø kì ri lɑ̈ggi tyeli mɑl, bï-ɑ piny keny-ɑ di yɑn e ópɑ̈rrø. Ábëëd ɑ́ bøli kej gëdhhi böörø. Kɑ yɑ köbbe kinni, “Dɑniel, yɑ ɑ́bï keny kɑ per kønyi yïn ki yodi gïn-ɑ wɑngi yi møg-ɑ ɑ́nyudhi yïn. Kwøbbí ɑ́lïngi yi Jwøk keny-ɑ ɑ́dhɑmí kì bøle. Yï mɑɑr yi Jwøk, bene ɑ bɑnge bëënɑ be köbbi yïn møgɑni. “Runn pyɑ̈r ɑ́bïryew tyel ɑ́bïryew bene gen cyɑ̈ngg-ɑ ɑ́cïb yi Jwøk gɑ møg-ɑ bɑng gen óyieel kɑɑl wun geki jii wun kì yij orøg kí rɑj. Orøg ólɑ̈ɑ̈ny kɑ dyër cïb keje yi Jwøk gïti ɑtheer, o møg-ɑ ɑ́nyodh geki møg-ɑ ɑ́töng pɑ̈dhi gen kɑ̈jji gen, o Kengø døøg ki thyeyø. Adɑ́ ngɑ̈ɑ̈ny wøw kɑ yood kinni, cɑg kì bøli keny-ɑ ómuuj cigg kinni geer Yerusɑlem, gïti keny-ɑ óbëën jɑgø men-ɑ ɑ́yieny yi Jwøk, runn ɑ́bïryew tyel ɑ́bïryew ópödhø. Yerusɑlem ódøøg ki gerø, ki yëthe geki uddi dörre, o ócungi ki runn pyɑ̈r ɑ́bïkyel wïdɑ́ryew tyel ɑ́bïryew, de ge óbëëdø gɑ runni orɑng. Keny-ɑ óthumi runnɑni, jɑng-ɑ ɑ́yieny yi Jwøk ówɑ̈dhi ki nɑ̈gø yøw e bong gïjø me rëny en. Kengø ócøør piny geki kɑɑldwøng yi liny jɑgø me teg me kɑ̈ɑ̈l pödhø megø. Kɑɑl geki Kenge óbëëdø ge ce órëny-ɑ yi bɑɑyø. Linyɑni pɑ cungi gïti keny-ɑ óthumi runnɑni. Bɑ Jwøk ɑ ɑ́kɑ̈ɑ̈l ryɑ̈ngɑni. Jɑngɑni ónywɑ̈gø ki kwøb kipe mër geki ji mø gïïr, o keny-ɑ óthumi budi runnɑni, gëdhhì geki byëli Jwøng-ɑ Ácwɑ̈ɑ̈j ócuung yi en. Kɑ cïb-ɑ oledh Kengø ki gïjø me böggi, gïnɑni óbëëdø kì kenyɑni gïti keny-ɑ ónyiig ngɑn-ɑ ɑ́cïbii kenyɑni yi Jwøk, ni kɑ ɑ́pyële kwøbbɑni.” (Kì dɑ̈ɑ̈g runni Körec rɑ̈nhdwøøng Pɑres kì yij lɑwø, ɑ ɑ́nyudhi Dɑniel, ɑ cwøl ɑ́ Beltecɑdhɑr ki kwøb. Wöönɑni ɑ́bëëd ɑ́ dyër, de yodi gïn-ɑ wɑngi yi en teeg cɑrø ki mendwøng. Gïn-ɑ wɑngi yi møgɑni ɑ́löbbi Dɑniel e nɑ lɑ̈g.) Kì yethi cyɑ̈nggɑni yɑn, yɑ Dɑniel, yɑ ɑ́bëëd yijɑ óywöngø ki osboo ɑ́dɑ̈g, yɑ pɑ nyi cyɑ̈mø ki gïncɑm me døøj, kí rïngø. Yɑ pɑ nyi mɑ̈dhø ki møgi oløg, wɑlɑ̀ yëyyi wïjɑ pɑ nyi pyël yi yɑn gïti kɑ ɑ́thumi osboo ɑ́dɑ̈g møgɑni. Kì pyɑ̈r ɑ́ryew wïdɑ́ngween cyɑ̈nggi dwɑ̈n-ɑ mɑl kì yij run, yɑ ɑ́bëëd yɑ ócungø kì gɑ̈ɑ̈d Tigrì. Kɑ wïjɑ tïngɑ, ɑlïdhɑ ki jɑl me rugø ki ógudhi kor-ɑ yöm, kí wëni dhɑm dhïw kì yije. Dële orɑ̈ngø ni tigø. Bøle orɑ̈ɑ̈dø ni loodh mɑl, o nyinge ceg-ɑ lyelø ni mɑc. Bɑ̈dde geki twel tyelle rɑw ni dilɑl me thøø yi yojø, o cwɑgge nɑ kenyi gwɑg teedø mø ngenyø. Bɑ yɑ ketɑ ɑ ɑ́nyudhi møgɑni. Bong gïjø mɑ ɑ́lidh yi tyëng-ɑ cyɑ̈dhi ki yɑn, de ge ɑ́bwøg kɑ ge reng-ɑ be pɑ̈nø. Kɑ yɑ odöngø yɑ ketɑ kì kenyɑni, yɑ onëënø ki gïg mɑ ɑ́cuung wïjɑ ki mendwøng, kɑ dëlɑ ceg-ɑ thøø kinni lɑ̈p, bëëdɑ ree ɑ́wile; bong ngɑn cuggi ngiji yɑn. Keny-ɑ ɑ́lïngɑ cwɑgge, kɑ yɑ ceg-ɑ pɑ̈ɑ̈dhø pyëwɑ tøøk, yɑ pɑ̈ɑ̈dhø yijɑ rum yɑn piny. Kɑ yɑ mɑg yi cingø megø, ɑtïnge yɑn kömi cøngɑ e cinggɑ thɑɑny yɑn piny, e dëlɑ nudd e okïrrø. Kɑ yɑ köbbi yi wëywönɑni kinni, “Dɑniel, yï mɑɑr yi Jwøk. Dhwödhí mɑl kɑ yï lïng kidøøj ki møg-ɑ köbbɑ yïn. Yɑ ɑ́ör-ɑ yïí.” Keny-ɑ ɑ́kwøbe møgɑni, kɑ yɑ dhwödh-ɑ mɑl dëlɑ nudd e okïrrø. Codhe, ɑkööbe kinni, “Dɑniel, yï ko böggi. Kwɑ̈jjí ɑ́lïngi yi Jwøk ceth kì cyɑ̈ng-ɑ ɑ́cɑ̈gi ki gwøgi rií mölø kipe yodi kwøbbɑni. Bɑ løøgi kwɑ̈jjí ɑ ɑ́kɑ̈ɑ̈l yi yɑn. Yɑ ɑ́cöngi yi wëywön-ɑ kor Pɑres ki cyɑ̈ng pyɑ̈r ɑ́ryew wïdɑ́kyel. Codhe, ɑbëën Mikɑil, ɑ bɑ ɑ́kyel kì kelli jɑggi wëywödd be kønyi yɑn, mɑ́ yɑ ketɑ ɑ ɑ́nud kì Pɑres. Yɑ ɑ́bï-ɑ be nyudhi yïn ki gïn-ɑ óbï kömi jií dhuki megø. Møg-ɑ nyudhi yïn, bɑ møg-ɑ ócwöb dhuki megø.” Keny-ɑ ɑ́kwøbe møgɑni, kɑ yɑ lïïdh-ɑ piny yɑ okudø. Wëywönɑni nënni e nɑ dhɑnhø, kɑ cinge rïïje, ɑnywɑle dhøgɑ, kɑ köbbɑ kinni, “Wuö, gïg-ɑ nyudhi yɑn èn, yɑ ɑ́nyönhi yi gen, o dëlɑ ɑ́dhɑ̈li wïyø ki okïr. Yɑ nɑ bɑ̈ng me cungi kì bøli wɑ̈n. Yɑ kööb ɑ dï ki yïn? Yïɑ bong tegø, yɑ nɑ ngɑnthøø.” Acige yɑ mɑgø, kɑ dëlɑ kɑl-ɑ tëngø. Akööbe kinni, “Yï mɑɑr yi Jwøk, ko di gïn lïngø kì pyëwí, wɑlɑ̀ ko di gïn böggi yi yïn.” Kɑ yɑ ti-ɑ tëngø keny-ɑ ɑ́kwøbe møgɑni, ɑköbbɑ en kinni, “Wuö, köbbí yɑn gïn-ɑ dwɑddí kwøbø. Yɑ ɑ́gwøg yɑ teeg yi yïn.” En ɑ cungi kipe kønyi yɑn, geki nyɑɑg kiperɑ. Møg-ɑ dwɑddɑ köbbi yïn ɑnɑn, bɑ dyër.” Akööb wëywönɑni kinni, “Dɑ rɑ̈nhì ɑ́dɑ̈g møøgø møg-ɑ ójyɑ̈ɑ̈gø kì Pɑres, ngween gen óbëëd e kɑ̈rø kibøli møg-ɑ kyeelø bënn. Pödhi Yönɑn ótyëddi yi en keny-ɑ ótënge kɑ ókɑ̈rø kidøøj. “Codhe, o rɑ̈dh me teeg cɑrø cwöbe. Rɑ̈nhɑni ójɑɑg-ɑ pödhø me dwøng cɑrø, o ógöög-ɑ wïje ki gïg-ɑ dwɑdde. De keny-ɑ ótënge ki mendwøng, pödhe ree ópɑ̈nge ɑ́ bud ɑ́ngwen. Rɑ̈nhì mø pɑth ki wɑdde ɑ ójyɑ̈ɑ̈gø kì keje, de ge koo bëëd ge teg ni en keny-ɑ ɑ́bëëde.” “Rɑ̈ɑ̈dh Rïp óbëëd e teg. Ákyel kì kelli pëjji linye ópëddi tegø, kɑ pödhø me dwøng jɑɑge. Kì bɑng runn møøgø, rɑ̈ɑ̈dh Rïp ónywɑ̈gø ki kwøb geki rɑ̈ɑ̈dh Arɑm, kɑ nyɑre mëgge rɑ̈ɑ̈dh Arɑm ɑ́ dhɑjø. De ge koo cög ge onywɑ̈gø ki kwøb; nyɑnɑni, kí jɑlgøle, kí nyɑre geki bɑ̈ngg-ɑ ɑ́kedh ki en ónɑ̈g bënn. Ákyel kì kelli wɑdde ógöögø ki rɑ̈dh kì bɑng keny me thiinh. Ópɑ̈ɑ̈r kömi liny Arɑm kɑ kedh-ɑ yethi kɑ̈ddi dörri gen kɑ gï tyɑme. Ngïjji jwöggi gen ókïdhe Rïp geki jɑmmi dhɑb kí ɑ́tegø møg-ɑ óthyëyyi jwöggɑni. Runni mër mø gïïr ópödhø, kì bɑng gen, rɑ̈ɑ̈dh Arɑm ópɑ̈ɑ̈r kömi Rïp, de ólwɑ̈ng ki nyɑɑn cyɑ̈n kɑ døøg-ɑ ngɑ̈je. “Wɑ̈ddi rɑ̈ɑ̈dh Arɑm ri gen ógwir gen kipe liny, kɑ ge ocungø ki yɑy me dwøng. Ákyel kì kelli wɑ̈dde óbëëd e nyi pödh-ɑ kömi ngetimɑ̈ɑ̈nø ni pïi bɑɑyø, kɑ dörre bɑɑbe piny. Rɑ̈ɑ̈dh Rïp ómɑg yi liny kɑ kedh-ɑ be nyɑɑg ki rɑ̈ɑ̈dh Arɑm, kɑ yɑɑy Arɑm ki dönge bëne tyɑme. Pyëwe ómïni yi tyɑ̈me, kí nɑ̈ge ki jøliny mø ngenyø, de koo rïïjø e otyɑ̈mø. “Rɑ̈ɑ̈dh Arɑm ócigi cøng ki yɑy me lod mi tyeli mɑl ki döng. Obëën bøli kenyɑni kì bɑng runn mø gïïr, óbï ki yɑy me kɑ̈ddi ki jɑmmi liny mø ngenyø. Kì bøli kenyɑni ji mø gïïr óngɑ̈nyyi wɑ̈yi gen kì ri Rïp. Kɑ yɑɑg-ɑ pëthi gen kej kì pödhi wun Dɑniel, ngɑ̈ny-ɑ wɑ̈g yi gïg-ɑ ócɑ̈rri gen, de ge ótyɑm. Rɑ̈ɑ̈dh Arɑm ótëggi ki kɑɑl me bɑ ɑger ki dörø kɑ gø mɑge. Jøliny Rïp ódhɑl yi nyɑɑg, cɑgg ɑ́ jödd, ge ónyönhi. Liny Arɑm keny-ɑ ómɑ̈nyye, gï ógögge gïn-ɑ dwɑdde; bong ngɑn cungi kì bøle. Rɑ̈nhɑni piny-ɑ ɑ́muuj cøn ómɑg yi en ki linye, yïe ódi tegø me rënye gøn. “Rɑ̈ɑ̈dh Arɑm ógwïïdø ki kwøbbi mɑ̈nyø, en kí yɑye bëne. Ónywɑ̈gø ki kwøb geki tyëngmɑ̈ɑ̈nø kɑ per kinni o pödhi gen órënye, nyɑre ómuuje ɑ́ dhɑjø, de møgɑni koo pɑ̈dhi kɑ̈jji gen. Codhe, cyee o pɑ̈ɑ̈re kömi pödhhi kömi nɑɑm omelø; ómɑ̈gi ki mø ngenyø kì kelli gen. De pënyi liny pödhø megø óbï kɑ wïj rɑ̈ɑ̈dh Arɑm dwööge. Rɑ̈nhɑni ódøøg pinye de ótyɑm, tege ólɑ̈ɑ̈ny, kɑ pere koo lïngi këti. “Keje ókwɑny yi rɑ̈dh men-ɑ óbuudh köthi ji ki gwɑ̈j men meede kɑ̈ɑ̈r pödhe. Rɑ̈nhɑni ójwɑn ki nɑ̈gø, de koo nɑ̈g-ɑ yij liny.” Kɑ wëywönɑni okööbø kinni, “Keje ójɑ̈ggi yi rɑ̈dh me rɑj, jɑl me pɑ di cuggi gwøg ɑ́ rɑ̈dh, de lɑwø ókwɑny yi en kɑ ɑmolpiny. Ngɑn rïwwi bøle, cɑgg ɑ́ men-ɑ Ókwër-ɑ Dwøng mi Jwøk, gø bɑɑbe’ piny kɑ gø nyiige wɑ̈ye. Ónywɑ̈gø ki kwøb ki pödhh-ɑ kyeelø ki wëënyø, o ókedh e ótëngø, cɑgg e ójɑɑg pödhø me thiinh. Modïrr-ɑ kɑ̈rø liibe’ piny, kɑ ogöögø ki gïg mø nuti pɑ̈nyø gwøgø yi kweyye. O jɑmm-ɑ ɑ́mɑge kì yij liny nyi pɑ̈nge kì kelli jøge. Óbëëd e nyii yɑ̈bø ki yëëth møg pɑ̈ɑ̈re kömi kɑ̈ddi dör, de jyɑ̈ge ócög e cyeeg. “Ócungø ki yɑy me dwøng cɑrø men pɑ̈ɑ̈re kömi Rïp. De ónyɑɑn cyɑ̈n yi Rïp ki yɑy me dwøng cɑrø me pëddi tegø. De rɑ̈ɑ̈dh Rïp ówëny kɑ tyɑm. Óbuudh yi jø tøg bure. Yɑye ócyeddi kɑ mø gïïr nɑ̈g kì kelli jølinye. Rɑ̈nhhɑni ryeet óbëëd yethi gen dɑ ɑ́buudhø ki ri gen, cɑgg ge ócyɑ̈mø kì tɑw ɑ́kyel. Gïn-ɑ dwɑddi yi gen koo yod yi gen, mɑ́ bøli keny-ɑ ɑ́cïb yi Jwøk nuti wɑ̈nhø. Rɑ̈ɑ̈dh Arɑm ódwöög e ókɑ̈ddø ki jɑmm-ɑ ɑ́mɑge kì yij liny, e pyëwe dɑ rënyi yïëyi jii Jwøk. Ógöögø ni kɑ̀ dwɑdde gøn, codhe o kedhe pödhe. “Ócigi døøg be mɑ̈nyi Rïp, de koo tyɑ̈mø ni tyeli mɑl. Tyëng Römɑ̀ óbï ki yɑ̈ɑ̈th kɑ joj yi gen, kɑ obwøgø. “Codhe, o dwööge pyëwe rɑɑj, o wɑɑnge kömi jii Jwøk. Ólïngø ki kwøbbi tyëng-ɑ ɑ́wiy yuu Jwøk. Kengø óbwöl yi kwï jølinye. Gëdhh-ɑ nyi muuj yethi cyɑ̈ng ócuung yi gen, kɑ ji göjji gen gwøg ki gïgrijjø, o ge mɑlli gen jwögg-ɑ pɑth kì kej kwër. Tyëng-ɑ ɑ́wiy Jwøøg gen ówëny yi rɑ̈nhɑni, de tyëng-ɑ mïdhi kwøbbi Jwøk ócungi kì kɑ̈jji gen, kɑ ge ogöögø ki møg nyɑg ri gen. Tyëng-ɑ wɑ̈thi gen pel, ópwönyi ki ji mø gïïr, cɑgg ge ónɑ̈g ki pilø wɑlɑ̀ ge rɑ̈b, wɑlɑ̀ ge mɑg, wɑlɑ̀ jɑmmi gen kɑbbi. Keny-ɑ ópɑ̈nhi gen kì yij liny, bɑ kønyø me nøg ɑ óyod yi gen, kelli gen ókedhi yi tyëngɑdud. Kwï pëjj-ɑ wɑ̈thi gen pel møgɑni ónɑ̈g, de nɑ̈gi gen ókɑ̈ɑ̈l-ɑ dhïwi ji. Møgɑni ócyɑ̈dhi kinøw gïti bëëni bøli keny-ɑ ɑ́cïb yi Jwøk. “Rɑ̈nhɑni ree ótïnge mɑl ki mendwøng, kɑ göög-ɑ wïje, bong jwøg men-ɑ ógɑ̈n yi en. O ókööbø ki gïg dhɑ̈li lïngø kì ri Jwøøg jwögg. Óbëëd e teg gïti keny-ɑ óthumi kej rɑ̈ji pyëw, o Jwøk ógwøg-ɑ gïg-ɑ ɑ́cïb yi en ceth. Jwöggi kweyye óbong per gen kì yïe, geki jwögg-ɑ mɑɑr yi mɑ̈nn. Bong jwøg men-ɑ ógɑ̈n yi en, ree ótïnge mɑl kibøli gen bënn. De ógɑ̈nn-ɑ jwøøg dörr-ɑ korri kɑɑl; jwøng-ɑ nuti pɑ̈nyø kwɑjjø yi kweyye, ótheg yi en ki dhɑb, kí ɑ́tegø, kí tigg geki jɑmm-ɑ ngewi gen teg. Ókøny-ɑ yi jwøg me pɑth ki korri kɑɑle. O tyëng-ɑ óyïëyii ɑ́ jɑngi gen ótheg yi en kidøøj. Gï ówëgge jɑɑgi ji mø gïïr, kɑ gï thödhe ki piny ɑ́ kööngi gen. “Keny-ɑ óbëën bøli kej rɑ̈ɑ̈dh Arɑm e óthumø, köme ópɑ̈ɑ̈r yi rɑ̈ɑ̈dh Rïp. De rɑ̈ɑ̈dh Arɑm ócööd köme ni ɑtunø ki yɑ̈thi wɑ̈g kí yɑ̈thi nɑm møge. Pödhh mø gïïr ómɑg yi en kɑ gï bɑɑbe piny ni bɑɑyø. Piny-ɑ myër ómɑg yi en thyew. Pödhh mø gïïr ópɑ̈ɑ̈dh, de Edöm kí Moɑb geki møg-ɑ ódöng kì kelli tyëng Amön óyiel kì cinge. Pödhh mø gïïr ójɑɑg yi en, cɑgg ɑ́ Rïp thyew pɑ bodh. Kɑ̈ɑ̈r Rïp; dhɑb kí ɑ́tegø, kí gïg-ɑ per gen teg bënn ókwɑny yi en. Kɑ Kuc geki Lïbiyɑ̀ mɑge. De óbwøg yi wödd-ɑ ókɑ̈ɑ̈l wɑɑng cyɑ̈ɑ̈ng mwøl kí wɑɑng wuudø. Kɑ ónyïɑ̈ggø ki rɑ̈ji pyëwe, kɑ onɑ̈gø ki ji mø gïïr. Kɑɑle, kɑɑl rɑ̈dh ógure kɑɑm nɑ̈mmi omelø, kì wïj kïti kwër-ɑ myër. De óthøw ceth, bong ngɑn-ɑ ókønyii.” Akööb wëywön-ɑ rug ógødh kor-ɑ yöm kinni, “Kì bøli kenyɑni, Mikɑil wëywön-ɑ dwøng, ɑ kor pödhi wun, ódhwödh. Ódi ywøøg yij me dwøng, ywøøg yiny ni menɑni nuti pɑ̈nyø’ lïngø kër-ɑ ɑ́cɑ̈gi pödhh. De kì bøli kenyɑni, tyëng pödhi wun bënn møg-ɑ nyingi gen ógweed yij wɑ̈nyø óyiel. Mø gïïr kì kelli tyëng-ɑ ɑ́thøw ódhwödh, møøgø ónëënø këti gïti ɑtheer, møg-ɑ kyeelø ókedh-ɑ yij orɑng-ɑ pɑ thumi. Jɑgg-ɑ wɑ̈thi gen pel, óbëëd ge tɑr ni mɑl, o møg-ɑ ɑ́pyejji ji ki yuu-ɑ dyër ómënyø ni kyelli mɑl gïti ɑtheer.” Kɑ yɑ köbbe kinni, “Anɑn Dɑniel, cyëëg wɑ̈nyø kɑ dhøge muul, óbëëdø ɑ́ ɑmul gïti keny-ɑ óthumi piny. Kì kɑɑmɑni, møøgø óbëëdø ge nyi kedh-ɑ keny kí keny ge yɑb-ɑ dïdø.” Codhe, kɑ jøg ɑ́ryew lidhɑ ge ócungø kì kömi nɑm, men ying-ɑ løøng, o men ying-ɑ løøng-ɑcɑ̀. Kɑ wëywön-ɑ rugø ki ógødh kor-ɑ yöm, ɑ ying wɑ̈thi pïi nɑm kì mɑl pyëj yi wëywön-ɑ kyeelø kinni, “Á kɑɑm me bëëdø kidï ɑ óthumi, o gïïngɑ̈ngø møg cwöb gen?” Kɑ wëywön-ɑ rugø ki ógødh kor-ɑ yöm, ɑ ying wɑ̈thi pïi nɑm kì mɑl cingge ryeet tïnge, kɑ lïngɑ e óköngø ki nyingi ngɑn-ɑ nëënø gïti ɑtheer, ɑkööbe kinni, “Bɑ runn ɑ́dɑ̈g kí budi run. Møgɑni ópɑ̈dhi kɑ̈jji gen ɑ keny-ɑ órum tyëng kwërø ki tyɑmø.” Møgɑni bënn ɑ́lïngɑ, de ge nuti gɑmø yi wïjɑ. Apëjjɑ kinni, “Gïgɑni bënn ónywøl-ɑ ngø, wuö?” Alögge kinni, “Wiy wɑ møgɑni Dɑniel, mɑ́ wɑ̈nyø ɑ́rum ki cyëgø kɑ mul, óbëëdø ɑ́ ɑcyëg gïti keny-ɑ óthumi piny. Ji mø gïïr óliil kɑ ge ogöögø ge dhïw, de tyëngrijjø ócög ge rijjø. Bong ngɑnrɑj me wïje ógɑm møgɑni, den-ɑ́ tyëng-ɑ wɑ̈thi gen pel. “Cɑg kì bøli keny-ɑ ócuung gëdhhi yethi cyɑ̈ng, kɑ ngïji jwøng pɑth cwöödh oledh Kengø, bɑ cyɑ̈ng ɑ́lïp kí miy ɑ́ryew kí pyɑ̈r ɑ́bïngwen ɑ ópödhø. Tyëng-ɑ ómïdhi yïëyi gen gïti ri thumi cyɑ̈ng ɑ́lïp kí miy ɑ́dɑ̈g kí pyɑ̈r ɑ́dɑ̈g wïdɑ́bïj, ri gen dɑ gyëdh! “O yïn, yï Dɑniel, mïdhí yïëyí, gïti keny-ɑ ówɑ̈nhi bøli kenyɑni. Yï óthøw kɑ yï odhwödhø kì cyɑ̈ɑ̈n piny, o yï kwɑny kööngí.” Men bene wööni Jwøng-ɑ Ácwɑ̈ɑ̈j men-ɑ ɑ́köbbe Odheyɑ̀ wɑ̈d Beerì, kì yethi runn-ɑ ɑ́jyɑ̈ɑ̈g Udhiyɑ̀ kí Yöthɑm, kí Akɑɑdh, kí Kedhekiyɑ̀ gɑ rɑ̈nhi Yeudiyɑ̀; yethi runnɑni ɑ ɑ́jyɑ̈ɑ̈g Yeroboɑm wɑ̈d Yöɑc ɑ́ rɑ̈dh kì Isrɑil. Cɑ̈gi wööni Jwøng-ɑ Ácwɑ̈ɑ̈j men-ɑ ɑ́kwøb yi Odheyɑ̀. Odheyɑ̀ ɑ́köbbi yi Jwøng-ɑ Ácwɑ̈ɑ̈j kinni, “Kedh kɑ̈bbí ki dhɑjø men-ɑ óyɑ̈bø ki cwøw, kɑ ókɑ̈nø ki nywøl kì wɑ̈g, mɑ́ Jwøng-ɑ Ácwɑ̈ɑ̈j ɑ́wiy piny yi pönhï, kɑ ji kedh-ɑ bɑng jwögg møøgø.” Codhe, ɑkedhe kɑ Gömer nyɑɑr Diblɑim kwɑnye, ɑyɑɑje kɑ gø nyödde ki wɑ̈d. Kɑ Odheyɑ̀ köbbi yi Jwøng-ɑ Ácwɑ̈ɑ̈j kinni, “Cɑɑg ɑ́ Yidhriil (ɑ wɑngi kinni ókedhhi yi Jwøng-ɑ Ácwɑ̈ɑ̈j,) mɑ́ yɑ óbï be coli rem-ɑ ɑ́dëëm kì Yidhriil kì bɑng nyɑ keny me thinh kì gøl Yeeu, o jyɑ̈gi gøl Yeeu tɑ̈ɑ̈yɑ piny. Mɑ́ keny-ɑ óbëën cyɑ̈ngɑni, weth gøl Isrɑil ótor yi yɑn kì töör Yidhriil.” Kɑ Gömer cig-ɑ yɑɑjø, ɑnywøle ki nyɑndhɑjø. Kɑ Odheyɑ̀ köbbi yi Jwøng-ɑ Ácwɑ̈ɑ̈j kinni, “Cɑɑg ɑ́ Lö Ruɑ̈mɑ̀ (wɑng-ɑ kinni bong lɑ̈mpyëw,) mɑ́ pyëwɑ pɑ cigi lɑ̈ɑ̈mø kì gøl Isrɑil, wɑlɑ̀ körri orøøg gen pɑ wiy yi yɑn. De pyëwɑ ólɑ̈ɑ̈m ki Yeudiyɑ̀ kɑ yiel yi yɑn, de ge pɑ yiel yi yɑn kɑ tøng, wɑlɑ̀ pilø wɑlɑ̀ ki liny, wɑlɑ̀ ki kyënyì, wɑlɑ̀ ki jøliny kyënyì.” Apøne Lö Ruɑ̈mɑ̀ kɑ onywølø ki wɑ̈d. Kɑ Odheyɑ̀ köbbi yi Jwøng-ɑ Ácwɑ̈ɑ̈j kinni, “Cɑɑg ɑ́ Lö Amì “pɑth ki jiɑ”, mɑ́ wu pɑth ki jiɑ. O yɑ koo bëëdø yɑn ɑ́ Jwøøg wun.” De tyëng Isrɑil óngënyi ni tør. O kì keny-ɑ́ nyi köbbi gen kinni, Lö Amì “pɑth ki jiɑ”, ge ócwølli gɑ nyigi Jwøng-ɑ Nëënø. Tyëng Yeudiyɑ̀ geki tyëng Isrɑil ge órëbi, kɑ ri gen rönyi gen ki jɑgø ɑ́kyel men-ɑ ójɑɑg gen bënn, mɑ́ cyɑ̈ɑ̈ng Yidhriil óbëëd ɑ́ cyɑ̈ng me dwøng. Cwøllu ómï wun ɑ́ Amì “Jiɑ.” Kɑ nyimï wun cwøl wun ɑ́ Ruɑ̈mɑ̀ “Lɑ̈mpyëw”. Gööny wun ki meyi wun, gøønyu en, mɑ́ yɑ ɑ́kyëëd kinni, “Yɑ pɑth ki jɑlgøle.” Köbbu en wïye ki bëënrɑj kɑ wïye ki yɑb ki cwøw. Keløg e pɑ wïyi, ólony yi yɑn, kɑ döng-ɑ nøw ree bong ógødh ni kɑ ɑ́nywølii. Ógwøg yi yɑn ɑ́ thwørø me bɑ ryɑng me yije bong pï, kɑ nɑ̈g yi yɑn ki röödhø. Pyëwɑ koo lɑ̈ɑ̈m ki wun, wu nyig-ɑ ɑ́kɑ̈ɑ̈l kì wɑ̈g. Mɑ́ meyi wun ɑ́göög ki ngɑn nyi niin ki köögi, o kwïj ɑyɑ̈r, kɑ nyi tir-ɑ kwøb kinni, “Yɑ ókedhi yï cwøwɑ møg-ɑ ɑ́mɑɑr yɑn, yɑ óthödhi yi gen ki gïncɑm, kí pï, kí møgi oløg, kí ógudh bënn, kí møøw dhetun.” Kì bɑng menɑni yuue óbɑg yi yɑn ki koodh. Ógëddɑ ki dörø, kɑ wen dïdyër, o jɑde ki yöö men kedhe yï cwøwe. Óyɑ̈bø ki yöö men kedhe yï cwøwe møg-ɑ mɑɑr yi en, de gï koo pïïde. Ge óyɑb yi en de gï koo yode. Codhe o kööbe kinni, “Yɑ døøg-ɑ yï jɑlgølɑ jɑl-ɑ ɑ́kwøng yɑn ki nywømø.” Nuti pɑ̈ny en ki yodø kinni bɑ yɑn ɑ ɑ́thödhii ki byel geki møøw dhetun. Anëngɑ en ki ɑ́tegø kí dhɑb møg-ɑ ɑ́gwøge gɑ mø Bɑɑl. Byellɑ ódwøøgɑ kì bøli keny-ɑ nyi cyeg gen, kɑ møgi oløgɑ dwøøgɑ kì bøli kej mɑdhe, kɑ ógudhɑ wɑɑrɑ, gen ɑ ógudh-ɑ nyi kume ree. Anɑn ɑyɑ̈re ónyodh yi yɑn kì bøli cwøwe; bong ngɑn-ɑ óyielii kì cingɑ. Tung-ɑ nyi rïïj ge otugø ɑnɑn, ɑ løg kwëër tuung run, kí kwëër tuung dwɑ̈y, kí Kwëër Sɑbɑth, geki tung-ɑ nyi tuug kì cyɑ̈nggi kwër møg-ɑ kyeelø, ge ócuung yi yɑn. Bɑ̈ggi oløg møg-ɑ rømme ce gï yood en ɑ yï cwøwe órënyi yi yɑn, kɑ ge gwøg yi yɑn gɑ thïm koodh, kɑ yethi gen cyɑ̈ɑ̈m yi lɑ̈yy. Bene kër-ɑ ócɑyɑ en ɑnɑn, kipe cyɑ̈ng-ɑ ɑ́rɑ̈be ki bɑkur, kɑ orugø ki gwel geki gïïyïthh, kɑ ocöngø ki thømi Bɑɑl, e thøø yi rugø ki gwel geki gïïyïthh, kɑ kedh-ɑ yï cwøwe wïje wïlø ki yɑn. Jwøng-ɑ Ácwɑ̈ɑ̈j ɑ́rum ki kwøb. Jwøng-ɑ Ácwɑ̈ɑ̈j okööbø kinni, “Orum møgɑni, ópɑng yi yɑn kɑ peejɑ yij ryɑng, o wɑ̈jji yi yɑn ki kwøb mø med. Kɑ bɑ̈gge döggɑ en kì kunɑni, kɑ Töör Akørr gwøgɑ ɑ́ kej gɑ̈ɑ̈nø, kɑ døøg-ɑ be kwøb ki kwøb mø døøj ki yɑn, ni kɑ ɑ́bëëde ɑ́ jùr keny-ɑ ɑ́bëëne wɑ̈g kì Rïp. Kì cyɑ̈ngɑni yɑ ócwøl yi en kinni, “Jɑlgølɑ.” O pɑ cwöddi këti kinni, “Bɑɑl wɑ̈ɑ.” Mɑ́ nyingi Bɑɑl ókɑ̈ɑ̈l wɑ̈g kì dhøge. Nyingɑni pɑ cigi cwøllø yi en. Wø ónywɑ̈gø ki kwøb wøki lɑ̈yyi pɑ̈l, kí winyyi mɑl, kí gïg-ɑ mulli kì piny kipere, kɑ pilø geki tøng bënn torɑ, kɑ liny cung yi yɑn kì kömi piny, kɑ ji wëggɑ buddø pëthi gen pɑ lïngø. Isrɑil, yï nyömmɑ’ riɑ gïti ɑtheer, ki nywöm-ɑ dyër kí mɑ̈ɑ̈dø geki yödi pyëw, o yï løgɑ miɑ gïti ɑtheer. Yï nywømɑ’ nywømø yijɑ bong ɑ́dud, o bëëdi Jwøng-ɑ Ácwɑ̈ɑ̈j yod yi yïn. Jiɑ, ócïbɑ piny, Ji-ɑ ɑ́cwølli kinni, Lö Amì “pɑth ki jiɑ” ócwølli kinni, Amì “Jiɑ”. Ge óköbbɑ kinni, “Wu bɑ jiɑ.” Kɑ yɑ köbbi yi gen kinni, “Yï bɑ Jwøøg wøn.” Kɑ Odheyɑ̀ köbbi yi Jwøng-ɑ Ácwɑ̈ɑ̈j kinni, “Døøg cyëgí ki mɑɑrø, cɑgg e rum kedhi yï jɑlø megø, o bɑ nyɑn kwïj bëëdø. Mɑɑr ni kɑ̀ mɑɑrɑ tyëng Isrɑil, ngö ge ɑ́kedhi bɑng jwögg møøgø, ge tyer-ɑ cɑmi ópùni Bɑɑl, ge rømm-ɑ kinni bene gïn-ɑ ówëggi gen nywølø ki nywøl mø gïïr.” Kɑ Gömer dwöög yi Odheyɑ̀ ki ngyëny ɑ́tegg pyɑ̈rø wïdɑ́bïj, kí kïlli ceir miyø kí pyɑ̈r ɑ́bïj. Kɑ Gömer köbbi yi Odheyɑ̀ kinni, “Yï óbëëdø ki yɑn ki cyɑ̈ng mø gïïr, kɑ yï ko bëëd yï bɑ ngɑn nyi niin ki köögi, wɑlɑ̀ yï ko buddi ki jɑlø megø, cɑgg ɑ́ yɑn thyew, yɑ pɑ buddi kì yij pyën ɑ́kyel wøki yïn, mɑ́ tyëng Isrɑil óbëëdø ni menɑni ki cyɑ̈ng mø gïïr, yï gen bong rɑ̈dh, wɑlɑ̀ jɑgg, o bong gëdhhì wɑlɑ̀ këli lɑm, o bong yuu pyëëj gïn-ɑ dwɑddi yi Jwøng-ɑ Ácwɑ̈ɑ̈j. Codhe, o gøl Isrɑil dwööge, o Jwøng-ɑ Ácwɑ̈ɑ̈j, Jwøøg gen yɑb yi gen geki kwɑɑr Debïd rɑ̈ɑ̈dh gen. Ge óbï yï Jwøng-ɑ Ácwɑ̈ɑ̈j, Jwøøg gen dëlli gen okïrrø, ge yɑb-ɑ dhwɑ̈nge.” Lïngu kwøbbi Jwøng-ɑ Ácwɑ̈ɑ̈j wun ɑ tyëng Isrɑil! Jwøng-ɑ Ácwɑ̈ɑ̈j yïe dɑ cɑ́y møg cɑɑye tyëng pönhï, kipe bong dyër kí kønyi rek mø gøggi, kɑ ji wɑ̈thi gen owïlø ki Jwøk. Lɑmm-ɑ rijjø, kí köngi pyed geki wëënyø kí nɑ̈g ki ji, kí kwɑl geki liny, kí yɑb ki mɑ̈nni ji møøgø, bene gen gïg-ɑ ceg ki gøggø yi wun. Kipe gïgɑni bënn, piny ócyënni mel, kɑ gïn-ɑ bëëdø kì piny bëne othøø, kí lɑ̈yyi pɑ̈l geki winyyi mɑl, cɑgg ɑ́ rij kì nɑm, ge bɑ møg thøw. Jwøng-ɑ Ácwɑ̈ɑ̈j okööbø kinni, “Ko di dhɑnhø me gøøny wɑɑd gen, kɑ ko di ngɑn me kööbø kì ri ngɑn megø. Yɑ gönyø kɑ wun, wun ɑ ókwër! Wu óthɑ̈mmi kì dicɑ̈ng kí wɑ̈r thyew, kɑ jøtöng óthɑ̈mmø kyeel ki wun. Isrɑil meyi wun bɑ men nɑ̈g yi yɑn. Jiɑ ri gen dɑ cyën, kì bɑng kɑ̀ kwïj gen Jwøk. Wun ɑ ókwër, yɑ ɑ́bɑny yi wun, kɑ pwönyɑ bɑny yi wun, wu ceg kɑ lonyø ki bɑnyø yi yɑn, o wɑ̈ddi wun pɑ yïëy yi yɑn gɑ ókwërrɑ. “Kɑ̀ ngënyi kwɑnni wun, yöd wu ceg-ɑ pëddø ki orøg! Wør-ɑ wøør wun yi ji ɑnɑn óløgɑ ɑyɑ̈r. Kɑ̀ cɑm wun gëdhhi orøøg jiɑ, bene ɑ tyeru kinni, o ge røngi gen kinøw, kipe kinni o ge nyi kɑ̈ni gen ki gëdhhì. De ji ɑ́göög ge pɑ̈r ki ókwër. Ge ócɑy yi yɑn ge bënn kipe rɑ̈ji buri gen. Ge cɑyɑ’ cɑyø kipe gïg-ɑ gøggi yi gen. Wu ócyɑ̈mø ki gëdhhì ceth, de wu pɑ yɑ̈ng. Mɑ̈nni wun óniin yi wun, de wu pɑ ngënyi, mɑ́ yɑ ɑ́wiy yi wun, kɑ wu kedh-ɑ bɑng jwögg møøgø.” Wu ɑ́ngɑ̈ɑ̈d kì wɑ̈thi kïttì, kɑ wu orɑ̈bø ki gëdhhì kì wɑ̈thi ótøng, kɑ wu orɑ̈bø ki bɑkur kì thɑ̈thi yenh-ɑ døngø kipe døøji tïbbi gen. “Bene ɑ bɑnge göög nyigi wun geki mɑ̈nni wun, gɑ tyëng-ɑ nyi niin ki köögi. De nyigi wun geki mɑ̈nni wun pɑ cɑy yi yɑn kipe gwøøg gen kinøw, mɑ́ men-ɑ́ cwøw mɑ̈nni gen ɑ́wiy gen piny, kɑ ge kedh-ɑ yï ɑ́mɑ̈jji keng, kɑ ge ongɑ̈dø kyeel ki gen ki gëdhhi jwögg-ɑ pɑth. Ji-ɑ pëthi gen bong gïn, ge bɑ møg pïïd yi ryɑ̈g ceth. “De cɑgg ɑ́ kɑ̀ rum yïn ki bɑ̈jjø, yïn ɑ Isrɑil, Yeudiyɑ̀ koo røngi thyew. Wu ko nyi kedhi Gilgɑl, wu ko nyi kedhi Bet Aben, kɑ wu ko nyi köngi kì kunɑni ki nyingi Jwøng-ɑ Ácwɑ̈ɑ̈j, Jwøng-ɑ Nëënø. Tyëng Isrɑil wɑ̈thi gen teg ni wïj dhyɑng mɑ ɑmyël. Ge ókwɑy kidï ni órömø mɑ mölø yi Jwøng-ɑ Ácwɑ̈ɑ̈j? Tyëng Isrɑil ɑ́pëggi be kwɑjji ngïjjì yøw, wiy ge bëëd gen ki bëëdi gen. Kɑ̀ yɑ̈ng gen yi møgi oløg, ge nyi døøg-ɑ ri mɑ̈j, ge tyer-ɑ gïg-ɑ rijjø kibøli dhwɑ̈ng. Ge ókøøl ni kenyi köddi yømø ɑ́kødɑkødø mɑl. Ge óyɑ̈r kì bɑng kenyi thödhi gen jwögg-ɑ pɑth ki gëdhhì. “Lïngu møg, wun ɑ ókwër. Kyën wun yïthhi wun, wu tyëng Isrɑil; lïng wun, wun ɑ tyëng gøl rɑ̈ɑ̈dhø, cɑ́y bɑ møg pɑ̈dhi kömi wun, kipe kɑ̀ pɑ nyi cïbu kwøb kɑ̈jji gen kì burø. Mɑ́ wu ɑ́bëëd wu bɑ ɑ́kɑ̈lli kì Midhpɑ̀, kɑ wu obëëdø wu bɑ bøyy møg-ɑ ócegø kì Tɑbör. Wu ɑ́göög ki bur me ludhi yi ji kì Cethïm. Gïg-ɑ gøggi yi yïn, yïn ɑ Isrɑil onennø yi yɑn. Bong gïn cuggi gwøgø yi yïn e pɑ nenni yi yɑn. Isrɑil ɑ́göög e nɑ ngɑn nyi yɑ̈bø ki cwøw, wiy-ɑ jɑlgøle piny. Isrɑil ree ɑ́ywëdhe.” Ge ɑ́mɑ̈ɑ̈n døøg kö Jwøk yi orøøg gen. Mɑ́ pëthi gen ɑ́kwɑny yi orøg, kɑ Jwøng-ɑ Ácwɑ̈ɑ̈j bɑny yi gen. Ngöni Isrɑil nyodh-ɑ orøge, ge óthɑ̈mmi yi gööj orøøg gen. Kɑ Yeudiyɑ̀ óthɑ̈mmø ki gen thyew. Ge ókedhi be mɑlli Jwøng-ɑ Ácwɑ̈ɑ̈j, ge ókwöddø ki dhögi gen kí dyëgi gen, de kwɑ̈jji gen pɑ løøg yi Jwøng-ɑ Ácwɑ̈ɑ̈j, mɑ́ e ɑ́kedh kì buti gen. Kwøbbi Jwøng-ɑ Ácwɑ̈ɑ̈j pɑ mïdhi yi gen, nyigi gen nyi yulli ge’ Bɑɑl. Tung-ɑ nyi tuug gen kì tuung dwɑ̈y bɑ orøg. Byelli gen órënyi kì bɑng orøøg gen. Kodhu tung kì kɑɑl Gibeɑ̀, pwödu bul ki köögø, kɑ kɑɑng ɑ́tegø kodh wun kì kɑɑl Rɑmɑ̀. Kiwu liny kì Bet Aben. Wu tyëng gøl Ben Yɑmïn, tëddu bøli wun ki liny. Isrɑil ódhur piny cyɑ̈ng-ɑ óliidh kwøb, lïng wun, wu kɑ̈lli Isrɑil, gïg-ɑ kømmi yi yɑn ópɑ̈dhi kɑ̈jji gen ceth. Jwøng-ɑ Ácwɑ̈ɑ̈j okööbø kinni, “Jɑggi Yeudiyɑ̀ nɑ ji møg-ɑ nyi cɑnggi kew. Kì bɑng menɑni, cɑ́y ókønyɑ kömi gen ni pïi bɑɑyø. Isrɑil ópïïd yi ryɑ̈ng dwøng, ryɑ̈ngɑni bï-ɑ köme kɑ̀ wëënye ree, ɑ rïnge kì bɑng jwögg-ɑ pɑth. Kì bɑng menɑni, yɑ óni tyemtuk kì ri Isrɑil, kɑ yɑ nɑ twöng-ɑ nyi cɑm leg kì ri Yeudiyɑ̀. “Jɑggi Isrɑil nyødhi gen ɑ́yod yi gen, kɑ yod yi jɑggi Yeudiyɑ̀ kì bøli kenyɑni kinni liny gen ɑ́dhɑ̈ɑ̈r, kɑ jɑggi Isrɑil öd-ɑ yï rɑ̈nhdwøøng Acuur, kinni o ge di køny yi en. De Isrɑil nuti kønyø yi rɑ̈nhɑni, o Yeudiyɑ̀ nuti yielø kɑ ɑ́dhɑ̈ɑ̈re. Yɑ óni thwøønh ngur kì kömi Isrɑil, kɑ yɑ nɑ mɑɑdh ngur kì kömi Yeudiyɑ̀. Ge óngølli yi yɑn gɑ thullì, yɑ kedh yɑ ókedhø. Yɑ cɑ̈mmi yɑ ókedhø; kɑ̀ gwɑ̈rrɑ bong ngɑn yïëdø. “Kì bɑng menɑni, jiɑ ówiyɑ piny o ge rɑngi gen, gïti keny-ɑ óyewi gen, kɑ ge dwöög-ɑ köörɑ.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Kɑ tyëng Isrɑil ri gen köbbi gen kinni, “Bïu, døøg wɑ yï Jwøng-ɑ Ácwɑ̈ɑ̈j. Wɑ ɑ́ngølle wɑ bɑ thullì, kɑ wɑ thödhe ki kedd, de wɑ órøde kej ɑ́kyel këti, kɑ keddee tuur yi en. Wɑ óthödhe ki wëyi kì bɑng cyɑ̈ng ɑ́ryew, kì ri dɑ̈ɑ̈g cyɑ̈ng wɑ ódwøøge kejee. Pɑ̈nyi wɑ riee kidøøj ki yodi Jwøng-ɑ Ácwɑ̈ɑ̈j, o bëe be kønyi wɑ, pɑ bɑ̈jji, óbï ceth ni cɑ̈ng ɑ pɑ nyi bɑ̈jji ki bëënø kì bøli keje, óni kødh ɑyɑr ɑ nyi kwööj piny.” De Jwøng-ɑ Ácwɑ̈ɑ̈j okööbø kinni, “Wun, wu tyëng Eprɑim kí tyëng Yeudiyɑ̀, wu göggɑ’ ngø o yɑ døøg be gɑ̈nø yi wun? Mɑ̈ɑ̈dø mi wun men-ɑ mɑɑr wun yɑn nyi jwɑn-ɑ lɑ̈ɑ̈nyø ni pølli mwøl, o nyi jwɑn-ɑ thwøwø ni thöjji mwøl. Bene ɑ bɑnge ɑ́ngøllɑ wun ki jøtöng møgɑ, wu ɑ́nɑ̈ɑ̈gɑ ki kwøbbi dhøgɑ. Cɑ́yɑ pɑ cwöng ki bëën kömi wun; wu pɑ̈ɑ̈yɑ’ piny ni göjji mɑl. Mɑ́ yɑ dwɑdd-ɑ kinni lïngi kwøbbɑ, de pɑth ki gëdhhì ɑ dwɑddi yi yɑn. Yodi møgɑ ying-ɑ mɑl kibøli gëdhh-ɑ rɑ̈bbi yɑn. “De keny-ɑ ɑ́wɑ̈dhi gen Adɑm ceth, ɑpɑ̈d gen lwöm-ɑ ɑ́ying kɑɑm wøn ki gen. Gilyɑd bɑ kɑɑl tyëngrijjø mø wɑ̈dhø nɑ̈g ki ji. Ókwër ɑ́göög ki ɑkuud kurrì møg nyi buddi kì yethi yëëth, ge orödhø ki ji-ɑ kɑ̈lli yuu Cekïm, o gï nɑ̈g yi gen. Ge gøgg-ɑ ɑyɑ̈r me pɑ døøj ki gøggø yi ókwër. Yɑ ɑ́lïdhi ki gïjø me rɑɑj cɑrø kì gøl Isrɑil, Eprɑim ɑ́göög ki ɑ́dheycwøw, o Isrɑil ree ɑ́ywëdhe. “Yïn thyew, Yeudiyɑ̀, yï ócɑy kipe gïgrijjø møg-ɑ gøggi yi yïn. Bøli kej cɑ́yɑni ɑ́rum ki cïbø yi yɑn. “Pyëwɑ nyi dwɑdd-ɑ gyëdhi jiɑ Isrɑil, o ge dwøøgɑ yij bëëndøj men-ɑ ɑ́bëëd yi gen. De kenyi dwɑdd-ɑ dwöögi gen yïɑ, nyii yodø yi yɑn kinni, ge pɑ cuggi dwöögø, mɑ́ bëëdi tyëng Sɑmɑriyɑ̀ kedh e ceg-ɑ rënyø; ge ceg-ɑ pëddø ki orøg. Tyëng Isrɑil ruj-ɑ ri gen. Ud nyii tørrø yi gen, kɑ ge okwɑ̈dø. Kɑ jɑmmi ji nyi kɑbbi yi gen kì yëthi wëll. De ɑ́dhɑ̈li kedhi wɑ̈thi gen kinni, rɑjj-ɑ gøggi yi gen bënn pɑ wïl kì wïjɑ, ge bëëdø ge ótyeeg dïdyër yi rɑjjɑni, mɑ́ rɑjjɑni ying-ɑ bølɑ ceth.” Jwøng-ɑ Ácwɑ̈ɑ̈j okööbø kinni, “Pyëw rɑ̈dh nyi mïn-ɑ yi orøøg gen, o pëthi jɑgg nyi mïn-ɑ yi wënyi gen. Ge bɑ tyëngrijjø bënn; pëthi gen lëëdh kipe gwøgi gïgrijjø, lëdhi pëthi gen kipe gwøgi orøg nɑ lëdhi mɑɑc purun ɑ pɑ nyi thuuj kër-ɑ nyööm ɑwɑj gïti kɑ̀ kwöde. Jɑgg ɑ́nɑ̈g yi møgi oløg kì cyɑ̈ɑ̈ng tungi rɑ̈dh, kɑ rɑ̈dh kedh-ɑ kelli jɑgg, kɑ órëbø ki tyëng-ɑ ɑ́yɑnyyi Áyïmø. Pëthi gen rijjø nɑ lëdhi mɑc; liny gen nyi lwëny-ɑ́ɑ̀ wɑ̈r, de nyii pëddø lënhø ni mɑc kì mwøl. “Ge lëëdh nɑ mɑɑc purun, ge nyi cɑm-ɑ jɑggi gen, ge nɑ̈ngg-ɑ rɑ̈nhi gen, o bong ngɑn mɑ ɑ́cwøl nyingɑ kì kelli rɑ̈nhhɑni.” Jwøng-ɑ Ácwɑ̈ɑ̈j okööbø kinni, “Eprɑim nyii rëbø ki jurrì møøgø. Eprɑim nɑ ɑbulø me nuti løgø; pɑ kønø kì pyëw, bude megø nuti cyegø. Tege ɑ́tyëg mɑ̈ɑ̈dh yi jurrɑni, de gø kwïje kinni nyönhø, nɑ jɑl me wïje mɑg yi wɑ́ri döng, de ree kwïje kinni yöø. Rɑ̈ji Isrɑil cung-ɑ́ɑ̀ bøle ceth, o nuti døøg kö wɑ̈n Jwøge; nuti yömmi yïe. Eprɑim nɑ gyenø, wïje nøg, dɑ kɑ̀ renge yï Rïp, o dɑ kɑ̀ cige rengi yï Acuur e dwɑdd-ɑ kønyø. Keny-ɑ ókedh gen, bøyɑ óleengɑ kömi gen, kɑ ge tëëlɑ piny ni winyyi mɑl. Ge ócɑy yi yɑn ki menrɑj kipe orøøg gen. “Ri gen dɑ cyën, mɑ́ yɑ ɑ́wiy yi gen! Ge othøø, mɑ́ ngɑ̈thi gen ɑ́lugi gen yɑn, ngö yɑ dwɑdd-ɑ dømi gen. Ge kømm-ɑ kwøbbi pyed kì riɑ Ge nuti ywöög yïɑ ki pëthi gen; ri gen lɑ̈ɑ̈w gen ki yɑn. Ge ceg-ɑ ri gen ki lenggø kì piny ni kenyi göög tyëng-ɑ kwïj Jwøk. Ge ɑ́pwönyi yi yɑn, kɑ ge thödhɑ ki tegø, de ge ɑ́yöd ge bɑny-ɑ gïgdøj møg-ɑ ɑ́göggɑ gen. Yɑ cög yɑ wiy ge’ piny, kɑ ge nyi kedh-ɑ yï jwøg me yïe bong tegø. Ge pɑ cuggi ngɑ̈dhø, mɑ́ ge nɑ böltøng me bøømø. Mɑ́ jɑggi gen nyi kømm-ɑ kwøbbi ɑthwøg, ge bɑ møg-ɑ óthumi ki nɑ̈gø ki pil, kì bɑng rɑ̈ji lebbi gen. Ge ógɑggi yi tyëng Rïp!” Jwøng-ɑ Ácwɑ̈ɑ̈j okööbø kinni, “Cïb kɑng dhøgí, kiw liny, de cor wïïn ɑ mɑl, mɑ́ lwöm-ɑ kɑɑm wøn ki ji ɑ́pɑ̈d yi gen, kɑ pwönyɑ ódhɑ̈lø mïdhø yi gen. Kɑ ciggɑ bɑny yi gen. Isrɑil kïïw ɑ wïjɑ, ge okööbø ce gɑ jiɑ, o ge ngɑ̈ny-ɑ yɑn, yɑn ɑ Jwøøg gen. De Isrɑil døøjø ɑ́bɑnye, bene ɑ bɑnge cyeddii yi ngɑn-ɑ mɑɑnii. “Jiɑ ɑ́rööny ki rɑ̈nhì, e rɑ̈nhhɑni nuti myeg-ɑ yi yɑn. Kɑ ge ókɑ̈bbø ki jɑgg yɑ nuti yïëyø. Dhɑbbi gen kí ɑ́teggi gen ɑ́gwøg gen gɑ ngïjji jwögg. Ge ónɑ̈g kɑ per møgɑni bënn. Rønyi dhɑb men-ɑ mɑlli yi tyëng Sɑmɑriyɑ̀ mɑɑn yi yɑn. Pyëwɑ rɑɑj ki gen. Ge gït-ɑ wɑɑng ge mɑll-ɑ ngïjjì? Ngïnyɑni ɑ́gwøg-ɑ yi bødhø yøw, o pɑth ki jwøg kinni tek! Rønyi dhɑb men-ɑ mɑlli yi Sɑmɑriyɑ̀ ómød, kɑ ogöögø ki gullì. Kɑ̀ kɑ̈gu yømø, wu kɑj-ɑ ɑ́kødɑkødø. Thyɑng cungi wɑ̈thi gen bong byel. Ge pɑ kɑ̈ni ki gïncɑm, ke bëëd e dɑ mø kɑ̈ɑ̈l yi gen, ge cɑm-ɑ yi tyëngpɑth. Isrɑil ɑ́göög e nɑ jurr-ɑ kyeelø; ɑ́göög e nɑ pug me thøø, bong pere kì yïɑ. Isrɑil ɑ́rengi; ɑ́töngi yïnø ni ɑderø me rengi pɑ̈l. Árengi Acuur. Ree ɑ́kïrre ki ngɑn korrii ni ngɑn nyi niin ki köögi men yɑb ngyëny kì yï cwøwe. De cɑgg ɑ́ kɑ̀ tɑɑy Isrɑil kelli jurrì møøgø ɑnɑn, ge bɑ møg-ɑ ócøng yi yɑn, o ge cɑyɑ. Ge ónyönhi keny-ɑ óguud nyingi gen yi rɑ̈nhdwøøng Acuur. “Isrɑil ɑ́pëggi be gyer ki këlli lɑm gɑ kɑ̈jji lɑ̈ɑ̈nyi orøg, de këllɑni kiri gen ceg bëëdø gɑ këlli orøg. Ge ɑ́gwëdɑ ki cigg møgɑ mø gïïr, de gï cwølli yi gen gɑ møg pɑth. Gëdhh-ɑ nyi ngɑ̈lli gen yɑn ɑnɑn, nyi ngɑlli yi gen gɑ rïngø men cɑm yi gen yøw, de pyëwɑ pɑ med ki gen, wïjɑ pɑ wïl ki orøøg gen; ge bɑ møg cɑy yi yɑn ceth. Ge ódøøg ki gwøg gɑ bɑ̈ngg ni kɑ ɑ́ying gen Rïp. “Isrɑil wïje ɑ́wïl ki ngɑn-ɑ ɑ́gwøgii, kɑ pëgg-ɑ be gyer ki ud mø døngø. O Yeudiyɑ̀ ɑ́pëggi be gyer ki kɑ̈dd-ɑ ówenø ki dör, de uddɑni geki kɑ̈ddɑni ógöjjɑ rɑ̈bø ki mɑc. “Pyëwí ko med, yï ko tuug ni jurr-ɑ kyeelø, mɑ́ yï ɑ́pɑ̈d kì ri Jwøgí ni ngɑn bɑny jɑlgøle, mɑ́ yï rømm-ɑ kinni, byel ɑ́mëggi yïn ɑ yi jwögg møøgø. De kì bɑng nyɑ keny me thiinh ceth, rɑrø ójɑd ki byel, kɑ ɑ́tɑy ojɑdø ki møgø. Wu pɑ cög wu obëëdø kì piny Jwøng-ɑ Ácwɑ̈ɑ̈j, wu døøg-ɑ yij bɑ̈ɑ̈ngø ni kɑ ɑ́ying wun Rïp. Wu kïdh-ɑ Acuur kun cyɑ̈ɑ̈m wun ki gïg pɑ nyi cɑm yi jii Jwøk. Jwøng-ɑ Ácwɑ̈ɑ̈j pɑ kunyi yi wun ki møgi oløg kì kunɑni. Bong gëdhhì møg-ɑ ómuuj yi wun. Gïgcɑmmi wun ywëdh-ɑ ngɑn-ɑ ócɑm gen, óni dyeel bɑ̈ɑ̈g; bɑ men nɑ̈ɑ̈g kɑ̈j yøw, bong møg kïdhi Kengi Jwøng-ɑ Ácwɑ̈ɑ̈j gɑ gëdhhì. Á ngø ɑ ógwøg yi wun kipe cyɑ̈ɑ̈ng kwër? Á ngø ɑ ógwøg yi wun kipe cyɑ̈ɑ̈ng Jwøng-ɑ Ácwɑ̈ɑ̈j keny-ɑ ókïdhi wun Acuur? Cɑgg wu bodh kì dhø ryɑ̈ngɑni, wu ócøng kej ɑ́kyel yi Rïp, kɑ wu kony kì Mɑmpis, kì kunɑni myërri wun geki kɑ̈rri wun ólɑg-ɑ yi lum; yenhi koodh ɑ ókwɑny myërri wun.” Bøli kej cɑ́y ɑ́bï, bøli keny-ɑ ókwɑny ji köggi orøøg gen ɑ́wɑ̈nhi. Ngɑ̈nyi Isrɑil wøw kinni møgɑni obëënø, mɑ́ wu okööbø kinni, “Jɑltöng bɑ dhëg, jɑlwëy wïje dɑ ɑ́nɑ̈gø!” Wu mɑɑn-ɑ yɑn mɑ́ orøøg wun dwøng cɑrø. Yɑ ɑ́ör yi Jwøk yɑn ɑ́ jɑltöng me köbbi jie, Isrɑil. De yëthɑ pɑ̈ɑ̈ng wun ki ɑ́kɑ̈llì, yɑ ceg kɑ judø yi wun, jɑltöng ceg kɑ mɑɑnø yi ji, cɑgg ɑ́ kì Kengi Jwøk. Ge ɑ́rënyi yi gïg-ɑ gøggi yi gen, ge pɑ yiel, ge ɑ́røngi ni tyëng Gibeɑ̀, orøøg gen pɑ wïl kì yï Jwøk. O ge ócɑy yi Jwøk ceth kì bɑng orøngɑni. Jwøng-ɑ Ácwɑ̈ɑ̈j okööbø kinni, “Ábëëd e nɑ kenyi yood oløg kì yij ryɑng kì lew, eni yon-ɑ ɑ́yodɑ Isrɑil, nɑ kenyi liidh yɑdh kɑ̀ cɑ̈ge ki nywølø, eni linh-ɑ ɑ́lidhɑ kweyyi wun, de ge ɑ́mɑ̈gi kì ri Bɑɑl Peor, kɑ ri gen kwɑɑj gen ri ngïji yøw, gïi ɑyɑ̈r, kɑ ge órënyø; ge ɑ́ywëdh ni jwögg-ɑ mɑɑr yi gen. Dhwɑ̈ɑ̈ng Isrɑil ópɑ̈r ni winyø, bong ngɑndhɑjø men-ɑ óngøl ki dhɑnhø, o bong ngɑndhɑjø men-ɑ óyɑɑj, o bong nywøl møg-ɑ ónywøl yi gen. De cɑgg ge yïddi ki nywøl, nywølɑni ókɑ̈l yi yɑn kì yï gen, bong men-ɑ ówiy yi yɑn e onëënø. Keny-ɑ ólugɑ ngɑ̈jɑ gen, gïg mø rijjø ócwöb kiper gen.” Jwøng-ɑ Ácwɑ̈ɑ̈j, yɑ nenn-ɑ nyigi Isrɑil ge muuj-ɑ ngɑn nɑ̈g gen. Á ngø ɑ kwɑjjɑ kì yïí, o göggi ji-ɑ ni møg? Wiy ji dwöög gen wɑ̈g kì yethi mɑ̈nni gen! Wiy cɑg dwön gen kì thïnhhi mɑ̈nni gen! Jwøng-ɑ Ácwɑ̈ɑ̈j okööbø kinni, “Bɑng orøøg gen ɑ ɑ́cɑɑgɑ gen ki mɑɑnø kì Gilgɑl. Ge ɑ́cɑg yi yɑn ki mɑɑnø kì kunɑni. Ge ókøølɑ wɑ̈g kì ødɑ kipe gïnrɑj men-ɑ ɑ́gwøg yi gen. Ge pɑ mɑɑr yi yɑn këti, mɑ́ jɑggi gen bënn ɑ́pëëm ki kwøbbɑ, ge ɑ́göög ki gïnrɑj. Isrɑil nɑ yɑdh me nɑ̈rø, køm-ɑ wøwø, men-ɑ́ pɑ cuggi kɑ̈nø ki nywøl, de cɑgg ge yïddi ki nyigi gen, nyigɑni ónɑ̈g yi yɑn, eni men-ɑ́ nyig-ɑ mɑɑr yi gen.” Jwøng-ɑ bøle cungɑ jie óbɑny yi en, mɑ́ ge ɑ́bɑ̈nyi lïngi kwøbbe. Ge ógöjji twɑ̈lø kì kelli jurrì. Isrɑil nɑ oløg me lɑ̈be med, o nywøle gïïr. Kɑ̀ cyeg jɑmme kidøøj nyi døøg-ɑ be gyer ki këlli lɑmmi jwögg mø pɑth, kɑ nyii pëddø ki ruugi löjji jwögge. Pëthi gen pɑ̈ng yi wëënyø, cɑ́yi orøøg gen pɑ̈dh-ɑ kömi gen ceth. Këlli lɑmmi gen kɑ̈jj-ɑ kwɑ̈jji gen ki jwögg-ɑ pɑth, ócøør piny yi Jwøng-ɑ Ácwɑ̈ɑ̈j kɑ ngïjji gen tørre. Ge ókööbø cyee kinni, “Yï wøn bong rɑ̈dh, mɑ́ wø pɑ böggi Jwøk. O cɑgg wø di bëëd yï wøn dɑ rɑ̈dh cøn, ɑ́ ngø ɑ di gwøge kiper wøn?” Ge nyi wɑ̈dh-ɑ köngø yøw ki köngi pyed. Lebbi gen pɑ nyi mïdhi yi gen. Ge rïïj ge peej-ɑ ri gen bur ge gøøny-ɑ ri gen. Ge rijjø nɑ mødø, lum-ɑ nyi nɑ̈g pwödhø e rumø ki purø. Rɑ̈nh-ɑ bëëdø kì Sɑmɑriyɑ̀ ókøøl Acuur geki jie, ni kenyi kwølli pɑ̈di yɑdh yi thew. Wɑ̈thi ótøng møg-ɑ di kengi Aben, kun-ɑ kwɑjji jwögg-ɑ pɑth ki dyër yi tyëng Isrɑil, ócøør piny bënn. Koodh geki lum óceg ì dut kì wɑ̈thi këlli lɑmmi gen. Kɑ kïttì köbbi yi gen kinni “Kɑnu wøn!” Kɑ ótøng köbbi yi gen kinni, “Kumu wøn!” Jwøng-ɑ Ácwɑ̈ɑ̈j okööbø kinni, “Wu tyëng Isrɑil, wu nuti wïyø ki orøg, këër orøng-ɑ ɑ́gwøg wun kì Gibeɑ̀, wu ɑ́cög kinøw, wu pɑ dwöög köörɑ. Tyëngorøg nuti nɑ̈gø yi liny ki Gibeɑ̀? Tyëngorøg møgɑni ócɑy yi yɑn kì bøli keny-ɑ ódwɑddɑ en, kömi gen ópɑ̈ɑ̈r yi jurrì møøgø, kɑ ge cɑy kipe orøng-ɑ dwøng men-ɑ ɑ́gwøg yi gen, ge ókɑ̈l gɑ ɑtwöj. “Eprɑim bɑ nyɑ wɑdh me mɑɑr gwøng-ɑ yöd yøw. De ɑcebø cïbɑ’ mune, mun-ɑ rɑw èn, døøg-ɑ be gwøg ki gwøng teg. Eprɑim ɑ gwej pwödhø, o Yeudiyɑ̀ pure pwönhɑni! Yɑgob ɑ ódwøgii! Pɑ̈ggi wun ri wun ki pwödh kidøøj, kɑj wun gïg-ɑ nywøl yi mɑ̈ɑ̈dø men-ɑ dyër. Pur wun ki pur-ɑ dyër, mɑ́ men bene bøli kej kwɑjji Jwøng-ɑ Ácwɑ̈ɑ̈j. Gïti keny-ɑ óbëëne, o wu pwönye ki kwøbb-ɑ tir. Wu ɑ́kɑ̈g-ɑ rɑ̈jø, kɑ wu kɑj-ɑ wëënyø. Wu ócɑm-ɑ gïg-ɑ nywøl yi wëënyø. “Mɑ́ wu ɑ́gɑ̈nn-ɑ yɑ̈thi liny geki yɑy-ɑ dwøng kì yï wun, Kömi jii wun óbëën yi liny, kɑ dörri wun cøør piny. Óbëëd e nɑ cyɑ̈ng-ɑ ɑ́nɑ̈ɑ̈g kɑɑl Bet Arbel yi Rɑ̈dh Cɑlmɑn, ɑ ɑ́nɑ̈ɑ̈g othønhø geki mëëg gen. Bene gïn-ɑ ógöggi yïn ɑnɑn, yïn ɑ Betiil, kipe orøgí, orøng-ɑ pëddi rɑ̈jø. Rɑ̈ɑ̈dh Isrɑil ónɑ̈g kì ri tuumi liny ceth.” Jwøng-ɑ Ácwɑ̈ɑ̈j okööbø kinni, “Isrɑil ɑ́mɑɑr yi yɑn e nudd e thiinh cɑrø. Kɑ cwöölɑ wɑ̈g kì Rïp, ɑ́ wɑ̈dɑ ceth. De kɑ̀ cwöölɑ en yïɑ, nyi yöd e ceg-ɑ pëddø kedhø kì butɑ. Jiɑ ngɑ̈dd-ɑ Bɑɑl ki gëdhhì ge ngɑ̈dd-ɑ ngïjjì ki gëdhhì. Bɑ yɑn ɑ ɑ́pwönyi Isrɑil ki cyɑ̈dhø. Áthɑ̈ɑ̈yɑ e pyejjɑ’ pyejjø kì cinge, de ɑ́dhɑ̈li yodø yi en kinni korr-ɑ yi yɑn. Ge ɑ́dööbɑ köörɑ ki mɑ̈ɑ̈dø me dwøng kɑ ge kwömmɑ, kɑ köörɑ dwøøgɑ piny, kɑ ge cɑɑm yi yɑn. “Ge døøg-ɑ be gwøgø gɑ bɑ̈ngg ni kɑ ɑ́ying gen Rïp. Ge ójɑɑg yi Acuur, mɑ́ ge ɑ́bɑ̈nyi yewø. Pil óbëëd ge cem-ɑ rɑ̈d kì kɑ̈dde, kɑ̈dde ócøør piny, kɑ ge nɑ̈g. Ge ɑ́bɑ̈nyi dwöög yïɑ. Ge bɑ møg-ɑ óywöngi yi ɑcebb-ɑ muddi gen, de bong ngɑn-ɑ ókɑ̈ɑ̈l ɑcebbɑni piny kì muddi gen. “Yɑ óngïr kidï yi yïn, yïn ɑ Isrɑil? Yï ówiyɑ piny kidï? Yï ócuggø nɑ̈gø yi yɑn ni kɑ ɑ́nɑ̈gɑ Admɑ̀, wɑlɑ̀ yï ócuggø gwøgø yi yɑn ni kɑ ɑ́gwøgɑ Dheböïm? Pyëwɑ pɑ yïëy ki göggi yïn gïn ni menɑni! Mɑɑr-ɑ mɑɑrɑ yïn dwøng cɑrø! Bong gïn gwøgɑ e pyëwɑ rɑɑj; Isrɑil pɑ cigɑ rënyø. Mɑ́ yɑ pɑth ki dhɑnhø; de yɑ bɑ Jwøk; yɑ bɑ kwërø, o yɑ nud kì buti wun. Yɑ pɑ bï yï wun ki rɑ̈ji pyëw. “Keny-ɑ ócwöölɑ gen, cwɑggɑ ólïngi yi gen kì kun lɑ̈wi ni ngɑ̈rri ngur. Kɑ ge bï-ɑ yïɑ ge kɑ̈ɑ̈l-ɑ kun lɑ̈wi dëlli gen okïrrø. Ge óbï ge kɑ̈ɑ̈l-ɑ Rïp kí Acuur, ge jwɑni nɑ kenyi pɑ̈rri winy. Ge ódwöögɑ myërri gen. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb.” Jwøng-ɑ Ácwɑ̈ɑ̈j okööbø kinni, “Tyëng Isrɑil yɑ tyeeg gen kɑ kwøbbi pyed kí wëënyø. Tyëng Yeudiyɑ̀ nudd ge pemm-ɑ kwøbbɑ, yɑn ɑ́ Jwøk kwërø ɑ nyi mïdhi kwøbbe. Eprɑim gøgg-ɑ óbɑɑd, ni ngɑn cɑɑm ree ki yømø. Tyëg cɑ̈ng e rïng-ɑ́ɑ̀ bɑng wuudø. Reb-ɑ wëënyø kí liny. Nyii nywɑ̈gø kwøb ki tyëng Acuur kí tyëng Rïp, kɑ nyi öd-ɑ yï gen ki møw, kinni o kor yi pödhhɑni.” Jwøng-ɑ Ácwɑ̈ɑ̈j yïe dɑ gøny geki Yeudiyɑ̀, o Yɑgob ócɑy kipe rɑjj-ɑ gøgge. Yɑgob kweyi wun ɑ́byëddi geki ómen ge nudd ge ying-ɑ yij meyi gen. Keny-ɑ ɑ́dønge, kɑ ge óbyëddø ki wëywödø, ɑ bɑ Jwøk. Ge ɑ́byëddi ki wëywödø kɑ ódhɑ̈lø tyɑmø yi wëywönɑni, kɑ óywöngø e kwɑjj-ɑ gyëdh kì yï wëywönɑni. Ayoodii Betiil yi Jwøk kɑ okööbø ki en kì kunɑni. Bene en Wïlɑ̈bø, nying-ɑ mɑllii bɑ Jwøng-ɑ Ácwɑ̈ɑ̈j. De yïn ɑ gøl Yɑgob, døøg kö Jwøgí, kɑ yï yewí! Mïdhí døøjø geki dyër, kɑ yï gɑ̈n Jwøgí ceth yethi cyɑ̈ng. Jwøng-ɑ Ácwɑ̈ɑ̈j okööbø kinni, “Eprɑim nɑ ngɑn yïe nyi ngëëw ki jɑmmì. Kɑ̈ll-ɑ rumi me wëënye ji, mɑ́ e mɑɑr-ɑ gwem.” Kɑ okööbø kinni, “Yɑ ɑ́kɑ̈ri, yɑ ɑ́yïddi ki tegø, o bong ngɑn-ɑ ókööbø kinni kɑ̈rɑ yood yɑn kɑ gwem!” Jwøng-ɑ Ácwɑ̈ɑ̈j okööbø kinni, “De yɑn, yɑ Jwøgí, Jwøng-ɑ Ácwɑ̈ɑ̈j, ɑ ɑ́pëëj yïn wɑ̈g kì Rïp, yï dwøøgɑ’ be bëëdø kì yethi kemmì këti, ni kɑ ɑ́bëëd keny-ɑ ɑ́bëënɑ yïí kì yij ryɑng. “Jøtöng ɑ́köbbɑ, kɑ ge nyudhɑ ki lɑ̈g mø gïïr. Kɑ gɑ́j mø gïïr kwøøbɑ dhøggi gen. Dɑ gïnrɑj kì Gilyɑd? Ge bɑ ji mø rijjø, ge ónɑ̈g yi orøøg gen. Ge ngɑ̈dd-ɑ Bɑɑl ki wɑ̈dhh gɑ gëdhhì kì Gilgɑl. Bene ɑ bëëd këlli gëdhhì mø gen nɑ kïttì møg-ɑ óröör piny kì yethi pwödh møg-ɑ ókøøgø.” Isrɑil pyëw Jwøng-ɑ Ácwɑ̈ɑ̈j ɑ́wëgge rënyø ki menrɑj, døj kɑ thøø kipe orøg. Ócɑy yi Jwøge, Jwøng-ɑ Ácwɑ̈ɑ̈j kipe remmi ji-ɑ ɑ́nɑ̈g yi en. Gøl Eprɑim ɑ́bëëd e kømm-ɑ kwøb mø tir, ɑböggii kɑ tïng mɑl yi tyëng Isrɑil bënn. De ge ɑ́døøg be mɑlli Bɑɑl. O ge bɑ møg thøw kì bɑng menɑni. Ge nudd ge ogöögø ki orøg me dwøng. Kɑ ɑ́tegø yøw nyi køny ɑ́ ngïjji røjj yi gen, ge gwøg-ɑ yi bödhhì mø wɑ̈thi gen pel. Kɑ ge nyi tir-ɑ ngɑl ki ji gɑ gëdhhì! Ge mɑll-ɑ røjjɑni! Bene kipe møgɑni ɑ ótɑy gen ni pølli mwøl, kɑ ge nɑ thöjj ɑ nyi jwɑn thwøwø. Ge óni cong ɑ nyi køøl yi yømø kì rɑrø, kenyi kwøør byel. Ge óni yïrø ɑ nyi køøl yi yømø. Akööb Jwøng-ɑ Ácwɑ̈ɑ̈j kinni, “De bene yɑn Jwøgí, Jwøng-ɑ Ácwɑ̈ɑ̈j, yɑ ketɑ ɑ bɑ Jwøgí, ki kër-ɑ ɑ́kɑ̈ɑ̈lɑ yïn wɑ̈g kì Rïp. Bong jwøg megø me ngɑ̈nyi yi yïn, den-ɑ́ yɑn ceth. Bong ngɑn me yiel yïn, den-ɑ́ yɑn ceth. Wu ɑ́korrɑ kì yij ryɑng, piny-ɑ yije bong pï. De keny-ɑ ɑ́wɑ̈nhi wun piny-ɑ døj, kɑ wu oyɑ̈ngø, codhe, ɑtɑ̈d wɑ̈thi wun. Kì bɑng menɑni, yɑ ópönhi yï wun ni ngur. Yɑ óbuddi kì yuu wun ni kenyi lïïb kwej. Wu ókedhhi yi yɑn ni kenyi kedhhi ji yi ngur me nyɑre ónɑ̈gø. Wu ócɑm yi yɑn ni kenyi cyɑ̈ɑ̈m mɑɑdh ngur. Wu óngølli yi yɑn wun-ɑ́ thullì ni kenyi ngud lɑ̈ɑ̈y pɑ̈l. “Yï othøø, yïn ɑ Isrɑil kipe kɑ ɑ́bɑɑny yɑn, bene yɑn ɑ ɑ́køny yïn! Rɑ̈dhí ying-ɑ keny ɑnɑn? Ede ɑ pɑ yiele yïn? Eni rɑ̈nh-ɑ ɑ́kwɑjji yi yïn, yï okööbø kinni, ‘Thödhí yɑn ki rɑ̈dh geki jɑgg.’ Yï ɑ́thödhɑ ki rɑ̈dh pyëwɑ rɑɑj, kɑ wɑɑrɑ kɑ ɑ́mɑɑg yɑn yi liny. “Kerri Isrɑil bɑ ɑcøng; orøge mïdh ɑ keje kì wɑ̈ye, ócɑy yi yɑn ki mendwøng, óni ngɑndhɑjø me pɑ̈dhi piny, de dhɑnhø dhɑ̈li bëën wɑ̈g, bɑ ɑlwöng. Kɑ pɑ̈dhi piny e thøø. Wu pɑ yïëëlɑ wɑ̈g kì yij thøø. Wu pɑ kɑ̈ɑ̈lɑ wɑ̈g kì dhø thøø, yïn ɑ thøø ɑ́gøne møgí? Yïn ɑ thøø, kɑ̈ɑ̈l ryɑ̈gí! Pyëwɑ pɑ lɑ̈ɑ̈m këti ki jiɑni. Cɑgg Isrɑil jwɑn døngø ni lum, yɑ óöni ki yømø me lëëdh kì yij ryɑng, kɑ nɑ̈mmi gen geki luyyi gen odwönø yi yømɑni. Jɑmm-ɑ døøj bënn ónɑ̈g yi yømɑni, eni yøm-ɑ ókɑ̈ɑ̈l yi yɑn, yømi wɑɑng wuudø. Sɑmɑriyɑ̀ ngïïne ki kerre ceth, mɑ́ Jwøge ɑ́bwöl yi en. Ge ópɑ̈nhi yi pilø. Nyigi gen møg-ɑ thønhø óngølli gɑ thullì, kɑ yethi ɑ́yɑjj kɑg.” Dwöög wun yï Jwøng-ɑ Ácwɑ̈ɑ̈j, Jwøøg wun, wun ɑ tyëng Isrɑil. Wu ɑ́tɑ̈ɑ̈y piny-ɑ yi orøøg wun. Døøg wun yï Jwøng-ɑ Ácwɑ̈ɑ̈j, kɑ wu kööb wun kinni, “Kɑ̈ɑ̈l kerri orøøg wøn wɑ̈g, kɑ kwɑ̈jji wøn yïëëy. Wiy leny-ɑ lejji wøn yïn ki dhøggi wøn, bëëde ɑ́ gëdhhì møg-ɑ mëggi yïn yi wøn, de pɑth ki gëdhhì møg-ɑ ngɑlli. Wø pɑ yiel yi Acuur, wø pɑ yiel këti yi kyënyi liny. Wø pɑ cigi kwøb këti kinni, ‘Møg bɑ jwöggi wøn!’ Mɑ́ ge bɑ gïg-ɑ ɑ́gwøg ki cing. Mɑ́ yïn yï ketí Jwøng-ɑ Ácwɑ̈ɑ̈j, ɑ yïí nyi yïddi yi kïj ki gïn-ɑ jɑ̈ddii.” Jwøng-ɑ Ácwɑ̈ɑ̈j okööbø kinni, “Jiɑ ódwöögɑ yïɑ. Ge ómɑɑr yi yɑn ki pyëwɑ bëne; pyëwɑ pɑ cigi bëëdø e rɑɑj ki gen. Yɑ óbëëdø kì yï tyëng Isrɑil yɑ nɑ kødh cwir. Ge ódhɑ̈y ni okøggi lum. Byerri gen óniyeeng piny, ni byerri yenhi Lubnɑn. Bɑ̈ddi gen ópedh yi gen, ge ógöögø ge nɑ ólɑm me myëër, Ge óbëëd yømi gen med ni yømi yenh sɑndɑl mø Lubnɑn. Ge ódwöög tïbɑ. Ge ókɑ̈gø ki byel këti, ge óngënyi ni nywøli oløg. Per gen ótëngi ni møgi oløøg Lubnɑn. Bong gïn-ɑ ógwøg yi tyëng Isrɑil ki ngïjjì këti; kwɑ̈jji gen óløøgɑ, kɑ ge korrɑ; Ge óbëëdø kì tïbɑ, mɑ́ yɑ nɑ yɑdh me yïthhe pɑ nyi wew. Gyëdhh-ɑ yï gen bënn kɑ̈ɑ̈l-ɑ yïɑ.” Ngɑn wïje pel, mïdhe kwøb møg. Ngɑn nyi lïngø, yode møgɑni, mɑ́ yëthi Jwøk bɑ óbödhh. Yëthɑni cyɑ̈dh-ɑ yi tyëngtir. De tyëngorøg ópɑ̈nhø kì yethi gen. Men bene wööni Wë, wöön-ɑ ɑ́mëgge Yöiil wɑ̈d Pethuel. Lïng wun, wun ɑ tyëngdøngø. Kyënu yïthhi wun, wun ɑ tyëng Yeudiyɑ̀. Dɑ gïn ni men mɑ ɑ́pɑ̈nyi cwöbø kɑ lidh yi wun, kì bøli keny-ɑ ɑ́nud kweyyi wun? Köbbu møgɑni nyigi wun, o nyigi gen ólony ki köbbø yi gen, o rïny-ɑ óbï ólony ki köbbø yi gen. Dɑɑg bɑ̈nyø ɑ́pëggi kömi byel; kɑ keny-ɑ nyi döng kì bɑng dɑɑng, nyi cɑm yi dɑɑng-ɑ bï kì bɑnge. Cyëëw wun, wun ɑ tyëng-ɑ ónɑ̈gø yi møgø; ywöngi wun, wun ɑ tyëngmɑdh ki møgø; oløng-ɑ di gwøøg møng-ɑ nyɑ̈n ɑ́rënyi. Dɑɑg bɑ̈nyø ɑ́pɑ̈ɑ̈r kömi pinyee; bɑ bɑ̈nyø me ngenyø, o pɑ cuggi kwɑnø; leggi gen bedh nɑ leggi ngur. Bɑ̈ggi oløgee ɑ́rënyi gen, o ólɑm ɑ́nyɑm gen. Pɑ̈ddi yenh ɑ́wej gen, yenh ɑ́döng ge tɑr. Ywöngi wun, ni kɑy me ywøg thøwi jɑlgøle ɑ́ wøb, eni jɑl-ɑ di nywømii. Bong byëli Jwøng-ɑ Ácwɑ̈ɑ̈j kí møgi oløg me muuj kì yij Kengø; ókwër ceg-ɑ ywøg, mɑ́ e bong gëdhhì mø mëggi gen Jwøng-ɑ Ácwɑ̈ɑ̈j. Pwödh tɑr; piny ceg-ɑ ywøg mɑ́ byel ɑ́rënyi, oløg ɑ́thwøw, o yenh dhetun ɑ́nɑ̈r. Ywöngi wun, wun ɑ jøpur; ywöngi wun, wun ɑ jøg-ɑ kor bɑ̈ggi oløg, mɑ́ gemè geki ceir, kí gïg-ɑ nyi cyeg bënn ɑ́rënyi. Oløg ɑ́thwøw, o ólɑm ɑ́nɑ̈r; yenhi bɑ̈gg bënn ɑ́thwøw. Medi pëthi ji ɑ́wɑ̈ɑ̈ny. Rug wun ki ocwɑ̈llì kɑ wu ywöngi wun, wun ɑ ókwërr-ɑ nyi göögø kì Kengø. Kɑ wu lɑngu wɑ̈r wu óywöngø kì Kengø! Bong møgi oløg, wɑlɑ̀ byëlø møg mëggu Jwøøg wun. Muuj wun ki cigg kipe twöni rek; cwøølu ji bënn kej ɑ́kyel! Cøngu jɑgg bënn geki tyëng Yeudiyɑ̀ bënn; Cøngu gen yij Kengi Jwøng-ɑ Ácwɑ̈ɑ̈j, Jwøøg wun, kɑ wu ywøøg wun kööre. Cyɑ̈ɑ̈ng Jwøng-ɑ Ácwɑ̈ɑ̈j ɑ́cyɑ̈ngi; eni cyɑ̈ng-ɑ ókɑ̈ni Wïlɑ̈bø ki ryɑ̈g, óbëëd ɑ́ cyɑ̈ɑ̈ng rɑj me ni ngø! Byelli wøn ɑ́rënyi ge onennø yi wøn. Bong medi pëëth kì yij Kengi Jwøøg wun. Köödh ɑ́kwɑ̈ɑ̈g piny; Bong byel kì yethi óköddì; o óköddì ɑ́rënyi, e bong byel kì yethi gen. Dhög geki dyëg ceg-ɑ ywøg, bong lum me cɑm yi gen; ge ceg-ɑ orɑng. Yɑ ywøøg-ɑ köörí yïn ɑ Jwøng-ɑ Ácwɑ̈ɑ̈j, mɑ́ lum geki yenh ɑ́thwøw, ge ce órɑ̈bø kɑ mɑc. Cɑgg ɑ́ lɑ̈yyi pɑ̈l ge ywøøg-ɑ yïí mɑ́ nɑ̈mm-ɑ thønhø ɑ́dwön. Kodhu kɑng ki köögø kì Dhɑyøn, kïti kwëër Jwøk. Bwøg wun, wun ɑ tyëng Yeudiyɑ̀! Cyɑ̈ɑ̈ng Jwøng-ɑ Ácwɑ̈ɑ̈j ɑ́cyɑ̈ngi. Óbëëd ɑ́ cyɑ̈ɑ̈ng muudhø me rɑj me pɑ̈ng yi pøøl mø looj. Liny bɑ̈nyø me dwøng obëënø e nɑ muudhø kenyi rïïme wɑ̈thi kïttì. Bong gïjø me ni menɑni mɑ ɑ́pɑ̈nyi cwöbø, o bong gøn men-ɑ ócwöb këti. Gïg-ɑ twïyø cɑm yi gen nɑ rɑ̈ɑ̈b mɑc; piny-ɑ bøli gen nɑ bɑɑg Eden, de bɑ ryɑng kì ngɑ̈thi gen. Bong gïn bodh kì bɑng gen. Ge nɑ kyënyì; o ge rïngi nɑ kyënyi liny. Ge pɑ̈r-ɑ́ɑ̀ wɑ̈thi kïttì; cwɑggi gen nɑ yɑ̈thi liny; ge tɑyyi nɑ lum-ɑ thwøwø kenyi rɑ̈bii yi mɑc. Ri gen jɑɑj gen ni jøg kedhi be liny. Ji ɑ́nɑ̈g yi wɑ̈ɑ̈rø ge nudd ge obëënø, kɑ nyingi gen pönh-ɑ wɑ̈g. Ge rïngi nɑ jøliny; ge yidh-ɑ dör. Ge pödh-ɑ bøli gen ceth yuu gen pɑ wil yi gen, o bong men rïw bøli megø. Ge pödh-ɑ yij liny, o bong gïn cung gen. Ge pödhi kömi kɑɑl; ge rïng-ɑ́ɑ̀ kömi dör; ge yïdh-ɑ́ɑ̀ wɑ̈thi ud, ge kɑ̈ll-ɑ ɑwɑjj ni kurrì. Piny ceg-ɑ onhɑ̈nh kì bøli gen; o mɑl ceg-ɑ kïïrø. Cɑ̈ng ɑ́lunyi geki dwɑ̈y, o kyell pɑ mënyø këti. Jwøng-ɑ Ácwɑ̈ɑ̈j liny ɑ́thödhe ki cigg, e cwɑgge ce pööd ɑ́ mɑl. Liny-ɑ kwølle gïïr cɑrø, o teg. Cyɑ̈ɑ̈ng Jwøng-ɑ Ácwɑ̈ɑ̈j dwøng, o böggi nɑ ngø! Á men ɑ óbødh kì yije? Jwøng-ɑ Ácwɑ̈ɑ̈j, okööbø kinni, “Yewi wun ki yew-ɑ dyër kɑ wu dwöög wun yïɑ ki twöni rek geki ywøg kí kïïmø. Wiy ywøøg wun nyodhe yewi wun; kɑggi ógudhi wun, bong gïn gwøge. Dwöög wun kö Jwøng-ɑ Ácwɑ̈ɑ̈j Jwøøg wun, mɑ́ e døøj o lɑ̈mpyëwe bong cöge; pyëwe pɑ nyi jwɑn rënyø, o pyëwe yöd, lɑɑwe nyi dwööge’ piny kibøli ke di cɑ̈ye.” Á men ɑ ngɑ̈nyii, ying Jwøng-ɑ Ácwɑ̈ɑ̈j, Jwøøg wun pyëwe ódwöög kɑ wu gëdhhe byel mø ngenyø. Codhe, o nëngi yi wun ki byëlø geki møgi oløg. Kodhu kɑng kì Kïti Dhɑyøn; muuj wun ciggi twöni rek, kɑ ji cøng wun! Cøng wun ji kej ɑ́kyel; be kømmi kwøbbi kwër; kɑ̈ɑ̈l wun tyëngdøngø, cøng wun othønhø kí møg-ɑ dhødh thyew. Cɑgg ɑ́ tyëng-ɑ cer ri gen nywømø, wiy gen uddi gen kɑ ge bï gen. Ywöngi ókwërr-ɑ göggi Jwøng-ɑ Ácwɑ̈ɑ̈j, kì kɑɑm këli lɑm geki dhø Kengø, kɑ Jwøk kwɑjji gen kinni, “Lɑ̈ɑ̈m pyëwí ki jií yïn ɑ Jwøng-ɑ Ácwɑ̈ɑ̈j! Wø ko wëggí gɑggø, o wø benyi yi pödhh-ɑ kyeelø, kɑ̀ kööb gen kinni, ‘Ágøne Jwøøg wun?’ ” Codhe ɑdwöög pyëw Jwøng-ɑ Ácwɑ̈ɑ̈j ki pinye; pyëwe ɑ́lɑ̈ɑ̈m ki jie. Aløøge kwøbbi gïn kinni, “Anɑn wu thödhɑ’ thödhø ki byel kí møgi oløg, kí møøw dhetun, o wu óyɑ̈ng. Wu koo benyi yi pödhh-ɑ kyeelø këti. Dɑɑg bɑ̈nyø bëne men-ɑ ɑ́kɑ̈ɑ̈l wɑɑng wuudø ókøølɑ; kwï gen ókøølɑ yij ryɑng. Pëjji gen ókøølɑ Luuy Omelø, o møg-ɑ cyɑ̈n ókøølɑ Nɑɑm Omeli Tɑr. møg-ɑ óthøw ókwɑ̈g. Ge ónɑ̈g yi yɑn kipe gïg-ɑ ɑ́göggi gen wun. “Wu ko böggi wun ɑ pwödh, de mïni pëthi wun, kipe gïg-ɑ ɑ́göggi wun yi Jwøng-ɑ Ácwɑ̈ɑ̈j bënn. Wu ko böggi, wun ɑ lɑ̈yy. Mɑ́ lum ɑ́twïy e mɑr; yenh ɑ́nywøl. Nywøli oløg geki nywøli ólɑm ɑ́ngënyi. “Wun ɑ tyëng Dhɑyøn, mïni pëthi wun kipe gïg-ɑ ɑ́göggi wun yi Jwøng-ɑ Ácwɑ̈ɑ̈j, Jwøøg wun. Wu ɑ́thödhe ki kønh døj kì bøli keje. o pɑ nyi jwɑn temø. Rɑrø ɑ́pɑ̈ng yi byel; kɑ møgi oløg geki møw ómullø kì buti kɑ̈jj-ɑ nyi biij gen. Gïg-ɑ ɑ́lɑ̈ɑ̈ny kì yï wun ócullɑ wun, gen ɑ byelli wun møg-ɑ ɑ́cɑm yi bɑ̈nyø Bɑ yɑn ɑ ɑ́ödi kömi wun ki dɑɑg bɑ̈nyø. Wu ócyɑ̈mø kɑ wu oyɑ̈ngø, Jwøng-ɑ Ácwɑ̈ɑ̈j, Jwøøg wun ólenhi yi wun, kipe gïg-ɑ myër møg-ɑ ógögge wun. Jiɑ koo benyi këti. Codhe, o yod yi yïn Isrɑil kinni yɑ nud kì kellí, kí kinni bene yɑn Jwøng-ɑ Ácwɑ̈ɑ̈j ɑ bɑ Jwøgí, bong Jwøk megø. Jiɑ koo benyi këti. “Kì bøli keny megø, wëyɑ ókønyɑ kömi ji bënn; kwøbbɑ ótöng yi wɑ̈ddi wun geki nyigi wun; ywödhhi wun ólɑ̈gi ki lɑ̈g o remthinh ócɑ̈rri ki kwøb. Kì bøli kenyɑni wëyɑ ókønyɑ kömi bɑ̈ngg-ɑ cwøw kí mɑ̈nn. “Yɑ ónyudhø ki ngïjjì kipe cyɑ̈ngɑni kì yij mɑl kí kömi piny; óbëëd e dɑ remø kí mɑc, kí löjji yïrø. Cɑ̈ng ólunyi, kɑ dwɑ̈y ókwɑ̈rrø ni remø, keny-ɑ ócyɑ̈ngi cyɑ̈ɑ̈ng Jwøng-ɑ Ácwɑ̈ɑ̈j ki bëënø; eni cyɑ̈ng-ɑ böggi ki mendwøng. De tyëng-ɑ ócwøl nyingi Jwøng-ɑ Ácwɑ̈ɑ̈j, ókøny kɑ ge yiel. Ni kɑ ɑ́kööb Jwøng-ɑ Ácwɑ̈ɑ̈j kinni, ‘Kwï ji óbodh kì Yerusɑlem; tyëng-ɑ ɑ́yienyɑ bɑ gen ɑ óbødh.’ ” Jwøng-ɑ Ácwɑ̈ɑ̈j okööbø kinni, “Kì bøli kenyɑni Yeudiyɑ̀ geki Yerusɑlem ówëggɑ døøgø dönyø. Pödhh bënn ócøngɑ, kɑ ge kɑ̈ɑ̈l-ɑ Töör Cɑ́y. Ge ócɑyɑ kì kenyɑni kipe gïg-ɑ ɑ́göggi gen jiɑ. Tyëng Isrɑil ɑ́kedhhi gen kì kelli pödhh-ɑ pɑth, kɑ pinyɑ, piny Isrɑil pɑ̈ngi yi gen. Ge ɑ́leng-ɑ wél kipe yodi ngɑn-ɑ ópɑ̈dhi ki ɑmɑgg. Womɑ̈nn kí yɑɑg-ɑ cwøw ɑ́ngeew gen yij bɑ̈ɑ̈ngø ki ngyëny møg culi tyëng-ɑ nyi niin ki köögi, kí møg ngëëw ki møgi oløg. “Á ngø ɑ dwɑddu göggi yɑn, wun ɑ Suur, kí Sïdön kí myërri Pelistiyɑ̀ bënn? Dɑ gïn pir yi wun kì yïɑ? Kwøbu en o jwɑnɑ ki culi wun! Átengɑ geki dhɑbɑ kí jɑmmɑ møg-ɑ per gen teg bënn ɑ́kɑ̈l wun, kɑ ge kïdhi wun yethi kenggi wun. Tyëng Yeudiyɑ̀ geki tyëng Yerusɑlem ɑ́kïdhi wun kun lɑ̈wi, kɑ ge ngëwwu tyëng Yönɑn. Anɑn ge ɑ́kɑ̈ɑ̈lɑ wɑ̈g kì kɑ̈jj-ɑ ɑ́ngeew wun gen, o wu lonyɑ ki göggi gïn-ɑ ɑ́göggu gen. Wɑ̈ddi wun geki nyigi wun óngëwwi tyëng Sɑbeɑ̀ pönh-ɑ lɑ̈wi yi tyëng Yeudiyɑ̀. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. “Kwøbu møg kì yethi pödhh kinni, ‘Tyeny wun ri wun kipe liny, cwølu jøliny, cøngu jøliny kɑ wu kedh wun! Tyeg wun kwërri wun gɑ pil, kɑ pɑlli wun tyeg wun gɑ tøngg. Cɑgg ɑ́ ngɑn nyødh, ceg-ɑ nyïɑ̈ggø thyew. Jwɑnu bëënø wun ɑ pödhh-ɑ cyɑ̈gi bënn, kɑ ri wun cøng wun yij tör.’ ” Ör linyí piny, yïn ɑ Jwøng-ɑ Ácwɑ̈ɑ̈j, o pɑ̈ɑ̈re kömi gen. “Tyeny pödhh ri gen kɑ ge bï gen Töör Cɑ́y. Yɑ Jwøng-ɑ Ácwɑ̈ɑ̈j, yɑ ópëggi kenyɑni, o pödhh-ɑ cyɑ̈gi bënn cɑyɑ. Ge rijjø ki mendwøng; ngøl gen piny ni byel, kenyi kɑɑj gen kɑ̀ cyeg gen. Nyøng gen ni kenyi nyøng nywøli oløg, kì yij buur bïjø gïti keny-ɑ ómulli møgi oløg.” Ji mø kwɑnni gen bɑ ɑ́lïp mø ngenyø ge ying-ɑ yij Töör Cɑ́y, mɑ́ cyɑ̈ɑ̈ng Jwøng-ɑ Ácwɑ̈ɑ̈j ójwɑn bëënø kì kunɑni. Cɑ̈ng ólunyi geki dwɑ̈y, o kyell pɑ mënyø këti. Jwøng-ɑ Ácwɑ̈ɑ̈j ɑ́ngɑ̈ɑ̈r kì Dhɑyøn; cwɑgge pödø nɑ mɑl kì Yerusɑlem; piny geki mɑl ceg-ɑ kïïrø. De jie ócwɑg yi en. “Codhe, o yod yi yïn, yïn ɑ Isrɑil kinni, bene yɑn ɑ bɑ Jwøng-ɑ Ácwɑ̈ɑ̈j, Jwøgí, o yɑ bëëd ɑ Dhɑyøn, kïtti kwërɑ. Yerusɑlem óbëëdø ɑ́ kej kwër, koo cigi tyɑmø yi tyëngpɑth. “Kì bøli kenyɑni wɑ̈thi kïttì ókum yi nywøli oløg, o dhög ópɑ̈ng wɑ̈thi kïtt-ɑ thønhø bënn, nɑ̈mmi Yeudiyɑ̀ ópɑ̈ng yi pï. Nɑm órïngi kì Kengi Jwøng-ɑ Ácwɑ̈ɑ̈j e reng-ɑ Töör Álwiy. “Rïp ógöögø ɑ́ ryɑng, kɑ Edöm rënyi, kipe kɑ ɑ́mɑg gen tyëng Yeudiyɑ̀, kɑ ji mø yï gen bɑ̈r nɑ̈g gen. Møg bɑ kwøbbi Amos, jɑl mɑ ɑ́bëëd yïe dɑ dyëg kì kɑɑl Tekoɑ̀, kwøbb-ɑ ɑ́cɑ̈rrii yi Jwøk, kì bøli keny-ɑ ɑ́bëëd Udhiyɑ̀ ɑ́ rɑ̈ɑ̈dh Yeudiyɑ̀, o Yeroboɑm wɑ̈d Yeöɑc bɑ rɑ̈ɑ̈dh Isrɑil. Ri thumi runn ɑ́ryew kì bɑng kwøbbɑni ɑ ɑ́nhɑ̈nhi piny. Amos ɑ́kööb kinni, “Jwøng-ɑ Ácwɑ̈ɑ̈j óngɑ̈rri ni ngur kì wïj Kïti Dhɑyøn, cwɑgge ólïngi ge kɑ̈ɑ̈l-ɑ Yerusɑlem ge nɑ pööd mɑl. Kɑ̈jj-ɑ nyi cyɑ̈ɑ̈m yi dhög óthwøw, lum ógöögø ki ɑyɑw kì wïj Kïti Kɑrmel.” “Tyëng Dimɑceg ɑ́røngi ki orøng dwøng cɑrø, ge pɑ bødh ki cɑyø yi yɑn, mɑ́ tyëng Gilyɑd ɑ́pwöd yi gen ni byel. Kipe orøngɑni, gøl Rɑ̈dh Adhɑil ógöjjɑ rɑ̈bø ki mɑc. Dör møg-ɑ ógerø yi Benɑdɑd órɑ̈b yi mɑc. Thïggi dhøggi döri Dimɑceg ómøddɑ piny, kɑ rɑ̈nh-ɑ bëëdø kì yij Töör Aben nɑ̈g geki jɑngi Bet Eden. Tyëng Arɑm ókøøl piny Kïr gɑ ɑmɑgg.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. “Tyëng Pelistiyɑ̀ ɑ́røngi ki orøng dwøng cɑrø, ge pɑ bødh ki cɑyø yi yɑn, mɑ́ pödhø bëne ɑ́køøl yi gen gɑ ɑmɑgg, kɑ gï ngëwwi gen tyëng Edöm. Dör-ɑ korri Gɑdhɑ̀ kɑɑl gen ógöjjɑ rɑ̈bø ki mɑc. Dör-ɑ pëddi tegø ócɑm yi mɑc. Jɑngi Acdöd ónɑ̈g yi yɑn geki jɑngi Ackelön. Ekrön ócɑy yi yɑn; o tyëng Pelistiyɑ̀ møg-ɑ ɑ́döng óthumi ki thøø.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. “Tyëng Suur ɑ́røngi ki orøng dwøng cɑrø, ge pɑ bødh ki cɑyø yi yɑn, mɑ́ pödhø bëne ɑ́køøl gen Edöm. Kɑ lwöm-ɑ ɑ́mïdhi gen gɑ wɑdd geki ji-ɑ kyeelø pɑ̈d yi gen. O dörri Suur ógöjjɑ rɑ̈bø ki mɑc, kɑ dör-ɑ korrii cɑm yi mɑc.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. “Tyëng Edöm ɑ́røngi ki orøng dwøng cɑrø, ge pɑ bødh ki cɑyø yi yɑn. Mɑ́ wɑddi gen, ɑ løg tyëng Isrɑil, ɑ́nɑ̈g yi gen ge thɑngg-ɑ cinggi gen, kɑ pëthi gen ódhɑ̈lø lɑ̈ɑ̈mø ki wɑddi gen. Kì bɑng menɑni, kɑɑl Temɑn ógöjjɑ rɑ̈bø ki mɑc, kɑ dör-ɑ korri Bodhrɑ̀ cɑm yi mɑc.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. “Tyëng Amön ɑ́røngi ki orøng dwøng cɑrø, ge pɑ bødh ki cɑyø yi yɑn, mɑ́ kì yij liny-ɑ ɑ́nyɑg yi gen, ge lɑny-ɑ kej gen, tyëng-ɑ mɑ̈nn møg-ɑ bɑ ɑ́yɑjj yethi gen ɑ́kɑg gen kì Gilyɑd. Kì bɑng menɑni, dörri Rɑbɑ̀ ógöjjɑ rɑ̈bø ki mɑc, kɑ dörr-ɑ korrii cɑm yi mɑc. Mɑnyɑni órɑ̈b-ɑ́ɑ̀ cyɑ̈ɑ̈ng liny, linyɑni óbëëd e teeg cɑrø ki mendwøng ni ɑtunø. Rɑ̈ɑ̈dh gen ókɑ̈l ɑ́ ɑmɑg geki jɑgge. Ge ókɑ̈l kì kej ɑ́kyel bënn.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. “Tyëng Moɑb ɑ́røngi ki orøng dwøng cɑrø, ge pɑ bødh ki cɑyø yi yɑn, mɑ́ cu rɑ̈ɑ̈dh Edöm ɑ́rɑ̈b yi gen kɑ ge ogöögø ki búr. Kì bɑng menɑni, Moɑb ógöjjɑ rɑ̈bø ki mɑc, men-ɑ ócɑm dörr-ɑ korri kɑɑl Keryöth. Tyëng Moɑb óthøw ge okïïwø ki ywøg kì yij liny, kɑ̈ngì óywöngø. Jɑngi Moɑb ónɑ̈g yi yɑn geki pëjji pɑɑre bënn.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. “Tyëng Yeudiyɑ̀ ɑ́røngi ki orøng dwøng cɑrø, ge pɑ bødh ki cɑyø yi yɑn, mɑ́ pwönyɑ ɑ́bɑny yi gen, kɑ ciggɑ ocögø gï pɑ mïdhi yi gen. Ge ɑ́kedhi bɑng jwögg mø pɑth ni kweyyi gen kɑ̈ge dööng, Kì bɑng menɑni, Yeudiyɑ̀ ógöjjɑ rɑ̈bø ki mɑc, men-ɑ ócɑm dörr-ɑ kor Yerusɑlem.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. “Tyëng Isrɑil ɑ́røngi ki orøng dwøng cɑrø, ge pɑ bødh ki cɑyø yi yɑn, mɑ́ ngɑntir men wɑnge cɑn nyi ngeew ge’ wɑ̈g ki ɑ́tegø, e bong gïn bɑɑj en. Kɑ ngɑn wɑnge cɑn cɑgg ɑ́ wɑrø ɑ pir kì yïe, nyi ngeew wɑ̈g o ngyënyy-ɑ kɑ̈ɑ̈l yi en ngëëw ki wɑr. Ge nyøn-ɑ tyëng-ɑ nyingi gen cɑn, de ge ce bong-ɑ per gen, o ge pɑ yïëy ki kønyi tyëng-ɑ rɑngø. Kɑ dhɑnhø nyii rëbø kì ri dhɑjø ɑ́kyel geki wïye, kɑ nyingɑ rënyi yi gen. Ge buud-ɑ kɑ̈jji mɑlli Jwøk kì kömi ógudh møg-ɑ ómɑgø kì yï tyëng-ɑ nyingi gen cɑn. Ge mɑdh-ɑ møgi oløg men-ɑ mɑɑg gen kì yï tyëng-ɑ pir yi gen kì Kengi Jwøøg gen. Yɑ ɑ́yïëëny kì kelli wɑ̈ddi wun ki ji mɑ ɑ́gwøgɑ gɑ jøtöng. Kɑ møøgø yienyɑ, o ge thyey gɑ møg göggi yɑn. Møgɑni pɑth ki dyër wun ɑ tyëng Isrɑil?” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Kɑ Jwøng-ɑ Ácwɑ̈ɑ̈j okööbø kinni, “De tyëngcyɑ̈rø ɑ́mɑ̈ɑ̈n wun köbbi wöönɑ teedø. Kɑ yɑɑg thønhø møg-ɑ bɑ ɑthyey göjji wun mɑdhi møgi oløg, ge ɑ́rënyi yi wun. Wu ómød yi yɑn ni kenyi nyøng ɑ́cungø kì piny ki lwedø. Yɑɑg-ɑ pëddi ngwej kì kelli wun pɑ cuggi rengø. O yɑɑg-ɑ teg óceg ì lɑ̈b. Kɑ nyel teg ódhɑ̈lø yieli ree. Yɑɑg-ɑ nyi pöödø ki weth, pɑ cungi kì bøli liny. Dërø pɑ bødh ki mɑgø. Ngɑn ying kömi kyeny, wëye pɑ lwɑ̈ng yi en ki yielø. Yɑɑg-ɑ jödd tønggi gen óleeng gen piny, kɑ ge órengø.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Lïng wun, wun ɑ tyëng Isrɑil, lïngu kwøbb-ɑ ɑ́cɑɑy wun yi Jwøng-ɑ Ácwɑ̈ɑ̈j, cɑ́y-ɑ ɑ́cɑɑye gøl-ɑ ɑ́kɑ̈ɑ̈le wɑ̈g kì Rïp gø korre’ korrø. “Wu keti wun ɑ ngɑ̈nyi yi yɑn kì kelli jurri kömi piny bënn. Wu ɑ́korrɑ kidøøj. De wu ócɑy yi yɑn kɑ per orøøg wun bëne.” Dɑ ji ɑ́ryew mø cuggi welø, keløg wel nuti nywɑɑg gen? Ngur nyii ngɑ̈rrø kì wɑg, e nuti mɑ̈gø ki lɑ̈y? Ócuggø ywøg kì keny-ɑ buude, e bong gïn mɑɑg en? Dɑ winyø me nyi mɑg yi ɑbyëg, keløg e bong cyɑ̈ɑ̈mi mɑ ɑ́cïb ri gøn? Dɑ ɑbyëg me nyi dyëddi, e bong gïn gumii? Dɑ ɑkyew me nyi kiiw, kɑ ji ocögø ge pɑ bwøg? Dɑ ryɑ̈g me töngi kömi pɑc, e nuti ör-ɑ yi Jwøng-ɑ Ácwɑ̈ɑ̈j? Bong gïjø me nyi gwøg yi Jwøng-ɑ Ácwɑ̈ɑ̈j, e yïthhi bɑ̈ngge, jøtöng nuti kwɑ̈d en. Kenyi ngɑ̈ɑ̈r ngur, ɑ́ men ɑ pɑ nyi bwøg? Kenyi kööb Wïlɑ̈bø Jwøng-ɑ Ácwɑ̈ɑ̈j, ɑ́ men ɑ cuggi mïdhi kwøbbɑni, gï pɑ köbbe ji? Tyëngkɑ̈rì kì Sɑmɑriyɑ̀ ɑ́köbbi yi Amos kinni, “Di bëëd ɑ dï, keløg jɑggi piny Acdöd geki jɑggi Rïp, ri gen cøng ge’ tøggi kɑɑl wun, kɑ guun-ɑ guud wun nyingi ji, geki orøng-ɑ røngi wun lidh yi gen, wu pɑ di yɑ̈r yi gen?” Jwøng-ɑ Ácwɑ̈ɑ̈j okööbø kinni, “Wun, wu tyëng Sɑmɑriyɑ̀, uddi wun pɑ̈ɑ̈ng wun kɑ jɑmm-ɑ kɑbbi yi wun ki orøg. Bëëndøj kwïj yi wun. Kì bɑng menɑni, tyëngmɑ̈ɑ̈nø óbï, kɑ kɑɑl wun kedhhi yi gen kɑ jɑmm-ɑ yethi uddi wun kɑ̈l yi gen. “Ngur kɑ̀ cɑme dyel, bɑ tyelli dyel ɑ́ryew wɑlɑ̀ yïthhe ɑ nyi döng kì bɑnge. Nɑ menɑni ceth, keny-ɑ obëën tyëngmɑ̈ɑ̈nø Sɑmɑriyɑ̀, bɑ tyelli nɑngɑreb ɑ́ryew geki thulli pënnì ɑ ódöng ge ótwɑ̈lø kì piny.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Wïlɑ̈bø Jwøng-ɑ Ácwɑ̈ɑ̈j okööbø kinni, “Lïngu møg kɑ ge köbbu kwɑrri Yɑgob. Kì cyɑ̈ng-ɑ ócɑyɑ tyëng Isrɑil kipe orøøg gen, kɑ̈jj-ɑ wɑ̈thi gen nyi ngɑ̈ɑ̈d gen ki gëdhhì, ócøørɑ piny kì Betiil. Tùngi këli lɑm møg-ɑ nyi mɑɑg gen jɑmm-ɑ kɑ̈l yi gen gɑ gëdhhì óputhɑ wɑ̈g. Myërr geki kɑ̈dd-ɑ nyi köddi kì lew ócøørɑ piny. Uddi tyëngkɑ̈rì ódöng nøw. Udd-ɑ døngø bënn ócøørɑ piny.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Lïng wun, wun ɑ mɑ̈nni Sɑmɑriyɑ̀, ɑ bëëd wu cwiy ni dhögi Bɑcɑn. Wu kɑbb-ɑ jɑmmi tyëng-ɑ ɑbuur, wu nyøn-ɑ tyëng-ɑ jɑdø. Kɑ cwøwi wun nyi tøøny wun ki köbbø kinni, “Kɑ̈ni wun ki møgi oløg men mɑdh yi wɑ.” Wïlɑ̈bø Jwøng-ɑ Ácwɑ̈ɑ̈j ɑ́köngi kiree kinni, “Bøli keny-ɑ ótëël wun wɑ̈g ni kenyi tëël rëjø wɑ̈g, e óryërø kì dhøg ɑbɑdh ɑ́cyɑ̈ngi. Dhɑnhø óryëri ni rëjø kì dhøg ɑbɑdh. Wu óywɑɑj wɑ̈g ki keny me twïyø kì ri dörø, kɑ wu weddi.” Wïlɑ̈bø okööbø kinni, “Wu tyëng Isrɑil, kenyi kedhu Betiil be mɑ̈ddø, kwïj yi wun wu ceg-ɑ orøg, mɑ́ wu guud-ɑ nyingi ji! Kenyi kedhu Gilgɑl be ngɑl ki gëdhhì, kwïj yi wun, wu ceg-ɑ orøg, mɑ́ wu kɑbb-ɑ jɑmmi tyëng-ɑ ɑbuur! Kwɑ̈ny-ɑ rïïj wun wu muuj-ɑ ɑ́kyeel pyɑ̈rri jɑmmi wun ri thumi cyɑ̈ng ɑ́dɑ̈g, kwïj yi wun ge pɑth ki ɑyïëy yi yɑn. Muuj wun ki ópùn-ɑ ógwøgø ki ɑwɑj me wɑ̈nyyø, ɑ́ gëëdhi mi pwøj, kɑ wu kɑ̈ɑ̈d wun ki gëdhh-ɑ kyeelø, mɑ́ bene gwøng-ɑ mɑɑr yi wun, wu tyëng Isrɑil. “Wu ɑ́twöönɑ ki gïncɑm kì yethi myërri wun. Kɑ bong-ɑ gïncɑm me yɑ̈ng ji kì yethi kɑ̈ddi wun. De wu nuti dwöög yïɑ. Wu ɑ́mɑ̈ɑ̈nɑ ki kødh e döngø ɑ́ dwɑ̈tt ɑ́dɑ̈g kinni o byel cyeg gen. Kɑ kødh nyii mɑ̈gø kì kɑɑl, kɑ nyii cöögø e pɑ mɑ̈gi kì kɑɑl-ɑ kyeelø. Kødh ómɑ̈gø kì pwönhï, de pwönh-ɑ kyeelø kedh e ceg-ɑ thwøwø. Ji nyi yɑ̈bb-ɑ kɑɑl-ɑ kyeelø ki pï, ge cyɑ̈dhi ge thøø yi röödhø. De ge nyi yod-ɑ pï mø nøg. Wu nuti pɑ̈nyi dwöög yïɑ thyew. “Byelli wun ɑ́göjjɑ gwøg ki ɑ́mujj, keny-ɑ ɑ́kedh bɑ̈ggi wun ge ólɑ̈nyø. Pwödhhi wun geki bɑ̈ggi wun ɑ́cɑm yi bɑ̈nyø. De wu nuti pɑ̈nyi dwöög yïɑ thyew. “Ryɑ̈g ɑ́göjjɑ wun ni kɑ ɑ́göjjɑ en tyëng Rïp. Yɑɑg-ɑ wøbbi wun ɑ́nɑ̈gɑ ki pilø. Kɑ kyënyi wun kwɑnyɑ kì yï wun. Kɑ wu køm-ɑ thengø yi pedi yømi tyëngthøø kì kɑɑl wun. De wu nuti pɑ̈nyi dwöög yïɑ thyew. “Kwï wun ɑ́nɑ̈gɑ ni kɑ ɑ́nɑ̈gɑ Sødømɑ̀ geki Gømørɑ̀. Kɑ wu nɑ yɑnh ywɑ̈ɑ̈j wɑ̈g kì mɑc e rum gɑ̈mmø. De wu nuti pɑ̈nyi dwöög yïɑ. “Kì bɑng menɑni yïn ɑ Isrɑil, yï ócɑy yi yɑn ceth, keløg yï pɑ yewi. Yï ócɑy ki cɑ́y mø døngø, de yɑb wïjí.” Bɑ Jwøk ɑ ɑ́cwɑ̈j kïtt-ɑ døngø en ɑ ɑ́cwɑ̈j yømø. Rumme nyi nyudhe’ ji; dicɑ̈ng nyi løge’ wɑ̈r. Cyɑ̈dh-ɑ́ɑ̀ mɑl kömi piny bëne. Nyinge bɑ Wïlɑ̈bø, Jwøng-ɑ Ácwɑ̈ɑ̈j! Lïngu wörri ywøg, møg-ɑ ywøøgɑ wun, wun ɑ tyëng Isrɑil. “Isrɑil, Nyɑdhey nywöm ɑ́pɑ̈ɑ̈dh. Pɑ cigi dhwödhø. Áwiy e obuddø kì piny e kete. Bong ngɑn kønyii ki dhwödhi mɑl.” Jwøng-ɑ Ácwɑ̈ɑ̈j okööbø kinni, “Kɑɑl kedhi be liny gɑ ɑ́lïp, bɑ miyø ɑ́kyel ɑ dwöög pɑc. O kɑɑl-ɑ kyeelø ókedhe ɑ́ miyø, bɑ pyɑ̈rø keti gen ɑ dwöög pɑc.” Yïn ɑ Isrɑil, Jwøng-ɑ Ácwɑ̈ɑ̈j okööbø kinni, “Lugu pëthi wun yɑn, o wu bødh wun ki cɑyø. De wu ko nyi tyer kedhi kengi Betiil. Kɑ wu ko nyi kedhi kengi Gilgɑl, kɑ wu ko kedhi Bircebɑ̀ be mɑ̈ddø, mɑ́ Betiil óbong nyinge, o Gilgɑl ókøøl yïnø.” Kedhu yï Jwøng-ɑ Ácwɑ̈ɑ̈j o wu yïddi wun ki nënnì. Ke pɑ kedhu yïe, óbï yï kwɑrri Yosep e nɑ mɑc. Betiil órɑ̈b yi en. Bong ngɑn-ɑ ólwɑ̈ng mɑnyɑni ki cɑwø. Wu ɑ́wïyi ki gøggi dyër, de gwøgi dyër nɑ mɑdhi kenø, wɑlɑ̀ gwen kì wïj thur. Kɑ tyëngtir mød yi wun, jɑmmi gen kɑbbu’ kɑbbø. Jwøng-ɑ Ácwɑ̈ɑ̈j ɑ ɑ́gwøg kyell, en ɑ ɑ́gwøg Curø geki Ábɑnyy. Muudhø nyi løge’ cɑr; kɑ dicɑ̈ng nyi løge wɑ̈r. Pïi nɑm nyi cwööle’ cwöölø, kɑ gï kønye kömi piny. Nyinge bɑ Jwøng-ɑ Ácwɑ̈ɑ̈j. Cɑgg ɑ́ kɑɑl-ɑ korri kidøøj, gø nyi kedhhe’ kedhhø. O kɑɑl-ɑ ówenø ki dörø me teg; döre nyi cøøre’ piny. Wu tyëng Isrɑil, wu nyi mɑɑn-ɑ tyëng-ɑ nyi kømmi dyër kì burø. Tyëng-ɑ dwɑddi dyër, pɑ dwɑddi yi wun. Wu nyøn-ɑ tyëng-ɑ ɑbuur, kɑ byelli gen nyi kɑbbi yi wun. Wu ɑ́gëëd ki ud mø myëër, de wu pɑth ki møg-ɑ óbëëdø kì yethi gen. Wu ópïdhø ki pwödh mø døngø, de wu pɑth ki møg-ɑ ócyɑ̈mø ki byelli gen. Orøg men-ɑ gøggi yi wun, ngɑ̈nyi yi yɑn; tyëng-ɑ gøggi dyër nyi göggu’ gïnrɑj. Wu nyi ruj-ɑ tyëng-ɑ ɑbuur kì kɑ̈jji gønyy. Kɑ jɑgø dhøge nyi kum wun ki ngyëny, kipe kinni o gøny cwɑ̈gge wun. Bëëdø ɑ́rënyi, kɑ tyëng-ɑ wɑ̈thi gen nud døøg-ɑ be kudø kenyi mød ji kì buti gen, mɑ́ piny rɑɑj. Wu ko tyer gøggi gïgrijjø, de tyer wun gøggi gïg-ɑ dyër, o wu bødh wun, o wu ómïdhi yi Jwøng-ɑ Ácwɑ̈ɑ̈j, Jwøøg lɑ̈bø bëne, ni ngɑ̈nh-ɑ ngɑ̈dhu en. Mɑɑnu rɑj, mɑɑru dyër. Kɑ kwøb nyi cïbu kɑ̈jji gen kì burø, men-ɑ ólɑ̈ɑ̈m pyëw Jwøng-ɑ Ácwɑ̈ɑ̈j, ki ɑ́kyëll-ɑ ódöng kì gøl Yosep. De Jwøng-ɑ Ácwɑ̈ɑ̈j okööbø kinni, “Ywøg óceg ì túl! Ji óceg ì kɑɑg ki ywøg, kì yethi kɑ̈dd, kí yethi pwödh; ji mø gïïr óthøw. Ódi ywøg kì yethi pwödh bënn, mɑ́ yɑ óbï kelli wun be cɑyi wun.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Wun, wu tyëng-ɑ guud nyingi ji, wu okööbø ce wu yïd-ɑ cyɑ̈ɑ̈ng bëëni Jwøng-ɑ Ácwɑ̈ɑ̈j be cɑyi tyëngrijjø. De wun kì ri wun, bene wun tyëng-ɑ rijjø. Cyɑ̈ngɑni óbëëd e rɑɑj kì yï wun, piny ólunyi kì nyingi wun, nyingi wun óbɑɑr. Kì cyɑ̈ngɑni wu óbëëd wu nɑ ngɑn cyeddi yi ngur, kɑ yöd e pödh-ɑ dhø kwej. Wɑlɑ̀ ngɑn yömmi ød, de cem cinge thɑɑnye ri dörø, kɑ kɑj yi thwöl. Cyɑ̈ngɑni óbëëd e rɑɑj kì yï wun. Koo bëëdø e døøj ni kɑ ɑ́rømmu en. Jwøng-ɑ Ácwɑ̈ɑ̈j okööbø kinni, “Yɑ̈yyi wun ɑ́bɑny yi yɑn ki mendwøng. Yɑ ɑ́ngïr yi kwɑ̈jji wun, wun ɑ́ yɑy. Keløg yɑ ómuuj yi wun ki gëdhhì møg-ɑ nyi rɑ̈b geki byëlø, ge pɑ yïëy yi yɑn. Cɑgg yɑ muuj yi wun ki gëdhhì gɑ wɑ̈dhh mø pëddi cwiyø gɑ møg kwɑjju mër, yɑ pɑ pɑ̈nyi lïïdh ri gen. Wu ko cööng ki thom wu owörø kì bølɑ, yɑ ɑ́ngïr yi ywøøg thømi wun. De bëëd wun wu cïmm-ɑ kwøb kì kɑ̈jji gen. Kɑ wu ko wïyi ki gøggi dyër ni thew kì Kiir ɑ pɑ nyi cungi. “Wun ɑ tyëng Isrɑil, yɑ nuti cwöddø kì yï wun ki gëdhhì, wɑlɑ̀ gïg-ɑ nyi muuj keny-ɑ ɑ́kɑ̈llɑ wun kì yij ryɑng, ki runn pyɑ̈r ɑ́ngwen. De ɑnɑn, mɑ́ wu kwɑjj-ɑ ngïjji yɑnh-ɑ cwøl ɑ́ Sɑkuth, jwøng-ɑ mïdhi yi wun ɑ́ rɑ̈ɑ̈dh wun geki ngïjji Kɑywɑn, ɑ løg kyelø men-ɑ mïdhi yi wun ɑ́ jwøg. Ngïjjɑni bɑ møg-ɑ ókɑ̈lli yi wun ceth, keny-ɑ ókøøl wun yïnø wu bɑ ɑmɑgg. Wu ókøølɑ yïnø wu bɑ ɑmɑgg, kɑ wu kïdhɑ pödhø me lɑ̈wi kì ngɑ̈ɑ̈j Dimɑceg kun-ɑcɑ̀.” Møg-ɑ ɑ́kwøb yi Jwøng-ɑ Ácwɑ̈ɑ̈j, ɑ bɑ Wïlɑ̈bø ɑgɑk. Wu órɑngi ki orɑng me teg, wu tyëng-ɑ bëëdø kì kɑ̈ll-ɑ døngø kì Yerusɑlem geki Sɑmɑriyɑ̀. Wu orumø ce bene wun ɑ per wun teg, kì pönh-ɑ pëddi døøjø kì kömi piny, o bɑ wun ɑ yï wun nyi kwɑ̈jji. Kedhu be lidhi Kɑlnè. Kɑ wu pödhu be lidhi Amɑth. Kɑ wu pödhu Gɑth kì Pelistiyɑ̀. Per wun pɑ teg kibøli pödhhɑni. Pödhi wun pɑ lɑɑj kibøli pödhi gen, ge ɑ́kedhhi, o wu bɑ møg-ɑ ókedhhi ni gen. Wu ɑ́dhɑ̈li yïëyø kinni cyɑ̈ɑ̈ng ryɑ̈g obëënø. De kwïj yi wun kinni ceg-ɑ jwɑn bëënø, kì bɑng orøg men-ɑ gøggi yi wun, kenyi göggu ji ki gïgrijjø. Wu órɑngi ki orɑng me teg wun ɑ jɑgg, mɑ́ wu ɑ́wɑ̈dhi pëggi piny be cɑm ki órömm, geki røjj-ɑ cwiy. Pëthi wun døngø. Wu buud-ɑ yij kɑ̈r wu wɑ̈dh-ɑ lɑɑlø yøw. Kɑ wu pëgg-ɑ be cɑg ki wör, wu orumø ce wu pɑ̈r ki Debïd. Wu mɑdhh-ɑ muggì kì yethi lödd-ɑ døngø. Wu gïïny-ɑ mɑ̈th-ɑ yømi gen med. Wɑ̈thi wun ɑ́wïl ki rëny-ɑ rënyi gøl Yosep. O bɑ wun ɑ ókwøng ki kïdhi yïnø, wu bɑ bɑ̈ngg. Tung-ɑ tuug wun ɑnɑn bɑ men cög. Wïlɑ̈bø, Jwøng-ɑ Ácwɑ̈ɑ̈j ɑ́köngi kiree kinni, “Ngwøni tyëng Isrɑil mɑɑn yi yɑn. Udd-ɑ døngø møg-ɑ geer gen ɑnɑn ɑ́bɑnyɑ. Tyëngmɑ̈ɑ̈nø óörɑ, o kɑɑl-ɑ dwøng kì Isrɑil mɑg yi gen.” Keløg e dɑ ji pyɑ̈rø mø döngø kì wïj gøl gen, ge ceg-ɑ thøø. Keny-ɑ óbëën wɑddi gen be konyi gen, ngɑn-ɑ ókedhi ød be kɑ̈ɑ̈li ji wɑ̈g, ópyëj yi ngɑn-ɑ ɑ́döng kì wɑ̈g kinni, “Dɑ ɑ́kyel me nëënø?” Nyel-ɑ ød ólöggi kinni, “Bong gøn, ge thøø bënn!” Kɑ nyel-ɑ wɑ̈g okööbø kinni, “Kud! Nyingi Jwøng-ɑ Ácwɑ̈ɑ̈j ko kɑ̈ɑ̈l. Jwøk pɑ cɑy yi wɑ!” Jwøng-ɑ Ácwɑ̈ɑ̈j okööbø kinni, i øn-ɑ dwøng mød-ɑ piny. Kɑ øn-ɑ thinh kedhhi. Kyënyì nyii rïngø kì wɑ̈thi kïttì? Byel nyii kɑ̈gø kì nɑm? Dɑ́ kipe ngø ɑ wil wun dyër, kɑ løg wun me keej ni kenø, kɑ kwøbb-ɑ dyër løg wun bɑ̈jjø? Wu ótøllø ce kɑɑl Lödebɑr mɑɑg wun. Wu pwöd-ɑ köthi wun ce Kɑrnɑim mɑɑg wun kɑ tegø. De Wïlɑ̈bø Jwøk, Jwøng-ɑ Ácwɑ̈ɑ̈j, ɑ́köngi kiree kinni, “Wun, wu tyëng Isrɑil, yɑ óöni ki liny me teg, men-ɑ ókwɑny pödhi wun. Wu ónyøn yi gen, cɑg kì Ókømi Amɑth kì wɑɑng wuudø gïti nɑɑm Árɑbɑ̀ kì wɑɑng wurlwɑl.” Yɑ ɑ́nyudhi kì yethi lɑ̈g yi Wïlɑ̈bø Jwøng-ɑ Ácwɑ̈ɑ̈j. Kì yethi lɑ̈ggɑni, yɑ ɑ́lidh-ɑ Jwøng-ɑ Ácwɑ̈ɑ̈j e ócunggø ki bɑ̈nyø men cɑm lum, e lum nudd e bɑ ɑ́pöjø, geki jɑmm-ɑ mɑr bënn. Kì yethi lɑ̈ggɑ, yɑ ɑ́lidh-ɑ bɑ̈nyø e cɑm-ɑ jɑmm-ɑ mɑr bënn kì kömi piny, ɑkööbɑ kinni, “Yïn ɑ Wïlɑ̈bø Jwøng-ɑ Ácwɑ̈ɑ̈j, dwöög lɑɑwí piny kipe jií! Isrɑil óyiel-ɑ yi ngø ki ryɑ̈ng-ɑ ni men? Ki tyëng-ɑ kwɑnni gen nøg ni møg!” Alɑ̈ɑ̈m pyëw Jwøng-ɑ Ácwɑ̈ɑ̈j, ɑkööbe kinni, “Møgɑni pɑ cwöb.” Møg-ɑ ɑ́cigi nyudhi yɑn yi Wïlɑ̈bø Jwøng-ɑ Ácwɑ̈ɑ̈j ek: Jwøng-ɑ Ácwɑ̈ɑ̈j, ɑ́lidhɑ e cɑy-ɑ jie, e men-ɑ́ gï göjje’ mɑc. Kɑ cɑ̈ng ólënhø ni mɑc, kɑ nɑ̈mmì odwönø bënn yi mɑnyɑni, geki pïg-ɑ thɑ piny bënn. Kɑ mɑnyɑni ócɑ̈gø rɑ̈bi piny. Codhe ɑkööbɑ kinni, “Cungí yïn ɑ Wïlɑ̈bø Jwøng-ɑ Ácwɑ̈ɑ̈j! Jií óyiel yi ngø ki ryɑ̈ng-ɑ ni men? Ki tyëng-ɑ kwɑnni gen nøg ni møg!” Kɑ Jwøng-ɑ Ácwɑ̈ɑ̈j pyëwe ólɑ̈ɑ̈mø, ɑkööbe kinni, “Møgɑni pɑ cwöb thyew.” Kɑ yɑ cigi nyudhø yi Jwøng-ɑ Ácwɑ̈ɑ̈j kì yethi lɑ̈g. Kì yethi lɑ̈ggɑni, yɑ ɑ́lidh-ɑ Jwøng-ɑ Ácwɑ̈ɑ̈j e ócungø kì buti mɑc, cinge dɑ gwej men-ɑ nyi tëëny ki böltøngg. Apyëje yɑn kinni, “Amos yï nenn-ɑ ngø?” Alöggɑ kinni, “Gwej men-ɑ nyi tëëny ki böltøngg.” Codhe, ɑkööbe kinni, “Tyëng Isrɑil nɑ böltøng me bøømø. Pyëwɑ pɑ cigi lɑ̈ɑ̈mø ki gen, mɑ́ ge ɑ́dhɑ̈li tyenyø ni böltøng. Keny-ɑ yije nyi mɑ̈ddi yi kwɑrri Yɑgob bɑ men cøør piny, kej kwëër Isrɑil ódöng ɑ́ ryɑng. Jyɑ̈gi Rɑ̈dh Yeroboɑm ócög.” Kɑ Amɑdhiyɑ̀ ókwëri Betiil öd-ɑ yï Rɑ̈dh Yeroboɑm ki wöödø kinni, “Amos dwɑdd-ɑ göggi yïn ki gïnrɑj, ki gïg-ɑ köbbe tyëng Isrɑil, piny bëne ɑ́pɑ̈ng yi kwøbbe. Amos rïïjø e kømm-ɑ kinni, ‘Yeroboɑm ónɑ̈g kɑ pilø. O tyëng Isrɑil bɑ møg køøl yïnø gɑ ɑmɑgg.’ ” Codhe, ɑköbbi Amos yi Amɑdhiyɑ̀ kinni, “Árum jɑlcyɑ̈rø! Døøg Yeudiyɑ̀, kɑ yï göög ki gwøøg cyɑ̈rø. Yï ócuddi ki ngyëny kì kunɑni. Yï ko kööb ki gïg ni møg kì Betiil këti. Keny bɑ keny-ɑ yije nyi kwɑjji Jwøk yi rɑ̈dh, en ɑ yije di kengi pödhø bëne.” Alöggi Amos kinni, “Yɑ pɑth ki ngeti cyɑ̈rø me göög ngyëny. Yïɑ dɑ dyëg kí pwödh. Yɑ nuti pwönyø ki cyɑ̈rø. De yɑ ɑ́kwɑny yi Jwøng-ɑ Ácwɑ̈ɑ̈j yɑ mïdh-ɑ jɑmmɑ kì wɑ̈yɑ, ɑköbbe yɑn kinni, ‘Kedh, kɑ møg-ɑ köbbɑ yïn nyi loony ki köbbi jiɑ, ɑ løg tyëng Isrɑil.’ De ɑnɑn lïngí møg-ɑ kømmi yi Jwøng-ɑ Ácwɑ̈ɑ̈j, mɑ́ yï kyëdd-ɑ yɑn kinni yɑ ko kööb kì keny ki kwøbbi cɑyi Isrɑil. Yïn, Amɑdhiyɑ̀, Jwøng-ɑ Ácwɑ̈ɑ̈j köbb-ɑ yïn kinni, ‘Cyëgí ógöögø ki ngɑn nyi niin ki köögi kì kɑɑl-ɑ ókøølii. Kɑ wɑ̈ddí geki nyigí womɑ̈nn nɑ̈g ki pilø. Kɑ piny gøl wun ngølli, kɑ pɑ̈ngi kì kelli ji møøgø. O yïn kirií, yï óthøw-ɑ yïnø kì pödhø megø. O tyëng Isrɑil bɑ møg kïdhi pödhø megø gɑ ɑmɑgg ceth.’ ” Kɑ yɑ nyudhi yi Wë Jwøng-ɑ Ácwɑ̈ɑ̈j ki lɑ̈g møøgø, kì yethi lɑ̈ggɑni, yɑ ɑ́lidh-ɑ dhöngø men-ɑ nyi lïm ki nywøli yenh. Apyëëj yɑn yi Jwøng-ɑ Ácwɑ̈ɑ̈j kinni, “Amos, yï nenn-ɑ ngø?” Alöggɑ kinni, “Dhöngø me pɑ̈ng yi nywøli yenh møg cyegø.” Aköbbe yɑn kinni, “Jiɑ, ɑ løg tyëng Isrɑil, bøli kej gen ɑ́cyɑ̈ngi. Ge pɑ cigɑ wiyø, ge cɑyɑ’ cɑyø ceth, wɑ̈thi tyëng Isrɑil ópøn yi yɑn ni nywøli yenh. Kì cyɑ̈ng-ɑ ócɑyɑ gen, wörr-ɑ wör kì kengi Betiil, ri gen óløg gen ywøg. Ji óbëëdø ge odhoongø kì piny ge thøø kì kɑ̈jj bënn. Piny óbëëd e kudø kudø.” Lïngu møg, wu tyëng-ɑ nyøn ji-ɑ jɑdø, wu cöd-ɑ minni tyëng-ɑ ɑbuur kì pönhï. Wu kømm-ɑ kinni, “Cyɑ̈ɑ̈ng ywömø mi wïj tuung dwɑ̈y óthumi kì wën, o wɑ ngëwwi wɑ wɑ̈g ki byellee? Sɑbɑth cyɑ̈ɑ̈ng ywömø óthumi kì wën, o wɑ døøg wɑ be ngyëwø? O ngyëny kïdhi mɑl, o thɑ̈thi rummi byel wööl yij, o midhɑn ol, o tyëng-ɑ ngëwø kì yïee gwem yi wɑ. Byell-ɑ bɑ cong ócuggø ngeew wɑ̈g yi wɑ ki ngyëny mø gïïr. O ngɑn wɑnge cɑn men köme di kwör, cɑgg ɑ́ kwör me thiinh, me ni ngyëny-ɑ ngeew wɑrø yøw, ngɑn ni menɑni ceg kɑ ngeew wɑ̈g yi wɑ ɑ́ bɑ̈ng.” Jwøng-ɑ Ácwɑ̈ɑ̈j, Jwøøg Isrɑil ɑ́köngi kiree kinni, “Wïjɑ pɑ wïl ki gïgrijjø møg-ɑ gøggi yi tyëngɑni. Piny ónhɑ̈nhi, dhɑnhø bëne óbëëd e óywöngø. Pönhï bëne órungi, kɑ ree tulle ni ɑpɑgi Kiir.” Wë Jwøng-ɑ Ácwɑ̈ɑ̈j ɑ́köngi kinni, “Cɑ̈ng ólunyi e ying-ɑ dïmɑl, kɑ piny ogöögø e looj kì dicɑ̈ng. Bulli dhwɑ̈ng ódøøg gɑ møg ywøøg tyëngthøø, kɑ wörri wun ogöögø gɑ wörri ywøg. Wu órugø ki thølli thøø ni ji mø ywøg wɑ̈d gen, wɑ̈dkyel. Cyɑ̈ngɑni óbëëd e pëddi rɑ̈jø ki mendwøng.” Wë ɑ́köngi kinni, “Cyɑ̈ng-ɑ ógöjjɑ wun kɑ̈j ɑ́cyɑ̈ngi. Ji ómɑg yi kɑ̈j, pɑth ki kɑ̈ɑ̈j gïncɑm, den-ɑ́ kɑ̈ɑ̈j kwøbbi Jwøk. Ji ómɑg yi röödhø, pɑth ki rönhi pï, den-ɑ́ rönhi kwøbbi Jwøk. Ge óbëëd ge bɑ̈nn-ɑ piny kì kɑɑm nɑɑm kí nɑɑm, kí kɑɑm cyɑ̈ɑ̈ng mwøl geki cyɑ̈ɑ̈ng böörø, ge nyii kedhø kɑ ge nyii dwöögø, ge yɑb-ɑ kwøbbi Jwøk, de gï pɑ yod yi gen. Kì bøli kenyɑni, yɑɑg-ɑ wøbb geki wojur-ɑ myëër, ópɑ̈nhi yi röödhø. De men-ɑ́ tyëng-ɑ nyi kwöng jwöggi Sɑmɑriyɑ̀ jwögg-ɑ pɑth ki dyër, ge cem-ɑ, ‘Ki nyigi jwøng-ɑ kwömø kì Dɑn!’ Wɑlɑ̀ ‘Ki nyingi jwøng-ɑ kwömø kì Bircebɑ̀!’ Ji-ɑ ni møgɑni bɑ møg pɑ̈ɑ̈dh ceth, ge pɑ cigi dhwödhø.” Jwøng-ɑ Ácwɑ̈ɑ̈j ɑ́lidhɑ e ócungø kì buti këli lɑm kì kengi Betiil, kɑ okööbø kinni, “Gøj mënhh-ɑ mïdhi kengø kì wɑ̈thi gen, o ge pɑ̈dhi gen kömi ji-ɑ yije, o ge thøw gen. Møg-ɑ óbødh ónɑ̈g yi yɑn kì kej liny ki pilø. Bong dhɑnhø ɑ́kyel me bødh, bong dhɑnhø me rengi. Keløg ri gen koony ge’ piny thɑ lɑ̈bø pödhi tyëngthøø, ge tëëlɑ’ wɑ̈g kì kunɑni. Keløg ge pɑ̈ɑ̈r-ɑ mɑl me lɑ̈wi, ge dwöögɑ’ piny. Keløg ge pɑ̈n-ɑ kelli thïm-ɑ wïj Kïti Kɑrmel, ge yodɑ’ yodø kɑ ge kɑ̈ɑ̈lɑ. Keløg ge pɑ̈n-ɑ nɑm thɑ́ pï, thwöl ɑ́köbbɑ, o gï kɑ̈ɑ̈je. Keløg ge omɑgø kɑ ge kɑ̈l yi tyëngmɑ̈ɑ̈nø mø gen, pilø óköbbi yi yɑn o gï nɑ̈ge. Yɑ ólugi kì bɑng gen yɑ kɑ̈ll-ɑ rɑ̈jø de pɑth ki døøjø.” Wïlɑ̈bø Wë, Jwøng-ɑ Ácwɑ̈ɑ̈j, ke nywɑle piny, piny ceg-ɑ onhɑ̈nh, kɑ tyëng-ɑ kömi piny óywöngø ki ywøøg thøø. Lɑ̈bø ree ótulle ni ɑpɑgi Kiir. Jwøk, mɑl ɑ́cwɑ̈je, kɑ pɑɑre geere kömi gøn, kɑ pyëën mɑl cïbe mɑl kömi piny. Pïi nɑm nyii kwɑnyø yi en kɑ gï kønye kömi piny. Nyinge bɑ Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j okööbø kinni, “Wun ɑ tyëng Isrɑil, wu pɑ̈r ki tyëng Kuc kì yïɑ, Wu ɑ́kɑ̈ɑ̈lɑ wɑ̈g kì Rïp, kɑ tyëng Pelistiyɑ̀ kɑ̈ɑ̈lɑ wɑ̈g kì Kɑptör kì muji Kirit, kɑ tyëng Arɑm kɑ̈ɑ̈lɑ kì Kïr.” Wë Jwøng-ɑ Ácwɑ̈ɑ̈j nenn-ɑ Isrɑil ki orøng-ɑ gøggi yi en, bɑ men nyinge órɑ̈ɑ̈j wɑ̈g kì kömi piny. De óyïddi ki ɑ́kyëllì møg-ɑ ódöng kì gøl Yɑgob. Gøl Yɑgob óyieg yi yɑn kì kelli jurrì, ni kenyi yieeg byel ki luy, bong nyɑ wɑng ɑ́kyel men-ɑ ódëëm piny. Tyëngorøg møg-ɑ kelli yɑyɑ bënn, gen ɑ tyëng-ɑ nyi kööbø kinni, ‘Jwøk wɑ koo wëgge pïïdø yi rɑ̈jø,’ ge ónɑ̈g ki pilø. Jwøng-ɑ Ácwɑ̈ɑ̈j okööbø kinni, “Pödhi Debïd nɑ ød me pɑ̈ɑ̈dhø, de óthïg yi yɑn, kɑ døøg-ɑ keje, ni kɑ ɑ́bëëde cøn.” “Budi Edöm men-ɑ dööngø ókwɑny yi tyëng Isrɑil geki pödhh-ɑ kyeelø møg-ɑ bɑ møgɑ.” Bene ge møg-ɑ ɑ́kwøb yi Jwøng-ɑ Ácwɑ̈ɑ̈j kinni ge ócwöb ɑgɑk. Jwøng-ɑ Ácwɑ̈ɑ̈j okööbø kinni, “Bøli keny-ɑ ójwɑn jɑmmì cyegø ɑ́cyɑ̈ngi, o oløg ójwɑn cyegø e møgø nuti gwøgø. Møgi oløg men-ɑ med ólɑɑj piny kì wɑ̈thi kïtt-ɑ døngø, kɑ ómullø kì wɑ̈thi kïtt-ɑ thønhø. Jiɑ ódwöögɑ piny gen. Kɑ̈dd-ɑ pɑ̈ɑ̈dhø óger yi gen, kɑ ge pëgg-ɑ kɑ̈ddɑni. Ge ópïdhø ki oløg, kɑ ge omɑ̈dhø ki møgi oløngɑni. Ge ópïdhø ki bɑ̈gg, kɑ gïg-ɑ pidh yi gen cɑm yi gen. “Jiɑ ógurɑ kej gen ni pijø, bong ngɑn lwɑ̈ng gen ki puthø këti.” Jwøgí Jwøng-ɑ Ácwɑ̈ɑ̈j, ɑ́rum ki kwøb. Møg-ɑ ɑ́yɑ̈lli Obɑdiyɑ̀, gen ɑ møg-ɑ ɑ́kwøb yi Wë Jwøng-ɑ Ácwɑ̈ɑ̈j kì ri Edöm. Jwøng-ɑ Ácwɑ̈ɑ̈j wëywöne ɑ́öre yï pödhh kɑ wööne lïngi wøn kinni, “Dwödh liny! Kedhu be nyɑɑg ki Edöm!” Jwøng-ɑ Ácwɑ̈ɑ̈j Edöm ɑ́köbbe kinni, “Yï ógwøgɑ yï nyøødh, yï óceg ki benyø yi ji bënn. Yï ɑ́wëny yi ɑthwøgí, Kɑɑl-ɑ jyɑ̈ɑ̈g yi yïn ógerø ki kïttì mø teg pɑɑrí ying-ɑ mɑl kì wɑ̈thi kïttì, bene ɑ bɑnge köbbí rií kinni, ‘Á men ɑ cuggi tëëli yɑn piny?’ De cɑgg ødí geer yïn mɑl ni ød cor kɑ ónënnø e ce ying-ɑ kelli kyell, yï ótëëlɑ piny. “Ke bëën kurrì gølí kì wɑ̈r, ge kwɑl-ɑ gïg-ɑ dwɑddi yi gen yøw. Kenyi lem oløg, nyii yïddø ki ɑ́kyëllì mø döng. De yï órënyi yi tyëng-ɑ mɑɑn yïn kinni tweet. Yïn ɑ gøl Isøø, kɑ̈rí ɑ́kɑ̈l. Yï ɑ́wëny yi mɑ̈dhhí yï ɑ́cyeed gen wɑ̈g kì pödhí. Ji-ɑ ɑ́bëëd ge mër ki yïn, yï ɑ́mɑny yi gen. Yï ɑ́ceg ki ɑ́kɑ̈llì yi ji-ɑ ɑ́cyɑ̈ɑ̈m wun, yï ɑ́thɑb yi gen kì bɑng nøgi wïjí. “Cyɑ̈ng-ɑ ócɑyɑ Edöm, bong ngɑn wïje pel men-ɑ ódöng! Mɑ́ tyëng-ɑ ngɑ̈ny wøw ógöjjɑ nøgi wɑ̈ɑ̈th. Jøliny Temɑn óbwøg, jøliny Edöm ónɑ̈g bënn. “Mɑ́ jɑmmi wɑddí kwɑrri Yɑgob ɑ́kɑb yi yïn kɑ wɑddi wun nɑ̈g wun, yï órënyi kɑ yï ocögø yï yɑ̈rø gïti ɑtheer. Yï ɑ́cungi yï lɑ̈wi, dicyɑ̈ng-ɑ ɑ́tëër kɑ̈re yi tyëngpɑth, kɑ thïggi döri kɑɑl toor gen piny. Yï ɑ́bëëd yï rɑj ni gen. gen ɑ tyëng-ɑ ɑ́kɑ̈l kɑ̈ɑ̈r Yerusɑlem, kɑ gø pɑ̈ngi gen kì kelli gen. Á kipe ngø ɑ ɑ́mïni pyëwí keny-ɑ ɑ́bëën ryɑ̈g kömi nyiimyëw kì Yeudiyɑ̀? Pyëwí pɑ di ceg mïnø, kì cyɑ̈ng-ɑ ɑ́bëën ryɑ̈g kömi gen. Ge pɑ di ngedhi yi yïn keny-ɑ ɑ́rɑngi gen. Yï di ceg-ɑ cögø yï pɑ kedhi kɑɑl jiɑ be gɑggi gen kí kwɑnyi jɑmmi gen kì cyɑ̈ng-ɑ ɑ́rɑngi gen. Yï pɑ di cungi kì ɑ́kɑrri yëëth, yï mɑng-ɑ tyëng-ɑ rengi. Ge pɑ di mɑ̈ggí tyëngmɑ̈ɑ̈nø, kì cyɑ̈ng-ɑ ɑ́rɑngi gen. “Yɑ Jwøng-ɑ Ácwɑ̈ɑ̈j, cyɑ̈ng-ɑ ócɑyɑ pödhh bënn ɑ́cyɑ̈ngi. Edöm, gïn-ɑ ɑ́gwøg yi yïn, ólony ki göggi yïn. Yï ómëgg-ɑ gïn-ɑ ɑ́muuj yi yïn. Jiɑ ɑ́cɑyɑ ki cɑ́y mø døngø kì wïj kïti kwërɑ. De pödhh-ɑ cyɑ̈gi ócɑyɑ thyew ki cɑ́y mø pëddi döng, ge óthumi ki thøø. “Ódi ji møg-ɑ óbodh kì Kïti Dhɑyøn o óbëëdø ɑ́ kej kwër. Tyëng gøl Yɑgob ódøøg ki kwɑnyi piny-ɑ bɑ mi gen. Gøl Yɑgob kí gøl Yosep óbëëdø ge nɑ mɑc; gøl Isøø órɑ̈b yi gen ni kenyi rɑ̈ɑ̈b wél yi mɑc, bong dhɑnhø men ɑ óbodh kì yije. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. “Tyëng gøl Yeudɑ̀ møg-ɑ ying wɑɑng wurlwɑl, piny Edöm ókwɑny yi gen. O Pelistiyɑ̀ ókwɑny yi tyëng gøl Yeudɑ̀ møg-ɑ thɑ́ kïtti wɑɑng cyɑ̈ɑ̈ng böörø. Piny Eprɑim kí Sɑmɑriyɑ̀ ókwɑny yi Isrɑil; Gilyɑd ókwɑny yi gøl Ben Yɑmïn. Piny Pinikiyɑ̀ ókwɑny yi tyëng gøl Isrɑil møg-ɑ wɑɑng wuudø ge dwöög ɑ yïnø, e pinyɑni pïd-ɑ Dhɑrepɑth. Myërri piny Yeudiyɑ̀ kì wɑɑng wurlwɑl, ókwɑny yi tyëng Yerusɑlem møg-ɑ ɑ́ying Sɑrdïs. Jøg-ɑ nyi tyɑ̈mø kì Yerusɑlem ópɑ̈ɑ̈r kömi Edöm, kɑ gø jɑɑg gen. Codhe o Jwøng-ɑ Ácwɑ̈ɑ̈j kiree jyɑ̈ge ɑ́ rɑ̈dh.” Kɑ Yönɑ̀ wɑ̈d Amitɑy köbbi yi Jwøng-ɑ Ácwɑ̈ɑ̈j cyɑ̈ng ɑ́kyel kinni, “Dhwöödh, kedhí Ninɑwɑ̀ kɑɑl-ɑ dwøng. Kɑ tyëng kɑɑlɑni köbbí cɑ́y-ɑ ócɑɑyɑ gen, mɑ́ orøøg gen nennɑ’ nennø.” De Yönɑ̀ ɑ́yöd e kedh-ɑ pödhø me ying tung-ɑ kyeelø, e ceg-ɑ pɑ̈ɑ̈rø kì bøli Jwøng-ɑ Ácwɑ̈ɑ̈j, ɑ́kedhi Yɑpɑ̀ kɑ óyïddø ki sɑpïnɑ̀ me kømi kedhi Tɑrcic. Kɑ ókïr yɑ̈y muuje, codhe kɑ odhwödhø ki yɑ̈yɑni, e kedh-ɑ kun lɑ̈ɑ̈we ree ki Jwøng-ɑ Ácwɑ̈ɑ̈j. Kɑ Jwøng-ɑ Ácwɑ̈ɑ̈j göjj-ɑ nɑɑm omelø ki yømø me teg, kɑ ɑpɑgø ódøngø kì nɑm ki menteg, kɑ sɑpïnɑ̀ ócyɑ̈ngø ki tørrø yi en. Kɑ jøkëw obwøgø ki mendwøng, kɑ men nyi ywøøg-ɑ kö jwøøg gøl gen. Aleeng gen jɑmm-ɑ yij yɑ̈y nɑm, o yɑ̈y yöne. Yönɑ̀ kedhi øn-ɑ piny kì thɑ sɑpïnɑ̀, kɑ óbuddø, kɑ ónenø. Kɑ yod kì kenyɑni yi jɑngi jøkëw, ɑköbbe gøn kinni, “Yïde ɑ cɑɑg nenø? Dhwöödh kwɑjjí jwøøg gøl wun men-ɑ ólɑ̈ɑ̈m pyëwe, kɑ wɑ yiele.” Kɑ ri gen köbbi gen kinni, “Kedhi wɑ be leng ki wél, o yod yi wɑ mɑ løge gööj men ɑ yïddi wɑ èn ki gïnrɑj.” Kɑ ge olëngø ki wél, ɑpɑ̈dhi wél ki Yönɑ̀. Aköbbii yi gen kinni, “Köbbí wøn, yïn ɑ kɑ̈ni ki göj men? Gwøgí bɑ ngø? O yï kɑ̈ɑ̈l-ɑ keny? O pödhi wun bɑ keny? O yï bɑ wɑ̈d jur ɑ́?” Aköbbi gen yi Yönɑ̀ kinni, “Yɑ bɑ Ibrì, o yɑ nyi mɑll-ɑ Jwøng-ɑ Ácwɑ̈ɑ̈j, Jwøøg mɑl, ɑ ɑ́cwɑ̈j nɑɑm omelø geki piny-ɑ thwøwø.” Kɑ ge köbbi yi Yönɑ̀ kinni ceg-ɑ pɑ̈ɑ̈rø kì buti Jwøng-ɑ Ácwɑ̈ɑ̈j. Keny-ɑ ɑ́rume kwøbi møgɑni, ɑbwøg jøgɑni ki mendwøng. Aköbbii yi gen kinni, “Yïde ɑ göög ki gïn ni men?” Kɑ yømø ókedhø e ótëngø, ɑpyëjii yi gen kinni, “Á ngø ɑ göggi wøn yïn, o yømø noge?” Aköbbe gïn kinni, “Kwɑnyu yɑn, kɑ yɑ leeng wun nɑm o yømø noge, mɑ́ yɑ ngɑ̈ny wøw kinni ryɑ̈g men ɑ́bï kömi wun kɑ göjɑ.” De jøgɑni ɑ́yöd ge kyëw-ɑ wɑ̈g, kɑ yɑ̈y ódhɑ̈lø kyeew wɑ̈g yi gen, mɑ́ yømø ɑ́kedh e ceg-ɑ tëngø. Akwɑjji Jwøng-ɑ Ácwɑ̈ɑ̈j yi gen kinni, “Yïn ɑ Jwøng-ɑ Ácwɑ̈ɑ̈j, wø ko wëggí thøø kipe wëyi jɑɑl, kɑ cyën me pɑth ko cïb kömi wøn, mɑ́ yï ɑ́gwøg-ɑ gïn-ɑ ɑ́dwɑddi yi yïn.” Akwɑny gen Yönɑ̀ kɑ gø leeng gen nɑm. Kɑ ɑpɑgø ócungø. Kɑ jøgɑni obwøgø yi Jwøng-ɑ Ácwɑ̈ɑ̈j ki mendwøng. Angɑ̈ddi Jwøng-ɑ Ácwɑ̈ɑ̈j yi gen ki gëëdhi, kɑ ge óköngø. Rëjø me dwøng ókɑ̈ɑ̈lø yi Jwøng-ɑ Ácwɑ̈ɑ̈j, kɑ Yönɑ̀ mwøøny yi rënyɑni. Kɑ Yönɑ̀ tyëg-ɑ cyɑ̈ng ɑ́dɑ̈g kí wɑ̈rr ɑ́dɑ̈g kì yij rënyɑni. Kɑ Yönɑ̀ ókwɑ̈jjø e ying-ɑ yij rëjø kinni, “Yï ɑ́kwɑjjɑ yɑ ying-ɑ yij orɑng yïn ɑ Jwøng-ɑ Ácwɑ̈ɑ̈j, kɑ kwɑ̈jjɑ løøg yi yïn. Yɑ ɑ́ryeer yɑ ying-ɑ yij rörø, kɑ cwɑggɑ lïngi yi yïn. Yɑ ɑ́luudh yi yïn piny piny, yɑ ɑ́kïdhí piny tyeli nɑɑm omelø, yɑ ɑ́tyeg yi pï kì wɑ̈thi tùng bënn. Apɑgø tørr-ɑ ree kì kömɑ. Kɑ yɑ okööbø kinni, yɑ óngøl wɑ̈yɑ, yɑ pɑ wɑ̈nhi bølí; Kengí kwërø pɑ lidhɑ këti. Yɑ ɑ́mud yi pï; yɑ ɑ́mwøøny yi nɑɑm omelø; wïjɑ ɑ́myen yi luum nɑɑm omelø. Yɑ ɑ́ludhi piny thɑ́ kïttì; lɑ̈bø ree ɑ́cyëëge kömɑ gïti ɑtheer. De wëyɑ ɑ́dwöög wɑ̈g yi yïn, yïn ɑ Wɑ̈ɑ Jwøgɑ. Keny-ɑ ɑ́dhɑ̈ɑ̈rɑ, yɑ ɑ́pɑr-ɑ yïn, kɑ yï kwɑjjɑ, yïn ɑ Jwøng-ɑ Ácwɑ̈ɑ̈j, kɑ cwɑggɑ lïngi yi yïn, kì yij Kengí kwërø. Tyëng-ɑ mïdhi jwögg-ɑ bong per gen, ge ɑ́wiy-ɑ dhwɑ̈ɑ̈ng gen. De yɑ wör yɑ lejj-ɑ yïn; yï óngɑ̈ddɑ ki gëdhhì; kɑ møg-ɑ ɑ́kwöngɑ mïdhi yi yɑn. Yïëdø kɑ̈ɑ̈l-ɑ yï Jwøng-ɑ Ácwɑ̈ɑ̈j.” Kɑ rënyɑni köbbi yi Jwøng-ɑ Ácwɑ̈ɑ̈j. Angøøge Yönɑ̀ wɑ̈g keny-ɑ thwøwø. Kɑ Yönɑ̀ cigi köbbø yi Jwøng-ɑ Ácwɑ̈ɑ̈j kinni, “Dhwöödh kedhí Ninɑwɑ̀ kɑɑl-ɑ dwøng, kɑ ge köbbi møg-ɑ óköbbɑ yïn.” Adhwödh Yönɑ̀ kɑ kedh-ɑ Ninɑwɑ̀ ni kɑ ɑ́köbbii yi Jwøng-ɑ Ácwɑ̈ɑ̈j. O Ninɑwɑ̀ ɑ́bëëd ɑ́ kɑɑl me dwøng cɑrø ki mendwøng, yije bɑ̈ɑ̈n yi dhɑnhø kɑ wɑ̈ɑ̈dh cyɑ̈ng ɑ́dɑ̈g. Kɑ Yönɑ̀ kedh-ɑ kɑɑlɑni, kɑ gø bɑ̈ɑ̈ne ki cyɑ̈ng ɑ́kyel, kɑ ócɑ̈gø töng ki kwøb kinni, “Ninɑwɑ̀ óryɑ̈g yi Jwøk bɑng cyɑ̈ng pyɑ̈r ɑ́ngwen.” Kɑ wöni Jwøk yïëy yi tyëng Ninɑwɑ̀, kɑ ge okööbø kinni, i thuum ji bënn, kɑ ge rug gen ki ocwɑ̈llì ge bënn, cɑg kì ri møg-ɑ thønhø gïti ri jøg-ɑ døngø. Kɑ kwøbbɑni wɑ̈dh-ɑ yï rɑ̈ɑ̈dh Ninɑwɑ̀ kɑ odhwödhø kì wïj kwøme, ɑlunye lɑne wɑ̈g, kɑ ree lunye ki ocwɑ̈lø, kɑ pëgg-ɑ yij búr. Kɑ rɑ̈dh omuujø ki cigg, e ceg-ɑ tyëng Ninɑwɑ̀ kinni, “Møg-ɑ ɑ́ceg yi rɑ̈dh geki jøgdøngø ek: Ko di dhɑnhø me cyɑ̈mø ki gïïpiny, kɑ ko di gïn mɑdh. Kɑ dhög geki dyëg ko gøøny pɑ̈l be cɑm. Kɑ ji geki dhög rug gen ki ocwɑ̈llì. Kɑ Jwøk kwɑjji ki menteg, kɑ yëthi orøg wiy yi dhɑnhø bëne, kɑ bëëdø men-ɑ rɑj wiy, men-ɑ ólɑ̈ɑ̈m pyëw Jwøk, kɑ lɑɑwe dwööge piny, kɑ ówïyø liny, o wɑ cög wɑ, wɑ pɑ thøw.” Gïn-ɑ ɑ́gwøg yi gen ɑ́lidh yi Jwøk; ɑ́lidhe kinni bëëdø men-ɑ rɑj, men-ɑ ɑ́beed yi gen ɑ́wiy yi gen. Codhe, ɑwiye gïn, kɑ ge ocögø ge pɑ cɑye ni kɑ ɑ́kööbe. Kɑ Yönɑ̀ mɑg yi liny ki mendwøng. Kɑ okööbø kinni, “Pɑth ki gïn-ɑ ɑ́rømmi yi yɑn ɑnɑn ceth keny-ɑ ɑ́nudd yɑ ying-ɑ pödhi wøn, ɑ bɑnge ɑ́dwɑddɑ pɑ̈ɑ̈r Tɑrcic? Mɑ́ yɑ ngɑ̈ny wøw kinni yï bɑ Jwøng pyëwí yöd. O lɑ̈mpyëwí bong cöge. Anɑn kɑ ɑ́rum bëëde kinøw, kwɑny wëyɑ, mɑ́ thøwɑ lɑ̈w kibøli nënnɑ.” Kɑ Jwøng-ɑ Ácwɑ̈ɑ̈j ólöggø kinni, “Yï mɑg yi liny kɑ per ngø? Dɑ dyër me pere mɑɑg yïn yi liny?” Kɑ Yönɑ̀ kedh-ɑ wɑ̈g kì kɑɑlɑni kì cyɑ̈ngɑni, e kedh-ɑ kuni wɑɑng cyɑ̈ɑ̈ng mwøl. Kɑ ree gögge ki nyɑ ɑkɑnø kì kunɑni. Kɑ pëgg-ɑ thɑre kì tïbe e nenn-ɑ gïn-ɑ ócwöb kì kɑɑlɑni. Kɑ yɑdh megø pidh yi Jwøk, Jwøng-ɑ Ácwɑ̈ɑ̈j, kɑ bɑ̈dde peedhe, ge gwøg-ɑ tïbø me yije bëëd yi Yönɑ̀, o dële ngïnye. Kɑ Yönɑ̀ pyëwe ómïnø ki mendwøng yi yɑnhɑni, de kì bɑ̈ɑ̈rø cyɑ̈ng-ɑ kyeelø, kɑ Jwøk ókɑ̈nø ki twöngø, kɑ yɑnhɑni byere cɑm yi twöngɑni, kɑ owøwø. Keny-ɑ ɑ́tuul cɑ̈ng, kɑ yømø me lëëdh ocödø e kɑ̈ɑ̈l-ɑ kuni wɑɑng cyɑ̈ɑ̈ng mwøl, kɑ Yönɑ̀ kømi nɑ̈gø yi lëdhi piny. Kɑ pyëwe tyer-ɑ thøø, ɑkööbe kinni, “Lɑ̈w thøwɑ kibøli nënnɑ.” Aköbbii yi Jwøng-ɑ Ácwɑ̈ɑ̈j kinni, “Yïí dɑ dyër me ywöngí kiper yɑdh men?” Alöggi Yönɑ̀ kinni, “Yɑ køm-ɑ nɑ̈gø yi rummi yɑnhɑni!” Aköbbii yi Jwøng-ɑ Ácwɑ̈ɑ̈j kinni, “Yï ywøg-ɑ yɑdh me nuti pidh-ɑ yi yïn. O ɑ́twïy-ɑ wɑ̈r ɑ́kyel kɑ othøø kì wɑ̈r-ɑ kyeelø. O pyëwɑ di dhɑ̈le’ dï ki lɑ̈ɑ̈mø ki Ninɑwɑ̀, eni kɑɑl-ɑ dwøng ni men? O men-ɑ́ yije dɑ othønhø mø yï gen bɑ̈r, mø kwɑnni gen pöödh ɑ́lïp miyø kí pyɑ̈r ɑ́ryew, geki dhög kí dyëg!” Men bɑ wööni Jwøng-ɑ Ácwɑ̈ɑ̈j men-ɑ ɑ́mëgge Miikɑ̀, jɑl Möreceth, kì yethi runn-ɑ ɑ́jyɑ̈ɑ̈g Yöthɑm, kí Akɑɑdh, kí Kedhekiyɑ̀ gɑ rɑ̈nhi Yeudiyɑ̀. Wöönɑni ɑ́kɑ̈lle kì Sɑmɑriyɑ̀ geki Yerusɑlem. Lïng wun, wu tyëng-ɑ bëëdø kì kömi piny; kyënu yïthhi wun, wu tyëng-ɑ bëëdø kì kömi piny. Rɑ̈ji wun ónyodh yi Wïlɑ̈bø, Jwøng-ɑ Ácwɑ̈ɑ̈j, Lïng wun! Kööbø e ying-ɑ pɑɑre mɑl. Jwøng-ɑ Ácwɑ̈ɑ̈j ódhwönhø kì pɑɑre e bï-ɑ piny. Óbï piny kɑ ócyɑ̈dhø kì wɑ̈thi kïttì. Kïttì óleny kì thɑ́ tyelle ni dwɑ̈lø kenyi lenye yi mɑc; Kɑ ge rïng-ɑ yij tör ni pïg rïngi kì wïj ótong. Møgɑni ócwöb, mɑ́ gøl Yɑgob ɑ́røngi, kɑ dhø Jwøk pyem yi gen. Á men ɑ ree ówɑɑng kipe orøøg Isrɑil? Pɑth ki Sɑmɑriyɑ̀ kiree! Á men-ɑ ree ówɑɑng kipe kɑ̀ kwɑ̈jji Yeudiyɑ̀ ki jwögg-ɑ pɑth? Pɑth ki Yerusɑlem kiree! Bene ɑ bɑnge kööb Jwøng-ɑ Ácwɑ̈ɑ̈j kinni, “Sɑmɑriyɑ̀ ógwøg yi yɑn e nɑ tuggì møg-ɑ óröör piny, tuggɑni ócøørɑ yij tör, kɑ tyelli udde kuunyɑ wɑ̈g. Kɑ kej kɑɑlɑni ogöögø ki pwödh. Ngïjji jwögge bënn órɑ̈b ki mɑc, kɑ kwï gen tørri, kɑ ge weddi. Jɑmm-ɑ ɑ́mëggi ɑ́mɑ̈jji keng órɑ̈b ki mɑc. Ge ɑ́mëggi Sɑmɑriyɑ̀ gɑ møg kwɑjji nyöödø, o ge ceg kɑ kɑ̈ɑ̈lø yi tyëng-ɑ mɑɑnii, o ge muuj ɑ́mɑ̈jji keng kì kɑ̈jj-ɑ kyeelø.” Codhe kɑ Miikɑ̀ okööbø kinni, “Kì bɑng menɑni yɑ óywöngi ki ywøøg mwög, kɑ yɑ okïïwø ni tulø. Yɑ ócyɑ̈dhi tyellɑ bong wɑr, riɑ bong ógødh. Sɑmɑriyɑ̀ ɑ́cyɑ̈ngi ki cɑyø, óni ngɑn ree di kedø mɑ nɑ̈ɑ̈g. Ryɑ̈ngɑni wɑ̈nh-ɑ dïdyëri Yerusɑlem kɑɑl jiɑ.” Tyɑmee ko köbbu tyëngmɑ̈ɑ̈nø kì Gɑth, wu ko ywöngi kinni tek. Wu tyëng Bet Leɑprɑ̀, ngyellu ri wun kì piny gwög, wu nyodh-ɑ bɑɑri nyingi wun. Wu tyëng Sɑpir, töngu yïnø wu cyɑ̈dh-ɑ nøw ki ɑyɑ̈r. Tyëng-ɑ bëëdø kì Dhɑnɑɑn ko pɑ̈nyi kedhi wɑ̈g kì kɑɑl gen. Keny-ɑ ólïngi wun tyëng Betedhel ge óywöngø, ngɑ̈nyu wøw kinni bong keny me yömmi yi wun kì kunɑni. Tyëng Mɑröth, opɑ̈wi gen ying-ɑ mɑl ge yïd-ɑ yielø, mɑ́ ryɑ̈g ɑ́bï piny e kɑ̈ɑ̈l-ɑ yï Jwøng-ɑ Ácwɑ̈ɑ̈j, kɑ wɑ̈nh-ɑ dïdyëri Yerusɑlem. Wu tyëng Lɑkic, twööju kyënyì ri yɑ̈ɑ̈th. Wu ɑ́ngøy-ɑ orøøg Isrɑil, codhe kɑ Yerusɑlem orøngø thyew kì bɑng wun. Wu tyëng Yeudiyɑ̀, dhwödh wun kì Möreceth Gɑth. Rɑ̈nhi Isrɑil pɑ køny yi kɑɑl Akdhïb. Wun ɑ tyëng Mɑrecɑ̀, wu ócïb cinggi tyëngmɑ̈ɑ̈nø, kɑ kɑɑl wun mɑg; kɑɑl-ɑ nyodh döngi Isrɑil órengi be pɑ̈nø kì órøngi kït kì Adulɑm. Wu tyëng Yeudiyɑ̀, nyɑ̈ɑ̈ru yëyyi wun wɑ̈g kì wɑ̈thi wun, o wɑ̈thi wun budh gen ni wïj cor órɑj, mɑ́ nyigi wun møg-ɑ mɑɑr yi wun ókøøl yïnø gɑ ɑmɑgg. Ri wun dɑ cyën, wu tyëng-ɑ nyi lɑng wɑ̈r wu rømm-ɑ gwøgi gïnrɑj! O kenyi ru wøw, o wu nyi møølu be gwøgi gïnrɑj menɑni, kenyi yïddi wun ki kej wɑng. Kɑ̀ dwɑddu pwödh, ge ceg kɑ kɑbø, kɑ̀ dwɑddu ud ge ceg kɑ kwɑnyø yi wun, bong gï gøl bodh ki kwɑnyø yi wun. Codhe, ɑkööb Jwøng-ɑ Ácwɑ̈ɑ̈j kinni, “Wu göjjɑ’ ryɑ̈g, wu pɑ bodh. Wɑ̈thi wun ócungi yi ɑkørrɑni; wu pɑ cigi cyɑ̈dhø wu tɑ̈dø. Keny-ɑ óbëën bøli kenyɑni, ryɑ̈g men-ɑ ópɑ̈dhi kömi wun ócög ɑ́ wɑ́j, kɑ wɑ́jɑni wör yi ji gɑ wörri ɑbɑɑrø kinni, Wɑ ɑ́gɑ̈g ki gɑ̈ngi dwøng! Pinyee ɑ́kwɑny yi Jwøng-ɑ Ácwɑ̈ɑ̈j kì yïee, kɑ gø mëgge tyëng-ɑ ɑ́kɑ̈l wɑ, wɑ bɑ ɑmɑgg.” Keny-ɑ ódwöög jii Jwøng-ɑ Ácwɑ̈ɑ̈j kì kun-ɑ ɑ́kïdhi gen, óbong keny me yod yi yïn, mɑ́ kɑ̈lli wun ópɑ̈ɑ̈dh. Yɑ nyii köbbø yi ji kinni, “Wø ko jud ki kwøbb-ɑ kømmi yi yïn ɑnɑn! Yï orumø kinni tyëng Isrɑil ri gen dɑ cyën? Jwøng-ɑ Ácwɑ̈ɑ̈j pyëwe ɑ́ceg-ɑ wïyø ki lɑ̈ɑ̈mø? Jwøng-ɑ Ácwɑ̈ɑ̈j ce nyi kømm-ɑ kwøbb-ɑ døj ki tyëng-ɑ gøggi dyër?” Jwøng-ɑ Ácwɑ̈ɑ̈j ólöggi kinni, “Wu pɑ̈r-ɑ́ɑ̀ kömi jiɑ ni tyëngmɑ̈ɑ̈nø, ge dwöög kì kej liny ki tɑrø, de wu yuud, wu yïd-ɑ gen kipe lunyi ógudhi gen wɑ̈g kì ri gen. Tyëng-ɑ mɑ̈nn ɑ́kɑ̈ɑ̈l wun wɑ̈g kì yethi uddi gen udd-ɑ døøj, kɑ gïgdøj møg-ɑ ɑ́dwɑddɑ mëggi othønhø kwɑny yi wun kì yï gen, kɑ ge ocögø ge pɑ döggu gen. Dhwödh wun, kedh wun, keny pɑth ki kej ywömø kì yï wun këti, keny ɑ́rënyi yi gööj orøøg wun. “Ji dwɑdd-ɑ jɑltöng men-ɑ cyɑ̈dhi e okööbø ki kwøbbi pyed yøw kinni, ‘Møgi oløg óbëëd e gïïr kì yï wun.’ “De kwï ɑ́kyëll-ɑ ódöng kì ri tyëng Isrɑil ócøngɑ kej ɑ́kyel ni dyëg kenyi kud gen ri gen. Piny wun ódøøg ki pɑ̈ngø yi ji, ni tör me pɑ̈ng yi dyëg.” Ge óyïëbbi ki yöö yi Jwøng-ɑ Ácwɑ̈ɑ̈j, kɑ ge kɑ̈ɑ̈l wɑ̈g kì kɑ̈jj-ɑ ɑ́kïdhi gen. Lïng wun, wu jɑggi Isrɑil. Pɑth ki wun ɑ di bëëd wu gøgg-ɑ dyër? De wude ɑ yöd ɑ́ wun ɑ mɑɑn gïndøj, o wu mɑɑru gwøgi gïnrɑj? Wu nɑ lɑ̈yyi pɑ̈l; jiɑ dëlli gen ɑ́yöödu wɑ̈g, kɑ rïnggi gen ngyëëdu wɑ̈g kì ri cu gen. Jiɑ ɑ́cɑm yi wun. Rïnggi gen ɑ́kɑ̈ɑ̈lu wɑ̈g kɑ cu gen kebbi wun ni rïngø men kïdhi dɑg. Obëën bøli kenyɑni, wu óywøøg kö Jwøng-ɑ Ácwɑ̈ɑ̈j, de kwøbbi wun koo løøge, mɑ́ wu gøgg-ɑ gïgrijjø. Jiɑ wɑ̈thi gen ɑ́rënyi yi jøtöng mø pyed, møg-ɑ nyi köbbi tyëng-ɑ thödhi gen ki ngyëny kinni, i piny dɑ mër, kɑ tyëng-ɑ pɑ muujø nyi köbbi yi gen kinni, i liny obëënø. Kì bɑng menɑni wu pɑ cigi töng këti, mɑ́ wu ówiy piny yi wëyi Jwøk; bong gïg-ɑ ónyudhi wun kì yethi lɑ̈g këti, mɑ́ jiɑ ɑ́wëny yi wun. Jøtöng møgɑni óyɑ̈r, kɑ ge døøg-ɑ be cyɑ̈dhø wɑ̈thi gen kuul gen piny, mɑ́ ge nyii rɑ̈ngø kɑ nyi bong-ɑ gïn nyudhi gen yi Jwøk. Yɑ ɑ́thödhi yi Jwøng-ɑ Ácwɑ̈ɑ̈j ki wëye geki tegø kí lögg-ɑ dyër, o yɑ köbb-ɑ tyëng Isrɑil bɑ̈jji gen. Lïngu kwøbbɑ, wun ɑ jɑggi Isrɑil, wu tyëng-ɑ mɑɑn dyër, wun ɑ nyi wil dyër kɑ løgu bɑ̈jjø. Yerusɑlem kɑɑl Jwøk ger yi wun kɑ remø, ɑ́løgu kej nɑ̈g, kí kej mød ki ji. Jɑggi Isrɑil, wu kwɑjji kɑ ngyëny kɑ̀ nennu gøny kì burø, o dyër nyi løg yi wun ɑ́ bɑ̈jjø. Wu tyëng kwër, cigg göög yi wun gɑ møg ri gen yïddi yi wun ki ngyëny. Wun jøtöng, wu nyi rɑ̈ngø kɑ per kinni o wu thödhi ki ngyëny, o wu bënn, wu wej-ɑ Jwøng-ɑ Ácwɑ̈ɑ̈j kinni nud kì kelli wun, wu okööbø kinni, “Bong bɑ̈jjø men-ɑ ócwöb kiperee, mɑ́ Jwøng-ɑ Ácwɑ̈ɑ̈j nud kì kellee!” Kì bɑng menɑni, Dhɑyøn ógöögø ki wɑɑg pur, kɑ Yerusɑlem ogöögø ki thur, kɑ wïj kïti Kengø, ogöögø ki thïm. Kì yethi cyɑ̈ngg-ɑ óbï, kïn-ɑ köme ógeer Kengi Jwøng-ɑ Ácwɑ̈ɑ̈j, ógöögø ɑ́ kïn-ɑ pëddi bɑ̈r wïje ókɑ̈ɑ̈l mɑl kibøli kïttì bënn. Pödhh mø gïïr óbï ge rɑɑd-ɑ wïje, ge okööbø kinni, “Bïu kedhi wɑ wïj kïti Jwøng-ɑ Ácwɑ̈ɑ̈j, yij Kengi Jwøøg Isrɑil. Wɑ ónyudhe gïn-ɑ dwɑdde kinni o gwøg yi wɑ, wɑ ódøøg be cyɑ̈dhø kì yethi yëthe. Mɑ́ Jwøng-ɑ Ácwɑ̈ɑ̈j pwönyi e ying-ɑ Yerusɑlem, kööbø kì jie e ying-ɑ Dhɑyøn. Akørr-ɑ kelli jurrì bënn ólidh yi en, cɑgg ɑ́ ɑkørri jurr-ɑ lɑ̈wi. Pilli gen óløg gen göjjì, kɑ tønggi gen løg gen pɑlli kɑj ki byel. Ge pɑ cigi nyɑɑg këti kinni tek, ri gen pɑ cigi gen pwönyø ki liny. Ji bënn óbëëdø ki mër; kɑ men pëgg-ɑ thɑ yɑdhe kì yij bɑɑg oløge; o bong ngɑn böggi yi en këti.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk, kinni gï ógwøge. Pödhh mɑll-ɑ jwöggi gen, ge lïng-ɑ kwøbbi gïn. De wøn, wø mɑll-ɑ Jwøøg wøn, Jwøng-ɑ Ácwɑ̈ɑ̈j, o bɑ en ɑ kwøbbe lïngi yi wøn gïti ɑtheer. Jwøng-ɑ Ácwɑ̈ɑ̈j ɑ́kööb kinni, “Bøli kenyɑni ɑ́cyɑ̈ngi, eni bøli keny-ɑ ócøngɑ ji-ɑ ɑ́cɑy yi yɑn, tyëng-ɑ ɑ́rɑngi kì yïnø. Ge nɑ ngöll mø ying kun lɑ̈wi ki pɑc, de ɑ́kyëll-ɑ ɑ́döng óthödhɑ ki tegø, kɑ ge gwøg yi yɑn gɑ pödhø me dwøng. Ge ójɑɑg yi yɑn kì wïj Kïti Dhɑyøn gïti ɑtheer.” Yïn ɑ Yerusɑlem, keny-ɑ nenni Jwøk jie ni jɑlkwɑ̈yø kenyi nenne dyëge, yï ódøøg ki gwøg yïn ɑ́ kɑɑl jyɑ̈ɑ̈gø ni keny-ɑ ɑ́bëëd cøn. Yïn ɑ Yerusɑlem, yïde ɑ ywöngi ki ywøng-ɑ rɑɑj cɑrø, de yï nɑ ngɑn yïe bong rɑ̈dh? O yïde ɑ rɑngi ni ngɑndhɑjø me pɑ̈dhi piny? Jøgdøngi tøg burí ɑ́ceg-ɑ thøø? Wun ɑ tyëng Yerusɑlem, wu órɑngi kɑ wu ócurrø ni ngɑndhɑjø me pɑ̈dhi piny, mɑ́ wu ódhwödh kì kɑɑl, kɑ wu kïdhi pɑ̈l. Wu ókïdhi Bɑbïl, de kì kunɑni wu óyiel yi Jwøng-ɑ Ácwɑ̈ɑ̈j kì cinggi tyëngmɑ̈ɑ̈nø. Yïn ɑ Yerusɑlem, jurrì mø gïïr cong-ɑ lìnyi gen kipe nyɑɑg ki yïn, ge okööbø kinni, “Yerusɑlem di dwɑddø kinni pɑ̈ɑ̈dhe. Kɑɑl menɑni ólidh yi wɑ e ywëdhø.” De jurrì møgɑni, gïn-ɑ pyëw Jwøng-ɑ Ácwɑ̈ɑ̈j kwïj yi gen. Gïn-ɑ́ pere ɑ́cøng gen ni byel kenyi cøng gen yij rɑrø, kwïj yi gen e bɑ kipe kinni o ge cɑy. Jwøng-ɑ Ácwɑ̈ɑ̈j okööbø kinni, “Wun ɑ tyëng Yerusɑlem, dhwödh wun, kɑ wu kedhu be cɑyi tyëngmɑ̈ɑ̈nø! Wu ógwøg yi yɑn wu teg ni wɑnh-ɑ thwønh men-ɑ tùnge óyiedhø ge bedh ni bethi mɑy, o dɑddi tyelle teg ni ngyënyø dilɑl. Jurrì mø gïïr ótyɑm yi wun, kɑ kɑ̈rri gen møg-ɑ ɑ́kɑbbi gen thërri yɑn yi wun, yɑ Wïlɑ̈bø bëne.” Wun ɑ tyëng Yerusɑlem, cøngu liny wun! Wɑ ɑ́tyeg! Jɑngi Isrɑil köme opɑ̈ɑ̈rø! Jwøng-ɑ Ácwɑ̈ɑ̈j okööbø kinni, “Betleem Eprɑtɑ̀, yï bɑ ɑ́kyel kì kelli kɑ̈dd-ɑ pëddi thïnh kì Yeudiyɑ̀, de jɑngi Isrɑil ókɑ̈ɑ̈l yi yɑn ɑ rií, kì kelli kɑ̈ll-ɑ wönø’ weenø.” Jwøng-ɑ Ácwɑ̈ɑ̈j jie ówiye cinggi tyëngmɑ̈ɑ̈nø, gïti keny-ɑ ópɑ̈dhi ngɑn-ɑ pɑ̈dhi piny ki wɑ̈de. Codhe cyee, o tyëng Isrɑil møg-ɑ yïnø rebe ki jii gen. Keny-ɑ óbëëne, jie ójɑɑg yi en ki tegø me kɑ̈ɑ̈l yï Jwøng-ɑ Ácwɑ̈ɑ̈j, geki mɑ̈ɑ̈r Jwøng-ɑ Ácwɑ̈ɑ̈j; ɑ bɑ Jwøk kiree. Jie óbëëd e bong gïjø me böggi yi gen, mɑ́ dönge óyod yi ji bënn kì kömi piny, o ókɑ̈ni ki mër. Keny-ɑ óbëën tyëng Acuur be mɑnyi pödhee, kɑ ge pödhh-ɑ kelli linyee, pëjj-ɑ pëddi tegø kì kellee óör yi wɑ yï gen be nyɑɑg ki gen. Acuur piny Nimröd ójɑɑg yi gen ki tegø, wɑ óyiel yi gen kì cingi Acuur keny-ɑ óbëëne be mɑnyi pödhee. Tyëng Isrɑil møg-ɑ óbodh, óni thöjj møg ör yi Jwøng-ɑ Ácwɑ̈ɑ̈j kì kelli jurrì, o ge óni onywiyì kì kömi lum. Ge ómïdh-ɑ yi Jwøk, pɑth ki dhɑnhø ɑ ómïdhi gen. De tyëng Isrɑil møg-ɑ döngi kelli jurrì mø gïïr, óni ngur kì kelli lɑ̈yyi pɑ̈l, ni wɑ̈d ngur kì kelli dyëg, kɑ̀ pɑ̈ɑ̈re kelli gen, gï nyi ngølle’ ngøllø gɑ thullì, bong gïn yïëdø. De Isrɑil tyëng-ɑ mɑɑnii ótyɑm yi en, tyëng-ɑ mɑɑnii óthumi bënn. Jwøng-ɑ Ácwɑ̈ɑ̈j okööbø kinni, “Kì cyɑ̈ngɑni, kyënyi linyí ónɑ̈g yi yɑn, kɑ yɑ̈thi linyí tørrɑ. Dörr-ɑ korri pödhí ócøørɑ piny, kɑ myërri pödhí rënyɑ. Wɑ̈lli wun órënyɑ, kɑ jøyenhi wun nɑ̈gɑ. Ngïjji jwöggi wun ótørrɑ, kɑ yïkki wun dhurɑ piny. Gïn-ɑ ɑ́gwøg yi wun ki cinggi wun, pɑ cigi mɑllø yi wun këti. Löjji Aceerɑ̀, jwøng-ɑ dhɑjø ómøddɑ piny kì pödhí, kɑ kɑ̈ddí rënyɑ. Jurr-ɑ kyeelø møg-ɑ nuti lïngi dhøgɑ, ócɑy yi yɑn ki rɑ̈ji pyëwɑ.” Lïng wun ki møg-ɑ kwøb yï Jwøng-ɑ Ácwɑ̈ɑ̈j, kì ri Isrɑil. Dhwöödh, yïn ɑ Jwøng-ɑ Ácwɑ̈ɑ̈j, gøny gønyí kì bøli kïttì, kɑ wiy cwɑggí lïngi yi ótøng. Kïttì, wun ɑ ɑ́wöni weenø wu ying-ɑ kömi piny, lïngu gøøny Jwøng-ɑ Ácwɑ̈ɑ̈j! Jwøng-ɑ Ácwɑ̈ɑ̈j yïe dɑ gøny ki tyëng Isrɑil, jie. Jwøng-ɑ Ácwɑ̈ɑ̈j okööbø kinni, “Á ngø ɑ rɑj, ɑ ɑ́göggɑ wun, jiɑ? Wu ɑ́jud yi yɑn kɑ ngø? Løøgu møgɑ. Wu ɑ́kɑ̈ɑ̈lɑ wɑ̈g kì Rïp; wu ɑ́yielɑ kì yij bɑ̈ɑ̈ngø; wu ɑ́örɑ Mosɑ̀, geki Aɑron, kí Miryɑm, o wu pyejji yi gen. Pɑru gïg-ɑ ɑ́dwɑddi göggi wun yi Bɑlɑk rɑ̈ɑ̈dh Moɑb, kí kër-ɑ ɑ́løøg kwøbbe yi Bɑlɑɑm. Pɑru gïg-ɑ ɑ́cwöb kì yöö wu dhwödh-ɑ kɑɑl Álwiy wu kedh-ɑ Gilgɑl. Pɑru gïgɑni bënn, o gïg-ɑ ɑ́gwøg yi yɑn kiper yieli wun, yod yi wun.” Á ngø ɑ ókɑ̈ɑ̈l yi yɑn keny-ɑ óbëënɑ bøli Jwøng-ɑ Ácwɑ̈ɑ̈j be mɑllii? Bïɑ yïe yɑ kwøll-ɑ wɑ̈dhh ówöbb gɑ gënh-ɑ nyi rɑ̈b? Jwøng-ɑ Ácwɑ̈ɑ̈j pyëwe ómïni keny-ɑ ómuujɑ en ki dyëg mø gïïr? Pyëwe ómïnø ke muujɑ en ki møøw dhetun me gïïr cɑrø? Muujɑ men-ɑ́ nyɑɑr yijɑ, wɑ̈n-ɑ kɑyø ɑ́ men gøøm bøli orøgɑ? Pɑth, gïn-ɑ døj ɑ́rum ki köbbi wɑ yi Jwøng-ɑ Ácwɑ̈ɑ̈j, gïn-ɑ dwɑddi yi en kì yïee bɑ gøggi dyër, kí mɑ̈ɑ̈dø men pɑ lwënyi, geki bëëdø ki möölø kì bøli Jwøgee. Böggi Jwøk døøj, bɑ peli wïj. Cwɑggi Jwøng-ɑ Ácwɑ̈ɑ̈j olïngø kì kɑɑl e okööbø kinni, “Lïng wun, wu tyëng-ɑ cugø kì dïkɑɑl! Kɑ̈rr-ɑ yethi uddi jøgi orøg ɑ́yod yi gen kɑ wëënyø. Ge ɑ́ceg-ɑ gwem ki ji kì kɑ̈jji ngyew, o gïn ni menɑni mɑɑn yi yɑn. Pyëwɑ ólɑ̈ɑ̈m kidï ki tyëng-ɑ gwëmø ki ji? Tyëngkɑ̈ri wun ruj-ɑ ɑbuur, o wu bɑ tyëngpyed bënn. Adɑ́ yɑ ɑ́cɑ̈gi cyee ki rënyi kɑ̈rri wun, o ryɑ̈g göjjɑ’ wun kipe orøng-ɑ gøggi yi wun. Wu ócyɑ̈mø de wu pɑ yɑ̈ng, yethi wun ócög ge olɑwø. Wu ócungø ki jɑmmì, de ge órënyi yi liny. Wu ópurø ki byel, de wu pɑ kɑ̈jø ki byel. Wu óbïïjø ki møw, de wu pɑ gïnyø ki møw. Wu óbïïjø ki møgi oløg, de wu pɑ mɑ̈dhø ki møgi oløg. Gïgɑni ócwöb kipe kɑ ɑ́ngøy wun gïgrijjø møg-ɑ ɑ́gøggi yi Rɑ̈dh Omrì, geki wɑ̈de Rɑ̈dh Akɑɑb. Wu órënyi yi yɑn, mɑ́ wu nudd wu gøgg-ɑ gïg ni møgɑni. Wu óbong per wun kì yï dhɑnhø bëne. Wu ógɑggi yi jurr-ɑ kyeelø.” Yɑ ɑ́gɑ̈g! Yɑ pɑ̈r ki ngɑn ree di kɑ̈j, me kedhi kö yɑdh be yɑb ki nywøli yɑdh møg cɑm yi en, de ɑ́jɑd kì kö yɑnhɑni. Nywøli yɑnhɑni rumø ki pønø bënn. Bong ji møg döngø ki pönhï, mø gøggi gïg-ɑ dwɑddi yi Jwøk. Bong ngɑn mïdhi kwøbbi Jwøk. Men yɑb-ɑ yöö men nɑ̈ge ki dhɑnhø, kɑ men nyi nɑ̈g yi men. Ge ɑ́wɑ̈dh bënn ki gøggi gïgrijjø. Jøgdøngi mïïri geki jɑgg yɑb-ɑ kwɑjjø ki ngyëny. Ngɑn cinge di tegø nyi cwøl-ɑ gïn-ɑ dwɑddi yi en, codhe o ge rum gen ki yuu-ɑ yodii. Møg-ɑ pëddi døøjø kì kelli gen, pɑ̈r ki thïm koodh. Møg-ɑ døøj cɑrø kì kelli gen pɑ̈r ki lum me ngɑ̈dø ki ji. Cyɑ̈ng-ɑ ócɑɑy ji yi Jwøk ɑ́bï, ni kɑ ɑ́köbbi gen yi jɑl-ɑ kwɑy gen, ɑ løg jɑltöng. Anɑn wɑ̈thi gen ɑ́cungi. Yï ko yïëy ki kwøbbi wɑɑd wun. Mɑ̈dhí ko gɑ̈nní. Korrí dhøgí cɑgg e bɑ cyëgí ɑ kööbø ki yïn. Kì yethi cyɑ̈nggɑni, ji ógwøøg dhëgg yi nyigi gen. Womɑ̈nn ópëmø ki dhøggi mëëg gen. Kɑ mɑ̈nn-ɑ thønhø nyi ceg-ɑ wërø ki mëëg cwøwi gen; ngeti mɑ̈ni dhɑnhø bɑ ngeti gøl gen. De yɑ ónenn-ɑ yï Jwøng-ɑ Ácwɑ̈ɑ̈j; yɑ ónenni yï Jwøk, mɑ́ yɑ rum yïëyø kinni yɑ óyiel yi en. Kwɑ̈jjɑ ólïngi yi Jwøgɑ. Bong gïn pere thwøg tyëngmɑ̈ɑ̈nø. Wø ɑ́ceg-ɑ pɑ̈ɑ̈dhø, de wø ódhwödh këti. Wø pɑ̈r ki ji mø ying yij muudhø ɑnɑn, de wø óthödhi ki cɑr yi Jwøng-ɑ Ácwɑ̈ɑ̈j. Wø ɑ́røngi kì bøli Jwøng-ɑ Ácwɑ̈ɑ̈j, o pyëwe rɑɑj ɑnɑn, de cɑ́yi wøn ceg kɑ yïëyø yi wøn ceth, gïti keny-ɑ ólidhe kwøbbi wøn, kɑ bɑ̈jjø løge dyër. Wø ókɑ̈ɑ̈le yij cɑr, wø óngïnø ceth gïti keny-ɑ óyiele wøn. Codhe, o tyëngmɑ̈ɑ̈nø lïdhi gen ki ɑyɑ̈ɑ̈r gen. Tyëng-ɑ ɑ́köbbi wøn kinni, “Ágøne Jwøng-ɑ Ácwɑ̈ɑ̈j, Jwøøg wun?” Ge ólɑr yi wøn. Kömi gen ócyɑ̈dhi ni gøngì kì yethi yëëth. Tyëng Yerusɑlem, bøli keny-ɑ ódøøg dörri kɑɑl wun ki gerø këti ɑ́bï. Pödhi wun ódøngi kì bøli kenyɑni. Jii wun ódwöög yï wun ge kɑ̈ɑ̈l-ɑ wɑ̈thi tùng bënn. Ge óbï ge kɑ̈ɑ̈l-ɑ Acuur kì wɑɑng cyɑ̈ɑ̈ng mwøl, kí Rïp kì wɑɑng wurlwɑl, kí myërr-ɑ kömi Nɑm Porɑt, kí kömi nɑ̈mmi omelø møg-ɑ lɑ̈wi, kí ngɑ̈thi kïttì. De piny ógöögø ki ryɑng yi gööj orøøg ji-ɑ bëëdø kì yije. Kwɑy jií, kwɑy ji-ɑ ɑ́yieny yi yïn, yïn ɑ Jwøng-ɑ Ácwɑ̈ɑ̈j, cɑgg ge ying yij thïm ɑnɑn, keny me cyɑ̈ɑ̈m ki lum nud kì bɑdhhi gen. Wiy ge cɑ̈mmi gen Bɑcɑn kì Gilyɑd, ni kɑ ɑ́bëëd gen kɑ̈ge dööng. Göög ki gïïngɑ̈ngø, yïn ɑ Jwøng-ɑ Ácwɑ̈ɑ̈j, ni kɑ ɑ́göög kɑ̈ge dööng, keny-ɑ ɑ́kɑ̈ɑ̈l wøn wɑ̈g kì Rïp. Jurr-ɑ kyeelø ri gen pɑ cigi gen lejjø, keny-ɑ óliidh gïïngɑ̈ngø møgɑni yi gen, cɑgg tegi gen dwøng ni ngø! Ge óbëëd ge yɑ̈rø, dhøggi gen pɑ tug yi gen, nyingi gen ókum yi gen. Ge ómulli kì piny yij tør ni thöllì, ge óbï wɑ̈g kì yethi dörri gen dëlli gen okïrrø. Ge ódwöög kö Jwøng-ɑ Ácwɑ̈ɑ̈j Jwøgee, ge ceg-ɑ böggø. Bong Jwøk megø me ni yïn, yïn ɑ Jwøng-ɑ Ácwɑ̈ɑ̈j; orøøg tyëng-ɑ ɑ́bødh ɑ́lɑ̈ɑ̈ny yi yïn. Pyëwí pɑ nyi cög e rɑɑj ki gen kipe orøøg gen. Yï pɑ nyi mïdhi ki ɑter, de pyëwí med ki wøn, kɑ wø nyi nyudhí mɑ̈ɑ̈dø mií men-ɑ pɑ nyi lwënyi. Pyëwí ócigi lɑ̈ɑ̈mø ki wøn, orøøg wøn óywööny yi yïn piny ki tyellí, kɑ luudh yi yïn tyeli nɑm thɑ́ pï. Tɑri pyëwí geki mɑ̈ɑ̈dø mií men-ɑ pɑ nyi lwënyi, ɑ́nyudhí jií, ɑ løg kwɑrri Abrɑhɑm geki Yɑgob, ni kɑ ɑ́köbbí kweyyi wøn kɑ̈ge dööng. Men bɑ wööni Jwøk kipe Ninɑwɑ̀, møgɑni ɑ́nyudhi Nɑum jɑl Elköc ge nɑ lɑ̈g. Jwøng-ɑ Ácwɑ̈ɑ̈j bɑ Jwøk me pëddi ki ɑter, tyëng-ɑ bɑny kwøbbe nyi cɑye’ cɑyø; tyëngmɑ̈ɑ̈nø nyi cɑye’ cɑyø ki rɑ̈ji pyëwe. Jwøng-ɑ Ácwɑ̈ɑ̈j pyëwe pɑ nyi jwɑn rënyø, o yïe dɑ tegø me dwøng, o ngɑn-ɑ ɑ́bɑ̈jji pɑ nyi wiy yi en gø pɑ cɑye. Keny-ɑ cyɑ̈dhi yi Jwøng-ɑ Ácwɑ̈ɑ̈j, nyi kwödd-ɑ yi ɑtunø, o pøøl bɑ tør tyelle. Nɑɑm omelø nyi köbbe köbbø kɑ othwøwø kɑ nɑ̈mm-ɑ thønhø gï nyi göjje dwönø. Piny Bɑcɑn ɑ́thwøw. Kïti Kɑrmel ɑ́göög ki ɑyɑw, kɑ okøggi Lubnɑn othøø. Kïtt-ɑ døngø nyii kïïrø kì bøle, kɑ kïtt-ɑ thønhø onøyø kì bøle. Piny nyi ceg-ɑ onhɑ̈nh kenyi bëën Jwøng-ɑ Ácwɑ̈ɑ̈j; kömi piny kí ji-ɑ yije bënn ceg-ɑ kïïrø. Á men ɑ cuggi cung kì bøle, kɑ̀ rënyi pyëwe ki menteg? Linye lyel nɑ mɑc, kɑ tuggì nyi nyønge, kɑ ge ogöögø ki búr. Jwøng-ɑ Ácwɑ̈ɑ̈j døj, jie nyi kore korø kì cyɑ̈ɑ̈ng rɑj, tyëng-ɑ nyi yömmi yïe, nyi kongge’ konggø. De tyëng-ɑ nyi pëmø, ómud yi en ki bɑɑyø, tyëngmɑ̈ɑ̈nø ócyeede yij muudhø. Á kipe ngø ɑ nywɑ̈ggu dhøggi wun Jwøng-ɑ Ácwɑ̈ɑ̈j? Wu ónɑ̈g yi en. Bong ngɑn nyi pyem dhøge ki tyel mø gïïr. Wu órɑ̈b yi mɑc ni koodh geki lum-ɑ thwøwø! Ninɑwɑ̀, yijí ɑ́bëën wɑ̈g yi dhɑnhø me yije pɑ̈ng yi rummì, men gøggi gïgrijjø, me rumø kipe göggi Jwøng-ɑ Ácwɑ̈ɑ̈j ki rɑj. Jwøng-ɑ Ácwɑ̈ɑ̈j jie, tyëng Isrɑil ɑ́köbbe kinni, “Cɑgg ɑ́ kɑ̀ bëëd tyëng Acuur ge teg, o ge gïïr, ge ótyëg ki nɑ̈gø. Wun ɑ jiɑ, wu ɑ́göjjɑ orɑng me dwøng, de wu pɑ cigɑ cɑyø. Anɑn ɑcebbi Acuur ókɑ̈ɑ̈lɑ wɑ̈g kì muddi wun, wu ógöönyɑ wɑ̈g kì yethi töjjì.” Møg-ɑ ɑ́kwøb yi Jwøng-ɑ Ácwɑ̈ɑ̈j kipe tyëng Acuur ek: “Yï gen óbong kwɑrr møg-ɑ ólɑg kɑ̈jji gen. Ngïjji jwöggi gen møg-ɑ yethi kenggi gen órënyɑ. Acuur ógwøøgɑ ɑ́ rörri ji, mɑ́ e pɑ myëër ki bëëdø e onëënø.” Ngeti wöödø ɑ bï ɑcɑ̀, e cyɑ̈dh-ɑ́ɑ̀ wɑ̈thi kïttì, e kɑ̈ll-ɑ wöndøj! Bï-ɑ be kwøbi wööni tyɑ̈mø! Tuug yïn ɑ Yeudiyɑ̀, gwøg møg-ɑ ɑ́köngí Jwøk cøn, mɑ́ kömí pɑ cigi pɑ̈ɑ̈rø yi tyëngrijjø. Ge ɑ́thumi kinni tweet! Ninɑwɑ̀ kömí opɑ̈ɑ̈rø! Ngɑn-ɑ yïe di teng-ɑ kedhhi yïn ɑ́wɑ̈nhi, Göög ki dör mø korrí rií! Kor yöö! Cwed rií kipe liny! (Jwøng-ɑ Ácwɑ̈ɑ̈j køm-ɑ dhwɑ̈ɑ̈ng Isrɑil dwöögø, o døøge keje ni kɑ ɑ́bëëde e nuti yɑgø yi tyëngmɑ̈ɑ̈nø.) Liny tyëngmɑ̈ɑ̈nø köddi gen bɑ didïggì o ge rug-ɑ ógudh mø kwɑrø. Ri gen tyeeny gen kipe liny! Yɑ̈thi liny mø gen mëënyø nɑ mɑc! Kyënyi gen ceg-ɑ otɑ̈m kipe liny. Yɑ̈thi liny mø gen cørr-ɑ yethi yëëth, ge nyi rengi gen, o ge nyi dwöög gen kì yethi ódɑ̈rri kɑɑl. Ge mëënyø nɑ ɑ́menyø, ge ceg-ɑ ogwel ni mɑl. Rɑ̈ɑ̈dh Acuur jyɑ̈gge ɑ́cwøle, ge ɑ́bï yïe ge ócyerrø. Tyëg ɑ́jwɑni kömi döri kɑɑl kɑ ge cïb-ɑ piny ki gënggi ngyënyø møg gëng gen ri gen. Ótïngø ɑ́mög, gøldwøng yije ɑ́pɑ̈ng yi wɑ̈ɑ̈rø Bɑ̈rɑ̈dh ɑ́kɑ̈l ɑ́ ɑmɑg, de bɑ̈ngge, bɑ̈ngg-ɑ mɑ̈nn ywøg-ɑ gøn, ge lengg-ɑ ri gen kì piny. Ninɑwɑ̀ nɑ luy me pïge rengi wɑ̈g, kɑ ɑ́rengi jie wɑ̈g, ge ócwølle kinni, “Cungi wun! Cungi wun!” De bong ngɑn-ɑ ólïïdh ngɑ̈je. Yɑg wun ɑ́tegø! Yɑg wun dhɑb! Kɑɑlɑni kɑ̈re bong cöge! Ninɑwɑ̀ ɑ́rënyi, ɑ́döng ɑ́ ryɑng! Ji ɑ́nɑ̈g yi wɑ̈ɑ̈rø, dëlli gen ceg-ɑ kïïrø, bong tegø kì yï gen këti. Ágøne Ninɑwɑ̀, kɑɑl-ɑ ɑ́bëëd e nɑ ød ngurrì, keny-ɑ́ yije ɑ́piidh nywøli ngurrì kun nyi kedh yi thwøønh ngur geki mɑdhe e bong gïn tɑg yi gen kipe nyigi gen? Ngur nywøle ɑ́mɑ̈gge ki lɑ̈yy, cyëge ɑ́mɑ̈gge thyew, øde pɑ̈ng yi rïng. Wïlɑ̈bø Jwøng-ɑ Ácwɑ̈ɑ̈j okööbø kinni, “Yɑ bɑ ngɑn mɑ̈n ki yïn! Yɑ̈thi linyí rɑ̈bɑ’ rɑ̈bø, jølinyí ónɑ̈g kì yij liny. Jɑmm-ɑ ɑ́kwɑny yi yïn kì yï tyëng-ɑ kyeelø kwɑnyɑ’ kwɑnyø. Kwøbbi tegí pɑ cigi lïngø këti kì kömi piny.” Yï ɑ́cyen, yï pödhi remø, pönh-ɑ pɑ̈ng yi jɑmmi kɑ̈b, ɑ pɑ nyi wïyi ki nɑ̈g! Lïngí ywøøg dël kɑ̀ ceme cwiiy, kí tyelli yɑ̈thi liny kɑ̀ kɑrri gen, kí tyelli kyënyì kɑ̀ tungi gen, kí otɑ̈ɑ̈r yɑ̈ɑ̈th. Lidh jøliny pil kɑ̀ rɑ̈ngi pilli gen, kí tøngg kɑ̀ gwelli gen! Tyëng-ɑ ɑ́nɑ̈g, ge óröör piny ge pɑ cuggi kwɑnø, o ge cwɑnyy-ɑ tyelli ji. Ninɑwɑ̀ cɑy yi Jwøk kɑ per kɑ ɑ́bëëde ɑ́ ngɑn nyi niin ki köögi. Thɑbb-ɑ ji ki thyënh rɑj, pödhh ɑ́gwøge gïn ɑ́ bɑ̈ngge ki thyëdhe Jwøng-ɑ Ácwɑ̈ɑ̈j okööbø kinni, “Yï cɑyɑ’ cɑyø, Ninɑwɑ̀! Ógudhí ówɑ̈ɑ̈dɑ wɑ̈g kì rií, o yï nenni yi pödhh yï cyɑ̈dh-ɑ nøw, o ɑyɑ̈rí lidh yi gen. Yï ócödh yi yɑn, yï óyɑ̈r yi yɑn, yï ówëggɑ ywørø yi ji. Ngɑn lidh yïn wïje óløg yi en. kɑ okööbø kinni, ‘Ninɑwɑ̀ ɑ́rënyi! Á men ɑ yije óywöngi kipere? Á men ɑ dwɑddi lugii?’ ” Ninɑwɑ̀, yï lɑ̈w kibøli Theybɑ̀, kɑɑl-ɑ jyɑ̈ɑ̈g kì Rïp? Kɑɑl-ɑ ying kömi Kiir, ɑ ótyegø yi pï, e kor-ɑ yi nɑm, pïge bene gen döre? Kɑɑl-ɑ jɑɑg Kuc geki Rïp, kí tegø me bong cöge. O nyii kønyø yi Lïbiyɑ̀. De cɑgg ɑ́ kinøw, jie ɑ́køøl yïnø. Kɑ nyige pöddi kì yethi yëëth bënn. Kɑ ge køm-ɑ thøø. Pëjje ɑ́køøl gɑ ɑtwöj ki ɑ́cwecwel, kɑ ge pɑ̈ngi kì kelli tyëng-ɑ ɑ́mɑg gen. Ninɑwɑ̀, yï ólunyi ki pɑ̈ɑ̈dhø, rií ópɑ̈nyí ki rengø keny-ɑ ócyeddi yïn yi tyëngmɑ̈ɑ̈nø. Dörrí, dörr-ɑ kor yïn ópɑ̈nhi ni kenyi dyëm nywøli ólɑm møg-ɑ cyegø ge dyëëm-ɑ dhøg ngɑn-ɑ nïngi ólɑmɑni! Lidh jølinyí kɑ̀ böggi gen ni tyëng-ɑ mɑ̈nn, thïggi dörrí órɑ̈b ki mɑc. Yëggi piny ki pï kɑ̈ng-ɑ nuti tyeeg yïn, ger kɑ̈jj-ɑ mïdhi dörrí, pɑ̈ɑ̈m ki thob, mɑ̈ɑ̈g jɑmm-ɑ nyi cwɑ̈ɑ̈j thob ki gwirø! Yï órɑ̈b ki mɑc, yï ónɑ̈g ki pilø, yï óni byel møg-ɑ ócɑmø yi bɑ̈nyø. Yï ɑ́ngënyi ni bɑ̈nyø! Jøngyew møgí ɑ́ngënyi kibøli kyelli mɑl! De ɑnɑn ge bong gïn. Ge ɑ́pɑ̈r ni bɑ̈nyø kenyi peere obërre, kɑ opɑ̈ɑ̈rø. Nyiirɑ̈dhhí geki pëjjí nɑ bɑ̈ny-ɑ nyi bëëdø kì kelli dörri lɑ̈bø møg-ɑ ógeer pwödhhi wun, kì dicyɑ̈ng-ɑ bëëd piny olïbø. De kɑ̀ yeer cɑ̈ng, ge nyii pɑ̈ɑ̈rø, kɑ bong ngɑn ngɑ̈nyi kun-ɑ ɑ́kedhi gen! Rɑ̈nhdwøøng Acuur, jɑggi myërrí thøø, o jøgdøngi pödhí ɑ́dhɑ̈li cyëwø! Jií ɑ́tɑɑy kelli kïttì, o bong ngɑn cøng gen. Kɑ̈jj-ɑ ledh kì rií pɑ nøggi, tyëng-ɑ ólïngi wöddi rënyí, cinggi gen óteng yi gen ki medi pëthi gen. Dɑ ngɑn mɑ ɑ́cög e nuti nywɑlø yi rɑjj-ɑ ɑ́gøggi yi yïn? Møg bɑ kwøbb-ɑ ɑ́cɑ̈rri Abɑkuk, jɑltöng yi Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j, yɑ gït-ɑ wɑɑng yɑ ywøøg-ɑ köörí kipe ruj, de yï pɑ yïëdø? Yɑde ɑ wëggí yɑn lidhi rɑjj-ɑ ni møg? Yïde ɑ cungí yï nenn-ɑ rɑj geki ruji ji? Rɑj kí ruj ying-ɑ bølɑ. Ryɑ̈g kí wëërø pɑth ki gïn ni ngø! Cigg pɑ 'göög, bong dyër me nud. Tyëngtir bɑ ɑwen yi tyëngrijjø. Kì bɑng menɑni, cɑ́y pɑ nyi pɑ̈dhi kɑ̈jji gen. Codhe, ɑköbbi ji yi Jwøng-ɑ Ácwɑ̈ɑ̈j kinni, “Nenni wun pödhh-ɑ buti wun, wu óngɑ̈ng yi gïn-ɑ óløøg yi yɑn, yɑ ógöögø ki gïïpiny me koo yïëy yi wun keny-ɑ ólïngu en. Tyëng Bɑbïl ótug yi yɑn, eni pönh-ɑ keej, pönh-ɑ jwɑni kì yij piny, o kwɑnye pìny mø pɑth ki møge, pönh-ɑ ceg ki böggø, e tɑ̈dø, cigge ying-ɑ cinge. “Kyënye nyi yöm-ɑ kwɑ̈nyì, ge pëddi rɑ̈jø kibøli gøøl mø ri gen di kɑ̈j. Jøkyënye rïngi ge tɑ̈dø, ge kɑ̈ɑ̈l-ɑ kun lɑ̈wi, ge pɑ̈rri nɑ cør mø dwɑddi cwøøy kömi gïn nɑ̈g ɑ́ men cɑm. “Liny gen bï-ɑ be mød ki ji, ji ɑ́nɑ̈g yi wɑ̈ɑ̈rø, ge nuti wɑ̈nhø. Tyëng-ɑ ɑ́mɑg yi gen nɑ tør. Rɑ̈nhì kí jɑgg ceg kɑ gɑggø yi gen. Bong dörø me thøø yi gerø me cuung gen, ge nyi rörr-ɑ piny ki lɑ̈bø kì buti döre, kɑ kɑɑlɑni mɑg gen. Codhe, o ge ruur gen yije ni ɑtunø, jøgɑni tegø mi gen bene Jwøøg gen.” Jwøng-ɑ Ácwɑ̈ɑ̈j, bene yïn ɑ bɑ Jwøk kër-ɑ ɑ́cɑ̈gi piny. Yï bɑ Jwøgɑ, yï bɑ kwërø gïti ɑtheer. Jwøng-ɑ Ácwɑ̈ɑ̈j yïn ɑ ɑ́yïëy tyëng Bɑbïl, kɑ ge thödhí ki tegø kipe kinni o wø cɑy yi gen. Yï bɑ kwërø, o pyëwí pɑ nyi yïëy ki nenni ruj, de yïde ɑ nenní tyëngrijjø, yïde ɑ kud kɑ̀ nɑ̈ɑ̈g tyëngtir yi gen? Gede ji ɑ gwøøg gen ni rijji nɑm, wɑlɑ̀ ni twöngg-ɑ bong jɑngi gen me nyudhi gen? Ji ceg yi tyëng Bɑbïl kɑ ɑ́bɑ̈dhh ni rij. Gï ywɑjji gen kɑ bøyy, ge ceg-ɑ ryeerø, pëthi gen ceg-ɑ medø! Bøyyi gen ceg kɑ mɑllø yi gen, gï ɑ́thödhi gen ki gëdhhì, kɑ gï rɑ̈bbi gen ki bɑkur, mɑ́ ge ɑ́thödhi yi bøyyɑni ki bëëdi medi pëëth, ge cɑm-ɑ gïgdøj. Ge ócög ge mɑng-ɑ ji ki bøyyɑni, e pëthi gen pɑ lɑ̈ɑ̈m ki nɑ̈gi ji gïti ɑtheer? Yɑ óyedhi mɑl øn-ɑ nyi kurɑ, o yɑ lidhɑ gïn-ɑ óköbbi yɑn yi Jwøng-ɑ Ácwɑ̈ɑ̈j, ki lögg-ɑ óløøge gønyɑ. Aløøg kwøbbɑ yi Jwøng-ɑ Ácwɑ̈ɑ̈j kinni, “Gweed møg-ɑ ɑ́cɑ̈rri yïn kömi gïïpiny, gwed gen ge ónënnø, o ge cuggi gen ki jwɑnø ki rɑngø, mɑ́ kwøbbɑni ópɑ̈dhi kɑ̈jji gen kì bøli keny-ɑ dwɑddi. De bøli kenyɑni ójwɑn bëënø kɑ møg-ɑ ɑ́köbbɑ yïn obëënø gɑ dyër. Cɑgg ge cwööng, yïd yøw, mɑ́ ge bɑ møg-ɑ ópɑ̈dhi kɑ̈jji gen ceth, ge koo ti cwöngø. Wöönɑni bɑ kinni, ‘Tyëngrijjø koo bødh, de tyëngtir óbødh, mɑ́ ge ngɑ̈dh-ɑ Jwøk.’ ” Møgø nɑ medi tyɑ̈mø kì yï ngɑn wïje tɑ̈dø, ree pɑ ywöm yi en. Pyëwe lɑɑj nɑ pyëw thøø; pɑ yɑ̈ng. Pödhh bënn nyi cunge’ ree, kɑ ji bënn cønge gïn-ɑ́ møge. Bøli keny megø óbï men-ɑ ógɑggi tyëng Bɑbïl yi tyëng-ɑ ɑ́mɑg yi gen. Gï óköbbi gen kinni, “Cyën ying-ɑ kömi tyëng-ɑ ɑ́congi jɑmm-ɑ pɑth ki mø gen! Wu gït-ɑ wɑɑng wu cïrr-ɑ ji cudi wun ki jɑmmì, kipe kinni o wu kɑ̈ri wun.” Tyëng-ɑ ɑ́mɑg yi wun ri gen koo jwɑn yi gen ki lugi wun? Wu koo døøg be böggø yi gen? Jɑmmi wun koo lony yi gen ki kɑbø? Mɑ́ pödhh møøgø mø gïïr ɑ́mɑg yi wun, tyëng-ɑ ɑ́bødh ócudø ki gøølø, eni gøøli tyëng-ɑ ɑ́nɑ̈g yi wun kì yethi kɑ̈ddɑni bënn. Cyën ying-ɑ kömi tyëng-ɑ ɑ́wëggi kɑ̈lli gen kɑ̈rø yi jɑmmi kɑ̈b kí ruj, kɑ ge ogëdø ki kɑ̈jj-ɑ døj, kipe kinni o bëëd e bong rɑj møg wɑ̈nhi yï gen! De kɑ̈lli wun ɑ́yɑ̈r yi wun ki nɑ̈gi ji mø gïïr yi wun, ri wun ɑ́rënyi wun. Cɑgg ɑ́ kïtt-ɑ ógeer dör óceg kïïwø, kɑ ɑ́lɑngi cwɑggi gen nyi gɑm yi yenh-ɑ ógeer tɑnø. Cyën ying-ɑ kömi wun, wu tyëng-ɑ ɑ́ger kɑɑl ki remø, kɑ kyer yi wun ki pödhh-ɑ gøggi gïgrijjø. Bɑ Jwøng-ɑ Ácwɑ̈ɑ̈j ɑ ɑ́wëggi tyëng-ɑ ɑ́mɑg yi wun pïdø yi gwøg, e bong gïn yod yi gen kì bɑng gwøngɑni. Kɑ gïg-ɑ ɑ́ger yi gen bënn rɑ̈b. Piny ópɑ̈ng yi döngi dhwɑ̈ɑ̈ng Jwøng-ɑ Ácwɑ̈ɑ̈j ni kenyi pɑ̈ng nɑɑm omelø yi pï. Cyën ying-ɑ kömi tyëng-ɑ ɑ́wëggi cyerrø yi yïn kì yij linyí, ni tyëng-ɑ ónɑ̈gø yi møgø. Yï ólunyi ki yɑ̈rø ki mendwøng, kibøli ke di thödhi yïn ki dhwɑ̈ng. Yï ónɑ̈g yi møgø. Jwøng-ɑ Ácwɑ̈ɑ̈j yï ócɑye ki cɑ́y mø døngø, kɑ dhwɑ̈ngí ree løge ɑyɑ̈r, mɑ́ møn-ɑ ɑ́mød Lubnɑn ceg kɑ lonyø ki belø yi yïn thyew. Lɑ̈yye ɑ́nɑ̈g yi yïn, de yï ókölli böögø yi lɑ̈yy ɑnɑn. Møgɑni bɑ kipe ji-ɑ ɑ́nɑ̈g yi yïn, kí rɑjj-ɑ ɑ́göggí ji-ɑ ɑ́bëëd kì pinyɑni kì yethi kɑ̈ddɑni. Á gïn ɑ døj kì ri ngïji? Bɑ gïjø mɑ ɑ́cwɑ̈j yi dhɑnhø, o pwöny-ɑ pyed yøw. Bong gïndøj me gögge ngɑn-ɑ ɑ́cwɑ̈jii, eni jwøng-ɑ pɑ kööbø. Cyën ying-ɑ kömí! Yïn ɑ nyi köbbi gïn-ɑ ógwøgø ɑ́ yɑdh kinni, “Cyëëw!” Wɑlɑ̀ ɑ nyi köbbi tungi kït kinni, “Dhwödhí mɑl!” Yï ócuggø nyudhø ki kwøb yi ngïji me köme ómwønø ki dhɑb, wɑlɑ̀ ki ɑ́tegø, o bong wëy kì ree? De Jwøng-ɑ Ácwɑ̈ɑ̈j ying-ɑ yij Kengi kwëre, wiy ji bënn kud gen kì bøle. Men bɑ kwɑ̈jji Abɑkuk, jɑltöng: Jwøng-ɑ Ácwɑ̈ɑ̈j, per gïg-ɑ ɑ́gwøg yi yïn cøn ɑ́lïngɑ, kɑ yɑ obwøgø ki mendwøng. Jølí møg-ɑ ɑ́gwøg yi yïn cøn, jølí gen kì bøli keny-ɑ di wøn èn. Lɑ̈ɑ̈m pyëwí cɑgg yï ómɑgø yi liny. Jwøk cig-ɑ bëënø e kɑ̈ɑ̈l-ɑ Edöm, Jwøk kwërø kɑ̈ɑ̈l-ɑ Kïti Pɑrɑn. Mɑl ɑ́rïïm yi cɑre kí dhwɑ̈nge, o piny ɑ́pɑ̈ng yi lenhe. Bï cɑre omënyø ni mɑl, cɑr ceg-ɑ rɑ̈ɑ̈dø kì cinge, keny-ɑ yije ókɑɑn tege. Yømø nɑ̈ɑ̈g cyɑ̈dh-ɑ́ɑ̀ bøle, o thøø lug-ɑ́ɑ̀ bɑnge. Acunge kɑ piny onhɑ̈nhø, ɑ́lïdhi kɑ ji okïïrø. Codhe, kɑ kïtt-ɑ weenø ókedhhø, kïtt-ɑ ɑ́wöni cøn ɑ́ludhi piny, gen ɑ kïtt-ɑ́ kömi gïn nyi cyɑ̈dhe cøn. Tyëng Kucɑn ɑ́lidhɑ ge bwøgø, o tyëng Midyɑn dëlli gen okïrrø. Bɑ nɑ̈mmì ɑ ɑ́wëggi yïn mɑgø yi liny, Jwøng-ɑ Ácwɑ̈ɑ̈j? Bɑ nɑɑm omelø ɑ ɑ́wëggi yïn mɑgø yi liny ki menteg? Yï ɑ́cyɑ̈dh ɑ kömi pøøl, yømø bene yɑ̈thi linyí, møg-ɑ nyi thödhí jií ki tyɑ̈mø. Rií ɑ́tyeeny kipe göjjø ki wethí yï køm-ɑ dyëddø ki nywøli wethí. Piny ɑ́pyëëd yi gen. Kïttì ɑ́kïïr keny-ɑ ɑ́liidh yïn yi gen, pï ɑ́dyëm kì mɑl. Pïg-ɑ thɑ piny ɑ́ruur, kɑ ɑpɑgi gen wɑ̈dh-ɑ mɑl Keny-ɑ ɑ́rɑ̈ɑ̈d nywøli wethí møg-ɑ pëddi rïngø, kɑ tøngí ogwelø, ɑcungi dwɑ̈y geki cɑ̈ng kì kɑ̈jji gen. Yij piny ɑ́bɑ̈ɑ̈n yi yïn e pyëwí rɑɑj, kɑ pödhh nyøn yi yïn. Yï óbï be yieli jií, geki rɑ̈dhí, rɑ̈nh-ɑ ɑ́yieny yi yïn. Pënyi tyëngrijjø ɑ́dhur piny yi yïn, kɑ jøbɑnge bënn nɑ̈g yi yïn. Jɑngi jølinye ɑ́cwøøb ki tøngí, keny-ɑ ɑ́bëëne ni yømø, e bï-ɑ be kedhhi wøn, e pëthi gen med ni ngɑn mød ɑbuur kì gød. Nɑɑm omelø ɑ́bɑ̈ɑ̈n yi yïn ki kyënyí, kɑ pïge wëggí othung ki óböy. Møgɑni ɑ́lïngɑ bënn, kɑ dëlɑ okïrrø, kɑ leggɑ ceg-ɑ oden yi wɑ̈ɑ̈rø. Dëlɑ ɑ́ceg ì lɑ̈b, kɑ tyellɑ cwɑnyyɑ. Yɑ ópëggi be yïd yøw kì bøli keny-ɑ ócɑɑy tyëng-ɑ ɑ́pɑ̈ɑ̈r kömee yi Jwøk. Cɑgg ɑ́ kɑ̀ pɑ nywøl ólɑm, o oløg bong nywøl kì kööre, cɑgg ɑ́ kɑ̀ rënyi dhetun, o bong byel mø cyeg kì yethi pwödh, cɑgg ɑ́ kɑ̀ thøw dyëg bënn, o bong dhög kì yethi lwɑ̈gg, pyëwɑ óbëëd e omedø, mɑ́ Jwøk, Jwøng-ɑ Ácwɑ̈ɑ̈j en ɑ bɑ yïënɑ. Wïlɑ̈bø Jwøng-ɑ Ácwɑ̈ɑ̈j bene tegɑ, tyellɑ nyi gwøge’ gwøgø ge teeg ni tyelli ɑ́køny o yɑ cuggɑ yïdhø kì kömi kïttì. Men bɑ wööni Jwøng-ɑ Ácwɑ̈ɑ̈j men-ɑ ɑ́cɑ̈rri Dhepɑniyɑ̀ wɑ̈d Kucì, wɑ̈d Gedɑliyɑ̀, wɑ̈d Amɑriyɑ̀, wɑ̈d Kedhekiyɑ̀. Bɑ kì ri Rɑ̈dh Yöciyɑ̀ wɑ̈d Amön, rɑ̈ɑ̈dh Yeudiyɑ̀ ɑ ɑ́mëggii wöönɑni. Jwøng-ɑ Ácwɑ̈ɑ̈j okööbø kinni, “Jɑmmi kömi piny bënn nɑ̈gɑ’ nɑ̈gø; gen ɑ ji kí lɑ̈yy, kí winy, kí rij bënn. Tyëngrijjø cɑyɑ’ cɑyø. Dhɑnhø bëne nɑ̈gɑ’ nɑ̈gø, bong gïn döng. Yɑ Jwøng-ɑ Ácwɑ̈ɑ̈j, yɑ ɑ́rum ki kwøb. “Tyëng Yerusɑlem cɑyɑ’ cɑyø, geki tyëng Yeudiyɑ̀ bënn. Tyëng-ɑ mɑlli Bɑɑl nɑ̈gɑ’ nɑ̈gø bënn, bong ngɑn-ɑ ópɑrri ókwërri jwögg-ɑ pɑth. Kí tyëng-ɑ nyi yedhi wɑ̈thi ud be mɑlli cɑ̈ng kí kyell. Kí tyëng-ɑ nyi mɑlli yɑn, kɑ ge nyii köngø ce yïëyi gen ki yɑn ómïdhi yi gen, de ge nyii døøgø ki köngø ki nyingi jwøg Mölek. Kí tyëng-ɑ ɑ́døøg cyɑ̈n, kɑ ge ówïyø cyɑ̈dhø kì bɑngɑ. Kí tyëng-ɑ ɑ́wïyi ki pyëji yɑn kinni o ge nyudhɑ yuu-ɑ bɑ dyër.” Cyɑ̈ng-ɑ ócɑɑy ji yi Jwøng-ɑ Ácwɑ̈ɑ̈j ɑ́cyɑ̈ngi, bëëd wun wu okudø kì bøle. Jwøng-ɑ Ácwɑ̈ɑ̈j gwir-ɑ ree kipe muuji jie gɑ gëdhhì, tyëngmɑ̈ɑ̈nø kɑ̈ɑ̈le’ be mɑnyi Yeudiyɑ̀. Jwøng-ɑ Ácwɑ̈ɑ̈j okööbø kinni, “Kì cyɑ̈ɑ̈ng ngɑl menɑni, jɑggi mïïri ócɑy yi yɑn, geki nyiirɑ̈dhh, kí tyëng-ɑ nyi göögø ki kwöng-ɑ pɑth bënn. Tyëng-ɑ nyi mɑlli jwögg-ɑ pɑth ócɑyɑ, geki tyëng-ɑ nyi kwɑ̈dø, kɑ ge onɑ̈gø kipe kinni o ge pɑ̈ng gen kɑ̈lli gen ki jɑmmi kɑ̈b. “Kì cyɑ̈ngɑni, ywøg ólïngi kì Dhøg Rij kì Yerusɑlem. Akyew ólïngi kì budi kɑɑl, bun-ɑ nyɑ̈n, kí cwɑggi pɑ̈ɑ̈dhi gïïpiny me dwøng kí kïtt-ɑ thønhø kì Yerusɑlem. Ywöngi wun, kɑ wu kïïw wun, wu tyëng-ɑ bëëdø kì yij mɑ̈ɑ̈dø kì kɑɑl, mɑ́ jøngyew bënn ónɑ̈g! “Kì bøli kenyɑni, Yerusɑlem yije óyɑb yi yɑn ki lɑ̈mbɑ̈. Tyëng-ɑ mɑɑr ri gen, ge ngɑ̈dh-ɑ ri gen cɑyɑ’ cɑyø; gen ɑ tyëng-ɑ nyi köbbi ri gen kinni, ‘Jwøng-ɑ Ácwɑ̈ɑ̈j bong gïndøj wɑlɑ̀ gïnrɑj me nyi gwøge.’ Kɑ̈ɑ̈r gen ókɑb, kɑ uddi gen rënyi, cɑgg ge gëdø ki ud, ge koo bëëdø kì yethi gen, cɑgg ge pïdhø ki bɑ̈ggi oløg, møgi oløøg gen koo mɑdh yi gen.” Cyɑ̈ng-ɑ dwøng; cyɑ̈ɑ̈ng Jwøng-ɑ Ácwɑ̈ɑ̈j ɑ́cyɑ̈ngi; ɑ́cyɑ̈ngi ki mendwøng. Óbëëd ɑ́ cyɑ̈ng me rɑj, cɑgg ɑ́ jödd, ge ókïïwø kì cyɑ̈ngɑni. Cyɑ̈ɑ̈ng rɑ̈ji pyëw menɑni, óbëëd ɑ́ cyɑ̈ɑ̈ng orɑng me dwøng geki rɑj, cyɑ̈ɑ̈ng rɑ̈jø, cyɑ̈ɑ̈ng muunh-ɑ dwøng, cyɑ̈ɑ̈ng lojø, cyɑ̈ɑ̈ng pøøl. Cyɑ̈ɑ̈ng kɑng geki ɑkyeew liny me pɑ̈ɑ̈r kömi kɑ̈ddi dör, møg-ɑ wɑ̈thi gen di udd-ɑ nyi kur. Kì cyɑ̈ngɑni, Jwøng-ɑ Ácwɑ̈ɑ̈j ókööbø kinni, “Ji ógöjjɑ ryɑ̈g; ge óthɑ̈mmi ni cörr. Mɑ́ ge ɑ́røngi kì bølɑ, remmi gen ómulli ni pï, ge ókwɑ̈ɑ̈g piny.” Ge koo yiel yi dhɑb kí ɑ́tegø mø gen ki cyɑ̈ɑ̈ng rɑ̈ji pyëw Jwøng-ɑ Ácwɑ̈ɑ̈j. Piny bëne ócɑm yi mɑɑc linye. Tyëng-ɑ bëëdø kì kömi piny bënn ójwɑn yi en ki nɑ̈gø. Cøngu ri wun, wu pödhh-ɑ pɑ böggi ki ɑyɑ̈r, kɑ̈ng-ɑ nuti køøl wun yi yømø ni cong, kɑ̈ng-ɑ nuti bëën liny Jwøng-ɑ Ácwɑ̈ɑ̈j, liny-ɑ teg kömi wun, kɑ̈ng-ɑ nuti bëën cyɑ̈ɑ̈ng liny Jwøng-ɑ Ácwɑ̈ɑ̈j. Dwöög wun kö Jwøng-ɑ Ácwɑ̈ɑ̈j wu tyëng-ɑ bɑ mööl bënn kì yij pödhø, wu tyëng-ɑ mïdhi cigge. Gøggu dyër, kɑ ri wun dwöög wun piny kì bøli Jwøng-ɑ Ácwɑ̈ɑ̈j, o wu ócög wu pɑ cɑy kì cyɑ̈ɑ̈ng liny Jwøng-ɑ Ácwɑ̈ɑ̈j. Bong dhɑnhø men-ɑ ódöng kì Gɑdhɑ̀, o Ackelön óbëëd e lïïwø. Tyëng Acdöd ócyeddi kì dicɑ̈ng, kɑ tyëng Ekrön cyeed wɑ̈g kì kɑɑl gen. Wun ɑ tyëng Pelistiyɑ̀, cyën ying-ɑ kömi wun, wun ɑ bëëdø kì kömi nɑɑm omelø, cɑ́yi Jwøng-ɑ Ácwɑ̈ɑ̈j ying-ɑ kömi wun, wu nɑ̈ge’ nɑ̈gø; bong ngɑn döng. Yïn, yï piny kömi nɑɑm omelø, yï ógöögø yïn ɑ́ kej kwɑ̈yø, bɑ gewwi kwɑ̈yyì geki kyelli dyëg ɑ óying yijí. Kömi nɑm ókwɑny yi tyëng Yeudiyɑ̀ møg-ɑ óbødh, jɑmmi gen ókwɑy yi gen kì yije, o tyëng Yeudiyɑ̀ ónin kì yethi uddi Ackelön. Ge ómïdhi yi Jwøng-ɑ Ácwɑ̈ɑ̈j, Jwøøg gen kɑ gï wëgge døøgø dönyø. Wïlɑ̈bø Jwøng-ɑ Ácwɑ̈ɑ̈j okööbø kinni, “Tyëng Moɑb geki tyëng Amön ɑ́lïngɑ ge gwɑdd-ɑ jiɑ, o gï gɑwwi ge’ gɑwwø, ge othwøgø ce piny gïn kwɑɑny gen. Ni kɑ̀ bëëdɑ yɑn ɑ́ Jwøng-ɑ Nëënø ceth, Jwøøg Isrɑil, yɑ óköngi kinni, Moɑb geki Amön órënyi ni Sødømɑ̀ geki Gømørɑ̀. Ge ógöögø ki buur omelø, ge órënyi gïti ɑtheer. Yethi gen ótwïy yi lum. Ge óyɑg yi jiɑ møg-ɑ óbødh, kɑ pinyɑni kwɑny yi gen.” Bene kër-ɑ ócɑɑy tyëng Moɑb geki tyëng Amön ɑnɑn, kì bɑng tɑ̈dø geki ɑthwøg mi gen, kí kipe kɑ ɑ́yɑnyyi gen jii Wïlɑ̈bø Jwøng-ɑ Ácwɑ̈ɑ̈j. Ge ógöjji wɑ̈ɑ̈rø yi Jwøng-ɑ Ácwɑ̈ɑ̈j, jwöggi piny bënn ógwøge ge bong per gen, codhe o Jwøng-ɑ Ácwɑ̈ɑ̈j ómɑlli yi pödhh bënn, pönhï kì keje, keny-ɑ bëëde. Tyëng Kuc ówëggi nɑ̈gø yi Jwøng-ɑ Ácwɑ̈ɑ̈j thyew. Jwøng-ɑ Ácwɑ̈ɑ̈j tege óløge wɑɑng wuudø be rënyi Acuur, Ninɑwɑ̀ órënye, kɑ gø løge ryɑng me yije bong pï. Yije óbuud yi dyëg kí dhög kí lɑ̈yyi pɑ̈l bënn. Tulø óbëëdø kì yethi ɑrugge, ge óywöngi kì ɑwɑjje, cør kí ɑ́gɑ̈ggì geki cyëwwì óbëëdø kì yije. Yenh sɑndɑl møge ówøw. Bene gïn-ɑ óbï kömi kɑɑl-ɑ ɑ́thwøg kipe tege, ɑ rumø kinni bong rɑj møg cuggi bëën köme. Pönh-ɑ kööbø kinni i bong pödhø me pɑ̈ɑ̈r ki en kì kömi piny. Órënyi ki rënyi teg! Yije óbëëd yi lɑ̈yyi pɑ̈l. Ngɑn kɑ̈l yije óngɑ̈ng kɑ wïje kene. Cyën ying-ɑ kömi kɑɑl-ɑ mune teeg, ɑ cödhø yi orøg, kɑɑl-ɑ nyi guud nyingi jie, kɑɑl-ɑ pɑ nyi lïngi kwøbbi Jwøng-ɑ Ácwɑ̈ɑ̈j, kɑ̀ cege gøn. Jwøng-ɑ Ácwɑ̈ɑ̈j pɑ ngɑ̈dh yi en wɑlɑ̀ pɑ nyi cyɑ̈ngi kì buti Jwøge. Jyɑ̈gge bɑ ngurrì møg ngɑ̈rri kì yije, o jɑggi bure bɑ óthönhì mø ri gen di kɑ̈j, ɑ bong gïn nyi cɑm yi gen me nyi döng gïti mwøl. Jøtöng møge bɑ tyëngpyed, o pëthi gen dɑdɑɑr. Ókwër møge Kengø ɑ́bwöl yi gen ki pyemi cigg. De Jwøng-ɑ Ácwɑ̈ɑ̈j nudd e nud kì yije, e gøgg-ɑ dyër de pɑth ki rɑj. Gøggi dyër ying-ɑ keje kì mwøl yethi cyɑ̈ng bënn. Cɑgg ɑ́ kinøw, tyëngrijjø nudd ge gøgg-ɑ rɑj ceth, wɑ̈thi gen pɑ lɑ̈ɑ̈y. Jwøng-ɑ Ácwɑ̈ɑ̈j okööbø kinni, “Pödhh ɑ́nɑ̈gɑ bënn, kɑ̈ddi gen ɑ́rënyɑ; dörr-ɑ bɑ̈rrø mø kur ɑ́döng gɑ thur. Kɑ̈ddi gen ɑ́döng gɑ ryɑng. Yethi yëëth bong ji, bong dhɑnhø mɑ ɑ́döng. Arumɑ kinni jiɑ yɑ óböggi yi gen, kɑ cigg-ɑ ɑ́cegɑ gen lïngi yi gen, o ge cög gen ge pɑ cɑy yi yɑn këti. De ge ɑ́yöd ge nyi gøgg-ɑ orøg ceth, kì ri jɑmm-ɑ nyi gwøg yi gen bënn.” Wë okööbø kinni, “Yïdu cyɑ̈ng-ɑ ódhwödhɑ be gøønyi pödhh, o ge cøngɑ, o tegi linyɑ lidh yi gen, kömi piny bëne ócɑm yi mɑɑc keji linyɑ. “Codhe o ji wilɑ, o ge kwɑjji gen yɑn, yɑ ketɑ e bong jwøg megø. Ciggɑ ómïdhi yi gen. Cɑgg ɑ́ Kuc, pönh-ɑ lɑ̈wi; jiɑ, ji-ɑ tɑyø yɑ ómuuj yi gen ki gëdhhì. Kì cyɑ̈ngɑni wu koo yɑ̈r, kipe kɑ ɑ́pyem wun kwøbbɑ, mɑ́ ngɑn-ɑ óthwøg kɑ otɑ̈dø, ókɑ̈ɑ̈lɑ wɑ̈g kì kelli wun. O kwøbbɑ koo døøg ki pyemø yi wun kì kïti kwërɑ. Mɑ́ yɑ ówiy-ɑ tyëng-ɑ bɑ mööl, ɑ ri gen dwöög gen piny kì kelli wun, gen ɑ tyëng-ɑ nyi bï yïɑ be kønyø. Tyëng-ɑ óbødh kì Isrɑil koo røngø, o ge koo pëëdø, wɑlɑ̀ ge koo wënyø. De ge óbëëdø kì yij kɑ̈r geki døøjø, e bong gïn böggi yi gen.” Wör wun, kɑ wu ryeer wun ki medi pëëth, wun ɑ tyëng Isrɑil! Mïni pyëwí ki mendwøng, yïn ɑ Yerusɑlem! Jwøng-ɑ Ácwɑ̈ɑ̈j ɑ́wïyi ki cɑyi yïn, tyëngmɑ̈ɑ̈nø ɑ́nyiige kì butí. Yï omïdhø yi Jwøng-ɑ Ácwɑ̈ɑ̈j, Rɑ̈ɑ̈dh Isrɑil bong rɑj mø böggi yi yïn këti. Kì cyɑ̈ngɑni Yerusɑlem óköbbi kinni, “Yï ko böggi Dhɑyøn! Pyëwí ko nyönhi. Yï omïdhø yi Jwøng-ɑ Ácwɑ̈ɑ̈j, Jwøgí kɑ yï yiele, yï ówëggi tyɑ̈mø yi tege. Jwøng-ɑ Ácwɑ̈ɑ̈j pyëwe ómed ki yïn, yï óthödhi yi mɑ̈ɑ̈dø mee ki medi pyëw geki nënnì kɑ yï owörø ki medi pyëwí, ni kenyi mïni pëthi ji kì kej tugø.” Jwøng-ɑ Ácwɑ̈ɑ̈j okööbø kinni, “Ryɑ̈g ókɑ̈ɑ̈lɑ wɑ̈g kì kömí, kɑ ɑyɑ̈rí kɑ̈ɑ̈lɑ wɑ̈g. Kì bøli kenyɑni, tyëng-ɑ ɑ́guud wɑngí ócɑyɑ, ngöll bënn óyiel yi yɑn, tyëng-ɑ yïnø ókɑ̈ɑ̈lɑ pɑc. Ayɑ̈ɑ̈r gen óløgɑ dhwɑ̈ng, kɑ ge pøjji yi kömi piny bëne. Kì bøli kenyɑni, jií, ji-ɑ tɑyø ókɑ̈ɑ̈lɑ pɑc, perí ówëggɑ tëngø kì kömi piny bëne, kɑ yï wëggɑ døøgø dönyø.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Kì ryeew runni jyɑ̈gi Rɑ̈nhdwøng Dɑryøs, kì kyeel cyɑ̈nggi bïkyeel dwɑ̈tt, ɑ ɑ́öni Jwøng-ɑ Ácwɑ̈ɑ̈j ki wöödø e kwøbbɑni kwøb-ɑ yi Agɑy jɑltöng, e köbb-ɑ Dherubɑbïl wɑ̈d Ceɑltiel, jɑngi mïïri kì Yeudiyɑ̀, geki Jöcwø wɑ̈d Yödhɑdɑk Ókwër-ɑ Dwøng. Agɑy jɑltöng ɑ́köbbi yi Jwøng-ɑ Ácwɑ̈ɑ̈j kinni, “Ji møg okööbø i men pɑth ki bøli kej døøgi Kengø ki gerø.” Aköbbi Agɑy jɑltöng yi Jwøng-ɑ Ácwɑ̈ɑ̈j i köbbe ji wöödø men kinni, “Wun ɑ jiɑ, wude ɑ bëëd wun kì yethi ud mø thøø yi gerø, o Kengɑ bɑ thur? Gïg-ɑ nyi cwöb kiper wun pɑ nenni yi wun? Wu kɑ̈g-ɑ jɑmmì mø gïïr, de wu kɑj-ɑ mø nøg. Wu ocyɑ̈mø, de wu pɑ yɑ̈ng. Wu omɑ̈dhø, de röödhø pɑ thøw. Wu orugø ki ógudh, de dëlli wun pɑ lënhi. O ngɑn-ɑ göögø ngyënye pɑ rømmi ree, ge nɑ gïn-ɑ ócïb yij kidhø me twïyø. Gïn-ɑ́ pere ɑ́cwöb møgɑni, pɑ yod yi wun? Kedhu wïj kït, kɑ wu kɑ̈ni wun ki pɑ̈mmì, kɑ Kengø ger wun, codhe o pyëwɑ mïne, o yɑ mɑlli ni kenyi bëëde ceth. “Wu nyii rumø kinni wu ókɑ̈jø ki jɑmmì mø gïïr, de ge nyi yod ge nøg kenyi kɑ̈ɑ̈l wun gen pɑc, ge nyi rënyɑ’ rënyø. Á kipe ngø ɑ göögɑ kinøw? Kipe kɑ̀ bëëd wu göög ɑ ri gyer ki uddi wun, de Kengɑ bɑ thur. Bene ɑ bëëd e bong kødh, o bong gïn twïy. Piny bëne; wɑ̈thi kïttì, kí pwödh, kí bɑ̈ggi oløg kí yenh dhetun, kí gïg-ɑ twïy bënn, kí ji geki lɑ̈yy, ge ɑ́göjjɑ mel.” Codhe, ɑlïngi kwøbbi Jwøng-ɑ Ácwɑ̈ɑ̈j yi Dherubɑbïl geki Jöcwø kí tyëng-ɑ ɑ́dwöög kì yïnø kì Bɑbïlöniyɑ̀ bënn. Kɑ gïn-ɑ ɑ́köbbi gen yi Jwøng-ɑ Ácwɑ̈ɑ̈j, Jwøøg gen gwøg gen. Ge ɑ́bwøg, kɑ dhøg Agɑy, jɑlwööni Jwøng-ɑ Ácwɑ̈ɑ̈j lïngi yi gen. Codhe, ɑköbbi wööni Jwøng-ɑ Ácwɑ̈ɑ̈j ji yi Agɑy kinni, Jwøng-ɑ Ácwɑ̈ɑ̈j okööbø kinni, “Yɑ óbëëdø kì kelli wun.” Acïb kwøbbi gwøøg Kengø pëthi ji yi Jwøng-ɑ Ácwɑ̈ɑ̈j, ɑ løg Dherubɑbïl, jɑngi Yeudiyɑ̀, kí Jöcwø Ókwër-ɑ Dwøng, kí tyëng-ɑ ɑ́dwöög kì yïnø bënn. Acɑ̈gi gen ki geri Kengi Wïlɑ̈bø, Jwøng-ɑ Ácwɑ̈ɑ̈j, Jwøøg gen, kì pyɑ̈r ɑ́ryew wïdɑ́ngween cyɑ̈nggi bïkyeel dwɑ̈tt, kì ryeew runni Rɑ̈nhdwøng Dɑryøs kì yij lɑwø. Kì pyɑ̈r ɑ́ryew wïdɑ́kyeel cyɑ̈nggi bïryeew dwɑ̈tt, kì ryeew runni Rɑ̈dh Dɑryøs kì yij lɑwø, ɑdøøg Agɑy jɑltöng ki köbbø yi Jwøng-ɑ Ácwɑ̈ɑ̈j kinni, i köbbe Dherubɑbïl, jɑngi mïïri kì Yeudiyɑ̀, geki Jöcwø Ókwër-ɑ Dwøng, kí tyëng-ɑ kyeelø kinni, “Dɑ dhɑnhø kì kelli wun me nuti pɑɑr döng geki myëri Kengø keny-ɑ ɑ́bëëde cøn? Bëëd ɑ dï, kɑ̀ nennii yi wun ɑnɑn? Pɑ nënni e dhɑ̈y ce pɑth ki gïïpiny? De pëthi wun ko nyönhi. Gwøgu gwøg ceth, mɑ́ yɑ nud kì kelli wun. Ni kɑ ɑ́köbbɑ wun, keny-ɑ ɑ́kɑ̈ɑ̈lɑ wun wɑ̈g kì Rïp kinni, yɑ óbëëdø kì kelli wun; yɑ óbëëdø kì kelli wun ceth, wu ko böggi. “Kì bɑng keny me thiinh, mɑl kí piny, kí nɑ̈mmì geki piny-ɑ thwøwø ógöjjɑ onhɑ̈nh. Pödhh órungɑ, kɑ̈ɑ̈r gen ókɑ̈ɑ̈l keny, Kengø men ópɑ̈ɑ̈ngɑ ki jɑmm-ɑ per gen teg. Átegø kí dhɑb mø kömi piny bɑ møgɑ. Döng geki myëri Kengø men ópëddi kibøli Kengø men-ɑ ɑ́nud cøn. Jiɑ óthödhɑ ki døøjø geki mër.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Kì pyɑ̈r ɑ́ryew wïdɑ́ngween cyɑ̈nggi bïngween dwɑ̈tt, kì ryeew runni Rɑ̈nhdwøng Dɑryøs kì yij lɑwø, ɑ ɑ́köbbi Agɑy jɑltöng yi Jwøng-ɑ Ácwɑ̈ɑ̈j kinni, “Pyëj ókwër ki gïn-ɑ kømmi yi cigg kipe pyëj møg; keløg dhɑnhø ókɑ̈bbø ki rïngø men-ɑ ɑ́kwër ɑ́ gëëdhi, kɑ gø kïdhe yij ógødhe, kɑ tøg ógødh ónywɑ̈dø ki ópun, wɑlɑ̀ møgi oløg, wɑlɑ̀ gïncɑm me bɑ ɑthɑl, wɑlɑ̀ møw, wɑlɑ̀ gïncɑm megø yøw; ogöögø ɑ́ ɑkwër thyew?” Alöggi ókwër kinni, “Pɑ göögø.” Acigi Agɑy pëjjø kinni, “Keløg dhɑnhø ree dɑ cølø, kɑ ónywɑ̈dø ki gïgcɑmm mø bɑ ɑkwër, ge ócuggø gwøg ge ywëdhø thyew?” Alöggi ókwër kinni, “Ngee!” Codhe ɑkööb Agɑy kinni, “Jwøng-ɑ Ácwɑ̈ɑ̈j okööbø kinni, menɑni bëëd ɑ nøw ki tyëng pönhï. Gïg-ɑ pidh yi gen, kí møg-ɑ muuj yi gen kì wïj këli lɑm ywëdhø.” Akööb Jwøng-ɑ Ácwɑ̈ɑ̈j kinni, “Nuti liidh wun, gen ɑ gïg-ɑ ɑ́cwöb cøn, wu nuti cɑ̈gø ki gyer ki Kengø? Yï ócuggø rumø kinni pëëm byel ókɑ̈ni ki kïllì miy ɑ́ryew, de nyi kɑ̈ɑ̈l-ɑ miyø kete. Ke kedhí keny-ɑ nyi biij møw yï yɑb-ɑ røthøl miy ɑ́ryew, yï yod-ɑ pyɑ̈r ɑ́ngwen yøw. Gïg-ɑ nyi pidh yi wun nyii rënyø yi yɑn ki mel geki ɑtuni ɑ́piy, de wu pɑ yewi. Dicyɑ̈ɑ̈ng bɑ cyɑ̈nggi dwɑ̈y pyɑ̈r ɑ́ryew wïdɑ́bïkyel kì bïngween dwɑ̈tt, cyɑ̈ng-ɑ ɑ́cigi Kengø døøgø ki gerø. Lidhu gïg-ɑ ócwöb, cɑg ɑnɑn. Cɑgg ɑ́ kɑ̀ bëëd e bong gemè me döngø, o oløg geki ólɑm kí romɑn, kí dhetun nuti cɑ̈gø nywølø, cɑg kì bøli keny gïti bøli keny megø, wu ógyëdh yi yɑn.” Kì cyɑ̈ngɑni kete, ɑ løg cyɑ̈nggi dwɑ̈y pyɑ̈r ɑ́ryew wïdɑ́ngwen, ɑdøøg Dherubɑbïl ki ödø ki wöödø yi Jwøng-ɑ Ácwɑ̈ɑ̈j, eni Dherubɑbïl jɑngi mïïri Yeudiyɑ̀ kinni, “Mɑl geki piny ɑ́cyɑ̈ngi ki nïngø yi yɑn. Rɑ̈nhi piny geki tyëng-ɑ jɑɑg yi gen órënyɑ. Yɑ̈thi liny órumɑ piny geki tyëng-ɑ kyewi gen, kyënyì óthøw, jøkyënyì ri gen ónɑ̈g yi gen. Dherubɑbïl bɑ̈ngɑ, yï ókwɑny yi yɑn kì cyɑ̈ngɑni, o yï jyɑ̈ɑ̈g ki nyingɑ. Bene yïn ɑ ɑ́myeg yi yɑn.” Møg-ɑ ɑ́kwøb yi Wïlɑ̈bø, Jwøng-ɑ Ácwɑ̈ɑ̈j ɑgɑk. Kì bïdɑ̈ɑ̈g dwɑ̈tt, kì ryeew runni Dɑryøs ɑ́ rɑ̈nhdwøøng Pɑres, ɑ ɑ́ödi jɑltöng, Dhekɑriyɑ̀ wɑ̈d Berekiyɑ̀ wɑ̈d Idö ki wöödø yi Jwøng-ɑ Ácwɑ̈ɑ̈j, Wïlɑ̈bø, Jwøng-ɑ Ácwɑ̈ɑ̈j, Dhekɑriyɑ̀ jɑltöng ɑ́köbbe i köbbe ji kinni, “Yɑn yɑ Jwøng-ɑ Ácwɑ̈ɑ̈j, pyëwɑ ɑ́rënyi ki kweyyi wun cøn. De ɑnɑn wu köbbɑ’ kinni, ‘Dwöög wun köörɑ, o yɑ dwöögɑ yï wun. Wu ko bëëd ni kweyyi wun ɑ ɑ́köbbi yi jøtöng kɑ̈ge dööng kinni, wïyu bënn ki gwøg ki orøg. De kwøbbɑ nuti lïngø yi gen. Kweyyi wun geki jøtöng møgɑni pɑ nudd ge onëënø ɑnɑn. De kwøbb-ɑ ɑ́cïgɑ bɑ̈nggɑ, jøtöng, kí gïg-ɑ ɑ́kyerɑ nuti yïëyø yi kweyyi wun, ɑ bɑnge rɑngi gen. Codhe ɑyewi gen, kɑ gø yod gen kinni bɑ yɑn, yɑ Jwøng-ɑ Ácwɑ̈ɑ̈j, ɑ ɑ́cɑy gen, kì bɑng orøøg gen ni kɑ ɑ́dwɑddɑ en.’ ” Kì ryeew runni Rɑ̈nhdwøng Dɑryøs kì yij lɑwø, kì pyɑ̈r ɑ́ryew wïdɑ́ngween cyɑ̈nggi pyɑ̈rø wïdɑ́kyeel dwɑ̈tt, ɑ ɑ́cɑ̈rri yɑn ki kwøb yi Jwøng-ɑ Ácwɑ̈ɑ̈j kì wɑ̈r. Yɑ ɑ́lïdhi ki jɑl me ying kömi kyeny me kwɑrø. O cung-ɑ́ɑ̀ kɑɑm yenh bɑlsɑm kì yij tör, o ngɑ̈je dɑ kyënyì møøgø mø kwɑrø, kí møg-ɑ ógwelø, kí møg tɑr. Apyëjɑ en kinni, “Wuö, kyënyì møg wɑng-ɑ ngø?” Alögge kinni, “Yï ónyudhɑ gïn-ɑ wɑngi yi gen. Ge ɑ́ör-ɑ yi Jwøng-ɑ Ácwɑ̈ɑ̈j kinni o ge kedhi gen be yɑgi piny.” Aköbbi wëywödø yi gen kinni, “Wø kɑ̈ɑ̈l-ɑ yij piny bëne, de piny ɑ́yod yi wøn e ree pɑ cuggi nyɑgø yi en, o bɑ ɑtyɑm.” Codhe, ɑlöggi wëywönɑni kinni “Wïlɑ̈bø Jwøng-ɑ Ácwɑ̈ɑ̈j, pyëwí rɑɑj ki Yerusɑlem geki kɑ̈ddi Yeudiyɑ̀ ki runn pyɑ̈r ɑ́bïryew, yï gït-ɑ wɑɑng pyëwí pɑ lɑ̈ɑ̈m ki gen?” Alöggi Jwøng-ɑ Ácwɑ̈ɑ̈j ki kwøbbi cïïjø me døøj. Kɑ yɑ köbbi yi wëywönɑni kinni, Wïlɑ̈bø Jwøng-ɑ Ácwɑ̈ɑ̈j okööbø kinni, “Yerusɑlem kɑɑl kwërɑ mɑɑr yi yɑn ki mendwøng, o pyëwɑ rɑɑj cɑrø ki pödhh-ɑ tɑ̈bbi kì yij kɑ̈r. Mɑ́ orɑɑng jiɑ ɑ́coodh yi gen keny-ɑ ɑ́kɑl pyëwɑ rënyø ki gen yøw. Pyëwɑ ɑ́lɑ̈ɑ̈m ki Yerusɑlem. Kengɑ ódøøg ki gerø, o kɑɑlɑni óger thyew.” Yɑ ɑ́köbbi yi wëywönɑni i kööbɑ thyew kinni, “Wïlɑ̈bø Jwøng-ɑ Ácwɑ̈ɑ̈j okööbø kinni, kɑ̈dde ódøøg ki dönyø, Yerusɑlem ódøøgɑ ki kønyø këti, kɑ obëëdø ɑ́ pɑɑrɑ.” Atïngɑ wïjɑ, kɑ yɑ ólïdhø ki tùng ɑ́ngwen, tùngi wɑ̈dhh. Apyëjɑ wëywön-ɑ ɑ́kööb wøn kinni, “Á ngø ɑ wɑngi yi tùngɑni?” Alögge kinni, “Ge bɑ nyuudhi kipe tegi pödhh-ɑ ɑ́kedhhi tyëng Yeudiyɑ̀, geki Isrɑil, kí Yerusɑlem.” Codhe, ɑnyudhi yɑn yi Jwøng-ɑ Ácwɑ̈ɑ̈j ki bödhhì ɑ́ngwen ki ɑ́bɑnyyi gen. Apëjjɑ kinni, “Jøg, ge ɑ́bï-ɑ be gwøgi ngø?” Alögge kinni, “Ge ɑ́bï-ɑ be göjji böögø pödhh-ɑ ɑ́nyøng Yeudiyɑ̀ kɑ gø kedhhi gen, o gï dhur gen piny.” Kɑ wïjɑ tïngɑ, ɑlïdhɑ ki jɑl me cinge di thøl mɑ rumi. Apyëjɑ en kinni, “Yï kedh-ɑ keny?” Alögge kinni, “Yɑ kedh-ɑ be rømi Yerusɑlem, o bɑ̈re geki lɑ̈je yodɑ.” Akedh wëywön-ɑ ɑ́kööb wøn, kɑ ge órwömø ki wëywödø megø, ɑköbbii yi wëywön-ɑ ɑ́rwööm gen kinni, “Rengí köbbí jɑl-ɑ cinge di rumi thøl kinni, Yerusɑlem yije dɑ ji kí dhög mø gïïr cɑrø, dwøng pɑ cuggi gëddø ki dörø. Jwøng-ɑ Ácwɑ̈ɑ̈j ɑ́köngi cem e óbëëdø ɑ́ döri mɑc kì tøggi kɑɑlɑni e kor-ɑ gøn, o óbëëdø kì yije ki dhwɑ̈nge bëne.” Ngɑn-ɑ ónywɑl wun, ɑ́cwög-ɑ wɑngɑ.” Bene ɑ bɑnge ör yɑn yi Wïlɑ̈bø Jwøng-ɑ Ácwɑ̈ɑ̈j; yɑ öre’ yï pödhh-ɑ mød jie, o ge köbbɑ kinni, “Jwøng-ɑ Ácwɑ̈ɑ̈j kiree ónyïɑ̈ggi ki wun, kɑ wu lony ki mødø yi tyëng-ɑ ɑ́bëëd gɑ bɑ̈nggi wun.” Óyod yi ji bënn keny-ɑ ócwöb møgɑni, kinni yɑ ɑ́ör-ɑ yi Wïlɑ̈bø Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j ɑ́kööb kinni, “Wör wun ki medi pëthi wun, wun ɑ tyëng Yerusɑlem! Mɑ́ yɑ bï-ɑ be bëëdø kì kelli wun!” Kì bøli kenyɑni, pödhh mø gïïr óbï yï Jwøng-ɑ Ácwɑ̈ɑ̈j, kɑ ge ogöögø gɑ jie. Óbëëdø kì kelli gïn, o óyod yi wun kinni en ɑ ɑ́ör yɑn yï wun. Yeudiyɑ̀ ógöögø ɑ́ mi Jwøng-ɑ Ácwɑ̈ɑ̈j, kì piny-ɑ bɑ ɑkwër. Kɑ Yerusɑlem ogöögø ki kɑɑl-ɑ mɑɑr yi en ki mendwøng. Kud wun bënn kì bøli Jwøng-ɑ Ácwɑ̈ɑ̈j, mɑ́ e kɑ̈ɑ̈l-ɑ kej kwëre. Anyudhi yɑn Jöcwø, Ókwër-ɑ Dwøng yi Jwøng-ɑ Ácwɑ̈ɑ̈j, e cung-ɑ́ɑ̀ bøli wëywöni Jwøng-ɑ Ácwɑ̈ɑ̈j, o Cethɑn ócungø kì buti Jöcwø, e dwɑdd-ɑ gøønyi gøn. Aköbbi Cethɑn yi wëywöni Jwøng-ɑ Ácwɑ̈ɑ̈j kinni, “Yï ócɑy yi Jwøng-ɑ Ácwɑ̈ɑ̈j, Cethɑn! Jwøng-ɑ Ácwɑ̈ɑ̈j ɑ mɑɑr Yerusɑlem. Jɑɑl, pɑ ni lonh ywɑ̈ɑ̈j wɑ̈g kì mɑc?” Jöcwø ɑ́bëëd e ócungø kì bøli wëywödø, e rug-ɑ ógudh mø cödhø. Aköbbi wëywödd møg-ɑ cungi kì buti wëywönɑni yi en kinni, “Kɑ̈ɑ̈lu ógudh-ɑ cödhø wɑ̈g kì ree.” Codhe ɑköbbe Jöcwø kinni, “Lidh, orøgí ɑ́kɑ̈ɑ̈lɑ wɑ̈g, o yï nëngɑ ki ógudh mø nyɑ̈n møg rug yi yïn.” Aköbbe gïn kinni kïdhi gen wïj Jöcwø ki wëëni me dhïw. Codhe, ɑkïdhi gen wïje ki wëëni, kɑ ree lunyi gen ki ógudh mø nyɑ̈n e wëywöni Jwøng-ɑ Ácwɑ̈ɑ̈j ócungø kì kenyɑni ceth. Aköbbi Jöcwø yi wëywönɑni kinni, Wïlɑ̈bø Jwøng-ɑ Ácwɑ̈ɑ̈j ɑ́kööb kinni, “Keløg ciggɑ ómïdhi yi yïn ceth, kɑ gïg-ɑ ɑ́köbbɑ yïn gwøg yi yïn, yï óbëëd yïn ɑ́ jɑngi Kengɑ geki gølɑ bëne, kɑ kwɑ̈jjí lïngɑ ni kenyi lïngɑ kwɑ̈jji wëywödd møg-ɑ nyi cungi kì bølɑ. Lïng Jöcwø, yïn ɑ bɑ Ókwër-ɑ Dwøng, kɑ wu lïng wun, wun ɑ ókwërr-ɑ kyeelø, wu bɑ ngïjjì kipe gïn-ɑ ócwöb dhuki megø, mɑ́ bɑ̈ngɑ ónyodhɑ, ɑ cwøl ɑ́ bɑɑd yɑdh. Bøli Jöcwø cïbɑ’ cïbø ki tungi kït me nyingi ngëdde bɑ ɑ́bïryew. Kïnɑni köme ótwïggɑ ki gwedd, o orøøg pönhï rɑ̈ɑ̈jɑ’ wɑ̈g ki cyɑ̈ng ɑ́kyel yøw. Keny-ɑ óbëën cyɑ̈ngɑni, ngɑɑn tyëng-ɑ cyɑ̈gi ki en ócwøle, o ge bëëd gen ki mër, ge ótyegø yi bɑ̈ggi oløg.” Adwöög wëywön-ɑ ɑ́kööb wøn, kɑ yɑ tuge, ɑyiebɑ nyingɑ ni ngɑn ceg cyëwø. Apëjje kinni, “Á ngø ɑ nenni yi yïn?” Alöggɑ kinni, “Teggi lɑ̈mbɑ̈ɑ̈ me bɑ dhɑb. O dɑ tɑbi møw me ying mɑl. Teggɑni wɑ̈thi gen dɑ lɑ̈mbɑ̈ɑ̈ ɑ́bïryew, kí kɑ̈jji korri mɑc kì ri gen. Dɑ yenh dhetun ɑ́ryew mø twïyø kì wɑ̈thi tùngi tengɑni, men ying-ɑ tuung, o megø ying-ɑ tung-ɑ kyeelø.” Codhe ɑpyëjɑ wëywönɑni kinni, “Gïg nyodh-ɑ ngø, wuö?” Apyëje yɑn kinni, “Kwïj yi yïn?” Akyëdɑ kinni, “Kwïj yi yɑn, wuö.” Aköbbi yɑn yi wëywönɑni i köbbɑ Dherubɑbïl kinni, Jwøng-ɑ Ácwɑ̈ɑ̈j okööbø kinni, “Pɑth ki tegí wɑlɑ̀ tegi jølinyí ɑ ótyɑ̈ɑ̈m, de yï ótyɑ̈ɑ̈m-ɑ wëyɑ. Akørr mø døngø ni kïttì ówɑ̈ɑ̈ny kì bølí. Kengø ódøøg yi yïn ki gerø, o keny-ɑ ócïb kïn-ɑ cyɑ̈n, ji óryeer kinni, ‘Myëër! Myëër!’ ” Acigi yɑn muujø ki wöödø megø yi Jwøng-ɑ Ácwɑ̈ɑ̈j. Ákööb kinni, “Dherubɑbïl tyelli Kengø ɑ́këële piny, o gø ótyëge ki gerø. Keny-ɑ ócwöb møgɑni, óyod yi jiɑ kinni bɑ yɑn ɑ ɑ́ör yïn yï gen. Pëthi gen pɑ med, mɑ́ gwøg me nøg ɑ ɑ́gwøg. De pëthi gen ómïni, keny-ɑ ólidh gen Dherubɑbïl e ger-ɑ Kengø.” Codhe ɑpyëjɑ en kinni, “Á ngø ɑ nyodh yi yenh dhetun ɑ́ryew møg-ɑ wɑ̈thi tùngi teggi lɑ̈mbɑ̈ɑ̈? O ɑ́ ngø ɑ nyodh yi bɑ̈ddi yɑdh dhetun ɑ́ryew møg-ɑ wɑ̈thi tùngi winni møw ɑ́ryew møg-ɑ bɑ dhɑb møg-ɑ kɑ̈ni wɑ̈g ki møw?” Apyëje yɑn kinni, “Ge kwïj yi yïn?” Alöggɑ kinni, “Ge kwïj yi yɑn, wuö.” Codhe, ɑkööbe kinni, “Møgɑni bɑ jøg ɑ́ryew møg-ɑ ɑ́yieny yi Jwøk, kɑ gï rønye kipe kinni o ge göggi gen en.” Codhe ɑdøøgɑ wïjɑ ki tïng mɑl, ɑlïdhɑ ki wɑ̈nyø me pɑ̈rri kì yij yømø. Apyëëj yɑn yi wëywödø kinni, “Yï ɑ́lidh-ɑ ngø?” Alöggɑ kinni, “Wɑ̈nyø me pɑ̈rri kì yij yømø, bɑ̈re bɑ mïtïr ɑ́bïngwen, o lɑ̈je bɑ mïtïr ɑ́ngwen kí budi mïtïr.” Aköbbe yɑn kinni, “Yij wɑ̈nyɑni ógweed-ɑ cyën me bï kömi piny bëne, yij ɑ́kyel ógwedø kinni tyëng-ɑ nyi kwɑ̈dø bënn ócyeed wɑ̈g kì yij piny, o yiny-ɑ kyeelø ógwedø kinni, tyëng-ɑ nyi köngi ki pyed ócyeed wɑ̈g thyew. Jwøng-ɑ Ácwɑ̈ɑ̈j okööbø kinni, cyënnɑni öre’ örø, o ge kedhi gen gøl kur kí gøl ngɑn-ɑ nyi kwöng nyinge ki pyed. Cyënnɑni óbëëdø kì kɑ̈llɑni, o ge ryɑ̈g gen.” Acigi wëywönɑni cwöbø, ɑkööbe kinni, “Lïdhí! Gïjø megø obëënø!” Apëjjɑ kinni, “Bɑ ngø?” Alögge kinni, “Bɑ dhöngø, me nyodh orøøg piny bëne.” Kum dhöngɑni bɑ ɑ́yömø. Kɑ̈ng-ɑ ɑ́nëënɑ, ɑyɑɑl kumɑni, ɑlïdhɑ ki ngɑndhɑjø me bëëdø kì yije! Akööb wëywönɑni kinni, “Ngɑnɑni nyodh-ɑ rɑ̈jø.” Codhe ɑthɑɑnye gøn piny kì yij dhöngø, kɑ kum dwøøge keje. Atïngɑ wïjɑ, kɑ yɑ ólïdhø ki tyëng-ɑ mɑ̈nn ɑ́ryew mø pɑ̈ɑ̈r kun-ɑ di yɑn, ge pɑ̈rri kɑ obërr mø teg ni obërri ówɑngø. Atïng gen dhöngɑni kɑ ge opɑ̈ɑ̈rø ki gøn. Apyëjɑ wëywödø kinni, “Ge kïdh-ɑ kun ki gøn?” Alögge kinni, “Ge kïdh-ɑ Bɑbïlöniyɑ̀, o gø gëddi gen ki kengø. Keny-ɑ órum kengɑni ki gerø, o dhöngɑni cïb gen yije, o mɑlli kì kenyɑni.” Codhe ɑcigɑ wïjɑ tïngø, kɑ yɑ ólïdhø ki yɑ̈thi liny ɑ́ngwen, ge kɑ̈ɑ̈l-ɑ kelli kïtti ngyënyø dilɑl ɑ́ryew. Yɑ̈y-ɑ mɑl pyejj-ɑ yi kyënyì mø kwɑrø, ryeew gen pyejj-ɑ yi kyënyì mø lojø, dɑ̈ɑ̈g gen pyejj-ɑ yi kyënyì mø tɑr, o ngween gen pyejj-ɑ yi kyënyì mø ri gen di kïddì. Apyëjɑ wëywödø kinni, “Á ngø ɑ wɑngi yi gen, wuö?” Alögge kinni, “Møgɑni bɑ yømi wɑ̈thi tùngi piny, ge kɑ̈ɑ̈l-ɑ bøli Wïi piny bëne.” Yɑ̈y-ɑ pyejji yi kyëny-ɑ lojø kedh-ɑ Bɑbïlöniyɑ̀, kì wɑɑng wuudø, o kyëny-ɑ tɑr kedh-ɑ wɑɑng cyɑ̈ɑ̈ng böörø, o kyëny-ɑ ri gen di kïddì kedh-ɑ wɑɑng wurlwɑl. Kyëny-ɑ ri gen di kïddì dwɑdd-ɑ jwɑni be yɑgi piny. Akööb wëywönɑni kinni, “Kedhu be yɑgi piny!” Akedh gen ceth. Aryeer wëywödø e köbb-ɑ yɑn kinni, “Kyëny-ɑ ɑ́kedhi Bɑbïlöniyɑ̀ wɑɑng wuudø, liny Jwøng-ɑ Ácwɑ̈ɑ̈j ɑ́wëggi gen kwöjø.” Aöni Jwøng-ɑ Ácwɑ̈ɑ̈j yïɑ ki wöödø kinni, “Kwɑny gëdhh-ɑ ɑ́muuj yi tyëng-ɑ ɑ́dwöög kì yïnø, kì Bɑbïlöniyɑ̀ ɑ løg Keldɑy, kí Töbiyɑ̀, kí Yedɑiyɑ̀, kɑ yï kedhí gøl Yöciyɑ̀ wɑ̈d Dhepɑniyɑ̀. Göög ki yɑ̈r ki ɑ́tegø kí dhɑb men-ɑ ɑ́muuj yi gen, kɑ cïb wïj Ókwër-ɑ Dwøng, Jöcwø wɑ̈d Yödhɑdɑk. Kɑ köbbí kinni, Wïlɑ̈bø Jwøng-ɑ Ácwɑ̈ɑ̈j okööbø kinni, ‘Jɑl-ɑ cwøl ɑ́ bɑɑd yɑdh ódøngi kì keje, kɑ Kengø døøge ki gerø. En ɑ ógerii, o óyïddi ki dhwɑ̈ɑ̈ng rɑ̈ɑ̈dhø, kɑ jie jɑɑge. Ódi ókwërø kì buti kwøme, o ge ógöögø kì kej ɑ́kyel ki mër.’ Yɑ̈rɑni óbëëdø kì yij Kengi Jwøng-ɑ Ácwɑ̈ɑ̈j ɑ́ men nyi pɑɑr Keldɑy, ki Töbiyɑ̀, kí Yedɑiyɑ̀, kí Yöciyɑ̀.” Jøg-ɑ bëëdø kì kɑ̈jj-ɑ lɑ̈wi óbï, kɑ ge ókunyø ki geri Kengi Jwøng-ɑ Ácwɑ̈ɑ̈j. Keny-ɑ órume ki gerø, óyod yi wun kinni Wïlɑ̈bø Jwøng-ɑ Ácwɑ̈ɑ̈j ɑ ɑ́ör yɑn yï wun. Møgɑni bënn ópɑ̈dhi kɑ̈jji gen keløg Ciggi Jwøng-ɑ Ácwɑ̈ɑ̈j, Jwøøg wun ómïdhi yi wun ge bënn ceth. Kì ngween runni Dɑryøs ɑ́ rɑ̈nhdwøng, kì ngween cyɑ̈nggi bïngween dwɑ̈tt, ɑ ɑ́ödi Dhekɑriyɑ̀ ki wöödø yi Jwøng-ɑ Ácwɑ̈ɑ̈j. Cɑredher geki Regemelek kí jø gen ɑ́ör Kengi Wïlɑ̈bø, Jwøng-ɑ Ácwɑ̈ɑ̈j yi tyëng Betiil be kwɑjji gyëdh kì yï Jwøng-ɑ Ácwɑ̈ɑ̈j, kí be pyëji ókwër geki jøtöng kinni, “Nyi ywöngi wøn kipe rënyi Kengø, kɑ ri wøn nyi twöön wøn kì bïïj dwɑ̈tt, ni kɑ ɑ́bëëd wøn kì yethi runn-ɑ ɑ́pöödh bënn?” Men bɑ wööni Jwøng-ɑ Ácwɑ̈ɑ̈j men-ɑ ɑ́öre yɑn. Jwøng-ɑ Ácwɑ̈ɑ̈j ɑ́kööb kinni, “Köbbí tyëng pödhø bënn, kí ókwër kinni, keny-ɑ ɑ́ywöngi gen, kɑ ri gen nyi twöön gen kì bïïj dwɑ̈tt geki bïryeew dwɑ̈tt ki runn pyɑ̈r ɑ́bïryew, ɑ́bëëd e pɑth kiper wøri yɑn. O keny-ɑ ɑ́cyɑ̈ɑ̈m gen kɑ ge omɑ̈dhø, ge ɑ́cɑ̈mm-ɑ yethi gen.” Bene gen møg-ɑ ɑ́kwøb yi Jwøng-ɑ Ácwɑ̈ɑ̈j kì ri jøtöng mø tyeli mɑl cøn, keny-ɑ ɑ́bëëd e Yerusɑlem nudd e døøj, e pɑ̈ng yi ji geki myërr-ɑ bɑdhhe, kí myërri wɑɑng wurlwɑl, kí myërri thɑ́ kïtti wɑɑng cyɑ̈ɑ̈ng böörø. Aödi Dhekɑriyɑ̀ ki wöödø yi Jwøng-ɑ Ácwɑ̈ɑ̈j kinni, “Kɑ̈ge dööng jiɑ ɑ́cegɑ kinni, ‘Gøggu dyër, kɑ yethi wun nyi ywöngi gen kipe ji møøgø. Tyëng-ɑ́ cwøwi gen ɑ́thøw kí kïjj møg-ɑ bëëdø kì kelli wun, ko nyi mød wun, kí tyëng-ɑ jɑdø thyew. Wu ko nyi rum kì ri göggi tyëngmøøgø ki rɑj.’ “De jiɑ ɑ́bɑ̈nyi lïngø, kɑ muddi gen ótëngø. Kɑ pëthi gen gwøg gen ge teeg ni kït kipe ciggɑ ólïngi yi gen, gen ɑ cigg-ɑ ɑ́örɑ gen kì ri jøtöng møg-ɑ ɑ́bëëd kì tyeli mɑl, ɑrënyi pyëwɑ ki mendwøng. Ge nuti lïngø keny-ɑ ɑ́köbbɑ gen, bene ɑ cög kwɑ̈jji gen nuti lïngi yɑn. Akedhhɑ gen ni kenyi kedhhi jɑmmì yi ɑtunø, kɑ ge køølɑ be bëëdø kì yethi pödhh-ɑ pɑth. Adöng piny-ɑ døj èn ɑ́ ryɑng, e bong dhɑnhø me bëëdø kì yije.” Aödi Dhekɑriyɑ̀ ki wöödø yi Wïlɑ̈bø Jwøng-ɑ Ácwɑ̈ɑ̈j kinni, “Pyëwɑ ɑ́bëëd e okønø ki kønyi Yerusɑlem kipe mɑɑr-ɑ mɑɑrɑ jie, eni mɑ̈ɑ̈dø men-ɑ ɑ́wëggi pyëwɑ rënyø ki tyëng-ɑ mɑɑnii. Yɑ ódwöög Yerusɑlem, kɑɑl kwërɑ, o yɑ bëëdɑ kì yije. Yerusɑlem ócwøl ɑ́ kɑɑl dyër geki kïti Wïlɑ̈bø Jwøng-ɑ Ácwɑ̈ɑ̈j; kïti kwëre. Ywödhh-ɑ kwömi ki kemm ódøøg be bëëdø kì yethi ódɑ̈rri kɑɑl. Kɑ yethi yëthe ódøøgø pɑ̈ngø yi othønhø møg tug. “Møgɑni órømmi gɑ gïg pɑ cuggi yi tyëng-ɑ nud ɑnɑn, de ge ódi bëëdø gɑ gïg pɑ cuggi kì yïɑ? Jiɑ óyïëëlɑ wɑ̈g kì pödhh-ɑ ɑ́kïdhi gen, kɑ ge dwöögɑ kì wɑɑng cyɑ̈ɑ̈ng mwøl geki wɑɑng cyɑ̈ɑ̈ng böörø, o ge bëëd gen kì Yerusɑlem. Ge óbëëdø gɑ jiɑ, o yɑ óbëëdø yɑn ɑ́ Jwøøg gen, ge ójɑɑgɑ ki gøggi dyër geki døøjø. “Tëngi pëthi wun! Wu lïng-ɑ kwøb mø ni møg-ɑ ɑ́kømmi yi jøtöng kì bøli keny-ɑ ɑ́këël tyeli Kengɑ piny. Kɑ̈ng-ɑ óbëëd bøli kenyɑni nuti bëënø, bong dhɑnhø me cuggi kïr ki dhɑnhø wɑlɑ̀ lɑ̈y, o ji óbëëd yï gen bong mër, ge ceg-ɑ orɑng kì cinggi tyëngmɑ̈ɑ̈nø, mɑ́ ji ɑ́cwɑ̈ɑ̈gɑ kì ri gen. De tyëng-ɑ ɑ́döng kì pönhï pɑ mïdhɑ kɑ yuuɑni. Ge ópurø ki byel kì yij mër. Bɑ̈ggi gen ónywøl, kɑ byelli gen ocyegø, kødh óbëëd e gïïr. Tyëng pödhɑ møg-ɑ ɑ́bødh óthödhɑ ki gyëdhhɑni bënn. Wun ɑ tyëng Yeudiyɑ̀ geki tyëng Isrɑil! Kɑ̈ge dööng tyëngpɑth ɑ́bëëd ge nyi lɑm-ɑ ri gen kinni, ‘Kömí ópɑ̈dhi yi ryɑ̈ng ni ryɑ̈ng-ɑ ɑ́pɑ̈dhi kömi Yeudiyɑ̀ geki Isrɑil!’ De wu óyielɑ kɑ tyëngɑni døøg-ɑ be köbbi ri gen kinni, ‘Yï óyïddi ki gyëdh ni gyëdhh-ɑ ɑ́yod yi Yeudiyɑ̀ geki Isrɑil!’ Kɑ ɑ́rum bëëde kinøw, tëngi pëthi wun kɑ wu ko böggi.” Wïlɑ̈bø Jwøng-ɑ Ácwɑ̈ɑ̈j okööbø kinni, “Keny-ɑ ɑ́rënyi pyëwɑ ki kweyyi wun, ge ɑ́göggɑ ki rɑj ceth. Anɑn yɑ dwɑdd-ɑ göggi tyëng Yerusɑlem geki tyëng Yeudiyɑ̀ ki gïgdøj. Kì bɑng menɑni wu ko böggi. Nyi kømmi dhɑnhø dyër ki wɑɑd gen. Nyi cïb wun gøny keje kì burø, nyi bëëd wun wu mër ki ji bënn. Wu ko nyi rømmi göggi ji møøgø ki rɑj. Wu ko nyi köngi ki pyed kì burø, mɑ́ pyed kí ruj kí mød mɑɑn yi yɑn.” Aödi Dhekɑriyɑ̀ ki wöödø yi Wïlɑ̈bø Jwøng-ɑ Ácwɑ̈ɑ̈j kinni, “Twön-ɑ nyi twöön wun ri wun kì ngween dwɑ̈tt, kí bïïj dwɑ̈tt, kí bïryeew dwɑ̈tt, kí pyɑ̈ri dwɑ̈tt, ge óbëëdø gɑ bøli kɑ̈jji kwëër medi pëëth kì yï tyëng Yeudiyɑ̀. Mɑɑru dyër geki mër.” Wïlɑ̈bø Jwøng-ɑ Ácwɑ̈ɑ̈j okööbø kinni, “Bøli keny-ɑ óbëën ji Yerusɑlem, ge kɑ̈ɑ̈l-ɑ kɑ̈dd-ɑ lɑ̈wi, ɑ́cyɑ̈ngi. Tyëng kɑɑl men, tyëng kɑɑl-ɑ kyeelø óköbbi gen kinni, ‘Wø kedh-ɑ be mɑlli Wïlɑ̈bø Jwøng-ɑ Ácwɑ̈ɑ̈j kì Yerusɑlem, o wø gyëdhe. Bïu kedh wɑ kyeel!’ Ji mø gïïr kí pödhh mø teg, ge óbï Yerusɑlem be mɑlli Wïlɑ̈bø Jwøng-ɑ Ácwɑ̈ɑ̈j, ge kwɑjj-ɑ gyëdhhe. Kì yethi cyɑ̈nggɑni, tyëngpɑth pyɑ̈rø ókedhi yï wɑ̈d Yeud ɑ́kyel, kɑ gø köbbi gen kinni, ‘Wø ceg-ɑ kedhø kyeel kí yïn, mɑ́ wø ɑ́lïng kinni i Jwøk ying-ɑ kelli wun.’ ” Men bɑ wööni Jwøng-ɑ Ácwɑ̈ɑ̈j. Jwøng-ɑ Ácwɑ̈ɑ̈j dwɑdd-ɑ cɑyi piny Adɑrɑk geki kɑɑl Dimɑceg. Pɑth ki Isrɑil kete ɑ bɑ mi Jwøng-ɑ Ácwɑ̈ɑ̈j, de kɑɑl-ɑ jɑɑg Arɑm bɑ mee thyew. Amɑth, ɑ cïb kew ki Adɑrɑk bɑ mee thyew, cɑgg ɑ́ kɑ̈dd-ɑ døngø; Suur geki Sïdön møg-ɑ rummi gen gïïr. Suur ree ɑ́gëdde ki dör mø korrii; ɑ́röri piny ki dhɑb kí ɑ́tegø mø ni tør! De jɑmme bënn ókwɑny yi Jwøng-ɑ Ácwɑ̈ɑ̈j, kɑ̈re óleenge nɑm, kɑ Suur rɑ̈b yi en ki mɑc. Cɑ́yɑni ólidh yi kɑɑl Ackelön kɑ obwøgø, o Gɑdhɑ̀ pyëwe ónyönhi keny-ɑ ólidhe cɑ́yɑni. Ekrön ókïïr yi wɑ̈ɑ̈rø, mɑ́ e gɑ̈nn-ɑ Gɑdhɑ̀ kinni en ɑ ójog tyëngmɑ̈ɑ̈nø. Gɑdhɑ̀ ómɑg, kɑ rɑ̈dhe mɑg, kɑ Ackelön rënyi kɑ odöngø ɑ́ ryɑng. Acdöd óbëëd-ɑ yi jurrì mø bɑ̈nni. Jwøng-ɑ Ácwɑ̈ɑ̈j okööbø kinni, “Athwøøg Pelistiyɑ̀ ócuung yi yɑn. Rïngø koo cɑm yi gen kí remø kì ree këti, wɑlɑ̀ ge koo cyɑ̈mø ki gïgcɑmm-ɑ kyeelø møg-ɑ bɑ ɑkerø. Tyëng-ɑ óbødh bënn órëbi ki jiɑ, ge óni kɑl ɑ́kyel kì yij gøl Yeudɑ̀. Ekrön órëbi ki jiɑ ni tyëng Yebus. Pinyɑ ókorɑ; jøliny ómɑ̈ɑ̈nɑ cøri yije. Bong jøgwɑ̈j møg-ɑ óruj jiɑ këti. Orɑɑng jiɑ ɑ́rum ki lidhø yi yɑn.” Mïni pëthi wun, wun ɑ tyëng Dhɑyøn! Ryeer wun ki medi pëëth, wun ɑ tyëng Yerusɑlem. Lidh, rɑ̈dhí ɑ bï ɑcɑ̀! Bï kɑ tyɑ̈mø me dwøng, de bɑ mölø, o cyɑ̈dh-ɑ́ɑ̀ kömi ɑderø, cyɑ̈dh-ɑ́ɑ̀ kömi ɑderø ówöb. Jwøng-ɑ Ácwɑ̈ɑ̈j okööbø kinni, “Yɑ̈thi liny ónyiigɑ kì Isrɑil o kyënyì ónyiigɑ kì Yerusɑlem, wethh-ɑ nyi nyïɑ̈ggi ki liny órënyi. Rɑ̈dhí óbëëdø ki mër geki pödhh-ɑ kyeelø, Lɑ̈ge ócɑ̈gi kì nɑɑm omelø kɑ gït-ɑ nɑɑm omel-ɑ kyeelø, ócɑ̈gi kì Nɑm Porɑt kɑ wɑ̈dh-ɑ cögi piny.” Jwøng-ɑ Ácwɑ̈ɑ̈j okööbø kinni, “Kipe lwöm-ɑ kɑɑmee, lwöm-ɑ ɑ́gɑ̈j ki remi gëdhhì, jií ógøny yi yɑn, ge ógöönyɑ wɑ̈g kì yethi burr-ɑ bong pï kì yïnø. Døøg wun, wu tyëng-ɑ yïnø, ɑ nudd yï wun di ngɑ̈ɑ̈dhø, døøg wun keny-ɑ óyieel wun. Gyëdhhi wun ówëggɑ ngënyø kì bɑng orɑng-ɑ ɑ́rɑngi wun. Yeudiyɑ̀ ógwøgɑ ɑ́ weth mi jɑl-liny, o Isrɑil ógwøgɑ ɑ́ nywøli weth. Jø Dhɑyøn ógwøgɑ gɑ pilø me nyïɑ̈ggɑ ki tyëng Yönɑn.” Jwøng-ɑ Ácwɑ̈ɑ̈j jie ɑ́peeje be liny, nywøli wethe óni pööd mɑl. Wïlɑ̈bø Jwøng-ɑ Ácwɑ̈ɑ̈j kɑng ókodhe, óbï e kɑ̈ɑ̈l-ɑ yij yømi wɑɑng wurlwɑl. Wïlɑ̈bø Jwøng-ɑ Ácwɑ̈ɑ̈j jie ókor yi en, kɑ tyëngmɑ̈ɑ̈nø tyɑm gen. Gï ónyøn gen. Ge óryeer kì yij liny ni jøg-ɑ ónɑ̈gø yi møgø, remmi tyëngmɑ̈ɑ̈nø ómøli ni remmi gëdhh-ɑ nyi køny wïj këli lɑm. Keny-ɑ óbëën cyɑ̈ngɑni, Jwøng-ɑ Ácwɑ̈ɑ̈j jie óyiele ni kenyi yiel jɑlkwɑ̈yø dyëge ki rɑj. Ge órɑ̈ɑ̈dø kì pinye ni tigg-ɑ per gen teg kì ri yɑ̈ɑ̈r wïj. Piny óbëëd e ce døj ɑ́ ngø! Othønhø ódøngi kɑ dëlli gen ótëngø yi byelli pinyɑni geki møgi oløge. Cwöddi wun ki kødh kì yï Jwøng-ɑ Ácwɑ̈ɑ̈j, e kødh køm-ɑ temø. O mɑl wëgge ogwel, o wu nënge ki kødh, o pwödh bënn wëgge mɑ̈rø. Ájwöggì geki tyëngbɑg pɑ nyi kømmi dyër, o ge nyi lɑ̈g-ɑ lɑ̈ggi pyed, cïïjø mi gen bong gïndøj kì ree. O ji nyi göjji ge’ wïïnø. Ge nyii rɑngø mɑ́ yï gen bong pëëji. Jwøng-ɑ Ácwɑ̈ɑ̈j okööbø kinni, “Pyëwɑ rɑɑj ki tyëngpɑth møg-ɑ jɑɑg jiɑ, o ge cɑyɑ’ cɑyø. Tyëng Yeudiyɑ̀ bɑ møgɑ, o ge ókongɑ. Ge bɑ kyënyɑ, kyënyi liny. Kelli gen ócwööb yi jɑgg, kí pëjji liny møg-ɑ ójɑɑg jiɑ. Tyëng Yeudiyɑ̀ óni jøg-ɑ nyi tyɑ̈mø, kɑ tyëngmɑ̈ɑ̈nø nyøn gen kì piny kì yethi yëëth. Ge ónyïɑ̈ggi mɑ́ Jwøng-ɑ Ácwɑ̈ɑ̈j ying-ɑ tuung gen. Cɑgg ɑ́ jøkyënyi tyëngmɑ̈ɑ̈nø, gï ótyɑm gen. “Tyëng Yeudiyɑ̀ ówëggɑ tëngø; tyëng Isrɑil óyielɑ. Pyëwɑ ólɑ̈ɑ̈m ki gen, kɑ ge dwöögɑ pɑc bënn. Ge óbëëd e dhɑ̈y ge ce nuti pɑ̈nyø bɑnyø yi yɑn. Bene yɑn Jwøng-ɑ Ácwɑ̈ɑ̈j, Jwøøg gen; kwɑ̈jji gen óløøgɑ. Tyëng Isrɑil ótëngi ni jøliny, pëthi gen ómïni ni ji mø mɑdh møgi oløg. Tyɑ̈mø mi gen ópɑrri yi kwɑrri gen, kɑ pëthi gen nyii mïnø kipe gïn-ɑ ɑ́gwøg yi Jwøng-ɑ Ácwɑ̈ɑ̈j. “Jiɑ ócwølɑ, kɑ ge cøngɑ kej ɑ́kyel. Ge óyielɑ, o ge óngënyi ni kɑ ɑ́bëëd gen cøn. Cɑgg ɑ́ kɑ ɑ́kedhhɑ gen, yɑ ópɑrri yi gen kì kɑ̈jj-ɑ lɑ̈wi. Ge óbødh geki nyigi gen, kɑ ge dwöög-ɑ pɑc kyeel. Ge ódwöögɑ kì Rïp geki Acuur, kɑ ge cïbɑ piny-ɑ bɑ mi gen Ge ócïbɑ Gilyɑd geki Lubnɑn thyew, pinyɑni bëne ópɑ̈ng yi ji. Kɑ̀ kɑ̈l gen yij nɑɑm omelø, yij orɑng, ɑpɑgø gøjɑ’ gøjø yɑ Jwøng-ɑ Ácwɑ̈ɑ̈j, kɑ tyeli nɑm othwøwø. Athwøøg Acuur ódwöög piny, kɑ tegi Rïp ólɑ̈ɑ̈nyø. Jiɑ ówëggɑ tëngø, yɑ ómɑlli yi gen, kɑ kwøbbɑ lïngi yi gen.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk. Yieb dhøggi dörrí Lubnɑn, o yenh sɑndɑl rɑ̈b yi mɑc. Ywöngi wun kɑ wu kïïw wun, wun ɑ yenh ɑmedh! Yenh sɑndɑl ɑ́pɑ̈ɑ̈dh, yenh-ɑ per gen teg ɑ́rënyi! Ywöngi wun kɑ wu kïïw wun, wun ɑ óthurri Bɑcɑn, thïm-ɑ twij ɑ́ngøl piny! Jɑgg ceg-ɑ ywøg, mɑ́ kɑ̈ɑ̈r gen ɑ́wɑ̈ɑ̈ny! Lïngu ngɑ̈ri ngurrì, mɑ́ wɑg men-ɑ́ yije nyi bëëd yi gen kì kömi Nɑm Urdun ɑ́rënyi! Jwøng-ɑ Ácwɑ̈ɑ̈j, Jwøgɑ yɑ ɑ́köbbe kinni, “Göög yïn ɑ́ jɑlkwɑ̈yi dyëg-ɑ ókïdhi be ngɑlø yi wëëg gen yøw, ge nyi wɑ̈dhi kɑ ngɑlø yi wëëg gen yøw, o ge pɑ nyi cɑy, kɑ rïngø nyi ngeew gen wɑ̈g ge okööbø kinni, ‘Pwøj wɑ Jwøng-ɑ Ácwɑ̈ɑ̈j! Wɑ ɑ́kɑ̈ri!’ Men-ɑ́ jøkwɑ̈yø mø gen yethi gen pɑ ywöngi kipe gen.” Jwøng-ɑ Ácwɑ̈ɑ̈j okööbø kinni, “Yijɑ pɑ ywöngi kipe tyëng kömi piny këti. Yɑn kiriɑ ɑ ócïb ji cinggi jɑggi gen. Piny órënyi yi jɑggɑni, o koo yiel yi yɑn kì cinggi gen.” Yɑ ɑ́kïr yi tyëngdyëg. Agöögɑ yɑn ɑ́ kwɑ̈yi dyëg-ɑ óngɑl. Akɑ̈bbɑ ki lødh ɑ́ryew, kɑ ɑ́kyel cɑgɑ ɑ́ “Jwödhø,” kɑ men-ɑ kyeelø cɑgɑ ɑ́ “Rëbø.” Codhe ɑkorɑ dyëg. Kɑ pyëwɑ órënyø ki jøkwɑ̈yø ɑ́dɑ̈g mø mɑɑn yɑn, kɑ ge nɑ̈gɑ bënn kì yij dwɑ̈y ɑ́kyel. Codhe, ɑköbbɑ dyëg kinni, “Yɑ pɑth ki jɑlkwɑ̈yø mi wun këti. Ngɑn thøw, wiy thøwe, men rënyi wiy rënye. Møg-ɑ ódöng, ri gen ónɑ̈g yi gen keti gen.” Codhe, ɑkwɑnyɑ lonh-ɑ cwøl ɑ́ “Jwödhø” kɑ torɑ, ɑ́ nyuudhi mi pɑ̈di lwöbø men-ɑ ɑ́ying kɑɑm Jwøng-ɑ Ácwɑ̈ɑ̈j geki pödhh. Lwömɑni ɑ́pɑ̈d dicyɑ̈ngɑni. Codhe, ɑliidh møgɑni yi tyëng-ɑ nyi ngyewi dyëg, kɑ gø yod gen kinni, bɑ Jwøng-ɑ Ácwɑ̈ɑ̈j ɑ kööbø kì riɑ. Kɑ ge köbbɑ kinni, “Keløg e odwɑddø yi wun, mëggu yɑn kööngɑ, de keløg e pɑ dwɑddi yi wun, wiy bëëde.” Codhe, ɑcudi gen yɑn ki ngyëny ɑ́tegg pyɑ̈r ɑ́dɑ̈g gɑ kööngɑ. Aköbbi yɑn yi Jwøng-ɑ Ácwɑ̈ɑ̈j kinni, “Cïb gen kömi ngyënyyi Kengø.” Akwɑnyɑ ngyëny ɑ́tegg pyɑ̈r ɑ́dɑ̈g, møg-ɑ ɑ́rømmi yi gen gɑ kööngɑ ceth, ɑcïbɑ gen kömi ngyënyyi Kengø. Codhe, ɑtorɑ ryeew lødh, men-ɑ cwøl ɑ́ “Rëbø.” Kɑ Yeudiyɑ̀ ódɑ̈ngø geki Isrɑil. Codhe, ɑköbbi yɑn yi Jwøng-ɑ Ácwɑ̈ɑ̈j kinni, “Døøg ki gwøg yïn ɑ́ jɑlkwɑ̈yø këti, göög yïn ɑ́ jɑlkwɑ̈yø mɑ dhëg. Dyëgɑ ɑ́cïbɑ cingi jɑlkwɑ̈yø me pɑ yiel gen kɑ̀ dwɑddi gen nɑ̈gø, wɑlɑ̀ møg-ɑ wɑ̈ɑ̈ny pɑ yɑb yi en, o møg-ɑ ri gen di kedd pɑ tuur yi en, wɑlɑ̀ møg-ɑ døøj pɑ pidhe. De yöd e cɑm-ɑ rïnggi møg-ɑ cwɑɑdhø, kɑ dɑddi gïn nyi kɑ̈ɑ̈le wɑ̈g. Jɑlkwɑ̈y-ɑ dhëg menɑni ree dɑ cyën! Dyëge ɑ́wiye piny. Ónyönhi yi liny. Cinge ódhëg, kɑ wɑnge, wɑɑng kyëj ocørø.” Men bɑ wööni Jwøng-ɑ Ácwɑ̈ɑ̈j kiper Isrɑil; Jwøng-ɑ Ácwɑ̈ɑ̈j ɑ ɑ́cwɑ̈j mɑl kí piny, kɑ dhɑnhø thödhe ki wëy, okööbø kinni, “Yerusɑlem ógwøgɑ e nɑ óthɑ̈ngi møgi oløg, pödhh-ɑ bɑdhhe bënn ómɑ̈dhi kɑ ge ócyerø ni ji-ɑ ónɑ̈gø yi møgø. O keny-ɑ ótyeg gen Yerusɑlem, kɑ̈ddi Yeudiyɑ̀ ceg kɑ tyegø thyew. De keny-ɑ óbëën bøli kenyɑni, Yerusɑlem ógwøgɑ e nɑ kït me peeg. Pönh-ɑ ópɑ̈nyii ki tïngø, ótor yi en. Pödhhi kömi piny bënn órëbi kipe nyɑɑg ki en. Kì bøli kenyɑni, pödhhɑni ógöjjɑ wɑ̈ɑ̈rø, kɑ jøkyënyì omyëlø. Tyëng Yeudiyɑ̀ ókøny yi yɑn, de kyënyi tyëngmɑ̈ɑ̈nø ógöjjɑ cøørø. “Wɑ̈thi kɑ̈lli Yeudɑ̀ okööbø ki pëthi gen kinni, ‘Jwøng-ɑ Ácwɑ̈ɑ̈j jie møg-ɑ bëëdø kì Yerusɑlem, nyii thödhø yi en ki tegø.’ “Kì bøli kenyɑni kɑ̈lli Yeudɑ̀ ógwøøgɑ ge nɑ mɑc kì yij thïm, wɑlɑ̀ kì yij pwödhi gemè me rum cyegø. Pödhh-ɑ bɑdhhi gen bënn ónɑ̈g yi gen. Tyëng Yerusɑlem óbëëd ge pɑ böggi. “Yɑn yɑ Jwøng-ɑ Ácwɑ̈ɑ̈j, liny Yeudiyɑ̀ ówëggɑ tyɑ̈mø møti, kipe kinni o kwɑrri Debïd geki tyëng Yerusɑlem cög ge pɑ thwøg ki gen. Kì bøli kenyɑni bɑ Jwøng-ɑ Ácwɑ̈ɑ̈j ɑ ókorri tyëng-ɑ bëëdø kì Yerusɑlem, o cɑgg ɑ́ ngɑn nyødh kì kelli gen, ótëngi ni kɑ ɑ́bëëd Debïd. Ge ópyejji yi kwɑrri Debïd ni kenyi pyëjji wëywöni Jwøng-ɑ Ácwɑ̈ɑ̈j, wɑlɑ̀ ni Jwøng-ɑ Ácwɑ̈ɑ̈j kiree. Kì bøli kenyɑni, pödhh-ɑ dwɑddi pɑ̈ɑ̈r kömi Yerusɑlem bënn ónɑ̈g yi yɑn. “Kwɑrri Debïd geki tyëng Yerusɑlem óthödhɑ ki wëyi ywøøg yeth geki wëyi mɑ̈ddø. Ge ónenni yï ngɑn-ɑ ɑ́cwøb yi gen kɑ othøø, o gø óywøg yi gen ni nyɑɑr gen men bɑ ɑ́kyel. Ge óywöngi ki ywøng teg ni ji møg ywøg wɑ̈d gen, wɑ̈n-ɑ kɑyø. Kì bøli kenyɑni, óbëëd e dɑ ywøg me dwøng kì Yerusɑlem, ni ywøng-ɑ ɑ́ywøøg Adɑd Rimön, kì thwøri Megidø Wïlɑ̈bø, Jwøng-ɑ Ácwɑ̈ɑ̈j okööbø kinni, “Keny-ɑ óbëën bøli kenyɑni, wɑɑng pï óyieb, o pïgɑni lwøøg orøøg kwɑrri Debïd geki tyëng Yerusɑlem, kí bɑ̈jji gen kì bɑng kɑ ɑ́mɑlli gen ngïjji jwögg-ɑ pɑth. Kì bøli kenyɑni nyingi ngïjji jwögg-ɑ pɑth ówɑ̈ɑ̈ny kì yij pödhø, kɑ bong-ɑ ngɑn pɑrri gen këti. Ngɑn-ɑ kööbø cem ɑ́ jɑltöng ónyiigɑ kì pönhï. O mɑlli ngïjji jwögg-ɑ pɑth lɑ̈ɑ̈nyɑ. Ngɑn-ɑ ónudd e otöngø, wïye kí meye ókööbø kinni nɑ̈g, mɑ́ e ɑ́kööb cem e kööbø kɑ nyingi Jwøng-ɑ Ácwɑ̈ɑ̈j, de yöd e ceg-ɑ pyed. Keny-ɑ ótönge, ónɑ̈g-ɑ yi wïye geki meye ceth. Kì bøli kenyɑni, jøtöng wɑ̈thi gen ólɑ̈ɑ̈y yi kwøbb-ɑ ɑ́cɑ̈rri gen keløg gï ótöng yi gen, ge koo rugø ki ógudh-ɑ ócwɑ̈jø ki yëyy, ge wëny-ɑ ji. De jɑltöng ókyëdø kinni, ‘Yɑ pɑth ki jɑltöng, de yɑ bɑ jɑlpur, bene gwøgɑ kër-ɑ ɑ́pïïdhɑ ceth.’ Keny-ɑ ópyëjii kinni, ‘Á kedd mø ngø ɑ rií ɑnɑn?’ Ólöggi kinni, ‘Riɑ ɑ́kïdh ɑ gøl mɑ̈dhɑ ki kedd.’ ” Wïlɑ̈bø Jwøng-ɑ Ácwɑ̈ɑ̈j okööbø kinni, “Cyëëw pilø, kɑ yï pɑ̈ɑ̈r kömi jɑl-ɑ kwɑy dyëgɑ! Nɑ̈ɑ̈g, o dyëg tɑy gen. Jiɑ ópwöödɑ piny. O ryeew ɑ́dɑ̈gg kwɑnni ji kì yij pödhø bëne óthøw. O kyeel ɑ́dɑ̈gg kwɑnni ji men-ɑ ódöng, órɑng yi yɑn ki mɑc ni kenyi rɑɑng ɑ́tegø kí dhɑb. Codhe o yɑ kwɑjji yi gen, o kwɑ̈jji gen óløøg yi yɑn. Kɑ ge köbbɑ kinni ge bɑ jiɑ, kɑ ge okööbø kinni, yɑ bɑ Jwøøg gen.” Cyɑ̈ɑ̈ng cɑ́yi Jwøng-ɑ Ácwɑ̈ɑ̈j ɑ́cyɑ̈ngi. Yerusɑlem óryɑ̈g, kɑ gïg-ɑ ɑ́kɑb pɑ̈ngi ge onennø yi wun ki nyingi wun. Pödhh-ɑ kyeelø óreb yi Jwøng-ɑ Ácwɑ̈ɑ̈j, o ge bï gen be nyɑɑg ki Yerusɑlem, o kɑɑlɑni mɑg. Udde óyɑg kɑ tyëng-ɑ mɑ̈nn mød. Kɑ budi ji kïdhi yïnø, de kwï jii kɑɑlɑni ódöng. Codhe, o Jwøng-ɑ Ácwɑ̈ɑ̈j kedhe be nyɑɑg ki pödhhɑni ni kɑ ɑ́nyïɑ̈gge cøn. Kì cyɑ̈ngɑni, Jwøng-ɑ Ácwɑ̈ɑ̈j ócungi kì wïj Kïti Dhetun, ɑ ying wɑɑng cyɑ̈ɑ̈ng mwøl kì Yerusɑlem. Codhe, o kïnɑni ree pɑ̈nge ɑ́ ɑ́ryew, o kɑɑm gen cwööb yi tör me dwøng, cɑg kì wɑɑng cyɑ̈ɑ̈ng mwøl gïti wɑɑng cyɑ̈ɑ̈ng böörø. Budi kït ókedhi wɑɑng wuudø, kɑ bun-ɑ kyeelø kedh-ɑ wɑɑng wurlwɑl. Wu ópɑ̈r wu kɑ̈l-ɑ yij tör-ɑ dɑ̈ɑ̈ng kïttì. Wu ópɑ̈r ni kɑ ɑ́pɑ̈r kweyyi wun yi onhɑ̈ɑ̈nh piny kì ri Rɑ̈dh Udhiyɑ̀, rɑ̈ɑ̈dh Yeudiyɑ̀. Jwøgɑ, Jwøng-ɑ Ácwɑ̈ɑ̈j óbï geki wëywödde bënn. Keny-ɑ óbëën bøli kenyɑni, óbëëd e bong ɑ́piy wɑlɑ̀ kööjø, wɑlɑ̀ muudhø, piny ócög e tɑr kì dicɑ̈ng kí wɑ̈r. Bøli keny-ɑ ócwöb gïgɑni ngɑ̈ny-ɑ yi Jwøng-ɑ Ácwɑ̈ɑ̈j kete. Keny-ɑ óbëën cyɑ̈ngɑni, pïg tïl ómulli kì Yerusɑlem, budi pïgɑni ómøli Luuy Omelø, kɑ bun-ɑ kyeelø møll-ɑ Nɑɑm Omeli Tɑr, pïgɑni ótyëg run bëne ge ómullø kì lew kí cwir. Codhe, o piny bëne jɑɑg yi Jwøng-ɑ Ácwɑ̈ɑ̈j, ómɑlli yi ji bënn ɑ́ Jwøk, o nyinge óyod yi gen bënn. Piny bëne wïje ópɑ̈ɑ̈r, cɑg kì Gebɑ̀ kì wɑɑng wuudø gïti Rimön kì wɑɑng wurlwɑl. De Yerusɑlem ógöögø ɑ́ ótong kɑ ólɑ̈nyø, cɑ̈gi kì Dhøg Ben Yɑmïn e gït-ɑ Dhøg Wïj Tung, keny-ɑ ɑ́di dhøng-ɑ weenø, kɑ ócɑ̈gø kì ri Ønbɑ̈r mi Anɑnel gïti keny-ɑ nyi biij oløg mi gøldwøng. Ji óbëëdø kì Yerusɑlem e bong gïn böggi yi gen; bong gïn cigii rënyø. Pödhh-ɑ́ nyi nyïɑ̈ggi ki Yerusɑlem bënn ógöjji rɑ̈ɑ̈m dëlli mø rijjø yi Jwøng-ɑ Ácwɑ̈ɑ̈j. Dëlli gen ówɑdhhi piny ge nudd ge ócungø kì kömi tyelli gen, o nyingi gen ókwɑ̈ɑ̈g yethi uddi gen, kɑ lebbi gen kwɑ̈ɑ̈g-ɑ yethi dhøggi gen. Ge ógöjji tummi wɑ̈thi gen yi Jwøng-ɑ Ácwɑ̈ɑ̈j kì cyɑ̈ngɑni, kɑ ngɑn nyi wɑ̈dh-ɑ töngi kömi wɑɑd gen yøw. Jø Yeudiyɑ̀ ónyïɑ̈ggi kiper Yerusɑlem, kɑ kɑ̈ɑ̈r pödhh-ɑ kyeelø kɑb yi gen, ɑ løg dhɑb kí ɑ́tegø kí ógudh mø gïïr cɑrø. Jɑmmi tyëngmɑ̈ɑ̈nø óthøw; gen ɑ kyënyì kí ógɑll, kí ɑmɑl geki ɑderr. Codhe, o tyëng-ɑ bodh kì kelli pödhh-ɑ ɑ́nyïɑ̈ggi ki Yerusɑlem nyi bï gen be mɑlli Wïlɑ̈bø Jwøng-ɑ Ácwɑ̈ɑ̈j ɑ́ rɑ̈dh kì yethi runn bënn, kí be gwøg ki Kwëër Akɑnnì. O pödhh-ɑ óbɑ̈nyi ki bëën be mɑlli Jwøng-ɑ Ácwɑ̈ɑ̈j ɑ́ rɑ̈dh, kødh koo mɑ̈gi kì piny gen. Keløg tyëng Rïp pɑ bï be gwøg ki Kwëër Akɑnnì, Jwøng-ɑ Ácwɑ̈ɑ̈j ceg-ɑ ödi kömi gen ki rɑ̈ɑ̈m dëllì møg-ɑ ɑ́göjje pödhh-ɑ kyeelø, møg-ɑ nuti bëënø. Bene cɑ́y-ɑ óbï kömi Rïp geki pödhh-ɑ koo gwøg Kwëër Akɑnnì bënn ɑnɑn. Kì bøli kenyɑni, cɑgg ɑ́ óköddi muddi kyënyì, ge ógwed kinni, “Athyeey Jwøng-ɑ Ácwɑ̈ɑ̈j”. Dɑ̈ggi Kengø óbëëdø gɑ ɑkwër ni tɑ̈mmi këli lɑm. Dɑ̈ggi Yerusɑlem geki dɑ̈ggi Yeudiyɑ̀ bënn ókwër kipe gwøøg Wïlɑ̈bø, Jwøng-ɑ Ácwɑ̈ɑ̈j. Óbëëd ɑ́ yethi gen ɑ nyi thɑɑl gëdhhì yi tyëng-ɑ nyi muuj gen. Kì bøli kenyɑni óbong-ɑ jøngyew kì yij Kengi Wïlɑ̈bø, Jwøng-ɑ Ácwɑ̈ɑ̈j. Men bɑ wööni Jwøng-ɑ Ácwɑ̈ɑ̈j men-ɑ ɑ́öre Isrɑil e kɑ̈ll-ɑ yi Mɑlɑkì. Jwøng-ɑ Ácwɑ̈ɑ̈j okööbø kinni, “Wu mɑɑr yi yɑn, wu tyëng Isrɑil!” De ge yöd ge okööbø kinni, “Mɑɑr-ɑ mɑɑr wøn ɑ́nyodh yi yïn kidï?” Jwøng-ɑ Ácwɑ̈ɑ̈j ólöggi kinni, “Isøø ɑ́bëëd gɑ nyiimëëg geki Yɑgob, yɑ ɑ́mɑɑr-ɑ Yɑgob geki kwɑrre, de Isøø ɑ́bɑnyɑ geki kwɑrre. Pödhi Isøø, piny-ɑ bɑ kïttì, ɑ́gwøgɑ ɑ́ ryɑng. Bong dhɑnhø me bëëdø kì yije ɑnɑn, ɑ́lɑg-ɑ yi ógwøgg.” Keløg kwɑrri Isøø, ɑ løg tyëng Edöm okööbø kinni, “Pödhi wøn ɑ́toor piny de óger yi wøn këti.” Wïlɑ̈bø, Jwøng-ɑ Ácwɑ̈ɑ̈j ólöggi kinni, “Ke døøgu en ki gerø, toorɑ’ piny këti. Ge ócwølli yi ji gɑ pönh-ɑ rɑj, pönh-ɑ ócög e omɑɑnø yi Jwøng-ɑ Ácwɑ̈ɑ̈j gïti ɑtheer.” Wu tyëng Isrɑil, wu ólïdhi ki nyingi wun, kɑ wu okööbø kinni, “Wïlɑ̈bø, Jwøng-ɑ Ácwɑ̈ɑ̈j yïe dɑ tegø kì kömi pödhh bënn; cɑgg pödhhɑni pɑth ki pödhi Isrɑil!” Wïlɑ̈bø Jwøng-ɑ Ácwɑ̈ɑ̈j okööbø kinni, “Dhɑnhø nyii wørø yi wɑ̈de, o bɑ̈ng wɑ̈n nyii wørø yi en. Yɑ bɑ wïyi wun, ɑ́ kipe ngø ɑ pɑ wøru yɑn? O yɑ bɑ wïi wun, ɑ́ kipe ngø ɑ pɑ böggu yɑn? Wun ɑ ókwër, yɑ ɑ́biw yi wun, de wu yöd wu opëjø kinni, ‘Yï ɑ́biw yi wøn kidï?’ Wu ónyudhɑ kër-ɑ biw wun yɑn. Wu ɑ́kïdh-ɑ jɑmmì geki muggi mø ywëdhø yij këlɑ. De wu okööbø kinni, ‘Áywëdh yi wøn kidï?’ Bɑ ɑbiw yi wun, kɑ̀ rum wun kinni i këli Jwøng-ɑ Ácwɑ̈ɑ̈j bong pere. Kenyi kɑ̈ni wun ki jɑmmì mø bɑ cörr, gɑ gëdhhì, rømmi yi wun e pɑth ki gïnrɑj? O kenyi kɑ̈ni wun ki jɑmmì mø bɑ ngöll, kí møg dëlli gen rɑ̈mø, rømmi yi wun e pɑth ki gïnrɑj? Keløg jɑmm-ɑ ni møgɑni muuj wu’ jɑngi wun, gï oyïëyø yi en, kɑ wu pwøj en?” Anɑn wun ɑ ókwër, kwɑjju Jwøk o wɑ gögge ki gïndøj. Kwɑ̈jji wun pɑ løøg yi en, o bɑ bɑ̈jji wun. Wïlɑ̈bø, Jwøng-ɑ Ácwɑ̈ɑ̈j okööbø kinni, “Ede ɑ bëëd e bong ngɑn cyëëg dhø Kengø kì kelli wun, o wu mɑ̈ɑ̈ne kodh ki mɑc kì wïj këlɑ, pyëwɑ pɑ med ki wun; gëdhh-ɑ muuju yɑn pɑ yïëy yi yɑn. Yɑ owørø yi jurrì bënn kì kömi piny, cɑg kì ri tuuli cɑ̈ng gïti kɑ̀ budde. Yɑ nyii rɑ̈bbø yi gen ki bɑkur, kɑ yɑ nyi muuj gen ki gëdhhì mø dhïw. O yɑ owørø yi gen. De yɑ ceg kɑ biwø yi wun kɑ̀ kööb wun kinni i këlɑ bong pere, kí kenyi kïdhu wïj këlɑ ki gïg-ɑ cedh yi wun kì kelli jɑmmi wun. Wu okööbø kinni, ‘Wø ɑ́pïd yi gïgɑni bënn!’ Wu törr-ɑ wɑ̈thi wun kì bølɑ. Kɑ yɑ nyi muuj yi wun ki jɑmm-ɑ bɑ ɑkwɑll, kí mø bɑ ngöll, kí mø dëlli gen rɑ̈mø. Wu orumø kinni ge óyïëy yi yɑn ki yï wun? Ngɑn köngi ce yɑ óthödhe ki gïïpiny, kɑ yɑ muuje gëëdhi me rɑj, e kelli jɑmme dɑ mø døj, ngɑn ni menɑni ree dɑ cyën! Mɑ́ yɑ bɑ rɑ̈dh me dwøng, o yɑ oböggø yi jurrì bënn.” Wïlɑ̈bø Jwøng-ɑ Ácwɑ̈ɑ̈j köbb-ɑ ókwër kinni, “Cigg møg bɑ kiper wun, wun ɑ ókwër. Keløg wu pɑ lïngø, o keløg kwøbbɑ pɑ cïb wun pëthi wun, kɑ nyingɑ wør yi wun, wu göjjɑ’ cyën, kɑ gyëdhhi wun løgɑ cyën. Nyigi wun ógöjji cyën, kɑ nyingi wun wøødhɑ ki wɑyyi gëdhh-ɑ nyi ngɑl yi wun, kɑ wu weddi kömi kwëëdh wɑyyì. Wu ɑ́örɑ cigg møg kɑ per kinni, o lwöm-ɑ kɑɑm wøn, wøki Leebì kweyi wun, cöge e pɑ pɑ̈d. “Lwöbø ɑ́ying-ɑ kɑɑm wøn ki kweyyi wun, lwömi wëy kí mër. Wëy geki mër ɑ́mëggɑ gen kiper kinni, o yɑ wør yi gen. Yɑ ɑ́wør yi gen kidyër kì yethi cyɑ̈nggɑni, kɑ nyingɑ böggi yi gen. Ge ɑ́pwöny-ɑ kwøbb-ɑ bɑ dyër, pɑth ki bɑ̈jjø ɑ ɑ́pwönyi yi gen. Ge ɑ́bëëd ge nyi gwøg-ɑ gïn-ɑ dwɑddi yi yɑn, kɑ ji mø gïïr dwöög gen wɑ̈g kì yuu orøg. Gwøøg ókwër bɑ pwönyi kwøbbi Jwøk, Ciggi Jwøk dïd-ɑ yï gen yi ji, mɑ́ ge bɑ jøwööni Wïlɑ̈bø, Jwøng-ɑ Ácwɑ̈ɑ̈j. “De ɑnɑn, wun ɑ ókwër, yuu-ɑ dyër ɑ́kyëj yi wun. Ji mø gïïr ɑ́göjji orøg yi pwöny-ɑ pwönyi yi wun. Lwöm-ɑ ɑ́ying kɑɑm wøn, wøki kweyyi wun, ɑ́pɑ̈d yi wun. Yɑn kì tungɑ thyew, wu göjjɑ’ cedhø yi tyëng Isrɑil, mɑ́ ciggɑ nuti lïngø yi wun, o kenyi pwönyu jiɑ, wu nyi pwönyi wu ceg-ɑ geny.” Wïyee pɑth ki ɑ́kyel wɑ bënn? Wɑ nuti cwɑ̈j-ɑ yi Jwøk ɑ́kyel wɑ bënn? De wɑde ɑ nyi pɑ̈d wɑ kwøb ki riee, o ede lwöm-ɑ kɑɑm Jwøk geki kweyyee ɑ biw wɑ en? Wu tyëng Yeudiyɑ̀, wude ɑ pɑ̈d wun lwöm-ɑ ɑ́ying kɑɑm wun ki Jwøk, kɑ wu pëgg-ɑ be gwøg ki gïgrijjø kì Yerusɑlem geki yij pödhø bëne? Kɑ Keng-ɑ mɑɑr yi Jwøng-ɑ Ácwɑ̈ɑ̈j bwöl yi wun. Kɑ wu ónyömø ki mɑ̈nn mø kwɑjji jwögg-ɑ pɑth. Tyëng-ɑ göögø ki gïg ni møgɑni kì kelli Isrɑil óngøl wɑ̈yi gen, cɑgg ge nyi kɑ̈ni ki gëdhhì mø muuj gen Wïlɑ̈bø, Jwøng-ɑ Ácwɑ̈ɑ̈j. Gïjø megø ɑ gwøg yi wun èn. Këli lɑm mi Jwøng-ɑ Ácwɑ̈ɑ̈j ɑ́mud yi wun ki pïi nyingi wun, wu óywöngø, wu okïïwø, mɑ́ gëdhh-ɑ nyi muuju en pɑ nyi yïëy yi en këti ni kɑ ɑ́bëëde kɑ̈ge dööng. Wu cög wu opëjø kinni, “Ede pyëw Jwøng-ɑ Ácwɑ̈ɑ̈j ɑ pɑ nyi mïne yi gëdhh-ɑ nyi muuj yi wøn?” Bɑ kipe kɑ ɑ́tɑ̈ɑ̈ng nyɑn-ɑ ɑ́nywøm yi yïn yï bɑ wøb. Ábëëd ɑ́ cyëgí, o ɑ́tɑ̈ng yi yïn ngö yï ɑ́rum ki köngø kì bøli Jwøng-ɑ Ácwɑ̈ɑ̈j, kinni ómïdhi yi yïn e bɑ cyëgí ceth. Wu nuti rebø yi Jwøk, kɑ wu ogöögø ki dhɑnhø ɑ́kyel? Bɑ kiper ngø ɑ ɑ́rebe wun? Bɑ kipe kinni o wu yïddi wun ki nywøl mø bɑ jii Jwøk kidyër. Adɑ́ ko di ngɑn me tɑ̈ng cyëge cyee. Jwøøg Isrɑil, Jwøng-ɑ Ácwɑ̈ɑ̈j okööbø kinni, “Tɑ̈ng, mɑɑn yi yɑn. Pyëwɑ nyii rënyø kenyi di ngɑn tɑ̈ng cyëge, menɑni rɑɑj. Yɑ kyëdd-ɑ wun, ko di ngɑn tɑ̈ng cyëge, møg-ɑ kwöng yi wun ko nyi pɑ̈d wun.” Jwøng-ɑ Ácwɑ̈ɑ̈j ɑ́pïd yi wun ki kwøbbi wun. De wu ceg-ɑ pyëj kinni, “Jwøng-ɑ Ácwɑ̈ɑ̈j ɑ́pïd yi wøn kidï?” Jwøng-ɑ Ácwɑ̈ɑ̈j ɑ́pïd yi ki kwøbbi wun kinni, “Tyëng-ɑ göögø ki gïgrijjø bënn mɑɑr yi Jwøng-ɑ Ácwɑ̈ɑ̈j,” Kí pyëjji wun kinni, “Ágøne Jwøng-ɑ ɑ́kømmi i nyi gøgg-ɑ dyër?” Wïlɑ̈bø, Jwøng-ɑ Ácwɑ̈ɑ̈j okööbø kinni, “Lïng wun, jɑlwöönɑ óörɑ bølɑ, be gwiri yöö kiperɑ. Wïi wun men-ɑ pyënyi yi wun, óceg ì nywil kì yij Kenge, jɑlwööni lwöbø men-ɑ yɑb yi wun óbï.” Bong ngɑn-ɑ óböyi ki cuung kì bøle keny-ɑ óbëëne; óni sɑbon ɑ nyi kɑ̈ɑ̈l cïl bënn wɑ̈g; o óni mɑc ɑ nyi leeny ɑ́tegø o dhïwe. Óni bødhø ɑ nyi leny ɑ́tegø o dhïwe, ni bønh-ɑ leny dhɑb kí ɑ́tegø, ókwër ógwøg ge dhïw yi jɑlwööni Jwøng-ɑ Ácwɑ̈ɑ̈j. O ge døøg gen be muuji Jwøng-ɑ Ácwɑ̈ɑ̈j ki gëdhhì mø dhïw. Codhe, o pyëw Jwøng-ɑ Ácwɑ̈ɑ̈j døøge be mïnø yi gëdhh-ɑ nyi muujii yi Yeudiyɑ̀ geki tyëng Yerusɑlem ni kɑ ɑ́bëëde cøn kɑ̈ge dööng. Wïlɑ̈bø, Jwøng-ɑ Ácwɑ̈ɑ̈j okööbø kinni, “Yɑ óbï yï wun be cɑyi wun. Tyëng-ɑ gøggi yɑdh ójwɑn yi yɑn ki cɑyø, geki cwøw-ɑ yɑ̈bø ki mɑ̈nn, kí mɑ̈nn-ɑ yɑ̈bø ki cwøw, geki tyëng-ɑ nyi köngi ki pyed kì burø, kí tyëng-ɑ pɑ nyi muuj kööngi ngeti gwøg, kí tyëng-ɑ nyi ruj thwömm geki kïjj, kí tyëng-ɑ nyi ruj ngeti jur-ɑ kyeelø men-ɑ buti gen, kí tyëng-ɑ pɑ nyi wør yɑn; ge ócɑyɑ bënn. “Mɑ́ yɑ bɑ Jwøng-ɑ Ácwɑ̈ɑ̈j, riɑ pɑ wil yi yɑn, o lwöbø pɑ pɑ̈d yi yɑn, kwɑrri Yɑgob nudd gɑ jiɑ. Áwöni kì ri kweyyi wun, wu bɑny-ɑ ciggɑ, o ge nuti mïdhø yi wun. Dwöögu köörɑ, o wu óyiel yi yɑn. De wu opëjø kinni, ‘Gwøg wø ngø, o wø dwöög wøn yïí?’ Jwøk ócuggø wënyø yi dhɑnhø cøn? Pɑ cuggi kinni tek. De yɑde ɑ wënyu yɑn? Wu okööbø kinni, ‘Yï ɑ́wëny yi wøn kidï?’ Yɑ köbb-ɑ wun kinni, wu ɑ́kwɑ̈ddi kì yïɑ kɑ̀ pɑ nyi mëggu yɑn ɑ́kyeel pyɑ̈rri jɑmmi wun geki gëdhhì. Cyën nud kì ri wun bënn, mɑ́ yɑ ɑ́wëny yi pödhø bëne. Kɑ̈nu ødɑ ki ɑ́kyeel pyɑ̈rri jɑmmi wun bënn, o gïncɑm bëëde e nud kì ødɑ. Pɑ̈nyu yɑn ki göggi møgɑni, o lidh yi wun keløg ɑwɑjji mɑl pɑ yïëbbɑ wun, kɑ gyëdh kønyɑ kömi wun. Bɑ̈nyø geki twöngg-ɑ kyeelø ómɑ̈ɑ̈nɑ cɑmi byelli wun. Köthi yenhi wun óbëëd ge pɑ̈ng yi nywøl. Codhe, o wu cwølli yi jurr-ɑ kyeelø wu bɑ ɑgyëdh, mɑ́ piny wun óbëëd e bɑ kej bëëdø me døøj.” Jwøng-ɑ Ácwɑ̈ɑ̈j okööbø kinni, “Wu ɑ́kööb ki kwøb mø rijjø ki mendwøng kì riɑ. De wu opëjø kinni, ‘Bɑ ngø ɑ rɑj, ɑ ɑ́kømmi yi wøn kì rií?’ Wu okööbø kinni, ‘Mɑlli Jwøk bong pere, ɑ́ ngø ɑ yod kì bɑng mïdhi cigge? Wɑlɑ̀ nyudhi Wïlɑ̈bø, Jwøng-ɑ Ácwɑ̈ɑ̈j kinni, wø ɑ́yewi ki orøøg wøn kɑ̈ɑ̈l-ɑ ngø? Nënni e bɑ tyëng-ɑ tɑ̈dø ɑ pëthi gen med. Pɑth ki kɑ̈r kete ɑ ɑ́yod yi tyëngrijjø, de Jwøk nyii rɑngø yi gen ki gïgrijjø møg-ɑ gøggi yi gen, o bong gïn kedhi ri gen.’ ” Kɑ tyëng-ɑ böggi Jwøng-ɑ Ácwɑ̈ɑ̈j ri gen köbbi gen, kɑ Jwøng-ɑ Ácwɑ̈ɑ̈j yïthhe kyëne, kɑ gïg-ɑ kømmi yi gen lïnge. Kɑ nyingi tyëng-ɑ wørii gweed piny kì bøle kì yij wɑ̈nyi pɑr. Jwøng-ɑ Ácwɑ̈ɑ̈j okööbø kinni, “Ge óbëëdø ge bɑ jiɑ. Cyɑ̈ng-ɑ ógwøgɑ gïn-ɑ dwɑddi yi yɑn ki gwøgø, pyëwɑ ólɑ̈ɑ̈m ki gen, ni dhɑnhø ɑ pyëwe nyi lɑ̈ɑ̈m ki wɑ̈de, eni wɑ̈n-ɑ gøggi gïn-ɑ dwɑddi yi wïye. O gïn-ɑ bɑ̈ɑ̈n kì kɑɑm tyëngdøj geki tyëngrijjø lidh yi jiɑ, kí gïn-ɑ bɑ̈ɑ̈n kì kɑɑm ngɑn-ɑ gøggi gïgdøj geki ngɑn pɑ nyi göögø ki gïndøj.” Wïlɑ̈bø, Jwøng-ɑ Ácwɑ̈ɑ̈j okööbø kinni, “Cyɑ̈ɑ̈ng cɑ́y obëënø; eni cyɑ̈ng-ɑ órɑ̈bbi tyëngrijjø ni kenyi rɑ̈bbi wél. Ge órɑ̈b kì cyɑ̈ngɑni; bong gïn-ɑ ódöng kì ri gen. De tyëng-ɑ wør yɑn, tegø men-ɑ yielɑ gen ómënyø ni cɑ̈ng kì kömi gen, kɑ dëlli gen opɑ̈dø; kɑ ge óbeddø ni røjj yi medi pëthi gen. Tyëngrijjø ótyɑm yi tyëngdøj, kɑ ge nyøn kì piny ni tør. Møgɑni ógwøg yi yɑn ceth. “Pɑru Ciggi Mosɑ̀ bɑ̈ngɑ, gen ɑ møg-ɑ ɑ́cïgɑ tyëng Isrɑil kì Sinɑy. Ciggɑni ɑ́muuj yi yɑn ge bɑ møg mïdhi yi Isrɑil. “Eliyɑ̀ jɑltöngɑ óörɑ yï wun, e bøli kej cɑ́y nuti bëënø. Wëëg ódwøøge kej ɑ́kyel geki nyigi gen, ke bɑ̈jji møgɑni ki cwöbø, yɑ óbï kɑ pödhi wun rënyɑ.” Men bɑ lwøbi gøl yɑɑ Yëso Mesiy, en ɑ kwɑɑr Debïd, o bɑ kwɑɑr Abrɑhɑm. Rïjj-ɑ cɑ̈gi kì ri Abrɑhɑm gïti ri Debïd bɑ pyɑ̈rø wïdɑ́ngwen; o rïjj-ɑ cɑ̈gi kì ri Debïd gïti kɑ ɑ́køøl ji yïnø Bɑbïl bɑ pyɑ̈rø wïdɑ́ngwen; o rïjj-ɑ cɑ̈gi kì ri køøli ji yïnø Bɑbïl gïti ri Mesiy bɑ pyɑ̈rø wïdɑ́ngwen. O men bene kër-ɑ ɑ́øør Yëso Mesiy piny: Meerì ɑ́bëëd e onywømø yi Yosep, de ɑ́yod yije dɑ dhɑnhø men-ɑ óyodø ki tegi Wëykwërø, e nuti dɑ̈gi yïe. O Yosep ɑ́bëëd ɑ́ jɑl me døj, nuti dwɑddi wøwi møgɑni, de gø ɑ́dwɑdde’ tɑ̈ngø kì gød. Kɑ̈ng-ɑ ɑ́nudd e orumø kì ri møgɑni, ɑcwöb wëywöni Wë kì bøle kì yethi lɑ̈g, kɑ gø köbbe kinni, “Yosep, kwɑɑr Debïd, yï ko böggi ki kwɑnyi Meerì ɑ́ cyëgí. Mɑ́ dhɑnhø men-ɑ yije ɑ́yod kɑ tegi Wëykwërø. Óøør piny ki wɑ̈d, kɑ nyinge ócɑɑg ɑ́ Yëso, mɑ́ jie óyiele kì yij orøøg gen.” Møgɑni bënn ɑ́cwöb kɑ per kinni, o møg-ɑ ɑ́kømmi yi Wë ki dhø jɑltöng mee pɑ̈dhi gen kɑ̈jji gen; kinni, “Nyɑnɑjur me nuti pɑ̈nyø nywɑlø yi jɑlø, óngøl ki dhɑnhø, kɑ øør-ɑ piny ki wɑ̈d, o ócɑg ɑ́ Imɑnwel.” (A wɑngi kinni, “Jwøk nud kì kellee.”) Keny-ɑ ɑ́cyëëw Yosep, kɑ møg-ɑ ɑ́cïgii yi wëywöni Wë gwøge ceth, kɑ Meerì kwɑnye ɑ́ cyëge. De nuti buddø ki gøn, kì kɑɑm-ɑ́ nuti pɑ̈dh en wɑ̈de piny. Kɑ cɑg yi Yosep ɑ́ Yëso. Yëso ɑ́øør piny kì kɑɑl Betleem kì Yeudiyɑ̀, kì ri Rɑ̈dh Ërödøs. Bɑng kenyɑni ɑ ɑ́bëën jøg wɑ̈thi gen pel Yerusɑlem, ge kɑ̈ɑ̈l-ɑ wɑɑng cyɑ̈ɑ̈ng mwøl, ge opëjø kinni, “Dhɑnhø men-ɑ ɑ́øør piny, ɑ́ ngɑn-ɑ ógöögø ki Rɑ̈ɑ̈dh Yeud ying-ɑ keny? Kyele ɑ́lidh yi wøn kɑ ɑ́tuule, o wø ɑ́bï-ɑ be mɑlii.” Keny-ɑ ɑ́lïngi møgɑni yi Rɑ̈dh Ërödøs, ɑngɑ̈nge geki tyëng Yerusɑlem bënn. Acønge jɑggi ókwër bënn geki jøpwönyi Ciggi Yeud, kɑ gï pëjje keny-ɑ óøør Mesiy piny. Kɑ ge ólöggø kinni, “Óøør piny kì kɑɑl Betleem kì Yeudiyɑ̀, mɑ́ møgɑni ɑ ɑ́gwed yi jɑltööng Jwøk kinni, ‘Yïn ɑ Betleem kì piny Yeudiyɑ̀, pɑth ki yïn ɑ thinh kì kelli kɑ̈ddi Yeudiyɑ̀ mɑ́ pëëji ókɑ̈ɑ̈l-ɑ rií eni pëny-ɑ ójɑɑg jiɑ, tyëng Isrɑil.’ ” Codhe, ɑcwøøl jøg-ɑ wɑ̈thi gen pel yi Ërödøs, kɑ gï pëjje bøli keny-ɑ ɑ́cwööb yi kyelɑni. Aöre gïn Betleem, kɑ gï köbbe kinni, “Kedh wun, yɑbu nyelthinh kidøøj, kɑ yɑ köbbi wun, keny-ɑ óyodu en, o yɑ ókedhɑ be mɑlii thyew.” Akedhi gen ød. Keny-ɑ ɑ́lidh gen dhɑnhø geki Meerì meye, ɑbøødh gen ri gen piny, kɑ gø mɑl gen. Apɑ̈d gen jɑmmi gen, kɑ ge kɑ̈n-ɑ wɑ̈g ki dhɑb, kí bɑkur, kí ryɑ̈ mor. Codhe, ɑkedh gen ge kɑ̈l-ɑ yöö megø, mɑ́ ge ɑ́kyëddi yi Jwøk kì yethi lɑ̈g kinni ge ko døøg yï Ërödøs. Kì bɑng kɑ ɑ́rum jøgɑni ki kedhø, ɑcwöb wëywöni Wë kì bøli Yosep kì yethi lɑ̈g, kɑ okööbø kinni, “Ërödøs óbï be yɑbi nyelthinh o gø nɑ̈ge. De dhwöödh, kwɑny nyelthinh geki meye, kɑ wu pɑ̈ɑ̈r wun Rïp. Kɑ wu bëëd wun kì kunɑni gïti keny-ɑ óköbbɑ yïn kinni dwöög.” Adhwödh Yosep, kɑ nyelthinh kwɑnye kì wɑ̈r geki meye, kɑ ge dɑ̈g-ɑ Rïp. Kɑ ge obëëdø kì kunɑni gïti kɑ ɑ́thøw Ërödøs. Møgɑni ɑ́cwöb kɑ per kinni, o møg-ɑ ɑ́kwøb yi Wë ki dhøg jɑltöng pɑ̈dhi gen kɑ̈jji gen kinni, “Wɑ̈dɑ ɑ́cwöölɑ wɑ̈g kì Rïp.” Keny-ɑ ɑ́yodii yi Ërödøs kinni ɑ́wëny yi wëll-ɑ ɑ́kɑ̈ɑ̈l wɑɑng cyɑ̈ɑ̈ng mwøl, ɑrënyi pyëwe ki mendwøng. Amuuje ki cigg kinni nɑ̈ɑ̈g othønh-ɑ bɑ cwøw kì Betleem geki myërr-ɑ bute; gen ɑ othønh-ɑ runni gen bɑ ɑ́ryew kí møg-ɑ thønhø kibøli gen bënn. Møgɑni ɑ́gwøg yi en gø kwɑɑne’ ri bøli kej cwöbi kyelø men-ɑ ɑ́kwøb yi wëllɑni. Kɑ møg-ɑ ɑ́kwøb yi Jermɑyɑ̀ jɑltööng Jwøk pɑ̈dh-ɑ kɑ̈jji gen kinni, “Akyew olïngø e kɑ̈ɑ̈l-ɑ Rɑmɑ̀, bɑ ywøg me dwøng Rɑceel ywøg-ɑ nyige, ɑ́dhɑ̈li lugø mɑ́ ge ɑ́rum ki thøø.” Kì bɑng kɑ ɑ́thøw Ërödøs, ɑcwöb wëywöni Wë kì bøli Yosep kì yethi lɑ̈g kì Rïp. Kɑ okööbø kinni, “Dhwöödh, kwɑny nyelthinh geki meye, kɑ wu døøg wun piny Isrɑil, mɑ́ tyëng-ɑ ɑ́dwɑddii nɑ̈gø ɑ́thøw.” Codhe, ɑdhwödh Yosep, kɑ nyelthinh kwɑnye geki meye, kɑ ge døøg-ɑ piny Isrɑil. De kɑ ɑ́lïng Yosep kinni, bɑ Arkelɑøs ɑ kwɑɑny lɑwi wïye Ërödøs, ɑ́ rɑ̈ɑ̈dh Yeudiyɑ̀, ɑbwøge ki døøg kunɑni. Ácigi köbbø yi Jwøk kì yethi lɑ̈g, codhe ɑkedhe be bëëdø kì myërri Gɑlelì. Kɑ pëgg-ɑ kɑɑl Nɑdhɑreth. Codhe, ɑpɑ̈dhi møg-ɑ ɑ́kwøb yi jøtööng Jwøk kɑ̈jji gen kinni, “Ócwøl ɑ́ jɑl Nɑdhɑreth.” Yethi cyɑ̈nggɑni ɑ ɑ́kedhi Jøn Jɑljwɑ̈g yij pɑ̈ɑ̈l Yeudiyɑ̀, kɑ ócɑ̈gø ki pwönyø kinni, “Yewi wun ki orøøg wun, mɑ́ Pödhi Jwøk cyɑ̈gi.” Bene en ɑ ɑ́wɑngi yi Icɑyɑ̀ jɑltöng, kɑ ɑ́kööbe kinni, “Ngɑn megø ócwöddø kì pɑ̈l kinni, ‘Tyenyu yuu Wë, gwøgu yëth-ɑ cyɑ̈dhe gɑ óbödh.’ ” Jøn nyi rug-ɑ ógødh men-ɑ ócwɑ̈jø ki yëyyi ɑmɑlø, o wëne bɑ dël, o gïgcɑmme bɑ bɑ̈nyy kí møøw kïc. Akedhi tyëng Yerusɑlem yïe, kí tyëng Yeudiyɑ̀ bënn, kí tyëng-ɑ myërri kömi Nɑm Urdun. Kɑ orøøg gen töng yi gen, kɑ ge jwɑ̈ɑ̈g yi Jøn kì Nɑm Urdun. Jøn keny-ɑ ɑ́lidhe Jøpɑresì geki Jøsɑduk mø gïïr ge bï-ɑ yïe be jwɑ̈ɑ̈gø, ɑköbbe gïn kinni, “Wu bɑ thöllì, ɑ́ men ɑ ɑ́köbbi wun kinni pɑru cɑ́y-ɑ ɑ́cyɑ̈ngi? Göög wun ki gïndøj men nyodh kinni, wu ɑ́yewi. Kɑ wu ko nyi rum ki pëthi wun kinni, wu óbødh ki cɑyø kɑ̀ kööb wun kinni, Abrɑhɑm bɑ kweyi wun. Yɑ köbb-ɑ wun kinni, tuggi kïttì møg ócuggø kwɑnyø yi Jwøk kɑ gï gwøge gɑ kwɑrri Abrɑhɑm. Dørø ɑ́rum ki cïb tyeli yɑdh, o yɑnh pɑ kɑ̈ni ki nywøl mø døøj, ceg kɑ ngølø, o leeng mɑc. Yɑ jwɑ̈ɑ̈g-ɑ wun ki pï ɑ́ ngïji yewø, de ngɑn-ɑ óbï kì bɑngɑ wu ójwɑ̈ɑ̈g yi en kɑ Wëykwërø kí mɑc. Dwøng cɑrø kibølɑ; o yɑ pɑ døøj ki kɑ̈lli wɑrre. Ólɑng-ɑ kwööde ki byel ying-ɑ cinge, byelle ókwøre kidøøj. Byelle ókïdhe yij thebø, de cong órɑ̈b yi en ki mɑc me pɑ thøw.” Kɑ Yëso obëënø kì Gɑlelì, e bï-ɑ be jwɑ̈ɑ̈gø yi Jøn kì kömi Nɑm Urdun. De ɑ́kyëddi yi Jøn kinni, “Yɑn ɑ ceg dwɑddi jwɑ̈ɑ̈gø yi yïn, de yïde ɑ yöd yï bï-ɑ yïɑ?” De møge ɑ́løøg yi Yëso kinni, “Wiy bëëde kinøw ɑnɑn. O bene yöö men-ɑ gwøg wɑ gïn-ɑ dwɑddi yi Jwøk.” Kɑ Jøn oyïëyø. Keny-ɑ ɑ́rum Yëso ki jwɑ̈ɑ̈gø ceth, ɑbëëne wɑ̈g kì yethi pï. Kɑ mɑl ree yiebe, kɑ Wëykwërø lidhe, e bï-ɑ piny e nɑ ɑkur, kɑ pëgg-ɑ köme. Kɑ cwɑg mø kɑ̈ɑ̈l mɑl okööbø kinni, “Men bene Wɑ̈dɑ, wɑ̈n-ɑ mɑɑrɑ, pyëwɑ med ki en.” Codhe, ɑpeej Yëso pɑ̈l yi Wëykwërø kun pɑ̈nyii yi Cethɑn. Kɑ ree twöne ki gïncɑm ki cyɑ̈ng pyɑ̈r ɑ́ngwen, ɑmɑgii yi kɑ̈j. Abëën Cethɑn, kɑ gø köbbe kinni, “Keløg yï bɑ Wɑ̈d Jwøk, köbbí tuggi kïttì møg, o ri gen løg gen gïncɑm.” Kɑ Yëso ólöggø kinni, “Bɑ ɑgwed kinni, ‘Pɑth ki gïncɑm kete ɑ nyi mïdhi dhɑnhø e onëënø, den-ɑ́ møg-ɑ kwøb yi Jwøk bënn.’ ” Codhe, ɑkïdhi Yëso Yerusɑlem yi Cethɑn, kɑ gø cïbe oledh Kengø, ɑköbbe gøn kinni, “Keløg yï bɑ Wɑ̈d Jwøk, leeng rií piny, mɑ́ e bɑ ɑgwed kinni, ‘Jwøk wëywödde óköbbe o yï ógɑm yi gen ki cinggi gen, kipe tyellí ópög yi kït.’ ” Aköbbii yi Yëso kinni, “Bɑ ɑgwed thyew kinni, ‘Wöw, Jwøgí ko rɑɑng.’ ” Akïdhi Yëso mɑl wïj kït me bɑ̈r yi Cethɑn, kɑ pödhhi kömi piny bëne nyudhe gøn, geki myërri gen. Kɑ gø köbbe kinni, “Møg bënn ómëggɑ yïn keløg rií bøødhí piny, kɑ yɑ mɑl yi yïn.” Aköbbii yi Yëso kinni, “Kedh Cethɑn! Mɑ́ e bɑ ɑgwed kinni, ‘Wør Wöw Jwøgí, kɑ mɑllí e kete kete.’ ” Codhe, ɑwiyii yi Cethɑn, kɑ wëywödd bï-ɑ be kɑ̈llii. Keny-ɑ ɑ́lïng Yëso kinni, i Jøn ómɑgø, ɑkedhe Gɑlelì. Nuti bëëdø kì Nɑdhɑreth, de ɑ́kedh-ɑ be bëëdø kì Kɑpernɑum kì buti Tɑɑy Gɑlelì kì piny Dhebulun geki Nɑptɑlì. Møgɑni ɑ́gwøg, o møg-ɑ ɑ́kwøb yi Icɑyɑ̀ jɑltöng pɑ̈dhi gen kɑ̈jji gen kinni, “Yïn ɑ piny Dhebulun kí piny Nɑptɑlì, wun ɑ kö yuu-ɑ kedhi nɑɑm omelø, kì løøg Nɑm Urdun, eni Gɑlelì piny pödhh-ɑ kyeelø! Tyëng-ɑ bëëdø kì yij muudhø ge ólïdhi ki cɑr me dwøng. Kömi tyëng-ɑ bëëdø kì yij muudhi thøø ómëëny yi cɑr.” Bøli kenyɑni ɑ ɑ́cɑ̈gi Yëso ki pwönyi wööne kinni, “Yewi wun ki orøøg wun, mɑ́ Pödhi Jwøk cyɑ̈gi.” Keny-ɑ ɑ́cyɑ̈dhi Yëso kì thɑ̈ngi Tɑɑy Gɑlelì, ɑlïdhe ki nyiimëëg ɑ́ryew, Sɑymøn (ɑ cwøl ɑ́ Pïtør) geki Andrø ómen, ge ópyëjjø ki bøy, mɑ́ ge bɑ yïdd. Kɑ ge köbbi yi Yëso kinni, “Bïu bɑngɑ, o wu løgɑ jømɑy ki ji.” Awiy gen bøyyi gen piny, kɑ ge løg-ɑ bɑnge. Kɑ ɑ́dhwödhe kì kenyɑni, ɑlïdhe ki nyiimëëg ɑ́ryew møøgø; gen ɑ Yɑgob geki Jøn wɑ̈ddi Dhebedì, ge ying-ɑ yij morkɑb geki Dhebedì wïyi gen, ge pyël-ɑ bøyyi gen. Acwøle gïn. Kɑ wïyi gen wiy gen yij morkɑmɑni, ɑløg gen bɑng Yëso. Kɑ Yëso ócyɑ̈dhø kì myërri Gɑlelì bënn, e ópwönyø kì sinɑgøgg, e töng-ɑ per Wöndøj men-ɑ kööbø kì ri Pödhi Jwøk. Kɑ ji mø gïïr yiel yi en ki rɑ̈ɑ̈m dëllì, kɑ tyëng-ɑ bɑ pùdh gwøge. Kɑ pere tɑɑy-ɑ yij Suriyɑ̀ bëne, kɑ tyëng-ɑ dëlli gen rɑ̈mø kïdhi yïe, kí møg-ɑ ri gen di wëyrijjø, kí pùdh, kí ji-ɑ dëlli gen dwɑnyø. Kɑ gï yiele bënn. Kɑ ji mø gïïr ólugø kì bɑnge, ge kɑ̈ɑ̈l-ɑ Gɑlelì kí kɑ̈dd-ɑ pyɑ̈rø, kí Yerusɑlem, kí Yeudiyɑ̀ kí myërr-ɑ løøg Nɑm Urdun. Kɑ lidh yi Yëso kinni ji gïïr, ɑkedhe mɑl wïj kït, kɑ pëgg-ɑ piny. Kɑ jøbɑnge ri gen cøng gen bute. Atuge dhøge, kɑ gï pwönye kinni, “Tyëng-ɑ ngɑ̈ny wøw kinni nyingi gen cɑn kì ri wëy, ri gen dɑ gyëdh, Pödhi Jwøk bɑ mi gen! Tyëng-ɑ kïïmø ri gen dɑ gyëdh, ge ólug yi Jwøk! Tyëng-ɑ bɑ mööl ri gen dɑ gyëdh, piny ólɑg yi gen! Tyëng-ɑ nyi tyer gøggi dyër, ri gen dɑ gyëdh, ge óthödhi yi Jwøk kɑ pëthi gen ókwöjø! Tyëng-ɑ yethi gen nyi ywöngi kipe ji møøgø ri gen dɑ gyëdh, Jwøk pyëwe ólɑ̈ɑ̈m ki gen! Tyëng-ɑ pëthi gen tïl, ri gen dɑ gyëdh, Jwøk ólidh yi gen! Tyëng-ɑ nyi göögø kipe mër ri gen dɑ gyëdh, ge ócwølli yi Jwøk gɑ nyige! Tyëng-ɑ nyingi gen guud kipe kɑ̀ nyi gwøg gen gïn-ɑ dwɑddi yi Jwøk, ri gen dɑ gyëdh, Pödhi Jwøk, bɑ mi gen! “Ri wun dɑ gyëdh, kenyi yɑnyyi wun yi teedø, kɑ nyingi wun guud yi gen, kɑ wu kwɑ̈dhhi yi gen ki kwøbbi pyed, kipe kɑ̀ bëëd wun ɑ́ jøbɑngɑ. Mïni pëthi wun ki mendwøng, mɑ́ köögi me dwøng omïdhø ɑ́ mi wun kì Pödhi Jwøk. Bene kër-ɑ ɑ́guud nyingi jøtöng, møg-ɑ ɑ́ying bøli wun ɑnɑn. “Wu pɑ̈r ki omelø, kipe kömi piny bëne. Keløg omelø ólwënyø, pɑ cuggi bëëdø ɑ́ omelø këti. Bong gïndøj kì ree këti, de ceg kɑ weddø, kɑ nyøn yi ji. “Wu pɑ̈r ki cɑr kipe piny. Kɑɑl-ɑ ógeer wïj kït, pɑ cuggi kɑnø. Bong ngɑn cwiny lɑ̈mbɑ̈ kɑ gø kume ki ɑ́tɑy, de nyi cïb-ɑ wïj tɑrɑbedhɑ̀, o tyëng-ɑ ying ød bënn thödhe ki cɑr. Wiy cɑɑr wun mëënye kì bøli teedø, kipe kinni, o gïg-ɑ døj møg-ɑ gøggi yi wun lidh yi teedø, o Wïyi wun ɑ ying mɑl pwøj yi gen. “Wu ko rum kinni, yɑ ɑ́bï-ɑ be rënyi møg-ɑ kømmi yi Cigg geki pwönyi jøtöng. Yɑ nuti bëën-ɑ be rënyi gen, de yɑ ɑ́bï-ɑ be cïbi gen kɑ̈jji gen. Yɑ köbb-ɑ wun kidyër kinni, kɑ̀ nud mɑl kí piny, bong gwedø ɑ́kyel wɑlɑ̀ cwinyø men-ɑ ólɑ̈ɑ̈ny kì ri Cigg, gïti keny-ɑ ópɑ̈dhi gen kɑ̈jji gen bënn. Kɑ̀ bëëde kinøw, ngɑn pyem nyɑ gïjø ɑ́kyel kì ri Cigg, o ji nyi pwönye kinni göög gen kinøw, ngɑn ni menɑni ócwøl ɑ́ ngɑn bong pere kì Pödhi Jwøk. De ngɑn-ɑ nyi göögø kì bɑng Cigg, kɑ ji nyi pwönye ki møgɑni, bene en ɑ ócwølli ɑ́ ngɑndwøng kì Pödhi Jwøk. Yɑ köbb-ɑ wun kinni, keløg døøji wun pɑ lod døøji jøpwönyi Cigg geki Jøpɑresì, wu pɑ wöl wɑ̈dhi Pödhi Jwøk. “Møg-ɑ ɑ́köbbi tyëng-ɑ ócyɑ̈ɑ̈ngi ɑ́lïngi yi wun kinni, ‘Yï ko nɑ̈gi ki dhɑnhø, o ngɑn nɑ̈gi ki dhɑnhø ceg kɑ kïdhi burø be gøny.’ De yɑ köbb-ɑ wun kinni, ngɑn wër ki wɑɑd gen ceg kɑ kïdhi burø, o ngɑn yɑny wɑɑd gen kïdh-ɑ burø. Ngɑn köbbi wɑɑd gen kinni, ‘Yï bɑ dhëg’ óleeng yij mɑc. Kɑ̀ bëëde kinøw, keløg yï køm-ɑ thödhi Jwøk kì wïj këli lɑm ki gëëdhi, kɑ yï ópɑ̈dø kì kenyɑni kinni, kɑɑm wun dɑ kwøb wuki wɑɑd wun, wiy gïn-ɑ muuj yi yïn kì bøli këli lɑm, kɑ yï kedh, kɑ wu rëbi wun, wuki wɑɑd wun, codhe o yï bïí, o gënhɑni muuj yi yïn cyee. “Jwɑnu rëbø ki ngɑn-ɑ gøøny yïn kɑ̈ng-ɑ nuti wɑ̈dhi wun burø, kipe yï ómuuj jɑgø yi ngɑnɑni, kɑ yï mëggi bölidh yi jɑgø, kɑ yï leeng ød mɑg. Yɑ köbb-ɑ yïn kidyër kinni, yï pɑ bï wɑ̈g kì kenyɑni gïti keny-ɑ órum kwör-ɑ kömí ki colø bëne. “Møg-ɑ ɑ́kømmi cøn ɑ́rum ki lïngø yi wun kinni, ‘Ngɑn nuti nywøøm wun ri wun ko niin yi yïn.’ De yɑ köbb-ɑ wun kinni, ngɑn nenni ri ngɑndhɑjø, kɑ ómwönyø ki lɑ́ɑ̀w, ɑ́rum ki orøg ki gøn kì pyëwe. Keløg wɑɑng kyëjí yï peeje’ be gwøg ki gïnrɑj, gööl wɑ̈g kɑ weddí, mɑ́ lɑ̈w keløg ɑ́ gïjø ɑ́kyel ɑ lɑ̈ɑ̈ny kì ri dëlí, kibøli ke di leeng dëlí bëne yij mɑc. O keløg cingi kyëjí yï peeje’ be gwøg ki gïnrɑj, ngul wɑ̈g kɑ weddí, mɑ́ lɑ̈w ke lɑ̈ɑ̈ny gïjø ɑ́kyel kì ri dëlí, kibøli ke di kedhi dëlí bëne yij mɑc. “Ákwøb cøn kinni, ‘Ngɑn tɑ̈ng cyëge, nënge gøn ki wɑ̈nyi tɑ̈ng.’ De yɑ köbb-ɑ wun kinni, ngɑn tɑ̈ng cyëge, e nuti niin yi jɑlø megø, ngɑnɑni ɑ́løge ngɑn niin ki köögi, o ngɑn nywøm ɑtɑ̈ng, ɑ́røngi thyew. “Wu ɑ́lïng thyew, i ji óköbbø kɑ̈ge dööng kinni, ‘Yï ko nyi köngi ki pyed, de nyi gwøg møg-ɑ ɑ́kwöng yi yïn kì bøli Wë.’ De yɑ köbb-ɑ wun kinni, wu ko nyi köngi kinni tek. Mɑl ko nyi kwöng, mɑ́ e bɑ kwøøm Jwøk, wɑlɑ̀ piny ko nyi kwöng, mɑ́ e bɑ thɑ̈nhi tyelle, wɑlɑ̀ Yerusɑlem ko nyi kwöng, mɑ́ e bɑ kɑɑl rɑ̈nh-ɑ dwøng. Kɑ wïjí ko nyi kwööng, mɑ́ yëyø ɑ́kyel dhɑ̈li gwøgø yi yïn e tɑr wɑlɑ̀ looj. De nyi kwøb wun kinni, ‘Yɑ ɑ́yïëy’ wɑlɑ̀ kinni, ‘Yɑ ɑ́kyëëd,’ keti gen. Keløg wu ókɑ̈nø ki kwøb møøgø, ge kɑ̈ɑ̈l-ɑ yï Ngɑnrɑj. “Møg-ɑ ɑ́kømmi cøn ɑ́lïngi yi wun kinni, ‘Wɑng col kɑ wɑng, o lëjø col kɑ lëjø.’ De yɑ köbb-ɑ wun kinni, keløg yï ogöggø ki gïnrɑj yi ngɑn megø, kejí ko cool. Ngɑn gøj yïn kì thɑ̈ngi kyëjí, lugí thɑ̈ng-ɑ kyeelø o gø gøje thyew. O keløg e dɑ ngɑn pir yïn e dwɑdd-ɑ kwɑnyi ɑ́ywödhí, ɑ́ywönhthinh, mëggí ɑ́ywönhdwøng en thyew. Keløg yï ocirø yi deny-ɑ ɑ́mɑg pödhee, kinni kɑ̈l jɑmme ki kïlomïtïr ɑ́kyel, lwøøg ki kïlomïtïr ɑ́ryew. Thödhí ngɑn kwɑ̈jji kì yïí, kɑ ngɑn dwɑddi wïdhø kì yïí ko mɑ̈ɑ̈n. “Wu ɑ́lïng i ókwøbø kinni, ‘Mɑɑr wɑddi wun, kɑ tyëngmɑ̈ɑ̈nø mɑɑn.’ De yɑ köbb-ɑ wun kinni, mɑɑru tyëng-ɑ mɑɑn wun, kɑ wu kwɑ̈jji wun kiper tyëng-ɑ guud nyingi wun, mɑ́ kɑ̀ göög wun kinøw, bene keny-ɑ óbëëd wun, wun-ɑ́ nyigi Wïyi wun ɑ ying mɑl. Mɑ́ cɑ̈nge nyi wëgge’ yeer kömi tyëngdøj geki tyëngrijjø, kɑ kødh nyi mëgge tyëngtir geki tyëngorøg bënn. Keløg wu nyi mɑɑr-ɑ tyëng-ɑ mɑɑr wun, bong köögi men-ɑ óyod yi wun kì yï Jwøk, cɑgg ɑ́ tyëng gwɑ̈j, ge pɑ nyi göög ɑ nøw? O keløg wu nyi mɑ̈dh-ɑ wɑddi wun keti gen, bong gïndøj mɑ ɑ́gwøg yi wun, me lod wun tyëng-ɑ kyeelø. Cɑgg ɑ́ tyëng pödhh-ɑ kyeelø, ge nyi göög ɑ nøw thyew! Bëëd wun wu tir, ni Wïyi wun ɑ ying mɑl. “Wu ko nyi göög ki gïgdøj kì bøli ji kipe kinni o wu pwøj, mɑ́ keløg wu ógöögø kinøw, bong köögi men-ɑ óyod yi wun ki yï Wïyi wun ɑ ying mɑl. “Kenyi thödhí ɑbuur ki gïïpiny, köörí ko nyi pwööd ni kenyi göög tyëngwëënyø kì uddi mɑlli Jwøk kí yethi yëëth, kipe kinni o ge pwøj yi teedø. Yɑ köbb-ɑ wun kidyër kinni, köögi mi gen ɑ́rum ki kwɑnyø yi gen. De kenyi muuj ki gïïpiny, wɑddí ko ngɑ̈ɑ̈j kipe gïn-ɑ ɑ́gwøg yi yïn, o muunyí cöge e pɑ lidh. O yï óyïddí ki köögi kì yï Wïyí, ngɑn-ɑ nyi lidh møg-ɑ pɑ nenni yi teedø. “Kenyi kwɑ̈jjí, yï ko nyi göög ni tyëngwëënyø! Ge mɑɑr-ɑ kwɑ̈jjø ge ócungø kì uddi mɑlli Jwøk, kí ɑ́kɑrri yëëth, o ge nenni yi ji. Yɑ köbb-ɑ wun kidyër kinni, köögi mi gen ɑ́rum ki kwɑnyø yi gen. De kenyi kwɑjjí Jwøk, nyi kedhí ødí yï ketí, kɑ dhø ød cyëëg, kɑ Wïyí kwɑjjí, en ɑ ngɑn-ɑ nud kì keny-ɑ pɑ nenni yi teedø. O yï óyïddí ki köögi kì yï Wïyí, ngɑn-ɑ nyi lidh møg-ɑ pɑ nenni yi teedø. “Kenyi kwɑ̈jji wun, wu ko nyi kööb ki kwøb mø gïïr, mø bong gïn wɑngi yi gen, ni tyëng pödhh-ɑ kyeelø, mɑ́ tyëngɑni nyii rumø kinni ce mø gen ólïngi yi Jwøk kipe kɑ̀ bëëd kwøbbi gen gïïr. Wu ko nyi bëëd ni gen, mɑ́ gïg-ɑ cɑ̈nni wun ngɑ̈nyi yi Wïyi wun, e men-ɑ́ ge nuti kwɑjjø yi wun. Kɑ ɑ́rum bëëde kinøw, nyi kwɑ̈jji wun kinni, ‘Wïyi wøn, yï ying-ɑ mɑl, wiy nyingí kwërø wør, wiy Pödhí bëe; wiy møg-ɑ dwɑddi yi yïn gwøg kì piny, ni kɑ̀ gwøøg gen kì mɑl. Mëggí wøn gïncɑɑm wøn mi dicyɑ̈ngtïn. Kɑ lɑɑwí dwöög piny kipe orøøg wøn, ni kenyi wiy wøn ji-ɑ nyi göggi wøn ki bɑ̈jjø. Wø ko wëggí pɑ̈nyø ki kwøb mø teeg, de yiel wøn kì cingi Ngɑnrɑj.’ “Wïyi wun ɑ mɑl lɑɑwe ódwööge piny kipe wun, keløg lɑɑwi wun nyi dwöögu’ piny thyew kipe gïgrijjø møg-ɑ nyi göggi wun yi ji møøgø. De keløg lɑɑwi wun pɑ nyi dwöög wun piny kipe ji møøgø, Wïyi wun lɑɑwe pɑ dwööge piny kipe gïgrijjø møg-ɑ nyi gwøg yi wun. “O kenyi thuum wun, wu ko nyi bëëd bøli wun looj, ni tyëng-ɑ bɑ wëëny, mɑ́ ge nyi cïll-ɑ bøli gen, ge nyudh-ɑ teedø kinni ge ceg-ɑ thuumø. Yɑ köbb-ɑ wun kidyër kinni, köögi mi gen ɑ́rum ki kwɑnyø yi gen. De yïn, kenyi thuum, nyi lwøg nyingí, kɑ yëyyi wïjí pyëël, o yï cöög yï pɑ ngij yi teedø kinni, yï ceg-ɑ thuumø, de yï óngij-ɑ yi Wïyí kete, ngɑn-ɑ pɑ nënni. O yï óyïddí ki gïn-ɑ dwɑddi yi yïn kì yï Wïyí, ngɑn-ɑ nyi lidh møg-ɑ pɑ nenni yi teedø. “Ri wun ko nyi cungi wun ki kɑ̈rì kì kömi piny, keny-ɑ nyi rënyi gen yi thoth kí nyɑllì, ɑ yije kwɑ̈ɑ̈d yi kurrì møg-ɑ nyi tørri ud. De cøngu jɑmmi wun mɑl, keny-ɑ pɑ rënyi gen yi thoth kí nyɑllì, o bong kurrì mø turri yethi ud, kɑ ge okwɑ̈dø. Mɑ́ pyëwí óying-ɑ keny-ɑ di kɑ̈rí. “Wɑng pɑ̈r ki lɑ̈mbɑ̈ kipe dëël dhɑnhø. Keløg wɑngí døøj, dëlí bëne óbëëd e pɑ̈ng yi cɑr, de keløg wɑngí pɑ døøj, dëlí bëne óying yij muudhø. O keløg cɑr men-ɑ ying rií bɑ muudhø, koo bëëdø ɑ́ muudhø me dwøng! “Bong ngɑn cuggi göggi wëëg ɑ́ryew; ɑ́kyel omɑɑrø yi en kɑ ngɑn-ɑ kyeelø mɑɑne, wɑlɑ̀ ócyɑ̈dhø kì bɑng ɑ́kyel, kɑ ngɑn-ɑ kyeelø bɑnye. Yï pɑ cuggi gwøg wïj ɑ́kyel kipe Jwøk geki kɑ̈r. “Bene ɑ pere köbbɑ wun kinni, pëthi wun ko lïngi kipe gïn-ɑ ócɑm yi wun, wɑlɑ̀ gïn-ɑ ómɑdh yi wun, kipe kinni o wu nëën wun, kɑ pëthi wun ko lïngi kipe ógudhi dëlli wun. Per wëyi dhɑnhø pɑ teg kibøli gïncɑm? O dëël dhɑnhø pere pɑ teg kibøli ógudh? Lidhu winy, ge pɑ nyi kɑ̈gø ki köödh, wɑlɑ̀ ge pɑ nyi kɑ̈jø ki byel, kɑ gï kïdhi gen yethi thebb, de ge pidh-ɑ yi Wïyi wun ɑ ying mɑl. Per wun pɑ teg cɑrø kibøli winy? Á men ɑ cuggi medi runne kɑ̀ lïngi pyëwe? “Á kipe ngø ɑ lïngi pëthi wun kipe ógudh? Lidh wun ókøggi lum kì pɑ̈l kɑ̀ dhɑ̈ɑ̈y gen. Ge pɑ nyi göögø, wɑlɑ̀ ri gen pɑ nyi cwɑ̈jji gen ki ógudh. De yɑ köbb-ɑ wun kinni, cɑgg ɑ́ Rɑ̈dh Sølømøn kì yij dhwɑ̈nge bëne, nuti rugø ki ógødh mø pɑ̈r ki ɑ́kyel kì kelli gen. Keløg luum pɑ̈l oruugø yi Jwøk kinøw; eni lum-ɑ nud dicyɑ̈ngtïn, kɑ kwɑny dhuki kɑ leeng yij purun ɑ́ yugg, ruung-ɑ óruug wun óbëëd ɑ dï? Yïëyø mi wun nøg nɑ ngø! “Adɑ́ pëthi wun ko lïngi kɑ wu okööbø kinni, ‘Wø ócɑm-ɑ ngø? Wø ómɑdh-ɑ ngø? Wø órug-ɑ ngø?’ (Bene gïgɑni ceth ɑ nyi tɑg yi pödhh-ɑ kyeelø.) Ngɑ̈nyi yi Wïyi wun, ɑ ying mɑl kinni, jɑmmɑni bënn di dwɑddø yi wun. Kɑ ɑ́rum bëëde kinøw, yɑbu Pödhi Jwøk møti, kɑ wu gwøgu gïn-ɑ dwɑdde, o jɑmm-ɑ kyeelø bënn ómëgge wun. “Kɑ pëthi wun ko lïngi kipe møg-ɑ óbï dhuki, mɑ́ dhuki óbï kɑ ɑkørre. Cyɑ̈ɑ̈ng dɑ ɑkørre, o cyɑ̈ɑ̈ng dɑ ɑkørre. “Wu ko nyi cɑ̈ɑ̈y ki ji møøgø, o wu ócög wu pɑ cɑy yi Jwøk, mɑ́ wu ócɑy yi Jwøk kɑ kër-ɑ cɑyyi wun ji møøgø, o gïn-ɑ yije nyi rummi wun ji møøgø, en ɑ yije órummi wun yi Jwøk. Yïde ɑ nenní wëël-ɑ thiinh kì wɑɑng wɑɑd wun, o men-ɑ́ duli yɑdh men-ɑ wɑngí pɑ ywør yi yïn? Wɑlɑ̀ wɑɑd wun óköbbi yi yïn kidï kinni, ‘Wiy wëël-ɑ wɑngí èn kɑ̈ɑ̈lɑ wɑ̈g,’ e men-ɑ́ wɑngí dɑ duli yɑdh? Yï bɑ wëny! Kɑ̈ɑ̈l duli yɑdh wɑ̈g kì wɑngí møti, o yï ónëën kidøøj, o yï cuggí kɑ̈ɑ̈li wëël-ɑ wɑɑng wɑɑd wun wɑ̈g. “Gïn-ɑ bɑ ɑkwër ko nyi mëggu gwögg, mɑ́ wu ógwɑ̈y yi gwöggɑni. Kɑ tiggi wun ko nyi lëngu kundhøngø, mɑ́ gï ónyøn yi gen. “Cwöddi wun, o wu óthödhi; yɑ̈ɑ̈b wun, o wu óyïddi wun; ngɑ̈jji wun, o dhø ød óyïëbbi wun. Mɑ́ ngɑn-ɑ nyi cwöddi, nyii thödhø; o ngɑn-ɑ nyi yɑ̈bø nyii yïddø; o ngɑn-ɑ nyi ngɑ̈jji, dhø ød nyi yïëbb-ɑ en. Dɑ dhɑnhø kì kelli wun me mëggi wɑ̈de tungi kït, kɑ̀ kwɑ̈jje ki ópun? Wɑlɑ̀ gø mëgge’ thwöl, ke kwɑ̈jje ki rëjø? Keløg wu ngɑ̈ny thödhi nyigi wun ki gïgdøj, wun ɑ́ tyëngrijjø, Wïyi wun ɑ ying mɑl, tyëng-ɑ cwöddi kì yïe, koo thödhe ki gïg pëddi døøjø? “Göggi wun ji møøgø gïg-ɑ dwɑddi yi wun o ge göggi wun yi gen. Bene møgɑni ɑ wɑngi yi Cigg geki tyëngtöng mø Jwøk. “Nyi kɑ̈lu dhøng-ɑ dhing, mɑ́ dhøng-ɑ yïëbbi mɑc lɑɑj, o wɑ̈dh yööd kì yuu-ɑ kedhi yije, o ji-ɑ kɑ̈lli yuuɑni gïïr. De yuu-ɑ kedhi kej nënn-ɑ ɑtheer dhing, o wɑ̈dh teeg kì yije, o bɑ ji mø nøg ɑ nyi yod yuuɑni. “Koru ri wun kipe jøtöng mø pyed, møg-ɑ nyi bï yï wun ge nënni ge nɑ dyëg, de kì yethi gen, ge bɑ óthönhì mø rijjø. Ge óngij yi wun kì bɑng gïg-ɑ gøggi yi gen. Nywøli oløg pɑ nyi pøn kì kö but. O nywøli ólɑm pɑ nyi pøn ki kö ɑ́lɑl. Yɑnh døj nyi nywøl-ɑ nywøl mø døøj, o yɑnh rɑj nyi nywøl-ɑ nywøl mø rijjø. Yɑnh døj pɑ cuggi nywølø ki nywøl mø rijjø, o yɑnh rɑj pɑ cuggi nywølø ki nywøl mø døøj. Yɑnh pɑ nywøl ki nywøl mø døøj, nyi ngøl-ɑ piny, kɑ leeng mɑc. Jøtöng mø pyed óngij yi wun kì bɑng gïg-ɑ gøggi yi gen ceth. “Pɑth ki tyëng-ɑ nyi cwølli yɑn kinni, ‘Wuö, Wuö,’ ɑ ówɑ̈dhi Pödhi Jwøk, den-ɑ́ ngɑn-ɑ nyi gwøg gïn-ɑ dwɑddi yi Wïyɑ, ɑ ying mɑl. Kì Cyɑ̈ɑ̈ng Cɑ́y, yɑ óköbbi yi ji mø gïïr kinni, ‘Wuö, Wuö, wø ɑ́tööng ki nyingí, kɑ wø ryëmm-ɑ wɑ̈g ki wëyrijjø ki nyingí, kɑ wø ogöögø ki gïgdøngø mø gïïr ki nyingí.’ De ge óköbbɑ kinni, ‘Wu kwïj yi yɑn ki mendwøng, kedh wun kì butɑ, wu bɑ tyëngrijjø.’ “Kɑ ɑ́rum bëëde kinøw, ngɑn-ɑ lïngi kwøbbɑ, kɑ ogöögø ki gïg-ɑ kømmɑ, ópɑ̈ɑ̈r yi yɑn kɑ jɑl me rumme nud, mɑ ɑ́geer øde kömi kït. Kɑ kødh ómɑ̈gø, kɑ bɑɑyø obëënø, kɑ yømø ocödø, kɑ ge göjj-ɑ kömi ønɑni, kɑ ocögø e pɑ pɑ̈ɑ̈dh, mɑ́ e ókëël-ɑ kömi kït. “O ngɑn-ɑ lïngi kwøbbɑ, kɑ gïg-ɑ kømmɑ ocögø gï pɑ gwøge, pɑ̈r ki jɑl mɑ dhëg, mɑ ɑ́geer øde kömi kwöjø. Kɑ kødh ómɑ̈gø, kɑ bɑɑyø obëënø, kɑ yømø ocödø, kɑ ge göjj-ɑ kömi ønɑni, kɑ ceg-ɑ pɑ̈ɑ̈dhø ki pɑ̈ɑ̈nhi dwøng!” Keny-ɑ ɑ́rum Yëso ki kwøbi møgɑni, kɑ teedø ongɑ̈ngø yi yëth-ɑ pwönye. Nuti bëëdø e pɑ̈r ki jøpwönyi Cigg; de ɑ́pwönyi kɑ tegø. Kɑ ɑ́yïnhi Yëso piny kì wïj kït, ɑløg bɑnge yi ji mø gïïr. Kɑ jɑl me ree di lɑ̈y bï-ɑ yïe, ɑbøødhe ree piny kì bøle, kɑ okööbø kinni, “Wuö, yɑ ócuggø yielø yi yïn, keløg yï dwɑdd-ɑ yieli yɑn.” Kɑ Yëso cinge rïje, kɑ jɑlɑni nywɑle, ɑkööbe kinni, “Yɑ dwɑdd-ɑ yieli yïn.” Awɑ̈ɑ̈ny lɑ̈y kì ree kì bøli kenyɑni ceth. Codhe, ɑköbbii yi Yëso kinni, “Lïng! Ko di ngɑn me köbbi yi yïn, de kedh kɑ rií nyudhí ókwërø, o yï rɑng yi en; kɑ yï muuj ki gënh-ɑ ɑ́ceg yi Mosɑ̀, ɑ́ nyudhi kiper dönyí.” Keny-ɑ ɑ́wɑ̈nhi Yëso Kɑpernɑum, ɑbëën dhɑbïdh megø yïe, e ókwɑ̈jjø kinni, “Wuö, bɑ̈ngɑ obuddø kì gølɑ, dhɑ̈rø yi rɑ̈ɑ̈m dële, o ceg-ɑ orɑng.” Aköbbii yi Yëso kinni, “Yɑ óbï be yielii.” De ɑ́kyëddi yi dhɑbïnhɑni kinni, “Wuö, yɑ pɑth ki ngɑn gølɑ kedhi yi yïn; de ceg kwøb yøw, o bɑ̈ngɑ bødhe. Møgɑni ngɑ̈nyi yi yɑn, mɑ́ yɑ ceg kɑ jɑɑgø, o dɑ ji mø jɑɑgɑ thyew. Ngɑn jɑɑgɑ nyi köbbɑ’ köbbø kinni, ‘Kedh!’ Kɑ nyii kedhø, kɑ megø nyi köbbɑ kinni, ‘Bïí!’ Kɑ nyii bëënø. Kɑ bɑ̈ngɑ nyi köbbɑ kinni, ‘Gwøg gïn!’ Kɑ gø nyi gwøge.” Angɑ̈ng Yëso kɑ ɑ́lïnge møgɑni, kɑ tyëng-ɑ cyɑ̈dhi kì bɑnge köbbe kinni, “Yɑ köbb-ɑ wun kidyër kinni, yɑ nuti yïddø ki ngɑn yïe di yïëyø me ni men, cɑgg ɑ́ kì kelli tyëng Isrɑil. Yɑ köbb-ɑ wun kinni, ji mø gïïr óbï ge kɑ̈ɑ̈l-ɑ wɑɑng cyɑ̈ɑ̈ng mwøl, møøgø óbï ge kɑ̈ɑ̈l-ɑ wɑɑng cyɑ̈ɑ̈ng böörø, kɑ ge pëgg-ɑ tɑw kì Pödhi Jwøk, kyeel ki Abrɑhɑm, kí Isɑɑk, kí Yɑgob. De tyëng-ɑ di ying pönhɑni óryeem yij muudhø, kun-ɑ óywöngi ji, kɑ leggi gen ngenyyi gen.” Aköbbi dhɑbïnhɑni yi Yëso kinni, “Kedhí gølí, møg-ɑ ɑ́yïëy yi yïn ógöggi yïn.” Kɑ bɑ̈ng dhɑbïdh ódönyø kì bøli kenyɑni ceth. Codhe, ɑkedhi Yëso gøl Pïtør, kɑ meyi cï Pïtør lidh yi en e buud-ɑ piny ki rɑ̈ɑ̈m dële, o dële lëëdh. Anywɑɑl cingi ngɑnɑni yi Yëso, kɑ lëdhi dële døøg-ɑ piny. Adhwödh ngɑnɑni, kɑ kedh-ɑ be kɑ̈lli gen. Keny-ɑ ɑ́göög piny ki wɑɑng thyënhø, kɑ ji mø gïïr mø ri gen di wëyrijjø kɑ̈ɑ̈l yïe, kɑ wëyɑni ryeeme wɑ̈g kì ri gen, kɑ tyëng-ɑ dëlli gen rɑ̈mø bënn yiele. Møgɑni ɑ́gwøge kɑ per kinni, o møg-ɑ ɑ́kømmi yi Icɑyɑ̀ jɑltöng, pɑ̈dhi gen kɑ̈jji gen kinni, “Rɑ̈ɑ̈m dëllee ɑ́kɑ̈l yi en. Kɑ gïg-ɑ rijjø kì dëllee tëre.” De kɑ ɑ́liidh ji yi Yëso ge gïïr kì bute, ɑköbbe jøbɑnge kinni, kedhi gen løøg nɑm. Kɑ jɑl mɑ jɑlpwönyi Cigg bï-ɑ yïe, kɑ gø köbbe kinni, “Jɑlpwönyø, yɑ ólugi kì bɑngí kì yethi kɑ̈jj-ɑ ókedhi yi yïn bënn.” Aköbbii yi Yëso kinni, “Ógwøgg dɑ burrì mø yethi gen nyi bëëd yi gen, o winy dɑ uddi gen, de Nyɑɑr Dhɑnhø bong keny nyi thɑ̈ɑ̈nhe wïje.” Kɑ Yëso köbbi yi jɑl megø kì kelli jøbɑnge kinni, “Wuö, wiy yɑ kedhɑ be konyi wïyɑ møti.” Kɑ köbbi yi Yëso kinni, “Bïí bɑngɑ, kɑ wiy tyëngthøø, kony gen tyëngthøø mø gen.” Kɑ Yëso kɑdh-ɑ yij morkɑb, ɑløg jøge bɑnge. Kɑ ɑtunø me dwøng ocödø ge ying-ɑ nɑm, kɑ morkɑb køm-ɑ mudø yi ɑpɑgø, de Yëso ɑ́bëëd e onenø. Kɑ jøbɑnge kedh-ɑ be cyëëwii, ɑkööb gen kinni, “Wuö, yiel wøn! Wø othøø!” Kɑ gï köbbe kinni, “Wude ɑ böggi wun? Yïëyø mi wun nøg kidï!” Adhwödhe, kɑ yømø geki ɑpɑgø köbbe cungi gen, kɑ piny ceg-ɑ ì dïw. Kɑ jøgɑni ongɑ̈ngø, ɑkööb gen kinni, “Jɑɑl ceg bëëdø ɑ́ ngø, ɑ lïngi dhøge yi yømø geki ɑpɑgø!” Keny-ɑ ɑ́wɑ̈dhi Yëso løøg nɑm, kì myërri Gɑdɑrɑ̀, ɑrøøm gen ki jøg ɑ́ryew mø kɑ̈ɑ̈l kelli rörri ji. Jøgɑni ryeet, ri gen dɑ wëyrijjø, ge nyi cɑɑg-ɑ rødh ki ji, kɑ yuuɑni wiy ki cɑɑdhø. Kɑ ge ceg-ɑ ryeerø kinni, “Cwɑggí ɑ́ ngø ki wøn, yïn ɑ́ Wɑ̈d Jwøk? Yï bï-ɑ be judi wøn e bøli kej wøn nuti bëënø?” Ádɑ dɑɑg kundhøngø me cyɑ̈mø, e lɑ̈wi kì buti gen. Kɑ Yëso kwɑjji yi wëyɑni kinni, “Keløg wø ryeem-ɑ wɑ̈g yi yïn, ör wøn yij dɑɑg kundhøngø.” Kɑ gï köbbe kinni, “Kedh wun!” Kɑ ge bï-ɑ wɑ̈g, ɑkedhi gen yij dɑɑg kundhøngø. Kɑ dɑɑg kundhøngø reng-ɑ piny kì wïj gëlø, kɑ ceg-ɑ ì cur kì nɑm, kɑ omudø bëne. Kɑ jøg-ɑ kwɑ̈yø reng-ɑ kɑɑl, kɑ møgɑni dwøg gen bënn, kí gïn-ɑ ɑ́cwöb kipe jøgɑni ryeet geki wëyrijjø. Codhe, kɑ tyëng kɑɑlɑni bënn kedh-ɑ be pɑɑri Yëso. Keny-ɑ ɑ́liidh Yëso yi gen, ɑkwɑjjii yi gen kinni kedhe kì pödhi gen. Kɑ Yëso kɑdh-ɑ yij morkɑb, kɑ bï-ɑ løøgø, kɑ kedh-ɑ pɑɑ gen. Akɑ̈ɑ̈l jɑl me dële dwɑnyø yïe, e kɑ̈lli e obuddø kì yij pyën. Kɑ ɑ́liidh yïëyø mi gen yi Yëso, ɑköbbe jɑl-ɑ dële dwɑnyø kinni, “Cwed pyëwí wɑ̈dɑ, orøgí ɑ́lɑ̈ɑ̈ny.” De kwï jøpwönyi Cigg ɑ́kööb ki pëthi gen kinni, “Jɑlɑni bwöl-ɑ nyingi Jwøk.” De rummi gen ɑ́yod yi Yëso, kɑ gï pyëje kinni, “Wude ɑ rum wun ki rummì mø rijjø ki pëthi wun? Á ngø ɑ yöd, köbbi dhɑnhø kinni, ‘Orøgí ɑ́lɑ̈ɑ̈ny,’ wɑlɑ̀ kinni, ‘Dhwöödh, kɑ yï cyɑ̈dhí?’ De wu ónyudhɑ kinni Nyɑɑr Dhɑnhø yïe dɑ tegø kì kömi piny, men lɑ̈ɑ̈nye orøg.” Aköbbe jɑl-ɑ dële dwɑnyø kinni, “Dhwöödh, kwɑny pyëní kɑ yï kedhí gølí.” Adhwödh jɑlɑni kɑ kedh-ɑ gøle. Keny-ɑ ɑ́liidh møgɑni yi teedø, kɑ ge obwøgø, kɑ Jwøk ngɑn-ɑ ɑ́thödhi ji ki tengɑni lejji gen. Kɑ ɑ́dhwödh Yëso kì kenyɑni, kɑ jɑl me cwøl ɑ́ Mɑthyëw lidhe, e obëëdø kì kej gwɑ̈j. Kɑ köbbi yi Yëso kinni, “Bïí bɑngɑ.” Kɑ Mɑthyëw odhwödhø, ɑkedhe bɑnge. Kɑ̈ng-ɑ ɑ́bëëde e ocyɑ̈mø kì gøl Mɑthyëw, kɑ jøgwɑ̈j mø gïïr obëënø geki tyëngorøg, kɑ ge pëgg-ɑ piny be cɑm geki Yëso kí jøbɑnge. Kɑ lidh yi Jøpɑresì, ɑpyëj gen jøbɑng Yëso kinni, “Ede jɑlpwönyi wun ɑ cyɑ̈me kì kej ɑ́kyel, ki jøgwɑ̈j geki tyëngorøg?” Møgɑni ɑ́lïngi yi Yëso, ɑkööbe kinni, “Pɑth ki tyëng-ɑ dëlli gen yööd ɑ nyi dwɑddi ɑkïm, den-ɑ́ tyëng-ɑ dëlli gen rɑ̈mø. Kedh wun kɑ tyelli møg-ɑ kööbø kì yij wɑ̈nyi kwërø yɑb wun kidøøj kinni, ‘Pɑth ki gëëdhi ɑ dwɑddi yi yɑn, de yɑ dwɑdd-ɑ lɑ̈mpyëw.’ Mɑ́ yɑ nuti bëën-ɑ be cwøli tyëngtir, den-ɑ́ tyëngorøg.” Kɑ jøbɑng Jøn Jɑljwɑ̈g bï-ɑ yïe, kɑ ge okööbø kinni, “Á kipe ngø ɑ nyi thuum wøn, wøki Jøpɑresì, de jøbɑngí pɑ nyi thuumø?” Kɑ ge köbbi yi Yëso kinni, “Tyëng nywöm pɑ nyi kïïmø kɑ̀ nud jɑlnywöm kì kelli gen, de dhuki megø keny-ɑ ókɑ̈ɑ̈l jɑlnywöm kì kelli gen, bene keny-ɑ óthuum gen. “Bong ngɑn nyi buul ógødh mɑ kwɑ̈ɑ̈l ki ógødh me nyɑ̈n, mɑ́ ógønh-ɑ ɑ́buud ree óyööde wɑ̈g kì ri ógønhɑni, kɑ keny-ɑ ɑ́buul ópëddø lɑ̈nyyø. Wɑlɑ̀ møgi oløg me nyɑ̈n pɑ nyi kïdhi yethi ɑthebb mø kɑ̈gi gen dööng, kipe ɑthebb ópyëëd, kɑ møgø kedh-ɑ piny, kɑ ɑthebb órënyø. De møng-ɑ nyɑ̈n nyi kïdh-ɑ yethi ɑthebb mø nyɑ̈n o ge cög gen ge døøj bënn.” De kɑ̈ng-ɑ ɑ́bëëde e köbb-ɑ gïn møgɑni, kɑ jɑl Yeud mɑ jɑgø bï-ɑ yïe, kɑ ree bøødhe piny kì bøle, ɑkööbe kinni, “Nyɑrɑ ɑ́cer-ɑ thøø ɑnɑn. De bïí, kɑ cinggí thɑɑny köme, o cɑ̈re.” Kɑ Yëso odhwödhø, kɑ ókedhø geki jɑlɑni kí jøbɑnge. Kɑ ngɑndhɑjø me ree cyɑ̈dhi yi wɑɑnø ki runn pyɑ̈rø wïdɑ́ryew kɑ̈ɑ̈l-ɑ ngɑ̈ɑ̈j Yëso. Kɑ tuung ógødh Yëso nywɑle, mɑ́ e ɑ́rum ki pyëwe kinni, “Keløg tuung ógødhe onywɑlø yi yɑn yøw, yɑ ódönyø.” Kɑ Yëso ree luge, kɑ ngɑnɑni lidhe, ɑköbbe gøn kinni, “Nyɑrɑ, pyëwí ko lïngi, yï ɑ́yiel yi yïëyí.” Adönyi ngɑnɑni, kì bøli kenyɑni ceth. Codhe, ɑwɑ̈dhi Yëso gøl jɑgø, kɑ ji-ɑ nyi ywöngi ge okudhø ki kɑ̈ngì geki ji møøgø mø ngenyø yuude ge owøwø. Akööbe kinni, “Kedhu wɑ̈g, mɑ́ nyɑnthinh nuti thøø, de ceg-ɑ nenø.” Kɑ gɑg yi gen. De keny-ɑ ɑ́rum teedø ki ryeem wɑ̈g, ɑkedhe ød, kɑ cingi nyɑnthinh mɑge, kɑ nyɑnɑni dhwödh-ɑ mɑl. Kɑ per møgɑni tɑɑy-ɑ yij pönhɑni bëne. Kɑ ɑ́kedh Yëso kì kenyɑni, ɑløg jøg mø bɑ cörr ɑ́ryew bɑnge, ge óryeerø kinni “Wɑ̈d Debïd, ywöngi yijí kiper wøn!” Keny-ɑ ɑ́wɑ̈dhe kɑl, kɑ cörrɑni kedh-ɑ bute. Kɑ ge pyëj yi Yëso kinni, “Wu ɑ́yïëy kinni, wu ócuggø yielø yɑn?” Alöggi gen kinni, “Wø ɑ́yïëy, Wuö.” Kɑ nyingi gen nywɑl yi Yëso, ɑkööbe kinni, “Gïn-ɑ ɑ́yïëy yi wun ógöggi wun ceth.” Kɑ nyingi gen óyïëbbø. Kɑ ge kyëddi yi Yëso kinni, “Ko di ngɑn köbbu møgɑni!” De ge ɑ́kedh, kɑ kwøbbi Yëso wɑjji gen kì yethi myërrɑni bënn. Keny-ɑ ɑ́kedh jøgɑni, kedh jɑl me mïïlø, o ree dɑ wëyrijjø kɑ̈ɑ̈l-ɑ yï Yëso. Kɑ ɑ́ryëëm wëyɑni wɑ̈g kì ri jɑlɑni, kɑ okööbø. Kɑ teedø ongɑ̈ngø, ɑkööb gen kinni, “Gïn ni men nuti pɑ̈nyø lidhø kì Isrɑil.” De Jøpɑresì ɑ́kööb kinni, “Bɑ jɑngi wëyrijjø ɑ thödhi Yëso ki tegø men-ɑ cyedde wëyrijjø.” Kɑ Yëso ócyɑ̈dhø kì kelli kɑ̈dd-ɑ døngø geki myërr-ɑ thønhø bënn, e ópwönyø ki ji kì sinɑgøgg. Kɑ kwøbbi Wöndøj mi Pödhi Jwøk pwönyi yi en, kɑ tyëngbuud yiele, ki rɑ̈ɑ̈m dëlli gen. De keny-ɑ ɑ́lidhe ji ge ngenyø, ɑywöngi yije kiper gen, mɑ́ ge wɑ̈dh-ɑ twɑ̈lø; wɑ̈thi gen muumø ni dyëg mø bong ngɑn kwɑy gen. Aköbbe jøbɑnge kinni, “Byel ɑ́cyeg ki mendwøng, de tyëng-ɑ kɑ̈jø nøg, de kwɑjji wun wïi pwödhø, o kɑ̈ne ki ji mø öre be kɑj ki byel.” Kɑ Yëso jøbɑnge cwøle gɑ pyɑ̈rø wïdɑ́ryew. Kɑ gï thödhe ki tegø men ryeem gen wëyrijjø wɑ̈g, kí yieli tyëng-ɑ buud ki rɑ̈ɑ̈m dëllì bënn. Nyingi tyëngwöödø gɑ pyɑ̈rø wïdɑ́ryew ek: mɑɑl gen bɑ Sɑymøn ɑ cwøl ɑ́ Pïtør, kí ómen Andrø; kí wɑ̈ddi Dhebedì, Yɑgob geki Jøn; kí Pïlïp, kí Bɑrthølømɑøs; kí Tömɑs kí Mɑthyëw jɑlgwɑ̈j; kí Yɑgob wɑ̈d Alpɑ̀ kí Thɑdeøs; kí Sɑymøn Lunø, kí Yeudɑ̀ jɑl Iskɑryøt, ɑ ɑ́ngeew Yëso. Bene pyɑ̈rø wïdɑ́ryewɑni ɑ ɑ́ör yi Yëso, kɑ gï cege kinni, “Wu ko töngi kelli tyëng pödhh-ɑ kyeelø, kɑ wu ko kedhi kelli myërri Sɑmɑriyɑ̀, de pödhu yï dyëg-ɑ ɑ́wɑ̈ɑ̈ny kì gøl Isrɑil. Cyɑ̈dhi wun wu kɑ̈ll-ɑ wöndøj kinni, ‘Pödhi Jwøk ɑ́cyɑ̈ngi.’ Nyi yielu tyëng-ɑ buud; kɑ tyëngthøø nyi tug wun; kɑ tyëng-ɑ ri gen di lɑ̈y gwøg wun, o ge dönyi gen; kɑ wëyrijjø ryeem wun wɑ̈g. Ko di gïn culi wun, mɑ́ tengɑni nuti cɑɑg kɑ ngewø yi wun. Wu ko kɑ̈ddi ki ngyëny dhɑb, wɑlɑ̀ ɑ́tegø, wɑlɑ̀ dilɑl kì yethi pödhhi wun, wɑlɑ̀ wu ko kɑ̈ddi ki beeg wel, wɑlɑ̀ ógudh mø pɑ rug, wɑlɑ̀ wɑr, wɑlɑ̀ lødh, mɑ́ ngɑn-ɑ göögø nyi ceg kɑ thödhø ceth ki köögi. “Kenyi wɑ̈dhu pɑc wɑlɑ̀ kɑɑl, nyi pëjji wun ki ngɑn-ɑ bute døøj ki pëggø, kɑ wu bëëd wun kì gøle gïti keny-ɑ ódhwödh wun kì kenyɑni. De kɑ̀ kedhu kɑl, mɑ̈dh wun tyëng gølɑni kinni, ‘Wu óbëëdø ki mër.’ O keløg tyëng gølɑni bɑ jii mër, mëër wun óbëëdø kì yije, de keløg gølɑni pɑth ki gøl mër, mëër wun døøg-ɑ yï wun. O keløg e dɑ kɑɑl wɑlɑ̀ pɑc me pɑ cwøøl wun yije, wɑlɑ̀ kwøbbi wun pɑ lïngi yi en, tëëngu tør tyelli wun wɑ̈g, kɑ wu kedh wun kì kenyɑni. Yɑ köbb-ɑ wun kidyër kinni, kì Cyɑ̈ɑ̈ng Cɑ́y, cɑ́y-ɑ ɑ́cɑɑy Sødømɑ̀ geki Gømørɑ̀ óbëëd ge lɑ̈w kibøli cɑ́y-ɑ ócɑɑy tyëng kɑɑlɑni! “Lïdhi wun! Wu ör yi yɑn wu pɑ̈r ki dyëg møg gøøj kelli óthönhì. Bëëd wun wɑ̈thi wun pel ni thöllì, kɑ wu bëëd wu bɑ mööl ni ɑkùr. Koru ri wun kipe teedø, mɑ́ kelli gen ódi tyëng-ɑ ómɑg wun, kɑ wu kïdhi burø, kɑ wu peej be pwödø kì yethi sinɑgøgg. Wu ópeej bøli modïrr geki rɑ̈nhì kipe nyingɑ; de köbbu Wöndøj gen geki tyëng pödhh-ɑ kyeelø. Pëthi wun ko lïngi keny-ɑ ókïdhi wun burø, kipe møg-ɑ ókømmi yi wun, mɑ́ wu ónyudhi møg-ɑ ókømmi yi wun kì bøli kenyɑni ceth. Mɑ́ kwøbb-ɑ ókømmi yi wun pɑth ki mø wun, de ge ókɑ̈ɑ̈l-ɑ yï Wëyi Wïyi wun, o bɑ en ɑ ókööbø kì ri wun. “Dhɑnhø ómen ómuuje, o kïdhi be nɑ̈gø, kɑ dhɑnhø wɑ̈de muuje, kɑ yɑnythønhø ri gen lugi gen wëëg gen kɑ gï nɑ̈g gen. Wu ómɑɑn yi ji bënn kipe nyingɑ. De ngɑn-ɑ óngïnø gïti kɑ̀ thumi møgɑni, bene en ɑ óyiel. Keny-ɑ ócuul nyingi gen ki wun kì kɑɑl, pɑ̈ɑ̈r wun kɑɑl-ɑ kyeelø. Yɑ köbb-ɑ wun kidyër kinni, myërri Isrɑil pɑ tyëg yi wun e Nyɑɑr Dhɑnhø nuti bëënø. “Ngɑn ceg ki pwönyø pɑ ying mɑl kibøli ngɑn-ɑ pwönyii, o bɑ̈ng pɑ ying mɑl kibøli wɑ̈n. Døøj ke göög ngɑn ceg ki pwönyø e pɑ̈r ki ngɑn-ɑ ɑ́pwönyii, o bɑ̈ng gööge e pɑ̈r ki wɑ̈n. Keløg wïi kɑl cwølli yi teedø ɑ́ Bɑɑldhebul, tyëng gøle ócwøl ɑ dï? “Kɑ ɑ́rum bëëde kinøw, wu ko böggi yi tyëngɑni, mɑ́ e bong gïjø ɑ́kyel me ying thɑ piny men koo nyodh. O bong gïjø ɑ́kyel men-ɑ ókɑnø men koo yod. Møg-ɑ köbbɑ wun kì yij muudhø, töngu gen kì dicɑ̈ng, o møg-ɑ ólïngi yi wun kì gød, töngu gen kì wɑ̈thi óthɑɑng ud mɑl. Wu ko böggi yi tyëng-ɑ nyi nɑ̈g dëël dhɑnhø, o wëy pɑ cuggi nɑ̈gø yi gen; de böggu Jwøk ngɑn-ɑ cuggi nɑ̈gi dëël dhɑnhø geki wëye kì yij mɑc. Ákeej ɑ́ryew nyii ngewø ki gïrïc ɑ́kyel, de bong ɑ́kyel kì kelli gen, men dëëm piny e kwïj yi Wïyi wun. Cɑgg ɑ́ kwɑnni yëyyi wɑ̈thi wun ngɑ̈nyi yi en bënn. Wu ko böggi, mɑ́ per wun teeg kibøli ɑ́keej mø ngenyø. “Ngɑn-ɑ óyïëy yɑn kì bøli teedø, ólonyɑ ki yïëyø kì bøli Wïyɑ ɑ ying mɑl. De ngɑn-ɑ óbɑny yɑn kì bøli teedø, ólony yi yɑn ki bɑnyø kì bøli Wïyɑ ɑ ying mɑl. “Wu ko rum kinni, yɑ ɑ́bï-ɑ be kɑ̈ɑ̈li mër kömi piny. Yɑ nuti bëën-ɑ be kɑ̈ɑ̈li mër dɑ́ be kɑ̈ɑ̈li pilø. Yɑ ɑ́bï-ɑ be cwɑ̈ɑ̈gi dhɑnhø kí wïye, kí cwɑ̈ɑ̈gi nyɑndhɑjø kí meye, kí cwɑ̈ɑ̈gi meyi jɑlø geki cï wɑ̈de. Tyëng-ɑ ómɑn dhɑnhø óbëëd gɑ tyëng gøl gen. “Ngɑn-ɑ mɑɑr wïye wɑlɑ̀ meye ki mɑ̈ɑ̈dø me lod mɑɑr-ɑ mɑɑre yɑn, pɑ døøj ki bëëdø ɑ́ ngetibɑngɑ; o ngɑn mɑɑr wɑ̈de wɑlɑ̀ nyɑre ki mɑ̈ɑ̈dø me lod mɑɑr-ɑ mɑɑre yɑn, pɑ døøj ki bëëdø ɑ́ ngetibɑngɑ. Ngɑn koo byel yɑdh ɑrïwe, kɑ lug-ɑ bɑngɑ, pɑ døøj ki bëëdø ɑ́ ngetibɑngɑ. Ngɑn kor wëye, wëye ólɑ̈ɑ̈ny kì yïe, o ngɑn lɑ̈ɑ̈ny wëye kiperɑ, wëye óyiele. “Ngɑn yïëy wun kì gøle, ɑ́yïëy-ɑ yɑn; o ngɑn yïëy yɑn kì gøle, ɑ́yïëy-ɑ ngɑn-ɑ ɑ́ör yɑn. Ngɑn yïëy ngeti wööni Jwøk kipe kɑ̀ bëëde ɑ́ ngeti wööni Jwøk, ókwɑny-ɑ kööngi ngeti wööni Jwøk. O ngɑn yïëy ngɑndøj kipe bëëde ɑ́ ngɑndøj, ókwɑny-ɑ kööngi ngɑndøj. O ngɑn thödhi othinh-ɑ thinh kì kelli møg, ki pïg ngij kipe kɑ̀ bëëde ɑ́ ngetibɑngɑ, köönge pɑ lɑ̈ɑ̈ny.” Keny-ɑ ɑ́rum Yëso ki cegi jøbɑnge, gɑ pyɑ̈rø wïdɑ́ryew, ɑdhwödhe kì kenyɑni, kɑ kedh-ɑ be pwönyø kì yethi myërr. Alïng Jøn Jɑljwɑ̈g kì ød mɑg ki møg-ɑ nyi gwøg yi Mesiy, kɑ öd-ɑ yïe ki jøbɑnge. Kɑ Yëso pyëj yi gen kinni, “Bene yïn ngɑn-ɑ ɑ́kømmi, i obëënø, wɑlɑ̀ yïd wøn ki ngɑn megø?” Kɑ mø gen løøg yi Yëso kinni, “Kedh wun, kɑ Jøn köbbu møg-ɑ lïngi yi wun, kí møg-ɑ nenni yi wun; cörr nyi døøg-ɑ be nënnø, kɑ ngöll døøg-ɑ be cyɑ̈dhø, kɑ tyëng-ɑ ri gen di lɑ̈y dëlli gen nyii dönyø, kɑ mïng nyi døøg-ɑ be lïngø, kɑ tyëngthøø nyi tug kì yij thøø, o Wöndøj pwöny-ɑ ɑbuur. Tyëng-ɑ yethi gen pɑ pyëër ki yɑn ri gen dɑ gyëdh.” Keny-ɑ ɑ́kedh jøgɑni, ɑköbbi teedø yi Yëso kipe Jøn kinni, “Wu ɑ́kedh-ɑ be ngø yij pɑ̈l? Wu ɑ́kedh-ɑ be ywøøri obej me nïngi yi yømø? De wu ɑ́kedh-ɑ be ywøøri ngø? Wu ɑ́kedh-ɑ be ywøøri ngɑn rugø ki ógudh mø myëër cɑrø? Tyëng-ɑ nyi rugø kinøw, nyi bëëd ɑ yethi kɑ̈ll-ɑ døngø; kɑ̈lli rɑ̈nhì! Köbbu yɑn, wu ɑ́kedh-ɑ be lidhi ngø yij pɑ̈l? Jɑltöng? Ngee, de ngɑn-ɑ ɑ́lidh yi wun lod-ɑ jɑltöng. Bɑ Jøn ɑ kømmi yi wɑ̈jji kwërø kinni, ‘Jwøk ɑ́kööb kinni, ‘Jɑlwöönɑ óörɑ bølí, o tyenye yöö kiperí.’ Yɑ köbb-ɑ wun kidyër kinni, Jøn Jɑljwɑ̈g dwøng kibøli tyëng-ɑ ɑ́bëëd kì kömi piny bënn. De ngɑn-ɑ thinh kì Pödhi Jwøk, dwøng kibøle. Kër-ɑ ɑ́cɑ̈gi Jøn ki pwönyø, pïd ɑnɑn, Pödhi Jwøk, ceg-ɑ orɑng kì cinggi tyëngkɑ̈b. Mø Pödhi Jwøk ɑ́bëëd ge okømmø yi tyëngtöng mø Jwøk, kɑ ge nyodh kì yethi Ciggi Mosɑ̀ gïti kɑ ɑ́bëën Jøn. Keløg wu dwɑdd-ɑ yïëyi wöni gen, Jøn kiree bene Eliyɑ̀, ɑ bëëne ɑ́mɑ̈ɑ̈g ki kwøbø. Ngɑn di yïthhe mø lïnge, wiy lïnge. “De rïj men ópɑ̈ɑ̈r yi yɑn kɑ ngø? Pɑ̈r ki othønhø mø bëëdø piny kì kej ngyew, ge ócwöddø ki wɑddi gen kinni, ‘Wu ɑ́göjji wøn ki bul, de wu nuti cöngø. Kɑ wø óywöngø ki ywøøg thøø, de wu nuti ywöngø.’ Mɑ́ Jøn ɑ́bï e pɑ cyɑ̈mø, wɑlɑ̀ pɑ nyi mɑ̈dhø ki møgi oløg, kɑ teedø okööbø kinni, ‘Ree dɑ wɑ̈lø.’ Nyɑɑr Dhɑnhø ɑ́bï e ocyɑ̈mø, o omɑ̈dhø ki møgi oløg, kɑ ge okööbø kinni, ‘Lidhu jɑɑl! Bɑ jɑlcɑm, o bɑ mɑ̈dhhi møgø, o bɑ mɑ̈dh ki jøgwɑ̈j geki tyëngorøg, kí luuy thyew!’ Peli wïj Jwøk nyi ngij-ɑ bɑng gïg-ɑ nyi gwøg yi en.” Bøli kenyɑni ɑ ɑ́cɑ̈gi Yëso ki cɑyi tyëng kɑ̈dd-ɑ́ yethi gen ɑ́gööge ki gïïngɑ̈ngø mø ngenyø, kipe kɑ̀ nuti yewi gen ki orøøg gen. Ákööb kinni, “Cyën ying-ɑ kömí, yïn ɑ Korɑdhïn! Cyën ying-ɑ kömí, yïn ɑ Betsɑidɑ̀, mɑ́ keløg gïïngɑ̈ngø møg-ɑ ɑ́gwøg kì yethi wun, di gwøg-ɑ Suur kí Sïdön, tyëng-ɑ yethi gen di yewi kɑ̈gi piny dööng, kɑ ge di rug ki ocwɑ̈llì, kɑ ge di bëëd kì yij belø. De yɑ köbb-ɑ wun kinni, kì Cyɑ̈ɑ̈ng Cɑ́y, cɑ́y-ɑ ócɑɑy Suur kí Sïdön óbëëd ge lɑ̈w kibøli cɑ́y-ɑ ócɑɑy wun. O yïn ø, Kɑpernɑum! Yï ɑ́dwɑdd-ɑ tïngi rií mɑl? Pɑth, yï óleeng-ɑ piny yij ölø. Mɑ́ keløg gïïngɑ̈ngø møg-ɑ ɑ́gwøg kì yijí di gwøg-ɑ Sødømɑ̀, di bëëd e nudd e nud pïd dicyɑ̈ngtïn. De yɑ köbb-ɑ yïn kinni, kì Cyɑ̈ɑ̈ng Cɑ́y, cɑ́y-ɑ ópɑ̈dhi kömi Sødømɑ̀ óbëëd ge lɑ̈w kibøli cɑ́y-ɑ ópɑ̈dhi kömí.” Akööb Yëso kì bøli kenyɑni kinni, “Wïyø, yɑ pwøj-ɑ yïn, yïn ɑ Wïi mɑl kí piny, kipe kɑ ɑ́kɑ̈nní møgɑni tyëng-ɑ dïdø kidøøj geki tyëng-ɑ wɑ̈thi gen pel, de ge ɑ́nyudhí tyëng-ɑ pɑ̈r ki othønhø. Ngee, Wïyø, møgɑni ɑ́dwɑdd-ɑ yi yïn. “Jɑmmì bënn ɑ́cïb cingɑ yi Wïyɑ. Bong ngɑn ngɑ̈nyi Wɑ̈d den-ɑ́ Wïye, o bong ngɑn ngɑ̈nyi Wïy den-ɑ́ Wɑ̈de geki tyëng-ɑ dwɑddi nyudhø yi Wɑ̈de. “Bïu yïɑ wu bënn, wu tyëng-ɑ dhɑ̈rø, kí tyëng-ɑ torø yi tyëddi gïgpeg, o wu nëngɑ ki ywömø. Cïb wun ɑcebɑ muddi wun, kɑ møgɑ dïd wun, mɑ́ yɑ bɑ mölø, o pyëwɑ bong dhɑ̈w. O wu óyïddi wun ki ywömø. Mɑ́ ɑcebø men-ɑ ómëggɑ wun døøj, gïg-ɑ ócïbɑ wɑ̈thi wun yööd.” Bɑng kenyɑni ɑ ɑ́kedh Yëso, e kɑ̈ll-ɑ yethi pwödh. Kɑ ɑ́mɑɑg jøbɑnge yi kɑ̈j, ɑmööd gen ki byel, kɑ ge onyɑ̈mø. O cyɑ̈ngɑni bɑ cyɑ̈ɑ̈ng Sɑbɑth. Keny-ɑ ɑ́liidh gen yi Jøpɑresì, ɑköbbi gen Yëso kinni, “Lidh, jøbɑngí gwøg-ɑ møg-ɑ bɑ ɑkerø gwøgø cyɑ̈ɑ̈ng Sɑbɑth.” Kɑ gï köbbe kinni, “Wu nuti rɑ̈ngø cøn ki kwøbbi gïn-ɑ ɑ́gwøg yi Debïd keny-ɑ ɑ́mɑgii yi kɑ̈j geki jøg-ɑ ɑ́cyɑ̈dhi ki en? A ɑ́kedhe ød Jwøk, kɑ ocyɑ̈mø ki ópùn-ɑ nyi thërri Jwøk, møg-ɑ bɑ ɑkerø cɑmø yi gen, de nyi cɑm-ɑ yi tyëng kwër keti gen. Wɑlɑ̀ wu nuti rɑ̈ngø kì yethi Cigg kinni, ókwër nyi pyem-ɑ ciggi Sɑbɑth, kenyi göög gen kì yij Kengø kì cyɑ̈ɑ̈ng Sɑbɑth, de kömi gen bong cɑ́y? Yɑ köbb-ɑ wun kinni, dɑ ngɑn megø kì keny, me lod Kengø ki döng. Wɑ̈jji kwërø okööbø kinni, ‘Yɑ dwɑdd-ɑ lɑ̈mpyëw, de pɑth ki gëëdhi ɑ dwɑddɑ.’ Ke di bëëd gïn-ɑ wɑngi yi møgɑni ngɑ̈nyi yi wun, tyëng-ɑ yï gen bɑ̈r pɑ di cɑy yi wun. Mɑ́ Nyɑɑr Dhɑnhø bɑ jɑngi Sɑbɑth.” Kɑ odhwödhø kì kenyɑni, ɑkedhe sinɑgøg. O ɑ́dɑ jɑl me cinge dhëgø kì kenyɑni. Kɑ Yëso pyëj yi gen kinni, “Møgɑni nud kì yethi Cigg kinni, nyi yieel dhɑnhø kì cyɑ̈ɑ̈ng Sɑbɑth?” Ge ɑ́yɑb-ɑ gïn pere di gøøny ge gøn. Kɑ mø gen løøg yi Yëso kinni, “Ngɑn yïe di órömø kì kelli wun, kɑ órömɑni pɑ̈dh-ɑ yij bur me ludhø kì cyɑ̈ɑ̈ng Sɑbɑth, gø pɑ kɑ̈ɑ̈le wɑ̈g? De dhɑnhø pere pɑ teeg kibøli dyel! Kɑ ɑ́rum bëëde kinøw, bɑ ɑyïëy yi Ciggee eni gwøgi gïndøj kì cyɑ̈ɑ̈ng Sɑbɑth.” Codhe, ɑköbbe jɑl-ɑ cinge dhëgø kinni, “Rïj cingí.” Kɑ gø rïje. Kɑ cinge døøg-ɑ keje ni cing-ɑ kyeelø. Kɑ Jøpɑresì ókedhø, ge oyɑ̈bø ki kwøbbi nɑ̈gi Yëso. Yëso keny-ɑ ɑ́yode gïn-ɑ dwɑddi göggii, ɑdhwödhe kì kenyɑni. Kɑ ji mø gïïr løg-ɑ bɑnge, kɑ gï yiele bënn ki gïgrijjø møg-ɑ ri gen. Kɑ gï cege kinni ko di ngɑn köbbi yi gen ki pere, o møg-ɑ ɑ́kømmi yi Icɑyɑ̀ jɑltöng pɑ̈dhi gen kɑ̈jji gen kinni, “Men bene bɑ̈ngɑ, bɑ̈ng-ɑ ɑ́yienyɑ, Mɑɑr yi yɑn, o pyëwɑ med ki en. Wëyɑ ócïbɑ ree, o møg-ɑ dwɑddɑ gï köbbe pödhh-ɑ kyeelø. Koo pëmø wɑlɑ̀ koo ryeer, wɑlɑ̀ bong ngɑn-ɑ ólïngi cwɑgge kì yethi yëëth. Pɑ turri ki obej me bøømø wɑlɑ̀ lɑ̈mbɑ̈ me kwengø pɑ nɑ̈g yi en, Ódyëjø ceth, gïti keny-ɑ ópɑ̈dhi møg-ɑ dwɑddɑ kɑ̈jji gen. O nyinge ógɑ̈nni yi tyëng pödhh-ɑ kyeelø.” Kɑ Yëso muuj jɑl me bɑ cwør, o pɑ kööbø, mɑ́ ree dɑ wëyrijjø. Kɑ gwøg yi Yëso, kɑ døøg-ɑ be kwøb, kɑ nyinge onëënø. Kɑ teedø ongɑ̈ngø yi gïn-ɑ ɑ́gwøg yi Yëso, ɑkööb gen kinni, “Jɑɑl ócuggø bëëdø ɑ́ Wɑ̈d Debïd?” De kɑ ɑ́lïngi møgɑni yi Jøpɑresì, ɑkööb gen kinni, “Bɑ tegi Bɑɑldhebul, jɑngi wëyrijjø ɑ cyeddi wëyɑni yi jɑlɑni.” De rummi gen ngɑ̈nyi yi Yëso, kɑ gï köbbe kinni, “Pönh-ɑ nyi dɑ̈ɑ̈ng ree, kɑ døøg-ɑ be nyïɑ̈ggø kete nyii rënyø, o pɑ nyi cwööng ki pɑ̈ɑ̈dhø. Keløg cethɑn cyedd-ɑ cethɑn, pönhɑni pɑ rum dɑ̈ngø? Ócungi e teeg kidï! Wu okööbø i wëyrijjø cyeddi yi yɑn kɑ tegi Bɑɑldhebul. Keløg ɑ́ dyër, dɑ́ men ɑ nyi thödhi jøbɑnggi wun ki teng-ɑ cyëddi gen ki wëyrijjø? Menɑni nyodh-ɑ kinni wu pɑ kømmi dyër. De keløg ɑ́ tegi Wëyi Jwøk ɑ ryëmmɑ ki wëyrijjø, Pödhi Jwøk ɑ́wɑ̈nhi kelli wun. “Dɑ ngɑn cuggi kedhi gøl jɑl me teg be yɑgi jɑmmi gølɑni, keløg jɑlkɑl nuti twööj en møti? “Ngɑn pɑ ying tungɑ, mɑ̈n ki yɑn, o ngɑn pɑ køny yɑn ki cungø, kedhh-ɑ jɑmmì. Kɑ ɑ́rum bëëde kinøw, yɑ köbb-ɑ wun kinni, lɑ́ɑ̀w ódwöög piny kipe ngɑn gwɑddi yɑn; de lɑ́ɑ̀w pɑ dwöög piny kipe ngɑn gwɑddi Wëykwërø. Ngɑn kwɑ̈dhhi Nyɑɑr Dhɑnhø lɑ́ɑ̀w ódwöög piny kipe orøge; de ngɑn kwɑ̈dhhi Wëykwërø, lɑ́ɑ̀w pɑ dwöög piny kipe orøge, kì kömi piny men, wɑlɑ̀ kì bøli keny-ɑ óbï. “Gwøgu yɑdh e døøj, o kɑ̈ne ki nywøl mø døøj, wɑlɑ̀ gwøgu yɑdh e rɑɑj, o kɑ̈ne ki nywøl mø rijjø, mɑ́ yɑdh nyi ngij-ɑ ri nywøle. Wu bɑ thöllì, wu di kööb ɑ dï ki kwøb mø døøj, wu ceg bëëdø wu rijjø? Mɑ́ dhøg nyi kwøb-ɑ møg-ɑ pɑ̈ɑ̈ng pyëw dhɑnhø. Ngɑndøj nyi kɑ̈n-ɑ wɑ̈g ki møg døj kì ri gïgdøj møg-ɑ congi yi en, o ngɑnrɑj nyi kɑ̈n-ɑ wɑ̈g ki rɑj kì ri gïgrijjø møg-ɑ congi yi en. “De yɑ köbb-ɑ wun kinni, kì Cyɑ̈ɑ̈ng Cɑ́y, kwøbb-ɑ nyi gwɑ̈ny kì dhøg dhɑnhø, bɑ møg-ɑ ókwɑ̈nnii ceth. Mɑ́ yï ócwɑg-ɑ bɑng kwøbbí, o yï ócɑy-ɑ bɑng kwøbbí thyew.” Codhe, ɑkööb kwï jøpwönyi Cigg kí Jøpɑresì kinni, “Jɑlpwönyø, wø dwɑdd-ɑ lidhi yïn, yï ogöögø ki ngïji.” Kɑ mø gen løøge kinni, “Rïny-ɑ rɑj ki orøg, ɑ cöödh ree, oyɑ̈bø ki ngïji? Bogøn! Ngïji men-ɑ ónyudhi wun bɑ ngïji mi Yönɑ̀ jɑltöng. Ni kɑ ɑ́bëëd Yönɑ̀ ki cyɑ̈ng ɑ́dɑ̈g kí wɑ̈rr ɑ́dɑ̈g, kì yij gur me dwøng, Nyɑɑr Dhɑnhø óbëëdø ki cyɑ̈ng ɑ́dɑ̈g kí wɑ̈rr ɑ́dɑ̈g kì yij lɑ̈bø. Tyëng Ninɑwɑ̀ ódhwödh kì Cyɑ̈ɑ̈ng Cɑ́y, kɑ wu gøøny yi gen, mɑ́ ge ɑ́yewi ki orøøg gen keny-ɑ ɑ́lïngi gen kwøbbi Yönɑ̀. O yɑ köbb-ɑ wun, ngɑn lod Yönɑ̀ ki döng ɑ keny èn! Rɑ̈ɑ̈dh Cebɑ̀ rɑ̈nh-ɑ dhɑjø, ódhwödh kì Cyɑ̈ɑ̈ng Cɑ́y, kɑ wu gøøny yi en, mɑ́ e ɑ́bï be lïngø ki kwøbbi peli wïj mø Sølømøn, e kɑ̈ɑ̈l-ɑ kun lɑ̈wi. O yɑ köbb-ɑ wun, ngɑn lod Sølømøn ki döng ɑ keny èn! “Kenyi bëën wëyrɑj wɑ̈g kì ri dhɑnhø, nyii wïïnø kì keny bong pï, e yɑb-ɑ keny ywööme ree. Ke pɑ yïdde, ree nyi köbbe’ köbbø kinni, ‘Yɑ ódøøg ødɑ.’ Odøøge, ønɑni óyuude e wɑ̈dh-ɑ bëëdø, o óyejø kɑ pyël kidøøj. Codhe, o døøge be yɑ̈bbø ki wëy ɑ́bïryew mø pëddi rɑ̈jø kibøle. Kɑ ge pëgg-ɑ be bëëdø kì ri ngɑnɑni. Bëëdi ngɑnɑni ceg-ɑ pëddø rɑ̈jø kibøli mi tyeli mɑl. Bene gïn-ɑ ócwöb ɑnɑn, kipe rïj men-ɑ rɑj èn.” Kɑ̈ng-ɑ́ nudd Yëso okööbø ki teedø, kɑ meye geki nyiimen yɑɑg-ɑ cwøw obëënø, kɑ ge ócungø kì wɑ̈g, ge dwɑdd-ɑ yïddø ki en. Kɑ köbbi yi ngɑn megø kinni, “Meyí geki nyiimyëw ócungø kì wɑ̈g, ge dwɑdd-ɑ yïddø ki yïn.” De møge ɑ́løøg yi Yëso kinni, “Meyɑ bɑ men, o nyiimïɑ bɑ møg?” Kɑ nyudh-ɑ tung-ɑ di jøbɑnge, ɑkööbe kinni, “Lïdhi wun! Meyɑ kí nyiimïɑ yɑɑg-ɑ cwøw ek! Ngɑn nyi gwøg møg-ɑ dwɑddi yi Wïyɑ ɑ ying mɑl, bene ómïɑ, kí meyɑ, kí nyimïɑ.” Kɑ Yëso odhwödhø kì kɑl, kɑ kedh-ɑ gɑ̈d, ɑpëgge thɑ̈ngi nɑm. De ɑ́kuud yi ji mø gïïr, codhe, ɑkɑdhe yij morkɑb kɑ pëgg-ɑ piny. Kɑ tyëngɑni ócungø kì thɑ̈ngi nɑm kì wɑ̈g. Kɑ gï köbbe ki gɑ́j mø gïïr. Ákööb kinni, “Jɑl megø ɑ́kedhi be wïïwø ki köödh. Kɑ ɑ́wïïwe, kɑ kwï köödh dëëm-ɑ tøg yöö. Abëën winy kɑ gï cɑm gen. Kɑ köödh møøgø dëëm-ɑ keny mɑ kït, me lɑ̈bø nøg kì köme, kɑ ge jwɑn-ɑ twïyø yi kɑ̀ bëëd lɑ̈bø e reeb. Keny-ɑ ɑ́yer cɑ̈ng, ɑrɑ̈bbi gen, kɑ ge othwøwø yi kɑ̀ bëëd ge bong byerri gen. Kɑ köödh møøgø dëëm-ɑ kelli koodh. Kɑ koodhɑni ódøngø, kɑ byel twij yi gen. Kɑ köödh møøgø dëëm-ɑ yij lɑ̈bø me døøj, kɑ ge ókɑ̈nø ki nying. Kwï gen ɑ́kɑ̈ni ki miyø, møøgø pyɑ̈r ɑ́bïkyel, møøgø pyɑ̈r ɑ́dɑ̈g.” Codhe ɑkööbe kinni, “Ngɑn di yïthhe mø lïnge, wiy lïnge.” Kɑ jøbɑnge bï-ɑ yïe, kɑ gø köbbi gen kinni, “Yïde ɑ 'kööb gɑ́j?” Kɑ Yëso ólöggø kinni, “Wun ɑ ɑ́thödhi ki dïdø men yod wun møg-ɑ bɑ ɑkɑnn kì Pödhi Jwøk, de pɑth ki gen. Mɑ́ ngɑn-ɑ yïe di gïïpiny óthödhi, o jɑmme ngënyi gen. De ngɑn jɑdø, cɑgg ɑ́ møg-ɑ nud kì yïe ókwɑny. Ge köbbi yi yɑn kɑ gɑ́j, mɑ́ nyingi gen bɑ ɑyieb de ge pɑ nëënø, o yïthhi gen kyëën gen, de bong gïn gɑm yi wɑ̈thi gen. Møg-ɑ ɑ́kwøb yi Icɑyɑ̀ jɑltöng kì ri tyëngɑni ɑ́pɑ̈dhi kɑ̈jji gen ceth kinni, ‘Jiɑni yïthhi gen ókënni gen, de bong gïn gɑm yi wɑ̈thi gen; nyingi gen ógwiir gen piny, de bong gïn lidh yi gen, mɑ́ wɑ̈thi gen gug, o yïthhi gen coog gen, o nyingi gen kum gen. Mɑ́ keløg ge di nëën ki nyingi gen, kɑ ge olïngø ki yïthhi gen, kɑ møgɑ gɑm yi wɑ̈thi gen, ge di dwöög köörɑ o ge di yielɑ.’ “Ri wun dɑ gyëdh, mɑ́ nyingi wun onëënø. O ri wun dɑ gyëdh, mɑ́ yïthhi wun olïngø. Yɑ köbb-ɑ wun kidyër kinni, tyëngtöng mø Jwøk mø ngenyø geki tyëngtir mø ngenyø, ge ɑ́dwɑdd-ɑ lidhi møg-ɑ nenni yi wun, de møgɑni nuti liidh gen. O ge ɑ́dwɑdd-ɑ lïngi møg-ɑ lïngi yi wun, de gï nuti lïngi gen. “De ɑnɑn lïngu gɑ́ji ngeti wïïwø ki köödh. Ngɑn lïngi kwøbbi Pödhi Jwøk, de gï pɑ gɑm yi wïje, bene köödh-ɑ ɑ́dëëm tøg yöö. Kenyi bëën Ngɑnrɑj, gïg-ɑ ɑ́piidh pyëwe nyi gwɑre’ gwɑrø. O ngɑn lïngi kwøbbi Pödhi Jwøk, kɑ gï kwɑnye ki medi pyëwe kì bøli kenyɑni ceth, bene en köödh-ɑ ɑ́dëëm kömi piny-ɑ bɑ kït. Kwøbbɑni nuti niyeeng pyëwe, o ge pɑ mɑ̈gi ki keny me bɑ̈ɑ̈r; mɑ́ kenyi bëën ɑkørr geki guudi nying, ge nyi jwɑn-ɑ døøg ngɑ̈thi gen. O köödh-ɑ ɑ́dëëm kelli koodh, bɑ tyëng-ɑ nyi lïngi kwøb, de kenyi bëën olïng pëëth, kí mɑɑri kɑ̈rì, wöödø nyii twijø yi gen, kɑ ocögø e pɑ kɑ̈ni ki nywøl. De møg-ɑ ɑ́dëëm kömi lɑ̈m-ɑ med, bɑ tyëng-ɑ nyi lïngi kwøb, kɑ gï nyi gɑm yi wɑ̈thi gen; gen ɑ nyi kɑ̈ni ki nywøl ceth, møøgø kɑ̈ɑ̈l-ɑ miyø, møøgø kɑ̈ɑ̈l-ɑ pyɑ̈r ɑ́bïkyel, møøgø kɑ̈ɑ̈l-ɑ pyɑ̈r ɑ́dɑ̈g.” Aköbbe gïn ki gɑ́j møøgø kinni, “Pödhi Jwøk ópɑ̈ɑ̈r kɑ jɑl megø mɑ ɑ́wïïw ki köödhi gemè mø døj kì yij pwödhe. Kɑ ngɑn mɑɑnii obëënø ji onenø, kɑ nywøli ɑdengø wiiwe kelli gemè kì yij pwönhɑni, kɑ ókedhø. Keny-ɑ ɑ́døngi gemè kɑ odhɑ̈yø, kɑ ɑdengø ree thyere thyew. Kɑ bɑ̈nggi jɑlpwödhø kedh-ɑ yïe, ɑkööb gen kinni, ‘Wuö, pɑth ki köödh mø døj ɑ ɑ́wiw yi wɑ kì yij pwödhø? De ɑdengø kɑ̈ɑ̈l-ɑ keny?’ Kɑ gï köbbe kinni, ‘Bɑ ngɑn mɑɑn yɑn ɑ gwøøg gïnɑni.’ Kɑ pyëj yi bɑ̈ngge kinni, ‘Wø pɑ kedhi be puthi ɑdengø?’ Kɑ gï kyëdde kinni, ‘Pɑth, mɑ́ keløg ɑdengø puth wu’ wɑ̈g, wu puth-ɑ wɑ̈g ki gemè thyew. Wiy ge døngi gen kyeel gïti keny-ɑ óbëën bøli kej nyɑri gen. Keny-ɑ ócɑ̈gi nyɑr, tyëng-ɑ nyɑ̈rø óceg yi yɑn kinni, ‘Puth wun ɑdengø møti, kɑ töjji wun, o rɑ̈b. Codhe, o gemè nyɑr yi wun cyee, o pwöd, o kïdhi yethi thebbɑ.’ ” Aköbbe gïn ki gɑ́j møøgø kinni, “Pödhi Jwøk ópɑ̈ɑ̈r kɑ wɑɑng köödhi kɑrdɑl, mɑ ɑ́kwɑny yi jɑl megø, kɑ gø kɑ̈ɑ̈ge yij pwödhe. Köödhø menɑni wɑnge thiinh kì kelli köödh bënn, de kenyi dønge nyi lod-ɑ gïg-ɑ ɑ́pidh bënn ki döng, kɑ ree nyi løge yɑdh me dwøng, kɑ winy nyii bëënø, kɑ ge nyii gëdø kì bɑ̈dde.” Aköbbe gïn ki gɑ́j møøgø kinni, “Pödhi Jwøk ópɑ̈ɑ̈r kɑ kɑmïrɑ̀ men kwɑny yi ngɑndhɑjø, kɑ gø nyööme møng-ɑ búr me bɑ rummì ɑ́dɑ̈g, kɑ ɑwɑnyɑni okwödø bëne.” Møgɑni bënn ɑ́kømmi yi Yëso, e ceg-ɑ gɑj kì bøli teedø. O bong kwøb møøgø mɑ ɑ́kømme ge pɑth ki gɑ́j. Kɑ møg-ɑ ɑ́kømmi yi Icɑyɑ̀ jɑltöng pɑ̈dh-ɑ kɑ̈jji gen kinni, “Dhøgɑ ótug yi yɑn, yɑ 'kööb-ɑ gɑ́j. O møg-ɑ ɑ́bëëd gɑ ɑkɑnn kër-ɑ ɑ́cwɑ̈ɑ̈j piny töngɑ.” Codhe, ɑdhwödhe kì kelli teedø, kɑ kedh-ɑ kɑl. Kɑ jøbɑnge bï-ɑ yïe, ɑkööb gen kinni, “Nyudhí wøn gïn-ɑ wɑngi yi gɑ́ji ɑdengø kì yij pwödhø.” Kɑ mø gen løøge kinni, “Ngɑn-ɑ ɑ́wiw köödh møg-ɑ døj bɑ Nyɑɑr Dhɑnhø, pwödhø bɑ piny, o köödh møg-ɑ døj bɑ jii Pödhi Jwøk, o ɑdengø bɑ jii Ngɑnrɑj. O ngetimɑ̈ɑ̈nø men-ɑ ɑ́wiw gen bene Cethɑn, o bøli kej nyɑr bɑ thumi piny, o jøgwøg bɑ wëywödd. Ni kenyi gween ɑdengø kì pwödhø, kɑ rɑ̈b ki mɑc, kwøbbɑni óbëëd ɑ nøw kì ri thumi piny. Nyɑɑr Dhɑnhø wëywödde óöre yij pödhe, o tyëng-ɑ nyi peej ji be orøg, kí tyëng-ɑ gøggi gïgrijjø bënn gwëën wɑ̈g. O ge leeng yij mɑc, kenyɑni ódi ywøg kí ngenyyi leg. Kì bøli kenyɑni jii Jwøk ómënyø ni cɑɑr cɑ̈ng kì yij Pödhi Wïyi gen. Ngɑn di yïthhe mø lïnge, wiy lïnge! “Pödhi Jwøk ópɑ̈ɑ̈r kɑ gïn pere teg men-ɑ ókɑnø kì yij pwödhø, kɑ yod yi jɑl megø, kɑ gø døøge ki kɑnø. Kɑ ókedhø, kɑ jɑmme bënn ngeewe wɑ̈g, pyëwe omedø, kɑ pwönhɑni ngewe. “Thyew, Pödhi Jwøk ópɑ̈ɑ̈r kɑ jɑlngyëwø men-ɑ nyi yɑ̈bø ki tigg mø døj. Keny-ɑ ɑ́yïddi jɑlɑni ki tigø me pere teeg cɑrø, ɑkedhe, kɑ jɑmme bënn ngeewe wɑ̈g, kɑ tingɑni lonye ki ngewø. “Thyew, Pödhi Jwøk ópɑ̈ɑ̈r kɑ bøy mɑ ɑ́luudh nɑm yi jømɑy, kɑ ómɑ̈gø ki wɑ̈thi rij bënn. Keny-ɑ ɑ́pɑ̈ng bøyɑni, ɑywɑ̈ɑ̈jii wɑ̈g yi jøgɑni, kɑ ge pëgg-ɑ kenyɑni, kɑ møg-ɑ døj cøng gen yethi dhöng, kɑ møg-ɑ bong per gen weddi. Óbëëdø kinøw thyew kì ri thumi piny. Wëywödd óbï kɑ tyëngrijjø dɑ̈ɑ̈ng yi gen ki tyëngdøj, kɑ tyëngrijjø leeng mɑc, kenyɑni ódi ywøg kí ngenyyi leg.” Apyëëj gen yi Yëso kinni, “Møgɑni ɑ́lïngi yi wun bënn?” Kɑ ge ólöggø kinni, “Ngee.” Kɑ gï köbbe kinni, “Kɑ ɑ́rum bëëde kinøw, jɑlpwönyi Cigg men göögø ki ngeti Pödhi Jwøk, pɑ̈r ki jɑlkɑl men-ɑ nyi kɑ̈ni wɑ̈g kì ri jɑmmi kɑ̈re, kwï gen bɑ møg nyɑ̈n, o kwï gen bɑ møg kɑ̈gi gen dööng.” Keny-ɑ ɑ́rum Yëso ki kwøbi gɑ́jɑni, ɑdhwödhe kì kenyɑni. Keny-ɑ ɑ́wɑ̈nhe pödhi gen, ɑpwönye teedø kì sinɑgøg. Kɑ teedø ongɑ̈ngø yi møgɑni, ɑkööb gen kinni, “Jɑlɑni kɑ̈n-ɑ́ɑ̀ keny ki dïdø men, kí gïïngɑ̈ngø møg? Jɑlɑni pɑth ki wɑ̈d bødhi pɑ̈mmì? Pɑth ki Meye ɑ nyi cwøl ɑ́ Meerì, o pɑth ki ómï Yɑgob, kí Yosep, kí Sɑymøn, kí Yeudɑ̀? O nyiimen womɑ̈nn pɑ nud kì keny? Jɑlɑni kɑ̈n-ɑ́ɑ̀ keny ki kwøbb-ɑ ni møg bënn?” Kɑ gø bɑny gen. Kɑ ge köbbi yi Yëso kinni, “Jɑltöng kenyi bɑnyii, nyi bɑny-ɑ yi pödhi gen geki gøl gen.” Kɑ ocögø e nuti göögø ki gïïngɑ̈ngø mø gïïr kì kunɑni, kì bɑng kɑ̀ nuti yïëëyii yi gen. Kɑ per Yëso lïngi yi Ërödøs, ɑ ɑ́bëëd ɑ́ modïïr Gɑlelì, kì bøli kenyɑni. Kɑ jøge köbbe kinni, “Bɑ Jøn Jɑljwɑ̈g, ɑ ɑ́dhwödh kì yij thøø kidyër. Bene ɑ di yïe teng-ɑ gööge ki gïïngɑ̈ngø.” Mɑ́ Jøn ómɑgø yi Ërödøs, kɑ gø twöje kɑ leeng ød mɑg, kipe Ërödiyɑ̀ cï Pïlïp ómen. Mɑ́ Jøn ɑ́ceg-ɑ kwøb kinni, “Pɑ døøj kɑ̀ kɑɑb cï ómyëw.” Kɑ Jøn dwɑdde nɑ̈gø, de ɑ́bwøg yi teedø, mɑ́ Jøn cwølli yi gen ɑ́ jɑltööng Jwøk. De keny-ɑ ɑ́wɑ̈nhi cyɑ̈ng-ɑ pɑɑr pɑ̈dhi Ërödøs piny, ɑcööng nyɑɑr Ërödiyɑ̀ kì bøli wëll-ɑ ɑ́ryej. Kɑ Ërödøs pyëwe ómïnø. Aköbbe nyɑnɑni kinni, “Yɑn ɑ köngi èn; kwøb gïn-ɑ dwɑddi yi yïn, ómëggɑ yïn ceth!” Kɑ nyɑnɑni pɑng yi meye, ɑköbbe Ërödøs kinni, “Mëggí yɑn wïj Jøn Jɑljwɑ̈g kì yij tɑbø.” Kɑ rɑ̈dh yije óywöngø ki mendwøng, de pɑ cuggi døøg cyɑ̈n, mɑ́ e ɑ́rum ki köngø kì bøli ji. Kɑ oödø, ɑkeb wïj Jøn kì ød mɑg. Kɑ kɑ̈ɑ̈l kì yij tɑbø kɑ mëggi nyɑnɑni, ɑmuuje gøn meye. Abëën jøbɑng Jøn, kɑ dëël dhɑnhø kɑ̈l yi gen, kɑ gø kony gen. Akedh gen, kɑ møgɑni dwöggi gen Yëso. Keny-ɑ ɑ́lïngi møgɑni yi Yëso, ɑdhwödhe kì kenyɑni ki morkɑb, kɑ töng-ɑ wɑ̈g kì keny me bong ji. De møgɑni ɑ́lïngi yi teedø, ɑløg gen bɑnge, ge kɑ̈ɑ̈l-ɑ kelli myërr ge ócyɑ̈dhø ki tyelli gen. Akɑdhe wɑ̈g kì yij morkɑb, kɑ ólïdhø ki ji mø gïïr, kɑ yije óywöngø kipe gïn, kɑ tyëng-ɑ buud kì kelli gïn yiele. Keny-ɑ ɑ́göög piny ki wɑɑng thyënhø, ɑbëën jøbɑnge yïe, kɑ ge okööbø kinni, “Men bɑ pɑ̈l, o wøw ɑ́yuudh. Dɑ̈ɑ̈ng teedø, o ge kedhi gen kelli myërr be ngyew ki gïgcɑmm.” Aköbbi gen yi Yëso kinni, “Á kipe ngø ɑ kedh gen? Thödhu gen ki gïncɑm!” Kɑ gø köbbi gen kinni, “Yï wøn dɑ ópùn ɑ́bïj kí rij ɑ́ryew keti gen kì keny.” Alögge kinni, “Kɑ̈ɑ̈lu gen!” Kɑ teedø köbbe kinni pëggi gen piny kömi lum. Kɑ ópùn kí rijjɑni kwɑnye. Alïïdhe mɑl, kɑ Jwøk pwøje, ɑpødde ópùnɑni, kɑ gï mëgge jøbɑnge. Kɑ ge cïmmi kì bøli teedø yi jøbɑnge. Kɑ teedø ocyɑ̈mø bënn, kɑ ge oyɑ̈ngø, kɑ nyingi gïncɑm møg-ɑ ɑ́döng gwen gen, kɑ dhöng pyɑ̈rø wïdɑ́ryew opɑ̈ngø yi thull-ɑ ɑ́döng. Jøg-ɑ cwøw møg-ɑ ɑ́cyɑ̈ɑ̈m kwɑnni gen bɑ ɑ́lïp ɑ́bïj, de tyëng-ɑ mɑ̈nn geki othønhø nuti kwɑnø. Kɑ jøbɑnge ciire yij morkɑb, o ge møøl gen løøgø, kɑ̈ng-ɑ ódɑ̈ɑ̈nge teedø. Keny-ɑ ɑ́rume dɑ̈ɑ̈ngi teedø, ɑyedhe mɑl wïj kït be lɑm, e kete. Kɑ wøw óyuudhø, e obëëdø kì kenyɑni kete. Morkɑb ɑ́bëëd e rum wɑ̈dhi dïnɑm kì bøli kenyɑni, e di lenggø yi ɑpɑgø, mɑ́ ge pyem-ɑ yømø. Abëën Yëso yï jøbɑnge kì bɑ̈ɑ̈rø, e ócyɑ̈dhø kì wɑ̈thi pï. Keny-ɑ ɑ́lidhii yi jøbɑnge, e ócyɑ̈dhø kì wɑ̈thi pï, ɑbwøg gen ki mendwøng, kɑ ge okööbø kinni, “Bɑ tïbi ngɑnthøø!” Kɑ ge óryeerø, mɑ́ ge ɑ́nɑ̈g yi wɑ̈ɑ̈rø. De ge ɑ́köbbi yi Yëso kinni, “Wu ko böggi! Bɑ yɑn!” Kɑ møge løøg yi Pïtør kinni, “Wuö, keløg ɑ́ yïn, köbbí yɑn, o yɑ bïɑ yïí, yɑ ócyɑ̈dhø kì wɑ̈thi pï.” Akööbe kinni, “Bïí!” Akɑdhi Pïtør wɑ̈g kì yij morkɑb, kɑ kedh-ɑ yï Yëso, e ócyɑ̈dhø kì wɑ̈thi pï. De kɑ ɑ́lidhe yømø e dwøng, kɑ obwøgø, kɑ ócyɑ̈ngø mudø, ɑryeere kinni, “Wuö, yiel yɑn.” Kɑ Yëso cinge rïje, ɑmɑge Pïtør, kɑ gø pyëje kinni, “Yïëyí nøg, ede yijí ɑ pyëre?” Kɑ ge kɑdh-ɑ yij morkɑb, ɑbed yømø. Kɑ tyëng-ɑ ɑ́ying yij morkɑmɑni ri gen bøødh gen piny kì bøli Yëso, ge okööbø kinni, “Yï bɑ Wɑ̈d Jwøk kidyër!” Keny-ɑ ɑ́wɑ̈dhi gen løøgø, ɑtöngi gen wɑ̈g kì myërri Genesɑret. Kɑ Yëso ngij yi tyëng myërrɑni, kɑ tyëng-ɑ buud bënn dwɑɑy gen, kɑ ge kɑ̈ɑ̈l yïe. Gø ɑ́kwɑjji gen kinni wiy tuung ógødhe nywɑl yi gen yøw. Kɑ tyëng-ɑ ɑ́nywɑ̈ddi bënn yiel ki rɑ̈ɑ̈m dëlli gen. Kɑ Jøpɑresì geki jøpwönyi Cigg bï-ɑ yï Yëso, ge kɑ̈ɑ̈l-ɑ Yerusɑlem, kɑ ge okööbø kinni, “Gede jøbɑngí ɑ nyi pyem gen kwööng kweyyee? Cinggi gen pɑ nyi lwøg yi gen kɑ̀ cyɑ̈ɑ̈m gen ki gïncɑm.” Kɑ mø gen løøg yi en kinni, “Wude ɑ nyi pyem wun Ciggi Jwøk, kipe mïdhi kwööng wun? Mɑ́ Jwøk ɑ́cïg kinni, ‘Wør wïyí kí meyí,’ o ‘Ngɑn yɑny wïye wɑlɑ̀ meye, ceg kɑ nɑ̈gø.’ De wu pwöny-ɑ ji kinni, i ke di ngɑn yïe di gïïpiny me di kønye wïye wɑlɑ̀ meye, kɑ gø köbbe kinni, gïn-ɑni di mëggɑ yïn, de ɑ́rum ki mëggi Jwøk, ngɑnɑni köme bong cɑ́y ke pɑ kønye wïye wɑlɑ̀ meye. Ciggi Jwøk nuti pyeem wun kipe mïdhi kwööng wun? Wu bɑ tyëngwëënyø! Møg-ɑ ɑ́töng yi Icɑyɑ̀ kiper wun bɑ dyër kinni, ‘Pönhï, yɑ wør yi en kɑ dhøge, de pyëwe lɑ̈wi ki yɑn. Bong gïn wɑngi yi mɑl-ɑ mɑlli yɑn yi gen mɑ́ ge pwöny-ɑ ciggi ji yøw.’ ” Kɑ teedø cwøl yi Yëso, kɑ gï köbbe kinni, “Lïngu møg, kɑ gïn-ɑ wɑngi yi gen ti wun ki yodø. Pɑth ki gïn-ɑ nyi kedhi dhø dhɑnhø ɑ nyi rënyii, den-ɑ́ gïn-ɑ nyi bï wɑ̈g kì dhøge.” Codhe, ɑbëën jøbɑnge yïe, kɑ gø köbbi gen kinni, “Ngɑ̈nyi yi yïn kinni, Jøpɑresì pëthi gen ɑ́rënyi kɑ ɑ́lïngi gen møg-ɑ kømmi yi yïn?” Kɑ mø gen løøge kinni, “Yɑnh nuti pidh-ɑ yi Wïyɑ, ɑ ying mɑl, ceg kɑ puth wɑ̈g. Wiyu gen, mɑ́ ge bɑ cörr, o ji-ɑ pyejji yi gen bɑ cörr. O keløg cwør pyejj-ɑ yi cwør megø, ge pɑ̈dh-ɑ yij bur ryeet.” Aköbbii yi Pïtør kinni, “Nyudhí wøn gïn-ɑ wɑngi yi gɑ́jɑni.” Alögge kinni, “Wun thyew, yethi kwøbbɑni nuti yood wun? Kwïj yi wun kinni, gïn-ɑ nyi kedhi dhø dhɑnhø, nyi pödh-ɑ yije, kɑ nyi bï-ɑ wɑ̈g, de gïn-ɑ nyi bï wɑ̈g kì dhø dhɑnhø, nyi kɑ̈ɑ̈l-ɑ pyëwe, o bene en ɑ nyi ywëdh dhɑnhø. Mɑ́ gïg-ɑ nyi bï wɑ̈g kì pyëw dhɑnhø, gen ɑ rumm-ɑ rijjø, kí nɑ̈gi dhɑnhø, kí orøøg yɑb ki mɑ̈nn, kí kwɑl, kí pyed, geki kwɑ̈dh. Bene gen gïg-ɑ nyi ywëdh dhɑnhø, de dhɑnhø pɑ ywëdh ke cyɑ̈me e cingge nuti lwøøg en.” Adhwödh Yëso kì kenyɑni, kɑ wel-ɑ myërri Suur kí Sïdön. Kɑ ngɑn mɑ ngeti Kɑnɑɑn obëënø, kɑ ócwöddø kinni, “Wuö, yïn ɑ Wɑ̈d Debïd, ywöngi yijí ki yɑn! Nyɑrɑ wɑnge ɑ́guud yi wëyrijjø.” De møge ɑ́cög ge pɑ løøg yi Yëso. Abëën jøbɑnge, kɑ gø kwɑjji gen kinni, “Ryem ngɑnɑni, mɑ́ e ceg-ɑ ryeerø kì bɑngee.” Kɑ ólöggø kinni, “Yɑ ɑ́ör-ɑ be dyëg-ɑ ɑ́wɑ̈ɑ̈ny kì gøl Isrɑil keti gen.” Kɑ ngɑnɑni obëënø, kɑ ree bøødhe piny kì bøle, ɑkööbe kinni, “Wuö, køny yɑn.” Kɑ gø köbbe kinni, “Gïncɑɑm othønhø pɑ døøj ki kwɑnyø, o lëngi gwögg.” Alöggi ngɑnɑni kinni, “Bɑ dyër Wuö, de cɑgg ɑ́ gwögg kiri gen, ge nyii cyɑ̈mø ki nyingi gïncɑm møg-ɑ nyi dëëm kì wïj tɑrɑbeedh wïi gen.” Kɑ møge løøg yi Yëso kinni, “Dhɑnh, yïëyí dwøng cɑrø! Gïn-ɑ dwɑddi yi yïn, óyod yi yïn.” Kɑ nyɑre ódönyø kì bøli kenyɑni ceth. Adhwödh Yëso kì kenyɑni, kɑ kɑ̈l-ɑ tøg Tɑɑy Gɑlelì, ɑyedhe mɑl wïj nyɑ kït, kɑ pëgg-ɑ piny. Kɑ ji mø gïïr bï-ɑ yïe, ge ókɑ̈ddø ki pùdh, kí ngöll, kí cörr, kí mïng, kí ji-ɑ dëlli gen rɑ̈mø mø ngenyø. Kɑ ge cïb piny kì bøli Yëso, kɑ gï yiele bënn. Kɑ teedø ongɑ̈ngø kɑ ɑ́lïdhi gen kinni, mïng okööbø, pùdh ócyɑ̈dhø, cörr onëënø. Kɑ Jwøøg Isrɑil lejji gen. Kɑ Yëso jøbɑnge cwøle yïe, kɑ gï köbbe kinni, “Nyingi tyëngɑni ocɑnø kì yïɑ, mɑ́ ge ɑ́lugi kì bɑngɑ ki cyɑ̈ng ɑ́dɑ̈g ɑnɑn, e bong gïn cɑm yi gen. De yɑ pɑ dwɑddi öri gen yöö ki kɑ̈j kipe ge ódhɑ̈ɑ̈r.” Kɑ köbbi yi jøbɑnge kinni, “Wɑ yïd-ɑ́ɑ̀ keny ki gïncɑm, wɑ ying-ɑ pɑ̈l ni men, kí ji-ɑ gïïr ni møg?” Kɑ ge pyëj yi Yëso kinni, “Yï wun dɑ ópùn ɑ́dï?” Akööb gen kinni, “Ópùn ɑ́bïryew kí nywøli rij mø nøg.” Kɑ teenɑni köbbi yi Yëso kinni pëggi gen piny. Kɑ ópùnɑni kí rijjɑni kwɑnye, kɑ Jwøk pwøje, ɑpødde gïn, kɑ gï mëgge jøbɑnge, kɑ ge lony ki mëggi teedø yi jøbɑnge. Kɑ teedø ocyɑ̈mø bënn, kɑ ge oyɑ̈ngø, kɑ nyingi gïncɑm møg-ɑ ɑ́döng gwen gen, kɑ ge kedh-ɑ yethi dhöng ɑ́bïryew. Kwɑnni jøg-ɑ cwøw møg-ɑ ɑ́cyɑ̈ɑ̈m bɑ ɑ́lïp ɑ́ngwen, o tyëng-ɑ mɑ̈nn kí othønhø nuti kwɑnø. Kɑ teedø dɑ̈ɑ̈ng yi Yëso, ɑkɑdhe yij morkɑb, kɑ kedh-ɑ myërri Mɑgɑdɑn. Abëën Jøpɑresì kí Jøsɑduk, kɑ gø kwɑjji gen kinni nyudhe gïn ki ngïji men kɑ̈ɑ̈l Pödhi Jwøk, ge ceg-ɑ gøn ki rɑngø. Aløøg mø gen yi Yëso kinni, “Kì ri buddi cɑ̈ng, wu nyii kööbø kinni, ‘Wɑɑng piny óbëëd e tɑr kɑ̀ bëëd mɑl e kwɑɑr.’ O kì mwøl wu nyii kööbø kinni, ‘Kødh ómɑ̈gi dicyɑ̈ngtïn, mɑ́ pøøl kwɑɑr, o mɑl køm-ɑ mïnø.’ Wu ngɑ̈ny rɑng ki ngïjji mɑl, de wu dhɑl yi rɑng ki ngïjji bëëdi dhɑnhø kì kömi piny. Rïny-ɑ rɑj ki orøg yɑb-ɑ ngïji. De bong ngïji men-ɑ ónyudhi gen, den-ɑ́ ngïji mi Yönɑ̀ kete.” Adhwödhe, kɑ gï wiye. Akedhi jøbɑng Yëso løøgø, de wɑ̈thi gen ɑ́wïl ki kɑ̈nø ki gïncɑm. Kɑ ge köbbi yi Yëso kinni, “Tiu nënnø, kɑ ri wun kor wun kipe kɑmïrɑ̀ mi Jøpɑresì kí Jøsɑduk.” Kɑ dhøggi gen lømmi gen kinni, “Kööb ɑ bɑng kɑ̀ bëëd e bong ópùn mɑ ɑ́kɑ̈ɑ̈l yi wɑ.” De møgɑni ngɑ̈nyi yi Yëso, kɑ gï pyëje kinni, “Wu tyëng-ɑ yïëyø mi wun nøg, wude ɑ lømmu dhøggi wun ki kwøbbi bongi ópùn kì yï wun? Kwøbbɑni nuti gɑmø yi wɑ̈thi wun? Wɑ̈thi wun ɑ́wïl ki ópùn ɑ́bïj møg-ɑ ɑ́cɑm yi ji gɑ ɑ́lïp ɑ́bïj? Á kwɑnni dhöng ɑ́dï ɑ ɑ́cøng yi wun ge pɑ̈ng yi nyingi gïncɑmɑni? Kí ópùn ɑ́bïryew møg-ɑ ɑ́cɑm yi ji gɑ ɑ́lïp ɑ́ngwen, ɑ́ dhöng ɑ́dï ɑ ɑ́cøng yi wun? Dhɑ̈li yodø kidï yi wun kinni yɑ pɑ kømmi kwøbbi ópun. De koru ri wun kipe kɑmïrɑ̀ mi Jøpɑresì kí Jøsɑduk.” Codhe, ɑyodii yi gen kinni pɑ wɑng-ɑ kinni kor gen ri gen kipe kɑmïri ópun, den-ɑ́ pwönyi Jøpɑresì geki Jøsɑduk ɑ kømme. De keny-ɑ ɑ́wɑ̈dhi Yëso myërr-ɑ buti kɑɑl Kɑysɑriyɑ̀ Pïlïpì, kɑ jøbɑnge pyëje kinni, “Ji okööbø kinni, Nyɑɑr Dhɑnhø bɑ men?” Kɑ ge ólöggø kinni, “Kwï ji okööbø kinni, bɑ Jøn Jɑljwɑ̈g, o møøgø okööbø kinni bɑ Eliyɑ̀, o møøgø okööbø kinni bɑ Jermɑyɑ̀ wɑlɑ̀ jɑltöng megø.” Kɑ gï pyëje kinni, “De wu okööbø kinni, yɑ bɑ men?” Alöggi Sɑymøn Pïtør kinni, “Yï bɑ Mesiy, Wɑ̈d Jwøng-ɑ Nëënø.” Kɑ köbbi yi Yëso kinni, “Yïn ɑ Sɑymøn wɑ̈d Jøn, rií dɑ gyëdh, mɑ́ møgɑni nuti nyudhi yïn ɑ yi dhɑnhø, den-ɑ́ Wïyɑ, ngɑn-ɑ ying mɑl. O yɑ köbb-ɑ yïn thyew kinni, yï bɑ kït, o kömi kïnɑni ɑ ógeerɑ kɑnïsɑ̀ miɑ, o bong gïn-ɑ ótyɑmii, cɑgg ɑ́ thøø. Moptɑɑ̀ mø Pödhi Jwøk ómëggɑ yïn, o gïn-ɑ kyer yi yïn kì kömi piny ókyer kì Pödhi Jwøk, o gïn-ɑ yïëy yi yïn kì kömi piny, bɑ ɑyïëy kì Pödhi Jwøk.” Codhe, kɑ jøbɑnge kyëdde kinni ko di ngɑn köbbi yi gen kinni, bɑ Mesiy. Bøli kenyɑni ɑ ɑ́cɑ̈gi Yëso ki nyudhi jøbɑnge kinni bɑ men kedhi Yerusɑlem, de órɑngi yi jɑmmì mø ngenyø kì cinggi jɑggi pödhø, kí jɑggi ókwër, kí jøpwönyi Cigg. O ónɑ̈g, de ódhwödh kì yij thøø, kì dɑ̈ɑ̈g cyɑ̈ng. Kɑ peej wɑ̈ye yi Pïtør, ɑcyɑ̈re gøn kinni, “Wuö, møgɑni tøøk kì yï Jwøk, gïg ni møg pɑ cuggi bëën kömí!” Kɑ lïïdh-ɑ yïe kidøøj, ɑköbbe Pïtør kinni, “Kedh kì butɑ, Cethɑn! Yïde ɑ rïwwí bølɑ? Møg-ɑ kømmi yi yïn pɑ kɑ̈ɑ̈l-ɑ yï Jwøk, de ge bɑ rummi dhɑnhø yøw!” Codhe, kɑ Yëso jøbɑnge köbbe kinni, “Ke di ngɑn dwɑddi bëën bɑngɑ, wedde pyëwe, kɑ yɑdh ɑrïwe byele, kɑ luge bɑngɑ. Mɑ́ ngɑn dwɑddi yieli wëye, wëye ólɑ̈ɑ̈nye, o ngɑn lɑ̈ɑ̈ny wëye kiperɑ, wëye óyode. Dɑ gïndøj me yod yi dhɑnhø, keløg piny bëne oyodø yi en, kɑ wëye lɑ̈ɑ̈nye? Wɑlɑ̀ ɑ́ gïn ɑ ómuuj yi dhɑnhø ɑ́ men gøøme wëye? Mɑ́ Nyɑɑr Dhɑnhø ɑ́cyɑ̈ngi bëënø, ki mɑ̈ɑ̈r Wïye, geki wëywödde, o ji mëgge köggi gen; ngɑn mëgg-ɑ kööng-ɑ kyëëw ki gïg-ɑ ɑ́gøgge. Yɑ köbb-ɑ wun kidyër kinni, dɑ ji møøgø kì kelli tyëng-ɑ nud kì keny ɑnɑn, mø thøø pɑ bel yi gen, gïti keny-ɑ ólidh gen Nyɑɑr Dhɑnhø, e obëënø ɑ́ Rɑ̈dh.” Kì bɑng cyɑ̈ng ɑ́bïkyel, ɑkɑ̈ɑ̈l Pïtør, kí Yɑgob kí Jøn ómen yi Yëso, kɑ gï kïdhe wïj kït me bɑ̈ɑ̈r keti gen. Kɑ ree wile kì bøli gïn, kɑ lele orɑ̈ɑ̈dø ni cɑ̈ng, kɑ ógudhe ótɑ̈rø ge ceg-ɑ orɑ̈ng. Kɑ Mosɑ̀ kí Eliyɑ̀ ocwöbø kì bøli gen, ge okööbø ki Yëso. Kɑ Yëso köbbi yi Pïtør kinni, “Wuö, døøj kɑ̀ ying wɑ keny! Ke dwɑddií, yɑ ógëdø ki ɑkɑnnì ɑ́dɑ̈g; ɑ́kyel mií, ɑ́kyel mi Mosɑ̀, ɑ́kyel mi Eliyɑ̀.” Kɑ̈ng-ɑ́ nudd e okööbø, kɑ ge rïm yi pøølø me tɑr. Kɑ ge olïngø ki cwɑg mø kɑ̈ɑ̈l yij pøølø, ge okööbø kinni, “Men bene Wɑ̈dɑ, wɑ̈n-ɑ mɑɑrɑ, lïngu kwøbbe!” Keny-ɑ ɑ́lïngi møgɑni yi jøbɑnge, kɑ ge obwøgø ki mendwøng, kɑ ge ópɑ̈ɑ̈dhø yethi gen rum gen piny. Abëën Yëso kɑ gï nywɑle, kɑ gï köbbe kinni, “Dhwödhu mɑl! Wu ko böggi!” De kɑ ɑ́tïng gen wɑ̈thi gen, bong dhɑnhø mɑ ɑ́lidh yi gen, den-ɑ́ Yëso kete. Keny-ɑ ɑ́yïnhi gen piny kì wïj kït, ɑceg gen yi Yëso kinni, “Ko di dhɑnhø me köbbi yi wun ki gïn-ɑ ɑ́lidh yi wun, gïti bøli keny-ɑ órum Nyɑɑr Dhɑnhø ki tugø kì yij thøø.” Kɑ Yëso pyëj yi jøbɑnge kinni, “Gede jøpwönyi Cigg ɑ nyi kööb gen kinni, bɑ Eliyɑ̀ ɑ ókwöngi ki bëënø?” Kɑ mø gen løøge kinni, “Eliyɑ̀ óbï kidyër, o jɑmmì bënn tyeny yi en. De yɑ köbb-ɑ wun kinni, Eliyɑ̀ ɑ́rum ki bëënø, de nuti ngijø yi tyëngɑni. Kɑ gø göggi gen ki gïn-ɑ ɑ́dwɑddi yi gen ki cwɑggi gen. Nyɑɑr Dhɑnhø ólunyi ki orɑng kì cinggi gen.” Codhe, ɑyodii yi jøbɑnge kinni, kømm-ɑ Jøn Jɑljwɑ̈g. Keny-ɑ ɑ́wɑ̈dhi gen kun-ɑ di teedø, ɑbëën jɑl megø yïe, kɑ ree bøødhe piny kì bøle, ɑkööbe kinni, “Wuö, ywöngi yijí ki wɑ̈dɑ, mɑ́ ree dɑ wëyrijjø, kɑ nyii rɑngø yi gøn ki mendwøng. Kɑ nyi pɑ̈dh-ɑ mɑc kí yethi pï tyel mø gïïr. Kɑ kɑ̈ɑ̈l-ɑ yï jøbɑngí, de ge ɑ́dhɑl yi yielii.” Alöggi Yëso kinni, “Yï rïny-ɑ rɑj, rïny-ɑ dhɑ̈li yïëyø! Yɑ gït-ɑ wɑɑng kì kelli wun? Wɑlɑ̀ yɑ gït-ɑ wɑɑng yɑ ngin-ɑ bëëdi wun? Kɑ̈ɑ̈lu nyelthinh keny!” Kɑ wëyrijjø ryeem wɑ̈g kì ree yi Yëso. Kɑ nyelthinh ódönyø kì bøli kenyɑni ceth. Codhe, ɑbëën jøbɑnge yïe kì gød, kɑ pyëj yi gen kinni, “Wøde ɑ ɑ́dhɑɑl wøn yi ryemi wëyɑni?” Kɑ gï köbbe kinni, “Bɑ kɑ̀ bëëd yïëyi wun nøg. Yɑ köbb-ɑ wun kidyër kinni, cɑgg yïëyi wun di bëëd e thiinh ni wɑɑng köödhi kɑrdɑl, kïn-ɑ dwøng èn, oköbbø yi wun kinni, ‘Nyegí kun-ɑcɑ̀,’ kɑ di nyegi ceth. Bong gïn di dhɑl wun!” De wëyɑni, nyi cyeddi kɑ mɑ̈ddø geki thuumø. Kɑ̈ng-ɑ ɑ́wïïn gen kì Gɑlelì, ɑköbbi gen yi Yëso kinni, “Nyɑɑr Dhɑnhø ócïb cingi teedø, o ónɑ̈g yi gen, o kì ri dɑ̈ɑ̈g cyɑ̈ng, ótug kì yij thøø.” Kɑ jøbɑnge pëthi gen órënyø ki mendwøng. Keny-ɑ ɑ́wɑ̈dhi gen Kɑpernɑum, kɑ tyëng-ɑ nyi cøng gwɑ̈ɑ̈j Kengø bï-ɑ yï Pïtør, ɑkööb gen kinni, “Jɑlpwönyi wun nyii cudø ki gwɑ̈ɑ̈j Kengø?” Kɑ oyïëyø kinni, “Ngee.” Keny-ɑ ɑ́kedhi Pïtør kɑl, kɑ mɑɑg ki pyëjø yi Yëso kinni, “Sɑymøn, yï rum ɑ dï? Rɑ̈nhi kömi piny nyi kɑ̈b-ɑ́ɑ̀ yï wɑddi gen wɑlɑ̀ kì yi tyëngpɑth ki gwɑ̈j?” Alöggi Pïtør kinni, “Ge nyi kɑ̈b-ɑ́ɑ̀ yï tyëngpɑth.” Alöggi Yëso kinni, “Kɑ ɑ́rum bëëde kinøw, tyëng pödhø pɑ cudø. De kipe tyëngɑni pëthi gen órënyi, kedhí gɑ̈d, kɑ ɑbɑdh leeng nɑm, kɑ dhø rëny-ɑ ókwøng yi yïn ki mɑgø yieeb; yï óyïddi ki ngyënyø kì dhøge. Kwɑny ngyënyyɑni kɑ mëggí tyëngɑni ɑ́ gwɑ̈jee.” Bøli kenyɑni ɑ ɑ́bëën jøbɑng Yëso yïe, kɑ ge ópëjjø kinni, “Á men ɑ ti döng kì Pödhi Jwøk?” Acwøøl nyɑ nyel me thiinh yi Yëso, kɑ gø cuunge kì dïdyëri gen. Akööbe kinni, “Yɑ köbb-ɑ wun kidyër kinni, keløg ri wun pɑ løg yi wun, kɑ wu obëëdø ni othønhø, wu pɑ wöl kedhi Pödhi Jwøk. De ngɑn-ɑ ódwöög ree cyɑ̈n, kɑ obëëdø ni othinh men, bene en ɑ ying mɑl kì Pödhi Jwøk. O ngɑn-ɑ ókwɑny othinh ɑ́kyel ni men ki nyingɑ, ɑ́kwɑny-ɑ yɑn thyew. “De ngɑn peej othinh ni men yij orøg, lɑ̈w keløg pil me dwøng di twööj mune, kɑ di luudh dïnɑm. Cyën ying-ɑ kömi piny kì bɑng gïg-ɑ nyi peej ji yij orøg. Mɑ́ ge bɑ møg bï ceth, de cyën ying-ɑ kömi ngɑn-ɑ ókɑ̈ɑ̈l gen. “Keløg yï kïdh-ɑ yij orøg yi cingí wɑlɑ̀ tyelí, ngul wɑ̈g kɑ weddí. Mɑ́ e lɑ̈w ke kedhí yethi nënnì, yï bɑ ngwøl, wɑlɑ̀ ɑ́cingikyel, kibøli kɑ̀ bëëd yïí dɑ cing ɑ́ryew kí tyel ɑ́ryew, kɑ yï leeng mɑc men pɑ thøw. O keløg yï kïdh-ɑ yij orøg yi wɑngí, gööl wɑ̈g kɑ weddí. Mɑ́ e lɑ̈w ke kedhí yethi nënnì ki wɑng ɑ́kyel, kibøli ke di leeng yïn mɑc, e yïí dɑ nying ɑ́ryew. “Ko di ngɑn benyi othønhø kì kelli wun, mɑ́ yɑ köbb-ɑ wun kinni, wëywöddi gen nyi bëëd ɑ buti Wïyɑ ngɑn ɑ ying mɑl. Mɑ́ Nyɑɑr Dhɑnhø ɑ́bï-ɑ be yieli tyëng-ɑ ɑ́lɑ̈ɑ̈ny. “De wu rum ɑ dï? Keløg jɑl megø yïe dɑ dyëg miyø, kɑ ɑ́kyel ówɑ̈ɑ̈nyø kì kelli gen, pyɑ̈r ɑ́bïngwen wïdɑ́bïngwen pɑ wiye piny, kɑ kedh-ɑ be yɑbi men-ɑ ɑ́wɑ̈ɑ̈ny? Yɑ köbb-ɑ wun kidyër kinni, keløg e óyod yi en, pyëwe ceg-ɑ mïnø ki dyelɑni, ki me lod medi pyëwe ki dyëg-ɑ kyeelø gɑ pyɑ̈r ɑ́bïngwen wïdɑ́bïngwen møg-ɑ nuti wɑ̈ɑ̈nyø. Bëëd ɑ nøw kì yï Wïyi wun ɑ ying mɑl. Pɑ dwɑddi kinni o nget ɑ́kyel lɑ̈ɑ̈nye kì kelli møg-ɑ thønhø. “Keløg yï ogöggø yi ómyëw ki gïnrɑj, kedhí yïe, kɑ wu kööb wun keti wun, kɑ nyudhí gïn-ɑ ɑ́bɑ̈ɑ̈n. Keløg kwøbbí ólïnge, ómyëw ɑ́yiel yi yïn. De keløg kwøbbí pɑ lïnge, cwöddí ki dhɑnhø ɑ́kyel wɑlɑ̀ ji ɑ́ryew, o møgɑni lïngi yi gen, mɑ́ kwøbbi dhøggi ji ɑ́ryew ócuggø yïëyø. De keløg mø gen óbɑny yi en, ngɑ̈j kɑnïsɑ̀ ki møgɑni. O keløg kwøbbi kɑnïsɑ̀ óbɑny yi en thyew, wiy bëëde kì yïí e nɑ ngɑn nuti yïëyø wɑlɑ̀ ngeti gwɑ̈j. “Yɑ köbb-ɑ wun kidyër kinni, møg-ɑ ókyer yi wun kì kömi piny, ókyer kì Pödhi Jwøk, o møg-ɑ óyïëy yi wun kì kömi piny, óyïëy kì Pödhi Jwøk. “De yɑ köbb-ɑ wun kidyër këti kinni, keløg ji ɑ́ryew kì kelli wun onywɑ̈gø ki kwøb kì kömi piny kipe gïn-ɑ ókwɑjji yi gen, gïnɑni ógöggi gen yi Wïyɑ ɑ ying mɑl. Mɑ́ keny cugi yi ji ɑ́ryew wɑlɑ̀ ɑ́dɑ̈g ki nyingɑ, yɑ nud kì kelli gen.” Kɑ Pïtør bï-ɑ yïe, kɑ gø pyëje kinni, “Wuö, ɑ́ tyel ɑ́dï ɑ lɑ̈ɑ̈m pyëwɑ ki ómïɑ kenyi gögge yɑn ki gïnrɑj? Tyel ɑ́bïryew?” Aköbbii yi Yëso kinni, “Pɑth ki tyel ɑ́bïryew, dɑ́ pyɑ̈r ɑ́bïryew tyel ɑ́bïryew. Mɑ́ Pödhi Jwøk pɑ̈r ki rɑ̈dh mɑ ɑ́dwɑddi lidhi kwɑnni gïg-ɑ gøggi yi bɑ̈ngge. Keny-ɑ ɑ́kwɑ̈ɑ̈n gen, ɑkɑ̈ɑ̈l bɑ̈ng ɑ́kyel yïe, cwɑgge dɑ ngyëny ɑ́tegg ɑ́lïp pyɑ̈rø. De kɑ ɑ́jɑde ki gïn cude, ɑkööb wɑ̈n kinni i ngeew jɑlɑni wɑ̈g geki cyëge, kí nyige, kí jɑmme bënn, o ngyënyyi gen cool kwör-ɑ köme. Kɑ bɑ̈ngɑni ree bøødhe piny, kɑ gø kwɑjje kinni, ‘Wuö mɑg pyëwí! Kwörɑni ócol yi yɑn bëne!’ Kɑ wïi bɑ̈ngɑni yije óywöngø kipere, kɑ gø gønye, kɑ kwörɑni bëne kyere kinni ko col. “De bɑ̈ngɑni kiree, kɑ ɑ́kedhe, ɑrwööme ki bɑ̈ng megø me cwɑgge di kwöre, mɑ ngyëny ɑ́tegg miyø. Kɑ gø mɑge kì mune, ɑköbbe gøn kinni, ‘Col ngyënyyɑ!’ Kɑ bɑ̈ng-ɑ kyeelø ree bøødhe piny kì bøle, kɑ gø kwɑjje kinni, ‘Mɑg pyëwí! Kwörɑni ócol yi yɑn.’ Kɑ okyëdø, ɑkɑ̈ɑ̈le gøn, kɑ gø leenge ød mɑg, gïti keny-ɑ óthumi kwör ki colø bëne. Kɑ ɑ́liidh møgɑni yi bɑ̈ngg-ɑ kyeelø, ɑrënyi pëthi gen, kɑ ge kedh-ɑ yï wïi gen, kɑ gø köbbi gen gïn-ɑ ɑ́cwöb. Codhe, ɑcwøøl bɑ̈ngɑni yi wɑ̈n, kɑ gø köbbe kinni, ‘Yïn ɑ bɑ̈ng rɑj, kwör men-ɑ ɑ́ying kömí ɑ́wiy yi yɑn kɑ per kɑ ɑ́kwɑjjí yɑn. Pɑ lɑ̈w ke di ywöngi yijí ki wɑɑd wun thyew ni kɑ ɑ́ywöngi yijɑ ki yïn?’ Kɑ wïi jɑlɑni owërø, kɑ gø cïbe cinggi tyëng-ɑ nyi cir ɑmɑgg, gïti keny-ɑ óthumi kwör-ɑ köme ki colø bëne.” Kɑ kwøbbɑni ngøl yi Yëso kinni, “Wïyɑ, ngɑn-ɑ mɑl, ógöögø kinøw thyew ki wun, keløg pëthi wun pɑ nyi lɑ̈ɑ̈m ki wɑddi wun.” Keny-ɑ ɑ́rum Yëso ki kwøbi møgɑni, ɑdhwödhe kì myërri Gɑlelì, kɑ wɑ̈dh-ɑ myërri Yeudiyɑ̀, kì løøg Nɑm Urdun. Kɑ ji mø gïïr løg-ɑ bɑnge, kɑ gï yiele ki gïg-ɑ ri gen kì kunɑni. Kɑ Jøpɑresì bï-ɑ yïe, kɑ gø pyëj gen, ge pɑ̈ny-ɑ gøn ki kwøb kinni, “Bɑ ɑyïëy yi Ciggee kinni, jɑlø ócuggø tɑ̈ngi cyëge kipe göj?” Kɑ ólöggø kinni, “Nuti rɑɑng wun cøn kinni, Ngɑn-ɑ ɑ́cwɑ̈j dhɑnhø kì tyeli mɑl, ɑ́cwɑ̈j-ɑ jɑlø kí dhɑjø? Kɑ Jwøk okööbø kinni, ‘Bene ɑ bɑnge nyi wiy dhɑnhø wïye geki meye, kɑ ómɑ̈gø kì ri cyëge, kɑ ge ogöögø ki ɑ́kyel.’ De ge pɑth ki ji ɑ́ryew këti, de ge bɑ dhɑnhø ɑ́kyel. Gïn-ɑ ɑ́reb yi Jwøk, pɑ cuggi dɑ̈ngø yi dhɑnhø.” Kɑ pyëj yi Jøpɑresì kinni, “Dɑ́ kipe ngø ɑ ɑ́cïg Mosɑ̀ kinni, jɑlø nënge cyëge ki wɑ̈nyi tɑ̈ng, kɑ gø ryeme?” Kɑ gï köbbe kinni, “Mosɑ̀ ɑ́yïëy kinni, nyi tɑ̈ng wun mɑ̈nni wun, mɑ́ wu ɑ́ceg-ɑ dhɑ̈lø ki pwönyø. De nuti bëëd ɑ nøw kì ri cwɑ̈ji lɑ̈bø. De yɑ köbb-ɑ wun kinni, ngɑn tɑ̈ng cyëge, e nuti røngø ki jɑlø megø, kɑ ónyömø, jɑlɑni ɑ́røngi. O ngɑn-ɑ ɑ́tɑ̈ng yi en, ɑ́gwøøge ngetorøg.” Aköbbii yi jøbɑnge kinni, “Keløg møgɑni bëëd ɑ nøw kì kɑɑm dhɑnhø geki cyëge, lɑ̈w cögi dhɑnhø e pɑ nyömi.” Kɑ gï köbbe kinni, “Møgɑni pɑ cuggi lïngø yi teedø bëne den-ɑ́ tyëng-ɑ ɑ́mëggi møgɑni keti gen. Gïg-ɑ per gen pɑ nyi nyömi ji bɑ̈nni; mɑ́ e dɑ ji mɑ ɑ́nywøl kinøw, o møøgø ɑ́gwøg-ɑ yi ji, o møøgø ri gen ɑ́gwøg gen kinøw kipe Pödhi Jwøk. Ngɑn cuggi yïëyi møgɑni wiy yïëye.” Kɑ ji møøgø kɑ̈n-ɑ yï Yëso ki othønhø kipe kinni o cingge thɑɑnye kömi gïn, o gï kwënge. Kɑ tyëngɑni cyɑ̈r yi jøbɑnge. Kɑ Yëso okööbø kinni, “Wiy othønhø bï gen yïɑ; ge ko mɑ̈ɑ̈n wun, mɑ́ Pödhi Jwøk bɑ mi gen.” Athɑɑnye cingge kömi gïn, kɑ odhwödhø kì kenyɑni. Kɑ wøb megø bï-ɑ yï Yëso, ɑkööbe kinni, “Jɑlpwönyø, gwøgɑ ngø ɑ døj, o yɑ yïddɑ ki nënn-ɑ ɑtheer?” Kɑ gø köbbe kinni, “Á kipe ngø ɑ pëjji yɑn gïn-ɑ døj? Bɑ nget ɑ́kyel kete ɑ døj. De keløg yï dwɑdd-ɑ yïddø ki nënnì, mïdhí Cigg.” Kɑ okööbø kinni, “Á cigg ɑ́?” Akööb Yëso kinni, “Yï ko nɑ̈gi ki dhɑnhø; yï ko niin ki ngɑn nuti nywøøm wun ri wun; yï ko kwɑ̈ɑ̈d; wɑɑd wun ko gøøny ki kwøbbi pyed. Wør wïyí kí meyí, kɑ ngɑn-ɑ butí mɑɑr ni kɑ̀ mɑɑr rií.” Alöggi nyelɑni kinni, “Møgɑni di mïdhø yi yɑn bënn. Dɑ́ gïn këti ɑ dwɑddi, o gwøgɑ?” Aköbbii yi Yëso kinni, “Keløg yï dwɑdd-ɑ bëëdø yï tir, kedh, kɑ jɑmmí ngeew wɑ̈g, kɑ ngyënyy-ɑ óngeew gen pɑ̈ngí kì kelli tyëng-ɑ ɑbuur, o yï óyïddi ki kɑ̈r kì Pödhi Jwøk, kɑ yï lug bɑngɑ.” De kɑ ɑ́lïngi møgɑni yi nyelɑni ɑkedhe, yije bɑɑrø, mɑ́ e ɑ́bëëd yïe dɑ jɑmmì mø gïïr cɑrø. Kɑ Yëso jøbɑnge köbbe kinni, “Yɑ köbb-ɑ wun kidyër kinni, kedhi Pödhi Jwøk teeg kipe ngɑn yïe di jɑmmì mø gïïr. De yɑ köbb-ɑ wun këti kinni, kɑ̈li ɑmɑlø wɑɑng ɑlïbrøw, yööd kibøli kedhi ngetikɑ̈r yij Pödhi Jwøk.” Keny-ɑ ɑ́lïngi møgɑni yi jøbɑnge, ɑmuum wɑ̈thi gen ki mendwøng, kɑ ge okööbø kinni, “Kɑ̀ bëëde kinøw, dɑ ngɑn cuggi yielø?” Aköbbi gen yi Yëso kinni, “Møgɑni pɑ cuggi lwɑ̈ngø yi dhɑnhø, de bong gïn nyi dhɑl Jwøk.” Alöggi Pïtør kinni, “Jɑmmi wøn bënn ɑ́wiy wøn piny, kɑ wø bï-ɑ bɑngí, ɑ́ gïn ɑ óyod yi wøn?” Aköbbi gen yi Yëso kinni, “Yɑ köbb-ɑ wun kidyër kinni, kì piny-ɑ nyɑ̈n, keny-ɑ ópëggi Nyɑɑr Dhɑnhø wïj kwøm kì yij dhwɑ̈nge, wu ópëggi wɑ̈thi kwømm pyɑ̈rø wïdɑ́ryew, wun ɑ tyëng-ɑ ɑ́cyɑ̈dhi kì bɑngɑ, wu jɑɑg-ɑ kɑ̈lli Isrɑil gɑ pyɑ̈rø wïdɑ́ryew. Ngɑn-ɑ ɑ́wiy ud, kí nyiimëëg-ɑ cwøw kí mɑ̈nn, kí wïye, kí meye, kí nyige geki pwödhe kipe nyingɑ, óyïddi ki møg lod gen ki tyel miyø, kɑ thödhi ki nënn-ɑ ɑtheer. Ji mø ngenyø møg-ɑ ying mɑl ɑnɑn ódøøg cyɑ̈n, o møg-ɑ cyɑ̈n óying mɑl. “Pödhi Jwøk, pɑ̈r ki jɑl megø me yïe di bɑɑg oløg. Kɑ møøl-ɑ be yɑb ki ji møg kïdhe be gwøg kì bɑɑg oløge. Kɑ kwøb nywɑg gen ki jøgwøg kinni köögi mi cyɑ̈ng ɑ́kyel bɑ ngyënyø ɑ́tegø; ɑöre gïn yij bɑge. Kɑ odøøgø kì sɑɑ̀ ɑ́bïngwen kì mwøl, kɑ óyïddø ki ji møøgø, ge wɑ̈dh-ɑ bëëdø kì kej ngyew. Kɑ gï köbbe kinni, ‘Kedhu yij bɑɑg oløgɑ thyew, wu óthödhɑ ki kööng-ɑ kyëëw ki wun.’ Kɑ ge ókedhø. Kɑ odøøgø kì sɑɑ̀ pyɑ̈rø wïdɑ́ryew kì dicɑ̈ng, kí sɑɑ̀ ɑ́dɑ̈g kì böörø, kɑ ogöögø kinøw. Kɑ døøg-ɑ kej ngyew, e piny køm-ɑ gwøg ki sɑɑ̀ ɑ́bïj, kɑ jøgwøg møøgø lidhe ge nudd ge ócungø kì kenyɑni. Kɑ gï pyëje kinni, ‘Wude ɑ tyëgu cɑ̈ng wu wɑ̈dh-ɑ cung kinnï?’ Alöggi gen kinni, ‘Bong ngɑn mɑ ɑ́kïr wøn.’ Kɑ gï köbbe kinni, ‘Keløg ɑ́ kinøw, kedhu yij bɑɑg oløgɑ thyew.’ “Keny-ɑ ɑ́göög piny ki wɑɑng thyënhø, ɑköbbe jɑngi jøgwøg kinni, ‘Cwøl jøgwøg, kɑ ge mëggí ngyënyyi gen, cɑ̈gí kì ri møg-ɑ ɑ́bï kì cyɑ̈n gïti ri møg-ɑ ɑ́kwöngi bëënø.’ Abëën jøg-ɑ ɑ́kïr kì sɑɑ̀ ɑ́bïj kì böörø, kɑ dhɑnhø ɑ́kyel mëggi ngyënyø ɑ́tegø. Keny-ɑ ɑ́bëën jøg-ɑ ɑ́kwøng ki kwɑnyø, ge ɑ́rømm-ɑ kinni, kööngi gen ómed, de dhɑnhø ɑ́mëgg-ɑ ngyënyø ɑ́tegø thyew. Keny-ɑ ɑ́rum gen ki kwɑnyi ngyënyyi gen, kɑ ge oköörø kì ri jɑlbɑɑg oløg, ge ɑ́kööb kinni, ‘Jøg-ɑ ɑ́bï kì cyɑ̈n, ge ɑ́göög kɑ sɑɑ̀ ɑ́kyel kete, de yöd ge ceg kɑ pɑ̈ɑ̈rø yi yïn ki wøn, wøn ɑ ɑ́göög ki gwøg me teeg kì yij cɑ̈ng e keej!’ “Kɑ jɑl ɑ́kyel kì kelli gen köbbi yi jɑlbɑɑg oløg kinni, ‘Mɑ̈dh, bong gïnrɑj mɑ ɑ́göggɑ yïn, mɑ́ yï ɑ́rum ki yïëyø kinni, yï kïr kɑ ngyënyø ɑ́tegø ɑ́kyel. Kwɑny kööngí kɑ yï kedh. Mɑ́ yɑ dwɑdd-ɑ thödhi jɑl-ɑ ɑ́bï kì cyɑ̈n ni kɑ̀ thödhɑ yïn ceth. Yɑ pɑ göögø ki gïn-ɑ dwɑddɑ ki ngyënyyɑ? Wɑlɑ̀ yijí dɑ mud kipe kɑ̀ bëëdɑ yɑ bɑ jwödhø?’ ” Kɑ Yëso kwøbbe tyëge kinni, “Bene en ɑnɑn; tyëng-ɑ cyɑ̈n óying mɑl, o tyëng-ɑ mɑl ódøøg cyɑ̈n.” Yëso ɑ́bëëd e ócyɑ̈dhø kì yöö, e kedh-ɑ Yerusɑlem, kɑ jøbɑnge pyɑ̈rø wïdɑ́ryew cwøle wɑ̈yi gen, kɑ gï köbbe kinni, “Wɑ kedh-ɑ Yerusɑlem, de Nyɑɑr Dhɑnhø, bɑ men cïb cinggi jɑggi ókwër geki jøpwönyi Cigg, o kuum yi gen ki thøø, o ócïb cinggi tyëngpɑth, o gɑggi yi gen, o pwöd yi gen, o gur gen wïj yɑdh ɑrïw, de ódhwödh kì dɑ̈ɑ̈g cyɑ̈ng.” Kɑ meyi wɑ̈ddi Dhebedì bï-ɑ yïe, geki wɑ̈dde. Abøødhe ree piny kì bøle, e kwɑjj-ɑ gøn. Kɑ ngɑnɑni pyëj yi Yëso kinni, “Yï kwɑjj-ɑ ngø?” Kɑ gø köbbe kinni, “Kööb kinni, wɑ̈ddɑ óbëëdø kì butí kì yij Pödhí, ɑ́kyel kì wïj kyëjí, ɑ́kyel kì wïj cɑɑmí.” Kɑ møge løøg yi Yëso kinni, “Gïn-ɑ kwɑjji yi wun kwïj yi wun. Wu ócuggi mɑ̈dhø kì yij óthɑ̈ng-ɑ ómɑ̈ɑ̈dh yi yɑn?” Kɑ gø köbbi gen kinni, “Wø ócuggø mɑdh.” Aköbbi gen yi Yëso kinni, “Wu ómɑ̈dhi kì yij óthɑ̈ngɑ kidyër, de kwøbbi bëëdø kì wïj kyëjɑ wɑlɑ̀ wïj cɑɑmɑ, pɑth ki mø cwɑggɑ, de kɑ̈jjɑni ɑ́rum ki tyenyø yi Wïyɑ kipe ji-ɑ ɑ́yieny yi en.” Keny-ɑ ɑ́lïngi møgɑni yi jøbɑnge gɑ pyɑ̈rø, kɑ pëthi gen ceg-ɑ rënyø ki nyiimëëgɑni. Codhe, ɑcwøøl gen kej ɑ́kyel yi Yëso, kɑ gï köbbe kinni, “Ngɑ̈nyi yi wun kinni, jyɑ̈ggi pödhh møøgø nyi jyɑ̈ɑ̈g-ɑ ɑthwøg, o jɑgg-ɑ døngø mø gen nyi jyɑ̈ɑ̈g-ɑ tegø. De pɑ bëëdø kinøw kì kelli wun. Ngɑn dwɑddi bëëdø ɑ́ ngɑndwøng kì kelli wun, bëëde ɑ́ ngɑn göggi wun, o ngɑn dwɑddi ying mɑl kì kelli wun, bëëde ɑ́ bɑ̈ng wun. Nyɑɑr Dhɑnhø bëëd ɑ nøw; nuti bëënø kɑ per kinni o göggi yi teedø, dɑ́ kiper kinni o gögge teedø, o wëye ómuuje e gøøm-ɑ bøli ji mø ngenyø.” Keny-ɑ ɑ́kedh gen ge cɑ̈dhh-ɑ Yerikö, kɑ ji mø gïïr løg-ɑ bɑnge. Kɑ jøg ɑ́ryew mø bɑ cörr, mø bëëdø kì tøg yöö olïngø kinni i Yëso obëënø e kɑ̈ll-ɑ yuuɑni, ɑryeer gen, ge ócwöddø kinni, “Wuö, yïn ɑ Wɑ̈d Debïd, ywöngi yijí kiper wøn!” Kɑ ge kyëddi yi teedø kinni, kud gen, de ge ɑ́yöd ge ceg-ɑ pëddø ryeerø kinni, “Wuö, yïn ɑ Wɑ̈d Debïd, ywöngi yijí kiper wøn!” Kɑ Yëso ócungø, kɑ gï cwøle, ɑkööbe kinni, “Wu dwɑdd-ɑ ngø, o göggɑ wun?” Aköbbii yi gen kinni, “Yieb nyingi wøn, Wuö!” Kɑ yij Yëso óywöngø kiper gen, ɑnywɑle nyingi gïn; kɑ ge onëënø kì bøli kenyɑni ceth, kɑ ge løg-ɑ bɑnge. Keny-ɑ ɑ́cyɑ̈ngi gen ki Yerusɑlem, ɑtöngi gen Betpɑjì, kì thɑ Kïti Dhetun, kɑ Yëso oödø ki jøbɑnge ɑ́ryew, kɑ gï köbbe kinni, “Kedhu pɑn-ɑ bøli wun, wu óyïddi kì pɑnɑni ki ɑderø e ómɑɑg piny ki wɑ̈de kì bute. Gønyu gen, kɑ ge kɑ̈ɑ̈lu keny. De keløg e dɑ ngɑn di gïn köbbe wun, köbbu en kinni, ‘Ge dwɑdd-ɑ yi Wïi wøn.’ Gï ómuuje.” Møgɑni ɑ́gwøg kipe kinni o møg-ɑ ɑ́kømmi yi jɑltöng pɑ̈dhi gen kɑ̈jji gen, kinni, “Köbbu Kɑɑl Dhɑyøn kinni, Lidh rɑ̈dhí ɑ bï yïí ɑnɑn! Bɑ mölø, o cyɑ̈dh-ɑ́ɑ̀ kömi ɑderø; cyɑ̈dh-ɑ́ɑ̀ kömi ɑderø ówöb.” Kɑ jøbɑnge ókedhø, kɑ møg-ɑ ɑ́kwøb yi Yëso gwøg yi gen. Aderø ɑ́kɑ̈ɑ̈l yi gen kí wɑ̈de, kɑ ógudhi gen peedh gen kömi ɑderø ówöb, kɑ Yëso pëgg-ɑ kömi ógudhɑni. Kɑ ji mø gïïr ógudhi gen peedh gen yij yöö, kɑ kwï ji ongudø ki ɑnɑ̈bbi yenh. Kɑ gï peedh gen yij yöö. Kɑ tyëng-ɑ cyɑ̈dhi kì mɑl, kí møg-ɑ kɑ̈lli cyɑ̈n óryeerø kinni, “Lenhi wɑ kwɑɑr Debïd! Ngɑn-ɑ bï ki nyingi Wë, bɑ ɑgyëdh! Lenhi wɑ Jwøk!” Keny-ɑ ɑ́wɑ̈nhe Yerusɑlem kɑ kɑɑl oyöllø bëne, ge opëjø kinni, “Jɑlɑni ɑ́ men?” Kɑ teedø okööbø kinni, “Bɑ Yëso jɑltöng, kɑ̈ɑ̈l-ɑ Nɑdhɑreth kì myërri Gɑlelì.” Kɑ Yëso kedh-ɑ Kengø, kɑ jøngyew ryeeme wɑ̈g bënn kì kenyɑni. Kɑ tɑrɑbedhhi jøg-ɑ wïïdø ki ngyëny dhure piny geki jɑmmi jøngyëwø ki ɑkùr. Kɑ gï köbbe kinni, “Bɑ ɑgwed kinni, ‘Ødɑ ócwøl ɑ́ ød mɑ̈ddø.’ De ɑ́løgu keny pɑ̈nni yi kurrì!” Kɑ cörr, kí ngöll bï-ɑ yïe kì Kengø, kɑ gï yiele. Kɑ jɑggi ókwër geki jøpwönyi Cigg mɑg yi liny kɑ ɑ́lidh gen ngïjj-ɑ døngø møg-ɑ ɑ́gwøg yi en, kí othønhø kɑ̀ ryeer gen kì Kengø kinni, “Lenhu kwɑɑr Debïd!” Apyëj gen Yëso kinni, “Møg-ɑ kømmi yi gen olïngø yi yïn?” Alöggi Yëso kinni, “Ngee, olïngø yi yɑn! Wu nuti rɑ̈ngø cøn kì yij wɑ̈nyi kwërø kinni, ‘Dhøggi othønhø geki møg-ɑ dhødh ɑ́cïbí ki mɑlli pwøj?’ ” Kɑ gï wiye, ɑkedhe Betɑnì, kɑ nïnn-ɑ kunɑni. Kɑ dwöög-ɑ kɑɑldwøng kì mwøl, e ree dɑ kɑ̈j. Kɑ ólïdhø ki ólɑm kì tøg yöö, ɑkedhe yï ólɑmɑni, de bong nywøl mɑ ɑ́yode kì kööre, den-ɑ́ yïthh keti gen. Kɑ gø köbbe kinni, “Yï koo nywøl këti kinni tek!” Kɑ ólɑmɑni owøwø kì bøli kenyɑni ceth. Kɑ ɑ́liidh møgɑni yi jøbɑnge, kɑ ge ongɑ̈ngø, ɑkööb gen kinni, “Ólɑmɑni ɑ́jwɑn wøwø kidï kinnï?” Aløøg mø gen yi Yëso kinni, “Yɑ köbb-ɑ wun kidyër kinni, keløg wu yïëyø o wu pɑ pëmø, wu ócuggø gwøg ki gïn-ɑ ɑ́göggɑ ólɑm men. Pɑth ki codhi gen, de kït men-ɑn ócuggø köbbø yi wun kinni, ‘Dhwöödh, kɑ rií leeng nɑɑm omelø.’ Kɑ ócuggø ceth. Jɑmm-ɑ kwɑjji yi wun bënn, e pëthi wun dɑ yïëyø, ge ceg kɑ yodø yi wun ceth.” Keny-ɑ ɑ́kedhe Kengø, ɑbëën jɑggi ókwër geki tyëngdøngø yïe, ɑpëjji gen kinni, “Yï göög-ɑ tegø mɑ ngø, ki gïg bënn? Á men ɑ ɑ́thödhi yïn ki tengɑni?” Kɑ mø gen løøg yi Yëso kinni, “Wu ólonyɑ ki pëjji gïjø ɑ́kyel. Keløg møgɑ óløøg yi wun, wu óköbbɑ teng-ɑ göögɑ ki møg. Jwɑ̈ng-ɑ ɑ́jwɑ̈ɑ̈g ji yi Jøn ɑ́kɑ̈ɑ̈l-ɑ keny? Kɑ̈ɑ̈l-ɑ yï Jwøk, wɑlɑ̀ kɑ̈ɑ̈l-ɑ yï ji?” Kɑ ge opëmø keti gen kinni, “Keløg wɑ okööbø kinni, ‘Kɑ̈ɑ̈l-ɑ yï Jwøk,’ wɑ óköbbe kinni, ‘De wude ɑ bɑnyu yïëyø?’ O keløg wɑ okööbø kinni, ‘Kɑ̈ɑ̈l-ɑ yï ji,’ wɑ óböggø yi teedø, mɑ́ ge rum yïëyø kinni, Jøn ɑ́bëëd ɑ́ jɑltöng.” Codhe, ɑløøg gen kwøbbi Yëso kinni, “Kwïj yi wøn.” Kɑ gï köbbe kinni, “De wu pɑ köbbɑ teng-ɑ göögɑ ki gïg. “De wu rum ɑ dï? Ádɑ jɑl me yïe di wɑ̈dd ɑ́ryew, kɑ kedh-ɑ yï nyel-ɑ dwøng, kɑ gø köbbe kinni, ‘Kedhí be gwøg yij bɑɑg oløg tïn, wɑ̈dɑ.’ Kɑ nyelɑni ólöggø kinni, ‘Yɑ pɑ dwɑddi kedhø.’ De ɑ́pɑ̈di kì cyɑ̈n, kɑ ókedhø. Kɑ kedh-ɑ yï wɑ̈de nyel-ɑ kyeelø, kɑ gø köbbe møgɑni. Kɑ ólöggø kinni, ‘Yɑ ókedh wuö.’ De ɑ́cög e pɑ kedh. Á men kì kelli yɑɑgɑni ryeet, ɑ ɑ́gwøg gïn-ɑ dwɑddi yi wïyi gen?” Kɑ ge ólöggø kinni, “Nyel-ɑ dwøng.” Aköbbi gen yi Yëso kinni, “Yɑ köbb-ɑ wun kidyër kinni, jøgwɑ̈j geki tyëng-ɑ nyi niin ki köögi, ge ókwöngi wɑ̈dhi Pödhi Jwøk kibøli wun. Mɑ́ Jøn Jɑljwɑ̈g ɑ́bï be nyudhi wun yuu-ɑ døøj kì bøli Jwøk, de møge nuti yïëëy wun, kɑ møge yïëy yi jøgwɑ̈j geki tyëng-ɑ nyi niin ki köögi. Møgɑni ɑ́lidh yi wun, de wu nuti yewø, o møge nuti yïëëy wun.” Kɑ ge köbbi yi Yëso kinni, “Lïng wun ki gɑ́j møøgø. Ádɑ jɑl me yïe di pinye. Kɑ opïdhø ki bɑɑg oløg. Kɑ gø gëdde ki kyel, kɑ ogëdø ki keny nyi biij oløg, kɑ ogëdø ki ønbɑ̈r men koorii. Acïbe gøn cinggi jøgwøg, kɑ kedh-ɑ be wel. Keny-ɑ ɑ́wɑ̈nhi bøli kej lemi oløg, ɑöre bɑ̈ngge yï jøgwøg, kinni o muuj bun-ɑ bɑ mee. Kɑ bɑ̈ngge mɑg yi jøgwøg, kɑ ɑ́kyel kì kelli gen pwöd gen, kɑ megø nɑ̈g, kɑ megø bɑ̈lli ki tuggi kïttì. Kɑ cig-ɑ ör ki bɑ̈ngg møøgø, mø gïïr kibøli mø tyeli mɑl, kɑ tyëngɑni cig-ɑ gwøg kinøw thyew. Kì cyɑ̈n, ɑöre wɑ̈de, e okööbø kinni, ‘Wɑ̈dɑ óböggi yi gen.’ De kɑ ɑ́liidh wɑ̈d jɑlɑni yi jøgwøg, kɑ ri gen köbbi gen kinni, ‘Bene ngɑn-ɑ ólɑg jɑmmì èn, bïu nɑ̈g wɑ en, o jɑmme kwɑny yi wɑ.’ Kɑ nyelɑni mɑg gen, kɑ gø peej gen wɑ̈g kì yij bɑɑg oløg, kɑ gø nɑ̈g gen.” Kɑ Yëso ópëjjø kinni, “Keny-ɑ óbëën wïi bɑɑg oløg, ɑ́ ngø ɑ ógögge tyëngɑni?” Kɑ ge ólöggø kinni, “Tyëngrijjø møgɑni ceg kɑ nɑ̈gø yi en, o bɑɑg oløg cïbe cinggi jøgwøg møøgø, møg-ɑ ómëggii nywøli oløg kenyi cyeg gen.” Aköbbi gen yi Yëso kinni, “Nuti rɑngø yi wun kì yij wɑ̈nyi kwërø, kinni, ‘Kït men-ɑ ɑ́bɑny yi bödhhi gyer, en ɑ ɑ́göög ki kïn-ɑ mïdhi ød. Menɑni bɑ gwøøg Jwøng-ɑ Ácwɑ̈ɑ̈j, de bɑ gïïngɑ̈ngø, kɑ ɑ́lidhii yi wɑ!’ Keny-ɑ ɑ́lïngi gɑ́jɑni yi jɑggi ókwër geki Jøpɑresì, kɑ gø ngij gen kinni, bɑ gen ɑ kømmi yi Yëso. Kɑ dwɑddi mɑgø yi gen, de ge ɑ́bëëd ge óböggø yi teedø, mɑ́ e cwøl yi gen ɑ́ jɑltöng. Kɑ ge cigi köbbø yi Yëso ki gɑ́j møøgø kinni, “Pödhi Jwøk pɑ̈r ki rɑ̈dh mɑ ɑ́göög ki thyëëg wɑ̈de. Kɑ rɑ̈nhɑni bɑ̈ngge öre be cwøli ji-ɑ ɑ́ryej, kɑ ge óbɑ̈nyø bëënø. Kɑ cig-ɑ ör ki bɑ̈ngg møøgø kinni, ‘Köbbu tyëng-ɑ ɑ́ryej kinni, yɑ ɑ́rum ki gwøg ki gïncɑm; dhögɑ, dhög-ɑ døngø geki røjj-ɑ cwɑɑdhø ɑ́rum ki ngɑlø yi yɑn, jɑmmì bënn ɑ́rum ki pyëlø. Bïu be thyëg.’ De kɑ̀ bëëd kwøbbɑni bong per gen kì yï gen, ɑcög ge pɑ kedh, kɑ men kedh-ɑ pwödhe, kɑ megø kedh-ɑ cuge. Kɑ bɑ̈ngge mɑg yi ji møøgø kì kelli gen, kɑ gï göggi gen ki gïnrɑj, kɑ ge nɑ̈g. Kɑ rɑ̈dh owërø, kɑ oödø ki jøliny, kɑ tyëng-ɑ ɑ́nɑ̈g bɑ̈ngge nɑ̈g, kɑ kɑɑl gen rɑ̈b. Codhe, ɑköbbe bɑ̈ngge kinni, ‘Jɑmmi thyëg ɑ́rum ki pyëlø, de tyëng-ɑ ɑ́ryej pɑ døøj ki thegø. Kedhu yethi yëëth, kɑ tyëng-ɑ óyod yi wun bënn cwööl wun kej thyëg.’ Kɑ bɑ̈nggɑni kedh-ɑ yethi yëëth, kɑ ji-ɑ ɑ́yod yi gen bënn cøng yi gen; tyëngrijjø kí tyëngdøj bënn, kɑ kej nywöm opɑ̈ngø yi wëll. “De kɑ ɑ́bëën rɑ̈dh be lidhi tyëng-ɑ ɑ́ryej, ɑlïdhe ki jɑl me pɑ rugø ki ógødh nywöm. Kɑ gø pyëje kinni, ‘Mɑ̈dh, yï ɑ́wɑ̈nhi keny kidï, e rií bong ógødh nywöm?’ Kɑ ojɑdø ki gïn løøge. Codhe, kɑ rɑ̈dh bɑ̈ngge köbbe kinni, ‘Twöju cinggi jɑlɑni kí tyelle, kɑ leengu wɑ̈g yij muudhø, kunɑni dɑ ywøg kí ngenyyi leg.’ ” Atyëg Yëso kwøbbe kinni, “Ji mø gïïr ɑ ɑ́cwøl, dɑ́ ji mø nøg ɑ ɑ́yieny.” Codhe, ɑkedh Jøpɑresì, kɑ dhøggi gen nywɑg gen kipe kinni o gø myen yi gen kì ri gïn-ɑ ókwøbe. Kɑ Jøpɑresì kí jø Ërödøs ör gen yïe. Kɑ ge okööbø kinni, “Jɑlpwönyø, ngɑ̈nyi yi wøn kinni, møgí bɑ dyër, o yuu Jwøk nyi pwönyi yi yïn kì ri kwøbb-ɑ dyër, yï pɑ nyi böggi yi ji, mɑ́ e bong ngɑn nyi yieny yi yïn. Köbbí wøn møg-ɑ rømmi yi yïn. Bɑ ɑyïëy yi cigg kinni, nyi cudi wɑ Kɑysɑr ki gwɑ̈j?” De gïn-ɑ ɑ́dwɑddi gwøgø yi gen ngɑ̈nyi yi Yëso, kɑ okööbø kinni, “Wun ɑ tyëngwëënyø, wude ɑ pɑ̈nyu yɑn? Nyudhu yɑn ki ngyënyi gwɑ̈j.” Kɑ ngyënyø ɑ́kyel mëggii, ɑpyëje gïn kinni, “Á ngïji men kí gweddi men ek?” Kɑ ge ólöggø kinni, “Mø Kɑysɑr.” Kɑ gï köbbe kinni, “Keløg ɑ́ kinøw, mëggu jɑmmi Kɑysɑr Kɑysɑr, kɑ jɑmmi Jwøk mëggu Jwøk.” Keny-ɑ ɑ́lïngi gen møgɑni, kɑ ge ongɑ̈ngø, ɑwiy ge gøn, kɑ ge ókedhø. Kɑ kì cyɑ̈ngɑni ceth, ɑbëën Jøsɑduk yïe, gen ɑ tyëng-ɑ nyi kööbø kinni, i bong dhwödhø kì yij thøø. Kɑ gø pyëj gen kinni, “Jɑlpwönyø, Mosɑ̀ ɑ́kööb kinni, ‘Keløg dhɑnhø othøø de yïe bong wɑ̈de, lɑɑg cyëge yi ómen o nywøle wïj ómen.’ De ɑ́dɑ nyiimëëg ɑ́bïryew. Kɑ nyel-ɑ dwøng ónyömø, kɑ othøø e bong wïje, kɑ cyëge lɑg yi nyel-ɑ bɑnge. Kɑ othøø ni menɑni, kí dɑ̈ɑ̈g gen thyew, gïti ri bïryeew gen. Athøw ngɑnɑni kì cyɑ̈ɑ̈n gen bënn. Ngɑnɑni óbëëd ɑ́ cï men, keny-ɑ ódhwödh ji kì yij thøø, mɑ́ e ɑ́bëëd ɑ́ cï gen bënn?” Kɑ mø gen løøg yi Yëso kinni, “Wu ɑ́bɑ̈jji, mɑ́ wɑ̈nyi kwërø kwïj yi wun geki tegi Jwøk. Keny-ɑ ódhwödh ji kì yij thøø, bong ngɑn-ɑ ónyömi wɑlɑ̀ bong ngɑn-ɑ ónywøm, de ji óbëëd ge nɑ wëywödd kì mɑl. De keløg ɑ́ per dhwödhø kì yij thøø, møg-ɑ ɑ́köbbi wun yi Jwøk nuti rɑɑng wun kinni, ‘Yɑ bɑ Jwøøg Abrɑhɑm, o yɑ bɑ Jwøøg Isɑɑk, o yɑ bɑ Jwøøg Yɑgob.’ Jwøk pɑth ki Jwøøg tyëngthøø, de bɑ Jwøøg tyëngnëënø.” Keny-ɑ ɑ́lïngi møgɑni yi teedø, kɑ ge ongɑ̈ngø yi pwönye. Keny-ɑ ɑ́lïng Jøpɑresì kinni, dhøggi Jøsɑduk nɑ̈ɑ̈g en, ɑcugi gen kì kej ɑ́kyel. Kɑ Yëso pyëj yi jɑl ɑ́kyel kì kelli jøpwönyi Cigg, e pɑ̈ny-ɑ gøn, kinni, “Jɑlpwönyø, cigg-ɑ døngø kì kelli cigg bënn, bɑ cigg ɑ́?” Alöggi Yëso kinni, “ ‘Mɑɑr Wöw Jwøgí, ki pyëwí bëne, kí wëyí bëne, kí rummí bënn.’ Bene cigg-ɑ mɑl; ɑ døngø kibøli cigg bënn. O ryeew gen nɑ en kinni, ‘Mɑɑr ngɑn-ɑ butí ni kɑ̀ mɑɑr rií.’ Ciggɑni ryeet ɑ bɑ byerri cigg geki pwönyi jøtöng bënn.” Kɑ̈ng-ɑ ɑ́bëëd Jøpɑresì ying-ɑ kej ɑ́kyel, ɑpyëëj gen yi Yëso kinni, “Wu rum ɑ dï kì ri Mesiy? Bɑ kwɑɑr men?” Alöggi gen kinni, “Bɑ kwɑɑr Debïd.” Kɑ gï köbbe kinni, “Dɑ́ kipe ngø ɑ cwøllii yi Debïd ɑ́ Wɑ̈n, kì bɑng pwönyi Wëy? Kɑ ɑ́kööbe kinni, ‘Wɑ̈ɑ ɑ́köbbi yi Jwøng-ɑ Ácwɑ̈ɑ̈j kinni, ‘Bëëd kì wïj kyëjɑ gïti keny-ɑ ócïbɑ tyëng-ɑ mɑɑn yïn thɑ́ tyellí.’ Keløg e cwølli yi Debïd ɑ́ Wɑ̈n, Mesiy óløg kwɑre kidï?” De bong ngɑn mɑ ɑ́cuggi løøgi kwøbbe, kɑ teedø bëne obwøgø, kɑ gø wiy gen ki pyënyø. Kɑ Yëso jøbɑnge geki teedø köbbe kinni, “Jøpwönyi Cigg geki Jøpɑresì bɑ gen ɑ nyi lwøb gïn-ɑ wɑngi yi Ciggi Mosɑ̀. Nyi gwøgu møg-ɑ köbbi wun yi gen ceth. De gïg-ɑ gøggi yi gen ko nyi ngøy wun. Mɑ́ ge nyi wɑ̈dh-ɑ kwøb, de møg-ɑ kømmi yi gen pɑ nyi gwøg yi gen. Tyëngɑni nyi cøng-ɑ gïg peg møg-ɑ nyi cïb gen wɑ̈thi ji, de ge pɑ yïëy nywɑ̈dø ki lwedø ɑ́kyel. Gïg-ɑ gøggi yi gen bënn, nyi gwøg yi gen kɑ per kinni o ge nenni yi ji, mɑ́ wɑ̈jj-ɑ rug yi gen nyi gwøg yi gen ge døngø, kɑ ojwɑrri ógudhi gen nyi gwøg yi gen ge bɑ̈rrø, ge mɑɑr-ɑ bëëdø kì wɑ̈thi kwømm-ɑ per gen teg kì kɑ̈jji ryëj, kí kwømm-ɑ døj kì sinɑgøgg, kí mɑ̈dhhø yi teedø kì yethi kɑ̈jji ngyew, geki cwølli gen yi teedø kinni, ‘Jɑlpwönyø.’ De ri wun ko wëggu cwøllø kinni, ‘Jɑlpwönyø.’ Mɑ́ jɑlpwönyi wun nud ɑ́ ɑ́kyel, o wu bɑ nyiimëëg bënn. Kɑ ko di dhɑnhø me cwølli yi wun ɑ́ wïyi wun kì kömi piny, mɑ́ wïyi wun bɑ ɑ́kyel kete, en ɑ ngɑn-ɑ ying Pödhi Jwøk. Wɑlɑ̀ wu ko nyi yïëy cwøllø yi teedø kinni, ‘Wuö,’ mɑ́ wïi wun bɑ ɑ́kyel en ɑ Mesiy. De ngɑn-ɑ dwøng kì kelli wun óløg bɑ̈ng wun. Ngɑn-ɑ nyi tïng ree mɑl ódwøøg cyɑ̈n, o ngɑn-ɑ nyi dwøøg ree cyɑ̈n ótïng mɑl. “Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ Pödhi Jwøk ɑ́cyëëg yi wun kipe ji møøgø; wu pɑ kedhi yije, o ji møøgø nuti wëggu kedhi yije. Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ kɑ̈lli thwömm nyii kɑbø yi wun, kɑ wu nyii lɑ̈mø ki lɑm mø bɑ̈rrø, kipe kinni o wu nenni yi teedø. Kömi wun ódi cɑ́y mø døngø. “Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ wu nyi bɑ̈nn-ɑ piny kí nɑ̈mmi omelø, wu oyɑ̈bø ki ngɑn yïëy ki kwøbbi wun. O kenyi yïddi wun, kɑ ngɑnɑni nyi løg wun ngɑn kedhi mɑc, me lod wun ki rɑ̈jø tyel ɑ́ryew! “Wun ɑ pëjj-ɑ bɑ cörr, ri wun dɑ cyën, mɑ́ wu nyii kööbø kinni, ‘Keløg dhɑnhø nyi kwöng-ɑ Kengø, bong nyinge, de keløg dhɑnhø nyi kwöng-ɑ dhɑm-ɑ yij Kengø, köme dɑ kwör mi köngɑni.’ Wun ɑ dhëgg-ɑ bɑ cörr, ɑ́ gïn ɑ pere teg, dhɑb wɑlɑ̀ Kengø ɑ nyi kwër dhɑb? Kɑ wu nyii kööbø kinni, ‘Keløg dhɑnhø nyi kwöng-ɑ këli lɑm, bong nyinge, de keløg dhɑnhø kwöng-ɑ gënh-ɑ muuj kì kömi këli lɑm, köme dɑ kwör mi köngɑni.’ Wun ɑ cörr, ɑ́ gïn ɑ pere teg kì kelli gen? Gënh-ɑ muuj wɑlɑ̀ këli lɑm men-ɑ nyi kwër gënh-ɑ muuj? Kɑ ɑ́rum bëëde kinøw, ngɑn-ɑ nyi kwöng këli lɑm, nyi kwöng-ɑ gøn geki jɑmm-ɑ wïje bënn. O ngɑn-ɑ nyi kwöng Kengø, nyi kwöng-ɑ gøn geki Jwøk ngɑn-ɑ bëëdø kì yije, o ngɑn-ɑ kwöng mɑl, kwöng-ɑ kwøøm Jwøk geki ngɑn-ɑ bëëdø kì wïje. “Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ wu nyi muuj-ɑ ɑ́kyeel pyɑ̈rø kì ri nɑnɑɑ̀ kí cumɑ̈r kí kɑmun, de møg-ɑ per gen teg kì yethi Cigg ɑ́wiy yi wun, gen ɑ kwøbbi jyɑ̈ng-ɑ tir kí ywøøg yeth geki yïëyø. Bene møgɑni ɑ di dwɑddi gwøgø yi wun ceth, kɑ møg-ɑ nyi gwøg yi wun ko nyi wiy wun. Wun ɑ pëjj-ɑ bɑ cörr, wu nyi reg-ɑ yi bɑ̈yø yøw, de ɑmɑlø nyii mwønyø yi wun. “Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ tɑ̈mmì geki ɑ́ludhhì nyii lwøgø yi wun kidøøj kì kömi gen, de yethi gen pɑ̈ng yi gïg-ɑ nyi gweem ji geki gïg-ɑ nyi kɑbbi ki döngi pëëth. Yïn ɑ Jɑlpɑresì, yï bɑ cwør, nyi lɑw yethi ɑ́ludhhì geki tɑ̈mmì møti, o kömi gen dhïwi gen. “Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ wu pɑ̈r ki rörri ji møg-ɑ ógøjø ki böyø me tɑr, o ge nënni ge døøj kì kömi gen, de yethi gen pɑ̈ng yi cu tyëngthøø geki gïgrijjø bënn. Wu nɑ gen ceth; wu nenni yi teedø wu døøj kì kömi wun, de pëthi wun pɑ̈ng yi wëënyø kí orøg. “Wun ɑ jøpwönyi Cigg kí Jøpɑresì, wu bɑ tyëngwëënyø, ri wun dɑ cyën, mɑ́ rörri tyëngtöng mø Jwøk nyii gerø yi wun, kɑ rörri tyëngdøj nyi göggi ki dhwɑ̈ng yi wun. Kɑ wu nyii kööbø kinni, ‘Keløg wø di ying-ɑ mø nud kì bøli keny-ɑ́ nud kweyyi wøn, cinggi wøn pɑ di kedhi yi remmi jøtöng ni gen.’ Kɑ̀ kööb wun kinøw, wu nyodh-ɑ ri wun kinni, wu bɑ wɑ̈ddi tyëng-ɑ ɑ́nɑ̈g jøtöng! De ɑnɑn, tyëgu gwøøg kweyyi wun. Wu bɑ thöllì, wɑ̈ddi thöllì, cɑyø ki mɑc óbɑj yi wun kidï? Kɑ ɑ́rum bëëde kinøw, wu óödɑ ki tyëngtöng, kí tyëng-ɑ wɑ̈thi gen pel geki jøpwönyø. Kwï gen ógur yi wun wɑ̈thi yenh ɑrïw, o møøgø ónɑ̈g yi wun, o møøgø ópwöd yi wun kì sinɑgøgg, kɑ nyingi gen guud yi wun kì yethi myërr. Codhe, o cu tyëngdøj bënn kì kömi piny bëne ying gen cinggi wun, cɑg kì ri cöngi Abel ngɑn yïe bɑ̈r, gïti ri cöngi Dhekɑriyɑ̀ wɑ̈d Berɑkiyɑ̀, ngɑn-ɑ ɑ́nɑ̈g yi wun kì kɑɑm Kengø geki këli lɑm. Yɑ köbb-ɑ wun kidyër kinni, møgɑni bënn óbï kömi rïj men. “Yerusɑlem! Yerusɑlem! Yïn ɑ nyi nɑ̈gø ki jøtöng, kɑ tyëng-ɑ ɑ́ör yïí yi Jwøk bɑ̈llí ki tuggi kïttì. Tyel mø gïïr yɑ ɑ́dwɑdd-ɑ cøngi nyigí ni gyenø kenyi cønge nyige thɑ́ obërre, de yï ɑ́bɑ̈nyi. De ɑnɑn, Kengi wun ódöng e lïïwø. Mɑ́ yɑ köbb-ɑ wun kinni, yɑ pɑ lidh yi wun këti gïti keny-ɑ ókööb wun kinni, ‘Ngɑn-ɑ bï ki nyingi Jwøng-ɑ Ácwɑ̈ɑ̈j, bɑ ɑgyëdh.’ ” Akedhi Yëso wɑ̈g kì yij Kengø, kɑ jøbɑnge kedh-ɑ be nyudhii udd-ɑ bɑdhhi Kengø. Kɑ mø gen løøg yi en kinni, “Jɑmmì møg bënn di nennø yi wun? Yɑ köbb-ɑ wun kidyër kinni, bong kït ɑ́kyel kì keny men-ɑ ódöng kì kömi megø e nuti dhur piny.” Keny-ɑ ɑ́pëgge piny kì wïj Kïti Dhetun, ɑbëën jøbɑnge yïe kì wɑ̈yi gen, ge okööbø kinni, “Köbbí wøn bøli keny-ɑ óbëën møgɑni. Á ngïji mɑ ngø ɑ ónyodh bøli kej bëëní geki thumi piny?” Aløøg mø gen yi Yëso kinni, “Koru ri wun kipe wu ópeej pɑ̈l yi ngɑn megø. Mɑ́ ji mø gïïr óbï ki nyingɑ, ge okööbø kinni, ‘Yɑn ɑ bɑ Mesiy.’ Kɑ ji mø gïïr peej gen pɑ̈l. Kɑ wu olïngø ki kwøbbi liny geki wöddi liny, de wu ko böggi, mɑ́ møgɑni bënn ɑ óbï møti, e thumi piny nuti bëënø. Mɑ́ pödhø megø ónyïɑ̈ggi ki pönh-ɑ kyeelø, kɑ rɑ̈dh ónyïɑ̈ggø ki rɑ̈nh-ɑ kyeelø, o kɑ̈j me dwøng óbï, kɑ piny onhɑ̈nhø kì kɑ̈jj møøgø. O møgɑni bɑ cɑ̈gi orɑng kì kömi piny. “Kì bøli kenyɑni nyingi gen ócuul ki wun, kɑ wu nɑ̈g yi gen. Kɑ wu mɑɑn yi jurrì bënn kipe nyingɑ. Ocwöb møgɑni, ji mø gïïr ódøøg cyɑ̈n. Kɑ ri gen tummi gen, kɑ ri gen mɑny gen. O jøtöng mø pɑ kømmi dyër ócwöb, kɑ ji mø ngenyø peej gen pɑ̈l. Rɑj óngënyi, kɑ mɑ̈ɑ̈dø men-ɑ ɑ́ying pëthi ji mø ngenyø ólwënyø. De ngɑn-ɑ óngïnø gïti keny-ɑ óthumi møgɑni, bene en ɑ óyiel. Codhe, o Wöndøj men-ɑ kööbø kì ri Pödhi Jwøk èn, kɑ̈lli kì kömi piny bëne, ɑ́ nyuudhi kipe wɑ̈thi jurrì bënn; o thumi piny bëe. “Ólidh yi wun, eni ‘Gïnrɑj,’ men-ɑ ɑ́kømmi yi Dɑniel jɑltöng e ócungø kì kej kwër.” (Ngɑn-ɑ rɑ̈ngø yode gïn-ɑ wɑngi yi møgɑni!) “Ocwöb møgɑni, kɑ tyëng-ɑ Yeudiyɑ̀ pɑ̈ɑ̈r gen kelli kïttì. O ngɑn ying wïj óthɑɑng ød, ko yïnhi piny be kwɑnyi jɑmme møg-ɑ yiny-ɑ ød. Kɑ ngɑn-ɑ pwödhø ko døøg be yɑɑbi ógødhe. Kì bøli kenyɑni, tyëng-ɑ mɑ̈nn møg-ɑ bɑ ɑ́yɑjj, kí møg-ɑ köthi gen dhøødh yi othønhø, ri gen ódi cyën. De kwɑjju Jwøk kipe kinni o wu ócög wu pɑ reng-ɑ́ɑ̀ wuudø wɑlɑ̀ cyɑ̈ɑ̈ng Sɑbɑth! Mɑ́ cyɑ̈ngɑni bɑ cyɑ̈ɑ̈ng orɑng me dwøng. Bong gïn ni menɑni mɑ ɑ́cwöb këër cɑ̈gi piny pïd dicyɑ̈ngtïn, o koo cigi cwöbø thyew. De keløg kwï cyɑ̈nggɑni pɑ di ngøl yi Jwøk, bong dhɑnhø me di bodh. De cyɑ̈nggɑni ɑ́ngøl ge ceggø kɑ per tyëng-ɑ ɑ́yieny. “Keløg e dɑ ngɑn köbbi wun kinni, ‘Mesiy ɑ keny èn,’ wɑlɑ̀ kinni, ‘Mesiy nud kì kun-ɑcɑ̀,’ kwøbbe ko yïëy wun. Mɑ́ Mesiy mø pyed, kí jøtöng mø pyed ócwöb; kɑ ge ogöögø ki gïïngɑ̈ngø mø døngø, ge pɑ̈ny-ɑ jii Jwøk møg-ɑ ɑ́yieny ki peej pɑ̈l. Lïng wun kidøøj, wu ɑ́rum ki köbbø yi yɑn e møgɑni nuti bëënø. “Wɑlɑ̀ keløg wu óköbbi yi gen kinni, ‘Mesiy nud kì yij pɑ̈l,’ wu ko kedhi kunɑni. Wɑlɑ̀ keløg ge okööbø kinni, ‘Mesiy nud kì kelli kɑ̈llì,’ møgɑni ko yïëy wun. Mɑ́ Nyɑɑr Dhɑnhø óbï e nɑ mɑl kenyi gööge kinni rɑ̈d kì wɑɑng cyɑ̈ɑ̈ng mwøl, kɑ mënyy-ɑ wɑɑng cyɑ̈ɑ̈ng böörø. “Keny-ɑ di gïnthøø, bɑ en ɑ yije nyi cugi yi cor órɑj. “De kì bøli keny-ɑ óthumi ryɑ̈ngɑni ceth, cɑ̈ng ólunyi, kɑ dwɑ̈y ocögø e pɑ mënyø, kɑ kyell odyëmø kì mɑl, kɑ gïg-ɑ teg kì yij mɑl okïïrø. Codhe, o ngïji Nyɑɑr Dhɑnhø cwöbe kì yij mɑl; o ji ywöngi gen kì kömi piny bëne, o Nyɑɑr Dhɑnhø lidh yi teedø e obëënø kì wɑ̈thi pølli mɑl, ki tege geki dhwɑ̈nge. Codhe, o wëywödde öre nyingi yømø gɑ ɑ́ngwen, ge okudhø ki kɑ̈ngì mø cwɑggi gen døngø. O jie møg-ɑ ɑ́yieny cung yi gen kì wɑ̈thi tùngi piny gɑ ɑ́ngwen, cɑg kì wïj tuung gïti wïj tung-ɑ kyeelø. “Dïd wun ki ri ólɑm. Kenyi nyog ólɑm kɑ ómɑ̈rø, nyii yodø yi wun kinni cwir ɑ́cyɑ̈ngi. Nɑ menɑni ceth, keny-ɑ ólidhu møgɑni bënn, kɑ wu ngɑ̈nyu wøw kinni, thumi piny ɑ́cyɑ̈ngi. Yɑ köbb-ɑ wun kidyër kinni, møgɑni ócwöb, e rïj men nuti thumø. Mɑl kí piny ólɑ̈ɑ̈ny, de kwøbbɑ pɑ lɑ̈ɑ̈ny. “De bøli kej bëëni cyɑ̈ngɑni wɑlɑ̀ sɑɑ̀ menɑni bong ngɑn ngɑ̈nyii; kwïj yi wëywödd kì Pödhi Jwøk, o kwïj yi Wɑ̈d, den-ɑ́ Wïy kete ɑ ngɑ̈nyii. Bëëni Nyɑɑr Dhɑnhø óni gïn-ɑ ɑ́cwöb kì ri Nöö. Mɑ́ kì yethi cyɑ̈ngg-ɑ ɑ́bëëd bɑɑyø nuti bëënø, ji ɑ́bëëd ge ocyɑ̈mø, o ge omɑ̈dhø; cwøw ónyömø, o mɑ̈nn onywømø gïti cyɑ̈ng-ɑ ɑ́kɑdhi Nöö yij yɑ̈y; gïn-ɑ cwöb nuti yodø yi wɑ̈thi gen, pïd kɑ ɑ́bëën bɑɑyø, ɑmude gïn. Óbëëd ɑ nøw keny-ɑ óbëën Nyɑɑr Dhɑnhø. Kì bøli kenyɑni jøg ɑ́ryew óløg mø nud kì yij pwödhø, ɑ́kyel ókɑ̈l kɑ megø wiy. Tyëng-ɑ mɑ̈nn ɑ́ryew ogurø kì kɑl, ɑ́kyel ókɑ̈l kɑ megø wiy. “De koru ri wun, mɑ́ cyɑ̈ng-ɑ óbëën Wïi wun kwïj yi wun. Bëëd wu ngɑ̈ny wøw kinni, keløg jɑlkɑl di bëëd bøli keny-ɑ óbëën yi kur kì wɑ̈r ngɑ̈nyi yi en, gøle pɑ di wëgge yɑyø yi kur. Kɑ ɑ́rum bëëde kinøw, bëëd wun ri wun gwiir wun, mɑ́ Nyɑɑr Dhɑnhø óbï-ɑ bøli keny me pɑ rømmi yi wun. “Á men ɑ bɑ bɑ̈ng-ɑ wïje pel? Bɑ bɑ̈ng-ɑ ɑ́gwøg yi wɑ̈n, ɑ́ jɑngi bɑ̈ngg-ɑ kyeelø, o gï nyi mëgge gïncɑɑm gen kì bøli keje. Bɑ̈ngɑni ree ódi gyëdh, keløg e óyuud e ogöögø kinøw yi wɑ̈n keny-ɑ ódwööge. Yɑ köbb-ɑ wun kidyër kinni, jɑmme bënn cïbe’ cingi bɑ̈ngɑni. De keløg ɑ́ bɑ̈ng me rɑj, kɑ okööbø ki pyëwe kinni, ‘Wɑ̈ɑ ɑ́cöög yïnø.’ Kɑ bɑ̈ngg-ɑ kyeelø nyi pwöde, kɑ nyii cyɑ̈mø kɑ nyii mɑ̈dhø geki jømɑdh ki muggì, wïi bɑ̈ngɑni óbï kì cyɑ̈ng me pɑ rømmi yi en, kì sɑɑ̀ me kwïj yi en thyew. Kɑ bɑ̈ngɑni pwöd yi en ki pwödø me teg, kɑ kïdhi kelli wëëny. Kenyɑni yije dɑ ywøg kí ngenyyi leg. “Kì bøli kenyɑni, Pödhi Jwøk óbëëdø ni wojur gɑ pyɑ̈rø møg-ɑ ɑ́kwɑny lɑ̈mbɑ̈ɑ̈ mø gen, kɑ ge kedh-ɑ be pɑɑri jɑlnywöm. Ábïj kì kelli gen bɑ dhëgg, de ɑ́bïj møøgø rummi gen nud. Kɑ møg-ɑ bɑ dhëgg kɑ̈l-ɑ lɑ̈mbɑ̈ɑ̈ mø gen yethi gen dɑ jɑ̈s, de bong jɑ̈s megø mɑ ɑ́kwöög yi gen. De møg-ɑ rummi gen nud kɑ̈dø ki jɑ̈s kì yethi ɑdhɑ̈dhì kyeel ki lɑ̈mbɑ̈ɑ̈ mø gen. Kɑ jɑlnywöm ócwöngø, ɑpëggi gen be nwɑyyø, kɑ ge ónenø bënn. “Kì dïwɑ̈r ɑlïngi cwɑg mø cwöddi kinni, ‘Bïu wɑ̈g be pɑɑri jɑlnywöm.’ Kɑ woɑni bënn odhwödhø, kɑ lɑ̈mbɑ̈ɑ̈ mø gen tim gen. Kɑ møg-ɑ rummi gen nud köbbi yi møg-ɑ bɑ dhëgg kinni, ‘Nëngu wøn ki jɑ̈s, mɑ́ lɑ̈mbɑ̈ɑ̈ mø wøn køm-ɑ thøø.’ Kɑ møg-ɑ rummi gen nud ólöggø kinni, ‘Jɑ̈s nøg, pɑ rømi ki wɑ bënn, kedhu cugg, kɑ wu ngëëw wun.’ Kɑ kɑ̈ng-ɑ ɑ́kedhi gen be ngyew, ɑbëën jɑlnywöm, kɑ wojur-ɑ tyeeny ri gen kedh-ɑ kej nywöm, kɑ dhø kɑl cyëëg. “Abëën woɑni kì cyɑ̈n, ge okööbø kinni, ‘Wuö, Wuö, yïëbbí wøn dhø kɑl.’ Kɑ mø gen løøg yi en kinni, ‘Yɑ köbb-ɑ wun kidyër kinni, wu kwïj yi yɑn.’ ” Kɑ møgɑni ngøl yi Yëso kinni, “Koru ri wun, mɑ́ cyɑ̈ngɑni geki sɑɑ̀ menɑni kwïj yi wun.” “Pödhi Jwøk pɑ̈r ki jɑl megø mɑ ɑ́dwɑddi kedhi be wel, kɑ bɑ̈ngge cwøle, kɑ jɑmme bënn cïbe cinggi gïn. Ákyel ɑ́mëgge ngyëny ɑ́lïp ɑ́bïj, kɑ megø mëgge ɑ́ryew, kɑ megø mëgge ɑ́kyel, gɑ møg lug kì kej ngyew. Kɑ nyel-ɑ ɑ́mëggi ɑ́lïp ɑ́bïj jwɑn-ɑ be løg, kɑ ɑ́bïjɑni onywølø ki ɑ́bïj møøgø. Kɑ nyel-ɑ ɑ́mëggi ɑ́ryew kedh-ɑ be løg thyew, kɑ óyïddø ki ɑ́ryew møøgø. Kɑ nyel-ɑ ɑ́mëggi ɑ́kyel ókedhø, kɑ okunyø ki bur kì piny, kɑ ngyënyyi wɑ̈n kɑne. “Kɑ wïi bɑ̈nggɑni ódwöögø piny kɑ̈ɑ̈l kun, kɑ ge ócɑ̈gø kwɑ̈nø ki gïg-ɑ ɑ́mëggi gen. Kɑ nyel-ɑ ɑ́mëggi ɑ́lïp ɑ́bïj obëënø e ókɑ̈ddø ki ɑ́bïj møøgø, ɑkööbe kinni, ‘Wuö, yɑ ɑ́mëggí ɑ́lïp ɑ́bïj, de yɑ ɑ́yïddi ki ɑ́bïj møøgø.’ Kɑ köbbi yi wɑ̈n kinni, ‘Gwøgí døøj, yïn ɑ bɑ̈ng-ɑ døj, yï ngɑ̈ny gɑ̈ɑ̈nø. Jɑmmì mø nøg ɑ́kor yi yïn kidøøj, o mø ngenyø ócïbɑ cingí. Bïí pëggí yij dhwɑ̈ɑ̈ng wöw.’ “Kɑ nyel-ɑ ɑ́mëggi ɑ́lïp ɑ́ryew obëënø thyew, ɑkööbe kinni, ‘Wuö, yɑ ɑ́mëggí ɑ́lïp ɑ́ryew, o yɑ ɑ́yïddi ki ɑ́ryew møøgø.’ Kɑ köbbi yi wɑ̈n kinni, ‘Gwøgí døøj, yïn ɑ bɑ̈ng-ɑ døj, yï ngɑ̈ny gɑ̈ɑ̈nø. Jɑmmì mø nøg ɑ́kor yi yïn kidøøj, o mø ngenyø ócïbɑ cingí. Bïí pëggí yij dhwɑ̈ɑ̈ng wöw.’ “Kɑ nyel-ɑ ɑ́mëggi ɑ́lïp ɑ́kyel obëënø thyew, kɑ okööbø kinni, ‘Wuö, yï ngɑ̈nyi yi yɑn, yï bɑ jɑlkej, yï nyii kɑ̈jø kì keny me nuti kɑ̈g-ɑ yi yïn. Kɑ yï nyii cungø ki byel mø nuti kwør-ɑ yi yïn. Yɑ ɑ́bëëd yɑ óböggø, ɑkedhɑ kɑ ɑ́lïp mií kɑɑnɑ piny. Ngyënyyí ɑgɑk.’ “Aköbbii yi wɑ̈n kinni, ‘Yï bɑ bɑ̈ng me rɑj, dëlí ledh. Ngɑ̈nyi yi yïn kinni, yɑ nyii kɑ̈jø ki byel mø nuti kɑ̈g-ɑ yi yɑn, kɑ yɑ nyii cungø ki byel mø nuti kwør-ɑ yi yɑn. Pɑ lɑ̈w ke di kïdhí ngyënyyɑ beng, o ge di yuud yi yɑn ge nywølø? Anɑn kwɑnyu ɑ́lïp menɑni kì yïe, kɑ mëggi nyel-ɑ yïe di pyɑ̈rø. Mɑ́ ngɑn-ɑ yïe di jɑmmì ócigi thödhø, kɑ jɑmme óngënyø. O ngɑn-ɑ jɑdø cɑgg ɑ́ møg-ɑ nud ge nøg kì yïe ceg kɑ kwɑnyø. Kɑ bɑ̈ng-ɑ rɑj leeng wun wɑ̈g yij muudhø. Kenyɑni yije dɑ ywøg kí ngenyyi leg.’ “Keny-ɑ óbëën Nyɑɑr Dhɑnhø ki wëywödde kì yij dhwɑ̈nge, ópëggi wïj kwøøm rɑ̈ɑ̈dhø, o wɑ̈thi jurrì bënn ócugi kì bøle. Codhe, o gï dɑ̈ɑ̈ng yi en, ni kenyi dɑ̈ɑ̈ng römm ki ɑ́tegg yi jɑlkwɑ̈yø. Römm ócïbe wïj kyëje kɑ ɑ́tegg cïbe wïj cɑɑme. Codhe, o Rɑ̈dh tyëng-ɑ wïj kyëje köbbe kinni, ‘Bïu, wun ɑ tyëng-ɑ ɑ́gyëdh yi Wïyɑ. Kwɑnyu pödhø men-ɑ ɑ́pyël ɑ́ mi wun, kì bøli keny-ɑ ɑ́cɑɑg piny ki cwɑ̈jø. Mɑ́ yɑ ɑ́mɑg yi kɑ̈j, kɑ yɑ nëngi yi wun ki gïncɑm; yɑ ɑ́mɑg yi röödhø, kɑ yɑ nëngi yi wun ki gïn mɑdh. Yɑ ɑ́bëëd yɑn ɑ́ wëlø, kɑ yɑ kïdhi wun ød. Yɑ ɑ́cyɑ̈dh-ɑ nøw, kɑ yɑ ruug yi wun ki ógødh. Yɑ ɑ́bëëd dëlɑ orɑ̈mø, kɑ yɑ këëm yi wun. Yɑ ɑ́ying-ɑ ød møg, kɑ wu bï-ɑ be këëmi yɑn.’ “O møge óløøg yi tyëngdøj kinni, ‘Wuö, ɑ́ ɑ́wën ɑ ɑ́lidh wøn yïn rií dɑ kɑ̈j, kɑ yï nëngi yi wøn ki gïncɑm? Wɑlɑ̀ rií dɑ röödhø, kɑ yï nëngi yi wøn ki gïn mɑdh? O bɑ ɑ́wën ɑ ɑ́lidh wøn yïn, yï bɑ wëlø, kɑ yï kïdhi wøn ød? Wɑlɑ̀ yï cyɑ̈dh-ɑ nøw, kɑ yï ruug yi wøn ki ógødh? O bɑ ɑ́wën ɑ́bëëd dëlí orɑ̈mø, wɑlɑ̀ yï ying-ɑ ød mɑg, kɑ yï këëm yi wøn?’ Codhe, o mø gen løøg yi Rɑ̈dh kinni, ‘Yɑ köbb-ɑ wun kidyër kinni, gïn-ɑ göggu ngɑn-ɑ thinh kì kelli nyiimïɑ, ɑ́göggu’ yɑn ceth.’ “Codhe, o tyëng-ɑ wïj cɑɑme köbbe kinni, ‘Kedh wun kì butɑ, wu tyëng-ɑ kömi wun di cyënni Jwøk! Kedhu yij mɑc men-ɑ gïti ɑtheer, eni mɑny-ɑ ɑ́gwøg kipe Cethɑn geki wëywödde. Mɑ́ yɑ ɑ́mɑg yi kɑ̈j, de yɑ nuti nëngø yi wun ki gïncɑm. Yɑ ɑ́mɑg yi röödhø, de yɑ nuti nëngø yi wun ki gïn mɑdh. Yɑ ɑ́bëëd yɑ bɑ wëlø, de yɑ nuti kïdhi wun ød. Yɑ ɑ́cyɑ̈dh-ɑ nøw, de yɑ nuti ruugø yi wun ki ógødh. Yɑ ɑ́bëëd dëlɑ orɑ̈mø, kɑ yɑ ying-ɑ ød mɑg, de yɑ nuti këëm wun.’ “Codhe, o ge löggi gen kinni, ‘Wuö, ɑ́ ɑ́wën ɑ ɑ́lidh wøn yïn yï ómɑgø yi kɑ̈j wɑlɑ̀ yi röödhø; wɑlɑ̀ yï bɑ wëlø; wɑlɑ̀ yï cyɑ̈dh-ɑ nøw; wɑlɑ̀ dëlí orɑ̈mø; wɑlɑ̀ yï ying-ɑ ød mɑg, kɑ yï ocögø yï pɑ køny yi wøn?’ O mø gen óløøg yi Rɑ̈dh kinni, ‘Yɑ köbb-ɑ wun kidyër kinni, kɑ̀ nuti göggu ngɑn pere bogøn ki møgɑni, wu nuti gögg-ɑ yɑn thyew.’ Tyëngɑni ócɑy ki cɑ́y mø gïti ɑtheer, de tyëngdøj ókedhi yethi nënn-ɑ ɑtheer.” Keny-ɑ ɑ́rum Yëso ki kwøbi møgɑni ɑköbbe jøbɑnge kinni, “Ngɑ̈nyi yi wun kinni Kwëër Ákɑɑdh ógwøg kì bɑng cyɑ̈ng ɑ́ryew, o Nyɑɑr Dhɑnhø bɑ men muuj o gur wïj yɑdh ɑrïw.” Codhe, ɑ cugi jɑggi ókwër geki jøgdøngø kì gøl Kɑyɑpɑ̀ Ókwër-ɑ Dwøng. Kɑ dhøggi gen nywɑg gen kinni o Yëso mɑg yi gen, o nɑ̈g yi gen kì gød. De ge ɑ́kööb kinni, “De gïnɑni pɑ gwøg yi wɑ kì bøli kej kwër kipe ji ówër.” Kɑ̈ng-ɑ ɑ́ying Yëso Betɑnì kì gøl Sɑymøn jɑl-ɑ́ ree ɑ́di lɑ̈y, ɑbëën ngɑndhɑjø megø yïe, e ókɑ̈ddø ki ɑ́thïwi møw me yøme med, o ngewe teeg. Kɑ gø kønye wïje, kɑ̈ng-ɑ ɑ́bëëde kì tɑw. De keny-ɑ ɑ́liidh møgɑni yi jøbɑnge, kɑ pëthi gen órënyø, kɑ ge okööbø kinni, “Ede møwɑni ɑ wɑ̈dhii ki nyïɑ̈gø kinøw? Møwɑni pɑ di ngeew wɑ̈g ki ngyëny mø gïïr, kɑ ngyënyyɑni di mëggi tyëng-ɑ ɑbuur?” Angij møgɑni yi Yëso, kɑ gï köbbe kinni, “Wude ɑ goddi wun ki ngɑnɑni, gïn-ɑ ɑ́gögge yɑn døøj cɑrø. Mɑ́ tyëng-ɑ ɑbuur nud ceth kì kelli wun, de yɑ koo cög yɑ nud kì kelli wun. Møwɑni ɑ́kønye wïjɑ e gwir-ɑ yɑn kipe konyɑ. Yɑ köbb-ɑ wun kidyër kinni, gïn-ɑ ɑ́gwøg yi ngɑnɑni ókømmi kì kɑ̈jj-ɑ ópwönyi wöndøj men kì kömi piny bëne, o nyi pɑ̈rri møgɑni.” Codhe, kɑ Yeudɑ̀ jɑl Iskɑryøt kedh-ɑ yï jɑggi ókwër, ɑpëjje kinni, “Á gïn ɑ ómëggu yɑn kipe kinni o jɑlɑni twɑ̈nyɑ wun?” Kɑ gø thödhi gen ki ngyëny ɑ́tegg gɑ pyɑ̈r ɑ́dɑ̈g. Kɑ Yeudɑ̀ ócɑ̈gø kì bøli kenyɑni ki yɑb ki keny muuje gøn. Kɑ tyëngwöödø kedh-ɑ yï Yëso kì cyɑ̈ng-ɑ cɑ̈gi Kwëër Ákɑɑdh, kɑ ge okööbø kinni, “Á keny ɑ dwɑddi yi yïn, o gïi Kwëër Ákɑɑdh pyël yi wøn kì yije kiperí?” Kɑ gï köbbe kinni, “Kedhu kɑɑldwøng yï ngɑn-ɑni, kɑ köbbu kinni, ‘Jɑlpwönyø okööbø kinni, bøli kejɑ ɑ́cyɑ̈ngi, yɑ dwɑdd-ɑ gwøgi Kwëër Ákɑɑdh kì gølí wøki jøbɑngɑ.’ ” Kɑ møg-ɑ ɑ́kwøb yi Yëso gwøg yi jøbɑnge, kɑ jɑmmi Kwëër Ákɑɑdh pyël yi gen. Keny-ɑ ɑ́bëën wɑɑng thyënhø, ɑpëgge tɑw geki jøbɑnge pyɑ̈rø wïdɑ́ryew. Kɑ okööbø ge nudd ge ocyɑ̈mø kinni, “Yɑ köbb-ɑ wun kidyër kinni, yɑ óngeew yi nget ɑ́kyel kì kelli wun.” Kɑ ge okïïmø ki mendwøng, ɑcɑ̈gi gen ki pyënyii, e nyi pëjji ɑ́ dhɑnhø ɑ́kyel kinni, “Yï kømm-ɑ yɑn, Wuö?” Kɑ gï köbbe kinni, “Ngɑn-ɑ cingɑ órøøm yij lwøl ki cinge, bɑ en ɑ óngeew yɑn. Nyɑɑr Dhɑnhø óthøw kɑ yöö men-ɑ ógwedø kipere, de ngɑn-ɑ ngeewii ree dɑ cyën. Lɑ̈w keløg ngɑnɑni pɑ di nywøl.” Kɑ Yeudɑ̀ jɑlɑmolpiny okööbø kinni, “Yï kømm-ɑ yɑn, Wuö?” Alöggi Yëso kinni, “Ákwøb yi yïn ceth.” Kɑ Yëso ókɑ̈bbø ki ópun ge nudd ge ocyɑ̈mø, ɑpwøje Jwøk, kɑ ópunɑni pøde, kɑ gø mëgge jøbɑnge e okööbø kinni, “Kwɑnyu en kɑ cɑm wun. Men bɑ dëlɑ.” Kɑ ókɑ̈bbø ki óthɑ̈gi, ɑpwøje Jwøk, kɑ gø mëgge gïn, e okööbø kinni, “Mɑ̈dhi wun kì ree, wu bënn. Men bɑ remɑ; remi nywɑ̈g ki kwøb, men-ɑ ókyëër piny kipe ji mø ngenyø kipe lɑ̈ɑ̈nyi orøg. Yɑ köbb-ɑ wun kinni, yɑ pɑ cigi mɑdh ki møgi oløg, gïti cyɑ̈ng-ɑ ómɑdhɑ en e nyɑ̈n, kì Pödhi Wïyɑ.” Codhe, ɑmɑ̈ddi gen ki wör, kɑ ge kedh-ɑ wïj Kïti Dhetun. Kɑ ge köbbi yi Yëso kinni, “Yɑ ówiy piny yi wun tïn kì wɑ̈r, mɑ́ e ógwedø kì yij wɑ̈nyi kwërø kinni, ‘Jɑlkwɑ̈yø ónɑ̈g yi yɑn, o dyëg tɑy gen.’ De keny-ɑ ódhwödhɑ kì yij thøø, wu óyöömɑ Gɑlelì.” Alöggi Pïtør kinni, “Cɑgg yï wiy piny yi teedø, yï pɑ wiyɑ piny.” Aköbbii yi Yëso kinni, “Yɑ köbb-ɑ yïn kidyër kinni, yï ókyëdø kinni yɑ kwïj yi yïn tïn kì wɑ̈r, ki tyel ɑ́dɑ̈g, e óthwønh nuti köögø.” Aköbbii yi Pïtør kinni, “Cɑgg yɑ thøw kyeel ki yïn, yï pɑ kyer yi yɑn.” Kɑ jøbɑnge bënn okööbø kinøw thyew. Codhe, ɑdhwödh Yëso geki jøbɑnge, kɑ ge kedh-ɑ keny me cwøl ɑ́ Getsemɑnì. Kɑ gï köbbe kinni, “Bëëd wun kì keny, o yɑ kedh-ɑ kun-ɑcɑ̀ be lɑm.” Kɑ Pïtør kɑ̈ɑ̈le geki wɑ̈ddi Dhebedì ryeet. Kɑ ócɑ̈gø kïïmø pyëwe olïngø. Kɑ gï köbbe kinni, “Pyëwɑ olïngø ki mendwøng. Bëëd wun kì keny, kɑ wɑ nëën wɑ.” Akɑle kedhø kì buti gen ki kɑɑm me thinh, kɑ ree leenge piny bøle këële’ piny, kɑ ókwɑ̈jjø kinni, “Wïyø, keløg e ócuggø, nyiig óthɑ̈ngi orɑng men kì butɑ! De pɑth ki gïn-ɑ dwɑddɑ, den-ɑ́ gïn-ɑ dwɑddi yi yïn ɑ gwøg.” Keny-ɑ ɑ́døøge yï jøbɑnge, kɑ gï yuude ge nenø, kɑ Pïtør köbbe kinni, “Bene gen ɑgɑk, wu pɑ cuggi bëëdø wu onëënø kyeel ki yɑn, ki sɑɑ̀ ɑ́kyel yøw? Nëën wun, kɑ wu kwɑ̈jji wun, o wu cög wu pɑ thɑb. Pyëw otyëëdø, de dël nyøødh.” Acigi Yëso kedhø, kɑ ókwɑ̈jjø kinni, “Wïyø, keløg óthɑ̈ngɑni pɑ cuggi nyiigø, dɑ́ kinni mɑdhɑ en ceth, gwøg gïn-ɑ dwɑddi yi pyëwí.” Adwööge, kɑ gï yuude ge rum nenø, mɑ́ nyingi gen ɑ́dhɑ̈li bëëdø gɑ ɑyieb Kɑ gï cige wiyø, ɑkedhe kɑ ókwɑ̈jjø ni menɑni, ki dɑ̈ɑ̈g kwɑ̈jjø. Codhe, ɑbëëne yï jøbɑnge, kɑ gï köbbe kinni, “Wu nudd wu ceg-ɑ nenø, wu ywöm-ɑ ri wun? Bøli kenyɑni ɑ́cyɑ̈ngi, Nyɑɑr Dhɑnhø cïb-ɑ cinggi tyëngorøg. Dhwödh wun, kedh wɑ. Ngɑn-ɑ ngeew yɑn ɑ́wɑ̈nhi.” Kɑ Yeudɑ̀ ówɑ̈nhø e Yëso nudd e okööbø. O Yeudɑ̀ bɑ jɑl ɑ́kyel kì kelli jøbɑng Yëso gɑ pyɑ̈rø wïdɑ́ryew; ɑ́bï kɑ yɑy me dwøng. Tyëngɑni ɑ́ör-ɑ yi jɑggi ókwër geki jøgdøngø, ge ókɑ̈ddø pil kí lødh. Ge óthödhø ki ngïji yi ngɑn-ɑ ɑ́ngeewii kinni, “Ngɑn-ɑ ónuum yi yɑn, bene en. Kɑ mɑg wun.” Kɑ pödh-ɑ yï Yëso ceth, ɑkööbe kinni, “Mɑ̈dh rií jɑlpwönyø.” Kɑ gø nuume. Kɑ köbbi yi Yëso kinni, “Mɑ̈dh, gwøg gïn-ɑ́ pere ɑ́bëën yi yïn.” Codhe, ɑmɑg gen Yëso, kɑ gø kɑ̈l gen. Kɑ ɑ́kyel kì kelli jøbɑng Yëso pile wøødhe. Kɑ bɑ̈ng Ókwër-ɑ Dwøng gøje, kɑ yïthe juude wɑ̈g. Aköbbii yi Yëso kinni, “Dwøøg pilí keje, mɑ́ ngɑn cinge di pilø, nyi nɑ̈g-ɑ yi pilø. Wɑlɑ̀ yï orumø kinni, yɑ pɑ cuggi kwɑ̈jjø kì yï Wïyɑ, kɑ yɑ öde ki wëywödd møg lod yɑ̈yyì pyɑ̈rø wïdɑ́ryew? Keløg ɑ́ kinøw, møg-ɑ ying yij wɑ̈nyi kwërø ópɑ̈dhi kɑ̈jji gen kidï, mɑ́ e bɑ ɑgwed kinni ge bɑ møg cwöb?” Codhe, ɑköbbi teedø yi Yëso kinni, “Wu bï yïɑ, wu ókɑ̈ddø ki pil kí lødh de yɑ nɑ ngetigöj? Yɑ ce nyi bëëd ɑ Kengø, yɑ ópwönyø yethi cyɑ̈ng bënn, o yɑ nuti mɑɑg wun. De møgɑni bënn ɑ́gwøg kɑ per kinni o møg-ɑ ɑ́gwed yi jøtöng pɑ̈dhi gen kɑ̈jji gen.” Codhe, ɑwiyii yi jøbɑnge, kɑ ge órengø. Kɑ Yëso peej gøl Kɑyɑpɑ̀, Ókwër-ɑ Dwøng yi tyëng-ɑ ɑ́mɑgii. Kun-ɑ cugi jøpwönyi Cigg geki jøgdøngø. Kɑ Pïtør løg-ɑ bɑnge e cyɑ̈dhi e lɑ̈wi, gïti kɑ ɑ́wɑ̈dhe gøl Ókwër-ɑ Dwøng, kɑ pödh-ɑ kɑl, ɑpëgge kelli bölidhh e nenn-ɑ thumi kwøbbɑni. Ókwërr-ɑ døngø geki jø tøg burø bënn, ɑ́bëëd ge oyɑ̈bø ki møg myeen gen kömi Yëso kipe kinni o nɑ̈g yi gen. De ge ɑ́jɑd ki møg myeen köme, mɑ́ tyëng-ɑ ɑ́mënni köme ɑ́ceg-ɑ pyed. Codhe, kɑ jøg ɑ́ryew dhwödh-ɑ mɑl, ɑkööb gen kinni, “Jɑlɑni ɑ́kööb kinni, ‘Kengø men ócuggø cøør piny yi yɑn, kɑ døøgɑ ki gerø ki cyɑ̈ng ɑ́dɑ̈g.’ ” Kɑ Ókwër-ɑ Dwøng dhwödh-ɑ mɑl, ɑköbbe Yëso kinni, “Bong gïn løøg yi yïn, kì ri møg-ɑ gøøny yïn yi gen?” De Yëso ɑ́cög e okudø. Kɑ köbbi yi Ókwër-ɑ Dwøng kinni, “Yï ceg yi yɑn kɑ köbbi köngø ki nyingi Jwøng-ɑ Nëënø, köbbí wøn keløg yï bɑ Mesiy, Wɑ̈d Jwøk.” Kɑ köbbi yi Yëso kinni, “Møgɑni ɑ́kwøb yi yïn ceth. O yɑ köbb-ɑ wun kinni, Nyɑɑr Dhɑnhø ólidh yi wun e obëëdø kì wïj kyëëj Jwøk ɑ bong gïn dhɑlii, kɑ lidh yi wun e obëënø e kɑ̈ll-ɑ kömi pølli mɑl.” Codhe, kɑ Ókwër-ɑ Dwøng ógødhe kɑge, ɑkööbe kinni, “Jwøk ɑ́bwöl yi jɑlɑni. Bong kwøb møøgø mø dwɑddi yi wɑ këti! Møg-ɑ ɑ́bwöle Jwøk ɑ́lïngi yi wun. Wu rum ɑ dï?” Kɑ ge ólöggø kinni, “Jɑlɑni ɑ́røngi, o ceg-ɑ thøø ceth.” Codhe, kɑ nyinge nguddi yi gen ki lɑ́ɑ̀w, kɑ gø pwöd gen. Kenyi gøjii ge nyi ceg-ɑ kwøb kinni, “Yïn ɑ Mesiy, tööng! Á men ɑ ɑ́gøj yïn!” Pïtør ɑ́ying-ɑ wɑ̈g e obëëdø kì kɑl. Kɑ bɑ̈ng mɑ dhɑjø kì gøl Ókwër-ɑ Dwøng bï-ɑ yïe, ɑkööbe kinni, “Yïn thyew, yï ɑ́cyɑ̈dhi kɑ Yëso jɑl Gɑlelì.” Kɑ Pïtør okyëdø kì bøli gen bënn kinni, “Møg-ɑ kømmi yi yïn kwïj yi yɑn.” Kɑ kedh-ɑ ódɑ̈r-ɑ yiny-ɑ wɑ̈g. Kɑ lidh yi bɑ̈ng megø mɑ dhɑjø, kɑ tyëng-ɑ kenyɑni köbbe kinni, “Jɑɑl, ɑ́cyɑ̈dhi kɑ Yëso jɑl Nɑdhɑreth.” Kɑ Pïtør cig-ɑ kyëdø, kɑ óköngø kinni, “Jɑlɑni kwïj yi yɑn!” Kì bɑng nyɑ keny me thiinh, kɑ tyëng-ɑ ɑ́ying kenyɑni bï-ɑ yï Pïtør, kɑ gø köbbi gen kinni, “Kidyër, yï bɑ ɑ́kyel kì kelli gen, yï ceg kɑ ngijø kì ri kwøbbí!” Codhe, ɑkööb Pïtør kinni, “Yɑ ceg-ɑ köngø ceth kinni yɑ kømm-ɑ dyër! Yɑ ócɑy yi Jwøk keløg yɑ ceg-ɑ pyed! Jɑlɑni kwïj yi yɑn!” Kɑ óthwønh oköögø kì bøli kenyɑni ceth. Kɑ Pïtør møg-ɑ ɑ́köbbii yi Yëso pɑre; kɑ ɑ́kööbe kinni, “Yɑ köbb-ɑ yïn kidyër kinni, yï ókyëdø kinni yɑ kwïj yi yïn tïn kì wɑ̈r, ki tyel ɑ́dɑ̈g, e óthwønh nuti köögø.” Akedhi Pïtør wɑ̈g kɑ óywöngø ki ywøng dwøng. Keny-ɑ ɑ́ru wøw, ɑcung jɑggi ókwër geki jøgdøngø ki burø kipe kwøbbi nɑ̈gi Yëso. Atwöj gen cingge, kɑ gø muuj gen modïr Pilɑtø. Keny-ɑ ɑ́yodii yi Yeudɑ̀ jɑl-ɑ ɑ́twɑ̈ɑ̈ny kinni i Yëso ókuumø ki thøø, ɑpɑ̈dde kɑ ngyëny ɑ́tegg pyɑ̈r ɑ́dɑ̈g dögge jɑggi ókwër. Akööbe kinni, “Yɑ ɑ́göög ki orøg, mɑ́ yɑ ɑ́twɑny-ɑ ngɑn yïe bɑ̈r kipe kinni o nɑ̈g!” Kɑ ge ólöggø kinni, “Cwɑggi wøn ɑ́ ngø? Møgɑk bɑ møgí!” Kɑ ngyëny ɑ́tegg møgɑni leenge Kengø, ɑkedhe kɑ ree ngɑbe. Kɑ ngyënyyɑni kwɑny yi jɑggi ókwër, ɑkööb gen kinni, “Møg bɑ ngyënyyi remø, o bɑ ɑkerø yi Ciggee kinni ge pɑ kïdhi kömi ngyënyyi Kengø.” Codhe, ɑlwööb gen, kɑ ngyënyyɑni ngeew pwödhi bødhi lɑ̈b, ɑ́ men yije nyi koony tyëng-ɑ thøw gɑ wëll. Bene ɑ bɑnge cwølli pwönhɑni ɑ́ ‘Pwödhi Remø,’ pïd dicyɑ̈ngtïn. Kɑ møg-ɑ ɑ́kwøb yi Jermɑyɑ̀ jɑltöng pɑ̈dh-ɑ kɑ̈jji gen, gen ɑ møg-ɑ ɑ́kwøbe kinni, “Kɑ ngyëny ɑ́tegg pyɑ̈r ɑ́dɑ̈g kwɑny yi gen, gen ɑ ngyënyy-ɑ ɑ́cïb yi tyëng Isrɑil gɑ møg ngewii, kɑ ngyënyyɑni ngeew pwödhi bødhi lɑ̈b, ni kɑ ɑ́ceg yɑn yi Wë.” Kɑ Yëso kïdhi bøli modïr, kɑ gø pyëje kinni, “Bene yïn Rɑ̈ɑ̈dh Yeud?” Alöggi Yëso kinni, “Møgɑni ɑ́kwøb yi yïn ceth.” De møg-ɑ ɑ́gøønyii yi jɑggi kwër geki jøgdøngø nuti løøg en. Aköbbii yi Pilɑtø kinni, “Yï pɑ lïngø ki møg-ɑ gøøny yïn yi gen bënn?” De Yëso nuti wöl löggø, kɑ Modïr ceg-ɑ ngɑ̈ngø ki mendwøng. Kì cyɑ̈ɑ̈ng Kwëër Ákɑɑdh, Modïr-ɑ jyɑ̈gø ki nyingi mïri Römɑ̀, ɑ́bëëd e nyi göny-ɑ wɑ̈g kì ød mɑg ki dhɑnhø ɑ́kyel men-ɑ kwøb yi teedø kinni gøny. Kì bøli kenyɑni ɑ́bëëd e dɑ ɑmɑg me pere ngɑ̈nyi yi teedø bëne, me nyinge cwøl ɑ́ Yëso Bɑrɑbɑ̀. Keny-ɑ ɑ́cugi teedø, ɑpyëëj gen yi Pilɑtø kinni, “Á men ɑ dwɑddi yi wun, o gönyɑ wun? Wu dwɑdd-ɑ Yëso Bɑrɑbɑ̀, wɑlɑ̀ Yëso jɑl-ɑ cwøl ɑ́ Mesiy?” Ábëëd gø ngɑ̈nyi yi en kinni, Yëso ɑ́muujii kɑ ɑter yi jɑggi Yeud. Kɑ Pilɑtø ödi ki wöödø yi cyëge e nudd e ying-ɑ kej gøny kinni, “Ko di gïn göggí jɑl-ɑ yïe bɑ̈r ni men, mɑ́ pyëwɑ orɑ̈mø yi møg-ɑ ɑ́lɑ̈gɑ ɑ́wɑ̈ɑ̈ kipere.” Kɑ wɑ̈thi ji pɑng yi jɑggi ókwër geki jøgdøngø kinni cwøl gen Bɑrɑbɑ̀ kì yï Pilɑtø, kɑ Yëso nɑ̈g. Kɑ teedø pyëj yi Pilɑtø kinni, “Á men kì kelli gen ryeet ɑ dwɑddi yi wun, o gönyɑ wun?” Kɑ ge ólöggø kinni, “Bɑrɑbɑ̀!” Aköbbi gen yi Pilɑtø kinni, “Kɑ̀ bëëde kinøw, ɑ́ gïn ɑ göggɑ Yëso, jɑl-ɑ cwøl ɑ́ Mesiy?” Kɑ ge ólöggø bënn kinni, “Gur wïj yɑdh ɑrïw!” Kɑ Pilɑtø okööbø kinni, “Á kipe ngø? Á ngø ɑ ɑ́rënye?” Kɑ ge óryeerø ki mendwøng kinni, “Gur wïj yɑdh ɑrïw!” De kɑ ɑ́lidhii yi Pilɑtø kinni, kwøbbɑni dhɑ̈li, o ɑwøw køm-ɑ tugø, ɑkɑ̈bbe ki pï, kɑ cingge lwøge kì bøli teedø bëne, e okööbø kinni, “Yïɑ bɑ̈r ki remi jɑlɑni; bɑ ngɑn yïe bɑ̈r. Menɑni bɑ gwøøg wun.” Kɑ teedø bëne ólöggø kinni, “Wiy reme yinge kömi wøn, wøki nyigi wøn.” Codhe, ɑgönye gïn Bɑrɑbɑ̀. Kɑ Yëso mëgge teedø kɑ ɑ́rume pwödø, o gur wïj yɑdh ɑrïw. Kɑ Yëso mɑg yi jøliny Pilɑtø, kɑ gø kïdhi gen ódɑ̈r-ɑ dwøng, kɑ tyeeg dïdyërø yi kɑtïbɑ̀ bëne. Kɑ lɑne luny wɑ̈g yi gen, kɑ gø rug gen ki pɑrø mɑ ɑ́cwïcwïl. Kɑ ge okɑ̈dø ki yɑ̈ɑ̈r koodh, kɑ bødh wïje, kɑ cingi kyëje cïbi ki obej. Kɑ ri gen bøødh gen piny kì bøle, ge gɑgg-ɑ gøn kinni, “Wø mɑl-ɑ yïn, yïn ɑ Rɑ̈ɑ̈dh Yeud.” Kɑ köme nguddi gen ki lɑ́ɑ̀w, kɑ obej kwɑny yi gen, kɑ Yëso gøj ki wïje. Keny-ɑ ɑ́rum gen ki gɑggii, kɑ pɑrø luny wɑ̈g kì ree, ɑruug ge gøn ki ógudhe. Kɑ gø peej gen be gur wïj yɑdh ɑrïw. Keny-ɑ ɑ́kedhi gen wɑ̈g kì kɑɑl, ɑrøøm gen ki jɑl megø, mɑ jɑl Serin me cwøl ɑ́ Sɑymøn. Kɑ jɑlɑni cir yi gen kinni byele yɑdh ɑrïw Yëso. Kɑ ɑ́wɑ̈dhi gen keny-ɑ nyi cwøl ɑ́ Gölgöthɑ̀, men-ɑ wɑngi kinni, “Kej Cu Wïj.” Kɑ gø nëngi gen ki møgi oløg men-ɑ ótolø ki gïjø me keej, de gø ɑ́wɑ̈dhe belø; gø nuti mɑɑdh en. Keny-ɑ ɑ́rume gur wïj yɑdh ɑrïw, kɑ lɑ̈ne pɑ̈ngi yi gen, ge leng kɑ wél. Kɑ ge obëëdø kì kenyɑni, ge kor-ɑ gøn. Kɑ gøny-ɑ́ pere ɑ́kuumii gweed mɑl kinni, “Men bene Yëso Rɑ̈ɑ̈dh Yeud.” Codhe, ɑguddi gen wɑ̈thi yenh ɑrïw ki ɑ́muddi ji ɑ́ryew, kì bute; ɑ́kyel kì wïj kyëje kí ɑ́kyel kì wïj cɑɑme. Kɑ nyi gɑg yi ji-ɑ nyi kɑ̈l bute kì yöö, ge lëgg-ɑ wɑ̈thi gen, kinni, “Yïn ɑ ngɑn-ɑ di dhur Kengø piny, kɑ cigí gerø ki cyɑ̈ng ɑ́dɑ̈g; yiel rií, keløg yï bɑ Wɑ̈d Jwøk, kɑ yï bïí piny kì wïj yɑdh ɑrïw.” Kɑ gɑg yi jɑggi ókwër kí jøpwönyi Cigg geki jøgdøngø ni menɑni thyew, kɑ ge okööbø kinni, “Ji møøgø ɑ́yiele, de dhɑ̈li yieli ree. Keløg e bɑ Rɑ̈ɑ̈dh Isrɑil, wiy bëe piny kì wïj yɑdh ɑrïw, o yïëy yi wɑ. Jwøk nyii ngɑ̈dhø yi en, wiy gø yiele ɑnɑn, keløg e dwɑdd-ɑ yielii, mɑ́ e ɑ́kööb cem ɑ́ Wɑ̈d Jwøk!” Kɑ gwɑddi yi ɑ́muddi ji ni menɑni thyew, gen ɑ jøg-ɑ ɑ́gur wɑ̈thi yenh ɑrïw kyeel ki en. Kɑ piny ree løge muudhø, cɑg kì sɑɑ̀ pyɑ̈rø wïdɑ́ryew kì dicɑ̈ng gïti sɑɑ̀ ɑ́dɑ̈g kì böörø. Keny-ɑ ɑ́wɑ̈nhi sɑɑ̀ ɑ́dɑ̈g kì böörø, ɑcwöddi Yëso, e óryeerø kinni, “Elì, Elì, lɑmɑ̀ sɑbɑktɑnì.” Møgɑni wɑng-ɑ kinni, “Jwøgɑ, Jwøgɑ, yïde ɑ wiy yɑn piny?” Keny-ɑ ɑ́lïng ji-ɑ cungi kì kenyɑni ɑkööb gen kinni, “Jɑlɑni cwøll-ɑ Eliyɑ̀.” Kɑ jɑl ɑ́kyel kì kelli gen órengø, kɑ ókɑ̈bbø ki ispwøny, ɑjwɑ̈ɑ̈ge gøn yij møgi oløg me wɑj, kɑ gø gɑ̈ɑ̈ne wïj obej. Kɑ gø tïnge mɑl kinni o cwij yi Yëso. Kɑ ji møøgø okööbø kinni, “Nëën wɑ, men-ɑ óbëën Eliyɑ̀ be yielii.” Kɑ Yëso cig-ɑ ryeerø, ɑmije wɑnge. Kɑ sitɑrɑ̀ men-ɑ bɑ gëng kì yij Kengø ópyëdø kì dïdyëre, cɑg kì wïje mɑl gïti tyele piny. Kɑ piny onhɑ̈nhø kɑ tuggi kïttì ópyëdø. Kɑ rörri ji ri gen yieb gen, kɑ jii Jwøk mø gïïr tug kì yij thøø, kɑ ge bï-ɑ wɑ̈g kì yethi rörr; kɑ ge lidh yi ji mø gïïr kì kɑɑldwøng, kì bɑng kɑ ɑ́rum Yëso ki dhwödhø kì yij thøø. Keny-ɑ ɑ́liidh gïn-ɑ ɑ́cwöb kí kër-ɑ ɑ́kïïr piny yi dhɑbïdh geki deny-ɑ kor Yëso, ɑbwøg gen ki mendwøng, kɑ ge okööbø kinni, “Jɑlɑni ce ying-ɑ Wɑ̈d Jwøk kidyër!” Ádɑ tyëng-ɑ mɑ̈nn mø gïïr, mɑ ɑ́bëëd ge onëënø ge lɑ̈wi kì kenyɑni; tyëngɑni ɑ́lug ɑ bɑng Yëso, ge kɑ̈ɑ̈l ɑ Gɑlelì, o ɑ́bëëd ɑ́ gen ɑ kɑ̈llii. Meerì Mɑgdɑliyɑ̀ kí Meerì meyi Yɑgob geki Yosep, kí meyi wɑ̈ddi Dhebedì, ge ɑ́ying-ɑ kelli gen. Keny-ɑ ɑ́göög piny ki wɑɑng thyënhø, ɑbëën jɑl mɑ jɑlkɑ̈r kì Arimɑthiyɑ̀, me cwøl ɑ́ Yosep, o ɑ́bëëd ɑ́ jɑlbɑng Yëso thyew. Kɑ jɑlɑni kedh-ɑ yï Pilɑtø be kwɑjji dëël Yëso. Kɑ Pilɑtø ocïgø kinni mëggii. Kɑ Dhɑnhø kwɑny yi Yosep, kɑ gø kode ki ógødh kor-ɑ yöm. Kɑ gø cïbe yij bur me nyɑ̈n, men-ɑ ówödø kì yij kït, kɑ kït me dwøng ngyeele dhø burɑni, kɑ ókedhø. De Meerì Mɑgdɑliyɑ̀ kí Meerì men-ɑ kyeelø, ge ɑ́bëëd ɑ piny ge rwöm ki rörɑni. Kɑ jɑggi ókwër geki Jøpɑresì kedh-ɑ be yïddø ki Pilɑtø, dhuki kì cyɑ̈ɑ̈ng Sɑbɑth. Kɑ ge okööbø kinni, “Jɑldwøng, møg-ɑ ɑ́kwøb yi jɑlɑni keny-ɑ ɑ́bëëde e onëënø ɑ́pɑr yi wøn; ɑ́kööb kinni, ‘Yɑ ódhwödh kì yij thøø kì bɑng cyɑ̈ng ɑ́dɑ̈g.’ De muuj ki cigg kinni koor röre kidøøj gïti keny-ɑ óthumi cyɑ̈ng ɑ́dɑ̈g, kipe jøbɑnge óbï kɑ dële kwɑl yi gen, kɑ teedø köbbi gen kinni, ‘Ádwöög wɑ̈g kì yij thøø.’ Kɑ møg-ɑ ɑ́bɑ̈ɑ̈n kì tyeli mɑl, lod yi møg-ɑ óbï kì cyɑ̈n.” Aköbbi gen yi Pilɑtø kinni, “Kɑ̈bbi wun ki jøg mø kurø, kɑ kenyɑni kor kidøøj.” Akedh gen, kɑ dhø rörø mul kidøøj, ɑwïy gen ki jøg korii. Keny-ɑ ɑ́thumi cyɑ̈ɑ̈ng ywömø, ɑkedh Meerì Mɑgdɑliyɑ̀ geki Meerì men-ɑ kyeelø kì mwøl ceth, ge kedh-ɑ be lidhi rörø. Kɑ piny onhɑ̈nhø ki mendwøng, e wëywöni Wë obëënø, e kɑ̈ɑ̈l-ɑ mɑl, kɑ kït ngyeele wɑ̈ye, kɑ pëgg-ɑ kömi gøn. Ánënni e ceg-ɑ rɑ̈ɑ̈dø ni loodh mɑl, o ógødhe tɑr ni ɑ́piy. Kɑ tyëng-ɑ kurø obwøgø yi gøn, kɑ dëlli gen okïïrø, kɑ ge nɑ tyëngthøø. Aköbbi tyëng-ɑ mɑ̈nn yi wëywödø kinni, “Wu ko böggi, mɑ́ yɑ ngɑ̈ny wøw kinni, wu yɑb-ɑ Yëso, jɑl-ɑ ɑ́gur wïj yɑdh ɑrïw. Tøøk kì keny; ɑ́dhwödh kì yij thøø ni kɑ ɑ́kööbe. Bïu, lidhu keny-ɑ́ yije ɑ́di en. Jwɑnu kedhø, kɑ jøbɑnge köbbu kinni, ‘Ádhwödh kì yij thøø, de ɑ́møøl bøli wun; ɑ́kedhi Gɑlelì, ólidh yi wun kì kunɑni.’ Wɑ̈thi wun ko wïl ki møg-ɑ ɑ́köbbɑ wun.” Kɑ ge jwɑn-ɑ dhwödhø kì buti rörø, ge óböggø, o pëthi gen med cɑrø, kɑ ge reng-ɑ be köbbi wöönɑni jøbɑnge. Arøøm gen ki Yëso, kɑ gï köbbe kinni, “Wu óbëëdø ki mër.” Akedhi tyëngɑni yïe, kɑ tyelle mɑg gen, kɑ mɑl yi gen. Codhe, ɑköbbi gen yi Yëso kinni, “Wu ko böggi, de köbbu nyiimïɑ, kinni kedhi gen Gɑlelì, yɑ ólidh yi gen kì kunɑni.” De kɑ̈ng-ɑ́ nudd tyëng-ɑ mɑ̈nn dwöög-ɑ kɑɑl, kwï jøg-ɑ ɑ́kor rörø ɑ́jwɑni, kɑ jɑggi ókwër köbbi gen gïg-ɑ ɑ́cwöb bënn. Kɑ jɑggi ókwër ócugø kì kej ɑ́kyel geki jøgdøngø, kɑ dhøggi gen nywɑg gen. Kɑ jøliny thödhi yi gen ki ngyëny mø gïïr, kɑ gï köbbi gen kinni, “Köbbu teedø kinni, ‘Jøbɑnge bëënø kì wɑ̈r, kɑ dële kwɑl yi gen wø onenø.’ De keløg kwøbbɑni ólïngi yi modïr, wïje ópɑng yi wøn, o bongii gïn lïngø kì pëthi wun.” Codhe, ɑkwɑɑny ngyëny yi gen, kɑ ge ogöögø ni kɑ ɑ́köbbi gen ceth. Kɑ kwøbbɑni otɑyø kì kelli Yeud, o ge nudd ge okømmø gïti dicyɑ̈ngtïn. Kɑ jøbɑnge, gɑ pyɑ̈rø wïdɑ́kyel, kedh-ɑ Gɑlelì wïj kït, kun-ɑ ɑ́köbbi gen yi Yëso. Keny-ɑ ɑ́lidhii yi gen, ɑmɑlii yi gen, ngö kwï gen yethi gen ópyërø. Abëën Yëso yï gen, kɑ okööbø kinni, “Yɑ ɑ́rum ki mëggi tegø bëne kì mɑl kí piny. Kɑ ɑ́rum bëëde kinøw, kedhu yï ji kì kömi piny bëne, kɑ ge gwøg wun gɑ jiɑ, kɑ ge jwɑ̈ɑ̈g wun ki nyingi Wïy kí Wɑ̈d kí Wëykwërø, kɑ ge pwönyi wun ki mïdhi møg-ɑ ɑ́cïgɑ wun bënn. O yɑ óbëëdø kì kelli wun ceth kì yethi cyɑ̈ng bënn gïti thumi piny.” Men bene Wöndøj mi Yëso Mesiy Wɑ̈d Jwøk. Ácɑ̈gi ni kɑ ógwedii kì yij wɑ̈nyi Icɑyɑ̀ jɑltöng kinni, “Jwøk ɑ́kööb kinni, ‘Jɑlwöönɑ óörɑ bølí o tyenye yuuí.’ Dɑ cwɑg mø cwöddi kì yij pɑ̈l kinni, ‘Tyenyu yöö kipe Wë, kɑ yëthe gwøg wun gɑ óbödh.’ ” Jøn Jɑljwɑ̈g ɑ́cwöb kì yij pɑ̈l e jwɑ̈ɑ̈g-ɑ ji, o ópwönyø kinni yewi ji kipe lɑ̈ɑ̈nyi orøg. Kɑ tyëng myërri Yeudiyɑ̀ kí tyëng Yerusɑlem bënn nyi kedh-ɑ pɑ̈l yïe, kɑ gï nyi jwɑ̈ɑ̈ge kì Nɑm Urdun, ge töng-ɑ orøøg gen. Jøn ɑ́rug-ɑ ógødh men-ɑ ócwɑ̈jø ki yëyyi ɑmɑlø, o wëne bɑ dël, o nyi cɑm-ɑ bɑ̈nyy kí møøw kïc. Kɑ ji nyi köbbe kinni, “Jɑl-ɑ óbï kì bɑngɑ, pëddi döng kibølɑ. Yɑ pɑ døøj ki kuung piny kì bøle kɑ wɑrre pɑ̈ɑ̈dɑ wɑ̈g kì tyelle. Yɑ jwɑ̈ɑ̈g-ɑ wun ki pï, de wu ójwɑ̈ɑ̈ge kɑ Wëykwërø.” Kì yethi cyɑ̈nggɑni ɑ ɑ́bëën Yëso, e kɑ̈ɑ̈l-ɑ Nɑdhɑreth kì Gɑlelì, kɑ jwɑ̈ɑ̈g yi Jøn kì Nɑm Urdun. Kì bøli keny-ɑ ɑ́bëëne wɑ̈g kì yethi pï, kɑ mɑl lidhe ree yieeb en, o Wëy bï-ɑ piny köme e nɑ ɑkur. Kɑ cwɑg obëënø ge kɑ̈ɑ̈l-ɑ mɑl kinni, “Yï bɑ dïl Wɑ̈dɑ. Pyëwɑ med ki yïn.” Kɑ Yëso kïdhi pɑ̈l yi Wëykwërø. Kɑ obëëdø kì kunɑni ki cyɑ̈ng pyɑ̈r ɑ́ngwen, e nyii pɑ̈nyø yi Cethɑn. Ábëëd ɑ kelli lɑ̈yyi pɑ̈l, e okɑ̈llø yi wëywödd. Keny-ɑ ɑ́rum Jøn ki kïdhi ød mɑg, ɑkedhi Yëso Gɑlelì, e pwöny-ɑ wöndøj men-ɑ kɑ̈ɑ̈l yï Jwøk. Kɑ okööbø kinni, “Bøli kenyɑni ɑ́wɑ̈nhi, o Pödhi Jwøk ɑ́cyɑ̈ngi. Wiy wun orøg, kɑ Wöndøj yïëy wun.” Keny-ɑ ɑ́kedh Yëso e ócyɑ̈dhø kì thɑ̈ngi Tɑɑy Gɑlelì, ɑlïdhe ki óyïnnì ɑ́ryew; Sɑymøn geki Andrø ómen, ge ocögø ki bøy. Kɑ ge köbbi yi Yëso kinni, “Bïu bɑngɑ, o wu løgɑ jømɑy ki ji.” Awiy gen bøyyi gen piny, kɑ ge løg-ɑ bɑnge. Kɑ kɑl-ɑ kedhø, ɑcige lïdhø ki nyiimëëg ɑ́ryew møøgø; Yɑgob geki Jøn wɑ̈ddi Dhebedì. Ge ɑ́bëëd ge pyël-ɑ bøyy kì yij yɑ̈ɑ̈y gen. Acwøle gïn, kɑ wïyi gen Dhebedì wiy gen yij morkɑb, geki jøg-ɑ bɑ ɑkïr. Kɑ ge løg-ɑ bɑng Yëso. Akedhi gen kɑɑl Kɑpernɑum. Kɑ Yëso kedh-ɑ sinɑgøg kì cyɑ̈ɑ̈ng Sɑbɑth geki jøbɑnge, kɑ ócɑ̈gø ki pwönyø. Kɑ teen-ɑ ɑ́lïngi møge ongɑ̈ngø yi pwönye, mɑ́ e pɑ pwönyi ni jøpwönyi Cigg; de ɑ́pwönyi kɑ tegø. Kɑ jɑl me ree di wëy me rɑj kedh-ɑ sinɑgøg, ɑcɑ̈ge ryeerø kinni, “Yëso jɑl Nɑdhɑreth, yïde ki wøn? Yï ɑ́bï-ɑ be nɑ̈gi wøn? Yï ngɑ̈nyi yi yɑn; yï bɑ Ngeti Kwërø men-ɑ ɑ́ör yi Jwøk!” Kɑ wëyɑni köbbi yi Yëso kinni, “Kud, kɑ yï bïí wɑ̈g kì ree!” Kɑ jɑlɑni tyelli yi wëyɑni, ɑryeere kɑ bï-ɑ wɑ̈g kì ree. Kɑ teedø ongɑ̈ngø bënn, ɑpyënyi gen ri gen kinni, “Men bɑ ngø? Ceg bëëdø ɑ́ pwönyø me nyɑ̈n! Jɑɑl yïe dɑ tegø men köbbe wëyrijjø, kɑ dhøge lïngi yi gen!” Kɑ per Yëso jwɑn-ɑ tɑɑy yethi myërri modïri Gɑlelì bënn. Adhwödh Yëso kì sinɑgøg geki jøbɑnge; Yɑgob kí Jøn, kɑ ge kedh-ɑ gøl yɑɑ Sɑymøn geki Andrø. Øri Sɑymøn, meyi cyëge, ɑ́bëëd e buud-ɑ piny yi rɑ̈ɑ̈m dële, o dële lëëdh. Kɑ pere köbbi Yëso. Akedhi Yëso yïe, kɑ cinge mɑge, ɑkønye gøn ki dhwödhi mɑl. Akwööj dëël ngɑnɑni, kɑ kedh-ɑ be kɑ̈lli gen. Kì thyënhø cɑ̈ng rum buddø, kɑ tyëng-ɑ dëlli gen rɑ̈mø geki møg-ɑ wɑ̈thi gen di ɑ́nɑ̈gø muuj Yëso bënn. Kɑ tyëng kɑɑlɑni bënn ócugø kì dhø gølɑni. Kɑ ji mø gïïr, mø dëlli gen rɑ̈mø yi gïg mø bɑ̈nni yiele. Kɑ wëyrijjø mø ngenyø ryëëme wɑ̈g. Kɑ wëyrijjø møgɑni kyëdde kinni, ge ko kööb, mɑ́ e ngɑ̈nyi yi gen. Kɑ Yëso odhwödhø kì kɑɑl dhuki kì mwøl, e cɑ̈ng nuti tuulø. Kɑ kedh-ɑ kun mɑlle Jwøk e kete. Kɑ Sɑymøn geki jøg-ɑ ɑ́cyɑ̈dhi gen kedh-ɑ be yɑbii. Ayod ge gøn, kɑ gø köbbi gen kinni, “Dhɑnhø bëne yɑb-ɑ yïn.” Kɑ gï köbbe kinni, “Kedhi wɑ yethi myërr-ɑ bølee, o yɑ pwönyɑ kì kɑ̈jjɑni thyew, mɑ́ bene per møgɑni ɑ ɑ́bëënɑ.” Kɑ myërri Gɑlelì tyëge bënn, e ópwönyø kì sinɑgøgg. Kɑ wëyrijjø nyi ryeeme wɑ̈g kì ri ji. Kɑ jɑl me ree di lɑ̈y bï-ɑ yï Yëso, ɑbøødhe ree piny kì bøle, kɑ gø kwɑjje kinni, “Ke dwɑddií, yɑ ócuggø gwøgø yi yïn o yɑ dhïwɑ.” Kɑ Yëso yije óywöngø kipe jɑlɑni, ɑrïje cinge, kɑ gø nywɑle, codhe ɑköbbe gøn kinni, “Di dwɑddø yi yɑn, wiy dëlí dönye.” Kɑ lɑ̈y ólɑ̈ɑ̈nyø kì ree, kɑ dële ódönyø. Acem wɑɑng jɑlɑni ki mendwøng yi Yëso, kɑ gø jwɑne ki ör yöö; kɑ ɑ́rume köbbii kinni, “Ko di ngɑn köbbi yi yïn, de kedh, kɑ rií nyudhí ókwërø. Kɑ yï muuj ki gëëdhi kipe kɑ ɑ́dönyi dëlí ni møg-ɑ ɑ́ceg yi Mosɑ̀, ɑ́ nyuudhi kì bøli teedø.” De jɑlɑni ɑ́kedh e kømm-ɑ kwøbbɑni kì kɑ̈jj bënn. Kɑ Yëso ódhɑ̈lø cyɑ̈dhø kì yethi myërr, de ɑ́bëëd ɑ pɑ̈l. Kɑ ji bënn nyi kedh-ɑ yïe, ge kɑ̈ɑ̈l-ɑ kɑ̈jj mø gïïr. Keny-ɑ ɑ́døøg Yëso Kɑpernɑum, kì bɑng cyɑ̈ng mø nøg, ɑlïngi pere yi teedø kinni, i ying-ɑ kɑl. Kɑ ji ócugø ge gïïr, kɑ kɑl opɑ̈ngø gïti dhøge. Kɑ gï pwönye ki kwøbbi Jwøk. Kɑ ji møøgø bï-ɑ yïe ge kɑ̈ll-ɑ jɑl me dële dwɑnyø, e otyëddø yi ji ɑ́ngwen. Keny-ɑ ɑ́dhɑɑl gen yi wɑ̈dhi buti Yëso yi ngenyi ji, ɑyedhi gen wïj óthɑɑng ød, kɑ keny-ɑ rwöm ki Yëso pɑ̈d yi gen. Codhe ɑluudh gen jɑl-ɑ dële dwɑnyø piny ki pyëne. Keny-ɑ ɑ́liidh yïëyi gen yi Yëso, ɑköbbe jɑl-ɑ dële dwɑnyø kinni, “Wɑ̈dɑ, lɑ́ɑ̀w ɑ́dwöög piny kipe orøgí.” Kɑ kwï jøpwönyi Cigg møg-ɑ bëëdø kì kenyɑni orumø ki pëthi gen kinni, “Ede jɑlɑni ɑ kööbe kinøw? Men bɑ bwöli nyingi Jwøk! Pɑth ki Jwøk kete ɑ cuggi dwöögi lɑ́ɑ̀w piny kipe orøg?” De møg-ɑ rømmi yi gen ki pëthi gen ɑ́yod yi Yëso, ɑköbbe gïn kinni, “Wude ɑ rum wun kinøw ki pëthi wun? Á ngø ɑ yöd? Köbbi ɑdwɑny kinni, ‘Lɑ́ɑ̀w ɑ́dwöög piny kipe orøgí,’ wɑlɑ̀ köbbe kinni, ‘Dhwöödh, kwɑny pyëní, kɑ yï kedh’? De wu ónyudhɑ kinni Nyɑɑr Dhɑnhø yïe dɑ tegø kì kömi piny, men dwööge lɑ́ɑ̀w piny kipe orøg.” Aköbbe ɑdwɑny kinni, “Yɑ köbb-ɑ yïn, dhwöödh, bɑn pyëní, kɑ yï kedhí gølí.” Adhwödh jɑlɑni kɑ pyëne bɑne, ɑkedhe wɑ̈g e onennø yi teedø bëne. Kɑ teedø ongɑ̈ngø ki mendwøng, kɑ Jwøk lejji gen, ɑkööb gen kinni, “Wø nuti wöl lïdhø ki gïn ni men!” Kɑ Yëso døøg-ɑ kömi Tɑɑy Gɑlelì. Kɑ ji mø gïïr ócugø kì bute, kɑ gï pwönye. Kɑ ɑ́dhwödhe kì kenyɑni, ɑlidhe Leebì wɑ̈d Alpɑ̀, e obëëdø kì kej gwɑ̈j. Kɑ gø köbbe kinni, “Bïí bɑngɑ.” Adhwödhe, kɑ løg-ɑ bɑnge. Yëso ɑ́bëëd e ocyɑ̈mø kì gøl Leebì geki jøbɑnge, kí jøgwɑ̈j geki luuy møg-ɑ ɑ́lugi kì bɑnge. Keny-ɑ ɑ́lidhii yi jøpwönyi Cigg møg-ɑ bɑ Jøpɑresì kinni, Yëso onywɑ̈gø geki luuy kí jøgwɑ̈j, ɑköbbi gen jøbɑnge kinni, “Ede ɑ nywɑ̈ge ki jøgwɑ̈j geki luuy?” Keny-ɑ ɑ́lïngi møgɑni yi Yëso, ɑköbbe gïn kinni, “Tyëng-ɑ dëlli gen yööd bong ɑkïm me nyi dwɑddi yi gen, dɑ́ tyëng-ɑ dëlli gen rɑ̈mø ɑ nyi dwɑddi ɑkïm. Yɑ nuti bëën-ɑ be cwøli tyëngdøj den-ɑ́ tyëngorøg.” Jøbɑng Jøn geki Jøpɑresì ɑ́bëëd ge othuumø. Kɑ ji møøgø bï-ɑ yï Yëso, kɑ gø pyëj gen kinni, “Gede jøbɑng Jøn geki Jøpɑresì ɑ nyi thuum gen, o jøbɑngí pɑ nyi thuumø?” Kɑ mø gen løøg yi Yëso kinni, “Jønywöm pɑ nyi thuumø e jɑlnywöm nud kì kelli gen. Ge pɑ cuggi thuumø. De cyɑ̈ng megø óbï; eni cyɑ̈ng-ɑ ókɑ̈ɑ̈l jɑlnywöm kì kelli gen, codhe o ge óthuum gen cyee. “Bong ngɑn nyi buul ógødh me bɑ kwɑ̈ɑ̈l ki ógødh me nyɑ̈n, kipe ógønh-ɑ nyɑ̈n ree óruude wɑ̈g kì ri kwɑ̈ɑ̈lɑni kɑ keny-ɑ ɑ́buul ópëddø lɑ̈nyyø. O bong ngɑn nyi kïdhi møgi oløg me nyɑ̈n yethi ɑthebb mø kɑ̈gi gen dööng, kipe ɑthebbɑni ópyëëd, kɑ møngɑni ogɑ̈gø geki ɑthebbɑni. De møng-ɑ nyɑ̈n nyi kïdh-ɑ yethi ɑthebb mø nyɑ̈n.” Kɑ Yëso cør-ɑ yethi pwödh geki jøbɑnge, kì cyɑ̈ɑ̈ng Sɑbɑth. Kɑ jøbɑnge omödø ki byel, ge kedh ge ócyɑ̈dhø. Kɑ Yëso köbbi yi Jøpɑresì kinni, “Lidh jøbɑngí! Gede ɑ göög gen ki gïn-ɑ bɑ ɑkerø gwøgø kì cyɑ̈ɑ̈ng Sɑbɑth?” Kɑ ge köbbi yi Yëso kinni, “Wu nuti pɑ̈nyi rɑng ki gïn-ɑ ɑ́gwøg yi Debïd kɑ ɑ́jɑde ki gïn cɑ̈mme kɑ̈j geki jøg-ɑ ɑ́cyɑ̈dhi ki en? Kí kɑ ɑ́kedhe ød Jwøk, kɑ ópùn-ɑ bɑ gëëdhi cɑm gen, e nyi cɑm-ɑ yi ókwër keti gen? Møgɑni nuti cwöbø ɑ́ Abiyɑthɑr ɑ bɑ Ókwër-ɑ Dwøng?” Kɑ gï köbbe kinni, “Cyɑ̈ɑ̈ng Sɑbɑth ɑ́gwøg kɑ per dhɑnhø, de dhɑnhø nuti cwɑ̈jø kɑ per Sɑbɑth. Kɑ ɑ́rum bëëde kinøw, Nyɑɑr Dhɑnhø bɑ Wïi Sɑbɑth.” Codhe, ɑkedhi Yëso sinɑgøg. O ɑ́dɑ jɑl me cinge dhëgø kì kenyɑni. Kenyɑni ɑ́dɑ ji mɑ ɑ́nennii, ying jɑlɑni ódi yielø yi en kì cyɑ̈ɑ̈ng Sɑbɑth, kipe kinni o gø gøøny gen. Kɑ jɑl-ɑ cinge dhëgø köbbe kinni, “Dhwöödh kɑ yï bïí cungí kì dïdyër.” Kɑ teedø pyëje kinni, “Á gïn ɑ bɑ ɑyïëy yi Ciggee kì cyɑ̈ɑ̈ng Sɑbɑth, gwøgi gïndøj wɑlɑ̀ gïnrɑj? Yieli dhɑnhø wɑlɑ̀ nɑ̈gii?” Kɑ ri gen dhïïg gen. Kɑ owïïdø ki nënnø kì kelli gïn, e ómɑgø yi liny, o yije orɑ̈mø kipe tegi wɑ̈thi gen. Aköbbe jɑl-ɑ cinge dhëgø kinni, “Rïj cingí.” Kɑ gø rïje, kɑ cinge døøg-ɑ keje. Kɑ Jøpɑresì ókedhø kì sinɑgøg, kɑ dhøggi gen jwɑn gen ki nywɑgø geki jø Ërödøs, kɑ ge oyɑ̈bø ki yöö men nɑ̈g gen Yëso. Kɑ Yëso geki jøbɑnge odhwödhø, kɑ ge kedh-ɑ thɑ̈ngi Tɑɑy Gɑlelì. Kɑ ji mø gïïr løg-ɑ bɑnge, ge kɑ̈ɑ̈l-ɑ myërri Gɑlelì kí Yeudiyɑ̀, kí Yerusɑlem, kí Idumiyɑ̀, kí løøg Nɑm Urdun kì wɑɑng cyɑ̈ɑ̈ng mwøl geki myërr-ɑ buti Suur kí Sïdön. Jiɑni bënn ɑ́bï yï Yëso mɑ́ gïg-ɑ gøgge bënn ɑ́lïngi yi gen. Aköbbe jøbɑnge kinni, yɑ̈bbi ki morkɑb, o cöge e pɑ dhing yi teedø. Ji mø gïïr ɑ́yiele, kɑ tyëng-ɑ dëlli gen rɑ̈mø bënn rïjj-ɑ bute, kipe kinni o gø nywɑl gen. Tyëng-ɑ ri gen di wëyrijjø, ri gen nyi bøødh ge’ piny kì bøle, kɑ ge nyii ryeerø kinni, “Yï bɑ Wɑ̈d Jwøk!” Kɑ nyingi gen tie ki cemø, kinni pere ko dwønggi gen. Kɑ Yëso kedh-ɑ wïj kït, kɑ jøg-ɑ ɑ́dwɑdde cwøle. Kɑ ge kedh-ɑ yïe, ɑkɑ̈bbe ki pyɑ̈rø wïdɑ́ryew, kɑ gï cɑge gɑ tyëngwöödø, møg cyɑ̈dhi ki en, o gï nyi öre be pwönyø. O yï gen dɑ tegø men ryëmmi gen ki wëyrijjø. Jøgɑni gɑ pyɑ̈rø wïdɑ́ryew bɑ Sɑymøn ɑ ɑ́cɑg yi Yëso ɑ́ Pïtør, kí wɑ̈ddi Dhebedì, Yɑgob geki Jøn ómen, gen ɑ ɑ́cɑg yi en gɑ Wɑ̈ddi Pööd Mɑl. Kí Andrø, kí Pïlïp, kí Bɑrthølømɑøs, kí Mɑthyëw, kí Tömɑs, kí Yɑgob wɑ̈d Alpɑ̀, kí Thɑdeøs, kí Sɑymøn Lunø, kí Yeudɑ̀ jɑl Iskɑryøt, ɑ ɑ́ngeew Yëso. Kɑ Yëso kedh-ɑ pɑɑ gen. Kɑ teedø ódøøgø cugø, kɑ Yëso ójɑ̈ddø ki keny cyɑ̈me geki jøbɑnge. Keny-ɑ ɑ́lïngi møgɑni yi wɑdde, ɑkedhi gen be mɑgii, mɑ́ kwï ji ɑ́kööb kinni, “Wïje ɑ́mɑg yi ɑ́nɑ̈gø!” Kwï jøpwönyi Cigg møg-ɑ ɑ́kɑ̈ɑ̈l Yerusɑlem ɑ́bëëd ge okööbø kinni, “Ree dɑ Bɑɑldhebul! Bɑ jɑngi wëyrijjø ɑ nëngii ki teng-ɑ ryemme wëyrijjø.” Codhe, ɑcwøøl teedø yi Yëso. Kɑ gï köbbe ki gɑ́j kinni, “Cethɑn ócuggø ryemi Cethɑn kidï? Keløg pödhø ópyëdø, kɑ ónyïɑ̈ggø ki ree kete, pönhɑni ceg-ɑ pɑ̈ɑ̈dhø. O keløg kɑl ópyëdø, gølɑni ceg-ɑ pɑ̈ɑ̈dhø. O keløg pödhi Cethɑn ónyïɑ̈ggø ki ree, pɑ cuggi bëëdø; ceg-ɑ dɑ̈ngø kɑ ópɑ̈ɑ̈dhø. “O bong ngɑn cuggi kedhi gøl jɑl me teg be yɑgi jɑmme, e jɑlkɑl nuti twööj en møti; codhe o gøle yɑge cyee. “Yɑ köbb-ɑ wun kidyër kinni, lɑ́ɑ̀w ódwöög piny kipe orøøg teedø bëne, geki kwøbb-ɑ rijjø møg-ɑ nyi kømmi yi gen bënn. De ngɑn-ɑ nyi kööbø kì ri Wëykwërø ki kwøb mø rijjø, lɑ́ɑ̀w pɑ dwöög piny kipere, de orøge óying köme gïti ɑtheer.” (Møgɑni ɑ́kwøb yi Yëso kipe kɑ ɑ́kööb kwï teedø kinni, “Ree dɑ wëy me rɑj.”) Kɑ meyi Yëso geki nyiimen yɑɑg-ɑ cwøw obëënø. Kɑ ge ócungø kì wɑ̈g, ɑöd gen, ge cwøl-ɑ gøn. Kɑ Yëso köbbi yi teen-ɑ bëëdø kì bute kinni, “Lidh, meyí kí nyiimyëw ge ying-ɑ wɑ̈g, ge cwøll-ɑ yïn.” Kɑ ólöggø kinni, “Meyɑ kí nyiimïɑ ɑ́ møg?” Alïïdhe ri tyëng-ɑ bëëdø kì bute, kɑ okööbø kinni, “Meyɑ kí nyiimïɑ ek! Mɑ́ ngɑn-ɑ nyi gwøg gïn-ɑ dwɑddi yi Jwøk, bene en ɑ bɑ ómïɑ, kí nyimïɑ, kí meyɑ.” Kɑ Yëso ócɑ̈gø pwönyø ki thɑ̈ngi Tɑɑy Gɑlelì. Kɑ dhing yi ji mø gïïr, ɑkɑdhe yij morkɑb, kɑ pëgg-ɑ yije kì nɑm. De teedø bëne ying-ɑ thɑ̈ngi nɑm kì wɑ̈g. Kɑ gï pwönye ki kwøb mø gïïr kì yethi gɑ́j. Kɑ gï köbbe kì yij pwönye kinni, “Lïng wun! Jɑl megø ɑ́kedhi be wïïwø ki köödh. Keny-ɑ ɑ́wïïwe, kɑ kwï köödh dëëm-ɑ tøg yöö. Abëën winy, kɑ gï cɑm gen. Kɑ köödh møøgø dëëm-ɑ keny mɑ kïttì, me lɑ̈bø reeb kì köme. Kɑ ge jwɑn-ɑ twïyø, yi kɑ̀ reb lɑ̈bø. Keny-ɑ ɑ́yer cɑ̈ng, ɑrɑ̈bbi gen, kɑ ge othwøwø yi kɑ̀ bëëd ge bong byerri gen. Kɑ kwï köödh dëëm-ɑ kelli koodh. Kɑ koodh ódøngø, kɑ byel twij yi koodh, kɑ ge ocögø ge pɑ kɑ̈ni ki nying. Kɑ köödh møøgø dëëm-ɑ yij lɑ̈bø me med, keny-ɑ ɑ́twïy gen kɑ ge ódøngø, kɑ kwï gen ókɑ̈nø ki nying pyɑ̈r ɑ́dɑ̈g, kɑ møøgø ókɑ̈nø ki pyɑ̈r ɑ́bïkyel, kɑ møøgø ókɑ̈nø ki miyø.” Kɑ okööbø kinni, “Ngɑn di yïthhe mø lïnge, wiy lïnge.” Keny-ɑ ɑ́dɑ̈ngi Yëso ki teedø, ɑkwɑjjii yi tyëng-ɑ ɑ́lugi kì bɑnge, kí tyëngwöödø gɑ pyɑ̈rø wïdɑ́ryew, kinni lwøbe gïn-ɑ wɑngi yi gɑ́jɑni. Alöggi Yëso kinni, “Bene wun ɑ ɑ́nëngi ki ngɑ̈nyi wøw ki møg-ɑ nuti nyodhø kipe Pödhi Jwøk. De tyëng-ɑ wɑ̈g kwøb bënn lïngi yi gen ɑ yethi gɑ́j, kipe kinni, ‘Ge ónëënø, kɑ ge onëënø, de bong gïn lidh yi gen; ge ólïngø, kɑ ge olïngø de kwøbbɑni pɑ gɑm yi wɑ̈thi gen. Mɑ́ ke yod gen møgɑni, ge døøg-ɑ kö Jwøk, kɑ lɑɑwe di dwøøge piny kipe gïn.’ ” Kɑ gï pyëje kinni, “Gïn-ɑ wɑngi yi gɑ́jɑni nuti yood wun? O gïn-ɑ wɑngi yi gɑ́j bënn óyod yi wun kidï? Ngɑn-ɑ wïïwø pidh-ɑ wööni Jwøk. Kwï ji nɑ köödh møg-ɑ ɑ́dëëm tøg yöö; kwøbbi Jwøk nyii lïngø yi gen, kɑ kwøbbɑni nyi jwɑn ki gwɑ̈ɑ̈r wɑ̈g yi Cethɑn kì pëthi gen. Kwï ji nɑ köödh-ɑ ɑ́dëëm keny-ɑ bɑ kïttì; kenyi lïngi gen kwøbbi Jwøk, gï nyi jwɑn yi gen kɑ yïëyø ki medi pëëth. De kwøbbɑni pɑ nyi niyeeng pëthi gen, o ge pɑ nyi mɑ̈gi kì ri gen. O kenyi bëën ɑkørr wɑlɑ̀ guudi nying, ge nyi jwɑn-ɑ døøg cyɑ̈n. Kwï ji nɑ köödh-ɑ ɑ́dëëm kelli koodh; kwøbbi Jwøk nyii lïngø yi gen ceth, de ge nyii tyɑmø yi ɑkørri kömi piny, kí mɑɑri kɑ̈r, kí döngi pëëth, kɑ kwøbbi Jwøk nyi twij yi gïgɑni bënn, kɑ bong-ɑ nywøl mø kɑ̈ɑ̈l yi gen. O kwï ji nɑ köödh-ɑ ɑ́dëëm yij lɑ̈m-ɑ med; kwøbbi Jwøk nyii yïëyø yi gen, kɑ gï pwönyi gen tyëng-ɑ kyeelø, kelli gen dɑ møg kɑ̈ni ki nywøl pyɑ̈r ɑ́dɑ̈g, møøgø kɑ̈ɑ̈l-ɑ pyɑ̈r ɑ́bïkyel, møøgø kɑ̈ɑ̈l-ɑ miyø.” Kɑ gï köbbe kinni, “Lɑ̈mbɑ̈ pɑ nyi kïdhi ød kɑ cïb thɑ ɑ́tɑy, wɑlɑ̀ thɑ nɑngɑreb, de nyi cïb ɑ wïj tɑrɑbedhɑ̀. Gïg-ɑ bɑ ɑkɑnn ókɑ̈ɑ̈l wɑ̈g, o gïg-ɑ bɑ ɑkum óyɑl. Ngɑn di yïthhe mø lïnge, wiy lïnge.” Kɑ gï köbbe kinni, “Nyi rum wun kì ri møg-ɑ lïngi yi wun. Rumi men-ɑ yije nyi muuj yi wun, bɑ en ɑ yije órummi wun, kɑ med thyew. Mɑ́ ngɑn yïe di jɑmmì, møge ómed; o ngɑn jɑdø, cɑgg ɑ́ møg-ɑ nøg kì yïe ókwɑny.” Kɑ Yëso okööbø kinni, “Pödhi Jwøk nɑ jɑl mɑ ɑ́pidh köödh kì pwödhe. Kɑ nyii buddø kì wɑ̈r, kɑ nyii dhwödhø kì dicɑ̈ng, kɑ köödh møgɑni otwïyø, kedh ge ódøngø, o kër-ɑ døngi gen kwïj yi en. Mɑ́ lɑ̈bø ɑ nyi pidh gen kete, o bɑ thyɑngø ɑ nyi bï møti, o wïj bëe kì bɑnge, codhe o nyingi byel bï gen cyee. Kenyi cyeg byel, jɑlɑni nyi pödh-ɑ ri pɑlø, mɑ́ bøli kej kɑj ɑ́wɑ̈nhi.” Kɑ okööbø kinni, “Pödhi Jwøk pɑ̈ɑ̈r yi wɑ kɑ ngø? Wɑlɑ̀ ónyodh kì ri gɑ́j mɑ ngø? Pɑ̈ɑ̈r kɑ wɑɑng köödhi kɑrdɑl men-ɑ nyi piidh piny e thiinh cɑrø kibøli köödh bënn kì kömi piny. De kenyi rume ki twïyø, nyii göögø ɑ́ yɑdh me dwøng, e lod-ɑ yenh møøgø ki döng. Kɑ bɑ̈dde nyi peedhe, kɑ winy nyii gëdø kì bɑ̈dde.” Kɑ gï pwönye ki gɑ́j mø gïïr ni møgɑni, ni kɑ ɑ́cuggi gen ki lïngø. O bong gïjø mɑ ɑ́köbbe gïn e pɑth ki gɑ́j, de møg-ɑ wɑngi yi gɑ́jɑni nyi löbbe’ jøbɑnge kì wɑ̈yi gen. Cyɑ̈ngɑni kì wɑɑng thyënhø, ɑ ɑ́köbbe gïn kinni, “Kedhi wɑ løøng-ɑcɑ̀.” Kɑ teedø wiy gen. Akɑ̈l gen Yëso kì yij morkɑm-ɑ ɑ́bëëde, e di lwønggø yi morkɑbb møøgø. Kɑ ɑtunø me dwøng ocödø, kɑ ɑpɑgø nyi pɑ̈dh-ɑ yij morkɑb, kɑ morkɑb køm-ɑ pɑ̈ngø yi pï, o Yëso ɑ́bëëd e onenø kì kuni thɑ morkɑb, wïje thɑ̈ɑ̈nh en ki mɑkɑdɑ̀. Kɑ cyëëw yi jøbɑnge, ɑköbbi ge gøn kinni, “Jɑlpwönyø, pɑ nenni yi yïn wɑ ceg-ɑ thøø?” Adhwödh Yëso kɑ yømø cɑ̈wwe, ɑköbbe nɑm kinni, “Cungí! Bëëd mɑ̈ɑ̈dh!” Abed yømø, kɑ piny ceg-ɑ ì dïw ki mendwøng. Kɑ Yëso jøbɑnge köbbe kinni, “Wude ɑ böggi wun? Bong yïëyø kì pëthi wun?” Kɑ ge ongɑ̈ngø ki mendwøng. Kɑ ge okööbø ki ri gen kinni, “Jɑɑl bɑ men, ɑ lïngi dhøge yi yømø geki ɑpɑgø?” Kɑ Yëso wɑ̈dh-ɑ myërri Gerɑsɑ̀ kì løøg Tɑɑy Gɑlelì geki jøbɑnge. Kì ri kɑdhe piny kì yij morkɑb ceth, kɑ ceg ki pɑɑrø yi jɑl me ree di wëyrijjø. Jɑlɑni nyi bëëd ɑ wɑ̈thi rörri ji kì pɑ̈l, e ceg-ɑ dhɑ̈lø mɑgø ki ɑ́cwecwel. Ábëëd e nyii twöjø ki ɑ́cwecwel tyel mø gïïr, kɑ ɑ́cwecwel nyi cödde kì cingge, kɑ digïddì nyi tørre kì tyelle. O bong ngɑn me teg me nyi dwöög wïje. De nyi bëëd ɑ wɑ̈thi rörri ji kì pɑ̈l geki wɑ̈thi kïttì, e ceg-ɑ ryeerø kì wɑ̈r kí dicɑ̈ng, kɑ dële nyi kɑgge ki óbɑyyi kïttì. Keny-ɑ ɑ́lidhe Yëso e lɑ̈wi, ɑrenge yïe, kɑ gø mɑle, ɑryeere ki cwɑg mø døngø kinni, “Yïde ki yɑn, Yëso Wɑ̈d Jwøng-ɑ Pëddi Döng? Yɑ kwɑjj-ɑ yïn ki nyingi Jwøk, yɑ ko göjjí orɑng.” Ákööb kinøw kì bɑng kɑ ɑ́köbbii yi Yëso kinni, “Wëyrɑj, bï wɑ̈g kì ri jɑlɑni!” Kɑ pyëj yi Yëso kinni, “Nyingí ɑ́ men?” Alögge kinni, “Nyingɑ bɑ Yɑy, mɑ́ wø gïïr.” Kɑ Yëso kwɑjji yi jɑlɑni ki mendwøng, kinni wëyrijjø møgɑni ko ör wɑ̈g kì pönhɑni. Ádɑ dɑɑg kundhøngø me cyɑ̈mø kì wɑɑng ngëdi kït. Kɑ Yëso kwɑjji yi wëyɑni kinni, “Ör wøn kun-ɑ di kundhøngø, kɑ wiy wø kedhi wøn ri gen.” Kɑ mø gen yïëy yi Yëso. Kɑ wëyrijjø bï-ɑ wɑ̈g kì ri jɑlɑni, kɑ ge kedh-ɑ ri kundhøngø. Kɑ dɑɑg kundhøngø e kwɑnne bɑ ɑ́lïp ɑ́ryew, reng-ɑ piny kì wïj gëlø, kɑ ceg-ɑ ì cur kì nɑm, kɑ omudø bëne. Kɑ tyëng-ɑ ɑ́kwɑy kundhøngø órengø. Kɑ møgɑni dwøg gen kì kɑɑlɑni geki yethi myërr bënn. Kɑ teedø bï-ɑ be lidhi gïn-ɑ ɑ́cwöb. Keny-ɑ ɑ́wɑ̈nhi gen yï Yëso, kɑ jɑl-ɑ́ ree ɑ́di wëyrijjø yuud gen e obëëdø kì piny, ree dɑ ógødh, o göögø ki dhɑnhø me døøj; kɑ tyëngɑni obwøgø. Kɑ ge löbbi gïg-ɑ ɑ́cwöb, kì ri jɑl-ɑ́ ree ɑ́di wëyrijjø, kí gïn-ɑ ɑ́pɑ̈dhi kömi kundhøngø yi tyëng-ɑ ɑ́lïdhi. Kɑ Yëso kwɑjji yi gen kinni dhwödhe kì pödhi gen. Keny-ɑ ɑ́kedh Yëso e kɑdh-ɑ yij morkɑb, ɑkwɑjjii yi jɑl-ɑ́ ree ɑ́di wëyrijjø kinni, “Wiy yɑ kedhɑ ki yïn!” Akyëëd Yëso, kɑ gø köbbe kinni, “Kedhí pɑɑ wun yï wɑddi wun, kɑ ge köbbí gïn-ɑ ɑ́göggi yïn yi Wë, kí kɑ ɑ́lɑ̈ɑ̈m pyëwe ki yïn.” Akedhe, kɑ gïn-ɑ ɑ́gwøg yi Yëso kipere kwøb yi en kì yethi kɑ̈dd-ɑ pyɑ̈rø. Kɑ ji ongɑ̈ngø bënn. Keny-ɑ ɑ́døøg Yëso løøgø ki morkɑb, kɑ ji mø gïïr ócugø kì bute kì thɑ̈ngi nɑm. Kɑ jɑl ɑ́kyel kì kelli jɑggi sinɑgøg me cwøl ɑ́ Yɑyrøs, bï-ɑ yï Yëso. Kɑ ree bøødhe piny kì bøle. Kɑ gø kwɑjje ki mendwøng kinni, “Nyɑrɑ ɑ́cyɑ̈ngi ki thøø. Bïí, thɑɑny cinggí köme, o dële dönye, o bødhe.” Akedhe geki jɑlɑni. Kɑ teedø mø gïïr løg-ɑ bɑnge, kɑ dhing yi ji. Ádɑ ngɑndhɑjø me ree cyɑ̈dhi yi wɑɑnø ki runn pyɑ̈rø wïdɑ́ryew. Ánëngi ki yɑdh yi ɑkïmm mø gïïr, kɑ jɑmme tyëge ki muujø de ɑ́dhɑ̈li dönyø, o dële ɑ́kedh e ceg-ɑ rënyø. Per Yëso lïng en, codhe ɑkedhe bɑnge kɑ rïjj-ɑ kelli teedø. Mɑ́ e ɑ́kööb ki pyëwe kinni, “Cɑgg yɑ nywɑl ógødhe yøw, yɑ bɑ men dönyi.” Kɑ ógødhe nywɑle, ɑcungi wɑɑnø kì bøli kenyɑni ceth; kɑ gø yode kinni dële ɑ́yöni. Kɑ yod yi Yëso kinni, dɑ tegø me kedhø kì ree, ɑluge ree teedø, kɑ ópëjjø kinni, “Á men ɑ ɑ́nywɑl ógødhɑ?” Aköbbii yi jøbɑnge kinni, “Nenni yi yïn yï bɑ ɑdhing yi teedø, o yï pëjj-ɑ́ɑ̀ dï kinni, ɑ́ men ɑ ɑ́nywɑl yïn?” De ɑ́cög e oyɑ̈bø ki wɑnge kì kelli teedø, e yɑb-ɑ ngɑn-ɑ ɑ́gwøg gïnɑni. Abëën ngɑnɑni e óböggø, o dële okïïrø, kɑ ɑ́yode gïn-ɑ ɑ́gwøg kipere. Abøødhe ree piny kì bøle, kɑ møg-ɑ ɑ́cwöb kidyër, kwøb yi en bënn. Kɑ ngɑnɑni köbbe kinni, “Nyɑrɑ, yï ɑ́yiel yi yïëyí. Kedh ki mër, o yï pɑ cigi mɑgø yi gïnɑni.” Kɑ̈ng-ɑ́ nudd e okööbø, ɑbëën ji møøgø ge kɑ̈ɑ̈l-ɑ gøl jɑngi sinɑgøg, ɑkööb gen kinni, “Nyɑrí ɑ́thøw. Yïde ɑ nudd yï jud-ɑ Jɑlpwönyø?” De møg-ɑ ɑ́kwøb yi gen ɑ́wøy yi Yëso, kɑ jɑngi sinɑgøg köbbe kinni, “Yï ko böggi, de ceg yïëyø.” Bong ngɑn mɑ ɑ́yïëye ki løg bɑnge kɑl, den-ɑ́ Pïtør kí Yɑgob kí Jøn ómï Yɑgob keti gen, ɑ ɑ́wëgge kedhi kɑl ki en. Kɑ ɑ́wɑ̈dhi gen dhø gøl Yɑyrøs, ji ɑ́yuud gen ge ceg-ɑ wøwø, o ge ceg-ɑ ywøg. Akedhe kɑl, kɑ gï köbbe kinni, “Wude ɑ wøw wun wu óywöngø? Nyɑnthinh nuti thøø, de ceg-ɑ nenø.” Kɑ gɑggi yi gen, kɑ gï ryeeme wɑ̈g bënn. Acwøle wïyi nyɑnɑni geki meye, kí jøbɑnge gɑ ɑ́dɑ̈g, kɑ ge kedh-ɑ øn-ɑ di dhɑnhø. Kɑ nyɑnthinh mɑge kì cinge. Aköbbe gøn kinni, “Tɑlithɑ̀ koomì,” Møgɑni wɑng-ɑ kinni, “Nyɑnthinh, dhwöödh!” Adhwödhi nyɑnɑni mɑl kì bøli kenyɑni ceth. Kɑ ócyɑ̈dhø, mɑ́ runne bɑ pyɑ̈rø wïdɑ́ryew. Kɑ teedø ceg-ɑ ngɑ̈ngø ki mendwøng. De ge ɑ́kyëddi yi Yëso kinni ko di ngɑn köbbi yi gen. Akööbe kinni, “Nëngu nyɑnthinh ki gïncɑm.” Kɑ Yëso odhwödhø kì kenyɑni, kɑ kedh-ɑ pɑɑ gen. Kɑ jøbɑnge løg-ɑ bɑnge. Kɑ ócɑ̈gø pwönyø kì sinɑgøg kì cyɑ̈ɑ̈ng Sɑbɑth. Kɑ ji mø gïïr møg-ɑ ɑ́lïngi kwøbbe ongɑ̈ngø, ɑkööb gen kinni, “Jɑɑl kɑ̈n-ɑ́ɑ̀ keny ki kwøb møg bënn? O peli wïj men bɑ ngø, o göög ɑ dï ki gïïngɑ̈ngø? Pɑth ki bødhi pɑ̈mmì, wɑ̈d Meerì, ɑ bɑ ómï Yɑgob kí Yosep kí Yeudɑ̀ kí Sɑymøn, o nyiimen pɑ bëëd ɑ kellee kì pɑɑn?” Kɑ pëthi gen órënyø ki en. Kɑ ge köbbi yi Yëso kinni, “Jøtöng nyi ceg kɑ wørø kì kɑ̈jj bënn, de ge nyi bɑny-ɑ yi tyëng pɑɑ gen geki wɑddi gen.” Kɑ Yëso ódhɑ̈lø gwøg ki gïïngɑ̈ngø kì kenyɑni, dɑ́ cingge ɑ ɑ́thɑɑnye kömi kwï tyëng-ɑ dëlli gen rɑ̈mø, kɑ gï yiele. Kɑ ceg-ɑ ngɑ̈ngø yi nøgi yïëyø mi gen. Kɑ Yëso ókedhø e kɑ̈ll-ɑ yethi myërr e ópwönyø. Kɑ jøbɑnge gɑ pyɑ̈rø wïdɑ́ryew cwøøle yïe. Kɑ gï öre bënn, gɑ ɑ́ryew, ɑ́ryew. Kɑ gï thödhe ki tegø kì kömi wëyrijjø. Kɑ gï cege kinni, “Kɑ̀ kedh wun, kɑ̈lli dhɑnhø lodh kete; wu ko kɑ̈ddi ki gïncɑm, wu ko kɑ̈ddi ki beg, kɑ wu ko kɑ̈ddi ki ngyëny kì yethi jyebbi wun. Cyɑ̈dhi wun ki wɑrr-ɑ tyelli wun, de dhɑnhø ko kɑ̈ddi ki ógødh megø.” Kɑ gï köbbe kinni, “Bëëd wun kì gøl-ɑ yije ócwøøl wun, pïd keny-ɑ ódhwödh wun kì kenyɑni. Keløg e dɑ keny megø men-ɑ óbɑɑny wun, kɑ mø wun bɑny ki lïngø yi tyëng-ɑ kenyɑni, keny-ɑ ódhwödh wun kì kenyɑni, kɑ tør teng wun kì tyelli wun, e bɑ ngɑ̈ji gen kipe cɑ́y-ɑ óbï kömi gen.” Codhe, ɑkedh gen. Kɑ ge ópwönyø kinni, yewi ji ki orøg. Kɑ ge cyëdd-ɑ wɑ̈g ki wëyrijjø mø gïïr. Kɑ ji mø gïïr mø dëlli gen rɑ̈mø gïny yi gen ki møw, kɑ gï yiel gen. Kɑ møgɑni lïngi yi Rɑ̈dh Ërödøs, mɑ́ nyingi Yëso ɑ́tɑɑy kɑ̈jj bënn. Kɑ kwï ji okööbø kinni, “Jøn Jɑljwɑ̈g ɑ́dhwödh kì yij thøø! Bene ɑ di yïe tegø men-ɑ gööge ki gïïngɑ̈ngø.” Kɑ møøgø okööbø kinni, “Bɑ Eliyɑ̀.” Kɑ møøgø okööbø kinni, “Bɑ jɑltöng me ni jøtöng møg-ɑ ɑ́wɑɑng.” Keny-ɑ ɑ́lïngi møgɑni yi Ërödøs, ɑkööbe kinni, “Bɑ Jøn Jɑljwɑ̈g, jɑl-ɑ́ wïje ɑ́keb yi yɑn, ɑ́dhwödh kì yij thøø!” Bɑ Ërödøs ɑ ɑ́öd, ɑ mɑɑg Jøn, kɑ gø twöje kì ød mɑg. Møgɑni ɑ́gwøg yi en kɑ per Ërödiyɑ̀, cï ómen Pïlïp ɑ ɑ́kɑb yi en. Kɑ Ërödøs nyi köbbi yi Jøn kinni, “Pɑ døøj kɑ̀ kɑɑb cï Pïlïp ómyëw!” Ërödiyɑ̀ ɑ́bëëd pyëwe rɑɑj ki Jøn, kɑ gø dwɑdde nɑ̈gø, de ɑ́dhɑ̈li. O Ërödøs ɑ́bëëd e óböggø yi Jøn, mɑ́ e ngɑ̈ny wøw kinni Jøn bɑ ngeti kwërø. Kɑ gø korre kidøøj. Nyi tyer-ɑ lïngi kwøbbe, ngö e ɑ́bëëd pyëwe nyi ceg-ɑ olïng yi møg-ɑ lïnge. Kɑ Ërödiyɑ̀ óyïddø ki yöö keny-ɑ ɑ́ryeej jø tøg burø, kí pëjji liny, kí jøgdøngi Gɑlelì yi Ërödøs kì cyɑ̈ng-ɑ pɑɑr cyɑ̈ng-ɑ ɑ́nywøølii. Nyɑɑr Ërödiyɑ̀ ɑ́kedh cyɑ̈ngɑni kɑ ocöngø kì bøli Ërödøs geki wëlle. Kɑ Rɑ̈dh Ërödøs pyëwe ómïnø, ɑköbbe nyɑnthinh kinni, “Köbbí yɑn gïn-ɑ dwɑddi yi yïn, o mëggɑ yïn.” Kɑ óköngø kinni, “Gïn-ɑ dwɑddi yi yïn, ómëggɑ yïn ceth, cɑgg ɑ́ budi pödhɑ!” Akedhe wɑ̈g, kɑ meye pyëje kinni, “Á gïn ɑ cwøl yi yɑn?” Akööb meye kinni, “Cwøl wïj Jøn Jɑljwɑ̈g.” Kɑ jwɑn-ɑ døøg yï rɑ̈dh, ɑkööbe kinni, “Yɑ dwɑdd-ɑ kinni mëggí yɑn wïj Jøn Jɑljwɑ̈g kì yij tɑbø!” Kɑ rɑ̈dh yije óywöngø ki mendwøng. De pɑ cuggi kyëdø mɑ́ e ɑ́rum ki köngø kì bøli wëlle. Kɑ öd-ɑ ød mɑg kì bøli kenyɑni ceth, kinni kɑ̈ɑ̈l wïj Jøn. Kɑ ɑlɑthker men-ɑ ɑ́ör kedh-ɑ ød mɑg, kɑ wïj Jøn kïbe wɑ̈g, ɑkɑ̈ɑ̈le gøn kì yij tɑbø, kɑ gø mëgge nyɑnɑni. Kɑ gø muuje meye. Keny-ɑ ɑ́lïngi møgɑni yi jøbɑng Jøn, ɑbëën gen kɑ dële kɑ̈l yi gen, kɑ gø kony gen. Kɑ tyëngwöödø dwöög-ɑ yï Yëso. Kɑ gø löbbi gen gïg-ɑ ɑ́gøggi yi gen kí møg-ɑ ɑ́pwönyi yi gen bënn. Ji ɑ́bëëd ge gïïr kì buti gen; møøgø obëënø, møøgø ókedhø, kɑ tyëngwöödø ojɑdø ki keny ywöm gen ri gen wɑlɑ̀ keny cyɑ̈ɑ̈m gen. Kɑ ge köbbi yi Yëso kinni, “Bïu, kedhi wɑ kun bëëd wɑ ketee, o wu kɑlu ywömø.” Akedh gen ki morkɑb, ge kedh-ɑ keny bëëd gen kì wɑ̈yi gen. Kɑ ge lidh yi ji mø gïïr, ge ókedhø, kɑ gï ngij gen. Kɑ ji órïngø kì yethi myërr bënn, ge reng-ɑ kunɑni, kɑ ge møøl-ɑ bøli Yëso. Keny-ɑ ɑ́kɑdhi Yëso wɑ̈g, ɑlidhe ji ge gïïr. Aywöngi yije kipe gïn, mɑ́ ge ɑ́bëëd ge nɑ dyëg mø bong ngɑn kwɑy gen. Kɑ gï pwönye ki gïg mø ngenyø. Keny-ɑ ɑ́yuudh wøw ɑbëën jøbɑnge yïe. Kɑ ge okööbø kinni, “Keny bɑ pɑ̈l, o wøw ɑ́yuudh. Ör ji, o ge kedhi gen yethi myërr-ɑ cyɑ̈gi, o ge ngëëw gen ki gïn cɑm yi gen.” Kɑ mø gen løøg yi Yëso kinni, “Thödhu gen ki gïncɑm.” Apëjji gen kinni, “Yï dwɑdd-ɑ kinni kedhi wøn be ngyew ki ópùn møg cɑm yi gen, ki ngyëny ɑ́tegg miy ɑ́ryew?” Kɑ gï pyëje kinni, “Á ópùn ɑ́dï ɑ yï wun? Kedh wun, lidhu gen.” Kɑ ge lidh, ɑköbbii kinni, “Ópùn ɑ́bïj kí rij ɑ́ryew.” Kɑ teedø bëne köbbe kinni pëggi gen kömi lum-ɑ mɑr, gɑ ɑkudd. Kɑ ge pëgg-ɑ piny gɑ ɑkudd, møøgø bɑ miy, møøgø bɑ pyɑ̈r ɑ́bïjj. Kɑ ópùnɑni gɑ ɑ́bïj kí rij ɑ́ryew kwɑny yi Yëso. Alïïdhe mɑl, kɑ gï kwënge. Apødde ópùn, kɑ gï mëgge jøbɑnge, o gï pɑ̈ngi gen kì bøli teedø. Kɑ rijjɑni ryeet pɑ̈ngi yi gen kì kelli ji bënn. Kɑ ge ocyɑ̈mø bënn, kɑ ge oyɑ̈ngø. Kɑ nyingi ópùn kí rijj-ɑ ɑ́döng gwen, kɑ dhöng pyɑ̈rø wïdɑ́ryew opɑ̈ngø. Kwɑnni jøg-ɑ cwøw møg-ɑ ɑ́cyɑ̈ɑ̈m ki ópùnɑni bɑ ɑ́lïp ɑ́bïj. Kì bøli kenyɑni ceth, kɑ Yëso jøbɑnge køøle yij morkɑb, kipe kinni o ge møøl gen løøg Betsɑidɑ̀, o dönge e köbb-ɑ teedø kinni dɑ̈ɑ̈ng gen. Keny-ɑ ɑ́rume ki mɑ̈dhi tyëngɑni, ɑkedhe wïj kït be lɑm. Kɑ piny ogöögø ki wɑɑng thyënhø, e morkɑb rum wɑ̈dhi dïnɑm, o Yëso ying-ɑ wɑ̈g e kete. Kɑ gø lidhe kinni, köthi gen ɑ́buudh yi këw, mɑ́ ge pyem-ɑ yømø. Kɑ kedh-ɑ yï gen kì bɑ̈ɑ̈rø, e cyɑ̈dh-ɑ́ɑ̀ wɑ̈thi pï, kɑ gï køme pödhø, kɑ lidh yi gen, e ócyɑ̈dhø kì wɑ̈thi pï, kɑ ge orumø kinni bɑ tïbi ngɑnthøø, ɑryeer gen, mɑ́ ge ɑ́bwøg bënn kɑ ɑ́lidh ge gøn. Kedh gï köbbe’ köbbø kinni, “Mɑɑgu pëthi wun piny! Wu ko böggi. Bɑ yɑn!” Akɑdhe yij morkɑb keny-ɑ di gen, kɑ yømø obedø. Kɑ ge ongɑ̈ngø ki mendwøng, mɑ́ gïn-ɑ wɑngi yi kwøbbi ópùn nuti yood gen, kì bɑng nøgi wɑ̈thi gen. Kɑ ge wɑ̈dh-ɑ løøgø, ɑkɑdhi gen piny kì bøli myërri Genesɑret, kɑ morkɑb mɑɑg gen piny. Keny-ɑ ɑ́bëën gen wɑ̈g kì yij morkɑb ceth, ɑngijii yi teedø. Kɑ teenɑni reng-ɑ yij pönhɑni bëne. Kɑ ge ócɑ̈gø ki tëëri tyëng-ɑ dëlli gen rɑ̈mø kì yethi pënni gen, ge tëër-ɑ kun-ɑ lïngi yi gen, i ying-ɑ yije. Kɑ kì yethi kɑ̈jj-ɑ nyi kedhi yi en, kì myërr-ɑ thønhø, wɑlɑ̀ myërr-ɑ døngø kì yij pödhø, tyëng-ɑ buud nyi yuude ge ótëër kɑ̈jji ngyew. Kɑ nyi kwɑjji yi gen, kinni wiy tuung lɑne nywɑl yi gen yøw. Kɑ møg-ɑ nyi nywɑlii bënn nyii dönyø. Kɑ Jøpɑresì geki jøpwönyi Cigg møg-ɑ ɑ́kɑ̈ɑ̈l Yerusɑlem ócugø kì buti Yëso. Kɑ lidh yi gen kinni, kwï jøbɑnge ocyɑ̈mø cinggi gen nuti lwøøg gen ni kwööng kwɑyy. (Mɑ́ Jøpɑresì kí Yeud bënn mïdh-ɑ kwöng; ge pɑ nyi cyɑ̈mø e cinggi gen nuti lwøøg gen. O gïn-ɑ kɑ̈ɑ̈l kì kej ngyew pɑ nyi cɑm yi gen e nuti lwøgø kidøøj. O dɑ könggi mø ngenyø mɑ ɑ́lɑg yi gen kì yï kweyyi gen, møg ceg ki mïdhø ceth; ni lwøgi óthɑ̈ggì kí ɑ́thïwwì, kí gïg-ɑ bɑ dilɑl, kí sɑrirr.) Kɑ pyëj yi Jøpɑresì geki jøpwönyi Cigg kinni, “Gede jøbɑngí ɑ pɑ mïdhi gen kwööng kweyyee; gede ɑ cyɑ̈ɑ̈m gen cinggi gen nuti lwøgø?” Kɑ gï köbbe kinni, “Wu bɑ tyëngwëënyø, møg-ɑ ɑ́töng yi Icɑyɑ̀ kiper wun bɑ dyër, gen ɑ møg-ɑ ógwedø kinni, ‘Yɑ wør yi ji møg kɑ dhøggi gen, de pëthi gen lɑ̈wi ki yɑn. Yɑ mɑlli yi gen kɑ pyed, mɑ́ ge pwöny-ɑ kwööng ji, e dhɑ̈y ge nɑ Ciggi Jwøk.’ “Ciggi Jwøk ɑ́wiy yi wun, kɑ wu mïdh-ɑ kwööng ji.” Kɑ ge köbbi yi Yëso kinni, “Ciggi Jwøk ceg yi wun kɑ këëjø ki wëënyø, kipe kinni o wu mïdhi wun kwööng wun! Mosɑ̀ ɑ́cïg kinni, ‘Wør wïyí ki meyí,’ kɑ okööbø kinni, ‘Nɑ̈ɑ̈g ngɑn lɑ̈mmi cyën wïye wɑlɑ̀ meye.’ De wu pwöny-ɑ ji kinni, i keløg dhɑnhø yïe dɑ gïn di kønye wïye wɑlɑ̀ meye, de okööbø kinni, ‘Men bɑ Gorbɑn,’ (ɑ wɑngi kinni, rumø ki mëggi Jwøk,) ngɑnɑni pɑ cïrri kønyi wïye wɑlɑ̀ meye. O kɑ̀ göög wun kinøw, wu kyer-ɑ kwøbbi Jwøk. O dɑ gïg ni møgɑni mø gïïr, møg nyi gwøg yi wun.” Kɑ teedø cige cwööl yïe, kɑ gï köbbe kinni, “Lïngu møgɑ wu bënn, kɑ ge ti wun ki yodø. Bong gïjø me nud kì wɑ̈g me cuggi ywëdhi dhɑnhø kɑ̀ kedhe yije. De bɑ gïg-ɑ nyi bï wɑ̈g kì yij dhɑnhø ɑ nyi ywëdhii.” (Ngɑn di yïthhe mø lïnge, wiy lïnge.) Keny-ɑ ɑ́wiy teedø yi en, kɑ kedh-ɑ kɑl, ɑpyëjii yi jøbɑnge ki gïn-ɑ wɑngi yi gɑ́jɑni. Kɑ gï köbbe kinni, “Wu bëëd ɑ nøw thyew, wu pɑ nyi lïngø? Kwïj yi wun kinni, gïn-ɑ kedhi yij, e kɑ̈ɑ̈l-ɑ wɑ̈g, dhɑnhø pɑ cuggi ywëdhø yi en? Mɑ́ gïnɑni pɑ kedhi pyëwe den-ɑ́ yije, o nyi bï-ɑ wɑ̈g kì dële.” (Møgɑni nyodh-ɑ kinni, gïgcɑmm bënn ɑ́kwøb yi Yëso kinni ge dhïw.) Kɑ gï köbbe kinni, “Gïn-ɑ bï wɑ̈g kì pyëw, bɑ en ɑ ywëdh dhɑnhø. Mɑ́ e bɑ yethi pëthi ji ɑ nyi kɑ̈ɑ̈l yi rumm-ɑ rijjø, kí kwïji burø, kí kwɑl, kí nɑ̈g ki ji, kí niini tyëng-ɑ nuti nywøøm ri gen, kí mud, kí gwøg ki gïgrijjø, kí wëënyø, kí bëëdi orøg, kí tyiel, kí ɑtum, kí ɑthwøg, kí gwøøg dhëëgø. Gïgrijjø møgɑni bënn nyi kɑ̈ɑ̈l-ɑ pyëw, kɑ dhɑnhø nyi ywëdh yi gen.” Kɑ Yëso odhwödhø, kɑ kedh-ɑ myërr-ɑ cyɑ̈gi ki Suur. Kɑ pödh-ɑ kɑl megø, mɑ́ e nuti dwɑddi kinni o per bëëne yod yi ji, de ɑ́dhɑ̈li pɑ̈nø. Per bëëne ólïngø yi ngɑndhɑjø me ri nyɑre di wëy me rɑj. Akedh ngɑnɑni, kɑ ree bøødhe piny kì bøle. Ngɑnɑni pɑth ki nyɑɑr Yeud, de bɑ ngeti Pinikiyɑ̀ kì Suriyɑ̀ me kweyye bɑ tyëng Yönɑn. Kɑ Yëso kwɑjje kinni ryëëme wëyrijjø wɑ̈g kì ri nyɑre. Aløøg mø ngɑnɑni yi Yëso kinni, “Wiy othønhø yɑ̈ng gen møti; gïncɑɑm othønhø pɑ døøj ki kwɑnyø o lëngi gwögg.” Kɑ møge løøg yi ngɑnɑni kinni, “Wuö, cɑgg ɑ́ gwögg kiri gen, thull-ɑ dyëëm thɑ tɑrɑbedhɑ̀ kì dhøggi othønhø, nyii cɑmø yi gen.” Kɑ ngɑnɑni köbbi yi Yëso kinni, “Kedhí gølí, wëyrijjø ɑ́bï wɑ̈g kì ri nyɑrí kì bɑng löggí.” Akedhe gøle, kɑ nyɑre yuude e obuddø kì wïj sɑrir, o wëyrijjø rum kedhø. Kɑ Yëso odhwödhø kì myërri Suur, kɑ dwöög-ɑ Tɑɑy Gɑlelì, ɑcøre Sïdön kɑ kɑ̈l-ɑ yuu Kɑ̈dd-ɑ Pyɑ̈rø. Kɑ muuj jɑl mɑ ming me mïïlø. Kɑ Yëso kwɑjji yi teedø kinni thɑɑnye cingge kömi jɑlɑni. Kɑ kïdhi wɑ̈ye yi Yëso, kɑ lwedde cøde yïthhi mingɑni, kɑ ónguddø ki lɑ́ɑ̀w, kɑ leeb jɑlɑni nywɑle. Ayëgge piny, kɑ lïïdh-ɑ mɑl, kɑ gø köbbe kinni, “Ipɑtɑ̀,” ɑ wɑngi kinni, “Yïëbbí.” Kɑ yïthhe ri gen yieb gen, kɑ lebe ree gønye, kɑ okööbø dhøge døøj. Kɑ nyingi gen cem yi Yëso kinni ko di ngɑn köbbu møgɑni. De kenyi ti nyingi gen ki cemø, ge nyi ceg-ɑ pëddø kømmi møgɑni. Kɑ wɑ̈thi gen ócungø de ge kømm-ɑ kinni, “Jɑmmì bënn ɑ́gwøge kidøøj! Cɑgg ɑ́ mïng gï ɑ́wëgge lïngø, kɑ tyëng-ɑ mïïlø wëgge kwøb!” Kì yethi cyɑ̈nggɑni, keny-ɑ ɑ́døøg ji mø ngenyø ki cugø, kɑ ge ójɑ̈ddø ki gïn cɑm yi gen, ɑcwøle jøbɑnge yïe, kɑ gï köbbe kinni, “Nyingi tyëngɑni ocɑnø kì yïɑ; ge lug-ɑ́ɑ̀ bɑngɑ ki cyɑ̈ng ɑ́dɑ̈g ɑnɑn, e bong gïn cɑm yi gen. De keløg ge örɑ’ myërri gen ki kɑ̈j, ge bɑ møg dhɑ̈ɑ̈r kì kö yöö, mɑ́ kwï gen kɑ̈ɑ̈l-ɑ kun lɑ̈wi.” Kɑ møge løøg yi jøbɑnge kinni, “Tyëngɑni ócuggi thödhø ki gïncɑm kidï kì yij pɑ̈l ni men?” Kɑ gï pyëje kinni, “Á ópùn ɑ́dï ɑ yï wun?” Alöggi gen kinni, “Ópùn ɑ́bïryew?” Kɑ teenɑni köbbe kinni pëggi gen piny. Kɑ ópùnɑni gɑ ɑ́bïryew kwɑnye. Keny-ɑ ɑ́rume pwøji Jwøk, ɑpødde gïn, kɑ gï mëgge jøbɑnge, o gï pɑ̈ngi gen kì bøli teedø, kɑ gï pɑ̈ngi gen. O yï gen ɑ́dɑ nywøli rij mø nøg thyew. Kɑ ge kwëng yi Yëso thyew, ɑköbbe jøbɑnge kinni pɑ̈ngi ge gïn kì kelli teedø thyew. Acyɑ̈ɑ̈m teedø, kɑ ge oyɑ̈ngø. Kɑ nyingi gïncɑm møg-ɑ ɑ́döng gwen, kɑ ge kedh-ɑ yethi dhöng ɑ́bïryew. Teedø ɑ́cyɑ̈ɑ̈m kɑ ge oyɑ̈ngø. Kwɑnni tyëng-ɑ ɑ́cyɑ̈ɑ̈m bɑ ɑ́lïp ɑ́ngwen. Kɑ gï köbbe kinni kedh gen. Kɑ kɑdh-ɑ yij morkɑb kì bøli kenyɑni ceth, geki jøbɑnge, kɑ ge kedh-ɑ myërri Dɑlmɑnuthɑ̀. Kwï Jøpɑresì ɑ́bï, ɑcɑ̈gi gen ki pëmø ki en, ge yɑb-ɑ ngïji kì yïe me nyodh kinni kɑ̈ɑ̈l-ɑ yï Jwøk, ge rɑng-ɑ gøn. Agɑ̈y Yëso, kɑ okööbø kinni, “Ede rïny, ɑ yɑ̈ɑ̈be ki ngïji? Yɑ köbb-ɑ wun kidyër kinni, bong ngïji me mëggi rïny!” Awiye gïn, kɑ kɑdh-ɑ yij morkɑb, ɑdøøge løøgø. Jøbɑng Yëso wɑ̈thi gen wïlø ki ópùn, dɑ́ ópun ɑ́kyel kete ɑ yï gen kì yij morkɑb. Kɑ nyingi gïn ceme kinni, “Nëën wun, kɑ ri wun kor wun kipe kɑmïrɑ̀ mi Jøpɑresì kí kɑmïrɑ̀ mi Ërödøs.” Kɑ ri gen pyënyi gen kinni, “Bɑ kɑ̀ bëëd e bong ópùn kì yïee ɑ pere kööbe kinøw?” Kɑ møg-ɑ kømmi yi gen yod yi Yëso, ɑpyëje gïn kinni, “Wude ɑ kømmi wun kwøbbi bëëdi ópùn ge bogïn kì yï wun? Wu nudd wu pɑ ngïji, wɑlɑ̀ wu pɑ lïngø kidøøj? Yethi wun teeg kinnï? Yï wun dɑ nying, de wude ɑ pɑ nëën wun? O yï wun dɑ yïthh, de wude ɑ pɑ lïng wun? Wɑ̈thi wun pɑ nyi pɑ̈ddi? Keny-ɑ ɑ́pøddɑ ópùn ɑ́bïj, ge mëggɑ’ ji ɑ́lïp ɑ́bïj, ɑ́ dhöng ɑ́dï ɑ ɑ́gwen yi wun?” Kɑ ge ólöggø kinni, “Pyɑ̈rø wïdɑ́ryew.” Apëjje kinni, “O keny-ɑ ɑ́pøddɑ ópùn ɑ́bïryew, ge mëggɑ’ ji ɑ́lïp ɑ́ngwen, ɑ́ dhöng ɑ́dï ɑ ɑ́gwen yi wun?” Kɑ ge ólöggø kinni, “Dhöng ɑ́bïryew.” Kɑ gï pyëje kinni, “Møgɑni nuti gɑmø yi wɑ̈thi wun?” Kɑ ge wɑ̈dh-ɑ Betsɑidɑ̀. Kɑ jɑl mɑ cwør kɑ̈ɑ̈l yïe yi ji møøgø. Kɑ Yëso kwɑjji gen kinni nywɑle gøn. Kɑ jɑl-ɑ bɑ cwør mɑge kì cinge, kɑ gø peeje ngɑ̈ɑ̈j pɑc. Kɑ ngudd-ɑ nyinge ki lɑ́ɑ̀w, ɑthɑɑnye cingge kömi jɑlɑni, kɑ gø pyëje kinni, “Dɑ gïjø me nenni yi yïn?” Kɑ jɑlɑni lïïdh-ɑ mɑl, ɑkööbe kinni, “Ji nennɑ ge nɑ yenh kɑ̀ cyɑ̈dhi gen.” Acige cingge thɑɑny kömi nyinge. Kɑ jɑlɑni nyinge gwiire piny, kɑ jɑmmì bënn yïëy-ɑ nennø yi en kidøøj. Kɑ gø köbbe kinni, “Kedh kɑ yï pödhí gølí, yï ko töngi dïpɑc, kɑ ko di ngɑn köbbi yi yïn.” Kɑ Yëso pödh-ɑ myërri Kɑysɑriyɑ̀ Pïlïpì geki jøbɑnge. Kɑ jøbɑnge pyëje kì kö yöö kinni, “Ji okööbø i yɑ bɑ men?” Kɑ ge ólöggø kinni, “Kwï ji okööbø i yï bɑ Jøn Jɑljwɑ̈g. O ji møøgø okööbø i yï bɑ Eliyɑ̀. O ji møøgø okööbø i yï bɑ ɑ́kyel kì kelli jøtöng.” Kɑ gï pyëje kinni, “O wun ø, wu okööbø kinni yɑ bɑ men?” Kɑ møge løøg yi Pïtør kinni, “Yï bɑ Mesiy.” Kɑ ge kyëddi yi Yëso kinni, ko di ngɑn köbbi yi gen pere. Kɑ ócɑ̈gø pwönyi gen kinni, “Nyɑɑr Dhɑnhø órɑngi yi gïg ngenyø. O óbɑny yi jøgdøngø, kí jɑggi ókwër, kí jøpwönyi Cigg, o ónɑ̈g. De ódhwödh kì yij thøø kì bɑng cyɑ̈ng ɑ́dɑ̈g.” De møgɑni ɑ́kømmi yi en gɑ dyër. Apeej Yëso wɑ̈ye yi Pïtør, kɑ ócɑ̈gø kyëddii. Kɑ Yëso ree løge, kɑ nenn-ɑ yï jøbɑnge, ɑcyɑ̈re Pïtør kinni, “Døøg ngɑ̈jɑ, yïn ɑ Cethɑn! Yï rømm-ɑ rummi dhɑnhø, de pɑth ki rummi Jwøk.” Kɑ teedø cwøøle yïe bënn kí jøbɑnge. Kɑ gï köbbe kinni, “Ke di ngɑn dwɑddi bëën bɑngɑ, wedde pyëwe, kɑ yɑdh ɑrïwe byele, kɑ luge bɑngɑ. Mɑ́ ngɑn dwɑddi kori wëye, wëye ólɑ̈ɑ̈nye. O ngɑn-ɑ ólɑ̈ɑ̈ny wëye kiperɑ geki per wöndøj, wëye óyiele. Á ngø ɑ óyod yi dhɑnhø e døj kipere, keløg piny bëne oyodø yi en, kɑ wëye lɑ̈ɑ̈nye? Dhɑnhø wëye ócuggø gøømø yi en ki ngø? Mɑ́ ngɑn wïje ólɑ̈ɑ̈y ki yɑn, kɑ wïje ólɑ̈ɑ̈yø ki kwøbbɑ kì kelli rïny-ɑ rɑj, ɑ kwïj Jwøk èn, Nyɑɑr Dhɑnhø wïje ólɑ̈ɑ̈y ki en thyew, keny-ɑ óbëëne ki dhwɑ̈ɑ̈ng Wïye geki wëywödd-ɑ tir.” Kɑ gï köbbe kinni, “Yɑ köbb-ɑ wun kidyër kinni, kwï ji nud kì kelli tyëng-ɑ cungi kì keny, møg ko bel thøø, pïd keny-ɑ ólidh gen Pödhi Jwøk e obëënø ki dhwɑ̈ng me dwøng.” Kì bɑng cyɑ̈ng ɑ́bïkyel, ɑkɑ̈ɑ̈l Pïtør, kí Yɑgob, kí Jøn yi Yëso, kɑ gï peeje mɑl wïj kït me bɑ̈ɑ̈r, keny bëëd gen kì wɑ̈yi gen ki Yëso. Kɑ ree løge kì bøli gïn. Kɑ lɑ̈ne omënyø, ge tɑr ki mendwøng, ge lod-ɑ ke di tɑ̈ri gen yi bödhhi lwøg mø kömi piny. Kɑ Eliyɑ̀ geki Mosɑ̀ ocwöbø kì bøli gen, kɑ ge okööbø ki Yëso. Kɑ Yëso köbbi yi Pïtør kinni, “Jɑlpwönyø, døj kɑ̀ ying wɑ keny. Wiy wø göög wøn ki ɑkɑnnì ɑ́dɑ̈g, ɑ́kyel mií, ɑ́kyel mi Mosɑ̀, ɑ́kyel mi Eliyɑ̀.” Pïtør wïje ɑ́ceg-ɑ cung, kɑ ojɑdø ki gïn kwøbe, mɑ́ ge ɑ́bwøg ki mendwøng. Abëën pøølø, kɑ ge rïm yi gøn. Kɑ cwɑg kɑ̈ɑ̈l-ɑ yij pøølø kinni, “Men bene Wɑ̈dɑ men-ɑ mɑɑrɑ, lïngu kwøbbe!” Keny-ɑ ɑ́tïng gen wɑ̈thi gen kì bøli kenyɑni ceth, kɑ ge lidh-ɑ Yëso kete kì buti gen. Keny-ɑ ɑ́bëën gen piny kì wïj kït, ɑcem nyingi gen yi Yëso kinni ko di ngɑn köbbi gen møgɑni, gïti keny-ɑ ódhwödh Nyɑɑr Dhɑnhø kì yij thøø. Codhe, ɑmïdhi gen kwøbbɑni, de ge ɑ́bëëd ge pyëny-ɑ ri gen ki gïn-ɑ wɑngi yi dhwödhø kì yij thøø. Apyëj ge gøn kinni, “Gede jøpwönyi Cigg ɑ nyi kööb gen kinni, bɑ Eliyɑ̀ ɑ ókwöngi bëënø?” Alögge kinni, “Bɑ Eliyɑ̀ ɑ ókwöngi bëënø kidyër. O jɑmmì bënn dwøøge kɑ̈jji gen. Pɑth ki ɑgwed kipe Nyɑɑr Dhɑnhø kinni, bɑ ngɑn-ɑ órɑngi yi gïg mø ngenyø, kɑ benyi yi teedø? De yɑ köbb-ɑ wun kinni, Eliyɑ̀ ɑ́rum ki bëënø. Kɑ göggi yi gen ki gïn-ɑ ɑ́dwɑddi yi gen, ni kɑ̀ ógwedii kì yethi wɑ̈jji kwërø.” Keny-ɑ ɑ́dwöög gen yï jøbɑnge møg-ɑ ɑ́döng, ɑlidh gen teedø mø gïïr kì buti gïn, e jøpwönyi Cigg opëmø ki gen. Keny-ɑ ɑ́liidh Yëso yi teedø, ɑngɑ̈ng gen ki mendwøng, kɑ ge reng-ɑ yïe, kɑ gø mɑl gen. Kɑ gï pyëje kinni, “Wu kømm-ɑ ngø ki gen?” Kɑ møge løøg yi nget ɑ́kyel kì kelli teenɑni kinni, “Jɑlpwönyø, yɑ ɑ́kɑ̈ɑ̈l-ɑ wɑ̈dɑ yïí, mɑ́ ree dɑ wëyrɑj me mɑ̈ɑ̈nii kwøb. Kenyi mɑgii yi wëyɑni, gø nyi leenge’ piny, kɑ dhøge nyii thungø ki óböy, kɑ legge nyi mwöde, kɑ nyi ceg-ɑ ì teel. Jøbɑngí ɑ́kwɑjjɑ kinni ryem ge gøn, de ge ɑ́dhɑl yi wëyɑni.” Kɑ mø gen løøg yi Yëso kinni, “Wu rïny-ɑ pyëwe bong yïëyø kinnï, yɑ ópïd wɑɑng yɑ obëëdø kì kelli wun? Yɑ pïd-ɑ wɑɑng yɑ ngin-ɑ bëëdi wun? Kɑ̈ɑ̈lu nyelthinh yïɑ!” Kɑ nyelthinh muujii. Keny-ɑ ɑ́liidh Yëso yi wëyɑni, ɑjwɑne nyelthinh ki telø, kɑ ópɑ̈ɑ̈dhø, kɑ ree ngyelle kì piny, dhøge othungø ki óböy. Kɑ wïye pyëj yi Yëso kinni, “Á keny me bëëdø kidï ɑ ɑ́tyëg yi en e ree dɑ gïnɑni?” Kɑ ólöggø kinni, “Kër-ɑ́ nudd e thiinh cɑrø. Nyi leeng-ɑ mɑc geki yethi pï tyel mø gïïr yi wëyrɑj menɑni, e dwɑdd-ɑ nɑ̈gii. Keløg e ócuggø kì yïí, ywöngi yijí kiper wøn, kɑ wø køny.” Aköbbii yi Yëso kinni, “Keløg yï ócuggø yïëyø, jɑmmì bënn nyii cuggø göggi ngɑn yïe di yïëyø.” Aryeer wïyi nyelthinh kinni, “Yɑ ɑ́yïëy, de yïëyɑ nøg! Køny yɑn o yïëyɑ ree mede.” Kɑ lidh yi Yëso, kinni ge ceg kɑ kuulø yi teedø, ɑcyɑ̈re wëyrɑj, kɑ gø köbbe kinni, “Yïn ɑ wëy-ɑ bɑ ming-ɑ mïïlø, yɑ köbb-ɑ yïn, bïí wɑ̈g kì ree, kɑ yï ko døøg ree këti.” Aryeer wëyɑni, e tyell-ɑ nyelɑni ki mendwøng, codhe ɑbëëne wɑ̈g kì ree. Kɑ nyelthinh odöngø kì piny ni ngɑnthøø, kɑ kwï teedø okööbø kinni, “Áthøw!” De ɑ́mɑg kì cinge yi Yëso, kɑ gø tïnge mɑl, kɑ odhwödhø. Keny-ɑ ɑ́wɑ̈dhe kɑl, ɑpyëjii yi jøbɑnge kì wɑ̈yi gen kinni, “Wøde ɑ dhɑɑl wøn yi ryemi wëyɑni?” Kɑ gï köbbe kinni, “Gïn ni men bong gïn cuggi kɑ̈ɑ̈lii wɑ̈g, den-ɑ́ kwɑjji Jwøk.” Akedh gen kì kenyɑni, kɑ ge cør-ɑ yethi myërri Gɑlelì. Ádwɑdd-ɑ kinni ko di dhɑnhø me yod pere, mɑ́ e ɑ́bëëd e pwöny-ɑ jøbɑnge, kɑ gï nyi köbbe kinni, “Nyɑɑr Dhɑnhø ócïb cingi teedø, o ónɑ̈g yi gen. O ódhwödh kì yij thøø, kì bɑng cyɑ̈ng ɑ́dɑ̈g.” De kwøbbɑni ɑ́cög ge pɑ gɑm yi wɑ̈thi gen, o ge ɑ́bëëd ge óböggø ki pyëjii. Kɑ ge wɑ̈dh-ɑ Kɑpernɑum. Apyëje gïn keny-ɑ ɑ́wɑ̈dhi gen kɑl kinni, “Á gïn ɑ ɑ́kømmi yi wun kì kö yöö?” Kɑ ge okudø, mɑ́ ge ɑ́ceg-ɑ pëmø kì yöö ki mɑ bëëde ɑ́ men ɑ ti döng kì kelli gen. Kɑ Yëso pëgg-ɑ piny, kɑ jøbɑnge gɑ pyɑ̈rø wïdɑ́ryew cwøøle yïe. Kɑ gï köbbe kinni, “Ke di ngɑn dwɑddi ying mɑl, wiy bëëde e ying-ɑ cyɑ̈ɑ̈n teedø bëne, kɑ bëëde ɑ́ bɑ̈ng teedø bëne.” Kɑ ókɑ̈bbø ki nyɑ nyelthinh, kɑ gø cuunge kì dïdyëri gïn. Kɑ gø dööbe kööre, ɑköbbe gïn kinni, “Ngɑn-ɑ ókwɑny nyɑ gïnthinh me ni men ki nyingɑ, ngɑnɑni ɑ́kwɑny-ɑ yɑn. O ngɑn-ɑ ókwɑny yɑn, pɑth ki yɑn ɑ ɑ́kwɑny yi en, dɑ́ ngɑn-ɑ ɑ́ör yɑn.” Aköbbii yi Jøn kinni, “Jɑlpwönyø, wø ɑ́lïdhi ki jɑl megø, e ryëmm-ɑ wɑ̈g ki wëyrijjø ki nyingí. Kɑ kyëddi yi wøn, mɑ́ e pɑ ying kelli ɑkudee.” Kɑ ge köbbi yi Yëso kinni, “Ko kyëddi wun, mɑ́ ngɑn göögø ki gïïngɑ̈ngø ki nyingɑ pɑ cuggi jwɑn kwøb ki rɑj kì riɑ. Mɑ́ ngɑn pɑ mɑ̈n ki wɑ, ying-ɑ tungee. Yɑ köbb-ɑ wun kidyër kinni, ke di ngɑn thödhi wun ki pïg mɑdh kì yij lwøl kipe kɑ̀ cyɑ̈dhi wun ki nyingi Mesiy, köönge ókwɑny yi en ceth. “Ngɑn thɑɑb nyɑ gïnthinh be orøg kì kelli møg-ɑ ɑ́yïëy yɑn, lɑ̈w keløg pil me dwøng di twööj mune, kɑ di leeng nɑɑm omelø. Keløg cingí, yï wëgge’ orøg, ngul wɑ̈g, mɑ́ e lɑ̈w kɑ̀ kedhí kej nënnì ki cingø ɑ́kyel, kibøli ke di kedhí mɑc e yïí dɑ cing ɑ́ryew, eni men-ɑ́ mɑny-ɑ pɑ nyi thøw. [Keny-ɑ di kunnì mø pɑ nyi thøw, o mɑc pɑ nyi thøw kì yije.] O keløg tyelí yï wëgge’ orøg, ngul wɑ̈g, mɑ́ e lɑ̈w kɑ̀ kedhí kej nënnì ki tyelø ɑ́kyel, kibøli ke di kedhí mɑc e yïí dɑ tyel ɑ́ryew. [Keny-ɑ di kunnì mø pɑ nyi thøw, o mɑc pɑ nyi thøw kì yije.] O keløg wɑngí yï wëgge’ orøg, gööl wɑ̈g, mɑ́ e lɑ̈w kɑ̀ kedhí Pödhi Jwøk ki wɑng ɑ́kyel, kibøli ke di kedhí mɑc, e yïí dɑ nying ɑ́ryew. Kunn-ɑ cyɑ̈mø kì kenyɑni pɑ nyi thøw, o mɑny-ɑ yije pɑ nyi nɑ̈g. “Ji bënn ógwøg ge dhïw ki mɑc, ni kenyi gwøøg gëdhhì ge dhïw ki omelø. “Omelø døøj, de keløg e ólwënyø, ógwøg yi wun e tɑng kidï? “Bëëd wun ri wun dɑ omelø, kɑ wu bëëd wun ki mër, ki ri wun.” Kɑ Yëso odhwödhø kì kenyɑni, kɑ kedh-ɑ myërri Yeudiyɑ̀, kɑ Nɑm Urdun bɑ̈ɑ̈ne. Kɑ teedø cig-ɑ cugø kì bute, kɑ gï pwönye ni kenyi pwönye kì yethi cyɑ̈ng. Kɑ Jøpɑresì bï-ɑ yïe, kɑ pyëj yi gen, ge rɑng-ɑ gøn kinni, “Bɑ ɑkerø kinni, dhɑnhø cyëge ko tɑ̈ng yi en?” Kɑ mø gen løøge kinni, “Wu ɑ́cïg-ɑ ngø yi Mosɑ̀?” Alöggi gen kinni, “Mosɑ̀ ɑ́yïëy kinni, nyi gwëëd jɑlø ki wɑ̈nyi tɑ̈ng, kɑ cyëge ryeme.” Kɑ ge köbbi yi Yëso kinni, “Bɑ kì bɑng tegi wɑ̈thi wun ɑ ɑ́gwëdi wun ciggɑni. De cɑg kì bøli keny-ɑ ɑ́cwɑ̈ɑ̈j piny, ‘Jwøk ɑ́cwɑ̈j-ɑ jɑlø kí dhɑjø,’ ni kɑ ógwedii kì yethi wɑ̈jji kwërø. ‘Bene ɑ bɑnge nyi wiy jɑlø wïye kí meye, kɑ órëbø ki cyëge, kɑ ge ogöögø ki dhɑnhø ɑ́kyel.’ Wɑng-ɑ kinni ge pɑth ki ɑ́ryew këti, de ge bɑ ɑ́kyel. Gïn-ɑ ɑ́reb yi Jwøk, pɑ cuggi dɑ̈ngø yi dhɑnhø.” Kɑ cigi pyëjø yi jøbɑnge kì kɑl kipe møgɑni. Kɑ gï köbbe kinni, “Ngɑn tɑ̈ng cyëge, kɑ ónyömø ki megø, jɑlɑni pɑ̈r ki ngɑn kedhi yethi pënnì mø pɑth. Nɑ menɑni ceth, ngɑndhɑjø men wiy jɑlgøle kɑ kedh-ɑ yï jɑlø megø, ngɑnɑni ɑ́göög ki orøg.” Kɑ ji møøgø kɑ̈n-ɑ yï Yëso ki othønhø, kipe kinni o cingge thɑɑnye kömi gïn. Kɑ ge cyɑ̈r yi jøbɑnge. Keny-ɑ ɑ́yood møgɑni yi Yëso, ɑrënyi pyëwe. Kɑ jøbɑnge köbbe kinni, “Wiy othønhø bï gen yïɑ; ge ko mɑ̈ɑ̈n, mɑ́ Pödhi Jwøk bɑ ji-ɑ ni gen. Yɑ köbb-ɑ wun kidyër kinni, ngɑn pɑ kwɑny Pödhi Jwøk e nɑ othinh, pɑ wöl kedhi yije.” Kɑ othønhø dööbe kööre, ɑthɑɑnye cingge kömi gïn bënn, kɑ gï kwënge. Keny-ɑ ɑ́dhwödhe yuue, ɑrengi jɑl megø yïe. Abøødhe ree piny kì bøle, kɑ gø pyëje kinni, “Jɑlpwöny-ɑ døj, gwøgɑ ngø, o yɑ yïddɑ ki nënn-ɑ ɑtheer?” Kɑ köbbi yi Yëso kinni, “Á kipe ngø, ɑ cwøllí yɑn yɑ døj? Bong ngɑn døj den-ɑ́ Jwøk kete. Cigg ngɑ̈nyi yi yïn kinni, ‘Yï ko nɑ̈gi ki dhɑnhø, yï ko niin ki ngɑn nuti nywøøm wun ri wun, yï ko kwɑ̈ɑ̈d, wɑɑd wun ko gøøny ki kwøbbi pyed, yï ko wëëny. Wør wïyí ki meyí.’ ” Kɑ møgɑni løøge kinni, “Jɑlpwönyø, yɑ ɑ́wöni yɑ thiinh, ciggɑni omïdhø yi yɑn.” Kɑ Yëso nenn-ɑ ri jɑlɑni ki medi pyëwe. Kɑ gø köbbe kinni, “Bɑ gïjø ɑ́kyel kete ɑ jɑ̈ddi yïn. Kedh, ngeew jɑmmí wɑ̈g, kɑ ngyënyyi gen mëggí tyëng-ɑ ɑbuur, o yï yïddí ki kɑ̈r kì pɑn-ɑ yij mɑl, codhe kɑ yï lug bɑngɑ.” Keny-ɑ ɑ́lïngi møgɑni yi jɑlɑni, kɑ dële ójuurø, kɑ ókedhø yije bɑɑrø, mɑ́ yïe ɑ́dɑ jɑmmì mø gïïr. Kɑ Yëso lïïdh-ɑ yï jøbɑnge, kɑ gï köbbe kinni, “Kedhi Pödhi Jwøk teeg cɑrø kipe tyëngkɑ̈rì!” Kɑ jøbɑnge ongɑ̈ngø yi kwøbbe. Kɑ gï cige köbbø kinni, “Nyigɑ, kedhi Pödhi Jwøk teeg cɑrø. Kɑ̈li ɑmɑlø wɑɑng ɑlïbrøw yööd kibøli kedhi ngetikɑ̈r Pödhi Jwøk.” Kɑ jøgɑni wɑ̈thi gen ceg-ɑ muumø ki mendwøng, kɑ ri gen pyënyi gen kinni, “Kɑ̀ bëëde kinøw, ɑ́ men ɑ cuggi yielø?” Anenni Yëso yï gen, kɑ ólöggø kinni, “Møgɑni pɑ cuggi lwɑ̈ngø yi dhɑnhø, de ge ócuggø lwɑ̈ngø yi Jwøk, mɑ́ jɑmmì bënn nyii cuggø gwøgø yi Jwøk.” Aköbbii yi Pïtør kinni, “Lidh, jɑmmì bënn ɑ́wiy yi wøn, kɑ wø lug-ɑ bɑngí.” Akööb Yëso kinni, “Yɑ köbb-ɑ wun kidyër kinni, ngɑn-ɑ ɑ́wiy øde, wɑlɑ̀ nyiimen, wɑlɑ̀ meye, wɑlɑ̀ wïye, wɑlɑ̀ nyige, wɑlɑ̀ pwödhe, kiperɑ geki per wöndøj, óyïddi ki møg ngenyø kì yij rïny. Óyïddi ki ud gɑ miy, kí nyiimëëg gɑ miy, kí mëëg gɑ miy, kí nywøl gɑ miy, kí pwödh gɑ miy, geki guudi nying thyew, O óyïddi ki nënn-ɑ ɑtheer kì yij rïny-ɑ óbï. Dɑ ji mø ngenyø møg ying mɑl ɑnɑn, de ge ódøøg cyɑ̈n; o dɑ mø ngenyø møg ying cyɑ̈n, de ge ókedhi mɑl.” Yëso ɑ́bëëd e cyɑ̈dhi kɑ jøbɑnge, ge kedh-ɑ Yerusɑlem. Yëso ɑ́cyɑ̈dh ɑ mɑl, o jøbɑnge lug-ɑ́ɑ̀ bɑnge wɑ̈thi gen cungø; o tyëng-ɑ ɑ́cyɑ̈dhi kì cyɑ̈n ɑ́bëëd ge ceg-ɑ böggø. Kɑ pyɑ̈rø wïdɑ́ryew cwøøle wɑ̈yi gen, kɑ gï köbbe gïg-ɑ ócwöb. Gï ɑ́köbbe kinni, “Wɑ ɑ kedhi Yerusɑlem èn, o Nyɑɑr Dhɑnhø ócïb cinggi jɑggi ókwër, kí jøpwönyi Cigg, o ókuum yi gen ki thøø, kɑ cïb cinggi tyëng pödhh-ɑ kyeelø, o ógɑggi yi tyëngɑni, kɑ köme nguddi gen ki lɑ́ɑ̀w, kɑ pwöd gen, kɑ nɑ̈g gen; de ódhwödh kì yij thøø kì bɑng cyɑ̈ng ɑ́dɑ̈g.” Abëën wɑ̈ddi Dhebedì, Yɑgob geki Jøn yï Yëso, kɑ gø köbbi gen kinni, “Jɑlpwönyø, wø dwɑdd-ɑ kinni, o wø göggi yi yïn gïn-ɑ kwɑjji yi wøn.” Kɑ gï pyëje kinni, “Gïn-ɑ dwɑddi yi wun bɑ ngø, o göggɑ wun?” Akööb gen kinni, “Wiy wø óbëëd wøn, ɑ́kyel kì wïj kyëjí kí ɑ́kyel kì wïj cɑɑmí, keny-ɑ ópëggí wïj kwømí kì Pödhí.” Kɑ ge köbbi yi Yëso kinni, “Gïn-ɑ kwɑjji yi wun kwïj yi wun. Wu ócuggi mɑ̈dhø kì yij óthɑ̈ng-ɑ yije ómɑ̈ɑ̈dh yi yɑn? Wɑlɑ̀ wu ócuggi jwɑ̈ɑ̈gø ki jwɑ̈ng-ɑ ójwɑ̈ɑ̈g yɑn?” Kɑ ge okööbø kinni, “Wø ócuggi.” Kɑ ge köbbi yi Yëso kinni, “Wu ómɑ̈dhi kì yij óthɑ̈ng-ɑ ómɑ̈ɑ̈dh yi yɑn, o wu ójwɑ̈ɑ̈g ki jwɑ̈ng-ɑ ójwɑ̈ɑ̈g yɑn. De bëëdi dhɑnhø kì wïj kyëjɑ wɑlɑ̀ wïj cɑɑmɑ pɑth ki cwɑggɑ. Kɑ̈jjɑni bɑ kipe tyëng-ɑ ɑ́gwir kiper gen.” Keny-ɑ ɑ́lïngi møgɑni yi jøbɑng Yëso gɑ pyɑ̈rø, kɑ pëthi gen órënyø ki Yɑgob geki Jøn. Kɑ ge cwööl yi Yëso, ɑköbbe gïn kinni, “Ngɑ̈nyi yi wun kinni, kì kömi piny men, tyëng-ɑ mïdhi gɑ jyɑ̈ggì, tyëng-ɑ jɑɑg yi gen nyi jɑɑg yi gen kɑ tegø. Menɑni pɑ bëëd ɑ nøw kì kelli wun, de ngɑn dwɑddi bëëdø ɑ́ ngɑndwøng kì kelli wun, bëëde ɑ́ ngɑn göggi tyëng-ɑ kyeelø. O ngɑn dwɑddi ying mɑl kì kelli wun bëëde ɑ́ bɑ̈ng wun bënn. Mɑ́ Nyɑɑr Dhɑnhø thyew nuti bëënø kɑ per kinni o göggi, den-ɑ́ kiper kinni o gööge, o wëye muuje gɑ møg gøøm bøli ji mø ngenyø.” Kɑ ge wɑ̈dh-ɑ Yerikö. Kɑ odhwödhø kì Yerikö geki jøbɑnge, kí teedø mø gïïr. Kɑ cwør me bɑ kwɑ̈ɑ̈j, me cwøl ɑ́ Bɑrtimɑøs wɑ̈d Timɑøs, yuud gen e obëëdø kì tøg yöö. Keny-ɑ ɑ́lïnge kinni, bɑ Yëso jɑl Nɑdhɑreth ɑ bï, ɑcɑ̈ge cwöd kinni, “Yëso Wɑ̈d Debïd, ywöngi yijí kiperɑ.” Kɑ kyëddi yi ji mø ngenyø kinni kude. De ɑ́kedh e ceg-ɑ kɑ̈ɑ̈dhø ki ryeerø kinni, “Wɑ̈d Debïd, ywöngi yijí kiperɑ!” Acungi Yëso kɑ okööbø kinni, “Cwølu en!” Kɑ cwørɑni cwööl yi gen kinni, “Mïni pyëwí, dhwöödh, yï ocwøllø yi en.” Aleenge lɑne wïj tøge, kɑ pɑ̈ɑ̈r-ɑ mɑl, kɑ bï-ɑ yï Yëso. Kɑ pyëj yi Yëso kinni, “Yï dwɑdd-ɑ ngø, o göggɑ yïn?” Kɑ köbbi yi cwørɑni kinni, “Jɑlpwönyø, yɑ dwɑdd-ɑ døøg be nënnø.” Kɑ köbbi yi Yëso kinni, “Kedhí yuuí, yï ɑ́yiel yi yïëyí.” Kɑ døøg-ɑ be nënnø kì bøli kenyɑni ceth, kɑ løg-ɑ bɑng Yëso. Keny-ɑ ɑ́cyɑ̈ngi gen ki Yerusɑlem, kɑ ge wɑ̈dh-ɑ Betpɑjì, kí Betɑnì kì buti Kïti Dhetun, ɑöde ki ji ɑ́ryew kì kelli jøbɑnge, kɑ gï köbbe kinni, “Kedhu pɑn-ɑ bøli wun. Keny-ɑ ówɑ̈dhu yije, wu óyïddi ki ɑderø ówöb me köme nuti pɑ̈nyø kɑdhø; óyuud yi wun e ómɑɑg piny. Gønyu en, kɑ kɑ̈ɑ̈l wun. Keløg e dɑ ngɑn-ɑ ópyëj wun kinni, ‘Wude ɑ göög wun kinøw?’ Kööb wun kinni, di dwɑddø yi Wë, de gø ójwɑn yi en ki dwöögø.” Akedh gen, kɑ ge óyïddø ki ɑderø ówöb, e ómɑɑg dhø ød me cyɑ̈gi ki yöö. Kɑ gø gøny gen. Kɑ ge pyëj yi ji mø cungi kì kenyɑni kinni, “Ede ɑderø ɑ gønyu en?” Kɑ gï köbbi gen møg-ɑ ɑ́kwøb yi Yëso. Kɑ ge wiy kedh gen. Kɑ ɑderø ówöb muuj gen Yëso. Kɑ ógudhi gen peedh gen köme. Kɑ Yëso kɑdh-ɑ köme. Kɑ ji mø gïïr ógudhi gen peedh gen yij yöö. Kɑ møøgø pedh-ɑ ɑnɑ̈bbi yenh møg-ɑ ɑ́ngøl yi gen kì yethi pwödh. Kɑ tyëng-ɑ cyɑ̈dhi kì mɑl kí møg-ɑ cyɑ̈n ómɑ̈ddø ge óryeerø kinni, “Lenhi wɑ Jwøk! Ngɑn-ɑ bï ki nyingi Jwøng-ɑ Ácwɑ̈ɑ̈j, bɑ ɑgyëdh! Lɑ̈ng-ɑ bï; lɑ̈gi kweyee Debïd, ógyëdh yi Jwøk! Lenhi wɑ Jwøk!” Awɑ̈dhe Yerusɑlem, kɑ kedh-ɑ yij Kengø. Keny-ɑ ɑ́rume nenni jɑmmì bënn, ɑkedhe wɑ̈g, kɑ kedh-ɑ Betɑnì geki jøbɑnge gɑ pyɑ̈rø wïdɑ́ryew, mɑ́ wøw ɑ́yuudh. Dhuki keny-ɑ ɑ́bëën gen ge kɑ̈ɑ̈l-ɑ Betɑnì, ɑmɑgii yi kɑ̈j kì kö yöö. Kɑ ólïdhø ki ólɑm me di yïthhe, e nudd e lɑ̈wi. Kɑ kedh-ɑ be lïdhø mɑ bëëd e dɑ gïn di yode kì ree. Keny-ɑ ɑ́wɑ̈dhe bute, kɑ gø yode ree bong nywøl, dɑ́ yïthh keti gen ɑ ree, mɑ́ e pɑth ki bøli keny-ɑ nyi cyeg nywøli ólɑm. Kɑ gø kwënge kinni, “Bong ngɑn-ɑ ówöl cɑm ki nywølí këti.” Kɑ møgɑni lïngi yi jøbɑnge. Kɑ ge wɑ̈dh-ɑ Yerusɑlem. Kɑ kedh-ɑ Kengø, ɑcɑ̈ge ki ryëmmi wɑ̈g ki tyëng-ɑ ngyëwi ki jɑmmì kì Kengø. Kɑ tɑrɑbedhhi tyëng-ɑ wïïdø ki ngyëny geki kwømmi jøngyëwø ki ɑkùr tɑrre kì piny bënn. Kɑ ji mɑ̈ɑ̈ne bɑ̈ɑ̈ni ódɑ̈ri Kengø ge ótyëddø ki jɑmmì. Codhe, ɑpwönye ji kinni, “Bɑ ɑgwed kì yethi wɑ̈jji kwërø kinni, Jwøk ɑ́kööb kinni, ‘Ødɑ ócwøl ɑ́ ød mɑ̈ddø yi wɑ̈thi jurrì bënn.’ De ɑ́løgu keny pɑ̈nni yi kurrì.” Kɑ møgɑni lïngi yi jɑggi ókwër geki jøpwönyi Cigg, kɑ ge oyɑ̈bø ki yöö men nɑ̈g gen Yëso. Ge ɑ́bëëd ge óböggø yi en, mɑ́ teedø bëne ngɑ̈ngø yi pwönye. Keny-ɑ ɑ́yuudh wøw, ɑkedhi Yëso wɑ̈g kì kɑɑldwøng geki jøbɑnge. Dhuki kì mwøl keny-ɑ ɑ́kɑ̈l gen yuuɑni, kɑ ólɑmɑni lidh gen e thwøwø pïd tyele. Kɑ kwøbbi Yëso pɑr yi Pïtør, ɑköbbe gøn kinni, “Jɑlpwönyø, lidh ólɑm-ɑ ɑ́kwëng yi yïn ɑ́wøw.” Kɑ møge løøg yi Yëso kinni, “Yïëy wun Jwøk. Yɑ köbb-ɑ wun kidyër kinni, ngɑn köbbi kïn-ɑ dwøng èn kinni, dhwödhe kɑ ree leenge nɑɑm omelø, keløg yije pɑ pyëër, de yïëyø kinni gïn-ɑ kwøb yi en ótïj, gïnɑni gögg-ɑ en ceth. Bene gïn-ɑ pere köbbɑ wun kinni, kenyi lɑ̈ɑ̈m wun kɑ wu ókwɑ̈jjø ki gïïpiny, nyi bëëd wu yïëyø kinni gïnɑni ɑ́rum ki yodø yi wun, o ómëggi wun ceth. O kenyi cungi wun, wu ókwɑ̈jjø, nyi lɑ̈ɑ̈m pëthi wun ki ri wun, o Wïyi wun ɑ ying mɑl pyëwe ólɑ̈ɑ̈me ki wun, kɑ orøøg wun lɑ̈ɑ̈nye. [De keløg pëthi wun pɑ nyi lɑ̈ɑ̈m kipe rɑjj-ɑ göggi wun, Wïyi wun ɑ ying mɑl pyëwe pɑ lɑ̈ɑ̈m ki wun.”] Kɑ døøg-ɑ Yerusɑlem. Keny-ɑ ɑ́kedhe e ócyɑ̈dhø kì Kengø, ɑkedhi jɑggi ókwër geki jøpwönyi Cigg, kí jøgdøngø yïe. Kɑ pyëj yi gen kinni, “Á teng ɑ́, ɑ gwøøg gïgɑni yi yïn? Wɑlɑ̀ ɑ́ men ɑ mëggi yïn teng-ɑ göög yi yïn?” Aköbbi gen yi Yëso kinni, “Wu ópyëj yi yɑn ki gïjø ɑ́kyel. Løøg wun møgɑ, o wu köbbɑ teng-ɑ gwøøgɑ gïgɑni. Köbbu yɑn, teng-ɑ ɑ́jwɑ̈ɑ̈g ji yi Jøn ɑ́kɑ̈ɑ̈l-ɑ yï Jwøk, wɑlɑ̀ ɑ́kɑ̈ɑ̈l-ɑ yï dhɑnhø?” Kɑ ge okööbø keti gen kinni, “Keløg wɑ okööbø kinni, ‘Ákɑ̈ɑ̈l-ɑ yï Jwøk,’ ókööbø kinni, ‘De ede Jøn, ɑ bɑnyu en ki yïëyø?’ De ke kööb wɑ kinni, ‘Kɑ̈ɑ̈l-ɑ yï dhɑnhø’ ” (De ge ɑ́bwøg yi teedø, mɑ́ teedø yïëyø bëne kinni Jøn bɑ jɑltöng kidyër.) Codhe, ɑløøg gen mø Yëso kinni, “Kwïj yi wøn.” Kɑ ge köbbi yi Yëso kinni, “Wu pɑ köbbɑ thyew ki teng-ɑ gwøøgɑ gïgɑni.” Kɑ Yëso ócɑ̈gø köbbi gen kì yethi gɑ́j kinni, “Jɑl megø ɑ́pïïdh ki bɑɑg oløg. Kɑ gø wene ki kyel. Kɑ ogöögø ki bur men nyi biij oløg. Kɑ ogëdø ki ɑkɑnø me bɑ̈r men wïje nyi kur. Kɑ bɑngɑni bëne kïrre jøg mø korii, kɑ ówelø. Kì bøli keny-ɑ nyi cyeg jɑmmì, ɑöde yï jøg-ɑ kor bɑg ki bɑ̈ng, kinni o di kɑ̈ne kì yï gen ki bun-ɑ bɑ mee kì ri gïg-ɑ ɑ́nywøl yi bɑngɑni. Kɑ bɑ̈ngɑni mɑg gen, kɑ gø pwöd gen, kɑ gø ryem gen ki cingge. Kɑ öd-ɑ yï gen ki bɑ̈ng megø. Kɑ wïje kïdhi gen ki kedd. Kɑ gø göggi gen ki gïnrɑj. Aöde ki megø, kɑ bɑ̈ngɑni nɑ̈g gen. Kɑ oödø ki møøgø, kɑ mø gïïr kì kelli gen pwöd gen, kɑ kwï gen nɑ̈g gen. Kɑ döng-ɑ́ wɑ̈de, wɑ̈n-ɑ mɑɑre. Kì cyɑ̈n cyee, ɑöre wɑ̈de yï jøgɑni, e okööbø kinni, ‘Wɑ̈dɑ ówør yi gen.’ De jøg-ɑ kor bɑɑg oløg ri gen ɑ́köbbi gen kinni, ‘Men bɑ wɑ̈d jɑlbɑg. Bïu, nɑ̈g wɑ en, o bɑg gööge ɑ́ miee.’ Kɑ gø mɑg gen, kɑ gø nɑ̈g gen. Kɑ gø ywɑɑj gen wɑ̈g kì yij bɑg.” Apëjji Yëso kinni, “Wïi bɑngɑni ógöög ɑ dï? Óbï kɑ tyëng-ɑ kor bɑngɑni nɑ̈ge, kɑ bɑg cïbe cinggi ji møøgø. Wu nuti rɑ̈ngø ki møg-ɑ ógwedø kì yethi wɑ̈jji kwërø kinni, ‘Kït men-ɑ ɑ́bɑny yi bödhhi gyer, en ɑ ɑ́göög ɑ́ kïn-ɑ mïdhi wïj tuung ød. Menɑni ɑ́gwøg-ɑ yi Wë bɑ gïïngɑ̈ngø kɑ ɑ́lidhii yi wɑ!’ ” Kɑ gø dwɑddi gen mɑgø, mɑ́ e ɑ́ngij yi gen kinni ɑ́gɑj-ɑ gen, de ge ɑ́bwøg yi teedø. Kɑ gø wiy gen, kɑ ge ókedhø. Kɑ ge öd-ɑ yïe ki kwï Jøpɑresì kí kwï jøgi ɑkuud Ërödøs, o ge yɑb gen dhøge, men-ɑ ókööbe ki gïn pere mɑgii yi gen. Abëën gen, kɑ gø köbbi gen kinni, “Jɑlpwönyø, ngɑ̈nyi yi wøn kinni, yï bɑ ngeti dyër, o bong ngɑn nyi geny yi yïn, mɑ́ yï pɑ nyi nenni bëëdi ji, de yï nyi pwöny-ɑ yuu-ɑ dyër, ɑ bɑ kwøbbi Jwøk. Bɑ ɑkerø yi Ciggee eni cudi Kɑysɑr ki gwɑ̈j? Nyi cud wøn, wɑlɑ̀ wø ko nyi cud?” Kɑ wëënyi gen ngij yi Yëso, ɑköbbe gïn kinni, “Á kipe ngø ɑ rɑngu yɑn? Muuju yɑn ki ngyënyø ɑ́tegø, o lidhɑ.” Kɑ ngyënyø ɑ́kyel kɑ̈ɑ̈l gen. Apëjje kinni, “Á ngïji men, kí gweddi men ek?” Kɑ ge okööbø kinni, “Mø Kɑysɑr.” Akööb Yëso kinni, “Keløg ɑ́ kinøw, mëggu jɑmmi Kɑysɑr, Kɑysɑr, kɑ jɑmmi Jwøk mëggu Jwøk.” Kɑ ge ongɑ̈ngø yi møg-ɑ kømmi yi Yëso. Kɑ Jøsɑduk møg-ɑ kööbø kinni i bong dhwödhø kì yij thøø bï-ɑ yï Yëso. Kɑ gø köbbi gen kinni, “Jɑlpwönyø, Mosɑ̀ wø ɑ́gwëde cigg møg kinni, ‘Keløg dhɑnhø ómen othøø, kɑ cyëge wiye, e bong wɑ̈d, lɑge cï ómen, o ómen nyödde ki wïj.’ Ádɑ nyiimëëg ɑ́bïryew, kɑ nyeldwøng ónyömø ki dhɑjø, kɑ othøø e bong nywøl mɑ ɑ́wiy yi en. Kɑ cyëge lɑg yi nyel-ɑ bɑnge, kɑ nyelɑni othøø, e bong nywøl mɑ ɑ́wiy yi en. Kɑ dɑ̈ɑ̈g gen kɑ̈l-ɑ bɑng gen thyew. Kɑ jøgɑni gɑ ɑ́bïryew bënn othøø e bong nywøl mɑ ɑ́wiy yi gen. Athøw ngɑnɑni kì cyɑ̈ɑ̈n gen bënn. Ngɑnɑni óbëëd ɑ́ cï men, keny-ɑ ódwöög ji wɑ̈g kì yij thøø? Mɑ́ e ɑ́bëëd ɑ́ dhɑjø kì yï ɑ́bïryew bënn.” Aköbbi gen yi Yëso kinni, “Wu ɑ́bɑ̈jji! Gïn-ɑ pere ɑ́bɑ̈jji wun ngɑ̈nyi wun? Bɑ kipe kɑ̀ kwïj wun Wɑ̈jji Kwërø geki tegi Jwøk. Mɑ́ keny-ɑ ódhwödh ji kì yij thøø, ge pɑ nyömi wɑlɑ̀ ge pɑ nywøm, de ge óni wëywödd kì mɑl. Anɑn kipe kwøbbi dwöögi tyëngthøø mɑl, wu nuti rɑ̈ngø kì yij Wɑ̈nyi Mosɑ̀ ki møg-ɑ ógwedø kì ri kwøbbi nyɑ kïrø? Kí keny-ɑ ɑ́kööb Jwøk kinni, ‘Yɑ bene Jwøøg Abrɑhɑm, kí Jwøøg Isɑɑk, kí Jwøøg Yɑgob.’ Jwøk pɑth ki Jwøøg tyëngthøø, den-ɑ́ Jwøøg tyëngnëënø. Wu ɑ́bɑ̈jji ki mendwøng!” Ákyel kì kelli jøpwönyi Cigg ɑ́bëëd e nud kì kenyɑni, o møg-ɑ ɑ́kømmi yi gen ɑ́lïnge. Kɑ gø lidhe kinni, mø Jøsɑduk ɑ́løøg yi Yëso kidøøj, codhe ɑkedhe yïe kɑ gø pyëje kinni, “Á cigg ɑ́, ɑ mɑl kibøli cigg bënn?” Alöggi Yëso kinni, “Cigg-ɑ mɑl bɑ kinni, ‘Lïng yïn ɑ Isrɑil, Wöw Jwøgí, ɑ bɑ Jwøk kete. Mɑɑr Wöw Jwøgí, ki pyëwí bëne, kí wëyí bëne, kí rummí bënn, kí tegí bëne.’ Men ɑ bɑnge bɑ kinni, ‘Mɑɑr ngɑn-ɑ butí ni kɑ̀ mɑɑr rií.’ Bong cigg møøgø mø lod møg ryeet ki döng.” Kɑ köbbi yi jɑlpwönyi Cigg kinni, “Jɑlpwönyø, kwøbbí bɑ dyër. Gïn-ɑ ɑ́kwøb yi yïn bɑ dyër kinni, Wë bene Jwøk, bong jwøg megø den-ɑ́ en kete. O kɑ̀ mɑɑr Jwøk yi dhɑnhø ki pyëwe bëne kí rumme bënn, kí tege bëne; kí mɑɑri dhɑnhø ngɑn-ɑ bute ni kɑ mɑɑre ree, møgɑni lod-ɑ gëdhhì geki gïg-ɑ nyi muuj, gɑ møg rɑ̈bbi Jwøk bënn.” Keny-ɑ ɑ́lidhii yi Yëso kinni lögge døøj, ɑköbbe gøn kinni, “Yï pɑ lɑ̈wi ki Pödhi Jwøk.” Kɑ teedø obwøgø pyëjii këti. Yëso ɑ́bëëd e ópwönyø kì yij Kengø, ɑkööbe kinni, “Mesiy nyi cwølli yi jøpwönyi Cigg ɑ́ kwɑɑr Debïd. Møgɑni ócuggi kidï? Møgɑni pɑ cuggi, mɑ́ Debïd kiree ɑ́kööb kì ri tegi Wëykwërø kinni, ‘Wɑ̈ɑ ɑ́köbbi yi Jwøng-ɑ Ácwɑ̈ɑ̈j kinni, Bëëd kì wïj kyëjɑ, gïti keny-ɑ ócïbɑ tyëng-ɑ mɑɑn yïn thɑ́ tyellí.’ Cwølli yi Debïd kiree ɑ́ wɑ̈n, de óløg kwɑre kidï?” Kɑ mø Yëso lïngi yi teedø bëne ki medi pëëth. Kɑ okööbø e pwöny-ɑ gen kinni, “Koru ri wun kipe jøpwönyi Cigg, gen ɑ tyëng-ɑ pëthi gen med ki wïïnø ki ɑ́ywödhh mø bɑ̈rrø, o ge nyi yɑb-ɑ mɑ̈dhhø kì kɑ̈jji ngyew. Ge nyi yɑb-ɑ bëëdø kì wɑ̈thi kwømm-ɑ døj kì sinɑgøgg, o ge yɑb-ɑ pëggi kɑ̈jj-ɑ døj kì kɑ̈jji ryëj. Ge nyii kɑ̈ɑ̈bø ki uddi thwömm, kɑ ge nyii lɑ̈mø ki lɑm me bɑ̈ɑ̈r, ge ceg-ɑ nɑ̈n. Ge óyïddi ki cɑ́y mø døngø.” Kɑ Yëso pëgg-ɑ piny ree rwööm en ki sɑnduug ngyëny. Kɑ teedø mø gïïr nenne, ge kïdh-ɑ yij sɑndungɑni ki ngyëny. Kɑ tyëngkɑ̈rì mø gïïr kïdh-ɑ yije ki ngyëny mø ngenyø. Kɑ ngɑndhɑjø mɑ thwöm, mɑ ɑbuur obëënø. Kɑ kïdh-ɑ yije ki gïrïc ɑ́ryew. Kɑ jøbɑnge cwøøle yïe. Kɑ gï köbbe kinni, “Yɑ köbb-ɑ wun kidyër kinni, thwöm-ɑ ɑbuur men, ɑ́muuj ki ngyëny mø lod møg-ɑ ɑ́muuj yi teedø bëne. Mɑ́ tyëngɑni bënn ɑ́muuj ɑ ri gïg-ɑ ɑ́döngi piny kì yï gen, de thwöm-ɑ ɑbuur men, ɑ́muuj-ɑ gïg-ɑ nud kì yïe bënn, gɑ møg di mïdhii.” Keny-ɑ ɑ́bëëne wɑ̈g kì yij Kengø, ɑköbbii yi ɑ́kyel kì kelli jøbɑnge kinni, “Jɑlpwönyø, lidh døøji kïttì kí døøji ud!” Akööb Yëso kinni, “Udd-ɑ døngø ɑgɑk onennø yi yïn? Bong kït ɑ́kyel kì kelli kïtt-ɑ ógeer gen, men-ɑ ódöng kì kömi megø, e nuti leeng piny.” Yëso ɑ́bëëd ɑ piny kì wïj Kïti Dhetun, e rwöm ki Kengø e kete, ɑkedhi Pïtør yïe geki Yɑgob, kí Jøn kí Andrø, kɑ gø köbbi gen kinni, “Köbbí wøn, ryɑ̈ngɑni óbï ɑ wën? Á ngïji mɑ ngø ɑ ónyodh kinni bëëne ɑ́cyɑ̈ngi?” Kɑ Yëso ócɑ̈gø köbbi gen kinni, “Koru ri wun, o bongi ngɑn-ɑ ópeej wun pɑ̈l. Ji mø gïïr óbï ce ge bɑ yɑn, ge ókööbø kinni, ‘Yɑ bene en!’ Kɑ ji mø gïïr peej ge pɑ̈l. O keny-ɑ ólïng wun ki kwøbbi liny kí wöddi liny, kɑ pëthi wun ko lïngi, mɑ́ møgɑni bɑ møg bï ceth, de cögi piny nuti. Mɑ́ jur ópɑ̈ɑ̈r kömi jur-ɑ kyeelø, kɑ pönhï pɑ̈ɑ̈r-ɑ kömi pönh-ɑ kyeelø. Kɑ piny onhɑ̈nhø kì kɑ̈jj mø gïïr. Kɑ kɑ̈j ómɑ̈gø. O møgɑni óbëëd gɑ mwölli orɑng. “Kɑ nyingi wun yieb wun kidøøj, mɑ́ wu ópeej sinɑgøgg, kɑ wu pwöd kì yethi sinɑgøgg, o wu ócungi kì bøli modïrr geki rɑ̈nhì kipe nyingɑ, kipe kinni, o møg-ɑ ngɑ̈nyi yi wun töng yi wun kì bøli gen. De wɑ̈thi jurrì bënn ceg kɑ pwönyø ki wöndøj, e cögi piny nuti bëënø. Keny-ɑ ómɑɑg wun kɑ wu køøl be gøny, kɑ pëthi wun ko lïngi kipe møg-ɑ ókømmi yi wun. De nyi kwøb wun møg-ɑ ómëggi wun kì bøli kenyɑni, mɑ́ e pɑth ki wun ɑ ókööbø den-ɑ́ Wëykwërø. Dhɑnhø ómen óngeewe kipe kinni o nɑ̈g, kɑ dhɑnhø wɑ̈de ngeewe, kɑ nywøl pɑ̈ɑ̈r-ɑ kömi wëëg gen geki mëëg gen, kɑ gï nɑ̈g gen. O wu ómɑɑn yi teedø bëne kipe nyingɑ, de ngɑn-ɑ óngïnø gïti keny-ɑ óthumi møgɑni, óyiel. “Gïnrɑj men-ɑ Böggi ólidh yi wun, e ócïb keny-ɑ pɑ døøj ki en, (Yod thɑ́ møgɑni, yïn ɑ ngɑn-ɑ rɑ̈ngø,) kɑ wiy tyëng-ɑ ying Yeudiyɑ̀ rengi gen kelli kïttì. Kɑ ngɑn-ɑ wïj óthɑɑng ød ko yïnhi piny, wɑlɑ̀ ko kedhi øde be dwɑ̈ddø ki gïïpiny. Kɑ ngɑn-ɑ yij pwödhe ko døøg be kwɑnyi ógødhe. Tyëng-ɑ bɑ ɑ́yɑjj geki ɑ́nyödd kì yethi cyɑ̈nggɑni ri gen ódi cyën. Kwɑ̈jji wun kipe kinni o møgɑni cög ge pɑ bï kì cwir. Mɑ́ yethi cyɑ̈nggɑni ódi orɑng me dwøng, me nuti pɑ̈nyi bëënø kër-ɑ ɑ́cwɑ̈ɑ̈j piny yi Jwøk gïti ɑnɑn, o koo cigi bëënø. O keløg cyɑ̈nggɑni pɑ di ngwöddi yi Wë, bong dhɑnhø me di bodh. De cyɑ̈nggɑni ɑ́ngwöddi yi en kipe ji-ɑ ɑ́yienye. “O keløg e dɑ ngɑn köbbi wun kinni, ‘Lidhu, Mesiy èn!’ Wɑlɑ̀ kinni, ‘Lidhu en ɑcɑ̀!’ Møgɑni ko yïëy wun. Mesiy mø pɑth ki dyër ócwöb, o jøtöng mø pɑth ki dyër ócwöb, kɑ ge onyudhø ki ngïjjì kí gïïngɑ̈ngø, kipe kinni o tyëng-ɑ ɑ́yieny peej gen pɑ̈l, keløg ɑ́ gïn cuggi. De koru ri wun. Møgɑni ɑ́rum ki köbbi wun yi yɑn, e bøli kenyɑni nuti bëënø. “Kì yethi cyɑ̈nggɑni, kì yij orɑng, cɑ̈ng ólunyi, kɑ bong-ɑ cɑr me kɑ̈ɑ̈l yi dwɑ̈y. Kɑ kyell odyëmø kì mɑl, kɑ gïg-ɑ teg kì mɑl okïïrø. Kì bøli kenyɑni, Nyɑɑr Dhɑnhø ólidh yi ji, e kɑ̈ɑ̈l-ɑ mɑl kì yij pøølø ki tegø me dwøng geki mɑ̈r. Kɑ wëywödde öre wɑ̈thi tùngi piny gɑ ɑ́ngwen, be cøngi ji-ɑ ɑ́yieny yi Jwøk. “Dïd wun kì ri ólɑm. Kɑ̀ nyi yömi ɑnɑ̈bbe, kɑ yïthhe otwïyø ngɑ̈nyi yi wun kinni, cwir ɑ́cyɑ̈ngi. Thyew, keny-ɑ ólidhu møgɑni ge ocwöbø, kɑ wu ngɑ̈nyu wøw kinni, thumi piny ɑ́cyɑ̈ngi ki bëënø. Yɑ köbb-ɑ wun kidyër kinni, rïj men pɑ thumi ki thøø, e møgɑni bënn nuti cwöbø. Mɑl kí piny ólɑ̈ɑ̈ny, de kwøbbɑ pɑ lɑ̈ɑ̈ny. “De cyɑ̈ngɑni wɑlɑ̀ sɑɑ̀ menɑni bong ngɑn ngɑ̈nyi gen, cɑgg ɑ́ wëywödd kì mɑl, wɑlɑ̀ Wɑ̈d den-ɑ́ Wïy kete ɑ ngɑ̈nyii. Koru ri wun, kɑ wu nëën wun kidøøj, mɑ́ keny-ɑ óbëën bøli kenyɑni kwïj yi wun. Menɑni nɑ jɑl mɑ ɑ́weli, kɑ gøle wiye kì cinggi bɑ̈ngge. Kɑ men nyi nyudhe gwøge. Kɑ jɑl-ɑ kor dhø kɑl cege kinni, nëëne kidøøj. Kɑ ɑ́rum bëëde kinøw, nëën wun, mɑ́ bøli keny-ɑ óbëën wïi kɑl kwïj yi wun, ócuggø bëënø kì böörø, wɑlɑ̀ dïwɑ̈r, wɑlɑ̀ bɑ̈ɑ̈rø, wɑlɑ̀ mwøl. Nëën wun, o wu ócög wu pɑ yuude, wu onenø. Møg-ɑ köbbɑ wun, köbbɑ’ teedø bëne kinni, nëën wun!” E döngø ɑ́ cyɑ̈ng ɑ́ryew, o cyɑ̈ɑ̈ng Kwëër Ákɑɑdh geki Kwëër Olwëny wɑ̈nhi gen. Ayɑ̈ɑ̈b jɑggi ókwër geki jøpwönyi Cigg ki yöö men mɑg gen Yëso kì gød, o nɑ̈g. Kɑ ge okööbø kinni, “Ko mɑg yi wɑ kì yethi cyɑ̈nggi kwër, kipe teedø ókër.” Kɑ kɑ̈ng-ɑ ɑ́ying Yëso Betɑnì kì gøl Sɑymøn, jɑl-ɑ́ ree ɑ́di lɑ̈y cøn, ge ocyɑ̈mø kì tɑw, ɑbëën ngɑndhɑjø megø, e ókɑ̈ddø ki ɑ́thïwi mɑ kït, me yije di nɑrd, møw-ɑ yøme med, o ngewe teeg. Kɑ dhøg ɑ́thïwɑni tore, kɑ møwɑni kønye wïj Yëso. Kɑ kwï møøgø kì kelli teen-ɑ kenyɑni okööbø pëthi gen dɑ liny kinni, “Ede møw ɑ wɑ̈dhii ki nyïɑ̈gø kinøw? Møwɑni pɑ di ngeew wɑ̈g ki ngyëny ɑ́tegg mø pöödh miy ɑ́dɑ̈g, kɑ ge di mëggi tyëng-ɑ ɑbuur?” Kɑ ngɑnɑni cɑy gen. Kɑ Yëso okööbø kinni, “Wiyu en. Ede ɑ judu en? Ágwøg-ɑ gïjø me myëër kiperɑ. Tyëng-ɑ ɑbuur ying-ɑ buti wun yethi cyɑ̈ng bënn, o ge ócuggø göggø yi wun ki gïgdøj kì bøli keny-ɑ dwɑddi yi wun. De yɑ koo ying buti wun yethi cyɑ̈ng bënn. Ágwøg-ɑ gïn-ɑ cuggi lwɑ̈ngø yi en. Dëlɑ ɑ́mɑ̈ɑ̈ge’ gïnyø e gwir-ɑ yɑn kipe konyø, e bøli kenyɑni nuti wɑ̈nhø. Yɑ köbb-ɑ wun kidyër kinni, gïn-ɑ ɑ́gwøg yi ngɑɑn, ówɑjji kì kɑ̈jj-ɑ ópwönyi wöndøj kì kömi piny bëne, o ge nyi pɑ̈rrii.” Kɑ Yeudɑ̀ jɑl Iskɑryøt, o bɑ ɑ́kyel kì kelli jøbɑng Yëso gɑ pyɑ̈rø wïdɑ́ryew, kedh-ɑ yï jɑggi ókwër, e kedh-ɑ be twɑnyi Yëso. Amïni pëthi gen, kɑ gø köbbi gen kinni ónëngi yi gen ki ngyëny. Kɑ Yeudɑ̀ oyɑ̈bø ki keny muuje gøn. Kɑ pyëj yi jøbɑnge, kì cyɑ̈ng-ɑ cɑ̈gi Kwëër Olwëny, eni cyɑ̈ng-ɑ nyi ngɑɑl órömm kì thyënhø kinni, “Á keny ɑ dwɑddi yi yïn, o wø kedhi wøn be gwøgi gïi kwër kì yije?” Aöde ki ɑ́ryew kì kelli jøbɑnge, kɑ gï köbbe kinni, “Kedhu kɑɑldwøng, wu órøøm ki jɑl me kɑ̈ddi ki pugi pï, kɑ wu løgu bɑnge. Kɑ jɑl gøl-ɑ ókedhe pyëj wun kinni, ‘Jɑlpwönyø okööbø kinni, ɑ́gøne øn-ɑ ócɑɑmɑ gïi Kwëër Ákɑɑdh, wøki jøbɑngɑ?’ Wu ónyudhe ød mɑl me lɑɑj, me yije di jɑmmì møg-ɑ ópyëlø. Kɑ jɑmmi kwër pyël wun kì kenyɑni.” Adhwödh jøbɑnge kɑ ge kedh-ɑ kɑɑldwøng. Kɑ møgɑni yood yi gen ni kɑ ɑ́köbbe gïn. Kɑ jɑmmi Kwëër Ákɑɑdh pyël gen. Keny-ɑ ɑ́göög piny ki wɑɑng thyënhø, ɑbëëne geki jøbɑnge, jøg-ɑ pyɑ̈rø wïdɑ́ryew. Keny-ɑ ɑ́ying gen tɑw ge ocyɑ̈mø, ɑkööb Yëso kinni, “Yɑ köbb-ɑ wun kidyër kinni, yɑ óngeew yi nget ɑ́kyel kì kelli wun; men-ɑ́ ngɑn cyɑ̈ɑ̈m wøn ceth.” Acɑ̈gi gen ki kïïmø yi kwøbbe, kɑ gø pyënyi gen, megø kì bɑng megø kinni, “Bɑ yɑn?” Kɑ gï köbbe kinni, “Bɑ ɑ́kyel kì kelli wun, wun ɑ pyɑ̈rø wïdɑ́ryew, o ngɑnɑni cingɑ ójwɑ̈ɑ̈gɑ yij tɑbø kyeel ki cinge. Nyɑɑr dhɑnhø bɑ men thøw, ni kɑ̀ ógwedii kì yethi wɑ̈jji kwërø. De ngɑn-ɑ ngeew Nyɑɑr dhɑnhø ree dɑ cyën! Lɑ̈w ke di cöge e pɑ nywøl.” Kɑ kɑ̈ng-ɑ́ nudd ge ocyɑ̈mø, ɑkɑ̈bbi Yëso ki ópun, ɑkwënge gøn, kɑ gø pøde, ɑmëgge gøn jøbɑnge, kɑ okööbø kinni, “Kwɑnyu en, men bɑ dëlɑ.” Kɑ ókɑ̈bbø ki óthɑ̈gi, kɑ Jwøk pwøje, kɑ gø mëgge gïn. Kɑ ge ómɑ̈dhø bënn kì ree. Kɑ gï köbbe kinni, “Men bɑ remɑ men-ɑ thyeer lwömi Jwøk, ókyëër piny kipe ji mø ngenyø. Yɑ köbb-ɑ wun kidyër kinni, yɑ pɑ mɑ̈ɑ̈dhø ki møgi oløg këti, gïti cyɑ̈ng-ɑ ómɑdhɑ en, e nyɑ̈n kì Pödhi Jwøk.” Keny-ɑ ɑ́rum gen ki mɑlli Jwøk ki wör, ɑkedhi gen wïj Kïti Dhetun. Kɑ ge köbbi yi Yëso kinni, “Wu órengi wu bënn, kɑ yɑ wiyu piny, mɑ́ wɑ̈nyi kwërø okööbø kinni, ‘Jɑlkwɑ̈yø ónɑ̈g yi Jwøk, kɑ dyëg otɑyø.’ De keny-ɑ ódwöögɑ mɑl, wu óyöömɑ Gɑlelì.” Kɑ köbbi yi Pïtør kinni, “Yï pɑ wiyɑ piny, cɑgg yï wiy piny yi tyëng-ɑ kyeelø bënn!” Kɑ köbbi yi Yëso kinni, “Yɑ köbb-ɑ yïn kidyër kinni, tïn kì wɑ̈r, e óthwønh nuti köögø tyel ɑ́ryew, yɑ ókyer yi yïn kinni yɑ kwïj yi yïn ki tyel ɑ́dɑ̈g.” Kɑ Pïtør órɑ̈ɑ̈yø ki kwøb kinni, “Cɑgg yɑ ceg thøø kyeel ki yïn, yɑ pɑ kyëdø kinni yï kwïjɑ!” Kɑ jøbɑnge møg-ɑ kyeelø bënn okööbø ki møg ni møgɑni. Kɑ ge kedh-ɑ keny me cwøl ɑ́ Getsemɑnì. Kɑ jøbɑnge köbbe kinni, “Pëggu keny, kɑ̈ng-ɑ kwɑ̈jjɑ.” Akɑ̈ɑ̈le Pïtør, kí Yɑgob, kí Jøn. Acɑ̈gi dële ki juurø, kɑ okïïmø ki mendwøng. Kɑ gï köbbe kinni, “Yijɑ óywöngø ki mendwøng, yɑ køm-ɑ nɑ̈gø yi kwøbbɑni. Bëëd wun kì keny, kɑ wu nëën wun.” Kɑ kɑl-ɑ kedhø, ɑleenge ree piny, kɑ ókwɑ̈jjø kinni, keløg ɑ́ gïn di cuggi, o di cöge e pɑ kedhi yij orɑng. Kɑ ókwɑ̈jjø kinni, “Wïyø! Jɑmmì bënn nyii cuggø gwøgø yi yïn. Nyiig óthɑ̈ngi orɑng men kì bølɑ. De pɑth ki gïn-ɑ dwɑddɑ, dɑ́ gïn-ɑ dwɑddi yi yïn ɑ gwøg.” Kɑ ódwöögø, kɑ jøbɑnge gɑ ɑ́dɑ̈g bënn yuude ge nenø. Kɑ Pïtør köbbe kinni, “Sɑymøn, yï ɑ́neni? Yï ɑ́dhɑ̈li bëëdø yï onëënø, cɑgg ɑ́ ki sɑɑ̀ ɑ́kyel yøw?” Kɑ gï köbbe kinni, “Nëën wun, kɑ wu kwɑ̈jji wun, o wu cög wu pɑ pɑ̈dhi yethi thɑb. Pyëw otyëëdø, de dël nyøødh.” Kɑ odøøgø, kɑ ókwɑ̈jjø e jøl-ɑ kwøbbi tyeli mɑl. Codhe ɑdwööge, kɑ gï yuude ge nenø, mɑ́ nyingi gen peeg yi nin. Kɑ ge ójɑ̈ddø ki gïn köbbi ge gøn. Kì ri dɑ̈ɑ̈g dwönge, kɑ gï köbbe kinni, “Wu nudd wu onenø? Wu ywöm-ɑ ri wun? Árum! Sɑɑ̀ menɑni ɑ́wɑ̈nhi! Nyɑɑr Dhɑnhø cïb-ɑ cinggi tyëngorøg. Dhwödh wun, kedh wɑ. Ngɑn-ɑ ɑ́twɑny yɑn ɑ wɑ̈nhi èn!” Kì bøli kenyɑni ceth kɑ̈ng-ɑ́ nudd e okööbø, ɑbëën Yeudɑ̀, jɑl ɑ́kyel kì kelli jøbɑng Yëso gɑ pyɑ̈rø wïdɑ́ryew, e cyɑ̈dhi kɑ ji mø gïïr, mø yï gen di pil kí lødh. Ge ör-ɑ yi jɑggi ókwër, geki jøpwönyi Cigg kí jøgdøngø. Ge rumø ki nyudhø ki ngïji yi jɑl-ɑ ɑ́ngeewii kinni, “Ngɑn-ɑ ónuum yi yɑn, bene en jɑlɑni. Mɑgu en, kɑ kɑ̈l wun e okorø kidøøj.” Keny-ɑ ɑ́wɑ̈nhe, ɑpödhe yï Yëso, kɑ ócwöddø kinni, “Jɑlpwönyø!” Kɑ gø nuume. Amɑg gen Yëso. Kɑ ɑ́kyel kì kelli tyëng-ɑ cungi kì kenyɑni, pile wøødhe, kɑ bɑ̈ng Ókwër-ɑ Dwøng gøje, kɑ yïthe juude wɑ̈g. Kɑ ge köbbi yi Yëso kinni, “Wu bï be mɑgi yɑn ki pil kí lødh, de wu ce bï-ɑ yï ɑ́muddi ji? Kì cyɑ̈ɑ̈ng yɑ nyi bëëd yɑ nud kì kelli wun kì yij Kengø, yɑ ópwönyø, o yɑ nuti mɑɑg wun. De møg-ɑ yethi wɑ̈jji kwërø ceg-ɑ pɑ̈dhi kɑ̈jji gen ceth.” Kɑ wiy piny yi jøbɑnge bënn, kɑ ge órengø. Kɑ nyelɑwøb megø ólugø kì bɑng Yëso, e rug-ɑ lɑwi kor-ɑ yöm kete. Kɑ dwɑddi mɑgø, de ɑ́bodh kɑ órengø e cyɑ̈dh-ɑ nøw, lɑwe wiye’ piny. Kɑ Yëso peej gøl Ókwër-ɑ Dwøng. Kɑ jɑggi ókwër geki jøgdøngø kí jøpwönyi Cigg bënn ócugø. Pïtør ɑ́bëëd e ólugø kì bɑng Yëso, e lɑ̈wi, gïti kɑ ɑ́wɑ̈dhe gøl Ókwër-ɑ Dwøng. Kɑ pëgg-ɑ buti jøg-ɑ nyi kurø, e oröjø ki mɑc. Ayɑ̈ɑ̈b jɑggi ókwër geki jøg-ɑ burø bënn, ki kwøb møg bɑng gen nɑ̈g gen Yëso. Kɑ ge ocögø ge pɑ yïddi. Kɑ ji mø gïïr nyi mënn-ɑ köme ki gøny me pɑth ki dyër, kɑ møg-ɑ nyi gøønyii yi gen nyii cögø ge pɑ røøm. Kɑ kwï ji møøgø dhwödh-ɑ mɑl, kɑ gø gøøny gen ki møg pɑth ki dyër, ge okööbø kinni, “Álïngi yi wøn, e okööbø kinni, ‘Kengø men-ɑ ógerø ki cing èn, ónyɑɑgɑ piny, o kì bɑng cyɑ̈ng ɑ́dɑ̈g, yɑ ógëdø ki men nuti gerø kɑ cinggi ji.’ ” Cɑgg ɑ́ kinøw, gøøny gen nuti røømø. Kɑ Ókwër-ɑ Dwøng dhwödh-ɑ mɑl, kì bøli burø, kɑ Yëso pyëje kinni, “Yï pɑ löggí ki møg-ɑ gøøny yïn yi gen?” De Yëso ɑ́cög e okudø, nuti wöl löggø. Acigii pyëjø yi Ókwër-ɑ Dwøng kinni, “Yïn ɑ bɑ Mesiy, Wɑ̈d Jwøng-ɑ lenhi?” Alöggi Yëso kinni, “Bene yɑn, o Nyɑɑr Dhɑnhø ólidh yi wun, e obëëdø kì wïj kyëëj Ngɑn-ɑ yïe di tegø, o ólidh yi wun e obëënø ki pølli mɑl!” Kɑ Ókwër-ɑ Dwøng ógødhe kɑge, ɑkööbe kinni, “Wɑ ócigi yɑb ki cwɑ̈gg? Møg-ɑ ɑ́bwöle Jwøk ɑ́lïngi yi wun. Wu lög-ɑ́ɑ̀ dï?” Kɑ ge ólöggø bënn kinni i bɑ̈jjø, o ceg-ɑ thøø. Kɑ kwï gen ngudd-ɑ kömi Yëso ki lɑ́ɑ̀w, kɑ nyinge twöj, kɑ pwöd, kɑ gø nyi köbbi gen kinni, “Bɑ̈ggí ki ngɑn-ɑ ɑ́gøj yïn!” Kɑ kwɑny yi jøg-ɑ nyi kurø, kɑ gø pwöd gen. Kɑ nyɑn me bɑ bɑ̈ng kì gøl Ókwër-ɑ Dwøng obëënø, e Pïtør obëëdø kì kɑl. Keny-ɑ ɑ́lidhe Pïtør, e oröjø ki mɑc, ɑnenne ree, kɑ okööbø kinni, “Yïn thyew, yï ɑ́bëëd wu cyɑ̈dhi kɑ Yëso jɑl Nɑdhɑreth.” Kɑ okyëdø kinni, “Møg-ɑ kømmi yi yïn kwïj yi yɑn, ge pɑ kedhi yïthhɑ.” Kɑ kedh-ɑ ódɑ̈r-ɑ kuni dhø kɑl. Kedh óthwønh oköögø. Kɑ lidh yi bɑ̈ng-ɑ dhɑjø, ɑcɑ̈ge ki köbbi tyëng-ɑ cungi kì kenyɑni këti kinni, “Jɑɑl bɑ ɑ́kyel kì kelli gen.” Kɑ møgɑni cigi kyerø yi Pïtør. Kì bɑng nyɑ keny me thinh, kɑ Pïtør köbbi yi jøg-ɑ cungi kì kenyɑni kinni, “Kidyër yï bɑ ɑ́kyel kì kelli gen, mɑ́ yï bɑ jɑl Gɑlelì.” Kɑ óköngø ki mendwøng kinni, “Jɑl-ɑ kømmi yi wun èn, kwïj yi yɑn.” Kì bøli kenyɑni ceth, ɑköög óthwønh ki ryeew køøg. Kɑ Pïtør ópɑ̈dø ki møg-ɑ ɑ́köbbii yi Yëso kinni, “Yɑ köbb-ɑ yïn kidyër kinni, tïn kì wɑ̈r, e óthwønh nuti köögø tyel ɑ́ryew, yɑ ókyer yi yïn kinni yɑ kwïj yi yïn ki tyel ɑ́dɑ̈g.” Kɑ óywöngø. Kì ri ru wøw ceth, kɑ jɑggi ókwër, kí jøgdøngø, kí jøpwönyi Cigg, kí jø tøg burø bënn ri gen löggi gen. Kɑ Yëso twöj gen, kɑ gø muuj gen Pilɑtø. Kɑ pyëj yi Pilɑtø kinni, “Bene yï Rɑ̈ɑ̈dh Yeud?” Alöggi Yëso kinni, “Ákwøb yi yïn.” Kɑ gøøny yi jɑggi ókwër ki kwøb mø ngenyø. Kɑ pyëj yi Pilɑtø këti kinni, “Bong gïn løøg yi yïn? Lidh kwøbb-ɑ gïïr ek møg-ɑ gøøny gen yïn.” Kɑ ɑ́cög Yëso e pɑ löggi, ɑngɑ̈ng Pilɑtø. De kì yethi Cyɑ̈nggi Kwëër Ákɑɑdh, Pilɑtø ɑ́bëëd e nyi göny-ɑ wɑ̈g kì ød mɑg ki dhɑnhø ɑ́kyel, o ngɑnɑni nyi cwøl-ɑ yi teedø. O ɑ́bëëd e dɑ jɑl me cwøl ɑ́ Bɑrɑbɑ̀ kì ød mɑg. Jɑlɑni ɑ́mɑg-ɑ kyeel ki jøg mɑ ɑ́nɑ̈ɑ̈g ki ji kì yethi cyɑ̈nggi ɑgwɑg. Kɑ teedø ócugø, ge kwɑjj-ɑ Pilɑtø kipe kinni o gööge ki gïn-ɑ nyi gwøge. Kɑ teedø pyëje kinni, “Wu dwɑdd-ɑ kinni, gönyɑ wun Rɑ̈ɑ̈dh Yeud?” Mɑ́ e ngɑ̈ny wøw kinni, Yëso ɑ́muujii kɑ ɑter yi jɑggi ókwër. Kɑ teedø cwɑɑg mɑl yi jɑggi ókwër kinni cwøl gen Bɑrɑbɑ̀ kì yï Pilɑtø. Aköbbi teedø këti yi Pilɑtø kinni, “Kɑ ɑ́rum bëëde kinøw, wu dwɑdd-ɑ kinni o ngɑn-ɑ cwølli yi wun ɑ́ Rɑ̈ɑ̈dh Yeud, göggɑ ngø?” Kɑ ge óryeerø kinni, “Gur wïj yɑdh ɑrïw!” Apëjji Pilɑtø kinni, “Á rɑj mɑ ngø ɑ ɑ́gwøge?” Kɑ ge ti-ɑ ryeerø ki mendwøng kinni, “Gur wïj yɑdh ɑrïw!” Kɑ Bɑrɑbɑ̀ gönyi teedø yi Pilɑtø, e dwɑdd-ɑ kinni o pëthi gen kwööj gen. Kɑ ɑ́rum Yëso ki pwödø, ɑmuuje gøn, o gur wïj yɑdh ɑrïw. Kɑ Yëso peej gøldwøng, (ɑ bɑ gøl modïr) yi dej, kɑ kɑtïbɑ̀ bëne cøng. Aruug ge gøn ki pɑrø me bɑ ɑ́cwïcwïl, kɑ ge okɑ̈dø ki yɑ̈ɑ̈r koodh, ɑcïb ge gøn wïje. Kɑ gø mɑl gen kinni, “Yï ɑ́mïdhi yi Jwøk, Rɑ̈ɑ̈dh Yeud!” Apwöd ge gøn kì wïje ki obej, kɑ ge ngudd-ɑ köme ki lɑ́ɑ̀w, kɑ ri gen bøødh gen piny kì bøle. Keny-ɑ ɑ́rum gen ki gɑggii, ɑluny gen pɑrø ɑ́cwïcwïl wɑ̈g kì ree, kɑ ógudhe dwøøg gen ree. Apeej ge gøn be gur wïj yɑdh ɑrïw. Kɑ ge órøømø ki Sɑymøn jɑl Serin, (wïyi Iskɑnder kí Rupus,) e kɑ̈ɑ̈l-ɑ yethi myërr. Kɑ cir yi jødej, kinni byelle yɑdh ɑrïw Yëso. Akïdhi ge gøn keny-ɑ cwøl ɑ́ Gölgöthɑ̀ (men-ɑ wɑngi kej Cu Wïj). Kɑ gø nëngi gen ki møgi oløg men-ɑ ótolø ki gïjø me keej. De ɑ́cög gø pɑ mɑdhe. Agur ge gøn wïj yɑdh ɑrïw. Kɑ ógudhe pɑ̈ngi yi gen kì kelli gen, ge leng kɑ wél. Águr wïj yɑdh ɑrïw, e piny bɑ sɑɑ̀ ɑ́bïngwen kì mwøl. Møg-ɑ per gïn ɑ́kuumii ógwedø kinni, “Rɑ̈ɑ̈dh Yeud.” Kɑ ɑ́muddi ji ɑ́ryew gur wɑ̈thi yenh ɑrïw kyeel ki en, ɑ́kyel kì wïj kyëje kí ɑ́kyel kì wïj cɑɑme. Kɑ møg-ɑ ókwøbø kì yethi wɑ̈jji kwërø kinni, “Ákwɑɑn kelli tyëngorøg,” pɑ̈dh-ɑ kɑ̈jji gen. Kɑ gɑggi yi tyëng-ɑ kɑ̈lli kenyɑni, ge lëgg-ɑ wɑ̈thi gen, ge okööbø kinni, “Ëë! Yï ngɑn-ɑ nyɑɑg Kengø piny kɑ ger yi yïn ki cyɑ̈ng ɑ́dɑ̈g! Yiel rií, kɑ yï bïí piny kì wïj yɑdh ɑrïw!” Kɑ gɑggi yi jɑggi ókwër geki jøpwönyi Cigg kinni, “Ji møøgø ɑ́yiele, de pɑ cuggi yieli ree. Wiy Mesiy Rɑ̈ɑ̈dh Isrɑil bëe piny ɑnɑn kì wïj yɑdh ɑrïw, o lidh yi wɑ, o yïëy yi wɑ.” Kɑ gwɑddi thyew yi jøg-ɑ ɑ́gur wɑ̈thi yenh ɑrïw kyeel ki en. Keny-ɑ ɑ́göög piny ki sɑɑ̀ pyɑ̈rø wïdɑ́ryew kì dicɑ̈ng, ɑløg piny ree muudhø kì wïj piny bëne, kɑ muunhɑni gït-ɑ sɑɑ̀ ɑ́dɑ̈g kì böörø. Kì sɑɑ̀ ɑ́dɑ̈g kì böörø ɑcwöddi Yëso e óryeerø kinni, “Elöì, Elöì, lɑmɑ̀ sɑbɑktɑnì.” Møgɑni wɑng-ɑ kinni, “Jwøgɑ, Jwøgɑ, yïde ɑ wiy yɑn piny?” Keny-ɑ ɑ́lïngi møgɑni yi kwï ji møg-ɑ cungi kì kenyɑni, kɑ ge okööbø kinni, “Lïng wun, cwøll-ɑ Eliyɑ̀!” Kɑ ɑ́kyel kì kelli gen órengø, kɑ ispwøny jwɑ̈ɑ̈ge yij møgi oløg me wɑj. Agɑ̈ɑ̈ne gøn wïj obej, kɑ gø cïbe dhøg Yëso, o gø cwije, ɑkööbe kinni, “Nëën wɑ, men-ɑ óbëën Eliyɑ̀ be kɑ̈ɑ̈lii piny kì wïj yɑdh ɑrïw!” Kɑ Yëso óryeerø, kɑ othøø. Kɑ ógønh-ɑ bɑ gëng kì yij Kengø ópyëdø kì dïdyëre, cɑg kì wïje mɑl gïti tyele piny. Kɑ dhɑbïdh men-ɑ ɑ́cungi ree rwööm en ki yɑdh ɑrïw, keny-ɑ ɑ́lidhe thøw-ɑ ɑ́thøw Yëso, ɑkööbe kinni, “Kidyër jɑɑl ɑ́bëëd ɑ́ Wɑ̈d Jwøk!” Ádɑ tyëng-ɑ mɑ̈nn mɑ ɑ́nëën ge lɑ̈wi. Meerì Mɑgdɑliyɑ̀, ki Meerì meyi Yɑgom-ɑ thinh geki Yosep, kí Sɑlömɑ̀. Gen ɑ ɑ́lugi kì bɑng Yëso keny-ɑ ɑ́yinge Gɑlelì, ge kɑ̈ll-ɑ gøn. O ɑ́dɑ tyëng-ɑ mɑ̈nn møøgø thyew møg-ɑ ɑ́bï Yerusɑlem ki en. Kɑ Pilɑtø ongɑ̈ngø kɑ ɑ́lïnge kinni, ɑ́rum ki thøø. Acwøle dhɑbïdh, kɑ gø pyëje mɑ rum Yëso ki thøø. Kɑ ɑ́yode møgɑni kì yï dhɑbïnhɑni, ɑmëgge dhɑnhø Yosep. Kɑ Yosep ongëwø ki ógødh kor-ɑ yöm. Kɑ dhɑnhø kɑ̈ɑ̈le piny kì wïj yɑdh ɑrïw, ɑkode gøn ki ógønhɑni, kɑ gø pyële yij rörø men-ɑ ótwegø kì ri kït. Kɑ ngyëd-ɑ dhø burɑni ki tungi kït. Kɑ keny-ɑ ɑ́pyëël dhɑnhø lidh yi Meerì Mɑgdɑliyɑ̀ geki Meerì meyi Yosep. Keny-ɑ ɑ́pöödh cyɑ̈ɑ̈ng Sɑbɑth, kɑ Meerì Mɑgdɑliyɑ̀, kí Meerì meyi Yɑgob, kí Sɑlömɑ̀ ge ongëwø ki ryɑ̈, me kïdhi gen be gïnyi dëël Yëso. Kì mwøl ceth kì cyɑ̈ɑ̈ng Jwøk, ri tuuli cɑ̈ng, ɑ ɑ́kedhi gen kun-ɑ di bur. Kɑ ge okööbø kinni, “Á men ɑ ókøny wɑ ki ngyeli kït kì dhø bur?” (Ábëëd ɑ́ tungi kït me dwøng cɑrø.) Keny-ɑ ɑ́tïng gen wɑ̈thi gen, ɑlidhii yi gen kinni, kïnɑni óngyeel cyɑ̈n. Keny-ɑ ɑ́kedhi gen yij burɑni, ɑlïdhi gen ki nyelɑwøb me bëëdø kì wïj tuung kyëj, e orugø ki ógødh me tɑr. Kɑ ge obwøgø. Kɑ gï köbbe kinni, “Wu ko böggi. Ngɑ̈nyi yi yɑn kinni wu yɑb-ɑ Yëso jɑl Nɑdhɑreth, jɑl-ɑ ɑ́gur wïj yɑdh ɑrïw. Ádhwödh, tøøk kì keny. Lidhu keny-ɑ ɑ́pyëëlii. De kedh wun, köbbu jøbɑnge, kí Pïtør kinni, ‘Møøl-ɑ bøli wun, ceg-ɑ kedhi Gɑlelì. Ólidh yi wun kì kunɑni, ni kɑ ɑ́köbbe wun.’ ” Akedhi gen wɑ̈g, kɑ ge órengø kì buti burɑni, mɑ́ wɑ̈ɑ̈rø ɑ́bï kömi gen, kɑ dëlli gen okïïrø. O bong dhɑnhø mɑ ɑ́köbbi yi gen, mɑ́ ge ɑ́bëëd ge óböggø. Keny-ɑ ɑ́dhwödh Yëso kì Cyɑ̈ɑ̈ng Jwøk kì mwøl ceth, ɑkwønge ree ki nyudhi Meerì Mɑgdɑliyɑ̀, ngɑn-ɑ́ ree ɑ́ryeme wëyrijjø ɑ́bïryew. Akedh Meerì kɑ tyëng-ɑ ɑ́cyɑ̈dhi ki Yëso köbbe. Ge ɑ́bëëd ge óywöngø yethi gen bɑɑrø. De ge nuti yïëyø keny-ɑ ɑ́lïng gen kinni Yëso onëënø, o ólidhø yi ngɑnɑni. Kɑ ocwöbø këti, e ree løg en, kì bøli jøg ɑ́ryew kì kelli gen, ge kedh-ɑ yethi myërr. Adøg ɑ́ryewɑni, kɑ tyëng-ɑ ɑ́döng köbbi gen; de ge ɑ́cög ge pɑ yïëy ki møgɑni. Kì cyɑ̈n cyee, ɑcwöbe kì bøli jøbɑnge gɑ pyɑ̈rø wïdɑ́kyel ge ocyɑ̈mø. Kɑ gï cɑye kipe kɑ̀ nuti yïëëy gen, kí kipe tegi wɑ̈thi gen. Mɑ́ ge ɑ́cög ge pɑ yïëy ki kwøbbi tyëng-ɑ ɑ́lidhii kì bɑng kɑ ɑ́dwööge wɑ̈g kì yij thøø. Kɑ gï köbbe kinni, “Kedhu wïj piny bëne, kɑ teedø bëne pwönyi wun ki wöndøj. Ngɑn-ɑ óyïëy kɑ jwɑ̈ɑ̈g óyiel, de ngɑn-ɑ pɑ yïëy ócɑy. Tyëng-ɑ yïëy ónëngi ki tegø men göög gen ki gïïngɑ̈ngø; ge óryëmmi wɑ̈g ki wëyrijjø ki nyingɑ; ge ódhumø ki dhøg mø pɑth ki dhøggi gen; keløg ge omɑ̈ɑ̈gø ki thöllì, wɑlɑ̀ ge omɑ̈dhø ki sïm, bong gïnrɑj me kedhi ri gen; cinggi gen óthɑɑny gen kömi tyëngbuud, kɑ ge ódönyø.” Kɑ ɑ́rum Wë Yëso ki kwøb ki gen, ɑkïdhii mɑl, kɑ pëgg-ɑ wïj kyëëj Jwøk. Akedh tyëngwöödø, kɑ ge ópwönyø kì kɑ̈jj bënn, ge okønyø yi Wë. Kɑ wööni Jwøk nyodhe kinni bɑ dyër, kì ri ngïjj-ɑ gøggi yi gen. Kɑ tyëng-ɑ mɑ̈nn kedh-ɑ yï Pïtør geki mɑ̈dhhe, kɑ gï löbbi gen møg-ɑ ɑ́köbbi gen bënn. Kì bɑng kenyɑni, kɑ Yëso kiree jøge öre kì wɑɑng cyɑ̈ɑ̈ng mwøl, gï öre’ wɑɑng cyɑ̈ɑ̈ng böörø, o ge kɑ̈l gen wööni kwërø; wöön-ɑ nëënø mi yïën-ɑ gïti ɑtheer. Yïn ɑ jɑldwøng Thyøpiløs. Ji mø gïïr ri gen ɑ́pɑ̈nyi yi gen ki gwed kì ri gïg-ɑ ɑ́cwöb kì kellee. Ge ɑ́gwed-ɑ møg-ɑ ɑ́lïngi yi wɑ kì yï ji, ɑ løg tyëng-ɑ ɑ́lïdhi ki nyingi gen, kí kër-ɑ ɑ́cɑ̈gi gen, kɑ ge ogöögø kipe nyingi Jwøk, ge köbb-ɑ ji wööni Jwøk. Mɑ́ tyelli møgɑni ɑ́rum ki yɑbø yi yɑn kidøøj, yïn ɑ jɑldwøng Thyøpiløs, nënni e døøj kì yïɑ kinni o ge gwëdɑ yïn, ge pyëël yɑn ni kɑ ɑ́cwöb gen ceth. O yod yi yïn kinni kwøbb-ɑ ɑ́pwönyi yïn bënn bɑ dyër. Kì ri Rɑ̈dh Ërödøs, rɑ̈ɑ̈dh Yeudiyɑ̀, ɑ́dɑ ókwërø me cwøl ɑ́ Dhekɑriyɑ̀, kì yij ɑkuud Abiyɑ̀. O cyëge bɑ nyɑɑr gøl kwër thyew, nyinge cwøl ɑ́ Elidhɑbeth. Gen ryeet, bëëdi gen ɑ́bëëd e døøj kì bøli Jwøk, ge mïdh-ɑ cigge kidøøj. De ge ɑ́bëëd ge bong nyigi gen, mɑ́ Elidhɑbeth ɑ́bëëd ɑ́ bwøj, o ge yöø bënn geki Dhekɑriyɑ̀. Cyɑ̈ng ɑ́kyel, ókwërø Dhekɑriyɑ̀ ɑ́bëëd e ogöögø kì bøli Jwøk kì yij Kengø, mɑ́ e bɑ ɑkun-ɑ yije di en ɑ göögø kì bøli kenyɑni. Ábëëd ɑ́ kwöng kì yï ókwër kinni, ngɑn-ɑ kedhi be rɑ̈bi bɑkur, nyi ceg kɑ lengø, codhe ɑpɑ̈dhi wél ki Dhekɑriyɑ̀. Akedhe Kengi Wë. Ádɑ ji mø gïïr cɑrø, mø cungi kì wɑ̈g ge ómɑ̈ddø kì bøli keny-ɑ rɑ̈ɑ̈b bɑkur. Codhe, kɑ wëywöni Wë ocwöbø kì bøli Dhekɑriyɑ̀, e cung-ɑ́ɑ̀ wïj kyëëj këli bɑkur. Dhekɑriyɑ̀ keny-ɑ ɑ́lidhe wëywödø, kɑ obwøgø ki mendwøng. De ɑ́köbbi yi wëywödø kinni, “Dhekɑriyɑ̀, yï ko böggi. Kwɑ̈jjí ɑ́lïngi yi Jwøk. Cyëgí Elidhɑbeth ónywøl ki wɑ̈d. Kɑ nyinge ócɑɑg ɑ́ Jøn. Yï óyïddi ki medi pyëw me dwøng, dhɑnhø bëne pyëwe ómïni keny-ɑ ónywøølii. Jøn óbëëd ɑ́ jɑl me pere teg kì yï Wë. Pɑ pɑ̈nyi mɑ̈dhø ki møgi oløg geki mugg-ɑ teg møg-ɑ kyeelø, ónywøl thyew e pɑ̈ngø yi Wëykwërø. Tyëng Isrɑil mø gïïr ódwööge yï Wë Jwøøg gen. Ócyɑ̈dhi kì bøli Wë ki Wëy geki tegø ni Eliyɑ̀ jɑltöng. Wëëg ólug yi en, kɑ gï rebe këti ki nyigi gen, kɑ tyëng-ɑ pyem kwøbbi Jwøk gï dwööge yij yuu rumm-ɑ dyër, o ji tyenye kipe bëëni Wë.” Aköbbi wëywönɑni yi Dhekɑriyɑ̀ kinni, “Óyod yi yɑn kidï, kinni møg-ɑ kømmi yi yïn bɑ dyër, yɑ yöø ni men? O cyëgɑ bɑ yu thyew!” Alöggi wëywödø kinni, “Bene yɑn Gɑbriel ngɑn-ɑ cungi kì bøli Jwøk. Yɑ ɑ́ör-ɑ yïí be kwøb ki yïn, o yï muujɑ wöön-ɑ døj èn. Adɑ́ lïng! Yï pɑ cuggi kwøb gïti keny-ɑ ópɑ̈dhi kwøbbɑni, mɑ́ kwøbbɑ nuti yïëëy yïn!” Ji ɑ́pïd yi yïd kì wɑ̈g, kɑ ge ongɑ̈ngø mɑ løge ngø ɑ wëggi Dhekɑriyɑ̀ cwöngø kì Kengø. Dhekɑriyɑ̀ ɑ́dhɑ̈li kwøb keny-ɑ ɑ́bëëne wɑ̈g. Kɑ yod yi ji kinni dɑ gïn liidh en kì Kengø. Keny-ɑ ɑ́thumi bøli kej gwøge kì yij Kengø, ɑkedhe pɑc. Kì bɑng kenyɑni, kɑ Elidhɑbeth cyëge óyïddø ki dhɑnhø. Kɑ ocögø e pɑ bï wɑ̈g kì gøle ki dwɑ̈tt ɑ́bïj. Kɑ Elidhɑbeth okööbø kinni, “Lidhu gïn-ɑ ɑ́göggi yɑn yi Jwøk! Yɑ ɑ́bëëd yɑ yɑ̈rø kì bøli ji bënn, de ɑnɑn ɑyɑ̈rɑni ɑ́kɑ̈ɑ̈l wɑ̈g kì kömɑ yi Wë!” Kì bïkyeel dwɑ̈tt, e Elidhɑbeth yije dɑ dhɑnhø, ɑör wëywödø Gɑbriel yi Jwøk, gø öre’ kɑɑl me cwøl ɑ́ Nɑdhɑreth kì modïri Gɑlelì, yï nyɑnɑjur me nywøm yi jɑl me cwøl ɑ́ Yosep kì thɑ gøl Debïd. Nyingi nyɑnɑni cwøl ɑ́ Meerì. Wëywödø ɑ́bï yïe, ɑkööbe kinni, “Mɑ̈dh rií! Yï okorrø yi Wë, kɑ yï gyëdhe ki mendwøng!” De Meerì ɑ́bwøg yi møg-ɑ ɑ́kwøb yi wëywönɑni, de pyëny-ɑ ree mɑ løge’ ngø ɑ wɑngi yi mɑ̈dhhɑni. Aköbbii yi wëywödø kinni, “Yï ko böggi Meerì, yï óthödhi yi Jwøk ki dhwɑ̈nge. Lïng! Yï óngøl ki dhɑnhø, kɑ yï pɑ̈dh-ɑ piny ki wɑ̈d. Kɑ nyinge ócɑɑg ɑ́ Yëso. Óbëëd ɑ́ dhɑnhø me dwøng, o ócwøl ɑ́ wɑ̈d Jwøng-ɑ Pëddi Döng. Ómëggi kwøøm kwɑn Rɑ̈dh Debïd yi Wë Jwøk. Tyëng gøl Yɑgob ójɑɑg yi en gïti ɑtheer, o jyɑ̈ge óbong cöge!” Kɑ Meerì wëywödø köbbe kinni, “Kwøbbɑni ócuggi kidï, e yɑ nuti pɑ̈nyø nywɑlø yi jɑlø?” Kɑ Meerì köbbi yi wëywödø kinni, “Wëykwërø óbï kömí, kɑ yï rïm yi tegi Jwøk, o nyelthinh óbëëd ɑ́ kwërø, o ócwøl ɑ́ Wɑ̈d Jwøk. Anɑn lidh Elidhɑbeth nyiwɑɑd wun, yije dɑ dhɑnhø ngö e bɑ yu. Ji bënn ɑ́rum kinni i pɑ cuggi yïddø dhɑnhø, de ɑnɑn, yije pɑ di dhɑnhi dwɑ̈tt ɑ́bïkyel? Bong gïjø ɑ́kyel me pɑ cuggi gwøgø yi Jwøk.” Kɑ Meerì okööbø kinni, “Bene yɑn nyɑ bɑ̈ng Wë, wiy møgɑni cwöb gen kiperɑ ni kɑ ɑ́kwøøb gen!” Codhe, kɑ wëywödø ókedhø. Adhwödh Meerì, kɑ jwɑn-ɑ pɑc megø kì myërri kwøømi Yeudiyɑ̀. Kɑ wɑ̈dh-ɑ gøl Dhekɑriyɑ̀, ɑmɑ̈dhe Elidhɑbeth. Keny-ɑ ɑ́lïngi mɑ̈dhhi Meerì yi Elidhɑbeth, ɑcɑ̈bbi dhɑnhø kì yije. Kɑ Elidhɑbeth opɑ̈ngø yi Wëykwërø. Aryeere ki cwɑg mø døngø kinni, “Yïn ɑ bɑ ɑgyëdh kì kelli tyëng-ɑ mɑ̈nn bënn, o dhɑnhø men-ɑ ónywøl yi yïn bɑ ɑgyëdh. Gïn-ɑ døøj ni men göggi yɑn kɑ per ngø, ɑ këëm yɑn yi meyi Wɑ̈ɑ? Mɑ́ keny-ɑ ɑ́lïngɑ cwɑggí ceth, kɑ dhɑnhø ócɑ̈bbø kì yijɑ yi medi pyëwe. Yï ɑ́gyëdh kì bɑng kɑ ɑ́yïëëy kinni, møg-ɑ ɑ́kwøb yi Wë ócwöb ceth kidyër!” Codhe, kɑ Meerì okööbø kinni, “Yɑ lejj-ɑ Wë ki pyëwɑ bëne, kɑ pyëwɑ ómïnø kì ri nyingi Jwøk ngɑn-ɑ bɑ Yïënɑ. Mɑ́ yɑn yɑ bɑ̈nge, yɑ korre’ korrø. Cɑg ɑnɑn ceth, yɑ ócwølli yi ji bënn yɑn ɑ́ ɑgyëdh, mɑ́ Jwøk Áyïmø ɑ́göög ki gïgdøngø kiperɑ. Nyinge bɑ kwërø. Jwøk lɑ̈mpyëwe nyi nyudhe’ tyëng-ɑ wørii kì yethi rïjj bënn gït-ɑ ɑtheer. Ágöög ki gïgdøngø ki tege. Tyëng-ɑ tɑ̈dø møg-ɑ nyi rumø ce dɑ per gen, ɑ́cyedde. Tyëng-ɑ jyɑ̈gø ɑ́kɑ̈ɑ̈le piny kì wɑ̈thi kwømmi gen, kɑ tyëng-ɑ bɑ mööl tïnge mɑl. Tyëng-ɑ ri gen di kɑ̈j, ɑ́yɑ̈ɑ̈nge ki jɑmm-ɑ døøj. Kɑ tyëngkɑ̈rì ryeme ki cinggi gen. Bɑ̈nge, Isrɑil nyi kønye’ kønyø, pyëwe nyii lɑ̈ɑ̈mø ceth ki jie. Ni kɑ ɑ́könge kì bøli kweyyee, ɑ løg Abrɑhɑm geki kwɑrre kinni, gï ókorre gïti ɑtheer.” Abëëd Meerì kì gøl Elidhɑbeth ki dwɑ̈tt ɑ́dɑ̈g, codhe ɑdøøge pɑɑ gen. Keny-ɑ ɑ́thumi dwɑ̈tti Elidhɑbeth, ɑpɑ̈dhe piny ki wɑ̈d. Kɑ lïngi yi tyëng byëëg gen kí wɑddi gen kinni i Jwøk pyëwe lɑ̈ɑ̈mø ki en, kɑ pëthi gen ómïnø ki mendwøng, geki Elidhɑbeth bënn. Kɑ nyɑnyelthinh ngøl keny-ɑ ɑ́göög cyɑ̈ngge ki ɑ́bïdɑ̈g. Nyinge ɑ́dwɑdd-ɑ cɑgø yi gen ɑ́ Dhekɑriyɑ̀, o di cwølli ki nyingi wïye. De meye ɑ́kyëëd kinni, “Pɑth! Nyinge ócɑg ɑ́ Jøn.” Aköbbi Elidhɑbeth yi gen kinni, “Dɑ́ ngø, e bong dhɑnhø me cwølli ki nyingɑni kì gøl wun.” Agwel wïye yi gen, ge pyëj-ɑ gøn ki nying-ɑ dwɑdde cɑ̈ggi dhɑnhø. Kɑ Dhekɑriyɑ̀ ócwöddø ki pɑ̈m-ɑ köme nyi gwëëd, ɑgwëde kinni, “Nyinge bɑ Jøn!” Kɑ dhɑnhø bëne ongɑ̈ngø. Kedh Dhekɑriyɑ̀ døøg-ɑ be kwøb kì bøli kenyɑni ceth. Kɑ ócɑ̈gø lejji Jwøk. Kɑ tyëng byëëg gen bënn obwøgø, kɑ teedø pëgg-ɑ be wɑjji møgɑni kì yethi myërri kwøømi Yeudiyɑ̀ bënn. Kɑ tyëng-ɑ lïngø ri gen nyi pyënyi gen kinni, “Dhɑnhø men, ógöögø ɑ́ ngø mɑwɑnø?” Mɑ́ tegi Wë ying-ɑ köme. Codhe, kɑ Wëykwërø bï-ɑ kömi Dhekɑriyɑ̀ wïyi Jøn, ɑcɑ̈ge töngi møg-ɑ ócwöb dhuki megø, ɑ́kööb kinni, “Lejji wɑ Wë Jwøøg Isrɑil! Kipe kɑ ɑ́bëëne be kønyi wɑ, kɑ wɑ dwööge wɑ̈g kì yethi rɑj. Wɑ ɑ́thödhe ki Yïëdi me teg, me kɑ̈ɑ̈l thɑ gøl Debïd bɑ̈nge, ni kɑ ɑ́kööbe kì ri jøtöng møge kwërø, kɑ̈ge dööng kinni, møgɑni ógwøge ɑ́köngi kinni wɑ óyiel yi en kì cinggi tyëngmɑ̈ɑ̈nø. Tyëng-ɑ mɑɑn wɑ pɑ yïddi ki tegø. Ákööb kinni pyëwe ólɑ̈ɑ̈m ki kweyyee, o wïje pɑ pɑ̈nyi wïlø ki könge, köng-ɑ bɑ kwër. O wɑ bëëd wɑ, wɑ bɑ ɑkwër, o wɑ tir kì bøli Jwøk, kì yethi cyɑ̈ngg-ɑ ónëën wɑ bënn. Yïn, nyɑrɑ! Yï ócwølli yïn ɑ́ jɑltööng Jwøng-ɑ Pëddi Döng. Yï ócyɑ̈dhi kì bøli Wë, yï gwir-ɑ yuue. Jie ónyudhi yi yïn kinni ge bɑ møg-ɑ óyiel keny-ɑ ólɑ̈ɑ̈ny orøøg gen. Jwøgee pyëwe yöd. Wɑ óthödhe ki cɑr, o wɑ óyiel yi en, o óbï e kɑ̈ɑ̈l-ɑ mɑl, kɑ omënyø kì kömi tyëng-ɑ bëëdø kì yij muudhi thøø bënn, o wɑ ókɑ̈lli yi en kì yij yuu mër.” Kɑ nyelthinh Jøn ókedhø e ódøngø, kedh e opɑ̈ngø yi wëy. Kɑ obëëdø kì yij pɑ̈l gïti kɑ ɑ́bëëne be pwönyi tyëng Isrɑil. Kì bøli kenyɑni, Ogostøs Kɑysɑr ɑ́muuj ki cigg i gweed nyingi ji-ɑ bëëdø kì yethi pödhh-ɑ jɑɑg yi mïri Römɑ̀ bënn. Gwenɑni ɑ ɑ́kwøng ki gwedø kì Suriyɑ̀, ɑ́ Kwïrïniyøs ɑ bɑ modïr. Kɑ ji bënn kedh-ɑ yethi kɑ̈ddi gen be gwedø. Codhe, ɑdhwödh Yosep kì kɑɑl Nɑdhɑreth kì modïri Gɑlelì, kɑ kedh-ɑ Betleem kì modïri Yeudiyɑ̀. Betleem bene kɑɑl-ɑ ɑ́nywøøl Rɑ̈dh Debïd. Yosep ɑ́kedh-ɑ kunɑni mɑ́ e bɑ wɑ̈d gøl Debïd. Kɑ Yosep nyinge gwed geki Meerì nyɑn-ɑ nywøm yi en, e yije dɑ dhɑnhø. Kɑ Meerì pïïd yi pɑ̈dhi piny ge nudd ge ying-ɑ Betleem, Kɑ pɑ̈dh-ɑ piny ki wɑ̈de, wɑ̈n-ɑ kɑyø. De mɑ́ e bong ød mɑ ɑ́yod yi gen kì gøl wëll, ɑbɑne dhɑnhø ki ógudh, kɑ gø pyëële yij gïn-ɑ nyi nëngi dhög ki gïn cɑm yi gen kì lwɑg. Kì wɑ̈rɑni, ɑ́dɑ jødyëg mɑ ɑ́ying yethi pwödh ge kor-ɑ dyëgi gen. Kɑ wëywödø ocwöbø kì bøli gen. Kɑ ge cɑr yi mɑ̈ɑ̈r Wë, ɑbwøg gen ki mendwøng. Kɑ ge köbbi yi wëywönɑni kinni, “Wu ko böggi, yɑ muuj-ɑ wun wöödø me døj, men-ɑ óthödhi ji bënn ki medi pyëw. Dicyɑ̈ɑ̈ng, yïëni wun ɑ́øør piny kì kɑɑl Debïd, bene en Mesiy Wë. Men bɑ ngïji kiper wun. Óyod yi wun e óbɑnø ki ógudh, o ópyëël yij gïn-ɑ nyi nëngi dhög ki gïn cɑm yi gen kì lwɑg.” Codhe, kì bøli kenyɑni ceth, ɑcwöb yɑɑy wëywödd kì buti wëywöni tyeli mɑl, ge lejj-ɑ Jwøk kinni, “Dhwɑ̈ng bɑ mi Jwøk kì mɑl, o mër bɑ mø ji-ɑ pyëw Jwøk med ki gen kì kömi piny!” Keny-ɑ ɑ́kedh wëywödd kì buti gen, ge døøg-ɑ mɑl, kɑ jødyëg ri gen köbbi gen kinni, “Kedhi wɑ Betleem, o wɑ lidh wɑ gïn-ɑ ɑ́cwöb, ɑ pere ɑ́köbbi wɑ yi Wë.” Codhe, kɑ jøkwɑ̈yø ókedhø ge ójwɑnø, ɑyod gen Meerì geki Yosep kí dhɑnhø. Dhɑnhø ɑ́yuud yi gen e buud-ɑ yij gïn-ɑ nyi nëngi dhög ki gïn cɑm yi gen kì lwɑg. Keny-ɑ ɑ́lidh ge gøn, ɑkwøb gen møg-ɑ ɑ́köbbi gen yi wëywödø kì ri nyɑgïnɑni. Tyëng-ɑ ɑ́lïng bënn ɑ́ngɑ̈ng yi møg-ɑ ɑ́kwøb yi jødyëg. De Meerì møgɑni mïdhe’ mïdhø kì pyëwe, e orumø kì ri gïn. Codhe, ɑdøøg jødyëg kun-ɑ di dyëgi gen, ge lejj-ɑ Jwøk, gø pøjji ge’ pøjjø kipe gïg-ɑ ɑ́lïngi yi gen, kí møg-ɑ ɑ́lidh yi gen. Kwøbb-ɑ ɑ́köbbi gen yi wëywödø ɑ́pɑ̈dhi kɑ̈jji gen ceth. Keny-ɑ ɑ́göög cyɑ̈nggi nyɑgïnɑni ki ɑ́bïdɑ̈g, ɑngølii, kɑ nyinge cɑg ɑ́ Yëso, nyingɑni ɑ ɑ́cɑɑgii yi wëywödø cøn e nuti yodø yi meye. Keny-ɑ ɑ́bëën bøli kej dhïwi gen, ni kɑ̀ ógwedii kì yij Wɑ̈nyi Ciggi Mosɑ̀, ɑkïdhi ge gøn Yerusɑlem be thërrii Wë, ni kɑ ógwedii kì yethi Ciggi Wë kinni, “Thyëyi kɑyø men-ɑ nywøl ɑ́ jɑlø Jwøng-ɑ Ácwɑ̈ɑ̈j.” Kì bɑng menɑni, Meerì geki Yosep ɑ́kedhi be muujø ki gëëdhi ni kɑ̀ kööb Ciggi Wë kinni, i muuj dhɑnhø ki ɑkùr-ɑ døngø ɑ́ryew, o ke bong ge gïn, muuje ki ɑkùr ójwɑt ɑ́ryew. Ádɑ jɑl mɑ ɑ́bëëd kì Yerusɑlem, me cwøl ɑ́ Sɑymøn, jɑlɑni ɑ́bëëd ɑ́ ngɑntir, o Jwøk wør yi en ki mendwøng. Ábëëd e yïd-ɑ bëëni ngɑn-ɑ óyiel Isrɑil, o Wëykwërø ɑ́ying-ɑ köme. Sɑymøn óköbbø yi Wëykwërø i pɑ wöl thøø, e Mesiy men-ɑ óör yi Wë be yieli Isrɑil nuti bëënø, kɑ gø lidhe. Akøøl Sɑymøn Kengø yi Wëykwërø keny-ɑ ɑ́bëën Yosep geki Meerì yij Kengø, be thyeri nyɑgïnthinh Yëso, ni kɑ ógwedii kì yethi Cigg. Kɑ nyɑgïnthinh kwɑny yi Sɑymøn, kɑ Jwøk pwøje, ɑkööbe kinni, “Anɑn Wuö, wiy yɑn, yɑ bɑ̈ngí, o yɑ thøwɑ ki mër. Yïëní ɑ́lidhɑ ki wɑngɑ, eni Yïën-ɑ ɑ́cïb yi yïn bøli ji bënn. Bɑ cɑr men-ɑ ólidh yi tyëngpɑth, o tyëng Isrɑil ówør kì bɑnge.” Wïyi Yëso geki Meye ɑ́ngɑ̈ng yi møg-ɑ ɑ́kwøb yi Sɑymøn kì ree. Akwëëng gen yi Sɑymøn. Kɑ Meerì köbbi yi Sɑymøn kinni, “Dhɑnhø men, ɑ́yieny yi Jwøk kɑ per kinni, o ji mø gïïr pɑ̈ɑ̈dh gen, o møøgø yiel kì Isrɑil. Bɑ ngïji men-ɑ ɑ́ör yi Jwøk, de pɑth ki men-ɑ óyïëy yi ji bënn. O pyëwí ópyëëd yi ledhi kwøbbɑni, ge óni pilø kì pyëwí, o rumm-ɑ kɑnni yi teedø kì pëthi gen yod.” Ádɑ ngetitöng, me cwøl ɑ́ Anɑ̀, bɑ nyɑɑr Pɑnuel kwɑɑr Aceer. Anɑ̀ bɑ yu. Ábëëd kɑ runn ɑ́bïryew geki jɑlgøle. Codhe, kɑ jɑlgøle othøø, ɑdönge ɑ́ thwöm. Anɑn runne bɑ pyɑ̈r ɑ́bïdɑ̈g wïdɑ́ngwen. Anɑ̀ ɑ́bëëd e pɑ nyi kedhi wɑ̈g kì Kengø, de nyi rïïjø e kwɑjj-ɑ Jwøk, e ree nyi twöne’ twönø ki gïncɑm kì dicɑ̈ng kí wɑ̈r. Anɑ̀ ɑ́bï kì bøli kenyɑni ceth, ɑpwøje Jwøk, kɑ okööbø kì ri Yëso, e köbb-ɑ tyëng-ɑ nenni yieli Yerusɑlem yi Jwøk Yosep geki Meerì keny-ɑ ɑ́rum gen ki gwøgi jɑmmi kwöng ni kɑ ɑ́cïg Wë, ɑdøøg gen Nɑdhɑreth pɑɑ gen kì Gɑlelì. Nyelthinh ɑ́døngi kɑ ótëngø. Ábëëd wïje pel, o gyëdhhi Jwøk ónënnø kì köme. Kì yethi runn bënn, tyëng gøl yɑɑ Yëso ɑ́bëëd ge nyi kedh-ɑ Yerusɑlem be Kwëër Ákɑɑdh. Keny-ɑ ɑ́göög runni Yëso ki pyɑ̈rø wïdɑ́ryew, ɑkedhe ki gïn ni kɑ̀ bëëde ɑ́ kwöng. Keny-ɑ ɑ́rum cyɑ̈nggi kwër, ɑcɑ̈gi gen ki døøg pɑc. Nyelthinh Yëso döngø kì ngɑ̈thi gen kì Yerusɑlem, de kwïj yi Yosep geki meye kinni döngø. Cɑ̈ng ɑ́tyëg yi gen ge ócyɑ̈dhø, ge rømm-ɑ kinni Yëso ying-ɑ kelli ji-ɑ cyɑ̈dhi ki gen. Codhe, ɑcɑ̈gi gen ki yɑbii kì kelli wɑddi gen geki mɑ̈dhhi gen. Kɑ ocögø e pɑ yod yi gen, ɑdøøg gen Yerusɑlem be yɑbii. Kì bɑng cyɑ̈ng ɑ́dɑ̈g, ɑyod gen Yëso kì yij Kengø, e obëëdø kì kelli jøpwönyø, e lïng-ɑ kwøbb-ɑ kømmi yi gen, kɑ gï nyi pyëje thyew. Tyëng-ɑ ɑ́lïngi kwøbbe ɑ́ngɑ̈ng bënn yi peli wïje geki lögg-ɑ nyi løøge. Wïyi Yëso geki meye ɑ́ceg ngɑ̈ngø keny-ɑ ɑ́lidh ge gøn. Kɑ köbbi yi meye kinni, “Wɑ̈dɑ, ɑ́ kipe ngø ɑ göggí wøn ki gïn ni men? Pëthi wøn ɑ́lïngi wøki wïyí, wø yɑb-ɑ yïn.” Aköbbi gen yi Yëso kinni, “Á kipe ngø, ɑ ɑ́yɑbu yɑn? Kwïj yi wun kinni, yɑ di dwɑddø o yɑ bëëdɑ kì ød Wïyɑ?” De gïn-ɑ ɑ́wɑngi yi en nuti gɑmø yi wɑ̈thi gen. Kɑ Yëso kedh-ɑ pɑc Nɑdhɑreth ki gen. Kɑ obëëdø e lïng-ɑ dhøggi gen. De møgɑni omïdhø yi meye kì pyëwe. Yëso wïje ɑ́pëddi pïlø, kɑ ódøngø. Pyëw Jwøk ɑ́bëëd e med ki en. O mɑɑr yi ji bënn. Ábëëd ɑ́ Tiberyøs Kɑysɑr ɑ jyɑ̈gø ɑ́ rɑ̈nhdwøng, e runne bɑ pyɑ̈rø wïdɑ́bïj kì yij lɑwø. Kì bøli kenyɑni Pilɑtø jɑl Pøntøs, ɑ ɑ́bëëd ɑ́ modïr mi Yeudiyɑ̀, o Ërödøs bɑ modïr mi Gɑlelì, o Pïlïp ómï Ërödøs bɑ modïr mi Ithuriyɑ̀, o Trɑkonitì geki Lisɑniyɑ̀ bɑ gen ɑ jyɑ̈gø kì Abilenɑ̀. Anɑ̀ geki Kɑyɑpɑ̀ ɑ́bëëd gɑ ókwërr-ɑ døngø. Kì bøli kenyɑni ɑ ɑ́bëën wööni Jwøk yï Jøn wɑ̈d Dhekɑriyɑ̀ e ying-ɑ yij pɑ̈l. Acyɑ̈dhe kì yethi myërri kömi Nɑm Urdun e cïj-ɑ ji kinni yewi gen, o ge jwɑ̈ɑ̈g, o lɑ́ɑ̀w ódwöög piny kipe orøøg gen. Ni kɑ ógwedii kì yij wɑ̈nyi Icɑyɑ̀ jɑltöng kinni, “Dɑ cwɑg møg cwöddi kì yij pɑ̈l kinni, Gwiru yuu Wë. Gwøgu yöö ɑ́ óbödh kipere. Thør kɑ̈jj-ɑ bɑ mɑ̈dd bënn. Kɑ kïttì geki ótøng bënn wɑ̈thi gen pɑ̈ɑ̈r ki piny. Tyeeny yëth-ɑ bɑ ɑ́dud. Kɑ yëth-ɑ bɑ gøngì gwøg ge lïw. O dhɑnhø bëne lïdhe ki yïën-ɑ kɑ̈ɑ̈l yï Jwøk.” Kɑ ji mø gïïr møg-ɑ ɑ́bï yïe be jwɑ̈ɑ̈gø, köbbe kinni, “Wu bɑ thöllì! Á men ɑ ɑ́töddi wun kinni, rengi wun yi rɑ̈ji pyëw Jwøk? Göög wun ki gïg nyodh kinni wu ɑ́yewi. Kɑ wu ko kööb ki pëthi wun kinni, ‘Abrɑhɑm bɑ kweyi wøn.’ Yɑ köbb-ɑ wun kinni, Jwøk ócuggø kɑ̈ni wɑ̈g kì ri kïttì møg ki kwɑrri Abrɑhɑm. Dørø ying-ɑ ri tyeli yɑdh ɑnɑn, yɑnh-ɑ pɑ kɑ̈ni ki nywøl mø døøj, ceg kɑ ngøl piny kɑ leeng mɑc.” Kɑ Jøn pyëj yi teedø kinni, “Gwøg wøn ngø?” Alöggi Jøn kinni, “Ke di ngɑn yïe di ógudh ɑ́ryew, nënge ngɑn-ɑ yïe bong ógødh. Ke di ngɑn yïe di gïncɑm, nywɑɑg gïncɑmɑni thyew.” Cɑgg ɑ́ jøgwɑ̈j, ge ɑ́bï yï Jøn thyew be jwɑ̈ɑ̈gø. Kɑ Jøn pyëj yi gen kinni, “Jɑlpwönyø! Gwøg wøn ngø?” Aköbbi gen yi Jøn kinni, “Wu ko nyi kɑ̈bbi ki gwɑ̈j mø gïïr kibøli men-ɑ ɑ́köbbi wun.” Kɑ pyëj yi ɑlɑthkerr kinni, “O wøn ø, gwøg wøn ngø?” Aköbbi gen yi Jøn kinni, “Ji ko nyi cir wun, o wu thödhi yi gen ki ngyëny, kɑ wu ko nyi mënni kömi gen ki kwøb. Nyi cöög wun ri ngyënyy-ɑ nyi culi wun kipe gwøøg wun.” Mɑ́ teedø ɑ́bëëd ge yïd-ɑ bëëni Mesiy, ge ɑ́cɑ̈gi ki pyënyi ri gen mɑ løge’ Jøn ɑ bɑ Mesiy. Aløøg kwøbbi teedø yi Jøn kinni, “Yɑ jwɑ̈ɑ̈g-ɑ wun ki pï. De dɑ ngɑn megø me bï, me teg kibølɑ, yɑ pɑ døøj ki gønyi wɑrre kì tyelle. Wu ójwɑ̈ɑ̈g yi en kɑ mɑc geki Wëykwërø. Óbï e kɑ̈ll-ɑ ólɑng me kwööde ki byelle; byell-ɑ døj ókïdhe yethi thebbe, de cong órɑ̈b yi en ki mɑc me pɑ thøw.” Kɑ obëëdø e pwöny-ɑ Wöndøj, kɑ gï nyi cïje ki kwøb møøgø mø gïïr. De Jøn Ërödøs ɑ́cɑye kinni, “Yïde ɑ ɑ́kwɑɑny Ërödiyɑ̀ cï ómyëw? O yïde ɑ nyi göög ki jɑmmì mø rijjø?” De Ërödøs ɑ́yöd e ceg-ɑ gwøg ki gïjø me pëddi rɑ̈jø; Jøn ɑ́kïdhe ød mɑg. Keny-ɑ ɑ́rum ji ki jwɑ̈ɑ̈gø bënn yi Jøn, ɑjwɑ̈ɑ̈g Yëso thyew. Kɑ̈ng-ɑ ɑ́bëëd Yëso e ókwɑ̈jjø, ɑyieb mɑl ree. Kɑ Wëykwërø bï-ɑ köme e nɑ ɑkur. Kɑ cwɑg obëënø ge kɑ̈ɑ̈l-ɑ mɑl kinni, “Yï bɑ dïl wɑ̈dɑ; yï mɑɑr yi yɑn ki mendwøng, pyëwɑ med ki yïn.” Yëso runne ɑ́bëëd gɑ pyɑ̈r ɑ́dɑ̈g keny-ɑ ɑ́cɑ̈ge ki gwøge. Teedø ɑ́rum i Yëso bɑ wɑ̈d Yosep. Yosep wɑ̈d Elì. Elì wɑ̈d Mɑthɑt, Mɑthɑt wɑ̈d Leebì. Leebì wɑ̈d Melkì. Melkì wɑ̈d Yɑnɑy, Yɑnɑy wɑ̈d Yosep. Yosep wɑ̈d Mɑtɑthiyɑ̀. Mɑtɑthiyɑ̀ wɑ̈d Amos. Amos wɑ̈d Nɑum. Nɑum wɑ̈d Eslì. Eslì wɑ̈d Nɑgɑy. Nɑgɑy wɑ̈d Mɑɑth. Mɑɑth wɑ̈d Mɑtɑthiyɑ̀, Mɑtɑthiyɑ̀ wɑ̈d Semein. Semein wɑ̈d Yosek. Yosek wɑ̈d Yodɑ̀. Yodɑ̀ wɑ̈d Yöɑnɑn. Yöɑnɑn wɑ̈d Reesɑ̀. Reesɑ̀ wɑ̈d Dherubɑbïl. Dherubɑbïl wɑ̈d Ceɑltiel. Ceɑltiel wɑ̈d Nerì. Nerì wɑ̈d Melkì. Melkì wɑ̈d Adì. Adì wɑ̈d Kösɑm. Kösɑm wɑ̈d Elmɑdɑm. Elmɑdɑm wɑ̈d Er. Er wɑ̈d Jöcwø. Jöcwø wɑ̈d Eliedher. Eliedher wɑ̈d Yörïm. Yörïm wɑ̈d Mɑthɑt. Mɑthɑt wɑ̈d Leebì. Leebì wɑ̈d Simeon. Simeon wɑ̈d Yeudɑ̀. Yeudɑ̀ wɑ̈d Yosep. Yosep wɑ̈d Yönɑm. Yönɑm wɑ̈d Eliɑkim. Eliɑkim wɑ̈d Meleɑ̀. Meleɑ̀ wɑ̈d Menɑ̀. Menɑ̀ wɑ̈d Mɑtɑthiyɑ̀. Mɑtɑthiyɑ̀ wɑ̈d Nɑthɑn. Nɑthɑn wɑ̈d Debïd. Debïd wɑ̈d Yesì. Yesì wɑ̈d Obed. Obed wɑ̈d Boɑdh. Boɑdh wɑ̈d Sɑlmön. Sɑlmön wɑ̈d Nɑɑ̈cön. Nɑɑ̈cön wɑ̈d Aminɑdɑb. Aminɑdɑb wɑ̈d Admïn. Admïn wɑ̈d Arnì. Arnì wɑ̈d Ëdhrön. Ëdhrön wɑ̈d Peredh. Peredh wɑ̈d Yeudɑ̀. Yeudɑ̀ wɑ̈d Yɑgob. Yɑgob wɑ̈d Isɑɑk. Isɑɑk wɑ̈d Abrɑhɑm. Abrɑhɑm wɑ̈d Terɑ̀. Terɑ̀ wɑ̈d Nɑor. Nɑor wɑ̈d Serug. Serug wɑ̈d Reu. Reu wɑ̈d Peleg. Peleg wɑ̈d Eber. Eber wɑ̈d Celɑ̀. Celɑ̀ wɑ̈d Kenɑn. Kenɑn wɑ̈d Arpɑkɑd. Arpɑkɑd wɑ̈d Sɑm. Sɑm wɑ̈d Nöö. Nöö wɑ̈d Lɑmɑk. Lɑmɑk wɑ̈d Mɑtucɑlè. Mɑtucɑlè wɑ̈d Enök. Enök wɑ̈d Yɑred. Yɑred wɑ̈d Mɑɑ̈lɑlel. Mɑɑ̈lɑlel wɑ̈d Kenɑn. Kenɑn wɑ̈d Enök. Enök wɑ̈d Ceeth. Ceeth wɑ̈d Adɑm. Adɑm wɑ̈d Jwøk. Yëso ɑ́dwöög kì kömi Nɑm Urdun e pɑ̈ngø yi Wëykwërø. Cem e døøg-ɑ pɑɑ gen, ɑpeejii pɑ̈l yi Wëykwërø, kun-ɑ ɑ́pɑ̈nyii ki thɑbø yi Cethɑn, ki cyɑ̈ng pyɑ̈r ɑ́ngwen e ying-ɑ yij pɑ̈l. Keny-ɑ ɑ́thumi cyɑ̈nggɑni, ɑmɑgii yi kɑ̈j. Kɑ Yëso köbbi yi Cethɑn kinni, “Keløg yï bɑ Wɑ̈d Jwøk, köbbí tungi kït men o ree løge ópun.” Alöggi Yëso kinni, “Bɑ ɑgwed kì yethi wɑ̈jji kwërø kinni, ‘Pɑth ki gïncɑm kete ɑ ree bëëd yi dhɑnhø.’ ” Codhe, ɑkɑ̈ɑ̈l Yëso yi Cethɑn kɑ gø nyudhe pödhhi kömi piny bënn ki nyɑ keny me thiinh. Aköbbi Yëso yi Cethɑn kinni, “Yï ómëggɑ pödhhɑni bënn, ki tegi gen geki dhwɑ̈ɑ̈ng gen. Ge ɑ́rum ki mëggi yɑn, o ge ócuggø muujø yi yɑn, ge mëggɑ’ ngɑn-ɑ dwɑddi yi yɑn. Keløg yɑ omɑlø yi yïn, ge ceg-ɑ gwøg gɑ møgí.” Kɑ Yëso ólöggø kinni, “Bɑ ɑgwed kinni, ‘Mɑllí Wöw Jwøgí, kɑ göggí e kete kete.’ ” Codhe, kɑ Yëso kïdhi Yerusɑlem yi Cethɑn, kɑ gø cïbe oledh Kengø. Aköbbe Yëso kinni, “Keløg yï bɑ Wɑ̈d Jwøk, leeng rií piny kì keny. Mɑ́ e bɑ ɑgwed kì yij wɑ̈nyi kwërø kinni, ‘Wëywödde óköbbe, o yï kor yi gen.’ Bɑ ɑgwed thyew kinni, ‘Yï ókwɑg yi gen kì yethi cinggi gen, o tyelí cöge e pɑ pög yi tuggi kïttì.’ ” Alöggi Yëso kinni “De bɑ ɑgwed thyew kinni, ‘Wöw, Jwøgí ko pɑ̈nyí ki rɑngø.’ ” Keny-ɑ ɑ́rum Cethɑn ki pɑ̈nyi Yëso ki yëëth bënn, ɑkɑle gøn ki wiyø. Kɑ Yëso døøg-ɑ Gɑlelì e pyejj-ɑ yi Wëykwërø. Kɑ møg-ɑ kømmi kì ree tɑɑy-ɑ yethi myërrɑni bënn. Kɑ ócɑ̈gø pwönyø kì yethi sinɑgøgg kì myërrɑni, kɑ pøjji yi dhɑnhø bëne. Kɑ Yëso kedh-ɑ Nɑdhɑreth kun-ɑ ɑ́pïïdhe. Kɑ kedh-ɑ sinɑgøg kì cyɑ̈ɑ̈ng Sɑbɑth, ni kenyi kedhe ceth, kɑ dhwödh-ɑ mɑl be rɑng. Kɑ mëggi wɑ̈nyi Icɑyɑ̀ jɑltöng, ɑyiebe wɑ̈nyø, kɑ yod-ɑ keny-ɑ ógwedø kinni, “Jwøng-ɑ Ácwɑ̈ɑ̈j, Wëye ɑ́cïbe riɑ, mɑ́ yɑ ɑ́kwɑny yi en, o yɑ köbb-ɑ Wöndøj tyëng-ɑ ɑbuur. Yɑ ɑ́ör yi en, o yɑ köbb-ɑ tyëng-ɑ ɑmɑgg kinni, ge ɑ́gøny, o cörr köbbɑ kinni, ge ócuggø nënnø. o yɑ kønyɑ tyëng-ɑ nyingi gen guud, o yɑ kwøbɑ kinni ɑ́wɑ̈nhi, eni bøli keny-ɑ óyiel Wë jie.” Yëso keny-ɑ ɑ́rume rɑng, ɑbɑne wɑ̈nyø, kɑ gø dögge jɑl-ɑ göögø kì sinɑgøg, ɑpëgge piny kì bøli teedø. Kɑ dhɑnhø bëne nyinge tööd-ɑ ri Yëso. Codhe ɑcɑ̈ge köbbi gen kinni, “Møg-ɑ ɑ́lïngi yi wun ɑnɑn, ɑ́pɑ̈dhi kɑ̈jji gen dicyɑ̈ngtïn!” Kɑ Yëso lenhi yi dhɑnhø bëne. Ge ɑ́ngɑ̈ng yi lögg-ɑ døj møg-ɑ kɑ̈ɑ̈l dhøge, kɑ ge okööbø kinni, “Nyel cøn, pɑth ki wɑ̈d Yosep?” Aköbbi gen yi Yëso kinni, “Ngɑ̈nyi yi yɑn, wu dwɑdd-ɑ köbbi yɑn gɑ́j-ɑ nyi kømmi kinni, ‘Akïm, yiel rií,’ wu dwɑdd-ɑ kwøb kinni, ‘Wø ɑ́lïng ki gïg-ɑ ɑ́gøggi yi yïn kì Kɑpernɑum! Gwøg gïgɑni kì pɑɑ wun keny!’ ” Kɑ Yëso okööbø kinni, “Yɑ köbb-ɑ wun kidyër, jɑltöng pɑ nyi yïëy kì pɑn-ɑ ɑ́nywøølii. “De yɑ köbb-ɑ wun kidyër kinni, ɑ́dɑ thwömm mø gïïr kì Isrɑil kì bøli keny-ɑ ɑ́nud Eliyɑ̀. Kødh nuti mɑ̈gø kì Isrɑil ki runn ɑ́dɑ̈g kí dwɑ̈tt ɑ́bïkyel, o kɑ̈j ɑ́bëëd e teeg kì yij pödhø bëne. De Eliyɑ̀ nuti ör yï thwöm ɑ́kyel kì kelli thwömmi Isrɑil. De ɑ́ör-ɑ yï thwöm me bëëdø kì Dhɑrepɑth kì myërri Sïdön. O ɑ́dɑ ji mø gïïr kì bøli keny-ɑ ɑ́nud Elicɑ̀ jɑltöng, mø ri gen di wɑɑny kì Isrɑil. De bong dhɑnhø ɑ́kyel mɑ ɑ́yiel yi Elicɑ̀ kì kelli gen, den-ɑ́ Nɑɑmɑn, jɑl-ɑ ɑ́bï e kɑ̈ɑ̈l-ɑ Suriyɑ̀, ɑ ɑ́yiel kete.” Keny-ɑ ɑ́lïngi møgɑni yi teedø bëne kì sinɑgøg, kɑ ge ceg ki mɑgø yi liny. Kɑ ge dhwödh-ɑ mɑl, kɑ Yëso ywɑɑj gen wɑ̈g kì kɑɑl, kɑ gø kïdhi gen wïj tøg kïn-ɑ köme ógeer kɑɑlɑni. Ge ɑ́dwɑdd-ɑ leengii piny kì wïj tøg kït. De Yëso ree ɑ́bodhe kɑ kɑ̈l-ɑ kelli gen, kɑ ókedhø kì wɑ̈ye. Kɑ Yëso kedh-ɑ Kɑpernɑum, kɑ ji pwönye kì cyɑ̈ɑ̈ng Sɑbɑth. Ji ɑ́ngɑ̈ng yi pwönye, mɑ́ kwøbbe nënni ge teg. Ádɑ jɑl me ree di wëy me rɑj kì sinɑgøg, kɑ jɑlɑni óryeerø ki cwɑg mø døngø kinni, “Yëso jɑl Nɑdhɑreth! Yïde ki wøn? Yï ɑ́bï-ɑ be rënyi wøn? Ngɑ̈nyi yi yɑn kinni yïn ɑ́ men, yï bɑ ngeti kwërø, men-ɑ ɑ́ör yi Jwøk.” Aköbbi wëyɑni yi Yëso kinni, “Kud, kɑ yï bïí wɑ̈g kì ree!” Kɑ jɑlɑni leeng piny yi wëyɑni kì bøli ji bënn. Codhe, kɑ jɑlɑni wiye e bong gïnrɑj mɑ ɑ́gögge gøn. Kɑ ji ongɑ̈ngø de ge pyëny-ɑ ri gen kinni, “Á kwøbbi ngø ɑ bëëdø’ ni? Acire wëyrijjø kinni bï gen wɑ̈g, kɑ dhøge lïngi yi gen!” Kɑ per Yëso wɑ̈dh-ɑ yethi myërrɑni bënn. Kɑ Yëso odhwödhø kì sinɑgøg, kɑ kedh-ɑ gøl Sɑymøn. Øri Sɑymøn, meyi cyëge, ɑ́bëëd ree dɑ lëdhi dël, kɑ Yëso kwɑjji yi gen kinni kønye gøn. Akedhe buti ngɑnɑni, kɑ lëdhi dël menɑni cïïre wɑ̈g kì ree. Kɑ dële ókwöjø, ɑdhwödhe mɑl kì bøli kenyɑni ceth, kɑ kedh-ɑ be kɑ̈lli gen. Keny-ɑ ɑ́kedhi cɑ̈ng piny, kɑ tyëng-ɑ buud muuj Yëso yi wɑddi gen. Kɑ gï yiele ki rɑ̈ɑ̈m dëlli gen bënn, e nyi cïb-ɑ cingge kömi ngɑn-ɑ buud. Wëyrijjø ɑ́bï wɑ̈g ge okïïwø kinni, “Yï bɑ Wɑ̈d Jwøk.” De Yëso wëyɑni ɑ́kyëdde kɑ gï mɑ̈ɑ̈ne kwøb, kipe kɑ ɑ́yod ge gøn kinni Yëso bene Mesiy. Kɑ Yëso odhwödhø kì mwøl kì ri tɑ̈ri piny ceth, kɑ kedh-ɑ kun bëëde kì wɑ̈ye, de ɑ́yɑb yi ji, kɑ yod yi gen, kɑ gø mɑ̈ɑ̈n gen kedhø. De ge ɑ́köbbi yi Yëso kinni, “Di dwɑddø kinni o yɑ pwönyɑ kwøbbi Jwøk kì yethi kɑ̈dd-ɑ kyeelø thyew, bene gïn-ɑ́ pere ɑ́ör yɑn.” Codhe, ɑwïïne e ópwönyø kì yethi sinɑgøgg kì myërri Yeud bënn. Cyɑ̈ng ɑ́kyel, Yëso ɑ́bëëd e ócungø kì tøg Tɑɑy Gɑlelì, kɑ ji mø gïïr ócugø kì bute be lïngi kwøbbi Jwøk. Kɑ Yɑ̈ɑ̈th ɑ́ryew lidh yi Yëso kì dhøwɑdh. Jømɑy rum bëën wɑ̈g kì yethi gen, o ge olöögø ki bøyyi gen. Kɑ Yëso kɑdh-ɑ yij morkɑb ɑ́kyel kì kelli gen, morkɑm-ɑ bɑ mi Sɑymøn, kɑ gø köbbe kinni kɑle morkɑb ki cøør nɑm. Kɑ Yëso pëgg-ɑ yij morkɑb e nudd e ópwönyø ki ji. Keny-ɑ ɑ́rum Yëso ki pwönyø, ɑköbbe Sɑymøn kinni, “Kyeew morkɑb keny-ɑ pɑ̈ng, kɑ bøyí leeng piny o yï mɑ̈gí ki rij.” Alöggi Sɑymøn kinni, “Wuö, wø ɑ́lɑng wɑ̈r wø omɑ̈yø, o wø nuti mɑ̈gø, de yï okööbø i leeng wøn bøyy piny, ge óleng yi yɑn.” Keny-ɑ ɑ́leeng gen bøyy piny ni kɑ ɑ́kööb Yëso, ge ɑ́mɑ̈gi ki rij mø gïïr cɑrø, kɑ bøyy kømi kɑggø yi rij. Kɑ jøg-ɑ yij morkɑm-ɑ kyeelø cwööl yi gen be kønyi gen. Abëën gen kɑ yɑ̈thɑni ryeet opɑ̈ngø yi rij, kɑ ge køm-ɑ mudø. Sɑymøn Pïtør keny-ɑ ɑ́lidhe gïn-ɑ ɑ́cwöb, kɑ ree bøødhe piny kì bøli Yëso, ɑkööbe kinni, “Nyegí kì butɑ, Wuö. Yɑ bɑ jɑlorøg!” Ge ɑ́ngɑ̈ng geki jøg-ɑ kyeelø yi ngenyi rijj-ɑ ɑ́mɑg yi gen. Yɑgob geki Jøn, wɑ̈ddi Dhebedì ɑ́ngɑ̈ng thyew yi møgɑni, ge ɑ́bëëd ge omɑ̈yø kyeel ki Sɑymøn. Kɑ Sɑymøn köbbi yi Yëso kinni, “Yï ko böggi! Cɑg ɑnɑn ceth, yï ómɑngg-ɑ ji.” Jøgɑni keny-ɑ ɑ́rum yɑ̈thi gen ki mɑɑg piny kì dhøwɑdh, kɑ jɑmmi gen wiy gen piny, kɑ ge løg-ɑ bɑng Yëso. Yëso kɑ̈ng-ɑ ɑ́yinge kɑɑl megø, ɑ́dɑ jɑl me ree di lɑ̈y kì kɑɑlɑni. Keny-ɑ ɑ́lidhe Yëso, ɑbøødhe ree piny kì bøle, kɑ gø kwɑjje, kinni, “Ke dwɑddií Wuö, yɑ ócuggø gwøgø yi yïn kɑ yɑ ódhïwø.” Kɑ Yëso cinge rïïje, ɑnywɑle jɑlɑni, kɑ okööbø kinni, “Odwɑddø yi yɑn! Dönyi dëlí!” Kɑ lɑ̈y ówɑ̈ɑ̈nyø kì bøli kenyɑni ceth. Codhe, ɑkööb Yëso kinni, “Ko di ngɑn köbbi yi yïn. De kedh, kɑ rií nyudhí ókwërø, kɑ yï muuj ki gëëdhi kipe kɑ ɑ́lɑ̈ɑ̈ny lɑ̈y, ni kɑ ɑ́cïg Mosɑ̀, menɑni óbëëd ɑ́ nyuudhi kì bøli teedø.” De wöddi Yëso ɑ́ceg pëddø tɑyø. Kɑ ji mø gïïr bï-ɑ yï Yëso be lïngi kwøbbe, møøgø bï kɑ per kinni o ge yiel ki rɑ̈ɑ̈m dëlli gen. De Yëso ree nyi boodhe’ wɑ̈ye kun cugge’ mɑlli Jwøk. Cyɑ̈ng ɑ́kyel, Yëso ɑ́bëëd e pwöny-ɑ ji, O kenyɑni ɑ́dɑ Jøpɑresì geki jøpwönyi Cigg mø kɑ̈ɑ̈l myërri Gɑlelì, møøgø kɑ̈ɑ̈l-ɑ Yeudiyɑ̀, o møøgø kɑ̈ɑ̈l-ɑ Yerusɑlem. Yëso ɑ́bëëd e nyii thödhø yi Wë ki tegø men yiele tyëng-ɑ buud ki rɑ̈ɑ̈m dëllì. Bøli kenyɑni ɑ ɑ́bëën jøg møøgø ge ókɑ̈ddø kì yij pyën ki jɑl me bɑ ɑdwɑny. Kɑ ri gen pɑ̈nyi gen ki kïdhii ød, o gø di cïb gen bøli Yëso. De ge ɑ́dhɑ̈li wɑ̈dhi ød yi ngenyi ji. Codhe, kɑ ge yedh-ɑ wïj óthɑɑng ød, men-ɑ yije di Yëso, kɑ jɑlɑni luudh gen piny kì keny mɑ ɑ́yɑl yi gen kì wïj ønɑni, kɑ gø cïb gen dïdyëri ji kì bøli Yëso. Keny-ɑ ɑ́liidh yïëyø mi gen yi Yëso, ɑkööbe kinni, “Jɑl, lɑ́ɑ̀w ɑ́dwöög piny kipe orøgí.” Kɑ jøpwönyi Cigg geki Jøpɑresì orumø ki pëthi gen kinni, “Jɑɑl, bɑ men cøn, ɑ yøn Jwøk kinnï? Pɑth ki Jwøk kete ɑ nyi cuggi lɑ̈ɑ̈ny orøøg dhɑnhø!” De møg-ɑ rømmi yi gen ngɑ̈nyi yi Yëso, ɑkööbe kinni, “Á kipe ngø ɑ rum wun ki gïg ni møg? Á ngø ɑ yöd, kwøb kinni, ‘Orøgí ɑ́lɑ̈ɑ̈ny’ wɑlɑ̀ kinni, ‘Dhwöödh kɑ yï cyɑ̈dhí?’ De wu ónyudhɑ kinni Nyɑɑr Dhɑnhø yïe dɑ tegø kì kömi piny, men lɑ̈ɑ̈nye orøg.” Codhe, kɑ Yëso jɑl-ɑ dële dwɑnyø köbbe kinni, “Yɑ köbb-ɑ yïn, dhwödhí mɑl, kwɑny pyëní, kɑ yï kedhí pɑɑ wun.” Kɑ jɑlɑni dhwödh-ɑ mɑl e onennø yi teedø bëne, ɑkwɑnye pyëne kɑ kedh-ɑ pɑɑ gen e lejj-ɑ Jwøk. Teedø ɑ́ngɑ̈ng kɑ ge obwøgø, ɑkööb gen kinni, “Wɑ ɑ́lïdhi ki gïïngɑ̈ngø dicyɑ̈ngtïn!” Kɑ Yëso ókedhø e owïïnø kì kɑɑlɑni, kɑ jɑlgwɑ̈j me cwøl ɑ́ Leebì lidhe e obëëdø kì kej gwøge. Aköbbii yi Yëso kinni, “Bïí bɑngɑ!” Codhe, kɑ Leebì dhwödh-ɑ mɑl kì keny-ɑ ɑ́bëëde, ɑwiye jɑmme bënn kenyɑni, kɑ løg-ɑ bɑng Yëso. Codhe, kɑ Leebì ogöögø ki ryëj me dwøng kipe kɑ ɑ́kedhi Yëso gøle. Jøgwɑ̈j mø gïïr geki kwï ji møøgø ɑ́bëëd ge nud kì kenyɑni thyew. De jøpwönyi Cigg geki Jøpɑresì ɑ́cɑ̈gi ki gönyi jøbɑng Yëso kinni, “Wude ɑ cyɑ̈ɑ̈m wun kì kej ɑ́kyel wuki jøgwɑ̈j geki tyëngorøg?” Aløøg kwøbbi gen yi Yëso kinni, “Pɑth ki tyëng-ɑ dëlli gen yööd ɑ nyi yɑ̈bø ki ɑkïm, den-ɑ́ tyëng-ɑ dëlli gen rɑ̈mø. Yɑ nuti bëën-ɑ be cwøli tyëngdøj, den-ɑ́ tyëngrijjø ɑ cwööl yi yɑn kipe kinni o pëthi gen geki bëëdi gen wil.” Kɑ Yëso pyëj yi ji møøgø kinni, “Jøbɑng Jøn ɑ́bëëd ri gen nyii twönø yi gen ki gïncɑm, kɑ ge nyii rïïjø ge mɑll-ɑ Jwøk ni kenyi göög Jøpɑresì. De jøbɑngí gede ɑ wɑ̈dhi gen cɑm yøw?” Aköbbi gen yi Yëso kinni, “Wëll ócuggi wiyø yi wun ki kɑ̈j kì kej thyëg, e jɑlnywöm nud kì kelli gen? Pɑ cuggi! De bøli keny-ɑ ókɑ̈ɑ̈l jɑlnywöm kì kelli gen óbï, o bene bøli kenyɑni ɑ ótwöön gen ri gen ki gïncɑm.” Awɑ̈jji gen gɑ́j møg yi Yëso kinni, “Bong dhɑnhø me cuggi kɑ̈ggø kì ri ógødh me nyɑ̈n ki nyɑ ógødh men buule ógødh me bɑ kwɑ̈ɑ̈l. Ngɑn göögø kinøw rëny-ɑ ógønh-ɑ nyɑ̈n, o men-ɑ ɑ́yød kì ri ógønh-ɑ nyɑ̈n pɑ kyëëw ki ógønh-ɑ bɑ kwɑ̈ɑ̈l. Thyew, bong dhɑnhø me cuggi kønyi møgi oløg me nyɑ̈n yij ɑtheb me bɑ kwɑ̈ɑ̈l. Ke gwøgii kinøw, møng-ɑ nyɑ̈n ɑtheb pyëde’ pyëdø, kɑ møgø røy-ɑ piny, kɑ ɑtheb órënyø. Møng-ɑ nyɑ̈n nyi kïdh-ɑ yij ɑtheb me nyɑ̈n. Bong dhɑnhø me nyi dwɑddi mɑdh ki møng-ɑ nuti twɑgø keløg e rum mɑdh ki men-ɑ twɑgø, mɑ́ e bɑ men kööbø ceth kinni, ‘Møng-ɑ twɑgø, en ɑ lɑ̈w!’ ” Cyɑ̈ng ɑ́kyel Yëso ɑ́kedh e ócyɑ̈dhø e kɑ̈ll-ɑ yethi pwödh geki jøbɑnge, cyɑ̈ngɑni ɑ́bëëd ɑ́ cyɑ̈ɑ̈ng Sɑbɑth. Akɑ̈bbi jøbɑnge ki byel, ɑnyøng ge gïn kì cinggi gen, kɑ gï nyɑm gen. Kɑ kwï Jøpɑresì okööbø kinni, “Wude ɑ göög wun ki gïn-ɑ bɑ ɑkerø kì cyɑ̈ɑ̈ng Sɑbɑth?” Kɑ Yëso ólöggø kinni, “Wu nuti rɑ̈ngø ki gïn-ɑ ɑ́gwøg yi Debïd geki jøbɑnge keny-ɑ ɑ́mɑɑg gen yi kɑ̈j? Nuti kedhi ød Jwøk, kɑ ókɑ̈bbø ki ópun-ɑ bɑ ɑkwër kɑ gø cɑme, ngö e nyi cɑm-ɑ yi ókwër, kɑ kwëe mëgge jøg-ɑ cyɑ̈dhi ki en!” Codhe kɑ Jøpɑresì köbbi yi Yëso kinni, “Nyɑɑr Dhɑnhø bɑ Wïi Sɑbɑth.” Kɑ Yëso kedh-ɑ be pwönyø kì sinɑgøg kì cyɑ̈ɑ̈ng Sɑbɑth. Ádɑ jɑl me cingi kyëje dhëgø kì kenyɑni, keny-ɑ ɑ́bëëd Yëso e ópwönyø. Jøpwönyi Cigg geki Jøpɑresì ɑ́bëëd ge lebb-ɑ Yëso mɑ di gööge ki tyëng-ɑ buud ki cyɑ̈ɑ̈ng Sɑbɑth, o gø di gøøny gen. De gïn-ɑ ɑ́rømmi yi gen ngɑ̈nyi yi Yëso. Kɑ jɑl-ɑ cinge dhëgø köbbe kinni, “Cungí kì dïdyëri ji keny.” Adhwödhi jɑlɑni mɑl kɑ ócungø kì kenyɑni. Kɑ Yëso jøg-ɑ lebbii köbbe kinni, “Yɑ pyëj-ɑ wun, ɑ́ ngø ɑ døj ki gwøgø kì cyɑ̈ɑ̈ng Sɑbɑth, gwøgi gïndøj wɑlɑ̀ gwøgi gïnrɑj? Yieli wëyi dhɑnhø ɑ døj, wɑlɑ̀ nɑ̈gi dhɑnhø?” Kɑ lïïdh-ɑ nyingi tyëng-ɑ gëddii ki ɑlɑggø ree werre’ werrø, kɑ jɑlɑni köbbe kinni, “Rïj cingí.” Kɑ jɑlɑni cinge rïïje, kɑ cinge ódönyø. De Jøpɑresì ɑ́bëëd pëthi gen rijjø ki mendwøng, kɑ ri gen pyënyi gen, ki gïn-ɑ ócuggi göggi Yëso yi gen. Kì bøli kenyɑni, kɑ Yëso yedh-ɑ wïj kït be mɑ̈ddø. Kɑ lɑng-ɑ wɑ̈r e mɑll-ɑ Jwøk. Kì mwøl keny-ɑ ɑ́ru wøw, ɑcwööle jøbɑnge yïe, kɑ oyïënyø ki pyɑ̈rø wïdɑ́ryew kì kelli gen, kɑ gï cɑge gɑ tyëngwöödø, Sɑymøn (ɑ ɑ́cɑg yi Yëso ɑ́ Pïtør) kí Ándrø ómï Sɑymøn, kí Yɑgob, kí Jøn, kí Pïlïp, kí Bɑrthølømɑøs kí Mɑthyëw, kí Tömɑs, kí Yɑgob wɑ̈d Alpɑ̀, kí Sɑymøn (ɑ nyi cwøl ɑ́ Lunø,) kí Yeudɑ̀ wɑ̈d Yɑgob, kí Yeudɑ̀ Iskɑryøt jɑl-ɑ ɑ́twɑny Yëso. Kɑ Yëso yïnh-ɑ piny kì wïj kït geki tyëngwöödø, kɑ ócungø kì dïthwørø. Ji mø gïïr kì kelli jøbɑnge ɑ́bëëd ge nud kì kenyɑni, kí ji mø gïïr cɑrø mø kɑ̈ɑ̈l myërri Yeudiyɑ̀, kí Yerusɑlem, kí myërri kömi nɑɑm omelø, ɑ løg Suur kí Sïdön. Ge ɑ́bï-ɑ be lïngi pwönye, o ge yiel ki rɑ̈ɑ̈m dëlli gen. Kɑ tyëng-ɑ köthi gen buudh yi wëyrijjø, yiele ki wëyɑni. Ji bënn ɑ́dwɑdd-ɑ nywɑli Yëso, mɑ́ e ɑ́dɑ tegø me nyi bï wɑ̈g kì ree, kɑ ngɑn-ɑ nywɑlii nyii dönyø. Kɑ Yëso lïïdh-ɑ yï jøbɑnge, ɑkööbe kinni, “Wu tyëng-ɑ nyingi wun cɑn, ri wun dɑ gyëdh; mɑ́ Pödhi Jwøk bɑ mi wun! Wu tyëng-ɑ ri wun di kɑ̈j ɑnɑn, ri wun dɑ gyëdh, mɑ́ wu óyɑ̈ng! Wu tyëng-ɑ ywöngi ɑnɑn, ri wun dɑ gyëdh, mɑ́ wu óngedhi ki medi pyëw! “Ri wun dɑ gyëdh keny-ɑ ómɑɑn wun yi ji, kɑ wu bɑny yi gen, kɑ wu gwɑddi yi gen, kɑ ge okööbø i wu bɑ tyëngrijjø kipe kɑ̀ cyɑ̈dhi wun kì bɑng Nyɑɑr Dhɑnhø. Mïni pëthi wun dicyɑ̈ngɑni, mɑ́ köögi mi wun dwøng kì mɑl, mɑ́ gïg ni møgɑni ɑ ɑ́bëëd ge nyi gögg-ɑ jøtöng yi kweyyi gen. “De wun ɑ tyëngkɑ̈rì, ri wun dɑ cyën, mɑ́ jɑmm-ɑ ɑ́tyer yi pëthi wun ɑ́yod yi wun! Wu tyëng-ɑ yɑ̈ngø ɑnɑn ri wun dɑ cyën, mɑ́ wu ómɑg yi kɑ̈j! Wu tyëng-ɑ ngedhi ɑnɑn, ri wun dɑ cyën, mɑ́ wu óywöngi kɑ wu okïïmø. “Ri wun dɑ cyën keløg wu ceg kɑ lenhø yi teedø bëne, mɑ́ kweyyi gen ɑ́bëëd ge nyi lenh-ɑ jøtöng møg-ɑ pɑ nyi töng dyër. “De yɑ köbb-ɑ wun, wu tyëng-ɑ lïngø èn kinni, mɑɑru tyëngmɑ̈ɑ̈nø. Nyi göggu tyëng-ɑ mɑɑn wun ki gïndøj. Nyi kwɑjji wun gyëdh kipe tyëng-ɑ nyi lɑ̈mmi wun cyën, geki tyëng-ɑ guud nyingi wun. Ke di ngɑn gøj yïn kì thɑ̈ngí, lugí thɑ̈ng-ɑ kyeelø thyew, o gø gøje. Keløg e dɑ ngɑn kwɑny lɑwí ko mɑ̈ɑ̈n ɑ́ywödhí thyew. Nyi thödhí ngɑn-ɑ kwɑ̈jji kì yïí. Kɑ ngɑn-ɑ kwɑny gïí ko piir. Bëëd ki ji ki bëën-ɑ di dwɑddi yi yïn kì yï gen. “Keløg yï mɑɑr-ɑ tyëng-ɑ mɑɑr yïn keti gen, dɑ gyëdh kì ri mɑ̈ɑ̈dø menɑni? Cɑgg ɑ́ tyëngorøg, ɑ́ ngø ge nyii göögø kinøw! Keløg ɑ́ tyëng-ɑ nyi göggi yïn ki gïndøj, ɑ nyi göggi yi yïn ki gïndøj, dɑ gyëdh kì ri gwøng ni menɑni? Cɑgg ɑ́ tyëngorøg, ɑ́ ngø ge nyii göögø kinøw! Keløg wu nyi wïdh-ɑ tyëng-ɑ rømmi yi wun kinni wu ócuggø cudø yi gen, dɑ gyëdh kì ri menɑni? Cɑgg ɑ́ tyëngorøg, ɑ́ ngø ge nyi wïdh-ɑ ji-ɑ ni gen kipe kinni o gïn-ɑ widh ócol! De mɑɑru tyëngmɑ̈ɑ̈nø. Nyi göggu gen ki gïndøj, kɑ ge nyi wïdhi wun wu pɑ rumø kinni wu ócuddi, o wu óyïddi wun ki köögi me dwøng, kɑ wu ogöögø ki nyigi Jwøng-ɑ Pëddi Döng, mɑ́ en kiree, pyëwe nyii lɑ̈ɑ̈mø ki ji, cɑgg gɑ ji mø kwïj pwøj, o pëthi gen pɑ̈ng yi orøg. Nyi lɑ̈ɑ̈m pëthi wun, ni kenyi lɑ̈ɑ̈m pyëw Wïyi wun ceth. “Wu ko nyi cɑ̈ɑ̈y ki tyëng-ɑ kyeelø kipe wu ócɑy. Tyëng-ɑ kyeelø ko nyi gøøny wun kinni i ge bɑ̈jjø, o wu ócög wun wu pɑ gøøny thyew. Nyi wiy wun tyëng-ɑ cɑɑg wun piny, o wu ówiy keny-ɑ ócɑ̈gi wun piny. Nyi nëngu ji møøgø, o wu ónëngi yi Jwøk. Wu ónëngi ki mø ngenyø; gïn-ɑ yije órummi óyeg kɑ rɑɑr-ɑ piny, kɑ køny yethi cinggi wun. Mɑ́ gïn-ɑ́ yije ɑ́muuj yi wun, en ɑ yije óthödhi wun yi Jwøk. Wu óthödhi yi Jwøk, kɑ yuu-ɑ nyi muuj yi wun.” Aköbbi gen yi Yëso kinni, “Dɑ cwør me cuggi pyejji cwør-ɑ kyeelø? Pɑ cuggi! Ge pɑ̈dh-ɑ yij wøl ryeet. Nyiigwed pɑ lɑ̈w kibøli jɑlpwönye, de nyiigwed men-ɑ ópwönyø kidøøj, ceg-ɑ gwøg e pɑ̈r ki jɑlpwönye. “Yïde ɑ nenní nyɑ wëëlø kì wɑɑng wɑɑd wun, o yï cöög duli yɑdh men-ɑ wɑngí pɑ nenni yi yïn? Wɑɑd wun óköbbi yi yïn kidï kinni, ‘Mɑ̈dh, wiy yɑ kɑ̈ɑ̈l-ɑ nyɑ wëëlø men wɑ̈g kì wɑngí,’ e duli yɑdh men-ɑ wɑngí pɑ nenni yi yïn? Yïn, wëny! Kɑ̈ɑ̈l duli yɑdh men-ɑ wɑngí wɑ̈g møti, codhe o yï nëën kidøøj, o wëël-ɑ wɑɑng ngɑn-ɑ kyeelø kɑ̈ɑ̈l yi yïn wɑ̈g cyee. “Yɑdh men-ɑ døj pɑ nyi nywøl ki nywøl mø rijjø, nɑ kɑ̀ pɑ nyi nywøl yɑnh rɑj ki nywøl mø døøj. Yɑdh nyi ngij-ɑ ri nywøle. Ji pɑ nyi punø ki nywøli ólɑm kì ri ɑ́lɑl, nɑ kɑ̀ pɑ nyi pøn nywøli oløg kì kö but. Tyëngdøj nyi kɑ̈ɑ̈l-ɑ gïgdøj wɑ̈g kì ri døøjø men-ɑ mïdhi yi gen kì yethi pëthi gen. De tyëngrijjø nyi kɑ̈ɑ̈l-ɑ gïgrijjø wɑ̈g kì ri rɑ̈jø men-ɑ mïdhi yi gen kì yethi pëthi gen. Ji nyi kømm-ɑ gïg-ɑ pëthi gen. “Wude ɑ nyi cwøllu yɑn kinni ‘Wuö, Wuö’ o gïn-ɑ kwøb yi yɑn pɑ gwøg yi wun? Wu ónyudhɑ ki ngɑn-ɑ pɑ̈r ki ngɑn bï be lïngi kwøbbɑ, kɑ ogöögø kì ri kwøbbɑni. Ngɑnɑni nɑ jɑl mɑ ɑ́gëëd ki ød. Kɑ tyelli ød konye, kɑ ge niyeeng-ɑ piny keny-ɑ bɑ kït. Keny-ɑ ɑ́bëën bɑɑyø, kɑ thew ree pɑ̈nye ki wøji ønɑni, de ød nuti wöl onhɑ̈nh, mɑ́ e ókëël-ɑ kömi kït. De ngɑn-ɑ lïngi kwøbbɑ, kɑ ocögø e pɑ göögø kì ri kwøbbɑni, nɑ jɑl mɑ ɑ́gëëd ki ød, e tyelli gøn nuti niyengø. Keny-ɑ ɑ́bëën bɑɑyø, ønɑni ɑ́jwɑn pɑ̈ɑ̈dhø, kɑ órënyø ki mendwøng!” Keny-ɑ ɑ́rum møgɑni bënn ki köbbi ji yi Yëso, ɑkedhe Kɑpernɑum. Ádɑ dhɑbïdh me yïe di bɑ̈ng me pere teg yi wɑ̈n. Bɑ̈ngɑni ɑ́bëëd dële orɑ̈mø ki menrɑj, kɑ ócyɑ̈ngø thøø. Dhɑbïnhɑni keny-ɑ ɑ́lïnge møg-ɑ kømmi yi teedø kì ri Yëso, ɑöde ki kwï jøgdøngi Yeud mø kedhi be kwɑjji Yëso, kinni bëe be yieli bɑ̈nge. Akedhi jøgɑni yï Yëso, kɑ kwɑjji yi gen kinni, “Dhɑbïnhɑni døøj ki kønyø yi yïn. Tyëng pödhee mɑɑr yi en, o wɑ ɑ́gëdde ki sinɑgøg.” Codhe, kɑ Yëso ókedhø ki gen. E rum cyɑ̈ngø ki gøl dhɑbïdh, ɑödi dhɑbïnhɑni yïe ki ji møg köbbii kinni, “Rií ko pïd ki bëën gølɑ Wuö, kipe yɑ pɑth ki dhɑnhø me gøle cuggi bëënø yi yïn. Bene gïn-ɑ́ pere ɑ́cögɑ yɑ pɑ bï yïí ki dëlɑ. De ceg kwøb yøw, o bɑ̈ngɑ bødhe. Yɑn thyew, yɑ bɑ dhɑnhø me ceg ki jɑɑgø. O yïɑ dɑ ɑlɑthkerr møg jɑɑg yi yɑn. Alɑthker nyi köbbɑ’ köbbø kinni, ‘Bïí!’ Kɑ nyii bëënø. O bɑ̈ngɑ nyi köbbɑ’ köbbø kinni, ‘Gwøg gïn!’ Kɑ gïnɑni nyi gwøge.” Keny-ɑ ɑ́lïngi møgɑni yi Yëso, kɑ ceg-ɑ ngɑ̈ngø. Aluge ree teen-ɑ cyɑ̈dhi kì bɑnge, ɑkööbe kinni, “Yɑ köbb-ɑ wun, bene yïëyø men-ɑ pëddi döng èn. Yɑ nuti wöl yïddø ki dhɑnhø me yïe di yïëyø me ni men, cɑgg ɑ́ kì Isrɑil!” Adøøg jøg-ɑ ɑ́ör gøl dhɑbïdh, kɑ bɑ̈ngɑni yuud gen dële yönø. Dhuki, ɑkedhi Yëso kɑɑl me cwøl ɑ́ Nɑin, kɑ jøbɑnge geki teedø mø ngenyø løg-ɑ bɑnge. Keny-ɑ ɑ́wɑ̈dhe dhø döri kɑɑlɑni, ɑrøøme ki dhɑnhø me kɑ̈lli e thøø, nyelɑni bɑ wɑ̈dkyel, meye ɑ́wiye piny ɑ́ thwöm, ngɑnɑni lug-ɑ́ɑ̀ bɑng wɑ̈de kɑ̀ tëërrii be konyø, o ji mø gïïr ólugø kì bɑnge. Keny-ɑ ɑ́liidh ngɑnɑni yi Wë, kɑ yije óywöngø kipere ki mendwøng, ɑköbbe gøn kinni, “Yï ko ywöngi.” Akedhe kɑ gïn-ɑ yije kɑ̈lli dhɑnhø nywɑle, kɑ tyëng-ɑ kɑ̈llii ócungø. Kɑ Yëso okööbø kinni, “Jɑlthinh, yɑ köbb-ɑ yïn, dhwödhí mɑl!” Kɑ nyel-ɑ thøø dhwödh-ɑ mɑl, kɑ ócɑ̈gø kwøb. Codhe, kɑ döggi meye yi Yëso. Ji bënn ɑ́ngɑ̈ng, kɑ ge ócɑ̈gø lejji Jwøk kinni, “Yïee ɑ́bëën yi jɑltöng me dwøng! Jwøk ɑ́bï be yieli jie.” Kɑ kwøbbi gïn-ɑ ɑ́gwøg yi Yëso tɑɑy-ɑ yethi myërri Yeudiyɑ̀ bënn, kí myërr-ɑ cyɑ̈gi. Jøn ɑ́köbbi yi jøbɑnge ki møgɑni bënn. Acwödde ki ɑ́ryew kì kelli jøbɑnge. Kɑ gï öre yï Wë be pëjjø kinni, “Bene yïn ngɑn-ɑ ɑ́wɑngi i obëënø, wɑlɑ̀ yïd wøn ki ngɑn megø?” Keny-ɑ ɑ́wɑ̈dhi jøgɑni yï Yëso, ɑkööb gen kinni, “Jøn Jɑljwɑ̈g, wø ɑ́öre yïí be pyëji yïn kinni, ‘Bene yïn ngɑn-ɑ ɑ́wɑngi i obëënø, wɑlɑ̀ yïd wøn ki ngɑn megø?’ ” Kì bøli kenyɑni Yëso ɑ́bëëd e ceg-ɑ yïëdø ki ji møg-ɑ dëlli gen rɑ̈mø bënn. Kɑ wëyrijjø cyedde, kɑ cörr nyingi gïn yiebe. Codhe, kɑ jøbɑng Jøn kwøbbi gen løøg yi Yëso, kinni, “Kedh wun, köbbu Jøn gïg-ɑ ɑ́lidh yi wun kí møg-ɑ ɑ́lïngi yi wun kì keny. Cwør ócuggø nënnø, ngwøl ócuggø cyɑ̈dhø, tyëng-ɑ ri gen di lɑ̈y nyii gwøgø kɑ ge ódhïwø. Ming ócuggø lïngø, tyëngthøø nyi dwöög-ɑ be nënnì. O tyëng-ɑ ɑbuur opwönyø ki Wöndøj. Tyëng-ɑ koo bɑny yɑn, ri gen dɑ gyëdh!” Keny-ɑ ɑ́kedh jøbɑng Jøn, ɑcɑ̈gi Yëso ki kwøb kì ri Jøn, kinni, “Wu ɑ́kedh-ɑ be lidhi ngø kì yij pɑ̈l? Obej me nïngi yi yømø? Wu ɑ́kedh-ɑ be lidhi ngø? Jɑl me rugø ki ógudh mø myëër? Pɑth, ji-ɑ nyi rugø ki ógudh-ɑ myëër, bɑ tyëngkɑ̈rì, o ge nyi ying-ɑ kɑ̈lli rɑ̈nhì. De wu ɑ́kedh-ɑ be lidhi ngø? Jɑltöng? Awøø, o yɑ köbb-ɑ wun, Jøn dwøng kibøli jɑltöng. Møg-ɑ ɑ́gwed kì ree ek: ‘Jɑlwöönɑ óörɑ mɑl bølí, en ɑ ógwir yöö kiperí.’ Yɑ köbb-ɑ wun, Jøn dwøng kibøli ji-ɑ ɑ́nywøl yi mɑ̈nn bënn, de cɑgg ɑ́ kinøw, ngɑn pere pɑ ti teg, dwøng kibøle kì Pödhi Jwøk.” Keny-ɑ ɑ́lïngi møgɑni yi ji, geki jøgwɑ̈j thyew, kɑ ge oyïëyø kinni pwönyi kwøbbi Jwøk døøj, mɑ́ ge ɑ́rum ki jwɑ̈ɑ̈gø yi Jøn. De Jøpɑresì geki jøpwönyi Cigg, møg-ɑ ɑ́ceg ki gwirø yi Jwøk kiper gen ɑ́bɑny yi gen; ge ɑ́bɑ̈nyi jwɑ̈ɑ̈gø yi Jøn. Codhe, kɑ Yëso okööbø kinni, “Rïj men ópɑ̈ɑ̈rɑ kɑ ngø? O ge nɑ ngø? Ge nɑ othønhø mø bëëdø kì yij kyeel ngyew, ge cwøll-ɑ ri gen kinni, ‘Wu ɑ́göjji wøn ki bul, de wu ɑ́cög wu nuti cöngø. Wø ɑ́wör wø óywöngø, de wu ɑ́cög wu nuti ywøg.’ Jøn Jɑljwɑ̈g ɑ́bï e pɑ nyi cyɑ̈mø ki gïncɑm, o pɑ nyi mɑ̈dhø ki møgi oløg, kɑ wu okööbø i ree dɑ wɑ̈l. Nyɑɑr Dhɑnhø ɑ́bï e ocyɑ̈mø ki gïncɑm, o omɑ̈dhø ki møgi oløg, kɑ wu okööbø kinni, ‘Lidhu en! Bɑ cyɑ̈ɑ̈mø, o bɑ mɑ̈dhi møgø, o bɑ mɑ̈dh ki jøgwɑ̈j geki tyëngorøg!’ De peli wïj Jwøk, ɑ́nyodh kinni bɑ dyër, yi tyëng-ɑ ɑ́yïëyii.” Kɑ Yëso ryej yi jɑl mɑ Jɑlpɑresì, ɑkedhe gøl jɑlɑni kɑ pëgg-ɑ tɑw. Ádɑ ngɑn nyi niin ki köögi kì kɑɑlɑni, keny-ɑ ɑ́lïng ngɑnɑni kinni i Yëso bɑ ɑryej kì gøl jɑl-ɑ bɑ Jɑlpɑresì, ɑbëëne e ókɑ̈ddø ki ɑ́thïwi e pɑ̈ng yi møw me yøme med. Kɑ pëgg-ɑ piny buti Yëso kì dhøggi tyelle, e óywöngø. Kɑ tyelli Yëso nebe ki pïi nyinge, kɑ gï nyi dime ki yëyyi wïje, gï numme’ nummø, kɑ gï nyi gïnye ki møw-ɑ yøme med. Keny-ɑ ɑ́lïdhi Jɑlpɑresì men-ɑ ɑ́ryej Yëso kì gøle, ɑrume ki pyëwe kinni, “Keløg jɑɑl di bëëd ɑ́ jɑltöng kidyër, di yod yi en kinni, ngɑndhɑjø men-ɑ nywɑllii bɑ ngetorøg!” Aköbbi Jɑlpɑresì menɑni yi Yëso kinni, “Sɑymøn, yïɑ dɑ gïjø me dwɑddɑ köbbi yïn.” Alögge kinni, “Kööb jɑlpwönyø.” Akööb Yëso kinni, “Ádɑ ji ɑ́ryew mø kömi gen di kwör mi jɑl megø. Ákyel köme dɑ ngyëny miy ɑ́bïj, o ngɑn-ɑ kyeelø köme dɑ pyɑ̈r ɑ́bïj. Yï gen bong ngyëny møg cud yi gen ki körri gen. De jɑlngyëny, jøgɑni ryeet ɑ́köbbe kinni i ge ko cud. Á men kì kelli gen ɑ ómɑɑr jɑlngyëny ki mendwøng?” Alöggi Sɑymøn kinni, “Yɑ orumø kinni, bɑ jɑl-ɑ́ köme ɑ́di ngyënyy-ɑ ngenyø.” Akööb Yëso kinni, “Yï ɑ́kwøb dyër.” Codhe, kɑ Yëso wïje luge ngɑnɑni, kɑ Sɑymøn köbbe kinni, “Ngɑɑn, onennø yi yïn? Keny-ɑ ɑ́bëënɑ gølí, bong pïg lwøøgɑ tyellɑ mɑ ɑ́mëggí yɑn, de ngɑnɑni tyellɑ ɑ́lwøge ki pïi nyinge, kɑ gï nyi dime ki yëyyi wïje. Yɑ nuti nuumø yi yïn ki nuumi mër, de ngɑnɑni kër-ɑ ɑ́bëënɑ kɑl, nuti wïyø ki nummi tyellɑ. Wïjɑ nuti gïnyø yi yïn ki møw, de ngɑnɑni, møw me yøme med ɑ́kønye kömi tyellɑ. Yɑ köbb-ɑ yïn kinni, orøge cɑgg e dwøng, ɑ́rum ki lɑ̈ɑ̈nyø, bene ɑ bɑnge mɑ̈ɑ̈de ki mendwøng, de ngɑn-ɑ ɑ́yiel ki orøg me nøg, mɑ̈ɑ̈d-ɑ mɑ̈ɑ̈dø me nøg.” Codhe, ɑköbbi ngɑnɑni yi Yëso kinni, “Orøgí ɑ́rum ki lɑ̈ɑ̈nyø.” Kɑ ji-ɑ tɑw ócɑ̈gø pyënyi ri gen kinni, “Jɑɑl bɑ men cøn, ɑ lɑ̈ɑ̈nye orøg?” Kɑ ngɑnɑni köbbi yi Yëso kinni, “Yï ɑ́yiel yi yïëyí; kedh ki mër.” Codhe, ɑkedh Yëso e owïïnø kì kelli kɑ̈dd-ɑ døngø kí kɑ̈dd-ɑ thønhø bënn, e pwöny-ɑ Wöndøj mi Pödhi Jwøk. Tyëngwöödø gɑ pyɑ̈rø wïdɑ́ryew ɑ́cyɑ̈dhi kɑ en. Thyew, ɑ́dɑ kwï tyëng-ɑ mɑ̈nn mɑ ɑ́cyɑ̈dhi ki Yëso, tyëngɑni ɑ́ceg kɑ yielø yi Yëso ki rɑ̈ɑ̈m dëllì geki wëyrijjø, ɑ løg Meerì ɑ nyi cwøl ɑ́ Mɑgdɑliyɑ̀, ɑ ree ɑ́ryëëm wëy ɑ́bïryew wɑ̈g. Kí Anɑ̀ cï Kudhɑ̀, jɑl-ɑ ɑ́bëëd ɑ́ jɑgø kì tøg buri Ërödøs; kí Susɑnɑ̀, kí tyëng-ɑ mɑ̈nn møøgø mø gïïr. Tyëngɑni ɑ́bëëd Yëso geki jøbɑnge nyii kønyø yi gen ki ngyëny møg-ɑ bɑ mø cwɑggi gen. Keny-ɑ ɑ́cugi teedø mø gïïr, kɑ ji møøgø bï-ɑ yï Yëso ge kɑ̈ɑ̈l-ɑ myërr mø gïïr, ɑwɑ̈jji gen gɑ́j møg yi Yëso. “Dɑ jɑl megø mɑ ɑ́kedhi pwödhe be wïïwø ki köödh. Kɑ̈ng-ɑ ɑ́wïïwe, kwï köödh ɑ́dëëm yij yöö. Kɑ köödhɑni nyøn yi ji, kɑ ge cɑm yi winy. Kwï köödh ɑ́dëëm keny me bɑ kït, keny-ɑ ɑ́cɑ̈gi gen ki twïyø, kɑ ge othøø, mɑ́ lɑ̈bi kenyɑni ɑ́jwɑn thwøwø. Kwï köödh ɑ́dëëm kelli koodh, de koodhɑni ɑ́kedh ge jwɑn-ɑ døngø, kɑ gïg-ɑ ɑ́twïy twij yi gen. Kɑ kwï köödh dëëm-ɑ yij lɑ̈bø me døøj, kɑ ge ocyegø kidøøj, kɑ ɑ́kyel onywølø ki nying miyø.” Kɑ møgɑni ngøl yi Yëso kinni, “Lïng wun keløg yï wun dɑ yïthh!” Apyëëj Yëso yi jøbɑnge ki gïn-ɑ wɑngi yi gɑ́jɑni. Kɑ Yëso okööbø kinni, “Bene wun ɑ ɑ́yieny, o wu nyudhi gïg-ɑ bɑ ɑkɑnn kì yij Pödhi Jwøk. De ji-ɑ kyeelø nyi wɑ̈jji kɑ gɑ́j kipe kinni, o ge bëëd gen nyingi gen bɑ ɑyieb, de ge pɑ nëënø. O ge lïng gen de gïg-ɑ lïngi yi gen pɑ gɑm yi wɑ̈thi gen. “Bene gïn-ɑ wɑngi yi gɑ́jɑni èn: köödh bɑ wööni Jwøk. Köödh-ɑ ɑ́dëëm tøg yöö, pɑ̈r ki ji-ɑ nyi lïngi kwøbbi Jwøk, de Cethɑn nyii bëënø kɑ kwøbbɑni nyi kɑ̈ɑ̈le wɑ̈g kì pëthi gen. Codhe, o ge dhɑ̈li gen ki yïëyø, o ge cög ge pɑ yiel. Köödh-ɑ ɑ́dëëm keny-ɑ bɑ kït, pɑ̈r ki ji-ɑ nyi lïngi kwøbbi Jwøk, kɑ yïëy yi gen ki medi pëthi gen, de kwøbbɑni pɑ nyi wëggi gen niyeeng pëthi gen. Ge nyi yïëy kɑ nyɑ keny me thiinh, kɑ ge nyi døøg-ɑ cyɑ̈n kenyi bëën ɑkørr. Köödh-ɑ ɑ́dëëm kelli koodh pɑ̈r ki ji-ɑ nyi lïngi kwøbbi Jwøk, de ri gen nyi wëggi ge’ tyɑmø yi rummi kömi piny geki ngwej kì bɑng kɑ̈rì, kí bëëdi kömi piny, kɑ ge nyii cögø ge pɑ døngi, kɑ ge nyii cögø ge pɑ kɑ̈ni ki nywøl. O köödh-ɑ ɑ́dëëm yij lɑ̈m-ɑ med, pɑ̈r ki ji-ɑ nyi lïngi kwøbbi Jwøk ki pëëth mø døøj, kɑ gïg-ɑ ɑ́pwönyi gen nyi mïdhi yi gen, kɑ ge odyëjø gïti keny-ɑ ókɑ̈ni gen ki nywøl. “Bong dhɑnhø me cwiny lɑ̈mbɑ̈ kɑ gø kume ki ɑ́tɑy, wɑlɑ̀ kɑ gø kɑɑne thɑ nɑngɑreb. De dhɑnhø kenyi cwinye lɑ̈mbɑ̈, gø nyi cïbe’ wïj tɑrɑbedhɑ̀, o ji-ɑ óbï ød nëën gen ki cɑr. “Jɑmm-ɑ bɑ ɑ́kɑnn bënn ónënni, kɑ gïg-ɑ kɑnni bënn yod. “Kɑ ɑ́rum bëëde kinøw, nyi lïng wun kidøøj, mɑ́ tyëng-ɑ nyi lïngø kɑ tyelli kwøb yod yi gen, dïdi gen ómed. De tyëng-ɑ pɑ nyi lïngø, o tyelli kwøb pɑ yod yi gen, cɑgg ɑ́ møg nøg, møg-ɑ rømmi yi gen ce gï yood gen, bɑ møg-ɑ ókɑ̈ɑ̈l wɑ̈g kì yï gen.” Kɑ meyi Yëso geki nyiimen bï-ɑ yïe be këëmii, de piny ɑ́bëëd e twij yi ngenyi ji, kɑ ge ódhɑ̈lø wɑ̈dhi yïe. Kɑ nget ɑ́kyel Yëso köbbe kinni, “Meyí geki nyiimyëw cung-ɑ́ɑ̀ wɑ̈g ge dwɑdd-ɑ yïddø ki yïn.” 21 Aløøg møge yi Yëso kinni, “Meyɑ ki nyiimïɑ, bɑ ji-ɑ nyi lïngi kwøbbi Jwøk, kɑ gï mïdhi gen.” Cyɑ̈ng ɑ́kyel, Yëso geki jøbɑnge ɑ́kɑdhi yij morkɑb, kɑ gï köbbe kinni, “Kedhi wɑ løøg nɑm.” Kɑ ge ócɑ̈gø këwwi løøngɑni. Kɑ̈ng-ɑ ɑ́nudd ge ókyëwø, kɑ Yëso ónenø. Kɑ yømø me teeg ocödø ge ying-ɑ dïnɑm. Kɑ morkɑb opɑ̈ngø yi pïgi ɑpɑgø; ge bɑ møg mud. Kɑ jøgɑni jwɑn-ɑ be cyëëwi Yëso ge okööbø kinni, “Wuö! Wuö! Wɑ othøø!” Adhwödhi Yëso mɑl, kɑ ɑtunø geki ɑpɑgø köbbe cungi gen. Kɑ piny ceg-ɑ ì dïw kì bøli kenyɑni ceth. Kɑ Yëso jøbɑnge köbbe kinni, “Yïëyi wun ying-ɑ keny?” Abwøg jøgɑni kɑ ge ongɑ̈ngø, de ge pyëny-ɑ ri gen kinni, “Jɑɑl bɑ men cyee, ɑ köbbi yømø geki ɑpɑgø, kɑ kwøbbe lïngi yi gen?” Kɑ Yëso geki jøbɑnge, odhwödhø ki morkɑb kì Gɑlelì ge bɑ̈ɑ̈n-ɑ nɑm, ge kedh-ɑ myërri Gerɑsɑ̀. Keny-ɑ ɑ́kɑdhi Yëso piny, ɑbëën jɑl me ree di wëyrijjø yïe. Jɑlɑni yïe dɑ keny me bɑ̈ɑ̈r e pɑ rugø ki ógudh, o pɑ bëëdø kì pɑc, de bëëd ɑ wɑ̈thi rörri ji kì pɑ̈l. Keny-ɑ ɑ́lidhe Yëso, ɑryeere kɑ ree leenge piny kì bøli Yëso. Akööbe ki cwɑg mø døngø kinni, “Yï yɑb-ɑ ngø kì yï wøn, Yëso, Wɑ̈d Jwøng-ɑ Pëddi Döng? Yɑ kwɑjj-ɑ yïn, yɑ ko göjjí orɑng!” Møgɑni ɑ́kwøbe kɑ per kɑ ɑ́köbbi wëyrɑj yi Yëso kinni bëe wɑ̈g kì ri jɑlɑni. Nyii mɑgø yi wëyɑni tyel mø gïïr. Cɑgg tyelle di yëll geki cingge, yëllɑni nyi tørre’ tørrø, kɑ nyi kïdhi pɑ̈l yi wëyɑni o bëëde kete kì kunɑni. Apyëjii yi Yëso kinni, “Nyingí bɑ men?” Alögge kinni, “Nyingɑ bɑ Yɑy!” Mɑ́ wëyɑni ɑ́bëëd ge gïïr kì ri jɑlɑni. Akwɑjji Yëso yi wëyɑni kinni, ge ko ör yij ölø. Ádɑ dɑɑg kundhøngø me cyɑ̈mø kì wïj kwøømø, kɑ Yëso kwɑjji yi wëyɑni kinni wiye gïn, o ge kedhi gen ri kundhøngø. Kɑ gï wiye kedh gen. Keny-ɑ ɑ́bëën wëyɑni wɑ̈g kì ri jɑlɑni, ɑkedhi gen ri kundhøngø, kɑ dɑɑg kundhøngø reng-ɑ piny kì wïj kwøømø, kɑ ceg-ɑ ì cur kì nɑm, kɑ omudø bëne. Kwɑ̈yyi kundhøngø keny-ɑ ɑ́lidh gen gïn-ɑ ɑ́cwöb, ɑrengi gen. Kɑ tyëng kɑɑlɑni geki tyëng myërr-ɑ cyɑ̈gi köbbi gen gïn-ɑ ɑ́cwöb. Kɑ ji kedh-ɑ be lidhi gïn-ɑ ɑ́cwöb. Keny-ɑ ɑ́wɑ̈nhi gen yï Yëso, kɑ jɑl-ɑ́ ree ɑ́di wëyrijjø yuud gen e obëëdø kì buti Yëso, ree dɑ ógudh, o göögø ki dhɑnhø me døøj. Kɑ jiɑni obwøgø. Ji-ɑ ɑ́lïdhi, tyëng-ɑ kyeelø ɑ́lony ki köbbø yi gen, ki kër-ɑ ɑ́gwøøg jɑlɑni yi Yëso. Kɑ Yëso kwɑjji yi tyëng myërri Gerɑsɑ̀ bënn kinni dhwödhe kì pödhi gen, mɑ́ ge ɑ́bwøg bënn. Codhe, ɑkɑdhi Yëso yij morkɑb kɑ døøg-ɑ Gɑlelì. Jɑl-ɑ ɑ́gwøg yi Yëso ɑ́kwɑ̈jji kinni, “Wiy yɑ kedhɑ ki wun.” De ɑ́ör yi Yëso kinni, “Døøg pɑc, kɑ ji köbbí gïn-ɑ ɑ́göggi yïn yi Jwøk!” Codhe, kɑ jɑlɑni ókedhø e owïïnø kì yethi myërr e köbb-ɑ ji gïn-ɑ ɑ́göggii yi Yëso. Keny-ɑ ɑ́døøg Yëso Gɑlelì, ɑywøørii yi dhɑnhø bëne, mɑ́ ji ɑ́bëëd ge yïd-ɑ en. Kɑ jɑl me cwøl ɑ́ Yɑyrøs, o bɑ jɑngi sinɑgøg, bï-ɑ yï Yëso, kɑ ree bøødhe piny kì bøle, e kwɑjj-ɑ gøn kinni kedhe gøle. Nyɑɑr Yɑyrøs, bɑ ɑ́kyel kete, runne bɑ pyɑ̈rø wïdɑ́ryew, o cyɑ̈ngø thøø. Kɑ̈ng-ɑ ɑ́cyɑ̈dhe e kedh-ɑ gøl Yɑyrøs, kɑ ceg ki twijø yi teedø. Ádɑ ngɑndhɑjø kì kelli teenɑni me ree cyɑ̈dhi yi wɑɑnø ki runn pyɑ̈rø wïdɑ́ryew, ngyënyye ɑ́tyëg yi ɑkïmm de ɑ́dhɑ̈li yielø ki gïn ni menɑni. Ngɑnɑni ɑ́jwɑni bɑng Yëso, kɑ tuung ógødhe nywɑle, kɑ wɑɑnø ócungø kì bøli kenyɑni ceth. Kɑ Yëso okööbø kinni, “Á men ɑ ɑ́nywɑl yɑn?” Kɑ ji okyëdø bënn, ɑkööb Pïtør kinni, “Wuö, yï pëjj-ɑ́ɑ̀ dï ɑnɑn, yï ótwij kej ɑ́kyel yi ji ni men, kì wɑ̈thi tùng bënn, o yï ceg kɑ dhɑ̈nggø yi gen?” De Yëso ɑ́kööb këti kinni, “Dɑ dhɑnhø mɑ ɑ́nywɑl yɑn ceth, kipe ɑ́yod yi yɑn kinni dɑ tegø mɑ ɑ́bï wɑ̈g kì riɑ.” Keny-ɑ ɑ́yodii yi ngɑnɑni kinni ɑ́rum ki yodø, ɑbëëne yï Yëso dële okïrrø, kɑ ree bøødhe bøli Yëso, kɑ okööbø kì bøli teedø ki gïn-ɑ́ pere ɑ́nywɑle Yëso, kí kër-ɑ ɑ́dönye kì bøli kenyɑni ceth. Aköbbii yi Yëso kinni, “Nyɑrɑ, yï ɑ́yiel yi yïëyí; kedh ki mër.” Kɑ̈ng-ɑ ɑ́nudd Yëso okööbø, ɑbëën ngɑn me kɑ̈ɑ̈l gøl Yɑyrøs, jɑngi sinɑgøg, kɑ Yɑyrøs köbbe kinni, “Nyɑrí ɑ́rum ki thøø. Jɑlpwönyø ko jud këti.” Keny-ɑ ɑ́lïngi møgɑni yi Yëso ɑköbbe Yɑyrøs kinni, “Yï ko bwøg. Yïëëy yøw, o nyɑrí bødhe.” Keny-ɑ ɑ́wɑ̈dhi Yëso kɑl, ɑ́wiy-ɑ Pïtør, kí Jøn, kí Yɑgob, kí wïyi nyɑnthinh geki meye, o ge kedhi gen ød kyeel ki en. Ji bënn ɑ́bëëd ge óywöngø, pëthi gen orɑ̈mø kipe thøwi nyɑnthinh, de Yëso ɑ́kööb kinni, “Wu ko ywöngi; nyɑnthinh nuti thøø, ceg-ɑ nenø yøw!” Kɑ Yëso gɑg yi teedø, mɑ́ ge ngɑ̈ny wøw kinni nyɑnthinh rum thøø. De Yëso cingi nyɑnɑni ɑ́mɑge, ɑcwøle gøn kinni, “Nyɑrɑ, dhwödhí mɑl!” Kɑ wëye dwöög-ɑ ree, kɑ dhwödh-ɑ mɑl kì bøli kenyɑni ceth. Codhe, ɑkööb Yëso kinni thödhi nyɑnthinh ki gïncɑm. Kɑ wïyi nyɑnɑni ongɑ̈ngø geki meye bënn, de ge ɑ́ceg yi Yëso kinni ko di dhɑnhø me köbbi yi gen ki gïn-ɑ ɑ́cwöb. Kɑ tyëngwöödø gɑ pyɑ̈rø wïdɑ́ryew, cwøøl kej ɑ́kyel yi Yëso, kɑ gï thödhe ki tegø kì kömi wëyrijjø bënn, kí tegø me yïëëd gen ki rɑ̈ɑ̈m dëllì bënn. Jøg-ɑ ɑ́ör, gï ɑ́öre’ be köbbi ji kwøbbi Pödhi Jwøk, o ji yiel yi gen ki rɑ̈ɑ̈m dëlli gen. Gï ɑ́köbbe kinni, “Ko di gïn kɑ̈lli yi wun, wu ko kɑ̈ddi ki lodh, wu ko kɑ̈ddi ki beg, wu ko kɑ̈ddi ki gïncɑm wɑlɑ̀ ngyëny, kɑ dhɑnhø ko kɑ̈ddi ki ógudh ɑ́ryew. Bëëd wun kì gøl-ɑ ótöngi yi wun ceth, gïti keny-ɑ ódhwödh wun kì kenyɑni. Keløg e dɑ kɑɑl men-ɑ óbɑny wun, kedhu wɑ̈g kì kɑɑlɑni kɑ tør teng wun kì tyelli wun, e bɑ ngɑ̈ji gen.” Codhe, kɑ tyëngwöödø ókedhø ge owïïnø kì yethi myërr bënn, ge pwöny-ɑ Wöndøj. O ge oyïëdø ki ji kì myërrɑni bënn. Kɑ modïr, Ërödøs olïngø ki møg-ɑ kømmi yi teedø kì ri Yëso, kí gïg-ɑ ɑ́cwöb bënn, kɑ wïje omuumø, mɑ́ kwï ji okööbø kinni, “Jøn Jɑljwɑ̈g ɑ́dhwödh kì yij thøø.” Møøgø okööbø kinni, “Eliyɑ̀ ɑ́dwöög mɑl.” Thyew, kwï møøgø okööbø kinni, “Ákyel kì kelli jøtöng mø kɑ̈ge dööng ɑ́dwöög mɑl.” Akööb Ërödøs kinni, “Jøn wïje ɑ́kïbɑ wɑ̈g, de jɑɑl bɑ men, ɑ ree lïngɑ kwøbb-ɑ ni møg?” Kɑ Ërödøs oyɑ̈bø ki keny yode Yëso, o gø di lidhe. Keny-ɑ ɑ́dwöög tyëngwöödø, ɑ́köbbi Yëso yi gen ki gïg-ɑ ɑ́gwøg yi gen bënn. Codhe, ɑkïdhi gen pɑc me cwøl ɑ́ Betsɑidɑ̀ yi Yëso, kun cuggi gen ki bëëdø keti gen kì kej ɑ́kyel. De keny-ɑ ɑ́kedhi yi Yëso ɑ́yod yi teedø, kɑ ge løg-ɑ bɑnge kunɑni. Kɑ Yëso oyïëyø yïddø ki gen, kɑ gï köbbe kì ri Pödhi Jwøk, kɑ tyëng-ɑ ɑ́dwɑddi yielø ki rɑ̈ɑ̈m dëllì, yiele. Abëën jøg-ɑ ɑ́ör gɑ pyɑ̈rø wïdɑ́ryew yï Yëso keny-ɑ ɑ́cyɑ̈ngi cɑ̈ng ki buddø, kɑ ge okööbø kinni, “Köbbí teedø kedh gen. Wiy ge kedhi gen yethi bɑ̈gg geki myërr-ɑ cyɑ̈gi o ge yïddi gen ki kɑ̈jj mø buddi yi gen, kí gïg cɑm yi gen, mɑ́ e bong ji mø bëëdø kì keny.” De ge ɑ́köbbi yi Yëso kinni, “Thödhu gen ki gïn cɑm yi gen.” Alöggi gen kinni, “Yï wøn dɑ ópùn ɑ́bïj kí rij ɑ́ryew, codhi gen. Keløg ri gen pɑ ngëwwi, bong gïn gwøg yi gen ki dhɑnhø men bëne.” Kwɑnni ji møg-ɑ kenyɑni bɑ gïn ni ɑ́lïp ɑ́bïj. Kɑ Yëso jøbɑnge köbbe kinni, “Köbbu ji pëggi gen piny gɑ ɑkudd; ɑkud ɑ́kyel yije dɑ ji pyɑ̈r ɑ́bïj.” Codhe, ɑgwøøg møgɑni yi jøgɑni. Kɑ ji pɑ̈ngi gen gɑ pyɑ̈r ɑ́bïj, pyɑ̈r ɑ́bïj. Codhe, kɑ ópùnɑni gɑ ɑ́bïj kí rij ɑ́ryew møgɑni kwɑny yi Yëso, kɑ Jwøk pwøje, e nenn-ɑ mɑl, kipe gïncɑm menɑni. Codhe, ɑpɑ̈nge gïncɑm, kɑ gø mëgge jøbɑnge, o ge thödhi gen ji. Acyɑ̈ɑ̈m ji bënn, kɑ ge oyɑ̈ngø, kɑ men-ɑ ɑ́döng cøng kej ɑ́kyel. Kɑ dhöng pyɑ̈rø wïdɑ́ryew opɑ̈ngø yi thulli ópùn-ɑ ɑ́döng kì bɑng tyëng-ɑ ɑ́cyɑ̈ɑ̈m. Tyelø ɑ́kyel Yëso ɑ́bëëd e mɑll-ɑ Jwøk kì wɑ̈ye, de jøbɑnge ɑ́bëëd ge cyɑ̈gi ki en, kɑ gï pyëje kinni, “Teedø okööbø i yɑ bɑ men?” Alöggi gen kinni, “Kwï ji okööbø i yï bɑ Jøn Jɑljwɑ̈g. Møøgø okööbø i yï bɑ Eliyɑ̀. O dɑ møøgø mø kööbø i yï bɑ ɑ́kyel kì kelli jøtöng mø kɑ̈ge dööng, me dwöög mɑl.” Apëjji Yëso kinni, “De wun ø, wu okööbø kinni yɑ bɑ men?” Alöggi Pïtør kinni, “Yï bɑ Mesiy mi Jwøk.” Akyëddi gen ki mendwøng yi Yëso kinni, ko di dhɑnhø me köbbi møgɑni yi gen. Kɑ Yëso okööbø kinni, “Nyɑɑr Dhɑnhø órɑngi yi gïg mø gïïr. Óbɑny yi jøgdøngø geki ókwërr-ɑ døngø, kí jøpwönyi Cigg. Ónɑ̈g, o ódhwödh kì yij thøø bɑng cyɑ̈ng ɑ́dɑ̈g.” Aköbbi ge bënn yi Yëso kinni, “Ngɑn dwɑddi cyɑ̈dhø ki yɑn, wiye jɑmm-ɑ tyer yi pyëwe. Kɑ yɑdh ɑrïwe byelle yethi cyɑ̈ng bënn, kɑ luge kì bɑngɑ. Ngɑn dwɑddi yieli wëye gï lɑ̈ɑ̈nye’ lɑ̈ɑ̈nyø, de ngɑn-ɑ ólɑ̈ɑ̈ny wëye kiperɑ, gï yiele’ yielø. Dɑ gïndøj me yod yi ji, cɑgg piny bëne göögø ki mi gen, o men-ɑ́ gen kì ri gen, ge rum lɑ̈ɑ̈nyø, wɑlɑ̀ ge bɑ ɑtyɑm? Bogøn kinni tek! Keløg yɑ obɑnyø yi ji, o kwøbbɑ bɑny yi gen, ge ólony ki bɑnyø yi Nyɑɑr Dhɑnhø keny-ɑ óbëëne ki mɑ̈re, geki mɑ̈ɑ̈r Jwøk kí wëywödde kwërø. Dyër ɑ köbbɑ wun kinni, kelli ji-ɑ cungi kì keny èn, dɑ møg koo thøw, pïd keny-ɑ ólidh gen Pödhi Jwøk.” Kì ri cyɑ̈ng ɑ́bïdɑ̈g kì bɑng kɑ ɑ́rum Yëso ki kwøbi møgɑni, ɑkwɑnye Pïtør, kí Jøn, kí Yɑgob, kɑ ge kedh-ɑ wïj kït be mɑ̈ddø. Kɑ̈ng-ɑ ɑ́bëëd Yëso e ómɑ̈ddø, kɑ bøle ree wile, kɑ ógudhe ótɑ̈rø ge ceg-ɑ orɑ̈ng. Codhe, kɑ jøg ɑ́ryew, ɑ løg Mosɑ̀ geki Eliyɑ̀, okööbø ki Yëso. Ge ɑ́cwöb ki dhwɑ̈ɑ̈ng mɑl kì ri gen, kɑ ge okööbø ki kwøbbi kër-ɑ óthøwe kì Yerusɑlem, e tyëg-ɑ møg-ɑ ɑ́gwir yi Jwøk. Pïtør geki jøg-ɑ kyeelø ɑ́bëëd ge ceg-ɑ nwɑyyø, de keny-ɑ ɑ́yieb gen nyingi gen kidøøj, ɑlidh gen mɑ̈ɑ̈r Yëso kí jøg-ɑ cungi ki en gɑ ɑ́ryew. Ri kedhi Mosɑ̀ kí Eliyɑ̀, kɑ ge ódɑ̈ngø ki en, ɑköbbi Yëso yi Pïtør kinni, “Wuö, døøj ke ying wɑ keny. Wiy wø gëëd wøn ki ud ɑ́dɑ̈g, ɑ́kyel mií, ɑ́kyel mi Mosɑ̀, ɑ́kyel mi Eliyɑ̀.” Pïtør gïn-ɑ kømmi yi en kwïje. Kɑ̈ng-ɑ ɑ́nudd e kwøb-ɑ møgɑni, kɑ pøølø obëënø, kɑ ge rïm yi pøølɑni, kɑ ge obwøgø keny-ɑ ɑ́rïïm gen yi pøølø. Kɑ cwɑg obëënø ge kɑ̈ɑ̈l-ɑ yij pøølɑni kinni, “Men bene Wɑ̈dɑ men-ɑ ɑ́yieny yi yɑn, lïngu møge!” Keny-ɑ ɑ́rum cwɑggɑni ki kwøb, döngø ɑ́ Yëso kete kì kenyɑni. Jøbɑnge møgɑni ɑ́cög ge okudø, o bong ngɑn mɑ ɑ́köbbi gïn-ɑ ɑ́lidh yi gen kì yethi cyɑ̈nggɑni. Dhuki, ɑyïnhi gen piny kì wïj kït, kɑ teedø mø ngenyø bï-ɑ yï Yëso. Kɑ jɑl megø kì kelli teenɑni óryeerø e köbb-ɑ Yëso kinni, “Jɑlpwönyø, yɑ kwɑjj-ɑ yïn, bï lidh wɑ̈dɑ, bɑ wɑ̈dkyel. Dɑ wëy me rɑj me nyi mɑgii, kɑ nyi ceg-ɑ ì kɑɑg ki ɑkiw. Nyelthinh nyi tɑ̈ɑ̈ye’ piny e pwöd-ɑ ree, dhøge othungø ki óböy. Nyi gögg-ɑ men-ɑ́ gïjø me rɑɑj yi wëyɑni, o pɑ nyi wiy yi en ki keny me bɑ̈ɑ̈r. Jøbɑngí ɑ́kwɑjjɑ, kinni cïïr ge gøn wɑ̈g, de ɑ́dhɑ̈li lwɑ̈ngø yi gen.” Alöggi Yëso kinni, “Wu bɑ ji mø yï wun bong yïëyø, o bëëdi wun rɑɑj. Yɑ ógït-ɑ wɑɑng yɑ obëëdø kì kelli wun, yɑ torø yi kwøbbi wun kinnï? Kɑ̈ɑ̈l wɑ̈dí keny.” Kɑɑm-ɑ ɑ́kedhi nyelthinh yï Yëso, ɑleengii piny yi wëyrɑj kɑ ree pwöde. De Yëso ɑ́cwøw ki menteg, kɑ wëy-ɑ rɑj köbbe bëe wɑ̈g. Kɑ nyelthinh yiele, ɑdögge gøn wïye. Teedø bëne ɑ́ngɑ̈ng kɑ ge obwøgø yi tegi Jwøk. Kɑ̈ng-ɑ ɑ́bëëd ji ge ceg-ɑ omøy yi gïg-ɑ ɑ́gwøg yi Yëso, ɑköbbe jøbɑnge kinni, “Wɑ̈thi wun ko wïl ki gïn-ɑ köbbɑ wun ɑnɑn, Nyɑɑr Dhɑnhø ócïb cinggi ji.” De kwøbbɑni nuti gɑmø yi wɑ̈thi jøbɑnge, kí gïn-ɑ wɑngi yi møgɑni; gïn-ɑ wɑngi yi møgɑni ɑ́bëëd ɑ́ ɑkɑn kipe rummi gen, o ge cög gen møgɑni pɑ yod yi gen. De ge ɑ́bwøg ki pëjjii møgɑni. Kɑ jøbɑng Yëso ócɑ̈gø pëmø ki ri gen, ki mɑ́ løge men ɑ ti döng kì kelli gen. Kɑ møg-ɑ rømmi yi gen yod yi Yëso, codhe ɑcwödde ki nyelthinh, kɑ nyelɑni cuunge kì bute. Akööb Yëso kinni, “Ngɑn yïëy nyelthinh men ki nyingɑ, yïëy-ɑ yɑn. O ngɑn-ɑ óyïëy yɑn, yïëy-ɑ Ngɑn-ɑ ɑ́ör yɑn, mɑ́ ngɑn-ɑ thinh kì kelli wun bënn, bene en ngɑn-ɑ dwøng kidyër.” Alöggi Jøn kinni, “Wuö, jɑl megø ɑ́lidh yi wøn e cïïr-ɑ wëyrijjø wɑ̈g kì ri ji ki nyingí. De ɑ́kyëddi yi wøn, mɑ́ e pɑ ying yij ɑkudee.” De Yëso ɑ́kyëëd kinni, “Ko kyëddi wun, mɑ́ ngɑn pɑ rïwwi bøli wun ying-ɑ tuung wun.” Keny-ɑ ɑ́cyɑ̈ngi bøli kej kedhe mɑl, ɑkööbe cem e dwɑdd-ɑ kedhi Yerusɑlem. Kɑ öd-ɑ bøle ki jøg mø kedhi be gwiri gøl-ɑ ópëgge kì pɑc ɑ́kyel kì kelli myërri Sɑmɑriyɑ̀. De tyëng pɑnɑni ɑ́kyëëd i ge ko töngi pɑɑ gen, mɑ́ Yëso kedh-ɑ Yerusɑlem. Kɑ jøbɑng Yëso, ɑ løg Yɑgob geki Jøn, okööbø kinni, “Odwɑddø yi yïn Wuö, kinni cwööl wøn mɑc piny kì mɑl, o rɑ̈be tyëngɑni, ni men-ɑ ɑ́gwøg yi Eliyɑ̀?” De Yëso ree ɑ́luge gïn, kɑ gï cɑ̈wwe. Codhe, kɑ ge kedh-ɑ pɑc megø. Kɑ jɑl megø Yëso köbbe, e ócyɑ̈dhø kì yöö kinni, “Yɑ ólugi kì bɑngí kì yethi kɑ̈jj-ɑ ókedhi yi yïn.” Aköbbii yi Yëso kinni, “Ógwøgg dɑ burrì mø yethi gen nyi buud yi gen. O winy dɑ uddi gen, de Nyɑɑr Dhɑnhø yïe bong keny ywööme wïje.” Kɑ jɑl megø köbbi yi Yëso kinni, “Lugí kì bɑngɑ!” De jɑlɑni ɑ́kööb kinni, “Wuö, wiy yɑ kedhɑ be konyi wïyɑ møti.” Kɑ köbbi yi Yëso kinni, “Wiy ji-ɑ thøø kony gen tyëngthøø mø gen. De men-ɑ́ yïn, kedh kɑ yï pwönyí Wöndøj mi Pödhi Jwøk.” Kɑ jɑl megø okööbø kinni, “Yɑ ólugi kì bɑngí Wuö, de wiy yɑ kedhɑ be mɑ̈dhi wɑddi wøn møti.” Kɑ köbbi yi Yëso kinni, “Ngɑn cïb cinge ri kwer, kɑ nyi lïïdh-ɑ ngɑ̈je, pɑ kyëëw ki Pödhi Jwøk.” Codhe, kɑ Wë ókɑ̈bbø ki ji pyɑ̈r ɑ́bïryew wïdɑ́ryew, kɑ gï öre gɑ ɑ́ryew, ɑ́ryew. Gï ɑ́öre bøle mɑl yethi myërr-ɑ dwɑdde kedhø. Kɑ gï köbbe kinni, “Byel ɑ́cyeg ge gïïr ki mendwøng, de jøgwøg møg-ɑ nud kwɑnni gen nøg. Kwɑjju wïi pwödhø, o öne ki jøgwøg mø gïïr møg kɑj byelle. Kedh wun ɑnɑn, de lïng wun! Wu ör yi yɑn wu nɑ dyëg møg kedhi kelli óthönhì. Wu ko kɑ̈ddi ki pødhi ngyëny, kɑ wu ko kɑ̈ddi ki beg, wɑlɑ̀ wɑr, kɑ wu ko nyi cungi wu mɑ̈dh-ɑ ji kì kö yöö. Nyi kööb wun kì ɑ́dyëddi gøl-ɑ kedhi yi wun kinni, ‘Wiy gøl, bëëde ki mër.’ Keløg yij gølɑni dɑ ngeti mër, mɑ̈dhhi mër mø wun óbëëdø kì gølɑni, de keløg ge pɑth ki tyëngmër, mɑ̈dhhi mër mø wun ódwöög yï wun. Bëëd wun kì gøl-ɑ bɑ gøl mër, kɑ wu cyɑ̈ɑ̈m wun, kɑ wu mɑ̈ɑ̈dh wun ki gïg-ɑ ómëggi wun, mɑ́ ngɑn-ɑ göögø nyi ceg kɑ thödhø ki köögi. Wu ko nyi dhwödh kì kɑl, kɑ wu dɑ̈g-ɑ gøl-ɑ kyeelø. Keløg wu kedh-ɑ kɑɑl kɑ wu kïdhi kɑl yi tyëng kɑɑlɑni, cɑm wun gïncɑm-ɑ ómëggi wun. Yiel wun tyëng-ɑ dëlli gen rɑ̈mø kì kenyɑni, kɑ ge köbbi wun kinni, ‘Pödhi Jwøk cyɑ̈gi ki wun.’ De keløg wu kedh-ɑ kɑɑl, kɑ wu ocögø wu pɑ cwøøl kɑl yi tyëng kɑɑlɑni, kedhu dïkɑɑlɑni kɑ wu kööb wun kinni, ‘Cɑgg ɑ́ tør kɑɑl wun men-ɑ ɑ́mɑ̈gi ki tyelli wøn tënggi wø’ wun. De wɑ̈thi wun ko wïl kinni Pödhi Jwøk ɑ́rum ki bëën buti wun!’ Yɑ köbb-ɑ wun kinni, kì Cyɑ̈ɑ̈ng Gøny, cɑ́y-ɑ ɑ́cɑɑy Sødømɑ̀ óløg mø lɑ̈w kibøli cɑ́y-ɑ ócɑɑy kɑɑlɑni. “Yï ɑ́gɑ̈g Korɑdhïn! Yï ɑ́gɑ̈g Betsɑidɑ̀! Mɑ́ keløg gïïngɑ̈ngø møg-ɑ ɑ́gwøg kì yethi wun di gwøg-ɑ Suur kí Sïdön, ge bɑ møg di yewi kɑ̈ge dööng, kɑ ri gen di bug gen ki belø, kɑ ge orugø ki ocwɑ̈llì. De kì Cyɑ̈ɑ̈ng Gøny, cɑ́y-ɑ ócɑɑy Suur kí Sïdön óløg mø lɑ̈w kibøli cɑ́y-ɑ ócɑɑy wun. O yïn ø, Kɑpernɑum! Yï ɑ́dwɑdd-ɑ tïngi rií mɑl? Pɑth, yï óleeng-ɑ piny yij ölø!” Kɑ Yëso jøbɑnge köbbe kinni, “Ngɑn-ɑ ólïngi kwøbbi wun, lïng-ɑ kwøbbɑ. O ngɑn-ɑ lïngi kwøbbɑ, lïng-ɑ kwøbbi ngɑn-ɑ ɑ́ör yɑn.” Keny-ɑ ɑ́dwöög jøg-ɑ ɑ́ör gɑ pyɑ̈r ɑ́bïryew wïdɑ́ryew, ge ɑ́dwöög pëthi gen omedø, kɑ ge okööbø kinni, “Wuö, cɑgg ɑ́ wëyrijjø, ge ceg-ɑ lïngø ki kwøbbi wøn, kenyi köbbi gen yi wøn ki nyingí!” Aköbbi gen yi Yëso kinni, “Cethɑn ɑ́nenni yi yɑn e ceg-ɑ dëëmø ni loodh mɑl. Lïng wun, wu ɑ́thödhɑ ki tegø me nyøn wun thöllì kí ïïdh; tegø me lod tegi ngetimɑ̈ɑ̈nø. O bëëd e bong gïn-ɑ ónywɑl wun. Pëthi wun ko med kipe kɑ̀ lïngi kwøbbi wun yi wëyrijjø, de med pëthi wun kiper kɑ ɑ́rum nyingi wun ki gwedø kì mɑl.” Amïni pyëw Yëso kì ri tegi Wëykwërø, ɑkööbe kinni, “Yɑ lejj-ɑ yïn, yïn ɑ Wïyɑ; Wïi mɑl kí piny, kipe kɑ ɑ́kɑ̈nní møgɑni tyëng-ɑ wɑ̈thi gen pel, geki tyëng-ɑ rummi gen nud. De ge ɑ́nyudhí ji-ɑ nuti dïdø. Ngee Wïyø, bɑ gïn-ɑ ɑ́dwɑddi yi yïn ceth kidyër. “Wïyɑ, yɑ ɑ́mëgge jɑmmì bënn. Bong ngɑn ngɑ̈nyi kinni Wɑ̈d bɑ men, dɑ́ Wïy kete ɑ ngɑ̈nyii. O bong ngɑn ngɑ̈nyi Wïy, den-ɑ́ Wɑ̈d geki ji-ɑ ɑ́myeg yi Wɑ̈d kɑ gï köbbe møgɑni.” Kɑ ree luge jøbɑnge, ɑköbbe gïn kì wɑ̈yi gen kinni, “Ri wun dɑ gyëdh, mɑ́ gïg di nennø yi wun! Yɑ köbb-ɑ wun kinni, jøtöng mø gïïr, kí rɑ̈nhì ɑ́dwɑdd-ɑ lidhi gïg-ɑ nenni yi wun ek, de ge ɑ́dhɑ̈li. O ge ɑ́dwɑdd-ɑ lïngi møg-ɑ lïngi yi wun ek, de ge ɑ́dhɑ̈li.” Kɑ jɑl mɑ jɑlpwönyi Cigg kedh-ɑ be pɑ̈nyi Yëso, ɑkööbe kinni, “Jɑlpwönyø, ɑ́ ngø ɑ dwɑddi kinni o gwøg yi yɑn, o yɑ yïddɑ ki nënn-ɑ ɑtheer?” Aløøg møge yi Yëso kinni, “Á ngø ɑ bɑ ɑgwed kì yethi Cigg? Á ngø ɑ ɑ́rɑng yi yïn kì yij wɑ̈nyi Cigg?” Kɑ jɑlɑni ólöggø kinni, “Mɑɑr Wöw Jwøgí ki pyëwí bëne, kí wëyí bëne, kí tegí bëne, kí rummí bënn, kɑ ngɑn-ɑ butí mɑɑr ni kɑ̀ mɑɑr rií.” Aköbbii yi Yëso kinni, “Löggí bɑ dyër. Gwøg møgɑni o yï yïddí ki nënn-ɑ ɑtheer.” De jɑlpwönyi Cigg ɑ́dwɑdd-ɑ yodi tegi per pyëjj-ɑ ɑ́pyëje, ɑpyëje Yëso kinni, “Ngɑn-ɑ butɑ ɑ́ men?” Alöggi Yëso kinni, “Dɑ jɑl megø mɑ ɑ́dhwödh kì Yerusɑlem e wel-ɑ Yerikö, kɑ rødh yi kurrì. Kɑ ógudhe kɑggi yi gen, kɑ gø pwöd gen, kɑ gø wiy gen e dhɑ̈rø. Kɑ jɑl mɑ ókwërø obëënø e kɑ̈ll-ɑ yuuɑni. Keny-ɑ ɑ́lidhe gøn, kɑ gø kyëje kedh e opödhø. Kì bɑnge, ɑbëën jɑl mɑ Kwɑɑr Leebì. Keny-ɑ ɑ́wɑ̈dhe kenyɑni, gø ɑ́lidhe, kɑ gø kyëje, kedh e opödhø. Codhe, kɑ jɑl Sɑmɑriyɑ̀ obëënø, e kɑ̈ll-ɑ yuuɑni. Keny-ɑ ɑ́lidhe jɑl-ɑ ɑ́pwöd, kɑ yije óywöngø kipere. Kɑ kedh-ɑ yïe, kɑ kedde kunye ki møgi oløg kí møw, kɑ gï kode. Atïnge gøn kömi ɑdere. Kɑ gø kïdhe gøl wëll, kun tuure gøn. Keny-ɑ ɑ́ru wøw dhuki, kɑ jɑl Sɑmɑriyɑ̀ omuujø ki ngyëny ɑ́tegg ɑ́ryew, gï mëgge’ jɑl-ɑ yïe di gøl wëll, kɑ gø köbbe kinni, ‘Tuur jɑɑl. Keløg e dɑ ngyëny møg-ɑ ódwɑddi yi yïn keny-ɑ óthumi møg, ge ócullɑ yïn keny-ɑ ódwöögɑ.’ ” Codhe, ɑkööb Yëso kinni, “Yï orumø kinni bɑ men kì kelli jøgɑni gɑ ɑ́dɑ̈g ɑ ɑ́göög ni ngɑn ying buti jɑl-ɑ ɑ́pwöd yi kurrì?” Kɑ jɑlpwönyi Cigg ólöggø kinni, “Jɑl-ɑ́ pyëwe ɑ́lɑ̈ɑ̈m ki en.” Aköbbii yi Yëso kinni, “Adɑ́ kedh ceth, kɑ yï göög kinøw.” Yëso geki jøbɑnge ɑ́bëëd ge ceg-ɑ wel, ɑtöngi gen pɑc megø. Kɑ ge cwøøl kɑl yi ngɑndhɑjø me cwøl ɑ́ Mɑrthɑ̀. Mɑrthɑ̀ yïe ɑ́dɑ nyimen me cwøl ɑ́ Meerì. Meerì ɑ́pëggi buti Yëso e lïng-ɑ pwönye. De Mɑrthɑ̀ ɑ́bëëd e ceg-ɑ gwøg ki gïg-ɑ dwɑddi gwøgø. Kɑ kedh-ɑ ød, ɑkööbe kinni, “Pɑ nenni yi yïn Wuö, nyimïɑ yɑ ɑ́wïye gwøg bëne? Köbbí bëe o yɑ køny yi en.” De møge ɑ́løøg yi Wë kinni, “Mɑrthɑ̀, Mɑrthɑ̀! Pyëwí lïngø kɑ per jɑmmì mø gïïr. Bɑ gïjø ɑ́kyel kete ɑ pere teg. Meerì ɑ́kwɑny-ɑ gïn-ɑ lɑ̈w, o pɑ cuggi kwɑnyø kì yïe.” Tyelø ɑ́kyel Yëso ɑ́bëëd e ókwɑ̈jjø kì keny megø. Keny-ɑ ɑ́rume, ɑpyëjii yi jɑl ɑ́kyel kì kelli jøbɑnge kinni, “Wuö, pwönyí wøn ki kwɑ̈jjø ni Jøn kɑ ɑ́pwönye jøbɑnge.” Aköbbi gen yi Yëso kinni, “Kenyi kwɑ̈jji wun, nyi kööb wun kinni, ‘Yïn ɑ Wïyi wøn, wiy nyingí kwërø wør; wiy Pödhí bëe. Nyi mëggí wøn gïncɑm men-ɑ dwɑddi yi wøn kì yethi cyɑ̈ng bënn. Dwöög lɑɑwí piny kipe orøøg wøn, mɑ́ wøn kì ri wøn, ngɑn-ɑ nyi göggi wøn ki gïnrɑj nyii wiyø yi wøn. Kɑ wø ko wëggí pɑ̈nyø ki kwøb mø teeg.’ ” Codhe, ɑköbbi gen yi Yëso kinni, “Keløg dhɑnhø ɑ́kyel kì kelli wun kedh-ɑ yï mɑ̈dhe kì dïwɑ̈r kɑ gø köbbe kinni, ‘Mɑ̈dh, wïdhí yɑn ki ópùn ɑ́dɑ̈g. Dɑ mɑ̈dhɑ mɑ ɑ́bï be këëmi yɑn, de yïɑ bong gïncɑm me mëggɑ en.’ Kɑ mɑ̈dhí ólöggø kì yiny-ɑ ød kinni, ‘Yɑ ko jud yi yïn! Dhø ød ɑ́rum ki dijø, o wø buud kɑ nyigɑ. Yɑ pɑ cuggi dhwödhi mɑl kɑ yï thödhɑ ki gïïpiny.’ Yɑ köbb-ɑ wun, keløg yï pɑ thödhi yi en kipe kɑ̀ bëëd yï bɑ mɑ̈dhe, yï thödhe’ thödhø kipe kɑ̀ dyëëj ki kwɑ̈jjø, e wïjí pɑ lɑ̈ɑ̈y. “Kɑ ɑ́rum bëëde kinøw, yɑ köbb-ɑ wun kinni, kwɑ̈jji wun, wu óthödhi. Yɑ̈ɑ̈b wun, wu óyïddi. Cwöddi wun, dhø ød óyïëbbi wun. Mɑ́ ngɑn-ɑ ókwɑ̈jji, óthödhi, o ngɑn-ɑ óyɑ̈bø óyïddi, o ngɑn-ɑ ócwöddi, dhø ød óyïëbbii. Á men ɑ nyɑre cwöddi ki rëjø kì yïe, kɑ gø mëgge thwöl ɑ́ kej rëjø? Wɑlɑ̀ keløg e ócwöddø ki tøng gyenø, gø mëgge’ iidh? Cɑgg ɑ́ kɑ̀ bëëd wun wu rijjø, wu ngɑ̈ny thödhi nyigi wun ki gïgdøj. Muuny-ɑ ómuuj yi Wïyi wun ɑ ying mɑl, óbëëd ɑ dï; keny-ɑ óöre Wëykwërø kömi tyëng-ɑ kwɑjjii!” Tyelø ɑ́kyel, Yëso ɑ́bëëd e ryem-ɑ wëyrijjø me mïïlø. Keny-ɑ ɑ́bëën wëyɑni wɑ̈g, kɑ jɑl-ɑ́ ree ɑ́di wëyɑni okööbø cyee, mɑ́ e ɑ́bëëd e pɑ nyi kööbø. Kɑ ji ceg-ɑ ngɑ̈ngø. De kwï gen ɑ́kööb kinni, “Yëso göög-ɑ tegi Bɑɑldhebul, jɑngi wëyrijjø, gøn ɑ cyëëde wëyrijjø wɑ̈g kì ri ji.” Ji møøgø ɑ́dwɑdd-ɑ pɑ̈nyi Yëso, ɑköbbi ge gøn kinni thödhe gïn ki ngïji me kɑ̈ɑ̈l mɑl. De mɑ́ rummi gen ɑ́yod yi Yëso, ɑköbbe gïn kinni, “Pödhø men-ɑ pɑ̈ngi ree ɑ́ ɑkudd, kɑ døøg-ɑ be nyɑɑg ki ree kete, pɑ nyi cwööng ki rënyø. Keløg ɑ́ kinøw, Cethɑn ke pɑ̈nge ree, jyɑ̈ge pɑ mɑ̈gi ki keny me bɑ̈ɑ̈r. Wu okööbø i yɑ göög-ɑ tegi Bɑɑldhebul, o bɑ en ɑ cyëddɑ wɑ̈g ki wëyrijjø. De keløg yɑ göög-ɑ tegi Bɑɑldhebul, o bɑ en ɑ cyëddɑ wɑ̈g ki wëyrijjø, ɑ́ tegø men-ɑ́, ɑ nyi göög yi jii wun, ɑ nyi cyëddi gen wɑ̈g ki wëyrijjø? Jii wun bɑ gen ɑ ócɑy wun. De keløg yɑ göög-ɑ tegi Jwøk, ɑ cyëddɑ wɑ̈g ki wëyrijjø, bene kinni Pödhi Jwøk ɑ́wɑ̈nhi yï wun. “Keløg nyel me teg, me yïe di tøngg mø gïïr pëgg-ɑ be kori gøle, bong gïjø me nywɑl jɑmme. De ke bëën ngɑn me lodii ki tegø, kɑ tyɑm yi en, tøngg-ɑ ɑ́ngɑ̈dhe okwɑnyø kì yïe yi nyel-ɑ teg, kɑ jɑmm-ɑ ɑ́kɑbe pɑ̈nge. “Ngɑn pɑ ying tungɑ bɑ ngɑn mɑ̈n ki yɑn. O ngɑn-ɑ pɑ cunggi kyeel ki yɑn ceg-ɑ kyedh. “Kenyi bëën wëy me rɑj wɑ̈g kì ri dhɑnhø, nyi kɑ̈ll-ɑ kɑ̈jj-ɑ thwøwø, e oyɑ̈bø ki keny me ywööme ree. De kenyi jɑde, nyii kööbø kinni, ‘Yɑ døøg-ɑ øn-ɑ ɑ́wiy yi yɑn.’ Keny-ɑ ódwööge, kɑ ønɑni yuude e rumø’ yiejø kidøøj, o thøø yi gwirø. Wëyrɑj ceg-ɑ døøgø, kɑ ókɑ̈nø ki wëyrijjø ɑ́bïryew mø lodii ki rɑ̈jø. Kɑ ge kedh-ɑ ri ngɑnɑni, kɑ ge obëëdø kì ree. Ngɑnɑni ceg-ɑ yïddø ki göj me lod mi tyeli mɑl.” E Yëso nudd e kwøb-ɑ møgɑni, ɑtïng ngɑndhɑjø megø cwɑgge kì kelli teedø, kɑ okööbø kinni, “Ngɑn-ɑ ɑ́kɑ̈lli yïn kì yije, ɑ thïnhe ɑ́dhødh yi yïn ree dɑ gyëdh!” De Yëso ɑ́yöd e ceg-ɑ kwøb kinni, “Pɑth, tyëng-ɑ ri gen di gyëdh, bɑ ji-ɑ lïngi kwøbbi Jwøk kɑ gï mïdhi gen.” Keny-ɑ ɑ́kedh teedø ge óngënyø, ɑkööb Yëso kinni, “Rïj men, bɑ rïj me rɑj. Ge dwɑdd-ɑ lïdhø ki gïïngɑ̈ngø ɑ́ ngïji, de bong ngïji men-ɑ ónyudhi gen, den-ɑ́ ngïji Yönɑ̀. Ni kɑ ɑ́bëëd Yönɑ̀ ɑ́ ngïji kipe tyëng Ninɑwɑ̀, Nyɑɑr Dhɑnhø óbëëdø ɑ ngïji kipe rïj men. Kì Cyɑ̈ɑ̈ng Gøny, Rɑ̈ɑ̈dh Cebɑ̀ rɑ̈nh-ɑ dhɑjø, ócungi kì bøli rïj men kɑ gø cɑye, mɑ́ e ɑ́bï e kɑ̈ɑ̈l-ɑ kun lɑ̈wi be lïngi pwönyi Sølømøn kì ri peli wïj. O yɑ köbb-ɑ wun, ngɑn me dwøng kibøli Sølømøn ɑ keny èn. Kì Cyɑ̈ɑ̈ng Gøny, tyëng Ninɑwɑ̀ ócungi kì bøli rïj men kɑ gø cɑy gen, mɑ́ keny-ɑ ɑ́cïïj gen yi Yönɑ̀, ge ɑ́yewi kɑ bëëdi gen wil yi gen. O yɑ köbb-ɑ wun, ngɑn me dwøng kibøli Yönɑ̀ ɑ keny èn. “Bong dhɑnhø me nyi cwiny lɑ̈mbɑ̈ kɑ gø kɑne, wɑlɑ̀ kɑ gø kume ki ɑ́tɑy, de gø nyi cïbe’ wïj tɑrɑbedhɑ̀, o cɑr lidh yi ji-ɑ bï ød. Nyingí bɑ cɑr kipe dëlí. Ke bëëd nyingí ge døøj, dëlí bëne óbëëd e pɑ̈ng yi cɑr. De keny-ɑ óbëëd nyingí pɑ døøj, dëlí bëne óbëëd e pɑ̈ng yi muudhø. De gwir wïjí kidøøj, kipe cɑr men-ɑ rií ógöögø ɑ́ muudhø. Keløg dëlí bëne pɑ̈ng yi cɑr, o bong keny me looj kì ree, bene keny-ɑ ómëëny ni kenyi meeny yïn yi cɑɑr lɑ̈mbɑ̈.” Keny-ɑ ɑ́rum Yëso ki kwøb, ɑryejii yi jɑl mɑ Jɑlpɑresì. Codhe, kɑ Yëso ókedhø, kɑ pëgg-ɑ tɑw. De Jɑlpɑresì menɑni ɑ́ngɑ̈ng keny-ɑ ɑ́lidhe Yëso e ócɑ̈gø cɑm, e cingge pɑ lwøg yi en møti. Aköbbii yi Wë kinni, “Wu Jøpɑresì, wu nyi lwøg-ɑ kömi óthɑ̈ggì geki löd, de yethi wun pɑ̈ng yi rummi kɑ̈b geki rumm-ɑ rijjø. Wu bɑ dhëgg! Jwøk ngɑn-ɑ ɑ́gwøg yiny-ɑ wɑ̈g, pɑth ki en cøn ɑ ɑ́gwøg yiny-ɑ yij thyew. Nyi mëggu gïn-ɑ yethi óthɑ̈ggi wun kí löddi wun tyëng-ɑ ɑbuur, codhe cyee, o wu dhïwi wun. “Wun ɑ Jøpɑresì, ri wun dɑ cyën! Mɑ́ wu nyi muuj-ɑ ɑ́kyeel pyɑ̈r kì ri nɑnɑɑ̀ kí cumɑ̈r geki jɑmm-ɑ nyi pidh kì yij bɑg bënn. De wu dhɑ̈li göggi tyëng-ɑ kyeelø ki gïndøj, kɑ mɑ̈ɑ̈dø mi Jwøk wøy yi wun. Møgɑni bene gen ɑ di gwøg yi wun, wu kedh wu ogöögø ki jɑmm-ɑ kyeelø. “Wu Jøpɑresì, ri wun dɑ cyën! Mɑ́ wu nyi tyer-ɑ bëëdø kì wɑ̈thi kwømm-ɑ døj kì sinɑgøgg, o wu tyer-ɑ mɑ̈dhhø yi teedø, wu owørø ki mendwøng kì dhøggi cugg. Ri wun dɑ cyën, mɑ́ wu nɑ rörri ji møg-ɑ wɑ̈thi gen pɑ̈ɑ̈rø ki piny, kɑ ji nyii cyɑ̈dhø kì kömi gen, ge kwïj gɑ rörr.” Kɑ Yëso köbbi yi ɑ́kyel kì kelli jøpwönyi Cigg kinni, “Jɑlpwönyø, kɑ̀ kwøøb møgɑni ɑnɑn, yï pɑ ceg wøn ki gwɑddø thyew!” Alöggi Yëso kinni, “Wun, wu jøpwönyi Cigg, ri wun dɑ cyën! Wu nyi muuj-ɑ cigg mø peeg, mø pɑ cuggi mïdhø yi ji, de men-ɑ́ wun, ri wun pɑ nyi pɑ̈nyi yi wun ki gwøg kì ri ciggɑni. Ri wun dɑ cyën! Kipe wu nyi ger-ɑ kenggi jøtöng møg-ɑ ɑ́ceg ki nɑ̈gø yi kweyyi wun! O ɑnɑn wu nyodh-ɑ kinni wu ɑ́yïëy ki gïn-ɑ ɑ́gwøg yi kweyyi wun. Jøtöng nɑ̈g yi kweyyi wun, o wu gëddu gen ki keng! Bene gïn-ɑ pere kööb yi men-ɑ cwøl ɑ́ Peli wïj Jwøk kinni, ‘Ge óödɑ ki jøtöng geki tyëngwödd. Kwï gen ónɑ̈g yi gen, o møg-ɑ kyeelø ógöggi yi gen ki gïnrɑj.’ Kì bɑng menɑni, wun, wu tyëng-ɑ nud ɑnɑn, wu bɑ møg-ɑ ócɑy kipe thøwi jøtöng møg-ɑ ɑ́nɑ̈g kër-ɑ ɑ́cɑ̈gi piny, cɑg kì ri nɑ̈gi Abel gïti ri nɑ̈gi Dhekɑriyɑ̀, jɑl-ɑ ɑ́nɑ̈g kì kɑɑm këli lɑm geki kej kwër. Ngee, yɑ köbb-ɑ wun, wu tyëng-ɑ nud kì bøli keny ɑnɑn, kinni wu bɑ møg-ɑ ócɑy ceth kipe gen bënn. “Ri wun dɑ cyën, wun ɑ jøpwönyi Cigg! Muptɑɑ̀ men-ɑ nyi yieeb dhø kej dïdø ɑ́kwɑny yi wun. Wun kiri wun, wu nuti kedhi yije, o tyëng-ɑ kyeelø ɑ́mɑ̈ɑ̈n yi wun kedhi yije!” Keny-ɑ ɑ́bëën Yëso e ókedhø kì kenyɑni, kɑ ceg ki dhingø ki pyëj yi jøpwönyi Cigg geki Jøpɑresì. Kɑ dhøge yɑb yi gen ki kwøb mø gïïr, ge lebb-ɑ gøn, mɑ di kööbe ki kwøb mø per gen di mɑgii. Kɑ ji mø kwɑnni gen bɑ ɑ́lïp mø ngenyø ri gen cøng gen, de ge nyøn-ɑ ri gen. Acɑ̈gi Yëso ki kwøb e köbb-ɑ jøbɑnge, kinni, “Wu ko göög wu bɑ wëëny ni Jøpɑresì, wëënyø mi gen nɑ kɑmïrɑ̀. Gïg-ɑ bɑ ɑkɑnn bënn ónyodh, o gïg-ɑ gonni yi teedø kì pëthi gen bɑ møg-ɑ ónyodh. Gïn-ɑ ɑ́kwøb yi yïn kì yij muudhø, ólïngi kì dicɑ̈ng, o gïg-ɑ ɑ́möngi yi yïn kì yiny-ɑ ød, bɑ møg-ɑ ólïngi kì wïj ød. “Yɑ köbb-ɑ wun mɑ̈dhhɑ, wu ko böggi yi ji-ɑ cuggi nɑ̈gi dël, o kì bɑng menɑni bong gïn ledh me cuggi gwøgø yi gen këti. Wu ónyudhɑ ngɑn-ɑ cuggi böggø. Böggu Jwøk ngɑn-ɑ yïe di tegø me cugge nɑ̈gi dhɑnhø, o yïe dɑ tegø thyew me cugge leengi dhɑnhø mɑc. Ngee, bene ngɑn-ɑ cuggi böggø yi wun ɑnɑn. “Winy ɑ́keej gɑ ɑ́bïj pɑ nyi ngew kɑ gïrïc ɑ́ryew yøw? Ngee, o bong ɑ́kyel kì kelli gen me wïl kì wïj Jwøk. De cɑgg ɑ́ yëyyi wɑ̈thi wun, kwɑnni gen ngɑ̈nyi. Wu ko böggi. Per wun teeg kibøli ɑ́kej mø gïïr!” “Yɑ köbb-ɑ wun kinni, ji bënn møg-ɑ ócungi kì bøli teedø, kɑ ge okööbø kinni yɑ ɑ́yïëy yi gen; yɑn, yɑ Nyɑɑr Dhɑnhø, yɑ ókööbø kì bøli wëywöddi Jwøk kinni, jiɑni bɑ jiɑ. De tyëng-ɑ ócungi kì bøli teedø, kɑ ge okööbø kinni yɑ nuti yïëyø yi gen, Nyɑɑr Dhɑnhø ókööbø kì bøli wëywöddi Jwøk kinni, ge pɑth ki jie. “Ngɑn kööbø ki rɑj kì ri Nyɑɑr Dhɑnhø, ócuggø wïyi bɑ̈jje, de ngɑn kööbø ki rɑj kì ri Wëykwërø pɑ cuggi wiyø e pɑ cɑy. “Keny-ɑ ókïdhi wun be gøønyø kì sinɑgøgg, kì bøli jɑgg geki tyëng-ɑ yï gen di tegø, pëthi wun ko lïngi kipe gïn-ɑ ókwøb yi wun, wu nyɑg-ɑ ri wun. Mɑ́ kì bøli kenyɑni, wu ópwönyi yi Wëykwërø ki gïn-ɑ dwɑddi yi en kinni o kwøb yi wun.” Kɑ Yëso köbbi yi jɑl megø kì kelli teedø kinni, “Jɑlpwönyø, köbbí ómïɑ o jɑmm-ɑ ɑ́wiy yi wïyi wøn keny-ɑ ɑ́thøwe, pɑ̈ngi yi en kì kɑɑm wøn.” De ɑ́köbbi yi Yëso kinni, “Jɑl, ɑ́ men ɑ ɑ́kööb i yɑ bɑ jɑgø men pɑ̈ggi kì kɑɑm wun?” Codhe, ɑköbbi teedø yi Yëso kinni, “Koru ri wun, kɑ pëthi wun ko wëggu døngø kipe kɑ̈r. Cɑgg dhɑnhø jɑmme ngenyø, pɑ nyi mɑ̈ɑ̈n thøø yi ngenyi jɑmme.” Codhe, ɑwɑɑj gɑ́j møg yi Yëso kinni, “Ádɑ jɑlkɑ̈r me yïe di pwödh mø døngø, møg yethi gen ócyeeg yi jɑmmì kidøøj. Kɑ orumø kì pyëwe kinni, ‘Yɑ ógöög ɑ dï? Bong keny yije mïdhɑ jɑmmɑ.’ Codhe, ɑkööbe kinni, ‘Bene gïn-ɑ ógwøgɑ èn, kɑ̈jj-ɑ mïdhɑ jɑmmɑ ócøørɑ piny, o yɑ gëëdɑ ki møg mø døngø, o yethi gen ómïdhɑ wɑ̈thi jɑmmɑ bënn. Codhe, o riɑ köbbɑ kinni, yïí dɑ jɑmmì mø døøj mɑ ɑ́cøng yi yïn, møg mɑ̈gi ki runn mø gïïr ge ocɑmø. Ywöm rií, kɑ yï cyɑ̈ɑ̈m, kɑ yï mɑ̈ɑ̈dh, kɑ yï bëëd pyëwí omedø!’ De ɑ́köbbi yi Jwøk kinni, ‘Jɑl-ɑ dhëg! Tïn kì wɑ̈r, wëyí bɑ møg kwɑny kì yïí. Dɑ́ men ɑ ókwɑny jɑmm-ɑ ɑ́cøng yi yïn kiperí?’ ” Kɑ Yëso okööbø kinni, “Bene en ɑnɑn, kër-ɑ óbëëd tyëng-ɑ nyi congi jɑmmì kiper gen, o ge pɑth ki tyëngkɑ̈rì kidyër kì yï Jwøk.” Kɑ Yëso jøbɑnge köbbe kinni, “Kì bɑng menɑni, yɑ köbb-ɑ wun kinni pëthi wun ko lïngi kipe gïncɑm men-ɑ mïdhi wun wu onëënø, wɑlɑ̀ kipe ógudh møg-ɑ dwɑddi yi wun kipe dëlli wun. Wëy pere teg kibøli gïncɑm, o dël pere teg kibøli ógudh. Lidhu winy; ge pɑ nyi pïïdhø ki byel, o bong gïn nyi kɑj yi gen, yï gen bong thebb kí óköddì, de ge ocɑɑmø yi Jwøk! O wun, per wun pɑ teeg kibøli winy! Á men kì kelli wun ɑ cuggi medi runne ki olïng pyëwe, cɑgg ɑ́ ki cyɑ̈ng ɑ́kyel yøw?” Keløg wu dhɑl-ɑ yi gwøgi nyɑ gïjø me thiinh ni menɑni, gede pëthi wun ɑ lïngi gen kipe gïg-ɑ kyeelø? Nennu luum okøgg kenyi twïye, eni lum-ɑ pɑ nyi göögø, o pɑ nyi cwɑ̈jø ki ógudh. De yɑ köbb-ɑ wun kinni cɑgg ɑ́ Sølømøn ki kɑ̈r-ɑ ɑ́ying yïe bëne, nuti rugø ki rug me myëër ni ɑ́kyel kì kelli okøggɑni. Jwøk rug-ɑ luum pɑ̈l, eni lum-ɑ nud dicyɑ̈ɑ̈ng, kɑ leeng mɑc dhuki! De men-ɑ́ wun, wu óruug-ɑ dï yi Jwøk, mɑ́ per wun teeg kibøli lum? Wu tyëng-ɑ yïëyi wun nøg! “Wu ko nyi rïïj wu rømm-ɑ per gïn-ɑ cɑm yi wun, wɑlɑ̀ gïn-ɑ mɑdh yi wun, kɑ wu ko nyi rïïj pëthi wun olïngø. Ji bënn kì kömi piny tyer-ɑ yodi gïgɑni bënn, o Wïyi wun ngɑ̈ny wøw kinni gïgɑni bënn odwɑddø yi wun. De yɑb wun kwøbbi Pödhi Jwøk, o wu ómëgge jɑmm-ɑ kyeelø bënn møg-ɑ dwɑddi yi wun. “Cɑgg ɑ́ kɑ̀ bëëd wun, wu bɑ nyɑ ɑkud me thiinh ni men, wu ko böggi, mɑ́ Wïyi wun dwɑdd-ɑ mëggi wun lɑ̈gø. Ngeew wun jɑmmi wun wɑ̈g, kɑ tyëng-ɑ ɑbuur thödhi wun. Yɑ̈ɑ̈b wun ki pødhi ngyëny men-ɑ pɑ nyi rënyi, kɑ kɑ̈rri wun kɑɑn wun mɑl, keny-ɑ bong kurrì møg kwɑ̈dø, o bong thoth men cyɑ̈mø ki jɑmmì. Mɑ́ pëthi wun óying-ɑ keny-ɑ di jɑmmi wun. “Bëëd wun ógudhi wun ying-ɑ ri wun, wu nenn-ɑ gwøøg wun ceth, kɑ wiy lɑ̈mbɑ̈ɑ̈ mø wun bëëd gen ge olyelø, ni bɑ̈ngg møg yïd wïi gen keny-ɑ ódwööge kì kej nywöm, kipe kinni ocwödde kì dhø kɑl, o kɑl ójwɑn ki yïëbbii ceth. Ge óyuud ógudhi gen ying-ɑ ri gen keny-ɑ ódwöög wïi gen. O lidh yi en kinni ge nenn-ɑ bëëne. Yɑ köbb-ɑ wun kidyër kinni, wïi gen ree ólunye ki ógudhi bɑ̈ɑ̈ngø, kɑ bɑ̈ngge köbbe kinni pëggi gen tɑw, kɑ gï kɑ̈lle. Bɑ̈nggɑni pëthi gen óløg mø med keny-ɑ óyuud gen ge onëënø yi wïi gen, cɑgg ɑ́ kì dïwɑ̈r, wɑlɑ̀ kì bɑ̈ɑ̈rø. Nyi pɑru møg kinni, ke di bëëd e bøli keny-ɑ bëën yi kur ngɑ̈nyi yi jɑlkɑl, kur pɑ di wëgge kedhi gøle. De bëëd wun wu nenn-ɑ yöö, mɑ́ Nyɑɑr Dhɑnhø óbï-ɑ bøli keny me kwïj yi wun!” Kɑ Pïtør okööbø kinni, “Wuö, gɑ́j møg ɑ́gɑ̈jjí wøn wɑlɑ̀ ge ɑ́gɑ̈jjí teedø?” Kɑ Wë okööbø kinni, “Á men ɑ bɑ bɑ̈ng-ɑ døj, ɑ cuggi ngɑ̈dhø yi wɑ̈n, kɑ cinge cïbe gïgcɑmmi bɑ̈ngg-ɑ kyeelø, o gï nyi thödhe kì bøli keny-ɑ dwɑddii? Keny-ɑ ódwöög wïi bɑ̈ngɑni, kɑ gø yuude gwøge ógwøgø yi en kidøøj. Bɑ̈ngɑni ree dɑ gyëdh. Yɑ köbb-ɑ wun kidyër, jɑmme bënn cïbe’ cingi bɑ̈ngɑni. De keløg bɑ̈ngɑni di rum kinni, wɑ̈ɑ pɑ jwɑn dwöögø, kɑ ócɑ̈gø pöd ki bɑ̈ngg-ɑ kyeelø, mɑ̈nn ki cwøw bënn, kɑ pëgg-ɑ be cɑm kí mɑdh, kɑ nyi nɑ̈g yi møgø, jɑlkɑl ódwöög kì bøli keny me nuti rømmø yi bɑ̈ngɑni; gø ópɑ̈ɑ̈ye piny e ree nuti gwiir en. Kɑ ceg ki ngøllø yi wɑ̈n; ónɑ̈g yi en ni kenyi nɑ̈ɑ̈g tyëngrijjø. “Bɑ̈ng-ɑ ngɑ̈nyi gïn-ɑ dwɑddi yi wɑ̈n, de gø pɑ gwøge, ceg kɑ pwödø ki pwöni dwøng! De bɑ̈ng-ɑ kwïj gïn-ɑ dwɑddi yi wɑ̈n, kɑ ogöögø ki gïn-ɑ pere nyi cɑɑy dhɑnhø, ópwöd kɑ pwödø me nøg. Ngɑn-ɑ ɑ́thödhi ki mø ngenyø, yïe ócwøøl-ɑ mø ngenyø. O ngɑn-ɑ cinge cïbi ki mø pëddi ngenyø, yïe dwɑdd-ɑ mø pëddi ngenyø. “Yɑ ɑ́bï-ɑ be lëngi kömi piny ki mɑc, o ce di bëëd e rum cɑ̈gø lyelø! Yïɑ dɑ jwɑ̈ɑ̈gø men-ɑ ójwɑ̈ɑ̈g yɑn ki orɑng, pyëwɑ pɑ wïyi ki olïng gïti keny-ɑ órume. Wu orumø kinni yɑ ɑ́kɑ̈ɑ̈l-ɑ mër kömi piny? Pɑth, yɑ köbb-ɑ wun, kinni yɑ ɑ́bï-ɑ be dɑ̈ɑ̈ngii. Cɑg ɑnɑn gïti dhuki megø, gøl-ɑ yije di ji ɑ́bïj ceg-ɑ dɑ̈ngø, ɑ́dɑ̈g ómɑ̈ni ki ɑ́ryew, kɑ ɑ́ryew ómɑ̈nø ki ɑ́dɑ̈g. Ri gen ópɑ̈ngi yi gen kinni, dhɑnhø ódɑ̈ɑ̈ng ki wɑ̈de kɑ wɑ̈d ódɑ̈ngø ki wïye; ngɑndhɑjø ódɑ̈ɑ̈ng ki nyɑre, kɑ nyɑndhɑjø ódɑ̈ngø ki meye; meyi jɑlø ódɑ̈ɑ̈ng ki kwɑre cï wɑ̈de, kɑ cï jɑlø ódɑ̈ngø ki wønge meyi jɑlgøle.” Codhe, ɑköbbi teedø yi Yëso kinni, “Kenyi lidhu pøøl ge obëënø kì wɑɑng cyɑ̈ng böörø, wu nyii kööbø kinni, ‘Kødh bɑ men mɑ̈gi,’ kɑ kødh nyii mɑ̈gø. O kenyi lidhu yømø e kɑ̈ɑ̈l-ɑ wɑɑng wurlwɑl, kɑ wu nyii kööbø kinni, ‘Piny óbëëd e lëëdh dicyɑ̈ngtïn.’ Kɑ piny nyi løg-ɑ me lëëdh. Wu bɑ wëëny! Ngïjji piny geki mɑl ngɑ̈nyi yi wun. De wude ɑ pɑ yod wun gïg-ɑ göögø ɑnɑn? “Wude ɑ pɑ yod wun gïn-ɑ bɑ dyër. Keløg yï peej-ɑ burø yi ngɑn gøøny yïn, pɑ̈nyí rií ki kwɑjjii, o kwøbbɑni wiy wu nuti wɑ̈dhi burø. De keløg rií pɑ pɑ̈nyi yi yïn, yï kïdh-ɑ bøli jɑgø yi ngɑn-ɑ gøøny yïn, o jɑgø yï ómëgge bölidh, kɑ yï leeng ød mɑg yi bölidh. Yɑ köbb-ɑ yïn, yï pɑ wɑ̈nhi wɑ̈g kì kenyɑni gïti keny-ɑ ócool kwör-ɑ kömí.” Kì bøli kenyɑni, ɑ ɑ́köbbi Yëso yi ji møøgø i dɑ ji møg-ɑ ónɑ̈gø yi Pilɑtø kì Gɑlelì ge mɑll-ɑ Jwøk. Remmi tyëngɑni ɑ́rebe ki remmi lɑ̈yy-ɑ ɑ́ngɑ̈lli Jwøk yi gen gɑ gëdhhì. Alöggi Yëso kinni, “Wu orumø kinni gïnɑni ɑ́pɑ̈dhi kömi gen kɑ per kɑ̀ bëëd ge lod-ɑ tyëng Gɑlelì bënn ki orøg? Pɑth, yɑ köbb-ɑ wun cyee kinni, keløg wu pɑ wïyi ki orøg, kɑ pëthi wun wil yi wun geki bëëdi wun, wu bɑ møg thøw ni gen! O ji-ɑ ɑ́thøw gɑ ɑ́bïdɑ̈g keny-ɑ ɑ́pɑ̈dhi ønbɑ̈r kömi gen kì Silwɑm ø? Wu orumø kinni gïnɑni ɑ́pɑ̈dhi kömi gen kɑ per kɑ̀ bëëd ge lod-ɑ tyëng Yerusɑlem ki orøg? Pɑth, yɑ köbb-ɑ wun cyee kinni, keløg wu pɑ wïyi ki orøg, kɑ pëthi wun geki bëëdi wun wil yi wun, wu bɑ møg thøw thyew!” Awɑɑj gɑ́j møg yi Yëso kinni, “Jɑl megø yïe ɑ́dɑ ólɑm kì yij bɑge. Kɑ kedh-ɑ be yɑ̈bbø ki nywøl kö ólɑmɑni, de bong mɑ ɑ́yode. Codhe, kɑ nyel-ɑ göögø kì bɑg köbbi yi jɑlɑni kinni, ‘Yɑ nyi yɑ̈mm-ɑ kö yɑɑnh ki nywøl, o yɑ pɑ nyi yïddi kì kööre ki nywøl. Ágöög ɑnɑn ki runn ɑ́dɑ̈g. Ngøl piny. Á kipe ngø ɑ nyïɑ̈ge bɑg?’ De bɑ̈ngɑni ɑ́löggi kinni, ‘Wuö, wiy yɑnhɑni ki run ɑ́kyel men-ɑ ónywøle. Wiy tyele kony yi yɑn o kïdhɑ ki nor. Keløg e ónywøl run-ɑ bï, døøj. De keløg e pɑ nywøl, ócuggø ngøl piny yi yïn.’ ” Yëso ɑ́bëëd e ópwönyø kì sinɑgøg kì cyɑ̈ɑ̈ng Sɑbɑth. Kenyɑni ɑ́dɑ ngɑndhɑjø me ree di wëy me rɑj, me dool köme, o yïe dɑ runn pyɑ̈rø wïdɑ́bïdɑ̈g e köme ree dool en. Nyi cyɑ̈dhi e köme kuul en piny, pɑ cuggi cung e kööre tïng en. Keny-ɑ ɑ́lidhii yi Yëso, ɑcwøle gøn, kɑ gø köbbe kinni, “Ngɑn, yï ɑ́pɑ̈d kì ri gïn-ɑ rií.” Kɑ Yëso cingge thɑɑnye kömi ngɑnɑni, kɑ köme tyenye kì bøli kenyɑni ceth, kɑ ócungø ree tyeeny en, kɑ ócɑ̈gø lejji Jwøk. Kɑ jɑngi sinɑgøg mɑg yi liny kipe kɑ ɑ́yïëëd Yëso kì cyɑ̈ɑ̈ng Sɑbɑth. Aköbbe ji kinni, “Dɑ cyɑ̈ng ɑ́bïkyel møg-ɑ yethi gen nyi göög yi ji, nyi bï wun be yielø ki rɑ̈ɑ̈m dëlli wun kì yethi cyɑ̈nggɑni, de wu ko nyi bï be yielø ki rɑ̈ɑ̈m dëllì kì cyɑ̈ɑ̈ng Sɑbɑth.” Alöggi Wë kinni, “Wu bɑ wëëny! Dhögi wun pɑ nyi gøny yi wun kɑ ge køøl wun be mɑ̈dhø ki pï, cɑgg ɑ́ kì cyɑ̈ɑ̈ng Sɑbɑth? Ngɑndhɑjø men-ɑ ɑ́yiel yi yɑn ki köme, bɑ nyɑɑr Abrɑhɑm, ɑ́bëëd ɑ́ ɑmɑg yi Cethɑn ki runn pyɑ̈rø wïdɑ́bïdɑ̈g. Pɑ cuggi pɑ̈dø kì yethi töjjɑni cɑgg ɑ́ kì cyɑ̈ɑ̈ng Sɑbɑth!” Keny-ɑ ɑ́kwøbe møgɑni kɑ tyëng-ɑ ɑ́cɑyyii wɑ̈thi gen ólɑ̈ɑ̈yø, de teen-ɑ ɑ́ying kenyɑni bëne pyëwe ɑ́mïni yi gïgdøj møg-ɑ ɑ́gwøg yi Yëso bënn. Codhe, ɑkööb Yëso kinni, “Pödhi Jwøk nɑ ngø? Pɑ̈ɑ̈r yi yɑn kɑ ngø? Nɑ nyɑ wɑɑng köödhi kɑrdɑl men pidh yi dhɑnhø kì yij bɑge. Kɑ köönhɑni otwïyø, kɑ ogöögø ki yɑdh, kɑ winy ogëdø ki uddi gen kì bɑ̈dde.” Kɑ Yëso okööbø këti kinni, “Pödhi Jwøk ópɑ̈ɑ̈r yi yɑn kɑ ngø? Pɑ̈r kɑ kɑmïrɑ̀ men kwɑny yi ngɑndhɑjø, kɑ gø nyööme ɑwɑj mɑ rummì ɑ́dɑ̈g, kɑ okwödø bëne yi kɑmïrɑni.” Yëso ɑ́kedh e kɑ̈ll-ɑ köthi myërr e ópwönyø, e kedh-ɑ Yerusɑlem. Kɑ Yëso köbbi yi jɑl megø kinni, “Wuö, bɑ ji mø nøg ɑ óyiel keti gen?” Alöggi Yëso kinni, “Pɑ̈nyu ri wun ki kɑ̈li dhøng-ɑ dhing, mɑ́ ji mø gïïr ri gen ópɑ̈nyi yi gen ki kɑ̈li kenyɑni, de ge koo cuggi. Keny-ɑ ódhwödh ngɑn-ɑ yïe di kɑl, kɑ kɑl cyëge, kɑ wu ócungø kì dhø kɑl kì wɑ̈g, wu ócwöddø kinni, ‘Wuö, yïëbbí wøn kɑl!’ Ólöggi kinni, ‘Wu kwïj yi yɑn, wu kɑ̈ɑ̈l-ɑ keny.’ Wu ókööbø kinni, ‘Wø ɑ́cyɑ̈ɑ̈m kɑ wø omɑ̈dhø kì kej ɑ́kyel ki yïn, kɑ yï ópwönyø kì pɑɑ wøn.’ Wu óyöd wu oköbbø yi en kinni, ‘Wu kwïj yi yɑn, o keny-ɑ kɑ̈ɑ̈l yi wun kwïjɑ thyew. Kedh wun kì butɑ, wu tyëng-ɑ gøggi rɑj!’ Wu óywöngi kɑ lweddi wun kɑ̈ɑ̈j wun yi ledhi dhø keny-ɑ ónenni wun Abrɑhɑm, kí Isɑɑk, kí Yɑgob, geki jøtöng bënn kì Pödhi Jwøk, de wun kì ri wun, wu óleeng wɑ̈g. Ji óbï ge kɑ̈ɑ̈l-ɑ wɑɑng cyɑ̈ɑ̈ng mwøl, møøgø óbï ge kɑ̈ɑ̈l-ɑ wɑɑng cyɑ̈ɑ̈ng böörø, møøgø óbï ge kɑ̈ɑ̈l-ɑ wɑɑng wuudø, o møøgø kɑ̈ɑ̈l-ɑ wɑɑng wurlwɑl kɑ ge pëgg-ɑ piny kì tɑw kì Pödhi Jwøk. Dɑ ji møøgø mø ying cyɑ̈n ɑnɑn, ge ókedhi mɑl, o dɑ møøgø mø ying mɑl, ge ódwøøg cyɑ̈n.” Kì bøli kenyɑni, ɑ ɑ́bëën kwï Jøpɑresì yï Yëso kɑ ge okööbø kinni, “Kedh kì keny! Ërödøs dwɑdd-ɑ nɑ̈gi yïn!” Aköbbi gen yi Yëso kinni, “Kedh wun, köbbu ógwøngɑni kinni, ‘Dicyɑ̈ɑ̈ng kí dhuki, yɑ cyëëd-ɑ wëyrijjø wɑ̈g kì ri ji, o yɑ oyïëdø ki ji-ɑ dëlli gen rɑ̈mø. O gwøgɑ ótyëg yi yɑn kì ri dɑ̈ɑ̈g cyɑ̈ng.’ Cɑgg ɑ́ kinøw ceth, yɑ di dwɑddø o yɑ cyɑ̈dhɑ ki yuuɑ dicyɑ̈ɑ̈ng, kí dhuki kí cyɑ̈ng-ɑ kyeelø. Pɑth ki dyër kinni jɑltöng ócuggø nɑ̈gø kì keny megø e pɑth ki Yerusɑlem. “Yerusɑlem, Yerusɑlem! Yï nyi nɑ̈g-ɑ jøtöng, kɑ ji-ɑ ɑ́ör yïí nɑ̈ɑ̈g ge bɑ̈llí bɑ̈llø ki tuggi kïttì. Riɑ ɑ́pɑ̈nyɑ tyel mø gïïr ki congi jií, ni gyenø kenyi cønge nyige thɑ́ obërre, de møgɑni nuti dwɑddø yi wun! Kengí ówiy piny. Yɑ köbb-ɑ wun kinni, yɑ pɑ lidh yi wun gïti bøli keny-ɑ ókööb wun kinni, ‘Ngɑn-ɑ bï ki nyingi Wë, bɑ ɑgyëdh.’ ” Kɑ Yëso kedh-ɑ be cɑm kì cyɑ̈ɑ̈ng Sɑbɑth, kì gøl jɑl ɑ́kyel kì kelli pëjji Jøpɑresì. Teedø ɑ́bëëd ge nenn-ɑ Yëso men-ɑ óyïëde kì cyɑ̈ɑ̈ng Sɑbɑth. O bøle ɑ́dɑ jɑl me ree di thyëw. Kɑ Jøpɑresì geki jøpwönyi Cigg pyëj yi Yëso kinni, “Yïëdø ki rɑ̈ɑ̈m dëllì kì cyɑ̈ɑ̈ng Sɑbɑth, bɑ ɑyïëy yi Ciggee wɑlɑ̀ bɑ ɑkerø?” De ge ɑ́dhɑ̈li løøgi pyëjje. Codhe, ɑkwɑɑny jɑl-ɑ ree di thyëw yi Yëso kɑ gø yiele ki gïn-ɑ ree, kɑ gø köbbe kinni kedhe. Aköbbi Jøpɑresì geki jøpwönyi Cigg yi Yëso kinni, “Keløg wɑ̈dí wɑlɑ̀ wɑdhí pɑ̈dh-ɑ yij yith kì cyɑ̈ɑ̈ng Sɑbɑth, pɑ jwɑn yi yïn ki tëël wɑ̈g?” De ge ɑ́dhɑ̈li løøgi kwøbbe. Kɑ lidh yi Yëso kinni tyëng-ɑ ɑ́ryej tyer-ɑ pëggi kɑ̈jj-ɑ døøj, ɑwɑje gɑ́j møg kinni, “Keløg yï oryejø kì kej thyëg, yï ko pëggi wïj kwøm-ɑ pere teg, kipe óbëëd e dɑ dhɑnhø me pere teg kibølí men-ɑ óryejø, kɑ jɑl-ɑ ɑ́ryej wun ryeet bï-ɑ yïí, kɑ yï köbbe kinni, ‘Mëggí jɑɑl kwømí.’ Codhe, kɑ yï døøg-ɑ wïj kwøm-ɑ cyɑ̈n yï yɑ̈rø. De keny-ɑ óryeej yïn, kedh kɑ yï pëggí wïj kwøm me pere pɑ teg. Obëën jɑlryëj, o yï óköbbe kinni, ‘Mɑ̈dh, dwöög mɑl keny-ɑ døøj èn.’ Codhe, o yï ówør yi wëll-ɑ kyeelø. Tyëng-ɑ tïng ri gen mɑl ódwöög cyɑ̈n, de tyëng-ɑ ódwöög ri gen cyɑ̈n ótïng mɑl.” Codhe, kɑ Yëso jɑl-ɑ ɑ́ryejii köbbe kinni, “Kenyi rëëj, yï ko nyi ryej mɑ̈dhhí, wɑlɑ̀ nyiimyëw, wɑlɑ̀ wɑddí, wɑlɑ̀ tyëng-ɑ kɑ̈rø kì byëëg wun kipe kinni o yï ólony yi gen ki ryejø, kɑ menɑni ógöögø ɑ́ köögi kì yïí. Keny-ɑ órëëj, cwøl ɑbuur, kí ngöll, kí pùdh, kí cörr, o yï ógyëdh, mɑ́ yï gen bong gïn cudi yïn yi gen, o yï ócudd-ɑ yi Jwøk, keny-ɑ ódhwödh tyëngtir kì yij thøø.” Keny-ɑ ɑ́lïngi møgɑni yi jɑl me cyɑ̈mø kì kenyɑni, ɑköbbe Yëso kinni, “Tyëng-ɑ óryej kì Pödhi Jwøk ri gen dɑ gyëdh.” Aköbbii yi Yëso kinni, “Dɑ jɑl mɑ ɑ́göög ki thyëg, kɑ ji mø gïïr ryeje. Keny-ɑ ɑ́bëën bøli kej cɑm, kɑ jɑlɑni bɑ̈nge öre be köbbi tyëng-ɑ theg kinni, ‘Bï wun, jɑmmì ɑ́rum ki gwirø bënn.’ De tyëng-ɑ theg bënn ɑ́yöd ge kɑ̈ɑ̈l-ɑ gøny megø. Jɑl-ɑ́ yïe ɑ́kwøng ki kedhø ɑ́kööb kinni, ‘Yɑ ɑ́cer-ɑ ngyew ki pwödhø. Yɑ ceg-ɑ kedhi be lidhii. Yɑ pɑ wɑ̈nhi.’ Kɑ jɑl-ɑ kyeelø okööbø kinni, ‘Yɑ ɑ́cer-ɑ ngyew ki wɑ̈dhh pyɑ̈rø, møg nyi köögø ki pwödh, yɑ kedh-ɑ be pɑ̈nyi gen. Yɑ pɑ wɑ̈nhi.’ Kɑ dɑ̈ɑ̈g gen okööbø kinni, ‘Yɑ ɑ́cer-ɑ nywöm, o cyëgɑ ɑ́cer-ɑ dɑ̈ngø. Yɑ pɑ wɑ̈nhi.’ “Codhe, kɑ bɑ̈ngɑni ódwöögø, ɑköbbe wɑ̈n ki gïg-ɑ ɑ́cwöb. Kɑ wïi bɑ̈ngɑni mɑg yi liny, ɑkööbe kinni, ‘Kedh yï ójwɑnø ɑnɑn ceth, kɑ ngöll, kí cörr, kí pùdh geki tyëng-ɑ ɑbuur møg-ɑ óyood yi yïn yij kyel, kí yethi yëëth, kɑ̈ɑ̈l keny bënn.’ Kɑ bɑ̈ngɑni ódwöögø, ɑkööbe kinni, ‘Wuö, møg-ɑ ɑ́kwøb yi yïn bënn ɑ́rum ki gwøgø yi yɑn, de kɑl nuti pɑ̈ngø yi ji.’ Kɑ jɑl gølɑni bɑ̈nge köbbe kinni, ‘Kedhí yethi myërr, ko di nyɑ pɑc me wiy yi yïn, kɑ ji cwööl gølɑ bënn gïti keny-ɑ ópɑ̈ng kɑl. Yɑ köbb-ɑ yïn, bong dhɑnhø ɑ́kyel kì kelli tyëng-ɑ ɑ́dwɑddɑ thegø men-ɑ óbel gïncɑmɑ tïn!’ ” Teedø mø ngenyø ɑ́bëëd ge ócyɑ̈dhø kì bɑng Yëso. Kɑ Yëso ree luge gïn, kɑ gï köbbe kinni, “Ngɑn-ɑ óbï yïɑ pɑ cuggi gwøg ki ngetibɑngɑ, keløg yɑ pɑ mɑɑr yi en kibøli wïye, kí meye, kí cyëge, kí nyige, kí nyiimen, cɑgg ɑ́ wëye. Ngɑn pɑ byel yɑdh ɑrïwe, kɑ lug-ɑ bɑngɑ, pɑ cuggi bëëdø ɑ́ ngetibɑngɑ. “Keløg yï dwɑdd-ɑ gyer ki ønbɑ̈r, yï ceg-ɑ wïjí ki gwirø møti, o yod yi yïn mɑ løge ngyëny ɑ́dï ɑ ókɑ̈l yi gere, kí mɑ di ngyëny mø ni møgɑni kì yïí, møg cuggi tyëgi gwøngɑni. Ke pɑ göög kinøw, yï bɑ men cɑg tyeli ønbɑ̈r, de pɑ cuggi lwɑ̈ngø yi yïn ki tyëgø. Codhe, kɑ yï gɑggi yi ji kinni, ‘Dhɑnhø men ɑ́cɑ̈gi ki gyer de ɑ́dhɑ̈li tyëgi gwøge!’ “Ke di rɑ̈dh me dwɑddi kedhi be nyïɑ̈ggø ki rɑ̈dh megø, ceg-ɑ pëggi piny o wïje gwire møti. Bɑ en ɑ ókwøb kinni kedh-ɑ be nyïɑ̈ggø, en geki yɑy-ɑ yïe gɑ ɑ́lïp pyɑ̈rø kɑ rɑ̈nh-ɑ kyeelø tyɑme, e rɑ̈nhɑni yïe dɑ yɑy mɑ ɑ́lïp pyɑ̈r ɑ́ryew. Ke yode gøn kinni pɑ cuggi tyɑ̈mø, kɑ̈ng-ɑ nudd rɑ̈nh-ɑ kyeelø e obëënø ki yɑye, ceg-ɑ mɑ̈ɑ̈gø ki ör ki ji møg kedhi be kwøb ki rɑ̈nh-ɑ bï, o ge kwɑjji ge gøn kipe mër. Ki yuu-ɑ ni menɑni ceth, bong ngɑn cuggi bëëdø ɑ́ ngetibɑngɑ, keløg jɑmm-ɑ yïe bënn pɑ wiye piny. “Omelø døøj, de keløg e ólwënyø, pɑ cuggi gwøgø yi yïn kɑ ódönyø. Bong gïn gwøøgii këti, o pɑ cuggi gwøgø ɑ́ nor. Ceg kɑ weddø. Ngɑn yïe di yïthhe mø lïnge, wiy lïnge.” Kɑ jøgwɑ̈j geki tyëngorøg kedh-ɑ be lïngi pwönyi Yëso. De Jøpɑresì geki jøpwönyi Cigg ɑ́cɑ̈gi ki gøny kinni, “Lïdhi wun, jɑlɑni bëëdø kɑ tyëngorøg, kɑ tøøny-ɑ nywɑ̈g ki gen.” Codhe, ɑwɑ̈jji gen gɑ́j møg yi Yëso. “Keløg nget ɑ́kyel kì kelli wun yïe dɑ dyëg miyø, kɑ ɑ́kyel ówɑ̈ɑ̈nyø kì kelli gen, dyëg-ɑ kyeelø gɑ pyɑ̈r ɑ́bïngwen wïdɑ́bïngwen pɑ wiye piny, kɑ kedh-ɑ be yɑbi dyel ɑ́kyel men-ɑ ɑ́wɑ̈ɑ̈ny gïti keny-ɑ óyode gøn? Keny-ɑ óyode gøn, gø cïbe’ wɑ̈thi tøgge pyëwe omedø, kɑ kedh-ɑ pɑc. Kɑ mɑ̈dhhe cwøle geki tyëng byëëg gen, kɑ gï köbbe kinni, ‘Mïni pëthee mɑ́ dyelɑ men-ɑ ɑ́wɑ̈ɑ̈ny ɑ́yodɑ.’ Ki yuu ni menɑni ceth, yɑ köbb-ɑ wun, ódi medi pyëw me dwøng kì mɑl kipe ngetorøg ɑ́kyel men wil pyëwe kɑ óyewø kibøli tyëngdøj gɑ pyɑ̈r ɑ́bïngwen wïdɑ́bïngwen møg bong gïn pere dwɑddi gen yewø. “Ngɑndhɑjø ke di yïe ngyëny ɑ́tegg pyɑ̈rø kɑ ɑ́kyel ówɑ̈ɑ̈nyø, lɑ̈mbɑ̈ ocwinyø yi en, kɑ ød yeje, kɑ oyɑ̈bø kidøøj ki ngyënye gïti keny-ɑ óyode gøn. O keny-ɑ óyode gøn, mɑ̈dhhe geki tyëng byëëg gen gï cwøle cwølø, kɑ gï köbbe kinni, ‘Mïni pëthee kipe ngyënyɑ men-ɑ ɑ́wɑ̈ɑ̈ny ɑ́yod yi yɑn.’ Ki yuu ni menɑni ceth, yɑ köbb-ɑ wun, wëywöddi Jwøk pëthi gen nyi ceg-ɑ mïnø kipe ngetorøg ɑ́kyel men yewi.” Kɑ Yëso okööbø kinni, “Ádɑ jɑl me yïe di wɑ̈dd ɑ́ryew. Kɑ nyel-ɑ thinh wïye köbbe kinni, ‘Mëggí yɑn budɑ kì ri jɑmmi kɑl.’ Codhe, kɑ jɑlɑni jɑmmì pɑ̈nge kì kɑɑm wɑ̈dde. Codhe, kɑ nyel-ɑ thinh jɑmme cønge bënn, kɑ kedh-ɑ pödhø me lɑ̈wi. Kɑ ngyënyye tyëge kì kunɑni ki nøgi wïje. Keny-ɑ ɑ́tyëge jɑmme bënn, kɑ kɑ̈j me dwøng ómɑ̈gø kì pönhɑni, kɑ nyelɑni ójɑ̈ddø ki gïn kwɑny yi en, kɑ mɑg yi kɑ̈j me teg. Kɑ kedh-ɑ be gwøg kì cingi jɑl mɑ jɑl pönhɑni, kɑ gø öre yethi pwödhhe be pïïdhø ki kundhøngø. Kɑ nyelɑni mɑg yi kɑ̈j ki menteg, kɑ pyëwe nyi dwɑdd-ɑ nyɑm ki thinyø men-ɑ cɑm yi kundhøngø, de bong ngɑn mɑ ɑ́pɑ̈nyii ki thödhø. Kɑ wïje ódwöögø, ɑkööbe kinni, ‘Bɑ̈nggi wïyɑ bënn yï gen dɑ gïgcɑmm mø gïïr. De yɑn kì keny, yɑ ceg-ɑ thøø yi kɑ̈j. Yɑ ceg-ɑ dhwödhø o yɑ døøgɑ yï wïyɑ, o köbbɑ kinni, ‘Wïyø, yɑ ɑ́røngi kì bøli Jwøk, kɑ yɑ ogöögø ki gïnrɑj kì bølí. Yɑ pɑ døøj ki cwøllø këti yɑn ɑ́ wɑ̈dí, de wiy yɑ bëëdɑ yɑ nɑ ɑ́kyel kì kelli bɑ̈nggí.’ Codhe, kɑ nyelɑni odhwödhø kɑ kedh-ɑ yï wïye. “Kɑ lidh yi wïye e nudd e lɑ̈wi, kɑ jɑlɑni pyëwe ocödø kipe wɑ̈de, ɑrenge be pɑɑrii, kɑ gø dööbe kööre kɑ gø nuume. Akööb wɑ̈de kinni, ‘Wïyø, yɑ ɑ́røngi kì bøli Jwøk, kɑ yɑ ogöögø ki gïnrɑj kì bølí. Yɑ pɑ døøj ki cwøllø yɑn ɑ́ wɑ̈dí këti.’ De wïye ɑ́yöd e köbb-ɑ bɑ̈ngge kinni, ‘Jwɑni wun! Kɑ̈ɑ̈l wun ógudh-ɑ pëddi døøjø kɑ ge lønyu ree. Kɑ lwede budhi wun ki gwelø, kɑ tyelle kïdhi wun ki wɑr. Kɑ wɑnh-ɑ pëddi cwɑɑdhø kì kelli wɑ̈dhh kɑ̈ɑ̈l wun kɑ ngɑl wun, o wɑ cyɑ̈ɑ̈m wɑ, o wɑ tug wɑ. Mɑ́ wɑ̈dɑ men ɑ́bëëd e thøø, de ɑ́dwöög be nënnì, ɑ́bëëd e lɑ̈ɑ̈nyø, de ɑ́yod!’ Codhe, ɑcɑ̈gi gen ki tugø. “Wɑ̈n-ɑ dwøng ɑ́bëëd e ying-ɑ yij pwödhø, keny-ɑ ɑ́bëëne e ócyɑ̈ngø ki kɑl, ɑlïnge bul kí cwɑggi ji mø cöngø. Acwøle ɑ́kyel kì kelli bɑ̈ngg, kɑ gø pyëje mɑ løge ngø ɑ cwöbø. Akööb bɑ̈ngɑni kinni, ‘Ómyëw ɑ́dwöög, kɑ wɑnh-ɑ cwɑɑdhø ngɑl yi wïyí, kipe kɑ ɑ́dwööge dële oyödø.’ “Kɑ wɑ̈n-ɑ dwøng mɑg yi liny, kɑ óbɑ̈nyø kedhi kɑl. Akedhi wïye wɑ̈g kɑ gø kwɑjje kinni bëe kɑl. De nyel-ɑ dwøng wïye ɑ́köbbe kinni, ‘Yï ɑ́göggɑ de yɑ nɑ bɑ̈ng ki runn mø gïïr, o dhøgí nuti pyeem yɑn. Á ngø ɑ ɑ́mëggí yɑn? Yɑ nuti thödhø yi yïn ki nyɑ ónywøg yøw, men cɑm yi yɑn wøki mɑ̈dhhɑ! De wɑ̈dí men-ɑ ɑ́cɑm ngyënyyí geki tyëng-ɑ nyi niin ki köögi, bene en ɑ ngɑ̈ddi yi yïn ki wɑdh me cwɑɑdhø, kipe kɑ ɑ́dwööge pɑc!’ Kɑ wïyi gen ólöggø kinni, ‘Wɑ̈dɑ, yï bëëd ɑ butɑ yethi cyɑ̈ng bënn, o jɑmm-ɑ nud kì yïɑ bënn bɑ møgí. Wɑ ceg-ɑ tugø ceth ki medi pëthee, mɑ́ ómyëw ɑ́bëëd e thøø, de ɑ́dwöög be nënnì ɑnɑn. Ábëëd e lɑ̈ɑ̈nyø de ɑ́yod.’ ” Kɑ Yëso jøbɑnge köbbe kinni, “Ádɑ jɑlkɑ̈r me yïe di jɑgø kì kömi jɑmme. Kɑ jɑngɑni gøøny yï wɑ̈n kinni i jɑmmi wɑ̈n ceg kɑ rënyø yi en. Codhe, ɑcwølii yi wɑ̈n kɑ gø pyëje kinni, ‘Á gïg ɑ lïngɑ kì rií ek? Gwëdí yɑn gïg-ɑ ɑ́gøggi yi yïn ki ngyënyyɑ, mɑ́ yï pɑ cuggi bëëdø yïn ɑ́ jɑgø kì kömi jɑmmɑ këti.’ Kɑ jɑngɑni orumø ki pyëwe kinni, ‘Yɑ göög ɑ dï cyee, mɑ́ yɑ kɑ̈ɑ̈l-ɑ wɑ̈g kì kej gwøgɑ yi wɑ̈ɑ? Yɑ nyøødh, o men-ɑ́ pur pɑ lwɑ̈ng yi yɑn, o wïjɑ ceg-ɑ lɑ̈yyø ki kwɑ̈jjø. Gïn-ɑ ógwøg yi yɑn ngɑ̈nyɑ, o yɑ óyïëy yi ji ki kedhi kɑ̈lli gen keny-ɑ ókɑ̈ɑ̈l yɑn wɑ̈g kì kej gwøgɑ.’ “Codhe, kɑ jɑngɑni tyëng-ɑ kömi gen di körri jɑmmi wɑ̈n cwööle bënn. Apyëje jɑl-ɑ ɑ́kwöngi bëënø kinni, ‘Á kwör mɑ ngø ɑ kömí?’ Alöggi jɑlɑni kinni, ‘Thɑpiy møw gɑ miyø.’ Kɑ köbbi yi jɑngɑni kinni, ‘Kwɑny wɑ̈nyi körrí, kɑ yï jwɑn pëggi piny, kɑ yï gwed pyɑ̈r ɑ́bïj.’ Codhe, ɑpyëje jɑl-ɑ kyeelø kinni, ‘Á kwör mɑ ngø ɑ kömí?’ Alögge kinni, ‘Ocwɑ̈lli gemè gɑ miyø.’ Aköbbii yi jɑngɑni kinni, ‘Kwɑny wɑ̈nyi körrí, kɑ yï jwɑn pëggi piny, kɑ yï gwed pyɑ̈r ɑ́bïdɑ̈g.’ “Kɑ jɑng-ɑ pɑ gøggi dyër pwøj yi wɑ̈n kipe kɑ ɑ́gööge ki peli wïje. Mɑ́ nyigi kömi piny men, wɑ̈thi gen pëddi pelø kibøli nyigi cɑr, kì ri yëth-ɑ bëëd gen ki ji-ɑ pɑ̈r ki gen. “Yɑ köbb-ɑ wun, yɑ̈ɑ̈b wun ki mɑ̈dhh ki jɑmmi kömi piny, o keny-ɑ óthumi jɑmmɑni, o wu óyïëy ki kedhi kɑ̈ll-ɑ bëëd gïti ɑtheer. Ngɑn cinge cïb nyɑ gïjø me thiinh, kɑ gø korre kidøøj, jɑmmì mø gïïr ócuggø cïb cinge, kɑ gï korre kidøøj. O ngɑn rënyi nyɑ gïn-ɑ ɑ́cïb cinge e thiinh, bɑ men rënyi gïjø me dwøng. Keløg wu dhɑl-ɑ yi mïdhi kɑ̈ɑ̈r kömi piny men-ɑ ɑ́cïb cinggi wun kinni o kor yi wun, ɑ́ men ɑ ócïbi cinggi wun ki kɑ̈r-ɑ dyër? O keløg wu pɑ cuggi kori jɑmm-ɑ bɑ mø ngɑn megø, o møg-ɑ bɑ mø wun ómëggi wun yi men? “Bong bɑ̈ng me cuggi göggi wëëg ɑ́ryew. Bɑ̈ngɑni wɑ̈n ɑ́kyel mɑɑne’ mɑɑnø, kɑ men-ɑ kyeelø mɑɑre, wɑlɑ̀ ómɑ̈gø kì ri jɑl ɑ́kyel, kɑ jɑl-ɑ kyeelø wiye. Wu pɑ cuggi göggi Jwøk, kedh wu ogöögø kiper ngyëny.” Jøpɑresì, jøg-ɑ mɑɑr ngyëny, ɑ́bëëd ge olïngø, kɑ Yëso gɑg yi gen. Aköbbi gen yi Yëso kinni, “Ri wun nyi gwøøg wu’ ji mø nënni ge døøj kì bøli teedø, De Jwøk gïn-ɑ ying pëthi wun ngɑ̈nyi yi en kidøøj. Gïn-ɑ pere teg kì yï ji, bong pere kì yï Jwøk. “Ciggi Mosɑ̀ geki kwøbb-ɑ ɑ́gwed yi jøtöng ɑ́bëëd ge opwönyø gïti kɑ ɑ́bëën Jøn. Ki këër kenyɑni, Wöndøj men-ɑ ɑ́kɑ̈ɑ̈l Pödhi Jwøk ceg kɑ kømmø, kɑ dhɑnhø bëne ree pɑ̈nye ki kedhi yij pönhɑni ki tegø. Lɑ̈ɑ̈nyi mɑl geki piny yööd kibøli lɑ̈ɑ̈nyi gwedø ɑ́kyel kì ri gweddi Cigg. “Ngɑn tɑ̈ng cyëge, kɑ ónyömø ki dhɑjø megø, ɑ́røngi; o jɑl nyömi ki dhɑjø me bɑ ɑtɑ̈ng, ɑ́røngi. Kɑ Yëso okööbø kinni, “Ádɑ jɑlkɑ̈r mɑ ɑ́bëëd e rug-ɑ ógudh mø pëddi døøjø, o ceg-ɑ tɑ̈bbø kì yij kɑ̈r, e cɑmm-ɑ jɑmmì mø døøj yethi cyɑ̈ng bënn. O ɑ́dɑ jɑl me wɑnge cɑn me cwøl ɑ́ Lɑdhɑrøs. Lɑdhɑrøs dële ɑ́bëëd e pɑ̈ng yi kɑ̈jj mø ledh, o nyi rïïjø e buud-ɑ dhø gøl jɑlkɑ̈rɑni, e pyëwe tyer-ɑ cɑmi thulli gïncɑm møg-ɑ nyi dyëm kì yï jɑlkɑ̈r kenyi cyɑ̈me. O kɑ̈jj-ɑ ledh kì dële nyi ceg kɑ nɑngø yi gwögg. “Kɑ Lɑdhɑrøs othøø kì cyɑ̈ɑ̈n piny, ɑkɑ̈ɑ̈lii yi wëywödd, kɑ cïb buti Abrɑhɑm. Kɑ jɑlkɑ̈r othøø, ɑkonyii. Kɑ jɑlkɑ̈r wïje tïnge e ceg-ɑ orɑng kì Ades, kɑ Abrɑhɑm lidhe geki Lɑdhɑrøs kì bute, ge lɑ̈wi ki en. Acwödde kinni, ‘Wïyø, Abrɑhɑm, lɑ̈ɑ̈m pyëwí ki yɑn! Ör Lɑdhɑrøs be jwɑ̈ɑ̈gi lwede yethi pï, o lebɑ kuure, o kwöje, mɑ́ yɑ ceg-ɑ orɑng kì yij mɑc men!’ “De Abrɑhɑm ɑ́kööb kinni, ‘Nyɑrɑ, pɑr kɑ ɑ́bëëd yï ying-ɑ kömi piny, yïí ɑ́dɑ jɑmm-ɑ døj, de Lɑdhɑrøs ɑ́yod-ɑ gïgrijjø. Anɑn Lɑdhɑrøs bong gïn cɑ̈nnii kì keny. O yï ceg-ɑ orɑng. Thyew, dɑ ölø me dwøng kì kɑɑmee, o bong ngɑn me cuggi kɑɑdhii, kɑ bï-ɑ yïí, o bong ngɑn me cuggi bëënø kì kun-ɑ di yïn, kɑ bï-ɑ keny.’ Kɑ jɑlkɑ̈r okööbø kinni, ‘Wïyø, keløg ɑ́ kinøw, ör Lɑdhɑrøs gøl wïyɑ. Yïɑ dɑ nyiimïɑ yɑɑg-ɑ cwøw ɑ́bïj, o ge köbbi yi Lɑdhɑrøs kipe ge ógöögø ni yɑn, kɑ ge bï-ɑ kej orɑng men.’ “Kɑ köbbi yi Abrɑhɑm kinni, ‘Nyiimyëw ókyëddi yi Mosɑ̀ geki jøtöng, wiy kwøbbi gen lïngi yi nyiimyëw.’ Kɑ jɑlkɑ̈r ólöggø kinni, ‘Pɑth, wïyø Abrɑhɑm! Keløg e dɑ ngɑn kedhi yï gen kì kelli tyëngthøø, ge ócuggø yïëyø kɑ pëthi gen geki bëëdi gen wil yi gen.’ De ɑ́köbbi yi Abrɑhɑm kinni, ‘Keløg kwøbbi Mosɑ̀ geki jøtöng pɑ lïngi yi gen, ge pɑ cuggi lïngi kwøbbi ngɑn dhwödh kì yij thøø.’ ” Kɑ jøbɑnge köbbe kinni, “Gïg-ɑ nyi göjji ji orøg ócwöb, de ngɑn-ɑ cinge ókɑ̈ɑ̈l yi gönyɑni ree dɑ cyën! Lɑ̈w keløg e luudh-ɑ nɑm e mune ótöjjø ki pil me dwøng kibøli keløg e køøl-ɑ ɑ́kyel kì kelli møg-ɑ thønhø ek be orøg. De koru ri wun! “Keløg wɑɑd wun óbɑ̈jjø, kyëddí; o keløg e óyewø kɑ ówïyø ki orøg, lɑ̈ɑ̈m pyëwí ki en. Keløg yï cɑɑge’ piny tyel ɑ́bïryew cyɑ̈ng ɑ́kyel kɑ nyi dwöög-ɑ yïí e okööbø kinni ‘Yɑ ɑ́bɑ̈jji,’ nyi lɑ̈ɑ̈m pyëwí ki en.” Kɑ Yëso köbbi yi tyëngwöödø kinni, ‘Med yïëyi wøn!’ Kɑ Wë okööbø kinni, “Cɑgg yïëyi wun thiinh ni nyɑ wɑɑng köödhi kɑrdɑl, yɑdh men-ɑ dwøng èn ócuggø köbbø yi wun kinni, ‘Dhööy rií wɑ̈g kì keny, kɑ rií cwöödh nɑɑm omelø.’ Kɑ kwøbbi wun lïngi yi en. “Keløg e dɑ dhɑnhø ɑ́kyel kì kelli wun me yïe di bɑ̈ng me nyi purø, wɑlɑ̀ me kwɑ̈yø ki dyëg, keny-ɑ óbëën bɑ̈ngɑni e kɑ̈ɑ̈l-ɑ be gwøg kì yij pɑ̈l, ócuggø köbbø yi yïn kinni, ‘Bïí ød kɑ yï pëggí piny kɑ yï cyɑ̈ɑ̈m?’ Pɑth, óköbbií kinni, ‘Göggí yɑn ki gïncɑm. Kɑ yɑ kɑ̈llí kidøøj pïd keny-ɑ órumɑ ki cɑm.’ Bɑ̈ng pɑ nyi pwøj kipe kenyi rume ki gwøgi gïn-ɑ ɑ́köbbii yi wɑ̈n i gwøge gøn. Pɑ̈r ki wun ceth, keny-ɑ ógwøg wun gïn-ɑ ɑ́köbbi wun i gwøgu en, ceg wun kwøb kinni, ‘Wø bɑ bɑ̈ngg yøw, wø ɑ́gwøg-ɑ gwøøg wøn kete!’ ” Keny-ɑ ɑ́kedhe e kedh-ɑ Yerusɑlem, ɑ́kedh e kɑ̈ll-ɑ köthi myërri Sɑmɑriyɑ̀ geki Gɑlelì. Kɑ töng-ɑ nyɑ pɑc me thiinh, ɑrøøm gen ki jøg mø kwɑnni gen bɑ pyɑ̈rø mø ri gen di lɑ̈y. Kɑ jøgɑni ócungø ge lɑ̈wi ki Yëso, ɑryeer gen kinni, ‘Wuö, Yëso! Lɑ̈ɑ̈m pyëwí ki wøn!’ Keny-ɑ ɑ́liidh gen yi Yëso, ɑkööbe kinni, “Kedh wun, kɑ ri wun nyudhi wun ókwërø.” Kɑ̈ng-ɑ ɑ́kedh ge ókedhø, kɑ dëlli gen ódönyø. Jɑl ɑ́kyel kì kelli gen kɑ ɑ́lidhe ree kinni dönyø, ɑdøøge yï Yëso, e lejj-ɑ Jwøk ki cwɑg mø døngø. Abøødhe ree piny kì dhøggi tyelli Yëso kɑ gø pwøje. Jɑl-ɑ ɑ́dwöög bɑ jɑl Sɑmɑriyɑ̀. Akööb Yëso kinni, “Pɑth ki ji pyɑ̈rø ɑ ɑ́yiel ki lɑ̈y? Ábïngwen ying-ɑ keny? Bene jɑl Sɑmɑriyɑ̀ men kete ɑ dwöög be pwøji Jwøk?” Aköbbii yi Yëso kinni, “Dhwödhí mɑl kɑ yï kedh. Yï ɑ́yiel yi yïëyí.” Kɑ Yëso pyëj yi kwï Jøpɑresì kinni, ‘Á kì wɑɑng ɑ óbëën Pödhi Jwøk?’ Alöggi Yëso kinni, “Pödhi Jwøk obëënø, de pɑ bï kɑ yöö men-ɑ cugge lidhø yi wun. Ji koo kööbø kinni, ‘Lïdhi wun, en ɑ keny èn!’ Wɑlɑ̀ kinni, ‘En ɑ kun-ɑcɑ̀!’ Mɑ́ Pödhi Jwøk ying-ɑ kelli wun.” Codhe, kɑ Yëso jøbɑnge köbbe kinni, “Óbï eni bøli keny-ɑ ódwɑddu lïdhø ki cyɑ̈ng ɑ́kyel kì kelli cyɑ̈nggi Nyɑɑr Dhɑnhø, de koo lidh yi wun. Ji ókööbø kinni ‘Lïdhi wun, en ɑcɑ̀!’ Wɑlɑ̀ kinni, ‘Lïdhi wun, en ɑ keny èn!’ Bëëd wun kì keny-ɑ di wun, wu ko kedhi be yɑb. Keny-ɑ óbëën Nyɑɑr Dhɑnhø, óceg meny ni loodh mɑl, ɑ nyi ì tɑr e bɑ̈ɑ̈n-ɑ mɑl, kɑ gø cɑre kì tuung gïti tung-ɑ kyeelø. De óceg orɑng yi gïg mø gïïr møti, kɑ bɑny yi ji-ɑ nud ɑnɑn. Keny-ɑ ódwöög Nyɑɑr Dhɑnhø, óbëëd e nɑ keny-ɑ ɑ́nud Nöö. Ji ɑ́bëëd ge omɑ̈dhø, o ge ocyɑ̈mø, o ge ónyömø, o nyigi gen onywømø, gïti cyɑ̈ng-ɑ ɑ́kedhi Nöö yij yɑ̈y, ɑbëën bɑɑyø, kɑ ge nɑ̈g yi bɑɑyø bënn. Óbëëd e pɑ̈r ki cyɑ̈ng-ɑ ɑ́nud Lot. Ji ɑ́bëëd ge ocyɑ̈mø, o ge omɑ̈dhø, ge ongëwø, o ge ngëww-ɑ wɑ̈g ki jɑmmì, o ge okɑ̈gø ki byel, o ge ogëdø ki ud. Cyɑ̈ng-ɑ ɑ́dhwödh Lot kì Sødømɑ̀, mɑc geki kïbrït ɑ́dëëm kì mɑl, kɑ ge nɑ̈g yi mɑc bënn. Bene kër-ɑ óbëëde ɑnɑn, keny-ɑ ódwöög Nyɑɑr Dhɑnhø. “Kì cyɑ̈ngɑni, ngɑn-ɑ óying wïj óthɑɑng ød, o jɑmme ying-ɑ yiny-ɑ ød, ko kedhi ød be dwɑɑyi gen. Ngɑn-ɑ óying yij pwödhø ko døøg pɑc. Pɑru gïn-ɑ ɑ́cwöb kipe cï Lot. Tyëng-ɑ dwɑddi mïdhi wëyi gen, wëyi gen ólɑ̈ɑ̈ny yi gen. De tyëng-ɑ óbøy muuji wëyi gen, wëyi gen óyiel yi gen. Yɑ köbb-ɑ wun, kì wɑ̈rɑni ji ɑ́ryew óbëëd ge obuddø kì yij pyën ɑ́kyel, ɑ́kyel ókwɑny kɑ ngɑn-ɑ kyeelø wiy. Ódi tyëng-ɑ mɑ̈nn ɑ́ryew mø rɑ̈gø ki byel kì kej ɑ́kyel, ɑ́kyel ókwɑny kɑ ngɑn-ɑ kyeelø wiy. Ódi jøg ɑ́ryew kì yij pɑ̈l, ɑ́kyel ókwɑny kɑ ɑ́kyel wiy.” Kɑ Yëso pyëj yi jøbɑnge kinni, ‘Gïnɑni ócwöb-ɑ keny Wuö?’ Alöggi Yëso kinni, “Cor órɑj nyi cug-ɑ́ɑ̀ keny-ɑ di gïnthøø.” Codhe, kɑ Yëso gɑ́j møg wɑ̈jje jøbɑnge e pwöny-ɑ gen kinni, pëthi gen ko nyönhi, de nyi kwɑ̈jji gen ceth kɑ ge ko wïyi ki gɑ̈nni Jwøk. Gï ɑ́köbbe kinni, “Ádɑ jɑngi gøny kì kɑɑl megø, jɑngɑni Jwøk pɑ wør yi en, o yïe bɑ̈r ki ji. O ɑ́dɑ ngɑndhɑjø mɑ thwöm kì kɑɑlɑni me nyi kedhi yï jɑngɑni be gøny e pir-ɑ ngɑn megø, kɑ nyii kööbø kinni, ‘Cwɑ̈ggí yɑn jɑmmɑ møg-ɑ yï ngɑn-ɑ gööny wøn.’ Kɑ jɑngɑni ocögø kwøbbi ngɑnɑni pɑ jwɑn yi en ki løøgø. De kì bɑng keny megø, ɑ́rum ki pyëwe kinni, ‘Cɑgg Jwøk pɑ wør yi yɑn, wɑlɑ̀ cɑgg yïɑ bɑ̈r ki ji, ngɑɑn ócwɑ̈ggɑ jɑmme. Ke pɑ cwɑ̈ggɑ en jɑmme, pɑ wïyi ki judi yɑn.’ ” Akööb Wë kinni, “Lïngu møg-ɑ ɑ́kwøb yi jɑng-ɑ bɑ ɑ́muddi ji. O men-ɑ́ Jwøk ocögø jie møg-ɑ ɑ́yieny yi en pɑ cwɑ̈gge gïg-ɑ kwɑjji yi gen, ge ywøøg-ɑ kööre ki wɑ̈r kí dicɑ̈ng? Yɑ köbb-ɑ wun, ge ójwɑn ki kønyø yi Jwøk. De keny-ɑ ódwöög Nyɑɑr Dhɑnhø, ódi yïddø kì kömi piny ki ji møg yï gen di yïëyø?” Gɑ́j møg ɑ́wɑj yi Yëso, e wɑ̈jj-ɑ kwï ji-ɑ nyi rumø ce ge døøj, o teen-ɑ kyeelø ceg kɑ benyø yi gen. Ákööb kinni, “Dɑ Jɑlpɑresì mɑ ɑ́kedhi be kwɑ̈jjø kì Kengø geki jɑlgwɑ̈j. “Kɑ Jɑlpɑresì ócungø kì wɑ̈ye e ókwɑ̈jjø kinni, ‘Yïn ɑ Jwøk, yɑ pwøj-ɑ yïn kipe yɑ pɑ ni tyëng-ɑ kyeelø møg-ɑ kwɑ̈dø, ɑ mudø ki ji, wɑlɑ̀ møg-ɑ yɑ̈bø ki mɑ̈nni tyëngmøøgø. Yɑ pwøj-ɑ yïn kipe yɑ pɑ pɑ̈r ki jɑlgwɑ̈j men. Yɑ nyii thuumø tyel ɑ́ryew kì osboo, kɑ ɑ́kyeel pyɑ̈ri jɑmmɑ bënn nyi mëggɑ yïn!’ “De jɑlgwɑ̈j ɑ́cungi e lɑ̈wi, nuti pɑ̈nyi lïïdh mɑl. De ɑ́ceg-ɑ wïje ki kuul piny, e cingge cïb en pyëwe, ɑkööbe kinni, ‘Yïn ɑ Jwøk, lɑ̈ɑ̈m pyëwí ki yɑn, yɑ bɑ ngetorøg.’ Yɑ köbb-ɑ wun kinni, bɑ jɑlgwɑ̈j ɑ ɑ́kedhi gøle e tir kì yï Jwøk, de pɑth ki Jɑlpɑresì. Mɑ́ tyëng-ɑ nyi tïng ri gen mɑl ódwöög cyɑ̈n, de tyëng-ɑ nyi dwöög ri gen cyɑ̈n ótïng mɑl.” Kɑ kwï ji nyigi gen, cɑgg ɑ́ møg-ɑ dhødh, muuj gen Yëso o gï gyëdhe. Keny-ɑ ɑ́liidh møgɑni yi jøbɑng Yëso, kɑ tyëngɑni cyɑ̈r yi gen. De Yëso othønhø ɑ́cwööle, ɑkööbe kinni, “Wiyu othønhø bï gen yïɑ. Ge ko jog wun. Mɑ́ Pödhi Jwøk bɑ mi ji-ɑ pɑ̈r ki othønhø ni møg. Yɑ köbb-ɑ wun kidyër kinni, ngɑn-ɑ pɑ kwɑny Pödhi Jwøk e nɑ othinh, pɑ wöl kedhi yije.” Jɑldwøng megø Yëso ɑ́pyëje kinni, ‘Jɑlpwöny-ɑ døj, gwøgɑ ngø o yɑ yïddɑ ki nënn-ɑ ɑtheer?’ Aköbbii yi Yëso kinni, “Á kipe ngø ɑ cwøllí yɑn, yɑ døj? Bong ngɑn døj den-ɑ́ Jwøk kete. Ngɑ̈nyi yi yïn gen ɑ cigg-ɑ kööbø kinni, ‘Yï ko niin ki ngɑn nuti nywøøm wun ri wun; yï ko nɑ̈gi ki dhɑnhø; yï ko kwɑ̈ɑ̈d; yï ko mënni kömi wɑɑd wun ki kwøbbi pyed; wør wïyí kí meyí.’ ” Kɑ jɑldwøngɑni ólöggø kinni, “Yɑ ɑ́cɑ̈gi ki mïdhi ciggɑni yɑ nudd yɑ thiinh; gïti ɑnɑn, ge mïdhɑ’ mïdhø.” Keny-ɑ ɑ́lïngi møgɑni yi Yëso, ɑköbbe gøn kinni, “Dɑ gïjø ɑ́kyel thyew, me cɑ̈nni yïn. Ngeew jɑmmí wɑ̈g bënn, kɑ ngyënyy-ɑ óngeew gen mëggí ɑbuur, o bëëd e yïí dɑ kɑ̈r kì mɑl. Codhe, kɑ yï bïí bɑngɑ.” De keny-ɑ ɑ́lïngi møgɑni yi jɑlɑni, kɑ yije ceg-ɑ bɑɑrø ki menteg, mɑ́ e ɑ́bëëd e kɑ̈rø ki mendwøng. Kɑ Yëso nenn-ɑ yïe, ɑkööbe kinni, “Kedhi Pödhi Jwøk teeg kipe tyëngkɑ̈rì. Kɑ̈li ɑmɑlø wɑɑng ɑlïbrøw yööd kibøli kedhi ngetikɑ̈r Pödhi Jwøk.” Keny-ɑ ɑ́lïngi møgɑni yi teedø ɑkööb gen kinni, ‘Keløg ɑ́ kinøw, ɑ́ men ɑ ócuggi yielø?’ Alöggi Yëso kinni, “Jwøk ócuggø gwøg ki gïg mø pɑ cuggi gwøgø yi ji.” Kɑ Pïtør okööbø kinni, ‘Lidh, jɑmmi wøn bënn ɑ́wiy wøn piny, kɑ wø lug-ɑ bɑngí.’ Kɑ Yëso okööbø kinni, “Yɑ kømm-ɑ dyër, tyëng-ɑ ɑ́wiy ud, kí mɑ̈nn, kí nyiimëëg gen kí wɑdd, wɑlɑ̀ nywøl kipe Pödhi Jwøk, ge óyïddi ki mø ngenyø ɑnɑn kì bøli keny, o ge óyïddi ki nënn-ɑ ɑtheer kì bøli keny-ɑ óbï.” Codhe, kɑ tyëngwöödø gɑ pyɑ̈rø wïdɑ́ryew kïdhi wɑ̈yi gen yi Yëso, kɑ gï köbbe kinni, “Wɑ kedh-ɑ Yerusɑlem. Gïg-ɑ ɑ́gwed bënn yi jøtöng kì ri Nyɑɑr Dhɑnhø, bɑ møg cwöb. Ócïb cinggi tyëngpɑth yi Yeud. Ógɑggi yi gen, kɑ yɑnyyi yi gen, kɑ köme nguddi gen ki lɑ́ɑ̀w. Kɑ pwöd yi gen ki dëllì, kɑ nɑ̈g yi gen. De ódhwödh kì dɑ̈ɑ̈g cyɑ̈ng, kɑ dwöög-ɑ be nënnì.” Thɑ́ møgɑni nuti yodø yi tyëngwöödø, gïn-ɑ wɑngi yi kwøbbɑni ɑ́bëëd ɑ́ ɑkɑn kipe rummi gen, o møg-ɑ ɑ́kømmi ɑ́cög ge pɑ gɑm yi wɑ̈thi gen. Keny-ɑ ɑ́cyɑ̈ngi Yëso ki kɑɑl Yerikö, ɑ́dɑ jɑl mɑ cwør me bëëdø kì tøg yöö e ókwɑ̈jjø. Keny-ɑ ɑ́lïnge ji ge obëënø ge kɑ̈ll-ɑ yöö, ɑpëjje kinni, ‘Á ngø ɑ ɑ́cwöb?’ Aköbbii kinni, “Yëso jɑl Nɑdhɑreth ɑ bï e kɑ̈ll-ɑ yöö.” Aryeer cwørɑni kinni, “Yëso Wɑ̈d Debïd, lɑ̈ɑ̈m pyëwí ki yɑn!” Kɑ jɑl-ɑ cwør cyɑ̈r yi jøg-ɑ cyɑ̈dhi kì bøli teedø mɑl kinni kude. De jɑl-ɑ bɑ cwør ɑ́ceg pëddø ryeerø kinni, ‘Wɑ̈d Debïd, lɑ̈ɑ̈m pyëwí ki yɑn!’ Acungi Yëso kɑ okööbø kinni muuj jɑlɑni en. Kɑ ɑ́wɑ̈nhe bute ɑpyëje gøn kinni, “Á ngø ɑ dwɑddi yi yïn, o göggɑ yïn?” Kɑ okööbø kinni, ‘Wuö, yɑ dwɑdd-ɑ døøg be nënnø.’ Aköbbii yi Yëso kinni, “Adɑ́ nëën. Yï ɑ́yiel yi yïëyí.” Kɑ jɑlɑni onëënø kì bøli kenyɑni ceth. Keny-ɑ ɑ́liidh møgɑni yi teedø bënn ɑlejji gen Jwøk. Yëso ɑ́kedh e bɑ̈ɑ̈n-ɑ kɑɑl Yerikö. Ádɑ jɑl me cyeg, mɑ jɑlgwɑ̈j me kɑ̈rø ki mendwøng, me cwøl ɑ́ Dhɑkɑ̀, o bëëd ɑ kɑɑlɑni. Dhɑkɑ̀ ɑ́dwɑdd-ɑ lidhi Yëso de ɑ́dhɑ̈li wɑ̈dhi bute yi ngenyi ji, o pɑ cuggi lïdhø kì wɑ̈thi ji, mɑ́ e bɑ jɑl me cyeg. Arenge mɑl kö yuu-ɑ cyɑ̈dhi yi Yëso kɑ yedh-ɑ wïj ólɑm, o Yëso cugge lidhø yi en. Keny-ɑ ɑ́wɑ̈nhi Yëso kenyɑni, kɑ lïïdh-ɑ mɑl, ɑkööbe kinni, “Dhɑkɑ̀, jwɑn yïnhi piny! Kipe yɑ dwɑdd-ɑ bëëdø yɑn ɑ́ wëlí dicyɑ̈ngtïn.” Kɑ Dhɑkɑ̀ jwɑn-ɑ yïnhi piny pyëwe omedø, kɑ Yëso cwøøle gøle. Keny-ɑ ɑ́lidhii yi teedø, ɑcɑ̈gi gen ki gøny kinni, ‘Yëso bëëd ɑ gøl ngetorøg!’ De Dhɑkɑ̀ ɑ́dhwödhi mɑl, ɑkööbe kinni, ‘Budi jɑmmɑ ómëggɑ tyëng-ɑ ɑbuur, o keløg e dɑ dhɑnhø men-ɑ órujø yi yɑn, gëe ócullɑ en ɑ́ ɑ́ngwen.’ Akööb Yëso kinni, “Gøl ɑ́rum ki yielø dicyɑ̈ngtïn, mɑ́ jɑɑl thyew bɑ wɑ̈d gøl Abrɑhɑm. Nyɑɑr Dhɑnhø ɑ́bï-ɑ be yɑbi ji-ɑ lɑ̈ɑ̈nyø, o ge yiel yi en.” Keny-ɑ ɑ́rum ji ki lïngø ki møg-ɑ ɑ́kwøb yi en, ɑwɑ̈jje gïn ki gɑ́j kipe kɑ ɑ́cyɑ̈nge ki Yerusɑlem, o ge ɑ́rum kinni Pödhi Jwøk ócwöb ɑnɑn ceth. Ákööb kinni, “Jɑl megø me pere teg ɑ́kedhi pödhø me lɑ̈wi be yɑ̈bbø ki lɑwø, o ódwööge pödhi gen ɑ́ rɑ̈dh. Kɑ bɑ̈ngge gɑ pyɑ̈rø cwøle, kɑ ngɑɑn nyi nënge ki ngyënyø pyɑ̈rø ɑ́kyel. Kɑ gï köbbe kinni, ‘Lug wun ki ngyëny møg gïti keny-ɑ ódwöögɑ.’ De jɑlɑni mɑɑn yi tyëng pödhi gen, kɑ ge öd-ɑ bɑnge ki ji møg kööbø kinni, ‘Wø pɑ dwɑddi jɑɑl, o bëëde ɑ́ rɑ̈ɑ̈dh wøn.’ “De jɑlɑni ɑ́göög ki rɑ̈dh. Keny-ɑ ɑ́døøge pödhi gen, ɑkööbe kinni, cwööl bɑ̈ngg-ɑ ɑ́nënge ki ngyëny, o yod yi en mɑ løge ngyëny ɑ́dï ɑ ónywølø yi ngyënyyɑni. Kɑ bɑ̈ng-ɑ ɑ́kwöngi bëënø okööbø kinni, ‘Wuö, ngyëny-ɑ ɑ́mëggí yɑn ɑ́lugɑ, kɑ yɑ óyïddø ki ngyëny pyɑ̈rø.’ Kɑ bɑ̈ngɑni köbbi yi rɑ̈dh kinni, ‘Døøj cɑrø! Yï bɑ bɑ̈ng me døj, mɑ́ cingí ɑ́cïb-ɑ nyɑ gïjø me thiinh, kɑ mïdhi yi yïn kidøøj, yï ówëggɑ jɑɑgi kɑ̈dd pyɑ̈rø.’ Kɑ ryeew bɑ̈ngg okööbø kinni, ‘Wuö, yɑ ɑ́yïddi ki ngyëny ɑ́bïj keny-ɑ ɑ́lugɑ ki ngyëny-ɑ ɑ́mëggí yɑn.’ Kɑ bɑ̈ngɑni köbbi yi rɑ̈dh kinni, ‘Yï ócuggø jyɑ̈gø ki kɑ̈dd ɑ́bïj.’ “Kɑ bɑ̈ng megø obëënø, kɑ rɑ̈dh, köbbe kinni ‘Wuö, ngyënyí èn, ɑ́bɑɑnɑ yij nyɑ ógødh, mɑ́ yɑ ɑ́bëëd yɑ óböggø ki yïn, kipe yï bɑ jɑl me yijí wöny. Yï nyi kwɑny-ɑ ngyëny mø nuti lem-ɑ yi yïn. Kɑ yï nyii kɑ̈jø ki byel mø nuti kɑ̈g-ɑ yi yïn.’ Kɑ bɑ̈ngɑni köbbi yi rɑ̈dh kinni, ‘Yï ócɑy yi yɑn kɑ kwøbbi dhøgí, yï bɑ̈ng-ɑ rɑj. Yɑ ngɑ̈nyi yi yïn yɑ bɑ jɑl me yijɑ wöny, yɑ nyi kwɑny-ɑ ngyëny mø nuti lem-ɑ yi yɑn, o yɑ nyi kɑj-ɑ byel mø nuti kɑ̈g-ɑ yi yɑn. Ede ngyënyɑ ɑ bɑɑnyí ki kïdhi beng? O ngyënyɑ di yuudɑ e nywølø keny-ɑ ɑ́bëënɑ.’ “Kɑ jøg-ɑ cungi kì kenyɑni köbbi yi rɑ̈dh kinni, ‘Kwɑnyu ngyënyø kì yï bɑ̈ngɑni, kɑ mëggu bɑ̈ng-ɑ yïe di pyɑ̈rø.’ Kɑ ge okööbø kinni, ‘Wuö, bɑ̈ngɑni yïe dɑ ngyëny pyɑ̈rø.’ Alöggi rɑ̈dh kinni, ‘Ngɑn yïe di gïïpiny, gëe ceg kɑ medø; o ngɑn-ɑ yïe bong gïïpiny, cɑgg ɑ́ men-ɑ nud kì yïe, ceg kɑ kwɑnyø. Anɑn, ɑ́gøne tyëng-ɑ mɑɑn yɑn, ɑ nuti dwɑddi kinni o yɑ göögɑ ki rɑ̈dh? Kɑ̈ɑ̈lu gen keny, kɑ ge nɑ̈g wun kì bølɑ.’ ” Keny-ɑ ɑ́rum Yëso ki kwøbi møgɑni, ɑwɑ̈dde yöö e kedh-ɑ Yerusɑlem. Keny-ɑ ɑ́cyɑ̈ngi Yëso ki myërri Betpɑjì geki Betɑnì kì buti Kïti Dhetun, ɑöde ki ɑ́ryew kì kelli jøbɑnge, kɑ gï köbbe kinni, “Kedhu pɑn-ɑ nenni yi wun ɑcɑ̀. Keny-ɑ ókedhu yije, wu óyïddi ki ɑderø ówöb, me köme nuti pɑ̈nyø kɑdhø yi dhɑnhø. Gønyu en kɑ muuju yɑn. Keløg e dɑ ngɑn me pyëj wun kinni ede ɑ gønyu en, kööb wun kinni dwɑdd-ɑ yi Wë.” Kɑ jøgɑni ryeet ókedhø, kɑ ɑderø ówöb yod gen ceth ni kɑ ɑ́köbbi gen yi Yëso. Agøny ge gøn. Kɑ ge pyëj yi wëëg ɑderø kinni, ‘Ede ɑderø ɑ gønyu en?’ Kɑ jøgɑni ólöggø kinni, “Dwɑdd-ɑ yi Wë.” Codhe, kɑ ɑderø muuj gen Yëso, ɑpeedh gen lɑ̈wwi gen kömi ɑderɑni, kɑ Yëso køny gen ki kɑdhi köme. E Yëso kedh-ɑ Yerusɑlem e ying-ɑ kömi ɑderø, kɑ ji ógudhi gen peedh gen yij yöö kì bøle. Keny-ɑ ɑ́cyɑ̈nge ki Yerusɑlem, keny-ɑ töngi yöö piny kì thɑ Kïti Dhetun, kɑ teen-ɑ cyɑ̈dhi kì bɑng Yëso ócɑ̈gø ryeerø ki medi pëthi gen, ge lejj-ɑ Jwøk kipe gïïngɑ̈ngø møg-ɑ ɑ́lidh yi gen bënn. Ge ɑ́ryeer kinni, “Rɑ̈nh-ɑ bï ki nyingi Wë bɑ ɑgyëdh. Dɑ mër kì mɑl, o Jwøk ceg kɑ lejjø!” Kɑ kwï Jøpɑresì møg-ɑ ɑ́ying kelli teedø Yëso köbbi gen kinni, “Jɑlpwönyø, kyëddí jøbɑngí o ge cög ge pɑ kööbø ki gïg ni møg.” Aløøg mø gen yi Yëso kinni, “Yɑ köbb-ɑ wun kinni, ke kud ji møg, tuggi kïttì ceg-ɑ cɑ̈gø ryeerø!” Kɑ ócyɑ̈ngø ki Yerusɑlem, keny-ɑ ɑ́lidhe gøn, ɑywönge, kɑ okööbø kinni, “Ce di bëëd e gïn-ɑ dwɑddi kipe mër ngɑ̈nyi yi yïn dicyɑ̈ngtïn! De ɑnɑn ɑ́dhɑ̈li lidhø yi yïn! Bøli keny-ɑ ótyeeg yïn yi tyëngmɑ̈ɑ̈nø óbï, kɑ yëthí cyëëg gen bënn, kɑ yï twij gen kì wɑ̈thi tùng bënn. Yï órënyi yi gen ki menteg, kɑ dörí cøør kömi ji-ɑ yijí, bong kïti gyer ɑ́kyel men-ɑ ówiy e ócungø kömi megø, mɑ́ bøli keny-ɑ ɑ́bëën Jwøk be yieli yïn nuti ngij yïn!” Codhe, ɑkedhi Yëso Kengø, kɑ ócɑ̈gø cyeedi jøngyew wɑ̈g, e gï köbbe’ köbbø kinni, “Bɑ ɑgwed kì yethi wɑ̈jji kwërø i Jwøk kööbø kinni, ‘Kengɑ ócwøl ɑ́ kej mɑ̈ddø.’ De ɑ́løgu keny pɑ̈nni yi kurrì!” Yëso ɑ́bëëd e nyii pwönyø kì Kengø yethi cyɑ̈ng bënn. Kɑ dwɑddi nɑ̈gø yi ókwërr-ɑ døngø, geki jøpwönyi Cigg kí jyɑ̈ggi pödhø. De ge ɑ́jɑd ki yöö me nɑ̈g ge gøn, mɑ́ ji bënn ɑ́bëëd ge lïng-ɑ kwøbbe, e bong møg wëggi bodhø yi gen. Cyɑ̈ng ɑ́kyel Yëso ɑ́bëëd e ying-ɑ Kengø, e pwöny-ɑ Wöndøj. Kɑ ókwërr-ɑ døngø geki jøpwönyi Cigg, kí jɑggi Yeud bï-ɑ yïe, Kɑ ge okööbø kinni, “Köbbí wøn, ɑ́ tegø mɑ ngø ɑ göög ki gïg-ɑ gøggi yi yïn ek? Á men ɑ ɑ́thödhi yïn ki tegø menɑni?” Alöggi Yëso kinni, “Wu ólonyɑ ki pyëjø thyew. Köbbu yɑn, Jøn keny-ɑ ɑ́jwɑ̈ɑ̈ge ji, teng-ɑ ɑ́gööge ɑ́kɑ̈ɑ̈l-ɑ yï Jwøk, wɑlɑ̀ ɑ́kɑ̈ɑ̈l-ɑ yï ji?” Kɑ møgɑni dwønggi gen ki kɑɑm gen kinni, “Keløg wɑ ólöggø kinni, Jwɑ̈ng-ɑ ɑ́jwɑ̈ɑ̈g ji yi Jøn ɑ́kɑ̈ɑ̈l-ɑ yï Jwøk, ókööbø kinni ‘De ede ɑ bɑnyii ki yïëyø yi wun?’ De keløg wɑ okööbø kinni, kɑ̈ɑ̈l-ɑ yï ji, wɑ ceg kɑ bɑ̈llø yi ji bënn ki tuggi kïttì, kɑ wɑ nɑ̈g yi gen, mɑ́ ge ɑ́yïëy kinni Jøn bɑ jɑltöng.” Codhe, ɑlöggi gen kinni, “Keny-ɑ ɑ́kɑ̈ɑ̈l yi tengɑni kwïj yi wøn.” Aköbbi gen yi Yëso kinni, “Keløg ɑ́ kinøw, wu pɑ köbbɑ thyew ki teng-ɑ gwøøgɑ møgɑni.” Codhe, ɑwɑ̈jji ji gɑ́j møg yi Yëso kinni, “Ádɑ jɑl mɑ ɑ́pïïdh ki bɑɑg oløg, kɑ gø kïre ki jøg mø purii. Codhe, ɑwele kɑ ómɑ̈gø ki keny me bɑ̈ɑ̈r e tøøk. Keny-ɑ ɑ́bëën kej lemi oløg, ɑöde yï jøg-ɑ ɑ́mɑ̈ggi bɑg ki bɑ̈ng me kɑ̈ɑ̈l bun-ɑ bɑ mee kì yï gen. De bɑ̈ngɑni ɑ́yöd e ceg kɑ pwödø yi gen, kɑ gø ryem gen ki cingge. Adøøge ki ör ki bɑ̈ng megø. Kɑ bɑ̈ngɑni pwöd yi gen thyew, o nuti wørø yi gen, kɑ gø ryem gen ki cingge. Codhe, kɑ jɑlɑni dɑ̈ɑ̈g bɑ̈ngg öre. Kɑ thödhi ki kedd yi jøgɑni, kɑ ywɑɑj gen wɑ̈g kì yij bɑg. Kɑ jɑlbɑg okööbø kinni, ‘Yɑ gwøg-ɑ ngø ɑnɑn? Wɑ̈dɑ ɑ́mɑɑrɑ, óör yi yɑn, ówør yi gen mɑwɑnø.’ De jøg-ɑ pur bɑg keny-ɑ ɑ́lidh gen wɑ̈d jɑlɑni, ɑköbbi gen ri gen kinni, ‘Wɑ̈de men, bene en ɑ ólɑg bɑg. Bïu, nɑ̈g wɑ en, o bɑg gööge ɑ́ miee.’ Codhe, kɑ wɑ̈d jɑlɑni ywɑɑj wɑ̈g kì yij bɑg yi jøgɑni kɑ gø nɑ̈g gen. “Jøgɑni ógögg-ɑ ngø yi wïi bɑngɑni? Óbï kɑ gï nɑ̈ge bënn, kɑ bɑg mɑ̈gge jøpur møøgø.” Keny-ɑ ɑ́lïngi møgɑni yi teedø, ɑkööb gen kinni, “Wiy gïn ni men cöge e pɑ cwöb!” De Yëso ɑ́lïïdh yï gen, ɑkööbe kinni, “Keløg ɑ́ kinøw, ɑ́ ngø ɑ wɑngi yi møg-ɑ bɑ ɑgwed kinni, ‘Kïti gyer men-ɑ ɑ́bɑny yi bödhhi gyer, en ɑ ɑ́göög ki kïn-ɑ pere teg kibøli kïtti gyer bënn.’ Ngɑn pɑ̈dhi kömi kïnɑni ceg-ɑ yïddø ki turø, o ngɑn-ɑ köme pɑ̈dhi yi kïnɑni, gø nyɑdhe’ nyɑdhø!” Kɑ Yëso dwɑddi mɑgø yi jøpwönyi Cigg geki ókwërr-ɑ døngø kì bøli kenyɑni ceth, mɑ́ gø ɑ́yod yi gen kinni gɑ́jɑni ɑ́gɑɑj-ɑ gen. De ge ɑ́bwøg yi teedø. Codhe, kɑ ge pëgg-ɑ be lebbi Yëso, kɑ ge oödø kì piny ki ji mø lebbii, ge nënni ge nɑ tyëngdøj. Ge ɑ́dwɑdd-ɑ thɑbi Yëso mɑ di kööbe ki gïjø mɑ bɑ̈jjø, o gø di gøøny gen bøli modïr. Codhe, kɑ Yëso pyëj yi jøg-ɑ ɑ́ör gɑ yïth kinni, “Jɑlpwönyø, wø ngɑ̈ny wøw kinni kwøbb-ɑ kømmi yi yïn, kí kwøbb-ɑ pwönyi yi yïn bɑ dyër. Yïí bɑ̈r ki bëëdi ji, ying gɑ ngø, o yï nyi pwöny-ɑ dyër ceth kì ri yëth-ɑ dwɑddi yi Jwøk. Köbbí wøn, bɑ ɑyïëy yi Ciggee eni cudi Kɑysɑr ki gwɑ̈j, wɑlɑ̀ pɑth ki ɑyïëy?” De wëënyi gen ɑ́yod yi Yëso, ɑkööbe kinni, “Nyudhu yɑn ki ngyënyø ɑ́tegø. Á ngïji men kí nyingi men ɑ köme?” Kɑ ge okööbø kinni, “Mø Kɑysɑr.” Aköbbi gen yi Yëso kinni, “Keløg ɑ́ kinøw mëggu Kɑysɑr jɑmm-ɑ bɑ mø Kɑysɑr, kɑ jɑmm-ɑ bɑ mø Jwøk mëggu Jwøk.” Codhe, kɑ ge ódhɑ̈lø mɑgi Yëso kì ri gïn-ɑ di kwøb yi en kɑ ɑ́thɑb ge gøn kì bøli teedø. Ge ɑ́ngɑ̈ng yi lögg-ɑ ɑ́løøge, ɑcög gen ge okudø. Kɑ kwï Jøsɑduk, ɑ løg jøg-ɑ nyi kööbø kinni ji koo dhwödh kì yij thøø, bï-ɑ yï Yëso. Apyëjii yi gen kinni, “Jɑlpwönyø, Mosɑ̀ ɑ́kööb kinni i keløg dhɑnhø othøø, kɑ ówïyø ki dhɑjø e bong nyige, i lɑɑg cï nyel-ɑ ɑ́thøw yi ómen, o nywøle wïj nyel-ɑ ɑ́thøw. Kì bøli keny megø, ɑ́dɑ nyiimëëg ɑ́bïryew. Kɑ nyel-ɑ mɑl ónyömø kɑ othøø, de bong nywøl mɑ ɑ́wiy yi en. Kɑ ngɑnɑni lɑg yi ryeew yɑɑgɑni, kɑ nyelɑni othøø. Kɑ nyɑnɑni lony ki lɑgø yi dɑ̈ɑ̈g nyiimëëgɑni, kɑ nyelɑni othøø thyew. Gïjø ɑ́kyel ɑ ɑ́cwöb kipe nyiimëëgɑni bënn, ge ɑ́thøw e bong nyigi gen. Alunyi ngɑnɑni ki thøø kì cyɑ̈n. Kɑ ɑ́rum bëëd ngɑnɑni ki nyiimëëgɑni gɑ ɑ́bïryew bënn, óbëëd ɑ́ cï men kì kelli gen keny-ɑ ódhwödh ji kì yij thøø?” Aköbbi gen yi Yëso kinni, “Kì kömi piny, ji nyii nyömø, kɑ ji nyi nywøm. De ji-ɑ bɑ ɑpwøj kinni ge óyïddi ki kej gen kì piny-ɑ óbï kì bɑng dhwödhø kì yij thøø, ge pɑ nywøm, o ge pɑ nyömi. Kì yij bëënɑni, ge nɑ wëywödd, o ge pɑ cuggi thøø këti. Ge bɑ nyigi Jwøk, mɑ́ ge ɑ́tug-ɑ yij thøø. Keløg ɑ́ per dhwödhø kì yij thøø, men-ɑ́ Mosɑ̀ kiree ɑ́nyuudh kì ri nyɑ kïrø, kɑ ɑ́kööbe kinni Wë bɑ Jwøøg Abrɑhɑm, o bɑ Jwøøg Isɑɑk, o bɑ Jwøøg Yɑgob. Jwøk pɑth ki Jwøøg tyëngthøø, de ceg bëëdø ɑ́ Jwøøg tyëngnëënø, mɑ́ ji bënn onëënø kì yïe!” Kɑ kwï jøpwönyi Cigg okööbø kinni, “Jɑlpwönyø, löggí døøj.” Bong ngɑn mɑ ɑ́cwed pyëwe, kɑ ópëjjø ki pyëj møøgø. Akööb Yëso kinni, “Á kipe ngø ɑ nyi kööb ji kinni Mesiy bɑ wɑ̈d Debïd? Debïd kiree okööbø kì yij Wɑ̈nyi Wör kinni, ‘Jwøng-ɑ Ácwɑ̈ɑ̈j, Wɑ̈ɑ ɑ́köbbe kinni, Bëëd kì wïj kyëjɑ, gïti keny-ɑ ócïbɑ tyëng-ɑ mɑɑn yïn thɑ́ tyellí.’ Mesiy cwølli yi Debïd ɑ́ Wɑ̈n, keløg ɑ́ kinøw, Mesiy óbëëd ɑ́ wɑ̈d Debïd kidï?” Kɑ Yëso jøbɑnge köbbe teedø olïngø bëne, kinni, “Koru ri wun kipe jøpwönyi Cigg. Ge nyi tyer-ɑ wïïnø ge orugø ki ógudh mø bɑ̈rrø, o ge mɑɑr-ɑ mɑ̈dhhø yi ji kì kɑ̈jji ngyew. Ge nyi mɑɑr-ɑ bëëdø kì wɑ̈thi kwømm-ɑ døj kì sinɑgøgg geki kɑ̈jji ryëj. De ge kedh ge ruj-ɑ tyëng-ɑ mɑ̈nn møg-ɑ bɑ thwömm, ge kwɑll-ɑ kɑ̈lli thwömmɑni, o ri gen nyi nyodh gen ce gɑ ji mø døøj, kenyi kwɑ̈jji gen ki kwɑ̈jjø me bɑ̈ɑ̈r. Ge ócɑy kɑ cɑ́y mø døngø!” Kɑ̈ng-ɑ ɑ́bëëd Yëso e nenn-ɑ ji kɑ̀ lëngi gen yij sɑnduug ngyënyy-ɑ nyi muuj kì Kengø, ɑ́lïdhi ki tyëngkɑ̈rì mø gïïr ge lëng-ɑ yij sɑndug ki ngyëny. Codhe, ɑlidhe ngɑndhɑjø mɑ thwöm me wɑnge cɑn, e lëng-ɑ yij sɑndug ki gïrïc ɑ́ryew. Kɑ okööbø kinni, “Yɑ köbb-ɑ wun kidyër kinni, thwöm-ɑ bɑ ɑbuur èn, bɑ en ɑ ɑ́muuj ki ngyëny mø ngenyø kibøli ji møgɑk bënn. Ge ɑ́muuj ɑ ri ngyënyy-ɑ ɑ́döngi piny kì bɑng kɑ ɑ́rum gen ki ngyew ki jɑmm-ɑ dwɑddi yi gen. Ngɑndhɑjø men wɑnge cɑn ki mendwøng, de ɑ́muuj-ɑ ngyënyy-ɑ di ngëëwe ki gïn cɑm yi en.” Kwï jøbɑng Yëso ɑ́bëëd ge okööbø kì ri Kengø, kí kër-ɑ ótɑɑgii ki kïttì mø myëër, kí ngenyi jɑmm-ɑ nyi mëggi Jwøk. De Yëso ɑ́løøg-ɑ kinni, “Keløg ɑ́ per gïg-ɑ nenni yi wun ek bënn, bøli keny megø obëënø; owɑ̈nhi bøli kenyɑni, bong kït ɑ́kyel men-ɑ ówiy e ócungø kì kömi men-ɑ kyeelø; kïttɑni bënn ócøør piny.” Apyëëj Yëso yi teedø kinni, “Jɑlpwönyø, ɑ́ kì wɑɑng ɑ ócwöb gïg ni møgɑni? Á ngø ɑ óbëëd ɑ́ ngïji, me nyodh kinni kej cwöbi gen ɑ́cyɑ̈ngi?” Alögge kinni, “Nëën wun kidøøj kipe wu ówëny. Ji mø gïïr óbï ki nyingɑ ge okööbø kinni, ‘Bene yɑn en.’ Kí kinni, ‘Bøli kenyɑni ɑ́wɑ̈nhi!’ De wu ko løg bɑng gen. Keny-ɑ ólïng wun ki wöddi liny geki ɑgwɑg, wu ko bwøg, mɑ́ gïgɑni di dwɑddø o ge cwöb gen, de ge pɑ wɑngi kinni thumi piny ɑ́cyɑ̈ngi.” Aköbbe gïn kinni, “Pödhh ónyïɑ̈ggi ki pödhh-ɑ kyeelø. Kɑ rɑ̈nhì ónyïɑ̈ggø ki rɑ̈nhh-ɑ kyeelø. Piny ónhɑ̈nhi kì kɑ̈jj mø gïïr, kɑ kɑ̈j ómɑ̈gø, kɑ yømø nɑ̈ɑ̈g tɑɑy-ɑ kelli ji. Gïg böggi mø gïïr ócwöb, kɑ ngïjjì mø døngø obëënø ge kɑ̈ɑ̈l-ɑ mɑl. De kɑ̈ng-ɑ nuti cwööb gïgɑni, wu ómɑg yi teedø, kɑ wu göggi gen ki gïgrijjø. Kɑ wu nyi gøøny gen kì sinɑgøgg, kɑ wu kïdhi gen uddi mɑg, kɑ wu kïdhi be gøønyø kì bøli rɑ̈nhì geki modïrr, kipe nyingɑ. De bene bøli kenyɑni ɑ óyod yi wun e døøj ki kwøbi Wöndøj. Pëthi wun ko nyi mɑ̈ɑ̈g ki olïng kipe gïn-ɑ ókwøb yi wun. Wu óthödhi yi yɑn ki peli wïj men nyi kwøb wun møg pɑ cuggi løøgø yi tyëngmɑ̈ɑ̈nø, wɑlɑ̀ bong bɑ̈jjø men-ɑ óyod yi gen kì dhøggi wun. Cɑgg ɑ́ wëëg wun geki mëëg wun, kí nyiimï wun, kí wɑddi wun, kí mɑ̈dhhi wun bënn, ge ómɑ̈ni ki wun, kɑ kwï wun nɑ̈g yi gen. Wu ómɑɑn yi ji bënn kipe nyingɑ. De bong yëyø ɑ́kyel men-ɑ ódëëm kì wɑ̈thi wun. Wëyi wun óyiel yi wun kɑ mïdhi yïëyø mi wun. “Keny-ɑ ólidhu Yerusɑlem e ótyegø yi yɑy me dwøng, kɑ wu ngɑ̈nyu wøw kinni kej cøøre piny ɑ́cyɑ̈ngi. Kì bøli kenyɑni, rengi tyëng Yeudiyɑ̀ kelli kïttì. Kɑ tyëng Yerusɑlem rengi gen wɑ̈g kì kɑɑl, kɑ tyëng-ɑ buti kɑɑl ko kedhi yije. Mɑ́ cyɑ̈nggɑni óbëëd gɑ ‘Cyɑ̈nggi Cɑ́y’ møg-ɑ bɑ ɑgwed kì yethi wɑ̈jji kwërø. Tyëng-ɑ mɑ̈nn møg-ɑ óbëëd gɑ ɑ́yɑjj geki møg-ɑ mïdhi ki othønhø kì bøli kenyɑni, ri gen dɑ cyën! Orɑng me dwøng ópɑ̈dhi kömi piny men, Jwøk pyëwe órënyi ki ji møg. Kwï gen ónɑ̈g, kɑ kwï gen kïdhi pödhh møøgø gɑ ɑmɑgg. Yerusɑlem ócøør piny yi ji mø pɑth ki Yeud, o óbëëd e onyønø yi jurrɑni gïti keny-ɑ óthumi kej gen. “Dɑ ngïjjì møg-ɑ ócwöb kì ri cɑ̈ng kí dwɑ̈y, kí kyell. Pödhh bënn óbëëd ge óböggø wɑ̈thi gen cungø kì kömi piny keny, ge bögg-ɑ ruuri nɑɑm omelø kí ngwölli ɑpɑgø. Ji ónɑ̈g yi wɑ̈ɑ̈rø; wɑ̈thi gen ócungi yi gïn-ɑ ópɑ̈dhi kömi piny e nɑ menɑni, mɑ́ jɑmm-ɑ teg kì mɑl ceg kɑ rungø kì kɑ̈jji gen. Codhe, o Nyɑɑr Dhɑnhø lidh yi ji e kɑ̈ɑ̈l-ɑ mɑl kì yij pøølø, ki tegø me dwøng geki mɑ̈r me dwøng. Keny-ɑ ócɑ̈gi gïgɑni ki cwöbø, lïïdhu mɑl kɑ wɑ̈thi wun tïng wun, mɑ́ bøli keny-ɑ óyieel wun ɑ́cyɑ̈ngi!” Codhe, ɑwɑɑj gɑ́j møg yi Yëso kinni, “Lidh wun ólɑm geki yenh-ɑ kyeelø. Kenyi nyog gen, kɑ yod yi wun kinni cwir ɑ́cyɑ̈ngi. Ki yuu-ɑ ni menɑni ceth, keny-ɑ ólidh wun gïgɑni ge ocwöbø, óyod yi wun kinni Pödhi Jwøk ɑ́cyɑ̈ngi. “Yɑ köbb-ɑ wun kidyër kinni, gïgɑni ócwöb bënn, ji møg-ɑ nud ɑnɑn nudd ge onëënø. Mɑl kí piny ólɑ̈ɑ̈ny, de kwøbbɑ pɑ lɑ̈ɑ̈ny. “Koru ri wun, wu ko nyi tyëg piny wu ceg-ɑ cɑm, o wu ceg-ɑ mɑdh, wɑlɑ̀ wu ceg-ɑ tɑg kì ri jɑmmi kömi piny. Keløg wu ógöögø kinøw, wu pɑ̈ɑ̈y-ɑ piny yi cyɑ̈ngɑni kɑ wu mɑge, ni kenyi mɑ̈gi ɑ́kɑ̈llì. Gïgɑni ópɑ̈dhi kömi ji bënn kì kömi piny. De nëën wun kì yethi cyɑ̈ng bënn. Kɑ wu nyi kwɑ̈jji wun ceth, o wu óbodh wun keny-ɑ ócwöb gïgɑni bënn, o wu ócuggi wun ki cung kì bøli Nyɑɑr Dhɑnhø.” Kɑ Yëso nyii rïïjø e pwöny-ɑ ji kì yij Kengø, kɑ nyi kedh-ɑ wɑ̈g kì kɑɑl kì wɑ̈r, kɑ nyi nïnn-ɑ wïj Kïti Dhetun. Kɑ ji nyi møøl-ɑ yij Kengø kì mwøl yethi cyɑ̈ng bënn, be lïngø ki kwøbbi Yëso. Kɑ bøli kej Kwëër Olwëny obëënø, kwërɑni ɑ nyi cwøl ɑ́ Kwëër Ákɑɑdh. Ókwërr-ɑ døngø geki jøpwönyi Cigg ɑ́bëëd ge oyɑ̈bø ki yöö men nɑ̈g gen Yëso, mɑ́ ge ɑ́bëëd ge óböggø yi teedø. Kɑ Cethɑn kedh-ɑ ri Yeudɑ̀ ɑ cwøl ɑ́ Iskɑryøt, jɑlɑni bɑ ɑ́kyel kì kelli tyëngwöödø gɑ pyɑ̈rø wïdɑ́ryew. Kɑ Yeudɑ̀ kedh-ɑ yï ókwërr-ɑ døngø geki kwï bölidhhi Kengø, kɑ gï köbbe yuu-ɑ cugge cïbi Yëso cinggi gen. Kɑ pëthi gen ómïnø, kɑ kwøb reb gen kinni, Yeudɑ̀ óthödhi ki ngyëny. Kɑ Yeudɑ̀ oyïëyø, kɑ oyɑ̈bø ki keny-ɑ ócïbe Yëso cinggi gen e kwïj yi teedø. Kɑ cyɑ̈ɑ̈ng Kwëër Olwëny obëënø, bøli keny-ɑ nyi ngɑɑl órömmi Kwëër Ákɑɑdh. Kɑ Pïtør geki Jøn köbbi yi Yëso kinni, “Kedh wun kɑ jɑmmi Kwëër Ákɑɑdh gwir wun, o wɑ cyɑ̈ɑ̈m wɑ.” Apëjji gen kinni, “Dwɑddi yi yïn o gwir yi wøn kì keny?” Aköbbi gen yi Yëso kinni, “Keny-ɑ órum wun ki wɑ̈dhi kɑɑl, wu órøøm ki jɑl me kɑ̈ddi ki pugi pï. Kɑ wu løgu bɑnge gøl-ɑ ókedhe. Kɑ jɑlkɑl köbbu kinni, ‘Jɑlpwönyø okööbø kinni, ɑ́gøne øn-ɑ yije ócɑɑmɑ gïi Kwëër Ákɑɑdh wøki jøbɑngɑ?’ Wu ónyudhe ød mɑl me lɑɑj, me rumø ki pedhø. Gwiru jɑmmi Kwëër Ákɑɑdh kì kenyɑni.” Codhe, ɑkedh Pïtør geki Jøn, kɑ møgɑni yuud gen ceth ni kɑ ɑ́kwøøb gen yi Yëso. Kɑ gïgcɑmmi Kwëër Ákɑɑdh gwøg yi gen. Keny-ɑ ɑ́bëën bøli keny-ɑ nyi cɑɑg jɑmmi kwër ki cɑmø, e Yëso rum pëggi tɑw geki jøbɑnge. Aköbbe gïn kinni, “Ádwɑddi yi yɑn ki mendwøng kinni o gïi Kwëër Ákɑɑdh men cɑm yi wɑ kì kej ɑ́kyel, yɑ nuti rɑngø. Yɑ pɑ cigi cɑm ki Kwëër Ákɑɑdh gïti keny-ɑ óbëën Pödhi Jwøk.” Codhe, kɑ Yëso ókɑ̈bbø ki óthɑ̈gi, kɑ Jwøk pwøje, ɑkööbe kinni, “Kwɑny wun óthɑ̈gi men, kɑ nywɑg wun. Yɑ pɑ cigi mɑdh këti ki møgi oløg gïti keny-ɑ óbëën Pödhi Jwøk.” Codhe, kɑ Yëso ókɑ̈bbø ki ópun, kɑ Jwøk pwøje, ɑpøde gøn, kɑ gø mëgge gïn, ɑkööbe kinni, “Men bɑ dëlɑ, men-ɑ muuj yi yɑn kiper wun. Nyi gwøgu møg, gɑ møg nyi pɑɑr yɑn yi wun.” Keny-ɑ ɑ́rum gen ki cɑm, kɑ óthɑ̈gi kwɑnye, kɑ okööbø kinni, “Óthɑ̈gi men bɑ lwöm-ɑ nyɑ̈n kì kɑɑm Jwøk geki jie. Lwömɑni cɑ̈gi kɑ remɑ, rem-ɑ ókøny piny kiper wun. “De ngɑn-ɑ ótwɑny yɑn, cinge ying-ɑ yij lwøl ɑ́kyel ki cingɑ. Gïn-ɑ ɑ́cïb yi Jwøk kipe Nyɑɑr Dhɑnhø ócwöb, de ngɑn-ɑ ótwɑnyii ree dɑ cyën me dwøng!” Acɑ̈gi gen ki pyënyi ri gen, mɑ løge men kì kelli gen, ɑ cuggi gwøgi gïn ni menɑni. Kɑ tyëngwöödø ócɑ̈gø pëmø thyew ki mɑ løge men ɑ mɑl kì kelli gen. De ge ɑ́köbbi yi Yëso kinni, “Rɑ̈nhi pödhh-ɑ kyeelø, jɑɑg-ɑ jii gen. O tyëng-ɑ jyɑ̈gø nyi tyer-ɑ cwøllø gɑ ji mø göggi ji ki gïgdøj. De wu pɑ bëëdø kinøw, wiy ngɑn-ɑ dwøng kì kelli wun bëëde e nɑ en ɑ thinh, o jɑgø bëëde e nɑ bɑ̈ng. Á men ɑ pere teg, ngɑn-ɑ pëggi piny be cɑm, wɑlɑ̀ ngɑn-ɑ göggii ki gïncɑm? Pɑth ki ngɑn-ɑ pëggi be cɑm ɑ pere teg? De yɑ ce nɑ bɑ̈ng kì kelli wun? “Wun ɑ nyi cungi kì kömɑ kenyi rɑɑng yɑn. O nɑ kɑ ɑ́thödhi yɑn ceth yi Wïyɑ ki tegø me jyɑ̈ɑ̈gɑ, wu óthödhɑ ki tegø ni menɑni ceth. Wu ócyɑ̈mø kɑ wu omɑ̈dhø kì tɑwɑ kì Pödhɑ. Kɑ wu pëgg-ɑ wɑ̈thi kwømm, wu jɑɑg-ɑ kɑ̈lli Isrɑil gɑ pyɑ̈rø wïdɑ́ryew. “Sɑymøn, Sɑymøn, Cethɑn kwɑjj-ɑ kinni o wu yieg yi en ni kenyi yieeg byel. De yɑ ɑ́kwɑ̈jji kinni o yïëyí cöge e pɑ wiy yi yïn! O nyiimyëw ótëngi gen kì bɑngí, keny-ɑ ódwöög yïɑ.” Alöggi Pïtør kinni, “Wuö, yɑ ceg-ɑ kedhi ød mɑg kyeel ki yïn, o yɑ ɑ́böyi ki thøø!” Akööb Yëso kinni, “Yɑ köbb-ɑ yïn Pïtør, óthwønh óköögø tïn, yï rum kyëdø tyel ɑ́dɑ̈g, kinni yɑ kwïj yi yïn.” Aköbbi jøwöödø yi Yëso kinni, “Keny-ɑ ɑ́örɑ wun, yï wun bong pødhi ngyëny, wɑlɑ̀ beeg ógudh, wɑlɑ̀ wɑr, ɑ́dɑ gïjø mɑ ɑ́jɑ̈ddi wun?” Alöggi gen kinni, “Bong gøn.” Aköbbe gïn kinni, “De ɑnɑn, ngɑn yïe di pødhi ngyëny, wɑlɑ̀ beeg ógudh, kɑ̈lle gïn. Keløg yïí bong pilø, ngeew ógødhí wɑ̈g kɑ yï ngëëw. Wɑ̈nyi kwërø okööbø kinni, ‘Ákwɑɑn kelli tyëngorøg.’ O kwøbbi wɑ̈nyɑni bɑ møg pɑ̈dhi kɑ̈jji gen, møg-ɑ ɑ́gwed kiperɑ, bɑ møg bï gɑ dyër ceth.” Kɑ jøbɑnge okööbø kinni, “Lïdhí, pil ɑ́ryew ɑ keny èn, Wuö.” Aköbbe gïn kinni, “Døj, ɑ́rum!” Adhwödh Yëso kì kɑɑldwøng, kɑ kedh-ɑ wïj Kïti Dhetun, ni kenyi kedhe cøn, kɑ jøge løg-ɑ bɑnge. Kɑ ɑ́wɑ̈dhe kenyɑni, ɑköbbe gïn kinni, “Kwɑ̈jji wun, o wu ócög wu pɑ thɑb.” Kɑ Yëso ókedhø kì buti gen, kɑ wɑ̈dh-ɑ kɑɑm me dëëm yi tuug kɑ̀ bɑ̈ddii. Arume cønge piny, kɑ ókwɑ̈jjø kinni, “Wïyø, keløg e odwɑddø yi yïn, nyiig óthɑ̈ngi orɑng men kì butɑ! De pɑth ki gïn-ɑ dwɑddi yi yɑn, dɑ́ gïn-ɑ dwɑddi yi yïn ɑ gwøg.” Kɑ wëywödø obëënø kì mɑl, ɑcïïje gøn. Kɑ Yëso ókwɑ̈jjø ki menteg, e pyëwe orɑ̈mø. Kɑ kwɑ̈ge dyëëm-ɑ piny e nɑ remø. Keny-ɑ ɑ́rume kwɑ̈jjø, ɑdøøge yï jøbɑnge kɑ gï yuude ge pïdø yi kïïmø, o ge nenø. Aköbbe gïn kinni, “Wude ɑ neni wun? Dhwödhu mɑl kɑ wu kwɑ̈jji wun, o wu ócög wu pɑ thɑb.” Kɑ̈ng-ɑ ɑ́nudd Yëso e okööbø, kɑ ji møøgø obëënø, ɑ́ Yeudɑ̀ ɑ pyejji gen, Yeudɑ̀ bɑ jɑl ɑ́kyel kì kelli tyëngwöödø møg-ɑ pyɑ̈rø wïdɑ́ryew. Apödhe be nuumi Yëso, Kɑ köbbi yi Yëso kinni, “Yeudɑ̀, Nyɑɑr Dhɑnhø twɑny yi yïn kɑ nuumø?” Jøbɑnge møg-ɑ ɑ́ying bute, keny-ɑ ɑ́lidh gen gïn-ɑ kømi cwöbø, ɑpëjji gen kinni, “Wuö, pwöd wø gen ki pilli wøn?” Kɑ bɑ̈ng Ókwër-ɑ Dwøng gøj yi ɑ́kyel kì kelli gen ki pilø, kɑ yïth kyëje juude wɑ̈g. Akööb Yëso kinni, “Árum! Ko di gïn ni menɑni.” Codhe, kɑ yïth bɑ̈ngɑni nywɑle, kɑ gø dwøøge keje. Tyëng-ɑ ɑ́bï be mɑgi Yëso, bɑ jɑggi ókwër, kí bölidhh-ɑ nyi kor Kengø, kí jøgdøngi Yeud. Kɑ ge köbbi yi Yëso kinni, “Wu ɑ́ceg bëënø wu kɑ̈ll-ɑ pil kí lødh, de yɑ nɑ ngetigöj. Yɑ nuti nywɑɑl wun, kenyi bëëdɑ kì buti wun kì yij Kengø yethi cyɑ̈ng bënn. De men bene bøli kej wun, eni bøli keny-ɑ jyɑ̈ɑ̈g yi muudhø.” Kɑ Yëso mɑg gen, kɑ gø kɑ̈l gen. Akïdhi ge gøn gøl Ókwër-ɑ Dwøng. Kɑ Pïtør ókedhø e ólugø kì bɑng gen, e lɑ̈wi. Keny-ɑ ɑ́rum ɑlɑthkerr ki kodh ki mɑc kì dïkɑl, ɑpëggi Pïtør kelli gen. Kɑ Pïtør lidh kì cɑɑr mɑc yi ngɑndhɑjø me göögø ɑ́ bɑ̈ng, kɑ gø tide kidøøj, ɑkööbe kinni, “Jɑɑl, ɑ́cyɑ̈dhi kɑ Yëso thyew.” De Pïtør ɑ́kyëëd kinni, “Jɑlɑni kwïj yi yɑn, ngɑn!” Kì bɑng nyɑ keny me thiinh, kɑ Pïtør lidh yi jɑl megø, ɑkööbe kinni, “Yï bɑ ɑ́kyel kì kelli gen thyew.” Akyëëd Pïtør kinni, “Yɑ pɑth, jɑl!” Kɑ ɑ́thumi sɑɑ̀, ɑdhiingii yi jɑl megø kinni, “Jɑɑl, pɑ bɑ̈jji bëëdø e cyɑ̈dhø kɑ Yëso, mɑ́ e bɑ jɑl Gɑlelì thyew!” De Pïtør ɑ́kyëëd kinni, “Jɑl, gïn-ɑ kømmi yi yïn kwïj yi yɑn!” Kì bøli keny-ɑ ɑ́nudd Pïtør e okööbø ceth, kɑ óthwønh oköögø. Kɑ Wë ree luge, ɑlïïdhe yï Pïtør. Kɑ Pïtør ópɑ̈dø ki møg-ɑ ɑ́köbbii yi Wë kinni, “Óthwønh óköögø tïn, yï rum kyëdø tyel ɑ́dɑ̈g, kinni yɑ kwïj yi yïn.” Akedhi Pïtør dhø kɑl, kɑ óywöngø ki rɑ̈ɑ̈m pyëwe. Kɑ Yëso gɑggi yi jøg-ɑ korii, kɑ gø pwöd gen. Nyinge ɑ́twöj gen kɑ ge okööbø kinni, “Bɑ̈ggí! Á men ɑ ɑ́gøj yïn?” Kɑ gø köbbi gen ki gïgrijjø mø gïïr. Keny-ɑ ɑ́ru wøw, kɑ jøgdøngø geki ókwërr-ɑ døngø kí jøpwönyi Cigg ge ócugø bënn kì kej ɑ́kyel, kɑ Yëso kïdhi burɑni. Kɑ Yëso köbbi gen kinni, “Köbbí wøn, yïn ɑ bɑ Mesiy?” Kɑ Yëso ólöggø kinni, “Ke köbbɑ wun, wu pɑ yïëy, o ke pyëjɑ wun, wu pɑ löggi. De cɑg ɑnɑn gïti dhuki megø, Nyɑɑr Dhɑnhø óbëëd ɑ wïj cingi kyëëj Jwøk Áyïmø.” Akööb gen bënn kinni, “Ngøø, bene yïn Wɑ̈d Jwøk?” Aløøge kwøbbi gïn kinni, “Ákwøb yi wun, bɑ yɑn.” Akööb gen kinni, “Á kipe ngø ɑ yɑ̈ɑ̈b wɑ ki ji møg köngi kipe gïn-ɑ ɑ́kwøb yi en? Møg-ɑ ɑ́kwøbe ɑ́lïngi yi wɑ kiriee!” Codhe, kɑ ɑkunɑni bëne odhwödhø, kɑ Yëso peej gen yï Pilɑtø. Kɑ ge ócɑ̈gø gøønyi Yëso kinni, “Jɑɑl, ɑ́mɑg yi wøn e köbb-ɑ tyëng pödhi wøn ki kwøb mø rënyi wɑ̈thi gen, kɑ gï mɑ̈ɑ̈ne cudi Kɑysɑr ki gwɑ̈j, o ree cwølli yi en ɑ́ Mesiy, rɑ̈dh.” Apyëjii yi Pilɑtø kinni, “Bene yïn Rɑ̈ɑ̈dh Yeud?” Kɑ Yëso ólöggø kinni, “Ákwøb yi yïn ceth.” Kɑ jɑggi ókwër geki teedø köbbi yi Pilɑtø kinni, “Bong gïjø mɑ ɑ́yod yi yɑn e óbɑjø yi jɑɑl.” Kɑ ge odyëjø ki gøny kinni, “Jɑlɑni rëny-ɑ wɑ̈thi ji ki pwöny-ɑ pwönyi yi en. Ácɑ̈g ɑ Gɑlelì, o ɑ́wɑ̈nhi keny ɑnɑn.” Keny-ɑ ɑ́lïngi møgɑni yi Pilɑtø, ɑpëjje kinni, “Jɑɑl, bɑ jɑl Gɑlelì?” Keny-ɑ ɑ́yode gøn kinni Yëso kɑ̈ɑ̈l-ɑ myërr-ɑ jɑɑg yi Ërödøs, o Ërödøs ɑ́bëëd e nud kì Yerusɑlem kì yethi cyɑ̈nggɑni, ɑöre Yëso yï Ërödøs. Ërödøs keny-ɑ ɑ́lidhe Yëso, kɑ pyëwe ceg-ɑ mïnø ki mendwøng, mɑ́ kwøbbi Yëso rumø ki lïngø yi en, o ɑ́dwɑdd-ɑ yïddø ki Yëso ki keny me bɑ̈ɑ̈r. Ádwɑdd-ɑ lidhi Yëso, e ogöögø gïïngɑ̈ngø. Kɑ Ërödøs Yëso pyënye ki pyëj mø gïïr, de bong gïjø mɑ ɑ́løøg yi Yëso. Jɑggi ókwër geki jøpwönyi Cigg ɑ́bëëd ge ócungø kì kenyɑni, ge gøøny-ɑ Yëso ki gøønyø me teg. Kɑ Yëso gɑggi yi Ërödøs geki ɑlɑthkerr møge, codhe ɑlunyi gen ree ki ógødh me døj, kɑ gø döggi gen Pilɑtø. Pilɑtø ɑ́bëëd ge mɑ̈n geki Ërödøs ki keny me bɑ̈ɑ̈r, de ge ɑ́ceg gwøg ki mɑ̈dhh dicyɑ̈ngɑni. Kɑ teedø bëne geki jɑggi ókwër, kí jøgdøngi Yeud, cwööl kej ɑ́kyel yi Pilɑtø. Aköbbe gïn kinni, “Jɑɑl, ɑ́muuj wun yɑn, wu okööbø i ókɑ̈ddø ki göj kì kelli ji. De ɑ́pyënyɑ kì bøli wun bënn, o nuti yodø yi yɑn kinni dɑ gïnrɑj men-ɑ ógwøgø yi en kì kelli møg-ɑ ɑ́gøønyu en bënn. Thyew, Ërödøs bong gïnrɑj mɑ ɑ́yode men-ɑ ógwøgø yi en, bene ɑ bɑnge dögge gøn wɑ. Ni kɑ̀ nëën wun, bong gïjø mɑ ɑ́gwøge me pere cugge kuumø ki thøø. Ópwöd yi yɑn, o gøny.” Nyi dɑ ɑmɑg me nyi gøny yi Pilɑtø cyɑ̈ɑ̈ng Kwëër Ákɑɑdh. Kɑ teedø bëne ceg-ɑ ryeerø wïj ɑ́kyel kinni, “Nɑ̈ɑ̈g! Kɑ wø gönyí Bɑrɑbɑ̀!” Bɑrɑbɑ̀ ómɑgø kɑ per ɑgwɑg me tug en kì kɑɑlɑni, kí per dhɑnhø me nɑ̈ɑ̈g en. Pilɑtø ɑ́dwɑdd-ɑ gønyi Yëso, kɑ møgɑni köbbe teedø kinøw. De ge ɑ́yöd ge ceg-ɑ ryeerø këti kinni, “Gur wïj yɑdh ɑrïw! Gur wïj yɑdh ɑrïw!” Apëjji Pilɑtø kì ri dɑ̈ɑ̈g lögge kinni, “Á kipe ngø? Á ngø ɑ ɑ́rënye? Bong gïjø mɑ ɑ́yodɑ me pere cugge nɑ̈gø. De ópwöd, o gøny.” De ge ɑ́cög ge nuti wïyø ryeerø kinni, i gur Yëso wïj yɑdh ɑrïw. Kì cyɑ̈n, kɑ Pilɑtø tyɑm yi ɑwøøw gen. Akuum Yëso ki thøø yi Pilɑtø ni kɑ ɑ́dwɑddii yi teedø. Kɑ jɑl-ɑ ɑ́dwɑddi yi gen gøny, eni jɑl-ɑ ɑ́ceg ki kïdhi ød mɑg kiper nɑ̈gi dhɑnhø, kɑ Yëso mëgge gïn, o gø göggi gen gïn-ɑ dwɑddi yi gen. Kɑ Yëso køøl wɑ̈g kì kɑɑl yi ɑlɑthkerr. Arøøm gen ki jɑl me cwøl ɑ́ Sɑymøn jɑl Serin, e kɑ̈ɑ̈l-ɑ pwödhø. Amɑg gen Sɑymøn kɑ yɑdh ɑrïw cïb wïj tøge, o gø byelle kì bɑng Yëso. Ji mø gïïr ɑ́bëëd ge ólugø kì bɑng Yëso, kelli gen dɑ tyëng-ɑ mɑ̈nn mø pëthi gen rɑ̈mø kipere, o ge cyɑ̈dhi ge ywøg-ɑ en. Kɑ Yëso ree luge gïn, ɑkööbe kinni, “Wun ɑ mɑ̈nni Yerusɑlem, wu ko ywøg yɑn, de ywøg wun ri wun, wuki nyigi wun. Ácyɑ̈ngi eni bøli keny-ɑ ókööb ji kinni, ‘Tyëng-ɑ mɑ̈nn møg-ɑ bøøjø, ɑ thïnhhi gen nuti pɑ̈nyø dhødhø, ri gen dɑ gyëdh!’ Kì bøli kenyɑni, kïttì óköbbi yi ji kinni, ‘Pɑ̈dhu kömi wøn!’ Kɑ kɑ̈jj-ɑ bɑ ótøng köbbi kinni, ‘Rïgu wøn piny!’ Mɑ́ keløg ɑ́ gïn ni men ɑ göggi yɑdh e mɑr, ógögg-ɑ ngø keny-ɑ ówøwe?” Ádɑ tyëngorøg ɑ́ryew mɑ ɑ́køøl wɑ̈g kì kɑɑl kyeel ki Yëso, ge kïdh-ɑ be nɑ̈gø. Keny-ɑ ɑ́wɑ̈dhi gen keny-ɑ cwøl ɑ́ Tɑngdɑr, ɑgur Yëso wïj yɑdh ɑrïw, kɑ tyëngorøg møgɑni gur wɑ̈thi yenh ɑrïw thyew, ɑ́kyel ying-ɑ wïj kyëëj Yëso, o men-ɑ kyeelø ying-ɑ wïj cɑɑme. Kɑ Yëso okööbø kinni, “Wïyø, lɑ̈ɑ̈m pyëwí ki gen, mɑ́ gïn-ɑ gwøg yi gen kwïj yi gen.” Kɑ ógudhe pɑ̈ngi yi ɑlɑthkerr ge ceg kɑ lengø ki wél. Ji ɑ́cungi ge onëënø ge lɑ̈wi, e Yëso ogɑggø yi jøg-ɑ jɑgg kinni, “Ji møøgø ɑ́yiele. Wiy yiele ree keløg e bɑ Mesiy men-ɑ ɑ́yieny yi Jwøk.” Ágɑggi yi ɑlɑthkerr thyew, ge ɑ́kedhi yï Yëso kɑ gø thödhi gen ki møgi oløg me wɑj. Kɑ ge okööbø kinni, “Keløg yï bɑ Rɑ̈ɑ̈dh Yeud, yiel rií!” Ádɑ gwedd kì wïj yɑnh-ɑ ɑ́gurii møg-ɑ ógwedø kinni, “Rɑ̈ɑ̈dh Yeud èn.” Kɑ ɑ́kyel kì kelli tyëngorøg kì wïj yɑdh ɑrïw, ócɑ̈gø yɑnyyi Yëso kinni, “Yï pɑth ki Mesiy? Yiel rií kɑ wø yieel!” De ɑ́kyëddi yi jɑlorøg men-ɑ kyeelø, kɑ gø köbbe kinni, “Yï pɑ böggi ki Jwøk! Yï bɑ ɑcɑy ki cɑ́y-ɑ ɑ́cɑɑyii. Wɑ ɑ́cɑy kɑ dyër; wɑ cɑ̈y-ɑ per gïn-ɑ ɑ́rënyi yi wɑ. De jɑɑl, bong gïjø me rɑj mɑ ɑ́gwøge.” Akööbe kinni, “Yëso, pɑr yɑn keny-ɑ óbëën yïn ɑ́ Rɑ̈dh.” Aköbbii yi Yëso kinni, “Yɑ köbb-ɑ yïn kidyër kinni, yï óying butɑ tïn kì yij Pɑrdös.” Keny-ɑ ɑ́gud cɑ̈ng ki löj, kɑ piny bëne ogöögø ki muudhø, kɑ gït-ɑ sɑɑ̀ ɑ́dɑ̈g kì böörø piny looj. Mɑ́ cɑ̈ng cɑre ɑ́lɑ̈ɑ̈ny. Kɑ ógønh-ɑ bɑ gëng kì yij Kengø ópyëdø kì dïdyëre kɑ ree pɑ̈nge ɑ́ ɑ́ryew. Aryeer Yëso ki cwɑg mø døngø kinni, “Wïyø, wëyɑ cïbɑ’ cingí.” Keny-ɑ ɑ́rum Yëso ki kwøbi møgɑni, ɑthøwe. Dhɑbïdh dej keny-ɑ ɑ́lidhe gïg-ɑ ɑ́cwöb, ɑlenhe Jwøk kinni, “Jɑɑl, bëëdø ɑ́ ngɑntir kidyër.” Tyëng-ɑ ɑ́bëëd ge ócungø kì kenyɑni ge onëënø, kɑ ɑ́lidh gen gïg-ɑ ɑ́cwöb, ɑdøøg gen kɑɑl ge tïngg-ɑ cinggi gen, pëthi gen orɑ̈mø. De møg-ɑ bɑ wɑddi Yëso geki mɑ̈dhhe kí tyëng-ɑ mɑ̈nn møg-ɑ ɑ́lug bɑnge ge kɑ̈ɑ̈l-ɑ Gɑlelì, ɑ́cungi ge lɑ̈wi, ge onëënø. Ádɑ jɑl me døøj me mïdhi kwøbbi Jwøk, o bɑ jɑgø kì buri Yeud me cwøl ɑ́ Yosep. De gïg-ɑ ɑ́göggi Yëso yi jɑggi Yeud ɑ́bëëd gï nuti yïëëy en. Bɑ jɑl Arimɑthiyɑ̀, o ɑ́bëëd e nenn-ɑ bëëni Pödhi Jwøk. Yosep ɑ́kedhi yï Pilɑtø be kwɑjji dëël Yëso. Kɑ Yëso kɑ̈ɑ̈le piny kì wïj yɑdh ɑrïw, ɑbɑɑne gøn yij ógødh, kɑ gø kïdhe yij rörø men-ɑ ótwegø kì ri kït. Rörɑni nuti pɑ̈nyø kïdhø ki dhɑnhø. Cyɑ̈ngɑni ɑ́bëëd ɑ́ cyɑ̈ɑ̈ng gwøg ɑ́bïj, o cyɑ̈ɑ̈ng Sɑbɑth cɑ̈g-ɑ́ɑ̀ ri buddi cɑ̈ng. Tyëng-ɑ mɑ̈nn møg-ɑ ɑ́bï ki Yëso kì Gɑlelì, ɑ́kedhi bɑng Yosep, ɑlidh gen keny-ɑ ɑ́cïb dëël Yëso yi Yosep. Codhe, ɑkedhi tyëng-ɑ mɑ̈nn be yɑb ki mɑ̈ɑ̈th møg-ɑ yømi gen med. Kɑ ge oywömø kì cyɑ̈ɑ̈ng Sɑbɑth ni kɑ ɑ́kwøbii kì yethi Cigg. Kì mwøl ceth kì cyɑ̈ng-ɑ mɑl kì yij osboo, ɑ ɑ́møøl tyëng-ɑ mɑ̈nn kun-ɑ di rörø, ge kɑ̈ll-ɑ mɑ̈th-ɑ yømi gen med møg-ɑ ɑ́gwøg yi gen. Kɑ kït yood gen e óngyeel wɑ̈ye kì dhø rörø, de keny-ɑ ɑ́kedhi gen yiny-ɑ ød, dëël Wë Yëso ɑ́cög gø nuti yood gen. Kɑ̈ng-ɑ́ nudd wɑ̈thi gen cungø yi møgɑni, kɑ jøg ɑ́ryew mø ógudhi gen rɑ̈nggø ceg-ɑ ì nywil, kɑ ge ócungø kì buti gen. Abwøg tyëng-ɑ mɑ̈nn ki mendwøng, kɑ wɑ̈thi gen kuul gen piny. Aköbbi gen yi jøgɑni ryeet kinni, “Wude ɑ yɑb wun ngɑn nëënø kì kelli tyëngthøø? Tøøk kì keny; ɑ́dhwödh. Pɑru møg-ɑ ɑ́köbbe wun keny-ɑ ɑ́yinge Gɑlelì, kinni, ‘Nyɑɑr Dhɑnhø ócïb cinggi tyëngorøg, kɑ gø gur gen wïj yɑdh ɑrïw, o ódhwödh kì yij thøø kì dɑ̈ɑ̈g cyɑ̈ng.’ ” Kɑ møg-ɑ ɑ́kwøb yi Yëso pɑr yi tyëngɑni. Akedh gen kɑ tyëngwöödø gɑ pyɑ̈rø wïdɑ́kyel köbbi yi gen, geki jøbɑng Yëso møg-ɑ kyeelø. Bɑ Meerì Mɑgdɑliyɑ̀, kí Anɑ̀, kí Meerì meyi Yɑgob, kí tyëng-ɑ mɑ̈nn møøgø, ɑ ɑ́köbbi tyëngwöödø ki gïg-ɑ ɑ́cwöb bënn. De kwøbbi tyëng-ɑ mɑ̈nn nuti yïëëy gen, mɑ́ gï lïngi yi gen e nɑ pyed yøw. De Pïtør ɑ́dhwödh kɑ reng-ɑ kun-ɑ di rörø. Amëdde yije, kɑ lidh-ɑ ógønh-ɑ ɑ́bëëd yije óbɑɑn Yëso. Adøøg Pïtør pɑc e ngɑ̈ngø, gø kwïje mɑ løge ngø ɑ cwöbø. Kì cyɑ̈ngɑni ceth, ɑ́dɑ jøbɑng Yëso ɑ́ryew mɑ ɑ́kedhi pɑc me cwøl ɑ́ Emɑos, kɑɑm pɑnɑni geki Yerusɑlem bɑ kïlomïtïr pyɑ̈rø wïdɑ́kyel. Ge ɑ́cyɑ̈dhi ge okööbø kì ri gïg-ɑ ɑ́cwöb bënn. Kɑ̈ng-ɑ ɑ́cyɑ̈dhi gen ge opëmø, kɑ Yëso obëënø, kɑ ócɑ̈gø’ cyɑ̈dhø ki gen, de gø nuti ngij gen. Codhe, ɑkööbe kinni, “Á gïg ɑ ri gen kööb yi wun, wu ócyɑ̈dhø?” Kɑ jøgɑni ryeet ócungø, ge nënni pëthi gen rijjø. Alöggi jɑl-ɑ cwøl ɑ́ Kelyöbɑ̀ kinni, “Bene yïn wëël-ɑ döngø kì Yerusɑlem e nuti lïngø ki gïg-ɑ ɑ́cer cwöbø?” Apyëëj gen yi Yëso kinni, “Á gïg mɑ ngø?” Akööb gen kinni, “Wø kømm-ɑ Yëso jɑl Nɑdhɑreth. Ábëëd ɑ́ jɑltöng mɑ ɑ́göög ki gïgdøngø mø gïïr kì bøli Jwøk, kí bøli teedø. Jɑggi pödhi wøn geki jɑggi ókwër, gen ɑ ɑ́muujii kinni cɑy ki thøø, kɑ gø gur gen wïj yɑdh ɑrïw. De wø ɑ́gɑ̈nn-ɑ kinni bɑ en ɑ di yiel Isrɑil. Pɑth ki codhi gen thyew, ɑ́göög ɑnɑn ki cyɑ̈ng ɑ́dɑ̈g kër-ɑ ɑ́cwöb gïgɑni. Átïni wɑ̈thi wøn ɑ́cuung yi kwøbbi tyëng-ɑ mɑ̈nn møøgø kì kelli wøn. Ge ɑ́møøl rörø ɑ́cøøn kì mwøl, de dële nuti yodø yi gen kì kenyɑni. Adwöög gen kɑ wø köbbi gen ce dɑ wëywödd ɑ́ryew mø liidh gen, kɑ ge okööbø i Yëso onëënø! Kwï jø wøn ɑ́kedhi rörø thyew. Kɑ gø yod gen ceth ni kɑ ɑ́kwøbii yi tyëng-ɑ mɑ̈nn, de Yëso nuti liidh gen.” Codhe, ɑköbbi gen yi Yëso kinni, “Wu bɑ dhëgg! O wu dhɑ̈li yïëyi kwøbbi jøtöng bënn. Ge ɑ́kööb kinni i Mesiy órɑngi yi gïgɑni bënn, o kedhe yij dhwɑ̈nge cyee.” Codhe, kɑ ócɑ̈gø kì ri Mosɑ̀ gïti kɑ ɑ́tyëge jøtöng bënn, e nyudh-ɑ gen ki gïg-ɑ ógwedø kì ree kì yethi wɑ̈jji kwërø. Keny-ɑ ɑ́wɑ̈dhi gen buti Emɑos, kɑ Yëso ókedhø e dhɑ̈y ce ceg-ɑ pöödhø. Amɑ̈ɑ̈nii yi gen, ge okööbø kinni, “Buddí kì buti wøn keny, mɑ́ wøw ɑ́yuudh, piny køm-ɑ gwøg ki wɑ̈r.” Codhe, ɑtönge pɑc be buddø. Keny-ɑ ɑ́pëggi gen be cɑm, ɑkɑ̈bbe ki ópun, kɑ Jwøk pwøje, ɑpøde gøn kɑ gø mëgge gïn. Kɑ Yëso ngij yi gen kì bøli kenyɑni ceth. De Yëso ɑ́wɑ̈dhi lɑ̈ɑ̈nyø yøw keny-ɑ ɑ́ngij ge gøn. Kɑ ri gen köbbi gen kinni, “Ce ying-ɑ en ɑ bëëde e nɑ mɑc ɑ lyel kì pëthee ɑ́tïni kì kö yöö keny-ɑ ɑ́kööb Yëso, e nyudh-ɑ wɑ møg-ɑ ógwedø kì yethi wɑ̈jji kwërø.” Codhe, kɑ jøgɑni ryeet, dhwödh-ɑ mɑl kì bøli kenyɑni ceth, kɑ ge døøg-ɑ Yerusɑlem. Ayuud gen tyëngwöödø gɑ pyɑ̈rø wïdɑ́kyel geki kwï jøbɑng Yëso kunɑni, ge obëëdø kì kej ɑ́kyel. Gï ɑ́yuud gen ge okööbø kinni, “Wë ɑ́dhwödh kidyër kì yij thøø! Ácwöb kì bøli Sɑymøn.” Codhe, kɑ jøgɑni ryeet olwöbø ki gïg-ɑ ɑ́cwöb kì kö yöö, kí kër-ɑ ɑ́ngij gen Yëso keny-ɑ ɑ́pøde ópun. E jøgɑni nudd ge wɑj-ɑ møgɑni ceth, kɑ Yëso kiree ócungø kì dïdyëri gen, ɑköbbe gïn kinni, “Wu óbëëdø ki mër.” Kɑ ge obwøgø ki mendwøng, ge orumø ce ge liidh-ɑ tïbi ngɑnthøø. De ge ɑ́köbbi yi Yëso kinni, “Wude ɑ böggi wun? Ede yethi wun ɑ pyëër gen? Lidhu tyellɑ geki cinggɑ. Bɑ yɑn kiriɑ! Nywɑlu yɑn kɑ yɑ lidh wun, mɑ́ tïbi dhɑnhø bong dël kì ree, ni kɑ̀ nëën wun, riɑ dɑ dël.” Keny-ɑ ɑ́rum Yëso ki kwøbi møgɑni, ɑnyudhe gïn cingge geki tyelle. Kɑ̈ng-ɑ́ nuti yïëëy gen yi kɑ̀ med pëthi gen, ɑkööb Yëso kinni, “Dɑ gïncɑm kì yï wun?” Athödhi ge gøn ki budi rëjø men-ɑ óthɑlø. Kɑ rënyɑni kwɑny yi Yëso, ɑcɑme gøn e onennø yi gen. Kɑ gï köbbe kinni, “Bene gïn-ɑ ɑ́wɑngi yi yɑn, kɑ̈ng-ɑ ɑ́nudd yɑ obëëdø kì kelli wun kinni, gïg-ɑ bɑ ɑgwed kì yij wɑ̈nyi Ciggi Mosɑ̀, kí wɑ̈jji jøtöng, kí Wɑ̈nyi Wör, bɑ møg-ɑ ɑ́dwɑddi ceth kinni o ge pɑ̈dhi gen kɑ̈jji gen.” Codhe, kɑ wɑ̈thi gen yieb yi Yëso, o ge cuggi gen ki yodi møg-ɑ bɑ ɑgwed kì yethi wɑ̈jji kwërø. Gï ɑ́köbbe kinni, “Bɑ ɑgwed kinni, Mesiy órɑngi kɑ odhwödhø kì yij thøø kì dɑ̈ɑ̈g cyɑ̈ng. Kí kinni jurrì bënn ócïj ki nyinge, kipe kinni o minni gen kí bëëdi gen wil yi gen, o lɑ́ɑ̀w ódwöög piny kipe orøøg gen, gwøngɑni cɑ̈g-ɑ́ɑ̀ Yerusɑlem. Wun ɑ óköbbi ji kwøbbɑni. Wu óörɑ gïn-ɑ ɑ́kwøb yi Wïyɑ kinni gø ómëgge wun, de bëëd wun kì Yerusɑlem gïti keny-ɑ óbëën tegø menɑni kömi wun, e kɑ̈ɑ̈l-ɑ mɑl.” Kɑ Yëso jøbɑnge peeje wɑ̈g kì kɑɑl, kɑ ge wɑ̈dh-ɑ buti Betɑnì, kɑ cingge tïnge, kɑ kwëng kønye kömi gïn. Kɑ̈ng-ɑ ɑ́nudd e kwëng-ɑ gen, kɑ ókedhø kì buti gen, e kedh-ɑ mɑl. Amɑɑl Yëso yi gen, kɑ ge døøg-ɑ Yerusɑlem pëthi gen omedø. Kɑ ge nyii rïïjø kì Kengø, ge lejj-ɑ Jwøk. Kì ri cɑ̈gø cøn, Lögø ɑ́bëëd e nud, o Lögø ɑ́ying-ɑ yï Jwøk, o Lögø ɑ́bëëd ɑ́ Jwøk. Lögø ɑ́ying-ɑ yï Jwøk kì ri cɑ̈gø cøn. Jɑmmì bënn ɑ́gwøg-ɑ ri Lögø, bong gïjø ɑ́kyel kì ri gïg-ɑ ɑ́cwɑ̈j me nuti gwøgø kì ree. Lögø ɑ ree ɑ́kɑ̈ɑ̈l yi nënnì, o nënnɑni ɑ́bëëd ɑ́ cɑr kipe dhɑnhø bëne. Cɑrɑni ceg-ɑ meny kì yij muudhø, de nuti pɑ̈nyø nɑ̈gø yi muudhø. Jwøk, jɑlwööne ɑ́öre, jɑlɑni cwøl ɑ́ Jøn. Jɑlɑni ɑ́bï-ɑ be köbbi ji kwøbbi cɑrɑni, o ji yïëy gen bënn. En kiree nuti bëëdø ɑ́ cɑr, ɑ́bï-ɑ be thyeri kwøbbi cɑr. Cɑrɑni, bene cɑr-ɑ dyër, eni cɑr-ɑ bï kömi piny, kɑ dhɑnhø bëne menye. Lögø ɑ́ying-ɑ kömi piny, de nuti ngijø yi kömi piny, ngö ɑ́ en ɑ ree ɑ́cwɑ̈ɑ̈j piny bëne. Ábï-ɑ pödhe, de ɑ́bɑny yi jie. De tyëng-ɑ ɑ́kwɑnyii, ɑ bɑ tyëng-ɑ ɑ́yïëyii, gï ɑ́thödhe ki dyër me göög gen ki nyigi Jwøk. Tyëngɑni nuti nywølø kɑ yuu-ɑ nyi nywøøl ji yi wëëg geki mëëg, Jwøk kiree ɑ ɑ́ceg bëëdø ɑ́ wïyi gen. Lögø ree ɑ́løge dhɑnhø, kɑ obëëdø kì kellee, e pɑ̈ngø yi dhwɑ̈ng geki dyër. Mɑ̈re ɑ́lidh yi wøn, eni mɑ̈ɑ̈r wɑ̈d Wïy, ɑ bɑ wɑ̈dkyel. Pere ɑ́kwøb yi Jøn, kɑ óryeerø kinni, “Bene ngɑn-ɑ ɑ́kømmɑ èn, keny-ɑ ɑ́kööbɑ kinni, ‘Óbï-ɑ bɑngɑ, de pëddi döng kibølɑ, mɑ́ e ɑ́bëëd e nud, yɑ nuti nywølø.’ ” Wɑ ɑ́thödhe kì ri dhwɑ̈ng-ɑ pɑ̈ng kì yïe, kɑ wɑ nyi cige thödhø. Cigg ɑ́muuj ɑ ri Mosɑ̀ yi Jwøk, de dhwɑ̈ng geki dyër ɑ́kɑ̈ɑ̈l-ɑ ri Yëso Mesiy. Bong dhɑnhø mɑ ɑ́pɑ̈nyi Jwøk ki lidhø, de Wɑ̈d Jwøk, ɑ bɑ wɑ̈dkyel, ɑ ying buti Jwøk, bɑ en ɑ ɑ́nyodh Jwøk. Kɑ jɑggi Yeud kì Yerusɑlem öd-ɑ yï Jøn ki ókwër kí Kwɑrri Leebì møg pyëjii kinni, “Yï bɑ men?” Jøn nuti bɑ̈nyø ki löggø, de ɑ́kyëëd kinni, “Yɑ pɑth ki Mesiy.” Kɑ gø pyëj gen kinni, “De yï ceg bëëdø yïn ɑ́ men? Yï bɑ Eliyɑ̀?” Kɑ okyëdø kinni, “Yɑ pɑth ki en.” Apëjji gen kinni, “Yï bɑ Jɑltöng?” Kɑ ólöggø kinni, “Yɑ pɑth.” Akööb gen kinni, “Adɑ́ köbbí wøn, yï bɑ men? Köbbí wøn, o møgɑni döggi wøn tyëng-ɑ ɑ́ör wøn. Á ngø ɑ kwøb yi yïn kì rií?” Jøn ɑ́löggi e kwøb-ɑ møg-ɑ ɑ́töng yi Icɑyɑ̀ kinni, “Yɑ bɑ cwɑggi ngɑn cwöddi kì pɑ̈l kinni, Gwøgu yuu-ɑ cyɑ̈dhi yi Wë ɑ́ óbödh.’ ” Alöggi Jøn kinni, “Ji jwɑ̈ɑ̈g yi yɑn kɑ pï, de dɑ dhɑnhø me cungi kì kelli wun, me ree kwïj yi wun. En ɑ óbï kì bɑngɑ, o yɑ pɑ døøj ki pɑ̈di wɑrre kì tyelle.” Møgɑni bënn ɑ́cwöb-ɑ Betɑnì, kì kömi Nɑm Urdun, kì tung-ɑ wɑɑng cyɑ̈ɑ̈ng mwøl, kun-ɑ ɑ́bëëd Jøn e jwɑ̈ɑ̈g-ɑ ji. Kɑ Yëso lidh yi Jøn dhuki, e bï-ɑ yïe. Kɑ Jøn okööbø kinni, “Bene Órömi Jwøk èn, en ɑ ókɑ̈l orøøg piny bëne! Men bene ngɑn-ɑ ɑ́kømmi yi yɑn, keny-ɑ ɑ́kööbɑ kinni, ‘Jɑl-ɑ óbï kì bɑngɑ, pëddi döng kibølɑ, mɑ́ e ɑ́bëëd e nud, yɑ nuti nywølø.’ Ábëëd e kwïj yi yɑn mɑ løge’ men, de yɑ ɑ́bï yɑ jwɑ̈ɑ̈g-ɑ ji ki pï, kipe kinni, o ngɑnɑni yod yi tyëng Isrɑil.” Kɑ Jøn møg-ɑ kømme tönge kinni, “Wëy ɑ́lidhɑ, e bï-ɑ piny ni ɑkur, kɑ pëgg-ɑ köme. Ábëëd e kwïj yi yɑn, de ngɑn-ɑ ɑ́ör yɑn be jwɑ̈ɑ̈gi ji ki pï, bɑ en ɑ ɑ́köbbi yɑn kinni, ‘Jɑl-ɑ ólidh yi yïn, e Wëy bï-ɑ köme, bene jɑlɑni. Bene en ɑ ójwɑ̈ɑ̈g ji ki Wëykwërø.’ Møgɑni ɑ́rum ki lidhø yi yɑn, o yɑ ceg-ɑ wun ki köbbø cyee kinni, en ɑ bɑ Wɑ̈d Jwøk.” Kì bɑng dhuki e Jøn ócungø geki ɑ́ryew kì kelli jøbɑnge, kɑ Yëso lidhe, e kɑ̈l-ɑ buti gen, ɑkööbe kinni, “Órömi Jwøk ɑnɑn!” Kɑ møgɑni lïngi yi jøgɑni ryeet, ɑløg gen bɑng Yëso. Kɑ Yëso ree luge, kɑ gï lidhe, ge lug-ɑ́ɑ̀ bɑnge, ɑpyëje gïn kinni, “Wu yɑb-ɑ ngø?” Kɑ ge ólöggø kinni, “Rɑbì, yï bëëd ɑ keny?” (Rɑbì wɑng-ɑ “Jɑlpwönyø.”) Kɑ ólöggø kinni, “Bïu, kɑ wu lïdhi wun.” (Piny ɑ́bëëd ɑ́ sɑɑ̀ ɑ́ngwen kì böörø.) Codhe ɑkedh gen, kɑ keny-ɑ bëëd yi en lidh yi gen. Kɑ wøw óyuudhø ge nudd ge ying-ɑ keny-ɑ bëëde. Dhɑnhø ɑ́kyel kì kelli ji ɑ́ryew-ɑ ɑ́lïngi kwøbbi Jøn, kɑ løg-ɑ bɑng Yëso, bɑ Andrø ómï Sɑymøn Pïtør. Keny-ɑ ɑ́yode Sɑymøn ómen, ɑköbbe gøn kinni, “Mesiy ɑ́yod yi wøn.” Akɑ̈ɑ̈le gøn yï Yëso. Kɑ Yëso nenn-ɑ yïe, ɑkööbe kinni, “Nyingí bɑ Sɑymøn wɑ̈d Jøn, de yï ócwøl yi yɑn yïn ɑ́ Sɑpɑ̀.” (Sɑpɑ̀ wɑng-ɑ Kït) Dhuki e Yëso køm-ɑ kedhi Gɑlelì, ɑyode Pïlïp, kɑ gø köbbe kinni, “Bïí bɑngɑ.” Pïlïp ɑ́bëëd ɑ Betsɑidɑ̀, kɑɑl-ɑ́ yije ɑ́kɑ̈ɑ̈l yi Andrø geki Pïtør. Ayood Nɑthɑnɑil yi Pïlïp, kɑ gø köbbe kinni, “Ngɑn-ɑ́ pere ɑ́gwed yi Mosɑ̀ kì yethi Cigg, kɑ pere gwed yi jøtöng kì yethi wɑ̈jji gen, ɑ́yod yi wøn. Bɑ Yëso wɑ̈d Yosep kì Nɑdhɑreth.” Akööb Nɑthɑnɑil kinni, “Dɑ gïndøj me cuggi kɑ̈ɑ̈l Nɑdhɑreth?” Aköbbii yi Pïlïp kinni, “Bïí, o yï lïdhí.” Keny-ɑ ɑ́liidh Nɑthɑnɑil yi Yëso, e bï-ɑ yïe, ɑkööbe kinni, “Lidhu jɑɑl, bɑ wɑ̈d dyëël Isrɑil kidyër, bong gïn gwɑ̈ɑ̈d kì ree.” Apyëjii yi Nɑthɑnɑil kinni, “Yɑ ngɑ̈nyi yi yïn ɑ kun?” Aløøg møge yi Yëso kinni, “Yï ɑ́lidh yi yɑn keny-ɑ ɑ́bëëd kì thɑ ólɑm, yï nuti cwølø yi Pïlïp.” Aköbbii yi Nɑthɑnɑil kinni, “Rɑbì, yï bɑ Wɑ̈d Jwøk, o yï bɑ rɑ̈ɑ̈dh Isrɑil!” Akööb Yëso kinni, “Yï yïëy kɑ per kɑ ɑ́köbbɑ yïn kinni, ‘Yï ɑ́lidh yi yɑn yï obëëdø kì thɑ ólɑm?’ Yï ólïdhi ki gïg mø døngø kibøli møgɑni,” Aköbbe gïn kinni, “Yɑ köbb-ɑ wun kidyër kinni, mɑl ólidh yi wun ɑ́ ɑyieb, kɑ wëywöddi Jwøk lidh yi wun, ge nyi kedh-ɑ mɑl kɑ ge nyi dwöög-ɑ piny kömi Nyɑɑr Dhɑnhø.” Kì dɑ̈ɑ̈g cyɑ̈ng, ɑ́dɑ nywöm kì kɑɑl Gɑnɑ̀ kì myërri Gɑlelì, o meyi Yëso ɑ́bëëd e nud kì kenyɑni. Kɑ Yëso geki jøbɑnge cwøøl kej nywöm thyew. Keny-ɑ ɑ́thumi møgi oløg, ɑköbbi Yëso yi meye kinni, “Tyëngɑni ɑ́jɑ̈ddi ki møgø.” Akööb Yëso kinni, “Dhɑnh, yïde ki yɑn, bøli kejɑ nuti bëënø.” Kɑ tyëng-ɑ göögø köbbi yi meyi Yëso kinni, “Gwøgu gïn-ɑ óköbbe wun.” Kenyɑni ɑ́dɑ puggì ɑ́bïkyel mø bɑ kïttì, ɑ́kyel yije nyi røm-ɑ yi gïn ni lïtïr miyø. Yethi gen nyi kïdh-ɑ pïg-ɑ nyi löög kì yij kwööng Yeud. Aköbbi gen yi Yëso kinni, “Pɑ̈ngu puggì ki pï.” Apɑ̈ng ge gïn ki pï. Kɑ gï köbbe kinni, “Tömi wun, kɑ muuj wun jɑldwøøng jønywöm.” Kɑ møgɑni gwøg yi gen. Abel pïg-ɑ ɑ́løg ri gen møgi oløg yi jɑlɑni, de kun-ɑ kɑ̈ɑ̈l yi møngɑni kwïj yi en, dɑ́ tyëng-ɑ ɑ́tøm pïgɑni ɑ ngɑ̈ny wøw. Acwøle jɑlnywöm, kɑ gø köbbe kinni, “Ji nyi muuj-ɑ møng-ɑ døj kì tyeli mɑl, o keny-ɑ órum ji ki nɑ̈gø yi møgø, o møng-ɑ rɑɑj kɑ̈ɑ̈l kì cyɑ̈n. De yï yöd yï mïdh-ɑ møng-ɑ døj, o kɑ̈ɑ̈l ɑnɑn kì cyɑ̈n!” Bene ngïji men-ɑ ɑ́kwøng ki gwøgø yi Yëso, gø ɑ́gwøg yi en ɑ Gɑnɑ̀, kì myërri Gɑlelì. Kenyɑni ɑ ɑ́nyodhe mɑ̈re, kɑ yïëy yi jøbɑnge. Codhe, ɑkedh gen bënn, ge kedh-ɑ Kɑpernɑum; en kí meye kí nyiimen geki jøbɑnge, kɑ obëëdø kì kunɑni ki cyɑ̈ng me nøg. Kɑ Yëso kedh-ɑ Yerusɑlem kì cyɑ̈ɑ̈ng Kwëër Ákɑɑdh. Kɑ jøngyëwø ki dhög kí dyëg kí ɑkùr yuude ódɑ̈ri Kengø. Kɑ jøwïïdø ki ngyëny yuude ge obëëdø kì buti tɑrɑbedhhi gen. Kɑ oyëdø ki ócøl, kɑ jiɑni cyeede wɑ̈g bënn kì ódɑ̈ri Kengø, kyeel kí dyëg, kí dhög. Kɑ ngyënyyi jøwïïdø kedhhe, kɑ tɑrɑbedhhi gen tɑrre kì piny. Kɑ jøngyëwø ki ɑkùr köbbe kinni, “Yëëg wun jɑmmi wun wɑ̈g, ød Wïyɑ ko løgu kej ngyew!” Apɑɑr møg-ɑ yij wɑ̈nyi kwërø yi jøbɑnge kinni, “Mɑɑr-ɑ mɑɑrɑ Kengí yïn ɑ Jwøk, lyel nɑ mɑc kì pyëwɑ.” Codhe, ɑköbbi Yëso yi Yeud kinni, “Á ngïji mɑ ngø ɑ ónyudhí wøn, kipe møg-ɑ gwøg yi yïn ek?” Aløøg mø gen yi Yëso kinni, “Nyɑɑg wun Kengɑni piny, o ódøøgɑ ki gerø ki cyɑ̈ng ɑ́dɑ̈g.” Akööb Yeud kinni, “Kengɑni ɑ́tyëg-ɑ runn pyɑ̈r ɑ́ngwen wïdɑ́bïkyel e ogerø, ócuggi gerø yi yïn ki cyɑ̈ng ɑ́dɑ̈g?” De Keng-ɑ kømme bɑ dële kiree. Kɑ kì bɑng kɑ ɑ́dwööge wɑ̈g kì yij thøø, ɑpɑɑr møg-ɑ ɑ́kømme yi jøbɑnge, kɑ møg-ɑ yij wɑ̈nyi kwërø yïëy yi gen geki møg-ɑ kømmi yi Yëso. Keny-ɑ ɑ́ying Yëso Yerusɑlem kì cyɑ̈nggi Kwëër Ákɑɑdh, ɑ́yïëy yi ji mø ngenyø, kɑ ɑ́lïdhi gen ki ngïjjì møg-ɑ ɑ́gwøg yi en. De Yëso ree nuti nyudh en tyëngɑni, mɑ́ dhɑnhø bëne ngɑ̈nyi yi en, o bong ngɑn dwɑdde me di köbbii møg-ɑ ying pëthi ji, mɑ́ en kiree, gïn-ɑ pyëw dhɑnhø bëne ngɑ̈nyi yi en. Ádɑ Jɑlpɑresì me cwøl ɑ́ Nikødemøs, o ɑ́bëëd ɑ́ jɑngi sinɑgøg. Jɑlɑni ɑ́bï yï Yëso kì wɑ̈r, kɑ okööbø kinni, “Jɑlpwönyø, ngɑ̈nyi yi wøn kinni, yï ɑ́kɑ̈ɑ̈l-ɑ yï Jwøk, mɑ́ e bong ngɑn me cuggi gwøg ki ngïjj-ɑ gøggi yi yïn, keløg e pɑ cyɑ̈dhi kɑ Jwøk.” Aløøg møge yi Yëso kinni, “Yɑ köbb-ɑ yïn kidyër kinni, keløg dhɑnhø pɑ cigi nywølø, Pödhi Jwøk pɑ cuggi lidhø yi en.” Apyëjii yï Nikødemøs kinni, “Dhɑnhø ócigi nywølø e bɑ jɑldwøng? Ócuggi døøg yij meye kɑ cigi nywølø?” Aløøg møge yi Yëso kinni, “Yɑ köbb-ɑ yïn kidyër kinni, keløg dhɑnhø pɑ cigi nywølø ki pï geki Wëy, pɑ wöl kedhi yij Pödhi Jwøk. Ngɑn-ɑ nywøl yi dhɑnhø bɑ dhɑnhø, o ngɑn nywøl yi Wëy bɑ wëy. Yï ko ngɑ̈ng kɑ̀ köbbɑ yïn kinni, ‘Di dwɑddø kinni cigi wun nywølø.’ Yømø nyi ködd-ɑ kun-ɑ dwɑdde, kɑ cwɑgge nyi lïngi yi yïn, de kun-ɑ kɑ̈ɑ̈le kí kun-ɑ kedhe kwïj yi yïn. Ngɑn-ɑ ónywølø kì ri Wëy bëëd ɑ nøw.” Akööb Nikødemøs kinni, “Møgɑni óbëëd ɑ dï?” Alöggi Yëso kinni, “Yï bɑ jɑlpwönyi kwɑrri Isrɑil, de yï dhɑɑl yïn yi møg kidï? Yɑ köbb-ɑ yïn kidyër kinni, wø nyi kømm-ɑ gïn ngɑ̈nyi yi wøn, o wø nyi töng-ɑ møg-ɑ ɑ́lidh yi wøn, de mø wøn pɑ yïëy yi wun. Keløg wu pɑ yïëy kɑ̀ köbbɑ wun ki jɑmmi piny, wu óyïëy kidï, keløg wu köbbɑ’ jɑmmi mɑl? Bong ngɑn mɑ ɑ́kedhi mɑl, den-ɑ́ Nyɑɑr Dhɑnhø, ngɑn-ɑ ɑ́bï piny e kɑ̈ɑ̈l-ɑ mɑl.” Nyɑɑr Dhɑnhø ceg kɑ tïng mɑl ceth, ni kɑ ɑ́tïng thwööl dilɑl mɑl yi Mosɑ̀ kì yij pɑ̈l, o ngɑn-ɑ óyïëyii yïdde ki nënn-ɑ ɑtheer. Mɑ́ jii kömi piny men ɑ́mɑɑr yi Jwøk ki mendwøng, ɑ bɑnge ɑ́muuje wɑ̈de, wɑ̈dkyel; kipe kinni o ngɑn-ɑ óyïëyii ócöge e pɑ thøw, de óyod-ɑ nënn-ɑ ɑtheer. Mɑ́ Jwøk kɑ ɑ́öre Wɑ̈de piny, nuti öre’ be cɑyi piny, de gø ɑ́öre ɑ́ ngɑn yiel piny. Ngɑn yïëyii pɑ cɑy, de ngɑn pɑ yïëyii ɑ́rum ki cɑyø, mɑ́ Wɑ̈d Jwøk nuti yïëëy en, Wɑ̈n-ɑ bɑ ɑ́kyel. Cɑ́yɑni bɑ kinni; cɑr ɑ́bï piny de ji ɑ́yöd ge mɑɑr-ɑ muudhø, kɑ cɑr bɑny yi gen, mɑ́ ge gøgg-ɑ rɑj. Mɑ́ ngɑn-ɑ gøggi rɑj mɑɑn-ɑ cɑr, kɑ nyii cögø e pɑ bï yij cɑr, kipe gwøge ócɑy. De ngɑn-ɑ gøggi dyër nyi bï-ɑ yij cɑr o nyodh kinni, nyi gwøg-ɑ gïg-ɑ dwɑddi yi Jwøk. Codhe, ɑkedhi Yëso myërri Yeudiyɑ̀ geki jøbɑnge, kɑ ge obëëdø kì kunɑni, kɑ ócɑ̈gø jwɑ̈ɑ̈gi ji. O Jøn ɑ́bëëd e jwɑ̈ɑ̈g-ɑ ji thyew kì Ein Nun, kì buti Sɑlïm, mɑ́ pï gïïr kì kunɑni. Kɑ ji nyii bëënø, kɑ ge nyi jwɑ̈ɑ̈g. (Jøn ɑ́bëëd e nuti kïdhi ød mɑg, keny-ɑ ɑ́gwøøg møgɑni.) Kɑ kwï jøbɑng Jøn opëmø ki Yeudì ɑ́kyel, kì ri guöög dhïwø. Codhe ɑkedhi gen yï Jøn, kɑ gø köbbi gen kinni, “Jɑlpwönyø, jɑl-ɑ ɑ́ying butí kì løøg Nɑm Urdun, kɑ lejji yi yïn, ji jwɑ̈ɑ̈ge’ jwɑ̈ɑ̈gø kì keny ɑnɑn, o teedø bëne ceg-ɑ kedhi yïe.” Aköbbi gen yi Jøn kinni, “Bong gïn yod yi dhɑnhø keløg e nuti mëggii kì mɑl. Wun ki ri wun, wu ɑ́lïng keny-ɑ ɑ́kööbɑ kinni, ‘Yɑ pɑth ki Mesiy, de yɑ ɑ́ceg kɑ ör bøle.’ Nyɑn-ɑ nywøm bɑ mi jɑlnywöm; de mɑ̈ɑ̈dh jɑlnywöm nyi cungi kì buti jɑlnywömɑni pyëwe omedø yi mwöjji jɑlnywöm. O pyëwɑ med nɑ menɑni ɑnɑn. Di dwɑddø kinni o kedhe e ódøngø, o yɑ kedhɑ yɑ ónungø.” Ngɑn-ɑ kɑ̈ɑ̈l mɑl bɑ en ɑ dwøng kibøli ji bënn. Ngɑn-ɑ bɑ ngeti piny, bɑ mi piny, o nyi kømm-ɑ mø piny; de ngɑn-ɑ kɑ̈ɑ̈l mɑl bɑ en ɑ dwøng kibøli ji bënn. Nyi kømm-ɑ møg-ɑ ɑ́lidhe kí møg-ɑ ɑ́lïnge, de bong ngɑn yïëy kwøbbe. Ngɑn yïëy møge nyi nyodh-ɑ kinni Jwøk nyi kømm-ɑ dyër ceth. Ngɑn-ɑ ɑ́ör yi Jwøk kɑ̈ll-ɑ kwøbbi Jwøk, mɑ́ Wëy nyi muuj yi Jwøk e bong cöge. Wɑ̈d mɑɑr yi Wïye, o jɑmmì bënn ɑ́cïbe cinge. Ngɑn yïëy Wɑ̈nɑni yïe dɑ nënn-ɑ ɑtheer. De ngɑn pɑ yïëy møge pɑ yïddi ki nënnì, o ócög köme dɑ cɑ́yi Jwøk. Kɑ Jøpɑresì olïngø kinni i ji mø gïïr løg bɑng Yëso, kɑ gï nyi jwɑ̈ɑ̈ge, o jie ɑ́ngënyi kibøli jii Jøn. (Pɑth ki Yëso kiree ɑ nyi jwɑ̈ɑ̈g ji, dɑ́ jøbɑnge.) Kɑ ɑ́lïngi møgɑni yi Wë, ɑdhwödhe kì myërri Yeudiyɑ̀, kɑ døøg-ɑ Gɑlelì. Yuu-ɑ ɑ́kedhe kɑ̈ll-ɑ yethi myërri Sɑmɑriyɑ̀. Atönge kɑɑl megø kì kelli kɑ̈ddi Sɑmɑriyɑ̀, kɑɑl-ɑ ɑ́tönge cwøl ɑ́ Sukɑr, kì buti piny-ɑ ɑ́mëggi Yosep yi wïye Yɑgob. Kenyɑni ɑ́dɑ yith, o kɑ ɑ́pïd Yëso yi wɑ̈dh ɑpëgge buti yiinhɑni. Piny ɑ́bëëd ɑ́ dicɑ̈ng. Kɑ ngɑndhɑjø obëënø e kɑ̈ɑ̈l-ɑ Sɑmɑriyɑ̀, e bï-ɑ be tömø ki pï. Aköbbii yi Yëso kinni, “Nëngí yɑn ki pïg mɑdhɑ.” Mɑ́ jøbɑnge ɑ́kedhi pɑc be ngyew ki gïncɑm. Aköbbii yi ngeti Sɑmɑriyɑ̀ kinni, “Yïde ɑ kwɑ̈jjí ki pï kì yïɑ, yï bɑ Yeudì, o yɑ bɑ ngeti Sɑmɑriyɑ̀?” (Tyëng Yeudiyɑ̀ pɑ nyi nywɑ̈gø ki tyëng Sɑmɑriyɑ̀.) Aköbbii yi Yëso kinni, “Keløg gïn-ɑ nyi muuj yi Jwøk geki ngɑn-ɑ kwɑ̈jji kinni, ‘Nëngí yɑn ki pïg mɑdhɑ,’ di bëëd e ngɑ̈nyi yi yïn, ti yï di kwɑ̈jji kì yïe, kɑ yï di nënge ki pïi nënnì.” Aköbbii yi ngɑnɑni kinni, “Yïí bong ɑtög, o yith ludhø, de yï kɑ̈n-ɑ́ɑ̀ keny ki pïi nënnì Jɑldwøng? Kweyi wøn Yɑgob ɑ ɑ́mëggi yiinhɑni wøn, o ɑ́mɑ̈ɑ̈dh kì yije; en kí wɑ̈dde, kí dhöge, de yï lod-ɑ Yɑgob ki döng?” Aløøg møge yi Yëso kinni, “Ngɑn mɑ̈ɑ̈dhø ki pïgɑni nyi cig-ɑ mɑgø yi röödhø. De ngɑn mɑdh pïg-ɑ ómëggɑ en, pɑ mɑg yi röödhø kinni tek. Pïg-ɑ ómëggɑ en ceg-ɑ gwøg kì ree ki wɑɑng pï me nëngii ki pïi nënnì, kɑ nëngi yi pïgɑni ki nënn-ɑ ɑtheer.” Kɑ köbbi yi ngɑnɑni kinni, “Jɑldwøng, nëngí yɑn ki pïgɑni, o yɑ cögɑ yɑ pɑ mɑg yi röödhø, o yɑ cögɑ yɑ pɑ dwöög keny be tömø ki pï.” Aköbbii yi Yëso kinni, “Kedh, cwøl jɑlgølí, kɑ wu bïu keny.” Aløøg møge yi ngɑnɑni kinni, “Yïɑ bong jɑlgølɑ.” Aköbbii yi Yëso kinni, “Yï kømm-ɑ dyër kinni yïí bong jɑlgølí, mɑ́ cwøw-ɑ ɑ́bëëd ki yïn bɑ ɑ́bïj, o jɑl-ɑ bëëd wun ɑnɑn pɑth ki jɑlgølí. Møg-ɑ ɑ́köbbí yɑn bɑ dyër.” Aköbbii yi ngɑnɑni kinni, “Jɑldwøng, ɑ́lidh yi yɑn kinni, yï bɑ jɑltöng. Jwøk ɑ́mɑl ɑ wïj kït men yi kweyyi wøn. De wu tyëng Yeudiyɑ̀ wu okööbø kinni, i mɑlli Jwøk kì Yerusɑlem.” Aköbbii yi Yëso kinni, “Dhɑnh, yïëy møgɑ, óbï eni bøli keny-ɑ koo mɑlli Wïy kì wïj kït men wɑlɑ̀ kì Yerusɑlem. Wu mɑll-ɑ ngɑn ree kwïj yi wun, de wø mɑll-ɑ ngɑn ree ngɑ̈nyi yi wøn, mɑ́ yïëdø ókɑ̈ɑ̈l-ɑ yï Yeud. De bøli kenyɑni obëënø, o ɑ́rum ki wɑ̈nhø, eni bøli keny-ɑ ómɑlli Wïy ki mɑll-ɑ dyër, ki tegi Wëyi Jwøk. Jwøk bɑ Wëy, o mɑlli kɑ tegi Wëye geki dyër yi tyëng-ɑ mɑllii.” Aköbbii yi ngɑnɑni kinni, “Ngɑ̈nyi yi yɑn kinni, Mesiy óbï, o keny-ɑ óbëëne, wɑ ónyudhe jɑmmì bënn.” Aköbbii yi Yëso kinni, “Yɑ ngɑn-ɑ kööbø ki yïn èn, yɑ bɑ en.” Bøli kenyɑni ceth ɑ ɑ́bëën jøbɑnge, kɑ ge ongɑ̈ngø yi kɑ̀ kööbe ki ngɑndhɑjø. De bong ngɑn mɑ ɑ́pyëjii kinni, “Yï dwɑdd-ɑ ngø?” Wɑlɑ̀ kinni, “Wude ɑ kööb wun ki ngɑnɑni?” Kɑ ngɑnɑni puge wiye kɑ reng-ɑ kɑɑl, kɑ teedø köbbe kinni, “Bïu lidhu jɑl-ɑ ɑ́köbbi yɑn møg-ɑ ɑ́gwøgɑ bënn cøn. Pɑ cuggi bëëdø ɑ́ Mesiy?” Abëën teedø wɑ̈g kì kɑɑl, kɑ ge kedh-ɑ yï Yëso. Kɑ Yëso kwɑjji yi jøbɑnge, e tyëngɑni nuti wɑ̈nhø kinni, “Cyɑ̈ɑ̈m, jɑlpwönyø!” Aköbbi gen yi Yëso kinni, “Yïɑ dɑ gïncɑm me nyi cɑmɑ, me kwïj yi wun.” Akööb jøbɑnge ki ri gen kinni, “Dɑ ngɑn me muujii ki gïncɑm mɑwɑnø?” Aköbbi gen yi Yëso kinni, “Gïncɑmɑ bɑ gwøgi gïn-ɑ dwɑddi yi ngɑn-ɑ ɑ́ör yɑn, kí tyëgi gwøge. Wu nyii kööbø kinni, ‘Ádöng ɑ́ dwɑ̈tt ɑ́ngwen o byel kɑj.’ De yɑ köbb-ɑ wun kinni, lidhu byel, kɑ̀ tɑ̈ri gen, o bøli kej kɑji gen ɑ́wɑ̈nhi. Ngɑn-ɑ kɑ̈jø köönge okwɑnyø yi en, o cønge byel kipe nënn-ɑ ɑtheer, o ngɑn-ɑ ɑ́kɑ̈ɑ̈g geki ngɑn-ɑ ɑ́kɑ̈ɑ̈j pëthi gen mïni gen ryeet. O møg-ɑ ɑ́kømmi cøn kinni, ‘Nget ɑ́kyel ceg-ɑ kɑ̈g, o ngɑn-ɑ kyeelø kɑ̈ɑ̈je, bï gen gɑ dyër. Wu ɑ́örɑ’ be kɑji jɑmmi pwödhø mø nuti pur-ɑ yi wun; ji møøgø ɑ ɑ́göög, dɑ́ wun ɑ yïddi ki døøjø kì bɑng gwøøg gen.” Kɑ Yëso yïëy yi tyëng Sɑmɑriyɑ̀ mø ngenyø møg-ɑ ɑ́ying kɑɑlɑni, kì bɑng møg-ɑ ɑ́kwøb yi ngɑnɑni kɑ ɑ́kööbe kinni, “Yɑ ɑ́köbbe møg-ɑ ɑ́gwøgɑ bënn cøn.” Keny-ɑ ɑ́bëën tyëng Sɑmɑriyɑ̀ yïe, gø ɑ́kwɑjji gen kinni bëëde kì kɑɑl gen. Kɑ obëëdø kì kɑɑlɑni ki cyɑ̈ng ɑ́ryew. Kɑ kwɑnni ji-ɑ ɑ́yïëy kì bɑng møg-ɑ ɑ́lïngi yi gen kì yïe, óngënyø. Kɑ ngɑnɑni köbbi gen kinni, “Wø ɑ́yïëy, de pɑth ki bɑng møg-ɑ ɑ́kwøb yi yïn keti gen. Mɑ́ ɑnɑn, wø ɑ́lïng ki møg-ɑ kømmi yi en. Kɑ yod yi wøn kinni, bɑ yïëni kömi piny bëne kidyër.” Kì bɑng cyɑ̈ng ɑ́ryew, ɑdhwödh Yëso kì kenyɑni, kɑ kedh-ɑ Gɑlelì, mɑ́ e ɑ́kööb kiree kinni, “Jɑltöng pɑ nyi wør kì pödhi gen.” Keny-ɑ ɑ́wɑ̈dhe Gɑlelì, kɑ tyëng Gɑlelì yuude ge yïd-ɑ en, mɑ́ gïg-ɑ ɑ́gwøge kì Yerusɑlem kì cyɑ̈nggi kwër ɑ́lidh yi gen. Adøøge Gɑnɑ̀ kì myërri Gɑlelì, kun-ɑ́ yije ɑ́løge pï møgi oløg. Ádɑ jɑl gøl rɑ̈ɑ̈dhø kì Kɑpernɑum, o yïe ɑ́dɑ wɑ̈de me dële rɑ̈mø. Keny-ɑ ɑ́lïng jɑlɑni kinni, Yëso wɑ̈nhi Gɑlelì, e kɑ̈ɑ̈l-ɑ Yeudiyɑ̀, ɑkedhe yïe, kɑ gø kwɑjje kinni kedhe be yieli wɑ̈de, mɑ́ nyelɑni cyɑ̈ngø thøø. Aköbbii yi Yëso kinni, “Keløg wu pɑ lïdhi ki ngïji geki gïïngɑ̈ngø, wu pɑ yïëy.” Akwɑjjii yi jɑlɑni kinni, “Jɑldwøng, bïí kɑ̈ng-ɑ nuti thøw wɑ̈dɑ.” Aköbbii yi Yëso kinni, “Døøg yuuí, wɑ̈dí pɑ thøw.” Ayïëëy møg-ɑ ɑ́kwøb yi Yëso yi jɑlɑni, kɑ odøøgø. Kɑ røøm-ɑ yöö ki bɑ̈ngge, ɑköbbi ge gøn kinni, “Wɑ̈dí dële ɑ́yöni.” Apyëje gïn, mɑ yöni dële piny bëëd ɑ dï? Alöggi gen kinni, “Dële ɑ́kwööj ɑ́wɑ̈ɑ̈ kì sɑɑ̀ ɑ́kyel kì dicɑ̈ng.” Kɑ yod yi wïye kinni, bɑ bøli kenyɑni ceth ɑ ɑ́kööb Yëso kinni, “Wɑ̈dí pɑ thøw.” Ayïëy jɑlɑni geki tyëng gøle bënn. Menɑni bene ryeew ngïjj-ɑ ɑ́gwøg yi Yëso keny-ɑ ɑ́bëëne Gɑlelì, e kɑ̈ɑ̈l-ɑ Yeudiyɑ̀. Kɑ kwëër Yeud obëënø, ɑkedhi Yëso Yerusɑlem. Dɑ luy kì Yerusɑlem kì buti Dhøg Dyëg, luyɑni cwøl ɑ́ Bet Dhɑtɑ̀ ki dhøg Ibru, o bute dɑ ɑkɑnnì ɑ́bïj. Thɑ̈thi ɑkɑnnɑni dɑ tyëngbuud mø ngenyø, kwï gen bɑ cörr, o møøgø bɑ ngöll, o møøgø bɑ pùdh. Ge yïd-ɑ bøli keny-ɑ nyi kyeer pï. Mɑ́ wëywöni Wë nyi kedh-ɑ yij luyɑni kì bøli keny megø, kɑ pï nyi kyere. Kɑ ngɑn-ɑ nyi kwöngi ki wɑ̈dhi yij luyɑni, kì bɑng kɑ ɑ́rum pï ki kyerø, nyi yiel ki gïn-ɑ ree. Kenyɑni ɑ́dɑ jɑl me buddø ki runn pyɑ̈r ɑ́dɑ̈g wïdɑ́bïdɑ̈g. Kɑ jɑlɑni lidh yi Yëso e obuddø kì piny, o ngɑ̈nyi yi en kinni, buddø kɑ̈ge dööng, ɑpyëje gøn kinni, “Yï dwɑdd-ɑ kinni, o yï yiel?” Alöggi jɑl-ɑ buud kinni, “Jɑldwøng bong dhɑnhø me nyi kïdhi yɑn yij luy kì bøli keny-ɑ nyi tulli pï ri gen. Kɑ̈ng-ɑ nyi nudd yɑ ókedhø, ngɑn megø nyi møøl-ɑ bølɑ.” Aköbbii yi Yëso kinni, “Dhwödhí mɑl, kwɑny pyëní, kɑ yï kedh.” Kɑ jɑlɑni ódönyø kì bøli kenyɑni ceth, ɑkwɑnye pyëne kɑ ókedhø. De cyɑ̈ngɑni bɑ cyɑ̈ɑ̈ng Sɑbɑth. Codhe, ɑköbbi jɑl-ɑ ɑ́dönyi yi Yeud kinni, “Men bɑ cyɑ̈ɑ̈ng Sɑbɑth, o yï pɑth ki ɑyïëy ki tyëddi pyëní.” Aløøg mø gen yi jɑlɑni kinni, “Ngɑn-ɑ ɑ́yiel yɑn, en ɑ ɑ́köbbi yɑn kinni, ‘Kwɑny pyëní kɑ yï kedh.’ ” Apyëjii yi gen kinni, “Á men ɑ ɑ́köbbi yïn kinni, ‘Kwɑny pyëní, kɑ yï kedh?’ ” De jɑl-ɑ ɑ́yiel, ngɑn-ɑ ɑ́yielii kwïje; mɑ́ Yëso ree ɑ́lɑ̈ɑ̈we kì teen-ɑ cugø kì kenyɑni. Kɑ jɑlɑni yod yi Yëso kì Kengø, kì bɑng keny megø, kɑ gø köbbe kinni, “Anɑn dëlí ɑ́yöni, yï ko göög ki orøg këti, o bëëd e bong gïnrɑj me yod yi yïn me lod menɑni.” Kɑ jɑlɑni ókedhø, kɑ Yeud köbbe kinni, bɑ Yëso ɑ ɑ́yielii. Kɑ Yëso jud yi Yeud, mɑ́ e ɑ́yïëëd ɑ cyɑ̈ɑ̈ng Sɑbɑth. Aløøg mø gen yi Yëso kinni, “Wïyɑ pɑ nyi wïyi ki gwøg, o yɑ ceg-ɑ gwøg ceth.” Kɑ ge ti-ɑ pëddø yɑb ki yöö men nɑ̈gii, kipe kɑ̀ pɑ mïdhe Ciggi Sɑbɑth, kí per kɑ̀ kööbe thyew kinni, Jwøk bɑ Wïye, e pɑ̈ɑ̈r-ɑ ree ki Jwøk. Aköbbi gen yi Yëso kinni, “Yɑ köbb-ɑ wun kidyër kinni, bong gïjø me cuggi gwøgø yi Wɑ̈d ki cwɑgge, den-ɑ́ gïn-ɑ nyi lidh yi en, e ogwøgø yi Wïy. Mɑ́ gïg-ɑ nyi gwøg yi Wïy bënn, bɑ gen ɑ nyi gwøg yi Wɑ̈d, ni kɑ̀ nyi gwøøg gen yi Wïy ceth. Mɑ́ Wɑ̈d mɑɑr yi Wïy, o gïg-ɑ nyi gwøg yi en bënn nyi nyudhe’ gøn, o ónyudhi yi en ki møg pëddi döng, kɑ wu ongɑ̈ngø. Ni kɑ̀ nyi tug tyëngthøø yi Wïy kɑ gï thödhe ki nënnì, Wɑ̈d tyëng-ɑ dwɑdde nyi thödhe’ thödhø thyew ki nënnì. Bong ngɑn me gønye lidh yi Wïy, mɑ́ gønyy bënn ɑ́cïb cingi Wɑ̈d, o Wɑ̈d wør yi teedø bëne ni kɑ̀ wør gen Wïy. Ngɑn pɑ wør Wɑ̈d, Wïy ɑ ɑ́örii pɑ wør yi en thyew. “Yɑ köbb-ɑ wun kidyër kinni, ngɑn-ɑ ólïngi kwøbbɑ, kɑ ngɑn-ɑ ɑ́ör yɑn yïëye, yïe dɑ nënn-ɑ ɑtheer, o pɑ wɑ̈dhi kej cɑ́y, mɑ́ e ɑ́bï wɑ̈g kì yij thøø, kɑ kedh-ɑ yethi nënnì Yɑ köbb-ɑ wun kidyër kinni bøli keny-ɑ ólïngi cwɑggi Wɑ̈d Jwøk yi tyëngthøø obëënø, o ɑ́wɑ̈nhi ɑnɑn, o tyëng-ɑ ólïngi møge ónëënø. Wïy kiree ɑ yïe nyi kɑ̈ɑ̈l yi nënnì, o Wɑ̈d ɑ́gwøge ɑ́ ngɑn yïe nyi kɑ̈ɑ̈l yi nënnì thyew. Kɑ gø thödhe ki tegø men nenne gønyy, mɑ́ e bɑ Nyɑɑr Dhɑnhø. Wu ko ngɑ̈ng yi møgɑni, mɑ́ e ɑ́cyɑ̈ngi, eni bøli keny-ɑ ólïngi cwɑgge yi tyëngthøø bënn, kɑ ge bï-ɑ wɑ̈g kì yethi rörri gen; tyëng-ɑ ɑ́gøggi gïgdøj ódhwödh kɑ ge onëënø, o tyëng-ɑ ɑ́gøggi gïgrijjø ódhwödh kɑ cɑ́y. “Bong gïjø me cuggi gwøgø yi yɑn ki cwɑggɑ, de gønyy løøg yi yɑn, yɑ ködd-ɑ ri møg-ɑ köbbi yɑn yi Jwøk. O löggɑ óbëëd gɑ dyër, mɑ́ yɑ pɑ gwøg gïn-ɑ dwɑddi yi yɑn, de yɑ gwøg-ɑ gïn-ɑ dwɑddi yi ngɑn-ɑ ɑ́ör yɑn. “Keløg yɑ kööbø kɑ perɑ, møgɑni pɑ pɑ̈dhi gɑ dyër. Dɑ ngɑn megø me nyi kööbø ki perɑ, o ngɑ̈nyi yi yɑn kinni, møg-ɑ kømmi yi en óyïëy gɑ dyër. Wu ɑ́ödi yï Jøn, kɑ wu köbbi yi en ki møg-ɑ dyër. Yɑ pɑ dwɑddi cwɑgø yi dhɑnhø, de møgɑni ɑ́kwøb yi yɑn kɑ per kinni o wu yiel. Jøn ɑ́bëëd e nɑ lɑ̈mbɑ̈ men muujø kì cɑr, o pëthi wun ɑ́bëëd ge med ki bëëdø kì yij cɑre kɑ̈ng-ɑ tïni. Yïɑ dɑ cwɑ̈ggɑ mø lod mø Jøn; ɑ løg gïg-ɑ ɑ́mëggi yɑn yi Wïy kinni gwøgɑ gen, gïgɑni bɑ cwɑ̈ggɑ, o ge nyodh-ɑ kinni bɑ Wïyɑ ɑ ɑ́ör yɑn. O yɑ bɑ ɑcwɑg yi Wïyɑ, ngɑn-ɑ ɑ́ör yɑn. Cwɑgge nuti lïngø yi wun kinni tek, o kïde kwïj yi wun. O kwøbbe pɑ bëëdø kì pëthi wun, mɑ́ ngɑn-ɑ ɑ́ör yi en nuti yïëëy wun. Wɑ̈jji kwërø nyii rɑngø yi wun kidøøj, mɑ́ wu orumø kinni, bene ri gen ɑ óyïddi wun ki nënn-ɑ ɑtheer. Wɑ̈jjɑni kiri gen cwɑg-ɑ yɑn! De wu yöd wu ceg-ɑ bɑ̈nyø ki bëën yïɑ, o wu yïddi wun ki nënnì. “Bong pwøj mø yɑb yi yɑn kì yï teedø. De wu ngɑ̈nyi yi yɑn kinni, mɑɑri Jwøk tøøk kì pëthi wun. Yɑ ɑ́bï ki nyingi Wïyɑ, o yɑ nuti kwɑnyø yi wun. De keløg ngɑn megø obëënø ki nyinge kete, ngɑnɑni nyii kwɑnyø yi wun. De wu ócuggi yïëyø kidï? Mɑ́ wu nyi dwɑdd-ɑ lejji ri wun, de dhwɑ̈ng-ɑ kɑ̈ɑ̈l yï Jwøng-ɑ bɑ ɑ́kyel kete, pɑ yɑb yi wun? Wu ko rum kinni, bɑ yɑn ɑ gøøny wun yï Wïy, de bɑ Mosɑ̀ ɑ ógøøny wun, en ɑ ngɑn-ɑ ɑ́ngɑ̈dh yi wun. Keløg Mosɑ̀ di yïëy yi wun, yɑ di yïëy yi wun thyew, mɑ́ e ɑ́gwëëd kì riɑ. De keløg wu pɑ yïëy ki møg-ɑ ɑ́gwed yi en, kwøbbɑ óyïëy yi wun kidï?” Codhe, ɑkedhi Yëso løøg Tɑɑy Gɑlelì, (cwølli thyew ɑ́ Tɑɑy Thɑbɑriyɑ̀.) Kɑ ji mø ngenyø løg-ɑ bɑnge, mɑ́ ge ɑ́lïdhi ki gïïngɑ̈ngø møg-ɑ ɑ́gwøge kì ri tyëngbuud. Ayedhi Yëso wïj kït me thiinh, kɑ pëgg-ɑ piny geki jøbɑnge. O Kwëër Ákɑɑdh rum cyɑ̈ngø. Kɑ Yëso wïje tïnge, kɑ ji mø ngenyø lidhe ge bï-ɑ yïe, ɑpyëje Pïlïp kinni, “Wɑ óngëëw ɑ keny ki gïncɑm men-ɑ ócɑm yi tyëngɑni?” Møgɑni ɑ́kwøb yi en, e rɑng-ɑ gøn, mɑ́ gïn-ɑ ógwøg yi en ngɑ̈nyi yi en. Aløøg møge yi Pïlïp kinni, “Ke ngëëw wɑ ki gïncɑɑm ngyëny miy ɑ́ryew pɑ rømi ri gen, cɑgg e ceg ki teggø.” Aköbbi Yëso yi nget ɑ́kyel kì kelli jøbɑnge, ɑ løg Andrø, ómï Sɑymøn Pïtør kinni, “Dɑ nyelthinh kì keny me yïe di ópùni ceir ɑ́bïj kí rij ɑ́ryew. De ge pɑ rømi ri teen-ɑ ngenyø ni men.” Akööb Yëso kinni, “Köbbu teedø pëggi gen piny.” Kenyɑni dɑ lum me ngenyø. Apëggi gen piny. Jøg-ɑ cwøw kwɑnni gen wɑ̈dh-ɑ ri ɑ́lïp ɑ́bïj. Kɑ ópùnɑni kwɑny yi Yëso, ɑpwøje Jwøk, kɑ gï mëgge tyëng-ɑ bëëdø kì piny. Agwøge rij ni menɑni thyew, kɑ teedø oyɑ̈ngø ni kɑ ɑ́dwɑddii yi gen. Kì bɑng kɑ ɑ́yɑ̈ng teedø, ɑköbbe jøbɑnge kinni, “Cøngu nyingi gïncɑm-ɑ ɑ́döng, o bongii gïn lɑ̈ɑ̈ny.” Acøng gen nyingi gïncɑm-ɑ ɑ́döng kì ri ópùni ceir ɑ́bïj, gen ɑ thull-ɑ ɑ́döng kì bɑng tyëng-ɑ ɑ́cyɑ̈ɑ̈m, kɑ ge kedh-ɑ yethi dhöng pyɑ̈rø wïdɑ́ryew. Kɑ ɑ́lïdhi tyëngɑni ki ngïji men-ɑ ɑ́gwøge, ɑkööb gen kinni, “Kidyër, men bɑ jɑltöng-ɑ ɑ́wɑngi i óbï kömi piny!” Kɑ yod yi Yëso kinni, tyëngɑni dwɑdd-ɑ mɑgii, o røny ɑ́ rɑ̈dh; codhe ɑlooye wïj kït. Keny-ɑ ɑ́göög piny ki wɑɑng thyënhø, ɑkedhi jøbɑnge gɑ̈d. Kɑ ge kɑdh-ɑ yij morkɑb, ge kedh-ɑ Kɑpernɑum. Piny ɑ́bëëd ɑ́ muudhø, o Yëso tøøk kì kelli gen. Apɑgø ɑ́bëëd e dɑder, mɑ́ yømø ɑ́cöd e teeg. Kɑ ge kyëw-ɑ keny ni kïlomïtïr ɑ́bïj wɑlɑ̀ ɑ́bïkyel, ɑlidh gen Yëso e ócyɑ̈dhø kì wɑ̈thi pï, e bï-ɑ kun-ɑ di morkɑb, kɑ ge obwøgø. Aköbbi gen yi Yëso kinni, “Bɑ yɑn, wu ko böggi.” Amïni pëthi gen kɑ gø dwɑddi gen ki kïdhi yij morkɑb. Kedh morkɑb wɑ̈dh-ɑ wɑ̈g kì keny-ɑ kedhi yi gen. Kɑ yod dhuki yi tyëng-ɑ ɑ́döng kì løøgø kinni, bɑ morkɑb ɑ́kyel ɑ ɑ́bëëd e nud kì kenyɑni, o Yëso nuti kɑdhi yije kyeel ki jøbɑnge, dɑ́ jøbɑnge ɑ ɑ́kedh keti gen. Abëën yɑ̈ɑ̈th møøgø ge kɑ̈ɑ̈l-ɑ Thɑbɑriyɑ̀, kɑ ge töng-ɑ wɑ̈g kì buti keny-ɑ ɑ́cyɑ̈ɑ̈m yi teedø ki gïncɑm, keny-ɑ ɑ́rum Yëso ki pwøji Jwøk. Keny-ɑ ɑ́yodii yi tyëngɑni kinni, Yëso kí jøbɑnge tøøk kì kenyɑni, ɑkɑdhi gen yethi morkɑbbɑni, kɑ ge bï-ɑ Kɑpernɑum, ge yɑb-ɑ Yëso. Keny-ɑ ɑ́yod ge gøn kì løøgø, ɑpyëj ge gøn kinni, “Jɑlpwönyø, ɑ́ ɑ́wën ɑ ɑ́bëën keny?” Aløøg mø gen yi Yëso kinni, “Yɑ köbb-ɑ wun kidyër kinni, yɑ pɑ yɑb yi wun kɑ per kɑ ɑ́lïdhi wun ki ngïji, dɑ́ per kɑ ɑ́cyɑ̈ɑ̈m wun ki gïncɑm, kɑ wu oyɑ̈ngø. Wu ko nyi göög kipe gïncɑm-ɑ nyi jwɑn rënyø, de göög wun kipe gïncɑm-ɑ pɑ nyi rënyi; eni gïncɑm-ɑ nyi kɑ̈ɑ̈l nënn-ɑ ɑtheer. Nyɑɑr Dhɑnhø, en ɑ ómëggi wun gïncɑmɑni, mɑ́ en ɑ köme ɑ́cïb ngïji yi Jwøk Wïy.” Apyëjii yi gen kinni, “Gïn-ɑ dwɑddi yi Jwøk, ógwøg yi wøn kidï?” Aløøg mø gen yi Yëso kinni, “Gïn-ɑ dwɑddi yi Jwøk bɑ kinni, yïëyu ngɑn-ɑ ɑ́ör yi en.” Apyëjii yi gen kinni, “Á ngïji mɑ ngø ɑ ógwøg yi yïn, o lidh yi wøn, o yï yïëy yi wøn? Á ngø ɑ cuggi gwøgø yi yïn? Kweyyi wøn ɑ́cyɑ̈ɑ̈m ki mɑnɑ̀ kì yij pɑ̈l, ni kɑ ógwedii kì yethi wɑ̈jji kwërø kinni, ‘Gï ɑ́thödhe ki ópun me kɑ̈ɑ̈l mɑl ɑ́ men cɑm yi gen.’ ” Aköbbi gen yi Yëso kinni, “Yɑ köbb-ɑ wun kidyër kinni, pɑth ki Mosɑ̀ ɑ ɑ́thödhi wun ki ópun-ɑ ɑ́kɑ̈ɑ̈l mɑl, de bɑ Wïyɑ kì mɑl, ɑ nyi thödhi wun ki ópun-ɑ dyër. Mɑ́ gïncɑm-ɑ nyi muuj yi Jwøk e kɑ̈ɑ̈l-ɑ mɑl, bɑ en ɑ nyi thödhi lɑ̈bø ki nënnì.” Akööb gen kinni, “Wuö, nyi thödhi wøn ki gïncɑmɑni yethi cyɑ̈ng.” Aköbbi gen yi Yëso kinni, “Yɑ bene ópuun nënnì. Ngɑn bï yïɑ pɑ mɑg yi kɑ̈j, o ngɑn-ɑ óyïëy yɑn pɑ wöl ki mɑgø yi röödhø. De wu ɑ́rum ki köbbø yi yɑn kinni, yɑ ɑ́lidh yi wun, de wu koo yïëy. Ngɑn mëggi yɑn yi Wïyɑ óbï yïɑ, o ngɑn-ɑ óbï yïɑ pɑ ryem yi yɑn, mɑ́ yɑ ɑ́bï yɑ kɑ̈ɑ̈l-ɑ mɑl, yɑ bï-ɑ be gwøgi gïn-ɑ dwɑddi yi ngɑn-ɑ ɑ́ör yɑn, de yɑ nuti bëën-ɑ be gwøgi møg-ɑ dwɑddi yi yɑn ki pyëwɑ. O møg-ɑ dwɑddi yi ngɑn-ɑ ɑ́ör yɑn bɑ kinni, o bongii dhɑnhø me lɑ̈ɑ̈ny kì kelli tyëng-ɑ ɑ́mëgge yɑn bënn, de ge ótïngɑ mɑl kì cyɑ̈ng-ɑ cyɑ̈n. O møg-ɑ dwɑddi yi Wïyɑ bɑ kinni, tyëng-ɑ ólidh Wɑ̈d, kɑ yïëy yi gen, ge óyïddi ki nënn-ɑ ɑtheer. O ge ótïngɑ mɑl kì cyɑ̈ng-ɑ cyɑ̈n.” Akwɑ̈ɑ̈dh Yëso yi Yeud kipe kɑ ɑ́kööbe kinni, “Yɑ bɑ ópun men-ɑ ɑ́kɑ̈ɑ̈l mɑl.” Kɑ ge okööbø kinni, “Men pɑth ki Yëso wɑ̈d Yosep, ɑ wïye kí meye ngɑ̈nyi yi wɑ? Ede ɑ kööbe kinni ɑ́kɑ̈ɑ̈l-ɑ mɑl?” Aløøg mø gen yi Yëso kinni, “Wu ko mungi. Bong ngɑn me cuggi bëën yïɑ, e nuti kölli yɑn yi Wïyɑ, ngɑn-ɑ ɑ́ör yɑn. De ngɑn-ɑ óbï yïɑ ótïngɑ mɑl kì cyɑ̈ng-ɑ cyɑ̈n. Bɑ ɑgwed kì yethi wɑ̈jji jøtöng kinni, ‘Ge ópwönyi yi Jwøk bënn.’ Ngɑn lïngi mø Wïy, kɑ møgɑni dïd yi en, bï-ɑ yïɑ. Pɑth ki kinni, dɑ ngɑn megø me liidh Wïy, dɑ́ ngɑn-ɑ ɑ́kɑ̈ɑ̈l yï Jwøk bɑ en ɑ ɑ́lidh Wïy. Yɑ köbb-ɑ wun kidyër kinni, ngɑn-ɑ yïëy, yïe dɑ nënn-ɑ ɑtheer. Yɑ bene ópuun nënnì. Kweyyi wun ɑ́cyɑ̈ɑ̈m ki mɑnɑ̀ kì yij pɑ̈l, de ge ɑ́thøw. De gïncɑm-ɑ kɑ̈ɑ̈l mɑl, ngɑn-ɑ ócɑmii pɑ thøw. Yɑn ɑ bɑ gïncɑɑm nënnì men-ɑ ɑ́kɑ̈ɑ̈l mɑl, ngɑn cyɑ̈mø ki gïncɑmɑni, ónëënø gïti ɑtheer. Kidyër, gïncɑm-ɑ ómuuj yi yɑn bɑ dëlɑ. Muuj yi yɑn kɑ per kinni o lɑ̈bø yïdde ki nënnì.” Apëëm Yeud keti gen kinni, “Jɑlɑni dële ócuggi mëggi wɑ yi en kidï, o cɑm yi wɑ?” Aköbbi gen yi Yëso kinni, “Yɑ köbb-ɑ wun kidyër kinni, keløg dëël Nyɑɑr Dhɑnhø koo cɑm yi wun, kɑ reme koo mɑdh yi wun, nënnì bogïn kì ri wun. Ngɑn cyɑ̈mø ki dëlɑ kɑ omɑ̈dhø ki remɑ, yïe dɑ nënn-ɑ ɑtheer, o ótïngɑ mɑl ki cyɑ̈ng-ɑ cyɑ̈n. Mɑ́ dëlɑ bɑ gïncɑm men-ɑ dyër, o remɑ bɑ gïn mɑdh men-ɑ dyër. Ngɑn cyɑ̈mø ki dëlɑ kɑ omɑ̈dhø ki remɑ, óbëëdø kì riɑ, kɑ yɑ obëëdø kì ree. Ni kɑ ɑ́ör yɑn yi Wïy ɑ nëënø, o yɑ nëën ɑ ree, ngɑn cyɑ̈mø ki dëlɑ, ónëënø kì riɑ thyew. Men bene ópun men-ɑ ɑ́kɑ̈ɑ̈l mɑl, o pɑ pɑ̈r ki møng-ɑ ɑ́cɑm yi kweyyi wun, kɑ ge othøø. Ngɑn cyɑ̈mø ki ópun men, ónëënø gïti ɑtheer.” Møgɑni ɑ́kømmi yi en ɑ Kɑpernɑum kì sinɑgøg, e pwöny-ɑ ji. Kɑ ɑ́lïngi møgɑni yi ji mø ngenyø kì kelli jøbɑnge, ɑkööb gen kinni, “Kwøbbɑni peeg, ge pɑ cuggi gɑmø yi wïj dhɑnhø.” Kɑ yod yi Yëso kinni, jøbɑnge omungø kipe kwøbbɑni, ɑpyëje gïn kinni, “Pëthi wun ɑ́rënyi yi kwøbbɑni? De di bëëd ɑ dï, keløg Nyɑɑr Dhɑnhø di lidh yi wun e kedh-ɑ mɑl, kun-ɑ ɑ́bëëde cøn? Bɑ Wëyi Jwøk ɑ nyi muuj nënnì, de dël bong gïn gwøge. Kwøbb-ɑ ɑ́köbbɑ wun bɑ wëy geki nënnì. De dɑ ji møøgø kì kelli wun møg pɑ yïëy.” (Yëso, tyëng-ɑ koo yïëyii geki ngɑn-ɑ óngeewii, ngɑ̈nyi yi en ceth.) Kɑ okööbø kinni, “Bɑ kipe møgɑni ɑ ɑ́köbbɑ wun cøn kinni, bong ngɑn cuggi bëën yïɑ, keløg Wïy nuti yïëyø kinni bëe.” Kɑ ji mø ngenyø kì kelli jøbɑng Yëso døøg-ɑ cyɑ̈n, kɑ ge ówïyø cyɑ̈dhø kì bɑnge. Apyëje jøwöödø gɑ pyɑ̈rø wïdɑ́ryew kinni, “Wu dwɑdd-ɑ kedhø thyew?” Aløøg møge yi Sɑymøn Pïtør kinni, “Wuö, wø kedh-ɑ yï men? Bɑ yïn ɑ yïí di nënn-ɑ ɑtheer. Wø ɑ́rum ki yïëyø, kɑ yod yi wøn kinni yï bɑ ngeti kwërø mi Jwøk.” Alöggi Yëso kinni, “Wu nuti yieny-ɑ yi yɑn, wun ɑ́ pyɑ̈rø wïdɑ́ryew? De ɑ́kyel kì kelli wun yije looj ki yɑn.” Yëso ɑ́kømm-ɑ Yeudɑ̀ wɑ̈d Sɑymøn Iskɑryøt, mɑ́ en ɑ óngeewii, o bɑ ɑ́kyel kì kelli pyɑ̈rø wïdɑ́ryew. Kì bɑng kenyɑni, ɑwïïn Yëso kì myërri Gɑlelì, e pɑ dwɑddi cyɑ̈dhø kì myërri Yeudiyɑ̀, mɑ́ tyëng Yeudiyɑ̀ oyɑ̈bø ki yuu nɑ̈g ge gøn. Kɑ bøli kej Kwëër Akɑnnì ócyɑ̈ngø. Aköbbii yi nyiimen kinni, “Dhwöödh kì keny, kɑ yï kedhí myërri Yeudiyɑ̀, o jøbɑngí thyew lïdhi gen ki gïg-ɑ nyi gwøg yi yïn. Mɑ́ ngɑn-ɑ nyi dwɑddi kinni, o gïg-ɑ gøggi yi en yod yi teedø pɑ nyi göögø kì gød. Keløg yï gøgg-ɑ gïg ni møg, nyudhí rií teedø bëne.” Mɑ́ møge nuti yïëyø yi nyiimen thyew. Aköbbi gen yi Yëso kinni, “Bøli kejɑ nuti bëënø, de kì yï wun cyɑ̈ng bënn pɑ̈r. Wu pɑ cuggi mɑɑnø yi piny, dɑ́ yɑn ɑ mɑɑn yi en, kipe kɑ̀ köbbɑ en kinni, gïg-ɑ gøggi yi en rijjø. Kedhu be kwërɑni, de yɑ pɑ kedh, mɑ́ bøli kejɑ nuti thumø.” Kɑ ɑ́rume kwøbi møgɑni, ɑdönge kì Gɑlelì. Keny-ɑ ɑ́kedhi nyiimen be kwërɑni, ɑlunye kedhø kì wɑ̈ye, e kɑnn-ɑ ree. Ayɑbii yi Yeud kì kej kwër, ge opëjø kinni, “Jɑlɑni ying-ɑ keny?” Kɑ ji omungø ge opëmø, kwï ji okööbø kinni, “Bɑ jɑl me døj,” møøgø okööbø kinni, “Pɑth, jɑlɑni peej-ɑ ji pɑ̈l.” De bong ngɑn me kwøb møge kì bøli teedø, mɑ́ ge óböggø yi jɑggi Yeud. Keny-ɑ ɑ́thumi budi cyɑ̈nggi kwër, ɑkedhi Yëso Kengø, kɑ ópwönyø. Angɑ̈ng Yeud yi møgɑni, kɑ ge okööbø kinni, “Jɑlɑni ɑ́dïd kidï, e nuti pɑ̈nyø ki pwönyø?” Aløøg mø gen yi Yëso kinni, “Pwönyɑ pɑth ki miɑ, den-ɑ́ mi ngɑn-ɑ ɑ́ör yɑn. Ke di dhɑnhø me pyëwe dwɑddi gwøgi gïn-ɑ dwɑddi yi Jwøk, pwönyø men ócuggø ngijø yi en ying e kɑ̈ɑ̈l-ɑ yï Jwøk wɑlɑ̀ yɑ 'kööb-ɑ cwɑggɑ. Ngɑn-ɑ nyi kømmi mø cwɑgge nyi yɑb-ɑ kinni o pwøj, de ngɑn-ɑ nyi yɑb kinni o ngɑn-ɑ ɑ́örii pwøj, ngɑnɑni nyi kømm-ɑ dyër, o bong ɑ́dud kì yije. Wu ɑ́thödhi yi Mosɑ̀ ki cigg, de bong dhɑnhø ɑ́kyel kì kelli wun me mïdhi ciggɑni. Wude ɑ yɑ̈ɑ̈b wun ki yöö men nɑ̈gu yɑn?” Alöggi teedø kinni, “Wïjí dɑ ɑ́nɑ̈gø, ɑ́ men ɑ dwɑddi nɑ̈gi yïn?” Aløøg mø gen yi Yëso kinni, “Yɑ ɑ́gwøg-ɑ ngïji ɑ́kyel, kɑ wu ongɑ̈ngø bënn yi menɑni. Bɑ Mosɑ̀ ɑ ɑ́thödhi wun ki cigg kinni, nyi ngøl dhɑnhø (pɑth ki Mosɑ̀ ɑ ɑ́cɑg kwöngɑni, de ɑ́wön ɑ ri kweyyi wun,) kɑ dhɑnhø nyi ngøl yi wun kì cyɑ̈ɑ̈ng Sɑbɑth. Keløg dhɑnhø nyii ngølø kì cyɑ̈ɑ̈ng Sɑbɑth kipe Ciggi Mosɑ̀ óbɑ̈ɑ̈n, wude ɑ wër wun ki yɑn, kenyi gwøgɑ dhɑnhø ki cyɑ̈ɑ̈ng Sɑbɑth kɑ dële ódönyø bëne? Wu ko nyi löggi kì bɑng gïn-ɑ lidh yi wun kete, de nyi löggi wun ki lögg-ɑ dyër.” Codhe, ɑkööb ji møøgø kì kelli tyëng Yerusɑlem kinni, “Pɑth ki jɑlɑni ɑ ɑ́dwɑddi nɑ̈gø yi gen? De pɑth ki en ɑ kööbø kì bøli teedø èn, o bong ngɑn kyëddii? Ócɑɑg kɑ yodø yi jyɑ̈ggì kidyër kinni, bɑ Mesiy? Anɑn kun-ɑ kɑ̈ɑ̈l yi jɑlɑni ngɑ̈nyi yi wɑ, de keny-ɑ óbëën Mesiy bong ngɑn-ɑ óngɑ̈nyi kun-ɑ ɑ́kɑ̈ɑ̈le.” Codhe, ɑryeer Yëso, e ópwönyø kì Kengø kinni, “Yɑ ngɑ̈nyi yi wun, o kun-ɑ kɑ̈ɑ̈l yi yɑn ngɑ̈nyi yi wun thyew. Yɑ nuti bëënø kɑ cwɑggɑ, de ngɑn-ɑ ɑ́ör yɑn bɑ ngɑn mɑ dyër, o ree kwïj yi wun. De ree ngɑ̈nyi yi yɑn, mɑ́ yɑ kɑ̈ɑ̈l-ɑ ree, o bɑ en ɑ ɑ́ör yɑn.” Kɑ kømi mɑgø yi gen kipe møgɑni, de bong ngɑn mɑ ɑ́cïb cinge ree, mɑ́ bøli keje nuti wɑ̈nhø. De ɑ́yïëy yi ji mø ngenyø, kɑ ge okööbø kinni, “Keny-ɑ óbëën Mesiy ógöögø ki ngïjjì mø ngenyø kibøli møg-ɑ ɑ́gwøg yi jɑɑl?” Kɑ møg-ɑ kømmi kì ree yi teedø lïngi yi Jøpɑresì. Aöd jɑggi ókwër geki Jøpɑresì ki bölidhh møg mɑgii. Aköbbi gen yi Yëso kinni, “Yɑ óbëëdø kì kelli wun ki nyɑ keny me thiinh, codhe o yɑ kedhɑ yï ngɑn-ɑ ɑ́ör yɑn. Yɑ óyɑb yi wun, de yɑ koo yod yi wun; mɑ́ wu pɑ cuggi kedhi kun-ɑ ódi yɑn.” Akööb Yeud kì kelli gen kinni, “Jɑlɑni ókedh-ɑ keny, o dhɑ̈le yodø yi wɑ? Ókedh-ɑ bɑng Yeud møg-ɑ ɑ́töngi yïnø Yönɑn, o pwönye tyëng Yönɑn? Wɑng-ɑ ngø kɑ̀ kööbe kinni, ‘Yɑ óyɑb yi wun de yɑ koo yod yi wun,’ kí kinni, ‘Kun-ɑ óbëëdɑ wu dhɑ̈li bëën yije?’ ” Kì cyɑ̈ng-ɑ thumi kwër, eni cyɑ̈ng-ɑ dwøng kì yethi cyɑ̈nggi kwër, ɑcungi Yëso, kɑ óryeerø kinni, “Ngɑn ree di röödhø, bëe yïɑ. Ngɑn-ɑ óyïëy yɑn, ceg-ɑ mɑdh; ni kɑ ókwøbii kì yethi wɑ̈jji kwërø kinni, ‘Nɑ̈mmi pïi nënnì órïngi wɑ̈g kì wɑɑng ngëdi ngɑn-ɑ óyïëy yɑn.’ ” O ɑ́kømm-ɑ wëy-ɑ óyod yi tyëng-ɑ óyïëyii, mɑ́ wëy nuti muujø, yi kɑ̀ nuti thödhi Yëso ki dhwɑ̈ng. Keny-ɑ ɑ́lïngi møgɑni yi teedø, ɑkööb kwï gen kinni, “Jɑɑl bɑ jɑltöng kidyër” Akööb ji møøgø kinni, “Jɑɑl bɑ Mesiy!” Kɑ kwï gen ópëjjø kinni, “Mesiy ókɑ̈ɑ̈l-ɑ Gɑlelì? Nuti kwøbø kì yij wɑ̈nyi kwërø kinni, Mesiy óbëëd ɑ́ kwɑɑr Debïd, o ókɑ̈ɑ̈l-ɑ Betleem kɑɑl Debïd?” Kɑ teedø ri gen pɑ̈ngi gen ki gööj Yëso. Ji møøgø ɑ́dwɑdd-ɑ mɑgii, de bong ngɑn mɑ ɑ́cïb cinge ree. Adwöög bölidhh yï jɑggi ókwër geki Jøpɑresì, kɑ ge pyëj kinni, “Ede ɑ nuti kɑ̈ɑ̈lii yi wun?” Alöggi bölidhh kinni, “Bong ngɑn mɑ ɑ́kööb cøn ni kɑ̀ kööb jɑlɑni.” Apyëëj gen yi Jøpɑresì kinni, “Wu ɑ́ceg kɑ peej pɑ̈l thyew? Dɑ ngɑn mɑ ɑ́yïëyii kì kelli jɑgg wɑlɑ̀ kì kelli Jøpɑresì? Bogøn! De teen-ɑ kwïj Ciggi Mosɑ̀, ri gen dɑ cyën.” Apyëëj gen yi Nikødemøs, jɑl-ɑ ɑ́bï yï Yëso cøn kinni, “Ciggee okööbø i cɑɑy dhɑnhø e kwøbbe nuti lïngø, o gïg-ɑ gøggi yi en nuti yodø yi wɑ?” Kɑ ge ólöggø kinni, “Yï bɑ jɑl Gɑlelì thyew? Yɑ̈ɑ̈b, kì yethi wɑ̈j, o óyod yi yïn kinni, bong jɑltöng men-ɑ ócwöb kì Gɑlelì.” Codhe, kɑ ngɑn kedh-ɑ gøle. Kɑ teedø bëne kedh-ɑ kɑ̈lli gen, kɑ Yëso kedh-ɑ wïj Kïti Dhetun. Dhuki kì mwøl ceth, ɑdwööge Kengø, kɑ teedø bëne bï-ɑ yïe. Apëgge piny, kɑ gï pwönye. Kɑ jøpwönyi Cigg geki Jøpɑresì, ókɑ̈nø ki ngɑndhɑjø men-ɑ ómɑgø ki jɑlø. Keny-ɑ ɑ́cïb ge gøn dïdyëri gen, ɑköbbi Yëso yi gen kinni, “Jɑlpwönyø, ngɑɑn ɑ́mɑg kɑ jɑlø. Ciggi Mosɑ̀ okööbø kinni i bɑ̈lli ngɑn ni men ki tuggi kïttì o thøwe. O yï kwøb-ɑ ngø ɑnɑn?” Møgɑni ɑ́kwøb yi gen, ge rɑng-ɑ gøn, o ge yïddi gen ki gïn pere gøøny ge gøn. Kɑ Yëso wïje kuule piny, kɑ ogwëdø kì piny ki lwede. Keny-ɑ ɑ́dhingii yi gen ki pyëjjɑni, ɑtïnge wïje, kɑ gï köbbe kinni, “Wiy ngɑn nuti göögø ki orøg kì kelli wun, kwönge bɑ̈ddø ki tungi kït.” Acige wïje kuul piny, kɑ ogwëdø kì piny ki lwede. Kɑ ɑ́lïngi møgɑni yi jøgɑni, ɑlømmi gen ri gen, ge kedh-ɑ wɑ̈g, cɑg kì ri jɑldwøøng gen. Adöng Yëso kete kí ngɑnɑni, e ócungø kì bøle. Kɑ Yëso wïje tïnge, ɑköbbe ngɑnɑni kinni, “Ge ying-ɑ keny? Bong ngɑn mɑ ɑ́kuum yïn?” Akööb ngɑnɑni kinni, “Bogøn, Wuö.” Aköbbii yi Yëso kinni, “Cɑgg ɑ́ yɑn thyew, yï pɑ kuum yi yɑn. Kedh kɑ yï ko røngi këti.” Codhe, ɑcigi gen köbbø yi Yëso kinni, “Yɑ bɑ cɑɑr kömi piny. Ngɑn-ɑ ólugi kì bɑngɑ, pɑ cyɑ̈dhi kì yij muudhø, de óyïddi ki cɑɑr nënnì.” Aköbbii yi Jøpɑresì kinni, “Yï kööbø kɑ per cwɑggí, møg-ɑ kømmi yi yïn pɑth ki dyër.” Aköbbi gen yi Yëso kinni, “Awøø, yɑ kööbø kɑ per cwɑggɑ, de møg-ɑ kømmɑ bɑ dyër, mɑ́ kun-ɑ kedhɑ ngɑ̈nyi yi yɑn. De kun-ɑ kɑ̈ɑ̈lɑ wɑlɑ̀ kun-ɑ kedhɑ kwïj yi wun. Cɑ́y-ɑ cɑ̈ɑ̈y wun bɑ cɑ́yi ji yøw, de bong ngɑn nyi cɑy yi yɑn. Cɑgg yɑ cɑ̈yø, cɑ́yɑ bɑ dyër, mɑ́ e pɑth ki yɑ ketɑ ɑ nyi cɑ̈ɑ̈yø, dɑ́ wøki ngɑn-ɑ ɑ́ör yɑn. Bɑ ɑgwed kì yethi ciggi wun kinni, møg-ɑ nyi kwøb yi cwɑ̈gg ɑ́ryew bɑ dyër. Yɑ bɑ cwɑ̈g kipe møgɑ; o Wïyɑ, ngɑn-ɑ ɑ́ör yɑn, bɑ cwɑ̈g kipe møgɑ thyew.” Codhe, ɑpyëjii yi gen kinni, “Wïyí ying-ɑ keny?” Alöggi Yëso kinni, “Yɑ kwïj yi wun, o Wïyɑ kwïj yi wun thyew. Keløg yɑ di bëëd yɑ ngɑ̈nyi yi wun, Wïyɑ di bëëd e ngɑ̈nyi yi wun thyew.” Møgɑni ɑ́kwøb yi en e bëëd ɑ keny-ɑ nyi mïdhi ngyëny, e ópwönyø kì Kengø, de bong ngɑn mɑ ɑ́mɑgii, mɑ́ bøli keje nuti wɑ̈nhø. Acigi gen köbbø yi Yëso kinni, “Yɑ ókedhø, o yɑ óyɑb yi wun, de wu óthøw ki orøøg wun. Wu pɑ cuggi kedhi kun-ɑ kedhɑ.” Akööb Yeud kinni, “Ree óceg yi en kɑ nɑ̈gø kɑ̀ kööbe kinni, i wɑ pɑ cuggi kedhi kun-ɑ kedhe?” Kɑ gï köbbe kinni, “Wu bɑ mø piny, de yɑ kɑ̈ɑ̈l-ɑ mɑl. Wu bɑ jii piny, de yɑ pɑth ki ngeti piny men. Wu ɑ́rum ki köbbø yi yɑn kinni, wu óthøw ki orøøg wun, mɑ́ keløg wu pɑ yïëy kinni, yɑ bene en, wu óthøw ki orøøg wun.” Apyëjii yi gen kinni, “Yïn ɑ́ men?” Aköbbi gen yi Yëso kinni, “Wu ɑ́kwøngɑ ki köbbø cøn, kinni yɑ bene en. Yïɑ dɑ kwøb mø ngenyø mø kømmi yi yɑn kipe wun, geki kwøb mø gïïr møg cɑɑyɑ wun, de ngɑn-ɑ ɑ́ör yɑn bɑ ngeti dyër, o møg-ɑ lïngi yi yɑn kì yïe bɑ gen ɑ nyi köbbɑ kömi piny.” De nuti yood gen kinni, kømm-ɑ per Wïy, kɑ̀ kööbe ki gïn. Aköbbi gen yi Yëso kinni, “Keny-ɑ órum Nyɑɑr Dhɑnhø ki tïng mɑl yi wun, óyod yi wun kinni, yɑ bene en, o bong gïn nyi gwøg yi yɑn ki cwɑggɑ, de møg-ɑ nyi kømmi yi yɑn bɑ møg-ɑ köbbi yɑn yi Wïyɑ. Ngɑn-ɑ ɑ́ör yɑn ying-ɑ butɑ; yɑ nuti wiy en yɑ ketɑ, mɑ́ kì yethi cyɑ̈ng, yɑ nyii göögø ki gïn-ɑ nyi mïni pyëwe.” Keny-ɑ ɑ́kwøbe møgɑni, ɑyïëy ji mø ngenyø ki gøn. Kɑ Yëso Yeud møg-ɑ ɑ́yïëyii köbbe kinni, “Keløg wu óbëëdø kì ri kwøbbɑ, wu ógöögø ki jiɑ kidyër. O dyër óyod yi wun, kɑ wu pɑ̈d yi dyër kì yethi töjjì.” Aløøg møge yi gen kinni, “Wø bɑ kwɑrri Abrɑhɑm, o wø nuti pɑ̈nyi bëëdø wø bɑ bɑ̈nggi ngɑn megø. Yïde ɑ kööb kinni, ‘Wu ógøny kì yethi töjjì?’ ” Aløøg mø gen yi Yëso kinni, “Yɑ köbb-ɑ wun kidyër kinni, ngɑn-ɑ nyi røngø, bɑ bɑ̈ng orøg. Bɑ̈ng pɑ nyi mɑ̈gi ki keny me bɑ̈ɑ̈r kì gøl wɑ̈n, dɑ́ wɑ̈d ɑ nyi bëëdø. Keløg wu ópɑ̈dø kì yethi töjjì yi Wɑ̈d, wu óbëëd wu bɑ ɑgøny kidyër. Ngɑ̈nyi yi yɑn kinni, wu bɑ kwɑrri Abrɑhɑm, de wu dwɑdd-ɑ nɑ̈gi yɑn, mɑ́ kwøbbɑ nuti yïddø ki kɑ̈jji gen kì pëthi wun. Yɑ nyi kømm-ɑ møg-ɑ ɑ́nyudhi yɑn yi Wïyɑ, de wu nyi gøgg-ɑ møg-ɑ ɑ́köbbi wun yi wïyi wun.” Aløøg mø Yëso yi gen kinni, “Wïyi wøn bɑ Abrɑhɑm.” Aköbbi gen yi Yëso kinni, “Keløg wu di bëëd wu bɑ nyigi Abrɑhɑm, wu di göög ni Abrɑhɑm. De ɑnɑn wu dwɑdd-ɑ nɑ̈gi yɑn, yɑ ngɑn-ɑ ɑ́köbbi wun dyër, ni kɑ ɑ́lïngɑ en kì yï Jwøk. Abrɑhɑm nuti göögø kinøw. Wu nyi gøgg-ɑ gïg-ɑ gwøg yi wïyi wun.” Aköbbii yi gen kinni, “Wø nuti wɑ̈dhø kɑ gwenø yøw. Wïyi wøn bɑ ɑ́kyel, en ɑ Jwøk.” Aköbbi gen yi Yëso kinni, “Keløg Jwøk di bëëd ɑ́ Wïyi wun, yɑ di mɑɑr yi wun, mɑ́ yɑ ɑ́bï, yɑ kɑ̈ɑ̈l-ɑ yï Jwøk. O yɑ nuti bëënø kɑ cwɑggɑ, de yɑ ɑ́ör-ɑ yi en. De møg-ɑ nyi kømmi yi yɑn pɑ lïngi yi wun, mɑ́ ge peeg kiper wun. Wu kɑ̈ɑ̈l-ɑ yï wïyi wun, en ɑ Ngɑnrɑj. Møg-ɑ nyi dwɑddi yi wïyi wun, bɑ gen ɑ nyi dwɑddi yi pëthi wun ki gwøgø. Áwöni ɑ́ jɑlnɑ̈g ki ji, o pɑ nyi cungi kì kömi dyër, mɑ́ dyër tøøk kì pyëwe. O kwøbbi pyed møg-ɑ nyi kømme kɑ̈ɑ̈l-ɑ bɑng bëëde, mɑ́ e bɑ jɑlpyed, o bɑ wïi pyed. De kwøbbɑ pɑ yïëy yi wun, mɑ́ yɑ kømm-ɑ dyër. Á men kì kelli wun ɑ cuggi nyudhø kinni, yɑ ɑ́røngi? Keløg yɑ kømm-ɑ dyër, wude ɑ pɑ yïëyu møgɑ? Ngɑn-ɑ ɑ́kɑ̈ɑ̈l yï Jwøk, kwøbbi Jwøk lïnge’ lïngø, o wu pɑ kɑ̈ɑ̈l-ɑ yï Jwøk, bene ɑ pɑ lïng wun.” Aløøg møge yi Yeud kinni, “Wø pɑ kømmi dyër, kɑ̀ kööb wøn kinni, yï bɑ jɑl Sɑmɑriyɑ̀, o rií dɑ wëyrijjø?” Alöggi Yëso kinni, “Riɑ bong wëyrijjø, o yɑ wør-ɑ Wïyɑ, de yɑ pɑ wør yi wun. Yɑ pɑ yɑb dhwɑ̈ɑ̈ng cwɑggɑ, de dɑ ngɑn megø me nyi yɑbii kiperɑ, o bene en ɑ nyi nenni kwøb. Yɑ köbb-ɑ wun kidyër kinni, ngɑn mïdhi kwøbbɑ, pɑ wöl thøø.” Aköbbii yi Yeud kinni, “Áyod yi wøn ɑnɑn kinni, rií dɑ wëyrijjø. Abrɑhɑm ɑ́thøw geki jøtöng, de yï okööbø kinni, ‘Ngɑn mïdhi kwøbbɑ, pɑ wöl thøø.’ Yï lod-ɑ kweyi wøn Abrɑhɑm ki döng, o ɑ́thøw? O jøtöng ɑ́thøw thyew, yï løg-ɑ rií men?” Alöggi Yëso kinni, “Keløg dhwɑ̈ngɑ kɑ̈ɑ̈l-ɑ riɑ, dhwɑ̈ngɑni bong nyinge, de bɑ Wïyɑ ɑ nyi thödhi yɑn ki dhwɑ̈ng, en ɑ ngɑn-ɑ kømmi yi wun kinni, bene Jwøøg wun, Cɑgg ree kwïj yi wun, ree ngɑ̈nyi yi yɑn. Keløg yɑ di kööb kinni, ree kwïj yi yɑn, yɑ di bëëd yɑ bɑ jɑlpyed ni wun. De ree ngɑ̈nyi yi yɑn, o kwøbbe omïdhø yi yɑn. Kweyi wun Abrɑhɑm ɑ́tyer-ɑ lidhi bøli kejɑ, o gø ɑ́lidhe, kɑ pyëwe ómïnø.” Aköbbii yi Yeud kinni, “Runní nuti wɑ̈dhi ri pyɑ̈r ɑ́bïj, o yï kööb kinni Abrɑhɑm liidh yïn?” Alöggi Yëso kinni, “Yɑ köbb-ɑ wun kidyër kinni, yɑ ɑ́bëëd yɑ nud e Abrɑhɑm nuti nywølø.” Akɑ̈bbi gen ki tuggi kïttì møg bɑ̈llii, de Yëso ree ɑ́kɑne, kɑ kedh-ɑ wɑ̈g kì Kengø. Keny-ɑ ɑ́kedhe, ɑlïdhe ki jɑl me ónywølø ɑ́ cwør. Kɑ pyëj yi jøbɑnge kinni, “Jɑlpwönyø, ɑ́ men ɑ ɑ́røngi kì kelli nyelɑni kí meye geki wïye, ɑ bɑnge nywøølii ɑ́ cwør?” Alöggi Yëso kinni, “Pɑth ki nyelɑni wɑlɑ̀ meye wɑlɑ̀ wïye ɑ ɑ́røngi ɑnywøølii ɑ́ cwør, dɑ́ kipe kinni o gwøøg Jwøk ónyodh kì ree. Wɑ gwøg-ɑ gwøøg ngɑn-ɑ ɑ́ör yɑn kɑ̀ bëëd piny nudd ɑ́ dicɑ̈ng, mɑ́ wɑ̈r obëënø, o bong ngɑn-ɑ ócuggi gwøg keny-ɑ óbëën wɑ̈r. Kɑ̈ng-ɑ bëëdɑ kì kömi piny, yɑ bɑ cɑɑr kömi piny.” Keny-ɑ ɑ́rume kwøbi møgɑni, ɑngudde piny ki lɑ́ɑ̀w, kɑ onywöbø ki lɑ̈bø, ɑwødhe nyingi jɑl-ɑ bɑ cwør ki lɑ̈mɑni, Kɑ gø köbbe kinni, “Kedh kɑ nyingí lwøøg kì Luuy Silwɑm.” (A wɑngi ɑör.) Akedhe, kɑ nyinge lwøge, kɑ ódwöögø nyinge onëënø. Akööb tyëng-ɑ bute geki tyëng-ɑ ngɑ̈nyii cøn ɑ́ kwɑ̈ɑ̈j kinni, “Pɑth ki jɑlɑni ɑ nyi bëëdø piny, e ókwɑ̈jjø?” Akööb møøgø kinni, “Bɑ en!” De møøgø ɑ́kööb kinni, “Pɑth ki en, de ceg-ɑ pɑ̈r ki en.” Akööb jɑlɑni kiree kinni, “Yɑ bɑ jɑlɑni.” Kɑ gø pyëj gen kinni, “Yï ɑ́nëën ɑ dï ɑnɑn?” Alögge kinni, “Jɑl me cwøl ɑ́ Yëso ɑ ɑ́nywööb ki lɑ̈bø, kɑ lɑ̈mɑni wøødhe nyingɑ, kɑ yɑ köbbe kinni, ‘Kedhí Luuy Silwɑm, kɑ nyingí lwøøg.’ Akedhɑ, kɑ nyingɑ lwøgɑ, kɑ nyingɑ onëënø.” Apyëjii yi gen kinni, “Jɑlɑni ying-ɑ keny?” Kɑ ólöggø kinni, “Kwïj yi yɑn.” Kɑ jɑl-ɑ ɑ́bëëd ɑ́ cwør muuj Jøpɑresì. O cyɑ̈ng-ɑ ɑ́nywööb Yëso ki lɑ̈bø kɑ nyingi jɑlɑni yiebe ɑ́bëëd ɑ́ cyɑ̈ɑ̈ng Sɑbɑth. Kɑ jɑlɑni pyëj yi Jøpɑresì kinni, nyinge ɑ́nëën ɑ dï? Aköbbe gïn kinni, “Nyingɑ ɑ́wødhe ki lɑ̈bø, ɑlwøgɑ nyingɑ, ɑnëënɑ.” Kɑ kwï Jøpɑresì okööbø kinni, “Ngɑnɑni pɑth ki ngeti Jwøk, mɑ́ cyɑ̈ɑ̈ng Sɑbɑth pɑ wør yi en.” De ji møøgø ɑ́kööb kinni, “Ngetorøg ócuggø gwøg ki ngïjj-ɑ ni møg kidï?” Kɑ dhøggi gen óbɑ̈nnø. Kɑ jɑlɑni cigi pyëjø yi gen kinni, “Yï okööbø kinni nyingí yieeb en, yï rum ɑ dï kipere?” Alöggi jɑlɑni kinni, “Bɑ jɑltöng.” De Yeud nuti yïëyø kinni, jɑlɑni bëëdø ɑ́ cwør, kɑ nyinge yïëy-ɑ nënnø, codhe ɑcwøøl wïye geki meye yi gen. Kɑ gï pyëj gen kinni, “Men bɑ wɑ̈d wun, men-ɑ kømmi yi wun kinni, ɑ́nywøl ɑ́ cwør? De nyinge nëën ɑ dï ɑnɑn?” Alöggi wïye geki meye kinni, “Ngɑ̈nyi yi wøn kinni, bɑ wɑ̈d wøn, o ɑ́nywøl ɑ́ cwør. De kwïj yi wøn, kinni ɑ́nëën ɑ dï ɑnɑn. Pyëju en, bɑ ngɑndwøng, o møge ókwøbe.” Møgɑni ɑ́kwøb yi gen, ge bögg-ɑ Yeud, mɑ́ Yeud dhøggi gen rum gen ki nywɑgø kinni, ke di ngɑn yïëy kinni, Yëso ɑ bɑ Mesiy, ngɑnɑni ceg kɑ ryemø kì sinɑgøg. Bene ɑ bɑnge ɑ́kööb wïye geki meye kinni, “Bɑ ngɑndwøng, pyëju en.” Acigi jɑl-ɑ ɑ́bëëd ɑ́ cwør cwølø yi gen, kɑ gø köbbi gen kinni, “Lejjí Jwøk! Ngɑ̈nyi yi wøn kinni, jɑlɑni bɑ jɑlorøg.” Kɑ ólöggø kinni, “Kwïj yi yɑn ying e bɑ jɑlorøg wɑlɑ̀ pɑth, dɑ́ gïjø ɑ́kyel ɑ ngɑ̈nyɑ kinni, yɑ ɑ́bëëd yɑ bɑ cwør, o yɑ onëënø ɑnɑn.” Kɑ gø pyëj gen kinni, “Yï ɑ́gögge’ ngø? Nyingí ɑ́yieb yi en kidï?” Aløøge mø gïn kinni, “Wu ɑ́rum ki köbbø yi yɑn ɑ́tïni, de wu pɑ lïngø. Wude ɑ dwɑddu lïngi møgɑni këti? Wu dwɑdd-ɑ gwøg ki jøbɑnge thyew?” Agwɑddii yi gen kinni, “Yïn ɑ bɑ ngete, de wø bɑ jø Mosɑ̀. Ngɑ̈nyi yi wøn kinni, Jwøk ɑ́kööb ki Mosɑ̀, de jɑɑl kun-ɑ kɑ̈ɑ̈le kwïj yi wøn.” Alöggi jɑlɑni kinni, “Men bɑ gïïngɑ̈ngø! Kun-ɑ kɑ̈ɑ̈l yi en kwïj yi wun, o nyingɑ ɑ́yieb yi en kidï! Ngɑ̈nyi yi wɑ kinni, kwɑ̈jji tyëngorøg pɑ nyi lïngi yi Jwøk; de nyi lïng-ɑ kwɑ̈jji ji-ɑ mɑllii, ɑ nyi gwøg gïn-ɑ dwɑdde. Kër-ɑ ɑ́cɑɑg piny ki cwɑ̈jø nuti lïngø kinni, i dɑ dhɑnhø me yieeb nyingi ngɑn-ɑ ónywølø ɑ́ cwør. Keløg jɑlɑni pɑ kɑ̈ɑ̈l yï Jwøk, ti bong gïn di cuggi gwøgø yi en.” Aløøg møge yi gen kinni, “Yï dwɑdd-ɑ pwönyi wøn, yïn ɑ ngɑn-ɑ ónywøøl yij orøg?” Kɑ gø ryeem gen wɑ̈g. Alïng Yëso kinni, gø ryeem gen wɑ̈g. Keny-ɑ ɑ́yode gøn, ɑpyëje gøn kinni, “Nyɑɑr Dhɑnhø ɑ́yïëy yi yïn?” Alögge kinni, “Jɑldwøng, Nyɑɑr Dhɑnhø ɑ́ men, o yïëy yi yɑn?” Aköbbii yi Yëso kinni, “Árum ki lidhø yi yïn, o bɑ en ɑ kööbø ki yïn èn.” Akööbe kinni, “Wuö, yɑ ɑ́yïëy.” Kɑ gø mɑle. Akööb Yëso kinni, “Yɑ ɑ́bï kömi piny kɑ per lidhi gønyy, o tyëng-ɑ nyinge gen pɑ nëënø, nëën gen; o tyëng-ɑ nyingi gen nëënø, cøør gen.” Kɑ ɑ́lïngi møgɑni yi Jøpɑresì møg-ɑ bute, ɑkööb gen kinni, “Wø thyew, wø cøørø?” Aköbbi gen yi Yëso kinni, “Ke di bëëd wun wu cøørø, ti yï wun bong orøg. De ɑnɑn kenyi kööb wun kinni, ‘Nyingi wøn onëënø,’ orøøg wun ceg-ɑ bëëdø kì kömi wun.” “Yɑ köbb-ɑ wun kidyër kinni, ngɑn-ɑ pɑ kɑ̈l dhø kyeel dyëg, de nyi kɑ̈l-ɑ wïj kyel, ngɑnɑni bɑ kur, o bɑ ngeti kɑ̈b. De ngɑn-ɑ nyi kɑ̈l dhø kyel, bɑ wïi dyëg. Dhø kyel nyi yïëbb-ɑ en yi jɑl-ɑ kurø, kɑ cwɑgge nyi lïngi yi dyëg. Kɑ dyëge nyi cwøle ki nyingi gen, kɑ gï nyi peeje wɑ̈g. Kenyi wɑ̈dhi gen wɑ̈g bënn, nyi cyɑ̈dh-ɑ́ɑ̀ mɑɑl gïn, kɑ ge nyii lugø kì bɑnge, mɑ́ cwɑgge ngɑ̈nyi yi gen. Ngɑnpɑth, bɑnge pɑ nyi løg yi gen, de ge nyii pɑ̈rø kì yïe, mɑ́ cwɑggi tyëngpɑth kwïj yi gen.” Møgɑni ɑ́gɑj yi Yëso kɑ per gen, de gïn-ɑ wɑngi yi en nuti yood gen. Codhe, ɑköbbi gen yi Yëso kinni, “Yɑ köbb-ɑ wun kidyër kinni, yɑn ɑ bɑ dhø kyeel dyëg. Tyëng-ɑ ɑ́kwöngi bëënø bënn kì bølɑ bɑ kurrì, o ge bɑ tyëngkɑ̈b, o dhøggi gen pɑ nyi lïngi yi dyëg. Yɑ bɑ dhø kyel, ngɑn-ɑ nyi kɑ̈l riɑ óyiel, o óbëëd e nyi wɑ̈dh-ɑ kedhi yije kɑ nyi wɑ̈dh-ɑ dwöög wɑ̈g, o kej cyɑ̈ɑ̈mø nyii yodø yi en. Kur nyi bï-ɑ be kwɑl kí nɑ̈g, kí rënyi jɑmmì yøw. De yɑ ɑ́bï-ɑ be yieli ji, o ge yïddi gen ki nënnì. “Yɑ bɑ jɑlkwɑ̈yø me døj, o jɑlkwɑ̈y-ɑ døj nyi muuj-ɑ wëye kipe dyëge. De ngɑn kwɑ̈yø e bɑ ɑkïr, e dyëg pɑth ki møge, kenyi lidhe gøøl e obëënø, dyëg nyi wiye’ piny, kɑ órengø, kɑ dyëg gwɑrri yi gøøl, kɑ gï kedhhe. Jɑl-ɑ bɑ ɑkïr nyi ceg-ɑ rengø, o dyëg bong per gen kì yïe. Yɑ bɑ jɑlkwɑ̈yø me døj. Dyëgɑ ngɑ̈nyi yi yɑn, o yɑ ngɑ̈nyi yi gen, Ni kɑ̀ ngɑ̈nyi yɑn yi Wïyɑ, o Wïyɑ ngɑ̈nyi yi yɑn, o wëyɑ muujɑ’ muujø kipe dyëgɑ. Yïɑ dɑ dyëg møøgø mø tøøk kì yij kyel men, ge ceg kɑ kɑ̈ɑ̈lø yi yɑn thyew, o cwɑggɑ ólïngi yi gen. O dɑɑg bëëde ɑ́ ɑ́kyel kí jɑlkwɑ̈yø ɑ́kyel. “Yɑ mɑɑr yi Wïyɑ mɑ́ yɑ muuj-ɑ wëyɑ gɑ møg-ɑ ódwöög yïɑ. Bong ngɑn-ɑ ókwɑny gen kì yïɑ, dɑ́ yɑn ki cwɑggɑ ɑ ómuuj gen. Yïɑ dɑ tegø men muujɑ gen, o yïɑ dɑ tegø men kwɑnyɑ gen. Gwøngɑni ɑ́muuj-ɑ yi Wïyɑ kinni gwøgɑ en.” Kɑ Yeud dhøggi gen cig-ɑ bɑ̈nnø kì bɑng kwøbbɑni. Kɑ ji mø ngenyø kì kelli gen okööbø kinni, “Ree dɑ wëyrijjø, ceg-ɑ myëlø, wude ɑ lïngu møge?” De ji møøgø ɑ́kööb kinni, “Kwøbb-ɑ ni møg pɑth ki kwøbbi ngɑn ree di wëyrijjø. Nyingi cörr ócuggø yiebø yi wëyrijjø?” Piny ɑ́bëëd ɑ́ wuudø, o bɑ bøli keny-ɑ pɑɑr thyeyi Kengø kì Yerusɑlem. Yëso ɑ́bëëd e ócyɑ̈dhø kì yij ɑkɑni Sølømøn kì ri Kengø. Atyegii kej ɑ́kyel yi Yeud, kɑ gø pyëj gen kinni, “Yï gït-ɑ wɑɑng wø pɑ köbbi yi yïn? Köbbí wøn dyër, yï bɑ Mesiy?” Alöggi Yëso kinni, “Wu ɑ́rum ki köbbø yi yɑn, de wu nuti yïëyø. Gïg-ɑ nyi gwøg yi yɑn ki nyingi Wïyɑ, bɑ cwɑ̈ggɑ; de wu pɑ yïëy, mɑ́ wu pɑth ki dyëgɑ. Dyëgɑ nyi lïng-ɑ cwɑggɑ, yɑ ngɑ̈nyi yi gen, o ge nyi lug-ɑ́ɑ̀ bɑngɑ. Ge mëggɑ’ nënn-ɑ ɑtheer, o ge pɑ wöl lɑ̈ɑ̈nyø, wɑlɑ̀ bong ngɑn me gwɑr gen kì cingɑ. Wïyɑ, ngɑn-ɑ ɑ́mëggi gen yɑn, bɑ en ɑ dwøng kibøli dhɑnhø bëne, o bong ngɑn me cuggi gwɑri gen kì cingi Wïyɑ. Wø bɑ ɑ́kyel kí Wïyɑ.” Codhe, ɑkɑ̈bbi Yeud ki tuggi kïttì møg bɑ̈llii. Aköbbi gen yi Yëso kinni, “Yɑ ɑ́göög ki gïgdøj mø gïïr kì bøli wun, o ge bɑ møg-ɑ ɑ́mëggi yɑn yi Wïyɑ kinni gwøgɑ gen. Á kipe gwøng ɑ́ kì kelli gen, ɑ dwɑddu yɑn bɑ̈llø?” Alöggi Yeud kinni, “Yï pɑ bɑ̈lli yi wøn kɑ per gwøg me døj, dɑ́ kipe kwøbb-ɑ nyi kømmi yi yïn kì ri Jwøk, mɑ́ yï bɑ dhɑnhø yøw, de yï ceg-ɑ rií ki pɑ̈ɑ̈rø ki Jwøk.” Aløøg mø gen yi Yëso kinni, “Bɑ ɑgwed kì yethi ciggi wun i Jwøk kööbø kinni, ‘Wu bɑ jwögg.’ Ngɑ̈nyi yi wɑ kinni møg-ɑ kømmi yi wɑ̈jji kwërø bɑ dyër ceth; o jiɑni cwølli yi Jwøk gɑ jwögg, gen ɑ tyëng-ɑ ɑ́mëggi wöönɑni. Keløg ɑ́ perɑ, yɑ ɑ́myeg-ɑ yi Wïy, kɑ yɑ öre kömi piny. De wu kööb ɑ dï kinni yɑ bwöl-ɑ nyingi Jwøk kipe kɑ ɑ́kööbɑ kinni, yɑ bɑ Wɑ̈d Jwøk? Keløg yɑ pɑ göögø ki gwøøg Wïyɑ, wu ko yïëy ki yɑn. De keløg yɑ nyi gøgg-ɑ gen, cɑgg yɑ pɑ yïëy yi wun, yïëyu gïg-ɑ gøggɑ, o yod yi wun kinni, Wïyɑ ying-ɑ riɑ, o yɑ ying-ɑ ri Wïyɑ.” Adwɑddii mɑgø yi gen këti, de ɑ́bodh kì cinggi gen. Kɑ Yëso kedh-ɑ løøg Nɑm Urdun, kun-ɑ ɑ́bëëd yi Jøn e jwɑ̈ɑ̈g-ɑ ji, kɑ obëëdø kì kunɑni. Abëën ji mø gïïr yïe, kɑ ge okööbø kinni, “Bong ngïji mɑ ɑ́gwøg yi Jøn, de møg-ɑ ɑ́kømmi yi en bënn kì ri jɑlɑni ɑ́bï gɑ dyër.” Kɑ yïëy yi ji mø gïïr kì kunɑni. Jɑl me cwøl ɑ́ Lɑdhɑrøs kì Betɑnì, ɑ́bëëd e ceg-ɑ buddø ki rɑ̈ɑ̈m dël. Pɑnɑni ɑ bëëd yi Meerì geki Mɑrthɑ̀ nyimen. Bɑ Meerì menɑni ɑ ɑ́gïny Wë ki møw-ɑ yøme med, kɑ tyelle pøjje ki yëyyi wïje, en ɑ ómen Lɑdhɑrøs buud. Kɑ nyiimï Lɑdhɑrøs öd-ɑ yï Yëso kinni, “Wuö, ngɑn-ɑ mɑɑr yi yïn obuddø ki rɑ̈ɑ̈m dële.” Keny-ɑ ɑ́lïngi møgɑni yi Yëso ɑkööbe kinni, “Buunɑni pɑth ki men thøw Lɑdhɑrøs, dɑ́ kipe kinni o Jwøk yïdde ki pwøj, o Wɑ̈d Jwøk yïdde ki pwøj thyew.” Mɑrthɑ̀ kí nyimen kí Lɑdhɑrøs ge mɑɑr yi Yëso. Keny-ɑ ɑ́lïng Yëso kinni, Lɑdhɑrøs obuddø, ɑ́rïïj ki cyɑ̈ng ɑ́ryew kì keny-ɑ ɑ́di en. Codhe, ɑköbbe jøbɑnge kinni, “Bïu, døøg wɑ myërri Yeudiyɑ̀.” Alöggi jøbɑnge kinni, “Jɑlpwönyø, yï ɑ́cer-ɑ kømi bɑ̈llø yi Yeud ki tuggi kïttì, o yï yöd yï døøg-ɑ kunɑni?” Alöggi Yëso kinni, “Pɑth ki sɑɑ̀ pyɑ̈rø wïdɑ́ryew ɑ nyi bëëd piny e tɑr? Keløg dhɑnhø cyɑ̈dh-ɑ́ɑ̀ dicɑ̈ng tyele pɑ cwɑny yi en, mɑ́ e onëënø yi tɑri piny. De keløg dhɑnhø cyɑ̈dh-ɑ́ɑ̀ wɑ̈r, tyele nyii cwɑnyø yi en, mɑ́ e bong cɑr kì wɑ̈r.” Kɑ ɑ́rume kwøbi møgɑni, ɑköbbe gïn kinni, “Mɑ̈dhee, Lɑdhɑrøs ceg-ɑ nenø, de yɑ kedh-ɑ be cyëëwii.” Aköbbii yi jøbɑnge kinni, “Wuö, keløg e nenø dële óyöni.” Yëso ɑ́kømm-ɑ ninni thøø, de gø cwøl yi gen kinni, wɑng-ɑ ywömi rɑw kì yethi nin. Aköbbi gen yi Yëso kinni, “Lɑdhɑrøs ɑ́thøw, de pyëwɑ med kɑ̀ bëëdɑ yɑ tøøk kì kunɑni kipe kinni o wu yïëy wun. Dhwödh wun, kedhi wɑ yïe!” Aköbbi jøbɑng Yëso møg-ɑ kyeelø yi Tömɑs Nyɑjwøk kinni, “Bïu, kedh wɑ thyew, o wɑ thøw wɑ kyeel ki en.” Keny-ɑ ɑ́bëën Yëso, ɑyode gøn kinni, Lɑdhɑrøs cyɑ̈ngge bɑ ɑ́ngwen kì yij rörø. O Betɑnì cyɑ̈gi ki Yerusɑlem, ki kïlomïtïr ɑ́dɑ̈g, o Yeud mø ngenyø kedhi be lugi Meerì geki Mɑrthɑ̀ ki thøwi ómï gen. Keny-ɑ ɑ́lïng Mɑrthɑ̀ kinni Yëso obëënø, ɑkedhe be pɑɑrii, de Meerì ɑ́döng, e obëëdø kì ød. Kɑ Yëso köbbi yi Mɑrthɑ̀ kinni, “Wuö, keløg yï di ying me nud, ómïɑ pɑ di thøw. De yɑ ngɑ̈ny wøw kinni, gïn-ɑ cwøl yi yïn kì yï Jwøk gø nyi mëgge’ yïn.” Aköbbii yi Yëso kinni, “Ómyëw ódhwödh.” Aköbbii yi Mɑrthɑ̀ kinni, “Ngɑ̈nyi yi yɑn kinni, ódhwödh kì bøli keny-ɑ ódhwödhi ji mɑl kì yij thøø kì cyɑ̈ng-ɑ cyɑ̈n.” Aköbbii yi Yëso kinni, “Yɑn ɑ bɑ dhwödhø kí nënnì; ngɑn yïëy yɑn, cɑgg e thøw ónëënø, o ngɑn nëënø ke yïëye yɑn, pɑ wöl thøø. Møgɑni ɑ́yïëy yi yïn?” Aköbbii yi ngɑnɑni kinni, “Yɑ ɑ́yïëy Wuö, yɑ ɑ́yïëy kinni, yï bɑ Mesiy, Wɑ̈d Jwøk, ngɑn-ɑ ɑ́kwøb i óbï kömi piny.” Keny-ɑ ɑ́rum Mɑrthɑ̀ ki kwøbi møgɑni ɑkedhe, kɑ Meerì nyimen cwøle; gø ɑ́köbbe mɑ̈ɑ̈dh kinni, “Jɑlpwönyø nud, o yï ocwøllø yi en.” Keny-ɑ ɑ́lïngi møgɑni yi Meerì, ɑjwɑne dhwödhø, kɑ kedh-ɑ yïe. Yëso nuti bëën pɑc; ɑ́nudd e bëëd ɑ keny-ɑ ɑ́yodii yi Mɑrthɑ̀. Kɑ Yeud møg-ɑ bëëdø kì buti Meerì kì ød, ge lug-ɑ gøn, kɑ ɑ́lidh gen Meerì e jwɑn-ɑ dhwödhø, e kedh-ɑ wɑ̈g, ɑløg gen bɑnge, ge orumø kinni i kedh-ɑ wïj rörø be ywøg. Keny-ɑ ɑ́wɑ̈nhi Meerì kun-ɑ di Yëso, ɑbøødhe ree piny kì bøle, e okööbø kinni, “Wuö, keløg yï di bëëd yï nud, ómïɑ pɑ di thøw!” Keny-ɑ ɑ́liidh Meerì yi Yëso, e óywöngø, geki teen-ɑ ɑ́cyɑ̈dhi ki en, ge óywöngø thyew, ɑyëgge mɑl, yije orɑ̈mø yi kwøbbɑni. Akööbe kinni, “Ákoonyu’ keny?” Alöggi gen kinni “Wuö, bïí lïdhí.” Kɑ Yëso óywöngø. Akööb Yeud kinni, “Lïdhu cyee, cɑɑg bëëdø e mɑɑr yi en ki mendwøng!” De kwï ji ɑ́kööb kinni, “Bong gïn di cuggi gwøgø yi jɑɑl, eni ngɑn-ɑ ɑ́yieb nyingi jɑl-ɑ́ cwør, Lɑdhɑrøs pɑ di mɑ̈ɑ̈ne thøø?” Kɑ Yëso cig-ɑ yëggi mɑl, kɑ nyeg-ɑ buti rörø. Rörɑni bɑ órøngi kït, dhøge bɑ ɑrïg ki tungi kït. Akööb Yëso kinni, “Nyiig wun kïnɑni wɑ̈ye.” Akööb Mɑrthɑ̀ nyimï jɑl-ɑ ɑ́thøw kinni, “Wuö, yømi dhɑnhø óngwɑ̈ɑ̈j tïn, mɑ́ cyɑ̈ngge bɑ ɑ́ngwen kì yij rörø.” Aköbbii yi Yëso kinni, “Yï nuti köbbø yi yɑn kinni, keløg yï óyïëy, mɑ̈ɑ̈r Jwøk ólidh yi yïn?” Codhe, ɑnyiig kïnɑni wɑ̈ye. Kɑ Yëso lïïdh-ɑ mɑl, ɑkööbe kinni, “Yɑ pwøj-ɑ yïn Wïyø, kipe kɑ ɑ́lïngí kwøbbɑ. Ngɑ̈nyi yi yɑn kinni, kwøbbɑ nyii lïngø yi yïn ceth, de møgɑni kwøb yi yɑn kɑ per ji-ɑ keny èn, kipe kinni o ge yïëy gen kinni, yɑ ɑ́ör-ɑ yi yïn.” Keny-ɑ ɑ́rum Yëso ki kwøbi møgɑni, ɑcwödde e óryeerø kinni, “Lɑdhɑrøs, bïí wɑ̈g.” Abëën ngɑnthøø wɑ̈g, cinge geki tyelle bɑ ɑkod ki ógødh, o nyinge bɑ ɑtwöj ki nyɑ ógødh. Aköbbi gen yi Yëso kinni, “Pɑ̈du en, kɑ wiy kedhe.” Ádɑ ji mø gïïr kì kelli Yeud mɑ ɑ́bï yï Meerì, kɑ gïn-ɑ ɑ́gwøg yi Yëso lidh yi gen, kɑ yïëy yi gen. De kwï gen ɑ́kedhi yï Jøpɑresì, kɑ gï köbbi gen gïn-ɑ ɑ́gwøg yi Yëso. Codhe, ɑcugi jɑggi ókwër geki Jøpɑresì, kɑ ge okööbø kinni, “Á gïn-ɑ ógwøg yi wɑ? Lidhu gïïngɑ̈ngø møg-ɑ gwøg yi jɑlɑni! Keløg e ówiy yi wɑ kinøw, óyïëy yi teedø bëne, kɑ mïri Römɑ̀ obëënø, kɑ Kengee kí juree rënye.” Kɑ jɑl ɑ́kyel kì kelli gen, me cwøl ɑ́ Kɑyɑpɑ̀, ɑ ɑ́bëëd ɑ́ Ókwër-ɑ Dwøng kì runɑni, okööbø kinni, “Bong gïn ngɑ̈nyi yi wun! Pɑ gɑm yi wɑ̈thi wun kinni, lɑ̈w thøwi jɑl ɑ́kyel e gøøm-ɑ bøli teedø, o jur bëne cöge e pɑ rënyi.” Møgɑni nuti kwøbø yi en kɑ cwɑgge, dɑ́ kɑ̀ bëëde ɑ́ Ókwër-ɑ Dwøng kì runɑni, ɑ́ceg kɑ mɑ̈ɑ̈gø ki yodø yi en kinni, Yëso bɑ men thøw e gøøm-ɑ bøli Yeud, o pɑth kipe gen keti gen, dɑ́ kipe nyigi Jwøk møg-ɑ tɑyø bënn, kinni o gï cønge kej ɑ́kyel thyew. Cɑg kì cyɑ̈ngɑni ge nyii rïïjø ge nywɑgg-ɑ dhøggi gen kipe nɑ̈ge. Codhe, ɑwïyi Yëso ki wɑ̈dhi cyɑ̈dhø kì kelli Yeud, kɑ odhwödhø kì kenyɑni kɑ kedh-ɑ kɑɑl-ɑ cwøl ɑ́ Eprɑim kì buti ryɑng, kɑ obëëdø kì kunɑni geki jøbɑnge. Kɑ bøli kej Kwëër Ákɑɑdh ócyɑ̈ngø. Kɑ ji mø ngenyø kì yethi myërr-ɑ thønhø kedh-ɑ Yerusɑlem be guöög dhïwø, kɑ̈ng-ɑ́ nuti bëën cyɑ̈ɑ̈ng kwër. Kɑ Yëso yɑb yi gen, ge okööbø kinni, “Jɑlɑni pɑ bï be kwër?” Mɑ́ jɑggi ókwër geki Jøpɑresì rum ceg kinni, i nyoodh keje yi ngɑn-ɑ óyodii, o mɑg yi gen. Kɑ ɑ́dönge ɑ́ cyɑ̈ng ɑ́bïkyel kipe cɑ̈gi Kwëër Ákɑɑdh, ɑbëën Yëso Betɑnì, pɑn-ɑ ɑ́di Lɑdhɑrøs, ngɑn-ɑ ɑ́tug yi en kì yij thøø. Aryejii ki gïncɑm kì kenyɑni, o bɑ Mɑrthɑ̀ ɑ ɑ́kɑ̈lli gïncɑm. O Lɑdhɑrøs ɑ́bëëd e nud kì kelli tyëng-ɑ ɑ́cyɑ̈ɑ̈m ki Yëso. Akɑ̈ni Meerì ki ɑ́thïwi møw me yøme med, me ngewe teeg, kɑ tyelli Yëso gïnye ki møwɑni. Kɑ gï pøjje ki yëyyi wïje. Kɑ ønɑni kɑb yi yømi møwɑni. Akööb Yeudɑ̀ Iskɑryøt, ɑ bɑ ɑ́kyel kì kelli jøbɑnge, eni ngɑn-ɑ ɑ́ngeewii kinni, “Ede møwɑni ɑ bɑnyii ki ngeew wɑ̈g ki ngyëny miy ɑ́dɑ̈g, o ngyënyyɑni di mëggi ɑbuur?” Møgɑni nuti kwøbø yi en, e ywøg-ɑ ɑbuur, dɑ́ kipe kɑ̀ bëëde ɑ́ kur, mɑ́ sɑnduug ngyëny ɑ́mïdh-ɑ yi en, o nyii kɑ̈bbø kì ri ngyënyy-ɑ nyi cïb yije. Akööb Yëso kinni, “Wiyu en, møwɑni ɑ́mïdhi yi en ɑ́ men koony yɑn. Abuur bëëd ɑ kelli wun yethi cyɑ̈ng bënn, de yɑ koo bëëdø kì kelli wun yethi cyɑ̈ng bënn.” Kɑ Yeud mø ngenyø olïngø kinni, Yëso nud kì Betɑnì, ɑbëën gen, de pɑth kipere kete, dɑ́ kipe kinni o Lɑdhɑrøs ngɑn-ɑ ɑ́tug yi en kì yij thøø, lidh yi gen thyew. Kɑ jɑggi ókwër dhøggi gen nywɑg gen kinni o Lɑdhɑrøs nɑ̈g thyew. Mɑ́ kì bɑnge, ge ɑ́bɑny yi ji mø ngenyø kì kelli Yeud, kɑ Yëso yïëy yi gen. Dhuki ɑlïng ji mø ngenyø møg-ɑ ɑ́bï be kwër kinni Yëso bï-ɑ Yerusɑlem. Akɑ̈bbi gen ki ówɑwwi benø mø mɑr, kɑ ge kedh-ɑ be pɑɑrii, ge óryeerø kinni, “Lenhi wɑ Jwøk! Ngɑn-ɑ bï ki nyingi Wë, bɑ ɑgyëdh! Rɑ̈ɑ̈dh Isrɑil ógyëdh yi Jwøk!” Ayïddi Yëso ki ɑderø ówöb, kɑ kɑdh-ɑ köme ni kɑ ógwedii kinni, “Nyɑɑr Dhɑyøn, yï ko böggi! Rɑ̈dhí ɑ bï èn, e obëëdø kì kömi ɑderø ówöb.” Tyelli møgɑni nuti yodø yi jøbɑnge kì tyeli mɑl, de kɑ ɑ́rum Yëso ki thödhø ki dhwɑ̈ng, ɑpɑrii yi gen kinni, møgɑni ógwedø kɑ pere, o bɑ møgɑni ɑ ɑ́göggii yi teedø. O tyëng-ɑ ɑ́bëëd ge nud keny-ɑ ɑ́cwööle Lɑdhɑrøs wɑ̈g kì yij bur, kì bøli keny-ɑ ɑ́tuge gøn kì yij thøø, ge ɑ́cyɑ̈dhi ge kømm-ɑ møgɑni kì kelli teedø. O bɑ kipe møgɑni ɑ ɑ́kedhi teedø be pɑɑrii, mɑ́ ge ɑ́lïng kinni, ngïji menɑni ɑ́gwøg-ɑ yi en. Kɑ Jøpɑresì ri gen köbbi gen kinni, “Bong gïn cuggi gwøgø yi wun. Ji pɑ nenni yi wun ge kedh-ɑ bɑnge!” Ádɑ tyëng Yönɑn mø nud kì kelli tyëng-ɑ ɑ́bï be mɑlli Jwøk kì cyɑ̈nggi kwër. Kɑ tyëngɑni bï-ɑ yï Pïlïp jɑl Betsɑidɑ̀ kì myërri Gɑlelì, kɑ gø kwɑjji gen kinni, “Jɑldwøng, wø dwɑdd-ɑ yïddø ki Yëso.” Akedh Pïlïp, kɑ Andrø köbbe, ɑbëën gen, kɑ Yëso köbbi gen. Aløøg mø gen yi Yëso kinni, “Bøli keny-ɑ óthödhi Nyɑɑr Dhɑnhø ki dhwɑ̈ng ɑ́wɑ̈nhi. Yɑ köbb-ɑ wun kidyër kinni, keløg wɑɑng byëlø pɑ dëëm piny kɑ othøø, nudd ɑ́ en ceth, de keløg e othøø, ceg-ɑ kɑ̈nø ki nying mø ngenyø. Ngɑn-ɑ mɑɑr ree wëye ólɑ̈ɑ̈ny kì yïe, de ngɑn-ɑ mɑɑn ree kì kömi piny men, wëye ómïdhi yi en kipe nënn-ɑ ɑtheer. Ngɑn dwɑddi göggi yɑn, luge kì bɑngɑ, o ngɑn-ɑ göggi yɑn óbëëd ɑ keny-ɑ ódi yɑn thyew. O ngɑn göögø kiperɑ, ótheg yi Wïy. “Anɑn pyëwɑ olïngø, de yɑ ókööb ɑ dï? Kööbɑ kinni, ‘Wïyø, yiel yɑn kì bøli keny?’ Pɑth ki kinøw, mɑ́ e bɑ per møgɑni ɑ ɑ́bëënɑ. Wïyø, thödhí nyingí ki dhwɑ̈ng.” Abëën cwɑg kì mɑl kinni, “Nyingɑ ɑ́rum ki thödhø dhwɑ̈ng yi yɑn, o cigɑ’ thödhø.” Alïngi møgɑni yi teen-ɑ cungi kì bute, kɑ ge okööbø kinni, “Men bɑ omɑ̈ɑ̈r mɑl!” Kɑ møøgø okööbø kinni, “Wëywödø ɑ ɑ́kööb ki en.” Alöggi Yëso kinni, “Cwɑggɑni nuti bëënø kɑ perɑ, dɑ́ kiper wun. Anɑn bøli kej cɑyi piny men ɑ́wɑ̈nhi, o jɑngi piny men, óryeem wɑ̈g. De yɑn, keny-ɑ ótïng yɑn kì piny, teedø bëne ótëëlɑ riɑ.” Møgɑni ɑ́kwøb yi en, gɑ møg nyodh thøw-ɑ óthøwe. Aløøg møge yi teedø kinni, “Wø ɑ́lïng kì yethi cigg kinni, ‘Mesiy óbëëdø gïti ɑtheer.’ De yï cigí kwøb kidï kinni, ‘Nyɑɑr Dhɑnhø ótïng mɑl?’ Á men ɑ bɑ Nyɑɑr Dhɑnhø?” Aköbbi gen yi Yëso kinni, “Cɑr óbëëdø kì kelli wun kɑ nyɑ keny me thiinh. Cyɑ̈dhi wun kɑ̈ng-ɑ nud cɑr kipe wu ópïïd yi muudhø. Ngɑn cyɑ̈dhi kì yij muudhø kun-ɑ kedhe kwïj yi en. Kɑ̈ng-ɑ nud cɑr kì kelli wun, yïëyu cɑr, o wu óbëëd wun wu bɑ nyigi cɑr.” Kɑ ɑ́rum møgɑni ki kwøbø yi Yëso, ɑkedhe, kɑ ree kɑne kipe gïn. Yëso nuti yïëyø yi gen, ngö e ɑ́göög ki ngïjjì mø ngenyø kì bøli gen, o møg-ɑ ɑ́kwøb yi Icɑyɑ̀ jɑltöng pɑ̈dhi gen kɑ̈jji gen, kɑ ɑ́kööbe kinni, “Wuö, ɑ́ men ɑ ɑ́yïëy møg-ɑ ɑ́kwøb yi wøn? O Jwøng-ɑ Ácwɑ̈ɑ̈j tege ɑ́nyudhe’ men?” Kɑ ge ódhɑ̈lø yïëyø, mɑ́ Icɑyɑ̀ ɑ́cigi kwøb kinni, “Nyingi gen ɑ́göjji cøørø yi Jwøk, kɑ wɑ̈thi gen ócungø, o nyingi gen cög ge pɑ nëënø o wɑ̈thi gen cög ge pɑ gɑ̈ɑ̈mø ki kwøb o ge cög ge pɑ dwöög köörɑ o ge di yielɑ.” Møgɑni ɑ́kwøb yi Icɑyɑ̀, mɑ́ dhwɑ̈nge ɑ́lidh yi en, kɑ okööbø kipe gøn. Cɑgg ɑ́ kɑ ɑ́kööbe kinøw, møge ɑ́yïëy yi ji mø ngenyø kì kelli jɑgg, de møgɑni nuti tööng gen kì bøli teedø, mɑ́ ge óböggø yi Jøpɑresì kipe ge óryem kì sinɑgøg. Mɑ́ ge mɑɑr-ɑ gøggi gïg-ɑ yïëy yi teedø kibøli mø Jwøk. Aryeer Yëso, kinni, “Ngɑn yïëy yɑn, pɑth ki yɑn ɑ yïëy yi en, dɑ́ ngɑn-ɑ ɑ́ör yɑn. O ngɑn lidh yɑn ɑ́lidh-ɑ ngɑn-ɑ ɑ́ör yɑn. Yɑ ɑ́bï piny yɑ bɑ cɑr, kipe kinni o ngɑn-ɑ óyïëy yɑn cöge e pɑ döng kì yij muudhø. Ke di ngɑn lïngi kwøbbɑ, kɑ gï cög gï pɑ mïdhi yi en, pɑth ki yɑn ɑ ócɑyii, mɑ́ yɑ nuti bëën-ɑ be cɑyi piny, de yɑ ɑ́bï-ɑ be yieli piny. Ngɑn bɑny yɑn, kɑ kwøbbɑ ódhɑ̈lø yïëyø yi en, dɑ ngɑn-ɑ ócɑyii. Bɑ kwøbb-ɑ ɑ́kømmɑ, ɑ ócɑyii kì cyɑ̈ng-ɑ cyɑ̈n! Mɑ́ yɑ nuti kööbø kɑ cwɑggɑ, de Wïy ɑ ɑ́ör yɑn, bɑ en ɑ ɑ́cïgi yɑn møg-ɑ ɑ́kømmɑ, kí yuu-ɑ ɑ́lwøbɑ gen. O ngɑ̈nyi yi yɑn kinni, cigge kɑ̈ɑ̈l-ɑ nënn-ɑ ɑtheer. Møg-ɑ kømmi yi yɑn bɑ møg-ɑ ɑ́köbbi yɑn yi Wïy kinni kwøbɑ gen.” Kɑ̈ng-ɑ́ nuti cɑ̈gi Kwëër Ákɑɑdh, o ngɑ̈nyi yi Yëso kinni, bøli keny-ɑ ódhwödhe kì kömi piny, kɑ kedh-ɑ yï Wïye ɑ́wɑ̈nhi. Mɑ̈ɑ̈dø mee bëne ɑ́cïbe kömi jie kì kömi piny, gen ɑ møg-ɑ ɑ́mɑɑr yi en ki mendwøng. Keny-ɑ ɑ́ying gen ød ge ocyɑ̈mø, kwøbbi ngeewi Yëso rumø cïb pyëw Yeudɑ̀ wɑ̈d Sɑymøn Iskɑryøt yi wëyrijjø. O Yëso ngɑ̈ny wøw kinni, jɑmmì bënn ɑ́cïb cinge yi Wïy, geki kinni, ɑ́bï e kɑ̈ɑ̈l-ɑ yï Jwøk, o bɑ men døøg yïe, ɑdhwödhe kì wïj lwøl, ɑlunye lɑne wɑ̈g, ɑkɑ̈be ki ógødh, kɑ gø weene ngɑ̈je. Kɑ pï kønye yij thɑnhø, kɑ ócɑ̈gø lwøgi tyelli jøbɑnge, kɑ gï nyi diime ki ógønh-ɑ twööj en ngɑ̈je. Awɑ̈dhe yï Sɑymøn Pïtør, kɑ pyëj yi Sɑymøn Pïtør kinni, “Wuö, yïn ɑ lwøg tyellɑ?” Aløøg møge yi Yëso kinni, “Gïn-ɑ gwøg yi yɑn kwïj yi yïn ɑnɑn, de óyod yi yïn dhuki megø.” Aköbbii yi Pïtør kinni, “Tyellɑ pɑ wöl yi yïn ki lwøgø.” Aløøg møge yi Yëso kinni, “Keløg yï pɑ lwøg yi yɑn, yï pɑ bëëdø yïn ɑ́ ngetibɑngɑ këti.” Aköbbii yi Sɑymøn Pïtør kinni, “Keløg ɑ́ kinøw Wuö, pɑth ki tyellɑ keti gen, de lwøg cingɑ kì wïjɑ thyew.” Aköbbii yi Yëso kinni, “Ngɑn-ɑ ɑ́rum ki lwøgø dhïw bëne, o bong keny lwøg kì ree, dɑ́ tyelle keti gen. Wu dhïw wu bënn, dɑ́ ɑ́kyel kete kì kelli wun ɑ pɑ dhïw.” (Mɑ́ ngɑn-ɑ óngeewii ngɑ̈nyi yi en, o bene ɑ bɑnge ɑ́kööbe kinni, “Pɑth ki wu bënn.”) Keny-ɑ ɑ́rum tyelli gen ki lwøgø yi en, ɑkwɑnye lɑne, kɑ pëgg-ɑ piny, kɑ gï pyëje kinni, “Gïn-ɑ ɑ́göggɑ wun ngɑ̈nyi yi wun? Yɑ nyi cwølli yi wun yɑn ɑ́ ‘Jɑlpwönyi wun, kí Wïi wun,’ o mø wun bɑ dyër, mɑ́ yɑ bëëd ɑ nøw ceth. Keløg ɑ́ yɑn, yɑ Wïi wun, o yɑ bɑ Jɑlpwönyi wun, ɑ ɑ́lwøg tyelli wun, men-ɑ́ wun kiri wun, nyi lwøg dhɑnhø tyelli ngɑn megø. Mɑ́ wu ɑ́rum ki nyudhø yi yɑn, o wu ógöög wun kinøw thyew. Yɑ köbb-ɑ wun kidyër kinni, bɑ̈ng pɑ lod wɑ̈n ki döng, o ngɑn-ɑ ɑ́ör pɑ lod ngɑn-ɑ ɑ́örii. Møgɑni ɑ́yod yi wun ɑnɑn, o ri wun ódi gyëdh, keløg wu ógöögø kì ri gen. “Yɑ pɑ kømmi wun bënn. Tyëng-ɑ ɑ́yieny yi yɑn ngɑ̈nyi yi yɑn, de wiy møg-ɑ ying yij wɑ̈nyi kwërø pɑ̈dhi gen kɑ̈jji gen kinni, ‘Ngɑn-ɑ ɑ́cyɑ̈ɑ̈m wøn kì kej ɑ́kyel, ɑ́dwöög cwɑggɑ.’ Møgɑni ɑ́mɑ̈ɑ̈gɑ ki köbbi wun ɑnɑn kɑ̈ng-ɑ nuti cwööb gen, o wu óyïëy wun, keny-ɑ ócwöb gen kinni, yɑ bɑ en. Yɑ köbb-ɑ wun kidyër kinni, ngɑn-ɑ ókwɑny ngɑn-ɑ ɑ́ör yi yɑn, kwɑny-ɑ yɑn thyew; o ngɑn-ɑ ókwɑny yɑn, kwɑny-ɑ ngɑn-ɑ ɑ́ör yɑn.” Keny-ɑ ɑ́rum møgɑni ki kwøbø yi Yëso ɑrɑ̈ɑ̈m pyëwe, kɑ okööbø kinni, “Yɑ köbb-ɑ wun kidyër kinni, yɑ óngeew yi nget ɑ́kyel kì kelli wun.” Anenni jøbɑnge ri gen, wɑ̈thi gen muumø yi ngɑn-ɑ ɑ́kwøb yi en. Nget ɑ́kyel kì kelli gen, eni ngɑn-ɑ mɑɑr yi en, ɑ́bëëd e cyɑ̈gi kì bute kì tɑw. Agwelii yi Sɑymøn Pïtør kinni, “Pyëëj ki ngɑn-ɑ kømmi yi en.” Atie nyegi ri Yëso, kɑ gø pyëje kinni, “Wuö, ngɑnɑni bɑ men?” Alöggi Yëso kinni, “Ngɑn-ɑ ómëggɑ gïncɑm keny-ɑ órumɑ ki jwɑ̈ɑ̈gii yij thɑnhø, bɑ en.” Keny-ɑ ɑ́rum gïncɑmɑni ki jwɑ̈ɑ̈gø yi en, ɑmëgge gøn Yeudɑ̀ wɑ̈d Sɑymøn Iskɑryøt. Kɑ kì bɑng kɑ ɑ́mëggii gïncɑmɑni ceth, ɑkedhi Cethɑn pyëwe. Aköbbii yi Yëso kinni, “Gïn-ɑ ógwøg yi yïn, jwɑɑn ki gwøgø.” De bong dhɑnhø kì tɑw me ngɑ̈nyi gïn-ɑ pere ɑ́köbbe gøn møgɑni. De mɑ́ sɑnduug ngyëny ɑ́ying-ɑ cingi Yeudɑ̀, kwï gen ɑ́rum kinni, Yëso ceg-ɑ gøn ki köbbø kinni, ngëëwe ki gïg-ɑ dwɑddi yi gen kipe cyɑ̈nggi kwër, wɑlɑ̀ kinni, thödhi tyëng-ɑ ɑbuur ki gïïpiny. Keny-ɑ ɑ́rum gïncɑm ki kwɑnyø yi Yeudɑ̀ ɑkedhe wɑ̈g. O piny ɑ́bëëd ɑ́ wɑ̈r. Keny-ɑ ɑ́rum Yeudɑ̀ ki kedhi wɑ̈g, ɑkööb Yëso kinni, “Nyɑɑr Dhɑnhø óthödhi ki dhwɑ̈ng ɑnɑn, o Jwøk óyïddi ki dhwɑ̈ng kì ree. Kɑ̀ yïddi Jwøk ki dhwɑ̈ng kì ri Nyɑɑr Dhɑnhø, Nyɑɑr Dhɑnhø óyïddi ki dhwɑ̈ng kì ri Jwøk kì bɑng nyɑ keny me thiinh Nyigɑ, wɑ óbëëdø kɑ nyɑ keny me thiinh. Yɑ óyɑb yi wun, de yɑ köbb-ɑ wun ɑnɑn, ni kɑ ɑ́köbbɑ Yeud kinni, ‘Kun-ɑ ókedhɑ wu dhɑ̈li bëën yije.’ Wu mëggɑ’ cigg mø nyɑ̈n kinni, ‘Mɑɑru ri wun, ni kɑ ɑ́mɑɑrɑ wun.’ Keløg ri wun ómɑɑr yi wun, óyod yi teedø bëne kinni, wu bɑ jiɑ.” Apyëjii yi Sɑymøn Pïtør kinni, “Wuö yï kedh-ɑ keny?” Alöggi Yëso kinni, “Yï pɑ cuggi lug bɑngɑ kun-ɑ kedhɑ, de yï óbï bɑngɑ cyɑ̈ng megø.” Apyëjii yi Pïtør kinni, “Wuö, ɑ́ ngø ɑ ómɑ̈ɑ̈n yɑn bëën bɑngí ɑnɑn? Yɑ óbøy thøø kiperí.” Apëjji Yëso kinni, “Yï óbøy thøø kiperɑ? Yɑ köbb-ɑ yïn kidyër kinni, yɑ ókyer yi yïn ki tyel ɑ́dɑ̈g, e óthwønh nuti köögø.” “Pëthi wun ko lïngi. Yïëyu Jwøk kɑ yɑ yïëy wun thyew. Gøl Wïyɑ dɑ ud mø ngenyø, o yɑ kedh-ɑ be tyenyi kɑ̈jji wun. Wu pɑ di köbbɑ møgɑni, keløg e pɑth ki kinøw. O keny-ɑ ókedhɑ kɑ kej wun pyëlɑ, yɑ ódwöög, o wu kɑ̈l yi yɑn, o wu bëëd wun kì keny-ɑ bëëd yi yɑn. Yuu kun-ɑ kedhɑ ngɑ̈nyi yi wun.” Akööb Tömɑs kinni, “Wuö, kun-ɑ kedhi yi yïn kwïj yi wøn, o yuu-ɑ kedhi kunɑni óngɑ̈nyi yi wøn kidï?” Aløøg møge yi Yëso kinni, “Yɑn ɑ bɑ yöö, geki dyër kí nënnì. Bong ngɑn cuggi bëën yï Wïy, den-ɑ́ kì riɑ. Keløg riɑ di ngɑ̈nyi yi wun, ti Wïyɑ di ngɑ̈nyi yi wun thyew. Áyod yi wun ɑnɑn, o ɑ́rum ki lidhø yi wun.” Aköbbii yi Pïlïp kinni, “Wuö, nyudhí wøn Wïy, o yethi wøn kwööj gen.” Aköbbii yi Yëso kinni, “Yɑ bëëd ɑ kelli wun ki keny me bɑ̈ɑ̈r, yïn ɑ Pïlïp; yɑ nudd yɑ kwïj yi yïn? Ngɑn-ɑ ɑ́lidh yɑn, Wïy ɑ́lidh yi en. Yïde ɑ kööb kinni, ‘Nyudhí wøn Wïy?’ Yï nuti yïëyø kinni, yɑ ying-ɑ ri Wïy, o Wïy ying-ɑ riɑ?” Kɑ jøbɑnge köbbe kinni, “Kwøbb-ɑ nyi köbbɑ wun, pɑ nyi kɑ̈ɑ̈l-ɑ cwɑggɑ, o gïg-ɑ gøggi yi yɑn, ge nyi gwøg-ɑ yi Wïy, ngɑn-ɑ bëëdø kì riɑ. Yïëyu møgɑ kinni yɑ ying-ɑ ri Wïy, o Wïy ying-ɑ riɑ, wɑlɑ̀ yïëyu møgɑ kì bɑng gïg-ɑ gøggi yi yɑn. Yɑ köbb-ɑ wun kidyër kinni, ngɑn yïëy yɑn, gïg-ɑ gøggi yi yɑn ógøggi yi en thyew, o gïg mø lod møgɑni ógøggi yi en, mɑ́ yɑ kedh-ɑ yï Wïy. Gïn-ɑ ókwɑjji yi wun ki nyingɑ, gïnɑni ógwøg yi yɑn, o Wïy yïdde ki dhwɑ̈ng kì ri Wɑ̈d. Keløg e dɑ gïjø me kwɑjji yi wun ki nyingɑ, gïnɑni ógwøg yi yɑn. “Keløg yɑ mɑɑr yi wun, ciggɑ ómïdhi yi wun. O Wïy ókwɑjji yi yɑn, o wu óthödhi yi en ki ngɑn megø, men-ɑ ókøny wun, o óbëëdø kì kelli wun gïti ɑtheer. Ngɑnɑni bɑ Wëy men-ɑ nyodh dyër kì ri Jwøk. Pɑ cuggi kwɑnyø yi kömi piny, mɑ́ e pɑ nenni yi kömi piny, o kwïj yi en. De ree ngɑ̈nyi yi wun, mɑ́ e bëëd ɑ kelli wun, o ying-ɑ pëthi wun. “Wu pɑ wiy yi yɑn wu bɑ kïjj, yɑ óbï yï wun. Kì bɑng nyɑ keny me thiinh yɑ pɑ lidh yi kömi piny këti, de yɑ ólidh yi wun, mɑ́ kɑ̀ nëënɑ wu ónëënø thyew. Keny-ɑ óbëën cyɑ̈ngɑni, óyod yi wun kinni, yɑ ying-ɑ ri Wïyɑ, o wu ying-ɑ riɑ ni kɑ̀ yingɑ ri wun. “Tyëng-ɑ óyïëy ciggɑ, kɑ gï mïdhi gen, bɑ gen ɑ mɑɑr yɑn. Tyëng-ɑ mɑɑr yɑn ómɑɑr yi Wïyɑ, ge ómɑɑr yi yɑn thyew, kɑ riɑ nyudhɑ gen.” Aköbbi Yëso yi Yeudɑ̀; pɑth ki Yeudɑ̀ jɑl Iskɑryøt, kinni, “Cug-ɑ́ɑ̀ dï Wuö, kinni rií nyudhí wøn, o rií pɑ nyudhi kömi piny?” Aløøg møge yi Yëso kinni, “Ngɑn mɑɑr yɑn, kwøbbɑ ómïdhe. Ngɑnɑni ómɑɑr yi Wïyɑ, o yɑ óbï yïe wøki Wïyɑ, kɑ wø obëëdø kì ree. O ngɑn pɑ mɑɑr yɑn, kwøbbɑ pɑ mïdhe. O kwøbb-ɑ ɑ́lïngi yi wun pɑth ki møgɑ, de ge kɑ̈ɑ̈l-ɑ yï Wïy, ngɑn-ɑ ɑ́ör yɑn. “Wu ɑ́köbbɑ møgɑni, yɑ nudd yɑ bëëd ɑ kelli wun. De ngɑn-ɑ ókunyi, en ɑ Wëykwërø, óör yi Wïy ki nyingɑ, jɑmmì bënn ópwönye wun, o wu ópɑ̈ddi yi en ki møg-ɑ ɑ́köbbɑ wun bënn. “Wu wïyɑ’ mër; bɑ mërɑ ɑ mëggɑ wun, pɑ muuj yi yɑn kɑ muuny-ɑ nyi muuj yi kömi piny. Pëthi wun ko lïngi, o wu ko böggi. Wu ɑ́lïng keny-ɑ ɑ́köbbɑ wun kinni, ‘Yɑ ókedhø, de yɑ ódwöög yï wun.’ Keløg yɑ omɑɑrø yi wun, pëthi wun di mïni, kɑ̀ kedhɑ yï Wïy, mɑ́ e dwøng kibølɑ. Wu ɑ́köbbɑ møgɑni ɑnɑn ge nuti cwöbø, kipe kinni keny-ɑ ócwöb gen, o ge óyïëy yi wun. Yɑ pɑ kööbø ki wun ki keny me bɑ̈ɑ̈r, mɑ́ jɑngi kömi piny men obëënø. Yïe bong tegø kì kömɑ, de gïn-ɑ dwɑddi kinni o yod yi kömi piny bɑ kinni, Wïy mɑɑr yi yɑn, o yɑ gøgg-ɑ gïg-ɑ ɑ́cïge yɑn. “Bïu, kedh wɑ kì keny. “Yɑ bene oløng-ɑ dyër, o Wïyɑ ɑ bɑ wïi bɑg. Bɑ̈ddɑ møg-ɑ pɑ nyi kɑ̈ni ki nywøl bënn, nyi ngule’ wɑ̈g, o bɑ̈dd-ɑ nyi kɑ̈ni ki nywøl nyi tebe tebø, o ge kɑ̈ni gen ki nywøl mø ngenyø. Wu ɑ́rum ki gwirø ɑnɑn, yi møg-ɑ ɑ́pwönyɑ wun. Bëëd wun kì riɑ, ni kɑ̀ bëëdɑ kì ri wun. Bɑɑd oløg dhɑ̈li kɑ̈nø ki nywøl kete, keløg e pɑ bëëdø kì ri oløg. Nɑ menɑni ceth, wu dhɑ̈li kɑ̈nø ki nywøl, keløg wu pɑ bëëdø kì riɑ. “Yɑ bɑ oløg, o wu bɑ bɑ̈dd. Ngɑn bëëdø kì riɑ, kɑ yɑ obëëdø kì ree, ókɑ̈ni ki nywøl mø ngenyø, mɑ́ keløg wu pɑ ying riɑ bong gïn cuggi gwøgø yi wun. Ngɑn pɑ bëëdø kì riɑ, ngɑnɑni óweddi ni bɑɑd oløg kɑ othwøwø. Bɑ̈dd-ɑ ni møgɑni nyi ceg kɑ gwenø, kɑ ge leeng mɑc, kɑ ge órɑ̈bbø. Keløg wu óbëëdø kì riɑ, kɑ kwøbbɑ obëëdø kì pëthi wun, wu ókwɑ̈jjø ki gïn-ɑ dwɑddi yi wun, kɑ gïnɑni yod yi wun. Mɑ̈ɑ̈r Wïyɑ ólidh-ɑ keny-ɑ ókɑ̈ni wun ki nywøl mø ngenyø, o wu göög wun ki jøbɑngɑ ki yuu-ɑ ni menɑni. Wu mɑɑr yi yɑn ni kɑ̀ mɑɑr yɑn yi Wïy, bëëd wun kì yij mɑ̈ɑ̈dø miɑ. Keløg ciggɑ ómïdhi yi wun, wu óbëëdø kì yij mɑ̈ɑ̈dø miɑ, ni kɑ̀ mïdhɑ ciggi Wïyɑ, o yɑ obëëdø kì yij mɑ̈ɑ̈dø mee. “Møgɑni ɑ́köbbɑ wun kɑ per kinni o medi pyëwɑ bëëde kì pëthi wun, o medi pëthi wun bëëd e bong gïn tøøk kì ree. Ciggɑ bɑ kinni, mɑɑru ri wun ni kɑ̀ mɑɑrɑ wun. Ngɑn muuj wëye kipe mɑ̈dhhe, bong ngɑn lodii ki mɑ̈ɑ̈dø. O wu bɑ mɑ̈dhhɑ keløg møg-ɑ cïgɑ wun ógwøg yi wun. Wu pɑ cwølli yi yɑn wun-ɑ́ bɑ̈nggɑ këti, mɑ́ bɑ̈ng gïn-ɑ gwøg yi wɑ̈n kwïje. De wu cwølli yi yɑn wun-ɑ́ mɑ̈dhh, mɑ́ gïg-ɑ ɑ́lïngi yi yɑn bënn kì yï Wïyɑ, ɑ́nyudhɑ wun. Yɑ nuti myeg-ɑ yi wun, dɑ́ yɑn ɑ ɑ́myeg wun. Kɑ wu cïbɑ kɑ̈jji wun, o wu kedhu be yïddø ki gïg nywøl yi gwøøg wun, o gïg-ɑ nywøl yi gwøøg wun óbëëd gen ki keny me bɑ̈ɑ̈r, kipe kinni o gïn-ɑ ókwɑjji yi wun kì yï Wïyɑ ki nyingɑ, ómëggi wun yi en. Kɑ̀ bëëde kinøw, bene møg-ɑ cïgɑ wun ek: mɑɑru ri wun. “Keløg wu mɑɑn yi kömi piny, bëëd wu ngɑ̈ny wøw kinni, yɑn ɑ ɑ́kwøng yi en ki mɑɑnø. Keløg wu di bëëd wun-ɑ́ mø kömi piny, wu di mɑɑr yi kömi piny, mɑ́ wu bɑ møge. De wu ɑ́myeg yi yɑn ɑ kömi piny, o wu pɑth ki møge, bene ɑ bɑnge mɑɑn wun yi kömi piny. Pɑru møg-ɑ ɑ́köbbɑ wun kinni, ‘Bɑ̈ngg, wïi gen pɑ lod yi gen ki döng.’ Keløg wɑngɑ óguudø yi ji, nyingi wun óguud yi gen thyew, keløg pwönyɑ oyïëyø yi gen, pwönyi wun óyïëy yi gen thyew. De møgɑni bënn ógöggi wun yi gen, kipe kɑ̀ bëëd wun, wun-ɑ́ møgɑ, mɑ́ ngɑn-ɑ ɑ́ör yɑn kwïj yi gen. Di bëëd e bong bɑ̈jjø mɑ ɑ́gwøg yi gen, keløg yɑ pɑ di bï kɑ yɑ okööbø ki gen, de ɑnɑn, bong keny kyëëj gen orøøg gen. Ngɑn mɑɑn yɑn, Wïyɑ mɑɑn yi en thyew. Keløg yɑ pɑ di göög kì kelli gen ki gïg-ɑ nuti pɑ̈nyø gwøgø yi ngɑn megø cøn, di bëëd yï gen bong orøg. De ɑnɑn, ge ɑ́rum ki lïdhø, kɑ yɑ mɑɑn yi gen wøki Wïyɑ. Møgɑni ɑ́gwøg kɑ per kinni o kwøbb-ɑ bɑ ɑgwed kì yethi Cigg pɑ̈dhi gen kɑ̈jji gen, kinni, ‘Yɑ ɑ́wɑ̈dhi kɑ mɑɑnø yi gen.’ “Ngɑn-ɑ ókunyi óbï, eni ngɑn-ɑ bɑ Wëy, en ɑ ónyodh dyër kì ri Jwøk, e kɑ̈ɑ̈l-ɑ yï Wïy. Óörɑ wun e kɑ̈ɑ̈l-ɑ yï Wïy, o ókööbø kì riɑ. O wun thyew, wu ókööbø kì riɑ, mɑ́ wu ɑ́bëëd ɑ butɑ këër cɑ̈gø cøn. “Møgɑni ɑ́köbbɑ wun kɑ per kinni, o yïëyi wun ócöge e pɑ wiy yi wun. Wu óryeem wɑ̈g yi teedø kì sinɑgøgg. Kidyër bøli kenyɑni obëënø; eni keny-ɑ órum ngɑn-ɑ ónɑ̈g wun kinni, gögg-ɑ Jwøk ki gïndøj. O møgɑni ógwøg yi gen, mɑ́ wø kwïj yi gen, wøki Wïyɑ. De møgɑni ɑ́köbbɑ wun kɑ per kinni, keny-ɑ óbëën bøli kɑ̈jji gen, o ge ópɑr yi wun kinni, ge ɑ́rum ki köbbi wun yi yɑn. “Møgɑni nuti köbbi wun yi yɑn cøn, mɑ́ yɑ ying-ɑ buti wun. De ɑnɑn yɑ kedh-ɑ yï ngɑn-ɑ ɑ́ör yɑn, o bong ngɑn pyëj yɑn kì kelli wun kinni, ‘Yï kedh-ɑ keny? O ɑnɑn wu ɑ́köbbɑ, kɑ yethi wun ceg-ɑ bɑɑrø. De yɑ köbb-ɑ wun møg-ɑ bɑ dyër kinni, døøj kiper wun kɑ̀ kedhɑ, mɑ́ keløg yɑ pɑ kedh, ngɑn-ɑ ókøny wun pɑ bï yï wun. De keløg yɑ ókedh, óörɑ yï wun. O keny-ɑ óbëëne, kömi piny óköbbi yi en kinni møg-ɑ rømmi yi en kì ri orøg, kí bëëndøj, kí cɑ́y ge pɑth ki dyër. Gï ónyudhe kinni ge ɑ́bɑ̈jji kì ri kwøbbi orøg, mɑ́ yɑ nuti yïëëy gen, o gï ónyudhe ki kwøbbi bëëndøj, mɑ́ yɑ kedh-ɑ yï Wïy, o yɑ pɑ lidh yi wun këti, o gï ónyudhe kì ri kwøbbi cɑ́y, mɑ́ jɑngi kömi piny men, ɑ́rum ki cɑyø. “Yïɑ dɑ kwøb mø gïïr møg köbbɑ wun, o ge pɑ cuggi gɑmø yi wɑ̈thi wun ɑnɑn. De keny-ɑ óbëën Wëy, ngɑn-ɑ ónyudhi wun dyër kì ri Jwøk, wu ópeeje yï dyër bëne, mɑ́ e koo kømm-ɑ mø cwɑgge, de ókømm-ɑ møg-ɑ nyi lïngi yi en. O wu ótönge møg-ɑ óbï. Yɑ óyïddi ki dhwɑ̈ng kì bɑnge, mɑ́ kwøbbɑ ókwɑnye kɑ gï köbbe wun. Jɑmm-ɑ bɑ mø Wïy bënn, bɑ møgɑ, bene ɑ ɑ́köbbɑ wun kinni, kwøbbɑ ókwɑny yi en, kɑ gï köbbe wun. “Kì bɑng nyɑ keny me thiinh yɑ pɑ lidh yi wun, de kì bɑng nyɑ keny me thinh këti, yɑ ólidh yi wun.” Kɑ jøbɑnge ri gen köbbi gen kinni, “Á ngø ɑ köbbe wɑ kinni, ‘Kì bɑng nyɑ keny me thiinh yɑ pɑ lidh yi wun, de kì bɑng nyɑ keny me thiinh yɑ ólidh yi wun këti? Geki kinni, ‘Mɑ́ yɑ kedh-ɑ yï Wïy?’ ” Akööb gen kinni, “Á ngø ɑ wɑngi yi en kɑ̀ kööbe kinni, ‘Kì bɑng nyɑ keny me thiinh?’ Gïn-ɑ wɑngi yi en kwïj yi wɑ.” De Yëso ngɑ̈ny wøw kinni ge dwɑdd-ɑ pyëjii, ɑköbbe gïn kinni, “Wu pyëny-ɑ ri wun kipe møg-ɑ kømmi yi yɑn kinni, ‘Kì bɑng nyɑ keny me thiinh yɑ pɑ lidh yi wun, de kì bɑng nyɑ keny me thiinh yɑ ólidh yi wun këti?’ Yɑ köbb-ɑ wun kidyër kinni, wu óywöngi, kɑ wu okïïmø, o tyëng kömi piny pëthi gen ómïni. Wu ókïïmø, de kïïmi wun ree óløge medi pëëth. Ngɑndhɑjø kenyi bëën bøli kej pɑ̈dhe piny nyi ying-ɑ yij orɑng, mɑ́ bøli keje ɑ́wɑ̈nhi, de kenyi rume ki pɑ̈dhi piny, rɑ̈ɑ̈m pɑ̈dhi piny pɑ nyi pɑr yi en, yi medi pyëwe kipe dhɑnhø men-ɑ ɑ́kɑ̈ɑ̈l wɑ̈g. Wun thyew, wu ceg-ɑ kïïmø ɑnɑn, de yɑ ódwöög kɑ wu lidh yi yɑn, kɑ pëthi wun ómïnø, o bong ngɑn-ɑ ókwɑny medi pëthi wun kì yï wun. “Kì cyɑ̈ngɑni, bong pyëj møg-ɑ ópëjju yɑn. Yɑ köbb-ɑ wun kidyër kinni, keløg e dɑ gïn kwɑjji yi wun kì yï Wïy, ómëggi wun kì ri nyingɑ. Bong gïjø mɑ ɑ́kwɑjji yi wun kì ri nyingɑ cøn gïti ɑnɑn, kwɑ̈jji wun, wu óyïddi, o døøji medi pëëth yod yi wun. “Møgɑni ɑ́köbbɑ wun kì yethi gɑ́j. De bøli keny-ɑ ócögɑ yɑ pɑ kööbø ki wun kì yethi gɑ́j ɑ́cyɑ̈ngi, o per Wïy ótöngɑ wun e bong gɑ́j. Kì cyɑ̈ngɑni wu ókwɑ̈jji kì yï Wïy ki nyingɑ. De wu pɑ köbbi yi yɑn kinni, Wïy ókwɑjji yi yɑn kiper wun, mɑ́ wu mɑɑr yi en, kipe kɑ̀ mɑɑr yɑn yi wun, kí kɑ ɑ́yïëy wun kinni, yɑ kɑ̈ɑ̈l-ɑ yïe. Awøø, yɑ ɑ́kɑ̈ɑ̈l-ɑ yï Wïy, kɑ yɑ bï-ɑ kömi piny, o yɑ kedh-ɑ yï Wïy.” Akööb jøbɑnge kinni, “Anɑn yï ceg-ɑ töng ki kwøb e bong gɑ́j kì ri gen. Áyod yi wøn ɑnɑn kinni, jɑmmì bënn ngɑ̈nyi yi yïn, o bong ngɑn dwɑddi yïn pyënyø këti. Kì bɑng menɑni, wø ɑ́yïëy kinni, yï kɑ̈ɑ̈l-ɑ yï Jwøk.” Aløøg mø gen yi Yëso kinni, “Wu ɑ́yïëy ɑnɑn cyee? Bøli kenyɑni obëënø, ɑ́wɑ̈nhi ɑnɑn, eni bøli keny-ɑ ótɑy wun, ngɑn kedh kɑ yuue, o yɑ ówiy yi wun yɑ ketɑ, de pɑth ki yɑ ketɑ, mɑ́ Wïy nud kì butɑ. Møgɑni ɑ́köbbɑ wun kɑ per kinni, o wu óyïddi wun ki mër kì riɑ. Wu órɑngi kì kömi piny, de mɑgu pëthi wun, mɑ́ kömi piny ɑ́tyɑm yi yɑn.” Kɑ ɑ́rum møgɑni ki kwøbø yi Yëso, ɑlïïdhe mɑl, kɑ okööbø kinni, “Wïyø, bøli kenyɑni ɑ́wɑ̈nhi. Thödhí Wɑ̈dí ki dhwɑ̈ng kipe kinni o yï óthödhi ki dhwɑ̈ng yi en. Mɑ́ e ɑ́thödhi yi yïn ki tegø kì kömi dhɑnhø bëne, kipe kinni o ji-ɑ ɑ́mëggií bënn óthödhe ki nënn-ɑ ɑtheer. Nënn-ɑ ɑtheer bɑ kinni, o yï yod yi gen; kinni yï ketí ɑ bɑ Jwøng-ɑ dyër, o Yëso Mesiy ngɑn-ɑ ɑ́ör yi yïn, yod yi gen. Yï ɑ́rum ki thödhø yi yɑn ki dhwɑ̈ng kì kömi piny kì ri kɑ ɑ́tyëgɑ gwøng-ɑ cïb cingɑ yi yïn. Wïyø! Thödhí yɑn ki mɑ̈r kì bølí ɑnɑn, en ɑ mɑ̈r-ɑ ɑ́ying yïɑ, kɑ̈ng-ɑ́ nuti cwɑ̈ɑ̈j piny. “Nyingí ɑ́nyudhɑ tyëng-ɑ ɑ́mëggí yɑn kì kömi piny. Ge bɑ møgí, de ge ɑ́mëggí yɑn, kɑ kwøbbí mïdhi yi gen. O ngɑ̈nyi yi gen ɑnɑn kinni, jɑmmì bënn møg-ɑ ɑ́mëggí yɑn kɑ̈ɑ̈l-ɑ yïí. Mɑ́ kwøbb-ɑ ɑ́mëggí yɑn, ɑ ɑ́köbbɑ gen kɑ gï yïëy gen, o ngɑ̈nyi yi gen kidyër kinni, yɑ ɑ́kɑ̈ɑ̈l-ɑ yïí, o ge yïëyø kinni, yɑ ɑ́ör-ɑ yi yïn. “Yɑ kwɑjj-ɑ yïn kipe gen. Yɑ pɑ kwɑ̈jji kipe kömi piny, dɑ́ kipe tyëng-ɑ ɑ́mëggí yɑn, mɑ́ ge bɑ møgí. Møgɑ bënn bɑ møgí, o møgí bɑ møgɑ, o yɑ yïddɑ ki dhwɑ̈ng kì ri gen. Yɑ koo ying kömi piny këti, de ge bëëd ɑ kömi piny; yɑ bï-ɑ yïí, yïn ɑ Wïy ɑ bɑ kwërø; mïdhí tyëng-ɑ ɑ́mëggí yɑn, o ge bëëd gen, gɑ ɑ́kyel, ni kɑ̀ bëëd wɑ, wɑ bɑ ɑ́kyel. Tyëng-ɑ ɑ́mëggí yɑn ɑ́mïdhɑ ki tegi nyingí, keny-ɑ ɑ́bëëdɑ kì kelli gen. Ge ɑ́kor yi yɑn, o bong ɑ́kyel mɑ ɑ́lɑ̈ɑ̈ny kì kelli gen, dɑ́ jɑl-ɑ ɑ́bëëd ɑ́ men lɑ̈ɑ̈ny, ɑ ɑ́lɑ̈ɑ̈ny. Kipe kinni o møg-ɑ yij wɑ̈nyi kwërø pɑ̈dhi gen kɑ̈jji gen. Yɑ bï-ɑ yïí ɑnɑn, o yɑ kööb ɑ kömi piny, kipe kinni o medi pyëwɑ nude ceth kì pëthi gen. Kwøbbí ɑ́mëggɑ gen. Kɑ ge mɑɑn yi kömi piny, mɑ́ ge pɑth ki tyëng kömi piny, ni kɑ̀ bëëdɑ yɑ pɑth ki ngeti kömi piny. Yï pɑ kwɑjjɑ kinni o ge kɑ̈l yi yïn kì kömi piny, dɑ́ kipe kinni o ge kor yi yïn kipe Ngɑnrɑj. Ge pɑth ki tyëng kömi piny, ni kɑ̀ bëëdɑ yɑ pɑth ki ngeti kömi piny. Kwër gen kì ri dyër, mɑ́ kwøbbí bɑ dyër. Ge ɑ́örɑ kömi piny ni kɑ ɑ́ör yɑn kömi piny yi yïn. Riɑ ɑ́muujɑ kiper gen, kipe kinni o ri gen ómuuj yi gen kì ri dyër. “Yɑ pɑ kwɑ̈jji kɑ per gen keti gen, dɑ́ kipe tyëng-ɑ óyïëy yɑn thyew kì bɑng kwøbbi gen. Wiy ge bëëd gɑ ɑ́kyel bënn, o ge bëëd gen gɑ ɑ́kyel kì riee yïn ɑ Wïy; ni yïn kɑ̀ ying riɑ, o yɑ ying-ɑ rií, kipe kinni o kömi piny yïëye kinni, yɑ ɑ́ör-ɑ yi yïn. Ge ɑ́mëggɑ dhwɑ̈ng-ɑ ɑ́mëggí yɑn, kipe kinni o ge bëëd gɑ ɑ́kyel ni kɑ̀ bëëd wɑ, wɑ bɑ ɑ́kyel. Yɑ ying-ɑ ri gen, o yï ying-ɑ riɑ, kipe kinni o ri gen reb yi gen gɑ ɑ́kyel, o yod yi kömi piny kinni, yɑ ɑ́ör-ɑ yi yïn, o tyëngɑni mɑɑr yi yïn, ni kɑ̀ mɑɑr yɑn yi yïn. “Wuö, yɑ dwɑdd-ɑ kinni, o tyëng-ɑ ɑ́mëggí yɑn bëëd gen kì butɑ kì keny-ɑ di yɑn, o dhwɑ̈ng-ɑ ɑ́mëggí yɑn lidh yi gen; mɑ́ yɑ ɑ́mɑɑr yi yïn e lɑ̈bø nuti cwɑ̈jø. Yïn ɑ Wïy ɑ døj, yï kwïj yi kömi piny, de yï ngɑ̈nyi yi yɑn, o ngɑ̈nyi yi ji møg kinni, yɑ ɑ́ör-ɑ yi yïn. Nyingí ɑ́nyudhɑ gen, o ge ócigɑ nyudhø, kipe kinni o mɑ̈ɑ̈dø men-ɑ ɑ́mɑɑr yɑn yi yïn óbëëde kì pëthi gen, o yɑ óbëëdø kì ri gen.” Kɑ ɑ́rum Yëso ki kwøbi møgɑni, ɑkedhe wɑ̈g geki jøbɑnge, ge kedh-ɑ løøg dhøg Kidrön. Kenyɑni dɑ bɑg. Kɑ kedh-ɑ yij bɑngɑni geki jøbɑnge. O kenyɑni ngɑ̈nyi yi Yeudɑ̀, ngɑn-ɑ ɑ́ngeewii, mɑ́ Yëso nyii cugø kì kenyɑni geki jøbɑnge tyel mø gïïr. Kɑ Yeudɑ̀ bï-ɑ kenyɑni e ókɑ̈ddø ki ɑlɑthkerri mïri Römɑ̀ kí bölidhhi Kengø, ge ör-ɑ yi jɑggi ókwër geki Jøpɑresì, ge ɑ́bï kenyɑni, ge ókɑ̈ddø ki lɑ̈mbɑ̈ɑ̈ kí ɑ́menyy geki jɑmmi liny. De Yëso ngɑ̈ny wøw ki gïg-ɑ óbï köme bënn, kɑ kedh-ɑ yï gïn, kɑ gï pyëje kinni, “Wu yɑb-ɑ men?” Alöggi gen kinni, “Yëso jɑl Nɑdhɑreth.” Aköbbi gen yi Yëso kinni, “Yɑ bɑ en.” Yeudɑ̀ ngɑn-ɑ ɑ́ngeewii, ɑ́bëëd e ócungø kì kelli gen. Keny-ɑ ɑ́köbbe gïn kinni, “Yɑ bɑ en,” ɑdøøg gen cyɑ̈n, kɑ ge ópɑ̈ɑ̈dhø. Acigi gen pyëjø yi Yëso kinni, “Wu yɑb-ɑ men?” Kɑ ge ólöggø kinni, “Yëso jɑl Nɑdhɑreth.” Alöggi Yëso kinni, “Wu ɑ́rum ki köbbø yi yɑn kinni, ‘Yɑ bɑ en.’ Keløg ɑ́ yɑn ɑ yɑb yi wun, wiyu ji møg kedh gen.” (Menɑni bɑ kipe kinni o kwøbbe pɑ̈dhi gen kɑ̈jji gen, kɑ ɑ́kööbe kinni, “Tyëng-ɑ ɑ́mëggí yɑn, bong nget ɑ́kyel me lɑ̈ɑ̈ny kì kelli gen.”) Kɑ Sɑymøn Pïtør pil-ɑ ɑ́ying yïe wöödhe wɑ̈g kì yij bøj, ɑgøje bɑ̈ng Ókwër-ɑ Dwøng, kɑ yïth kyëje juude wɑ̈g. Bɑ̈ngɑni cwøl ɑ́ Mɑlkøs. Aköbbi Pïtør yi Yëso kinni, “Dwøøg pilí yij bøje. Óthɑ̈ngi orɑng men-ɑ mëggi yɑn yi Wïyɑ pɑ mɑdh yi yɑn?” Kɑ Yëso mɑg, kɑ twöj yi ɑlɑthkerr kí dhɑbïdh, kí bölidhhi Kengø. Apeej ge gøn yï Anɑ̀ møti, mɑ́ e bɑ øri Kɑyɑpɑ̀ Ókwër-ɑ Dwøng kì wɑɑngɑni. Bɑ Kɑyɑpɑ̀ ɑ ɑ́köbbi Yeud kinni, lɑ̈w thøwi nget ɑ́kyel kibøli thøwi jur bëne. Kɑ Sɑymøn Pïtør geki jɑlbɑng Yëso ɑ́kyel løg-ɑ bɑng Yëso. O jɑlbɑng Yëso menɑni, ngɑ̈nyi yi Ókwër-ɑ Dwøng. Kɑ kedh-ɑ gøl Ókwër-ɑ Dwøng kyeel ki Yëso. Kɑ Pïtør ócungø kì dhø kɑl. Kɑ jɑlbɑng Yëso men-ɑ ngɑ̈nyi yi Ókwër-ɑ Dwøng dwöög-ɑ wɑ̈g, kɑ nyɑn-ɑ kor dhø kɑl köbbe, kɑ Pïtør kɑ̈ɑ̈le kɑl. Apyëëj Pïtør yi nyɑnɑni kinni, “Yï pɑth ki ɑ́kyel kì kelli jøbɑng jɑlɑni thyew?” Alögge kinni, “Yɑ pɑth.” Kɑ bɑ̈nggi gølɑni geki bölidhh orubø ki mɑɑc cug, mɑ́ piny dɑ kööjø, kɑ ge ócungø ge oröjø. Kɑ Pïtør thyew ócungø kì kelli gen, e oröjø. Codhe, ɑpyënyi Yëso yi Ókwër-ɑ Dwøng kipe jøbɑnge geki pwönye. Aløøg møge yi Yëso kinni, “Yɑ ɑ́kööb ɑ bøli teedø bëne. Kenyi pwönyɑ, yɑ nyi pwöny-ɑ́ɑ̀ yethi sinɑgøgg geki Kengø, gen ɑ kɑ̈jj-ɑ nyi cugi yi Yeud bënn, o bong gïjø mɑ ɑ́kømmɑ kì gød. Yïde ɑ pyënyí yɑn? Pyëj tyëng-ɑ ɑ́lïngi kwøbbɑ. Pyëj gen ki møg-ɑ ɑ́köbbɑ gen, mɑ́ møg-ɑ ɑ́kømmɑ ngɑ̈nyi yi gen.” Kɑ ɑ́kwøøb møgɑni yi Yëso ɑgøjii ki ɑtɑyø yi jɑngi bölidhh men-ɑ cungi kì bute, ɑkööbe kinni, “Yï løøg-ɑ kwøbbi Ókwër-ɑ Dwøng kinøw?” Aløøg møge yi Yëso kinni, “Keløg gïn-ɑ kømmi yi yɑn rɑɑj nyudhí yɑn ki gïn-ɑ rɑj, de keløg gïn-ɑ kømmi yi yɑn døøj, ɑ́ kipe ngø ɑ gøøj yɑn?” Codhe, ɑörii Kɑyɑpɑ̀ Ókwër-ɑ Dwøng yi Anɑ̀ e cingge bɑ ɑtwöj. Keny-ɑ ɑ́bëëd Sɑymøn Pïtør e ócungø e oröjø ki mɑc. Apyëjii kinni, “Yï pɑth ki ɑ́kyel kì kelli jøbɑnge thyew?” Akyëde kinni, “Yɑ pɑth.” Jɑl ɑ́kyel kì kelli bɑ̈nggi Ókwër-ɑ Dwøng bɑ wɑɑd ki bɑ̈ng-ɑ́ yïthe ɑ́jod yi Pïtør. Apëjji jɑlɑni kinni, “Yï nuti liidh yɑn kì yij bɑg, wuki en?” Akyëëd Pïtør këti, kɑ kì bøli kenyɑni ceth, ɑköög óthwønh. Akɑ̈ɑ̈l Yëso yi gen kì yï Kɑyɑpɑ̀, kɑ kïdhi burø kì mwøl ceth cɑ̈ng nuti tuulø. De ge nuti kedhi kej burø kipe ge óywëdh, kɑ ge ocögø ge pɑ cyɑ̈mø ki gïi Kwëër Ákɑɑdh. Codhe, ɑkedhi Pilɑtø wɑ̈g yï gen, kɑ okööbø kinni, “Wu gønyu ngø ki jɑlɑni?” Aløøg møge yi gen kinni, “Keløg e pɑth ki ngetigöj, pɑ di muuj yïn yi wøn.” Aköbbi gen yi Pilɑtø kinni, “Kɑ̈lu en, kɑ gønye lidh wun wu ködd-ɑ kömi ciggi wun.” Alöggi gen kinni, “Wø bɑ ɑkerø ki kuumi dhɑnhø ki thøø.” (Møgɑni ɑ́cwöb kɑ per kinni, o møg-ɑ ɑ́kwøb yi Yëso keny-ɑ ɑ́nyodhe thøw-ɑ óthøwe pɑ̈dhi gen kɑ̈jji gen.) Adøøg Pilɑtø kej burø, kɑ Yëso cwøle, kɑ gø köbbe kinni, “Bene yïn Rɑ̈ɑ̈dh Yeud?” Aløøg møge yi Yëso kinni, “Møgɑni bɑ mø cwɑggí, wɑlɑ̀ yï ɑ́köbb-ɑ yi ji møøgø kiperɑ?” Alöggi Pilɑtø kinni, “Yɑ bɑ Yeudì? Yï ɑ́mëggi yɑn ɑ yi jur wun, kí jɑggi ókwër. Á ngø ɑ ɑ́gwøg yi yïn?” Alöggi Yëso kinni, “Pödhɑ pɑth ki mi kömi piny men. Keløg pödhɑ di bëëd ɑ́ mi kömi piny men, ti tyëng-ɑ cyɑ̈dhi kì bɑngɑ di nyïɑ̈ggi kiperɑ, o yɑ di cögɑ yɑ pɑ mɑg yi Yeud. Pɑth, pödhɑ pɑth ki mi keny.” Apyëjii yi Pilɑtø kinni, “Yï bɑ rɑ̈dh, pɑth en?” Alöggi Yëso kinni, “Ákwøb yi yïn ceth, yɑ bɑ rɑ̈dh. Bɑ per møgɑni ɑ ɑ́nywøøl yɑn, o yɑ ɑ́bï-ɑ kömi piny be thyeri møg-ɑ bɑ dyër. Ngɑn-ɑ bɑ ngeti dyër cwɑggɑ ólïnge.” Apëjji Pilɑtø kinni, “Dyër bɑ ngø?” Kɑ ɑ́rume kwøbi møgɑni, ɑdøøge wɑ̈g yï Yeud, kɑ gï köbbe kinni, “Bong gïnrɑj mɑ ɑ́yod yi yɑn kì yï jɑlɑni. De yï wun dɑ lwöbø kinni, nyi gönyɑ wun nget ɑ́kyel, kì bøli kej Kwëër Ákɑɑdh. Wu dwɑdd-ɑ kinni, o wu gönyɑ Rɑ̈ɑ̈dh Yeud?” Aryeer gen kinni, “Pɑth ki en, dɑ́ Bɑrɑbɑ̀.” O Bɑrɑbɑ̀ bɑ ɑ́muddi ji. Codhe, ɑkwɑɑny Yëso yi Pilɑtø, kɑ gø pwöde. Akɑ̈ɑ̈d dej ki yɑ̈ɑ̈r koodh, kɑ gø bødh gen wïje, kɑ rug ki pɑrø mɑ ɑ́cwïcwïl. Kɑ ge nyi bï-ɑ yïe, ge okööbø kinni, “Mɑ̈dh rií, yïn ɑ Rɑ̈ɑ̈dh Yeud.” Kɑ nyi gøj yi gen ki ɑtɑyø. Akedhi Pilɑtø wɑ̈g, kɑ gï köbbe kinni, “Jɑlɑni ɑ kɑ̈ɑ̈lɑ wɑ̈g yï wun èn, kipe kinni o wu ngɑ̈nyu wøw kinni, bong gïnrɑj mɑ ɑ́yodɑ kì yïe.” Abëën Yëso wɑ̈g, e orugø ki yɑ̈ɑ̈r koodh, kí pɑrø mɑ ɑ́cwïcwïl. Aköbbi gen yi Pilɑtø kinni, “Jɑlɑni èn!” Kɑ ɑ́lidhii yi jɑggi ókwër geki bölidhh, ɑryeer gen kinni, “Gur wïj yɑdh ɑrïw! Gur wïj yɑdh ɑrïw!” Aköbbi gen yi Pilɑtø kinni, “Kwɑnyu en, kɑ gur wun wïj yɑdh ɑrïw, mɑ́ e bong gïnrɑj mɑ ɑ́yodɑ kì yïe.” Aløøg møge yi Yeud kinni, “Yï wøn dɑ cigg, o ceg-ɑ thøw bɑng ciggɑni, mɑ́ e cwølli ree, ɑ́ Wɑ̈d Jwøk.” Kɑ ɑ́lïngi møgɑni yi Pilɑtø, kɑ ti-ɑ bwøgø ki mendwøng. Kɑ døøg-ɑ kej burø, kɑ Yëso pyëje kinni, “Yï kɑ̈ɑ̈l-ɑ keny?” Kɑ møge ocögø ge pɑ løøg yi Yëso. Codhe, ɑpyëjii yi Pilɑtø kinni, “Yï pɑ dwɑddi kwøb ki yɑn? Kwïj yi yïn kinni, yïɑ dɑ tegø men gønyɑ yïn, o yïɑ dɑ tegø men gurɑ yïn wïj yɑdh ɑrïw?” Aløøg møge yi Yëso kinni, “Ti yïí di bong tegø kì kömɑ, keløg e pɑ di mëggi yïn kì mɑl. Kɑ̀ bëëde kinøw, ngɑn-ɑ ɑ́muuj yɑn yïn, yïe dɑ orøg me lod orøgí.” Kɑ Pilɑtø oyɑ̈bø ki yöö men gønye gøn. Akedh Yeud ge ceg-ɑ pëddø ryeerø kinni, “Keløg jɑlɑni ógøny yi yïn, wu pɑth ki mɑ̈dhh ki Kɑysɑr. Ngɑn-ɑ kööbø cem ɑ́ rɑ̈dh, tyëdd-ɑ Kɑysɑr.” Keny-ɑ ɑ́lïngi kwøbbɑni yi Pilɑtø, ɑkɑ̈ɑ̈le Yëso wɑ̈g, kɑ pëgg-ɑ wïj kwøøm jyɑ̈gø kì burø kì keny me cwøl ɑ́ “Wïj Kït.” O cwøl ɑ́ Gɑbɑthɑ̀ ki dhøg Ibru. Cyɑ̈ngɑni ɑ́bëëd ɑ́ cyɑ̈ɑ̈ng tyëny ki jɑmmi Kwëër Ákɑɑdh, o piny bɑ sɑɑ̀ pyɑ̈rø wïdɑ́ryew kì dicɑ̈ng. Aköbbe Yeud kinni, “Rɑ̈ɑ̈dh wun èn!” Aryeer gen kinni, “Gur wïj yɑdh ɑrïw! Gur wïj yɑdh ɑrïw!” Apyëëj gen yi Pilɑtø kinni, “Gurɑ rɑ̈ɑ̈dh wun wïj yɑdh ɑrïw?” Alöggi jɑggi ókwër kinni, “Bong rɑ̈dh kì yi wøn den-ɑ́ Kɑysɑr kete.” Codhe, ɑmëggi Yëso gen, o gur wïj yɑdh ɑrïw. Akwɑɑny Yëso yi gen, kɑ gø kɑ̈l gen. Kɑ kedh-ɑ wɑ̈g, e byell-ɑ yɑdh ɑrïwe, kɑ kedh-ɑ keny-ɑ cwøl ɑ́ kej Cu Wïj. (Cwøl ɑ́ Gölgöthɑ̀ ki dhøg Ibru.) Kenyɑni ɑ ɑ́gurii wïj yɑdh ɑrïw, kyeel ki jøg ɑ́ryew møøgø, ɑ́kyel kì tuung kí ɑ́kyel kì tuung, e Yëso ying-ɑ kɑɑm gen. Kɑ Pilɑtø ngɑ̈bb-ɑ wïj yɑdh ɑrïw ki pɑ̈m men-ɑ ógwedø kinni, “Yëso jɑl Nɑdhɑreth, Rɑ̈ɑ̈dh Yeud.” Kɑ møgɑni rɑng yi Yeud mø ngenyø, mɑ́ keny-ɑ ɑ́gur Yëso wïj yɑdh ɑrïw cyɑ̈gi ki kɑɑl. O kwøbbɑni bɑ ɑgwed ki dhøg Ibru, kí dhø Lɑtïn, kí dhø Yönɑn. Aköbbi Pilɑtø yi jɑggi ókwërri Yeud kinni, “Ko gwed kinni, ‘Rɑ̈ɑ̈dh Yeud, de gwed kinni, ‘Jɑɑl ɑ́kööb kinni, ‘Yɑ bɑ Rɑ̈ɑ̈dh Yeud.’ ” Alöggi Pilɑtø kinni, “Møg-ɑ ɑ́gwed yi yɑn ɑ́rum ki gwedø.” Kɑ ɑ́rum dej ki guri Yëso wïj yɑdh ɑrïw, ɑkwɑny gen ógudhi Yëso, kɑ gï pɑ̈ngi gen gɑ kɑ̈jj ɑ́ngwen, ɑ́kyel kipe nget ɑ́kyel. Kɑ ɑ́ywödhe, men-ɑ ócwɑ̈jø e bɑ̈r gïti tyele, kwɑny yi gen thyew. Aköbbi gen ri gen kinni, “Ko kɑggi wɑ, de lëëng wɑ ki wél ki ngɑn-ɑ ókwɑnyii.” Kipe kinni o møg-ɑ ying yij wɑ̈nyi kwërø pɑ̈dhi gen kɑ̈jji gen kinni, “Ógudhɑ ɑ́pɑ̈ngi yi gen kì kelli gen, ge leng-ɑ wél kipe ɑ́ywödhɑ.” Møgɑni ɑ ɑ́gwøg yi dej. Meyi Yëso kí nyimï meye Meerì cï Kelyöbɑ̀, kí Meerì Mɑgdɑliyɑ̀, ge ɑ́cung ɑ buti yɑdh ɑrïw Yëso. Yëso keny-ɑ ɑ́lidhe meye, kí jɑlbɑnge men-ɑ mɑɑr yi en kì bute, ɑköbbe meye kinni, “Dhɑnh, wɑ̈dí ɑnɑn.” Kɑ jɑlbɑnge köbbe kinni, “Meyí ɑnɑn.” Kì bøli kenyɑni ɑ ɑ́kwɑɑny ngɑnɑni yi jɑlbɑng Yëso, kɑ gø kïdhe gøle. Kɑ lidh yi Yëso kinni, jɑmmì bënn ɑ́cïb këër gen. De kipe kinni o møg-ɑ ying yij wɑ̈nyi kwërø pɑ̈dhi gen kɑ̈jji gen, ɑkööbe kinni, “Riɑ dɑ röödhø.” Kenyɑni ɑ́dɑ pug me yije pɑ̈ng yi møgi oløg me wɑj. Kɑ ispwøny jwɑ̈ɑ̈g yij møngɑni, kɑ gɑ̈ɑ̈n wïj obej, kɑ kïdhi dhøge. Keny-ɑ ɑ́rum Yëso ki cwïjjø kì ri møngɑni, ɑkööbe kinni, “Árum.” Akuule wïje piny, kɑ othøø. Cyɑ̈ngɑni bɑ cyɑ̈ɑ̈ng tyëny kipe jɑmmi Kwëër Ákɑɑdh, o dëlli ji pɑ nyi dwɑddi, o ge bëëd gen kì wɑ̈thi yenh ɑrïw kì cyɑ̈ɑ̈ng ywömø, mɑ́ cyɑ̈ɑ̈ng ywömø menɑni bɑ cyɑ̈ɑ̈ng kwër me dwøng. Akwɑjji Pilɑtø yi Yeud kinni wiy tyelli gen tørri, o dëlli gen kɑ̈ɑ̈l piny. Codhe, ɑbëën dej yï ngɑn-ɑ mɑl kì kelli tyëng-ɑ ɑ́gur wɑ̈thi yenh ɑrïw kyeel ki Yëso, kɑ tyelle tørri, ɑloony tyelli jɑl-ɑ kyeelø ki tørrø. Keny-ɑ ɑ́bëën gen yï Yëso, ɑyuud ge gøn e rum thøø, kɑ ocögø tyelle pɑ tørri yi gen. De ɑ́cwøb ki tøng kì wɑɑng ngëde yi ɑlɑthker ɑ́kyel. Abëën remø wɑ̈g kí pï. Møgɑni ɑ́kwøb yi ngɑn-ɑ ɑ́lïdhi, o wu óyïëy wun. O møgɑni bɑ dyër, o ngɑ̈nyi yi en kinni, kømm-ɑ dyër. Møgɑni ɑ́cwöb kɑ per kinni, o møg-ɑ yij wɑ̈nyi kwërø pɑ̈dhi gen kɑ̈jji gen kinni, “Bong cögø ɑ́kyel kì ree men-ɑ ótor.” O ókwøbø ki keny megø kì yij wɑ̈nyi kwërø kinni, “Ge ónenni ri ngɑn-ɑ ɑ́cwøb yi gen.” Kɑ Yosep jɑl Arimɑthiyɑ̀, o bɑ jɑlbɑng Yëso kì gød, mɑ́ e óböggø yi Yeud, kedh-ɑ be kwɑjji Pilɑtø kinni mëggi dëël Yëso. Ayïëy Pilɑtø, kɑ Yosep obëënø, kɑ dëël Yëso kɑ̈l yi en. Kɑ Nikødemøs, jɑl-ɑ ɑ́bï yï Yëso kì wɑ̈r cyɑ̈ng ɑ́kyel, obëënø thyew, e ókɑ̈ddø ki ryɑ̈ mor, me óyölø ki lubɑn, ge bɑ kïllì pyɑ̈r ɑ́dɑ̈g wïdɑ́ngwen. Kɑ dëël Yëso kwɑny yi gen, kɑ kod gen ki ógødh kor-ɑ yöm, ni kɑ̀ bëëde kì yij kwööng Yeud. Buti keny-ɑ ɑ́gurii wïj yɑdh ɑrïw ɑ́dɑ bɑg. Bɑngɑni yije ɑ́dɑ rörø me nyɑ̈n kì yij kït, me yije nuti pɑ̈nyø kïdhø ki dhɑnhø. Kɑ Yëso kïdhi gen yij burɑni, mɑ́ e bɑ cyɑ̈ɑ̈ng tyëny ki jɑmmi Kwëër Ákɑɑdh. Cyɑ̈ɑ̈ng Jwøk kì mwøl piny nudd e looj, ɑ ɑ́møøl Meerì Mɑgdɑliyɑ̀ kej bur. Kɑ tungi kït lidhe e ónyiig wɑ̈ye kì dhø bur. Codhe, ɑrenge yï Sɑymøn Pïtør geki jɑlbɑng Yëso men-ɑ ɑ́mɑɑr yi Yëso, kɑ gï köbbe kinni, “Wë ókɑ̈ɑ̈lø kì yij bur, o kun-ɑ ókïdhii kwïj yi wøn.” Adhwödh Pïtør geki jɑlbɑng Yëso men-ɑ kyeelø, kɑ ge kedh-ɑ kun-ɑ di bur. Arengi gen kyeel, kɑ Pïtør yöm yi jɑl-ɑ kyeelø, kɑ ókwöngø wɑ̈dhi dhø bur. Kɑ ómëddø, ɑlidhe ógødh kor-ɑ yöm kì piny, de nuti kedhi yij bur. Awɑ̈nhi Sɑymøn Pïtør kì bɑnge, kɑ pödh-ɑ yij bur. Kɑ ógønhɑni lidhe kì piny, o nyɑ ógønh-ɑ ɑ́bëëd e ótwööj wïj Yëso óbɑnø, o ócïb wɑ̈ye. Codhe, ɑlunyi jɑlbɑng Yëso men-ɑ ɑ́kwöngi wɑ̈dhø ki kedhi yij bur, ɑlïdhe kɑ oyïëyø. (Mɑ́ møg-ɑ kööbø kì yij wɑ̈nyi kwërø kinni ódhwödh kì yij thøø nuti gɑmø yi wɑ̈thi gen.) Kɑ jøbɑnge døøg-ɑ kɑ̈lli gen. Meerì ɑ́cungi e óywöngø kì dhø bur, ɑmëdde yij bur. Kɑ wëywödd ɑ́ryew lidhe, ge orugø ki ógudh mø tɑr, ge obëëdø piny kì keny-ɑ ɑ́di dëël Yëso, ɑ́kyel ying-ɑ kej wïje, o ɑ́kyel ying-ɑ kej tyelle. Apyëj ge gøn kinni, “Dhɑnh, yïde ɑ ywöngí?” Alögge kinni, “Wɑ̈ɑ ókɑ̈ɑ̈lø, o kun-ɑ ókïdhii kwïj yi yɑn.” Kɑ ɑ́rume kwøbi møgɑni, ɑlïïdhe ngɑ̈je, kɑ Yëso lidhe e ócungø, de gø nuti ngij en kinni bɑ Yëso. Apyëjii yi Yëso kinni, “Dhɑnh, yïde ɑ ywöngí? Yï yɑb-ɑ men?” Kɑ Meerì orumø kinni bɑ jɑlbɑg, ɑköbbe gøn kinni, “Jɑldwøng, keløg ɑ́ yïn ɑ kɑ̈ɑ̈lii, köbbí yɑn keny-ɑ ɑ́cïbí, o kɑ̈l yi yɑn.” Acwølii yi Yëso kinni, “Meerì!” Kɑ Meerì ree løge, kɑ gø köbbe ki dhøg Ibru kinni, “Rɑbonì!” (A wɑngi kinni, Jɑlpwönyø.) Aköbbii yi Yëso kinni, “Yɑ ko mïdhi, mɑ́ yɑ nuti kedhi mɑl yï Wïy. De kedhí yï nyiimïɑ, kɑ ge köbbí kinni, yɑ kedh-ɑ mɑl yï Wïyɑ, o bɑ Wïyi wun; Jwøgɑ, o bɑ Jwøøg wun.” Akedh Meerì Mɑgdɑliyɑ̀, kɑ jøbɑng Yëso köbbe kinni, Wë liidh en. Kɑ gï dwögge møg-ɑ ɑ́köbbii yi Yëso. Kì wɑɑng thyënhi cyɑ̈ngɑni, en ɑ cyɑ̈ɑ̈ng Jwøk, jøbɑng Yëso ɑ́bëëd ge cugø e thïg bënn bɑ ɑcyëg, mɑ́ ge óböggø yi Yeud. Abëën Yëso, kɑ ócungø kì dïdyëri gen. Kɑ gï köbbe kinni, “Wu óbëëdø ki mër!” Kɑ ɑ́rume kwøbi møgɑni, ɑnyudhe gïn cingge geki wɑɑng ngëde. Kɑ jøbɑnge pëthi gen ómïnø kɑ ɑ́lidh gen Wë. Acigi gen köbbø yi Yëso kinni, “Wu óbëëdø ki mër. Wu ceg yi yɑn kɑ örø, ni kɑ ɑ́ör yɑn yi Wïy.” Kɑ ɑ́rume kwøbi møgɑni, ɑkudhe kömi gïn ki yømø, kɑ gï köbbe kinni, “Kwɑnyu Wëykwërø. Keløg lɑɑwi wun dwöög wu’ piny kipe orøøg dhɑnhø, lɑ́ɑ̀w ɑ́rum ki dwöög piny kipe orøngɑni, de keløg orøøg dhɑnhø ómïdhi yi wun, ónudd e omïdhø.” De Tömɑs Nyɑjwøk, ɑ bɑ ɑ́kyel kì kelli jøbɑng Yëso gɑ pyɑ̈rø wïdɑ́ryew, ɑ́bëëd e tøøk kì kelli gen keny-ɑ ɑ́bëën Yëso. Aköbbii yi jøbɑng Yëso møg-ɑ kyeelø kinni, “Wë ɑ́lidh yi wøn.” Kɑ ge köbbi yi Tömɑs kinni, “Ke pɑ lidhɑ kɑ̈jji gedd kì cingge, kɑ lwedɑ kïdhɑ kɑ̈jjɑni, kɑ cingɑ cïbɑ wɑɑng ngëde, yɑ pɑ yïëy.” Kì bɑng osboo, ɑcugi jøbɑnge kì ød, kí Tömɑs kì kelli gen. Kɑ Yëso obëënø e thïg bɑ ɑcyëg, kɑ ócungø kì dïdyëri gen, ɑkööbe kinni, “Wu óbëëdø ki mër!” Codhe, ɑköbbe Tömɑs kinni, “Cïb lwedí keny, kɑ cinggɑ liidh, kɑ cingí rïïj, kɑ cïb wɑɑng ngëdɑ. Wïyí ki pëmø, kɑ yï yïëëy.” Alöggi Tömɑs kinni, “Wɑ̈ɑ, Jwøgɑ!” Aköbbii yi Yëso kinni, “Tömɑs, yï ɑ́yïëy kɑ per kɑ ɑ́liidh yɑn? Ngɑn yïëy e nuti lïdhø, ree dɑ gyëdh.” Dɑ gïïngɑ̈ngø møøgø mø ngenyø mɑ ɑ́gwøg yi Yëso kì bøli jøbɑnge, o ge nuti gwedø kì yij wɑ̈nyø men. De møg ɑ́gwed kɑ per kinni o wu yïëy wun kinni, Yëso ɑ bɑ Mesiy, Wɑ̈d Jwøk, kí kinni o wu óyïddi wun ki nënn-ɑ ɑtheer kì bɑng yïëyø mi wun. Kɑ Yëso ocwöbø këti kì bøli jøbɑnge, kì kömi Tɑɑy Thɑbɑriyɑ̀. Bene kër-ɑ ɑ́cwöb møgɑni èn: Sɑymøn Pïtør kí Tömɑs (ɑ cwøl ɑ́ Nyɑjwøk,) kí Nɑthɑnɑil jɑl Gɑnɑ̀ kì myërri Gɑlelì, kí wɑ̈ddi Dhebedì, geki jøbɑnge ɑ́ryew møøgø, ge ɑ́bëëd ge cugø kì kej ɑ́kyel. Aköbbi gen yi Sɑymøn Pïtør kinni, “Yɑ kedh-ɑ be mɑy.” Aköbbii yi gen kinni, “Wɑ ókedh.” Akedh gen, kɑ ge kɑdh-ɑ yij morkɑb, de bong rij mɑ ɑ́yod yi gen kì wɑ̈rɑni. Keny-ɑ ɑ́ru wøw, ɑcungi Yëso kì thɑ̈ngi nɑm, de kwïj yi jøbɑnge kinni, bɑ Yëso. Apyëëj gen yi Yëso kinni, “Yɑnythønhø, yï wun dɑ rij?” Alöggi gen kinni, “Bogïn.” Aköbbe gïn kinni, “Luudh wun bøy wïj kyëëj morkɑb. O wu mɑ̈gi wun ki rij.” Codhe, ɑluudh ge gøn, kɑ bøy ódhɑ̈lø ywɑ̈ɑ̈j wɑ̈g yi ngenyi rij. Kɑ jɑlbɑng Yëso men-ɑ mɑɑr yi en, Pïtør köbbe kinni, “Ngɑnɑni bɑ Wë.” Kɑ ɑ́lïng Pïtør kinni, bɑ Wë, ɑlønye ógødhe ree, mɑ́ e ɑ́bëëd e cyɑ̈dh-ɑ nøw, kɑ pɑ̈ɑ̈r-ɑ nɑm. De jøbɑng Yëso møg-ɑ kyeelø ɑ́bï ki morkɑb, ge ywɑjj-ɑ bøyɑni, e pɑ̈ng yi rij, mɑ́ ge cyɑ̈gi ki wɑ̈g, ki mïtïr miyø. Keny-ɑ ɑ́wɑ̈dhi gen wɑ̈g, ɑkɑdhi gen piny, kɑ mɑɑc cug lidh gen, wïje dɑ rij kí ópun. Aköbbi gen yi Yëso kinni, “Kɑ̈ni wun ki rijj-ɑ ɑ́cer mɑgø yi wun.” Akɑdhi Sɑymøn Pïtør yij morkɑb, kɑ bøy ywɑ̈ɑ̈je wɑ̈g, yije pɑ̈ng yi rij mø døngø, kwɑnni gen bɑ miyø kí pyɑ̈r ɑ́bïj wïdɑ́dɑ̈g. O bøy nuti pyëdø, ngö rij ngenyø. Aköbbi gen yi Yëso kinni, “Bïu, cyɑ̈ɑ̈m wun.” Bong ngɑn mɑ ɑ́pɑ̈nyi pëjjø kì kelli jøbɑng Yëso kinni, “Yï bɑ men?” Mɑ́ e ngɑ̈nyi yi gen ɑ́ Wë. Abëën Yëso, ɑkwɑnye ópun kɑ gø mëgge gïn, kɑ rij mëgge gïn thyew. Men bene dɑ̈ɑ̈g cwöbi Yëso kì bøli jøbɑnge, kì bɑng kɑ ɑ́dhwödhe kì yij thøø. Keny-ɑ ɑ́rum gen ki cɑm, ɑpyëëj Sɑymøn Pïtør yi Yëso kinni, “Sɑymøn wɑ̈d Jøn, mɑɑr-ɑ mɑɑr yɑn yi yïn, lod-ɑ mɑɑr-ɑ mɑɑr yɑn yi ji møg?” Alögge kinni, “Awøø, Wuö, ngɑ̈nyi yi yïn kinni, yï mɑɑr yi yɑn.” Aköbbii yi Yëso kinni, “Kor dyëgɑ.” Acige gøn pyëjø kinni, “Sɑymøn wɑ̈d Jøn, yɑ mɑɑr yi yïn?” Alögge kinni, “Awøø, Wuö, ngɑ̈nyi yi yïn kinni, yï mɑɑr yi yɑn.” Aköbbii yi Yëso kinni, “Kwɑy dyëgɑ.” Apyëje gøn ki dɑ̈ɑ̈g pëjjø kinni, “Sɑymøn wɑ̈d Jøn, yɑ mɑɑr yi yïn?” Kɑ Pïtør yije obɑɑrø kipe kɑ ɑ́pyëjii ki dɑ̈ɑ̈g pëjjø kinni, “Yɑ mɑɑr yi yïn?” Kɑ gø köbbe kinni, “Wuö, jɑmmì bënn ngɑ̈nyi yi yïn, o yï ngɑ̈ny wøw kinni, yï mɑɑr yi yɑn.” Aköbbe gøn kinni, “Kor dyëgɑ. Yɑ köbb-ɑ yïn kidyër kinni, kɑ ɑ́bëëd yï bɑ wøb, yï ketí ɑ nyi ruug rií, o yï nyi wïn-ɑ kun-ɑ dwɑddi yi yïn, de keny-ɑ óyöø yi yïn, cinggí óbøødh rií, kɑ yï ruug yi ngɑn megø, kɑ yï kïdhi kun-ɑ pɑ dwɑddi yi yïn.” (Møgɑni ɑ́kwøb yi en gɑ møg nyoodhe thøw-ɑ óthøw Pïtør, men-ɑ ree óyïddi yi Jwøk ki dhwɑ̈ng.) Codhe, ɑköbbii yi Yëso kinni, “Bïí bɑngɑ!” Aløg Pïtør ree kɑ jɑlbɑng Yëso men-ɑ mɑɑr yi Yëso lidhe, e ócyɑ̈dhø kì bɑng gen. Bɑ jɑl-ɑ ɑ́jyɑ̈ɑ̈ng ree kö Yëso keny-ɑ ɑ́cyɑ̈ɑ̈m gen ki gïncɑm, kɑ Yëso pyëje kinni, “Wuö, ɑ́ men ɑ óngeew yïn?” Keny-ɑ ɑ́lidhii yi Pïtør, ɑpyëëj Yëso yi Pïtør kinni, “Wuö, o jɑɑl ø?” Aköbbii yi Yëso kinni, “Keløg yɑ dwɑdd-ɑ kinni, o bëëde gïti keny-ɑ ódwöögɑ, cwɑggí ɑ́ ngø? Bïí bɑngɑ!” Atɑɑy kwøbbɑni kelli nyiimëëg kinni, jɑlbɑng Yëso menɑni pɑ thøw, de Yëso nuti kwøb-ɑ kinni, pɑ thøw, dɑ́ kinni, “Keløg yɑ dwɑdd-ɑ kinni, o bëëde gïti keny-ɑ ódwöögɑ, cwɑggí ɑ́ ngø?” Jɑlɑni bene jɑlbɑng Yëso men-ɑ thyer møgɑni, o en ɑ ɑ́gwed gïn, o ngɑ̈nyi yi wɑ kinni, møg-ɑ thyer yi en bɑ dyër. O dɑ gïg møøgø thyew mø ngenyø mɑ ɑ́gwøg yi Yëso, o keløg ge di gwed bënn, yɑ orumø kinni, kömi piny di göög e dhiing yi wɑ̈jj-ɑ di gweed gen. Yïn ɑ Thyøpiløs, Kì yij wɑ̈nyø men-ɑ ɑ́kwøng yi yɑn ki gwedø, møg-ɑ ɑ́kømmi yi yɑn bɑ møg-ɑ ɑ́gwøg yi Yëso geki møg-ɑ ɑ́pwönyi yi en bënn, cɑg kì tyeli mɑl gïti cyɑ̈ng-ɑ ɑ́kïdhii mɑl. De kì bøli kenyɑni, tyëngwöödø møg-ɑ ɑ́yieny yi en rumø cegø yi en kì ri Wëykwërø. Kì bɑng kɑ ɑ́thøwe, ree nyi nyudhe’ gïn, e onëënø, kì ri ngïjjì mø ngenyø, o kì yethi cyɑ̈ng pyɑ̈r ɑ́ngwen ɑ́bëëd e nyii cwöbø kì bøli gen, e kømm-ɑ kwøbbi Pödhi Jwøk. O kɑ̈ng-ɑ ɑ́bëëde ki gïn, gï ɑ́cege kinni, “Wu ko dhwödh kì Yerusɑlem, de yïd wun møg-ɑ ɑ́kwøb yi Wïy kinni ómuuje; o møgɑni ɑ́lïngi yi wun kì yïɑ. Ji ɑ́jwɑ̈ɑ̈g yi Jøn kɑ pï kidyër, de kì bɑng cyɑ̈ng mø nøg, ji ójwɑ̈ɑ̈g yi wun kɑ Wëykwërø.” Kɑ kì bɑng kɑ ɑ́cugi gen, ɑpyëj ge gøn kinni, “Wuö, men bɑ bøli keny-ɑ ódöggí lɑwø tyëng Isrɑil?” Kɑ gï köbbe kinni, “Kɑ̈gi piny, kí bøli keny-ɑ gwøøg jɑmmì bënn ying-ɑ cingi Wïy, ge pɑ dwɑddi kinni o ge bëëd ge ngɑ̈nyi yi wun. De wu óyïddi ki tegø keny-ɑ óbëën Wëykwërø kömi wun; o wu óbëëd wu bɑ cwɑ̈ggɑ kì Yerusɑlem, kí Yeudiyɑ̀ bëne, kí Sɑmɑriyɑ̀ gïti wɑ̈thi tùngi piny.” Kɑ ɑ́rume kwøbi møgɑni, ge nudd ge nenn-ɑ yïe, ɑtïngii mɑl, kɑ gëng yi pøølø. Ge ɑ́nudd ge nenn-ɑ mɑl, kun-ɑ ɑ́kedhe; ɑcwöb jøg ɑ́ryew mø ri gen di ógudh mø tɑr ge ócungø kì buti gen, kɑ ge köbbi yi jøgɑni ryeet kinni, “Wun ɑ jø Gɑlelì, wude ɑ nudd wu nenn-ɑ mɑl? Yëso, en ɑ ngɑn-ɑ ɑ́kɑ̈l kì kelli wun, e kïdh-ɑ mɑl, ódwöög ni kɑ ɑ́lidhii yi wun, e kedh-ɑ mɑl.” Codhe, ɑdøøg gen Yerusɑlem, ge kɑ̈ɑ̈l-ɑ wïj Kïti Dhetun. Kïnɑni cyɑ̈gi ki Yerusɑlem ki kïlomïtïr ɑ́kyel. Keny-ɑ ɑ́wɑ̈dhi gen kɑɑl, ɑpödhi gen ød mɑl keny-ɑ nyi bëëd yi gen; jøgɑni bɑ Pïtør kí Jøn, kí Yɑgob kí Andrø, kí Pïlïp kí Tömɑs, kí Bɑrthølømɑøs, kí Mɑthyëw, kí Yɑgob wɑ̈d Alpɑ̀, kí Sɑymøn Lunø, kí Yeudɑ̀ wɑ̈d Yɑgob. Ge ɑ́bëëd ge kwɑjj-ɑ Jwøk kì kej ɑ́kyel, geki tyëng-ɑ mɑ̈nn, kí Meerì meyi Yëso geki nyiimï Yëso yɑɑg-ɑ cwøw. Yethi cyɑ̈nggɑni ɑ ɑ́löggi Pïtør kì bøli nyiimëëg, e kwɑnni gen wɑ̈dh-ɑ ri miyø kí pyɑ̈r ɑ́ryew. Kɑ okööbø kinni, “Nyiimïɑ, møg-ɑ ying yij wɑ̈nyi kwërø ɑ́bëëd gɑ møg pɑ̈dhi kɑ̈jji gen ceth; gen ɑ møg-ɑ ɑ́mɑ̈ɑ̈g ki kwøbø yi Wëykwërø ki dhøg Debïd, e kømm-ɑ Yeudɑ̀, ngɑn-ɑ ɑ́pej tyëng-ɑ ɑ́mɑg Yëso. Ábëëd ɑ́ dhɑnhø ɑ́kyel kì kellee, kɑ thödhi ki keje kì ri gwøg men.” (Ngyënyy-ɑ ɑ́køøg Yeudɑ̀ kipe gïnrɑj men-ɑ ɑ́gwøge, ge ɑ́ngëëw ki pwödhø kì keny-ɑ́ yije ɑ́pɑ̈dhe kɑ othøø, kɑ yije ópyëdø, kɑ cïnne røy-ɑ piny. Kɑ kwøbbɑni lïngi yi ji-ɑ bëëdø kì Yerusɑlem bënn, kɑ pwönhɑni cɑg ɑ́ Akeldɑmɑ̀ ki dhø gen; ɑ wɑngi “Pwödhi Remø.”) “Wɑ̈nyi Wör okööbø kinni, ‘Wiy gøle döng e lïïwø, o bongii dhɑnhø me bëëdø kì yije.’ Bɑ ɑgwed thyew kinni, ‘Wiy gwøge kwɑny yi ngɑn megø.’ “Wɑ ceg-ɑ kɑ̈bbø ki nget ɑ́kyel me bï kömee, kì kelli tyëng-ɑ ɑ́cyɑ̈dhi ki wɑ keny-ɑ ɑ́nud Wë Yëso kì kellee, cɑg kì ri keny-ɑ ɑ́jwɑ̈ɑ̈g ji yi Jøn, gïti kɑ ɑ́kïdhii mɑl. O ngɑnɑni ókɑ̈lle kwøbbi dhwönhi Wë kì yij thøø kyeel ki wɑ.” Akɑ̈ɑ̈l gen jøg ɑ́ryew. Jɑl ɑ́kyel bɑ Yosep ɑ cwøl ɑ́ Bɑrsɑbɑ̀, ɑ dhømmi ɑ́ Yostøs, o jɑl-ɑ kyeelø bɑ Mɑtiyɑs. Akwɑ̈jji gen kinni, “Wuö, pëthi ji bënn ngɑ̈nyi yi yïn, nyudhí wøn ngɑn-ɑ ɑ́yieny yi yïn kì kelli jøg ryeet, ɑ́ men-ɑ ógöögø jɑlwöödø kì kej Yeudɑ̀, ngɑn-ɑ ɑ́kedhi keny-ɑ bɑ keje.” Kɑ ge olëngø ki wél, kɑ wél pɑ̈dhi kɑ Mɑtiyɑs, ɑ rëbe ki tyëngwöödø gɑ pyɑ̈rø wïdɑ́kyel. Keny-ɑ ɑ́wɑ̈nhi cyɑ̈ng-ɑ Pyɑ̈r Ábïj, ge ɑ́bëëd ge cugø bënn kì kej ɑ́kyel. Kɑ ɑtunø me teeg wɑ̈dh-ɑ ì dut kì øn-ɑ́ yije ɑ́bëëd yi gen. Kɑ lebbi mɑc ocwöbø, kɑ ri gen pɑ̈ngi gen, kɑ ge ócungø kì wɑ̈thi jiɑni; men ki leeb mɑc kì wïje. Kɑ pëthi gen bënn opɑ̈ngø yi Wëykwërø, kɑ ge ócɑ̈gø kwøb ki dhøg møøgø, ni kɑ ɑ́thödhi gen yi Wëykwërø ki dhøgg-ɑ 'kööb gen. Ádɑ Yeud kì Yerusɑlem mø bɑ tyëngtir; ge ɑ́bï ge kɑ̈ɑ̈l-ɑ pödhhi kömi piny bënn. Keny-ɑ ɑ́lïngi cwɑggi ɑtunø yi teenɑni, ɑcugi gen, kɑ wɑ̈thi gen omuumø, mɑ́ ngɑn lïng-ɑ dhø gen, kɑ̀ kööb tyëng-ɑ ɑ́yïëy. Kɑ wɑ̈thi gen ócungø yi møgɑni, ɑkööb gen kinni, “Ji-ɑ kööbø ek bënn pɑth ki tyëng Gɑlelì? Dɑ́ kidï ɑnɑn, ɑ lïngi wɑ kwøbbi gen; e ngɑn lïng-ɑ dhø jur gen? Wɑ ɑ́bï wɑ kɑ̈ɑ̈l-ɑ Pɑrthiyɑ̀, kí Mɑdɑy, kí Elɑm; møøgø kɑ̈ɑ̈l-ɑ Pøntøs kí Ásiyɑ̀, møøgø kɑ̈ɑ̈l-ɑ Perïjiyɑ̀ kí Pɑmpïliyɑ̀; møøgø kɑ̈ɑ̈l-ɑ Rïp kí myërri Lïbiyɑ̀ møg-ɑ buti Serin. Kwïee kɑ̈ɑ̈l-ɑ Römɑ̀; gɑ Yeud, kí jurr-ɑ kyeelø møg-ɑ ɑ́løg ri gen Yeud; o kwïee kɑ̈ɑ̈l-ɑ Kirit kí pödhi Árɑb, de cɑgg ɑ́ kinøw, ge ceg kɑ lïngø yi wɑ bënn ge 'kööb-ɑ dhøggee, ge lwøb-ɑ gïgdøngø møg-ɑ ɑ́gwøg yi Jwøk!” Ge ɑ́ceg ngɑ̈ngø bënn, kɑ wɑ̈thi gen ócungø; ge pyëny-ɑ ri gen kinni, “Men wɑng-ɑ ngø?” De ji møøgø ɑ́ceg-ɑ gɑ̈ɑ̈gø kinni, “Jiɑni wɑ̈thi gen dɑ møgø!” Adhwödhi Pïtør mɑl geki tyëngwöödø møg-ɑ kyeelø gɑ pyɑ̈rø wïdɑ́kyel; kɑ cwɑgge tïnge, ɑköbbe teedø kinni, “Lïng wun, wun ɑ Yeud, kí tyëng-ɑ bëëdø kì Yerusɑlem, o wu köbbɑ gïn-ɑ wɑngi yi møgɑni. Ji møg wɑ̈thi gen bong møgø, ni kɑ̀ rømmii yi wun, mɑ́ piny nudd ɑ́ sɑɑ̀ ɑ́bïngwen kì mwøl. De møg, bɑ møg-ɑ ɑ́kwøb yi Yöiil jɑltöng kinni, ‘Jwøk ɑ́kööb kinni, kì yethi cyɑ̈ngg-ɑ cyɑ̈n, Wëyɑ ókønyɑ kömi dhɑnhø bëne. Nyigi wun; cwøw kí mɑ̈nn, wöönɑ ótöng yi gen; wøbbi wun ólïdhi ki møg-ɑ ócɑ̈rri gen, o ywödhhi wun ólɑ̈gi ki lɑ̈g. Ngee, cɑgg ɑ́ kömi bɑ̈nggɑ; cwøw kí mɑ̈nn ókunyɑ ki wëyɑ kì yethi cyɑ̈nggɑni, kɑ wöönɑ kɑ̈lli yi gen. Kɑ yɑ onyudhø ki gïïngɑ̈ngø kì mɑl kí ngïjjì kì kömi piny. Ódi remø, kí mɑc, kí yïrø me dwøng. Cɑ̈ng ógöögø ki muudhø, kɑ dwɑ̈y ogöögø e kwɑɑr ni remø, e Cyɑ̈ɑ̈ng Wë; cyɑ̈ng-ɑ dwøng, cyɑ̈ɑ̈ng mɑ̈r nuti bëënø. Codhe, o ngɑn kwɑjji kønyø ki nyingi Wë yiel.’ “Wun ɑ tyëng Isrɑil, lïngi wun møg: Yëso jɑl Nɑdhɑreth ɑ́nyudhi wun yi Jwøk kì ri gïgdøngø kí gïïngɑ̈ngø geki ngïjjì møg-ɑ ɑ́gwøg yi Jwøk kì ree, kɑ ɑ́nude kì kelli wun, ni kɑ̀ ngɑ̈nyu en. Bɑ gïjø mɑ ɑ́rum ki cïbø yi Jwøk, ni kɑ ɑ́dwɑdde gøn, kinni Yëso bɑ men mëggi wun, o nɑ̈g yi wun, e ceg kɑ cïb cinggi tyëngorøg yi wun, o gø gur gen wïj yɑdh ɑrïw. De ɑ́tug mɑl yi Jwøk, kɑ töjji thøø cödde, mɑ́ e pɑ cuggi mïdhø yi thøø. Mɑ́ ree ɑ ɑ́kööb yi Debïd kinni, ‘Wë onennø yi yɑn kì bølɑ kì yethi cyɑ̈ng ying-ɑ butɑ, o pyëwɑ pɑ lïngø. Bene ɑ med pyëwɑ, o yɑ 'kööb-ɑ medi pyëwɑ O cɑgg ɑ́ kɑ̀ bëëdɑ yɑ bɑ dhɑnhø yøw, yɑ óbëëdø yïɑ dɑ ngɑ̈ɑ̈dhø. Mɑ́ yɑ koo wiy yi yïn piny pödhi tyëngthøø; bɑ̈ngí koo wëggí kwɑ̈ɑ̈g yij rörø. Yɑ ɑ́nyudhí yëth-ɑ kedhi yethi nënnì, o yɑ óbëëdø ki medi pyëw, mɑ́ yï ying-ɑ butɑ.’ “Wun ɑ nyiimïɑ, wiy wu köbbɑ kidøøj kinni, kweyee Rɑ̈dh Debïd ɑ́thøw, kɑ kony, o röre nud kì butee dicyɑ̈ngtïn. Ábëëd ɑ́ jɑltöng, o møg-ɑ ɑ́kwøb yi Jwøk ngɑ̈nyi yi en. Jwøk ɑ́köngi kinni, ɑ́kyel kì kelli kwɑrre ócïb wïj kwøme. Gïn-ɑ ódwɑddi gwøgø yi Jwøk dhuki megø ɑ ɑ́lidh yi Debïd, ɑkööbe kì ri dhwönhi Mesiy kì yij thøø; ɑ́kööb kinni, ‘Nuti wiy pödhi tyëngthøø; nuti kwɑ̈ɑ̈g yij rörø.’ Yëso kiree, ɑ́tug yi Jwøk kì yij thøø, kɑ lidh yi wøn kidyër. Kɑ kïdhi mɑl, kɑ cïb wïj kyëëj Wïye Jwøk, kɑ gø mëgge wëy ni kɑ ɑ́kööbe, kɑ wëyɑni kønye kömi wøn; o bene møgɑni ɑ lïngi yi wun, o gen ɑ nenni yi wun ɑnɑn. Mɑ́ Debïd nuti kedhi mɑl, de ɑ́kwøb-ɑ kinni, ‘Wɑ̈ɑ ɑ́köbbi yi Jwøng-ɑ Ácwɑ̈ɑ̈j kinni, ‘Bëëd kì wïj kyëjɑ, gïti keny-ɑ ócïbɑ tyëng-ɑ mɑɑn yïn thɑ́ tyellí.’ “Wiy gøl Isrɑil bëne ngɑ̈nye wøw ceth kinni Yëso menɑni; eni ngɑn-ɑ ɑ́gur yi wun wïj yɑdh ɑrïw, bɑ en ɑ ɑ́røny yi Jwøk ɑ́ Wë kɑ løg-ɑ Mesiy.” Keny-ɑ ɑ́lïngi kwøbbɑni yi teedø, ɑpödhi møgɑni pëthi gen, kɑ Pïtør geki tyëngwöödø köbbi gen kinni, “Nyiimïɑ, göög wøn kidï?” Kɑ ge köbbi yi Pïtør kinni, “Yewi wun, kɑ wu jwɑ̈ɑ̈g, wu bënn, ki nyingi Yëso Mesiy, o lɑ́ɑ̀w dwöög piny kipe orøøg wun, o wu yïddi wun ki Wëykwërø, men-ɑ ómuuj yi Jwøk. Mɑ́ møg-ɑ ɑ́kwöng yi Jwøk bɑ kiper wun, wuki nyigi wun, kí tyëng-ɑ lɑ̈wi bënn, gen ɑ tyëng-ɑ cwøl yi Wë Jwøgee.” Kɑ Pïtør okööbø ki kwøb mø gïïr thyew, e cïj-ɑ gen kinni, “Yielu ri wun ki cɑ́y-ɑ óbï kömi ji-ɑ rijjø ek!” Kɑ kwøbbe yïëy yi ji mø gïïr kì kelli gen, kɑ tyëng-ɑ ɑ́yïëy jwɑ̈ɑ̈g, kɑ ji ɑ́lïp ɑ́dɑ̈g órëbø ki tyëng-ɑ ɑ́yïëy kì cyɑ̈ngɑni. Kɑ pëthi gen cïb gen kömi møg-ɑ pwönyi yi tyëngwöödø, kí cyɑ̈dhø kì kömi gïjø ɑ́kyel, kí pødi ópun, geki kwɑjji Jwøk. Kɑ tyëngwöödø ogöögø ki gïïngɑ̈ngø kí ngïjjì mø ngenyø, kɑ teedø bëne obwøgø. Kɑ ji-ɑ ɑ́yïëy bënn obëëdø kì kej ɑ́kyel, kɑ jɑmmi gen bënn nyi nywɑg yi gen. Kɑ jɑmmi gen ngeew gen wɑ̈g, kɑ ngyëny nyi pɑ̈ngi yi gen kì kelli gen; e ngɑn nyi mëgg-ɑ gïn-ɑ jɑ̈ddii. Kɑ ge nyii cugø kì Kengø, yethi cyɑ̈ng bënn, ki pyëw ɑ́kyel, kɑ ópun nyi pød yi gen kì yethi kɑ̈lli gen, kɑ ge nyii nywɑ̈gø ki medi pëthi gen, e bong ɑ́dud ki yethi gen. Kɑ Jwøk nyi pwøj yi gen, kɑ ji bënn pëthi gen løg-ɑ mø med ki gen. Kɑ kwɑnni gen med yi Wë ki tyëng-ɑ nyi kedh ge oyielø kì yethi cyɑ̈ng bënn. Cyɑ̈ng ɑ́kyel, kɑ Pïtør kedh-ɑ Kengø geki Jøn, kì bøli keny-ɑ nyi kwɑjji Jwøk ki sɑɑ̀ ɑ́dɑ̈g kì böörø. Ádɑ jɑl men-ɑ ónywølø ɑ́ pudh, me nyi kɑ̈ɑ̈l kɑ cïb be kwɑ̈jjø kì yï ji-ɑ kedhi Kengø; ki dhøng-ɑ cwøl ɑ́ Dhøng-ɑ Myër. Jɑlɑni keny-ɑ ɑ́lidhe Pïtør geki Jøn, ge køm-ɑ kedhi Kengø, ɑkwɑ̈jje kì yï gen. Kɑ Pïtør geki Jøn nenn-ɑ ree, ɑköbbii yi Pïtør kinni, “Lïïdh yï wøn!” Kɑ lïïdh-ɑ yï gïn, e orumø cem e óyïddi ki gïn mëggii yi gïn. Kɑ köbbi yi Pïtør kinni, “Yïɑ bong ɑ́tegø, o yïɑ bong dhɑb, de yï ómëggɑ gïn-ɑ nud kì yïɑ. Yɑ köbb-ɑ yïn kinni, dhwöödh kɑ yï cyɑ̈dhí, ki nyingi Yëso Mesiy jɑl Nɑdhɑreth!” Kɑ gø mɑge kì cingi kyëje, kɑ gø tïnge mɑl, kɑ tyelle kí nyɑ́jyɑ̈nggi tyelle ótëngø kì bøli kenyɑni ceth. Apɑ̈ɑ̈re mɑl, kɑ ócungø, kɑ ócyɑ̈dhø. Akedhe Kengø kyeel ki gen, e cyɑ̈dhi e ópɑ̈rrø e lenh-ɑ Jwøk. Kɑ lidh yi teedø bëne e ócyɑ̈dhø, e lenh-ɑ Jwøk, kɑ gø ngij gen kinni bɑ jɑl-ɑ nyi bëëdø kì dhø Kengø, dhøng-ɑ cwøl ɑ́ Dhøng-ɑ Myër, ɑ nyi kwɑ̈jji kì yï ji. Angɑ̈ng gen, kɑ wɑ̈thi gen omuumø yi gïn-ɑ ɑ́kedhi ree. Kɑ̈ng-ɑ ɑ́bëëd jɑlɑni e nudd e mɑ̈gø kì bɑng Pïtør geki Jøn, ɑrengi ji bënn yï gen, kì thɑ ɑkɑni Sølømøn, kɑ ge ceg-ɑ ngɑ̈ngø ki mendwøng. Keny-ɑ ɑ́liidh møgɑni yi Pïtør, ɑköbbe teedø kinni, “Wun ɑ tyëng Isrɑil, wude ɑ ngɑ̈ng wun yi møgɑni, wɑlɑ̀ wude ɑ nenni wun ri wøn, de jɑlɑni ce gwøøg wøn kɑ tegi wøn, wɑlɑ̀ kɑ bëëdi wøn, wøn ɑ́ jii Jwøk? Jwøøg Abrɑhɑm, kí Isɑɑk, kí Yɑgob; eni Jwøøg kweyyee, bɑ en ɑ ɑ́thödhi Yëso wɑ̈de ki dhwɑ̈ng, eni ngɑn-ɑ ɑ́cïb cingi Pilɑtø yi wun, kɑ bɑny yi wun kì bøli keny-ɑ ɑ́dwɑdde gø gønyø. Ngee, ngeti kwërø, ngɑntir ɑ́bɑny yi wun, kɑ wu cwøl-ɑ ɑ́muddi ji. Kɑ ngɑn-ɑ yïe kɑ̈ɑ̈l yi nënnì nɑ̈g yi wun, de ɑ́tug yi Jwøk kì yij thøø, kɑ lidh yi wøn. O bɑ tegi nyingi Yëso ɑ ɑ́wëggi jɑɑl dönyø, e ɑ́bëëd ɑ́ pudh. Gïn-ɑ nenni yi wun ɑnɑn, ɑ́gwøg kɑ yïëyi nyingi Yëso; bɑ yïëyi Yëso ɑ ɑ́gwøgii, ɑdönye ni kɑ̀ nennu en ɑnɑn. “O ɑnɑn wun ɑ nyiimïɑ, tyëng Isrɑil, ngɑ̈nyi yi yɑn kinni, gïn-ɑ ɑ́göggu Yëso wuki jɑggi wun, ɑ́gwøg yi wun kɑ kwïji wøw. Kɑ møg-ɑ ɑ́mɑ̈ɑ̈g yi Jwøk ki kwøbø ki dhøggi jøtöng bënn kinni, Mesiy órɑngi ceth, pɑ̈dh-ɑ kɑ̈jji gen. De yewi wun, kɑ wu døøgu kö Jwøk, o orøøg wun lɑ̈ɑ̈ny, o cyɑ̈nggi ywömø kɑ̈ɑ̈l yi Wë, keny-ɑ óöre wun Mesiy men-ɑ ɑ́yieny yi en, eni Yëso kiree. Ceg-ɑ bëëdø kì mɑl gïti bøli keny-ɑ ódwøøg jɑmmì kɑ̈jji gen bënn, ni kɑ ɑ́ngɑ̈ɑ̈j møgɑni yi Jwøk ki dhøggi jøtöng møge, tyëngtöng-ɑ tir. Mosɑ̀ ɑ́kööb kinni, ‘Wu óödi yi Wë Jwøøg wun, ki jɑltöng, ni kɑ ɑ́öre yɑn, o óbëëd ɑ́ dhɑnhø ɑ́kyel kì kelli jii wun. Kɑ møg-ɑ óköbbe wun kinni gwøøg gen, nyi gwøg wun ceth. Ngɑn-ɑ óbɑ̈nyi ki lïngi kwøbbi jɑltöngɑni, ceg kɑ kɑ̈ɑ̈l wɑ̈g kì kelli jii Jwøk.’ O wööni møg-ɑ cwöb kì yethi cyɑ̈ng møg ɑnɑn, ɑ́rum ki kwøbø yi jøtöng møg-ɑ ɑ́kööb bënn, cɑg kì ri Sɑmwel kí tyëng-ɑ ɑ́bï kì bɑnge. Wu bɑ wɑ̈ddi jøtöng, o wu nud kì yij dhøng-ɑ ɑ́nywɑg yi Jwøk geki kweyyi wun, kɑ ɑ́köbbe Abrɑhɑm kinni, ‘Gyëdhh-ɑ ómëggɑ jurri kömi piny bënn, ókɑ̈ɑ̈l-ɑ ri kwɑrrí.’ Kɑ Jwøk bɑ̈nge myege, ɑkwønge gøn ki ör yï wun, ɑ́ gyëdh møg dwöög wun wɑ̈g kì yuu orøg.” Kɑ̈ng-ɑ́ nudd Pïtør geki Jøn ge köbb-ɑ teedø, ɑbëën ókwër geki jɑngi bölidhhi Kengø, kí Jøsɑduk yï gen. Pëthi gen ɑ́rënyi kipe kɑ̀ pwönyi gen teedø kinni, Yëso ɑ́dhwödh kì yij thøø, men nyodh kinni tyëngthøø bɑ møg-ɑ ódhwödh. Kɑ gï mɑg gen, ɑleeng gen ød mɑg gïti dhuki, mɑ́ wøw yuudhø. De ji mø ngenyø kì kelli tyëng-ɑ ɑ́lïngi kwøbbɑni ɑ́yïëy, kɑ kwɑnni jøg-ɑ cwøw køm-ɑ wɑ̈dhi ri ɑ́lïp ɑ́bïj. Dhuki, kɑ jɑggi Yeud geki jøgdøngø, kí jøpwönyi Cigg ócugø kì Yerusɑlem, kí Anɑ̀ Ókwër-ɑ Dwøng kí Kɑyɑpɑ̀, kí Jøn, kí Iskɑnder, kí wɑ̈ddi jɑggi ókwër bënn. Akɑ̈ɑ̈l tyëngwöödø bøli burø, kɑ ge pyëj kinni, “Gïn, ɑ́gwøg yi wun ɑ dï? Á tegø mɑ ngø ɑ yï wun, wɑlɑ̀ ɑ́ kì ri nyingi men ɑ ɑ́gwøgu gïnɑni?” Kɑ pyëjji gen løøg yi Pïtør, e pyëwe pɑ̈ngø yi Wëykwërø; ɑ́kööb kinni, “Wun ɑ jɑggi pödhø, kí jøgdøngø, keløg wø pëjju’ gïndøj men-ɑ ɑ́göggi pudh men dicyɑ̈ngtïn, kí kër-ɑ ɑ́yieelii, yodu en wuki tyëng Isrɑil bënn kinni, kɑ̀ cunge kì bøli wun dële døøj ɑnɑn, ɑ́gwøg kɑ nyingi Yëso Mesiy, jɑl Nɑdhɑreth; eni jɑl-ɑ ɑ́gur wïj yɑdh ɑrïw yi wun, kɑ tug yi Jwøk kì yij thøø. Bɑ Yëso ɑ kømmi yi wɑ̈jji kwërø kinni, ‘Kït men-ɑ ɑ́bɑny yi bödhhi gyer, en ɑ ɑ́göög ki kïn-ɑ pere pëddi tegø.’ Yielø ókɑ̈ɑ̈l-ɑ ree kete; bong dhɑnhø megø kì kömi piny, mɑ ɑ́muuj yi Jwøk ɑ́ ngɑn yïëdø, den-ɑ́ e kete.” Kɑ jɑggi burø ongɑ̈ngø keny-ɑ ɑ́lidh gen yëth-ɑ 'kööb yi Pïtør geki Jøn ki tegi pëëth; mɑ gï ngɑ̈nyi yi gen gɑ ji mø nuti dïdø ki gwed; de ɑ́yod yi gen kinni, ge ɑ́cyɑ̈dhi kɑ Yëso cøn. De ge ɑ́jɑd ki gïn kwøb yi gen, mɑ́ jɑl-ɑ ɑ́yiel ócungø kì bøli gen. Aör gen wɑ̈g kì ød burø. Codhe, ɑpyënyi gen ri gen kinni, “Á ngø ɑ göggi wɑ jøgɑni ryeet? Mɑ́ ngïji men ɑ́gwøg yi gen, e ngɑ̈nyi yi tyëng Yerusɑlem bënn, o møgɑni pɑ cuggi pyemø yi wɑ. Lɑ̈w ke cem wɑ nyingi gen, kinni nyingi Yëso ko kømmi yi gen kì kelli teedø, kipe wöönɑni ótɑɑy kelli teedø.” Codhe, ɑcwööl gen, kɑ gï ceg gen kinni nyingi Yëso ko wöl gen ki kømmø, wɑlɑ̀ ge ko pwönyi këti ki nyingɑni. Kɑ mø gen løøg yi Pïtør geki Jøn kinni, “Wun kiri wun nyodhu gïn bɑ dyër kì bøli Jwøk, — bɑ gwøgi gïn-ɑ kwøb yi wun, wɑlɑ̀ gïn-ɑ kwøb yi Jwøk? De keløg ɑ́ per wøn, wø pɑ cuggi kudø kì kömi møg-ɑ ɑ́lidh yi wøn, kɑ ge lïngi yi wøn.” Kɑ nyingi gen døøg ki cemø yi burø, ɑwiy gen kedh gen; ge ɑ́jɑd ki keny cɑy ge gïn, mɑ́ ge óböggø yi teedø. Mɑ́ teedø bëne ɑ́bëëd e pøjj-ɑ Jwøk kipe gïn-ɑ ɑ́cwöb. Jɑl-ɑ ɑ́yiel kì ri ngïnyɑni runne bɑ pyɑ̈r ɑ́ngwen wïje nud. Kɑ ɑ́rum Pïtør geki Jøn ki gønyø, ɑdøøg gen yï ɑkuud gen, kɑ gï köbbi gen møg-ɑ ɑ́kwøb yi jɑggi ókwër geki jøgdøngø. Keny-ɑ ɑ́lïngi gen møgɑni, ɑtïng gen cwɑggi gen wïj ɑ́kyel kì bøli Jwøk, ge ókwɑ̈jjø kinni, “Wuö, bɑ yïn ɑ ɑ́cwɑ̈j mɑl kí piny, kí nɑ̈mmì kí gïg-ɑ yethi gen bënn! Yï ɑ́kööb ki dhø kweyi wøn Debïd, bɑ̈ngí, kɑ ɑ́kööbe ki tegi Wëykwërø kinni, ‘Gede tyëngpɑth ɑ mɑɑg gen yi liny; gede teedø ɑ göög gen ki ɑmolpiny? Rɑ̈nhi kömi piny ri gen ɑ́tyeny gen kɑ jɑgg ocungø ki bur ge tyëdd-ɑ Jwøng-ɑ Ácwɑ̈ɑ̈j geki Mesiy mee.’ Kidyër, Ërödøs geki Pilɑtø jɑl Pøntøs ɑ́cugi kì kɑɑl, kyeel ki tyëngpɑth ki Yeud, kí tyëng Isrɑil, kɑ dhøggi gen nywɑ̈ggi gen nyɑrí Yëso; eni ngɑntir men-ɑ ɑ́gwøg yi yïn ɑ́ Mesiy. Ge ɑ́cugi kɑ per gwøgi møg-ɑ ɑ́rum ki pyëlø yi yïn ki tegí kɑ̈ge dööng, gɑ møg-ɑ ócwöb ceth. De ɑnɑn, Wuö, lidh kɑ̀ cemmi gen nyingi wøn. Wiy kwøbbí töng yi bɑ̈nggí, ge pɑ böggi. Rïj cöngí kɑ yï yïëëd, kɑ wiy ngïjjì kí gïïngɑ̈ngø gwøg ki nyingi ngɑn-ɑ tir, Yëso Bɑ̈ngí Kwërø.” Keny-ɑ ɑ́rum gen ki kwɑ̈jjø, kɑ keny-ɑ cugi gen okïïrø, kɑ pëthi gen bënn opɑ̈ngø yi Wëykwërø. Kɑ kwøbbi Jwøk pwönyi yi gen, ge pɑ böggi. Kɑ ji møg-ɑ ɑ́yïëy bënn rummi gen kí pëthi gen cïb gen kej ɑ́kyel; bong ngɑn kööbø kinni, dɑ jɑmmi cwɑgge. De jɑmmi gen bënn ceg kɑ nywɑgø yi gen. Tyëngwöödø kwøbbi dhwönhi Wë Yëso kì yij thøø ɑ́töng yi gen kidøøj ki tegi pëëth. Kɑ Jwøk gyëdhhe kønye kömi gen bënn. Bong ngɑn mɑ ɑ́di gïn jɑ̈ddii kì kelli gen, mɑ́ tyëng-ɑ́ yï gen ɑ́di pwödh kí kɑ̈llì, ɑ́bëëd gï nyi ngeew ge’ wɑ̈g, kɑ ngyënyy-ɑ ngeew gen nyi kɑ̈ɑ̈l yi gen, kɑ gï nyi cïb gen cinggi tyëngwöödø, kɑ ngyënyyɑni nyi pɑ̈ngi kì kelli teedø, e dhɑnhø mëgg-ɑ gïn-ɑ jɑ̈ddii. Gïn ni menɑni ɑ ɑ́gwøg yi Yosep, ɑ ɑ́cɑg ɑ́ Bɑrnɑbɑ̀ yi tyëngwöödø (men-ɑ wɑngi Jɑlcïïjø). Yosep bɑ Kwɑɑr Leebì kì Kobros. Yosep pwödhe ɑ́ngeewe wɑ̈g, kɑ ngyënyyi pwönhɑni kɑ̈ɑ̈le, kɑ gï cïbe cinggi tyëngwöödø. Kɑ jɑl me cwøl ɑ́ Anɑniyɑ̀ geki cyëge Sɑpïrɑ̀ pwödhi gen ngeew gen wɑ̈g. Kɑ kwï ngyënyyi pwödhø kɑn yi jɑlɑni, e ngɑ̈nyi yi cyëge, kɑ møg-ɑ ɑ́döng kɑ̈ɑ̈le, kɑ gï cïbe cinggi tyëngwöödø. Kɑ köbbi yi Pïtør kinni, “Anɑniyɑ̀, ede pyëwí ɑ wëggí kwɑnyø yi Cethɑn, o yï kømmi kwøbbi pyed ki Wëykwërø, kɑ kwï ngyënyyi pwödhø kɑɑn? Pwönhɑni bëne nuti bëëdø ɑ́ mií, o pɑ di cög ɑ́ mií ke di mïdhií? Dɑ́ kipe ngø ɑ gwøøg gïn ni men? Pɑth ki ji ɑ ɑ́köbbi yi yïn ki kwøbbi pyed, dɑ́ men-ɑ́ Jwøk kiree.” Keny-ɑ ɑ́lïngi kwøbbɑni yi Anɑniyɑ̀, ɑpɑ̈ɑ̈dhe e thøø; kɑ tyëng-ɑ ɑ́lïngi møgɑni obwøgø ki mendwøng. Adhwödh yɑɑg-ɑ wøbb, kɑ dhɑnhø kod yi gen ki ógødh, ɑkɑ̈l ge gøn, kɑ gø kony gen. Kì bɑng thøwe ki sɑɑ̀ ɑ́dɑ̈g, ɑbëën cyëge, kɑ kedh-ɑ ød, e gïn-ɑ ɑ́cwöb kwïj yi en. Kɑ pyëj yi Pïtør kinni, “Köbbí yɑn, pwödhi wun ɑ́ngew kɑ ngyënyyɑni ceth?” Kɑ oyïëyø kinni, “Gen ceth.” Kɑ köbbi yi Pïtør kinni, “Á kipe ngø ɑ rebu dhøggi wun, wu pɑ̈ny-ɑ Wëyi Wë? Yɑɑg-ɑ ɑ́kony jɑlgølí ɑ wɑ̈g ɑnɑn. Yï ceg kɑ kïdhi wɑ̈g yi gen thyew.” Apɑ̈ɑ̈dh ngɑnɑni kì bøli kenyɑni ceth, kì bøli Pïtør, kɑ othøø. Kɑ yɑɑg-ɑ wøbb kedh-ɑ ød, ɑyuud ge gøn e rum thøø, kɑ gø kïdhi gen wɑ̈g, kɑ gø koony gen buti jɑlgøle. Kɑ böögø me dwøng bï-ɑ kömi kɑnïsɑ̀ bëne, kɑ teen-ɑ ɑ́lïngi møgɑni obwøgø. Kɑ tyëngwöödø ogöögø ki ngïjjì kí gïïngɑ̈ngø mø ngenyø kì kelli teedø. Kɑ ge nyii cugø kì thɑ ɑkɑni Sølømøn. Kɑ bong-ɑ nget ɑ́kyel kì kelli ji, mɑ ɑ́cwed pyëwe kɑ kedh-ɑ be rëbø ki gen, ngö ge ɑ́bëëd ge ceg kɑ lejjø yi teedø. Kɑ kwɑnni ji-ɑ ɑ́yïëy Wë ókedhø ge óngënyø ki mendwøng, ge bɑ cwøw kí mɑ̈nn. Kɑ tyëngbuud nyi tëër yethi yëëth, kɑ ge nyi pyëël wɑ̈thi nɑngɑrebb kí pënnì; ge dwɑdd-ɑ kinni o tïbi Pïtør yøw ópɑ̈dhe kömi ngɑn buud kenyi bëëne e kɑ̈ll-ɑ yuuɑni. Kɑ ji nyi bï-ɑ Yerusɑlem ge kɑ̈ɑ̈l-ɑ yethi myërr, ge kɑ̈ll-ɑ tyëngbuud geki tyëng-ɑ ri gen di wëyrijjø, kɑ ge nyi yiel bënn. Kɑ Ókwër-ɑ Dwøng geki Jøsɑduk mɑg yi tyiel ki mendwøng. Kɑ tyëngwöödø mɑg gen, kɑ gï leeng gen ød mɑg. Kɑ dhø ød mɑg yieb yi wëywöni Wë kì wɑ̈r, kɑ tyëngwöödø kɑ̈ɑ̈le wɑ̈g, kɑ gï köbbe kinni, “Kedh wun, kɑ wu cungi wun kì Kengø, kɑ teedø lwöbbi wun ki kwøbbi bëën-ɑ nyɑ̈n.” Kɑ kwøbbi wëywödø lïngi gen, ɑmøøl gen Kengø, cɑ̈ng nuti tuulø, kɑ ge ócɑ̈gø pwönyø. Abëën Ókwër-ɑ Dwøng geki tyëng-ɑ cyɑ̈dhi ki en, kɑ ge ócugø geki jøgdøngi Isrɑil, kɑ ge öd-ɑ ød mɑg kinni kɑ̈ɑ̈l tyëngwöödø burø. Kɑ bölidhh ókedhø, ɑyuud ge gïn ge tøøk kì ød mɑg, kɑ ge døøg-ɑ burø. Akööb gen kinni, “Ød mɑg ɑ́yuud yi wøn dhøge ódijø kidøøj, o tyëng-ɑ kurø ócungø ki dhø ød kì wɑ̈g, de kɑ ɑ́yieb wøn en, bong dhɑnhø mɑ ɑ́yod yi wøn kì yije.” Keny-ɑ ɑ́lïngi møgɑni yi jɑggi ókwër geki pëjji bölidhhi Kengø, kɑ wɑ̈thi gen ceg-ɑ cung ki mendwøng, de ge pyëny-ɑ ri gen, mɑ løge ngø ɑ cwöbø kipe tyëngwöödø. Kɑ jɑl megø bï-ɑ ød, ɑköbbe gïn kinni, “Tyëng-ɑ ɑ́leengu ød mɑg, ge ócungø kì Kengø, ge pwöny-ɑ teedø!” Kɑ pënyi bölidhh kedh-ɑ Kengø geki jøge, ɑkɑ̈ɑ̈l gen tyëngwöödø mɑ̈ɑ̈dh, e bong cïr, mɑ́ ge óböggø kipe ge óbɑ̈lli yi teedø. Keny-ɑ ɑ́kɑ̈ɑ̈l ge gïn, ɑcïb gen bøli burø, kɑ ge pyëj yi Ókwër-ɑ Dwøng kinni, “Wu nuti kyëddi wøn ki mendwøng, kinni wu ko pwönyi ki nyingɑni? De wu yöd wu pɑ̈ng-ɑ Yerusɑlem ki pwönyø mi wun, wu dwɑdd-ɑ kinni, o cöngi jɑlɑni cïb wun kömi wøn!” Kɑ Pïtør geki tyëngwöödø ólöggø kinni, “Lɑ̈w kɑ̀ lïngi wøn kwøbbi Jwøk kibøli ke di lïngi wøn kwøbbi ji. Yëso, ngɑn-ɑ ɑ́nɑ̈g yi wun, e ngɑɑb wu’ ri yɑdh, ɑ́tug yi Jwøøg kweyyee. Ácïb yi Jwøk wïj kyëje, kɑ gø gwøge ɑ́ Jɑgø, kɑ løg-ɑ Yïëdi, o tyëng Isrɑil wëgge ki keny yewi gen, o orøøg gen lɑ̈ɑ̈ny. O wø bɑ cwɑ̈gg kipe møgɑni, o Wëykwërø men-ɑ ɑ́mëgge tyëng-ɑ mïdhi kwøbbe, bɑ cwɑ̈g thyew.” Keny-ɑ ɑ́lïngi møgɑni yi jɑggi burø, ɑkënyi pëthi gen ki mendwøng, ge dwɑdd-ɑ nɑ̈gi gïn. De ɑ́dɑ jɑl ɑ́kyel kì kelli gen mɑ Jɑlpɑresì, me cwøl ɑ́ Gɑmɑliel, me bɑ jɑlpwönyi Cigg me pere teeg ki mendwøng kì kelli teedø bëne. Kɑ Gɑmɑliel okööbø kinni, kɑɑl tyëngɑni ki kïdhi wɑ̈g. Aköbbe jɑggi burø kinni, “Wun ɑ tyëng Isrɑil, dwøøgu opɑ̈wi wun piny kipe gïn-ɑ dwɑddu göggi jøgɑni. Ngɑ̈nyi yi wun kinni Thyødɑs ɑ́dhwödh cøn, kɑ okööbø kinni bɑ jɑldwøng, kɑ jøg mø kwɑnni gen bɑ miy ɑ́ngwen løg-ɑ bɑnge. De ɑ́nɑ̈g kɑ tyëng-ɑ ɑ́løg bɑnge ókedhhø. Kɑ Yeudɑ̀ jɑl Gɑlelì ólunyø dhwödhø, kì yethi cyɑ̈ng-ɑ ɑ́kwɑɑn ji, kɑ ji møøgø peeje bɑnge. Kɑ nɑ̈g thyew, kɑ ji-ɑ ɑ́løg bɑnge bënn ókedhhø. De ɑnɑn yɑ köbb-ɑ wun kì ri møg kinni, dwøøg wun opɑ̈wi wun piny, kɑ jøgɑni wiy wun, mɑ́ keløg kwøbb-ɑ kømmi yi gen, wɑlɑ̀ møg-ɑ pwönyi yi gen kɑ̈ɑ̈l-ɑ yi ji, ge ólɑ̈ɑ̈ny. De keløg ge kɑ̈ɑ̈l-ɑ yï Jwøk, ge pɑ cuggi tyɑmø yi wun, mɑ́ ri wun óyod yi wun kinni, wu nyïɑ̈ggi kɑ Jwøk.” Kɑ møge yïëy yi jɑggi burø. Acwööl tyëngwöödø ød, ɑpwöd ge gïn, kɑ gï ceg gen kinni wiy gen kwøb kì ri nyingi Yëso. Kɑ ge wiy kedh gen. Kɑ tyëngwöödø kedh-ɑ wɑ̈g kì bøli burø, pëthi gen omedø, mɑ́ ge ɑ́yod yi Jwøk ge døøj ki ngïïnø ki ɑyɑ̈r, kipe nyingi Yëso. Kɑ ge nyii pwönyø kì Kengø yethi cyɑ̈ng bënn, kí cyɑ̈ɑ̈ng Sɑbɑth, kinni Yëso ɑ bɑ Mesiy. Kì yethi cyɑ̈nggɑni, tyëngbɑng Yëso ɑ́kedh kwɑnni gen óngënyø, kɑ tyëng Ibru kwɑ̈dhhi yi tyëng-ɑ nyi kööbø ki dhø Yönɑn kinni, thwömmi gen nyi wiy-ɑ wɑ̈g kenyi pɑ̈ngi jɑmmì, kì yethi cyɑ̈ng. Kɑ jøbɑng Yëso bënn, cwøl yi pyɑ̈rø wïdɑ́ryewɑni, kɑ ge okööbø kinni, “Wø pɑ wïyi ki pwönyi kwøbbi Jwøk, o wø pëggi wøn be tenyi kwøbbi gïgcɑmm. De kɑ̈bbi wun nyiimïɑ, ki jøg-ɑ cwøw ɑ́bïryew mø bëëdi gen døøj kì kelli wun, gɑ ji mø wɑ̈thi gen pel, mø pëthi gen pɑ̈ng yi Wëykwërø, o ge cïb wøn kömi gwøngɑni, o gwøøg wøn bëëde ɑ́ mɑlli Jwøk, kí pwönyi kwøbbi Jwøk.” Kɑ møg-ɑ kømmi yi tyëngwöödø yïëy yi ɑkunɑni bëne, kɑ Istïpen, ngɑn-ɑ pyëwe pɑ̈ng yi yïëyø kí Wëykwërø kwɑny, geki Pïlïp, kí Prökörɑs, kí Nikɑnør, kí Timøn, kí Pɑrmïnɑ̀, kí Nikölɑ̀ jɑl Anthɑkiyɑ̀ mɑ ree ɑ́løge Yeudì. Kɑ jøgɑni cïb gen bøli tyëngwöödø. Akwɑjji Jwøk yi tyëngwöödø, kɑ cinggi gen thɑɑny gen kömi gïn. Kɑ kwøbbi Jwøk otɑyø, kɑ kwɑnni jøbɑng Yëso óngënyø ki mendwøng kì Yerusɑlem, kɑ ji mø gïïr kì kelli ókwër oyïëyø. Kɑ Istïpen, ngɑn-ɑ pyëwe pɑ̈ng yi dhwɑ̈ng, kí tegø men-ɑ kɑ̈ɑ̈l yï Jwøk, ogöögø ki ngïjjì kí gïïngɑ̈ngø mø døngø kì kelli teedø. Kɑ kwï tyëng sinɑgøg, men-ɑ cwøl ɑ́ sinɑgøøg Jøg-ɑ Ágøny, ɑ kelli gen di tyëng-ɑ ɑ́kɑ̈ɑ̈l Serin, kí Iskɑnderiyɑ̀, kí Kilikiyɑ̀, kí Ásiyɑ̀, opëmø ki Istïpen. Adhɑɑl gen yi kwøbb-ɑ kømmi yi en, mɑ́ e ɑ́nëng-ɑ yi Wëykwërø ki peli wïj men-ɑ 'kööbe. Kɑ ge ongëwø ki ji møg köngi kinni, “Jɑlɑni ɑ́lïngi yi wøn, e okööbø ki kwøb mø rijjø kì ri Mosɑ̀ geki Jwøk!” Kɑ teedø kí jøgdøngø, kí jøpwönyi Cigg cwɑɑg mɑl yi gen, kɑ ge bï-ɑ kömi Istïpen, kɑ gø mɑg gen, kɑ gø kïdhi gen burø. Kɑ ge ókɑ̈nø ki ji møg köngi ki pyed kinni, “Jɑlɑni pɑ nyi wïyi ki kømmi kwøb mø rijjø kì ri Kengi kwër, geki Ciggi Mosɑ̀. Kɑ lïngi wøn e okööbø kinni, i Yëso jɑl Nɑdhɑreth Kengø ócøøre piny, o kwöng men-ɑ ɑ́wöni kì ri Mosɑ̀ e omïdhø yi wɑ gø wile.” Kɑ teen-ɑ burø nenn-ɑ yïe, kɑ bøle lidh gen e nɑ bøli wëywödø. Apyëjii yi Ókwër-ɑ Dwøng kinni, “Kwøbbɑni bɑ dyër?” Kɑ Istïpen ólöggø kinni, “Wun ɑ nyiimïɑ kí wëëgɑ, lïngu møgɑ! Jwøng-ɑ yïe di dhwɑ̈ng ɑ́cwöb kì bøli Abrɑhɑm kweyee, keny-ɑ ɑ́yinge Misøpøtɑmiyɑ̀, e nuti dɑ̈gi Arɑn, kɑ gø köbbe kinni, ‘Dhwöödh kì pödhi wun; kì kelli wɑddi wun, kɑ yï bïí yij pönh-ɑ ónyudhɑ yïn.’ Codhe, ɑdhwödhe kì pödhi gen, kɑ kedh-ɑ be bëëdø kì Arɑn. O kì bɑng kɑ ɑ́thøw wïyi Abrɑhɑm, ɑkɑ̈ɑ̈l Abrɑhɑm piny-ɑ yije bëëd wun èn yi Jwøk. O nuti thödhø yi Jwøk ki piny mɑ mi nyinge, wɑlɑ̀ nuti nëng en ki keny cïbe tyele, de Jwøk ɑ́köngi kinni pinyɑni óbëëd ɑ́ mee; en kí kwɑrre. Abrɑhɑm ɑ́bëëd yïe bong wɑ̈de kì bøli keny-ɑ ɑ́köbbii møgɑni yi Jwøk. Akööb Jwøk kinni, ‘Kwɑrrí óbëëdø kì pödhø me pɑth, gɑ bɑ̈ngg, o nyingi gen óguud ki runn miy ɑ́ngwen. De pönh-ɑ ógwøg gen gɑ bɑ̈ngg ócɑy yi yɑn, codhe o kwɑrrí bï gen wɑ̈g kì pönhɑni, o yɑ mɑlli yi gen kì keny.’ Kɑ kwööng ngølø mëggi Abrɑhɑm yi Jwøk, ɑ́ ngïji mi kwøbb-ɑ ɑ́nywɑg yi gen kì bøli kenyɑni. Anywøøl Isɑɑk yi Abrɑhɑm, kɑ gø ngøle kì bïdɑ̈ɑ̈g cyɑ̈ng. Kɑ Yɑgob ngøl yi Isɑɑk, kɑ Yɑgob wɑ̈dde gɑ pyɑ̈rø wïdɑ́ryew ngøle, ɑ løg kweyyi wɑ̈thi kɑ̈llee gɑ pyɑ̈rø wïdɑ́ryew. “Kɑ Yosep mod yi kweyyee, kɑ gø ngeew gen wɑ̈g, ɑkïdhii Rïp. De ɑ́køny yi Jwøk, kɑ gø yiele kì yethi rɑjj-ɑ ɑ́bï köme bënn, kɑ thödhi yi Jwøk ki medi pyëw geki peli wïj kì bøli rɑ̈ɑ̈dh Rïp, ɑrønyii yi rɑ̈dh ɑ́ jɑgø kì kömi Rïp bëne, kí kömi gøle thyew. Kɑ kɑ̈j me dwøng bï-ɑ kömi Rïp bëne geki Kɑnɑɑn, kɑ kweyyee ojɑdø ki gïncɑm. Kɑ Yɑgob olïngø kinni i dɑ byel kì Rïp, ɑöre kweyyee ki öri tyeli mɑl. Keny-ɑ ɑ́cige gïn örø, kɑ Yosep ree nyudhe nyiimen, kɑ kwøbbi gøl yɑɑ Yosep yod yi rɑ̈ɑ̈dh Rïp. Kɑ Yosep oödø, ɑcwøøle Yɑgob wïye kun-ɑ di en, geki gøle bëne, e kwɑnni gen bɑ pyɑ̈r ɑ́bïryew wïdɑ́bïj. Kɑ Yɑgob kedh-ɑ Rïp. Kɑ othøø, geki kweyyee. Kɑ cu gen tëër Cekïm, kɑ ge koony kej tyëngthøø men-ɑ ɑ́ngew yi Abrɑhɑm ki ngyëny kì yï kwɑrri Amör. “Keny-ɑ ɑ́kedh bøli kej gwøgi møg-ɑ ɑ́köngi Abrɑhɑm yi Jwøk e ócyɑ̈ngø, kedh kwɑnni ji ceg-ɑ ngënyø kì Rïp. Arøøny rɑ̈dh megø kì kömi Rïp, me kwïj Yosep. Kɑ juree wëny yi en, kɑ nyingi gïn guude, kɑ kweyyee cïrre weddi nyigi gen, kipe kinni o ge nyi thøw gen. Bøli kenyɑni ɑ ɑ́nywøøl Mosɑ̀, o ɑ́bëëd e myëër ki mendwøng. Kɑ pidh kì gøl wïye ki dwɑ̈tt ɑ́dɑ̈g. De keny-ɑ ɑ́weddii, ɑkwɑnyii yi nyɑɑr rɑ̈ɑ̈dh Rïp, ɑpidhe gøn, e nɑ wɑ̈de ceth. Kɑ Mosɑ̀ pwönyi ki peli wïj Rïp. Kɑ ogöögø ki jɑl me pere teg, me kømmi dyër, o gøgg-ɑ dyër. “Keny-ɑ ɑ́göög runne ki pyɑ̈r ɑ́ngwen, ɑkööbe ki pyëwe kinni, dwɑdd-ɑ kedhi be këëmi nyiimen, gen ɑ kwɑrri Isrɑil. Kɑ ólïdhø ki ɑ́kyel kì kelli gen, e orujø yi wɑ̈d Rïp, ɑcwɑge gøn, kɑ wɑ̈d Rïp nɑ̈ge. Kɑ Mosɑ̀ orumø kinni, di yod yi nyiimen kinni, bɑ ngɑn-ɑ ógwøg yi Jwøk ɑ́ men yiel gen, de møgɑni nuti yood gen. Dhuki ɑyuude ji møøgø kì kelli gen, ge owërø. Aköbbe gïn e lug-ɑ gen kinni, ‘Lïng wun jøg, wu bɑ nyiimëëg, wude ɑ göggu ri wun ki gïnrɑj?’ Adhurii wɑ̈ye yi jɑl-ɑ ɑ́cɑɑg wɑɑd gen piny, kɑ okööbø kinni, ‘Á men ɑ ɑ́røny yïn, yïn ɑ́ jɑgø men nenni gønyyi wøn? Yï dwɑdd-ɑ nɑ̈gi yɑn ni kɑ ɑ́nɑ̈ɑ̈g wɑ̈d Rïp ɑ́wɑ̈ɑ̈?’ Keny-ɑ ɑ́lïngi møgɑni yi Mosɑ̀, ɑpɑ̈ɑ̈re kì Rïp, kɑ kedh-ɑ be bëëdø kì Midyɑn, kɑ ónywølø ki wɑ̈dd ɑ́ryew kì kunɑni. “Kɑ ɑ́pöödh runn pyɑ̈r ɑ́ngwen, ɑcwöb wëywödø kì yij nyɑ kïrø me lyel ki mɑc, kì yij pɑ̈l kì buti Kïti Sinɑy. Keny-ɑ ɑ́lidhii yi Mosɑ̀, ɑngɑ̈nge kɑ nyeg-ɑ buti nyɑ kïrɑni, kinni o tie lïdhø. Kɑ cwɑggi Wë lïnge e okööbø kinni, ‘Yɑ bene Jwøøg kweyyi wun, Jwøøg Abrɑhɑm, kí Isɑɑk, kí Yɑgob.’ Kɑ Mosɑ̀ dële okïrrø, kɑ obwøgø ki lïïdh kenyɑni. Kɑ köbbi yi Wë kinni, ‘Kɑ̈ɑ̈l wɑrrí wɑ̈g kì tyellí, mɑ́ keny-ɑ cungi yi yïn èn bɑ kej kwër. Tung-ɑ tuug jiɑ kì Rïp ɑ́lidh yi yɑn, kɑ ywøøg gen lïngɑ, ɑbëënɑ piny be yieli gen. Bïí ɑnɑn, o yï örɑ Rïp.’ “Mosɑ̀, jɑl-ɑ ɑ́bɑny yi gen, kɑ gø köbbi gen kinni, ‘Á men ɑ ɑ́røny yïn, yïn ɑ́ jɑgø men nenni gønyyi wøn?’ Bɑ en ɑ ɑ́ör yi Jwøk ɑ jɑgø men yïëdø, e køny-ɑ yi wëywödø men-ɑ ɑ́cwöb kì bøle kì ri nyɑ kïrø. Kɑ jie peeje wɑ̈g kì Rïp, kì bɑng kɑ ɑ́gööge ki ngïjjì kí gïïngɑ̈ngø kì Rïp, kí yij Nɑɑm Omeli Kwɑrø. Kɑ gï pyejje kì yij pɑ̈l ki runn pyɑ̈r ɑ́ngwen. Bɑ Mosɑ̀ kiree ɑ ɑ́köbbi tyëng Isrɑil kinni, ‘Wu óödi yi Jwøk ki jɑltöng, ni kɑ ɑ́öre yɑn.’ Bɑ Mosɑ̀ ɑ ɑ́kɑ̈lli tyëng Isrɑil kì yij pɑ̈l, o bɑ en ɑ ɑ́reb kweyye ki wëywön-ɑ ɑ́kööb ki en kì wïj Kïti Sinɑy, e nyi kwɑny-ɑ kwøbbi nënnì kì yïe, o gï nyi lonye ki muuj wɑ. “De kwøbbi Mosɑ̀ ɑ́bɑny yi kweyyee, kɑ gø cøør gen wɑ̈ye. Aløg gen pëthi gen Rïp. Kɑ Aɑron köbbi gen kinni, ‘Cwɑ̈jjí wɑ ki jwøg men cyɑ̈dhi kì bølee, mɑ́ gïn-ɑ mɑɑg Mosɑ̀, jɑl-ɑ ɑ́pëëj wɑ wɑ̈g kì Rïp, kwïj yi wɑ.’ Kɑ ge ocwɑ̈jø ki røjø kì yethi cyɑ̈nggɑni, gøn-ɑ́ jwøøg gen, kɑ gø ngɑ̈ddi gen ki gëdhhì, kɑ pëthi gen ómïnø ki gïn-ɑ ɑ́cwɑ̈j yi gen ki cinggi gen. Kɑ Jwøk ngɑ̈je luge gïn, kɑ gï wëgge mɑlli kyelli mɑl, ni kɑ ógwedii kì yij wɑ̈nyi jøtöng kinni, ‘Yïn ɑ gøl Isrɑil, pɑth ki yɑn ɑ ɑ́ngɑ̈ddi yi wun ki gëdhhì ki runn pyɑ̈r ɑ́ngwen kì yij pɑ̈l. Wu ɑ́kɑ̈ll-ɑ kemɑ̀ mi Mölek geki ngïji Repɑn, jwøøg kyelø; bene gen ngïjj-ɑ ɑ́gwøg yi wun gɑ møg mɑlli yi wun. O wu kïdhɑ’ yïnø ngɑ̈ɑ̈j Bɑbïl, kipe kɑ ɑ́gwøg wun gïn ni menɑni.’ “Kweyyee yï gen ɑ́dɑ Kemi Jwøk mɑ ɑ́kɑ̈lli yi gen kì yij pɑ̈l; en ɑ kemɑ̀ men-ɑ ɑ́gwøg yi Mosɑ̀, ni kɑ ɑ́köbbii yi Jwøk kinni gwøge gøn e pɑ̈r ki men-ɑ ɑ́lidh yi en. Kemɑni ɑ́lɑg yi kweyyee; en ɑ ɑ́tyëddi yi gen kì mɑl keny-ɑ ɑ́mɑg gen pödhhi jurr-ɑ ɑ́cyeddi yi Jwøk kì bøli gen, ge pyejj-ɑ yi Jöcwø. Kɑ kemɑni obëëdø e nud pïd ri Rɑ̈dh Debïd. Jwøk pyëwe ɑ́bëëd e med ki Debïd. Kɑ Jwøk kwɑjji yi Debïd kinni wiy gëdde Jwøøg Yɑgob ki keny yije bëëde. De ɑ́gëdd-ɑ yi Sølømøn ki ød. “De Jwøng-ɑ Pëddi Döng, pɑ nyi bëëdø kì udd-ɑ ger yi ji ki cinggi gen, ni kɑ ɑ́kwøbii yi jɑltöng kinni, ‘Jwøng-ɑ Ácwɑ̈ɑ̈j ɑ́kööb kinni, mɑl bɑ kwømɑ, o piny bɑ thɑ̈nhi tyellɑ. Á ød me bëëdø kidï ɑ ógërru yɑn? Wɑlɑ̀ kej ywömɑ ying-ɑ keny? Pɑth ki yɑn ɑ ɑ́cwɑ̈j jɑmmɑni bënn?’ “Muddi wun teeg ki mendwøng! Pëthi wun bogïn, o yïthhi wun pɑ lïngø! Wu nudd wu opëmø ki kwøbbi Wëykwërø, ni kɑ ɑ́bëëd kweyyi wun ceth. Dɑ jɑltöng ɑ́kyel me wɑnge nuti bɑɑrø yi kweyyi wun? Tyëng-ɑ ɑ́töng kwøbbi bëëni ngɑntir nuti mɑɑg wun kɑ ge nɑ̈g yi wun? Ciggi Jwøk ɑ́kwɑny yi wun ɑ cinggi wëywödd, de ciggɑni ɑ́cög ge pɑ mïdhi yi wun.” Keny-ɑ ɑ́lïngi kwøbbi Istïpen yi jɑggi burø, kɑ ge ceg-ɑ kënyø ki mendwøng, kɑ leggi gen kɑjji gen kipe Istïpen. Kɑ Istïpen nenn-ɑ mɑl e pyëwe pɑ̈ngø yi Wëykwërø, kɑ dhwɑ̈ng Jwøk lidhe, o Yëso ócungø kì wïj kyëëj Jwøk. Akööbe kinni, “Mɑl onennø yi yɑn e bɑ ɑyieb, o Nyɑɑr Dhɑnhø ócungø kì wïj kyëëj Jwøk!” Kɑ ge óryeerø, yïthhi gen kum gen, kɑ ge pɑ̈ɑ̈r-ɑ köme. Kɑ gø kïdhi gen wɑ̈g kì kɑɑl, gø kïdhi ge’ be bɑ̈llø ki tuggi kïttì. Kɑ tyëng-ɑ bɑ̈llii ógudhi gen cïb gen bøli wøb me cwøl ɑ́ Cɑul. Kɑ Istïpen bɑ̈lli gen, e kwɑjj-ɑ Wë kinni, “Wuö Yëso, kwɑny wëyɑ.” Arume cønge piny, kɑ óryeerø kinni, “Wuö, orøg men ko cïb kömi gen.” Kɑ ɑ́rume kwøbi møgɑni, ɑthøwe. Cɑul ɑ́bëëd e yïëyø ki nɑ̈ge. Kɑ kɑnïsɑ̀ kì Yerusɑlem wɑnge cɑg ki guudø ki mendwøng kì cyɑ̈ngɑni ceth. Atɑɑy tyëngyïëyø kelli Yeudiyɑ̀ kí Sɑmɑriyɑ̀, ɑdöng tyëngwöödø keti gen. Kɑ Istïpen kony yi jøg mø wør Jwøk, kɑ gø ywøg gen ki mendwøng. De Cɑul kedh e rëny-ɑ kɑnïsɑ̀, kɑ nyi pödh-ɑ yethi ud, kɑ jøg-ɑ cwøw geki mɑ̈nn nyi ywɑ̈ɑ̈je wɑ̈g, kɑ gï nyi leenge ød mɑg. Kɑ tyëng-ɑ ɑ́tɑy ócyɑ̈dhø ge cɑngg-ɑ myërr, ge pwöny-ɑ wöndøj. Kɑ Pïlïp kedh-ɑ kɑɑl megø kì kelli kɑ̈ddi Sɑmɑriyɑ̀, kɑ ócɑ̈gø pwönyi per Mesiy kì yethi kɑ̈ddɑni. Kɑ kwøbbe yïëy yi tyëngɑni bënn kidøøj, mɑ́ ge ɑ́lïng ki kwøbbi gïïngɑ̈ngø møge, o møøgø ɑ́ceg-ɑ lïdhø. Kɑ wëyrijjø bï-ɑ wɑ̈g kì ri ji ge okïïwø ki cwɑg mø døngø. Kɑ ji mø gïïr mø dëlli gen rɑ̈mø, kí ɑdwɑnyy, kí møg-ɑ bɑ ngöll yiel. Kɑ medi pyëw me dwøng løg-ɑ me nud kì kɑɑlɑni. Jɑl me cwøl ɑ́ Sɑymøn, me bɑ ɑjwøgø ɑ́bëëd ɑ kɑɑlɑni, e kømm-ɑ ree cem ɑ́ ngɑn pere teg, kɑ tyëng Sɑmɑriyɑ̀ nyii dɑɑyø yi gwøge. Kɑ ji bënn; tyëngdøngø ki othønhø, tyer-ɑ lïngi møge, kɑ ge nyii kööbø kinni, “Jɑɑl bɑ tegi Jwøk; teng-ɑ dwøng.” Kɑ møge nyi lïngi gen kidøøj, mɑ́ ge ɑ́bëëd ge dɑɑyø ki keny me bɑ̈ɑ̈r yi thyënh-ɑ nyi thyëdh yi en. De kɑ ɑ́yïëy gen ki mø Pïlïp, kɑ ɑ́lwøbe Wöndøj men-ɑ kööbø kì ri Pödhi Jwøk geki kwøbbi Yëso Mesiy, ɑjwɑ̈ɑ̈g gen; cwøw kí mɑ̈nn. Sɑymøn kiree ɑ́yïëy, kɑ jwɑ̈ɑ̈g, kɑ dɑ̈g-ɑ be cyɑ̈dhø ki Pïlïp. Kɑ nyii ngɑ̈ngø, kenyi lïdhe ki ngïjjì geki gïgdøngø møg-ɑ nyi gwøg yi Pïlïp. Keny-ɑ ɑ́lïng tyëngwöödø møg-ɑ ying Yerusɑlem kinni, kwøbbi Jwøk ɑ́yïëy yi tyëng Sɑmɑriyɑ̀, ɑör gen Pïtør geki Jøn. Keny-ɑ ɑ́wɑ̈nhi gen Sɑmɑriyɑ̀, ɑkwɑ̈jji gen kipe kinni o tyëng Sɑmɑriyɑ̀ kömi gen bëën yi Wëykwërø. Mɑ́ Wëykwërø nuti wöl bëën kömi dhɑnhø ɑ́kyel kì kelli gen, de ge ɑ́jwɑ̈ɑ̈g kɑ nyingi Wë Yëso kete. Codhe, ɑthɑɑny gen cinggi gen kömi tyëngɑni, kɑ ge óyïddø ki Wëykwërø. Kɑ lidh yi Sɑymøn kinni, Wëykwërø ɑ́mëggi tyëng-ɑ ɑ́yïëy kɑ thɑɑnyi cinggi tyëngwöödø kömi gen. Anënge Pïtør geki Jøn ki ngyëny, kɑ gï köbbe kinni, “Nëngu yɑn ki tengɑni thyew, o ngɑn-ɑ köme nyi thɑɑnyɑ cinggɑ nyi yïdde ki Wëykwërø.” Aköbbii yi Pïtør kinni, “Yï ókedhi pödhi tyëngthøø wuki ngyënyyí, mɑ́ yï orumø kinni, gïg-ɑ nyi muuj yi Jwøk ócuggø ngewø yi yïn ki ngyëny. Nyingí bogïn kì ri gwøøg wøn, bong gïn yod yi yïn kì ree, mɑ́ møg-ɑ ying pyëwí pɑ døøj kì bøli Jwøk. Yewí ki rɑjj-ɑ ɑ́gwøg yi yïn, kɑ Wë kwɑjjí, men-ɑ ólɑ̈ɑ̈m pyëwe ki yïn ki gööj møg-ɑ ying pyëwí. Yɑ ɑ́lïdhi kinni, yï keej nɑ kenø, o yï bɑ ɑtwöj yi orøg.” Kɑ Sɑymøn ólöggø kinni, “Kwɑjju Wë kiperɑ, o bongii gïjø ɑ́kyel me bï kömɑ kì ri møg-ɑ kømmi yi wun.” Keny-ɑ ɑ́rum gen ki thyeri møg-ɑ ying pëthi gen, kí kømmi kwøbbi Wë, ɑdøøg gen Yerusɑlem, ge pwöny-ɑ wöndøj kì yethi myërri Sɑmɑriyɑ̀ mø ngenyø. Kɑ Pïlïp köbbi yi wëywöni Wë kinni, “Dhwöödh, kɑ yï kedhí kuni wɑɑng wurlwɑl, kɑ yï kɑ̈l yuu-ɑ kedh kì Yerusɑlem e kedh-ɑ Gɑdhɑ̀.” (Yuuɑni ɑ́wiy ki cɑɑdhø ɑnɑn.) Adhwödhe, kɑ ókedhø. Alïdhe ki jɑl Kuc me bɑ órøj. Bɑ jɑng-ɑ mïdhi jɑmmi gøldwøøng Kɑndɑkɑ̀ rɑ̈ɑ̈dh Kuc, rɑ̈nh-ɑ dhɑjø. Jɑlɑni bëën-ɑ Yerusɑlem be mɑlli Jwøk, de døøg-ɑ pödhi gen ki yɑ̈ye; yɑ̈y-ɑ nyi pyejji yi kyënyì, e orɑ̈ngø ki wɑ̈nyi Icɑyɑ̀ jɑltöng. Kɑ Pïlïp köbbi yi Wëykwërø kinni, “Pödhí bølí, kɑ yɑ̈y-ɑcɑ̀ pïïd, kɑ yï cyɑ̈dhí yï cyɑ̈gi ki en.” Kɑ Pïlïp jwɑn-ɑ yï yɑ̈yɑni, kɑ jɑlɑni lïnge e orɑ̈ngø kì yij wɑ̈nyi Icɑyɑ̀ jɑltöng. Apyëje jɑlɑni kinni, “Møg-ɑ rɑng yi yïn olïngø yi yïn?” Kɑ ólöggø kinni, “Ge ócuggi lïngø yi yɑn kidï, e bong ngɑn nyudhi yɑn?” Acwøle Pïlïp kinni kɑdhe yij yɑ̈y kɑ pëgge bute. Møg-ɑ ɑ́rɑng yi en kì yij wɑ̈nyi kwërø bɑ kinni, ‘Ápej e nɑ dyel men kïdhi be ngɑlø; nɑ órömø kì bøli tyëng-ɑ nyɑr yëyye; nuti wöl löggø. Ágwøg e bong pere, kɑ ruj. Bong ngɑn-ɑ ócuggi lwøbi kwɑrre, mɑ́ wëye ɑ́lɑ̈ɑ̈ny kì kömi piny.’ Kɑ mø Pïlïp løøg yi jɑlɑni kinni, “Köbbí yɑn, ɑ́ men, ɑ kømmi yi jɑltöng kinøw? Kømm-ɑ ree, wɑlɑ̀ kømm-ɑ ngɑn megø?” Codhe, kɑ Pïlïp dhøge tuge, e cɑ̈g-ɑ́ɑ̀ ri møgɑni, kɑ gø löbbe wöndøj mi Yëso. Kɑ̈ng-ɑ ɑ́cyɑ̈dhi gen kì kö yöö, ɑwɑ̈dhi gen keny me di pï. Kɑ jɑlɑni okööbø kinni, “Lidh, pï ek. Á gïn ɑ mɑ̈ɑ̈n yɑn jwɑ̈ɑ̈gø?” Kɑ Pïlïp okööbø kinni, “Keløg yï yïëyø ki pyëwí bëne, yï ócuggø jwɑ̈ɑ̈gø.” Alögge kinni, “Yɑ ɑ́yïëy kinni, Yëso Mesiy bɑ Wɑ̈d Jwøk.” Kɑ okööbø kinni cuung yɑ̈y. Akedhi Pïlïp yethi pï geki jɑlɑni, kɑ gø jwɑ̈ɑ̈ge. Keny-ɑ ɑ́bëën gen wɑ̈g kì yethi pï, ɑgwɑɑr Pïlïp yi Wëyi Wë, kɑ ocögø e pɑ lidh yi jɑlɑni këti, kɑ jɑlɑni kedh-ɑ yuue pyëwe omedø. Kɑ Pïlïp ree yode e ying-ɑ Acdöd, ɑpödhe Kɑysɑriyɑ̀ e cyɑ̈dhi e pwöny-ɑ wöndøj kì yethi myërr bënn. Cɑul nuti wïyø ki guudi nyingi tyëng-ɑ ɑ́yïëy Wë, kí nɑ̈gi gen; kɑ kedh-ɑ yï Ókwër-ɑ Dwøng, ɑcwödde ki wɑ̈j kì yïe møg mëggi jɑggi sinɑgøgg kì Dimɑceg, kipe kinni o tyëng Wë møg-ɑ óyod yi en, gɑ cwøw wɑlɑ̀ mɑ̈nn, gï kɑ̈ɑ̈le Yerusɑlem, gɑ ɑtwöj. Keny-ɑ ɑ́cyɑ̈nge ki Dimɑceg, kɑ piny ceg-ɑ ì tɑr, yi cɑr me kɑ̈ɑ̈l mɑl. Apɑ̈ɑ̈dhe, kɑ olïngø ki cwɑg mø köbbii kinni, “Cɑul, Cɑul! Yïde ɑ guud wɑngɑ?” Apëjji Cɑul kinni, “Yïn ɑ́ men, Wuö?” Kɑ cwɑggɑni okööbø kinni, “Yɑ Yëso, ngɑn-ɑ wɑngí cuulø ki en. De dhwödhí mɑl, kɑ yï kedhí kɑɑldwøng, o yï köbbi kì kenyɑni ki gïn-ɑ ógwøg yi yïn.” Kɑ jøg-ɑ ɑ́cyɑ̈dhi ki en ócungø, ge kudø, ge lïng-ɑ cwɑg, de bong dhɑnhø me nenni yi gen. Adhwödh Cɑul, kɑ pej yi jøgɑni kì cinge, kɑ gø kïdhi gen Dimɑceg. Kɑ orïïjø ki cyɑ̈ng ɑ́dɑ̈g nyinge pɑ nëënø, o pɑ cyɑ̈mø wɑlɑ̀ pɑ mɑ̈dhø ki pï. Kì yethi cyɑ̈nggɑni ɑ́dɑ jɑlbɑng Yëso kì Dimɑceg me cwøl ɑ́ Anɑniyɑ̀. Kɑ jɑlɑni cwøl yi Wë kì yethi lɑ̈g kinni, “Anɑniyɑ̀!” Kɑ oyïëyø kinni, “Yɑn èn, Wuö.” Kɑ köbbi yi Wë kinni, “Dhwöödh, kɑ yï kedhí yuu-ɑ cwøl ɑ́ Óbödh, kɑ yï pëjjí kì gøl Yeudɑ̀, yï yɑb-ɑ jɑl Tɑrsos me cwøl ɑ́ Cɑul. Jɑlɑni ókwɑ̈jjø ɑnɑn, o jɑl me cwøl ɑ́ Anɑniyɑ̀ ɑ́lidh yi en, e bï-ɑ kɑl, kɑ cingge thɑɑnye köme kipe kinni o nyinge døøg gen be nënnø.” Kɑ Anɑniyɑ̀ ólöggø kinni, “Wuö, yɑ ɑ́lïng kì yï ji mø gïïr i jɑlɑni, jií møg-ɑ Yerusɑlem ge ógöggø yi en ki gïgrijjø mø ngenyø, o ɑnɑn ɑ́bï Dimɑceg, e yïe dɑ tegø men-ɑ ɑ́mëggii yi jɑggi ókwër, kinni mɑge ji bënn møg-ɑ nyi cwöddi ki nyingí.” Kɑ köbbi yi Wë kinni, “Kedh, mɑ́ jɑlɑni ɑ́myeg yi yɑn ɑ́ jɑlwöödø men kɑ̈lli nyingɑ kì kelli jurr-ɑ kyeelø, kí rɑ̈nhì, kí kwɑrri Isrɑil. O ónyudhi yi yɑn ki orɑng-ɑ óngin yi en kipe nyingɑ.” Adhwödh Anɑniyɑ̀, kɑ pödh-ɑ gølɑni. Athɑɑnye cingge kömi Cɑul, e okööbø kinni, “Cɑul ómïɑ, Wë Yëso, ngɑn-ɑ ɑ́cwöb kì bølí kì kö yöö, bɑ en ɑ ɑ́ör yɑn yïí, kipe kinni o nyingí døøg gen be nënnø, o yï pɑ̈ɑ̈ng yi Wëykwërø.” Kì bøli kenyɑni ceth, kɑ gïg mø ni kwɑ́j ódëëmø kì nyinge, kɑ nyinge døøg-ɑ be nënnø. Adhwödhe, kɑ jwɑ̈ɑ̈g, kɑ ocyɑ̈mø, kɑ dële ódøøgø tëngø. Kɑ Cɑul obëëdø kì kelli jøbɑng Yëso møg-ɑ ying Dimɑceg ki cyɑ̈ng mø nøg. Kɑ pödh-ɑ be töngi per Yëso kì yethi sinɑgøgg kinni, “Yëso bɑ Wɑ̈d Jwøk.” Kɑ tyëng-ɑ ɑ́lïngii bënn ongɑ̈ngø, ɑkööb gen kinni, “Men pɑth ki jɑl-ɑ ɑ́nɑ̈ɑ̈g ki tyëng-ɑ nyi cwöddi ki nyingɑni kì Yerusɑlem? Ábï keny kɑ per møgɑni ceth, o tyëngɑni mɑge o gï kïdhe bøli jɑggi ókwër.” Kɑ Cɑul pyëwe ókedhø e ótëngø, kɑ dhøggi Yeud møg-ɑ bëëdø kì Dimɑceg nɑ̈ge, e nyudh-ɑ gïn kinni, Yëso ɑ bɑ Mesiy. Kì bɑng kɑ ɑ́pöödh cyɑ̈ng mø gïïr, kɑ Yeud dhøggi gen nywɑg gen kipe nɑ̈gi Cɑul, kɑ møg-ɑ ɑ́nywɑg yi gen wɑ̈dh-ɑ yïe. Kɑ ge pëgg-ɑ be kori dhøggi döri kɑɑl, kì dicɑ̈ng kí wɑ̈r ge dwɑdd-ɑ nɑ̈gii. De Cɑul ɑ́kwɑny yi tyëng-ɑ ɑ́yïëy kì wɑ̈r, kɑ gø miid gen piny kì wɑ̈g, gø kɑ̈ɑ̈l ge’ keny mɑ ɑyieb kì ri dörø kì yij dhöngø. Keny-ɑ ɑ́wɑ̈dhi Cɑul Yerusɑlem, ree ɑ́pɑ̈nye ki rëbø ki jii bɑng Yëso, de ge ɑ́bwøg yi gøn bënn, mɑ́ ge nuti yïëyø kinni, bɑ jɑlbɑng Yëso. Akɑ̈ɑ̈lii yi Bɑrnɑbɑ̀, kɑ gø muuje tyëngwöödø. Alwöbbe gïn kër-ɑ ɑ́lidhe Wë kɑ okööbø ki en kì kö yöö; kí kër-ɑ ɑ́kööbe ki tegi pyëwe kì ri nyingi Yëso kì Dimɑceg. Kɑ Cɑul obëëdø kì kelli tyëngyïëyø kì Yerusɑlem, e ópwönyø ki nyingi Wë e pɑ böggi. Kɑ nyii kööbø ki Yeud møg-ɑ 'kööb dhø Yönɑn, e opëmø ki gïn, kɑ ge oyɑ̈bø ki keny nɑ̈g ge gøn. Keny-ɑ ɑ́yood møgɑni yi nyiimïee, ɑlwøøg ge gøn Kɑysɑriyɑ̀, kɑ gø ör gen Tɑrsos. Kɑ kɑnïsɑ̀ kì Yeudiyɑ̀ bëne, kí Gɑlelì, kí Sɑmɑriyɑ̀ óyïddø ki mër, kɑ ótëngø. Kɑ tyëng kwøbbi Jwøk kedh ge óngënyø, kɑ ge obëëdø ge wør-ɑ Wë, kɑ ge nyi cïj yi Wëykwërø. Keny-ɑ ɑ́cyɑ̈dhi Pïtør kì kelli gen bënn, ɑwɑ̈nhe kun-ɑ di jii Jwøk møg-ɑ bëëdø kì Ludɑ̀ thyew. Kɑ óyïddø ki jɑl me cwøl ɑ́ Ainiyɑs, me tyëëg runn ɑ́bïdɑ̈g e dële dwɑnyø, pɑ nyi dhwödh kì yij pyën. Kɑ köbbi yi Pïtør kinni, “Ainiyɑs, yï ɑ́yiel yi Yëso Mesiy, dhwödhí mɑl, kɑ pyëní pyëël.” Kɑ odhwödhø kì bøli kenyɑni ceth. Kɑ tyëng Ludɑ̀ kí tyëng Cɑrön bënn Wë yïëy yi gen, kɑ ɑ́lidh gen jɑlɑni. Ádɑ ngetibɑng Yëso megø kì Yɑpɑ̀ me cwøl ɑ́ Tɑbïthɑ̀, (nyinge ki dhø Yönɑn bɑ Dørkɑs, o wɑng-ɑ ɑ́køny). Ngɑnɑni nyi rïïjø e køny-ɑ tyëng-ɑ jɑdø, e ogöögø ki gïgdøj. Kɑ dële ócɑ̈gø ki rɑ̈m kì yethi cyɑ̈nggɑni, kɑ othøø; de kɑ ɑ́rume lwøgø yi tyëng-ɑ ɑ́ying köme, ɑpyëël ge gøn ød mɑl. O Ludɑ̀ kelli gen cyɑ̈gi ki Yɑpɑ̀. Keny-ɑ ɑ́lïng tyëng-ɑ ɑ́yïëy kinni, Pïtør nud kì Yɑpɑ̀, ɑöd gen ki jøg ɑ́ryew møg kedhi be kwɑjji Pïtør kinni, “Jwɑn bëën yï wøn, yï ko cwööng.” Codhe, ɑdhwödh Pïtør, kɑ ókedhø ki gïn. Keny-ɑ ɑ́wɑ̈nhe, ɑkïdhi ge gøn ød mɑl. Kɑ thwömm bënn ócugø kì bute, ge óywöngø, ge nyødh-ɑ ógudh-ɑ ókwenø, kí ɑ́ywödhh-ɑ ócwɑ̈jø yi Dørkɑs, keny-ɑ ɑ́bëëde e onëënø. Kɑ tyëngɑni bënn ör wɑ̈g yi Pïtør, kɑ pëgg-ɑ wɑ̈thi cønge, kɑ ókwɑ̈jjø. Codhe, ɑløge ree yï ngɑn-ɑ ɑ́thøw, kɑ gø köbbe kinni, “Tɑbïthɑ̀, dhwödhí mɑl.” Kɑ nyinge yiebe, ɑlidhe Pïtør, kɑ dhwödh-ɑ mɑl. Kɑ Pïtør cinge mëgge gøn, kɑ gø tïnge mɑl. Codhe, ɑcwøle nyiimëëg geki thwömm, ɑmëgge gø gïn e onëënø. Kɑ møgɑni wɑ̈dh-ɑ kelli teedø bëne kì Yɑpɑ̀, kɑ Wë yïëy yi ji mø ngenyø. Kɑ Pïtør obëëdø kì Yɑpɑ̀ ki cyɑ̈ng mø ngenyø, kì buti Sɑymøn bødhi nginy ki pënnì. Ádɑ jɑl megø kì Kɑysɑriyɑ̀ me cwøl ɑ́ Kornelyøs. Jɑlɑni ɑ́bëëd ɑ́ dhɑbïdh kì yij kɑtïm-ɑ nyi cwøl ɑ́ kɑtïbi Itɑliyɑ̀. Bɑ ngɑntir, me böggi Jwøk geki gøle bëne. Nyii muujø kì ri jɑmme, kɑ Jwøk nyi kwɑjji yi en kì yethi cyɑ̈ng bënn. Cyɑ̈ng ɑ́kyel kì sɑɑ̀ ɑ́dɑ̈g kì böörø, kɑ wëywöni Jwøk lidh yi en kidøøj kì yethi lɑ̈g, e bï-ɑ yïe, kɑ gø cwøle kinni, “Kornelyøs!” Kɑ nenn-ɑ yï wëywönɑni, e óböggø, ɑkööbe kinni, “Á ngø, Wuö?” Kɑ köbbi yi wëywönɑni kinni, “Kwɑ̈jjí geki muunyí ɑ́wɑ̈dhi mɑl gɑ møg pɑɑr yïn kì bøli Jwøk. De ɑnɑn, ödí Yɑpɑ̀ ki ji møg dwɑɑy Sɑymøn, ɑ cwøl ɑ́ Pïtør. Jɑlɑni bëëd ɑ gøl Sɑymøn bødhi nginy ki pënnì, ɑ gøle ying-ɑ tøg nɑɑm omelø.” Keny-ɑ ɑ́kedh wëywödø men-ɑ ɑ́kööb ki en, ɑcwödde ki ji ɑ́ryew kì kelli tyëng-ɑ nyi göggii, kí ɑlɑthker ɑ́kyel me gɑ̈nni Jwøk kì kelli jøg-ɑ nyi korii. Keny-ɑ ɑ́rume lwöbi gïn møgɑni bënn, ɑöre gïn Yɑpɑ̀. Dhuki ge ócyɑ̈ngø ki Yɑpɑ̀, ɑyedhi Pïtør mɑl wïj óthɑɑng ød, kì dicɑ̈ng, be kwɑjji Jwøk. Amɑgii yi kɑ̈j, kɑ pyëwe dwɑdd-ɑ cɑm. De kɑ̈ng-ɑ́ nudd gïncɑm ogwøgø, ɑbëëde e dhɑ̈y ce ceg-ɑ nwɑyyø. Alidhe mɑl ree yieeb en, o gïjø me ni mɑlɑyɑ̀ me dwøng kɑ̈ɑ̈l-ɑ mɑl, e kɑ̈ɑ̈r-ɑ piny kì wɑ̈thi tùnge gɑ ɑ́ngwen. Mɑlɑyɑni yije dɑ wɑ̈thi lɑ̈yy bënn, kí gïg-ɑ nyi mulli kì piny, kí winy. Kɑ cwɑg bï-ɑ yïe kinni, “Pïtør, dhwödhí mɑl. Ngɑ̈ɑ̈d, kɑ yï cyɑ̈ɑ̈m.” Kɑ Pïtør ólöggø kinni, “Pɑ cuggi Wuö! Yɑ nuti wöl cɑm ki gïn ywëdhø wɑlɑ̀ gïn-ɑ bɑ ɑbwöl!” Kɑ cwɑggɑni cig-ɑ kwøb kinni, “Gïn-ɑ ɑ́gwøg e dhïw yi Jwøk, ko cwøllí ɑ́ gïn ywëdhø!” Møgɑni ɑ́cwöb tyel ɑ́dɑ̈g, kɑ gïnɑni døøg-ɑ mɑl kì bøli kenyɑni ceth. Kɑ̈ng-ɑ́ nudd Pïtør wïje cungø yi gïn-ɑ wɑngi yi møg-ɑ ɑ́cɑ̈rrii, kedh gøl Sɑymøn oyodø yi jøg-ɑ ɑ́ör yi Kornelyøs, kɑ ge ócungø kì dhø kɑl. Kɑ ge ócwöddø, ɑpëjji gen mɑ ying Sɑymøn, ɑ cwøl ɑ́ Pïtør gølɑni. Kɑ̈ng-ɑ́ nudd Pïtør, e orumø kì ri møg-ɑ ɑ́cɑ̈rrii, ɑköbbii yi Wëy kinni, “Dɑ jøg ɑ́dɑ̈g kì keny møg yɑb yïn. Dhwöödh, kɑ yï kedhí piny yï gen. Kɑ wu kedh wun ki gen, yï ko lyebbi, mɑ́ yɑn ɑ ɑ́ör gen.” Kɑ Pïtør kedh-ɑ piny yï jøgɑni, kɑ okööbø kinni, “Yɑ bene ngɑn-ɑ yɑb yi wun. Wu ɑ́bï kɑ per ngø?” Alöggi gen kinni, “Wø ɑ́ör-ɑ yi Kornelyøs. Jɑlɑni bɑ dhɑbïdh me tir, me böggi Jwøk; o per døøje nyii kømmø kì kelli Yeud bënn. Áceg kɑ köbbø yi wëywöni Jwøk, i dwɑ̈ɑ̈ye yïn, o yï kedhí gøle, o møg-ɑ ókømmi yi yïn lïngi yi en.” Kɑ jøgɑni cwööl kɑl yi Pïtør, kɑ gï köbbe kinni nin gen kì gølɑni. Dhuki ɑdhwödhe, kɑ ókedhø ki gïn, kɑ lwøøg yi kwï nyiimëëg kì Yɑpɑ̀, Kɑ ge wɑ̈dh-ɑ Kɑysɑriyɑ̀ dhuki. Kornelyøs tyëng-ɑ bɑ wɑdde bënn kí mɑ̈dhhe rumø cwöölø yi en, mɑ́ e yïd-ɑ gïn. Keny-ɑ ɑ́wɑ̈nhi Pïtør, ɑpɑɑrii yi Kornelyøs, kɑ ree bøødhe piny kì bøle, kɑ gø mɑle. Kɑ tïng mɑl yi Pïtør, ɑköbbe gøn kinni, “Dhwödhí mɑl, yɑ bɑ dhɑnhø ni yïn.” Apödhe ød, e okööbø ki gøn. Ayuude ji mø gïïr ri gen cøng gen. Aköbbe gïn kinni, “Ngɑ̈nyi yi wun kinni, Yeudì bɑ ɑkerø ki rëbø ki wɑ̈d jur megø, wɑlɑ̀ pɑ lwöbø ki gøn. De yɑ ɑ́nyudhi yi Jwøk kinni, bong dhɑnhø me ywëdhø, wɑlɑ̀ me bɑ ɑbwöl. O keny-ɑ ɑ́cwølu yɑn, ɑbëënɑ e bong gïn jog yɑn. De yɑ ceg-ɑ wun ki pyëjø; yɑ ɑ́cwøl yi wun kɑ per ngø?” Kɑ Kornelyøs okööbø kinni, “Ágöög ki cyɑ̈ng ɑ́ngwen ɑnɑn, keny-ɑ ɑ́bëëdɑ yɑ ókwɑ̈jjø kì gølɑ, kì sɑɑ̀ ɑ́dɑ̈g kì böörø; piny nɑ men, ɑlidhɑ jɑl megø e ócungø kì bølɑ, e órugø ki ógødh me mënyø, kɑ okööbø kinni, ‘Kornelyøs, kwɑ̈jjí ɑ́lïngi, o gïg-ɑ nyi muuj yi yïn, ge opɑrrø kì bøli Jwøk. Anɑn ödí Yɑpɑ̀, kɑ Sɑymøn, ɑ cwøl ɑ́ Pïtør cwööl. Jɑlɑni bëëd ɑ gøl Sɑymøn bødhi nginy ki pënnì; gøle ying-ɑ thɑ̈ngi nɑɑm omelø. Codhe, ɑödɑ yïí kì bøli kenyɑni ceth; døøj kɑ ɑ́bëën. Wø ying-ɑ bøli Jwøk ɑnɑn, o møg-ɑ ɑ́köbbi yïn yi Wë lïngi yi wøn.” Atug Pïtør dhøge, kɑ okööbø kinni, “Áyod yi yɑn kidyër kinni, bong ngɑn mɑ ɑyieny yi Jwøk kì wɑ̈ye. De kì kelli jurrì bënn ngɑn-ɑ wørii, kɑ nyii göögø ki gwøngtir, bene en ɑ nyi yïëy yi Jwøk. Kwøbbe ɑ́öre kwɑrri Isrɑil, kɑ wöndøj mi mër töng yi en kì ri Yëso Mesiy, ngɑn-ɑ bɑ Wïi piny bëne. Ngɑ̈nyi yi wun, eni møg-ɑ ɑ́cwöb kì Yeudiyɑ̀ bëne, cɑg kì Gɑlelì kì bɑng kɑ ɑ́cwøøl ji be jwɑ̈ɑ̈gø yi Jøn. O ngɑ̈nyi yi wun thyew kinni, Yëso jɑl Nɑdhɑreth ɑ́røny yi Jwøk, kɑ gø thödhe ki Wëykwërø kí tegø, kɑ ócyɑ̈dhø, e ogöögø ki gïgdøj, kɑ tyëng-ɑ rɑngø yi wëyrijjø yiel yi en, mɑ́ Jwøk ɑ́cyɑ̈dhi kɑ en. O wø bɑ cwɑ̈gg kipe møg-ɑ ɑ́gwøg yi en bënn kì pödhi Yeud geki Yerusɑlem. Gø ɑ́nɑ̈g gen; gø gur ge’ wïj yɑdh. Kɑ tug mɑl yi Jwøk kì dɑ̈ɑ̈g cyɑ̈ng, kɑ gø wëgge cwöbø, de pɑth ki bøli teedø bëne, dɑ́ kì bøli wøn, wø tyëng-ɑ yieny yi Jwøk cøn; wø tyëng-ɑ ɑ́cyɑ̈ɑ̈m kɑ wø omɑ̈dhø ki en kì bɑng kɑ ɑ́dhwödhe kì yij thøø. Kɑ wø cege kinni pwönyi wøn teedø kɑ kwøbbe thyer wøn kinni, bɑ en ɑ ɑ́røny yi Jwøk, ɑ́ jɑng-ɑ óløøg kwøbbi tyëngnëënø kí tyëngthøø. O jøtöng bënn bɑ cwɑ̈gge; ge ɑ́kööb kinni ngɑn-ɑ óyïëyii, Jwøk lɑɑwe ódwööge piny kipe orøge.” Kɑ̈ng-ɑ́ nudd Pïtør kømm-ɑ møgɑni, ɑbëën Wëykwërø piny kömi ji-ɑ ɑ́bëëd ge lïng-ɑ kwøbbe bënn. Kɑ ji-ɑ bɑ ɑngøl møg-ɑ ɑ́cyɑ̈dhi ki Pïtør ongɑ̈ngø keny-ɑ ɑ́lïdhi gen kinni ji mø pɑth ki Yeud, ɑ́mëggi Wëykwërø yi Jwøk. Mɑ́ gï ɑ́lïngi gen ge okööbø ki dhøg mø pɑth ki dhøggi gen, ge lejj-ɑ Jwøk. Kɑ Pïtør okööbø kinni, “Ji møg ɑ́yïddi ki Wëykwërø ni wɑ, dɑ́ men ɑ cuggi mɑ̈ɑ̈ni gen jwɑ̈ɑ̈gø ki pï?” Akööbe kinni jwɑ̈ɑ̈g gen ki nyingi Yëso Mesiy. Kɑ Pïtør kwɑjji gen kinni bëëde kì buti gen, ki cyɑ̈ng mø nøg. Kɑ tyëngwöödø geki nyiimëëg møg-ɑ Yeudiyɑ̀ olïngø kinni i ji mø pɑth ki Yeud kwøbbi Jwøk yïëëy gen thyew. Kɑ tyëng-ɑ bɑ ɑngøl owërø ki Pïtør, keny-ɑ ɑ́kedhe Yerusɑlem, kɑ ge okööbø kinni, “Yï ɑ́kedhi yï ji mø nuti ngølø, kɑ yï ocyɑ̈mø wuki gen!” Acɑ̈gi Pïtør ki löbbi gïn ki tyelli kwøbbɑni, e pyël-ɑ gïn kinni, “Yɑ ɑ́bëëd yɑ kwɑjj-ɑ Jwøk kì Yɑpɑ̀, kɑ yɑ ogöögø yɑ ce ceg-ɑ nwɑyyø, ɑlïdhɑ ki gïjø me ni mɑlɑyɑ̀ me dwøng e kɑ̈ɑ̈l-ɑ mɑl, e kɑ̈ɑ̈r-ɑ piny kì wɑ̈thi tùnge gɑ ɑ́ngwen, kɑ wɑ̈nh-ɑ yïɑ. Keny-ɑ ɑ́nennɑ ree kidøøj, ɑlidhɑ wɑ̈thi lɑ̈yyi kömi piny; lɑ̈yy-ɑ døngø, kí møg-ɑ mulli, kí winyyi mɑl. Kɑ yɑ olïngø ki cwɑg mø köbbi yɑn kinni, ‘Dhwödhí mɑl Pïtør, ngɑ̈ɑ̈d, kɑ yï cyɑ̈ɑ̈m.’ Kɑ yɑ okyëdø kinni, ‘Pɑ cuggi Wuö, mɑ́ gïn ywëdhø wɑlɑ̀ gïn bɑ ɑbwöl nuti wöl kedhi dhøgɑ.’ Kɑ cwɑggɑni cig-ɑ kwøb kinni, ‘Gïn-ɑ ɑ́gwøg yi Jwøk e dhïw, ko cwøllí ɑ́ gïn ywëdhø.’ Kɑ møgɑni jøli tyel ɑ́dɑ̈g, kɑ gïnɑni bëne døøg-ɑ mɑl. Bøli kenyɑni ceth, ɑ ɑ́cungi jøg ɑ́dɑ̈g kì dhø gøl-ɑ bëëdɑ, ge ör-ɑ yïɑ, ge kɑ̈ɑ̈l-ɑ Kɑysɑriyɑ̀. Kɑ yɑ köbbi yi Wëy kinni kedhɑ ki gen, yɑ pɑ lyebbi. Kɑ yɑ lwøøg yi nyiimëëg ɑ́bïkyel, kɑ wø wɑ̈dh-ɑ gøl jɑlɑni. Kɑ wø köbbe ki kër-ɑ liidh en wëywödø me cungø kì bøle, kɑ gø köbbe kinni, ‘Ödí Yɑpɑ̀, kɑ Sɑymøn, ɑ cwøl ɑ́ Pïtør cwööl. Yï óköbbe ki wöödø men-ɑ ree óyieel yïn, wuki gølí bëne.’ Keny-ɑ ɑ́cɑ̈gɑ ki kwøb, ɑbëën Wëykwërø kömi gen, ni kɑ ɑ́bëëne kömee kì tyeli mɑl. Kɑ kwøbbi Wë pɑr yi yɑn, kɑ ɑ́kööbe kinni, ‘Ji ɑ́jwɑ̈ɑ̈g yi Jøn kɑ pï, de ji ójwɑ̈ɑ̈g yi wun kɑ Wëykwërø.’ Keløg gïn-ɑ ɑ́mëggi gen yi Jwøk, pɑ̈r ki gïn-ɑ ɑ́mëgge wɑ kì bøli keny-ɑ ɑ́yïëy wɑ Wë Yëso Mesiy, yɑ bɑ men, ɑ pyemɑ dhø Jwøk?” Keny-ɑ ɑ́lïngi møgɑni yi teen-ɑ ɑ́ying kenyɑni, ɑkud gen, kɑ Jwøk lejji yi gen. Akööb gen kinni, “Ji-ɑ pɑth ki Yeud ɑ́thödhi yi Jwøk ki yöö men yewi gen, o ge yïddi gen ki nënnì.” Tyëng-ɑ ɑ́yïëy møg-ɑ ɑ́tɑy kɑ ɑ́guud nyingi ji, kì bɑng nɑ̈gi Istïpen, ge ɑ́dɑ̈ggi Pinikiyɑ̀, kí Kobros kí Anthɑkiyɑ̀. Kɑ kwøbbi Jwøk pwönyi yi gen kì kelli Yeud keti gen, e bong ji møøgø mø köbbi yi gen. De dɑ kwï ji møøgø kì kelli gen mɑ jø Kobros, kí jø Serin, mɑ ɑ́kedhi Anthɑkiyɑ̀, ɑpwönyi gen tyëng-ɑ 'kööb dhø Yönɑn thyew, ki wöndøj mi Wë Yëso. Kɑ ge køny yi Wë, kɑ ji mø ngenyø møg-ɑ ɑ́yïëy dwöögɑ kö Wë. Keny-ɑ ɑ́lïngi møgɑni yi kɑnïsɑ̀ kì Yerusɑlem, ɑör gen Bɑrnɑbɑ̀ Anthɑkiyɑ̀. Keny-ɑ ɑ́wɑ̈dhe, kɑ dhwɑ̈ɑ̈ng Jwøk lidhe, ɑmïni pyëwe kɑ gï cïje, kinni mɑ̈gi gen ki ri Wë ki pëthi gen bënn. Bɑrnɑbɑ̀ ɑ́bëëd ɑ́ jɑl me tir, me pɑ̈ɑ̈ngø yi Wëykwërø kí yïëyø, kɑ ji mø gïïr dwöög-ɑ tuung Wë. Kɑ Bɑrnɑbɑ̀ kedh-ɑ Tɑrsos be yɑbi Cɑul, keny-ɑ ɑ́yode gøn, ɑkɑ̈ɑ̈le gøn Anthɑkiyɑ̀. Kɑ run ɑ́kyel tyëg gen, ge obëëdø ki kɑnïsɑ̀, kɑ ji mø gïïr pwönyi yi gen. O bɑ kì Anthɑkiyɑ̀, ɑ ɑ́kwøøng jii bɑng Yëso ki cwøllø gɑ Jii Mesiy (Krïstyɑnn). Kɑ kwï jøtöng bï-ɑ Anthɑkiyɑ̀, ge kɑ̈ɑ̈l-ɑ Yerusɑlem, kì yethi cyɑ̈nggɑni. Kɑ ɑ́kyel kì kelli gen me cwøl ɑ́ Agɑbøs dhwödh-ɑ mɑl. Amɑ̈ɑ̈ge ki kwøb kì ri tegi Wëy kinni, “Kɑ̈j me dwøng óbï kömi piny bëne.” Kɑ møgɑni pɑ̈dh-ɑ kɑ̈jji gen kì ri Kelɑwdiyøs Kɑysɑr. Kɑ jøbɑng Yëso oyïëyø ki gwɑ̈j ki jɑmmì, ngɑn muuj-ɑ møg-ɑ cuggi yodø yi en, gɑ møg køny gen nyiimëëg møg-ɑ bëëdø kì Yeudiyɑ̀. Kɑ møgɑni gwøg yi gen ceth, kɑ jɑmmɑni öri jøgdøngi kɑnïsɑ̀; ge ɑ́kɑ̈l-ɑ yi Bɑrnɑbɑ̀ geki Cɑul. Bɑ yethi cyɑ̈nggɑni ɑ ɑ́mɑɑg kwï tyëng kɑnïsɑ̀ yi Rɑ̈dh Ërödøs, kɑ gï gögge ki gïnrɑj. Kɑ Yɑgob ómï Jøn nɑ̈g yi en ki pilø. Keny-ɑ ɑ́lïdhe kinni, pëthi Yeud ɑ́mïni yi møgɑni, ɑmɑge Pïtør thyew. Cyɑ̈nggɑni ɑ́bëëd gɑ cyɑ̈nggi Kwëër Olwëny. Keny-ɑ ɑ́rume mɑgø ɑkïdhe gøn ød mɑg, kun korii yi ɑlɑthker gɑ ɑkudd ɑ́ngwen; ɑkud ɑ́kyel yije dɑ ɑlɑthkerr ɑ́ngwen. O ɑ́dwɑdd-ɑ kïdhii bøli teedø keny-ɑ óthumi cyɑ̈nggi Kwëër Ákɑɑdh. Kɑ Pïtør mïdhe kì ød mɑg. Kɑnïsɑ̀ bëne ɑ́bëëd e ókwɑ̈jjø ki mendwøng kipere. Kì yij wɑ̈r-ɑ bɑnge di kɑ̈ɑ̈l Pïtør bøli teedø yi Ërödøs, Pïtør ɑ́bëëd e onenø kì kɑɑm ɑlɑthker ɑ́ryew, e ómɑgø ki ɑ́cwecwel ɑ́ryew, o tyëng-ɑ kurø ócungø kì dhø ød mɑg, ge kor-ɑ gøn. Acwöb wëywöni Wë, kɑ cɑr omënyø kì yij ønɑni. Kɑ Pïtør gøj yi wëywönɑni kì wɑɑng ngëde, kɑ gø tuge kinni, “Jwɑn dhwödhi mɑl.” Kɑ ɑ́cwecwel dëëm-ɑ piny kì cingge. Kɑ köbbi yi wëywönɑni kinni, “Løny ógødhí rií, kɑ wɑrrí gøød tyellí.” Kɑ møgɑni gwøg yi en. Aköbbe gøn kinni, “Leeng ógønhdwøng kömí, kɑ yï lug bɑngɑ.” Akedhe wɑ̈g, kɑ løg-ɑ bɑnge. De kwïj yi en kinni, gïn-ɑ gwøg yi wëywönɑni bɑ dyër, de gø ɑ́cwølli yi en, e nenn-ɑ gïjø megø kì yethi lɑ̈g. De kɑ ɑ́rum kej kor men-ɑ mɑl ki pöödhø yi gen geki men-ɑ bɑnge, ɑwɑ̈nhi gen dhø dörø men-ɑ yïëbbi kɑɑldwøng; o dhø dörɑni bɑ ngyënyø, kɑ dhø dörɑni ree yïëbbe gen, kɑ ge kedh-ɑ wɑ̈g, kɑ ge bødh-ɑ yij yöö ɑ́kyel, ɑwiyii yi wëywönɑni. Kɑ Pïtør wïje ódwöögø, ɑkööbe kinni, “Áyod yi yɑn ɑnɑn kidyër kinni; Wë, wëywöne ɑ́öre be yieli yɑn kì cingi Ërödøs geki møg-ɑ ɑ́dwɑddi gwøgø yi Yeud.” Keny-ɑ ɑ́ngije møgɑni, ɑbëëne gøl Meerì meyi Jøn, ɑ nyi cwøl ɑ́ Mɑrk, o ji mø gïïr cugø kì kenyɑni, ge ókwɑ̈jjø. Keny-ɑ ɑ́cwödde kì dhø kɑl, ɑbëën bɑ̈ng-ɑ dhɑjø me cwøl ɑ́ Rödɑ̀ be lïdhø. Kɑ cwɑggi Pïtør ngije, ɑcög dhø kɑl pɑ yieb yi en yi medi pyëw, kɑ reng-ɑ ød, kɑ teedø köbbe kinni, “Pïtør ócungø kì dhø kɑl.” Kɑ köbbi yi gen kinni, “Yï ceg-ɑ myëlø,” de nudd e otyëëdø kinni, kømm-ɑ dyër ceth. Akööb gen kinni, “Bɑ wëywöne.” Kedh dhø kɑl ti kɑ pwödø yi Pïtør, codhe ɑyieb gen kɑl, kɑ ge ongɑ̈ngø keny-ɑ ɑ́lidh ge gøn. Kɑ gï kyëdde ki cinge kinni, kud gen. Kɑ kwøbbi kɑ ɑ́kɑ̈ɑ̈lii wɑ̈g yi Wë kì ød mɑg lwøbe. Kɑ okööbø kinni, “Dwöggu møgɑni Yɑgob geki tyëng yïëyø.” Codhe ɑdhwödhe, kɑ kedh-ɑ keny megø. Keny-ɑ ɑ́ru wøw, ɑyölli ɑlɑthkerr ki mendwøng, ki mɑ göög Pïtør kidï. Kɑ Ërödøs omuujø ki cigg kinni yɑɑb Pïtør. Kɑ ocögø e pɑ yod yi en, Atie jøg-ɑ ɑ́kur ki pyënyø, kɑ omuujø ki cigg kinni, nɑ̈ɑ̈g gen. Adhwödh Ërödøs kì Yeudiyɑ̀, kɑ kedh-ɑ Kɑysɑriyɑ̀, kɑ obëëdø kì kunɑni. Kì yethi cyɑ̈nggɑni, Ërödøs ɑ́bëëd pyëwe dɑ liny ki tyëng Suur geki tyëng Sïdön. Kɑ ge onywɑ̈gø ki kwøb, ɑkedhi gen yïe gɑ yɑy, kì bɑng kɑ ɑ́rum Belɑstøs, jɑngi gøldwøng ki pɑngø yi gen. Akedhi gen yï Ërödøs, kɑ gø kwɑjji gen kipe mër, mɑ́ gïgcɑmmi pödhi gen nyi kɑ̈ɑ̈l ɑ pödhi rɑ̈nhɑni. Kɑ ge obëënø kì cyɑ̈ng-ɑ ɑ́kwøb yi Ërödøs. Kɑ Ërödøs lɑ̈ni rɑ̈ɑ̈dhø lønye ree, kɑ pëgg-ɑ wïj kwøm, kɑ oköörø kì bøli gïn. Kɑ tyëngɑni óryeerø kinni, “Bɑ cwɑggi jwøg. Pɑth ki cwɑggi dhɑnhø, ɑ kööbø.” Kɑ gøj yi wëywöni Wë, kì bøli kenyɑni ceth, mɑ́ Jwøk nuti lenhø yi en. Kɑ cɑm yi kunnì, kɑ othøø. Kɑ kwøbbi Jwøk otɑyø, kɑ tyëng-ɑ ɑ́yïëy óngënyø. Bɑrnɑbɑ̀ kí Cɑul, kɑ ɑ́tyëg gen gwøng-ɑ́ pere ɑ́öri gen, ɑdwöög gen kì Yerusɑlem. Kɑ Jøn, ɑ nyi cwøl ɑ́ Mɑrk, kɑ̈ɑ̈l yi gen. Ádɑ jøtöng geki jøpwönyø kì yij kɑnïsɑ̀ ki Anthɑkiyɑ̀, gen ɑ Bɑrnɑbɑ̀, kí Simeon (ɑ nyi cwøl ɑ́ Ditɑ̈ng), kí Luciyøs (jɑl Serin), kí Menɑin ɑ ɑ́bëëd ɑ́ mɑ̈ɑ̈dh modïr Ërödøs ki këër thïnh, kí Cɑul. Kɑ kɑ̈ng-ɑ ɑ́mɑlli gen Wë, ge othuumø, ɑköbbi gen yi Wëykwërø kinni, “Cïb wun Bɑrnɑbɑ̀ geki Cɑul wɑ̈yi gen kiperɑ, o ge gwøg gen gwøng-ɑ́ pere ɑ́cöllɑ gen.” Athuum gen ge ókwɑ̈jjø, ɑthɑɑny gen cinggi gen kömi gïn, kɑ gï ör gen. Kɑ ge ör yi Wëykwërø, ɑkedhi gen Seleukiyɑ̀, kɑ ge kɑdh-ɑ yij sɑpïnɑ̀ kì kenyɑni ge kedh-ɑ Kobros. Keny-ɑ ɑ́wɑ̈dhi gen Sɑlɑmis, ɑpwönyi kwøbbi Jwøk yi gen kì yethi sinɑgøgg. Jøn ɑ́cyɑ̈dhi kɑ gen, e gögg-ɑ gen. Kɑ ge cør-ɑ yij munyɑni bëne gïti kɑ ɑ́wɑ̈dhi gen Pɑpøs, ɑcwɑ̈nyi gen ki ɑjwøgø megø kì kenyɑni me bɑ Yeudì, me cwøl ɑ́ Bɑryësos, o ree cwølle cem ɑ́ jɑltöng. Jɑlɑni ɑ́bëëd ɑ buti modïr, Serjiøs Pøøl, jɑl-ɑ rumme nud. Kɑ Bɑrnɑbɑ̀ cwøl geki Cɑul yi modïrɑni, kɑ gï kwɑjje kinni dwɑdd-ɑ lïngi kwøbbi Jwøk. Kɑ ge dyël yi Elimɑis, eni ɑjwøgø, (kipe menɑni bene gïn-ɑ wɑngi yi nyinge) kɑ wïj modïr bɑ̈nne, o cöge e pɑ yïëy. Kɑ Cɑul, ɑ cwøl ɑ́ Pøøl thyew, opɑ̈ngø yi Wëykwërø, ɑnenne yï ɑjwøngɑni. Kɑ gø köbbe kinni, “Yïn, wɑ̈d Ngɑnrɑj, yï mɑɑn-ɑ gïndøj, o yijí pɑ̈ng yi wëënyø! Yïde ɑ pɑ wïyí ki döddi yëthi Wë, yëth-ɑ bɑ óbödhh? Cingi Wë ópɑ̈dhi rií ɑnɑn; yï ceg-ɑ cørø, o cɑɑr cɑ̈ng koo lidh yi yïn ki kɑɑm megø.” Kɑ nyinge rïm yi ólɑbø me looj, ɑcɑ̈ge ki werri ree e oyɑ̈bø ki ngɑn pyejjii kì cinge. Kɑ modïr oyïëyø kɑ ɑ́lidhe gïn-ɑ ɑ́cwöb, kɑ ongɑ̈ngø yi pwönyi Wë. Codhe, ɑdhwödh Pøøl geki mɑ̈dhhe kì Pɑpøs, ɑkedh gen ki sɑpïnɑ̀ ge bï-ɑ Perjɑ̀ kì Pɑmpïliyɑ̀. Kɑ ge wiy piny yi Jøn, kɑ døøg-ɑ Yerusɑlem. Kɑ ge odhwödhø kì Perjɑ̀, ge kedh-ɑ Anthɑkiyɑ̀ kì Pïsïdiyɑ̀. Kɑ ge kedh-ɑ sinɑgøg kì cyɑ̈ɑ̈ng Sɑbɑth, kɑ ge pëgg-ɑ piny. Aödi jɑggi sinɑgøg yï gen, ge okööbø kinni, “Nyiimïɑ, keløg e dɑ kwøb mø nud kì yï wun møg cïju teedø, kwøbu gen.” Adhwödhi Pøøl mɑl, kɑ ónyudhø ki cinge. Kɑ ócɑ̈gø kwøb kinni, “Wun ɑ tyëng Isrɑil, kí wu tyëng-ɑ nyi wør Jwøk, lïng wun. Jwøøg tyëng Isrɑil, kweyyee ɑ́yienye, kɑ gï løge ji mø per gen teg keny-ɑ ɑ́bëëd gen gɑ wëdhh kì Rïp. Kɑ gï kɑ̈ɑ̈le wɑ̈g kì Rïp ki tegø me dwøng. Angine kwøbbi gïn kì yij pɑ̈l ki runn pyɑ̈r ɑ́ngwen. Anɑ̈ɑ̈ge ki jurrì ɑ́bïryew kì piny Kɑnɑɑn, kɑ piny gïn mëgge jie. Møgɑni bënn ɑ́tyëg-ɑ runn miy ɑ́ngwen kí pyɑ̈r ɑ́bïj. “Codhe, ɑthödhe gïn ki jɑgg gïti ri Sɑmwel jɑltöng. Kɑ ge ócwöddø ki rɑ̈dh. Amëggi gen Cɑul wɑ̈d Kïc kwɑɑr Ben Yɑmïn, yi Jwøk, kɑ obëëdø ɑ́ rɑ̈ɑ̈dh gen ki runn pyɑ̈r ɑ́ngwen. Kɑ gø pɑ̈de, ɑgwøøge Debïd ɑ́ rɑ̈ɑ̈dh gen, o ɑ́kööb kì ree kinni, ‘Debïd wɑ̈d Yesì, bɑ jɑl mɑ ɑ́yïëy yi pyëwɑ, o gïg-ɑ dwɑddɑ ógwøg yi en. Bɑ Yëso kwɑɑr Debïd, ɑ ɑ́gwøg yi Jwøk ɑ́ Yïëdi mi tyëng Isrɑil, ni kɑ ɑ́könge. Kɑ tyëng Isrɑil bënn köbbi yi Jøn kinni yewi gen kɑ ge jwɑ̈ɑ̈g. Kɑ kì bøli keny-ɑ ɑ́kømi kej Jøn tyëgø yi en, ɑkööbe kinni, ‘Yɑ pɑth ki ngɑn-ɑ rømmi yi wun. Obëënø kì bɑngɑ, o yɑ pɑ døøj ki göödi wɑrre wɑ̈g kì tyelle.’ “Nyiimïɑ, wun ɑ kwɑrri Abrɑhɑm, kí tyëng-ɑ kelli wun, møg-ɑ wør Jwøk, bene wɑ ɑ ɑ́ödi ki kwøbbi yuu yieli dhɑnhø. Mesiy nuti yodø yi tyëng Yerusɑlem geki jɑggi gen, gen ɑ kwøbbi jøtöng møg-ɑ nyi rɑng kì cyɑ̈ɑ̈ng Sɑbɑth, kɑ møgɑni tyëg gen ki kuumii ki thøø. Pilɑtø ɑ́köbbi yi gen kinni kuume gøn ki thøø, e bong gïn bɑɑj en. Keny-ɑ ɑ́rum gen ki tyëgi møg-ɑ ɑ́gwed bënn kipere, ɑkɑ̈ɑ̈l ge gøn piny kì wïj yɑdh, kɑ gø cïb gen yij rörø. De ɑ́tug yi Jwøk kì yij thøø. Kɑ nyii cwöbø kì yethi cyɑ̈ng mø ngenyø kì bøli tyëng-ɑ ɑ́bï Yerusɑlem ki en bënn ge kɑ̈ɑ̈l-ɑ Gɑlelì. O bɑ tyëngɑni ɑ bɑ cwɑ̈gg møge ɑnɑn kì bøli teedø. O wø muuj-ɑ wun wöndøj men-ɑ ɑ́köbbi kweyyee yi Jwøk; møgɑni ɑ́pɑ̈dhi kɑ̈jji gïn kì riee, wɑ ɑ bɑ nyigi gen, kɑ ɑ́tuge Yëso mɑl. Bene møgɑni ɑ ógwedø thyew kì yij Wɑ̈nyi Wör kinni, ‘Yï bɑ Wɑ̈dɑ; yɑ ɑ́göög ki wïyí dicyɑ̈ngtïn.’ De kipe kwøbbi kɑ ɑ́tuge gøn kì yij thøø, kɑ dële ocögø e pɑ kwɑ̈g, møgɑni ɑ́kwøbe kinni, ‘Wu ónëngi yi yɑn ki gyëdhhi tirø, gen ɑ gyëdhh-ɑ ɑ́kwøbɑ kinni ge ómëggɑ Debïd.’ Bene ɑ ɑ́kööbe kì yethi wör møøgø kinni, ‘Bɑ̈ngí, bɑ̈ng-ɑ tir, koo wëggí kwɑ̈ɑ̈g yij rörø.’ Debïd, kɑ ɑ́rume gwøgi møg-ɑ ɑ́dwɑddi yi Jwøk kì kelli rïj gen, ɑ́thøw kɑ koony buti kweyye, kɑ kwɑ̈ɑ̈g-ɑ yij rörø. De ngɑn-ɑ ɑ́tug mɑl yi Jwøk, nuti kwɑ̈gø. Ngɑ̈nyu wøw, wun ɑ nyiimïɑ kinni, wø muuj-ɑ wun wööni Yëso kipe lɑ̈ɑ̈nyi orøg. O kì ree, ji-ɑ yïëy bënn, bɑ ɑgøny kì yij orøg; gïn-ɑ pɑ cuggi lwɑ̈ngø yi Ciggi Mosɑ̀ ki gwøgø. Koru ri wun cyee, kipe ge óbï kömi wun, gen ɑ møg-ɑ ɑ́kømmi yi jøtöng kinni, “Lïdhi wun, wun ɑ jøgɑg! Ngɑ̈ng wun, kɑ wu thøw wun! Mɑ́ gïn-ɑ ógwøg yi yɑn dicyɑ̈ngtïn bɑ gïjø me koo yïëy yi wun cɑgg e di ngɑn löbbii wun.’ ” Keny-ɑ ɑ́kedhi gen wɑ̈g kì sinɑgøg, ɑkwɑjji gen yi teedø o kwøbbɑni døøg yi gen ki kwøbø ki cyɑ̈ɑ̈ng Sɑbɑth men-ɑ óbï. Keny-ɑ ɑ́dɑ̈ngi burɑni, kɑ Yeud mø gïïr geki tyëng-ɑ nyi wør Jwøk møg-ɑ ɑ́løg ri gen Yeud, løg-ɑ bɑng Pøøl geki Bɑrnɑbɑ̀. Kɑ tyëngɑni pwönyi yi Pøøl geki Bɑrnɑbɑ̀, ge cïj-ɑ gïn kinni o ge bëëd gen kì yij dhwɑ̈ng-ɑ kɑ̈ɑ̈l yï Jwøk. Kì cyɑ̈ɑ̈ng Sɑbɑth men-ɑ bɑnge, kɑ tyëng kɑɑlɑni cug-ɑ be lïngi kwøbbi Wë. De kɑ ɑ́liidh teedø ge gïïr yi Yeud, ɑmɑɑg gen yi tyiel, kɑ møg-ɑ kømmi yi Pøøl dëddi yi gen, kɑ Pøøl gwɑddi gen. Kɑ Pøøl geki Bɑrnɑbɑ̀ okööbø kinni, “Bɑ wun ɑ di kwøng yi wøn ki köbbi kwøbbi Jwøk. De kɑ ɑ́bɑɑny gen yi wun, kɑ ri wun cɑy yi wun kinni, wu pɑ døøj ki yïddø ki nënn-ɑ ɑtheer, ri wøn ólugi wøn tyëng-ɑ pɑth ki Yeud. Mɑ́ wø ɑ́ceg yi Wë kinni, ‘Yï ɑ́gwøg yi yɑn, yï bɑ cɑr kipe pödhh-ɑ kyeelø kipe kinni o kömi piny bëne yiel.’ ” Keny-ɑ ɑ́lïngi møgɑni yi tyëng-ɑ pɑth ki Yeud, ɑmïni pëthi gen, kɑ kwøbbi Jwøk lejji yi gen. Kɑ ji-ɑ bɑ ɑyieny kipe nënn-ɑ ɑtheer kì kelli gen oyïëyø. Kɑ kwøbbi Wë otɑyø kì yij pönhɑni bëne. Kɑ tyëng-ɑ mɑ̈nn møg-ɑ per gen teg, møg-ɑ nyi wør Jwøk geki jøgdøngi kɑɑlɑni pɑng yi Yeud, kɑ nyingi gen ocuulø ki Pøøl geki Bɑrnɑbɑ̀, kɑ gï cyeed gen wɑ̈g kì kɑɑl gen. Kɑ tør tyelli gen tënggi gen tyëng kɑɑlɑni, kɑ ge kedh-ɑ Ayköniyɑ̀. De tyëng-ɑ ɑ́yïëy kì Anthɑkiyɑ̀ ɑ́bëëd pëthi gen med cɑrø, o ge pɑ̈ngø yi Wëykwërø. Kɑ Pøøl kedh-ɑ sinɑgøg geki Bɑrnɑbɑ̀ kì Ayköniyɑ̀ thyew, kɑ ge okööbø kì kenyɑni, kɑ ji mø gïïr kì kelli Yeud geki tyëng Yönɑn oyïëyø. Kɑ tyëngpɑth kì kelli Yeud cwɑɑg mɑl yi Yeud møg-ɑ nuti yïëyø, kɑ wɑ̈thi gïn rënyi gen, o ge mɑ̈ni gen ki tyëng-ɑ ɑ́yïëy. Kɑ ge ómɑ̈gø ki keny me bɑ̈ɑ̈r kì kenyɑni, ge ópwönyø, ge pɑ böggi, kì ri tegi Wë. Kɑ Wë kwøbbi dhwɑ̈ng-ɑ kɑ̈ɑ̈l yïe thyer yi en kì ri kɑ ɑ́thöthe gïn ki ngïjjì geki gïïngɑ̈ngø mø gwøg yi gen ki cinggi gen. Kɑ tyëng kɑɑlɑni ópyëdø kì dyëri gen; kwï gen cwɑg-ɑ Yeud, o møøgø cwɑg-ɑ tyëngwöödø. Keny-ɑ ɑ́yɑ̈ɑ̈b Yeud geki tyëngpɑth kí Yeud geki jɑggi gen ki yöö me tuug gen tyëngwöödø; o gï di bɑ̈lli gen ki tuggi kïttì, kɑ møgɑni lïngi yi gen, ɑpɑ̈ɑ̈r gen kɑ̈ddi Listrɑ̀, kí Derbɑ̀, kí Likɑoniyɑ̀ geki myërr-ɑ cyɑ̈gi ki kɑ̈ddɑni. Kɑ wöndøj pwönyi yi gen kì kɑ̈jjɑni. Ádɑ jɑl megø kì Listrɑ̀, me bɑ pudh; nuti wöl cyɑ̈dhø kër-ɑ ónywøølii. Ábëëd e olïngø ki kwøbbi Pøøl. Kɑ lidh yi Pøøl kinni jɑlɑni ɑ́yïëy, o ócuggø yielø. Kɑ cwɑgge tïnge, ɑkööbe kinni, “Dhwöödh, kɑ yï cungí kì kömi tyellí, yï bɑ óbödh.” Apɑ̈ɑ̈re mɑl, kɑ ócyɑ̈dhø. Keny-ɑ ɑ́lïdhi teedø ki gïn-ɑ ɑ́gwøg yi Pøøl, ɑryeer gen ki dhøg tyëng Likɑoniyɑ̀ kinni, “Jwögg ri gen ɑ́pɑ̈ɑ̈r gen ki ji, kɑ ge bï-ɑ piny yïee!” Kɑ Bɑrnɑbɑ̀ cɑg ɑ́ Dhiyøs yi gen, kɑ Pøøl cɑg ɑ́ Ërmes, kipe kɑ̀ bëëde ɑ́ en ɑ kööbø. Kɑ ókwëri Dhiyøs men-ɑ kenge ying dhø döri kɑɑlɑni, kɑ̈n-ɑ dhø dörø ki wɑ̈dhh, kí yɑ̈rri okøggi lum, ókwërɑni geki teedø ɑ́dwɑdd-ɑ ngɑ̈ddi tyëngwöödø ki gëëdhi. De keny-ɑ ɑ́lïngi kwøbbɑni yi tyëngwöödø, gen ɑ Bɑrnɑbɑ̀ kí Pøøl, ɑkɑg gen ógudhi gen, kɑ ge reng-ɑ kelli teedø, ge óryeerø kinni, “Jøg, ɑ́ gïn ɑ gwøg yi wun kinøw? Wøn thyew, wø bɑ ji, bëëdi wøn nɑ bëëdi wun ceth. O wø ɑ́bï-ɑ be muuji wun wöndøj, kipe kinni, o gïg-ɑ bong per gen ni møg wiy yi wun, o ri wun løg wun yï Jwøng-ɑ Nëënø; ɑ ɑ́cwɑ̈j mɑl kí piny, kí nɑɑm omelø, kí gïg-ɑ yethi gen bënn. Kì yethi rïjj-ɑ ɑ́pöödh bënn, jurrì bënn ɑ́wiye, o ge cyɑ̈dhi gen kì yethi yëthi gen. De ɑ́bëëd ree nyii nyodhø yi en ceth kinni nud, kì ri gïgdøj møg-ɑ nyi gwøge. Wu nyi thödhe’ thödhø ki kødh kì mɑl, kɑ wu nyi thödhe ki byel kì bøli kej gen; wu nyii thödhø yi en ki gïncɑm, kɑ wu nyi thödhe ki medi pyëw me dwøng.” Kwøbbi gen ɑ́dhɑ̈li ki mɑ̈ɑ̈ni teedø ngɑ̈ddi gen ki gëdhhì. Kɑ Yeud møøgø obëënø, ge kɑ̈ɑ̈l-ɑ Anthɑkiyɑ̀ kì Pïsïdiyɑ̀ geki Ayköniyɑ̀. Kɑ wɑ̈thi ji pɑng yi gen, ɑbɑ̈lli gen Pøøl ki tuggi kïttì, kɑ gø ywɑɑj gen wɑ̈g kì kɑɑlɑni, e rømmi yi gen i thøø. De keny-ɑ ɑ́cugi jøbɑng Yëso ki bute, ɑdhwödhe mɑl kɑ kedh-ɑ kɑɑl. Dhuki, ɑkedhe Derbɑ̀ geki Bɑrnɑbɑ̀. Kɑ ɑ́rum gen ki pwönyi wöndøj kì bøli tyëng kɑɑlɑni, kɑ ge óyïddø ki ji mø ngenyø mɑ ɑ́løg ri gen jii bɑng Yëso, ɑdøøg gen Listrɑ̀, kɑ ge cig-ɑ dhwödhø ge kedh-ɑ Ayköniyɑ̀ kí Anthɑkiyɑ̀ kì Pïsïdiyɑ̀. Kɑ jøbɑng Yëso pëthi gïn mɑg gen, kɑ gï cïj gen kinni bëëd gen kì ri møg-ɑ ɑ́yïëy yi gen. Kɑ gï köbbi gen kinni, “Bɑ kì bɑng orɑng me ngenyø ɑ ówɑ̈dhi wɑ Pödhi Jwøk.” Kɑ kɑnïsɑ̀ nyi rönyi gen ki jɑgge, kɑ ge nyii kwɑ̈jjø, kɑ ge nyii thuumø, codhe, o gï nyi cïb gen cingi Wë; ngɑn-ɑ ɑ́yïëy yi gen. Kɑ ge ókedhø ge bɑ̈ɑ̈n-ɑ myërri Pïsïdiyɑ̀, ɑwɑ̈dhi gen Pɑmpïliyɑ̀. Kɑ kwøbbi Jwøk pwönyi gen kì Perjɑ̀, codhe ɑkedhi gen Atɑliyɑ̀. Akɑdhi gen yij sɑpïnɑ̀ kì kenyɑni, kɑ ge døøg-ɑ Anthɑkiyɑ̀, kun-ɑ ɑ́thyeey gen kipe gwøgi gwøng-ɑ ɑ́rum ki tyëgø yi gen, ge kwøll-ɑ yi Jwøk. Keny-ɑ ɑ́wɑ̈dhi gen Anthɑkiyɑ̀, ɑcøng gen kɑnïsɑ̀, kɑ gïg-ɑ ɑ́gwøg yi Jwøk ki cinggi gen lwøb yi gen, kí kër-ɑ ɑ́yïëbbe yuu yïëyø tyëng-ɑ pɑth ki Yeud. Kɑ ge kɑl-ɑ bëëdø ki tyëng-ɑ ɑ́yïëy. Kɑ kwï ji møøgø obëënø kì Yeudiyɑ̀, kɑ tyëng-ɑ ɑ́yïëy pwönyi gen kinni, “Keløg wu pɑ ngøl kì bɑng kwööng Mosɑ̀, wu pɑ cuggi yielø.” Kɑ kwøbbɑni ókɑ̈nø ki bɑ̈nni dhøg, kí pëëmø kì kɑɑm Pøøl kí Bɑrnɑbɑ̀ geki tyëngɑni. Kɑ Pøøl kí Bɑrnɑbɑ̀ geki kwï ji møøgø yieny yi teedø o ge kedhi gen Yerusɑlem, yï tyëngwöödø geki jøgdøngø kipe kwøbbɑni. Kɑ kì bɑng kɑ ɑ́rum gen ki lwøøg kö yuu gen yi tyëng kɑnïsɑ̀, ɑkedh gen ge bødh-ɑ kö Pinikiyɑ̀ geki Sɑmɑriyɑ̀, ge dwøngg-ɑ kwøbbi kɑ ɑ́løg tyëngpɑth ki Yeud ri gen. Kɑ tyëng-ɑ ɑ́yïëy bënn pëthi gen ómïnø ki mendwøng. Keny-ɑ ɑ́wɑ̈nhi gen Yerusɑlem, kɑ ge ywöör yi kɑnïsɑ̀ kí tyëngwöödø kí jøgdøngø, kɑ møg-ɑ ɑ́gwøg yi Jwøk kì ri gen bënn lwøb yi gen. Kɑ kwï tyëng-ɑ ɑ́yïëy møg-ɑ ɑ́bëëd gɑ Jøpɑresì dhwödh-ɑ mɑl, kɑ ge okööbø kinni, “Ngøl tyëng-ɑ pɑth ki Yeud, kɑ ge köbbi kinni mïdhi gen Ciggi Mosɑ̀.” Kɑ tyëngwöödø geki jøgdøngø, ge ócugø kipe lidhi kwøbbɑni. Kɑ ge ómɑ̈gø ki keny me bɑ̈ɑ̈r ge pemm-ɑ møgɑni, ɑdhwödhi Pïtør mɑl, kɑ gï köbbe kinni, “Nyiimïɑ, ngɑ̈nyi yi wun kinni, kì tyeli mɑl, bɑ yɑn ɑ ɑ́yieny yi Jwøk kì kelli wun, kipe kinni, o Wöndøj pwönyɑ tyëngpɑth ki Yeud, o ge yïëy gen. O ge ɑ́rum ki yïëyø yi Jwøk, ngɑn-ɑ ngɑ̈nyi møg-ɑ pëëth, kɑ gï mëgge Wëykwërø ni kɑ ɑ́mëgge gøn wɑ. O wɑ nuti dɑ̈ɑ̈ng en ki gen; de pëthi gen ɑ́lwøg yi en kì bɑng yïëyø mi gen. Dɑ́ kipe ngø, ɑ rɑngu Jwøk ɑnɑn, kɑ̀ cïbu kömi jii bɑng Yëso ki ɑcebø mɑ ɑ́ceg dhɑ̈lø ki tyëddø yi kweyyee, kɑ wɑ dhɑle thyew? O men-ɑ́ wɑ ɑ́yïëy, kinni wɑ yiel-ɑ ri dhwɑ̈ng-ɑ kɑ̈ɑ̈l ri Wë Yëso, o ge yiel kɑ yuuɑni ceth.” Kɑ burø bëne okudø, ge lïng-ɑ mø Bɑrnɑbɑ̀ geki Pøøl kɑ̀ lwøb gen ngïjjì geki gïïngɑ̈ngø møg-ɑ ɑ́gwøg yi Jwøk kì ri gen kì kelli tyëngpɑth ki Yeud. Keny-ɑ ɑ́rum gen ki kwøb, ɑlöggi Yɑgob kinni, “Nyiimïɑ, lïngu møgɑ. Wu ɑ́lwöbbi yi Sɑymøn ki kwøbbi kɑ ɑ́kwøøng tyëngpɑth ki Yeud ki këëmø yi Jwøk, kipe kinni, o kɑ̈ne wɑ̈g ki ji kì kelli gen mø cölli nyinge. O kwøbbi jøtöng órøømø ki møgɑni ceth, ni kɑ ógwedii kinni, ‘Jwøng-ɑ Ácwɑ̈ɑ̈j ɑ́kööb kinni, ‘Orume, o yɑ dwöögɑ, o pödhi Debïd men-ɑ pɑ̈ɑ̈dhø dwøøgɑ keje. Kɑ̈jj-ɑ pɑ̈ɑ̈dhø kì ree ódøøgɑ ki gerø, o ócigɑ gwøgø e teeg. Codhe, o dhɑnhø bëne bëe yïɑ, gen ɑ pödhh-ɑ kyeelø bënn møg-ɑ ɑ́cwöölɑ gɑ møgɑ.’ Bene møg-ɑ kømmi Wë, ngɑn-ɑ ɑ́nyodh møgɑni kɑ̈ge dööng. “Yɑ orumø kinni, tyëngpɑth ki Yeud møg-ɑ nyi lug ri gen yï Jwøk, ko tuug yi wɑ. De gwëdi wɑ gen ki wɑ̈nyø, kinni ge ko cyɑ̈ɑ̈m ki gëdhh-ɑ ngɑ̈lli ngïjji jwögg; kɑ ji mø nuti nywøøm ri gen ko niin; kɑ ge ko cyɑ̈ɑ̈m ki gïn-ɑ twij kì cwɑgge; kɑ ge ko cyɑ̈ɑ̈m ki remø. Mɑ́ Ciggi Mosɑ̀ ɑ́wöni ge orɑngø kì sinɑgøgg kì yethi cyɑ̈nggi Sɑbɑth bënn, o kwøbbe opwönyø kì yethi kɑ̈dd bënn.” Kɑ jøwöödø dhøggi gen reb gen geki jøgdøngø kí kɑnïsɑ̀ bëne, kinni yïëëny gen ki ji kì kelli gen møg ör Anthɑkiyɑ̀ kyeel ki Pøøl kí Bɑrnɑbɑ̀. Akwɑny gen Yeudɑ̀ ɑ cwøl ɑ́ Bɑrsɑbɑ̀ geki Silɑ̀; o ge ɑ́bëëd ge ceg kɑ wørø ki mendwøng yi tyëng-ɑ ɑ́yïëy, ge ɑ́kedh ge kɑ̈l-ɑ wɑ̈nyø me kööbø kinni, “Wɑ̈nyø men ör-ɑ yi nyiimï wun, tyëngwöödø geki jøgdøngø; wø gwëd-ɑ wun, wun ɑ nyiimï wøn møg-ɑ pɑth ki Yeud kì Anthɑkiyɑ̀ kì Suriyɑ̀, kí Kilikiyɑ̀; wu óbëëdø ki mër. Wø ɑ́lïng kinni i dɑ ji mø bëën yï wun, ge nuti ör-ɑ yi wøn; kɑ wu jud yi gen, kɑ pëthi wun wëggi gen nyönhø. Areb wøn dhøggi wøn kinni kɑ̈bbi wøn ki jøg ɑ́ryew møg ör yï wøn, kyeel ki Bɑrnɑbɑ̀ geki Pøøl, jøg-ɑ mɑɑr yi wøn; gen ɑ jøg-ɑ ɑ́weddi pëthi gen kipe nyingi Wë Yëso Mesiy. Wø ör-ɑ wun Yeudɑ̀ geki Silɑ̀, o møg-ɑ gwed yi wøn, ólöbbi wun yi gen. Wëykwërø ɑ́yïëy, kɑ wø oyïëyø kinni, kömi wun ko kïdhi ki cigg mø peg, den-ɑ́ møg-ɑ per gen teg ek: wu ko cyɑ̈ɑ̈m ki gëdhh-ɑ ngɑ̈lli ngïjji jwögg; kɑ wu ko cyɑ̈ɑ̈m ki remø geki gïn-ɑ ceg ki twijø; kɑ dhɑnhø ko niin ki ngɑn nuti nywøøm gen ri gen. Keløg ri wun ókorri yi wun kipe gïgɑni, wu ɑ́gwøg gïndøj. Mɑ̈dhu ri wun.” Akedh gen, kɑ ge wɑ̈dh-ɑ Anthɑkiyɑ̀. Acwøl gen tyëng-ɑ ɑ́yïëy, kɑ gï mëggi gen wɑ̈nyɑni Keny-ɑ ɑ́rɑng ge gøn, ɑmïni pëthi gen yi cïïny-ɑ cïïj gen kì yije. Kɑ tyëng-ɑ ɑ́yïëy cïj yi Yeudɑ̀ geki Silɑ̀ ki kwøb mø ngenyø, kɑ pëthi gen ótëngø, mɑ́ jøgɑni ryeet bɑ jøtöng. Keny-ɑ ɑ́rum gen ki bëëdø ki keny me lɑɑj kì Anthɑkiyɑ̀, ɑlwøøg gen yöö ki mër yi tyëng-ɑ ɑ́yïëy, o ge døøg gen yï ji-ɑ ɑ́ör gen. De Silɑ̀ ɑ́kyëëd cem e pɑ døg, ɑdøg Yeudɑ̀ kete. Kɑ Pøøl kí Bɑrnɑbɑ̀ obëëdø kì Anthɑkiyɑ̀, ge pwöny-ɑ kwøbbi Wë kyeel ki ji møøgø mø gïïr thyew. Bɑng cyɑ̈ng mø nøg ɑköbbi Bɑrnɑbɑ̀ yi Pøøl kinni, “Bïí døøg wɑ be këëmi tyëng-ɑ ɑ́yïëy kì yethi kɑ̈dd-ɑ ɑ́pwönyi wɑ kwøbbi Wë, o ge lidh yi wɑ mɑ bëëd gen kidï.” Bɑrnɑbɑ̀ ɑ́dwɑdd-ɑ kɑ̈li Jøn Mɑrk. De Pøøl ɑ́kyëëd kinni, ngɑn-ɑ ɑ́wiy gen piny kì Pɑmpïliyɑ̀, o nuti kunyø ki gwøg, pɑ cyɑ̈dhi ki gen. Kɑ pëëmø me teeg ócɑ̈gø kì kelli gen, ɑdɑ̈ngi gen, kɑ Mɑrk kwɑny yi Bɑrnɑbɑ̀, kɑ ge kedh-ɑ Kobros ki sɑpïnɑ̀. Kɑ Pøøl kwɑny-ɑ Silɑ̀. Adhwödh gen kì Anthɑkiyɑ̀, kì bɑng kɑ ɑ́rume thyëyi Wë yi tyëng-ɑ ɑ́yïëy. Kɑ ókedhø, e kɑ̈l-ɑ kö Suriyɑ̀ kí Kilikiyɑ̀, e cïj-ɑ kɑnïsɑ̀ o tënge. Kɑ Pøøl wɑ̈dh-ɑ Derbɑ̀ geki Listrɑ̀. O ɑ́dɑ Ngeti Mesiy kì kenyɑni me cwøl ɑ́ Timøthì, nyelɑni bɑ wɑ̈d nyɑɑr Yeud me yïëyø, de wïye bɑ wɑ̈d Yönɑn. Kɑ per døøje nyi kømmi yi tyëng-ɑ ɑ́yïëy møg-ɑ ying Listrɑ̀ kí Ayköniyɑ̀. Kɑ dwɑddi kɑ̈ɑ̈lø yi Pøøl, ɑngøle gøn, mɑ́ e ngɑ̈nyi yi Yeud møg-ɑ myërrɑni, kinni wïye bɑ wɑ̈d Yönɑn. Keny-ɑ ɑ́kedh gen, ge ɑ́bødh-ɑ yethi kɑ̈dd-ɑ døngø, kɑ møg-ɑ ɑ́ceg yi tyëngwöödø geki jøgdøngø møg-ɑ ying Yerusɑlem nyi köbbi gen teedø, kinni mïdhi gen ciggɑni. Kɑ yïëyø mi kɑnïsɑ̀ ótëngø, kɑ kwɑnni ji ókedhø ge óngënyø kì yethi cyɑ̈ng bënn. Kɑ ge kɑ̈l-ɑ myërri Perïjiyɑ̀ kí Gɑlɑthiyɑ̀, mɑ́ ge ɑ́mɑ̈ɑ̈n pwönyø kì Ásiyɑ̀ yi Wëykwërø. De kɑ ɑ́wɑ̈dhi gen wïj tuung Misiyɑ̀, kɑ cem ge kedh-ɑ Bithiniyɑ̀, ɑmɑ̈ɑ̈n gen yi Wëyi Yëso. Codhe, ɑpödhi gen Misiyɑ̀, kɑ ge wɑ̈dh-ɑ Torwɑs. Kɑ Pøøl cɑ̈rri kì wɑ̈r kì yethi lɑ̈g. Kɑ ólïdhø ki jɑl Mɑkdöniyɑ̀ me cungi, e kwɑjj-ɑ gøn kinni, “Bïí Mɑkdöniyɑ̀ løøng-ɑ di wøn, o wø køny yi yïn!” Kì bɑng kenyɑni ceth, ɑgwir wøn ri wøn kipe kedhi Mɑkdöniyɑ̀, mɑ́ e ɑ́yod yi wøn kinni, wø ɑ́cwøl-ɑ yi Jwøk, o tyëng pönhɑni köbbi yi wøn ki wöndøj. Codhe, ɑdhwödh wøn kì Torwɑs ki sɑpïnɑ̀, kɑ wø pödh-ɑ Sɑmotherɑkiyɑ̀, dhuki ɑkedhi wøn Neɑpølis, ɑpödhi wøn Pïlïpì, ɑ bɑ kɑɑl-ɑ dwøng kì modïri Mɑkdöniyɑ̀, de jɑɑg-ɑ yi mïri Römɑ̀. Kɑ wø obëëdø kì kɑɑlɑni ki cyɑ̈ng mø nøg. Kɑ kì cyɑ̈ɑ̈ng Sɑbɑth, ɑkedhi wøn wɑ̈g kì kɑɑlɑni, wø kedh-ɑ thɑ̈ngi nɑm keny-ɑ nyi kwɑ̈jji yi Yeud. Apëggi wøn piny, kɑ wø okööbø ki tyëng-ɑ mɑ̈nn mø cugø kì kenyɑni. Dhɑnhø ɑ́kyel kì kelli tyëng-ɑ ɑ́lïngi kwøbbi wøn bɑ ngɑndhɑjø me cwøl ɑ́ Lïdiyɑ̀, ngeti kɑɑl Theyɑtirɑ̀. Ngɑnɑni nyi ngyew-ɑ ógudh-ɑ bɑ ɑ́cwïcwïl, o nyi mɑll-ɑ Jwøk. Kɑ pyëwe yieb yi Wë kipe kinni o lïnge kidøøj ki møg-ɑ kømmi yi Pøøl. Keny-ɑ ɑ́rume jwɑ̈ɑ̈gø kyeel geki tyëng gøle, ɑköbbe wøn kinni, “Keløg wu orumø kinni, yɑ bɑ ngɑn-ɑ ɑ́yïëy Wë kidyër, bïu be bëëdø kì gølɑ.” Kɑ wø dyeje ki kedhi gøle. Keny-ɑ ɑ́kedhi wøn kej kwɑ̈jjø, ɑrøøm wøn ki bɑ̈ng-ɑ dhɑjø me ree di wëy me rɑj; wëyɑni bɑ wëyi rɑng, kɑ wëëge nyii yïddø ki jɑmmì mø ngenyø kì bɑng rɑnge. Kɑ nyɑnɑni ólugø kì bɑng wøki Pøøl, e óryeerø kinni, “Jøg bɑ bɑ̈nggi Jwøng-ɑ Pëddi Döng, o ge pwöny-ɑ wun ki yuu yielø.” Kɑ ómɑ̈gø ki cyɑ̈ng mø gïïr e ogöögø kinøw. Kɑ Pøøl kööre óbuudhø yi møgɑni, kɑ ree løge, kɑ wëyɑni köbbe kinni, “Yɑ köbb-ɑ yïn ki nyingi Yëso Mesiy, bïí wɑ̈g kì ree.” Abëën wëyɑni wɑ̈g kì bøli kenyɑni ceth. Keny-ɑ ɑ́lïdhi wëëg nyɑnɑni kinni, gïn-ɑ́ ree ɑ́yïddi gen ki ngyëny ɑ́kedh, ɑmɑg gen Pøøl geki Silɑ̀, kɑ gï ywɑɑj gen yï jɑggi burø kì ódɑ̈ri kɑɑlɑni. Kɑ gï mëggi gen jɑggi burø, ɑkööb gen kinni, “Jøg bɑ Yeud, de kɑɑlee ceg kɑ rungø yi gen ki mendwøng. Ge pwöny-ɑ kwøbbi kwöng me bɑ ɑkerø ki yïëyø yi wɑ, mɑ́ wɑ bɑ tyëng Römɑ̀.” Adhwönhi ji mø gïïr kömi gen, kɑ ógudhi gen luny wɑ̈g yi jɑggi gøny, kɑ ge kuum ki pwödø. Kɑ ge pwöd ki pwödø me rɑɑj, ɑleeng gen ød mɑg, kɑ jɑngi ød mɑg ceg kinni ti gen ki korø kidøøj. Keny-ɑ ɑ́rume lïngi møgɑni, ɑkïdhe gïn yij øn-ɑ dïdyëri ød mɑg, kɑ tyeli gïn mɑɑge ri pɑ̈mmì mø peeg. Kì dïwɑ̈r, Pøøl ɑ́bëëd e ókwɑ̈jjø geki Silɑ̀, ge lenh-ɑ Jwøk ki wör, o ɑmɑgg olïngø. Kɑ piny onhɑ̈nhø, kɑ ød mɑg runge ki menteg, kɑ thïg ri gen yieb gen, kɑ ɑ́cwecwelli ɑmɑgg ri gen dɑd gen. Kɑ jɑngi ød mɑg ócyëwø, ɑlidhe thïggi ød gɑ ɑyieb, kɑ pile wødhe, kɑ ree dwɑdde nɑ̈gø, e ceg-ɑ rumø kinni, ɑmɑgg pɑ̈ɑ̈rø. Kɑ cwøl yi Pøøl e óryeerø kinni, “Rií ko nyïɑ̈ɑ̈g! Wø nud bënn.” Acwödde ki ɑ́menyø, kɑ jwɑn-ɑ ød, kɑ ree leenge piny kì bøli Pøøl geki Silɑ̀, dële okïïrø yi wɑ̈ɑ̈rø. Akɑ̈ɑ̈le gïn wɑ̈g, kɑ okööbø kinni, “Wun ɑ wëëgɑ, gwøgɑ ngø, o yɑ yiel?” Kɑ köbbi yi gen kinni, “Yïëy Wë Yëso, o yï yiel, wuki gølí bëne.” Kɑ gø pwönyi gen ki kwøbbi Wë, en geki tyëng-ɑ ying gøle bënn. Akɑ̈ɑ̈le gïn kì bøli kenyɑni ceth kì wɑ̈r, kɑ keddi gïn lwøge; kɑ jɑlɑni jwɑ̈ɑ̈g geki tyëng gøle bënn. Akïdhe gïn gøle, kɑ gï thödhe ki gïncɑm. Kɑ pyëwe ómïnø ki mendwøng geki gøle bëne, kì bɑng kɑ ɑ́yïëy gen Jwøk. Keny-ɑ ɑ́ru wøw, ɑör bölidhh yi jyɑ̈ggi gøny kinni, “Gøøny jøgɑni.” Kɑ kwøbbɑni löbbi Pøøl yi jɑngi ød mɑg kinni, “Jyɑ̈ggi gøny ɑ́öni i gøøny wun. Anɑn, bïu wɑ̈g, kɑ wu kedh wun ki mër.” De ge ɑ́köbbi yi Pøøl kinni, “Wø ɑ́pwöd yi gen kì bøli teedø bëne, wø nuti cɑyø, kɑ wø leeng ød mɑg, wøn ɑ́ tyëng Römɑ̀. Anɑn wø dwɑdd-ɑ ryemø yi gen kì gød! Pɑth ki kinøw! Gen kiri gen, bï gen be kɑ̈ɑ̈li wøn wɑ̈g.” Kɑ kwøbbɑni köbbi jyɑ̈ggi gøny yi bölidhh, kɑ ge obwøgø kɑ ɑ́lïng gen kinni ge bɑ tyëng Römɑ̀. Abëën gen, kɑ ge yömm-ɑ köthi gïn. Akɑ̈ɑ̈l ge gïn wɑ̈g, kɑ gï kwɑjji gen, kinni dhwödh gen kì kɑɑlɑni. Akedhi gen wɑ̈g kì ød mɑg, kɑ Lïdiyɑ̀ këëm yi gen. Keny-ɑ ɑ́rum gen ki yïddø ki tyëng-ɑ ɑ́yïëy, ɑcïj ge gïn, kɑ ge ókedhø. Akedh gen, ge kɑ̈l-ɑ Ampïpølis kí Apøløniyɑ̀, kɑ ge wɑ̈dh-ɑ Tesɑlonikɑ̀, o yije ɑ́dɑ sinɑgøg. Kɑ Pøøl pödh-ɑ sinɑgøg ni kenyi gööge, kɑ ómɑ̈gø kì Sɑbɑɑth ɑ́dɑ̈g, e lømm-ɑ dhøggi gen ki gïn, e nyodh-ɑ møg-ɑ yethi wɑ̈jji kwërø, gï lwøbe’ lwøbø kinni, bɑ gïn-ɑ ɑ́dwɑddi ceth kinni Mesiy bɑ men rɑngø, kí kinni, ódwöög wɑ̈g kì yij thøø. Kɑ okööbø kinni, “Yëso, ngɑn-ɑ́ pere ɑ́köbbɑ wun, en ɑ bɑ Mesiy.” Kɑ kwï tyëngɑni oyïëyø, kɑ ge órëbø ki Pøøl geki Silɑ̀. Kɑ ji mø gïïr møg-ɑ nyi wør Jwøk kì kelli tyëng Yönɑn, geki pëjjì mø ngenyø kì kelli tyëng-ɑ mɑ̈nn, órëbø ki gen thyew. Kɑ Yeud mɑg yi tyiel, kɑ ge ókɑ̈nø ki luuy, kɑ teedø me gïïr cøng gen, kɑ kɑɑlɑni tug yi gen ki ɑwøw, kɑ ge pödh-ɑ gøl Yɑsøn, ge yɑb-ɑ Pøøl geki Silɑ̀ kinni o gï di kïdhi gen bøli teen-ɑ cugø. Keny-ɑ ɑ́cög gï pɑ yod yi gen, ɑywɑɑj gen Yɑsøn wɑ̈g kyeel ki kwï tyëng-ɑ ɑ́yïëy, kɑ ge kïdhi bøli jɑggi kɑɑlɑni, ge óryeerø kinni, “Jøg-ɑ rënyi piny ɑ́wɑ̈nhi keny thyew, o ge ying-ɑ gøl Yɑsøn. O ge bënn, ge gøgg-ɑ gïg-ɑ bɑ ɑkerø yi ciggi Kɑysɑr; ge okööbø kinni, i dɑ rɑ̈dh megø me nud, me cwøl ɑ́ Yëso.” Kɑ teedø bëne kí jɑggi kɑɑlɑni, ceg-ɑ pëddø ki wøwø keny-ɑ ɑ́lïngi gen møgɑni. Kɑ Yɑsøn geki jøg-ɑ ɑ́mɑg köbbi col ki ngyëny, codhe, ɑwiy ge gïn, o ge kedh gen. Bɑ bøli kenyɑni ceth, ɑ ɑ́ör Pøøl geki Silɑ̀ kì wɑ̈r yi tyëng-ɑ ɑ́yïëy, kinni kedhi gen Beriyɑ̀. Keny-ɑ ɑ́wɑ̈dhi gen, ɑkedhi gen sinɑgøg. De Yeud møg-ɑ ying kɑɑlɑni rummi gen nud kibøli tyëng Tesɑlonikɑ̀. Yïthhi gen ɑ́kënni gen kwøbbi Jwøk. Kɑ Wɑ̈nyi Kwërø nyi rɑng yi gen kì yethi cyɑ̈ng, ge yɑb-ɑ thɑ́ møg-ɑ kømmi yi Pøøl, mɑ bëëd gɑ dyër. Ji mø gïïr ɑ́yïëy kì kelli gen, kí tyëng-ɑ mɑ̈nn møg-ɑ bɑ pëjjì kì kelli tyëng Yönɑn, kí jøg-ɑ cwøw thyew. De kɑ ɑ́lïng Yeud mø Tesɑlonikɑ̀ kinni, Pøøl ópwönyø ki kwøbbi Jwøk kì Beriyɑ̀, ɑbëën gen kɑɑlɑni be bɑ̈nni wɑ̈thi ji, kɑ gï tunggi gen. Codhe, ɑör Pøøl yi tyëng-ɑ ɑ́yïëy kinni kedhe thɑ̈ngi nɑɑm omelø, kɑ Silɑ̀ odöngø kì Beriyɑ̀ geki Timøthì. Kɑ tyëng-ɑ ɑ́lwøøg Pøøl, wɑ̈dh-ɑ Athïnɑ̀, ɑdwöög gen ge ókɑ̈ddø ki wöödø mɑ ɑ́ör yi Pøøl kinni i jwɑn Silɑ̀ geki Timøthì kedhi bɑnge. Kɑ̈ng-ɑ ɑ́ying Pøøl Athïnɑ̀, e yïd-ɑ Silɑ̀ geki Timøthì, pyëwe ɑ́rënyi kɑ ɑ́lïdhe kinni, kɑɑlɑni pɑ̈ng yi ngïjji jwögg. Codhe, ɑkedhe sinɑgøg kɑ nyii kööbø kì kenyɑni geki Yeud kí ji møøgø møg-ɑ nyi wør Jwøk. Kɑ Pøøl nyii kööbø kì yethi cyɑ̈ng bënn, ki tyëng-ɑ nyi yod yi en kì kɑ̈jji ngyew kì kɑɑlɑni. Kɑ órøømø ki ji mø bɑ tïddi kwøb møg-ɑ nyi cwølli gɑ Epikur kí Istøyik, kɑ kwï gen okööbø kinni, “Á gïn ɑ kømmi yi jɑl-ɑ wɑ̈dhi twɑgø èn?” Kɑ ji møøgø ólöggø kinni, “Jɑlɑni pwöny-ɑ kwøbbi jwögg mø kwïj.” Mɑ́ e töng-ɑ kwøbbi Yëso geki kwøbbi dwöngi mɑl kì yij thøø. Kɑ gø mɑg gen, kɑ gø kïdhi gen bur-ɑ nyi cwøl ɑ́ Aryøpɑgøs. Kɑ ge okööbø kinni, “Nyudhí wøn pwöny-ɑ nyɑ̈n men-ɑ kømmi yi yïn, wø dwɑdd-ɑ yodi gïn-ɑ wɑnge, mɑ́ yï kɑ̈ll-ɑ kwøb mø nuti kwøngø lïngø yi wøn cøn. O wø dwɑdd-ɑ yodi gïn-ɑ wɑngi yi gen.” Tyëng Athïnɑ̀ bënn kí wëdhh-ɑ kelli gen, nyi tyëg piny ge tyer-ɑ kwøb kí lïngø ki møg-ɑ nyɑ̈n. Kɑ Pøøl ócungø kì bøli Aryøpɑgøs, kɑ okööbø kinni, “Wun ɑ jøgi Athïnɑ̀, ɑ́lidh yi yɑn kinni, wu bɑ tyëng kwøbbi Jwøk, kì wɑ̈thi tùng bënn. Mɑ́ yɑ ɑ́wïïn kì kɑɑl wun, yɑ nenn-ɑ ri kenggi wun, kɑ yɑ óyïddø ki këli lɑm me köme ógwedø kinni, ‘Mëgg-ɑ jwøng kwïj.’ Jwøng-ɑ nyi mɑlli yi wun, e kwïj yi wun, bene en ɑ kwøbbe muujɑ wun ɑnɑn. En ɑ bɑ Jwøng-ɑ ɑ́cwɑ̈j lɑ̈bø kí gïg-ɑ yije bënn; en ɑ bɑ Wïi mɑl kí piny, o pɑ nyi bëëdø kì yethi keng møg-ɑ ógerø yi ji ki cinggi gen. O pɑ cuggi göggø yi ji e dhɑ̈y ce dɑ gïn jɑ̈ddii, mɑ́ en ɑ nyi thödhi ji bënn ki nënnì, kí wëy, kí jɑmmì bënn. Wɑ̈thi jurrì bënn ɑ́cwɑ̈j yi en kì ri dhɑnhø ɑ́kyel, kɑ gï cïbe kömi piny; kɑ gï cïbe ki bøli kɑ̈jj-ɑ nud gen, kí kɑ̈jj-ɑ bëëd yi gen. Ágöög kinøw kɑ per kinni o óyɑb yi gen, o yod yi gen, mɑ́ e cyɑ̈gi kì butee wɑ bënn; ni kɑ ɑ́kwøbii yi ngɑn-ɑ ɑ́kööb kinni, ‘Bɑ ree ɑ nëën yi wɑ; en ɑ ree cyɑ̈dhi yi wɑ; o en ɑ ree nud wɑ.’ Ni kɑ ɑ́kwøbii yi ɑcɑ̈ggi wun kinni, ‘Wɑ bɑ nyige thyew.’ Kɑ̀ bëëd wɑ bɑ nyigi Jwøk, wɑ ko rum kinni jwøg bɑ gïn cuggi gwøgø yi dhɑnhø ki døøji cinge, ɑ́ dhɑb, wɑlɑ̀ ɑ́tegø, wɑlɑ̀ kït. Møgɑni ɑ́wøy yi Jwøk, kì bøli kej kwïji wøw, de ɑnɑn ji bënn, kì yethi kɑ̈jj bënn, cege’ cegø kinni yewi gen ki bëënrɑj, mɑ́ cyɑ̈ng-ɑ ócɑye piny ki gøny-ɑ dyër ki cingi ngɑn-ɑ ɑ́yieny yi en, ɑ́rum ki cïbø yi en. Ngɑnɑni ɑ́rum ki nyudhi dhɑnhø bëne yi en, keny-ɑ ɑ́tuge gøn kì yij thøø.” Keny-ɑ ɑ́lïngi gen kwøbbi tugø kì yij thøø, ɑgɑggii yi kwï gen, kɑ møøgø okööbø kinni, “Kwøbbí ócigi lïngø yi wøn kipe møgɑni.” Codhe, ɑkedhi Pøøl wɑ̈g kì kelli gen. De kwï gen ɑ́rëbi ki en, kɑ ge oyïëyø. Kelli tyëng-ɑ ɑ́yïëy dɑ; Diyønisiyøs, o bɑ jɑl ɑ́kyel kì kelli jɑggi Aryøpɑgøs; kí ngɑndhɑjø me cwøl ɑ́ Dɑmɑris, kí ji møøgø. Codhe, ɑdhwödh Pøøl kì Athïnɑ̀, kɑ kedh-ɑ Körintøs. Kunɑni ɑ ɑ́yode Yeudì me cwøl ɑ́ Akïlɑ̀, o ónywøøl ɑ Pøntøs, o cer-ɑ bëënø e kɑ̈ɑ̈l-ɑ Itɑliyɑ̀ geki cyëge Priskilɑ̀, mɑ́ Yeud ɑ́ryem kì Römɑ̀ yi Kelɑwdiyøs Kɑysɑr. Akedhi Pøøl be yïddø ki gen, kɑ pëgg-ɑ be gwøg kì buti gen, mɑ́ gwøøg gen bɑ ɑ́kyel, ɑ løg cwɑ̈j ki kemm. Kɑ nyii pwönyø kì cyɑ̈nggi Sɑbɑth bënn kì sinɑgøg, e yɑb-ɑ løgi wɑ̈thi Yeud, kí tyëng Yönɑn bënn. Keny-ɑ ɑ́wɑ̈nhi Silɑ̀ geki Timøthì, ge kɑ̈ɑ̈l-ɑ Mɑkdöniyɑ̀, ɑyuud gen Pøøl wïje ómɑgø yi pwönyø ki menteg, e thyer-ɑ kwøb kì bøli Yeud kinni, Yëso bene Mesiy. De kwøbbe ɑ́bɑny yi gen, kɑ gø gwɑddi gen, ɑbɑ̈ɑ̈de ógødhe, kɑ gï köbbe kinni, “Keløg wu ólɑ̈ɑ̈ny, cɑ́y óying kömi wun; yïɑ bɑ̈r! Yɑ ceg-ɑ cɑ̈gø ki kedhi yï tyëngpɑth ki Yeud ɑnɑn ceth.” Adhwödhe kì kenyɑni kɑ kedh-ɑ gøl jɑl me pɑth ki Yeudì me nyi mɑlli Jwøk; nyinge cwøl ɑ́ Titiyøs Yøstøs; gøle ying-ɑ buti sinɑgøg. Kɑ Wë yïëy yi Krispøs jɑngi sinɑgøg geki gøle bëne. Kɑ ji mø ngenyø kì kelli tyëng Körintøs oyïëyø kɑ ɑ́lïngi gen kwøbbi Pøøl, kɑ ge jwɑ̈ɑ̈g. Kɑ Pøøl köbbi yi Wë kì yethi lɑ̈g kì wɑ̈r kinni, “Yï ko böggi! De kööb, yï ko kud, mɑ́ yɑ nud kì butí, o bong ngɑn-ɑ ónywɑl yïn, yïɑ dɑ ji mø ngenyø kì kɑɑl men.” Kɑ obëëdø kì kɑɑlɑni ki run ɑ́kyel kí dwɑ̈tt ɑ́bïkyel, e pwöny-ɑ kwøbbi Jwøk. Keny-ɑ ɑ́gwøøg Gɑliyø ɑ́ modïr mi Akɑiyɑ̀, ɑrëbi Yeud, kɑ Pøøl mɑg gen, kɑ gø kïdhi gen burø, ɑkööb gen kinni, “Jɑlɑni pɑng-ɑ wɑ̈thi ji, kinni nyi mɑl gen Jwøk ki yöö me bɑ ɑkerø yi cigg!” Pøøl ɑ́dwɑdd-ɑ löggø, kɑ Yeud köbbi yi Gɑliyø kinni, “Wun ɑ Yeud, keløg møgɑni di bëëd gɑ kwøbbi gwøg ki gïnrɑj wɑlɑ̀ bɑ̈jjø, kwøbbi wun di lïngɑ ni kɑ̀ dwɑddii yi cigg-ɑ dyër, de kɑ̀ bëëde ɑ́ pëmø ki kwøb møøgø geki nying kì ri ciggi wun, møgɑni lidh-ɑ yi wun, wu keti wun. Yɑ pɑ bëëdø yɑn ɑ́ jɑgø kipe kwøbbɑni.” Aryeeme gïn wɑ̈g kì kej gøny. Kɑ Sosthenis, jɑngi sinɑgøg, mɑg gen bënn, kɑ gø pwöd gen kì bøli kej gøny. Kɑ Gɑliyø ree dhïïge. Kɑ Pøøl obëëdø ki cyɑ̈ng mø ngenyø, codhe ɑwiye tyëng-ɑ ɑ́yïëy kɑ kedh-ɑ Suriyɑ̀ ki sɑpïnɑ̀, kyeel ki Priskilɑ̀ geki Akïlɑ̀. Kɑ wïje lyel kì Senkeriɑ̀ kipe møg mø kwööng en. Kɑ ge wɑ̈dh-ɑ Epɑsos, kɑ Priskilɑ̀ geki Akïlɑ̀ wiy yi Pøøl kì keny-ɑ ɑ́pëggi yi gen, kɑ kedh-ɑ sinɑgøg, kɑ dhøggi gen lømmi gen ki Yeud. Kɑ kwɑjji yi gen kinni kɑle bëëdø, ɑkyëde. Kɑ ɑ́rume mɑ̈dhi gïn, ɑkööbe kinni, “Yɑ ódwöög yï wun, keløg ɑ́ gïn dwɑddi yi Jwøk.” Kɑ odhwödhø kì Epɑsos ki sɑpïnɑ̀. Kɑ kɑdh-ɑ wɑ̈g kì Kɑysɑriyɑ̀, ɑtönge Yerusɑlem be mɑ̈dhi kɑnïsɑ̀, ɑpödhe Anthɑkiyɑ̀. Kɑ kɑl-ɑ bëëdø kì kenyɑni, codhe ɑdhwödhe, kɑ ókedhø e ócyɑ̈dhø kì kelli myërri Gɑlɑthiyɑ̀ geki Perïjiyɑ̀, e cïj-ɑ tyëng-ɑ ɑ́yïëy bënn. Kɑ Yeudì me cwøl ɑ́ Apøløs, o bɑ jɑl Iskɑnderiyɑ̀ bï-ɑ Epɑsos. Jɑlɑni bɑ löngø, o ngɑ̈ny lwøbi møg-ɑ yij wɑ̈nyi kwërø kidøøj. Rumø pwönyø ki kwøbbi Wë cøn, o pyëwe ying-ɑ kömi kwøbbɑni, kɑ ócɑ̈gø pwönyø ki kwøbbi Yëso ki yuu-ɑ dyër. De ngɑ̈ny-ɑ jwɑ̈ng-ɑ ɑ́jwɑ̈ɑ̈g ji yi Jøn kete. Kɑ ócɑ̈gø kwøb kì sinɑgøg ki tegi pyëwe, ɑlïngi møge yi Priskilɑ̀ geki Akïlɑ̀, ɑcwøøl ge gøn gøl gen, kɑ tyelli kwøbbi yuu Jwøk ti yi gen ki löbbii. Kɑ okööbø cem e dwɑdd-ɑ kedhi Akɑiyɑ̀, ɑcïïjii yi tyëng-ɑ ɑ́yïëy kì Epɑsos, kɑ ge gwëd-ɑ yï tyëng-ɑ ɑ́yïëy kì Akɑiyɑ̀ kinni cwøøl ge gøn kelli gen. Keny-ɑ ɑ́wɑ̈dhe, kɑ tyëng-ɑ ɑ́göög ki jii Mesiy kì bɑng dhwɑ̈ng-ɑ kɑ̈ɑ̈l yï Jwøk, gï kønye ki mendwøng. Mɑ́ dhøggi Yeud ɑ́nɑ̈ge ki menteg kì bøli teedø, kɑ gï nyudhe møg-ɑ yij wɑ̈nyi kwërø kinni, Yëso bene Mesiy. Pøøl ɑ́kedh e cør-ɑ yij modïrɑni, kɑ wɑ̈dh-ɑ Epɑsos e Apøløs nudd e ying-ɑ Körintøs. Kɑ óyïddø ki tyëngbɑng Yëso kì kenyɑni. Kɑ gï pyëje kinni, “Wu ɑ́di yïddø ki Wëykwërø kì bøli keny-ɑ ɑ́yïëy wun?” Kɑ ge ólöggø kinni, “Bogøn. Wø nuti wöl lïngø kinni, i dɑ Wëykwërø.” Akööbe kinni, “De wu ɑ́jwɑ̈ɑ̈g ɑ ri ngø?” Kɑ ge okööbø kinni, “Jwɑ̈ɑ̈gi Jøn.” Kɑ Pøøl okööbø kinni, “Jwɑ̈ngi Jøn bɑ kipe yewi tyëng Isrɑil ki orøøg gen, e nyi köbb-ɑ teedø kinni, yïëy gen ki ngɑn-ɑ óbï kì bɑnge, ɑ løg Yëso.” Keny-ɑ ɑ́lïngi gen møgɑni, ɑjwɑ̈ɑ̈g gen ki nyingi Wë Yëso. Kɑ Pøøl cingge thɑɑnye kömi gïn, ɑbëën Wëykwërø kömi gen, kɑ ge odhumø ki dhøg mø pɑth ki dhøggi gen, kɑ ge otöngø. Kwɑnni gen wɑ̈dh-ɑ ri pyɑ̈rø wïdɑ́ryew. Kɑ Pøøl kedh-ɑ sinɑgøg, kɑ dwɑ̈tt ɑ́dɑ̈g tyëge, e ópwönyø ki tegi pyëwe, ge lømm-ɑ dhøggi gen kì ri Pödhi Jwøk, e tyer-ɑ nɑ̈gi dhøggi gen. Kɑ kwï ji opëmø, kɑ ge óbɑ̈nyø ki yïëyø, kɑ ge okööbø ki kwøb mø rijjø kì ri Yuu Wë kì bøli teedø bëne, ɑdhwödh Pøøl kì kelli gen, kɑ jøbɑng Yëso kɑ̈l yi en, kɑ gï nyi pwönye kì yethi cyɑ̈ng bënn, kì ød gweed Terɑnøs. Kɑ tyëg-ɑ runn ɑ́ryew kinøw. Kɑ kwøbbi Wë lïngi yi Yeud, kí tyëng Yönɑn, kí ji-ɑ bëëdø kì Ásiyɑ̀ bënn. Kɑ Jwøk ogöögø kì cingi Pøøl ki gïïngɑ̈ngø mø nuti pɑ̈nyø gwøgø cøn. Kɑ mɑndïll kí pɑ̈rrì nyi kɑ̈l kì ree yi teedø, kɑ gï nyi cïb gen ri wɑddi gen møg-ɑ buud, kɑ ge nyii dönyø, kɑ wëyrijjø nyi bï-ɑ wɑ̈g. Kɑ kwï Yeud møg-ɑ nyi wïïnø, ge cyëdd-ɑ wɑ̈g ki wëyrijjø, ri gen pɑ̈nyi gen ki ryëmmø ki nyingi Wë Yëso, kɑ ge nyii kööbø kinni, “Yɑ köbb-ɑ yïn ki nyingi Yëso, ngɑn-ɑ pere pwönyi yi Pøøl.” Ádɑ Yeudì me cwøl ɑ́ Iskɑbɑ̀, o bɑ ókwërø me dwøng. Jɑlɑni yïe ɑ́dɑ wɑ̈dd ɑ́bïryew møg nyi göögø kinøw. Kɑ mø gen løøg yi wëyɑni kinni, “Yëso ngɑ̈nyi yi yɑn, o Pøøl ngɑ̈nyi yi yɑn, de wu bɑ møg?” Kɑ jɑl-ɑ́ ree ɑ́di wëyrɑj pɑ̈ɑ̈r-ɑ kömi gen, kɑ gï tyɑme, ge bënn, kɑ ge reng-ɑ wɑ̈g kì kɑl, ri gen bong ógudh, o ri gen dɑ kedd. Kɑ møgɑni lïngi yi Yeud geki tyëng Yönɑn møg-ɑ bëëdø kì Epɑsos; kɑ ge obwøgø bënn. Kɑ nyingi Wë Yëso ti ki wørø. Kɑ ji mø ngenyø kì kelli tyëng-ɑ ɑ́yïëy bï-ɑ be thyeri yïëyi gen kì bøli teedø, kɑ ge óyewø ki gïg-ɑ ɑ́gøggi yi gen ki yɑdh. Kɑ ji mø gïïr kì kelli tyëng-ɑ nyi thëdhø cøn, wɑ̈jji gen cøng gen, kɑ gï rɑ̈b gen kì bøli teedø. Kɑ ngyënyy-ɑ óngeew wɑ̈jjɑni kwɑn, kɑ kwɑnni ngyëny ɑ́tegg møgɑni wɑ̈dh-ɑ ri ɑ́lïp pyɑ̈r ɑ́bïj. Kɑ kwøbbi Wë otɑyø, kɑ ge pödh-ɑ mɑl ki mendwøng. Keny-ɑ ɑ́rum gïgɑni ki cwöbø, ɑkööb Pøøl kinni dwɑdd-ɑ kedhi Yerusɑlem, e kɑ̈l-ɑ kö Mɑkdöniyɑ̀ kí Akɑiyɑ̀. Kɑ okööbø kinni, “Keny-ɑ órumɑ ki kedhi kunɑni, yɑ ceg-ɑ kedhi be lidhi Römɑ̀ thyew.” Kɑ Pøøl jøg-ɑ nyi kønyii gɑ ɑ́ryew, gen ɑ Timøthì kí Erɑstøs, öre Mɑkdöniyɑ̀, de ɑ́kɑl bëëdø kì Ásiyɑ̀. Bøli kenyɑni ɑ ɑ́bëën ɑkørr mø døngø kömi Yuu Wë, mɑ́ e ɑ́dɑ jɑl me cwøl ɑ́ Dimitriyøs, o bɑ bødhi køny ki ɑ́tegø; ɑ́bëëd e nyi thɑ̈dh-ɑ ngïjji kengi Artemïs, jwøng-ɑ dhɑjø, o bödhhì ɑ́bëëd ge nyi ceg-ɑ yïddø ki jɑmmì mø gïïr kì bɑng gwøngɑni. Kɑ bödhhɑni cøng kej ɑ́kyel yi Dimitriyøs. Kɑ gï köbbe kinni, “Nyiimïɑ, ngɑ̈nyi yi wun kinni, bɑ ri gwøngɑni ɑ nyi yïddi yi wɑ ki jɑmmì. Gïg-ɑ gøggi yi jɑl-ɑ cwøl ɑ́ Pøøl ɑ́lidh yi wun, kɑ møg-ɑ kømme lïngi yi wun, kɑ̀ pɑngge ji kinni, i jwögg-ɑ gwøg ki cing ge pɑth ki jwögg kinni tek; o pɑth ki Epɑsos kete ɑ kømme møgɑni, dɑ́ kì Ásiyɑ̀ bëne. Pɑth ki gwøgee kete ɑ rënyi, de kengi Artemïs, jwøng-ɑ dhɑjø men-ɑ dwøng, ceg-ɑ pɑ̈ɑ̈dhø ki dhwɑ̈nge, e men-ɑ́ Artemïs mɑll-ɑ yi ji bënn kì Ásiyɑ̀ kí kömi piny bëne.” Kɑ pëthi gen ókënyø ki mendwøng, kɑ ɑ́lïngi gen møgɑni, kɑ ge óryeerø kinni, “Artemïs jwøøg Epɑsos, bɑ en ɑ dwøng.” Kɑ kɑɑl bëne opɑ̈ngø yi ɑgwɑg, kɑ Gɑyøs kí Aristɑrkøs, jø Mɑkdöniyɑ̀ møg-ɑ cyɑ̈dhi ki Pøøl mɑg, kɑ ge ywɑɑj ódɑ̈ri kɑɑlɑni. Pøøl ɑ́dwɑdd-ɑ kedhi yï teenɑni, de ɑ́mɑ̈ɑ̈n yi jøbɑng Yëso. Kɑ kwï jyɑ̈ggi Ásiyɑ̀ møg-ɑ bɑ mɑ̈dhh ki Pøøl öd-ɑ yïe ge kwɑjj-ɑ gøn kinni, ko kedhi medɑn. Kɑ ɑgwɑg ceg-ɑ ì dut, kwï ji ryeer ge wɑng-ɑ gïjø megø, o møøgø ryeer, ge wɑng-ɑ gïn-ɑ kyeelø; mɑ́ ji mø gïïr kì kenyɑni, gïn-ɑ́ pere ɑ́cugi ji kwïj yi gen. Kɑ Iskɑnder, cøør mɑl yi Yeud, kɑ cinge tïnge e dwɑdd-ɑ löggi teedø. Keny-ɑ ɑ́ngijii yi gen kinni, bɑ Yeudì; kɑ ge ómɑ̈gø ki sɑɑ̀ ɑ́ryew ge óryeerø wïj ɑ́kyel kinni, “Artemïs jwøøg Epɑsos, bɑ en ɑ dwøng.” Kì cyɑ̈n cyee, ɑkyëddi teedø yi jɑlgweed kɑɑlɑni kinni, kud gen, kɑ okööbø kinni, “Wun ɑ tyëng Epɑsos, ɑ́ men kì kömi piny, ɑ kwïj wøw kinni, Epɑsos kɑɑlee bene en ɑ kor kengi Artemïs jwøng-ɑ dhɑjø geki kïti kwër men-ɑ ɑ́dëëm kì mɑl? Bong ngɑn cuggi kyeri møgɑni. De kud wun, kɑ wu ko kööb ki kwøbbi dhëëgø. Anɑn jøg ryeet ge ɑ́kɑ̈ɑ̈l yi wun keny, e bong jɑmmì mø kwɑɑl gen kì yij kengø, wɑlɑ̀ bong gïnrɑj mɑ ɑ́kømmi gen kì ri jwøgee jwøng-ɑ dhɑjø. Keløg Dimitriyøs geki bödhhe yï gen dɑ gøny ki ngɑn megø, buri gøny bɑ ɑyieb, o modïr nud. Kɑ̈ɑ̈l gen gøøny gen. De keløg e dɑ gøny megø me nud kì yï wun, ólidh kì yij buri cigg. O nënni wɑ bɑ møg-ɑ ócɑy kipe ɑgwɑɑg dicyɑ̈ngtïn, o bong ngɑn-ɑ ólwøb cɑ̈gi ɑgwɑngɑni.” Keny-ɑ ɑ́rume kwøbi møgɑni, ɑköbbe teenɑni kinni, dɑ̈ɑ̈ng gen. Keny-ɑ ɑ́døøg ɑgwɑngɑni piny, kɑ Pøøl tyëngbɑng Yëso cwøle, keny-ɑ ɑ́rum gen ki cïjø yi en, ɑmɑ̈dhe gïn, kɑ odhwödhø, e kedh-ɑ Mɑkdöniyɑ̀. Kɑ kɑ̈l-ɑ köthi kɑ̈ddɑni, e cïj-ɑ tyëngyïëyø, kɑ wɑ̈dh-ɑ Akɑiyɑ̀. Amɑ̈ge ki dwɑ̈tt ɑ́dɑ̈g kì kenyɑni, kɑ nywɑ̈ggi dhøg yi Yeud kinni o di nɑ̈g, kì bøli keny-ɑ ɑ́køme kedhi Suriyɑ̀ ki sɑpïnɑ̀, ɑrume kinni, lɑ̈w ke døøge, e kɑ̈l-ɑ Mɑkdöniyɑ̀. Alwøøgii yi Söpɑter wɑ̈d Pirøs, jɑl Beriyɑ̀; kí Aristɑrkøs geki Sekundus jø Tesɑlonikɑ̀; kí Gɑyøs jɑl Derbɑ̀; kí Tikikøs geki Trøpimøs, jø modïri Ásiyɑ̀; kí Timøthì. Jøgɑni ɑ́møøl bøli wøn, kɑ ge wɑ̈dh-ɑ Torwɑs, ɑyïd wøn yi gen kì kunɑni, Kɑ wø odhwödhø kì Pïlïpì ki sɑpïnɑ̀ kì bɑng cyɑ̈ɑ̈ng Kwëër Olwëny, kɑ ge pïïd wøn Torwɑs, kì bɑng cyɑ̈ng ɑ́bïj. Kɑ wø obëëdø ki osboo. Kɑ wø ócugø kì cyɑ̈ɑ̈ng Jwøk, kipe pødi ópun, kɑ Pøøl okööbø ki teedø, mɑ́ e bɑ men dhwödh dhuki. Kɑ ómɑ̈gø ki keny me bɑ̈ɑ̈r e ópwönyø gïti dïwɑ̈r. Ádɑ lɑ̈mbɑ̈ɑ̈ mø ngenyø kì ød mɑl men-ɑ ɑ́cugi yi wøn. Nyelɑwøb me cwøl ɑ́ Yutikøs ɑ́bëëd ɑ wɑɑng ɑwɑj. Kɑ ócɑ̈gø ki nwɑyyø e Pøøl nudd e ópwönyø, ɑpɑ̈ɑ̈dhe kì dɑ̈ɑ̈g dör kì mɑl, kɑ tïng e thøø. Kɑ Pøøl kedh-ɑ piny, ɑleenge ree kömi nyelɑni, kɑ gø dööbe kööre, ɑkööbe kinni, “Pëthi wun ko lïngi, nudd e onëënø.” Keny-ɑ ɑ́rum Pøøl ki døøg dör-ɑ mɑl, ɑpøde ópun, kɑ ocyɑ̈mø. Kɑ pëgg-ɑ be dwøg ki gïn, gïti kɑ ɑ́ru wøw, codhe ɑkedhe. Kɑ nyelɑni kïdhi gøl gen e onëënø, kɑ pëthi gen ómïnø ki mendwøng. Kɑ wø kedh-ɑ kun-ɑ di sɑpïnɑ̀, ɑdhwödh wøn, wø kedh-ɑ Asös, kinni o Pøøl kwɑny yi wøn ki kunɑni, mɑ́ e ɑ́kedhi kunɑni kɑ tyelle. Kɑ wø røøm-ɑ Asös ki en, ɑkwɑny wøn en ki sɑpïnɑ̀, kɑ wø kedh-ɑ Mitilenɑ̀. Kɑ wø odhwödhø kì kenyɑni ki sɑpïnɑ̀, dhuki ɑwɑ̈dhi wøn bøli Kiyøs. Kɑ wø kɑ̈l-ɑ bøli Sɑmös kì dɑ̈ɑ̈g cyɑ̈ng. Codhe ɑwɑ̈dhi wøn Miletøs kì ngween cyɑ̈ng. Kɑ Epɑsos pöödh wøn, wø kɑ̈ll-ɑ nɑɑm omelø, mɑ́ Pøøl nuti dwɑddi cwöngø kì Ásiyɑ̀, de ɑ́ceg-ɑ jwɑ̈ɑ̈nø kipe kinni, o wɑ̈dhe Yerusɑlem cyɑ̈ng-ɑ Pyɑ̈r Ábïj nuti bëënø. Kɑ öd-ɑ Epɑsos e ying-ɑ Miletøs, be cwööli jøgdøngi kɑnïsɑ̀. Keny-ɑ ɑ́wɑ̈nhi gen yïe, ɑköbbe gïn kinni, “Bëëdɑ ngɑ̈nyi yi wun, yɑ ɑ́bëëd ɑ kelli wun, cɑg kì cyɑ̈ng-ɑ ɑ́ywöönyɑ tyelɑ Ásiyɑ̀, kí kɑ ɑ́göögɑ kipe Wë ki möölø, yɑ ceg-ɑ kïïmø; kí orɑng-ɑ nyi bï kömɑ kì bɑng kɑ̀ nyi nywɑ̈ggi yɑn dhøg yi Yeud. O bong gïndøj mɑ ɑ́cög e nuti göggi wun yi yɑn, kɑ ɑ́pwönyɑ kì bøli teedø, kí yethi kɑ̈lli wun. Kɑ kwøbbi yewø kì bøli Jwøk geki kwøbbi yïëyi Wë Yëso Mesiy nyi thyerɑ kì bøli Yeud kí tyëng Yönɑn bënn. De ɑnɑn yɑ kedh-ɑ Yerusɑlem, yɑ kɑ̈ll-ɑ yi Wëykwërø, o gïn-ɑ óbï kömɑ kì kunɑni kwïj yi yɑn, de yɑ ɑ́bëëd yɑ nyii köbbø yi Wëykwërø kì yethi kɑ̈dd bënn kinni, dɑ ɑkørr kí digïddì mø yïd yɑn. Kì yïɑ, wëyɑ bong per gen, de yɑ dwɑdd-ɑ tyëgi bøli kejɑ kete, geki gwøng-ɑ ɑ́mëggi yɑn yi Wë Yëso, eni pwönyi Wöndøj mi dhwɑ̈ng-ɑ kɑ̈ɑ̈l yï Jwøk. “Yɑ ɑ́cyɑ̈dhi kì kelli wun bënn, yɑ pwöny-ɑ kwøbbi Pödhi Jwøk. O ngɑ̈nyi yi yɑn kinni, yɑ pɑ lidh yi wun këti. Bene ɑ köbbɑ wun dicyɑ̈ngtïn kinni, yïɑ bɑ̈r ki remi dhɑnhø bëne, mɑ́ wu nuti kɑ̈nø yi yɑn ki kwøbb-ɑ ying pyëw Jwøk. Koru ri wun, wuki dyëg-ɑ ɑ́cïb cinggi wun bënn yi Wëykwërø; wu tyëng-ɑ kwɑy kɑnïsɑ̀ mi Wë, men-ɑ ɑ́ngewe ki reme. Ngɑ̈nyi yi yɑn kinni, kì bɑng keny-ɑ ódhwödhɑ, gøll-ɑ nyi gwɑ̈rø óbï kelli wun, o dyëg koo wiy yi gen. O ji møøgø ódhwödh kì kelli wun, kɑ tyëng-ɑ ɑ́yïëy peej gen pɑ̈l ki kwøbbi pyed. Nëën wun kidøøj, kɑ wu nyi pɑru kinni wu ɑ́pwönyɑ, e pïi nyingɑ órïngø kì wɑ̈r kí dicɑ̈ng, ki runn ɑ́dɑ̈g, wu nyi cegɑ’ cegø. “De ɑnɑn, wu cïbɑ’ cingi Jwøk geki kwøbbi dhwɑ̈ng-ɑ kɑ̈ɑ̈l yïe. Wu ótïng mɑl yi kwøbbɑni, o wu óyïddi ki gyëdh møg-ɑ ɑ́kwøb yi Jwøk kinni gï ómëgge jie. Yɑ nuti mudø kipe ngyëny wɑlɑ̀ kipe ógudh mø ngɑn megø. Ngɑ̈nyi yi wun kì ri wun kinni, yɑ ɑ́göög-ɑ cinggɑ møg, kipe kinni o yɑ nyi yïddɑ ki gïg-ɑ dwɑddi yi yɑn wøki tyëng-ɑ cyɑ̈dhi ki yɑn. Wu ɑ́nyudhɑ kì ri jɑmmì bënn kinni, göög wɑ ki gwøng teg, kɑ tyëng-ɑ nyødh nyi køny wɑ. Kɑ kwøbbi Wë Yëso nyi pɑr wɑ; gen ɑ møg-ɑ ɑ́kwøbe kinni, ‘Medi pyëw men-ɑ yod yi ngɑn-ɑ muujø, lod-ɑ medi pyëw ngɑn-ɑ nëngi yi en.’ ” Keny-ɑ ɑ́rume kwøbi møgɑni, ɑpëgge wɑ̈thi cønge, kɑ ókwɑ̈jjø kyeel ki tyëngɑni bënn. Kɑ ge óywöngø bënn, kɑ Pøøl döbbi gen, kɑ gø nuum gen. O gïn-ɑ́ pere ɑ́ti gen kïïmø ki mendwøng, bɑ kɑ ɑ́kööbe kinni, pɑ lidh yi gen këti. Alwøøg ge gøn yij sɑpïnɑ̀. Keny-ɑ ɑ́rum wøn ki dɑ̈ngø ki gen, ɑdhwödh wøn ki sɑpïnɑ̀, wø cïm-ɑ Kös, kɑ wø wɑ̈dh-ɑ Rödis dhuki; kɑ wø pödh-ɑ Pɑtɑrɑ̀. Kɑ wø óyïddø ki sɑpïnɑ̀ me kedhi Pinikiyɑ̀, ɑkɑdhi wøn yije, kɑ wø odhwödhø. Kɑ wø wɑ̈dh-ɑ keny mɑ ɑ́nënni yi Kobros, ɑwiy wø en kì wɑ̈thi cyɑ̈mmi wøn, kɑ wø pödh-ɑ Suriyɑ̀, kɑ wø töng-ɑ wɑ̈g kì Suur, mɑ́ e ɑ́dɑ jɑmmì mɑ ɑ́yëëg wɑ̈g kì yij sɑpïnɑ̀. Kɑ wø óyïddø ki jøbɑng Yëso, ɑbëëd wøn kì kenyɑni ki cyɑ̈ng ɑ́bïryew. Kɑ Pøøl kyëddi yi tyëngɑni kì bɑng møg lïngi gen kì yï Wëy kinni ko kedhi Yerusɑlem. Keny-ɑ ɑ́thumi cyɑ̈nggi wøn kì kenyɑni, ɑdhwödh wøn, kɑ wø lwøøg yi tyëngɑni bënn geki mɑ̈nni gen, kí nyigi gen, gïti kɑ ɑ́wɑ̈dhi wøn ngɑ̈ɑ̈j kɑɑl. Kɑ wø pëgg-ɑ wɑ̈thi cøngi wøn kì thɑ̈ngi nɑɑm omelø, kɑ wø ókwɑ̈jjø, kɑ ri wøn mɑ̈dh wøn. Akɑdhi wøn yij sɑpïnɑ̀, kɑ ge døøg-ɑ kɑ̈lli gen. Keny-ɑ ɑ́rum wøn ki dhwödhø kì Suur ki sɑpïnɑ̀, ɑwɑ̈dhi wøn Tølemɑis. Amɑ̈dhi wøn ki tyëng-ɑ ɑ́yïëy, kɑ wø orïïjø ki gen ki cyɑ̈ng ɑ́kyel. Dhuki ɑdhwödh wøn, kɑ wø kedh-ɑ Kɑysɑriyɑ̀. Akedhi wøn gøl Pïlïp, jɑl-ɑ nyi pwönyi wöndøj, kɑ wø obëëdø kì bute. Pïlïp bɑ ɑ́kyel kì kelli ɑ́bïryew. O yïe ɑ́dɑ nyige wojur ɑ́ngwen mø nyi töngø. Keny-ɑ ɑ́rum wøn ki bëëdø ki cyɑ̈ng mø nøg, ɑbëën jɑltöng me kɑ̈ɑ̈l Yeudiyɑ̀, me cwøl ɑ́ Agɑbøs. Kɑ bï-ɑ yï wøn, ɑkwɑnye wëni Pøøl, kɑ tyelle kí cingge twöje, kɑ okööbø kinni, “Wëykwërø okööbø kinni, ‘Wïi wëëni men, ótwöj kinni, yi Yeud kì Yerusɑlem, kɑ cïb cinggi tyëngpɑth ki Yeud.” Keny-ɑ ɑ́lïngi wøn møgɑni, wøki tyëng-ɑ kenyɑni, ɑkwɑjji wøn Pøøl kinni cöge e pɑ kedhi Yerusɑlem. Kɑ Pøøl ólöggø kinni, “Á ngø ɑ gwøg yi wun kinnï, ɑ cöd wun pyëwɑ ki ywøg? Riɑ tyeeny yɑn kipe mɑgø, cɑgg ɑ́ kipe thøø kì Yerusɑlem kiper nyingi Wë Yëso.” Keny-ɑ ɑ́dhɑ̈le jogø, ɑkud wøn, kɑ wø okööbø kinni, “Wiy møg-ɑ dwɑddi yi Wë gwøg.” Bɑng cyɑ̈ng mø nøg, ɑcøng wøn jɑmmì, kɑ wø kedh-ɑ Yerusɑlem. Kɑ wø lwøøg yi kwï jøbɑng Yëso kì Kɑysɑriyɑ̀, kɑ wø kïdhi gen gøl Menɑsøn jɑl Kobros, o wø bëëd wøn kì gøle. Jɑlɑni bɑ ɑ́kyel kì kelli jøbɑng Yëso mø tyeli mɑl. Keny-ɑ ɑ́wɑ̈dhi wøn Yerusɑlem, kɑ wø pɑɑr yöö yi tyëng-ɑ ɑ́yïëy ki medi pëthi gen. Dhuki ɑkedhi wøn be yïddø ki Yɑgob wøki Pøøl, o jøgdøngø bënn ɑ́bëëd ge nud kì kenyɑni. Keny-ɑ ɑ́rume mɑ̈dhi gïn, ɑlwøbe kwøbbi gïg-ɑ ɑ́gwøg yi Jwøk kì kelli jurrì bënn. Keny-ɑ ɑ́lïngi gen møgɑni, ɑpwøj gen Jwøk. Kɑ Pøøl köbbi gen kinni, “Yïn ɑ ómï wøn, yï ɑ́lïdhi ki ji-ɑ ɑ́yïëy gɑ ɑ́lïp mø ngenyø kì kelli Yeud, ge nudd ge mɑ̈gø ki menteg kì ri Ciggi Mosɑ̀. O jiɑni ɑ́lïng kinni i yï köbb-ɑ Yeud møg-ɑ bëëdø kì pödhh-ɑ kyeelø bënn kinni, i wiy gen mïdhi Ciggi Mosɑ̀, i kɑ ge kyëddi yi yïn kinni, wɑ̈ddi gen ko ngøl, kɑ kwöng ko mïdhi gen. Á gïn ɑ gwøg ɑnɑn? Mɑ́ bëëní ólïngi yi gen ceth. Anɑn gwøg gïn-ɑ köbbi yïn yi wøn. Yï wøn dɑ jøg ɑ́ngwen mɑ ɑ́köngi. Kɑ̈l jøgɑni, kɑ wu göög wun ki guöög dhïwø, kɑ wïj köngi gen cool, o wɑ̈thi gen lyel gen. Codhe, o yod yi teedø bëne kinni møg-ɑ ɑ́lïngi yi gen kì rií pɑth ki dyër; o Ciggi Mosɑ̀ omïdhø yi yïn ceth. De tyëngpɑth ki Yeud møg-ɑ ɑ́yïëy, ge ɑ́gwëdi yi wøn ki møg-ɑ ɑ́tyëg yi wøn kinni, ge ko cyɑ̈ɑ̈m ki gëdhh-ɑ ngɑ̈lli ngïjji jwögg; kɑ ge ko cyɑ̈ɑ̈m ki remø geki gïn-ɑ ceg ki twijø; kɑ dhɑnhø ko niin ki ngɑn nuti nywøøm gen ri gen.” Codhe, ɑkɑ̈ɑ̈l jøgɑni yi Pøøl, dhuki ɑgwøg gen guöög dhïwø, kɑ Pøøl kedh-ɑ Kengø be ngɑ̈ji bøli keny-ɑ óthumi cyɑ̈ngg-ɑ kwër gen ri gen, o ge muuj gen bënn ki gëdhhi wɑ̈thi kwöng. Keny-ɑ ɑ́kømi cyɑ̈ng ɑ́bïryew møg-ɑ ɑ́kwɑn ki thumø, ɑliidh Pøøl kì Kengø yi Yeud møg-ɑ kɑ̈ɑ̈l Ásiyɑ̀. Atug teedø bëne yi gen. Amɑg ge gøn, ge óryeerø kinni, “Wun ɑ jø Isrɑil, kønyu wøn! Jɑlɑni èn, eni jɑl-ɑ nyi pwönyi teedø kì yethi kɑ̈jj bënn ki kwøb mø rënyi juree, kí Ciggi Mosɑ̀, kí Kengø men. Kɑ kɑ̈n-ɑ Kengø ki tyëng Yönɑn, kɑ kej kwër men bwöl yi en.” (Ge ɑ́kööb kinøw, mɑ́ Terøpimøs jɑl Epɑsos ɑ́lidh yi gen cøn, e ócyɑ̈dhø geki Pøøl kì kɑɑlɑni, o ge ɑ́rum kinni, i jɑlɑni ókɑ̈ɑ̈l yij Kengø yi Pøøl.) Codhe, ɑtug kɑɑlɑni bëne, ɑmɑɑg Pøøl yi gen, kɑ gø ywɑɑj gen wɑ̈g kì yij Kengø. Kɑ dhø Kengø jwɑn gen ki cyëgø. Kɑ dwɑddi nɑ̈gø yi gen, ɑwɑ̈dhi wöödø yï jɑngi kɑtïbɑ̀ mi Römɑ̀ kinni, i ɑgwɑg me dwøng tugø ki Yerusɑlem bëne. Ajwɑne kɑ̈bbø ki jøliny, kí dhɑbïdh, møg rengi kej ɑgwɑg. Kɑ teedø ówïyø pwödi Pøøl, keny-ɑ ɑ́lidh gen jɑngi kɑtïbɑ̀ geki jøliny. Abëën jɑngi dej menɑni, kɑ okööbø kinni mɑɑg Pøøl, kɑ twöj ki ɑ́cwecwel ɑ́ryew. Apëjje ki mɑ yinge men, ki gïn-ɑ gwøøg en. Kɑ kwï teedø óryeerø, ge wɑng-ɑ gïjø megø, o møøgø ryeer, ge wɑng-ɑ gïn-ɑ kyeelø. Keny-ɑ ɑ́dhɑ̈li tyelli kwøbbɑni ki yodø yi en, kì bɑng ɑgwɑngɑni, ɑkööbe kinni kïdhi ønbɑ̈r. Keny-ɑ ɑ́wɑ̈dhi gen kej pɑ̈ltyel, ɑbyeel Pøøl mɑl, yi jøliny kipe e ónyïɑ̈g yi teedø, mɑ́ teenɑni lug-ɑ́ɑ̀ bɑng gen ge óryeerø kinni, “Nɑ̈gu en!” Keny-ɑ ɑ́kømi Pøøl kedhi yij ønbɑ̈r, ɑköbbe jɑngi kɑtïbɑ̀ kinni, “Yï óyïëy köbbø yi yɑn ki gïjø megø?” Kɑ ópëjjø kinni, “Dhø Yönɑn ngɑ̈nyi yi yïn? Yï pɑth ki wɑ̈d Rïp men-ɑ ɑ́cer tug ki ɑgwɑg, kɑ pëjj-ɑ pɑ̈l ki ɑ́muddi ji gɑ ɑ́lïp ɑ́ngwen?” Alöggi Pøøl kinni, “Yɑ bɑ Yeudì, jɑl Tɑrsos kì myërri Kilikiyɑ̀; yɑ bɑ jɑl kɑɑl me pere teg. Wiy yɑ köbbɑ teedø.” Kɑ jɑlɑni oyïëyø, ɑcungi Pøøl kì kömi pɑ̈ltyel, kɑ teedø kyëdde ki cinge. Kɑ piny ceg-ɑ ì dïw, ɑköbbe teedø ki dhøg Ibru kinni, “Nyiimïɑ kí wëëgɑ, lïngu møg-ɑ gøny yi yɑn kì bøli wun.” Keny-ɑ ɑ́lïngii yi gen kinni 'kööb-ɑ dhøg Ibru ki gen, ɑkud gen, kɑ okööbø kinni, “Yɑ bɑ Yeudì, yɑ ɑ́nywøl-ɑ Tɑrsos kì Kilikiyɑ̀, o yɑ ɑ́pwönyi kì kɑɑl keny yi Gɑmɑliel, ki Ciggi kweyyee ceth, o pyëwɑ ɑ́ying-ɑ mɑl kipe gwøøg Jwøk ni kɑ̀ bëëd pëthi wun bënn dicyɑ̈ngtïn. Yɑ ɑ́bëëd yɑ guud-ɑ wɑɑng Yöö men gïti thøø; kɑ jøg-ɑ cwøw kí tyëng-ɑ mɑ̈nn nyi mɑgɑ, kɑ ge nyi leengɑ ød mɑg. O yɑ bɑ ɑcwɑg yi Ókwër-ɑ Dwøng kí jøgdøngø bënn kipe kwøbbɑni. Bɑ gen ɑ ɑ́nëngi yɑn ki wɑ̈j møg-ɑ ɑ́muujɑ wɑddee møg-ɑ bɑ Yeud kì Dimɑceg; ɑkedhɑ be mɑgi tyëng-ɑ ɑ́yïëy ki Yuuɑni, o ge kɑ̈ɑ̈l-ɑ Yerusɑlem, gɑ ɑtwöj, o ge cɑy. “Kɑ yɑ cïm-ɑ yuuɑ. Keny-ɑ ɑ́cyɑ̈ngɑ ki Dimɑceg, piny bɑ dicɑ̈ng, ɑcɑɑr yɑn yi cɑr me dwøng me kɑ̈ɑ̈l mɑl, ɑpɑ̈ɑ̈dhɑ, kɑ yɑ olïngø ki cwɑg mø köbbi yɑn kinni, ‘Cɑul, Cɑul! Ede wɑngɑ ɑ guudií?” Kɑ yɑ ólöggø kinni, ‘Yïn ɑ́ men, Wuö?’ Kɑ yɑ köbbe kinni, ‘Yɑ bɑ Yëso jɑl Nɑdhɑreth, ngɑn-ɑ wɑngí cuulø ki en.’ Jøg-ɑ cyɑ̈dhi ki yɑn, cɑrɑni ɑ́lidh yi gen, de cwɑggi ngɑn-ɑ köbbi yɑn nuti lïngi gen. Kɑ yɑ okööbø kinni, ‘Gwøgɑ ngø, Wuö?’ Kɑ yɑ köbbi yi Wë kinni, “Dhwöödh, kɑ yï kedhí Dimɑceg. Kì kunɑni yï óköbbi ki jɑmmì bënn møg-ɑ ɑ́rum ki pyëlø, gɑ møg-ɑ ógwøg yi yïn.’ Nyingɑ ɑ́cøør yi tɑri cɑrɑni, ɑpeej yɑn ki cingɑ yi jøg-ɑ ɑ́cyɑ̈dhi ki yɑn, kɑ yɑ wɑ̈dh-ɑ Dimɑceg. “Kɑ jɑl megø me cwøl ɑ́ Anɑniyɑ̀, jɑl me wør Jwøk me mïdhi Ciggi Mosɑ̀, o per døøje nyii kømmø yi Yeud bënn møg-ɑ bëëdø kì kɑɑlɑni, bï-ɑ yïɑ. Kɑ ócungø kì butɑ, kɑ yɑ köbbe kinni, ‘Cɑul ómïɑ, døøg be nënni.’ Kɑ kì bøli kenyɑni ceth, ɑdøøgɑ be nënni, kɑ jɑlɑni lidh yi yɑn. Kɑ okööbø kinni, ‘Yï ɑ́yieny yi Jwøøg kweyyee, o møg-ɑ dwɑddi yi en yod yi yïn, o wøm-ɑ tir men-ɑ mee, lidh yi yïn; o møg-ɑ kɑ̈ɑ̈l dhøge lïngi yi yïn. Mɑ́ yï óbëëd yïn ɑ́ cwɑ̈ge kì bøli teedø bëne, kipe møg-ɑ ɑ́lidh yi yïn geki møg-ɑ ɑ́lïngi yi yïn. De ɑnɑn, yïde ɑ cöngí rií? Dhwödhí mɑl, kɑ yï jwɑ̈ɑ̈g ki nyinge, o orøgí lwöög wɑ̈g kɑ̀ kwɑjjií.’ “Kɑ yɑ døøg-ɑ Yerusɑlem. O kɑ̈ng-ɑ ɑ́bëëdɑ yɑ ókwɑ̈jjø kì Kengø, ɑcɑ̈rri yɑn; kɑ Wë lidhɑ, e okööbø ki yɑn kinni, ‘Pyeew, jwɑní wɑ̈g kì Yerusɑlem, mɑ́ ge pɑ yïëy ki møg-ɑ óthyer yi yïn kiperɑ.’ Akööbɑ kinni, ‘Wuö, gen kiri gen, ge ngɑ̈ny wøw kinni, tyëng-ɑ ɑ́yïëy yïn kì yethi sinɑgøgg bënn ɑ́mɑg yi yɑn, kɑ ge pwöd yi yɑn. Keny-ɑ ɑ́dëëm remi Istïpen piny, eni ngɑn-ɑ ɑ́bëëd ɑ́ cwɑ̈gí, yɑ ɑ́bëëd yɑ nud kì kenyɑni thyew, yɑ yïëyø ki nɑ̈gii. O bɑ yɑn ɑ ɑ́kor ógudhi tyëng-ɑ ɑ́nɑ̈gii.’ Kɑ yɑ köbbe kinni, ‘Dhwöödh, yï óörɑ kun me lɑ̈wi; yï tyëngpɑth ki Yeud.’ ” Kwøbbi Pøøl ɑ́bëëd ge olïngø yi teedø kidøøj gïti kɑ ɑ́kwøbe møgɑni, codhe ɑryeer gen kinni, “Nɑ̈gu jɑl ni menɑni pɑ døøj ki nënnì!” Kɑ ge pëgg-ɑ be ryeerø, ge bɑ̈dd-ɑ ógudhi gen, o ge kwödd-ɑ mɑl ki tør, Akööb jɑngi kɑtïbɑ̀ kinni kïdhi Pøøl ønbɑ̈r, kɑ okööbø kinni, i rɑng ki pwödø, o gïn-ɑ pere mɑɑnii yi teedø, ɑ ryeer gen yod. De kɑ ɑ́rume twöjø kɑ rïïj piny, ɑpyëje dhɑbïnh-ɑ cungi kì kenyɑni kinni, “Bɑ cigg kì yï wun kinni, dhɑnhø ɑ́ ngeti Römɑ̀ nyii pwödø, e gønye nuti lidhø?” Keny-ɑ ɑ́lïngi møgɑni yi dhɑbïnhɑni, ɑkedhe yï jɑngi kɑtïbɑ̀, kɑ gø köbbe kinni, “Á gïn ɑ kømi gwøgø yi yïn? Jɑlɑni bɑ ngeti Römɑ̀.” Codhe, ɑbëën jɑngi kɑtïbɑ̀, kɑ gø köbbe kinni, “Köbbí yɑn, yï bɑ ngeti Römɑ̀?” Kɑ oyïëyø kinni, “Ngee.” Kɑ jɑngi kɑtïbɑ̀ ólöggø kinni, “Yɑ ɑ́muuj-ɑ ngyëny mø gïïr, ɑgöögɑ ki ngeti Römɑ̀.” Kɑ Pøøl ólöggø kinni, “De yɑ ɑ́nywøl yɑn ɑ́ ngeti Römɑ̀!” Kɑ tyëng-ɑ ɑ́kømii pwödø odhwödhø kì bute kì bøli kenyɑni ceth. Keny-ɑ ɑ́yodii yi jɑngi kɑtïbɑ̀ kinni, Pøøl bɑ ngeti Römɑ̀, ɑbwøge kipe kɑ ɑ́mɑge gøn kɑ gø twöje ki ɑ́cwecwel. Dhuki kì mwøl, kɑ jɑggi ókwër geki jɑggi burø cwööl yi jɑngi kɑtïbɑ̀, kipe kinni o yode gïn-ɑ pere gøøny Pøøl yi Yeud. Apɑ̈de töjji Pøøl, kɑ gø kïdhe bøli buri gen. Kɑ Pøøl ti-ɑ nenni yï tyëng-ɑ burø, ɑkööbe kinni, “Nyiimïɑ, yɑ ɑ́cyɑ̈dh ɑ bøli Jwøk ki tɑri pyëwɑ gïti dicyɑ̈ngtïn.” Kɑ Ókwër-ɑ Dwøng, en ɑ Anɑniyɑ̀, tyëng-ɑ cungi kì bute köbbe kinni gøj kì dhøge. Kɑ köbbi yi Pøøl kinni, “Yï ógøj yi Jwøk, yïn ɑ ni dörø men-ɑ ógøjø ki böyø me tɑr èn; yï ying-ɑ keny kɑ per cɑyi yɑn, yï ködd-ɑ kömi cigg, o ɑnɑn yï yöd yï pyem-ɑ cigg, kɑ̀ kööb kinni, gøøj yɑn!” Kɑ tyëng-ɑ cungi kì kenyɑni okööbø kinni, “Yï yɑny-ɑ Ókwër-ɑ Dwøng men-ɑ ɑ́cïb yi Jwøk?” Kɑ Pøøl ólöggø kinni, “Ábëëd e kwïj yi yɑn, nyiimïɑ kinni, bɑ Ókwër-ɑ Dwøng, mɑ́ e bɑ ɑgwed kinni, ‘Yï ko nyi kööb ki gïnrɑj kì ri jɑngi jur wun.’ ” De kɑ ɑ́lïdhi Pøøl kinni, kwï ji bɑ Jøsɑduk o jøg møøgø bɑ Jøpɑresì, ɑryeere kì yij burø kinni, “Nyiimïɑ, yɑ bɑ Jɑlpɑresì wɑ̈d Jɑlpɑresì, o bɑ kipe kwøbb-ɑ ngɑ̈dhi yi wɑ geki dwöögi tyëngthøø mɑl, ɑ kɑ̈ɑ̈l yɑn be gøny dicyɑ̈ngtïn.” Keny-ɑ ɑ́kwøbe møgɑni, kɑ Jøsɑduk, dhøggi gen óbɑ̈nnø kì Jøpɑresì, kɑ burø ree pɑ̈nge. Mɑ́ Jøsɑduk nyii kööbø i bong dwöög mɑl kì yij thøø, o bong wëywödd wɑlɑ̀ wëy møøgø, de møgɑni bënn bɑ ɑyïëy yi Jøpɑresì, kinni, i ge nud. Kɑ ɑwøw me dwøng otugø, kɑ kwï jøpwönyi Cigg kì wïj tuung Jøpɑresì dhwödh-ɑ mɑl, kɑ ge okööbø kinni, “Bong gïnrɑj mɑ ɑ́yod yi wøn ki yï jɑɑl, óbëëdø e óköbbø kidyër yi wëy wɑlɑ̀ wëywödø.” Kɑ ɑgwɑg ceg-ɑ døngø ki mendwøng, ɑbwøg jɑngi kɑtïbɑ̀ kinni, Pøøl bɑ men cöddi yi gen. Kɑ jøliny köbbe kinni kwɑny gen Pøøl kì cinggi teenɑni, kɑ kïdhi ønbɑ̈r. Cyɑ̈ngɑni ceth kì wɑ̈r, ɑ ɑ́cwöb Wë kì bøli Pøøl, kɑ okööbø kinni, “Cwed pyëwí! Yï ókööbø thyew yïn ɑ́ cwɑ̈gɑ kì Römɑ̀, ni kɑ ɑ́kööb kì Yerusɑlem.” Keny-ɑ ɑ́ru wøw, ɑnywɑg Yeud dhøggi gen, kɑ ge óköngø kinni, ge pɑ cyɑ̈mø wɑlɑ̀ ge pɑ mɑ̈dhø gïti keny-ɑ órum Pøøl ki nɑ̈gø yi gen. Tyëng-ɑ ɑ́nywɑg dhøggi gen, kwɑnni gen bɑ pyɑ̈r ɑ́ngwen wïje nud. Kɑ ge kedh-ɑ yï jɑggi ókwër geki jøgdøngø, kɑ ge okööbø kinni, “Wø ɑ́köngi ki köngi dwøng kinni, wø pɑ wöl bïddø ki gïïpiny, gïti keny-ɑ órum Pøøl ki nɑ̈gø yi wøn. Köbbu jɑngi kɑtïbɑ̀, kinni wu dwɑdd-ɑ ti gøøny Pøøl ki lidhø, kɑ wiy gø öre yï wun. Wø óbuddi kì yöö, o ónɑ̈g yi wøn e nuti wɑ̈nhi yï wun.” Alïngi kwøbbi buddi yuu Pøøl yi ókɑ̈n. Akedhe kɑ pödh-ɑ ønbɑ̈r, kɑ Pøøl köbbe. Kɑ ɑlɑthker ɑ́kyel cwøl yi Pøøl, kɑ gø köbbe kinni, “Kïdhí nyelthinh men yï jɑngi kɑtïbɑ̀; dhøge dɑ kwøb ki gøn.” Codhe ɑkɑ̈ɑ̈le gøn, kɑ gø muuje jɑngi kɑtïbɑ̀, kɑ okööbø kinni, “Yɑ ɑ́cwøl-ɑ yi Pøøl, jɑl-ɑ bɑ ɑmɑg, ɑkwɑjje yɑn kinni kɑ̈ɑ̈lɑ nyel bølí, i yïe dɑ gïn dwɑdde köbbi yïn.” Amɑɑg nyelɑni kì cinge yi jɑngi kɑtïbɑ̀, ɑkedhi gen wɑ̈yi gen, kɑ gø pyëje kì gød kinni, “Á ngø ɑ dwɑddí köbbi yɑn?” Akööbe kinni, “Yeud dhøggi gen ɑ́nywɑg yi gen kinni o yï kwɑjji yi gen, kinni kïdhi Pøøl burø dhuki, mɑ́ ge dwɑdd-ɑ ti gønye ki lidhø. De yï ko yïëy ki mø gen, mɑ́ ji mø kwɑnni gen bɑ pyɑ̈r ɑ́ngwen wïje nud, obuddø kì yöö, ge rum köngø kinni, ge pɑ cyɑ̈mø wɑlɑ̀ ge pɑ mɑ̈dhø gïti keny-ɑ órum Pøøl ki nɑ̈gø yi gen. De ɑnɑn, ri gen tyeeny gen, ge yïd-ɑ møgí.” Codhe, ɑör nyelɑni wɑ̈g yi jɑngi kɑtïbɑ̀, kɑ gø cege kinni, “Ko di ngɑn köbbi yi yïn kinni, møgɑni ɑ́köbbí yɑn.” Codhe, ɑcwödde ki dhɑbïdhh ɑ́ryew, kɑ gï köbbe kinni, “Kɑ̈bbi wun ki jøliny miy ɑ́ryew møg kedhi Kɑysɑriyɑ̀ kì sɑɑ̀ ɑ́bïngwen tïn kì wɑ̈r, kí jøkyënyì pyɑ̈r ɑ́bïryew, kí yɑy tøngg kwɑnne bɑ miy ɑ́ryew. Thyew nëngu pøøl ki kyënyì møg kïdhii yï modïr Peliks ki tɑrø.” Kɑ ogwëdø ki wɑ̈nyø kinni, “Yïn ɑ modïr Peliks, yɑ mɑ̈dh-ɑ yïn; yɑ Kelɑwdiyøs Lisyɑs. Jɑɑl, ɑ́mɑg yi Yeud, kɑ gø kømi gen nɑ̈gø, kɑ pïïdɑ wøki jøliny, ɑyielɑ en kipe kɑ ɑ́lïngɑ kinni, bɑ ngeti Römɑ̀. Kɑ kïdhɑ bøli buri gen, yɑ dwɑdd-ɑ lïngi gïn-ɑ dwɑddi ge gønyø ki gøn, Kɑ yod yi yɑn kinni, gø gøøny yi gen kɑ per kwøbbi ciggi gen, o gønyɑni pɑth ki men pere cugge ki thøø, wɑlɑ̀ ki mɑgø. Keny-ɑ ɑ́wɑ̈nhi kwøb yïɑ kinni, jɑlɑni ónywɑ̈ggi dhøg, ɑjwɑnɑ en ki ör yïí ceth, kɑ tyëng-ɑ gøønyii ceg yi yɑn, o per gïn-ɑ mɑɑn ge gøn lwøb yi gen kì bølí.” Codhe, kɑ møg-ɑ ɑ́köbbi ɑlɑthkerr yi jɑngi gen gwøg gen, ɑkwɑny gen Pøøl, kɑ gø kïdhi gen Antipɑtris kì wɑ̈r. Dhuki ɑdøøg gen keny-ɑ nyi bëëd yi gen, kɑ jøkyënyì wiy gen, o ge lwøøg ge gøn. Keny-ɑ ɑ́wɑ̈dhi gen Kɑysɑriyɑ̀, kɑ wɑ̈nyø mëggi gen modïr, ɑcïb gen Pøøl bøle thyew, Keny-ɑ ɑ́rum wɑ̈nyø ki rɑngø yi en, ɑpyëje gøn kinni, “Yï bɑ jɑl pönh-ɑ́?” Keny-ɑ yode gøn kinni bɑ jɑl Kilikiyɑ̀, ɑkööbe kinni, “Møgí ólïngi yi yɑn keny-ɑ ówɑ̈nhi tyëng-ɑ ɑ́gøøny yïn.” Kɑ ocïgø kinni kor kì gøldwøng; ɑ bɑ gøl modïr. Bɑng cyɑ̈ng ɑ́bïj ɑ ɑ́bëën Anɑniyɑ̀ Ókwër-ɑ Dwøng kí kwï jøgdøngø, kí cwɑ̈g Tertuløs, ɑkïdhi gen gøøny gen bøli modïr. Keny-ɑ ɑ́rum Pøøl ki cwölø, ɑcɑ̈gi Tertuløs ki gøønyii kinni, “Yïn ɑ modïr Peliks, bɑ rií ɑ ɑ́yïddi wøn ki mër me dwøng, o bɑ yïn ɑ ɑ́tyeny pödhi wøn kì bɑng døøji rummí. O møgɑni ɑ́yïëy yi wøn ki medi pëthi wøn, kì yethi kɑ̈jj bënn, kí bøli kɑ̈jj bënn, kí pwøj mø døngø. Yɑ pɑ dwɑddi mïdhi yïn ki keny me bɑ̈ɑ̈r, de yɑ kwɑjj-ɑ yïn, lïngí møg-ɑ kømmi yi wøn ki yödi pyëwí. Jɑɑl ɑ́yod yi wøn ɑ́ ngɑn nyi tunggi piny, o bɑ ngɑn nyi bɑ̈nni wɑ̈thi Yeud kì kömi piny bëne, o bɑ pënyi ɑkuud jø Nɑdhɑreth. Kengø kiree cem gø obwölø yi en, de ɑ́mɑg yi wøn. Gønye di lidh yi wøn, wø ködd-ɑ kömi ciggi wøn. De Lisyɑs jɑngi kɑtïbɑ̀ ɑ́bï, kɑ gø dwööje wɑ̈g kì cinggi wøn, Kɑ tyëng-ɑ ɑ́gøønyii köbbe kinni i bï gen bølí. Keløg e órɑng yi yïn kirií, tyelli møg-ɑ gøøny wøn en ócuggø yodø yi yïn kì yïe.” Kɑ Yeud órëbø thyew kì ri gøny-ɑ ɑ́gøønyii, kɑ ge oyïëyø kinni, møgɑni bënn bɑ dyër. Kɑ modïr cinge tïnge, e köbb-ɑ Pøøl kinni lögge. Akööbe kinni, “Ngɑ̈nyi yi yɑn kinni, pönhï ɑ́jɑɑg yi yïn ki runn mø gïïr, o riɑ ónyɑg yi yɑn e pyëwɑ pɑ lïngø. Ócuggø yodø yi yïn kinni, bɑ cyɑ̈ng pyɑ̈rø wïdɑ́ryew keti gen ɑ ɑ́pöödh, kër-ɑ ɑ́kedhɑ Yerusɑlem be mɑlli Jwøk, O yɑ nuti yodø yi gen, yɑ opëmø kì ngɑn megø, wɑlɑ̀ yɑ tungg-ɑ teedø kì yij Kengø, wɑlɑ̀ kì sinɑgøgg wɑlɑ̀ kì dïkɑɑl. Møg-ɑ gøøny yɑn yi gen ɑnɑn, pɑ cuggi nyudhi yïn yi gen kinni ge bɑ dyër. Møg-ɑ yïëy yi yɑn kì bølí bɑ kinni: Yɑ nyi mɑll-ɑ Jwøøg kweyyi wøn, ki yuu-ɑ cwølli yi gen, i pɑth ki dyër. De yɑn thyew, yɑ yïëyø ki møg-ɑ bɑ ɑgwed bënn kì yethi Ciggi Mosɑ̀, kí wɑ̈jji jøtöng bënn. Gïn-ɑ ngɑ̈dhɑ kì yï Jwøk, bɑ gøn ɑ ngɑ̈dh yi gen; eni dhwödhi tyëngdøj geki tyëngrijjø kì yij thøø. O riɑ nyi korɑ’ korø ceth, o yɑ bëëdɑ yɑ tir kì yï Jwøk geki bøli teedø. “Kì bɑng kɑ ɑ́bëëd yɑ tøøk kì Yerusɑlem ki runn mø nøg, ɑ ɑ́bëënɑ yɑ bï-ɑ be muuji jur wøn jɑmm-ɑ ɑ́gwɑj geki gëdhhì. Kɑ yɑ yood yij Kengø yi kwï Yeud mø Ásiyɑ̀, yɑ rumø ki kwëri riɑ, o bong ji mɑ ɑ́cyɑ̈dhi ki yɑn, wɑlɑ̀ bong ɑgwɑg mɑ ɑ́tugɑ. Ge di ceg-ɑ bëën bølí be gøønyi yɑn, keløg e dɑ gïn pere gøøny yɑn yi gen, wɑlɑ̀ wiy jøg-ɑ nud kì keny kööb gen, keløg e dɑ gïnrɑj men-ɑ óyodø yi gen kì yïɑ, kɑ ɑ́cungɑ kì bøli burø. De bɑ gïjø ɑ́kyel kete ɑ ɑ́kwøbɑ yɑ óryeerø, kɑ ɑ́yingɑ kelli gen kinni, ‘Bɑ kipe kwøbbi dwöngi tyëngthøø mɑl, ɑ ɑ́kɑ̈ɑ̈l yɑn bøli wun be gøny dicyɑ̈ngtïn.’ ” De Peliks ɑ́bëëd tyelli kwøbbi Yuu Wë ngɑ̈nyi en kidøøj, ɑdɑ̈ɑ̈nge burø, kɑ okööbø kinni, “Keny-ɑ óbëën Lisyɑs, jɑngi kɑtïbɑ̀, gønyí óti yi yɑn ki lidhø.” Codhe ɑköbbe dhɑbïdh kinni, “Koor Pøøl kì ød mɑg, de ko mïdhi ɑ́ ɑmɑg, kɑ mɑ̈dhhe ko nyi mɑ̈ɑ̈n bëën bute, o keløg e dɑ gïn dwɑdde, wiy nyi muujii.” Kì bɑng cyɑ̈ng mø nøg, ɑbëën Peliks geki cyëge Druselɑ̀, ɑ bɑ nyɑɑr Yeud. Kɑ oödø kinni dwɑɑy Pøøl, kɑ ge olïngø kì yïe kɑ̀ lwöbe ki kwøbbi yïëyi Mesiy Yëso. De kɑ ɑ́lwøbe kwøbbi bëëdi ji ge tir, kí kwøbbi mïdhi pëëth geki kwøbbi cɑ́y-ɑ óbï, ɑbwøg Peliks ki mendwøng, kɑ okööbø kinni, “Dhwöödh ɑnɑn, kɑ yï kedh. Yï ódøøgɑ ki cwöölø kì bøli keny-ɑ ólɑ̈nyi wïjɑ.” De Peliks ɑ́dwɑdd-ɑ kinni o di nëngi yi Pøøl ki ngyëny. Bene ɑ bɑnge nyi öde kinni dwɑɑy, o ge nyi wɑ̈ɑ̈j gen. Kɑ keje kwɑny yi Pörkiyøs Pestøs kì bɑng runn ɑ́ryew. Peliks ɑ́dwɑdd-ɑ kinni o pëthi Yeud med gen ki en, ɑwiye Pøøl kì ød mɑg. Keny-ɑ ɑ́wɑ̈dhi Pestøs kɑɑl-ɑ jyɑ̈ɑ̈g yi en, ɑrïïje ki cyɑ̈ng ɑ́dɑ̈g, ɑdhwödhe kì Kɑysɑriyɑ̀, e kedh-ɑ Yerusɑlem. Kɑ pëjji Yeud gøøny gen ki Pøøl köbbi gen Pestøs. Kɑ gø kwɑjji gen, kinni kɑ̈ɑ̈l Yerusɑlem kɑ mëggi gen. Ge ɑ́dwɑdd-ɑ buddø kì yuue kinni o di nɑ̈g yi gen. Alöggi Pestøs kinni, “Pøøl óbëëdø ɑ́ ɑmɑg kì Kɑysɑriyɑ̀, o yɑ ójwɑn døøg kunɑni. Wiy pëjji wun kedhi gen Kɑysɑriyɑ̀ kyeel ki yɑn, o ge gøøny gen jɑlɑni, keløg e dɑ gïnrɑj me gwøøg en.” Keny-ɑ ɑ́rume bëëdø ki cyɑ̈ng ɑ́bïdɑ̈g wɑlɑ̀ cyɑ̈ng pyɑ̈rø, ɑkedhe Kɑysɑriyɑ̀; dhuki ɑpëgge wïj kwøm kì kej gøny, kɑ oödø kinni dwɑɑy Pøøl. Keny-ɑ ɑ́wɑ̈nhi Pøøl, ɑtyegii yi Yeud møg-ɑ kɑ̈ɑ̈l Yerusɑlem. Kɑ ge cïb-ɑ köme ki kwøb mø peeg mø pɑ cuggi nyodhø yi gen kinni ge bɑ dyër. Kɑ Pøøl okööbø, e nyɑg-ɑ ree kinni, “Ciggi Yeud nuti pɑ̈nyi yɑn ki pyemø, wɑlɑ̀ Kengø nuti bwööl yɑn, wɑlɑ̀ Kɑysɑr nuti yɑɑny yɑn.” Pestøs ɑ́dwɑdd-ɑ gwøg ki gïn mïni pëthi Yeud ki en, ɑköbbe Pøøl kinni, “Yï óyïëy kedhi Yerusɑlem, o gïg-ɑ gøøny yïn lidh kì kunɑni kì bølɑ?” Kɑ Pøøl ólöggø kinni, “Bong gïnrɑj mɑ ɑ́göggɑ Yeud, o møgɑni ngɑ̈nyi yi yïn thyew. Yɑ ying-ɑ buri Kɑysɑr, o bɑ bøli Kɑysɑr ɑ liidh gønyɑ. Keløg Cigg pyeem yɑn kɑ yɑ ogöögø ki gïn pere cuggɑ thøø, yɑ pɑ cuggi kwɑ̈jjø kinni wiy yɑn. De keløg e bong dyër kì ri møg-ɑ gøøny yɑn yi gen, bong dhɑnhø me cuggi cïbi yɑn cinggi gen. Kïdhi gønyɑ bøli Kɑysɑr.” Keny-ɑ ɑ́rum møgɑni ki kømmø yi Pestøs geki jø tøg bure, ɑlögge kinni, “Yï dwɑdd-ɑ kïdhi bøli Kɑysɑr ki gønyí. Døj, yï kedh-ɑ bøli Kɑysɑr ceth.” Kɑ cyɑ̈ng mø nøg opödhø, ɑwɑ̈dhi Rɑ̈dh Agripɑ̀ Kɑysɑriyɑ̀ geki Bernikɑ̀, ge bï-ɑ be mɑ̈dhi Pestøs. Kɑ ge kɑl-ɑ bëëdø kì kenyɑni ki cyɑ̈ng mø ngenyø, ɑcïb gøøny Pøøl bøli rɑ̈dh yi Pestøs; ɑ́kööb kinni, “Dɑ jɑl megø mɑ ɑ́wiy ɑ́ ɑmɑg yi Peliks. O keny-ɑ ɑ́yingɑ Yerusɑlem, yɑ ɑ́gönyi yi jɑggi ókwër geki jøgdøngi Yeud kipere, ge ɑ́dwɑdd-ɑ kuumii. Kɑ ge köbbɑ kinni, bɑ kwöng kì yï tyëng Römɑ̀, kinni dhɑnhø pɑ nyi cɑy ki thøø, de nyi ceg-ɑ gøny geki tyëng-ɑ gøønyii, o wiy løøge møg-ɑ per gen gøønyii yi gen. Kì cyɑ̈ng-ɑ ɑ́rïïj gen kì keny, ɑjwɑnɑ pëggi wïj kwøm kì kej gøny. Kɑ yɑ oödø kinni dwɑɑy jɑlɑni. Kɑ tyëng-ɑ gøønyii dhwödh-ɑ mɑl ge gøøny-ɑ gøn, de bong kwøb mø rijjø mø ni møg-ɑ ɑ́rømmi yi yɑn mɑ ɑ́kwøb yi gen kì ri møg-ɑ gøønyii. De ge ɑ́yödi be pëmø ki kwøb møøgø kì ri kwööng gen geki kwøbbi ngɑn me cwøl ɑ́ Yëso me thøø, me pere kømmi yi Pøøl kinni, i nudd e onëënø. Kɑ ɑ́cungi wïjɑ yi kwøbbɑni, ɑpyëjɑ Pøøl men-ɑ óyïëye kedhi Yerusɑlem, o gønye lidh kì kunɑni. De Pøøl ɑ́kööb ce kïdhi gønye bøli Kɑysɑr, ɑkööbɑ kinni, mïdhi gïti keny-ɑ óörɑ en Kɑysɑr.” Aköbbi Pestøs yi Agripɑ̀ kinni, “Yɑ dwɑdd-ɑ lïngi kwøbbi jɑlɑni thyew.” Kɑ Pestøs okööbø kinni, “Møge ólïngi yi yïn dhuki.” Dhuki, ɑbëën Agripɑ̀ geki Bernikɑ̀ ge óngwønø ki ngwøni dwøng, kɑ ge pödh-ɑ øn-ɑ nyi lïngi kwøb kyeel ki jyɑ̈ggi liny, kí jøgdøngi kɑɑlɑni, kɑ Pestøs oödø kinni kɑ̈ɑ̈l Pøøl, kɑ kɑ̈ɑ̈l. Akööb Pestøs kinni, “Yïn ɑ Rɑ̈dh Agripɑ̀, wuki teen-ɑ ying keny, jɑl-ɑ nenni yi wun ɑnɑn, ɑ́gøøny-ɑ yi Yeud bënn kì Yerusɑlem kí keny thyew; yɑ ɑ́gönyi yi gen ge óryeerø kinni, i jɑlɑni pɑ døøj ki nënnì. De ɑ́yod yi yɑn kinni, bong gïjø mɑ ɑ́gwøge me pere cugge thøø. Kɑ okööbø ce kïdhi gønye bøli Kɑysɑr; kɑ yɑ okööbø kinni, óörɑ yïe ceth. De bong kwøb mɑ dyër mɑ ɑ́yod yi yɑn, møg gweedɑ piny ki pere. Bene ɑ kɑ̈ɑ̈lɑ en bølí, yïn ɑ Rɑ̈dh Agripɑ̀, kì bøli ji møg bënn, kipe kinni o rɑng yi wɑ, o yɑ yïddɑ ki møg gwedɑ. Kì yïɑ, nënni e nɑ dhëëgø, keløg ɑmɑg oörø, o gïn-ɑ pere ógøønyii nuti nyodhø.” Aköbbi Pøøl yi Agripɑ̀ kinni, “Lwøb kwøbbí.” Kɑ Pøøl cinge tïnge mɑl, kɑ gøny lwøbe kinni, “Yïn ɑ Rɑ̈dh Agripɑ̀, yɑ orumø kinni, miɑ bɑ gyëdh kipe kɑ̀ bëënɑ bølí be nyɑgi riɑ dicyɑ̈ngtïn, kipe møg-ɑ gøøny yɑn bënn yi Yeud. Mɑ́ kwööng Yeud ngɑ̈nyi yi yïn kidøøj geki møg-ɑ nyi pemmi yi gen, yɑ kwɑjj-ɑ yïn; lïngí møgɑ ki medi pyëwí. “Cɑg kì tyeli mɑl, kër-ɑ ɑ́wönɑ yɑ thiinh kì kelli jur wøn kì Yerusɑlem, bëëdɑ ngɑ̈nyi yi Yeud bënn. Yɑ ɑ́bëëd yɑ bɑ Jɑlpɑresì, ɑkun-ɑ nyi mïdhi møg-ɑ nyi yïëy yi wøn ki menteg. Møgɑni ngɑ̈nyi yi gen, o ócuggø kwøbø yi gen keløg ɑ́ gïn dwɑddi yi gen. De ɑnɑn, yɑ ying-ɑ burø kipe kɑ ngɑ̈dhɑ møg-ɑ ɑ́kwöng yi Jwøk kipe kweyyi wøn. O bene møgɑni ɑ ngɑ̈dh yi jur wøn bëne, ɑ́ wɑ̈thi kɑ̈llì pyɑ̈rø wïdɑ́ryew. Bɑ per ngɑ̈ɑ̈dhø menɑni ɑ gøøny yɑn yi Yeud, yïn ɑ rɑ̈dh. Wude ɑ pɑ yïëy wun kinni, tyëngthøø nyii tugø yi Jwøk? “O men-ɑ́ yɑn kiriɑ, yɑ ɑ́bëëd yɑ tyer-ɑ lɑ̈ɑ̈nyi nyingi Yëso jɑl Nɑdhɑreth, kɑ riɑ pɑ̈nyɑ ki mendwøng. O møgɑni ɑ́gwøgɑ ceth kì Yerusɑlem. Yɑ ɑ́nëngi ki tegø yi jɑggi ókwër, men-ɑ ɑ́mɑ̈ɑ̈gɑ ki jii Jwøk mø ngenyø, kɑ ge leengɑ ød mɑg, o keny-ɑ ɑ́nɑ̈ɑ̈g gen, yɑ ɑ́bëëd yɑ yïëyø ki nɑ̈gi gen. Kɑ nyingi gen guud yi yɑn kì yethi sinɑgøgg bënn, kɑ ge nyi cirɑ kinni wiy gen yïëyø mi gen. Kɑ pyëwɑ ti-ɑ rënyø ki gen ki mendwøng, kɑ yɑ kedh-ɑ kɑ̈dd-ɑ pɑth yɑ órïngø kì bɑng gen. “Kɑ yɑ kedh-ɑ Dimɑceg, yɑ ör-ɑ yi jɑggi ókwër, e yïɑ dɑ tegø men-ɑ ɑ́mëggi yɑn yi gen kipe gwøngɑni. Kì dicɑ̈ng wø ying-ɑ kö yöö, yïn ɑ rɑ̈dh, ɑ ɑ́lïdhɑ ki cɑr, e kɑ̈ɑ̈l-ɑ mɑl, tɑre lod-ɑ cɑ̈ng, yɑ wen en, wøki tyëng-ɑ cyɑ̈dhi ki yɑn. Kɑ wø ópɑ̈ɑ̈dhø wø bënn, ɑlïngɑ ki cwɑg, ge köbb-ɑ yɑn ki dhøg Ibru kinni, ‘Cɑul, Cɑul! Yïde ɑ cuul wɑngí ki yɑn? Yï nyïɑ̈gg-ɑ rií kɑ̀ gwëëj ni wɑɑdh pur men nyi gwej lonh-ɑ bedh men-ɑ cørrii yi wɑ̈n.’ Akööbɑ kinni, ‘Yï bɑ men, Wuö?’ Kɑ Wë ólöggø kinni, ‘Yɑ bɑ Yëso, ngɑn-ɑ wɑngí cuulø ki en. De dhwödhí kömi tyellí, mɑ́ yɑ ɑ́cwöb kì bølí kɑ per kinni, o yï løgɑ ngɑn göggi yɑn, o yï bëëd yï bɑ cwɑ̈gɑ kipe linh-ɑ ɑ́liidh yɑn geki møg-ɑ ócigi lidhø yi yïn kenyi cwöbɑ kì bølí dhuki megø. O yï óyiel yi yɑn kì cinggi Yeud geki cinggi tyëngpɑth møg-ɑ yï gen óörɑ yïn. Yï óörɑ be yiebi nyingi gen, o muudhø wiy yi gen, o ge dwöög gen yij cɑr; o ge dwöög gen wɑ̈g kì cingi Cethɑn, ge kedh-ɑ yï Jwøk; o ge yïddi gen ki dwöögi lɑ́ɑ̀w piny kipe orøg, o ge yïddi gen ki kej gen kì kelli tyëng kwërø.’ “Yïn ɑ Rɑ̈dh Agripɑ̀, yɑ nuti bɑ̈nyø ki møg-ɑ ɑ́cɑ̈rri yɑn ge kɑ̈ɑ̈l-ɑ mɑl. Kɑ kwøbbɑni kwøngɑ ki pwönyi tyëng-ɑ ying Dimɑceg, kɑ ge pwönyɑ kì Yerusɑlem geki Yeudiyɑ̀ bëne, kí kelli tyëngpɑth ki Yeud thyew; ge köbbɑ’ kinni, yewi gen, kɑ ri gen lugi gen Jwøk, kɑ ge göög gen ki gïgdøj møg nyodh yewø. Bɑ kipe møgɑni ɑ ɑ́mɑɑg yɑn yi Yeud kì yij Kengø, kɑ yɑ kømi nɑ̈gø yi gen. Gïti dicyɑ̈ngtïn, yɑ nyi køny-ɑ yi Jwøk, ɑ cungɑ kì keny èn, kipe kinni o yɑ köbbɑ møgɑni teedø bëne; othønhø, kí tyëngdøngø. O møg-ɑ kømmɑ bɑ møg-ɑ ɑ́kømmi yi Mosɑ̀ geki jøtöng, kinni Mesiy órɑngø, o óbëëd ɑ́ en ɑ ókwöngi dhwödhø kì yij thøø; o kwøbbi cɑr-ɑ yïëdø pwönyi Yeud geki jurr-ɑ kyeelø bënn.” E Pøøl nudd e nyɑg-ɑ ree kinøw, ɑryeer Pestøs kì wïje kinni, “Pøøl, wïjí dɑ ɑ́nɑ̈gø! Wïjí ɑ́rënyi yi döngi dïdí!” Alöggi Pøøl kinni, “Yïn ɑ modïr Pestøs, yɑ óbëëdø wïjɑ dɑ ɑ́nɑ̈gø kidï, yɑ kømm-ɑ dyër? O men-ɑ́ rɑ̈nh-ɑ köbbɑ møgɑni ɑnɑn e yijɑ bong ɑ́dud, gïgɑni bënn ngɑ̈nyi yi en, o yɑ orumø ceth kinni bong gïn nuti lïng en kì ri møgɑni, mɑ́ e pɑth ki gød ɑ ɑ́cwöb gen. Yïn ɑ Rɑ̈dh Agripɑ̀, kwøbbi jøtöng ɑ́yïëy yi yïn? Ngɑ̈nyi yi yɑn kinni, yï yïëyø.” Aköbbi Pøøl yi Agripɑ̀ kinni, “Yï køm-ɑ yɑ jwɑnø ki løg Ngeti Mesiy kì keny me nøg?” Alöggi Pøøl kinni, “Cɑgg ɑ́ keny me nøg wɑlɑ̀ keny me bɑ̈ɑ̈r; gïn-ɑ kwɑjjɑ kì yï Jwøk kiperí, wuki tyëng-ɑ lïngi møgɑ dicyɑ̈ngtïn, bɑ kinni o wu göög wun ni yɑn, dɑ́ ɑ́cwecwel møg keti gen, ɑ pɑ dwɑddɑ kiper wun!” Codhe, ɑdhwödhi rɑ̈dh mɑl geki modïr, kí Bernikɑ̀, kí tyëng-ɑ ɑ́bëëd kì kenyɑni ki gen, ɑkedh gen ge okööbø kinni, “Jɑlɑni bong gïjø mɑ ɑ́gwøge me pere cugge thøø, wɑlɑ̀ me pere mɑgii.” Aköbbi Pestøs yi Agripɑ̀ kinni, “Keløg jɑlɑni pɑ di tyer kïdhi bøli Kɑysɑr, di ceg kɑ gønyø.” Keny-ɑ ɑ́rum kwøbbɑni ki tyëgø kinni, wø bɑ møg kedhi Itɑliyɑ̀ ki sɑpïnɑ̀, ɑcïb Pøøl geki ɑmɑgg møøgø cingi dhɑbïdh me cwøl ɑ́ Juliyøs, kì yij kɑtïbɑ̀ mi Rɑ̈nhdwøng. Adhwödh wøn ki sɑpïnɑ̀ me kɑ̈ɑ̈l Adrɑmit e kedh-ɑ dhøøwɑ̈dhhi Ásiyɑ̀. Akɑdhi wøn yij sɑpïnɑ̀, wøki Aristɑrkøs jɑl Mɑkdöniyɑ̀ me kɑ̈ɑ̈l Tesɑlonikɑ̀. Dhuki, kɑ wø wɑ̈dh-ɑ Sïdön, kɑ Pøøl göggi ki gïndøj yi Juliyøs, ɑwiye gøn o kedhe yï mɑ̈dhhe, o køny yi gen. Kɑ wø odhwödhø kì kenyɑni ki sɑpïnɑ̀, ɑkedh wøn wø bøødh-ɑ kö muji Kobros, mɑ́ wø ɑ́pyem-ɑ yømø. Keny-ɑ ɑ́rum wøn ki bɑ̈ɑ̈ni nɑɑm omelø kì bøli Kilikiyɑ̀ geki Pɑmpïliyɑ̀, ɑkɑdhi wøn wɑ̈g kì Mirɑ̀ kì Likiyɑ̀. Ayïddi dhɑbïdh kì kenyɑni ki sɑpïnɑ̀ me kɑ̈ɑ̈l Iskɑnderiyɑ̀, o kedh-ɑ Itɑliyɑ̀, kɑ wø cïbe yij sɑpïnɑni. Acyɑ̈dhi wøn mɑ̈ɑ̈dh ki cyɑ̈ng mø gïïr, kɑ wø ócyɑ̈ngø ki kɑɑl Kenidøs kì bɑng orɑng me teeg. Kɑ wø mɑ̈ɑ̈n wɑ̈dhi kɑɑlɑni yi yømø, ɑtöngi wøn gøød muji Kirit kì bøli Kɑngi Sɑlmönɑ̀. Akɑ̈l wøn leggi wɑ̈g, kɑ kì bɑng gwøg me teeg ɑwɑ̈dhi wøn keny-ɑ cwøl ɑ́ Dhøwɑnh Døj men-ɑ cyɑ̈gi ki kɑɑl Lɑseyɑ̀. Kɑ cyɑ̈ng mø ngenyø opödhø kinøw, o bøli kej thuumø ɑ́pöödh, o wɑ̈ɑ̈dh sɑpïnɑ̀ kedh e órënyø. Aköbbi tyëng sɑpïnɑ̀ yi Pøøl kinni, “Jøg, ɑ́lidh yi yɑn kinni, wɑ̈dh men ókɑ̈ni ki rɑj, kɑ jɑmmì mø gïïr ólɑ̈ɑ̈nyø, o pɑth ki sɑpïnɑ̀ geki jɑmm-ɑ yije keti gen de bɑ men wɑ̈dhi ri wëyee thyew.” De dhɑbïdh ɑ́lïng-ɑ mø jɑngi sɑpïnɑ̀ geki wïi sɑpïnɑ̀, kɑ møg-ɑ kømmi yi Pøøl wøøye. Dhøwɑnhɑni pɑ døøj ki tyëgi wuudø, kɑ ji mø ngenyø kì kelli wøn, tyer-ɑ dhwödhø kì yije, ge rømm-ɑ kinni yɑ̈y ócuggø wɑ̈dhi Piniks, ɑ bɑ dhøwɑdh kì muji Kirit, o wuudø di tyëg yi wøn kì kenyɑni; dhøwɑɑdh Piniks nenn-ɑ wɑɑng wuudø kì kuni wɑɑng cyɑ̈ɑ̈ng böörø, kí wɑɑng wurlwɑl kì kuni wɑɑng cyɑ̈ɑ̈ng böörø. Kɑ yømi wurlwɑl ókönø mɑ̈ɑ̈dh, kɑ ge orumø kinni, gïn-ɑ dwɑddi yi gen ɑ́yod yi gen, ɑtïng gen ódëll yij sɑpïnɑ̀, kɑ ge ókedhø ge bøødh-ɑ tøggi muji Kirit. De kì bɑng nyɑ keny me thiinh kɑ yømø me teeg, ocödø kì wɑɑng wuudø kì kuni wɑɑng cyɑ̈ɑ̈ng mwøl, tung-ɑ di mujø, kɑ ódhɑ̈lø pyemø yi sɑpïnɑ̀. Awiy wø en, kɑ wø køøl yi yømø. Akɑ̈l wøn gøød nyɑ mujø me thiinh me cwøl ɑ́ Kɑwdɑ̀, kɑ pɑlugø tïng yij sɑpïnɑ̀ kì bɑng gwøg me teeg. Keny-ɑ ɑ́rume tïng yij sɑpïnɑ̀, kɑ gø döb gen ki thøll. Codhe, ɑdwöög gen opërri sɑpïnɑ̀ piny, ge bögg-ɑ kinni, ge ópödhi kömi ɑyejø kì thɑ̈ngi nɑɑm omelø kì bøli Lïbiyɑ̀. Akøøl sɑpïnɑ̀ yi yømø. Kɑ wø wɑ̈dh-ɑ dhuki wø nudd wø opwödø yi yømø, ɑcɑ̈gi gen ki leengi jɑmm-ɑ yij sɑpïnɑ̀ nɑm. Kɑ jɑmm-ɑ nyi gwøøg sɑpïnɑ̀ kwɑny gen kì dɑ̈ɑ̈g cyɑ̈ng, kɑ gï leeng gen nɑm. Kɑ cyɑ̈ng mø gïïr opödhø e cɑ̈ng nuti liidh wøn kí kyell thyew. Kɑ yømø pëgg-ɑ be lenggi sɑpïnɑ̀, kɑ wø orumø kinni wø pɑ bødh ki thøø. O jøkëw ɑ́bëëd ge bɑ̈nyi cɑm, ɑdhwödhi Pøøl mɑl kì kelli gen, kɑ okööbø kinni, “Jøg, lɑ̈w keløg kwøbbɑ di lïngi yi wun, kɑ wu di cög wu pɑ dhwödh kì Kirit, ti bong rɑj wɑlɑ̀ lɑ̈ɑ̈nyi jɑmmì me di yod yi wun. De ɑnɑn, yɑ köbb-ɑ wun, mɑgu pëthi wun, mɑ́ e bong dhɑnhø ɑ́kyel men-ɑ ólɑ̈ɑ̈ny kì kelli wun, dɑ́ sɑpïnɑ̀ kete ɑ ótørri. Átïni kì wɑ̈r wëywöni Jwøgɑ, Jwøng-ɑ nyi mɑllɑ, ɑ́bï kɑ ócungø kì butɑ. Kɑ yɑ köbbe kinni, ‘Pøøl, yï ko böggi! Yï ówɑ̈dhi bøli Kɑysɑr ceth. O ji-ɑ cyɑ̈dhi ki yïn kì yij sɑpïnɑ̀ ɑ́wïyi yïn yi Jwøk.’ Kɑ ɑ́rum bëëde kinøw, mɑgu pëthi wun, mɑ́ yɑ ɑ́yïëy kinni, kwøbbɑni ópɑ̈dhi kɑ̈jji gen ni kɑ köbbi gen yɑn ceth. Wɑ óleeng mujø megø yi yømø.” Kì wɑ̈r, kì pyɑ̈rø wïdɑ́ngwen cyɑ̈ng, wø tumm-ɑ wɑ̈thi wøn kì yij Nɑɑm Omeli Tɑr, kɑ jøkëw orumø ce ge cyɑ̈ngø kì wɑ̈g, e piny bɑ dïwɑ̈r. Alim gen nɑm, kɑ gø yod gen ɑ́ mïtïr pyɑ̈r ɑ́ngwen; kɑ cigi rømø kì bɑng keny me thiinh, kɑ gø yod gen ɑ́ mïtïr pyɑ̈r ɑ́dɑ̈g. Aluudh gen ódëll ɑ́ngwen piny thɑ sɑpïnɑ̀, ge bögg-ɑ kinni sɑpïnɑ̀ ópödhi kömi kïttì. Kɑ ge pëgg-ɑ be yïdi ru wøw. Kɑ jøg-ɑ kyewi yɑ̈y oyɑ̈bø ki kwøbbi pɑ̈ɑ̈rø, ge wiy-ɑ yɑ̈y, ɑkïdhi gen pɑlugø nɑm, e dhɑ̈y ge ce luudh-ɑ ódëll piny kì muni sɑpïnɑ̀. Aköbbi dhɑbïdh geki jøliny yi Pøøl kinni, “Keløg jøgɑni pɑ bëëdø kì yij sɑpïnɑ̀, bong ngɑn cuggi bødhø kì kelli wun.” Codhe, ɑngøl thølli pɑlugø yi jøliny. Awiy ge gøn o kedhe. Keny-ɑ ɑ́rum piny ki tɑ̈rø, ɑkwɑjji tyëngɑni yi Pøøl kinni kɑ̈bbi gen ki gïncɑm; kɑ gï köbbe kinni, “Tïn bɑ pyɑ̈rø wïdɑ́ngween cyɑ̈ng wu pɑ cyɑ̈mø. Yɑ kwɑjj-ɑ wun, kɑ̈bbi wun ki gïncɑm, o wu óbødh wun. Bong yïëyø ɑ́kyel men-ɑ ólɑ̈ɑ̈ny kì wɑ̈thi wun bënn.” Keny-ɑ ɑ́rume kwøbi møgɑni, ɑkɑ̈bbe ki ópun, ɑpwøje Jwøk kì bøli gen bënn, ɑpøde gøn, kɑ ócɑ̈gø cɑm. Codhe, ɑtëngi pëthi gen bënn, kɑ ge ókɑ̈bbø ki gïncɑm thyew. Kwɑnni wøn bënn kì yij sɑpïnɑ̀ bɑ miy ɑ́ryew kí pyɑ̈r ɑ́bïryew wïdɑ́bïkyel. Keny-ɑ ɑ́rum gen ki cɑm, ɑleeng gen byel nɑm kipe kinni o sɑpïnɑ̀ yöne. Keny-ɑ ɑ́ru wøw, ɑdhɑɑl gen yi ngiji piny-ɑ yije di gen, kɑ ge ólïdhø ki gøølø me thɑ̈nge bɑ kwöjø, kɑ ge orumø ki kwøbbi tööngi sɑpïnɑ̀ wɑ̈g kì yije, keløg ɑ́ gïn di cuggi. Codhe, ɑgøny gen ódëlli sɑpïnɑ̀, kɑ gï wiy gen nɑm, kɑ thøll-ɑ nyi mïdhi ópɑddi thɑ sɑpïnɑ̀ lwɑ̈nggi gen kì bøli kenyɑni thyew. Atïng gen opërri cuur sɑpïnɑ̀, kɑ ge töng-ɑ keny-ɑ bɑ kwöjø kì thɑ̈ngi gøølø. De kɑ ɑ́wɑ̈dhi gen keny mɑ kɑngi nɑ̈mmì, ɑpödhi sɑpïnɑ̀ wïj kɑgø, ɑmɑ̈gi yedh sɑpïnɑ̀ kì kenyɑni. Atoor thɑ sɑpïnɑ̀ yi ɑpɑgø. Arum jøliny kipe nɑ̈gi ɑmɑgg, o bongii men kwɑngi wɑ̈g kɑ opɑ̈ɑ̈rø. De dhɑbïdh ɑ́dwɑdd-ɑ yieli Pøøl, ɑjoge ɑlɑthkerr, kɑ gï mɑ̈ɑ̈ne gwøgi gïn-ɑ ɑ́dwɑddi yi gen. Kɑ okööbø kinni pɑ̈ɑ̈r tyëng-ɑ ngɑ̈ny kwɑng nɑm, kɑ ge kwɑngi gen wɑ̈g, o tyëng-ɑ ódöng kedhi gen wɑ̈g kì kömi pɑ̈mmi wɑlɑ̀ ópɑddi sɑpïnɑ̀. Codhe, ɑwɑ̈dhi gen wɑ̈g bënn, e bong gïnrɑj. Kì bɑng kɑ ɑ́bødh wøn, kɑ yod yi wøn kinni, munyɑni cwøl ɑ́ Mɑlthɑ̀. Kɑ wø göggi ki gïndøj yi tyëng pönhɑni ki mendwøng; ge ɑ́rub ki mɑc, kɑ wø pɑɑr yi gen, wø bënn, mɑ́ kødh ceg-ɑ mɑ̈gø, o piny ceg-ɑ lïbø. Kɑ Pøøl ogwënø ki yugg, kɑ gï nyi leenge mɑc, kɑ thwöl bï-ɑ wɑ̈g kì kelli yugg yi lëdhi mɑc, kɑ ree døge ri cinge. Keny-ɑ ɑ́liidh thwöl yi tyëng pönhɑni, ree kood en ri cinge, ɑköbbi gen ri gen kinni, “Jɑlɑni ceg bëëdø ɑ́ ɑ́muddi ji, thøø nudd e rïng-ɑ́ɑ̀ bɑnge, cɑgg ɑ́ kɑ ɑ́bødhe ki thøw nɑɑm omelø.” Abɑ̈ɑ̈d thwölɑni mɑc yi Pøøl, o bong gïnrɑj mɑ ɑ́nywɑlii. Teenɑni ɑ́nenn-ɑ kinni dële ókwöd wɑlɑ̀ óceg ì tɑ̈y kì piny e thøø, de keny-ɑ ɑ́mɑ̈gi gen ki keny me bɑ̈ɑ̈r, e bong gïnrɑj me bï köme, ɑwil gen rummi gen, kɑ ge okööbø kinni, “Jɑlɑni bɑ jwøg!” Piny Publiyøs, jɑngi mujø menɑni ɑ́bëëd e cyɑ̈gi, kɑ wø thege ki cyɑ̈ng ɑ́dɑ̈g. Wïyi Publiyøs ɑ́bëëd e ceg-ɑ buddø ki thøwi cïn, geki lëdhi dël. Kɑ Pøøl kedh-ɑ øn-ɑ buude, ɑkwɑjje Jwøk, kɑ cingge thɑɑnye köme, kɑ gø yiele. Codhe, kɑ tyëng munyɑni; møg-ɑ dëlli gen rɑ̈mø bënn bï-ɑ yïe kɑ gï yiele. Kɑ wø theg yi gen ki mendwøng; ɑnëngi wøn yi gen ki gïg cɑɑm yöö mø gïïr, keny-ɑ ɑ́dhwödh wøn. Bɑng dwɑ̈tt ɑ́dɑ̈g, ɑ ɑ́dhwödh wøn ki sɑpïnɑ̀ me tyëëg wuudø kì munyɑni. Sɑpïnɑni bɑ sɑpïni Iskɑnderiyɑ̀, ree dɑ ngïjji jwögg-ɑ bɑ ɑcwegg-ɑ cwøw. Kɑ wø töng-ɑ wɑ̈g kì kɑɑl Sirɑkøs, ɑmɑ̈gi wøn ki cyɑ̈ng ɑ́dɑ̈g kì kenyɑni. Kɑ wø odhwödhø kì kenyɑni, kɑ wø wɑ̈dh-ɑ Rejium. Kɑ yømi wurlwɑl ókönø kì ryeew cyɑ̈ng, ɑwɑ̈dhi wøn kɑɑl Puteølì kì dɑ̈ɑ̈g cyɑ̈ng. Kɑ wø óyïddø ki tyëng-ɑ ɑ́yïëy kì kenyɑni, kɑ wø jog yi gen kinni bëëd wøn kì buti gen ki cyɑ̈ng ɑ́bïryew. Codhe, ɑwɑ̈dhi wøn Römɑ̀. Kɑ per bëëni wøn lïngi yi tyëng-ɑ ɑ́yïëy, ɑpɑɑr wøn Ódɑ̈ri ngyeew Apiyøs kí Ud Ádɑ̈g mø wëll. Keny-ɑ ɑ́liidh gen yi Pøøl, ɑpwøje Jwøk, kɑ pyëwe ótëngø. Kɑ Pøøl wiy bëëde kì gøle keny-ɑ ɑ́wɑ̈dhi wøn Römɑ̀, o yïe ɑ́dɑ ɑlɑthker ɑ́kyel men korii. Kì bɑng cyɑ̈ng ɑ́dɑ̈g ɑcwøøl jøgdøngi Yeud møg-ɑ kɑɑlɑni yi Pøøl. Keny-ɑ ɑ́cugi gen, ɑköbbe gïn kinni, “Nyiimïɑ, bong gïnrɑj mɑ ɑ́göggɑ juree kí kwööng kweyyee; yɑ ɑ́wɑ̈dhi kɑ mɑgø yi Yeud kì Yerusɑlem, ɑmëggi yɑn tyëng Römɑ̀ yi gen. Kɑ gønyɑ lïngi yi gen, ɑdwɑddi gen gønyi yɑn, mɑ́ e bong gïjø mɑ ɑ́yod yi gen kì ri møg-ɑ ɑ́gøøny yɑn, me pere kuum yɑn ki thøø. De Yeud ɑ́kyëëd, ɑdhɑɑl yɑn yi møgɑni, kɑ yɑ bøy-ɑ kïdhi gønyɑ bøli Kɑysɑr, de bong gïn pere gøønyɑ juree. Bɑ kipe kwøbbɑni ɑ ɑ́cwølɑ wun, o wɑ yïddi wɑ, o wɑ kööb wɑ, mɑ́ e bɑ kipe møg-ɑ ngɑ̈dh yi kwɑrri Isrɑil ɑ ómɑɑg yɑn ki ɑ́cwecwel møg.” Kɑ ge okööbø kinni, “Bong wɑ̈nyø mɑ ɑ́öri wøn yi tyëng-ɑ Yeudiyɑ̀ kiperí wɑlɑ̀ bong dhɑnhø kì kelli nyiimïee møg-ɑ nyi bï keny, mɑ ɑ́kɑ̈ni ki wöödø wɑlɑ̀ mɑ ɑ́kööb ki gïnrɑj kì rií. De wø dwɑdd-ɑ lïngø kì yïí ki gïg-ɑ rømmi yi yïn, mɑ́ e ngɑ̈nyi yi wøn kinni, ji ceg-ɑ bɑ̈nyø ki Yuuɑni kì kɑ̈jj bënn.” Akwøb gen cyɑ̈ng-ɑ ódwöög gen yï Pøøl. Kɑ ge obëënø kì cyɑ̈ngɑni e kwɑnni gen gïïr. Alwöbbe gïn tyelli kwøbbɑni; ɑ́cɑ̈g ɑ mwøl kɑ gït-ɑ böörø e köbb-ɑ gen kwøbbi Pödhi Jwøk, e tyer-ɑ kinni o tyëngɑni Yëso yïëy yi gen, kì ri møg-ɑ kømmi yi Ciggi Mosɑ̀ geki wɑ̈jji jøtöng. Kɑ møg-ɑ kømmi yi Pøøl yïëy yi kwï gen, kɑ møøgø óbɑ̈nyø. Keny-ɑ ɑ́dhɑ̈li kwøbbi gen ki rëbø, ɑdɑ̈ngi gen kì bɑng kɑ ɑ́rum gen ki köbbø yi Pøøl ki gïg-ɑ kyeelø kinni, “Wëykwërø ɑ́kømm-ɑ dyër ceth, kɑ ɑ́köbbe kweyyi wun kì ri Icɑyɑ̀ jɑltöng, kɑ ɑ́kööbe kinni, ‘Kedh kɑ jiɑni köbbí kinni; Wu ólïngø kɑ wu olïngø, de bong gïn gɑm yi wɑ̈thi wun; nyingi wun ógwiir wun piny kɑ wu onëënø, de bong gïn lidh yi wun, Mɑ́ ji wɑ̈thi gen gug o yïthhi gen coog gen, kɑ nyingi gen kum gen. Ke pɑ di bëëde kinøw, nyingi gen di nëën, kɑ yïthhi gen di lïng kɑ møgɑni di gɑm yi wɑ̈thi gen, kɑ ge di dwöög köörɑ, kɑ ge di tuurɑ.’ ” Kɑ Pøøl kwøbbe ngøle kinni, “Ngɑ̈nyu wøw cyee kinni, wööni Jwøk kipe yielø, ɑ́rum ki ör yï tyëngpɑth ki Yeud; o ólïngi yi gen ceth!” Keny-ɑ ɑ́rum Pøøl ki kwøbi møgɑni, ɑdɑ̈ngi Yeud, ge opëmø ki mendwøng ki ri gen. Kɑ runn ɑ́ryew tyëg yi en kì kenyɑni, e obëëdø kì gøl-ɑ ɑ́kïr yi en, e pwöny-ɑ kwøbbi Pödhi Jwøk, kɑ ópwönyø ki kwøbbi Wë Yëso Mesiy e pɑ böggi, e bong gïn jogii. Wɑ̈nyø men kɑ̈ɑ̈l-ɑ yï Pøøl, bɑ̈ng Yëso Mesiy o bɑ jɑlwöödø men-ɑ ɑ́yieny yi Jwøk, kɑ gø cwøle kipe kinni o pwönye Wöndøj mee. Wöönɑni bɑ wöön-ɑ ɑ́kømmi yi Jwøk cøn kì yethi wɑ̈jji jøtöng møge kinni óbï ceth. O wöönɑni bɑ kwøbbi Wɑ̈de, ngɑn-ɑ ɑ́kɑ̈ɑ̈l thɑ gøl Debïd kì bɑng kwööng kömi piny. De kì tung-ɑ kyeelø, ree ɑ́nyodhe kinni bɑ Wɑ̈d Jwøk ceth, kì bɑng kɑ ɑ́dwööge wɑ̈g kì yij thøø kì ri tegi Wëykwërø. En ɑ ree ɑ́yïddɑ ki dhwɑ̈ng, men bëëdɑ yɑn ɑ́ ngeti wööne, o jurrì bënn cwöölɑ be yïëyø kí gɑ̈nni Yëso. Wöönɑni bɑ kiper wun thyew, wun ɑ tyëng Römɑ̀, mɑ́ wu ɑ́cwøl yi Jwøk, o wu bëëd wun, wun ɑ́ jii Wë Yëso Mesiy. De ɑnɑn, yɑ gwëd-ɑ wun, wu bënn, wun ɑ tyëng-ɑ mɑɑr yi Jwøk kì kelli tyëng Römɑ̀. Kɑ wu cwøl yi Jwøk kipe kinni o wu bëëd wun, wu bɑ ɑkwër. Wiy dhwɑ̈ng geki mër møg-ɑ nyi kɑ̈ɑ̈l yï Jwøk Wïyee geki Yëso Mesiy Wɑ̈de bëëd gen kì kömi wun. Møg-ɑ ɑ́kømmi yi yɑn kì tyeli mɑl bɑ kinni, Jwøgee nyii pwøjø yi yɑn ki nyingi Yëso Mesiy kipe gïgdøj møg-ɑ ɑ́gwøg yi wun bënn, mɑ́ kwøbbi yïëyi wun olïngø kì kömi piny bëne. Ngɑ̈nyi yi Jwøk kinni møg-ɑ kømmɑ bɑ dyër; eni Jwøng-ɑ göggɑ ki pyëwɑ bëne, yɑ kɑ̈ll-ɑ Wöndøj mi Wɑ̈de. Kenyi kwɑ̈jjɑ kì yethi cyɑ̈ng bënn, nyingi wun pɑ nyi wiyɑ wɑ̈g. Kɑ Jwøk nyi kwɑjjɑ thyew kinni, o yɑ óyïddɑ ki keny bëënɑ yï wun, keløg møgɑni di dwɑddø yi en. Mɑ́ pyëwɑ okønø ki bëën be pwönyi wun, o wu yïddi wun ki tegø men-ɑ nyi yod kì bɑng dhwɑ̈ng-ɑ nyi kɑ̈ɑ̈l yï Wëykwërø. Møgɑni bɑ kipe kinni o pëthi wun tëngi gen. Gïn-ɑ kømmɑ bɑ kinni, wɑ ceg-ɑ riee ki cïjø bënn; wu cïj yi yïëyɑ, o yɑ cïj yi yïëyi wun. Wɑ̈thi wun ko wïl, wun ɑ nyiimïɑ, kinni yɑ nyi dwɑdd-ɑ bëën be këëmi wun kër-ɑ ówëni, de wïjɑ nyii jogø yi gïjø megø. Kipe kinni o yɑ di yïddɑ ki köödh kì kelli wun ni köödh-ɑ ɑ́yodɑ kì kelli tyëng pödhh-ɑ kyeelø. Mɑ́ kömɑ dɑ kwör kipe tyëng Yönɑn kí møg-ɑ pɑth ki tyëng Yönɑn; kí tyëng-ɑ wɑ̈thi gen pel geki tyëng-ɑ kwïj wøw thyew. Bene ɑ tyerɑ pwönyi wun ki Wöndøj, wun ɑ tyëng Römɑ̀. Wïjɑ pɑ lɑ̈ɑ̈y ki pwönyi Wöndøj, mɑ́ e bɑ tegi Jwøk men-ɑ nyi yiel tyëng-ɑ ɑ́yïëy bënn; Yeud ɑ mɑl, bɑng gen dɑ tyëngpɑth ki Yeud. Mɑ́ Wöndøj nyodh-ɑ kër-ɑ óyieel dhɑnhø, kì bɑng yïëyø ceth. Ni kɑ ógwedii kì yij wɑ̈nyi kwërø kinni, “Tyëngtir óbødh, mɑ́ ge ngɑ̈dh-ɑ Jwøk.” Jwøk owërø kì mɑl, kipe orøg geki rɑj møg-ɑ gøggi yi ji, mɑ́ dyër nyi mɑ̈ɑ̈n ge’ yodø. Ge ocɑyø yi Jwøk mɑ́ møg-ɑ cuggi yodø yi ji kì ri bëëdi Jwøk, ɑ́gwøg yi Jwøk kiree ge ónënnø. Gïg-ɑ ɑ́cwɑ̈j yi Jwøk bënn, cɑg kì bøli keny-ɑ ɑ́cwɑ̈je lɑ̈bø, nyodh-ɑ tege geki bëëde ɑ́ Jwøng-ɑ gïti ɑtheer. Jiɑni bong keny-ɑ ókëjji yi gen. Mɑ́ Jwøk ngɑ̈nyi yi gen, de pɑ lejji yi gen, wɑlɑ̀ pɑ nyi pwøj yi gen. De rummi gen ɑ́ruud, kɑ wɑ̈thi gen, wɑ̈th-ɑ nøg ogöögø ki muudhø. Ge ɑ́cwølli ri gen gɑ ji mø wɑ̈thi gen pel, kɑ yöd ge ceg-ɑ gwøg ki dhëgg. Jwøk ɑ pɑ nyi thøw pɑ mɑlli yi gen, de ge ɑ́yöd ge mɑll-ɑ gïg-ɑ nyi gwøg yi gen, ge nɑ ji yøw, wɑlɑ̀ winy, wɑlɑ̀ lɑ̈yy, wɑlɑ̀ gïg-ɑ mulli kì piny. Kɑ ge wiy yi Jwøk, o ge gøggi gen gïg-ɑ tyer yi pëthi gen; kɑ ge pëgg-ɑ be gøggi ɑyɑ̈r ki ri gen. Kɑ kwøbb-ɑ bɑ dyër kipe Jwøk, wil yi gen ki kwøbbi pyed. Kɑ gïg-ɑ ɑ́cwɑ̈j yi en nyi mɑlli yi gen gɑ jwöggi gen; ge mɑll-ɑ gïg-ɑ ɑ́ceg ki cwɑ̈jø, o ge bɑny gen Ngɑn-ɑ Ácwɑ̈ɑ̈j, eni ngɑn-ɑ lenhi gïti ɑtheer! Amen. Kì bɑng kɑ̀ gøggi gen gïgɑni, Jwøk cinge ɑ́lwɑ̈nge kì ri gen, kɑ ge döng ge gøgg-ɑ gïgrijjø møg-ɑ nyi tyer yi pëthi gen. Kɑ yuu-ɑ nyi niin tyëng-ɑ mɑ̈nn, wil yi mɑ̈nni gen ki men pɑth ki en. Kɑ jøg-ɑ cwøw ówïyø niin ki mɑ̈nn, de ge nɑ̈g yi mɑ̈j kɑ ri gen keti gen; kɑ jɑlø nyi niin yi jɑlø, kɑ ge kɑ̈n-ɑ kömi gen ki cɑ́y mø kyëëw ki döngi orøøg gen. Ge ɑ́wiy ki rɑ̈ji rummi gen yi Jwøk, kipe kɑ ɑ́bɑ̈nyi gen ki mïdhi dïdø men-ɑ kɑ̈ɑ̈l yï Jwøk; ɑpëggi gen be gøggi gïg pɑ di gwøg yi gen. Kɑ pëthi gen opɑ̈ngø yi rumm-ɑ rijjø; ɑ løg gøggi gïgrijjø, kí döngi pëëth, kí rënyi jɑmmi ji møøgø. Kɑ pëthi gen opɑ̈ngø yi mud, kí nɑ̈g ki ji, kí liny, kí ɑ́buudhø, geki loji pëëth, kí ɑtum, Ge bɑ tyëngkwɑ̈dh, ge mɑ̈n ki Jwøk; wɑ̈thi gen tɑ̈dø; ge bɑ tyëngdhɑ̈w, ge lejji ri gen; ge rømm-ɑ gøggi rɑj; ge pemm-ɑ dhøggi wëëg gen, kí mëëg gen. Wɑ̈thi gen nøg, ge pɑ nyi bëëdø kì kömi dhøggi gen, yethi gen wöny, o pëthi gen pɑ nyi lɑ̈ɑ̈m. Ge ɑ́dhɑ̈li wiyi gïgɑni, ngö gø ngɑ̈nyi yi gen kinni tyëng-ɑ nyi göögø ki gïg ni møgɑni, nyi cɑy yi Jwøk kɑ thøø; kɑ pëthi gen yöd ge med kɑ tyëng-ɑ gøggi rɑjjɑni Kɑ ɑ́rum bëëde kinøw, yïn ɑ ngɑn-ɑ nyi cɑy ngɑn megø, cɑgg yï løg men, bong keny këjji yi yïn; yï ngɑn-ɑ cɑyyi tyëngmøøgø, yï gøgg-ɑ gïg-ɑ gøggi yi gen; mɑ́ kenyi cɑɑy gen, yï nyi cɑy-ɑ rií. O wɑ ngɑ̈ny wøw kinni, tyëng-ɑ nyi gwøg møgɑni, cɑ́y-ɑ dyër møg-ɑ nyi kɑ̈ɑ̈l yï Jwøk nyi bï-ɑ kömi gen. O yïn, yï ngɑn-ɑ nyi cɑy tyëng-ɑ nyi göögø ki gïg ni møgɑni, e gïgɑni ogøggø yi yïn; yï orumø kinni yï óbødh ki cɑyø yi Jwøk? Wɑlɑ̀ yï bwøn-ɑ døøji Jwøk, kí guume, kí ngïne mɑwɑnø. Ngɑ̈nyi yi yïn ceth kinni Jwøk døøj, o dwɑdd-ɑ kinni o yï yewí. De kɑ̀ bëëd muní teeg, o yï pëddi pëmø, cɑ́y-ɑ ópɑ̈dhi kömí ceg kɑ gwøgø yi yïn ge døngø, kì cyɑ̈ɑ̈ng rɑ̈ji pyëw Jwøk; cyɑ̈ng-ɑ ónyoodh cɑ́y-ɑ dyër. Mɑ́ dhɑnhø óyod-ɑ kööng-ɑ kyëëw ki gwøge. Kwï ji nyi cög ge gwøg-ɑ gwøng døj, o ge tyer-ɑ dhwɑ̈ng, kí wuödø, kí bëëndøj; jiɑni ónëngi yi Jwøk ki nënn-ɑ ɑtheer. Ji møøgø bɑ cuung, o ge bɑny-ɑ gïn-ɑ bɑ dyër, ge yɑb-ɑ gïg-ɑ pɑth ki dyër; Jwøk rɑ̈ji pyëwe geki linye ókønye kömi gen. Tyëng-ɑ nyi gøggi gïgrijjø, kömi gen ópɑ̈dhi yi cyën geki ryɑ̈g; Yeud ɑ mɑl, bɑng gen dɑ tyëngpɑth ki Yeud. De tyëng-ɑ gøggi gïgdøj, ge óyod-ɑ dhwɑ̈ng, kí døøjø, kí mër; Yeud ɑ mɑl, bɑng gen dɑ tyëngpɑth ki Yeud. Mɑ́ e bong ji mø yïëy yi Jwøk kì wɑ̈ye gen. Anɑn, ji-ɑ røngø bënn, e Ciggi Mosɑ̀ kwïj yi gen, ge óthøw yï gen bɑ̈r ki Ciggɑni. De tyëng-ɑ røngø ge ying-ɑ thɑ́ Ciggi Mosɑ̀, ge ócɑɑy-ɑ bɑng Ciggɑni ceth. Mɑ́ e pɑth ki tyëng-ɑ nyi wɑ̈dhi Ciggi Mosɑ̀ ki lïngø ɑ tir kì yï Jwøk; dɑ́ tyëng-ɑ nyi gwøg møg-ɑ kømmi yi Ciggɑni ɑ nyi göögø ge tir. Tyëngpɑth ki Yeud kì yethi pödhh bënn, bong Ciggi Mosɑ̀ kì yï gen, de kenyi gwøg gen møg-ɑ ceg yi Ciggɑni, ge bɑ cigg ki cwɑggi gen, cɑgg ɑ́ kɑ̀ bong yï gen Ciggi Mosɑ̀. Kɑ̀ göög gen kinøw, nyodh-ɑ kinni, gïn-ɑ wɑngi yi Ciggi Mosɑ̀ bɑ ɑgwed kì pëthi gen. O møg-ɑ rømmi yi gen ki pëthi gen kipe gïgdøj wɑlɑ̀ gïgrijjø, nɑ møg-ɑ kømmi yi Ciggi Mosɑ̀, mɑ́ ge nyii cɑyø yi rummi pëthi gen, o dɑ kɑ̀ cwɑɑg gen yi rummɑni. O kì yij Wöndøj men-ɑ pwönyi yi yɑn, bɑ ɑnyodh ceth kinni óbëëd ɑ nøw kì Cyɑ̈ng-ɑ óliidh gønyy yi Jwøk kì ri Yëso Mesiy, kɑ rumm-ɑ kɑnni yi ji kì pëthi gen nyodh. O yïn ø? Yï cwølli rií yïn ɑ́ Yeudì, yï bëëd ɑ kömi Ciggi Jwøk; o rií olejjø yi yïn ce Jwøk ngɑ̈nyí; ce gïn-ɑ dwɑddi gwøgø yi Jwøk ngɑ̈nyi yi yïn, o gïn-ɑ lɑ̈w ngɑ̈nyi yi yïn thyew, kì bɑng kɑ ɑ́pwönyi yi yïn ki Ciggi Mosɑ̀; o yï orumø kinni, yï bɑ ngɑn nyi pyejji cörr, o yï bɑ cɑr kipe ji-ɑ yij muudhø; o yïn ɑ nyi tënyi tyëng-ɑ wɑ̈thi gen nøg; o yïn ɑ nyi pwönyi tyëng-ɑ kwïj wøw; o rií kwɑɑny yïn ceth kinni Cigg ngɑ̈nyi yi yïn kidøøj, o yï dïdø; yï pwöny-ɑ ji møøgø; o yïde ɑ pɑ pwönyí rií? Yï pwöny-ɑ ji kinni, “Yï ko kwɑ̈ddi.” O yïn kirií, yïde ɑ kwɑ̈ɑ̈d? Yï okööbø kinni, “Yï ko niin ki ngɑn nuti nywøøm wun ri wun.” O yïde ɑ göög ki orøngɑni? Yï bɑny-ɑ ngïjji jwögg; o yïde ɑ kɑbbí jɑmm-ɑ yethi kenggi jwöggɑnì? Yï pwöd-ɑ köörí kipe Ciggi Mosɑ̀; o yïde ɑ kedh yï pyem-ɑ Ciggɑni? Wɑ̈nyi kwërø okööbø kinni, “Jwøk ceg kɑ gwɑddø yi jurr-ɑ kyeelø kì bɑng gïg-ɑ gøggi yi wun, wu Yeud.” Keløg Cigg omïdhø yi yïn, yï óyïddi ki døøjø kì bɑng ngølø; de keløg Cigg pɑ mïdhi yi yïn, yï kwɑɑn-ɑ kelli tyëng-ɑ nuti ngølø. Keløg møg-ɑ kwøb yi Cigg ogwøgø yi ngɑn nuti ngølø, pɑ cuggi kwɑɑn kelli tyëng-ɑ bɑ ɑngøl yi Jwøk? O ngɑn-ɑ mïdhi Ciggi Mosɑ̀ e nuti ngølø, yï pɑ cɑy yi en keny-ɑ ópyeem Cigg, e yïí dɑ wɑ̈nyi Ciggɑni o yï bɑ ɑngøl? Bëëdi dhɑnhø ɑ́ Yeudì, pɑ køøl-ɑ ri bëëde men-ɑ nenni yi teedø; o pɑth kiper ngølø kete ɑ nyi cwølli dhɑnhø ɑ́ Yeudì. De dhɑnhø ceg bëëdø ɑ́ Yeudì ki pyëwe ceth. O kwøbbi ngølø men-ɑ bɑ dyër, bɑ men-ɑ nyi kɑ̈ɑ̈l pyëw dhɑnhø kì bɑng Wëykwërø, de pɑth ki gweddi Cigg. Ngɑn ni menɑni ópwøj-ɑ yi Jwøk kete. Kɑ̀ bëëd møgɑni kinøw, dɑ tegi per Yeud këti, wɑlɑ̀ dɑ gïndøj men-ɑ óyod kì bɑng ngølø? Ngee, tegi per gen óbëëd e nud kì wɑ̈thi tùng bënn! Tung-ɑ mɑl bɑ kinni, Jwøk wööne ɑ́cïbe’ cinggi Yeud. De óbëëd ɑ dï keløg kwï Yeud Ciggɑni pɑ mïdhi yi gen? Jwøk, dhøge ódi wilø yi en? Pɑ cuggi! Mɑ́ Jwøk nyi kømm-ɑ dyër ceth, cɑgg dhɑnhø ceg pyed. Mɑ́ wɑ̈nyi kwërø okööbø kinni, “Wiy yï yod kinni yï kømm-ɑ dyër kenyi kööb; nyi tyɑ̈ɑ̈m kì burø kenyi gøøny yïn.” Keløg orøgee nyodh-ɑ døøji Jwøk, wɑ kööb ɑ dï? Wɑ ócuggi kwøb kinni, Jwøk ceg-ɑ ruj ke rënyi pyëwe kɑ wɑ cɑye? (Nënni ɑ́ pyëj mø døøj ki pyëjø yi dhɑnhø.) Pɑ cuggi! Keløg Jwøk pɑ nyi gøggi dyër, gøøny lɑ̈bø ólidh yi en kidï? Keløg pyedɑ nyodh-ɑ dhwɑ̈ɑ̈ng Jwøk kí bëëde e gøgg-ɑ dyër, ɑ́ kipe ngø ɑ cɑɑy yɑn, de yɑ nɑ jɑlorøg? Á kipe ngø ɑ pɑ kööb wɑ kinni, “Göög wɑ ki rɑj, o rɑjjɑni kɑ̈ni gen ki døøjø?” Dɑ ji mɑ ɑ́gøøny yɑn i yɑ kööbø kinøw! Cɑ́yi gen óyod yi gen, kipe kwøbbɑni. Anɑn, kɑ̀ bëëd møgɑni kinøw, bɑ kinni wøn ɑ Yeud wø lɑ̈w kibøli tyëngpɑth ki Yeud? Pɑth, mɑ́ Yeud geki tyëng Yönɑn bënn, ying-ɑ cingi orøg ni kɑ ɑ́kwøbɑ en. Ni kɑ̀ kööb wɑ̈nyi kwërø kinni, “Bong dhɑnhø me tir. Bong ngɑn wïje pel wɑlɑ̀ bong ngɑn mɑlli Jwøk. Ji bënn ɑ́töngi wɑ̈yi gen kì yuu Jwøk; ge ɑ́bɑ̈jji ge bënn; bong ɑ́kyel me gøggi dyër, bong nyɑ ɑ́kyel kinni tek. Yethi kwøbbi gen pɑ̈ng yi wëënyø, kwøbbi wëënyø me rɑj ɑ nyi kɑ̈ɑ̈l dhøggi gen, o bɑ lwɑ̈g mɑ nɑ̈ɑ̈g ni kugi thwöl, ɑ nyi kømmi yi gen. Dhøggi gen pɑ̈ng yi lɑm mø rijjø thyew. Ge pɑ nyi cwööng ki liny, o ge nyi jwɑn-ɑ nɑ̈ggø ki dhɑnhø; Keny-ɑ dhwöödh yi gen, nyi döng e rënyø, o ryɑ̈gø Yuu mër nuti pɑ̈nyø yodø yi gen, o ge nuti dïdø ki wøri Jwøk.” O wɑ ngɑ̈ny wøw kinni, møg-ɑ kømmi yi Ciggi Mosɑ̀, köbb-ɑ tyëng-ɑ thɑ́ Ciggɑni; kipe kinni o ji bënn kud gen, o kömi piny bëne jɑɑg yi Jwøk. Dhɑnhø pɑ cuggi gwøg e tir kì yï Jwøk kɑ̀ gwøge møg-ɑ kømmi yi Cigg, mɑ́ Cigg bɑ kipe yodi kinni dhɑnhø ɑ́røngi. De ɑnɑn yuu-ɑ gwøøg dhɑnhø e tir ɑ́rum ki nyodhø. Yïe bɑ̈r ki Cigg, cɑgg ɑ́ kɑ̀ cwɑgii yi Ciggi Mosɑ̀ geki jøtöng. Ji gwøg yi Jwøk ge tir kɑ yïëyi Yëso Mesiy, mɑ́ e bong gïn bɑ̈ɑ̈n kì ri ji. Mɑ́ ji bënn ɑ́røngi, kɑ ge ojɑdø ki dhwɑ̈ɑ̈ng Jwøk. De ge ɑ́gwøg ge tir yi Jwøk, kɑ gï nënge ki dhwɑ̈ng kì ri Yëso Mesiy ngɑn-ɑ ɑ́døm gen. En ɑ ɑ́muuj yi Jwøk, o reme gøøm bøli tyëng-ɑ ɑ́yïëyii bënn. Møgɑni ɑ́gwøg yi Jwøk kɑ per nyodhi ree kinni tir. Bene ɑ pere ɑ́wiye orøøg cøn, gø nuti cɑɑy en. De kì bøli keny ɑnɑn, nyodh-ɑ ree kinni tir, o tyëng-ɑ ɑ́yïëy Yëso ógwøge ge tir. De köthee ópwöd yi wɑ kɑ per ngø? Bogøn! Bɑ kipe kinni Cigg omïdhø yi wɑ? Pɑth, köthee pwöd yi wɑ kɑ per kɑ ɑ́yïëy wɑ. Gïn-ɑ nud ceth, bɑ kinni, ceg bëëdø ɑ́ bɑng yïëyø ɑ göög dhɑnhø e tir, de pɑth ki bɑng gwøgi gïn-ɑ kømmi yi Cigg. Wɑlɑ̀ Jwøk ceg bëëdø ɑ́ Jwøøg Yeud keti gen? Pɑth ki Jwøøg tyëngpɑth ki Yeud thyew? Awøø, bɑ Jwøøg jurrì bënn. Mɑ́ Jwøk bɑ ɑ́kyel, en ɑ gwøg Yeud ge tir kì bɑng yïëyø, ni kɑ̀ gwøge tyëngpɑth ki Yeud ge tir kì bɑng yïëyø. De kɑ̀ bëëd møgɑni kinøw, Ciggi Mosɑ̀ ówiy yi wɑ ki gööj yïëyø? Pɑth ki kinøw, Cigg ceg yi wɑ kɑ mïdhø kì kɑ̈jji gen ceth. Á ngø ɑ kwøb yi yɑn kì ri wïyee Abrɑhɑm, ɑ́ ngø ɑ ɑ́cwöb kipere? Keløg e di yïëy yi Jwøk kinni tir kɑ per gïg-ɑ ɑ́gwøge, kööre di pwöde kidyër, de pɑ di nenni yi Jwøk e tir. Mɑ́ wɑ̈nyi kwërø okööbø kinni, “Abrɑhɑm kwøbbi Jwøk ɑ́yïëye, kɑ kwɑny yi Jwøk ɑ́ ngɑntir kì bɑng yïëye.” Ngɑn göögø, köönge bɑ mee, de nuti cɑɑg kɑ wɑ̈dhø mëggii. De tyëng-ɑ bëëdø kì ri yïëyø, e pɑth ki gwøg, ɑ ree bëëd yi gen, kí tyëng-ɑ gɑ̈nni Jwøk ɑ nyi kwøb kinni ngɑn-ɑ ɑ́bɑ̈jji bong cɑ́y kì köme këti, ceg bëëdø ɑ́ yïëyø menɑni ɑ nyi lidh yi Jwøk, o kööbe kinni bong kwöör orøg kì kömi gen. Bɑ per møgɑni, ɑ ɑ́kwøb yi Debïd e lejj-ɑ medi pyëw ngɑn-ɑ ɑ́gwøg e tir yi Jwøk, e bong gïn gwøøg en kinni, “Tyëng-ɑ orøøg gen nyi lɑ̈ɑ̈ny, ri gen dɑ gyëdh; mɑ́ Jwøk lɑɑwe nyi dwööge’ piny kipe orøøg gen! Ngɑn-ɑ orøge pɑ kwɑ̈nnii yi Jwøk ree dɑ gyëdh!” De gyëdh møg-ɑ kømmi yi Debïd bɑ kipe tyëng-ɑ ɑ́ngøl keti gen, wɑlɑ̀ bɑ kipe ji bënn? Wɑ nyii kööbø kinni, Abrɑhɑm cwølli yi Jwøk ɑ́ ngɑntir kì bɑng yïëye. Á ɑ́wën ɑ ɑ́cwöb møgɑni; ge ɑ́cwöb e ngølø cɑ̈gø wɑlɑ̀ nuti cɑ̈gø? Abrɑhɑm ɑ́ngøl-ɑ cyɑ̈n e rum yïëyø. De ngølɑni ɑ́nyodh dhwɑ̈ng-ɑ ɑ́yod yi en e nuti ngølø. O bɑ per møgɑni ɑ ɑ́göög Abrɑhɑm ki wïyi ji-ɑ nyi yïëy bënn ge nuti ngølø, kipe kinni o ge yïddi gen ki dhwɑ̈ng, cɑgg ɑ́ kɑ̀ nuti ngøl gen. O Abrɑhɑm bɑ wïyi tyëng-ɑ ɑ́ngøl møg-ɑ pɑ mïdhi ciggi ngøl keti gen, de ge bëëd-ɑ bëëdi Abrɑhɑm ɑ ɑ́yïëy e nuti ngølø. Møg-ɑ ɑ́köbbi Abrɑhɑm yi Jwøk kinni, piny bëne ógöögø ki mee geki kwɑrre, bɑ kì bɑng yïëye, de pɑth ki bɑng Ciggi Mosɑ̀. Mɑ́ keløg e di bëëd ɑ́ bɑng Ciggi Mosɑ̀ ɑ di lɑɑg piny, ti yïëyɑni di gɑ̈g. Kɑ møg-ɑ ɑ́kwëng yi Jwøk di bong per gen. Cigg nyii kɑ̈nø ki rënyi pyëw Jwøk, o keny-ɑ bong Cigg bong pëëmø. Köngø cung-ɑ́ɑ̀ kömi yïëyø, o kwënggi Jwøk cungi gen ɑ́ gïn-ɑ ɑ́muuj yi Jwøk, e thödh-ɑ nyigi Abrɑhɑm bënn; pɑ mëgg-ɑ tyëng-ɑ mïdhi Cigg keti gen, dɑ́ kí tyëng-ɑ ɑ́yïëy bënn ni Abrɑhɑm thyew. Mɑ́ Abrɑhɑm bɑ wïyee wɑ bënn, ni kɑ̀ kööb wɑ̈nyi kwërø kinni, “Yï ɑ́gwøgɑ yïn ɑ́ wïyi jurrì mø ngenyø.” O kwënggɑni døøj kì yï Jwøk, eni Jwøng-ɑ ɑ́yïëy yi Abrɑhɑm; Jwøng-ɑ nyi dwöög tyëngthøø be nënni, kɑ gïjø mɑ ɑ́bëëd e bogøn nyii cwöbø kɑ̀ kööbe. Abrɑhɑm ɑ́yïëy e yïe dɑ gɑ̈ɑ̈nø, kì keny me bong gïn gɑ̈nni, codhe ɑgööge ki “wïyi pödhh mø ngenyø.” Ni kɑ ɑ́kwøbii yi wɑ̈nyi kwërø ceth kinni, “Kwɑrrí óbëëd ge gïïr ni kyell.” Abrɑhɑm ɑ́bëëd runne cyɑ̈ngø gwøg ki miyø kì bøli kenyɑni, o yïëye nuti nyönhø keny-ɑ ɑ́lïdhe kinni dële rum thøø, o nyödi Sɑrɑ̀ cyëge rum thøø thyew. Yije nuti pyërø ki møg-ɑ ɑ́kwëng yi Jwøk; de pyëwe ɑ́wëggi tëngø yi yïëye. E gɑ̈nn-ɑ kinni, Jwøk, gïn-ɑ ɑ́kwøbe ógwøg yi en ceth. Bɑng yïëyɑni ɑ ɑ́kwɑɑny Abrɑhɑm yi Jwøk, ɑ́ ngɑntir. Kwøbbi kinni, “Ákwɑny ɑ́ ngɑntir yi Jwøk” nuti gwedø kɑ pere kete. Ge ɑ́gwed kɑ peree thyew, wɑ ɑ ókwɑny wɑ bɑ tyëngtir, wɑ tyëng-ɑ ɑ́yïëyii, en ɑ ngɑn-ɑ ɑ́tug Wë Yëso kì yij thøø. Ámuuj yi en kɑ per lɑ̈ɑ̈nyi orøgee, kɑ gø tuge kì yij thøø kipe løgi wɑ tyëngtir. Anɑn kɑ ɑ́gwøøg wɑ, wɑ tir yi Jwøk kì ri yïëyø, wɑ ɑ́yïddi ki mër kì kɑɑmee ki en, kì ri Wë Yëso Mesiy. O bɑ ree ɑ ɑ́kïdhi wɑ yij dhwɑ̈ngɑni ki yïëyø, o bɑ yij yïëyø menɑni ɑ bëëd yi wɑ kì yij cɑɑr Jwøk. O pëthee nyi bëëd ge med kenyi bëën kömee yi ɑkørr, mɑ́ ɑkørr nyi nywøl-ɑ ngïïnø, o ngïïnø nyi nywøl-ɑ yïëyi dhɑnhø yi Jwøk, o yïëyi dhɑnhø yi Jwøk nyi nywøl-ɑ gɑ̈ɑ̈nø. O wɑ̈thee koo wëggi lɑ̈ɑ̈yø yi gɑ̈ɑ̈nø menɑni, mɑ́ Jwøk mɑ̈ɑ̈dø mee ɑ́kønye yethi pëthee kì ri Wëykwërø, ɑ ɑ́mëggi wɑ yi Jwøk. Mɑ́ e bɑ bøli keny-ɑ ɑ́bëëd wɑ nudd wɑ nyøødh cøn, ɑ ɑ́thøw Mesiy kipe tyëngorøg kì bøli keny-ɑ ɑ́cïb yi Jwøk. Thøwi dhɑnhø kipe ngɑntir bɑ gïjø me gwøge teeg, de dhɑnhø ócuggø böyø thøø mɑwɑnø kipe ngɑndøj. De wɑ ɑ́nyudhi yi Jwøk ki kër-ɑ mɑɑre wɑ; Mesiy ɑ́thøw kiperee wɑ nudd wɑ bɑ tyëngorøg. Wɑ ɑ́reb ki Jwøk yi reme; o wɑ bɑ møg yiel yi en ceth ki cɑ́yi Jwøk møg-ɑ di bï kömee. Wɑ ɑ́bëëd wɑ mɑ̈n ki Jwøk, de wɑ ɑ́reb ki en yi thøwi Wɑ̈de. Kɑ ɑ́rum wɑ ki rebø ki Jwøk ɑnɑn, wɑ bɑ møg yiel ceth kì ri bëëdi Mesiy. Pëthee ceg-ɑ medø thyew kipe gïn-ɑ ɑ́gwøg yi Jwøk kì ri Wë Yëso Mesiy, ngɑn-ɑ ɑ́reb wɑ ki Jwøk. Orøg ɑ́bï kömi piny e kɑ̈ɑ̈l-ɑ ri dhɑnhø ɑ́kyel, en ɑ Adɑm, kɑ orøngɑni ókɑ̈nø ki thøø. Kɑ thøø tɑɑy-ɑ kelli ji bënn, mɑ́ ji ɑ́røngi bënn. Kidyër, orøg ɑ́bëëd e nud kì kömi piny e Ciggi Mosɑ̀ nudd ge bogïn; de keny-ɑ bong Cigg, bong cɑ́y kipe orøg. Mɑ́ cɑg kì ri Adɑm gïti ri Mosɑ̀, bɑ thøø ɑ ɑ́jɑɑg dhɑnhø bëne; cɑgg ɑ́ tyëng-ɑ nuti røngø ki orøøg Adɑm, ɑ ɑ́pyem ciggi Jwøk, tyëngɑni ɑ́thøw thyew. Adɑm ɑ́bëëd ɑ́ ngïji ngɑn-ɑ óbï kì bɑnge. De ge pɑ pɑ̈r; dhwɑ̈ng-ɑ muuj yi Jwøk pɑ ni orøøg Adɑm. Keløg dhɑnhø bëne ojɑɑgø yi thøø ki gööj dhɑnhø ɑ́kyel, dhwɑ̈ɑ̈ng Jwøk dwøng ki mendwøng, nɑ gïn-ɑ mëgge ji kì ri dhɑnhø ɑ́kyel, en ɑ Yëso Mesiy. Gïn-ɑ muuj yi Jwøk, bɑ̈ɑ̈n ki orøøg dhɑnhø ɑ́kyel. Orøøg dhɑnhø ɑ́kyel ɑ́göjj-ɑ ji thøø; de muunyi Jwøk orøg me ngenyø ɑ́nyiige kɑ ji yïëële wɑ̈g. Keløg ji ojɑɑgø yi thøø ki gööj dhɑnhø ɑ́kyel, ji ceg kɑ jɑɑgø yi nënnì kì bɑng dhɑnhø ɑ́kyel, en ɑ Yëso Mesiy! Tyëng-ɑ ɑ́thödhi ki dhwɑ̈ɑ̈ng Jwøk men-ɑ dwøng, kɑ ge ogöögø ge tir kì yï Jwøk, ge ójyɑ̈ɑ̈gø kì yethi nënnì kì ri Mesiy. Ni kɑ ɑ́pɑ̈dhi orøøg dhɑnhø ɑ́kyel kömi ji bënn, bëëdi dhɑnhø ɑ́kyel e tir, ji bënn gwøge’ gwøgø ge tir, kɑ gï thödhe ki wëy. Cøn, ji mø gïïr ɑ́cwølli gɑ tyëngorøg kì bɑng pëëmi dhɑnhø ɑ́kyel. Nɑ menɑni thyew, ji mø gïïr ócwølli gɑ tyëngtir kì bɑng dhɑnhø ɑ́kyel me pɑ pëmø. Ciggi Mosɑ̀ ɑ́bï kɑ orøg óngënyø, de keny-ɑ ɑ́ngënyi orøg, dhwɑ̈ɑ̈ng Jwøk ɑ́pëddi ngënyø. Nɑ menɑni ceth, ni kɑ ɑ́jyɑ̈ɑ̈g orøg ki thøø, dhwɑ̈ɑ̈ng Jwøk göög-ɑ bëëntir, men-ɑ peej wɑ yethi nënn-ɑ ɑtheer kì ri Wë Yëso Mesiy. Wɑ ókööb ɑ dï? Bëëd wɑ kì yij orøg, o dhwɑ̈ɑ̈ng Jwøk dønge? Pɑth! Wɑ ɑ́rum ki thøø kì yij orøg, wɑ pɑ cuggi døøg yij orøngɑni këti. Ngɑ̈nyi yi wun kinni keny-ɑ ɑ́jwɑ̈ɑ̈g wɑ, wɑ ɑ́ceg-ɑ rëbø ki Yëso Mesiy, o wɑ óthøw wɑ kyeel ki en. Wɑ ɑ́kony kyeel ki en kì yij jwɑ̈ɑ̈gø, kɑ thøwe nywɑg wɑ ki en, o nɑ kɑ ɑ́tugii yi Wïy kì yij thøø, wɑ óbëëdø ki bëën-ɑ nyɑ̈n thyew. Kɑ ɑ́rum wɑ ki rëbø ki en kì yij thøø me ni thøwe, wɑ órëbi ki en thyew kì yij dhwönhe. O ngɑ̈nyi yi wɑ kinni bëëdee men-ɑ kɑ̈ge dööng ɑ́gur wïj yɑdh ɑrïw kyeel ki Mesiy kipe kinni, o orøg wïye ki jɑɑgi dëllee; o wɑ koo bëëdø këti wɑ bɑ bɑ̈nggi orøg. Mɑ́ kenyi thøw ji, ge nyi ceg-ɑ bëën wɑ̈g kì thɑ́ ciggi orøg. Mɑ́ wɑ ɑ́thøw kyeel ki Mesiy, wɑ ɑ́yïëy ceth kinni wɑ ónëënø kyeel ki en. O wɑ ngɑ̈ny wøw kinni, Mesiy kɑ ɑ́rume tugø yi Jwøk kì yij thøø, pɑ cigi thøø. O thøø óbëëdø yïe bong tegø kì köme. Mɑ́ kɑ ɑ́thøwe, ɑ́thøw e gøøm-ɑ orøg tyelø ɑ́kyel, o kì yethi nënne, ónëënø e rëbø ki Jwøk. Kwɑnyu ri wun ceth kinni wu ɑ́rum ki thøø ki gööj orøg, o wu nëënø wu rëbø Jwøk kì ri Yëso Mesiy. Dëlli wun, dëll-ɑ óthøw, ko wëggu jɑɑgø yi orøg, kipe wu ópeeje be gwøg ki gïg-ɑ tyer yi dëlli wun. Dëlli wun ko mïdhi wun gɑ møg nyi göög wun ki gïgrijjø. De mïdhu dëlli wun gɑ møg gwøg wun gwøøg Jwøk. Wu ko jɑɑg yi orøg këti, mɑ́ wu pɑ ying thɑ́ Ciggi Mosɑ̀, de wu jɑɑg-ɑ yi dhwɑ̈ɑ̈ng Jwøk. Dɑ́ kidï? Røngi wɑ mɑ́ wɑ pɑ jɑɑg-ɑ yi Ciggi Mosɑ̀, de wɑ jɑɑg-ɑ yi bëëntir kì yij dhwɑ̈ɑ̈ng Jwøk? Pɑth! Ngɑ̈nyi yi wun kinni, keløg ri wun gwøøg wu’ bɑ̈nggi ngɑn megø, bɑ ngɑnɑni ceth ɑ kwøbbe lïngi yi wun; ying-ɑ́ orøg ɑ nyi nywøl thøø, kí ying-ɑ́ yïëyø ɑ nyi nywøl bëëntir. De pwøj wɑ Jwøk, mɑ́ wu ɑ́bëëd wu bɑ bɑ̈nggi orøg kidyër, kɑ møg-ɑ ɑ́pwönyi wun bënn yïëy yi wun, kɑ wu pɑ̈d kì yethi töjji orøg, ɑgöög wun ki bɑ̈nggi bëëntir. (Yɑ 'kööb-ɑ yëth-ɑ nyi 'kööb yi ji yethi cyɑ̈ng, mɑ́ wu nyøødh ki nyødhi dhɑnhø yøw.) Wu ɑ́bëëd kì bøli keny megø ri wun gwøøg wun bɑ̈nggi bëënrɑj; wu gøgg-ɑ rɑj, de ɑnɑn kɑ ɑ́døøg wun yuu Jwøk, bëëd wun wu bɑ ɑkwër, wun ɑ́ bɑ̈nggi bëëntir. Keny-ɑ ɑ́bëëd wu bɑ bɑ̈nggi orøg, e bong gïn cïrri wun bëëntir, dɑ gïgdøj mɑ ɑ́yod yi wun kì bɑng gïgrijjø møg-ɑ ɑ́gøggi yi wun, wu yɑ̈ɑ̈rø yi gen ɑnɑn? Gïgɑni nywøl-ɑ thøø! De ɑnɑn, wu ɑ́rum ki pɑ̈dø kì yethi töjji orøg; o wu ɑ́göög ki bɑ̈nggi Jwøk. Gïn-ɑ ɑ́yod yi wun bɑ bëëdi wun wu bɑ ɑkwër, o wu óyïddi ki nënn-ɑ ɑtheer. Mɑ́ köögi mi orøg bɑ thøø; de gïn-ɑ nyi muuj yi Jwøk bɑ nënn-ɑ ɑtheer, kì ri Wë Yëso Mesiy. Wun ɑ nyiimïɑ, møg-ɑ dwɑddɑ kwøbø ek ngɑ̈nyi yi wun, mɑ́ Ciggi Mosɑ̀ ngɑ̈nyi yi wun; Ciggi Mosɑ̀ yï gen dɑ tegø kì kömi ji kɑ̀ bëëd gen ge onëënø kì kömi piny. Møgɑni nɑ kɑ nyi bëëd ngɑndhɑjø e bɑ ɑtwöj yi kwøbbi jɑlgøle kɑ̀ nud jɑlɑni e onëënø kì kömi piny. De keløg jɑlɑni othøø, ngɑnɑni pɑth ki ɑtwöj këti yi ciggi nywöm møg-ɑ ɑ́rebii ki jɑlgøle. Kɑ̀ bëëd møgɑni kinøw, keløg ngɑnɑni okwɑnyø yi jɑlø megø, e jɑlgøle nudd e onëënø, ngɑnɑni cwøl ɑ́ ngetorøg. De keløg jɑlgøle thøø, ciggɑni, yï gen bong tegø kì köme këti. O keløg e okwɑnyø yi jɑlø megø, pɑth ki orøg këti. Wu bëëd ɑ nøw thyew nyiimïɑ ki Ciggi Mosɑ̀; wu ɑ́rum ki thøø, mɑ́ wu bɑ kwï dëël Mesiy; o ɑnɑn wu bɑ mø ngɑn-ɑ ɑ́tug kì yij thøø, o wu ógöggi wun Jwøk. Keny-ɑ ɑ́bëëd wɑ, wɑ ködd-ɑ kömi bëëdi dël, wɑ ɑ́yɑb-ɑ gïgrijjø møg-ɑ tyer yi pëthee, ge tug-ɑ yi Ciggi Mosɑ̀, kɑ orøngɑni ókɑ̈nø ki thøø. De ɑnɑn, wɑ ɑ́pɑ̈d kì ri Ciggi Mosɑ̀, mɑ́ wɑ ɑ́thøw kì ri gïn-ɑ ɑ́twööj wɑ piny, kipe kinni o wɑ mɑlli wɑ Jwøk ki yuu-ɑ nyɑ̈n men-ɑ kɑ̈ɑ̈l yï Wëy. Anɑn, ɑ́ gïn ɑ ókømmi yi wɑ kipe Ciggi Mosɑ̀? Wu orumø kinni, Ciggɑni bɑ orøg? Ge pɑth ki orøg. De ge bɑ Cigg-ɑ ɑ́nyudhi yɑn gïn-ɑ wɑngi orøg. Keløg Ciggi Mosɑ̀ pɑ di kööb kinni, “Yï ko nyi tyer gïi ngɑn megø,” tyëëdø pɑ di yod yi yɑn. De orøg ɑ́yïddi ki yöö kì bɑng Ciggɑni, mɑ́ orøg ceg bëëdø e thøø ke bongii Cigg. Yɑ ɑ́bëëd yɑ onëënø keny-ɑ ɑ́bëëd kömɑ bong Cigg; keny-ɑ ɑ́bëën Cigg, kɑ orøg ócɑ̈gø nënni, kɑ yɑ othøø. Kɑ yod yi yɑn thyew kinni, Ciggi Jwøk møg-ɑ di kɑ̈ni ki nënn-ɑ ɑtheer, bene gen ɑ nënni ge kɑ̈ɑ̈l-ɑ thøwɑ. Orøg ɑ́yïddi ki yöö men thɑbe yɑn, kɑ yɑ nɑ̈ge. Ciggi Mosɑ̀ kiri gen bɑ gïi kwër, o møg-ɑ ceg yi Jwøk bɑ gïi kwër, o bɑ dyër, o døøj. De yöd ɑ́ gïndøj ɑ kɑ̈ni ki thøwɑ? Pɑth! De ceg bëëdø ɑ́ orøg ɑ ɑ́gwøg gïnɑni e göög-ɑ gïn-ɑ døøj. Orøg ɑ́kɑ̈ni ki thøwɑ, o bëëde e rɑɑj lidh. O kɑ̀ køøl møgɑni kömi cigg ceth, orøg ceg-ɑ nënnø e pëddi rɑ̈jø. Ngɑ̈nyi yi wɑ kinni, Ciggi Mosɑ̀ bɑ kipe wë̈yee. De yɑ bɑ dhɑnhø mɑ ɑ́ngëwwi orøg ɑ́ bɑ̈ng. Gïn-ɑ gwøg yi yɑn dhɑ̈li gɑmø yi wïjɑ; mɑ́ yɑ pɑ nyi gwøg-ɑ gïn-ɑ dwɑddɑ, de yɑ nyi yöd yɑ gwøg-ɑ gïn-ɑ mɑɑn yi pyëwɑ. O kɑ̀ gwøgɑ gïn-ɑ mɑɑn yi pyëwɑ, menɑni nyodh-ɑ kinni yɑ ɑ́yïëy kinni Ciggi Mosɑ̀ bɑ dyër. Kɑ̀ bëëde kinøw, pɑth ki yɑn ɑ gwøg gïnɑni kidyër, de bɑ orøng-ɑ bëëdø kì riɑ, ɑ ɑ́gwøgii. Yɑ ngɑ̈ny wøw kinni, bong døøjø me ying dëlɑ, mɑ́ gwøngdøj men-ɑ nyi dwɑddɑ gwøgø nyii kyerø yi dëlɑ. Gïndøj men-ɑ dwɑddɑ gwøgø pɑ nyi gwøg yi yɑn; de yɑ nyi yöd yɑ gwøg-ɑ gïnrɑj men-ɑ pɑ dwɑddɑ gwøgø. O keløg yɑ nyi gwøg-ɑ gïn-ɑ pɑ dwɑddɑ gwøgø, menɑni wɑng-ɑ kinni pɑth ki yɑn ɑ gwøgii, dɑ́ orøg men-ɑ bëëdø kì riɑ ɑ gwøgii. Kɑ yodɑ ceth kinni cigg ogöögø, kɑ̀ dwɑddɑ gwøgi gïndøj, nyi yöd ɑ́ gïnrɑj kete ɑ nud. Pyëwɑ med cɑrø ki Ciggi Jwøk. De nenni yi yɑn kinni bɑ cigg mø bɑ̈ɑ̈n ɑ göögø kì riɑ; cigg mø bɑ̈ɑ̈n ki cigg-ɑ yïëy yi rummɑ. Møgɑni yɑ ɑ́løg gen ɑmɑɑg ciggi orøg men-ɑ göögø kì riɑ. Yeki yɑn ø! Wïjɑ ɑ́muum! Á men ɑ óyiel yɑn ki dël-ɑ kïdhi yɑn yij thøø kinnï? Yɑ pwøj-ɑ Jwøk, kì ri Wë Yëso Mesiy. Bene bëëdɑ èn: kì yïɑ, yɑ ócuggø göggi ciggi Jwøk ki rummɑ, kedh bëëdi dhɑnhø men-ɑ riɑ gögg-ɑ orøg. Anɑn, bong cɑ́yi Jwøk men-ɑ óyod yi tyëng-ɑ ɑ́yïëy Yëso Mesiy. Mɑ́ ge ɑ́gööny wɑ̈g kì yethi töjji orøg geki thøø. O ngɑn-ɑ ɑ́gööny gen wɑ̈g bɑ Wëy, ngɑn-ɑ nyi kɑ̈ni ki nënn-ɑ ɑtheer kɑ̀ yïëëy Yëso Mesiy yi dhɑnhø. Mɑ́ gïn-ɑ ɑ́dhɑ̈li gwøgø yi Ciggi Mosɑ̀ kì bɑng nyødhi dhɑnhø, ɑ́gwøg yi Jwøk keny-ɑ ɑ́öre Wɑ̈de e rug-ɑ dël me pɑ̈r ki dëllee, dëlli orøg; o orøg kɑ̈ɑ̈le wɑ̈g. Møgɑni bɑ kipe kinni, o gïn-ɑ ceg yi Jwøk kì yethi Ciggi Mosɑ̀ gwøg yi wɑ. Mɑ́ wɑ pɑth ki ji-ɑ nyi cyɑ̈dhi kì bɑng orøng-ɑ nyi kɑ̈ɑ̈l ri bëëdi dhɑnhø. De wɑ nyi cyɑ̈dh-ɑ́ɑ̀ bɑng Wëy ceth. Tyëng-ɑ nyi cyɑ̈dhi kì bɑng orøng-ɑ nyi kɑ̈ɑ̈l ri bëëdi dhɑnhø, nyi mïdh-ɑ kwøbbɑni ceth. De tyëng-ɑ nyi bëëdø kì bɑng Wëy nyi mïdh-ɑ kwøbbi Wëyɑni ceth. Ngɑn-ɑ nyi cïb rumme kömi orøg, bɑ en ɑ óthøw. De ngɑn-ɑ nyi cïb rumme kömi kwøbbi Wëy, bɑ en ɑ ómërri ki Jwøk, kɑ óyïddø ki nënn-ɑ ɑtheer. Ji nyii göögø ge mɑ̈n ki Jwøk, kenyi jɑɑg gen yi dëlli gen; mɑ́ ciggi Jwøk pɑ mïdhi yi gen, o ge pɑ cuggi mïdhi yi gen kidyër. Jwøk pyëwe pɑ med ki tyëng-ɑ jɑɑg yi dëlli gen. De wun, wu pɑ lug-ɑ́ɑ̀ bɑng gïg-ɑ tyer yi dëlli wun; wu lug-ɑ́ɑ̀ bɑng Wëy, mɑ́ Wëyi Jwøk bëëd ɑ ri wun. Ngɑn yïe bong Wëyi Mesiy, pɑth ki ngeti Mesiy. Keløg Wëyi Mesiy bëëd ɑ ri wun, o dëlli wun bɑ møg-ɑ óthøw ki gööj orøg, Wëyɑni bɑ nënnì kì yï wun, mɑ́ wu ɑ́gwøg wu tir yi Jwøk. O thyew, keløg Wëyi Jwøk, ngɑn-ɑ ɑ́tug Yëso Mesiy kì yij thøø, bëëd ɑ ri wun, ngɑn-ɑ ɑ́tug Yëso Mesiy kì yij thøø, dëlli wun møg-ɑ thøø, óthödhe ki nënnì kì ri Wëye møg-ɑ bëëdø kì ri wun. Nyiimïɑ, kömee dɑ gwøg, de pɑth ki kinni o wɑ bëëd wɑ ki bëën-ɑ dwɑddi yi dëllee. Mɑ́ keløg wu obëëdø ki bëën-ɑ dwɑddi yi dëlli wun, wu ceg-ɑ thøø; de keløg ɑ́ gïn-ɑ dwɑddi yi Wëy ɑ nyi gwøg yi wun, wu nɑ̈g-ɑ gwøøg orøg, wu ónëënø. Tyëng-ɑ pyejji yi Wëyi Jwøk, ge bɑ nyigi Jwøk. Mɑ́ Wëy-ɑ ɑ́mëggi wun yi Jwøk, wu pɑ gwøøge bɑ̈ngg, o wu pɑ wëgge böggø; de wu gwøøge’ nyigi Jwøk, men cuggi wɑ ki cwöd ki tegi Wëyɑni kinni, “Abɑ̀! Wïyø!” Wëyi Jwøk ceg-ɑ rëbø ki wëyee, o ge kööb gen kinni, wɑ bɑ nyigi Jwøk. Kɑ̀ bëëd wɑ, wɑ bɑ nyigi Jwøk, gyëdhh-ɑ mïdhe gɑ mø jie ókwɑny yi wɑ; o møg-ɑ ɑ́mïdhi yi Jwøk gɑ mø Mesiy, ókwɑny yi wɑki Mesiy. Mɑ́ keløg wɑ orɑngø kyeel ki Mesiy, dhwɑ̈nge ónywɑg yi wɑ ki en thyew. Orɑng-ɑ rɑngi wɑ ɑnɑn rømmi yi yɑn kinni pɑ cuggi kyëëwø ki dhwɑ̈ng men-ɑ ónënni kì riee. Jɑmm-ɑ ɑ́cwɑ̈j yi Jwøk bënn yïd-ɑ bøli keny-ɑ ónyodh Jwøk nyige. Mɑ́ gïg-ɑ ɑ́cwɑ̈j ɑ́bëëd gɑ ɑkwøb ceth kinni kej gen óthumi, e pɑth ki gïn-ɑ dwɑddi yi gen, de ɑ́dwɑdd-ɑ yi Jwøk kinøw. De ɑ́bëëd e dɑ gɑ̈ɑ̈nø ceth kinni, gïg-ɑ ɑ́cwɑ̈j ópɑ̈d cyɑ̈ng megø kì yij bɑ̈ɑ̈ngø mi rɑ̈jø, kɑ ge óyïddø ki dhwɑ̈ɑ̈ng nyigi Jwøk, kɑ ge ótɑ̈bbø geki nyigi Jwøk kì yij dhwɑ̈ngɑni. Mɑ́ e ngɑ̈nyi yi wɑ kinni gïg-ɑ ɑ́cwɑ̈j ɑ́wöni ge ceg-ɑ orɑng ki orɑng me dhøge ledh, ni rɑ̈ɑ̈m pɑ̈dhi piny. De pɑth ki gïg-ɑ ɑ́cwɑ̈j keti gen ɑ rɑngø; wɑ ɑ yïee di Wëy, ɑ́ gïn-ɑ ɑ́kwøng ki mëggi wɑ yi Jwøk, wɑ ceg-ɑ orɑng kiriee, wɑ yïd-ɑ Jwøk, o wɑ gwøøge wɑ bɑ nyige, o wɑ göönye wɑ̈g kì yij orɑngee bëne. Mɑ́ wɑ ɑ́yiel-ɑ bɑng gɑ̈ɑ̈nø; de ke di bëëd e gïn-ɑ ngɑ̈nni yi wɑ onennø yi wɑ, menɑni pɑ cwølli ɑ́ gɑ̈ɑ̈nø. Á men ɑ cuggi gɑ̈nni gïn-ɑ nenne? De keløg wɑ gɑ̈nn-ɑ gïjø me pɑ nenni yi wɑ, wɑ yïdø wɑ ceg-ɑ ngïnø. O Wëy nyi bï-ɑ be kønyi wɑ thyew kì bɑng nyødhee. Mɑ́ wɑ kwïj kwɑ̈jjø kidøøj; Wëy kiree kwɑjj-ɑ Jwøk kiperee ki orɑng me pɑ cuggi kwøbø. O Jwøk ngɑn-ɑ nyi nenni yethi pëthee, rumm-ɑ rømmi yi Wëy ngɑ̈nyi yi en; mɑ́ Wëy nyi ceg-ɑ odhɑm kì bøli Jwøk kipe jie, e kwɑjj-ɑ møg-ɑ kyëëw ki gïn-ɑ dwɑddi yi Jwøk ceth. Ngɑ̈nyi yi wɑ kinni, Jwøk göög ɑ kyeel geki tyëng-ɑ mɑɑrii, gen ɑ ji-ɑ ɑ́cwøle kipe gïn-ɑ dwɑdde. Tyëngɑni ɑ́yieny-ɑ yi Jwøk kɑ gï cïbe wɑ̈yi gen kipe kinni o ge göög gen ni Wɑ̈de, o Wɑ̈d bëëde ɑ́ nyeldwøng kì gøl-ɑ ngenyø. Tyëng-ɑ ɑ́yieeny wɑ̈yi gen yi Jwøk, gï ɑ́cwøøle yïe; o tyëng-ɑ ɑ́cwøle, ɑ́gwøge ge tir, kɑ gï thödhe ki dhwɑ̈nge. Kɑ̀ bëëd møgɑni bënn kinøw, wɑ kööb ɑ dï? Keløg wɑ bɑ ɑcwɑg yi Jwøk, ɑ́ men ɑ cuggi tøønyi wɑ? O men-ɑ́ Jwøk, ɑ nuti mɑ̈ɑ̈n Wɑ̈de, de gø ɑ́muuje kɑ nɑ̈g kiperee wɑ bënn, dɑ gïn-ɑ ómɑ̈ɑ̈ne wɑ këti? Á men ɑ cuggi gøønyi tyëng-ɑ ɑ́rum ki cwɑgø yi Jwøk, kɑ gï løge tyëngtir? Wɑlɑ̀ ɑ́ men-ɑ ócɑy gen? Mɑ́ ge pɑ cɑy yi Mesiy ngɑn-ɑ ɑ́thøw kiper gen, eni ngɑn-ɑ ɑ́dhwödh kì yij thøø, o bëëd ɑ wïj kyëëj Jwøk, e kwɑjj-ɑ Jwøk kiperee! Á men ɑ cuggi dɑ̈ɑ̈ngi wɑ ki mɑ̈ɑ̈dø mi Mesiy? Wɑ ócuggø dɑ̈ɑ̈ngø ki en yi ɑkørr, wɑlɑ̀ orɑng, wɑlɑ̀ guudi nying, wɑlɑ̀ kɑ̈j, wɑlɑ̀ cyɑ̈dhi nøw, wɑlɑ̀ böögø, wɑlɑ̀ thøø? Ni kɑ̀ kööb wɑ̈nyi kwërø kinni, “Wø nyi køm-ɑ nɑ̈gø kipe nyingí kì yethi cyɑ̈ng bënn; wø mïdhi wø nɑ dyëg møg kïdhi be ngɑlø.” Cɑgg wɑ rɑngø, wɑ ótyɑ̈mø ceth ki nyingi ngɑn-ɑ ɑ́mɑɑr wɑ. Mɑ́ yɑ ngɑ̈ny wøw kinni bong gïn cuggi dɑ̈ɑ̈ngi wɑ ki mɑ̈ɑ̈dø mee: wɑ pɑ cuggi dɑ̈ɑ̈ngø yi thøø wɑlɑ̀ nënnì; wɑ pɑ cuggi dɑ̈ɑ̈ngø yi wëywödd wɑlɑ̀ jɑggi wëywödd; wɑ pɑ cuggi dɑ̈ɑ̈ngø yi bøli keny ɑnɑn wɑlɑ̀ dhuki megø; wɑ pɑ cuggi dɑ̈ɑ̈ngø yi mɑl wɑlɑ̀ piny; bong gïïpiny kì ri gïg-ɑ ɑ́cwɑ̈j bënn, me cuggi dɑ̈ɑ̈ngi wɑ ki mɑ̈ɑ̈dø mi Jwøk kì ri Wë Yëso Mesiy. Anɑn, kɑ̀ bëëdɑ yɑn ɑ́ ngɑn-ɑ ɑ́yïëy Mesiy, yɑ pɑ kømmi pyed, o møg-ɑ rømmi yi yɑn ki pyëwɑ kì ri Wëykwërø bɑ kinni, yijɑ ceg-ɑ ywøg ki mendwøng, o pyëwɑ dhɑ̈li kwöjø; pyëwɑ tyer-ɑ kinni di ying me lɑ̈w keløg yɑ di bëëd yɑ pɑ̈dø kì ri Mesiy kipe kinni o yɑ di cuggɑ ki yieli tyëng pödhi wøn. Tyëngɑni bɑ kwɑrri Isrɑil. Ge bɑ jii Jwøk; o ge ɑ́gwøg yi Jwøk gɑ nyige, kɑ dhwɑ̈nge nyudhe gïn, kɑ onywɑ̈gø kwøb ki gen, ɑmëgge gïn Cigg, kí mɑ̈ddø men-ɑ dyër, kí kwëng. Kwɑyy ɑ́kɑ̈ɑ̈l-ɑ ri gen, o Mesiy keny-ɑ ɑ́gööge ɑ́ dhɑnhø, ɑ́ying-ɑ kelli jurɑni. Wiy Jwøk Ngɑn-ɑ jɑɑg gïïpiny bëne lenhi gïti ɑtheer! Amen. Yɑ pɑ ceg kwøb kinni møg-ɑ ɑ́kwëng yi Jwøk ɑ́bɑ̈jji; mɑ́ e pɑth ki tyëng Isrɑil bënn ɑ bɑ jii Jwøk. O pɑth ki kwɑrri Abrɑhɑm bënn ɑ bɑ nyigi Jwøk. Abrɑhɑm ɑ́köbbi yi Jwøk kinni, “Kwɑrrí møg-ɑ ɑ́kømmɑ ónywøl-ɑ yi Isɑɑk.” Kwøbbɑni wɑng-ɑ kinni, nywøl-ɑ nywøl ki yuu-ɑ nyi nywøøl ji, pɑth ki nyigi Jwøk; dɑ́ nywøl-ɑ ɑ́nywøl kì bɑng kwëng ɑ bɑ nyigi Jwøk. Kwëngg-ɑ ɑ́kwøb yi Jwøk bɑ kinni, “Yɑ ódwöög dhung-ɑcɑ̀ piny nɑ men, kì bøli kenyɑni Sɑrɑ̀ óbëëd kööre dɑ wɑ̈d.” Pɑth ki codhi gen. Mɑ́ wɑ̈ddi Rebekɑ̀ gɑ ɑ́ryew, wïyi gen bɑ ɑ́kyel, ɑ løg Isɑɑk. Møgɑni nɑ møg-ɑ ógwedø kinni, “Yɑgob ɑ́mɑɑrɑ, kɑ Isøø mɑɑnɑ ki mendwøng.” Wɑ kwøb-ɑ ngø? Jwøk yije dɑ geny? Bogøn kinni tek. Mɑ́ Mosɑ̀ ɑ́köbbe kinni, “Pyëwɑ ólɑ̈ɑ̈m ki ngɑn-ɑ dwɑddɑ. O yijɑ óywöngi ki ngɑn-ɑ dwɑddɑ thyew.” Kɑ̀ bëëde kinøw, pɑth ki gïg-ɑ dwɑddi yi dhɑnhø wɑlɑ̀ gïg-ɑ gwøg yi en, dɑ́ Jwøk ɑ nyi gwøg møg-ɑ dwɑdde e kete. Mɑ́ wɑ̈nyi kwërø rɑ̈ɑ̈dh Rïp ɑ́köbbe kinni, “Yï ɑ́gwøgɑ yïn ɑ́ rɑ̈dh kɑ per kinni, o tegɑ nyodhɑ kì rií, o perɑ tɑɑye kömi piny bëne.” Menɑni wɑng-ɑ kinni, Jwøk pyëwe nyii lɑ̈ɑ̈mø ki ngɑn-ɑ dwɑdde. O ngɑn-ɑ dwɑdde wëggi pëmø nyi göjje’ pëëmø. Yɑ óköbbi yi nget ɑ́kyel kì kelli wun kinni, “Keløg ɑ́ kinøw, ɑ́ kipe ngø ɑ kööb Jwøk kinni dhɑnhø bɑ̈jjø? Á men ɑ cuggi jogi Jwøk?” Yï bɑ dhɑnhø yøw! Jwøk ócuggø jogø yi yïn? Gïn-ɑ ɑ́cwɑ̈j ki lɑ̈bø ócuggi pyëji ngɑn-ɑ ɑ́cwɑ̈jii kinni, “Yɑde ɑ cwɑ̈ɑ̈j yɑn kinøw?” Yï orumø kinni bødhi lɑ̈b, yïe pɑ di tegø me cwɑ̈je lɑ̈bø ni kɑ̀ dwɑdde gøn? Ngee, ócuggø cwɑ̈j ki tɑ̈mmì ɑ́ryew ki lɑ̈bø mɑ ɑ́nywøb ɑ́ ɑ́kyel; ɑ́kyel bɑ me nyi kïdhi gïndøj, o men-ɑ kyeelø bɑ men nyi kïdhi gïn cödhø. Pɑ̈r ceth ki gïn-ɑ ɑ́gwøg yi Jwøk; ɑ́dwɑdd-ɑ nyodhi linye, kipe kinni o bëëdi tege yod, de tyëng-ɑ ɑ́wëggi pyëwe rënyø ɑ́ngine, gen ɑ møg-ɑ ɑ́cïb gɑ mø ryɑ̈gø. Ádwɑdd-ɑ nyodhi döngi dhwɑ̈nge, men-ɑ ɑ́kønye kömee, wɑ tyëng-ɑ́ riee ɑ́dwɑdde nyodhi lɑ̈mpyëwe, ɑ ɑ́yienye gɑ møg mëgge dhwɑ̈nge. Mɑ́ bene wɑ tyëng-ɑ ɑ́cwøle, o pɑth ki kelli Yeud keti gen ɑ ɑ́yieeny wɑ, de kwïee ɑ́yïëëny ɑ kelli tyëngpɑth ki Yeud. Møgɑni nɑ møg-ɑ kømmi yi Jwøk kì yij wɑ̈nyi Odheyɑ̀ kinni, “Tyëng-ɑ ɑ́bëëd ge pɑth ki møgɑ, ge ócwøllɑ gɑ jiɑ. O pönh-ɑ ɑ́bëëd e pɑ mɑɑrɑ, ócwøllɑ ɑ́ pönh-ɑ mɑɑrɑ. O kì keny-ɑ́ yije ɑ́köbbi gen kinni, ‘Wu pɑth ki jiɑ,’ ge ódøøg be cwøllø gɑ nyigi Jwøng-ɑ Nëënø.” Kɑ Icɑyɑ̀ okööbø kì ri tyëng Isrɑil kinni, “Cɑgg kwɑnni tyëng Isrɑil gïïr ni ɑyejø, bɑ mø nøg kì kelli gen ɑ óyiel; mɑ́ Wë Jwøk, gøøny kömi piny ójwɑne ki lidhø.” Møgɑni nɑ møg-ɑ ɑ́töng yi Icɑyɑ̀ kinni, “Keløg Jwøk Áyïmø, wɑ pɑ di wïye ki kwɑrr, wɑ di göög ni Sødømɑ̀ geki Gømørɑ̀.” Wɑ okööbø kinni, tyëngpɑth ki Yeud møg-ɑ nuti pɑ̈nyi ri gen ki yɑbi bëëntir, ge ɑ́göög ge tir kì bɑng yïëyø; e bëëntir nuti yodø yi jii Jwøk, møg-ɑ ɑ́yɑb cigg. Á kipe ngø? Kipe kɑ̀ nuti cungi gen kì kömi yïëyø, de ge ɑ́cung ɑ kömi gïg-ɑ ɑ́gøggi yi gen. Acwɑny gen “Kït.” Eni kïn-ɑ kømmi yi wɑ̈nyi kwërø kinni, “Yɑ cïb-ɑ Dhɑyøn ki kït, kït men-ɑ ócwɑnyyi tyelli ji; kït men-ɑ ówëggi gen pɑ̈nhhø. De ngɑn óyïëyii wïje koo wöl lɑ̈ɑ̈yø.” Wun ɑ nyiimïɑ, gïn-ɑ tyerɑ ki mendwøng bɑ kinni, o tyëng Isrɑil yiel, o yɑ nyi kwɑjj-ɑ Jwøk kiper gen. Mɑ́ gïn-ɑ ngɑ̈nyɑ bɑ kinni, ri gen mëggi gen Jwøk, de gïn-ɑ nyi gwøg yi gen pɑ nyi pɑ̈dhi keje, kì bɑng kwïji wøw. De kër-ɑ nyi bëëd ji ge tir kì yï Jwøk kwïj yi gen, o ge nyi tyer-ɑ gwøg ge tir ki cwɑggi gen. O yuu bëën-ɑ dwɑddi yi Jwøk bɑny yi gen. Bëëdø menɑni bɑ kinni Cigg ɑ́ködd-ɑ ri Mesiy; o ngɑn yïëyii ceg-ɑ gwøg e tir kì yï Jwøk. Mosɑ̀ ɑ́gwëëd ki kër-ɑ göög dhɑnhø e tir kì ri Cigg kinni, “Ngɑn-ɑ ógwøg møg-ɑ kømmi yi Cigg óyïddi ki nënnì.” De møg-ɑ kømmi yi wɑ̈nyi kwërø kì ri gwøøg dhɑnhø e tir kì bɑng yïëyø bɑ kinni, “Ri wun ko pyënyi wun kinni ɑ́ men-ɑ ókedhi mɑl?” (Menɑni bɑ kinni, o Mesiy kɑ̈ɑ̈le piny). Wɑlɑ̀ wu ko pëjji kinni, “Á men ɑ ókedhi pönh-ɑ thɑ piny?” Bɑ kinni o Mesiy kɑ̈ɑ̈le wɑ̈g kì yij thøø. Møg-ɑ kømme bɑ kinni, “Wööni Jwøk ying-ɑ butí; ying-ɑ dhøgí, kí pyëwí.” O menɑni bene wööni yïëyø men-ɑ pwönyi yi wøn. Keløg yï okööbø kì bøli teedø kinni Yëso bɑ Wë, kɑ yï oyïëyø ki pyëwí kinni ɑ́tug yi Jwøk kì yij thøø, yï óyiel. Mɑ́ bɑng yïëyø miee, ɑ yïëëy wɑ yi Jwøk kinni wɑ tir; o wɑ yiel-ɑ bɑng kɑ̀ kwøb wɑ møgɑni kì bøli teedø. Mɑ́ wɑ̈nyi kwërø okööbø kinni, “Ngɑn-ɑ yïëyii, wïje koo lɑ̈ɑ̈y.” Menɑni wɑng-ɑ dhɑnhø bëne, mɑ́ bong gïn bɑ̈ɑ̈n kì kelli Yeud ki tyëng Yönɑn. Mɑ́ Jwøk bɑ Wïi gen bënn; gyëdhhe nyi mëgge’ tyëng-ɑ kwɑjjii bënn. Nɑ møg-ɑ kømmi yi wɑ̈nyi kwërø kinni, “Ngɑn-ɑ kwɑ̈jji ki nyingi Wë, óyiel.” De ókwɑjji yi gen kidï, keløg ge nuti yïëyø? O ge óyïëy kidï, keløg wöödø nuti lïngø yi gen? O ge ólïngø kidï keløg ge nuti pwönyø? O wöödø ópwönyi kidï, keløg e tyëngwöödø nuti örø? Møgɑni nɑ møg-ɑ kømmi yi wɑ̈nyi kwërø kinni, “Tyëng-ɑ nyi kɑ̈lli Wöndøj, nyi muuj-ɑ teedø ki medi pëëth.” De pɑth ki ge bënn ɑ ɑ́yïëy Wöndøj. Møgɑni nɑ møg-ɑ kømmi yi Icɑyɑ̀ kinni, “Wuö, ɑ́ men ɑ ɑ́yïëy wöön-ɑ kɑ̈lli yi wøn?” Kɑ̀ bëëde kinøw, yïëyø nyi kɑ̈ɑ̈l-ɑ ri lïngi wöödø, o wöödø nyi kɑ̈ɑ̈l-ɑ ri pwönyi kwøbbi Mesiy. De yɑ ceg-ɑ pëjjø kinni, wöönɑni nuti lïngø yi gen kidyër? Ge ɑ́rum ki lïngø ceth, mɑ́ wɑ̈nyi kwërø okööbø kinni, “Cwɑggi gen ɑ́wɑ̈dhi kömi piny bëne; møg-ɑ ɑ́kømmi yi gen ɑ́wɑ̈dhi cögi piny.” O yɑ cig-ɑ pëjjø kinni; tyelli møgɑni nuti yodø yi tyëng Isrɑil? Bɑ Mosɑ̀ kiree ɑ ɑ́kwöngi kwøb kinni, “Wu ógöjjɑ mɑgø yi tyiel ki ji mø pɑth ki pödhø; wu ógöjjɑ mɑgø yi tyiel ki pödhø me bong gïn ngɑ̈nye.” O Icɑyɑ̀ ɑ́kööb ceth e pɑ lyebbi kinni, “Yɑ ɑ́yod-ɑ yi ji mø nuti yɑɑb yɑn; yɑ ɑ́cwöb kì bøli ji mø nuti pyënyi kejɑ.” De møg-ɑ kømme kì ri Isrɑil bɑ kinni, “Yɑ nyi tyëg-ɑ cɑ̈ng, yɑ thɑngg-ɑ cinggɑ, yɑ cwøll-ɑ ji mø muddi gen teeg, mø pëddi pëëmø.” Yɑ ceg-ɑ pëjjø kinni: Jwøk jie ɑ́bɑnye? Gï nuti bɑɑny en! Yɑn kiriɑ, yɑ bɑ wɑ̈d Isrɑil, kwɑɑr Abrɑhɑm, kì gøl Ben Yɑmïn. Jwøk jie nuti bɑɑny en, gen ɑ ji-ɑ ɑ́kwønge ki myegø. Møg-ɑ kømmi yi wɑ̈nyi kwërø ngɑ̈nyi yi wun, keny-ɑ ɑ́gøøny tyëng Isrɑil yï Jwøk yi Eliyɑ̀, ɑ ɑ́kööbe kinni, “Wuö, jøtöng møgí bënn ɑ́nɑ̈g yi gen, kɑ këlli lɑm møgí cøør gen piny; yɑ ketɑ ɑ ɑ́döng, o ge dwɑdd-ɑ nɑ̈gi yɑn.” Kwøbbe ɑ́løøg ɑ dï yi Jwøk? Jwøk ɑ́löggi kinni, “Riɑ ɑ́wïyɑ ki jøg mø kwɑnni gen bɑ ɑ́lïp ɑ́bïryew, mø nuti mɑɑl Bɑɑl, jwøng-ɑ pɑth ki dyër.” Anɑn thyew, dɑ ji mø nøg, mɑ ɑ́yieny yi Jwøk kì bɑng dhwɑ̈ng-ɑ nyi kɑ̈ɑ̈l yïe. Myëg mee kɑ̈ɑ̈l-ɑ bɑng dhwɑ̈ng-ɑ kɑ̈ɑ̈l yïe, de pɑ køøl-ɑ kömi gïg-ɑ ɑ́gwøg yi tyëng-ɑ ɑ́myege. Mɑ́ keløg myëëg Jwøk di køøl-ɑ kömi gïg-ɑ gwøg yi ji, dhwɑ̈nge pɑ di bëëd ɑ́ dhwɑ̈ng-ɑ dyër. Dɑ́ kidï? Gïn-ɑ ɑ́yɑb yi tyëng Isrɑil nuti yood gen. Bɑ ɑkun-ɑ thiinh men-ɑ ɑ́yieny yi Jwøk ɑ ɑ́yodii, de teen-ɑ kyeelø ɑ́meng, kɑ cwöddi Jwøk ocögø gï pɑ lïngi yi gen. Nɑ kɑ̀ kööb wɑ̈nyi kwërø kinni, “Wɑ̈thi gen ɑ́gwøg ge gug yi Jwøk, kɑ pëthi gen gwøge ge nøg, kɑ gï mëgge nying mø pɑ nëënø, kí yïthh mø pɑ lïngø.” O Debïd okööbø kinni, “Wiy ge rënyi yi gïgcɑmm-ɑ rëëj gen, wiy ge pɑ̈nhhi gen, wiy ge cɑy. Wiy ge cør gen, o ge cög ge pɑ nëënø; kɑ wiy ge tor gen yi ɑkørri gen kì yethi cyɑ̈ng bënn.” Yɑ ceg-ɑ pëjjø kinni, “Kɑ ɑ́bɑ̈jji tyëng Isrɑil kinøw, ge ɑ́di wiyø yi Jwøk ki mendwøng?” Ge nuti wiyø ki mendwøng! De kɑ ɑ́bɑ̈nyi gen ki yuu Jwøk, Jwøk wïje ɑ́løge be yieli tyëngpɑth ki Yeud. Møgɑni bɑ kipe kinni o tyëng Isrɑil mɑg yi tyiel kipe kɑ ɑ́kwɑɑny kɑ̈jji gen yi tyëngpɑth ki Yeud. Orøøg Yeud ɑ́kɑ̈ni kömi piny ki gyëdh mø døngø; o tyëngpɑth ɑ́yïddi ki gyëdh kì bɑng nøgi yïëyi Yeud. Kɑ̀ bëëd møgɑni kinøw, gyëdhhi Jwøk koo pëddi døngø keløg tyëng Isrɑil bënn óthumi ki dwöög kö Jwøk? Mɑ́ keny-ɑ ɑ́bɑɑny gen, dhɑnhø bëne ɑ́mërri ki Jwøk. De óbëëd ɑ dï keny-ɑ óyïëëy gen? Óbëëd e nɑ dwöög wɑ̈g kì yij thøø! Keløg budi ópun mëgg-ɑ Jwøk, ópunɑni bëne bɑ mi Jwøk thyew; o keløg byeri yɑdh mëgg-ɑ Jwøk, bɑ̈ddi yɑnhɑni bɑ mø Jwøk thyew. Kwï bɑ̈ddi yɑdh dhetun men-ɑ ɑ́ceg ki pidhø ɑ́rum ki ngølø, kɑ ree mɑ̈gi ki bɑɑd yɑdh mɑ ɑ́kɑ̈ɑ̈l kì pɑ̈l. Wun ɑ tyëngpɑth ki Yeud, wu pɑ̈r ki bɑɑd yɑdh men-ɑ ɑ́kɑ̈ɑ̈l kì pɑ̈l, o ɑnɑn wu onywɑ̈gø wuki Yeud ki gyëdhh-ɑ ɑ́yod yi gen kì bɑng yïëyø. Tyëng-ɑ ɑ́ngøl ni bɑ̈ddi yɑdh ko benyí. Yï thwøg-ɑ dï, yï bëëd ɑ ri byerr, o pɑth ki byerr ɑ bëëdø kì rií? De yï ókööbø kinni, “Bɑ̈ddi yɑnhɑni ɑ́ngøl kɑ per kinni o yɑ mɑɑg kɑ̈jji gen.” Møgɑni bɑ dyër. Ge ɑ́ngøl kɑ per kɑ̀ nuti yïëëy gen, o yï bëëdø kì kenyɑni kɑ per kɑ ɑ́yïëëy. De yï ko thwøg kipe møgɑni, lɑ̈w keløg yï ceg-ɑ böggø. Yeud nuti wiyø yi Jwøk gï pɑ cɑye, ngö ɑ́ gen ɑ pɑ̈r dïl bɑ̈ddi yɑdh; yï orumø kinni yï ówiye yï pɑ cɑye? Anɑn, lidh døøji Jwøk geki keji pyëwe; pyëwe keej ki tyëng-ɑ ɑ́pɑ̈ɑ̈dh, de pyëwe med ki yïn, keløg yï ócög yï mɑ̈gø kì ree. De keløg yï pɑ mɑ̈gi kì ree, yï bɑ men ngøl piny thyew. Keløg Yeud ówïyø pëëmø, ge dwøøg-ɑ kɑ̈jj-ɑ ɑ́di gen; mɑ́ gïn ni menɑni ócuggø gwøgø yi Jwøk. Wu tyëng-ɑ pɑth ki Yeud, wu pɑ̈r ki bɑɑd yɑdh dhetun me twïyø kì pɑ̈l, kɑ ngøl piny; de nuti weddø; ɑ́kɑ̈ɑ̈l kɑ mɑɑg ri yɑdh dhetun men-ɑ ópidhø. Yeud pɑ̈r ki yɑnh-ɑ bɑ ɑpidh, o dwøøgi gen ri yɑnh-ɑ ɑ́ngul gen bɑ gïjø me gwøge yööd yi Jwøk. Wun ɑ nyiimïɑ, yɑ pɑ dwɑddi kinni, o kwøbb-ɑ ɑkɑnn møgɑni bëëd ge kwïj yi wun, o wu mɑ̈ɑ̈ne rumø kinni wɑ̈thi wun pel. Kwøbb-ɑ ɑkɑnn møgɑni bɑ kinni, tegi muddi tyëng Isrɑil óthumi kì bɑng nyɑ keny me thiinh. O bene kër-ɑ óyieel Isrɑil bëne. Ni kɑ̀ kööb wɑ̈jji kwërø kinni, “Yïëdi óbï e kɑ̈ɑ̈l-ɑ Dhɑyøn, o rɑj ókɑ̈ɑ̈le wɑ̈g kì kelli kwɑrri Yɑgob. Møgɑni ónywɑg yi wøki gen kì bøli keny-ɑ ólɑ̈ɑ̈nyɑ orøøg gen.” Anɑn, kɑ̀ bɑɑny Wöndøj yi tyëng Isrɑil, pɑ̈r ki kinni, ge ɑ́mɑ̈ni ki Jwøk, kiper wun, wu tyëng-ɑ pɑth ki Yeud. De kì tung-ɑ kyeelø, ge mɑɑr yi Jwøk kì bɑng kweyyi gen, mɑ́ ge bɑ tyëng-ɑ ɑ́yieny yi Jwøk. Mɑ́ Jwøk gyëdhh-ɑ mëgge ngɑn-ɑ yieny yi en, pɑ nyi wɑɑre. Keløg ɑ́ per wun, wu tyëng-ɑ pɑth ki Yeud, dhø Jwøk ɑ́pyem yi wun cøn, de ɑnɑn, Jwøk pyëwe ɑ́lɑ̈ɑ̈m ki wun, kipe kɑ ɑ́pëëm tyëng Isrɑil. Ki yuu ni menɑni ceth, kì bɑng lɑ̈mpyëw men-ɑ ɑ́yod yi wun, ɑpyeem dhø Jwøk yi Yeud ɑnɑn, kipe kinni o pyëw Jwøk ólɑ̈ɑ̈me ki gen thyew. Mɑ́ ji bënn ɑ́göjji pëëmø yi Jwøk, kipe kinni o lɑ̈mpyëwe ónyodhe kì ri ji bënn. Kɑ̈ɑ̈r Jwøk dwøng nɑ ngø! Peli wïje geki dïde bong cögi gen! Bong dhɑnhø me cuggi yodi kër-ɑ nyi løøge kwøb geki yëth-ɑ gööge. Nɑ møg-ɑ kømmi yi wɑ̈nyi kwërø kinni, “Á men ɑ ngɑ̈nyi rummi Jwøk? Á men ɑ cuggi cïjii? Á men ɑ ɑ́pɑ̈nyii ki thödhø gïïpiny, kipe kinni o gø ólonye ki thödhø?” Mɑ́ gïg-ɑ nud bënn ɑ́cwɑ̈j-ɑ yi en; o gïïpiny bëne bëëd ɑ ree; gïn-ɑ́ møge. Wiy nyingi Jwøk lenhi gïti ɑtheer! Amen. Yɑ kwɑjj-ɑ wun, wun ɑ nyiimïɑ kinni, mɑ́ Jwøk bɑ ngɑn pyëwe nyi lɑ̈ɑ̈m; mëggu ri wun Jwøk, wun ɑ́ gëëdhi me nëënø, wu bɑ ɑthyey kipe göggii, o pyëwe mede ki wun. Menɑni bene mɑll-ɑ mɑllu en. Wu ko bëëd ki bëën-ɑ beed kì kömi piny men, de wilu bëëdi wun kɑ rummi wun wil wun. Codhe, o gïn-ɑ dwɑddi yi Jwøk yod yi wun; eni gïn-ɑ døj, ɑ bɑ ɑyïëy yi Jwøk, o bong gïn gwɑ̈ɑ̈d kì ree. Anɑn, kɑ̀ bëëd yïɑ dɑ tegø men-ɑ ɑ́mëggi yɑn yi Jwøk kì bɑng medi pyëwe, wu ócuggø cegø yi yɑn kinni, ko di dhɑnhø ɑ́kyel me kööbø kinni pere teg. Mɑ́ menɑni bɑ ngedhi rɑw kete. De rum dhɑnhø ki rumm-ɑ dyër kipe gwøng-ɑ gwøg yi en ki tegø men-ɑ ɑ́mëggii yi Jwøk. Yïee dɑ gïg mø bëëdi gen bɑ̈nni kì ri dël ɑ́kyel, o gïgɑni nyi gwøg-ɑ jɑmmi mø bɑ̈nni. Nɑ menɑni ceth; cɑgg ɑ́ kɑ̀ bëëd wɑ gïïr, wɑ bɑ ɑ́kyel kɑ̀ rëbi wɑ kì ri Mesiy; wɑ ying-ɑ ri dël ɑ́kyel. Yïee dɑ tegø men cuggi wɑ ki gwøg ki gïg bɑ̈nni, e kyëëw kɑ dhwɑ̈ng-ɑ ɑ́yod yi wɑ; ngɑn yïe di tegø men töönge, wiy tönge møg-ɑ kyëëw ki yïëyø; keløg ɑ́ ngɑ̈nyi gwøg, wiy gögge kɑnïsɑ̀, keløg ɑ́ ngɑ̈nyi pwönyø, wiy pwönye; keløg ɑ́ cïji tyëng-ɑ kyeelø, wiy cïje gïn. Ngɑn muujø, wiy muuje; ngɑn ngɑ̈ny jyɑ̈gø wiy jyɑ̈ge; ngɑn teg ki gwøg, wiy gööge; ngɑn køny tyëng-ɑ kyeelø, kunye ki medi pyëwe. Bëëd mɑ̈ɑ̈dø e kɑ̈ɑ̈l-ɑ pyëw. Mɑɑnu rɑj, kɑ wu mɑ̈gi wun kì ri gïndøj. Mɑɑru ri wun, kɑ wu bëëd wun wu nɑ nyiimëëg, jii Mesiy. Nyi wøru ri wun ki mendwøng. Kɑ wu nyi dyëëj wun ki gwøg kipe Wë, e pëthi wun pɑ̈ng yi Wëykwërø. Kɑ wu nyi bëëd wun pëthi wun med ki ngɑ̈dhi gïgdøj møg-ɑ óbï. Nyi ngïïn wun kì yij orɑng. Kɑ Jwøk nyi kwɑjji wun kì yethi cyɑ̈ng bënn. Kɑ̀ jɑd jii Mesiy, nyi thödhu gen ki jɑmmì; nyi theg wun wëll. Kɑ Jwøk nyi kwɑjji wun kiper tyëng-ɑ nyi guud nyingi wun; ɑwøø, nyi lɑ̈mmu gen gyëdh, kɑ ge ko nyi lɑ̈mmu cyën. Nyi mïni pëthi wun kyeel ki tyëng-ɑ pëthi gen med. Nyi ywöngi wun kyeel ki tyëng-ɑ ywöngi. Kɑ wun ki ri wun, bëëd wun, rummi wun bɑ ɑ́kyel. Kɑ ko di dhɑnhø me nyi rumø ki rummi dhɑ̈w. Kɑ wu ko nyi yɑb cyɑ̈dhø ki tyëng-ɑ per gen teg keti gen. Kɑ ko di dhɑnhø me nyi rumø kinni, ce rumme gïïr. Ngɑn göggi yïn ki gïnrɑj, ko nyi loony ki göggø ki gïnrɑj thyew. De nyi yɑbu gwøng-ɑ myëër kì bøli ji bënn. Wu ko nyi kɑ̈ni ki göj. De nyi bëëd wun wu mër ki ji bënn, keløg e ócuggø. Gøøli wun ko nyi col wun; de nyi wïyu møgɑni liny Jwøk. Mɑ́ wɑ̈nyi kwërø okööbø kinni, “Coli gøølø bɑ cwɑggɑ, bɑ yɑn ɑ ócol kɑ̈jji gen.” De keløg ngɑn-ɑ ɑ́mɑ̈ni ki yïn obëënø e torø yi kɑ̈j, thödhí ki gïncɑm. Wɑlɑ̀ keløg ree dɑ röödhø, thödhí ki pï. Mɑ́ kɑ̀ göög kinøw, ngɑnɑni wïje ceg-ɑ lɑ̈ɑ̈yø ki gïn-ɑ ɑ́gwøg yi en. Ri wun ko wëggu tyɑmø yi rɑj, de tyɑm wun rɑj ki gwøngdøj. Wiy dhɑnhø bëne nyi lïnge dhøggi tyëng-ɑ jɑɑg piny. Mɑ́ e bong ngɑn jɑ̈ggi e Jwøk nuti yïëyø. Ngɑn-ɑ nyi pyem kwøbbi jɑgg wɑng-ɑ kinni, gwøng-ɑ pere ɑ́rönyi gen yi Jwøk ɑ́pyem yi en. O ji-ɑ nyi pëëmø kinøw, nyi cwööl-ɑ cɑ́yi Jwøk kömi gen. Mɑ́ ji-ɑ nyi göögø ki gïgdøj, pëthi gen pɑ nyi lïngø, wɑlɑ̀ jyɑ̈ggì pɑ nyi böggi yi gen, dɑ́ ji-ɑ nyi göögø ki gïgrijjø ɑ nyi böggi yi jyɑ̈ggì ki mendwøng. Mɑ́ jyɑ̈ggɑni göögø kɑ per Jwøk; kipe kinni o buri wun bëëde e døøj. De keløg wu nyii göögø ki gïgrijjø, nyi böggi wun ceth. Jyɑ̈ggì pɑ nyi wɑ̈dhi mïdhø pilø, de pilɑni nyodh-ɑ kinni, yï gen dɑ tegø men cɑɑy ngɑn-ɑ nyi göögø ki gïnrɑj. O tegø menɑni kɑ̈ɑ̈l-ɑ yï Jwøk. Kɑ̀ bëëd møgɑni kinøw, bëëd dhɑnhø e lïng-ɑ dhøggi jyɑ̈ggì; pɑth ki kipe böggi cɑ́yi Jwøk kete gen, dɑ́ kipe gïn-ɑ ngɑ̈nyi yi dhɑnhø ki pyëwe kinni døøj. O bene bɑng møgɑni ɑ nyi gwɑ̈ɑ̈j wun thyew. Mɑ́ jɑgø kɑ̀ cunge ki gwɑ̈j, gwøg-ɑ gwøøg Jwøk. Nyi mëggu gen gïg-ɑ dwɑddi yi gen kì yï wun; culí gen gwɑ̈ɑ̈jí kí gwɑ̈ɑ̈j jɑmmí, kɑ ge wøør ki wør-ɑ kyëëw ki gen. Ko bëëd e dɑ kwöör ngɑn megø kì cwɑggí; den-ɑ́ kwöör mɑɑri ri wun. Ngɑn mɑɑr wɑɑd gen, mïdh-ɑ Cigg. Cigg-ɑ kööbø kinni, “Yï ko niin ki ngɑn nuti nywøøm wun ri wun, wɑlɑ̀ yï ko nɑ̈gi ki dhɑnhø, wɑlɑ̀ yï ko kwɑ̈ɑ̈d, wɑlɑ̀ yï ko mod gï ngɑn megø.” Kí cigg-ɑ kyeelø bënn, ying-ɑ yethi cigg-ɑ kööbø èn kinni, “Mɑɑr ngɑn-ɑ butí ni kɑ̀ mɑɑr rií.” Ngɑn mɑɑr ngɑn-ɑ bute, bong gïnrɑj men-ɑ ógögge ngɑn megø, mɑ̈ɑ̈dø bene mïdhi Cigg ki këër gen bënn. De wu ngɑ̈ny wøw thyew kinni, thumi piny ɑ́cyɑ̈ngi, cyëëw wun, mɑ́ bøli keny-ɑ óyieel wɑ ɑ́göög e cyɑ̈gi ɑnɑn kibøli cyɑ̈ng-ɑ ɑ́kwöngi wɑ ki yïëyø. Wɑ̈r køm-ɑ thumø; wøw køm-ɑ ruø. Weddi wɑ gïg-ɑ nyi gøggi kì yij muudhø, kɑ jɑmmi liny møg-ɑ nyi nyïɑ̈ggi kì yij cɑr, kwɑny wɑ. Bëëd wɑ ki bëëndøj, ni ji mø bëëdø kì yij cɑr kì dicɑ̈ng – bong twɑyø; bong nɑ̈gø yi møgø; bong niin ki mɑ̈nni ji møøgø; bong niini cwøw ri gen; bong wëërø; bong mud. De ngøy wɑ bëëdi Wë Yëso Mesiy, kipe kinni o jɑmmi kömi piny møg-ɑ nyi kønø ki pëthi teedø cög ge pɑ kønø kì pëthi wun. Køny wun tyëng-ɑ yïëyø mi gen nyøødh, de wu ko nyi pëëm ki gen kì ri gïg-ɑ rømmi yi gen. Mɑ́ e dɑ ngɑn-ɑ rumø kinni ócuggø cɑm ki jɑmmì bënn; de ngɑn-ɑ yïëye nyøødh, nyi cɑm-ɑ lum. Kɑ ngɑn-ɑ nyi cyɑ̈mø ki jɑmmì bënn, ngɑn-ɑ pɑ cyɑ̈mø ni en ko gɑgge, mɑ́ e bɑ ɑyïëy yi Jwøk. Yïn ɑ́ men cøn, ɑ cɑɑy bɑ̈ng ngɑn megø? Bɑ wɑ̈n; en ɑ ókööbø kinni ogöögø kidøøj, wɑlɑ̀ ɑ́dhɑl yi gwøg. Mɑ́ e ócuggø wëggi gwøg kidøøj yi Wë. Kwï ji orumø kinni cyɑ̈ng-ɑni pere teeg kibøli cyɑ̈ngg-ɑ kyeelø; o dɑ ji mø rumø kinni cyɑ̈ng pɑ̈r bënn; wiy dhɑnhø mïdhe men-ɑ rømme ɑ́ dyër. Tyëng-ɑ wør cyɑ̈ng megø kì wɑ̈ye, wør ge gøn kipe nyingi Wë. Kɑ tyëng-ɑ nyi cyɑ̈mø ki jɑmmì bënn, cyɑ̈ɑ̈m gen ge wør-ɑ Wë, mɑ́ Jwøk nyii pwøjø yi gen kipe gïncɑmɑni. Tyëng-ɑ bɑ̈nyi cɑm ki jɑmmì møøgø, göög gen kinøw ge wør-ɑ Wë, kɑ Jwøk nyi pwøj gen. Bong dhɑnhø kì kellee me bëëd cwɑgge kete, wɑlɑ̀ bong dhɑnhø me wɑ̈dhi thøø ki cwɑgge kete. De kɑ̀ bëëd wɑ kì kömi piny keny, wɑ bëëd ɑ ri Wë; wɑlɑ̀ ke thøw wɑ thyew, wɑ thøw-ɑ ree. Kɑ ɑ́rum bëëde kinøw, kɑ̀ nëën wɑ, wɑ nëën ɑ ri Wë; ke thøw wɑ, wɑ thøw-ɑ ri Wë. Mɑ́ Mesiy ɑ́thøw kɑ odhwödhø kì yij thøø, kɑ per kinni o bëëde ɑ́ Wïi tyëngnëënø kí tyëngthøø. Yï ngɑn-ɑ nyi cɑm lum kete, yïde ɑ cɑɑy ómyëw? Yïde ɑ benyí tyëng-ɑ kyeelø, mɑ́ wɑ ócungi bënn kì bøli Jwøk, o gønyee lidh. Mɑ́ wɑ̈nyi kwërø okööbø kinni, “Wë ɑ́kööb kinni, yɑ Jwøng-ɑ Nëënø, dhɑnhø bëne cønge órume piny kì bølɑ, o ji bënn óyïëy kinni yɑ bɑ Jwøk.” Kɑ̀ bëëd møgɑni kinøw, wɑ bënn, wɑ bɑ møg-ɑ ócungi kì bøli Jwøk, kɑ ngɑn nyi pëjji gïg-ɑ ɑ́gøggi yi en. Kɑ ri wun ko nyi cɑyyi wun. O lɑ̈w keløg wu ceg-ɑ kyëdø kinni dhɑnhø koo göögø ki gïn göjji wɑɑd gen pɑ̈dhi yij orøg. Bëëdɑ kì ri Wë Yëso yɑ ɑ́nyudhe kinni, bong gïjø me ceg bëëdø e ywëdhø; de keløg e dɑ ngɑn yïëyø kinni gïn-ɑni ywëdhø; ywëdhø kɑ pere kete. Keløg yï ngɑ̈ny wøw kinni, gïn-ɑ cɑm yi yïn nyi wëgg-ɑ pyëw wɑɑd wun rënyø, yï pɑ cyɑ̈dh-ɑ́ɑ̀ yuu mɑ̈ɑ̈dø. Gïn-ɑ cɑm yi yïn ko bëëd ɑ́ göj me rënyi ngɑn mɑ pere ɑ́thøw yi Mesiy. Gïn-ɑ rømmi yi yïn kinni døøj, ko wëggí kwɑ̈dhhø. Mɑ́ Pödhi Jwøk pɑth ki cɑm wɑlɑ̀ mɑdh, de bɑ gøggi dyër, kí mër, geki medi pyëw kì ri Wëykwërø. Ngɑn göggi Mesiy ki gïg ni møgɑni, Jwøk pyëwe óbëëd e med ki en, kɑ pøjji yi teedø. Kɑ wɑ nyi tyer wɑ gøggi gïg-ɑ kɑ̈ni ki mër, kí møg-ɑ wëggi pëthi tyëng-ɑ kyeelø tëngø. Gwøøg Jwøk, ko tɑ̈ɑ̈y wɑ piny kipe gïncɑm. Gïgcɑmm bënn ócuggø cɑmø; de bɑ bɑ̈jjø keløg yï cɑm-ɑ gïn göjji ngɑn megø pɑ̈dhi yij orøg. Gïn-ɑ døøj ki gwøgø yi yïn, bɑ kinni; yï ko cyɑ̈ɑ̈m ki rïngø, kɑ yï ko mɑ̈ɑ̈dh ki møgi oløg, wɑlɑ̀ yï ko göög ki gïn göjji wɑɑd wun pɑ̈ɑ̈dhø. De mïdhí møg-ɑ yïëy yi yïn kì kɑɑm wuki Jwøk. Tyëng-ɑ nyi gwøg gïn-ɑ rømmi yi gen ɑ́ dyër, kɑ ge ocögø pëthi gen bong kerri gwøngɑni, ri gen dɑ gyëdh. De ngɑn-ɑ yije nyi pyëër ki gïn-ɑ cɑm yi en, köme dɑ cɑ́y kinni gïnɑni nuti gwøøg en kɑ yïëyø. O gïn-ɑ pɑ gwøøg bɑng yïëyø, bɑ orøg. Wɑ tyëng-ɑ yïëyø miee teeg, køny wɑ tyëng-ɑ yïëyø mi gen nøg ki tyëddi gïg peg møg-ɑ dhɑl gen. Wɑ ko yɑb gïg-ɑ mïni pëthee ketee. De nyi gwøg wɑ gïn-ɑ døøj kipe nyiimïee bënn, kipe kinni o yïëyø mi gen kedhe e ódøngø. Mɑ́ Mesiy kiree, nuti gwøg-ɑ gïn mïni pyëwe, de ɑ́gwøg-ɑ møg-ɑ bɑ ɑgwed kì yij wɑ̈nyi kwërø kinni, “Yɑ̈ddi tyëng-ɑ nyi yɑnyyi yïn, ge ɑ́pɑ̈dhi kömɑ.” Gïg-ɑ ógweed yij wɑ̈nyi kwërø bënn, ɑ́gwed gɑ møg pwönyi wɑ, kipe kinni o wɑ óyïddi wɑ ki ngɑ̈ɑ̈dhø kì bɑng ngïïnø geki cïïjø møg-ɑ mëggi wɑ yi wɑ̈nyɑni. De ɑnɑn, kɑ̀ bëëd Jwøk bɑ ngɑn-ɑ yïe nyi kɑ̈ɑ̈l yi møgɑni, wiy wu thödhi yi en ki rumm-ɑ bɑng gen óbëëd wun pëthi wun bɑ ɑ́kyel, kì ri yöö men-ɑ ɑ́nyudhi wun yi Yëso Mesiy. O møgɑni bɑ kipe kinni, o wu bëëd wun pëthi wun bɑ ɑ́kyel. O Jwøk, Wïyi Wë Yëso Mesiy, ómɑlli yi wun ki wör e cwɑggi wun bɑ ɑ́kyel. Nyi yïëyu ri wun, ni kɑ̀ ɑ́yïëëy wun yi Mesiy, kipe lejji nyingi Jwøk. Mɑ́ yɑ köbb-ɑ wun kinni, bëëdi bɑ̈ɑ̈ngø men-ɑ ɑ́beed yi Mesiy bɑ kipe Yeud, kipe nyudhi gen kinni Jwøk dhøge nyi mïdhe’ mïdhø; o møg-ɑ ɑ́könge kweyyi gen, ɑ́bï gɑ dyër; o tyëngpɑth ki Yeud ócuggi gen ki lenhi Jwøk kipe lɑ̈mpyëwe. Ni kɑ̀ kööb yi wɑ̈nyi kwërø kinni, “Yï ólenhɑ kì kelli tyëngpɑth ki Yeud; yï ólenhɑ ki wör.” Okööbø këti kinni, “Med pëthi wun, wu tyëngpɑth ki Yeud; med pëthi wun kyeel ki jii Jwøk!” Kí kinni, “Lenhu Wë, wun ɑ tyëngpɑth bënn; lenhu en, wun ɑ ji bënn!” O Icɑyɑ̀ okööbø këti kinni, “Dɑ kwɑɑr Yesì men-ɑ ócwöb; óbï be jɑɑgi tyëngpɑth ki Yeud, en ɑ óngɑ̈dh yi gen.” Anɑn wun ɑ tyëng Römɑ̀, kɑ ɑ́yïëy wun ki ngɑ̈dhii kinøw, wiy wu thödhi yi en ki medi pëëth geki mër, mɑ́ bene en ɑ yïe nyi ngɑ̈dhɑ gïg-ɑ óbï. O møgɑni bɑ kipe kinni, o ngɑ̈ɑ̈dhø dønge kì pëthi wun, kì ri tegi Wëykwërø. Wun ɑ nyiimïɑ, ngɑ̈nyi yi yɑn kinni, pëthi wun nyi tyer-ɑ gwøg ki gïgdøj geki dïdø ki kwøbbi Jwøk. O wu nyii cuggø pwönyi ri wun thyew. De kì yij wɑ̈nyø men, yɑ nuti böggø ki pɑ̈ddi wun ki kwøb møøgø. Yɑ nuti böggø kì bɑng dhwɑ̈ng men-ɑ ɑ́mëggi yɑn yi Jwøk, kipe kinni o yɑ bëëdɑ yɑn ɑ́ bɑ̈ng Yëso Mesiy, o yɑ göggɑ tyëngpɑth ki Yeud, o yɑ göögɑ yɑ nɑ ókwërø, yɑ kɑ̈ll-ɑ Wöndøj men-ɑ kɑ̈ɑ̈l yï Jwøk, kipe kinni o tyëngpɑth ki Yeud göög gen gɑ gëëdhi me bɑ ɑyïëy yi Jwøk; ge óthyëyyii yi Wëykwërø. De ɑnɑn, kɑ̀ bëëdɑ yɑn ɑ jɑlbɑng Yëso Mesiy, gïn-ɑ pere pwödɑ köörɑ bɑ kipe gwøng-ɑ gwøg yi yɑn kipe Jwøk. Gïg-ɑ ɑ́gwøg yi Mesiy, bɑ gen ɑ ri gen ókööbɑ yɑ pɑ böggi, o tyëngpɑth ki Yeud nyudhɑ kër-ɑ ómïdhi gen kwøbbi Jwøk, ki tegi ngïjjì geki gïïngɑ̈ngø, kí tegi Wëyi Jwøk. Pwönyi Wöndøj mi Mesiy ɑ́tyëgɑ kì Yerusɑlem, kí myërr-ɑ bute, gïti Ilirikøm. Yɑ nuti dwɑddi kinni, o Wöndøj pwönyɑ kì kɑ̈jj-ɑ ɑ́rum ki lïngi nyingi Mesiy, kipe yɑ ógëddi kömi tyeli ød mɑ ɑ́cïb yi ngɑn megø. Ni møg-ɑ kømmi yi wɑ̈jji kwërø kinni; “Tyëng-ɑ ɑ́bëëd ge nuti köbbi pere ólïdhi, o kwøbbe óyod yi tyëng-ɑ nuti pɑ̈nyi kwøbbe ki lïngø.” O bene gïn-ɑ nyi mɑ̈ɑ̈n yɑn bëën yï wun. De ɑnɑn bong gïn gwøg yi yɑn këti kì yethi pödhhɑni, o pyëwɑ ɑ́bëëd e okønø ceth ki bëën yï wun kì yethi runn-ɑ ɑ́pöödh bënn, yɑ gɑ̈n yɑ ótöngi be lidhi wun keny-ɑ óbëënɑ yɑ kedh-ɑ Ispɑniyɑ̀, o yɑ ókøny yi wun ki kedhi kunɑni, e pyëwɑ rum mïnø kɑ ɑ́yïddɑ ki wun. De ɑnɑn yɑ kedh-ɑ Yerusɑlem be kønyi jii Jwøk. Mɑ́ kɑnïsɑ̀ kì Mɑkdöniyɑ̀ geki Akɑiyɑ̀ ge ɑ́göög ki gïjø me døøj; ge ɑ́gwɑ̈ɑ̈j ki gïg køny gen nyiimï gen møg-ɑ jɑdø kì Yerusɑlem. Rummɑni ɑ́kɑ̈ɑ̈l-ɑ yï gen keti gen; de kidyër ceth, døøj kɑ̀ kunyi gen, mɑ́ gyëdhhi yïëyi Yeud ɑ́nywɑg yi gen ki tyëngpɑth ki Yeud, tyëngɑni ceg-ɑ lunyø ceth ki kønyi Yeud ki jɑmmi kömi piny. Keny-ɑ órumɑ ki mëggi gen jɑmmɑni, yɑ ódhwödh yɑ kedh-ɑ Ispɑniyɑ̀, o yɑ ótöngi be këëmi wun. O ngɑ̈nyi yi yɑn kinni, keny-ɑ óbëënɑ yï wun, yɑ óbï kɑ gyëdhhi Mesiy bënn. Wun ɑ nyiimïɑ, yɑ kwɑjj-ɑ wun ki nyingi Wë Yëso Mesiy kí mɑ̈ɑ̈dø men-ɑ muuj yi Wëy, kinni kwɑjji wɑ Jwøk kiperɑ, o yɑ yiele kì cinggi tyëng-ɑ bɑny yïëyø kì Yeudiyɑ̀, o kunyø miɑ óyïëy yi jii Jwøk kì kunɑni. O yɑ óbïɑ yï wun pyëwɑ omedø, keløg ɑ́ gïn dwɑddi yi Jwøk, o këëmi wun óbëëde med kì yïɑ. Wɑ ókøny yi Jwøk, ngɑn-ɑ yïe nyi kɑ̈ɑ̈l yi mër. Amen. Anɑn, yɑ köbb-ɑ wun kinni, kønyu nyimïee Pïbì, ngɑn-ɑ ɑ́ör yi yɑn be muuji wun wɑ̈nyø men. Ngɑnɑni ɑ göögø kì kɑnïsɑ̀ kì Kenkeriyɑ̀. Thegu en ki nyingi Wë, ki thegø men-ɑ kyëëw ki tyëng-ɑ ɑ́yïëy, kɑ køny wun o óbongii gïn jɑ̈ddii, mɑ́ e ɑ́kunyi ki tyëng-ɑ ɑ́yïëy mø ngenyø, kɑ yɑ kønye thyew. Mɑ̈dhu Priskilɑ̀ geki Akïlɑ̀, tyëng-ɑ køny wøn ki gwøøg Yëso Mesiy. Tyëngɑni ɑ́kømi nɑ̈gø kipe kɑ ɑ́yieel yɑn yi gen. O pɑth ki yɑ ketɑ ɑ pwøj gen, de ge opøjjø thyew yi kɑnïsɑ̀ mø tyëng-ɑ ɑ́yïëy ge pɑth ki Yeud bënn. Kɑ tyëng kɑnïsɑ̀ møg-ɑ nyi bï gøl gen mɑ̈dh wun thyew. Mɑ̈dh wun Epɑynetøs mɑ̈dhɑ, en ɑ ngɑn-ɑ ɑ́kwöngi ki yïëyi Mesiy kì modïri Ásiyɑ̀. Mɑ̈dh wun Meerì ngɑn-ɑ ɑ́køny wun ki gwøng teg. Mɑ̈dh wun Andrønikøs geki Yuniyɑs, gen ɑ Yeud møg-ɑ ɑ́bëëd kì ød mɑg kyeel ki yɑn. Ge bɑ jøg mø ngɑ̈nyi kidøøj kì kelli tyëngwöödø, o gen ɑ ɑ́kwöngi gwøg ki jii Mesiy kibølɑ. Mɑ̈dh wun Ampliyɑtøs, mɑ̈dhɑ nyel-ɑ pere teg kì ri Wë. Mɑ̈dh wun Urbɑnøs, mɑ̈dhɑ kì ri gwøøg Wë geki mɑ̈dhɑ Istɑkøs. Mɑ̈dh wun Apeles, ngɑn-ɑ teg kì ri kwøbbi Mesiy. Kɑ tyëng gøl Aristøbuløs, mɑ̈dh wun bënn. Kɑ Ërödiyøn wɑ̈d Yeud, mɑ̈dh wun, geki jii Mesiy møg-ɑ gøl Nɑrkisøs. Mɑ̈dh wun Tripɑynɑ̀ geki Tripösɑ̀, tyëng-ɑ göögø ki gwøøg Jwøk, mɑ̈dh wun gen. Kɑ mɑ̈dhɑ Persis mɑ̈dh wun, en ɑ ngɑn-ɑ ɑ́göög ki gwøøg Wë ki menteg. Kɑ Rupus, ngɑn-ɑ pere teg kì kelli tyëng-ɑ ɑ́yïëy Wë mɑ̈dh wun, geki meye ngɑn-ɑ ɑ́mïdhi yɑn yɑ nɑ wɑ̈de. Mɑ̈dh wun Asinkritøs, kí Pelegön, kí Ërmis, kí Pɑtröbɑs, kí Ërmɑs geki Jii Mesiy møg-ɑ bëëdø kì buti gen. Kɑ Pilölögøs, kí Juliyɑ̀, kí Nereøs kí nyiimen, kí Olimpɑs, geki jii Jwøk møg-ɑ buti bënn mɑ̈dh wun. Kɑ ri wun mɑ̈dh wun ki nuumi kwër. Wu ɑ́mɑ̈dh yi tyëng kɑnïsɑ̀ mø Mesiy bënn thyew. Anɑn, wun ɑ nyiimïɑ, yɑ kwɑjj-ɑ wun kinni kor wun ri wun kipe tyëng-ɑ nyi kɑ̈ni ki gïg dɑ̈ɑ̈ng ji, kɑ yïëyi ji møøgø nyi rënyi yi gen ki kwøb mø bɑ̈ɑ̈n ki møg-ɑ ɑ́pwönyi wun. Lɑ̈ɑ̈w wun ri wun ki ji-ɑ ni møgɑni! Mɑ́ ji-ɑ nyi göögø ki gïg ni møgɑni pɑ göögø kɑ per Mesiy Wë. De ge göög ɑ bɑng gïn-ɑ kønø ki pëthi gen. Kɑ tyëng-ɑ rummi gen nøg nyi wëny yi gen ki kwøb mø med. Kwøbbi yïëyi wun ki wöndøj ngɑ̈nyi yi teedø bëne. O pyëwɑ med ki møgɑni. De bëëd wun wɑ̈thi wun pel, wu tyer-ɑ gïndøj, kɑ wu bëëd wun yï wun bɑ̈r ki gïgrijjø. O Cethɑn ójwɑn ki tyɑmø, kɑ cïb thɑ́ tyelli wun yi Jwøk, ngɑn-ɑ yïe nyi kɑ̈ɑ̈l yi mër. Dhwɑ̈ɑ̈ng Wë Yëso Mesiy óying kömi wun. Wu ɑ́mɑ̈dh yi Timøthì, ngɑn-ɑ nyi göög wøn. Kɑ wu mɑ̈dh thyew yi Lukiyøs, kí Yɑsøn, geki Susipɑter wɑddi wøn møg-ɑ bɑ Yeud. Yɑ mɑ̈dh-ɑ wun ki nyingi Wë, yɑ Tertiyøs, jɑl-ɑ ɑ́gwed wɑ̈nyø men. Wu ɑ́mɑ̈dh yi Gɑyøs, jɑl-ɑ gøle bëëd yi wøn, wøki tyëng kɑnïsɑ̀ bënn. O wu ɑ́mɑ̈dh yi Erɑstøs, jɑl-ɑ nyi mïdhi ngyënyyi kɑɑl men. Kɑ wu mɑ̈dh yi Kwɑrtøs ómïee thyew. Wiy dhwɑ̈ɑ̈ng Wë Yëso Mesiy bëëde kì ri wun bënn. Lejji wɑ Jwøk! Wu ógwøge wu teeg kì yij yïëyø mi wun, ni møg-ɑ kømmi yi Wöndøj men-ɑ pwönyi yi yɑn, kì ri Yëso Mesiy, kì bɑng møg-ɑ ɑ́yɑl, ɑ ɑ́bëëd gɑ ɑkɑnn kì yethi rïjj-ɑ gïïr møg-ɑ ɑ́pöödh. Anɑn, dyër ɑ́rum ki nyodhø, kɑ yod yi pödhh bënn kì ri møg-ɑ ɑ́gwed yi jøtöng, ni kɑ ɑ́kwøbii yi Jwøng-ɑ nudd gïti ɑtheer, kipe kinni o ji óyïëy gen bënn, o møgɑni ómïdhi yi gen. Lejji wɑ Jwøk, ngɑn-ɑ wïje pel kete, kì ri Yëso Mesiy. Amen. Wɑ̈nyø men kɑ̈ɑ̈l-ɑ yï Pøøl, ngɑn-ɑ ɑ́cwøl yi Jwøk ni kɑ ɑ́dwɑdde gøn, o bëëde ɑ́ ngeti Wööni Yëso Mesiy. Wɑ̈nyɑni ör-ɑ yi en geki ómïee Sosthenis. Ge öd-ɑ kɑnïsɑ̀ mi Jwøk kì Körintøs; gen ɑ tyëng-ɑ ɑ́kwër kì ri nyingi Yëso Mesiy, kɑ gï cwøle, o ge bëëd gen gɑ tyëng kwërø, kyeel ki ji-ɑ kɑ̈jj bënn ki nyingi Wë Yëso Mesiy, Wïi gen, o bɑ Wë. Wiy dhwɑ̈ng geki mër møg-ɑ nyi kɑ̈ɑ̈l yï Jwøk Wïyee geki Wë Yëso Mesiy, ying gen kömi wun. Anɑn, Jwøk nyii pwøjø yi yɑn ki medi pyëwɑ kì yethi cyɑ̈ng bënn, kipe kɑ ɑ́thödhe wun ki dhwɑ̈ng kì bɑng kɑ ɑ́yïëy wun Yëso Mesiy, o Jwøk nyii pwøjø yi yɑn thyew kipe kɑ̀ bëëd e bong gïn kwïj yi wun kì ri møg-ɑ ɑ́dïd yi wun, geki møg-ɑ nyi kømmi bëën kipe Mesiy. Mɑ́ møg-ɑ kømmi yi yɑn kipe Mesiy óyod gɑ dyër kì bɑng gïg-ɑ gwøg yi wun. O wu ócög wu pɑ nyi jɑd ki gïjø ɑ́kyel kì ri tegø men-ɑ nyi yod kì yï Wëykwërø kɑ̈ng-ɑ nudd wu nenn-ɑ bøli keny-ɑ ódwöög Yëso Mesiy kömi piny. Mɑ́ bɑ en ɑ mïdhi wun wu teeg kì kɑ̈jji wun gïti thumi piny, o wu óbëëd, kömi wun bong cɑ́y cyɑ̈ng-ɑ óliidh gøny. Gɑ̈nnu Jwøk, eni ngɑn-ɑ ɑ́cwøl wun kipe kinni o wu nywɑ̈ɑ̈g wun ki dhwɑ̈ɑ̈ng Wɑ̈de; Wë Yëso Mesiy. Anɑn, wun ɑ nyiimïɑ, yɑ kwɑjj-ɑ wun ki nyingi Wë Yëso Mesiy kinni, reb wun dhøggi wun, o bëëde e bong pëëmø kì kelli wun, kɑ wiy rummi wun geki kwøbbi wun bëëd gen gɑ ɑ́kyel. Wun ɑ nyiimïɑ, yɑ ɑ́lïng kì yï tyëng-ɑ ɑ́kɑ̈ɑ̈l gøl Keloè kinni i dɑ pëëmø kì kelli wun. Møg-ɑ wɑngi yi yɑn bɑ kinni, nget ɑ́kyel kì kelli wun nyii kööbø kinni, “Yɑ ying-ɑ tuung Pøøl”; kɑ ngɑn megø nyii kööbø kinni, “Yɑ ying-ɑ tuung Apøløs”; kɑ megø nyii kööbø kinni, “Yɑ ying-ɑ tuung Pïtør”. Kɑ megø nyii kööbø kinni, “Yɑ ying-ɑ tuung Mesiy”. Mesiy nyi di pɑ̈ngø? Pøøl ɑ́di gur wïj yɑdh ɑrïw kiper wun? Wɑlɑ̀ wu ɑ́jwɑ̈ɑ̈g kɑ nyingi Pøøl? Pyëwɑ med kɑ̀ bongii dhɑnhø mɑ ɑ́jwɑ̈ɑ̈g yi yɑn kì kelli wun, dɑ́ Krispøs geki Gɑyøs keti gen, ɑ ɑ́jwɑ̈ɑ̈gɑ. O bongii ngɑn cuggi kwøb kinni, ɑ́jwɑ̈ɑ̈g kɑ nyingɑ. (Awøø, tyëng gøl Istïpɑnɑ̀ ɑ́jwɑ̈ɑ̈gɑ thyew; de pɑ cuggi pɑrø yi yɑn ying e dɑ ngɑn megø me jwɑ̈ɑ̈g yɑn.) Mɑ́ yɑ nuti ör-ɑ be jwɑ̈ɑ̈gi ji yi Mesiy, de yɑ ɑ́öre’ be pwönyi wöndøj, yɑ pɑ 'kööb-ɑ peli wïj men-ɑ nyi 'kööb yi teedø, kipe tegi thøwi Mesiy kì wïj yɑdh ɑrïw ólwënyi. Pwönyi wööni thøwi Mesiy kì wïj yɑdh ɑrïw bɑ “nøgi wïj” kì yï tyëng-ɑ kɑ̈lli yuu thøø. De bɑ tegi Jwøk kì yïee, wɑ tyëng-ɑ ɑ́yiel. Wɑ̈nyi kwërø okööbø kinni, “Peli wɑ̈thi tyëng-ɑ wɑ̈thi gen pel órënyɑ o dïdi bödhhi gwed ónyiigɑ.” Keløg ɑ́ kinøw, tyëng-ɑ wɑ̈thi gen pel ódöng-ɑ keny? O tyëng-ɑ dïdø ying-ɑ keny? Wɑlɑ̀ dɑ bödhhi gwed? Wɑlɑ̀ dɑ ngɑn kwøbbe dhɑ̈li løøgø yi Jwøk? Mɑ́ dïdø ɑ́løg dhëëgø yi Jwøk. Mɑ́ Jwøk ki peli wïj men-ɑ yïe, bëëde ɑ́mɑ̈ɑ̈ne yodø yi ji ki peli wɑ̈thi gen. De Jwøk ɑ́yöd e göög-ɑ gïn-ɑ cwølli teedø ɑ́ “dhëëgø” eni wöön-ɑ pwönyi yi wøn, o gø yieele tyëng-ɑ yïëy. Yeud nyi yɑb-ɑ nyudhø ki ngïjjì, o tyëng Yönɑn nyi yɑb-ɑ peli wïj, de wø kɑ̈ll-ɑ wööni guri Mesiy wïj yɑdh ɑrïw. Wöönɑni pëthi Yeud nyi ceg-ɑ rënyø yi en, o bɑ óbɑɑd kì yï tyëng Yönɑn, de wöönɑni bɑ Mesiy, ɑ bɑ tegi Jwøk, kí peli wïj Jwøk kì yï tyëng-ɑ ɑ́cwøl kì kelli Yeud kí tyëng Yönɑn. Mɑ́ gïn-ɑ nenni yi ji e nɑ dhëëgø kì yï Jwøk, lod-ɑ peli wɑ̈thi ji. O gïn nënni e nɑ nyødhi Jwøk, teeg kibøli tegi ji. Nyiimïɑ, pɑru bëën-ɑ ɑ́bëëd wun cøn, keny-ɑ ɑ́cwøøl wun yi Jwøk. Mø nøg kì kelli wun ɑ ɑ́nenni yi teedø e wɑ̈thi gen pel, wɑlɑ̀ ɑ teg, wɑlɑ̀ ɑ per gen teg yi teedø. Dɑ́ gïn-ɑ bɑ kwøbbi dhëëgø kì yï tyëng kömi piny, ɑ ɑ́yieny yi Jwøk kipe kinni, o tyëng-ɑ ngɑ̈ny wøw ki jɑmmi kömi piny, wɑ̈thi gen lɑ̈ɑ̈y gen; o ngɑn-ɑ nyødh kì kömi piny gwøg yi Jwøk ɑ́ ngɑn teg, kipe kinni o tyëngteg wɑ̈thi gen lɑ̈ɑ̈y gen, o jɑmm-ɑ bong nyingi gen kì yï tyëng kömi piny, geki gïg-ɑ pɑ nyi wør yi teedø kinni tek, bɑ gen ɑ ɑ́yieny yi Jwøk kipe kinni, o gïg-ɑ per gen teg ki yï teedø gɑ̈g gen. De møgɑni ɑ́gwøg yi Jwøk kɑ per kinni, o bongii dhɑnhø me lejji ree kì bøle. Anɑn, bëëdi wun kì ri Yëso Mesiy kɑ̈ɑ̈l-ɑ yï Jwøk, mɑ́ en ɑ ɑ́gwøg yi Jwøk ɑ́ ngɑn-ɑ ree nyi kɑ̈ɑ̈l yi peli wïj men-ɑ yïee. Ree ɑ göög wɑ, wɑ tir kì yï Jwøk; o ree göög wɑ ki tyëng-ɑ ɑ́kwër gɑ jii Jwøk, kɑ wɑ yiel. Ni kɑ ɑ́kwøbii yi wɑ̈nyi kwërø kinni, “Ngɑn dwɑddi lejji ree, lejje gïg-ɑ ɑ́gwøg yi Wë.” Anɑn, wun ɑ nyiimïɑ, kɑ ɑ́bëënɑ yï wun, yɑ nuti bëën-ɑ be töngi kwøbb-ɑ dyër mø Jwøk ki medi lebɑ, wɑlɑ̀ kì bɑng dïdø ki jɑmmi kömi piny. Mɑ́ kɑ ɑ́bëëdɑ kì kelli wun, bong gïjø mɑ ɑ́rømmi yi yɑn mɑ megø kì wɑ̈ye, dɑ́ kwøbbi Yëso Mesiy kɑ ɑ́gurii wïj yɑdh ɑrïw. Yɑ ɑ́bï yï wun pyëwɑ nyøødh, o yɑ ceg-ɑ böggø, dëlɑ ceg-ɑ kïïrø, o pwönyɑ kí wöön-ɑ ɑ́kɑ̈llɑ nuti kømmi yɑn kɑ yëthi peli wïj men-ɑ nyi 'kööb yi ji kipe kinni o tyëng-ɑ kyeelø yïëy gen, de kwøbbɑni nyi nyodh-ɑ yi Wëyi Jwøk, kipe kinni o yïëyø mi wun bëëde e pɑ mïdh-ɑ yi peli wïj dhɑnhø, de mïdh-ɑ yi tegi Jwøk. De kì tung-ɑ kyeelø, yɑ nyii pwönyø kì kelli tyëng-ɑ rummi gen cyegø kì ri wëy, yɑ kømm-ɑ kwøbbɑni ki peli wïj, de pɑth ki peli wïj mi kömi piny men, ɑ tege nyi lɑ̈ɑ̈ny, dɑ́ peli wïj Jwøk; peli wïny-ɑ bɑ ɑkɑn, ɑ ɑ́cïb yi Jwøk kɑ̈ng-ɑ nuti cɑ̈gi piny ɑ́ men bɑnge óyïddi yi wɑ ki dhwɑ̈ng. Kwøbbɑni nuti lïngø yi jyɑ̈ggi kömi piny, mɑ́ keløg møgɑni di ngɑ̈nyi yi gen, ti Wïi mɑ̈r pɑ di gur yi gen wïj yɑdh ɑrïw. De møgɑni nɑ møg-ɑ ógwedø kì yij wɑ̈nyi kwërø kinni, “Gïn-ɑ nuti lidhø wɑlɑ̀ nuti lïngø yi dhɑnhø, gïn nuti rømmø kinni ócwöb, bene gïn-ɑ ɑ́gwir yi Jwøk kipe ji-ɑ mɑɑrii.” De bɑ wɑ ɑ ɑ́nyudhi gïg-ɑ ɑkɑnn møgɑni yi Jwøk ki Wëye, mɑ́ Wëy ceg-ɑ pwönyø ki jɑmmì bënn cɑgg ɑ́ møg-ɑ pyëw Jwøk. Bɑ wëy-ɑ ri dhɑnhø ɑ ngɑ̈nyi møg-ɑ pyëw ngɑnɑni. Nɑ menɑni ceth, bɑ Wëyi Jwøk kete ɑ ngɑ̈nyi møg-ɑ pyëw Jwøk bënn. Wëy møg-ɑ ɑ́yod yi wɑ pɑth ki mø piny keny, de bɑ Wëy-ɑ ɑ́ör yi Jwøk, kipe kinni o gïg-ɑ ɑ́mëggi wɑ yi Jwøk óbëëd ge ngɑ̈nyi yi wɑ. Wø pɑ kømmi kwøb mɑ ɑ́ceg ki pwönyø ki peli wïj dhɑnhø, de wø kømm-ɑ kwøb mɑ ɑ́pwönyi yi Wëy; wø lwøb-ɑ dyër kì ri wëy, ki kwøb mø kɑ̈ɑ̈l yï Wëy. De ngɑn yïe bong Wëy, pɑ yïddi ki gïg-ɑ muuj yi Wëy-ɑ kɑ̈ɑ̈l yï Jwøk. Møgɑni pɑ cuggi gɑmø yi wɑ̈thi ji-ɑ ni møgɑni; ge bɑ óbɑɑd kì yï gen, mɑ́ tegi per møgɑni yod kɑ wëy. Ngɑn-ɑ yïe di Wëy, bëëdi gïg-ɑ nud bënn nyii yodø yi en, de bong ngɑn cuggi yodi bëëde. Ni kɑ̀ kööb wɑ̈nyi kwërø kinni, “Á men ɑ ngɑ̈nyi rummi Wë? Á men ɑ cuggi cïjii?” Wɑ thyew, yïee dɑ rummi Mesiy. Cɑgg ɑ́ kɑ̀ bëëd møgɑni kinøw, wun ɑ nyiimïɑ, yɑ pɑ kööbø ki wun ni ke di kööbɑ ki tyëng-ɑ yï gen di Wëy; de yɑ kööbø ki wun ni ke di kööbɑ ki tyëng-ɑ nyi cyɑ̈dhi kì bɑng gïn-ɑ nyi rømmi yi gen kí cwɑggi gen; rummi wun kì ri Mesiy, nudd ge nɑ rummi othønhø. Wu ɑ́pwönyi yi yɑn kɑ kwøb mø yöd, ni kenyi piidh othinh ki cɑg. Cɑgg ɑ́ ɑnɑn ceth, wu nudd wu nyøødh. Mɑ́ wu nudd wu bëëdø kɑ bëëdi tyëng kömi piny. Anɑn, kɑ̀ nud ɑter geki wëërø kì kelli wun, menɑni pɑ nyodh kinni wu bɑ tyëng kömi piny men? Kɑ̀ bëëd møgɑni kinøw, wu pɑ̈r ki tyëng-ɑ kwïj wøw ceth. Mɑ́ keløg nget ɑ́kyel nyii kööbø kinni, “Yɑ bɑ jɑlbɑng Pøøl”, kɑ megø okööbø kinni, “Yɑ bɑ jɑlbɑng Apøløs,” kɑ̀ göög wun kinøw, wu pɑ pɑ̈r ki tyëng-ɑ nudd ge cyɑ̈dh-ɑ́ɑ̀ bɑng jɑmmi kömi piny? Apøløs bɑ men? Wɑlɑ̀ Pøøl bɑ men? Wø bɑ tyëng-ɑ nyi göögø kipe kɑnïsɑ̀ ceth, o bene bɑng wøn ɑ ɑ́yïëy wun. De dhɑnhø gwøg-ɑ gwøge men-ɑ ɑ́mëggi yi Wë. Yɑ Pøøl, kɑ ɑ́pwönyɑ kwøbbi Jwøk kì kelli wun kì tyeli mɑl, pɑ̈r ki kinni, yɑ ɑ́ceg-ɑ kɑ̈g. O Apøløs, kɑ ɑ́pwönye kì kelli wun kì cyɑ̈n, pɑ̈r ki kinni, gïg-ɑ ɑ́kɑ̈g yi yɑn ɑ́cɑwe ki pï. Dɑ́ Jwøk ɑ ɑ́wëggi gïg-ɑ ɑ́pidh døngø. Kɑ ɑ́rum bëëde kinøw, ngɑn-ɑ ɑ́kɑ̈ɑ̈g, kí ngɑn-ɑ ɑ́cyɑ̈ɑ̈w bong per gen ryeet, dɑ́ Jwøk ngɑn-ɑ ɑ́wëggi gïn-ɑ ɑ́pidh døngø, ɑ pere teg. Bong gïn bɑ̈ɑ̈n kì kɑɑm ngɑn-ɑ ɑ́kɑ̈ɑ̈g kí ngɑn-ɑ ɑ́cyɑ̈ɑ̈w; ngö ge óthödhi yi Jwøk ki köögi, e ngɑn mëgg-ɑ köögi men-ɑ kyëëw ki gwøng-ɑ ɑ́gwøge. Wø bɑ ji mø göggi Jwøk kì kej ɑ́kyel; o wu bɑ pwödhi Jwøk. Wu bɑ øn-ɑ ger yi Jwøk thyew. Yɑn ɑ ɑ́këël tyeli ønɑni piny ki dïdø men-ɑ ɑ́mëggi yɑn yi Jwøk, o bɑ ngɑn megø ɑ gëddi kömi tyeli ønɑni. De ngɑn-ɑ gëdø gwire rumme ki kër-ɑ gëde. Bong tyeli ød megø këti men-ɑ ókëël piny yi ngɑn megø, dɑ́ men-ɑ ɑ́rum ki këël piny yi yɑn ɑ köme gëddi, o tyeli ønɑni bɑ Yëso Mesiy. Keløg e dɑ dhɑnhø me gëdø kì kömi tyeli ønɑni, e gëëd-ɑ dhɑb, wɑlɑ̀ ɑ́tegø, wɑlɑ̀ kïtt-ɑ per gen teg, wɑlɑ̀ yenh, wɑlɑ̀ thyɑng, wɑlɑ̀ lum, bëëd ngɑnɑni e ngɑ̈ny wøw kinni, gwøge órɑng ceth. Mɑ́ gwøøg dhɑnhø bëne órɑng kì ri thumi piny. Kì cyɑ̈ngɑni, gwøøg ngɑnɑni órɑng ki mɑc ni kenyi rɑɑng ngyënyø ki mɑc yi bødhø. Ngɑn gwøge koo rɑ̈bbi, köögi mee óyode. O ngɑn-ɑ gwøge órɑ̈bbi, cingge ceg-ɑ gɑ̈gø; o óbødh, de óbëëd e nɑ ngɑn yïëël wɑ̈g kì dhø mɑc. Kwïj yi wun kinni, wu bɑ kengi Jwøk, o Wëyi Jwøk bëëd ɑ ri wun? Keløg kengi Jwøk orënyø yi ngɑn megø, ngɑnɑni kiree, órënyi yi Jwøk. Mɑ́ kengi Jwøk bɑ kej kwër, o wun ɑ bɑ kengɑni. Anɑn, ko di dhɑnhø me budh ree kinni, cem e kwøbbi kömi piny men ngɑ̈nyi yi en bënn, mɑ́ keløg e dwɑdd-ɑ yodi møg-ɑ bɑ dyër, wiy løge ree wɑɑd ki dhëg. Kwøbbi ngɑ̈nyi wøw mi piny men bɑ kwøbbi dhëëgø kì yï Jwøk. O bɑ ɑgwed kì yij wɑ̈nyi kwërø kinni, “Tyëng-ɑ ngɑ̈ny wøw, Jwøk dhɑ̈li wënyø yi gen kinni tek, mɑ́ ge ómɑg yï wënyi gen.” O bɑ ɑgwed thyew kinni, “Ngɑ̈nyi yi Wë kinni, rummi tyëng-ɑ wɑ̈thi gen pel, bɑ yɑnggì yøw.” Ko di ngɑn pwöd kööre kipe gïn-ɑ cuggi gwøgø yi dhɑnhø. Ge ceg bëëdø gɑ mø wun eni Pøøl, kí Apøløs, kí Pïtør, kí jɑmmi kömi piny, kí thøø, kí ɑnɑn geki dhuki megø; gïgɑni bënn, bɑ mø wun; de wu bɑ mø Mesiy, o Mesiy bɑ mi Jwøk. Rømmu wøn ceth kinni, wø bɑ bɑ̈nggi Mesiy, o wø bɑ tyëng-ɑ cinggi wøn ɑ́cïb kwøbbi Jwøk møg-ɑ nuti nyodhø cøn. Kɑ thyew, tyëng-ɑ cinggi gen di kwøbbɑni di dwɑddø kinni bëëd gen gɑ tyëngtir ki mendwøng. De keløg gwøgɑ ocɑyø yi wun, wɑlɑ̀ yi ji møøgø, møgɑni bong per gen kì yïɑ, mɑ́ riɑ pɑ nyi cɑy yi yɑn. Bong gïn tɑg yi yɑn, de menɑni pɑ wɑngi kinni yïɑ bɑ̈r kidyër. Mɑ́ e bɑ Wë ɑ ópwøj gwøgɑ, wɑlɑ̀ ɑ ócɑyii. Kɑ ɑ́rum bëëde kinøw, ko di ngɑn cɑy yi wun e bøli kej cɑ́y nuti wɑ̈nhø; eni keny-ɑ óbëën Wë, o gïg-ɑ kɑnni kì yij muudhø menye, o gïg-ɑ tyer yi pëëth nyodhe, o dhɑnhø yode pwøjj-ɑ kyëëw ki en kì yï Jwøk. Wun ɑ nyiimïɑ, yɑ dwɑdd-ɑ kinni, o wøki Apøløs, wø óbëëd wøn, wøn-ɑ́ nyuudhi kipe kwøbbɑni, o møg-ɑ bɑ ɑgwed kì yij wɑ̈nyi kwërø kinni, “Mïdhu bëëndøj,” dïd yi wun, o bëëd e bong ngɑn lenhi ngɑn megø, o cɑyye ngɑn-ɑ kyeelø. Á men ɑ ɑ́gwøg yïn perí teeg kibøli ngɑn-ɑ kyeelø? Wɑlɑ̀ ɑ́ gïn ɑ nud kì yïí, e nuti mëggi yïn ɑ yi Jwøk? Dɑ́ kipe ngø ɑ pwööd köörí e dhɑ̈y gïn-ɑ pere thwøøg nuti cɑɑg kɑ mëggi yïn? Wu orumø kinni jɑmm-ɑ dwɑddi yi wun bënn, ɑ́rum ki yodø yi wun? Wu ɑ́kɑ̈ri? Wu ɑ́ceg-ɑ gwøg ki rɑ̈nhì, ngö wø nudd wø bɑ ji yøw? Di bëëd e døøj ke di bëëd wun wu bɑ rɑ̈nhì kidyër; rɑ̈ɑ̈dhø di nywɑg yi wɑ. Mɑ́ e nenni yi yɑn kinni, wøn, wø tyëngwöödø, wø ɑ́cïb-ɑ cyɑ̈n yi Jwøk, ni tyëng-ɑ ókuumø ki thøø kì bøli teedø bëne; mɑ́ wø ɑ́göög wø ceg kɑ ywørø yi lɑ̈bø bëne, kí wëywödd geki ji. Wø bɑ dhëgg kipe Mesiy, o wɑ̈thi wun pel kì ri Mesiy; wø nyøødh, o wu teeg. Wø ceg kɑ benyø, o wu ceg kɑ wørø. Wø nudd wø ceg-ɑ orɑng yi kɑ̈j geki röödhø; wø rug-ɑ kwɑ̈llì; wø nyi ceg kɑ pwödø; o wø ceg-ɑ twɑ̈lø; wø pïdø yi gwøg ki cinggi wøn. De kɑ̀ yɑnyyi wøn yi teedø, tyëng-ɑ gwɑddi wøn nyi lɑ̈mmi wø gyëdh, o guun-ɑ guud nyingi wøn ongiinø yi wøn, yɑ̈d nyi løøg yi wøn kɑ kwøb mø døøj. Wø ɑ́bɑny yi kömi piny; wø ɑ́göög ni gïg nyi weddi wïj thur. Wu pɑ gwëdɑ møg kɑ per kinni o wɑ̈thi wun lɑ̈ɑ̈y gen, de yɑ ceg-ɑ wun ni nyigɑ. Cɑgg tyëng-ɑ pwönyi wun ki yuu Mesiy bɑ ɑ́lïp pyɑ̈rø, wïyi wun bɑ ɑ́kyel kete. Mɑ́ kì yij bëëdi wun kì ri Mesiy, yɑ ɑ́göög ki wïyi wun ceth, kì bɑng kɑ ɑ́muujɑ Wöndøj wun. O yɑ kwɑjj-ɑ wun kinni ngøyu bëëdɑ. Bene ɑ pere örɑ Timøthì yï wun, eni wɑ̈dɑ, nyel-ɑ mɑɑr yi yɑn, ɑ mïdhi yïëyø kidøøj. O wu ópɑ̈ddi yi en ki bëëdɑ kì ri Mesiy, ni kɑ ɑ́pwönyɑ kɑnïsɑ̀ ki møgɑni kì yethi kɑ̈jj bënn. Dɑ ji kì kelli wun, mɑ ɑ́rum kinni i yɑ koo bï be këëmi wun, kɑ ge ceg-ɑ tɑ̈dø ki mendwøng. De yɑ óbï yï wun kì bɑng nyɑ keny me thiinh, ke dwɑddii yi Wë. Kwøbb-ɑ kømmi yi tyëng-ɑ tɑ̈dø geki gïg-ɑ gøggi yi gen, óyod yi yɑn keny-ɑ óbëënɑ. Mɑ́ Pödhi Jwøk pɑth ki kwøb yøw, de bɑ tegø. Á ngø ɑ lɑ̈w kì yï wun? Bïɑ yï wun yɑ kɑ̈ll-ɑ lonh pöödɑ? Wɑlɑ̀ bïɑ yï wun ki mɑ̈ɑ̈dø geki möölø? Okømmø ɑnɑn, i dɑ orøg kì kelli wun, men-ɑ́ orøg me pɑ cuggi gwøgø yi tyëngpɑth ki Yeud. I dɑ nyel me bëëdø ki cï wïye. O wu yöd wu ceg-ɑ thwøgø, ngö wu di ceg-ɑ kïïmø! O nyel-ɑ ɑ́gwøg gïn ni menɑni di ceg yi wun kɑ cyeed wɑ̈g kì kelli wun. Ri wun ko nyi lejji wun, mɑ́ lejji rek pɑ døj kì bøli Jwøk. Kwïj yi wun kinni, møng-ɑ búr men-ɑ nyi gwøøg ópun nyii twɑgø yi nyɑ kɑmïrɑ̀ me thiinh? Nyiig wun kɑmïr-ɑ kɑ̈ge dööng, ɑ bɑ mi orøg kì kelli wun, o wu göög wun, wu pɑ̈r ki ɑwɑj me nyɑ̈n, ni kɑ ɑ́ngɑ̈nyɑ wun; mɑ́ Órömi Kwëër Ákɑɑdh miee ɑ́rum ki ngɑlø; en ɑ Mesiy. Gwøg wɑ Kwëër Ákɑɑdh miee ki ópun me ree bong kɑmïrɑ̀ mi orøøg kɑ̈ge dööng. De gwøg wɑ en ki ópun me ree bong kɑmïrɑ̀; ɑ løg ópuun dhïwø geki dyër. Kì yij wɑ̈ny-ɑ ɑ́gwëdɑ wun, wu ɑ́cegɑ kinni, wu ko nyi 'lwööb ki tyëng-ɑ nyi niin ki ngɑn nuti nywøøm gen ri gen. Yɑ nuti wɑng-ɑ tyëng kömi piny, møg-ɑ nyi niin ri gen, wɑlɑ̀ møg-ɑ pëthi gen døngø, wɑlɑ̀ møg-ɑ nyi kwɑ̈dø, wɑlɑ̀ møg-ɑ nyi mɑlli ngïjji jwögg. Mɑ́ keløg wu pɑ di cyɑ̈dhi kì kelli tyëngɑni, wu di ceg-ɑ dhwödhø kì kömi piny men. De møg-ɑ ɑ́cïgɑ wun bɑ kinni: wu ko nyi cyɑ̈dhi ki ngɑn-ɑ nyi cwølli ree ɑ́ ngɑn-ɑ ɑ́yïëy, keløg e bɑ ngɑn nyi niin ki ngɑn nuti nywøøm gen ri gen, wɑlɑ̀ pyëwe dwøng, wɑlɑ̀ nyi mɑll-ɑ ngïjji jwögg, wɑlɑ̀ bɑ ɑ́leb, wɑlɑ̀ bɑ mɑ̈dhi møgø, wɑlɑ̀ bɑ kur. Wu ko wöl pëggi kej ɑ́kyel ki ngɑn ni menɑni. De ngɑn pɑ ying kɑnïsɑ̀, ócɑy kɑ per ngø? Pɑ lɑ̈w keløg wu cɑy-ɑ tyëng-ɑ kɑnïsɑ̀? Mɑ́ tyëng-ɑ pɑ ying kɑnïsɑ̀ ócɑy-ɑ yi Jwøk, ni kɑ̀ kööb wɑ̈nyi kwërø kinni, “Kɑ̈ɑ̈lu ngɑnrɑj wɑ̈g kì kelli wun.” Keløg dhɑnhø yïe dɑ gøny ki wɑɑd gen, ngɑn-ɑ ɑ́yïëy, ge kedh-ɑ́ɑ̀ dï, ɑ pödhi gen be gøny kì bøli jɑgg-ɑ kwïj Jwøk; ge pɑ gönyi bøli jii Jwøk? Kwïj yi wun kinni, jii Jwøk, bɑ gen ɑ ólidh gøøny piny bëne? De keløg gøøny piny bëne ólidh-ɑ yi wun, wu pɑ cuggi lidhi gønyy-ɑ yööd? Kwïj yi wun kinni, bɑ wɑ ɑ ólidh gønyyi wëywödd? De kɑ̀ bëëd møgɑni kinøw, dɑ gïn mɑ̈ɑ̈n wɑ lidhi gønyyi piny men? De keløg yï wun dɑ gøny, ɑ́ kipe ngø ɑ nyi kïdhu en bøli tyëng-ɑ bong per gen kì yï kɑnïsɑ̀? Wɑ̈thi wun pɑ lɑ̈ɑ̈y! Pɑ jɑ̈ddi ki dhɑnhø ɑ́kyel kì kelli wun me wïje pel, me cuggi yieli gøøny jii Mesiy. O bongii ngɑn gøøny wɑɑd gen buri tyëng-ɑ nuti yïëyø. Kɑ̀ bëëde e dɑ gønyy kì kɑɑm wun, menɑni wɑng-ɑ kinni wu ɑ́dhɑl yi bëëdø. Pɑ di bëëd e lɑ̈w keløg ɑkørr-ɑ ruj wun di ngin yi wun? De wu yöd wu ruj-ɑ nyiimï wun, kɑ jɑmmi gen nyi kɑb wun! Kwïj yi wun kinni, tyëng-ɑ nyi rujø ki ji koo wɑ̈dhi Pödhi Jwøk? Ri wun ko wëny wun; de bëëd wu ngɑ̈ny wøw kinni, tyëng-ɑ nyi niin ki ngɑn nuti nywøøm gen ri gen, kí tyëng-ɑ mɑlli ngïjji jwögg, kí cwøw-ɑ nyi niin ri gen, kí tyëng-ɑ nyi kwɑ̈dø, kí tyëng-ɑ nyi kɑ̈bø ki jɑmmì, kí tyëng-ɑ nyi nɑ̈g yi møgø; kí tyëng-ɑ nyi yɑ̈dø, geki ɑ́muddi ji, Pödhi Jwøk pɑ lidh yi gen bënn. Kwï wun ɑ́bëëd ɑ nøw. De orøøg wun ɑ́lwöög wɑ̈g; kɑ wu thyëyi Jwøk; wu ɑ́gwøg wu tir kì yï Jwøk yi Wë Yëso Mesiy geki Wëyi Jwøgee. Dɑ ji mø kööbø kinni, “Yɑ bɑ ɑyïëy ki gwøg ki jɑmmì bënn.” De jɑmmɑni pɑ døøj bënn kiperí. Yɑ ócuggø kwøb kinni bong gïjø me bɑ ɑkerø ki gwøgø yi yɑn, de yɑ pɑ yïëy kinni, o yɑ gwøøg bɑ̈ng yi gïjø ɑ́kyel kì kelli jɑmmɑni bënn. Wu nyii kööbø kinni, “Gïncɑm bɑ kipe yij, o yij bɑ kej gïncɑm.” Kwøbbɑni bɑ dyër. De gïgɑni ryeet bɑ møg ólɑ̈ɑ̈ny keny-ɑ óthøw dhɑnhø. Dëël dhɑnhø nuti cwɑ̈jø ɑ́ men yɑ̈ɑ̈b ki mɑ̈nn, de ɑ́cwɑ̈j kɑ per Wë, o bɑ Wë ɑ nyi thödhi dëël dhɑnhø ki gïn-ɑ dwɑdde. O Jwøk ngɑn-ɑ ɑ́tug Wë kì yij thøø, wɑ ólony yi en ki tugø ki tege. Kwïj yi wun kinni, dëlli wun bɑ gïïi dëël Mesiy? De gïïi dëël Mesiy ókɑ̈l yi dhɑnhø kidï, o gï rebe ki dëël ngɑn nyi niin ki köögi? Møgɑni pɑ cuggi kinni tek. Ngɑ̈nyi yi wun kinni, ngɑn-ɑ nyi bëëdø ki ngɑn nyi niin ki köögi, dële ɑ́göög ki dël ɑ́kyel ki dëël ngɑn nyi niin ki köögi. Mɑ́ e bɑ ɑgwed kì yij wɑ̈nyi kwërø kinni, “Gen ryeet, ri gen óløg gen dhɑnhø ɑ́kyel.” De kì tung-ɑ kyeelø, ngɑn-ɑ ɑ́rëbi ki Wë Mesiy, wëye ɑ́rëbi ki Wëyi Mesiy. Nyi këëj wun niin ki mɑ̈nn-ɑ pɑth ki mɑ̈nni wun. Bong orøg megø me nyi kɑ̈ni wɑ̈g kì ri dëël dhɑnhø ni niin ki dhɑjø. O ngɑn niin mɑ̈nn mø pɑth, nyïɑ̈g-ɑ dële. Kwïj yi wun kinni, dëlli wun bɑ kengi Wëykwërø, ɑ ɑ́mëggi wun yi Jwøk, o bëëd ɑ ri wun? Wu ɑ́ceg kɑ ngewø yi en, kɑ gïn-ɑ ɑ́ngëwe muuje. Kɑ ɑ́rum bëëde kinøw, mïdhu dëlli wun gɑ møg lejju Jwøk. Anɑn, yɑ løøg-ɑ ɑkørr-ɑ́ per gen ɑ́gwëdu yɑn. Døøj ke cög jɑlø e pɑ nywɑ̈ddi ki dhɑjø. De kɑ̀ bëëd orøg gïïr, bëëd jɑlø yïe dɑ cyëge, kɑ dhɑjø bëëde yïe dɑ jɑlgøle. Jɑl-ɑ ɑ́nyömi ko bɑ̈nyi ki pëggi kej ɑ́kyel ki nyɑn-ɑ ɑ́nywøm yi en, kɑ nyɑn-ɑ ɑ́nywøm ko bɑ̈nyi ki pëggi kej ɑ́kyel ki jɑl-ɑ ɑ́nywømii thyew. Mɑ́ dëël dhɑjø bɑ mi jɑlgøle, o dëël jɑlø bɑ mi cyëge. Ri wun ko nyi bɑny wun, keløg e pɑth ki møg cɑɑg wun kɑ nywɑgø, kipe kinni o wu yïddi wun ki keny mɑllu Jwøk, codhe o wu døøg wun kej ɑ́kyel. Keny-ɑ óbëëd wun kinøw, Cethɑn koo yïddi ki keny thɑɑbe wun be orøg. Wu pɑ ceg yi yɑn ki cegø, de miɑ bɑ yïëyø. Mɑ́ yɑ dwɑdd-ɑ kinni, o ji bënn di bëëd gen ni yɑn. De ngɑn bëëdø kɑ bëën-ɑ ɑ́mëggii yi Jwøk, ngɑn mëgg-ɑ gïn, ngɑn mëgg-ɑ gïn-ɑ kyeelø. O yɑ köbb-ɑ tyëng-ɑ nuti nyömø geki thwömm kinni, lɑ̈w keløg ge obëëdø ni yɑn ɑ nuti nyömø. De keløg dhɑnhø dhɑ̈li mɑgi pyëwe, nyöme; mɑ́ lɑ̈w ke nyöme, kibøli ke di bëëde nyinge ókɑ̈ngø yi mɑ̈j. De wun ɑ tyëng-ɑ ɑ́nywøm ri wun, yɑ ceg-ɑ wun kinni ngɑn-ɑ ɑ́nywøm, jɑlgøle ko nyi wiye piny, o ciggɑni pɑ kɑ̈ɑ̈l yïɑ, de ge kɑ̈ɑ̈l-ɑ yï Wë. De keløg jɑlgøle wiye’ piny, cöge e pɑ cigi nywømø, wɑlɑ̀ cigi gen rëbø ki jɑlgøle. Kɑ jɑlø cyëge ko tɑ̈nge. De tyëng-ɑ kyeelø köbb-ɑ yi yɑn, pɑth ki Wë kinni, ngɑn-ɑ ɑ́yïëy, keløg yïe dɑ dhɑjø me nuti yïëyø, de ngɑnɑni pyëwe dwɑdd-ɑ jɑlgøle, gø ko tɑ̈nge. Wɑlɑ̀ keløg e dɑ ngɑndhɑjø me yïëyø, o jɑlgøle nuti yïëyø, kɑ jɑlɑni oyïëyø bëëdø ki en, gø ko tɑ̈nge. Mɑ́ jɑl-ɑ nuti yïëyø, ree ɑ́løge me pɑ̈r ki ngeti kwøbbi Jwøk kì bɑng cyëge, o dhɑjø men-ɑ nuti yïëyø, ree ɑ́løge me pɑ̈r ki ngeti kwøbbi Jwøk kì bɑng jɑlgøle thyew. Keløg e pɑ di bëëd kinøw, nyigi gen di bëëd ge nɑ nyigi tyëng-ɑ nuti yïëyø, ngö ge bɑ ɑyïëy yi Jwøk. De keløg ngɑn-ɑ nuti yïëëy kwøbbi Jwøk dwɑdd-ɑ kedhø, wiy kedhe. Mɑ́ keløg ge dwɑdd-ɑ dɑ̈ngø, pɑth ki cwɑggi ngɑn-ɑ bɑ ngeti kɑnïsɑ̀ këti. Mɑ́ wu ɑ́cwøl yi Jwøk kɑ per kinni o wu bëëd wun ki mër. Anɑn, yïn ɑ ngɑndhɑjø, ngɑ̈nyi yi yïn kidï keløg jɑlgølí di yiel kì bɑngí. Wɑlɑ̀ yïn ɑ jɑlø, ngɑ̈nyi yi yïn kidï keløg cyëgí di yiel kì bɑngí. De gïn-ɑ pere teg cɑrø bɑ kinni bëëd dhɑnhø ki bëën-ɑ ɑ́bëëde cøn, keny-ɑ́ nuti cwølii yi Jwøk, o møgɑni cïgɑ’ kɑnïsɑ̀ kì kɑ̈jj bënn. Keløg e dɑ ngɑn-ɑ ócwølø yi Jwøk e rumø ngølø, ngïji menɑni ko wiy yi en. Wɑlɑ̀ keløg e dɑ ngɑn-ɑ ócwølø yi Jwøk e nuti ngølø ko yɑ̈ɑ̈b ki kwøbbi ngølø. Mɑ́ bëëdi dhɑnhø ɑ́ ɑngøl wɑlɑ̀ bëëde e nuti ngølø bogïn wɑngi yi gen, dɑ́ mïdhi ciggi Jwøk kidøøj, ɑ pere teg cɑrø. Bëëd ji bënn ni kɑ ɑ́cwøøl gen yi Jwøk. Keløg yï bëëdø yï bɑ bɑ̈ng cøn, pyëwí ko lïngi. De keløg yï óyïddø ki keny gööny ri wɑ̈g kì yij bɑ̈ɑ̈ngø, gøny rií ceth. Ngɑn-ɑ ɑ́cwøl yi Mesiy e pɑth ki bɑ̈ng, bɑ bɑ̈ng Mesiy ceth. Wu ɑ́ngew yi Jwøk, kɑ gïn-ɑ ɑ́ngëëwe muuje, wu ko göög ki bɑ̈nggi ji. Wun ɑ nyiimïɑ, cög dhɑnhø e nɑ keny-ɑ ɑ́bëëde kɑ ɑ́cwølii yi Jwøk. Bong cigg mɑ ɑ́yod yi yɑn kì yï Wë kipe ngɑn-ɑ nuti nyömø, wɑlɑ̀ ngɑn-ɑ nuti nywømø. De yɑ kwøb-ɑ møg-ɑ rømmɑ, ni ngɑn cuggi ngɑ̈dhø kì bɑng kɑ̀ bëëde ɑ́ ngɑn-ɑ́ pyëw Wë ɑ́lɑ̈ɑ̈m ki en. Anɑn, yɑ orumø kinni, lɑ̈w keløg dhɑnhø obëëdø ni kɑ̀ bëëde ɑnɑn, mɑ́ piny órënyi. Keløg dhɑnhø bɑ ɑtwöj yi kwøbbi gøle, ko yɑ̈ɑ̈b ki keny bëëne wɑ̈g kì yethi töjjɑni. Wɑlɑ̀ keløg dhɑnhø nuti nyömø, ko yɑ̈ɑ̈b ki kwøbbi nywöm. De keløg yï ónyömø, menɑni pɑth ki orøg. De tyëng-ɑ nyi nyömi nyii yïddø ki orɑng kì kömi piny men, o yɑ dwɑdd-ɑ wu lɑ̈ɑ̈wø ki orɑngɑni. Wun ɑ nyiimïɑ, gïn-ɑ wɑngi yi yɑn bɑ kinni, piny kedh e ócyɑ̈ngø thumø, bëëd tyëng-ɑ yï gen di mɑ̈nn ni tyëng-ɑ yï gen bong mɑ̈nn. Kɑ tyëng-ɑ ywöngi bëëd gen ni tyëng-ɑ pɑ ywöngi; kɑ tyëng-ɑ pëthi gen med, bëëd gen ni tyëng-ɑ pëthi gen pɑ med; kɑ tyëng-ɑ ngëwø bëëd gen ni tyëng-ɑ yï bong jɑmmì, kɑ tyëng-ɑ yï gen di kɑ̈r pëthi gen ko cïb gen kömi jɑmmɑni. Mɑ́ piny men ki bëën-ɑ bëëde ɑnɑn, koo mɑ̈gi ki keny me bɑ̈ɑ̈r. Yɑ dwɑdd-ɑ kinni, bëëd wun pëthi wun pɑ lïngø, mɑ́ ngɑn-ɑ nuti nyömø rumme nyi cïbe’ ri göggi Wë; de ngɑn-ɑ ɑ́nyömi nyi rømm-ɑ kwøbbi jɑmmi kömi piny, kí gïg-ɑ nyi wëggi pyëw cyëge mïnø; ceg kɑ tyellø kì wɑ̈thi tùng ɑ́ryew. O nyɑnɑjur men-ɑ nuti nywɑlø yi jɑlø, kí ngɑndhɑjø men-ɑ yïe bong jɑlø nyi rum ɑ ri kwøbbi Wë, mɑ́ e dwɑdd-ɑ kinni o dële geki pyëwe bëëd gen gɑ ɑkwër. De ngɑn-ɑ ɑ́nywøm nyi rømm-ɑ jɑmmi kömi piny møg-ɑ nyi mïni pyëw jɑlgøle. Møg kømmi yi yɑn kɑ per kɑ̀ dwɑdd-ɑ kønyi wun. Bong gïn ceg yi yɑn ki dwɑddi mɑ̈ɑ̈ni wun. De yɑ dwɑdd-ɑ kinni o wu gwøg wun gïn-ɑ døøj, ɑ bɑ dyër, o ri wun mëggu gwøøg Wë, e pëthi wun pɑ lïngø. Keløg e dɑ ngɑn rumø kinni, nyɑnɑjur men-ɑ ɑ́myeg yi en tyer yi en ki mendwøng, o dwɑdd-ɑ tyëgi nywöm, tyëge nywöm ceth kɑ cyëge kwɑnye; menɑni pɑth ki orøg. De ngɑn-ɑ ɑ́yïëy ki pyëwe bëne, kinni ócuggø bëëdø e pɑ nyömi, e pɑth ki ɑcerø, ócuggø bëëdø e nyɑn-ɑ ɑ́myeg yi en pɑ nywøme. Menɑni wɑng-ɑ kinni jɑl-ɑ nyömi ɑ́gwøg-ɑ gïjø me døøj, o jɑl-ɑ nuti nyömø ɑ́gwøg-ɑ gïjø me pëddi døøjø. Ngɑndhɑjø pɑ bëëd wïje kɑ̀ bëëd jɑlgøle onëënø; de ke thøw jɑlgøle, ócuggø kedhi yï jɑl-ɑ dwɑdde; de bëëd jɑl-ɑ yïe kedhe ɑ́ ngeti Mesiy. De yɑ orumø kinni ócuggø bëëdø pyëwe omedø ke cöge e pɑ yɑ̈bø ki jɑlø, o yɑ orumø kinni bɑ Wëyi Jwøk møg-ɑ riɑ ɑ kwøb møgɑni. Anɑn, møg bɑ kipe møg-ɑ ɑ́gwed yi wun kipe gëdhh-ɑ nyi ngɑ̈lli ngïjji jwögg. Bɑ dyër ceth kinni “wɑ dïdø wɑ bënn,” ni kɑ̀ kømmii. Dïdø menɑni dhɑnhø nyi wëgge’ kwööd mɑl yi ngöönø; de mɑ̈ɑ̈dø bɑ en ɑ nyi gëdø. Keløg dhɑnhø nyii rumø kinni, dɑ kwøb mø dïd en ki mendwøng, ngɑnɑni nuti ti dïdø. De keløg Jwøk mɑɑr yi dhɑnhø, ngɑ̈nyi yi Jwøk kinni, ngɑnɑni bɑ ngete. Kì ri kwøbbi rïnggi gëdhh-ɑ nyi ngɑ̈lli ngïjji jwögg; ngɑ̈nyi yi wɑ kinni ngïjjɑni pɑth ki jwögg kidyër, o bong Jwøk megø, de Jwøk bɑ ɑ́kyel kete. Cɑgg e di gïg mø cwølli gɑ jwögg, kì mɑl wɑlɑ̀ piny, cɑgg ɑ́ kɑ̀ ngeeny jwöggɑni geki wëëg møgɑni, yïee dɑ Jwøk ɑ́kyel, en ɑ Wïy, Ngɑn-ɑ ɑ́cwɑ̈j jɑmmì bënn, o en ɑ ree bëëd yi wɑ; o Wë nud ɑ́ ɑ́kyel, en ɑ Yëso Mesiy; en ɑ ree ɑ́cwɑ̈ɑ̈j jɑmmì bënn, o en ɑ ree bëëd yi wɑ. De pɑth ki ji bënn ɑ ngɑ̈nyi møgɑni. Kwï ji wɑ̈thi gen ɑ́kɑ̈l yi møgɑni; pïd ɑnɑn kɑ̀ cyɑ̈ɑ̈m gen ki gëdhhi jwöggɑni, ge nyii rumø kinni ge ceg-ɑ ywëdhø, mɑ́ rømmi yi gen ɑ́ mi ngïjjɑni; pëthi gen nyøødh. Wɑ pɑ cuggi kïdhi buti Jwøk yi gïncɑm, o bong gïn kedh kì yïee ke cög wɑ, wɑ pɑ cyɑ̈mø, o ke cyɑ̈ɑ̈m wɑ, bong gïn yod yi wɑ. De gwiru rummi wun kidøøj, kipe bëëdi wun wu göög-ɑ wɑ̈thi wun, ko göög ki men wëggi tyëng-ɑ pëthi gen nyøødh pɑ̈dhi yij orøg. Keløg yïn, yïn ɑ ngɑn-ɑ cwølli rií ce yï dïdø, keløg yï ocyɑ̈mø kì kengi jwøg me pɑth, kɑ yï lidh yi ngɑn-ɑ pyëwe nyøødh, ngɑnɑni pyëwe pɑ ceg tëngø, kɑ ocyɑ̈mø ki rïngi gïn-ɑ ɑ́ngɑ̈lli jwøng-ɑ pɑth ki dyër? Kɑ̀ bëëde kinøw, ngɑn-ɑ nyødh, othøø kì bɑng dïdø mií, eni ngɑn-ɑ́ pere ɑ́thøw yi Mesiy. O yï ɑ́göög ki orøg kì bøli Mesiy. Keløg gïncɑm göjj-ɑ wɑɑd wøn orøg, yɑ pɑ ciggi cɑm ki gïncɑmɑni, kipe kinni o wɑɑd wøn ócöge e pɑ pɑ̈dhi yij orøg ki göjɑ. Yɑ pɑ bëëd wïjɑ? Yɑ pɑth ki jɑlwöödø? Wë Yëso, nuti liidh yi yɑn? Wu pɑth ki gïn-ɑ ɑ́nywøl yi gwøng-ɑ ɑ́gwøgɑ kipe nyingi Wë? Cɑgg ji møøgø nuti yïëyø kinni yɑ bɑ jɑlwöödø, kì yï wun yɑ bɑ jɑlwöödø ceth, mɑ́ wun kì ri wun, wu bɑ ngïji men-ɑ nyodh kinni, yɑ bɑ jɑlwöödø mi Wë ceth, mɑ́ gwøng-ɑ́ pere ɑ́öri yɑn yi Wë ɑ́gwøgɑ ceth. Kenyi cɑɑy yɑn yi ji møøgø, riɑ nyi nyɑg yi yɑn kɑ kinni: Yïɑ bong dyër me köme cyɑ̈mɑ kɑ yɑ omɑ̈dhø? Yïɑ bong dyër me cuggɑ nyömø ki dhɑjø me yïëyø, men cyɑ̈dhi ki yɑn ni mɑ̈nni nyiimï Wë geki Pïtør? Wɑlɑ̀ bɑ wøki Bɑrnɑbɑ̀ keti wøn, ɑ cïrri gwøg kipe gïn-ɑ cɑm yi wøn? Wu ɑ́wöl lïngø cyɑ̈ng ɑ́kyel kinni, ɑlɑthker nyii göögø, e bong gïn culii? Wɑlɑ̀ dɑ dhɑnhø me nyi pïdhø ki bɑɑg oløg, kɑ ocögø e pɑ cyɑ̈mø ki nywøli oløngɑni? Wɑlɑ̀ dɑ dhɑnhø me nyi mɑ̈gø ki dyëg, kɑ ocögø e pɑ cyɑ̈mø ki cɑɑg dyëgɑni? Kwøbb-ɑ kømmi yi yɑn ek pɑ kɑ̈ɑ̈l-ɑ cwɑggɑ ketɑ; ge nud kì yethi Ciggi Mosɑ̀. Mɑ́ e bɑ ɑgwed kì yethi Ciggɑni kinni, “Wɑnh-ɑ pyejji gïn-ɑ pwööd byel, dhøge ko nyi twöj.” Anɑn, wu orumø kinni Jwøk kööre lïngø kɑ per wɑ̈dhh? Pɑ wɑngi wɑ keny-ɑ ɑ́kwøbe møgɑni? Møgɑni ɑ́gwed kɑ peree ceth. Ngɑn-ɑ purø kí ngɑn-ɑ kɑj byel nyi göögø ge gɑ̈nn-ɑ kinni ge óyïddi ki köögi. Wø ɑ́kɑ̈ɑ̈g ki köödhi wëy kì kelli wun, bɑ gïg mø ngenyø ɑ cwøl yi wøn kì yï wun, ke cwöddi wøn ki gïïpiny? Keløg ji møøgø yï gen dɑ tegø me nyi yïddi gen ki jɑmmɑni ki yï wun, tegø mi gen pɑ lod yi tegø mi wøn? Cɑgg ɑ́ kɑ̀ bëëd møgɑni kinøw, gïg-ɑ di yod yi wøn gɑ mø wøn ceth, nuti yodø yi wøn. De wø ɑ́ngïïn kɑ per kinni o bongii gïn jog Wöndøj kì ri Mesiy. Kwïj yi wun kinni, tyëng-ɑ nyi göögø kì yij Kengø nyi cyɑ̈ɑ̈m ɑ ri Kengø, o tyëng-ɑ nyi muuj gëdhhì nyi cyɑ̈ɑ̈m ɑ ri gëdhhɑni? Nɑ menɑni ceth, Wë ɑ́cïg kinni, ji-ɑ pwönyi Wöndøj, cyɑ̈ɑ̈m ɑ ri Wöönɑni. De bong gïjø mɑ ɑ́cwølɑ kì ri gïg-ɑ di mëggu yɑn, o yɑ pɑ ceg cwöd ki gïïpiny kì yï wun kɑ̀ gwedɑ møgɑni ɑnɑn. Thøø lɑ̈w kì yïɑ kibøli rënyi dhwɑ̈ng-ɑ ni men. Kɑ̀ pwönyɑ Wöndøj, riɑ pɑ lejji yi yɑn, mɑ́ gwøngɑni bɑ gwøgɑ ceth, o di bëëd ɑ́ cyën kì kömɑ keløg Wöndøj di cög e pɑ pwönyi yi yɑn. Keløg yɑ di pwönyi kɑ cwɑggɑ, yɑ di rum kinni yɑ ónëngi ki köögi, de gwøng-ɑ gwøg yi yɑn, ɑ́ceg kɑ cïb cingɑ yi Jwøk. Köögi miɑ bɑ ngø? Köögi men-ɑ yod yi yɑn bɑ pwönyi Wöndøj, e bong gïn culi yɑn. Yɑ bɑ ngɑn bëëd wïjɑ, yɑ pɑth ki bɑ̈ng ngɑn megø. De riɑ ɑ́løgɑ bɑ̈ng ji bënn, kipe kinni o ji mø gïïr cög ge pɑ lɑ̈ɑ̈ny. Keny-ɑ ɑ́göögɑ kì kelli Yeud, yɑ ɑ́bëëd yɑ nɑ gen, kipe kinni o Yeud yïëy gen, o ge ócög, ge pɑ lɑ̈ɑ̈ny. De kɑ̀ kööbɑ kì kelli tyëng-ɑ kömi gen bong Ciggi Mosɑ̀, yɑ ceg-ɑ bëëdø ni gen. De møgɑni pɑ wɑngi kinni, kömɑ bong cigg kidyër, mɑ́ ciggi Mesiy per gen teeg cɑrø kì yïɑ. O thyew, kɑ̀ kööbɑ kì kelli tyëng-ɑ pëthi gen nyøødh, yɑ ceg-ɑ gwøg ni ngɑn pyëwe nyøødh, kipe kinni o ge cög ge pɑ lɑ̈ɑ̈ny thyew. Møgɑni ɑ́gwøg yi yɑn kì kelli ji bënn, kipe kinni o kwï ji yiel kì wɑ̈thi tùngɑni bënn. De møgɑni bënn ɑ́gwøg yi yɑn thyew kipe kinni o yɑ løgɑ dhɑnhø ɑ́kyel kì kelli tyëng-ɑ nyi gyëdh kì bɑng kɑ̀ göög gen kipe Wöndøj. Kwïj yi wun kinni, dërr mø gïïr nyi rɑɑdø, de bɑ dhɑnhø ɑ́kyel kete kì kelli gen ɑ nyi yïddi ki pwøj? Nyi rɑɑd wun kipe kinni o wu yïddi wun ki gïn pwøøj wun. Tyëng-ɑ nyi tug kì bøli teedø ge nyi ceg kɑ pwönyø kidøøj. Møgɑni nyi gwøg yi gen kɑ per kinni, o ge ópöödh gen keny-ɑ órɑɑng gen, o ge óyïddi gen ki yɑ̈r men pwøøj gen. De yɑ̈r mi gen órënyi, mɑ́ e bɑ mi kömi piny. De yɑ̈r men-ɑ ópwøøj wɑ pɑth ki men-ɑ órënyi, mɑ́ e kɑ̈ɑ̈l-ɑ yï Jwøk. Bene ɑ bɑnge cwedɑ riɑ ki ngwej kipe kinni, o yɑ wɑ̈dhɑ keny-ɑ rengi; o bene ɑ bɑnge nyïɑ̈ggɑ yɑ nenn-ɑ keny-ɑ gøj yi yɑn ceth. Dëlɑ nyii pwödø yi yɑn, kɑ riɑ nyi cirɑ kipe kinni ko bëëd ɑ́ yɑn ɑ dhɑl yi bëëdø men-ɑ ɑ́pwönyɑ ji. Yɑ dwɑdd-ɑ pɑ̈ddi wun nyiimïɑ ki gïn-ɑ ɑ́cwöb kipe kweyyee møg-ɑ ɑ́lugi kì bɑng Mosɑ̀. Ge ɑ́gëng-ɑ yi pøølø bënn, kɑ Nɑɑm Omeli Kwɑrø bɑ̈ɑ̈n gen ge bënn. Ge ɑ́jwɑ̈ɑ̈g kì yij pøølɑni kí yij nɑɑm omelø gɑ jøbɑng Mosɑ̀. Kɑ ge ocyɑ̈mø bënn kì kej ɑ́kyel ki gïncɑm-ɑ ɑ́muuj yi Jwøk. Kɑ ge omɑ̈dhø bënn kì kej ɑ́kyel ki pïg-ɑ ɑ́kɑ̈ɑ̈l ri kïti wëy men-ɑ ɑ́cyɑ̈dhi ki gen. O kïnɑni bɑ Mesiy. Cɑgg ɑ́ kì bøli kenyɑni, Jwøk nuti bëëdø pyëwe med ki møøgø kì kelli gen; ɑthøw gen kì yij pɑ̈l. Møgɑni bënn ɑ́bëëd gɑ nyuudhi kiperee, kipe kinni o wɑ cög wɑ pɑ tyer gïgrijjø ni gen. Ngïjji jwögg ko mɑlli wun, ni kɑ ɑ́mɑlli gen yi kwï kweyyee. Ni møg-ɑ kømmi yi wɑ̈nyi kwërø kinni, “Teedø ɑ́pëggi piny be cɑm geki mɑdh, kɑ ge dhwödh-ɑ be ngyëëdø.” Wɑ ko pëggi be yɑb ki mɑ̈nn ni kɑ ɑ́göög kwï gen, ɑ ɑ́thøw ji ɑ́lïp pyɑ̈r ɑ́ryew wïdɑ́dɑ̈g cyɑ̈ng ɑ́kyel. Jwøk ko pɑ̈nyi wɑ ni kɑ ɑ́pɑ̈nyii yi kweyyee kɑ ge kɑ̈ɑ̈j yi thöllì. Wɑlɑ̀ wɑ ko kwɑ̈ɑ̈dh ni kɑ ɑ́kwɑ̈ɑ̈dh kwï gen, kɑ ge nɑ̈g yi Wëywöni Thøø. Gïgɑni bënn ɑ́pɑ̈dhi kömi gen gɑ nyuudhi kipe tyëng-ɑ kyeelø; kɑ ge gwed gɑ møg kyëddi wɑ, wɑ tyëng-ɑ riee thumi yi piny. Tyëng-ɑ rumø kinni ge cung-ɑ́ɑ̀ kömi tyelli gen, ri gen ko wëggi gen pɑ̈ɑ̈dhø. Akørr-ɑ ɑ́bï kömi wun, pɑ̈r ki møg-ɑ nyi bï kömi ji. De Jwøk dhøge pɑ wil yi en; kömi wun pɑ wëgge bëën yi ɑkørr mø dhɑ̈li yielø yi wun; wu óthödhe ki tegø me ngïïn wun kì bøli keny-ɑ nyi rɑɑng wun. Kɑ ɑ́rum bëëde kinøw, yeki nyiimïɑ, nyi rengi wun kì keny-ɑ mɑlli ngïjji jwögg. Yɑ kööbø ki wun, wun ɑ́ ji mø rummi wun nud; kɑ thɑ́ møg-ɑ kwøb yi yɑn yɑb wun. Óthɑ̈ngi gyëdh men-ɑ thyey yi wɑ, bɑ nywɑ̈g ki remi Mesiy; o ópun-ɑ nyi pød yi wɑ, bɑ nywɑ̈g ki dëël Mesiy. Wɑ bɑ dëël dhɑnhø ɑ́kyel wɑ bënn, cɑgg ɑ́ kɑ̀ ngeeny kwɑnnee; mɑ́ wɑ nywɑg-ɑ ópunɑni ɑ́ ɑ́kyel. Lidh wun kwɑrri Isrɑil; kɑ̀ nyi cyɑ̈ɑ̈m gen ki gëdhhì, ge ceg-ɑ nywɑ̈g ki gwøøg këli lɑm. Yɑ wɑng-ɑ kinni, ngïji jwøg geki gënh-ɑ mëggii bong per gen? Pɑth! Gïn-ɑ wɑngɑ bɑ kinni, gënh-ɑ nyi muuj yi tyëng-ɑ kwïj Jwøk pɑ nyi mëgg-ɑ Jwøk, de nyi mëgg-ɑ wëyrijjø. O yɑ pɑ dwɑddi kinni o wu nywɑ̈ɑ̈g wun ki wëyrijjø. Wu pɑ cuggi mɑdh kì yij óthɑ̈ngi Wë, kedh wu omɑ̈dhø kì yij óthɑ̈ngi wëyrijjø; o wu pɑ cuggi cɑm kì tɑɑw Wë, kedh wu ocyɑ̈mø kì tɑɑw wëyrijjø. Wɑlɑ̀ wu dwɑdd-ɑ kinni o Wë mɑg yi tyiel? Wu orumø kinni wɑ teeg kibøle? Teedø okööbø kinni, “Bong gïn bɑ ɑkerø ki cɑmø.” Bɑ dyër, de jɑmmì pɑ døøj bënn. Kí møg-ɑ kømmi kinni, “Bong gïn bɑ ɑkerø ki gwøgø.” De gïg-ɑ gøggi bënn pɑ nyi nywøl gïndøj. Dhɑnhø ko nyi gwøg gïn-ɑ døøj kipere kete; de nyi gwøg dhɑnhø gïn-ɑ døøj kiper ji møøgø thyew. Yï ócuggø cɑm ki rïngø men-ɑ kej ngyew ni kɑ̀ dwɑddí, e bong gïn pyënyi yi yïn kì ree, o bëëde e bong olïng pyëw. Mɑ́ wɑ̈nyi kwërø okööbø kinni, “Piny kí jɑmm-ɑ yije bënn, bɑ mø Wë.” Keløg wu oryejø yi ngɑn nuti yïëyø, kɑ wu oyïëyø ki kedhø, cyɑ̈ɑ̈m wun ki gïgcɑmm-ɑ mëggi wun bënn. Kɑ wu ko pëëj, o bëëde e bong olïng pyëw. De keløg wu oköbbø yi ngɑn megø kinni, “Rïngø men bɑ gëdhhi ngïjji jwögg,” wu ko cyɑ̈ɑ̈m ki rïngɑni, mɑ́ wu ɑ́rum ki köbbø, o bëëde e bong olïng pyëw. De yɑ pɑ wɑngi olïng pëthi wun; dɑ́ ngɑn megø ɑ kømmɑ. De ngɑn megø ócuggø pëjjø kinni, “Á kipe ngø ɑ mɑ̈ɑ̈n yɑn gïn-ɑ dwɑddi yi pyëwɑ kipe ngɑn megø? Keløg Jwøk nyii pwøjø yi yɑn kiper gïncɑmɑni, ɑ́ kipe ɑ cɑɑy yɑn kipe cɑmi gïncɑm mɑ pere ɑ́pwøjɑ Jwøk?” Keløg wu ceg-ɑ cɑm wɑlɑ̀ wu ceg-ɑ mɑdh, wɑlɑ̀ wu ceg-ɑ gwøg, nyi gwøgu gïgɑni bënn gɑ møg lejju Jwøk. Wu ko göög ki gïn göjji ji møøgø pɑ̈ɑ̈dhø; ying gɑ Yeud, wɑlɑ̀ tyëng Yönɑn, wɑlɑ̀ tyëng kɑnïsɑ̀. De bëëd wun ni yɑn; ɑ nyi pɑ̈nyi riɑ ceth ki gwøgi gïn mïni pëthi ji bënn. O yɑ pɑ nyi gwøg gïn-ɑ døøj kiperɑ, de yɑ nyi gwøg-ɑ gïn-ɑ døøj kipe ji mø gïïr, kipe kinni o ge yiel. Nyi ngøyu bëëdɑ ni kɑ ɑ́ngøyɑ bëëdi Mesiy. Yɑ pwøjɑ wun kipe kɑ̀ nyi pɑrru yɑn kì yethi cyɑ̈ng bënn, kí kɑ̀ mïdhu cigg-ɑ ɑ́mëggɑ wun. De yɑ dwɑdd-ɑ kinni o yod yi wun kinni, Mesiy, bɑ en ɑ jɑɑg jøg-ɑ cwøw bënn, o jɑlø bɑ en ɑ jɑɑg cyëge, o bɑ Jwøk ɑ jɑɑg Mesiy. Keløg e dɑ jɑlø me mɑlli Jwøk, wɑlɑ̀ me nyi töng mø Jwøk wïje bɑ ɑkum, wɑng-ɑ kinni Wë pɑ wør yi en. De ke di ngɑndhɑjø me mɑlli Jwøk wɑlɑ̀ töng mø Jwøk wïje nuti kum en, wɑng-ɑ kinni jɑlgøle pɑ wør yi en, o pɑ̈r ki ke di bëëde wïje bɑ ɑlyel. Mɑ́ keløg ngɑndhɑjø wïje pɑ kum yi en, lɑ̈w ke di lyëële yëyye wɑ̈g. De kɑ̀ bëëd wïj ngɑndhɑjø nyii lɑ̈ɑ̈yø keløg yëyye bɑ ɑteb wɑlɑ̀ wïje bɑ ɑlyel, wiy gø kume. Anɑn, jɑlø ko dwɑddi kinni o wïje kume, mɑ́ e bɑ ngïji Jwøk, o døøje kɑ̈ɑ̈l-ɑ bɑng døøji Jwøk. De døøji ngɑndhɑjø kɑ̈ɑ̈l-ɑ ri jɑlø. Mɑ́ jɑlø nuti kɑ̈ɑ̈l-ɑ ri dhɑjø, de dhɑjø kɑ̈ɑ̈l-ɑ ri jɑlø. O thyew, jɑlø nuti cwɑ̈jø kɑ per dhɑjø, dɑ́ dhɑjø ɑ ɑ́cwɑ̈j kiper jɑlø. Bene kì bɑng menɑni, ɑ nyi kum wïj ngɑndhɑjø ki ógødh kipe kinni o wëywödd ngɑ̈ny gen wøw kinni, ngɑnɑni cyɑ̈dh-ɑ́ɑ̀ bɑng tegø mi jɑlgøle. Cɑgg ɑ́ kɑ̀ bëëd møgɑni kinøw kì bøli Wë, dhɑjø bëëd ɑ ri jɑlgøle, o jɑlø bëëd ɑ ri cyëge thyew. Cɑgg ɑ́ kɑ ɑ́kɑ̈ɑ̈l dhɑjø ri jɑlø kì tyeli mɑl, ki yuu-ɑ ni menɑni ceth, jɑlø ɑ́nywøl-ɑ yi dhɑjø, o bɑ Jwøk ɑ nyi gwøg jɑmmì bënn. Løøg wun møgɑni kiri wun. Ngɑndhɑjø døøj ki mɑlli Jwøk, wïje nuti kumø? Cɑgg ɑ́ kì yij bëëdee kete, ngɑ̈nyi yi wɑ kinni, bɑ̈ri yëyyi wïj jɑlø bɑ ɑyɑ̈r, de bɑ̈ri yëyyi wïj dhɑjø bɑ dhwɑ̈ng, mɑ́ yëyy møgɑni ɑ́mëggii yi Jwøk gɑ møg kumii. De keløg e dɑ ngɑn pëmø kì ri møgɑni, gïn-ɑ köbbɑ en bɑ kinni; bong yöö megø men yïëy yi wøn, wɑlɑ̀ men yïëy yi kɑnïsɑ̀ thyew. Anɑn, bong gïn pwøjɑ wun kì ri møg-ɑ köbbɑ wun èn, mɑ́ gïgdøj møg-ɑ nyi gwøg yi wun kɑ̀ cugi wun, nyii lodø yi gïgrijjø møg-ɑ nyi gwøg yi wun kì kenyɑni. Møg-ɑ mɑl bɑ kinni yɑ ɑ́lïng kinni, i dɑ ɑkud me pëmø kì yij buri wun; kɑ yɑ oyïëyø kinni, kwï kwøbbɑni bɑ dyër. (De tyëng-ɑ mïdhi kwøbb-ɑ dyër óyod kidï, keløg e di bëëd e bong ji mø bɑ̈nni wɑ̈thi teedø?) Kenyi cugi wun be cɑm kì kej ɑ́kyel, wu pɑ nyi cyɑ̈mø kɑ yuu-ɑ nyi cɑɑm gïi kwëër Wë. De dhɑnhø nyi cɑm-ɑ gïncɑme kì wɑ̈ye, kɑ ngɑn megø nyii cögø ree dɑ kɑ̈j, kɑ ngɑn-ɑ kyeelø nyi nɑ̈g yi møgø. Á kipe ngø, ɑ nyi göög wun kinøw? Yï wun bong kɑ̈llì mø yethi gen nyi cyɑ̈ɑ̈m yi wun? Wɑlɑ̀ bong kɑ̈llì møg yethi gen nyi mɑ̈ɑ̈dh yi wun? Kɑnïsɑ̀ pɑ ceg ki yɑ̈rø yi wun, kɑ̀ pɑ nyi køny wun tyëng-ɑ cinggi gen jɑdø? Anɑn, yɑ ókööb ɑ dï kiper wun? Wu ócuggø pwøjø yi yɑn kipe møgɑni? Wu pɑ pwøj yi yɑn kinni tek. Møg-ɑ ɑ́yod yi yɑn kì yï Wë, bɑ gen ɑ ɑ́muujɑ wun, o møgɑni bɑ kinni, Wë Yëso ɑ́kɑ̈bbi ki ópun kì wɑ̈r-ɑ ɑ́twɑnyii, ɑpwøje Jwøk, kɑ ópunɑni pøde, ɑkööbe kinni, “Men bɑ dëlɑ men-ɑ muuj kiper wun, nyi gwøgu møgɑni kipe pɑri yɑn.” Kɑ kì bøli keny-ɑ ɑ́rum gen ki cɑm, kɑ óthɑ̈gi kwɑnye ni menɑni thyew. Kɑ okööbø kinni, “Óthɑ̈gi men bɑ lwömi Jwøk, lwöm-ɑ nyɑ̈n kì ri remɑ. Kenyi mɑdhu en, nyi gwøgu en ɑ́ men pɑru yɑn.” Mɑ́ kì yethi cyɑ̈ngg-ɑ nyi cyɑ̈ɑ̈m wun ki ópunɑni, kɑ wu omɑ̈dhø kì yij óthɑ̈ngɑni, wu nyudh-ɑ teedø kwøbbi thøwi Wë, gïti bøli keny-ɑ ódwööge. Menɑni bɑ kinni, ngɑn cyɑ̈mø ki ópuun Wë, kɑ omɑ̈dhø kì yij óthɑ̈nge kì yöö me pɑ myëër ki en, ngɑnɑni köme dɑ cɑ́y, kipe kɑ ɑ́bwöle dëël Wë geki reme. Nyi tyeny dhɑnhø ree møti, codhe o cyɑ̈me ki ópunɑni, o mɑ̈ɑ̈dhe kì yij óthɑ̈ngɑni. Mɑ́ ngɑn-ɑ nyi cyɑ̈mø, kɑ omɑ̈dhø, e pɑ rumø kidøøj ki gïn-ɑ wɑngi yi dëël Mesiy, ngɑnɑni cwööl-ɑ cɑ́y köme. Bene kì bɑng møgɑni, ɑ nyi bëëd ji mø gïïr kì kelli wun dëlli gen nyøødh, o dëlli gen orɑ̈mø, kɑ kwï ji nyii thøø. De keløg riee di gwir yi wɑ møti, wɑ pɑ di cɑy yi Jwøk. De kenyi cɑɑy wɑ yi Wë, ceg-ɑ wɑ ki tyenyø ni kenyi ceg nyɑ gïnthinh, o møgɑni bɑ kipe kinni, o wɑ cög wɑ pɑ yïddi ki cɑ́yi Jwøk kyeel ki tyëng-ɑ nyi cyɑ̈dhi kì bɑng jɑmmi kömi piny. De kɑ̀ bëëd møgɑni kinøw, wun ɑ nyiimïɑ, kɑ̀ cugu kej ɑ́kyel be cɑm, nyi yïdu ri wun. Keløg ngɑn megø ree dɑ kɑ̈j, cyɑ̈me kì gøle kipe keny-ɑ ócugu be cɑm, wu ócög wu pɑ cɑy yi Jwøk. De wu óceg yi yɑn ki kwøb møøgø keny-ɑ óbëënɑ yï wun. Anɑn yɑ løøg-ɑ møg-ɑ ɑ́gwed yi wun kì ri gïg-ɑ nyi muuj yi Wëykwërø. Yɑ dwɑdd-ɑ kinni, bëëd gen ge ngɑ̈nyi yi wun. Ngɑ̈nyi yi wun kinni, kɑ ɑ́bëëd wu nuti yïëyø, wu ɑ́thɑɑb be mɑlli ngïjji jwögg mø ri gen bong wëy. Anɑn yɑ dwɑdd-ɑ köbbi wun kinni bong ngɑn yïe di Wëyi Jwøk me cuggi kwøb kinni, “Yëso ree dɑ cyën!” O bong ngɑn cuggi kwøb kinni, “Yëso bɑ Wë,” keløg e pɑ nyudh-ɑ yi Wëykwërø. Dɑ gïg mø gïïr mø nyi muuj yi wëy, de wëy-ɑ muuj gen bɑ ɑ́kyel. O gïg-ɑ nyi gwøg yi ji kipe kɑnïsɑ̀ pɑ pɑ̈r; de Wë, ngɑn-ɑ pere göög yi wɑ bɑ ɑ́kyel. O gïg-ɑ nyi yod kì bɑng møgɑni pɑ pɑ̈r, de Jwøk bɑ ɑ́kyel, en ɑ ngɑn-ɑ nyi thödhi ji bënn ki tegø kipe gwøgi gïgɑni. Ji bënn nyi thödh-ɑ yi Jwøk ki tegø men nyodh kinni, Wëykwërø ogöögø kì pëthi gen kipe kinni, o tyëng kɑnïsɑ̀ yïddi gen ki gïgdøj. Dhɑnhø othödhø yi Wëy ki kwøbbi peli wïj; kɑ ngɑn megø thödhi yi Wëyɑni ki dïdø kwøb. Kɑ ngɑn megø thödhi yi Wëyɑni kete ki yïëyø; kɑ ngɑn megø mëgge yieli tyëngbuud. Ngɑn megø othödhø yi Wëy ki tegø men gööge ki gïïngɑ̈ngø, kɑ ngɑn megø mëgge töng; kɑ ngɑn-ɑ kyeelø wëgge ngij ki wëy; kɑ megø wëgge kwøb ki dhøg mø gïïr; kɑ megø wëgge løgi dhøggɑni. Møgɑni bënn gwøg-ɑ yi Wëy ɑ́kyel, e gï pɑ̈nge’ pɑ̈ngø kì kelli ji ni kɑ̀ dwɑdde gøn, dhɑnhø nyi mëgge’ me bɑ̈ɑ̈n ki men-ɑ mëgge ngɑn-ɑ kyeelø. Mesiy pɑ̈r ki dëël dhɑnhø ɑ́kyel, ɑ ree di gïg mø gïïr; o bɑ dël ɑ́kyel ceth cɑgg ree di gïg mø gïïr. Wɑ bënn thyew, ying wɑ bɑ Yeud, wɑlɑ̀ wɑ bɑ tyëng Yönɑn, wɑlɑ̀ wɑ bɑ bɑ̈ngg; wɑlɑ̀ wɑ bëëd-ɑ wɑ̈thee, wɑ ɑ́jwɑ̈ɑ̈g kɑ Wëy ɑ́kyel, kipe kinni o wɑ bëëd wɑ bɑ dël ɑ́kyel, o wɑ ɑ́mëgg-ɑ Wëyɑni ɑ́ ɑ́kyel. Mɑ́ dëël dhɑnhø pɑth ki gïjø ɑ́kyel kete, de bɑ gïg mø gïïr. Keløg tyelø okööbø kinni, “Kɑ̀ bëëdɑ yɑ pɑth ki cingø, yɑ tøøk kì ri dël,” di bëëd e tøøk kì ri dëël dhɑnhø kidyër? Wɑlɑ̀ keløg yïth okööbø kinni, “Kɑ̀ bëëdɑ yɑ pɑth ki wɑng, yɑ tøøk kì ri dëël dhɑnhø,” di bëëd e tøøk kì ri dëël dhɑnhø kidyër? Anɑn, keløg dëël dhɑnhø bëne di bëëd ɑ́ wɑng, dhɑnhø di lïng kidï? Wɑlɑ̀ keløg dëël dhɑnhø bëne di bëëd ɑ́ yïth, dhɑnhø di ngwɑ̈ɑ̈j kidï? De gïg-ɑ ri dëël dhɑnhø ɑ́cïb-ɑ yi Jwøk ni kɑ ɑ́dwɑdde gøn. Di bong dëël dhɑnhø, keløg e di bëëd ɑ́ gïjø ɑ́kyel. Gïg-ɑ ri dhɑnhø gïïr, o dël bɑ ɑ́kyel. O cingø pɑ cuggi köbbø yi wɑng kinni, “Yï pɑ dwɑddɑ!” O tyel pɑ cuggi köbbø yi wïj kinni, “Wu pɑ dwɑddɑ!” Gïg-ɑ nënni ge nyøødh kì ri dhɑnhø, yöd ɑ́ gen ɑ per gen pëddi tegø; gïg-ɑ nenni yi wɑ per gen pɑ teg, yöd ɑ́ gen ɑ korri yi wɑ; o gïg-ɑ nënni ge pɑ myëër kì ri dhɑnhø, bɑ gen ɑ ceg ki wørø, men-ɑ pɑ dwɑddi yi møg-ɑ pëddi myëërø. Gïg-ɑ ri dëël dhɑnhø ópyëlø yi Jwøk kɑ yöö me wøør møg-ɑ nënni per gen bogøn. O møgɑni bɑ kipe kinni o bongii gïn dɑ̈ɑ̈ng gïg-ɑ ri dëël dhɑnhø; o gïgɑni óbëëd gen ge køny-ɑ ri gen. Keløg e dɑ keny rɑ̈mø kì ri gïjø ɑ́kyel, dëël dhɑnhø bëne ceg-ɑ orɑng. O keløg gïjø ɑ́kyel olenhø, gïg-ɑ ri dhɑnhø bënn pëthi gen ceg-ɑ mïnø. Wu bënn, wu bɑ dëël Mesiy; o dhɑnhø ɑ́kyel bɑ gïjø ɑ́kyel kì ree. Ji bënn ɑ́cïb kɑ̈jji gen yi Jwøk kì yij kɑnïsɑ̀; tyëngwöödø ɑ mɑl, ryeew gen bɑ jøtöng; dɑ̈ɑ̈g gen bɑ jøpwönyø; kɑ ji møøgø nënge ki tegø men göög gen ki gïïngɑ̈ngø; møøgø yiel-ɑ tyëngbuud; møøgø køny-ɑ ji; møøgø ceg-ɑ tyëny ki kwøb; o møøgø 'kööb-ɑ dhøg mø kwïj. Ge pɑth ki tyëngwöödø ge bënn, wɑlɑ̀ jøtöng, wɑlɑ̀ jøpwönyø. Pɑth ki ji bënn ɑ yï gen di tegø me göög gen ki gïïngɑ̈ngø, wɑlɑ̀ me yïëëd gen ki tyëngbuud; wɑlɑ̀ me 'kööb ki dhøgg-ɑ kwïj yi gen; wɑlɑ̀ me lwøb gen møg-ɑ kwøb ki dhøng kwïj. Kɑ ɑ́rum bëëde kinøw, cïbu pëthi wun ri møg-ɑ ɑ́muuj gɑ møg døj. O wu ónyudhɑ yuu-ɑ pëddi døøjø. Ke 'kööbɑ ki dhøggi ji, wɑlɑ̀ yɑ 'kööbø ki dhøggi wëywödd, de mɑ̈ɑ̈dø bogøn kì pyëwɑ, yɑ nɑ thɑpiyø me pwöd wɑlɑ̀ mɑ̈lø me løng. Keløg yɑ onëngø yi Jwøk ki tegø men pwönyɑ, kí dïdø ki thɑ́ kwøb bënn, o yïɑ dɑ yïëyø me cuggi nyiigi kïttì kì kɑ̈jji gen, de pyëwɑ bong mɑ̈ɑ̈dø, perɑ bogøn. Cɑgg jɑmmɑ bënn, mëggɑ tyëng-ɑ nyingi gen cɑn, wɑlɑ̀ cɑgg dëlɑ muujɑ kipe kinni o rɑ̈b ki mɑc, de bong mɑ̈ɑ̈dø kì pyëwɑ, bong gïn yod yi yɑn. Mɑ̈ɑ̈dø bɑ ywøøg yij geki ngïïnø. Mɑ̈ɑ̈dø kwïj ɑter, wɑlɑ̀ kwïj pwödi kɑ̈w. Mɑ̈ɑ̈dø kwïj tɑ̈di wïj, wɑlɑ̀ pɑ nyi kɑ̈ni ki kwøb mø lɑ̈ɑ̈y wïj. Pyëw-ɑ di mɑ̈ɑ̈dø pɑ nyi göögø kɑ per cwɑgge kete, o pɑ nyi jwɑn rënyø, wɑlɑ̀ pɑ nyi cudø ki keje. Pyëw-ɑ di mɑ̈ɑ̈dø pɑ nyi bëëdø e med ki kwøbb-ɑ rijjø, de nyi bëëd e med kɑ kwøbb-ɑ døj. Pyëw-ɑ di mɑ̈ɑ̈dø nyii dyëjø, o nyii yïëyø ki jɑmmì bënn, o nyii ngɑ̈dhø ki gïg-ɑ óyod kì yï Jwøk bënn, o nyii yïdø ki bøli keny-ɑ óbëën gïgɑni bënn thyew. Mɑ̈ɑ̈dø gït-ɑ ɑtheer. De møg-ɑ töng kej gen nyii dhumø; o kwøb ki dhøgg-ɑ kwïj ócög; o dïdø ókedh. Mɑ́ dïdø miee, wɑlɑ̀ töngi mø Jwøk budi gen tøøk. O keny-ɑ óbëën gïn-ɑ bong bude me tøøk, gïg-ɑ budi gen tøøk ceg-ɑ lɑ̈ɑ̈nyø. Keny-ɑ ɑ́bëëdɑ yɑ thiinh, kwøbbɑ, kí bëëdɑ, kí rummɑ ɑ́bëëd gɑ mø othinh; o kɑ ɑ́døngɑ ɑnɑn, gwøøg thïnh ɑ́wiy yi yɑn. Gïg-ɑ nenni yi wɑ ɑnɑn, nɑ ngïji me dhïïdhø kì yij rɑ̈ɑ̈ngi; de obëën bøli kenyɑni, nyingee ótyëëm wɑ ki ngïji menɑni. Gïg-ɑ ngɑ̈nyi yi yɑn ɑnɑn, bɑ budi gen yøw ɑ ngɑ̈nyi yi yɑn; de obëën bøli kenyɑni, ge ótuum, ni kɑ̀ ngɑ̈nyi yɑn yi Jwøk kidøøj. Gïg-ɑ ócög ge nud ceth, bɑ ɑ́dɑ̈g; gen ɑ yïëyø, kí gɑ̈nø, kí mɑ̈ɑ̈dø; o gïn-ɑ pere teg kì kelli gen bënn bɑ mɑ̈ɑ̈dø. Nyi yɑbu mɑ̈ɑ̈dø menɑni ceth. Kɑ tegø men-ɑ nyi mëggi dhɑnhø yi Wëykwërø nyi tyeru thyew. De men-ɑ dwɑddi tyerø ki mendwøng bɑ tegø men-ɑ tööng mø Jwøk. Tyëng-ɑ nyi dhumø ki dhøgg-ɑ kwïj, pɑ nyi kööbø ki ji, de ge nyi kööbø kɑ Jwøk. O gïn-ɑ kømmi yi gen pɑ nyi lïngi yi teedø, mɑ́ e bɑ Wëykwërø ɑ kööbø kì ri gen ki kwøb mø nudd gï kwïj yi gen. De tyëng-ɑ pwönyi teedø ki wööni Jwøk nyi köbb-ɑ teedø ki kwøbb-ɑ nyi døm gen, kí kwøbb-ɑ nyi cïïj gen, geki kwøbb-ɑ nyi lug pëthi gen. Tyëng-ɑ nyi dhumø ki dhøgg-ɑ kwïj, nyi døm-ɑ ri gen keti gen, de tyëng-ɑ nyi pwönyi wööni Jwøk nyi døm-ɑ kɑnïsɑ̀ bëne. Yɑ dwɑdd-ɑ kinni, o wu dhum wun ki dhøgg-ɑ kwïj yi wun, de gïn-ɑ dwɑddi yi yɑn ki mendwøng bɑ kinni, o wu töngu mø Jwøk ceth. Ngɑn-ɑ pwönyi wööni Jwøk lod-ɑ ngɑn-ɑ dhumø ki dhøg me kwïj; mɑ́ gïn-ɑ wɑngi yi en pɑ yod, keløg e bong ngɑn løg møg-ɑ kømme, kipe kinni o kɑnïsɑ̀ døm yi møgɑni. Keløg yɑ bï-ɑ yï wun, wun ɑ nyiimïɑ yɑ 'kööb-ɑ dhøg me kwïj, ɑ́ ngø ɑ døj ɑ cuggi yodø yi wun kì ri møg-ɑ kømmɑ? Bogøn, de lɑ̈w keløg wu muujɑ’ kwøb mɑ ɑ́yɑl yi Jwøk, wɑlɑ̀ dïdø, wɑlɑ̀ töng, wɑlɑ̀ pwönyø. Keløg gïg-ɑ bɑ gïwwì ni kɑ̈ngì, kí thom, kí gïtɑr pɑ kɑ̈ni ki cwɑg møg ngïjji gen, wör-ɑ wör ki gen óyod kidï? Wɑlɑ̀ keløg kɑng pɑ ywöngi ki köögø, ɑ́ men ɑ ógwir ree kipe liny? Bëëd ɑ nøw ki wun thyew. Mɑ́ keløg wu kømm-ɑ kwøb mø pɑ gɑm yi wɑ̈thi ji, gïn-ɑ kømmi yi wun óyod kidï? Kwøbb-ɑ kømmi yi wun pɑ ceg ki wɑ̈dhø køølø yi yømø yøw? Dhøgg-ɑ 'kööb kì kömi piny gïïr, o bong me bogïn wɑnge kì kelli gen. De keløg gïn-ɑ wɑngi yi dhøg megø kwïj yi yɑn, yɑ nɑ ngɑnpɑth kì yï ngɑn-ɑ dhumø ki dhøngɑni; o ngɑnɑni nɑ ngɑnpɑth kì yïɑ thyew. O wun thyew kɑ̀ bëëd wu tyer-ɑ gïg-ɑ nyi muuj yi wëy, tyeru kinni o wu nëngi yi Jwøk ki møg geru kɑnïsɑ̀. Ngɑn-ɑ dhumø ki dhøgg-ɑ kwïj, kwɑjje Jwøk kipe kinni o thödhi ki tegø men lwøbe møg-ɑ kwøbe. Mɑ́ keløg Jwøk kwɑjji yi yɑn kɑ dhøg me kwïj yi yɑn, bɑ wëyɑ ɑ kwɑ̈jji, de bong gïn gɑm yi wïjɑ. Yɑ gwøg-ɑ ngø cyee? Jwøk ceg kɑ kwɑjjø yi yɑn ki wëyɑ geki rummɑ; o wörre wörɑ ki wëyɑ geki rummɑ. Keløg Jwøk pwøj yi yïn kɑ wëyí, pwøjjí óløøg kidï yi ji-ɑ lïngø kinni “Amen,” e gïn-ɑ kømmi yi yïn kwïj yi gen? Cɑgg kwɑ̈ny-ɑ pwøøj Jwøk døøj, ngɑn megø pɑ døm yi kwøbbɑni kinni tek. Jwøk ceg kɑ pwøjø yi yɑn kipe kɑ̀ ngɑ̈nyɑ dhøg mø ngenyø kibøli wun bënn. Lɑ̈w ke köbb-ɑ ji löggì ɑ́bïj mø cuggi gɑmø yi wɑ̈thi gen, yɑ ceg-ɑ pwönyø, kibøli ke di kööbɑ ki löggì ɑ́lïp mø ngenyø ki dhøg mø kwïj. Wun ɑ nyiimïɑ, wu ko nyi rum ki rummi othønhø, de bëëd wu nɑ othønhø ɑ kwïj gwøg ki rɑj, kɑ wu rømmu rummi döng. Bɑ ɑgwed kì yethi wɑ̈jji kwërø kinni, “Wë okööbø kinni, yɑ ókööbø ki jiɑ kì ri tyëng-ɑ 'kööb dhøg mø pɑth Yɑ ókööbø ki dhøggi tyëngpɑth de cɑgg ɑ́ men-ɑ́ jiɑ, kwøbbɑ koo lïngi yi gen.” Kwøb ki dhøgg-ɑ kwïj bɑ ngïji kì yï tyëng-ɑ nuti yïëyø; pɑth ki ngïji kì yï tyëng-ɑ ɑ́yïëy; o tegi pwönyi wööni Jwøk bɑ ngïji kì yï tyëng-ɑ ɑ́yïëy; pɑth ki ngïji kì yï tyëng-ɑ nuti yïëyø. Ke cugi kɑnïsɑ̀ bëne, kɑ ji bënn ócɑ̈gø dhum ki dhøg mø kwïj, kɑ ji mø nyɑ̈n kì kɑnïsɑ̀ wɑlɑ̀ ji mø nuti yïëyø obëënø, ge pɑ ceg kwøb kinni wɑ̈thi wun dɑ ɑ́nɑ̈gø? De keløg ji bënn pwöny-ɑ wööni Jwøk, kɑ ji mø nyɑ̈n kì kɑnïsɑ̀ wɑlɑ̀ ji mø nuti yïëyø obëënø, ge ceg kɑ cɑyø yi møg-ɑ lïngi yi gen. Rumm-ɑ kɑnni yi gen kì pëthi gen ceg kɑ yodø, kɑ ri gen bøødh gen piny, kɑ Jwøk mɑl yi gen, kɑ ge oyïëyø kinni Jwøk nud kì kelli wun kidyër. Bene gïn-ɑ wɑngi yi yɑn èn nyiimïɑ. Kenyi cugi wun wu ceg-ɑ mɑ̈ddø, nget ɑ́kyel yïe ódi wörø, ngɑn-ɑ kyeelø yïe ódi møg pwönye, o ngɑn megø ólwøb-ɑ gïn-ɑ wɑngi yi møg-ɑ ɑ́kømmi. Bëëd møgɑni bënn ge køny-ɑ kɑnïsɑ̀. O keløg wu okööbø ki dhøg mø kwïj, wiy bëëde ɑ́ ji ɑ́ryew wɑlɑ̀ ɑ́dɑ̈g ɑ kööbø, e ngɑn kööb ɑ bɑng ngɑn-ɑ kyeelø, kɑ møg-ɑ kømmi yi gen nyi løg yi ngɑn-ɑ ngɑ̈nyi dhøng-ɑ 'kööb. Keløg e bong dhumi me løg møg-ɑ kømmi ki dhøng-ɑ kwïj, kɑ ngɑn-ɑ 'kööb dhøng-ɑ kwïj cöge e okudø, kɑ köbbe ree kete geki Jwøk. Kɑ tyëng-ɑ pwönyi wööni Jwøk kööb gen gɑ ɑ́ryew wɑlɑ̀ ɑ́dɑ̈g, o møg-ɑ kømmi yi gen órømmi yi teedø. De keløg e dɑ ngɑn yïe bëën yi wööni Jwøk, kud ngɑn-ɑ kööbø. Wu ócuggø töngi wööni Jwøk wu bënn, e ceg kɑ lwøbø, kinni ngɑn nyi kööbe kì bɑng ngɑn-ɑ kyeelø, kipe kinni o ji dïd gen, o pëthi gen tëngi gen. Mɑ́ wëyi jøtöng jɑɑg-ɑ yi jøtöng, mɑ́ Jwøk pɑth ki Jwøøg ɑwøw, de bɑ Jwøøg mër. Ni kɑ̀ bëëde kì kɑnïsɑ̀ mi jii Jwøk kì kɑ̈jj bënn, bëëd tyëng-ɑ mɑ̈nn ge okudø kì keny-ɑ cugi yi kɑnïsɑ̀. Ge pɑth ki ɑyïëy ki kwøb, ni kɑ ógwedii kì yethi Ciggi Yeud. Keløg e dɑ gïn dwɑddi pyëjø yi gen, nyi pyëj gen cwøwi gen kì kɑ̈lli gen, mɑ́ ngɑndhɑjø pɑ myëër ki kwøb kì yij kɑnïsɑ̀. Wɑlɑ̀ kidï, kwøbbi Jwøk ɑ́cɑ̈g ɑ ri wun? Wɑlɑ̀ ge ɑ́bï-ɑ yï wun keti wun? Ngɑn kööbø cem ɑ́ jɑltöng, ngɑ̈nye wøw kinni møg-ɑ gwed yi yɑn ek, bɑ ciggi Wë. De ngɑn pɑ yïëy møgɑni, wu ko yïëy ki kwøbbe. Kɑ̀ bëëde kinøw, wun ɑ nyiimïɑ, cïbu pëthi wun ri töngi wööni Jwøk, kɑ tyëng-ɑ kööbø ki dhøg mø kwïj, ko nyi mɑ̈ɑ̈n wun kwøb; de gøggi jɑmmì bënn gɑ ɑpyël kidøøj. De ɑnɑn, wun ɑ nyiimïɑ, yɑ dwɑdd-ɑ pɑ̈ddi wun ki yuu-ɑ ɑ́pwönyɑ Wöndøj kì kelli wun cøn, eni kɑ ɑ́yïëy wun Wöönɑni, kɑ mïdhi yi wun ceth. Bɑ yïëyø menɑni ɑ ree yieel wun, ke mïdhu en kidøøj ni kɑ ɑ́pwönyɑ wun, de keløg Wöönɑni pɑ mïdhi yi wun kidøøj, wu pɑ yiel. Wöödø men-ɑ ɑ́muujɑ wun pere teeg cɑrø, mɑ́ Jwøk ɑ ɑ́mëggii yɑn, o wöönɑni bɑ kinni, Mesiy ɑ́thøw kipe orøgee ni kɑ ógwedii kì yij wɑ̈nyi kwërø kinni, ɑ́kony kɑ tug kì yij thøø kì dɑ̈ɑ̈g cyɑ̈ng, ni kɑ ógwedii ceth kì yethi wɑ̈jji kwërø; kinni ɑ́cwöb kì bøli Pïtør. Kɑ cig-ɑ cwöbø kì bøli tyëngwöödø gɑ pyɑ̈rø wïdɑ́ryew. Kɑ cig-ɑ cwöbø kì bøli nyiimïee keny-ɑ ɑ́ying gen kej ɑ́kyel, e kwɑnni gen pöödh-ɑ miy ɑ́bïj; mø gïïr kì kelli gen nudd ge onëënø gïti ɑnɑn, o bɑ mø nøg ɑ ɑ́lɑɑy yïnø. Codhe, ɑcwöbe kì bøli Yɑgob. Kɑ cig-ɑ cwöbø kì bøli tyëngwöödø bënn. Kɑ kì cyɑ̈n cyee, ɑcwöbe kì bølɑ, de yɑ nɑ ngɑn-ɑ ónywølø e keje pöödhø. Yɑn ɑ cyɑ̈n kì kelli tyëngwöödø bënn, o riɑ nennɑ yɑ pɑ myëër ki cwøllø yɑn ɑ́ jɑlwöödø, mɑ́ kɑnïsɑ̀ mi Jwøk wɑnge ɑ́guud yi yɑn cøn. De kì bɑng dhwɑ̈ɑ̈ng Jwøk, yɑn ɑ bɑ yɑn èn, o dhwɑ̈ng-ɑ ɑ́mëgge yɑn nuti wɑ̈dhe’ muujø, dɑ́ kì bɑng kɑ ɑ́bëëdɑ ɑ́ yɑn ɑ ɑ́ti dyëjø ki gwøg kibøli tyëngwöödø møg-ɑ kyeelø; ngö yɑ nuti göög-ɑ tegɑ, de yɑ ɑ́køny-ɑ yi Jwøk. Kɑ ɑ́rum bëëde kinøw, cɑgg wöönɑni ókɑ̈ɑ̈l-ɑ yi yɑn wɑlɑ̀ gen, bene møgɑni ɑ pwönyi yi wøn bënn, o bene wöönɑni ɑ ɑ́yïëy yi wun. O ɑnɑn, kɑ̀ bëëd wø pwöny-ɑ kwøbbi kinni, Mesiy ɑ́dhwödh kì yij thøø, ɑ́ kipe ngø ɑ kööb kwï wun kinni, i tyëngthøø koo dhwödh? Keløg tyëngthøø koo dhwödh, menɑni wɑng-ɑ kinni Mesiy nuti dhwödhø kì yij thøø. O keløg Mesiy nuti dhwödhø kì yij thøø, møg-ɑ pwönyi yi wøn di bëëd gɑ yɑnggì yøw, o yïëyø mi wun di bëëd e bong pere. O thyew keløg tyëngthøø pɑ cuggi dwöög wɑ̈g kì yij thøø, møg-ɑ pwönyi yi wøn kinni, Mesiy ɑ́tug yi Jwøk kì yij thøø di bëëd gɑ kwøbbi pyed. Mɑ́ keløg tyëngthøø pɑ nyi dhwödh, ti Mesiy nuti dhwödhø thyew. O keløg Mesiy nuti dhwödhø kì yij thøø, ti yïëyi wun bong gïn wɑnge, o wu di bëëd wu nudd wu ying-ɑ yij orøøg wun. Kì bɑng menɑni, keløg tyëngthøø pɑ nyi dwöög wɑ̈g kì yij thøø, jii Mesiy møg-ɑ ɑ́rum ki thøø di bëëd gɑ møg lɑ̈ɑ̈nyø. Keløg Mesiy gɑ̈n yi wɑ kɑ per bëëdø kì kömi piny kete, ti bɑ wɑ ɑ nyingee cɑn kibøli ji bënn. De dyër bɑ kinni, Mesiy ɑ́dhwödh kì yij thøø, o bɑ en ɑ wɑd mɑɑl tyëng-ɑ dhwödh. Thøø ɑ́kɑ̈ɑ̈l-ɑ yi dhɑnhø ɑ́kyel, o dhwödhø kì yij thøø ókɑ̈ɑ̈l-ɑ yi dhɑnhø ɑ́kyel. Wɑlɑ̀ ni kɑ ɑ́thøw dhɑnhø bëne kì bɑng Adɑm, nɑ menɑni thyew, ji bënn óyïddi ki nënnì kì ri Mesiy. De ji ódhwödh ge bɑ ɑpyël; Mesiy ɑ mɑɑl ji bënn, o jie lunyi gen ki dhwödhø, keny-ɑ ódwööge. Codhe, o cögi piny bëe cyee, keny-ɑ ótyɑɑm wëy-ɑ yï gen di tegø, kí jyɑ̈ggi kömi piny, kí tyëng-ɑ teg kì kömi piny yi Mesiy, kɑ rɑ̈ɑ̈dhø mëgge Wïy Jwøk. Mɑ́ Mesiy ceg-ɑ jyɑ̈gø ceth, gïti keny-ɑ ótyɑɑm tyëng-ɑ mɑɑnii yi Jwøk, kɑ gï cïbe thɑ́ tyelle. O ngetimɑ̈ɑ̈nø men-ɑ ótyɑm yi en kì cyɑ̈n bɑ thøø. Mɑ́ wɑ̈nyi kwërø okööbø kinni, “Gïïpiny bëne ɑ́cïb cinge yi Jwøk kipe kinni o gï jɑɑg yi en.” Kɑ̀ kööbe kinni, “Gïïpiny bëne,” ceg-ɑ nënnø ceth kinni Jwøk ngɑn-ɑ ɑ́cïb gïgɑni cingi Mesiy, tøøk kì kelli gïgɑni. De keny-ɑ órum gïïpiny bëne ki cïb cingi Mesiy, codhe o en, ɑ bɑ Wɑ̈d, ree lonye ki cïb thɑ́ ciggi Jwøk, ngɑn-ɑ ɑ́cïb gïïpiny bëne cinge; o gïg-ɑ nud bënn jɑɑg yi Jwøk. Keløg e pɑth ki kinøw, ɑ́ ngø ɑ yod yi ji-ɑ jwɑ̈ɑ̈g ki nyingi tyëng-ɑ ɑ́thøw? Keløg tyëng-ɑ ɑ́thøw pɑ nyi dwöög wɑ̈g kì yij thøø, ɑ́ kipe ngø ɑ nyi jwɑ̈ɑ̈g ji ki nyingi gen? Wɑlɑ̀ ɑ́ kipe ngø ɑ nyi bøy wɑ thøø yethi cyɑ̈ng bënn? Thøø ying-ɑ butɑ yethi cyɑ̈ng bënn, wun ɑ nyiimïɑ! Ngöönø men-ɑ pyëwɑ kiper wun, kí bëëdee wɑ rëbø kì ri Wë Mesiy, bɑ en ɑ wëggi yɑn kwøb kinøw. Keløg yɑ byëddø ki lɑ̈yyi pɑ̈l kì Epɑsos kɑ per gïg-ɑ nyi tyer yi pyëw dhɑnhø, ɑ́ ngø ɑ di yod yi yɑn? O keløg tyëngthøø pɑ dhwödh, wɑ ceg-ɑ kwøb kyeel ki teen-ɑ kööbø kinni, “Cyɑ̈ɑ̈m wɑ kɑ wɑ mɑ̈ɑ̈dh wɑ, mɑ́ wɑ bɑ møg-ɑ óthøw dhuki.” Wu ko bëëd wu bɑ dhëgg. “Cyɑ̈dhø ki tyëngrijjø nyi rëny-ɑ ngɑn døj.” Nyi yɑbu wɑ̈thi wun, kɑ wu nyi rum wun kidøøj, kɑ orøg wiy wun; mɑ́ Jwøk kwïj yi kwï wun; yɑ kööbø kinøw kɑ per kinni o wu yɑ̈r wun. De ngɑn megø ópëjji kinni, “Tyëngthøø ódwöög be nënnø kidï? Á dël mɑ ngø ɑ órug yi gen?” Yïn, dhëg! Gïn-ɑ kɑ̈g yi yïn, otwïyø keløg e pɑ thøw? Gïn-ɑ kɑ̈g yi yïn ócuggø bëëdø ɑ́ wɑɑng byëlø, wɑlɑ̀ köödhø megø yøw, de pɑth ki men-ɑ ógööge ɑ́ thyɑngø. Köödhø menɑni nyii nëngø yi Jwøk ki dël ni kɑ̀ dwɑdde gøn; kɑ köödhø men nyi mëgge dële kì wɑ̈ye. O dëlli gïg-ɑ nëënø bënn pɑ pɑ̈r; dhɑnhø yïe dɑ dële, o lɑ̈y yïe dɑ dële; o winyø yïe dɑ dële; o rëjø yïe dɑ dële. O gïg-ɑ yij mɑl dɑ dëlli gen, o gïg-ɑ kömi piny dɑ dëlli gen thyew. Myër-ɑ myër gïg-ɑ mɑl, bɑ̈ɑ̈n ki myër-ɑ myër gïg-ɑ piny. Cɑ̈ng yïe dɑ myëre; o dwɑ̈y yïe dɑ myëre; o kyell yï gen dɑ myëri gen; o myëri kyelï, bɑ̈ɑ̈n ki myëri kyel-ɑ kyeelø. Bene kër-ɑ óbëëde ɑnɑn, keny-ɑ ódhwödh tyëngthøø. Dël nyi kony e thøø; o ódhwödh e pɑth ki gïnthøw. Nyi kony ɑ́ óngwɑny, o nyøødh; de ódhwödh e myëër, o teeg. Kony ɑ́ dëël dhɑnhø, de ódhwödh ɑ́ wëy. Mɑ́ wɑ̈nyi kwërø okööbø kinni, “Adɑm mi tyeli mɑl ɑ́cwɑ̈j ɑ́ gïn nëënø,” de Adɑm men-ɑ cyɑ̈n bɑ Wëy me muuj nënnì. Pɑth ki men-ɑ bɑ Wëy ɑ ɑ́kwöngi ki bëënø, dɑ́ men-ɑ bɑ dhɑnhø, o men-ɑ bɑ Wëy ɑ́bï-ɑ bɑnge. Ngeti tyeli mɑl bɑ mi kömi piny, men-ɑ ɑ́cwɑ̈j ki lɑ̈bø, de ngɑn-ɑ ɑ́bï kì cyɑ̈n ɑ́kɑ̈ɑ̈l-ɑ yij mɑl. Møg-ɑ bɑ jii kömi piny, nɑ ngɑn-ɑ ɑ́cwɑ̈j ki lɑ̈bø; o jii mɑl, nɑ ngɑn-ɑ ɑ́bï e kɑ̈ɑ̈l-ɑ yij mɑl. O ni kɑ̀ rug wɑ ngïji jɑl-ɑ ɑ́cwɑ̈j ki lɑ̈bø, ngïji Jɑl-ɑ kɑ̈ɑ̈l yij mɑl ólony yi wɑ ki rugø. Yɑ köbb-ɑ wun, wun ɑ nyiimïɑ kinni, Pödhi Jwøk pɑ yod yi gïn-ɑ bɑ rïngø kí remø; gïn-ɑ nyi thøw pɑ cuggi lɑgi keny-ɑ yije bong thøø. Mɑ́ gïn nyi thøw ceg kɑ løgø ɑ́ gïn pɑ thøw. Keny-ɑ ócwöb møgɑni, kɑ gïn-ɑ nyi thøw løg ɑ́ gïn pɑ thøw, kwøbbi wɑ̈nyi kwërø ceg-ɑ pɑ̈dhi kɑ̈jji gen kinni, “Thøø ɑ́tyɑm ki mendwøng!” “Yïn ɑ thøø, tyɑ̈mí ying-ɑ keny? Wɑlɑ̀ ɑdïmí men-ɑ dhøge di sïm ying-ɑ keny?” Thøø teg-ɑ bɑng orøg, o orøg teg-ɑ bɑng Ciggi Mosɑ̀. De pwøj wɑ Jwøk, ɑ nyi wëggi wɑ tyɑ̈mø kì ri Wë Yëso Mesiy. Kɑ ɑ́rum bëëde kinøw, wun ɑ nyiimïɑ, bëëd wun pëthi wun teeg. Kɑ wu ko nyi døøg cyɑ̈n. De nyi göög wun ki gwøøg Wë ki mendwøng, mɑ́ wu ngɑ̈ny wøw kinni, gwøngɑni pɑ gɑ̈g. Gwøg wun møg-ɑ ɑ́cïgɑ kɑnïsɑ̀ kì Gɑlɑthiyɑ̀ kipe gïg-ɑ nyi muuj jii Jwøk kì Yeudiyɑ̀. Møgɑni bɑ kinni, kì yethi cyɑ̈nggi Jwøk bënn, dhɑnhø kì kelli wun nyi cïbe piny kì ri jɑmm-ɑ nyi yod yi en. Kɑ gï kore kidøøj, kipe kinni o óbongii ngɑn-ɑ ópïd ki cøng këti keny-ɑ óbëënɑ. Keny-ɑ ówɑ̈nhɑ, ji-ɑ ɑ́yieny yi wun kipe kïdhi jɑmmɑni Yerusɑlem, ógwëdɑ ki wɑ̈nyø, o jɑmm-ɑ muuj yi wun ki medi pëthi wun ókɑ̈l yi gen. Keløg e óbëëd ɑ dï, wø ókedh ki gen. De wu ókëëm yi yɑn keny-ɑ ódwöögɑ Mɑkdöniyɑ̀, mɑ́ yɑ ókedhi kunɑni. Yɑ óbëëdø kì buti wun gïti wuudø mɑwɑnø, kipe kinni o yɑ óyïddɑ ki tyëng-ɑ ólwøøg yɑn keny-ɑ ókedhɑ. Yɑ pɑ dwɑddi kinni, o yɑ pöödhɑ yɑ cung-ɑ́ɑ̀ mɑl, de yɑ orumø kinni, yɑ ókɑl bëëdø kì buti wun, ke dwɑddii yi Jwøk. Yɑ óbëëdø kì Epɑsos keny, gïti kwëër cyɑ̈ng-ɑ Pyɑ̈r Ábïj. Mɑ́ yöö ɑ́yieb yi Jwøk kipe kinni o yɑ yïddɑ ki keny tyëgɑ gwøg men-ɑ pere teg. De tyëng-ɑ tyëddi yɑn gïïr cɑrø kì keny. Keny-ɑ ówɑ̈nhi Timøthì yï wun, kɑ ókøny wun, o cöge e bong gïn jɑ̈ddii, mɑ́ e gögg-ɑ Wë ni yɑn. Ko di ngɑn wøyii, de kønyu en ceth, o wele tyëg yi en ki mër; o ódwööge yï wøn; mɑ́ yɑ ónenni yöö kipere ceth wøki nyiimïee. Apøløs ómïee ɑ́kwɑjji yi yɑn ki mendwøng kipe kinni, o di bëe be këëmi wun geki kwï tyëng-ɑ ɑ́yïëy, de ɑ́kyëëd, cem e pɑ dwɑddi bëën yï wun ɑnɑn, de óbï keløg wïje ólɑ̈nyi. Nyi koru ri wun kidøøj. Nyi bëëd wun kì ri kwøbb-ɑ ɑ́yïëy yi wun. Nyi göög wun ki tegi pëthi wun, kɑ wu bëëd wu teeg ceth. Nyi gwøøg jɑmmì bënn ki mɑ̈ɑ̈dø. Anɑn, wun ɑ nyiimïɑ, ngɑ̈nyi yi wun kinni bene gøl Istïpen ɑ ɑ́kwöngi yïëyø kì Akɑiyɑ̀, o bɑ gen ɑ ɑ́muuj ri gen gɑ tyëng-ɑ nyi göögø kipe jii Jwøk. O gïn-ɑ dwɑddi yi yɑn kì yï wun bɑ kinni, o wu yïëy wun jɑɑgø yi ji-ɑ ni møgɑni geki ji-ɑ nyi göögø kyeel ki wun, keløg ge nyii göögø ki gwøng teg. Pyëwɑ med ki bëëni Istïpen, kí Pørtunɑtøs, kí Akɑikøs; mɑ́ ge ɑ́coolɑ’ kɑ̈jji wun, kɑ̀ tøøk wun, o wɑngɑ ɑ́tëngi kɑ ɑ́bëën gen, ni kenyi tëngi nyingi wun kenyi bëën gen yï wun. Nyi wør wun tyëng-ɑ ni møgɑni kidøøj. Wu ɑ́mɑ̈dh yi kɑnïsɑ̀ kì Ásiyɑ̀. Ki nyingi Wë; wu ɑ́mɑ̈dh yi Akïlɑ̀ geki Priskilɑ̀ ki mendwøng, kí tyëng kɑnïsɑ̀ møg-ɑ nyi cugi kì gøl gen. O wu ɑ́mɑ̈dh yi nyiimïee bënn thyew. Kɑ ri wun mɑ̈dh wun kidøøj. Møg ɑ́gwed-ɑ yi yɑn ki cingɑ kinni: Wu ɑ́mɑ̈dh yi Pøøl Ngɑn pɑ mɑɑr Wë, ree dɑ cyën! Mɑrɑnɑ thɑ̀ – Bïí, yïn ɑ Wïi wøn! Wiy dhwɑ̈ng-ɑ kɑ̈ɑ̈l yï Jwøk yinge kömi wun. Kɑ wiy mɑ̈ɑ̈dø miɑ óbëëde kì kömi wun bënn, kì ri Yëso Mesiy. Wɑ̈nyø men kɑ̈ɑ̈l-ɑ yï Pøøl, ngeti wööni Yëso Mesiy, geki Timøthì ómïee, kì bɑng møg-ɑ ɑ́dwɑddi yi Jwøk. Ge gwëd-ɑ kɑnïsɑ̀ kì Körintøs geki jii Jwøk møg-ɑ ying Akɑiyɑ̀ bënn. Wiy dhwɑ̈ng geki mër, møg-ɑ nyi kɑ̈ɑ̈l yï Jwøk Wïyee geki Wë Yëso Mesiy ying gen kömi wun. Pwøj wɑ Jwøk, Wïyi Wë Yëso Mesiy, eni Wïy-ɑ pyëwe nyi jwɑn lɑ̈ɑ̈mø; Jwøng-ɑ nyi kunyi. Mɑ́ en ɑ nyi køny wøn ki ɑkørr-ɑ nyi bï kömi wøn bënn, o wø ólony wøn tyëngmøøgø ki cïjø, kí teng-ɑ ɑ́mëggi wøn yi Jwøk. Cɑgg ɑ́ kɑ̀ rɑngi wøn ki mendwøng kì ri nyingi Mesiy kinøw, pëthi wøn ómɑg yi en ki mendwøng thyew. Keløg wø yïddø ki orɑng, orɑngɑni bɑ kipe kinni, o nyingi wun tëngi gen, o wu óyiel. Keløg wø okønyø, kunyɑni bɑ kipe kønyi wun, o wu óyïddi wun ki tegø men ngïïn wun ki orɑng. Wu ceg kɑ gɑ̈nø yi wøn ceth, mɑ́ wø ngɑ̈ny wøw kinni, wu ɑ́rɑngi kyeel ki wøn, o wu bɑ møg-ɑ ókøny kyeel ki wøn ceth. Wø dwɑdd-ɑ pɑ̈ddi wun, wun ɑ nyiimïɑ, ki orɑng-ɑ ɑ́yod yi wøn kì Ásiyɑ̀. Akørr-ɑ ɑ́bï kömi wøn døngø ki mendwøng, kɑ wø orumø kinni lɑ̈w ke lɑ̈ɑ̈ny wëyi wøn kì kömi piny. Kidyër, wø ɑ́rum kinni, thøø ɑ́bï kömi wøn ceth. De møgɑni ɑ́bï kɑ per kinni, o wø cög wø pɑ ngɑ̈dhi tegi wøn, dɑ́ kinni o wø óngɑ̈dh wøn ngɑn-ɑ nyi tug tyëngthøø. Wø ɑ́yiel yi en kì dhø thøø, o wø ócige yielø ki gøn. Awøø, ongɑ̈dhø yi wøn ceth kinni wø ócige yielø. De kwɑjju Jwøk kiper wøn, mɑ́ keny-ɑ ógyëëdh wøn yi Jwøk kipe kwɑ̈jji ji mø gïïr, Jwøk ópwøj yi ji mø gïïr kiper wøn. Wø ceg-ɑ köthi wøn ki pwödø, mɑ́ e ɑ́yod yi wøn ki pëthi wøn kinni, bong gïn cɑy kì ri bëëdi wøn kì kelli teedø geki kelli wun. Mɑ́ wø ɑ́bëëd kɑ tɑri pëëth, wø mïdh-ɑ bëën-ɑ dwɑddi yi Jwøk, kì bɑng dhwɑ̈ng-ɑ kɑ̈ɑ̈l yï Jwøk; de pɑth ki peli wïj dhɑnhø. Møgɑni ɑ́rømmɑ ceth kinni ge ócuggi, bene ɑ kööbɑ kinni wun ɑ ókwøng yi yɑn ki këëmø, kipe kinni o wu óyïddi wun ki gyëdh tyel ɑ́ryew. Mɑ́ yɑ ótöngi yï wun keny-ɑ óbëënɑ yɑ kedh-ɑ Mɑkdöniyɑ̀, o yɑ ócigi töngi yï wun keny-ɑ ódwöögɑ, o yɑ óyïddɑ kì yï wun ki gïn kønyɑ riɑ ki weli Yeudiyɑ̀. Kɑ̀ kööbɑ ki kwøbbi bëën yï wun, wu orumø kinni yɑ ceg-ɑ wun ki nɑ̈nø? Wɑlɑ̀ wu orumø kinni, yɑ bɑ ngɑn nyi wɑ̈dhi kwøbbɑ ki wilø yøw, men-ɑ nyi kööbø kinni, “Ngee, ngee” kí “Pɑth, pɑth” kì wïj ɑ́kyel? De ɑnɑn, kwøbbɑ pɑ nyi wɑ̈dhi wilø yøw, mɑ́ ge kɑ̈ɑ̈l-ɑ yï Jwøk, ngɑn-ɑ myër ki ngɑ̈ɑ̈dhø. O kwøbbi Yëso Mesiy Wɑ̈d Jwøk møg-ɑ ɑ́pwönyi yi yɑn wøki Silɑ̀, kí Timøthì, pɑ nyi wil thyew. Mɑ́ kwëng bënn møg-ɑ kwëng yi Jwøk kinni, ge bɑ dyër ceth, nyi pɑ̈dh-ɑ kɑ̈jji gen kì bɑng kwøbbi Mesiy; o bene ɑ bɑnge nyi lenhi wɑ Jwøk. Kɑ wɑ nyii kööbø kinni, “Amen.” De bɑ Jwøk kiree ɑ ɑ́yieny wɑ, kɑ wɑ reb yi en kì ri Mesiy. Kɑ Wëykwërø nyi kedh-ɑ pëthee ɑ́ ngïji men nyodh kinni, wɑ bɑ jie, o wɑ bëëd ɑ ree. Anɑn, gïn-ɑ́ pere ɑ́cögɑ yɑ pɑ bï Körintøs ngɑ̈nyi yi Jwøk; o bɑ kinni, keløg yɑ di bï, wu di yïddi ki kwøb mø teg. De keløg møg-ɑ kømmi yi yɑn pɑth ki dyër, wiy yɑ ócɑy yi Jwøk. Wu ko nyi rum kinni, wu ceg yi wøn kɑ cirø kì kömi yïëyi wun. Mɑ́ wø ngɑ̈ny wøw kinni, yïëyi wun teeg. De wø dwɑdd-ɑ kinni göög wɑ kyeel kipe medi pëthi wun bënn. Bene ɑ bɑnge kööbɑ kinni yɑ pɑ bï yï wun; mɑ́ keløg yɑ di bï yï wun ki rɑ̈ji pyëwɑ, wu di göjjɑ kïïmø ki mendwøng. Mɑ́ keløg pëthi wun di wëggɑ rënyø, ɑ́ wun ɑ yï wun nyi yïddɑ ki kwøbb-ɑ nyi mïni pyëwɑ, yɑ di yïd ɑ keny ki medi pyëw? Møg-ɑ ɑ́gwed yi yɑn kì yij wɑ̈nyi tyeli mɑl, ɑ́gwed yi yɑn kinøw kipe kinni o keny-ɑ óbëënɑ yï wun, o yɑ cögɑ yɑ pɑ yïddi ki rɑ̈ji pyëw ki yï wun, wun ɑ ji-ɑ di wëggi pyëwɑ mïnø. Mɑ́ yɑ ngɑ̈ny wøw ki mendwøng kinni, gïn-ɑ mïni pyëwɑ bɑ gïn-ɑ mïni pëthi wun thyew. Wu ɑ́gwëdi yi yɑn e pï nyingɑ ómullø, o yijɑ óywöngø, o pyëwɑ orɑ̈mø ki mendwøng. Yɑ nuti dwɑdd-ɑ rënyi pëthi wun, de yɑ ɑ́dwɑdd-ɑ kinni o mɑɑr-ɑ mɑɑrɑ wun bënn yod yi wun. De keløg e dɑ ngɑn göögø ki gïnrɑj, pɑth ki yɑ ketɑ ɑ ɑ́wëgge kïïmø, de kwï ji møøgø kì kelli wun pëthi gen ɑ́rɑ̈ɑ̈m thyew. (Møgɑni kwøb yi yɑn kɑ per kɑ̀ pɑ dwɑddɑ cɑyi ngɑnɑni ki cɑy mø teg.) De ngɑn-ɑ ɑ́kɑ̈ɑ̈l kwøbbɑni, kɑ ɑ́rume cɑyø yi ji-ɑ ngenyø kì kɑnïsɑ̀ men-ɑ yije di wun, pɑ myëër ki cɑyø këti. Lɑ̈w keløg pëthi wun ólɑ̈ɑ̈mø ki en kipe kinni o wïje cöge e pɑ ti lɑ̈ɑ̈yø. De yɑ kwɑjj-ɑ wun ki mendwøng kinni, nyudhu ngɑnɑni kinni mɑɑr yi wun kidyër. Wɑ̈nyɑni ɑ́gwëdɑ wun kɑ per kinni o lidh yi yɑn ying kwøbbɑ bënn nyii yïëyø yi wun, wɑlɑ̀ ge pɑ nyi yïëy yi wun. Kenyi lɑ̈ɑ̈m pëthi wun ki dhɑnhø me gwøøg bɑ̈jjø, pyëwɑ ceg-ɑ lɑ̈ɑ̈mø ki en thyew. Mɑ́ kenyi lɑ̈ɑ̈m pyëwɑ, pyëwɑ pɑ nyi nudd e dɑ gøølø, møgɑni gwøg yi yɑn ɑnɑn kì bøli Mesiy kɑ per wun. Kipe wɑ ótyɑm yi Cethɑn, e gïg-ɑ kömi gïn ködde ngɑ̈nyi yi wɑ. Keny-ɑ ɑ́wɑ̈dhɑ Torwɑs, be pwönyi Wöndøj mi Mesiy, kɑ yodɑ kinni yöö bɑ ɑyieb yi Wë kipe gwøg kì kenyɑni. De yɑ ɑ́bëëd pyëwɑ olïngø kipe kɑ̀ nuti yood yɑn ómïee Tïtø. Codhe, ɑmɑ̈dhɑ ji-ɑ kenyɑni, kɑ yɑ pödh-ɑ Mɑkdöniyɑ̀. Pwøj wɑ Jwøk, ngɑn-ɑ pyejji wɑ kì yij yɑɑy tyɑ̈me kì ri Mesiy, kɑ wɑ gwøge wɑ bɑ tyëng-ɑ kɑ̈lli Wööni Mesiy; kɑ wöönɑni otɑyø, eni wöön-ɑ yøme med ni bɑkur. Mɑ́ wɑ nɑ bɑkur-ɑ yøme med, men-ɑ mëggi Jwøk yi Mesiy, men-ɑ medi yøme ótɑɑy kelli tyëng-ɑ óyiel geki tyëng-ɑ ólɑ̈ɑ̈ny. Bɑ gïjø me yøme nɑ̈gø kì yï tyëng-ɑ ólɑ̈ɑ̈ny; o bɑ yømø me yïëdø kì yï tyëng-ɑ óyiel. Wø pɑ ni tyëng-ɑ kɑ̈lli kwøbbi Jwøk, ge nɑ gïg ceg yi gen ki ngyewø; de wø kømm-ɑ dyër, wøn ɑ́ bɑ̈nggi Mesiy, mɑ́ wø ɑ́ör-ɑ yi Jwøk. Anɑn, wu orumø kinni wø ceg-ɑ ri wøn ki tïng mɑl? Wɑlɑ̀ wu orumø kinni wø dwɑdd-ɑ gwëdø yi wun ki wɑ̈jji pwøj møg kɑ̈lli yi wøn, ni tyëng-ɑ kyeelø, wɑlɑ̀ wøn ɑ gwëdi wun? Wun kì ri wun, ɑ kɑ̈lli yi wøn wun ɑ́ wɑ̈nyi pwøj, me bɑ ɑgwed kì yethi minni wøn, ɑ́ men rɑng yi ji bënn. Ceg-ɑ nënnø ceth kinni bɑ Mesiy ɑ ɑ́gwed wɑ̈nyɑni, ɑöre wøn be kɑ̈lii. Pɑth ki ɑgwed ki kïdø men-ɑ gweed wɑ̈nyø, de ógwedø kɑ Wëyi Jwøng-ɑ Nëënø; o nuti gweed-ɑ kömi ópɑddi kïttì, de ógweed-ɑ kömi minni ji. Møgɑni kwøb yi wøn kɑ per kɑ̀ ngɑ̈dh wøn Jwøk kì ri Mesiy. Bong gïn wëggi wøn kwøb kinni gwøngɑni ócuggø lwɑ̈ngø yi wøn ki gwøgø ki tegi wøn. De teng-ɑ cuggi wøn ki gwøg kɑ̈ɑ̈l-ɑ yï Jwøk; bɑ en ɑ ɑ́nëngi wøn ki tegø men-ɑ cuggi wøn ki gwøg kipe lwöm-ɑ nyɑ̈n, o lwömɑni pɑth ki cigg mø bɑ ɑgwed, de ciggɑni kɑ̈ɑ̈l-ɑ ri Wëy. Cigg-ɑ bɑ ɑgwed nyi kɑ̈ɑ̈l-ɑ thøø, de Wëy nyi muuj-ɑ nënnì. Cigg ɑ́gweed-ɑ kömi ópɑddi kït, kɑ mɑ̈ɑ̈r Jwøk ocwöbø keny-ɑ ɑ́muuj gen. Kɑ tyëng Isrɑil obwøgø ki nenni yï Mosɑ̀, mɑ́ lele ɑ́bëëd e omënyø. Keløg Cigg-ɑ ókɑ̈ɑ̈l thøø keny-ɑ ócɑ̈gi gen ki gwøg, bï kɑ mɑ̈r me dwøng kinnï; döngi mɑ̈ɑ̈r gwøøg Wëy óbëëd ɑ dï? Keløg Cigg-ɑ bɑng gen ɑ́cɑɑy ji ki thøø keny-ɑ ópyeem gen, bï kɑ mɑ̈r; mɑ̈ɑ̈r gwøng-ɑ kɑ̈ɑ̈l yielø óbëëdø e dwøng ni ngø! Mɑ̈r-ɑ ɑ́bëëd e dwøng kɑ̈ge dööng, ɑ́lɑ̈ɑ̈ny kì bɑng døøji mɑ̈r men-ɑ lodii ɑnɑn. Keløg men-ɑ ólɑ̈ɑ̈ny ree dɑ mɑ̈r; mɑ̈ɑ̈r men-ɑ óbëëdø gïti ɑtheer óbëëd ɑ dï? Wø pɑ böggi, kì bɑng kɑ̀ di yï wøn ngɑ̈ɑ̈dhø. Wø pɑ ni Mosɑ̀, ɑ ɑ́bëëd e nyi kum-ɑ lele ki thɑrɑ̀, kipe mɑ̈r-ɑ ólɑ̈ɑ̈ny men-ɑ ɑ́mëëny kì lele ólidh yi tyëng Isrɑil. Ge ɑ́bëëd rummi gen bɑ ɑkum, o pïd dicyɑ̈ngtïn, rummi gen nudd gɑ ɑkum yi thɑrɑ̀ menɑni, kenyi rɑng gen wɑ̈jji lwöm-ɑ weenø. Thɑrɑ̀ menɑni nyiig ɑ keny-ɑ órëbi dhɑnhø ki Mesiy. Pïd dicyɑ̈ngtïn, kenyi rɑɑng Ciggi Mosɑ̀ yi gen, rummi gen nyii kumø yi thɑrɑni. De thɑrɑni ócuggø kɑ̈ɑ̈l wɑ̈g, ni kɑ ógwedii kì ri Mosɑ̀ kinni, “Mosɑ̀ kenyi kedhe be kwøb geki Jwøng-ɑ Ácwɑ̈ɑ̈j, thɑrɑ̀ nyi kɑ̈ɑ̈le’ wɑ̈g kì wïje.” “Jwøng-ɑ Ácwɑ̈ɑ̈j” ɑ ógwedø ɑ́ Wëy kì keny, o keny-ɑ di Wëyi Jwøng-ɑ Ácwɑ̈ɑ̈j, dɑ tɑ̈bbø. Wɑ bënn, nyodh wɑ mɑ̈ɑ̈r Jwøk ki wɑ̈ɑ̈th mø pɑth ki ɑkum, o mɑ̈r-ɑ kɑ̈ɑ̈l yï Wë, ɑ bɑ Wëy, wɑ løge ngïje, me ree di mɑ̈r me pëddi döng. Gwøøng ɑ́mëggi wøn-ɑ yi Jwøk kì bɑng lɑ̈mpyëwe, o ceg kɑ gwøgø yi wøn ceth, wø pɑ lyebbi. Gïgrijjø møg-ɑ nyi gøggi kì gødd geki bëën-ɑ nyi kɑ̈ni ki ɑyɑ̈r, ge ɑ́wiy yi wøn; wø pɑ göögø ki wëënyø, o kwøbbi Jwøk pɑ nyi løg wøn kwøbbi pyed; de wø nyi nyodh-ɑ dyër kì bøli Jwøk, o per wøn tënge kì yï dhɑnhø men-ɑ pyëwe nud. Keløg Wöndøj men-ɑ pwönyi yi wøn bɑ ɑkum; bɑ ɑkum kì yï tyëng-ɑ lɑ̈ɑ̈nyø. Ge pɑ yïëy, mɑ́ rummi gen mïdh ɑ yij muudhø yi jwøng-ɑ rɑj, jwøøg kömi piny men. Gï mɑ̈ɑ̈ne’ lidhi cɑr e omënyø kì kömi gen, eni cɑr-ɑ kɑ̈ɑ̈l ri Wöndøj men-ɑ kööbø kì ri dhwɑ̈ɑ̈ng Mesiy, ɑ ceg bëëdø ɑ́ ngïji Jwøk. Wø pɑ pwöny-ɑ per wøn; de wø pwöny-ɑ per Yëso Mesiy, ɑ bɑ Wë; o wø bɑ bɑ̈nggi wun kiper Mesiy. O Jwøng-ɑ ɑ́kööb kinni, “Cɑr ómënyø kì yij muudhø!” Bene Jwøng-ɑ ɑ́wëggi cɑre meny kì yethi pëthee, o wɑ muuje mɑ̈ɑ̈r Jwøk men-ɑ mënyø kì leli Mesiy. Wøn ɑ kɑ̈lli kɑ̈ɑ̈r Wëy, wø pɑ̈r ki puggi lɑ̈b yøw, men nyodh kinni, teng-ɑ dwøng menɑni bɑ mi Jwøk; pɑth ki mi wøn. Kömi wøn nyii bëënø yi ɑkørr, de wø nuti torø yi ɑkørrɑni; yethi wøn nyii pyërø tyel møøgø, de wø nuti lëngi piny. Nyingi wøn oguudø yi ji, de wø nuti wiy piny yi Jwøk; wø nyi pwööd-ɑ piny, de wø nuti thøø. Wø kɑ̈ll-ɑ orɑɑng thøwi Yëso Mesiy kì dëlli wøn, dëll-ɑ óthøw, kipe kinni o nënne ólidh kì dëlli wøn. Kì yij bëëdi wøn bëne, wø nyi køm-ɑ nɑ̈gø kiper nyingi Yëso, o nënne ólidh kì ri dëlli wøn, dëll-ɑ óthøw. Menɑni wɑng-ɑ kinni thøø göög ɑ ri wøn, de nënnì göög ɑ ri wun. Wɑ̈nyi kwërø okööbø kinni, “Yɑ ɑ́kööb kɑ per kɑ ɑ́yïëyɑ.” O wøn thyew ki wëyi yïëyø menɑni, wø ceg-ɑ kwøb kipe kɑ ɑ́yïëy wøn. Ngɑ̈nyi yi wøn kinni Jwøk, ngɑn-ɑ ɑ́tug Wë Yëso kì yij thøø, wø ótug yi en thyew, kɑ wø kɑ̈l yi en, wøki wun, wɑ kïdhe’ bute. Møgɑni bënn bɑ kiper wun; o keny-ɑ ókedh dhwɑ̈ɑ̈ng Jwøk e wɑ̈dh-ɑ yï ji mø ngenyø, kwɑnni tyëng-ɑ mɑlli Jwøk ki mɑ́li pwøj óngënyi kɑ Jwøk lejji. Cɑgg dëlli wøn kedh ge órënyø, pëthi wøn pɑ nyönhi; o cɑgg dëlli wøn cyɑ̈ngø ki thøø, wëy ceg-ɑ pëddø ki wööbø yethi cyɑ̈ng bënn. Orɑng-ɑ yije di wøn ki kɑɑm-ɑ nøg èn, gwir-ɑ wøn kipe yodi dhwɑ̈ng-ɑ dwøng men-ɑ óbëëdø gïti ɑtheer. Mɑ́ wø pɑ nenn-ɑ gïg-ɑ nyi lidh yi wɑ ki nyingee, de nyingi wøn tööd-ɑ ri gïg pɑ nënni. Gïn-ɑ lidh ki wɑng nyii lɑ̈ɑ̈nyø, de gïn-ɑ pɑ nënni nyii bëëdø gïti ɑtheer. Mɑ́ wø ngɑ̈ny wøw kinni keløg kemɑ̀ mi wøn kì piny keny, ɑ løg dëlli wøn ópɑ̈ɑ̈dhø, yï wøn dɑ ød me nuti gerø kɑ cing kì mɑl, ød me pɑ nyi pɑ̈ɑ̈dh. Kɑ̀ bëëd wøn ɑnɑn, pëthi wøn okønø ki bëëdø kì yij øn-ɑ kɑ̈ɑ̈l mɑl. De møgɑni bɑ kipe kinni, kɑ̀ yïddi wëyi wøn ki kɑ̈jj mø bëëd yi gen, pɑ̈r ki kinni, ge órugø ki ógudh mø nyɑ̈n. Wø torø torø yi kɑ̀ nudd wø rug-ɑ dëlli kömi piny; pɑth ki kinni wø dwɑdd-ɑ bëën wɑ̈g kì yethi dëllɑni, dɑ́ kinni wø dwɑdd-ɑ lønyi dëlli wøn møg-ɑ kɑ̈ɑ̈l mɑl, kömi dëllì mø piny, o dël-ɑ bëëdø ɑ́ men thøw kì ri wøn, mwøøny yi nënnì. Bɑ Jwøk ɑ ɑ́gwir wøn kipe møgɑni, kɑ wø nënge ki wëy. Bene ɑ bɑnge bëëd yï wøn dɑ ngɑ̈ɑ̈dhø me dwøng, o wø ngɑ̈ny wøw kinni wø lɑ̈wi ki Wë, kɑ̀ nudd wø rug-ɑ dël men. Mɑ́ wø cyɑ̈dh-ɑ́ɑ̀ kömi yïëyø mi wøn, de wø pɑ lug-ɑ́ɑ̀ bɑng gïg-ɑ nenni yi wøn. Pëthi wøn teeg, o lɑ̈w bëëni wøn wɑ̈g kì yij dël-ɑ rug yi wøn ɑnɑn, o wø kedhi wøn be bëëdø kì buti Wë. De cɑgg wëyi wøn ying buti Wë, wɑlɑ̀ ge tøøk, gïn-ɑ köme köddi yi wøn bɑ gwøgi gïn-ɑ dwɑddi yi Wë. Wɑ bënn, wɑ óying bøli Mesiy, keny-ɑ óbëëne kömi piny be lidhi gønyy. O dhɑnhø bëne gønye ólidh kì bɑng gïgdøj wɑlɑ̀ gïgrijjø møg-ɑ gwøøg en kì kömi piny keny. Gïn-ɑ wɑngi yi wøri Wë ngɑ̈nyi yi wøn, bene ɑ bɑnge dyej wøn tyëng-ɑ kyeelø kinni yïëy gen. Wø ngɑ̈nyi yi Jwøk ki mendwøng, o yɑ gɑ̈n yɑ ngɑ̈nyi yi wun ki pëthi wun thyew. Wø pɑ dwɑddi pwøji ri wøn kì bøli wun, de wø dwɑdd-ɑ thödhi wun ki yöö men pwöd wun köthi wun kiper wøn, o wu óyïddi wun ki møg-ɑ óløøg wun kwøbbi tyëng-ɑ nyi lejji døøji dëël dhɑnhø, e pɑth ki gïg-ɑ pyëwe. Keløg wɑ̈thi wøn dɑ ɑ́nɑ̈gø, bɑ kiper Jwøk. O keløg wɑ̈thi wøn nud, bɑ kiper wun. Wø jɑɑg-ɑ yi mɑ̈ɑ̈dø mi Mesiy, kì bɑng kɑ ɑ́yodii yi wøn kinni, dhɑnhø ɑ́kyel ɑ́thøw kɑ per ji bënn; wɑng-ɑ kinni thøwe ɑ́nywɑg yi ji bënn. Áthøw kɑ per ji bënn, kipe kinni o tyëng-ɑ nëënø bëëd ge pɑ nëënø kɑ per cwɑggi gen, de ge nëënø kɑ per ngɑn-ɑ ɑ́thøw kɑ odhwödhø kì yij thøø kiper gen. Bëëdi dhɑnhø pɑ yod yi wøn ɑ ri kër-ɑ nënni dële këti. Cɑgg ɑ́ kɑ ɑ́nenni wøn bëëdi Mesiy kì ri dële cøn, wø pɑ göögø kinøw këti. Ngɑn-ɑ ɑ́rëbi ki Mesiy, bɑ dhɑnhø me nyɑ̈n; dhɑnhi cøn ɑ́lɑ̈ɑ̈ny, dɑ́ dhɑnh-ɑ nyɑ̈n ɑ nud. Møgɑni bënn gwøg-ɑ yi Jwøk, ngɑn-ɑ ɑ́gwøg wɑ, wɑ mër ki en kì ri Mesiy; kɑ wø mëgge gwøøg løgi ji mø mër ki en. Wöön-ɑ kɑ̈lli yi wøn bɑ kinni, Jwøk dhɑnhø bëne løge’ me mër ki en kì ri Mesiy. Kerri orøøg gen nuti mïdhø yi Jwøk, o wø ɑ́mëgge kɑ̈lli wöön-ɑ nyudhi ji kër-ɑ løge gïn mø mër ki en. Wø cyɑ̈dhi wøn ɑ́ kej Mesiy, o wø kööbø e dhɑ̈y nɑ Jwøk kiree ɑ kööbø ki lebbi wøn; kɑ wø mëgge kɑ̈lli kwøbbi rëbi ji ki Jwøk. Mesiy bong orøg mɑ ɑ́gwøge, de ɑ́gwøg e nɑ ngetorøg yi Jwøk kipe kinni o wɑ bëëd wɑ tir. Kì yij gwøøg wøn kì kej ɑ́kyel ki Jwøk, wø kwɑjj-ɑ wun, wu tyëng-ɑ ɑ́yïddi ki dhwɑ̈ng kì yï Jwøk, kinni dhwɑ̈ngɑni ko wëggu gɑ̈ɑ̈gø. Lïngu møg-ɑ kømmi yi Jwøk kinni, “Keny-ɑ ɑ́bëën bøli keny-ɑ ɑ́dwɑddɑ kønyi wun, kɑ kwɑ̈jji wun lïngɑ Keny-ɑ ɑ́wɑ̈nhi cyɑ̈ng-ɑ kønyɑ wun, kɑ wu køny yi yɑn.” Lïng wun! Men bene bøli keny-ɑ kunyi Jwøk; bene cyɑ̈ng-ɑ yïëde èn! De keløg gïg-ɑ di gwøg yi wøn bɑ gïg-ɑ di mɑ̈ɑ̈n dhɑnhø kɑ̈li yuu Jwøk, gïgɑni pɑ gwøg yi wøn kinni tek. Møgɑni bɑ kipe kinni, o gwøg men-ɑ gwøg yi wøn kipe Jwøk cöge e pɑ cɑy yi ji møøgø. Ri wøn nyii nyodhø yi wøn kì ri gïg-ɑ gøggi yi wøn bënn kinni, wø gögg-ɑ Jwøk, kenyi ngïïn wøn ki ɑkørr, kí jɑdø, kí gïg dhɑ̈li, kí pwödø, kí mɑgø, kí orɑng, kí pïdø, kí dhɑ̈lø nenø, kí ngïnø kɑ̈j. Ri wøn ɑ́nyodh wøn kinni wø bɑ bɑ̈nggi Jwøk ki bëëdi wøn wø dhïw, geki dïdø, kí ngïïnø, kí tɑri pyëw, kí bëëdi kwër, kí mɑ̈ɑ̈dø men-ɑ dyër, kí kwøbb-ɑ dyër geki tegi Jwøk. Bëëntir ɑ bɑ tøøng wøn, en ɑ këëd wøn, o en ɑ nyɑg wøn ri wøn. Wø nyii lenhø, kɑ wø nyi benyi; wø nyii kwɑ̈dhhø kɑ wø nyi pøjji; wø cwølli wøn ɑ́ tyëngpyed, ngö wø kømm-ɑ dyër; wø nɑ ji mø kwïj, ngö wø ngɑ̈nyi yi ji bënn; wø nɑ tyëngthøø, de wø onëënø ni kɑ̀ nennu wøn. Wø ɑ́pwööd piny, o wø nuti thøø; cɑgg wø kïïmø, pëthi wøn nyi bëëd ge med thyew; wø nënni nyingi wøn cɑn, de ji mø gïïr nyi løg wø’ tyëngkɑ̈rì; wø nënni e bong gïn nud kì yï wøn, de jɑmmì bënn nud kì yï wøn. Wun ɑ tyëng Körintøs, wø ɑ́kööb ki wun kɑ tɑri pëthi wøn, o bong gïjø mɑ ɑ́cög e nuti köbbi wun yi wøn. Pëthi wøn nuti rënyø ki kwøbbi wun, dɑ́ wun ɑ pëthi wun ɑ́rënyi ki kwøbbi wøn. Wu köbbi yi yɑn wu nɑ nyigɑ; dwɑddu kwøbbi wøn, ni kɑ̀ dwɑddi wøn kwøbbi wun, kɑ wu bëëd wun pëthi wun tɑr ki wøn thyew. Yɑ ceg-ɑ wun kinni, wu ko nyi rëbi ki tyëng-ɑ pɑ nyi yïëy kwøbbi Jwøk. Mɑ́ tyëng-ɑ yɑb bëëdø ki bëëntir dhɑ̈li rëbø kì kej ɑ́kyel ki tyëng-ɑ nyi yɑb orøg. Cɑr reb-ɑ yi ngø ki muudhø? Mesiy reb-ɑ yi ngø ki Cethɑn? O ngɑn yïëyø reb-ɑ yi ngø ki ngɑn nuti yïëyø? Kengi Jwøk rëb-ɑ́ɑ̀ ri ngø ki ngïjji jwögg? Wɑ bɑ kengi Jwøk, keng-ɑ nëënø. Bene møg-ɑ ɑ́kwøb yi Jwøk kinni, “Øn-ɑ bëëdɑ óying kelli gen yɑ óbëëdø kì kelli jiɑ; Yɑ óbëëdø yɑn ɑ́ Jwøøg gen, o ge óbëëdø gɑ jiɑ.” Akööb Wë kinni, “Wu ko bëëd kì kelli tyëngɑni; dwöög wun wɑ̈g kì kelli gen, Gïg ywëdhø ko nyi nywɑl wun, o wu yïëyɑ keny-ɑ ódwöög wun köörɑ. Yɑ óbëëdø yɑn ɑ́ Wïyi wun, o wu óbëëdø wun ɑ́ nyigɑ, bene møg-ɑ kømmi yi Wïlɑ̈bø ɑgɑk.” Gïgɑni bënn ɑ́kwøb yi Jwøk kinni gï ómëgge wɑ yeki nyiimïɑ, de gwir wɑ riee o wɑ göög wɑ, wɑ dhïw, kɑ̀ lɑ̈ɑ̈w wɑ riee ki gïg-ɑ nyi ywëdh dël geki wëy, kɑ wɑ bëëd wɑ, wɑ bɑ ɑkwër, wɑ wør-ɑ Jwøk. Pëthi wun ko rënyi ki wøn. Mɑ́ e bong ngɑn mɑ ɑ́göggi yi wøn ki gïnrɑj, wɑlɑ̀ bong ngɑn mɑ gëe ɑ́kwɑny yi wøn ki wëënyø. Møgɑni pɑ kwøb yi yɑn yɑ cɑy-ɑ wun, o wu ɑ́rum ki köbbø yi yɑn cøn, kinni per wun teeg kì yï wøn, o wɑ óying kej ɑ́kyel ceth, cɑgg wɑ nëënø wɑlɑ̀ wɑ thøø. Wu gɑ̈n yi yɑn ki mendwøng, bene ɑ bɑnge lejjɑ wun. Cɑgg ɑ́ kɑ̀ bëëd yɑ torø yi ɑkørr, yɑ pɑ böggi, o pyëwɑ med ki mendwøng. Kɑ ɑ́wɑ̈dhi wøn Mɑkdöniyɑ̀, bong keny mɑ ɑ́ywöm wøn dëlli wøn me døøj, mɑ́ wø ɑ́dhing yi ɑkørr kì wɑ̈thi tùng bënn; ji møøgø nyii wërø ki wøn, o yethi wøn dɑ wɑ̈ɑ̈rø. De Jwøk, ngɑn-ɑ nyi cïj tyëng-ɑ yethi gen bɑɑrø, wø ɑ́muuje Tïtø. De pɑth ki bëëni Tïtø kete, ɑ ɑ́mïni pëthi wøn, dɑ́ kɑ ɑ́köbbe wøn kwøbbi medi pyëw men-ɑ ɑ́yod yi en kì yï wun, kí kɑ̀ tyeer wun tung-ɑ di wøn. Cɑgg pëthi wun rënyø yi wɑ̈ny-ɑ ɑ́gwëdɑ wun, yɑ pɑ pɑ̈ddi kipe kɑ ɑ́gwedɑ en. Yɑ di pɑ̈ddi kɑ per kɑ ɑ́wëgge pëthi wun rënyø ki nyɑ keny me thiinh. Pyëwɑ omedø ɑnɑn, de pɑth kiper kɑ ɑ́wëggɑ pëthi wun rënyø ɑ med pyëwɑ, dɑ́ kiper kɑ ɑ́wiil bëëdi wun yi rënyi pëthi wun. Rɑ̈ji pyëw menɑni ɑ ɑ́wiil bëëdi wun yi Jwøk; kɑ̀ bëëde kinøw, bong gïnrɑj mɑ ɑ́göggi wun yi wøn. Mɑ́ rɑ̈ɑ̈m pyëw men-ɑ nyi kɑ̈ɑ̈l yï Jwøk, nyii kɑ̈nø yewø kí yieli dhɑnhø, o bong pɑ̈ddø kì ri møgɑni! De rɑ̈ɑ̈m pyëw men-ɑ nyi kɑ̈ɑ̈l bɑng kwøbbi kömi piny nyii kɑ̈nø ki thøø. Lidhu gïn-ɑ ɑ́gwøg yi Jwøk ki rënyi pëthi wun møg-ɑ ɑ́kɑ̈ɑ̈l yï Jwøk; rummi wun ɑ́dwöög, kɑ bɑ̈jji wun yod yi wun! Møgɑni wu ɑ́wëggi gen yewø, kí kyeri rɑj, kí bwøgø, kí tyëëdø, kí tyiel, kí cɑyi gwøøg orøg! Kɑ ceg ki nyodhø yi wun ceth kinni yï wun bɑ̈r ki møg-ɑ ɑ́cwöb bënn. Cɑgg ɑ́ kɑ ɑ́gwedɑ wɑ̈nyɑni, nuti gweed yɑn kɑ per ngɑn-ɑ ɑ́göög ki bɑ̈jjø, wɑlɑ̀ ngɑn-ɑ ɑ́göggi ki rɑj; dɑ́ kipe kinni, o teng-ɑ teg per wøn kì yï wun nënne kì bøli Jwøk. Kɑ pëthi wøn ótëngø kì bɑng kɑ ɑ́tëngi pëthi wun. Tëngi pëthi wøn ɑ́rëbi ki medi pyëw men-ɑ ɑ́yod yi Tïtø kì yï wun, mɑ́ e ɑ́køny yi wun, wu bënn kidøøj. Tïtø ɑ́köbbɑ per døøji wun e nuti wɑ̈dhi yï wun, kɑ møg-ɑ ɑ́köbbɑ en yode gɑ dyër ceth, keny-ɑ ɑ́bëëne yï wun. Wø ɑ́wöni wø nyi kømm-ɑ dyër ceth kì ri wun, o pwøny-ɑ nyi pwøøj wun yi wøn ɑ́yod ɑ́ dyër yi Tïtø. Kɑ ceg-ɑ pëddø ki mɑɑri wun, o wïje koo wöl wïlø ki kër-ɑ nyi gwøg wun møg-ɑ nyi köbbe wun bënn, kí wør-ɑ ɑ́wøørii yi wun, e dëlli wun ceg-ɑ okïr kipere. O pyëwɑ med ki gɑ̈nni wun kì ri jɑmmì bënn. Wun ɑ nyiimïɑ, wø dwɑdd-ɑ köbbi wun gïn-ɑ ɑ́gwøg yi gyëdhhi Jwøk kì kɑnïsɑ̀ kì Mɑkdöniyɑ̀. Ge ɑ́rɑng yi Jwøk ki ɑkørr mø ngenyø, de ge ɑ́yïddi ki medi pyëw me dwøng, mɑ ɑ́wëggi gen muujø ki jɑmmi mø ngenyø, ngö nyingi gen cɑn. O ɑ́lidh yi yɑn kinni, ge ɑ́muuj-ɑ gïg-ɑ ɑ́cuggi muujø yi gen, o ge ɑ́ceg-ɑ yɑb ki gïg muuj. O yɑ ceg-ɑ wun ki köbbø kinni ge nuti cɑɑg kɑ cïrri muujø. Wø ɑ́ceg kɑ kwɑjjø yi gen kinni, wiy ge muuj gen thyew ki gïg køny gen jii Jwøk kì Yeudiyɑ̀. Ge ɑ́gwøg-ɑ gïg mø døngø kibøli møg-ɑ ɑ́rømmi yi wøn! Men-ɑ mɑl bɑ kinni ri gen ɑ́mëggi gen Jwøk; codhe ɑmëggi gen ri gen wøn thyew, ni kɑ ɑ́dwɑddii yi Jwøk. O bene ɑ kwɑjji wøn Tïtø, ngɑn-ɑ ɑ́cɑg kwøbbi muunyɑni, kinni kønye wun ki gwøg ki gwøng-ɑ døj ni menɑni. Wu kɑ̈rø yi jɑmmì bënn; kì yij yïëyø, kí kwøb, kí dïdø, kí kunyø, kí döngi mɑɑr-ɑ mɑɑr wøn yi wun. O wø dwɑdd-ɑ kinni; muuj wun ki medi pëëth, kì yij gwøøg mɑ̈ɑ̈dø men. Wu pɑ ceg yi yɑn ki cirø, de yɑ dwɑdd-ɑ nyudhi wun kinni dɑ ji mø tyer kunyø ki mendwøng, yɑ pɑ̈ny-ɑ mɑ̈ɑ̈dø mi wun ki lidhø, mɑ bëëde ɑ́ dyër. Dhwɑ̈ɑ̈ng Wë Yëso Mesiy ngɑ̈nyi yi wun; ɑ́bëëd e kɑ̈rø, kɑ ree løge ɑbuur kiper wun, o wu gwøøge wun ɑ́ tyëngkɑ̈rì kì ri bëëde ɑ́ ɑbuur. Gïn-ɑ rømmɑ bɑ kinni lɑ̈w ke tyëgu gwøng-ɑ ɑ́cɑg yi wun run-ɑ ɑ́pöödh. Wun ɑ ɑ́kwöngi cɑ̈gø, o bɑ wun ɑ ɑ́dwɑddi gwøngɑni. Tyëgu gwøngɑni ɑnɑn ceth, ni kɑ ɑ́cɑgu en. Keløg yï otyëëdø ki muujø, Jwøk óyïëy-ɑ gïn-ɑ nud kì yïí, de pɑth ki gïn-ɑ tyer yi pyëwí ki muujø e bogøn. Yɑ pɑ dwɑddi kinni, o ji møøgø dönyi gen kì bɑng gwøng teg mi wun, de yɑ dwɑdd-ɑ kinni o wu bëëd wu pɑ̈r. Kinni o wu kønyu tyëng-ɑ jɑdø ɑnɑn, kɑ̀ di yï wun jɑmmì, o wu ólony yi gen ki kønyø keny-ɑ ólunyi wun ki jɑdø, o wu óbëëd wu pɑ̈r. Mɑ́ wɑ̈nyi kwërø okööbø kinni, “Ngɑn-ɑ ɑ́gwen mø ngenyø, bong mɑ ɑ́döng kì yïe, o ngɑn-ɑ ɑ́gwen mø nøg nuti jɑdø.” Wø pwøj-ɑ Jwøk kipe kɑ ɑ́göjje Tïtø tyeri kønyi wun, ni kɑ̀ tyer wøn kønyi wun. Nuti bëën yï wun kɑ per kɑ ɑ́köbbii yi wøn, de ɑ́ceg bëëdø e dwɑdd-ɑ kunyø ceth. Ge ɑ́ör yi wøn kyeel ki ómïee, nyel-ɑ pøjji yi kɑnïsɑ̀ kì kɑ̈jj bënn, kipe gwøøg pwönyi wöndøj. Árum ki myegø, kɑ kwɑny thyew ɑ́ ngɑn køny wøn yi tyëng kɑnïsɑ̀, o cyɑ̈dhe ki wøn, e køny-ɑ wøn ki gwøøg mɑ̈ɑ̈dø, kipe døngi mɑ̈ɑ̈r Wë, geki nyodhi kinni wø dwɑdd-ɑ kunyø. Wø pɑ dwɑddi cɑyø kipe yuu-ɑ gwøøg muuny-ɑ dwøng ni men. Mɑ́ wø dwɑdd-ɑ gwøgi gïndøj, kì bøli Wë, kí bøli ji thyew. Kɑ ɑ́rum bëëde kinøw, ómïee oörø yi wøn kyeel ki gen; ɑ́pɑ̈nyi yi wøn tyel mø gïïr, kɑ yod yi wøn kinni pyëwe dwɑdd-ɑ kunyø kidyër. Anɑn pyëwe ying-ɑ mɑl kipe kunyø, kì bɑng kɑ̀ gɑ̈nne wun ki mendwøng. De Tïtø nyi 'lwööb kɑ yɑn, gwøg-ɑ gwøng-ɑ gwøg yi yɑn e køny-ɑ wun; o nyiimïee møg-ɑ cyɑ̈dhi ki en, bɑ tyëng kɑnïsɑ̀ kì kɑ̈jj bënn, men cyɑ̈dhi ɑ́ kej kɑnïsɑ̀ kì keny-ɑ kɑ̈ɑ̈le, o Mesiy lenhi. Kɑ̀ bëëde kinøw, nyudhu gen kinni wø mɑɑr yi wun, o yod thyew yi kɑnïsɑ̀ kì kɑ̈jj bënn kinni, pøny-ɑ nyi pøjji wun yi wøn bɑ dyër. De ɑnɑn, yɑ pɑ dwɑddi kinni, o wu gwëdɑ këti kipe gïg-ɑ nyi muuj kipe jii Jwøk kì Yeudiyɑ̀, mɑ́ yɑ ngɑ̈ny wøw kinni, pëthi wun med ki kønyi gen ceth. Nyingi wun nyii lejjø yi yɑn kidøøj kì bøli tyëng Mɑkdöniyɑ̀; ge nyi köbbɑ’ köbbø kinni, “Nyiimïee kì Akɑiyɑ̀, ge ɑ́bëëd ceth ge dwɑdd-ɑ kunyø këër run-ɑ ɑ́pöödh.” De nyiimïee óör yi yɑn kipe kinni, o kwøbbi kɑ̀ lejjɑ wun bëëd gen gɑ dyër ceth, o wu óbëëd ri wun tyeeny wun ni kɑ ɑ́kööbɑ. Keløg yɑ di bï wøki kwï tyëng Mɑkdöniyɑ̀, kɑ wu di yuud ri wun nuti tyeeny wun, wø di yɑ̈r-ɑ dï! Yɑ pɑ kømmi yɑ̈ri wun, dɑ́ wøn ɑ yɑ̈r kipe kɑ ɑ́wɑ̈dhi wø wun ki lejjø. Bene ɑ bɑnge kwøngɑ nyiimïee ki ör yï wun, o jɑmm-ɑ ɑ́kwøb yi wun kinni ge ómuuj yi wun ópyël yi gen. Codhe, o yɑ ólunyɑ ki bëënø, e jɑmmɑni rumø ki cøngø, o menɑni ónyodhe kinni, bɑ wu keti wun ɑ ɑ́muuj ki tɑri pëthi wun, de wu nuti cɑɑg kɑ köbbi muujø. Ngɑ̈nyi yi wun kinni, ngɑn-ɑ kɑ̈g köödh mø nøg, ókɑj-ɑ byel mø nøg, de ngɑn-ɑ kɑ̈g köödh mø gïïr, ókɑj-ɑ byel mø gïïr. Muuj dhɑnhø gïn-ɑ ɑ́rømmi yi en ki pyëwe ceth, e pɑ pɑ̈ddi wɑlɑ̀ pɑ cir, mɑ́ ngɑn-ɑ nyi muujø ki tɑri pyëw mɑɑr yi Jwøk. O wu ócuggø thödhø yi Jwøk ki mø ngenyø kibøli møg-ɑ dwɑddi yi wun, o óbëëde e bong gïn jɑ̈ddi wun yethi cyɑ̈ng bënn, o wu yïddi wun ki døøjø. Wɑ̈nyi kwërø okööbø kinni, “Ngɑn jɑdø nyi thödhe’ thödhø døøje gït-ɑ ɑtheer.” O Jwøk ɑ nyi muujø ki köödh møg kɑ̈g, kí gïncɑm men cɑm, wu ónënge ki köödh kɑ gï wëgge twïyø, kɑ ge onywølø ki byel mø gïïr, kì bɑng kɑ̀ nyi muuj wun. Wu ówëgge kɑ̈rø, kipe kinni o wu nyi muuj wun ceth, o Jwøk ópwøj yi ji mø gïïr kipe gïg-ɑ muuj yi wun, o ge cïb cinggi gen yi wøn. Gïg-ɑ muuj yi wun kinøw, gɑ møg yieel jii Jwøk, pɑ cöög ri gen, de Jwøk ópwøj ki mendwøng kì bɑng muunyɑni thyew. Muujø menɑni nyodh-ɑ yïëyø mi wun, o Jwøk ólenhi kì bɑng kɑ ɑ́yïëy wun ki Wöndøj mi Mesiy geki kɑ nyi yïëy wun ki nywɑ̈g ki jɑmmi wun ki jii Jwøk kì kɑ̈jj-ɑ kyeelø. O ge ókwɑ̈jji kiper wun, kipe dhwɑ̈ng-ɑ ɑ́mëggi wun yi Jwøk. Pwøj wɑ Jwøk kipe gïgdøj møg-ɑ nyi muuje. Yɑ Pøøl, yɑ kwɑjj-ɑ wun ki möölø geki mɑ̈ɑ̈dø ni ke di kwɑjji wun yi Mesiy. Cɑgg ɑ́ kenyi kööb ji møøgø kì kelli wun kinni, i yɑ bɑ mölø kenyi kööbɑ kì bøli wun, de wu nyi gwëdɑ’ kwøb mø teeg, kenyi bëëdɑ yɑ lɑ̈wi ki wun. Yɑ kwɑjj-ɑ wun kinni yɑ ko wëggu kwøb ki kwøb mø teeg keny-ɑ óbëënɑ; mɑ́ yɑ ócuggø kwøb ki kwøb mø teeg ki tyëng-ɑ kööbø i wø göögø kɑ per jɑmmi kömi piny. Bɑ dyër kinni wø bëëd ɑ kömi piny, de wø pɑ nyïɑ̈ggi kɑ per jɑmmi kömi piny. Mɑ́ jɑmmi liny mø wøn pɑth ki mø kömi piny, de ge bɑ mø Jwøk møg-ɑ teeg, møg-ɑ dhuri wøn piny ki uddi dörr-ɑ teeg. Tyëng-ɑ pëëm pyed dhøggi gen nyii nɑ̈gø yi wøn; pëëmø ki pyed ki kwøbb-ɑ mɑ̈ɑ̈n dïdø ki kwøbbi Jwøk bënn nyi cøør wø’ piny, rummì bënn nyii mɑgø yi wøn, kɑ ge nyi løg wøn møg lïngi kwøbbi Mesiy. Keny-ɑ órum wun ki yïëyø kidøøj, ngɑn-ɑ pëmø ceg kɑ cɑyø yi wun. Tidu kwøbb-ɑ dyër kidøøj. Ngɑn rumø cem ɑ́ ngeti Mesiy, rømme ree kidøøj, mɑ́ wø ceg bëëdø wø bɑ jii Mesiy ni en. Mɑ́ wïjɑ pɑ lɑ̈ɑ̈y keløg riɑ lejji yi yɑn kɑ per tegø men-ɑ ɑ́mëggi wøn yi Wë, ɑ́ men tïng wun mɑl, de pɑth ki men cøør wun piny. Yɑ pɑ dwɑddi kinni, o wu böggi wun yi wɑ̈jj-ɑ nyi gwed yi yɑn. Ngɑn megø kì kelli wun ócuggø kwøb kinni, “Wɑ̈jj-ɑ nyi gwed yi Pøøl, kwøbbi gen teeg; de nyi 'kööb-ɑ möölø kenyi yinge kellee!” Wiy ngɑn ni menɑni ngɑ̈nye wøw kinni, gïg-ɑ nyi gwëdɑ wun kì yethi wɑ̈j, bɑ møg-ɑ di kwøb yi yɑn keløg yɑ di bëëd yɑ nud. Riɑ pɑ cuggi pɑ̈ɑ̈rø yi yɑn ki tyëng-ɑ nyi lejji ri gen, mɑ́ ge ceg bëëdø gɑ dhëgg! Ri gen ɑ́tïng gen mɑl, o ri gen rømmi yi gen kɑ këër keny-ɑ ɑ́tïng gen ri gen. De ri wøn pɑ lejji yi wøn ki gïn nuti gwøøg wøn. Ri wøn ólejji yi wøn kɑ per gwøng-ɑ ɑ́mëggi wøn yi Jwøk kete, o menɑni reb-ɑ gwøøg wøn kì kelli wun. O kì bɑng kɑ̀ ying wun yij keew-ɑ göög yi wøn, kewɑni nuti cɑɑg wøn kɑ pöödhø keny-ɑ ɑ́bëën wøn yï wun, wø kɑ̈ll-ɑ Wöndøj mi Mesiy. Ri wøn pɑ lejji yi wøn kɑ per gwøng-ɑ ógwøgø yi ji møøgø kì løøg kew-ɑ ɑ́cïb wøn yi Jwøk. De wø kwɑjj-ɑ kinni o yïëyø mi wun dønge, o wø ócuggi wøn ki gwøg ki gïg mø ngenyø kì kelli wun, e kew-ɑ ɑ́cïb yi Jwøk pɑ pöödh yi wøn. Codhe, o wø ócuggi wøn ki pwönyi Wöndøj kì pödhh-ɑ kyeelø, de ri wøn pɑ lejji yi wøn kipe gwøng-ɑ ógwøgø kì kej ngɑn megø. Mɑ́ wɑ̈nyi kwërø okööbø kinni, “Ngɑn dwɑddi lejji ree, lejje gïg-ɑ ɑ́gwøg yi Wë.” Mɑ́ ngɑn-ɑ lejji yi Wë, bɑ en ɑ yïëy yi Jwøk, de pɑth ki ngɑn-ɑ lejji ree. Lïngu kwøbbɑ yøw, cɑgg yɑ kømi bëëdø yɑn ɑ́ dhëg! Yɑ nyii mɑgø yi tyiel kiper wun, ni kenyi mɑɑg Jwøk yi tyiel, mɑ́ wu nyömmɑ’ jɑlø ɑ́kyel, en ɑ Mesiy, o mëggɑ nyɑnɑjur me dhïw, me nuti pɑ̈nyø nywɑlø yi jɑlø. Yɑ óböggø kinni, rummi wun órënyi, kɑ wu opɑ̈ɑ̈dø kì ri Mesiy, ni kɑ ɑ́wëëny Awɑ̀ yi thwöl. Mɑ́ ke bëën ngɑn megø be pwönyi wun ki kwøbbi Yëso, me pɑth ki Yëso men-ɑ́ kwøbbe ɑ́pwönyi yi wøn, kɑ wu köbbe yïddø ki wëy geki wöndøj me bɑ̈ɑ̈n ki wëy geki wöndøj men-ɑ ɑ́yod yi wun kì yï wøn, kwøbbe pɑ di ceg yi wun ki yïëyø? Yɑ pɑ rumø kinni yɑ ying-ɑ cyɑ̈n yi ji-ɑ cwølli gɑ tyëngwöödø møg-ɑ døngø! Cɑgg yɑ kwïj kwøb kì bøli teedø, yɑ bɑ ngɑn dïdø ceth. O wu ɑ́rum ki thödhø yi wøn ki kwøbb-ɑ dyër kì ri jɑmmì bënn. Yɑ ɑ́ceg-ɑ bɑ̈jjø kɑ̀ nuti cwöddi yɑn ki köögi kì yï wun, keny-ɑ ɑ́pwönyɑ wun ki wööni Jwøk, kɑ riɑ dwøøgɑ cyɑ̈n kipe kinni o per wun tënge? Yɑ ɑ́bëëd yɑ nyi nëng-ɑ yi kɑnïsɑ̀ men-ɑ kɑ̈jj-ɑ kyeelø keny-ɑ ɑ́göögɑ kì kelli wun; yɑ nyi kwɑny-ɑ jɑmmi gen kipe kinni o yɑ kønyɑ wun. Keny-ɑ ɑ́bëëdɑ kì buti wun, wu nuti jud yɑn; yɑ nuti cwöd ki ngyënyø kì yï wun. Bɑ nyiimïee møg-ɑ ɑ́kɑ̈ɑ̈l Mɑkdöniyɑ̀ ɑ ɑ́muuj yɑn ki gïg-ɑ ɑ́dwɑddɑ bënn. Nɑ kɑ ɑ́bëëdɑ cøn, gïti dhuki megø, wu koo jud yi yɑn kipe jɑmm-ɑ dwɑddɑ. Kɑ̀ bëëd dyër mi Mesiy ying-ɑ riɑ, yɑ pɑ wïyi ki lejji riɑ kipe møgɑni kì Akɑiyɑ̀ bëne. Møgɑni kwøb yi yɑn kɑ per kɑ̀ pɑ mɑɑrɑ wun? Ngɑ̈nyi yi Jwøk kinni, wu mɑɑr yi yɑn ki mendwøng! Yɑ pɑ wïyi ki gïn-ɑ gwøg yi yɑn ɑnɑn, kipe kinni o “tyëngwöödø” møg-ɑ kyeelø jɑ̈ddi gen ki keny kööb gen ce ge göögø kɑ yuu-ɑ göög yi wøn. Jøgɑni pɑth ki tyëngwöödø møg-ɑ dyër, ge göög-ɑ wëënyø, o ge kɑngg-ɑ ri gen ce ge bɑ jøwööni Mesiy. De pɑth ki gïn ngɑ̈ɑ̈ng yi ji, mɑ́ Cethɑn kiree, ree nyii kɑɑngø yi en kɑ ónënnø e nɑ wëywöni cɑr! Kɑ ɑ́rum bëëde kinøw, pɑth ki gïïngɑ̈ngø keløg bɑ̈ngge ri gen okɑɑngø yi gen, o ge nënni gen ge nɑ bɑ̈nggi tirø. De kì ri thumi piny, ge óyod-ɑ gïjø me kyëëw ki gïg-ɑ gøggi yi gen. Wu cigɑ’ köbbø kinni, yɑ pɑth ki dhëg. De keløg wu orumø kinni yɑ bɑ dhëg, yïëyu yɑn ki dhëëgɑ yøw, o yɑ yïddɑ ki gïn pere lejjɑ riɑ. Møg-ɑ kømmi yi yɑn ɑnɑn, pɑth ki møg-ɑ dwɑddi yi Wë, mɑ́ yɑ bɑ dhëg kidyër kì ri kwøbbi lejji rɑw. De kɑ̀ bëëd e dɑ ji mø lejji ri gen kipe kwøbbi kömi piny, yɑ ceg-ɑ lunyø lejji riɑ thyew. Wu ceg bëëdø wɑ̈thi wun pel, bene ɑ bɑnge nyi yïëy wun kwøbbi dhëgg! Mɑ́ wu pɑ nyi wër ki ngɑn cïrri wun bɑ̈ɑ̈ngø, kí ngɑn tuug wun, kí ngɑn yerri wun, kí ngɑn pwöd wun ki ɑtɑyø kì yethi nyingi wun. Yɑ ɑ́mɑg yi ɑyɑ̈r kipe kɑ ɑ́gwøg wøn møgɑni ki nyødhi pëthi wøn. De keløg e dɑ ngɑn lejji ree kipe gïïpiny — yɑ kööbø nɑ dhëg cyee — riɑ ólejjɑ thyew. Ge bɑ tyëng Ibru? Yɑ bɑ wɑ̈d Ibru thyew. Ge bɑ tyëng Isrɑil? Yɑ bɑ ngeti Isrɑil thyew. Ge bɑ kwɑrri Abrɑhɑm? Yɑ bɑ kwɑɑr Abrɑhɑm thyew. Ge bɑ bɑ̈nggi Mesiy? Yɑ ce 'kööb-ɑ ɑ́nɑ̈gø — de yɑ bɑ bɑ̈ng me lɑ̈w kibøli gen! Yɑ ɑ́göög ki gwøg me teeg kibøli gen; Yɑ ɑ́kïdhi ød mɑg ki tyel mø gïïr; kɑ yɑ pwöd ki tyel mø gïïr; kɑ yɑ nyii cyɑ̈ngø ki thøø. Yɑ ɑ́pwöd yi Yeud tyel ɑ́bïj; yɑ nyi pwöd kɑ dëllì pyɑ̈r ɑ́dɑ̈g wïdɑ́bïngwen. Yɑ ɑ́pwöd tyel ɑ́dɑ̈g yi tyëng Römɑ̀. Kɑ yɑ bɑ̈lli ki tuggi kïttì tyelø ɑ́kyel. Kɑ sɑpïnɑ̀ ɑ́dɑ̈g ótørrø yɑ nud kì yethi gen, kɑ wɑ̈r kí dicɑ̈ng tyëgɑ yɑ kwɑ̈ng-ɑ wɑ̈g kì nɑɑm omelø. Kì yij wɑ̈nh-ɑ ɑ́cɑɑdhɑ bëne, yɑ ɑ́cyɑ̈ngi ki mudø; kɑ yɑ ócyɑ̈ngø nɑ̈gø yi kurrì; kɑ yɑ kømi nɑ̈gø yi wɑddi wøn Yeud, kí tyëngpɑth ki Yeud; yɑ nyi bëëd yɑ obɑjjø yi thøø kì yethi kɑ̈dd, kí yij pɑ̈l, kí yethi nɑ̈mmi omelø, kí ji-ɑ nyi wënyø ce ge bɑ wɑdd. Kɑ yɑ nyii göögø ki gwøng teg. Yɑ nyii dhɑ̈lø nenø tyel mø gïïr; kɑ yɑ nɑ̈g yi kɑ̈j kí röödhø; kɑ yɑ nyii jɑdø ki gïncɑm, kí keny bëëdɑ; kɑ yɑ nyii jɑdø ki ógønh rugɑ. Møgɑni bënn ceg-ɑ rëbø ki tɑng-ɑ tɑɑgɑ kwøbbi bëëdi kɑnïsɑ̀ kì kɑ̈jj bënn kì yethi cyɑ̈ng. Kenyi di ngɑn nyødh, yɑ nyi ceg-ɑ nyönhø thyew; kenyi di ngɑn pɑ̈dhi yij orøg, yɑ nyi ceg-ɑ juudø. Keløg riɑ dwɑddɑ’ lejjø, riɑ lejjɑ kɑ per gïg-ɑ nyodh nyødhɑ. De ngɑ̈nyi yi Jwøk, Wïyi Wë Yëso — wiy nyinge lenhi gïti ɑtheer — kinni yɑ pɑ ceg pyed. Keny-ɑ ɑ́yingɑ Dimɑceg, modïr men-ɑ ɑ́jɑɑg kɑɑlɑni kì ri Rɑ̈dh Aretɑs, ɑ́cïbi dhø döri kɑɑl ki ɑlɑthker møg mɑg yɑn. Kɑ yɑ miid piny, yiny-ɑ wɑ̈g kì yij dhöngø, yɑ kɑ̈ɑ̈l-ɑ keny me twïyø kì ri döri kɑɑl, ɑbødhɑ ki thøø. Riɑ ceg yi yɑn kɑ lejjø ceth, cɑgg e bong gïndøj me gwøg yi møgɑni. De ɑnɑn yɑ ceg-ɑ kwøb kì ri møg-ɑ ɑ́cɑ̈rri yɑn kí møg-ɑ ɑ́yɑ̈lli yɑn yi Wë. Ádɑ jɑl mɑ ngeti Mesiy mɑ ɑ́kïdhi mɑl; ɑ́göög ki runn pyɑ̈rø wïdɑ́ngwen ɑnɑn kër-ɑ ɑ́cwöb møgɑni, (kwïj yi yɑn ying møgɑni cwöbø kidyër, wɑlɑ̀ ócɑɑg kɑ cɑ̈rri møgɑni — ngɑ̈ny-ɑ yi Jwøk kete). Ngɑ̈nyi yi yɑn kinni jɑlɑni ɑ́ceg kɑ gwɑɑr Pɑrdös, (kwïj yi yɑn ying e ókɑ̈ɑ̈lø kɑ dële — ngɑ̈ny-ɑ yi Jwøk). Ngɑ̈nyi yi yɑn kinni ɑ́kïdhi Pɑrdös, kɑ olïngø ki kwøb mø dhɑ̈li kwøbø yi dhɑnhø yøw, o bɑ ɑkerø ki pɑrri gen. Jɑlɑni ólejji yi yɑn kipe møgɑni, de riɑ ólejjɑ kɑ per nyødhɑ kete. Keløg yɑ di dwɑdd-ɑ lejji riɑ, yɑ pɑ di bëëd yɑ bɑ dhëg, mɑ́ yɑ kømm-ɑ dyër. De yɑ pɑ dwɑddi lejji riɑ, kipe ngɑn megø órumø i yɑ dwøng kibøli nenn-ɑ nenne yɑn, wɑlɑ̀ møg-ɑ nyi lïnge kì riɑ. De yɑ ɑ́thödhi ki koodhø me rɑ̈mø kì dëlɑ, kipe yɑ ókwöd yi ɑthwøg kì bɑng møg-ɑ ɑ́lidhɑ; koonhɑni ying dëlɑ e nɑ wëywöni Cethɑn, men nyi cwøb yɑn, o yɑ nyi mɑ̈ɑ̈ne thwøgø. Kɑ Wë kwɑjjɑ tyel ɑ́dɑ̈g kinni kɑ̈ɑ̈le koonhɑni wɑ̈g kì riɑ. De yɑ ɑ́köbbi yi en kinni, “Dhwɑ̈ngɑ kete ɑ dwɑddi yi yïn; mɑ́ tegɑ døng-ɑ́ɑ̀ bɑng nyødhí.” O pyëwɑ med kenyi lejjɑ nyødhɑ kipe kinni o yɑ yïddɑ ki tegø kì yï Mesiy. Bene ɑ bɑnge bëëdɑ yɑ yïëyø ki ngini bëëdɑ yɑ nyøødh, kí ngini yɑ̈d geki jud, kí ngini guun-ɑ guud wɑngɑ geki pïdø kiper Mesiy; mɑ́ kenyi bëëdɑ yɑ nyøødh, bene ɑ nyi bëëdɑ yɑ teeg. Yɑ ɑ́göög ki dhëg – dɑ́ wun ɑ ɑ́wëggi yɑn gwøg ki dhëg. Bɑ wun ɑ di pwøj gwøgɑ. Mɑ́ cɑgg yɑ bong perɑ, yɑ pɑ lod yi tyëng-ɑ cwølli gɑ “tyëngwöödø” møg-ɑ døngø. Ngïjj-ɑ nyodh kinni yɑ bɑ jɑlwöödø, ɑ́gwøg-ɑ kelli wun ki ngïïnø me dwøng. Wu lod kɑ ngø yi kɑnïsɑ̀ møg-ɑ kɑ̈jj-ɑ kyeelø, e pɑth ki kɑ̀ nuti toor wun yi yɑn ki cwöd ki jɑmmì? Lɑ̈ɑ̈m pëthi wun ki yɑn, kipe bɑ̈jjø menɑni! Anɑn riɑ gwiir yɑn kipe bëën yï wun, ki dɑ̈ɑ̈g bëënø — o bong gïjø men-ɑ ócwøl yi yɑn kì yï wun. Yɑ dwɑdd-ɑ wun kiri wun, de pɑth ki ngyënyyi wun ɑ dwɑddɑ. Pɑth ki othønhø ɑ nyi pidh wëëg gen, de bɑ wëëg ɑ nyi pidh nyigi gen. Pyëwɑ med ki muuji jɑmmɑ bënn, cɑgg ɑ́ riɑ thyew, yɑ køny-ɑ wun. Yɑ pɑ ti yi wun ki mɑɑrø, kɑ per kɑ̀ mɑɑrɑ wun ki mendwøng? Wu nuti jud yɑn kidyër, ki cwöd ki jɑmmì. De yɑ ɑ́di bëëdø yɑn ɑ́ wëny, kɑ wu thɑbbɑ ki pyed? Dɑ ngɑn-ɑ ɑ́cɑm ngyënyyi wun kì kelli tyëng-ɑ ɑ́örɑ wun? Tïtø ɑ́kwɑjji yi yɑn ki mendwøng kinni, bëe be këëmi wun, kɑ ómïee megø örɑ kyeel ki en. Dɑ gïjø mɑ ɑ́kwɑny yi Tïtø kì yï wun? Wø pɑ ködd-ɑ kömi gïjø ɑ́kyel? O yëth-ɑ göög wøn pɑ pɑ̈r? Wun ɑ nyiimïɑ, wu orumø kinni, wø ceg-ɑ ri wøn ki cwɑgø? Pɑth! Wø kööb ɑ bøli Jwøk kì ri Mesiy, o møg-ɑ kømmi yi wøn bënn bɑ kipe tyenyi wun. Yɑ bögg-ɑ kinni, bëëdi wun óyod yi yɑn e pɑth ki men-ɑ dwɑddi yi yɑn; kɑ bëëdɑ yod yi wun e pɑth ki men-ɑ ɑ́dwɑddi yi wun thyew, keny-ɑ óbëënɑ yï wun. Wɑlɑ̀ wu óyuud yi yɑn kelli wun dɑ wërø, kí ɑter, kí keji pëëth, kí tyiel, kí yɑ̈d, kí ɑtum, kí ɑthwøg geki ɑwøw. Yɑ bögg-ɑ kinni keny-ɑ ócigɑ bëën yï wun, wïjɑ ólɑ̈ɑ̈y yi Jwøgɑ kì bɑng bëëdi wun; kɑ yɑ óywöngø kipe tyëng-ɑ ɑ́bɑ̈jji cøn, kɑ ge ocögø ge pɑ yewi kipe kwïji bëëdø, kí niini ji mø nuti nywøøm ri gen, kí niini cwøw ri gen. Men ɑnɑn bɑ dɑ̈ɑ̈g bëënɑ be këëmi wun. “Dhɑnhø gøøny ɑ kömi dhøggi ji-ɑ ɑ́lïdhi gɑ ɑ́ryew wɑlɑ̀ ɑ́dɑ̈g” — ni kɑ ógwedii kì yij wɑ̈nyi kwërø. Keny-ɑ ɑ́bëënɑ yï wun ki ryeew këëmɑ, tyëng-ɑ ɑ́røngi ɑ́köbbɑ, o møgɑni ɑ köbbɑ tyëng-ɑ göögø kinøw yɑ tøøk; ge ɑ́köbbɑ kinni, keny-ɑ ódwöögɑ yï wun, pyëwɑ pɑ cigi lɑ̈ɑ̈mø ki dhɑnhø, mɑ́ wu dwɑdd-ɑ gïn nyodh kinni Mesiy okööbø ki lebɑ. O wu pɑ mïdhi yi Mesiy kɑ nyødhø, de ceg bëëdø e teeg kì kelli wun. Cɑgg ɑ́ kɑ ɑ́gurii wïj yɑdh ɑrïw e nyøødh, onëënø ɑnɑn ki tegi Jwøk. O wøn thyew wø nyøødh kì ree, de wø óbëëd wø onëënø ki tegi Jwøk, kɑ̀ ying wøn kelli wun. Nyi rɑngu ri wun mɑ bëëd yïëyø mi wun kidï. Kenyi lïïdh wun ri wun, pɑ nyi yod yi wun kinni Mesiy nud kì kelli wun? Codhe, o yod yi wun kinni, pwöny-ɑ ɑ́pwönyi yi wøn kì kelli wun bɑ dyër. Jwøk nyii kwɑjjø yi wøn kiper wun, kipe kinni o wu cög wu pɑ göögø ki gïnrɑj; pɑth kipe nyodhi ri wøn kinni wø ɑ́göög ki gwøg me døøj, dɑ́ kipe kinni o wu nyi gwøg wun gïn-ɑ bɑ dyër, cɑgg e nënni wø ódhɑlø yi gwøøg wøn. Mɑ́ wø pɑ cuggi bɑnyi dyër, de wø göög-ɑ per dyër ceth. Cɑgg ɑ́ kɑ bëëd wøn wø nyødh de wu teg, pëthi wøn med. O gïn-ɑ nyi kwɑjji yi wøn kì yï Jwøk bɑ kinni, o wu dönyi wun. Wɑ̈nyø men gwed yi yɑn yɑ nuti bëënø, kɑ per kinni, o yɑ cögɑ, yɑ pɑ wër ki wun, kì kömi tegø men-ɑ ɑ́mëggi yɑn yi Wë ɑ́ mi tyëny, de pɑth ki mi cödi piny. Anɑn wun ɑ nyiimïɑ, mɑ̈dhu ri wun! Tyer wun bëëndøj; lïngu møg-ɑ cïgɑ wun; nyi kømmu kwøb ɑ́kyel; bëëd wun ki mër. O wu ókor yi Jwøk, ɑ bɑ Jwøøg mɑ̈ɑ̈dø kí mër. Mɑ̈dh wun ri wun ki nuumi kwër. Wu ɑ́mɑ̈dh yi jii Jwøk bënn. Dhwɑ̈ɑ̈ng Wë Yëso Mesiy, kí mɑ̈ɑ̈dø mi Jwøk, geki nywɑ̈ɑ̈g Wëykwërø, óying kömi wun bënn. Wɑ̈nyø men kɑ̈ɑ̈l-ɑ yïɑ, yɑ Pøøl jɑlwöödø, ngɑn-ɑ nuti cwøl-ɑ yi dhɑnhø, wɑlɑ̀ nuti cwølø kɑ yëth-ɑ nyi cwöddi yi ji, de yɑ ɑ́cwøl-ɑ yi Yëso Mesiy geki Jwøk Wïy, ngɑn-ɑ ɑ́tugii kì yij thøø. Yɑ mɑ̈dh-ɑ wun, wu tyëng Gɑlɑthiyɑ̀; wu ɑ́mɑ̈dh thyew yi nyiimïee bënn, møg-ɑ buti gen bëëdɑ kì keny. Wiy dhwɑ̈ng geki mër møg-ɑ nyi kɑ̈ɑ̈l yï Jwøk Wïyee geki Wë Yëso Mesiy, ying gen kömi wun. Mesiy ree ɑ́muuje o gøøm bøli orøgee, e gwøg-ɑ møg-ɑ ɑ́dwɑddi yi Wïy Jwøk, o wɑ yieele wɑ̈g kì yij rïny-ɑ rɑj èn. Lejji wɑ Jwøk gïti ɑtheer! Amen. Yɑ ɑ́ngɑ̈ng yi bëëdi wun! Ngɑn-ɑ ɑ́cwøl wun ki dhwɑ̈ɑ̈ng Mesiy, ɑ́jwɑn yi wun ki wiy piny, kɑ wu oyïëyø ki wöndøj megø. Pɑth ki kinni dɑ wöndøj megø kidyër, de yɑ kømm-ɑ kenyi pɑɑng wun yi ji møøgø, kipe kinni o Wöndøj mi Mesiy wil yi wun. Cɑgg ɑ́ wøn ɑ pwönyi wun, wɑlɑ̀ wu pwönyi yi wëywödø me bï e kɑ̈ɑ̈l-ɑ mɑl, e pwöny-ɑ wöndøj me bɑ̈ɑ̈n ki men-ɑ ɑ́pwönyi wun yi wøn cøn, ngɑnɑni ree dɑ cyën. De wø köbb-ɑ wun këti ni kɑ ɑ́kwøng wøn wun ki köbbø cøn kinni, keløg e dɑ ngɑn pwönyi wun ki wöndøj me bɑ̈ɑ̈n ki men-ɑ ɑ́yod yi wun kì yï wøn, ngɑnɑni ree dɑ cyën! Ónënnø kinni yɑ tyer-ɑ gwøgi gïn-ɑ dwɑddi yi ji? Pɑth! Yɑ tyer-ɑ gwøgi gïn-ɑ dwɑddi yi Jwøk. Yɑ tyer-ɑ pøjjø yi ji? Keløg yɑ di tyer pøjjø yi ji, yɑ pɑ di bëëd yɑn ɑ́ bɑ̈ng Mesiy. Bëëd wu ngɑ̈ny wøw, wun ɑ nyiimïɑ kinni, wöndøj men-ɑ ɑ́pwönyɑ wun, nuti kɑ̈ɑ̈l-ɑ yï ji. Mɑ́ wöönɑni nuti yood yɑn ɑ yï dhɑnhø, wɑlɑ̀ nuti pwönyi yɑn ɑ yi dhɑnhø, de ɑ́nyudhi yɑn ɑ yi Yëso Mesiy kiree. Wu ɑ́rum ki köbbi bëën-ɑ ɑ́bëëdɑ keny-ɑ ɑ́bëëdɑ yɑ mïdh-ɑ kwøbbi Yïëyi Yeud, kí kër-ɑ ɑ́guudɑ wɑɑng kɑnïsɑ̀ mi Jwøk e pyëwɑ pɑ lɑ̈ɑ̈m, kɑ riɑ pɑ̈nyɑ ki tɑ̈ɑ̈yii piny. Kɑ perɑ ótëngø kì kelli yɑ̈jji wøn kì bɑng kɑ̀ di yijɑ tyiel kipe kwøbbi Yïëyi Yeud geki kwööng kweyyi wøn. De Jwøk ki dhwɑ̈nge, yɑ ɑ́myege yɑ nudd yɑ ying-ɑ yij meyɑ, kɑ yɑ cwøøle be göggii. O keny-ɑ ɑ́dwɑdde nyudhi Wɑ̈de yɑn, kì bɑng medi pyëwe, kipe kinni o yɑ pwönyɑ wöndøj mi Wɑ̈de kì kelli tyëngpɑth ki Yeud, bong dhɑnhø mɑ ɑ́pëjjɑ møgɑni, wɑlɑ̀ yɑ nuti kedhi Yerusɑlem be lidhi tyëng-ɑ ɑ́kwöngi gwøg ki tyëngwöödø kibølɑ. De yɑ ɑ́kedh-ɑ Pödhi Árɑb. Codhe, kɑ yɑ dwöög-ɑ Dimɑceg. Kì bɑng runn ɑ́dɑ̈g, kɑ yɑ kedh-ɑ Yerusɑlem be këëmi Pïtør. Kɑ yɑ obëëdø kì bute ki osboo ɑ́ryew. Bong dhɑnhø ɑ́kyel mɑ ɑ́lidhɑ kì kelli tyëngwöödø, den-ɑ́ Yɑgob, ómï Wë ɑ ɑ́lidhɑ kete. Møg-ɑ gwëdɑ wun bɑ dyër. O ngɑ̈nyi yi Jwøk kinni yɑ pɑ ceg pyed. Codhe, kɑ yɑ kedh-ɑ myërri Suriyɑ̀ geki Kilikiyɑ̀. O yɑ ɑ́bëëd yɑ nuti lidhø yi tyëng kɑnïsɑ̀ kì myërri Yeudiyɑ̀. De ge ɑ́wɑ̈dh-ɑ lïngø kinni, i ngɑn-ɑ ɑ́guud nyingi gen cøn, pwöny-ɑ teedø kinni yïëy gen ki kwøbb-ɑ ɑ́dwɑdde rënyø. Kɑ Jwøk lenhi yi gen kiperɑ. Kì bɑng runn pyɑ̈rø wïdɑ́ngwen, kɑ yɑ kedh-ɑ Yerusɑlem wøki Bɑrnɑbɑ̀ ki ryeew kedhø. Kɑ Tïtø ókedhø ki wøn thyew. De wø ɑ́kedhi kunɑni kɑ per gïn-ɑ ɑ́nyudhi yɑn yi Jwøk. Kɑ kwøbbi Wöndøj men-ɑ nyi pwönyi yi yɑn kì kelli tyëngpɑth ki Yeud, lwøb yi yɑn kì bøli tyëngdøngø keti gen. Yɑ nuti dwɑddi kinni o gwøng-ɑ ɑ́gwøg yi yɑn cøn, wɑlɑ̀ men-ɑ ógwøg yi yɑn dhuki megø thøwe piny. Tïtø, jɑl-ɑ ɑ́cyɑ̈dhi ki yɑn, ngö e bɑ wɑ̈d Yönɑn, nuti cïrri ngølø; ngö e ɑ́dɑ kwï ji mɑ ɑ́dwɑddi kinni i ngøl. Jiɑni ri gen ɑ́kɑɑng gen ce ge bɑ tyëng-ɑ ɑ́yïëy, kɑ ge bï-ɑ kellee gɑ yïthhi piny mø dwɑddi rënyi tɑ̈bbø men-ɑ ɑ́yod yi wɑ kì ri Yëso Mesiy, o wɑ di løg gen bɑ̈ngg. De kwøbbi gen nuti yïëëy wun kinni tek, kipe kinni o kwøbb-ɑ dyër mø Wöndøj mïdhi kidøøj, ni kɑ̀ ngɑ̈nyu en. De tyëng-ɑ ɑ́nënni gɑ pëjjì — yɑ kööbø kinøw kɑ per kɑ̀ bongii gïn wɑnge kì yïɑ, ying gɑ ngø wɑlɑ̀ ngø, mɑ́ Jwøk pɑ nyi nenn-ɑ bëëdi dëël dhɑnhø — yɑ nuti kønyø yi pëjjɑni ki rummì. De ge ɑ́yöd ge ceg-ɑ kwøb kinni i Jwøk yɑ ɑ́mëgge’ gwøøg pwönyi tyëngpɑth ki Yeud; ni kɑ ɑ́mëgge Pïtør pwönyi Yeud. Mɑ́ ngɑn-ɑ ɑ́ör Pïtør yï Yeud, bɑ en ɑ ɑ́ör yɑn yï tyëngpɑth ki Yeud. Yɑgob, kí Pïtør, kí Jøn, ɑ bɑ pëjjì; kɑ ɑ́lidh gen dhwɑ̈ng kí teng-ɑ ɑ́mëggi yɑn yi Jwøk, kɑ cinggi wøn mɑg gen, ɑyïëy gen kinni kedhi wøn yï tyëngpɑth ki Yeud, o ge ókedhi yï Yeud. Gïn-ɑ ɑ́kwɑjji yi gen bɑ kinni, wɑ̈thi wøn ko wïl ki tyëng-ɑ jɑdø kì yij ɑkuud gen; o bene gïn-ɑ ɑ́tyer yi pyëwɑ ki gwøgø thyew. De keny-ɑ ɑ́bëën Pïtør Anthɑkiyɑ̀, ɑ́cɑyɑ kì bøli teedø, mɑ́ e ɑ́ceg-ɑ bɑ̈jjø. Keny-ɑ ɑ́bëëd jøg-ɑ ɑ́ör yi Yɑgob nuti wɑ̈nhø, Pïtør ɑ́bëëd e onywɑ̈gø ki tyëngpɑth ki Yeud. De kɑ ɑ́wɑ̈nhi jøgɑni, kɑ ree lɑ̈ɑ̈we ki jiɑni; ɑ́bëëd e óböggø yi tyëng-ɑ kööbø i ngøl ji. Kɑ kwï Yeud møg-ɑ bɑ jii Mesiy, ri gen løg gen tyëngɑdud kyeel ki en. Kɑ Bɑrnɑbɑ̀ óngöyø ki kwøbbɑni thyew. De kɑ ɑ́yodɑ en kinni ge pɑ cyɑ̈dhi kì yij yuu-ɑ bɑ óbödh, ɑ kyëëw ki Wöndøj, ɑköbbɑ Pïtør kì bøli teedø kinni, “Yï bɑ Yeudì, o yï pɑ bëëdø ki bëëdi Yeudì, dɑ́ kipe ngø ɑ dwɑddí ciri tyëngpɑth ki Yeud kinni bëëd gen ki bëëdi Yeud?” Wøn kì ri wøn, wø ɑ́nywøl wø bɑ Yeud, de wø pɑth ki tyëngorøg ni kɑ̀ cwøllu tyëngpɑth ki Yeud. O wø ngɑ̈ny wøw kinni, dhɑnhø pɑ göögø e tir kì yï Jwøk kì bɑng kɑ̀ mïdhe Cigg, dɑ́ kɑ̀ yïëye Yëso Mesiy. Mɑ́ bong ngɑn göögø e tir kì yï Jwøk kì bɑng kɑ̀ mïdhe Cigg. Anɑn, keløg wø yɑb-ɑ gwøg wø tir kì ri Mesiy, ngö wø ying-ɑ kelli tyëngorøg, bɑ kinni Mesiy göögø kɑ per orøg? Pɑth ki kinøw. Keløg yɑ di døøg be geri gïn-ɑ ɑ́cøørɑ piny, riɑ di gwøøgɑ yɑn ɑ́ ngɑn pyem Cigg. Mɑ́ keløg ɑ́ kömi Cigg ɑ köddi, yɑ rum thøø — yɑ ɑ́nɑ̈g-ɑ yi Ciggɑni kiri gen — kipe kinni o yɑ ónënnɑ Jwøk. Yɑ ɑ́rum ki nɑ̈gø kyeel ki Mesiy kì wïj yɑdh ɑrïwe. Yɑ ɑ́gur wïj yɑdh ɑrïw kyeel ki Mesiy, o pɑth ki yɑn ɑ nëënø ɑnɑn, dɑ́ Mesiy ɑ nëënø kì riɑ. Cɑgg ɑ́ kɑ̀ bëëdɑ yɑ onëënø, yɑ rug-ɑ dël, yɑ nëën ɑ yij yïëyi Wɑ̈d Jwøk, ngɑn-ɑ ɑ́mɑɑr yɑn, kɑ wëye muuje kiperɑ. Yɑ ɑ́kyëëd ki bɑnyi dhwɑ̈ɑ̈ng Jwøk. Mɑ́ keløg dhɑnhø göögø e tir kì bɑng kɑ̀ mïdhe Cigg, ti bong gïjø mɑ pere ɑ́thøw yi Mesiy! 8 Wu bɑ dhëgg, wu tyëng Gɑlɑthiyɑ̀! Á men ɑ ɑ́thyëdh wun? Wu nuti rumø ki nyudhi Yëso Mesiy e ógur wïj yɑdh ɑrïw? Gïn-ɑ dwɑddɑ yodø kì yï wun bɑ kinni: Bɑ kì bɑng kɑ ɑ́mïdhu Cigg, ɑ ɑ́yïddi wun ki Wëykwërø, wɑlɑ̀ kì bɑng kɑ ɑ́yïëy wun møg-ɑ ɑ́lïngi yi wun? Wu ceg bëëdø wun ɑ́ dhëgg kidyër? Wu ɑ́cɑ̈gi kɑ wëy, wu rum kɑ dël? Gïg-ɑ ɑ́dïd yi wun cøn bɑ møg gɑ̈g? O dïdø menɑni ógɑ̈g kidï? Jwøk, keny-ɑ ɑ́mëgge wun Wëykwërø, gø ɑ́muuj yi en kɑ per kɑ̀ mïdhu Cigg, wɑlɑ̀ kipe kɑ ɑ́yïëy wun Wöndøj men-ɑ ɑ́lïngi yi wun? Nɑ kɑ ɑ́yïëëy kwøbbi Jwøk yi Abrɑhɑm, kɑ kwɑny yi Jwøk ɑ́ ngɑntir kì bɑng yïëye. Ceg wun en ki yodø ceth kinni, tyëng-ɑ ɑ́yïëy bene gen dïl kwɑrri Abrɑhɑm. Keny-ɑ ɑ́mɑ̈ɑ̈gii ki yodø yi wɑ̈nyi kwërø kinni tyëngpɑth ki Yeud ógwøg ge tir yi Jwøk kì bɑng yïëyø, ɑköbbe Wöndøj Abrɑhɑm kinni, “Dhɑnhø bëne kì kömi piny, ógyëdh yi yɑn, gyëdh kedh-ɑ́ɑ̀ rií.” Kɑ ɑ́rum bëëde kinøw, tyëng-ɑ ɑ́yïëy ógyëdh ni Abrɑhɑm ngɑn-ɑ ɑ́yïëy. Tyëng-ɑ bëëdø kì ri mïdhi Cigg keti gen, ri gen dɑ cyën bënn. Mɑ́ wɑ̈nyi kwërø okööbø kinni, “Cyënni Jwøk ying-ɑ kömi ngɑn pyem Ciggi Jwøk bënn geki pwönye.” Ceg-ɑ nënnø ɑnɑn, kinni bong ngɑn gwøg e tir yi mïdhi Cigg, mɑ́ e bɑ ɑgwed kì yij wɑ̈nyi kwërø kinni, “Ngɑn-ɑ göögø e tir kì bɑng kɑ ɑ́yïëye, bɑ en ɑ ónëënø.” De mïdhi Cigg kelli gen lɑ̈wi ki yïëyø. Mɑ́ e bɑ ɑgwed kì yij wɑ̈nyi kwërø kinni, “Ngɑn-ɑ nyi gwøg møg-ɑ kømmi yi Cigg, ónëënø kì bɑng møgɑni.” Mesiy wɑ ɑ́yiele ki cyënn-ɑ nyi kɑ̈ɑ̈l yi Cigg, kɑ ɑ́gööge ki ngeti cyën kiperee, mɑ́ wɑ̈nyi kwërø okööbø kinni, “Dhɑnhø men-ɑ ryërri kì ri yɑdh, köme dɑ cyënni Jwøk.” Møgɑni ɑ́gwøg yi Mesiy kɑ per kinni, o gyëdh møg-ɑ ɑ́mëggi Abrɑhɑm yi Jwøk, ómëggi tyëngpɑth ki Yeud, kì ri Yëso Mesiy; kipe kinni o wɑ yïddi wɑ kì bɑng yïëyø, ki Wëy-ɑ ɑ́kwøb yi Jwøk kinni gï ómuuje. Wun ɑ nyiimïɑ, wu köbbɑ’ gïjø me nyi cwöb yethi cyɑ̈ng bënn; kenyi nywɑg ji ɑ́ryew dhøggi gen kipe gïïpiny, kɑ møgɑni gweed gen piny, bong ngɑn nyi pɑ̈d lwömɑni, wɑlɑ̀ pɑ kïdhi kömi gen ki møøgø. Anɑn Jwøk ɑ́kwëng-ɑ Abrɑhɑm geki “kwɑre” de nuti kööbø kinni geki “kwɑrre” ɑ́kwøb-ɑ kwɑre ɑ́kyel kete, en ɑ Mesiy. Gïn-ɑ dwɑddɑ kwøbø bɑ kinni, Jwøk ɑ́lwööb ki Abrɑhɑm kɑ gø kwënge. O Cigg-ɑ ɑ́bï kì bɑng runn miy ɑ́ngwen kí pyɑ̈r ɑ́dɑ̈g kì bɑng lwömɑni, møg-ɑ ɑ́kwëng yi Jwøk pɑ cuggi pɑ̈dø yi gen. Mɑ́ keløg kwënggi Jwøk di kɑ̈ɑ̈l-ɑ ri Cigg, ge pɑ di cuggi bëëdø gɑ kwëng, mɑ́ Abrɑhɑm ɑ́thödh ɑ bɑng kwënggɑni yi Jwøk ki gïg-ɑ ɑ́mëggii. Keløg ɑ́ kinøw, Cigg ɑ́muuj kɑ per ngø? Ciggɑni ɑ́muuj kɑ per nyodhi bɑ̈jjø, o ɑ́dwɑddi kinni ge ówiy-ɑ keny-ɑ óbëën kwɑɑr Abrɑhɑm men-ɑ ɑ́kwøb yi Jwøk kinni óbï. Ciggɑni ɑ́thyey-ɑ yi wëywödd, kì cingi jɑl-ɑ kɑɑm; ɑ ɑ́gɑ̈mmi ciggɑni teedø. Ngɑn-ɑ kɑɑm pɑ dwɑddi kɑ̀ bëëde ɑ́ nget ɑ́kyel ɑ göögø, o Jwøk göög ɑ kete. Cigg tyëdd-ɑ ri gen ki møg-ɑ kwëng yi Jwøk? Pɑth! Ri gen pɑ tyëddi yi gen kinni tek. Mɑ́ keløg ji di mëgg-ɑ Cigg møg muujø ki nënnì, bëëntir di kɑ̈ɑ̈l-ɑ ri Ciggɑni. De wɑ̈nyi kwërø okööbø kinni, i kömi piny bëne jɑɑg-ɑ yi orøg; o gïn-ɑ ɑ́kwøb kinni ómuuj ɑ ri yïëyi Mesiy, ómëggi tyëng-ɑ óyïëyii. Kɑ̈ng-ɑ́ nuti bëën yïëyø, wɑ ɑ́mïdhi yi Cigg wɑ bɑ ɑmɑgg, pïd keny-ɑ ónyoodh yïëyø. Wɑ ɑ́jɑɑg-ɑ yi Cigg gïti keny-ɑ ɑ́bëën Mesiy, kipe kinni o wɑ göög wɑ, wɑ tir kì yï Jwøk kì bɑng yïëyø. O ɑnɑn kɑ ɑ́wɑ̈nhi bøli kej yïëyø, wɑ pɑ jɑɑg-ɑ yi Cigg këti. Bɑ kì ri yïëyø ɑ bëëd wu bɑ nyigi Jwøk kì ri Yëso Mesiy. Anɑn kɑ ɑ́rum wun ki jwɑ̈ɑ̈gø kì ri Mesiy, wu ɑ́göög ki møg rug Mesiy. Bong gïn bɑ̈ɑ̈n Yeudì ki ngɑn pɑth ki Yeudì këti; o bogïn bɑ̈ɑ̈n bɑ̈ng ki ngɑn göög wïje; o bogïn bɑ̈ɑ̈n cwøw ki mɑ̈nn; wu bɑ ɑ́kyel wu bënn, wu rëbø ki Yëso Mesiy. Keløg wu bɑ jii Mesiy, bene wun kwɑrri Abrɑhɑm, møg-ɑ óyïddi ki møg-ɑ kwëng yi Jwøk. Yɑ ceg-ɑ kwøb kinni; nyel-ɑ lɑg jɑmmì pɑ̈r ki bɑ̈ng kɑ̀ nudd e thiinh, ngö jɑmmɑni mïdhi gɑ møge. Mɑ́ e nudd e ying-ɑ cinggi tyëng-ɑ pidhii gïti bøli keny-ɑ ɑ́kømmi yi wïye. Wɑ bëëd ɑ nøw thyew, kɑ ɑ́bëëd wɑ cøn, e yïëyø miee nudd e thiinh; wɑ ɑ́bëëd wɑ bɑ bɑ̈nggi wëyi jwögg-ɑ nyi mɑlli yi teedø kì kömi piny bëne. De kɑ ɑ́bëën bøli keny-ɑ ɑ́cïb yi Jwøk, ɑöre Wɑ̈de kömi piny, e kɑ̈ɑ̈l-ɑ ri ngɑndhɑjø kipe kinni, o bëëde e ying-ɑ thɑ́ Ciggi Mosɑ̀. De møgɑni bɑ kipe kinni o tyëng-ɑ ying thɑ́ Ciggi Mosɑ̀ ódwöög gen wɑ̈g kì ri kwøbbɑni, o ge ókwɑny yi Jwøk gïn-ɑ́ nyige. Jwøk ɑ́dwɑdd-ɑ nyodhi kinni wu bɑ nyige, ɑöre Wëyi Wɑ̈de yethi pëthee, eni Wëy-ɑ nyi cwöddi kinni, “Abɑ̀! Wïyø!” Kɑ ɑ́rum bëëde kinøw, yï pɑth ki bɑ̈ng këti, de yï bɑ nyɑre. O jɑmm-ɑ nyi lɑg yi nyigi Jwøk óyod yi yïn ceth. Cøn, ɑ́dɑ bøli keny mɑ ɑ́bëëd wun Jwøk kwïj yi wun. O wu ɑ́bëëd wu bɑ bɑ̈nggi jwögg-ɑ pɑth ki dyër. De ɑnɑn, Jwøk ɑ́yod yi wun, wɑlɑ̀ wu ɑ́yod yi en; wu cigu døøg be mɑlli jwöggi piny kidï, gen ɑ jwögg-ɑ nyødh, ɑ bong per gen; wude ɑ dwɑddu døøg be gwøg ki bɑ̈nggi gen? E wu kwër-ɑ cyɑ̈ng, kí dwɑ̈tt, kí buddi run, kí run! Pyëwɑ ceg-ɑ olïng kiper wun! Gwøng-ɑ ɑ́gwøg yi yɑn kì kelli wun bɑ men gɑ̈g? Yɑ kwɑjj-ɑ wun, wun ɑ nyiimïɑ, bëëd wu nɑ yɑn, mɑ́ yɑ ɑ́rum ki gwøg ni wun. Bong gïnrɑj mɑ ɑ́göggu yɑn. O ngɑ̈nyi yi wun kinni, wun ɑ ɑ́kwøng yi yɑn ki pwönyø ki wöndøj kì bɑng kɑ ɑ́rɑ̈ɑ̈m dëlɑ. De cɑgg ɑ́ kɑ ɑ́bëëd dëlɑ rɑɑj kinøw, yɑ nuti gɑggø yi wun, wɑlɑ̀ yɑ nuti benyø yi wun; de yɑ ɑ́kwɑny yi wun, yɑ nɑ wëywöni Jwøk, wɑlɑ̀ men-ɑ́ Mesiy kiree. Wu ɑ́bëëd pëthi wun omedø! Dɑ́ ngø ɑ ɑ́cwöb? Men-ɑ́ yɑ ɑ́rum kì bøli kenyɑni, kinni nyingi wun bɑ møg di gööl wun wɑ̈g kɑ ge di mëggu yɑn, keløg ɑ́ gïn di cuggi. Yɑ ɑ́ceg-ɑ gwøg ki ngɑn mɑ̈n ki wun kipe kɑ̀ köbbɑ wun møg-ɑ dyër? Jiɑni kømm-ɑ kinni per wun teeg yi gen, de gïn-ɑ dwɑddi gwøgø yi gen pɑ døøj. Gïn-ɑ ceg yi gen ki dwɑddø, bɑ dɑ̈ɑ̈ngi wun ki yɑn, kipe kinni o per gen tënge kì yï wun. Keløg wɑ bɑ wɑdd kì yij yöö men-ɑ myër, ɑ́ kipe ngø ɑ dɑ̈ɑ̈ng wɑddee kɑ̀ bëëdɑ yɑ tøøk kì kelli wun? Yeki nyigɑ! Kiper wun, yɑ nɑ ngɑndhɑjø me ngin ledhi dhø pɑ̈dhi piny, gïti keny-ɑ óløg wun ri wun ngïjji Mesiy. Yɑ ɑ́rum kinni, yɑ ce di ying-ɑ buti wun ɑnɑn, o cwɑggɑ di wilø, mɑ́ wïjɑ ɑ́muum yi kwøbbi wun. Wiy yɑ pyëjɑ tyëng-ɑ dwɑddi bëëdø kì thɑ́ Cigg kì kelli wun: møg-ɑ kømmi yi Ciggɑni pɑ lïngi yi wun? Ciggɑni okööbø kinni i Abrɑhɑm bëëdø yïe dɑ wɑ̈dd ɑ́ryew; ɑ́kyel bɑ wɑ̈d bɑ̈ng, o ɑ́kyel bɑ wɑ̈d nyɑn-ɑ pɑth ki bɑ̈ng. De wɑ̈d bɑ̈ng nuti yood ɑ bɑng kwënggi Jwøk, dɑ́ wɑ̈d ngɑn-ɑ bɑ ɑnywøm ɑ ɑ́yod kì bɑng møg-ɑ ɑ́kwëng yi Jwøk. Kwøbbɑni bɑ gɑ́j, mɑ́ tyëng-ɑ mɑ̈nn møgɑni ryeet, cungi gɑ kɑ̈jji møg-ɑ ɑ́lwøb yi Jwøk gɑ ɑ́ryew. Kyeel gen bɑ Äjer, ɑ nyige ɑ́nywøøl yij bɑ̈ɑ̈ngø, o cungi ɑ́ kej lwöm-ɑ ɑ́lwøb kì Kïti Sinɑy. Äjer, cungi ɑ́ kej Kïti Sinɑy, en ɑ bɑ ngïji Yerusɑlem men-ɑ ying yij bɑ̈ɑ̈ngø ɑnɑn kí jie bënn. De Yerusɑlem men-ɑ ɑ́kɑ̈ɑ̈l mɑl, pɑth ki bɑ̈ng, o en ɑ bɑ meyee. Mɑ́ wɑ̈nyi kwërø okööbø kinni, “Med pyëwí, yïn ɑ ngɑn yïí bong nyigí! Ryeer ki medi pyëwí, yïn ɑ ngɑn nuti bel ledhi dhø pɑ̈dhi piny! Mɑ́ nyigi ngɑn-ɑ ɑ́wiy piny, óbëëdø ge gïïr kibøli nywøli ngɑn-ɑ nuti pɑ̈nyø wiy piny yi jɑlgøle.” Anɑn wun ɑ nyiimïɑ, wu bɑ nyigi Jwøk, møg-ɑ ɑ́nywøl kì bɑng kwëngge; wu nɑ men-ɑ́ Isɑɑk. Nɑ kɑ ɑ́bëëde cøn kinni, wɑ̈n-ɑ ɑ́yod kì ri Wëyi Jwøk, ɑ́tuug yi wɑ̈n-ɑ ɑ́yod ki yuu-ɑ nyi nywøøl ji; o bɑ mø ni møgɑni ɑ nud dicyɑ̈ngtïn. De wɑ̈nyi kwërø kööb ɑ dï? Okööbø kinni, “Ryem nyɑn-ɑ bɑ bɑ̈ng geki wɑ̈de; mɑ́ wɑ̈d bɑ̈ng pɑ cuggi lɑ̈gø ki jɑmmì kyeel ki wɑ̈d nyɑn-ɑ pɑth ki bɑ̈ng.” Kɑ ɑ́rum bëëde kinøw, wun ɑ nyiimïɑ, wɑ pɑth ki nyigi bɑ̈ng këti, de wɑ bɑ nyigi nyɑn-ɑ ɑ́ceg ki nywømø. Anɑn, wɑ ɑ́dwöög wɑ̈g kì thɑ́ Ciggi Mosɑ̀ yi Mesiy. Kɑ ɑ́rum bëëde kinøw, bëëd wun wu teeg, kɑ ri wun ko wëggu dwøøg yij bɑ̈ɑ̈ngø. Lïng wun! Yɑ Pøøl, yɑ köbb-ɑ wun kinni, keløg wu oyïëyø ki ngølø, menɑni wɑng-ɑ kinni Mesiy bong pere kì yï wun. Wu ɑ́rum ki cegø yi yɑn kinni, ngɑn-ɑ ɑ́rum ki ngølø, ceg-ɑ Ciggi Mosɑ̀ ki mïdhø bënn ceth. Tyëng-ɑ dwɑddi gwøg ge tir kì bɑng mïdhi Cigg, ge ceg-ɑ dɑ̈ngø ki Mesiy. Ge tøøk kì yij dhwɑ̈ɑ̈ng Jwøk. De keløg ɑ́ peree, wɑ ngɑ̈dh-ɑ kinni wɑ ógwøg wɑ tir yi Jwøk; ki tegi Wëyi Jwøk kì bɑng yïëyø miee. Mɑ́ kɑ̀ bëëd yï rëbø ki Yëso Mesiy, bong gïn wil yi ngølí wɑlɑ̀ cögí yï nuti ngølø; gïn-ɑ pere teg, bɑ yïëyø men-ɑ göögø kì ri mɑ̈ɑ̈dø. Bëëdi wun ɑ́bëëd e døøj! Á men ɑ ɑ́mɑ̈ɑ̈n wun gwøgi dyër? Wu ɑ́thɑb yi en ɑ dï? Kwøbbɑni nuti kɑ̈ɑ̈l-ɑ yï Jwøk, ngɑn-ɑ cwøøl wun yïe. Teedø nyii kööbø kinni, “Awɑj nyii kwödø yi nyɑ kɑmïrɑ̀ me thiinh.” Wu nudd wu ongɑ̈dhø yi yɑn ki mendwøng. Bëëdee kì ri Wë, yɑ ɑ́wëgge ngɑ̈dhi wun, o jɑl-ɑ jud wun, ócɑy yi Jwøk ceth, cɑgg e bɑ men. Wun ɑ nyiimïɑ, keløg yɑ di bëëd yɑ ópwönyø kinni ngølø pere teeg, ɑ́ kipe ngø ɑ guud wɑngɑ? Yɑ pɑ di yïddi ki orɑng thyew kì bɑng kɑ̀ pwönyɑ per yɑdh ɑrïw Mesiy. Tyëng-ɑ dhɑ̈ɑ̈l wun kipe kwøbbi ngølø, pɑ lɑ̈w keløg jɑmmi gen di ceg yi gen ki ngul wɑ̈g? Anɑn, wun ɑ nyiimïɑ, wu ɑ́cwøl yi Jwøk kɑ per kinni o wu dwöög wun wɑ̈g kì yij bɑ̈ɑ̈ngø. De dwöög wɑ̈g kì yij bɑ̈ɑ̈ngø, dhɑnhø ko løge ngɑn tyer gøggi gïg-ɑ dwɑddi yi dële, de kønyu ri wun ki yuu mɑ̈ɑ̈dø. Mɑ́ Cigg bënn thum-ɑ́ɑ̀ ri gïjø ɑ́kyel kinni, “Mɑɑr ngɑn-ɑ butí ni kɑ̀ mɑɑr rií.” De keløg wu cɑmm-ɑ ri wun ni lɑ̈yyi pɑ̈l, ri wun ceg yi wun kɑ tyëgø. De yɑ köbb-ɑ wun kinni, nyi cyɑ̈dhi wun kì bɑng Wëy. Kɑ pyëw dhɑnhø ko nyi køni ki gïg-ɑ nyi tyer yi dëël dhɑnhø. Mɑ́ gïg-ɑ nyi tyer yi dëël dhɑnhø bɑ̈ɑ̈n ki gïg-ɑ dwɑddi yi Wëy. Ge nyi tyëdd-ɑ ri gen, o menɑni wɑng-ɑ kinni wu pɑ wɑ̈dhi gwøg ki gïg-ɑ tyer yi wun. Keløg wu pyejj-ɑ yi Wëy, wu pɑ ying thɑ́ Cigg. Gïg-ɑ nyi gøggi yi dhɑnhø nyi bëëd ge ceg-ɑ nënnø kì ri yɑb ki mɑ̈nn, kí niini cwøw ri gen, kí wɑ̈dhi cyɑ̈dhø kì kɑ̈jji orøg, kí mɑlli ngïjji jwögg, kí thyëdh, kí mɑ̈ɑ̈nø, kí liny, kí tyiel, kí mɑngø yi liny, kí döngi pyëw, kí bëëdi ji ge dɑ̈ɑ̈ngø, kí mud, kí nɑ̈gø yi møgø, kí cyɑ̈ɑ̈mø, kí gøggi gïg ni møgɑni bënn. Yɑ kyëdd-ɑ wun ni kɑ ɑ́kyëddɑ wun cøn kinni, tyëng-ɑ nyi göögø kinøw, Pödhi Jwøk pɑ yod yi gen. De gïg-ɑ nyi yod yi dhɑnhø kì ri Wëy bɑ mɑ̈ɑ̈dø, kí medi pyëw, kí mër, kí ngïnø, kí tɑri yij, kí døøji burø, kí mïdhi kwøbb-ɑ ɑ́yïëy yi dhɑnhø, kí möölø geki mɑgi pyëw. O bong cigg mø kyer gïgɑni. O ji-ɑ bɑ mø Yëso Mesiy, gïg-ɑ nyi yɑb yi dëël dhɑnhø ɑ́rum ki nɑ̈gø yi gen, kyeel ki tyëëdø, kí okøn pyëw ki gen. Keløg wɑ bëëd ɑ ri Wëy, cyɑ̈dhi wɑ kì bɑng Wëyɑni ceth. Kɑ wɑ ko tɑ̈d, kɑ riee ko tyëddi wɑ, wɑlɑ̀ riee ko mod wɑ. Anɑn, wun ɑ nyiimïɑ, keløg e dɑ ngɑn bɑ̈jji kì kelli wun, tyeny yi tyëng-ɑ yï gen di wëy, de kømmu møgɑni mɑ̈ɑ̈dh. Kɑ ri wun tid wun, kipe wu óthɑb thyew. Nyi kønyu ri wun ki ɑkørr, o ciggi Mesiy mïdhi yi wun kɑ yuu-ɑ ni menɑni. Mɑ́ ngɑn rumø ce pere teeg, e pere pɑ teeg kidyër, wëny-ɑ ree kete. Nenni dhɑnhø bëëde kete. Keløg bëëdí døøj, yï ócuggø lejji rií kipe gïn-ɑ ɑ́gwøg yi yïn, de rií ko lejjí kipe gïn-ɑ ɑ́gwøg yi ngɑn megø. Mɑ́ wɑ bënn, ngɑn yïe dɑ gïn peg me tyëdde. Tyëng-ɑ ceg ki pwönyø ki kwøbbi Jwøk, nywɑg gen jɑmm-ɑ døøj kì yï gen bënn ki jøpwönyi gen. Ri wun ko nyi wëny wun, mɑ́ Jwøk pɑ cuggi wënyø. Ji ókɑj-ɑ gïg-ɑ ɑ́kɑ̈g yi gen ceth. Keløg ge kɑ̈g-ɑ yij pwödhi gïg-ɑ tyer yi dëlli gen, bɑ thøø ɑ ókɑj yi gen kì yij pwönhɑni; keløg ge kɑ̈g-ɑ yij pwödhi Wëy, ge ókɑ̈jø kì ri Wëyɑni ki nënn-ɑ ɑtheer. Wɑ ko pïd yi gwøg ki gïgdøj, mɑ́ keløg wɑ pɑ pïd, bøli keny-ɑ ókɑj wɑ gïgɑni óbï ceth. O keløg wɑ óyïddø ki keny göög wɑ, göggi wɑ ji bënn ki gïgdøj, ɑ́ nyiimïee møg-ɑ ɑ́yïëy ɑ kwøng ki göggø. Lidhu møg-ɑ gwëdɑ wun ek, ngëddi gen døngø! Tyëng-ɑ dwɑddi wun cïrri ngølø, bɑ tyëng-ɑ dwɑddi lejji rek kipe gïg-ɑ nënni kì ri dëël dhɑnhø. Gïgɑni gøggi yi gen kɑ per kinni o ge ócög nyingi gen pɑ guud kipe yɑdh ɑrïw mi Mesiy. Cɑgg ɑ́ tyëng-ɑ bɑ ɑngøl, Cigg pɑ mïdhi yi gen, de ge dwɑdd-ɑ kinni o wu ngøl kipe kinni o ri gen lejji gen kipe dëlli wun. De riɑ ólejjɑ kɑ per yɑdh ɑrïw Wë Yëso Mesiy kete; mɑ́ kì bɑng kɑ ɑ́gurii wïj yɑdh ɑrïw, kömi piny ɑ́göög e ógur wïj yɑdh kì yïɑ, kɑ yɑ ogöögø yɑ ógur wïj yɑdh kì yï kömi piny. Bong gïn wɑngi yi bëëdi dhɑnhø e bɑ ɑngøl wɑlɑ̀ nuti ngølø, gïn-ɑ pere teg bɑ bëëde e nɑ ngɑn-ɑ ócwɑ̈jø e nyɑ̈n. Wiy tyëng-ɑ mïdhi ciggɑni kì yij bëëdi gen, yïddi gen ki mër geki lɑ̈mpyëw kyeel ki jii Jwøk bënn. Ko di ngɑn jud yɑn këti, mɑ́ kedd-ɑ ɑ́rɑngɑ kiper Yëso nudd ge ónënnø kì dëlɑ. Wun ɑ nyiimïɑ, wiy dhwɑ̈ɑ̈ng Wë Yëso Mesiy, yinge kömi wun, wu bënn. Amen. Wɑ̈nyø men kɑ̈ɑ̈l-ɑ yï Pøøl, ngeti Wööni Yëso Mesiy kì bɑng kɑ ɑ́dwɑddii yi Jwøk. E gwëd-ɑ jii Jwøk kì Epɑsos, møg-ɑ mïdhi yïëyø mi gen, ge bɑ ɑ́kyel kì ri Yëso Mesiy. Wiy wu ónëngi ki dhwɑ̈ng geki mër yi Jwøk Wïyee geki Wë Yëso Mesiy. Lenhi wɑ Jwøk Wïyi Wë Yëso Mesiy! Mɑ́ wɑ ɑ́thödhe ki dhwɑ̈ng-ɑ nyi muuj yi wëy e kɑ̈ɑ̈l-ɑ mɑl, kì bɑng bëëdee wɑ rëbø ki Mesiy. De kwøbbɑni kɑ̈ɑ̈l-ɑ bɑng kɑ ɑ́yieeny wɑ yi en kɑ̈ng-ɑ́ nuti cwɑ̈ɑ̈j piny kipe kinni, o wɑ óbëëd wɑ bɑ ɑkwër kì ri nyingi Mesiy, o óbëëd e bong gïn-ɑ ócɑ̈yyi wɑ yi en. De møgɑni ɑ́gwøg yi en ɑ bɑng kɑ̀ mɑɑre wɑ. Mɑ́ e ɑ́rum ki cïbø yi Jwøk ceth kinni, wɑ óløge nyige kì ri Yëso Mesiy; o bɑ gïn-ɑ ɑ́dwɑdde gwøgø ki medi pyëwe. Lenhi wɑ Jwøk kipe dhwɑ̈nge, dhwɑ̈ng-ɑ dwøng men-ɑ ɑ́mëgge wɑ kì ri Wɑ̈de ɑ́mɑɑre. Mɑ́ wɑ ɑ́gööny wɑ̈g yi remi Mesiy, bɑ kinni orøgee ɑ́lɑ̈ɑ̈ny. Dhwɑ̈ɑ̈ng Jwøk pëddi döng; eni dhwɑ̈ng-ɑ ɑ́kønye kömee! Kì bɑng peli wïj geki ngɑ̈nyi kwøb bënn, møg-ɑ dwɑdde ɑ́gwøge, kɑ wɑ nyudhe gïg-ɑ ɑ́gwire gɑ møg-ɑ ógwøg kì ri Mesiy. Gïg-ɑ ɑ́gwir yi Jwøk gɑ møg-ɑ ógwøg kì bøli kɑ̈jji gen, bɑ møg-ɑ óreb gïg-ɑ ɑ́cwɑ̈j bënn, kì mɑl kí piny kej ɑ́kyel, ɑ́ Mesiy ɑ bɑ wïj. Jɑmmì bënn nyi gwøg kɑ yuu-ɑ ɑ́gwiir gen yi Jwøk, o wɑ ɑ́rum ki myegø yi Jwøk wɑ ɑ́ jie kì ri Mesiy, e ködd-ɑ kömi gïn-ɑ ɑ́dwɑdde gwøgø ceth. Lejji wɑ dönge, wɑ tyëng-ɑ ɑ́kwöngi ki ngɑ̈dhi gïn-ɑ óyod kì ri Mesiy, lenhi wɑ döngi Jwøk! Wun thyew, wu ɑ́göög ki jii Jwøk, keny-ɑ ɑ́lïngi wun wöön-ɑ dyër, en ɑ Wöndøj men-ɑ ɑ́kɑ̈ɑ̈l yieli wun. Mesiy ɑ́yïëy yi wun, kɑ Jwøk ngïji men-ɑ nyodh kinni wu bɑ møge, thɑɑnye kömi wun, kɑ ɑ́mëgge wun Wëykwërø, ni kɑ ɑ́kööbe ceth. Wëykwërø en ɑ bɑ nyuudhi kinni, møg-ɑ ɑ́kwëng yi Jwøk kipe jie bɑ møg-ɑ óyod yi wɑ kì yïe ceth. Menɑni bɑ kinni Jwøk jie ówëgge tɑ̈bbø. Lenhi wɑ dönge! Kɑ Jwøk pwøjɑ kipe kɑ ɑ́lïngɑ kinni Wë Yëso yïëëy wun; o nyiimïee, jii Mesiy mɑɑr yi wun. Yɑ nuti wïyø pøjji Jwøk kiper wun, wu nyii pɑrrø yi yɑn ceth kenyi kwɑ̈jjɑ, kɑ Jwøøg Wë Yëso Mesiy, Wïy ɑ yïe di mɑ̈r, nyi kwɑjjɑ kinni nënge wun ki Wëy, men-ɑ ónëngi wun ki peli wïj, o Jwøk nyudhe wun, o óbëëde e ngɑ̈nyi yi wun kidøøj. Yɑ kwɑjj-ɑ kinni yiebe wɑ̈thi wun, o cɑre lidh yi wun, o ngɑ̈ɑ̈dhø men-ɑ́ pere ɑ́cölle wun yod yi wun. O óyod yi wun thyew kinni, gïg-ɑ ɑ́kwøbe kinni gï ómëgge jie bɑ gïg mø døngø. Kí kinni, tege men-ɑ göögø kì riee dwøng, wɑ tyëng-ɑ ɑ́yïëy. Teng-ɑ göögø kì riee dwøng nɑ teng-ɑ ɑ́gööge keny-ɑ ɑ́tuge Mesiy kì yij thøø, kɑ gø cïbe wïj kyëje kì mɑl. Kɑ Mesiy óyïddø ki tegø kì kömi jyɑ̈ggì bënn, kí dhɑnhø bëne, kí wëy bënn, kí lɑ̈gø bëne. Kɑ nyinge kedh-ɑ mɑl kibøli nying bënn, kì kömi piny men, geki men-ɑ óbï thyew. Kɑ jɑmmì bënn cïb thɑ́ tyelli Mesiy yi Jwøk, kɑ gø cïbe kömi jɑmmì bënn, ɑ́ wïj kɑnïsɑ̀, ɑ bɑ dëël Mesiy ki këre bëne, eni ngɑn-ɑ nyi muuj jɑmmì bënn. Kì tyeli mɑl cøn, wu ɑ́bëëd tïbbi wun thøø kì bɑng kɑ ɑ́bëëd wu ying-ɑ yij orøg. Wu ɑ́cyɑ̈dh ɑ bɑng jɑmmi kömi piny kì bøli kenyɑni; wu ɑ́lug ɑ bɑng jɑngi wëyrijjø, wëy-ɑ göögø ɑnɑn kì kelli tyëng-ɑ nudd ge opëmø. Wɑ ɑ́bëëd wɑ nɑ jiɑni, wɑ bënn, o wɑ ɑ́bëëd wɑ jɑɑg-ɑ yi dëllee, wɑ nyi gwøg-ɑ gïg-ɑ tyer yi dëllee. Kɑ pëthee nyii kønø ki jɑmmi kömi piny, o wɑ di cɑy yi Jwøk kì ri thumi piny ni ji-ɑ kyeelø bënn. De Jwøk ɑ lɑ̈mpyëwe bong cöge, o mɑ̈ɑ̈dø mee pɑ nyi lwënyi, wɑ ɑ́thödhe ki nënnì kì ri Mesiy, ngö wɑ ɑ́bëëd tïbbee thøø. Wu ɑ́yiel kɑ dhwɑ̈ɑ̈ng Jwøk. Kì bɑng rëbee ki Yëso Mesiy, wɑ ɑ́kïdhe mɑl, o wɑ jyɑ̈ɑ̈g wɑ kyeel ki en kì mɑl. Møgɑni ɑ́gwøg yi en kɑ per kinni, o döngi dhwɑ̈nge geki mɑ̈ɑ̈dø mee kì ri Yëso Mesiy, lidh yi rïjj-ɑ óbï. Wu ɑ́yiel kɑ dhwɑ̈ɑ̈ng Jwøk, kì bɑng yïëyø, de pɑth ki bɑng gwøg, o bongii ngɑn lejji ree. Wɑ ɑ́gwøg yi Jwøk wɑ nɑ kɑ̀ nënni wɑ ɑnɑn, kɑ wɑ thödhe ki bëëdø me nyɑ̈n kì ri Yëso Mesiy kipe gwøngdøj men-ɑ ɑ́pyël yi en ɑ́ men gwøg yi wɑ. Wu tyëng-ɑ ɑ́nywøl wu pɑth ki Yeud; wu cwølli wun ɑ́ “tyëng-ɑ nuti ngølø” (men nyodh gïn-ɑ gwøg yi ji kì dëlli gen); pɑrri wun kër-ɑ ɑ́bëëd wun cøn. Wu ɑ́bëëd wu lɑ̈wi ki Mesiy, kì bøli kenyɑni. Wu ɑ́bëëd wu bɑ tyëngpɑth; wu tøøk kì kelli ji-ɑ ɑ́yieny yi Jwøk. Ábëëd e bong kej wun kì yij lwöbø, men-ɑ ɑ́bï kì bɑng kwënggi Jwøk møg-ɑ ɑ́köbbe jie, o wu ɑ́bëëd kì kömi piny men e bong gïn ngɑ̈dh yi wun, o yï wun bong Jwøk. De kɑ ɑ́rëbi wun ki Yëso Mesiy, wu tyëng-ɑ ɑ́bëëd wu lɑ̈wi, wu ɑ́nyïïg yi remi Mesiy. Mɑ́ Mesiy kiree ɑ ɑ́thödhi wɑ ki mër, kì bɑng kɑ ɑ́gwøge Yeud kí tyëngpɑth ki Yeud, gɑ ji ɑ́kyel; kɑ dör-ɑ ɑ́dɑ̈ɑ̈ng gen cøøre piny. Ciggi Mosɑ̀ ɑ́cuunge kí kwööng gen, kipe kinni o ɑkuddɑni ryeet rebe ree, o ge göög gen ki ji ɑ́kyel, o bëëde e dɑ mër kì kɑɑm gen. O gï rebe ki Jwøk kì ri thøwe kì wïj yɑdh ɑrïw, kɑ gï gwøge gɑ dhɑnhø ɑ́kyel. Mesiy ɑ́bï, kɑ Wöndøj mi mër pwönye ji bënn – wu ɑ́pwönye wu tyëng-ɑ pɑth ki Yeud, ngö wu ɑ́bëëd wu lɑ̈wi ki Jwøk, kɑ Yeud tyëng-ɑ ɑ́bëëd ge cyɑ̈gi ki Jwøk pwönye thyew. Bɑ ri Mesiy ɑ rëbi yi wɑ kì yij wëy ɑ́kyel, Yeud kí tyëng-ɑ pɑth ki Yeud, wɑ ɑ́rëbi kì yij wëy ɑ́kyel kì bøli Wïy. Kɑ ɑ́rum bëëde kinøw, wu pɑth ki tyëngpɑth këti, wɑlɑ̀ wu pɑth ki wëdhh. De wu bɑ jii Jwøk, ni Yeud ceth. Wun thyew, wu ógeer-ɑ kömi tyeli ød men-ɑ ɑ́cïb yi tyëngwöödø, o kïn-ɑ mïdhi ønɑni bɑ Yëso Mesiy kiree. En ɑ mïdhi ønɑni ree mɑɑg en kidøøj, gø løge’ kengi kwër, men thyëyi Wë. Kɑ̀ rëbi wun kì ree thyew, wu ógeer-ɑ kej ɑ́kyel ki tyëng-ɑ kyeelø, wun ɑ́ keny bëëd yi Jwøk kì ri Wëye. Bɑ kiper møgɑni ɑ kwɑjjɑ Jwøk, yɑ Pøøl; yɑ bɑ ɑmɑɑg Yëso Mesiy kiper wun, wu tyëng-ɑ pɑth ki Yeud. Wu ɑ́rum ki lïngø ki kwøbbi dhwɑ̈ɑ̈ng Jwøk, men-ɑ ɑ́mëgge yɑn ɑ́ men göögɑ kiper wun. Møg-ɑ ɑ́gwir gɑ ɑkɑnn yi Jwøk, gï ɑ́nyudhe yɑn. (Yɑ ɑ́gwëëd ki kwøb mø nøg kì ri møgɑni, o keny-ɑ órɑng wun møg-ɑ ɑ́gwed yi yɑn, gïg-ɑ ɑ́dïd yi yɑn kì ri møg-ɑ ɑkɑnn kì ri Mesiy, óyod yi wun.) Ji ɑ́bëëd ge nuti nyudhi ɑkɑnn møgɑni cøn, de ge ɑ́yɑl yi Jwøk ɑnɑn kì ri Wëy, kɑ gï nyudhe tyëngwöödø geki jøtöng møge, gen ɑ tyëng kwërø. Kwøbb-ɑ ɑkɑnn møgɑni bɑ kinni, tyëngpɑth ki Yeud ɑ́yïddi kì ri kwëngg-ɑ ɑ́köbbi Yeud yi Jwøk, kì bɑng wöndøj; o ge ying-ɑ ri dël ɑ́kyel, ge nywɑg-ɑ kwënggi Jwøk, kì ri Yëso Mesiy. Yɑ ɑ́gwøg yɑn ɑ́ ngɑn pwönyi Wöndøj, ki tegø men-ɑ ɑ́mëggi yɑn yi Jwøk. Cɑgg ɑ́ kɑ̀ yingɑ cyɑ̈n kibøli jii Jwøk bënn; yɑ ɑ́nëngi yi Jwøk ki dhwɑ̈ng kipe kinni, o tyëngpɑth ki Yeud pwönyi yi yɑn ki kwøbbi kɑ̈ɑ̈r Mesiy; kɑ̈r-ɑ bong cöge, o ji bënn nyudhɑ møg-ɑ ɑ́gwir gɑ ɑkɑnn yi Jwøk, kí kër-ɑ ógwøøg møgɑni; o møg-ɑ ɑ́gwire ki peli wïje yod kì yï kɑnïsɑ̀, kì bøli keny-ɑ di wɑ ɑnɑn, yi jyɑ̈ggi wëywödd møg-ɑ mɑl geki wëy-ɑ yï gen di tegø. Møgɑni ɑ́gwøg yi Jwøk e ködd-ɑ kömi møg-ɑ ɑ́gwire gɑ møg gïti ɑtheer, ɑ ɑ́pɑ̈dhi kɑ̈jji gen kì ri Wë Yëso Mesiy, Kɑ̀ yïëy wɑ ngɑ̈dhi Mesiy, ngëddee ceg-ɑ tëngø, kɑ wɑ kedh-ɑ bøli Jwøk e pëthee pɑ lïngø. Yɑ kwɑjj-ɑ wun kinni, pëthi wun ko nyönhi kì bɑng kɑ̀ rɑngɑ kiper wun; mɑ́ møgɑni bënn bɑ kipe dönyi wun. Bene ɑ bɑnge rumɑ cøngɑ piny, yɑ mɑll-ɑ Wïyee, mɑ́ nying-ɑ cwølli kɑ̈llì bënn kì mɑl kí piny, kɑ̈ɑ̈l-ɑ yïe. Yɑ kwɑjj-ɑ Jwøk ngɑn-ɑ yïe di mɑ̈r, o wu nënge kì ri Wëy; ki tegø men tëngi pëthi wun. O yɑ kwɑjj-ɑ kinni, o Mesiy bëëde kì pëthi wun kì bɑng yïëyø mi wun. O yɑ ókwɑ̈jjø kipe kinni o byerri wun niyeeng gen piny kì yij mɑ̈ɑ̈dø, o wu yïddi wun, wuki jii Jwøk bënn, ki tegø men yod wun këër lɑ̈j geki bɑ̈r, kí dörø geki ludhi mɑ̈ɑ̈dø mi Mesiy. Ngee, bëëdi mɑ̈ɑ̈dø mi Mesiy óyod yi wun – cɑgg e pɑ cuggi yodø bëne – codhe, o wu pɑ̈ng wun yi ngɑ̈nyi këër bëëdi Jwøk. Lenhi wɑ Jwøk, ɑ bogïn dhɑlii; ngɑn-ɑ tegø mee göögø kì riee, o gööge ki gïg mø ngenyø kibøli møg-ɑ ɑ́cwøl yi wɑ, wɑlɑ̀ mø pɑ cuggi kɑ̈ɑ̈lø yi wɑ̈thee. Lenhi wɑ Jwøk kì kɑnïsɑ̀, kì ri Yëso Mesiy, kì yethi rïjj bënn, gïti ɑtheer! Amen. Kɑ ɑ́rum bëëde kinøw, yɑ kwɑjj-ɑ wun – yɑ ngɑn-ɑ bɑ ɑmɑg kipe Wë: bëëd wun ki bëëdø me kyëëw ki cwøl-ɑ ɑ́cwøøl wun yi Jwøk. Nyi bëëd wun, wun ɑ́ mööl, e bong dhɑ̈w kì pëthi wun. Nyi ngïïn wun, kɑ wu nyi guum wun ki kwøb kì bɑng mɑ̈ɑ̈dø men-ɑ nyi kɑ̈ɑ̈l yï Jwøk. Nyi tyeru bëëdø kì kej ɑ́kyel ki mër, mɑ́ kwøbbɑni kɑ̈ɑ̈l-ɑ ri Wëy. Wu bɑ dëël dhɑnhø ɑ́kyel; kí Wëy ɑ́kyel, ni kɑ̀ bëëd gïn ngɑ̈dh men-ɑ́ pere ɑ́cölli wun yi Jwøk bɑ ɑ́kyel. O Wïi wun bɑ ɑ́kyel, kí yïëyø ɑ́kyel, kí jwɑ̈ɑ̈gø ɑ́kyel. Kí Jwøk ɑ́kyel, en ɑ Wïyee bënn, ngɑn-ɑ rïïm piny bëne, ɑ göögø kì ri jɑmmì bënn, o nud kì yethi jɑmmì bënn. Wɑ ɑ́yïddi, wɑ bënn ki dhwɑ̈ng; ngɑn ɑ́mëgg-ɑ men-ɑ kyëëw ki en yi Mesiy. Ni møg-ɑ kømmi yi wɑ̈nyi kwërø kinni, “Keny-ɑ ɑ́kedhe yij mɑl kun lɑ̈wi, ɑ́kɑ̈ɑ̈d ki ɑmɑggi liny mø ngenyø; kɑ teedø thödhe ki jɑmmì mø gïïr.” Kɑ̀ kwøbii kinni, “ɑ́kedhi mɑl” wɑng-ɑ ngø? Wɑng-ɑ kinni ɑ́ceg-ɑ kwöngø ki kedhi piny thɑ lɑ̈bø. Bɑ ngɑn-ɑ ɑ́bï piny, ɑ ɑ́kedhi mɑl, kɑ mɑl pöödhe, o lɑ̈bø bëne bëëde e pɑ̈ngø yi en. En ɑ nyi muujø; kɑ kwï ji gwøge gɑ tyëngwöödø; kɑ møøgø gwøge gɑ jøtöng; møøgø bɑ tyëng kwøbbi Jwøk; o møøgø bɑ ókwër; møøgø bɑ jøpwönyø. Møgɑni ɑ́gwøg yi en kɑ per gwiri jii Jwøk bënn kipe göggi jii Mesiy, kipe geri dëël Mesiy. O wɑ rëbi wɑ bënn kì yij yïëyø miee, geki dïdee Wɑ̈d Jwøk, göög wɑ ki tyëngdøngø, kɑ wɑ bɑ̈ri wɑ, o wɑ̈thee pɑ̈ɑ̈r gen ki wïj Mesiy. Codhe, o wɑ bëëd wɑ pɑth ki othønhø mø wɑ̈dhi ki wøjjø yi ɑpɑgø, kɑ ge nyi køøl kun kí kun yi yømi pwönyi tyëngwëënyø, møg-ɑ nyi peej tyëng-ɑ kyeelø pɑ̈l ki pel. De bëëd wɑ, wɑ kømm-ɑ dyër kì ri mɑ̈ɑ̈dø. O kɑnïsɑ̀ kedhe e ódøngø ni kenyi døngi dhɑnhø, mɑ́ kɑnïsɑ̀ pɑ̈r ki dëël dhɑnhø, dɑ́ Mesiy ɑ bɑ wïj. Kɑ̀ jɑɑge dël bëne, bɑ en ɑ mïdhi gïg-ɑ ri dëlɑni gɑ ɑ́kyel ki nyingi cu. Gïjø ɑ́kyel kɑ̀ gööge kidøøj, bɑ dël bëne ɑ døngi, e ger kɑ mɑ̈ɑ̈dø. O yɑ köbb-ɑ wun ki nyingi Wë kinni, wu ko ngöyi këti ki bëëdi tyëng-ɑ kwïj Jwøk, ɑ rømmi gïg bong per gen, ge ying-ɑ yij muudhø. De kɑ̀ bëëd gen ge kwïj wøw kinøw, ge lɑ̈wi ki yuu Jwøk, mɑ́ ge kwïj wøw, o muddi gen teeg. Dëlli gen pɑ nyi ì ywɑ̈y, o wɑ̈thi gen pɑ nyi lɑ̈ɑ̈y. Kɑ ge ogöögø ki ji mø mɑɑr gwøg ki orøg geki gïgrijjø bënn. Møgɑni pɑth ki gen ɑ ɑ́dïd yi wun kì ri Mesiy. Kwøbbi Mesiy nuti lïngø yi wun? Wu nuti pwönyø ki kwøbb-ɑ dyër kì ri Mesiy? Adɑ́ wiy wun bëëdø mi tyeli mɑl, eni bëëdø men-ɑ ɑ́wëggi wun rënyø yi wëënyø geki gïg-ɑ tyer yi pëëth. Gwøg wun minni wun geki pëthi wun gɑ møg nyɑ̈n, kɑ wu kwɑny wun dël-ɑ nyɑ̈n, eni dël-ɑ ɑ́cwɑ̈j ɑ́ ngïji Jwøk, men-ɑ nyodh ree kì ri bëëntir kí bëëdi tyëng kwërø. Bong pyed këti cyee! Nyi kømmu dyër ki ri wun, mɑ́ wu bɑ ɑ́kyel kì ri dëël Mesiy. Keløg yï omɑgø yi liny, rií ko wëggi peej yij orøg yi linyɑni, kɑ cɑ̈ng ko tyëëg pyëwí rɑɑj. Cethɑn ko thödhí ki kej wɑng. Tyëng-ɑ ɑ́bëëd ge okwɑ̈dø, wiy gen kwɑl, kɑ ge göög gen ki cinggi gen, o ge ócuggi gen ki kønyi tyëng-ɑ jɑdø. Yï ko nyi kööb ki kwøb mø ledh, de nyi kømmí kwøb mø med; kwøbb-ɑ kunyi ki tyëny, o tyëng-ɑ lïngi kwøbbɑni óyïddi gen ki døøjø. Pyëw Wëyi Jwøk kwërø ko wëggu rënyø; mɑ́ Wëyɑni ɑ ɑ́thɑɑny kömi wun ɑ́ ngïji men nyodh kinni wu bɑ mø Jwøk, o bɑ en ɑ bɑnge óyieel wun, obëën Cyɑ̈ngɑni. Wiyu keji pëëth, kí wëërø, kí yɑ̈d. Wu ko nyi kööb wu óryeerø kɑ ri wun ko nyi jɑnggi wun. De bëëd wun ki tɑri pëëth, kí möölø, kɑ pëthi wun nyi lɑ̈ɑ̈m gen ki ri wun, ni kɑ ɑ́lɑ̈ɑ̈m pyëw Jwøk ki wun kì ri Mesiy. Kɑ̀ bëëd wun, wun ɑ́ nyigi Jwøk møg-ɑ mɑɑr yi en, pɑ̈nyu ri wun ki bëëdø wu nɑ en. Nyi bëëd wun kì yij yuu mɑ̈ɑ̈dø thyew, ni kɑ ɑ́mɑɑr wɑ yi Mesiy, kɑ ree muuje kiperee, ɑ́ gëëdhi me yømi tole med, men mïni pyëw Jwøk. Mɑ́ wu bɑ jii Jwøk, kwøbbi yɑb ki mɑ̈nn, kí gwøg ki gïgrijjø geki döngi pyëw ko pɑ̈nyi ki lïngø kì kelli wun. O wu pɑ myëër ki kømmi møg-ɑ nyi kɑ̈ɑ̈l lɑ̈ɑ̈yi wɑ̈ɑ̈th, kí kwøbbi dhëëgø geki ɑthwøg. De nyi bëëd wun wu pøjj-ɑ Jwøk. Bëëd wu ngɑ̈ny wøw kinni, tyëng-ɑ nyi niin ngɑn nuti nywøøm gen ri gen; kí tyëng-ɑ nyi gøggi gïgrijjø; kí tyëng-ɑ pëthi gen døngø; ge koo yïddi ki kɑ̈jji gen kì pödhi Mesiy geki Jwøk. Ri wun ko wëggu wënyø ki kwøbb-ɑ pɑth ki dyër, mɑ́ pyëw Jwøk nyii rënyø ki tyëngpëëmø. Wu ko nyi rëbi ki ji-ɑ ni møgɑni. Wun kiri wun, wu ɑ́bëëd ɑ yij muudhø, de kɑ ɑ́göög wun ki jii Wë, wu ying-ɑ yij cɑr. Kɑ wu bëëd wun cyee ki bëëdi jii cɑr. Mɑ́ cɑr nyi nywøl-ɑ døøjø kí bëëntir, kí dyër. Dïd wun ki gøggi gïg-ɑ nyi mïni pyëw Wë. De wu ko nyi yïëy ki gwøg ki gïgrijjø møg-ɑ gøggi yi teedø kì yij muudhø, de nyi kɑ̈ɑ̈lu gïgɑni yij cɑr. Gïg-ɑ nyi gwøg kì yij muudhø wɑ̈ɑ̈th nyii lɑ̈ɑ̈yø yi gen; cɑgg ɑ́ ngɑn kwøb gen, wïje nyi ceg-ɑ lɑ̈ɑ̈yø. Keny-ɑ órum jɑmmì bënn ki kɑ̈ɑ̈l yij cɑr, këër bëëdi gen ceg-ɑ nënnø; mɑ́ gïn-ɑ bɑ ɑnyodh, kɑ ónënnø nyi ceg-ɑ gwøg ki cɑr. Bene ɑ bɑnge ɑ́kwøbii kì yethi wör møøgø kinni, “Dhwödhí mɑl, yï ngɑn-ɑ nin, dhwöödh kì yij thøø, o Mesiy mëënye kì kömí.” Gwiru wɑ̈thi wun ki kër-ɑ bëëd wun. Wu ko bëëd ni ji mø kwïj wøw, de bëëd wun wɑ̈thi wun pel. Ko di gïndøj men wëggu bodhø, mɑ́ rɑj gïïr yethi cyɑ̈ng møg. Wu ko bëëd wɑ̈thi wun nøg, de nyi yɑbu yodi gïg-ɑ dwɑddi yi Jwøk. Ri wun ko nyi wëggu nɑ̈gø yi møgø, mɑ́ wu órënyi yi en; de pɑ̈ng wun yi Wëy. Nyi kööb wun wu pɑrr-ɑ kwøbb-ɑ yethi wör, kɑ wu nyi wör wun, wu lenh-ɑ Jwøk ki wörri pwøj ki pëthi wun bënn. Nyi pwøj wun Wïy Jwøk kipe jɑmmì bënn, ki nyingi Wë Yëso Mesiy. Nyi lïngu dhøggi wun; kipe kɑ̀ wør wun Mesiy. Wun ɑ tyëng-ɑ mɑ̈nn, nyi yïëyu jɑɑgø yi cwøwi wun ni kɑ̀ jɑɑg wun yi Wë. Mɑ́ jɑlø yïe dɑ tegø kì kömi cyëge ni kɑ̀ bëëd Mesiy yïe dɑ tegø kì kömi kɑnïsɑ̀; o Mesiy bene ɑ bɑ yïëni kɑnïsɑ̀, ɑ løg dële. Jɑɑg tyëng-ɑ mɑ̈nn yi cwøwi gen, ni kɑ̀ jɑɑg kɑnïsɑ̀ yi Mesiy ceth. Wun ɑ jøg-ɑ cwøw, mɑɑr wun mɑ̈nni wun, ni kɑ̀ mɑɑr kɑnïsɑ̀ yi Mesiy, kɑ wëye muuje kipere, kipe kinni o kɑnïsɑ̀ thyëye Jwøk ki kwøbbe, keny-ɑ órume lwøgø ki pï; o kɑnïsɑ̀ óthyëyye ree e myëër, o dhïw e bong gïn gwɑ̈ɑ̈d kì ree, o ree bong jweng, o bong keny me rɑɑj kì ree. Jøg-ɑ cwøw, mɑɑr gen mɑ̈nni gen, ni kɑ̀ mɑɑr gen dëlli gen ceth. Jɑl-ɑ mɑɑr cyëge, ree omɑɑrø yi en thyew. (Mɑ́ bong ngɑn mɑɑn dële, de gø nyi korre’ korrø ceth, ni kɑ̀ korri kɑnïsɑ̀ yi Mesiy, mɑ́ wɑ bɑ gïg ying ri dële.) Bene ɑ bɑnge nyi wiy jɑlø wïye geki meye, kɑ ómɑ̈gø kì ri cyëge, kɑ ge ogöögø ki dhɑnhø ɑ́kyel. Men bɑ gïjø me pere teg men-ɑ ɑ́bëëd e nuti nyodhø cøn; yɑ kømm-ɑ bëëdi Mesiy geki kɑnïsɑ̀. Wu bënn, mɑɑr dhɑnhø cyëge ni kɑ̀ mɑɑre ree, kɑ ngɑndhɑjø wøre jɑlgøle. Othønhø, lïngu kwøbbi wëëg wun geki mëëg wun, mɑ́ menɑni bene gïn-ɑ døj ki gwøgø yi tyëng-ɑ cyɑ̈dhi kì bɑng Wë. “Wør wïyí kí meyí” bene cigg-ɑ bɑng gen di kwëng; “o yï óyïddí ki døøjø, o runní óngënyi gen kì yij piny.” Wun ɑ wëëg kí mëëg, nyigi wun ko nyi göggi wun ki gïg rënyi pëthi gen. De pidhu gen ge opwönyø yi wun ki ciggi Wë geki bëëndøj. Wun ɑ bɑ̈ngg, nyi lïngu kwøbbi tyëng-ɑ cinggi gen bëëd yi wun kì kömi piny. Wør wun gen ki mendwøng ni kenyi wør wun Mesiy. Nyi göög wun ceth cɑgg wu pɑ nenni yi gen, mɑ́ wu pɑ göögø kɑ per kinni o wu ópøjji yi gen, de gwøg wun gïn-ɑ dwɑddi yi Jwøk ki medi pëthi wun, mɑ́ wu bɑ bɑ̈nggi Mesiy. Göög wun pëthi wun omedø, wu ce gögg-ɑ Wë, de pɑth ki ji yøw. Bëëd wu ngɑ̈ny wøw kinni, ji bënn ókøøg yi Jwøk kipe gwøngdøj, cɑgg ge bɑ bɑ̈ngg wɑlɑ̀ ge bëëd-ɑ wɑ̈thi gen. Wu tyëng-ɑ yï wun di bɑ̈ngg, mïdhu bɑ̈nggi wun ki bëëndøj, kɑ ge ko nyi cɑ̈rri wun. Kɑ wu bëëd wu ngɑ̈ny wøw ceth kinni Wïi wun ki gen bɑ ɑ́kyel kì mɑl; ji pɑ̈r kì yïe, o bong ngɑn geny yi en. Møg-ɑ kwøb yi yɑn kì cyɑ̈n bɑ kinni, cwed wun pëthi wun, kɑ wu ngɑ̈dhu tegi Wë. Løny wun ɑ́dhedheg men-ɑ ɑ́mëggi wun yi Jwøk ri wun, o wu ócuggi wun ki cung kì bøli wëënyø mi Ngɑnrɑj. Mɑ́ wɑ pɑ nyïɑ̈ggi kɑ ji mø ri gen di dël kí remø, de wɑ nyïɑ̈ggi kɑ wëyi lɑ̈bø bëne; gen ɑ jɑgg, kí wëy-ɑ yï gen di tegø, kí wëyrijjø. De løny wun ɑ́dhedheg Jwøk! Kipe kinni o wu ócungi wun kì kɑ̈jji wun obëën cyɑ̈ɑ̈ng rɑj; o wu ópëggu kɑ̈jji wun, keny-ɑ órum liny ki nyɑgø. Kɑ wu cungi wun kì kɑ̈jji wun, yethi wun dɑ wëni dyër, e köddi wun bɑ bëëntir, o wɑrri wun bɑ Wöndøj mi mër. Kɑ yïëyø mi wun nyi kɑ̈llu ceth ɑ́ kwöd, mɑ́ en ɑ ókëëj wun nywøli weth mø Ngɑnrɑj, møg-ɑ dhøggi gen di mɑc. Kɑ kwøbbi yielø cïb wun wɑ̈thi wun ɑ́ ɑcudh, kɑ kwøbbi Jwøk kwɑny wun gɑ pilø men-ɑ mëggi wun yi Wëy. Nyi gwøg wun møgɑni bënn wu ókwɑ̈jjø kipe kunyi Jwøk. Nyi kwɑ̈jji wun kì bøli kɑ̈jj bënn, wu pyejj-ɑ yi Wëy. Bëëd wun ri wun tyeeny wun ceth, kɑ köthi wun ko buudh; kɑ wu nyi kwɑ̈jji wun ceth kipe jii Jwøk. Nyi kwɑjji wun Jwøk kiperɑ thyew, kipe kinni o yɑ nyi nënge ki wöödø kenyi kømmɑ kwøb; o yɑ ókööbɑ yɑ pɑ böggi kenyi kwøbɑ kwøbb-ɑ ɑkɑnn mø Wöndøj. Yɑ bɑ cwɑ̈ɑ̈g Jwøk, cɑgg ɑ́ kɑ̀ yingɑ ød mɑg ɑnɑn. Nyi kwɑ̈jji wun ceth, kipe kinni o yɑ kööbɑ ki tegi pyëwɑ ni kɑ̀ dwɑddii yi Jwøk. Tikikøs, ómïee, nyel-ɑ bɑ bɑ̈ng Wë bɑ̈ng-ɑ dyër, wu óköbbe, o kër-ɑ bëëdɑ yod yi wun, o wöddɑ bënn ómuuje wun. Áörɑ yï wun kɑ per kinni o wu óköbbe kër-ɑ bëëd wøn, o wu ócïj yi en thyew. Wiy mër kí mɑ̈ɑ̈dø møg-ɑ nyi kɑ̈ɑ̈l yï Jwøk Wïyee geki Yëso Mesiy Wɑ̈de, bëëd gen kì pëthi nyiimïee bënn, kì bɑng yïëyø. Wiy dhwɑ̈ng-ɑ nyi kɑ̈ɑ̈l yï Jwøk yinge kömi ji-ɑ mɑɑr Wë Yëso Mesiy ki mɑ̈ɑ̈dø men koo lɑ̈ɑ̈ny. Wɑ̈nyø men kɑ̈ɑ̈l-ɑ yï bɑ̈nggi Yëso Mesiy, gen ɑ Pøøl geki Timøthì. Ge gwëd-ɑ jii Jwøk bënn kì Pïlïpì, gen ɑ tyëng-ɑ rëbø ki Yëso Mesiy, kí jɑggi kɑnïsɑ̀ geki tyëng-ɑ kunyi. Wiy dhwɑ̈ng-ɑ nyi kɑ̈ɑ̈l yï Jwøk Wïyee geki Yëso Mesiy, yinge kömi wun. Jwøgee nyii pwøjø yi yɑn kenyi rumɑ kì ri wun. Kenyi kwɑjjɑ Jwøk kiper wun, yɑ nyi kwɑ̈jji pyëwɑ omedø. Mɑ́ wɑ nudd wɑ nywɑg-ɑ gwøg ɑ́kyel, en ɑ pwönyi Wöndøj. O yɑ orumø ceth kinni Jwøk, ɑ ɑ́cɑg gwøngɑni kì ri wun, óbëëd e nudd e ogöögø ceth kì ri wun, pïd keny-ɑ óthume kì Cyɑ̈ɑ̈ng Wë Yëso Mesiy. Pyëwɑ ying-ɑ kömi wun ceth! O bɑ gïjø me døøj kɑ̀ rumɑ kinøw kiper wun. Mɑ́ gwøng-ɑ gwøg yi wɑ bɑ ɑ́kyel, eni gwøng-ɑ ɑ́mëggi yɑn yi Jwøk; cɑgg yɑ ying ød mɑg ɑnɑn, kí keny-ɑ ɑ́nyïɑ̈ggɑ kipe kinni o Wöndøj cïb piny kidøøj. Ngɑ̈nyi yi Jwøk kinni yɑ nyi kømm-ɑ dyër, kenyi kööbɑ kinni rumm-ɑ rømmɑ kiper wun kɑ̈ɑ̈l-ɑ yï Yëso Mesiy. Yɑ kwɑjj-ɑ Jwøk kinni o mɑ̈ɑ̈dø mi wun kedhe e ódøngø, kì bɑng dïdø geki ngɑ̈nyi wøw, o wu ócuggi wun ki myegi gïn-ɑ pëddi døøjø. Codhe, o wu óbëëd wu dhïw, o bongii gïn pere ócɑɑy wun cyɑ̈ng-ɑ óbëën Wë. O wu óbëëd wun ki bëëndøj men-ɑ nyi yod kì ri Yëso Mesiy, kipe lejji Jwøk kí dhømme. Yɑ dwɑdd-ɑ kinni o yod yi wun, wun ɑ nyiimïɑ kinni, gïg-ɑ ɑ́pɑ̈dhi kömɑ ɑ́kunyi ki tɑyi Wöndøj. Cɑgg ɑ́ kwøbbi bëëdɑ yɑ bɑ ɑmɑg kipe Mesiy ɑ́tɑy, kɑ wɑ̈dh-ɑ yij gøldwøng. Kɑ nyiimïee mø gïïr, yïëyø mi gen ótëngø kì bɑng kɑ ɑ́mɑɑg yɑn, kɑ ge ti-ɑ pëddø ki pwönyi kwøbbi Jwøk, ge pɑ böggi. O bɑ dyër thyew kinni kwï gen pwönyi kɑ tyiel, o møøgø pwönyi kɑ tɑri pyëw, o ge göög-ɑ mɑ̈ɑ̈dø, ge ngɑ̈ny wøw kinni, bɑ yɑn ɑ ɑ́kwɑny yi Jwøk, yɑn ɑ́ ngɑn nyɑg per Wöndøj. De tyëng-ɑ pwönyi kwøbbi Mesiy ki tyiel, ge dwɑdd-ɑ kinni, o yɑ nɑ̈g yi rummì kì ød mɑg. Møgɑni bong per gen, mɑ́ kwøbbi Mesiy opwönyø ki yëëth bënn, cɑgg tyëngɑni pwönyi kɑ tyiel wɑlɑ̀ tɑri pëëth. O yɑ ócög pyëwɑ omedø, mɑ́ yɑ ngɑ̈ny wøw kinni yɑ ógøny kì bɑng kwɑ̈jji wun, kí kuny-ɑ kɑ̈ɑ̈l yï Mesiy. Gïn-ɑ tyer yi pyëwɑ ki mendwøng bɑ kinni, yɑ ko dhɑl yi gwøgɑ, o yɑ kwɑjj-ɑ kinni, o yɑ göögɑ yɑ pɑ böggi, o yɑ göögɑ ki pyëwɑ bëne, o Mesiy ólejji, cɑgg yɑ nëënø wɑlɑ̀ yɑ thøø. Nënnì bɑ ngø? Kì yïɑ, nënnì bɑ Mesiy. O thøø bɑnge óyïddi ki mø ngenyø. De keløg bëëdɑ yɑ onëënø dɑ gïndøj me nywøle; kwïjɑ cyee ying yɑ myeg-ɑ nënnì wɑlɑ̀ thøø; yɑ ɑ́dɑɑg yi møgɑni; yɑ tyer-ɑ wiyi nënnì, o yɑ yingɑ buti Mesiy, o bene men-ɑ lɑ̈w. De bëëdɑ kì kelli wun pere pëddi tegø, kipe kinni o wu køny yi yɑn. Møgɑni nennɑ gɑ dyër, o yɑ óbëëdø ceth kì kelli wun, o wu ókønyɑ ki kedhi bøli wun, o wu óyïddi wun ki medi pyëw geki yïëyø, o keny-ɑ ódwöögɑ yï wun, o ri wun óti yi wun ki lejjø kì ri Yëso Mesiy. Anɑn, gïn-ɑ pere teg bɑ kinni, o wu bëëd wun ki bëën-ɑ kyëëw ki Wöndøj mi Mesiy. O cɑgg yɑ pɑ bï yï wun, yɑ órïïj yɑ olïngø ceth kinni i pëthi wun bɑ ɑ́kyel, o rummi wun bɑ ɑ́kyel, o wu göög ɑ kej ɑ́kyel kipe Wöndøj mi Mesiy. Wu ko böggi yi tyëng-ɑ mɑɑn wun, de cwed wun pëthi wun, o óyod yi gen kinni bong gïn-ɑ óyod yi gen, de gwøøg wun ópɑ̈dhi keje, mɑ́ Jwøk ɑ nyi muuj tyɑ̈mø. De dhwɑ̈ng-ɑ ɑ́mëggi wun yi Jwøk pɑth kiper mïdhi yïëyø kete, de wu ɑ́thödhe ki orɑng thyew kipe nyingi Mesiy. Anɑn yɑ ócuggø kønyø yi wun ki nyɑɑg. Bɑ liny-ɑ ɑ́lidh yi wun e onyɑɑgø yi yɑn cøn, o wu olïngø ɑnɑn kinni yɑ nudd yɑ ónyïɑ̈ggø. Wu ceg kɑ gwøgø wu teeg yi bëëdø kì ri Mesiy, o wu ceg-ɑ yïddø ki ywömø kì ri mɑ̈ɑ̈dø, wu nywɑg-ɑ Wëy kí døøjø, wu mɑɑr-ɑ ri wun. De kɑ̀ bëëd møgɑni kinøw, nyi bëëd wun pëthi wun bɑ ɑ́kyel, o mɑ̈ɑ̈dø mi wun bɑ ɑ́kyel, o burø mi wun bɑ ɑ́kyel, o rummi wun bɑ ɑ́kyel thyew, kipe kinni, o medi pyëwɑ pɑ̈dhe keje. Ko di gïn gwøg yi dhɑnhø kipe cwɑgge kete, wɑlɑ̀ ko di gïn gwøg yi dhɑnhø ki döngi pyëwe. De bëëd dhɑnhø e orumø kinni, pɑth ki en ɑ døj kete. Dhɑnhø ko nyi yɑb gïn-ɑ døj kipere kete, de nyi rume kipe ji møøgø. Nyi rum wun ki rummi Yëso Mesiy. Bëëde bɑ bëëdi Jwøk ceth, de nuti dwɑddi kinni o cöge e obëëdø ki tegø, e pɑ̈r ki Jwøk. De ree ɑ́dwööge cyɑ̈n, e kete, kɑ kwɑny-ɑ bëëdi bɑ̈ng. Ágöög e nɑ dhɑnhø, e nënni ɑ́ dhɑnhø ceth Ácyɑ̈dh-ɑ möölø kí yömi yïthh, e meer-ɑ thøø thøw-ɑ ɑ́thøwe wïj yɑdh ɑrïw. Bene ɑ bɑnge tïngii mɑl ki mendwøng yi Jwøk kɑ gø cɑ̈gge ki nying mø ying mɑl kibøli nying-ɑ cwöddi bënn. O kipe wøri nyingi Yëso, gïg-ɑ nëënø bënn kì mɑl kí piny, kí thɑ piny cøngi gen órum gen piny, kɑ ge okööbø kinni Yëso Mesiy bɑ Wë. kipe lejji Jwøk Wïy. Anɑn wun ɑ nyiimïɑ, kɑ̀ bëëd møgɑni kinøw, yïëyu møg-ɑ kømmi yi yɑn yɑ lɑ̈wi ɑnɑn; ki yïëyø me lod yïëyi møg-ɑ ɑ́kømmɑ keny-ɑ ɑ́yingɑ kelli wun. Göög wun ki gwøng teg wu óböggø, dëlli wun okïrrø kipe yieli wun, mɑ́ Jwøk ceg-ɑ gwøg ceth kì ri wun, o wu løge møg tyer lïngi kwøbbe. Nyi gwøg wun jɑmmì bënn wu pɑ nguni, wɑlɑ̀ wu pɑ pëmø. Møgɑni bɑ kipe kinni o wu cög wun yï wun bɑ̈r ki orøg, o óbëëd e bong cɑ́y kì kömi wun, ni nyigi Jwøk, møg bëëdø kì kömi piny me rɑj, kì kelli tyëngorøg. Bëëd wun wu omënyø kì kelli gen ni kyelli mɑl, kɑ̀ mëggu gen wööni nënnì. Keny-ɑ ógöög wun kinøw, riɑ ólejjɑ kiper wun kì Cyɑ̈ɑ̈ng Mesiy, mɑ́ menɑni ónyodh-ɑ kinni, pïdø miɑ bëne kí gwøng-ɑ ɑ́gwøgɑ nuti gɑ̈gø. Keløg yɑ ónɑ̈g, kɑ remɑ dëëm-ɑ piny ɑ́ gëëdhi men-ɑ mëggi Jwøk yi yïëyø mi wun, pyëwɑ ceg-ɑ mïnø kyeel ki wun, wu bënn. Bëëd wun pëthi wun med thyew kyeel ki yɑn. Keløg ɑ́ gïn dwɑddi yi Jwøk, Timøthì óörɑ yï wun kì bɑng nyɑ keny me thiinh. Mɑ́ pyëwɑ ómïni keny-ɑ ólïngɑ per wun kì yïe. Bong ngɑn megø me tyer kwøbbi wun ni en. Mɑ́ ji-ɑ kyeelø bënn, nyi gøgg-ɑ mø cwɑggi gen, de yï gen bɑ̈r ki kwøbbi Yëso Mesiy. De ngɑ̈nyi yi wun kenyi køny yɑn yi Timøthì ki pwönyi Wöndøj; ɑ́bëëd e nɑ kenyi køny dhɑnhø yi wɑ̈de ki gwøg. Timøthì ójwɑn yi yɑn ki ör yï wun, kì bɑng keny-ɑ óyodɑ gïn-ɑ ócwöb kiperɑ. De yɑ orumø kinni yɑ ókøny yi Wë, kɑ yɑ bï-ɑ yï wun, kì bɑng nyɑ keny me thiinh. Pyëwɑ med ki Epɑprøditøs ómïee, ngɑn-ɑ ɑ́køny yɑn ki gwøg, kɑ yɑ kønye ki liny, kɑ nyi örɑ yï wun. Pyëwe tyer-ɑ bëën be lidhi wun bënn, o pyëwe olïngø thyew, mɑ́ kwøbbi rɑ̈ɑ̈m dële ɑ́lïngi yi wun. Kidyër, ɑ́bëëd dële orɑ̈mø, kɑ køm-ɑ thøø, de Jwøk pyëwe ɑ́lɑ̈ɑ̈m ki en, kɑ obødhø. De pyëwɑ ɑ́mïni, mɑ́ keløg e di thøw, yɑ di kïïm ki mendwøng. Bene ɑ dwɑddɑ örii yï wun ceth, kipe kinni o pëthi wun pëggi gen piny keny-ɑ ólidhu en. Kɑ óyïëy wun ki medi pëëth, ni ómï wun ceth kì ri Wë. Nyi wør wun ji-ɑ ni en ceth, mɑ́ e ɑ́ceg-ɑ böyø, kɑ køm-ɑ thøø kì bɑng gwøøg Mesiy, kipe kinni o yɑ mëgge gïjø me pɑ di lwɑ̈ng yi wun ki mëggi yɑn. Møg-ɑ gwëdɑ wun kì cyɑ̈n bɑ kinni, nyi bëëd wun pëthi wun med kì ri nyingi Wë. Cɑgg wu cigɑ gwëdø ki møg ni mø tyeli mɑl, yɑ pɑ pïd, mɑ́ wɑ̈nyø men-ɑ gwed yi yɑn bɑ men kor wun. Nyi koru ri wun kipe ji-ɑ nyi wɑ̈dhi gwɑ̈y ni gwögg yøw. Kɑ ri wun kor wun kipe tyëng-ɑ nyi göögø ki gïgrijjø. Kɑ ri wun kor wun thyew kipe tyëng-ɑ nyi rënyi dëlli gen ki ngølø. Bɑ wɑ, de pɑth ki gen ɑ ɑ́kwɑny ngøl-ɑ dyër, mɑ́ Jwøk kwɑjji yi wɑ kɑ Wëye, e pëthee med kì bɑng kɑ̀ bëëd wɑ rëbø ki Yëso Mesiy. Wɑ pɑ ngɑ̈dhi gïg-ɑ gøggi kì ri dël. Yɑ di bëëd yɑ gɑ̈nn-ɑ gïg ni møgɑni, keløg ji bënn di gɑ̈nn-ɑ møgɑni. Mɑ́ yɑ ɑ́ngøl kì bïdɑ̈ɑ̈g cyɑ̈ng, kì bɑng kɑ ɑ́pɑ̈dhi yɑn piny. O yɑ bɑ wɑ̈d Isrɑil, kì gøl Ben Yɑmïn; yɑ bɑ dïl wɑ̈d Ibru. O keløg ɑ́ per mïdhi Cigg, yɑ ɑ́ying-ɑ yij ɑkuud Jøpɑresì, o yɑ ɑ́bëëd yɑ pëddi tyiel, kɑ wɑɑng kɑnïsɑ̀ guudɑ. O kipe bëëntir men-ɑ kɑ̈ɑ̈l yi mïdhi Cigg, bong gïjø mɑ ɑ́bɑj yi yɑn. Gïgɑni di yod yi yɑn gɑ gïgdøj, de ge ɑ́göög ge bong nyingi gen kì yïɑ, mɑ́ Mesiy ɑ pere teg. Pɑth ki møgɑk keti gen; de jɑmmì bënn bong nyingi gen kì yïɑ kipe gïn-ɑ pere pëddi tegø, ɑ løg ngɑ̈nyi Wɑ̈ɑ Yëso Mesiy. Jɑmmì bënn ɑ́weddɑ kipere; jɑmmì bënn ɑ́bɑnyɑ kipe yodi Mesiy, o yɑ óbëëdɑ kì ree. O bëëdtir cöge e pɑ yod yi yɑn kì bɑng mïdhi Cigg, de yod yi yɑn kì bɑng yïëyi Mesiy, o bene bëëntir men-ɑ nyi muuj yi Jwøk kì bɑng Yïëyø. Gïn-ɑ dwɑddɑ bɑ yodi Mesiy, kí teng-ɑ ɑ́dhwödhe kì yij thøø, o yɑ yïddɑ kì ri orɑnge, o riɑ pɑ̈ɑ̈rɑ ki en kì yij thøwe, yɑ ngɑ̈dh-ɑ kinni yɑ ótug kì yij thøø. De yɑ pɑ ceg kwøb kinni, møgɑni ɑ́rum ki yodø yi yɑn, wɑlɑ̀ kinni bëëdɑ ɑ́rum ki pɑ̈dhi keje. De yɑ nudd yɑ odyëjø kipe kinni o kwøbbɑni ti ki yodø yi yɑn, ni kɑ ɑ́yood kwøbbɑ yi Mesiy. Wun ɑ nyiimïɑ, yɑ pɑ rumø kinni, bëëdɑ ɑ́rum ki pɑ̈dhi keje, de gïn-ɑ tyer yi yɑn bɑ kinni, o wïjɑ wïle ki møg-ɑ ɑ́pöödh, o yɑ nennɑ gïg-ɑ óbï. De yɑ ceg-ɑ dyëjø ki ngwej, o ji yöömɑ kun-ɑ rengi, o köögi ókwɑny yi yɑn, o köögi menɑni bɑ cwøøli ji yethi nënnì yi Jwøk kì pɑn-ɑ mɑl, kì ri Yëso Mesiy. Nyi rum wɑ kinøw, wɑ tyëng-ɑ cyɑ̈dhi kì yij yuu-ɑ bɑ óbödh. De keløg yï wun dɑ rummì møøgø, ge óti ki nyudhi wun yi Jwøk. Møg-ɑ ɑ́rum ki yodø yi wɑ gɑ dyër, ko wiy wɑ; de mïdhi wɑ gen kidøøj. Wun ɑ nyiimïɑ, ngøy wun bëëdɑ, kɑ tyëng-ɑ bëëdø ni wɑ nyi tid wun. Wu ɑ́rum ki köbbø yi yɑn, o wu cigɑ’ köbbø ɑnɑn e pïi nyingɑ órïngø kinni, dɑ ji mø gïïr, mø bëëd bëëdø me wëggi gen gwøg ki ji mø mɑ̈n ki yɑdh ɑrïw Mesiy. Ge ókïdhi yij mɑc, mɑ́ jwøøg gen bɑ gïn-ɑ tyer yi dëlli gen. Ge thwøg kɑ per gïn di ceg gen yɑ̈rø, o ge rømm-ɑ per gïg-ɑ bɑ mø kömi piny. De wɑ bɑ tyëng mɑl, o wɑ yïd-ɑ bëëni Yëso Mesiy Yïënee; keny-ɑ óbëëne e kɑ̈ɑ̈l-ɑ mɑl. Bɑ en ɑ ówil dëllee, møg-ɑ ying riee ɑnɑn, o gï gwøge gɑ ngïjji dële, dël-ɑ di mɑ̈r; møgɑni ógwøge ki tege men-ɑ jɑɑge jɑmmì bënn. Wun ɑ nyiimïɑ, per wun teeg, o kej wun ɑ́dwɑ̈ddi kì yïɑ. Pyëwɑ med, o riɑ nyi lejjɑ’ lejjø kiper wun. Gïn-ɑ dwɑddɑ wun ɑ nyiimïɑ, bɑ kinni mɑ̈gi wun kì ri Wë, kɑ wu cungi wun wu teeg. Euodiyɑ̀ wuki Sintikɑ̀, yɑ kwɑjj-ɑ wun, kinni rëbi wun, ki rëbi nyiimëëg kì ri Wë. Kɑ yïn thyew, yi ngɑn-ɑ göögø kyeel ki wøn, yɑ kwɑjj-ɑ yïn, kinni køny tyëng-ɑ mɑ̈nn møgɑni, mɑ́ yɑ ɑ́køny yi gen ki gwøøg pwönyi Wöndøj. Gen kí Kelement, kí ji-ɑ ɑ́køny yɑn bënn, nyingi gen bënn bɑ ɑgwed kì yij wɑ̈nyi nënnì. Bëëd wun pëthi wun med, wu rëbø kì ri Wë. Yɑ ceg-ɑ kwøb këti kinni med pëthi wun. Wiy døøji buri wun lidh yi teedø bëne. Mɑ́ bëëni Wë ɑ́cyɑ̈ngi. Pëthi wun ko wëggu olïng. De nyi kwɑjju Jwøk kipe gïg-ɑ dwɑddi yi wun; nyi kwɑjju en e opøjjø yi wun. O mër møg-ɑ nyi kɑ̈ɑ̈l yï Jwøk; mër-ɑ dhɑ̈li gɑmø yi wïj dhɑnhø, minni wun geki rummi wun ókore, wu rëbø kì ri Yëso Mesiy ceth. Kì cyɑ̈ɑ̈n kwøbbɑ, wun ɑ nyiimïɑ, yɑ köbbɑ wun kinni, cïbu rummi wun ri gïg-ɑ bɑ dyër, gïg-ɑ døøj, ɑ ri gen bong ruj, kí rɑj; kí gïg-ɑ døøj ki lïngø bënn, kí dhwɑ̈ng geki gwøng bɑnge nyi yood pwøj. Nyi göög wun kì ri møg-ɑ ɑ́dïd yi wun, kí møg-ɑ ɑ́lidh yi wun kì yïɑ. O wu ókøny yi Jwøøg mër. Pyëwɑ med ki mendwøng kɑ ɑ́døøg wun be kønyi yɑn, o møgɑni kɑ̈ɑ̈l-ɑ yï Wë. Kidyër, kwøbbɑni ɑ́bëëd ge nud kì pëthi wun cøn, de bong keny mɑ ɑ́yod yi wun men kønyu yɑn. Anɑn, bong gïn rømmi yi yɑn këti kipe kwøbbi jɑdɑ. Mɑ́ yɑ ɑ́dïd ki bëëdø kinøw, de bong gïjø megø me yɑbɑ këti, de yɑ ócöög ri gïn-ɑ nud kì yïɑ ceth. Jɑdø ngɑ̈nyi yi yɑn, o ngenyi jɑmmì ngɑ̈nyi yi yɑn thyew. Cɑgg kɑ̈j nud wɑlɑ̀ kɑ̈j bogøn, cɑgg rɑ̈jø nud wɑlɑ̀ rɑ̈jø bogøn, yɑ dïdø ki rugi gen bënn. Mɑ́ yïɑ dɑ tegø me kɑ̈ɑ̈l yï Wë kipe gwøg ki jɑmmì bënn. De bɑ gïjø me døøj kɑ ɑ́kønyu yɑn keny-ɑ ɑ́rɑngɑ. Wun ɑ tyëng Pïlïpì, ngɑ̈nyi yi wun kinni, kɑ ɑ́dhwödhɑ kì Mɑkdöniyɑ̀, kër-ɑ ɑ́cɑ̈gɑ ki pwönyi Wöndøj, bong kɑnïsɑ̀, mɑ ɑ́køny yɑn ki ngyëny den-ɑ́ wun keti wun. Yɑ ɑ́ödi yi wun ki jɑmmì, tyelø ɑ́kyel wɑlɑ̀ tyel ɑ́ryew, keny-ɑ ɑ́jɑdɑ yɑ ying-ɑ Tesɑlonikɑ̀. Møgɑni pɑ kwøb yi yɑn kɑ per kinni yɑ nyi mɑɑr-ɑ thödhø, dɑ́ kipe kɑ̀ tyerɑ kinni, o kwɑnni jɑmmi wun møg-ɑ bɑ ɑgwedd, lidhɑ ge óngënyø. Bong gïn cɑ̈nni yɑn këti, mɑ́ gïg-ɑ ɑ́muuj yi wun ɑ́kɑ̈ɑ̈l yi Epɑprøditøs, o ge gïïr thyew kibøli møg-ɑ ɑ́jɑ̈ddi yɑn. Gïgɑni nɑ gëëdhi, me yøme med, men mëggi Jwøk; o gø yïëye ceth ki medi pyëwe. Wiy gïg-ɑ jɑ̈ddi wun bënn, mëggi wun yi Jwøk kì kelli gïgdøj bënn møg-ɑ ying yï Yëso Mesiy kì pɑre mɑl. Wiy nyingi Jwøk Wïyee nyi lenhi gïti ɑtheer! Amen. Mɑ̈dhu tyëng-ɑ ɑ́kwër gɑ jii Yëso bënn. Wu ɑ́mɑ̈dh yi nyiimïee møg-ɑ buti gen bëëdɑ. Kɑ wu mɑ̈dh yi tyëng-ɑ ɑ́kwër gɑ jii Jwøk, de tyëng-ɑ mɑ̈dh wun ki mendwøng, bɑ tyëng-ɑ göögø kì gøl Rɑ̈nhdwøng. Wiy dhwɑ̈ɑ̈ng Wë Yëso Mesiy yinge kömi wun. Wɑ̈nyø men kɑ̈ɑ̈l-ɑ yï Pøøl, ɑ bɑ bɑ̈ng Yëso Mesiy ni kɑ ɑ́dwɑddii yi Jwøk, geki Timøthì ómïee. Ge öd-ɑ jii Jwøk kì Kölösì, gen ɑ nyiimï wøn møg-ɑ ɑ́rëbi ki wøn kì ri Mesiy. Wiy dhwɑ̈ng geki mër møg-ɑ nyi kɑ̈ɑ̈l yï Jwøk Wïyee ying gen kömi wun. Wø nyi pwøj-ɑ Jwøk, Wïyi Wë Yëso Mesiy, kenyi kwɑ̈jji wøn kiper wun. De gïn-ɑ pere nyi pwøj wøn Jwøk bɑ kipe kɑ ɑ́lïng wøn kinni, i wu yïëyø ki ngɑ̈dhi Mesiy ɑ́ Yïëdi, kí kɑ̀ mɑɑr wun tyëng-ɑ ɑ́kwër gɑ jii Jwøk bënn. Keny-ɑ ɑ́kwöngi wöön-ɑ dyër; en ɑ Wöndøj ki bëën yï wun, kwøbbi gɑ̈ɑ̈nø men-ɑ nyi muuj yi en ɑ́lïngi yi wun. O yïëyø kí mɑ̈ɑ̈dø mi wun ködd-ɑ kömi gïn-ɑ gɑ̈nni yi wun, men-ɑ mïdhi kì mɑl ɑ́ men-ɑ ómëggi wun. Wöndøj nudd e ókɑ̈nø ki gyëdh, o ceg-ɑ tɑɑy kömi piny bëne, ni kɑ ɑ́wɑ̈nhe yï wun ceth, kì cyɑ̈ng-ɑ ɑ́kwøøng per dhwɑ̈ɑ̈ng Jwøk ki lïngø yi wun, kɑ bëëde yod yi wun kidyër. Kwøbbi dhwɑ̈ɑ̈ng Jwøk ɑ́lïngi yi wun ɑ yï Epɑprɑs, ómïee nyel-ɑ göögø kyeel ki wøn ki gwøøg Mesiy ki pyëw ɑ́kyel. Wø ɑ́köbbe kwøbbi mɑ̈ɑ̈dø men-ɑ ɑ́mëggi wun yi Wëykwërø. Bene ɑ pere nyi kwɑ̈jji wøn kiper wun, wø ɑ́cɑ̈gi ki kwɑ̈j ɑ bøli keny-ɑ ɑ́lïngi wøn møgɑni ceth. Wø ókwɑ̈jjø kipe kinni, o wu nyudhi yi Jwøk ki møg-ɑ dwɑdde; o wu thödhe ki peli wïj geki ngɑ̈nyi wøw møg-ɑ nyi muuj yi Wëye. O wu ócuggi wun ki bëëdø ki yuu-ɑ dwɑddi yi Wë, wu gøgg-ɑ gïg mïni pyëwe; wu gwøg-ɑ gïgdøj kì yij bëëdi wun, kí dïdi mø Jwøk. Wɑ ɑ́døm yi en, kɑ wɑ kɑ̈ɑ̈le wɑ̈g kì yij tegi muudhø, kɑ wɑ kïdhe pödhi Wɑ̈de, Wɑ̈n-ɑ ɑ́mɑɑre, en ɑ ngɑn-ɑ ɑ́døm wɑ, kɑ orøgee lɑ̈ɑ̈nye. Mesiy bɑ ngïji Jwøk, ngɑn-ɑ pɑ nyi lidh. En ɑ bɑ Wɑ̈n-ɑ kɑyø, ɑ dwøng kibøli gïg-ɑ ɑ́cwɑ̈j bënn. Mɑ́ ree ɑ ɑ́cwɑ̈ɑ̈j jɑmmì bënn; møg-ɑ mɑl kí møg-ɑ kömi piny; møg-ɑ nënni, kí møg-ɑ pɑ nënni; kí wëy-ɑ jyɑ̈gø; kí wëy-ɑ yï gen di tegø; kí jɑggi wëy bënn. Lɑ̈bø bëne ɑ́cwɑ̈j-ɑ ree gøn ɑ́ mee yi Jwøk. Mesiy ɑ́bëëd e nud keny-ɑ ɑ́bëëd jɑmmì bënn bogïn, o en ɑ ree ɑ́cïb jɑmmì bënn kɑ̈jji gen. En ɑ bɑ wïj kì ri dële, o dëlɑni bene kɑnïsɑ̀; o en ɑ ree kɑ̈ɑ̈l yi nënni dëlɑni. Bene Wɑ̈n-ɑ kɑyø men-ɑ ɑ́tug kì yij thøø, kipe kinni o óyinge mɑl kì ri jɑmmì bënn. Mɑ́ Jwøk ɑ ɑ́dwɑddi kinni, o Wɑ̈de bëëde ni en ceth. Jwøk lɑ̈bø bëne ɑ́dwøøge yïe kì ri Wɑ̈d; mër ɑ́kɑ̈ɑ̈l yi Jwøk ki remi Wɑ̈de kì wïj yɑdh ɑrïw, codhe ɑdwøøge jɑmm-ɑ mɑl kí piny bënn yïe. Kɑ̈ge dööng, wu ɑ́bëëd wu mɑ̈n ki Jwøk, kì bɑng gïgrijjø møg-ɑ ɑ́gøggi yi wun kí møg-ɑ ɑ́rømmi yi wun. De ɑnɑn Jwøk ɑ́mërri ki wun, kì bɑng kɑ ɑ́thøw Wɑ̈de, kipe kinni o wu dwøøge yïe ki këër wun, wu dhïw, e bong gïn gwɑ̈ɑ̈d kì ri wun. De mïdhu møg-ɑ ɑ́yïëy yi wun ceth, kɑ wu bëëd wu teeg; ri wun ko wëggu rungø, kɑ wu ko wïyi ki ngɑ̈dhi Wöndøj men-ɑ ɑ́lïngi yi wun. Bɑ kipe Wöndøj menɑni ɑ ɑ́göögɑ yɑ nɑ bɑ̈ng, eni wöndøj men-ɑ ɑ́pwönyi dhɑnhø bëne kì kömi piny. Anɑn, pyëwɑ med kɑ̀ rɑngɑ kiper wun, o kwï orɑɑng Mesiy tyëëgɑ ri dëlɑ, kipe dëël Mesiy, ɑ bɑ kɑnïsɑ̀. Yɑ ɑ́løg bɑ̈ng kɑnïsɑ̀ yi Jwøk kiper wun. Mɑ́ yɑ ɑ́mëgge’ gwøøg pwönyi wööne ki këre bëne; gen ɑ møg-ɑ ɑ́wöni gɑ ɑkɑnn kì yethi rïjj bënn, de ɑnɑn gï ɑ́nyudhe jie. Møg-ɑ ɑ́gwir yi Jwøk, bɑ kinni o møg-ɑ ɑ́bëëd gɑ ɑkɑnn nyudhe jie; eni gïn-ɑ myër, ɑ bong gïn jɑ̈ddi kì ree, ɑ ɑ́mïdhe ɑ́ mi ji bënn. O ɑkɑnnɑni bɑ kinni, Mesiy ying-ɑ ri wun, o menɑni wɑng-ɑ kinni wu óyïddi kì ri dhwɑ̈ɑ̈ng Jwøk. Bɑ kwøbbi Mesiy ɑ pwönyi ji bënn yi wøn. Møgɑni bɑ kipe kinni o ji bënn bëëd gen rummi gen cyegø kì ri kwøbbi Mesiy. O bɑ kipe gwøgi møgɑni ɑ nyïɑ̈ggɑ kì bɑng tegø men-ɑ nyi muuj yi Mesiy, ɑ́ men göögɑ. Wiy wu köbbɑ kër-ɑ ɑ́göögɑ ki gwøng teg kiper wun, kí per tyëng-ɑ Lɑwdikiyɑ̀, kí tyëng-ɑ kwïj yɑn bënn. O pëthi gen tëngi gen, o ri gen ti yi gen ki mɑɑrø, o ge óyïddi gen ki kɑ̈r-ɑ nyi muuj yi dïdø men-ɑ dyër. O møg-ɑ nuti nyodhø yi Jwøk yod yi gen, gen ɑ møg-ɑ ceg bëëdø gɑ Mesiy kiree. Mɑ́ ngɑ̈nyi wøw geki dïdø møg-ɑ per gen teg, yod ɑ ri Mesiy. Møgɑni köbbɑ’ wun kipe wu ówëny yi tyëng-ɑ nyi pɑnggi wɑ̈thi ji. Cɑgg yɑ tøøk kì kelli wun, wëyɑ nud kì buti wun ceth. De pyëwɑ med kɑ̀ lïngɑ kinni, i wu ying-ɑ kɑ̈jji wun, o wu nuti wïyø ki ngɑ̈dhi Mesiy. Kɑ ɑ́rum wun ki yïëyi Yëso Mesiy ɑ́ Wïi wun, bëëd wun kì ree ceth. Nyi bëëd wun pëthi wun teeg kì ri yïëyø, ni kɑ ɑ́pwönyi wun. Kɑ Jwøk nyi pwøj wun ki mendwøng. Koru ri wun, o wu cög wu pɑ thɑb yi tyëng-ɑ nyi cwølli ri gen gɑ tïddi kwøb møg-ɑ nyi wɑ̈dhi ji ki wënyø yøw, mɑ́ kwøbb-ɑ pwönyi yi gen kɑ̈ɑ̈l-ɑ ri kwööng ji geki wëyi kömi piny, de ge pɑ kɑ̈ɑ̈l-ɑ ri pwönyi Mesiy. Mesiy kete ɑ ree di bëëdi Jwøk bëne, kì ri bëëde ɑ́ dhɑnhø. O wu ɑ́yïddi ki nënnì kì bɑng kɑ ɑ́rëbi wun ki en. En ɑ dwøng kì kömi wëy-ɑ jyɑ̈gø bënn, kí møg-ɑ yï gen di tegø. Wu ɑ́ngøl-ɑ ri Mesiy; o wu nuti ngølø kɑ cing, de wu ɑ́ngøl kɑ kɑ̈ɑ̈li dëël orøøg dhɑnhø wɑ̈g, o menɑni bene ngøl mi Mesiy. Mɑ́ keny-ɑ ɑ́jwɑ̈ɑ̈g wun, wu ɑ́ceg kɑ konyø kyeel ki en, kɑ wu odhwödhø kyeel ki en thyew; kipe kɑ ɑ́yïëy wun ki tegi Jwøk; teng-ɑ ɑ́tugii kì yij thøø. Wu ɑ́bëëd wu thøø yi gööj orøøg wun, kí bëëdi wun wu nuti ngølø. De Jwøk wu ɑ́kɑ̈ɑ̈le yethi nënnì ɑnɑn kì ri Mesiy. Orøgee bëne ɑ́lɑ̈ɑ̈ny yi Jwøk; körri orøgee ɑ́kɑ̈ɑ̈le wɑ̈g kì kömee; kɑ gï gure wïj yɑdh ɑrïw. O kì wïj yɑdh ɑrïw, Mesiy wëy-ɑ jyɑ̈gø geki møg-ɑ yï gen di tegø ɑ́tyɑme; kɑ gï køøle gɑ ɑmɑgg. O bëëde e bong ngɑn thödhi wun ki cigg kipe gïg-ɑ cɑm geki gïg-ɑ mɑdh yi wun; kí ciggi cyɑ̈nggi wööwø, kí cɑ̈gi dwɑ̈y, kí cyɑ̈ɑ̈ng Sɑbɑth. Gïgɑni bënn bɑ tïbbi gïg-ɑ óbï dhuki megø; de dyër ceg bëëdø ɑ́ Mesiy. Wu ko yïëy cɑyø yi tyëng-ɑ kööbø ce per gen teg, kì bɑng møg-ɑ nyi cɑ̈rri gen, kí gwøgi ri gen gɑ mööl, kí mɑlli wëywödd. Cɑgg ge nënni per gen teeg, møg-ɑ kømmi yi gen, kɑ̈ɑ̈l-ɑ ri rummi dhɑnhø yøw, o ge pɑth ki dyër, mɑ́ ri gen ɑ́lɑ̈ɑ̈w yi gen ki Mesiy, ɑ ceg bëëdø ɑ́ wïj men-ɑ thödhi dël ki tegø; o bɑ en ɑ mïdhi dël gø mɑɑg en kej ɑ́kyel ki nyingi cu, o dëlɑni ceg-ɑ piidhø ni kɑ̀ dwɑddii yi Jwøk. Wu ɑ́thøw kyeel ki Mesiy, kɑ wu kɑ̈ɑ̈l wɑ̈g kì thɑ́ ciggi wëy-ɑ jyɑ̈gø kì kömi piny. Á kipe ngø ɑ bëëd wun wu nɑ tyëng kömi piny men? Á kipe ngø ɑ mïdhu cigg-ɑ kööbø kinni, “Gïn ko kwɑɑny,” “Gïn-ɑni ko cɑɑm,” “Gïn-ɑni ko nywɑɑl”? Ciggɑni bënn kyer-ɑ gïg-ɑ ógöögø ge bong per gen, keny-ɑ ógwøøg gen; ngee, ciggɑni geki pwönyɑni bɑ kwøbbi ji yøw. Ge nënni ge nɑ kwøbbi peli wïj, kɑ̀ di ri gen mɑ̈ddø kí möölø geki juudi dëël dhɑnhø; de bong gïn gwøg yi gen, kipe mɑ̈ɑ̈ni gïg-ɑ tyer yi dëël dhɑnhø. Wu ɑ́rum ki tugø kì yij thøø kyeel ki Mesiy, kɑ pëthi wun cïb wun ri jɑmm-ɑ yij mɑl, kun-ɑ bëëd yi Mesiy kì wïj kyëëj Jwøk. Cïb wun rummi wun ri jɑmm-ɑ kunɑni, kɑ wu ko rum kì ri jɑmm-ɑ kömi piny. Mɑ́ wu ɑ́thøw, o wëyi wun ókɑɑn ri Mesiy kì yï Jwøk. O kì bøli keny-ɑ ócwöb Mesiy, ngɑn-ɑ bɑ nënni wun, wu ócwöb kyeel ki en kì yij dhwɑ̈nge. Kɑ ɑ́rum bëëde kinøw, nɑ̈g wun jɑmmi kömi piny, møg-ɑ göögø kì ri wun; ni niini ji-ɑ nuti nywøøm ri gen; kí gøggi gïgrijjø, kí tyeri gïgrijjø, kí ngöng, kí döngi pëëth (mɑ́ döngi pëëth bɑ wɑdd ki niini ji-ɑ nuti nywøøm ri gen). Mɑ́ cɑ́yi Jwøk nyi bï-ɑ kömi tyëngpëëmø møg-ɑ nyi göögø ki gïgɑni. Wun kiri wun, wu ɑ́bëëd wu gøgg-ɑ gïg ni møgɑni. De ɑnɑn, wiyu gïgɑni bënn; ko di liny, kí wëërø, kí mɑ̈ɑ̈nø. Ko di yɑ̈d, kɑ kwøbb-ɑ nyi kɑ̈ni ki lɑ̈ɑ̈yi wɑ̈ɑ̈th ko wöl wun ki tïng dhøggi wun. Wu ko nyi kööb ki kwøbbi pyed, mɑ́ bëëdi tyeli mɑl ɑ́wiy yi wun. Kɑ bëëdø men-ɑ nyɑ̈n, men-ɑ kɑ̈ɑ̈l bɑng ngɑ̈nyi Jwøk yod wun. Kɑ ri wun løg wun ngïji ngɑn-ɑ ɑ́cwɑ̈j wun. O møgɑni kɑ̈ɑ̈l-ɑ kinni, bong gïn bɑ̈ɑ̈n këti kì kɑɑm Yeudì ki ngɑn pɑth ki Yeudì; wɑlɑ̀ kɑɑm ngɑn-ɑ óngølø ki ngɑn nuti ngølø; wɑlɑ̀ kɑɑm tyëng-ɑ dhøg gen kwïj ki tyëng-ɑ wïïnø kì pɑ̈l; wɑlɑ̀ kɑɑm bɑ̈ng ki ngɑn cyɑ̈dhi wïje. Dɑ́ Mesiy ɑ ree røøm, o en ɑ rïbø. Wun ɑ bɑ jii Jwøk; wu ɑ́mɑɑr yi en, kɑ wu myege wun ɑ́ jie. Kɑ ɑ́rum bëëde kinøw, nyi ywöngi yethi wun ki wɑddi wun, kɑ wu bëëd wun ki tɑri pëëth, kí möölø, kí bëëndøj geki ngïïnø. Nyi guum wun kwøbb-ɑ ledh kì kelli wun; nyi wiy wun wɑddi wun kenyi cɑɑg gen wun piny. Nyi lɑ̈ɑ̈m pëthi wun ki ri wun ceth, ni kɑ ɑ́lɑ̈ɑ̈m pyëw Wë ki wun. Wiy mɑ̈ɑ̈dø yinge mɑl kibøli jɑmmì bënn, mɑ́ bene en ɑ nyi reb jɑmmì kej ɑ́kyel bënn. Wiy mër men-ɑ nyi kɑ̈ɑ̈l yï Mesiy bëëde kì kelli wun thyew, mɑ́ wu ɑ́cwøl yi Jwøk kɑ per kinni o wu bëëd wun kì ri mërɑni, o wu göög wun ki dhɑnhø ɑ́kyel. Kɑ wu bëëd wun wu ceg-ɑ pwøj ceth. Bëëd wööni Mesiy kí kɑ̈re bëne kì pëthi wun. Kɑ ri wun pwönyi wun ki kwøbbi peli wïj bënn. Nyi wör wun ceth ki wörri pwøj, geki wörri kwër; nyi wör wun wu pøjj-ɑ Jwøk ki pëthi wun bënn. Kɑ møg-ɑ nyi kømmi, geki møg-ɑ nyi gwøg yi wun bënn, nyi gwøøg gen ki nyingi Wë Yëso, e Jwøk Wïyee opøjjø yi wun kì ree. Anɑn, wun ɑ tyëng-ɑ mɑ̈nn, nyi yïëyu jɑɑgø yi cwøwi wun, mɑ́ e bɑ gïjø me myër kipe tyëng kɑnïsɑ̀. Wun ɑ jøg-ɑ cwøw, mɑɑru mɑ̈nni wun. Kɑ ge ko nyi jɑngi wun. Othønhø, nyi lïngu kwøbbi wëëg wun kí mëëg wun, mɑ́ møgɑni med kì pyëw Wë. Wun ɑ wëëg, pëthi nyigi wun ko nyi wëggu rënyø, kipe nyingi gen óbɑɑr. Wun ɑ bɑ̈ngg, nyi gwøg wun gïn-ɑ kwøb yi tyëng-ɑ cinggi gen bëëd yi wun ceth; pɑth ki kenyi bëëd wu onennø yi gen kete, de nyi göög wun ki pyëw ɑ́kyel, wu wør-ɑ Wë. Kɑ gïg-ɑ nyi gwøg yi wun bënn nyi gwøg wun ki medi pëëth, wu ce gögg-ɑ Wë, de pɑth ki ji. Kɑ wu bëëd wu ngɑ̈ny wøw ceth, kinni wu ónëngi yi Wë ki köögi, mɑ́ wu gögg-ɑ Mesiy Wë. O ngɑn-ɑ gøggi rɑj, óyod-ɑ kööngi gwøge, mɑ́ Jwøk dhɑnhø nyi mëgge’ kööng-ɑ kyëëw ki gwøge ceth. Wu tyëng-ɑ yï wun di bɑ̈ngg, mïdhu bɑ̈nggi wun ki bëëndøj, kɑ ge ko nyi jɑngi wun. Kɑ wu bëëd wu ngɑ̈ny wøw ceth kinni yï wun dɑ Wïi wun thyew kì mɑl. Wu ko nyi wïyi ki kwɑjji Jwøk, kɑ nyi pwøj wun. Kɑ wu nyi kwɑ̈jji wun kiper wøn thyew, kipe kinni o yuu pwönyi wøn yieb yi en, o kwøbbi Mesiy møg-ɑ bɑ ɑkɑnn, töng yi wøn kì bøli teedø, gen ɑ møg-ɑ bɑng gen yingɑ ød mɑg ɑnɑn. Nyi kwɑ̈jji wun kipe kinni o kwøbbɑni ókømmi yi yɑn kidøøj, ki yöö me myëër. Bëëd wun ki peli wïj, kì kelli tyëng-ɑ nuti yïëyø, e bong keny wëggu bodhø. Kɑ gïg-ɑ nyi kømmi yi wun kì bøli gen, ko bëëd ni gïncɑm me ree bong omelø, de bëëd ge myëër. Kɑ kwøbbi ji nyi løøg wun kidøøj. Kwøbbɑ bënn ólïngi yi wun kì yï Tikikøs ómïee, ngɑn-ɑ mɑɑr yi yɑn; o bɑ ngɑn-ɑ nyi køny yɑn ki gwøøg Wë. Áörɑ yï wun kɑ per kinni o wu köbbi yi en këër bëëdi wøn; o wu ócïj yi en thyew. Onesimøs ómïee, nyel-ɑ ngɑ̈ny bëëdø kidøøj, o bɑ jɑl pödhi wun, ɑ́örɑ kyeel kí Tikikøs. Wu óköbbi gen gïg-ɑ ɑ́cwöb kì keny bënn. Wu ɑ́mɑ̈dh yi Aristɑrkøs, jɑl-ɑ ying ød mɑg kyeel ki yɑn. Kɑ wu mɑ̈dh yi Mɑrk, ówï Bɑrnɑbɑ̀. (Wu ɑ́rum ki cegø kinni køny wun en, keløg e ódi bëën yï wun.) Wu ɑ́mɑ̈dh yi Jöcwø, ɑ nyi cwøl ɑ́ Yøstøs. Jøgɑni gɑ ɑ́dɑ̈g, bene gen keti gen ɑ bɑ Yeud, kì kelli tyëng-ɑ göög wøn kyeel kipe Pödhi Jwøk, o yɑ ɑ́køny yi gen ki mendwøng. Kɑ wu mɑ̈dh yi Epɑprɑs, jɑl pödhi wun megø, o bɑ bɑ̈ng Yëso. Nyi rïïj e kwɑjj-ɑ Jwøk kiper wun, kipe kinni o wu løge mø teg, o wu bëëd wun, wun ɑ́ jii Mesiy mø yïëyø kidøøj, o wu gøggu møg-ɑ dwɑddi yi Jwøk. O yɑ ceg-ɑ kwøb ceth kinni, ɑ́pïd yi gwøg ki mendwøng kiper wun, wuki tyëng Lɑwdikiyɑ̀, kí tyëng Ërɑpølis. Wu ɑ́mɑ̈dh yi Luk, ɑkïm men-ɑ mɑɑr yi dhɑnhø bëne; kɑ wu mɑ̈dh yi Demɑs. Mɑ̈dh wun nyiimïee kì Lɑwdikiyɑ̀; kɑ Nimpɑ̀ mɑ̈dh wun geki tyëng kɑnïsɑ̀ møg-ɑ nyi cugi kì gøle. Keny-ɑ órum wɑ̈nyø men ki rɑngø yi wun, kɑ ör wun kɑnïsɑ̀ kì Lɑwdikiyɑ̀, o gø lony gen ki rɑngø. Kɑ wɑ̈ny-ɑ ɑ́örɑ kɑnïsɑ̀ kì Lɑwdikiyɑ̀ cwøl wun, o lony yi wun ki rɑngø thyew. Kɑ Arkipøs köbbi wun kinni, “Tyëg gwøng-ɑ ɑ́kwɑny yi yïn ki nyingi Wë.” Møg gwed yi yɑn kɑ cingɑ. Wu ɑ́mɑ̈dh yi Pøøl Wɑ̈thi wun ko wïl ki ɑ́cwecwell-ɑ cinggɑ! Wiy dhwɑ̈ɑ̈ng Jwøk yinge kömi wun. Wɑ̈nyø men kɑ̈ɑ̈l-ɑ yï Pøøl, kí Silɑ̀, kí Timøthì. Ge gwëd-ɑ kɑnïsɑ̀ kì Tesɑlonikɑ̀, gen ɑ tyëng-ɑ bɑ mø Wïy Jwøk, kí Wë Yëso Mesiy. Wu óbëëdø yï wun dɑ dhwɑ̈ng geki mër. Jwøk nyii pwøjø yi wøn kipe wun bënn, kì yethi cyɑ̈ng bënn; kɑ wu nyi pɑr yi wøn kenyi kwɑ̈jji wøn. Kɑ ge nyi kwøb wøn kì bøli Wïyee Jwøgee, gen ɑ kwøbbi kɑ̀ nyɑ̈ggi wun kömi yïëyø, kì bɑng mɑ̈ɑ̈dø, kí kɑ̀ gɑ̈nu Wë Yëso Mesiy ki mendwøng. Wun ɑ nyiimïɑ, ngɑ̈nyi yi wøn, kinni wu mɑɑr yi Jwøk, o wu ɑ́rum ki myegø yi en wun ɑ́ jie. Mɑ́ Wöndøj nuti muuj wun yi wøn kɑ kwøb yøw, de ɑ́kɑ̈ɑ̈l yi wøn kɑ tegø geki Wëykwërø, ki yïëyø me dwøng geki dyër. Kër-ɑ ɑ́bëëd wøn ngɑ̈nyi yi wun keny-ɑ ɑ́ying wøn kelli wun; wø ɑ́göög kɑ per kinni o wu dönyi wun. Kɑ bëëdi wøn geki bëëdi Wë ngøy yi wun; o cɑgg ɑ́ kɑ ɑ́rɑngi wun ki mendwøng, wöödø ɑ́yïëy yi wun ki medi pyëw men-ɑ kɑ̈ɑ̈l yï Wëykwërø. Kɑ wu ogöögø ki nyuudhi kipe ji-ɑ ɑ́yïëy bënn kì kelli tyëng Mɑkdöniyɑ̀ geki Akɑiyɑ̀. Pɑth ki per kɑ ɑ́kedh wöödø kì yï wun, kɑ tɑɑy-ɑ Mɑkdöniyɑ̀ geki Akɑiyɑ̀ kete; de wöddi kɑ ɑ́yïëyu Jwøk ɑ́tɑɑy kömi piny bëne. O bogïn kømmi yi wøn këti. Jiɑni bënn kømm-ɑ kwøbbi kɑ ɑ́yïëyu pwönyø mi wøn, geki kɑ ɑ́wiy wun ngïjji jwögg, kɑ wu døøg-ɑ be mɑlli Jwøng-ɑ Nëënø; Jwøng-ɑ dyër, o wu yïd-ɑ bëëni Wɑ̈de; keny-ɑ óbëëne e kɑ̈ɑ̈l-ɑ mɑl; eni Wɑ̈de Yëso, ɑ ɑ́tug yi en kì yij thøø; o bɑ en ɑ ódøm wɑ obëën rɑ̈ji pyëw Jwøk. Ngɑ̈nyi yi wun, wun ɑ nyiimïɑ kinni wø nuti wɑ̈dh-ɑ wëli yï wun. O ngɑ̈nyi yi wun kɑ ɑ́göggi wøn ki gïnrɑj, kɑ wø gwɑddi kì Pïlïpì, keny-ɑ ɑ́bëëd wø nuti bëën yï wun kì Tesɑlonikɑ̀. De cɑgg ɑ́ kɑ ɑ́di pëëmø, wø ɑ́thödhi yi Jwøgee ki tegi pyëw men pwönyi wøn Wöndøj men-ɑ kɑ̈ɑ̈l yïe. Møg-ɑ pwönyi yi wøn bong bɑ̈jjø kì ri gen, o bɑ kwøb mø dhïw, mø yethi gen bong wëënyø. Wø nyi kømm-ɑ møg-ɑ dwɑddi yi Jwøk ceth, mɑ́ wø ɑ́yod yi en wø myëër ki kɑ̈lli Wöndøj. Wø pɑ nyi gwøg-ɑ gïn mïni pëthi ji, de wø nyi gwøg-ɑ gïn mïni pyëw Jwøk, ngɑn-ɑ nyi rɑng pëthi wøn. Ngɑ̈nyi yi wun kinni, ri wøn pɑ nyi kwɑjji yi wøn, kipe kinni o wø yïddi wøn ki gïi cwɑggi wøn; o møgɑni ngɑ̈nyi yi Jwøk thyew. Wø pɑ dwɑddi pøjjø yi wun, wɑlɑ̀ yi ji møøgø. De wu mïdhi yi wøn ni kenyi mïdhi nyɑ gïnthinh yi meye. Kì bɑng kɑ̀ mɑɑr wun yi wøn, wø nuti dwɑdd-ɑ nywɑgi Wöndøj mi Jwøk kete ki wun, de cɑgg ɑ́ bëëdi wøn ɑ́dwɑddi wø’ nywɑgø ki wun thyew. Wu mɑɑr yi wøn ki mendwøng! Wun ɑ nyiimïɑ, ngɑ̈nyi yi wun kinni wø ɑ́ceg-ɑ tïj ki menteg kì wɑ̈r kí dicɑ̈ng, mɑ́ wø nuti dwɑddi judi wun, wø pwöny-ɑ wun, ki Wöndøj men-ɑ kɑ̈ɑ̈l yï Jwøk. Bëëdi wøn ngɑ̈nyi yi wun, o ngɑ̈nyi yi Jwøk, kinni wø ɑ́bëëd kì kelli wun kɑ bëëdø me døøj, me yije bong geny, wɑlɑ̀ bong bɑ̈jjø. Wø ɑ́bëëd ki wun kɑ bëëdi dhɑnhø ki nyige. Wu ɑ́pwönyi yi wøn, kɑ wu cïj yi wøn, kɑ wu nyi köbbi wøn kinni bëëd wun ki bëëdø men-ɑ med kì pyëw Jwøk, ngɑn-ɑ ɑ́cwøøl wun yij Pödhe, o wu bëëd wun kì yij dhwɑ̈nge. Jwøk nyii pwøjø yi wøn kì yethi cyɑ̈ng bënn, mɑ́ keny-ɑ ɑ́muuj kwøbbi Jwøk wun yi wøn, ge ɑ́lïngi yi wun kɑ ge yïëy wun gɑ wöödø me kɑ̈ɑ̈l yï Jwøk; o bɑ dyër ceth. Mɑ́ Jwøk ogöögø kì ri wun, wu tyëng-ɑ ɑ́yïëy. Wun ɑ nyiimïɑ, bong gïn bɑ̈ɑ̈n kì kɑɑm wun ki tyëng kɑnïsɑ̀ mi Yëso Mesiy, møg-ɑ ying Yeudiyɑ̀; mɑ́ rɑjj-ɑ ɑ́göggi wun yi tyëng pödhi wun, pɑ̈r ki rɑjj-ɑ ɑ́göggi gen yi Yeud. Bɑ tyëngɑni ɑ ɑ́nɑ̈g Wë Yëso geki tyëngtöng mø Jwøk; kɑ nyingi wøn guud yi gen thyew. Jwøk pyëwe rɑɑj ki gen! Ge ɑ́göög ge mɑ̈n ki ji bënn. Kɑ ri gen pɑ̈nyi gen ki mɑ̈ɑ̈ni wøn muuji tyëngpɑth ki Yeud, wöön-ɑ kɑ̈ɑ̈l yieli gen. Jwøk linye ɑ́ngøøge kömi gen, ɑnɑn cyee. Wun ɑ nyiimïɑ, wø ɑ́lɑ̈wi ki wun ki nyɑ keny me thiinh – pɑth ki rummi wøn, den-ɑ́ dëlli wøn ɑ lɑ̈wi ki wun – kɑ kej wun ceg-ɑ dwɑ̈ddø ceth; o wø tyer-ɑ bëën be lidhi wun! Pëthi wøn ɑ́dwɑdd-ɑ bëën yï wun. Yɑn kiriɑ, yɑ ɑ́dwɑdd-ɑ dwöög yï wun tyel mø gïïr, de wø ɑ́mɑ̈ɑ̈n yi Cethɑn. Mɑ́ e ceg bëëdø ɑ́ wun ɑ gɑ̈n yi wøn; de pɑth ki ji møøgø; wun ɑ nëngi wøn ki medi pyëw; o bɑ per wun ɑ ólejji wøn ri wøn kì bøli Wë, kì cyɑ̈ng-ɑ ódwööge, kinni wø ɑ́tyɑ̈ɑ̈m. Bɑ dyër ceth; wø lejji ri wøn kɑ per wun, o wø yïd-ɑ́ɑ̀ bɑng wun ki medi pyëw. Kɑ ɑ́pïd wøn yi ngïïnø, ɑpëggi wøn be bëëdø kì Athïnɑ̀ keti wøn, kɑ Timøthì ómïee, nyel-ɑ göggi Jwøk, ki gwøøg pwönyi wööni Mesiy ör wøn yï wun be cïji wun, o bongii ngɑn døøg cyɑ̈n kì kelli wun, kì bɑng jud. Kɑ ɑ́ying wøn buti wun cøn, wu ɑ́köbbi yi wøn kinni, wɑ bɑ møg-ɑ óyïddi ki orɑng ceth, o møgɑni ɑ́cwöb ni kɑ̀ ngɑ̈nyu en. Bene ɑ bɑnge ɑ́örɑ Timøthì. Pyëwɑ ɑ́ceg-ɑ dhɑ̈lø mɑgø, ɑörɑ en be lidhi yïëyø mi wun, mɑ́ yɑ óböggø kinni wu óbëëd wu ópɑ̈nyø yi jɑlthɑb, kɑ wø thuw-ɑ pïdø. De ɑnɑn, Timøthì ɑ́dwöög ki wöödø me døøj kipe yïëyø geki mɑ̈ɑ̈dø mi wun; kɑ yɑ köbbe kinni, i per wøn nyii rømmø yi wun ceth; o wu tyer-ɑ lidhi wøn ni kɑ̀ tyerɑ lidhi wun. Wø ɑ́bëëd wø torø yi ɑkørr kí orɑng me dwøng; de pëthi wøn ɑ́tëngi, yeki nyiimïɑ, kì bɑng yïëyø mi wun. Bëëdɑ kì kömi piny ɑ́dönyi cyee, kì bɑng kɑ̀ cungi wun wu teeg kì ri Mesiy. Á pwøj mø bëëdø dï ɑ ópwøj wøn Jwøk kiper wun? Mɑ́ pëthi wøn ɑ́mïni ki mendwøng kì bøli Jwøk kɑ ɑ́lïngi wøn kwøbbi wun. Kɑ Jwøk nyi kwɑjjɑ kì wɑ̈r kí dicɑ̈ng kipe kinni, o nyingee ólidh yi wɑ këti; o keny-ɑ gwɑ̈ɑ̈d kì ri yïëyø mi wun tyeny yi wɑ. Anɑn, bëëni wøn yï wun ying-ɑ cingi Jwøk Wïyee geki Wë Yëso. Wiy mɑ̈ɑ̈dø men-ɑ mɑɑr wun ri wun, kí mɑɑr-ɑ mɑɑr wun ji bënn, med yi Wë Yëso, o tënge ni mɑɑr-ɑ mɑɑr wun yi wøn. O pëthi wun wëgge tëngø, o wu óbëëd wu bɑ ɑkwër, e bong gïn cɑy kì ri wun kì bøli Wïyee Jwøgee, keny-ɑ ódwöög Wë Yëso geki tyëng kwërø møge. Amen. Møg-ɑ kwøb yi wøn kì cyɑ̈n, wun ɑ nyiimïɑ, bɑ kinni dïd wun kì yï wøn ki bëëdø men-ɑ med kì pyëw Jwøk. O bɑ bëënɑni ceth ɑ beed yi wun; de wø kwɑjj-ɑ wun ɑnɑn ki nyingi Wë Yëso, kinni bëëd wun ki bëëdø me lod menɑni ki døøjø. Mɑ́ møg-ɑ ɑ́pwönyi wun yi wøn ki tegi Wë Yëso, ge ngɑ̈nyi yi wun ceth. Møg-ɑ dwɑddi yi Jwøk bɑ kinni, bëëd wun wu bɑ ɑkwër, kɑ dhɑnhø ko niin ki ngɑn nuti nywøøm gen ri gen. Kɑ dhɑnhø bëëde e ngɑ̈ny korri dële ɑ́ ɑkwër, e ree owørø yi en. Kɑ wu ko nyi nɑ̈g yi mɑ̈j ni tyëng-ɑ kwïj kwøbbi Jwøk. Ko di dhɑnhø me bɑ̈jji ki wɑɑd gen ngeti Mesiy, wɑlɑ̀ ko di ngɑn ruj ngɑn-ɑ kyeelø. Bɑ Wë ɑ ócɑ̈yyi kipe møgɑni, ni kɑ ɑ́köbbi wun yi wøn cøn. Wɑ nuti cwølø yi Jwøk kɑ per bëëdi orøg; de wɑ ɑ́cwøl yi en kɑ per bëëdø ki bëëde kwërø. O ngɑn pyem kwøbbɑni, pɑ pyem-ɑ kwøbbi dhɑnhø; de pyem-ɑ kwøbbi Jwøk, ngɑn-ɑ thödhi wun ki Wëykwërø. Wu ɑ́rum ki dïdø kì yï Jwøk ki mɑɑri ri wun yeki nyiimïɑ, o bong gïn gwëdi wun yi wøn kì ri kwøbbɑni. O wu bëëd ɑ nøw ceth kidyër; tyëng Mɑkdöniyɑ̀ mɑɑr yi wun; de wø kwɑjj-ɑ wun yeki nyiimïɑ kinni, nyi mɑɑru ri wun ki mendwøng. Bëëd wun mɑ̈ɑ̈dh. Kɑ dhɑnhø nyi gööge ki gwøge kidøøj. Nyi göög dhɑnhø ki cingge ceth; ni kɑ ɑ́ceg wun yi wøn. Møgɑni bɑ kipe kinni, o wu wør yi ji-ɑ pɑth ki tyëng kɑnïsɑ̀; o wu cög wu pɑ nenni cwɑggi ji møøgø. Anɑn, wun ɑ nyiimïɑ, wø pɑ dwɑddi kinni, o wu bëëd wu kwïj wøw ki kwøbbi tyëng-ɑ ɑ́thøw. Møgɑni bɑ kipe kinni, o wu cög wu pɑ ywöngi kipe gen; ni ji-ɑ yï gen bong gɑ̈ɑ̈nø. Keløg wɑ yïëyø kinni, Yëso ɑ́thøw, kɑ odhwödhø kì yij thøø, ji-ɑ ɑ́thøw ge yïëyø, ge ódwöög yi Jwøk kyeel ki Yëso. Møg-ɑ pwönyi wun yi wøn ɑnɑn, bɑ møg-ɑ ɑ́pwönyi yi Wë kinni; wɑ tyëng-ɑ nëënø, wɑ koo møøl bøli tyëng-ɑ ɑ́thøw. Mɑ́ Wë kiree óbï piny e kɑ̈ɑ̈l-ɑ mɑl, keny-ɑ ólïngi cwɑggi jɑngi wëywödd, kí ywøøg kɑɑng Jwøk; o tyëng-ɑ ɑ́thøw e Mesiy rumø yïëyø yi gen, kwöngi gen ki dhwödhø. Codhe, o wɑ gwɑɑr mɑl kì yij pøølø, wɑ tyëng-ɑ yuud wɑ onëënø, o wɑ røøm wɑ yij mɑl ki Wë, o wɑ cöög wɑ buti Wë. Cïj wun ri wun ki kwøbbɑni. De ɑnɑn, wun ɑ nyiimïɑ, bong mø gwëdɑ wun, kipe bøli keny-ɑ ócwöb møgɑni. Mɑ́ wu ngɑ̈ny wøw kinni, Cyɑ̈ɑ̈ng Wë óbï e nɑ bëëni kur kì wɑ̈r. O keny-ɑ ókööb ji kinni, “Bogïn böggi; piny dɑ mër,” ge ceg kɑ pɑ̈ɑ̈y piny yi ryɑ̈g, ni kenyi pɑ̈ɑ̈y ngɑndhɑjø piny yi pɑ̈dhi piny; o ge pɑ cuggi bodhø. De wun ɑ nyiimïɑ, wu pɑ ying yij muudhø, me yije ópɑ̈ɑ̈y wun piny yi Cyɑ̈ɑ̈ng Wë; mɑ́ wu bënn, wu bɑ jii cɑr; wu bɑ tyëng dicɑ̈ng. Wɑ pɑth ki tyëng wɑ̈r, wɑlɑ̀ wɑ pɑth ki tyëng muudhø. Wɑ ko nin ni ji-ɑ kyeelø, de bëëd wɑ, wɑ̈thee onëënø. Ji nyi nen-ɑ́ɑ̀ wɑ̈r, o bɑ wɑ̈r ɑ nyi nɑ̈ɑ̈g gen yi møgø. De wɑ, ɑ bɑ nyigi dicɑ̈ng, bëëd wɑ ceth wɑ̈thee onëënø, kɑ yïëyø geki mɑ̈ɑ̈dø rug wɑ gɑ ɑ́dhedheg; kɑ gɑ̈ɑ̈nø kinni wɑ óyiel, rug wɑ ni ɑcudh. Wɑ nuti yienyø yi Jwøk kɑ per kinni o wɑ cɑy; dɑ́ kipe kinni o wɑ yïddi wɑ ki keny yieel wɑ ki nyingi Wë Yëso Mesiy, ngɑn-ɑ ɑ́thøw kiperee, kipe kinni o wɑ nëën wɑ bënn kyeel ki en, ying wɑ yuud wɑ onëënø wɑlɑ̀ wɑ thøø keny-ɑ óbëëne. Nyi køny wun ri wun; kɑ ri wun nyi cïj wun, ni kɑ̀ göög wun ɑnɑn. Anɑn, wun ɑ nyiimïɑ, wø kwɑjj-ɑ wun kinni, nyi wør wun tyëng-ɑ göögø kì kelli wun, gen ɑ tyëng-ɑ pyejji wun, ɑ pwönyi wun ki bëëdi jii Mesiy. Kɑ ge wør wun, ge omɑɑrø yi wun ki mendwøng, kipe gwøng-ɑ gwøg yi gen. Kɑ wu bëëd wun ki mër. Wø köbb-ɑ wun yeki nyiimïɑ kinni, nyi cïj wun tyëng-ɑ bɑ rɑj, geki tyëng-ɑ bɑ wɑ̈rrì, kɑ tyëng-ɑ nyøødh nyi køny wun, kɑ kwøbbi ji bënn nyi ngin wun. Kɑ tyëng-ɑ nyi göggi wun ki gïnrɑj, ko nyi göggi wun ki gïnrɑj thyew. De nyi bëëd wu gögg-ɑ ri wun gïgdøj, kɑ tyëng-ɑ kyeelø nyi göggu gïgdøj thyew. Wiy pëthi wun nyi bëëd ge med yethi cyɑ̈ng bënn. Nyi kwɑjju Jwøk yethi cyɑ̈ng bënn. Nyi pwøju Jwøk kipe jɑmmì bënn. Bene gïn-ɑ dwɑddi yi Jwøk kì yï wun kɑ̀ nëën wun kì ri Yëso Mesiy. Bøli gwøøg Wëykwërø ko nyi rïwwi wun; møg-ɑ töng ko nyi wøy wun. De nyi rɑng wun jɑmmì bënn; kɑ wu nyi mɑ̈gi wun kì ri gïn-ɑ døj; kɑ gïgrijjø bënn nyi këëj wun. Wu ógwøg wu bɑ ɑkwër kì wɑ̈thi tùng bënn yi Jwøøg mër, kɑ wu kore kì yij bëëdi wun bëne – wëyi wun, tïbbi wun kí dëlli wun – e bong gïnrɑj me kedhi ri wun, kì ri bëëni Wë Yëso Mesiy Møgɑni ógwøg yi ngɑn-ɑ cwølli wun, mɑ́ dhøge nyi mïdhe’ mïdhø. Yeki nyiimïɑ, nyi kwɑjju Jwøk kiper wøn. Mɑ̈dhu nyiimïee bënn, ki nuumi mër. Yɑ ceg-ɑ wun ki nyingi Wë, kinni kɑ wɑ̈nyø men órɑ̈ngu nyiimïee bënn. Wiy dhwɑ̈ɑ̈ng Wë Yëso Mesiy yinge kömi wun. Wɑ̈nyø men kɑ̈ɑ̈l-ɑ yï Pøøl, kí Silɑ̀, kí Timøthì. Ge gwëd-ɑ kɑnïsɑ̀ kì Tesɑlonikɑ̀, gen ɑ tyëng-ɑ bɑ mø Wïy Jwøk, kí Wë Yëso Mesiy. Wiy dhwɑ̈ng geki mër møg-ɑ nyi kɑ̈ɑ̈l yï Jwøk ying gen kömi wun. Wun ɑ nyiimïɑ, Jwøk ceg kɑ pøjjø yi wøn ceth kiper wun. Bɑ gïjø mɑ dyër, mɑ́ yïëyø mi wun kedh e ódøngø, o mɑɑr-ɑ mɑɑru ri wun kedh e ódøngø ki mendwøng. Bene ɑ bɑnge nyi lejji wun yi wøn kì bøli kɑnïsɑ̀ mi Jwøk kì yethi kɑ̈jj bënn. Wu olejjø yi wøn kipe kɑ̀ ngïïn wun, wu mïdh-ɑ yïëyø mi wun, ngö nyingi wun ceg kɑ guudø, o wu ceg-ɑ orɑng. Møgɑni bënn nyodh-ɑ kinni löggi Jwøk bɑ dyër, o wu óbëëd wu myër ki kedhi yij Pödhe; pönh-ɑ pere bëëd wu orɑngø. Jwøk ógöögø ki gïn-ɑ dyër; tyëng-ɑ ɑ́wëggi wun orɑng, gï ógöjje orɑng. Kɑ wun ɑ tyëng-ɑ ɑ́yïddi ki orɑng kyeel ki wøn; wu óyiel kì yij orɑng kì bøli keny-ɑ ódwöög Wë Yëso, e kɑ̈ɑ̈l-ɑ mɑl geki wëywödde møg-ɑ teg, ge ókɑ̈ddø ki mɑc me ceg opɑ̈m, e bï-ɑ be cɑyi tyëng-ɑ bɑny Jwøk, ɑ pɑ dwɑddi lïngi Wöndøj mi Wë Yëso. Tyëngɑni óryem kì bøli Jwøk, kɑ ge lɑ̈ny-ɑ wɑ̈yi gen gïti ɑtheer. Kɑ mɑ̈ɑ̈dø men-ɑ nyi ying yï Wë ocögø gø pɑ lidh yi gen, keny-ɑ óbëëne kì cyɑ̈ngɑni, o lenhi yi tyëng-ɑ ɑ́kwër gɑ jii Jwøk. O ji-ɑ ɑ́yïëy bënn ki ngɑ̈dhii, pëthi gen mïni gen ki mendwøng. O wu óbëëd wu nud kì kenyɑni thyew; mɑ́ kwøbb-ɑ ɑ́pwönyi wun yi wøn ɑ́yïëy yi wun ceth. Bene ɑ nyi kwɑ̈jji wøn kiper wun yethi cyɑ̈ng bënn, kipe kinni o wu gwøg yi en wu myër ki gwøng-ɑ́ pere ɑ́cwøle wun, o gïgdøj møg-ɑ ɑ́tyer yi wun ki gwøgø, ówëgge pɑ̈dhi kɑ̈jji gen ki tege. O Wë Yëso ólenhi kì bɑng wun, o wu óyïddi wun ki dhwɑ̈ɑ̈ng Jwøk geki dhwɑ̈ɑ̈ng Wë Yëso Mesiy. De møg-ɑ kømmi kipe bëëni Wë Yëso Mesiy, kí rëbee ki en, wun ɑ nyiimïɑ, wɑ̈thi wun ko muum yi gen, kɑ̀ kømmii i Cyɑ̈ɑ̈ng Wë rum bëënø. Ócuggø bëëdø e nënni e ókwøb-ɑ yi wøn, wø ceg-ɑ töng, wɑlɑ̀ wø ceg-ɑ pwönyø, wɑlɑ̀ ge gweed wø’ yij wɑ̈nyø. Ri wun ko wëggu wënyø yi dhɑnhø. Mɑ́ cyɑ̈ngɑni óbï e pëëmø rum døngø, o Ngɑnrɑj rum cwöbø, eni ngɑn-ɑ köme di cɑ́y. Ngɑnɑni kööre ópwöd yi en cem e ying-ɑ mɑl kibøli gïg-ɑ nyi cwølli yi teedø gɑ jwögg. Kɑ obëëdø kì yij Kengi Jwøng-ɑ dyër; kɑ okööbø cem ɑ́ Jwøk. Wɑ̈thi wun ɑ́ceg-ɑ wïlø? Wu ce ɑ́köbbɑ’ møgɑni tyel mø gïïr keny-ɑ ɑ́yingɑ buti wun? Dɑ gïjø me mɑ̈ɑ̈n møgɑni cwöbø ɑnɑn, o gïnɑni bëëde ngɑ̈nyi yi wun. Ngɑnrɑj óbï-ɑ bøli keje. Pëëmø men-ɑ thɑre kwïj nudd e ogöögø ɑnɑn, de gïn-ɑ ócwöb pɑ cwöb gïti keny-ɑ ónyiig ngɑn-ɑ mɑ̈ɑ̈nii cwöbø. Codhe, o Ngɑnrɑj nyodh. De keny-ɑ óbëën Wë Yëso ki cɑre, ngɑnɑni ónɑ̈g yi en ki yømø me kɑ̈ɑ̈l dhøge. Ngɑnrɑj óbï kɑ tegi Cethɑn, o ógöögø ki gïïngɑ̈ngø, kí ngïjjì mø pyed, o ji-ɑ ɑ́cïb gɑ møg lɑ̈ɑ̈ny thɑb yi en ki wëënyø me rɑj. Ge ólɑ̈ɑ̈ny mɑ́ ge ɑ́bɑny-ɑ mɑ̈ɑ̈dø men-ɑ dyër, kinni o ge di yiel. Bene ɑ nyi ödi kömi gen yi Jwøk ki tegø me lɑ̈ɑ̈ny gen, o ge nyi yïëy gen ki kwøbbi pyed. O ge cɑy, gen ɑ tyëng-ɑ pɑ nyi yïëy ki dyër, ɑ tyer gøggi rɑj. Jwøk nyii pøjjø yi wøn yethi cyɑ̈ng bënn, kiper wun yeki nyiimïɑ, wu tyëng-ɑ mɑɑr yi Wë. Wu ɑ́rum ki yienyø yi Jwøk cøn, wun ɑ́ møg yiel ki tegi Wëy, o wu gwøg wun ɑ́ tyëng kwër, kì ri yïëyø kí dyër. Kɑ wu cwøl yi en kipe kinni o wu yiel kì bɑng Wöndøj men-ɑ ɑ́pwönyi wun yi wøn, kipe kinni o wu óyïddi wun ki dhwɑ̈ɑ̈ng Wë Yëso Mesiy. Kɑ ɑ́rum bëëde kinøw, wun ɑ nyiimïɑ, mïdhu møg-ɑ ɑ́pwönyi wun yi wøn, kí møg-ɑ ɑ́gwëdi wun yi wøn. Wë Yëso Mesiy kiree, geki Wïyee Jwøk ɑ ɑ́mɑɑr wɑ, kɑ wɑ thödhe ki dhwɑ̈nge, kí gɑ̈ɑ̈nø me dwøng; pëthi wun ówëggi gen tëngø, o wu nyi kømmu dyër, o wu nyi gøggu dyër. De gïn-ɑ kwøb yi wøn kì cyɑ̈n, wun ɑ nyiimïɑ, bɑ kinni, nyi kwɑjju Jwøk kiper wøn, o kwøbbe jwɑn gen tɑyø, o lenhi ni kɑ̀ lenhii kì kelli wun. Kɑ wu nyi kwɑ̈jji wun thyew kipe kinni, o wø yiel kì cinggi tyëngpëëmø geki tyëngorøg; mɑ́ e pɑth ki ji bënn ɑ nyi yïëy kwøbbi Jwøk. De kɑ̀ bëëd Wë, e myër ki ngɑ̈dhø, wu óthödhi yi en ki tegø; o wu ókor yi en ki Ngɑnrɑj. Wø ogɑ̈nø ceth ki nyingi Wë kinni, cigg-ɑ kømmi yi wøn ɑ́yïëy yi wun ɑnɑn, o ge óyïëy yi wun dhuki megø thyew. Wu ónyudhi yi Wë, kɑ bëëdi mɑ̈ɑ̈dø mi Jwøk gɑm yi wɑ̈thi wun, kɑ wu odïdø ki ngïïnø men-ɑ nyi muuj yi Mesiy. Anɑn, wun ɑ nyiimïɑ, wø ceg-ɑ wun ki nyingi Wë Yëso Mesiy kinni, lɑ̈ɑ̈w wun ri wun ki tyëng-ɑ ɑ́yïëy møg-ɑ bɑ rɑj, ɑ pɑ dwɑddi lïngi møg-ɑ nyi ceg gen yi wøn. Ngɑ̈nyi yi wun kinni wu di ceg-ɑ bëëdi wøn ki ngøyø. Wø nuti bëëdø wø bɑ rɑj keny-ɑ ɑ́ying wøn kelli wun. O bong gïncɑɑm ngɑn megø mɑ ɑ́wɑ̈dhi ki cɑmø yi wøn. De wø ɑ́ceg-ɑ gwøg kì wɑ̈r kí dicɑ̈ng, kipe kinni o bongii ngɑn jud yi wøn. Menɑni pɑth kipe kinni, yï wøn bong tegø men cwöddi wøn kì yï wun; de wø ɑ́dwɑdd-ɑ nyudhi wun tegi per gwøg. Keny-ɑ ɑ́ying wøn kelli wun, wu ɑ́bëëd wu nyii köbbø yi wøn kinni, “Ngɑn bɑ̈nyi ki gwøg, ko wëggu cɑm.” Møgɑni kwøb yi wøn kɑ per kɑ ɑ́lïng wøn kinni, i dɑ ji møøgø kì kelli wun mø wɑ̈dhi bëëdø ge pɑ göögø; de ge ceg-ɑ wïïnø kì kelli teedø ge kɑ̈ll-ɑ wöddi gïg-ɑ gøggi yi ji møøgø. Ceg wun ji-ɑ ni møgɑni; kɑ ge köbbi ki nyingi Wë Yëso Mesiy kinni göög gen, ge okudø. Wun ɑ nyiimïɑ, köthi wun ko buudh yi gwøg ki gïgdøj. O keløg e dɑ ngɑn bɑ̈nyi ki lïngi kwøbbi wøn møg-ɑ yij wɑ̈nyø men, tidu en, kɑ këëj wun, o wïje lɑ̈ɑ̈ye. Ko gwøg wun ɑ́ ngetimɑ̈ɑ̈nø; de nyi cegu en ni wɑd. Wu óthödhi ki mër yi Wë, ngɑn-ɑ yïe nyi kɑ̈ɑ̈l yi mër kì yethi cyɑ̈ng bënn, ki yëëth bënn. Wu ómïdhi yi Wë, wu bënn. Yɑn ɑ gwed møg ki cingɑ. Wu ɑ́mɑ̈dh yi Pøøl Bene yuu-ɑ nyi thɑnyɑ wɑ̈jj-ɑ gwedɑ bënn ɑnɑn; bene gwedɑ ɑnɑn Wiy dhwɑ̈ɑ̈ng Wë Yëso Mesiy yinge kömi wun bënn. Wɑ̈nyø men kɑ̈ɑ̈l-ɑ yï Pøøl, jɑlwööni Yëso Mesiy, kì bɑng møg-ɑ ɑ́ceg yi Jwøk Yïënee, geki Yëso Mesiy, ngɑn-ɑ gɑ̈n yi wɑ. Yɑ gwëd-ɑ Timøthì wɑ̈dɑ, wɑ̈n-ɑ dyër kì yij yïëyø. Wiy dhwɑ̈ng kí mër geki lɑ̈mpyëw møg-ɑ nyi kɑ̈ɑ̈l yï Jwøk Wïyee geki Wë Yëso Mesiy, ying gen kömí. Yɑ dwɑdd-ɑ kinni o yï bëëd kì Epɑsos, ni kɑ ɑ́köbbɑ yïn cøn, e yɑ kedh-ɑ Mɑkdöniyɑ̀. Dɑ ji mø pwönyi kwøbbi pyed kì kunɑni, kyëddí gen kinni wiy gen pwönyɑni. Köbbí gen kinni wiy gen wɑ́j-ɑ ócyɑ̈ɑ̈ngi, kɑ løbbi kwɑyy wiy gen, mɑ́ møgɑni nyi kɑ̈ɑ̈l-ɑ pëëmø yøw; møgɑni pɑ göögø kì ri møg-ɑ ɑ́gwir yi Jwøk; gen ɑ møg-ɑ nyi yod kì bɑng yïëyø. Gïn-ɑ pere ceg møg, bɑ kipe tugi mɑ̈ɑ̈dø men-ɑ nyi kɑ̈ɑ̈l yethi pëth-ɑ tïl, o yeth bëëd ge bong ɑ́dud, o yïëyø bëëde ɑ́ yïëy-ɑ dyër. Ji møøgø ɑ́dwöög wɑ̈g kì ri møgɑni, kɑ ge døøg-ɑ be kømmi kwøb mø bong thɑ́ gen. Ge dwɑdd-ɑ løgi ri gen jøpwönyi Ciggi Mosɑ̀; de gïg-ɑ kømmi yi gen kwïj yi gen; o møg-ɑ tenyi yi gen, kwïj yi gen. Ngɑ̈nyi yi wɑ kinni, Ciggi Mosɑ̀ døøj, keløg ge omïdhø kidøøj. De wɑ̈thi ji ko wïl kinni, cigg nuti gwøgø kɑ per tyëngtir, de ge ɑ́gwøg kɑ per tyëngpëëmø, kí tyëngorøg, kí tyëng-ɑ bɑny Jwøk geki tyëng-ɑ mɑɑr orøg; kí tyëng-ɑ nuti yïëyø; kí tyëng-ɑ pɑth ki ɑkwër, kí tyëng-ɑ nyi nɑ̈g wëëg gen geki mëëg gen, kí ɑ́muddi ji, kí tyëng-ɑ nyi niin ngɑn nuti nywøøm gen ri gen; kí cwøw-ɑ nyi niin ri gen; kí tyëng-ɑ nyi kwɑlli nyigi ji møøgø; kí tyëngpyed, wɑlɑ̀ tyëng-ɑ nyi köngi ki pyed, ɑ nyi pwönyi kwøbb-ɑ pɑth ki dyër. Pwöny-ɑ dyër ying-ɑ yij wöndøj men-ɑ ɑ́mëggi yɑn kinni o köbbɑ ji, eni Wöndøj men-ɑ kɑ̈ɑ̈l yï Jwøk, ngɑn-ɑ lenhi kɑ lejji. Yɑ pwøj-ɑ Wë Yëso Mesiy, ngɑn-ɑ ɑ́thödhi yɑn ki tegø men göögɑ. Yɑ pwøj-ɑ en kipe kɑ ɑ́yode yɑn yɑ døøj ki göggii, cɑgg ɑ́ kɑ ɑ́bëëdɑ yɑ bɑ ngɑn mɑ ɑ́kømmi kwøb mø rijjø kì ree cøn kɑ gwɑddɑ. De Jwøk pyëwe ɑ́ceg-ɑ lɑ̈ɑ̈mø ki yɑn, mɑ́ yɑ ɑ́bëëd yɑ nuti yïëyø kì bøli kenyɑni, o yɑ ɑ́gwøg-ɑ gïjø me kwïj yi yɑn. Kɑ dhwɑ̈ng-ɑ ɑ́yod yi yɑn kì yï Wë, ree mede kì bɑng yïëyø geki mɑ̈ɑ̈dø men-ɑ nyi yod yi dhɑnhø kɑ̀ yïëye ki ngɑ̈dhi Yëso Mesiy. Kwøbb-ɑ myër ki ngɑ̈dhø yi dhɑnhø, o ge døøj ki yïëyø yi teedø bëne, bɑ kinni Yëso Mesiy ɑ́bï kömi piny be yieli tyëngorøg; o teedø bëne lod yi yɑn ki orøg, de Jwøk pyëwe ɑ́lɑ̈ɑ̈m ki yɑn, kipe kinni o ngïni Yëso Mesiy kwønge ki nyodhø kì riɑ; yɑ ngɑn-ɑ pëddi ki orøg, o yɑ bëëdɑ yɑn ɑ́ nyuudhi kipe tyëng-ɑ yïëyii kì bɑngɑ, o ge óyïddi gen ki nënn-ɑ ɑtheer. Wøør Rɑ̈nh-ɑ pɑ thøw, o pɑ nënni; ɑ bɑ Jwøk kete, kɑ lejji gïti ɑtheer! Amen. Timøthì wɑ̈dɑ, gïg-ɑ cïgɑ yïn ɑ́cïbɑ cingí kì bɑng kwøbb-ɑ ɑ́töng kì rií kɑ̈ge dööng. Gwøg kwøbbɑni gɑ møg nyïɑ̈ggí ki liny; mïdhí yïëyø mií, kɑ yï göög yijí bong ɑ́dud. Kwï ji ɑ́ceg-ɑ bɑ̈nyø ki gwøgi møg-ɑ ngɑ̈nyi yi gen gɑ dyër, kɑ yïëyø mi gen rënyi gen. Kelli tyëngɑni dɑ Ëmenɑøs, kí Iskɑnder; jøg-ɑ ɑ́mëggi ri gen Cethɑn; kipe kinni o ge ódïd gen kì bɑng møgɑni, o nyingi Jwøk wiy yi gen ki bwölø. Gïn-ɑ dwɑddi yi yɑn kinni nyi gwøg kì kɑnïsɑ̀ bɑ cwöd kì yï Jwøk, kí kwɑ̈jjø, kí mɑ́l, kí pwøj kipe ji bënn; kí kiper rɑ̈nhì, kí jɑgg, kipe kinni, o wɑ bëëd wɑ mɑ̈ɑ̈dh ki bëëntir, kí mëri Jwøk, kí wuödø. Møgɑni døøj ki gwøgø, o pyëw Jwøk Yïënee med ki gen, mɑ́ e dwɑddi kinni o ji yiel bënn, o ge dïd gen ki kwøbb-ɑ dyër. Mɑ́ Jwøk bɑ ɑ́kyel kete, o ngɑn-ɑ reb ji ki Jwøk bɑ ɑ́kyel, en ɑ Yëso Mesiy; ngɑn-ɑ ɑ́muuj wëye ge gøøm-ɑ bølí dhɑnhø bëne, o bɑ per møgɑni ɑ ɑ́ör yɑn, yɑn ɑ́ jɑlwöödø me pwönyi tyëngpɑth ki Yeud, o yɑ kwøbɑ wööni yïëyø geki dyër. Yɑ pɑ ceg pyed; yɑ kømm-ɑ dyër! Yɑ dwɑdd-ɑ kinni nyi kwɑ̈jji cwøw kì kɑnïsɑ̀ kì kɑ̈jj bënn, e ri gen thyeey gen, o cinggi gen tïngi gen Jwøk ge dhïw, e bong wëërø wɑlɑ̀ pëëmø kì kelli gen. O yɑ dwɑdd-ɑ kinni rug tyëng-ɑ mɑ̈nn ki ógudh møg kum dëlli gen kidøøj, kɑ ge gwøg gen dhwɑ̈ng me pere wøør gen; o yëyy pɑ nyølli; o ge ko rug ki dhɑb geki tigg-ɑ per gen teg. Kɑ ge bëëd gen ge gøgg-ɑ gïgdøj, mø kyëëw ki tyëng-ɑ mɑ̈nn møg-ɑ wør Jwøk. Kɑ tyëng-ɑ mɑ̈nn dïd gen, ge bëëd-ɑ möölø e bong gwɑgø. O yɑ pɑ yïëy kinni pwönyi ji yi tyëng-ɑ mɑ̈nn, kɑ cwøw ko jɑɑg yi gen, de ceg gen bëëdø mɑ̈ɑ̈dh. Mɑ́ Adɑm ɑ ɑ́kwøng ki cwɑ̈jø, codhe ɑloony Awɑ̀ ki cwɑ̈jø. O pɑth ki Adɑm ɑ ɑ́thɑb, de bɑ ngɑndhɑjø ɑ ɑ́thɑb kɑ ciggi Jwøk pyeme. De ngɑndhɑjø óyiel kì ri pɑ̈dhe piny, keløg e obëëdø ki bëëndøj kì kömi yïëyø kí mɑ̈ɑ̈dø, ɑ ɑkwër. Møg-ɑ kømmi kinni; ngɑn yɑb gwøg ɑ́ jɑgø kì kömi kɑnïsɑ̀, ɑ́kwɑny gwøg me døøj, bɑ dyër. De bëëd jɑngi kɑnïsɑ̀ köme bong ɑyɑ̈r, e cyëge bɑ ɑ́kyel; kɑ bëëde wïje onëënø, o ngɑ̈ny mɑgi pyëwe, o ngɑ̈ny gwïdø; kɑ bëëde ɑ́ ngɑn bute nyi töngi yi wëll; o ócuggø ki pwönyi ji; o pɑ nyi nɑ̈g yi møgø, o pyëwe pɑ dwøng kipe ngyëny. Kɑ bëëde gøle okorø yi en kidøøj, o kwøbbe olïngø yi nyige, e owørø yi gen ki mendwøng. Mɑ́ keløg e dhɑl-ɑ yi mïdhi gøle, kɑnïsɑ̀ mi Jwøk ómïdhi yi en kidï? Kɑ ko bëëd ɑ́ ngɑn me cer yïëyø, kipe wïje ótɑ̈d, kɑ cɑy ni kɑ ɑ́cɑɑy Cethɑn. De bëëde ɑ́ ngɑn me wør yi teen-ɑ pɑ ying kɑnïsɑ̀, o cöge e pɑ yɑ̈r kɑ mɑg yi ɑ́kɑ̈lli Cethɑn. Kɑ tyëng-ɑ kunyi ki gwøg kì kɑnïsɑ̀ bëëd gen gɑ ji mø wør yi teedø, o ge pɑ nyi kømmi dhøg ɑ́ryew; o ge pɑ nyi mɑ̈dhø møgø me gïïr; kɑ ge bëëd gen pëthi gen pɑ ngɑm kipe ngyëny wɑlɑ̀ jɑmmì mø gïïr; kɑ ge bëëd gen gɑ ji mø mïdhi kwøbb-ɑ ɑkɑnn mø yïëyø ki pëëth mø tïl. Cɑɑg tyëngɑni ki rɑngø møti, oyood gen e bong gïnrɑj kì yï gen, o ge røny cyee. Kɑ mɑ̈nni gen bëëd gen gɑ ji mø wør thyew, o ge pɑth ki tyëngkwɑ̈dh; o wɑ̈thi gen ogöögø, o ge bɑ ji mø nyi cungi kì kömi dhøggi gen kì ri jɑmmì bënn. Ngɑn-ɑ kunyi ki gwøg kì kɑnïsɑ̀ bëëde cyëge bɑ ɑ́kyel, kɑ bëëde gøle geki nyige omïdhø yi en kidøøj. Tyëng-ɑ kunyi møg-ɑ göögø kidøøj, per gen nyii tëngø kɑ ge gɑ̈nni; kɑ ge nyii kööbø ge pɑ böggi kì ri yïëyø mi gen ki Yëso Mesiy. Møg-ɑ gwëdɑ yïn ɑnɑn bɑ kinni, yɑ ogɑ̈nø yɑ ójwɑn bëën yïí. De keløg yɑ ócwöngø, bëëd yï ngɑ̈ny gïn-ɑ døøj ki gwøgø yi yïn kì gøl Jwøk, ɑ bɑ kɑnïsɑ̀ mi Jwøng-ɑ nëënø; ɑ bɑ löj men-ɑ mïdhi dyër. Bong pëëmø kì ri döngi kwøbb-ɑ ɑkɑnn mø yielø kinni: Ácwöb e rug-ɑ dëël dhɑnhø, kɑ nyodh yi Wëykwërø kinni bɑ dyër kɑ lidh yi wëywödd. Kwøbbe ɑ́pwönyi kì yethi pödhh, kɑ møge yïëy yi lɑ̈bø bëne, kɑ kïdhi yij mɑl. Wëy okööbø ceth kinni kwï ji yïëyø mi gen ówiy yi gen kì cyɑ̈ngg-ɑ cyɑ̈n; ge ódøøg be lïngi kwøbbi wëy-ɑ ceg pyed, kɑ ge yïëy-ɑ pwönyi Cethɑn. Pwönyø menɑni kɑ̈ll-ɑ yi tyëngwëënyø møg-ɑ ceg pyed; gen ɑ tyëng-ɑ pëthi gen thøø, de ge ce ócwɑ̈yø kɑ ngyënyø me kɑ̈ɑ̈l kì mɑc e kwɑɑr. Ge mɑ̈ɑ̈n-ɑ ji nywöm kí cɑm ki kwï gïgcɑmm, e gïgcɑmmɑni ɑ́cwɑ̈j yi Jwøk gɑ møg cɑm, o nyi pwøj kiper gïgɑni yi tyëng-ɑ ɑ́yïëy, kɑ dyër yod yi gen. Gïg-ɑ ɑ́cwɑ̈j yi Jwøk døøj bënn, o ko di gïjø me cuggi bɑnyø, de di dwɑddø kinni yïëëy gen bënn, kɑ Jwøk pwøj kiper gen. Keløg nyiimyëw nyudhí ciggɑni, yï óbëëd yïn ɑ́ ngeti gwøøg Yëso Mesiy me døj; mɑ́ yï cɑɑm rií kɑ kwøbbi yïëyø geki pwöny-ɑ dyër men-ɑ bɑnge cyɑ̈dhi yi yïn. Këëj wɑ́j-ɑ pɑ kyëëw ki kwøbbi Jwøk, geki møg-ɑ nyi wɑjji yi ywödhh; kɑ rií pwönyí ki bëëdø ki bëëntir. Pwönyi dël ki dyëjø døøj, de pwönyi rɑw ki bëëntir døøj kì wɑ̈thi tùng bënn, mɑ́ ree dɑ ngɑ̈dhi nënni ɑnɑn kí nënn-ɑ óbï dhuki megø. Kwøbbɑni bɑ dyër, o ge døøj ki yïëyø yi ji bënn, kinni; wɑ ɑ́dyëëj ki gwøg, mɑ́ wɑ ngɑ̈dh-ɑ Jwøng-ɑ nëënø, ɑ bɑ Yïëni ji bënn, o mɑɑl gen bɑ tyëng-ɑ ɑ́yïëy. Nyi pwönyí teedø ki møgɑni, kɑ ge nyi ceg ki kër-ɑ ómïdhi ge gïn. Rií ko wëggí cɑyø yi ngɑn megø kipe kɑ̀ bëëd yï bɑ wøb. De kwøbbí, kí bëëdí, kí mɑ̈ɑ̈dø mií, kí yïëyí, geki kɑ̀ bëëd kelli wun lɑ̈wi ki gïgrijjø, wiy bëëd gen gɑ nyuudhi kipe tyëng-ɑ ɑ́yïëy. Kɑ wɑ̈nyi Jwøk nyi rɑɑng kì bøli teedø, kɑ ge nyi pwönyí, kɑ ge nyi cïïj, gïti keny-ɑ óbëënɑ. Tegø men-ɑ ɑ́muuj yi Jwøk kì bøli keny-ɑ ɑ́thɑɑny cinggi jøgdøngø kömí keny-ɑ ɑ́røøny yïn, ko wëggí lɑ̈ɑ̈nyø. Kɑ rií ngiij ki dyëjø ki gwøngɑni kipe kinni o bëëdí lidh yi teedø bëne e kedh e ódönyø. Tid rií, kɑ pwönyí tiid. Dyëëj ki gøggi møgɑni; mɑ́ keløg yï ógöögø kinøw, rií óyiel yi yïn, wuki ji-ɑ nyi lïngi møgí. Ngɑn-ɑ dwøng kibølí ko nyi jɑngí, de nyi kööb mɑ̈ɑ̈dh ki en, e nɑ wïyí ceth. Kɑ yɑnythønhø mïdhí ge nɑ nyiimyëw. Kɑ tyëng-ɑ mɑ̈nn møg-ɑ døngø mïdhí ni ke di mïdhí meyí. Kɑ womɑ̈nn mïdhí ki tɑri pyëwí, ge nɑ nyiimyëw. Wør tyëng-ɑ mɑ̈nn møg-ɑ bɑ thwömm. Keløg e dɑ ngɑndhɑjø me yïe di nywøl wɑlɑ̀ kwɑrr, dïd gen møti ki møg-ɑ kømmi yi kwøbbi Jwøk kipe kønyi tyëng kɑ̈lli gen; mɑ́ e bɑ gïjø me døøj kì bøli Jwøk, keløg tyëng-ɑ ɑ́pidh gen okønyø yi gen. Ngɑndhɑjø men-ɑ bɑ thwöm, o bëëd ɑ kete ki cwɑgge, nyi ngɑ̈dh-ɑ Jwøk, o gønye nyi gönye’ Jwøk yethi cyɑ̈ng bënn. De ngɑn-ɑ bɑ thwöm-ɑ nyi rumø kipe jɑmmi kömi piny, cɑgg e nëënø, pɑ̈r ki ngɑnthøø kì bøli Jwøk. Nyi ceg gen ki møgɑni, kipe kinni o bongii ɑyɑ̈r kì kömi gen. Keløg e dɑ dhɑnhø me pɑ nyi thödhi wɑddi gen wɑlɑ̀ tyëng gøl gen ki gïn-ɑ jɑ̈ddi gen, møg-ɑ ɑ́yïëy yi en cøn ɑ́pyeme, o lod-ɑ ngɑn-ɑ nuti yïëyø ki rɑ̈jø. Ko di ngɑndhɑjø me gwed kinni bɑ thwöm, keløg runne nuti wɑ̈dhi ri pyɑ̈r ɑ́bïkyel, o ko bëëd e ónywømø tyel ɑ́ryew. De ngɑn-ɑ gwed ɑ́ thwöm bëëde ɑ́ ngɑn me ngɑ̈nyi yi teedø bëne kinni, nyi gøgg-ɑ gïgdøj, o nyige piidh en kidøøj, o bute nyii töngø yi wëll, o kɑ̈jji tyëng-ɑ ɑ́kwër gɑ jii Jwøk nyii tyenyø yi en, o nyii kunyø ki tyëng-ɑ kömi gen di ɑkørr. O nyi gwøg-ɑ gïn-ɑ døøj ceth. De tyëng-ɑ mɑ̈nn møg-ɑ nudd ge thønhø ko gwed kinni ge bɑ thwömm møg pidh yi kɑnïsɑ̀, mɑ́ kenyi køni kwøbbi nywømø ki pëthi gen, Mesiy nyi wiy ge’ piny, kɑ pɑ̈di møg-ɑ ɑ́kwöng yi gen ogöögø ki cɑ́y kì kömi gen. Ge nyi tyëg piny ge owïïnø kì kelli kɑ̈llì, kɑ ge nyii dïdø ki ɑtum, kɑ ge nyi kedh-ɑ yethi kwøb mø pɑth ki mø gen, kí kømmi kwøb mø rijjø. Yɑ dwɑdd-ɑ kinni nywøøm mɑ̈nn-ɑ thwömm møg-ɑ bɑ othønhø, o ge yïddi gen ki nyigi gen, o kɑ̈lli gen kor yi gen. Møgɑni bɑ kipe kinni, o ngetimɑ̈ɑ̈nø cöge e pɑ yïddi ki yöö men yɑnye wɑ, mɑ́ kwï ji ɑ́rum ki peej pɑ̈l yi Cethɑn. Keløg e dɑ jɑlø wɑlɑ̀ dhɑjø me wɑɑd gen bɑ thwöm, kønye gøn, mɑ́ kɑnïsɑ̀ ókøny-ɑ thwömm møg-ɑ bong wɑddi gen, de pɑth ki kinni o pïd ki thwömm møg-ɑ di wɑddi gen. Bëëd yï ngɑ̈ny wøw kinni, tyëngdøngø møg-ɑ jɑɑg kɑnïsɑ̀ kidøøj, bɑ gen ɑ ngyënyyi gen cuggi medø, mɑɑl gen bɑ tyëng-ɑ nyi pwönyi kwøbbi Jwøk, kɑ gï lwøb gen kidøøj. Mɑ́ e bɑ ɑgwed kì yij wɑ̈nyi kwërø kinni, “Wɑdh, men-ɑ ywɑjji gïn-ɑ pwööd byel kì yij rɑrø, dhøge ko nyi twöj.” Kí kinni, “Nyi mëggi dhɑnhø köönge.” Yï ko yïëy ki lidhi gøøny ngɑn dwøng mi kɑnïsɑ̀ kɑ̀ gøønyii yi ngɑn megø e bong cwɑ̈gg ɑ́ryew wɑlɑ̀ ɑ́dɑ̈g. De nyi cɑy tyëng-ɑ røngi kì bøli teedø bëne, kipe kinni o ji møøgø óböggi gen ki gwøg ki orøg. Bɑ bøli Jwøk geki Yëso Mesiy kí wëywödd, ɑ cegɑ yïn kinni, mïdhí møg-ɑ köbbɑ yïn ek, kɑ ko di ngɑn cwɑg yi yïn kibøli ngɑn-ɑ kyeelø. Kɑ yï ko nyi jwɑn røny ki ji mø bëëdi gen kwïj yi yïn, møgɑni bɑ kipe kinni, o yï ócöög yï pɑ cɑy kipe orøng-ɑ ógwøg yi gen. Nyi kor rií ki gïgrijjø. Yï ko nyi mɑdh pï keti gen, de nyi mɑ̈ɑ̈dh ki møgi oløg me nøg, kipe kinni o gïncɑm nyi jwɑne töyø kì yijí, mɑ́ dëlí nyii rɑ̈mø. Wiy tyëng-ɑ nudd ge ying-ɑ yij bɑ̈ɑ̈ngø wør gen tyëng-ɑ cinggi gen di gen. Møgɑni bɑ kipe kinni, o nyingi Jwøk geki pwönye cög ge pɑ bwöl yi gen. Kɑ bɑ̈ngg-ɑ bëëdø kì cinggi tyëng-ɑ ɑ́yïëy, wëëg gen ko benyi gen, mɑ́ ge bɑ nyiimëëg, de ti gen gwøg mɑ́ ge gögg-ɑ tyëng-ɑ ɑ́yïëy mø ceg ki mɑɑrø yi gen. Nyi pwönyí ji ki møgɑni, kɑ ge nyi cïïj kidøøj. De keløg e dɑ ngɑn megø me nyi pwönyi ki kwøb møøgø, o pɑ nyi yïëy ki kwøbbi Mesiy møg-ɑ dyër, ɑ kyëëw ki bëëntir, ngɑnɑni wïje tɑ̈dø, o bong gïn ngɑ̈nyi yi en. Tyer-ɑ gïg mø rijjø, møg nywøl pëëmø, kí wëërø, kí tyiel, kí mɑ̈ɑ̈nø, kí ɑgwɑddø, kí myën, kí gøny kì kɑɑm ji-ɑ́ wɑ̈thi gen ɑ́rënyi, møg-ɑ ɑ́göög ge kwïj kwøbb-ɑ dyër. Ge rømm-ɑ kinni i kwøbbi Jwøk bɑ gïg bɑng gen kɑ̈ri. Ngee, dhɑnhø nyii kɑ̈rø yi kwøbbi Jwøk kidyër, keløg pyëwe gøøj en kömi jɑmm-ɑ yïe keti gen. Á ngø ɑ ɑ́kɑ̈ɑ̈l yi wɑ kömi piny keny-ɑ ɑ́nywøøl wɑ? Bogøn! Á ngø ɑ ókɑ̈l yi wɑ kì kömi piny? Bogøn! Kɑ ɑ́rum bëëde kinøw, bong gïn dwɑddi yi wɑ këti keløg yïee dɑ gïncɑm kí ógødh. Mɑ́ tyëng-ɑ nyi rïngi kì bɑng kɑ̈rì nyi jwɑn kɑ thɑbø yi wëyrijjø, kɑ ge nyii göögø ki bɑ̈ngge, kɑ pëthi gen nyii tyëëdø ki mendwøng, kɑ ryɑ̈g nyi jwɑn-ɑ pɑ̈dhi kömi gen. Mɑ́ rɑj bënn nyi kɑ̈ɑ̈l-ɑ bɑng mɑɑri ngyëny. Dɑ ji møøgø mɑ pëthi gen ɑ́døngi kipe ngyëny, kɑ ge ówɑ̈ɑ̈nyø ki yuu yïëyø, ɑyïddi gen ki rɑ̈ɑ̈m pyëw me dwøng. De yïn, jɑlkwøbbi Jwøk, lɑ̈ɑ̈w rií ki jɑmmɑni bënn. Nyïɑ̈ggí kipe bëëntir, kí bëëndøj, kí yïëyø, kí mɑ̈ɑ̈dø, kí ngïïnø, geki bëëdø mɑ̈ɑ̈dh. Nyɑg rií kidøøj kipe møg-ɑ ɑ́yïëy yi yïn; kɑ nënn-ɑ ɑtheer kwɑɑny gɑ kööngí; mɑ́ per nënnɑni ɑ ɑ́cwøøl yïn yi Jwøk, kɑ ɑ́yïëëy kì bøli ji mø gïïr. Yï ceg yi yɑn ɑ bøli Jwøk thyew, ngɑn-ɑ nyi muuj wëy kí jɑmmì bënn; kí bøli Yëso Mesiy, ngɑn-ɑ ɑ́cony møge kì bøli Pilɑtø jɑl Pøntøs, e pɑ böggi. Mïdhí cigg kidøøj, gïti Cyɑ̈ng-ɑ óbëën Wë Yëso Mesiy. Mɑ́ e ócwöb kì bøli keje; eni bøli keny-ɑ ɑ́cïb yi Jwøk, ngeti gyëdh, ɑ jyɑ̈gø e kete, Rɑ̈ɑ̈dh rɑ̈nhì, Wïi wëëg. E kete ɑ pɑ thøw; bëëd ɑ yij cɑr me bute pɑ wɑ̈dhi yi dhɑnhø. Bong dhɑnhø mɑ ɑ́pɑ̈nyii ki lidhø; bong ngɑn cuggi lidhii. En ɑ wør, ɑ jyɑ̈gø gïti ɑtheer! Amen. Köbbí tyëng-ɑ kɑ̈rø yi jɑmmi kömi piny kinni ge ko thwøg, wɑlɑ̀ rummi gen ko cïb gen ri kɑ̈r-ɑ nyi lɑ̈ɑ̈ny. De cïb gen rummi gen ri Jwøk, ngɑn-ɑ nyi thödhi wɑ ki jɑmm-ɑ nyi mïni pëthee. Kɑ tyëngkɑ̈rì nyi göög gen ki gïgdøj, kɑ ge nyi muuj gen ki tɑri pëëth, ge køny-ɑ tyëng-ɑ kyeelø ki jɑmmi gen. Kɑ̀ göög gen kinøw, ge cøng-ɑ gïg-ɑ ómïdhi gen kidøøj dhuki megø, o ge óyïddi gen ki nënn-ɑ dyër. Timøthì, kor møg-ɑ ɑ́cïb cingí kidøøj; këëj kwøbb-ɑ bɑ yɑnggì geki wɑ̈dhi pëmø, kí kwøbb-ɑ cwølli yi kwï ji i bɑ dïdø. Mɑ́ ji møøgø ɑ́kwɑny-ɑ møgɑni, kɑ ge ówɑ̈ɑ̈nyø ki yuu yïëyø. Wiy dhwɑ̈ng-ɑ nyi kɑ̈ɑ̈l yï Jwøk yinge kömí. Wɑ̈nyø men ör-ɑ yi Pøøl, jɑlwööni Yëso Mesiy kì bɑng gïn-ɑ ɑ́dwɑddi yi Jwøk; ɑ́ör ɑ́ jɑlwöödø men kɑ̈lli wööni nënn-ɑ yod kì bɑng rëbø ki Yëso Mesiy. Yɑ gwëd-ɑ Timøthì wɑ̈dɑ wɑ̈n-ɑ mɑɑrɑ. Wiy kwøbbi kɑ ɑ́lɑ̈ɑ̈m pyëw Jwøk kiperí, kí dhwɑ̈ng geki mër møg-ɑ nyi kɑ̈ɑ̈l yï Jwøk Wïyee geki Wë Yëso Mesiy, ying gen kömí. Yɑ pwøj-ɑ Jwøk, ngɑn-ɑ göggɑ ni kɑ ɑ́göög kweyyee cøn, e bong ɑ́dud kì yethi gen. Nyii pwøjø yi yɑn kenyi kwɑ̈jjɑ kiperí yethi cyɑ̈ng bënn. Yɑ nyi rïïj yɑ orumø kiperí yethi cyɑ̈ng bënn, kɑ ywøng-ɑ ɑ́ywøg yi yïn kì bøli keny-ɑ ɑ́dɑ̈ngi wɑ, nyi pɑɑrɑ. Yïëyø mií, yïëy-ɑ dyër orømmø yi yɑn ceth; eni yïëy-ɑ ɑ́ying yï wøngí Løis geki meyí Yunïkɑ̀ cøn. Bene ɑ pere pɑ̈ddɑ yïn kinni, mïdhí tegø men-ɑ ɑ́mëggi yïn yi Jwøk kì bɑng kɑ ɑ́thɑɑnyɑ cinggɑ kömí. Mɑ́ wɑ pɑ løg wɑ̈rrì yi Wëy-ɑ ɑ́mëggi wɑ yi Jwøk, de wɑ ceg kɑ thödhø yi Wëyɑni ki tegø geki mɑ̈ɑ̈dø, kí kori rɑw. Kɑ wïjí ko lɑ̈yyi cyee ki kømmi mø Wë, kɑ wïjí ko lɑ̈ɑ̈y kipe kɑ̀ bëëdɑ yɑ bɑ ɑmɑg. De yïëëy ki orɑng kipe Wöndøj, kɑ̀ thödhi yïn yi Jwøk ki tegø men gwøøg møgɑni. Wɑ ɑ́yiel yi Jwøk kɑ wɑ cwøle o wɑ bëëd wɑ, wɑ bɑ jie. De pɑth ki per gïn gwøøg wɑ, dɑ́ gïn-ɑ ɑ́dwɑddi yi pyëwe kì bɑng døøje. Dhwɑ̈ngɑni ɑ́mëgge wɑ kì ri Yëso Mesiy cøn, e piny nuti cwɑ̈jø, de møgɑni ɑ́nyudhi wɑ ɑnɑn, kì ri bëëni Yïënee, Yëso Mesiy. Thøø ɑ́tyɑm yi en, kɑ kwøbbi nënn-ɑ ɑtheer nyodhe kì ri wöndøj. Yɑ ɑ́kwɑny yi Jwøk, yɑn ɑ́ jɑlwöödø, kɑ yɑ gwøge yɑn ɑ́ jɑlpwönyi Wöndøj men kɑ̈llii kì kelli teedø. Bɑ kiper møgɑni ɑ ɑ́rɑngɑ yi gïg mø gïïr e wïjɑ pɑ lɑ̈ɑ̈y, mɑ́ ngɑn-ɑ ngɑ̈dh yi yɑn ngɑ̈nyɑ, o gïn-ɑ ɑ́cïbe cingɑ ómïdhi gïti keny-ɑ óbëën Cyɑ̈ngɑni. Mɑ̈gí kidøøj kì ri kwøbb-ɑ dyër møg-ɑ ɑ́pwönyɑ yïn bënn, kɑ yï bëëd yï mïdh-ɑ yïëyø, kí mɑ̈ɑ̈dø møg-ɑ kɑ̈ɑ̈l yï Yëso Mesiy. Korrí kwøbb-ɑ dyër, møg-ɑ ɑ́cïb cingí, o yï ókøny yi Wëykwërø ngɑn-ɑ bëëdø kì riee. Ngɑ̈nyi yi yïn kinni, yɑ ɑ́wiy piny yi tyëng Ásiyɑ̀, kí Pijeløs geki Ërmojenes kì kelli gen. Gøl Onisipørøs ókøny yi Jwøk, mɑ́ yɑ ɑ́cïj yi en, o wïje nuti lɑ̈ɑ̈yø yi yëll-ɑ cinggɑ. De yɑ ɑ́yɑbe keny-ɑ ɑ́wɑ̈nhe Römɑ̀, kɑ yɑ yode. Jwøk pyëwe ólɑ̈ɑ̈m ki en kì Cyɑ̈ngɑni! O óyïddi ki gyëdh. Mɑ́ e ngɑ̈nyi yi yïn ki mendwøng, kinni yɑ ɑ́køny yi en keny-ɑ ɑ́yingɑ Epɑsos. De ɑnɑn, yïn ɑ wɑ̈dɑ, bëëd yï teeg kì bɑng dhwɑ̈ng-ɑ nyi yod kɑ̀ yïëy dhɑnhø ki ngɑ̈dhi Yëso Mesiy. Kɑ pwönyɑ men-ɑ ɑ́lïngi yi yïn kì kelli ji mø gïïr, nyi loony ki pwönyi tyëng-ɑ ngɑ̈nyí yi yïn ceth kinni, ge bɑ ji mø cuggi pwönyi ji møøgø. Nyi böyí ki orɑng ni ɑlɑthker men-ɑ nyi nyïɑ̈ggi kidøøj kipe Mesiy. Mɑ́ bong ɑlɑthker me nyi göögø ki gïg-ɑ nyi gwøg yi tyëng-ɑ pɑth ki ɑlɑthker. De gïn-ɑ dwɑddi yi en bɑ kinni, o gwøge bëëde e døøj kì bøli ngɑn-ɑ ɑ́kwɑnyii. Kɑ thyew, ngeti tugø pɑ nyi wɑ̈dhi thödhø ki yɑ̈r men-ɑ nyi pwøøj tyëng-ɑ ɑ́pöödh, dɑ́ kenyi pöödhe geki kɑ̀ nyi mïdhe ciggi tugø kidøøj. O ngeti pur men-ɑ ɑ́göög ki gwøng teg, bɑ en ɑ kwøng ki thödhø kì ri byellɑni. Yod møg-ɑ kømmi yi yɑn kidøøj, mɑ́ yï óthödhi yi Wë ki rummì mø døøj kipe kwøbbɑni bënn. Wïjí ko wïl kinni Yëso Mesiy, ɑ ɑ́dhwödh kì yij thøø, bɑ wɑ̈d gøl Debïd, ni kɑ̀ pwönyɑ møgɑni kì yij Wöndøj men-ɑ kɑ̈lli yi yɑn. O bɑ kipe kɑ̀ pwönyɑ Wöndøj menɑni ɑ yïddɑ ki orɑng, kɑ yɑ opödø ki yëll ni ngetorøg. De kwøbbi Jwøk pɑ cuggi mɑgø ki yëll, bene ɑ bɑnge nginɑ gïg mø gïïr kipe tyëng-ɑ ɑ́yieny gɑ jii Jwøk, kipe kinni o ge óyïddi gen ki yielø men-ɑ nyi kɑ̈ɑ̈l bɑng kɑ̀ yïëy dhɑnhø ki ngɑ̈dhi Yëso Mesiy, o ge óbëëd gen kì yij cɑɑr Jwøk gïti ɑtheer kyeel ki en. Kwøb møg bɑ dyër kinni, “Keløg wɑ thøø kyeel ki en, wɑ ónëënø kyeel ki en thyew, Keløg wɑ pɑ wïyi ki ngïïnø, wɑ ójyɑ̈ɑ̈gø kyeel ki en thyew, Keløg e óbɑny yi wɑ, wɑ ólony yi en ki bɑnyø thyew. Keløg wɑ døøg-ɑ cyɑ̈n, pɑ cuggi døøg cyɑ̈n, mɑ́ ree pɑ cuggi bɑnyø yi en.” Nyi pɑ̈ddí tyëng kɑnïsɑ̀ ki møgɑni. Kɑ ge nyi kyëddí kinni, ge ko nyi wɑ̈dhi pëmø kì kelli gen, mɑ́ pëëmɑni rɑɑj kì bøli Wë, o nyi rëny-ɑ yïëyø mi tyëng-ɑ lïngø. Nyi göög kidøøj kipe kinni, o rií nyudhí Jwøk, o yï óyïëy yi en kinni, yï bɑ ngeti gwøg me wïje pɑ nyi lɑ̈ɑ̈y, mɑ́ kwøbb-ɑ dyër nyii lwøbø yi yïn kidøøj. Nyi këëj kwøbb-ɑ bong thɑ́ gen, mɑ́ kwøbbɑni nyi lɑ̈ɑ̈w-ɑ ji mø gïïr ki yuu Jwøk. Kwøbbɑni nɑ ɑ́rudø ɑ nyi cɑm dëël dhɑnhø; Ëmenɑøs geki Piletøs nud kì kelli ji-ɑ kɑ̈lli kwøbbɑni. Yuu dyër ɑ́wiy yi gen, o ge rëny-ɑ wɑ̈thi tyëng-ɑ ɑ́yïëy, kɑ̀ kööb gen kinni, i dhwödhø miee rum bëënø. De tyeli øn-ɑ ɑ́cïb yi Jwøk pɑ cuggi ki onhɑ̈nh, mɑ́ köme ógwedø kinni, “Wë ji-ɑ bɑ møge ngɑ̈nye” de “Tyëng-ɑ kööbø ce ge bɑ mø Wë, ceg gen wïyø ki gwøg ki gïgrijjø møti.” Yij øn-ɑ dwøng nyi dɑ puggì kí óthɑ̈ggì mø döngi ngëddi gen bɑ̈nni; møøgø ócwɑ̈jø kɑ dhɑb kí ɑ́tegø, møøgø ógwøgø kɑ ɑ́bwödø kí lɑ̈bø; kwï gen bɑ mø ryëj; o møøgø wɑ̈dhi kɑ gwøg yøw. Keløg ji ri gen ogwøgø yi gen ge dhïw, kɑ̀ lɑ̈ɑ̈w gen ri gen ki gïgrijjø møgɑni, ge ceg-ɑ gwøg gɑ mø ryëj, mɑ́ ge bɑ ɑthyey, o ge døøj kì yï wïi gen, ge bɑ ɑgwir ceth kipe gwøng døj. Këëj gïg-ɑ nyi tyer yi pëthi wøbb, kɑ yï tyer bëëntir kí yïëyø, kí mɑ̈ɑ̈dø geki mër, wuki tyëng-ɑ cwølli Wë ki pëëth mø tïl kinni kunye. Kɑ rií lɑ̈ɑ̈w ki tyëng-ɑ nyi wɑ̈dhi pëmø ki kwïji wøw geki dhëëgø, mɑ́ ge yɑb-ɑ wëërø kete. De ngɑn-ɑ nyi göögø kì bɑng Wë, ko bëëd ɑ́ ngɑn nyi yɑ̈bø ki wëërø; de bëëde ɑ́ ngɑn nyi bëëdø mɑ̈ɑ̈dh ki ji bënn. Kɑ bëëde ɑ́ jɑlpwönyø me døøj, o ngɑ̈ny ngïnø. Kɑ kwøbbi tyëng-ɑ pemmi dhøge nyi løøge mɑ̈ɑ̈dh, e bong wëërø, mɑ́ gø kwïj yi en ying pëthi gen óløg yi Jwøk, kɑ ge óyewø. Kɑ kwøbb-ɑ dyër yod yi gen. Kɑ ge obodhø kì dhøggi ɑ́kɑ̈lli Cethɑn, mɑ́ gï mɑɑg en, kɑ gï løge møg lïngi kwøbbe. Bëëd yï ngɑ̈ny wøw kinni, keny-ɑ óbëën cögi piny, kwøb mø peeg ócwöb. Pëthi ji ódøngi kipe jɑmmi kömi piny, kɑ ge ogöögø ge pɑ nywɑ̈gø, ge pwöd-ɑ köthi gen, ge thwøgø, ge ceg-ɑ gwɑ̈dø, o othønhø pemm-ɑ dhøggi wëëg geki mëëg; o ngɑn göggi gïndøj pɑ pwöjji, o kwøbbi Jwøk ówiy; ji ógöögø pëthi pɑ nyi lɑ̈ɑ̈m; ge ceg-ɑ pɑ̈d ki kwøb; ge ceg-ɑ kwɑ̈dh; ge nyɑ̈gg-ɑ ri gen; pëthi gen keej; o ge ógöögø ge mɑɑn-ɑ gïndøj. Ge ógöögø ki tyëngɑmolpiny; yethi gen órönyi, kɑ ge otɑ̈dø; o Jwøk óbɑny yi gen, kɑ ge mɑɑr-ɑ gïg-ɑ tyer yi pëthi gen. Ge ómɑ̈gi kì ri møg-ɑ bɑ pɑ̈ddi kwøbbi Jwøk, de yethi kwøbbɑni óbɑny yi gen. Kɑ rií lɑ̈ɑ̈w cyee ki jiɑni. Kwï jøgɑni nyi kedh-ɑ kɑ̈lli ji møøgø, kɑ tyëng-ɑ mɑ̈nn møg-ɑ pëthi gen nyøødh nyi jwɑn ki tyɑmø yi gen, mɑ́ tyëng-ɑ mɑ̈nn møgɑni nyi yuud ge torø yi kerri orøøg gen, ge pyejj-ɑ yi gïg-ɑ tyer yi pëthi gen bënn; tyëng-ɑ mɑ̈nn møgɑni ri gen nyii pɑ̈nyø yi gen ki dïdø, de ge dhɑ̈li ki yodi dyër. Jøgɑni pɑ̈r ki Yɑnis geki Yɑmbres; jøg-ɑ ɑ́tyëddi Mosɑ̀, o jiɑni ge bɑny-ɑ dyër thyew; ge bɑ ji mø wɑ̈thi gen pɑ göögø, o ge ɑ́dhɑ̈li yïëyø. De bong keny-ɑ ówɑ̈dhi yi gen, mɑ́ nøgi wɑ̈thi gen óyod yi ji bënn. O bɑ gïn ni menɑni ɑ ɑ́cwöb kipe Yɑnis geki Yɑmbres. De yï ɑ́kwɑny-ɑ pwönyɑ, kí bëëdɑ, kí gïn-ɑ köme köddɑ, kí yïëyɑ, kí ngïnɑ, kí mɑ̈ɑ̈dø miɑ, kí bëëdɑ yɑ pɑ nhɑ̈nhi, kí ɑbɑɑrɑ, kí orɑngɑ. Ngɑ̈nyi yi yïn kinni gïgɑni bënn ɑ́pɑ̈dhi kömɑ kì Anthɑkiyɑ̀, kí Ayköniyɑ̀ geki Listrɑ̀; wɑngɑ ɑ́guud ki mendwøng! De yɑ ɑ́yiel yi Wë ki møgɑni bënn. Mɑ́ ngɑn dwɑddi bëëdø ki bëëntir kì ri Yëso Mesiy, wɑnge ceg kɑ guudø ceth. De tyëngorøg, kí tyëngwëënyø, ge ceg-ɑ pëddø ki rɑ̈jø; ge óthɑ̈bø ki ji, o ge ólony ki thɑbø. De yïn, mïdhí yuu-ɑ dyër men-ɑ ɑ́pwönyi yïn yï thiinh, kɑ yïëyø menɑni mïdhí. Tyëng-ɑ ɑ́pwönyi yïn ngɑ̈nyi yi yïn. Mɑ́ yï ɑ́wöni yï thiinh, e wɑ̈jji kwërø ngɑ̈nyi yi yïn, o yï ócuggø thödhø yi wɑ̈jjɑni ki peli wïj men-ɑ nyodh yuu yielø, kì ri yïëyi Yëso Mesiy. Møg-ɑ yij wɑ̈nyi kwërø bënn ɑ́yɑl-ɑ yi Jwøk, gɑ møg pwönyi dyër, kí cɑyi bɑ̈jjø, kí tyëny, kí cigg kipe bëëntir. Kipe kinni o ngeti kwøbbi Jwøk óbëëde e bong gïn gwɑ̈ɑ̈d kì ree, o óbëëde ɑ́ ɑgwir kipe gwøg ki gwøng døj. Yï kwɑjji yi yɑn ɑ bøli Jwøk geki Yëso Mesiy, ngɑn-ɑ óløøg kwøbbi tyëngnëënø kí tyëngthøø keny-ɑ ócwöbe kì bøli keje. Pwönyí wöödø, (cɑgg ɑ́ kì bøli keny me døøj ki pwönyø wɑlɑ̀ pɑ døøj), kɑ yï dyëëj, o ge yïëy gen; kɑ ge nyi kyëddí; kɑ ge nyi cïïj; kɑ yï pwönyí ceth e köörí pɑ buudh. Bøli keny-ɑ óbɑ̈nyi ji ki pwöny-ɑ dyër obëënø. Ge ótyer-ɑ jɑmm-ɑ mɑɑr yi gen, o ge óyɑ̈bø ki jøpwönyø møg-ɑ óköbbi gen gïg-ɑ med ki lïngø yi yïthhi gen. Ge óbɑ̈nyi ki lïngi møg-ɑ dyër, kɑ ge kedh-ɑ be lïngi wɑ̈thi ngur. De yïn kirií, bëëd wïjí onëënø. Kɑ yï ngïïn ki orɑng. Kɑ yï göög ki gwøøg jɑlkwøbbi Jwøk, kɑ gwøgí nyi gwøøg kidøøj. Keløg ɑ́ perɑ, sɑɑ̀ men-ɑ ngɑɑl yɑn, yɑn ɑ́ gëëdhi ɑ́wɑ̈nhi; o bøli keny-ɑ kedhɑ ɑ́wɑ̈nhi thyew. Yɑ ɑ́rum ki nyɑɑg kidøøj kipe kwøbbi Jwøk, o møg-ɑ ɑ́yïëy yi yɑn mïdhɑ’ mïdhø. Møgɑni pɑ̈r ki kinni, yɑ ɑ́pöödh kì yij rɑɑdø. O dɑ köögi me mïdhi yi Jwøk kiperɑ; kööngɑni ómëggi yɑn kì Cyɑ̈ngɑni yi Wë Jɑng-ɑ dyër, kiper kɑ ɑ́tyɑ̈mɑ. Pɑth ki yɑ ketɑ ɑ óthödhi, dɑ́ ji bënn møg-ɑ yïd cwöbe ki mɑ̈ɑ̈dø. Jwɑn bëën yïɑ. Mɑ́ Demɑs, pyëwe ɑ́døngi kipe jɑmmi kömi piny, kɑ yɑ wiye piny, ɑkedhe Tesɑlonikɑ̀. O Kreskes ɑ́kedhi Gɑlɑthiyɑ̀. Kɑ Tïtø kedh-ɑ Dɑlmɑthiyɑ̀. Luk ɑ ɑ́döng kì butɑ kete. Kwɑny Mɑrk kɑ wu bï wun kyeel, mɑ́ en ɑ nyi køny yɑn ki gwøgɑ. De Tikikøs ɑ́örɑ Epɑsos. Keny-ɑ óbëën wun, kɑ wu ótöngi wun gøl Kɑrpøs kì Torwɑs, kɑ pɑrɑ men-ɑ ɑ́wiyɑ kunɑni kɑ̈ɑ̈l wun geki wɑ̈j; møg-ɑ per teg cɑrø bɑ wɑ̈jj-ɑ bɑ pënnì. Yɑ ɑ́göggi ki gïjø me rɑɑj yi Iskɑnder, bødhi dilɑl. De ócɑy-ɑ yi Wë kipe gïn-ɑ ɑ́gögge yɑn. Kor rií thyew kipere, mɑ́ kwøbbɑ ɑ́bɑny yi en ki mendwøng. Bong ngɑn mɑ ɑ́ying tungɑ keny-ɑ ɑ́nyɑɑgɑ riɑ kì tyeli mɑl; yɑ ɑ́wiy piny yi gen ge bënn. Ge ówiy yi Jwøk! De Wë ɑ́bëëd e nud kì butɑ, kɑ yɑ thödhe ki tegø men lwøbɑ kwøbbe kidøøj, kipe kinni o ge lïngi yi tyëngpɑth ki Yeud bënn; ɑbødhɑ ki kuumø thøø. Yɑ óyiel yi Wë ki rɑj bënn, kɑ yɑ kïdhe pödhe kì mɑl ki tɑrø. En ɑ lejji gïti ɑtheer! Amen. Mɑ̈dh Priskilɑ̀ geki Akïlɑ̀, kɑ tyëng gøl Onisipørøs mɑ̈ɑ̈dh. Erɑstøs ɑ́cöög Körintøs. O Trøpimøs ɑ́wiyɑ Miletøs, mɑ́ dële ɑ́bëëd e orɑ̈mø. Jwɑn bëënø kɑ̈ng-ɑ nuti köni wuudø. Yï ɑ́mɑ̈dh yi Yubuløs kí Pudens, kí Lïnøs, kí Kelɑwdiyɑ̀, geki nyiimïee bënn. Wë, wëyí ómïdhe. Dhwɑ̈ɑ̈ng Jwøk óying kömi wun bënn. Wɑ̈nyø men kɑ̈ɑ̈l-ɑ yï Pøøl, bɑ̈ng Jwøk, o bɑ jɑlwööni Yëso Mesiy. Yɑ ɑ́ceg kɑ myegø, kɑ yɑ ör be kønyi tyëng-ɑ ɑ́yieny gɑ jii Jwøk kì bɑng yïëyø, o ge peejɑ yij dyër men-ɑ pwönyi yi kwøbbi Jwøgee, dyër menɑni bɑ ngɑ̈dhi nënn-ɑ ɑtheer. Jwøk ngɑn-ɑ pɑ nyi kømmi pyed, bɑ en ɑ ɑ́kööb e piny nuti cɑ̈gø, kinni nënnɑni ómëgge wɑ. Keny-ɑ ɑ́wɑ̈nhi bøli keny-ɑ ɑ́dwɑddi yi Jwøk Yïënee kipe nyodhe møgɑni, ɑnyodhe gïn kì ri pwönyø men-ɑ ɑ́cïbe cingɑ. Mɑ́ yɑ ɑ́ceg yi en kinni, pwönyɑ gen ceth. Yɑ gwëd-ɑ yïn, yïn ɑ Tïtø, mɑ́ yï bɑ dïl wɑ̈dɑ kì bɑng yïëyø men-ɑ reb wɑ. Wiy dhwɑ̈ng geki mër, møg-ɑ nyi kɑ̈ɑ̈l yï Jwøk Wïyee geki Yëso Mesiy Yïënee, ying gen kömí. Gïn-ɑ́ pere ɑ́wiyɑ yïn kì Kirit bɑ kinni, o gïg-ɑ bɑ̈jjø kì yij kɑnïsɑ̀ kì pönhɑni tyeny yi yïn. Codhe, o yï rööny ki jɑggi kɑnïsɑ̀ kì yethi myërr bënn ni kɑ ɑ́nyudhɑ yïn cøn. Bëëd jɑngi kɑnïsɑ̀ köme bong kwøb, kɑ bëëde cyëge bɑ ɑ́kyel, o kwøbbi Jwøk óyïëyø yi nyige, o ge ngɑ̈ny bëëdø, o ge pɑ pëmø. Mɑ́ jɑngi kɑnïsɑ̀ mïdh-ɑ gwøøg Jwøk, ko bëëd köme dɑ cɑ́y. Ko bëëd ɑ́ jɑlɑthwøg, o ko bëëd ɑ́ ngɑn nyi mɑngi yi liny, wɑlɑ̀ ngɑn nyi nɑ̈g yi møgø, wɑlɑ̀ ngɑn kwøbbe teeg; kɑ ko bëëd pyëwe dwøøng kipe ngyëny. De bëëde ɑ́ jɑl nyi cwøøl wëll gøle, o mɑɑr-ɑ gwøng døj. Bëëde wïje onëënø, e tir, o bɑ ngeti kwër me ngɑ̈ny bëëdø. Kɑ bëëde e mïdh-ɑ kwøbb-ɑ dyër møg-ɑ kyëëw ki pwönyee. Møgɑni bɑ kipe kinni, o ócugge pwönyø ki kwøbb-ɑ dyër ceth, o dhøggi tyëng-ɑ pëmø nɑ̈g yi en. Tyëng-ɑ pëmø gïïr; mɑɑl gen dɑ ji-ɑ ɑ́bëëd gɑ Yeud; ge ceg-ɑ pëmø, o ge wëny-ɑ ji ki kwøbbi pyed. Kyëddí jiɑni, mɑ́ ge rëny-ɑ kɑ̈llì mø gïïr, kɑ̀ pwönyi gen gïg mø pɑ døøj ki pwönyø, kipe kinni o ge yïddi gen ki ngyëny. Bɑ jɑl Kirit kiree; o bɑ jɑltööng gen ɑ ɑ́kööb kinni, “Tyëng Kirit ceg bëëdø gɑ tyëngpyed; ge bɑ lɑ̈yyi pɑ̈l; ge bɑ rɑj, o ge bɑ cɑ̈mmì.” Kwøbbɑni bɑ dyër ceth. De cem nyingi gen ki mendwøng, o yïëyø mi gen óbëëde ɑ́ dyër. Wiy gen mïdhi kwööng Yeud geki ciggi tyëng-ɑ bɑny kwøbb-ɑ dyër. Jɑmmì bënn dhïw kì yï tyëng-ɑ dhïw, de bong gïjø me dhïw kì yï tyëng-ɑ ywëdhø, ɑ nuti yïëyø; mɑ́ rummi gen kí pëthi gen ywëdhø. Ge okööbø ce Jwøk ngɑ̈nyi yi gen, de gïg-ɑ gøggi yi gen nyodh-ɑ kinni, Jwøk bɑɑny gen. Ge bɑ tyëngrijjø mø pëddi pëmø, o bong gïndøj me cuggi gwøgø yi gen. De kømmí møg-ɑ kyëëw ki pwöny-ɑ dyër. Pwönyí jøgdøngø kinni bëëd gen wɑ̈thi gen onëënø, ge wør-ɑ ri gen, o lebbi gen okorø yi gen, o yï gen dɑ yïëyø, kí mɑ̈ɑ̈dø, kí ngïïnø. Kɑ tyëng-ɑ mɑ̈nn møg-ɑ døngø pwönyí thyew kinni bëëd gen ki bëëdi tyëng-ɑ mɑ̈nn møg-ɑ bɑ tyëng kwërø; ge ko bëëd gɑ tyëngkwɑ̈dh, wɑlɑ̀ ge ko nyi mɑ̈ɑ̈dh ki møgø me gïïr. De nyi nyodh gen bëën-ɑ døj. Møgɑni bɑ kipe kinni o tyëng-ɑ mɑ̈nn møg-ɑ nudd gɑ kɑyy pwönyi yi gen ki mɑɑri cwøwi gen geki nyigi gen, o ge bëëd gen rummi gen nud, o ge cög ge pɑ røngø ki cwøw møøgø, o ge korri gen kɑ̈lli gen kidøøj, o ge bëëd gen buri gen døøj kì bøli ji bënn, o ge nyi lïngi gen ciggi cwøwi gen. Møgɑni bɑ kipe kinni o kɑnïsɑ̀ cöge, e pɑ cɑy kì bɑng gen. Kɑ yɑɑg-ɑ wøbb ceg kinni bëëd gen rummi gen nud. Kɑ yï bëëd yï bɑ nyuudhi kipe gwøng døj, kɑ yï pwönyí yijí bong ɑ́dud. Nyi kømmí kwøb mø bong gïn cuggi cɑyø kì ri gen; o ngɑn-ɑ pëmø wïje ólɑ̈ɑ̈ye, o jɑ̈dde ki gïnrɑj me kwøbe kì riee. Bɑ̈ngg lïngi gen ciggi tyëng-ɑ cinggi gen bëëd yi gen. Kɑ ge nyi gwøg gen gïgdøj kipe jyɑ̈ggɑni kì yethi yëëth bënn, e bong pëmø. Kɑ ge ko kwɑ̈ɑ̈d kì yï gen. De nyodh gen ri gen ceth kinni ge bɑ ji mø døøj. Møgɑni bɑ kipe kinni o kwøbb-ɑ pwönyi yi wɑ kipe Jwøk Yïënee, pwøj yi teedø kì bɑng gen. Mɑ́ Jwøk dhwɑ̈nge ɑ́nyodhe kinni bɑ men yieel dhɑnhø bëne. Dhwɑ̈ngɑni pwöny-ɑ wɑ ki wiyi bëëdø men-ɑ bɑ̈ɑ̈n ki bëën-ɑ dwɑddi yi kwøbbi Jwøk, kí wiyi mɑɑri jɑmmi kömi piny, o wɑ bëëd wɑ ki bëëntir, wɑ mïdh-ɑ pëthee, o wɑ lïng-ɑ kwøbbi Jwøk, o wɑ yïd-ɑ cyɑ̈ɑ̈ng gyëdh men-ɑ ngɑ̈dh yi wɑ; eni cyɑ̈ng-ɑ ócwöb mɑ̈ɑ̈r Jwøgee, geki Yïënee Yëso Mesiy, ngɑn-ɑ ɑ́muuj ree kipe dømee, kɑ wɑ løge ji mø dhïw, mø bɑ jie kete, møg tyer gøggi gïgdøj. Köbbí møgɑni teedø bëne, kɑ ge nyi cïïj kipe gwøng døj, kɑ ge nyi kyëddí ki gwøg ki gïnrɑj. Rií ko wëggí dhɑ̈ɑ̈ng cyɑ̈n yi ngɑn megø. Nyi pɑ̈ddí teedø kinni bëëd gen ge lïng-ɑ ciggi jyɑ̈ggì geki tyëng-ɑ cinggi gen di tegø, kɑ gïg-ɑ nyi köbbi gen yi tyëngɑni nyi lïngi gen, kɑ ge bëëd gen ri gen tyeeny gen kipe gwøg ki gïndøj, kɑ ko di dhɑnhø me yɑny yi gen, kɑ wëërø nyi këëj gen, kɑ ge bëëd gen gɑ mööl, ge owuödø ki ji bënn. Wɑ ɑ́bëëd cøn wɑ bɑ dhëgg, o wɑ rɑj ki pëmø; o wɑ nɑ ji mø lɑ̈nyi pɑ̈l; o wɑ jɑɑg-ɑ yi gïg-ɑ tyer yi pëthee; wɑ ɑ́bëëd wɑ ceg-ɑ wëny, o wɑ ceg-ɑ mud, wɑ mɑɑn-ɑ riee. De keny-ɑ ɑ́nyoodh døøji Jwøk Yïënee geki mɑ̈ɑ̈dø mee, wɑ ɑ́yiele. Wɑ nuti yieel en kɑ per gïndøj me gwøøg wɑ, de møgɑni ɑ́gwøg yi en ɑ bɑng kɑ ɑ́lɑ̈ɑ̈m pyëwe, kì ri Wëykwërø ɑ nyi wëggi wɑ døøgø nywølø, kɑ wɑ thödhe ki nënn-ɑ nyɑ̈n kɑ ɑ́lwøøg wɑ. Wëykwërø ɑ́køny kömee yi Jwøk kì ri Yëso Mesiy Yïënee, kipe kinni, o wɑ løg tyëngtir yi dhwɑ̈nge; o wɑ óyïddi wɑ ki nënn-ɑ ɑtheer men-ɑ ngɑ̈dh yi wɑ. Kwøbbɑni bɑ dyër. Yɑ dwɑdd-ɑ kinni, pwönyí kwøbbɑni kipe kinni, o tyëng-ɑ ɑ́yïëy Jwøk pëggi gen be gwøg ki gwøng døj; mɑ́ møgɑni døøj, o dhɑnhø nyii kønyø yi gen. De këëj pëëmi dhëëgø, kí kwøbbi wɑ̈thi kɑ̈llì, kí wëërø, kí nyïɑ̈ggø kì kömi Cigg, mɑ́ e bong gïn nywøl yi gen, o bong gïndøj me yod kì bɑng gen. Keløg dhɑnhø okyëddø yi yïn tyelø ɑ́kyel, wɑlɑ̀ tyel ɑ́ryew de nudd e opëmø, ko di gïn kømmí ki en këti. Ngɑ̈nyi yi yïn kinni ji-ɑ ni møgɑni bɑ tyëngrijjø, o orøøg gen nyodh-ɑ rɑ̈ji gen. Keløg Artemɑs wɑlɑ̀ Tikikøs óörɑ yïí, nyɑg rií, kɑ yï bï yïɑ kì Nikøpølis, mɑ́ yɑ dwɑdd-ɑ tyëgi wuudø kì kɑɑlɑni. Pɑ̈nyí rií ki kønyi Dhenɑs bødhi Cigg, geki Apøløs ki gwiri ri gen kipe wel, o óbongii gïn jɑ̈ddi gen kì kö yöö. Dïd jiee ki gwøg ki gwøng døj, o óbëëde e bong gïn jɑ̈ddi gen, kɑ ge ko wɑ̈dhi bëëdø yøw. Yï ɑ́mɑ̈dh yi teen-ɑ buti gen bëëdɑ kì keny. Kɑ wɑddee kì yij yïëyø mɑ̈ɑ̈dh. Wiy dhwɑ̈ɑ̈ng Jwøk yinge kömi wun bënn. Wɑ̈nyø men kɑ̈ɑ̈l-ɑ yï Pøøl, ngɑn-ɑ ɑ́mɑg kipe nyingi Yëso Mesiy, geki Timøthì ómïee. E gwëd-ɑ Pilemøn, ngɑn-ɑ pere teg kì yï wøn, ɑ göögø kyeel ki wøn; kí kɑnïsɑ̀ men-ɑ nyi cugi kì gølí; kí nyimïee Apiyɑ̀; kí Arkipøs, wɑn-ɑ nyɑg wɑ liny. Wiy wu óthödhi ki dhwɑ̈ng kí mër yi Wïyee Jwøk, geki Wë Yëso Mesiy. Kenyi kwɑjjɑ Jwøk kɑ nyi pwøjɑ, nyingí nyii pɑrø yi yɑn, yeki ómïɑ Pilemøn. Mɑ́ kwøbbi mɑɑr-ɑ mɑɑr jii Jwøk yi yïn, kí yïëyí Wë Yëso olïngø yi yɑn. Kɑ Jwøk nyi kwɑjjɑ kipe kinni, o nywɑgí yïëyø ki wøn bëëde ɑ́ yöö men gwøg wɑ gïn-ɑ cuggi gwøgø yi wɑ kiper nyingi Mesiy. Pyëwɑ ɑ́tëngi kì bɑng mɑ̈ɑ̈dø mií, yeki ómïɑ, mɑ́ pëthi tyëng-ɑ ɑ́kwër gɑ jii Jwøk nyii mïnø kì bɑngí. Bene ɑ bɑnge bëëdɑ yɑ pɑ böggi ki köbbi yïn kì ri Mesiy ki gïn-ɑ dwɑddɑ kinni gwøg. De yɑ ɑ́tyer-ɑ kwɑjji yïn ki nyingi mɑ̈ɑ̈dø, yɑ jɑldwøng Pøøl, yɑ bɑ ɑmɑg ɑnɑn kipe nyingi Mesiy, kiper Onesimøs, wɑ̈dɑ kì ri Mesiy, mɑ́ yɑ ɑ́göög ki wïye kì ri kwøbbi Jwøk yɑ ying-ɑ ød mɑg. Nyelɑni ɑ́bëëd pere bogøn kì yïí kì bøli keny megø, de ɑnɑn, pere ɑ́tëngi kì yïee ryeet. Döggɑ’ yïn ɑnɑn, o men-ɑ́ pyëwɑ ɑ́kedh ki en. Ádwɑddɑ’ mïdhø kì butɑ, yɑ ying-ɑ ød mɑg kipe wöndøj, o yɑ di kønye ɑ́ kejí. De yɑ pɑ dwɑddi ciri yïn kinni göggí yɑn; yɑ dwɑdd-ɑ kinni ceg kunyø yï kuny-ɑ cwɑggí. O bong gïjø me cuggi gwøgø yi yɑn keløg yï pɑ yïëy. Ócuggø bëëdø kinni Onesimøs kedhø kì butí ki keny me nøg, kiper kinni o ódwööge e cöög-ɑ yïí. O pɑth kipe kinni o bëëde ɑ́ bɑ̈ng yøw këti, de pere teeg kibøli bɑ̈ng; mɑ́ e bɑ ómïee kì ri Mesiy. Pere teeg kì yïɑ ki mendwøng! O pere koo ceg pëddø ki tëngø kì yïí, mɑ́ e bɑ bɑ̈ngí, o bɑ ómyëw kì ri Wë! De ɑnɑn, keløg yɑ orømmø yi yïn kinni, wɑ gwøg-ɑ gwøg ɑ́kyel, kwɑɑny ni ke di kwɑɑny yɑn ceth. Keløg e dɑ gïnrɑj men-ɑ ógöggi yïn yi en, wɑlɑ̀ dɑ gïïpiny kì cwɑgge, wiy kwörɑni yinge cwɑggɑ. Møgɑni ɑ gwedɑ ki cingɑ èn kinni: Yɑ ɑ́yïëy ki culi yïn gïgɑni (De kì tung-ɑ kyeelø, cɑgg yï pɑ köbbi yi yɑn, ngɑ̈nyi yi yïn ceth kinni, yielø mií kɑ̈ɑ̈l-ɑ yïɑ) Kɑ ɑ́rum bëëde kinøw, gwøg gïn-ɑ köbbɑ yïn yeki ómïɑ, kipe nyingi Wë; gwøg gïn mïni pyëwɑ, mɑ́ yɑ bɑ ómyëw kì ri Mesiy! Kɑ̀ gwedɑ møgɑni ɑnɑn, yɑ gwëdø yɑ ngɑ̈ny wøw kinni, gïn-ɑ köbbɑ yïn ógwøg yi yïn ceth; o ceg bëëdø e ngɑ̈nyi yi yɑn ceth kinni yï ócuggø gwøg ki gïjø me lod men-ɑ köbbɑ yïn. Kɑ yɑ yɑ̈bbí ki ød thyew, mɑ́ yɑ ogɑ̈nø kinni, kwɑ̈jji wun óløøg yi Jwøk kɑ yɑ dögge wun. Yï ɑ́mɑ̈dh yi Epɑprɑs, jɑl-ɑ ying wøn ød mɑg kipe nyingi Yëso Mesiy. O yï ɑ́mɑ̈dh yi Mɑrk kí Aristɑrkøs, kí Demɑs kí Luk, jøg-ɑ göögø ki wøn kì kej ɑ́kyel. Wiy dhwɑ̈ɑ̈ng Wë Yëso Mesiy yinge kömi wun bënn. Cøn, Jwøk ɑ́kööb ki kweyyee kì yethi kɑ̈jj bënn ki yëëth mø gïïr kì ri jøtöng møge. De kɑ ɑ́thumi bøli kɑ̈jjɑni, ɑkööbe ki wɑ kì ri Wɑ̈de, ngɑn-ɑ ɑ́yieny yi en kipe kinni o jɑmmì bënn cïbe cinge, mɑ́ bene ree ɑ ɑ́cwɑ̈ɑ̈j jɑmmì bënn. O bɑ ree ɑ ɑ́kɑ̈ɑ̈l yi cɑɑr Jwøk, o bɑ en ceth ɑ nyudhi wɑ bëëdi Jwøk. Jɑmmì bënn omïdhø yi en kì kɑ̈jji gen ki tege. Mɑ́ e ɑ́thøw e gøøm-ɑ bøli dhɑnhø bëne, kipe kinni o ge dhïwi gen. Codhe ɑpëgge wïj kyëëj Jwøk kì pɑɑre mɑl. Wɑ̈d ɑ́gwøg e dwøng kibøli wëywödd, ni kɑ̀ bëëd nyinge ying-ɑ mɑl kibøli nyingi gen. Mɑ́ Jwøk bong ɑ́kyel kì kelli wëywödde mɑ ɑ́köbbe kinni, “Yï bɑ Wɑ̈dɑ, yɑ ɑ́göög ki wïyí dicyɑ̈ngtïn.” Wɑlɑ̀ bong wëywödø mɑ ɑ́kwøb yi Jwøk kinni, “Yɑ ógöögø ki wïye, kɑ ogöögø ki wɑ̈dɑ.” Jwøk keny-ɑ ɑ́öre Wɑ̈de, Wɑ̈n-ɑ kɑyø kömi piny, ɑ́kööb kinni, “Mɑlli yi wëywöddi Jwøk bënn.” De kì ri wëywödd Jwøk ɑ́kwøb-ɑ kinni, “Jwøk wëywödde ɑ́gwøge gɑ yømø, kɑ bɑ̈ngge gwøge gɑ lebbi mɑc.” De møg-ɑ ɑ́kwøb yi Jwøk kì ri Wɑ̈d bɑ kinni, “Yïn ɑ Jwøk, kwømí óbëëdø gïti ɑtheer; jií jɑɑg yi yïn kɑ gøggi dyër. Yï mɑɑr-ɑ gïn-ɑ bɑ dyër, o men-ɑ bɑ bɑ̈jjø mɑɑn yi yïn bene ɑ bɑnge ɑ́myeeg yïn yi Jwøgí kɑ yï thödhe ki medi pyëw geki dhwɑ̈ng me dwøng kibøli men-ɑ ɑ́mëgge jøg-ɑ cyɑ̈dhi wun.” Ákööb thyew kinni, “Wuö, piny ɑ́cwɑ̈j yi yïn kì tyeli mɑl, kɑ mɑl cwɑ̈ɑ̈j ki cinggí. Ge ólɑ̈ɑ̈ny, de yï ódöng yï nud ge órënyi ni ógødh. Ge óbɑn yi yïn, ni kenyi bɑɑn ɑ́ywödh, o ge ówil yi yïn, ni kenyi wiil ógudh. De yï ócög yï nɑ kejí ceth, o runní bong cögi gen.” Bong wëywödø mɑ ɑ́köbbi yi Jwøk kinni, “Bëëd kì wïj kyëjɑ gïti keny-ɑ ócïbɑ tyëng-ɑ mɑɑn yïn, thɑ́ tyellí.” Mɑ́ wëywöddɑni bënn bɑ wëy, o ge gögg-ɑ Jwøk, o gï nyi öre’ tyëng-ɑ ɑ́yieny gɑ møg-ɑ óyiel. Bene ɑ pere dwɑddi wɑ mïdhi møg-ɑ ɑ́pwönyi wɑ cøn, o wɑ cög wɑ pɑ lɑ̈ɑ̈ny. Mɑ́ kwøbb-ɑ ɑ́köbbi kweyyee yi wëywödd cøn, ɑ́bï gɑ dyër, kɑ tyëng-ɑ ɑ́bɑ̈nyi lïngi gen, wɑlɑ̀ tyëng-ɑ ɑ́bɑ̈nyi gwøgi møgɑni, cɑy ki cɑ́y-ɑ kyëëw ki gen. De wɑ óbødh-ɑ dï ki cɑyø, keløg kwøbbi yiel-ɑ dwøng ni men owøyø yi wɑ? Yielø menɑni ɑ́kwøb-ɑ yi Wë kiree, kɑ wɑ lony ki köbbø yi tyëng-ɑ ɑ́lïng, kinni møgɑni bɑ dyër ceth. Kɑ kwøbbɑni nyodh yi Jwøk gɑ dyër thyew kì ri ngïjjì kí gïïngɑ̈ngø mø bɑ̈nni geki muuji Wëykwërø ni kɑ̀ dwɑdde gøn. Wëywödd nuti kwɑnyø yi Jwøk gɑ møg-ɑ ójɑɑg piny-ɑ óbï, eni piny-ɑ kømmi yi wɑ. De nɑ møg-ɑ kømmi yi wɑ̈nyi kwërø kinni, “Dhɑnhø bɑ ngø, ɑ rømmí pere yïn ɑ Jwøk; yïde ɑ tɑɑg kwøbbi dhɑnhø yøw? Ge ɑ́cïbí cyɑ̈n nyɑ me thiinh kibøli wëywödd, kɑ ge thödhí ki mɑ̈r kí dhwɑ̈ng, kɑ ge wëggí jɑɑgi jɑmmì bënn.” Okööbø kinni i ji ógwøgø yi Jwøk gɑ møg jɑɑg jɑmmì bënn. O cɑgg ɑ́ kinøw, ji pɑ nenni yi wɑ ɑnɑn ge jɑɑg-ɑ jɑmmì bënn. De Yëso onennø yi wɑ; eni ngɑn-ɑ ɑ́gwøg e nøg kibøli wëywödd ki nyɑ keny me thiinh, kipe kinni o thøwe kì ri dhwɑ̈ɑ̈ng Jwøk kiper ji bënn. Nenni yi wɑ ɑnɑn e yïe dɑ dhwɑ̈ng kí mɑ̈r kì bɑng thøw-ɑ ɑ́rɑnge. Bɑ gïjø me døøj ɑ ɑ́gwøg yi Jwøk ngɑn-ɑ ɑ́cwɑ̈j jɑmmì bënn, o bɑ en ɑ mïdhi jɑmmì bënn, kɑ ɑ́gwire Yëso ki orɑng kipe peeji ji bënn yij dhwɑ̈nge. Mɑ́ e bɑ Yëso ɑ peej gen yij yielø. En ɑ kwër ji, o bɑ ɑ́kyel ki tyëng-ɑ kwër yi en; wïyi gen bɑ ɑ́kyel. Bene ɑ bɑnge cwølli gen yi Yëso gɑ wɑdde, e wïje pɑ lɑ̈ɑ̈y. Jwøk ɑ́köbbe kinni, “Wɑddi wøn óköbbɑ gïg-ɑ ɑ́gwøg yi yïn, yï ólenhɑ kì yij buri gen.” Okööbø thyew kinni, “Yɑ óngɑ̈dh-ɑ Jwøk.” O okööbø thyew kinni, “Yɑn ɑ kej ɑ́kyel èn ki nyig-ɑ ɑ́mëggi yɑn yi Jwøk.” O kɑ̀ bëëd nyig-ɑ kømmi yi en bɑ ji mø ri gen di dël kí cu, ɑgöög Yëso ni gen. Kipe kinni o tyɑme Ngɑnrɑj, ɑ løg jɑngi thøø; o ji-ɑ ɑ́bëëd ge ómɑgø yi wɑ̈ri thøø bënn, pɑ̈ɑ̈de wɑ̈g kì yethi töjji wɑ̈ɑ̈rø. Mɑ́ e ceg-ɑ nënnø ceth kinni nuti bëën-ɑ be kønyi wëywödd, de ɑ́bï-ɑ be kønyi kwɑrri Abrɑhɑm. Menɑni wɑng-ɑ kinni ceg-ɑ gwøg ceth e pɑ̈r ki wɑdde kì yethi yëëth bënn, kipe kinni o bëëde ɑ́ Ókwër-ɑ Dwøng, me pyëwe yöd, e gögg-ɑ Jwøk yije bong ɑ́dud thyew. Anɑn, tyëng-ɑ rɑngø okønyø yi en, mɑ́ e ɑ́rɑngi kɑ ongïnø. Nyiimïɑ, wu ɑ́ceg kɑ cwølø thyew yi Jwøk ni kɑ ɑ́cwøøl wøn! Rum wun kì ri Yëso, ngɑn-ɑ ɑ́ör ɑ́ Ókwër-ɑ Dwøng mi yïëyee yi Jwøk. Ágöög-ɑ pyëw ɑ́kyel kì bøli Jwøk, ngɑn-ɑ ɑ́örii, ni kɑ ɑ́göög Mosɑ̀ ki pyëw ɑ́kyel kì ød Jwøk. Ngɑn-ɑ ɑ́ger ød nyi bëëd pere teeg kibøli øn-ɑ ɑ́ger yi en; nɑ menɑni ceth, Yëso pere teeg kibøli Mosɑ̀. Ød nyi dɑ ngɑn geerii, de ngɑn-ɑ ɑ́cwɑ̈j jɑmmì bënn bɑ Jwøk. Mosɑ̀ ɑ́göög kidøøj kì ød Jwøk ɑ́ bɑ̈ng, kɑ okööbø kì ri møg-ɑ ógwøg yi Jwøk. De Mesiy ɑ́göög kidøøj e ceg bëëdø ɑ́ Wɑ̈d Jwøk. Wɑ ɑ bɑ øde keløg pëthee pɑ nyönhi ki ngɑ̈dhi gïg-ɑ óyod yi wɑ. Menɑni nɑ møg-ɑ ɑ́kwøb yi Wëykwërø kinni, “Keløg cwɑggi Jwøk ólïngi yi wun dicyɑ̈ngtïn, kɑ muddi wun ko tëngi, ni muddi kweyyi wun ɑ ɑ́pyem dhø Jwøk, kì cyɑ̈ngɑni kì yij pɑ̈l keny-ɑ ɑ́rɑng gen Jwøk. Yɑ ɑ́rɑng yi gen, kɑ yɑ pɑ̈nyi gen kì kunɑni, ngö gïg-ɑ ɑ́gøggɑ ki runn pyɑ̈r ɑ́ngwen ɑ́lidh yi gen. Kɑ pyëwɑ órënyø ki jiɑni, ɑkööbɑ kinni, ‘Ge bɑ ji mø lɑ̈nyyi pɑ̈l, o ge ɑ́bɑ̈nyi mïdhi ciggɑ.’ Yɑ ɑ́bëëd pyëwɑ rɑɑj, ɑköngɑ kinni, ‘Ge pɑ wöl kedhi piny-ɑ yije di thödhɑ gen ki ywömø!’ ” Koru ri wun yeki nyiimïɑ, o bongii ngɑn yïe di pyëw me rɑj, me nuti yïëyø kì kelli wun, men lugi ngɑ̈je Jwøng-ɑ nud ceth. De nyi cïju ri wun kì yethi cyɑ̈ng bënn, o bongii ngɑn thɑb yi orøg kɑ ogöögø ki ngeti pëëmø, mɑ́ “Dicyɑ̈ngtïn” men-ɑ kømmi yi wɑ̈nyi kwërø köbb-ɑ wun thyew. Mɑ́ wɑ göög ɑ kyeel ki Mesiy kɑ̀ mïdhi wɑ ngɑ̈ɑ̈dhø men-ɑ ɑ́ying yïee kì tyeli mɑl. Møg-ɑ kømmi yi wɑ̈nyi kwërø bɑ kinni, “Keløg cwɑggi Jwøk ólïngi yi wun dicyɑ̈ngtïn, kɑ muddi wun ko løgu mø teeg, ni kɑ ɑ́bëëd kweyyi wun keny-ɑ ɑ́pyem gen kwøbbi Jwøk.” Á møg ɑ ɑ́lïngi cwɑggi Jwøk kɑ muddi gen ótëngø ki en? Bɑ tyëng-ɑ ɑ́pëëj wɑ̈g kì Rïp bënn yi Mosɑ̀. Jwøk ɑ́bëëd pyëwe rɑɑj kɑ møg ki runn pyɑ̈r ɑ́ngwen? Pyëwe ɑ́bëëd e rɑɑj kɑ tyëng-ɑ ɑ́røngi, ɑ ɑ́pɑ̈ɑ̈dh ge thøø kì yij pɑ̈l. Keny-ɑ ɑ́köngi Jwøk kinni, “Ge pɑ wöl kedhi piny-ɑ yije di thödhɑ gen ki ywömø!” Ákømm-ɑ møg? Ákømm-ɑ tyëng-ɑ́ muddi gen ɑ́tëngi. Ngɑ̈nyi yi wɑ kinni, ge ɑ́dhɑ̈li kedhi pinyɑni kɑ per kɑ̀ nuti yïëëy gen. Kɑ ɑ́rum wɑ ki köbbø yi Jwøk kinni wɑ ómëgge ywömø men-ɑ ɑ́kømmi yi en, kor wɑ riee cyee, o bongii ngɑn-ɑ ójɑ̈ddi kì kelli wun ki ywömɑni. Mɑ́ wöndøj ɑ́rum ki lïngø yi wɑ ni kɑ ɑ́lïngii yi gen. De bong gïjø mɑ ɑ́yod yi gen, mɑ́ ge ɑ́cög ge nuti yïëyø keny-ɑ ɑ́lïngi gen wöönɑni. Wɑ tyëng-ɑ ɑ́yïëy, wɑ óyïddi ki ywömø men-ɑ ɑ́kwøb yi Jwøk kinni gø ómëgge wɑ. Nɑ kɑ ɑ́kööbe ceth kinni, “Pyëwɑ ɑ́ceg-ɑ rënyø, ɑköngɑ kinni, ‘Ge pɑ kedhi piny-ɑ ɑ́kwøb yi yɑn kinni ge óthödhɑ ki ywömø kì yije.’ ” Møgɑni ɑ́kwøbe, ngö gwøge ɑ́rum kì bøli keny-ɑ ɑ́cwɑ̈je piny. Mɑ́ møgɑni bɑ ɑkwøb kì yij wɑ̈nyi kwërø kinni, “Jwøk gwøng-ɑ ɑ́bëëd gø ogwøgø yi en ɑ́tyëge, kɑ oywömø kì bïryeew cyɑ̈ng.” Møgɑni ɑ ɑ́cigi kwøbø kinni, “Ge pɑ wɑ̈dhi piny-ɑ yije di thödhɑ gen ki ywömɑ.” Tyëng-ɑ ɑ́kwøng Wöndøj ki lïngø, ywömø menɑni nuti yood gen, kì bɑng kɑ ɑ́pëëm gen. O dɑ ji møøgø ceth møg-ɑ óyod ywömɑni. Møgɑni nyodh-ɑ yi cïb Jwøk ki cyɑ̈ng megø me cwøl ɑ́ “Dicyɑ̈ngtïn”. Kì ri Debïd kì bɑng runn mø gïïr, kí møg-ɑ ɑ́rum ki kwøbø kì keny megø kinni, “Keløg cwɑggi Jwøk olïngø yi wun dicyɑ̈ngtïn, kɑ muddi wun ko tëngi.” Keløg tyëng Isrɑil di yïddi ki ywöm-ɑ ɑ́kwøb yi Jwøk kì bɑng Jöcwø, ti bong cyɑ̈ng megø me di kwøb yi Jwøk. Kɑ ɑ́rum bëëde kinøw, dɑ ywömø mɑ ɑ́döng kipe jii Jwøk, me ni ywöm-ɑ ɑ́ywööm yi Jwøk kì bïryeew cyɑ̈ng. Mɑ́ ngɑn-ɑ ɑ́wɑ̈dhi yij ywömi Jwøk ceg-ɑ cögø e pɑ göögø, ni kɑ ɑ́ywöm Jwøk ree kì bïryeew cyɑ̈ng. Pɑ̈nyi wɑ riee kidøøj, o ywömø menɑni yod yi wɑ, o bongii ngɑn jɑ̈ddi ki ywömø ni jiɑni, kì bɑng kɑ ɑ́pëëm gen. Mɑ́ lögi Jwøk onëënø, o teeg, o nɑ pilø me bɑ̈lle ryeet bedh. Nyi wɑ̈dh-ɑ kɑɑm tïbi dhɑnhø geki wëye, kí nyingi cu. Gïg-ɑ tyer yi pyëw dhɑnhø kí møg-ɑ rømme nyii ngijø yi en. Bong gïn cuggi kɑnø kɑ ódhɑ̈lø yodø yi Jwøk, jɑmmì bënn onennø yi en, o bɑ en ɑ óløøg kwøbbee. Mɑ̈gi wɑ kì ri møg-ɑ ɑ́yïëy yi wɑ. Mɑ́ yïee dɑ Ókwër-ɑ Dwøng me pëddi döng, mɑ ɑ́wɑ̈dhi bøli Jwøk; en ɑ Yëso Wɑ̈d Jwøk. Ókwër-ɑ Dwøng miee bɑ ngɑn pyëwe nyi lɑ̈ɑ̈m, o nyødhee ngɑ̈nyi yi en, mɑ́ e bɑ ngɑn mɑ ɑ́thɑb kì yethi yëëth bënn ni wɑ, dɑ́ orøg ɑ nuti gwøøg en kinni tek. Kedhi wɑ bøli kwøøm Jwøk keny-ɑ di dhwɑ̈ng, e yethee pɑ pyëër. Jwøk pyëwe ólɑ̈ɑ̈m ki wɑ, kɑ wɑ thödhe ki dhwɑ̈ng. Ókwër-ɑ Dwøng nyi yieny-ɑ kelli wɑdde, o nyi kwɑny ɑ́ kej ji, o gögge Jwøk, o nyi muuje gënh-ɑ nyi rɑ̈b bëne kí gënhi orøg. Kɑ̀ bëëde ɑ́ ngɑn nyødh thyew, ócuggø dwöögi pëthi tyëng-ɑ kwïj wøw kí tyëng-ɑ nyi bɑ̈jji. Kì bɑng kɑ ɑ́bëëde e nyøødh thyew, ɑ́bëëd e nyi ceg-ɑ muujø ki gëëdhi kipe orøge, ni kenyi muuje ki gëëdhi kipe orøøg teedø. Bong ngɑn cuggi rønyi ree ɑ́ Ókwër-ɑ Dwøng, e nuti cwøøl-ɑ yi Jwøk ni kɑ ɑ́cwøøl Aɑron cøn. Nɑ menɑni ceth, Mesiy ree nuti røøny-ɑ yi en ɑ́ Ókwër-ɑ Dwøng, de ɑ́røny-ɑ yi Ngɑn-ɑ ɑ́köbbii kinni, “Yï bɑ Wɑ̈dɑ yɑ ɑ́göög yɑn ɑ́ wïyí dicyɑ̈ngtïn.” O Jwøk ɑ́kööb kì keny megø kinni, “Yï óbëëdø yï bɑ ókwërø gïti ɑtheer, kì yij lɑw-ɑ ɑ́ying yï Melkidhedek.” Keny-ɑ ɑ́bëëd Yëso kì kömi piny, ɑ́bëëd e nyii kwɑ̈jjø e óryeerø pïi nyinge ómullø, e kwɑjj-ɑ Jwøk ngɑn-ɑ cuggi yielii ki thøø. Kɑ kwɑ̈jje lïngi yi Jwøk, mɑ́ e ɑ́kwɑ̈jj-ɑ möölø e ceg-ɑ odhɑm. Cɑgg ɑ́ kɑ̀ bëëde ɑ́ Wɑ̈d Jwøk, ɑ́dïd ki bëëdi möölø kì bɑng orɑng-ɑ ɑ́rɑnge. Kì bɑng kɑ ɑ́gööge e bong gïn gwɑ̈ɑ̈d kì ree, ree ɑ́løge Ngɑn-ɑ óyiel ji-ɑ ólïngi kwøbbe bënn, o ge óyïddi gen ki nënn-ɑ ɑtheer. Mɑ́ e ɑ́yieny yi Jwøk ɑ́ Ókwër-ɑ Dwøng kì ri kwööng Melkidhedek. Dɑ kwøb mø gïïr mø di kømmi yi wøn kì ri møgɑni, de lwøbi gen teeg, mɑ́ wɑ̈thi wun pɑ nyi jwɑn gɑ̈mmø ki kwøb. Bøli keny-ɑ di göög wun ki jøpwönyø ɑ́pöödh ki mendwøng. De wu nudd wu dwɑdd-ɑ ji mø pwönyi wun ki kwøbbi Jwøk møg-ɑ yöd cɑrø. Pɑth ki gïncɑm-ɑ teg ɑ dwɑddi yi wun, de wu dwɑdd-ɑ cɑg ni othønhø. Mɑ́ ngɑn-ɑ nyi mɑdh cɑg keti gen bɑ othinh, kwøbbi bëëntir nuti yodø yi en. De gïncɑm-ɑ tek bɑ kipe tyëngdøngø, gen ɑ tyëng-ɑ ɑ́dïd ki ngiji gïgdøj kí gïgrijjø. Kedhi wɑ mɑl, ri pwönyø ki kwøbb-ɑ døngø, kɑ pwöny-ɑ ɑ́mwøøl wööni Mesiy wiy wɑ cyɑ̈n. Wɑ ko døøg ri møg-ɑ ɑ́kwøng ki pwönyø kipe wiyi gøggi rɑj, kí yïëyi Jwøk, kí pwönyi jwɑ̈ɑ̈gø, kí thɑɑnyi cing kömi ji, kí dhwödhø kì yij thøø, kí cɑ́y-ɑ gïti ɑtheer. Kedhi wɑ bølee! Bene gïn-ɑ ógwøg yi wɑ, ke dwɑddii yi Jwøk. Tyëng-ɑ ɑ́yïddi ki cɑɑr Jwøk kì pëthi gen, kɑ ge døøg-ɑ cyɑ̈n, ge ócuggi dwöög be yewø këti? Ge ɑ́bëëd gɑ cɑɑr Jwøk, kɑ ge óbïdø ki gïg-ɑ nyi muuj ge kɑ̈ɑ̈l ɑ mɑl, kɑ ge óyïddø ki Wëykwërø. Kɑ medi kwøbbi Jwøk yod yi gen, kí ngïjji piny-ɑ óbï. Codhe kɑ yïëyø mi gen wiy gen! Ge pɑ cuggi dwöögø kɑ ge óyewø këti, mɑ́ Wɑ̈d Jwøk ceg kɑ cigi gur wïj yɑdh ɑrïw yi gen, o ceg kɑ yɑ̈rø yi gen kì bøli teedø. Mɑ́ pwönh-ɑ yije mɑ̈gi yi kødh tyel mø gïïr, kɑ jɑmm-ɑ døj otwïyø kì yije, bɑ ɑgyëdh yi Jwøk. De keløg ɑ́ koodh kí lum ɑ twïy kì yije, bong gïndøj kì ree; bɑ men köme óbëën yi cyënni Jwøk, o órɑ̈b ki mɑc. De cɑgg wø kööbø kinøw, wun ɑ wɑddi wøn, bong gïn tɑg yi wøn kiper wun. Mɑ́ Jwøk bɑ ngɑn nyi nenni dyër, o wïje pɑ cuggi wïlø ki gïg-ɑ ɑ́gwøg yi wun, geki mɑ̈ɑ̈dø men-ɑ nyodh yi wun kì bɑng kɑ ɑ́kønyu jii Jwøk, o ge nudd ge okønyø yi wun ɑnɑn thyew. Gïn-ɑ dwɑddi yi wøn kì yï wun, bɑ kinni bëëd wun wu odyëjø ceth gïti cöge, o gïg-ɑ ngɑ̈dh yi wun óbï gen gɑ dyër. Wø pɑ dwɑddi kinni o wu bëëd wun dëlli wun ledh ki gwøg, de wø dwɑdd-ɑ kinni ngøy wun bëëdi tyëng-ɑ ɑ́yïëy kɑ ge ongïnø, ɑyïddi gen ki møg-ɑ ɑ́kwëng yi Jwøk. Abrɑhɑm keny-ɑ ɑ́köbbii kwëng yi Jwøk, Jwøk ɑ́köngi kinni møg-ɑ ɑ́kwøbe ógwøg yi en. De kɑ̀ bëëde e bong ngɑn dwøng kibøle, ɑ́kwöng-ɑ ree kinni, “Yɑn ɑ köngi èn ki nyingɑ; yï gyëdhɑ’ gyëdhø, o yï ónëngɑ ki kwɑrr mø gïïr.” Kì bɑng kɑ ɑ́ngïïn Abrɑhɑm kidøøj, møg-ɑ ɑ́kwëng yi Jwøk ɑ́yod yi en. Ji nyi köngi kɑ nyingi ngɑn me dwøng kibøli gen, kɑ pëëmø nyi cung yi köngø møgɑni. Nɑ menɑni ceth, Jwøk ɑ́köngi ki ree kinni, “Gïn-ɑ óngɑ̈dh yi teedø óyod yi gen ceth.” Møgɑni bɑ kipe kinni o tyëng-ɑ óyïddi ki møg-ɑ ɑ́kwëng yi en, óbëëd ge ngɑ̈ny wøw ki mendwøng kinni, bɑ gïn-ɑ ɑ́dwɑddi yi Jwøk. Jɑmmì ɑ́ryew møgɑni pɑ cuggi wili ri gen, o Jwøk pɑ cuggi kwøbi pyed kì ri gen. Kɑ̀ bëëde kinøw, wɑ tyëng-ɑ ɑ́ywööm bute, wɑ bɑ ɑcïj kinni, mɑ̈gi wɑ kì ri ngɑ̈ɑ̈dhø men-ɑ ɑ́cïb bølee. Ngɑ̈ɑ̈dhø menɑni pɑ̈r ki ódëli sɑpïnɑ̀ kipe wëyi dhɑnhø. O kì bɑnge, wɑ nyii bødhø kì ri gïg-ɑ di dwøøg wɑ cyɑ̈n. De nyi bëëd wɑ kì kɑ̈jjee ceth, mɑ́ ngɑn-ɑ ngɑ̈dh yi wɑ ɑ́wɑ̈dhi yij gëng. Mɑ́ Yëso ɑ́wɑ̈dhi kunɑni kiperee, kɑ ogöögø ki Ókwër-ɑ Dwøng gïti ɑtheer, kì bɑng kwööng Melkidhedek. Melkidhedek ɑ́bëëd ɑ́ rɑ̈ɑ̈dh Cɑlem, o bɑ ókwëri Jwøng-ɑ Pëddi Döng, kɑ kedh-ɑ be pɑɑri Abrɑhɑm keny-ɑ ɑ́dwööge kì be tyɑmi rɑ̈nhhɑni gɑ ɑ́ngwen, kɑ nëngi yi Abrɑhɑm ki ɑ́kyeel pyɑ̈rri jɑmmì bënn. (Nyingi Melkidhedek wɑng-ɑ “Rɑ̈nh Tir” o kɑ̀ bëëde ɑ́ rɑ̈ɑ̈dh Cɑlem, menɑni bɑ kinni “Rɑ̈ɑ̈dh Mër”.) Melkidhedek bong wïye wɑlɑ̀ meye me ngɑ̈nyi; wɑlɑ̀ bong kweyye, o bong ngɑn ngɑ̈nyi kër-ɑ ónywøølii. Nɑ wɑ̈d Jwøk, o cög ɑ́ ókwërø gïti ɑtheer. Nyi rømmi wun tegi per Melkidhedek, kɑ ɑ́thödhii yi Abrɑhɑm kweyee ki ɑ́kyeel pyɑ̈rri jɑmmì, kì ri gïg-ɑ ɑ́mɑg yi en kì yij liny. O ókwër møg-ɑ bɑ Kwɑrri Leebì, ge oköbbø yi Cigg kinni i nyi kɑ̈bbi gen ki ɑ́kyeel pyɑ̈ri jɑmmì kì yï teedø, o teenɑni ceg bëëdø gɑ wɑddi gen bënn, cɑgg ɑ́ kɑ̀ bëëd gen thyew gɑ kwɑrri Abrɑhɑm. Melkidhedek ɑ́bëëd e pɑth ki Kwɑɑr Leebì, de ɑ́kɑ̈bbi kì yï Abrɑhɑm ki ɑ́kyeel pyɑ̈ri jɑmm-ɑ ɑ́mɑg yi en kì yij liny, kɑ Abrɑhɑm ngɑn-ɑ köme di kwënggi Jwøk kwënge. Bong pëëmø kì ri kinni, bɑ ngɑn-ɑ dwøng ɑ nyi kwëng ngɑn-ɑ thinh kibøle. Kì tuung ókwër, ɑ́kyeel pyɑ̈r kwɑny-ɑ yi ji mø nyi thøw, de ɑ́kyeel pyɑ̈rr-ɑ ɑ́mëggi Melkidhedek, ɑ́kwɑny-ɑ yi ngɑn pɑ thøw, ni kɑ ɑ́kwøbii yi wɑ̈nyi kwërø. Wɑ ócuggø kwøb kinni, keny-ɑ ɑ́muuj ɑ́kyeel pyɑ̈r yi Abrɑhɑm, Leebì (ɑ kwɑrre nyi kwɑny ɑ́kyeel pyɑ̈r) ɑ́muuj thyew. Mɑ́ Leebì ɑ́bëëd e nuti nywølø kì bøli kenyɑni, de ɑ́bëëd e nud kì dëël kweye Abrɑhɑm, keny-ɑ ɑ́kedhi Melkidhedek be pɑɑrii. Keløg kwöng di pɑ̈dhi keje kì ri kwëër Kwɑrri Leebì; ɑ ceg bëëdø ɑ́ tyeli Cigg-ɑ ɑ́mëggi teedø, di dɑ ókwërø megø me dwɑddi, me mïdhi kwööng Melkidhedek? Wɑ̈nyi kwërø ɑ́kwøb-ɑ Melkidhedek, de nuti kwøøb-ɑ Aɑron. Mɑ́ keløg kwër owilø, cigg ceg kɑ wilø thyew. O Wë ngɑn-ɑ pere kømmi, bɑ wɑ̈d kɑl megø, o bong ngeti gøl gen mɑ ɑ́göög ɑ́ ókwërø. O ngɑ̈nyi ceth kinni, Wë bɑ wɑ̈d gøl Yeudɑ̀, o gølɑni nuti kwøbø yi Mosɑ̀ keny-ɑ ɑ́kwøbe kwööng ókwër. Kɑ møgɑni ceg-ɑ ti nënnø kidøøj, keny-ɑ ɑ́bëën ókwërø megø me pɑ̈r ki Melkidhedek. Mɑ́ ngɑnɑni nuti rønyø ɑ́ ókwërø kɑ røny-ɑ nyi røøny ji, de ɑ́røny kɑ tegi nënnì møg koo thumi. Mɑ́ wɑ̈nyi kwërø okööbø kinni, “Yï bɑ ókwërø men-ɑ óbëëdø gïti ɑtheer, kì bɑng kwööng Melkidhedek.” Cigg-ɑ kɑ̈gi gen dööng ɑ́wiy, mɑ́ ge pɑ teeg, o bong døøjø me dwøng, me yod kì bɑng gen. Mɑ́ Ciggi Mosɑ̀ bong gïjø mɑ ɑ́cïb gen keje. Akwɑɑny keje yi ngɑ̈ɑ̈dhø men-ɑ ree göög wɑ, wɑ cyɑ̈gi ki Jwøk. Kömi møgɑni dɑ kwënggi Jwøk thyew. Ábëëd e bong kwëng mø ni møgɑni, keny-ɑ ɑ́røøny Kwɑrri Leebì gɑ ókwër. De Yëso ɑ́göög ki ókwërø kì bɑng kwëng; keny-ɑ ɑ́köbbii yi Jwøk kinni, “Wë ɑ́rum ki kwëng, o kwënggɑni pɑ pɑ̈d yi en; ɑ́kööb kinni, ‘Yï óbëëdø yïn ɑ́ ókwërø gïti ɑtheer.’ ” Kwënggɑni Yëso ɑ́gwøg gen ɑ́ nyuudhi mi lwöbø, me lod lwömi tyeli mɑl. Dɑ gïjø me bɑ̈ɑ̈n kì kɑɑm gen thyew; ókwërrɑni kwɑnni gen gïïr, mɑ́ ge nyi mɑ̈ɑ̈n-ɑ cöög yij gwøøg gen yi thøø. De Yëso gït-ɑ ɑtheer e onëënø, o gwøge ɑ́ ókwërø pɑ cög. Yëso yïe dɑ tegø men cugge yieli ji-ɑ nyi ywøøg kö Jwøk ki nyinge. Mɑ́ e nud gïti ɑtheer, o kwɑjj-ɑ Jwøk kiper gen. Kɑ ɑ́rum bëëde kinøw, Yëso bene Ókwër-ɑ Dwøng men-ɑ ngɑ̈nyi gïg-ɑ dwɑddi yi wɑ. Bɑ kwërø, o bong gïnrɑj kì ree, o yije bong orøg. Árum ki dɑ̈ngø ki tyëngorøg, kɑ tïng mɑldwøng. Pɑ pɑ̈r ki ókwërr-ɑ døngø møg-ɑ kyeelø; bong gënhi orøg me muuje kipere møti, wɑlɑ̀ kiper orøøg teedø yethi cyɑ̈ng bënn. Ámuuj-ɑ gëëdhi ɑ́kyel me bɑnge pɑ muuj ki megø, keny-ɑ ɑ́muuje ree ɑ́ gëëdhi. Mɑ́ ji-ɑ nyi røny gɑ ókwër kì bɑng Ciggi Mosɑ̀ nyi bëëd ge nyøødh, de Wɑ̈d Jwøk, men-ɑ bɑ kwërø ɑ́røny-ɑ bɑng kwënggi Jwøk, o óying keje gïti ɑtheer. Møg-ɑ ceg ki kømmø bɑ kinni, yïee dɑ Ókwër-ɑ Dwøng me pere teg, me bëëdø kì wïj kyëëj Kwøøm Rɑ̈ɑ̈dhø kì yij mɑl. Göögø ɑ́ Ókwër-ɑ Dwøng kì Kej Kwërdwøng, men-ɑ yij kemɑ̀ men-ɑ dyër, men-ɑ ɑ́gur piny yi Wë; nuti ger-ɑ yi dhɑnhø. Ókwër-ɑ Dwøng nyi røny ɑ́ ngɑn ngɑ̈ddi Jwøk ki gëdhhì. Men wɑngi kinni Ókwër-ɑ Dwøng miee dɑ gïjø me muuje. Keløg Yëso di ying-ɑ kömi piny, pɑ di gwøg ɑ́ ókwërø kinni tek, mɑ́ e dɑ ji mø nyi muuj gëdhhì, ni kɑ ɑ́kwøbii yi Cigg. Gwøng-ɑ gwøg yi gen gɑ ókwër bɑ surɑ̀ kí tïbi gïg-ɑ gøggi kì mɑl. Mɑ́ keny-ɑ ɑ́dwɑddi Mosɑ̀ guddi piny ki kemɑ̀, ɑ́köbbi yi Jwøk kinni, “Nëën kidøøj, kɑ jɑmmì bënn gwøøg ge nɑ møg-ɑ ɑ́nyudhɑ yïn kì wïj kït.” De ɑnɑn, ɑ́thödhi ki gwøøg ókwërø me lod mi gen, ni kɑ̀ bëëde ɑ́ en ɑ ree nywɑɑg lwöbø men-ɑ lɑ̈w kibøli lwömi tyeli mɑl. Mɑ́ lwöm-ɑ nyɑ̈n ɑ́cïb-ɑ kömi kwëng mø lɑ̈w kibøli kwëngg-ɑcɑ̀. Ke di bongii gïnrɑj kì ri lwömi tyeli mɑl, bong lwöbø megø me di dwɑddi. De Jwøk ɑ́ceg-ɑ yïddø ki gïn gwɑ̈ɑ̈d kì ri jie, kɑ̀ kööbe kinni, “Wë ɑ́kööb kinni cyɑ̈ng møøgø óbï, mø yethi gen ólwöbɑ ki lwöbø me nyɑ̈n wøki tyëng Isrɑil kí tyëng Yeudiyɑ̀. De lwömɑni koo bëëdø e nɑ lwömi tyeli mɑl, kì cyɑ̈ng-ɑ ɑ́pëëjɑ gen wɑ̈g kì Rïp ge mïdhɑ’ mïdhø kì cinggi gen, Lwöm-ɑ ɑ́lwøb yi wøki gen nuti mïdhi gen, bene ɑ bɑnge wøyɑ gen. O bene lwöm-ɑ ónywɑg yi yɑn wøki tyëng Isrɑil èn Wë okööbø kinni, kì yethi cyɑ̈ngg-ɑ óbï: Ciggɑ ócïbɑ wɑ̈thi gen, kɑ ge gweedɑ kömi minni gen. Yɑ óbëëdø yɑn ɑ́ Jwøøg gen, o ge óbëëdø gɑ jiɑ. Bong dhɑnhø men-ɑ ópwönyi wɑɑd gen, wɑlɑ̀ bong ngɑn köbbi wɑɑd gen kinni, ‘Yod Wë,’ Mɑ́ yɑ óyod yi gen bënn, cɑg kì ri ngɑn pere teg gïti ri ngɑn bong pere. Orøøg gen ólɑ̈ɑ̈nyɑ o gïg-ɑ ɑ́bɑj yi gen koo pɑrrɑ këti.” Kɑ̀ kööb Jwøk kinni i dɑ lwöbø me nyɑ̈n, lwömi tyeli mɑl ɑ́gwøge ɑ́ men-ɑ weenø, o gïn-ɑ kɑ̈ge døngi kɑ oyöø, ceg-ɑ cyɑ̈ngø ki lɑ̈ɑ̈nyø. Lwöm-ɑ mɑl yïe ɑ́dɑ ciggi mɑ̈ddø kí kej mɑ̈ddø kì kömi piny. Ádɑ Kemɑ̀ mɑ ɑ́cwöödh piny, bene øn-ɑ mɑl, ɑ cwøl ɑ́ Kej Kwër. Yije ɑ ɑ́di teggi lɑ̈mbɑ̈ɑ̈, kí tɑrɑbedhɑ̀ men-ɑ köme nyi cïb ópun-ɑ mëggi Jwøk. Ngɑ̈ɑ̈j ryeew sitɑrrì dɑ kemɑ̀ me cwøl ɑ́ Kej Kwërdwøng. Yije ɑ di këli dhɑb men-ɑ köme nyi rɑ̈ɑ̈b bɑkur, kí Sɑnduug Cigg men-ɑ bɑ ɑmwøn ki dhɑb, yije dɑ pugi dhɑb men-ɑ yije di mɑnɑ̀, kí loodh Aɑron men-ɑ ɑ́nyog, kí ópɑ̈nni kït ɑ́ryew møg-ɑ kömi gen ógweed cigg. Kí ngïjji kerobb ɑ́ryew møg-ɑ nyodh bëëdi Jwøk e nud kì kömi sɑndungɑni, obërri gen peedh gen kì mɑl, kì kömi keny-ɑ lɑ̈ɑ̈ny orøg. De men pɑth ki bøli keny-ɑ cuggi gïgɑni bënn ki tyëgø lwøbø. Bene kër-ɑ ópyëël gïgɑni ɑnɑn. Ókwër nyi kedh-ɑ yij Kem-ɑ yiny-ɑ wɑ̈g yethi cyɑ̈ng bënn, be gwøg ki gwøøg gen. De bɑ Ókwër-ɑ Dwøng kete ɑ nyi kedhi yij Kem-ɑ yiny-ɑ ød tyelø ɑ́kyel kì yij run. Nyi kedhi yije e ókɑ̈ddø ki remø men-ɑ nyi muuj ɑ́ gëëdhi me gøøm orøge kí orøng-ɑ nyi gwøg yi teedø ge kwïj wøw kinni ge ceg-ɑ orøg. Wëykwërø ópwönyø kì ri pyël-ɑ ópyëël gïgɑni kinni, yuu-ɑ kedhi Kej Kwërdwøng nuti yiebø, kì bɑng kɑ̀ nudd Kem-ɑ yiny-ɑ wɑ̈g e ócungø. O møgɑni keny-ɑ ópyëël gen kinøw, ge nyodh-ɑ gïg-ɑ nud kì bøli keny ɑnɑn. Menɑni wɑng-ɑ kinni pyëw ngɑn-ɑ mɑlli Jwøk pɑ tyeny yi gëdhhì geki gïg-ɑ nyi muuj. Mɑ́ ge ceg bëëdø gɑ gïgcɑmm kí gïg mɑdh, kí guöög tɑ̈ri dël. Ge ɑ́cïb gɑ møg gwøg gïti bøli keny-ɑ ótyeeny jɑmmì bënn yi Jwøk. De Mesiy ɑ́rum ki bëënø ɑ́ Ókwër-ɑ Dwøng, mi gïgdøj møg-ɑ keny ek. Kem-ɑ yije gööge ki kwër pere teg kibøli mi tyeli mɑl, o bong gïn gwɑ̈ɑ̈d kì ree, pɑth ki kemɑ̀ men-ɑ ógwøgø ki cingi dhɑnhø; men wɑngi kinni pɑ ying kelli gïg-ɑ ɑ́ceg ki cwɑ̈jø. De Yëso ɑ́kedhi Kej Kwërdwøng tyelø ɑ́kyel kete, e bong remmi dyëg wɑlɑ̀ remmi wɑ̈dhh mɑ ɑ́kɑ̈l yi en, dɑ́ reme ɑ ɑ́kɑ̈ɑ̈le, kɑ óyïddø ki nënn-ɑ ɑtheer kiperee. Remmi dyëg geki wɑ̈dhh kí beli røny-ɑ ɑ́rɑ̈b, ɑ nyi wiid ri tyëng-ɑ ywëdhø, o ge dhïwi gen. Mɑ́ møgɑni bɑ dyër, bɑ gïjø me ni ngø ɑ cuggi gwøgø yi remi Mesiy! Kì ri Wëye møg-ɑ gïti ɑtheer ge nud; keny-ɑ ɑ́mëgge ree Jwøk ɑ́ gënh-ɑ dyër. Pëthee ólwøg yi en kɑ gwøng-ɑ nyi kɑ̈ni ki thøø kɑ̈ɑ̈le wɑ̈g, o wɑ ócuggi wɑ ki göggi Jwøng-ɑ nud gïti ɑtheer. Bene ɑ bëëde ɑ́ Mesiy ɑ gwir lwöm-ɑ nyɑ̈n, kipe kinni o tyëng-ɑ ɑ́cwøl yi Jwøk yïddi gen ki gyëdhh-ɑ gïti ɑtheer møg-ɑ ɑ́kwøb yi Jwøk kinni gï ómuuje. Mɑ́ en ɑ ɑ́thøw e gøøm-ɑ bøli orøng-ɑ ɑ́gwøg yi teedø kì yethi cyɑ̈nggi lwömi tyeli mɑl. Jɑmm-ɑ ceg kinni ge ólɑg, pɑ cuggi kwɑnyø e ngɑn-ɑ ɑ́cïg nuti thøø. Wɑ̈ny-ɑ gwed yi dhɑnhø e nyodh-ɑ kër-ɑ ólɑɑg jɑmme, nyi ceg-ɑ bëëdø gïti bøli keny-ɑ óthøwe, de jɑmme pɑ cuggi lɑgø e nudd e onëënø. Bene ɑ pere ɑ́thyeey lwömi tyeli mɑl ki remø. Mosɑ̀ ɑ́ceg-ɑ teedø ki rɑ̈ngi cigg bënn. Codhe ɑkwɑnye remmi wɑ̈dhh kí ónyögg, kɑ gï tole ki pï, ɑkinye gïn kömi wɑ̈nyi Cigg geki ji, e kïny-ɑ yelø kí kori yëyy me kwɑrø. Kɑ okööbø kinni, “Men bɑ rem-ɑ thyeey lwöm-ɑ ɑ́köbbi wun yi Jwøk kinni mïdhu en.” Kɑ Kemi Kwër geki jɑmmi kwër bënn ri gen wïddi yi Mosɑ̀ ki remø ni menɑni. Kì ri Ciggi Mosɑ̀, jɑmmì bënn nyi gwøg ge dhïw kɑ remø, o orøg pɑ lɑ̈ɑ̈ny e bong remø me dëëm piny. Keløg jɑmm-ɑ bɑ tïbbi gïg-ɑ mɑl, gwøg ge dhïw kɑ guöng ni men, jɑmm-ɑ mɑl kiri gen, pɑ gwøg ge dhïw kɑ gëdhhì mø lod møgɑni? Mɑ́ Mesiy nuti kedh-ɑ Kej Kwër men-ɑ ógwøg-ɑ yi dhɑnhø ki cingge, ɑ́ tïbi men-ɑ dyër. De ɑ́kedh-ɑ yij mɑl kiree, keny-ɑ bëëde ɑnɑn kì bøli Jwøk kiperee. Ókwër-ɑ Dwøng nyi kedhi Kej Kwërdwøng kɑ tyelø ɑ́kyel kì yij run, e ókɑ̈ddø ki remø me pɑth ki reme. De Mesiy nuti kedhi mɑl be muuji ree kɑ tyel mø gïïr ni kenyi göög Ókwër-ɑ Dwøng. Keløg ɑ́ kinøw, ti Mesiy di rɑngi kɑ tyel mø gïïr, e wön-ɑ́ɑ̀ kër-ɑ ɑ́cwɑ̈ɑ̈j piny. De ɑ́cwöb ɑnɑn ki tyelø ɑ́kyel, kì bøli keny-ɑ ɑ́rum jɑmmì ki cïb kɑ̈jji gen, kipe kinni o orøg lɑ̈ɑ̈nye, e mëgg-ɑ ree Jwøk ɑ́ gëëdhi. Dhɑnhø nyi thøw-ɑ tyelø ɑ́kyel, codhe o gønye nyi lidh yi Jwøk. Nɑ menɑni ceth, Mesiy, ɑ́muuj ɑ́ gëëdhi tyelø ɑ́kyel kipe lɑ̈ɑ̈nyi orøøg ji mø gïïr. Ódøøg ki cwöbø, de koo dwöög kɑ per lɑ̈ɑ̈nyi orøg, de óbï-ɑ be yieli tyëng-ɑ yïd bëëne. Mɑ́ Ciggi Yeud bɑ tïbbi gïgdøj møg-ɑ óbï, de pɑth ki gïgɑni kiri gen, tyëng-ɑ nyi muuj gëdhhì kì yethi runn bënn, pɑ cuggi gwøgø yi Ciggɑni ge tir kì yï Jwøk. O keløg tyëng-ɑ mɑlli Jwøk di göög ge dhïw kidyër, pëthi gen di wïyi ki olïng kipe orøg kɑ gëdhhì di wiy ki ngɑllø. De kenyi ngɑɑl gëdhhì kì yethi runn bënn, guöngɑni nyi pɑ̈dd-ɑ dhɑnhø kinni, orøg nuti lɑ̈ɑ̈nyø kì pyëwe, mɑ́ orøg dhɑ̈li lɑ̈ɑ̈nyø kì pyëwe yi remmi wɑ̈dhh geki remmi dyëg keti gen. Bene gïn-ɑ́ pere ɑ́kööb Mesiy keny-ɑ ɑ́bëëne kömi piny, e köbb-ɑ Jwøk kinni, “Yï pɑ dwɑddi gëdhh-ɑ ngɑl geki gïg-ɑ muuj, de yɑ ɑ́göggí ki dël. Pyëwí pɑ med ki gëdhh-ɑ nyi rɑ̈b kì wïj këli lɑm wɑlɑ̀ gëdhh-ɑ nyi muuj kipe gøømi bøli orøg.” Codhe, ɑkööbɑ kinni, “Yɑn èn Jwøk, gïn-ɑ dwɑddi yi yïn ógwøgɑ ni kɑ ógwedii kì yij Wɑ̈nyi Cigg.” Ákwöngi ki kwøb kinni, “Yï nuti dwɑdd-ɑ gëdhhì geki gïg-ɑ nyi muuj, o pyëwí nuti bëëdø e med ki lɑ̈yy-ɑ nyi rɑ̈b gɑ møg lɑ̈ɑ̈ny orøg.” Møgɑni ɑ́kwøb yi en ngö gïgɑni bënn nyi ceg kɑ gwøgø ceth ni kɑ ókwøøb gen yi Cigg. Codhe ɑkööbe kinni, “Yɑn èn Wuö Jwøk, gïn-ɑ dwɑddi yi yïn ógwøg yi yɑn.” Codhe ɑcuung gëdhh-ɑ weenø yi Jwøk, kɑ gënhi Mesiy cïbe kɑ̈jji gïn. Kɑ wɑ yiel ki orøgee yi gënh-ɑ ɑ́muuj yi Yëso Mesiy tyelø ɑ́kyel, ɑ́ dële kiree, mɑ́ e ɑ́gwøg-ɑ gïn-ɑ ɑ́dwɑddi yi Jwøk. Ókwëri Yeud nyi dhwödh-ɑ be gwøgi gwøge yethi cyɑ̈ng bënn; kɑ nyii ngɑ̈dø ki gëdhhì tyel mø gïïr; de orøg dhɑ̈li lɑ̈ɑ̈nyø yi gëdhhɑni. De Mesiy ɑ́muuj-ɑ gëëdhi ɑ́kyel men lɑ̈ɑ̈ny orøg gïti ɑtheer, codhe ɑpëgge wïj kyëëj Jwøk. O obëëdø ɑnɑn kì kunɑni e yïd-ɑ bøli keny-ɑ ógwøøg tyëng-ɑ mɑ̈n ki en gɑ thɑ̈nhi tyelle yi Jwøk. Mɑ́ tyëng-ɑ ɑ́kwër yi en ɑ́gwøge ge tir gïti ɑtheer kɑ gëëdhi ɑ́kyel. O bɑ møgɑni ceth ɑ ɑ́kwøb thyew yi Wëykwërø. Ákwöngi ki kwøb kinni: “Men bene lwöm-ɑ ónywɑg yi wøki gen kì yethi cyɑ̈ngg-ɑ óbï ciggɑ ócïbɑ yethi minni gen kɑ ge gweedɑ yethi wɑ̈thi gen.” Kɑ cig-ɑ kwøb kinni, “Orøøg gen geki gïgrijjø møg-ɑ ɑ́gøggi yi gen pɑ cigɑ pɑrrø.” Kɑ ɑ́rum møgɑni ki lɑ̈ɑ̈nyø bënn, bong gëëdhi me dwɑddi këti kipe lɑ̈ɑ̈nyi orøg. Kɑ ɑ́rum bëëde kinøw, wun ɑ nyiimïɑ; wɑ ócuggø kedhi Kej Kwërdwøng ni kɑ̀ dwɑddii yi wɑ, wɑ kɑ̈l-ɑ ri thøwi Yëso. Wɑ ɑ́yïëbbe ki yöö me nyɑ̈n, me nëënø, kì ri gëng, men-ɑ bɑ dële. Yïee dɑ ókwërø me dwøng, me mïdhi ød Jwøk. Kɑ wɑ døøg wɑ kö Jwøk ki pyëw ɑ́kyel, kí yïëyø mɑ dyër, kí min mø yethi gen ókɑ̈ɑ̈l kerri orøg wɑ̈g, kí dëllì møg-ɑ ólwøgø kidøøj. Mɑ̈gi wɑ kì ri ngɑ̈ɑ̈dhø men-ɑ ɑ́yïëy yi wɑ, mɑ́ wɑ gɑ̈nn-ɑ Jwøk kinni møg-ɑ ɑ́kwøbe ógwøge ceth. Konggi wɑ riee, kɑ riee nyi køny wɑ, wɑ mɑɑr-ɑ riee, wɑ gøgg-ɑ gïgdøj. Kɑ wu ko wïyi ki cugø, ni kenyi göög yi kwï wun, de nyi cïj wun ri wun, mɑ́ wu ngɑ̈ny wøw kinni Cyɑ̈ɑ̈ng Wë ɑ́cyɑ̈ngi. Keløg wɑ ogöögø ki orøg ki tirø, wɑ rum lïngø ki møg-ɑ bɑ dyër, bong gëëdhi men-ɑ ógøøm orøg këti. De tyëng-ɑ pyem kwøbbi Jwøk ócɑy, kɑ ge leeng yij mɑc me lyëdh ki mendwøng. Ngɑn pyem Ciggi Mosɑ̀, kɑ gøøny yi ji ɑ́ryew wɑlɑ̀ ɑ́dɑ̈g møg-ɑ ɑ́lïdhi, nyi ceg kɑ cɑyø ki thøø. Wu orumø bɑ cɑ́y mø bëëdø kidï ɑ ócɑɑy tyëng-ɑ nyøn Wɑ̈d Jwøk, kɑ rem-ɑ ɑ́thyeey lwöbø gwøg gen ɑ́ gïn bong pere, kɑ Wëyi Jwøk geki dhwɑ̈nge gwɑddi gen? Mɑ́ ngɑ̈nyi yi wɑ, eni ngɑn-ɑ ɑ́kööb kinni, “Gøølø col-ɑ yi yɑn; yɑn ɑ ócɑ̈yyi.” Kɑ okööbø thyew kinni, “Wë gøøny jie ólidhe.” Ngɑn-ɑ ópɑ̈dhi cingi Jwøng-ɑ Nëënø, ree dɑ cyën. Pɑr wun keny-ɑ ɑ́bëëd wun kɑ̈ge dööng; kɑ ɑ́rum cɑɑr Jwøk ki meny kì kömi wun, wu ɑ́rɑngi yi gïg mø gïïr, de wu ɑ́cög wu nuti tyɑmø yi gïgɑni. Wu ɑ́bëëd wu ceg kɑ gwɑddø yi teedø, kɑ wu nyi göggi ki gïgrijjø, kɑ wu nyii göögø møg rëbi ki tyëng-ɑ kyeelø møg-ɑ nyi göggi ki gïg ni møgɑni. Kɑ yethi wun nyii ywöngø kiper tyëng-ɑ ying ød mɑg, o pëthi wun nuti rënyø, kɑ ɑ́mɑɑg jɑmmi wun. Mɑ́ e ngɑ̈nyi yi wun kinni yï wun dɑ jɑmmì møøgø mø lod møgɑni, møg-ɑ óbëëdø gïti ɑtheer. Kɑ ɑ́rum bëëde kinøw, pëthi wun ko wëggu nyönhø, mɑ́ köögi men-ɑ óyod yi wun kì yï Jwøk dwøng. Ngïïn wun, o wu gwøg wu gïn-ɑ dwɑddi yi Jwøk, o köögi men-ɑ ɑ́kwøb yi en óyod yi wun. Nɑ kɑ̀ kööb wɑ̈nyi kwërø kinni, “Kì bɑng nyɑ keny me thiinh, ngɑn-ɑ bï óbï koo cwööng. Jiɑ, tyëngtir óyïëy kɑ ge óyïddø ki nënnì, de keløg e dɑ ngɑn døøg cyɑ̈n kì kelli gen, pyëwɑ koo bëëdø e med ki en.” Wɑ tøøk kì kelli tyëng-ɑ nyi døøg cyɑ̈n, kɑ ge ólɑ̈ɑ̈nyø. De wɑ bɑ tyëng-ɑ ɑ́yïëy, o wɑ óyiel ceth. Yïëyø bɑ bëëdi dhɑnhø e yïëyø kinni gïg-ɑ ngɑ̈dh yi en, ngö gï pɑ nenne óyode ceth. Bɑ kì bɑng yïëyø ɑ ɑ́pwøøj tyëng-ɑ ócyɑ̈ɑ̈ngi yi Jwøk. Bɑ yïëyø ɑ wëggi wɑ yodi kinni lɑ̈bø ɑ́cwɑ̈j kɑ lögi Jwøk, o gïn-ɑ cuggi nennø gwøg kì ri gïn pɑ cuggi nennø. Bɑ yïëyø ɑ ɑ́wëggi Abel muujø ki gëëdhi me lod mi Kɑin. Kɑ pwøj yi Jwøk kinni bɑ ngɑntir keny-ɑ ɑ́yïëye gënhe. O bɑ kì bɑng yïëyø, ɑ nudd Abel e okööbø ngö e rum thøø. Bɑ yïëyø ɑ ɑ́mɑ̈ɑ̈n Enök thøø. De ɑ́kïdh-ɑ yï Jwøk, kɑ ocögø e bong ngɑn yodii, mɑ́ e ɑ́kïdhi mɑl yi Jwøk. Wɑ̈nyi kwërø okööbø kinni, i keny-ɑ ɑ́bëëd Enök nuti kïdhi mɑl, Jwøk ɑ́bëëd pyëwe med ki en. Bong ngɑn cuggi bëëdø pyëw Jwøk med ki en, keløg yïe bong yïëyø, mɑ́ e bong ngɑn cuggi wɑ̈dhi bøli Jwøk keløg e nuti yïëyø kinni Jwøk nud, o nyi køøg-ɑ tyëng-ɑ yɑbii. Bɑ yïëyø ɑ ɑ́wëggi Nöö lïngi kwøbbi Jwøk, kɑ gïg-ɑ ócwöb dhuki megø yïëye, ngö gï pɑ nenne. Kwøbbi Jwøk ɑ́lïnge, ɑgude ki sɑpïnɑ̀ men-ɑ ɑ́yielii geki gøle. Codhe, ɑcɑɑy lɑ̈bø, kɑ Nöö óyïddø ki gyëdhhi Jwøk kì bɑng yïëye. Bɑ yïëyø ɑ ɑ́wëggi Abrɑhɑm lïngi kwøbbi Jwøk, keny-ɑ ɑ́cwööle gøn wɑ̈g kì pödhi gen, o kedhe pönh-ɑ ɑ́kwøb yi Jwøk kinni ómëggii yi en. Ádhwödh kì pödhi gen e kun-ɑ kedhe kwïje Bɑ yïëyø ɑ ɑ́wëggii bëëdø ɑ́ wëdh kì pönh-ɑ ɑ́kwøb yi Jwøk kinni ómëggii. Abrɑhɑm ɑ́bëëd ɑ yethi kemmì, en kí Isɑɑk kí Yɑgob, jøg-ɑ ɑ́nywɑg gen kwëng ɑ́kyel. Mɑ́ Abrɑhɑm ɑ́bëëd e nenn-ɑ bøli keny-ɑ ówɑ̈dhe kɑɑldwøng men-ɑ́ tyele ɑ́këël piny kidøøj yi Jwøk kɑ gø gere. Bɑ yïëyø ɑ ɑ́wëggi Sɑrɑ̀ yïddø ki dhɑnhø, e bɑ bwøj o rum yöø, mɑ́ ngɑn-ɑ ɑ́kwëngii kinni óyïddi ki dhɑnhø gɑ̈n yi en. Abrɑhɑm ɑ́yïddi ki kwɑrr mø gïïr ni kyelli mɑl, kɑ ge nɑ ɑyejø kì thɑ̈ngi nɑɑm omelø, ngö e ɑ́bëëd e nɑ ngɑnthøø. Tyëngɑni bënn ge ɑ́thøw-ɑ yij yïëyø. Gïg-ɑ ɑ́kwøb yi Jwøk kinni gï ómëgge gïn nuti yood gen, de gïgɑni ɑ́lidh yi gen ge lɑ̈wi lɑ̈wi, kɑ ge ópwöjjø, ɑyïëy gen kinni ge bɑ wëdhh kì wïj piny. Tyëng-ɑ kööbø kinøw nyodh-ɑ kinni, ge oyɑ̈bø ki pödhø me bɑ mi gen. Ge nuti cögø ge rømm-ɑ kwøbbi kun-ɑ ɑ́kɑ̈ɑ̈l yi gen; keløg gø di rømmi yi gen, ge di yïddi ki keny døøg gen kunɑni. De ge ɑ́tyer-ɑ yïddø ki pödhø me døøj kibøli menɑni, pödhi Jwøk. O Jwøk wïje koo lɑ̈ɑ̈y kɑ̀ cwøllii yi gen ɑ́ Jwøøg gen, mɑ́ gï ɑ́gëdde ki kɑɑl. Bɑ yïëyø ɑ ɑ́wëggi Abrɑhɑm muuji wɑ̈de Isɑɑk ɑ́ gëëdhi, keny-ɑ ɑ́rɑngii yi Jwøk. Bɑ Abrɑhɑm ɑ ɑ́köbbi kwëng yi Jwøk, de ɑ́yöd wɑ̈de wɑ̈dkyel omuujø yi en ɑ́ gëëdhi. Abrɑhɑm ɑ́köbbi yi Jwøk cøn kinni, “Kwɑrr-ɑ ɑ́köbbɑ yïn kinni ge ómëggɑ yïn, ge ónywøl-ɑ yi Isɑɑk.” Mɑ́ Abrɑhɑm ɑ́rum kinni, cɑgg dhɑnhø thøw, ócuggø tugø yi Jwøk kì yij thøø, o ɑ́bëëd e Isɑɑk ce ótug ɑ yij thøø kidyër. Bɑ yïëyø ɑ ɑ́wëggi Isɑɑk kwëngi Yɑgob geki Isøø. Bɑ yïëyø ɑ ɑ́wëggi Yɑgob kwëngi wɑ̈ddi Yosep, kì bøli keny-ɑ ɑ́cyɑ̈ngi thøwe, kɑ Jwøk mɑlle e ree mïdhe kɑ keme. Bɑ yïëyø ɑ ɑ́wëggi Yosep köbbi tyëng Isrɑil ki kwøbbi bëën wɑ̈g kì Rïp, kɑ gï cege kinni kwöög ge gøn keny-ɑ ɑ́kwøbe kinni ókoonyii. Møgɑni ɑ́kwøb yi en ɑ keny-ɑ ɑ́cyɑ̈nge ki thøø. Bɑ yïëyø ɑ ɑ́wëggi Mosɑ̀ kɑnnø yi wïye geki meye ki dwɑ̈tt ɑ́dɑ̈g kì bɑng kɑ ɑ́nywølii. Áceg kɑ lidhø yi gen kinni bɑ nyelthinh me døøj, ɑböyyi gen ki pyemi kwøbbi rɑ̈dh. Bɑ yïëyø ɑ ɑ́wëggi Mosɑ̀ bɑ̈nyø ki cwøllø ɑ́ wɑ̈d nyɑɑr rɑ̈dh, keny-ɑ ɑ́dønge. Ákwɑny-ɑ bëëdø kì kelli jii Jwøk, kɑ medi bëëdi orøg, ɑ nyi jwɑn lɑ̈ɑ̈nyø bɑnye. Mosɑ̀ ɑ́bøy-ɑ orɑng kiper Mesiy, ɑbɑnye kɑ̈ɑ̈r Rïp, mɑ́ e ɑ́bëëd rumme cïb en ri köögi men-ɑ óyod yi tyëngtir dhuki megø. Bɑ yïëyø ɑ ɑ́wëggi Mosɑ̀ dhwödhø kì Rïp, e pɑ böggi yi liny rɑ̈dh. Ábëëd e dhɑ̈y Jwøk ɑ pɑ nyi nenni, di nennø yi en, ɑcöge e nuti døøg ngɑ̈je. Bɑ yïëyø ɑ ɑ́wëggii gwøgi Ákɑɑdh, kí gɑ̈ɑ̈ji remø ri bɑ̈lli ud, kipe kinni o wëywön-ɑ nɑ̈ɑ̈gø ócöge e pɑ nɑ̈gi ki wɑ̈dd-ɑ bɑ kɑyyi tyëng Isrɑil. Bɑ yïëyø ɑ ɑ́wëggi tyëng Isrɑil bɑ̈ɑ̈ni Nɑɑm Omeli Kwɑrø, ge ce cyɑ̈dh-ɑ́ɑ̀ piny me thwøwø; kɑ tyëng Rïp mwøøny yi pï keny-ɑ ɑ́pɑ̈nyi gen ri gen ki bɑ̈ɑ̈ni nɑmɑni. Bɑ yïëyø ɑ ɑ́tɑ̈ɑ̈y döri kɑɑl Yerikö piny, kɑ ɑ́rume wenø yi tyëng Isrɑil ki cyɑ̈ng ɑ́bïryew. Bɑ yïëyø ɑ ɑ́yiel Rɑɑ̈b, ngɑn nyi niin ki köögi, kì kelli tyëng-ɑ pëmø, mɑ́ lyëwwi tyëng Isrɑil ɑ́cwøøle gøle. Á ngø ɑ kwøbɑ këti? Bong keny kööbɑ kì ri, Gideon, kí Bɑrɑk, kí Cimcön, kí Yeptɑɑ̀, kí Debïd, kí Sɑmwel, geki jøtöng. Bɑ yïëyø ɑ ɑ́wëggi gen tyɑmi pödhh. Ge ɑ́gwøg-ɑ dyër, ɑyïddi gen ki gïgdøj møg-ɑ ɑ́kwëng yi Jwøk. Dhøggi ngurrì ɑ́cyëëg gen, kɑ mɑ̈ɑ̈c mø døngø nɑ̈g gen; kɑ ge obødhø kì dhø pilø. Ge ɑ́bëëd ge nyødh, de ge ɑ́tëngi; ge ɑ́bëëd ge teg ki liny, kɑ lìnyi pödhh-ɑ kyeelø tyɑm gen. Kì bɑng yïëyø, tyëng-ɑ mɑ̈nn, mø nyigi gen thøø, ɑ́dwöög gen be nënnø. Kwï gen ɑ́bøy-ɑ orɑng, kɑ ge óbɑ̈nyø ki yielø, kipe kinni o ge óyïddi gen ki yuu-ɑ ódhwödhi gen yethi nënn-ɑ dyër. Møøgø ɑ́gɑggi kɑ ge pwöd, kɑ møøgø twöj ki ɑ́cwecwel, kɑ ge kïdhi ød mɑg. Kwï gen ɑ́bɑ̈lli ki tuggi kïttì, kɑ møøgø kɑg ki mocɑr; kɑ møøgø keb ki pilø. Møøgø ɑ́rug-ɑ lɑ̈wwi dyëg; ge jɑdø, o nyingi gen ceg kɑ guudø. Kɑ bëëdø kì kömi piny órënyø kì yï gen! Ge ɑ́ceg-ɑ twɑ̈lø kì yij ryɑng, kí kelli kïttì, ge bëëd ɑ yethi órøggi kïttì kí yethi burrì. Cɑgg ɑ́ kɑ ɑ́rɑngi tyëngɑni kinøw, kɑ yïëyø mi gen yod e teeg cɑrø, møg-ɑ ɑ́kwëng yi Jwøk nuti yood gen kì bøli kenyɑni, mɑ́ e dɑ gïjø me lɑ̈w kibøli møgɑni mɑ ɑ́gwir yi Jwøk kiperee. Gïn-ɑ dwɑddi yi Jwøk bɑ kinni, ge ógwøg ge tir e bong gïn gwɑ̈ɑ̈d kì ri gen kyeel kɑ wɑ. Wɑ bɑ ɑwen yi teen-ɑ nenni gwøgee. De ceg wɑ gïg-ɑ toor wɑ geki orøg bëne ki leeng piny, kɑ wɑ rengi wɑ, wɑ bɑ̈ɑ̈n-ɑ thwør-ɑ yije rɑɑd. Cög wɑ, wɑ nenn-ɑ ri Yëso ngɑn-ɑ ree bëëd yi yïëyee. Gure wïj yɑdh ɑrïw ɑ́ngine e pɑ böggi ki ɑyɑ̈r, kipe medi pyëw men-ɑ óyod yi en; bëëd ɑ wïj kyëëj kwøøm Jwøk ɑnɑn. Rum wun kì ri ngɑn-ɑ ɑ́ngin kwøbbi tyëngorøg møg-ɑ mɑɑnii, o pëthi wun cög ge pɑ nyönhi. Keny-ɑ ɑ́nyïɑ̈ggi wun ki orøg, bong ngɑn mɑ reme ɑ́dëëm. Wɑ̈thi wun ɑ́ceg-ɑ wïlø ki møg-ɑ ɑ́köbbi wun yi Jwøk e ceg-ɑ nyige? Ákööb kinni, “Wɑ̈dɑ, nyi kyën yïthhí kenyi tyeeny yïn yi Wë, kɑ pyëwí ko nyi nyönhi kenyi cɑye yïn. Mɑ́ Wë nyi tyeny-ɑ tyëng-ɑ mɑɑr yi en, o ngɑn-ɑ ɑ́yïëy yi en, ɑ́ nyɑre nyii cɑyø yi en ki mendwøng.” Ngin wun orɑng men-ɑ kɑ̈ɑ̈l bɑng ceng-ɑ ceg wun yi Jwøk wïyi wun. Á men ɑ pɑ nyi ceg yi wïye? Keløg wu ocögø wu pɑ tyeny kyeel ki jii Jwøk bënn, wɑng-ɑ kinni, wu pɑth ki nyige, de wu bɑ nywøl møg-ɑ ókɑ̈ɑ̈lø kì wɑ̈g. O thyew, yïee dɑ wëëgee kì kömi piny møg-ɑ nyi tenyi wɑ, o ge nyii wørø yi wɑ. Pɑ lɑ̈w keløg ngɑn-ɑ bɑ Wïyee kì mɑl owørø yi wɑ, kipe kinni o wɑ óyïddi wɑ ki nënn-ɑ ɑtheer? Wɑ nyii cegø yi wëëgee møg-ɑ bɑ ji ki kɑɑm me nøg, ni kɑ̀ dwɑddii yi gen; de wɑ tyeny yi Jwøk kɑ per dönyee, o wɑ yïddi wɑ kì ri kwëre. Pyëw dhɑnhø nyii rënyø kenyi pwödii e ceg kɑ cegø, de nyii yodø yi en kì cyɑ̈n kinni bɑ gïndøj ɑ ógöggii kenyi yïdde ki bëëntir. Tïng wun cinggi wun, cingg-ɑ dhɑ̈ɑ̈rø mɑl; kɑ tyelli wun, tyell-ɑ kïrrø këël wun piny kidøøj. Kɑ wu kɑ̈lli wun yëth-ɑ bɑ óbödhh, kipe tyel-ɑ ngølø ódhɑ̈li ki cyɑ̈dhø, de wiy cɑɑge dönyø. Bëëd wun ki mër kì kelli ji bënn, kɑ wu bëëd wun ki bëëntir; mɑ́ ngɑn pɑ bëëdø kinøw pɑ cuggi wɑ̈dhi bøli Wë. Koru ri wun; dhwɑ̈ɑ̈ng Jwøk ko wiyu piny. Ko di ngɑn wëggu gwøg e nɑ yɑdh me keej, mɑ́ ji mø gïïr órënye. Ko di ngɑn pɑ wør Jwøk kì kelli wun, wɑlɑ̀ ko di ngɑn pyëwe nyönhi ni Isøø ɑ ɑ́muuj kej kɑyø kipe gïncɑm me cɑm tyelø ɑ́kyel yøw. Ngɑ̈nyi yi wun kinni, kɑ ɑ́kwɑ̈jje ki gyëdh kì yï wïye, bong gyëdh mɑ ɑ́yode, ngö e ɑ́kwɑ̈jji e ceg-ɑ ywøg. Wu nuti bëënø kɑ bëëni tyëng Isrɑil, wu nuti kedh-ɑ yï gïn nenni yi wun, kɑ Kïti Sinɑy lidh yi wun e opɑ̈mmø ki mɑc, o piny bɑ muudhø, e ɑtunø me teeg ókwöddø, e ywøøg kɑng olïngø, kí cwɑg mø kööbø. Keny-ɑ ɑ́lïngi cwɑggɑni yi teedø, ɑkwɑ̈jji gen kinni ge ko cigi lïngø ki kwøbbɑni, mɑ́ ge ɑ́bwøg yi cigg-ɑ ɑ́kwøb kinni, “Keløg kït men onywɑlø; cɑgg ɑ́ lɑ̈y ɑ nywɑlii, bɑ̈lli lɑ̈yɑni ki tuggi kïttì, o thøwe.” Ji ɑ́bwøg yi gïn-ɑ ɑ́lidh yi gen; men-ɑ́ Mosɑ̀ kiree ɑ́kööb kinni, “Yɑ ɑ́bwøg, o dëlɑ ceg-ɑ kïïrø!” De wu ɑ́kedh-ɑ Kïti Dhɑyøn, kɑɑl kwër; kɑɑl Jwøk; Yerusɑlem men-ɑ mɑl, ki wëywödde gɑ ɑ́lïp mø ngenyø. Wu ɑ́kedh-ɑ keny-ɑ bëëd yi kɑyyi Jwøk, møg-ɑ nyingi gen bɑ ɑgwed kì mɑl. Wu ɑ́kedh-ɑ yï Jwøk jɑngi gøøny ji bënn, keny-ɑ bëëd yi wëyi tyëngdøj møg-ɑ ɑ́gwøg ge tir. Wu ɑ́kedh-ɑ yï Yëso, ngɑn-ɑ ɑ́thyey lwöm-ɑ nyɑ̈n, ki rem-ɑ ɑ́dëëm piny men-ɑ muuj døøjø me dwøng kibøli døøny-ɑ ɑ́muuj yi remi Abel. Koru ri wun, kɑ wu ko bɑ̈nyi ki lïngi kwøbbi ngɑn-ɑ kööbø. Tyëng-ɑ ɑ́bɑ̈nyi ki lïngi kwøbbi ngɑn-ɑ ɑ́muuj wööni Jwøk kì kömi piny, nuti bødhø ki cɑyø. De wɑ óbødh-ɑ dï ki cɑyø keløg wɑ bɑny-ɑ kwøbbi ngɑn-ɑ ying mɑl! Piny ɑ́nhɑ̈nhi yi cwɑgge cøn, de ɑ́kööb ɑnɑn kinni, “Pɑth ki piny kete ɑ ógöjjɑ onhɑ̈nh këti, de mɑl ógöjjɑ onhɑ̈nh thyew.” Kwøbbe kinni “këti”, wɑng-ɑ kinni gïg-ɑ ɑ́cwɑ̈j órungi kɑ ge nyiig, codhe o gïg-ɑ pɑ cuggi rungø döng gen. Pwöjji wɑ, mɑ́ wɑ ɑ́yïddi ki pödhø me pɑ cuggi rungø. Pwøj wɑ Jwøk, kɑ mɑlli wɑ ki mɑ́l-ɑ med kì pyëwe, e owørø yi wɑ, wɑ óböggø yi en, mɑ́ Jwøgee bɑ mɑc me ceg rɑ̈b. Wun ɑ nyiimïɑ, bëëd wun wu mɑɑr-ɑ ri wun ni nyiimëëg ceth. Kɑ wɑ̈thi wun ko wïl ki thegi wëll, mɑ́ e ɑ́dɑ ji mɑ ɑ́theg wëywödd gï cwølli gen gɑ ji yøw. Wɑ̈thi wun ko nyi wïl ki tyëng-ɑ ød mɑg, de bëëd wu ce ying-ɑ ød mɑg kyeel ki gen. Kɑ tyëng-ɑ nyingi gen guud nyi pɑrri wun, wu ce ceg-ɑ orɑng kyeel ki gen. Wøør nywöm yi ji bënn, kɑ wiy pyëën tyëng-ɑ ɑ́nywøm ri gen bëëde e dhïw, mɑ́ tyëng-ɑ nyi kedhi yethi pënnì mø pɑth ócɑy yi Jwøk. Pëthi wun ko göjju mɑɑri ngyëny, de mɑg wun pëthi wun ki møg-ɑ yï wun. Mɑ́ Jwøk ɑ́kööb kinni, “Wu pɑ wøyɑ; wɑlɑ̀ wu pɑ wiyɑ piny.” Nyi kööb wɑ yethee pɑ pyëër kinni, “Bɑ Wë ɑ nyi køny yɑn, yɑ pɑ böggi. Á ngø ɑ cuggi göggi yɑn yi dhɑnhø?” Nyi pɑrri wun pëjji wun mø tyeli mɑl, jøg-ɑ ɑ́köbbi wun wööni Jwøk. Rømmu kër-ɑ ɑ́bëëd gen kí kër-ɑ ɑ́thøw gen, kɑ yïëyø mi gen ngøy wun. De Yëso ying-ɑ keje ceth; bëëde ɑ́wɑ̈ɑ̈ pɑ̈r ki bëëde dicyɑ̈ngtïn; gït-ɑ ɑtheer ree pɑ wile. Ri wun ko wëggu peej pɑ̈l yi tyëng-ɑ nyi pwönyi møg-ɑ bɑ̈ɑ̈n ki kwøbbi Yëso geki pwöny-ɑ pɑth ki dyër, mɑ́ e lɑ̈w keløg dhɑnhø obëëdø kì ri dhwɑ̈ng-ɑ nyi kɑ̈ɑ̈l yï Jwøk, de pɑth ki mïdhi cigg kipe gïgcɑmm, mɑ́ tyëng-ɑ mïdhi ciggɑni nuti kønyø yi mïdhi gen. Yïee dɑ këli lɑm me gëdhh-ɑ köme pɑ cuggi cɑmø yi ókwërr-ɑ ɑ́göög cøn kì Kemi Kwër. Ókwër-ɑ Dwøng ɑ́bëëd e nyi kïdh-ɑ Kej Kwërdwøng ki remmi lɑ̈yy mø muuje ɑ́ gëëdhi me gøøm orøg; de rïnggi gëdhhɑni nyi rɑ̈b ɑ dhøg kemɑni kì wɑ̈g. Bene ɑ bɑnge ɑ́thøw Yëso dhøg döri kɑɑl, kipe kinni o ji gwøge ge dhïw ki reme. Kedhi wɑ yïe kì dhøg kemɑ̀ kì yiny-ɑ wɑ̈g, kɑ ɑyɑ̈re nywɑg wɑ ki en. Mɑ́ e bong kɑɑl me ceg bëëdø ɑ́ miee kì kömi piny; wɑ yïd-ɑ kɑɑl-ɑ óbï. Pwøj wɑ Jwøk yethi cyɑ̈ng bënn, e pwøjjɑni bɑ kej gëëdhi men-ɑ di mëggii yi wɑ kì ri Yëso. Wɑ̈thi wun ko nyi wïl ki gwøg ki gïgdøj, wɑlɑ̀ ki nywɑ̈g ki jɑmmi wun, mɑ́ møgɑni pɑ̈r ki gëdhh-ɑ nyi wëggi pyëw Jwøk mïnø. Nyi lïngu kwøbbi tyëngdøngi wun, mɑ́ ge bɑ pëjji wun. O ge korr-ɑ wëyi wun, mɑ́ ge bɑ møg-ɑ ócɑy yi Jwøk ke pɑ kor ge gïn. Keløg kwøbbi gen olïngø yi wun, ge ceg-ɑ gwøg ki medi pëthi gen, de keløg ge ógöögø pëthi gen rijjø, bong kunyø me yod yi wun. Nyi kwɑjju Jwøk kiper wøn, mɑ́ wø ngɑ̈ny wøw kinni, bong gïnrɑj kì pëthi wøn kipe gwøng-ɑ ɑ́gwøg yi wøn. De wø nyi tyer-ɑ gwøg ki gïg-ɑ myëër kì ri jɑmmì bënn. Yɑ kwɑjj-ɑ wun ki mendwøng kinni kwɑjju Jwøk ceth, o yɑ ójwɑne kì döggi wun. Yɑ kwɑjj-ɑ wun, yeki nyiimïɑ, kinni lïngu kwøbb-ɑ cïïjɑ wun; mɑ́ wɑ̈ny-ɑ ɑ́gwëdɑ wun pɑth ki wɑ̈nyø me dwøng. Yɑ ngɑ̈j-ɑ wun kinni, Timøthì ómïee ɑ́gööny wɑ̈g kì ød mɑg. Keløg e jwɑn-ɑ bëënø, yɑ ólwöög yi en keny-ɑ óbëënɑ yï wun. Mɑ̈dh wun pëjji wun geki jii Jwøk bënn. Wu ɑ́mɑ̈dh yi nyiimïee møg-ɑ kɑ̈ɑ̈l Itɑliyɑ̀. Wiy dhwɑ̈ɑ̈ng Jwøk yinge kömi wun bënn. Wɑ̈nyø men kɑ̈ɑ̈l-ɑ yï Yɑgob bɑ̈ng Jwøk geki Wë Yëso Mesiy. Yɑ mɑ̈dh-ɑ jii Jwøk møg-ɑ tɑɑy kömi piny bëne. Nyiimïɑ, ngɑ̈nyu wøw kinni, ri wun dɑ gyëdh kɑ̀ rɑngi wun kinøw kì wɑ̈thi tùng bënn, mɑ́ wu ngɑ̈ny wøw kinni kɑ̀ cuggi wun ki ngini orɑngɑni kì bɑng tegi yïëyø mi wun, wu ceg-ɑ yïddø ki tegø men ngïïn wun. Ngïïn wun ceth kɑ pëthi wun ko wëggu nyönhø, o óbongii gïn gwɑ̈ɑ̈d kì ri wun, wɑlɑ̀ gïn jɑ̈ddi wun. De keløg e dɑ ngɑn jɑ̈ddi ki peli wïj kì kelli wun, kwɑjje Jwøk, o óthödhi yi Jwøk ki peli wïj, mɑ́ Jwøk ji bënn nyi thödhe’ thödhø e muujø kɑ medi pyëwe. De nyi kwɑ̈jji wun yethi wun pɑ pyëër; mɑ́ ngɑn-ɑ yije nyi pyëër nɑ ɑpɑng-ɑ nyi pwöj yi yømø kì nɑɑm omelø. Ngɑn ni menɑni ko rum kinni dɑ gïn-ɑ óyod yi en kì yï Wë, mɑ́ e bɑ dhɑnhø me rumme tɑyø, o nyi døøg-ɑ cyɑ̈n kì ri gïg-ɑ gøgge bënn. Tyëng-ɑ jɑdø kì kelli nyiimïee, nyi mïni pëthi gen, keløg ge tïng-ɑ mɑl yi Jwøk. Kɑ ngetikɑ̈r, nyi med pyëwe ceth kɑ̀ wɑ̈ɑ̈ny kɑ̈re; mɑ́ ngetikɑ̈r ólɑ̈ɑ̈ny ni okøggi luum pɑ̈l. Mɑ́ kenyi tuul cɑ̈ng kɑ ólënhø, lum nyi ceg-ɑ thwøwø kɑ okøgge odyëmø, kɑ myëre ólɑ̈ɑ̈nyø; bëëd ɑ nøw ceth, ngetikɑ̈r óthøw e cong-ɑ jɑmme. Ngɑn nyi ngïnø kɑ̀ rɑngii, ree dɑ gyëdh, mɑ́ keny-ɑ óthumi orɑngɑni, óthödhi yi Jwøk ki köögi men-ɑ ɑ́kwøb yi Jwøk kinni gø ómëgge tyëng-ɑ mɑɑrii. De kenyi thɑɑb dhɑnhø, ko nyi kööb kinni, “Yɑ ɑ́thɑb-ɑ yi Jwøk”, mɑ́ Jwøk kiree, pɑ nyi thɑb yi rɑj, o bong ngɑn nyi thɑb yi en thyew. De dhɑnhø nyi thɑb-ɑ yi gïnrɑj men-ɑ nyi kønø kì pyëwe, kɑ nyi mɑg yi gïn-ɑ tyer yi pyëwe. Okøn pyëw ki gïnrɑj nyii nywølø ki orøg, o orøg kɑ̀ ngënye kì pyëw dhɑnhø nyii kɑ̈nø ki thøø. Ri wun ko wëggu wënyø, yeki nyiimïɑ! Gïn-ɑ muuj e døj, kí gïn-ɑ muuj e bong gïn gwɑ̈ɑ̈d kì ree nyi bï e kɑ̈ɑ̈l-ɑ mɑl; nyi bï piny e kɑ̈ɑ̈l-ɑ yï Jwøk, ngɑn-ɑ ɑ́cwɑ̈j gïg-ɑ mëënyø kì mɑl, eni ngɑn-ɑ pɑ nyi wil ree, ɑ bong tïbe kenyi wiire ree. Bɑ gïn-ɑ ɑ́dwɑdde ɑ ɑ́gwøge, keny-ɑ ɑ́cwɑ̈je wɑ ki kwøbb-ɑ dyër, kipe kinni o wɑ óying wɑ mɑl kibøli gïg-ɑ ɑ́cwɑ̈je bënn. Wɑ̈thi wun ko wïl yeki nyiimïɑ kinni, nyi jwɑn dhɑnhø lïngø, de ko nyi jwɑn löggø, kɑ ko nyi jwɑn ki mɑgø yi liny. Mɑ́ liny dhɑnhø, bong dyër me gwøge kì bøli Jwøk. Kɑ ɑ́rum bëëde kinøw, bɑny wun gïgrijjø geki bëëdi orøg. Kɑ ri wun cïb wun cingi Jwøk, kɑ kwøbb-ɑ cïbe pëthi wun nyi mïdhi wun, mɑ́ wu ócuggø yielø yi kwøbbɑni. Ri wun ko wëny wun; kwøbbi Jwøk ko nyi wɑ̈dhi wun ki lïngø, de nyi gwøg wun gïn-ɑ köbbe wun. Ngɑn lïngi kwøbbi Jwøk, kɑ ocögø e gïn-ɑ dwɑddi yi Jwøk pɑ gwøge, nɑ ngɑn lidh ree kì yij rɑ̈ɑ̈ngi. Ánenni ree kidøøj, kɑ ókedhø; de wïje ɑ́jwɑn wïlø kinni nënni e nɑ ngø. De tyëng-ɑ nenni ri cigg-ɑ nyi pɑ̈d ji kì yethi töjjì, kɑ gï mïdhi gen ceth, e gï pɑ wëggi gen wïlø, de gïn-ɑ kømmi yi ciggɑni nyii gwøgø yi gen, Jwøk tyëngɑni ógëdhe gïg-ɑ gøggi yi gen bënn. Ngɑn rumø kinni mïdh-ɑ kwøbbi Jwøk, de lebe pɑ mïdhe, budh-ɑ ree; o kwøbbi Jwøk møge, bong gïn wɑngi yi gen. Møg-ɑ dwɑddi yi Wïyee Jwøk bɑ kinni: køny kïjj geki thwömm kì yij orɑɑng gen, kɑ dhɑnhø ree ko wëgge rënyø yi bëëdi kömi piny. Wun ɑ nyiimïɑ, mɑ́ wu bɑ tyëng-ɑ ɑ́yïëy Wë Yëso Mesiy, Wïi mɑ̈r; ji ko nyi genyyi wun kipe nënn-ɑ nënni dëlli gen. Keløg e dɑ ngetikɑ̈r me bï keny-ɑ cugi wun, e lwede dɑ gweli dhɑb, o orugø ki ógudh mø døj, codhe kɑ ngɑn me wɑnge cɑn ólunyø bëënø, e rug-ɑ ógudh mø bɑ kwɑ̈llì, kɑ ngɑn-ɑ ree di ógudh-ɑ døj köbbi yi wun kinni, “Mɑɑg rií keny”, kɑ ngɑn-ɑ wɑnge cɑn köbbi yi wun kinni, “Cungí kì keny-ɑn, wɑlɑ̀ pëggí piny keny-ɑ cïb wøn tyelli wøn ek,” menɑni bɑ kinni dhɑnhø ɑ́kyel ɑ́geny yi wun kì kelli gen, kɑ ri wun løg wun jɑgg mø rijjø. Lïngu møg-ɑ köbbɑ wun yeki nyiimïɑ kinni, tyëng-ɑ nënni gɑ ɑbuur kì kömi piny, bɑ tyëng-ɑ ɑ́yieny yi Jwøk gɑ møg-ɑ ólɑg pönh-ɑ ɑ́kwøbe kinni gø ómëgge tyëng-ɑ mɑɑrii. De wude ɑ benyi wun tyëng-ɑ ɑbuur! Á møg ɑ guud nyingi wun, ɑ nyi ywɑɑj wun burø? Pɑth ki tyëngkɑ̈rì? Pɑth ki gen ɑ nyi kööbø ki gïgrijjø kì ri Yëso Mesiy, ngɑn-ɑ ceg ki lenhø, ɑ nyinge cölli wun? Bɑ gïjø me døøj, keløg wu mïdh-ɑ cigg-ɑ døngø møg-ɑ kööbø kì yij wɑ̈nyi kwërø kinni, “Mɑɑr ngɑn-ɑ butí ni kɑ̀ mɑɑr rií.” De keløg ji møøgø nyii genyyø yi wun, wu ɑ́røngi; o wu bɑ møg-ɑ ócɑy, mɑ́ ciggɑni ɑ́pyem yi wun. Ngɑn mïdhi Cigg bënn, kɑ ɑ́kyel kì kelli ciggɑni pyeme, cɑ́ye pɑ̈r ki cɑ́yi ngɑn-ɑ pyem ciggɑni bënn. Mɑ́ ngɑn-ɑ ɑ́cïg kinni, “Yï ko niin kí ngɑn nuti nywøøm wun ri wun,” bɑ en ɑ ɑ́cïg thyew kinni, “Yï ko nɑ̈gi ki dhɑnhø.” Cɑgg yï pɑ niin ki ngɑn nuti nywøøm wun ri wun, kɑ yï ónɑ̈ggø ki dhɑnhø, cigg ɑ́pyem yi yïn. Kɑ ɑ́rum bëëde kinøw, nyi kööb wun, kɑ wu nyi göög wun ni tyëng-ɑ ócɑy yi Jwøk, e ködd-ɑ kömi cigg-ɑ pɑ̈ɑ̈d wɑ wɑ̈g kì yethi töjjì. Mɑ́ Jwøk pyëwe koo lɑ̈ɑ̈m ki ngɑn pyëwe pɑ nyi lɑ̈ɑ̈m, keny-ɑ ólidhe gønyy, de cɑ́y ótyɑm yi lɑ̈mpyëw. Wun ɑ nyiimïɑ, ɑ́ gïjø mɑ ngø ɑ yod yi ji, keløg ge okööbø kinni, yï gen dɑ yïëyø, e bong gïn gwøg yi gen? Ge ócuggø yielø yi yïëyɑni? Keløg ómï wun, wɑlɑ̀ nyiimï wun cyɑ̈dh-ɑ nøw, wɑlɑ̀ yïe bong gïncɑm, ɑ́ ngø ɑ gwøg yi kwøbbi wun kinni, “Yï ógyëdh yi Jwøk!” Keløg e pɑ thödhi yi wun ki gïn-ɑ jɑ̈ddii? Yïëyø bëëd ɑ nøw, keløg ɑ́ en kete ɑ nud de bong gwøg, yïëyø menɑni thøø. Ngɑn megø ócuggø kwøb kinni, “Ngɑn megø yïe dɑ yïëyø, o ngɑn-ɑ kyeelø yïe dɑ gwøg.” Kwøbbi ngɑnɑni óløøgɑ kinni, “Nyudhí yɑn kër-ɑ cuggi dhɑnhø ki bëëdø yïe dɑ yïëyø, e pɑ göögø? Yïëyø miɑ ónyudhɑ yïn kɑ gwøgɑ.” Yï yïëyø kinni, Jwøk bɑ ɑ́kyel? Døøj! Møgɑni bɑ ɑyïëy yi wëyrijjø thyew, o dëlli gen ceg-ɑ kïïrø yi wɑ̈ɑ̈rø kì bɑng møgɑni. Dhëg! Yï dwɑdd-ɑ nyudhø kinni yïëyø e bong gwøg, bogïn døj kì ree? Lidh wïyee Abrɑhɑm, nuti yïëyø yi Jwøk kinni bɑ ngɑntir kì bɑng kɑ ɑ́muuje wɑ̈de kì kömi këli lɑm, ɑ́ gëëdhi? Kɑ yod yi yïn ceth kinni, yïëyø mee ɑ́lwööb kɑ gwøge; kɑ yïëye pɑ̈dh-ɑ keje kì bɑng gwøge. Kɑ møg-ɑ ógwedø kì yij wɑ̈nyi kwërø kinni, “Jwøk ɑ́yïëy yi Abrɑhɑm, kɑ cwølli yi Jwøk ɑ́ ngɑntir,” pɑ̈dh-ɑ kɑ̈jji gen. Acwølli Abrɑhɑm ɑ́ mɑ̈ɑ̈dh Jwøk. Áyod yi wun cyee kinni, dhɑnhø nyi göögø e tir kì bɑng gwøg de pɑ göögø e tir yi yïëyø kete. Nɑ menɑni thyew, Rɑɑ̈b, ngɑn nyi niin ki köögi ɑ́cwɑg yi Jwøk kì bɑng kɑ ɑ́kïdhe lyëwwì gøle, kɑ gï öre wɑ̈g ki yöö megø. Dëël dhɑnhø kɑ̀ bong ree wëy, rum thøø; yïëyø thyew, ke pɑ 'lwööbe ki gwøg, rum thøø. Wun ɑ nyiimïɑ, ko di ji mø gïïr kì kelli wun mø gwøg ri gen gɑ jøpwönyø, mɑ́ e ngɑ̈nyi yi wun kinni, cɑ́y-ɑ ócɑɑy wɑ, wɑ jøpwönyø teeg kibøli cɑ́y-ɑ ócɑɑy ji yøw. Wɑ nyii bɑ̈jjø bënn tyel mø gïïr. De keløg dhɑnhø pɑ nyi bɑ̈jji kì ri kwøbb-ɑ kømme, bɑ ngɑntir, o ree ócuggø korø yi en. Dhøg kyeny nyii göddø yi wɑ ki yël men gerrii, o nyi kedhe kun-ɑ dwɑddi yi wɑ. Lidhu sɑpïnɑ̀ ki dönge, kí yøm-ɑ teeg ɑ nyi wøjjii; nyi gerri yi jɑlkëw kɑ lɑwi me thiinh yøw, kɑ nyi kedh-ɑ kun-ɑ dwɑddi yi jɑlkëwɑni. Leb bëëd ɑ nøw thyew; nënni e thiinh, de ócuggø tïnggø ki gïg mø døngø. Lidh opeli mɑc ɑ thiinh, ede ɑ nyi rɑ̈be thïm me dwøng! Leb pɑ̈r ki mɑc. Ying-ɑ ri dhɑnhø ɑ́ gïn cuggi rënyi bëëdø kì kömi piny bëne. Bëëdee nyi rɑ̈be’ rɑ̈bø ni kenyi rɑ̈ɑ̈b mɑc, o rɑ̈ɑ̈b-ɑ men-ɑ́ mɑɑc pödhi thøø kiree. Lɑ̈yyi pɑ̈l bënn, kí winy, kí gïg-ɑ mulli, kí rij; ge ócuggø mɑ̈ɑ̈gø yi dhɑnhø. De bong dhɑnhø mɑ ɑ́lwɑ̈ng leb ki mɑgø. Leb rɑj, o dhɑ̈li mɑgø, o yije pɑ̈ng yi sïm me nɑ̈ɑ̈gø. Wë geki Wïyee nyi lenhi yi wɑ kɑ en, o tyëng-ɑ kyeelø nyi gwɑddi yi wɑ kɑ en thyew, e men-ɑ́ ge ɑ́cwɑ̈j gɑ ngïjji Jwøk. Dhøngɑni kete ɑ yije kɑ̈ɑ̈l yi gyëdh geki ɑgwɑddø; gïn ni menɑni ko cwöb yeki nyiimïɑ! Dɑ pï mø med geki pï mø tɑng mø cuggi kɑ̈ɑ̈l yij yith ɑ́kyel? Ólɑm pɑ nyi nywøl ki benø, wɑlɑ̀ oløg pɑ nyi nywøl ki nywøli ólɑm; o wɑɑng pï mø tɑng pɑ cuggi kɑ̈nø ki pï mø med. Keløg e dɑ ngɑn wïje pel kì kelli wun o dïdø, bëëde ki bëëndøj men-ɑ nyodh peli wïje geki dïde. De keløg yethi wun dɑ mud kí mɑ̈ɑ̈nø, kí geny; wu ko pëëd kì kömi dyër, kɑ̀ kööb wun ce wɑ̈thi wun pel. Mɑ́ peli wïny ni menɑni pɑ kɑ̈ɑ̈l-ɑ mɑl; bɑ mi kömi piny; bɑ peli wïj dhɑnhø yøw, o kɑ̈ɑ̈l-ɑ yï Cethɑn. Keny-ɑ di mud geki mɑ̈ɑ̈nø, yije nyi bong-ɑ bëëndøj; dɑ́ olïng pëëth geki rɑj bënn ɑ nyi ying yije. De peli wïj men-ɑ kɑ̈ɑ̈l mɑl, dhïw o bogïn rɑj kì ree; pëddi mëërø thyew, o bɑ mölø, ngɑ̈ny bëëdø, o pyëwe nyii lɑ̈ɑ̈mø; pɑ nyi gënyø, o pɑ nyi wënyø. O bɑ bëëntir ɑ nyi nywøl yi gïn-ɑ pidh yi tyëng-ɑ göögø kipe mër, ge pïïdh-ɑ mër. Liny geki wëërø men-ɑ kɑɑm wun kɑ̈ɑ̈l-ɑ keny? Ge kɑ̈ɑ̈l-ɑ ri gïg-ɑ tyer yi dëlli wun, gïgɑni ceg-ɑ byëddø kì ri wun. Pëthi wun otyëëdø, de gïg-ɑ tyer yi pëthi wun pɑ nyi yod yi wun; kɑ wu nyi yöd wu dwɑdd-ɑ nɑ̈g ki ji; pëthi wun otyëëdø ki jɑmmì, de ge pɑ cuggi yodø yi wun, bene ɑ bɑnge nyi wër wun kɑ wu ónyïɑ̈ggø. Dɑ gïg jɑ̈ddi wun, mɑ́ wu pɑ nyi cwöddi kì yï Jwøk. Cɑgg wu nyi kwɑ̈jji, wu pɑ nyi yïddi, mɑ́ kenyi kwɑ̈jji wun, wu nyi kwɑjj-ɑ gïg-ɑ tyer yi pëthi wun, gɑ mø cwɑggi wun. Wu bɑ tyëngɑdud! Kwïj yi wun kinni wu ceg-ɑ mɑ̈nø ki Jwøk, kɑ̀ bëëd wu mër ki kömi piny? Tyëng-ɑ dwɑddi bëëdø ge mër ki kömi piny, ceg-ɑ gwøg ge mɑ̈n ki Jwøk. Wu ko rum kinni bong dyër kì ri møg-ɑ kømmi yi wɑ̈nyi kwërø kinni, “Wëy-ɑ ɑ́cïb riee yi Jwøk pëddi tyiel.” De dhwɑ̈ng-ɑ muuj yi Jwøk pëddi döng. Ni kɑ̀ kööb wɑ̈nyi kwërø kinni, “Ngeti ɑthwøg nyi thɑɑny-ɑ cyɑ̈n yi Jwøk, de mölø nyi thödhe’ thödhø ki dhwɑ̈ng.” De cïbu ri wun cingi Jwøk, kɑ wu nyïɑ̈ggi wun ki Ngɑnrɑj, o renge kì buti wun. Nyegu buti Jwøk, o ónyïnge buti wun. Lwøgu cinggi wun, wun ɑ tyëngorøg! Gwøgu pëthi wun ge dhïw, wun ɑ tyëngwëënyø! Tɑg wun rɑjji wun, kɑ wu kïïm wun, kɑ wu ywöngi wun; løgu ngyerø mi wun ɑ́ ywøg, kɑ medi pëthi wun løg wun ɑ́ kïïmø! Gwøgu ri wun wu bɑ mööl kì bøli Wë, o wu ótïnge mɑl. Ri wun ko nyi kwɑ̈dhhi wun, yeki nyiimïɑ. Mɑ́ ngɑn kwɑ̈dh wɑɑd gen, wɑlɑ̀ cɑy wɑɑd gen ki pyed, kømm-ɑ rɑj kì ri Cigg, o cɑyy-ɑ Cigg. Keløg yï cɑyy-ɑ Cigg, yï pɑth ki ngɑn mïdhi Ciggɑni, de yï bɑ ngɑn nenni gen. Jwøk kete ɑ nyi muuj cigg, o bɑ en kete ɑ nenni ciggɑni. Bɑ en kete ɑ cuggi yïëdø, o bɑ en ɑ cuggi nɑ̈ggø. Yï bɑ men cøn, ɑ cɑyyí wɑɑd wun? Wu tyëng-ɑ nyi kööbø kinni, “Wø ókedhi kɑɑl-ɑni tïn wɑlɑ̀ dhuki, o wø tyëg wøn run kì kunɑni wø óngyëwø, o wø yïddi wøn ki ngyëny mø gïïr.” Kwïj yi wun kinni wu óbëëd ɑ dï dhuki! Wu nɑ yïr-ɑ nyi ì twɑ̈ɑ̈g, kɑ nyii lɑ̈ɑ̈nyø kì bɑng nyɑ keny me thiinh. Wu di kwøb-ɑ kinni, “Keløg ɑ́ gïn dwɑddi yi Jwøk, wø ókedh kɑ wø ogöögø ki gïn-ɑni.” De ɑnɑn wu ceg-ɑ thwøgø, wu lejj-ɑ ri wun; lejji rek bɑ bɑ̈jjø. Ngɑn ngɑ̈ny gwøgi gïndøj, kɑ ocögø gø pɑ gwøge, ɑ́røngi. Wun ɑ tyëngkɑ̈rì, ywöngi wun, kɑ wu kïïm wun kipe ɑkørr-ɑ óbï kömi wun! Kɑ̈rri wun ɑ́kwɑ̈g, o ógudhi wun ɑ́cɑm yi rob. Dhɑɑb wun kí ɑ́tengi wun kömi gen pɑ̈ng yi nyɑllì; nyɑllì nyodh-ɑ cɑ́yi wun, o rïnggi wun ócɑm yi nyɑllɑni ni cɑɑm mɑc. Mɑ́ wu ɑ́pëggi be congi kɑ̈rì kì yethi cyɑ̈ngg-ɑ cyɑ̈n ek. Tyëng-ɑ göögø kì yethi pwödhhi wun nuti mëggu köggi gen. Lïngu gøøny gen! Gøøny tyëng-ɑ kɑj byelli wun ɑ́lïngi yi Jwøk, ɑ bɑ Wïlɑ̈bø. Wu ɑ́bëëd kì kömi piny yï wun dɑ jɑmmì mø døj, wu yɑ̈ngø yɑ̈ngø, o wu cɑmm-ɑ wɑ̈dhh mø cwɑɑdhø cwɑɑdhø. Ji mø yï gen bɑ̈r, ɑ́cɑy yi wun ki pyed, kɑ ge nɑ̈g wun, ge dhɑ̈li nyɑgi ri gen. Ngïïn wun, yeki nyiimïɑ gïti keny-ɑ óbëën Wë. Lidhu jɑlpur kenyi ngïïne e yïd-ɑ cyegi byelle. Cwir nyi yïde’ yïdø pyëwe gøøj en. Wun thyew, ngïïn wun, kɑ pëthi wun ko wëggu nyönhø, mɑ́ cyɑ̈ɑ̈ng bëëni Wë ɑ́cyɑ̈ngi. Wu ko nyi nguni ki ri wun, yeki nyiimïɑ; o wu ócög wu pɑ cɑy yi Jwøk. Jɑngi gøny cyɑ̈gi; ɑ́cyɑ̈ngi ki cwöbø. Pɑrri wun bëëdi jøtöng møg-ɑ ɑ́kømmi mø Wë cøn; ngøy wun bëëdi gen ki orɑng-ɑ ɑ́ngin yi gen. Tyëng-ɑ nyi ngïnø ri gen dɑ gyëdh. Kwøbbi ngïni Ayub ɑ́lïngi yi wun, kɑ kër-ɑ ɑ́køøgii yi Jwøk kì cyɑ̈n yod yi wun. Mɑ́ Jwøk døøj, o pyëwe nyii lɑ̈ɑ̈mø. Gïn-ɑ pere teg wun ɑ nyiimïɑ, bɑ kinni, wu ko nyi köngi ki mɑl wɑlɑ̀ ki piny, wɑlɑ̀ ki gïjø megø yøw. Nyi kwøb kinni “Yɑ ɑ́yïëy,” kenyi yïëëy; kɑ yï nyi kwøb kinni “Yɑ ɑ́kyëëd,” kenyi kyëëd, o yï ócög yï pɑ cɑy yi Jwøk. Keløg e dɑ dhɑnhø kì kelli wun me ying yij orɑng, kwɑjje Jwøk. O keløg e dɑ ngɑn pyëwe med, lenhe Jwøk ki wör. Keløg e dɑ ngɑn buud ki rɑ̈ɑ̈m dël, cwøle tyëngdøngø mø kɑnïsɑ̀, o Jwøk kwɑjji yi gen kì köme, o gïny yi gen ki møøw kwër ki nyinge Wë. Mɑ́ kwɑ̈ny-ɑ kwɑjji ki yïëyø, ngɑn-ɑ buud nyi yiele’ yielø, kɑ dële nyi wëggi yönø yi Wë. O keløg e dɑ orøg me gwøøg en, orøngɑni nyi lɑ̈ɑ̈nye’ lɑ̈ɑ̈nyø. Kɑ ɑ́rum bëëde kinøw, nyi töng dhɑnhø orøge kì bøli ngɑn-ɑ kyeelø. Kɑ wu nyi kwɑ̈jji wun kipe tyëng-ɑ kyeelø, o dëlli wun nyi yöni gen. Mɑ́ kwɑ̈jji tyëngtir yïe dɑ tegø me dwøng. Eliyɑ̀ ɑ́bëëd ɑ́ dhɑnhø ni wɑ, kɑ Jwøk kwɑjje ki mendwøng kinni, cög kødh e pɑ mɑ̈gi, kɑ kødh ocögø e pɑ mɑ̈gi ki runn ɑ́dɑ̈g kí dwɑ̈tt ɑ́bïkyel. Codhe, ɑkwɑ̈jje këti kɑ kødh ómɑ̈gø, kɑ piny ódøøgø twïyø ki jɑmmì. Wun ɑ nyiimïɑ, keløg dhɑnhø ólɑ̈ɑ̈nyø ki yuu dyër, kɑ dwöög yij yöö yi ngɑn megø, wɑ̈thi wun ko wïl cyee kinni ngɑn-ɑ ɑ́dwöög dhɑnhø yij yuu dyër, ɑ́yiel-ɑ ngɑnɑni kì yij thøø, kɑ orøg me dwøng wëgge lɑ̈ɑ̈nyø. Wɑ̈nyø men kɑ̈ɑ̈l-ɑ yï Pïtør, jɑlwööni Yëso Mesiy. E gwëd-ɑ tyëng-ɑ ɑ́yieny yi Jwøk møg-ɑ tɑyø kì modïrri Pøntøs, kí Gɑlɑthiyɑ̀, kí Kɑpɑdökiyɑ̀, kí Ásiyɑ̀, kí Bithiniyɑ̀. Wu ɑ́ceg kɑ yienyø ni kɑ ɑ́dwɑddii yi Wïy Jwøk, kɑ wu kwër yi Wëye kipe kinni o wu ómïdhi wun kwøbbi Yëso Mesiy, o wu gwøg wu dhïw yi reme. Wiy dhwɑ̈ng geki mër møg-ɑ nyi kɑ̈ɑ̈l yï Jwøk med gen ri gen kì kelli wun. Pwøj wɑ Jwøk, Wïyi Wë Yëso Mesiy! Mɑ́ pyëwe ɑ́lɑ̈ɑ̈m ki wɑ, kɑ wɑ thödhe ki nënnì mø nyɑ̈n, kɑ ɑ́tuge Yëso Mesiy kì yij thøø. Kɑ wɑ thödhi yi møgɑni ki bëëdi ngɑ̈ɑ̈dhø, o wɑ yïd-ɑ bëëni gyëdhh-ɑ døngø møg-ɑ mïdhi yi Jwøk gɑ mø jie. Ge mïdhi yi en gɑ mø wun, kì mɑl, kun-ɑ bëëd gen ge pɑ rënyi, o ge pɑ kwɑ̈g wɑlɑ̀ ge pɑ nungi. Ge bɑ mø wun, wu tyëng-ɑ korri yi Jwøk kì bɑng yïëyi wun, wun-ɑ́ møg-ɑ óyiel ki tegi Jwøk kì cyɑ̈ng-ɑ cyɑ̈n. Med pëthi wun kipe møgɑni, cɑgg pëthi wun nyi rënyi kenyi rɑɑng wun kɑ wu orɑngø. Rɑngø menɑni bɑ kipe lidhi yïëyi wun, mɑ bëëde ɑ́ dyër. Mɑ́ cɑgg ɑ́ dhɑb ɑ cuggi rënyø, nyi rɑng kɑ mɑc; yïëyi wun thyew, ɑ pere teeg, ceg kɑ rɑngø. Codhe, o wu óyïddi wun ki pwøj geki dhwɑ̈ng, o wu ówør kì cyɑ̈ng-ɑ ócwöb Yëso Mesiy. Yëso mɑɑr yi wun, ngö e nuti liidh wun; kɑ yïëy yi wun e pɑ nenni yi wun ɑnɑn, kɑ pëthi wun nyii mïnø ki medi pyëw me pɑ yïëy kwøbø, mɑ́ yieli wëyi wun bene gïn-ɑ óyod yi wun kì bɑng yïëyø menɑni. Mɑ́ bene yielø menɑni ɑ ɑ́yɑb yi jøtöng cøn, kɑ kwøbbi dhwɑ̈ng-ɑ óyod yi wun töng yi gen. Kɑ bøli keny-ɑ ócwöb møgɑni kí kër-ɑ óbëën dhwɑ̈ngɑni yɑb yi gen. O bøli kenyɑni bene bøli keny-ɑ ɑ́nyudhi gen yi Wëyi Mesiy, ɑbɑg gen orɑng-ɑ óngin yi Mesiy, kí dhwɑ̈ng-ɑ óbï kì bɑng orɑngɑni. Jøtöng møgɑni ɑ́nyudhi yi Jwøk kinni, ge pɑ göögø kɑ per cwɑggi gen, de ge ɑ́göög kɑ per wun, keny-ɑ ɑ́kømmi gen gïg-ɑ ɑ́lïngi yi wun kì yï jøwöödø, møg-ɑ ɑ́muuj wun Wöndøj, ki tegi Wëykwërø men-ɑ ɑ́ör kì mɑl. Gïgɑni ɑ thɑ́ gen ceg ki yɑbø yi wëywödd kiri gen. Kɑ ɑ́rum bëëde kinøw, gwir wun rummi wun, kɑ wɑ̈thi wun yieb wun, wu gɑ̈nn-ɑ dhwɑ̈ng men-ɑ óyod yi wun keny-ɑ ócwöb Yëso Mesiy. Mïdhu kwøbbi Jwøk, kɑ pëthi wun ko wëggu kɑ̈ɑ̈lø yi gïg-ɑ tyer yi dëlli wun, ni kɑ ɑ́bëëd wun wu kwïj wøw cøn. De bëëd wun wu bɑ tyëng kwërø kì ri gïg-ɑ gøggi yi wun bënn, ni kɑ̀ bëëd Jwøk ngɑn-ɑ cwølli wun ɑ́ kwërø. Wɑ̈nyi kwërø okööbø kinni, “Bëëd wun wu bɑ ɑkwër, mɑ́ yɑ bɑ kwërø.” Jwøk nyi cwølli yi wun ɑ́ Wïyi wun kenyi kwɑjju en, eni ngɑn-ɑ nyi lidh gøøny ji e bong ngɑn geny yi en, e ngɑn cɑ̈yy-ɑ per gïn-ɑ gwøøg en; kɑ wu bëëd wun cyee, wu wør-ɑ en kì kömi piny keny. Mɑ́ e ngɑ̈nyi yi wun kinni ɑ́gøøm-ɑ bøli wun kì bɑng bëënrɑj men-ɑ ɑ́lɑg yi wun kì yï kweyyi wun. Bøli wun nuti gøømø kɑ gïg nyi rënyi ni dhɑb wɑlɑ̀ ɑ́tegø; dɑ́ Mesiy ɑ ɑ́muuj ɑ́ gëëdhi; e nɑ órömø me bong gïn gwɑ̈ɑ̈d kì ree. Áyieny yi Jwøk e lɑ̈bø nuti cwɑ̈jø; ɑnyodhii kì cyɑ̈ngg-ɑ cyɑ̈n ek kiper wun. Ree ɑ ɑ́yïëëy Jwøk yi wun, eni Jwøng-ɑ ɑ́tugii kì yij thøø kɑ gø thödhe ki dhwɑ̈ng; ɑgöög Jwøk ɑ́ en ɑ köme köddi yi yïëyi wun, o en ɑ gɑ̈n yi wun. Anɑn kɑ ɑ́rum wun ki gwøgi ri wun wu dhïw kì bɑng kɑ̀ mïdhu dyër, kɑ wu døøg-ɑ be mɑɑri ri wun, wu tyëng-ɑ ɑ́yïëy; cög wun wu mɑɑr-ɑ ri wun ceth ki pyëw ɑ́kyel. Mɑ́ wu ɑ́ceg kɑ cigi nywølø wun ɑ́ köödh møg koo thøw, kì ri lögi Jwøk, löng-ɑ nëënø. Mɑ́ wɑ̈nyi kwërø okööbø kinni, “Ji pɑ̈r ki lum, o dhwɑ̈ɑ̈ng gen bëne nɑ okøggi luum pɑ̈l. Lum nyii nɑ̈rø, kɑ okøgg ódëëmø. De lögi Jwøk óbëëdø gïti ɑtheer.” Löngɑni bene Wöndøj men-ɑ ɑ́pwönyi wun. Kɑ ɑ́rum bëëde kinøw, wiy wun thɑb, kí wëënyø, kí ɑ́dud, kí ɑter, kí mud geki kwɑ̈dh bënn. Bëëd wun, wu nɑ othønh-ɑ ócer nywølø, wu tyer-ɑ cɑɑg wëy, cɑg-ɑ dhïw. Ni møg-ɑ kømmi yi wɑ̈nyi kwërø kinni, “Áyod yi wun kiri wun kinni Jwøk pëddi døøjø.” Anɑn, dwöög wun kö Wë, ɑ bɑ kïti gyer, kïn-ɑ nëënø men-ɑ ɑ́bɑny yi teedø i bong pere, de bɑ ɑyieny yi Jwøk, o pere teeg kì yïe thyew. Wu bɑ kïtti gyer mø nëënø thyew, o wu geer-ɑ kengi wëy, kì keny-ɑ ógöög yi wun wu bɑ ókwër, wu muuj-ɑ gëëdhi mi wëy; gënh-ɑ óyïëy yi Jwøk ki nyingi Yëso Mesiy. Wɑ̈nyi Kwërø okööbø kinni, “Yɑ ɑ́yïëëny ki kïti gyer me pere teg, men cïb yi yɑn ɑ́ kïn-ɑ mïdhi ød kì Dhɑyøn; o ngɑn yïëyii wïje pɑ wöl lɑ̈ɑ̈yø.” Bɑ kït me pere teg kì yï wun, wu tyëng-ɑ ɑ́yïëy; o bene “Kïti gyer men-ɑ ɑ́bɑny yi bödhhi gyer, en ɑ ɑ́göög ki kïn-ɑ mïdhi ød.” Wɑ̈nyi kwërø okööbø thyew kinni ‘Tyelli ji ócwɑnyyi gen kì ri kïnɑni, kɑ ge ópɑ̈nhø.’ Ge ópɑ̈nhi kì bɑng kɑ̀ nuti yïëëy kwøbbɑni yi gen; o bene gïn-ɑ ɑ́dwɑddi yi Jwøk kiper gen. De wu bɑ ji-ɑ ɑ́yieny gɑ tyëng kwërø, jii Jwøk; o wu bɑ ji-ɑ ɑ́kwër gɑ møg-ɑ ónyodh døøji Jwøk; o bɑ Jwøk kiree ɑ cwööl wun wɑ̈g kì yij muudhø, wu cwøøle’ yij cɑre; cɑr-ɑ bɑ ngɑ̈ngø. Wu nuti bëëdø wun ɑ́ jii Jwøk cøn, de wu bɑ jie ɑnɑn; lɑ̈mpyëw Jwøk ɑ́bëëd e kwïj yi wun cøn, de ɑnɑn, lɑ̈mpyëwe ɑ́yod yi wun. Yɑ kwɑjj-ɑ wun yeki nyiimïɑ kinni, bɑny wun gïg-ɑ nyi tyer yi pyëw, kipe kɑ̀ nyi nyïɑ̈ggi gen ki wëy; mɑ́ wu bɑ wëll kì kömi piny men. Bëëd wun ki bëëdø me døøj kì kelli teen-ɑ nuti yïëyø, o døøji bëëdi wun ópɑr yi gen kì bøli keny-ɑ ókwøøbii i wu bɑ tyëngrijjø; o Jwøk ópwøj yi gen kì cyɑ̈ng-ɑ óbëëne. Nyi yïëyu jɑɑgø yi ji-ɑ jyɑ̈gø; nyi lïngu kwøbbi rɑ̈nhdwøng, ngɑn-ɑ jɑɑg ji bënn. Kí kwøbbi modïrr-ɑ ɑ́røny yi en gɑ møg nyi cɑy tyëng-ɑ gøggi rɑj, o ge nyi pwøj gen tyëng-ɑ gøggi gïgdøj. Mɑ́ gïn-ɑ dwɑddi yi Jwøk bɑ kinni, o dhøggi tyëng-ɑ bɑ dhëgg nɑ̈g yi wun kì bɑng kɑ̀ göög wun ki gïgdøj. Nyi göög wun wɑ̈thi wun; kɑ wu ko bëëd ni tyëng-ɑ nyi göögø ki orøg kenyi wiy gen ge göög-ɑ wɑ̈thi gen; de bëëd wun wu bɑ bɑ̈nggi Jwøk. Nyi wøru ji bënn, kɑ tyëng kɑnïsɑ̀ mɑɑr wun kidøøj. Böggu Jwøk, kɑ rɑ̈nhdwøng wør wun. Wun ɑ bɑ̈ngg, nyi lïngu kwøbbi tyëng-ɑ cinggi gen bëëd yi wun, kɑ ge wør wun. Wu ko wør møg-ɑ mïdhi wun kidøøj keti gen, de wøru møg-ɑ guud nyingi wun thyew. Wu ógyëdh yi Jwøk keløg wu óngïnø kipe kɑ̀ ngɑ̈nyu gïn-ɑ dwɑdde. Á köögi mɑ ngø ɑ yod yi wun, keløg wu cɑy kɑ per gïjø me bɑɑj wun? De keløg wu ngin-ɑ orɑng wu gøgg-ɑ dyër, wu ceg kɑ gyëdhø yi Jwøk kipe møgɑni. O bene gïn-ɑ́ pere ɑ́cwøøl wun yi Jwøk. Mɑ́ Mesiy ɑ́rɑngi kiper wun, kɑ wu wïye ki nyuudhi, o wu ókwøbbu tyelle. Bong orøg mɑ ɑ́gwøge, o bong kwøbbi pyed mɑ ɑ́lïngi kì dhøge. Keny-ɑ ɑ́yɑnyyii, nuti pɑ̈nyi yɑ̈ddø; keny-ɑ ɑ́rɑnge nuti pɑ̈nyi lwɑ̈g, de ɑ́gɑ̈nn-ɑ Jwøk, ɑ nyi løøg dyër ceth. Mesiy orøgee ɑ́tëëre wïj yɑdh ɑrïw kì dële, kipe kinni o bëëdø kì yij orøg wiy yi wɑ, o wɑ óbëëd wɑ ki bëëntir. Wu ɑ́yiel kɑ kedde. Wu ɑ́bëëd wu nɑ dyëg mø lɑ̈nyi pɑ̈l, de ɑnɑn wu ɑ́dwöög be lugø kì bɑng ngɑn-ɑ kwɑy wun, ɑ mïdhi wëyi wun. Wun ɑ tyëng-ɑ mɑ̈nn thyew, lïngu kwøbbi cwøwi wun; keløg e ódi ngɑn me nuti yïëëy kwøbbi Jwøk kì kelli gen, óyïëy kì bɑng døøji bëëdi wun, cɑgg e nuti köbbø yi wun. Mɑ́ ge óyïëy-ɑ keny-ɑ ólidh gen wør-ɑ wøør wun, kí kɑ̀ korru ri wun ki bëëntir. Mɑ́ døøji wun koo nën-ɑ́ɑ̀ kömi wun kete, kipe ɑkɑ̈ddi yëyy, wɑlɑ̀ kipe dhɑm-ɑ rug geki ógudh; de døøji wun ying-ɑ yethi pëthi wun, kí tɑri pyëw geki möölø, o bëëdø menɑni pere teeg kì yï Jwøk. Mɑ̈nn-ɑ bɑ tyëng kwërø ge ɑ́bëëd ɑ nøw cøn, e ri gen jyɑ̈ɑ̈ng gen ri Jwøk, o ge lïng-ɑ kwøbbi cwøwi gen. Ni Sɑrɑ̀ ɑ ɑ́bëëd e lïng-ɑ kwøbbi Abrɑhɑm, kɑ gø cwølle ɑ́ wɑ̈n. Wu bɑ nyigi Sɑrɑ̀ ɑnɑn, keløg wu gøgg-ɑ gïgdøj e bong gïn böggi yi wun. Wun ɑ jøg-ɑ cwøw, bëëd wun wu olwöbø ki mɑ̈nni wun, wu ngɑ̈ny wøw ceth kinni ge nyøødh kibøli wun. Wøru gen, mɑ́ ge óyïddi ki dhwɑ̈ɑ̈ng nënnì kyeel ki wun. Bëëd wun kinøw o óbongii gïn-ɑ órïwwi bøli kwɑ̈jjø mi wun. Gïn-ɑ kwøbɑ kì cyɑ̈n bɑ kinni, nyi bëëd wun wu kømm-ɑ dhøg ɑ́kyel. Mɑɑru ri wun ni kenyi mɑɑr nyiimëëg ri gen, ki døøji burø geki möölø. Kɑ rɑj ko nyi col ki rɑj, wɑlɑ̀ yɑ̈d ko nyi col ki yɑ̈d, de nyi lɑ̈mmu gyëdh tyëng-ɑ gwɑddi wun, mɑ́ keny-ɑ ɑ́cwøøl wun yi Jwøk, wu ɑ́köbbe kinni wu óthödhe ki gyëdh; ni kɑ ógwedii kì yij wɑ̈nyi kwërø kinni, “Ngɑn dwɑddi bëëdø pyëwe omedø, o dwɑdd-ɑ kinni bëëd e bong rɑj, ko kööb ki kwøb mø rijjø, kɑ kwøbbi pyed wiye. Kɑ gwøg ki gïgrijjø wiye, kɑ nyi gwøge gïgdøj; kɑ yɑbe bëëdø ki mër ki pyëwe bëne. Mɑ́ tyëngtir okorrø yi Wë o kwɑ̈jji gen nyi lïnge’ lïngø; de pɑ dwɑddi tyëng-ɑ nyi göögø ki rɑj.” Keløg wu tyer-ɑ gwøg ki gïgdøj kì bøli Jwøk, ɑ́ men-ɑ ógöggi wun ki gïgrijjø? O ri wun dɑ gyëdh keløg wu rɑng ɑ kömi dyër! Ko di ngɑn böggi yi wun, wɑlɑ̀ pëthi wun ko lïngi. De kwër wun Mesiy kì pëthi wun, kɑ wør wun ceth ɑ́ Wïi wun. Kɑ wu bëëd wun ri wun tyeeny wun kì yethi cyɑ̈ng bënn, kipe nyudhi tyëng-ɑ ópëjji wun gïg-ɑ ngɑ̈dh yi wun gɑ møg-ɑ óbï. De nyi løøgu kwøbbɑni mɑ̈ɑ̈dh, wu owuödø. Bëëd wun pëthi wun gøøj wun, kipe kinni keløg wu ódi yɑnyø, o tyëng-ɑ óyɑny wun kipe bëëdi wun, wun ɑ́ jii Mesiy, wɑ̈thi gen ólɑ̈ɑ̈y gen. Mɑ́ e lɑ̈w keløg wu rɑngø kɑ per gøggi dyër, ke bëëde ɑ́ gïn dwɑddi yi Jwøk, kibøli ke rɑngi wun wu gøgg-ɑ rɑj. Mɑ́ Mesiy ɑ́thøw kɑ per orøg tyelø ɑ́kyel kete. Áthøw e tir kipe tyëngrijjø, kipe kinni o gï nyiige buti Jwøk. Ánɑ̈g kɑ dële othøø, de ɑ́tug yi Jwøk ɑ́ wëy, ɑkedhe ɑ́ wëy, kɑ wëy-ɑ bɑ ɑmɑgg cïje. Wëyɑni bɑ wëyi tyëng-ɑ ɑ́cög kwøbbi Jwøk nuti lïngø yi gen, keny-ɑ ɑ́ngine gïn kì yethi cyɑ̈ngg-ɑ ɑ́bëëd Nöö e ogudø ki yɑ̈y, ɑbødh ji ɑ́bïdɑ̈g keti gen kì dhøggi pï. De pïi bɑɑyɑni gɑj-ɑ jwɑ̈ng-ɑ ɑ́jwɑ̈ɑ̈g wun, ɑ yiel wun ɑnɑn. Pɑth ki lwöögi cïlli dël wɑ̈g, dɑ́ møg köbbi Jwøk ge kɑ̈ɑ̈l-ɑ pyëw me døøj. Wu yiel yi en ɑ ri dhwönhi Mesiy, ngɑn-ɑ ɑ́kedhi mɑl, o bëëd ɑ wïj kyëëj Jwøk, e jɑɑg-ɑ wëywödd bënn, kí wëy-ɑ yï gen di tegø, geki wëy-ɑ jyɑ̈gø. Mesiy ɑ́ceg-ɑ orɑng kì kömi piny, wun thyew cwed wun pëthi wun wu rømm-ɑ møgɑni; mɑ́ ngɑn-ɑ rɑngø bong gïn rebii ki orøg. Cɑg ɑnɑn ceth, bëëd wun wu gwøg-ɑ gïn-ɑ dwɑddi yi Jwøk, kɑ wu ko nyi tyer gwøgi gïn-ɑ dwɑddi yi ji. Wu ɑ́rum ki bëëdø ni tyëng-ɑ kwïj Jwøk; kɑ ɑ́bëëd wun wu cyɑ̈dh-ɑ́ɑ̀ kɑ̈jji orøg, wu gøgg-ɑ gïg-ɑ tyer yi dëlli wun; wu mɑdhh-ɑ muggì; wu mɑll-ɑ ngïjji jwögg-ɑ kømi pyëw lɑ̈mmø. De ɑnɑn, tyëng-ɑ kwïj Jwøk ɑ́ceg ngɑ̈ngø yi kɑ ɑ́cög wun wu pɑ nyi kedhi kelli gen, bene ɑ bɑnge gwɑddi wun yi gen. De kwøbbi gen óløøg-ɑ yi Jwøk, ngɑn ɑ bɑ jɑngi gøny; en ɑ óløøg kwøbbi tyëngnëënø kí tyëngthøø. Bene ɑ bɑnge ɑ́pwönyi Wöndøj kì kelli tyëngthøø thyew, mɑ́ cɑgg ɑ́ kɑ ɑ́cɑɑy gen ki thøø, kɑ ɑ́ying gen kömi piny, wëyi gen óyïddi ki keny nëën gen kì yï Jwøk, ngɑn-ɑ bɑ wëy. Anɑn, cögi piny geki cögi jɑmmì møg-ɑ ying yije bënn ɑ́cyɑ̈ngi. Kɑ wu bëëd wun wɑ̈thi wun onëënø, kɑ ri wun nyi kor wun thyew, kɑ Jwøk nyi kwɑjji wun kì yethi cyɑ̈ng bënn. De gïn-ɑ pere teg cɑrø bɑ kinni, wu ko wïyi ki mɑɑri ri wun, mɑ́ orøg me dwøng nyii kumø yi mɑ̈ɑ̈dø. Nyi yïëbbu kɑ̈lli wun ji, wu pɑ köörø. Teng-ɑ ɑ́mëggi dhɑnhø yi Jwøk nyi mïdhe gøn kidøøj, kɑ gø nyi kønye ji-ɑ kyeelø. Ngɑn pwönyi, pwönye wööni Jwøk; ngɑn göög cinge, gööge ki teng-ɑ ɑ́mëggii yi Jwøk; o Jwøk ólenhi kì ri Yëso Mesiy; ngɑn-ɑ gïti ɑtheer e yïe dɑ dhwɑ̈ng kí tegø. Amen. Wu ko nyi ngɑ̈ng yi orɑng-ɑ ngin yi wun, orɑngɑni nɑ mɑc men rɑɑng wun. De nyi bëëd wun pëthi wun med kɑ̀ yïddi wun ki orɑng ni men-ɑ ɑ́yod yi Mesiy. Mɑ́ keny-ɑ ódwöög Yëso kömi piny keny, ree ódi cɑɑr Jwøk, o pëthi wun ómïni ki mendwøng. Keløg wu ogwɑddø yi teedø kipe nyingi Mesiy, ri wun dɑ gyëdh; mɑ́ menɑni nyodh-ɑ kinni wëyi mɑ̈r, ɑ bɑ wëyi Jwøk ying-ɑ kömi wun. Ke di ngɑn rɑngø kì kelli wun, pɑ rɑngi kɑ per bëëde ɑ́ ngɑn nɑ̈ɑ̈g dhɑnhø, wɑlɑ̀ kur, wɑlɑ̀ ngɑn nyi kedhi yethi kwøbbi tyëngmøøgø. Keløg yï rɑngø kɑ per kɑ̀ bëëd yïn ɑ́ ngeti Mesiy, wïjí ko lɑ̈ɑ̈y, de ceg Jwøk ki pwøjø kipe kɑ̀ cölli yïn Mesiy. Bøli keny-ɑ óliidh gønyy ɑ́cyɑ̈ngi, o gønyyɑni ócɑ̈gi kɑ tyëng kɑnïsɑ̀ ceth. De keløg gønyyɑni ócɑ̈gi kɑ wɑ, ɑ́ gïn ɑ óyod yi tyëng-ɑ bɑny Wöndøj mi Jwøk, keny-ɑ óliidh gønyyi gen kì cyɑ̈n? Mɑ́ wɑ̈nyi kwërø okööbø kinni, “Keløg yieli tyëngtir teeg; óbëëd ɑ dï kipe tyëngorøg, gen ɑ tyëng-ɑ pɑ wør Jwøk!” Anɑn, wiy tyëng-ɑ nyi yïddi ki orɑng kì bɑng gïn-ɑ dwɑddi yi Jwøk, göög gen ki gwøng døj; wiy ngɑntir men-ɑ ɑ́cwɑ̈j gen gɑ̈n yi gen ɑ́ ngɑn-ɑ óyiel wëyi gen. Yɑ bɑ jɑldwøng thyew, o yɑ kwɑjj-ɑ jøgdøngi kɑnïsɑ̀ møg-ɑ kelli wun. Orɑng-ɑ ɑ́ngin yi Mesiy ɑ́lidh yi yɑn, o yɑ óyïddi kì ri dhwɑ̈ng-ɑ óbï. Yɑ kwɑjj-ɑ wun kinni, kor wun dyëg-ɑ ɑ́cïb cinggi wun yi Jwøk. Ge ko kor ki cïr, de koor gen ki medi pëëth. Ge ko kor yi wun kipe kinni o wu óyïddi wun ki jɑmmi kömi piny; de bëëd gwøngɑni e kɑ̈ɑ̈l-ɑ pëthi wun ceth. Kɑ wu ko bëëd wu bɑ jɑgg mø kwøbbi gen teeg, de bëëd wun, wu bɑ pëjjì mø døøj, møg-ɑ bɑng gen nyi lugi yi dyëg. Keny-ɑ ówɑ̈nhi Jɑlkwɑ̈y-ɑ dwøng, wu ónënge ki yɑ̈r me cɑre ko lɑ̈ɑ̈ny. Wun ɑ yɑɑg-ɑ wøbb, yɑ köbb-ɑ wun thyew kinni, nyi lïngu kwøbbi jøgdøngø, kɑ wu nyi bëëd wun, wu bɑ mööl. Mɑ́ wɑ̈nyi kwërø okööbø kinni, “Ngeti ɑthwøg nyi thɑɑny-ɑ cyɑ̈n yi Jwøk, de pyëwe nyi med kɑ ngɑn-ɑ bɑ mölø.” Nyi yömmi wun kö Jwøk, ngɑn-ɑ yïe di tegø bëne. Mɑ́ kɑ̈jji wun ótyeny yi en, kì bøli keny megø. Keløg e dɑ gïn lïngø kì pëthi wun, nyi cïbu en cingi Jwøk, mɑ́ per wun teeg kì yïe. Nyi koru ri wun, kɑ wu nëën wun kidøøj! Ngetimɑ̈ɑ̈nø mi wun, Ngɑnrɑj wïïnø e óngɑ̈rrø ni ngur, me yɑ̈bø ki ngɑn cɑm yi en. Mïdhu yïëyi wun e teeg, kɑ wu nyïɑ̈ggi wun ki en, mɑ́ wu ngɑ̈ny wøw kinni wɑddi wun, ɑ løg tyëng-ɑ ɑ́yïëy kì kömi piny bëne, ge ceg-ɑ orɑng kinøw. De kì bɑng kɑ ɑ́rɑngi wun ki nyɑ keny me thiinh, Jwøk ngɑn-ɑ yïe nyi kɑ̈ɑ̈l yi dhwɑ̈ng bëne, ɑ cwøøl wun be nywɑ̈g kì ri Mesiy ki dhwɑ̈ng-ɑ ko lɑ̈ɑ̈ny, wu ówëgge tëngø; kɑ wu ócungø wu teeg kì kɑ̈jji wun ceth. En ɑ yïe di tegø gïti ɑtheer! Amen. Wɑ̈ny-ɑ gwëdɑ wun e cyeeg èn, yɑ ɑ́køny-ɑ yi Silɑ̀ ki gwedii. O jɑlɑni ceg bëëdø ɑ́ ngeti Mesiy me mïdhi yïëyø kidøøj. Yɑ cïj-ɑ wun kinni, menɑni bene dhwɑ̈ɑ̈ng Jwøk, dhwɑ̈ng-ɑ dyër. Mɑ̈gi wun kì ree. Wu ɑ́mɑ̈dh yi tyëng kɑnïsɑ̀ men-ɑ Bɑbïl, ge bɑ ɑyieny thyew yi Jwøk, kɑ wu mɑ̈dh thyew yi Mɑrk wɑ̈dɑ. Mɑ̈dhu ri wun ki nuumi mër. Wu óbëëdø ki mër, wun ɑ jii Mesiy bënn. Amen. Wɑ̈nyø men kɑ̈ɑ̈l-ɑ yï Sɑymøn Pïtør, ɑ bɑ bɑ̈ng kɑ løg-ɑ jɑlwööni Yëso Mesiy. E gwëd-ɑ tyëng-ɑ ɑ́yïëy, ɑ ɑ́göög ge tir kì ri nyingi Yëso Mesiy Yïënee. Wiy wu óyïddi wun ki dhwɑ̈ng geki mër mø døngø, kì bɑng dïdi wun ki kwøbbi Jwøk geki Wë Yëso. Wɑ ɑ́thödhi yi tegi Jwøk ki gïg-ɑ dwɑddi yi wɑ kiper bëëdø ki bëëndøj men-ɑ kyëëw ki ngɑ̈nyi kwøbbi Jwøk, ngɑn-ɑ ɑ́cwøøl wɑ be nywɑ̈g ki døøje geki dhwɑ̈nge. Wɑ ɑ́mëgge gïgdøngø møg-ɑ ɑ́kwøbe kinni gï ómëgge wɑ ki yuu-ɑ ni menɑni, o wu óbødh wun ki nɑ̈gø yi döngi pëëth kipe jɑmmi kömi piny, o wɑ ónywɑ̈ɑ̈g wɑ ki bëëde kwërø. Kipe gïg ni møgɑni, pɑ̈nyu ri wun kɑ kömi yïëyø kïdhi wun ki døøjø, kɑ kömi døøjø kïdhi wun ki dïdø; kɑ kömi dïdø kïdhi wun ki mɑgi pyëw; kɑ kömi mɑgi pyëw kïdhi wun ki ngïïnø; kɑ kömi ngïïnø kïdhi wun ki bëëdø kì yuu Jwøk, kɑ kömi bëëdø kì yuu Jwøk kïdhu mɑɑri jii Mesiy. Keløg gïg-ɑ døøj ni møgɑni nud kì yï wun, kɑ ge mïdhi yi wun, wu løg ge’ ji mø nyi göögø ge teg kì ri ngɑ̈nyi wøw men-ɑ kɑ̈ɑ̈l yï Wë Yëso Mesiy. De ji-ɑ yï gen bong gïgdøj ni møgɑni, ge bɑ cörr, o wɑ̈thi gen wïlø kinni ge ɑ́rum ki gwøgø ge dhïw; bong kerri orøøg kɑ̈ge dööng kì kömi gen. Kɑ ɑ́rum bëëde kinøw, wun ɑ nyiimïɑ, nyi tyeru gwøg ceth ki gïg-ɑ per gen ɑ́yieeny wun yi Jwøk; keløg wu ógöögø kinøw, yïëyø mi wun koo pɑ̈nyi yi wun ki wiyø; o wu ówëggi kedhi Pödhi Wë ɑ bɑ Yïënee, en ɑ Yëso Mesiy, eni pönh-ɑ óbëëdø gïti ɑtheer. O ri wun ópɑ̈ddi yi wun ki møgɑni, cɑgg ɑ́ kɑ̀ ngɑ̈nyu gen, o wu mɑ̈gø kì ri dyër men-ɑ ɑ́yod yi wun. Yɑ orumø kinni døøj kenyi pɑ̈ddɑ wun ki møgɑni kɑ̈ng-ɑ nëënɑ. Ngɑ̈nyi yi yɑn kinni, dël-ɑ nyi thøw èn, ɑ́cyɑ̈ngi ki løny piny yi yɑn, ni kɑ ɑ́köbbi yɑn ceth yi Wë Yëso Mesiy. Riɑ ópɑ̈nyɑ ki gwøg ki gïjø me nyi wëggi wun pɑrri møgɑni ceth, kì bɑng thøwɑ. Wø nuti kømm-ɑ kwøb møg nyi ceg ki cwɑ̈jø, kɑ ɑ́nyudhi wun yi wøn ki tegi Wë Yëso Mesiy, geki kwøbbi bëëne, mɑ́ dönge ɑ́lidh yi wøn ki nyingi wøn. Wø ɑ́bëëd wø nud kì bøli keny-ɑ ɑ́yïdde ki mɑ̈r geki dhwɑ̈ng kì yï Jwøk Wïy, kɑ ɑ́bëën cwɑg yïe ge kɑ̈ɑ̈l-ɑ yï Jwøng-ɑ Pëddi Döng kinni, “Men bene Wɑ̈dɑ, wɑ̈n-ɑ med kì pyëwɑ!” Cwɑggɑni ɑ́lïngi yi wøn ge kɑ̈ɑ̈l-ɑ mɑl, keny-ɑ ɑ́ying wøn wïj kïti kwër wøki en. Kɑ wø ceg-ɑ pëddø yïëyi kwøbbi jøtöng. O bɑ gïjø me døøj ke cïb wun rummi wun ri møgɑni, mɑ́ ge nɑ cɑr me mëënyø kì yij muudhø, pïd cyɑ̈ng-ɑ ótuul kyeli ru wøw kì yethi pëthi wun. Gïn-ɑ pere teg men-ɑ dwɑddi kinni bëëde e ngɑ̈nyi yi wun bɑ kinni, bong ngɑn cuggi lwøbi gïn-ɑ wɑngi yi møg-ɑ ɑ́töng kì yij Wɑ̈nyi Kwërø ki cwɑgge. Mɑ́ jøtöng nuti tööng-ɑ møg kɑ̈ɑ̈l yï dhɑnhø, de jiɑni ɑ́kööb-ɑ tegi Wëykwërø kenyi töng gen møg-ɑ kɑ̈ɑ̈l yï Jwøk. Ódi jøpwönyi pyed møg-ɑ ócwöb kì kelli wun, ni kɑ ɑ́cwöb jøtöng mø pyed kì kelli tyëng Isrɑil cøn. Ge ókɑ̈ni ki ryɑ̈g, kí pwönyø me pɑth ki dyër, o Wïi gen ngɑn-ɑ ɑ́døm gen óbɑny yi gen, kɑ ge jwɑn-ɑ kɑ̈ni kömi gen ki thøø. Ji mø gïïr óngöyi ki gwøg ki gïgrijjø møg-ɑ gøggi yi gen, kɑ ji møøgø okööbø ki gïgrijjø kì ri Yuu Dyër ki gööj gen. Pëthi gen ódøngi kipe ngyëny, kɑ ngyënyyi wun cɑm yi gen kì bɑng wɑ́j-ɑ pɑth ki dyër. De cɑ́yi gen koo cwöng; ngɑn-ɑ nɑ̈g gen yïdø nyinge yieeb en! O Jwøk, wëywödd-ɑ ɑ́göög ki orøg nuti wiy en gï pɑ cɑye, de gï ɑ́leenge kej cɑ́y, kun mïdhi gen gɑ ɑmɑgg ki ɑ́cwecwel kì yij muudhø, ge yïd-ɑ Cyɑ̈ɑ̈ng Gøny. Jwøk, tyëng-ɑ ɑ́bëëd kì kömi piny kɑ̈ge dööng nuti wiy en, de bɑɑyø ɑ́kɑ̈ɑ̈le kömi tyëngrijjø; o bɑ Nöö, ngɑn-ɑ ɑ́cïj teenɑni kinni bëëd gen ki bëëntir, geki ji ɑ́bïryew keti gen ɑ ɑ́wiy yi Jwøk. Kɑ̈ddi Sødømɑ̀ geki Gømørɑ̀ ɑ́rɑ̈b yi Jwøk ki mɑc, kɑ gï løge belø, kɑ gï gwøge gɑ nyuudhi kipe tyëngrijjø møg-ɑ ólunyi kì bɑng gen. Kɑ Lot, ngɑntir, ɑ ɑ́bɑny bëëdi orøg gø yiele. Lot ɑ́bëëd ɑ kelli tyëngɑni, e olïngø, o onëënø ki rɑjj-ɑ gøggi yi gen, kì yethi cyɑ̈ng bënn, kɑ pyëwe nyii rɑ̈ɑ̈mø ki mendwøng. Jwøk ngɑ̈ny yuu-ɑ nyi yiele tyëngtir kì yij orɑng, o tyëngrijjø nyi mïdhe’ mïdhø ge yïd-ɑ Cyɑ̈ɑ̈ng Cɑ́y. Ji-ɑ nyi tie ki cɑyø, bɑ tyëng-ɑ gøggi gïg-ɑ tyer yi dëlli gen, o döngi Jwøk pɑ wør yi gen. Jøpwönyi pyed møgɑni tɑ̈dø; wëy-ɑ døngø kì mɑl pɑ wør yi gen; de gï yöd ge ceg kɑ gwɑddø yi gen. Cɑgg ɑ́ wëywödd, ɑ pëddi tegø kibøli jøpwönyi pyed møgɑni, jiɑni pɑ nyi gøøny yi gen kì bøli Jwøk. Jiɑni göög-ɑ nøgi wɑ̈ɑ̈th; ge nɑ lɑ̈yyi pɑ̈l, ɑ nyi nywøl gɑ møg dwɑr o ge nɑ̈g. Gïn-ɑ bëëde pɑ gɑm yi wɑ̈thi gen, nyi ceg kɑ gwɑddø yi gen. Ge ónɑ̈g ni lɑ̈yyi pɑ̈l, o ge ócɑy kɑ ge orɑngø kipe orɑng men-ɑ ɑ́göjji gen ji. Ge nyi tyer-ɑ gøggi gïg-ɑ dwɑddi yi dëlli gen kì dɑ̈ri cɑ̈ng; ge nyi kɑ̈ɑ̈l-ɑ ɑyɑ̈r kömi wun kenyi nywɑ̈ɑ̈g wun ki gïgcɑmm ki gen, mɑ́ ge mɑɑr-ɑ wëënyø. Ge tyer-ɑ nenni mɑ̈nn-ɑ røngø; ge pɑ nyi yɑ̈ng yi orøg. Tyëng-ɑ pëthi gen nyøødh nyi peej ge’ yethi ɑ́kɑ̈llì. Ge thøø yi pwönyø ki döngi pyëw. Ge ógöjji cyën yi Jwøk! Mɑ́ yuu-ɑ dyër ɑ́wiy yi gen, kɑ ge töng-ɑ wɑ̈yi gen, kɑ ge løg-ɑ bɑng Bɑlɑɑm wɑ̈d Beor, ngɑn-ɑ ɑ́mɑɑr køøgø kipe gwøng rɑj. Kɑ Bɑlɑɑm cɑy kipe orøge. Adere ɑ́löggi ki cwɑggi dhɑnhø, kɑ jɑltöngɑni wïje dwööge. Jøpwönyɑni nɑ nyingi pï mø cungø; ge nɑ pøøl mø wøjji yi yømø; ge ɑ́rum ki wïyø yi Jwøk ki keny-ɑ ókïdhi gen kì yij muudhø men-ɑ piny piny. Ge tɑ̈dø tɑ̈dø, o ge kööbø dhøggi gen omedø, ge wëny-ɑ ji-ɑ nyi kømi bëën wɑ̈g kì kelli teen-ɑ lɑ̈ɑ̈nyø, ki gøggi gïg-ɑ tyer yi dël. Ge okööbø kinni gï ódwöög gen wɑ̈g kì yij bɑ̈ɑ̈ngø, e men-ɑ́ gen kiri gen, ge bɑ bɑ̈nggi ryɑ̈g, mɑ́ dhɑnhø bɑ bɑ̈ng yi gïn-ɑ dhɑlii. De keløg kwøbbi Wë Yëso Mesiy Yïënee óyïëyø yi ji, kɑ ge yiel; codhe kɑ ge døøg-ɑ be bëëdø ki bëëdi kömi piny, bëëdi gen ceg-ɑ pëddø ki rënyø ki me lod rɑ̈ji tyeli mɑl. Mɑ́ e di bëëd e lɑ̈w keløg bëëntir di bëëd e kwïj yi gen, kibøli kenyi døøg gen cyɑ̈n kɑ cigg pyem gen. Menɑni pɑ̈r ki møg-ɑ nyi gɑj kinni, “Gwög ɑ́døøg kömi ngwøgge.” Kí kinni, “Kundhøngø men-ɑ ɑ́rum ki lwøgø, ɑ́døøg be ngyelli ree kì yij bub.” Men bɑ ryeew wɑ̈jj-ɑ gwëdɑ wun, yeki nyiimïɑ. Riɑ ɑ́pɑ̈nyɑ ki pɑ̈ddi wun kì yethi wɑ̈jjɑni ryeet, o wu órum wun kì ri møgɑni. Yɑ dwɑdd-ɑ pɑ̈ddi wun ki møg-ɑ ɑ́kømmi yi jøtöng mø Jwøk, geki møg-ɑ cïgi wɑ yi Wë Yïënee, gen ɑ møg-ɑ ɑ́köbbi wun yi tyëngwöödø. Gïn-ɑ mɑl kì ri møgɑni bɑ kinni, bëëd wu ngɑ̈ny wøw kinni dɑ ji møg-ɑ ócwöb kì cyɑ̈ngg-ɑ cyɑ̈n, møg-ɑ dir yi jɑmmi kömi piny. Wu ógɑggi yi gen, kɑ ge opëjø kinni, “Nuti kööbø cem e óbï? De ɑ́gøne en? Kweyyee ɑ́thøw, o piny nudd e nɑ keje, bong gïjø mɑ ɑ́wil ree, kër-ɑ ɑ́cwɑ̈ɑ̈j piny.” Gïn-ɑ wøy yi gen, e gø ngɑ̈nyi yi gen bɑ kinni, Jwøk ɑ́ceg-ɑ kwøb, ɑcwɑ̈ɑ̈j mɑl kí piny. Piny ɑ́gwøg-ɑ ri pï, e gwøg kɑ pï. O bɑ pï, pïi bɑɑyø ɑ ɑ́nɑ̈ɑ̈g piny kɑ̈ge dööng. De mɑl kí piny møg-ɑ nud ɑnɑn ge mïdh-ɑ yi ciggɑni ceth; o mïdhi ɑ́ men-ɑ órɑ̈b ki mɑc. Gïgɑni mïdhi kɑ per cyɑ̈ng-ɑ óløøg kwøbbi tyëngrijjø, o ge cɑy. De gïjø ɑ́kyel ko wïl kì wɑ̈thi wun, wun ɑ nyiimïɑ; kinni cyɑ̈ng ɑ́kyel kì yï Jwøk, pɑ̈r ki runn ɑ́lïp; o runn ɑ́lïp pɑ̈r ki cyɑ̈ng ɑ́kyel. Wë pɑ nyi cwööng ki gwøgi gïn-ɑ kwøbe kinni gø ógwøge, ni kɑ̀ rum kwï ji. De bëëdi wun ceg kɑ nginø yi en, mɑ́ e pɑ dwɑddi kinni o bëëde e dɑ ngɑn wëye lɑ̈ɑ̈ny, dɑ́ kinni yewi ji bënn. Cyɑ̈ɑ̈ng Wë, óbï e nɑ kur. Mɑl ólɑ̈ɑ̈ny kì cyɑ̈ngɑni e ceg-ɑ ruurø ni kenyi pööde, kɑ gïg-ɑ mɑl órɑ̈bbø, kɑ piny ólɑ̈ɑ̈nyø geki gïg-ɑ yije bënn. Kɑ̀ bëëd jɑmmì bënn gɑ møg-ɑ ólɑ̈ɑ̈ny kinøw, wu óceg bëëdø wun ɑ́ ji mɑ ngø? Bëëd wun wu bɑ tyëng kwërø, o wëyi wun óthyëyyi Jwøk, wu yïd-ɑ Cyɑ̈ɑ̈ng Jwøk, wu kwɑjj-ɑ kinni jwɑne bëënø; eni cyɑ̈ng-ɑ órɑ̈bbi mɑl kɑ ólɑ̈ɑ̈nyø; kɑ gïg-ɑ mɑl olenyø yi lëdhi mɑc. De wɑ yïd-ɑ gïn-ɑ ɑ́kwøb yi Jwøk kinni gø ógwøge; ɑ løg mɑl me nyɑ̈n kí piny me nyɑ̈n, møg yethi gen óbëëd ki bëëntir. Pɑ̈nyu ri wun ki tyenyø yeki nyiimïɑ, o wu óyuud yi cyɑ̈ngɑni e bong gïn gwɑ̈ɑ̈d kì ri wun, o bongii gïn pere ócɑɑy wun. Lidhu ngïn-ɑ ngïïn yi Wë, kɑ̀ wëgge wun ki keny yewi wun, ni møg-ɑ ɑ́gwëdi wun yi Pøøl ómïee, e gwëëd-ɑ peli wïj men-ɑ ɑ́mëggii yi Jwøk. Kwøbbɑni ɑ nyi gwed yi Pøøl, kenyi gwëde kì ri møgɑni. De kwï kwøbbɑni teeg; ge pɑ yïëy gɑmø yi wɑ̈thi ji møøgø, kɑ ge nyi myen yi gen ni kenyi myen gen wɑ̈jji kwërø møg-ɑ kyeelø. Tyëngɑni nyi cwööl-ɑ thøø kömi gen. De møgɑni ngɑ̈nyi yi wun nyiimïɑ. Kor wun ri wun, o wu ócög wu pɑ thɑɑb pɑ̈l yi bɑ̈jji tyëng-ɑ ɑ́døøg cyɑ̈n, kɑ wu ódhɑ̈lø cung kì kɑ̈jji wun. De pëddi wun ki dïdi kwøbbi Wë, Yïënee, Yëso Mesiy. En ɑ lenhi ɑnɑn, gïti ɑtheer! Amen. Wø köbb-ɑ wun møg-ɑ ɑ́wöni cøn, o ge ɑ́lïngi yi wøn, kɑ ge lidh yi wøn ki nyingi wøn. Awøø, ɑ́lidh yi wøn kɑ nywɑl yi wøn ki cinggi wøn thyew. Álidh yi wøn keny-ɑ ɑ́nyodhe ree kì bøli teedø, o bɑ en ɑ pere kømmi yi wøn ɑnɑn. O møg-ɑ nyi pwönyi yi wøn bɑ kinni, ngɑnɑni ɑ́ying-ɑ yï Wïy cøn, de ree ɑ́nyodhe, o wø köbb-ɑ wun kwøbbi nënn-ɑ ɑtheer møg-ɑ ɑ́yod yi wøn kì yïe. Dɑ́ møg-ɑ ɑ́lidh yi wøn geki møg-ɑ ɑ́lïngi yi wøn ɑ köbbɑ wun thyew, o møgɑni bɑ kipe kinni o wɑ cyɑ̈dhi wɑ kì yöö ɑ́kyel, o wɑ yïddi wɑ ki nënn-ɑ ɑtheer kì yï Wïy geki Yëso Mesiy Wɑ̈de, ngɑn-ɑ pere kømmi yi wøn. De wø gwëd-ɑ wun møgɑni ɑnɑn kipe kinni o medi pëthee kedh gen ge ódøngø. Anɑn, wöön-ɑ ɑ́lïngi yi wøn kì yï Wɑ̈de, gen ɑ møg-ɑ kwøb yi wøn ek, bɑ kinni: Jwøk bɑ cɑr, o bong muudhø kì ree kinni tek. Keløg wɑ okööbø kinni, wɑ cyɑ̈dh-ɑ́ɑ̀ yöö ɑ́kyel ki en, de wɑ nudd wɑ bëëd ɑ yij muudhø, wɑ ceg-ɑ pyed, o wɑ pɑ gøggi dyër. De wɑ ócyɑ̈dhi kì yöö ɑ́kyel ki en, keløg wɑ cyɑ̈dh-ɑ́ɑ̀ yij cɑr ni kɑ̀ bëëde kì yij cɑrɑni, o wɑ óbëëd wɑ bɑ ɑ́kyel, o orøgee ólwöög wɑ̈g yi remi Yëso Wɑ̈de. De keløg wɑ okööbø kinni, yïee bong orøg, wɑ budh-ɑ riee yøw, o kwøbb-ɑ dyër bogïn kì yïee. De ke tönggi wɑ orøgee Jwøk, lɑɑwe dwööge’ piny kipe orøngɑni mɑ́ e døj, o dhøge pɑ nyi wil yi en. Keløg wɑ okööbø kinni, bong orøg mɑ ɑ́gwøg yi wɑ, wɑng-ɑ kinni, Jwøk ɑ́gwøg yi wɑ ɑ́ ngeti pyed, o møge tøøk kì pëthee. Anɑn, wun ɑ nyigɑ, møgɑni gwëdɑ’ wun kipe kinni, o wu ócög wu pɑ røngø. De ke bɑ̈jji dhɑnhø, yïee dɑ ngɑn køny wɑ kì bøli Wïy. O ngɑnɑni bɑ Yëso Mesiy; en ɑ ngɑntir. En ɑ nyi gøøm bøli orøgee. De pɑth ki kipe orøgee kete, dɑ́ kipe orøøg kömi piny bëne. Keløg cigge omïdhø yi wɑ, nyodh-ɑ kinni, Yëso ngɑ̈nyi yi wɑ ceth. De ngɑn-ɑ kööbø kinni, Yëso ngɑ̈nyi yi en, de cigge pɑ mïdhe, ngɑnɑni bɑ ngeti pyed, o bong dyër kì yïe. Tyëng-ɑ lïngi kwøbbe bënn bɑ tyëng-ɑ mɑɑr Jwøk kidøøj; o bene kër-ɑ óyodii yi wɑ kinni wɑ rëbø ki Jwøk. Tyëng-ɑ kööbø kinni ge mïdh-ɑ kwøbbi Jwøk, bëëd gen ceth ki bëën-ɑ ɑ́beed yi Yëso Mesiy. Anɑn, wun ɑ nyiimïɑ møg-ɑ mɑɑrɑ, cigg-ɑ gwëdɑ wun pɑth ki cigg mø nyɑ̈n, de ge bɑ cigg mø kɑ̈gi gen dööng, mɑ́ ge ɑ́rum ki lïngø yi wun kì tyeli mɑl. De kì tung-ɑ kyeelø, yɑ gwëd-ɑ wun ki cigg mø nyɑ̈n, o bëëdi gen gɑ dyër nën-ɑ́ɑ̀ ri Mesiy kí ri wun thyew. Mɑ́ muudhø kedh e ówɑ̈ɑ̈nyø, o cɑɑr Jwøk men-ɑ bɑ dyër ɑ́rum ki cɑ̈gø meny. Ngɑn kööbø cem e ying-ɑ yij cɑrɑni, de wɑɑd gen mɑɑn yi en, ngɑnɑni nudd e ying-ɑ yij muudhø. Ngɑn mɑɑr wɑɑd gen, bëëd ɑ yij cɑrɑni, o tyele koo cwɑnye kì yij cɑr. De ngɑn-ɑ mɑɑn wɑɑd gen, bëëd ɑ yij muudhø, o cyɑ̈dh-ɑ́ɑ̀ yij muudhø; o yuu-ɑ kedhe kwïje, mɑ́ e ɑ́gwøg ɑ́ cwør yi muudhø. Yɑ gwëd-ɑ wun ki wɑ̈nyø men, wun ɑ nyigɑ, kipe kinni o wu óngɑ̈nyu wøw kinni, Jwøk lɑɑwe ɑ́dwööge piny kipe orøøg wun kì ri nyingi Yëso Mesiy. O wun ɑ wëëg, yɑ gwëd-ɑ wun thyew, mɑ́ e bɑ wun ɑ ngɑ̈nyi ngɑn-ɑ ɑ́bëëd e nud kì ri cɑ̈gi piny gïti ɑnɑn. O wun ɑ yɑɑg-ɑ wøbb, yɑ gwëd-ɑ wun, mɑ́ Ngɑnrɑj ɑ́tyɑm yi wun. Yɑ gwëd-ɑ wun, wun ɑ yɑnythønhø, mɑ́ Wïy ngɑ̈nyi yi wun. Yɑ gwëd-ɑ wun, wun ɑ wëëg, mɑ́ ngɑn-ɑ ɑ́wöni e nud kì ri cɑ̈gø cøn, ngɑ̈nyi yi wun. Yɑ gwëd-ɑ wun, wun ɑ yɑɑg-ɑ wøbb, mɑ́ wu teg, o kwøbbi Jwøk obëëdø kì pëthi wun, o Ngɑnrɑj ɑ́tyɑm yi wun. Kömi piny wɑlɑ̀ jɑmm-ɑ yije ko mɑɑr wun, mɑ́ keløg jɑmmi kömi piny omɑɑrø yi dhɑnhø, mɑ̈ɑ̈dø mi Wïy tøøk kì pyëwe. Jɑmmi kömi piny bënn, ɑ løg jɑmm-ɑ tyer yi pyëw orøg, gen ɑ jɑmm-ɑ nenni yi ji; ɑ tyer yi pëthi gen, kí jɑmmi kömi piny bënn, møg-ɑ per gen nyi thwøøg yi dhɑnhø; ge pɑ kɑ̈ɑ̈l yï Wïy, de ge nyi kɑ̈ɑ̈l-ɑ kömi piny. Piny men ówɑ̈ɑ̈ny geki okøn pëëth kipe jɑmm-ɑ ying yije, de ngɑn-ɑ nyi gwøg gïn-ɑ dwɑddi yi Jwøk, óbëëdø gïti ɑtheer. Nyigɑ, thumi piny ɑ́cyɑ̈ngi, o ni kɑ ɑ́lïng wun kinni, ngetimɑ̈ɑ̈nø mi Mesiy obëënø; o tyëng-ɑ mɑɑn Mesiy mø gïïr ɑ́cwöb ɑnɑn, bene ɑ yod wɑ en kinni, thumi piny ɑ́cyɑ̈ngi. Tyëngɑni ɑ́cwöb kì kellee, de ge pɑth ki wɑddee këti. Mɑ́ keløg ge di bëëd gɑ wɑddee, ge di bëëd kì kellee, de kɑ ɑ́kedhi gen wɑ̈g, menɑni nyodh-ɑ kinni, ge pɑth ki wɑddee këti. De wu ɑ́rum ki yodi Wëykwërø, ɑ́køny kömi wun yi Mesiy, bene ɑ bëëd wu ngɑ̈ny dyër, wu bënn. Wu pɑ gwëdi yi yɑn kɑ per kinni dyër kwïj yi wun, dɑ́ kipe kɑ̀ bëëde e ngɑ̈nyi yi wun; o ngɑ̈nyi yi wun thyew kinni bong pyed me nyi kɑ̈ɑ̈l ri dyër. De ngɑn-ɑ nyi pëmø kinni, Yëso pɑth ki Mesiy, bɑ ngeti pyed, mɑ́ ngɑn-ɑ nyi pyem Wïy geki Wɑ̈d, mɑ̈n ki Mesiy, o bɑ ngɑn tyëddii. Mɑ́ tyëng-ɑ bɑny Wɑ̈d, bɑny-ɑ Wïy thyew. Tyëng-ɑ yïëy Wɑ̈d, Wïy nud kì yï gen thyew. Wiy møg-ɑ ɑ́lïngi yi wun kì ri Wɑ̈d kì tyeli mɑl bëëd gen kì pëthi wun, mɑ́ ke mɑ̈gi wun kì ri møg-ɑ ɑ́lïngi yi wun cøn, wu ceg-ɑ mɑ̈gø thyew kì ri Wɑ̈d kí Wïy. Mɑ́ møg-ɑ ɑ́kømmi yi Yëso gɑ møg-ɑ óyod yi wɑ ceth, ge bɑ nënn-ɑ ɑtheer. Wu gwëdi yi yɑn kɑ per kinni o ri wun kor yi wun ki tyëng-ɑ dwɑddi wun wënyø. De keløg ɑ́ per wun, Wëykwërø ɑ́rum ki køny kömi wun yi Mesiy. O kɑ̀ bëëd Wëykwërø kì kömi wun, bong ngɑn dwɑddi yi wun ɑ́ ngɑn pwönyi wun. Mɑ́ wu ópwönyi yi Wëye, o møg-ɑ pwönye bɑ dyër, pɑth ki pyed. Lïngu møg-ɑ pwönyi yi Wëy, kɑ wu bëëd wun wu mɑ̈gø kì ri Mesiy. Ngee, wun ɑ nyigɑ, mɑ̈gi wun kì ree, o wɑ óbëëd wɑ pëthee teeg keny-ɑ ócwöbe, o wɑ̈thee ócög ge pɑ lɑ̈ɑ̈y kì cyɑ̈ng-ɑ ódwööge. Keløg wu ngɑ̈ny wøw kinni, Wɑ̈d Jwøk bɑ ngɑntir kì bøli Jwøk, bëëd wu ngɑ̈ny wøw thyew kinni, tyëng-ɑ nyi ngøy bëëde, kɑ ge obëëdø ge tir ni en, ge bɑ nyigi Jwøk ceth. Jwøk, mɑ̈ɑ̈dø mee ɑ́nyudhe wɑ ki mendwøng kipe kɑ̀ cwølli wɑ, wɑ bɑ nyigi Jwøk; o wɑ bɑ nyige kidyër ceth. De gïn-ɑ pere bëëd wɑ kwïj yi tyëng kömi piny, bɑ kɑ̀ kwïj gen Jwøk. Wun ɑ nyiimïɑ, wɑ bɑ nyigi Jwøk ɑnɑn, de bëëdø men-ɑ óbeed yi wɑ dhuki megø nuti nyudhi wɑ yi en. De ngɑ̈nyi yi wɑ kinni, kì bøli keny-ɑ ódwöög Yëso kömi piny, wɑ óbëëdø ni en ceth, mɑ́ e ólidh yi wɑ ɑ́ Wɑ̈d Jwøk ceth. De ngɑn-ɑ nyi ngɑ̈dhi dwönge, ree nyii tyenyø yi en. Mɑ́ e ngɑ̈ny wøw kinni, Wɑ̈d Jwøk kelli gen pɑ cyɑ̈gi ki gïgrijjø. Ngɑn-ɑ nyi göögø ki orøg nyi pyem-ɑ Ciggi Jwøk, o gwøg ki orøg bɑ pyemi ciggi Jwøk ceth. O ngɑ̈nyi yi wun kinni, Mesiy yïe bong orøg, de ɑ́bï kömi piny be yiel dhɑnhø bëne kì yij orøge. Ngɑn mɑ̈gi kì ree pɑ göögø ki orøg; de ngɑn-ɑ nyi røngø, Mesiy nuti liidh en, o nuti yood en. Nyigɑ, ri wun ko wëggu wënyø! Ngɑn nyi gwøg dyër, bɑ ngɑntir, ni kɑ̀ bëëd Mesiy e tir. De ngɑn-ɑ nyi göögø ki orøg bɑ ngeti Ngɑnrɑj, mɑ́ Ngɑnrɑj menɑni ɑ́røng ɑ ri cɑ̈gø cøn. De Wɑ̈d Jwøk ɑ́bï-ɑ be rënyi gwøøg Ngɑnrɑj. Bong dhɑnhø kì kelli nyigi Jwøk me nyi cög e orøngø; mɑ́ bëëdi Jwøk nud kì ri gen; o ge pɑ cuggi cögø ge orøngø, mɑ́ Jwøk bɑ Wïyi gen. Gïn-ɑ bɑ̈ɑ̈n kì kɑɑm nyigi Jwøk geki nyigi Ngɑnrɑj bɑ kinni: tyëng-ɑ pɑ nyi göögø ki gïgdøj, o ji-ɑ kyeelø pɑ mɑɑr yi gen, ge pɑth ki nyigi Jwøk. Wöön-ɑ ɑ́lïngi yi wun kì tyeli mɑl cøn bɑ kinni: mɑɑr wɑ riee. Wɑ ko bëëd ni Kɑin, ngɑn-ɑ ɑ́bëëd ɑ́ mi Ngɑnrɑj, kɑ ómen nɑ̈ge. Á kipe ngø ɑ ɑ́nɑ̈ge gøn? Bɑ kipe kɑ ɑ́bëëd gwøge rɑɑj, o gwøøg ómen døøj. Wu ko ngɑ̈ng, wun ɑ nyiimïɑ, keløg wu omɑɑnø yi tyëng kömi piny. Mɑ́ e ngɑ̈nyi yi wɑ kinni, wɑ ɑ́dwöög wɑ̈g kì thɑ́ ciggi thøø, mɑ́ nyiimïee mɑɑr yi wɑ. Ngɑn pyëwe bong mɑ̈ɑ̈dø, nuti dwöög wɑ̈g kì thɑ́ ciggi thøø. Tyëng-ɑ mɑɑn ji pɑ̈r ki tyëng-ɑ nyi nɑ̈gø ki ji, o ngɑ̈nyi yi wun kinni, tyëng-ɑ nyi nɑ̈gø ki ji, yï gen bong nënn-ɑ ɑtheer. Gïn-ɑ bɑnge ɑ́yood bëëdi mɑ̈ɑ̈dø yi wɑ bɑ kinni, Yëso wëye ɑ́muuje kiperee, wɑ thyew muuj wɑ wëyyee kipe nyiimïee. Ngɑn yïee di gïïpiny; kɑ wɑɑd gen me jɑdø twöne, ko wöl kwøb kinni Jwøk mɑɑr yi en. Nyigɑ, mɑ̈ɑ̈dø miee ko bëëd ɑ́ kwøb yøw; bëëde ɑ́ mɑ̈ɑ̈dø mɑ dyër, me nyodh ree ki gwøg. Bɑ ri møgɑni ɑ óyodii yi wɑ kinni wɑ bɑ jii dyër; møgɑni ɑ ówëggi wɑ bëëdø kì bøli Jwøk e pëthee pɑ lïngø. Keløg pëthee nyii nywiyø kenyi bɑ̈jji wɑ, menɑni wɑng-ɑ kinni, Jwøk dwøng kibøli pëthee, o jɑmmì bënn ngɑ̈nyi yi en. Wun ɑ nyiimïɑ, keløg pëthee pɑ lïngø kì bɑng gïg-ɑ gøggi yi wɑ, menɑni wɑng-ɑ kinni bong gïn böggi yi wɑ kì bøli Jwøk. O gïn-ɑ nyi kwɑjji yi wɑ kì yï Jwøk óyod yi wɑ, mɑ́ ciggi Jwøk omïdhø yi wɑ, kɑ gïn-ɑ kwøbe nyi gwøg yi wɑ. Møg-ɑ ɑ́ceg yi Jwøk bɑ kinni, yïëy wɑ Wɑ̈de Yëso Mesiy, kɑ riee mɑɑr wɑ thyew, ni kɑ ɑ́ceg wɑ yi Mesiy. Tyëng-ɑ mïdhi ciggi Jwøk ge bëëd ɑ ri Jwøk; o Jwøk bëëdø e rëbø ki gen. O ngɑ̈nyi yi wɑ kinni Jwøk rëbø ki wɑ, kì bɑng Wëy-ɑ ɑ́mëgge wɑ. Wun ɑ nyiimïɑ, wu ko nyi wɑ̈dhi yïëyø ki kwøbbi tyëng-ɑ nyi kööbø ce ri gen dɑ Wëy, de nyi rɑngu gen, o yod yi wun ying wëy-ɑ ri gen kɑ̈ɑ̈l-ɑ yï Jwøk. Mɑ́ e dɑ jøtöng mø pyed mɑ ɑ́tɑɑy kömi piny. Bene kër-ɑ óyodu en ying wëyɑni kɑ̈ɑ̈l-ɑ yï Jwøk èn: ngɑn-ɑ yïëy kinni Mesiy bëënø ɑ́ dhɑnhø, ree dɑ Wëy-ɑ kɑ̈ɑ̈l yï Jwøk. De ngɑn-ɑ pɑ yïëy Yëso, pɑ cuggi bëëdø yïe dɑ Wëy-ɑ kɑ̈ɑ̈l yï Jwøk. Wëy-ɑ ree kɑ̈ɑ̈l-ɑ yï ngɑn-ɑ mɑɑn Mesiy; wu ɑ́lïng kinni i wëyɑni óbï; o en ɑ kömi piny keny ɑnɑn. De wu bɑ nyigi Jwøk, yeki nyigɑ; o jøtööng pyed ɑ́rum ki tyɑmø yi wun, mɑ́ Wëy-ɑ ri wun teeg kibøli wëy-ɑ ri tyëng-ɑ bɑ mø kömi piny. Jøtööng pyed møgɑni, ge nyi kømm-ɑ kwøbbi jɑmmi kömi piny, o kwøbbi gen ceg kɑ lïngø yi kömi piny, mɑ́ ge bɑ tyëng kömi piny. De wɑ bɑ jii Jwøk, o kwøbbee ólïng-ɑ yi ngɑn ngɑ̈nyi Jwøk; kwøbbee pɑ lïngi yi ngɑn pɑth ki ngeti Jwøk. O bɑ yuu-ɑ ni menɑni ɑ yod wɑ wëyi dyër kí wëyi pyed. Nyiimïɑ, mɑɑr wɑ riee, mɑ́ mɑ̈ɑ̈dø kɑ̈ɑ̈l-ɑ yï Jwøk. Dhɑnhø men-ɑ mɑ̈ɑ̈dø bɑ nyɑɑr Jwøk, o Jwøk ngɑ̈nyi yi en. Ngɑn-ɑ pyëwe bong mɑ̈ɑ̈dø, Jwøk kwïj yi en, mɑ́ Jwøk bɑ mɑ̈ɑ̈dø. O Jwøk mɑɑr-ɑ mɑɑre wɑ ɑ́nyodh yi en kɑ ɑ́öre Wɑ̈de, Wɑ̈dkyel kömi piny, o wɑ yïddi wɑ ki nënnì kì ree. Menɑni bene mɑ̈ɑ̈dø: pɑth ki wɑ ɑ ɑ́mɑɑr Jwøk; de bɑ kinni wɑ ɑ́mɑɑr yi en, ɑöre Wɑ̈de ɑ́ men gøøm orøgee. Wun ɑ nyiimïɑ, keløg e bene kër-ɑ ɑ́mɑɑr wɑ yi Jwøk ɑnɑn, mɑɑr wɑ riee. Bong dhɑnhø mɑ ɑ́lidh Jwøk kinni tek. De keløg riee omɑɑrø yi wɑ, wɑ óbëëd wɑ rëbø ki Jwøk, kɑ mɑ̈ɑ̈dø mee pɑ̈dh-ɑ keje kì riee. Ngɑ̈nyi yi wɑ kinni, wɑ bëëd ɑ ri Jwøk, o Jwøk bëëd ɑ riee, mɑ́ wɑ ɑ́mëgge Wëye. Wø ɑ́lïdhi kɑ wø okööbø kì bøli teedø kinni, Jwøk Wɑ̈de ɑ́öre ɑ́ Yïëdi mi lɑ̈bø. Ngɑn yïëy kì bøli teedø kinni, Yëso bɑ Wɑ̈d Jwøk, Jwøk ceg-ɑ bëëdø kì ree, o ceg-ɑ bëëdø kì ri Jwøk thyew. Ngɑ̈nyi yi wɑ, o wɑ yïëyø ceth kinni wɑ mɑɑr yi Jwøk. Jwøk bɑ mɑ̈ɑ̈dø, o tyëng-ɑ bëëdø kì yij mɑ̈ɑ̈dø, ge bëëd ɑ ri Jwøk, o Jwøk bëëd ɑ ri gen. Mɑ̈ɑ̈dø ɑ́cïb pëthee kɑ per kinni o wɑ óbëëd wɑ pɑ böggi kì Cyɑ̈ɑ̈ng Cɑ́y. O møgɑni ócuggi ceth, mɑ́ bëëdee kì kömi piny nɑ bëëdi Mesiy. Mɑ́ e bong wɑ̈ɑ̈rø kì keny-ɑ di mɑ̈ɑ̈dø; o mɑ̈ɑ̈dø kenyi pɑ̈dhe keje, wɑ̈ɑ̈rø nyii lɑ̈ɑ̈nyø yi en kì pyëw dhɑnhø, mɑ́ wɑ̈ɑ̈rø nyi 'lwööb kɑ cɑ́y. Wɑ omɑ̈ɑ̈dø, mɑ́ wɑ ɑ́ceg kɑ mɑɑrø yi Jwøk kì tyeli mɑl. Keløg wɑ okööbø kinni, Jwøk mɑɑr yi wɑ, de wɑdde mɑɑn yi wɑ, wɑ bɑ tyëngpyed. Mɑ́ ji pɑ cuggi mɑɑri Jwøk e nuti liidh gen, keløg wɑddi gen møg-ɑ nenni yi gen pɑ mɑɑr yi gen. Cigg-ɑ ɑ́mëggi wɑ yi Mesiy bɑ kinni: tyëng-ɑ mɑɑr Jwøk, mɑɑr gen nyiimï gen bënn. Ngɑn yïëy kinni Yëso ɑ bɑ Mesiy, bɑ nyɑɑr Jwøk; o ngɑn mɑɑr ngɑndwøng, nyɑɑr ngɑnɑni omɑɑrø yi en thyew. O óyod yi wɑ kinni nyigi Jwøk mɑɑr yi wɑ, kɑ̀ mïdhi wɑ ciggi Jwøk. Mɑ́ mɑɑri Jwøk yi wɑ, wɑng-ɑ kinni cigge omïdhø yi wɑ, mɑ́ ngɑn-ɑ bɑ nyɑɑr Jwøk ócuggø tyɑmi kömi piny. Á men ɑ cuggi tyɑmi kömi piny? Bɑ ngɑn-ɑ yïëyø kinni Yëso bɑ Wɑ̈d Jwøk. Yëso Mesiy bene ngɑn-ɑ ɑ́bï ki pïi jwɑ̈ɑ̈ge geki reme. Nuti bëënø kɑ pï keti gen, dɑ́ pï kí remø. O Wëy okööbø ceth kinni møgɑni bɑ dyër, mɑ́ Wëyɑni bɑ dyër. Dɑ cwɑ̈gg ɑ́dɑ̈g: Wëy, kí pï, kí remø; o ɑ́dɑ̈gɑni kømm-ɑ dhøg ɑ́kyel. Wɑ nyii yïëyø ki dhøng-ɑ kwøb yi ji; de men-ɑ́ dhøng-ɑ kwøb yi Jwøk pëddi döng, o dhøngɑni ɑ́kwøbe kì ri Wɑ̈de. Tyëng-ɑ yïëy Wɑ̈d Jwøk, yï gen dɑ dhøngɑni kì yethi pëthi gen; de tyëng-ɑ pɑ yïëy Jwøk, Jwøk ɑ́gwøg yi gen ɑ́ ngeti pyed; mɑ́ møg-ɑ ɑ́kwøb yi Jwøk kì ri Wɑ̈de nuti yïëëy gen. Dhøngɑni bɑ kinni: Jwøk, wɑ óthödhe ki nënn-ɑ ɑtheer, o nënnɑni kɑ̈ɑ̈l-ɑ ri Wɑ̈de. Ngɑn-ɑ yïe di Wɑ̈d, yïe dɑ nënnì; de ngɑn yïe bong Wɑ̈d Jwøk, yïe bong nënnì. Wu tyëng-ɑ yïëëy Wɑ̈d Jwøk, wɑ̈nyø men gwëdɑ’ wun kipe kinni, o wu ngɑ̈nyu wøw kinni, yï wun dɑ nënn-ɑ ɑtheer. Pëthee pɑ lïngø kì bøli Jwøk, mɑ́ wɑ ngɑ̈ny wøw kinni, keløg wɑ kwɑjj-ɑ gïjø me kyëëw ki møg-ɑ dwɑddi yi pyëwe, gïn-ɑ kwɑjji yi wɑ gø mëgge’ wɑ. O keløg wɑ ngɑ̈ny wøw kinni, gïg-ɑ nyi kwɑjji yi wɑ bënn nyii muujø yi en, gïg-ɑ kwɑjji yi wɑ ceg kɑ yodø yi wɑ kì yïe. Keløg wɑɑd wun olidhø yi yïn e ogöögø ki orøg me pɑ göjjii thøø, kwɑjjí Jwøk o ngɑnɑni thödhe ki nënnì. Menɑni cuggi kɑ per ji-ɑ orøøg gen pɑ kɑ̈ni ki thøø. De dɑ orøg me nyi kɑ̈ni ki thøø, o pɑth ki orøngɑni ɑ pere dwɑddɑ kinni kwɑjji. Bɑ̈jjø bɑ orøg, de dɑ orøg me pɑ nyi kɑ̈ni ki thøø. Ngɑ̈nyi yi wɑ kinni, bong nyigi Jwøk møg nyi rïïj ge orøngø, mɑ́ ge nyii yielø yi Wɑ̈d Jwøk, o ge pɑ cuggi nyïɑ̈gø yi Ngɑnrɑj. Wɑ ngɑ̈ny wøw kinni wɑ bɑ mø Jwøk ceth, cɑgg ɑ́ kɑ̀ bëëd piny bëne jɑɑg-ɑ yi Ngɑnrɑj. Ngɑ̈nyi yi wɑ kinni Wɑ̈d Jwøk ɑ́bï, kɑ wɑ thödhe ki dïdø men yod wɑ Jwøng-ɑ dyër. Wɑ bëëdø wɑ rëbø ki Jwøng-ɑ dyër – wɑ rëbø ki Wɑ̈de Yëso Mesiy. Men bene Jwøng-ɑ dyër; o men bene nënn-ɑ ɑtheer. Nyigɑ, lɑ̈ɑ̈wu ri wun ki jwögg-ɑ pɑth ki dyër. Wɑ̈nyø men kɑ̈ɑ̈l-ɑ yïɑ, yɑ Jɑldwøng. Yɑ gwëd-ɑ Dhɑnhdwøng geki nyige, gen ɑ tyëng-ɑ mɑɑr yi yɑn. Pɑth ki yɑ ketɑ ɑ mɑɑr wun, de wu mɑɑr yi tyëng-ɑ mɑɑr dyër bënn, mɑ́ dyër ɑ́mɑ̈gi kì riee, o ócög e obëëdø kì riee gïti ɑtheer. Wɑ óthödhi ki dhwɑ̈ng, kí lɑ̈mpyëw, kí mër yi Jwøk Wïy geki Yëso Mesiy, Wɑ̈d Wïy, wiy ge ócög gen gɑ møgee kì yij dyër geki mɑ̈ɑ̈dø. Pyëwɑ ɑ́mïni ki mendwøng, kɑ ɑ́lïngɑ kinni kwï nyigí bëëd ɑ ri dyër, ni kɑ ɑ́ceg wɑ yi Wïy. De yɑ kwɑjj-ɑ yïn, yïn ɑ Dhɑnhdwøng, kinni mɑɑr wɑ riee. Bɑ møgɑni ɑ cïgɑ yïn ɑnɑn, o bɑ ciggɑni ɑ ɑ́mïdhi yi wɑ ceth kì ri cɑ̈gø cøn. Mɑ̈ɑ̈dø men-ɑ wɑngɑ bɑ kinni, bëëd wɑ, wɑ mïdh-ɑ ciggi Jwøk. Cigg-ɑ ɑ́kwøng ki lïngø yi wun bënn kì ri cɑ̈gø cøn bɑ kinni, bëëd wun bënn, wu mɑɑr-ɑ ri wun. Tyëngwëënyø mø gïïr ɑ́tɑɑy kömi piny bëne; tyëngɑni bɑ møg-ɑ nuti yïëyø kinni Yëso ɑ́bï ɑ́ dhɑnhø. Ngɑn ni menɑni bɑ wëny, o bɑ ngɑn mɑ̈n ki Mesiy. Nyi korru ri wun kipe kinni, o gïn-ɑ́ pere ɑ́göög yi wun cöge e pɑ lɑ̈ɑ̈ny, dɑ́ kipe kinni o köögi mi wun óyod yi wun. Ngɑn pɑ mïdhi kwøbb-ɑ ɑ́pwönyi yi Mesiy, Jwøk pɑ yod yi en. Ngɑn bï yï wun e pɑ kɑ̈ll-ɑ pwönyø menɑni, ko cwøøl wun kɑ̈lli wun; ko wöl ki köbbø kinni, “Yï óbëëdø ki mër.” Mɑ́ ngɑn mɑ̈dh gen, køny-ɑ gen ki gwøng rɑj men-ɑ gwøg yi gen. Yïɑ dɑ kwøb mø gïïr, mø dwɑddɑ köbbi wun, o yɑ pɑ dwɑddi gweedi gen yij wɑ̈nyø; de yɑ tyer-ɑ këëmi wun, o wɑ kööb wɑ, wɑ nenn-ɑ nyingee, o pëthee mïni gen ki mendwøng. Wu ɑ́mɑ̈dh yi nyigi nyimyëw, møg-ɑ ɑ́yieny yi Jwøk. Wɑ̈nyø men kɑ̈ɑ̈l-ɑ yïɑ, yɑ Jɑldwøng. Yɑ gwëd-ɑ Gɑyøs, jɑl-ɑ mɑɑr yi yɑn ki mendwøng. Yɑ kwɑjj-ɑ Jwøk kiperí, wɑɑd wøn; kinni o yï bëëd pyëwí omedø, o dëlí yööd – ni kɑ̀ ngɑ̈nyɑ en kinni wëyí bëëd-ɑ tɑrø. Pyëwɑ ɑ́mïni ki mendwøng kɑ ɑ́bëën nyiimïee, kɑ perí kwøb yi gen kinni, i yï mïdh-ɑ dyër, o yï bëëdø yï gøgg-ɑ dyër. Bong medi pyëw me lod men-ɑ yïɑ kɑ̀ lïngɑ kinni, i nyigɑ bëëdø ge mïdh-ɑ dyër. Gwøgí døøj wɑɑd wøn, mɑ́ tyëng-ɑ ɑ́yïëy ɑ́køny yi yïn, yï ködd-ɑ kömi yïëyø, cɑgg ge bɑ tyëngpɑth. O yï ɑ́pwøj yi gen, kipe kɑ̀ mɑɑr tyëng kɑnïsɑ̀ bënn. Yɑ kwɑjj-ɑ yïn, køny gen ceth, o weel gen tyëg yi gen, ki yuu-ɑ døøj kì bøli Jwøk. Mɑ́ ge ɑ́kedhi be wel kɑ per nyingi Mesiy, o ge nuti wöl kɑ̈bbø ki gïïpiny kì yï tyëng-ɑ nuti yïëyø. Jiɑni ceg kɑ kønyø yi wɑ ceth, wɑ køny-ɑ gen ki gwøg kipe dyër. Kɑnïsɑ̀ ɑ́rum ki gwëdø yi yɑn ki wɑ̈nyø megø, de Dyøtrepes, jɑl-ɑ dwɑddi gwøg ɑ́ jɑngi gen, pɑ dwɑddi lïngø ki kwøbbee. Keny-ɑ óbëënɑ, gïgrijjø møg-ɑ kømme kì riee, kí kwøbbi pyed møg-ɑ kømme, ge óköbbɑ wun. De pɑth ki møgɑni keti gen; wɑdde, jii Mesiy pɑ nyi yïëy yi en, kɑ tyëng-ɑ dwɑddi kunyø nyi mɑ̈ɑ̈ne kønyi gen, kɑ gï nyi dwɑdde cyeed wɑ̈g kì kɑnïsɑ̀. Wɑɑd wøn, yï ko nyi ngöyi ki gwøg ki gïgrijjø, ngøy gwøgi gïgdøj. Ngɑn gøggi gïgdøj bɑ ngeti Jwøk; o ngɑn gøggi gïgrijjø, Jwøk nuti liidh en. Dimitriyøs ceg kɑ pøjjø yi ji bënn; o ceg kɑ pøjjø yi dyër kiree. O opøjjø yi wøn thyew, o ngɑ̈nyi yi yïn kinni pwøjji wøn bɑ dyër. Yïɑ dɑ kwøb mø gïïr mø dwɑddɑ köbbi yïn, de yɑ pɑ dwɑddi gweedi gen yij wɑ̈nyø. Yɑ dwɑdd-ɑ bëën be këëmi wun kì bɑng nyɑ keny me thiinh; o møgɑni kømmi yi wɑ, wɑ nenn-ɑ nyingee. Yï óbëëdø ki mër. Yï ɑ́mɑ̈dh yi mɑ̈dhhí bënn. Mɑ̈dh wɑddee bënn; nyi mɑ̈dh ngɑn ki nyinge. Bene yɑn Yeudɑ̀ bɑ̈ng Yëso Mesiy, o yɑ bɑ ómï Yɑgob. Yɑ gwëd-ɑ tyëng-ɑ ɑ́cwøl yi Jwøk; gen ɑ tyëng-ɑ bëëdø kì yij mɑ̈ɑ̈dø mi Wïyee Jwøk, ge kor-ɑ yi Yëso Mesiy. Wiy Jwøk pyëwe ólɑ̈ɑ̈me ki wun, o wu thödhe ki mër geki mɑ̈ɑ̈dø mø bong cögi gen. Riɑ ɑ́ceg yi yɑn kɑ pɑ̈nyø ceth, wun ɑ nyiimïɑ, ki gwëdi wun ki wɑ̈nyø kipe kwøbbi yielø men-ɑ nywɑg yi wɑ bënn. Pyëwɑ ɑ́dwɑdd-ɑ cïji wun, o wu nyïɑ̈ggi wun kipe yïëyi wun, kí per jɑmm-ɑ ɑ́muuj yi Jwøk gï mëgge’ jie. Mɑ́ e dɑ ji møøgø, mø pɑ wør Jwøk mɑ ɑ́bï kellee ge kwïj yi wɑ. Jiɑni wööni dhwɑ̈ɑ̈ng Jwøk ɑ́wil yi gen, o kyëëwe ki gïgrijjø møg-ɑ gøggi yi gen, o Wë Yëso Mesiy, ngɑn-ɑ cinge di wɑ bɑ ɑbɑny yi gen. Tyëngɑni cɑ́yi gen rumø ki gweed piny kɑ̈ge dööng. Cɑgg møgɑni ngɑ̈nyi yi wun, yɑ dwɑdd-ɑ pɑ̈ddi wun ki kër-ɑ ɑ́yieel tyëng Isrɑil yi Wë kì cinggi tyëng Rïp; de tyëng-ɑ ɑ́pëëm kì kelli gen ɑ́nɑ̈ge. Nyi pɑrri wun wëywödd-ɑ ɑ́bëëd pëthi gen pɑ med ki lɑ̈ni mø gen, kɑ kɑ̈jji gen wiy yi gen; ge bɑ ɑmɑg ki ɑ́cwecwel, kì yij muudhø kì thɑ piny; kunɑni ɑ mïdhi gen yi Jwøk, ge yïd-ɑ cyɑ̈ng-ɑ óliidh kwøbbi gen. Pɑrri wun Sødømɑ̀ kí Gømørɑ̀, kí myërr-ɑ cyɑ̈gi ki gen, ki kër-ɑ ɑ́cɑɑy gen ki mɑc, kì bɑng kɑ ɑ́pëggi gen be orøg, ge gøgg-ɑ gïgrijjø. Ge ɑ́cɑy kinøw kɑ per kinni o tyëng-ɑ kyeelø bwøg gen. Jiɑni nyi ceg-ɑ lɑ̈g, kɑ ge nyi göjji orøg ki dëlli gen yi lɑ̈ggɑni; jyɑ̈gø mi Jwøk pɑ wør yi gen, kɑ wëy-ɑ jyɑ̈gø kì mɑl nyi tir ki gwɑddø yi gen. Cɑgg ɑ́ men-ɑ́ Mikɑil, jɑngi wëywödd, nuti göögø ki gïn ni menɑni. Keny-ɑ ɑ́wër Mikɑil geki Ngɑnrɑj kì kömi dëël Mosɑ̀, Mikɑil Ngɑnrɑj nuti pɑ̈ny en ki yɑnyø, de gø ɑ́köbbe’ kinni, “Yï ócɑ̈wwi yi Jwøk!” De tyëngɑni, gïg-ɑ tyelli gen kwïj yi gen nyi ceg kɑ gwɑddø yi gen; o men-ɑ́ gïg-ɑ ngɑ̈nyi yi gen nɑ møg-ɑ ngɑ̈nyi yi lɑ̈yyi pɑ̈l; o bɑ gïgɑni ɑ nyi kɑ̈ni kömi gen ki thøø. Ge kɑ̈ɑ̈l-ɑ ɑyɑ̈r yij tɑɑw wun; mɑ́ ge tyer-ɑ pɑ̈ngi yethi gen ki jɑmm-ɑ tyer yi pëthi gen. Ge korr-ɑ ri gen keti gen. Ge nɑ pøøl mø wøjji yi yømø, de ge pɑ kɑ̈ni ki kødh. Ge nɑ yenh mø pɑ nyi nywøl, cɑgg piny bɑ cwir; gen ɑ yenh-ɑ óputhø ki byerri gen, o ge rum thøø. Ge nɑ ɑpɑgø kì nɑɑm omelø, o gïgrijjø møg-ɑ gøggi yi gen nɑ óbööy dhøg ɑpɑngɑni. Ge nɑ kyell mø wɑ̈dhi cyɑ̈dhø, møg-ɑ ówïyø yi Jwøk ki kej gen kì yij muudhø. Enök, ngɑn-ɑ ɑ́pɑ̈dhi piny kì ri bïryeew rïjj kì bɑng Adɑm, per tyëngɑni ɑ́kwøb yi en kinni, “Wë óbï e olwøngø yi wëywödde mø kwɑnni gen bɑ ɑ́lïp mø ngenyø. Bï-ɑ be løøgi kwøbbi dhɑnhø bëne, o tyëngrijjø cɑye kipe gïgrijjø møg-ɑ ɑ́gwøg yi gen kì bøli Jwøk, kí gïgrijjø møg-ɑ ɑ́kømmi yi gen kì ree.” Teenɑni nyi ceg-ɑ køør ge cɑyy-ɑ tyëng-ɑ kyeelø; ge yɑb-ɑ gïgrijjø møg-ɑ tyer yi pëthi gen; ge lejj-ɑ ri gen, o ge thɑbb-ɑ ji ki dhøng yöm kipe gïg-ɑ yɑb yi gen. De nyi pɑrri wun møg-ɑ ɑ́köbbi wun cøn yi jøwööni Wë Yëso Mesiy. Wu ɑ́köbbi yi gen kinni, “Keny-ɑ óbëën cyɑ̈ɑ̈n piny, ódi ji møg-ɑ ócwöb, gɑ møg-ɑ ógwɑddi wun; ge óbëëd gɑ ji mø pɑ wør Jwøk, o ge tyer-ɑ gøggi gïg-ɑ dwɑddi yi pëthi gen.” Bene tyëngɑni ɑ nyi kɑ̈ɑ̈l dɑ̈ɑ̈ngi ji ri gen, mɑ́ ge nyi cyɑ̈dh-ɑ́ɑ̀ bɑng jɑmmi kömi piny, o ri gen bong Wëy. De wun ɑ nyiimïɑ, nyi dømu ri wun ki yïëy-ɑ́ ree ɑ́kwëër wun. Nyi kwɑ̈jji wun ki tegi Wëykwërø. Mïdhu ri wun kì ri mɑ̈ɑ̈dø men-ɑ kɑ̈ɑ̈l yï Jwøk; wu yïd-ɑ bøli keny-ɑ ólɑ̈ɑ̈m pyëw Wë Yëso Mesiy ki wun, kɑ wu thödhe ki nënn-ɑ ɑtheer. Nyi lɑ̈ɑ̈m pëthi wun ki tyëng-ɑ yethi gen pyëër; kɑ kwï ji møøgø kì kelli gen nyi yiel wun, ge gwɑ̈ɑ̈ru’ wɑ̈g kì yij mɑc. De nyi lɑ̈ɑ̈m pëthi wun ki ji møøgø, e yethi wun óböggø, de mɑɑn wun rɑjji gen, kí men-ɑ́ ógudh-ɑ ywëëdh dëlli gen. Lenhu ngɑn-ɑ ko wëggi wun pɑ̈ɑ̈dhø, o wu ókïdhe bøli mɑ̈r ki medi pyëw e bong gïn gwɑ̈ɑ̈d kì ri wun. Lenhu Yïënee, ɑ bɑ Jwøk kete, kì ri Wë Yëso Mesiy; eni ngɑn-ɑ yïe di mɑ̈r, kí döng, kí tegø, kí jyɑ̈gø møg-ɑ ɑ́wöni weenø, kí ɑnɑn e gït-ɑ ɑtheer! Amen. Kwøb møg, bɑ møg-ɑ ɑ́cïb cingi Yëso Mesiy yi Jwøk, o bɑ̈ngge nyudhe gïg-ɑ ójwɑn cwöbø, ɑöre wëywöne kinni o møgɑni nyudhe Jøn, møg-ɑ ɑ́lidh yi Jøn gï ɑ́kwøbe bënn. Menɑni bene wöön-ɑ kɑ̈ɑ̈l yï Jwøk, kí dyër men-ɑ ɑ́nyodh yi Yëso Mesiy. Ngɑn rɑng wɑ̈nyø men kì bøli teedø ree ódi gyëdh, o tyëng-ɑ ólïngi møg-ɑ töng kì yij wɑ̈nyø men, kɑ møg-ɑ ógwedø kì yije mïdhi yi gen, ri gen dɑ gyëdh. Wɑ̈nyø men kɑ̈ɑ̈l-ɑ yïɑ yɑ Jøn, yɑ gwëd-ɑ ɑkuddi kɑnïsɑ̀ gɑ ɑ́bïryew kì modïri Ásiyɑ̀. Wu óthödhi ki dhwɑ̈ng geki mër yi ngɑn-ɑ ɑ́bëëd e nud cøn, o nud ɑnɑn, o bɑ en ɑ óbï, geki wëy ɑ́bïryew møg-ɑ cungi kì bøli kwøme, kí Yëso Mesiy, cwɑ̈ng-ɑ dyër, o bene ngɑn-ɑ ɑ́kwøng ki tugø kì yij thøø, ɑ jɑɑg rɑ̈nhi kömi piny. Wɑ mɑɑr yi en, kɑ wɑ pɑ̈ɑ̈de wɑ̈g kì yethi töjji orøg ki thøwe. Kɑ wɑ gwøge wɑ bɑ pödhi ókwër møg göggi Wïye Jwøk; o bɑ en ɑ lejji; o en ɑ yïe di tegø ɑnɑn gïti ɑtheer! Amen. En ɑ bï ɑnɑn e kɑ̈ll-ɑ wɑ̈thi pøøl! Ólidh yi dhɑnhø bëne; o ólidh thyew yi tyëng-ɑ ɑ́cwøbii ki tøng. Kɑ ywøg yi ji bënn kì kömi piny. Møgɑni óbï kinøw ceth. Amen. Kɑ Wë Jwøk Áyïmø okööbø kinni, “Yɑn ɑ mɑl, o yɑn ɑ cyɑ̈n.” En ɑ nud ɑnɑn, en ɑ ɑ́bëëd e nud cøn, o bɑ en ɑ óbï. Yɑ bɑ Jøn, ómï wun, o kɑ̀ bëëdɑ yɑ bɑ ngeti Yëso, wɑ ngïïn ɑ kyeel ki orɑng-ɑ nyi bï kömi tyëng Pödhe. Yɑ ɑ́cïb yij muji Pɑtmøs kɑ per kɑ ɑ́pwönyɑ kwøbbi Jwøk geki dyër men-ɑ ɑ́nyodh yi Yëso. Kɑ Wëy bï-ɑ kömɑ kì cyɑ̈ɑ̈ng Wë, kɑ yɑ olïngø ki cwɑg mø kɑ̈ɑ̈l ngɑ̈jɑ, ge nɑ ywøøg kɑng. Kɑ cwɑggɑni okööbø kinni, “Gweed gïg-ɑ nenni yi yïn yij wɑ̈nyø, ke ge ör yï ɑkuddi kɑnïsɑ̀ møg-ɑ kɑ̈ddi: Epɑsos, Semirnɑ̀, Pergɑmum, Theyɑtirɑ̀, Sɑrdïs, Pilɑdelpiyɑ̀ kí Lɑwdikiyɑ̀.” Kɑ riɑ wirɑ, o yɑ lidhɑ ngɑn-ɑ kööbø ki yɑn, kɑ yɑ lidh-ɑ teggi lɑ̈mbɑ̈ɑ̈ ɑ́bïryew mø bɑ dhɑb, o dïdyëri gen dɑ gïjø me ni dhɑnhø, me rugø ki ɑ́ywödh me wɑ̈dhi ri tyelle piny, kí wëni dhɑb me ween en ɑ́ngɑne, o yëyyi wïje tɑr ge nɑ yëyyi dyel wɑlɑ̀ ge nɑ ɑ́piy, o bøle ce lyel ɑ́ mɑc, tyelle ceg-ɑ orɑ̈ng ni ngyënyø dilɑl men-ɑ ólenyø kidøøj kɑ yoj, o cwɑgge lïngi ge nɑ luuli pïg rïngi piny kì wïj kït. Cingi kyëje dɑ kyell ɑ́bïryew, o dhøge dɑ pilø me bɑ̈lle ryeet bedh, o bøle rɑ̈nggø nɑ cɑ̈ng kenyi yeere. Keny-ɑ ɑ́lidhɑ en, kɑ yɑ ceg-ɑ pɑ̈dhi dhøggi tyelle yɑ nɑ ngɑnthøø. Kɑ yɑ nywɑle ki cingi kyëje, ɑkööbe kinni, “Yï ko böggi! Yɑn ɑ mɑl, o yɑn ɑ cyɑ̈n. Yɑn ɑ nëënø! Yɑ ɑ́bëëd yɑ thøø, de yɑ ónëënø ceth gïti ɑtheer. Yïɑ dɑ tegø kì kömi thøø, geki pödhi tyëngthøø. Gwed gïg-ɑ nenni yi yïn cyee; gen ɑ gïg-ɑ nud ɑnɑn, kí møg-ɑ ócwöb. Gïn-ɑ wɑngi yi kyell ɑ́bïryew møg-ɑ cingi kyëjɑ, geki teggi lɑ̈mbɑ̈ɑ̈ bɑ kinni: kyell ɑ́bïryew bɑ wëywödd mø ɑkuddi kɑnïsɑ̀ gɑ ɑ́bïryew, o teggi lɑ̈mbɑ̈ɑ̈ bɑ ɑkuddi kɑnïsɑ̀ møgɑni. “Gwëdí wëywöni kɑnïsɑ̀ kì Epɑsos kinni, “Bene møg-ɑ kømmi ek, yi ngɑn-ɑ mïdhi kyell ɑ́bïryew kì cingi kyëje, ɑ cyɑ̈dhi kì kelli teggi lɑ̈mbɑ̈ɑ̈: Gïn-ɑ ɑ́gwøg yi yïn ngɑ̈nyɑ; ngɑ̈nyi yi yɑn kinni yï ɑ́göög ki gwøng teg, kɑ yï ongïnø. Ngɑ̈nyi yi yɑn kinni yï pɑ nyi yïëy ki bëëdi tyëngrijjø, kɑ tyëng-ɑ pëëdø ce ge bɑ tyëngwöödø rɑng yi yïn, kɑ yod yi yïn ceth kinni ge ceg-ɑ pyed. Yï ngɑ̈ny ngïïnø; yï ɑ́nyïɑ̈ggi kipe nyingɑ, o yï nuti pïdø. De gïn-ɑ bɑny yi yɑn kì yïí bɑ kinni: yɑ pɑ mɑɑr yi yïn ɑnɑn, ni kɑ ɑ́mɑɑr yɑn kì tyeli mɑl. Yod kër-ɑ ɑ́pɑ̈ɑ̈dh yi yïn, kɑ yï yewí, kɑ yï døøg be gwøg ni mi tyeli mɑl. Keløg yï pɑ yewi, yɑ óbï yïí kɑ tengi lɑ̈mbɑ̈ɑ̈ mií kwɑnyɑ kì keje. De bɑ gïjø me døj kì yïɑ kɑ̀ mɑɑn gwøøg jø Nikølɑ̀ ni kɑ̀ mɑɑnɑ gen. “Ngɑn yïe di yïthhe, lïnge møg-ɑ köbbi ɑkuddi kɑnïsɑ̀ yi Wëy! “Ngɑn-ɑ ótyɑ̈mø ówëggɑ cɑm ki nywøli yɑɑdh Nënnì, kì yij Bɑɑg Jwøk. “Kɑ wëywöni kɑnïsɑ̀ kì Semirnɑ̀ gwëdí kinni, “Møg-ɑ kømmi ek, yi ngɑn-ɑ mɑl kí cyɑ̈n, eni ngɑn-ɑ ɑ́thøw kɑ cig-ɑ dwöög be nënnø: Akørrí ngɑ̈nyi yi yɑn; ngɑ̈nyi yɑn kinni yï jɑdø, de yïí dɑ kɑ̈r! Gïgrijjø møg-ɑ kømmi kì rií yi tyëng-ɑ kööbø ce ge bɑ Yeud, ngö ge pɑth ki Yeud, ngɑ̈nyi yi yɑn, ge bɑ ɑkuud Cethɑn. Yï ko böggi yi orɑng men-ɑ nudd e ying-ɑ bølí. Mɑ́ wu órɑng yi Ngɑnrɑj kɑ kwï wun leenge ød mɑg, kɑ wu orɑngø ki cyɑ̈ng pyɑ̈rø. Mïdhí yïëyí pïd thøø, o yï ónëngɑ ki nënnì, gɑ pwøj kipe kɑ ɑ́tyɑ̈ɑ̈m. “Ngɑn yïe di yïthhe, lïnge møg-ɑ köbbi ɑkuddi kɑnïsɑ̀ yi Wëy! “Tyëng-ɑ ótyɑ̈mø, pɑ wöl ki nyïɑ̈ɑ̈gø yi ryeew thøø kinni tek. “Kɑ wëywöni kɑnïsɑ̀ kì Pergɑmum gwëdí kinni, “Bene møg-ɑ kømmi ek, yi ngɑn-ɑ yïe di pil-ɑ bɑ̈lle ryeet bedh: Keny-ɑ bëëd yi yïn ngɑ̈nyi yi yɑn, Cethɑn kwøme cïb en kenyɑni. Yɑ nudd yɑ yïëëy yïn ceth, yï nuti døøg cyɑ̈n; cɑgg ɑ́ kì bøli keny-ɑ ɑ́nɑ̈ɑ̈g Antipɑs, jɑl-ɑ yïëyø ki mendwøng kì keny-ɑ bëëd yi Cethɑn. De dɑ gïg mø nøg mø per gen cɑyɑ yïn: dɑ kwï ji kì kelli wun møg mïdhi pwönyi Bɑlɑɑm, ɑ ɑ́pwönyi Bɑlɑk ki peeji tyëng Isrɑil be orøg; kɑ ɑ́kölle gïn cɑm ki gëdhh-ɑ ngɑ̈lli ngïjji jwögg, o ge niin gen ki tyëng-ɑ nuti nywøøm gen ri gen. O yïí dɑ kwï ji mø mïdhi pwönyi jø Nikølɑ̀. Yewí ki orøgí! Keløg yï pɑ yewi, yɑ óbï yïí, kɑ yɑ ónyïɑ̈ggø ki jiɑni ki pil-ɑ dhøgɑ. “Ngɑn yïe di yïthhe, lïnge møg-ɑ köbbi ɑkuddi kɑnïsɑ̀ yi Wëy! “Tyëng-ɑ ɑ́tyɑ̈ɑ̈m, ge óthödhɑ kì ri mɑnɑ̀ men-ɑ bɑ ɑkɑn. Ge óthödhɑ bënn thyew ki ópɑ̈nni kït mø tɑr; ngɑn ki mee, e köme ógwëdø ki nying mø pɑ yod yi ngɑn megø; dɑ́ ngɑn-ɑ mëggii kete ɑ óngɑ̈nyi nyingɑni. “Kɑ wëywöni kɑnïsɑ̀ kì Theyɑtirɑ̀ gwëdí kinni: “Men bene wöön-ɑ kɑ̈ɑ̈l yï Wɑ̈d Jwøk, eni ngɑn-ɑ nyinge lyel ni mɑc, ɑ tyelle rɑ̈nggø ni dilɑl me thøø yi yojø. Gïn-ɑ gwøg yi yïn ngɑ̈nyɑ. Mɑ̈ɑ̈n-ɑ mɑ̈ɑ̈d yi yïn ngɑ̈nyɑ, kí mïnh-ɑ mïdhí yïëyø, kí gwøng døj men-ɑ gwøg yi yïn, kí ngïn-ɑ ngiin yi yïn. Ngɑ̈nyi yi yɑn kinni yï ceg-ɑ gwøg ɑnɑn ki gwøng teg me lod gwøng-ɑ ɑ́gwøg yi yïn cøn. De dɑ gïn pere cɑyɑ yïn: yïde ɑ ngiin kwøbbi Yidhɑbel, ngɑn-ɑ cwølli ree ɑ́ ngetitöng; kɑ tyëng-ɑ mɑlli yɑn nyi wënye, kɑ gï nyi kölle cɑm ki gëdhh-ɑ ngɑ̈lli ngïjjì jwögg, o ge niin gen ki tyëng-ɑ nuti nywøøm gen ri gen. Ánëngɑ ki keny yewe ki orøge, de ɑ́dhɑ̈li wïyø ki gøggi rɑj. Kɑ ɑ́rum bëëde kinøw, ngɑnɑni óleengɑ yij pyën men-ɑ órɑnge ki menrɑj geki teen-ɑ ɑ́niinii bënn. Møgɑni gwøgɑ’ gwøgø keløg ge pɑ wïyi ki gøggi rɑj geki ngɑnɑni. O tyëng-ɑ lugi kì bɑnge ónɑ̈g yi yɑn, codhe o yod yi ɑkuddi kɑnïsɑ̀ kì kɑ̈jj-ɑ kyeelø bënn, kinni bɑ yɑn ɑ ngɑ̈ny rummi ji bënn, kí gïg-ɑ tyer yi gen. Dhɑnhø kì kelli wun ócuddɑ ki köögi me kyëëw ki gïn-ɑ ɑ́gwøge “De mø ngenyø kì kelli wun, kì Theyɑtirɑ̀ ge nuti yïëyø ki kwøbb-ɑ pwönyi yi ngɑnɑni; wu nuti dïdø ki gïn-ɑ cwølli yi jiɑni ɑ́ kwøbb-ɑ ɑkɑnn-ɑ døngø mø Cethɑn. De mïdhu møg-ɑ yï wun ɑnɑn, pïd keny-ɑ óbëënɑ. “Ngɑn yïe di yïthhe, lïnge møg-ɑ köbbi ɑkuddi kɑnïsɑ̀ yi Wëy!” “Kɑ wëywöni kɑnïsɑ̀ kì Sɑrdïs gwëdí kinni: “Bene møg-ɑ kømmi ek, yi ngɑn-ɑ yïe di wëyi Jwøk gɑ ɑ́bïryew kí kyell ɑ́bïryew: Gïn-ɑ gwøg yi yïn ngɑ̈nyi yi yɑn; ngɑ̈nyi yi yɑn kinni yï kømmi i yï onëënø, ngö yï rum thøø! Cyëëw, kɑ rií nyɑɑg, o yï tëngí, kɑ̈ng-ɑ nuti pïïd yïn yi thøø. Mɑ́ gïg-ɑ gøggí pɑ nënni ge tir kì yï Jwøgɑ. Nyi pɑrrí møg-ɑ ɑ́pwönyi yïn, kí møg-ɑ ɑ́lïngi yi yïn; mïdhí møgɑni kɑ yï wïyí ki orøg. Keløg yï pɑ cyëëw, yɑ óbï yïí ni kur, o bøli keny-ɑ óbëënɑ koo yod yi yïn. De dɑ ji mø nøg kì kelli wun kì Sɑrdïs, mɑ ɑ́mïdhi ógudhi gen ge tɑr. Yï ócyɑ̈dhi ki yɑn yï rug-ɑ ógønh tɑr, mɑ́ yï døøj ki rugii. Tyëng-ɑ ótyɑ̈mø órug-ɑ ógudh mø tɑr, o nyingi gen pɑ rɑ̈ɑ̈jɑ wɑ̈g kì yij wɑ̈nyi nënnì. Yɑ ókööbø kì bøli Wïyɑ geki wëywödde, kinni jiɑni bɑ møgɑ. “Ngɑn yïe di yïthhe, lïnge møg-ɑ köbbi ɑkuddi kɑnïsɑ̀ yi Wëy! “Kɑ wëywöni kɑnïsɑ̀ kì Pilɑdelpiyɑ̀ gwëdí kinni: “Bene møg-ɑ kømmi ek, yi ngɑn-ɑ bɑ kwërø, o bɑ dyër: Muptɑɑ̀ men-ɑ bɑ mi Debïd nud kì yïe, o kɑ̀ yiebe thïgø, bong ngɑn cuggi cyëgii; o kɑ̀ cyëge gøn bong ngɑn cuggi yiebii. Gwøgí ngɑ̈nyi yi yɑn; o ngɑ̈nyi yi yɑn kinni yïí dɑ tegø me thiinh; pwönyɑ ɑ́mïdhi yi yïn, o yɑ nuti bɑɑny yïn. Yï ɑ́yïëbbɑ thïgø, me bong ngɑn cuggi cyëgii. Tyëng-ɑ yij ɑkuud Cethɑn, ɑ pëëdø ce ge bɑ Yeud, ngö ge pɑth ki Yeud, ge ówëggɑ bëën yïí kɑ ri gen bøødh gen bølí. O óyod yi gen bënn kinni yï mɑɑr yi yɑn. Yï ókor yi yɑn ki ɑkørr-ɑ óbï kömi piny, gen ɑ ɑkørr-ɑ órɑɑng dhɑnhø bëne, mɑ́ kwøbbɑ ɑ́mïdhi yi yïn kidøøj, kɑ yï ongïnø. Yɑ ójwɑn bëënø. Korrí gïg-ɑ yïí, o bongii ngɑn kɑb köögi men-ɑ mëggi yïn kipe kɑ ɑ́tyɑ̈ɑ̈m. Tyëng-ɑ tyɑ̈mø ógwøg yi yɑn gɑ löjj kì yij kengi Jwøgɑ, o ge koo kedh kì yije. Nyingi Jwøgɑ, kí nyingi kɑɑl Jwøgɑ, ɑ bɑ Yerusɑlem men-ɑ nyɑ̈n ógweedɑ kömi gen. Nyingɑ men-ɑ nyɑ̈n ógweedɑ kömi gen thyew. “Ngɑn yïe di yïthhe, lïnge møg-ɑ köbbi ɑkuddi kɑnïsɑ̀ yi Wëy! “Kɑ wëywöni kɑnïsɑ̀ kì Lɑwdikiyɑ̀ gwëdí kinni: “Bene møg-ɑ kømmi ek, yi Amen, ngɑn-ɑ nyi kømmi dhøg ɑ́kyel, ɑ nyi kwøb dyër, ɑ ree kɑ̈ɑ̈l yi jɑmmì bënn: Gïn-ɑ ɑ́gwøg yi yïn ngɑ̈nyi yi yɑn; yï ngɑ̈nyɑ kinni yï pɑ lïb, o yï pɑ lëëdh. Yɑ ɑ́dwɑdd-ɑ kinni o yï di bëëd yï lïb wɑlɑ̀ yï lëëdh! Mɑ́ yï ceg bëëdø yï mør; yï pɑ lëëdh, o yï pɑ lïb; yï ngoolɑ’ piny kì dhøgɑ! Yï okööbø kinni, ‘Yɑ kɑ̈rø, bong gïn jɑ̈ddi yɑn.’ De kwïj yi yïn kinni yijí bɑɑrø, o wɑngí ocɑnø! Yï bɑ ɑbuur; yï cyɑ̈dh-ɑ nøw, o yï bɑ cwør. Yɑ köbb-ɑ yïn ki møg døj kinni, ngëëw ki dhɑm dhïw kì yïɑ, o yï kɑ̈rí. Kɑ yï ngëëw thyew ki ógønh tɑr men kum rií, o yï wïyi ki cyɑ̈dhi nøw, o ɑyɑ̈r bëe wɑ̈g kì kömí. Ngëëw thyew ki yɑdh men kïdhí nyingí, o yï nëën. Tyëng-ɑ mɑɑr yi yɑn nyii cɑ̈wwø yi yɑn kɑ ge nyi cɑyɑ. Kɑ ɑ́rum bëëde kinøw, gwir rummí kɑ yï wïyí ki orøg. Yɑn ɑ cwöddi èn kì dhø ød. Ngɑn lïngi cwɑggɑ kɑ ød yiebe, yɑ kedh-ɑ ød kɑ yɑ onywɑ̈gø ki gïncɑm ki gen, o ge ólunyi nywɑ̈g ki yɑn. Tyëng-ɑ ótyɑ̈mø, ge ówëggɑ bëëdø kì butɑ kì wïj kwømɑ, ni yɑn ɑ ɑ́tyɑ̈ɑ̈m, ɑbëëdɑ ɑnɑn kì buti Wïyɑ kì wïj kwøme. “Ngɑn yïe di yïthhe, lïnge møg-ɑ köbbi ɑkuddi kɑnïsɑ̀ yi Wëy!” Kɑ yɑ cigi cɑ̈rrø ki møøgø; yɑ ɑ́lidh-ɑ thïgø me bɑ ɑyieb kì mɑl. Kɑ yɑ olïngø ki cwɑg mø ni ywøøg kɑng, kɑ yɑ köbbi yi cwɑggɑni kinni, “Bïí mɑl keny, o yï nyudhɑ gïn-ɑ ócwöb.” Kɑ yɑ gwɑɑr mɑl yi Wëy, kì bøli kenyɑni ceth. Mɑl kunɑni dɑ kwøm kí ngɑn me bëëdø kì wïje. De ngɑn-ɑ bëëdø kì kenyɑni ree dɑ cɑr me tɑr cɑrø, kí megø me kwɑrø geki ówɑw. Kwømɑni bɑ ɑwen yi órøngø me ni kïdi ting-ɑ cwøl ɑ́ dhɑmröd. Bɑdhhi kwømɑni dɑ kwømm pyɑ̈r ɑ́ryew wïdɑ́ngwen; wɑ̈thi kwømmɑni dɑ jøgdøngø pyɑ̈r ɑ́ryew wïdɑ́ngwen, mø rug ógudh mø tɑr, o wɑ̈thi gen dɑ yɑ̈rri dhɑb. Kɑ ogwel kí pööd mɑl kɑ̈ɑ̈l-ɑ ri kwømɑni, e bøle olyelø yi lɑ̈mbɑ̈ɑ̈ ɑ́bïryew, gen ɑ wëyi Jwøk gɑ ɑ́bïryew. Bøli kwømɑni dɑ nɑm me di pïg kwïlø. Kwømɑni wɑ̈thi tùnge gɑ ɑ́ngwen dɑ gïg mø nëënø gɑ ɑ́ngwen mø ri gen pɑ̈ng yi nying kì bøli gen kí ngɑ̈thi gen. Men-ɑ mɑl nënni e nɑ ngur, o ryeew gen nɑ wɑdh, o dɑ̈ɑ̈g gen bøle nɑ bøli dhɑnhø, o ngween gen nɑ cor me pɑ̈rri. Lɑ̈yyɑni bënn, yï gen dɑ obërr; ɑ́kyel yïe dɑ obërr ɑ́bïkyel. Ri obërrɑni ótɑɑgø ki nying kì kömi gen geki yethi gen. Ge nyi lɑng-ɑ wɑ̈r kí dicɑ̈ng ge owörø kinni, “Kwërø, kwërø, kwërø, bene Jwøk Wïlɑ̈bø, en ɑ ɑ́bëëd e nud, en ɑ nud ɑnɑn, o bɑ en ɑ óbï.” Gïg nëënø møgɑni gɑ ɑ́ngwen, ge ceg-ɑ wör ge lejj-ɑ ngɑn-ɑ wïj kwøm, ge lenh-ɑ en, o ge pøjj-ɑ en; en ɑ ngɑn-ɑ óbëëdø gïti ɑtheer. Kɑ jøgdøngɑni gɑ pyɑ̈r ɑ́ryew wïdɑ́ngwen, ri gen bøødh gen piny kì bøli ngɑn-ɑ wïj kwøm, en ɑ ngɑn-ɑ óbëëdø gïti ɑtheer; kɑ yɑ̈rri wɑ̈thi gen leeng gen bøli kwøm, ɑkööb gen kinni: “Yïn ɑ Wïi wøn, Jwøøg wøn! Yï døøj ki lenhø, o yï døøj ki wørø thyew. Mɑ́ yïn ɑ ɑ́cwɑ̈j jɑmmì bënn; kɑ ge obëëdø ge onëënø ceth ni kɑ̀ dwɑddí.” Kɑ yɑ ólïdhø ki wɑ̈ny-ɑ nyi bɑn men-ɑ ógwedø kì yije kí köme, kì cingi kyëëj ngɑn-ɑ wïj kwøm; wɑ̈nyɑni ódijø ki kitimmi ónyɑɑm dij ɑ́bïryew. Kɑ yɑ ólïdhø ki wëywödø me teg, kɑ wëywönɑni okööbø ki cwɑg mø døngø kinni, “Á men ɑ døøj ki yiebi wɑ̈nyø, o ónyɑɑm-ɑ ódijii tore?” De ɑ́bong-ɑ dhɑnhø kì mɑl, wɑlɑ̀ kì kömi piny, wɑlɑ̀ kì thɑ́ piny, mɑ ɑ́cuggi yiebi wɑ̈nyɑni, o di lidhe møg-ɑ yije. Kɑ yɑ óywöngø ki mendwøng, kipe kɑ̀ bongii ngɑn mɑ ɑ́yod e døøj ki yiebi wɑ̈nyɑni. Aköbbi yɑn yi ɑ́kyel kì kelli jøgdøngø kinni, “Yï ko ywöngi. Ngur men-ɑ kɑ̈ɑ̈l gøl Yeudɑ̀, kwɑɑr Debïd ɑ́tyɑ̈ɑ̈m, o ócuggø tori ónyɑɑm dij, o wɑ̈nyø óyieb yi en.” Codhe, ɑlïdhɑ ki Órömø me cungi kì bøli kwøm ɑ́ ɑwen yi gïg nëënø gɑ ɑ́ngwen geki jøgdøngø. Órömɑni ɑ́nënni e nɑ ɑngɑl. Yïe dɑ nying ɑ́bïryew, kí tùng ɑ́bïryew, gen ɑ wëyi Jwøk gɑ ɑ́bïryew møg-ɑ ɑ́ör kömi piny bëne. Kɑ Órömø kedh-ɑ yï ngɑn-ɑ wïj kwøm, kɑ wɑ̈nyø kwɑnye kì cingi kyëëj ngɑn-ɑ wïj kwøm. Keny-ɑ ɑ́kwɑnye wɑ̈nyø, kɑ gïg nëënø gɑ ɑ́ngwen ri gen bøødh gen piny geki jøgdøngø gɑ pyɑ̈r ɑ́ryew wïdɑ́ngwen. Cinggi gen bënn dɑ thøm kí óthɑ̈ggi dhɑb mø pɑ̈ng yi bɑkur; ngɑn cinge dɑ thom ki óthɑ̈gi; gïgɑni bɑ mɑlli tyëng kwërø. Kɑ ge owörø ki wörø me nyɑ̈n kinni, “Wuö, yïn ɑ døøj ki yiebi wɑ̈nyø, o ónyɑɑm-ɑ ódijii tor yi yïn. Mɑ́ yï ɑ́ceg kɑ nɑ̈gø, kɑ Jwøk ngëwwí ki remí ki ji kì ri jurrì bënn, kí wɑ̈thi dhøg bënn, kì yethi pödhh bënn, kí wïj dhɑnhø bëne. Kɑ ge gwøg yi yïn gɑ pödhi ókwër, møg göggi Jwøgee o ge ójyɑ̈ɑ̈gø kì kömi piny.” Acigɑ lïdhø, kɑ yɑ olïngø ki cwɑggi wëywödd mø kwɑnni gen bɑ ɑ́lïp mø ngenyø; kwøm kí gïg nëënø gɑ ɑ́ngwen, kí jøgdøngø gï wen gen dïdyër. O ge owörø ki cwɑg mø døngø kinni, “Óröm-ɑ ɑ́nɑ̈g bɑ en ɑ døøj ki mëggi jyɑ̈gø, kí kɑ̈r, kí peli wïj, kí tegø, en ɑ døøj ki wørø, kí lejjø, kí lenhø!” Kɑ gïg-ɑ mɑl, kí møg-ɑ piny, kí møg-ɑ thɑ piny, ki møg-ɑ nɑɑm omelø – men-ɑ́ gïg-ɑ yij lɑ̈bø bënn – lïngɑ ge owörø kinni, “Ngɑn-ɑ bëëdø kì wïj kwøm geki Órömø bɑ gen ɑ lenhi, gen ɑ wør; gen ɑ yï gen di mɑ̈r kí tegø, gïti ɑtheer.” Kɑ gïg nëënø gɑ ɑ́ngwen okööbø kinni, “Amen!” Kɑ jøgdøngø ri gen bøødh gen piny ge ómɑ̈ddø. Kɑ Órömø lidhɑ e tor-ɑ ónyɑɑm dij men-ɑ mɑl kì ri ɑ́bïryewɑni, kɑ ɑ́kyel kì kelli gïg nëënø gɑ ɑ́ngwen, cwɑgge lïngɑ e okööbø kinni, “Bïí!” Kɑ wïjɑ tïngɑ, ɑlïdhɑ ki kyeny mɑ nyibøng. Ngɑn-ɑ kömi kyenyɑni cinge dɑ weth, kɑ nëngi ki yɑ̈r. Kɑ ókedhø e nënni ɑ́ ngɑn me rum tyɑ̈mø, me kedhi be tyɑ̈mø. Codhe, ɑtoor ryeew ónyɑɑm dij yi Órömø, kɑ ryeew gïg nëënø okööbø kinni, “Bïí!” Kɑ kyeny mɑ didïgø bï-ɑ wɑ̈g. Kɑ ngɑn-ɑ köme nëngi ki tegø me kɑ̈ɑ̈le mër wɑ̈g kì kömi piny, o ji nyïɑ̈ggi gen ki ri gen, kɑ nëngi ki pilø me dwøng. Atoor dɑ̈ɑ̈g ónyɑɑm dij yi Óromø, kɑ dɑ̈ɑ̈g gïg nëënø lïngɑ e okööbø kinni, “Bïí!” Atïngɑ wïjɑ, kɑ yɑ ólïdhø ki kyeny mɑ ditɑ̈ng. Ngɑn-ɑ köme cinge dɑ midhɑn. Kɑ cwɑg mø kɑ̈ɑ̈l kelli gïg nëënø gɑ ɑ́ngwen lïngɑ e okööbø kinni, “Gemè me nøg ɑ bɑ köögi mi cyɑ̈ng ɑ́kyel, o rummì ɑ́dɑ̈g mø ceir bɑ köögi mi cyɑ̈ng ɑ́kyel. De dhetun geki bɑ̈ggi oløg ko rënyí.” Keny-ɑ ɑ́toor ngween ónyɑɑm dij yi Órömø, ɑlïngɑ ngween gïg nëënø e okööbø kinni, “Bïí!” Atïngɑ wïjɑ, kɑ yɑ ólïdhø ki kyeny mɑ dithwöl. O ngɑn-ɑ köme cwøl ɑ́ Thøø, o Pödhi Thøø cyɑ̈dh-ɑ́ɑ̀ bɑnge. Kɑ jii budø ɑ́kyel kì kelli buddi piny gɑ ɑ́ngwen cïb cinggi gen, o gï nɑ̈g gen ki pilø, kí kɑ̈j, kí rɑ̈ɑ̈m dëllì geki lɑ̈yyi pɑ̈l. Keny-ɑ ɑ́toor bïïj ónyɑɑm dij yi Órömø, ɑlidhɑ wëyi tyëng-ɑ ɑ́nɑ̈g kipe yïëyi gen ki kwøbbi Jwøk, kì thɑ këli lɑm. Kɑ wëyɑni óryeerø ki cwɑg mø døngø kinni, “Wuö, yï teg o yï dwøng, o yï bɑ kwërø! Yï pïd-ɑ wɑɑng e tyëng kömi piny pɑ cɑy yi yïn, kipe kɑ ɑ́nɑ̈ɑ̈g wøn yi gen?” Kɑ ge thödhi ki ógudh mø tɑr bënn. Kɑ ge köbbi kinni, i ywöm gen ri gen, ki nyɑ keny me thiinh, gïti keny-ɑ óthumi kwɑnni bɑ̈ngg-ɑ wɑddi gen kí nyiimï gen møg ónɑ̈g ni gen. Kɑ Órömø lidhɑ e tor-ɑ bïkyeel ónyɑɑm dij, kɑ piny onhɑ̈nhø ki mendwøng, kɑ cɑ̈ng ólunyø ni ógønh lojø, kɑ dwɑ̈y ogöögø e nɑ remø. kɑ kyell odyëmø ni nywøli ólɑm kenyi nïngi gen yi ɑtunø. Kɑ mɑl ólɑ̈ɑ̈nyø ni kenyi bɑɑn wɑ̈nyø, kɑ kïttì geki muj bënn ónyegø kì kɑ̈jji gen. Kɑ rɑ̈nhi piny, kí jɑgge, kí pëjji liny, kí tyëngkɑ̈rì, kí tyëngteg, kí ji-ɑ kyeelø bënn; bɑ̈ngg kí ji-ɑ bëëd wɑ̈thi gen, reng-ɑ be pɑ̈nø kì kelli kïttì. Kɑ kïttɑni köbbi gen kinni, “Pɑ̈dhu kömi wøn, kɑ wø kum wun piny, o wø cög wø pɑ nenni yi ngɑn-ɑ bëëdø kì wïj kwøm, kí Órömø ɑ pyëwe keej. Mɑ́ cyɑ̈ng-ɑ rënyi pëthi gen ɑ́wɑ̈nhi, ɑ́ men ɑ cuggi cung kì keje?” Codhe, ɑlïdhɑ ki wëywödd ɑ́ngwen ge ócungø kì wɑ̈thi tùngi piny gɑ ɑ́ngwen, ge mïdh-ɑ yømø kì wɑ̈thi tùngɑni, o bongii yømø me köddi kömi piny, wɑlɑ̀ nɑɑm omelø, wɑlɑ̀ kömi yenh. Kɑ wëywödø megø lidhɑ e kɑ̈ɑ̈l-ɑ wɑɑng cyɑ̈ɑ̈ng mwøl, e ókɑ̈ddø ki kitim dij mi Jwøng-ɑ nëënø, kɑ ócwöddø ki cwɑg mø døngø, e cwøll-ɑ wëywödd ɑ́ngwen mø tyeli mɑl, møg-ɑ ɑ́thödhi yi Jwøk ki tegø men rënyi gen piny geki nɑ̈mmì. Kɑ gï köbbe kinni, “Piny, kí nɑ̈mmì, kí yenh, ge ko rënyi wun, kɑ̈ng-ɑ nudd wø dïjj-ɑ bøli jii Jwøgee ki ngïjjì ki kitim dij.” Kɑ yɑ olïngø i kwɑnni tyëng-ɑ́ bøli gen ɑ́dïjji ki ngïjjì bɑ ɑ́lïp miyø kí pyɑ̈r ɑ́ngwen wïdɑ́ngwen, ge bɑ wɑ̈thi kɑ̈lli Isrɑil bënn. Codhe, ɑtïngɑ wïjɑ kɑ yɑ ólïdhø ki teedø mø ngenyø, mø pɑ cuggi kwɑnø, ge bɑ wɑ̈thi pödhh bënn, kí jurrì bënn, kí wïj dhɑnhø bëne, men 'kööb-ɑ dhøge! Ge cung-ɑ́ɑ̀ bøli kwøm kì bøli Órömø, ge rug-ɑ ógudh mø tɑr, o cinggi gen dɑ ówɑwwi benø mø mɑr. Kɑ ge óryeerø ki cwɑg mø døngø kinni, “Tyɑ̈mø muuj-ɑ yi Jwøgee ngɑn-ɑ wïj kwøm geki Órömø!” Kɑ wëywödd bënn ócungø kì bɑdhhi kwøm geki jøgdøngø, kí gïg nëënø gɑ ɑ́ngwen. Codhe, kɑ ri gen bødh gen, wɑ̈thi gen këël gen piny, kɑ Jwøk mɑl gen, ge okööbø kinni, “Amen! Lejø geki döng; peli wïj geki pwøj; kí wuödø geki tegø, ge bɑ mø Jwøgee gïti ɑtheer! Amen!” Kɑ yɑ pyëj yi ɑ́kyel kì kelli jøgdøngø kinni, “Tyëng-ɑ rugø ki ógudh-ɑ tɑr bɑ møg, o ge kɑ̈ɑ̈l-ɑ kun?” Alöggɑ kinni, “Wuö, kun-ɑ kɑ̈ɑ̈l yi gen kwïj yi yɑn, dɑ́ yïn ɑ ngɑ̈nyii.” Kɑ ólöggø kinni, “Ge bɑ tyëng-ɑ ɑ́bodh kì bɑng guun-ɑ ɑ́guud nyingi ji ki mendwøng. Ógudhi gen ɑ́lwøg gen, kɑ gï gwøg gen ge tɑr ki remi Órömø. Bene ɑ bɑnge cungi gen kì bøli kwøm, ge gögg-ɑ Jwøk kì yij Kenge, kì wɑ̈r kí dicɑ̈ng. Ge ókorri yi ngɑn-ɑ bëëdø kì wïj kwøm. Ge pɑ cigi mɑgø yi kɑ̈j wɑlɑ̀ röödhø; o ge pɑ rɑ̈b yi cɑ̈ng wɑlɑ̀ lëdhi piny, mɑ́ ge kwɑy-ɑ yi Órömø, ngɑn-ɑ dïdyëri kwøm, kɑ gï nyi køøle kömi nyingi pïi nënnì. O pï ópoj yi Jwøk kì nyingi gen.” Keny-ɑ ɑ́toor bïryeew ónyɑɑm dij yi Órömø, kɑ mɑl ceg-ɑ kudø, kɑ tyëg-ɑ gïn ni budi sɑɑ̀ e okudø. Alidhɑ wëywödd ɑ́bïryew møg-ɑ cungi kì bøli Jwøk, kɑ ge nëngi ki kɑ̈ngì; men ki kɑnge. Kɑ wëywödø megø obëënø, e ókɑ̈ddø ki ópɑni bɑkur me bɑ dhɑb, ɑcunge kì bøli këli lɑm, kɑ thödhi ki bɑkur me gïïr, men muuje kyeel kí kwɑ̈jji tyëng kwërø, kì wïj këli lɑm, men-ɑ bɑ dhɑb, ɑ cungi kì bøli Jwøk. Kɑ yïri bɑkurɑni ceg-ɑ ì twɑ̈ɑ̈g kì cingi wëywödø, kɑ kedh-ɑ mɑl bøli Jwøk, kyeel ki kwɑ̈jji tyëng kwërø. Codhe, ɑkwɑɑny ópɑni bɑkur menɑni yi wëywödø, kɑ gø pɑ̈nge ki lelli mɑc mɑ ɑ́kwɑnye kì wïj këli lɑm, ɑleenge gøn piny. Kɑ ɑgwɑg otugø kì piny, kɑ mɑl opödø e ceg-ɑ rɑ̈ɑ̈dø, kɑ piny onhɑ̈nhø. Kɑ wëywödd ɑ́bïryew, møg-ɑ cinggi gen di kɑ̈ngì ɑ́bïryew, ri gen tim gen. Kɑ wëywön-ɑ mɑl kɑnge kodhe, kɑ ɑ́piy kí mɑc kí remø ceg-ɑ ì buk kì piny, kɑ ɑ́kyeel ɑ́dɑ̈ɑ̈g buddi piny órɑ̈bbø, kí ɑ́kyeel ɑ́dɑ̈ɑ̈g yenh kí lum-ɑ mɑr bëne. Kɑ ryeew wëywödd kɑnge kodhe, kɑ gïjø me ni kït me dwøng me lyel ɑ́ mɑc, pɑ̈dh-ɑ nɑɑm omelø. Kɑ ɑ́kyeel ɑ́dɑ̈ɑ̈g buddi nɑɑm omelø ree løge remø, kɑ ɑ́kyeel ɑ́dɑ̈ɑ̈g buddi gïg-ɑ nëënø kì nɑɑm omelø othøø, kɑ ɑ́kyeel ɑ́dɑ̈ɑ̈g buddi sɑpïnnì ótørrø. Codhe, kɑ dɑ̈ɑ̈g wëywödd kɑnge kodhe. Kɑ kyelø me dwøng me lyel ɑ́ mɑc ódëëmø kì mɑl, kɑ pɑ̈dh-ɑ kömi ɑ́kyeel ɑ́dɑ̈ɑ̈g buddi nɑ̈mm-ɑ rïngi geki nyingi pï. Kɑ pï ókënyø, kɑ ji mø gïïr nɑ̈g yi pïgɑni, mɑ́ ge keej. Kɑ ngween wëywödd kɑnge kodhe, kɑ ɑ́kyeel ɑ́dɑ̈ɑ̈g buddi cɑ̈ng, kí dwɑ̈y, kí kyell göjji muudhø, kɑ ɑ́kyeel ɑ́dɑ̈ɑ̈g buddi cɑɑr gen ólɑ̈ɑ̈nyø. Kɑ bong-ɑ cɑr kì ɑ́kyeel ɑ́dɑ̈ɑ̈g buddi wɑ̈r kí dicɑ̈ng. Kɑ wïjɑ tïngɑ, ɑlïdhɑ ki cor me pɑ̈rri kì mɑl, e óryeerø ki cwɑg mø døngø kinni, “Ryɑ̈g! Ryɑ̈g! Ryɑ̈g me dwøng pɑ̈dh-ɑ kömi tyëng-ɑ kömi piny, keny-ɑ ókoodh kɑ̈ngì yi wëywödd ɑ́dɑ̈g møg-ɑ ɑ́döng ge nuti kodh!” Kɑ bïïj wëywödd kɑnge kodhe. Kɑ yɑ ólïdhø ki kyelø me dëëm piny, kɑ mëggi muptɑɑ̀ mi ölø Kɑ dhø ölɑni yiebe, kɑ yïrø me ni yïri mɑc me dwøng bï-ɑ wɑ̈g kì kenyɑni. Kɑ cɑ̈ng ólunyø, kɑ piny ólunyø bëne yi yïr-ɑ kɑ̈ɑ̈l yij ölɑni. Kɑ bɑ̈nyø me ngenyø bï-ɑ wɑ̈g kì yij yïrɑni, kɑ wïj piny cyëge, kɑ nëngi ki tegø me ni teng-ɑ yï ïïdh. Kɑ bɑ̈nyø köbbi kinni, lum kí yenh, kí gïg mɑr ko nywɑl gen; de töngi gen ri tyëng-ɑ bøli gen nuti dïjjø ki ngïji Jwøk. Bɑ̈nyø nuti wëggi nɑ̈gi tyëngɑni, de ɑ́wëgg-ɑ buudhi köthi gen ki dwɑ̈tt ɑ́bïj, kɑ jiɑni ceg-ɑ orɑng de ge ce kɑ̈ɑ̈j-ɑ yi ïïdh. Kì yethi dwɑ̈tt ɑ́bïj møgɑni, jiɑni thøø óyɑb yi gen, de pɑ yod yi gen; ge ódwɑddi thøø, de thøø órengi kì yï gen. Kɑ bɑ̈nyɑni lidhɑ e nɑ kyënyì mø kedhi be liny; wɑ̈thi gen dɑ gïg mø ni yɑ̈rri dhɑb, o bølli gen nɑ bølli ji. Yëyyi wɑ̈thi gen nɑ yëyyi tyëng-ɑ mɑ̈nn, o leggi gen nɑ leggi ngurrì. Köthi gen bɑ ɑkum ki gïjø me ni ɑ́dhedheg ngyënyø dødø, o ywøøg obërri gen nɑ ywøøg tyelli yɑ̈ɑ̈th mø ngenyø, møg rengi be liny ge pyejj-ɑ yi kyënyì. Yï gen dɑ yëbb mø nyi kɑ̈ɑ̈j ni yëbbi ïïdh, yëbbɑni ɑ cööb gen ji ki dwɑ̈tt ɑ́bïj. Yï gen dɑ rɑ̈dh me jɑɑg gen, o rɑ̈nhɑni bene wëywön-ɑ mïdhi ölø. Nyinge cwøl ɑ́ Abɑdön kì dhøg Ibru; o cwøl ɑ́ Apølyøn (ɑ wɑngi Nɑ̈ɑ̈g) ki dhøg Yönɑn. Ryɑ̈ng-ɑ mɑl ɑ́pöödh; o bɑnge óbëën yi ryɑ̈gg ɑ́ryew mø pëddi rɑ̈jø. Kɑ bïkyeel wëywödd kɑnge kodhe. Kɑ yɑ olïngø ki cwɑg mø kɑ̈ɑ̈l wɑ̈thi tùngi këli lɑm-ɑ bɑ dhɑb, men-ɑ cungi kì bøli Jwøk. Kɑ bïkyeel wëywödd köbbi yi cwɑggɑni kinni, “Gøny wëywödd ɑ́ngwen møg-ɑ bɑ ɑmɑgg kì kömi Nɑm Porɑt!” Kɑ wëywöddɑni gøny; ge ɑ́mïdhi ceth gɑ møg nɑ̈g ɑ́kyeel ɑ́dɑ̈ɑ̈g kwɑnni ji kì kömi piny, kì sɑɑ̀ menɑni, kì cyɑ̈ngɑni, kì dwɑ̈yɑni, kì runɑni. Kɑ kwɑnni tyëng-ɑ kömi kyënyì köbbi yɑn; kwɑnni gen bɑ mïlyönn miy ɑ́ryew. Kɑ yɑ nyudhi kyënyì kí tyëng-ɑ kömi gen; köthi jøgɑni dɑ ɑ́dhedheg mø kwɑrø ni mɑc, kí ówɑw ni kïdi mɑl, kí óbwörø ni kibrït. Wɑ̈thi kyënyì nɑ wɑ̈thi ngurrì, o dɑ mɑc, kí yïrø, kí kïbrït mø kɑ̈ɑ̈l dhøggi gen. Kɑ ɑ́kyeel ɑ́dɑ̈ɑ̈g kwɑnni ji kì kömi piny, nɑ̈g yi ryɑ̈ggɑni gɑ ɑ́dɑ̈g; ɑ løg mɑc, kí yïrø, kí kïbrït møg-ɑ ɑ́kɑ̈ɑ̈l dhøggi kyënyì. Tegi kyënyɑni ɑ́ying-ɑ dhøggi gen kí yëbbi gen thyew. Yëbbi gen nɑ thöllì mø di wɑ̈ɑ̈th mø nɑ̈ɑ̈g gen ki ji. De tyëng-ɑ ɑ́döng ge nuti nɑ̈gø yi ryɑ̈ggɑni, nuti wïyø ki gïg-ɑ ɑ́gwøg yi gen ki cinggi gen; ge ɑ́cög ge mɑll-ɑ wëyrijjø, kí ngïjj-ɑ ógwøgø ki dhɑb, kí ɑ́tegø, kí dilɑl, kí kïttì, kí yenh; gen gïg-ɑ pɑ nëënø, o ge pɑ lïngø wɑlɑ̀ ge pɑ cyɑ̈dhi. Ge nuti yewø thyew kipe ji-ɑ ɑ́nɑ̈g yi gen; ge nuti wïyø ki thyëdh, o ge nuti wïyø ki wɑ̈dhi ri gen ki niin, wɑlɑ̀ ge nuti wïyø ki kwɑl. Kɑ yɑ ólïdhø ki wëywödø me teeg e bï-ɑ piny e orugø ki pøølø, o wïje dɑ órøngø, o bøle nɑ cɑ̈ng, o twel tyelle nɑ löjji mɑc ɑ́ryew. Ókɑ̈ddø ki wɑ̈ny-ɑ nyi bɑn me thiinh. Kɑ tyeli kyëje cïbe nɑɑm omelø, kɑ tyeli cɑɑme cïbe piny keny thwøwø. Aryeere ki cwɑg mø døngø ni ngɑ̈ri ngurrì, kɑ ɑtunnì ɑ́bïryew ólöggø ge ceg-ɑ ngɑ̈ɑ̈rø. Keny-ɑ ɑ́löggi gen ceth, kɑ riɑ timɑ kinni o yɑ di gwëdɑ, ɑlïngɑ ki cwɑg mø kööbø e kɑ̈ɑ̈l-ɑ mɑl kinni, “Kɑn møg-ɑ ɑ́kwøb yi ɑtunnɑni gɑ ɑ́bïryew; ge ko gweed piny!” Kɑ wëywön-ɑ ɑ́lidh yi yɑn e ócungø e tyelle kɑɑr en, ɑ́kyel ying-ɑ nɑɑm omelø, o ɑ́kyel ying-ɑ wɑ̈g, cinge tïnge mɑl, Kɑ óköngø ki nyingi ngɑn-ɑ nëënø gïti ɑtheer; ɑ ɑ́cwɑ̈j mɑl geki jɑmm-ɑ yije, kí piny geki jɑmm-ɑ yije. Wëywönɑni ɑ́köngi kinni, “Bong cwöngø këti! De bïryeew wëywödd keny-ɑ ókodhe kɑnge, gïg-ɑ ɑ́mïdhi yi Jwøk gɑ ɑkɑnn ógwøge, ni kɑ ɑ́köbbe gïn bɑ̈ngge, ɑ løg jøtöng.” Kɑ yɑ köbbi këti yi cwɑgg-ɑ kɑ̈ɑ̈l mɑl kinni, “Kedh, kɑ wɑ̈ny-ɑ bɑ ɑyieb kì cingi wëywön-ɑ cungi kì kömi nɑɑm omelø geki wɑ̈ng thwøwø kwɑɑny.” Akedhɑ yï wëywönɑni, kɑ nyɑ wɑ̈nyɑni cwølɑ kì yïe. Aköbbe yɑn kinni, “Kwɑɑny kɑ cɑɑm; ókënyi kì yijí, de óbëëdø e med ni møøw kïc kì dhøgí.” Kɑ nyɑ wɑ̈nyɑni kwɑnyɑ kì cinge, ɑkïdhɑ en dhøgɑ, kɑ ceg-ɑ gwøg e med ni møøw kïc kì dhøgɑ. De keny-ɑ ɑ́mwønyɑ en, kɑ ceg-ɑ gwøg e keej cɑrø kì yijɑ. Codhe, ɑköbbi yɑn kinni, “Cigí wööni Jwøk töngø, eni wöön-ɑ kööbø kì ri pödhh, kí jurrì, jur ki dhøge, kí rɑ̈nhì.” Kɑ gïjø me ni thyɑng-ɑ nyi rum mëggi yɑn, kɑ yɑ köbbi kinni, “Dhwöödh, røm kengi Jwøk geki këli lɑm. Kɑ tyëng-ɑ nyi mɑlli Jwøk kì kenyɑni kwɑɑn. De ódɑ̈r-ɑ wɑ̈g ko røm, mɑ́ e ɑ́mëgg-ɑ jurr-ɑ kyeelø, o Kɑɑl Kwër ónyøn yi gen ceth ki dwɑ̈tt pyɑ̈r ɑ́ngwen wïdɑ́ryew. Cwɑ̈ggɑ gɑ ɑ́ryew óör yi yɑn ge rug-ɑ ocwɑ̈llì, o wööni Jwøk ókɑ̈lli yi gen kì yethi cyɑ̈nggɑni gɑ ɑ́lïp kí miy ɑ́ryew kí pyɑ̈r ɑ́bïkyel.” Cwɑ̈ggɑni ryeet bɑ yenh dhetun ɑ́ryew, kí lɑ̈mbɑ̈ɑ̈ ɑ́ryew møg-ɑ cungi kì bøli Wïi piny. Ke di ngɑn dwɑddi göggi gen ki gïnrɑj, mɑc óbï wɑ̈g kì dhøggi gen kɑ tyëng-ɑ mɑɑn gen nɑ̈g gen. O ngɑn dwɑddi göggi gen ki gïnrɑj nɑ̈g kɑ yuu-ɑ ni menɑni ceth. Yï gen dɑ tegø men cyëëg gen mɑl, o bongii kødh me mɑ̈gi kì yethi cyɑ̈ngg-ɑ ótööng gen. O yï gen dɑ tegø me løg gen pï remø, o piny ócuggø göjji wïj ryɑ̈g bëne yi gen ni kɑ̀ dwɑddii yi gen. Keny-ɑ órum cwɑ̈ggɑni ki töng, kɑ lɑ̈y-ɑ rɑj bï-ɑ wɑ̈g kì yij ölø, kɑ ónyïɑ̈ggø ki gen. Gï ótyɑme kɑ gï nɑ̈ge, kɑ ge obuddø ge thøø kì yij yöö kì kɑɑldwøng, keny-ɑ ɑ́gur Wïi gen wïj yɑdh ɑrïw kɑ othøø. Nyingi ɑngølli kɑɑlɑni bɑ Sødømɑ̀, wɑlɑ̀ Rïp. Ge óbuud ge thøø kinøw ki cyɑ̈ng ɑ́dɑ̈g kí budø, o ge nenni yi tyëng pödhh bënn, kí jurrì bënn, jur ki dhøge, o ge koo wëggi konyø. Tyëng kömi piny pëthi gen ómïni kì bɑng thøwi jøgɑni ryeet. Ge óceg tugø kɑ ri gen nëngi gen ki jɑmmi medi pëëth, mɑ́ kömi piny ɑ́muuj ki orɑng yi jøtöngɑni ryeet. Kì bɑng thumi cyɑ̈ng ɑ́dɑ̈g kí budø, kɑ yømi wëy kedh-ɑ ri gen, e kɑ̈ɑ̈l-ɑ yï Jwøk, kɑ ge dhwödh-ɑ kömi tyelli gen; kɑ tyëng-ɑ ɑ́lidh gen bënn ceg-ɑ bwøgø ki mendwøng. Kɑ jøtöngɑni ryeet olïngø ki cwɑg mø døngø, mø kɑ̈ɑ̈l mɑl e okööbø kinni, “Bïu mɑl keny!” Kɑ ge kedh-ɑ mɑl kì yij pøølø, ge onennø yi tyëng-ɑ mɑɑn gen. Kɑ piny okïïrø ki mendwøng kì bøli kenyɑni ceth; kɑ ɑ́kyeel pyɑ̈ri buddi kɑɑl ópɑ̈ɑ̈dhø, kɑ ji ɑ́lïp ɑ́bïryew othøø, kɑ teen-ɑ ɑ́döng obwøgø, ɑcɑ̈gi gen ki lenhi Jwøøg mɑl. Ryeew ryɑ̈gg ɑ́pöödh, de dɑ̈ɑ̈g gen ójwɑn bëënø. Kɑ bïryeew wëywödd kɑnge kodhe. Kɑ cwɑg mø døngø lïngi ge kɑ̈ɑ̈l-ɑ mɑl ge okööbø kinni, “Teng-ɑ jɑɑg lɑ̈bø ɑnɑn, bɑ mi Wë geki Mesiy, o ójyɑ̈ɑ̈gø gïti ɑtheer!” Kɑ jøgdøngø gɑ pyɑ̈r ɑ́ryew wïdɑ́ngwen, møg-ɑ bëëdø kì bøli Jwøk kì wɑ̈thi kwømmi gen, ri gen bøødh gen piny, kɑ Jwøk mɑl yi gen, ge okööbø kinni, “Wuö Jwøk Áyïmø, yï nud ɑnɑn, o yï ɑ́wön ɑ weenø! Wø pwøj-ɑ yïn kipe kɑ ɑ́kwɑɑny rɑ̈ɑ̈dhø, kɑ yï ócɑ̈gø ki jyɑ̈gø. Tyëng-ɑ pɑ wør Jwøk ɑ́mɑg yi liny, mɑ́ bøli keny-ɑ mɑɑg yïn yi liny ɑ́bï; eni bøli keny-ɑ løøg kwøbbi tyëngthøø. Bøli keny-ɑ køøg bɑ̈nggí jøtöng ɑ́bï, geki jií bënn; gen ɑ tyëng-ɑ ɑ́wør yïn bënn, møg-ɑ døngø kí møg-ɑ thønhø. Bøli keny-ɑ nɑ̈ɑ̈g tyëng-ɑ nɑ̈g piny ɑ́wɑ̈nhi!” Kɑ kengi Jwøk ree yiebe, kɑ Sɑnduug Cigg ónënnø. Kɑ mɑl ogwelø kɑ opödø, kɑ piny okïïrø, kɑ ɑtuni ɑ́piy ceg-ɑ ì buk kì kömi piny. Kɑ gïjø me dwøng me bɑ gïïngɑ̈ngø ocwöbø kì mɑl; ngɑndhɑjø me rug cɑ̈ng, o dwɑ̈y ying-ɑ thɑ́ tyelle, o wïje dɑ yɑ̈r mɑ lwøøb kyell pyɑ̈rø wïdɑ́ryew. Ngɑnɑni ceg-ɑ pɑ̈dhi piny, de óywöngø yi ledhi dhø pɑ̈dhi piny. Kɑ gïïngɑ̈ngø megø ocwöbø kì mɑl; nɑ̈ɑ̈ynyɑng me dwøng, me bɑ didïgø, o wɑ̈the bɑ ɑ́bïryew kí tùng pyɑ̈rø, wɑ̈thɑni dɑ yɑ̈rr bënn. Kɑ ɑ́kyeel ɑ́dɑ̈ɑ̈g buddi kyell ywɑɑje piny ki yëbe. Kɑ nɑ̈ɑ̈ynyɑng ócungø kì bøli ngɑnɑni, e yïd-ɑ bëëni dhɑnhø wɑ̈g, o gø di mwønye kì ri nywøle ceth. Kɑ ngɑnɑni pɑ̈dh-ɑ piny ki wɑ̈d; o bene wɑ̈nɑni ɑ ójɑɑg pödhh bënn ki lodh mɑ ngyënyø dødø kì cinge. De wɑ̈de ɑ́gwɑr yi Jwøk, kɑ kïdhi kwøøm Jwøk. Kɑ ngɑnɑni reng-ɑ be pɑ̈nø pɑ̈l, kì keny mɑ ɑ́rum ki pyëlø yi Jwøk, o ókɑ̈lli kì kunɑni ki cyɑ̈ngg-ɑ bɑ ɑ́lïp kí miy ɑ́ryew kí pyɑ̈r ɑ́bïkyel. Kɑ liny ótuumø kì mɑl; Mikɑil geki wëywödde ge ɑ́nyïɑ̈ggi ki nɑ̈ɑ̈ynyɑng geki wëywödde. Kɑ nɑ̈ɑ̈ynyɑng tyɑm, kɑ cyeddi kì mɑl geki wëywödde. Kɑ nɑ̈ɑ̈ynyɑng gïn ditïngdïr ópɑ̈ɑ̈dhø kì mɑl; en ɑ thwöl-ɑ kɑ̈ge dööng, ɑ cwøl ɑ́ Ngɑnrɑj wɑlɑ̀ Cethɑn; ngɑn-ɑ ɑ́wëny lɑ̈bø bëne; ɑ́pɑ̈ɑ̈dh geki wëywödde. Kɑ yɑ olïngø ki cwɑg mø døngø ge kɑ̈ɑ̈l-ɑ mɑl, ge okööbø kinni, “Jwøk ɑ́yïëëd dicyɑ̈ngtïn! Jwøk ree ɑ́nyodhe kinni bɑ rɑ̈dh ki tegø me dwøng! Mesiy men-ɑ ɑ́yienye jyɑ̈ge ɑ́nyodhe! Mɑ́ ngɑn-ɑ ɑ́bëëd e nyi gøøny-ɑ nyiimïee kì bøli Jwøgee, kì wɑ̈r kí dicɑ̈ng ɑ́rum ki leeng piny. Átyɑm yi nyiimïee ki remi Órömø, kí dyër men-ɑ ɑ́kømmi yi gen; o ge ɑ́ceg-ɑ böyø ki muuji wëyi gen; ge nuti böggø ki thøø. Kɑ pyëwí mïne yïn ɑ mɑl, kí tyëng-ɑ bëëdø kì yijí. Cyën ying-ɑ kömí yïn ɑ piny, wuki nɑɑm omelø! Mɑ́ Ngɑnrɑj ɑ́bï piny yï wun, o bï pyëwe rɑɑj ki mendwøng, mɑ́ e ngɑ̈ny wøw kinni cyɑ̈ngge ɑ́döng ge nøg.” Kɑ ɑ́yodii yi nɑ̈ɑ̈ynyɑng kinni ɑ́leeng piny, ɑcɑ̈ge ki guudi wɑɑng ngɑndhɑjø men-ɑ ɑ́pɑ̈dhi piny ki wɑ̈de, wɑ̈n-ɑ kɑyø. Kɑ ngɑnɑni nëngi ki obërri cor mø døngø, o gï pɑ̈ɑ̈re keje kì yij pɑ̈l; kun bëëde e okorrø kipe nɑ̈ɑ̈ynyɑng ki runn ɑ́dɑ̈g kí budi run. Kɑ nɑ̈ɑ̈ynyɑng ongøgø ki pï mø gïïr, kipe kinni o ngɑnɑni di mude. De ngɑnɑni ɑ́yiel yi piny; piny dhøge ɑ́yiebe, kɑ nɑm-ɑ ɑ́cøør piny yi nɑ̈ɑ̈ynyɑng kì dhøge mwønye. Kɑ nɑ̈ɑ̈ynyɑngɑni mɑg yi liny ki mendwøng ki ngɑnɑni. Kɑ kedh-ɑ be nyɑɑg ki kwɑrri ngɑnɑni; gen ɑ tyëng-ɑ mïdhi ciggi Jwøk, kɑ kwøbbi Yëso nyi töng yi gen. Kɑ nɑ̈ɑ̈ynyɑngɑni ócungø kì kömi nɑɑm omelø. Kɑ lɑ̈y megø lidhɑ e kɑ̈ɑ̈l-ɑ nɑɑm omelø. Lɑ̈yɑni yïe dɑ tùng pyɑ̈rø, kí wɑ̈ɑ̈th ɑ́bïryew, wɑ̈thi tùngɑni dɑ yɑ̈r; ɑ́kyel kì wïj tung; o dɑ nying møg-ɑ ógweed ri wɑ̈the; wïj ɑ́kyel dɑ nying; o nyingɑni gwɑɑd-ɑ Jwøk. Lɑ̈yɑni nënni e nɑ kwej, o tyelle nɑ tyelli løny dub, o dhøge nɑ dhøg ngur. Kɑ nɑ̈ɑ̈ynyɑng tege mëgge lɑ̈yɑni, kí kwøme kí lɑw-ɑ jɑɑge. Wïje ɑ́kyel ɑ́nënni ree dɑ kedø me dwøng cøn, kɑ kenɑni jwɑn-ɑ nøggø, kɑ piny ongɑ̈ngø bëne. Kɑ teedø bënn løg-ɑ bɑng lɑ̈yɑni. Kɑ nɑ̈ɑ̈ynyɑng mɑl yi teedø kipe kɑ ɑ́mëgge lɑwe lɑ̈yɑni. Amɑlli gen lɑ̈yɑni, kɑ ge okööbø kinni, “Á men ɑ pɑ̈r ki lɑ̈y? Wɑlɑ̀ ɑ́ men ɑ ócuggi nyɑɑg ki en?” Lɑ̈yɑni ɑ́ceg kɑ wiyø o gwɑdde Jwøk ki tɑ̈dø, kɑ nëngi ki tegø me jyɑ̈ɑ̈ge ki dwɑ̈tt pyɑ̈r ɑ́ngwen wïdɑ́ryew. Kɑ ócɑ̈gø ki gwɑddi Jwøk, kí nyingi Jwøk, kí keny-ɑ bëëd yi Jwøk, kí teen-ɑ bëëdø kì mɑl bënn. Kɑ lɑ̈yɑni óyïddø ki keny nyïɑ̈gge ki jii Jwøk, kɑ gï tyɑme, kɑ óyïddø tegø men jɑɑge jurrì bënn, kí pödhh bënn, kí wïj dhɑnhø bëne, men ki dhøge. Kɑ mɑlli yi jii kömi piny bënn; gen ɑ tyëng-ɑ nyingi gen nuti gweed yij wɑ̈nyi nënnì kì ri cɑ̈gi lɑ̈bø; ɑ løg wɑ̈nyi Óröm-ɑ ɑ́nɑ̈g. “Lïng wun cyee, keløg yï wun dɑ yïthh! Ngɑn-ɑ ógwedø ɑ́ men mɑg, ceg kɑ mɑgø; ngɑn-ɑ ógwedø ɑ́ men nɑ̈g ki pilø, ceg kɑ nɑ̈gø. Menɑni wɑng-ɑ kinni ngïïn tyëng kwërø kɑ yïëyø mi gen mïdhi gen.” Codhe, kɑ yɑ ólïdhø ki lɑ̈y me bï wɑ̈g kì piny. Lɑ̈yɑni wïje dɑ tùng ɑ́ryew mø ni tùngi órömø. De okööbø ni nɑ̈ɑ̈ynyɑng. Kɑ lɑwi lɑ̈ɑ̈y tyeli mɑl kwɑnye e nud. Kɑ piny bëne cïrre mɑlli lɑ̈ɑ̈y tyeli mɑl, lɑ̈y-ɑ ɑ́bëëd ree dɑ kedø me dwøng. Kɑ ogöögø ki gïïngɑ̈ngø mø døngø, kɑ kɑ̈n-ɑ piny ki mɑc, mɑc kɑ̈ɑ̈l-ɑ mɑl kì bøli ji bënn. Kɑ jii kömi piny thɑbe ki ngïjj-ɑ gøgge ki teng-ɑ ɑ́yode kì yï lɑ̈ɑ̈y tyeli mɑl. Kɑ jii kömi piny köbbe kinni göggi lɑ̈ɑ̈y tyeli mɑl ki ngïji; eni lɑ̈y-ɑ́ ree ɑ́di kedi pilø, de ɑ́cög e nuti nɑ̈gø yi kenɑni. Kɑ thödhi ki tegø men kudhe ri ngïji lɑ̈yɑni ki wëy, kɑ ngïji menɑni okööbø, kɑ nëngi ki tegø men cugge nɑ̈gi tyëng-ɑ pɑ mɑlli ngïji lɑ̈yɑni. Kɑ ji bënn; othønhø kí tyëngdøngø, tyëngkɑ̈rì kí tyëng-ɑ jɑdø, kí bɑ̈ngg, kí ji-ɑ bëëd wɑ̈thi gen, gï cire kinni o cinggi gen wɑlɑ̀ bøli gen kïdhi ki ngïji. Bong ngɑn cuggi ngyew ki gïïpiny, o bong ngɑn cuggi ngëwwi wɑ̈g keløg ree bong ngïji menɑni. Ngïji menɑni bɑ nyingi lɑ̈yɑni, wɑlɑ̀ kwɑnn-ɑ cungi ɑ́ kej nyingɑni. O møgɑni dwɑdd-ɑ peli wïj. Ngɑn wïje pel, ócuggø ki yodi gïn-ɑ wɑngi yi kwɑnn-ɑ bɑ kej nyingi lɑ̈yɑni, mɑ́ kwɑnnɑni cungi ɑ́ kej nyingi dhɑnhø. Bɑ kwɑn miy ɑ́bïkyel kí pyɑ̈r ɑ́bïkyel wïdɑ́bïkyel. Kɑ wïjɑ tïngɑ, ɑlidhɑ Órömø, e ócungø kì wïj Kïti Dhɑyøn, bute dɑ ji mø bøli gen di ngïje geki ngïji Wïye; jiɑni kwɑnni gen bɑ ɑ́lïp miyø kí pyɑ̈r ɑ́ngwen wïdɑ́ngwen. Kɑ yɑ olïngø ki cwɑg mø kɑ̈ɑ̈l mɑl, ge ruur nɑ pï kenyi rengi gen piny kì wïj kït, wɑlɑ̀ ge nɑ mɑl kenyi mɑ̈ɑ̈re, o nɑ ywøøg thøm kì tung-ɑ kyeelø. Kɑ ji-ɑ bøli gen di ngïji Jwøk owörø ki wörø me nyɑ̈n kì bøli Jwøk geki gïg nëënø gɑ ɑ́ngwen. De bong ngɑn cuggi dïdi wörɑni, den-ɑ́ jøgdøng-ɑ kwɑnni gen bɑ ɑ́lïp miyø kí pyɑ̈r ɑ́ngwen wïdɑ́ngwen ɑ ɑ́dïdii. Bene gen ɑ ɑ́døm keti gen. Jøgɑni bɑ gen ɑ ɑ́mïdhi ri gen ge dhïw; ri gen nuti ywëëdh gen ki niin ki mɑ̈nn; Ge lug-ɑ́ɑ̀ bɑng Órömø kì kɑ̈jj-ɑ cyɑ̈dhe bënn. Gen ɑ ɑ́døm kì kelli ji bënn, o bene gen ji-ɑ ɑ́kwøng ki mëggi Jwøk geki Órömø. Bong kwøbbi pyed mɑ ɑ́yod kì dhøggi gen, wɑlɑ̀ kömi gen bong cɑ́y. Kɑ yɑ ólïdhø ki wëywödø megø e ópɑ̈rrø kì dïmɑl. Kɑ̈ll-ɑ Wöndøj men gïti ɑtheer, men muuje dhɑnhø bëne kì kömi piny. Wëywönɑni ceg-ɑ ryeerø ki cwɑg mø døngø kinni, “Wøru Jwøk kɑ dönge lejji wun! Mɑ́ bøli keny-ɑ lidhe gønyy ɑ́wɑ̈nhi. Mɑllu ngɑn-ɑ ɑ́cwɑ̈j mɑl kí piny, kí nɑɑm omelø, kí nyingi pï!” Kɑ wëywödø megø obëënø, kɑ okööbø kinni, “Ápɑ̈ɑ̈dh! Ápɑ̈ɑ̈dh! Kɑɑldwøng Bɑbïl ɑ́pɑ̈ɑ̈dh! Ji bënn ɑ́cïre mɑdh ki møgi oløge, eni møgi orøge møng-ɑ keej.” Kɑ dɑ̈ɑ̈g wëywödd obëënø e ócwöddø kinni, “Ngɑn-ɑ mɑlli lɑ̈y geki ngïje, kɑ ree kïdhi ki ngïji lɑ̈yɑni kì cinge wɑlɑ̀ bøle, ceg-ɑ mɑ̈dhø ki møgi rɑ̈ji pyëw Jwøk, møng-ɑ keej! Tyëng-ɑ ɑ́göög ki gïn ni menɑni ge ceg kɑ göjji orɑng yi mɑc, kí kïbrït, kì bøli wëywöddi kwërø geki Órömø. O yïri mɑny-ɑ rɑ̈b gen ócög e pïdh-ɑ mɑl gïti ɑtheer. Bong ywömø me yod kì wɑ̈r wɑlɑ̀ dicɑ̈ng, yi tyëng-ɑ mɑlli lɑ̈y geki ngïje; gen ɑ tyëng-ɑ ri gen di ngïji lɑ̈yɑni.” Menɑni wɑng-ɑ kinni ngïïn jii Jwøk, gen ɑ tyëng-ɑ mïdhi Ciggi Jwøk, e Yëso yïëëy gen kidøøj. Kɑ cwɑg møgø lïngɑ ge kɑ̈ɑ̈l-ɑ mɑl, ge okööbø kinni, “Gwed møg: tyëng-ɑ thøw ge gögg-ɑ Wë ri gen dɑ gyëdh!” Kɑ Wëy ólöggø kinni, “Ngee bɑ dyër! Ri gen óywöm yi gen ki gwøg, mɑ́ köggi gwøøg gen cøn cyɑ̈dhi kɑ gen.” Kɑ wïjɑ tïngɑ, ɑlïdhɑ ki pøølø me tɑr. Kömi pøølɑni obëëdø yi gïjø me ni dhɑnhø, me wïje di yɑ̈ɑ̈r dhɑb, o cinge dɑ ɑ́ngön me bedh. Kɑ wëywödø megø bï-ɑ wɑ̈g kì kengø. Kɑ ngɑn-ɑ bëëdø kì kömi pøølɑni köbbe kinni, “Mɑg ɑ́ngön kɑ yï nyɑ̈ɑ̈r. Piny ɑ́cyeg, o bøli kej nyɑre ɑ́wɑ̈nhi!” Kɑ ngɑn-ɑ ɑ́bëëd kì kömi pøølø ɑ́ngöne leenge piny, kɑ piny nyɑre. Kɑ wëywödø megø bï-ɑ wɑ̈g kì yij keng-ɑ mɑl, e cinge dɑ ɑ́ngön me bedh thyew. Kɑ wëywödø men-ɑ mïdhi mɑc, bï-ɑ wɑ̈g kì këli lɑm, kɑ wëywön-ɑ cinge di ɑ́ngön-ɑ bedh köbbe ki cwɑg mø døngø kinni, “Mɑg ɑ́ngön kɑ yï nyɑ̈ɑ̈r, nyɑr oløg kì yethi bɑ̈gg kì kömi piny, mɑ́ oløg ɑ́cyeg!” Kɑ wëywönɑni ɑ́ngöne leenge piny, kɑ oløg nyɑɑre piny kì yethi bɑ̈gg, kɑ gø leenge yij buur bïjø mi liny Jwøk, bur-ɑ dwøng. Kɑ oløg bij kì yij bur kì ngɑ̈ɑ̈j kɑɑl, kɑ remø rïng-ɑ wɑ̈g kì yij burɑni, ɑ́ bɑɑyø, döre bɑ mïtïr ɑ́ryew, o bɑ̈re bɑ kïlomïtïr miy ɑ́dɑ̈g. Kɑ yɑ ólïdhø kì mɑl ki gïïngɑ̈ngø megø; bɑ ngïji me dwøng. Yɑ ɑ́lidh-ɑ wëywödd ɑ́bïryew mø kɑ̈ddi ki ryɑ̈gg ɑ́bïryew, o bene gen ryɑ̈gg-ɑ cyɑ̈n, mɑ́ gen ɑ tyëg rɑ̈ji pyëw Jwøk. Kɑ yɑ ólïdhø ki nɑɑm omelø me pïge bɑ ɑdhɑ̈nh-ɑ ólenyø, kí mɑc. Kɑ tyëng-ɑ ɑ́tyɑm lɑ̈y kí ngïje, kí kwɑnn-ɑ cungi ɑ́ kej nyinge, lidhɑ ge ócungø kì kömi nɑɑm ɑdhɑ̈dh menɑni, yï gen dɑ thømi Jwøk, ge owörø ki wöri Mosɑ̀, bɑ̈ng Jwøk, kí wöri Órömø kinni, “Wuö, Jwøk Áyïmø, yï gøgg-ɑ gïgdøngø mø bɑ gïïngɑ̈ngø! Yï bɑ rɑ̈ɑ̈dh pödhh; yëthí bɑ dyër o ge bɑ óbödh! Á men ɑ koo böggi yïn Wuö? Á men ɑ koo lejji yïn? Yï ketí ɑ bɑ kwërø. Pödhh bënn óbï, kɑ yï mɑlli yi gen, mɑ́ gïg-ɑ dyër møg-ɑ gøggí onennø yi dhɑnhø bëne.” Codhe, ɑtïngɑ wïjɑ, kɑ kengø lidhɑ ɑ́ ɑyieb kì mɑl, ki Kemi Kwër kì yije. Kɑ wëywödd ɑ́bïryew møg-ɑ kɑ̈ni kömi piny ki ryɑ̈gg ɑ́bïryew, bï-ɑ wɑ̈g kì kengø, ri gen dɑ ógudhi kor-ɑ yöm mø ceg rɑ̈ɑ̈dø, o ɑ́ngɑddi gen dɑ wënni dhɑb. Kɑ wëywöddɑni nëngi ki tɑ̈mmi dhɑb ɑ́bïryew yi ɑ́kyel kì kelli gïg nëënø ɑ́ngwen; tɑ̈mmɑni pɑ̈ng yi liny Jwøk, ngɑn-ɑ nëënø gïti ɑtheer. Kɑ yij kengø opɑ̈ngø yi yïri mɑ̈ɑ̈r Jwøk geki tege; o bong ngɑn cuggi kedhi kengø, pïd keny-ɑ óthumi ryɑ̈gg ɑ́bïryew møg-ɑ kɑ̈lli yi wëywöddɑni gɑ ɑ́bïryew. Kɑ cwɑg mø døngø lïngɑ ge kɑ̈ɑ̈l-ɑ yij kengø, ge köbb-ɑ wëywöddɑni kinni, “Kedh wun, kɑ gïg-ɑ yethi tɑ̈mmi liny Jwøk, køny wun kömi piny!” Kɑ wëywön-ɑ mɑl kì kelli gen ókedhø, kɑ tɑbe kønye piny. Kɑ tyëng-ɑ ri gen di ngïji lɑ̈y; ɑ nyi mɑllii dëlli gen mɑg yi bør mø rijjø. Kɑ ryeew wëywöddɑni, tɑbe kønye nɑɑm omelø, kɑ pï ri gen løg gen remø, kɑ gïg-ɑ nëënø kì nɑɑm omelø othøø bënn. Kɑ dɑ̈ɑ̈g wëywödd, tɑbe kønye yethi nɑ̈mm-ɑ rïngi geki yïïth, kɑ pïi gen ogöögø ki remø thyew. Kɑ wëywön-ɑ mïdhi pï lïngɑ e okööbø kinni, “Wuö, yï bɑ kwërø, o cɑ́y-ɑ ɑ́muuj yi yïn bɑ dyër, yïn ɑ nud ɑnɑn, o yï ɑ́wöni yï nud! Remmi jii Jwøk geki remmi tyëngtöng ɑ́nyïɑ̈ɑ̈g piny yi gen, bene ɑ bɑnge mëggí gen remø o gø mɑdh gen. Ge kwɑny-ɑ köögi men-ɑ kyëëw ki gen.” Kɑ cwɑg møøgø lïngɑ ge kɑ̈ɑ̈l-ɑ këli lɑm, ge okööbø kinni, “Wuö Jwøk Áyïmø! Cɑ́yí bɑ dyër, o yethi gen bong ruj!” Kɑ ngween wëywöddɑni tɑbe kønye kömi cɑ̈ng, kɑ cɑ̈ng göjji rɑ̈bi ji. Kɑ ji rɑ̈b yi lëdhi cɑ̈ng, kɑ Jwøk ngɑn-ɑ ɑ́kɑ̈ɑ̈l ryɑ̈ggɑni gwɑddi gen. De ge nuti yewø ki orøøg gen, wɑlɑ̀ Jwøk nuti lenhi gen. Kɑ bïïj wëywödd tɑbe kønye wïj kwøøm lɑ̈yɑni. Kɑ muudhø ceg-ɑ ì bïp kì kömi pödhe, kɑ ji lebbi gen kɑ̈ɑ̈j gen yi gööj rɑ̈ɑ̈m dëlli gen. Kɑ Jwøk gwɑddi gen, kipe kɑ̀ rɑ̈ɑ̈m dëlli gen, kí bør-ɑ ri gen. De ge nuti wïyø ki gøggi rɑj. Kɑ bïkyeel wëywödd tɑbe kønye Nɑm Porɑt. Kɑ nɑmɑni othwøwø, o rɑ̈nhi wɑɑng cyɑ̈ɑ̈ng mwøl thödhe yöö men bëën gen. Kɑ wëyrijjø ɑ́dɑ̈g mø ni ógwɑ̈llì lidhɑ; ɑ́kyel kɑ̈ɑ̈l-ɑ dhøg nɑ̈ɑ̈ynyɑng, ɑ́kyel kɑ̈ɑ̈l-ɑ dhøg lɑ̈y, o dɑ̈ɑ̈g gen kɑ̈ɑ̈l-ɑ dhøg jɑltööng pyed. Wëyɑni bɑ wëyrijjø mø göögø ki gïïngɑ̈ngø, kɑ ge nyi kedh-ɑ yï rɑ̈nhi kömi piny bënn, ge cong-ɑ liny kipe cyɑ̈ng-ɑ dwøng, Cyɑ̈ɑ̈ng Jwøk Áyïmø. “Lïng wun! Yɑ obëënø ni kenyi bëën kur! Ngɑn-ɑ óbëëdø e pɑ nin, o ógudhe okorø yi en, ree dɑ gyëdh, kipe ócyɑ̈dhi nøw kì bøli teedø, kɑ oyɑ̈rø.” Kɑ rɑ̈nhì cøng yi wëyɑni, kì keny-ɑ cwøl ɑ́ Armɑjedön ki dhøg Ibru. Kɑ bïryeew wëywöddɑni tɑbe kønye yij yømø. Kɑ cwɑg mø døngø obëënø ge kɑ̈ɑ̈l-ɑ ri kwøm kì yij kengø, ge okööbø kinni, “Árum ki gwøgø!” Kɑ mɑl ogwelø, kɑ opödø, kɑ piny okïïrø ki mendwøng; piny nuti pɑ̈nyi kïïrø kinøw, kër-ɑ ɑ́cwɑ̈ɑ̈j ji. Kɑ kɑɑldwøng ópyëdø ɑ́ ɑ́dɑ̈g, kɑ kɑ̈ddi pödhh-ɑ kyeelø ópɑ̈ɑ̈dhø. Kɑ kɑɑldwøng Bɑbïl pɑr yi Jwøk, ɑwëgge gøn mɑ̈dhø ki óthɑ̈ngi linye, liny-ɑ keej. Kɑ muj ólɑ̈ɑ̈nyø bënn, kɑ kïttì ólɑ̈ɑ̈nyø thyew. Kɑ ɑtuni ɑ́piy me dwøng ódëëmø; pegi wɑɑng ɑ́piy ɑ́kyel bɑ kïllì pyɑ̈r ɑ́bïj, kɑ Jwøk gwɑddi yi ji kipe ryɑ̈ng-ɑ dwøng, ɑ pëddi rɑ̈jø ni menɑni. Codhe, kɑ wëywödø ɑ́kyel kì kelli ɑ́bïryew møg-ɑ mïdhi ki tɑ̈mmì, bï-ɑ yïɑ, kɑ yɑ köbbe kinni, “Bïí bɑngɑ, o yï nyudhɑ cɑ́y-ɑ ócɑɑy ngɑn nyi niin ki köögi; eni kɑɑl-ɑ dwøng, ɑ ógeer buti nɑ̈mm-ɑ gïïr. Mɑ́ rɑ̈nhi kömi piny bënn nyii göögø ki orøg ki en. Kɑ ge nyi nɑ̈g yi møgi oløg men-ɑ nyi mɑdh yi gen kì bute.” Kɑ yɑ kïdhi yij pɑ̈l yi Wëy. Kɑ yɑ ólïdhø ki ngɑndhɑjø me bëëdø kì kömi lɑ̈y mɑ didïgø me köme ógwedø bëne ki nying mø gwɑddi Jwøk. Lɑ̈yɑni yïe dɑ wɑ̈ɑ̈th ɑ́bïryew kí tùng pyɑ̈rø. Ngɑnɑni ɑ́rug-ɑ ógødh me bɑ ɑ́cwïcwïl, kí kïddì mø kwɑrø. Cingge dɑ yëlli dhɑb, o yedhe dɑ tigg mø ngewi gen teeg. O cinge dɑ óthɑ̈ngi dhɑb, me pɑ̈ng yi jɑmm-ɑ nyi lwɑ̈ɑ̈nge ki ji. O bøle ógwëdø ki nying me di kwøbb-ɑ ɑkɑnn, mø wɑngi kinni, “Bɑbïl, meyi tyëng-ɑ nyi niin ki köögi, o bene ngɑn-ɑ rënyi lɑ̈bø.” Kɑ ngɑnɑni lidhɑ e mɑdh-ɑ remmi jii Jwøk, møg-ɑ ɑ́nɑ̈g kipe kɑ ɑ́yïëy gen Yëso. Kɑ yɑ ceg-ɑ tyɑɑjø keny-ɑ ɑ́lidhɑ ngɑnɑni. Kɑ yɑ köbbi yi wëywönɑni kinni, “Yïde ɑ tyɑɑj! Yï ónyudhɑ gïn-ɑ wɑngi yi ngɑnɑni geki lɑ̈y-ɑ köme bëëde, ɑ yïe di wɑ̈ɑ̈th ɑ́bïryew kí tùng pyɑ̈rø. Lɑ̈y-ɑ ɑ́lidh yi yïn ɑ́bëëd e nud cøn, de pɑ nudd e nud. Óbï wɑ̈g kì yij ölø kì bɑng nyɑ keny me thiinh, codhe o kedhe kun thøwe. O tyëng kömi piny møg-ɑ nyingi gen nuti gwedø cøn kì yij wɑ̈nyi nënnì ótyɑɑj keny-ɑ ólidh gen lɑ̈yɑni. Ábëëd e onëënø; o pɑ nudd e onëënø ɑnɑn, de ódøøg ki cwöbø. “Møgɑni dwɑdd-ɑ peli wïj kí dïdø. Wɑ̈ɑ̈th ɑ́bïryew bɑ kïtt-ɑ thønhø ɑ́bïryew møg-ɑ kömi gen bëëd yi ngɑnɑni. Ge bɑ rɑ̈nhì ɑ́bïryew thyew. Ábïj kì kelli gen ɑ́rum ki pɑ̈ɑ̈dhø, o ɑ́kyel nudd e ojyɑ̈gø; o ɑ́kyel nuti bëënø, o koo mɑ̈gi ki keny me bɑ̈ɑ̈r keny-ɑ óbëëne. O lɑ̈y-ɑ ɑ́bëëd e onëënø, o pɑ nudd e onëënø, ceg bëëdø ɑ́ bïdɑ̈ɑ̈g rɑ̈nhì møgɑni gɑ ɑ́bïryew, o kedh-ɑ kun thøwe. “Tùng pyɑ̈rø møg-ɑ ɑ́lidh yi yïn, bɑ rɑ̈nhì pyɑ̈rø mø nuti cɑ̈gø jyɑ̈gø. De ge ówiy o ge jyɑ̈ɑ̈g gen ki sɑɑ̀ ɑ́kyel, kyeel geki lɑ̈y. Pyɑ̈rø møgɑni bënn ködd-ɑ kömi gïjø ɑ́kyel, o lɑ̈wwi gen ómëggi gen lɑ̈y. Ge ónyïɑ̈ggi ki Órömø, de ge ótyɑm yi Órömø geki ji-ɑ ɑ́yieny gɑ møge, ɑ ɑ́yïëyii; mɑ́ e bɑ Wïi wëëg, o bɑ Rɑ̈ɑ̈dh rɑ̈nhì.” Kɑ yɑ köbbi yi wëywönɑni kinni, “Nɑ̈mm-ɑ ɑ́lidh yi yïn, møg-ɑ buti gen bëëd yi ngɑnɑni, bɑ pödhh, kí jurrì, kí wïj dhɑnhø bëne jur ki dhøge. Ngɑn nyi niin ki köögi menɑni ómɑɑn yi lɑ̈y geki tùng-ɑ ɑ́lidh yi yïn gɑ pyɑ̈rø; jɑmme ókwɑny yi gen kɑ odöngø e cyɑ̈dh-ɑ nøw; rïnge ócɑm yi gen kɑ gø rɑ̈b gen ki mɑc. Mɑ́ pëthi gen ɑ́cïbi yi Jwøk ki tyëëdø men gwøg gen gïn-ɑ dwɑdde, ge göög ɑ kej ɑ́kyel, kí kinni o ge yïëy gen ki mëggi lɑ̈wwi gen lɑ̈y, o kwøbbi Jwøk pɑ̈dhi gen kɑ̈jji gen. “Ngɑnɑni bɑ kɑɑldwøng, men-ɑ jɑɑg rɑ̈nhi kömi piny bënn.” Kɑ wëywödø me yïe di tegø me dwøng lidhɑ e kɑ̈ɑ̈l-ɑ mɑl. Kɑ piny meny yi cɑre. Kɑ óryeerø ki cwɑg mø døngø kinni, “Ápɑ̈ɑ̈dh! Ápɑ̈ɑ̈dh! Kɑɑldwøng Bɑbïl ɑ́pɑ̈ɑ̈dh! Yije bëëd-ɑ yi wɑ̈l geki wëyrijjø, winyy-ɑ cödhø, ɑ bɑ mugø bënn bëëd ɑ yije ɑnɑn. Mɑ́ pödhh bënn ɑ́mɑ̈dhi ki møgi oløge, kɑ niin yi rɑ̈nhi kömi piny bënn, kɑ jøngyëwø mø kömi piny bënn, nyi bï-ɑ be ngyew kì ri kɑ̈re.” Kɑ cwɑg møøgø lïngɑ ge kɑ̈ɑ̈l-ɑ mɑl, ge okööbø kinni, “Bï wun wɑ̈g jiɑ! Dhwödh wun kì bute! Wu ko ngöyi ki orøge; cɑ́ye ko nywɑg wun ki en! Mɑ́ orøge óröör piny kɑ wɑ̈dh-ɑ mɑl, o gïgrijjø møg-ɑ gøgge pɑ wïl kì yï Jwøk. Göggu en ki gïn ni men-ɑ ɑ́gögge wun, colu gøøli orøng-ɑ ɑ́gwøge ɑ́ tyel ɑ́ryew. Pɑ̈ng wun óthɑ̈nge ki møgø me lod mi tyeli mɑl ki kejø tyel ɑ́ryew ni møng-ɑ keej men-ɑ ɑ́gögge wun cøn. Göjju en orɑng, o kïïme; orɑng me kyëëw ki døøjø men-ɑ ɑ́mëgge ree. Mɑ́ e ɑ́bëëd e lejj-ɑ ree kinni, ‘Yɑ bëëdø kì keny yɑn ɑ́ rɑ̈nh-ɑ dhɑjø! Yɑ pɑth ki thwöm, yɑ koo wöl kïïmø!’ Köme ópɑ̈ɑ̈r yi yømø nɑ̈ɑ̈g, kɑ othøø kì cyɑ̈ng ɑ́kyel; köme ópɑ̈ɑ̈r yi rɑ̈ɑ̈m dël, kí rɑ̈ɑ̈m yij, kí kɑ̈j. O órɑ̈b ki mɑc, mɑ́ Wë Jwøk ngɑn-ɑ cɑyii, teg ki mendwøng.” O rɑ̈nhi kömi piny møg-ɑ ɑ́göög ki orøg kì kɑɑlɑni óywöngi ki mendwøng keny-ɑ ólidh gen yïri mɑc men-ɑ órɑ̈ɑ̈bii. Kɑ ge ócungø ge lɑ̈wi ki en, mɑ́ ge óböggø yi cɑ́y-ɑ ɑ́cɑɑyii. De ge ógɑ̈y kinni, “Á gïn ɑ rɑɑj kinnï! Bɑ gïjø me pëddi rɑ̈jø! Kɑɑldwøng Bɑbïl, yï ɑ́rënyi kì sɑɑ̀ ɑ́kyel!” O óywøg ki mendwøng yi jøngyëwø kì kömi piny, mɑ́ e bong ngɑn-ɑ óngew jɑmmi gen këti. Gïg-ɑ bɑ dhɑb, kí ɑ́tegø, kí tigg-ɑ per gen teg, kí ógudh-ɑ per gen teg ni mø rɑ̈nhì, kí møg-ɑ bɑ ɑrir, kí møg kwɑrø, kí wɑ̈thi ryɑ̈ɑ̈, kí wɑ̈thi yenh-ɑ nyi yɑb yi bödhhi pɑ̈mmì, kí jɑmm-ɑ ógwøgø ki lëji lyej, kí pɑ̈mm-ɑ per gen teg, kí dilɑl, kí ngyënyø dødø, kí kïtt-ɑ per gen teg, kí gïrpɑ̀, kí bɑkur, kí ryɑ̈ mor, kí lubɑn, kí møgi oløg, kí møøw dhetun, kí møng-ɑ búr, kí gemè, kí dhög, kí dyëg, kí kyënyì, kí yɑ̈th-ɑ nyi pyejji yi kyënyì, kí bɑ̈ngg. Bɑbïl óköbbi yi tyëng ngyëwø kinni, “Jɑmm-ɑ ɑ́tyer yi pyëwí ɑ́lɑ̈ɑ̈ny, o yɑ̈ɑ̈ngø ɑ́kedh geki døøjø bëne, ge pɑ yod yi yïn këti!” Mɑ́ tyëng ngyëwø møg-ɑ ɑ́kɑ̈ri kì bɑng Bɑbïl ócungi ge lɑ̈wi ge óböggø yi cɑ́y-ɑ ɑ́pɑ̈dhi kömi kɑɑlɑni. Ge óywöngi kɑ ge okïïmø ki mendwøng, kɑ ge okööbø kinni, “Á gï ngø ɑ rɑj ni men! Kɑɑldwøng ɑ́gɑ̈g! E ɑ́bëëd e nyi rug-ɑ ógudh-ɑ yöm, kí ɑ́cwïcwïl, kí ógudh-ɑ kwɑrø, ree dhyɑɑw en ki dhɑb, kí tigg-ɑ per gen teg, kí tigø ɑ́gør! Alɑ̈ɑ̈ny gïgɑni bënn èn kì sɑɑ̀ ɑ́kyel yøw!” Kɑ jɑggi sɑpïnnì bënn, kí tyëngwel, kí jøkëw, kí teen-ɑ cyɑ̈mø kì ri nɑ̈mmi omelø bënn, ócungø ge lɑ̈wi. Kɑ ge óywöngø kɑ̀ nenni gen mɑc kí yïrø e töng-ɑ mɑl, ge okööbø kinni, “Bong kɑɑl megø mɑ ɑ́bëëd e dwøng ni kɑɑl men!” Kɑ wɑ̈thi gen yëddi gen ki búr, kɑ ge ogɑ̈yø ki mendwøng kinni, “Ápɑ̈ɑ̈dh! Ápɑ̈ɑ̈dh! Kɑɑldwøng Bɑbïl ɑ́pɑ̈ɑ̈dh! Tyëng yɑ̈thi nɑm bënn ɑ́kɑ̈ri yi jɑmme! Jɑmmɑni bënn ɑ́lɑ̈ɑ̈ny kì sɑɑ̀ ɑ́kyel yøw!” Kɑ cwɑg møøgø lïngi ge okööbø kinni, “Yïn ɑ mɑl, mïni pyëwí kipe kɑ ɑ́pɑ̈ɑ̈dhe! Mïni pëthi wun, wun ɑ tyëng kwërø, kí jøwöödø, kí jøtöng mɑ́ e ɑ́cɑy yi Jwøk, kɑ per gïn-ɑ ɑ́gögge wun.” Kɑ wëywödø megø ókɑ̈bbø ki tungi kït me dwøng ni kïti thɑonɑ̀, kɑ gø leenge nɑɑm omelø e okööbø kinni, “Bɑbïl óleeng piny ni men, o koo cigi yodø kinni tek. Mɑ́ bong wörø, wɑlɑ̀ cwɑggi bul, wɑlɑ̀ ywøøg supɑrɑ̀, wɑlɑ̀ ywøøg kɑng, wɑlɑ̀ thom, møg-ɑ ólïngi këti kì kɑɑlɑni. O bong bödhhì møg-ɑ ógöögø kì kɑɑlɑni këti. O bong ngɑn-ɑ ólïngi e ogurø këti, wɑlɑ̀ bong mɑc men-ɑ ówöl ki lidhø, wɑlɑ̀ bong buul nywöm men-ɑ ócøng. Jøngyëwø møgí ɑ́bëëd ɑ́ gen ɑ pëddi tegø kì kömi piny bëne, kɑ pödhhi kömi piny wëny yi yïn ki yɑdhí.” Bɑbïl ɑ́cɑy kɑ per kɑ ɑ́yood remmi jøtöng geki jii Jwøk kì yije, geki remmi tyëng-ɑ ɑ́nɑ̈g kì yije bënn. Codhe, ɑlïngɑ ki cwɑg mø ruur ni cwɑggi teedø mø ngenyø kì mɑl e okööbø kinni, “Lenhi wɑ Jwøk! Mɑ́ Jwøgee ɑ nyi yïëdø, o en ɑ nyi muuj tegø! Nyi løøg-ɑ dyër, o pɑ nyi rujø; ngɑn nyi niin ki köögi men-ɑ ɑ́rënyi piny, gø ɑ́cɑye. Ácɑy yi Jwøk kɑ per kɑ ɑ́nɑ̈ge bɑ̈nggi Jwøk.” Kɑ teenɑni cig-ɑ ryeerø kinni, “Lenhi wɑ Jwøk! Wiy yïri mɑc men-ɑ rɑ̈b kɑɑlɑni cöge e odungø gïti ɑtheer!” Kɑ jøgdøngø gɑ pyɑ̈r ɑ́ryew wïdɑ́ngwen geki gïg nëënø gɑ ɑ́ngwen, ri gen bøødh gen piny, kɑ Jwøk mɑl yi gen, ɑkööb gen kinni, “Amen! Lenhi wɑ Jwøk!” Kɑ cwɑg møøgø kɑ̈ɑ̈l-ɑ ri kwøm, ge okööbø kinni, “Lenhu Jwøgee, wun ɑ tyëng-ɑ mɑllii, kí tyëng-ɑ wørii; othønhø kí tyëngdøngø bënn!” Kɑ yɑ olïngø ki cwɑg mø ni cwɑggi teedø mø ngenyø, o nɑ ruuri pï mø ngenyø, o nɑ omɑ̈ɑ̈r mɑl, ge okööbø kinni, “Lenhi wɑ Jwøk! Mɑ́ Wë Jwøgee bɑ rɑ̈dh me teg! Mïni pëthee kɑ wɑ tug wɑ; lejji wɑ dönge! Mɑ́ bøli kej nywööm Órömø ɑ́wɑ̈nhi; o nyɑn-ɑ nywøme ɑ́rum ki gwøg ki dhwɑ̈ng. Kɑ nëngi ki ógødh kor-ɑ yöm me pëddi tɑrø ɑ́ men ruge.” (Kor-ɑ yöm bɑ gwøng døj men-ɑ ɑ́gwøg yi jii Jwøk.) Kɑ yɑ köbbi yi wëywönɑni kinni, “Gwed møg: tyëng-ɑ ɑ́cwøøl kej thyëëg Órömø, ri gen dɑ gyëdh!” Acigi wëywönɑni kwøb kinni, “Møg bɑ kwøbbi Jwøk, møg-ɑ dyër!” Kɑ riɑ bøødhɑ piny kì bøle yɑ mɑl-ɑ en, de yɑ ɑ́köbbe kinni, “Gïn ni men ko gwøøg! Yɑ bɑ bɑ̈ng ni yïn, wɑki wɑddí møg-ɑ ɑ́yïëy Yëso bënn. De mɑllí Jwøk!” Mɑ́ dyër men-ɑ ɑ́nyodh yi Yëso, bene wëy-ɑ ɑ́göög kì ri tyëngtöng. Codhe, kɑ mɑl lidhɑ ɑ́ ɑyieb. Kɑ kyeny mɑ nyibøng lidhɑ. Jɑl-ɑ kömi kyenyɑni cwøl ɑ́ jɑl pɑ nyi wil dhøge; ɑ nyi kømmi dyër ceth; jyɑ̈gø e gøgg-ɑ dyër, o nyïɑ̈gg-ɑ dyër. Nyinge lyel nɑ mɑc, o wïje dɑ yɑ̈rr mø gïïr. Dɑ nying møg-ɑ ógweed köme; o nyingɑni ngɑ̈ny-ɑ yi en kete kete. Rug-ɑ ógødh men-ɑ ójwɑ̈ɑ̈g yij remø, o cwøl ɑ́ “Lögi Jwøk.” Bɑnge lug-ɑ yi kyënyì mɑ nyibøngg, kömi gen dɑ yɑɑy mɑl, mø rug ógudhi kor-ɑ yöm mø pëddi tɑrø. Dɑ pilø me bedh, me nyi bï wɑ̈g kì dhøge; pilɑni ɑ tyɑɑme pödhh. Gï ójɑɑge cinge dɑ lodh mɑ ngyënyø dødø, o møgi oløg mi rɑ̈ji pyëw Jwøk Áyïmø óbïïje wɑ̈g ki tyelle kì yij bure. Dɑ nying møg-ɑ ógweed ri ɑ́ywödhe, kí rɑ̈me kinni, “Rɑ̈ɑ̈dh rɑ̈nhì, kí Wïi wëëg.” Codhe, ɑlïdhɑ ki wëywödø me cungi kì kömi cɑ̈ng, e óryeerø e köbb-ɑ winyy-ɑ pɑ̈rri kì yij yømø kinni, “Bïu, cungu ri wun kej ryëëj Jwøk ryëny-ɑ dwøng! O wu cyɑ̈ɑ̈m wun ki rïnggi rɑ̈nhì, kí pëjji liny, kí ɑlɑthkerr, kí kyënyì geki tyëng-ɑ ɑ́ying kömi gen, kí rïnggi ji bënn, bɑ̈ngg kí ji-ɑ bëëd wɑ̈thi gen, kí tyëngdøngø kí othønhø.” Kɑ lɑ̈y lidhɑ geki rɑ̈nhi piny kí yɑ̈yyi gen, ge cong-ɑ ri gen kipe nyɑɑg ki pënyi linyɑni geki yɑye. Kɑ lɑ̈y mɑg kì yij linyɑni geki jɑltööng pyed men-ɑ ɑ́göög ki gïïngɑ̈ngø kì bøli lɑ̈y, kɑ tyëng-ɑ ri gen di ngïji lɑ̈y wënye. Kɑ lɑ̈y geki jɑltööng pyed leeng yij nɑɑm mɑɑc kïbrït ge onëënø. Kɑ jøliny gen bënn nɑ̈g yi pil-ɑ nyi kɑ̈ɑ̈l dhøg jɑl-ɑ kömi kyeny-ɑ bɑ nyibøng, Kɑ winy bënn oyɑ̈ngø yi rïnggi gen. Codhe, ɑlïdhɑ ki wëywödø me kɑ̈ɑ̈l mɑl, cinge dɑ muptɑɑ̀ mi ölø kí ɑ́cwecwel me dwøng. Kɑ nɑ̈ɑ̈ynyɑng mɑge; en ɑ thwöl-ɑ kɑ̈ge dööng, ɑ bɑ Ngɑnrɑj wɑlɑ̀ Cethɑn, kɑ gø mɑɑge piny ki ɑ́cwecwel, o bëëde ɑ́ ɑmɑg ki runn ɑ́lïp ɑ́kyel. Kɑ leeng yij ölø kì thɑ piny yi wëywönɑni, kɑ dhøg ölø dije, kɑ gø thɑnye ki kitim dij, o cöge e pödhh pɑ wënye ki runn ɑ́lïp ɑ́kyel. Codhe, o ókɑl ki gønyø keny-ɑ óthumi runnɑni. Kɑ yɑ ólïdhø ki kwømm wɑ̈thi gen dɑ tyëng-ɑ ɑ́kwɑny gɑ jɑggi gøny. Kɑ wëyi tyëng-ɑ ɑ́nɑ̈g kipe kɑ ɑ́töng gen dyër men-ɑ ɑ́nyodh yi Yëso, kí kwøbbi Jwøk, lidhɑ thyew. Lɑ̈y nuti mɑlli gen, o ngïje nuti mɑlli gen, o bøli gen wɑlɑ̀ cinggi gen nuti dïjjø ki ngïji lɑ̈yɑni. Ge ɑ́dwöög be nënnø kɑ ge ojyɑ̈gø kyeel ki Mesiy ki runn ɑ́lïp. (Tyëngthøø møg-ɑ kyeelø bënn pɑ dwöög be nënnø, pïd keny-ɑ óthumi runn ɑ́lïp.) Men bene kwöngi tyëngthøø ki dhwödhø kì yij thøø. Tyëng-ɑ ɑ́kwöngi ki dhwödhi mɑl kì yij thøø ri gen dɑ gyëdh mø døngø. Ryeew thøø yïe bong tegø kì kömi gen; de ge óbëëdø gɑ ókwërri Jwøk geki Mesiy; o ge ójyɑ̈ɑ̈gø kyeel ki Mesiy ki runn ɑ́lïp. Cethɑn ógööny wɑ̈g kì øn-ɑ ɑ́mɑɑgii, keny-ɑ óthumi runnɑni gɑ ɑ́lïp. O ókedhi be wënyi pödhh-ɑ wɑ̈thi tùngi piny gɑ ɑ́ngwen; gen ɑ Gög kí Mɑgög. Ge ókɑ̈ɑ̈l be liny yi Cethɑn; o ge óbï kwɑnni gen nɑ nyingi ɑyejø kì thɑ̈ngi nɑɑm omelø. Kɑ ge ceg-ɑ ì jɑɑj kì kömi piny bëne, kɑ kɑɑl jii Jwøk geki kɑɑldwøng men-ɑ mɑɑre tyeg gen. De mɑc ɑ́bï e kɑ̈ɑ̈l-ɑ mɑl, kɑ gï nɑ̈ge. Kɑ Cethɑn, ngɑn-ɑ ɑ́thɑb gen, leeng yij nɑɑm kïbrït, keny-ɑ bëëd yi lɑ̈y geki jɑltööng pyed, o ge rɑngi gen kì dicɑ̈ng kí wɑ̈r, gïti ɑtheer. Kɑ yɑ ólïdhø ki kwøm me tɑr, o dwøng, kɑ ngɑn-ɑ bëëdø kì wïje lidhɑ. Piny ɑ́rengi geki mɑl kì bøle, kɑ ge ólɑ̈ɑ̈nyø; ge pɑ nenni. Kɑ tyëngthøø; tyëngdøngø kí othønhø lidhɑ ge ócungø kì bøli kwømɑni. Kɑ wɑ̈j yieb, ɑlidhɑ wɑ̈nyø megø e oyiebø, en ɑ bɑ wɑ̈nyi nënnì. Kɑ tyëngthøø cɑy ki cɑ́y-ɑ ógweed yethi wɑ̈j; ngɑn cɑy kɑ per gïn gwøøg en. Kɑ nɑɑm omelø tyëngthøø møge muuje. Kɑ thøø geki pödhi tyëngthøø, tyëngthøø mø gen muuj gen thyew. Kɑ ngɑn nyi cɑy ki cɑ́y-ɑ kyëëw ki gïn gwøøg en. Codhe, kɑ thøø geki pödhi tyëngthøø leeng nɑɑm mɑc. (Nɑɑm mɑc menɑni bene ryeew thøø.) O tyëng-ɑ ɑ́yod nyingi gen tøøk kì yij wɑ̈nyi nënnì, ge ɑ́leeng nɑɑm mɑc. Codhe, ɑlïdhɑ ki piny me nyɑ̈n kí mɑl me nyɑ̈n, mɑ́ mɑl men-ɑ kɑ̈ge dööng geki piny-ɑ kɑ̈ge dööng ɑ́lɑ̈ɑ̈ny, o bong nɑm me nud. Codhe ɑlidhɑ Kɑɑl Kwër, Yerusɑlem men-ɑ nyɑ̈n, e kɑ̈ɑ̈l-ɑ mɑl yï Jwøk, e nɑ nyɑn nywøm me thøø yi ruugø, o kedh-ɑ be yïddø ki jɑl-ɑ nywømii. Kɑ cwɑg mø døngø lïngɑ ge kɑ̈ɑ̈l-ɑ yï ngɑn-ɑ wïj kwøm kinni, “Anɑn, Jwøk pɑɑre ying-ɑ kelli ji! Óbëëdø kì kelli gen, o ge óbëëdø gɑ jie, o óbëëd ɑ́ Jwøøg gen. Pï ópoje kì nyingi gen. O óbong thøø këti; bong kïïmø, o bong ywøg; bong rɑ̈ɑ̈m dëllì. Mɑ́ jɑmm-ɑ weenø ɑ́lɑ̈ɑ̈ny.” Kɑ ngɑn-ɑ bëëdø kì wïj kwøm okööbø kinni, “Anɑn, jɑmmì bënn løgɑ’ møg nyɑ̈n!” Kɑ yɑ köbbe thyew kinni, “Gwed møgɑni, mɑ́ kwøb møg bɑ dyër, o ge ócuggø ngɑ̈dhø.” Kɑ yɑ köbbe thyew kinni, “Jɑmmì ɑ́rum ki gwøgø bënn! Bɑ yɑn ɑ mɑl, o bɑ yɑn ɑ cyɑ̈n; yɑ bɑ cɑ̈gø kí cögø. Ngɑn ree di röödhø, ówëggɑ mɑ̈dhø kì wɑɑng pïi nënnì e bong gïn cole. Gïgɑni bënn, ómëggɑ tyëng-ɑ ótyɑ̈mø: Yɑ óbëëdø yɑn ɑ́ Jwøøg gen, o ge óbëëdø gɑ nyigɑ. De wɑ̈rrì, kí tyëngɑmolpiny, kí tyëng-ɑ nyi pɑ̈ɑ̈dø ki kwøb, kí tyëng-ɑ nyi nɑ̈gø ki ji, kí tyëng-ɑ nyi wɑ̈dhi niin ki ji møøgø, kí ɑ́jwöggì, kí tyëng-ɑ mɑlli ngïjji jwögg, kí tyëngpyed –– kej gen bɑ yij mɑɑc kïbrït me lyel; menɑni bene ryeew thøø.” Kɑ yɑ köbbi yi wëywödø ɑ́kyel kì kelli wëywödd ɑ́bïryew møg-ɑ yï gen di tɑ̈mmì ɑ́bïryew mø ryɑ̈g kinni, “Bïí o yï nyudhɑ nyɑn-ɑ nywøm yi Órömø.” Akwɑɑny yɑn yi Wëy, kɑ yɑ kïdhe wïj kït me bɑ̈r. Kɑ yɑ nyudhe Yerusɑlem, Kɑɑl Kwër, e bï piny, e kɑ̈ɑ̈l-ɑ mɑl yï Jwøk, e ceg-ɑ rɑ̈ɑ̈dø yi mɑ̈ɑ̈r Jwøk. Kɑɑlɑni ceg-ɑ orɑ̈ng ni tigø me pere teg; tïl nɑ ɑdhɑ̈dh. Ówenø ki dörø me bɑ̈r, o dörɑni dhøgge bɑ pyɑ̈rø wïdɑ́ryew, ge kor-ɑ yi wëywödd pyɑ̈rø wïdɑ́ryew. Dhøggi dörø ógwëdø ki nying, gen ɑ nyingi wɑ̈thi kɑ̈lli Isrɑil gɑ pyɑ̈rø wïdɑ́ryew. Tuung dörø dɑ dhøg ɑ́dɑ̈g: ɑ́dɑ̈g kì wɑɑng cyɑ̈ɑ̈ng mwøl; ɑ́dɑ̈g kì wɑɑng wurlwɑl; ɑ́dɑ̈g kì wɑɑng cyɑ̈ɑ̈ng böörø; ɑ́dɑ̈g kì wɑɑng wuudø. O döri kɑɑl cung-ɑ́ɑ̀ kömi tyel pyɑ̈rø wïdɑ́ryew, tyelø ɑ́kyel köme ógweed-ɑ nyingi dhɑnhø ɑ́kyel kì kelli tyëngwöödø møgi Órömø. Wëywödø men-ɑ ɑ́köbbi yɑn, ɑ́bëëd yïe dɑ thyɑngi røm me bɑ dhɑb, me røme kɑɑl, kí thïgge, kí dörre. Kɑɑlɑni bɑ óør, bɑ̈re pɑ̈r ki lɑ̈je. Kɑ røm yi wëywödø, kɑ bɑ̈ri dörø yod ɑ́ kïlomïtïr ɑ́lïp ɑ́ryew kí miy ɑ́ngwen, o lɑ̈je nɑ bɑ̈re. Kɑ dörø røm yi wëywönɑni, kɑ yod bɑ̈ri döre e töng-ɑ mɑl, bɑ mïtïr pyɑ̈r ɑ́bïkyel. Dörɑni ógerø kɑ kïti yeceb, o kɑɑl kiree ógerø kɑ dhɑb, me mïllø ni rɑ̈ɑ̈ngi. O tyelli dörɑni ógwelø kɑ wɑ̈thi tigg mø gïïr; tyel-ɑ mɑl bɑ yeceb, ryeew gen bɑ yɑgut ówɑw, dɑ̈ɑ̈g gen bɑ ɑgig me tɑr, ngween gen bɑ dhɑmröd, bïïj gen bɑ ɑgig me lojø, bïkyeel gen bɑ ɑgig me kwɑrø, bïryeew gen bɑ dhɑbɑrjed óbwörø, bïdɑ̈ɑ̈g gen bɑ yedhè ówɑw, bïngween gen bɑ yɑgut óbwörø, pyɑ̈ri gen bɑ ɑgig me mɑr, pyɑ̈rø wïdɑ́kyeel gen bɑ perudh me kïde bɑ ɑ́dwøgø, o pyɑ̈rø wïdɑ́ryeew gen bɑ jemced. De dhøggi döri kɑɑlɑni gɑ pyɑ̈rø wïdɑ́ryew, ógerø kɑ kïtti tigg, men ki kïte. O ódɑ̈ri kɑɑl bɑ dhɑb me mïllø ni rɑ̈ɑ̈ngi. Bong Kengø mɑ ɑ́lidhɑ kì kɑɑlɑni. Mɑ́ Wë Jwøk Áyïmø geki Órömø, ɑ bɑ Kenge. Bong cɑɑr cɑ̈ng wɑlɑ̀ cɑɑr dwɑ̈y me dwɑddi kipe kɑɑlɑni. Mɑ́ mɑ̈ɑ̈r Jwøk omënyø kì köme, o Órömø bɑ lɑ̈mbɑ̈ mee. Jii kömi piny ócyɑ̈dh-ɑ́ɑ̀ yij cɑre, o rɑ̈nhi kömi piny kɑ̈ɑ̈r gen ókɑ̈ɑ̈l gen yije. Dhøggi döri kɑɑlɑni ócög gɑ ɑyieb; ge koo wöl ki cyëgø, mɑ́ e óbëëd e bong wɑ̈r kì kunɑni. Kɑ̈ɑ̈r kömi piny geki dhwɑ̈nge ókɑ̈ɑ̈l kɑɑlɑni. De bong gïn ywëdhø men-ɑ ókedhi kɑɑlɑni, wɑlɑ̀ bong ngɑn nyi göögø ki gïi ɑyɑ̈r, kí ngeti pyed men-ɑ ókedhi yije. Tyëng-ɑ nyingi gen ógweed yij wɑ̈nyi Órömø, wɑ̈nyi nënnì, bɑ gen ɑ ókedhi kɑɑlɑni. Kɑ yɑ nyudhi nɑɑm pïi nënnì yi wëywönɑni, nɑmɑni pïge tïl, e kɑ̈ɑ̈l-ɑ ri kwøøm Jwøk geki Órömø, e reng-ɑ yij yuu dïkɑɑl. Nɑmɑni köme dɑ yenhi nënnì ɑ́ryew; ɑ́kyel kì tuung, kí ɑ́kyel kì tung-ɑ kyeelø. Yenhɑni nyi nywøl-ɑ tyel pyɑ̈rø wïdɑ́ryew kì run ɑ́kyel; kì yij dwɑ̈ɑ̈n kí dwɑ̈ɑ̈n; o yïthhe bɑ møg nyi tuur pödhh. O jɑmm-ɑ kömi gen di cyënni Jwøk óbëëdø ge bogïn kì kɑɑlɑni. Kwøøm Jwøk geki Órömø óying kɑɑlɑni, o ómɑlli yi bɑ̈ngge. Ólidh yi gen, o nyinge óbëëd ɑ́ ɑgwed kì bøli gen. Óbëëd e bong wɑ̈r, o bong cɑɑr cɑ̈ng wɑlɑ̀ cɑɑr lɑ̈mbɑ̈ men-ɑ ódwɑddi yi gen. Mɑ́ Wë Jwøk ɑ óbëëd ɑ́ cɑɑr gen, o ge ójyɑ̈ɑ̈gø gɑ rɑ̈nhi gïti ɑtheer. Kɑ yɑ köbbi yi wëywönɑni kinni, “Mïdhí kwøbbɑni kidøøj, mɑ́ ge bɑ dyër ceth. O Wë Jwøk, ɑ nyi mëggi Wëye tyëngtöng, wëywöne ɑ́öre be nyudhi bɑ̈ngge gïn-ɑ ócwöb, o koo cwööng ki cwöbø.” Yëso okööbø kinni, “Lïng wun! Yɑn ɑ jwɑn bëënø èn! Tyëng-ɑ ógwøg møg-ɑ bɑ ɑtöng kì yij wɑ̈nyø men, ri gen dɑ gyëdh!” Yɑ Jøn, gïgɑni ɑ́lïngɑ kɑ ge lidhɑ. Keny-ɑ ɑ́rumɑ ki lïngi møgɑni kɑ ge lidhɑ, ɑpɑ̈dhɑ dhøggi tyelli wëywön-ɑ ɑ́nyudhi yɑn møgɑni, yɑ mɑl-ɑ en. De yɑ ɑ́kyëdde kinni, “Yɑ ko mɑɑl, mɑ́ yɑ bɑ bɑ̈ng ni yïn, wuki jøtöng, wɑddí; kí tyëng-ɑ mïdhi kwøbb-ɑ yij wɑ̈nyø men. De mɑllí Jwøk!” Kɑ yɑ köbbe këti kinni, “Møg-ɑ kømmi kì yij wɑ̈nyø men ko kɑɑn, mɑ́ bøli kɑ̈jji gen ɑ́cyɑ̈ngi. Kɑ wiy tyëngorøg, røngi gen; kɑ ngɑn-ɑ cödhø cöge e cödhø; kɑ ngɑn-ɑ døj cöge e døj. Kɑ ngɑn-ɑ bɑ ɑkwër, cöge ɑ́ ɑkwër.” Yëso okööbø kinni, “Lïng wun! Yɑ ójwɑn bëënø! Köögi men-ɑ muujɑ ókwöögɑ, o dhɑnhø mëggɑ kööng-ɑ kyëëw ki gïn-ɑ ɑ́gwøge. Yɑn ɑ mɑl, o yɑn ɑ cyɑ̈n; yɑn ɑ bɑ cɑ̈gø kí cögø.” Tyëng-ɑ ólwøg ógudhi gen kɑ ge ótɑ̈rø, ri gen dɑ gyëdh; ge ówiy o ge cyɑ̈ɑ̈m gen ki yɑɑdh nënnì, o ge ówëggi kedhi kɑɑl ge kɑ̈l-ɑ dhøggi döre. De tyëng-ɑ ócög ge pɑ wëggi kedhi kɑɑl, bɑ tyëng-ɑ nyi pɑ̈ɑ̈dø ki kwøb, kí ɑ́jwöggì, kí tyëng-ɑ nyi wɑ̈dhi niin ki ji møøgø, kí tyëng-ɑ nyi nɑ̈gø ki ji; kí tyëng-ɑ mɑlli ngïjji jwögg, kí tyëngpyed møg-ɑ pɑ nyi gøggi dyër. “Yɑ Yëso, ɑ ɑ́ör wëywönɑ, o møgɑni köbbe wun kì yethi ɑkuddi kɑnïsɑ̀. Yɑ bɑ kwɑɑr Debïd; yɑn ɑ bɑ kyeli ru wøw.” Wëy okööbø geki nyɑn-ɑ nywøm kinni, “Bïí!” Ngɑn-ɑ lïngi møgɑni kööbe thyew kinni, “Bïí!” Bï ngɑn ree di röödhø; kɑ kɑ̈bbe ki pïi nënnì, e bong gïn cole. O yɑn yɑ Jøn, yɑ kwëng-ɑ ngɑn lïngi kwøbb-ɑ töng kì yij wɑ̈nyø men kinni: kömi gen ko kïdhi ki gwedø ɑ́kyel, ke kïdhi kömi gen, ryɑ̈gg møg-ɑ bɑ ɑgwed kì yij wɑ̈nyø men, ge ceg kɑ medø yi Jwøk. O ke di ngɑn kɑ̈ni wɑ̈g kì ri møg-ɑ bɑ ɑtöng kì yij wɑ̈nyø men ki gwedø ɑ́kyel, gïn-ɑ di mëggii kì ri yɑɑdh nënnì, kí møg-ɑ di mëggii kì kɑɑl kwër, pɑ yode; gen ɑ gïg-ɑ bɑ ɑgwed kì yij wɑ̈nyø men. Ngɑn-ɑ nyodh kwøbbɑni okööbø kinni, “Ngee bɑ dyër! Yɑ ójwɑn bëënø!” Wø ɑ́yïëy. Bïí, Wuö Yëso! Wiy dhwɑ̈ɑ̈ng Wë Yëso Mesiy yinge kömi jii Jwøk bënn.