Mathomong Modimo o hlodile legodimo le lefase. Lefase le be le sa dulwe, le se na selo. Bodiba bjo bogolo bo be bo pipilwe ke leswiswi, mme moya wa Modimo o be o akaletše ka godimo ga meetse. Gomme Modimo a laela a re: “A go be le seetša” – seetša sa ba gona. Modimo a se bona, a kgahlega. A aroganya seetša le leswiswi, mme a re seetša ke “mosegare”, leswiswi ke “bošego”. Gwa feta mantšiboa, gwa tla meso – leo e be e le letšatši la pele. Modimo a laela gape a re: “A go be le lefaufau go aroganya meetse le go a dira gore a be mafelong a mabedi” – gwa direga bjalo. Ka gona Modimo a dira lefaufau mme a aroganya meetse a ka fase ga lona le a ka godimo ga lona. *** A re lefaufau ke “legodimo”. Gwa feta mantšiboa, gwa tla meso – leo e be e le letšatši la bobedi. Modimo a laela gape a re: “A meetse a a lego ka fase ga legodimo a kgobokane felo gotee gore naga e bonale” – gwa direga bjalo. A re naga ke “lefase” mme meetse a a kgobokanego felo gotee a re ke “lewatle”. Modimo a di bona, a kgahlega. Gomme a laela a re: “A lefase le be le mehuta yohle ya dimela – tšeo di hlagišago dithoro, le mehlare ye e enywago dienywa” – gwa direga bjalo. Ka fao lefase la ba le mehuta ka moka ya dimela – tšeo di hlagišago dithoro, le mehlare ye e enywago dienywa. Gomme Modimo a di bona, a kgahlega. Gwa feta mantšiboa, gwa tla meso – leo e be e le letšatši la boraro. Modimo a laela gape a re: “A dietša di be gona legodimong go aroganya mosegare le bošego, le go bontšha nako yeo go thomago matšatši, le mengwaga, le matšatši a menyanya ya sedumedi; di tage legodimong go bonega lefase” – gwa direga bjalo. Ka gona Modimo a dira dietša tše pedi tše kgolo, letšatši go buša mosegare, le ngwedi go buša bošego; a dira le dinaledi. A bea dietša legodimong gore di bonege lefase, go laola mosegare le bošego, le go aroganya seetša le leswiswi. Gomme Modimo a di bona, a kgahlega. Gwa feta mantšiboa, gwa tla meso – leo e be e le letšatši la bone. Modimo a laela gape a re: “A meetse a nyeume diphedi tša mehuta yohle, mme legodimo le tlale dinonyana.” Ka gona Modimo a hlola diphedi tše kgolokgolo tša lewatle, le diphedi tša mehuta ka moka ya ka meetseng, le dinonyana tša mehuta ka moka. Gomme Modimo a di bona, a kgahlega. A di šegofatša ka moka, gomme a botša diphedi tša ka meetseng gore di ate di tlale lewatle, le dinonyana a di botša gore di ate. Gwa feta mantšiboa, gwa tla meso – leo e be e le letšatši la bohlano. Modimo a laela gape a re: “A lefase le be le diphedi tša mehuta yohle – diruiwa, le diphoofolo tša lešoka, le digagabi” – gwa direga bjalo. Ka gona Modimo a di dira ka moka mme a kgahlwa ke tšeo a di bonago. Gape Modimo a re: “Bjale a re direng batho ka seswantšho sa rena, ba swane le rena. Ba tla laola dihlapi, le dinonyana, le diruiwa, le diphoofolo tša lešoka, le digagabi ka moka tša lefase.” Ka gona Modimo a hlola batho, a ba dira gore ba swane le yena. A ba dira e le monna le mosadi, a ba šegofatša mme a re go bona: “Le beng le bana ba bantši gore ditlogolo tša lena di tle di phele gohle lefaseng mme di le laole. Ke le bea balaodi ba dihlapi le dinonyana le diphedi tšohle tša lefase. Ke le file dimela tšohle tša peu lefaseng ka moka le mehlare yohle ya dienywa tša peu, gore e be dijo tša lena. Ge e le diphoofolo tša lešoka le dinonyana le digagabi ka moka, tšona ke di file ditala tšohle gore e be dijo tša tšona” – gwa direga bjalo. Modimo a lebelela tšohle tše a di dirilego mme a kgahlega kudu. Mantšiboa a feta, gwa tla meso – leo e be e le letšatši la boselela. Ke ka fao Modimo a phethilego modiro wa go hlola legodimo le tšohle tše di lego go lona, le lefase le tšohle tše di lego go lona. Ka letšatši la bošupa Modimo ke ge a feditše mediro ye a bego a e dira; mme ka letšatši leo a khutša, a feditše mediro ka moka ye a bego a e dira. A šegofatša letšatši la bošupa mme a le dira letšatši le lekgethwa, ka gore ka letšatši leo ke ge a feditše tlholo ya gagwe mme a lesa mošomo ka moka. Ke ka fao legodimo le lefase di hlotšwego ka gona. Ge Morena Modimo a hlola legodimo le lefase, go be go se na dimela lefaseng goba ditala tšeo di medilego, ka gore o be a se a ka a neša pula, gape go se yo a ka lemago. Fela meetse ona a be a nyaganyaga fase a nošetša naga. Morena Modimo a ntšha mobu fase a bopa monna ka wona; a budulela moya wa bophelo ka dinkong tša gagwe, gomme monna a thoma go phela. Morena Modimo a dira serapa kua Edene ka bohlabela, mme a bea monna yola a mmopilego ka moo. Fao a mediša dimela tše botse tša mehuta yohle, mme tša enywa dienywa tše bose. Gare ga serapa go be go na le mohlare wo o fago bophelo, le mohlare wo o fago tsebo ya se sebotse le se sebe. Moo Edene gwa ba le moela wa meetse wo o nošetšago serapa. Ka ntle ga Edene moela woo o be o tšwile dinoka tše nne. Noka ya pele ke Pishone, mme yona e ela go dikologa naga ya Habila mo go hwetšwago gauta. Gauta yeo ga se ya tswakwa; senkgabose se e sego sa mehleng le mohuta wo mongwe wa magakabje di hwetšwa fao. Noka ya bobedi ke Gihone. Yona e ela go dikologa naga ya Kushe. Noka ya boraro ke Tigrise ye e fetago ka bohlabela bja Asiria, mme ya bone noka yona ke Yufratese. Ka gona Morena Modimo a bea monna moo serapeng sa Edene gore a se leme, a se lete. A mmotša a re: “O ka ja dienywa tša mohlare ofe le ofe mo serapeng ntle le tša mohlare wo o fago tsebo ya se sebotse le se sebe. O se ke wa ja dienywa tša mohlare woo; ge o ka di ja, o tla hwa lehu ka lona letšatši leo.” Ke moo Morena Modimo a itšego: “Ga go botse ge monna a phela a nnoši. Ke tla mo direla mothuši yo a mo swanetšego.” Ka fao a ntšha mobu fase a bopa diphoofolo ka moka le dinonyana ka moka, a di tliša pele ga monna gore a bone gore o tla di rea maina afe. Ke ka moo ka moka di reilwego maina. Ka fao monna a rea dinonyana le diruiwa tšohle le diphoofolo tšohle tša lešoka maina, fela a hloka le e tee ya tšona ye e ka bago mothuši yo a mo swanetšego. Ke moo Morena Modimo a swarišitšego monna boroko bjo bogolo, mme a re a sa robetše, a ntšha kgopo e tee ya monna mme a thiba sekgala sela ka nama. Ka kgopo yeo a dira mosadi mme a mo tliša go monna. Ke fao monna a itšego: “Bjale gona ke bile ke hweditše yo a swanago le nna – lešapo le le ntšhitšwego mašapong a ka, le nama ye e ntšhitšwego nameng ya ka. Leina la gagwe ke ‘mosadi’, ka gobane o ntšhitšwe go monna.” Ke ka fao monna a tlogelago tatagwe le mmagwe, a kopana le mosadi wa gagwe, mme bobedi bja bona ya ba mmele o tee. Monna le mosadi bobedi ba be ba se ba tšwara, eupša ba be ba sa lewe ke dihlong. Bjale noga e be e le phoofolo ya mahlajana kudu go feta diphoofolo tšohle tša lešoka tše Morena Modimo a di dirilego. Ka gona noga ya botšiša mosadi ya re: “A Modimo o tloga a le boditše gore le se ke la ja dienywa tša mohlare ofe le ofe ka mo serapeng?” Mosadi a e fetola a re: “Re ka ja dienywa tša mohlare ofe le ofe ka mo serapeng, ntle le tša mohlare wo o lego gare ga serapa. Modimo o re boditše gore re se ke ra ja dienywa tša mohlare woo goba ra o kgwatha; ge re ka dira bjalo, re tla hwa.” Noga ya mo fetola ya re: “Taba yeo ga se therešo; le ka se hwe. Modimo o boletše bjalo ka gobane a tseba gore ge le ka o ja, le tla ba le tlhaologanyo la swana le yena mme la tseba se sebotse le se sebe.” Mosadi a bona gore mohlare woo ke wo mobotsebotse le gore dienywa tša wona e ka ba tše bose ge motho a di ja, gomme a gopodišiša gore e ka ba mo gobose bjang go ja dienywa tšeo le go ba le bohlale. Ka fao a fula tše dingwe tša tšona a di ja. A fa mogatšagwe tše dingwe, mme le yena a di ja. Ge ba seno di ja, ba ba le tlhaologanyo mme ba lemoga gore ga se ba tšwara. Ka gona ba rokaganya matlakala a mogo, ba a tšwara. Mantšiboeng ao ba kwa Morena Modimo a itshepelela ka mo serapeng, mme ba mo utamela gare ga mehlare. Eupša Morena Modimo a bitša monna a re: “O go kae?” Monna a mo araba a re: “Ke go kwele o sepela ka mo serapeng, ka tšhoga mme ka go utamela ka gore ke be ke se ka tšwara.” Modimo a mmotšiša a re: “Ke mang yo a go boditšego gore ga se wa tšwara? A o lle dienywa tšela ke go boditšego gore o se ke wa di ja?” Monna a mo fetola a re: “Mosadi yo o mmeilego mo le nna o mphile dienywa tšeo mme nna ka di ja.” Morena Modimo a botšiša mosadi a re: “Ke ka baka lang o dirile taba ye?” Mosadi a mo fetola a re: “Ke noga yeo e mphoraforeditšego gore ke di je.” Ke moo Morena Modimo a itšego go noga: “Ka gobane o dirile taba yeo, o tla rwala thogako ye: O tla tšhabja ke diruiwa tšohle le diphoofolo tšohle tša lešoka; go tloga bjale o tla gogoba fase ka mpa mme wa ja lerole bophelo bja gago ka moka. Ke tla dira gore wena le mosadi le hloyane, le gore ditlogolo tša gagwe le ditlogolo tša gago di hloyane ka mehla. Ditlogolo tša gagwe di tla go pšhatlaganya hlogo, mme wena o tla ba loma direthe.” Gomme a re go mosadi: “Ke tla go atišetša mathata ge o ima, le bohloko ge o belega. Le ge go le bjalo, o tla no fela o duma mogatšago, mme wa laolwa ke yena.” Mme a re go monna: “O theeditše mosadi wa gago mme wa ja dienywa tše ke go boditšego gore o se ke wa di ja. Ka baka la seo o se dirilego, mobu o rogakilwe. O tla tlemega go šoma ka boima bophelo bja gago ka moka gore lefase le go hlagišetše dijo tše di lekanego. Lefase le tla hlagiša ditshehlo le meetlwa, wa ba wa tlemega go ja ditala tša naga. O tla šoma ka boima wa tšwa kudumela go ikhweletša dijo mobung go fihlela o boela mobung, gobane o bopilwe ka wona. O bopilwe ka mobu mme o tla fetoga mobu gape.” Adamo a rea mosadi wa gagwe leina la Efa, ka gobane e be e le mmagobatho ka moka. Gomme Morena Modimo a direla Adamo le mosadi wa gagwe diaparo ka mekgopa ya diphoofolo, a ba apeša tšona. Ke moo Morena Modimo a itšego: “Bjale batho ba swana le rena, ba na le tsebo ya se sebotse le se sebe. Ga ba a swanela go dumelelwa go ja dienywa tša mohlare wa bophelo mme ba phelela sa ruri.” Ka fao Morena Modimo a ba raka serapeng sa Edene, mme a dira gore monna a leme mobu wo a bopilwego ka wona. Ka lehlakoreng la ka bohlabela la serapa a bea bakerubi, le tšhoša ye e laumelago ka mathoko ohle go thibela motho go batamela mohlare wa bophelo. Adamo a robala le mosadi wa gagwe, mme mosadi a ima. A belega morwa mme a re: “Ka thušo ya Morena ke hweditše morwa.” Ka fao a mo rea leina la Kaine. Ka morago a belega morwa yo mongwe, e lego Abele. Yena e ile ya ba modiši, Kaine ya ba molemi. Ka morago ga lebaka Kaine a išetša Morena kabelo ya go tšwa ka tšhemong ya gagwe. Abele yena a hlaba maitšibolo a mangwe a dihuswane tša gagwe, mme a dira sehlabelo ka ditho tše dingwe tša makhura. Morena a kgahlwa ke Abele le sehlabelo sa gagwe, eupša a se kgahlwe ke Kaine le kabelo ya gagwe. Kaine a befelwa kudu, mme a senya sefahlego. Ke moo Morena a itšego go Kaine: “Ke ka baka lang o befetšwe? Ke ka baka lang o sentše sefahlego? Ge o ka dira se se lokilego a o ka se thabe? Fela ge o ka dira se se sego sa loka, sebe se go laletše kgauswi se nyaka go go buša, eupša wena o swanetše go se fenya.” Kaine a re go Abele, ngwanabo: “A re sepelele mašemong.” Ge ba le kua mašemong, Kaine a tsogela ngwanabo a mmolaya. Morena a botšiša Kaine a re: “A Abele, ngwaneno, o kae?” Kaine a mo fetola a re: “Ga ke tsebe. A ke nna mohlokomedi wa ngwanešo?” Ke moo Morena a itšego: “O dirile eng? Madi a ngwaneno a ntelela a etšwa mobung. Ka gona o rogakilwe, gomme o ka se hlwe o lema mobu wo o nwelego madi a ngwaneno ge o mmolaya. Ge o ka lema, mobu o ka se ke wa go hlagišetša selo; wena o tla ba motšhabi le moraladi mo lefaseng.” Ke moo Kaine a itšego go Morena: “Kotlo yeo ke ye boima kudu go nna go ka e šikara. O nthaka mo nageng ye lehono mme ke tla ba kgole le wena. Ke tla ba motšhabi le moraladi mo lefaseng, mme mang le mang yo a nkhwetšago o tla mpolaya.” Fela Morena a mo fetola a re: “Aowa! Ge motho a ka go bolaya, go tla hwa batho ba ba šupago ba meloko yabo go go lefeletša.” Ka gona Morena a swaya Kaine leswao la go tsebiša yo mongwe le yo mongwe yo a gahlanago naye gore a se ke a mmolaya. Gomme Kaine a tloga pele ga Morena, a yo phela nageng ye e bitšwago “Thalalong”, ka bohlabela bja Edene. Kaine le mosadi wa gagwe ba ba le morwa, mme ba mo rea leina la Enoko. Kaine a aga motse mme a o reela morwa wa gagwe. Enoko a ba le morwa mme a mo rea leina la Irade, yo e bilego tatagoMehuyaele; yena ya ba tatagoMethushaele, tatagoLamege. Lamege a nyala basadi ba babedi, e lego Ada le Tsila. Ada a tswala Jabale, yo e bilego rakgolokhukhu wa bao ba ruago diruiwa mme ba dulago ka mešašeng. Ngwanabo e bile Jubale, rakgolokhukhu wa diopedi tša go letša sekgapa le nakana. Tsila a tswala Tubale-Kaine, morulatshipi yoo a bego a dira dilo ka moka tša mphiri le tša tshipi. Kgaetšedi ya Tubale-Kaine e be e le Naama. Lamege a re go basadi ba gagwe: “Ada le Tsila, ntheetšeng: Ke bolaile lesogana le lengwe ka gobane le nkgobaditše. Ge go ehwa batho ba ba šupago ge go bolailwe Kaine, go tla hwa ba masome a a šupago le metšo ye e šupago ge yo mongwe a ka mpolaya.” Adamo le mosadi wa gagwe ba ba le morwa yo mongwe. Efa a re: “Modimo o mphile morwa yo mongwe legatong la Abele yo Kaine a mmolailego.” Ka gona a mo rea leina la Sete. Sete a ba le morwa yo a ilego a mo rea leina la Enose. Ke ka yona nako yeo moo batho ba thomilego go šomiša leina le lekgethwa la Morena tirelong. Ge Modimo a bopa batho, o ba dirile gore ba swane le yena. O ba bopile ka botona le botshadi, a ba šegofatša mme a ba bitša gore ke “batho”. Le ke lenaneo la ditlogolo tša Adamo. *** Ge Adamo a na le mengwaga ye 130, o ile a ba le morwa yo a swanago le yena mme a mo rea leina la Sete. Ka morago ga fao Adamo o phetše mengwaga ye mengwe ye 800. O ile a ba le bana ba bangwe, mme a hlokafala a na le mengwaga ye 930. Ge Sete a na le mengwaga ye 105, o ile a ba le morwa, e lego Enose, mme a phela mengwaga ye mengwe ye 807. O ile a ba le bana ba bangwe, mme a hlokafala a na le mengwaga ye 912. Ge Enose a na le mengwaga ye 90, o ile a ba le morwa, e lego Kenane, mme a phela mengwaga ye mengwe ye 815. O ile a ba le bana ba bangwe, mme a hlokafala a na le mengwaga ye 905. Ge Kenane a na le mengwaga ye 70, o ile a ba le morwa, e lego Mahalalele, mme a phela mengwaga ye mengwe ye 840. O bile le bana ba bangwe, mme a hlokafala a na le mengwaga ye 910. Ge Mahalalele a na le mengwaga ye 65, o ile a ba le morwa, e lego Jerede, mme a phela mengwaga ye mengwe ye 830. O bile le bana ba bangwe, mme a hlokafala a na le mengwaga ye 895. Ge Jerede a na le mengwaga ye 162, o ile a ba le morwa, e lego Enoko, mme a phela mengwaga ye mengwe ye 800. O bile le bana ba bangwe, mme a hlokafala a na le mengwaga ye 962. Ge Enoko a na le mengwaga ye 65, o ile a ba le morwa, e lego Metushelage. Ka morago ga moo Enoko a phela a ikopantše le Modimo mengwaga ye 300, mme a ba le bana ba bangwe. O phetše mengwaga ye 365. O phetše bophelo bja gagwe ka moka a ikopantše le Modimo, mme a timelela ka ge Modimo a ile a mo tšea. Ge Metushelage a na le mengwaga ye 187, o ile a ba le morwa, e lego Lamege, mme a phela mengwaga ye mengwe ye 782. O bile le bana ba bangwe, mme a hlokafala a na le mengwaga ye 969. Ge Lamege a na le mengwaga ye 182, o ile a ba le morwa, mme a re: “Ngwana yo o tla re bea pelo medirong yohle ya rena ye boima ye re swanetšego go e dira mobung wo Morena a o rogakilego wo.” Ka fao a mo rea leina la Noa. Lamege a phela mengwaga ye mengwe ye 595; a ba le bana ba bangwe, mme a hlokafala a na le mengwaga ye 777. Ka morago ga ge Noa a na le mengwaga ye 500, o ile a ba le barwa ba bararo, e lego Seme le Hamo le Jafeta. Ge batho ba thomile go ikala le lefase ka moka mme barwedi ba belegwa, dibopiwa tše dingwe tša legodimo tša bona gore basetsana bao ke ba babotse. Ka fao tša itšeela basadi bao di ba kganyogago. Ke moo Morena a itšego: “Nka se dumelele batho gore ba phelele sa ruri; ke bafeti. Go tloga bjale ba ka se hlwe ba phela go feta mengwaga ye 120.” Mehleng yeo, ešita le ka morago ga fao, go be go le ditšitširipa lefaseng tšeo di hlolegilego ge dibopiwa tša legodimo di robala le barwedi ba batho. Ke bona bagale ba bagolo le banna ba go tuma ba bagologolo. Ge Morena a bona gore batho ke ba babe kudu, le gore ka mehla megopolo ya bona ke ye mebe kudu, o ile a nyama ge a kile a ba dira mme a ba bea lefaseng. O ile a tlala boitsholo moo a ilego a ba a re: “Ke tla tloša batho ka moka ba ke ba dirilego, ka tloša le diphoofolo le digagabi le dinonyana, ka gore ke nyama ge ke di dirile.” Fela Morena a thabišwa ke Noa. Tše ke ditaba tša Noa. O be a na le barwa ba bararo, e lego Seme le Hamo le Jafeta. Noa o be a se na diphošo, mme e le motho a nnoši yo a lokilego gare ga batho ba mehleng yeo. O be a phela a ikopantše le Modimo, *** mola yo mongwe le yo mongwe e le yo mobe pele ga Modimo, mme polayano e phatlalaletše mo gohle. Modimo a lebelela lefase mme a bona e le le lebe, ka gobane batho ka moka ba be ba phela bophelo bjo bobe. Ke moo Modimo a rilego go Noa: “Ke ikemišeditše go fediša batho ka moka. Ke tlilo ba fediša ka moka ka gobane lefase le tletše mediro ya bona ye mebe. Ipetlele leselawatle ka dikota tše di tiilego; o dire diphapoši ka go lona mme o le manege ka moti ka ntle le ka gare. Botelele bja lona e be dimetara tše 138, bophara e be dimetara tše 23, mme bogodimo e be dimetara tše 14. O direle leselawatle tlhaka, gomme o šadiše lešoba la disentimetara tše 46 kgathe ga tlhaka le mahlakore. O le dire mabato a mararo, mme ka lehlakoreng o tsenye lemati. Ke tlilo romela lefula lefaseng go fediša se sengwe le se sengwe se se phelago. Se sengwe le se sengwe lefaseng se tla hwa, eupša nna ke tla dira kgwerano le wena. O tsene ka leselawatleng le mosadi wa gago le barwa ba gago le basadi ba bona. Ka leselawatleng o tsene le tona le tshadi ya mohuta wo mongwe le wo mongwe wa dinonyana le wa diphoofolo le wa digagabi, gore di tle di phele. *** O tšee le dijo tša mehuta ka moka tša lena le tša tšona.” Noa a dira tšohle tše Morena a mo laetšego tšona. Morena a re go Noa: “Tsena ka leselawatleng le ba lapa la gago ka moka; ke bone gore ke wena o nnoši lefaseng ka moka yo o dirago se se lokilego. Go mohuta wo mongwe le wo mongwe wa diphoofolo tše di hlwekilego o tšee tše di šupago tše tona le tše di šupago tša ditshadi, mme go mohuta wo mongwe le wo mongwe wa tše di sego tša hlweka o tšee e tee ye tona le e tee ya tshadi. Le go mohuta wo mongwe le wo mongwe wa dinonyana o tšee tše di šupago tše tona le tše di šupago tša ditshadi. O dire ka tsela yeo gore mohuta wo mongwe le wo mongwe wa diphoofolo le dinonyana o phele mme o tle o atafale gape lefaseng. Matšatši a a šupago go tloga bjale ke tlile go neša pula ye e tlago tšea matšatši a masome a mane le mašego a ona, gore e fediše dilo ka moka tše di phelago tše ke di dirilego.” Noa a dira tšohle tše Morena a mo laetšego tšona. Noa o be a na le mengwaga ye 600 ge lefula le etla lefaseng. Yena le mosadi wa gagwe le barwa ba gagwe le basadi ba bona ba tsena ka leselawatleng go phonyokga lefula. Tona le tshadi ya mohuta wo mongwe le wo mongwe wa diphoofolo le wa dinonyana le wa digagabi, mohuta wo o hlwekilego le wo o sego wa hlweka, tša tsena ka leselawatleng le Noa, ka moo Modimo a laetšego ka gona. Ka morago ga matšatši a a šupago lefula la tla. Ge Noa a na le mengwaga ye 600, ka letšatši la lesome le metšo ye e šupago la kgwedi ya bobedi, methopo ka moka ya lewatle le legolo ka fase ga lefase ya thiboga, mme dithibo ka moka tša mafula a legodimo tša bulega, gomme pula ya tšhologela lefaseng matšatši a masome a mane le mašego a ona. Ka lona letšatši leo Noa le mosadi wa gagwe ba tsena ka leselawatleng le barwa ba bona ba bararo, e lego Seme le Hamo le Jafeta, le basadi ba bona. Ba tsena le diphoofolo tša mehuta yohle tša lešoka, le diruiwa tša mehuta yohle, le digagabi tša mehuta yohle, le dinonyana tša mehuta yohle. Tona le tshadi ya mohuta wo mongwe le wo mongwe wa diphedi tša tsena ka leselawatleng le Noa ka moo Modimo a laetšego ka gona. Ka morago ga fao Morena a tswalelela Noa ka gare. Lefula la tšea matšatši a masome a mane, mme meetse ya ba a mantši moo e lego gore leselawatle le ile la phaphamala. Meetse a fela a oketšega kudu mme leselawatle la itshepelela godimo ga ona. A fela a oketšega kudu a ba a khupetša dithaba tša godimodimo; a fela a rotoga go fihlela a eba dimetara tše di šupago ka godimo ga dintlhohlo tša dithaba. Selo se sengwe le se sengwe se se phelago mo lefaseng sa hwa – dinonyana, le diruiwa, le diphoofolo tša lešoka, le digagabi, le batho. Tšohle tše di bušago moya lefaseng tša hwa. Morena a fediša diphedi tšohle tša lefase – batho le diphoofolo le digagabi le dinonyana. Bao ba ilego ba šala e bile fela Noa le bao ba bego ba na le yena ka leselawatleng. Meetse ga se a ka a thoma go phohlela, gwa ba gwa feta matšatši a 150. Modimo o ile a gopola Noa le diruiwa tšohle le diphoofolo tšohle tša lešoka tše di bego di na le yena ka leselawatleng; a fokiša phefo, mme meetse a thoma go ya fase. Methopo ya lewatle ka fase ga lefase le dithibo tša mafula a legodimo tša tswalelwa. Pula ya khula, mme meetse a ya fase ka gonnyane ka gonnyane matšatši a 150. Ka letšatši la lesome le metšo ye e šupago la kgwedi ya bošupa leselawatle la rokama thabeng ye nngwe molokolokong wa dithaba tša Ararate. Meetse a fela a eya fase, mme ka letšatši la pele la kgwedi ya lesome dintlha tša dithaba tša bonala. Ka morago ga matšatši a masome a mane Noa a bula lefasetere gomme a ntšha legokobu. Lona le ile la se ke la boa, eupša la fofafofa gohle go fihlela meetse a gopela sa ruri. Ge go le bjalo, Noa a roma leeba go yo bona ge e ka ba meetse a ile fase, fela ka ge meetse a be a sa khupeditše lefase ka moka, leeba le ile la hloka moo le ka kotamago gona. Le ile la boela ka leselawatleng, mme Noa a obeletša letsogo a le swara a le tsenya ka gare ga lona. A letela gape matšatši a mangwe a a šupago, a tsebo roma leeba lela gape. Le ile la boela go yena mantšiboa le momile letlakala le lefsa la mohlware. Ka gona Noa a tseba gore meetse a ile fase. Ka morago ga fao a letela matšatši a mangwe a a šupago, a tsebo roma leeba lela gapegape; ka lekga le le ile la se ke la boa. Ge Noa a na le mengwaga ye 601, ka letšatši la pele la kgwedi ya mathomo, meetse a gopa. Noa a šuthiša tlhaka ya leselawatle, a lebelela ka gohle mme a bona lefase le thoma go oma. Ka letšatši la masome a mabedi le metšo ye e šupago la kgwedi ya bobedi ke ge lefase le omile. Modimo a re go Noa: “Tšwaa ka leselawatleng le mosadi le barwa ba gago le basadi ba bona. O ntšhe le dinonyana le diphoofolo le digagabi ka moka gore di tle di ate di tlale lefase ka moka.” Ka gona Noa a tšwa ka leselawatleng le mosadi le barwa ba gagwe le basadi ba bona. Diphoofolo le digagabi le dinonyana ka moka tša tšwa ka leselawatleng ka dihlophanahlophana go ya ka mehuta ya tšona. Noa a agela Morena aletare; a tšea e tee ya mohuta wo mongwe le wo mongwe wa diphoofolo le dinonyana tše di hlwekilego mme a di tšhuma moo aletareng ya ba sehlabelo sa go tšhungwa ka moka. Monkgo wa sehlabelo seo wa thabiša Morena mme ka pelong a re: “Nka se tsoge ke rogakile lefase gape ka baka la seo motho a se dirago, ke tseba gore go tloga bofseng megopolo ya gagwe ke ye mebe. Nka se tsoge ke fedišitše diphedi ka moka gape. Ge lefase le sa le gona go tla ba le nako ya go bjala le nako ya go buna. Ka mehla go tla ba le go tonya le go fiša, selemo le marega, mosegare le bošego.” Modimo a šegofatša Noa le barwa ba gagwe mme a re go bona: “Le beng le bana ba bantši gore ditlogolo tša lena di tle di phele gohle lefaseng. Diphoofolo le dinonyana le digagabi le dihlapi ka moka di tla phela di le boifa. Ka moka di bewa diatleng tša lena. Bjale le ka di ja, la ja le ditala; ke le fa tšona ka moka gore e be dijo tša lena. Selo se tee se le sego la swanela go se ja ke nama ye e nago le madi; ke le iletša yona ka baka la gore bophelo bo mading. Yo a bolayago motho ke tla mo otla. Phoofolo efe le efe ye e bolayago motho ke tla e otla. Yo a bolayago motho le yena o tla bolawa ke batho, ka gore motho o dirilwe gore a swane le Modimo. “Fela lena, le be le bana ba bantši gore ditlogolo tša lena di tle di phele gohle lefaseng.” Modimo a re go Noa le barwa ba gagwe: “Bjale ke dira kgwerano ya ka le lena le ditlogolo tša lena le diphedi tšohle tša lefase tše di bego di na le lena – dinonyana, le diruiwa, le diphoofolo tšohle tša lešoka – se sengwe le se sengwe seo se tšwilego ka leselawatleng le lena. Ke dira kgwerano ya ka le lena ke re: Diphedi ka moka di ka se tsoge di fedišitšwe ka lefula gape; lefula le ka se tsoge le sentše lefase gape. Sese sešupo sa kgwerano ye ya neng le neng ye ke e dirago le lena le diphedi ka moka: ke molalatladi wa ka wo ke o tsemago marung. E tla ba sešupo sa kgwerano ya ka le lefase. Nako le nako ge ke pipa legodimo ka maru mme molalatladi o bonala, ke tla gopola kgwerano ya ka le lena le diphoofolo ka moka ya gore lefula le ka se tsoge le fedišitše diphedi ka moka gape. Ge molalatladi o le marung ke tla o bona, mme ka gopola kgwerano ya go ya go ile gare ga ka le diphedi ka moka lefaseng. Se ke sešupo sa kgwerano ye ke e dirago le diphedi ka moka.” Barwa ba Noa bao ba tšwilego ka leselawatleng ke Seme le Hamo le Jafeta. Hamo e be e le tatagoKanana. Barwa ba ba bararo ba Noa e bile borakgolokhukhu ba batho ka moka lefaseng. Noa, yo e bego e le molemi, e bile yena motho wa mathomo wa go bjala merara. Ka morago ga ge a nwele beine o ile a tagwa, mme a ithobalela ka mošašeng wa gagwe a apotše. Ge Hamo, tatagoKanana, a bona gore tatagwe ga a tšwara, o ile a tšwa a yo botša bomorwarragwe ka babedi. Ke moo Seme le Jafeta ba tšerego kobo mme ba e bea magetleng, ba tsena ka mošašeng ba sepela ka sa morago, gomme ba pipa tatabo ka kobo yela; ba itebelediša thoko gore ba se ke ba mmonela. Ge Noa a tšwiwa ke beine mme a ekwa gore morwagwe yo monnyane o mo dirile eng, a re: “Kanana a a rogakwe! E tla ba lekgobakgoba la bomorwarragwe. Retang Morena, Modimo wa Seme! Kanana e tla ba lekgoba la Seme. A Modimo a atiše Jafeta; ditlogolo tša gagwe di phele le batho ba Seme. Kanana e tla ba lekgoba la Jafeta.” Ka morago ga lefula Noa o phetše mengwaga ye 350, mme a hlokafala a na le mengwaga ye 950. Šedi ditlogolo tša barwa ba Noa, Seme le Hamo le Jafeta. Ba bararo ba ba bile le barwa ka morago ga lefula. Barwa ba Jafeta šeba: ke Gomere le Magogo le Madai le Jabane le Tubale le Mesheke le Tirase. Bona e bile borakgolokhukhu ba ditšhaba tšeo di reetšwego maina a bona. Ditlogolo tša Gomere e bile setšhaba sa Ashkenase le sa Rifate le sa Togarma. Ditlogolo tša Jabane e bile setšhaba sa Elisha le sa Tarshishe le sa Saeprose le sa Rodose; bona e bile borakgolokhukhu ba ditšhaba tše di dulago go ipata le lebopo le dihlakahlakeng. Bao ka moka ke ditlogolo tša Jafeta, mme ba dula melokong le ditšhabeng tša gabobona le dinageng tše di fapanego; sehlopha se sengwe le se sengwe se bolela polelo ya sona. Barwa ba Hamo šeba: ke Kushe le Egepeta le Libia le Kanana. Bona e bile borakgolokhukhu ba ditšhaba tšeo di reetšwego maina a bona. Ditlogolo tša Kushe e bile setšhaba sa Seba le sa Habila le sa Sabta le sa Rama le sa Sabteka. Ditlogolo tša Rama e bile setšhaba sa Sheba le sa Dedane. Kushe o ile a ba le morwa yoo leina la gagwe e bego e le Nimrode. Yena e bile mogale wa mathomo lefaseng. E be e le motsomi yo mogolo le mahlong a Morena; ke ka baka leo batho ba rego: “Bjalo ka Nimrode o motsomi yo mogolo le mahlong a Morena.” Mathomong mmušo wa gagwe o be o akaretša Babele le Ereke le Akade. Naga tše ka moka di Babilonia. Go tloga nageng yeo o ile a ya Asiria, mme fao a aga metse ya Ninibe le Rehobote-Ire le Kelage le Resene – motse wo o lego gare ga Ninibe le motse wo mogolo wa Kelage. Ditlogolo tša Egepeta e bile batho ba Lidia le Anamo le Lehaba le Naftuage le Patruse le Kasluage le Kreta, bao go bona go tšwilego Bafilista. Barwa ba Kanana šeba: Sidone, wa leitšibolo, le Hete. Bona e bile borakgolokhukhu ba batho bao ba reetšwego maina a bona. Kanana gape e bile rakgolokhukhu wa Bajebuse le Baamore le Bagirgashe le Bahibe le Baaraki le Basine le Baarbade le Batsemare le Bahamate. Dikgoro tše di fapanego tša Bakanana tša ikala. Naga ya Bakanana e be e tloga Sidone e leba Gerare go yo fihla Gasa, e leba Sodoma le Gomora le Adma le Tseboime go yo fihla Lesha. Tšeo ke ditlogolo tša Hamo tše di dulago melokong le ditšhabeng tša gabotšona le dinageng tša tšona tše di fapanego; sehlopha se sengwe le se sengwe se bolela polelo ya sona. Seme, mogolwaJafeta, e bile rakgolokhukhu wa Baheberu ka moka. Barwa ba Seme šeba: Elamo le Ashure le Arpakshade le Lude le Aramo. Bona e bile borakgolokhukhu ba ditšhaba tšeo ba reetšwego maina a tšona. Ditlogolo tša Aramo e bile setšhaba sa Utse le sa Hule le sa Getere le sa Mashe. Arpakshade e bile tatagoShelage, yo e bilego tatagoEbere. Ebere o bile le barwa ba babedi: Yo mongwe o ile a bitšwa Pelege, ka gore nakong ya gagwe batho ba lefase ba be ba arogane; yo mongwe yena o ile a bitšwa Jokotane. Ditlogolo tša Jokotane e bile setšhaba sa Almodade le sa Shelefo le sa Hatsarmabete le sa Jerage le sa Hadoramo le sa Usale le sa Dikla le sa Obale le sa Abimaele le sa Sheba le sa Ofire le sa Habila le sa Jobabe. Ka moka ga bona ba tšwile go Jokotane. Naga yeo ba bego ba dula go yona e be e tloga Mesha e fihla Sefare kua mebotong ya ka bohlabela. Tšeo ke ditlogolo tša Seme tše di dulago melokong le ditšhabeng tše di fapanego, le dinageng tše di fapanego. Sehlopha se sengwe le se sengwe se bolela polelo ya sona. Ditšhaba tše ka moka ke ditlogolo tša Noa, setšhaba ka setšhaba, go ya ka borakgolokhukhu ba bona bao ba fapanego. Ka morago ga lefula ditšhaba ka moka tša lefase di tšwile barweng ba Noa. Mathomong batho ba lefase lohle ba be ba na le polelo e tee fela, mme ba šomiša mantšu a a swanago. Ge ba falalela thoko ya bohlabela ba ile ba fihla molaleng wo mongwe kua Babilonia, gomme ba dula moo. Ba botšana ba re: “Tlang re bopeng ditena mme re di tšhume di butšwe!” Ka gona ba ba le ditena tša go aga, le letsopa la go di swaraganya. Ke moo ba itšego: “Bjale a re ageng motse wa tora ye e fihlago legodimong, gore re tle re itirele leina mme re se ka ra šwalalanywa le lefase ka moka.” Morena a theoga go tlo bona motse le tora yeo batho bao ba di agilego, mme a re: “Bjale bonang, batho ba ka moka ke batho ba tee gomme ba bolela polelo e tee; se e no ba mathomo a se ba tlilego go se dira. Go se gwa ya kae ba tla be ba kgona go dira se sengwe le se sengwe se ba nyakago go se dira. A re theogeng re yo hlakahlakanya polelo ya bona gore ba se ke ba kwešišana.” Ke moo Morena a ba tšitlantšego gohle lefaseng, mme ba se hlwe ba aga motse wola. Motse woo wa bitšwa Babele, ka gobane moo Morena o hlakahlakantše polelo ya batho ka moka, mme go tloga moo a ba tšitlanyetša gohle lefaseng. Ditlogolo tša Seme šedi: Mengwaga ye mebedi ka morago ga lefula, ge Seme a na le mengwaga ye 100, o ile a ba le morwa, Arpakshade. Ka morago ga fao a phela mengwaga ye mengwe ye 500, mme a ba le bana ba bangwe. Ge Arpakshade a na le mengwaga ye 35 o ile a ba le morwa, Shelage; ka morago ga fao a phela mengwaga ye mengwe ye 403, mme a ba le bana ba bangwe. Ge Shelage a na le mengwaga ye 30 o ile a ba le morwa, Ebere; ka morago ga fao a phela mengwaga ye mengwe ye 403, mme a ba le bana ba bangwe. Ge Ebere a na le mengwaga ye 34 o ile a ba le morwa, Pelege; ka morago ga fao a phela mengwaga ye mengwe ye 430, mme a ba le bana ba bangwe. Ge Pelege a na le mengwaga ye 30 o ile a ba le morwa, Regu; ka morago ga fao a phela mengwaga ye mengwe ye 209, mme a ba le bana ba bangwe. Ge Regu a na le mengwaga ye 32 o ile a ba le morwa, Seruge; ka morago ga fao a phela mengwaga ye mengwe ye 207, mme a ba le bana ba bangwe. Ge Seruge a na le mengwaga ye 30 o ile a ba le morwa, Nahoro; ka morago ga fao a phela mengwaga ye mengwe ye 200, mme a ba le bana ba bangwe. Ge Nahoro a na le mengwaga ye 29 o ile a ba le morwa, Terage; ka morago ga fao a phela mengwaga ye mengwe ye 119, mme a ba le bana ba bangwe. Ge Terage a na le mengwaga ye 70, o ile a ba tatagoAbramo le Nahoro le Harane. Šedi ditlogolo tša Terage yo e bilego tatagoAbramo le Nahoro le Harane: Harane e bile tatagoLote, mme Harane a hwela motseng wa gabo wa Ure kua Babilonia tatagwe a sa phela. Abramo a nyala Sarai, mme Nahoro a nyala Milka, morwedi wa Harane. Morwedi yo mongwe wa Harane e be e le Jiska. Sarai o be a sa belege. Terage o ile a tloga motseng wa Ure, kua Babilonia, a na le Abramo, morwagwe, le Lote, setlogolo sa gagwe, morwa wa Harane, le ngwetši ya gagwe, Sarai, mosadi wa Abramo, a leba Kanana. Ba fihla Harane mme ba itulela gona. Terage o ile a hwela moo a na le mengwaga ye 205. Morena o ile a re go Abramo: “Tlogela naga ya geno le meloko ya geno le lapa la tatago mme o ye nageng ye ke tlilego go go laetša yona. Ke tla go fa ditlogolo tše ntši, mme ya ba setšhaba se segolo. Ke tla go šegofatša mme ka dira gore leina la gago le tsebalege, gore ba bangwe ba tle ba šegofatšwe ka wena. “Ke tla šegofatša bao ba go šegofatšago, ka rogaka bao ba go rogakago. Ditšhaba tša lefase ka moka di tla nkgopela go di šegofatša bjalo ka ge ke go šegofaditše.” Ge Abramo a na le mengwaga ye masome a a šupago a metšo ye mehlano, o ile a tloga Harane ka moo Morena a mmoditšego ka gona; Lote o ile a tloga naye. Abramo a tšea mosadi wa gagwe, Sarai, le Lote, morwa morwarragwe, le dithoto ka moka tšeo ba di kgobokantšego, le makgoba ohle ao ba bilego nao Harane, mme ba tloga ba leba nageng ya Kanana. Ge ba fihla Kanana, Abramo a phatša naga go fihlela a fihla mohlareng wo mogolo wa More, mo e lego felo mo gokgethwa kua Shekeme. Ka nako yeo Bakanana ba be ba sa dula nageng yeo. Morena a iponagatša go Abramo mme a re go yena: “Ye ke naga ye ke tlilego go e fa ditlogolo tša gago.” Ya ba Abramo o agela Morena yo a iponagaditšego go yena aletare fao. Ka morago ga moo a hudugela thoko ya borwa dithabeng tšeo di lego ka bohlabela bja motse wa Bethele, gomme a hloma mešaša ya gagwe gare ga Bethele ka bodikela, le Ai ka bohlabela. Moo le gona a aga aletare, a khunamela Morena. Ka morago ga fao a fetela pele, a tloga mo a eya mola, a lebile thokong ya borwa bja Kanana. Go ile gwa wa tlala nageng ya Kanana, gomme ya ba ye šoro mo Abramo a ilego a ba a theogela Egepeta go yo dula moo lebakanyana. Ge a batametše go tshela mollwane go tsena ka Egepeta, a botša mosadi wa gagwe, Sarai, a re: “O mosadi yo mobotse. Ge Baegepeta ba go bona ba tla re: ‘Ke mosadi wa Abramo’ – ka fao ba tla mpolaya mme wena ba go lesa wa phela. O ba botše gore o kgaetšedi ya ka; ke moo ka baka la gago ba tlago ntesa ka phela mme ba ntshwara gabotse.” Ge a tshela mollwane a tsena ka Egepeta, Baegepeta ba ile ba bona gore mosadi wa gagwe ke yo mobotse kudu. Ba bangwe ba bakgomana ba mošate ba mmona, gomme ba botša kgoši ka moo e lego yo mobotse ka gona; ka fao a tšewa a išwa mošate. Ka baka la gagwe kgoši a swara Abramo gabotse, mme a mo fa mehlape ya dihuswane le dikgomo le dipokolo le makgoba le dikamela. Fela ka gore kgoši a be a tšere Sarai, Morena o ile a mo otla le ba lapa la gagwe ka dikotlo tše kgolo. Ke moo kgoši a biditšego Abramo, a mmotšiša a re: “A o ntirile eng? Ke ka baka lang o se wa mpotša gore ke mosadi wa gago? Ke kang o boletše gore ke kgaetšedi ya gago mme wa ntesa ka mo tšea ya ba mosadi wa ka? Mosadi wa gago šoo; mo tšee o tšwe!” Kgoši ya laela banna ba yona go ntšha Abramo ka nageng, yena le mosadi wa gagwe le tšohle tše e bego e le tša gagwe. Abramo o ile go tšwa Egepeta a ya leboa thokong ya borwa bja Kanana le mosadi wa gagwe le tšohle tše e bego e le tša gagwe, gomme Lote a ya naye. Abramo e be e le monna wa mohumi kudu a na le diruiwa, gotee le silibera le gauta. O ile a tloga moo gomme a aga mo le mola, a eya Bethele. A fihla kgathe ga Bethele le Ai, felo mola a ilego a hloma mešaša pele a ba a aga aletare gona. Moo o ile a khunamela Morena. Lote le yena o be a na le diruiwa le la gagwe lapa le bahlanka. Naga e be e sa lekane gore bobedi ba ka dula mmogo, ka gore ba be ba na le leruo le lentši kudu. Ka gona go ile gwa tsoga diphapano gare ga badiši ba diruiwa tša Abramo le badiši ba diruiwa tša Lote. Ka nako yeo Bakanana le Baperise ba be ba sa dula nageng yeo. Ke moo Abramo a itšego go Lote: “A nna le wena re se lwe, badiši ba ka le ba gago le bona ba se lwe, ka gobane re bana ba motho. Ka gona a re arogane. Kgetha karolo ye o e nyakago ya naga. O ye go yona mme nna ke tla ya thoko ye nngwe.” Ke moo Lote a ilego a lealea, gomme a bona gore moedi ka moka wa Jordane go fihlela Tsoare o na le meetse a mantši, go swana le serapa sa Morena, goba go swana le naga ya Egepeta. E be e le pele ga ge Morena a fediša motse wa Sodoma le wa Gomora. Lote a ikgethela moedi wa Jordane ka moka mme a leba thoko ya bohlabela. Ke ka moo banna ba babedi bao ba aroganego ka gona. Abramo o ile a dula nageng ya Kanana, Lote yena a dula metseng ya ka moeding, mme a hloma mešaša kgauswi le Sodoma. Badudi ba Sodoma e be e le ba babe, mme ba fošetša Morena kudu. Ka morago ga ge Lote a sepetše, Morena o ile a re go Abramo: “Nke o iše mahlo ka gohle o le moo o lego gona. Naga ka moka ye o e bonago ke tla e fa wena le ditlogolo tša gago, gomme e tla ba ya gago go ya go ile. Ke tla dira gore ditlogolo tša gago di lekane le lerole la lefase ka bontši; ge eba go na le motho yo a kago bala lerole la lefase, le ditlogolo tša gago a ka di bala. Eya o sepele le naga yohle, ka gobane ke tlile go go fa yona.” Ka fao Abramo a hlahlamolla mešaša ya gagwe a yo dula kgauswi le mehlare ye mekgethwa ya Mamre kua Hebrone, gomme moo a agela Morena aletare. Amrafele, kgoši ya Babilonia, le Arioko, kgoši ya Elasara, le Kedore-Laomere, kgoši ya Elamo, le Tidale, kgoši ya Goime, di ile tša yo lwa le Bera, kgoši ya Sodoma, le Birsha, kgoši ya Gomora, le Shinabe, kgoši ya Adma, le Semebere, kgoši ya Tseboime, le kgoši ya Bela, goba Tsoare. Dikgoši tše tlhano tše di be di dirile seboka gomme tša kopanya madira a tšona ka moeding wa Sidime, woo bjale e lego Lewatle le le Hwilego. Ba be ba hlanketše Kedore-Laomere mengwaga ye lesome le metšo ye mebedi, eupša ka ngwaga wa lesome le metšo ye meraro ba mo tsogela maatla. Ka ngwaga wa lesome le metšo ye mene Kedore-Laomere le seboka sa gagwe ba tla ka madira a bona, gomme ba fenya Barafa kua Ashterote-Karnaime, le Basuse kua Hamo, le Baeme molaleng wa Kiriathaime, le Bahori dithabeng tša Seire; ba ba rakediša go fihla Ele-Parane, mathomong a lešoka. Ke moka ba gomela Kadeshe, yeo e bego e tsebja ka la Ene-Mishpate, ba thopa naga ka moka ya Baamaleke mme ba fenya Baamore bao ba bego ba dula Hatsetsone-Thamare. Ke moo kgoši ya Sodoma le ya Gomora le ya Adma le ya Tseboime le ya Bela di ilego tša hlamela madira a tšona ntwa ka moeding wa Sidime, mme tša lwa le kgoši ya Elamo le ya Goime le ya Babilonia le ya Elasara, dikgoši tše tlhano tša lwa le dikgoši tše nne. Moedi o be o tletše dikoti tša sekontiri, gomme ge kgoši ya Sodoma le ya Gomora di leka go tšhaba ntweng tša wela ka moo; fela dikgoši tše dingwe tše tharo tša tšhabela dithabeng. Dikgoši tšela tše nne tša tšea se sengwe le se sengwe Sodoma le Gomora, gotee le dijo, tša tloga natšo. Lote, morwa wa ngwanaboAbramo, o be a dula Sodoma, ka gona le yena ba mo tšea le tšohle tše e lego tša gagwe. Eupša monna yo mongwe a phonyokga gomme a bega ditaba tše go Abramo, Moheberu. Abramo yena o be a dula kgauswi le mehlare ye mekgethwa ye e bego e le ya Mamre, Moamore. Yena le bomorwarragwe, Eshkolo le Anere, e be e le bathuši ba Abramo. Ge Abramo a ekwa gore morwa wa ngwanabo o thopilwe, a kgoboketša banna ba ba itlhamilego mešašeng ya gagwe, ba makgolo a mararo le ba lesome le metšo ye seswai, mme a wela mohlaleng wa dikgoši tšela tše nne go fihla Dane. Fao a arola banna ba gagwe dihlopha, a hlasela manaba bošego mme a ba fenya. A ba rakediša go fihla Hoba, ka leboa la Damaskose, mme a buša thoto ka moka ye e bego e thopile. A ba a buša le morwa wa ngwanabo, Lote, le tše e bego e le tša gagwe, gotee le basadi le mathopša a mangwe. Ge Abramo a boa go fenya Kedore-Laomere le dikgoši tšela tše dingwe, kgoši ya Sodoma ya tšwa go yo mo gahlanetša kua moeding wa Shabe, woo gape o bitšwago Moedi wa Kgoši. Melkitsedeke, yo e bego e le kgoši ya Saleme gape e le moprista wa Modimo Yogodimodimo, a tliša senkgwa le beine go Abramo, a mo šegofatša a re: “A Modimo Yogodimodimo, yo a dirilego legodimo le lefase, a šegofatše Abramo! A Modimo Yogodimodimo a tumišwe, yoo a go fentšhišitšego manaba a gago!” Gomme Abramo a mo fa karolo ya lesome ya thoto yeo. Kgoši ya Sodoma ya re go Abramo: “Itšeele thoto mme o mpušetše batho ba ka ka moka.” Abramo a fetola a re: “Ke ena ke tiišitše pele ga Morena, Modimo Yogodimodimo, Mohlodi wa legodimo le lefase, gore ga go le se tee sa gago se ke tlago itšeela sona, le ge e le tlhale, goba leralana la seeta. Ke moo o ka se tsogego o rile: ‘Ke nna ke humišitšego Abramo.’ Nka se itšeele selo. Sa ka e tla ba fela tšeo banna ba ka ba šetšego ba di lle. Fela o lese bathuši ba ka, Anere le Eshkolo le Mamre, ba tšee dikarolo tša bona.” Ka morago ga tšeo Abramo a bona pono gomme a kwa Morena a bolela le yena a re: “O se ke wa boifa, Abramo. Ke tla go phemela kotsing, mme ka go fa moputso wo mogolo.” Eupša Abramo a re: “Morena, Mong wa ka, moputso woo o tla nkholang, ka gobane ga ke na bana? Mojalefa wa ka ke Eliesere wa Damaskose a nnoši. Ga se wa mpha bana, gomme yo mongwe wa makgoba a ka o tlile go ja bohwa bja ka.” Morena a re go yena: “Lekgoba le le ka se ke la ja lefa la gago; yo e lego morwa wa gago tiitii e tla ba yena mojalefa wa gago.” Morena a mo ntšhetša ntle a re: “Lebelela legodimong mme o bale dinaledi, ge o kgona; ditlogolo tša gago di tla ba kaalo.” Abramo a dumela go Morena, gomme ka baka la tumelo ya gagwe Morena a mmona e le moloki. Ke moo Morena a itšego go yena: “Ke nna Morena yo a go ntšhitšego Ure kua Babilonia go tlo go fa naga ye gore e be bohwa bja gago.” Eupša Abramo a re: “Morena, Mong wa ka, nka tseba bjang gore e tla ba ya ka?” Morena a mo fetola a re: “Ntlišetše kgomo ya tshadi le pudi le kgapa, ka moka e be tša mengwaga ye meraro, le mokuru le leeba.” Abramo a tliša diruiwa tšeo go Modimo, a di ripa ka bogare, mme a tšea mephapha a e bea ka go lebana ka methaladi ye mebedi; fela ge e le dinonyana tšela tšona a se ke a di ripaganya. Manong a theogela moo dibelebeleng tšeo, fela Abramo a a raka. Ge letšatši le dikela, Abramo a swarwa ke boroko bjo bogolo, mme a tlelwa ke poifo le letšhogo. Morena a re go yena: “Tseba gore ruri ditlogolo tša gago e tla ba bafaladi nageng e šele; e tla ba makgoba moo gomme ba tla gatelelwa mengwaga ye makgolo a mane. Eupša ke tla otla setšhaba seo se ba dirago makgoba, gomme ba tla tšea mahumo a mantši ge ba tloga moo nageng yeo. Ge e le wena, o tla ithobalela ka khutšo wa bolokwa o phetše galelele. Ba ba tlago boela mo ke moloko wa gago wa bone, mme ka nako yeo ke mo bokgopo bja Baamore bo tlago ba bo gaketše mo ba tlago ba ba swanela gore ke ba otle.” Ge letšatši le diketše, leswiswi le swere, ka bjako sebešo se se kuelelago muši le serumola se se laumago mollo tša rotoga mme tša feta gare ga mephapha yela ya diruiwa. Gona moo Morena a dira kgwerano le Abramo a re: “Ke tla fa ditlogolo tša gago naga ye go tloga mollwaneng wa Egepeta go fihlela nokeng ya Yufratese, go akaretša naga ya Bakene le ya Bakenase le ya Bakadmone le ya Bahete le ya Baperise le ya Barafa le ya Baamore le ya Bakanana le ya Bagirgashe le ya Bajebuse.” Mosadi wa Abramo, Sarai, o be a se a belegela Abramo bana. Fela o be a na le lekgoba la mosetsana la Moegepeta leo leina la lona e bego e le Hagare, ka gona Sarai a re go Abramo: “Nna Morena o ntimile thari. O reng o sa robale le lekgoba la ka la mosetsana? Mohlomongwe a ka mpelegela ngwana.” Abramo a dumela kgopelo ya Sarai. Ka gona Sarai a mo neela Hagare gore e be mosadi wa gagwe. Ke ge go fetile mengwaga ye lesome Abramo a dutše nageng ya Kanana. Abramo a robala le Hagare, mme Hagare a ima. Ge a lemoga gore o imile, a thoma go nyatša Sarai. Ke moo Sarai a itšego go Abramo: “Ke molato wa gago ge Hagare a nnyatša. Ke nna ka bonna ke go neetšego yena, gomme e sa le go tloga mola a lemogago gore o imile o a nnyatša. A Morena a ahlole gore nna le wena wa phošo ke mang.” Abramo a mo fetola a re: “Go lokile, ke lekgoba la gago mme o laolwa ke wena; dira se o se ratago ka yena.” Ke moka Sarai a swara Hagare gasehlogo, Hagare a ba a tšhaba. Morongwa wa Morena a gahlanetša Hagare mothopong kua lešokeng tseleng ya go ya Shure, gomme a re: “Hagare, lekgoba la Sarai, a o tšwa kae, mme o ya kae?” A mo fetola a re: “Ke tšhabela mong wa ka, Sarai.” Morongwa a re: “Boela go yena gomme o ikokobetše go yena.” Ke moo a itšego: “Ke tla go fa ditlogolo tše ntši mo e lego gore ga go yo a ka di balago. O tlile go ba le morwa mme o mo ree Ishmaele, ka gobane Morena o kwele sello sa gago sa tlaišego. Fela morwa wa gago e tla ba monna wa go se tlwaetšege, a etša pitsi; o tla lwa le mang le mang, mme mang le mang o tla lwa naye. O tla phela a hloile meloko ya gabo ka moka.” Hagare a ipotšiša a re: “Na e ka ba ruri ke bone Modimo mme ka fela ke phela?” Ka gona a rea Morena yo a boletšego le yena leina la “Modimo yo a bonago”. Ke ka baka leo batho ba bitšago sediba seo se lego gare ga Kadeshe le Berede “Sediba sa Mophelaampona”. Hagare a belegela Abramo morwa, mme Abramo a mo rea leina la Ishmaele. Abramo o be a na le mengwaga ye masome a seswai le metšo ye e selelago ka nako yeo. Ge Abramo a na le mengwaga ye masome a senyane a metšo ye senyane, Morena o ile a iponagatša go yena mme a re: “Ke nna Modimo Ramaatlaohle. O ntheetše mme ka mehla o dire se se lokilego. Ke tla dira kgwerano ya ka le wena, mme ka go fa ditlogolo tše ntšintši.” Abramo a itahlela fase ka sefahlego, mme Modimo a re: “Še kgwerano ye ke e dirago le wena: O tla ba tatagoditšhaba tše ntši. Leina la gago e ka se hlwe e le Abramo, eupša e tla ba Abrahama, ka gore ke go dira tatagoditšhaba tše ntši. Ke tla go fa ditlogolo tše ntšintši ya ba ditšhaba, gomme tše dingwe tša tšona e tla ba dikgoši. “Ke tla dira kgwerano le wena le ditlogolo tša gago tša meloko ya ka moso, ya ba kgwerano ya neng le neng, ya go re ke tla ba Modimo wa gago le wa ditlogolo tša gago. Ke tla fa wena le ditlogolo tša gago yona naga ye bjale o lego mofaladi go yona. Naga ka moka ya Kanana e tla ba ya ditlogolo tša gago go ya go ile, gomme ke tla ba Modimo wa bona.” Modimo a re go Abrahama: “Le wena o botegele kgwerano ya ka le wena, wena gotee le ditlogolo tša gago tša meloko ya ka moso. Sese sešupo sa kgwerano ya ka le wena, wena le ditlogolo tša gago: Motho mang le mang wa monna gare ga lena a bolotšwe. Go tloga bjale le bolotše lesea le lengwe le le lengwe la mošemane ge le na le matšatši a seswai, gotee le makgoba a a tswalwago malapeng a lena, le makgoba a le a rekago go bašele. Se e tla ba sešupo sa kgwerano ya ka le lena. *** Yo mongwe le yo mongwe a bolotšwe. Leswao le la mmeleng e tla ba sešupo sa kgwerano ya ka le lena ya neng le neng. Mošemane goba monna ofe le ofe yo a sego a bolotšwa e ka se hlwe e le yo mongwe wa setšhaba sa ka, ka gore ga se a botegela kgwerano ya ka.” Modimo a re go Abrahama: “O se ke wa hlwa o bitša mosadi wa gago Sarai; go tloga bjale leina la gagwe ke Sara. Ke tla mo šegofatša gomme ke tla go fa morwa ka yena. Ke tla mo šegofatša gomme e tla ba mmagoditšhaba, mme go tla ba le dikgoši gare ga ditlogolo tša gagwe.” Abrahama a itahlela fase ka sefahlego a sega ka pelong a re: “Na monna wa mengwaga ye lekgolo a ka tswala ngwana? A Sara a ka ba le ngwana a na le mengwaga ye masome a senyane?” Abrahama a re go Modimo: “Hle, a Ishmaele e no ba mojalefa wa ka.” Eupša Modimo a re: “Aowa, mosadi wa gago, Sara, o tla go belegela morwa gomme o mo ree leina la Isaka. Ke tla botegela kgwerano ya ka le yena le ditlogolo tša gagwe. Ke kgwerano ya go ya go ile. Ke kwele kgopelo ya gago mabapi le Ishmaele, ka fao ke tla mo šegofatša ka mo fa bana ba bantši le ditlogolo tše ntši. E tla ba tatagobabuši ba lesome le metšo ye mebedi, mme ke tla dira ditlogolo tša gagwe setšhaba se segolo. Eupša ke tla botegela kgwerano ya ka le morwa wa gago, Isaka, yo a tlago belegwa ke Sara ka tšona nako tše ngwaga wo o tlago.” Ge Modimo a feditše go bolela le Abrahama, o ile a mo tlogela, a rotoga. Ka lona letšatši leo Abrahama a phetha taelo ya Modimo, a bolotša morwa wa gagwe, Ishmaele, le bašemane le banna ka moka ba lapa la gagwe, gotee le makgoba a a tswetšwego lapeng la gagwe, le ao a a rekilego. Abrahama o be a na le mengwaga ye masome a senyane a metšo ye senyane ge a bolotšwa, mme morwa wa gagwe, Ishmaele, o be a na le mengwaga ye lesome le ye meraro. Bobedi bja bona ba boloditšwe ka letšatši le tee, gotee le makgoba ohle a Abrahama. Morena o ile a iponagatša go Abrahama mehlareng ye mekgethwa ya Mamre. Abrahama o be a dutše mojakong wa mošaša wa gagwe nakong ya ge letšatši le fiša tšhiritšhiri. Ya re ge a iša mahlo a bona banna ba bararo ba eme moo. Ge a ba bona a kganyelela go ba gahlanetša. A obamela fase, a re: “Barena, hle, se mpheteng, nna, mohlanka wa lena. A ke yo le tšeela meetse le tle le hlape maoto; le ka khutša ka fase ga mohlare wo. Ke tla ba ka le tlela le dijonyana tša go le lapološa, le tsebo tšwela pele le leeto la lena, ka gobane le fetile mo lapeng la mohlanka wa lena.” Ba mo fetola ba re: “Go lokile.” Abrahama a akgofela mošašeng a re go Sara: “Akgofa o tšee mokotlana wa bupi bja mathume, o bo dube, o apee dinkgwa.” Ke moo a kitimetšego mohlapeng mme a kgetha namane ya lerojana ya go nona, a e neela mohlanka, mme yoo a itlhaganela a e hlaba. Abrahama a tšea lebebe le maswi le nama a di bea pele ga banna bale ka moo fase ga mohlare, ba ja, yena a ba emaemela. Ke moo ba mmotšišitšego ba re: “Mosadi wa gago, Sara, o kae?” A ba fetola a re: “O ka mola mošašeng.” Yo mongwe wa bona a re: “Ngwaga wo o tlago ka nako ye ke tla boa mo, gomme mosadi wa gago, Sara, o tla be a na le morwa.” Sara o be a le ka morago ga gagwe, mojakong wa mošaša, a theeditše. Abrahama le Sara ba be ba tšofetše kudu, gomme Sara o be a sa hlwe a bona kgwedi. Ka gona Sara a itshegela a re: “Na nka re ke kgekotše ke le bjale ka hlwa ke sa kgona go ipshina ka go robala le monna? Monna wa ka le yena o tšofetše.” Ke moo Morena a botšišitšego Abrahama a re: “Sara o reng a sega ge a re: ‘Na nka re ke tšofetše ka mokgwa wo ka hlwa ke sa ba le ngwana?’ A go na le seo se ka šitago Morena? Bjalo ka ge ke boletše, ngwaga wo o tlago ka nako ye ke tla boa mo, mme Sara o tla be a na le morwa.” Ka ge Sara a be a boifa o ile a latola a re: “Ga se ka sega.” Morena a re: “Ee, o segile, hle.” Ke moo banna bao ba tlogilego ba ya felo moo ba ka rego ge ba le gona ba okamela motse wa Sodoma, mme Abrahama a ba felegetša. Gomme Morena ka pelong a re: “Na nka napa ka utela Abrahama seo ke tlilego go se dira? Ditlogolo tša gagwe e tla ba setšhaba se segolo se maatla, gomme ditšhaba tša lefase ka moka di tla nkgopela go di šegofatša bjalo ka ge ke mo šegofaditše. Ke mo kgethile gore a laye barwa ba gagwe le ditlogolo tša gagwe gore ba ntheetše, mme ba dire tše di swanetšego le tše di lokilego. Ge ba ka dira bjalo, ke tla mo direla tšohle tše ke mo holofeditšego tšona.” Ke moo Morena a itšego go Abrahama: “Motse wa Sodoma le wa Gomora e begwa ka tše di šiišago, gomme sebe sa badudi ba gona ke se segolo kudu. Ke swanetše go theoga go yo bona ge eba tše ke kwelego ba begwa ka tšona ke nnete; gomme ge e se nnete ke tla tseba.” Ke moo banna ba babedi bao ba tlogilego ba leba Sodoma, Morena yena a šala le Abrahama. Abrahama a batamela Morena, a mmotšiša a re: “A ruri o yo fediša batho ba ba se nago molato mmogo le bao ba nago le molato? Ge go na le batho ba masome a fetšago seatla ba ba se nago molato motseng, a o ka fediša motse ka moka? A o ka se o swarele ka baka la bao ba masome a mahlano? Hle, taba ye bjalo o se e dire, wa bolaya baloki le bakgopo gotee, wa swara baloki le bakgopo go swana. Hle, yeo taba o se ke wa e dira! Ga ke re Moahlodi wa lefase ka moka o swanetše go dira ka toka?” Morena a mo fetola a re: “Ge nka hwetša baloki ba masome a mahlano kua Sodoma, ke tla swarela motse ka moka ka baka la bona.” Abrahama a buša a re: “Hle, o ntshwarele ge ke fela ke bolela le wena, Mong wa ka. Ke nna motho fela, ga ke na tokelo ya go bolela selo. Mohlomongwe go ka ba le baloki ba masome a mane le ba bahlano fela, e sego ba masome a mahlano. A o tla fediša motse ka moka ka gore go hlaelelwa ba bahlano?” Morena a mo fetola a re: “Nka se fediše motse woo ge nka hwetša baloki ba masome a mane le ba bahlano.” Abrahama a tšwela pele a re: “Mohlomongwe e tla ba ba masome a mane fela.” Morena a mo fetola a re: “Nka se o fediše ge go na le ba masome a mane.” Abrahama a re: “Hle, o se ke wa mpefelelwa, Mong wa ka, ge ke bolela gape. Mohlomongwe e tla ba ba masome a mararo fela.” Morena a mo fetola a re: “Nka se o fediše ge nka hwetša ba masome a mararo.” Abrahama a re: “Hle, o ntshwarele ge ke sa fela ke bolela nago, Mong wa ka. Mohlomongwe go ka ba le ba masome a mabedi fela.” Morena a re: “Nka se fediše motse woo ge nka hwetša ba masome a mabedi fela.” Abrahama a re: “Hle, o se ke wa mpefelelwa, Mong wa ka, mme ke tla bolela gatee fela. Mohlomongwe go ka hwetšwa ba lesome fela.” Morena a re: “Nka se o fediše ge e le ba lesome.” Ya re ge Morena a feditše go bolela le Abrahama a sepela, mme Abrahama a boela gae. Ge barongwa bale ba babedi ba fihla Sodoma mantšiboa ao, Lote o be a dutše kgorong ya motse. Ge a ba bona a emelela a ya go ba gahlanetša. A obamela fase pele ga bona, a re: “Barena, a re yeng ngwakong wa ka, nna, mohlanka wa lena. Le hlape maoto, le robale gona. E re ka moswane le tsogele tseleng.” Bona ba mo fetola ba re: “Aowa, re tla robala mo kgorong ya motse.” A fela a ba phegeletše, ba ba ba ya le yena ngwakong wa gagwe. A laela bahlanka ba gagwe gore ba ba apeele dijo le dinkgwa tše di se nago komelo, gomme baeng ba ja. Pele ga ge baeng ba eya malaong, banna ba Sodoma ba dikanetša ngwako. Banna ka moka ba motse, masogana le bakgalabje, ba be ba le moo. Ba goeletša Lote ba re: “Banna ba ba tlilego mo ga gago bošegong bjono ba kae? Ba ntšhe o ba tliše go rena gore re tle re ba robale!” Lote a tšwa, gomme a tswalela lemati. A bolela le bona a re: “Bagešo, ke a le rapela, le se ke la dira taba ye mpe ka tsela ye! Bonang, ke na le barwedi ba babedi bao ba sego ba ke ba robala le monna. A ke le neeleng bona mme le ka dira seo le se ratago ka bona. Fela banna ba le se ke la ba dira selo; ke baeng ba lapa la ka, gomme ke swanetše go ba šireletša.” Eupša bona ba re: “Re šuthelele, mofaladi tena! O mang wena o ka re botšago se re swanetšego go se dira? Šutha, go sego bjalo re tla go swara gampe go feta bona.” Ba kgorometša Lote, mme ba šuthela pele go pšhatla lemati. Fela banna ba babedi bale ba ka gare ba ntšha matsogo mme ba gogela Lote ka ngwakong, ba tswalela lemati. Ba napa ba foufatša banna ka moka ba ba lego ka ntle moo ba ilego ba šitwa ke go bona lemati. Banna bao ba babedi ba re go Lote: “Ge eba o na le yo mongwe mo, e ka ba barwa, barwedi, bakgonyana, goba meloko ye mengwe mo motseng wo, ba ntšhe, ka gobane re tlile go fediša felo fa. Morena o kwele tše di šiišago tše batho ba ba begwago ka tšona, mme o re romile go tlo fediša Sodoma.” Ke moo Lote a ilego go bakgonyana ba gagwe, a re go bona: “Itlhaganeleng le tšweng mo; Morena o tlile go fediša felo fa.” Eupša bona ba gopola gore o a swaswa. Ka masa barongwa ba tutuetša Lote ba re: “Itlhaganele! Tšea mosadi le barwedi ba gago ka babedi o tšwe, gore le se ke la tla la bolawa ge motse o fedišwa.” Lote a fela a diega. Le ge go le bjalo, Morena a mo šokela; ka gona banna bao ba ba tšea ka matsogo, yena le mosadi le barwedi ba gagwe ka babedi, mme ba ba ntšha motseng. Ke moo yo mongwe wa barongwa a itšego: “Tšhabang le iphološe! Le se ke la lebelela morago goba la ema ka moeding. Le tšhabeleng dithabeng gore le se ke la tla la bolawa.” Eupša Lote a mo fetola a re: “Aowa hle, mong wa ka, o se ke wa re kganyediša ka mokgwa woo. Bona, o bile yo botho go nna, o ntšhoketše kudu mme wa mphološa. Fela nka se kgone go tšhabela kua dithabeng; nka welwa ke masetlapelo ka hwa pele ga ge ke fihla. Motse šole o kgauswi mo e lego gore go wona nka fihla, ebile ke motsana wo monnyane. A ke tšhabele go wona – ga ke re ke motse wo monnyane – mme mola ke tla bolokega.” Morongwa a re: “Go lokile. Nka se fediše motse woo. Itlhaganele! Tšhaba! Nka se dire selo pele ga ge o fihla gona.” Ka ge Lote a rile ke wo monnyane, motse woo o ile wa rewa leina la Tsoare. Ge Lote a fihla Tsoare ke ge letšatši le hlaba. Morena a neša tshebela ye e tukago godimo ga motse wa Sodoma le wa Gomora, mme a e fiša le moedi ka moka, gotee le batho ba fao ka moka le tšohle tše di bego di metše nageng. Mosadi wa Lote yena o ile a lebelela morago, mme a fetošwa sehlwaseeme sa letswai. Ka letšatši le le latelago Abrahama a tsogela felo fale a bego a na le Morena gona. Ge a iša mahlo Sodoma le Gomora le moeding ka moka a bona muši o thunya nageng, o le bjalo ka muši wo o tšwago moubelong wo mogolo. Ge Modimo a fediša metse ya moeding moo Lote a bego a dula gona, o ile a gopola Abrahama, mme a tšhabiša Lote. Ka ge Lote a be a boifa go dula Tsoare, yena le barwedi ba gagwe ka babedi ba ile ba rotogela dithabeng, gomme fao ba dula ka leweng. Morwedi yo mogolo a re go ngwanabo: “Tatagorena o a tšofala, gomme ga go banna mo nageng ye ba ba tlago tla ba robala le rena bjalo ka ge e le setlwaedi lefaseng ka moka. Tlaa re tagiše tatagorena beine, gore re tle re kgone go robala naye mme re be le bana le yena.” Bošego bjoo ba mo noša beine, mme morwedi yo mogolo a robala naye; fela Lote a se tsebe taba yeo. Ka letšatši le le latelago morwedi yo mogolo a re go ngwanabo: “Nna ke robetše naye bošego bja go feta; bjale a re mo tagiše beine gape bošego bjo, mme le wena o robale naye gore re be le bana le tatagorena.” Ka gona le bošego bjoo ba mo tagiša beine, mme morwedi yo monnyane a robala naye. Gapegape a se tsebe taba yeo. Ka tsela ye barwedi ba Lote ka bobedi ba imišwa ke tatagobona. Morwedi yo mogolo a ba le morwa yo a ilego a mo rea leina la Moaba. Yena e bile rakgolokhukhu wa Bamoaba ba lehono. Morwedi yo monnyane le yena a ba le morwa yo a ilego a mo rea leina la Bene-Ami. Yena e bile rakgolokhukhu wa Baamone ba lehono. Abrahama o ile a tloga Mamre a ya seleteng sa ka borwa bja Kanana, mme a dula gare ga Kadeshe le Shure. Mola a falaletše Gerare o ile a re mosadi wa gagwe, Sara, ke kgaetšedi ya gagwe. Ka gona, Kgoši Abimeleke wa Gerare a roma bahlanka ba tšea Sara. Ya re bošego Modimo a iponagatša go yena ka toro a re: “O kgauswi le go hwa, ka gore o tšere mosadi yo; ke mosadi wa monna yo mongwe.” Fela Abimeleke o be a sešo a robala naye, gomme a re: “Mong wa ka, ga ke na molato! A bjale o tla mpolaya le setšhaba sa ka? Abrahama ke yena a itšego ke kgaetšedi ya gagwe, mme le yena mosadi a re Abrahama ke kgaetšedi ya gagwe. Ke dirile taba ye ke se na bomenetša, gomme ga ke ipone molato.” Modimo a mo fetola torong yeo a re: “Ee, le nna ke a tseba gore o dirile taba yeo o se na bomenetša; ka fao ke go thibetše gore o se mphošetše ka go robala naye. Bjale ge, mmušetše go monna wa gagwe. Yena ke moprofeta, mme o tla go rapelela gore o se ke wa hwa. Eupša ge o sa mmušetše, tseba gore o tlilo hwa, wena le setšhaba sa gago ka moka.” Ka le le latelago Abimeleke a tsoga e sa le bošego a bitša bakgomana ba gagwe ka moka, a ba botša tšohle tšeo di hlagilego, mme ba tšhoga kudu. Abimeleke a bitša Abrahama, a mmotšiša a re: “Ke taba mang ye o re dirilego yona ye? Ke go fošeditše ka eng ge e bile o hlolela nna le mmušo wa ka molato wo mokaaka? O ntirile taba ye e sa dirwego. Ke ka baka lang o dirile taba ye?” Abrahama a mo fetola a re: “Ke be ke gopola gore ga go na le motho yo a boifago Modimo mo, le gore ba tla mpolaya gore ba tšee mosadi wa ka. Yena gabotsebotse ke kgaetšedi ya ka. Ke morwedi wa tate, fela e sego wa mme, gomme ke mo nyetše. Ka gona, ge Modimo a nntšha lapeng la tate gore ke ralale le dinaga, ke ile ka re go mosadi wa ka: ‘Se o ka bontšhago ka sona gore o a nthata sese: Gohle mo re fihlago gona o re ke nna kgaetšedi ya gago.’ ” Ke moo Abimeleke a bušeditšego Sara go Abrahama, a mo fa le dihuswane, dikgomo le makgoba. A re go Abrahama: “Naga ya ka še; dula mo o go kganyogago.” A re go Sara: “Ke fa kgaetšedi ya gago dipapetlana tša silibera tše sekete e le bohlatse go bohle ba ba nago le wena gore ga o ne molato; yo mongwe le yo mongwe o tla tseba gore ga go sebe se o se dirilego.” Ka baka la seo se hlagetšego Sara, mosadi wa Abrahama, Morena o be a dirile gore mosadi yo mongwe le yo mongwe lapeng la Abimeleke a se kgone go ba le bana. Ka gona Abrahama a rapelela Abimeleke, mme Modimo a mo fodiša, a fodiša le mosadi wa gagwe le makgoba a basadi gore ba kgone go ba le bana. Morena o ile a šegofatša Sara, bjalo ka ge a be a holofeditše, gomme Sara a ima, a belegela Abrahama morwa mola Abrahama a tšofetše. Mošemanyana a belegwa ka nako yeo Modimo a bego a boletše gore o tla belegwa ka yona. Abrahama a mo rea leina la Isaka. Ge lesea le na le matšatši a seswai Abrahama a le bolotša, bjalo ka ge Modimo a be a mo laetše. Abrahama o be a na le mengwaga ye lekgolo ge Isaka a belegwa. Sara a re: “Modimo o ntlholetše lesego. Yo mongwe le yo mongwe yo a kwago taba ye o tla sega le nna.” A tlaleletša ka go re: “Ke mang yo a ka bego a boditše Abrahama a re Sara o tla antšha bana? Le ge go le bjalo, ke mmelegetše morwa mola a tšofetše.” Ngwana a gola, gomme ka letšatši le a tshwešwago ka lona Abrahama a dira mokete wo mogolo. Ka letšatši le lengwe Ishmaele yoo Hagare, Moegepeta, a bego a mmelegetše Abrahama, o be a bapala le morwa wa Sara, Isaka. Sara a ba bona gomme a re go Abrahama: “Raka lekgoba le la mosetsana le morwa wa lona. Morwa wa lekgoba le ga a swanela go ja bohwa gotee le morwa wa ka, Isaka.” *** Taba yeo ya nyamiša Abrahama kudu, ka gobane Ishmaele le yena e be e le morwa wa gagwe. Eupša Modimo a re go Abrahama: “O se ke wa tshwenyega ka mošemanyana le ka lekgoba la gago, Hagare. Dira se sengwe le se sengwe seo Sara a go botšago sona, ka gobane ke ka Isaka moo o tlago ba le ditlogolo. Fela morwa wa lekgoba le la mosetsana le yena ke tla mo fa bana ba bantši, gore e tle e be setšhaba, ka gobane le yena ke morwa wa gago.” Ka le le latelago Abrahama a tsoga e sa le bošego, a neela Hagare dijo le lekuka la meetse. A mmeleša ngwana, a mo fa tsela. Hagare a tloga a ralala le lešoka la Beresheba. Ge a feletšwe ke meetse, a tlogela ngwana ka fase ga mohlašana, a yo dula fase bokgole bjo e ka bago dimetara tše lekgolo. Ka pelong a re: “Nka se kgotlelele go bona ngwana a ehwa.” Mola a dutše fao a thoma go lla. Modimo a kwa ngwana a lla, mme morongwa wa Modimo a bolela le Hagare a le legodimong a re: “A o tshwentšwe ke eng, Hagare? O se ke wa boifa. Modimo o kwele mošemanyana a lla. Emelela, o ye o mo kuke, o mo homotše. Ke tla dira ditlogolo tša gagwe setšhaba se segolo.” Ke moo Modimo a mmutšego mahlo, gomme a bona sediba. A ya a tlatša lekuka lela ka meetse, a noša mošemanyana. Modimo a ba le mošemanyana yoo ge a gola; a phela lešokeng gomme ya ba setsebi sa mosebe. Mmagwe a mo tšeela mosadi wa Moegepeta. Yona mehleng yeo Abimeleke a ya le Pigole, molaodi wa madira a gagwe, go Abrahama a re: “Modimo o na le wena go tšohle tše o di dirago. Ka gona nkenele fa pele ga Modimo gore o ka se nthadie, nna le bana ba ka le ditlogolo tša ka. Ke go botegetše, ka fao ena gore le wena o tla mpotegela wa botegela le naga ye o falaletšego go yona.” Abrahama a re: “Ke a ena.” Gomme Abrahama a ipelaetša go Abimeleke ka sediba se bahlanka ba Abimeleke ba bego ba se thopile. Abimeleke a re: “Ga ke tsebe gore ke mang yo a dirilego taba yeo. Ga se wa ka wa mpotša, gomme ke la mathomo ke ekwa taba yeo.” Ke moo Abrahama a neetšego Abimeleke dihuswane le dikgomo, gomme bobedi bja bona ba dira kwano. Abrahama a hlaola dikwanyana tše di šupago tša ditshadi mohlapeng wa gagwe, gomme Abimeleke a mmotšiša a re: “O diretšeng taba yeo?” Abrahama a mo fetola a re: “Tšea dikwanyana tše di šupago tše. Ka go dira seo o dumela gore ke nna ke epilego sediba se.” Ka gona felo fao gwa bitšwa Beresheba, ka gobane ke fao bobedi bja bona ba enelanego. Ka morago ga ge ba enelane bjalo fao Beresheba, Abimeleke le Pigole ba boela Filistia. Abrahama a bjala mohlare wa motamariske moo Beresheba, gomme a khunamela Morena, Modimo wa go sa felego. Abrahama o dutše moo Filistia lebaka le letelele. Ka morago ga lebaka Modimo a leka Abrahama; a mmitša a re: “Abrahama!” Yena a araba a re: “Ke nna yo!” Modimo a re: “Tšea morwa wa gago, yo e lego yena a nnoši, Isaka, yo o mo ratago kudu, o ye nageng ya Moria. Fao o ntirele sehlabelo sa go tšhungwa ka moka ka yena thabeng ye ke tlago go laetša yona.” Ka le le latelago e sa le bošego Abrahama a phapha dikgong tša sehlabelo, a saletša pokolo ya gagwe, gomme a tloga le Isaka le bahlanka ba babedi. Ba leba felo fao Modimo a mmoditšego gona. Ka letšatši la boraro Abrahama a bona felo fao a sa le kgojana. Ke moo a itšego go bahlanka: “Šalang mo le pokolo ye. Nna le mošemanyana re tla fetela mola go yo rapela, mme ka morago ra boela mo go lena.” Abrahama a rweša Isaka dikgong tša sehlabelo, gomme yena a swara thipa le magala a go gotša mollo. Ge bobedi bja bona ba swere tsela mmogo, Isaka a re go tatagwe: “Tate!” Tatagwe a araba a re: “Eye, ngwanaka.” Isaka a mmotšiša a re: “Mollo le dikgong šedi, kwanyana ya sehlabelo yona e kae?” Abrahama a mo fetola a re: “Modimo o tla inyakela yona, ngwanaka.” Gomme bobedi bja bona ba fela ba swere tsela mmogo. Ge ba fihla felo fao Modimo a mmoditšego gona, Abrahama a aga aletare, gomme a beakanya dikgong godimo ga yona. A tlema morwa wa gagwe gomme a mmea aletareng godimo ga dikgong. Ke moka a tšea thipa gore a mmolaye. Eupša morongwa wa Morena a mmitša a le legodimong a re: “Abrahama, Abrahama!” Yena a araba a re: “Ke nna yo.” Morongwa a re: “O se gobatše mošemanyana yoo goba wa mo dira selo. Bjale ke a tseba gore o boifa Modimo, ka gobane ga se wa gana go mo neela morwa wa gago a nnoši.” Abrahama ge a lebelela a bona kgapa e tantšwe ka sethokgwaneng ka dinaka. A ya a e tšea mme a dira sehlabelo sa go tšhungwa ka moka ka yona legatong la morwa wa gagwe. Abrahama a rea felo fao leina la “Morena o a fa.” Gomme le lehono batho ba sa re: “Thabeng ya Morena o a fa.” Morongwa wa Morena a bitša Abrahama la bobedi a le legodimong a re: “Morena o re: ‘Ke ena ka nna mong gore ka ge o dirile taba ye gomme o se wa ntima morwa wa gago a nnoši, ke tla go šegofatša kudu, ka go fa le ditlogolo tše ntši bjalo ka dinaledi tša legodimo goba dithorwana tša lešabašaba lebopong la lewatle. Ditlogolo tša gago di tla fenya manaba a tšona. Ditšhaba tša lefase ka moka di tla nkgopela go di šegofatša bjalo ka ge ke šegofaditše ditlogolo tša gago, ka gobane o phethile taelo ya ka.’ ” Abrahama a boela go bahlanka ba gagwe, gomme ba tloga mmogo ba ya Beresheba, mme Abrahama a dula fao. Ka morago ga lebaka Abrahama a kwa gore le Milka o belegetše Nahoro, ngwanabo, bana: Utse, wa mathomo, le Buse, ngwanabo, le Kemuele, tatagoAramo, le Kesede le Haso le Pildashe le Jidelafo le Bethuele, tatagoRebeka. Milka o belegetše Nahoro, ngwanaboAbrahama, barwa bao ba seswai. Reuma, motlabo wa Nahoro, yena o belege Tebage le Gahama le Tahashe le Maaka. Sara o ile a phela mengwaga ye lekgolo le masome a mabedi le metšo ye e šupago. O hwetše Kiriate-Arba, e lego Hebrone, nageng ya Kanana, mme Abrahama a mo ilela. O ile a tloga felo fao setopo sa mosadi wa gagwe se bego se le gona, gomme a ya go Bahete a re: “Ke nna mošele le mofaladi gare ga lena; nthekišetšeng naga gore ke kgone go boloka mosadi wa ka.” Bona ba mo fetola ba re: “Hle, re theetše, morena. O mokgomana yo maatla gare ga rena; boloka mosadi wa gago lebitleng le le phalago mabitla a re nago le ona. Mo gare ga rena ga go yo a ka se thabelego go go fa lebitla gore o boloke mohu wa gago.” Ke moo Abrahama a obamilego pele ga bona, a re: “Ge le ntumelela gore ke boloke mosadi wa ka mo, hle, mpoleleleng le Efrone, morwa wa Tsohare, gore a nthekišetše lewa la Makapela leo le lego ka lešing la tšhemo ya gagwe. Le mo kgopeleng gore a nthekišetše lona ka theko ye e le lekanego le le gona mo, gore e tle e be felo ga ka ga polokelo.” Efrone yena o be a dutše le Bahete ba bangwe kgorong ya motse; a fetola a kwewa ke yo mongwe le yo mongwe fao a re: “Theetša, morena, ke tla go fa tšhemo ka moka le lewa leo le lego go yona. Mo pele ga batho ba gešo ke tla go fa yona gore o kgone go boloka mosadi wa gago.” Eupša Abrahama a obama pele ga badudi ba moo, a araba Efrone bohle ba ekwa a re: “Hle, anke o ntheetše. Ke nyaka go e reka. Amogela tefelo ya ka, gomme ke tla boloka mosadi wa ka moo.” Efrone a mo fetola a re: “Morena, nke o ntheetše. Na re ka napa ra hlwa re ngangišana ka tšhemo ye e jago fela dipapetlana tša silibera tše makgolo a mane? Boloka mosadi wa gago go yona.” Abrahama a dumela, mme a ela tšhelete ye Efrone a e boletšego a kwewa ke batho – dipapetlana tša silibera tše makgolo a mane, go ya ka dikeloboima tša semmušo tše di šomišwago ke bagwebi. Ke ka moo tšhemo yela e bego e le ya Efrone kua Makapela, ka bohlabela bja Mamre, e bilego ya Abrahama ka gona. E be e le tšhemo le lewa leo le bego le le go yona le mehlare ka moka go fihlela lešing la tšhemo. Thekišetšano yeo e ile ya phethwa pele ga Bahete ka moka bao ba bego ba le gona kgorong. Ka morago ga moo Abrahama a yo boloka mosadi wa gagwe, Sara, ka leweng leo nageng ya Kanana. Ka gona tšhemo yeo e bego e le ya Bahete le lewa le le lego go yona ya ba serapa sa Abrahama sa go bolokela bahu. Bjale Abrahama o be a tšofetše kudu, gomme Morena o be a mo šegofaditše dilong ka moka. A bolela le mohlanka wa gagwe yo mogolo yo a bego a hlokometše tšohle tše a bego a na le tšona a re: “Nke o tsenye seatla sa gago gare ga dirope tša ka, o ene. Ke nyaka go go eniša ka Morena, Modimo wa legodimo le lefase, gore o ka se kgethele morwa wa ka mosadi gare ga batho ba ba mo Kanana. O boele nageng ye ke tswetšwego go yona, gomme o tšeele morwa wa ka, Isaka, mosadi melokong yešo.” Eupša mohlanka a mmotšiša a re: “Bjale ge mosetsana yoo a ka se dumele go tloga ga gabo go tla le nna nageng ye, na ke bušetše morwa wa gago nageng yela o tšwago go yona?” Abrahama a mo fetola a re: “Morwa wa ka yena o se ke wa ba wa leka go mmušetša kua! Morena, Modimo wa legodimo, o nntšhitše lapeng la tate le nageng ya gešo, gomme a nkenela gore o tla neela ditlogolo tša ka naga ye. O tla roma morongwa wa gagwe a go etelela pele, gore o nyalele morwa wa ka mosadi fao. Ge mosetsana yoo a ka gana go tla le wena, o tla bofologa kenong ye. Morwa wa ka yena o se ke wa ba wa mmušetša kua.” Ka fao mohlanka yoo a bea seatla gare ga dirope tša Abrahama, mong wa gagwe, gomme a ena gore o tla dira seo Abrahama a se kgopetšego. Mohlanka yoo a tšea dikamela tše lesome tša mong wa gagwe, a tšea le dimpho tša mehutahuta, gomme a ya motseng wa gaboNahoro kua Mesopotamia. Ge a fihla a khunamiša dikamela sedibeng ka ntle ga motse. E be e le ka merithi ye megolo, nako yeo basadi ba bego ba etla go ga meetse ka yona. A rapela a re: “Morena, Modimo wa mong wa ka, Abrahama, mphe mahlatse lehono mme o botegele mong wa ka. Ke nna yo mo sedibeng seo makgarebe a motse wo a tlago tla go ga meetse. Ke tla re go yo mongwe wa bona: ‘Hle, sekamiša moeta wa gago gomme o nnoše meetse.’ Ge a ka re: ‘Nwaa, gomme ke tla gela le dikamela tša gago meetse,’ a e be yena yoo o mmeetšego mohlanka wa gago, Isaka. Ge taba ye e ka direga, ke tla tseba gore o botegetše mong wa ka.” A sešo a fetša go rapela, Rebeka a fihla a beile moeta wa meetse legetleng. Yena e be e le morwedi wa Bethuele, yo e bego e le morwa wa ngwanaboAbrahama, Nahoro, le mosadi wa gagwe, Milka. E be e le mosetsana yo mobotse kudu, gomme a se a ke a robala le monna. A theogela sedibeng, a tlatša moeta wa gagwe mme a rotoga. Mohlanka yola a kganyelela go mo gahlanetša gomme a re: “Hle, nnoše meetse moeteng wa gago.” Mosetsana a re: “O ka nwa, morena,” gomme ka bjako mosetsana a rola moeta legetleng mme a o swareletša ge mohlanka a enwa. Ge a kgotšwe, mosetsana a re: “Ke tla gela le dikamela tša gago meetse gore di nwe di kgolwe.” Ka bjako a tšhollela meetse ka legopong la diruiwa mme a kganyelela sedibeng go yo di gela gape, go fihlela a nošitše dikamela tša mohlanka yola ka moka. Monna yoo a fela a mo lebeletše a homotše go bona ge e ka ba Morena o mo atlile leetong la gagwe. Ge mosetsana a feditše, monna yola a ntšha mphiri wa nko wa gauta wa theko ye kgolo, a o khwamela nkong ya mosetsana, a mo rweša le maseka a mabedi a magolo a gauta matsogong. A re go mosetsana yoo: “Hle, mpotše gore o morwedi wa mang. A go na le marobalo ngwakong wa tatago moo re ka robalago gona?” Mosetsana a mo fetola a re: “Ke nna morwedi wa Bethuele, morwa wa Nahoro le Milka. Go na le ditlhaka le furu ye ntši ka gešo, le marobalo a gona.” Ke moo monna yoo a obamego, a khunamela Morena a re: “A go retwe Morena, Modimo wa mong wa ka, Abrahama, yo a botegetšego go phetha se a se tshephišetšego mong wa ka. Morena o ntlišitše go meloko ya mong wa ka.” Mosetsana a kganyelela ngwakong wa mmagwe, a yo ba botša ditaba tšeo. Rebeka o be a na le kgaetšedi yo leina la gagwe e bego e le Labane, gomme yena Labane a kganyelela ka ntle a ya sedibeng seo mohlanka wa Abrahama a bego a le go sona. O be a bone mphiri wola wa nko le maseka matsogong a kgaetšediagwe, gomme a mo kwele ge a bolela tšeo monna yoo a mmoditšego tšona. A ya go mohlanka wa Abrahama yoo a bego a eme moo dikameleng tša gagwe sedibeng, gomme a re: “A re ye le nna ka gae, wena mošegofatšwa wa Morena. O reng o eme ka ntle? Ke go lokišeditše ka ngwakong wa ka, le sebaka sa dikamela tša gago ke se lokišitše.” Ka gona monna yoo a tsena ka ngwakong, gomme Labane a fološa merwalo dikameleng, a di fa mahlaka le furu. Ka morago ga moo a tlišetša mohlanka wa Abrahama le banna ba gagwe meetse a go hlapa maoto. Ge ba mo tlišetša dijo a re: “Nka se je ke sešo ka bolela se ke se tletšego.” Labane a re: “Se bolele.” Monna yoo a re: “Ke nna mohlanka wa Abrahama. Morena o šegofaditše mong wa ka kudu, gomme ya ba mohumi. O mo file mehlape ya dihuswane, le ya dikgomo, silibera, gauta, makgoba a banna le a basadi, dikamela le dipokolo. Sara, mosadi wa mong wa ka, o mmelegetše morwa mola yena Sara a šetše a tšofetše. Mong wa ka o file morwa yoo tšohle tše e lego tša gagwe. Mong wa ka o ile a nkeniša gore ke phethe taelo ya gagwe mme a re: ‘O se ke wa nyalela morwa wa ka mosadi go basetsana ba naga ye ya Kanana, eupša o ye go batho ba gabotate, go meloko ya gešo, mme fao o nyalele morwa wa ka mosadi.’ Ka botšiša mong wa ka ka re: ‘Ke direng ge mosetsana a ka se dumele go tloga le nna?’ Yena a mphetola a re: ‘Morena yo ke mo theetšego ka mehla o tla roma morongwa wa gagwe a ya le wena, mme a go fa mahlatse. O tla tšeela morwa wa ka mosadi go batho ba gešo, go lapa la tate. Ge o ka ya go meloko ya gešo gomme bona ba gana go go neela mosadi, gona o tla bofologa go yona.’ “Ge ke fihla sedibeng lehono, ke ile ka rapela ka re: ‘Morena, Modimo wa mong wa ka, Abrahama, hle, mphe mahlatse go seo ke se dirago. Ke nna yo mo sedibeng. Ge kgarebe e tlilo ga meetse, ke tla re go yona: “Hle, nnoše meetse moeteng wa gago.” Ge a ka mphetola a re: “O ka nwa mme ke tla gela le dikamela tša gago meetse,” a e be yena yo o mmeetšego go ba mosadi wa morwa wa mong wa ka.’ Ke sešo ka fetša go rapela ka pelong, Rebeka a fihla a beile moeta legetleng, a theogela sedibeng go yo ga meetse. Ka re go yena: ‘Hle, nnoše meetse.’ Ka bjako a rola moeta wa gagwe legetleng a re: ‘O ka nwa, mme ke tla noša le dikamela tša gago.’ Ke ile ka nwa, gomme yena a noša dikamela. Ka mmotšiša ka re: ‘O morwedi wa mang?’ Yena a mphetola a re: ‘Ke nna morwedi wa Bethuele, morwa wa Nahoro le Milka.’ Ke moka ka mo rweša mphiri nkong le maseka matsogong. Ka obama, ka khunamela Morena. Ka reta Morena, Modimo wa mong wa ka, Abrahama, yo a ntshepedišitšego ka tsela ye e lokilego gore ke tle go moloko wa mong wa ka, moo ke hweditšego morwedi wa gagwe yo a tlago ba mosadi wa morwa wa mong wa ka. Bjale, ge le ikemišeditše go direla mong wa ka lerato le ka potego, hle, mpotšeng; ge le se la ikemišetša, le gona mpotšeng, gomme nna ke tla bona gore ke tla dira eng.” Labane le Bethuele ba fetola ba re: “Ka ge taba ye e etšwa go Morena, e ka se be rena re tšeago sephetho. Rebeka šo; mo tšee o sepele le yena, e be mosadi wa morwa wa mong wa gago, bjalo ka ge Morena a boletše.” Ge mohlanka wa Abrahama a ekwa taba ye, o ile a itahlela fase a kunamela Morena. A ntšha dikgabišo tša silibera le tša gauta, le diaparo, a di fa Rebeka. A fa le kgaetšediagwe le mmagwe dimpho tša theko ye kgolo. Ka morago ga fao mohlanka wa Abrahama le banna ba ba bego ba na le yena ba ja, ba nwa, gomme ba robala moo. Ge ba tsoga e sa le bošego a re: “A ke boele go mong wa ka.” Fela kgaetšedi ya Rebeka le mmagwe ba re: “A mosetsana a dule le rena matšatši a e ka bago a lesome, a kgone a sepela.” Eupša mohlanka a re: “Le se ke la re diegiša. Morena o atlegišitše leeto la ka; a ke boele go mong wa ka.” Ba fetola ba re: “A re bitšeng mosetsana gomme re kweng gore yena o reng.” Ka gona ba bitša Rebeka, ba mmotšiša ba re: “A o nyaka go sepela le monna yo?” A ba fetola a re: “Ee.” Ke moo ba lesitšego Rebeka le mofepi wa gagwe ba tloga le mohlanka wa Abrahama le banna ba gagwe. Gomme ba šegofatša Rebeka ba re: “A wena, kgaetšedi, o be mmagodiketekete! A ditlogolo tša gago di thope metse ya manaba a bona!” Ke moo Rebeka le badiredigadi ba gagwe ba itokišitšego mme ba namela dikamela go sepela le mohlanka wa Abrahama, gomme ba thoma leeto. Isaka o be a tlile lešokeng la “Sediba sa Mophelaampona”, gomme o be a dula seleteng sa ka borwa bja Kanana. O be a tšwetše mašemong e šetše e le mantšiboa a ikotlolla dinao, gomme a bona dikamela di rotoga. Ge Rebeka a bona Isaka, a fologa kamela ya gagwe ka pela, a botšiša mohlanka wa Abrahama a re: “Monna yola a lego mašemong a tlago go rena ke mang?” Mohlanka a mo fetola a re: “Ke mong wa ka.” Ka gona Rebeka a tšea lešira la gagwe a ikhurumetša sefahlego. Mohlanka a botša Isaka tšohle tše a di dirilego. Ke moo Isaka a tsentšego Rebeka ka mošašeng woo Sara, mmagwe, a bego a dula ka go wona, gomme Rebeka ya ba mosadi wa gagwe. Isaka a rata Rebeka, mme a homotšega ka ge a be a lahlegetšwe ke mmagwe. Abrahama o ile a nyala mosadi yo mongwe yoo leina la gagwe e bego e le Ketura. Yena a mmelegela Simrane le Jokoshane le Medane le Midiane le Jishbake le Shuage. Jokoshane e bile tatagoSheba le Dedane, gomme ditlogolo tša Dedane e bile Baashure le Baletushe le Baleume. Barwa ba Midiane e bile Efa le Efere le Enoko le Abida le Eldaa. Bao e bile ditlogolo tša Ketura. Abrahama o tlogeletše Isaka tšohle tša gagwe, eupša ge a sa phela, o ile a fa barwa bao metlabo ya gagwe e bego e mmelegetše bona dimpho. Ka morago a romela barwa bao nageng ye e lego ka bohlabela, kgole le morwa wa gagwe, Isaka. Abrahama o hwile a tšofetše kudu a na le mengwaga ye lekgolo le masome a šupago le metšo ye mehlano. *** Barwa ba gagwe, Isaka le Ishmaele, ba ile ba mmoloka ka leweng la Makapela, ka bohlabela bja Mamre, tšhemong yeo e bego e kile ya ba ya Efrone, morwa wa Tsohare, Mohete. E be e le tšhemo yela Abrahama a bego a e rekile go Bahete; bobedi bja bona, Abrahama le mosadi wa gagwe, Sara, ba ile ba bolokwa fao. Ka morago ga lehu la Abrahama Modimo o ile a šegofatša morwagwe Isaka, yo a bego a dula kgauswi le “Sediba sa Mophelaampona”. Tše ke ditlogolo tša Ishmaele yoo Hagare, lekgobagadi la Moegepeta la Sara, a mmelegetšego Abrahama. Šea maina a barwa ba Ishmaele ka tatelano ya matswalo a bona: Wa mathomo e bile Nebayote, gwa latela Kedara, Adbeele, Mibisamo, Mishma, Duma, Masa, Hadade, Tema, Jeture, Nafishe le Kedema. Bona e bile baetapele ba dikgoro tše lesome le tše pedi, gomme maina a bona a fiwa metse ya bona le mafelo a go hloma mešaša. Ishmaele o be a na le mengwaga ye lekgolo le masome a mararo a metšo ye e šupago ge a ehwa. Ditlogolo tša Ishmaele di be di dutše nageng ye e lego gare ga Habila le Shure, ka bohlabela bja Egepeta, tseleng ya go ya Asiria. Bona ba ile ba phela ba hloile ditlogolo tše dingwe tša Abrahama. Šedi ditaba tša Isaka, morwa wa Abrahama: Isaka o be a na le mengwaga ye masome a mane ge a nyala Rebeka, kgaetšedi ya Labane, morwedi wa Bethuele, Moaramo wa Mesopotamia. Ka ge Rebeka a be a se na bana, Isaka o ile a mo rapelela go Morena. Morena a kwa thapelo ya gagwe, gomme Rebeka a ima. O ile a belega mafahla, gomme pele ga ge ba belegwa, ba šušumetšana ka teng ga gagwe. A re: “Ke go reng ke hlagelwa ke taba ya mohuta wo?” Ka gona a yo botšiša Morena. Morena a re go yena: “Ditšhaba tše pedi di ka popelong ya gago; o tla belega merafe ye mebedi ya go se kwane. Wo mongwe o tla feta wo mongwe ka maatla; morwa yo mogolo o tla hlankela moratho.” Nako ya gore a belege ya fihla, gomme a ba le mafahla a bašemane. Wa mathomo e be e le yo mohubetšwana mme letlalo la gagwe le swana le seaparo sa boya, ka gona a rewa leina la Esau. Wa bobedi a belegwa a swere serethe sa Esau a se tiišitše, ka gona a rewa leina la Jakobo. Isaka o be a na le mengwaga ye masome a a selelago ge ba belegwa. Bašemanyana ba gola, gomme Esau ya ba motsomi wa bokgoni, motho wa go rata bophelo bja lešoka, Jakobo yena ya ba motho wa go ikhomolela, wa go itlhwela gae. Isaka o be a rata Esau ka gore a be a ipshina ka go ja diphoofolo tšeo Esau a bego a di bolaya, eupša Rebeka yena o be a rata Jakobo. Ka letšatši le lengwe ge Jakobo a sa apeile setopša, Esau a goroga a tšo tsoma. O be a lapile kudu, gomme a re go Jakobo: “Ke dikologa ka tlala; a ke fologetše selo seo se sehubedu.” Ke ka moo a ilego a rewa leina la Edomo. Jakobo a mo fetola a re: “Nthekišetše tokelo ya bogolo bja gago pele.” Esau a re: “Go lokile, ke kgauswi le go hwa; bogolo bo nkholang?” Jakobo a mo fetola a re: “Nkenele pele.” Esau a ena gomme a rekišetša Jakobo tokelo ya bogolo bja gagwe. Ke moo Jakobo a mo filego senkgwa a ba a mo tšhelela le setopša sela. Esau a ja, a nwa, gomme a emelela a sepela. Ke ka moo a ilego a nyatša tokelo ya bogolo bja gagwe. Go ile gwa wa tlala ye nngwe nageng, ntle le yela ya pele ya mehleng ya Abrahama. Ka gona Isaka a ya go Abimeleke, kgoši ya Bafilista, kua Gerare. Morena o be a iponagaditše go Isaka mme a re: “O se ke wa ya Egepeta; dula nageng ye ke go botšago gore o dule go yona. Dula mo o le mofaladi, gomme ke tla ba nago ka go šegofatša. Wena le ditlogolo tša gago ke tla le fa dinaga tše ka moka. Ke tla phetha se ke se enetšego Abrahama, tatago. Ke tla dira gore o be le ditlogolo tše ntši bjalo ka dinaledi tša legodimo, ka ba fa dinaga tše ka moka. Ditšhaba tša lefase ka moka di tla nkgopela go di šegofatša bjalo ka ge ke šegofaditše ditlogolo tša gago. Ke tlile go go šegofatša ka gobane Abrahama a ntheeditše, gomme a phetha melao le ditaelo tša ka ka moka.” Ka gona Isaka a dula Gerare. Ge batho ba moo ba mmotšiša mabapi le mosadi wa gagwe, o ile a re: “Ke kgaetšedi ya ka,” ka gobane a be a boifa go ba botša gore ke mosadi wa gagwe. O be a tšhaba gore banna ba moo ba tla mmolaya gore ba tšee Rebeka, ka gore e be e le yo mobotse. Ge Isaka a bile fao lebaka, Kgoši Abimeleke a okamela ka ntle ka lefasetere gomme a bona Isaka le Rebeka ba bapadišana. Abimeleke a laela gore Isaka a bitšwe, gomme a re go yena: “Ke bone gabotse gore yola ke mosadi wa gago! Ke ka baka lang o rile ke kgaetšediago?” Isaka a mo fetola a re: “Ke be ke gopola gore ke tla bolawa ge nka re ke mosadi wa ka.” Abimeleke a re: “O re dirile eng? Yo mongwe wa banna ba ka o be a ka no ithobalela le mosadi wa gago, gomme ya ba ge wena o re obišitše molato.” Abimeleke a lemoša batho ka moka a re: “Yo a tlaišago monna yo goba mosadi wa gagwe o tla bolawa.” Isaka a lema nageng yeo, gomme ngwageng woo kgetsi ya peu ya mmušetša dikgetsi tše lekgolo, ka gobane Morena o ile a mo šegofatša. A huma, a atlega go iša pele gomme ya ba monna wa maemo. Bafilista ba mo tsebafela ka gobane o be a na le mehlape ye mentši ya dihuswane le dikgomo, le bahlanka ba bantši. Ka gona ba šiba didiba tšohle tšeo bahlanka ba Abrahama, tatagwe, ba di epilego mola Abrahama a sa phela. Ke moo Abimeleke a itšego go Isaka: “Re tšwele nageng. O a re imela.” Ka gona Isaka a tloga, gomme a hloma mešaša moeding wa Gerare, a dula gona. A šibolla didiba tšela tša go epiwa mehleng ya Abrahama, tšela Bafilista ba di šibilego ka morago ga lehu la Abrahama. Isaka a rea didiba tšeo maina ale tatagwe a bego a di reile ona. Bahlanka ba Isaka ba epa meetse ka moeding, gomme ba hwetša sediba sa meetse a a runyago. Badiši ba Gerare ba fapana le badiši ba Isaka, gomme ba re: “Meetse a ke a rena.” Ka fao Isaka a rea sediba seo leina la “Phapano”. Badiši ba Isaka ba epa sediba se sengwe, le sona seo ba se fapanela, ka fao a se rea leina la “Ngangišano”. A tloga fao mme a epa sediba se sengwe. Gwa se be le ngangišano ka ga sona, ka gona a se rea leina la “Sebaka”. A re: “Bjale Morena o re file sebaka nageng ye, gomme mo re tla atlega.” Go tloga moo Isaka a ya Beresheba. Bošegong bjoo Morena a iponagatša go yena mme a re: “Ke nna Modimo wa Abrahama, tatago. O se ke wa boifa; ke na le wena. Ke tla go šegofatša ka ba ka go fa ditlogolo tše ntši ka baka la Abrahama, mohlanka wa ka.” Isaka a aga aletare moo, a khunamela Morena. A hloma mešaša ya gagwe fao, gomme bahlanka ba gagwe ba epa sediba se sengwe. Abimeleke a tla go Isaka a etšwa Gerare a na le Ahusate, moeletši wa gagwe, le Pigole, molaodi wa madira a gagwe. Isaka a ba botšiša a re: “Le reng le tlile go nna etšwe le ntlhoile mme le nthakile nageng ya lena?” Ba mo fetola ba re: “Bjale re lemoga gabotse gore Modimo o na le wena, mme re bona gore rena le wena re enelane, re kwane gore o ka se re dire bošula, bjalo ka ge le rena re se ra ka ra go iša seatla. Re bile le botho go wena mme ra dira gore o tloge ka khutšo. Bjale go molaleng gore Morena o go šegofaditše.” Isaka a ba direla monyanya, gomme ba ja, ba nwa. Ka le le latelago ba tsoga e sa le bošego ba enelana. Isaka a ba felegetša gomme ba mo tlogela ba thabile. Ka lona letšatši leo bahlanka ba Isaka ba tla ba mmotša ka ga sediba se ba se epilego. Ba re: “Re phutše meetse.” A rea sediba seo leina la “Keno”. Ke ka fao motse wa Beresheba o reilwego leina la wona. Ge Esau a na le mengwaga ye masome a mane, o ile a nyala basetsana ba babedi ba Bahete, Judite, morwedi wa Beeri, le Basemate, morwedi wa Elone. Bona ba ile ba galakišetša Isaka le Rebeka bophelo. Bjale Isaka o be a tšofetše kudu mme a foufetše. A laela gore Esau, morwagwe yo mogolo, a bitšwe mme a re go yena: “Ngwanaka!” Esau a araba a re: “Tama!” Isaka a re: “O a bona gore ke tšofetše gomme nka hwa nako efe le efe. Tšea bora bja gago le mesebe, o ye nageng mme o ntsomele phoofolo. O nkapeele dijo tšela tše bose ke di ratago, gomme o ntlišetše tšona. Ge ke di lle ke tla go šegofatša pele ke ehwa.” Ge Isaka a bolela le Esau, Rebeka o be a theeditše. Ka gona ge Esau a etšwa a ilo tsoma, Rebeka a re go Jakobo: “Ke sa tšo kwa tatago a re go Esau: ‘Ntlišetše phoofolo o nkapeele dijo tšela tše bose. Ge ke di lle ke tla go šegofatša pele ga Morena pele ke ehwa.’ ” Rebeka a tšwela pele a re: “Bjale, ngwanaka, ntheetše gomme o dire se ke go botšago sona. Sepela dihuswaneng, o hlaole diputšane tše pedi tša go nona gore ke tle ke apeele tatago dijo tšela a di ratago. O tle o di iše go yena gore a di je, gomme yena o tla go šegofatša pele a ehwa.” Jakobo a fetola mmagwe a re: “O a tseba gore Esau ke monna wa boya, eupša nna ke motho yo boreledi. Mohlomongwe tate o tla mphophola gomme a tšea gore ke mo dira lešilo; ka gona ke tla itlišetša thogako bakeng sa tšhegofatšo.” Mmagwe a re go yena: “A thogako yeo e wele godimo ga ka, ngwanake; eno dira bjalo ka ge ke go botša, o ye o ntšeele diputšane tšeo.” Ka gona a yo di tšea a di tliša go yena, gomme mmagwe a apea dijo tšela tatagwe a di ratago. Ka morago a tšea diaparo tše kaonekaone tša Esau, morwagwe yo mogolo, tše a bego a di beile ka ngwakong, a apeša Jakobo, morwagwe yo monnyane. A mo tatetša matsogo le molaleng mo go sego moriri ka matlalo a diputšane tšela. A mo neela dijo tšela tše bose, gotee le senkgwa se a se apeilego. Ke moka Jakobo a ya go tatagwe a re: “Tate!” Tatagwe a re: “Eye, o morwa wa ka ofe, ngwanaka?” Jakobo a mo fetola a re: “Ke nna Esau, morwago wa leitšibolo; ke dirile ka moo o ntaetšego ka gona. Hle, tsoga o dule, o je nama ya phoofolo ye ke go tlišeditšego yona gore o tle o ntšhegofatše.” Isaka a re go morwagwe: “Go tlile bjang gore o e hwetše ka pela ka tsela ye, ngwanaka?” Jakobo a mo fetola a re: “Morena Modimo wa gago o nkgahlantše nayo.” Isaka a re go Jakobo: “Hle, batamela ke go phophole, ngwanaka, gore ke kwe ge eba ke wena morwa wa ka, Esau.” Jakobo a batamela, mme Isaka a mo phophola a re: “Lentšu la gago le kwagala bjalo ka la Jakobo, eupša matsogo ona a kwega bjalo ka a Esau.” O ile a se lemoge Jakobo, ka gore matsogo a gagwe a be a na le boya bjalo ka a Esau. Ke ka baka leo mafelelong a ilego a mo šegofatša. Gomme a mmotšiša a re: “Na ruri ke wena Esau?” Jakobo a mo fetola a re: “Ke nna.” Isaka a re: “Ntlišetše nama yeo ya phoofolo ke je, ngwanaka, gore ke go šegofatše.” Jakobo a e tliša go yena, gomme a ja; a mo tlišetša le beine gore a nwe. Ka morago tatagwe a re: “Hle, batamela o nkatle, ngwanaka.” Ge a batamela a mo atla, Isaka a dupa diaparo tša gagwe; a napa a mo šegofatša a re: “Agaa, monkgo wo mobose wa morwa wa ka o bjalo ka monkgo wa naga ye Morena a e šegofaditšego. A Modimo a go fe phoka ya legodimo, gomme a nontšhe mašemo a gago! A a go fe mabele a mantši le beine ye ntši! A ditšhaba e be bahlanka ba gago, gomme merafe e obame pele ga gago. O buše meloko yeno, mme ditlogolo tša mmago di obame pele ga gago. A bao ba go rogakago ba rogakwe, mme bao ba go šegofatšago ba šegofatšwe.” Isaka a fetša go šegofatša Jakobo, gomme ge Jakobo a seno tloga, Esau, mogolwagwe, a tsena a tšo tsoma. Le yena a apea dijo tše bose mme a di iša go tatagwe a re: “Hle, tate, tsoga o je nama ya phoofolo ye ke go tlišeditšego yona, gore o tle o ntšhegofatše.” Isaka a mmotšiša a re: “Ke wena mang?” Esau a mo fetola a re: “Ke nna Esau, morwa wa gago wa leitšibolo.” Isaka a thothomela kudu, a mmotšiša a re: “Bjale ke mang yo a bolailego phoofolo a ntlišetša yona? Ke e lle pejana ga ge o etla. Ke mo šegofaditše, gomme o šegofaditšwe go ya go ile.” Ge Esau a ekwa taba yeo, a hlaboša lentšu a lla gabohloko kudu a re: “Le nna ntšhegofatše, tate!” Isaka a mo fetola a re: “Ngwaneno o tlile fa ka boradia, a tšea tšhegofatšo ya gago.” Esau a re: “Le ke la bobedi ge a nthadia. Ga go makatše ge leina la gagwe e le Jakobo. O nkamogile bogolo, mme bjale šemo o nkamogile le tšhegofatšo. A ga go na tšhegofatšo ye o ntšhadišeditšego yona?” Isaka a mo fetola a re: “Ke šetše ke mo dirile mong wa gago, mme ke dirile meloko ka moka yabo bahlanka ba gagwe. Ke mo file mabele le beine. Bjale ga go sa le selo se nka go direlago sona, ngwanaka!” Esau a kgopela tatagwe a re: “A o ne tšhegofatšo e tee fela, tate? Tate, le nna ntšhegofatše!” A hlaboša lentšu a lla. Ke moo Isaka a itšego go yena: “O ka se be le mašemo a nonnego; le phoka ya legodimo e ka se a wele. O tla phela o elwa, gomme o tla ba mohlanka wa ngwaneno. Eupša mohla o mo fenya, o tla ikhutša yena.” Esau a tsota Jakobo ka gobane tatagwe a mo šegofaditše. A rera ka pelong a re: “Nako ya go llela tatagorena e a batamela; ka morago ga moo ke tla bolaya Jakobo.” Eupša Rebeka a kwa ka maano a Esau, a laela gore Jakobo a bitšwe, gomme a re go yena: “Theetša, Esau, mogolwago, o ikemišeditše go itefetša ka go go bolaya. Bjale ngwanaka, dira se ke go botšago sona. Itlhaganele o tšhabele go kgaetšedi ya ka, Labane, kua Harane. O dule le yena lebakanyana go fihlela ngwaneno a buša pelo, a lebala se o mo dirilego sona. Ke moo ke tlago roma motho a tla a go bitša. Ga ke nyake go tlo lahlegelwa ke lena ka bobedi ka letšatši le tee.” Rebeka a re go Isaka: “Ke lapile wa go hwa ka basadi ba šele ba Esau. Ge Jakobo le yena a ka nyala yo mongwe wa basetsana ba ba mo ba Bahete, go tla re ke ikhwele.” Isaka a bitša Jakobo, a mo šegofatša, gomme a mo laya a re: “O se ke wa nyala mosetsana wa Mokanana. Itokiše o ye seleteng sa ka leboa sa Mesopotamia, lapeng la Bethuele, rakgolwago. O nyale kgarebe ye nngwe ka fao, yo mongwe wa barwedi ba malomeago, Labane. A Modimo Ramaatlaohle a šegofatše lenyalo la gago mme a go fe bana ba bantši, gore o tle o be tatagoditšhabatšhaba. A a šegofatše wena le ditlogolo tša gago bjalo ka ge a šegofaditše Abrahama, gomme o tle o tšee naga ye o falaletšego go yona, naga ye Modimo a e filego Abrahama.” Isaka a roma Jakobo kua Mesopotamia go Labane, morwa wa Bethuele, Moaramo. Labane e be e le kgaetšedi ya Rebeka, mmagoJakobo le Esau. Esau a kwa gore Isaka o šegofaditše Jakobo a ba a mo roma Mesopotamia go yo nyala mosadi fao. A kwa le gore ge Isaka a mo šegofatša, o mo laile gore a se ke a nyala mosadi wa Mokanana. A lemoga gore Jakobo o phethile taelo ya tatagwe le mmagwe o ile Mesopotamia. Ke moo Esau a bonego gore Isaka, tatagwe, ga a rate basadi ba Bakanana. Ka gona a ya go Ishmaele, morwa wa Abrahama, gomme a nyala Mahalate, morwediagwe, yo e bego e le kgaetšedi ya Nebayote, ya ba mosadi wa gagwe yo mongwe. Jakobo a tloga Beresheba, a leba Harane. A fihla felo mo gokgethwa gomme a lala fao, ka gobane letšatši le be le diketše. A tšea letlapa moo, a robala a le sametše. A lora a bona manamelo a tloga lefaseng a fihla legodimong, gomme barongwa ba namela ba theoga godimo ga wona. A bona Morena a eme godimodimo ga manamelo gomme a re go Jakobo: “Ke nna Morena, Modimo wa botatago Abrahama le Isaka. Naga ye o robetšego go yona ke tla e fa wena le ditlogolo tša gago. Ditlogolo tša gago e tla ba tše ntši bjalo ka lerole la lefase. Ba tla ikala go ya mathokong ohle, gomme ditšhaba tša lefase ka moka di tla nkgopela gore ke di šegofatše bjalo ka ge ke šegofaditše wena le ditlogolo tša gago. Bona, ke tla ba le wena ka go šireletša gohle mo o yago, ka tla ka go bušetša mo nageng ye. Nka se go tlogele; ke tla ba ka phetha tšohle tše ke go boditšego tšona.” Jakobo a phafoga gomme a re: “Ruri, Morena o gona felo fa, nna ke be ke sa tsebe!” A boifa, mme a re: “Felo fa go boifiša bjang! Mo ke bjona bodulo bja Modimo, ke kgoro ya legodimo.” Jakobo a tsoga e sa le bošego ka le le latelago, a tšea letlapa le a bego a le sametše, a le hloma ya ba letlapa la segopotšo. A tšhela makhura a mohlware godimo ga lona. A rea felo fao leina la Bethele. Pele motse woo o be o bitšwa Luse. Ke moka Jakobo a enela Morena a re: “Ge o ka ba le nna, wa ntšhireletša mo leetong le ke le tšeago, wa mpha dijo le diaparo, ka ba ka boela ngwakong wa tate ke bolokegile, gona o tla ba Modimo wa ka. Letlapa le la segopotšo le ke le hlomilego e tla ba felo fao o tlago khunamelwa ntshe, gomme ke tla go fa karolo ya lesome ya tšohle tše o mphago tšona.” Jakobo a wela tsela a leba nageng ya bohlabela. Ka bjako a bona sediba kua molaleng, le mehlape ye meraro ya dihuswane e robetše moo. Mehlape e be e nošwa sedibeng seo se bego se na le letlapa le legolo molomong. Ge mehlape ka moka e kgobokantšwe fao, badiši ba be ba kgokološa letlapa, ba e noša. Ka morago ga fao ba be ba bušetša letlapa madulong. Jakobo a ba botšiša a re: “Banabešo, a le tšwa kae?” Ba mo fetola ba re: “Re tšwa Harane.” A ba botšiša a re: “A le tseba Labane, morwa wa Nahoro?” Ba re: “Ee, re a mo tseba.” A ba botšiša a re: “A o sa phela gabotse?” Ba mo fetola ba re: “O sa phela gabotse. Ebile Ragele, morwediagwe, šo o tla le dihuswane tša tatagwe.” Jakobo a re: “Ka ge e sa le mosegare wo monana gomme e sešo ya ba nako ya go goroša mehlape, le reng le sa e noše mme la e bušetša phulong?” Ba mo fetola ba re: “Re ka se kgone go dira bjalo mehlape ka moka e sešo ya ba mo, le letlapa la kgokološwa; ke gona re tlago noša mehlape.” Ge Jakobo a sa bolela nabo, Ragele, yo a bego a diša dihuswane tša tatagwe, a fihla le mohlape. Ge Jakobo a bona Ragele le mohlape wa Labane, malomeagwe, a ya sedibeng, a kgokološa letlapa, gomme a noša dihuswane. Ka morago Jakobo a atla Ragele, a napa a hlaboša lentšu a lla. A mmotša a re: “Ke nna motlogolo wa tatago, ke morwa wa Rebeka.” Ragele a kitima a yo botša tatagwe, gomme yena ge a ekwa tša Jakobo, motlogoloagwe, a kitimela go mo gahlanetša, a mo ubarela a mo atla a thabile, gomme a mo goroša ka lapeng. Ge Jakobo a botša Labane ditaba ka moka, Labane a re: “Ee, ke therešo, o madi ešo.” Jakobo a dula ka ga gagwe kgwedi ka moka. Labane a re go Jakobo: “Na o ka napa wa ntšhomela fela e le ka ge o le motlogolo wa ka! Mpotše gore ke go lefe bokae.” Labane o be a na le barwedi ba babedi; yo mogolo e le Lea, yo monnyane e le Ragele. Lea o be a na le mahlo a go tiba, Ragele yena a bopegile mme e le yo mobotse. Jakobo o be a rata Ragele, ka gona a re: “Ke tla go šomela mengwaga ye e šupago gore ke tšee Ragele, morwediago yo monnyane.” Labane a mo fetola a re: “Go kaone gore a tšewe ke wena go na le gore a tšewe ke yo mongwe; dula le nna.” Jakobo a šoma mengwaga ye e šupago gore a tšee Ragele, gomme lebaka leo la ba bjalo ka matšatši a se makae go yena ka gore o be a rata Ragele. Ke moo Jakobo a itšego go Labane: “Mengwaga yela e fedile. Mphe morwedi wa gago ke mo nyale.” Ka gona Labane a dira monyanya gomme a laletša bohle motseng woo. Eupša bošegong bjoo Labane a iša Lea go Jakobo, gomme Jakobo a robala naye. Labane a tšea lekgoba la gagwe la mosetsana, Silpa, a le fa Lea, morwedi wa gagwe, gore e be mofepi. Jakobo o ile a se ke a lemoga gore ke Lea go fihlela mesong ya le le latelago. O ile a ya go Labane mme a re: “Ke ka baka lang o ntirile taba ye? Ke šometše go nyala Ragele. Bjale o reng o nthadiile?” Labane a mo fetola a re: “Ga se setlwaedi sa mo go nyadiša morwedi yo monnyane pele ga yo mogolo. Letela go fihlela ge beke ya monyanya e fela, mme ke tla go fa Ragele, ge eba o tla ntšhomela mengwaga ye mengwe ye e šupago.” Jakobo a dumela, gomme ge beke ya monyanya e fedile, Labane a mo fa morwedi wa gagwe Ragele gore e be mosadi wa gagwe. Labane a tšea lekgoba la gagwe la mosetsana, Bilha, a le fa Ragele, morwedi wa gagwe, gore e be mofepi. Le Ragele Jakobo a robala naye, gomme a mo rata go feta Lea. A šomela Labane mengwaga ye mengwe ye e šupago. Ge Morena a bona gore Lea ga a ratwe, a mo fa thari, Ragele yena a hloka bana. Lea a ima, gomme a belega morwa, a re: “Morena o bone tlaišego ya ka, gomme bjale mogatšake o tla nthata”; ka gona a mo rea leina la Rubene. A ima gape, gomme a belega morwa yo mongwe, a re: “Morena o mphile le morwa yo, ka gobane a kwele gore ke be ke sa ratwe”; ka gona a mo rea leina la Simeone. A buša a ima, a belega morwa yo mongwe, a re: “Bjale mogatšake o tla nkgomarela ka gore ke mmelegetše barwa ba bararo”; ka gona a mo rea leina la Lefi. Ka morago a ima gapegape, a belega morwa yo mongwe, a re: “Bjale ke tla reta Morena”; ka gona a mo rea leina la Juda. A emiša pelego. Fela Ragele o be a se a belegela Jakobo bana, ka gona a tsebafela mogolwagwe gomme a re go Jakobo: “Mphe bana, go sego bjalo ke tla ikhwela.” Jakobo a befelelwa Ragele a re: “A nka kgona go ema legatong la Modimo? Ke yena yo a go thibelago go ba le bana.” Ragele a re: “Lekgoba la ka la mosetsana, Bilha, šo; robala naye a ntlhatswe dirope. Ka tsela yeo le nna ke tla ba mmagongwana ka yena.” Ka fao a mo neela Bilha gore e be mosadi wa gagwe, gomme Jakobo a robala naye. Bilha a ima, mme a belegela Jakobo morwa. Ragele a re: “Modimo o nkahloletše. O kwele thapelo ya ka mme o mphile morwa”; ka gona a mo rea leina la Dane. Bilha a ima gape, gomme a belegela Jakobo morwa wa bobedi. Ragele a re: “Ke katane o šoro le mogolwake, fela ke fentše”; ka gona a mo rea leina la Naftali. Ge Lea a bona gore o emišitše pelego, o ile a neela Jakobo lekgoba la gagwe la mosetsana, Silpa, gore e be mosadi wa gagwe. Silpa a belegela Jakobo morwa. Lea a re: “Ke bile le mahlatse”; ka gona a mo rea leina la Gade. Silpa a belegela Jakobo morwa yo mongwe, gomme Lea a re: “Ke thabile kudu! Bjale basadi ba tla mpitša yo a thabilego”; ka gona a mo rea leina la Asere. Ge go bunwa korong Rubene a ya lešokeng gomme a hwetša dienywa tša meratišo, a di tliša go Lea, mmagwe. Ragele a re go Lea: “Hle, mphe dienywa tše dingwe tša morwago.” Lea a mo fetola a re: “Na ga se wa kgotsofala ge o nkamogile monna? Bjale o nyaka go nkamoga le dienywa tša morwaka tša moratišo.” Ragele a re: “Ge o ka mpha dienywa tšeo o ka no robala le Jakobo bošego bjo.” Ge Jakobo a boa mašemong mantšiboa, Lea a tšwa a yo mo gahlanetša, a re: “O swanetše go robala le nna bošego bjo ka gore ke go rekile ka dienywa tša morwaka tša moratišo.” Ka gona Jakobo a robala le Lea bošego bjoo. Modimo a kwa thapelo ya Lea, mme Lea a ima, a belegela Jakobo morwa wa bohlano. Lea a re: “Modimo o mphile moputso ka ge ke neetše mogatšake lekgoba la ka”; ka gona a rea morwa wa gagwe leina la Isakara. Lea a ima gape, gomme a belegela Jakobo morwa wa boselela, a re: “Modimo o mphile mpho ye botse. Bjale mogatšake o tla nkgotlelela, ka gobane ke mmelegetše barwa ba ba selelago”; ka gona a mo rea leina la Sebulone. Ka morago Lea a belega morwedi, a mo rea leina la Dina. Ke moo Modimo a gopotšego Ragele; a kwa thapelo ya gagwe gomme a mmula pelego. A ima, a belega morwa, a re: “Modimo o ntlošitše dihlong. A Morena a mphe morwa yo mongwe”; ka gona a mo rea leina la Josefa. Ge Josefa a seno belegwa Jakobo a re go Labane: “E re ke boele gae. Mphe basadi le bana bao ke ba šometšego, ke tloge gobane o a tseba ka moo ke go diretšego ka gona.” Labane a re go yena: “Hle, a re kwane; ke be ke na le madimabe, gomme Morena o ntšhegofaditše ka baka la gago. Mpotše gore ke go lefe bjang, gomme ke tla go lefa.” Jakobo a mo fetola a re: “O tseba ka moo ke go šometšego ka gona, le ka moo mehlape ya gago e atlegilego ka gona e dišwa ke nna. Leruo le lennyane le o bego o na le lona pele ke etla le oketšegile kudu, gomme Morena o go šegofaditše ka baka la ka. Bjale la ka lapa nna ke tla le šomela neng?” Labane a mmotšiša a re: “Ke go fe eng?” Jakobo a mo fetola a re: “Ga ke nyake tefo. Ke tla tšwela pele le go go dišetša mehlape ya gago ge o dumela taba ye: A ke sepele le mohlape wa gago ka moka lehono ke kgethe kwanyana tšohle tše ntsho le tše swana, le dinku le dipudi tšohle tše kgwadi le tše kgwana. Tšohle tšeo e be wona moputso wa ka. Ka moso o tla tla o bona ge eba ke ile ka botega. Ge e ka re ge o etla go lekodišiša dihuswane tša ka, wa hwetša pudi ye nngwe e se ye kgwadi goba ye kgwana, goba kwanyana ye nngwe e se ye ntsho goba ye swana, o tla tseba gore e utswitšwe.” Labane a mo fetola a re: “Go lokile. A re dire bjalo ka ge o bolela.” Eupša letšatši leo Labane a hlaola diphooko tše sega le tše kgwadi, le dipudi tšohle tše kgwana le tše segana, le tšohle tše di nago le bošweu; a hlaola le dikwanyana tšohle tše ntsho le tše swana. A laela barwa ba gagwe gore ba di diše, gomme a tloga go Jakobo le dihuswane tšeo, a di gapa leeto la matšatši a mararo. Jakobo a šala a hlokometše dihuswane tše di šetšego tša Labane. Jakobo a tšea dithupa tše meetse tša mopopoliri, le tša moalmone, le tša moplatane, gomme a di khuma ka mathoko tša ba le methaladi ye mešweu. A bea dithupa tšeo pele ga dihuswane magopong a tšona a go nwela. A di bea fao ka gore di be di goelana ge di tlile go nwa. Ka gona ge dipudi di goelane pele ga dithupa tšeo, di be di tswala diputšanyane tše segana le tše kgwadi le tše kgwana. Jakobo a hlaola dinku dipuding mme a di lebanya le dihuswane tše nalana le tše ntsho tša mohlape wa Labane. Ka tsela ye a itirela mohlape wa gagwe a o hlaolela thoko, a se ke a o hlakanya le wa Labane. Ge diruiwa tše di tiilego di goelana, Jakobo o be a bea dithupa tšela pele ga tšona kua magopong gore di tle di goelane moo gare ga tšona. Eupša o ile a se ke a bea dithupa tšeo pele ga diruiwa tše di fokolago. Ka gona Labane a ba le diruiwa tše di fokolago, mola tša Jakobo e le tše di tiilego. Ka tsela ye Jakobo a huma kudukudu. A ba le mehlape ye mentši le makgoba le dikamela le dipokolo. Jakobo a kwa gore barwa ba Labane ba re: “Jakobo o tšere tšohle tše e bego e le tša tatagorena. Lehumo la gagwe ka moka le tšwa go tše e bego e le tša tatagorena.” A bona le gore Labane ga a sa mo thabela go swana le pele. Ke moo Morena a itšego go Jakobo: “Boela nageng ya botatago go meloko ya geno. Ke tla ba le wena.” Ka gona Jakobo a romela Ragele le Lea molaetša wa go re ba tle ba gahlane naye nageng, moo mehlape ya gagwe e bego e le gona. Yena a re go bona: “Ke lemogile gore tatagolena ga a sa nthabela go swana le pele; eupša Modimo wa tate o bile le nna. Lena le a tseba gore ke šometše tatagolena ka maatla a ka ka moka. Le ge go le bjalo o nthadiile, gomme o fetošitše moputso wa ka galesome. Fela Modimo ga se a ka a mo lesa gore a nkgone. Ge Labane a itše: ‘Dipudi tše kgwana e tla ba mogolo wa gago,’ mohlape ka moka o be o tswala diputšanyane tše kgwana. Ge a itše: ‘Dipudi tše segana e tla ba moputso wa gago,’ mohlape ka moka o be o tswala diputšanyane tše segana. Modimo o amogile tatagolena mehlape, a e fa nna. “Ka nako ya ge di goelana, ke ile ka lora ke bona diphokwana tše di bego di di goela e le tše sega le tše kgwadi le tše thamaga. Morongwa wa Modimo a mpitša torong a re: ‘Jakobo!’ Ka araba ka re: ‘Iše!’ Yena a tšwela pele a re: ‘Bona, diphokwana ka moka tšeo di goelago ke tše sega le tše kgwadi le tše thamaga, ka gore ke bone tšohle tše Labane a go dirago tšona. Ke nna Modimo yo a iponaditšego go wena kua Bethele, moo o tšhetšego makhura a mohlware godimo ga letlapa lela la segopotšo, gape o nkenetšego. Bjale itokiše, o tloge nageng ye, o boele nageng ya geno.’ ” Ragele le Lea ba fetola Jakobo ba re: “Ga go sa na le seo se sa re šaletšego se tatagorena a ka re abelago sona. O re swara bjalo ka batho bašele. O re rekišitše, gomme bjale o lle tšhelete ka moka yeo a re rekišitšego ka yona. Go bjalo, mahumo a ka moka ao Modimo a a amogilego tatagorena ke a rena le a bana ba rena. Wena dira tšohle tše Modimo a go boditšego tšona.” Ka gona Jakobo a itokišetša go boela go tatagwe nageng ya Kanana. A nametša bana le basadi ba gagwe dikamela mme a gapa mehlape ya gagwe ka moka, gotee le tšohle tše a di hweditšego Mesopotamia. *** Labane o be a sa ile go kota dinku tša gagwe, mme ya re a sa ile Ragele a utswa medimo ya lapa la tatagwe. Jakobo a radia Labane ka go se mo tsebiše gore o a sepela. A tšea tšohle tše e bego e le tša gagwe gomme a tloga ka potlako. A tshela noka ya Yufratese, a leba dithabeng tša Gileade. Ka morago ga matšatši a mararo Labane a botšwa gore Jakobo o tšhabile. A tloga le bomorwarragwe gomme a rakediša Jakobo matšatši a a šupago, go fihlela ge a mo swara dithabeng tša Gileade. Bošegong bjoo Modimo a tla go Labane, a mmotša ka toro a re: “O itshware, o se ke wa re selo go Jakobo.” Jakobo o be a hlomile mešaša thabeng, gomme Labane a hlomile ya gagwe le bomorwarragwe dithabeng tša Gileade. Labane a re go Jakobo: “Ke go reng o nthadiile wa gapa barwedi ba ka bjalo ka basadi ba ba thopilwego ntweng? Ke ka baka lang o nngwegetše, wa nthadia, wa se mpotše? Ge o ka be o mpoditše nkabe ke go laetše ka lethabo le ka dikoša, ka meropa le ka dikgapa. Ga se wa ka wa mpha le sebaka sa go atla ditlogolo tša ka le barwedi ba ka, ka laelana nabo. O dirile taba ya botlaela! Ke na le maatla a go ka go kweša bohloko, fela bošegong bja go feta Modimo wa tatago o mpoditše gore ke itshware ke se ke ka re selo go wena. Bjale go tloga gona šemo o tlogile, ka gobane o be o tloge o hlologetše go boela gageno, bjale ke ka baka lang o utswitše medimo ya ka?” Jakobo a mo fetola a re: “Ke be ke boifa, ka gobane ke ile ka gopola gore o tla nkamoga barwedi ba gago. Fela ge o ka hwetša yo mongwe mo a swere medimo ya gago, a bolawe. Nke o nyake se sengwe le se sengwe seo e lego sa gago bomorwarragorena ba lebeletše, gomme o se tšee.” Jakobo o be a sa tsebe gore Ragele o utswitše medimo ya Labane. Labane a ya a putuka mošaša wa Jakobo; a fetela ka go wa Lea, le ka go ya makgoba ale a mabedi a basadi, eupša a se ke a hwetša medimo ya gagwe. Ke moo a tsenego mošašeng wa Ragele. Ragele o be a tšere medimo yeo ya lapa a e beile ka mokotleng wa sala ya kamela, mme a dutše godimo ga yona. Labane a putuka gohle ka mošašeng, eupša a se ke a e hwetša. Ragele a re go tatagwe: “O se ke wa mpefelelwa, mong wa ka, ka gobane ga ke kgone go emelela o le gona; ke bone kgwedi.” Labane a nyaka eupša a se ke a hwetša medimo ya lapa la gagwe. Ke moo Jakobo a befetšwego, a omanya Labane a re: “Ke molato ofe wo ke o obilego? Ke phošo efe ye ke e dirilego ye e go dirago gore o ntšhale morago ka mokgwa wo? Bjale ka gore o putukile dilong tša ka ka moka, ke eng sa lapa la gago se o se hweditšego? Se ntšhe o se bee mo gore meloko yešo le meloko yeno ba se bone mme ba re ahlolele, nna le wena. Ke bile le wena mengwaga ye masome a mabedi; dinku le dipudi tša gago ga se tša ka tša folotša le gona ga se ka ka ka ja kgapa ya mohlape wa gago. Ge nku e bolailwe ke dibata ke be ke sa e tliše go wena, tshenyegelo e be e eba ya ka. O be o nyaka gore ke lefe ye nngwe le ye nngwe ye e utswitšwego bošego goba mosegare. Ke be ke hlwa ke tšhungwa ke letšatši mosegare, ke lala ke bolawa ke phefo bošego, ke bile ke hlobega boroko. Go bile ka tsela yeo mengwaga ye masome a mabedi yeo ke bilego nago. Ke go šometše mengwaga ye lesome le ye mene gore o nnee barwedi ba gago ba babedi, le mengwaga ye e selelago gore o mphe dihuswane tša gago. Le ge go bile bjalo, o fetošitše mogolo wa ka galesome. Ge nkabe Modimo wa botate, Modimo wa Abrahama, yo Isaka a bego a mo hlompha, a se ke a ba le nna, nkabe o ile wa nthaka ke se na selo. Eupša Modimo o bone bothata bja ka le mošomo wo ke o dirilego, gomme bošegong bja go feta a go kgala.” Labane a fetola Jakobo a re: “Basetsana ba ke barwedi ba ka, bana ba bona ke ba ka, le mehlape ye ke ya ka. Gabotsebotse se sengwe le se sengwe se o se bonago fa ke sa ka. Fela bjalo ka ge go sa hlwe go le se nka se direlago barwedi ba ba ka le barwa ba bona, nna le wena a re kwane, gomme re dire mokgobo wa matlapa go re gopotša kwano yeo ya rena.” Ka gona Jakobo a tšea letlapa a le tsema gore e be segopotšo. A laela ba lapa la gagwe gore ba thothe matlapa ba a dire mokgobo. Ka morago ga fao ba ja dijo ka thoko ga mokgobo woo wa matlapa. Labane a o rea leina la Jegare-Sahaduta, mola Jakobo a o rea leina la Galede. Labane a re go Jakobo: “Mokgobo wo wa matlapa e tla ba segopotšo go rena ka babedi.” Ka baka leo felo fao go ile gwa rewa leina la Galede. Labane o ile a ba a re: “A Morena a re hlapetše ge re arogane.” Ka gona felo fao gwa rewa le leina la Mitsepa. Labane a tšwela pele a re: “Ge o ka swara barwedi ba ka gampe, goba wa nyala basadi ba bangwe, le ge nka se tsebe taba tšeo, o gopole gore Modimo o re lebeletše. Šo mokgobo wo ke o kgobokantšego gare ga rena, le letlapa la segopotšo šele. Mokgobo wo le letlapa le ke digopotšo. Nka se tsoge ke tshetše mokgobo wo go tlo go hlasela, gomme le wena o se ke wa tsoga o o tshetše, goba o tshetše letlapa le la segopotšo go tlo ntlhasela. Modimo wa Abrahama, yena Modimo wa Nahoro, o tla re ahlolela.” Ka gona Jakobo a ena ka leina la Modimo yo Isaka, tatagwe, a bego a mmoifa gore o tla phetha keno ya gagwe. O ile a dira sehlabelo thabeng, gomme a laletša meloko yeo yabo gore ba tle dijong. Ka morago ga ge ba lle, ba robala moo thabeng. Eitše e sa le bošego ka letšatši le le latelago, Labane a atla ditlogolo tša gagwe le barwedi ba gagwe, a ba šadiša gabotse, a tloga a boela gae. Ge Jakobo a le tseleng, a gahlanetšwa ke barongwa ba Modimo. Ge a ba bona a re: “Mo ke mešaša ya Modimo”; ka gona a rea felo fao leina la Mahanaime. Jakobo a roma batseta ba mo eta pele go yo gahlana le Esau, mogolwagwe, nageng ya Edomo, seleteng sa Seire. A ba laela gore ba mmotše ba re: “Nna, Jakobo, mohlanka wa gago, ke begela Esau, mong wa ka, gore ke be ke falaletše go Labane, ka itulela fao go fihlela bjale. Ke na le dikgomo, dipokolo, dihuswane le makgoba. Ke go begela bjalo, mong wa ka, gore ke lebelelwe ka botho.” Ge batseta bale ba boela go Jakobo, ba ile ba re go yena: “Re fihlile go Esau, mogolwago, gomme o šetše a le tseleng go tlo go gahlanetša. O tla le banna ba makgolo a mane.” Jakobo a tšhoga kudu, a tlalelwa. A aroganya batho ba ba bego ba na le yena le dihuswane le dikgomo le dikamela ka dihlopha tše pedi. Ka pelong a re: “Ge Esau a ka tla a hlasela sehlopha sa pele, sehlopha se sengwe se tla kgona go tšhaba.” Ke moo Jakobo a rapetšego a re: “Modimo wa rakgolo Abrahama, Modimo wa tate Isaka, o mpoditše, Morena, gore ke boele nageng ya gešo le go meloko ya gešo, gomme o tla dira gore tšohle di ntshepelele gabotse. Ga ke swanelwe ke botho bjohle le potego ye o ntiretšego yona, nna, mohlanka wa gago. Ke tshetše Jordane ke se ne selo ge e se lepara fela, gomme bjale ke boile le dihlopha tše pedi tše. Ke a rapela, mphološe go Esau, mogolwake. Ke boifa gore o tlilo re hlasela gomme a re fediša ka moka, le bona basadi le bana. Gopola gore o nkholofeditše gore tšohle di tla ntshepelela gabotse, le gore o tla mpha ditlogolo tše ntši go feta tše motho a ka di balago, tše ntši bjalo ka dithorwana tša lešabašaba lebopong la lewatle.” Jakobo o ile a lala a robetše fao, gomme mosong wa le le latelago a kgethela Esau, mogolwagwe, diloba diruiweng tša gagwe: dipudi tša ditshadi tše makgolo a mabedi le diphooko tše masome a mabedi, ditshelau tše makgolo a mabedi, le dikgapa tše masome a mabedi, dikamela tše di amušago tše masome a mararo le bana ba tšona, dikgomo tša ditshadi tše masome a mane le dipoo tše lesome, dipokolo tša ditshadi tše masome a mabedi le tša dipholo tše lesome. *** *** A di arola mehlape mme a bea bahlanka go hlokomela mohlape wo mongwe le wo mongwe. A re go bona: “Nketeng pele mme le tlogeleng sebaka gare ga mohlape wo mongwe le wo mongwe.” A laela mohlanka wa mathomo a re: “Ge Esau, mogolwake, a gahlana le wena gomme a go botšiša a re: ‘Mong wa gago ke mang? O ya kae? Diruiwa tše di lego pele ga gago ke tša mang?’ wena o mo fetole o re: ‘Ke tša mohlanka wa gago, Jakobo. O di rometše gore e be seloba go Esau, mong wa gagwe. Jakobo yena o re šetše morago.’ ” A laela mohlanka wa bobedi ka wona mokgwa woo, le go wa boraro a realo, le bahlanka ka moka bao ba bego ba hlokometše mehlape ya gagwe a re: “Le realo ge le gahlana le Esau. Le re: ‘Mohlanka wa gago, Jakobo, o re šetše morago.’ ” Jakobo o ile a gopola a re: “Ke tla mo utswa pelo ka diloba tše, gomme ya re ge ke gahlana naye mohlomongwe a ntebalela.” A etiša diloba tšeo pele gomme bošego bjoo a lala mešašeng. Bjona bošego bjoo Jakobo a tsoga, a tšea basadi ba gagwe ka babedi, le makgoba a gagwe a basadi ka mabedi, le bana ba gagwe ba lesome le o tee, gomme a tshela nokana ya Jaboko ka letšibogong. Ge a seno ba tshediša, a tshediša le thoto yohle ya gagwe, yena a šala ka mošola a le noši. Ke moka monna yo mongwe a tla a katana le yena go fihlela letšatši le nyako hlaba. Ge monna yoo a bona gore Jakobo o a mo palela, a mo itia noka gomme ya tšwa madulong. Monna yoo a re: “Ntese ke sepele; letšatši le a hlaba.” Jakobo a mo fetola a re: “Nka se go lese ge o sa ntšhegofatše.” Monna yoo a mmotšiša a re: “A leina la gago ke wena mang?” Jakobo a mo fetola a re: “Ke nna Jakobo.” Monna yoo a re: “Leina la gago e ka se sa ba Jakobo. O katane le Modimo le batho mme o ba fentše; ka gona leina la gago e tla ba Israele.” Jakobo a re: “Bjale mpotše la gago leina.” Eupša monna yoo a mo fetola a re: “Ke ka baka lang o rata go tseba leina la ka?” Ke moka a šegofatša Jakobo. Jakobo a re: “Ke bone Modimo ke lebantše sefahlego le yena, fela ke sa phela”; ka gona a rea felo fao leina la Penuele. Letšatši la hlaba ge Jakobo a tloga Penuele, gomme o be a hlotša ka baka la noka. Go fihlela le lehono ditlogolo tša Israele ga di je mošifa wo o lego magahlanong a noka, ka gobane ke mo mošifeng wo moo Jakobo a iteilwego gona. Jakobo a bona Esau a etla le banna ba gagwe ba makgolo a mane, ka gona a arolela Lea le Ragele le makgoba a gagwe a basadi ka mabedi bana. A etiša makgoba le bana ba ona pele, gwa latela Lea le bana ba gagwe, mme mafelelong gwa ba Ragele le Josefa. Jakobo a ba eta pele ka moka, gomme a obama gašupa ge a batamela mogolwagwe. Esau yena a kganyelela go mo gahlanetša, a mo ubarela a mo atla, gomme ba lla. Ge Esau a lebelela mme a bona basadi le bana, o ile a mmotšiša a re: “A batho ba ba nago le wena ke bomang?” Jakobo a mo fetola a re: “Ba ke bana ba Modimo a mphilego bona ka botho bja gagwe, nna, mohlanka wa gago.” Ke moo makgoba a basadi a tlilego le bana ba ona a obama; gwa tla Lea le bana ba gagwe, mme mafelelong gwa tla Josefa le Ragele, ba obama. Esau a mmotšiša a re: “A dihlopha tšela ka moka ke gahlanego natšo ke tša eng?” Jakobo a mo fetola a re: “E be e le tša go dira gore o ntebelele ka botho, mong wa ka.” Eupša Esau a re: “Ke na le tše di lekanego, morwarre; itshwarele tšeo tša gago.” Jakobo a re: “Aowa, hle, ge eba o ntebelela ka botho, amogela seloba sa ka. Go bona sefahlego sa gago go nna go swana le go bona sefahlego sa Modimo, gobane o bile yo botho go nna. Hle, amogela seloba se ke go tlišeditšego sona; Modimo o bile yo botho go nna, ka gona ke na le tšohle tše ke di nyakago.” A fela a mo kgopela go fihlela a di amogela. Esau a re: “A re thothe re tloge. Ke tla go eta pele.” Jakobo a mo fetola a re: “Mong wa ka, o a tseba gore bana ba e sa le ba bannyane, le gona ke swanetše go gopola dihuswane le dikgomo tša ditswetši. Ge di ka gapšagapša kudu ešita le letšatši le tee, dihuswane ka moka di tla hwa. Hle, nkete pele, gomme nna ke tla latela ke neneka ke iketlile, ke eya le moneneko wa dikgomo le bana, go fihlela ke go swara kua Seire.” Esau a re: “Gona a ke go tlogele le banna ba ka ba bangwenyana.” Fela Jakobo a mo fetola a re: “E le gore o direlang? Nna se ke se nyakago ke fela gore o ntebelele ka botho, mong wa ka.” Ka lona letšatši leo Esau a swara leeto la go boela Seire. Jakobo yena a ya Sukote moo a ilego a ikagela ngwako gona le makuba a dikgomo tša gagwe. Ke ka fao felo fao go ilego gwa rewa leina la Sukote. Jakobo ge a boa Mesopotamia o ile a fihla a bolokegile motseng wa Shekeme, nageng ya Kanana, gomme a hloma mešaša ya gagwe go lebana le motse. Setsha seo a hlomilego mešaša ya gagwe go sona a se reka go ditlogolo tša Hamore, tatagoShekeme, ka dipapetlana tša silibera tše lekgolo. A aga aletare moo, gomme a e reela Ele, Modimo wa Israele. Ka letšatši le lengwe Dina, morwedi wa Jakobo le Lea, o ile a etela basadi ba Bakanana. Ge Shekeme, morwa wa Hamore, Mohibe, yo e bego e le kgoši ya selete seo, a mmona, a mo tšea a yo mo kata. Fela mosetsana o be a kgahla Shekeme, gomme Shekeme a mo rata mme a leka go thopa pelo ya gagwe. A botša tatagwe a re: “Nnyalele mosetsana yo.” Jakobo a kwa gore morwedi wa gagwe o gobošitšwe, fela ka gore barwa ba gagwe ba be ba le nageng le dikgomo tša gagwe, a se ke a dira selo go fihlela ba boa. Hamore, tatagoShekeme, a tloga a yo bolela le Jakobo ka nako ye barwa ba Jakobo ba goroga ba etšwa nageng. Ge ba ekwa taba yeo ba selekega ba befelwa kudu, ka ge Shekeme a dirile taba ya dihlong setšhabeng sa Israele ka go robala le morwedi wa Jakobo, a dirile taba ye e sa dirwego. Hamore a re go bona: “Morwa wa ka, Shekeme, o rata morwedi wa lena; hle, ke a le kgopela, a a mo nyale. Nke re nyalelaneng – le re neele barwedi ba lena, le rena re le neele barwedi ba rena. Ke gona le tlago dula le rena mo nageng ya rena; le ka dula mo gongwe le mo gongwe moo le go ratago, la sepela le lokologile la ikhweletša ya lena naga.” Ke moo Shekeme a itšego go tatagoDina le dikgaetšedi tša Dina: “Ntumeleleng ke mo nyale, gomme ke tla le fa se sengwe le se sengwe se le se nyakago. Le ka rotoša magadi ka moo le ratago ka gona, ke tla le fa se le se nyakago ge eba le tla mpha yena ya ba mosadi wa ka.” Barwa ba Jakobo ba fetola Shekeme le Hamore, tatagwe, ka go ba radia, ka gobane Shekeme a be a gobošitše kgaetšedi ya bona, Dina. Ba re go yena: “Re ka se dumelele gore kgaetšedi ya rena e nyalwe ke monna yo a sego a bolla; seo e ka ba kgobogo go rena. Re ka dumela taba yeo ge fela lena le ka swana le rena ka go bolotša banna ba lena ka moka. Ke mo re kago kwana, ra nyalelana. Re tla dula gare ga lena, ra ba setšhaba se tee le lena. Eupša ge le sa kwane le se re se nyakago la bolotšwa, re tla tšea Dina ra tloga.” Hamore le Shekeme, morwa wa gagwe, ba kgahlwa ke polelo ya banna bao, gomme lesogana leo la se hlwe le diega go dira seo se kgopelwago, ka gore o be a rata morwedi wa Jakobo. E be e le yena yo mogolo ka lapeng labo. Hamore le Shekeme, morwa wa gagwe, ba ya kgorong ya motse, ba bolela le banna ba gabobona ba re: “Batho ba ga ba tshwenye; a re ba leseng ba dule mo nageng ye le rena, ba sepele ba lokologile. Naga ye ke ye kgolo mme le bona ba ka dula mo. A re nyaleng barwedi ba bona, gomme le bona ba nyale ba rena. Batho ba ba dumela go dula gare ga rena le go ba setšhaba se tee le rena, ge fela re ka phetha lebaka la gore re bolotše banna ba rena ka moka, bjalo ka ge bona ba bolotše. A ke re diruiwa tša bona ka moka le tšohle tše e lego tša bona e tla ba tša rena? Ka gona a re dumeleng gore ba dule le rena.” Badudi ka moka ba motse ba kwana le seo Hamore le Shekeme ba se bolelago, gomme banna ka moka ba bolotšwa. Ka morago ga matšatši a mararo ge banna ba sa babelwa ke dintho, barwa ba Jakobo ba babedi, Simeone le Lefi, dikgaetšedi tša Dina, ba tšea ditšhoša tša bona, ba tsena motseng ba sa gopolelwe selo, ba bolaya banna ka moka. Ba bolaya le Hamore le Shekeme, morwa wa gagwe, ba tšea Dina ngwakong wa Shekeme, mme ba tloga. Ka morago ga polao yeo barwa ba bangwe ba Jakobo ba thopela motse go lefeletša kgobošo ya kgaetšedi ya bona. Ba tšea dihuswane, dikgomo, dipokolo le se sengwe le se sengwe motseng le mašemong. Ba tšea dithoto tša bona ka moka, ba thopa basadi le bana ka moka, ba tšea le tšohle ka mengwakong. Jakobo a re go Simeone le Lefi: “Le ntsentše bothateng; bjale Bakanana le Baperise le yo mongwe le yo mongwe mo nageng o tlilo ntlhoya. Ga ke ne banna ba bantši; ge ba ka ntirela seboka mme ba ntlhasela, nna le lapa la ka re tla fedišwa.” Bona ba mo fetola ba re: “O ra gore re ka lesa kgaetšedi ya rena e swarwa bjalo ka sefebe?” Modimo a re go Jakobo: “Itokiše o ye Bethele o yo dula fao. Moo o age aletare, o e agele Modimo yo a iponagaditšego go wena ge o be o tšhabela ngwaneno Esau.” Ka gona Jakobo a re go ba lapa la gagwe le go bohle ba ba bego ba na le yena: “Lahlang medimo e šele ye le nago le yona; itlhwekišeng, gomme le apare diaparo tše di hlwekilego. Re tlile go tloga mo ra ya Bethele, moo ke tlago aga aletare, ka e agela Modimo yo a nthušitšego ka nako ya matshwenyego a ka, a ba a ba le nna gohle mo ke ilego ka ya.” Ka fao ba neela Jakobo medimo e šele ka moka ye ba bego ba na le yona, gotee le mangina a ba bego ba a rwele. A di epela ka fase ga mohlare wa moeike wo o bego o le kgauswi le Shekeme. Ge Jakobo le barwa ba gagwe ba tloga, Modimo o ile a tšhoša batho ba metse ya kgauswi, mme ba se ke ba ba hlomara. Jakobo a fihla le batho ba gagwe ka moka Luse, yeo bjale e tsebjago ka la Bethele, nageng ya Kanana. A aga aletare gona, mme a reela felo fao leina la Modimo wa Bethele, ka gobane Modimo o iponaditše go yena fao ge a be a tšhabela mogolwagwe. Mofepi wa Rebeka, Debora, a hwa gomme a bolokwa ka fase ga moeike ka tlase ga Bethele. Ka gona gwa rewa leina la “Moeike wa Sello”. Ge Jakobo a boa Mesopotamia, Modimo o ile a iponatša go yena gape, gomme a mo šegofatša. A re go yena: “Leina la gago o Jakobo, fela go tloga bjale o tla ba Israele.” Ka gona Modimo a mo rea leina la Israele. A re go yena: “Ke nna Modimo Ramaatlaohle. O atelwe ke thari. Ditšhaba di tla tšwa go wena, mme o tla ba rakgolokhukhu wa magoši. Ke tla go fa naga ye ke e filego Abrahama le Isaka, ke tla e neela le ditlogolo tša gago ge o seno hlokafala.” Modimo a napa a tloga go yena. Jakobo a hloma letlapa la segopotšo gona fao Modimo a boletšego naye, gomme a tšhela beine le makhura a mohlware godimo ga lona. A rea felo fao leina la Bethele. Jakobo le lapa la gagwe ba tloga Bethele, gomme ya re ba sa le kgojana le Efrata, mabaka a fihla a gore Ragele a belege, mme a swarwa ke lešoko le bohlokohloko. Ge lešoko la gagwe le gaketše, mmelegiši a re go yena: “O se ke wa boifa; ke mošemanyana yo mongwe gape.” Fela Ragele o be a ehwa, mme ge moya o etšwa nameng, a rea morwa wa gagwe leina la Benoni, eupša tatagomošemanyana a mo rea leina la Benjamene. Ragele a hlokafala, mme a bolokwa ka thoko ga tsela ya go ya Efrata, motse wo bjale o tsebjago ka la Betlelehema. Jakobo a hloma letlapa la segopotšo moo, gomme le lehono letlapa leo le sa šupa lebitla la Ragele. Jakobo a fetela pele gomme a hloma mešaša ya gagwe ka thoko yela ya tora ya Edere. Ge Jakobo a sa dula nageng yeo, Rubene o ile a robala le Bilha, yo mongwe wa metlabo ya tatagwe. Ge Jakobo a ekwa taba yeo a selekega kudu. Jakobo o be a na le barwa ba lesome le metšo ye mebedi. Barwa ba Lea e be e le Rubene, leitšibolo la Jakobo, Simeone, Lefi, Juda, Isakara le Sebulone. Barwa ba Ragele e be e le Josefa le Benjamene. Barwa ba Bilha, lekgoba la Ragele, e be e le Dane le Naftali. Barwa ba Silpa, lekgoba la Lea, e be e le Gade le Asere. Barwa ba ba belegwe Mesopotamia. Jakobo a tla go Isaka, tatagwe, kua Mamre, kgauswi le Kiriate-Arba, e lego Hebrone, moo Abrahama le Isaka ba bego ba falaletše gona. Isaka o phetše a ba le mengwaga ye lekgolo le masome a seswai. O hlokafetše a tšofetše kudu, gomme barwa ba gagwe, Esau le Jakobo, ba mmoloka. Šedi ditlogolo tša Esau yoo a bitšwago le ka la Edomo. Esau o ile a nyala basadi ba Bakanana: Ada, morwedi wa Elone, Mohete; Oholibama, morwedi wa Ana, morwa wa Tsibone, Mohibe; le Basemate, morwedi wa Ishmaele, kgaetšedi ya Nebayote. Ada a belega Elifase; Basemate a belega Reuele; Oholibama yena a belega Jeushe, Jalamo le Korage. Barwa ba ba belegetšwe Esau kua nageng ya Kanana. Ke moka Esau a tšea basadi ba gagwe, barwa, barwedi, le batho ka moka ba lapa la gagwe, le dikgomo tša gagwe, le diruiwa ka moka, le tšohle tše a bilego natšo nageng ya Kanana, gomme a tloga go Jakobo, ngwanabo, a ya nageng e šele. O ile a tloga ka gobane naga yeo yena le Jakobo ba bego ba falaletše go yona e be e sa kgone go ba phediša; ba be ba na le leruo le lentšintši, mme ba se sa kgona go dula mmogo. Ka gona Esau a dula nageng ya dithaba ya Edomo. Leina le lengwe la Esau e be e le Edomo. Šedi ditlogolo tša Esau, rakgolokhukhu wa Baedomo kua nageng ya dithaba ya Edomo. Ada, mosadi wa Esau, o mmelegetše morwa o tee, Elifase. Elifase o bile le barwa ba bahlano: Temane, Omare, Tsefo, Gatamo le Kenase. Gomme ka motlabo wo mongwe, Timna, a ba le morwa yo mongwe gape, Amaleke. Basemate, mosadi wa Esau, a mmelegela morwa o tee, Reuele. Reuele o bile le barwa ba bane: Nahate, Serage, Shama le Misa. *** *** *** Mosadi wa Esau, Oholibama, morwedi wa Ana, morwa wa Tsibone, a mmelegela barwa ba bararo: Jeushe, Jalamo le Korage. Dikgoro tše di fapafapanego e bile ditlogolo tša Esau. Morwa wa Esau wa mathomo, Elifase, e bile rakgolokhukhu wa dikgoro tše di latelago: Temane, Omare, Tsefo, Kenase, Korage, Gatamo le Amaleke. Tšeo ka moka e bile ditlogolo tša Ada, mosadi wa Esau. Reuele, morwa wa Esau, e bile rakgolokhukhu wa dikgoro tše di latelago: Nahate, Serage, Shama le Misa. Tšeo ka moka e bile ditlogolo tša Basemate, mosadi wa Esau. Dikgoro tše di latelago di tšwile go Esau ka mosadi wa gagwe, Oholibama, morwedi wa Ana: Jeushe, Jalamo le Korage. Dikgoro tše ka moka e bile ditlogolo tša Esau. Badudi ba mathomo ba naga ya Edomo e be e le ba dikgoro tše di tšwilego go ditlogolo tše di latelago tša Seire, Mohori: Lotane, Shobale, Tsibone, Ana, Dishone, Etsere le Dishane. *** Lotane e bile rakgolokhukhu wa kgorwana ya Hori le ya Hemane. Lotane o be a na le kgaetšedi yo leina la gagwe e bego e le Timna. Shobale e bile rakgolokhukhu wa kgorwana ya Albane, le ya Manahate, le ya Ebale, le ya Shefi, le ya Onamo. Tsibone o bile le barwa ba babedi, Aya le Ana. Yo ke Ana yo a hweditšego didiba tša meetse a a fišago kua lešokeng ge a be a dišitše dipokolo tša tatagwe. Ana e bile tatagoDishone, yo e bilego rakgolokhukhu wa kgorwana ya Hemdane, le ya Eshbane, le ya Jitrane, le ya Kerane. Ana o be a bile a na le morwedi yo leina la gagwe e bego e le Oholibama. *** Etsere e bile rakgolokhukhu wa kgorwana ya Bilhane, le ya Saabane, le ya Akane. Dishane e bile rakgolokhukhu wa kgorwana ya Utse le ya Arane. Ditšhaba tša Bahori nageng ya Edomo šedi: Lotane, Shobale, Tsibone, Ana, Dishone, Etsere le Dishane. *** Dikgoši tše di latelago di bušitše naga ya Edomo ka go latelana ga tšona pele ga ge go eba le dikgoši nageng ya Israele: Bela, morwa wa Beore, wa Dinhaba Jobabe, morwa wa Serage, wa Botsra Hushamo, wa selete sa Temane Hadade, morwa wa Bedade, wa Abite; yena o fentše Bamidiane ntweng nageng ya Moaba Samla wa Masreka Shaulo wa Rehobote-lebopong-la-Yufratese Baale-Hanane, morwa wa Akboro Hadade wa Pagu; mosadi wa gagwe e be e le Mehetabele, morwedi wa Matrede le setlogolwana sa Me-Sahabe. *** *** *** *** *** *** *** *** Esau e bile rakgolokhukhu wa dikgoro tše di latelago tša Baedomo: Timna, Alba, Jetete, Oholibama, Ela, Pinone, Kenase, Temane, Mibitsare, Magadiele le Iramo. Selete seo setšhaba se sengwe le se sengwe se dutšego go sona se ile sa tsebja ka leina la setšhaba seo. Jakobo o ile a no fela a dutše nageng ya Kanana, moo tatagwe a bego a falaletše gona. Ditaba tša lapa la gagwe šedi: Josefa, lesoganyana la mengwaga ye lesome le metšo ye e šupago, o be a diša dihuswane le bomorwarragwe, barwa ba Bilha le Silpa, metlabo ya tatagwe. O be a botša tatagwe dilo tše mpe tše bomorwarragwe ba bego ba di dira. Jakobo o be a rata Josefa go feta barwa ba bangwe ba gagwe ka moka, ka gobane o mmelegetšwe mola a tšofetše. A mo rokela seaparo se setelele sa matsogo a matelele. Ge bomorwarragwe ba bona gore tatagobona o rata Josefa go ba feta, ba hloya ngwanabobona kudu moo e lego gore ba be ba sa mmolediše ka botho. Bošegong bjo bongwe Josefa a lora toro, mme ge a e botša bomorwarragwe, bona ba mo hloya go fetišiša. O ile a re: “Theetšang toro ye ke e lorilego. Ka moka ga rena re be re le mašemong re tlema dingata tša mabele, gomme ngata ya ka ya tsoga ya ema thwii. Tša lena tša dikologa ya ka, gomme tša e obamela.” Bomorwarragwe ba mmotšiša ba re: “A o gopola gore o tlile go ba kgoši ya rena? A o tlile go re buša?” Ka gona ba mo hloya go fetišiša ka baka la seo a se boletšego ka ditoro tša gagwe. Josefa a lora ye nngwe toro gomme a botša bomorwarragwe a re: “Ke lorile toro ye nngwe, ka bona letšatši le ngwedi le dinaledi tše lesome le e tee di nkobamela.” A botša le tatagwe toro yeo, gomme tatagwe a mo omanya a re: “Ke toro ya mohuta mang yeo? A o gopola gore mmago le bomorwarrago le nna re tlilo tla ra go obamela?” BomorwarragoJosefa ba mo tsebafela, tatagwe yena a fela a gopodišiša taba yeo. Ka nako ye nngwe ge bomorwarragoJosefa ba ile Shekeme go yo diša dihuswane tša tatagobona, Jakobo o ile a re go Josefa: “Ke nyaka gore o ye Shekeme moo bomorwarrago ba dišitšego dihuswane.” Josefa a mo fetola a re: “Go lokile.” Tatagwe a re go yena: “Sepela o bone ge eba bomorwarrago ba sa iketlile, le ge eba dihuswane di sa le gabotse; gomme o boe o tle o mpotše.” Ka gona tatagwe a mo roma ba le moeding wa Hebrone. Josefa a fihla Shekeme, mme a ralala le naga yeo. Monna yo mongwe a mmona gomme a mmotšiša a re: “A o nyaka eng?” Josefa a mo fetola a re: “Ke nyaka bomorwarre. Na o ka mpotša mo ba dišago gona?” Monna yoo a re: “Ba šetše ba tlogile. Ke ba kwele ba re ba ya Dotane.” Ka fao Josefa a šala bomorwarragwe morago mme a ba hwetša kua Dotane. Ba mmona a sa le kgole, gomme pele ga ge a fihla go bona, ba kwana go mmolaya. Ba boledišana ba re: “Raditoro yola šo o etla. Tlang re mmolayeng, re mo lahlele ka moleteng wo mongwe. Re tla re o bolailwe ke sebata. Ke moo re tlago bona gore na ditoro tša gagwe di tla feletša kae.” Rubene a ba kwa, gomme a leka go phološa Josefa a re: “A re se ke ra mmolaya. Se tšholleng madi. Mo lahleleng ka mo moleteng wo mo lešokeng, eupša le se ke la mo iša seatla.” A realo gore a mo phološe go bona gomme a mmušetše go tatagwe. Ge Josefa a fihla go bomorwarragwe, ba mo hlobola seaparo sa gagwe se setelele sa matsogo a matelele. Gomme ba mo tšea ba mo lahlela ka moleteng wo o bego o se na le meetse. Ba dula fase ba ja, ya re ge ba iša mahlo ba bona sehlopha sa Baishmaele se etšwa Gileade se eya Egepeta. Dikamela tša bona di be di rwele dinoko le marokhu. Juda a re go bomorwarragwe: “Re tla boelwa ke eng ka go bolaya ngwanaborena le ka go uta polao yeo? A re mo rekišeng go Baishmaele ba, re se ke ra ba ra mo iša seatla. Ga ke re ke ngwanaborena, ke madi a borena?” Bongwanabo ba dumela, gomme ge bagwebi ba Bamidiane ba etla, bongwanaboJosefa ba mo ntšha moleteng, ba mo rekišetša Baishmaele ka dipapetlana tša silibera tše masome a mabedi; bona ba mo tšea ba ya naye Egepeta. Ge Rubene a etla moo moleteng gomme a hwetša gore Josefa ga a gona, a gagola diaparo tša gagwe. A boela go bomorwarragwe a re: “Mošemanyana yola ga a gona! A ke tlilo dirang?” Ke moo ba bolailego phooko, ba korobetša seaparo sa Josefa ka mading a yona. Ba tšea seaparo seo ba se iša go tatagobona mme ba re: “Re hweditše seaparo sese. Nke o se lekodišiše o bone ge eba ke sa morwago goba ga se sona.” A se lekodišiša mme a re: “Seaparo sa morwake! O llwe ke sebata! Morwa wa ka, Josefa, o rathagantšwe!” Jakobo a gagola diaparo tša gagwe, a apara tša go ilela, a llela morwa wa gagwe nako ye telele. Barwa ba gagwe ka moka le barwedi ba tla go mo homotša, eupša a gana go homotšwa mme a re: “Ke tla theogela bodulabahu ke sa llela morwa wa ka.” Ka gona a tšwela pele a llela morwa wa gagwe, Josefa. Kua Egepeta Bamidiane ba ile ba rekiša Josefa go Potifare, mohlankedi yo mongwe wa kgoši, yo e bego e le molaodi wa baleti ba kgoši. Yona mehleng yeo Juda a tlogela bomorwarragwe, a theoga a yo dula le Hira, monna yo a bego a etšwa motseng wa Adulamo. Moo Juda a gahlana le mosetsana wa Mokanana yo tatagwe e bego e le Shua. A mo nyala, a robala naye, gomme mosetsana a ima, a mmelegela morwa; Juda a mo rea leina la Ere. A ima gape, a belega morwa yo mongwe, gomme a mo rea leina la Onane. A ba le morwa gape, mme a mo rea leina la Shelage. Juda o be a le kua Akesibe ge mosadi a mmelegela Shelage. Juda a hweletša morwa wa gagwe wa mathomo, Ere, mosadi; leina la gagwe e be e le Tamare. Ere o be a fošetša Morena, ka gona Morena a mmolaya. Ke moo Juda a itšego go Onane: “Sepela o yo robala le mohlologadi wa mogolwago. O mo tsenele gore mogolwago a tle a be le ditlogolo.” Fela Onane a tseba gore bana bao e ka se tlo ba ba gagwe, ka gona nako ye nngwe le ye nngwe ge a robala le mohlologadi wa mogolwagwe, a tšhollela matšhedi fase gore go se ke gwa ba le bana ba mogolwagwe. Se a se dirilego sa befediša Morena, mme le yena Morena a mmolaya. Ke moo Juda a itšego go Tamare, ngwetši ya gagwe: “Ipoelele ga geno mme o fele o le mohlologadi go fihlela morwa wa ka, Shelage, a godile.” A realo ka gobane a boifa gore Shelage o tla bolawa bjalo ka bomogolwagwe. Ka gona Tamare a ipoelela ga gabo. Ka morago ga lebaka le letelele mosadi wa Juda a hwa. Ge Juda a feditše go ilela, yena le mogwera wa gagwe, Hira wa Adulamo, ba ya Timna, moo dinku tša Juda di bego di kotwa ntshe. Motho yo mongwe a botša Tamare a re: “Ratswalago o ya Timna go yo kota dinku tša gagwe.” Ka gona Tamare a apola diaparo tša bohlologadi, a ipipa sefahlego ka lešira, a itira gore a se ke a tsebja, gomme a dula fase moo tsela e phamogelago Enaime, motse wo o bego o le tseleng ya go ya Timna. O be a tseba gabotse gore morwa wa Juda wa mafelelo, Shelage, bjale o godile, gomme le ge go le bjalo ga se a ka a mo fiwa gore a mo tsenele. Ge Juda a mmona, a gopola gore ke segwebakathobalo, ka gore o be a ipipile sefahlego. A ya go yena ka thoko ga tsela a re: “Etla re robale.” O be a sa tsebe gore ke ngwetši ya gagwe. Tamare a re: “A o tla mpha eng?” Juda a mo fetola a re: “Ke tla go romela putšane ya go tšwa mohlapeng wa ka.” Tamare a re: “Go lokile, ge o ka mpha se ke tlago šala ke se swere go fihlela o e romela.” Juda a mmotšiša a re: “Ke go neele eng se o tlago šala o se swere?” Tamare a mo fetola a re: “Papetlana ya gago ya go itsebiša, le ketanyana ya yona, le lepara le o le swerego.” A mo neela tšona. A robala naye, gomme Tamare a ima. Tamare a ya gae, a apola lešira, a apara diaparo tšela tša gagwe tša bohlologadi. Juda a roma Hira, mogwera wa gagwe, go iša putšane yela le go tšea dilo tšela mosadi yola a šadilego a di swere, fela a se ke a mo hwetša. A botšiša banna ba bangwe kua Enaime a re: “A segwebakathobalo sela se bego se le mo tseleng se kae?” Ba mo fetola ba re: “Ga se gwa ka gwa ba le segwebakathobalo mo.” A boela go Juda a re: “Ga se ka mo hwetša. Banna ba felo fao ba re ga se gwa ka gwa ba le segwebakathobalo fao.” Juda a re: “A a itshwarele dilo tšeo. Ga re nyake go segwa ke batho. Go leka gona ke lekile go mo lefa, fela ga se wa mo hwetša.” Ka morago ga dikgwedi tše e ka bago tše tharo, motho yo mongwe a botša Juda a re: “Ngwetši ya gago, Tamare, e be e itirile sefebe, mme bjale e imile.” Juda a re: “Mo ntšheng le mo tšhumeng a hwe.” Ge a ntšhetšwa ntle, a roma motho go ratswalagwe a re: “Ke imišitšwe ke monna yoo dilo tše e lego tša gagwe. Di lebeledišiše mme o bone gore ke tša mang – papetlana ye ya go itsebiša, le ketanyana ya yona, le lepara le.” Juda a di tseba gomme a re: “O a rereša ka gobane ga se ka mo neela morwa wa ka, Shelage, gore e be mosadi wa gagwe.” Juda a se ke a hlwa a robala naye gape. Ge nako ya gagwe ya go belega e fihla, go ile gwa lemogwa gore o tlilo belega mafahla. Ge a le gare a belega, yo mongwe wa bona a ntšha letsogwana; mmelegiši a le swara, a le tlema ka tlhale ye khubedu, gomme a re: “Yo o tswetšwe pele.” Fela lesea la gomiša letsogwana lela, mme ngwanabolona a belegwa pele. Ke moo mmelegiši a itšego: “Jo, wa tla wa šwahla?” Ka gona a rewa leina la Peretse. Ka morago gwa belegwa ngwanabo le tlhale yela ye khubedu letsogwaneng la gagwe, gomme a rewa leina la Serage. Baishmaele ba be ba išitše Josefa Egepeta mme ba mo rekišeditše Potifare, mohlankedi yo mongwe wa kgoši, yo e bego e le molaodi wa baleti ba kgoši. Morena a ba le Josefa mme a mo atla. O be a dula ngwakong wa mong wa gagwe wa Moegepeta. Yena a bona gore Morena o na le Josefa, o mo atla go se sengwe le se sengwe se a se dirago. Potifare a mo thabela mme a mo dira mohlanka wa gagwe yo mogolo, ka gona a mmea mohlokomedi wa ngwako wa gagwe le wa tšohle tša gagwe. Go tloga ka nako yeo Morena a šegofatša lapa la Moegepeta yoo ka baka la Josefa. Morena a šegofatša se sengwe le se sengwe se a bego a na le sona lapeng la gagwe le mašemong a gagwe. Potifare a bea Josefa mohlokomedi wa tšohle tše a nago le tšona, gomme a se ke a be a itshwenya ka selo ntle le dijo tše a bego a di ja. Josefa o be a bopegile e le yo mobotse. Ka morago ga lebaka mosadi wa mong wa gagwe a thoma go mo duma, gomme a mo kgopela gore a robale naye. Josefa a gana a re go yena: “Bona, mong wa ka ga a sa itshwenya ka selo ka mo lapeng ka gobane ke le gona. O ntirile mohlokomedi wa tšohle tše a nago le tšona. Ke na le maatla a a lekanago le a gagwe mo lapeng le, gomme ga go seo a nkganetšago sona ntle le wena. Bjale nka napa ka dira taba ye mpe ka mokgwa woo, ka fošetša Modimo?” Le ge a be a kgopela Josefa letšatši ka letšatši, Josefa a se ke a dumela go robala naye. Ka letšatši le lengwe ge Josefa a tsena ka ngwakong go yo dira mošomo wa gagwe, gwa be go se ne motho ka gae. Mosadi wa Potifare a mo swara ka seaparo a re: “Tlaa o robale le nna!” Eupša Josefa a phonyokga a tšhabela ntle, a šia seaparo sela sa gagwe matsogong a mosadi yola. Ge mosadi a bona gore Josefa o tlogetše seaparo sa gagwe gomme o tšhabetše ntle, a bitša bahlanka ba lapa, a re: “Bonang! Moheberu yo mogatšake a mo tlišitšego mo lapeng o a re hlompholla. O tsene ka phapošing ya ka go tlo nkata, fela nna ka goeletša ka kudu. Ge a ekwa ke goeletša, a tlogela seaparo sa gagwe ka thoko ga ka, a tšhabela ntle.” A swara seaparo seo sa Josefa go fihlela mong wa gagwe a etla gae. Ke moo a mmoditšego yona taba yela a re: “Lekgoba lela la Moheberu o le tlišitšego mo le tsene ka phapošing ya ka mme la ntlhompholla. Eupša ge ke goeletša, a tšhabela ka ntle, a šia seaparo sa gagwe ka thoko ga ka.” Mong wa Josefa a befelwa kudu gomme a laela gore Josefa a swarwe, a tsenywe ka kgolegong yeo bagolegwa ba kgoši ba bego ba tswaleletšwe ka go yona, gomme a dula fao. Fela Modimo a ba le Josefa mme a mo šegofatša gore rakgolego a mo thabele. A bea Josefa mohlokomedi wa bagolegwa ka moka, le wa tšohle tše di dirwago ka kgolegong. Rakgolego a se hlwe a tlemegile go hlokomela selo se se bego se le diatleng tša Josefa, ka gobane Morena o be a na le yena, gomme a atla se sengwe le se sengwe se a se dirago. Ka morago ga nako motšhelabeine wa kgoši ya Egepeta le moapeimogolo wa dinkgwa ba befediša kgoši. O ile a befelelwa bahlankedi bao ba babedi, gomme a ba hlahlela kgolegong ngwakong wa molaodi wa baleti ba kgoši, gona ka mola Josefa a bego a tswaleletšwe ka gona. Ba tšea nako ye telele kgolegong, gomme molaodi a dira Josefa mohlanka wa bona. Bošego bjo bongwe gona ka moo kgolegong motšhelabeine le moapeimogolo ba lora ditoro, mme ditoro tšeo di be di na le ditlhathollo tše di fapanego. Ge Josefa a etla go bona mosong, a bona gore ba tshwenyegile. A ba botšiša a re: “Ke ka baka lang le tshwenyegile lehono?” Ba mo fetola ba re: “Yo mongwe le yo mongwe wa rena o lorile toro, gomme ga go na motho yo a kgonago go di hlatholla.” Josefa a re: “A ga se Modimo yo a kgontšhago motho go hlatholla ditoro? Mpotšeng ditoro tša lena.” Ka gona motšhelabeine a re: “Nna ke lorile ke bona morara pele ga ka o na le mahlogedi a mararo. Ge matlakala a seno hloga, mabue a tšwelela, gomme diterebe tša butšwa. Ke be ke swere senwelo sa kgoši; ka gona ka tšea diterebe ka di pitlela ka senwelong, ka se fa kgoši.” Josefa a re: “Tlhathollo ya toro yeo še: Mahlogedi a mararo ke matšatši a mararo. Ka morago ga matšatši a mararo kgoši o tla go lokolla, a go swarela, a go boetša maemong a gago. O tla mo fa senwelo sa gagwe bjale ka pele ge o be o le motšhelabeine wa gagwe. Fela hle, o nkgopole ge tšohle di go sepelela gabotse, o ntšwele mohola ka go mpolelela kgoši, mme o nntšhe ka mo kgolegong. Gabotsebotse ke tšhabišitšwe nageng ya Baheberu, mme le gona mo Egepeta ga go se ke se dirilego gore ke be ke lahlelwe kgolegong.” Ge moapeimogolo wa dinkgwa a bona tlhathollo ya toro ya motšhelabeine e le ye botse, a re go Josefa: “Le nna ke lorile toro; ke be ke rwele diroto tše tharo tša dinkgwa hlogong. Ka serotong sa ka godimodimo go be go na le dijo tša kgoši tša mehutahuta tše di apeilwego, gomme dinonyana di be di di ja.” Josefa a mo fetola a re: “Tlhathollo ya toro yeo še: Diroto tše tharo ke matšatši a mararo. Ka morago ga matšatši a mararo kgoši o tla go ripa hlogo. Ke moka a lekeletša setopo sa gago koteng, gomme manong a ja nama ya gago.” Ka letšatši la boraro, letšatši la matswalo a kgoši, kgoši a direla bahlankedi ba gagwe ka moka monyanya; a lokolla motšhelabeine le moapeimogolo mme a ba tliša pele ga bahlankedi ba gagwe. A boetša motšhelabeine maemong a gagwe a pele, moapeimogolo yena a mmolaya, gwa direga bjalo ka ge Josefa a be a boletše. Fela motšhelabeine a se ke a gopola Josefa, a mo lebala. Ka morago ga mengwaga ye mebedi kgoši ya Egepeta ya lora e eme ka thoko ga noka ya Naele, gomme a bona dikgomo tše di šupago tša ditshadi tša go nona tša go phatsema di etšwa ka nokeng, mme di thoma go fula mahlakanokeng. Ke moka gwa rotoga dikgomo tše dingwe tše di šupago tša ditshadi; tšona e be e le makhoro, di otile. Di ile tša rotoga tša ema kgauswi le dikgomo tšela tše dingwe lebopong la noka. Kgomo tša go ota tša ja dikgomo tšela tše di šupago tša go nona. Kgoši a phafoga. A swarwa ke boroko gape, gomme a lora la bobedi. A bona diako tše di šupago tša mabele tše di tladitšego mme di budule, di metše lehlakeng le tee. Diako tše dingwe tše di šupago tša mabele tša hloga; e be e le tše tshesenyane, mme di tšhumilwe ke phefo ya leganata. Diako tšela tše tshesenyane tša metša tšela tša go šupa tša go tlatša tše koto. Kgoši a phafoga mme a lemoga gore o be a lora. Ka moswane a tshwenyega, ka gona a bitša didupe ka moka le banna ba bohlale ba Egepeta. A ba botša ditoro tša gagwe, fela le o tee a se kgone go mo hlathollela tšona. Ke moo motšhelabeine a itšego go kgoši: “Lehono ke swanetše go ipolela gore ke dirile phošo. O be o mpefeletšwe, nna le moapeimogolo, wa re lahlela kgolegong ngwakong wa molaodi wa baleti ba kgoši. Bošegong bjo bongwe yo mongwe le yo mongwe wa rena o ile a lora toro, mme ditoro tšeo di be di na le ditlhathollo tše di fapanego. Lesogana la Moheberu, lekgoba la molaodi wa baleti ba kgoši, le be le na le rena moo. Re ile ra mmotša ditoro tša rena, gomme a re hlathollela tšona. Go diregile ka mo a re hlatholletšego ka gona: O mpoeditše maemong a ka, moapeimogolo yena wa mmolaya.” Kgoši a laela gore Josefa a tlišwe, gomme a ntšhwa kgolegong ka bjako. Ge a bootše maledu, a apara diaparo tše dingwe, a tsena, a ema pele ga kgoši. Kgoši a re go yena: “Ke lorile toro, gomme ga go yo a kgonago go e hlathollago. Ke boditšwe gore wena o kgona go hlatholla ditoro.” Josefa a mo fetola a re: “Ga ke kgone, kgoši, fela Modimo o tla go utollela tše botse ka yona.” Kgoši a re: “Ke lorile ke eme lebopong la noka ya Naele, gomme ka bona dikgomo tše di šupago tša ditshadi tša go nona tša go phatsema di etšwa ka nokeng, mme di thoma go fula mahlakanokeng. Ke moka gwa rotoga dikgomo tše dingwe tše di šupago tša ditshadi tše di bego di gwametšwe, e le makhoro, di otile kudu. E be e le makhoro a ke sego ka ke ka a bona nageng ka moka ya Egepeta. Dikgomo tšeo tša makhoro tša ja tšela tša go nona, eupša go be go se yo a ka lemogago gore di di lle, ka gobane di ile tša no fela di sa otile bjalo ka pele. Gomme ka phafoga. Ka buša ka lora ke bona diako tše di šupago tša mabele tšeo di bego di tladitše mme di budule, di metše lehlakeng le tee. Ka bona go hloga tše dingwe diako tše di šupago, tše tshesenyane tše di tšhumilwego ke phefo ya leganata. Diako tšeo tše tshesenyane tša mabele tša metša tšela tša go tlatša tše di šupago. Ke boditše didupe ditoro tše, fela ga go le o tee wa bona yo a kgonnego go ntlhathollela tšona.” Josefa a re go kgoši: “Ditoro tšeo tše pedi di ra selo se tee, kgoši; Modimo o go boditše se a tlilego go se dira. Dikgomo tša go nona tše di šupago ke mengwaga ye e šupago, mme diako tša mabele tše di tladitšego tše di šupago le tšona ke mengwaga ye e šupago; di ra selo se tee. Dikgomo tše di šupago tša ditshadi tša makhoro tše di rotogilego ka morago, le diako tša mabele tše tshesenyane tše di šupago tše di tšhumilwego ke phefo ya leganata ke mengwaga ye e šupago ya tlala. Go ka wona mokgwa woo ke go boditšego, kgoši – Modimo o go laeditše se a tlilego go se dira. Go tla ba le mengwaga ye e šupago ya mokhora wo mogolo nageng ka moka ya Egepeta. Ka morago ga moo go tla ba le mengwaga ye e šupago ya tlala, gomme mengwaga yela ya mokhora e tla lebalwa, ka gobane tlala e tla senya naga. Mokhora wola o tla lebalwa, ka gobane tlala ye e tlago latela e tla ba ye šoro kudu. Go ipoeletša ga toro ya gago go ra gore taba yeo e beilwe ke Modimo, le gore o tla e hlagiša kgauswinyana. “Bjale, kgoši, kgetha monna wa bohlale le kwešišo, o mmee molaodi wa naga. O be o bee bahlapetši ba go ntšhiša batho karolo ya bohlano ya tše ba di bunnego mo mengwageng ye e šupago ya mokhora. O ba laele gore ba kgoboketše dijo ka moka mo mengwageng ya mokhora ye e tlago, gomme o ba fe maatla a go boloka mabele mo metseng, le go a leta. Dijo tše di tla tla di fepa setšhaba mo mengwageng ye e šupago ya tlala ye e tlilego go wela Egepeta, gore batho ba se ke ba tla ba hwa ka tlala.” Kgoši le bakgomana ba gagwe ba amogela keletšo yeo, gomme kgoši a re go bona: “Re ka se tsoge re hweditše motho yo mokaone go feta Josefa, monna yo a nago le moya wa Modimo.” Kgoši a re go Josefa: “Modimo o go utolletše tše ka moka, ka gona go molaleng gore o na le bohlale bjo bogolo le kwešišo go feta batho bohle. Ke tla go bea mookamedi wa lapa la ka, gomme batho ba ka ka moka ba tla phetha ditaelo tša gago. Maatla a gago a tla fetwa ke a ka fela. Bjale ke go bea mmušiši wa Egepeta ka moka.” Kgoši a khwamola palamonwana ya gagwe ye e bego e tlokilwe sekibo sa mošate, a e khwamela monwaneng wa Josefa. A mo apeša seaparo sa lešela le boletiana, a mo apeša le ketane ya gauta molaleng. A mo fa koloi ya bobedi ya mošate gore a sepele ka yona, gomme baleti ba gagwe ba mo eta pele ba goa ba re: “Tlogang tseleng! Tlogang tseleng!” Ka gona Josefa a bewa mmušiši wa naga ya Egepeta ka moka. Kgoši a re go yena: “Kgoši ke nna – gomme ga go le o tee nageng ya Egepeta ka moka yo a tlago dira selo a se a dumelelwa ke wena.” A fa Josefa leina la Seegepeta la Tsafenate-Paneage. A mo fa mosadi, Asenate, morwedi wa Potifera, moprista wa motse wa Heliopolise. Josefa o be a na le mengwaga ye masome a mararo ge a thoma go hlankela kgoši ya Egepeta. O ile a tloga kgorong ya kgoši gomme a ralala le naga ka moka. *** Mo mengwageng ye e šupago ya mokhora naga e ile ya ntšha mabele a mantši. Josefa a kgoboketša dijo ka moka moo mengwageng yeo e šupago, a di boloka mo metseng. Motseng wo mongwe le wo mongwe a boloka dijo tše di tšwago mašemong a wona. A boloka mabele a mantši moo a ilego a šala a swana le lešabašaba la lewatle. Ya ba a mantši mo a ilego a ba a lesa go a ela. Pele ga ge mengwaga ya tlala e etla Josefa o ile a ba le barwa ba babedi ka Asenate. A re: “Modimo o ntebadišitše ditlaišego tša ka ka moka, le lapa la tate ka moka”; ka gona a rea morwa wa gagwe wa mathomo leina la Manase. A ba a re: “Modimo o mphile bana nageng ye ke hlakilego go yona”; ka gona a rea morwa wa gagwe wa bobedi leina la Efraime. Mengwaga ye e šupago ya mokhora nageng ya Egepeta ya fela, mme gwa thoma mengwaga ye e šupago ya tlala, bjalo ka ge Josefa a boletše. Gwa wa tlala nageng ye nngwe le ye nngwe, eupša Egepeta ka moka gwa ba le dijo. Ge Baegepeta ba thoma go kwa tlala, ba llela go kgoši gore a ba fe dijo. Yena a re go bona: “Sepelang go Josefa, le direng se a le botšago sona.” Tlala ya ba ye šorošoro ya aparela naga ka moka, ka gona Josefa a bula mengwako ka moka ya polokelo, a rekišetša Baegepeta mabele. Batho ba tla Egepeta ba etšwa gohle lefaseng go tlo reka mabele go Josefa, ka gobane tlala e be e iphile maatla mo gongwe le mo gongwe. Ge Jakobo a ekwa gore go ne mabele Egepeta, a re go barwa ba gagwe: “Le reng le sa itšhikinye? Ke kwa gore go na le mabele kua Egepeta; sepelang gona le yo re rekela, gore re tle re phele re se ke ra hwa.” Ka gona bomorwarragoJosefa ba lesome ba yo reka mabele Egepeta, eupša Jakobo a se ke a ba roma le Benjamene, ngwanaboJosefa, ka gobane o be a boifa gore a ka welwa ke kotsi. Barwa ba Jakobo ba fihla ba na le batho ba bangwe go tlo reka mabele, ka gobane go be go wele tlala nageng ya Kanana. Josefa, ka ge e be e le mmušiši wa naga ya Egepeta, o be a rekišetša batho ba lefase ka moka mabele. Ka gona bomorwarragoJosefa ba fihla, mme ba obama pele ga gagwe. Ge Josefa a bona bomorwarragwe, a ba tseba, fela a dira mo nkego ga a ba tsebe. A ba botšiša ka bogale a re: “Le tšwa kae?” Bona ba mo fetola ba re: “Re tšwa Kanana, re tlile go reka dijo.” Josefa a tseba bomorwarragwe, eupša bona ba se ke ba mo tseba. A gopola ditoro tše a kilego a di lora ka bona, gomme a re: “Ke lena dihlodi; le tlile go bona moo naga ya rena e kago šwahlelwa gabonolo gona.” Ba mo fetola ba re: “Aowa, mong wa rena. Rena bahlanka ba gago re tlile go reka dijo. Re barwa ba monna o tee ka moka ga rena. Rena bahlanka ba gago ga re dihlodi, re batho bao ba botegago.” Josefa a re go bona: “Ga go bjalo! Le tlile go bona moo naga ya rena e ka šwahlelwago gabonolo gona.” Bona ba re: “Rena bahlanka ba gago re be re le barwa ba lesome le ba babedi, barwa ba monna o tee kua nageng ya Kanana. O tee ga a sa le gona, gomme wa phejane o šetše le tatagorena.” Josefa a ba fetola a re: “Go no ba ka moo ke boletšego; le dihlodi. Le tla lekwa ka mokgwa wo: Ke ena ka kgoši gore le ka se sepele, ge e se ge ngwanabolena wa mafelelo a ka tla mo. Romang yo mongwe wa lena go yo mo tšea. Lena ba bangwe le tla dišwa go fihlela therešo ya se le se bolelago e kgonthišišwa. Go sego bjalo gona ke ena ka kgoši gore le dihlodi.” Ge a seno realo, a ba tswalelela kgolegong matšatši a mararo. Ka letšatši la boraro Josefa a re go bona: “Ke nna motho yo a boifago Modimo. Dirang se ke le botšago sona, gomme le tla phela. Go laetša gore le a botega, yo mongwe wa lena o tla šala ka kgolegong ye le bego le le ka go yona; lena ba bangwe le ka sepela la iša mabele ao le a rekilego malapeng a lena ao a bolawago ke tlala. Mme le tlišeng ngwanabolena wa mafelelo go nna. Seo se tla šupa gore le be le bolela therešo, gomme nka se le bolaye.” Ba kwana le taba yeo, gomme ba botšana ba re: “Ee, re tlaišwa ka baka la se re se dirilego ngwanaborena; re bone tlalelo ye kgolo yeo a bego a le go yona ge a be a kgopela kgaugelo, fela ra se ke ra mo theetša. Ke ka baka leo bjale re lego mo matshwenyegong a.” Rubene a re: “Ke le boditše gore le se ke la dira mošemanyana yola bobe, fela la se ke la theetša. Gomme gonabjale lehu la gagwe le lefeletšwa ka rena.” Josefa o be a kwešiša se ba se bolelago, eupša bona ba sa tsebe, ka gobane ba be ba bolela naye ka mohlatholledi. Josefa a tloga go bona gomme a thoma go lla. Ge a kgona go bolela gape, a boa, a hlaola Simeone, mme a laela gore a tlengwe pele ga bona. Josefa a laela gore mekotla ya bomorwarragwe e tlatšwe mabele, le gore tšhelete ya yo mongwe le yo mongwe e boetšwe ka mokotleng wa gagwe, le gore ba fiwe mefago. Seo sa dirwa. Barwa bao ba rweša dipokolo tša bona mabele a ba a rekilego, gomme ba tloga. Ge ba le lefelong leo go robalwago go lona tseleng, yo mongwe wa bona a tlemolla mokotla wa gagwe gore a fe pokolo ya gagwe dijo, mme a hwetša tšhelete ya gagwe ka molomong wa mokotla wa gagwe. A bitša bomorwarragwe a re: “Tšhelete yela ya ka e bušitšwe; še ka mo mokotleng wa ka!” Ba gakanega, gomme ba botšišana ba tšhogile ba re: “Ke eng se Modimo a re dirilego sona?” Ge ba fihla go Jakobo, tatabo, kua Kanana, ba mmotša tšohle tše di diregilego ba re: “Mmušiši wa Egepeta o boletše le rena ka bogale, a re bea molato wa go re re dihlodi tša naga ya gagwe. Re ile ra mo fetola ra re: ‘Ga re dihlodi, re batho bao ba botegago. Re be re le barwa ba lesome le ba babedi ba monna o tee. Yo mongwe o tlogile, gomme wa mafelelo bjale o kua Kanana le tatagorena.’ Monna yoo a re fetola a re: ‘Ge eba le ba ba botegago ke tla bona ka mokgwa wo: Yo mongwe wa lena o tla šala le nna; ba bangwe le tla tšea mabele a malapa a lena a a bolawago ke tlala, la tloga. Le tlišeng ngwanabolena wa mafelelo go nna. Ke moo ke tlago tseba gore ga le dihlodi, le batho ba ba botegago; ke tla le neela ngwanabolena, gomme le ka dula mo la sepela le lokologile.’ ” Ge ba kgothola mekotla, yo mongwe le yo mongwe a hwetša mokotlana wa gagwe wa tšhelete; gomme ge ba bona tšhelete yeo, bona le Jakobo, tatabo, ba tšhoga. Tatabo a re go bona: “A le nyaka go ntahlela bana ba ka ka moka? Josefa o ile, Simeone o ile, mme bjale le nyaka go tšea Benjamene. Bohloko bo kwewa ke nna!” Rubene a re go tatagwe: “Ge nka se boe le Benjamene go wena, o bolaye barwa ba ka ba babedi. Mo gafele diatleng tša ka, gomme ke tla mmušetša go wena.” Eupša Jakobo a re: “Morwa wa ka a ka se ye le lena; mogolwagwe o hwile, mme ke yena a nnoši yo a šetšego. Se sengwe se ka mo hlagela mo tseleng. Ke nna motho yo a tšofetšego, gomme manyami a le kago ntlišetša ona a tla mpolaya.” Tlala e ile ya gakala nageng ya Kanana, gomme ge lapa la Jakobo le feditše mabele ao ba bego ba tšo a tšea Egepeta, Jakobo a re go barwa ba gagwe: “Boelelang le yo re selela.” Juda a re go yena: “Monna yola o re boditše tsebegokwa gore re ka se ke ra dumelelwa go boela go yena, ge e se ge re na le ngwanaborena. Ge o dumela go re roma le ngwanaborena, re tla ya ra go rekela dijo. Ge o sa dumele re ka se ye, ka gobane monna yola o re boditše gore re ka se dumelelwe go boela go yena ge e se ge ngwanaborena a na le rena.” Jakobo a re: “Ke ka baka lang ge le ntsošeditše matshwenyego a makaaka ka go botša monna yola gore le na le ngwanabolena yo mongwe?” Ba mo fetola ba re: “Monna yola o ile a fela a re botšiša tša rena le tša lapa laborena a re: ‘A tatagolena o sa phela? A le sa na le ngwanabolena?’ Re ile ra tlemega go fetola dipotšišo tša gagwe. Re be re ka tseba bjang gore o tla re botša gore re tle le ngwanaborena?” Juda a re go tatagwe: “Lesa mošemanyana yo a sepele le nna, re napeng re tloge, gore rena le wena le bana ba rena re se tlo hwa ka tlala. Molato e tla ba wa ka ge a ka se boe; o mo nyake go nna. Ge nka se mmušetše go wena a sa phela gabotse, ke tla šikara molato woo ka mehla. Ge nkabe re se ra tšea nako ye telele re letile, nkabe bjale re ile fao gabedi mme e bile re boile.” Tatabo a re go bona: “Ge eba go swanetše go ba bjalo, gona dirang se: Tšeang ditšweletšwa tše kaonekaone tša naga ka mekotla ya lena e le diloba tša mmušiši: borokhu bjo bonnyane, todi ye nnyane, dinoko, ditloomake le dialmone. Le tšeeng le tšhelete ye e lekanago le yela gabedi, ka gobane le swanetše go bušetša tšhelete yela ya go bewa ka melomong ya mekotla ya lena. Mohlomongwe e be e le phošo. Tšeang ngwanabolena, le nape le boeleng fao. A Modimo Ramaatlaohle a dire gore monna yola a le šokele, a le bušetše Benjamene le yoo ngawanabolena yo mongwe. Ge e le nnaena, ge eba ke swanetše go lahlegelwa ke bana ba ka, ga go seo nka se dirago.” Ka gona barwa ba tšea diloba tšeo le tšhelete ye e lekanago le yela gabedi, ba leba Egepeta le Benjamene. Ba fihla ba itlhagiša go Josefa. Ge Josefa a bona Benjamene a na le bona, a re go mohlokomedi wa ngwako wa gagwe: “Tšea banna ba o ba iše ka ngwakong. Ba tlile go ja le nna mosegare, ka gona o hlabe seruiwa o se apee.” Monna yoo a dira ka moo a bego a laelwa ka gona, a iša banna bao ka ngwakong wa Josefa. Ge ba išwa ngwakong ba boifa, ba re ka pelong: “Re tlišwa mo ka baka la tšhelete yela e ilego ya bušetšwa ka mekotleng ya rena la mathomo. Ba tla tloga ba re hlasela, ba tšea dipokolo tša rena, mme ba re dira makgoba a gagwe.” Ka gona ge ba le lemating la ngwako ba re go mohlokomedi wa ngwako: “Morena, hle, a re go botše: Re kile ra tla mo go sela. Ge re le lefelong leo go robalwago go lona tseleng ya go ya gae, ra bula mekotla ya rena, gomme yo mongwe le yo mongwe wa rena a hwetša tšhelete ya gagwe ka moka ka molomong wa mokotla wa gagwe. Re boile le yona. Re tlile le tšhelete ye nngwe go tlo sela gape. Ga re tsebe gore ke mang yo a bušeditšego tšhelete ya rena ka mekotleng ya rena.” Mohlokomedi yoo a re: “Le se ke la tshwenyega. Le se ke la boifa. Modimo wa lena, Modimo wa tatagolena, o swanetše go ba a bušeditše tšhelete ya lena ka mekotleng ya lena. Nna ke amogetše tefelo ya lena.” Ke moka a tliša Simeone go bona. Mohlokomedi yoo a iša bomorwarragoJosefa ka ngwakong. A ba fa meetse gore ba hlape maoto, a ba a fepa dipokolo tša bona. Ba lokiša diloba tša bona gore e re ge Josefa a fihla mosegare, ba mo fe tšona, ka gobane ba be ba boditšwe gore ba tla ja naye. Ge Josefa a fihla gae, ba iša diloba tšela ngwakong go yena, gomme ba obama pele ga gagwe. A ba botšiša maphelo, a ba a tšwela pele a re: “A mokgalabje, tatagolena yo le mpoditšego ka yena, o kae? A o sa phela?” Ba mo fetola ba re: “Tatagorena, mohlanka wa gago, o gona o sa phela.” Gomme ba khunama pele ga gagwe ba mo lotšha. Ge Josefa a bona Benjamene, ngwana wa mmagwe, a re: “Na yo ke yena ngwanabolena wa mafelelo yo le mpoditšego ka yena?” Ke moka a re go Benjamene: “Modimo a go šegofatše, morwa wa ka.” A tloga ka potlako, ka gobane o be a rata ngwanabo kudu. O be a nyaka go lla, ka fao a ya phapošing ya gagwe, a llela gona. Ge a hlapile mahlo a tšwa a itshwere, a laela gore dijo di tlišwe. Josefa o ile a fiwa dijo tafoleng ye nngwe, bomorwarragwe le bona ba fiwa dijo go ye nngwe. Baegepeta bao ba bego ba eja moo ba ile ba fiwa dijo ka thoko, ka gobane ba be ba bona e le go ikiša fase go ja le Baheberu. BomorwarragoJosefa ba dudišwa tafoleng pele ga Josefa ka go latelana ga bona matswalong, go tloga ka yo mogolo go fihlela ka yo monnyane. Ge ba bona ka moo ba dudišitšwego ka gona, ba lebelelana ba tlabegile. Ba ile ba fiwa dijo di etšwa tafoleng ya Josefa, gomme Benjamene a fiwa dijo gahlano go feta yo mongwe le yo mongwe wa bona. Ka gona ba ja, ba nwa le Josefa ba khora. Josefa o ile a laela mohlokomedi wa ngwako wa gagwe a re: “Tšhelela banna ba dijo ka mekotleng ya bona tše ba ka kgonago go di rwala, gomme o bee tšhelete ya monna yo mongwe le yo mongwe ka molomong wa mokotla wa gagwe. O bee senwelo sa ka sa silibera ka molomong wa mokotla wa yo monnyane, gotee le tšhelete ya mabele a gagwe.” Mohlokomedi a dira ka moo a laetšwego ka gona. E rile e sa le bošego ka la ka moswane bomorwarragoJosefa ba fiwa tsela le dipokolo tša bona. Ge ba sa sepetše sekgalanyana go tloga motseng, Josefa a re go mohlokomedi wa ngwako wa gagwe: “Kitima o šale banna bale morago. Ge o seno ba swara tseleng o ba botšiše o re: ‘Ke ka baka la eng le lefelediše botse ka bobe? Le reng le utswitše senwelo sa mong wa ka sa silibera? Ke senwelo se mong wa ka a nwago ka sona, gape a laolago ka sona. Le obile molato wo mogolo!’ ” Ge mohlokomedi yoo a ba swere tseleng, o ile a bolela ka mokgwa woo. Ba mo fetola ba re: “O ra eng, morena, ge o bolela ka mokgwa wo? Ruri, re a go botša, ga ra dira taba ya mohuta woo. O a tseba gore re go boetše le tšhelete yela ra go e hwetša ka melomong ya mekotla ya rena ge re boa nageng ya Kanana. Bjale re ka napa ra utswa silibera goba gauta ya ngwako wa mong wa gago? Morena, ge yo mongwe wa rena a ka hwetšwa a se swere, a a bolawe, mme rena ka moka re tla ba makgoba a gago.” Yena a re: “Go lokile; eupša ke fela yoo a tlago hwetšwa a swere senwelo yo e tlago ba lekgoba la ka, lena ka moka le tla lokologa.” Ka gona ba phakiša ba theoša mekotla ya bona, gomme yo mongwe le yo mongwe a tlemolla mokotla wa gagwe. Mohlanka yoo wa Josefa a nyaka ka tlhokomelo, a thoma ka wa yo mogolo a feleletša ka wa yo monnyane, gomme senwelo seo sa hwetšwa ka mokotleng wa Benjamene. BomorwarragoJosefa ba gagola diaparo tša bona, ba rweša dipokolo tša bona mekotla, mme ba gomela motseng. Ge Juda le bomorwarragwe ba fihla ngwakong wa Josefa, Josefa o be a sa le fao. Ba itahlela fase pele ga gagwe, gomme yena a re: “Le dirile eng? A le be le sa tsebe gore motho wa maemo a ka o na le maatla a go le utolla ka go phekola?” Juda a mo fetola a re: “Ke ge re ka hlwa re sa go botšang, mong wa ka? Re ka go ngangiša bjang? Re ka laetša bjang gore ga re na le molato? Modimo o utolotše molato wa rena, bahlanka ba gago. Ka moka ga rena bjale re makgoba a gago, mong wa ka, e sego fela yoo senwelo se hweditšwego go yena.” Josefa a re: “Aowaowaa! Nka se tsoge ke dirile taba yeo! Ke yoo senwelo se hweditšwego go yena fela yo e tlago ba lekgoba la ka. Lena ka moka le ka ipoelela go tatagolena ka khutšo.” Juda a batamela go Josefa a re: “Hle, mong wa ka, ntumelele gore ke bolele nago ke lokologile. O se ke wa mpefelelwa; o swana le kgoši ka sebele. Mong wa ka, o re botšišitše wa re: ‘A le na le tatagolena goba ngwanabolena yo mongwe?’ Ra go fetola, mong wa ka, ra re: ‘Re na le tatagorena yo a tšofetšego, le ngwanaborena yo monnyane yo a mmelegetšwego botšofading bja gagwe. Mogolo wa mošemanyana yoo o hlokafetše, gomme yena ke yena a nnoši wa bana ba mmagwe yo a sa phelago; tatagwe o mo rata ka kudu.’ Ke mo o rilego go rena, bahlanka ba gago: ‘Le mo tlišeng mo, gore ke tle ke mmone.’ Gomme rena ra go fetola, mong wa ka, ra re: ‘Mošemanyana yoo a ka se tlogele tatagwe; ge a ka mo tlogela, tatagwe o tla hwa.’ Ke moo wena o itšego go rena, bahlanka ba gago: ‘Le ka se dumelelwe go boela mo go nna ge e se ge ngwanabolena wa mafelelo a ka tla le lena.’ “Ge re boetše go tatagorena, re ile ra mmotša seo o se boletšego. Ke moo yena a itšego: ‘Boelelang le yo re selela.’ Rena ra mo fetola ra re: ‘Re ka se kgone go ya; re ka se dumelelwe go boela go monna yola ge e se ge ngwanaborena wa mafelelo a na le rena. Re tla ya fela ge ngwanaborena wa mafelelo a ka ya le rena.’ Tate, mohlanka wa gago, a re go rena: ‘Le a tseba gore mogatšake, Ragele, o mpelegetše barwa ba babedi fela. Yo mongwe wa bona o šetše a ntlogetše. O swanetše go ba a rathagantšwe ke dibata, ka gore e sa le go tloga mola ga se ka ke ka mmona gape. Ge bjale le ka tšea yo mo go nna, gomme a hlagelwa ke se sengwe, manyami a le tlago a tliša a tla mpolaya, ka gore ke tšofetše kudu.’ ” Juda a tšwela pele a re: “Bjale, mong wa rena, ge nka boela go tate ke se ne mošemanyana yo, ge a seno bona gore mošemanyana ga a ne nna, o tla hwa, ka gobane o rata mošemanyana yo kudu. Le gona o tšofetše mo e lego gore manyami a re ka mo tlišetšago ona a ka mmolaya. *** Go feta moo, nna, mohlanka wa gago, ke itlemile go tate ka baka la mošemanyana yo. Ke mmoditše gore ge nka se bušetše mošemanyana yo go yena, ke tla šikara molato woo bophelo bja ka ka moka. Gomme bjale, mong wa ka, a go šale nna, mohlanka wa gago, ke le lekgoba la gago bakeng sa mošemanyana yo; mo lese a boele morago le bomorwarragwe. Nka boela bjang go tate ge mošemanyana yo a se na le nna? Nka se kgotlelele go bona masetlapelo ao a ka welago tate.” Josefa o be a se sa kgona go itshwara pele ga bahlanka ba gagwe, ka gona a ba laela ka moka gore ba tloge go yena. Go be go se na motho yo mongwe ge Josefa a botša bomorwarragwe gore ke yena mang. O be a llela godimo moo e lego gore Baegepeta ba ile ba mo kwa, gomme taba yeo ya begwa mošate. Josefa a re go bomorwarragwe: “Ke nna Josefa. A tate o sa phela?” Fela bomorwarragwe ba be ba mmoifa moo e lego gore ba ile ba se ke ba mo fetola. Ke moo Josefa a itšego go bona: “Hle, batamelang.” Ba batamela, gomme a re: “Ke nna ngwanabolena, Josefa, yola le mo rekišitšego Egepeta. Bjale le se ke la tshwenyega goba la itshola ka ge le nthekišitše fa. Gabotsebotse ke Modimo yo a nthometšego mo pele ga ge le etla, gore ke tle ke phološe malapa a lena. Wo e sa le fela ngwaga wa bobedi wa tlala nageng; go tla ba le mengwaga ye mehlano gape yeo ka yona go ka se kego gwa lengwa goba gwa bunwa. Modimo o nthometše mo pele ga ge le etla gore a tle a phološe ba bantši ba lena, gore le se ke la hwa la felela mo lefaseng. Ga se lena le nthometšego mo, ke Modimo. O ntirile mohlankedi yo mogologolo wa kgoši. Ke okametše lapa la gagwe lohle; ke nna mmuši wa Egepeta ka moka. “Bjale itlhaganeleng le boeleng go tate le fihle le mmotše le re Josefa, morwago, o re: ‘Modimo o ntirile mmuši wa Egepeta ka moka; tlaa go nna ntle le go dikadika. O tla dula seleteng sa Goshene moo o tlago ba kgauswi le nna – wena, le bana ba gago, le ditlogolo tša gago, le dihuswane tša gago, le dikgomo tša gago, le tšohle tše e lego tša gago. Ge o le Goshene ke tla kgona go go hlokomela. Go sa tlo ba le mengwaga ye mehlano ya tlala; gomme ga ke nyake gore wena le lapa la gago le diruiwa tša gago le bolawe ke tlala.’ ” Josefa a tšwela pele a re: “Bjale ka moka ga lena, le wena ngwanešo, Benjamene, le a bona gore ke tloge ke le yena Josefa. Le botšeng tate gore ke yo mogolo bjang mo Egepeta, le mmotšeng le ka tšohle tše le di bonego. Gomme le akgofeng le mo tlišeng mo.” A ubarela ngwanabo, Benjamene, gomme a lla; Benjamene le yena a lla ge a mo ubarela. A re a sa lla, a ubarela yo mongwe le yo mongwe wa bomorwarragwe, a ba atla. Ka morago ga fao bomorwarragwe ba thoma go bolela le yena. Ge lapa la mošate le ekwa gore bomorwarragoJosefa ba tlile, kgoši le bakgomana ba gagwe ba thaba. Kgoši a re go Josefa: “Botša bongwaneno ba rweše diruiwa tša bona merwalo, ba boele nageng ya Kanana; ba yo tšea tatagobona le malapa a bona, ba boe. Ke tla ba fa naga ye kaonekaone mo Egepeta, gomme ba tla ba le dijo tše ntšintši. O ba botše le gore ba tloge le dikoloi mo Egepeta tše di tlago namelwa ke basadi ba bona le bana ba bona ba bannyane, le gore ba tle le tatagobona. Ba se ke ba tshwenyega ge ba ka tlogela dilo tše dingwe tša bona, ka gobane tše kaonekaone tša naga ka moka ya Egepeta e tla ba tša bona.” Barwa ba Jakobo ba dira ka moo ba boditšwego ka gona. Josefa a ba fa dikoloi bjalo ka ge kgoši a laetše, a ba a ba fa le mefago. A fa le yo mongwe le yo mongwe diaparo tše mpsha, Benjamene yena a mo fa dipapetlana tša silibera tše makgolo a mararo, le diaparo tše mpsha tše tlhano. A romela tatagwe dipokolo tše lesome di rwele dithoto tše kaonekaone tša Egepeta, le tše lesome di rwele mabele le dinkgwa le mefago ye mengwe ya tatagwe. A laelana le bomorwarragwe, ya re ge ba sepela a re go bona: “Le se ke la tšama le elwa mo tseleng.” Ba tloga Egepeta, ba boela gae go Jakobo, tatabo, kua Kanana. Ba fihla ba mmotša ba re: “Josefa o sa phela! Ke mmuši wa Egepeta ka moka!” Jakobo a gakgamala mme a se ke a ba kgolwa. Eupša ge ba mmotša tšohle tše Josefa a ba boditšego tšona, le ge a bona dikoloi tše Josefa a di rometšego go tlo mo iša Egepeta, a beega pelo. Ke moo a itšego: “Morwa wa ka Josefa o sa phela! Di kwetše! Ke swanetše go yo mmona pele ga ge ke ehwa.” Jakobo o ile a phutha tšohle tše a bego a na le tšona gomme a ya Beresheba, moo a fihla a direla Modimo wa tatagwe Isaka dihlabelo. Modimo a bolela le yena ka pono bošego a mmitša a re: “Jakobo! Jakobo!” Jakobo a mo araba a re: “Iše, ke theeditše.” Modimo a re: “Ke nna Modimo, Modimo wa tatago. O se ke wa boifa go ya Egepeta; ke tla dira ditlogolo tša gago setšhaba se segolo fao. Ke tla ya nago Egepeta, gomme ka kgonthe ke tla bušetša ditlogolo tša gago mo nageng ye. Josefa o tla ba le wena ge o ehwa.” Jakobo a tloga Beresheba. Barwa ba gagwe ba mo nametša le bana ba bona ba bannyane le basadi ba bona dikoloi tšeo kgoši ya Egepeta e bego e di rometše. Ba tšea diruiwa tša bona le tšohle tše ba di kgobokantšego Kanana, ba ya Egepeta. Jakobo a tšea ditlogolo ka moka tša gagwe: barwa ba gagwe, le ditlogolo tša gagwe tša bašemane, le barwedi ba gagwe, le ditlogolo tša gagwe tša basetsana. Šeba bana ba lapa la Jakobo bao ba ilego le yena Egepeta: Rubene, morwa yo mogolo wa Jakobo, le barwa ba gagwe: Enoko, Palu, Hetserone le Karmi. Simeone le barwa ba gagwe: Jemuele, Jamine, Ohade, Jakine, Tsohare le Shaulo, morwa wa mosadi wa Mokanana. Lefi le barwa ba gagwe: Gershone, Kehate le Merari. Juda le barwa ba gagwe: Shelage, Peretse le Serage. Barwa ba bangwe ba Juda, Ere le Onane, ba hwetše Kanana. Barwa ba Peretse e be e le Hetserone le Hamule. Isakara le barwa ba gagwe: Tola, Puba, Jashube le Shimrone. Sebulone le barwa ba gagwe: Serede, Elone le Jagliele. Bao ke barwa ba Lea a ba belegetšego Jakobo kua Mesopotamia, go sa balwe le morwedi wa gagwe, Dina. Ka moka ditlogolo tša gagwe ka Lea e be e le tše masome a mararo a metšo ye meraro. Gade le barwa ba gagwe: Tsifione, Hagi, Shuni, Etsebone, Eri, Arode le Areli. Asere le barwa ba gagwe: Jimna, Jishba, Jishbi le Beria, le kgaetšedi ya bona, Serage. Barwa ba Beria e be e le Hebere le Malkiele. Batho ba ba lesome le metšo ye e selelago ke ditlogolo tša Jakobo ka Silpa, mosetsana wa lekgoba yo Labane a mo filego Lea, morwediagwe. Mosadi wa Jakobo, Ragele, o ile a mmelegela barwa ba babedi: Josefa le Benjamene. Kua Egepeta Josefa o ile a ba le barwa ba babedi, Manase le Efraime, ka Asenate, morwedi wa Potifera, moprista wa Heliopolise. Barwa ba Benjamene e be e le Bela, Bekere, Ashbele, Gera, Naamane, Ehi, Roshe, Mupime, Hupime le Arde. Batho ba ba lesome le ba bane ke ditlogolo tša Jakobo ka Ragele. Dane le morwa wa gagwe, Hushime. Naftali le barwa ba gagwe: Jagtsiele, Guni, Jetsere le Shileme. Batho ba ba šupago ba ke ditlogolo tša Jakobo ka Bilha, mosetsana wa lekgoba yoo Labane a mo filego Ragele, morwediagwe. Batho ka moka ba leloko la Jakobo ka madi ba ba ilego ba ya Egepeta le yena e be e le ba masome a a selelago le metšo ye e selelago, go sa balwe basadi ba barwa ba gagwe. Barwa ba ba belegetšwego Josefa kua Egepeta e be e le ba babedi, ka gona batho ba lapa la Jakobo ka moka ba ba bilego fao ya ba ba masome a a šupago. Jakobo o ile a roma Juda go ba eta pele go kgopela Josefa gore a ba gahlanetše kua Goshene. Ge ba fihla, Josefa a namela koloi ya gagwe gomme a ya Goshene go yo gahlanetša tatagwe. Ge ba gahlana, Josefa a ubarela tatagwe molaleng, gomme a lla nako ye telele. Jakobo a re go Josefa: “Bjale ka gore ke go bone gomme ke a tseba gore o sa phela, nka no ikhwela.” Ke moo Josefa a itšego go bomorwarragwe le go ba bangwe ka moka ba lapa la Jakobo: “Ke tla ya ka begela kgoši gore bomorwarre le ba lapa la tate ka moka bao ba bego ba dula Kanana, ba tlile go nna. Ke tla mmotša gore lena le badiši mme le batho ba leruo, le gore le tlile le dihuswane le dikgomo le tšohle tše e lego tša lena. Ge kgoši a le bitša a le botšiša gore modiro wa lena ke eng, le mmotše gore le dišitše diruiwa bophelo bja lena ka moka, bjalo ka borakgolokhukhu ba lena. Ke moo a tlago le dumelela go dula seleteng sa Goshene.” Josefa o ile realo ka gobane Baegepeta ba be ba hlaswa badiši. Ka gona Josefa a tšea bomorwarragwe ba bahlano a ya nabo go kgoši. A botša kgoši a re: “Tate le bomorwarre ba tlile ba etšwa Kanana le dihuswane le dikgomo tša bona le tšohle tše e lego tša bona. Bjale ba mo seleteng sa Goshene.” A napa a tsebiša kgoši bomorwarragwe. *** Kgoši a ba botšiša a re: “Mošomo wa lena ke eng?” Ba mo fetola ba re: “Re badiši, rena bahlanka ba gago, bjalo ka borakgolokhukhu ba rena. Re falaletše mo nageng ye ka gobane nageng ya Kanana komelelo ke ye šorošoro mo e lego gore ga go phulo ya mehlape ya rena. Hle, re dumelele go dula seleteng sa Goshene.” Kgoši a re go Josefa: “Bjale ka gore tatago le bomorwarrago ba fihlile, naga ya Egepeta ke ya bona. A ba dule seleteng sa Goshene, karolong ye kaonekaone ya naga. Gomme ge eba go na le banna ba tsebo ya leruo gare ga bona, o ba bee bahlokomedi ba diruiwa tša ka.” Ke moka Josefa a yo tšea Jakobo, tatagwe, a mo tsebiša kgoši. Jakobo a šegofatša kgoši, gomme kgoši a mmotšiša a re: “A o na le mengwaga ye mekae?” Jakobo a mo fetola a re: “Bophelo bja ka bja go ralala le naga e bile mengwaga ye lekgolo le masome a mararo. Mengwaga yeo e bile ye mennyane ye methata, ga se ya swana le mengwaga ye mentši ya botate ya go ralala ga bona.” Jakobo a laela kgoši ka tšhegofatšo, gomme a tloga. Ka gona Josefa a dudiša tatagwe le bomorwarragwe nageng ya Egepeta, a ba fa naga mo go kaonekaone kgauswi le motse wa Ramsese, ka moo kgoši a laetšego ka gona. Josefa a fa tatagwe le bomorwarragwe le batho ka moka ba lapa la tatagwe dijo, gotee le ba bannyane. Tlala e be e iphile maatla go se na le dijo nageng ka moka, gomme batho ba Egepeta le ba Kanana ba fokola ka baka la yona. Ge ba reka mabele Josefa a kgoboketša tšhelete ka moka, a e iša mošate. Ge tšhelete ka moka ya Egepeta le Kanana e fedile, Baegepeta ba tla go Josefa ba re: “Re fe dijo! O se ke wa re lesa re ehwa. Tšhelete ya rena e fedile.” Josefa a ba fetola a re: “Tlišang diruiwa tša lena; ke tla di tšea ka le fa dijo ge eba tšhelete ya lena e fedile.” Ka gona ba tliša diruiwa tša bona go Josefa, gomme a ba fa dijo; a tšea dipere le dihuswane le dikgomo le dipokolo. Ngwaga woo ba reka mabele go yena ka diruiwa tšohle tša bona. Ka ngwaga wo o latelago ba tla go yena ba re: “Re ka se go utele, mong wa rena, gore tšhelete ya rena e fedile taa, gomme le diruiwa tša rena di feletše go wena. Ga go seo se šetšego se re ka go neago sona ge e se rena beng le mašemo a rena. Se re lese re ehwa, le mašemo a rena a omelela wena o lebeletše. Re reke ka dijo, rena gotee le mašemo a rena. Re tla ba makgoba a kgoši, gomme mašemo a rena ya ba a gagwe. Re fe peu gore re phele re se ke ra hwa, le gore mašemo a rena a se ke a senyega.” Josefa a rekela kgoši naga ka moka ya Egepeta. Moegepeta yo mongwe le yo mongwe a gapeletšega go rekiša tšhemo ya gagwe, ka gobane tlala e be e le ye šoro kudu, gomme naga ka moka ya ba ya kgoši. Josefa a dira batho ka moka ba naga ya Egepeta makgoba. Ke naga ya baprista fela ye a ilego a se ke a e reka. Bona ba ile ba se gapeletšege go rekiša naga ya bona ka gobane kgoši o ile a ba fa kabelo ye ba ka phelago ka yona. Josefa a re go batho: “Bonang, bjale ke le rekile gore le be ba kgoši, lena le mašemo a lena. Peu še, le e bjale mašemong a lena. Ka nako ya go buna le swanetše go fa kgoši karolo ya bohlano ya tše le di bunnego. Mabele a a šalago le ka a beela peu le dijo tša lena le tša ba malapa a lena.” Ba mo fetola ba re: “O re phološitše; o ile wa re lokela, mong wa rena, gomme re tla ba makgoba a kgoši.” Ka gona Josefa a beela naga ya Egepeta molao wa go re karolo ya bohlano ya tše di bunnwego ke ya kgoši. Molao wo o sa le gona le lehono. E bile naga ya baprista fela ye e sego ya ka ya ba ya kgoši. Baisraele ba ile ba dula Egepeta seleteng sa Goshene; ba iketla gomme ba ba le bana ba bantši. Jakobo o dutše Egepeta mengwaga ye lesome le ye e šupago, ka gona o phetše mengwaga ye lekgolo le masome a mane a metšo ye e šupago. Ge nako ya gore a hwe e batamela, a laela gore morwa wa gagwe, Josefa, a bitšwe, gomme a re go yena: “Hle, tsenya seatla sa gago gare ga dirope tša ka, gomme o ene o tiišitše gore o ka se mpoloke Egepeta. Ke nyaka go bolokwa moo botate ba lego gona; o nthwale o nntšhe mo Egepeta, gomme o yo mpoloka moo ba bolokilwego gona.” Josefa a mo fetola a re: “Ke tla dira ka moo o nkgopelago ka gona.” Jakobo a re: “Nkenele gore o tla dira bjalo.” Josefa a ena, gomme Jakobo a obama a leboga Modimo a le malaong a gagwe. Ka morago ga lebaka Josefa a botšwa gore tatagwe o a babja. Ka gona a tšea barwa ba gagwe ka babedi, Manase le Efraime, a yo bona Jakobo. Ge Jakobo a botšwa gore Josefa, morwagwe, o tlile go mmona, a itiiša, a tsoga a dula malaong. A re go Josefa: “Modimo Ramaatlaohle o iponagaditše go nna kua Luse, nageng ya Kanana, a ntšhegofatša. A re go nna: ‘Ke tla go fa bana ba bantši, mme ditlogolo tša gago e tla ba ditšhaba tše ntši; ke tla fa ditlogolo tša gago naga ye gore ba dule go yona go ya go ile.’ ” Jakobo a tšwela pele a re: “Josefa, barwa ba gago ka babedi bao o ba belegetšwego mo Egepeta pele ga ge ke etla mo, ke ba ka; Efraime le Manase ke ba ka bjalo ka Rubene le Simeone. Ge o ka ba le barwa ba bangwe gape, e ka se be ba ka; bohwa bjo ba bo hwetšago bo tla tla ka Efraime le Manase. Ke dira se ka baka la Ragele, mmago. Ke ile ka nyama kudu ge a hlokafalela nageng ya Kanana, re šetše re batametše Efrata, ge ke boa Mesopotamia. Ke mmolokile fao ka thoko ga tsela ya go ya Efrata.” Efrata bjale e tsebja ka la Betlelehema. Ge Jakobo a bona barwa ba Josefa, a mmotšiša a re: “A bašemanyana ba ke bomang?” Josefa a mo fetola a re: “Ba ke bona barwa ba ka bao Modimo a mphilego bona mo Egepeta.” Jakobo a re: “Ba tliše mo go nna gore ke ba šegofatše.” Mahlo a Jakobo a be a šetše a fifala ka baka la botšofadi, mme o be a sa bone gabotse. Josefa a tliša bašemanyana bao go yena, mme Jakobo a ba ubarela, a ba atla. A re go Josefa: “Ke be ke sa gopole gore ke tla go bona gape, gomme bjale Modimo o ntirile gore ke bone le bana ba gago.” Ke moo Josefa a ba tšerego difarong tša Jakobo, a obama pele ga gagwe. Josefa a tšea Efraime ka letsogo la gagwe la go ja, a mmea go lebana le la nngele la Jakobo, gomme a tšea Manase ka letsogo la gagwe la nngele, a mmea go lebana le la go ja la Jakobo. Eupša Jakobo a putlaganya matsogo a gagwe, gomme a bea letsogo la go ja hlogong ya Efraime, le ge e be e le yo monnyane, mme letsogo la nngele la ba hlogong ya Manase, yo e bego e le yo mogolo. Ka gona a šegofatša Josefa a re: “A Modimo yo borakgolo Abrahama le Isaka ba mo hlanketšego a šegofatše bašemanyana ba! A Modimo yo a ntlhokometšego bophelong bja ka ka moka go fihlela letšatši le la lehono a ba šegofatše! A morongwa yo a mphološitšego bobeng ka moka a ba šegofatše! A leina la ka le maina a borakgolo Abrahama le Isaka a dule a le gona ka bona! A ba be le bana ba bantši le ditlogolo tše ntši!” Josefa o ile a tshwenyega ge a bona gore tatagwe o beile letsogo la gagwe la go ja godimo ga hlogo ya Efraime; ka gona a swara letsogo la tatagwe go le tloša hlogong ya Efraime go le iša go ya Manase. A re go tatagwe: “E sego ka mokgwa woo, tate. Mošemanyana yo mogolo šo; bea letsogo la gago la go ja hlogong ya gagwe.” Tatagwe a gana a re: “Ke a tseba, morwake, ke a tseba. Ditlogolo tša Manase le tšona e tla ba batho ba bantši. Fela moratho wa gagwe e tla ba yo mogolo go mo feta, gomme ditlogolo tša gagwe e tla ba ditšhaba tše kgolo.” A ba šegofatša ka tšatši leo a re: “Baisraele ba tla šegofatšana ka maina a lena. Ba tla re: ‘A Modimo a go šegofatše bjalo ka ge a šegofaditše Efraime le Manase.’ ” Ka tsela yeo Jakobo a etiša Efraime pele ga Manase. Ke moo Jakobo a itšego go Josefa: “O a bona, ke batametše go hwa, fela Modimo o tla ba le wena, gomme o tla go bušetša nageng ya borakgolokhukhu ba gago. Shekeme, selete sela sa go nona se ke se tšerego go Baamore ka tšhoša ya ka le bora bja ka, ke e fa wena, e sego bomorwarrago.” Jakobo o ile a laela gore barwa ba gagwe ba bitšwe, a re: “Mpotapoteng, ke le botše tše di tlago le hlagela ka moso: “Kgobokanang mme le theetšeng, lena barwa ba Jakobo. Theetšang Israele, tatagolena. “Wena, Rubene, leitšibolo la ka, o maatla a ka, o thakangwaga ya bonna bja ka, o moikgodiši le senatla go feta barwa ba ka ka moka. O swana le lefula le le falalago, eupša o ka se be yo mogologolo ka gobane o robetše le motlabo wa ka, wa tšhilafatša malao a tatago. “Simeone le Lefi ke motho le moratho. Ditšhoša tša bona ke tša go bolaya batho. Nka se be nabo melakeng ya bona, le dikopanong tša bona nka se ye, ka gobane ba bolaile batho ba befetšwe, le dipoo ba di golofaditše ba sa kgathale. Pefelo ya bona a e rogakwe, ka gore ke ye šorošoro, le bogale bja bona, ka gobane ke bjo bobebobe. Ke tla ba gašanya le naga ya Israele ka moka, ke tla ba šwalalanya gare ga batho ba yona. “Juda, wena bongwaneno ba tla go tumiša. O swara manaba a gago ka melala. Bomorwarrago ba tla obama pele ga gago. Juda o swana le tau. O bolaya phoofolo, a gomele segoleng sa gagwe, a ikotlolle a patlame. Ke mang yo a kago mo tshwenya? Juda o tla swara molamo wa bogoši. Ditlogolo tša gagwe di tla buša ka mehla. Ditšhaba di tla mo tlišetša diloba, tša mo hlompha. O tlema pokolwana ya gagwe morareng, go wo mokaonekaone wa merara ya gagwe. O hlatswa diaparo tša gagwe ka beine, dikobo tša gagwe o di hlatswa ka matutu a diterebe. O na le beine ye ntši mo e lego gore mahlo a gagwe a hubeditšwe ke go nwa beine, meno a gagwe a šweufaditšwe ke go nwa maswi. “Sebulone o tla dula lebopong la lewatle, gomme lona e tla ba boemakepe. Naga ya gagwe e tla fihla Sidone. “Isakara o swana le pokolo ya lekhoro ye e phatlamego gare ga mekotla ya sala ya yona. O bona gore mo a khuditšego gona go bose, le gore naga e a mo kgahla. Ka gona o sekamiša legetla a rwala morwalo; o gapeletšega go šoma bjalo ka lekgoba. “Dane o tla ahlolela batho ba gagwe. Ba tla swana le dikgoro tše dingwe tša Israele. E tla ba noga ka thoko ga tsela, mokopa kgauswi le tsejana wo o kopago pere tlhakong, gore monamedi a we ka sa morago. “Ke letetše phološo ya gago, Morena. “Gade o tla hlaselwa ke lekoko la bahlakodi, eupša o tla ba rakediša. “Nageng ya Asere go tla tšwa dijo tša matsaka. Yena o tla ba le dijo tše di swanetšego kgoši. “Naftali ke phala ye e kitimago e lokologile, ye e nago le diphalana tše botse. “Josefa o swana le mohlare sedibeng, mohlare wa dienywa wo o ikalago lebotong. Manaba a gagwe a a mo rumola, a mo hlasela ka mara le mesebe ya bona. Eupša yena ge a thuntšha, bja gagwe bora ga bo foše, o matšato ka diatleng ke maatla a Modimo Yomaatla wa Jakobo, ke Modiši, Mošireletši wa Israele. Ke Modimo wa tatago, ke yena a go thušago, ke Ramaatlaohle yo a go šegofatšago ka ditšhegofatšo tša pula ye e tšwago godimo, le tša meetse a a runyago ka fase ga lefase, le tša leruo le bana. Ditšhegofatšo tša tatago di phala ditšhegofatšo tša dithaba tša kgalekgale, le dilo tše di kgahlišago tše di tšwago mebotong ya neng le neng. A ditšhegofatšo tše di tlele Josefa, di tlele yoo a kgethilwego go bomorwarragwe. “Benjamene o swana le phiri ye e gagolago. Mosong o hlasela manaba, mantšiboa o abaganya dithebola.” Tšeo ke dikgoro tše lesome le tše pedi tša Israele, gomme seo ke se tatabo a se boletšego ge a šegofatša barwa ba gagwe, mongwe le mongwe a fiwa tšhegofatšo ye e mo swanelago. Ke moo Jakobo a laetšego barwa ba gagwe a re: “Bjale ka gore ke kgauswi le go kopana le batho ba gešo ka go hwa, le mpolokeng le botate ka leweng leo le lego tšhemong ya Efrone, Mohete, kua Makapela, ka bohlabela bja Mamre, nageng ya Kanana. Abrahama o rekile lewa leo le tšhemo yeo go Efrone, Mohete, gore e be serapa sa go bolokela bahu. Fao ke mo ba bolokilego Abrahama le mosadi wa gagwe, Sara; fao ke mo ba bolokilego Isaka le mosadi wa gagwe, Rebeka; gomme fao ke mo ke bolokilego Lea. Ke ra tšhemo le lewa le le lego go yona tše di rekilwego go Bahete.” Ge Jakobo a fetša go laela barwa ba gagwe a boetša maoto malaong, gomme a kgaoga. Josefa a itahlela go tatagwe, a lla, a mo atla sefahlego. Ka morago a laela bahlanka ba gagwe ba dingaka gore ba omeletše setopo sa tatagwe. Komeletšo yeo e ile ya tšea matšatši a masome a mane, gobane go omeletša setopo go tšea matšatši a makaalo. Ka morago Baegepeta ba mo ilela matšatši a masome a a šupago. Ge nako ya go mo ilela e fetile, Josefa a re go bakgomana ba kgoši: “Hle, mpoleleng le kgoši le re: ‘Ge tate a batametše go hwa, o ile a nkeniša gore ke mmoloke lebitleng leo a ipetletšego lona kua Kanana. Ka gona hle, ntumelele ke sepele ke yo boloka tate, gomme ka morago ga moo ke tla boa.’ ” Kgoši ya fetola ya re: “Sepela o yo boloka tatago, bjalo ka ge o enne.” Ka gona Josefa a ya go boloka tatagwe. Bahlankedi ba kgoši ka moka, le bakgomana ba bagolo ba kgoro ya gagwe, le baetapele ka moka ba Egepeta ba ya le Josefa. Lapa la gagwe ka moka, le bomorwarragwe, le lapa la tatagwe ba ya naye. Seleteng sa Goshene go ile gwa šala fela bana ba bona ba bannyane le dihuswane le dikgomo. Banna ba makoloi le ba ba nametšego dipere ba ya le yena; ya ba sephohla se segolo kudu. Ge ba fihla seboeng kua Atade, ka bohlabela bja noka ya Jordane, ba tsoša sello se segolo, gomme Josefa a dira ditlhobogo matšatši a a šupago. Ge badudi ba Kanana ba bona batho bao ba lla kua Atade, ba ile ba re: “Sello sa Baegepeta ke se segolo bjang!” Ke ka baka leo felo fao go ilego gwa rewa leina la Abele-Mitsraime. Lefelo leo le ka bohlabela bja Jordane. Ka gona barwa ba Jakobo ba ile ba dira ka moo a bego a ba laetše ka gona; ba mo iša Kanana, gomme ba mmoloka ka leweng tšhemong ye e lego Makapela, ka bohlabela bja Mamre, yeo Abrahama a bego a e rekile go Efrone, Mohete, gore e be serapa sa go bolokela bahu. Ge Josefa a bolokile tatagwe, a boela Egepeta le bomorwarragwe le bohle bao ba bego ba ile polokong le yena. Ge bomorwarragoJosefa ba bona gore tatagobona o hlokafetše ba ile ba re: “Re tla dira eng ge eba Josefa o sa re swere ka pelo, gomme o ikemišeditše go itefeletša bobe ka moka bjo re mo dirilego bjona?” Ka gona ba romela molaetša go Josefa ba re: “Pele ga ge tatagorena a hlokafala o boletše gore re go botše re re: ‘Hle, o lebalele bomorwarrago molato wa bona ka ge ba ile ba go dira gampe.’ Bjale hle, re lebalele phošo ye re e dirilego, rena bahlanka ba Modimo wa tatago.” Josefa a lla ge a botšwa molaetša wo. Ke moka bomorwarragwe le bona ba tla ba itahlela fase pele ga gagwe ba re: “Ke rena ba, re makgoba a gago.” Eupša Josefa a re go bona: “Le se ke la boifa; nka se ipee maemong a Modimo. Le ile la rera go ntira bobe, eupša Modimo a fetoša bobe bjoo botse, gore a tle a dire se re se bonago lehono, e lego go phološwa ga batho ba bantši. Le se ke la boifa selo. Ke tla le hlokomela, lena le bana ba lena.” Ka gona a ba kgothatša a ba bea pelo. Josefa o ile a fela a phela Egepeta le ba lapa la tatagwe; o be a na le mengwaga ye lekgolo le ye lesome ge a ehwa. O ile a phela, a ba a bona bana ba Efraime le bana ba bona. A amogela bana ba Makire, morwa wa Manase, ya ba ba gagwe. A re go bomorwarragwe: “Ke kgauswi le go hwa, eupša Modimo o tla le hlokomela, a le ntšha mo nageng ye a le iša go ye a enetšego Abrahama le Isaka le Jakobo a re o tla ba fa yona.” Ke moo Josefa a enišitšego barwa ba Jakobo a re: “Nkeneleng gore ge Modimo a le iša nageng yeo, le tla sepela le mašapo a ka.” Ka gona Josefa a hlokafala a na le mengwaga ye lekgolo le ye lesome. Ba omeletša setopo sa gagwe Egepeta, gomme ba se bea ka lepokising. Šea maina a barwa ba Jakobo bao ba ilego ba ya le yena Egepeta, yo mongwe le yo mongwe le lapa la gagwe: Rubene, Simeone, Lefi, Juda, Isakara, Sebulone, Benjamene, Dane, Naftali, Gade le Asere. Batho ka moka ba leloko la Jakobo ka madi e be e le ba masome a a šupago; Josefa, morwagwe, yena o be a šetše a le Egepeta. Josefa le bomorwarragwe ka moka le batho ka moka ba mehleng yeo ba ile ba hwa. Fela Baisraele, ditlogolo tša Jakobo, ba ba le thari ba ata kudu, ba ba le maatla gagolo mme ba enela, ba tlala naga ya Egepeta. Ka morago ga lebaka gwa bewa kgoši ye mpsha Egepeta ye e bego e sa tsebe selo ka Josefa. Ya re go batho ba yona: “Bonang! Baisraele ba ba ata kudu, ba ba le maatla go re feta. Ge ntwa e ka tsoga ba ka ema le manaba, ba lwa le rena mme ba tšhaba nageng ye. A re logeng maano gore ba se hlwe ba ata go ya pele.” Ka fao Baegepeta ba beela Baisraele bahlapetši ba go ba šomiša sekgoba, gore ba ba fetše maatla ka go ba diriša mešomo ye boima. Baisraele ba agela kgoši metse ye megolo ya polokelo ya Pitome le Ramsese. Eupša ge Baegepeta ba gatelela Baisraele kudu, ya ba moo Baisraele ba atago go fetišiša, ba tlala naga moo e lego gore Baegepeta ba ile ba thoma go tlalelwa. Ba napa ba gapeletša Baisraele bokgoba ka sehlogo; ba ba galakišetša bophelo ka go ba gapeletša mediro ye boima ya maraga le ditena le mediro ka moka ya mašemong ka sehlogo se segolo. Bjale kgoši ya Egepeta ya bolela le babelegiši ba basadi ba Baheberu; leina la yo mongwe e be e le Shifra, la yo mongwe e le Pua. A re go bona: “Le hlokomeleng ge le belegiša basadi ba Baheberu; ge le hwetša leseana e le mošemane le le bolaye, fela ge le hwetša e le mosetsana le le lese le phele.” Fela babelegiši ba be ba boifa Modimo mme ba se ke ba dira ka moo kgoši a ba laetšego, eupša ba lesa bašemane ba phela. Ka gona kgoši a bitša babelegiši a re go bona: “Le direlang taba ye? Le reng le lesa bašemane ba phela?” Bona ba fetola kgoši ba re: “Basadi ba Baheberu ga ba swane le basadi ba Baegepeta; ba Baheberu ba belega sesolo, mme pele mmelegiši a fihla go bona ba be ba šetše ba belege.” Ka ge babelegiši ba be ba boifa Modimo, Modimo a ba fa bana. Gomme Baisraele ba fela ba ata ba eba le maatla kudu. *** Ke moo kgoši a laetšego setšhaba sa gagwe ka moka a re: “Mošemanyana yo mongwe le yo mongwe wa Moheberu yo a belegwago le mo lahlele ka nokeng ya Naele, fela banenyana le ba lese ba phele.” Monna yo mongwe wa kgoro ya Lefi o ile a nyala mosadi kgorong ya gabo ya Lefi. Gomme mosadi yoo a belega morwa; ge a bona leseana le tloga le kgahliša, a le uta dikgwedi tše tharo. Mola a sa hlwe a kgona go ka mo uta, a tšea sešegwana sa mahlaka a se botela ka borokhu le moti gore meetse a se ke a tsena. A robatša leseana ka sešegwaneng, a le bea ka gare ga lehlakanoka lešing la noka ya Naele. Kgaetšedi ya leseana ya hlapetša e le kgojana go bona se se ka le hlagelago. Morwedi wa kgoši a theogela nokeng go yo hlapa, mola bahlokomedi ba gagwe ba makgarebe ba itshepelela khwiting ya noka. Ge a re gadi a bona sešegwana ka gare ga lehlakanoka, gomme a roma mohlankedi wa gagwe wa mosetsana go yo mo tšeela sona. Morwedi wa kgoši a se khurumolla, a hwetša lesea, lesogana le itelela! A le kwela bohloko a re: “Etse ruri yo ke yo mongwe wa bana ba Baheberu!” Ke moo kgaetšedi ya lesea a kgopetšego morwedi wa kgoši a re: “A nka se ye ke go biletša mosadi wa motswetši wa Moheberu gore a tle a go antšhetše lesea le?” Morwedi wa kgoši a re go yena: “Sepela, hle!” Ke gona mosetsana a tlogilego a yo bitša yola mmagolesea. Morwedi wa kgoši a botša mosadi yoo a re: “Tšea lesea le o nkantšhetše lona, mme nna ke tla go lefa.” Ka fao mosadi yoo a tšea lesea a le antšha. Ge ngwana a tshwele, a mo iša go morwedi wa kgoši, yena a mo dira morwa wa gagwe. Gomme morwedi wa kgoši a mo rea leina la Moshe ka ge a be a re: “Ke ka gobane ke mo ntšhitše meetseng.” Mola Moshe a godile, o ile a tšwa a ya go batho ba gabo mme a bona ka moo ba bego ba gapeletšwa mešomo ye boima ka gona. A bona Moegepeta a itia Moheberu wa gabo o šoro. A gaša mahlo thoko tšohle, mme ge a bona a sa bonwe ke motho, a bolaya Moegepeta, a mo epela lešabašabeng. Ge a eya gape ka letšatši le le latelago, a makala a hwetša banna ba babedi ba Baheberu ba elwa. A re go yoo a nago le phošo: “A o itielang Moheberu wa geno?” Mme yoo a mo fetola a re: “Ke mang a go beilego mmuši le moahlodi wa rena? A o ikemišeditše go mpolaya bjalo ka ge o bolaile Moegepeta?” Ke moo Moshe a tšhogilego mme a kgotsa a re: “Kganthe taba yela e a tsebja!” Ya re ge kgoši a ekwa taba ye, a nyaka gore Moshe a bolawe, eupša Moshe a tšhaba a yo dula nageng ya Midiane. Moprista wa Midiane o be a na le barwedi ba ba šupago. Ka letšatši le lengwe ge Moshe a dutše sedibeng, barwedi ba moprista ba tla fao go gelela meetse le go tlatša magopo gore ba noše dihuswane tša tatagobona. *** Fela badiši ba bangwe ba tla ba ba raka; eupša Moshe a emelela, a ba thuša, a noša dihuswane tša bona. Ge ba boela go Reuele, tatagobona, yena a ba botšiša a re: “Go tlile bjang gore le goroše e sa le ka pela lehono?” Bona ba mo fetola ba re: “Moegepeta yo mongwe o re namoletše diatleng tša badiši, a ba a re gelelela meetse a noša dihuswane.” Tatagobona a ba botšiša a re: “A bjale o kae? Le be le reng le mo tlogela? Sepelang le yo mmitša, le tle le mo fe tša go ja.” Moshe a dumela go dula ka ga Jetro, gomme yena a mo nyadiša Tsipora, morwedi wa gagwe. Tsipora a belegela Moshe morwa, gomme Moshe a mo rea leina la Gershome, ka gobane a be a re: “Ke nna mofaladi nageng e šele.” Ka morago ga mengwaga kgoši ya Egepeta ya hwa. Baisraele bona ba fela ba tsetla bokgobeng, ba lla sello se bohloko ba tsoma thušo. Sello sa bona sa rotogela go Modimo. Modimo a kwa metsetlo ya bona, mme a gopola kgwerano ya gagwe le Abrahama le Isaka le Jakobo. A bona bokgoba bja Baisraele mme a ba šokela. Ka letšatši le lengwe Moshe o be a dišitše dihuswane tša ratswalagwe Jetro, moprista wa Midiane. O be a fudišetša mohlape go ya bosobela lešokeng, a ba a fihla Horebe, thabeng ya Modimo. Gona moo morongwa wa Morena a iponagatša go yena ka kgabo ya mollo e lauma e etšwa gare ga mošwana. Ya re ge a lebelediša, a tlabega a bona mošwana o tuka mollo eupša o sa swe. Moshe a re: “Anke ke batamele ke bontšhiše semaka se: E reng mošwana o sa swe?” Ge Modimo a bona Moshe a batamela, a mmitša a le gare ga mošwana a re: “Moshe, Moshe!” Moshe a araba a re: “Ke nna e!” Modimo a re: “O se ke wa batamela mo. Rola dieta tša gago gobane mo o emego gona ke felo mo gokgethwa. Ke nna Modimo wa borakgolokhukhu ba gago, Modimo wa Abrahama le Isaka le Jakobo.” Moshe a ipipa sefahlego ka gobane o be a tšhaba go lebelela Modimo. Ke moo Modimo a boletšego a re: “Ke bone gabotse ka moo setšhaba sa ka se tlaišwago ka gona kua Egepeta; ke kwele ba golola ba llela go hlakodišwa diatleng tša bahlapetši ba go ba šomiša sekgoba. Ke tseba mohlako wa bona ka moka. Ke fologetše go tlo ba hlakodiša diatleng tša Baegepeta le go ba ntšha Egepeta go ba iša nageng ye e nonnego ye e nabilego. Ke naga ya mokhora le monono yeo bjale e dulwago ke Bakanana le Bahete le Baamore le Baperise le Bahibe le Bajebuse. Ke kwele sello sa setšhaba sa ka, gomme ke bona ka moo Baegepeta ba ba gatelelago ka gona. Bjale ge, ke go roma go kgoši ya Egepeta gore o tle o ete setšhaba sa ka pele o se ntšhe nageng yeo.” Moshe a botšiša Modimo a re: “Ke nna mang nka yago go kgoši le gona ka ntšha Baisraele Egepeta?” Modimo a mo fetola a re: “Ke tla ba le wena. E tla re ge o ntšhitše Baisraele nageng ya Egepeta, la tla la nkhunamela mo thabeng ye, ke moo o tlago lemoga gore o be o rongwa ke nna.” Moshe a mo araba a re: “Ge ke fihla go Baisraele ke ba botša ke re: ‘Modimo wa borakgolokhukhu ba lena o nthomile go lena,’ ba tla mpotšiša ba re: ‘Leina la gagwe ke mang?’ Ke ba botše ke reng?” Modimo a re: “Ke nna yo ke lego yena.” A tiišetša a re: “O ba botše o re: ‘KE NNA o nthomile go lena.’ O tsebiše Baisraele gore nna, Morena, Modimo wa borakgolokhukhu ba bona, Modimo wa Abrahama le Isaka le Jakobo, ke go romile go bona. Le ke leina la ka go ya go sa felego; ba meloko ka moka ya ka moso ba tla mpitša ka lona leina le. Eya o rape pitšo ya bagolo ba Baisraele o ba botše gore nna, Morena, Modimo wa borakgolokhukhu ba bona, Modimo wa Abrahama le Isaka le Jakobo, ke iponagaditše go wena, gomme ke go laetše gore o ba botše o re: ‘Ke be ke le etše hloko, gomme ka bona tše Baegepeta ba le dirago tšona. Ke ikemišeditše go le ntšha Egepeta, nageng ye le tlaišwago go yona, ka le iša nageng ya mokhora le monono, nageng ya Bakanana, Bahete, Baamore, Baperise, Bahibe le Bajebuse.’ “Setšhaba sa ka se tla theeletša se o se bolelago. O ye le bagolo ba Baisraele go kgoši ya Egepeta, le fihle le mmotše le re: ‘Morena, Modimo wa Baheberu, o gahlane le rena; ka gona, re dumelele re sepele leeto la matšatši a mararo re tšwele lešokeng re yo direla Morena Modimo wa rena dihlabelo.’ Fela nna ke a tseba gore kgoši ya Egepeta e ka se le dumelele go ya, ka ntle le ge e ka gapeletšwa. Ka gona ke tla otlolla letsogo la ka, ka otla Egepeta ka mehlolo ye ke tlago e dira moo. Ka morago ga fao kgoši ya Egepeta e tla le lesa la sepela. “Ke tla dira gore Baisraele ba hwetše botho go Baegepeta, gore e tle e re ge setšhaba sa ka se huduga, se se tloge se le fela. “Mosadi yo mongwe le yo mongwe wa Moisraele o tla ya go moagišani wa gagwe wa Moegepeta, le go mosadi yo mongwe le yo mongwe wa Moegepeta yo a dulago le yena ka lapeng, a mo kgopela diaparo le dikgabišo tša gauta le tša silibera. Baisraele ba tla di apeša barwa le barwedi ba bona, ya ba ge ba hula Baegepeta.” Moshe a mo fetola a re: “Ge Baisraele ba ka se nkgolwe gomme ba gana go kwa tše ke ba botšago, ke tla reng ge ba ka re Morena ga se a iponagatša go nna?” Morena a botšiša Moshe a re: “Ka seatleng o swereng?” Moshe a mo fetola a re: “Ke swere lepara.” Morena a re: “Le lahlele fase.” Ge Moshe a lahlela lepara lela fase, la fetoga noga, mme a tsaroga. Ke moka Morena a laela Moshe a re: “Otlolla letsogo o e sware ka mosela.” Moshe a hlaeletša letsogo a e swara, mme noga ya fetoga lepara. Morena a re: “O dire sona se go Baisraele go ba kgodiša gore Morena, Modimo wa borakgolokhukhu ba bona, Modimo wa Abrahama le Isaka le Jakobo, o iponagaditše go wena.” Morena a bolela le Moshe gape a re: “Anke o tsenye seatla ka seaparong kgareng.” Moshe a se tsenya, mme ge a se ntšha, a tšhoga se pherile se kgamathetše dipue tše tšhweu nke ke lehlwa. Ke mo Morena a itšego go Moshe: “Bušetša seatla ka seaparong kgareng.” A se bušetša, gomme ge a se ntšha gape, a makala se fodile se swana le mmele ka moka. Morena a re: “Ge ba ile ba se ke ba go kgolwa, goba ba se ke ba ušwa pelo ke mohlolo wa pele, wo wa bobedi wona o tla ba kgotsofatša. Ge ba ka fela ba sa go kgolwe le ge o ba diretše mehlolo ye mebedi ye, gomme ba se ke ba kwa seo o se bolelago, o ge meetse nokeng ya Naele o a kgaphetše fa go omilego. Meetse a tla fetoga madi fao.” Moshe a re: “Aowaowa, Mong wa ka, nka se ye. Ga se nke ka ba seboledi, le gonabjale ge o bolela le nna, mohlanka wa gago, ga se ka fetoga seboledi. Ke lešaedi la polelo, ke a gakanega ka itoma diteme.” Morena a re go Moshe: “Ke mang yo a fago motho molomo? Ke mang a dirago motho semuma goba sefoa? Ke mang a mo fago sefahlego goba a mo foufatša? A ga se nna, yena Morena? Bjale sepela; ke tla go thuša go bolela, le gona ke tla go botša se o swanetšego go se bolela.” Eupša Moshe a mo fetola a re: “Aowa hle, Mong wa ka, roma yo mongwe, e sego nna.” Morena a tukela Moshe bogale a re: “A ke re o na le morwarrago Arone, wa Molefi? Ke tseba gore yena o kgona polelo gabotse. Le gonabjale ge ke bolela šole o šetše a le tseleng go go gahlanetša, mme o tla thaba ge a go bona. O boledišane naye o mmotše gore a bolele a reng. Nna ke tla le thuša go bolela, ka ba ka le laetša gore le dire eng. Arone yena o tla go bolelela le setšhaba. E tla ba yena motseta wa gago, gomme wena o tla ba bjalo ka Modimo go yena, wa mmotša gore a bolele eng. Tšea lepara le o le sware; ka lona o tla dira mehlolo.” Moshe o ile a boela go Jetro, ratswalagwe, a re go yena: “Anke o ntumelele ke boele Egepeta ke yo hlola ba gešo le go bona gore na ba sa phela.” Jetro a re: “Tselatšhweu.” Ya re Moshe a sa le Midiane Modimo a re go yena: “Boela Egepeta; bale ba bego ba nyaka go go bolaya ba hwile ka moka.” Ka gona Moshe a tšea mosadi le barwa ba gagwe, a ba nametša pokolo, a wela tsela go ya Egepeta a swere lepara lela Modimo a go mo laela go le swara. Morena a bolela le Moshe a re: “Bjale ka gore o ya Egepeta, o itokišetše go dira mehlolo yela ka moka ke go filego maatla a go e dira pele ga kgoši. Fela nna ke tla thatafatša pelo ya gagwe, mme o tla gana go lesa setšhaba se sepela. Ke moo o swanetšego go tsebiša kgoši gore nna, Morena, ke re: ‘Israele ke morwa wa ka wa leitšibolo. Ke go boditše gore o lese morwa wa ka a sepele gore a yo nkhunamele, eupša wena o ganne. Bjale ke tlilo bolaya morwago wa leitšibolo.’ ” Ya re ge ba le tseleng, felo mo go robalwago gona, Morena a gahlana le Moshe gomme a nyaka go mmolaya. Ke moo Tsipora, mogatšaMoshe, a topilego legakabje a ripa ntlhana ya morotwana wa morwagwe; a tšea ntlhana yeo a kgwatha maoto a Moshe ka yona. Tsipora a re go Moshe: “O mogatšake wa madi.” Ge a realo o be a era lebollo leo. Ka gona Morena a lesa Moshe. Morena o be a rile go Arone: “Sepelela lešokeng o gahlanetše Moshe.” Ke moo Arone a tšwetšego go gahlanetša Moshe thabeng ya Modimo. E rile ge a gahlana naye, a mo atla. Moshe a laodišetša Arone ditaba ka moka tše Morena a mo laetšego tšona ge a mo roma; a mmotša le ka mehlolo yela ka moka Morena a bego a mo laetše go e dira. Moshe le Arone ba sepela ba ya Egepeta, gomme ba rapa pitšo ya bagolo ba Baisraele. Arone a ba laodišetša tšohle tše Morena a di laetšego Moshe, yena a dira mehlolo yela pele ga setšhaba. Ba ile ba kgolwa, gomme ge ba ekwa gore Morena o be a ba etše hloko mme a bona ka moo ba tlaišwago ka gona, ba obama ba rapela. Ke gona Moshe le Arone ba ilego go kgoši ya Egepeta ba re go yena: “Morena, Modimo wa Baisraele, o re: ‘Lesa setšhaba sa ka se sepele, gore se ye go ntirela monyanya lešokeng.’ ” Kgoši a ba botšiša a re: “Morena ke mang yo nkago ba ka mo theeletša, ka lesa Baisraele ba sepela? Nna Morena ga ke mo tsebe; ka gona nka se lese setšhaba sa Israele se sepela.” Bona ba re: “Modimo wa Baheberu o ikutolotše go rena. Anke o re dumelele re sepele leeto la matšatši a mararo re tšwele lešokeng go yo direla Morena Modimo wa rena dihlabelo, gore a se tlo re otla ka dinkhu goba ka ntwa.” Kgoši ya re go Moshe le Arone: “Le reng le tlogediša batho modiro wa bona? A makgoba ao a boele modirong! Lena batho tenang le šetše le ntšifetše go feta Baegepeta. Gomme bjale le nyaka go ba lesiša mošomo!” Ka lona letšatši leo kgoši a laela bahlapetši ba go ba šomiša sekgoba ba Baegepeta le dintona tša Baisraele a re: “Le se hlwe le efa batho ditlhaka ge ba dira ditena bjalo ka mehleng, eupša batho bona ka bobona ba itopele ditlhaka. Palo ya ditena yona le ba beele ya go lekana le ya pele, ba se fokoletšwe le ka setena se tee! Ke dibodu, ke ka baka leo ba felago ba ntlhodia ba re ke ba lese ba yo direla Modimo wa bona dihlabelo! Gapeletšang banna ba go šoma go fetiša, le gona le ba swareleleng gore ba se ke ba ba le sebaka sa go theeletša mabarebare a maaka.” Bahlapetši ba go ba šomiša sekgoba le dintona tša Baisraele ba tšwa ba ya go Baisraele ba re: “Kgoši o re a ka se hlwe a le fa ditlhaka. Sepelang le yo itopela tšona mo le ka di hwetšago gona, fela modiro wa lena wona o ka se fokotšwe.” Ka gona batho ba phatlalala le naga ya Egepeta ba tsoma dikutwana go di diriša bjalo ka ditlhaka. Bahlapetši ba go ba šomiša sekgoba ba Baegepeta ba phegelela go ba diriša ditena tše di lekanago le tšela ba bego ba di dira ka letšatši mola ba sa fiwa ditlhaka. Ba itia dintona tša Baisraele tše ba bego ba di beile baokamedi ba bašomi, ba fela ba ba botšiša ba re: “Le reng le šitwa go dira ditena bjalo ka pele?” Dintona tša ba tša ya go kgoši tša mo llela tša re: “O re direlang ka mokgwa wo, rena bahlanka ba gago? Ga re fiwe ditlhaka, eupša re sa laelwa gwa thwe: ‘Dirang ditena!’ Šefa bjale re a otlwa, e le gore molato ke wa batho ba gago.” Kgoši ya ba fetola ya re: “Le dibodu, ga le rate go šoma, ke ka baka leo le nkgopelago gore ke le lese le yo direla Morena wa lena dihlabelo. Tlogang mo le boeleng mošomong! Le ka se ke la fiwa ditlhaka, fela le swanetše go dira ditena tša palo ya mola pele.” Dintona tša lemoga gore bjale gona di wetše bothateng ge di botšwa gore di swanetše go dira ditena tša palo ye e lekanago le ya mola pele letšatši ka letšatši. Ge ba boa ba gahlana le Moshe le Arone bao ba bego ba ba letetše, ba re go bona: “Morena o bone se le se dirilego mme o tla le otla ka ge le dirile gore kgoši le bakgomana ba yona ba re hloye. Le ba buletše tsela ya go re bolaya.” Moshe a napa a itebanya le Modimo gape a re: “Mong wa ka, o reng o hlokofatša setšhaba se? O be o reng o nthomela fa? Go tloga mohlang wola ka go ya go kgoši ke romilwe ke wena, kgoši o napile o hlokofatša setšhaba se. Gomme wena, Morena, ga se wa dira selo go hlakodiša setšhaba sa gago!” Ke moo Morena a rilego go Moshe: “Bjale ke gona o tlago bona se ke tlago se dira kgoši. Ke tla mo gapeletša go lesa setšhaba sa ka gore se sepele. Ee, ke tla mo gapeletša go ba raka nageng ya gagwe.” Modimo a re go Moshe: “Ke nna Morena. Ke iponagaditše go Abrahama le Isaka le Jakobo ke le Modimo Ramaatlaohle, fela ga ka itsebiša bona ka leina la ka la Morena. Gape ke dirile kgwerano ya ka le bona, ke ba holofetša naga ya Kanana, naga yeo ba bego ba falaletše go yona. Bjale nna ke kwele metsetlo ya Baisraele bao Baegepeta ba ba dirilego makgoba, gomme ke gopotše kgwerano ya ka. Ka gona botša Baisraele gore ke re go bona: ‘Ke nna Morena; ke tla le ntšha mešomong ye boima, ka le lokolla bokgobeng bja lena go Baegepeta. Ke tla emiša letsogo la ka le le maatla ba welwa ke kotlo ye šoro, gomme lena ka le phološa. Ke tla le dira setšhaba sa ka, mme nna ka ba Modimo wa lena. Le tla tseba gore ke nna Morena Modimo wa lena ge ke le ntšha mešomong ye boima ya Baegepeta. Ke tla le goroša nageng ye ke e enetšego Abrahama le Isaka le Jakobo; ke tla le fa yona ya ba bohwa bja lena. Ke nna Morena.’ ” Moshe o ile a botša Baisraele taba tše, eupša bona ba gana go mo theeletša ka ge ba be ba nolegile moko ka baka la bošoro bja bokgoba. Morena a napa a re go Moshe: “Sepela o botše kgoši ya Egepeta gore a lese Baisraele ba tloge mo nageng ya gagwe.” Fela Moshe a mo fetola a re: “E ka re le Baisraele ba sa ntheeletše, kgoši yena a ntheeletša bjang? Nna polelo e a mpalela.” Morena o laetše Moshe le Arone go ya go Baisraele le go kgoši ya Egepeta gore ba ete Baisraele pele ba ba ntšhe Egepeta. Dihlogo tša malapa a bona ke tše: Rubene, leitšibolo la Jakobo, o bile le barwa ba: Enoko, Palu, Hetserone le Karmi. Bona e bile borakgolokhukhu ba dikgorwana tša Rubene. Simeone yena o bile le barwa ba: Jemuele, Jamine, Ohade, Jakine, Tsohare le Shaulo, morwa wa mosadi wa Mokanana. Bona e bile borakgolokhukhu ba dikgorwana tša Simeone. Lefi yena o bile le barwa ba: Gershone, Kehate le Merari. Bona e bile borakgolokhukhu ba dikgorwana tša Lefi. Lefi o phetše mengwaga ye 137. Gershone o bile le barwa ba: Libni le Shimi, gomme le bona ba bile le magorwanagorwana. Kehate o bile le barwa ba: Amramo, Jitsara, Hebrone le Usiele. Kehate o phetše mengwaga ye 133. Merari o bile le barwa ba: Magli le Mushi. Tše ke tšona dikgorwana tša Lefi le ditlogolo tša ona. Amramo o ile a nyala rakgadiagwe yo a bitšwago Jogobede, gomme yena a mmelegela Arone le Moshe. Amramo o phetše mengwaga ye 137. Jitsara o bile le barwa ba: Korage, Nefege le Sikri. Usiele le yena o bile le barwa ba: Mishaele, Elitsafane le Sitri. Arone o nyetše Elisheba, morwedi wa Aminadaba, kgaetšedi ya Nagshone. Elisheba o mmelegetše Nadaba, Abihu, Eleasara le Ithamara. Korage o bile le barwa ba: Asire, Elkana le Abiasafo; bona e bile borakgolokhukhu ba dikgorwana tša Korage. Eleasara, morwa wa Arone, yena o ile a nyala morwedi yo mongwe wa Putiele, gomme yena a mmelegela Finease. Ba e bile bona dihlogo tša malapa le dikgorwana tša kgoro ya Lefi. Ge e le Moshe le Arone ke bona bao Morena a rilego go bona: “Ntšhang dikgoro tša Baisraele nageng ya Egepeta ka go hlatlamana ga tšona.” Gomme Moshe le Arone e bile bona ba go bolela le kgoši ya Egepeta gore a lokolle Baisraele. Mola Morena a bolela le Moshe nageng ya Egepeta, o ile a re: “Ke nna Morena. Botša kgoši ya Egepeta tšohle tše ke go botšago tšona.” Eupša Moshe a mo fetola a re: “Hle, Morena, o a tseba gore nna polelo e a mpalela; kgoši o tla be a ntheetša a ekwa eng?” Morena a re: “Bjale tseba ke tla go dira gore o be bjalo ka Modimo go kgoši, gomme Arone, morwarrago, o tla bolela naye a le bjalo ka moprofeta wa gago. Wena o botše Arone ka moka tše ke go laelago tšona, gomme yena o tla botša kgoši gore a lese Baisraele ba tšwe mo nageng ye. Fela nna ke tla thatafatša pelo ya kgoši, mme a ka se go theeletše, le ge nka atiša mehlolo ya ka mo nageng ya Egepeta. Ke moo ke tlago swara Egepeta ka diatla ka e tlišetša kotlo ye šoro, mme ka ntšha dikgoro tša setšhaba sa ka nageng ye. *** Baegepeta bona ba tla tseba gore ke nna Morena ge ke ba emela ka maoto, mme ke ntšha Baisraele go bona.” Moshe le Arone ba dirile ka mo Morena a ba laetšego ka gona. Moshe o be a na le mengwaga ye masome a seswai, Arone yena a na le ye masome a seswai le metšo ye meraro ge ba bolela le kgoši. Morena o rile go Moshe le Arone: “Ge kgoši a ka re le dire mohlolo, o botše Arone gore a tšee lepara la gagwe a le lahlele fase dinaong tša kgoši, gomme le tla fetoga noga.” Ke gona Moshe le Arone ba ilego go kgoši mme ba dira ka moo Morena a ba laetšego ka gona. Arone a lahlela lepara la gagwe fase pele ga kgoši le bakgomana ba gagwe, mme la fetoga noga. Ke moo kgoši a biditšego dihlalefi le didupe le boramaselamose, mme ka maselamose a bona le bona ba dira bjalo. Yo mongwe le yo mongwe wa bona a lahlela lepara la gagwe fase, mme la fetoga noga. Eupša lepara la Arone la metša a bona. Kgoši a fela a thatafetše pelo, a gana go theeletša Moshe le Arone, gwa ba bjalo ka ge Morena a boletše. Ke moo Morena a rilego go Moshe: “Kgoši e retetše pelo mme e gana go lesa setšhaba se sepela. Sepela o gahlane le yena e sa le ka meso ge a theogela nokeng ya Naele. O tšee lepara la gago lela la go fetoga noga, gomme o mo letele lekoribeng la noka. O re go yena: ‘Morena, Modimo wa Baheberu, o nthomile go go botša gore o lese setšhaba sa gagwe se sepele, gore se yo mo khunamela lešokeng. Fela go fihlela bjale o ganne. Bjale, Morena o re o tla tseba gore yena ke yena mang ka seo a tlago se dira. Šedio ge, ke tlile go itia meetse a noka ye ka lepara le, gomme meetse a tla fetošwa madi. Dihlapi di tla hwa mme noka ya nkga mo e lego gore Baegepeta ba ka se sa kgona go nwa meetse a yona.’ ” Morena a re go Moshe: “Laela Arone gore a tšee lepara la gagwe a le lobalatše ka godimo ga meetse a Egepeta: ka godimo ga dinoka le mekero le megobe ka moka. Meetse ohle a tla fetoga madi, gomme nageng ka moka go tla ba le madi, ešita le magopong le meeteng.” Moshe le Arone ba ile ba dira ka mo Morena a ba laetšego ka gona. Ba le pele ga kgoši le bakgomana Arone a emiša lepara la gagwe a itia meetse a noka, mme meetse ohle a noka a fetoga madi. Dihlapi tša ka nokeng tša hwa, gwa šala go nkga go re phu mo Baegepeta ba ilego ba šitwa go nwa nokeng. Nageng ka moka ya Egepeta gwa ba madi. Eupša boramaselamose ba kgoši le bona ba dira sona seo ka maselamose a bona, pelo ya kgoši ya thatafalela go ya pele. Gwa phethagala le le boletšwego ke Morena, kgoši ya gana go theeletša Moshe le Arone. A napa a retologa a ipoelela mošate, gomme le tšona tšeo tša se mo tsene. Baegepeta ka moka ba epa didiba tša meetse a go nwa lebopong la noka, gobane ba be ba šitwa ke go nwa meetse a ka nokeng. Go ile gwa feta matšatši a a šupago ka morago ga ge Morena a iteile meetse a noka. Ya ba gona Morena a rego go Moshe: “Yaa go kgoši o mmotše gore Morena o re: ‘Lesa setšhaba sa ka se sepele, gore se yo nkhunamele. Ge o gana ke tla otla naga ya gago ka go e tlatša digwegwe. Noka ya Naele e tla re go tlala digwegwe tša ba tša pharuma tša tšwa ka nokeng, tša rotogela ntlong ya mošate, tša tsenelela phapošing ya gago, le godimo ga malao a gago, le nywakong ya bakgomana ba gago le ya setšhaba sa gago, ešita le dibešong le ka dipitšeng. Di tla pharumela godimo ga gago le setšhaba sa gago le bakgomana ba gago ka moka.’ ” Morena a re go Moshe: “Botša Arone a phagamiše lepara la gagwe ka godimo ga dinoka le mekero le megobe ka moka, gomme a dire gore digwegwe di rotoge di tlale naga ya Egepeta.” Ke mo Arone a phagamišitšego lepara ka godimo ga meetse ohle, mme digwegwe tša unyologa tša tlala naga. Eupša boramaselamose ba diriša maselamose a bona, mme le bona ba dira gore digwegwe di rotogele nageng. Kgoši ya bitša Moshe le Arone, ya re go bona: “Rapelang Morena gore a tloše digwegwe tše, mme nna ke tla lesa setšhaba gore se sepele se yo direla Morena dihlabelo.” Moshe a mo fetola a re: “Ke tla thabela go go rapelela. Wena bea nako mme ke tla go rapelela, ka rapelela le bakgomana ba gago le setšhaba sa gago gore o ikhutše digwegwe, go se ke gwa šala le se tee nageng ge e se ka nokeng ya Naele.” Kgoši ya mo fetola ya re: “O nthapelele ka moswane.” Moshe a re: “Ke tla dira ka moo o kgopelago, ke moo o tlago tseba gore ga go na le modimo yo a swanago le Morena Modimo wa rena. Wena le bakgomana ba gago le setšhaba sa gago le tla ikhutša digwegwe, gomme go ka se šale le se tee ge e se ka nokeng ya Naele.” Ke moo Moshe le Arone ba tlogilego pele ga kgoši, gomme Moshe a llela Morena gore a tloše digwegwe tšeo a bego a di rometše go kgoši. Morena o ile a dira ka moo Moshe a kgopetšego, gomme digwegwe ka nywakong le malapeng le mašemong tša hwa gai. Baegepeta ba di bokela ya ba dintotomatotoma, naga ya šala e nkga e re hang. Ge kgoši e bona gore digwegwe di hwile, ya retela pelo gape, bjalo ka ge Morena a boletše, gomme ya gana go theeletša Moshe le Arone. Morena a laela Moshe a re: “Botša Arone gore a itie mobu ka lepara la gagwe, gomme lerole nageng ya Egepeta ka moka le tla fetoga menang.” Ke moo Arone a iteilego mobu ka lepara la gagwe, gomme lerole ka moka la naga ya Egepeta la fetoga menang, ya bokanela batho le diphoofolo. Boramaselamose ba leka go diriša maletlana a bona go dira menang, eupša ba palelwa. Menang ya tsenelela mo gohle, boramaselamose ba re go kgoši: “Tše ke ditiro tša Modimo.” Fela pelo ya kgoši ya thatafala bjalo ka ge Morena a boletše, gomme a gana go theeletša Moshe le Arone. Morena a re go Moshe: “Ka la ka moswane o tsogele o yo letela kgoši ge a eya nokeng, gomme o mmotše o re Morena o re: ‘Lesa setšhaba sa ka se sepele, gore se yo nkhunamela. Eupša ge o ka gana se sepela, ke tla go otla ka go go romela diboba, wena le bakgomana ba gago le setšhaba sa gago. Dintlo tša Baegepeta di tla tlala diboba, gomme fase e tla ba legogwa la tšona fela. Fela ke tla šikologa selete sa Goshene mo go dulago setšhaba sa ka, gore kua ntshe go se be le diboba, gore o tle o lemoge gore nna, Morena, ke nna ke šomago nageng ye. Setšhaba sa ka le sa gago nka se di sware go swana. Mohlolo wo o tla direga ka la ka moswane.’ ” Morena a romela metšhitšhi ye megolo ya diboba mošate le mantlong a bakgomana ba mošate. Diboba tša lobiša naga ka moka ya Egepeta. Ke moka kgoši a bitša Moshe le Arone, gomme a re go bona: “Sepelang le ye go direla Modimo wa lena dihlabelo mo nageng ye.” Moshe a mo fetola a re: “Go ka se loke go dira ka mokgwa woo, ka gobane Baegepeta ba tla bona e le bohlola ka diruiwa tše re tlago di hlabela Modimo wa rena. Ge re ka dira dihlabelo ka diruiwa tše di iletšwago ke Baegepeta bona ba re lebeletše, a ba tla se re bolaye ka maswika? Re swanetše go sepela leeto la matšatši a mararo re tšwele lešokeng go direla Morena Modimo wa rena dihlabelo ka moo a re laetšego ka gona.” Kgoši ya re: “Ke tla le lesa la sepela la yo direla Morena Modimo wa lena dihlabelo kua lešokeng, fela le se ke la sepelela kgole kudu. Le nthapeleleng.” Moshe a mo fetola a re: “Gona bjale ge ke seno tloga fa, ke tla rapela Morena gore ka la ka moswane diboba di tlogele kgoši le bakgomana ba yona le setšhaba sa yona. Fela kgoši a se ke a re fora gape ka go thibela setšhaba go ya go direla Morena dihlabelo.” Moshe a tloga pele ga kgoši a ya go rapela, gomme Morena a dira ka moo Moshe a kgopetšego ka gona. Diboba tša tlogela kgoši le bakgomana ba yona le setšhaba sa yona; gwa se šale le seboba se tee! Fela le ka wona mohla woo kgoši o ile a thatafatša pelo, mme a gana gape go lesa setšhaba se sepela. Morena a re go Moshe: “Yaa go kgoši o e botše gore Morena, Modimo wa Baheberu, o re: ‘Lesa setšhaba sa ka se sepele, gore se yo nkhunamela. Ge o gana go ba lesa ba sepela, o fela o ba swareletše, ke tla otla diruiwa tša gago ka moka ka bolwetši bjo bošoro: dipere, dipokolo, dikamela, dikgomo le dihuswane tša gago. Nka se sware diruiwa tša Baisraele le tša Baegepeta go swana, mme le se tee seruiwa sa Baisraele se ka se hwe. Nna, Morena, ke beile letšatši la ka moswane gore e be la go phethagatša taba ye.’ ” Ka la ka moswane Morena a dira ka moo a bego a boletše, mme diruiwa ka moka tša Baegepeta tša hwa, eupša mo go tša Baisraele gwa se hwe le e tee. Kgoši ya botšiša ka seo se diregilego, mme ya botšwa gore ga go na le seruiwa se tee sa Baisraele se se hwilego. Eupša a fela a retetše pelo, a gana go lesa setšhaba se sepela. Morena a re go Moshe le Arone: “Gamarang magoswi a mošidi leubelong, gomme Moshe a o gaše moyeng pele ga kgoši. Mošidi o tla tšitlana le naga ya Egepeta bjalo ka lerole, gomme nageng ka moka wa ntšha batho le diphoofolo dišo tše di pherilego.” Ka gona ba gamara mošidi, ba ya ba ema pele ga kgoši. Moshe a gaša mošidi moyeng, gomme mošidi wa tšitlana wa tšama o ntšha batho le diphoofolo dišo tše di pherago. Boramaselamose ba šitwa go tšea kgang le Moshe ka ge le bona ba be ba tšwile dišo bjalo ka Baegepeta ka moka. Fela Morena a thatafatša pelo ya kgoši, gomme kgoši a se ke a theeletša Moshe le Arone, bjalo ka ge Morena a boditše Moshe. Morena a re go Moshe: “Ka la ka moswane goseng o ye o eme pele ga kgoši, o mmotše gore nna, Morena, Modimo wa Baheberu, ke re: ‘Lesa setšhaba sa ka se sepele, gore se yo nkhunamela. Lehono nka se otle bakgomana ba gago le setšhaba sa gago fela, ke tla itia le wena hlogo, gore o tle o tsebe gore ga go yo a swanago le nna lefaseng ka moka. Bjale mola ke be ke ile ka emišetša letsogo la ka go otla wena le setšhaba sa gago ka bolwetši, nkabe ke go feleleditše sa ruri. Fela ke go lesitše wa phela gore ke tle ke go bontšhe maatla a ka, le gore leina la ka le tle le tsebege lefaseng ka moka. Eupša wena o sa ikgogomoša, o gana go lesa setšhaba sa ka sa sepela. Ka la ka moswane ka yona nako ye ke tla neša sefako se se šiišago, seo Egepeta e sa lego e eba gona se sego sa ka sa na. Bjale ntšha taelo ya gore diruiwa tša gago le tšohle tše di lego kua nageng di šireletšwe. Sefako se tla rothotha batho le diphoofolo tše di sego tša šireletšwa nageng, tša hwa ka moka.’ ” Bakgomana ba bangwe ba kgoši ge ba ekwa taba ye ya Morena ba ile ba boifa, ba tliša makgoba a bona le diruiwa tša bona, ba di tšhabišetša ka mantlong mo go šireletšegilego. Ba bangwe bona ba se ke ba šetša tshebotšo ya Morena, ba tlogela makgoba a bona le diruiwa tša bona kgakala. Ke moka Morena a re go Moshe: “Emišetša letsogo la gago leratadimeng, ke gona sefako se tlago na nageng ka moka ya Egepeta; se tla rothotha batho, diphoofolo le dibjalo ka moka mašemong.” Ka gona Moshe a emišetša lepara la gagwe leratadimeng – Morena a romela ledumaedi le sefako, tladi ya ratha fase. Morena a theoša sefako se se šiišago, le dikgadima tša thalaganya. E bile ledimo le le šiišago le Egepeta e sa lego e eba gona e sego ya ka ya le bona. Nageng ka moka ya Egepeta sefako sa rothotha se sengwe le se sengwe se se bego se le kgakala, batho le diphoofolo ka moka. Sa rothotha dibjalo ka moka mašemong, sa roba mehlare ka moka. Selete sa Goshene sona, moo go bego go dula Baisraele, e bile sona se nnoši moo sefako se ilego sa se ne. Kgoši a bitša Moshe le Arone, a re go bona: “Lehono gona ke sentše; Morena ga a na phošo, ba ba nago le phošo ke nna le setšhaba sa ka. Rapelang Morena; ge e le ledumaedi le sefako tšona re di bone go lekane. Ke tla le lesa le sepele; ga le a swanela go hlwa le dutše le rena mo.” Moshe a re go yena: “Ge ke seno tšwa mo motseng wo, ke tla emiša diatla ka rapela Morena. Dikgadima di tla homola, le sefako se tla kgaotša; ke moo o tlago lemoga gore lefase ke la Morena. Fela ke a tseba gore wena le bakgomana ba gago ga se la tšwe le boifa Morena Modimo.” Leokodi le garase di ile tša rothothelwa fase, gobane garase e be ya butšwa gomme leokodi le khukhuša. Ge e le korong yona e ile ya se ke ya senyega, ka gobane e butšwetša morago. Moshe a tloga go kgoši, a tšwa motseng, a napa a emiša diatla a rapela Morena. Dikgadima le sefako tša kgaotša, le pula ya khula. Ge kgoši e bona go khudile ya senya gapegape. A retela pelo, yena le bakgomana ba gagwe. Kgoši a thatafatša pelo, a gana go lesa Baisraele ba sepela, bjalo ka ge Morena a boletše ka Moshe. Morena a re go Moshe: “Eya go kgoši, gobane ke nna ke mo reteditšego pelo, yena le bakgomana ba gagwe, gore ke tle ke dire mehlolo ye ya ka gare ga bona, le gore wena o tle o kgone go botša bana ba gago le ditlogolo ka moo ke dirilego Baegepeta diebela ge ke dira mehlolo. Lena ka moka le tla tseba gore ke nna Morena.” Ka gona Moshe le Arone ba ya go kgoši, ba fihla ba re go yena: “Morena, Modimo wa Baheberu, o re: ‘O tla gana go fihla neng go ineela go nna? Lesa setšhaba sa ka se sepele, gore se yo nkhunamela. Ge o fela o gana, gona nna ke tla romela tšie nageng ya gago ka la ka moswane. E tla ba leru la tšie gomme ya pipetša gohle fase gwa hloka le bobono. E tla ja se sengwe le se sengwe se se le šaletšego mola sefako se rothotha, le mohlare wo mongwe le wo mongwe wa lena wo o rego o a hloga o tla lewa. Tšie e tla tlala nywakong ya gago le ya bakgomana ba gago le ya Baegepeta ka moka. E tla ba sehlogo kudu go fetiša ka moo borrago le borakgolwago ba kilego ba bona.’ ” Moshe a fularela kgoši a sepela. Bakgomana ba re go kgoši: “Na monna yo o tla re tshwenya go fihlela neng? Lesa banna ba Baisraele ba sepele gore ba yo khunamela Morena Modimo wa bona. Afa o a lemoga gore naga ya Egepeta e šetše e senyegile?” Ka gona Moshe le Arone ba bušetšwa pele ga kgoši, gomme kgoši ya re go bona: “Sepelang le yo khunamela Morena Modimo wa lena! Le re ke bomang ba ba yago?” Moshe a mo fetola a re: “Rena ka moka re tla ya le bana ba rena le batšofadi ba rena. Re tla tšea barwa le barwedi ba rena le dihuswane tša rena le dikgomo tša rena ka moka, ka gobane re nyaka go yo direla Morena monyanya.” Kgoši ya re: “Ruri, ke ena ka Morena gore nka se le lese la tšea basadi le bana ba lena! Go molaleng gore le fehla mpherefere. Ke a gana! A go ye banna fela go yo khunamela Morena, ge e ka ba seo ke se le se nyakago.” Ba napa ba lelekwa pele ga kgoši. Morena a re go Moshe: “Emišetša letsogo la gago godimo ga naga ya Egepeta gore tšie e tle. Yona e tla udubatša naga, ya ja dibjalo ka moka, tšohle tše di šetšego mohla wola wa sefako.” Ka gona Moshe a emiša lepara la gagwe, gomme Morena a tsoša phefo ye e tšwago bohlabela, ya tšutla nageng letšatši leo ka moka le bošego bjoo ka moka. Ge go esa ke ge e tlišitše tšie. Tšie ya tla e le metšhitšhitšhitšhi ya aparela naga ka moka. E be e le motšhitšhi wo mogologolo wo o bego o se wa ke o bonwa, goba wo o kago tsoga o bonwe gape. Tšie ya pipetša naga, naga ya šala e fifetše; ya ja dibjalo le dienywa tšohle mehlareng tšeo sefako se di tshetšego. Gwa se ke gwa šala le lehlašana goba bjanyana bjo botalana nageng ka moka ya Egepeta. Kgoši ya phakiša ya bitša Moshe le Arone ya re: “Ke senyeditše Morena Modimo wa lena, le lena ke le senyeditše. Hle, ke a le rapela, ntebaleleng bosenyi bja ka mo lekgatheng le e be moka, gomme le rapeleng Morena Modimo wa lena, gore a upše a tloše kotlo ye ya go bolayago dimela tšohle.” Moshe a re go tloga fao pele ga kgoši a rapela Morena. Gomme Morena a fetoša phefo yela ya bohlabela a e dira phefo ye maatla ya bodikela; ya rwalelela tšie ya e gogolela ka Lewatleng la Mahlaka. Le e tee tšie ya se hlwe e bonwa nageng ya Egepeta ka moka. Fela Morena a thatafatša pelo ya kgoši, gomme ya gana go lesa Baisraele ba sepela. Morena a re go Moshe: “Emišetša letsogo la gago leratadimeng, gomme go tla wa leswiswi le legolo la go phopholwa la apeša naga ya Egepeta.” Moshe a emišetša letsogo leratadimeng, gwa wa kgampipi ya leswiswi nageng ya Egepeta ka moka la tšea matšatši a mararo. Baegepeta ba se ke ba kgona go bonana, gwa se ke gwa ba le o tee a tšwago ntlong ya gagwe lebakeng leo. Baisraele ka moka bona ba be ba na le seetša mo ba dulago gona. Kgoši ya bitša Moshe ya re: “Sepelang le yo khunamela Morena; le basadi le bana ba lena ba ka no ya le lena. Ge e le dihuswane le dikgomo tša lena tšona le di tlogele mo.” Moshe a mo fetola a re: “Gona wena o swanetše go re fa diruiwa tša dihlabelo tša go tšhungwa ka moka le tša dihlabelo tše dingwe go direla Morena Modimo wa rena. Diruiwa tša rena le tšona di swanetše go ya le rena, go se šale le se tee, gobane mo go tšona re tla hlaola tšeo ka tšona re tlago direla Morena Modimo wa rena. Le gona rena ka noši re ka se kgone go tseba pele re fihla kua gore ke dife tšeo ka tšona re swanetšego go direla Morena.” Morena a thatafatša pelo ya kgoši, gomme kgoši a gana go ba lesa ba sepela. Kgoši ya befelelwa Moshe ya re: “Tloga mo! O hlokomele gore ke se hlwe ke go bona! Tšatši le ke go bonago o tla hwa!” Moshe a mo fetola a re: “O boletše taba! Nnaena o ka se hlwe o mpone.” Morena a re go Moshe: “Ke tla otla kgoši le Baegepeta ka moka ka kotlo e tee gape. Ka morago ga yona o tla le lesa la sepela. Gabotsebotse, o tla le koba la tšwa nageng ye. Bjale ge, loma Baisraele tsebe, o ba botše gore yo mongwe le yo mongwe a kgopele dikgabišo tša gauta le tša silibera go moagišani wa gagwe.” Morena a dira gore Baisraele ba hwetše botho go Baegepeta. Gomme le yena Moshe a hlompšha ke bakgomana le setšhaba ka moka; ba mmona e le motho yo mogolo kudu. Moshe a re go kgoši: “Morena o re: ‘Mašegogare ke tla putlaganya naga ya Egepeta, gomme maitšibolo ka moka a bašemane ba Baegepeta a tla hwa, go thoma ka morwa wa pele wa kgoši, mojalefa wa bogoši, go fihlela ka morwa wa pele wa lekgoba la mosadi, leo sa lona e lego go šila. Le maitšibolo a dikgomo le ona ka moka a tla hwa. Go tla ba sello se segolo nageng ya Egepeta ka moka, sello se se sa kago sa ba gona, le gona se ka se tsogego se bile gona gape. Fela mo go Baisraele go ka se ke gwa ba le mpša le e tee ye e gobago motho goba phoofolo. Ke gona le tlago tseba gore nna, Morena, ga ke sware Baegepeta le Baisraele go swana.’ ” Moshe a iša pele a re: “Bakgomana ba gago ka moka ba tla tla go nna, ba ntotšha, ba nthapela gore ke tšee setšhaba sa gešo ka moka ke se huduše. Ka morago ga fao ke tla huduga.” Ke moka Moshe a tloga pele ga kgoši a befetšwe kudu. Morena o be a rile go Moshe: “Kgoši e tla tšwela pele le go gana go le theeletša, gore ke atiše mehlolo ya ka nageng ya Egepeta.” Moshe le Arone ba dirile mehlolo ye ka moka pele ga kgoši, fela Morena a thatafatša pelo ya gagwe, gomme a se lese Baisraele ba etšwa nageng ya gagwe. Morena o boletše le Moshe le Arone nageng ya Egepeta a re: “Ye kgwedi ke yona e tlago ba kgwedi ya mathomo ya ngwaga wa lena. Botšang setšhaba sa Israele ka moka le re: Ka letšatši la lesome la yona kgwedi ye, monna yo mongwe le yo mongwe a hlaolele lapa la gagwe kgapana goba phookwana. Ge lapa la gagwe e le le lennyane mo le ka palelwago ke go ja sehuswane seo la se fetša, a lapa leo le kwane le moagišani go abagana sehuswane seo go ya ka palo ya batho, le ka moo motho o tee a ka jago ka gona. Monna a hlaole kgapana goba phookwana mohlapeng, e be tona ya ngwaga o tee ye e se nago bosodi. Gomme a e hlahlelele thoko go fihlela ka maabane a letšatši la lesome le metšo ye mene la kgwedi, mme setšhaba sa Israele ka moka se hlabe dihuswane tšeo. Ba tšee madi ba a tlotše direpoding ka godimo le ka mathoko mejakong ya nywako yeo dihuswane di tlago jelwa go yona. Bošegong bjoo nama e bešwe, e lewe le mešunkwane ye e galakago le dinkgwa tše di se nago komelo. Go se be le nama ye e lewago e le ye tala goba e apeilwe, eupša nama yohle e bešwe e sa na le hlogo le meomo le dikateng. E se ke ya šadišwa molatša go lewa ka la ka moswane; ye e ka šalago e tšhungwe. Le e je le itlhaganetše – le apere tša maeto, le rwele dieta dinaong, le swere mapara ka diatla. Ke wona Monyanya wa Paseka wa go nkgodiša, nna, Morena. “Bošegong bjoo ke tla putlaganya naga ya Egepeta ka bolaya bašemane ba maitšibolo, le maitšibolo a diruiwa a dipholwana, ka otla le medimo ya Egepeta ka moka. Ke nna Morena. Madi a mo direpoding e tla ba leswao la nywako ye le dulago ka go yona. Ge ke bona madi ke tla le feta gomme ka se ke ka le dira bošula ge ke otlaka Baegepeta. Tšatši le e be letšatši la segopotšo go lena, mme ka lona le bine monyanya wa Morena go ikgopotša se nna, Morena, ke se dirilego. Ka lona lena le ditlogolo tša lena le bine monyanya e le molao wa ka mehla le mabakeng a a tlago.” Morena a re: “Mo matšatšing a a šupago le se ke la ja dinkgwa tše di nago le komelo, le jeng fela dinkgwa tše di se nago komelo. Ka letšatši la mathomo le tloše komelo ka moka mo nywakong ya lena, ka gobane ge yo mongwe wa lena a ka ja selo se se ometšwego mo matšatšing a a šupago, o tla kgaolwa setšhabeng sa Israele. Ka letšatši la mathomo le ka letšatši la bošupa le phuthegele tirelo ye kgethwa. Mo matšatšing ao a šupago go se ke gwa dirwa modiro wo mongwe ge e se fela tše motho a swanetšego go dija. Le bineng monyanya wo ka mehla gobane ke ka lona letšatši le mo ke ntšhitšego dikgoro tša lena Egepeta. Ka mehla yohle ye e tlago, go iša ditlogolwaneng, le sware letšatši le e le la monyanya wa molao. Go tloga mantšiboa a letšatši la lesome le metšo ye mene la kgwedi ya pele go fihlela mantšiboa a la masome a mabedi le motšo o tee, le se ke la ja dinkgwa tše di nago le komelo. Mo matšatšing a a šupago go se ke gwa hwetšwa hlabego nywakong ya lena, gobane ge yo mongwe a ka ja se se hlabegilwego, o tla kgaolwa setšhabeng sa Israele, e ka ba ngwana wa mobu goba mofaladi. Le se ke la ja selo se se ometšwego; nywakong ya lena ka moka le je dinkgwa tše di sego tša hlabegwa.” Moshe o ile a bitša bagolo ka moka ba Israele, a re go bona: “Yaang le yo hlaolela lapa le lengwe le le lengwe kgapana goba phookwana, le di hlabe gore le je Paseka. Le tšeeng motšitlo wa hisopo, le o ine mogopong wo o nago le madi a sehuswane, le tlotše direpodi tša mojako ka godimo le ka mathoko. Go se be le o tee yo a tšwago ngwakong wa gagwe go be go se. E tla re ge Morena a putlaganya naga go bolaya Baegepeta, a bona madi direpoding, a feta mme a se dumelele Morongwammolai go tsena nywakong ya lena go le bolaya. Lena le bana ba lena le swareng ditaelo tše e be molao wa lena go ya go ile. Ge le goroga nageng ye Morena a tlago le fa yona bjalo ka ge a boletše, le direng tirelo ye leboelela. Ge bana ba lena ba le botšiša ba re: ‘Tirelo ye e šupa eng?’ le ba fetole le re: ‘Ke sehlabelo sa Paseka go godiša Morena, gobane o fetile nywako ya Baisraele kua Egepeta. O ile a bolaya Baegepeta, mme a šireletša malapa a rena.’ ” Baisraele ba obama ba rapela. Ba ile ba tloga, ba dira tšeo Modimo a di laetšego Moshe le Arone. Bošegogare Morena a bolaya bašemane ba maitšibolo nageng ya Egepeta, go thoma ka morwa wa kgoši yo e bego e le yena mojalefa wa bogoši, go fihlela ka morwa wa sebofša se se lego ka kgolegong; maitšibolo ka moka a diruiwa le wona a bolawa. Bošego bjoo kgoši le bakgomana ba gagwe le Baegepeta ka moka ba ile ba phafoga. Gwa kwala sello se segolo nageng ya Egepeta, ka gobane go be go se le lapa le tee moo go bego go se na le mohu. Bošegong bjoo kgoši a bitša Moshe le Arone, a ba laela a re: “Tlogang! Etšwang setšhabeng sa ka, lena le Baisraele ba gabolena; eyang le yo khunamela Morena ka moo le kgopetšego ka gona. Gapang mehlape ya lena le sepeleng. Le nna le nkgopeleleng tšhegofatšo.” Baegepeta ba tutuetša Baisraele gore ba potlake ba tšwe Egepeta; ba re: “Re tla hwa ka moka ge le sa sepele.” Ka gona Baisraele ba tšea maupi a bona a a dubilwego ka ntle le komelo, ba phuthela megopo ka mašela, ba e šikara magetleng. Baisraele ba be ba dirile ka mokgwa woo Moshe a ba laetšego, ba kgopetše Baegepeta dikgabišo tša gauta le tša silibera, le diaparo. Morena o ile a dira gore Baisraele ba hwetše botho go Baegepeta, mme Baegepeta ba neela Baisraele se ba se kgopelago. Ka tsela ye Baisraele ba hula Baegepeta. Baisraele ba ile ba thoma leeto go tloga Ramsese go ya Sukote. Ge go sa balwe le basadi le bana, e be e ka ba banna ba 600 000 ba ba sepelago ka maoto. Batho ba bangwe ba bantši ba mahlakanasela ba sepela le bona, le dihuswane le dikgomo tše dintši. Ba apea diphaphatha ka maupi a a se nago komelo ao ba a dubilego ge ba etšwa Egepeta. Ba be ba lelekilwe Egepeta ka lephakuphaku mo ba hlokilego le nako ya go dira mefago le go duba maupi a a nago le komelo. Baisraele ba dutše Egepeta nywaga ye 430. Ka lona letšatši la ge go fela nywaga ye 430, dikgoro ka moka tša setšhaba sa Morena tša huduga Egepeta. E be e le bošego bjo Morena a bego a letše a letetše go ba ntšha nageng ya Egepeta. Ngwaga ka ngwaga bošegong bjo Baisraele bohle le ditlogolo tša bona ba swanetše go lala ba letetše, e le go godiša Morena. Morena o rile go Moshe le Arone: “Še melawana ya Paseka: Motho o šele a se ke a ja dijo tša Paseka, eupša lekgoba le motho a le rekilego le ka ja Paseka ge le boloditšwe. Moeng goba mothwalwa a se ke a ja Paseka. Dijo tša Paseka a di jelwe ngwakong woo di apeetšwego ka go wona; nama ya sehuswane e se ke ya ntšhetšwa ntle. Mašapo a sona a se ke a robja. Setšhaba ka moka sa Baisraele se bine monyanya wo. Monna yo a sego a bolla a se ke a ja Paseka. Ge mofaladi a dula le lena gomme a rata go ja Paseka go godiša Morena, banna le bašemane ka moka lapeng la gagwe ba bolotšwe pele. Ka morago ga fao o tla ba bjalo ka Moisraele ka go tswalwa, gomme a ka batamela a keteka monyanya. Melawana yeo e ama Baisraele ka matswalo le bafaladi ba ba dutšego gare ga bona.” Baisraele ka moka ba ile ba phetha melawana ye Morena a e laetšego Moshe le Arone. Ka lona tšatši leo Morena o ntšhitše dikgoro ka moka tša Baisraele nageng ya Egepeta. Morena a re go Moshe: “O nneele maitšibolo ka moka a matona. Leitšibolo le lengwe le le lengwe la Moisraele le e lego mošemane ke la ka, le leitšibolo le lengwe le le lengwe la seruiwa le letona ke la ka.” Moshe a re go setšhaba: “Gopolang letšatši le; ke letšatši le ka lona le tšwilego Egepeta, mo le bego le le makgoba. Le ke lona letšatši le Morena a le ntšhitšego ka maatla a gagwe a magolo. Go se ke gwa lewa se se ometšwego. Le huduga Egepeta lehono mo kgweding ya mathomo, kgwedi ya Abibi. Morena o enetše borakgolokhukhu ba lena gore o tla le fa naga ya Bakanana le Bahete le Baamore le Bahibe le Bajebuse. Ke naga ya mokhora le monono. Ge Morena a le goroša nageng yeo, le keteke monyanya wo mo kgweding ya mathomo ya ngwaga wo mongwe le wo mongwe. Matšatši a a šupago le je dinkgwa tše di se nago komelo, gomme ka letšatši la bošupa go be le monyanya wa go godiša Morena. Matšatši a a šupago ao le se ke la ja dinkgwa tše di nago le komelo; go se ke gwa ba le komelo goba selo se se nago le komelo mo gohle nageng ya lena. Tšatšing leo yo mongwe le yo mongwe a hlathollele morwa wa gagwe gore o bina monyanya ka baka la seo Morena a mo diretšego sona mohla a etšwa Egepeta. Tirelo ye e tla ba segopotšo bjalo ka selo se se tlemeletšwego seatleng goba phatleng; e tla le gopotša go fela le ikgakolla le ithuta melao ya Morena, ka gobane Morena a le ntšhitše Egepeta ka maatla a magolo. Le keteke monyanya wo ka nako ye e beilwego, ngwaga ka ngwaga, e le molao.” “Morena o tla le goroša nageng ya Bakanana ye a e enetšego lena le borakgolokhukhu ba lena. Mohla a le abela yona, lena le abele Morena mošemane yo mongwe le yo mongwe wa leitšibolo. Leitšibolo le lengwe le le lengwe le letona la seruiwa ke la Morena; ge e le leitšibolo le letona la pokolo lona le rekollwe go Morena ka kgapana. Ge le sa rate go rekolla pokolo, gona le e robeng molala. Le rekolleng morwa wa lena wa leitšibolo. Ka moso ge morwa wa gago a go botšiša gore tirelo ye e šupa eng, o mo fetole ka go re: ‘Ka maatla a magolo Morena o re ntšhitše Egepeta, mo re bego re le makgoba. Mola kgoši ya Egepeta e ngangabetše e gana go re lesa re sepela, Morena o ile a bolaya maitšibolo ka moka a matona nageng ya Egepeta, go thoma ka a batho go iša go a diruiwa. Ke ka baka leo re direlago Morena sehlabelo ka leitšibolo le letona, barwa ba rena ba maitšibolo bona ra ba rekolla. Tirelo ye e tla ba segopotšo, go swana le selo se se tlemeletšwego diatleng goba diphatleng tša rena; e tla re gopotša gore Morena o re ntšhitše Egepeta ka maatla a gagwe a magolo.’ ” E rile ge kgoši ya Egepeta e lesa Baisraele ba sepela, Modimo a se ke a sepediša Baisraele ka tsela ya go ipata ka lewatle go leba nageng ya Bafilista, le ge tsela ye e be e kgaoletša kudukudu. Modimo o itše: “Ga ke nyake gore setšhaba se hlanoge mme se gomele Egepeta ge se bona gore se tlile go swanelwa ke go lwa.” Ka baka leo a ba tepoša ka tsela ya morarela, ba putla lešoka, ba leba Lewatlekhubedu. Ba tšwile Egepeta ba itlhamile ba ipeakanyeditše tlhabano. Moshe o ile a tšea mašapo a Josefa a sepela nao, ka ge Josefa a be a ile a eniša Baisraele gore ba tloge nao. O be a ile a re: “Ka kgonthe Morena o tla le hlakodiša, gomme mohla a le hlakodiša, le rwale mašapo a ka le tloge nao fa.” Ba tlogile Sukote, ba ya ba hloma mešaša kua Ethamo, mafelelong a lešoka. Mosegare Morena o be a ba eta pele ka thololo ya leru go ba laetša tsela, gomme bošego a ba eta pele ka thololo ya mollo go ba bonegela, gore ba sepele bošego le mosegare. Thololo ya leru e be e fela e ba eta pele mosegare, mme thololo ya mollo e ba bonegela bošego. Morena a re go Moshe: “Botša Baisraele ba gome mme ba hlome mešaša pele ga Pi-Hagirote, kgatheng ga Migdolo le Lewatle la Mahlaka, kgauswi le Baale-Tsefone, lebopong la lewatle. Kgoši o tla bona nke Baisraele ba tlaruma le naga, ba thibetšwe ke lešoka. Ke tla mo thatafatša pelo mme a le hlomara, gomme go fenya kgoši ga ka le madira a gagwe go tla nkgodiša. Ke gona Baegepeta ba tlago tseba gore ke nna Morena.” Baisraele ba dira ka moo ba botšwago. Ge kgoši ya Egepeta e tsebišwa gore setšhaba sa Israele se tšhabile, yena le bakgomana ba gagwe ba hlanoga ba re: “E bago re dirile eng? Re lesitše Baisraele ba sepela, gomme re lahlegetšwe ke makgoba!” Kgoši a napa a lokiša koloi ya gagwe ya ntwa le madira. A tšwa dira ka makoloi a ntwa ka moka a gagwe, a ntšha le makoloi a ntwa a makgolo a a selelago a mošate, a a laolwago ke balaodi ba bogale. Morena a thatafatša pelo ya kgoši, a hlomara Baisraele bao ba bego ba sepela ba šireleditšwe ke Morena. Madira a Baegepeta ka dipere le makoloi a ntwa le banamedi ba dipere ka moka ba hlomara Baisraele ba ba ba fihla go bona, moo ba bego ba hlomile mešaša lebopong la Lewatle la Mahlaka, kgauswi le Pi-Hagirote le Baale-Tsefone. Ge Baegepeta ba batamela, Baisraele ge ba lebelela, ba bona kgoši le madira a gagwe a ba wela. Ba tšhoga kudu, ba llela go Morena ba nyaka thušo. Ba botšiša Moshe ba re: “Na go be go se ne mabitla kua Egepeta? A o re tlišitše mono lešokeng gore re tle re hwele gona? Bona tše o re dirilego tšona ka go re ntšha Egepeta! A ga se ra go botša pele re huduga Egepeta gore re tla welwa ke tšona tše? Re go boditše ra re o re tlogele re iphelele re le makgoba a Baegepeta. Go ka be go bile kaone go iphelela re le makgoba go phala ge re tlilo hwela mo lešokeng.” Moshe a ba fetola a re: “Se boifeng! Emang le tie, gomme le tla bona se Morena a tlago go se dira go le phološa lehono; le ka se tsoge le bone Baegepeta ba gape. Morena o tla le hlabanela, mme lena le ka se itapiše ka selo.” Morena a re go Moshe: “Le reng le lla le nyaka thušo? Laela setšhaba se rutlologele pele. Wena o emiše lepara la gago, o le lobalatše ka godimo ga lewatle. Meetse a tla arogana, mme Baisraele ba tla tshela lewatle mo go omilego. Ge e le nna ke tla re go thatafatša pelo tša Baegepeta, ba tsenelela morago ga Baisraele, gomme go fenya kgoši ga ka le madira a gagwe le makoloi a gagwe a ntwa le banamedi ba gagwe ba dipere go tla nkgodiša. Baegepeta ba tla tseba gore ke nna Morena ge ke ithopela kgodišo ka go fenya kgoši le makoloi a ntwa le banamedi ba gagwe ba dipere.” Morongwa wa Modimo yo a bego a etile madira a Israele pele, a ya ka morago ga Baisraele. Le thololo ya leru ya rotologa go fihlela e ema kgathe ga Baegepeta le Baisraele. Leru la dira leswiswi pele ga Baegepeta, mola Baisraele bona le ba bonegela. Ka gona madira a Baegepeta le a Baisraele a se ke a batamelana bošego bjoo ka moka. Moshe a emiša letsogo ka godimo ga lewatle, gomme Morena a budulela lewatle morago ka phefo ye maatla ya bohlabela. Ya tšutla bošego ka moka, gomme moo e bego e le lewatle gwa fetoga naga ye e omilego. Meetse a aroganywa, gomme Baisraele ba tshela lewatle mo go omilego, mme meetse e le maboto ka mathoko. Baegepeta ba ba hlomara, ba tsenelela lewatleng ka dipere le makoloi a ntwa le banamedi ba dipere ka moka. Ka masa Morena a okamela madira a Baegepeta a le thololong ya mollo le leru, a ba gakantšha. A dira gore maotwana a makoloi a bona a ntwa a tanywe, ba ritše ka bothata bjo bogolo. Baegepeta ba ba ba re: “Morena o hlabanela Baisraele. A re ba gomeleng!” Morena a re go Moshe: “Emiša letsogo la gago ka godimo ga lewatle, gomme meetse a tla boa a pitametša Baegepeta le makoloi a bona a ntwa le banamedi ba dipere.” Ka gona Moshe a emiša letsogo ka godimo ga lewatle, gomme ge letšatši le hlaba, meetse a boela seemong sa ona sa ka mehla. Baegepeta ba katana go tšwa meetseng, eupša Morena a ba lahlela ka gare ga lewatle. Meetse a boa a pitametša makoloi a ntwa le banamedi ba dipere le madira ka moka a Baegepeta a a bego a hlomere Baisraele go tsenelela lewatleng; gwa se phonyokge le o tee. Ge e le Baisraele bona ba tshela lewatle mo go omilego, mme meetse e le maboto ka mathoko. Letšatšing leo Morena o phološitše Baisraele diatleng tša Baegepeta, gomme Baisraele ba bona Baegepeta ba hwile lebopong la lewatle. Ba bona maatla a magolo ao ka ona Morena a fentšego Baegepeta, gomme setšhaba sa boifa Morena; ba dumela go Morena le go mohlanka wa gagwe, Moshe. Ke moo Moshe le Baisraele ba opeletšego Morena kopelo ye: “A ke opelele Morena kopelo, gobane o fentše ka mokgwa wo o makatšago; pere le monamedi o lahletše lewatleng. Morena ke molwedi wa ka yo maatla; ke yena yo a mphološitšego. Ke Modimo wa ka, ke tla mo reta, ke Modimo wa tate, ke tla mo godiša. Morena ke mohlabani; Morena ke leina la gagwe. “Madira a kgoši ya Egepeta le makoloi a ntwa o kgoromeleditše lewatleng; bagalegale ba gagwe ba sobeletšwa Lewatleng la Mahlaka. Maphoto a lewatle a ba ribegetša; ba tekela ntshobeleleng bjalo ka leswika. “Morena, letsogo la gago la go ja ke le maatlamaatla; letsogo la gago la go ja, Morena, le roboketša manaba. O uša manaba a gago o rokame ka bogoši; pefelo ya gago e tuka bogale, ya tšhuma bjalo ka hlaga. O budutše ka dinko, meetse a kgobokana; maphoto a kubuga, a ema bjalo ka meboto, botengteng bja lewatle bja thema. Lenaba le rile: ‘Ke tla ba hlomara ka ba swara; ke tla abaganya thoto tša bona, ka tšea tšohle tše ke di kganyogago; ke tla bekenya tšhoša ya ka ka ba gapagapa.’ Eupša o budutše gatee, Morena, meetse a pitametša Baegepeta; ba teka bjalo ka morodi meetseng a mašoro. “Morena, ke mang gare ga medimo yo a swanago le wena? Ke mang a swanago le wena, Yomokgethwakgethwa? Ke mang a dirago mehlolo le ditiro tše šiišago tše maatla bjalo ka tša gago? O otlolotše letsogo la gago la go ja, lefase la metša manaba a rena. Setšhaba se o se phološitšego o se etile pele ka potego, ka mo o se holofeditšego; ka maatla a gago o se hlahlile, wa se goroša nageng ya gago ye kgethwa. Baditšhaba ba kwele, mme ba thothomela ka poifo; Bafilista ba swerwe ke motlhakgaselo. Magoši a Edomo a tšhogile; banna ba dinatla ba Moaba ba a tlekatleka; badudi bohle ba Kanana ba nolega moko. Letšhogo le poifo di ba wela godimo. Ba bona maatla a gago, wena Morena, mme ba tsetseana ka poifo, go fihlela setšhaba sa gago se feta, sona setšhaba se o se lokolotšego bokgobeng. O a ba goroša mme wa ba hloma thabeng ya gago, felo moo, wena Morena, o ikgethetšego bodulo, e lego Tempele ye, wena Mong wa ka, o e agilego ka noši. Wena Morena, o tla buša ka mehla yohle.” Ba opetše bjalo ka gobane dipere tša kgoši le makoloi a gagwe a ntwa le banamedi ba gagwe ba dipere ba ile ba tsenelela ka lewatleng. Morena a thenkgolla lewatle la ba pitametša, mola Baisraele bona ba ile ba iphetela mo go omilego gare ga lewatle. Moprofeta Miriamo, kgaetšedi ya Arone, a tšea moropa a o pidinya, basadi ka moka ba mo latela ka ya bona ba bina. Miriamo a ba opelela a re: “Opelelang Morena kopelo, gobane o fentše ka mokgwa wo o makatšago; pere le monamedi o lahletše lewatleng.” Go tloga moo Lewatleng la Mahlaka, Moshe o etile Baisraele pele, ba ya lešokeng la Shure. Ba sepela leeto matšatši a mararo lešokeng ba sa hwetše meetse. Ka morago ba fihla felo mo go bitšwago Mara, fela meetse a gona a be a galaka kudu mo a bego a pala ka ganong. Ke ka baka leo felo fao go bitšwago Mara. Batho ba ngongoregela Moshe ba re: “Re tlilo nwang?” Moshe a rapela a llela Morena, gomme Morena a mo laetša kotana ye Moshe a ilego a e lahlela meetseng, mme meetse ya ba a mabose. Gona fao Morena a ba fa melao le ditaelo, a ba a ba leka ba le gona fao. A re: “Ge le ka ntheeletša gabotsebotse, la dira tše ke bonago di lokile, la phetha ditaelo tša ka, gona nka se le otle le ka bjo botee bja malwetši ale ke otlilego Baegepeta ka ona. Gobane ke nna Morena, Moalafi wa lena.” Go tloga moo ba fihlile Elime, felo ga methopo ye lesome le ye mebedi, le mehlare ya mepalema ye masome a a šupago; ba hloma mešaša ya bona moo kgauswi le meetse. Setšhaba ka moka sa Israele se rutlologile sa tloga Elime, gomme ka letšatši la lesome le metšo ye mehlano la kgwedi ya bobedi ge ba tlogile Egepeta, ba fihla lešokeng la Tsine, le le lego kgatheng ga Elime le Sinai. Ge ba le moo lešokeng, ka moka ba ngongoregela Moshe le Arone ba re: “Re duma ge nkabe Morena a re bolaile re sa le Egepeta, moo re bego re kgona go itulela pele ga dipitša tša nama, ra ja ra khora. Bjale le re ntšhitše Egepeta la re tliša mo lešokeng go bolaya setšhaba se ka moka ka tlala.” Morena a re go Moshe: “Bona, ke tlilo le nešetša dijo tše di tšwago legodimong. Batho a ba tšwe letšatši ka letšatši ba yo itopela tše di lekanego letšatši leo. Ka tsela ye ke tla ba leka gore ke bone ge eba ba tla phetha ditaelo tša ka, goba ba ka se di phethe. Ka letšatši la boselela ba itopele tše di lekanego matšatši a mabedi, gomme ba di apee.” Ka gona Moshe le Arone ba re go Baisraele ka moka: “Mantšiboeng a lehono le tla tseba gore ke Morena yo a le ntšhitšego nageng ya Egepeta. Mosong le tla bona seetša se se fahlago sa letago la Morena, gobane o kwele ge le mo tsota. Gape le tsota yena, gobane ge e le rena re bomang moo le ka hlwago le re tsota?” Ke moka Moshe a re: “Ge Morena a le fa nama mantšiboeng, gomme goseng a le fa bogobe bjo bo lekanego go le khoriša, ka ge a kwele ka mo le mo tsotago, rena re bomang? Ge le tsota rena, gabotsebotse le tsota Morena.” Moshe a re go Arone: “Botša setšhaba ka moka se batamele pele ga Morena, gobane o kwele dingongorego tša bona.” Ge Arone a bolela le setšhaba sohle, ba lebiša difahlego lešokeng, gomme ka bjako seetša se se fahlago sa letago la Morena sa bonagala lerung. Morena a re go Moshe: “Ke kwele dingongorego tša Baisraele. Ba botše gore ka maabane ba tla ba le nama ya go ja, gomme goseng ba khorišwa ka bogobe. Ke gona ba tlago tseba gore nna, Morena, ke Modimo wa bona.” Mantšiboa gwa rotoga dikhwiri tša aparela mešaša, gomme goseng phoka e be e wele go dikologa mešaša. Ge phoka e tologa, gwa šala dikgakgapšana tše tshesenyane tša go gwaša di ikadile nageng. E be e le tše boletiana bjalo ka tšhwaane. Ge Baisraele ba di fahlogela ba se ke ba tseba gore ke eng, mme ba botšišana ba re: “Ke eng tše?” Moshe a re go bona: “Tše ke bogobe bjo Morena a le filego bjona gore le je. Morena o laetše gore yo mongwe le yo mongwe wa lena a tope ka mo go lekanego, yo mongwe le yo mongwe lapeng a hwetše dilitara tše pedi.” Baisraele ba dira bjalo, ba bangwe ba topa kudu mola ba bangwe ba topa gannyane. Ge ba ela, gwa hwetšagala gore ba ba topilego kudu ga ba topa kudu go fetiša tekanyo, mme bao ba topilego gannyane le bona ga ba nyenyefatša kudu go hlaetša. Yo mongwe le yo mongwe o topile ka mo go mo lekanego. Moshe a re go bona: “Go se be le yo a šadišago dijo molatša a beela la ka moswane.” Ba bangwe ba bona ba se ke ba theeletša Moshe, gomme ba šadiša molatša. Ka la ka moswane ke ge dijo di nyeuma diboko di nkga sebodi, gomme Moshe a ba befelelwa. Mosong wa tšatši le lengwe le le lengwe yo mongwe le yo mongwe o be a topa fela ka tekanyetšo; ge letšatši le thoma go fiša, tše di šetšego nageng di be di tologa. Ka letšatši la boselela ba topa dijo tše di lekanego matšatši a mabedi, dilitara tše nne hlogo ya motho. Baetapele ka moka ba setšhaba ba tla go Moshe ba mmegela taba ye, gomme yena a re go bona: “Morena o laetše gore la ka moswane ke letšatši le lekgethwa la go khutša, le kgethetšwe Morena. Lehono le bešeng se le ratago go se beša, le apeeng se le ratago go se apea. Tšohle tše le di šadišago le di bolokeleng la ka moswane.” Ba dira ka mo Moshe a ba laetšego ka gona, ba bolokela tše di šetšego la ka moswane; dijo tša se ke tša senyega, le gona tša se be le diboko. Moshe a re: “Di jeng lehono, gobane lehono ke Sabatha, letšatši la go khutša le le kgethetšwego Morena, gomme le ka se hwetše dijo kua nageng lehono. Le tope dijo matšatši a a selelago, eupša ka la bošupa, letšatši la go khutša, go ka se be le selo.” Ka letšatši la bošupa ba bangwe ba setšhaba ba tšwa go yo topa, eupša ba se hwetše selo. Ke mo Morena a rilego go Moshe: “Go tla fihlela neng le gana go phetha melao le ditaelo tša ka? Gopolang gore nna, Morena, ke le file letšatši la go khutša, ke ka baka leo ka letšatši la boselela ke tlago fela ke le fa dijo tša matšatši a mabedi. Yo mongwe le yo mongwe a hlwe gae, a se ke a tloga mo a dulago ntshe ka letšatši la bošupa.” Ka gona setšhaba sa khutša ka letšatši la bošupa. Setšhaba sa Israele sa rea dijo tšeo leina la manna. A be a swana le pewana ye tšhwaanyana, mme ka ganong a kwala bjalo ka dinkgwana tša magegetswana tša go dirwa ka todi ya nose. Moshe a re: “Morena o re laetše go lota manna a mangwe, gore a bolokelwe ditlogolo tša rena, di tle di bone dijo tše Morena a re filego tšona re le lešokeng gore re je ge a re ntšha Egepeta.” Moshe a re go Arone: “Tšea pitšana o tšhele dilitara tše pedi tša manna ka go yona, gomme o e bee pele ga sefahlego sa Morena gore a lotelwe ditlogolo.” Arone a bea manna pele ga Polokelo ya Kgwerano, ka moo Morena a laetšego Moshe, gore a tle a lotege. Baisraele ba lle manna mengwaga ye masome a mane, go fihlela ba fihla nageng ye e dutšwego ke batho, mellwaneng ya naga ya Kanana. Pitšana yeo ya go swara dilitara tše pedi e be e tsena galesome ka moeteng. Setšhaba ka moka sa Baisraele se tlogile lešokeng la Tsine, sa ralala le naga ka moo Morena a ba laelago ka gona. Ba hloma mešaša Refidime, fela fao setšhaba sa hloka meetse a go nwa. Ba omanya Moshe ba re: “Re fe meetse re nwe.” Moshe a ba fetola a re: “Le reng le nkomanya? Le lekelang Morena?” Fela setšhaba se be se tloga se swerwe ke lenyora; sa phegelela sa ngongoregela Moshe sa re: “O be o reng o re ntšha Egepeta? O re ntšheditše go re bolaya ka lenyora, rena le bana ba rena le mehlape ya rena?” Moshe a rapela a llela Morena a re: “Bjale ke direng ka setšhaba se? Ba šetše ba nyaka go mpolaya ka maswika.” Morena a re go Moshe: “Eta setšhaba pele, o tloge le ba bangwe ba bagolo ba Baisraele. O tšee lepara lela la gago wa go itia noka ya Naele ka lona. Nna ke tla ema pele ga gago mola godimo ga leswika thabeng ya Sinai. O tie leswika, gomme meetse a tla tšwa leswikeng, mme setšhaba sa nwa.” Moshe a dira bjalo pele ga bagolo ba Baisraele. Ba rea felo fao leina la Masa le Meriba, ka gobane Baisraele ba omane ba leka Morena mola ba botšiša ba re: “A Morena o na le rena goba ga a na le rena?” Baamaleke ba tla ba hlasela Baisraele gona moo Refidime. Moshe a re go Joshua: “Kgetha banna ba o tlago ya le bona go lwa le Baamaleke ka la ka moswane. Nna ke tla ema godimo ga thabana ke emišitše lepara lela Modimo a go ntaela go le swara.” Joshua a dira ka moo Moshe a mo laetšego ka gona, a tšwa dira go lwa le Baamaleke, mola Moshe le Arone le Hure ba nametše godimo ga thabana. Ge Moshe a emišitše matsogo, Baisraele ba be ba fenya, eupša ge a a khutšiša, Baamaleke ba be ba thoma go fenya. Ya re ge Moshe a thoma go lapa matsogo, Arone le Hure ba mo tlišetša leswika gore a dule godimo ga lona, mola bona ba mo eme ka mathoko ba emišitše matsogo a gagwe. Ka fao matsogo a Moshe a hlwa a emišitšwe go fihlela letšatši le dikela, gomme Joshua a fenyetša Baamaleke sa ruri. Ke gona Morena a rilego go Moshe: “Ngwala ditaba tše pukung gore di tle di gopolwe, gomme o di tsebiše Joshua, o be o mmotše tsebegokwa gore ke tla feleletša Baamaleke sa ruriruri.” Moshe a aga aletare, a e rea leina la “Morena ke sefoka sa ka”. A ba a re: “Phagamišetšang sefoka sa Morena godimo! Morena o tla lwa le Baamaleke go ya go ile!” Ratswale wa Moshe, Jetro, moprista wa Midiane, a kwa ka tšohle tše Modimo a di diretšego Moshe le setšhaba sa Israele ge a ba ntšha Egepeta. Ka gona a tla go Moshe a na le Tsipora, mogatša wa Moshe, yo Moshe a bego a mmušeditše gagabo, le Gershome le Eliesere, barwa ba babedi ba Tsipora. Moshe o be a ile a re: “Ke nna mofaladi nageng e šele”; ka gona a rea yo mongwe wa barwa ba gagwe leina la Gershome. Le gona o be a ile a re: “Modimo wa tate o nthušitše a mphološa lehung diatleng tša kgoši ya Egepeta”; ka gona a rea morwa wa gagwe wa bobedi leina la Eliesere. Jetro le mogatša wa Moshe le barwa ba babedi ba Moshe ba tla go Moshe lešokeng moo a bego a hlomile mešaša thabeng ya Modimo. Jetro o be a ile a tsebiša Moshe gore ba etla, ka gona Moshe a tšwa go yo ba gahlanetša, gomme a obama pele ga Jetro a mo atla. Ba botšišana maphelo, mme ba tsena ka mošašeng wa Moshe. Moshe a laodišetša Jetro tšohle tše Morena a di dirilego kgoši le setšhaba sa Egepeta ka baka la Baisraele. A mo laodišetša le mathata a ba bilego nao leetong, le ka moo Morena a ba hlatlotšego. Jetro a thaba kudu ge a ekwa tše botse ka moka tše Morena a di diretšego Baisraele. A re: “Retang Morena yo a le namoletšego go kgoši le setšhaba sa Egepeta! Retang Morena yo a lokolotšego setšhaba sa gagwe bokgobeng! Bjale gona ke tseba gore Morena ka bogolo o feta medimo ka moka, gobane o dirile tše bjalo mola Baegepeta ba nyatša Baisraele.” Jetro a napa a tliša sehlabelo sa go tšhungwa ka moka le dihlabelo tše dingwe gore di hlabelwe Modimo; Arone le bagolo ba Baisraele ka moka ba ya le Jetro go yo ja dijo tše kgethwa, e le gona ge ba khunamela Modimo. Ka letšatši le le latelago Moshe o be a dutše gare ga setšhaba a ahlola melato, gomme batho ba mo dulela go tloga goseng go fihlela mantšiboa. Ya re ge Jetro a bona tšohle tše Moshe a tlemegilego go di dira, a mmotšiša a re: “O reng o direla setšhaba ka mokgwa wo? O reng o ahlola o nnoši, batho ba go emeletša go tloga goseng go fihlela mantšiboa?” Moshe a mo fetola a re: “Ke tlemegile go dira bjalo, gobane setšhaba se tla go nna gore se tsebe thato ya Modimo. Ge batho ba babedi ba fapane, ba tla go nna, gomme nna ka ba ahlola, ka napa ka ba tsebiša ditaelo tša Modimo le melao ya gagwe.” Ke gona Jetro a itšego: “Taba ye o e dirago ga e botse. O tla itlhagatša, wena gammogo le setšhaba se. Ke go ithweša boima go dira taba ye o nnoši. Bjale a ke go fe keletšo ye botse, mme Modimo o tla ba nago. Sa gago ke go emela setšhaba go Modimo, wa fihliša ditaba tša bona pele ga gagwe. Lemoša setšhaba ditaelo tša Modimo, gomme o ba hlathollele gore ba phedišane bjang le gore ba dire eng. Godimo ga fao, wena hlaola banna ba mafolofolo, o ba bee bagolo ba setšhaba: baokamedi ba ba dikete, ba ba makgolo, ba ba masome a mahlano, ba ba masome. E be banna ba ba boifago Modimo, ba ba botegago, mme ba ka se amogelego tsogolekobong. A ba direle setšhaba e le baahlodi ka dinako tšohle. Bona ba ka go begela melato ka moka ye methata, fela bona ka noši ba phethe melatwana ka moka ye mennyane. Se se tla go imolla ka ge le bona ba go rwadiša morwalo wo wa gago. Ge o dira se ka mo Modimo a laelago, o tla swarelela, gomme le batho ba ka moka ba tla ipoelela magae melato ya bona e ahlotšwe.” Moshe a tšea keletšo ya Jetro. A hlaola banna ba mafolofolo gare ga Baisraele ka moka, a ba bea baokamedi ba ba dikete le ba ba makgolo le ba ba masome a mahlano le ba ba masome. Ba direla setšhaba e le baahlodi ka dinako tšhole, ba tliša melato ye methata go Moshe, melatwana ye mennyane yona ba e ahlola ka noši. Ke moo Moshe le Jetro ba laelanego, mme Jetro a ipoelela gae. Setšhaba sa Israele sa tloga Refidime, mme ka letšatši la pele la kgwedi ya boraro morago ga ge ba tlogile Egepeta, ba fihla lešokeng la Sinai. Ba hloma mešaša go lebana le thaba ya Sinai, *** gomme Moshe a rotogela thabeng go kopana le Modimo. Morena a mmolediša a le thabeng, a mmotša gore a botše Baisraele, ditlogolo tša Jakobo, a re: “Le bone se nna, Morena, ke se dirilego Baegepeta, le ka mo ke le kukilego bjalo ka ntšu e belege matswiana a yona mafegong, gomme ka le tliša fa go nna. Bjale, ge le ka ntheeletša gabotse mme la botegela kgwerano ya ka, le tla ba setšhaba sa ka se se kgethilwego gare ga ditšhaba ka moka. Lefase lohle ke la ka, eupša lena le tla ba setšhaba se se kgethetšwego nna ke nnoši, gomme le tla ntlhankela le le baprista.” Ke gona Moshe a fologilego a kgobokanya bagolo ba setšhaba, a ba botša tšohle tše Morena a mo laetšego tšona. Ke moo setšhaba ka moka se fetotšego mmogo sa re: “Re tla dira tšohle tše Morena a re boditšego tšona.” Moshe a begela Morena taba ye. Morena a re go Moshe: “Ke tla theogela go wena ka sepipa sa leru, gore setšhaba se nkwe ge ke bolela le wena, ba tle ba go kgolwe go tloga bjale.” Moshe a botša Morena ka moo setšhaba se fetotšego ka gona. Morena a re go yena: “Eya go setšhaba o ba botše gore lehono le ka moswane ba hlwe ba itlhwekiša. Ba hlatswe diaparo tša bona, ba itokišetše letšatši le le latelago letšatši la ka moswane. Ka lona letšatši leo ke tla theogela thabeng ya Sinai mo setšhaba ka moka se ka kgonago go mpona. Dira mollwane go dikologa thaba, mme o botše setšhaba se hlokomele gore se se ke sa namela thaba, ešita le go e batamela. Yo a tlago gata thaba o tla hwa lehu; go se be le yo a mo kgwathago ka seatla, eupša a bolawe ka maswika, goba a thunywe ka mesebe – e ka ba seruiwa goba motho – se se ke sa phela. E tla re ge phalafala e lla, e be gona batho ba namelelago thabeng.” Ke gona Moshe a fologilego thaba gomme a tsebiša setšhaba gore se itlhwekiše. Ka fao ba hlatswa diaparo tša bona, mme Moshe a re go bona: “Itokišetšeng letšatši le le latelago letšatši la ka moswane, gomme monna a se ke a robala mosadi lebakeng le.” Goseng ga letšatši la boraro thabeng gwa ba medumo le dikgadima, sepipa sa leru sa rotoga, gomme phalafala ye maatla ya galagala. Setšhaba ka moka mešašeng sa thothomela ka letšhogo. Moshe a ba hlahla ba tšwa mešašeng go gahlana le Modimo, gomme ba ema tlase ga thaba. Thaba ka moka ya Sinai e be e pipeditšwe ke muši, gobane Morena o be a theogetše godimo ga yona ka mollo. Muši o be o kuelelela godimo bjalo ka muši o etšwa leubeng, gomme setšhaba ka moka sa tlekatleka o šoro. Go lla ga phalafala gwa galagala go eya. Moshe a bolela, gomme Modimo a mo fetola ka modumo. Morena a fologela ntlheng ya thaba ya Sinai, a bitša Moshe gore a namelele thabeng. Moshe a namelela, gomme Morena a re go yena: “Theogela tlase o yo botša setšhaba gore se se ke sa šwahla mollwane gore se mpone, ka gore ba ka hwa ka bontši. Le bona baprista ba ba mpatamelago ba itlhwekiše, gore ke se ba hlokofatše.” Moshe a re go Morena: “Setšhaba ga se dumelelwe go namela thaba ye, gobane wena mong o re boditše gore re tšee thaba ye e le ye kgethwa, le gore re e beele mollwane.” Morena a mo fetola a re: “Theoga, o boe le Arone. Fela baprista le setšhaba ba se ke ba šwahla mollwane go rotogela go nna, gore ke se ba hlokofatše.” Moshe a theogela go setšhaba a se botša tše Morena a di boletšego. Modimo o boletše a laya setšhaba a re: “Ke nna Morena Modimo wa gago yo a go ntšhitšego Egepeta, mo o bego o le lekgoba. “O se ke wa direla modimo wo mongwe ka ntle ga ka. “O se ke wa itirela seswantšho sa selo se sengwenyana sa legodimong, goba sa lefaseng, goba sa ka meetseng ka fase ga lefase. O se ke wa di obamela goba wa di direla, gobane ke nna Morena Modimo wa gago, Modimo yo a sa kgotlelelego tirelo ya medingwana ya diswantšho. Ke otla ba ba ntlhoilego le ditlogolo tša bona, ka latišiša go fihlela molokong wa boraro le wa bone. Eupša diketekete tša meloko ya bao ba nthatago, ba phethago melao ya ka, ke di direla ka lerato. “O se ke wa goboša leina la ka, gobane nna, Morena Modimo wa gago, ke tla otla yoo a gobošago leina la ka. “Hlompha Sabatha mme o se kgethwafatše. Ka matšatši a a selelago o dire mediro ya gago ka moka, fela letšatši la bošupa ke la go khutša, le kgethetšwe nna, Modimo wa gago. Ka lona o se ke wa dira modiro ofe le ofe – wena, goba ngwana wa gago, goba lekgoba la gago, goba seruiwa sa gago, goba mofaladi yo a dulago nageng ya geno. Ka matšatši a a selelago nna, Morena, ke dirile lefase le legodimo le mawatle le tšohle tše di lego go tšona, eupša ka letšatši la bošupa ka khutša. Ke ka baka leo nna, Morena, ke šegofaditšego letšatši la Sabatha ka le dira le lekgethwa. “Hlompha tatago le mmago gore o phele nako ye telele nageng ye nna, Morena Modimo wa gago, ke go fago yona. “O se ke wa bolaya. “O se ke wa otswa. “O se ke wa utswa. “O se ke wa bolela bohlatse bja maaka ka yo mongwe. “O se ke wa duma ngwako wa yo mongwe. O se ke wa duma mosadi wa gagwe, goba lekgoba la gagwe, goba kgomo ya gagwe, goba pokolo ya gagwe, goba se sengwe se e lego sa gagwe.” Ya re ge setšhaba se ekwa medumo le segalo sa phalafala mme ba bona dikgadima le thaba e kuela muši, ba thothomela ka poifo, ba emela kgole. Ba re go Moshe: “A e be wena o bolelago le rena, hle, re tla theeletša; a e se be Modimo a bolelago le rena, re se tlo hwa.” Moshe a ba fetola a re: “Se boifeng; Modimo o tletše fela go le leka le go le tiišetša gore le fele le mmoifa, mme le se senye.” Eupša setšhaba sa fela se emetše kgole, ya ba Moshe fela a batamelago leru leo le leso mo Modimo a bego a le gona. Morena o laetše Moshe gore a botše Baisraele a re: “Le iponetše ka bolena gore nna, Morena, ke boletše le lena ke le legodimong. Le se ke la itirela medimo ya silibera goba ya gauta go e khunamela legatong la go khunamela nna. O ntirele aletare ya mobu, gomme godimo ga yona o dire dihlabelo ka dihuswane tša gago le dikgomo tša gago e be dihlabelo tša go tšhungwa ka moka le dihlabelo tša kagišano. Lefelong le lengwe le le lengwe leo ke tlago go kgethela go ntirela go lona, ke tla tla go wena ka go šegofatša. Ge o ntirela aletare ya matlapa o se ke wa e aga ka matlapa a a betlilwego, gobane ge o betla matlapa, o a a tšhilafatša. O se ke wa nkagela aletare ye e namelelwago ka manamelo; ge o ka dira bjalo, o tla bonelwa ge o rotoga ka manamelo.” “Šedi ditaelo tše o swanetšego go di fa Baisraele: Ge o reka lekgoba le e lego Moheberu, le go hlankele nywaga ye e selelago. Ka ngwaga wa bošupa a lokollwe a sa lefe selo. Ge a be a se a nyala ge a thoma go go hlankela, a se sepele le mosadi ge a tloga; eupša ge a be a nyetše ge a eba lekgoba la gago, gona a tloge le mosadi wa gagwe. Ge mong wa gagwe a mo nyadišitše mosadi, gomme mosadi yoo a mmelegela barwa goba barwedi, gona mosadi le bana ba gagwe ke ba mong, gomme monna a tloge a nnoši. Fela ge monna wa lekgoba a ka ikana gore o rata mong wa gagwe le mosadi wa gagwe le bana ba gagwe, ka gona ga a nyake go lokollwa, gona mong wa gagwe a tsene naye felo ga tirelo. Fao a mmapetše le lemati goba serepodi, gomme a mo phule tsebe ka tšhwana. Gona mohlanka e tla ba lekgoba la mong wa gagwe bophelo ka moka. “Ge monna a ka rekiša morwedi wa gagwe gore e be lekgoba, morwedi a se ke a rekollwa bjalo ka makgoba a banna. Ge morwedi a ka rekišetšwa monna yo a mmeeleditšego, fela monna yoo a ikhwetša a sa rate mosadi yo, gona morwedi a rekollelwe go tatagwe; mong wa gagwe ga a na tokelo ya go mo rekiša setšhabeng se šele, ka ge monna yoo a forile mosadi yoo. Ge monna a ka rekela morwagwe lekgoba la mosetsana, a monna yoo a sware mosetsana mo nkego ke morwediagwe. Ge monna a ka nyala mosadi wa bobedi, a fele a efa mosadi wa pele dijo le diaparo le ditokelo tša nyalano bjalo ka mehleng. Ge monna a sa phethe ditshwanelo tše tharo tše, gona mosadi yoo a tloge a lokologile, monna a sa lefiwe selo.” “Motho yo a ka itiago yo mongwe a hwa, le yena a bolawe. Fela ge a bolaile yo mongwe e se ka boomo, e le tiro tša ka, nna, Modimo, gona a ka no tšhabela mo nna, Morena, ke tlago mo laolela gona. Fela ge motho a ka rera yo mongwe a mmolaya ka boomo, le yena a bolawe, le ge a ka tšhabela aletareng ya ka gore a lotege. “Motho yo a itiago tatagwe goba mmagwe, a bolawe. “Motho yo a utswago yo mongwe go mo rekiša, goba go mo dira lekgoba, a bolawe. “Motho yo a rogago tatagwe goba mmagwe, a bolawe. “Ge batho ba elwa gomme motho a itia yo mongwe ka leswika goba ka letswele, fela a se hwe, yo bjalo motho a se otlwe. Ge monna yo a iteilwego a ka ikoka a robetše, fela ka morago a tielela, a totobela ka ntle le ge e le ka go ikokotlela ka lehlotlo, moitei wa gagwe a se ke a bonwa molato, fela a lefele nako ya ge moiteiwa a be a robetše, mme a be a bone gore o folela sa ruri. “Ge motho a ka itia lekgoba la gagwe la monna goba la mosadi ka molamo, gomme lekgoba la hwa semeetseng, mmolai yoo a otlwe. Fela ge lekgoba le ka se hwe, gwa ba gwa feta letšatši goba a mabedi, mong wa lekgoba a se ke a otlwa, ka gobane lekgoba leo ke thoto ya gagwe. “Ge banna ba ka re ba elwa, ba thula mosadi wa moimana gomme mpa ya senyega, eupša yena mosadi a se gobale ka mokgwana wo mongwe, monna yo a gobaditšego moimana yoo a lefišwe ka mo monna wa mosadi yoo a nyakago ka gona le baahlodi ba dumelago. Fela ge eba moimana a gobetše, gona kotlo e ebe ya go lefeletša bophelo ka bophelo, leihlo ka leihlo, leino ka leino, seatla ka seatla, leoto ka leoto, mollo ka mollo, ntho ka ntho, mogogoma ka mogogoma. “Ge motho a ka fahla lekgoba la gagwe la monna goba la mosadi mme a le gonya leihlo, a motho yoo a lokolle lekgoba leo e le tefelo ya leihlo. Ge motho a ka re a itia lekgoba a le kgola leino, a lokolle lekgoba leo e le tefelo ya leino.” “Ge poo e ka hlaba motho ya mmolaya, poo yeo e bolawe ka maswika, mme nama ya yona e se ke ya lewa; mong wa yona yena a tšwe molatong. Eupša ge poo yeo e tsebja e ehlwa e hlaba batho, gomme mong wa yona a lemošitšwe taba ye fela a sa e diše, gomme ya bolaya motho, e bolawe ka maswika, mong wa yona le yena a bolawe. Fela ge mong wa yona a ka dumelelwa go ntšha setseka gore a phele, a a lefe tefelo ka moka ya molato yeo a e lefišwago. Ge poo e ka bolaya mošemanyana goba mosetsana, a go dirišwe wona molao wo. Ge poo e ka bolaya lekgoba la monna goba la mosadi, mong wa yona a lefe mong wa lekgoba dipapetlana tša silibera tše masome a mararo, gomme yona e bolawe ka maswika. “Ge motho a ka khurumolla molete goba a epa molete a se o khurumele, gomme poo goba pokolo ya yo mongwe ya wela ka gare, motho yoo a lefele seruiwa seo. A lefe mong wa sona ka tšhelete, gomme yena a šale le setoto. Ge poo ya motho e ka bolaya ya yo mongwe, banna ba babedi bao ba rekiše poo ye e phelago, mme ba arogane tšhelete ya thekišo; ba arogane le nama ya kgomo ye e bolailwego. Eupša ge go tsebja gore poo yeo e tlwaetše go hlaba, gomme mong wa yona a se e diše, mong yoo a lefe yo a lobilego ka poo ye e phelago, yena a šale le setoto.” “Ge motho a ka utswa kgomo goba nku gomme a e bolaya goba a e rekiša, a lefe kgomo yeo ka kgomo tše tlhano, mme nku yeo ka dihuswane tše nne.” “A lefele se a se utswitšego. Ge a se ne selo, a rekišwe e be lekgoba go lefa se a se utswitšego. Ge seruiwa se se utswitšwego – e ka ba kgomo goba pokolo goba nku – se ka hwetšwa diatleng tša gagwe se sa phela, a lefe se tee ka tše pedi. “Ge lehodu le ka hwetšwa le thuba ntlo bošego mme la bolawa, yo a le bolailego ga a ne molato wa polao. Fela ge e le mosegare o na le molato wa polao. *** *** “Ge motho a ka re a fudiša diruiwa mo tšhemong goba serapeng sa merara a di lesa tša ja tšhemong ya yo mongwe, mong wa tšona a lefe tshenyegelo ya yo mongwe yoo ka tše kaonekaone tša tšhemong ya gagwe goba tša ka serapeng sa gagwe sa merara. “Ge motho a ka re a goditše mollo tšhemong ya gagwe, mollo wa tšhuma hlaga wa tshelela tšhemong ya yo mongwe gomme wa tšhuma mabele lehlakeng, goba ao a kgobetšwego, goba wa tšhuma tšhemo, yoo a goditšego mollo a lefele tshenyegelo ka moka. “Ge motho a ka re a neetše yo mongwe tšhelete goba dilo tše dingwe tša mohola gore a mo lotele tšona, tša utswiwa ngwakong wa gagwe gomme lehodu la swarwa, a le lefe selo se tee ka tše pedi. Eupša ge lehodu le sa swarwe, motho yoo a bego a lotile tšeo tša mohola a tlišwe felo ga tirelo, mme fao a ene gore ga se a utswa dilo tšeo tša yo mongwe. “Ge batho ba bakišana dilo, e ka ba kgomo, goba pokolo, goba nku, goba seaparo, goba se sengwe se se timetšego, a babakišani ba tlišwe felo ga tirelo. Yo Modimo a mo hwetšago molato a lefe yo mongwe yola gabedi. “Ge motho a ka re a fišitše yo mongwe pokolo, goba kgomo, goba nku, goba seruiwa se sengwe, seruiwa seo sa hwa, goba sa gobala, goba sa thopša ke manaba, mme gwa hlokega hlatse, mofišetšwa a ye felo ga tirelo gomme a ene gore ga se a utswa seruiwa sa yo mongwe yoo. Ge seruiwa se se sa utswiwa, mong wa sona a dumele mofišetšwa gomme mofišetšwa a se ke a lefa selo; eupša ge seruiwa se utswitšwe diatleng tša mofišetšwa, mofišetšwa a lefe mong. Ge seruiwa se bolailwe ke dibata, motho a tliše mašaledi gore e be bohlatse; a se ke a lefa se se bolailwego ke dibata. “Ge motho a adimile seruiwa go yo mongwe, gomme seruiwa sa gobala goba sa hwa mong wa sona a se gona, motho yoo a se lefe. Fela ge seo se ka direga mong wa seruiwa a le gona, moadingwa a se ke a lefa. Ge seruiwa se adimilwe ka tšhelete, tahlegelo e lefše ka tefo ya kadimo.” “Ge monna a ka pateletša kgarebe ye e sego ya beeletšwa a e robala, a ntšhe magadi a nyale kgarebe yeo. Fela ge tatagokgarebe a ka tloge a mo ganetša go mo nyala, gona monna yoo a lefe tatagokgarebe tšhelete ye e lekanego magadi a kgarebe. “Mosadi yo a loyago a bolawe. “Monna yo a robalago phoofolo, a bolawe tho. “Motho yo a direlago modimo wo mongwe dihlabelo ka ntle ga ka, le yena a bolawe tho. “O se ke wa tlaiša goba wa gatelela mofaladi; gopola gore le lena le be le le bafaladi Egepeta. Le se ke la tlaiša bahlologadi goba ditšhuana. Ge le ka ba tlaiša, nna, Morena, ruri ke tla ba araba ge ba ntelela ba nyaka thušo, ke tla tuka bogale ka le bolaya ntweng. Gomme basadi ba lena ba tla fetoga bahlologadi, le bana ba lena ya ba ditšhuana. “Ge o ka adima modiidi tšhelete setšhabeng sa ka, o se ke wa etša baadimiši ba ditšhelete, wa re e boe e tsweše. Ge o ka tšeela yo mongwe kobo e le setlemo sa gore a go lefe, o mmušetše yona pele ga ge letšatši le sobela, gore a se ke a bolawa ke phefo, gobane ke sona seaparo sa gagwe se nnoši. Kgane wena o re a robale ka eng? Ge a ntelela ke tla mo thuša, gobane nna ke yo botho. “O se ke wa nyatša Modimo, le gona o se ke wa rogaka moetapele wa setšhaba sa geno. “O mphe ka pelo ka moka kabelo ye e tšwago mabeleng a gago, le beineng ya gago, le makhureng a gago a mohlware ka mabaka a gona. “O nkabele morwa wa gago wa leitšibolo. O nkabele maitšibolo a dikgomo tša gago le a dihuswane tša gago. Leitšibolo la pholwana le hlwe le mmagolona matšatši a a šupago, gomme ka letšatši la seswai o nkabele lona. “Ke lena batho ba ka ba bakgethwa, ka gona le se ke la ja nama ya seruiwa se se bolailwego ke dibata; nama ye bjalo le e fe dimpša. “O se ke wa phatlalatša mabarebare a maaka. O se thuše motho yo a rwelego molato ka bohlatse bja maaka. O se ke wa ya le mogofe ge o dira phošo goba ge o hlatsela ka maaka go kgopamiša toka. O se ke wa emelela modiitšana tshekong e le ka ge e le modiitšana. “Ge o ka bona kgomo goba pokolo ya lenaba la gago e timela, o e bušetše go mong wa yona. Ge pokolo ya yo a go hloilego e pharame ka morwalo, o thušane le mong wa yona go e tsoša; o se ke wa no feta. “O se ke wa pateletša mohloki tshekong. O se rweše motho molato ka maaka. O se bolaye motho yo a se nago molato, gobane ge o ka mmolaya, ke tla go bona molato. O se ke wa amogela tsogolekobong, gobane tsogelekobong le foufatša motho yo a bonago therešo gabotse, mme a senyeletša ba ba se nago molato. “O se ke wa tlaiša mofaladi; lena ka noši le a tseba gore go bjang go ba mofaladi, gobane le be le le bafaladi Egepeta.” “Mengwageng ye e selelago o leme tšhemo ya gago gomme o kgobele tše o di bunnego. Eupša ka ngwaga wa bošupa o e ladiše, o se bune selo se se hlogago go yona. Badiitšana ba bune se se melago moo, le diphoofolo tša naga di fule ka boithatelo. Le dirapeng tša gago tša merara le mehlareng ya gago ya mehlware o dire bjalo. “O šome ka matšatši a a selelago, eupša ka la bošupa o se šome, gore makgoba le bafaladi ba ba go šomelago, le tšona diruiwa tša gago, ba khutše. “Le ele hloko tšohle tše nna, Morena, ke le boditšego tšona. Le se ke la rapela medimo ye mengwe; le ona maina a yona le se ke la a bolela.” “O ntirele menyanya ye meraro mo ngwageng. Mo kgweding ya Abibi, kgwedi ye o tšwilego ka yona Egepeta, o dire Monyanya wa Dinkgwa tše di se nago komelo, ka moo ke go laetšego ka gona. Mo matšatšing a a šupago a monyanya wo o se je dinkgwa tše di hlabegilwego. O se ke wa tla go nkhunamela o se wa ntshwarela kabelo. “O bine Monyanya wa Puno nakong ya ge o thoma go buna. “O bine Monyanya wa Kgobelo lehlabula ge o kgobela dienywa tša gago mašemong. Ngwaga ka ngwaga, menyanyeng ye meraro ye, banna ba geno bohle ba tle go ntirela, nna, Morena Modimo. “Ge o ntirela sehlabelo o se se tliše gotee le senkgwa se se nago le komelo. Makhura a diruiwa tše di hlabilwego menyanyeng ye a se ke a latšwa go fihlela ka la ka moswane. “Dithakangwaga tše kaonekaone tša ka mašemong a gago o di tliše ntlong ya Morena Modimo wa gago. “O se ke wa apea kwanyana goba putšanyana ka maswi a mmayo.” “Bona, ke tla go romela morongwa a go eta pele go go šireletša tseleng le go go goroša felo fa ke go lokišitšego. O mo ele hloko, o mo theeletše. O se mo nyatše; o romilwe ke nna, gomme a ka se kgotlelele lenyatšo. Fela ge o ka tloga o mo theeletša, wa dira tšohle tše ke go laelago tšona, ke tla go lwela manabeng a gago ka moka. Morongwa wa ka o tla go eta pele, a go goroša nageng ya Baamore le Bahete le Baperise le Bakanana le Bahibe le Bajebuse, gomme ke tla ba thubaganya. O se ke wa obamela medimo ya bona, goba wa e khunamela, goba wa latela ditlwaedi tša bona. Medimo ya bona o e pšhatlaganye, o pšhatlaganye le dikokwane tša bona tša borapedi tša maswika. Ge le nkhunamela, nna, Morena Modimo wa lena, ke tla le šegofatša ka dijo le meetse, gomme ka tloša malwetši ka moka gare ga lena. Mo nageng ya gabolena go ka se be le mosadi yo a senyegelwago ke mpa, goba wa moopa. Ke tla le phediša galelele. “Ke tla dira gore batho ba ba le lwantšhago ba tšhoge nna; ke tla dira gore batho ba le lwago nabo ba gakanege, ka ba ka dira gore manaba a lena a hlanole direthe. Ke tla tšhoša manaba a lena; ke tla leleka Bahibe le Bakanana le Bahete ge le goroga. Nka se ba leleke ka ngwaga o tee gore naga e se tlo fetoga lešoka, gomme diphoofolo tša naga tša le bekiša. Ke tla ba leleka gannyane gannyane, go fihlela le atafetše, naga e eba ya lena. Ke tla dira gore mellwane ya naga ya lena e thome kgogometšaneng ya Akaba e fihle nokeng ya Yufratese, e tloge Lewatleng la Mediteraniene e sobelele lešokeng. Ke tla le fa maatla gore le fenye badudi ba naga yeo, gomme le tla ba leleka ge le goroga. Le se ke la dira kgwerano le bona goba le medimo ya bona. Le se ke la ba dumelela go dula nageng ya lena. Ge le ka ba dumelela, ba tla le diriša sebe pele ga ka. Mohla le khunamelago medimo ya bona, le tsebe gore le wetše molabeng.” Morena o rile go Moshe: “Rotogela go nna thabeng o na le Arone le Nadaba le Abihu le bagolo ba Baisraele ba masome a a šupago, gomme le obame le le kgojana. Wena o le noši o mpatamele, ba bangwe bona ba se mpatamele. Setšhaba sona se se ke sa namela thaba.” Moshe o ile a tloga a botša setšhaba ditaelo ka moka tša Morena, gomme setšhaba sa fetola setee sa re: “Re tla dira tšohle tše Morena a di boletšego.” Moshe a ngwala ditaelo tšohle tša Morena. Ka le le latelago a tsogela go aga aletare tlase ga thaba, a ba a tsema mabje a lesome le a mabedi, le lengwe le le lengwe la emela kgoro ya Israele. A roma masogana ba ya ba direla Morena dihlabelo tša go tšhungwa ka moka, mme ka dipoo ba dira dihlabelo tša kagišano. Moshe a arola madi a diruiwa a a tšhela ka meruswing; a tšea madi a a šetšego a foka aletare ka ona. A tšea puku ya kgwerano, ye e bego e ngwadilwe ditaelo tša Morena, a e balela setšhaba ka go hlaboša. Ba bolela ba re: “Re tla theeletša Morena, ra dira tšohle tše a re laetšego tšona.” Moshe a napa a tšea madi ale a ka meruswing a foka setšhaba ka ona a re: “A ke madi a go tiišetša kgwerano ye Morena a e dirilego le lena ge a le fa ditaelo tše ka moka.” Moshe le Arone le Nadaba le Abihu le bagolo ba Israele ba masome a a šupago ba namelela thabeng, mme ba bona Modimo wa Baisraele. Ka fase ga nao tša gagwe go be go ikadile se ekego lebato la magakabje a safire, a botala bja legodimo. Modimo o ile a se ke a dira baetapele ba ba Baisraele selo; ba bone Modimo, gomme ba ja, ba nwa. Morena a re go Moshe: “Namelela thabeng o tle go nna, mme ge o na le nna mo ke tla go neela matlapa ao godimo ga ona go ngwadilwego melao le ditaelo tše ke di ngwaletšego go ruta setšhaba.” Moshe le mothuši wa gagwe, Joshua, ba itokiša, mme Moshe a thoma go namelela thabeng ye kgethwa. Moshe a re go bagolo ba setšhaba: “Re leteleng mo mešašeng go fihlela re boa. Arone le Hure ba na le lena mo; motho yo a nago le taba ye a ratago e rerwa a ka ya go bona.” Moshe a namelela thabeng ya Sinai, gomme leru la pipetša thaba. Seetša se se fahlago sa letago la Morena sa theogela thabeng; go Baisraele seetša seo e be eke ke mollo wo o laumago godimo ga thaba. Leru la pipetša thaba matšatši a a selelago, gomme ka letšatši la bošupa Morena, a le gare ga leru, a bitša Moshe. *** Moshe a namelela thabeng a tsena lerung. A ba fao thabeng matšatši a masome a mane le mašego a ona. Morena a re go Moshe: “Botša Baisraele ba ntlišetše dikabelo. Le amogele dikabelo tšeo go motho yo mongwe le yo mongwe yo a ratago go ntlišetša tšona. Šedi dikabelo tše le swanetšego go di tliša: gauta le silibera le mphiri; mašela a boletiana; wulu ya botala bja legodimo le ya bohubedu bja moretele le ya bohubedu bja madi; lešela le le dirilwego ka boya bja dipudi; matlalo a dikgapa a a tloditšwego ka letsoku; mekgopana e boletiana; dikota tša mogohlo; makhura a go tukiša mabone; dinoko tša makhura a tlotšo le tša seorelo sa go nkga bose; dikarneliene le magakabje a mangwe a go rokelelwa seaparong se sekgethwa sa Moprista yo Mogolo le phaphathianeng ya sehubeng sa gagwe. A setšhaba se ntirele tente ye kgethwa, gore ke tle ke dule gare ga bona. O dire tente le ditlabakelo tšohle tša yona go ya ka leano le ke tlago go laetša lona.” “Botša batho ba betle polokelo ka dikota tša mogohlo, e be ya disentimetara tše 115 botelele, le bophara bja disentimetara tše 69, le bogodimo bja disentimetara tše 69. Polokelo o e manege ka ntle le ka gare ka gauta ye e sego ya tswakwa, mme o e direle morumo wa gauta go e dikologa. O dire mekgoko ye mene ya gauta, mme o e kgokelele maotwaneng a yona ka mane, mekgoko ye mebedi lehlakoreng le lengwe le lengwe. O betle mapara a go rwala ka dikota tša mogohlo, mme le ona o a manege ka gauta, o a tsenye mekgokong ya ka mahlakoreng a polokelo. Mapara a dule a le mekgokong a se ke a ntšhwa. Ke moka o nokele matlapa ka polokelong a ke tlago go fa ona, ao go ona go ngwadilwego melao. “O dire sekhurumelo ka gauta ye e sego ya tswakwa, sa disentimetara tše 115 botelele le disentimetara tše 69 bophara. O bope bakerubi ba babedi ka gauta ye e rutšwego. Mokerubi o tee o mmee ka mafelelong a mangwe a sekhurumelo, yo mongwe o mmee ka mafelelong a mangwe a sona. O dire gore ba kgomagane le sekhurumelo. Bakerubi bao ba lebane ka difahlego go putla sekhurumelo, gomme diphego tša bona di phurologele godimo di pipetše sekhurumelo. O nokele matlapa ao ka polokelong, gomme o e khurumele ka sekhurumelo. Nna ke tla go gahlanetša moo polokelong ka go fa melao ya ka ka moka ye e amago Baisraele ke le godimo ga sekhurumelo, kgathe ga bakerubi bao ba babedi.” “O betle tafola ka dikota tša mogohlo, e be ya botelele bja disentimetara tše 92, le bophara bja disentimetara tše 46, le bogodimo bja disentimetara tše 69. O e manege ka gauta ye e sego ya tswakwa, gomme o e direle morumo wa gauta go e dikologa. O dire lepanta la bophaphathi bja dimilimetara tše 75 go e dikologa, gomme o bee morumo wa gauta go dikologa lepanta leo. O e direle mekgoko ye mene ya gauta ya go e rwala, o e kgokelele dikhutlong ka dine maotwaneng. Mekgoko ya go swara mapara a go rwala tafola e kgokelelwe kgauswi le lepanta. O betle mapara a ka dikota tša mogohlo, gomme o a manege ka gauta. O dire meruswi, megopo, diphafana, le digo tša go tšhela dikabelo tša dino. Dibjana tše ka moka di dirwe ka gauta ye e sego ya tswakwa. Tafola e bewe pele ga Polokelo ya Kgwerano, gomme godimo ga tafola ka mehla go be le dinkgwa tše kgethwa tšeo di abetšwego nna.” “O dire sehlomamabone ka gauta ye e sego ya tswakwa. O dire bogato bja sona le thito ya sona ka gauta ye e rutšwego; matšoba a go se kgabiša gotee le matšoba a a sego a khukhuša le matlakala a ona e be selo se tee le bogato le thito. Makabe a a selelago a tšwe ka mathoko a thito, a mararo ka thoko e tee. Lekabe le lengwe le le lengwe la ona ao a selelago le be le matšoba a mararo a go le kgabiša a sebopego sa letšoba la moalmone, le matšoba a a sego a khukhuša, le matlakala a ona. Thito ya sehlomamabone e be le matšoba a mane a go e kgabiša a sebopego sa letšoba la moalmone le matšoba a a sego a khukhuša le matlakala a ona. Go be le letšoba le le sego la khukhuša ka fase ga makabe a mangwe le a mangwe a mabedi. Matšoba a a sego a khukhuša le makabe le sehlomamabone e be selo se tee sa gauta ye e rutšwego ye e sego ya tswakwa. O dire mabone a a šupago a sehlomamabone, gomme o a hlome gore a bonegele pele. Ditlao tša sona le dibjana tša sona tša magala e be tša gauta ye e sego ya tswakwa. O diriše gauta ye e sego ya tswakwa ya boima bja dikilokramo tše masome a mararo go dira sehlomamabone le ditlabakelo tše ka moka. O hlokomele gore o di dire go ya ka leano le ke go laeditšego lona kua thabeng.” “Tente ye kgethwa, Tente ya bodulo bja Morena, o e dire ka diripa tše lesome tša lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi. O di logelele mekgabišo ya diswantšho tša bakerubi. O lekalekanye diripa tšeo e be tša dimetara tše 12,9 botelele, le bophara bja dimetara tše 1,8. O rokaganye diripa tše tlhano e be thokaganyo e tee, gomme tše dingwe tše tlhano o di rokaganye ka wona mokgwa woo. O dire digole tša lešela la botala bja legodimo morumong wa seripa sa ka ntle thokaganyong tše pedi. Mo seripeng sa mathomo sa thokaganyo ya mathomo o rokelele digole tše masome a mahlano, mo go sa mafelelo sa thokaganyo ya bobedi le gona o rokelele digole tše masome a mahlano, di lebane. O dire dikgwaetšo tša gauta tše masome a mahlano tša go kgokaganya dithokaganyo tšeo tše pedi gore e be selo se tee. “O direle Tente sepipetši ka diripa tše lesome le setee tša lešela la boya bja dipudi. O lekalekanye diripa tše e be tša dimetara tše 13,8 botelele, le bophara bja dimetara tše 1,8. O rokaganye diripa tše tlhano di dire thokaganyo e tee, gomme diripa tše dingwe tšeo tše di selelago le tšona o di rokaganye thokaganyo ye nngwe. O menaganye seripa sa boselela gabedi mo pele ga Tente. Morumong wa seripa sa mafelelo sa thokaganyo ye nngwe o kgokelele digole tše masome a mahlano, morumong wa ye nngwe thokaganyo le gona o kgokelele digole tše masome a mahlano. O dire dikgwaetšo tša mphiri tše masome a mahlano, mme o di tsenye digoleng go kgohlaganya dithokaganyo tše pedi go dira sepipetši se tee. Seripana se sengwe se se šalago sa sepipetši o se lekeletše ka morago ga Tente. Diripana tše dingwe tša disentimetara tše 46 tše di šalago ka mathoko a mabedi a Tente di lekelele ka moo mathoko go e pipa. “O dire dipipetši tše pedi gape, se sengwe ka matlalo a dikgapa a a tloditšwego ka letsoku, mme se sengwe ka mekgopa ye boletiana gore di pipetše bokantle. “O dire mahlomo a dikota tša mogohlo go thekga Tente. Mahlomo a go thekga e be a dimetara tše 4,6 botelele, le disentimetara tše 69 bophara, le maphakga a mabedi lefateng go swaraganya mahlomo ao a go thekga. Mahlomo ka moka a go thekga a be le maphakga a. O dire mahlomo a go thekga a masome a mabedi lehlakoreng la ka borwa, le mabogato a silibera a masome a mane ka fase ga wona, mabogato a mabedi a le ka fase ga lehlomo le lengwe le le lengwe go swarelela maphakga ka mabedi a lehlomo. O dire mahlomo a go thekga a masome a mabedi a ka leboa la Tente, le mabogato a silibera a masome a mane, a mabedi a le ka fase ga lehlomo le lengwe le le lengwe. Ka lehlakoreng la ka morago, ka bodikela, o dire mahlomo a go thekga a a selelago, le mahlomo a mabedi a go thekga a dikhutlo tša ka morago. Mahlomo a a go thekga a dikhutlo a tlemaganywe go tloga fase go rotoga go fihlela mokgokong wa ka godimo. Mahlomo a mabedi a go thekga a a dirago dikhutlo tše pedi a dirwe ka tsela yeo. Ka gona go tla ba le mahlomo a seswai a go thekga a a nago le mabogato a silibera a lesome le a a selelago, e le a mabedi ka fase ga lehlomo le lengwe le lengwe. “O betle dipalelo tše lesome le tše tlhano ka dikota tša mogohlo, tše tlhano e be tša mahlomo a go thekga a ka thoko ye nngwe ya Tente, tše tlhano e be tša mahlomo a go thekga a ka thoko ye nngwe, mme tše tlhano gape e be tša mahlomo a go thekga a ka thoko ya ka bodikela, ka morago. Palelo ya gare, ye e lego seripagareng sa bogodimo bja mahlomo a go thekga, e tloge mathomong a Tente e fihle mafelelong a yona. O manege mahlomo ao a go thekga ka gauta, gomme o a kgokelele mekgoko ya gauta ya go khwamela dipalelo; le tšona dipalelo di manegwe ka gauta. O hlome Tente go ya ka leano le ke go laeditšego lona kua thabeng. “O dire seširo ka lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi. O e logelele mokgabišo wa diswantšho tša bakerubi. O fege seširo dikoteng tše nne tša mogohlo tše di manegilwego ka gauta, tše di kgokeletšwego dikgwaetšo, di tsemilwe mabogatong a silibera a mane. O kgokelele seširo ka fase ga molokoloko wa dikgwaetšo tlhakeng ya Tente, gomme ka morago ga seširo o bee Polokelo ya Kgwerano ye e swerego matlapa. Seširo se tla aroganya Felo mo Gokgethwa le Felo mo Gokgethwakgethwa. O khurumele Polokelo ya Kgwerano ka sekhurumelo ka Felong mo Gokgethwakgethwa. Ka mo ntle ga Felo mo Gokgethwakgethwa o bee tafola ka thoko ya ka leboa ya Tente, gomme sehlomamabone o se bee ka thoko ya ka borwa go lebana le tafola. “O direle mojako wa Tente seširo ka lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi, e be mologelelo wa mebala wa mekgabišo ya bokgwari. Seširo se o se direle dikota tša mogohlo tše tlhano tše di manegilwego ka gauta mme di kgokeletšwe dikgwaetšo tša gauta; dikota tše o di direle mabogato a mahlano a mphiri.” “O dire aletare ka dikota tša mogohlo. E lekalekane ka thoko tšohle: E be ya dimetara tše 2,3 ka botelele, dimetara tše 2,3 ka bophara, mme bogodimo e be ya dimetara tše 1,4. O dire dinakana dikhutlong ka bone. Di be selo se tee le aletare, gomme aletare ka moka e manegwe ka mphiri. O dire dibjana tša go olelela melora, le digarafo, le meruswi, le diforoko tša mašimelo, le dibjana tša magala. Ditlabakelo tše ka moka di dirwe ka mphiri. O dire papetla ya mphiri, gomme o e khwamele mekgoko ye mene ya mphiri ya go e kuka dikhutlong tša yona. O bee papetla ye ka fase ga morumo wa aletare gore e be gare ga bogodimo bja aletare. O betle mapara a go rwala ka dikota tša mogohlo, mme o a manege ka mphiri; ona o a tsenye mekgokong ka mahlakoreng a mabedi a aletare ge e rwalwa. O dire aletare ka diphaphathi, gomme e be lehoa, go ya ka leano le ke go laeditšego lona kua thabeng.” “O age kgoro ya Tente ya bodulo bja ka ka legora la diširo tša lešela le boletiana. Ka lehlakoreng la ka borwa diširo e be tša dimetara tše 46 botelele, mme di lekeletšwe dikoteng tše masome a mabedi tša mphiri tše di lego mabogatong a masome a mabedi a mphiri ka dikgwaetšo le mapheko a silibera. Le ka lehlakoreng la ka leboa la kgoro o dire ka yona tsela yeo. Ka lehlakoreng la ka bodikela go be le diširo tša dimetara tše 23 botelele, di lekelele dikoteng tše lesome tše di tsemilwego mabogatong a lesome. Le ka bohlabela, mo go lego mojako wa Tente, le gona kgoro e be ya bophara bja dimetara tše 23. Ka thoko ye nngwe le ye nngwe ya mojako go be le diširo tša dimetara tše 6,9 tše di lekelelago dikoteng tše tharo tše di tsemilwego mabogatong a mararo. *** Mo mojakong go lekelele seširo sa dimetara tše 9,2 botelele se se dirilwego ka lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi, e be mologelelo wa mebala ya mekgabišo ya bokgwari. Seširo se thekgwe ka dikota tše nne tše di tsemilwego mabogatong a mane. Dikota ka moka tša kgoro go dikologa di kopanywe ka mapheko a silibera; dikgwaetšo tša tšona e be tša silibera mme mabogato a tšona e be a mphiri. Kgoro e be ya dimetara tše 46 botelele, le dimetara tše 23 bophara, le dimetara tše 2,3 bogodimo. Diširo di dirwe ka lešela le boletiana, mme mabogato e be a mphiri. Ditlabakelo ka moka tše di dirišwago Tenteng le dibapola ka moka tša Tente le kgoro di dirwe ka mphiri.” “O laele setšhaba sa Israele go go tlišetša makhura a mohlware a a sego a tswakwa a sehlomamabone a mabotsebotse, gore mabone a fele a tuka bošego bjo bongwe le bjo bongwe. Arone le barwa ba gagwe ba a gotetše ka Tenteng ya bodulo bja ka ka ntlenyana ga seširo sa ka pele ga Polokelo ya Kgwerano. Gona moo pele ga Morena mabone a tuke bošego ka moka go fihlela go esa. Taelo ye e phethwe ke Baisraele le ditlogolo tša bona ka mehla go ya go ile.” “Bitša Arone, morwarrago, le barwa ba gagwe, Nadaba, Abihu, Eleasara le Ithamara. O ba hlaole setšhabeng sa Israele, gore ba ntirele e le baprista. O rokele Arone, morwarrago, diaparo tše dikgethwa, gore a be le serithi le botšhepi. O bitše bomakgone ka moka ba ke ba filego bokgoni, o ba botše ba rokele Arone diaparo a tle a bewe moprista wa go ntirela. O ba botše ba dire phaphathiana ya sehubeng, le seaparo se sekgethwa, le phurabura, le hempe ye e kgabišitšwego, le tuku ya hlogo, le lepanta la bodiredi. A ba rokele morwarrago Arone le barwa ba gagwe diaparo tše dikgethwa tše, gore bona ba ntirele e le baprista. Bomakgone ba roke tša wulu ya botala bja legodimo, le ya bohubedu bja moretele, le ya bohubedu bja madi, le tlhale ya gauta, le lešela le boletiana. “Ba roke seaparo se sekgethwa ka wulu ya botala bja legodimo, le ya bohubedu bja moretele, le ya bohubedu bja madi, le ka tlhale ya gauta, le ka lešela le boletiana, e be mologelelo wa mekgabišo ya bokgwari. Mapantana a mabedi a go tlemelela seaparo se sekgethwa magetleng a rokelelwe ka mathoko. Lepanta le le logilwego gabotse le dirilwego ka tšona dilo tšeo le logelelwe seaparong se sekgethwa sehubeng, e be selo se tee le seaparo. O tšee matlapa a mabedi a magakabje a karneliene o a tloke maina a barwa ba lesome le ba babedi ba Jakobo ka go hlatlamana ga bona, maina a a selelago a be letlapeng le lengwe, a mangwe a selelago a be go le lengwe. O nyake mmetli wa magakabje, a tloke maina a barwa ba Jakobo matlapeng ao a mabedi, a a rokelele ka tlhale ya gauta. O a rokelele mapantaneng a mabedi a magetleng a seaparo se sekgethwa go emela dikgoro tše lesome le tše pedi tša Baisraele. Ka tsela ye Arone o tla šikara maina a bona magetleng a gagwe gore nna, Morena, ka mehla ke gopole setšhaba sa ka. O dire merokelelo ye mebedi ya gauta, le diketane tše pedi tša gauta ye e sego ya tswakwa tše di logagantšwego bjalo ka thapo, mme o di rokelele merokelelong yeo.” “O direle Moprista yo Mogolo phaphathiana ya sehubeng gore a e diriše go tseba thato ya Modimo. E dirwe ka dilo tša go swana le tša ge go dirwa seaparo se sekgethwa le mologelelo wa sona. E lekalekane ka thoko tšohle, e menwe gabedi, e be ya disentimetara tše 22 ka botelele, le disentimetara tše 22 ka bophara. O rokelele methalo ye mene ya magakabje go yona; mothalong wa mathomo o rokelele rubi, thopase le garneta; mothalong wa bobedi o rokelele emerale, safire le taamane; mothalong wa boraro o rokelele thekoise, agathe le amethesite; mothalong wa bone o rokelele berile, karneliene le jaspere. Magakabje a a rokelelwe ka tlhale ya gauta. Le lengwe le le lengwe la magakabje a lesome le a mabedi a le tlokwe leina la yo mongwe wa barwa ba Jakobo go emela dikgoro tše lesome le tše pedi tša Baisraele. O dire diketane tša phaphathiana ya sehubeng tše di logagantšwego bjalo ka thapo ka gauta ye e sego ya tswakwa. O dire mekgoko ye mebedi ya gauta, o e rokelele dikhutlong tša ka godimo tša phaphathiana ya sehubeng, mme o tlemelele thapo tšeo tše pedi tša gauta moo mekgokong ka mebedi. O tlemelele dintlha tša dithapo tšeo tše pedi merokelelong yeo ye mebedi, mme ka tsela ye o tlemelele dithapo ka pele mapantaneng a magetleng a seaparo se sekgethwa. Bjale o dire mekgoko ye mebedi ya gauta, o e rokelele dikhutlong tše pedi tša ka fase tša phaphathiana ya sehubeng, momenetšong wa ka gare kgauswi le seaparo se sekgethwa. O dire mekgoko ye mengwe ye mebedi ya gauta, o e rokelele seripeng sa ka fase ka pele mapantaneng ka mabedi a magetleng a seaparo se sekgethwa, kgauswi le morumo le ka godingwana ga lepanta la seaparo se sekgethwa. O tlemaganye mekgoko ya phaphathiana ya sehubeng le ya seaparo se sekgethwa ka thapo ya botala bja legodimo, gore phaphathiana ya sehubeng e be godimo ga lepanta la seaparo se sekgethwa mme e se ke ya hlepha. “Ge Arone a tsena Felo mo Gokgethwa a apare phaphathiana ya sehubeng ye e tlokilwego maina a dikgoro tša Baisraele gore e be kgauswi le pelo ya gagwe, gore nna, Morena, ka mehla ke gopole setšhaba sa ka. O bee Urime le Tumime ka gare ga phaphathiana yeo ya sehubeng, gore di be kgauswi le pelo ya gagwe ge a etla go lebana le nna. Ka mehla ge a lebana le nna, a apare phaphathiana ye ya sehubeng, gore a tsebe thato ya ka go setšhaba sa Israele.” “Phurabura ye e aparwago ka godimo ga seaparo se sekgethwa e rokwe ka wulu ya botala bja legodimo fela. E be le lešoba la go tsenya hlogo, mme lešoba leo le phethwe ka morumo wo o logilwego gore seaparo se se ke sa gagoga. Go dikologa morumo wa ka fase wa phurabura yeo go lekeletšwe mekgabišo ya wulu ya go swana le garenate ya botala bja legodimo, le ya bohubedu bja moretele, le ya bohubedu bja madi, e latelane le ditleloko tša gauta. *** Arone a apare phurabura ye ge a dira modiro wa boprista. Ge a etla pele ga ka Felong mo Gokgethwa goba a etšwa, ditleloko di tla lla tša kwala mme a ka se bolawe. “O dire sekgabišo sa gauta ye e sego ya tswakwa, mme godimo ga sona o tloke mantšu a: ‘Se abetšwe Morena’. O se tlemelele tukung ya hlogo mo phatleng ka thapo ya botala bja legodimo. Arone a dule a se rwele mo phatleng ya gagwe go phumola bošaedi bja Baisraele, gore nna, Morena, ke amogele dikabelo tše ba nkabelago tšona, le ge ba ka dira bošaedi bjo bongwe ge ba nkabela tšona. “O rokele Arone hempe ka lešela le boletiana, le tuku ya gagwe ya hlogo o e dire ka lešela le boletiana, o mo rokele le lepanta la bodiredi le le logeletšwego mekgabišo ya mebalabala. “O rokele barwa ba Arone dihempe, le mapanta a bodiredi, le dikefana ba be le serithi le botšhepi. O apeše Arone, morwarrago, le barwa ba gagwe diaparo tše. E be gona o ba beago baprista le go ba šegofaletša modiro ka go ba tlotša ka makhura a mohlware gore ba ntirele e le baprista. O ba rokele marokgwana ka lešela, a tloge mathekeng a boe diropeng, gore ba se ke ba bonelwa. Arone le barwa ba gagwe ba tšware marokgo a ka mehla ge ba tsena ka Tenteng ya bodulo bja ka, goba ge ba batamela aletare go dira modiro wa boprista Felo mo Gokgethwa, gore ba se ke ba bolawa ka baka la go se tšware ga bona. Molao wo o beetšwe Arone le ditlogolo tša gagwe go ya go ile.” “Sese se o swanetšego go se direla Arone le barwa ba gagwe ge o ba bea baprista ba go ntirela. O hlaole powana e tee le dikgapa tše pedi tše di se nago bosodi. Ka bupi bja matoka bja korong bjo bo se nago komelo o apee dinkgwa tše di hlakantšwego le makhura a mohlware, le dinkgwa tše di se nago makhura a mohlware, le dinkgwana tša diphaphathiana tše di tšhatšhitšwego ka makhura a mohlware. O di nokele ka leselong, gomme o nkabele tšona ge o dira sehlabelo ka powana le dikgapa tše pedi. “O batametše Arone le barwa ba gagwe mojakong wa Tente ya bodulo bja ka, gomme o ba hlapiše ka meetse. Ke moka o apeše Arone diaparo tše dikgethwa – hempe, le phurabura ya seaparo se sekgethwa, le seaparo se sekgethwa, le phaphathiana ya sehubeng, o tlemelele seaparo se sekgethwa sehubeng ka lepanta la sona, o mo rweše tuku ya hlogo, gomme go yona o tlemelele sekgabišo se sekgethwa seo godimo ga sona go tlokilwego mantšu a: ‘Se abetšwe Morena’. Bjale o tšee makhura a tlotšo o a tšhele hlogong ya gagwe, o mo tlotše. “O batametše barwa ba gagwe go wena, o ba apeše dihempe; o ba tleme matheka ka mapanta a bodiredi, mme o ba rweše dikefana dihlogong. Ye ke yona tsela ya go bea Arone le barwa ba gagwe baprista. Bona le ditlogolo tša bona ba ntirele e le baprista go ya go ile. “O batametše powana pele ga Tente ya bodulo bja ka, mme o botše Arone le barwa ba gagwe ba bee diatla tša bona godimo ga hlogo ya powana. O hlabe powana moo pele ga ka mojakong wa Tente. O tšee madi a mangwe a powana o a tlotše dinakaneng tša aletare ka monwana. Bjale o tšhollele madi a a šetšego thitong ya aletare. Ka morago ga moo o kgakgamolle mabipi ka moka, o tšee le mphapha wo moteletšana wa sebete le dipshio bobedi bja tšona le makhura a tšona, mme tšeo ka moka o di tšhume aletareng e le kabelo ya ka. Ge e le nama ya powana le mokgopa wa yona le dikateng tše dingwe tša yona o di tšhume ka mollo kua ntle ga mešaša. Se ke sehlabelo sa go tloša dibe tša baprista. “O tšee kgapa ye nngwe mme o botše Arone le barwa ba gagwe ba bee diatla tša bona godimo ga hlogo ya yona. O e hlabe gomme o tšee madi a yona o a fokele aletare ka mahlakoreng ka mane. O phakologanye kgapa, o hlatswe dikateng tša yona le meomo ya yona, o di bee godimo ga hlogo ya kgapa le ditho tše dingwe. O tšhume kgapa ka moka ga yona godimo ga aletare e le sehlabelo sa go tšhungwa ka moka. Ke tsefelwa ke monkgo wa sehlabelo se. “O tšee kgapa yela ye nngwe o botše Arone le barwa ba gagwe gore ba bee diatla tša bona godimo ga hlogo ya yona. O e hlabe, o tšee madi a mangwe a yona o tlotše lerephu la tsebe ya la go ja ya Arone ka ona, le marephu a ditsebe tša la go ja tša barwa ba gagwe, le menwana ya bona ye megolo ya diatla tša la go ja, le menwana ya bona ye megolo ya maoto a la go ja. Ka madi a a šetšego o fokele aletare ka mahlakoreng ka mane. O tšee madi a mangwe a a lego godimo ga aletare le makhura a tlotšo o foke Arone le diaparo tša gagwe, le barwa ba gagwe le diaparo tša bona ka ona. Yena Arone le diaparo tša gagwe le barwa ba gagwe le diaparo tša bona ba tla be ba abetšwe nna. “O tšee makhura a kgapa, le mosela, le mabipi, le mphapha wo moteletšana wa sebete, le dipshio ka bobedi, le makhura a tšona, le serope sa la go ja. Mola dinkgweng tša ka leselong tše di se nago komelo tše di abetšwego nna o tšee senkgwa se tee se se apeilwego ka makhura a mohlware, se tee se se apeilwego ka ntle le makhura, le senkgwana sa phaphathiana. O bee dijo tše ka moka ka diatleng tša Arone le ka go tša barwa ba gagwe, gomme o nkabele tšona e le mpho ye e fiwago nna ka tsela ye e itšeng. Bjale o di tšee diatleng tša bona, o di tšhume aletareng godimo ga sehlabelo sela sa go tšhungwa ka moka, e be sehlabelo go nna. Ke tsefelwa ke monkgo wa sehlabelo seo. “O tšee leumo la kgapa yeo gomme o nkabele lona e le mpho ye e fiwago nna ka tsela ye e itšeng. Setho se sa seruiwa e tla ba sa gago. “Ge monna a bewa moprista, leumo le serope sa kgapa yeo e dirišetšwago go bewa moprista moo di abelwe nna e le mpho ye e fiwago nna ka tsela ye e itšeng, mme di bewe ka thoko e be tša baprista. Ke taelo ya ka ya ka mehla go iša go sa felego, gore ka mehla ge setšhaba se dira dihlabelo tša sona tša kagišano, leumo le serope sa seruiwa ke tša baprista. Mpho ye e fiwago nna ye ka tsela ye e itšeng, ke kabelo ye batho ba e abelago nna, Morena. “Diaparo tša Arone tše dikgethwa di neelwe barwa ba gagwe ka morago ga ge a hwile, gore ba di apare ge ba bewa baprista. Morwa wa Arone yo a latelago tatagwe bopristeng gomme a tsena ka Tenteng ya bodulo bja ka go dira mošomo wa baprista ka Felo mo Gokgethwa, a apare diaparo tše matšatši a a šupago. “O tšee nama ya kgapa ye e dirišetšwago go bea Arone le barwa ba gagwe baprista, o e apeele ka felo mo gokgethwa. Arone le barwa ba gagwe ba jele nama ye gotee le dinkgwa tše di šetšego ka leselong, mojakong wa Tente ya bodulo bja ka. Ba je seo se dirišitšwego tirelong ya tebalelo ge ba bewa baprista. Ke baprista fela ba ka jago dijo tše, ka gobane ke dijo tše kgethwa. Ge nama ye nngwe goba dinkgwa tše dingwe di se tša lewa go fihlela ka la ka moswane, gona dijo tšeo di tšhungwe. Di se ke tša lewa ke motho, gobane ke tše kgethwa. “O sware ditirelo tša go bewa baprista ga Arone le ga barwa ba gagwe matšatši a a šupago ka moo ke go laetšego ka gona. Tšatši le lengwe le le lengwe o dire sehlabelo sa powana e be tefelo ya dibe. Sehlabelo se se tla hlwekiša aletare. Ka morago o tlotše aletare ka makhura a mohlware go e kgethwafatša. O dire ka mokgwa woo letšatši le lengwe le le lengwe matšatši a a šupago. Gona aletare e tla ba ye e kgethwafetšego ruriruri, gomme mang le mang goba eng le eng ye e ka e kgwathago e tla tšhelwa madimabe ke maatla a bokgethwa bja yona. “Letšatši le lengwe le le lengwe, mabakeng ka moka, o dire dihlabelo aletareng ka kwanyana tše pedi tša ngwaga o tee. O dire sehlabelo ka e tee mosong, gomme ka ye nngwe o dire sehlabelo mantšiboa. Ge o dira sehlabelo ka kwanyana ya pele, o abe le bupi bja matoka bja korong bja tekanyo ya kilokramo e tee, o bo dube ka makhura a mohlware a a hlwekilego a litara e tee. O tliše litara e tee ya beine e be kabelo ya seno. Mantšiboa le gona o dire sehlabelo ka kwanyana ya bobedi gotee le ditekanyo tša bupi le makhura a mohlware le beine bjalo ka mosong. Bupi le makhura a mohlware ke kabelo ya dijo, mme beine ke kabelo ya seno go nna, Morena. Monkgo wa sehlabelo se ka moka o a ntsefela. Sehlabelo se sa go tšhungwa ka moka se dirwe pele ga ka mabakeng ka moka a a tlago, mojakong wa Tente ya bodulo bja ka. Moo ke mo ke tlago gahlana le setšhaba sa ka, ka bolela le wena. Gona moo ke tla gahlana le setšhaba sa Israele, gomme seetša se se fahlago sa letago la ka se tla kgethwafatša felo fao. Ke tla kgethwafatša Tente le aletare, gomme ka hlaola Arone le barwa ba gagwe gore ba ntirele e le baprista. Ke tla dula gare ga setšhaba sa Israele, gomme ka ba Modimo wa bona. Ba tla tseba gore ke nna Morena Modimo wa bona yo ke ba ntšhitšego Egepeta gore ke dule gare ga bona. Ke nna Morena Modimo wa bona.” “O dire aletare ya go tšhumela seorelo ka dikota tša mogohlo. O e lekalekanye ka mathoko, e be botelele bja disentimetara tše 46 le bophara bja disentimetara tše 46, mme bogodimo e be disentimetara tše 92. Dinakana tša dikhutlo tša yona e be selo se tee le yona. O e manege bogodimo ka gauta ye e sego ya tswakwa, le mahlakore ka mane le dinakana tša yona ka moka, gomme o e direle morumo wa gauta go e dikologa. O dire mekgoko ye mebedi ya go e rwala, o e kgokelele ka tlase ga morumo mahlakoreng ka mabedi gore go tsene mapara a go e rwala. O betle mapara a ka dikota tša mogohlo, mme le ona o a manege ka gauta. Aletare ye o e bee ka ntle ga seširo se se fegilwego pele ga Polokelo ya Kgwerano. Moo ke felo mo ke tlago gahlana le wena. Mosong wo mongwe le wo mongwe ge Arone a etla go lokiša mabone, a tšhume seorelo sa go nkga bose godimo ga yona. A dire ka yona tsela yeo le ge a gotetša mabone mantšiboa. Seorelo se se fele se tšhungwa ka mehla. O se ke wa tupiša seorelo se šele godimo ga aletare ye, goba wa dira sehlabelo sa seruiwa, goba kabelo ya dijo, le gona o se ke wa tšhela kabelo ya seno godimo ga yona. Gatee mo ngwageng Arone a dire tirelo ya go hlwekiša aletare ka go tlotša dinakana tša yona ka dine ka madi a seruiwa se se dirilwego sehlabelo sa tshwarelo ya dibe. Se se dirwe ngwaga ka ngwaga mehleng ka moka ye e tlago. Aletare ye e be ye e kgethwafetšego ruriruri, ye e abetšwego nna, Morena.” Morena o laetše Moshe a re: “Mohla o bala setšhaba sa Israele monna yo mongwe le yo mongwe a ntefe ka tšhelete, gore bošula bo se ke bja mo wela lebakeng la ge setšhaba se balwa. Mang le mang yo a balwago a lefe dikramo tše di selelago tša silibera ye e etšwego go ya ka boima bja papetlana ya silibera ya ka Felo mo Gokgethwa. Mang le mang a lefe tšhelete ye e le kabelo ya ka. Mang le mang yo a balwago, ke go re monna yo mongwe le yo mongwe wa mengwaga ye masome a mabedi goba go feta, a lefe motšhelo wo. Mohumi a se ke a ntšha tšhelete ya go feta ye e beilwego, le modiidi a se ke a ntšha ya go fetwa ke ye e beilwego, ge ba tšhela motšhelo wo. O kgobokanye tšhelete ye setšhabeng sa Israele gomme o e diriše go hlokomela Tente ya bodulo bja ka. Motšhelo wo e tla ba seloba sa gore ke se ba bolaye, gomme ke tla gopola go ba šireletša.” Morena o laetše Moshe a re: “O dire sebjana sa mphiri sa go hlapela se se nago le bogato bja mphiri. O bee sebjana se kgathe ga Tente le aletare, gomme o tšhele meetse ka go sona. Arone le barwa ba gagwe ba hlape diatla le maoto ka meetse a pele ba tsena ka Tenteng, goba ba batamela aletare go dira sehlabelo. Ke moo ba ka se bolawego. Ba hlape diatla le maoto gore ba se ke ba hwa. Wo ke molao wo bona le ditlogolo tša bona ba swanetšego go o phetha go ya go ile.” Morena a re go Moshe: “Tšea dinoko tše dibotsebotse: dikilokramo tše 5,7 tša seela sa mira, dikilokramo tše 2,9 tša sinamone ya monkgo wo mobose, dikilokramo tše 2,9 tša lehlaka la monkgo wo mobose, dikilokramo tše 5,7 tša kasia, ka moka di etšwe go ya ka boima bja papetlana ya silibera ya ka Felo mo Gokgethwa. O oketše ka dilitara tše 3,7 tša makhura a mohlware mme o dire makhura a makgethwa a tlotšo a a tswakantšwego go swana le senkgabose. O diriše makhura a go tlotša Tente ya bodulo bja ka, le Polokelo ya Kgwerano, le tafola le ditlabakelo tša yona ka moka, le sehlomamabone le ditlabakelo tša sona ka moka, le aletare ya go tšhumela seorelo, le aletare ya dihlabelo le ditlabakelo tša yona ka moka, le sebjana sa go hlapela gotee le bogato bja sona. O nkabele dilo tše ka mokgwa wo mme e tla ba tše di kgethwafetšego ruriruri, gomme mang le mang goba sengwe le sengwe se se ka di kgwathago se tla tšhelwa madimabe ke maatla a bokgethwa bja tšona. Ke moka o tlotše Arone le barwa ba gagwe, o ba kgethwafatše gore ba ntirele e le baprista. O botše le setšhaba sa Israele o re: ‘Makhura a makgethwa a tlotšo a dirišwe tirelong ya ka mabakeng ka moka a a tlago. A se ke a tšhelwa bathofela, gomme le se ke la dira a mangwe a motswako wo o swanago le wa ona. Ke a makgethwa gomme le a sware bjalo ka selo se sekgethwa. Motho mang le mang yo a ka dirago a a swanago le ona, goba a tlotša motho yo mongwe yo e sego moprista ka ona, a kgaolwe setšhabeng sa ka.’ ” Morena o laetše Moshe a re: “Tšea diripa tše di lekanago tša se sengwe le se sengwe sa dinoko tše bose tše di latelago: setakite le onika le galebanume, le seorelo se se sego sa tswakwa. Ka tšona o dire seorelo se se tswakantšwego go swana le senkgabose. O se noke ka letswai gore se fele se hlwekile e le se sekgethwa. O šile seripa se sengwe sa sona e be lerole, o se iše Tenteng ya bodulo bja ka moo ke gahlanago nago, o se gaše pele ga Polokelo ya Kgwerano. O sware seorelo se bjalo ka selo se se kgethwafetšego ruriruri. Le se ke la itirela seorelo se sengwe se se swanago le sona. Le se sware bjalo ka selo se sekgethwa se se abetšwego nna. Yo a kago dira seorelo se se swanago le se go itirela senkgabose, o tla kgaolwa setšhabeng sa ka.” Morena a re go Moshe: “Ke kgethile Betsaliele, morwa wa Uri, wa kgorwana ya Hure, wa kgoro ya Juda, gomme ke mo hlamile ka moya wa ka. Ke mo file tsebo le tlhaologanyo le bokgoni go dira modiro ofe le ofe wa bokgwari go beakanya mediro ya bokgwari, le go e šoma ka gauta le silibera le mphiri, le go seta magakabje a go rokelelwa, le go betla dikota, le go dira mošomo ofe le ofe wa bokgwari. Ke kgethile le Oholiabe, morwa wa Ahisamake, wa kgoro ya Dane, go šoma le yena. Le gona ke file bomakgone ba bangwe ka moka bokgoni bjo bogolo gore ba kgone go phetha se sengwe le se sengwe se ke laetšego gore se dirwe: Tente ya bodulo bja ka, le Polokelo ya Kgwerano le sekhurumelo sa yona, le ditlabakelo ka moka tša Tente, le tafola le ditlabakelo tša yona, le sehlomamabone sa gauta ye e sego ya tswakwa le ditlabakelo tša sona ka moka, le aletare ya go tšhumela seorelo, le aletare ya dihlabelo le ditlabakelo tša yona ka moka, le sebjana sa go hlapela le bogato bja sona, le diaparo tša botšhepi tše dikgethwa tša Arone le tša barwa ba gagwe tše ba di aparago ge ba dira modiro wa baprista, le makhura a tlotšo, le seorelo sa go nkga bose sa Felo mo Gokgethwa. Ge ba dira dilo tše ka moka ba dire ka moo ke go laetšego ka gona.” Morena o laetše Moshe gore a botše setšhaba sa Israele a re: “Le tloge le hlokomela Sabatha, letšatši la ka la go khutša, gobane ke sešupo kgatheng ga ka le lena mabakeng ka moka a a tlago gore nna, Morena, ke le dirile setšhaba sa ka. Le hlokomele letšatši la go khutša, ka gobane ke le lekgethwa. Yo a tšhilafatšago letšatši le ka go šoma ka lona, a kgaolwe setšhabeng sa ka, a bolawe a hwe lehu. Le na le matšatši a a selelago ao ka wona le ka dirago mešomo ya lena, eupša letšatši la bošupa ke letšatši le legolo la go khutša le le abetšwego nna. Yo a dirago modiro ofe le ofe ka lona letšatši leo, a bolawe a hwe lehu. Setšhaba sa Israele se hlokomele letšatši le go iša ditlogolong tša sona e le sešupo sa kgwerano. Ke sešupo sa go ya go ile kgathe ga setšhaba sa Israele le nna, gobane nna, Morena, ke dirile legodimo le lefase ka matšatši a a selelago, gomme ka letšatši la bošupa ka khutša, ka lapologa.” Ge Modimo a feditše go bolela le Moshe thabeng ya Sinai, a mo fa matlapa a mabedi ao mo go ona Modimo ka noši a bego a ngwadile melao. Ge setšhaba se bona Moshe a diega go theoga thabeng, sa bokanela Arone sa re go yena: “Ga re tsebe se se hlagetšego yola Moshe, monna yo a re ntšhitšego nageng ya Egepeta; ka gona, ema o re direle modimo yo a tlago re eta pele.” Arone a ba fetola re: “Khwamolang mangina a gauta ao basadi ba lena le barwa ba lena le barwedi ba lena ba a rwelego ditsebeng, le a tlišeng mo go nna.” Ka gona setšhaba ka moka sa khwamola mangina a sona a gauta, sa a iša go Arone. Arone a tšea mangina ao go bona, a a tološa, a a tšhollela foromong, a bopa powana ya gauta. Setšhaba sa re: “Lena Baisraele, yo ke modimo wa rena yo a re ntšhitšego nageng ya Egepeta!” Ya re ge Arone a bona tšeo, a aga aletare pele ga powana ya gauta mme a goeletša a re: “Ka la ka moswane e tla ba monyanya wa go tumiša Morena.” Ka la ka moswane setšhaba sa tsogela go dira dihlabelo tša go tšhungwa ka moka le dihlabelo tša kagišano. Sa dulela monyanya gomme wa fetoga bohlaswa bja botagwa le thobalano. Morena a re go Moshe: “Itlhaganele o theoge, gobane setšhaba sa geno se o se ntšhitšego nageng ya Egepeta se sentše, se ntlhanogetše. Ba šetše ba arogile tsela ye ke ba laetšego gore ba e latele; ba dirile powana ka gauta ye e tološitšwego, gomme ba e khunametše ba ba ba e hlabela dihlabelo. Ba re yona ke yena modimo wa bona yo a ba ntšhitšego nageng ya Egepeta. Ke tseba ka moo batho ba ba nago le melala ye methata. Bjale hle, o se ke wa leka go nkema pele. Ke ba befeletšwe, mme ke ile go ba fediša. Ka morago ga fao ke tla dira wena le ditlogolo tša gago setšhaba se segolo.” Eupša Moshe a phophotha Morena Modimo wa gagwe a re: “Morena, o reng o befelelwa setšhaba sa gago gakaaka, setšhaba se o se hlakodišitšego Egepeta ka maatla a magolo le ditiro tše maatla? O reng o nyaka go re kweriša Baegepeta, gore ba re o ntšhitše setšhaba sa gago Egepeta e le maanomabe a go ba bolaya dithabeng le go ba feleletša sa ruri? Hle, o se sa re galefela; buša pelo, gomme o se ke wa tlišetša setšhaba sa gago bošula bjoo. Gopola bahlanka ba gago, Abrahama le Isaka le Jakobo. Gopola kholofetšo ya gago ye kgolo ye o ba enetšego yona wa re o tla ba fa ditlogolo tše ntši bjalo ka dinaledi tša legodimo, le gore o tla fa ditlogolo tša bona naga ka moka ye o ba holofeditšego yona wa re e tla ba ya bona go ya go ile.” Ka gona Morena a buša pelo mme a se ke a tlišetša setšhaba sa gagwe bošula bjo a bego a ikemišeditše go se tlišetša bjona. Moshe a theoga thabeng a swere matlapa ao a ngwadilwego melao ka mo le ka mo. Matlapa ao a be a betlilwe ke Modimo, mme yena ka noši a a tlokile melao. Joshua a kwa setšhaba se hlabile lešata, mme a re go Moshe: “Ke kwa mašata a ntwa kua mešašeng.” Moshe a re: “Hleng go kwagala e ke mašata ale ga se mekgolokwane ya phenyo, goba dillo tša go fenywa; mašata ale ke a mogobo.” Ge Moshe a batametše mešaseng mo a kgonago go bona powana le go bona batho ba bina, a tuka bogale. Gona moo patogeng ya thaba Moshe a napa a lahlela matlapa ale a bego a a swere fase, a pšhatlagana. A tšea powana yela ba bego ba e dirile, a e tološa, a e šila ya ba lerole la matoka, gomme a le tšhela ka meetseng. A gapeletša Baisraele go nwa meetse ao. A botšiša Arone a re: “Setšhaba se se go dirile eng ge e bile o se diriša sebe se sekaaka?” Arone a mo fetola a re: “Hle, se mpefelelwe, mong wa ka; wena o tseba gabotse ka moo setšhaba se e lego se sebe ka gona. Ba rile go nna: ‘Ga re tsebe se se hlagetšego yola Moshe, monna yo a re ntšhitšego nageng ya Egepeta; ka gona re direle modimo yo a tlago re eta pele.’ Nna ka ba kgopela gore ba ntlišetše dikgabišo tša bona tša gauta, gomme ba ba bego ba na le tšona ba di kgakgamolla ba nneela tšona. Nna ka di lahlela mollong, mme fao gwa tšwa powana ye!” Ge Moshe a bona gore Arone o ntšhitše setšhaba tseleng gomme sa itlontlolla pele ga manaba a sona, a ema kgorong ya mešaša a goa a re: “Yo a emago le Morena a a tle go nna!” Ke moo Balefi ka moka ba mo kgobokanetšego, gomme yena a re go bona: “Morena Modimo wa Israele o laela yo mongwe le yo mongwe wa lena go itlhama ka tšhoša le go putlaganya mešaša go tloga kgorong ye go fihla go ye nngwe, le go bolaya bomorwarragwe le bagwera ba gagwe le baagišani ba gagwe.” Balefi ba phetha taelo yeo, gomme ba bolaya banna ba e ka bago ba dikete tše tharo ka lona tšatši leo. Moshe a re go Balefi: “Lehono le ikgethwafaditše la ba baprista ba go direla Morena ka go bolaya barwa ba lena le bomorwarragolena, ka gona Morena o le šegofaditše.” Ka letšatši le le latelago Moshe a re go setšhaba: “Le dirile sebe se segolo. Bjale ge, ke tla boela kua thabeng go Morena; mohlomongwe nka kgona go le boelanya naye.” Ke gona Moshe a boetšego go Morena a re: “Jonna, Morena, setšhaba se se dirile sebe se segolo. Se itiretše modimo ka gauta, gomme sa o khunamela. Bjale hle, ba lebalele sebe sa bona; go sego bjalo o phumole leina la ka pukung ye o ngwadilego maina a batho ba gago go yona.” Morena a mo fetola a re: “Bao ba mphošeditšego ke bona bao ke tlago phumola maina a bona pukung ya ka. Wena bjale sepela, o ete setšhaba sa ka pele o se iše felo mo ke go boditšego gona. Bona, morongwa wa ka o tla go eta pele, fela mohla nako ya kotlo e fihla, ke tla otla setšhaba se ka baka la sebe sa bona.” Ke moka Morena a romela bolwetši bja leuba setšhabeng, ka gobane ba gapeleditše Arone go bopa powana ya gauta. Morena a re go Moshe: “Tloga felo fa, wena le setšhaba se o se ntšhitšego nageng ya Egepeta, o ye nageng ye ke enetšego Abrahama le Isaka le Jakobo ka re ke tla e fa bona le ditlogolo tša bona. Ke tla roma morongwa a go eta pele, gomme ke tla leleka Bakanana le Baamore le Bahete le Baperise le Bahibe le Bajebuse. Le ya nageng ya mokhora le monono. Eupša nna nka se ye le lena, ka gobane le setšhaba sa melala ye methata, gomme nka le feleletša tseleng.” Ge setšhaba se ekwa taba ye thata ye, sa thoma go itshola gomme sa se hlwe se apara dikgabišo. Morena o be a laetše Moshe gore a ba botše go re: “Le setšhaba sa melala ye methata. Ge nka sepela le lena, le ge e le lebakanyana fela, ke tla le feleletša sa ruri. Bjale ge, apolang dikgabišo tša lena, gomme nna ke tla bona gore ke dirang ka lena.” Ka gona, ge Baisraele ba tlogile thabeng ya Sinai, ba ile ba se hlwe ba apara dikgabišo. Ka mehla ge setšhaba sa Israele se hloma mešaša, Moshe o be a tšea Tente ye kgethwa a e hlome kua ntle kgojana le mešaša. E be e bitšwa Tente ya bodulo bja Morena, gomme yo mongwe le yo mongwe yo a bego a nyaka go kopana le Morena o be a tšwela kua go yona. Ka mehla ge Moshe a tšwela kua go yona, setšhaba se be se ema mejakong ya mešaša ya sona se lebelela Moshe go fihlela a sobelela ka go yona. Ge Moshe a tsene, thololo ya leru e be e theoga e dule mojakong wa Tente, gomme Morena a bolele le Moshe a le lerung. E be e re ge setšhaba se bona thololo ya leru mojakong wa Tente, se obame. Morena o be a bolela le Moshe ba lebane ka difahlego, bjalo ka ge motho a bolela le mogweragwe. Ka morago ga fao Moshe o be a boela mešašeng. Fela lesogana le e bego e le mothuši wa gagwe, Joshua, morwa wa Nunu, le be le šala Tenteng. Moshe a re go Morena: “O ntaetše gore ke ntšhe setšhaba se, fela ga se wa mpotša gore o nthoma le mang. O boletše gore o ntseba gabotse, le gore ke a go kgahla. Bjale ge ke go kgahla, hle, ntsebiše maikemišetšo a gago, gore ke go tsebe gomme ke fele ke go kgahla. O gopole le gore batho ba ke setšhaba sa gago.” Morena a re: “Ke tla sepela nago, ka go fa khutšo.” Moshe a mo fetola a re: “Ge o sa sepele le rena, gona o se ke wa re tloša fa. Motho o tla tseba bjang gore nna le setšhaba sa gago re a go kgahla, ge wena o sa sepele le rena? Go ba le rena ga gago go tla re hlaola ditšhabeng tše dingwe ka moka lefaseng.” Morena a re go Moshe: “Ke tla dira ka moo o kgopetšego ka gona, ka gobane ke go tseba gabotse, gomme o a nkgahla.” Ke mo Moshe a kgopetšego Morena a re: “Hle, ntaetše seetša se se fahlago sa letago la gago.” Morena a mo fetola a re: “Ke tla feta pele ga gago ka botse bjohle bja letago la ka, gomme ka go begela leina la ka la Morena. Ke tla gaugela yo ke ratago go mo gaugela, ka šokela yo ke ratago go mo šokela. Nka se go dumelele gore o bone sefahlego sa ka, gobane ga go motho yo a ka rego go bona sefahlego sa ka a fela a sa phela, fela mo thoko ga ka go na le felo mo o ka emago gona godimo ga leswika. Ge seetša se se fahlago sa letago la ka se putla, ke tla go bea ka leweng mo leswikeng, ka go pipa ka seatla go fihlela ke putlile. Ka morago ga moo ke tla tloša seatla sa ka gomme wa mpona ke go fularetše, wa se bone sefahlego sa ka.” Morena a re go Moshe: “Ipetlele matlapa a mabedi a a swanago le ale a pele, mme nna ke tla ngwala mantšu a a bego a le mola matlapeng a pele a o a pšhatlilego. Itokišetše la bosasa mosong, o namele thaba ya Sinai gomme o gahlane le nna kua godimo ga yona. Go se be le o tee yo a namelago le wena; go se be le o tee yo a bonwago mo gongwe thabeng; le gona go se be le sehuswane goba kgomo ye e fulago patogeng ya thaba.” Ka gona Moshe a betla matlapa a mangwe a mabedi gomme a tsoga e sa le ka moswane, a namela thaba ya Sinai a a swere, ka moo Morena a bego a mo laetše ka gona. Morena a theoga ka leru, a ema moo go yena, a bolela leina la gagwe, la Morena. Morena a putla pele ga gagwe a bega a re: “Nna, Morena, ke Modimo wa lešoko le kwelobohloko, yo a sa befelwego ka bjako, le gona yo a nago le lerato le legolo le potego. Ke botegela kholofetšo ya ka melokong ye diketekete, mme ka lebalela batho makgopo le dibe tša bona; eupša nka se lese go otla bana le ditlogolo go iša molokong wa boraro le wa bone ka baka la dibe tša batswadi ba bona.” Ka bjako Moshe a obama, a itahlela fase, a rapela a re: “Mong wa ka, ge ke tloga ke go kgahla, Morena, hle, sepela le rena. Setšhaba se se na le melala ye methata, fela re lebalele bokgopo bja rena le sebe sa rena, mme o re amogele re be setšhaba sa gago.” Morena a re go Moshe: “Bjale ke dira kgwerano le setšhaba sa geno. Ke tla dira mehlolo setšhaba se ntebeletše ye e sego ya ka ya dirwa setšhabeng se sengwe lefaseng lohle. Ditšhaba ka moka di tla bona tše kgolo tše nna, Morena, ke tlago di dira, gobane tše ke tlago di dira ka lena di a šiiša. Le phethe melao ye ke le fago yona lehono. Ke tla leleka Baamore, Bakanana, Bahete, Baperise, Bahibe le Bajebuse ge le goroga. Le se ke la dira kgwerano le badudi ba naga ye le yago go yona, gobane seo e ka ba molaba go lena. Lena le kgerešeng dialetare tša bona, le thubaganye dikokwane tša bona tša borapedi tša maswika, le remeng dikota tša bona tša borapedi. “Le se ke la khunamela medimo ye mengwe, gobane nna, Morena, ke Modimo yo a sa kgotlelelego tirelo ya medimo ye mengwe. Le se ke la dira kgwerano le badudi ba naga yeo, gobane ba ka re ge ba kgeloga go nna ka go khunamela medimo ya bona e šele, ba e direla le dihlabelo, ba le laletša gore le e khunamele le bona, la ja le dihlabelo tšeo tša bona. Le barwa ba lena ba ka nyala basadi ba šele bao, gomme bona ba ba kgeloša go nna ka go dira gore ba khunamele medimo yeo ya bona. “Le se ke la itirela medimo ya tshipi mme la e rapela. “Le bineng Monyanya wa Dinkgwa tše di se nago komelo. Le je dinkgwa tše di se nago komelo matšatši a a šupago mo kgweding ya Abibi, ka mo ke le laetšego ka gona, ka gobane ke ka yona kgwedi yeo mo le tšwilego Egepeta. “Leitšibolo le letona la motho goba la seruiwa ke la ka, eupša leitšibolo le letona la pokolo le le rekolle ka kwanyana. Ge le sa le rekolle, gona le le robe molala. Le rekolleng mošemane yo mongwe le yo mongwe wa leitšibolo. “Go se be le o tee yo a tlago pele ga ka a se a swara kabelo. “Mediro ya lena le e dire ka matšatši a a selelago, fela ka letšatši la bošupa le se šome, le ge e ka ba mabakeng a ge go lengwa goba go bunwa. “Le bineng Monyanya wa Puno ge le thoma go buna mabele a lena a pele, gomme le bine le Monyanya wa Kgobelo ge le kgobela dienywa tša lena lehlabula. “Gararo mo ngwageng banna ba gabolena ka moka ba tle go khunamela nna, Morena, Modimo wa Israele. Ge ke lelekile ditšhaba ge le goroga gomme ke katološitše naga ya lena, ga go yo a kago leka go thopa naga ya lena nakong ya ge go binwa menyanya ye meraro ye. “Ge le ntirela sehlabelo le se ke la se tliša le senkgwa se se nago komelo. Le se ke la latša seruiwa se se hlabilwego Monyanyeng wa Paseka go fihlela ka la ka moswane. “Ngwakong wa Morena Modimo wa lena le tliše dibjalo tše kaonekaone tše le di bunago pele. “Le se ke la apea kwanyana goba putšanyana ka maswi a mmayo.” Morena a re go Moshe: “Ngwala mantšu a, ka gobane ke dira kgwerano le wena le Baisraele go ya ka ona.” Moshe o dutše moo le Morena matšatši a masome a mane le mašego a ona a sa je selo a sa nwe selo. Gomme a ngwala mantšu a kgwerano e lego Melao ye Lesome matlapeng ao. Ge Moshe a theoga thabeng ya Sinai a swere Melao ye Lesome, sefahlego sa gagwe se be se phadima ka ge a be a boletše le Morena, fela yena o be a sa tsebe. Arone le Baisraele ka moka ba lebelela Moshe, ba bona sefahlego sa gagwe se phadima, mme ba boifa go mmatamela. Eupša Moshe a ba bitša, gomme Arone le baetapele ka moka ba setšhaba ba ya go yena, gomme Moshe a bolela le bona. Ka morago ga fao, Baisraele ka moka ba mmokanela, gomme Moshe a ba botša tšohle tše Morena a mmoditšego tšona thabeng ya Sinai a re ba di phethe. Ge Moshe a feditše go bolela nabo, a ikhurumetša sefahlego ka lešira. Ka mehla ge Moshe a tsena ka Tenteng ya bodulo bja Morena go bolela le yena, o be a tloša lešira. Ge a etšwa, o be a laodišetša setšhaba sa Israele tšohle tše a bego a laetšwe go ba botša tšona, gomme bona ba be ba bona sefahlego sa gagwe se phadima. Ka fao o be a ikhurumetša ka lešira go fihlela a eya gape go bolela le Morena. Moshe a rapa pitšo ya setšhaba ka moka sa Israele, a re go sona: “Tše Morena a le laetšego gore le di dire šedi: Mediro ya lena le ka e dira matšatšing a a selelago, eupša letšatši la bošupa e be le lekgethwa, letšatši le legolo la go khutša le le abetšwego nna, Morena. Mang le mang yo a dirago modiro ka letšatši leo a bolawe. Ešita le mollo ka malapeng a lena le se ke la o gotša ka tšatši la Sabatha.” Moshe a re go setšhaba ka moka sa Israele: “Sese se Morena a le laetšego sona: Le ntšhetše Morena dimpho. Yo mongwe le yo mongwe yo a ratago go ntšha mpho, a ntšhe ya gauta goba ya silibera goba ya mphiri. Le ntšhe le mašela a boletiana, le wulu ya botala bja legodimo, le ya bohubedu bja moretele, le ya bohubedu bja madi, le lešela le le dirilwego ka boya bja dipudi, le matlalo a dikgapa a a tloditšwego ka letsoku, le mekgopana ye boletiana, le dikota tša mogohlo, le makhura a go tukiša mabone, le dinoko tša makhura a tlotšo le tša seorelo sa go nkga bose, le dikarneliene le magakabje a mangwe a go rokelelwa seaparong se sekgethwa sa Moprista yo Mogolo le phaphathianeng ya sehubeng sa gagwe.” “Bomakgone bohle magareng a lena ba tle ba dire tšohle tše Morena a di laetšego. Ba dire Tente le sepipetši sa yona sa ka gare le sa ka ntle, le dikgwaetšo tša yona, le mahlomo a yona a go thekga, le dipalelo tša yona, le dikota tša yona, le mabogato a yona, le Polokelo ya Kgwerano, le mapara a yona, le sekhurumelo sa yona, le seširo sa go e šira, le tafola, le mapara a yona, le ditlabakelo ka moka tša yona, le dinkgwa tše di abetšwego Modimo, le sehlomamabone sa lebone le ditlabakelo tša sona, le mabone le makhura a ona, le aletare ya seorelo le mapara a yona, le makhura a tlotšo, le seorelo sa go nkga bose, le seširo sa mojako wa Tente, le aletare ya dihlabelo, le papetla ya yona ya mphiri e kgomareditšwe, le mapara a yona, le ditlabakelo ka moka tša yona, le sebjana sa go hlapela le bogato bja sona, le diširo tša kgoro le dikota tša yona, le mabogato a tšona, le seširo sa mojako wa kgoro, le dibapola le dithapo tša Tente le kgoro, le diaparo tša botšhepi tše baprista ba swanetšego go di apara ge ba dira mošomo wa baprista ka Felo mo Gokgethwa, diaparo tše dikgethwa tša Arone, moprista, le tša barwa ba gagwe.” Setšhaba ka moka sa Israele sa tloga go Moshe, gomme yo mongwe le yo mongwe yo a ikwago a tlišetša Morena mpho ya go aga Tente ya bodulo bja Morena. Ba tliša dilo ka moka tše di tsomegago go tlo dirišwa tirelong le go tlo roka diaparo tše dikgethwa. Mang le mang yo a ratago, banna le basadi, ba tliša dithobošo le mangina le dipalamonwana le dipheta, le magakabje a mehutahuta a gauta, mme ba di abela Morena. Mang le mang yo a bego a na le mašela a boletiana, goba wulu ya botala bja legodimo, le ya bohubedu bja moretele, le ya bohubedu bja madi, goba lešela le le dirilwego ka boya bja dipudi, goba matlalo a dikgapa a a tloditšwego ka letsoku, goba mekgopana ye boletiana, a di tliša. Bohle ba ba bego ba kgona go ntšha dimpho tša silibera goba tša mphiri, ba tlišetša Morena dimpho tša bona, le bohle ba ba bego ba na le dikota tša mogohlo tše di bego di ka dirišwa, le bona ba di tliša. Bomakgone bohle ba basadi ba tliša ditlhale tša lešela le boletiana le ditlhale tša wulu ya botala bja legodimo, le ya bohubedu bja moretele, le ya bohubedu bja madi tše ba bego ba di ohlile. Ba ohla le tlhale ya boya bja dipudi. Baetapele ba tliša dikarneliene le magakabje a mangwe a go rokelelwa seaparong se sekgethwa le phaphathianeng ya sehubeng, le dinoko le makhura, e le tša mabone le tša makhura a tlotšo le tša seorelo sa go nkga bose. Baisraele ka moka bao ba bego ba ikwa ba ile ba ithaopa ba tliša dikabelo tša bona go Morena, gore go tle go dirwe modiro woo Morena a bego a laetše Moshe go o dira. Moshe a re go Baisraele: “Morena o kgethile Betsaliele, morwa wa Uri, wa kgorwana ya Hure, wa kgoro ya Juda. Modimo o mo hlamile ka maatla a gagwe, mme o mo file tsebo le tlhaologanyo le bokgoni go dira modiro ofe le ofe wa bokgwari, e lego go beakanya mediro ya bokgwari, le go e šoma ka gauta le silibera le mphiri, le go seta magakabje a go rokelelwa, le go betla dikota, le go dira mošomo ofe le ofe wa bokgwari. Morena o file yena le Oholiabe, morwa wa Ahisamake, wa kgoro ya Dane, mpho ya go kgona go ruta ba bangwe bokgoni bja bona. Morena o ba file bokgoni medirong ka moka ye e dirwago ke batloki le babeakanyi le balogi ba mašela a boletiana, le ba wulu ya botala bja legodimo, le ya bohubedu bja moretele, le ya bohubedu bja madi, le ba mašela a mangwe. Ba kgona go dira mešomo ya mehutahuta, mme ke babeakanyi ba dikgwari. “Betsaliele le Oholiabe le bomakgone ba bangwe ka moka bao Morena a ba filego tsebo le tlhaologanyo, bao ba tsebago go dira se sengwe le se sengwe seo se tsomegago go aga Tente ye kgethwa, ba dire tšohle ka moo Morena a laetšego ka gona.” Moshe a bitša Betsaliele le Oholiabe le bomakgone ba bangwe ka moka bao Morena a ba filego bokgoni ba bile ba rata go thuša, gomme a ba botša gore ba thome go šoma. Ba ile ba amogela go Moshe dimpho tšohle tše Baisraele ba bego ba di tlišitše go aga Tente ye kgethwa. Setšhaba sa Israele sa fela se tliša dimpho tša sona ka go ithaopa mosong wo mongwe le wo mongwe. Bjale banna bao ba go ba bomakgone, bao ba bego ba dira mediro ye e fapanego, ba tla go Moshe ba re go yena: “Setšhaba se tliša dimpho tše ntši go feta tekanyo ya modiro wo Morena a laetšego gore o dirwe.” Ka gona Moshe a romela molaetša go bohle mešašeng gore ba se hlwe ba ntšhetša Tente ye kgethwa dimpho; ka fao batho ba se hlwe ba ntšha dimpho. Tšeo di bego di šetše di tlišitšwe di be di šetše di feta tekanyo go phetha modiro ka moka. Ba e bego e le bomakgonekgone gare ga bao ba bego ba dira mediro ba dira Tente ya bodulo bja Morena. Ba e dira ka diripa tše lesome tša lešela le boletiana tše di logeletšwego wulu ya botala bja legodimo, le ya bohubedu bja moretele, le ya bohubedu bja madi, gomme di logeletšwe mekgabišo ya diswantšho tša bakerubi. Diripa ka moka di be di lekana, e le tša botelele bja dimetara tše 12,9, le bophara bja dimetara tše 1,8. Ba rokaganya tše tlhano tša tšona gotee ya ba thokaganyo e tee, mme le tše dingwe tše tlhano ba di rokaganya ka wona mokgwa woo. Ba dira digole tša lešela la botala bja legodimo morumong wa seripa sa ka ntle thokaganyong tše pedi. Ba rokelela digole tše masome a mahlano seripeng sa mathomo sa thokaganyo ya mathomo, le tše masome a mahlano tša go lebana natšo seripeng sa mafelelo sa thokaganyo ya bobedi. Ba dira dikgwaetšo tša gauta tše masome a mahlano tša go kgokaganya dithokaganyo tšeo tše pedi ya ba selo se tee. Ka morago ga fao ba dira sepipetši sa Tente ka diripa tše lesome le se tee tša lešela le le dirilwego ka boya bja dipudi. Ba lekanya diripa tšeo ka moka ya ba tša botelele bja dimetara tše 13,8, le bophara bja dimetara tše 1,8. Ba rokaganya tše tlhano tša tšona ya ba thokaganyo e tee, mme le tše dingwe tše di selelago tša tšona ba di rokaganya thokaganyo ye nngwe. Ba kgokelela digole tše masome a mahlano morumong wa seripa sa mafelelo sa thokaganyo e tee, le digole tše masome a mahlano morumong wa seripa sa mafelelo sa thokaganyo ye nngwe. Ba dira dikgwaetšo tša mphiri tše masome a mahlano tša go kgokaganya dithokaganyo tšeo tše pedi gore e be sepipetši se tee. Ba dira dipipetši tše dingwe tše pedi, se sengwe ka matlalo a dikgapa a a tloditšwego ka letsoku, le se sengwe ka mekgopana ye boletiana, gore di pipetše bokantle. Ba dira mahlomo a dikota tša mogohlo go thekga Tente. Lehlomo le lengwe le le lengwe ya ba la botelele bja dimetara tše 4,6, le bophara bja disentimetara tše 69, la ba le maphakga a mabedi lefateng go swaranya mahlomo gotee. Mahlomo ka moka a go thekga a ba le maphakga a. Ba dira mahlomo a go thekga a masome a mabedi lehlakoreng la ka borwa, le mabogato a silibera a masome a mane ka fase ga ona, mabogato a mabedi a le ka fase ga lehlomo le lengwe le le lengwe go swarelela maphakga ka mabedi a lehlomo. Ba dira mahlomo a go thekga a masome a mabedi ka lehlakoreng la ka leboa la Tente, le mabogato a silibera a masome a mane, a mabedi a le ka fase ga lehlomo le lengwe le le lengwe. Ka lehlakoreng la ka morago, ka bodikela, ba dira mahlomo a a selelago a go thekga, le mahlomo a mabedi a go thekga a dikhutlo tša ka morago. Mahlomo a a go thekga a dikhutlo a tlemaganywa go tloga fase go rotoga go fihlela mokgokong wa ka godimo. Mahlomo a mabedi a go thekga a a dirago dikhutlo tšeo tše pedi a dirwa bjalo. Ka gona gwa ba le mahlomo a seswai a go thekga, le mabogato a silibera a lesome le a a selelago, a mabedi a le ka fase ga lehlomo le lengwe le le lengwe. Ba betla dipalelo tše lesome le tše tlhano ka dikota tša mogohlo, tše tlhano ya ba tša mahlomo a go thekga a ka thoko ye nngwe ya Tente, tše tlhano ya ba tša mahlomo a go thekga a ka thoko ye nngwe, mme tše tlhano ya ba tša mahlomo a go thekga a ka thoko ya ka bodikela, ka morago. Palelo ya gare, ye e lego seripagareng sa bogodimo bja mahlomo a go thekga, ya tloga mathomong a Tente ya fihla mafelelong a yona. Ba manega mahlomo a go thekga ka gauta, mme ba a kgokelela mekgoko ya gauta ya go khwamela dipalelo tšeo le tšona di bego di manegilwe ka gauta. Ba dira seširo ka lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi, mme ba e logelela mekgabišo ya diswantšho tša bakerubi. Ba betla dikota tša mogohlo tše nne tša go thekga seširo; ba di manega ka gauta, ba ba ba di kgokelela dikgwaetšo tša gauta. Ba dira mabogato a silibera a mane go swarelela dikota tšeo. Mojako wa Tente ba o direla seširo sa lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi, ya ba mologelelo wa mebala wa mekgabišo ya bokgwari. Seširo se ba se direla dikota tše tlhano tše di kgokeletšwego dikgwaetšo; ba manega bogodimo le mapheko a tšona ka gauta, mme ba di direla mabogato a mahlano a mphiri. Betsaliele o betlile Polokelo ya Kgwerano ka dikota tša mogohlo, ya ba ya botelele bja disentimetara tše 115, le bophara bja disentimetara tše 69, le bogodimo bja disentimetara tše 69. A e manega ka ntle le ka gare ka gauta ye e sego ya tswakwa, mme a e direla morumo wa gauta go e dikologa. A e direla mekgoko ye mene ya gauta, mme a e kgokelela maotwaneng a yona ka mane, mekgoko ye mebedi lehlakoreng le lengwe le le lengwe. A betla mapara a go rwala ka dikota tša mogohlo, mme le ona a a manega ka gauta, a a tsenya mekgokong ya ka mahlakoreng a Polokelo. A dira sekhurumelo ka gauta ye e sego ya tswakwa, ya ba sa botelele bja disentimetara tše 115, le bophara bja disentimetara tše 69. A bopa diswantšho tša bakerubi ba babedi ka gauta ye e rutšwego. A bea se tee ka mafelelong a mangwe a sekhurumelo, se sengwe a se bea ka mafelelong a mangwe a sona; a dira gore di kgomagane le sekhurumelo. Bakerubi bao ba lebana ka difahlego go putla sekhurumelo, mme diphego tša bona tša phurulogela godimo go pipetša sekhurumelo. A dira tafola ka dikota tša mogohlo, ya ba ya botelele bja disentimetara tše 92, le bophara bja disentimetara tše 46, le bogodimo bja disentimetara tše 69. A e manega ka gauta ye e sego ya tswakwa, mme a e direla morumo wa gauta go e dikologa. A e direla lepanta la bophaphathi bja disentimetara tše 7,4 go e dikologa, mme a bea morumo wa gauta go dikologa lepanta leo. A e direla mekgoko ye mene ya gauta ya go e rwala, mme a e kgokelela dikhutlong ka dine maotwaneng. Mekgoko ya go swara mapara a go rwala tafola a e kgokelela kgauswi le lepanta. A betla mapara ao ka dikota tša mogohlo, mme a a manega ka gauta. A direla tafola dibjana ka gauta ye e sego ya tswakwa, e lego meruswi, megopo, diphafana le digo tša go tšhela dikabelo tša dino. A dira sehlomamabone ka gauta ye e sego ya tswakwa. A dira bogato bja sona le thito ya sona ka gauta ye e rutšwego; matšoba a go se kgabiša, gotee le matšoba a a sego a khukhuša le matlakala a ona ya ba selo se tee le bogato le thito. Makabe a a selelago a tšwa ka mathoko a thito, a mararo ka thoko e tee. Lekabe le lengwe le le lengwe la ona ao a selelago la ba le matšoba a mararo a go le kgabiša a sebopego sa letšoba la moalmone, le matšoba a a sego a khukhuša, le matlakala a ona. Thito ya sehlomamabone yona ya ba le matšoba a mane a go e kgabiša a sebopego sa letšoba la moalmone, le matšoba a a sego a khukhuša, le matlakala a ona. Gwa ba le letšoba le le sego la khukhuša ka fase ga makabe a mangwe le a mangwe a mabedi. Matšoba a a sego a khukhuša le makabe le sehlomamabone ya ba selo se tee sa gauta ye e rutšwego ye e sego ya tswakwa. A dira mabone a a šupago a sehlomamabone, a dira le ditlao tša sona le dibjana tša sona tša magala ka gauta ye e sego ya tswakwa. O dirišitše gauta ye e sego ya tswakwa ya boima bja dikilokramo tše masome a mararo go dira sehlomamabone le ditlabakelo tša sona ka moka. A dira aletare ya go tšhumela seorelo ka dikota tša mogohlo. A e lekalekanya ka mathoko, ya ba ya botelele bja disentimetara tše 46, le bophara bja disentimetara tše 46, mme bogodimo ya ba disentimetara tše 92. Dinakana tša dikhutlo tša yona ya ba selo se tee le yona. A manega bogodimo bja yona le mahlakore a yona ka mane le dinakana tša yona ka moka ka gauta ye e sego ya tswakwa, mme a e direla morumo wa gauta go e dikologa. A e direla mekgoko ye mebedi ya go e rwala, a e kgokelela ka tlase ga morumo mahlakoreng ka mabedi gore go tsene mapara a go e rwala. A betla mapara ao ka dikota tša mogohlo, mme le ona a a manega ka gauta. A dira le makhura a makgethwa a tlotšo, le seorelo se se sego sa tswakwa sa go nkga bose, se se hlakantšwego go swana le senkgabose. A dira aletare ya dihlabelo ka dikota tša mogohlo. Ya lekalekana ka thoko tšohle: ya ba ya botelele bja dimetara tše 2,3, bophara bja dimetara tše 2,3, bogodimo ya ba bja dimetara tše 1,4. A dira dinakana dikhutlong ka dine mme ya ba selo se tee le aletare. Ka moka ga yona a e manega ka mphiri. A dira ditlabakelo ka moka tša aletare – dibjana tša go olelela melora, digarafo, meruswi, diforoko tša mašimelo, le dibjana tša magala. Ditlabakelo tša yona tšohle a di dira ka mphiri. A dira papetla ya mphiri mme a e bea ka fase ga morumo wa aletare gore e be gare ga bogodimo bja aletare. A dira mekgoko ye mene ya go e kuka, mme a e khwamela dikhutlong ka dine tša papetla yeo. A e betlela mapara a go e rwala ka dikota tša mogohlo, a a manega ka mphiri, gomme a a tsenya ka mahlakoreng a mabedi a aletare. Aletare o e dirile ka diphaphathi gomme ya ba lehoa. O ile a dira sebjana sa mphiri sa go hlapela gotee le bogato bja sona bja mphiri ka diipone tša basadi bao ba bego ba šoma mojakong wa Tente ya bodulo bja Morena. A aga kgoro ya Tente ya bodulo bja Morena ka legora la diširo tša lešela le boletiana. Ka lehlakoreng la ka borwa diširo ya ba tša botelele bja dimetara tše 46, mme tša lekeletšwa ka dikgwaetšo le mapheko a silibera dikoteng tša mphiri tše masome a mabedi tše di lego mabogatong a masome a mabedi a mphiri. Kgoro ya ba ka wona mokgwa woo le ka lehlakoreng la ka leboa. Ka lehlakoreng la ka bodikela gwa ba le diširo tša botelele bja dimetara tše 23, tša lekelela dikoteng tše lesome tše di tsemilwego mabogatong a lesome, le dikgwaetšo le mapheko a a dirilwego ka silibera. Le ka bohlabela, ka moo go bego go le mojako, kgoro ya ba ya bophara bja dimetara tše 23. Ka thoko ye nngwe le ye nngwe ya mojako gwa ba le diširo tša dimetara tše 6,9 tše di lekelelago dikoteng tše tharo tše di tsemilwego mabogatong a mararo. *** Diširo ka moka go dikologa kgoro tša dirwa ka lešela le boletiana. Mabogato a dikota ona a dirwa ka mphiri, ge e le dikgwaetšo le mapheko le manego ya bogodimo bja dikota tšona tša dirwa ka silibera. Dikota ka moka tša kgoro go dikologa tša kopanywa ka mapheko a silibera. Seširo sa mojako wa kgoro sa dirwa ka lešela le boletiana le le logeletšwego wulu ya botala bja legodimo, le ya bohubedu bja moretele, le ya bohubedu bja madi la mologelelo wa mebala ya mekgabišo ya bokgwari. Ya ba sa botelele bja dimetara tše 9,2 le bogodimo bja dimetara tše 2,3, go no swana le diširo tša kgoro. Seširo sa thekgwa ka dikota tše nne tše di tsemilwego mabogatong a mane a mphiri. Dikgwaetšo le manego ya bogodimo bja tšona le mapheko a tšona tša dirwa ka silibera. Dibapola ka moka tša Tente le tša kgoro go dikologa tša dirwa ka mphiri. Le ke lenaneo la bontši bja ditshipi tše di dirišitšwego Tenteng ya bodulo bja Morena, moo go bego go beilwe matlapa a mabedi ao go ona go bego go ngwadilwe Melao ye Lesome. Moshe o ntšhitše taelo ya gore go dirwe lenaneo le, mme lona la dirwa ke Balefi ba ba bego ba šoma ba laetšwe ke Ithamara, morwa wa Arone, moprista. Betsaliele, morwa wa Uri, wa kgorwana ya Hure, wa kgoro ya Juda, o dirile tšohle tše Morena a di laetšego. Mothuši wa gagwe, Oholiabe, morwa wa Ahisamake, wa kgoro ya Dane, e bile motloki le mmeakanyi le mologi wa lešela le boletiana, le wa wulu ya botala bja legodimo, le ya bohubedu bja moretele, le ya bohubedu bja madi. Gauta ka moka ye e bego e abetšwe Morena ya Tente ye kgethwa e be e le ya boima bja dikilokramo tše 878 ye e etšwego go ya ka boima bja papetlana ya gauta ya ka Felo mo Gokgethwa. Silibera ye e ntšhitšwego ke batho ba ba badilwego e be e le ya boima bja dikilokramo tše 3 020 ye e etšwego go ya ka boima bja papetlana ya silibera ya ka Felo mo Gokgethwa. Tšhelete ye e be e lekana le ye e ntšhitšwego ke batho ka moka bao ba bego ba badilwe, yo mongwe le yo mongwe a ntšhitše tšhelete ya boima bja dikramo tše 6, ge e elwa go ya ka boima bja papetlana ya silibera ya ka Felo mo Gokgethwa. Banna bao ba bego ba badilwe, ba mengwaga ye masome a mabedi goba go feta moo, e be e le ba 603 550. Ka silibera ya boima bja dikilokramo tše 3 000 go ile gwa bopša mabogato a lekgolo a Tente ye kgethwa le a seširo, dikilokramo tše 30 bogatong bjo bongwe le bjo bongwe. Ka dikilokramo tše 20 tšeo di šalago tša silibera o ile a dira mapheko, le dikgwaetšo tša dikota, le manego ya bogodimo bja dikota tšeo. Mphiri wo o bego o abetšwe Morena e ile ya ba wa dikilokramo tše 2 127. Ka wona o ile a dira mabogato a mojako wa Tente ya bodulo bja Morena, le aletare ya mphiri le papetla ya yona ya mphiri, le ditlabakelo ka moka tša aletare, le mabogato a kgoro go dikologa, le a mojako wa kgoro, le dibapola ka moka tša Tente ya bodulo bja Morena le tša kgoro go dikologa. Ba roka diaparo tša botšhepi tše baprista ba di aparago ge ba dira mošomo wa baprista ka Felo mo Gokgethwa ka wulu ya botala bja legodimo, le ya bohubedu bja moretele, le ya bohubedu bja madi. Ba roka diaparo tše dikgethwa tša Arone ka moo Morena a laetšego Moshe. Ba roka seaparo se sekgethwa ka lešela le boletiana, le ka wulu ya botala bja legodimo, le ya bohubedu bja moretele, le ya bohubedu bja madi, le ka tlhale ya gauta. Ba natla diphaphathi tša gauta mme ba di ripaganya ya ba tše teletšana gore di tle di rokelelwe lešeleng le boletiana, le wulung ya botala bja legodimo, le ya bohubedu bja moretele, le ya bohubedu bja madi. Ba roka mapantana a mabedi a seaparo se sekgethwa, mme ba a rokelela ka mathoko a sona gore se tle se tlengwe ka ona. Lepanta le le logilwego gabotse, le le dirilwego ka tšona dilo tšeo, la rokelelwa seaparong se sekgethwa gore e be selo se tee le sona, ka moo Morena a laetšego Moshe. Ba beakanya dikarneliene, mme ba di rokelela ka gauta. Tša tlokwa maina a barwa ba lesome le ba babedi ba Jakobo ka bothakga. Ba di rokelela mapantaneng a mabedi a magetleng a seaparo se sekgethwa go emela dikgoro tše lesome le tše pedi tša Israele, ka moo Morena a laetšego Moshe. Ba dira phaphathiana ya sehubeng ka dilo tša go swana le tša go dira seaparo se sekgethwa le mologelelo wa sona. E be e lekalekana ka thoko tšohle mme e mennwe gabedi, e le ya disentimetara tše 22 ka botelele, le bophara bja disentimetara tše 22. Ba rokelela methalo ye mene ya magakabje go yona; mothalong wa mathomo ba rokelela rubi, thopase le garneta; mothalong wa bobedi ba rokelela emerale, safire le taamane; mothalong wa boraro ba rokelela thekoise, agathe le amethesite, mme mothalong wa bone ba rokelela berile, karneliene le jaspere. Magakabje a a rokelelwa ka tlhale ya gauta. Le lengwe le le lengwe la magakabje a lesome le a mabedi a la tlokwa leina la yo mongwe wa barwa ba Jakobo go emela dikgoro tše lesome le tše pedi tša Baisraele. Ba dira diketane tša phaphathiana ya sehubeng tše di logagantšwego bjalo ka thapo ka tlhale ya gauta ye e sego ya tswakwa. Ba dira merokelelo ye mebedi ya gauta, le mekgoko ye mebedi ya gauta, mme ba rokelela mekgoko ye mebedi ye dikhutlong tša ka godimo tša phaphathiana ya sehubeng. Ba tlemelela thapo tšela tše pedi tša gauta moo mekgokong ka mebedi, mme dintlha tša dithapo tšeo tše pedi ba di tlemelela merokelelong yeo ye mebedi, mme ka tsela yeo ba tlemelela dithapo ka pele mapantaneng a magetleng a seaparo se sekgethwa. Ba dira mekgoko ye mebedi ya gauta, mme ba e rokelela dikhutlong tše pedi tša ka fase tša phaphathiana ya sehubeng morumong wa ka gare kgauswi le seaparo se sekgethwa. Ba dira mekgoko ye mengwe ye mebedi ya gauta, mme ba e rokelela seripeng sa ka fase ka pele mapantaneng ka mabedi a magetleng a seaparo se sekgethwa, kgauswi le morumo le ka godingwana ga lepanta la seaparo se sekgethwa. Ba tlemaganya mekgoko ya phaphathiana ya sehubeng le ya seaparo se sekgethwa ka thapo ya botala bja legodimo, gore phaphathiana ya sehubeng e be godimo ga lepanta la seaparo se sekgethwa mme e se ke ya hlepha, ka moo Morena a laetšego Moshe ka gona. Ba roka phurabura ye e aparwago ka godimo ga seaparo se sekgethwa, ya rokwa fela ka wulu ya botala bja legodimo. Lešoba la yona la go tsenya hlogo la phethwa ka morumo wo o logilwego, gore seaparo se se ke sa gagoga. Go dikologa morumo wa ka fase wa phurabura ba lekeletša mekgabišo ya go swana le garenate ya lešela le boletiana, le ya wulu ya botala bja legodimo, le ya bohubedu bja moretele, le ya bohubedu bja madi, ya latelana le ditleloko tša gauta ye e sego ya tswakwa, ka moo Morena a laetšego Moshe ka gona. *** *** Ba rokela Arone le barwa ba gagwe dihempe, ba roka le tuku ya hlogo, le dikefana, le diaparo tša ka gare ka lešela, le lepanta la bodiredi ka lešela le boletiana, le ka wulu ya botala bja legodimo, le ya bohubedu bja moretele, le ya bohubedu bja madi, le le logeletšwego mekgabišo ya bokgwari ya mebalabala, ka moo Morena a laetšego Moshe. Ba dira sekgabišo se sekgethwa ka gauta ye e sego ya tswakwa, mme godimo ga sona ba tloka mantšu a: “Se abetšwe Morena”. Ba se tlemelela tukung ya hlogo phatleng ka thapo ya botala bja legodimo, ka moo Morena a laetšego Moshe ka gona. Modiro ka moka wa Tente ya bodulo bja Morena o ile wa phethwa. Baisraele ba be ba dirile se sengwe le se sengwe ka moo Morena a bego a laetše Moshe. Ba tliša Tente ye kgethwa go Moshe le ditlabakelo ka moka tša yona, dikgwaetšo le mahlomo a go thekga, le dipalelo, le dikota, le mabogato; sepipetši sa matlalo a dikgapa a a tloditšwego ka letsoku, le sepipetši sa mekgopa ye boletiana, le seširo sa go šira; Polokelo ya Kgwerano yeo e bego e swere matlapa, le mapara a yona le sekhurumelo sa yona; tafola le ditlabakelo tša yona ka moka, le dinkgwa tše di abetšwego Modimo; sehlomamabone sa gauta ye e sego ya tswakwa le mabone a sona, le ditlabakelo tšohle tša sona, le makhura a mabone; aletare ya gauta, le makhura a tlotšo, le seorelo sa go nkga bose, le seširo sa mojako wa Tente, le aletare ya mphiri le papetla ya yona ya mphiri, le mapara a yona, le ditlabakelo ka moka tša yona, le sebjana sa go hlapela le bogato bja sona, le diširo tša kgoro le dikota le mabogato a tšona, le seširo sa mojako wa kgoro le dithapo tša sona, le dibapola tša Tente le ditlabakelo ka moka tša tirelo ya Tenteng, le diaparo tša botšhepi tše baprista ba bego ba swanetše go di apara Felo mo Gokgethwa – diaparo tše dikgethwa tša Arone, moprista, le tša barwa ba gagwe. Baisraele ba be ba phethile modiro ka moo Morena a bego a laetše Moshe ka gona. Moshe o ile a lekola se sengwe le se sengwe, mme a hwetša gore ba dirile tšohle ka moo Morena a bego a laetše ka gona. Ka fao Moshe a ba šegofatša. Morena a re go Moshe: “Ka letšatši la pele la kgwedi ya mathomo o hlome Tente ya bodulo bja ka. Ka gare ga yona o bee Polokelo ya Kgwerano yeo e swerego Melao ye Lesome, mme o e širetše ka seširo. O tsenye tafola ka Tenteng, mme o beakanye ditlabakelo godimo ga yona. O tsenye le sehlomamabone, mme o hlome mabone godimo ga sona. O bee aletare ya gauta ya go tšhumela seorelo pele ga Polokelo ya Kgwerano yeo e swerego Melao ye Lesome, gomme o fege seširo mojakong wa Tente. Pele ga mojako wa Tente o bee aletare ya dihlabelo. O bee sebjana sa go hlapela gare ga Tente le aletare, mme o se tlatše meetse. O hlome kgoro mme o fege seširo mojakong wa yona. “Ka morago ga fao o kgethwafatše Tente le ditlabakelo tša yona ka moka ka go e tlotša ka makhura a tlotšo, mme e tla ba ye kgethwa. Bjale o kgethwafatše aletare le ditlabakelo tša yona ka moka ka go e tlotša ka ona, mme e tla ba ye kgethwakgethwa. O kgethwafatše le sebjana sa go hlapela le bogato bja sona ka yona tsela yeo. “O tliše Arone le barwa ba gagwe mojakong wa Tente, gomme o ba hlapiše ka meetse. O apeše Arone diaparo tše dikgethwa, o mo tlotše ka makhura ale, mme e be go mo kgethwafatša, gore a tle a kgone go ntirela e le moprista. O tliše barwa ba gagwe, o ba apeše dihempe. Bjale o ba tlotše ka wona mokgwa woo o tloditšego tatabo, gore ba tle ba kgone go ntirela e le baprista. Go tlotšwa mo go tla ba dira baprista ba go ya go ile.” Moshe a dira tšohle ka moo Morena a mo laetšego. Ka fao ka letšatši la pele la kgwedi ya mathomo ya ngwaga wa bobedi ka morago ga ge ba tlogile Egepeta, Tente ya bodulo bja Morena ya hlongwa. Moshe a bea mabogato a yona, a hloma mahlomo a yona a go e thekga, a tlemelela dipalelo tša yona, mme a tsema dikota tša yona. A phurolla sepipetši godimo ga Tente, a bea le sepipetši sa ka ntle godimo ga sona, ka moo Morena a laetšego ka gona. Ka morago ga fao a tšea matlapa ale a mabedi a a bea ka Polokelong ya Kgwerano. A khwamela mapara mekgokong ya Polokelo, mme a e khurumela ka sekhurumelo. Bjale a bea Polokelo ka Tenteng mme a fega seširo sa go e širetša. Ka tsela ye a šireletša Polokelo ya Kgwerano yeo e bego e swere matlapa, ka moo Morena a bego a laetše ka gona. A bea tafola ka Tenteng, ka lehlakoreng la ka leboa ka ntle ga seširo, gomme godimo ga yona a beakanya dinkgwa tšeo di bego di abetšwe Morena, ka moo Morena a bego a laetše ka gona. A bea sehlomamabone ka Tenteng go lebana le tafola ka lehlakoreng la ka borwa, gomme moo pele ga Morena a hloma mabone ale, ka moo Morena a bego a laetše ka gona. A bea aletare ya gauta ka Tenteng pele ga seširo, mme a tšhuma seorelo sa go nkga bose, ka moo Morena a bego a laetše ka gona. A fega seširo mojakong wa Tente, mme moo pele ga seširo a bea aletare ya dihlabelo. Godimo ga yona a dira sehlabelo sa go tšhungwa ka moka, le kabelo ya bupi, ka moo Morena a bego a laetše ka gona. A bea sebjana sa go hlapela gare ga Tente le aletare, mme a se tlatša meetse. Moshe le Arone le barwa ba gagwe ba hlapela diatla le maoto ka moo nako ye nngwe le ye nngwe ge ba tsena ka Tenteng, goba ba batamela aletare, ka moo Morena a bego a laetše ka gona. Moshe a hloma kgoro go dikologa Tente le aletare, mme a fega seširo mojakong wa kgoro. Ke ka mo a phethilego modiro ka moka. Bjale leru la pipetša Tente ya bodulo bja Morena, mme seetša se se fahlago sa letago la Morena sa tlala Tente. Ka baka leo Moshe a se ke a kgona go tsena ka Tenteng. Mo leetong lohle la Baisraele, e be e re ge leru le apoga ka godimo ga Tente, Baisraele ba huduge. Ge leru le sa apoge, ba be ba sa huduge. Leetong la bona ka moka ba be ba bona leru la letago la Morena godimo ga Tente mosegare, le mollo wo o tukago ka godimo ga yona bošego. Morena o ile a bitša Moshe a le Tenteng ya bodulo bja Morena, a mo fa melawana ye gore Baisraele ba e phethe ge ba dira dihlabelo tša bona. Ge motho a dira sehlabelo ka seruiwa, a ka hlaba kgomo goba sehuswane sa gagwe. Ge a dira sehlabelo ka kgomo e le sa go tšhungwa ka moka, a se dire ka poo ye e se nago bosodi. A e tliše mojakong wa Tente ya bodulo bja Morena gore Morena a e amogele. A bee seatla godimo ga hlogo ya yona, gomme e tla amogelwa e le sehlabelo sa go mmoelanya le Morena ka ge a be a dirile sebe. A hlabe poo yeo moo, gomme baprista ba Baarone ba tliše madi pele ga Morena mme ba foke aletare ye e lego mojakong wa Tente ka mahlakoreng ka moka. Ke moka a bue seruiwa seo, a be a se phakologanye, gomme baprista ba Baarone ba gotše mollo godimo ga aletare, ba bešetše dikgong. Ba bee ditho tša seruiwa seo le hlogo le makhura a dipshio moo mollong. Motho yoo a hlatswe dikateng le meomo, gomme moprista a tšhume sehlabelo seo ka moka godimo ga aletare. Monkgo wa sona o tsefela Morena. Ge eba a dira sehlabelo ka sehuswane, e be sa tona se se se nago bosodi. A se hlabe ka lehlakoreng la ka leboa la aletare, gomme baprista ba foke aletare ka madi a sona ka mahlakoreng ka moka. Ge a e phakologantše, moprista a bee ditho ka moka le hlogo le makhura a dipshio mollong. Motho yoo a hlatswe dikateng le meomo, gomme moprista a tliše sehlabelo seo go Morena, mme a se tšhume ka moka aletareng. Monkgo wa sehlabelo se o tsefela Morena. Ge motho a direla Morena sehlabelo sa go tšhungwa ka moka ka nonyana, e be mokuru goba leeba. Moprista a e tliše aletareng, a e phetle molala, gomme a tšhume hlogo ya yona moo. Madi a yona a gamolelwe ka lehlakoreng la aletare. A ntšhe tšelo le tšeo di lego ka go yona, mme a di lahlele ka bohlabela bja aletare moo go tšhollelwago melora. A e sware ka diphego mme a e fatole ka bogare ka ntle le go thaola diphego tšeo, gomme a e tšhume ka moka aletareng. Monkgo wa sehlabelo se o tsefela Morena. Ge motho a tlišetša Morena kabelo ya bupi, e be bja matoka. A bo tšhele makhura a mohlware le seorelo, gomme a bo tliše go baprista ba Baarone. Moprista a ntšhe bupi bjoo le makhura ka legoswi, le seorelo seo ka moka, gomme a di tšhume aletareng e le sešupo sa gore tšohle di abetšwe Morena. Monkgo wa kabelo ye o tsefela Morena. Kabelo ye e šetšego ke ya baprista; ke ye kgethwakgethwa, ka ge e tšerwe buping bjo bo abetšwego Morena. Ge kabelo e le dinkgwa tše di pakilwego ka ontong, e be tša bupi bja matoka tše di se nago komelo. E ka ba tše di dirilwego ka bupi bjo bo hlakantšwego le makhura a mohlware, goba tša diphaphathiana tše di tšhatšhitšwego ka makhura a mohlware. Ge kabelo e le dinkgwa tše di pakilwego ka pane, e be tša bupi bja matoka bjo bo hlakantšwego le makhura a mohlware, eupša bo se na le komelo. A di ngwathaganye mme a di tšhele ka makhura; seo ke kabelo ya bupi. Ge kabelo e le dinkgwa tše di apeilwego ka pitša, e be tša bupi bja matoka le makhura a mohlware. A bo tliše go Morena e le kabelo, a bo neele baprista bao ba tlago bo iša aletareng. Moprista a tšee seripa sa bjona e le sešupo sa gore ka moka bo abetšwe Morena, mme a se tšhume aletareng. Monkgo wa kabelo ye o tsefela Morena. Kabelo ye e šetšego ke ya baprista; ke ye kgethwakgethwa, ka gobane e tšerwe buping bjo bo abetšwego Morena. Go se ke gwa ba le e tee ya dikabelo tša bupi tšeo le di tlišago go Morena le di dirile ka komelo; le se ke la tsoge le šomišitše komelo goba todi kabelong ya bupi ye le e tšhumelago Morena. Le ka šomiša komelo goba todi dikabelong tša mabele a pele a le a bunago, eupša monkgo wa tšona o ka se tsefele Morena ge di tšhungwa godimo ga aletare. Le tšhele kabelo ye nngwe le ye nngwe ya bupi letswai, ka gobane letswai le emela kgwerano ya Modimo le lena. Dikabelo tšohle tša lena le di tšhele letswai. Ge o tlišetša Morena kabelo ya mabele a mathomo a o a bunago, o tliše dithuthupe tša mabele, goba bupi bja mabele a mafsa. O e tšhele makhura a mohlware le seorelo. Moprista a tšhume seripa sela sa bupi le sa makhura go laetša gore kabelo yohle ke ya Morena, gotee le seorelo ka moka. Ke kabelo ya bupi go Morena. Ge motho a dira sehlabelo sa kagišano ka kgomo ya gagwe, e ka ba ye tona goba ye tshadi e be ye e se nago bosodi. A bee seatla godimo ga hlogo ya kgomo yeo, gomme a e hlabe mojakong wa Tente ya bodulo bja Morena. Baprista ba Baarone ba foke aletare ka madi mahlakoreng ka moka, gomme ba abele Morena ditho tše di latelago tša kgomo yeo e le sehlabelo: mabipi ka moka, dipshio le makhura a a lego go tšona, le mphapha wo moteletšana wa sebete. Baprista ba tšhume ditho tše ka moka aletareng gotee le sehlabelo sa go tšhungwa ka moka. Monkgo wa sehlabelo se o tsefela Morena. Ge a dira sehlabelo sa kagišano ka sehuswane, e ka ba se setona goba se setshadi, eupša e be se se se nago bosodi. Ge motho a abela Morena kwanyana, a bee seatla godimo ga hlogo ya yona, gomme a e hlabe pele ga Tente ya bodulo bja Morena. Baprista ba foke aletare ka madi a yona mahlakoreng ka moka, gomme ba abele Morena ditho tše di latelago tša sehuswane seo e le sehlabelo: makhura, le mosela wohle o ripilwe kgauswi le mokokotlo, le mabipi ka moka, le dipshio le makhura ao a lego go tšona, le mphapha wo moteletšana wa sebete. Moprista a tšhume dilo tše aletareng e le sehlabelo sa dijo go Morena. Ge motho a abela Morena pudi, a bee seatla godimo ga hlogo ya yona, gomme a e hlabe pele ga Tente ya bodulo bja Morena. Baprista ba foke aletare ka madi a yona mahlakoreng ka moka, gomme ba abele Morena ditho tše di latelago e le sehlabelo: mabipi ka moka, dipshio le makhura a a lego go tšona, le mphapha wo moteletšana wa sebete. Baprista ba tšhume dilo tše godimo ga aletare e le sehlabelo sa dijo se se tsefelago Morena. Makhura ka moka ke a Morena. Le se tsoge le jele makhura goba bobete; ye ke taelo ye lena le ditlogolo tša lena le swanetšego go e phetha go ya go ile gohle moo le dulago gona. Morena o laetše Moshe gore a botše Baisraele gore ge yo mongwe a ka dira sebe a tshela ye nngwe ya ditaelo tša Morena a se a ikemišetša, o swanetše go phetha melawana ye e latelago. Ge sebe se dirilwe ke Moprista yo Mogolo, ka fao a obela setšhaba molato, a tliše powana ye e se nago bosodi mme a e hlabele Morena ka baka la sebe sa gagwe. A e tliše mojakong wa Tente ya bodulo bja Morena, a bee seatla godimo ga hlogo ya yona, gomme a e hlabe moo pele ga Morena. Moprista yo Mogolo a tšee madi a mangwe a poo, a tsene nao Tenteng. A ine monwana mading, gomme a a fokele gašupa pele ga seširo se sekgethwa. A tlotše dinakana tša dikhutlo tša aletare ya seorelo ka gare ga Tente ka madi a mangwe. A tšhollele madi a a šetšego thitong ya aletare ya dihlabelo ye e lego mojakong wa Tente. A ntšhe makhura ka moka a poo yeo, le mabipi, le dipshio le makhura a a lego go tšona, le mphapha wo moteletšana wa sebete. Moprista a tšee ditho tšeo a di tšhume aletareng ya dihlabelo. Ditho tšeo di ntšhwago di swane le tšela di ntšhwago sehlabelong sa kagišano. Eupša mokgopa wa yona, le nama ya yona ka moka, le hlogo ya yona, le maoto a yona, le dikateng tša yona gotee le mošwang, tšohle a di ntšhe mešašeng a di iše lefelong le le hlweketšego tirelo moo go tšhollwago melora, gomme fao a di tšhume ka mollo wa dikgong. Ge sebe se dirilwe ke setšhaba ka moka sa Israele, gomme sa ba le molato wa go tshela ye nngwe ya ditaelo tša Morena se se sa ikemišetša, ge sebe se seno tsebja, setšhaba se tliše powana e be sehlabelo sa tshwarelo ya dibe. Se e tliše Tenteng ya bodulo bja Morena; bagolo ba setšhaba ba bee diatla godimo ga hlogo ya yona, gomme e hlabje moo pele ga Morena. Moprista yo Mogolo a iše madi a mangwe a yona ka Tenteng, a ine monwana go ona gomme a a fokele gašupa pele ga seširo. A tlotše dinakana tša dikhutlo tša aletare ya seorelo ye e lego ka gare ga Tente ka madi a mangwe a yona, gomme a tšhollele a a šetšego thitong ya aletare ya dihlabelo ye e lego mojakong wa Tente. A tšee makhura ka moka a yona a a tšhume aletareng. A dire ka poo ye ka wona mokgwa woo a dirago ka poo ya sehlabelo sa tshwarelo ya dibe, mme ka tsela ye a boelanye setšhaba le Morena ka ge ba be ba dirile sebe, gomme ba tla lebalelwa. Ka morago a ntšhetše poo yeo ka ntle ga mešaša, gomme a e tšhume ka wona mokgwa woo a tšhumago poo yeo e hlabjago ka baka la sa gagwe sebe. Se ke sehlabelo sa go tloša sebe sa setšhaba. Ge sebe se dirilwe ke mmuši, mme a ba le molato wa go tshela ye nngwe ya ditaelo tša Morena a se a ikemišetša, ge a seno tsebišwa sebe seo, a tliše phooko ye e se nago bosodi e be sehlabelo sa gagwe. A bee seatla godimo ga hlogo ya yona, gomme a e bolaele moo diruiwa tša dihlabelo tša go tšhungwa ka moka di bolaelwago gona. Se ke sehlabelo sa go tloša dibe. Moprista a ine monwana mading a phooko yeo, a tlotše dinakana tša dikhutlo tša aletare ya dihlabelo ka ona, gomme ao a šalago a a tšhollele thitong ya aletare. A tšhume makhura a yona ka moka aletareng, ka wona mokgwa woo a tšhumago makhura a diruiwa tšeo di bolaetšwego go ba dihlabelo tša kagišano. Ka sehlabelo se sa sebe moprista a boelanye mmuši le Morena ka ge mmuši a be a dirile sebe, gomme o tla lebalelwa. Ge sebe se dirilwe ke mothofela, mme a ba le molato wa go tshela ye nngwe ya ditaelo tša Morena a se a ikemišetša, ge a seno tsebišwa sebe seo, a tliše pudi ya tshadi ye e se nago bosodi e be sehlabelo sa gagwe. A bee seatla godimo ga hlogo ya yona, gomme a e hlabe moo go bolaelwago diruiwa tša dihlabelo tša go tšhungwa ka moka. Moprista a ine monwana mading a pudi yeo, a tlotše dinakana tša dikhutlo tša aletare, gomme a a šetšego a a tšhollele thitong ya aletare. A tloše makhura ka moka go yona, bjalo ka ge makhura a diruiwa tše di bolailwego go ba dihlabelo tša kagišano a tlošwa, gomme a a tšhume aletareng go dira monkgo wo o tsefelago Morena. Ka sehlabelo se sa sebe moprista a boelanye motho yoo le Morena, gomme motho yoo o tla lebalelwa. Ge motho a tliša kwanyana e le sehlabelo sa tshwarelo ya dibe, e be ya tshadi ye e se nago bosodi. A bee seatla godimo ga hlogo ya yona gomme a e hlabe moo diruiwa tša dihlabelo tša go tšhungwa ka moka di bolaelwago gona. Moprista a ine monwana mading a kwanyana yeo, a tlotše dinakana tša dikhutlo tša aletare ka ona, gomme ao a šetšego a a tšhollele thitong ya aletare. A tloše makhura a yona ka moka ka moo makhura a tlošwago kwanyaneng ye e bolaetšwego go ba sehlabelo sa kagišano, mme a a tšhume aletareng gotee le dikabelo tša go tšhumelwa Morena. Ka sehlabelo se sa tshwarelo ya dibe moprista a boelanye motho yoo le Morena, gomme yoo o tla lebalelwa. Dihlabelo tša tshwarelo ya dibe di nyakega melatong ye e latelago. Ge motho a biditšwe phatlalatša go tlo ba hlatse kgorong ya tsheko gomme a se ke a bolela se a se bonego goba a se kwelego, o na le molato. Ge motho a ka kgwatha selo se se tšhilafetšego a se a ikemišetša, se se bjalo ka phoofolo goba segagabi se se hwilego, o tšhilafetše mme o na le molato ge a seno bona se a se dirilego. Ge motho a ka kgwatha selo se se tšhilafetšego sa go tšwa mothong a se a ikemišetša, e ka ba eng goba eng, o na le molato ge a seno bona se a se dirilego. Ge motho a ka ena a se a nagana gabotse go dira selo, e ka ba se sebotse goba se sebe, o na le molato ge a seno bona se a se dirilego. Ge motho a ne molato, o swanetše go ipolela sebe seo, gomme a tlišetše Morena kwanyana ya tshadi goba pudi ya tshadi e be selefa sa molato wa sebe seo sa gagwe. Moprista a boelanye motho yoo le Morena ka sehlabelo se, ka ge a be a dirile sebe. Ge motho a se na le kwanyana goba putšane, a tlišetše Morena mekuru ye mebedi goba maeba a mabedi e be selefa sa sebe sa gagwe; le lengwe e be sehlabelo sa tshwarelo ya dibe, mme le lengwe e be sehlabelo sa go tšhungwa ka moka. A a tliše go moprista yo a swanetšego go dira sehlabelo sa tshwarelo ya dibe ka nonyana ya pele. A le phetle molala a sa le kgaole hlogo, gomme a fokele madi a mangwe a lona ka thoko ya aletare. Madi ao a šetšego a gamolelwe thitong ya aletare. Se ke sehlabelo sa tshwarelo ya dibe. Ka morago a dire sehlabelo sa go tšhungwa ka moka ka nonyana ya bobedi, go ya ka molao. Ka tsela ye moprista a boelanye motho yoo le Morena ka ge a be a dirile sebe, gomme o tla lebalelwa. Ge motho a se ne mekuru ye mebedi goba maeba a mabedi, a tliše bupi bja kilokramo e tee e le kabelo ya go tloša dibe. A se ke a bo tšhela makhura a mohlware goba seorelo, ka gobane ke kabelo ya tshwarelo ya dibe. A bo tliše go moprista yo a swanetšego go ntšha legoswi la bjona go laetša gore ka moka ga bjona bo abetšwe Morena. Bupi bjoo bja legoswi a bo tšhume aletareng e le kabelo. Ke kabelo ya tshwarelo ya dibe. Ka tsela ye moprista a boelanye motho yoo le Morena ka ge a be a dirile dibe tšeo ka moka, gomme motho yoo o tla lebalelwa. Bupi bjo bo šetšego ke bja moprista, go ya ka molao wa kabelo ya bupi. Morena o file Moshe melawana ye. Ge motho a ka tshela molao a dira sebe a se a ikemišetša ka go se tšhele metšhelo ye mekgethwa ya Morena, a tliše kgapa goba phooko ye e se nago bosodi e le selefa sa gagwe go Morena. Theko ya yona e bewe ka dipapetlana tša silibera ye e etšwego go ya ka boima bja papetlana ya silibera ya ka Felo mo Gokgethwa. O tlemegile go tšhela metšhelo ye a šitilwego ke go e tšhela, gomme godimo ga moo a lefe le karolo ya bohlano ya yona. A e fe moprista, gomme ka go hlaba sehuswane seo e le sehlabelo sa tshwarelo ya dibe, moprista a boelanye motho yoo le Morena, gomme o tla lebalelwa. Ge motho a ka dira sebe a se a ikemišetša ka go dira se se iletšwago ke Morena, o tla ba le molato, mme o swanetše go lefa molato woo. A tliše kgapa goba phooko ye e se nago bosodi go moprista e le kabelo ya tefelo ya dibe. Theko ya yona e bewe ka dipapetlana tša silibera ye e etšwego go ya ka boima bja papetlana ya silibera ya ka Felo mo Gokgethwa. Ka go dira sehlabelo ka sehuswane seo, moprista a boelanye motho yoo le Morena ka ge a be a dirile sebe, gomme o tla lebalelwa. Ke sehlabelo sa tefelo ya dibe se motho yoo a swanetšego go se dira ka ge a senyeditše Morena. Morena o file Moshe melawana ye. Ge motho a senyeditše Morena ka go latola gore Moisraelekayena o kile a mo neela selo gore a mo lotele sona, goba ka go mo utswetša, goba ka go mo amoga selo, goba ka go bolela maaka ka selo se se timetšego mme a ena gore ga se a se thwala, goba a ena ka maaka ka sebe se a se dirilego, go swanetše go dirwa sehlabelo. Ge motho a dirile sebe se sebjalo, a lefe seo a se hweditšego ka bomenetša bja mohuta woo. Ka letšatši leo a bonwego molato ka lona, o swanetše go lefa mong wa selo ka botlalo; godimo ga moo a be a mo lefe le karolo ya bohlano ya sona. *** A tliše kgapa goba phooko ye e se nago bosodi go moprista e le sehlabelo sa tefo go Morena. Theko ya yona e bewe ka dipapetlana tša silibera ye e etšwego go ya ka boima bja papetlana ya silibera ya ka Felo mo Gokgethwa. Ka sehlabelo se moprista a boelanye motho yoo le Morena ka ge a be a dirile sebe, gomme o tla lebalelwa. Morena o laetše Moshe gore a fe Arone le barwa ba gagwe melawana ye e latelago ya dihlabelo tša go tšhungwa ka moka. Sehlabelo sa go tšhungwa ka moka se swanetše go tlogelwa aletareng bošego ka moka, mme mollo o tukišwe bošego bjohle. Ke moka moprista a apare seaparo sa gagwe sa lešela, le diaparo tša ka gare tša lešela, gomme a tloše melora ye e šetšego aletareng, a e bee ka thoko ga aletare. A apole diaparo tšeo tša gagwe, a apare tše dingwe, a ntšhetše melora ka ntle ga mešaša a e iše felong moo go hlweketšego tirelo. Mollo wola wa aletareng o fele o tukišwa, o se ke wa leswa wa tima. Mosong wo mongwe le wo mongwe moprista a beše dikgong go wona, a beakanye sehlabelo sa go tšhungwa ka moka godimo ga wona, gomme a tšhume makhura a sehlabelo sa kagišano. Ka mehla mollo o fele o tukišwa aletareng, o se ke wa leswa wa tima. Še melawana ya dikabelo tša bupi. Moprista wa Moarone a tlišetše Morena kabelo ya bupi pele ga aletare. Ke moka a ntšhe legoswi la bupi bjo bo hlakantšwego le makhura a mohlware, a tšee le seorelo sohle, mme a di tšhume aletareng go laetša gore tšohle di abetšwe Morena. Monkgo wa kabelo ye o tsefela Morena. Baprista ba je tšeo di šalago. Go apewe dinkgwa tše di se nago komelo ka tšona mme di lewe felong mo gokgethwa, e lego kgorong ya Tente ya bodulo bja Morena. Morena o ba file tšona gore e be seripa sa bona sa dikabelo tša bupi. Ke tše kgethwakgethwa go swana le dihlabelo tša tshwarelo ya dibe le dihlabelo tša tefelo ya tšona. Banna bohle ba e lego ditlogolo tša Arone ba ka di ja e le seaba sa bona go ya go ile sa dijo tše di abelwago Morena. Mang le mang yo a kgwathago kabelo ya bupi o tla tšhelwa madimabe ke maatla a bokgethwa bja yona. *** Morena o file Moshe melawana ye e latelago ya go bea moprista wa Moarone. Ka letšatši leo a bewago ka lona, a tlišetše Morena bupi bja kilokramo e tee e le kabelo, bupi bjo bo lekanago le bja kabelo ya bupi ya letšatši ka letšatši, seripagare mosong le seripagare mantšiboa. Bo hlakanywe le makhura a mohlware, bo apewe ka pane, gomme bo šilwe bo tlišwe e le kabelo; wo ke monkgo wo o tsefelago Morena. Ka mehla mabakeng a a tlago kabelo ye e swanetše go dirwa ke ditlogolo tšohle tša Arone tše e lego Baprista ba Bagolo. E tšhungwe ka moka e le kabelo ya Morena. Go se be le se se lewago se se apeilwego ka kabelo ya moprista ya bupi; kabelo yeo ka moka e tšhungwe. Morena o laetše Moshe go fa Arone le barwa ba gagwe melawana ye e latelago ya dikabelo tša tshwarelo ya dibe. Seruiwa sa sehlabelo sa tshwarelo ya dibe se swanetše go hlabja moo go bolaelwago diruiwa tša dihlabelo tša go tšhungwa ka moka. Se ke sehlabelo se se kgethwakgethwa. Moprista yo a hlabago seruiwa a se jele felong mo go kgethwa, ka kgorong ya Tente ya bodulo bja Morena. Se se ka kgwathago nama ya seruiwa seo se tla tšhelwa madimabe ke maatla a bokgethwa bja yona. Ge seaparo se ka thantshelwa ke madi a seruiwa seo, se swanetše go hlatswiwa felong mo gokgethwa. Pitša ya letsopa yeo nama e apeilwego ka yona e swanetše go pšhatlwa, gomme ge go šomišitšwe pitša ya mphiri, e swanetše go gohlwa mme e tšokotšwe ka meetse. Monna yo mongwe le yo mongwe wa lapa la moprista a ka ja sehlabelo se; ke se kgethwakgethwa. Eupša ge madi a sehlabelo sa tshwarelo ya dibe a ka tsenywa ka Tenteng mme ka ona gwa boelanywa motho le Morena, sehlabelo seo se se ke sa lewa; se tšhungwe. Melawana ya dihlabelo tše kgethwakgethwa tša tefelo ya dibe še. Seruiwa sa sehlabelo se se swanetše go hlabja moo diruiwa tša dihlabelo tša go tšhungwa ka moka di bolaelwago gona, gomme ka madi a sona go fokwe aletare mahlakoreng ka moka. Makhura a sona ka moka, a mosela, le mabipi, le dipshio le makhura a tšona, le mphapha wo moteletšana wa sebete a tšhungwe aletareng. Moprista a tšhume makhura ka moka aletareng e le sehlabelo go Morena. Ke sehlabelo sa tefelo ya dibe. Monna yo mongwe le yo mongwe wa lapa la moprista a ka se ja. Se swanetše go jelwa ka felo mo gokgethwa, ka gobane ke se sekgethwakgethwa. Go na le molawana o tee wo o amago sehlabelo sa tshwarelo ya dibe le sehlabelo sa tefelo ya tšona: nama ke ya moprista yo a dirago sehlabelo. Mokgopa wa seruiwa seo se bolaetšwego go ba sehlabelo sa go tšhungwa ka moka ke wa moprista yo a dirago sehlabelo. Kabelo ye nngwe le ye nngwe ya bupi – e ka ba dinkgwa tše di pakilwego ka ontong, goba tšohle tše di pakilwego ka pitša goba ka pane – ke ya moprista yo a e abetšego Morena. Fela dikabelo ka moka tša bupi tše di sego tša apewa, di hlakantšwe le makhura goba di se tša hlakanywa nao, ke tša baprista ba Baarone, gomme ba swanetše go di abelana ka go lekana. Še melawana ya dihlabelo tša kagišano tšeo di direlwago Morena. Ge motho a dira sehlabelo se e le sa go leboga Morena, a tliše seruiwa gotee le kabelo ya dinkgwa tše di apeilwego ntle le komelo: e ka ba tše di dirilwego ka bupi bjo bo hlakantšwego le makhura a mohlware, goba tša diphaphathiana tše di tšhatšhitšwego ka makhura a mohlware, goba tša go nyaka go swana le tšela di dirilwego ka bupi bjo bo hlakantšwego le makhura a mohlware. A di tliše le dinkgwa tše di tšhetšwego komelo. A tliše seripa se tee sa mohuta wo mongwe le wo mongwe wa senkgwa e le mpho ye e fiwago Morena ka tsela ye e itšeng; ke sa moprista yo a fokago aletare ka madi a sehlabelo. Nama ya sehlabelo seo e lewe ka letšatši leo go dirilwego sehlabelo ka lona; e se ke ya šadišwa go fihlela mosong wa letšatši le le latelago. Ge motho a dira sehlabelo sa kagišano e le go phethagatša keno goba e le sehlabelo sa gagwe sa go ithaopa, ga se gore nama yohle ya sona e tlemegile go lewa ka letšatši leo, eupša ye e ka šalago e ka lewa ka letšatši le le latelago. Nama ye e sa šetšego le ka letšatši la boraro e swanetše go tšhungwa. Ge ye nngwe ya yona e ka lewa ka letšatši la boraro, Modimo a ka se amogele sehlabelo sa monna yoo. Sehlabelo seo se ka se mo hole ka selo, eupša se tla tšewa gore se tšhilafetše, gomme yo a se jago o tla otlwa. Ge nama yeo e ka kgwathwa ke se sengwe se se tšhilafetšego, e se ke ya lewa, e tšhungwe. Mang le mang yo a hlwekilego a ka ja nama yeo, eupša ge yo mongwe yo a sego a hlweka a ka e ja, o swanetše go kgaolwa setšhabeng sa gabo. Le gona, ge motho a ka ja nama ya sehlabelo se a kgwathile se sengwe se se sego sa hlweka, sa go tšwa mothong goba phoofolong, goba se sengwe se se tšhilafetšego, o swanetše go kgaolwa setšhabeng sa gabo. Morena o file Moshe melawana ye e latelago ya setšhaba sa Israele. Le se ke la ja makhura a kgomo goba a nku goba a pudi. Makhura a seruiwa seo se ikhwetšego ka bosona, goba seo se bolailwego ke dibata a se ke a lewa, eupša a ka šomišwa ka mererong ye mengwe. Motho yo a ka jago makhura a sehlabelo se se tšhumelwago Morena a kgaolwe setšhabeng sa gabo. Mo gongwe le mo gongwe mo Baisraele ba dulago gona ba se ke ba tsoga ba lle bobete bja dinonyana goba bja diphoofolo. Yo a ka tshelago molao wo a kgaolwe setšhabeng sa gabo. Morena o file Moshe melawana ye e latelago ya setšhaba sa Israele. Yo a dirago sehlabelo sa kagišano a tliše seripa sa sona e le mpho ye e itšeng go Morena, a se tliše ka boyena e le sehlabelo. A tliše makhura a sehlabelo seo le leumo la sona, gomme leumo le abelwe Morena e le mpho ye e fiwago yena ka tsela ye e itšeng. Moprista a tšhume makhura aletareng, eupša leumo lona e be la baprista. Serope sa la go ja sa sehlabelo seo se fiwe moprista yo a dirago sehlabelo ka madi le makhura a sehlabelo sa kagišano e le kabelo ye e abjago ka tsela ye e itšeng. *** Leumo la sehlabelo seo ke mpho ye e fiwago Morena ka tsela ye e itšeng, gomme serope sa la go ja le sona ke kabelo ye e abelwago Morena ka tsela ye e itšeng. Ke ditho tše Morena a di tšerego go setšhaba sa Israele mme a di fa baprista. Tše ke tše Baisraele ba swanetšego go di fa baprista ka dinako tšohle. Tše ke diripa tša dihlabelo tše di direlwago Morena tšeo di filwego Arone le barwa ba gagwe ka letšatši lela ba beilwego baprista ka lona. Ka letšatši leo Morena o laetše Baisraele gore ba ba fe diripa tše tša sehlabelo. Ke molawana wo ba swanetšego go o phetha ka dinako tšohle. Yeo ke melawana ya dihlabelo tša go tšhungwa ka moka, le dikabelo tša bupi, le dihlabelo tša tshwarelo ya dibe, le dihlabelo tša tefelo ya tšona, le dihlabelo tša go bewa ga baprista, le dihlabelo tša kagišano. Morena o file Moshe melawana ye thabeng ya Sinai kua lešokeng, ka letšatši le a boditšego Baisraele gore ba direle yena Morena dihlabelo le dikabelo. Morena o rile go Moshe: “Tšea Arone le barwa ba gagwe o ba iše mojakong wa Tente ya bodulo bja ka, o tliše le diaparo tša boprista le makhura a tlotšo, le powana ya sehlabelo sa tshwarelo ya dibe, le dikgapa tše pedi, le seroto sa dinkgwa tše di se nago komelo. Ke moka o kgobokanye setšhaba ka moka fao.” Moshe a dira ka mo Morena a mo laetšego ka gona, gomme ge setšhaba se bokane, a re go bona: “Se ke tlilego go se dira bjale ke se Morena a laetšego gore se dirwe.” Moshe a batametša Arone le barwa ba gagwe go yena mme a ba hlapiša. A apeša Arone hempe le phurabura, a mo tlema letheka ka lepanta la bodiredi. A mo apeša seaparo se sekgethwa, gomme a se tlema lethekeng ka lepanta la sona le le logilwego gabotse. A mo apeša phaphathiana ya sehubeng, gomme a bea Urime le Tumime ka gare ga yona. A mo rweša tuku ya hlogo, a tlemelela go yona mo patleng sekgabišo se sekgethwa sa gauta, ka moo Morena a mo laetšego ka gona. A tšea makhura a tlotšo a tlotša Tente ya bodulo bja Morena le tšohle tše di bego di le ka go yona, mme ka go dira bjalo a di kgethwafaletša Morena. A tšea makhura a mangwe a foka aletare ka ona gašupa, a foka le ditlabakelo tša yona, le sebjana sa go hlapela le thito ya sona, gore a di kgethwafaletše Morena. A bea Arone moprista ka go mo tlotša hlogo ka makhura ao. Ke moka a batametša barwa ba Arone go yena mme a ba apeša dihempe, a ba tlema matheka ka mapanta a bodiredi, mme a ba rweša dikefana, ka moo Morena a laetšego ka gona. Ke mo a tlišitšego powana ya sehlabelo sa tshwarelo ya dibe, gomme Arone le barwa ba gagwe ba bea diatla godimo ga hlogo ya yona. Moshe a e hlaba, gomme a tšea madi a mangwe a yona a tlotša dinakana tša dikhutlo tša aletare ka monwana, gore a hlwekiše aletare. Madi a a šetšego a a tšholla thitong ya aletare. Ka tiro yeo ya go boelanya motho le Morena a kgethwafatša aletare. A ntšha mabipi ka moka, le mphapha wo moteletšana wa sebete, le dipshio le makhura a a lego go tšona, gomme a di tšhuma aletareng. A tšea poo yeo ka moka le mokgopa wa yona le nama le mošwang, a di tšhuma ka ntle ga mešaša, ka moo Morena a laetšego ka gona. A tliša kgapa ya sehlabelo sa go tšhungwa ka moka, gomme Arone le barwa ba gagwe ba bea diatla godimo ga hlogo ya yona. Moshe a e hlaba, gomme a foka aletare ka madi a yona mahlakoreng ka moka. A phakologanya kgapa yeo, a hlatswa dikateng le meomo, gomme a tšhuma hlogo ya yona le makhura le tšohle tše di šetšego aletareng, ka wona mokgwa woo Morena a laetšego. Sehlabelo se sa go tšhungwa ka moka se be se diretšwe Morena, gomme monkgo wa sona wa mo tsefela. *** Moshe a tliša kgapa ya bobedi ye e bego e le ya go bewa ga baprista, gomme Arone le barwa ba gagwe ba bea diatla godimo ga hlogo ya yona. Moshe a e hlaba, gomme a tšea madi a mangwe a yona a tlotša lerephu la tsebe ya la go ja ya Arone, le monwana wa gagwe wo mogolo wa seatla sa la go ja, le monwana wa gagwe wo mogolo wa leoto la go ja. A batametša barwa ba Arone go yena, gomme a tšea madi a mangwe a tlotša marephu a ditsebe tša bona tša la go ja, le menwana ya bona ye megolo ya diatla tša la go ja, le menwana ya bona ye megolo ya maoto a la go ja ka ona. A foka aletare ka madi a a šetšego mahlakoreng ka moka. A tšea makhura, le mosela, le mabipi ka moka, le mphapha wo moteletšana wa sebete, le dipshio le makhura a a lego go tšona, le serope sa la go ja. Ke moo a tšerego senkgwa se tee serotong sa dinkgwa tše di se nago komelo tše di abetšwego Morena, se tee se se dirilwego ka makhura a mohlware, le senkgwa se tee sa phaphathiana, gomme a di bea godimo ga makhura le serope sa la go ja. A bea dijo tše ka moka ka diatleng tša Arone le tša barwa ba gagwe, gomme ba di abela Morena e le mpho ye e fiwago yena ka tsela ye e itšeng. A tšea dijo tšeo go bona mme a di tšhuma aletareng, gotee le sehlabelo sa go tšhungwa ka moka, e le sehlabelo sa go bea baprista. Sehlabelo se se be se diretšwe Morena, gomme monkgo wa sona wa mo tsefela. Ke moo Moshe a tšerego leumo a le abela Morena e le mpho ye e fiwago yena ka tsela ye e itšeng. E ile ya ba setho sa Moshe sa kgapa yela ya go bewa ga baprista. Moshe a dira tšohle ka moo Morena a laetšego ka gona. A tšea makhura a mangwe a tlotšo le madi a mangwe a a bego a le aletareng, a foka Arone le barwa ba gagwe le diaparo tša bona ka ona. Ka tsela ye a ba kgethwafatša gotee le diaparo tša bona. A re go Arone le barwa ba gagwe: “Tšeang nama ye le e iše mojakong wa Tente ya bodulo bja Morena, le e apee, le e jele fao gotee le dinkgwa tšela di lego ka serotong sa dikabelo tša ge go bewa ga baprista, ka moo Morena a laetšego ka gona. Nama ye e ka šalago goba senkgwa le e tšhume. Le se ke la tloga mojakong wa Tente pele matšatši a a šupago a ditirelo tša go bewa boprista ga lena a fela. Morena o re laetše go dira se re se dirilego lehono gore le boelanywe le yena. Le swanetše go dula mojakong wa Tente ya bodulo bja Morena matšatši a a šupago bošego le mosegare, le dira tše Morena a le laetšego. Ge le ka se dire bjalo, le tla hwa. Se ke se Morena a ntaetšego sona.” Ka gona Arone le barwa ba gagwe ba dira tšohle tše Morena a di laetšego ka Moshe. Ka letšatši la seswai, letšatši la ka morago ga ge ditirelo tša go bea baprista di feditšwe, Moshe a bitša Arone le barwa ba gagwe le bagolo ba Baisraele. A re go Arone: “Tšea powana le kgapa ye e se nago bosodi o direle Morena dihlabelo ka tšona; powana e be ya sehlabelo sa tshwarelo ya dibe, gomme kgapa e be ya sehlabelo sa go tšhungwa ka moka. O botše Baisraele ba tšee phooko ya sehlabelo sa tshwarelo ya dibe, le namane ya ngwaga o tee, le kwanyana ya ngwaga o tee ye e se nago bosodi e be tša sehlabelo sa go tšhungwa ka moka, le poo le kgapa e be tša sehlabelo sa kagišano. Ba direle Morena dihlabelo ka tšona gotee le kabelo ya bupi ye e hlakantšwego le makhura a mohlware. Ba swanetše go dira seo ka gobane Morena o tla iponagatša go bona lehono.” Tšohle tše Moshe a bego a ba laetše tšona ba di tliša pele ga Tente ya bodulo bja Morena, gomme setšhaba ka moka sa bokana moo pele ga Morena. Moshe a re: “Morena o le laetše gore le dire tše ka moka, gore seetša se se fahlago sa letago la gagwe se tle se bonagale go lena.” A re go Arone: “Sepela aletareng o yo dira sehlabelo sa tshwarelo ya dibe, le sehlabelo sa go tšhungwa ka moka go ipoelanya le Morena, le go boelanya setšhaba le Morena. O dire sehlabelo se gomme o boelanye setšhaba le Morena, ka moo Morena a laetšego ka gona.” Arone a ya aletareng mme a hlaba powana ye e bego e le ya sehlabelo sa tshwarelo ya dibe tša gagwe. Barwa ba gagwe ba mo tlišetša madi, gomme a ina monwana wa gagwe go ona, a tlotša dinakana tša dikhutlo tša aletare, mme a tšhollela madi ao a šetšego thitong ya aletare. A tšhuma makhura, le dipshio, le mphapha wo moteletšana wa sebete aletareng, ka moo Morena a laetšego Moshe ka gona. Eupša nama le mokgopa a di tšhuma ka ntle ga mešaša. A hlaba kgapa ye e bego e le ya sehlabelo sa go tšhungwa ka moka. Barwa ba gagwe ba mo tlišetša madi, gomme a foka aletare ka ona mahlakoreng ka moka. Ba mo neela hlogo ya kgapa le ditho tše dingwe tša seruiwa seo, gomme a di tšhuma aletareng. Ke moka a hlatswa dikateng le meomo, gomme a di tšhuma aletareng gotee le sehlabelo se sa go tšhungwa ka moka. Ka morago ga moo a dira dihlabelo tša setšhaba. A tšea pudi ye e bego e tlile go dirwa sehlabelo sa tshwarelo ya dibe tša setšhaba, a e hlaba, a dira sehlabelo ka yona, bjalo ka ge a dirile ka sehlabelo sa tshwarelo ya dibe tša gagwe. A tliša le seruiwa sa sehlabelo sa go tšhungwa ka moka gomme a dira sehlabelo ka yona, go ya ka melawana ya sehlabelo seo. A tliša kabelo ya bupi a ntšha legoswi la bjona mme a di tšhuma aletareng. Se e be e le go tlaleletša sehlabelo sa go tšhungwa ka moka sa letšatši ka letšatši. A hlaba poo le kgapa e le sehlabelo sa kagišano sa setšhaba. Barwa ba gagwe ba mo tlišetša madi, mme a foka aletare ka ona mahlakoreng ka moka. A bea ditho tša makhura tša poo le tša kgapa, e lego mosela, le mabipi, le dipshio, le mphapha wo moteletšana wa sebete, godimo ga maumo a diruiwa tšeo. Ka morago ga moo a tšhuma makhura aletareng, mme a abela Morena maumo le dirope tša la go ja e le mpho ye e fiwago yena Morena ka tsela ye e itšeng, bjalo ka ge Moshe a laetše. Ge a feditše go dira dihlabelo tšeo ka moka, a emišetša matsogo setšhabeng a se šegofatša, mme a theoga. Moshe le Arone ba tsena ka Tenteng ya bodulo bja Morena, gomme ge ba etšwa ba šegofatša setšhaba, mme seetša se se fahlago sa letago la Morena sa bonwa ke setšhaba ka moka. Ke moka Morena a romela mollo wa metša sehlabelo sa go tšhungwa ka moka le ditho tša makhura godimo ga aletare. Ge setšhaba se di bona, ka moka sa goa mme ba itahlela fase ka difahlego. Barwa ba Arone, Nadaba le Abihu, ba tšea dibjana tša bona tša magala ba nokela magala, ba tšhela seorelo godimo ga ona, gomme ba a tliša go Morena. Fela mollo wo o be o se wa dumelelwa, ka gobane Morena o be a se a ba laela go o tliša. Ka bjako Morena a romela mollo, gomme wa ba tšhuma ba hwa gona moo pele ga gagwe. Moshe a re go Arone: “Se ke se Morena a bego a bolela ka sona ge a re: ‘Ka moka bao ba ntirelago ba swanetše go hlompha bokgethwa bja ka; ke tla utollela setšhaba sa ka letago la ka.’ ” Eupša Arone a ikhomolela. Moshe a bitša Mishaele le Elitsafane, barwa ba Usiele, rangwane wa Arone, a re go bona: “Tlang mo, le tlošeng ditopo tša bomorwarragolena Tenteng ye kgethwa, le di bee ka ntle ga mešaša.” Ba tla ba di kuka di sa le ka diaparong tša boprista ba di iša ka ntle ga mešaša, ka moo Moshe a laetšego ka gona. Ke moo Moshe a itšego go Arone le barwa ba gagwe, Eleasara le Ithamara: “Le se ke la tlogela meriri ya ba mahlafarara, goba la gagola diaparo tša lena. Ge le ka dira bjalo le tla hwa, gomme Morena o tla befelelwa setšhaba ka moka. Fela Baisraele ba gabolena ka moka bona ba dumeletšwe go ilela bahu ba ba bolailwego ka mollo woo Morena a o rometšego. Le se ke la tloga mojakong wa Tente gore le se hwe, ka gobane le beilwe baprista ka makhura a Morena a tlotšo.” Ba dira bjalo ka ge Moshe a be a ba laetše. Morena a re go Arone: “Wena le barwa ba gago le se ke la tsena ka Tenteng ya bodulo bja ka le nwele beine goba bjala, gore le se hwe. Wo ke molao woo o swanetšego go phethwa ke ditlogolo tša gago ka moka. Le kgetholle tše dikgethwa go tše e sego tše dikgethwa, le tše di hlwekilego go tše di sego tša hlweka. Le ruteng setšhaba sa Israele melao ka moka ye ke le filego yona ka Moshe.” Moshe a re go Arone le go barwa ba gagwe ba babedi ba ba šetšego, Eleasara le Ithamara: “Tšeang kabelo ya bupi ye e šetšego mola dijong tše di abetšwego Morena, mme ka yona le direng senkgwa se se se nago komelo, gomme le se je ka lehlakoreng la aletare, ka gobane kabelo ye ke ye kgethwakgethwa. Le se jeng felong mo gokgethwa; ke seripa se e lego sa gago le barwa ba gago sa dijo tše di abetšwego Morena. Seo ke se Morena a ntaetšego sona. Gomme lena le ba malapa a lena le ka jela leumo le serope tšela di abelwago Morena e le mpho ye e fiwago yena, le kabelo ye e abelwago yena ka tsela ye e itšeng. Le ka di ja lefelong lefe le lefe le le hlweketšego tirelo. Diaba tše di filwe lena le bana ba lena e le seripa se e lego sa lena sa dihlabelo tša kagišano tša Baisraele. Ba tliše serope seo le leumo leo ka nako ya ge makhura a tlišwa e le sehlabelo go Morena. Diaba tše ke tša lena le bana ba lena go ya go ile, ka moo Morena a laetšego ka gona.” Moshe a botšiša ka pudi ya sehlabelo sa tshwarelo ya dibe, gomme a kwa gore e šetše e tšhumilwe. Ka gona a befelelwa Eleasara le Ithamara mme a ba botšiša a re: “Ke ka baka lang le se la ja sehlabelo sa tshwarelo ya dibe felong mo go kgethwa? Ke se sekgethwakgethwa, gomme Morena o le file sona gore le tloše sebe sa setšhaba go se boelanya le Morena. Ka ge madi a yona a se a tlišwa ka tenteng ye kgethwa, le be le swanetše go ja sehlabelo seo ka ntshe, ka moo ke laetšego ka gona.” Arone a mo fetola a re: “Ge nkabe ke lle sehlabelo seo lehono, a seo se be se tla kgahla Morena? Setšhaba se diretše Morena sehlabelo sa sona sa tshwarelo ya dibe le sehlabelo sa go tšhungwa ka moka lehono, le ge go le bjalo ke hlagetšwe ke tše šoro tše.” Ge Moshe a ekwa taba yeo, a kgotsofala. Morena o file Moshe le Arone melawana ye ya Baisraele. Le ka ja phoofolo efe goba efe ya nageng ye e nago le ditlhako tša mapharo gape ye e otlago. Eupša le se ke la ja dikamela le dipela le mebutla. Tše di swanetše go tšewa gore di tšhilafetše; di a otla, eupša ga di ne ditlhako tša mapharo. *** *** Le se ke la ja dikolobe. Di swanetše go tšewa gore di tšhilafetše; di na le ditlhako tša mapharo, fela ga di otle. Le se ke la ja diphoofolo tše le ge e le go kgwatha ditoto tša tšona; di tšhilafetše. Le ka ja dihlapi tša mohuta ofe le ofe tše di nago le diphegwana le magapi, eupša se sengwe le se sengwe se se phelago ka meetseng se se ne diphegwana le magapi se tšhilafetše. Dibopiwa tša mohuta woo di swanetše go tšewa gore ke ditšhila go lena. Ga le a swanela go di ja le ge e le go kgwatha ditoto tša tšona. Se sengwe le se sengwe se se phelago ka meetseng mme se se ne diphegwana le magapi ke ditšhila go lena. Dinonyana tše di latelago le se ke la di ja; ke ditšhila go lena: manong, le dintšhu, le maaka ka mehuta ya ona, le dipekwa ka mehuta ya tšona, le magokobu ka mehuta ya ona, le dimpšhe, le maribiši ka mehuta ya ona, le digotšane ka mehuta ya tšona, le dikokolohute, le megole, le bomašianoke ka mehuta ya bona, le dikukuku, le bomankgaganyane ka mehuta ya bona. *** *** *** *** *** *** Dikhunkhwane ka moka tše di nago le diphego di tšhilafetše, ntle le tšeo di nago le maotwana a di tabogatabogago ka ona. Le ka ja tšie ya segongwane ka mehuta ya yona, le ditatakgope ka mehuta ya tšona, le mehloro ka mehuta ya yona, le ditlhakwanapitsi ka mehuta ya tšona. Eupša dilo tše dingwe tše nnyane tše di nago le diphego gape di nago le maotwana a mane di swanetše go tšewa gore ke ditšhila go lena. Yo a ka kgwathago ditoto tša diphoofolo tše di latelago o tla tšhilafala go fihlela mantšiboa: diphoofolo ka moka tša ditlhako, ge e se ge ditlhako tša tšona e le mapharo gomme di otla, le diphoofolo ka moka tša maoto a mane tša borofa. Yo a ka rwalago ditoto tša tšona o swanetše go hlatswa diaparo tša gagwe, eupša o tla fela a sa tšhilafetše go fihlela mantšiboa. *** *** *** *** Dirunya le magotlo le mahohomedi le mekgaritswane ye mengwe le maobu di swanetše go tšewa gore di tšhilafetše. *** Yo a ka di kgwathago di hwile o tla tšhilafala go fihlela mantšiboa. Gomme ge di ka wela godimo ga selo se sengwe di hwile, se tla tšhilafala, e ka ba se se dirilwego ka kota goba lešela goba mokgopa goba lesaka, go sa kgathalege gore se šomišwa go dira eng. Selo seo se inwe meetseng, eupša se tla no ba se tšhilafetše go fihlela mantšiboa. Gomme ge ditoto tša tšona di ka wela ka pitšeng ya letsopa, se sengwe le se sengwe se se lego ka go yona se tla tšhilafala, gomme pitša yeo le e pšhatle. Dijo tše di loketšego go lewa, ge di ka tšhelwa ka meetse a a tšwago ka pitšeng yeo, di tla tšhilafala, le seno sefe le sefe se se lego ka pitšeng yeo se tšhilafetše. Selo sefe le sefe se se ka welwago ke ditoto tša dilo tšeo se tšhilafetše; ge e ka ba onto goba setofo sa letsopa se pšhatlwe; ge e le mothopo goba molete wa meetse wona ga o tšhilafale, go tšhilafala se se ka kgwathago ditoto tša tšona tše di wetšego ka go wona. Ge setoto sa tšona se ka wela godimo ga peu ye e yago go bjalwa, peu yeo e ka se tšhilafale. Eupša ge peu yeo e ka welwa ke setoto sa tšona e šetše e innwe ka meetseng, gona peu yeo e tšhilafetše. Ge phoofolo ye e lewago e ka hwa, yo a ka e kgwathago o tla tšhilafala go fihlela mantšiboa. Gomme yo a ka jago nama ya yona, a hlatswe diaparo tša gagwe, fela o tla fela a sa tšhilafetše go fihlela mantšiboa; yo a ka rwalago setoto seo o swanetše go hlatswa diaparo tša gagwe, fela o tla fela a sa tšhilafetše go fihlela mantšiboa. Le se ke la ja segagabi sefe le sefe, e ka ba se se sepelago ka mpa, goba ka maoto a mane, goba ka maoto a mantši – tšohle di tšhilafetše. Le se ke la itšhilafatša ka go ja se sengwe sa tšona. Ke nna Morena Modimo wa lena, gomme ineeleng go nna, mme le beng ba bakgethwa, ka gore nna ke yo mokgethwa. Ke nna Morena yo ke le ntšhitšego Egepeta gore ke tle ke be Modimo wa lena. Le beng ba bakgethwa, ka gobane nna ke yo mokgethwa. Woo ke wona molao mabapi le diphoofolo, le dinonyana, le diphedi tšohle tša ka meetseng, le digagabi tšohle. Molao wo ke wa gore le kgethologanye se se hlwekilego le se se sego sa hlweka, diphedi tše di ka lewago le tšeo di sego tša swanela go lewa. Morena o file Moshe melawana ye ya Baisraele. Ge mosadi a ka belega ngwana wa mošemane, o tšhilafala matšatši a a šupago, go no swana le ge a tšhilafala ge a bone kgwedi. Ka letšatši la seswai ngwana yoo a bolotšwe. Go tla feta matšatši a mangwe a masome a mararo le metšo ye meraro gore mmagwe a hlweke ka ge a tšwele madi; a se ke a kgwatha selo se sekgethwa goba a tsena ka Tenteng ye kgethwa go fihlela ge nako ya gagwe ya go hlwekišwa e fetile. Ge mosadi a ka belega ngwana wa mosetsana, o tšhilafala matšatši a lesome le a mane, go no swana le ge a tšhilafala ge a bone kgwedi. Go tla feta matšatši a mangwe a masome a a selelago le metšo ye e selelago gore a hlweke ka ge a tšwele madi. Ge mosadi a belege ngwana wa mošemane goba wa mosetsana mme nako ya go hlwekišwa ga gagwe e fetile, a tliše kwanyana ya ngwaga o tee go moprista mojakong wa Tente ya bodulo bja Morena e le sehlabelo sa go tšhungwa ka moka; a tliše le leeba goba mokuru e le sehlabelo sa tshwarelo ya dibe. Moprista a direle Morena sehlabelo seo sa mosadi yoo mme a mmoelanye le yena; ke moo a tlago ba a hlwekišitšwe ka ge a be a tšwele madi. Seo ke se mosadi a swanetšego go se dira ge a seno belega. Ge mosadi a se ne kwanyana, a tliše mekuru ye mebedi goba maeba a mabedi, le lengwe e be la sehlabelo sa go tšhungwa ka moka, mme le lengwe e be la sehlabelo sa tshwarelo ya dibe, gomme moprista a mmoelanye le Morena, mme o tla hlweka. Morena o file Moshe le Arone melawana ye e latelago. Ge motho a na le serurugi letlalong goba mogarogo goba setswata, gomme selo seo sa keka ya ba bolwetši bja letlalo bja go mo tšhilafatša, a tlišwe go moprista Arone, goba go yo mongwe wa baprista ba Baarone. Moprista a lekodišiše sešo seo, gomme ge mehlahla ye e lego go sona e fetogile ye mešweu mme sešo nke se sobeletše letlalong, ke bolwetši bja letlalo bja go mo tšhilafatša. Moprista a bege gore o tšhilafetše. Eupša ge sešo e le se sešweu gomme nke ga se sa sobelela letlalong mme mehlahla le yona e se ya fetoga ye mešweu, moprista a beele motho yoo thoko matšatši a a šupago. A mo hlahlobe gape ka letšatši la bošupa, gomme ge ka moo a bonago ka gona sešo seo se sa swana le pele mme se se sa keka, a beele motho yoo thoko matšatši a mangwe a a šupago. A mo hlahlobe gape ka letšatši la bošupa, mme ge sešo seo se timelela gomme se sa keke, a bege gore o hlwekile; e be e le sešo fela. Motho yoo a hlatswe diaparo tša gagwe, mme e tla ba yo a hlwekilego. Eupša ge sešo se ka keka ka morago ga ge moprista a mo hlahlobile mme a itše o hlwekile, o swanetše go tla go moprista gape. Moprista a mo hlahlobe gape, gomme ge sešo se kekile, moprista a bege gore o tšhilafetše; ke bolwetši bja letlalo bja go mo tšhilafatša. Ge motho a na le bolwetši bja letlalo bja go mo tšhilafatša, a tlišwe go moprista, mme yena a mo hlahlobe. Ge go na le serurugi se sešweu letlalong la gagwe seo se fetošago mehlahla gore e be ye mešweu mme se bulegile, ke bolwetši bja go se fole bja letlalo bja go mo tšhilafatša. Moprista a re o tšhilafetše, mme a se hlwe a re o mmeela thoko, ka gobane go a bonagala gore o tšhilafetše. Ge bolwetši bjoo bja letlalo bo ka phatlalala bja aparela motho yoo go tloga hlogong go fihla leotong, moprista a mo hlahlobe gape. Ge a ka hwetša gore gabotsebotse bo aparetše mmele ka moka, a bege gore motho yoo o hlwekile. Ge letlalo la gagwe ka moka le fetogile le lešweu, o hlwekile. Fela go tloga ka nako ye sešo se se phulegilego se bonala, o tšhilafetše. Moprista a mo hlahlobe gape, gomme ge a ka hwetša sešo se se phulegilego, a re motho yoo o tšhilafetše. Sešo seo se phulegilego se šupa bolwetši bja letlalo bja go mo tšhilafatša, gomme motho yoo o tšhilafetše. Eupša ge sešo seo se fola mme se eba se sešweu gape, motho yoo a ye go moprista, mme yena a mo hlahlobe gape. Ge sešo seo se fetogile se sešweu, o hlwekile, gomme moprista a re o hlwekile. Ge motho a be a tšwile sekaku mme sa fola, gomme ka morago gwa bonala serurugi se sešweu goba setswata sa bošweu bja bohubedu moo go bego go le sekaku, a ye go moprista. Moprista a mo hlahlobe, gomme ge felo fao go bonala go sobeletše letlalong mme mehlahla ya moo e fetogile ye mešweu, moprista a re motho yoo o tšhilafetše. Ke bolwetši bja letlalo bja go mo tšhilafatša bjo bo thomilego ka sekakung. Eupša ge moprista a ka hlahloba felo fao, gomme a hwetša gore mehlahla ya moo ga se ya fetoga ye mešweu, le gore felo fao ga se gwa sobelela letlalong, fela go galogile, moprista a beele motho yoo thoko matšatši a a šupago. Ge go ka keka, moprista a re motho yoo o tšhilafetše; o swerwe ke bolwetši. Eupša ge sekaku se ka ema felo gotee mme sa se ke sa keka, ke fela lebadi la sekaku sela, gomme moprista a re motho yoo o hlwekile. Mabapi le motho yo a swelego, ge ntho yeo e eba ye tšhweu goba ya bošweu bja bohubedu, moprista a mo hlahlobe. Ge mehlahla ya setswata e fetogile ye mešweu mme se sobeletše letlalong, ke bolwetši bja letlalo bja go mo tšhilafatša bjo bo thomilego nthong ya mollo, gomme moprista a re motho yoo o tšhilafetše. Eupša ge mehlahla ya setswata e se ya fetoga ye mešweu mme felo fao go se gwa sobelela letlalong, fela go galogile, moprista a mmeele thoko matšatši a a šupago. Moprista a mo hlahlobe gape ka letšatši la bošupa, gomme ge go keka, ke bolwetši bja letlalo bja go mo tšhilafatša, mme moprista a re motho yoo o tšhilafetše. Eupša ge setswata se ka ema felo gotee mme sa se keke, sa galoga, ke go tšwa ga mollo fela. Moprista a re motho yoo o hlwekile, ka gobane ke fela leswao la go swa mola. Ge monna goba mosadi a tšwile sešo hlogong goba seledung, moprista a se hlahlobe. Ge e ka ba se sobeletše letlalong mme meriri ya moo go sona ke ye mesehla ye mesesenyane, ke bolwetši bja letlalo bja go mo tšhilafatša, gomme moprista a re motho yoo o tšhilafetše. Ge eba ge moprista a mo hlahloba, sešo seo ga se bonale se sobeletše letlalong, le ge go le bjalo go se na meriri ye meso go sona, moprista a mmeele thoko matšatši a a šupago. Moprista a se hlahlobe gape ka letšatši la bošupa, gomme ge se sa ka sa keka, go se na meriri ye mesehla go sona mme se sa bonale se sobeletše letlalong, motho yoo a kote tikologo ya sešo seo. Moprista a mmeele thoko matšatši a mangwe a a šupago. Ka letšatši la bošupa moprista a se hlahlobe gape, gomme ge se se sa keka mme se sa bonale se sobeletše letlalong, a re motho yoo o hlwekile. Motho yoo a hlatswe diaparo tša gagwe, mme o tla be a hlwekile. Eupša ge sešo seo se ka keka ka morago ga ge moprista a itše o hlwekile, a mo hlahlobe gape. Ge se kekile, moprista a se hlwe a re o nyaka meriri ye mesehla; go molaleng gore motho yoo o tšhilafetše. Eupša ge go ya ka mo moprista a bonago ka gona sešo se sa ka sa keka gomme go sona go metše meriri ye meso, sešo seo se a timelela, gomme moprista a re motho yoo o hlwekile. Ge monna goba mosadi a ka tšwa ditswata tše tšhweu letlalong, moprista a hlahlobe motho yoo. Ge ditswata tšeo e le tše tshehla, e no ba fela dibabo tše di tšwelego letlalong; motho yoo o hlwekile. Ge motho a hlobega meriri hlogong ka sephothong goba ka thoko ya phatla, e no ba lefatla fela; seo ga se mo tšhilafatše. *** Eupša ge sešo sa bošweu bja bohubedu se ka tšwa moo lefatleng, ke bolwetši bja letlalo bja go mo tšhilafatša. Moprista a mo hlahlobe, gomme ge go na le serurugi sa bošweu bja bohubedu sa go swana le sa bolwetši bja letlalo bja go mo tšhilafatša, moprista a re o tšhilafetše, ka baka la bolwetši bjoo bo lego hlogong ya gagwe. Motho yo a nago le bolwetši bja letlalo bja go mo tšhilafatša, a apare diaparo tša mankgeretla, a tlogele moriri e le mahlafarara, a ipipe go tloga molomong go ya seledung, gomme a goelele a re: “Ke tšhilafetše! Ke tšhilafetše!” Ge a sa swerwe ke bolwetši bjoo e tla no ba yo a tšhilafatšego, gomme o swanetše go dula ka ntle ga mešaša, kgole le batho. Ge go na le mouta seaparong, e ka ba sa wulu goba sa leokodi, goba lešeleng la go logwa ka leokodi goba ka wulu, goba mokgopeng goba selong se se dirilwego ka mokgopa, e le se se talanyana goba se se hubetšwana, ke mouta wa go tšhilafatša gomme o swanetše go laetšwa moprista. Moprista a hlahlobe selo seo, gomme a se beele thoko matšatši a a šupago. A se hlahlobe gape ka letšatši la bošupa, mme ge mouta woo o kekile, selo seo se tšhilafetše. Moprista a se tšhume, ka gobane ke mouta wa go tšhilafatša wo o swanetšego go fedišwa ka mollo. Eupša ge moprista a ka re a se hlahloba a hwetša mouta wola o se wa keka moo seaparong goba selong seo, a laele gore se hlatswiwe gomme se beelwe thoko matšatši a mangwe a a šupago. Ka morago ga moo a se hlahlobe gape, gomme ge mouta o se wa fetoga mmala, le ge o se wa keka, se sa tšhilafetše; a se tšhume, le ge se llwe ka ntle goba ka gare. Eupša ge e ka re ge moprista a se hlahloba gape a hwetša mouta o tlogile, a gagole seripana sa seaparo goba sa selo mo go nago le mouta. Ka morago, ge mouta wola o ka bonala la bobedi mme wa keka gape, mong wa selo seo a se tšhume. Ge a ka hlatswa selo seo mme mouta wa timelela, a se hlatswe gape, gomme e tla ba se se hlwekilego. Wo ke wona molao mabapi le mouta seaparong, e ka ba sa wulu goba sa leokodi, goba sa lešela la go logwa ka leokodi goba ka wulu, goba selong se se dirilwego ka mokgopa. Morena o file Moshe melawana ye mabapi le go hlwekišwa ga motho yo a alafilwego bolwetši bja letlalo bja go mo tšhilafatša. Ka letšatši le a tlago begwa gore o hlwekile, a tlišwe go moprista, gomme moprista a mo ntšhe mešašeng, mme a mo hlahlobe. Ge motho yoo a fodile, moprista a laele gore go tlišwe dinonyana tše pedi tše di phelago tše di hlwekilego, gotee le kotana ya mosedere, le thapo ye khubedu, le motšitlo wa hisopo. Moprista a laele gore ye nngwe ya dinonyana tšeo e bolaelwe ka moruswing wo o swerego meetse a a sa tšogo gewa mothopong. A tšee yela ye nngwe nonyana a e ine gotee le kotana yela ya mosedere le thapo ye khubedu le hisopo ka mading a nonyana yela ya go bolawa. Moprista a foke motho yoo a tlilego go hlwekišwa bolwetšing bja letlalo ka madi ao gašupa, gomme a bege gore o hlwekile. A lese nonyana yela e phelago e fofele nageng. Motho yoo a hlatswe diaparo tša gagwe, a ipoole moriri le maledu le dintšhi le maboya ka moka mmeleng wa gagwe, a be a hlape mmele; ke mo a tlago ba yo a hlwekilego. A ka tla mešašeng, eupša o swanetše go dula ka ntle ga mošaša wa gagwe matšatši a a šupago. Ka letšatši la bošupa a ipoole gape; a hlatswe diaparo tša gagwe gomme a hlape mmele; ke gona e tlago ba yo a hlwekilego. *** Ka letšatši la seswai a tliše dikgapana tše pedi le kwanyana e tee ya tshadi ya ngwaga o tee tše di se nago bosodi, le bupi bja dikilokramo tše tharo bjo bo hlakantšwego le makhura a mohlware e le kabelo ya bupi, le karolo ya boraro ya litara ya makhura a mohlware. Moprista a iše motho yoo le dikabelo tšeo mojakong wa Tente ya bodulo bja Morena. Ke moka a tšee kgapana e tee le karolo yela ya boraro ya makhura a mohlware a dire sehlabelo sa tefelo ya dibe. A di abele Morena e le mpho ye e fiwago yena ka tsela ye e itšeng. A bolaye kgapana felo mola diruiwa tša dihlabelo tša tshwarelo ya dibe le tša dihlabelo tša go tšhungwa ka moka di bolaelwago gona. O swanetše go dira seo ka gobane sehlabelo sa tefelo ya dibe ke sa go lewa ke moprista, go no swana le sehlabelo sa tshwarelo ya dibe, mme ke se sekgethwakgethwa. Moprista a tšee madi a mangwe a kgapana a tlotše lerephu la tsebe ya la go ja, le monwana wo mogolo wa letsogo la go ja, le monwana wo mogolo wa leoto la go ja la motho yo a tlilego go begwa gore o hlwekile. Moprista a tšee makhura a mangwe a mohlware a itšhelele ona ka seatleng sa la mpogošo, a ine monwana wa la go ja go ona, gomme a foke ka ona gašupa fao pele ga Morena. A tšee makhura a mangwe ka seatleng sa gagwe le madi a mangwe a kgapana a tlotše lerephu la tsebe ya la go ja, le monwana wo mogolo wa letsogo la go ja, le monwana wo mogolo wa leoto la go ja la motho yo a tlilego go begwa gore o hlwekile. Moprista a tšhele makhura a a šetšego ka seatleng sa gagwe godimo ga hlogo ya motho yoo. E be gona go mo phethela tiro ya poelano moo pele ga Morena. Ke moka moprista a dire sehlabelo sa tshwarelo ya dibe, gomme ka mokgwa wo a boelanye mohlwekišwa le Morena. Ka morago ga moo a bolaye seruiwa sa sehlabelo sa go tšhungwa ka moka, mme a se tliše le kabelo ya bupi aletareng. Ka tsela ye moprista a boelanye motho yoo le Morena, gomme motho yoo e tla ba yo a hlwekilego. Ge motho yoo a diila mme a se ne sa gagwe, a tliše kgapana e tee e le sehlabelo sa tefelo ya dibe, mpho ye e fiwago Morena ka tsela ye e itšeng, gore a tle a boelanywe le Morena. A tliše bupi bja kilokramo e tee bjo bo hlakantšwego le makhura a mohlware e le kabelo ya bupi, le karolo ya boraro ya litara ya makhura a mohlware. A tliše le mekuru ye mebedi goba maeba a mabedi, le lengwe e be la sehlabelo sa tshwarelo ya dibe, le lengwe e be la sehlabelo sa go tšhungwa ka moka. Ka letšatši la seswai la go hlwekišwa ga gagwe a a tliše go moprista mojakong wa Tente ya bodulo bja Morena moo Morena a lego gona. Moprista a tšee kgapana yeo le makhura a mohlware mme a di abele Morena e le mpho ye e fiwago yena ka tsela ye e itšeng. A bolaye kgapana yeo, gomme a tšee madi a mangwe a yona a tlotše lerephu la la go ja la tsebe ya motho yoo, le monwana wo mogolo wa letsogo la gagwe la go ja, le monwana wo mogolo wa leoto la gagwe la go ja. Moprista a itšhelele makhura a mangwe ka seatleng sa a mpogošo, gomme ka monwana wa letsogo la gagwe la go ja a foke ka ona gašupa moo pele ga Morena. A tšee makhuranyana a mangwe ka seatleng sa gagwe a a tlotše mola a tloditšego madi: lerephung la la go ja la tsebe ya motho yoo, le monwaneng wo mogolo wa letsogo la gagwe la go ja, le monwaneng wo mogolo wa leoto la gagwe la go ja. A tšhele makhura a a šetšego ka seatleng sa gagwe godimo ga hlogo ya motho yoo, mme ka tsela ye a mo phethele tiro ya poelano moo pele ga Morena. Ka morago a dire sehlabelo sa tshwarelo ya dibe ka mokuru o tee goba leeba le tee, gomme ka le lengwe a dire sehlabelo sa go tšhungwa ka moka gotee le kabelo ya bupi. Ka tsela ye moprista a boelanye mohlwekišwa le Morena. *** Wo ke molao wo o swanetšego go phethwa ke motho yo a nago le bolwetši bja letlalo bja go mo tšhilafatša, eupša a se ne dilo tša mehleng tše di nyakegago tša go hlwekišwa ga gagwe. Morena o file Moshe le Arone melawana ye e latelago mabapi le mengwako ye a ka e tšhelago mouta wa go tšhilafatša. Melawana ye e be e swanetše go phethwa ka morago ga ge setšhaba sa Israele se tsene nageng ya Kanana, yeo Morena a bego a ile go ba fa yona. Mang le mang yo a bonago se se swanago le mouta ka ngwakong wa gagwe a botše moprista ka sona. Moprista a laele gore se sengwe le se sengwe se tlošwe ngwakong pele ga ge a tsena go tlo lekola selo seo; go sego bjalo se sengwe le se sengwe ngwakong se tla tšhilafala. Ke moka a tsene ka ngwakong mme a lekole selo seo. Ge go le makonko a botalanyana bja lehlare goba a bohubetšwana a a bonalago a eja leboto, a tšwe ngwakong mme a o tswalele matšatši a a šupago. Ka letšatši la bošupa a boe mme a o lekole gape. Ge selo seo se keketše mabotong a ngwako, a laele gore maswika ao selo seo se hwetšwago go ona a tlošwe, a lahlelwe lefelong le lengwe le le tšhilafaletšego tirelo ka ntle ga motse. Ka morago ga moo a laele gore maboto ka moka a gopše ka gare mme thogorogo ye e tšwago moo e tšhollelwe lefelong le le tšhilafaletšego tirelo ka ntle ga motse. Go šomišwe matlapa a mangwe go ema ale a go tlošwa legato, mme go šomišwe mobu wo mofsa go ritela maboto ao gape. Ge selo seo se ka rotoga gape ka ngwakong ka morago ga ge matlapa ale a tlošitšwe mme ngwako o gopilwe o ritetšwe gape, moprista a ye go lekola. Ge se kekile, ke mouta wa go tšhilafatša mme ngwako o tšhilafetše. O swanetše go phušolwa, gomme matlapa a wona le dikota tša wona le mobu ka moka wo o bego o o ritetše di swanetše go thothelwa ka ntle ga motse felo mo go tšhilafaletšego tirelo. Mang le mang yo a ka tsenago ka ngwakong woo mola o sa tswaletšwe o tla be a tšhilafetše go fihlela mantšiboa. Yo a ka robalago goba a jela ka ngwakong woo o swanetše go hlatswa diaparo tša gagwe. Ge e ka re ge moprista a tlile go lekola, a hwetša mouta o se wa rotoga gape ka morago ga ge ngwako o ritetšwe, a bege gore ngwako woo o hlwekile, ka gobane mouta o tlošitšwe. Go hlwekiša ngwako a tšee dinonyana tše pedi, le kotana ya mosedere, le thapo ye khubedu, le motšitlo wa hisopo. A bolaele ye nngwe ya dinonyana tšela ka moruswing wo o swerego meetse a a sa tšogo gewa mothopong. Ka morago ga moo a tšee kotana ya mosedere, le hisopo, le thapo ye khubedu, le nonyana yela e phelago, a di ine ka mading a nonyana yela e bolailwego, le ka meetseng ale, mme a foke ngwako woo gašupa. Ka tsela ye a hlwekiše ngwako ka madi a nonyana, le ka meetse ale, le ka nonyana ye e phelago, le ka kotana ya mosedere, le ka hisopo, le ka thapo ye khubedu. Ke moka a lese nonyana yela e phelago e fofele nageng e tloge motseng. Ka tsela ye a phethele ngwako woo tiro ya poelano, gomme ngwako e tla ba wo o hlwekilego. Ye ke melao mabapi le malwetši a letlalo a go tšhilafatša, le dirurugi goba dikaku goba ditswata, le mouta diaparong le nywakong. *** Melao ye e laetša ge selo se tšhilafetše goba se hlwekile. Morena o file Moshe le Arone melawana ye e latelago ya setšhaba sa Israele. Ge monna a ka tšwa seela bopeleng, seela seo se tšhilafetše ge se etšwa motšhaotšhele goba se bo thibile. Malao a mangwe le a mangwe ao a robalago go ona, goba selo se sengwe le se sengwe se a dulago go sona se tšhilafetše. Yo a ka kgwathago malao a gagwe goba a dula godimo ga selo seo monna yoo a bego a dutše go sona, o swanetše go hlatswa diaparo tša gagwe, a hlape le mmele, gomme o tla no ba a tšhilafetše go fihlela mantšiboa. Yo a ka kgwathago monna yo a tšwago seela o swanetše go hlatswa diaparo tša gagwe, a hlape le mmele, gomme o tla no ba a tšhilafetše go fihlela mantšiboa. Ge monna yo a tšwago seela a ka tshwela yo mongwe yo a hlwekilego ka mare, motho yoo o swanetše go hlatswa diaparo tša gagwe, a hlape le mmele, gomme o tla ba a tšhilafetše go fihlela mantšiboa. Sala yeo motho yo a tšwago seela a ka dulago go yona e tšhilafetše. Yo a ka kgwathago se sengwe se motho yoo a bego a dutše go sona o tla be a tšhilafetše go fihlela mantšiboa. Yo a ka rwalago se sengwe se motho yoo a bego a dutše go sona, o swanetše go hlatswa diaparo tša gagwe, a hlape le mmele, gomme o tla no ba a tšhilafetše go fihlela mantšiboa. Ge motho yo a tšwago seela a ka kgwatha yo mongwe a se a hlapa diatla pele, motho yoo o swanetše go hlatswa diaparo tša gagwe, a hlape le mmele, gomme o tla no ba a tšhilafetše go fihlela mantšiboa. Moruswi wo motho yoo a ka o kgwathago o swanetše go pšhatlwa, le sebjana se sengwe le se sengwe sa kota se motho yoo a ka se kgwathago se swanetše go hlatswiwa. Ge monna yoo a alafilwe go tšwa seela moo ga gagwe, a letele matšatši a a šupago mme a tsebo hlatswa diaparo tša gagwe, a hlape le mmele ka meetse a a sa tšogo gewa mothopong, mme e tla ba yo a hlwekilego. Ka letšatši la seswai a tšee mekuru ye mebedi goba maeba a mabedi a ye mojakong wa Tente ya bodulo bja Morena, mme a a neele moprista. Moprista a dire sehlabelo sa tshwarelo ya dibe ka le tee la ona, gomme ka le lengwe a dire sehlabelo sa go tšhungwa ka moka. Ka tsela ye a phethele monna yoo tiro ya poelano moo pele ga Morena. Ge monna a bile le go tšwa matšhedi, o swanetše go hlapa mmele ka moka, gomme o tla no ba a tšhilafetše go fihlela mantšiboa. Selo sefe le sefe se se dirilwego ka lešela goba ka mokgopa se se ka tšhelwago ke matšhedi ao se swanetše go hlatswiwa, gomme se tla no ba se tšhilafetše go fihlela mantšiboa. Ge monna a ka robala le mosadi, ka babedi ga bona ba swanetše go hlapa mmele, gomme ba tla no ba ba tšhilafetše go fihlela mantšiboa. Ge mosadi a bone kgwedi o tla be a tšhilafetše matšatši a a šupago. Yo mongwe le yo mongwe yo a ka mo kgwathago o tla be a tšhilafetše go fihlela mantšiboa. Selo sefe le sefe se mosadi yoo a ka dulago go sona goba a robala go sona nakong ya ge a bone kgwedi se tla be se tšhilafetše. Yo a ka kgwathago malao a gagwe, goba selo se a bego a dutše go sona, goba selo se se lego godimo ga tšona, o swanetše go hlatswa diaparo tša gagwe, a hlape le mmele, gomme o tla fela a tšhilafetše go fihlela mantšiboa. *** *** Ge monna a ka mo robala ge a bone kgwedi, o kgotletšwe ke go tšhilafala ga gagwe mme o tla no ba a tšhilafetše matšatši a a šupago, gomme malao ao a ka robalago go ona a tla be a tšhilafetše. Ge mosadi a ka tšwa madi matšatši a mmalwa ka ntle le matšatši a gagwe a go bona kgwedi, goba ge go tšwa madi moo go ka fetiša matšatši a gagwe a ka mehla a go bona kgwedi, o tla no ba a tšhilafetše ge go tšwa madi moo go sa tšwela pele, bjalo ka ge a tšhilafetše ge a bone kgwedi. Malao ao a ka robalago go ona le selo se sengwe le se sengwe se a ka dulago go sona ka nako yeo se tšhilafetše. Yo a ka di kgwathago o tšhilafetše, gomme o swanetše go hlatswa diaparo tša gagwe, a hlape le mmele; o tla no ba a tšhilafetše go fihlela mantšiboa. Ge a se sa tšwa madi o swanetše go letela matšatši a a šupago, gomme ke moo a tlago hlweka. Ka letšatši la seswai a tšee mekuru ye mebedi goba maeba a mabedi a a iše go moprista mojakong wa Tente ya bodulo bja Morena. Moprista a dire sehlabelo sa tshwarelo ya dibe ka le tee la ona, mme ka le lengwe a dire sehlabelo sa go tšhungwa ka moka, ka tsela ye a phethele mosadi yoo tiro ya poelano moo pele ga Morena. Morena o boditše Moshe gore a laye setšhaba sa Israele mabapi le dilo tše di ka ba tšhilafatšago, gore ba se ke ba tla ba kgotlela Tente ya bodulo bja gagwe ye e lego gare ga bona. Ge ba ka ikgotlela, ba tla bolawa. Ye ke melao mabapi le monna yo a tšwago seela goba yo a tšwago matšhedi, le mosadi yo a bonego kgwedi, goba monna yo a ka robalago mosadi yo a tšhilafetšego. Ka morago ga lehu la barwa ba babedi ba Arone bale ba go bolawa ge ba tlišetša Morena mollo wo o sego wa dumelelwa. Morena a re go Moshe: “Botša Arone, morwarrago, gore a se ke a no tsena neng le neng ka Felo mo Gokgethwakgethwa ka morago ga seširo se se lego pele ga sekhurumelo sa Polokelo ya Kgwerano, ka gobane fao ke moo ke bonalago ke le gare ga leru ka godimo ga sekhurumelo. Ge a ka se theeletše o tla hwa. A ka tsena ka Felo mo Gokgethwakgethwa fela ge a tlišitše powana ya sehlabelo sa tshwarelo ya dibe le kgapa ya sehlabelo sa go tšhungwa ka moka. “Pele ga ge Arone a tsena ka Felo mo Gokgethwakgethwa, a hlape mmele gomme a apare diaparo tše dikgethwa tša lešela: hempe, le diaparo tša ka gare, le lepanta la bodiredi, le tuku ya hlogo. “Setšhaba sa Israele se fe Arone diphooko tše pedi tša sehlabelo sa tshwarelo ya dibe, le kgapa ya sehlabelo sa go tšhungwa ka moka. A dire sehlabelo ka poo yeo go ipoelanya le nna, le go boelanya lapa la gagwe le nna. Ka morago a tšee dipudi tšela tše pedi a di tliše pele ga ka mojakong wa Tente ya bodulo bja ka. Moo a dire matengwa a šomiša maswika a mabedi, le lengwe e be la ka, le lengwe e be la Asasele. Arone a hlabe pudi ye e kgethetšwego nna ka matengwa, mme a dire sehlabelo sa tshwarelo ya dibe ka yona. Pudi ye e kgethetšwego Asasele e tlišwe go nna e sa phela gomme e rakelwe lešokeng go Asasele. Ka mokgwa wo go phethwe tiro ya poelano ka pudi. “Ge Arone a hlaba poo go dira sehlabelo sa tshwarelo ya dibe tša gagwe go ipoelanya le nna le go boelanya lapa la gagwe le nna, a tšee sebjana se se tletšego magala a a tšwago pele ga ka aletareng, le magoswi a mabedi a seorelo sa mathume, mme a di tliše Felo mo Gokgethwakgethwa. Moo pele ga ka a tšhele seorelo mollong, gomme muši wa seorelo seo o tla khupetša sekhurumelo sa Polokelo ya Kgwerano gore a se ke a se bona mme a hwa. A tšee madi a mangwe a poo mme ka monwana a fokele sekhurumelo ka pele ka ona, a mangwe a a fokele gašupa ka pele ga sekhurumelo. “Ka morago ga moo a bolaye pudi ya sehlabelo sa tshwarelo ya dibe tša setšhaba, a tliše madi a yona ka Felo mo Gokgethwakgethwa, a fokele sekhurumelo ka ona, mme ka morago a a fokele le pele ga sekhurumelo, bjalo ka ge a dirile ka madi a poo. Ka tsela ye a phethele Felo mo Gokgethwakgethwa tiro ya poelano ka baka la go tšhilafala ga setšhaba sa Israele le ka baka la dibe tša bona tšohle. Tente ya bodulo bja ka le yona a e phethele tiro ya poelano bjalo, ka gobane e gare ga setšhaba se se tšhilafetšego. Go tloga ka nako ye Arone a tsenago ka Felo mo Gokgethwakgethwa go yo phetha tiro ya poelano go fihlela ge a etšwa, go se ke gwa ba le motho ka Tenteng. Ge a iphethetše tiro yeo, a phethetše le lapa la gagwe le setšhaba ka moka, a tšwe a ye aletareng ya dihlabelo ye e lego pele ga ka, gomme a e direle tiro ya poelano. A tšee madi a mangwe a poo le a mangwe a pudi a a tlotše gohle dinakaneng a dikhutlo tša aletare. Ka a mangwe a fokele aletare gašupa ka monwana. Ka tsela ye a e hlwekiše dibeng tša setšhaba sa Israele mme a e dire ye kgethwa.” “Ge Arone a feditše go phethela Felo mo Gokgethwakgethwa tiro ya poelano le Tente ya bodulo bja ka le aletare, a tliše go nna pudi yela e phelago. A bee diatla tša gagwe ka dipedi godimo ga hlogo ya pudi yeo, mme a bolele moo go yona melato ka moka le dibe ka moka tša setšhaba sa Israele, mme ka go dira bjalo a di fetišetše hlogong ya pudi yeo. Ka morago pudi e rakelwe lešokeng ke monna yo a laetšwego go e raka. Pudi e tla rwala dibe tša setšhaba ka moka ya di iša nageng ya leganata. “Ka morago Arone a tsene ka Tenteng, a apole diaparo tša baprista tše a bego a di apere ge a tsena ka Felo mo Gokgethwakgethwa, gomme a di tlogele moo. A hlape mmele lefelong le lekgethwa, gomme a apare diaparo tša gagwe. Ka morago ga moo a tšwe, gomme a dire sehlabelo sa go tšhungwa ka moka go ipoelanya le nna le go boelanya setšhaba le nna. A tšhume makhura a seruiwa sa sehlabelo sa tshwarelo ya dibe aletareng. Monna yola a raketšego pudi lešokeng go Asasele a hlatswe diaparo tša gagwe, a hlape le mmele pele ga ge a boela ka mešašeng. Poo ya sehlabelo sa tshwarelo ya dibe le pudi ya sehlabelo sa tshwarelo ya dibe tšeo madi a tšona a tlišitšwego ka Felo mo Gokgethwakgethwa go dira poelano, di thothelwe ka ntle ga mešaša, di tšhungwe. Mokgopa le nama le mošwang le tšohle di tšhungwe. Yo a di tšhumilego a hlatswe diaparo tša gagwe, a hlape le mmele pele ga ge a boela ka mešašeng.” “Melawana ye e latelago e swanetše go phethwa mabakeng ka moka a a tlago. Ka letšatši la lesome la kgwedi ya bošupa Baisraele le bafaladi bao ba dulago gare ga bona ba swanetše go ikokobetša ka go ikona dijo, gomme ba se ke ba dira modiro. Ka letšatši leo go dirwe tiro ya poelano go ba hlwekiša dibeng tšohle tša bona, gore ba tle ba hlweke pele ga ka. Letšatši leo e swanetše go ba letšatši le lekgethwakgethwa leo ka lona ba ikokobetšago ka go ikona dijo, mme ba se ke ba dira modiro. Melawana ye e phethwe mabakeng ka moka a a tlago. Moprista yo Mogolo, yo a tloditšwego mme a beilwego moprista go latela tatagwe, a phethe tiro ya poelano. A apare diaparo tša lešela tše dikgethwa gomme a phethele Felo mo Gokgethwakgethwa, le Tente ya bodulo bja ka, le aletare, le baprista, le setšhaba ka moka tiro ya poelano. Melawana ye e phethwe mabakeng ka moka a a tlago. Tiro ye e phethagatšwe gatee ka ngwaga go boelanya setšhaba sa Israele le nna ka baka la dibe tšohle tše ba di dirilego.” Arone a dira bjalo ka ge Morena a laetše Moshe. Morena o laetše Moshe go fa Arone le barwa ba gagwe le Baisraele ka moka melawana ye e latelago. Moisraele yo a ka direlago Morena sehlabelo ka kgomo goba kgapana goba pudi ka mešašeng goba ka ntle ga mešaša e se mojakong wa Tente ya bodulo bja Morena, o obile molato ka go tšholla madi. O tšholotše madi, gomme a kgaolwe setšhabeng sa gabo. *** Se taelo ye e se šupago ke go re Baisraele bjale ba tlišetše Morena diruiwa tše ba bego ba tlwaetše go dira dihlabelo ka tšona kua nageng. Bjale ba di tliše go baprista mojakong wa Tente mme ba di bolaele fao ba direle Morena dihlabelo tša kagišano. Moprista a foke aletare ya Morena mojakong wa Tente ka madi mahlakoreng, mme a tšhume makhura gore a dire monkgo wo o tsefelago Morena. Baisraele ba se hlwe ba sa kgeloga go Morena ka go direla bademone ba ba swanago le diphooko dihlabelo. Baisraele ba phethe taelo ye mabakeng ka moka a a tlago. Moisraele goba mofaladi yo a ka rego a dula setšhabeng sa Israele a direla Morena sehlabelo sa go tšhungwa ka moka goba sehlabelo se sengwe felo mo gongwe ntle le mojakong wa Tente, a kgaolwe setšhabeng sa gabo. *** Moisraele goba mofaladi yo a ka rego a dula setšhabeng sa Israele a ja bobete, Morena o tla mo hlanamela gomme a mo kgaola setšhabeng sa gabo. Bophelo bja sephedi se sengwe le se sengwe bo mading, gomme ke ka baka leo Morena a laetšego gore madi a tšhollelwe aletareng go boelanya batho le Morena. Madi ke bophelo, gomme a boelanya batho le Morena. Ke ka baka leo Morena a boditšego Baisraele gore le o tee wa bona goba wa bafaladi ba ba dulago gare ga bona a se ke a ja bobete. Ge Moisraele goba mofaladi yo a dulago setšhabeng sa Israele a ka bolaya phoofolo goba nonyana ye Baisraele ba e ilago, o swanetše go tšholla madi a yona mme a a khupetše ka mobu. Bophelo bja sephedi se sengwe le se sengwe bo mading, gomme ke ka baka leo Morena a boditšego Baisraele gore ba se ke ba ja bobete, le gore yo a ka bo jago a kgaolwe setšhabeng. Motho ofe le ofe, e ka ba Moisraele goba mofaladi, yo a ka jago nama ya phoofolo ye e ikhwetšego ka boyona goba ye e bolailwego ke dibata, a hlatswe diaparo tša gagwe a hlape le mmele, mme a letele go fihlela mantšiboa pele e ka ba yo a hlwekilego. Ge a ka se dire bjalo, o ikobela molato. Morena o boditše Moshe gore a re go Baisraele: “Ke nna Morena Modimo wa lena. Le se ke la latela ditlwaedi tša batho ba Egepeta moo le kilego la dula gona, goba tša batho ba naga ya Kanana moo ke le išago gona. Le phethe melao ya ka mme le direng tše ke le laelago tšona. Ke nna Morena Modimo wa lena. Le latele ditlwaedi le melao ye ke le fago yona; ge le ka dira bjalo le tla phela. Ke nna Morena. “O se ke wa robala le mosadi yo mongwe wa leloko la geno la kgauswi la madi. Ke nna Morena. O se ke wa goboša tatago ka go robala le mmago. Mmago ke mmago, mme o se ke wa mo goboša. O se ke wa goboša tatago ka go robala le yo mongwe wa basadi ba gagwe. O se ke wa robala le kgaetšedi ya gago ya letswele goba ya seyantlo goba ya motlabo wa tatago, ge a tswaletšwe ka lapeng le tee le wena goba a tswaletšwe mo gongwe. O se ke wa robala le setlogolo sa gago; seo e ka ba go ikgoboša. O se ke wa robala le kgaetšedi ya gago ya lapa le lengwe; le yena ke kgaetšedi ya gago. O se ke wa robala le rakgadi wa gago; ke leloko la tatago la madi. O se ke wa robala le mmamogolo wa gago goba mmangwane wa gago; ke leloko la mmago la madi. O se ke wa goboša ramogolo wa gago goba rangwane wa gago ka go robala le mosadi wa gagwe; le yena ke mmamogolo wa gago goba mmangwane wa gago. O se ke wa robala le ngwetši wa gago; ke mosadi wa morwa wa gago. O se ke wa goboša morwarrago ka go robala le mosadi wa gagwe. O se ke wa robala le morwedi goba setlogolo sa mosadi yo o kilego wa robala naye; ke madi a gagwe gomme ke bohlola. O se ke wa nyala ngwanabo mosadi wa gago goba mogolwagwe mosadi wa gago a sa phela. “O se ke wa robala le mosadi nakong ya ge a bone kgwedi, ka gobane o tšhilafetše. O se ke wa robala le mosadi wa monna yo mongwe; seo se tla go tšhilafatša. Ngwana wa gago o se ke wa mo neela Mologo, modimo wa seswantšho, gore e be sehlabelo sa gagwe, ka gobane seo se tla kgotlela leina la Modimo wa gago. Ke nna Morena. Monna a se ke a robala monna yo mongwe; ke makgapha. Go se ke gwa ba le monna goba mosadi yo a robalago le phoofolo; makgapha ao a a go tšhilafatša. “Le se ke la itšhilafatša ka ye nngwe ya ditiro tše. Ye ke yona tsela ye baditšhaba ba ke ba rakago ge le goroga ba itšhilafaditšego ka yona. Ditiro tša bona di tšhilafaditše naga ya bona, ka gona Morena o e otla ka go e dira gore e hlatše batho bao ba dutšego moo. Ba dirile dilo tše tša bohlola ka moka mme ba tšhilafatša naga, fela lena le se ke la di dira. Ka moka ga lena, Baisraele goba bafaladi, le phethe melao ya Morena le ditaelo tša gagwe, *** ke moo naga e ka se le hlatšego, bjalo ka ge e hlatšitše baditšhaba bao ba dutšego fao pele le goroga. Yo a ka dirago ye nngwe ya dilo tše tša bohlola o tla kgaolwa setšhabeng sa gabo.” Gomme Morena a re: “Le phethe taelo ye ke le fago yona mme le se ke la latela ditlwaedi tša bohlola tša batho ba ba dutšego nageng yeo pele le goroga, gomme le se ke la itšhilafatša ka go dira ye nngwe ya dilo tše. Ke nna Morena Modimo wa lena.” Morena o laetše Moshe gore a botše setšhaba sa Israele a re: “Ebang ba bakgethwa, ka gobane nna, Morena Modimo wa lena, ke yo mokgethwa. Yo mongwe le yo mongwe wa lena a hlomphe mmagwe le tatagwe, a hlomphe le Sabatha. Ke nna Morena Modimo wa lena. “Le se ke la ntlhanogela la direla medimo ya diswantšho; le se ke la itirela medimo ka tshipi. Ke nna Morena Modimo wa lena. “Ge le dira sehlabelo sa kagišano, le direng ka tsela ye e lego gore se tla amogelwa. Nama yeo e swanetše go lewa ka letšatši le seruiwa se hlabilwego ka lona goba ka letšatši le le latelago. Nama ye e sa šetšego ka letšatši la boraro e tšhungwe, ka gobane e tšhilafetše, gomme ge yo mongwe a ka e ja, nka se amogele sehlabelo seo. Yo a ka e jago o tla ikobela molato wa go hlompholla se se abetšwego nna, gomme o tla kgaolwa setšhabeng sa gabo. “Ge le buna mašemo a lena, le se ke la ripa diako ka moka tša ka mellwaneng, le gona le se ke la boela go yo budutša diako tše di šetšego. Le se ke la fula diterebe ka moka merareng ya lena, goba la topa diterebe tše di welego; le di tlogeleleng badiidi le bafaladi. Ke nna Morena Modimo wa lena. “Le se ke la utswa, goba la bolela maaka, goba la radia motho. Le se ke la ena ka leina la ka ge le se la ikemišetša go phetha keno yeo; seo se goboša leina la ka. Ke nna Morena Modimo wa lena. “Le se ke la jeletša yo mongwe goba la mo radia. Le se ke la gana le moputso, le ge e ka ba bošego bo tee fela, wa yo le mo thwetšego. Le se ke la rogaka sefoa goba la bea selo pele ga sefofu gore se mo thetše. Le mpoifeng; ke nna Morena Modimo wa lena. “Le botegeng mme le ahloleng melato ka toka; le se ke la emelela babotlana ka ge e le babotlana, goba la tšhaba batsebegi. Le se ke la senya motho yo mongwe leina. Ge motho a le tshekong yeo go yona a kago ahlolelwa lehu, le se ke la homola ge e le gore bohlatse bja lena bo ka mo thuša. Ke nna Morena. “O se ke wa swara motho ka pelo, eupša o mmotše diphošo tša gagwe mahlong, gore o se ke wa dira sebe ka baka la gagwe. O se ke wa itefeletša go yo mongwe goba wa tšwela pele le go mo hloya; o rate bangwekawena bjalo ka ge o ithata. Ke nna Morena. “Le phetheng ditaelo tša ka. O se ke wa goelanya diruiwa tše e sego tša mohuta o tee. O se ke wa gaša dipeu tša mehuta ye mebedi tšhemong e tee. O se ke wa apara diaparo tše di dirilwego ka mehuta ye mebedi ya lešela. “Ge monna a holofeditše go rekišetša monna yo mongwe lekgoba la mosetsana gore e be motlabo wa gagwe, fela monna yoo a se a tšwe a mo lefela, goba mosetsana a se a tšwe a lokollwa, gona mong le mosetsana yoo ga ba swanela go bolawa ge ba ka robalana; ba swanetše go otlwa fela. Gabotsebotse e sa le lekgoba la gagwe. Monna yoo a tliše kgapa mojakong wa Tente ya bodulo bja ka e le sehlabelo sa gagwe sa tefelo ya dibe, gomme ka yona moprista a mmoelanye le nna ka ge a dirile sebe, gomme ke tla mo lebalela. “Ge le fihla nageng ya Kanana gomme le bjetše mehlare ya mehuta ya dikenywa, mengwageng ye meraro ya mathomo dikenywa tšeo di tšhilafetše. Nakong yeo le se ke la di ja. Ka ngwaga wa bone le nkabele dikenywa ka moka moketeng wa go godiša nna, Morena. Eupša ka ngwaga wa go fetša seatla le ka ja dikenywa. Ge le ka dira bjalo, mehlare ya lena e tla enywa dikenywa tše ntši. Ke nna Morena Modimo wa lena. “Le se ke la ja nama ye e sa nago le madi. Le se ke la ba didupe goba la dira tša boloi. Le se ke la ilela bahu ka go boola tlopo, goba ka go fokotša maledu a lena, goba ka go iphatša, goba la itlhaba dipadi mebeleng. Ke nna Morena. *** “Le se ke la goboša barwedi ba lena ka go ba dira digwebakathobalo tša ditempeleng; ge le ka dira bjalo, le tla be le kgelogela go medimo ye mengwe gomme naga ya tlala bofebe. Hlomphang Sabatha, gomme le hlompheng felo mo ke khunamelwago gona. Ke nna Morena. “Le se ke la kgopela keletšo go batho ba malopo, goba go didupe. Ge le ka dira bjalo le tla tšhilafala. Ke nna Morena Modimo wa lena. “Le hlompheng batšofadi, le ba godišeng. Mpoifeng; ke nna Morena. “Le se ke la swara bafaladi ba ba dulago nageng ya lena gampe. Le ba swareng ka mo le swarago Moisraelekalena, gomme le ba rateng bjalo ka ge le ithata, ka gobane le lena le kile la ba bafaladi nageng ya Egepeta. Ke nna Morena Modimo wa lena. “Le se ke la radia yo mongwe ka go šomiša dikelo tša bofora ge le ela botelele goba boima goba bontši. Le šomišeng dikala le dikeloboima le dikelo tše di nepagetšego. Ke nna Morena Modimo wa lena yo a le ntšhitšego nageng ya Egepeta. Le phetheng melao ya ka le ditaelo tša ka ka moka. Ke nna Morena.” Morena o boditše Moshe gore a botše Baisraele a re: “Ge yo mongwe wa lena goba mofaladi yo a dulago gare ga lena a ka neela ngwana wa gagwe go Mologo, modimo wa seswantšho, a bolawe ka maswika ke setšhaba ka moka. Ge yo mongwe a ka neela Mologo ngwana wa gagwe ka gona a tšhilafatša Tente ya ka ye kgethwa mme a goboša leina la ka le lekgethwa, ke tla mo hlanamela, ka mo kgaola setšhabeng sa gabo. Fela ge setšhaba se ka hlokomologa taba ye a e dirilego mme sa se ke sa mmolaya, nna ke tla mo hlanamela, yena le lapa la gagwe ka moka le bohle ba ba mo šalago morago ka go kgeloga go nna ba khunamela Mologo. Ke tla ba kgaola setšhabeng sa gabobona. “Ge motho a ka kgeloga a kgopela keletšo go batho ba malopo goba a ya go didupe, ke tla mo hlanamela, ka mo kgaola setšhabeng sa gabo. Le ineeleng go nna mme le beng ba bakgethwa, ka gobane ke nna Morena Modimo wa lena. Le phetheng melao ya ka, ka gobane ke nna Morena yo ke le kgethwafatšago. “Ka gona, yo a rogakago tatagwe goba mmagwe a bolawe; ke yena mong yo a ipolailego. “Ge monna a ka otswa le mosadi wa Moisraelekayena, yena le mosadi yoo ba bolawe. Monna yo a ka robalago le mosadi wa tatagwe o goboša tatagwe, gomme bobedi, yena le mosadi yoo, ba bolawe. Ke bona beng bao ba ipolailego. Ge monna a ka robala le ngwetši wa gagwe, bobedi ba swanetše go bolawa. Ba dirile bohlola, gomme ke bona beng ba ba ipolailego. Ge monna a ka robala monna yo mongwe, ba dirile taba ya bohlola, gomme bobedi ba bolawe. Ke bona beng bao ba ipolailego. Ge monna a ka nyala mosadi le mmagomosadi yoo, a bolawe ka go tšhungwa gotee le bona ka babedi ka baka la taba ya dihlong ye ba e dirilego; taba ya mohuta woo e se ke ya ba gona gare ga lena. Ge monna a ka robala phoofolo, yena le phoofolo yeo ba bolawe. Ge mosadi a ka batamela phoofolo gore e mo robale, yena le phoofolo yeo ba bolawe. Ke bona beng bao ba ipolailego. “Ge monna a ka nyala kgaetšedi ya gagwe ya letswele goba ya seyantlo goba ya motlabo wa tatagwe, ke taba ya dihlong, gomme ba swanetše go kgaolwa phatlalatša setšhabeng sa gabobona. O robetše le kgaetšedi ya gagwe gomme o ikobetše molato. Ge monna a ka robala le mosadi nakong ya ge a bone kgwedi, bobedi ba swanetše go kgaolwa setšhabeng sa gabobona, ka gobane ba khupolotše mo lehlapo la mosadi yoo le tšwago gona. “Ge monna a ka robala le mmamogolo wa gagwe goba mmangwane wa gagwe goba rakgadi wa gagwe, o robetše le leloko la gagwe la madi, gomme ba ikobetše molato. Ge monna a ka goboša ramogolo wa gagwe goba rangwane wa gagwe goba malome wa gagwe ka go robala le mosadi wa gagwe, ba ikobetše molato; ba tla hwa ba se ne bana. Ge monna a ka nyala mosadi wa moratho wa gagwe goba wa mogolo wa gagwe, ba tla hwa ba se na le bana. O dirile bohlola gomme o gobošitše yoo moratho goba mogolo wa gagwe. “Le phetheng melao le ditaelo tša ka ka moka, gore naga ya Kanana ye ke le išago go yona, e se ke ya le hlatša. Le se ke la latela mekgwa ya batho bao ke ba rakago ge le goroga. Ba ntshelekile ka ditlwaedi tšohle tša bona tše mpe. Eupša ke le tshephišitše naga ye ya mokhora le monono gore e be ya lena tiitii, gomme ke tla le fa yona. Ke nna Morena Modimo wa lena yo ke le hlaotšego ditšhabeng tše dingwe. Ka gona le swanetše go hlaola diphoofolo le dinonyana tše di hlwekilego go tšeo di sego tša hlweka. Le se ke la ja diphoofolo le dinonyana le tše di gagabago fase tše di sego tša hlweka. Ke di begile gore di tšhilafetše, gomme go di ja go tla le tšhilafatša. Le beng ba bakgethwa ba le lego ba ka ke nnoši, ka gobane ke nna Morena gomme ke yo mokgethwa. Ke le hlaotše ditšhabeng tše dingwe gore le tle le be ba ka ke nnoši. “Monna goba mosadi wa lelopo goba wa go ya go didupe a bolawe ka maswika; ke yena mong yo a ipolailego.” Morena o laetše Moshe gore a botše baprista ba Baarone a re: “Go se be le moprista yo a itšhilafatšago ka go llela goba go ilela mohu wa leloko labo, ge e se ge e le wa leloko la kgauswi la madi, e lego mmagwe goba tatagwe goba morwa wa gagwe goba morwedi wa gagwe goba mogolo wa gagwe goba moratho wa gagwe goba kgaetšedi ya gagwe ye e sego ya nyalwa. A se ke a itšhilafatša lehung la motho wa leloko labo la kgomo. “Baprista ba se ke ba ipoola dihlogo, goba ba fokotša maledu, goba ba iphatša mebele go laetša gore ba iletše. E be ba bakgethwa gomme ba se ke ba kgotlela leina la ka. Ba ntirela dihlabelo le dikabelo, e lego dijo tše di abelwago Modimo wa bona; ka gona e be ba bakgethwa. Moprista a se ke a nyala mosadi wa segwebakathobalo, goba yo a kilego a robala le monna, goba yo a hladilwego; moprista o kgethetšwe go ntirela, nna, Modimo. Setšhaba se swanetše go tšea moprista gore ke yo mokgethwa, ka gobane o ntirela dihlabelo le dikabelo, e lego dijo tše di abelwago Modimo wa bona. Nna, Morena, yo ke kgethwafatšago setšhaba sa ka, ke yo mokgethwa. Ge morwedi wa moprista e ka ba segwebakathobalo, o a ikgotlela, o kgotlela le tatagwe; a tšhungwe ka mollo, a hwe. “Moprista yo Mogolo yo a šegofaditšwego ka go tlotšwa ka makhura a tlotšo hlogong, a bile a šegofaleditšwe go apara diaparo tša baprista, a se ke a tlogela moriri e le mahlafarara, goba a gagola diaparo tša gagwe go laetša gore o iletše. O abetšwe nna ka go tlotšwa ka makhura, gomme ga a swanela go itšhilafatša goba go kgotlela tente ya ka ye kgethwa ka go tloga go yona a tsena ngwakong woo go lego mohu ka go wona, le ge mohu e le tatagwe goba mmagwe. Ke nna Morena. *** O swanetše go nyala mosadi yo a sego a ka a robala le monna, e sego mohlologadi, goba mosadi yo a hladilwego, goba yo e kilego ya ba segwebakathobalo. A nyale fela mosadi wa kgoro ya gabo yo a sego a ka a robala le monna. Go sego bjalo gona, bana ba gagwe ba tla tšhilafala. Ke nna Morena yo ke mo hlaotšego gore e be Moprista yo Mogolo.” Morena o laetše Moshe gore a botše Arone a re: “Go se ke gwa ba le setlogolo sa gago seo se golofetšego se se kago ntirela sehlabelo goba kabelo, e lego dijo tše di abelwago Modimo wa sona. Taelo ye e phethwe mabakeng ka moka a a tlago. Monna wa segole a se ke a dira sehlabelo goba kabelo: sefofu goba sehlotša goba sepoteganko goba kotwane goba tsogwane; yo a robegilego leoto goba letsogo; yo a nago le lehutla goba yo e lego kgopana kudu; yo a nago le bolwetši bja mahlo, goba yo a tšwilego lekhwekhwe, goba pudi, goba yo a pšhatlegilego bonna. Setlogolo sa moprista Arone se se golofetšego se se ke sa ntirela sehlabelo goba kabelo, e lego dijo tše di abelwago Modimo wa sona. Motho wa mohuta woo a ka ja dijo tše di abetšwego Modimo wa gagwe, e lego sehlabelo se sekgethwa le se sekgethwakgethwa, goba kabelo ye kgethwa le ye kgethwakgethwa, eupša ka gore o golofetše, a se ke a batamela seširo se sekgethwa goba a ya aletareng. A se ke a kgotlela dilo tše kgethwa tše, ka gobane ke nna Morena yo ke di kgethwafaditšego.” Seo ke se Moshe a se boditšego Arone le barwa ba gagwe le setšhaba ka moka sa Israele. Morena o laetše Moshe gore a botše Arone le barwa ba gagwe a re: “Le hlompheng dihlabelo le dikabelo tše kgethwa tše Baisraele ba nkabelago tšona, gore le se ke la kgotlela leina la ka le lekgethwa. Ke nna Morena. Ge yo mongwe wa ditlogolo tša lena yo a tšhilafetšego a ka batamela dihlabelo goba dikabelo tše kgethwa tše Baisraele ba di abetšego nna, a se ke a tsoga a tlile pele ga ka. Taelo ye e phethwe mabakeng ka moka a a tlago. Ke nna Morena. “Setlogolo sa Arone se se ka bago le bolwetši bja letlalo bja go mo tšhilafatša, goba yo a ka tšwago seela, a se ke a ja sehlabelo goba kabelo ye kgethwa go fihlela ge a hlwekile. Moprista yo a kgwathilego selo se se tšhilafaditšwego ke go kgwathana le setopo, goba yo a tšwilego matšhedi, goba yo a kgwathilego segagabi sa go mo tšhilafatša, goba motho wa go mo tšhilafatša, o tšhilafetše. Moprista yo a tšhilafetšego o tla fela a tšhilafetše go fihlela mantšiboa, gomme le ka yona nako yeo a se ke a ja sehlabelo goba kabelo ye kgethwa a sešo a hlapa mmele. Ge letšatši le diketše o tla ba a hlwekile, gomme a ka ja dihlabelo goba dikabelo tše kgethwa, ka gobane ke dijo tša gagwe. A se ke a ja nama ya phoofolo ye e ikhwetšego ka boyona goba ye e bolailwego ke dibata; e tla mo tšhilafatša. Ke nna Morena. “Baprista ka moka ba phethe ditaelo tša ka, gore ba se be le molato gomme ba hwa, ka ge ba tshetše ditaelo tše kgethwa. Ke nna Morena yo ke ba kgethwafatšago. “Ke leloko fela la lapa la moprista le le ka jago sehlabelo goba kabelo ye kgethwa; go se be le yo mongwe yo a di jago – le ge e le motho yo a dulago le moprista goba yo moprista a mo thwetšego. Fela makgoba ao moprista a a rekilego ka tšhelete ya gagwe goba ao a tswetšwego lapeng la gagwe, a ka ja dijo tšeo moprista a di amogelago. Morwedi wa moprista yo a nyetšwego ke motho yo e sego moprista, a se ke a ja sehlabelo goba kabelo ye kgethwa. Fela morwedi yo e lego mohlologadi goba yo a hladilwego, a se nago bana, mme a ipoetšego go tlo dula gape lapeng la tatagwe bjalo ka bjaneng bja gagwe, a ka ja dijo tšeo tatagwe a di amogelago ka ge e le moprista. Ke leloko fela la lapa la moprista le le kago ja dijo tšeo. “Ge motho yo mongwe yo e sego wa lapa la moprista a ka ja sehlabelo goba kabelo ye kgethwa a se a ikemišetša, o swanetše go lefa moprista ka sa go lekana le seo a se llego, a be a oketše ka karolo ya bohlano ya sona. Moprista ga a swanela go kgotlela dihlabelo goba dikabelo tše kgethwa ka go lesa motho yo a se nago tokelo a di ja; se se tla tlišetša motho yoo molato le kotlo. Ke nna Morena yo ke kgethwafatšago dihlabelo le dikabelo.” Morena o laetše Moshe go fa Arone le barwa ba gagwe le Baisraele ka moka melawana ye e latelago: “Ge Moisraele goba mofaladi yo a dulago setšhabeng sa Israele a tliša sehlabelo sa go tšhungwa ka moka, e le go phethagatša keno goba e le sehlabelo sa boithaopo, e se be seruiwa se se nago bosodi. E be se setona se se se nago bosodi gore se amogelwe. Ge le ka dira sehlabelo ka seruiwa se se nago le bosodi, Morena a ka se se amogele. Ge motho a direla Morena sehlabelo sa kagišano e le go phethagatša keno goba e le sehlabelo sa boithaopo, seruiwa sa gona e be se se se nago le bosodi bjo bongwenyana gore se tle se amogelwe. Le se ke la direla Morena sehlabelo ka seruiwa se se foufetšego, goba se se golofetšego, goba se se kgaogilego setho, goba se se nago le sešo sa go tšwa boladu, goba se se nago le lekhwekhwe, goba se se nago le pudi; le se ke la direla Morena sehlabelo ka seruiwa se sebjalo aletareng. Ge le direla Morena sehlabelo sa boithaopo, le ka se dira ka seruiwa se se nago le ditho tša go fetana, fela ge e le sehlabelo sa go phethagatša keno, se ka se amogelwe. Le se ke la direla Morena sehlabelo ka seruiwa se se gobetšego botona, goba se kgatletšwego, goba se fagotšwego. Se ga se dumelelwe nageng ya lena. “Le se ke la dira sehlabelo e le dijo tše di abelwago Modimo wa lena ka seruiwa se sebjalo se etšwa go motho o šele. Diruiwa tše dibjalo di tšewa gore di golofetše, ga tša felela, gomme ga di amogelege. “Namanyana goba kwanyana goba putšane ye e tswetšwego ga ya swanela go tlošwa go mmagoyona e sešo ya fetša matšatši a a šupago, fela go tloga ka tšatši la seswai e ka amogelega ya ba sehlabelo. *** Ge le dira sehlabelo ka kgomo goba sehuswane, le se ke la e hlaba le ngwana wa yona ka letšatši le tee. Ge le direla Morena sehlabelo sa tebogo, le se direng ka mokgwa wo se tlago amogelwa; le se jeng ka lona letšatši leo gomme le se ke la se šadiša molatša go fihlela mosong wo o latelago. Ke nna Morena.” Morena o itše: “Le phetheng ditaelo tša ka; ke nna Morena. Le se ke la kgotlela leina la ka le lekgethwa; Baisraele ba swanetše go ntseba gore ke yo mokgethwa. Ke nna Morena yo ke le kgethwafatšago; ke le ntšhitše Egepeta gore ke tle ke be Modimo wa lena. Ke nna Morena.” Morena o file Moshe melawana ye e latelago ya menyanya ya sedumedi, ge Baisraele ba swanetše go phuthegela tirelo. “Le na le matšatši a a selelago ao ka wona le ka dirago mešomo ya lena, eupša letšatši la bošupa ke Sabatha, ke letšatši la go khutša. Ka letšatši leo le se ke la šoma, eupša le phuthegele tirelo. Sabatha ke sa Morena gohle mo le dulago gona. Menyanya ye e beilwego ya sedumedi ye le swanetšego go kgobokana ka mabaka a yona še: “Paseka, ye e ketekwago go hlompha Morena, e thoma ge letšatši la lesome le metšo ye mene la kgwedi ya mathomo le dikela. Ka letšatši la lesome le metšo ye mehlano go thoma Monyanya wa Dinkgwa tše di se nago komelo, gomme matšatši a a šupago le je senkgwa se se sego sa dirwa ka komelo. Ka letšatši la mathomo le phuthegele tirelo, mme le se ke la ba la dira mediro ya lena ya mehleng. Le direleng Morena dihlabelo le dikabelo matšatši a a šupago. Ka letšatši la bošupa le phuthegeleng gape tirelo, mme le se ke la ba la dira mediro ya lena ya mehleng. “Ge le gorogile nageng ye Morena a le fago yona mme le bunne mabele a lena, le išeng ngata ya mathomo go moprista. *** A e abele Morena e le mpho ye e fiwago yena ka tsela ye e itšeng, gore a le amogele. Moprista a e tliše ka letšatši la ka morago ga Sabatha. Ka letšatši le le tlišago kabelo yeo ya mabele ka lona, le dire le sehlabelo sa go tšhungwa ka moka ka kgapana ya ngwaga o tee ye e se nago bosodi. Le se tliše le bupi bja dikilokramo tše pedi bjo bo hlakantšwego le makhura a mohlware e le kabelo ya bupi. Monkgo wa kabelo ye o tsefela Morena. Le tliše le kabelo ya litara e tee ya beine. Le se ke la ja senkgwa goba dithuthupe tša mabele goba mabele a mafsa go fihlela ge le tlišitše kabelo yeo go Morena. Molawana wo o phethwe le ke ditlogolo tša lena ka moka nakong tšohle tše di tlago.” “Le baleng dibeke tše di šupago tše di tletšego ka morago ga Sabatha seo ka sona le tlišago ngata ya lena ya mabele go tlo e abela Morena ka tsela ye e itšeng. Ka letšatši la masome a mahlano, letšatši la ka morago ga Sabatha sa bošupa, le tlišetše Morena kabelo ye nngwe ya mabele a mafsa. Lapa le lengwe le le lengwe le tliše dinkgwa tše pedi mme le di abele Morena e le mpho ye e fiwago yena ka tsela ye e itšeng. Dinkgwa tšeo di dirwe ka bupi bja dikilokramo tše pedi bjo bo dubilwego ka komelo, gomme di tlišetšwe Morena e le kabelo ya mabele a mathomo a a bunwago. Gotee le dinkgwa tšeo setšhaba se tliše dikgapana tša ngwaga o tee tše di šupago, le poo e tee, le dipudi tše pedi; tšohle e be tše di se nago bosodi. Di dirwe sehlabelo sa go tšhungwa ka moka sa Morena, gotee le kabelo ya bupi le ya beine. Monkgo wa sehlabelo se o tsefela Morena. Le dire le sehlabelo sa tshwarelo ya dibe ka phooko e tee, gomme ka dikgapana tše pedi tše di nago le ngwaga o tee le dire sehlabelo sa kagišano. Moprista a tliše dihlabelo tšeo gotee le dinkgwa e le mpho ya baprista ye e fiwago Morena ka tsela ye e itšeng. Dihlabelo tšeo ke tše kgethwa. Ka letšatši leo le se ke la dira mediro ya lena ya mehleng, eupša le phuthegele tirelo. Le ditlogolo tša lena di swanetše go phetha molawana wo mabakeng ka moka a a tlago gohle mo ba dulago gona. “Ge le buna mašemo a lena, le se ke la ripa diako ka moka tša ka mellwaneng ya mašemo, le gona le se ke la boela go yo budutša diako tše di šetšego ge go bunwa; le di tlogeleleng badiidi le bafaladi. Ke nna Morena Modimo wa lena. “Letšatši la pele la kgwedi ya bošupa e be letšatši la lena la segopotšo la go khutša, gomme le phuthegeleng tirelo ge mapapata a lla. *** Le se ke la ba la dira mediro ya lena ya mehleng, gomme le direle Morena sehlabelo. “Letšatši la lesome la kgwedi ya bošupa ke Letšatši la Poelano. Ka letšatši leo le ikokobetše ka go ikona dijo; le phuthegeleng tirelo, gomme le direle Morena sehlabelo. *** Le se ke la šoma ka letšatši leo, ka gobane ke letšatši la go phethagatša tirelo ya go le boelanya le Modimo. Yo a sa ikokobetšego ka go ikona dijo ka letšatši leo, a kgaolwe setšhabeng sa gabo. Gomme yo a ka dirago modiro ofe le ofe ka letšatši leo, Morena o tla mmolaya. Molawana wo o phethwe le ke ditlogolo tša lena ka moka gohle mo ba dulago gona. Go tloga ge le dikela ka letšatši la senyane la kgwedi go fihlela ge le dikela ka letšatši la lesome, le hlompheng letšatši le e le letšatši la go khutša, leo ka lona le ikokobetšago ka go ikona dijo. “Monyanya wa Mešaša o thoma ka letšatši la lesome le metšo ye mehlano la kgwedi ya bošupa, wa tšea matšatši a a šupago. *** Ka letšatši la mathomo le phuthegeleng tirelo, gomme le se ke la ba la dira mediro ya lena ya mehleng. Letšatši le lengwe le le lengwe la matšatši ao a šupago le direleng Morena sehlabelo. Ka letšatši la seswai le phuthegeleng tirelo gape mme le direleng Morena sehlabelo sa dijo. Ke letšatši le legolo, mme ka lona le se ke la swara modiro. “Ye ke menyanya ya sedumedi yeo ka yona le hlomphago Morena ka go phuthegela tirelong le ka go tliša dihlabelo le dikabelo, e lego dihlabelo tša go tšhungwa ka moka, le dikabelo tša bupi, le dihlabelo tše dingwe, le dikabelo tša beine, ka moo go nyakegago letšatši ka letšatši. Menyanya ye e tlaleletša Disabatha tša Morena, mme dihlabelo le dikabelo tše di tlaleletša dimpho tša lena tša mehleng, le dihlabelo tša lena tša go phethagatša dikeno, le dikabelo tša lena tša boithaopo tše le di fago Morena. “Ka letšatši la lesome le metšo ye mehlano la kgwedi ya bošupa, ge le bunne mašemo a lena, le ketekeng monyanya wo matšatši a a šupago. Letšatši la pele le la seswai e be matšatši a go khutša. Ka letšatši la pele le fuleng dikenywa tše kaonekaone tša mehlare ya lena, le tšeeng makala a mepalema le a mehlare ye metala le a mopopoliri gomme le ketekeng monyanya pele ga Morena Modimo wa lena. Le o keteke matšatši a a šupago mo ngwageng. Molawana wo o phethwe le ke ditlogolo tša lena nakong tšohle tše di tlago. Baisraele ka moka ba dule ka mešašeng matšatši a a šupago, gore ditlogolo tša lena di tle di tsebe gore Morena o dirile gore Baisraele ba dule ka mešašeng ge a ba ntšha Egepeta. Ke yena Morena Modimo wa lena.” Ke ka mo Moshe a filego setšhaba sa Israele melawana ya go keteka menyanya ya sedumedi go hlompha Morena. Morena o boditše Moshe a re: “Laela Baisraele gore ba tliše makhura a mohlware a a hlwekilego a mabotsebotse a mabone a ka Tenteng, gore mabone a fele a tuka bošego bjo bongwe le bjo bongwe. Mantšiboa a mangwe le a mangwe Arone a a gotetše mme a tuke go fihlela mosong moo pele ga Morena ka ntle ga seširo pele ga Polokelo ya Kgwerano, yeo e lego ka Felong mo Gokgethwakgethwa. Molawana wo o phethwe le mabakeng ka moka a a tlago. Arone a hlokomele mabone a a lego sehlomamaboneng sa gauta ye e sego ya tswakwa, mme a bone gore a fela a tuka bošego bjo bongwe le bjo bongwe moo pele ga Morena.” “O tšee bupi bja dikilokramo tše lesome le tše pedi gomme o pake dinkgwa tše lesome le tše pedi. O bee dinkgwa tšeo ka methaladi ye mebedi, tše di selelago mothalading wo mongwe le wo mongwe, tafoleng ye e manegilwego ka gauta ye e sego ya tswakwa, ye e lego pele ga Morena. O bee seorelo se se sego sa tswakwa mothalading wo mongwe le wo mongwe, e le sešupo sa kabelo ya Morena go tšea sebaka sa dinkgwa. Ka Sabatha se sengwe le se sengwe le dinakong tšohle tše di tlago dinkgwa di swanetše go bewa pele ga Morena. Wo ke molawana wa Baisraele go ya go ile. Dinkgwa tšeo ke tša Arone le ditlogolo tša gagwe, gomme ba di je felong mo go kgethwa, ka gore se ke seripa se sekgethwakgethwa sa dikabelo tša baprista tše di abelwago Morena. Wo ke molawana wa go ya go ile.” Setšhabeng sa Israele go be go na le monna yo mongwe yo tatagwe e bego e le Moegepeta gomme mmagwe e le Moisraele, a bitšwa Shelomite, morwedi wa Dibri wa kgoro ya Dane. Monna yo o ile a fapana le Moisraele mešašeng. Phapanong yeo monna yoo a rogaka Modimo; ka gona ba mo iša go Moshe, *** ba mo diša gomme ba letela gore Morena a ba botše gore ba dire eng ka yena. Morena a re go Moshe: “Ntšhang monna yoo mešašeng. Yo mongwe le yo mongwe yo a mo kwelego a rogaka, a bee diatla tša gagwe godimo ga hlogo ya gagwe, gomme setšhaba ka moka se mmolaye ka maswika. O botše Baisraele gore yo a rogakago Modimo, o swanetše go lefa ka setopo, mme ka nnete a bolawe. Yo a rogakago Modimo, goba ke Moisraele goba ke mofaladi, a bolawe ke setšhaba ka moka ka maswika. “Yo a bolayago motho, le yena a bolawe; yo a bolayago seruiwa sa yo mongwe, a se lefe ka se sengwe. Molao ke go re bophelo bo lefša ka bophelo. “Ge motho a gobaditše yo mongwe, le yena a dirwe se a se dirilego: go roba go lefše ka go roba; leihlo ka leihlo; leino ka leino. Motho a gobatšwe ka moo a gobaditšego yo mongwe ka gona. Yo a bolailego seruiwa, a se lefe ka se sengwe, yo a bolailego motho, yena a bolawe. Molao wo o ama lena ka moka, Baisraele le bafaladi ba ba dulago gare ga lena, ka gobane ke nna Morena Modimo wa lena.” Ka gona Moshe a botša batho ba Israele tše Morena a mmoditšego tšona, gomme ba ntšhetša monna yola ka ntle ga mešaša, ba mmolaya ka maswika. Ka tsela ye Baisraele ba dira se Morena a se laetšego Moshe. Morena o laetše Moshe thabeng ya Sinai gore a fe Baisraele melawana ye e latelago. Ge le gorogile nageng ye Morena a le fago yona, le mo hlomphe ka go latša mašemo ngwaga wo mongwe le wo mongwe wa bošupa. Le leme mašemo a lena, le thene merara ya lena, le bune le mašemo a lena mo mengwageng ye e selelago. Eupša ngwaga wa bošupa e swanetše go ba ngwaga wa go khutšiša naga ka botlalo, ngwaga wo o abetšwego Morena. Le se ke la lema mašemo a lena goba la thena merara ya lena. Le se ke la buna le ge e ka ba mabele ao a imelelago ka boona, goba la fula diterebe merareng ya lena ye e sego ya thenwa; ke ngwaga wa go khutšiša naga ka botlalo. Le ge ngwageng woo naga e se ya lengwa e tla le fa dijo, lena le makgoba a lena le bathwalwa ba lena le bafaladi ba ba dulago le lena, le diruiwa tša lena le diphoofolo tše di lego nageng ya lena. Se sengwe le se sengwe se naga e se medišago se ka lewa ke batho goba diphoofolo. Le baleng mengwaga ye e šupago gašupa, ke go re mengwaga ye masome a mane le metšo ye senyane. Gomme ka letšatši la lesome la kgwedi ya bošupa, e lego Letšatši la Poelano, go letšwe lepapata nageng ka moka. Ka tsela ye le hlaole ngwaga wa masome a mahlano mme le bege tokologo ya badudi ka moka ba naga. Ke ngwaga wa tokologo: Ka ngwaga wo thoto ka moka ye e bego e rekišitšwe e boetšwe go beng ba yona ba pele, le motho yo mongwe le yo mongwe yo a bego a rekišitšwe e le lekgoba a boele kgorong ya gabo. Le se ke la lema mašemo a lena, goba la buna mabele a a imelelago ka boona, goba la fula diterebe merareng ya lena ye e sego ya thenwa. Ngwaga ka moka e be wo mokgethwa go lena; le jeng fela tše mašemo a di medišago ka boona. Ka ngwaga wo thoto ka moka ye e bego e rekišitšwe e boetšwe go mong wa yona wa pele. Ka gona ge o rekišetša Moisraelekawena naga, goba ge o reka naga go yena, o se ke wa mo pata. Theko e bewe go ya ka palo ya mengwaga yeo ka yona naga e kago ntšha puno pele ga Ngwaga wa Poetšo wo o latelago. Ge go sa šetše mengwaga ye mentši, theko e ye godingwana, eupša ge go šetše ye mennyane fela, theko e ye fasenyana, ka gore se se rekišwago ke tekanyo ya puno ye naga yeo e ka e ntšhago. O se ke wa pata Moisraelekawena, eupša o boife Modimo; ke yena Morena Modimo wa gago. Le phetheng melao le ditaelo tša Morena ka moka, gore le tle le dule le bolokegile mo nageng. Naga e tla mediša dibjalo tša yona mme le tla ba le dijo ka bontši, gomme le tla dula ka polokego. Fela le ka botšiša gore go tla lewa eng ka ngwaga wa bošupa ge go se na mašemo ao a lemilwego le tšeo di kago bunwa. Morena o tla šegofatša naga ka ngwaga wa boselela gore e ntšhe dijo tše di lekanego mengwaga ye meraro. Ge le lema mašemo a lena ka ngwaga wa seswai, le tla be le sa ja tšeo le di bunnego ka ngwaga wa boselela, gomme le tla ba le tša go ja tše di lekanego go fihlela ge dibjalo tše le di bjalago ka ngwaga woo di bunwa ka ngwaga wo o latelago. Naga ya lena e se ke ya rekišetšwa sa ruri ka gore ga se ya lena; ke ya Modimo, gomme lena le bjalo ka bafaladi goba bafeti bao ba dumeletšwego go e šomiša. Ge naga e rekišwa, go gopolwe gore mong wa yona wa pele o sa na le tokelo ya go e rekolla. Ge Moisraele a ka diila gomme a gapeletšega go rekiša naga ya gagwe, moloko wa gagwe wa kgauswikgauswi a e rekolle. Motho yo a se nago moloko wa go e rekolla, a ka e rekolla ka morago ka boyena mola a na le sa gagwe. Ge go le ka tsela yeo, o swanetše go lefa motho yo a e rekilego tšhelete ye e tlago lekana mengwaga ye e sa šetšego gore go fihle Ngwaga wa Poetšo wo o latelago; ke gona a kago hwetša naga ya gagwe. Eupša ge a se ne tšhelete ye e lekanego go rekolla naga yeo, e tla fela e laolwa ke motho yo a e rekilego, go fihlela Ngwageng wa Poetšo wo o latelago. Ka ngwaga woo e tla boetšwa go mong wa yona wa pele. Ge motho a ka rekiša ngwako motseng wo o ageleditšwego ka morako, o na le tokelo ya go o rekolla ngwageng wa mathomo wo o tletšego go tloga ka letšatši le a o rekišitšego ka lona. Fela ge a sa o rekolle mo ngwageng woo, o lahlegelwa ke tokelo ya thekollo, gomme ngwako e ba wa moreki le ditlogolo tša gagwe go ya go ile; o ka se bušwe ka Ngwaga wa Poetšo. Fela mengwako ye e lego metsaneng ye e sego ya ageletšwa ka morako e swanetše go tšewa bjalo ka mašemo; beng ba yona ba mathomo ba na le tokelo ya go e rekolla, gomme e swanetše go boetšwa go beng ka Ngwaga wa Poetšo. Le ge go le bjalo, Balefi bona ba na le tokelo ya go rekolla mengwako ya bona ka nako ye nngwe le ye nngwe metseng ye ba e filwego. Ge ngwako wa motseng woo o rekišitšwe ke Molefi gomme o se wa rekollwa, o swanetše go boetšwa go mong ka Ngwaga wa Poetšo, ka gobane mengwako ye e lego ya Balefi metseng ke ya bona go ya go ile gare ga batho ba Israele. Fela naga ya phulo go dikologa metse ya Balefi e se ke ya tsoga e rekišitšwe; ke ya bona go ya go ile. Ge Moisraelekawena yo a dulago le wena a ka diila mme a se kgone go iphediša, o mo thuše bjalo ka ge o be o tla thuša mofaladi goba motho yo a go šomelago, gore a tle a kgone go tšwela pele le go dula le wena. O se ke wa mo lefiša mašokotšo a tše o mo adimago, goba wa dira gore o boelwe, eupša o boife Modimo mme o lese Moisraelekawena a dule le wena. O se ke wa mo adima tšhelete e le ge o nyaka mašokotšo a yona, le gona o se ke wa ba le poelo dijong tše o mo rekišetšago tšona. Ye ke taelo ya Morena Modimo wa lena yo a le ntšhitšego Egepeta gore a tle a le fe naga ya Kanana, le gore e tle e be Modimo wa lena. Ge Moisraelekawena yo a dulago le wena a ka diila mme a ithekiša go wena ya ba lekgoba la gago, o se ke wa mo šomiša mešomo ya makgoba. A dule nago e le mothwalwa wa gago le mofeti, gomme a go hlankele go fihlela Ngwaga wa Poetšo wo o latelago. Ka nako yeo yena le bana ba gagwe ba tloge go wena mme ba boele kgorong ya gabobona, gomme yena a boele nageng ya borakgolokhukhu ba gagwe. Baisraele ke makgoba a Morena, mme o ba ntšhitše Egepeta; ga ba swanelwa go rekišwa ya ba makgoba. O se ke wa ba swara gampe, eupša o boife Modimo. Ge o nyaka makgoba, o ka a reka go ditšhaba tše di le dikologilego. O ka reka le bana ba bafaladi bao ba dulago gare ga lena. Bana ba babjalo bao ba tswetšwego nageng ya lena e ka ba ba gago, gomme o ka ba tlogelela barwa ba gago go ba bohwa bja bona, mme bana bao ba ka ba hlankela ge ba sa phela. Fela Moisraelekawena yena o se ke wa mo swara gampe. Ge mofaladi goba motho yo a dutšego le wena lebakanyana a ka huma, mola Moisraelekawena a diila, gomme a ithekiša go mofaladi yoo goba motho yoo ya ba lekgoba la gagwe, o sa na le tokelo ya go rekollwa. Yo mongwe wa banababo, goba rangwane wa gagwe, goba ramogolo wa gagwe, goba morwarragwe, goba yo mongwe wa meloko yabo ya kgauswikgauswi ka madi a ka mo rekolla; goba ge yena ka boyena a ka ba le tšhelete ye e lekanego, a ka ithekolla. O swanetše go boledišana le yo a mo rekilego, mme ba bale mengwaga go tloga ka nako yela a ithekišitšego ka yona go fihlela ka Ngwaga wa Poetšo wo o latelago, mme ba bee theko ya tokollo ya gagwe go ya ka mogolo wo o lefiwago motho yo a thwetšwego. O swanetše go mo lefa seripa sa theko go ya ka palo ya mengwaga ye e sa šetšego, *** bjalo ka ge nke o be a thwalwa ngwaga ka ngwaga. Mong wa gagwe a se ke a mo swara gampe. Ge a sa lokollwe ka ye nngwe ya ditsela tše, yena le bana ba gagwe ba lokollwe ka Ngwaga wa Poetšo wo o latelago. Moisraele e ka se be lekgoba go ya go ile, ka gobane Baisraele ke makgoba a Morena. O ba ntšhitše Egepeta; ke yena Morena Modimo wa bona. Morena o rile: “Le se ke la dira medimo ya diswantšho, goba la tsema dihlwadieme, goba dikokwane tša matlapa, goba matlapa a a betlilwego gore le di obamele, ka gobane Modimo wa lena ke nna, Morena. Le keteke menyanya ya sedumedi, gape le hlompheng felo ga ka mo gokgethwa. Ke nna Morena. “Ge le phela go ya ka melao ya ka mme le phetha ditaelo tša ka, ke tla le nešetša pula ka nako ya gona, gore naga e tle e mediše dibjalo, le mehlare e enywe. Le tla be le sa fola mabele ge nako ya go fula diterebe e fihla, mme le tla be le sa fula diterebe ge nako ya go bjala mabele e fihla. Le tla ba le dijo ka bontši, le gona le tla dula le bolokegile nageng ya lena. “Ke tla le fa khutšo nageng ya lena, le gona le tla robala le sa tšhoge motho. Ke tla tloša dibata nageng ya lena, le dintwa di ka se sa ba gona. Le tla hlomara manaba a lena la a fenya ka tšhoša; ba bahlano ba lena ba tla kgona go hlomara ba lekgolo, mme ba lekgolo ba tla kgona go hlomara ba dikete tše lesome ba ba fenya ka tšhoša. Ke tla le šegofatša, ka le fa le bana ba bantši; ke tla botegela kgwerano ye ke e dirilego le lena. Le tla be le sa ja tša ngwagola, la ba la di tloša tša šuthela tše mpsha. Ke tla dula gare ga lena ka tenteng ya ka ye kgethwa, gomme nka se tsoge ke le hlanogetše. Ke tla ba le lena; ke tla ba Modimo wa lena, gomme lena le tla ba setšhaba sa ka. Nna, Morena Modimo wa lena, ke le ntšhitše Egepeta gore le se ke la hlwa le le makgoba. Ke fedišitše maatla a bagateledi ba lena, ka le hlakodiša.” Morena o rile: “Fela ge le sa ntheetše, le sa phethe ditaelo tša ka, le tla otlwa. Ge le gana go phetha melao ya ka, le nyatša ditaelo tša ka gomme le lahla kgwerano ye ke e dirilego le lena, ke tla le otla. Ke tla le tlišetša madimabe – bolwetši bja mafahla le bja letadi la go foufatša le go le fokotša la ba la hwa. Le tla bjala dibjalo tša lena, eupša go ka se le hole selo, ka gobane manaba a lena a tla di ja. Ke tla le hlanamela la ba la fenywa, gomme la bušwa ke ba ba le hloilego; le tla no tšhaba le ge le sa rakedišwe ke motho. “Ge le ka no se ntheeletše le ge ke le dirile tše ka moka, ke tla oketša kotlo ya lena gašupa. Ke tla fediša maatla a le ikgodišago ka ona; leratadima le ka se le nešetše pula, ka gona naga ya lena e tla omelela, ya thatafala bjalo ka mphiri. Le ge le ka šoma gaboima le ka se holege ka selo, ka gobane naga ya lena e ka se mediše dibjalo, le mehlare e ka se enywe. “Ge le ka no fela le nngangabalela mme la se ntheetše, ke tla oketša kotlo ya lena gašupa gape. Ke tla le romela dibata tše di tlago bolaya bana ba lena, tša fediša le diruiwa tša lena, gomme tša le fokotša mo ditsela tša lena di tlago wela kgwahlana. “Ge le ka morago ga kotlo ye le ka fela le sa ntheetše mme la tšwela pele la ntwantšha, gona le nna ke tla le lwantšha mme ka le otla gašupa gabohloko go feta pele. Ke tla le tsošetša dintwa go itefeletša ka ge le lahlile kgwerano ya ka le lena, gomme le ge le ka bokana metseng ya lena gore le itote, ke tla le romela bolwetši bja leuba la ba la gapeletšega go ineela go manaba a lena. Ke tla le hlokiša dijo mo e lego gore basadi ba lesome ba tla apea dinkgwa ka ontong e tee. Ba tla di ngwathelana, gomme la re go di ja la no fela le sa swerwe ke tlala. “Ge le ka morago ga kotlo tšeo le ka no fela le tšwela pele le go se ntheetše mme la ntwantšha, gona le nna ke tla le lwantšha ke befetšwe, ka le otla gape gašupa gabohloko le go feta pele. Tlala e tla le golela la ba la ja bana ba lena. Ke tla phušola dintotoma tše le khunamelago medimo ya diswantšho go tšona, ka kgereša dialetare tša lena tša seorelo, ka lahlela ditopo tša lena godimo ga medimo ya lena ya diswantšho ye e welego. Ke tla le šišingwa, ka fetoša metse ya lena marope, ka senya mafelo ao le khunamelago go ona, ka ba ka gana dihlabelo tša lena. Ke tla senya naga ya lena mo e lego gore manaba a a tlago dula go yona a tla tšhošwa ke go senyega ga yona. Ke tla tliša manaba gore a lwe le lena, ka le šwalalanya le ditšhaba. Naga ya lena e tla fetoga lešoka, le metse ya lena e tla šala e le marope. Ke gona naga e tlago ba le mengwaga ya go khutša ye le bego le gana go e fa yona; e tla dula e tlogetšwe gomme ya hwetša khutšo ya yona mola lena le le nageng ya manaba a lena. *** “Ke tla dira gore mašaledi a lena ao a lego nageng ya manaba a ona a tšhošwe le ke mogwaša wa matlakala ao a itšeelwago ke phefo, ba tšhabe. Ba tla tšhaba mo nkego ba hlomerwe ntweng, ba wa mola go se lenaba le le ba lelekišago. Ba tla thetšana ba sa rakedišwe ke motho, gomme ba ka se be le maatla a go lwa le manaba a lena. Ba tla hwa e le mathopša, ba metšwa ke naga ya manaba a bona. Mašaledi a lena nageng ya manaba a lena a tla fokotšega a ehwa ka baka la sebe sa lena le sa borakgolokhukhu ba lena. “Ditlogolo tša lena tšona di tla dumela gore tšona le borakgolokhukhu ba tšona bao ba sa mpotegelego gomme ba ntwantšhago ba dirile dibe, mme ba ntira gore ke ba lwantšhe ke be ke ba romele bothopša nageng ya manaba a bona. Mafelelong, ge ditlogolo tša lena tše di ngangabetšego di kokobeditšwe gomme di lefile molato wa bokgopo bja bona, ke tla gopola kgwerano ya ka le Jakobo le Isaka le Abrahama, mme ka gopola le naga ya lena. Fela pele, batho ba swanetše go tlošwa nageng gore naga e tle e ipshine ka go khutša, mme ba swanetše go lefa molato wa bona ka botlalo wa ge ba ganne melao ya ka mme ba hlaswitše ditaelo tša ka. Le ge go le bjalo, ge ba sa le nageng ya manaba a bona, nka se ba tlogelele sa ruri, goba ka ba feleletša sa ruri. Seo se ka fediša kgwerano ya ka le bona, gobane ke nna Morena Modimo wa bona. Ke tla mpshafatša kgwerano ye ke e dirilego le borakgolokhukhu ba bona ge ke laetša ditšhaba ka moka maatla a ka ka go ba ntšha Egepeta, gore nna, Morena, ke tle ke be Modimo wa bona.” Tše ka moka ke melao le ditaelo tša setšhaba sa Israele tše Morena a di filego Moshe thabeng ya Sinai. Morena o file Moshe melawana ye e latelago ya Baisraele. Ge motho a neetšwe Morena e le go phethagatša keno ye e itšeng, motho yoo a ka lokollwa ka go lefa ditefo tše di latelago, go ya ka papetlana ya silibera ye e etšwego go ya ka boima bja papetlana ya silibera ya ka Felo mo Gokgethwa: monna wa mengwaga ye masome a mabedi go iša go wa ye masome a a selelago: dipapetlana tša silibera tše masome a mahlano mosadi wa mengwaga yeo: dipapetlana tša silibera tše masome a mararo mošemane wa mengwaga ye mehlano go iša go wa ye masome a mabedi: dipapetlana tša silibera tše masome a mabedi mosetsana wa mengwaga yeo: dipapetlana tša silibera tše lesome ngwana wa mošemane wa kgwedi e tee go iša go wa mengwaga ye mehlano: dipapetlana tša silibera tše tlhano ngwana wa mosetsana wa kgwedi e tee go iša go wa mengwaga ye mehlano: dipapetlana tša silibera tše tharo monna wa mengwaga ya ka godimo ga ye masome a a selelago: dipapetlana tša silibera tše lesome le tše tlhano mosadi wa mengwaga yeo: dipapetlana tša silibera tše lesome *** *** *** *** Ge motho yo a ennego a diila mo a palelwago ke tefo ye e beilwego, a tliše motho yoo go moprista, gomme moprista a mmeele theko ye a ka e kgonago. Ge eba se a ikannego ka sona ke seruiwa se se ka amogelwago ke Morena e le sehlabelo, seruiwa seo sa go abelwa Morena e tla ba se sekgethwa, gomme motho yoo a ennego a se ke a šupa seruiwa se sengwe sebakeng sa seo. Ge a ka dira bjalo, diruiwa tšeo tše pedi di abelwe Morena. Eupša ge keno ye bjalo e le mabapi le seruiwa se se tšhilafetšego, se se sa amogelegego go ba sehlabelo go Morena, motho yoo a iše seruiwa seo go moprista. Moprista a bee theko ya sona, go ya ka moo e lego se se lokilego goba se se solegago, gomme theko yeo e eme gona moo. Ge motho yoo a nyaka go se rekolla, o swanetše go ntšha theko yeo, a be a tlaleletše ka karolo ya bohlano ya theko yeo. Ge motho a abela Morena ngwako wa gagwe, moprista a bee theko ya wona go ya ka moo ngwako o lokilego goba o solegago ka gona, mme theko yeo e eme gona moo. Ge yoo a abetšego Morena ngwako a nyaka go o rekolla, o swanetše go ntšha theko yeo, a be a tlaleletše ka karolo ya bohlano ya theko yeo. Ge motho a abela Morena karolo ya tšhemo ya gagwe ye e lego bohwa bja gagwe, theko ya yona e bewe go ya ka bontši bja peu yeo e gašwago moo; theko ya garase ye e imelago dikilokramo tše lekgolo e be dipapetlana tše masome a mahlano tša silibera. Ge a ka aba tšhemo yeo ge Ngwaga wa Poetšo o seno feta, go bewe theko ye e tletšego. Ge a ka e aba nakong ye nngwe ka morago, moprista a bee theko ya yona ya tšhelete go ya ka palo ya mengwaga ye e sa šetšego gore go fihle Ngwaga wa Poetšo wo o latelago, mme a fokotše theko ya yona ye e tletšego, go ya ka mengwaga yeo. Ge motho yo a abilego tšhemo a nyaka go e rekolla, o swanetše go lefa theko yeo, a be a tlaleletše ka karolo ya bohlano ya yona. Ge a ka rekišetša yo mongwe tšhemo yeo a se a e rekolla go Morena pele, o lahlegelwa ke tokelo ya go e rekolla. Ka Ngwaga wa Poetšo wo o latelago tšhemo yeo e abelwe Morena go ya go ile; e be ya baprista. Ge motho a ka abela Morena tšhemo ye a e rekilego, moprista a bee theko ya yona go ya ka palo ya mengwaga go fihlela go Ngwaga wa Poetšo wo o latelago, gomme motho yoo o swanetše go lefa theko yeo ka lona letšatši leo; tšhelete yeo ke kabelo ye kgethwa go Morena. Ka Ngwaga wa Poetšo tšhemo yeo e boele go mong wa yona wa pele, goba go ditlogolo tša gagwe. Ditheko ka moka di bewe go ya ka papetlana ya silibera ye e etšwego go ya ka boima bja papetlana ya silibera ya ka Felo mo Gokgethwa. Papetlana yeo e swanetše go ba ya boima bjo e ka bago dikramo tše lesome. Leitšibolo la seruiwa, e ka ba namanyana goba kwanyana goba putšane, ke la Morena ka matswalo, ka gona go se be le yo a mo abelago lona. Leitšibolo la seruiwa se se tšhilafetšego lona le ka rekollwa ka theko ye e beilwego e tlaleleditšwe ka karolo ya bohlano ya yona. Ge e sa rekollwe e ka rekišetšwa yo mongwe ka theko ye e beilwego. Eupša motho a se ke a rekiša goba a rekolla seo a se fetšego Morena sa ruri, e ka ba motho goba seruiwa goba tšhemo. Dilo tše bjalo ka moka ke tše kgethwakgethwa go Morena. Le motho yoo a abetšwego Morena sa ruri a ka se rekollwe; o swanetše go bolawa. Karolo ya lesome ya tšohle tše di bunnwego ka mašemong, e ka ba mabele goba dikenywa, ke ya Morena. Ke ye kgethwa go yena. Ge motho a nyaka go rekolla seripa sa karolo ya lesome ya gagwe, o swanetše go lefa theko ye e beilwego mme a tlaleletše ka karolo ya bohlano ya yona. Karolo ya lesome ya diruiwa tša gago ka moka o e ntšhe ka tsela ye: Ge diruiwa di balwa, ye nngwe le ye nngwe ya lesome e abelwe Morena. Mong a se ke a tshwenyega ge eba ke diruiwa tše di se nago bosodi goba tše di nago le bjona tše di tlago kgethwa, mme a se ke a dira gore tše dingwe di tšee sebaka sa tše dingwe. Ge a ka dira bjalo, gona diruiwa tšeo tše pedi di abelwe Morena gomme di se ke tša rekollwa. Tše ke ditaelo tša Baisraele tše Morena a di filego Moshe thabeng ya Sinai. Ka letšatši la pele la kgwedi ya bobedi ngwageng wa bobedi ka morago ga ge setšhaba sa Israele se tlogile Egepeta, Morena a bolela le Moshe ka Tenteng ya bodulo bja gagwe lešokeng la Sinai a re: “Wena le Arone, balang setšhaba sa Israele ka dikgorwana le malapa. Le ngwaleng maina a banna ka moka ba ba nago le mengwaga ye masome a mabedi goba go feta moo bao e kago ba bahlabani. Le ba beeng ka dihlopha. Le kgopeleng ntona ya kgorwana kgorong ye nngwe le ye nngwe go le thuša.” Banna ba ba ilego ba kgethelwa modiro wo setšhabeng e le mantona a dikgorwana le baetapele dikgorong tša bona šeba: Kgoro Ntona ya kgorwana Rubene Elitsure, morwa wa Shedeure Simeone Shelumiele, morwa wa Tsurishadai Juda Nagshone, morwa wa Aminadaba Isakara Netanele, morwa wa Tsuare Sebulone Eliaba, morwa wa Helone Efraime Elishama, morwa wa Amihude Manase Gamliele, morwa wa Pedatsure Benjamene Abidane, morwa wa Gidoni Dane Ahiesere, morwa wa Amishadai Asere Pagiele, morwa wa Okrane Gade Elisafo, morwa wa Reuele Naftali Ahira, morwa wa Enane *** *** *** *** *** *** *** *** *** *** Moshe le Arone ba ile ba thušana le banna ba lesome le ba babedi ba go bokanya setšhaba ka moka ka letšatši la pele la kgwedi ya bobedi, mme setšhaba ka moka sa ngwadišwa ka dikgorwana le ka malapa. Maina a banna ka moka ba mengwaga ye masome a mabedi goba go feta a ngwalwa mme a balwa, bjalo ka ge Morena a be a laetše. Moshe o ngwadišitše setšhaba lešokeng la Sinai. Banna ba mengwaga ye masome a mabedi goba go feta ba e bego e ka ba bahlabani ba ile ba ngwadišwa ka maina, go ya ka dikgorwana le malapa, go thoma ka kgoro ya Rubene, morwa yo mogolo wa Jakobo. Palo ya bona e bile ka mokgwa wo: Kgoro Palo Rubene 46 500 Simeone 59 300 Gade 45 650 Juda 74 600 Isakara 54 400 Sebulone 57 400 Efraime 40 500 Manase 32 200 Benjamene 35 400 Dane 62 700 Asere 41 500 Naftali 53 400 Palomoka: 603 550 *** *** *** *** *** *** *** *** *** *** Eupša Balefi ba ile ba se ke ba ngwadišwa le dikgoro tše dingwe, ka gobane Morena o be a rile go Moshe: “Ge o bala Baisraele o se ke wa ngwala le ba kgoro ya Lefi. Balefi o ba bee bahlokomedi ba Tente ya bodulo bja ka le ditlabakelo tša yona ka moka. Bona ba e rwale gotee le ditlabakelo tša yona, ba e hlokomele, mme ba hlome mešaša ya bona go e dikologa. Ge le huduga, Balefi ba rutlolle Tente gomme ba e hlome gape mo le hlomago mešaša. Motho yo e sego Molefi ge a ka batamela Tente a bolawe. Ba bangwe ba Baisraele ba hlome mešaša, ka dihlopha ka dihlopha, monna yo mongwe le yo mongwe le sehlopha sa gabo ka sefoka sa gabo. Balefi bona ba hlome mešaša ya bona go dikologa Tente go e leta, gore go se ke gwa ba le yo a e batamelago mme a mpefediša, ka otla setšhaba sa Israele.” Ka gona Baisraele ba dira tšohle tše Morena a bego a di laetše Moshe. Morena o file Moshe le Arone ditaelo tše di latelago. Ge Baisraele ba hloma mešaša, monna yo mongwe le yo mongwe a hlome mošaša wa gagwe sekgaong sa gabo le sefokeng sa kgorwana ya gabo. Mešaša e hlongwe go rarela Tente. Ka thokong ya bohlabela ba sefoka sa sekgao sa Juda ba hlome mešaša ka dihlopha tša bona, ba na le baetapele ba bona, ka mokgwa wo: Kgoro Moetapele Palo Juda Nagshone, morwa wa Aminadaba 74 600 Isakara Netanele, morwa wa Tsuare 54 400 Sebulone Eliaba, morwa wa Helone 57 400 Palomoka: 186 400 Sekgao sa Juda se tloge pele. *** *** *** *** *** *** Ka borwa ba sefoka sa sekgao sa Rubene ba hlome mešaša ka dihlopha tša bona, ba na le baetapele ba bona, ka mokgwa wo: Kgoro Moetapele Palo Rubene Elitsure, morwa wa Shedeure 46 500 Simeone Shelumiele, morwa wa Tsurishadai 59 300 Gade Elisafo, morwa wa Reuele 45 650 Palomoka: 151 450 Sekgao sa Rubene se tloge se latele sa Juda. *** *** *** *** *** *** Ke moka gare ga dikgao tše pedi tša mathomo le dikgao tše pedi tša mafelelo Balefi ba tloge ba rwele Tente. Dikgao ka moka di tloge ka tatelano ya tšona ya ge di hloma mešaša, se sengwe le se sengwe maemong a sona ka sefoka sa sona. Ka bodikela ba sefoka sa sekgao sa Efraime ba hlome mešaša ka dihlopha tša bona, ba na le baetapele ba bona, ka mokgwa wo: Kgoro Moetapele Palo Efraime Elishama, morwa wa Amihude 40 500 Manase Gamliele, morwa wa Pedatsure 32 200 Benjamene Abidane, morwa wa Gidoni 35 400 Palomoka: 108 100 Sekgao sa Efraime se tloge se latele sa Rubene. *** *** *** *** *** *** Ka leboa ba sefoka sa sekgao sa Dane ba hlome mešaša ka dihlopha tša bona, ba na le baetapele ba bona, ka mokgwa wo: Kgoro Moetapele Palo Dane Ahiesere, morwa wa Amishadai 62 700 Asere Pagiele, morwa wa Okrane 41 500 Naftali Ahira, morwa wa Enane 53 400 Palomoka: 157 600 Sekgao sa Dane se tloge morago. *** *** *** *** *** *** Baisraele ka moka ba ba ngwadišitšwego dikgaong, sehlopha ka sehlopha, e be e le ba 603 550. Fela, bjalo ka ge Morena a be a laetše Moshe, Balefi ba ile ba se ke ba ngwadišwa le Baisraele ba bangwe. Ka gona Baisraele ba dira tšohle tše Morena a bego a di laetše Moshe. Ba hloma mešaša, ba bangwe le ba bangwe ka morago ga sefoka sa bona, gomme ba bangwe le ba bangwe ba tloga le ba kgorwana ya gabobona. Šeba ba lešika la Arone le Moshe ka nako ye Morena a bolela le Moshe thabeng ya Sinai. Arone o be a na le barwa ba bane: Nadaba, yo mogolo go bona, le Abihu le Eleasara le Ithamara. Ba ile ba tlotšwa, ba bewa baprista, eupša Nadaba le Abihu ba ile ba bolawa ge ba tlišetša Morena mollo wo o sego wa dumelelwa lešokeng la Sinai. Ba be ba se na bana, ka gona Eleasara le Ithamara ba be ba dira modiro wa baprista nakong ya ge tatagobona Arone a sa phela. Morena a re go Moshe: “Tliša ba kgoro ya Lefi o ba bee bahlanka ba Arone moprista. Ba dire modiro wo o swanetšego go dirwa Tenteng ya bodulo bja ka, ba phethe le mediro ya Arone le ya setšhaba ka moka. Ba hlokomele ditlabakelo ka moka tša Tente, ba be ba phethe mediro ya Baisraele ka moka. Modiro o nnoši wa Balefi ke go hlankela Arone le barwa ba gagwe. Arone le barwa ba gagwe bona o ba bee badiri ba mediro ya baprista; yo mongwe ka ntle le bona yo a ka lekago go dira mediro ya bona a bolawe.” Morena a re go Moshe: “Balefi bjale e swanetše go ba ba ka. Ka letšatši lela ke bolaya maitšibolo ka moka a Baegepeta ke ile ka ikabela mošemane wa leitšibolo wa lapa le lengwe le le lengwe la Moisraele, le leitšibolo la seruiwa se sengwe le se sengwe. Bjale bakeng sa gore bašemane ba Baisraele ba maitšibolo e be ba ka, nna ke ikabetše Balefi; e swanetše go ba ba ka. Ke nna Morena.” *** Lešokeng la Sinai Morena o laetše Moshe gore a ngwale Balefi ka dikgorwana le malapa a bona, a ngwale banna ka moka le bašemanyana ba ba nago le kgwedi e tee goba go feta fao, gomme Moshe a dira bjalo. Lefi o bile le barwa ba bararo: Gershone le Kehate le Merari, ba e bilego borakgolokhukhu ba dikgorwana tšeo di tsebjago ka maina a bona. Gershone o bile le barwa ba babedi: Libni le Shimi; Kehate o bile le barwa ba bane: Amramo le Jitsara le Hebrone le Usiele; Merari o bile le barwa ba babedi: Magli le Mushi. Bao e bile borakgolokhukhu ba malapa ao a tsebjago ka maina a bona. *** *** *** Kgorwana ya Gershone e be e bopilwe ke lapa la Libni le la Shimi. Banna le bašemane ba kgwedi e tee goba go feta fao ba ba ilego ba ngwalwa e be e le ba 7 500. Kgorwana ye e be e swanetše go hloma mešaša ka morago ga Tente, ka bodikela; Elisafo, morwa wa Laele, e be e le ntona ya kgorwana yeo. Ba be ba hlokometše Tente: sepipetši sa yona sa ka gare le sa ka ntle, seširo sa mojako, diširo tša kgoro ye e dikologilego Tente le aletare, diširo tša mojako wa kgoro, le dithapo ka moka. Ba be ba hlokometše mediro ka moka ye e amanago le dilo tše. Kgorwana ya Kehate e be e bopša ke lapa la Amramo, la Jitsara, la Hebrone le la Usiele. Banna le bašemane ba kgwedi e tee goba go feta bao ba ilego ba ngwalwa e be e le ba 8 600. Sa bona e be e le go hlokomela Tente. Kgorwana ye e be e swanetše go hloma mešaša ka lehlakoreng la ka borwa la Tente; Elitsafane, morwa wa Usiele, e be e le ntona ya kgorwana yeo. Ba be ba hlokometše Polokelo ya Kgwerano, tafola, sehlomamabone, dialetare, dibjana tšeo baprista ba di šomišago ka Felo mo Gokgethwa, le seširo sa mojako wa Felo mo Gokgethwakgethwa. Ba be ba hlokometše mediro ka moka ye e amanago le dilo tše. Moetapele wa Balefi e be e le Eleasara, morwa wa moprista Arone. O be a hlokometše bao ba dirago mediro ka Felong mo Gokgethwa. Kgorwana ya Merari e be e bopša ke lapa la Magli le la Mushi. Banna le bašemane ba kgwedi e tee goba go feta moo bao ba ilego ba ngwalwa e be e le ba 6 200. Ntona ya kgorwana yeo e be e le Tsuriele, morwa wa Abihaile. Kgorwana ye e be e swanetše go hloma mešaša ka lehlakoreng la ka leboa la Tente. Ba ile ba bewa go hlokomela mahlomo a go thekga Tente, dipalelo tša yona, dikota, mabogato, le thoto ya yona ka moka. Ba be ba hlokometše mediro ka moka ye e amanago le dilo tše. Ba be ba hlokometše le dikota, mabogato, dibapola le dithapo tša kgoro. Moshe le Arone le barwa ba gagwe ba be ba swanetše go hloma mešaša pele ga Tente ka bohlabela. Ba be ba hlokometše mediro ye e dirwago ka Felong mo Gokgethwa ya setšhaba sa Israele. Yo mongwe ka ntle le bona yo a bego a ka leka go dira mediro yeo o be a swanetše go bolawa. Banna le bašemane ka moka ba Balefi ba kgwedi e tee goba go feta bao Moshe a ba ngwadilego ka dikgorwana ka taelo ya Morena e be e le ba 22 000. Morena a re go Moshe: “Bala bašemane bohle ba maitšibolo ba Baisraele ba kgwedi e tee goba go feta fao, gomme o ngwale maina a bona. Ke ikabetše Balefi sebakeng sa bašemane bohle ba maitšibolo. Ke nna Morena. Ke ikabetše le diruiwa tša Balefi legatong la maitšibolo ka moka a diruiwa tša Baisraele.” Moshe a phetha taelo a ngwala bašemane ba maitšibolo ka moka ba kgwedi e tee goba go feta, ya ba ba 22 273. Morena a re go Moshe: “Bjale nkabele Balefi sebakeng sa bašemane ba maitšibolo ba Baisraele, le diruiwa tša Balefi legatong la maitšibolo a diruiwa tša Baisraele. Ka ge bašemane ba maitšibolo ba Baisraele ba feta Balefi ka ba 273, o rekolle barwa bao ba fetago palo. Yo mongwe le yo mongwe o mo lefele ka dipapetlana tše di fetšago seatla tša silibera, tše di etšwego go ya ka boima bja papetlana ya silibera ya ka Felo mo Gokgethwa, mme o neele Arone le barwa ba gagwe tšhelete yeo.” Papetlana ya silibera ya ka Felo mo Gokgethwa ke ya boima bja dikramo tše e ka bago tše lesome. *** Moshe a phetha taelo yeo gomme a tšea dipapetlana tše 1 365 tša silibera, a di neela Arone le barwa ba gagwe. Morena o boditše Moshe gore a ngwale ba kgorwana ya Balefi ya Kehate ka dihlophana le malapa a bona. A ngwadiše banna ka moka ba mengwaga ye masome a mararo go iša go ba ye masome a mahlano ba ba bego ba swanela go šoma ka Tenteng ya bodulo bja Morena. Modiro wa bona e be e le go hlokomela dilo tše kgethwakgethwa. Morena o file Moshe melawana ye e latelago: Ge mešaša e rutlollwa, Arone le barwa ba gagwe ba tsene ka Tenteng, ba fegolle seširo se se lego pele ga Polokelo ya Kgwerano, gomme ba phuthele Polokelo yeo ka sona. Ba e phuthele ka mokgopa wo boletiana, mme ka godimo ba ale lešela la botala bja legodimo, gomme ba e khwamele mapara a go e rwala. Ba ale lešela la botala bja legodimo tafoleng ya dinkgwa tšeo di abetšwego Morena, gomme godimo ga yona ba bee meruswi, megopo, digo, le diphafana tša dikabelo tša beine. Dinkgwa tšeo le tšona di be tafoleng. Ba apeše tšeo ka moka ka lešela le lehubedu, ba di pipe ka mokgopa wo boletiana, gomme ba khwamele tafola mapara a go e rwala. Ba tšee lešela la botala bja legodimo ba phuthele sehlomamabone le mabone a sona, ditlao, dibjana tša magala, le meruswi ya makhura a mohlware. Ba se phuthele le ditlabakelo tša sona ka moka ka mokgopa wo boletiana, gomme ba se bee leakong la go se rwala. Ka morago ga moo ba ale lešela la botala bja legodimo godimo ga aletare ya gauta, ba e pipe ka mokgopa wo boletiana, mme ba e khwamele mapara a go e rwala. Ba tšee dibjana ka moka tše di šomišwago ka Felong mo Gokgethwa ba di phuthele ka lešela la botala bja legodimo, ba di pipe ka mokgopa wo boletiana, mme ba di bee godimo ga leako la go di rwala. Ba tloše melora aletareng, mme ba apeše aletare ka lešela la bohubedu bja moretele. Godimo ga yona ba bee ditlabakelo ka moka tše di šomišwago tirelong go yona: dibjana tša magala, le diforoko tša mašimelo, le digarafo, le meruswi. Ke moka ba e pipe ka mokgopa wo boletiana, gomme ba e khwamele mapara a go e rwala. Ge e le nako ya go hlahlamolla mešaša, kgorwana ya Kehate e rwale dilo tše kgethwa, fela e be ka morago ga ge Arone le barwa ba gagwe ba feditše go di phuthela gotee le ditlabakelo tša tšona ka moka. Ba kgorwana ya Kehate ba se ke ba kgwatha dilo tšeo tše kgethwa, gore ba se hwe. Ye ke mediro ya kgorwana ya Kehate nako ye nngwe le ye nngwe ge Tente e tlošwa. Eleasara, morwa wa moprista Arone, a hlokomele Tente ka moka le makhura a mabone, le seorelo sa go nkga bose, le dikabelo tša bupi tša ka mehla, le makhura a tlotšo, le ditlabakelo tša Tente, le se sengwe le se sengwe ka Tenteng se se kgethwafaleditšwego Morena. Morena a re go Moshe le Arone: “Le se ke la lesa kgorwana ya Kehate e fedišwa go Balefi ka baka la go batamela dilo tše kgethwakgethwa tše. Gore taba ye e se ke ya direga, Arone le barwa ba gagwe ba tsene ka Tenteng, ba fe monna yo mongwe le yo mongwe modiro wa gagwe, ba mmotše le gore a rwale eng. Eupša ge Bakehate ba ka tsena ka Tenteng ba lebelela dilo tše kgethwa le ge e le motsotswana fela, ba tla hwa.” Morena o boditše Moshe gore a ngwale ba kgorwana ya Balefi ya Gershone ka dihlophana le malapa a bona. A ngwadiše banna ka moka ba mengwaga ye masome a mararo go iša go ba ye masome a a fetšago seatla ba ba bego ba swanela go šoma ka Tenteng ya bodulo bja gagwe. Ba rwale dilo tše di latelago: Tente, sepipetši sa yona sa ka gare le sa ka ntle, sepipetši sa mokgopa wo boletiana godimo ga yona, seširo sa mojako, diširo le dithapo tša kgoro ye e dikologilego Tente, aletare, seširo sa mojako wa kgoro, le ditlabakelo ka moka tše di šomišwago go hloma dilo tše. Ba phethe mediro ka moka ya dilo tše ye e swanetšego go dirwa. Moshe le Arone ba hlokomele gore Bagershone ba phethe mediro ka moka, mme ba rwale tšohle tše Arone le barwa ba gagwe ba ba šupago tšona. Ye ke mediro ya kgorwana ya Gershone ka Tenteng; ba e dire ba hlapeditšwe ke Ithamara, morwa wa moprista Arone. Morena o boditše Moshe gore a ngwale kgorwana ya Balefi ya Merari ka dihlophana le malapa a bona. A ngwadiše banna ka moka ba mengwaga ye masome a mararo go iša go ba ye masome a a fetšago seatla ba ba swanelago go šoma ka Tenteng ya bodulo bja gagwe. Ba hlokomele go rwala mahlomo a go thekga, le dipalelo, le dikota tša Tente le mabogato a yona, le dikota tša kgoro le mabogato a tšona, le dibapola le dithapo tša kgoro ya go rarela Tente, le ditlabakelo ka moka tše di šomišwago go di hloma. Monna yo mongwe le yo mongwe a botšwe se a swanetšego go se rwala. Ye ke mediro ya kgorwana ya Merari mošomong wa bona ka Tenteng; ba e dire ba hlapeditšwe ke Ithamara, morwa wa moprista Arone. Ka go phetha taelo ya Morena, Moshe le Arone le baetapele ba setšhaba ba ile ba bala ba dikgorwana tše tharo tša Lefi, e lego ya Kehate, ya Gershone, le ya Merari, ka dihlophana le malapa a bona. Ba ngwala banna ka moka ba mengwaga ye masome a mararo go iša go ba ye masome a mahlano ba ba swanelago go šoma ka Tenteng ya bodulo bja Morena, ba ba ngwala ka mokgwa wo: Kgorwana Palo Kehate 2 750 Gershone 2 630 Merari 3 200 Palomoka: 8 580 *** *** *** *** *** *** *** *** *** *** Monna yo mongwe le yo mongwe a ngwadišwa go ya ka moo Morena a bego a laetše Moshe, gomme a fiwa modiro wa gagwe le se a swanetšego go se rwala, go ya ka moo Morena a laetšego Moshe. Morena a re go Moshe: “Laela Baisraele gore yo mongwe le yo mongwe yo a nago le bolwetši bja letlalo bja go mo tšhilafatša, goba yo a tšwago seela mmeleng, goba yo a tšhilafetšego ka gobane a kgwathile setopo, a ntšhwe mešašeng. E ka ba monna goba mosadi yo a tšhilafetšego, ba ntšhwe gore ba tle ba se ke ba kgotlela mešaša moo ke dulago ntshe gare ga setšhaba sa ka.” Baisraele ba ile ba phetha taelo ye, gomme ba ba ntšha ka moka mešašeng. Morena o file Moshe melawana ye e latelago ya Baisraele. Ge motho a ka se botegele Morena a phošetša yo mongwe, a ipolele sebe sa gagwe, a be a lefe motho yo a mo phošeditšego, a tlaleletše ka karolo ya bohlano ya tefo yeo. Eupša ge motho yoo a hwile gomme a se na moloko wa kgauswi yoo tefo e ka fiwago yena, e fiwe Morena e be ya baprista. Tefo ye e tlaleletša kgapa ya sehlabelo sa go mmoelanya le Morena se se dirilwego ka yona. Gape kabelo ye nngwe le ye nngwe yeo Baisraele ba e fago Morena ka tsela ye e itšeng ke ya moprista yoo e neelwago go yena. Moprista yo mongwe le yo mongwe a ipolokele dikabelo tše a neelwago tšona. Morena o laetše Moshe gore a fe Baisraele melawana ye e latelago. Ge monna a ka belaela gore mosadi wa gagwe ga a mmotegele, o ikgotletše ka go robala le monna yo mongwe, fela a se be le therešo ya taba yeo ka ge mosadi a e dirile sephiri – go se na hlatse, a bile a se a swarwa – goba ge monna a ka belaela mosadi wa gagwe, le ge e le gore mosadi ga a na molato, gona monna yoo a iše mosadi wa gagwe go moprista. A ye le kabelo ye e nyakegago, e lego bupi bja kilokramo e tee bja garase, eupša a se ke a e tšhela makhura a mohlware goba seorelo, ka gobane ke kabelo ya bupi ye e tšwago go monna wa pelaelo ye e direlwago go utolla therešo. Moprista a batametše mosadi yoo aletareng pele ga Morena. A tšhele meetse a makgethwa ka moruswing, a tšee lerole lebatong la Tente ya bodulo bja Morena, mme a le tšhele ka moo meetseng. Ke moka a hlahlamolle moriri wa mosadi, gomme a bee kabelo ya bupi ka diatleng tša gagwe. Ka diatla moprista a sware moruswi wola wa meetse a go galaka a go tliša thogako. A eniše mosadi yoo ka go re go yena: “Ge o se wa otswa, meetse a a thogako a ka se go dire selo. Eupša ge o otswitše, gona a Morena a go dire morogakwa le molahlwa bathong beno. A go dire moopa, a go kokomoše le dimpa. A meetse a a thogako a tsene ka mpeng ya gago a e kokomoše, a be a go dire moopa.” Mosadi a fetole a re: “Ke a dumela; a Morena a dire bjalo.” Moprista a ngwale thogako yeo, ebe o hlatswa mangwalo ao ka meetseng ale a go galaka. Pele ga ge a noša mosadi yoo meetse ao a kago mo hlolela bohloko bjo bogolo, moprista a tšee kabelo ya bupi diatleng tša gagwe, a e abele Morena ka tsela ye e itšeng, mme a e tliše aletareng. A ntšhe legoswi la yona go laetša gore yohle e abetšwe Morena, mme a le tšhume aletareng, a kgone a noša mosadi yoo meetse ao. Ge a otswitše, meetse ao a tla mo hlolela bohloko bjo bogolo, gomme o tla kokomoga dimpa, a ba a ba moopa. E tla ba morogakwa bathong babo. Eupša ge a se ne molato a ka se mo dire selo, mme o tla kgona go ba le bana. Wo ke molao wa ge monna a na le lehufa mme a belaela mosadi wa gagwe gore o otswitše. Mosadi yoo a emišwe pele ga Morena, mme moprista a phethe tiro ye. *** Monna a ka se be le molato, eupša mosadi yoo, ge eba o na le molato, o tla otlwa. Morena o laetše Moshe gore a fe Baisraele melawana ye e latelago. Ge monna goba mosadi a ikanne go ba Monasire mme a ineetše go Morena, a ile beine le mabjala a mangwe. A se ke a nwa seno sa mohuta ofe le ofe se se dirilwego ka diterebe, goba a ja diterebe goba makwapi a diterebe. Ge e sa le Monasire a se ke a ja selo se se tšwago moterebeng, le ge e le dithapo goba makgata a diterebe. Ge a sa itlemile ka keno ya Banasire a se ke a kota moriri goba maledu. O itlemile ka keno nako ka moka ya ge a sa ineetše go Morena, gomme a tlogele moriri le maledu. Moriri wa gagwe ke sešupo sa go ineela ga gagwe go Modimo, ka gona a se ke a ikgotlela ka go batamela setopo, le ge e ka hlwe e le sa tatagwe, goba sa mmagwe, goba sa morwarragwe, goba sa kgaetšediagwe. *** Ge e sa le Monasire o kgethwafaleditšwe Morena. Ge mo pele ga gagwe go ka hwa motho ka bjako, ka fao moriri wo o neetšwego Morena wa kgotlelwa, a letele matšatši a a šupago, e be gona a kotago moriri le maledu, gomme a hlweke. Ka letšatši la seswai a tliše mekuru ye mebedi goba maeba a mabedi go moprista mojakong wa Tente ya bodulo bja Morena. Moprista a dire sehlabelo sa tshwarelo ya dibe ka le lengwe, mme ka le lengwe a dire sehlabelo sa go tšhungwa ka moka, gomme ka tsela ye a phethe tiro ya go mmoelanya le Morena ka ge a ikgotletše ka go ba kgauswi le setopo. Ka lona letšatši leo motho yoo a tlogele moriri wa gagwe o mele gape, a ineele Morena ka lefsa, e be Monasire gape. Nako yela ya pele ga e balwe, ka gobane moriri wa gagwe wola o bego o neetšwe Morena o ile wa kgotlelwa. A tliše kwanyana ya ngwaga o tee e be sehlabelo sa tefelo ya dibe. Ge nako ya gagwe ya go ikgethwafaletša Morena e fetile a dire ka mokgwa wo: A ye mojakong wa Tente, a neele Morena diruiwa tše tharo tše di se nago bosodi: kgapana ya ngwaga o tee ya sehlabelo sa go tšhungwa ka moka, le kwanyana e tee ya tshatšana ya ngwaga o tee ya sehlabelo sa tshwarelo ya dibe, le kgapa ya sehlabelo sa kagišano. A tliše le seroto sa dinkgwa tše di dubilwego ntle le komelo: tše di dirilwego ka bupi bjo bo hlakantšwego le makhura a mohlware, le dinkgwana tša diphaphathiana tše di tšhatšhitšwego ka makhura a mohlware, le dikabelo tše di nyakegago tša bupi le tša dino. Moprista a di neele Morena, a dire sehlabelo sa tshwarelo ya dibe le sehlabelo sa go tšhungwa ka moka. A direle Morena sehlabelo sa kagišano ka kgapa yeo, mme a se neele Morena gotee le seroto seo sa dinkgwa; a mo neele le dikabelo tša bupi le tša dino. Monasire a kote moriri wa gagwe mojakong wa Tente, mme a ye a o lahlele mollong woo go wona go tšhungwago sehlabelo sa kagišano. Moprista a tšee legetla la kgapa le le bego le apeilwe, le senkgwa se tee le senkgwana sa phaphathiana serotong, mme a di bee ka diatleng tša Monasire. Ke moka moprista a di abele Morena e le mpho ye e fiwago yena ka tsela ye e itšeng; ke mpho ye kgethwa ya moprista go tlaleletša mpho ya leumo le kabelo ya serope tšeo di fiwago Morena ka tsela ye e itšeng. Go tloga moo Monasire a ka nwa beine. Yeo ke melawana ya Banasire; eupša ge yo mongwe wa bona a ka itlema go ntšha kabelo ye e fetago ye a ikanetšego yona, o swanetše go phetha se a itlemilego ka sona. Morena o laetše Moshe gore a botše Arone le barwa ba gagwe gore ba šegofatše Baisraele ba re: Morena a go šegofatše, a go boloke; Morena a go edišetše sefahlego sa gagwe, a go gaugele; Morena a go lebelele ka botho, mme a go fe khutšo. Morena a ba a re: “Ge ba bolela leina la ka ka mokgwa wo go laetša gore ke setšhaba sa ka, gona nna ke tla ba šegofatša.” Ka letšatši le Moshe a feditšego go hloma Tente ya bodulo bja Morena, o ile a e tlotša a e kgethwafatša gotee le ditlabakelo tša yona ka moka, le aletare le ditlabakelo tša yona ka moka. Ke moo baetapele ba Baisraele, e lego mantona a dikgorwana, bona e bego e le baetapele dikgorong tša Baisraele, bale ba bego ba hlokometše go balwa ga setšhaba, ba ilego ba tlišetša Morena dikabelo tša bona: dikoloi tše di selelago tša ditente, le dipholo tše lesome le tše pedi – koloi e tee e ntšhwa ke baetapele ba babedi ba babedi, le pholo e tee e ntšhwa ke moetapele o tee o tee. Ge ba di tlišitše pele ga Tente, Morena a re go Moshe: “Amogela dilo tše mme o di šomiše modirong wo o swanetšego go dirwa wa Tente; o di fe Balefi, go ya ka modiro wo kgorwana ye nngwe le ye nngwe e swanetšego go o dira.” Ka gona Moshe a fa Balefi dikoloi le dipholo tšeo. A fa Bagershone dikoloi tše pedi le dipholo tše nne; a fa Bamerari dikoloi tše nne le dipholo tše seswai. Modiro wa bona ka moka o be o swanetše go dirwa ba laolwa ke Ithamara, morwa wa Arone. Fela Moshe o ile a se ke a fa Bakehate dikoloi goba dipholo, ka gobane dilo tše kgethwa tše ba bego ba di hlokometše ba be ba swanetše go di rwala magetleng. Baetapele ba tliša le dikabelo tšatšing la go kgethwafatša aletare le go e tlotša. Ba tliša dimpho tša bona aletareng. Morena a re go Moshe: “Ba botše gore letšatši le lengwe le le lengwe moetapele yo mongwe a tliše dimpho tša gagwe tša go kgethwafatša aletare.” Ba tlišitše dikabelo tša bona ka lenaneo le: Letšatši Kgoro Moetapele La pele Juda Nagshone, morwa wa Aminadaba La bobedi Isakara Netanele, morwa wa Tsuare La boraro Sebulone Eliaba, morwa wa Helone La bone Rubene Elitsure, morwa wa Shedeure La bohlano Simeone Shelumiele, morwa wa Tsurishadai La boselela Gade Elisafo, morwa wa Reuele La bošupa Efraime Elishama, morwa wa Amihude La seswai Manase Gamliele, morwa wa Pedatsure La senyane Benjamene Abidane, morwa wa Gidoni La lesome Dane Ahiesere, morwa wa Amishadai La lesome le motšo o tee Asere Pagiele, morwa wa Okrane La lesome le metšo ye mebedi Naftali Ahira, morwa wa Enane Dikabelo tšeo ba di tlišitšego di be di swana: sekotlelo se tee sa silibera ya boima bja 1,5 kilokramo, le sebjana se tee sa silibera ya boima bja dikramo tše 800 ye e etšwego go ya ka boima bja papetlana ya silibera ya ka Felo mo Gokgethwa, tšona di tletše bupi bjo bo hlakantšwego le makhura a mohlware e le kabelo ya bupi; pane e tee ya gauta ya boima bja dikramo tše 110 e tletše seorelo; powana e tee, kgapa e tee, le kwanyana ya ngwaga o tee tša sehlabelo sa go tšhungwa ka moka; phooko e tee ya sehlabelo sa tshwarelo ya dibe; dipoo tše pedi, dikgapa tše tlhano, diphooko tše tlhano, le dikwanyana tše di fetšago seatla tše di nago le ngwaga o tee tša sehlabelo sa kagišano. *** *** *** *** *** *** *** *** *** *** Dikabelo tše di tlišitšwego ke baetapele ba lesome le ba babedi tša go khethwafatša aletare le go e tlotša e bile tše: dikotlelo tša silibera tše lesome le tše pedi le dibjana tša silibera tše lesome le tše pedi tša boima bja dikilokramo tše 27,4 dipane tša gauta tše lesome le tše pedi tša boima bja 1,37 kilokramo tše di tletšego seorelo dipoo tše lesome le tše pedi, dikgapa tše lesome le tše pedi, le dikwanyana tše lesome le tše pedi tše di nago le ngwaga o tee, gotee le dikabelo tša bupi tše di sepelago natšo, tša dihlabelo tša go tšhungwa ka moka diphooko tše lesome le tše pedi tša sehlabelo sa tshwarelo ya dibe dipoo tše masome a mabedi le tše nne, dikgapa tše masome a a selelago, diphooko tše masome a a selelago, le dikwanyana tše masome a a selelago tše di nago le ngwaga o tee tša sehlabelo sa kagišano. *** *** *** *** Ge Moshe a tsena ka Tenteng go yo bolela le Morena, o ile a kwa Morena a mmolediša ka godimo ga sekhurumelo godimo ga Polokelo ya Kgwerano, gare ga bakerubi ba babedi. Morena a re go Moshe: “Botša Arone gore ge a hloma mabone a a šupago godimo ga sehlomamabone, a a bee ka moo e lego gore seetša se tla bonegela pele.” Arone a phetha taelo yeo, a hloma mabone ka go a lebeletša pele ga sehlomamabone. Sehlomamabone ka moka ga sona go tloga bogatong go fihla matšobeng a sona se be se dirilwe ka gauta ye e rutšwego. Moshe o be a se dirile ka go swantšha se Morena a bego a mmontšhitše sona. Morena a re go Moshe: “Ntšha Balefi go Baisraele ka moka, o ba hlwekiše ka mokgwa wo: O ba fokele ka meetse a go hlwekiša; ba ipoole mmele ka moka, ba hlatswe le diaparo tša bona. Ke gona ba tlago hlweka. Ba tšee powana le kabelo ya bupi ye e nyakegago ye e hlakantšwego le makhura a mohlware; o tšee le powana ye nngwe ya sehlabelo sa tshwarelo ya dibe. E be gona o kgobokanyago setšhaba ka moka sa Israele, gomme o batametše Balefi pele ga Tente ya bodulo bja ka. Baisraele ba bee Balefi diatla dihlogong, mme Arone a nkabele Balefi e le mpho ya Baisraele ye e fiwago nna ka tsela ye e itšeng, gore ba tle ba dire modiro wa ka. Ke moka Balefi bona ba bee diatla tša bona godimo ga dihlogo tša dipowana tšeo tše pedi; ka ye nngwe go dirwe sehlabelo sa tshwarelo ya dibe, mme ka ye nngwe go dirwe sehlabelo sa go tšhungwa ka moka, gore go tle go phethwe tiro ya go hlwekišwa ga Balefi. “O nkabele Balefi e le mpho ye e fiwago nna ka tsela ye e itšeng, gomme o bee Arone le barwa ba gagwe baokamedi ba bona. O hlaole Balefi ka tsela ye go Baisraele ka moka, gore e tle e be ba ka. Ge o feditše go hlwekiša Balefi mme o nkabetše bona, ba ka thoma mošomo wa bona ka Tenteng. Ke ikabetše bona sebakeng sa bašemane ba maitšibolo ka moka ba Baisraele, gomme ke ba ka ke nnoši. Ge ke bolaya maitšibolo ka moka Egepeta, ke kgethwafaditše morwa wa mathomo wa lapa le lengwe le le lengwe la Moisraele gore e be wa ka, le leitšibolo la seruiwa se sengwe le se sengwe ke le kgethwafaditše. Bjale ke tšea Balefi sebakeng sa maitšibolo ka moka a Baisraele, gomme ke ba nea Arone le barwa ba gagwe e le mpho ye e tšwago go Baisraele go šomela Baisraele ka Tenteng, le go ba šireletša kotsing ye e tlago ba wela ge ba ka batamela Felo mo Gokgethwa.” Ka gona Moshe le Arone le setšhaba ka moka sa Israele ba abela Morena Balefi bjalo ka ge Morena a laetše Moshe. Balefi ba itlhwekiša mme ba hlatswa diaparo tša bona, gomme Arone a ba abela Morena e le mpho ye e fiwago yena ka tsela ye e itšeng. A ba a ba phethela tiro ya go ba hlwekiša. Setšhaba sa dira tšohle tše Morena a ba laetšego tšona ka Balefi. Ka gona Balefi ba tla ba dira modiro wa bona ka Tenteng ba laolwa ke Arone le barwa ba gagwe. Morena a re go Moshe: “Molefi yo mongwe le yo mongwe yo a nago le mengwaga ye masome a mabedi le metšo ye mehlano goba go feta, a tle a dire modiro wa gagwe ka Tenteng ya bodulo bja ka, gomme a tlogele modiro ge a na le mengwaga ye masome a mahlano. Ka morago ga fao a ka thuša Balefi ba gabo go dira mediro ya bona ka Tenteng, eupša ga a swanela go phetha modiro ofe le ofe ka boyena. Ke ka moo o swanetšego go fa Balefi mediro ya bona.” Morena o boletše le Moshe lešokeng la Sinai ka kgwedi ya mathomo ya ngwaga wa bobedi wa ge setšhaba sa Israele se tlogile Egepeta a re: “Baisraele ba keteke Paseka go thoma ge letšatši la lesome le metšo ye mene la kgwedi ye le diketše, go ya ka melao le ditaelo ka moka tša yona.” *** Ka gona Moshe a botša setšhaba go keteka Paseka, gomme ba dira bjalo mantšiboa a letšatši la lesome le metšo ye mene la kgwedi ya mathomo lešokeng la Sinai. Setšhaba sa dira tšohle ka moo Morena a laetšego Moshe. Eupša go be go le banna ba bangwe bao ba bego ba tšhilafetše ka gobane ba be ba kgwathile setopo, gomme ba šitwa ke go keteka Paseka ka letšatši leo. Ba ile ba ya go Moshe le Arone ba re: “Re tšhilafetše ka gore re kgwathile setopo, fela a re ka napa ra ganetšwa go dira sehlabelo sa Morena le Baisraele ba bangwe?” Moshe a ba fetola a re: “Nkemeleng go fihlela ke ekwa se Morena a tlago ntaela sona mabapi le lena.” Morena a laela Moshe gore a botše Baisraele a re: “Le ge yo mongwe wa lena goba wa ditlogolo tša lena a tšhilafetše ka ge a kgwathile setopo, goba a le kgole leetong, o sa swanetše go keteka Paseka. Batho bao ba dumeletšwe go e keteka mantšiboa a letšatši la lesome le metšo ye mene la kgwedi ya bobedi. Ba e je ka dinkgwa tše di se nago komelo, le dimela tše di galakago. Ba se ke ba e šadiša molatša go fihlela mosong wa le le latelago, le gona ba se ke ba roba kwanyana ya Paseka lešapo. Ba keteke Paseka go ya ka melawana ya yona ka moka. Fela yo a hlwekilego a bile a se kgole leetong, eupša a se keteke Paseka, a kgaolwe setšhabeng sa gabo ka gobane a se a dira sehlabelo sa ka ka nako ye e beilwego. O tla otlwa ka ge a dirile sebe. “Ge mofaladi yo a dulago gare ga lena a nyaka go keteka Paseka, o swanetše go e keteka go ya ka melao le melawana ya yona ka moka. Molao woo o ama mang le mang, e ka ba ngwana wa mobu, goba mofaladi.” Ka letšatši leo Tente ya bodulo bja Morena e hlomilwego ka lona, leru le ile la tla la e pipetša. Bošego le be le le bjalo ka mollo. Go ile gwa ba ka mokgwa woo ka mehla. *** Nako ye nngwe le ye nngwe ge leru le phagama, Baisraele ba be ba huduga, mme e re mo le theogelago gona, ba hlome mešaša gape. Ba be ba huduga ka taelo ya Morena, mme ka taelo ya gagwe ba hloma mešaša. Ge leru le sa le godimo ga Tente ba be ba dula gona moo mešašeng. Ge leru le dutše godimo ga Tente nako ye telele, ba be ba phetha taelo ya Morena, ba sa huduge. Ka nako ye nngwe leru le be le dula godimo ga Tente matšatši a se makae fela; mabakeng ao ka moka ba be ba dula mešašeng goba ba huduge go ya ka taelo ya Morena. Ka nako ye nngwe leru le be le dula fao go tloga mantšiboa go fihlela fela mosong, gomme ba be ba huduga ge leru le seno phagama. Ge leru le phagama, le ge e le bošego le ge e le mosegare, ba be ba huduga. Ge leru le sa le godimo ga Tente matšatši a mabedi goba kgwedi goba go feta fao, ba be ba sa huduge; eupša ge le phagama, ba be ba huduga. Ba be ba hloma mešaša ba bile ba huduga ka go phetha ditaelo tše Morena a ba fago tšona ka Moshe. Morena a re go Moshe: “Dira diphala tše pedi tša silibera ye e rutšwego, e be tša ge go kgobokanywa setšhaba le ge go rutlollwa mešaša. Ge ka dipedi di letšwa nako ye telele, setšhaba ka moka se kgobokane pele ga gago mojakong wa Tente ya bodulo bja ka. Fela ge go letšwa e tee, go kgobokane mantona a dikgorwana. Ge di letšwa di kgaotša, dikgoro tše di hlomilego mešaša ka bohlabela di e rutlolle. Ge diphala di letšwa di kgaotšwa la bobedi, dikgoro tše di lego ka borwa di rutlolle mešaša ya tšona. Ka gona diphala di swanetše go letšwa di kgaotšwa gore go rutlollwe mešaša, fela ge go kgobokanywa setšhaba di swanetše go letšwa di sa kgaotšwe. Diphala tšeo di swanetše go letšwa ke baprista, barwa ba Arone. “Yeo ke taelo ye e swanetšego go phethwa ke lena le ditlogolo tša lena go ya go ile. Ge le le ntweng nageng ya lena, le itšhireletša manabeng a a le hlasetšego, le letšeng diphala tše le di kgaotša. Nna, Morena Modimo wa lena, ke tla le gopola mme ka le hlakodiša manabeng a lena. Le ka mabaka a lethabo le menyanyeng ya lena ya ge kgwedi e balamile le menyanyeng ya lena ye mengwe, le swanetše go letša diphala ge le tliša dihlabelo tša lena tša go tšhungwa ka moka le tša kagišano. Ke moo ke tlago le thuša. Ke nna Morena Modimo wa lena.” Ka letšatši la masome a mabedi la kgwedi ya bobedi ngwageng wa bobedi ka morago ga ge setšhaba se tlogile Egepeta, leru lela la ka godimo ga Tente ya bodulo bja Morena le ile la phagama, gomme Baisraele ba thoma leeto la bona le go tšama ba ema go tšwa lešokeng la Sinai. Leru leo la ema lešokeng la Parane. E be e le la mathomo ge Morena a ba laela ka Moshe gore ba huduge. Nako ye nngwe le ye nngwe ge ba huduga, kgoro ya Juda e be e sepela pele e swere sefoka sa yona, madira a yona a beakantšwe ka dihlopha, Nagshone, morwa wa Aminadaba, e le yena a ba okametšego. Netanele, morwa wa Tsuare, o be a laola madira a kgoro ya Isakara, gomme Eliaba, morwa wa Helone, a laola a kgoro ya Sebulone. Ya ba Tente e a rutlollwa, gomme kgorwana ya Gershone le ya Merari tše di bego di e rwala tša thoma leeto. Ka morago gwa latela ba kgoro ya Rubene ba swere sefoka sa yona, madira a yona a beakantšwe ka dihlopha, ba okametšwe ke Elitsure, morwa wa Shedeure. Shelumiele, morwa wa Tsurishadai, o be a laola madira a kgoro ya Simeone, gomme Elisafo, morwa wa Reuele, a laola a Gade. Ka morago gwa latela ba kgorwana ya Kehate bao ba bego ba rwele dilo tše kgethwa. Ka nako ye ba fihla lefelong le lefsa la go hloma mešaša, ba hwetša Tente e šetše e hlomilwe gape. Ka morago gwa latela ba kgoro ya Efraime ba swere sefoka sa yona, madira a yona a beakantšwe ka dihlopha, Elishama, morwa wa Amihude, a ba laola. Gamliele, morwa wa Pedatsure, o be a laola madira a kgoro ya Manase, gomme Abidane, morwa wa Gidoni, a laola a kgoro ya Benjamene. Mafelelong gwa latela ba kgoro ya Dane ba swere sefoka sa yona, madira a yona a beakantšwe ka dihlopha, ba okametšwe ke Ahiesere, morwa wa Amishadai. Madira a kgoro ya Dane e be e le bahlabani ba ka morago ba dikgoro ka moka. Pagiele, morwa wa Okrane, o be a okametše ba kgoro ya Asere, gomme Ahira, morwa wa Enane, a okametše ba ya Naftali. Woo e be e le mokgwa wo Baisraele ba bego ba latelana ka wona, sehlopha ka sehlopha, nako ye nngwe le ye nngwe ge ba hlahlamolla mešaša ba huduga. Moshe a re go Hobabe, mogweagwe, morwa wa Jetro, Momidiane: “Re batametše go thoma leeto la go ya lefelong leo Morena a itšego o tla re fa lona. O tshephišitše Baisraele gore o tla ba humiša, ka gona sepela le rena, gomme re tla go swara gabotse.” Hobabe a mo fetola a re: “Aowa, ke boela nageng ya gešo.” Moshe a re: “Hle, o se ke wa re tlogela. O tseba mo re kago hloma mešaša lešokeng, mme o ka ba mohlahli wa rena. Ge o ka sepela le rena, re tla abelana le wena tšohle tše botse tše Morena a tlago re fa tšona.” Ge setšhaba se tloga Sinai, thabeng ye kgethwa, se ile sa sepela matšatši a mararo, gomme Polokelo ya Kgwerano ya Morena ya ba eta pele go yo ba hweletša lefelo le ba ka hlomago mešaša go lona. E be e re ge ba tloga mo ba bego ba hlomile mešaša gona, leru la Morena le be ka godimo ga bona mosegare. Nako le nako ge Polokelo ya Kgwerano e tloga, Moshe o be a re: “Nanoga, Morena, o šwalalanye manaba a gago, o dire gore bahloi ba gago ba tšhabe!” Ge Polokelo e ema o be a re: “Morena, boela malapeng a diketekete a Baisraele!” Setšhaba se ile sa thoma go ngongoregela Morena ka ga mehlako ya bona. Ge Morena a ekwa dingongorego tšeo, a befelwa gomme a romela mollo setšhabeng, wa tšhuma lehlakore le lengwe la mešaša. Setšhaba sa llela Moshe se nyaka thušo; yena a rapela Morena, gomme mollo woo wa tima. Ka gona felo fao gwa rewa leina la Tabera, ka gore moo mollo wa Morena o ile wa tuka gare ga bona. Go be go na le bafaladi ba bangwe ba ba bego ba sepela le Baisraele. Bona ba be ba duma nama kudu, mme Baisraele le bona ba thoma go ngongorega ba re: “Nke nkabe re ka no hwetša namanyana! Kua Egepeta re be re tlwaetše go ja hlapi re sa ntšhe selo. Gopolang maraka ale le magapu le digwere le dieie le dikonofolo tše re bego re di ja! Eupša bjale maatla a rena a ile. Ga re na sa go ja, ge e se ona manna a re a bonago ka mehla a!” Manna a be a swana le dipewana tše nnyane, mmala wa ona e le wa bošweu bja bodipa. A be a wela mešašeng bošego gotee le phoka. Mosong wa le le latelago setšhaba se be se eya ka gohle se a kgobela, ba a šila lwaleng goba ba a setla ka mosetlo, ba a bediša, ba dira diphaphatha ka ona. Ka ganong a be a le bjalo ka senkgwa se se apeilwego ka makhura a mohlware. *** Moshe a kwa setšhaba se ngongorega, lapa le lengwe le lengwe le eme mojako wa mošaša wa lona. Morena a ba galefela, mme Moshe a hlomoga pelo, a re go Morena: “O reng o ntlišetša matshwenyego a, nna, mohlanka wa gago? Ke go selekile ka eng ge o tla ba wa nthweša morwalo wa setšhaba se ka moka? Na ke nna ke ba imilego goba ke ba tswetšego, ge o nkgopela gore ke be bjalo ka mofepi, ke ba kuke ka matsogo bjalo ka masea tseleng ya go ya nageng ye o enetšego borakgolokhukhu ba bona wa re o tla ba fa yona? Ke tla hwetša kae nama ye e lekanego batho ba ka moka? Ba dula ba ntelela ba nyaka nama. Nna ga ke sa kgona ke nnoši go rwala morwalo wo setšhaba se ka moka se nthwešago wona; o a nkimela! Ge o ntira ka mokgwa wo gona go kaone o mpolaye; ge o ntebeletše ka botho gona a ke se hlwe ke bona bošula bjo bja ka.” Morena a re go Moshe: “Kgobokanya bagolo ba masome a a šupago bao ba tsebjago e le baetapele ba setšhaba, o ba tliše go nna Tenteng ya bodulo bja ka, mme o ba botše gore ba eme moo ka thoko ga gago. Ke tla theoga ka bolela le wena fao, gomme ke tla ba abela moya wo ke go filego wona. Ba tla go rwadiša morwalo wa setšhaba se, gomme o ka se hlwe o o šikere o nnoši. Botša setšhaba o re: ‘Itlhwekišetšeng la bosasa; le tla ba le nama ye le tlago e ja. Morena o le kwele ge le belaela le re le duma ge le ka hwetša nama, le ge le re le be le ipshina kua Egepeta. Bjale Morena o tla le fa nama la ja. Le ka se e je fela letšatši le tee goba a mabedi goba a mahlano goba a lesome, le ge e le a masome a mabedi, eupša le tla e ja kgwedi ka moka go fihlela e le tlapela, e bile e le nkgela, e le ka gobane le hlanogetše Morena yo a lego mo gare ga lena, la mo ngongoregela la re nkabe le sa ka la tloga Egepeta.’ ” Moshe a re go Morena: “Bahlabani ba ba nago le nna ke ba dikete tše makgolo a a selelago, gomme o re o tla ba fa nama ye e lekanego kgwedi ka moka? Ke dikgomo le dihuswane tše kae tše di kago hlabja tša ba lekana? Kgane dihlapi ka moka tša ka lewatleng di ka ba lekana?” Morena a mo fetola a re: “Na go na le se se ka mpalelago? Gonabjale o tla bona ge eba seo ke se boletšego se tla phethega goba se ka se phethege!” Ke moka Moshe a tšwa, a botša setšhaba se Morena a se boletšego. A kgetha bagolo ba masome a a šupago setšhabeng mme a ba emiša go dikanetša Tente ya bodulo bja Morena. Ya ba Morena o theoga ka leru mme o bolela naye. A abela bagolo bao ba masome a a šupago moya wo a o filego Moshe. Ge moya o ba tsena ba thoma go porofeta, fela ba se ke ba tšea nako ye telele. Ba babedi ba bagolo bao ba masome a a šupago, Eldade le Medade, ba be ba šetše mešašeng, ba se ba ya Tenteng. Gona moo mešašeng moya wa tla go bona, gomme ba thoma go porofeta. Lesogana le lengwe la tla le kitima go botša Moshe la re: “Eldade le Medade ba a porofeta kua mešašeng!” Ke moo Joshua, morwa wa Nunu, yo e bilego mohlanka wa Moshe go tloga ge e sa le lesogana, a rilego go Moshe: “Ba homotše, mong wa ka, Moshe!” Moshe a mo fetola a re: “Kgane o tshwenyega ka nna? Nke nkabe Morena a efa setšhaba sa gagwe ka moka moya wa gagwe mme a dira gore bohle ba porofete!” Ke moka Moshe le bagolo bao ba masome a a šupago ba Baisraele ba boela mešašeng. Ka bjako Morena a fokiša phefo ye e ilego ya tliša dikhwiri di etšwa lewatleng. Phefo yeo ya di wetša mešašeng le tikologong ya yona yohle ya go lekana leeto la letšatši, go fihlela di pharelana fase mo e ka bago metara go ya godimo. Ka gona setšhaba sa hlwa se swara dikhwiri letšatši leo ka moka le bošego bja gona, le letšatši le le latelago; mang le mang a swara tše di imelago dikilokramo tše sekete, goba go feta. Ba di anega mo gohle mešašeng gore di ome. Ya re ba sa khupile nama, le go e hlahuna ba se ba tšwe ba e hlahuna, Morena a ba galefela, a ba otla ka bolwetši bjo bošoro bja leuba. Felo fao go ile gwa rewa leina la “Mabitla a go duma”, ka gobane moo ba be ba bolokile batho bao ba ilego ba duma nama. Go tloga moo setšhaba sa hudugela Hatserote, moo ba hlomilego mešaša gona. Moshe o be a nyetše mosadi wa Mokushe, gomme Miriamo le Arone ba mo solela taba yeo. Ba re: “Na Morena o boletše ka Moshe fela? Na ga se a bolela le ka rena?” Morena a kwa se ba se bolelago. Moshe e be e le motho wa go ikokobetša, a ikokobetša go feta batho bohle lefaseng. Ka bjako Morena a re go Moshe le Arone le Miriamo: “Ka bararo ga lena tlang Tenteng ya bodulo bja ka.” Ba ya, gomme Morena a theoga ka thololo ya leru, a ema mojakong wa Tente, a bitša Arone le Miriamo. Ka babedi ga bona ba batamela, gomme Morena a re: “Bjale theetšang se ke se bolelago! Ge go na le moprofeta gare ga lena, ke ikutollela yena ka dipono, ka bolela le yena ka ditoro. Ga go swane le ge ke bolela le mohlanka wa ka, Moshe; yena ke mmeile mohlokomedi wa setšhaba sa ka ka moka sa Israele. Ka gona yena ke bolela naye re lebantše difahlego; ke bolela le yena ka moo go kwagalago, e sego ka dika; gape o šetše a bone sebopego sa ka! Bjale ke ka baka lang le bile le sebete sa go sola mohlanka wa ka, Moshe?” Morena o be a ba galefetše; ka gona ya re ge a tloga mme le leru le tloga Tenteng, Miriamo a aparelwa ke bolwetši bjo bošoro ba letlalo, mme ya ba yo mošweu bjalo ka lehlwa. Ge Arone a mo lebelela, a bona a aparetšwe ke bolwetši bjoo, mme a re go Moshe: “Hle, mong wa ka, se re otle ka kotlo ye ya sebe sa rena sa botlatla. Se mo lese a eba bjalo ka lesea la go tswalwa le hwile, le le llwego ka thoko.” Ka gona Moshe a llela Morena a re: “Hle, Modimo, mo fodiše!” Morena a mo fetola a re: “Ge tatagwe a ka be a mo tshwetše ka mare sefahlego, a o be a ka se fetše matšatši a a šupago a gobogile? Ka gona a a tswalelelwe ka ntle ga mešaša matšatši a a šupago, gomme ka morago ga moo a ka bušetšwa mešašeng.” Miriamo a tswalelelwa ka ntle ga mešaša matšatši a a šupago, gomme setšhaba sa se ke sa huduga, sa letela go fihlela ge a tsenywa gape mešašeng. Ya ba gona ba tlogago Hatserote, gomme ba ya ba hloma mešaša lešokeng la Parane. Morena a re go Moshe: “Kgetha moetapele o tee kgorong ye nngwe le ye nngwe, o ba rome e le dihlodi go yo hlola naga ya Kanana ye ke e fago Baisraele.” Moshe a phetha taelo yeo, a roma baetapele ba ba latelago go tloga lešokeng la Parane: Kgoro Moetapele Rubene Shamua, morwa wa Sakure Simeone Shafate, morwa wa Hori Juda Kalebe, morwa wa Jefune Isakara Jigale, morwa wa Josefa Efraime Hosea, morwa wa Nunu Benjamene Palti, morwa wa Rafu Sebulone Gadiele, morwa wa Sodi Manase Gadi, morwa wa Susi Dane Amiele, morwa wa Gemali Asere Seture, morwa wa Mikaele Naftali Nagbi, morwa wa Bofisi Gade Geuele, morwa wa Maki *** *** *** *** *** *** *** *** *** *** Bao ke dihlodi tše Moshe a di romilego go yo hlola naga. O ile a fetola leina la Hosea, morwa wa Nunu, a re ke Joshua. Ge Moshe a ba roma, a re go bona: “Sepelang leboa ka karolong ya ka borwa ya naga, mme ka morago le rotogeleng nageng ya dithaba. Le boneng gore ke naga ya mohuta mang, ke batho ba bakae ba ba dulago moo, le gore ba tiile bjang. Le lebeleleng gabotse gore a naga yeo ke ye botse goba ke ye mpe, le gore a batho ba moo ba dula mešašeng goba metseng ye e ageleditšwego ka merako. Le lebeleleng gore na mobu wa ntshe o nonne goba ke wa lehwafa, le ge eba naga yeo e na le dithokgwa. Le beng le sebete le boeng le dikenywa tše dingwe tša naga yeo.” E be e le sehla sa ge diterebe di thoma go butšwa. Ka gona banna bao ba ya leboa mme ba bona naga go tloga lešokeng la Tsine ka borwa go ba go fihla Rehobo, kgauswi le sefate sa Hamate ka leboa. Pele ba ile ba ya karolong ya ka borwa ya naga mme ba fihla Hebrone, moo go bego go dula ba kgorwana ya Ahimane, ya Sheshai, le ya Talmai, ditlogolo tša setšhaba sa Baanake. Hebrone e rile go agwa gwa feta mengwaga ye e šupago pele ga ge Tsoane e agwa kua Egepeta. Ba fihla moeding wa Eshkolo, gomme moo ba rema lekala leo le bego le na le ntšhuhla e tee ya diterebe ye e bego e imela mo e lego gore e ile ya rwalwa ke banna ba babedi ka go e šikara ka kota. Ba ile ba ba ba boa le digarenate le mago. Felo fao go ile gwa rewa leina la moedi wa Eshkolo ka baka la ntšhuhla ya diterebe yeo Baisraele ba ilego ba e rema moo. Ka morago ga ge ba hlotše naga matšatši a masome a mane, ba ile ba boela go Moshe le go Arone le go setšhaba ka moka sa Israele kua Kadeshe, lešokeng la Parane. Ba ile ba bega seo ba se bonego, mme ba ba laetša dikenywa tše ba tlilego natšo. Ba botša Moshe ba re: “Re lekotše naga ye o bego o re romile gore re yo e bona; ke naga ya mokhora le monono, gomme dikenywa tša yona šedi. Eupša batho ba ba dulago moo ke batho ba maatla, le metse ya bona ke ye megolo kudu ye e ageleditšwego gabotse ka merako. Godimo ga moo re bone ditlogolo tša ditšitširipa tša Baanake fao. Baamaleke ba dula ka karolong ya ka borwa ya naga; Bahete le Bajebuse le Baamore ba dula kua dinageng tša dithaba; Bakanana ba dula go ipata le Lewatle la Mediteraniene le go ipata le noka ya Jordane.” Kalebe o ile a homotša batho bao ba ilego ba thoma go ngongoregela Moshe a re: “A re napeng re ye re thope naga ya bona, ka gobane e ka se re palele.” Eupša banna bale ba go yo hlola naga le yena ba re: “Aowa, re ka se kgone go lwa le ditšhaba tšela, ka gobane di re feta ka maatla.” Ka gona ba napa ba botša Baisraele maaka ka ga naga yeo ba tšogo e lekola ba re: “Naga ya gona ga e robale. Batho ba re ba bonego moo go yona ke ba bateleletelele. Re bone le ditšitširipa fao, ditlogolo tša Anake. Re ile ra ipona re le ba bannyane bjalo ka ditšie, gomme le bona ba re bona re le bjalo.” Bošego ka moka setšhaba sa goelela se lla. Ba ngongoregela Moshe le Arone ba re: “Go kaone ge re ka be re ikhwetše kua Egepeta goba gona mo lešokeng! Morena o reng a re iša nageng yeo? Re tla bolawa ntweng, gomme basadi le bana ba rena ba thopša. A go ka se be kaone go boela Egepeta?” Ka gona ba botšana ba re: “A re kgetheng moetapele, re boeleng Egepeta!” Ke moo Moshe le Arone ba itahletšego fase ka difahlego pele ga setšhaba ka moka. Gomme Joshua, morwa wa Nunu, le Kalebe, morwa wa Jefune, ba babedi ba dihlodi tšela, ba gagola diaparo tša bona ka manyami, mme ba re go setšhaba ka moka: “Naga ye re tšogo e hlola ke naga ye botse kudu. Ge eba re kgahla Morena, o tla re iša go yona gomme a re fa naga yeo ya mokhora le monono. Le se ke la tsogela Morena maatla, le gona le se ke la boifa batho ba ba dulago moo. Re tla ba fenya gabonolo. Medimo ye e bego e ba šireleditše e ba furaletše, eupša rena Morena o na le rena; ka gona le se ke la boifa.” Setšhaba ka moka se be se šetše se nyaka go ba bolaya ka maswika, eupša ka bjako batho ba bona seetša se se fahlago sa letago la Morena Tenteng. Morena a re go Moshe: “Setšhaba se se tla nnyatša go fihlela neng? Se tla gana go ntshepha go fihlela neng le ge ke dirile mehlolo ye mekaa gare ga bona? Ke tla ba bolaya ka bolwetši bja leuba ka ba fediša, eupša wena ke tla go dira tatagosetšhaba se segolo sa maatla go feta se!” Fela Moshe a re go Morena: “O ntšhitše setšhaba se Egepeta ka maatla a gago. Ge Baegepeta ba ekwa se o se dirilego setšhaba sa gago, ba tla botša batho ba ba dulago mo nageng ye. Batho ba ba šetše ba kwele gore wena, Morena, o na le rena, le gore o bonala pepeneneng ge leru la gago le ema ka godimo ga rena, le gore o sepela pele ga rena ka thololo ya leru mosegare, le ka thololo ya mollo bošego. Bjale ge o ka bolaya setšhaba sa gago ka moka, ditšhaba tše di kwelego go tuma ga gago di tla re o bolaile setšhaba sa gago lešokeng, ka gobane o be o palelwa ke go se goroša nageng ye o se holofeditšego yona ka keno. Bjale ge, Mong wa ka, ke a go rapela, re laetše maatla a gago mme o dire se o re holofeditšego sona mola o re: ‘Nna, Morena, ga ke befelwe ka pela, ebile ke na le potego le lerato le legolo, mme ke lebalela batho dibe le dikarogo tša bona. Le ge go le bjalo nka se lese go otla bana le ditlogolwana go iša molokong wa boraro le wa bone ka baka la dibe tša batswadi ba bona.’ Ka gona ke a go rapela, Morena, lebalela setšhaba se sebe sa sona go ya ka potego le lerato la gago le legolo, bjalo ka ge o dutše o se lebalela mola se tlogago Egepeta.” Morena a mo fetola a re: “Ke tla ba lebalela, bjalo ka ge o nkgopela. Eupša ke ikana ke le Modimo yo a phelago, yo bogoši bja ka bo tletšego lefase, gore ga go le o tee wa setšhaba se yo a tlago tsena nageng yeo. Ba bone seetša se se fahlago sa letago la ka, le mehlolo ye ke e dirilego kua Egepeta le mo lešokeng, eupša ba ntekile leboelela gomme ba ganne go ntheetša. Ruri, ga go le o tee wa bao ba nnyaditšego yo a tlago tsena nageng ye ke e holofeditšego borakgolokhukhu ba bona ka keno. *** Fela ka gobane mohlanka wa ka, Kalebe, yena ga a swane le bona, mme o ntatela ka pelo ya gagwe ka moka, ke tla mo fihliša nageng ye a tšwago go e lekola, gomme ditlogolo tša gagwe di tla tšea naga yeo ya ba ya tšona, naga yeo meeding ya yona bjale go dulago Baamaleke le Bakanana. Le boeleng morago ka moswane mme le tsene lešokeng go ya kgogometšaneng ya Akaba.” Morena a re go Moshe le Arone: “Setšhaba se sebe se se tla fela se nngongoregela go fihlela neng? Ke tennwe ke dingongorego tše! Bjale ba botše o re: ‘Ke ikana ke le Modimo yo a phelago gore ke tla le dira tšona tše ke kwelego le di bolela. Ke realo, nna, Morena. Le tla hwa gomme ditopo tša lena di tla šwalalana le lešoka le. Ka ge le nngongoregetše ga go le o tee wa lena yo a nago le mengwaga ye masome a mabedi goba go feta yo a tlago tsena nageng yela. Ke enne ka re ke tla le dudiša nageng yela, fela le o tee wa lena a ka se dule moo, ge e se Kalebe le Joshua. Le boletše gore bana ba lena ba tla thopša, eupša nna ke tla ba goroša nageng yeo le e gannego, gomme e tla ba ya bona. Fela lena le tla hwela mo lešokeng le. Bana ba lena ba tla ralala le lešoka bjalo ka badiši mengwaga ye masome a mane, ba tlaišega ka baka la go se botege ga lena, go fihlela ge wa mafelelo wa lena a ehwa. Bjalo ka ge le ile la hlola naga matšatši a masome a mane, le tla otlelwa sebe sa lena mengwaga ye masome a mane, letšatši ka le tee le emela ngwaga. Le tla tseba gore go lwa le nna go ra eng! Ke ena gore ke tla le otla ka mokgwa wo, lena setšhaba se sebe le kgobokanetšego go lwa le nna. Ka moka ga lena le tlilo hwela gona mo lešokeng le. Ke realo, nna, Morena.’ ” Banna bao Moshe a ilego a ba roma go yo lekola naga ba ile ba boa mme ba bolela maaka ao a ilego a dira gore batho ba ngongoregele Morena. Ka gona Morena a ba otla ka bolwetši, gomme ba hwa. *** Go dihlodi tšela tše lesome le tše pedi go ile gwa šala Joshua le Kalebe fela. Ge Moshe a botša Baisraele ka moka seo Morena a se boletšego, ba ile ba lla gabohloko. Mosong wa letšatši le le latelago ba tsogela go namelela dithabeng go yo šwahlela naga yeo, ba re: “Bjale re itokišeditše go ya nageng ye Morena a re holofeditšego yona. Re a dumela gore re dirile sebe.” Eupša Moshe a re: “Bjale le reng le tshela taelo ya Morena? Le ka se ke la atlega! Le se ke la ya. Morena ga a na le lena, mme manaba a lena a tla le fenya. Ge le lebana le Baamaleke le Bakanana le tla bolawa ntweng; Morena a ka se be le lena ka gore le ganne go mo latela.” Le ge go le bjalo ba no fela ba ngangabetše, ba rotogela nageng ya dithaba, le ge Polokelo ya Kgwerano ya Morena e se ya tšwa mešašeng, le yena Moshe a se a tšwa. Ka gona Baamaleke le Bakanana bao ba bego ba dula moo ba fologa dithaba ba ba fenya, gomme ba ba rakediša go fihla Horma. Morena o file Moshe melawana ye e latelago ye Baisraele ba swanetšego go e phetha nageng ye a bego a ile go ba fa yona. Ge le direla Morena sehlabelo ka kgomo goba ka sehuswane e le sehlabelo sa go tšhungwa ka moka, goba sehlabelo sa go phethagatša keno, goba sehlabelo sa boithaopo, goba sehlabelo sa menyanya ya lena ye e beilwego, sa monkgo wa go tsefela Morena, gona yo a se dirago a se tliše le kabelo ya bupi bja kilokramo e tee bo hlakantšwe le litara ya makhura a mohlware. Ge motho a dira sehlabelo sa go tšhungwa ka moka goba sehlabelo se sengwe ka kgapana, a tliše le litara ya beine e le kabelo ya seno. Ge motho a dira sehlabelo ka kgapa, a tliše bupi bja dikilokramo tše pedi bo hlakantšwe le makhura a mohlware a litara ya 1,25 e le kabelo ya bupi, gotee le litara e tee ya beine le seripa sa yona e le kabelo ya seno. Monkgo wa sehlabelo se o tsefela Morena. Ge go direlwa Morena sehlabelo sa go tšhungwa ka moka ka poo, goba go dirwa sehlabelo sa go phethagatša keno goba sa kagišano, le bupi bja dikilokramo tše tharo bo hlakantšwe le litara tše pedi tša makhura a mohlware bo tlišwe e be kabelo ya bupi, gotee le litara tše pedi tša beine e be kabelo ya seno. Monkgo wa sehlabelo se o tsefela Morena. Go dirwe ka mokgwa woo ge e le sehlabelo sa poo goba kgapa goba kwanyana goba kgapana. Ge go dirwa sehlabelo ka diruiwa tša go feta e tee, kabelo ya go sepela le sehlabelo seo e swanetše go oketšwa go ya ka palo ya diruiwa. Moisraele yo mongwe le yo mongwe o swanetše go dira seo ge a dira sehlabelo sa monkgo wo o tsefelago Morena. Gomme ge go na le mofaladi yo a dulago gare ga lena, a dutše lebakanyana fela goba a duletše sa ruri, mme a dira sehlabelo sa monkgo wo o tsefelago Morena, le yena o swanetše go phetha yona melawana ye. Dinakong tšohle tše di tlago tšona ditaelo tšeo di sa le tlemile, mme le bona bafaladi ba ba dulago gare ga lena di tla fela di ba tlemile. Lena le bona le a swana pele ga Morena; melao le melawana ye e swanago e ama lena le bona. Morena o file Moshe melawana ye e latelago ye Baisraele ba swanetšego go e phetha nageng ye a bego a ile go ba fa yona. Ge go lewa dijo tša naga yeo, tše dingwe tša tšona di abelwe Morena e le kabelo ye e fiwago yena ka tsela ye e itšeng. Ngwaga wo mongwe le wo mongwe ge le seno buna, senkgwa sa mathomo se se dirilwego ka mabele a mafsa se abelwe Morena e le kabelo ye e fiwago yena ka tsela ye e itšeng. Sona se abje ka wona mokgwa woo go abjago kabelo ye e fiwago Morena ka tsela ye e itšeng ye le e ntšhago mabeleng a le a folago. Ka dinako tšohle tše di tlago kabelo yeo e abelwe Morena e etšwa dinkgweng tša mathomo tše di apewago ge go bunnwe. Fela ge ba ka tšhoga ba tshetše molawana wo mongwe wo Morena a o filego Moshe, goba ge ka moso ba ka se dire tšohle tše Morena a ba laetšego tšona ka Moshe – ge phošo yeo e dirilwe ka baka la go se tsebe ga setšhaba – ba dire sehlabelo sa go tšhungwa ka moka ka poo sa monkgo wo o tsefelago Morena, gotee le kabelo ye e swanetšego ya bupi le ya seno. Ba dire le sehlabelo sa tshwarelo ya dibe ka phooko. Moprista a boelanye setšhaba le Modimo ka ge ba dirile phošo, mme ba tla lebalelwa, ka gore phošo yeo e be e se ya maikemišetšo, gomme ba diretše Morena sehlabelo sa tshwarelo ya dibe tša bona. Setšhaba ka moka sa Israele le bafaladi ba ba dulago gare ga bona ba tla lebalelwa, ka gore yo mongwe le yo mongwe o be a angwa ke phošo yeo. Ge motho a ka tšhoga a dirile sebe, a dire sehlabelo sa tshwarelo ya dibe ka pudi ya tshadi ya ngwaga o tee. Moprista a mo phethele tiro ya poelano pele ga Morena ka ge a dirile sebe, gomme o tla lebalelwa. Wona molawana wo o ama yo mongwe le yo mongwe yo a ka dirago sebe e se ka boomo, le ge e le Moisraele, goba e le mofaladi yo a dulago le bona. Eupša motho yo a ka dirago sebe ka boomo, e le Moisraele goba e le mofaladi, o nyatša Morena, gomme a kgaolwe setšhabeng sa gabo, ka gobane o ganne se Morena a se boletšego gomme o tshetše taelo ya gagwe ka boomo. O tla otlwa ka baka la sebe sa gagwe. Mola Baisraele ba sa le lešokeng ba kile ba hwetša motho a rwalela dikgong ka Sabatha. Ba mo iša go Moshe le Arone le go setšhaba ka moka, mme a dišwa, ka gobane go be go sa tsebje gabotse gore ba dire eng ka yena. Ke moo Morena a itšego go Moshe: “Motho yoo o swanetše go bolawa thoo; setšhaba ka moka se mmolaye ka maswika ka ntle ga mešaša.” Ka gona setšhaba ka moka sa mo ntšhetša ka ntle ga mešaša gomme sa mmolaya ka maswika, ka moo Morena a laetšego ka gona. Morena o laetše Moshe gore a botše Baisraele a re: “Le logeleleng mašaphu merumong ya diaparo tša lena, gomme le rokelele thapo ya botala bja legodimo lešaphung le lengwe le le lengwe. Le direng seo le mabakeng ka moka a a tlago. Mašaphu ao e tla ba digopotšo, gomme nako ye nngwe le ye nngwe ge le a bona le gopoleng ditaelo tša ka ka moka, mme le di phetheng; ke moo le ka se ntlhanogelego la latela ditumo le dikganyogo tša lena. A tla le gopotša go phetha ditaelo tša ka ka moka, mme le tla ba ba ka ka botlalo. Ke nna Morena Modimo wa lena yo ke le ntšhitšego Egepeta gore ke tle ke be Modimo wa lena. Ke nna Morena Modimo wa lena.” Korage, morwa wa Jitsara, wa kgorwana ya Lefi ya Kehate, o kile a ba le sebete sa go tsogela Moshe maatla. O be a na le maloko a mararo a kgoro ya Rubene – Datane le Abiramo, barwa ba Eliaba, le One, morwa wa Pelete – le Baisraele ba bangwe ba makgolo a mabedi le masome a mahlano, baetapele ba go tsebega bao ba bego ba kgethilwe ke setšhaba. *** Ba ile ba kgobokana pele ga Moshe le Arone, gomme ba re go bona: “Le ya kudu! Batho ka moka ba setšhaba ke ba Morena, mme Morena o na le rena ka moka. Bjale ke ka baka lang ge lena le ipona ba bagolo setšhabeng sa Morena?” Ge Moshe a ba kwa, a itahlela fase ka sefahlego gomme a rapela. Ke moka a re go Korage le lekoko la gagwe: “Mosong wa la ka moswane Morena o tla re laetša gore ke mang yo e lego wa gagwe; gomme yena yoo o tla mmatametša go yena aletareng. Ka moswane wena le lekoko la gago le tšeeng dibjana, le tšheleng magala ka go tšona, mme godimo ga ona le tšheleng seorelo, gomme le tšeeng dibjana tšeo le di išeng aletareng. Ke moo re tlago bona gore ke mang wa rena yo Morena a mo kgethilego. Ke lena Balefi le yago kudu!” *** Moshe a tšwela pele le go bolela le Korage a re: “Theetšang, lena Balefi! A le re ke tabana ye nnyane ge Modimo wa Israele a le hlaotše setšhabeng ka moka, gore le tle le kgone go mmatamela, le direng mošomo wa lena ka Tenteng ya Morena, mme le emeng pele ga setšhaba le se direle? O le batameditše go yena gotee le Balefi ba bangwe, mme bjale le nyaka go hwetša le bjona boprista! Ge le ngongoregela Arone, gabotsebotse lena le lekoko la lena le tsogela Morena maatla, gobane ge e le Arone ke eng?” Ke moo Moshe a itšego Datane le Abiramo ba bitšwe, eupša bona ba re: “Re ka se tle! A ga go a lekana ge o re ntšhitše nageng ya mokhora le monono ya Egepeta go tlo re bolaya mo lešokeng? Godimo ga moo na go sa nyakega gore o hlwe o ipea mmuši wa rena? Le gona ga se wa re goroša nageng ya mokhora le monono, goba wa re fa mašemo le dirapa tša merara, mme bjale o leka go re hlalefetša. Re ka se tle!” Moshe a befelwa gomme a re go Morena: “O se amogele kabelo goba sehlabelo sefe le sefe se banna ba ba se tlišago. Ga se ka phošetša le o tee wa bona; ga se ka tšea le ge e ka ba pokolo e tee ya bona.” Moshe a re go Korage: “Ka moswane wena le lekoko la gago lohle le tleng Tenteng ya bodulo bja Morena; Arone le yena o tla ba fao. Yo mongwe le yo mongwe a tšee sebjana sa gagwe sa magala, a tšhele seorelo go sona, gomme a se iše pele ga Morena.” Ka gona yo mongwe le yo mongwe a tšea sebjana sa gagwe, a tšhela magala le seorelo go sona, gomme a ema mojakong wa Tente le Moshe le Arone. Ke moo Korage a kgobokantšego setšhaba ka moka gore se yo lwa le Moshe le Arone mojakong wa Tente. Ka bjako seetša se se fahlago sa letago la Morena sa bonwa ke setšhaba ka moka, gomme Morena a re go Moshe le Arone: “Itlhaoleng setšhabeng se, mme ke tla ba fediša gatee fela.” Eupša Moshe le Arone ba itahlela fase ka difahlego mme ba re: “Wena Modimo, o mothopo wa bophelo ka moka. Ge motho o tee a dirile sebe, a o ka galefela setšhaba ka moka?” Morena a re go Moshe: “Botša setšhaba gore se tloge mošašeng wa Korage le go wa Datane le go wa Abiramo.” Ke moo Moshe a ilego go Datane le Abiramo a felegeditšwe ke baetapele ba Baisraele. A re go setšhaba: “Hle, tlogang mešašeng ya banna ba babe ba, mme le se ke la kgwatha selo se e lego sa bona, gore le se tlo fedišwa le bona ka baka la dibe tšohle tša bona.” Ka gona ba tloga mošašeng wa Korage le go wa Datane le go wa Abiramo. Datane le Abiramo ba be ba tšwile mme ba eme mejakong ya mešaša ya bona, gotee le basadi ba bona le bana. Moshe a re go setšhaba: “Šo mokgwa woo ka wona le tlago tseba gore Morena o nthomile go dira dilo tše ka moka, le gore ga ke di dire ka go ithatela. Ge banna ba ba ka hwa lehu la tlhago bjalo ka batho ka moka, gona Morena ga se a nthoma. Eupša ge Morena a ka dira se sengwe se se sego sa ka sa kwewa, gomme lefase la bulega la ba metša le tšohle tše e lego tša bona, gore ba tle ba theogele bodulabahu ba phela, gona le tla tseba gore banna ba ba ganne Morena.” Ge a seno fetša go bolela, lefase la palega mo go emego Datane le Abiramo, mme la ba metša le malapa a bona, gotee le balatedi ba Korage ka moka le tšohle tša bona. Ka gona ba theogela bodulabahu ba phela, le dithoto tša bona. Lefase la ba khupetšega, gomme ba timelela. Setšhaba ka moka sa Israele se se bego se le moo sa tšhaba ge se ekwa sello sa bona, mme ba goa ba re: “A re tšhabeng! Le rena lefase le ka re metša!” Ke moo Morena a rometšego mollo wo o ilego wa tšhuma banna bale ba makgolo a mabedi le masome a mahlano ba ba bego ba tlišitše seorelo. Ke moo Morena a itšego go Moshe: “Botša Eleasara, morwa wa moprista Arone, gore a tloše dibjana tša magala tša mphiri meloreng ya batho bao ba tšhumilwego ke mollo, mme a gašanye mešidi ye e tšwago dibjaneng tšeo felo mo gongwe, gobane dibjana tšeo ke tše kgethwa. E bile tše kgethwa mola di tlišwa pele ga ka. Ka gona tšea dibjana tša magala tša banna bao ba bolaetšwego sebe sa bona, o di kgatle e be diphaphathi, mme o dire sepipetši sa aletare ka tšona. E tla ba segopotšo go Baisraele.” Ka gona moprista Eleasara a tšea dibjana tšeo tša magala, tša kgatlwa ya ba diphaphathi go dira sepipetši sa aletare. Seo e bile segopotšo go Baisraele sa go re motho yo a se nago tokelo, yo e sego setlogolo sa Arone, a se ke a tla aletareng go tšhuma seorelo pele ga Morena, gore a se bolawe go swana le Korage le lekoko la gagwe. Tšohle tšeo Morena a bego a di laetše Eleasara ka Moshe di ile tša dirwa. Ka letšatši le le latelago setšhaba ka moka sa ngongoregela Moshe le Arone sa re: “Lena le bolaile ba bangwe ba setšhaba sa Morena.” Ya re ge ba kgobokane ba tsošetša Moshe le Arone tshele, ba lebelela Tenteng, gomme ba bona leru le e khupeditše mme seetša se se fahlago sa letago la Morena se bonagala. Moshe le Arone ba ya ba ema pele ga Tente, gomme Morena a re go Moshe: “Šuthang le tlogeng go batho ba, ke ba feleletše ka ponyo ya leihlo!” Bona ba itahlela fase ka difahlego, gomme Moshe a re go Arone: “Tšea sebjana sa gago sa magala, o tšhele magala a a tšwago aletareng go sona, o tšhele le seorelo go ona. O nape o itlhaganele o ye naso go setšhaba mme o se phethele tiro ya poelano. Itlhaganele! Morena o šetše a galefile, gomme bolwetši bja leuba bo šetše bo ba aparetše.” Arone a dira se Moshe a mmotšago sona, a tšea sebjana sa gagwe sa magala, a kitimela ka gare ga batho bao ba bego ba kgobokane. Ge a bona gore bolwetši bo šetše bo thomile go ba aparela, a tšhela seorelo magaleng gomme a phethela setšhaba tiro ya poelano. Seo sa emiša bolwetši, mme yena a šala a eme gare ga batho ba ba phelago le ba ba hwilego. Batho ba ba ilego ba hwa e ile ya ba 14 700, go sa balwe le ba ba ilego ba hwa mpherefereng wa Korage. Ge bolwetši bo eme, Arone a boela go Moshe mojakong wa Tente. Morena a re go Moshe: “Botša setšhaba sa Israele gore ba go fe mapara a lesome le a mabedi; go moetapele wa kgoro ye nngwe le ye nngwe go tšwe le tee. O ngwale leina la moetapele yo mongwe le yo mongwe lepareng la gagwe, mme lepareng le le emelago Lefi o ngwale leina la Arone. Go be le lepara le tee la moetapele wa kgoro ye nngwe le ye nngwe. O a bee fase ka Tenteng ya bodulo bja ka, pele ga Polokelo ya Kgwerano, moo ke gahlanago nago. Gomme lepara la moetapele yo ke mo kgethilego le tla hloga. Ka tsela ye ke tla fediša dingongorego tše di sa felego tša Baisraele ba ge ba le tsošetša tshele.” Ka gona Moshe a bolela le Baisraele, gomme moetapele yo mongwe le yo mongwe a mo fa lepara; gwa tšwa le tee kgorong ye nngwe le ye nngwe, mme ka moka ya ba a lesome le a mabedi. Lepara la Arone le lona le be le le gare ga ao a bona. Moshe a bea mapara ao ka moka fase ka Tenteng pele ga Polokelo ya Kgwerano ya Morena. Ka letšatši le le latelago, ge Moshe a tsena ka Tenteng, a hwetša lepara la Arone, le le emetšego kgoro ya Lefi, le hlogile. Le be le dirile mabue, le khukhušitše, mme le entšwe dialmone tše di budulego! Moshe a tšea mapara ale ka moka a a laetša Baisraele. Ba bona se se diregilego, mme moetapele yo mongwe le yo mongwe a tšea lepara la gagwe. Morena a re go Moshe: “Boetša lepara la Arone pele ga Polokelo ya Kgwerano. Le bewe moo e be segopotšo sa go gopotša Baisraele ba dinganga gore ba tla hwa ge ba ka se lese go ngongorega.” Moshe a dira ka moo Morena a mo laetšego ka gona. Baisraele ba re go Moshe: “Bjale gona ke gona ge re fedile! Ka moka ga rena re hwile! Ge eba mang le mang yo a nogo batamela Tente o tla hwa, gona ka moka ke setšha re hwile!” Morena a re go Arone: “Wena le barwa ba gago le Balefi le tla otlelwa molato ofe le ofe wa go tšhilafatša Tente ya bodulo bja ka; eupša wena le barwa ba gago ke lena fela le tlago otlelwa diphošo tša baprista. O tle le meloko ya gago, kgoro ya Lefi, gore ba tle ba šome nago ba go thuše mola wena le barwa ba gago le šoma Tenteng. Ba phethe mediro ye o ba fago yona le mešomo ya bona ya Tente, eupša ba se ke ba batamela selo sefe goba sefe se sekgethwa ka Felo mo Gokgethwa, goba ba batamela aletare. Ge ba ka batamela, lena le bona le tla bolawa. Ba šome nago gomme ba phethe mešomo ya bona medirong ka moka ya ka Tenteng, fela motho yo a se nego tokelo a se ke a šoma nago. Ke wena le barwa ba gago ba le swanetšego go dira mešomo ya lena ya Felo mo Gokgethwa le ya aletare, gore ke se ke ka tsoga ke galefetše setšhaba sa Israele gape. Ke nna yo ke kgethilego meloko ya lena, Balefi, go Baisraele gore e be mpho ya lena. Ba abetšwe nna, gore ba tle ba phethagatše mediro ya bona ka Tenteng. Eupša ke wena le barwa ba gago fela ba le swanetšego go phetha mešomo ka moka ya baprista yeo e amago aletare le tše di lego ka Felo mo Gokgethwakgethwa. Mediro ye ke boikarabelo bja lena, ka gobane ke le file mpho ya boprista. Motho ofe le ofe yo a se nago tokelo yo a batamelago dilo tše kgethwa a bolawe.” Morena a re go Arone: “Ke go beile mohlokomedi wa dikabelo ka moka tše ke di fiwago. Dikabelo tšohle tše Baisraele ba nkabelago tšona ke di fa wena le ditlogolo tša gago, e le karolo ye le e abetšwego go ya go ile. Mo go dihlabelo le dikabelo tše kgethwakgethwa tše di sa tšhungwego aletareng, tše di latelago ke tša gago: dikabelo tša bupi le dihlabelo tša tshwarelo ya dibe le tša tefelo ya tšona. Se sengwe le se sengwe se se tlišwago go nna e le sehlabelo goba kabelo ye kgethwakgethwa ke sa gago le barwa ba gago. Le jeleng dilo tše Felong mo Gokgethwa, mme e be banna fela ba ba di jago; ke tše kgethwa go lena. “Dikabelo goba dimpho dife le dife tšeo Baisraele ba mphago tšona ka tsela ye e itšeng le tšona e tla ba tša gago. Ke di fa wena le barwa ba gago le barwedi ba gago bophelong bja lena ka moka. Leloko le lengwe le le lengwe la lapa la gago le le hlwekilego le ka di ja. “Ke go fa ka moka tše kaonekaone tšeo Baisraele ba di bunago pele tše ba mphago tšona ngwaga ka ngwaga: makhura a mohlware le beine le mabele. Ka moka ke tša gago. Leloko le lengwe le le lengwe la lapa la gago le le hlwekilego le ka di ja. “Se sengwe le se sengwe mo go Baisraele se se fetšwego nna sa ruri ke sa gago. “Leitšibolo le lengwe le le lengwe la motho goba la seruiwa le Baisraele ba le tlišago go nna ke la gago. Eupša o swanetše go tloga o amogela tefo ya go rekolla leitšibolo le lengwe le le lengwe la motho; o amogele le tefo ya go rekolla leitšibolo le lengwe le le lengwe la seruiwa se se tšhilafetšego. Bana ge ba na le kgwedi ba rekollwe ka theko ye e beilwego ya dipapetlana tše tlhano tša silibera ye e etšwego go ya ka boima bja papetlana ya silibera ya ka Felo mo Gokgethwa. Papetlana yeo e swanetše go ba ya boima bjo e ka bago dikramo tše lesome le motšo o tee. Fela maitšibolo a dikgomo le a dinku le a dipudi a se ke a rekollwa; ke a makgethwa go nna, gomme go swanetše go dirwa dihlabelo ka ona. O foke aletare ka madi a ona, gomme o tšhume makhura a ona e le sehlabelo, e be monkgo wo o ntsefelago. Nama ya ona ke ya gago, go swana le leumo le serope sa la go ja sa mpho ye e fiwago nna ka tsela ye e itšeng. “Ka dinako tšohle tše di tlago ke fa wena le barwa ba gago le barwedi ba gago dikabelo ka moka tše Baisraele ba mphago tšona ka tsela ye e itšeng. Ye ke kgwerano ya go ya go ile ye ke e dirilego le wena le ditlogolo tša gago.” Morena a re go Arone: “O se amogele thoto efe goba efe ye e ka bago bohwa, gomme go se be le seripa sa naga ya Israele se se abelwago wena. Kabelo ya gago le bohwa mo go Baisraele ke nna.” Morena a re: “Ke file Balefi karolo ya lesome ya se sengwe le se sengwe seo Baisraele ba se tlišago go nna. Wo ke moputso wa bona ka ge ba šoma go hlokomela Tente ya bodulo bja ka. Baisraele ba se sa batamela Tente, ba ithweša kotlo ya lehu. Go tloga bjale ke Balefi fela ba ba swanetšego go hlokomela Tente, mme ba ba le boikarabelo go yona ka botlalo. Wo ke molao wa neng le neng wo o amago le tšona ditlogolo tša lena. Balefi ba ka se be le naga mo go Baisraele, ka gobane ke ba file karolo ya lesome ye Baisraele ba e tlišago go nna e le kabelo ye e fiwago nna ka tsela ye e itšeng. Ke ka baka leo ke ba boditšego gore ba ka se be le naga mo go Baisraele.” Morena o laetše Moshe gore a botše Balefi a re: “Ge le amogela go Baisraele karolo ya lesome ye Morena a le fago yona e etšwa go bona, le tliše karolo ya lesome ya yona e le kabelo ye e fiwago Morena ka tsela ye e itšeng. Kabelo yeo e tla tšewa gore e lekana le kabelo ye molemi a e ntšhago ya mabele a mafsa le beine ye mpsha. Ka tsela ye le lena le tliše kabelo ye e fiwago Morena ka tsela ye e itšeng go dikarolo tša lesome tša lena ka moka tše le di amogelago go Baisraele. Le neele moprista Arone kabelo yeo e fiwago Morena ka tsela ye e itšeng. Le e ntšheng go tše kaonekaone tša tšohle tšeo le di amogelago e le mpho ye kgethwa. Ka gona, ge le tlišitše karolo ye ye kaonekaone, le ka itshwarela se se šetšego, bjalo ka ge molemi a itshwarela se se šetšego ka morago ga ge a ntšhitše kabelo ya gagwe. Lena le ba malapa a lena le ka se ja mo gongwe le mo gongwe, ka gobane ke moputso wa lena wa ge le šoma ka Tenteng. Le ka se be le molato ge le se ja, ge e le gore le tlišitše se se kaonekaone sa sona go Morena. Le se ke la kgotlela dimpho tše kgethwa tša Baisraele ka go ja se sengwe sa dimpho pele ga ge karolo ye ye kaonekaone e abja, gore le se bolawe.” Morena o laetše Moshe le Arone gore ba fe Baisraele melawana ye e latelago. “Le tliše kgomo ye khunwana ye e se nago bosodi gape ye e sego ya ka ya panwa, le e neele moprista Eleasara. E ntšhwe mešašeng mme e bolawe pele ga gagwe. Ka morago Eleasara a tšee madi a mangwe a yona a a foke ka monwana gašupa go lebana le bokapele bja Tente. Seruiwa seo ka moka – mokgopa le nama le madi le mošwang – se tšhungwe moprista a lebeletše. Ke moka a tšee kotana ya mosedere, motšitlo wa hisopo, le thapo ye khubedu, gomme a di lahlele moo mollong. Ka morago ga moo a hlatswe diaparo tša gagwe, a hlape mmele ka meetse; a kgone a tsena ka mešašeng, eupša o tla no ba a tšhilafetše go fihlela mantšiboa. Monna yoo a tšhumilego kgomo yeo le yena a hlatswe diaparo tša gagwe, a hlape mmele ka meetse, eupša le yena o tla no ba a tšhilafetše go fihlela mantšiboa. Monna yo a hlwekilego a olele melora ya kgomo yela, mme a e bee felo mo go hlweketšego tirelo ka ntle ga mešaša, moo e swanetšego go bolokelwa setšhaba sa Israele gore e tle e dirišwe ge go lokišwa meetse a go tloša sešila. Tiro ye ke ya sehlabelo sa tshwarelo ya dibe. Monna yoo a olelago melora yeo o swanetše go hlatswa diaparo tša gagwe, eupša o tla no ba a tšhilafetše go fihlela mantšiboa. Molawana wo ke wa mehla ka moka go Baisraele gotee le bafaladi ba ba dulago gare ga bona. “Yo a ka kgwathago motho yo a hwilego o tla tšhilafala matšatši a a šupago. O swanetše go itlhwekiša ka meetse a tlhwekišo ka letšatši la boraro le ka letšatši la bošupa, ke moo a tlago hlweka. Eupša ge a ka se itlhwekiše ka letšatši la boraro le la bošupa a ka se hlweke. Yo a ka kgwathago setopo mme a se ke a itlhwekiša o tla fela a tšhilafetše, ka gobane ga se a fokwa ka meetse a tlhwekišo. O kgotlela Tente ya Morena, gomme a kgaolwe setšhabeng sa Israele. “Molawana wa ge motho a ka hwela ka tenteng šo: Yo a lego ka moo tenteng ka nako yeo ya lehu goba yo a ka tsenago ka moo o tla tšhilafala matšatši a a šupago. Sebjana se sengwe le se sengwe se se sego sa khurumelwa, goba pitša ye e sego ya khurumelwa le yona e a tšhilafala. Ge motho a ka re a le nageng a kgwatha motho yo a bolailwego, goba yo a ikhwetšego ka boyena, goba a kgwatha lešapo la motho, goba lebitla, o tla tšhilafala matšatši a a šupago. “Ge go hlwekišwa motho wa mohuta woo, go ntšhwe molora wa kgomo yela ya go tšhungwa e le sehlabelo sa tshwarelo ya dibe, o tšhelwe ka pitšeng, mme go tšhelwe meetse a noka go wona. Lekgeng la pele, yo mongwe yo a hlwekilego a tšee motšitlo wa hisopo, a o ine ka meetseng, gomme a foke tente le tšohle tše di lego go yona, le batho ba ba lego moo. Lekgeng la bobedi, yo mongwe yo a hlwekilego a foke motho yoo a kgwathilego lešapo la motho, goba setopo, goba lebitla, ka meetse ao. Ka letšatši la boraro le ka la bošupa motho yoo a hlwekilego a foke motho yoo a tšhilafetšego ka meetse ao. Ka letšatši la bošupa a hlwekiše motho yoo. E tla re ge a hlatswitše diaparo tša gagwe mme a hlapile ka meetse, ya ba gona a hlwekago mantšiboa. “Yo a tšhilafetšego mme a se itlhwekiše o tla fela a tšhilafetše, ka gobane ga se a fokwa ka meetse a tlhwekišo. O kgotlela Tente ya Morena, gomme a kgaolwe setšhabeng. Le phethe molawana wo le ka dinako tšohle tše di tlago. Motho yo a fokago ka meetse a tlhwekišo le yena a hlatswe diaparo tša gagwe; yo a kgwathago meetse ao o tla fela a tšhilafetše go fihlela mantšiboa. Se sengwe le se sengwe se motho yo a tšhilafetšego a se kgwathago le sona se tšhilafetše, le yo a kgwathago selo seo o tla fela a tšhilafetše go fihlela mantšiboa.” Ka kgwedi ya mathomo setšhaba ka moka sa Israele sa fihla lešokeng la Tsine, mme sa hloma mešaša Kadeshe. Gona moo Miriamo a hlokafala gomme a bolokwa. Fao go be go se na meetse, ka gona setšhaba sa bokanela Moshe le Arone mme ba omanya Moshe ba re: “Go ka be go bile kaone ge re ka be re ikhwetše pele ga Tente ya Morena gotee le Baisraele ba gaborena. O re tlišeditšeng mo lešokeng le? Gore re tle re hwele mo le diruiwa tša rena? O re ntšheditšeng Egepeta wa re tliša mo nageng ye mpe ye? Ga go mabele, ga go mago, ga go diterebe, ga go digarenate. Go hlokega le wona meetse a go nwa!” Moshe le Arone ba tloga pele ga setšhaba ba ya ba ema mojakong wa Tente. Ba itahlela fase ka difahlego, gomme ba bona seetša se se fahlago sa letago la Morena. Morena a re go Moshe: “Tšea lepara le le lego pele ga Polokelo ya Kgwerano, gomme wena le Arone le kgobokanyeng setšhaba ka moka. Moo pele ga bona ka moka o laele leswika lela, gore le tšwe meetse. Ka tsela ye o tla ntšhetša setšhaba meetse leswikeng, gore bona le diruiwa tša bona ba tle ba nwe.” Moshe a yo tšea lepara lela, bjalo ka ge Morena a laetše. Yena le Arone ba kgobokanya setšhaba ka moka pele ga leswika lela, gomme Moshe a re: “Theetšang, lena dinganga tenang! Kgane re le ntšhetše meetse leswikeng le?” Ke moo Moshe a emišitšego lepara a itia leswika lela gabedi ka lona, gomme moela wo mogolo wa meetse wa phulega, mme setšhaba le diruiwa ka moka ba nwa. Eupša Morena a omanya Moshe le Arone a re: “Ka gobane ga se la dumela go nna la ntlhompha pele ga setšhaba sa Israele ka ge ke le mokgethwa, le ka se ba goroše nageng ye ke ba holofeditšego yona.” Se se diregile kua Meriba, moo Baisraele ba ilego ba omanya Morena, moo a ilego a ba laetša gore ke yo mokgethwa. Moshe a roma banna ba tloga Kadeshe go ya go kgoši ya Edomo. Bona ba re: “Molaetša wo o tšwa go meloko yeno, Baisraele. O tseba mabothata a re bilego nao, ka moo borakgolokhukhu ba rena ba ilego ba ya Egepeta moo re dutšego mengwaga ye mentši. Baegepeta ba tlaišitše borakgolokhukhu ba rena le rena, gomme re lletše Morena gore a re thuše. O kwele sello sa rena gomme a roma morongwa yo a re ntšhitšego Egepeta. Bjale re mola Kadeshe, motse wo o lego mollwaneng wa naga ya lena. Hle, re dumeleng go putla mo nageng ya lena. Rena le diruiwa tša rena re ka se aroge tsela le gatee, goba ra tsena mašemong a lena, goba dirapeng tša lena tša merara, le gona re ka se nwe meetse didibeng tša lena. Re tla fela re tšere ka tselakgolo ya kgoši go fihlela re etšwa nageng ya lena.” Eupša Baedomo ba ba fetola ba re: “Re a gana go le lesa le putla naga ya rena! Ge le ka leka, re tla tšwa ra le hlasela.” Baisraele ba re: “Re tla fela re swere tsela ye kgolo, gomme ge re ka nwa meetse a lena, rena goba diruiwa tša rena, re tla a lefela; se re se nyakago ke go iphetela fela.” Baedomo ba boeletša ba re: “Re a gana!” Ke moo ba tšwilego ka madira a go tia go yo ba hlasela. Ka gobane Baedomo ba ile ba gana go ba lesa ba putla nageng ya bona, Baisraele ba ile ba phamoga ba swara ye nngwe tsela. Setšhaba ka moka sa Israele sa tloga Kadeshe gomme sa fihla thabeng ya Hore, mollwaneng wa naga ya Edomo. Moo Morena a re go Moshe le Arone: “Arone a ka se tsene nageng ye ke e holofeditšego Baisraele; o tlilo hwa, ka gobane lena ka babedi le nyaditše taelo ya ka kua Meriba. Tšea Arone le morwa wa gagwe, Eleasara, o namele le bona thaba ya Hore, gomme o apole Arone diaparo tša boprista o di apeše Eleasara. Arone o tla hlokafalela moo.” Moshe a dira se Morena a mo laetšego sona. Ba namela thaba ya Hore ba lebeletšwe ke setšhaba ka moka, gomme Moshe a apola Arone diaparo tša boprista mme a di apeša Eleasara. Gona moo godimo ga thaba Arone a hlokafala, gomme Moshe le Eleasara ba theoga. Setšhaba ka moka sa kwa gore Arone o hlokafetše, gomme bohle ba mo ilela matšatši a masome a mararo. Ge kgoši ya Bakanana ya Arade ka karolong ya borwa ya Kanana a ekwa gore Baisraele ba etla ba tšere ka tsela ya Atharime, o ile a ba hlasela mme a thopa ba bangwe ba bona. Ke moo Baisraele ba ennego pele ga Morena ba re: “Ge o ka gafela setšhaba se diatleng tša rena, re tla go fela sona sa ruri le metse ya bona, mme ra ba fediša.” Morena a ba kwa gomme a ba thuša go fenya Bakanana. Ka gona Baisraele ba ba bolaya, le metse ya bona ba e fediša taa, gomme ba rea felo fao leina la Horma. Baisraele ba tloga thabeng ya Hore ka tsela ye e yago kgogometšaneng ya Akaba, gore ba tle ba potologe naga ya Edomo. Eupša mo tseleng setšhaba sa fela pelo mme ba ngongoregela Modimo le Moshe ba re: “Ke ka baka lang o re ntšhitše Egepeta gore re tle re hwele mo lešokeng le, mo go sego dijo goba meetse? Re tennwe ke dijo tše mpe tše!” Ke moo Morena a rometšego dinoga tša mpholo gare ga setšhaba, gomme Baisraele ba bantši ba longwa, ba hwa. Setšhaba sa tla go Moshe sa re: “Re dirile sebe ge re ngongoregela Morena le wena. Bjale rapela Morena gore a tloše dinoga tše.” Ka gona Moshe a rapelela setšhaba. Ke moo Morena a boditšego Moshe gore a dire noga ya mphiri a e fege koteng, gore yo mongwe le yo mongwe yo a longwago a kgone go e lebelela mme a fodišwe. Ka gona Moshe a dira noga ya mphiri, a e fega koteng. Yo a lomilwego o be a lebelela noga yeo ya mphiri, mme a fodišwe. Baisraele ba tšwela pele, gomme ba hloma mešaša kua Obote. Ge ba tlogile Obote ba hloma mešaša maropeng a Abarime, lešokeng le le lego ka bohlabela bja naga ya Moaba. Ba tloga moo mme ba hloma mešaša ka moeding wa Serede. Go tloga moo ba sepela gape ba yo hloma mešaša ka thoko ya leboa ya nokana ya Arnone, lešokeng le le fihlago ka nageng ya Baamore. Nokana ya Arnone e be e le mollwane wa Bamoaba le Baamore. Ke ka baka leo Puku ya Dintwa tša Morena e bolelago ka ga “... motse wa Vahebe tikologong ya Sufa, le meedi; nokana ya Arnone, le magologelong a meedi ye e fihlago motseng wa Are le go ya mollwaneng wa Moaba.” Go tloga moo ba fetela pele felo fa go bitšwago Didiba, moo Morena a ilego a re go Moshe: “Bokanya setšhaba mme ke tla ba fa meetse.” Ka nako yeo Baisraele ke ge ba opela koša ba re: “Didiba, runyang meetse, mme re tla a dumediša ka koša – sediba se se epilwego ke baetapele le ke bakgomana ba setšhaba, se se epilwego ka molamo wa bogoši le ka mapara a bona.” Ba tloga lešokeng ba ya Matana gomme go tloga moo ba ya Nagaliele, mme go tloga Nagaliele ba ya Bamothe, mme go tloga Bamothe ba ya moeding wo o lego ka nageng ya Bamoaba, ka fase ga malekeleke a thaba ya Pisga, go ukamela lešoka. Setšhaba sa Israele sa romile batseta go Sihone, kgoši ya Baamore, ba re: “Re dumelele re putle nageng ya gago. Rena le diruiwa tša rena re ka se tšwe tseleng ra tsena mašemong a gago goba dirapeng tša gago tša merara, le gona re ka se nwe meetse didibeng tša gago, re tla fela re tšere ka tselakgolo ya kgoši go fihlela re etšwa nageng ya gago.” Eupša Sihone a gana gore setšhaba sa Israele se putle naga ya gagwe. A bokanya madira a gagwe ka moka gomme a ya Jahatse kua lešokeng, mme a hlasela Baisraele. Eupša Baisraele ba bolaya ba bantši ba manaba ao ntweng, gomme ba thopa naga ya bona go tloga nokaneng ya Arnone go ya leboa go fihla go ya Jaboko, ke go re go Baamone, ka gobane mollwane wa Baamone o be o šireleditšwe kudu. Ka fao setšhaba sa Israele sa thopa metse ya Baamore ka moka, gotee le Heshbone le metse ka moka ya tikologo, mme ba dula go yona. Heshbone e be e le mošate wa Sihone, kgoši ya Baamore, yo a bego a lwele le kgoši ya pele ya Bamoaba mme a thopa naga ya gagwe ka moka go fihlela nokaneng ya Arnone. Ke ka fao direti di rego: “Tlang Heshbone, mošate wa Kgoši Sihone! A o agwe lefsa, o boele sekeng ka gobane mo motseng wo wa Heshbone madira a Sihone a kile a tšwa bjalo ka mollo; a ja metse ya Moaba, a metša meboto ya Arnone bjalo ka kgabo ya mollo. Le na le madimabe bjang lena, setšhaba sa Moaba! Lena barapedi ba Kemoshe le a felela! Modimo wa lena o lesitše banna e eba batšhabi, basadi bona ya ba mathopša a Sihone, kgoši ya Baamore. Gomme bjale ditlogolo tša bona di a fedišwa mo gohle go tloga Heshbone go fihla Dibone, go tloga Nashime go fihla Nofage, kgauswi le Medeba.” Ka gona setšhaba sa Israele sa dula nageng ya Baamore, gomme Moshe a roma banna go yo hlola ka moo ba kago hlasela motse wa Jasere ka gona. Ka morago ga moo Baisraele ba o thopa le metse ya tikologo ya wona, gomme ba raka Baamore ba ba bego ba dula go yona. Ke moka Baisraele ba phamoga mme ba tšea tsela ya go ya Bashane, gomme Kgoši Ogo wa Bashane a tla le madira a gagwe ka moka go ba hlasela kua Edrei. Morena a re go Moshe: “O se ke wa mmoifa. Ke tla go dira gore o mo fenye gotee le setšhaba sa gagwe ka moka le naga ya gagwe. O mo dire se o se dirilego Sihone, kgoši ya Baamore, yo a bego a buša kua Heshbone.” Ka gona Baisraele ba bolaya Ogo le barwa ba gagwe le setšhaba sa gagwe ka moka, ba se šadiše motho, gomme ba dula nageng ya gagwe. Baisraele ba fetela pele, ba yo hloma mešaša melaleng ya Moaba, ka bohlabela bja Jordane go lebana le Jeriko. Ge kgoši ya Moaba, Balaka, morwa wa Tsiporo, a ekwa se Baisraele ba se dirilego Baamore, le gore Baisraele e be e le ba bantši, yena le setšhaba ka moka sa Moaba ba boifa kudu. Bamoaba ba re go baetapele ba Bamidiane: “Lešaba le le kgauswi le go senya se sengwe le se sengwe mo tikologong ya rena, go swana le ge poo e garola bjang phulong.” Ka gona Kgoši Balaka a roma batseta go yo bitša Bileamo, morwa wa Beore, yo a bego a le Petore kgauswi le noka ya Yufratese, nageng ya Amao. Ba mo išetša molaetša wa go re: “Ke go tsebiša gore go na le setšhaba se sengwe se se tšwago Egepeta; se aparetše naga mme se ipeile kgauswi le rena. Ba re feta ka bontši; ka gona, hle, tlaa o nthogakele bona. Ke moo mohlomongwe re tlago kgona go ba fenya mme ra ba ntšha nageng. Ke tseba gore ge o šegofatša motho o a šegofala, le ge o mo rogaka e ba yo a rogakilwego.” Ka gona baetapele ba Bamoaba le ba Bamidiane ba tšea seloba se ba yago go lefela thogako yeo ka sona, ba ya go Bileamo gomme ba mmotša molaetša wa Balaka. Bileamo a re go bona: “Robalang mo, gomme ka moswane ke tla le begela se Morena a mpotšago sona.” Ka fao baetapele ba Bamoaba ba lala ga Bileamo. Modimo a tla go Bileamo a mmotšiša a re: “Banna ba ba tlilego ga gago ke bomang?” Bileamo a mo fetola a re: “Ba romilwe ke Kgoši Balaka wa Moaba go tlo mpotša gore setšhaba se sengwe se se tšwago Egepeta se aparetše naga ka moka. O nyaka gore ke tle ke mo rogakele sona, mohlomongwe ke gona a ka kgonago go se lwantšha mme a se raka.” Modimo a re go Bileamo: “O se ke wa sepela le banna ba, le gona o se ke wa rogaka setšhaba sa Israele, ka gobane ke ba šegofaditše.” Mosong wa le le latelago Bileamo a ya go batseta ba Balaka a re: “Boelang gae; Morena o ganne gore ke sepele le lena.” Ka gona ba boela go Balaka, ba fihla ba mmotša gore Bileamo o ganne go tla le bona. Ke moo Balaka a romilego baetapele ba go feta ba pele ka bontši le ka go hlomphega. Ba ya go Bileamo ba fihla ba mmotša gore Balaka o re: “Hle, o se ke wa thibelwa ke selo go tla go nna! Ke tla go putsa kudu mme ka dira se sengwe le se sengwe se o mpotšago sona. Ka gona, hle, etla o nthogakele setšhaba se.” Eupša Bileamo a ba fetola a re: “Le ge Balaka a ka be a mphile silibera le gauta ka moka ya mošate wa gagwe, ke be nka se tshele taelo ya Morena Modimo wa ka, ešita le tabeng ye nnyane kudu. Eupša hle, le lena robalang mo gore ke tle ke kwe ge eba Morena o na le se sengwe gape se a tlago mpotša sona.” Bošegong bjoo Modimo a tla go Bileamo a re: “Ge eba banna ba ba tletše go go kgopela gore o sepele le bona, itokiše o sepele nabo, eupša o dire fela se ke go botšago sona.” Ka gona mosong wa le le latelago Bileamo a saletša pokolo ya gagwe ya tshadi, a sepela le baetapele ba Bamoaba. Modimo a befelwa ge Bileamo a eya, gomme ya re ge Bileamo a le tseleng a nametše pokolo ya gagwe a felegeditšwe ke bahlanka ba gagwe ba babedi, morongwa wa Morena a ema tseleng go mo thibela. Ge pokolo e bona morongwa a eme fao a emišitše tšhoša, ya phamoga tsela ya hlahlatha le naga. Bileamo a itia pokolo yela a e gomišetša tseleng. Ke moo morongwa a ilego a ema mo tsela e pitlagantšwego ke dirapa tše pedi tša merara, ka mathoko a tsela go le morako. Ge pokolo e bona morongwa ya ipatagantšha le morako, ya kgobola Bileamo leoto ka wona. Bileamo a itia pokolo yela gape. Morongwa yola a ya pele gape gomme a ema mo go pitlaganego moo go bego go se mo go ka fetwago ka mathoko ga tsela. Lekga le, ge pokolo e bona morongwa, ya robala. Bileamo a befelwa mme a thoma go itia pokolo ka lepara la gagwe. Ke moo Morena a dirilego gore pokolo e bolele, gomme ya re go Bileamo: “Ke go dirile eng ge o mphethile gararo bjale?” Bileamo a e fetola a re: “O ntirile setlatla! Ge nkabe ke swere tšhoša, nkabe ke go bolaya gonabjale.” Pokolo ya mo fetola ya re: “A ga se nna pokolo ya gago ye o e nametšego ka mehla go fihlela lehono? Kgane nkile ka tlwaela go go swara ka mokgwa wo?” Bileamo a e fetola a re: “Aowa.” Ke mo Morena a dirilego gore Bileamo a bone morongwa yola a eme fao a emišitše tšhoša; mme Bileamo a obama, a itahlela fase ka sefahlego. Morongwa a mmotšiša a re: “Ke ka baka lang o bethile pokolo ya gago gararo ka tsela ye? Ke tlile go go thibela tsela, ka gore ga wa swanela go tšea leeto le. Eupša pokolo ya gago e mpone mme ya šikologa gararo. Ge e ka be e se ya šikologa, nkabe ke go bolaile mme yona ka e lesa ya phela.” Bileamo a mo fetola a re: “Ke dirile sebe. Ke be ke sa tsebe gore o nkeme tseleng; eupša bjale ge o bona gore ke phošo gore ke tšwele pele, ke tla gomela gae.” Fela morongwa a re: “Tšwela pele le banna ba, eupša o bolele fela se ke go botšago sona.” Ka gona Bileamo a tšwela pele le bona. Ge Balaka a ekwa gore Bileamo o etla, o ile a yo mo gahlanetša motseng wo o lego mollwaneng wa Moaba, nokaneng ya Arnone. Balaka a re go Bileamo: “O be o reng o sa tle mola ke romile batho la mathomo go tlo go bitša? Kgane o be o gopola gore nka se kgone go go putsa?” Bileamo a mo fetola a re: “Ga ke re šemo ke tlile? Fela nka se ipolele se ke se ratago; ke tla bolela fela se Morena a mpotšago sona.” Ka gona Bileamo a ya le Balaka motseng wa Kiriate-Hutsote, moo Balaka a fihlilego a dira dihlabelo ka dikgomo le dihuswane, gomme a re Bileamo le baetapele ba ba bego ba na le yena ba išetšwe dibego tša dinama tšeo. Mosong wa le le latelago Balaka a rotoga le Bileamo a mo iša mebotong ya Baale. Ge ba le moo Bileamo o be a kgona go bona karolo ya setšhaba sa Israele. A re go Balaka: “Nkagele dialetare tše di šupago mo, mme o hlabe dipoo tše di šupago le dikgapa tše di šupago.” Balaka a dira ka moo a boditšwego ka gona, gomme yena le Bileamo ba dira sehlabelo ka poo le kgapa aletareng ye nngwe le ye nngwe. Ke gona Bileamo a itšego go Balaka: “Šala o eme mo kgauswi le sehlabelo sa gago sa go tšhungwa ka moka, ge nna ke sa ile go bona ge eba Morena a ka nkgahlanetša. Ke tla boa ke go botša se sengwe le se sengwe se a ka nkutollelago sona.” Ka gona a namelela godimo mo go sego mehlare, mme Modimo a mo gahlanetša. Bileamo a re go yena: “Ke agile dialetare tše di šupago mme ka dira sehlabelo ka poo le kgapa go ye nngwe le ye nngwe ya tšona.” Morena a botša Bileamo molaetša wa gagwe, gomme a re a boele morago a yo o botša Balaka. Ka gona a boela morago mme a hwetša Balaka a sa eme kgauswi le sehlabelo sa gagwe sa go tšhungwa ka moka a na le baetapele ka moka ba Moaba. Bileamo a hlaba sereto a re: “Balaka, kgoši ya Moaba, o ntšere Siria, dithabeng tša ka bohlabela. A re: ‘Tlaa o nthogakele ditlogolo tša Jakobo, o rogake setšhaba sa Israele.’ A nka rogaka bjang se Modimo a sego a se rogaka, goba ka se hlolela madimabe mola Modimo a se a se hlolela? Ke ba bona ke le matlapeng a godimo; ke ba lebeletše ke le mebotong. Ke setšhaba se se phelago se nnoši; ga ba ipale le ditšhaba tše dingwe. Ditlogolo tša Israele ke sekalerole – ke mašabašaba, mapalelammadi. Anke ke fetše matšatši a ka bjalo ka yo mongwe wa setšhaba sa Modimo, ke hwe ka khutšo go swana le baloki.” Ke moo Balaka a itšego go Bileamo: “A o ntirile eng? Ke go tlišitše mo gore o tle o rogake manaba a ka, bjale wena o ba šegofaditše.” Bileamo a mo fetola a re: “Gape ke swanetše go bolela fela se Morena a mpotšago gore ke se bolele.” Ke moo Balaka a itšego go Bileamo: “A re ye felo mo gongwe moo o tlago bona fela karolo ya Baisraele. O nthogakele bona o le moo.” A mo iša felo ga bahlodi godimodimo ga thaba ya Pisga. Moo le gona a aga dialetare tše di šupago, mme a dira sehlabelo ka poo le kgapa aletareng ye nngwe le ye nngwe ya tšona. Bileamo a re go Balaka: “Šala o eme mo kgauswi le sehlabelo sa gago sa go tšhungwa ka moka, ge nna ke sa ile go gahlanetša Modimo mola.” Morena a gahlanetša Bileamo, a mmotša se a swanetšego go se bolela, gomme a re a gomele go Balaka go yo bolela molaetša woo. Ka gona Bileamo a boela morago mme a hwetša Balaka a sa eme kgauswi le sehlabelo sa gagwe sa go tšhungwa ka moka a na le baetapele ba Moaba. Balaka a mmotšiša gore Morena o boletše eng, gomme Bileamo a hlaba sereto a re: “Tlaa, Balaka, morwa wa Tsiporo, o kwe se ke go botšago sona. Modimo ga se motho a kago bolela maaka; ga se motho, yo a kago itshola. Se a se holofetšago o a se dira; o a bolela, mme gwa phethega. Ke laetšwe gore ke šegofatše, gomme ge Modimo a šegofatša, nna nka se fetoše. Ga ke bone madimabe goba bothata bjo bo tlago tlela Israele. Morena Modimo wa bona o na le bona; ba mo gobela megobo ba re ke kgoši ya bona. Modimo yo a ba ntšhitšego Egepeta o ba lwela bjalo ka nare. Ditlogolo tša Jakobo ga di kgonwe ka boloi; setšhaba sa Israele ga se phekolwe ka bodupe. Bjale go tla bolelwa ka Baisraele gwa thwe: ‘Bonang tše Modimo a di dirilego!’ Setšhaba sa Israele ke se maatla bjalo ka tau; ke se bogale bjalo ka taugadi. Tau ga e patlame e se ya ja nama, e se ya nwa madi a se e se bolailego.” Ke moo Balaka a itšego go Bileamo: “Ge o gana go rogaka setšhaba sa Israele, o lese le go se šegofatša!” Bileamo a mo fetola a re: “A ga se ka go botša gore ke swanetše go dira tšohle tše Morena a mpoditšego tšona?” Balaka a re: “Hle, tlaa ke go iše lefelong le lengwe. Mohlomongwe fao Modimo o tla go dumelela wa nthogakela bona.” Ka gona a iša Bileamo godimodimo ga thaba ya Peore ye e okametšego lešoka. Bileamo a re go yena: “Nkagele dialetare tše di šupago mo, mme o hlabe dipoo tše di šupago le dikgapa tše di šupago.” Balaka a dira ka moo a botšwago ka gona, a dira sehlabelo ka poo le kgapa aletareng ye nngwe le ye nngwe. Fela bjale Bileamo o be a šetše a tseba gore Morena o rata gore a šegofatše setšhaba sa Israele, ka gona a se ke a hlwa a ilo phekolwa bjalo ka pele. O ile a retologela lešokeng gomme a bona setšhaba sa Israele se hlomile mešaša, kgoro ka kgoro. Moya wa Modimo wa mo tsena, gomme a hlaba sereto a re: “Go bolela Bileamo, morwa wa Beore, monna yo a utollelwago dipono, mokwi wa tše Modimo a di bolelago, malotšhaakhuname, etšwe a ntšhitše mahlo dinameng, a bona pono tša Ramaatlaohle. E botse bjang mešaša ya ditlogolo tša Jakobo; mekutwana ya Baisraele ga se ka go kgahliša. E swana le melokoloko ya mepalema, e etša dirapa tše di bapilego le noka, nke ke dikgophana tše di bjetšwego ke Morena, goba mesedere ye e bapetšego le meetse. Didiba tša bona di tla falala, gomme ba bjala dipeu mašemong a monola wo montši. Kgoši ya bona e tla feta Agage ka bogolo, mme mmušo wa gagwe o tla tumišwa. Modimo yo a ba ntšhitšego Egepeta o ba lwela bjalo ka nare. Ba fediša manaba a bona, ba ba robaganya mašapo, ba thokgaganya mesebe ya bona. Setšhaba se se bjalo ka tau ye maatla; ge e patlame ke mang yo a ka e tshwenyago? Yo a šegofatšago Baisraele o tla šegofatšwa, yo a ba rogakago le yena o tla rogakwa.” Balaka a huna matswele a befetšwe, a re go Bileamo: “Ke go bileditše gore o rogake manaba a ka, eupša bjale ke gararo o ba šegofatša bakeng sa gore o ba rogake. Gona sepela ga geno! Ke go holofeditše gore ke tla go putsa, eupša Morena o go thibetše go hwetša moputso woo.” Bileamo a mo fetola a re: “Ke boditše batseta bale o ba romilego go nna gore le ge o ka mpha silibera le gauta ka moka ya mošate wa gago, nka se kgone go tshela taelo ya Morena ka go dira se sengwe ka bonna. Ke tla bolela fela se Morena a mpotšago gore ke se bolele.” Bileamo a re go Balaka: “Bjale ke boela morago go batho ba gešo, fela pele ga ge ke tloga ke go lemoša se setšhaba sa Israele se tlago se dira setšhaba sa gago ka moso.” Ke moka a hlaba sereto a re: “Go bolela Bileamo, morwa wa Beore, monna yo a utollelwago dipono, mokwi wa tše Modimo a di bolelago, motsebi wa tše di tsebjago ke Yogodimodimo, malotšhaakhuname, etšwe a ntšhitše mahlo dinameng, a bona pono tša Ramaatlaohle. Ke bona kgoši a le kgole; ga se a tšwa a fihla, fela o tla tla. O tla rotoga ditlogolong tša Jakobo bjalo ka naledi. O tla tšwa go Baisraele bjalo ka naledi ya mosela. O tla pšhatlaganya Bamoaba dihlogo, a šilaganya magata a setšhaba ka moka sa Sete. O tla fenya manaba a gagwe kua Edomo, a tšea naga ya bona ya ba ya gagwe, Gomme Baisraele ba tia ya ba ba maatla. Ditlogolong tša Jakobo go tla tšwa mmuši, a fediša mašaletšana a motse.” Bileamo a bona Baamaleke ponong, mme a hlaba sereto a re: “Amaleke e be e le setšhaba se maatla go feta tšohle, fela mafelelong se tla hwela sa ruri.” Ponong a bona Bakene, mme a hlaba sereto a re: “Le ge mo le dulago gona, lena Bakene, go šireletšegile boka sehlaga legageng, le tla fedišwa ge Asiria e le thopa.” *** Bileamo a hlaba sereto a re: “Joo, a setšhaba se se kgobokanago ka leboa ke bomang? Bašwahledi ba tla tla ka maselawatle ba etšwa Saeprose; ba tla fenya Asiria le Ebere, eupša le bona ba tla bolawa.” Ke moka Bileamo a tloga a boela ga gabo; Balaka le yena a swara ya gagwe tsela. E ile ya re ge Baisraele ba hlomile mešaša Moeding wa Megohlo, banna ba thoma go robala le basadi ba Bamoaba. Basadi bao ba ba laletša go tla didimong tše ba bego ba di direla modimo wa Moaba. Baisraele ba ja dijo tša mohuta woo mme ba khunamela modimo wa seswantšho, Baale wa Peore. Ka go itlemaganya le modimo yoo ba ile ba galefiša Morena, gomme yena a re go Moshe: “Tšea baetapele ka moka ba Israele mme o nkgodiše ka go ba bolaya letšatši le hlabile; ke moo ke tlago tlogela go galefela setšhaba se.” Moshe a re go baetapele: “Yo mongwe le yo mongwe wa lena o swanetše go bolaya monna wa kgoro ya gabo yo a itlemagantšego le Baale wa Peore.” Yo mongwe wa Baisraele a tsenya mosadi wa Momidiane mošašeng wa gagwe Moshe le setšhaba ka moka ba lebeletše mola ba sa lla mojakong wa Tente ya bodulo bja Morena. Ge Finease, morwa wa Eleasara, setlogolo sa moprista Arone, a bona seo, a emelela a tloga go setšhaba. A ya a tšea lerumo, a latela monna yoo le mosadi yoo ka moo mošašeng, mme a ba phuleletša ka babedi ga bona ka lona. Ka tsela ye bolwetši bja leuba bjoo bo bego bo fetša Baisraele bja emišwa, fela bo be bo šetše bo bolaile batho ba dikete tše masome a mabedi le tše nne. Morena a re go Moshe: “Ka baka la seo Finease a se dirilego ga ke sa galefetše setšhaba sa Israele. Ga se a kgotlelela gore modimo wo mongwe ka ntle ga ka a khunamelwe, mme lebaka ke lona leo ge ke se ka ba fediša mola ke sa befetšwe. Ka gona, mmotše gore ke dira kgwerano le yena. Yena le ditlogolo tša gagwe ba beetšwe sa ruri go ba baprista, ka gobane ga se a kgotlelela gore modimo wo mongwe ka ntle ga ka o khunamelwe, mme ka go realo o boelantše setšhaba le nna.” Leina la Moisraele yo a bolailwego le mosadi wa Momidiane e be e le Simri, morwa wa Salu, hlogo ya lapa le lengwe kgorong ya Simeone. Leina la mosadi yoo e be e le Kosbi. Tsure, tatagwe, e be e le kgoši ya sehlopha se sengwe sa dikgorwana tša Bamidiane. Morena a laela Moshe a re: “Hlasela Bamidiane, o ba fediše ka baka la bobe bjo ba le dirilego bjona ge ba le hlalefetša kua Peore, le ka baka la Kosbi yo a bolailwego nako yela ya bolwetši bja leuba gona moo.” Ka morago ga bolwetši bjoo bja leuba Morena a re go Moshe le Eleasara, morwa wa Arone: “Balang setšhaba ka moka sa Israele ka malapa a sona, banna bohle ba ba nago le mengwaga ye masome a mabedi goba go feta fao ba e kago ba bahlabani.” Moshe le Eleasara ba phetha taelo yeo, mme ba kgobokanya banna ka moka ba mengwaga yeo. Ba kgobokana melaleng ya Moaba, mošola wa noka ya Jordane go lebana le Jeriko. Baisraele ba ba tšwilego Egepeta šeba: *** Kgoro ya Rubene, leitšibolo la Jakobo: dikgorwana tša Enoko, Palu, Hetserone le Karmi. Dikgorwana tše di be di na le banna ba 43 730. Ditlogolo tša Palu e bile Eliaba le barwa ba gagwe, Nemuele, Datane le Abiramo. Ba ke Datane le Abiramo bale ba go kgethwa ke setšhaba. Ba ile ba tšea kgang le Moshe le Arone, gomme ba ikopanya le lekoko la Korage ge le tsogela Morena maatla. Lefase le ile la palega gomme la ba metša, mme ba hwa le Korage le lekoko la gagwe mola mollo o fediša banna ba 250; e ile ya ba seeletši go setšhaba. Eupša barwa ba Korage ga se ba ka ba bolawa. Kgoro ya Simeone: dikgorwana tša Nemuele, Jamine, Jakine, Serage le Shaulo. Dikgorwana tše di be di na le banna ba 22 200. Kgoro ya Gade: dikgorwana tša Tsifione, Hagi, Shuni, Osni, Eri, Arode le Areli. Dikgorwana tše di be di na le banna ba 40 500. Kgoro ya Juda: dikgorwana tša Shela, Peretse, Serage, Hetserone le Hamule. Barwa ba Juda ba babedi, Ere le Onane, ba hwetše nageng ya Kanana. *** *** Dikgorwana tše di be di na le banna ba 76 500. Kgoro ya Isakara: dikgorwana tša Tola, Puba, Jashube le Shimrone. Dikgorwana tše di be di na le banna ba 64 300. Kgoro ya Sebulone: dikgorwana tša Serede, Elone le Jagliele. Dikgorwana tše di be di na le banna ba 60 500. Dikgoro tša Josefa, yo e bilego tatagobarwa ba babedi, Manase le Efraime. Kgoro ya Manase: Makire, morwa wa Manase, e bile tatagoGileade, gomme dikgorwana tše di latelago di tšwile go Gileade: dikgorwana tša Jesere, Heleke, Asriele, Shekeme, Shemida le Hefere. Tselofohade, morwa wa Hefere, o ile a se ke a ba le barwa, a ba le barwedi fela; maina a bona e be e le Magla, Noa, Hogla, Milka le Tirtsa. Dikgorwana tše di be di na le banna ba 52 700. Kgoro ya Efraime: dikgorwana tša Shutelage, Bekere le Tahane. Kgorwana ya Erane e be e tšwile go Shutelage. Dikgorwana tše di be di na le banna ba 32 500. Tšeo ke dikgorwana tše di tšwilego go Josefa. Kgoro ya Benjamene: dikgorwana tša Bela, Ashbele, Ahiramo, Shefufane le Hufamo. Dikgorwana tša Arde le Naamane di be di tšwile go Bela. Dikgorwana tše di be di na le banna ba 45 600. Kgoro ya Dane: kgorwana ya Shuhamo ye e bego e na le banna ba 64 400. Kgoro ya Asere: dikgorwana tša Jimna, Jishbi le Beria. Dikgorwana tša Hebere le Malkiele di be di tšwile go Beria. Asere o bile le morwedi yo leina la gagwe e bego e le Serage. Dikgorwana tše di be di na le banna ba 53 400. Kgoro ya Naftali: dikgorwana tša Jagtsiele, Guni, Jetsere le Shileme. Dikgorwana tše di be di na le banna ba 45 400. Banna ka moka ba Israele e be e le ba 601 730. Morena a re go Moshe: “Arola naga ka dikgoro, go ya ka bontši bja batho ba tšona. O arole naga ka go dira matengwa, gomme kgoro ye e nago le batho ba bantši o e fe karolo ye kgolo, mme kgoro ya batho ba bannyane o e fe karolo ye nnyane.” *** *** Kgoro ya Lefi e be e bopilwe ke dikgorwana tša Gershone, Kehate le Merari. Ditlogolo tša bona di be di akaretša dihlophana tša Libni, Hebrone, Magli, Mushi le Korage. Kehate e bile tatagoAmramo, yo a bego a nyetše morwedi wa Lefi, Jogobede, yo a tswetšwego Egepeta. O belegetše Amramo barwa ba babedi, Arone le Moshe, le morwedi, Miriamo. Arone o bile le barwa ba bane, Nadaba, Abihu, Eleasara le Ithamara. Nadaba le Abihu ba ile ba hwa mola ba tlišetša Morena mollo wo o sego wa dumelelwa. Balefi ba be ba na le banna le bašemane ba 23 000 ba ba nago le kgwedi e tee goba go feta fao. Ba ile ba se ngwalwe le Baisraele ba bangwe ka gore ba ile ba se ke ba fiwa karolo ya naga mo go Baisraele. Dikgorwana tše ka moka di ile tša ngwalwa ke Moshe le Eleasara ge ba bala Baisraele melaleng ya Moaba mošola wa noka ya Jordane go lebana le Jeriko. Gare ga bona go be go se gwa šala le monna o tee wa bale ba go balwa ge Moshe le Arone ba ngwala setšhaba la mathomo lešokeng la Sinai. Morena o be a boletše gore ka kgonthe bohle ba tla hwela lešokeng, gomme ka moka ba ile ba hwela moo ntle le Kalebe, morwa wa Jefune, le Joshua, morwa wa Nunu. Magla, Noa, Hogla, Milka le Tirtsa e be e le barwedi ba Tselofohade, morwa wa Hefere, Hefere morwa wa Gileade, Gileade morwa wa Makire, Makire wa kgoro ya Manase, Manase morwa wa Josefa. Ba ile ba ya ba ema pele ga Moshe le moprista Eleasara le baetapele le setšhaba ka moka mojakong wa Tente ya bodulo bja Morena, gomme ba re: “Tatagorena o hlokafaletše lešokeng a se ne morwa. O be a se lekokong la Korage lela la go tsogela Morena maatla; o hwile ka baka la sa gagwe sebe. Ke go reng ge leina la tatagorena le timelela kgorwaneng ya gabo e le fela ka gore a se a ka a ba le barwa? Re feng naga gare ga meloko ya botatagorena.” Moshe a ala taba ya bona pele ga Morena, gomme Morena a re go yena: “Se barwedi ba Tselofohade ba se kgopelago se lokile; ba fe naga gare ga meloko ya botatagobona. Bohwa bja gagwe a bo fetele go bona. Botša setšhaba sa Israele gore ge monna a ka hwa a se ne morwa, morwedi wa gagwe a tšee bohwa bja gagwe. Ge a se ne morwedi, bomorwarragwe ba swanetše go tšea bohwa bjoo. Ge a se na le bomorwarragwe, boramogolwagwe goba borangwanagwe ba swanetše go tšea bohwa bjoo. Ge a se ne boramogolwagwe goba borangwanagwe, gona moloko wabo wa kgauswikgauswi ka madi a tšee bohwa bjoo e be bja gagwe. Setšhaba sa Israele se phethe taelo ye e le molao, bjalo ka ge nna, Morena, ke go laetše.” Morena a re go Moshe: “Namela thaba ya Abarime, o lebeledišiše naga ye ke e fago Baisraele. Ka morago ga ge o e bone, o tla hwa bjalo ka ge Arone, morwarrago, a hwile, ka gobane bobedi bja lena le tshetše taelo ya ka lešokeng la Tsine. Ge setšhaba ka moka se nngongoregela kua Meriba, le ganne go ntumelela go laetša maatla a ka a makgethwa pele ga bona.” Meriba ke felo mola ga meetse kua Kadeshe, lešokeng la Tsine. Moshe a rapela a re: “Morena Modimo, wena Mothopo wa bophelo ka moka, ke a go rapela, beela setšhaba se monna yo a tlago kgona go se eta pele mme a se laola ntweng, gore setšhaba se sa gago se se ke sa tla sa swana le dinku tše di se nago modiši.” Morena a re go Moshe: “Tšea Joshua, morwa wa Nunu, monna wa bokgoni, mme o mmee diatla hlogong. O mo emiše pele ga moprista Eleasara le setšhaba ka moka, gomme moo pele ga bona o bege gore ke yo a tlago tšea legato la gago. O mo arolele bogolo bja gago, gore setšhaba ka moka sa Israele se tle se mo theeletše. A bote moprista Eleasara, yo a tlago tseba thato ya ka ka go šomiša Urime le Tumime. Ka tsela ye Eleasara o tla hlahla Joshua le setšhaba ka moka sa Israele ditabeng tša bona ka moka.” Moshe a dira ka moo Morena a mo laetšego ka gona. A emiša Joshua pele ga moprista Eleasara le setšhaba ka moka. Gomme bjalo ka ge Morena a be a laetše, a bea Joshua diatla hlogong, mme a bega gore ke yo a tlago tšea legato la gagwe. Morena o laetše Moshe gore a botše Baisraele ba tlišetše Modimo dihlabelo le dikabelo ka dinako tše di beilwego e le dijo tša gagwe. Monkgo wa tšona o a mo tsefela. Tše ke dihlabelo le dikabelo tše di swanetšego go tlišwa go Morena: sehlabelo sa go tšhungwa ka moka sa letšatši ka letšatši, sa dikgapana tše pedi tše di nago le ngwaga o tee tše di se nago bosodi. Le dire sehlabelo ka kgapana ya mathomo mosong, mme mantšiboa le dire se sengwe ka ya bobedi, se sengwe le se sengwe se dirwe le kabelo ya bupi ya kilokramo e tee ya bupi bjo bo hlakantšwego le litara e tee ya makhura a mohlware a a hlwekilego. Se ke sehlabelo sa letšatši ka letšatši se se tšhungwago ka moka, se se dirilwego la mathomo thabeng ya Sinai e le monkgo wo o tsefelago Morena. Le tšheleng litara e tee ya beine aletareng e le kabelo ya seno ya go sepela le kgapana ya mathomo. Mantšiboa le dire sehlabelo ka kgapana ya bobedi ka yona tsela yela le dirilego sehlabelo sa mosong le kabelo ya sona ya seno. Monkgo wa sehlabelo se le wona o tsefela Morena. Ka letšatši la Sabatha le dire sehlabelo ka dikgapana tše pedi tše di nago le ngwaga o tee tše di se nago bosodi; le abe le bupi bja dikilokramo tše pedi bjo bo hlakantšwego le makhura a mohlware e le kabelo ya bupi le kabelo ya seno. Sehlabelo se sa go tšhungwa ka moka se dirwe Sabatha se sengwe le se sengwe go tlaleletša sehlabelo sa letšatši ka letšatši le kabelo ya sona ya seno. Le direleng Morena sehlabelo sa go tšhungwa ka moka mathomong a kgwedi ye nngwe le ye nngwe ka diruiwa tše di latelago: dipowana tše pedi le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi. Go dira kabelo ya bupi le abe bupi bjo bo hlakantšwego le makhura a mohlware: gotee le poo ye nngwe le ye nngwe le abe bupi bja dikilokramo tše tharo; gotee le kgapa le abe bja dikilokramo tše pedi, gomme gotee le kgapana ye nngwe le ye nngwe le abe bja kilokramo e tee. Dihlabelo tše tša go tšhungwa ka moka ke tša monkgo wo o tsefelago Morena. Kabelo ya seno ya dihlabelo tše ke beine ya dilitara tše pedi gotee le poo ye nngwe le ye nngwe, le litara le seripa gotee le kgapa, le litara e tee le kgapana ye nngwe le ye nngwe. Wo ke molawana wa sehlabelo sa go tšhungwa ka moka sa letšatši la mathomo la kgwedi ye nngwe le ye nngwe ngwaga ka moka. Gomme go tlaleletša sehlabelo sa go tšhungwa ka moka sa letšatši ka letšatši le kabelo ya seno ye e sepelago le sona le dire sehlabelo sa tshwarelo ya dibe ka phooko e tee. Monyanya wa Paseka wa go hlompha Morena o ketekwa ka letšatši la lesome le metšo ye mene la kgwedi ya mathomo. Ka letšatši la lesome le metšo ye mehlano go thoma monyanya wo o tšeago matšatši a a šupago, woo ka wona go swanetšego go lewa fela dinkgwa tše di dirilwego ntle le komelo. Ka letšatši la pele la monyanya wo le phuthegeleng tirelo, gomme le se ke la dira mediro ya lena ya mehleng. Le direleng Morena sehlabelo sa go tšhungwa ka moka ka diruiwa tše di latelago: dipowana tše pedi le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi. Gotee le sehlabelo se le abe bupi bjo bo hlakantšwego le makhura a mohlware e le kabelo ya bupi: gotee le poo ye nngwe le ye nngwe le abe bupi bja dikilokramo tše tharo; gotee le kgapa le abe bja dikilokramo tše pedi, mme gotee le kgapana ye nngwe le abe bja kilokramo e tee. Le dire le sehlabelo sa tshwarelo ya dibe ka phooko e tee, mme ka tsela ye setšhaba se boelanywe le Morena. Le abeng tšeo go tlaleletša sehlabelo sa go tšhungwa ka moka sa mosong wa letšatši le lengwe le le lengwe. Ka yona tsela yeo le abeleng Morena kabelo ya bupi matšatši a a šupago e le ya monkgo wo o mo tsefelago. Le abeng seo go tlaleletša sehlabelo sa letšatši ka letšatši sa go tšhungwa ka moka le kabelo ya seno ye e sepelago le sona. Le phuthegeleng tirelo ka letšatši la bošupa, gomme le se ke la dira mediro ya lena ya mehleng. Ka letšatši la pele la Monyanya wa Puno, ge le tliša kabelo ya mabele a mafsa go Morena, le phuthegeleng tirelo, gomme le se ke la dira mediro ya lena ya mehleng. Le dire sehlabelo sa go tšhungwa ka moka e le sa monkgo wo o tsefelago Morena ka diruiwa tše di latelago: dipowana tše pedi le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi. Gotee le sehlabelo se le abe bupi bjo bo hlakantšwego le makhura a mohlware e le kabelo ya bupi: gotee le poo ye nngwe le ye nngwe le abe bupi bja dikilokramo tše tharo; gotee le kgapa le abe bja dikilokramo tše pedi, gomme gotee le kgapana ye nngwe le ye nngwe le abe bja kilokramo e tee. Le direng le sehlabelo sa tshwarelo ya dibe ka phooko e tee, mme ka tsela ye setšhaba se boelanywe le Morena. Le abeng tšeo le kabelo ya seno go tlaleletša sehlabelo sa go tšhungwa ka moka sa letšatši ka letšatši le kabelo ya bupi. Ka letšatši la pele la kgwedi ya bošupa le phuthegeleng tirelo, mme le se ke la dira mediro ya lena ya mehleng. Ka letšatši leo diphala di letšwe. Le direleng Morena sehlabelo sa go tšhungwa ka moka sa monkgo wo o mo tsefelago ka diruiwa tše di latelago: powana e tee le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi. Gotee le sehlabelo se le abe bupi bjo bo hlakantšwego le makhura a mohlware e le kabelo ya bupi: gotee le poo le abe bupi bja dikilokramo tše tharo; gotee le kgapa le abe bja dikilokramo tše pedi, gomme gotee le kgapana ye nngwe le ye nngwe le abe bja kilokramo e tee. Le dire le sehlabelo sa tshwarelo ya dibe ka phooko e tee, mme ka tsela ye setšhaba se boelanywe le Morena. Le direng dihlabelo tšeo go tlaleletša sehlabelo sa go tšhungwa ka moka sa letšatši le lengwe le le lengwe la pele la kgwedi gotee le kabelo ya sona ya bupi, le sehlabelo sa go tšhungwa ka moka sa letšatši ka letšatši le kabelo ya sona ya bupi ya monkgo wo o tsefelago Morena. Le phuthegeleng tirelo ka letšatši la lesome la kgwedi ya bošupa; le ikokobetšeng ka go se je dijo, le gona le se ke la dira mediro ya lena ya mehleng. Le direleng Morena sehlabelo sa go tšhungwa ka moka sa monkgo wo o mo tsefelago ka diruiwa tše di latelago: powana e tee le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi. Gotee le sehlabelo se le abeng bupi bjo bo hlakantšwego le makhura a mohlware e le kabelo ya bupi: gotee le poo le abe bupi bja dikilokramo tše tharo; gotee le kgapa le abe bja dikilokramo tše pedi, gomme gotee le kgapana ye nngwe le ye nngwe le abe bja kilokramo e tee. Le dire le sehlabelo sa tshwarelo ya dibe ka phooko e tee go tlaleletša sehlabelo sa tshwarelo ya dibe seo ka sona go phethwago tiro ya poelano, le sehlabelo sa go tšhungwa ka moka sa letšatši ka letšatši le kabelo ya sona ya bupi le ya seno. Le phuthegeleng tirelo ka letšatši la lesome le metšo ye mehlano la kgwedi ya bošupa. Le ketekeng monyanya wo matšatši a a šupago go hlompha Morena, mme le se ke la dira mediro ya lena ya mehleng. Ka la pele la matšatši a a šupago a le direle Morena sehlabelo sa go tšhungwa ka moka sa monkgo wo o mo tsefelago. Le hlabe diruiwa tše di latelago: dipowana tše lesome le tše tharo, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. Gotee le sehlabelo se le abe bupi bjo bo hlakantšwego le makhura a mohlware e le kabelo ya bupi: gotee le poo ye nngwe le ye nngwe le abe bupi bja dikilokramo tše tharo; gotee le kgapa ye nngwe le ye nngwe le abe bja dikilokramo tše pedi, gomme gotee le kgapana ye nngwe le ye nngwe le abe bja kilokramo e tee. Tšeo ka moka di sepele le dikabelo tše di nyakegago tša dino. Le dire le sehlabelo sa tshwarelo ya dibe ka phooko e tee. Le direng dihlabelo le dikabelo tšeo go tlaleletša sehlabelo sa go tšhungwa ka moka sa letšatši ka letšatši le kabelo ya sona ya bupi le ya seno. Ka letšatši la bobedi le dire sehlabelo ka dipowana tše lesome le tše pedi, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo. *** Ka letšatši la boraro le direng sehlabelo ka dipowana tše lesome le e tee, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. Gotee le tšona le dire dihlabelo le dikabelo tše di nyakegago letšatšing la mathomo. *** Ka letšatši la bone le dire sehlabelo ka dipowana tše lesome, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo. *** Ka letšatši la bohlano le dire sehlabelo ka dipowana tše senyane, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo. *** Ka letšatši la boselela le dire sehlabelo ka dipowana tše seswai, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo. *** Ka letšatši la bošupa le dire sehlabelo ka dipowana tše di šupago, dikgapa tše pedi, le dikgapana tše lesome le tše nne tše di nago le ngwaga o tee, ka moka e be tše di se nago bosodi. Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo. *** Ka letšatši la seswai le phuthegeleng tirelo mme le se ke la dira mediro ya lena ya mehleng. Le dire sehlabelo sa go tšhungwa ka moka sa monkgo wo o tsefelago Morena ka diruiwa tše di latelago: powana e tee, kgapa e tee, le dikgapana tše di šupago tše di nago le ngwaga o tee, ka moka e be tše di se nago bosodi. Gotee le tšona le dire dihlabelo le dikabelo tše dingwe ka moka tše di nyakegago letšatšing la mathomo. *** Yeo ke melawana mabapi le dihlabelo tša go tšhungwa ka moka, dikabelo tša bupi, dikabelo tša dino, le dihlabelo tša kagišano tšeo le swanetšego go di direla Morena menyanyeng ya lena ye e beilwego. Tše di tlaleletša dihlabelo tše le di dirago go phethagatša dikeno, goba e le dikabelo tša boithaopo. Ka gona Moshe a botša setšhaba sa Israele tšohle tše Morena a mo laetšego tšona. Moshe o ile a fa baetapele ba dikgoro tša Israele ditaelo tše di latelago tša Morena. Ge motho a enne go fa Morena se sengwe goba go ikona se sengwe, a se ke a tshela keno ya gagwe, eupša a dire se sengwe le se sengwe se a itšego o tla se dira. Ge kgarebe ye e sa dulago lapeng la tatagoyona e enne go fa Morena se sengwe goba e tshephišitše gore e tla ikona se sengwe, e swanetše go dira tšohle tše e di ennego goba e di holofeditšego, ge e se ge tatagoyona a ka gana ge a ekwa taba yeo. Fela ge tatagwe a ka mo ganetša go phethagatša keno ya gagwe ge a e ekwa, gona ga se a tlemega go e phetha. Morena o tla mo lebalela, ka gobane tatagwe o mo ganeditše go phethagatša keno ya gagwe. Ge mosadi yo a sego a nyalwa a enne, a ikemišeditše goba a se a ikemišetša, goba a tshephišitše go ikona se sengwe, mme ka morago a nyalwa, o swanetše go dira tšohle tše a di ennego goba a di tshephišitšego, ge e se ge monna wa gagwe a ka gana ge a ekwa taba yeo. Fela ge monna wa gagwe a ka mo ganetša go phethagatša keno ya gagwe ge a e ekwa, ga se a tlemega go e phethagatša. Morena o tla mo lebalela. Mohlologadi goba mosadi yo a hladilwego o swanetše go phethagatša keno ye nngwe le ye nngwe ye a e dirilego goba tshephišo ya go ikona se sengwe. Ge mosadi yo a nyetšwego a enne goba a tshephišitše go ikona se sengwe, o swanetše go dira tšohle tše a di ennego goba a di tshephišitšego, ge e se ge monna wa gagwe a ka gana ge a ekwa taba yeo. Fela ge monna wa gagwe a ka mo ganetša go phethagatša keno ge a e ekwa, ga se a tlemega go e phethagatša. Monna wa gagwe o mo thibetše go phethagatša keno ya gagwe; Morena o tla mo lebalela. Monna wa gagwe o na le tokelo ya go dumela goba go gana keno goba tshephišo ye nngwe le ye nngwe yeo mosadi a e dirilego. Eupša ge ka letšatši le le latelago leo monna wa gagwe a kwelego keno yeo ka lona, a se a ba a e gana, mosadi o swanetše go dira tšohle tše a di ennego goba a di tshephišitšego. O dumetše keno yeo ka go se e gane ka letšatši le a e kwelego ka lona. Fela ge a ka gana keno yeo ka morago, o tla otlelwa ge mosadi wa gagwe a se phethagatše keno ya gagwe. Ye ke melao ye Morena a e filego Moshe mabapi le dikeno tše di dirilwego ke mosadi yo a nyetšwego, goba mosadi yo a sego a nyalwa yo a sa dulago ka lapeng labo. Morena a re go Moshe: “Otla Bamidiane ka baka la seo ba se dirilego setšhaba sa Israele. Ka morago ga moo o tla ithobalela.” Ka gona Moshe a re go setšhaba: “Itokišetšeng ntwa gore le tle le hlasele Midiane, mme le otlele batho ba yona se ba se dirilego Morena. Kgorong ye nngwe le ye nngwe ya Baisraele le ntšhe banna ba sekete ba ye ntweng.” Ka gona kgorong ye nngwe le ye nngwe gwa kgethwa banna ba sekete, ya ba banna ba dikete tše lesome le tše pedi ba ba itlhametšego ntwa. Moshe a ba romela ntweng ba na le Finease, morwa wa moprista Eleasara, yo a bego a hlokometše dilo tše kgethwa le diphala tša go hlaba mokgoši wa ntwa. Ba hlasela Midiane ka moo Morena a laetšego Moshe, mme ba bolaya banna ba gona ka moka, gotee le dikgoši tše tlhano tša Midiane: Ebi, Rekeme, Tsure, Hure le Reba. Ba bolaya le Bileamo, morwa wa Beore. Madira a Baisraele a thopa basadi le bana ba Midiane, a tšea dikgomo le dihuswane tša bona, a thopa le mahumo a bona ka moka, mme ba tšhuma metse le mešaša ya bona yohle. Ba tšea thoto ka moka ye ba e thopilego, gotee le dibofša le diruiwa, mme ba di tliša go Moshe le Eleasara le go setšhaba sa Israele, seo se bego se le mešašeng melaleng ya Moaba, mošola wa Jordane go lebana le Jeriko. Moshe le Eleasara le baetapele ba bangwe ka moka ba setšhaba ba tšwa mešašeng go yo gahlanetša madira. Moshe a galefela balaodi ba madira, balaodi ba ba sekete le ba ba lekgolo, bao ba bego ba boa ntweng. A ba botšiša a re: “Ke ka baka lang le lesitše basadi ka moka ba phela? Gopolang gore ke basadi ba ba phethilego ditaelo tša Bileamo mme ba dira gore setšhaba se se tshephegele Morena kua Peore. Ke seo se tlišitšego bolwetši bja leuba setšhabeng sa Morena. Bjale ge, bolayang bašemane ka moka, le bolayeng le mosadi yo mongwe le yo mongwe yo a kilego a robala le monna, fela le lese basetsana le basadi ka moka ba ba sego ba ka ba robala le monna ba phele e be ba lena. Bohle ba le ilego la bolaya motho goba la kgwatha motho yo a bolailwego, le swanetše go dula ka ntle ga mešaša matšatši a a šupago. Ka letšatši la boraro le ka letšatši la bošupa le itlhwekišeng, le be le hlwekišeng le basadi ba le ba thopilego. Le hlwekišeng le diaparo ka moka le tšohle tše di dirilwego ka mokgopa, goba ka boya bja pudi, goba ka kota.” Moprista Eleasara a re go banna bao ba bego ba boile ntweng: “Šedi ditaelo tše Morena a di filego Moshe. Se sengwe le se sengwe se se sa swego, bjalo ka gauta goba silibera goba mphiri goba tshipi goba lesenke goba morodi, le se hlwekiše ka go se putliša mollong, le ka go se hlatswa ka meetse a tlhwekišo. Ge e le tše dingwe tšona di hlwekišwe ka go hlatswiwa ka meetse a tlhwekišo fela. *** Ka letšatši la bošupa le hlatswe diaparo tša lena; ke moo le tlago hlweka mme la dumelelwa go tsena mešašeng.” Morena a re go Moshe: “Wena le Eleasara le baetapele ba bangwe ba setšhaba le baleng tšohle tše di thopilwego, gotee le dibofša le diruiwa. O arole tše di tšogo thopša diripa tše pedi tše di lekanago, se sengwe e be sa banna ba ba tšwago ntweng, mme se sengwe e be sa setšhaba ka moka. Mo karolong ye e lego ya madira o ntšhe sebofša se tee dibofšeng tše dingwe le tše dingwe tše makgolo a mahlano gore e be motšhelo wa Morena, mme o dire bjalo mo go dikgomo le dipokolo le dihuswane. O di fe moprista Eleasara e le kabelo ye e fiwago Morena ka tsela ye e itšeng. Mo go karolo ye e fiwago setšhaba ka moka o tšee sebofša se tee go dibofša tše dingwe le tše dingwe tše masome a mahlano, mme o dire bjalo le mo go dikgomo le dipokolo le dihuswane. O di fe Balefi ba ba hlokometšego Tente ya Morena.” Moshe le Eleasara ba dira se Morena a se laetšego. Lenaneo la tše di thopilwego go tlaleletša tše ba itšeetšego tšona šele: dihuswane tše 675 000, dikgomo tše 72 000, dipokolo tše 61 000, le basadi ba ba sego ba ka ba robala le monna ba 32 000. *** *** *** Karolo ye e filwego madira e bile dihuswane tše 337 500, mme motšhelo wa Morena ya ba 675; dikgomo tše 36 000 tša madira, mme tše 72 ya ba motšhelo wa Morena; dipokolo tše 30 500 tša madira, mme tše 61 ya ba motšhelo wa Morena; basadi ba ba sego ba ka ba robala le monna ba 16 000 ba madira, mme ba 32 ya ba motšhelo wa Morena. *** *** *** *** Ka gona Moshe a fa Eleasara motšhelo woo e le kabelo ye e fiwago Morena ka tsela ye e itšeng, ka moo Morena a laetšego. Karolo ye e filwego setšhaba e be e lekana le ya madira: dihuswane tše 337 500, dikgomo tše 36 000, dipokolo tše 30 500, le basadi ba ba sego ba ka ba robala le monna ba 16 000. *** *** *** *** Mo go karolo ye Moshe o ile a ntšha sebofša se tee go dibofša tše dingwe le tše dingwe tše masome a mahlano, le mo go diruiwa, mme bjalo ka ge Morena a laetše, a di fa Balefi ba ba bego ba hlokometše Tente ya Morena. Ke moo balaodi ba ba laotšego madira ba ilego go Moshe, ba mmegela ba re: “Rena, bahlanka ba gago, re badile bahlabani ba re ba laolago, mme ga go le o tee yo a sego gona. Ka gona re tliša dikgabišo tša gauta e lego maseka a maoto, maseka a matsogo, dipalamonwana, mangina le dipheta tše yo mongwe le yo mongwe wa rena a bego a itšeetše tšona. Re di abela Morena gore ka tšona re boelanywe le yena.” Moshe le Eleasara ba amogela gauta yeo, ye ka moka ga yona e bego e le dikgabišo. Kabelo ka moka ye e tšwilego go balaodi ba madira e be e le ya boima bjo e ka bago dikilokramo tše 191. Bao e bego e se balaodi ba ile ba itshwarela tše ba itšeetšego tšona. Ka gona Moshe le Eleasara ba iša gauta yeo Tenteng, gore Morena a tle a šireletše setšhaba sa Israele. Kgoro ya Rubene le ya Gade di be di na le diruiwa tše ntši kudu. Ge ba bona gore naga ya Jasere le ya Gileade ke selete se se loketšego leruo, ba ya go Moshe le Eleasara le baetapele ba bangwe ba setšhaba ba re: “Selete se Morena a thušitšego Baisraele gore ba se thope – motse wa Atharote, wa Dibone, wa Jasere, wa Nimra, wa Heshbone, wa Elale, wa Sibma, wa Nebo le wa Beone – ke naga ye e loketšego diruiwa, mme rena re na le leruo le lentši. *** Hle, re fe naga ye e be ya rena, gomme o se ke wa re tshediša noka ya Jordane ra yo dula gona.” Moshe a ba fetola a re: “A le nyaka go dula fa mola Baisraele ba gabolena ba eya ntweng? Le reng le nyaka go nola setšhaba sa Israele moko gore se se tshele noka ya Jordane sa tsena nageng ye Morena a ba filego yona? Seo ke se botatagolena ba se dirilego ge ke ba roma go tloga Kadeshe-Barnea go tlo hlola naga. Ba fihla moeding wa Eshkolo mme ba bona naga, eupša ge ba boa, ba nola setšhaba moko gore se se ke sa tsena nageng ye Morena a ba filego yona. Morena a ba galefela tšatši leo, gomme a ena a re: ‘Ruriruri, ka ge ba se ba mpotegela, ga go monna yo a nago le mengwaga ye masome a mabedi goba go feta moo yo a tšwilego Egepeta yo a tlago tsena nageng ye ke enetšego Abrahama le Isaka le Jakobo ka re ke tla ba fa yona.’ Keno yeo e be e akaretša yo mongwe le yo mongwe, ntle le Kalebe, morwa wa Jefune, Mokenase, le Joshua, morwa wa Nunu; bona ba ile ba fela ba botegetše Morena. Morena a galefela setšhaba mme a se tlarumiša lešokeng mengwaga ye masome a mane, go fihlela ge moloko woo wa go mo galefiša o hwile ka moka. Mme bjale le eme botatagolena legato, lešabana le lefsa la banna ba dibe ba ba itokišeditšego go theošetša bogale bjo bošoro bja Morena godimo ga Baisraele gape! Ge lena batho ba Rubene le ba Gade bjale le gana go latela Morena, o tla boeletša a tlogela setšhaba se mo lešokeng, gomme le tla be le se bolaile ka moka.” Ba ile ba tla go Moshe ba re: “Re dumelele re agele dihuswane tša rena mašaka ka maswika, re agele le bana ba rena le basadi le batšofadi metse ye e ageleditšwego ka merako. Ke moo re tlago itokišetša go ya ntweng le Baisraele ba gaborena re ba etile pele go fihlela re ba goroša nageng ye e tlago ba ya bona. Ge tšeo di direga bana ba rena le basadi le batšofadi ba tla be ba dula mo metseng ye e ageleditšwego ka merako, ba šireleditšwe gore ba se hlaselwe ke badudi ba naga ye. Re ka se boele magaeng a rena pele Baisraele ka moka ba thopa naga ye ba e aroletšwego. Re ka se arolelane naga le bona ka mošola wa Jordane, ka gobane re šetše re tšere ya rena karolo ka mono bohlabela bja Jordane.” Moshe a ba fetola a re: “Ge le tloga le tiišitše go dira se le se bolelago, gona itlhameng mo pele ga Morena. Banna bohle ba lena ba ba itlhamilego ba tshele Jordane, mme ka taelo ya Morena ba hlasele manaba a rena go fihlela Morena a ba rakile mme a tšere naga yeo. Ka morago ga moo le ka ipoela, ka gobane le tla be le phethile se le swanetšego go se phethela Morena le Baisraele ba gabolena. Ke moo Morena a tlago dumela gore naga ye ya ka bohlabela bja Jordane ke ya lena. Eupša ge le ka se phethe ka mo le tshephišitše ka gona, le tla be le fošetša Morena. Le se ke la iphora; le tla otlelwa sebe seo sa lena. Ka gona agang metse ya lena le mašaka a dihuswane tša lena, fela le dire se le se tshephišitšego.” Banna ba Gade le ba Rubene ba mo fetola ba re: “Rena, bahlanka ba gago, re tla dira ka moo o re laelago ka gona. Basadi ba rena le bana ba rena ba tla šala mo metseng ya Gileade le diruiwa tša rena tšohle. Eupša rena ka moka ba re itlhametšego ntwa re tla tshela Jordane mme ra lwa re laolwa ke Morena ka moo o boletšego ka gona, mong wa rena.” Ka gona Moshe a fa Eleasara le Joshua le baetapele ba bangwe ba Baisraele ditaelo tše: “Ge banna ba Gade le ba Rubene ba ka tshela Jordane ba itlhametše ntwa ka taelo ya Morena, le ge ka thušo ya bona le ka kgona go thopa naga, gona le ba fe naga ya Gileade gore e be lefa la bona. Eupša ge ba ka se tshele Jordane mme ba se ye ntweng le lena, gona ba arolelane le lena naga nageng ya Kanana.” Banna ba Gade le ba Rubene ba mo fetola ba re: “Rena, bahlanka ba gago, re tla dira bjalo ka ge Morena a laetše. Ka taelo ya gagwe re tla tshelela ka nageng ya Kanana re itlhametše ntwa, gore naga ye ya ka bohlabela bja Jordane e tle be ya rena.” Ka gona Moshe a fa kgoro ya Gade le ya Rubene le seripa sa kgoro ya Manase naga ka moka ya Kgoši Sihone wa Baamore le ya Kgoši Ogo wa Bashane, gotee le metse le naga ya tikologo yeo. Kgoro ya Gade ya tsošološa motse wo o ageleditšwego wa Dibone, wa Atharote, wa Aroere, wa Atharote-Shofane, wa Jasere, wa Jogoboha, wa Bethe-Nimra, le wa Bethe-Haramo. Ba ile ba aga le mašaka a dihuswane. Kgoro ya Rubene ya tsošološa Heshbone, Elale, Kiriathaime, Nebo, Baale-Meone (leina le le ile la fetošwa), le Sibma. Ba ile ba rea metse ye ba e tsošološitšego maina a mafsa. Kgorwana ya Makire, morwa wa Manase, e ile ya hlasela naga ya Gileade, ya e thopa, mme ya raka Baamore ba ba bego ba le fao. Ka gona Moshe a fa kgorwana ya Makire naga ya Gileade, mme ba dula fao. Jaire, wa kgoro ya Manase, o ile a yo thopa metsana ye mengwe a e rea leina la metse ya Jaire. Nobage o ile a yo thopa Kenate le metse ya yona, mme a e reela leina la gagwe la Nobage. Lenaneo le le latelago ke la maina a mafelo ao Baisraele ba hlomilego mešaša go wona ka morago ga ge ba tlogile Egepeta ba etilwe pele ke Moshe le Arone. Ka taelo ya Morena Moshe o be a ngwala leina la lefelo leo ba fihlago go lona nako ye nngwe le ye nngwe ge ba hloma mešaša. Setšhaba sa Israele se tlogile Egepeta ka letšatši la lesome le metšo ye mehlano la kgwedi ya mathomo ya ngwaga, letšatši le le latelago Paseka ya mathomo. Ka tšhireletšo ya Morena ba ile ba tloga motseng wa Ramsese Baegepeta ba ba bona gabotse. Ka nako yeo Baegepeta ba be ba boloka bašemane ba maitšibolo bao Morena a bego a ba bolaile. Ka go bolaya maitšibolo ao Morena o ile a otla medimo ya Baegepeta. Baisraele ba ile ba tloga Ramsese, ba yo hloma mešaša Sukote. Go tloga Sukote ba yo hloma mešaša Ethamo ka lešing la lešoka. Go tloga moo ba gomela morago Pi-Hagirote, ka bohlabela bja Baale-Tsefone, gomme ba yo hloma mešaša kgauswi le Migdolo. Ba tloga Pi-Hagirote ba tshela Lewatle la Mahlaka. Ka morago ga go sepela matšatši a mararo lešokeng la Ethamo, ba yo hloma mešaša Mara. Go tloga moo ba ya Elime moo ba hlomilego mešaša, ka gobane go be go le methopo ya meetse ye lesome le ye mebedi, le mehlare ya mepalema ye masome a a šupago. Ba tloga Elime ba yo hloma mešaša kgauswi le kgogometšana ya Suez. Go tloga moo ba yo hloma mešaša lešokeng la Tsine. Go tloga moo ba yo hloma mešaša Dofka, mme go tloga moo ba yo e hloma Alushe. Ba tloga mo ba yo e hloma Refidime, moo go bego go se meetse a go nwa. Ge ba tloga Refidime ba eya thabeng ya Hore ba ile ba hloma mešaša mafelong a a latelago: lešokeng la Sinai, Kibrote-Taaba, Hatserote, Ritma, Rimone-Peretse, Libna, Risa, Kehelata, thabeng ya Shefere, Harada, Makhelote, Tahate, Terage, Mitika, Hashmona, Moserote, Bene-Jaakane, Hore-Gidgade, Jotobatha, Abrona, Etsione-Gebere, lešokeng la Tsine (ke go re Kadeshe), le thabeng ya Hore, mollwaneng wa naga ya Edomo. *** *** *** *** *** *** *** *** *** *** Ka taelo ya Morena moprista Arone a namela thaba ya Hore. A hlokafalela moo, a na le mengwaga ye lekgolo le masome a mabedi le metšo ye meraro, ka letšatši la pele la kgwedi ya bohlano ya ngwaga wa masome a mane ka morago ga ge Baisraele ba tlogile Egepeta. *** Kgoši ya Arade ka borwa bja Kanana a kwa gore Baisraele ba etla. Ge ba tloga thabeng ya Hore ba eya melaleng ya Moaba ba ile ba hloma mešaša mafelong a a latelago: Tsalmona, Punone, Obote, maropeng a Abarime nageng ya Moaba, Dibone-Gade, Almone-Diblataima, thabeng ya Abarime kgauswi le thaba ya Nebo, le melaleng ya Moaba, mošola wa noka ya Jordane go lebana le Jeriko, gare ga Bethe-Jeshimote le Moedi wa Megohlo. *** *** *** *** *** *** *** *** Moo melaleng ya Moaba, mošola wa Jordane go lebana le Jeriko, Morena a fa Moshe ditaelo tše di latelago tša Baisraele: “Ge le tshela Jordane le tsena nageng ya Kanana, le rake badudi ka moka ba naga yeo. Le pšhatlaganye medimo yohle ya bona ya diswantšho ya matlapa le ya ditshipi, le phušole le dintotoma tšeo go tšona ba khunamelago medimo ya diswantšho. Le tšeeng naga yeo le dule go yona, ka gobane ke le fa yona. Le aroleng naga go ya ka dikgoro le dikgorwana tše di fapanego ka go dira matengwa, le fe kgorwana ye e nago le batho ba bantši naga ye kgolo, mme kgorwana ya batho ba bannyane le efe naga ye nnyane. Eupša ge le ka se rake badudi ba naga yeo, bao ba šetšego ba tla ba bjalo ka dilabi tša go le fahla ka mahlong, goba meetlwa ya go le hlaba mahlakore, le gona ba tla lwa le lena. Ge le ka se ba rake, ke tla le dira se ke ikemišeditšego go ba dira sona.” Morena o file Moshe ditaelo tše di latelago tša setšhaba sa Israele: “Ge le fihla nageng ya Kanana ye ke le fago yona, mellwane ya lena e be ye e latelago. Mollwane wa ka borwa o tloge lešokeng la Tsine go ipata le mollwane wa Edomo. O thome ka bohlabela magomong a ka borwa a Lewatle le le Hwilego. O lebe borwa go ya Sefateng sa Diphepheng, mme o tšwele pele go putla Tsine, go ya borwa go fihla Kadeshe-Barnea. Go tloga moo o lebe leboabodikela go ya Hatsare-Adara le go fetela go Atsmone, moo o swanetšego go leba moeding wa noka ya Egepeta, mme wa felela Lewatleng la Mediteraniene. “Mollwane wa ka bodikela e be Lewatle la Mediteraniene. “Mollwane wa ka leboa o tloge Mediteraniene o lebe thabeng ya Hore, mme go tloga moo o ye sefateng sa Hamate. O fetele Tsedade le Sifrone, mme o felele Hatsare-Enane. “Mollwane wa ka bohlabela o tloge Hatsare-Enane o lebe Shefamo. Go tloga moo o ye borwa Ribla, ka bohlabela bja Aine, mme o gome mebotong ya lebopong la ka bohlabela la letsha la Genesarete, mme o ye borwa ka noka ya Jordane go fihla Lewatleng le le Hwilego. “Ye e be mellwane ye mene ya naga ya lena.” Ka gona Moshe a re go Baisraele: “Še naga ye le tlago e hwetša ka go dira matengwa, naga ye Morena a laetšego gore e fiwe dikgoro tše senyane le seripa sa kgoro. Kgoro ya Rubene le ya Gade le seripa sa kgoro ya Manase ba šetše ba hweditše naga ya bona ka bohlabela bja Jordane go lebana le Jeriko, ye e arotšwego go ya ka malapa a bona.” *** Morena a re go Moshe: “Moprista Eleasara le Joshua, morwa wa Nunu, ba arolele setšhaba naga. O tšee le moetapele o tee kgorong ye nngwe le ye nngwe go ba thuša go e arola.” Banna bao Morena a ba kgethilego šeba: Kgoro Moetapele Juda Kalebe, morwa wa Jefune Simeone Shemuele, morwa wa Amihude Benjamene Elidade, morwa wa Kislone Dane Buki, morwa wa Jogli Manase Haniele, morwa wa Efode Efraime Kemuele, morwa wa Shiftane Sebulone Elitsafane, morwa wa Parnage Isakara Paltiele, morwa wa Asane Asere Ahihude, morwa wa Shelomi Naftali Pedahele, morwa wa Amihude *** *** *** *** *** *** *** *** *** Ba ke banna bao Morena a ba laetšego go abaganyetša Baisraele naga kua Kanana. Melaleng ya Moaba, mošola wa Jordane go lebana le Jeriko, Morena a re go Moshe: “Botša Baisraele gore mo nageng ye ba e hweditšego ba fe Balefi metse ye mengwe ye ba ka dulago go yona, le phulo go dikologa metse yeo. Metse yeo e tla ba ya Balefi, mme ba dula go yona. Phulo e tla ba ya dikgomo le diruiwa tšohle tša bona. Naga ya phulo ye e dikologilego metse ye le e filego Balefi e be dimetara tše makgolo a mane le masome a a selelago go tloga morakong wa motse, mme e be ya botelele bja dimetara tše makgolo a senyane le masome a mabedi. Ka mathoko ohle a motse go be le lefelo le le bjalo gore motse o be gare. Le feng Balefi metse ye e selelago ya botšhabelo yeo motho a ka tšhabelago go yona ge a bolaile yo mongwe ka phošo. Godimo ga moo le ba fe le metse ye mengwe ye masome a mane le metšo ye mebedi gotee le phulo ya yona. Metse yohle ya bona ge e kopana e be ye masome a mane le ye seswai. Dikgoro tše di hweditšego naga ye kgolo di swanetše go fa Balefi metse ye mentši go feta tšeo di hweditšego naga ye nnyane.” Morena o laetše Moshe gore a botše setšhaba sa Israele a re: “Ge le tshetše noka ya Jordane mme le gorogile nageng ya Kanana, le kgethe metse ya botšhabelo yeo motho a ka tšhabelago go yona ge a bolaile yo mongwe ka phošo. Moo o tla bolokega go moloko wa kgauswikgauswi wa mohu yo a nyakago go lefeletša yoo a bolailwego, gore yo a rwešwago molato wa go bolaya motho a se ke a bolawa ntle le go sekišwa phatlalatša. Le kgethe metse ye e selelago, ye meraro ka bohlabela bja Jordane, le ye meraro ka nageng ya Kanana. Ye e tla ba metse ya botšhabelo ya Baisraele le bafaladi bao ba dulago le Baisraele lebakanyana fela, goba bao ba duletšego le bona sa ruri. Yo a bolailego yo mongwe a se a ikemišetša a ka tšhabela go wo mongwe wa yona. “Fela ge motho a ka bolaya yo mongwe ka sebolai sa tshipi goba sa kota goba ka leswika, o na le molato wa polao, gomme o swanetše go bolawa. *** *** Moloko wa kgauswikgauswi wa mohu a bolaye mmolai yoo ge a mo hweditše. “Ge motho a hloile yo mongwe mme a mmolaya ka go mo kgoromeletša fase, goba ka go mo foša ka se sengwe, goba ka go mo tia ka letswele, o na le molato wa polao mme o swanetše go bolawa. Moloko wa kgauswikgauswi a bolaye mmolai yoo ge a mo hweditše. “Ge motho a ka tšhoga a bolaile yo mongwe e se ka lehloyo, e ka ba ka go mo kgoromeletša fase, goba ka go mo foša ka se sengwe, goba a mo kgatla ka leswika a sa mmone mme a mmolaya e se lenaba la gagwe, a bile a se a ikemišetša go mo gobatša, gona setšhaba se ahlole taba ya mmolai le moloko wa mohu yo a nyakago tefeletšo go ya ka ditaelo tšeo. Setšhaba se phološe motho yoo a nago le molato wa go bolaya motho go moloko wa mohu, mme se mmoetše motseng wa botšhabelo woo a tšhabetšego go wona. A dule moo go fihlela ge Moprista yo Mogolo wa nako yeo, yo a tloditšwego ka makhura a makgethwa, a ehwa. Ge motho yo a nago le molato wa go bolaya motho a ka tloga motseng wa botšhabelo wo a tšhabetšego go wona, gomme moloko wa mohu a mo hwetša mme a mmolaya, gona ga a na molato tefeletšong yeo ya polao. Motho yo a nago le molato wa go bolaya motho o swanetše go dula motseng wa botšhabelo go fihlela ge Moprista yo Mogolo a ehwa; ka morago ga moo gona a ka gomela gae. Melao ye e ama lena le ditlogolo tša lena mo gongwe le mo gongwe mo le ka bego le dula gona. “Motho yo a rwešwago molato wa polao a ka bonwa molato gomme a bolawa fela ge dihlatse tše pedi goba go feta fao di hlatsela bjalo; bohlatse bja hlatse e tee ga bja lekana go ka thekga molato wa polao. Mmolayi yo a bonwego molato wa polao o swanetše go bolawa. A ka se pheme kotlo ya gagwe ka go lefa ka tšhelete. Le se ke la dumelela motho yo a tšhabetšego motseng wa botšhabelo go lefa gore a boele gae pele ga ge Moprista yo Mogolo a ehwa. Le se ke la kgotlela naga ye le dulago go yona. Polao e kgotlela naga, gomme ga go ka moo go ka phethagatšwago tiro ya tlhwekišo ya naga yeo motho a bolaetšwego go yona ka gona, ntle le ka lehu la mmolai. Le se ke la tšhilafatša naga ye le dulago go yona moo go dulago nna, ka gobane ke nna Morena, gomme ke dula gare ga setšhaba sa Israele.” Dihlogo tša malapa a kgorwana ya Gileade, morwa wa Makire, setlogolwana sa Manase, morwa wa Josefa, di ile tša ya go Moshe le go baetapele ba bangwe tša re: “Morena o laetše wena, mong wa rena, gore o arolele setšhaba sa Israele naga ka go dira matengwa. O go laetše le gore naga ya moloko wa rena, Tselofohade, o e fe barwedi ba gagwe. Eupša ge ba ka nyalwa ke banna ba kgoro ye nngwe, naga ya bona e tla ba ya kgoro yeo, gomme ye e aroletšwego rena ya fokotšega. Ka Ngwaga wa Poetšo naga ya barwedi ba Tselofohade e tla tsenyetšwa sa ruri kgorong ye ba nyetšwego go yona, mme ya lahlegela kgoro ya botatagorena.” Ka gona Moshe a fa setšhaba sa Israele taelo ye e tšwago go Morena a re: “Se kgoro ya Manase e se bolelago ke therešo, ka gona Morena o re barwedi ba Tselofohade ba ka nyalwa ke mang goba mang yo ba mo ratago, fela e be monna wa kgoro ya gabobona. Naga ya Moisraele yo mongwe le yo mongwe e tla fela e tlemagane le kgoro ya gabo. Mosadi yo mongwe le yo mongwe yo a hwetšago bohwa bja naga kgorong ya Israele o swanetše go nyalwa ke monna yo e lego wa kgoro yeo. Ka tsela ye Moisraele yo mongwe le yo mongwe o tla hwetša bohwa bja borakgolokhukhu ba gagwe, gomme bohwa bjoo bo ka se tloge go kgoro ye nngwe bja ya go ye nngwe. Kgoro ye nngwe le ye nngwe e tla fela e itshwaretše naga ya yona.” Ka gona Magla, Tirtsa, Hogla, Milka le Noa, barwedi ba Tselofohade, ba dira ka moo Morena a laetšego Moshe, gomme ba nyalwa ke dikgaetšedi tša bona tša kgoro. *** Ba ile ba nyalwa dikgorwaneng tša kgoro ya Manase, morwa wa Josefa, mme naga ya bona ya fela e le kgorong ya botatagobona. Tšeo ke ditaelo le melawana ye Morena a e filego Baisraele ka Moshe melaleng ya Moaba, mošola wa Jordane go lebana le Jeriko. Ka mo pukung ye go na le mantšu ao Moshe a a boditšego setšhaba sa Israele ge se le lešokeng ka bohlabela bja noka ya Jordane. Ba be ba le moeding wa Jordane kgauswi le Sufe, kgathe ga motse wa Parane ka lehlakoreng le lengwe, le motse wa Tofele, le wa Labane, le wa Hatserote, le wa Di-Sahaba ka go le lengwe. Go tloga thabeng ya Sinai go fihla Kadeshe-Barnea ka tsela ya naga ya dithaba ya Edomo go tšea matšatši a lesome le le tee. Ka letšatši la pele la kgwedi ya lesome le motšo o tee ya ngwaga wa masome a mane ka morago ga ge Baisraele ba tlogile Egepeta, Moshe o ile a ba botša tšohle tše Morena a mo laetšego gore a ba botše tšona. Seo se diregile ka morago ga ge Moshe a fentše Kgoši Sihone wa Baamore, yo a bego a buša motseng wa Heshbone, le Kgoši Ogo wa Bashane, yo a bego a buša motseng wa Ashtarote le wa Edrei. Ke mola setšhaba se sa le ka bohlabela bja Jordane, nageng ya Moaba, ge Moshe a thoma go hlatholla melao ya Morena le dithuto tša gagwe. O ile a re: “Ge re be re sa le kua thabeng ya Sinai, Morena Modimo wa rena o ile a re go rena: ‘Le dutše mo thabeng ye go lekane. Hlahlamollang mešaša, le hudugeleng nageng ya dithaba ya Baamore le ditikologong tša moo ka moka – moeding wa Jordane, dithabeng le nagengtlase, seleteng sa ka borwa, le lebopong la Lewatle la Mediteraniene. Yaang nageng ya Kanana, le be le feteleng ka thoko yela ya thaba ya Lebanone go yo fihla nokeng ye kgolo ya Yufratese. Yeo ke naga ye nna, Morena, ke enetšego borakgolokhukhu ba lena, Abrahama le Isaka le Jakobo, gore ke tla e fa bona le ditlogolo tša bona. Sepelang mme le e thopeng, ka gobane ke le gafetše yona.’ ” Moshe a re go setšhaba: “Mola re sa le thabeng ya Sinai ke le boditše ka re: ‘Go le eta pele ke nnoši go a mpalela. Morena Modimo wa lena o le atišitše la ba bjalo ka dinaledi tša legodimo. Anke Morena, Modimo wa borakgolokhukhu ba lena, a le oketše gasekete, gomme a le šegofatše bjalo ka ge a le tshephišitše! Bjale nna ke nnoši nka rwala bjang boikarabelo bja go le lamola?’ Ke ile ka re kgethang banna ba bohlale le kwešišo le tsebo kgorong ye nngwe le ye nngwe, mme ke tla ba bea bahlokomedi ba lena. La dumela gore seo e ka ba taba ye botse. Ka gona ka tšea baetapele ba bohlale ba ba nago le tsebo ba le ba kgethilego dikgorong tša lena, ka ba bea bahlokomedi ba lena. Ba bangwe ba ile ba hlokomela batho ba sekete, ba bangwe ba hlokomela ba lekgolo, ba bangwe ba hlokomela ba masome a mahlano, mme ba bangwe ba hlokomela ba lesome. Ke beile le bahlankedi ba bangwe dikgorong ka moka. “Mehleng yeo ke ile ka ba laela ka re: ‘Le theetšeng diphapano tše di tsogago gare ga batho ba gabolena. Phapanong ye nngwe le ye nngwe ye e amago batho ba gabolena goba bafaladi ba ba dulago gare ga lena le ahlole motho gabotse. Le se ke la ahlola sepitša; le ahloleng yo mongwe le yo mongwe ka moo go lebanego, le se ke la lebelela gore ke wa maemo afe. Le se ke la boifa motho, ka gobane kahlolo ya lena e tšwa go Modimo. Ge go na le molato wo o le palelago, le o tlišeng go nna mme nna ke tla o ahlola.’ Ka yona nako yeo ke ile ka le laela ditaba ka moka tše le bego le swanetše go di dira.” “Re dirile seo Morena Modimo wa rena a re laetšego sona. Re tlogile thabeng ya Sinai, gomme ra putla lešoka lela le legolo la go boifiša tseleng ya go ya nageng ya dithaba ya Baamore. Ge re fihla Kadeshe-Barnea ka re go lena: ‘Bjale le fihlile nageng ya dithaba ya Baamore yeo Morena Modimo wa rena, Modimo wa borakgolokhukhu ba rena, a re fago yona. Yaang le e thopeng ka moo a laetšego ka gona, ka gobane o le gafetše yona. Le se ke la boifa goba la nolega moko.’ *** “Eupša le ile la tla go nna la re: ‘A re romeng banna go yo hlola naga yela, pele ga ge re eya, gore ba tle ba re botše tsela ye kaonekaone ye re ka tšeago ka yona, le gore ke metse ye mebjang yeo e lego fao.’ “Ke ile ka kwana le taba yeo, ka gona ka kgetha banna ba lesome le ba babedi, o tee kgorong ye nngwe le ye nngwe. Ba ile ba ya nageng ya dithaba ba ba ba yo fihla moeding wa Eshkolo, ba e lekola. Ba re tlela le dienywa tše dingwe tša naga yeo, gomme ba re begela gore naga yeo Morena Modimo wa rena a re fago yona e nonne kudu. “Eupša le ile la nyatša taelo ya Morena Modimo wa lena, mme la se nyake go tsena nageng yeo. La ngongorega la re: ‘Morena o re hloile. O re ntšhitše Egepeta e le fela go tlo re gafela go Baamore ba, gore ba re fetše. Ke naga mang ye re yago go yona? Re nolegile moko. Banna ba re bego re ba romile ba re botša gore batho ba moo ba tiile, ebile ke ba batelele go re feta, le gore ba dula metseng ye e ageleditšwego ka merako ye e fihlago legodimong. Ba bile ba bone ditšitširipa moo, ditlogolo tša Baanake!’ “Fela ke ile ka le botša ka re: ‘Le se ke la boifa goba la tšhaba batho bao. Morena Modimo wa lena yo a le etilego pele o tla le lwela, bjalo ka ge le mmone a le lwela kua Egepeta le mo lešokeng. Le bone ka moo a le sepedišitšego ka polokego tseleng ka moka go tlo fihla fa, bjalo ka ge monna a kuka morwa wa gagwe.’ Eupša godimo ga tšeo ke di boletšego, le ile la fela le sa tshephe Morena Modimo wa lena, yoo ka mehla a le etilego pele go yo le hweletša lefelo leo le ka hlomago mešaša go lona. O be a sepela pele ga lena ka thololo ya mollo bošego, le ka thololo ya leru mosegare go le laetša tsela.” “Morena o ile a kwa dipelaelo tša lena mme a galefa. A ena a re: ‘Ga go le o tee wa lena wa moloko wo mobe wo yo a tlago goroga nageng ye e nonnego ye ke ennego go e fa borakgolokhukhu ba lena. Ke Kalebe fela, morwa wa Jefune, yo a tlago goroga go yona. O ile a no fela a mpotegela, mme ke tla fa yena le ditlogolo tša gagwe naga yeo a e hlotšego.’ Ka baka la lena Morena o ile a ba a galefela le nna, mme a re: ‘Le wena, Moshe, o ka se tsene nageng yeo. Eupša mothuši wa gago, Joshua, morwa wa Nunu, yena o tla tsena go yona. Wena mo tutuetše, ka gobane ke yena a tlago eta Baisraele pele go thopa naga yeo.’ “Ke moo Morena a itšego go rena ka moka: ‘Bana ba lena ba e sa lego ba bannyane, ba sa tsebego botse le bobe, ke bona ba tlago goroga nageng yeo – bona bana bale le itšego ba tla thopša ke manaba a lena. Ke tla ba fa naga yeo gomme ba e thopa. Eupša ge e le lena, gomang le boeleng lešokeng tseleng ya go ya kgogometšaneng ya Akaba.’ ” “Le ile la fetola la re: ‘Moshe, re fošeditše Morena. Fela bjale re tla hlasela Baamore ka mo Morena Modimo wa rena a re laetšego.’ Ke moo yo mongwe le yo mongwe wa lena a itokišeditšego go lwa a gopola gore go šwahlela naga ya dithaba go tla ba bonolo. “Fela Morena a re go nna: ‘Ba botše gore ba se ke ba hlasela, ka gobane nka se be le bona, gomme manaba a bona a tla ba fenya.’ Ke ile ka le botša se Morena a se boletšego, eupša la se ke la ntheetša, la gana taelo ya Morena, mme ka boikgogomošo bja lena la šwahlela naga ya dithaba. Baamore ba ba bego ba dula moo dithabeng tšeo ba le gahlanetša bjalo ka motšhitšhi wa dinose. Ba le rakediša mme ba le fenya kua Horma, nageng ya dithaba ya Edomo. Ka gona ge le boa la llela Morena le nyaka thušo, fela yena a se ke a le theetša goba a le ela hloko.” “E rile ge re feditše nako ye telele re dutše Kadeshe, ra boela lešokeng, go ya kgogometšaneng ya Akaba, ka moo Morena a laetšego ka gona, gomme ra tšea nako ye telele re ralala re ipatile le naga ya dithaba ya Edomo. “Morena a re go nna: ‘Le tšere nako ye telele, le ralala le naga ye ya dithaba go lekane; bjale lebang leboa. Botša setšhaba o re: Le batametše go putla naga ya dithaba ya Edomo, naga ya bomorwarragolena, ditlogolo tša Esau. Ba tla le boifa, fela le itshware le se ke la lwa le bona, ka gobane nka se le fe le ge e le seripana sa naga ya bona. Naga ye ya Edomo ke e file ditlogolo tša Esau. Le ka reka dijo le meetse go bona.’ “Gopolang ka moo Morena Modimo wa lena a le šegofaditšego go tšohle tše le di dirilego. O le hlokometše ge le ralala le lešoka le le legolo. O bile le lena mengwaga ye ye masome a mane, gomme le bile le tšohle tše le bego le di nyaka. “Ka gona re tlogile go ditlogolo tša Esau, ra phamoga tsela ye e tšwago motseng wa Elate le wa Etsione-Gebere e yago moeding wa Jordane, gomme ra ya leboabohlabela go leba Moaba. Gomme Morena a re go nna: ‘O se ke wa rumola batho ba Moaba, ditlogolo tša Lote, goba wa lwa le bona. Ke ba file motse wa Are, gomme nka se go fe seripa se sengwe sa naga ya bona.’ ” Morafe wo mongwe wa maatla wa ditšitširipa wo o bego o bitšwa Baeme o be o dula Are. E be e le batho ba batelele bjalo ka Baanake, morafe wo mongwe wa ditšitširipa. Go no swana le Baanake ba be ba tsebja le ka la Barafa, fela Bamoaba ba be ba ba bitša Baeme. Bahori ba be ba dula Edomo, eupša ditlogolo tša Esau di ile tša ba raka moo, tša fediša setšhaba sa bona, gomme tša dula fao sebakeng sa bona, go no swana le ge Baisraele ka morago ba ile ba tla ba raka manaba a bona nageng yeo Morena a ba filego yona. “Ke moka ra itokiša ra tshela nokana ya Serede bjalo ka ge Morena a re laetše. E bile mengwaga ye masome a mararo a metšo ye seswai go thoma ka nako ye re tloga Kadeshe-Barnea go fihlela ge re tshela nokana ya Serede. Bahlabani ka moka ba thaka yeo ba be ba hwile, go bile bjalo ka ge Morena a be a ba enetše. Morena o ile a fela a elwa le bona go fihlela ge a ba feditše ka moka setšhabeng. “Ka morago ga ge bahlabani bao ka moka ba hwile, Morena o ile a re go rena: ‘Lehono le swanetše go putla naga ya Moaba ka tsela ya Are. Ke gona le tlago ba le le kgauswi le naga ya Baamone, ditlogolo tša Lote. Le se ke la ba rumola goba la lwa le bona, ka gobane nka se le fe seripa se sengwe sa naga ye ke ba filego yona.’ ” Naga yeo e tsebja le ka la naga ya Barafa, batho bao pele ba bego ba dula moo, mme Baamone ba ba bitša Basamsume. E be e le ba batelele bjalo ka Baanake; e le ba bantši, ebile e le setšhaba se maatla. Fela Morena o ile a ba fediša, ka gona Baamone ba thopa naga yeo mme ba dula go yona. Seo ke se Morena a bego a se diretše Baedomo, ditlogolo tša Esau, ba ba bego ba dula nageng ya dithaba ya Edomo. O ile a fediša Bahori, mme Baedomo ba tšea naga ya bona ba dula go yona, moo ba sa dulago gona le bjale. Batho ba ba tšwago sehlakahlakeng sa Krete ba ile ba fediša Baaba bao ba bego ba dula metseng ya go ya borwa go fihla motseng wa Gasa, mme ba dula go yona. “Ka morago ga ge re putlile naga ya Moaba Morena a re go rena: ‘Itokišeng le thomeng leeto le tsheleng nokana ya Arnone. Ke gafela Sihone, Moamore, kgoši ya Heshbone, gotee le naga ya gagwe diatleng tša lena. Le mo hlaseleng, mme ka tsela yeo le thome go thopa naga ya gagwe. Lehono ke tla thoma go dira gore batho mo gohle ba le boife. Yo mongwe le yo mongwe o tla thothomela ka poifo ge a ekwa ka maatla a lena.’ “E rile ge re le lešokeng la Kedemote ka roma batseta go Kgoši Sihone wa Heshbone ba iša molaetša wa khutšo wa go re: ‘Re dumelele re putle nageng ya gago. Re tla fela re swere tsela gomme re ka se phamoge. Re tla lefela dijo tše re di jago le meetse a re a nwago. Se re se nyakago ke fela go iphetela nageng ya gago go fihlela re tshela noka ya Jordane re tsena nageng ye Morena Modimo wa rena a re fago yona. Ditlogolo tša Esau tšeo di dulago Edomo, le Bamoaba bao ba dulago Are ba re dumeletše go putla nageng ya bona.’ “Fela Kgoši Sihone a gana go re dumelela go putla nageng ya gagwe. Morena Modimo wa lena a mo thatafatša, a mo ngangabatša gore a tle a mo fenye a tšee naga ya gagwe ye le bjale re sa e thopilego. “Ke moo Morena a itšego go nna: ‘Bona, ke gafetše Kgoši Sihone le naga ya gagwe diatleng tša gago; thoma go thopa naga ya gagwe mme o dule go yona.’ Sihone o ile a tšwa le bahlabani ba gagwe ka moka go tlo lwa le rena kgauswi le motse wa Jahatse, fela Morena Modimo wa rena a mo gafela diatleng tša rena, gomme ra mmolaya gotee le barwa ba gagwe le bahlabani ba gagwe ka moka. Ka yona nako yeo re ile ra fenya metse ka moka, ra e pšhatla, mme ra bolaya batho bohle – banna, basadi le bana. Ra se šadiše motho le o tee. Ra thopa diruiwa, ra ba ra hula metse. Morena Modimo wa rena o gafetše metse ka moka diatleng tša rena go tloga Aroere, ka thoko ga moedi wa nokana ya Arnone, le motseng wo o lego ka moeding, go fihlela Gileade; gwa se be le motse wo o tiilego, wa go ageletšwa, mo o kago re palela. Fela ga se ra ka ra batamela naga ya Baamone, goba mabopong a nokana ya Jaboko, goba metse ya naga ya dithaba, goba nageng ye nngwe le ye nngwe yeo Morena Modimo wa rena a re laetšego gore re se ke ra ya go yona.” “Ka morago ga moo ra leba leboa ka tsela ya go ya seleteng sa Bashane, gomme Kgoši Ogo a tšwa le bahlabani ba gagwe ka moka go tlo lwa le rena kgauswi le motse wa Edrei. Morena a re go nna: ‘O se ke wa mmoifa. Ke tlilo mo gafela wena gotee le bahlabani ba gagwe le naga ya gagwe ka moka. O mo dire se o se dirilego Sihone, kgoši ya Baamore, yo a bego a buša Heshbone.’ “Ka gona Kgoši Ogo le setšhaba sa gagwe le bona Morena Modimo wa rena a ba gafela diatleng tša rena, gomme ra ba bolaya ka moka, ra se šadiše motho. Ka yona nako yeo ra ba ra thopa metse ya gagwe ka moka – gwa se be le o tee wo re sa o tšeego. Metse ka moka ye re e thopilego e bile ye masome a a selelago – e le ya selete ka moka sa Argobe moo Kgoši Ogo wa Bashane a bego a buša ntshe. Metse ye ka moka e be e ageleditšwe ka merako ya go ya godimo, le ka dikgoro le mapheko a go di tswalela, go bile go na le metse ye mentši ye e se nago merako. Re ile ra pšhatla metse ka moka mme ra bolaya banna ka moka le basadi le bana, ka wona mokgwa woo re dirilego metseng ye e bego e le ya Kgoši Sihone wa Heshbone. Ra thopa diruiwa ra ba ra hula metse. “Ka nako yeo re ile ra tšea naga ya ka bohlabela bja noka ya Jordane, go tloga nokaneng ya Arnone go fihla thabeng ya Hermone, go dikgoši tšeo tše pedi tša Baamore. Basidone ge ba bitša thaba ya Hermone ba re ke Sirione, Baamore bona ba re ke Senire. Re tšere naga ka moka ya Kgoši Ogo wa Bashane: metse ya dinaga tše di phagamego, dilete tša Gileade le Bashane, go ya bohlabela go yo fihla metseng ya Salka le Edrei.” Kgoši Ogo e bile yena wa mafelelo wa Barafa. Lepokisi leo setopo sa gagwe se bolokilwego ka lona le be le dirilwe ka letlapa. E be e le la botelele bja dimetara tše nne, le bophara bjo e ka bago dimetara tše pedi, go ya ka tekanyo ye e tlwaelegilego ya mehleng yeo. Le sa bonwa motseng wa Baamone wa Raba. “Ge re thopile naga yeo, ke ile ka arolela kgoro ya Rubene le ya Gade naga ye e lego ka leboa la motse wa Aroere kgauswi le nokana ya Arnone, le seripa sa naga ya dithaba ya Gileade gotee le metse ya yona. Ka arolela seripa sa kgoro ya Manase naga ya Gileade ye e bego e sa šetše, gammogo le naga ya Bashane ka moka moo Ogo a bušitšego ntshe, ke go re selete ka moka sa Argobe.” Bashane ka moka e be e tsebja gore ke naga ya Barafa. Jaire, wa kgoro ya Manase, o tšere selete ka moka sa Argobe, ke go re Bashane, go yo fihla mollwaneng wa Geshure le Maaka. A reela metse yeo leina la gagwe, gomme e sa tsebja e le metse ya Jaire. “Ke file kgorwana ya Makire le kgoro ya Manase naga ya Gileade. Gomme kgoro ya Rubene le ya Gade ka di fa naga ya go tloga Gileade go fihla nokaneng ya Arnone. Bogare bja nokana e bile mollwane wa bona wa ka borwa, mme mollwane wa bona wa ka leboa ya ba nokana ya Jaboko, yeo seripa sa yona se bego se dira mollwane wa Baamone. Ka bodikela naga ya bona e be e fihla nokeng ya Jordane, go tloga letsheng la Genesarete ka leboa go theogela Lewatleng le le Hwilego ka borwa, le go yo fihla patogeng ya thaba ya Pisga ka bohlabela. “Ka yona nako yeo ke ile ka ba laela ka re: ‘Morena Modimo wa lena o le file naga ye ya ka bohlabela bja Jordane gore le e thope. Bjale hlamang bahlabani ba lena, le ba romeleng mošola wa Jordane ba thake dikgoro tše dingwe tša Baisraele pele. Bao ba šalago metseng ye ke le aroletšego yona e be fela basadi ba lena, le bana ba lena, le diruiwa tša lena; ke a tseba gore le na le dikgomo tše ntši. Le thuše Baisraele ba gabolena ntweng go fihlela ba thopa naga ye Morena a ba fago yona ka bodikela bja Jordane, gomme Morena a ba dudiša moo ka khutšo, bjalo ka ge le lena a le dudišitše. Ka morago ga moo le ka boela mono nageng ye ke le aroletšego yona.’ “Ke moo ke laetšego Joshua ka re: ‘O bone se Morena Modimo wa gago a se dirilego magoši ale a mabedi, Sihone le Ogo; gomme sona seo ke se a tlago se dira mebušo yohle ye le e šwahlelago. O se ke wa ba boifa, ka gobane Morena Modimo wa gago o tla go lwela.’ “Ka nako yeo ke ile ka rapela ke tiišitše ka re: ‘Morena, Mong wa ka, o sa ntaeditše fela mathomo a dilo tše kgolo tše di makatšago tše o tlilego go di dira. Ga go modimo legodimong goba lefaseng yo a ka dirago dilo tše kgolo tše o di dirilego! A ke tshele noka ya Jordane, Morena, mme ke bone naga ye e nonnego ya ka mošola wa yona, naga ye botse ya dithaba le dithaba tša Lebanone.’ “Eupša ka baka la lena Morena o be a nkgalefetšwe mme a se ke a ntheetša. A re: ‘Go lekane! O se sa nkgopela seo gape! Namelela ntlhohlong ya thaba ya Pisga, o lebelele bodikela, le leboa, le borwa, le bohlabela. O lebeledišiše gabotse se o se bonago, ka gobane o ka se tsoge o tshetše noka ya Jordane. Botša Joshua se a swanetšego go se dira. Mo tutuetše, o mo tiiše, ka gobane o tla eta setšhaba pele a se tshediša noka go yo dula nageng ye o e bonago.’ “Ka gona re ile ra fela re dutše moeding go lebana le motse wa Bethe-Peore.” Moshe a re go setšhaba: “Le phethe melao ka moka ye ke le fago yona, mme le tla phela la dula nageng ye Morena, Modimo wa borakgolokhukhu ba lena, a le fago yona. Le se ke la oketša tše ke le laelago tšona, goba la di fokotša. Le phethe ditaelo tša Morena Modimo wa lena tše ke le fago tšona. Le iponetše ka bolena se Morena a se dirilego thabeng ya Peore. O fedišitše bohle ba ba bego ba khunamela Baale moo, eupša lena bao le bego le botegela Morena Modimo wa lena le sa phela le lehono. “Ke le file melao ka moka, bjalo ka ge Morena Modimo wa ka a mpoditše gore ke le fe yona. Le e phetheng le nageng ye le batametšego go e šwahlela le go dula go yona. Le e phetheng, le e latele, gomme seo se tla laetša ditšhaba tše dingwe gore le ba bohlale bjang. Ge ba ekwa ka melao ye ka moka, ba tla kgotsa ba re: ‘Setšhaba se segolo se se na le bohlale le kwešišo bjang!’ “Ga go setšhaba se sengwe se segolo se se nago le modimo yo a lego kgauswi le sona bjalo ka ge Morena Modimo wa rena a le kgauswi le rena nako ye nngwe le ye nngwe ge re mo kgopela thušo. Ga go setšhaba se sengwe se segolo se se nago le melao le melawana ye e lokilego bjalo ka ye ke le filego yona lehono. Le itlhokomeleng! Le kgonthišišeng gore le se ke la tsoga le lebetše se le se bonego ka mahlo a lena. Le botšeng bana ba lena le ditlogolwana tša lena ka tša letšatši lela le eme pele ga Morena Modimo wa lena kua thabeng ya Sinai mola a re go nna: ‘Bokanya setšhaba. Ke nyaka gore ba kwe se ke tlago se bolela, gore ba tle ba ithute go mpoifa bophelong bja bona ka moka, le gore ba tle ba rute le bana ba bona go mpoifa.’ “Le laodišetšeng bana ba lena ka moo le ilego la batamela thabeng la ema patogeng ya thaba ye e bego e pipeditšwe ke maru a dipipa a muši wo mosomoso, le mollo woo o laumelago legodimong. Le ba botšeng ka moo Morena a boletšego le lena a le gare ga mollo, ka moo le mo kwelego a bolela eupša la se mmone sebopego. O le boditše se le swanetšego go se dira go botegela kgwerano ye a e dirilego le lena – le swanetše go phetha Melao ye Lesome yeo a e ngwadilego matlapeng a mabedi. Morena o mpoditše gore ke le fe melao le melawana ka moka ye le swanetšego go e phetha nageng ye le batametšego go e šwahlela le go dula go yona.” “Ge Morena a bolela le lena a le ka gare ga mollo thabeng ya Sinai, ga se la bona sebopego sa gagwe. Gore le tle le bolokege, gona le itišeng le se dire sebe ka go itirela modimo wa seswantšho sa sebopego se sengwenyana – e ka ba sa monna goba sa mosadi, sa phoofolo goba sa nonyana, sa segagabi goba sa hlapi. Le se ke la lekega mme la obama la direla tše le di bonago legodimong – letšatši, ngwedi le dinaledi. Morena Modimo wa lena o file ditšhaba ka moka dilo tše gore ba di khunamele. Eupša lena Morena o le phološitše Egepeta, mouba wola o fišago wa go tološa tshipi. O le ntšhitše fao gore le tle le be setšhaba sa gagwe, bjalo ka ge le le ba gagwe le lehono. Ka baka la lena Morena Modimo wa rena o ile a nkgalefela mme a ena gore nka se tshele noka ya Jordane ka tsena nageng ye botse ye a le fago yona. Ke tla hwela mo nageng ye, nka se tsoge ke tshetše noka ye, fela lena le tla tshela la yo dula nageng yeo ye botse. Le hlokomeleng gore le se lebale kgwerano ye Morena Modimo wa lena a e dirilego le lena. Le phetheng taelo ya gagwe ya gore le se ke la itirela modimo wo mongwenyana wa seswantšho, ka gobane Morena Modimo wa lena o bjalo ka mollo wo o tukago; ga a kgotlelele tirelo ya medimo ye mengwe. “Le ge le dutše moo nageng yeo nako ye telele mme le bile le bana le ditlogolwana, le se ke la dira sebe ka go itirela modimo wa seswantšho wa sebopego se sengwenyana. Bjoo ke bobe pele ga Morena, gomme bo tla mo kgopiša. Lehono ke dira legodimo le lefase dihlatse tša ka gore ge le sa ntheeletše, le tla timelela nageng yeo. Le ka se phele nako ye telele nageng yela ya ka mošola wa Jordane ye le batametšego go e thopa. Le tla feleletšwa taa. Morena o tla le šwalalanya gare ga ditšhaba tše dingwe moo go tlago phologa fela ba mmalwa. Fao le tla khunamela medimo ye e dirilwego ke batho, medimo ya dikota le ya matlapa, medimo ye e sa bonego goba e sa kwego, ye e sa kgonego go ja goba go dupa. Moo le tla nyaka Morena Modimo wa lena, gomme ge le ka mo nyaka ka dipelo tša lena ka moka, le tla mo hwetša. Eupša ge le le bothateng mme dilo tše ka moka di le hlagela, ke gona mafelelong le tlago retologela go Morena mme la mo theeletša. Ke Modimo wa kgaugelo. A ka se le lahle goba a le fediša, le gona a ka se lebale kgwerano yela yena a e dirilego le borakgolokhukhu ba lena. “Nyakišišang tša mehleng ye e fetilego, nako yela le sešo la belegwa, go thoma ka nako yela Modimo a bopa motho mo lefaseng. Lekodišišang lefase lohle. A go na le selo se sengwe se segolo se se kilego sa direga sa go swana le se? A go na le yo a kilego a kwa taba ye e swanago le ye? A go na le setšhaba seo se kilego sa phela ka morago ga ge se kwele modimo a bolela le sona a le gare ga mollo, bjalo ka ge lena le mo kwele? A go na le modimo yo a kilego a ba le sebete sa go ya go ntšha setšhaba setšhabeng se sengwe mme a se dira sa gagwe, bjalo ka ge Morena Modimo wa lena a le diretše kua Egepeta? O dirišitše maatla a gagwe a magolo le go tia ga gagwe, a tliša dikotlo le ntwa, a dira mehlolo le dimakatšo, a ba a hlagiša tše di šiišago mahlong a lena. Morena o le laeditše seo gore le tle le tsebe gore yena a nnoši ke Modimo, le gore ga go yo mongwe modimo. O le kwešitše lentšu la gagwe le etšwa legodimong gore a le rute; le mo lefaseng o dirile gore le bone mollo wo mogolo wa gagwe, gomme a bolela le lena a le go wona. Ka gobane o ratile borakgolokhukhu ba lena o kgethile lena ditlogolo tša bona, gomme ka maatla a gagwe a magolo a le ntšha Egepeta ka boyena. Ge le etla o rakile ditšhaba tše kgolo le tše maatla go le feta, gore a tle a le goroše mme a le fe naga ya tšona, naga ye le lehono e sa lego ya lena. Ka gona, lehono gopolang, le se ke la lebala gore Morena ke Modimo legodimong le lefaseng. Ga go modimo yo mongwe. Le phethe melao le melawana ya gagwe ka moka ye ke le filego yona lehono, gore tšohle di tle di le atle, lena le ditlogolo tša lena. Le tla fela le dula nageng ye Morena Modimo wa lena a le felago yona sa ruri.” Moshe a kgetha metse ye meraro ka bohlabatšatši bja Jordane gore yo a bolailego motho ka phošo e se lenaba la gagwe a tšhabele go wo mongwe wa yona gore a se ke a bolawa. Kgoro ya Rubene e ile ya abelwa motse wa Betsere, nagathoteng ya lešoka; kgoro ya Gade yona ya abelwa Ramote, nageng ya Gileade; ge e le kgoro ya Manase yona ya abelwa Golane, nageng ya Bashane. Moshe o ile a fa setšhaba sa Israele melao le dithuto tša Modimo. Ke ka morago ga ge ba tšwile Egepeta, ba le ka bohlabela bja noka ya Jordane ka moeding, go lebana le motse wa Bethe-Peore, ge a ba fa melao ye. Moo e be e le nageng ya Kgoši Sihone wa Baamore, yo a bego a buša a le motseng wa Heshbone. Moshe le setšhaba sa Israele ba ile ba mo fenya ge ba etšwa Egepeta. *** Ba dula nageng ya gagwe le nageng ya Kgoši Ogo wa Bashane. Tšeo e be e le dikgoši tše pedi tša Baamore tše di bego di dula ka bohlabela bja Jordane. Naga yeo e be e tloga motseng wa Aroere, lebopong la nokana ya Arnone, go yo fihla thabeng ya Sirione, ke go re thaba ya Hermone. E be e akaretša le moedi ka moka ka bohlabela bja noka ya Jordane go yo fihla Lewatleng le le Hwilego le patogeng ya thaba ya Pisga. Moshe o ile a bokanya setšhaba ka moka sa Israele, a re go sona: “Lena Baisraele, le theetšeng melao le melawana ka moka ye ke le botšago yona lehono. Le ithute yona mme le e phethe ka potego. Morena Modimo wa rena o dirile kgwerano le rena thabeng ya Sinai, e sego fela le botatagorena, eupša le rena bao re phelago mo lehono. Moo thabeng Morena o boletše le lena le lebantše difahlego naye a le gare ga mollo. Ke ile ka ema kgathe ga lena le Morena ka nako yeo go le botša se a se bolelago, ka gobane le be le boifa mollo mme le gana go namelela thabeng. “Morena a re: ‘Ke nna Morena Modimo wa gago yo a go ntšhitšego Egepeta, mo o bego o le lekgoba. “ ‘O se ke wa direla modimo wo mongwe ka ntle le nna. “ ‘O se ke wa itirela seswantšho sa selo se sengwenyana sa legodimong, goba sa lefaseng, goba sa ka meetseng ka fase ga lefase. O se ke wa di obamela goba wa di direla, gobane ke nna Morena Modimo wa gago, Modimo yo a sa kgotlelelego tirelo ya medingwana ya diswantšho. Ke otla ba ba ntlhoilego le ditlogolo tša bona, ka latišiša go fihlela molokong wa boraro le wa bone. Eupša diketekete tša meloko ya bao ba nthatago, ba phethago melao ya ka, ke di direla ka lerato. “ ‘O se ke wa goboša leina la ka, ka gobane nna, Morena Modimo wa gago, ke tla otla yo a gobošago leina la ka. “ ‘Hlompha Sabatha mme o se kgethwafatše, bjalo ka ge nna, Morena Modimo wa gago, ke go laetše. Ka matšatši a a selelago o dire mediro ya gago ka moka, eupša letšatši la bošupa ke la go khutša, le kgethetšwe nna, Modimo wa gago. Ka lona o se ke wa dira modiro ofe le ofe – wena, goba ngwana wa gago, goba lekgoba la gago, goba seruiwa sa gago, goba mofaladi yo a dulago nageng ya geno. Lekgoba la gago le swanetše go khutša bjalo ka wena. O gopole gore o be o le lekgoba Egepeta, le gore nna, Morena Modimo wa gago, ke go ntšhitše ka maatla a ka a magolo le go tia ga ka. Ke ka baka leo ke go laelago gore o hlomphe Sabatha. “ ‘Hlompha tatago le mmago, bjalo ka ge nna, Morena Modimo wa gago, ke go laela, gore tšohle di tle di go atle mme o phele nako ye telele nageng ye ke go fago yona. “ ‘O se ke wa bolaya. “ ‘O se ke wa otswa. “ ‘O se ke wa utswa. “ ‘O se ke wa bolela bohlatse bja maaka ka yo mongwe. “ ‘O se ke wa duma mosadi wa yo mongwe. O se ke wa duma ngwako wa gagwe, goba tšhemo ya gagwe, goba lekgoba la gagwe, goba kgomo ya gagwe, goba pokolo ya gagwe, goba se sengwe se e lego sa gagwe.’ “Ye ke melao ye Morena a e filego lena ka moka ge le be le kgobokane thabeng. O le file melao ye gomme a se ke a oketša ka selo, ge a be a bolela ka lentšu le legolo a le gare ga mollo le gare ga maru a masomaso. Ke mohla a ngwadilego melao yeo matlapeng a mabedi mme a nneela ona. “Ge thaba e eswa mme le ekwa lentšu le etšwa swiswing, baetapele ba lena le mantona a dikgoro tša lena ba ile ba tla go nna ba re: ‘Morena Modimo wa rena o re laeditše bogolo bja gagwe le letago la gagwe ge re mo kwa a bolela a le ka gare ga mollo. Lehono re bone gore go a kgonega gore motho a fele a phela le ge Modimo a boletše le yena. Bjale ke ka baka lang re ikiša lehung gape? Mollo wola wo mošoro o tla re feleletša. Ka nnete re tla hwa ge re ka kwa Morena Modimo wa rena a bolela gape. A go na le motho yo mongwe yo bjalo ka rena a kilego a kwa Modimo yo a phelago a bolela a le ka gare ga mollo, gomme a phela? Boela morago, wena Moshe, mme o theetše tšohle tše Morena Modimo wa rena a di bolelago. Ka morago o boe o tle o re botše tše a go boditšego tšona. Re tla di theetša mme ra di phetha.’ “Ge Morena a ekwa seo a re go nna: ‘Ke kwele se setšhaba se se se boletšego, mme se a rereša. Nke nkabe ba ka no fela ba na le pelo ya mohuta wo, ke go re ba ntlhompha ka mehla mme ba phetha ditaelo tša ka ka moka, gore bona le ditlogolo tša bona ba atlege go ya go ile! Sepela o ba botše gore ba ka boela mešašeng ya bona. Fela wena, Moshe, o dule mo le nna, gomme ke tla go fa melao le melawana ya ka ka moka. O e fe setšhaba gore se tle se e phethe nageng ye ke ba fago yona.’ “Lena Baisraele, le hlokomeleng gore le dire tšohle tše Morena Modimo wa lena a le laetšego tšona. Le se ke la tshela wo mongwenyana wa melao ya gagwe. Le e phetheng ka moka, gore tšohle di tle di le atle mme le fele le phela nageng ye le yago go e thopa.” “Še melao le melawana ye Morena Modimo wa lena a ntaetšego gore ke le fe yona. Le e phetheng nageng ye le batametšego go tsena go yona le go e thopa. Ge le sa phela, lena le ditlogolo tša lena le hlompheng Morena Modimo wa lena mme le phethe melao ya gagwe ye ke le fago yona, gore le tle le dule moo nako ye telele. Theetšang, lena Baisraele! Le phethe melao ye! Ke moo le tlago atlega, la ba setšhaba se segolo mme la dula nageng ya mokhora le monono, ka mo Morena, Modimo wa borakgolokhukhu ba rena, a le tshephišitšego. “Lena Baisraele, gopolang gore Morena Modimo wa rena ke yena Morena a nnoši. Rata Morena Modimo wa gago ka pelo ya gago ka moka, le ka moya wa gago ka moka, le ka maatla a gago ka moka. O se ke wa lebala ditaelo tše ke go fago tšona lehono. O di toutele bana ba gago. O bolele ka tšona ge le le gae le ge le le leetong, ge le khutša le ge le šoma. O di tlemelele matsogong, o di rwale le phatleng e le segopotšo. O di ngwale direpoding tša mejako ya ngwako wa gago, le dikgorong tša gago. “Morena Modimo wa lena o enetše borakgolokhukhu ba lena, Abrahama le Isaka le Jakobo, gore o tla le fa naga ya metse ye megolo ye mebotse ye e sego ya agwa ke lena. Mengwako ya gona e tla be e tletše dilo tše botsebotse tše di sego tša bewa ke lena ka go yona, la hwetša le didiba tše di sego tša epša ke lena, le dirapa tša merara le tša mehlware ye e sego ya bjalwa ke lena. Ge Morena a le goroša nageng yeo mme le eba le tšohle tše le di nyakago tša go ja, *** le hlokomeleng gore le se lebale Morena yo a le ntšhitšego Egepeta moo le bego le le makgoba. Le boifeng Morena Modimo wa lena, le direleng yena fela, mme le eneng ka leina la gagwe a nnoši. Le se ke la khunamela medimo ye mengwe, ke go re medimo ya ditšhaba tše di bapilego le lena. Ge le ka khunamela medimo ye mengwe, pefelo ya Morena e tla le tšhuma bjalo ka mollo mme ya le feleletša sa ruri, ka gobane Morena Modimo wa lena yo a nago le lena ga a kgotlelele tirelo ya medimo ye mengwe. “Le se ke la leka Morena Modimo wa lena bjalo ka ge le kile la mo leka kua Masa. Le hlokomeleng gore le phethe melao le melawana ka moka ye a le filego yona. Le direng se Morena a rego se lokile mme ke se sebotse, gomme le tla atlega. Le tla kgona go thopa naga yela e nonnego ye Morena a enetšego borakgolokhukhu ba lena gore o tla le fa yona, gomme le tla leleka manaba a lena, bjalo ka ge Morena a boletše. “Mabakeng a a tlago ge bana ba lena ba le botšiša ba re: ‘Ke ka baka lang Morena Modimo wa rena a le laetše go phetha melao ye ka moka?’ le ba fetole le re: ‘Re be re le makgoba a kgoši ya Egepeta, mme Morena a re ntšha moo ka maatla a gagwe a magolo. Ka mahlo a rena re bone ge a dira mehlolo mme a dira Baegepeta le kgoši ya bona le bakgomana ba yona ka moka dilo tše di tšhošago. O re ntšhitše Egepeta go re tliša mo go tlo re fa naga ye, ka moo a bego a enetše borakgolokhukhu ba rena ka gona. Ke moo Morena Modimo wa rena a re laetšego go phetha melao le melawana ye, le go mmoifa. Ge re ka dira bjalo, ka mehla o tla fela a dišitše setšhaba sa rena mme a se dira gore se atlege. Ge re ka phetha se sengwe le se sengwe ka potego se Modimo a re laetšego sona, re tla mo kgahla.’ ” “Morena Modimo wa lena o tla le goroša nageng ye le yago go dula go yona, gomme a leleka ditšhaba tše ntši ge le tsena go yona. Ge le fihla gona o tla raka ditšhaba tše di šupago tše kgolo tše maatla go le feta: Bahete, Bagirgashe, Baamore, Bakanana, Baperise, Bahibe le Bajebuse. Ge Morena Modimo wa lena a gafela ditšhaba tše diatleng tša lena mme le ba fenya, le ba bolaye ka moka. Le se ke la dira kwano le bona goba la ba kwela bohloko. Le se ke la nyalana le bona, le bana ba lena le ba thibele go nyalana le bana ba bona, ka gobane ba tla aroša bana ba lena go Morena ba direla medimo ye mengwe, mme Morena a le galefela gomme a le feleletša gateetee. Ka gona, le phušoleng dialetare tša bona, le pšhatlaganyeng dikokwane tša bona tša borapedi tša maswika, le remeng dikota tša bona tša borapedi, le tšhumeng le medimo ya bona ya diswantšho. Le direng seo ka gobane le setšhaba se sekgethwa sa Morena Modimo wa lena. O le kgethile gare ga ditšhaba ka moka lefaseng gore le be setšhaba sa gagwe se a se ratago. “Morena ga se a le rata mme a le kgetha ka gobane le be le feta ditšhaba tše dingwe ka bontši; le be le le setšhabana se sennyane lefaseng. Eupša Morena o le ratile mme a nyaka go phetha keno ye a e enetšego borakgolokhukhu ba lena. Ke ka baka leo a le ntšhitšego Egepeta ka maatla a gagwe a magolo a le lokolla bokgobeng bja kgoši ya gona. Gopolang gore Morena Modimo wa lena ke yena Modimo a nnoši, le gore o a botega. O tla botegela kgwerano ya gagwe, mme meloko ye sekete ya bao ba mo ratago mme ba phethago ditaelo tša gagwe a e direla ka leratorato la gagwe, eupša bao ba mo hloilego a ka se dikadike go ba otla ka go ba bolaya. Bjale ge, hlokomelang gore le phethe melao le melawana ye ke le filego yona lehono.” “Ge le ka ela ditaelo tše hloko mme la di phetha ka potego, gona Morena Modimo wa lena o tla botegela kgwerano ya gagwe le lena mme a le direla ka leratorato la gagwe, ka moo a enetšego borakgolokhukhu ba lena. O tla le rata mme a le šegofatša, gore le tle le ate le be le bana ba bantši; o tla šegofatša mašemo a lena, gore le tle le be le mabele le beine le makhura a mohlware, le gona o tla le šegofatša ka go le fa dikgomo tše ntši le dihuswane. O tla le fa ditšhegofatšo tše ka moka kua nageng ye a enetšego borakgolokhukhu ba lena gore o tla le fa yona. Ga go setšhaba se sengwe lefaseng se a tlago se šegofatša ka kudu go swana le lena. Ga go monna goba mosadi mo go lena yo a ka se bego le ngwana, goba seruiwa se se sa tswalego. Morena o tla thibela malwetši ka moka go lena. A ka se le wišetše malwetši ale a mašoro le a bonego Egepeta, eupša o tla a wišetša manaba ka moka a lena. Setšhaba se sengwe le se sengwe seo Morena Modimo wa lena a se gafelago diatleng tša lena le se feleletše, le se ke la ba kwela bohloko le gatee. Le se ke la khunamela medimo ya bona, ka gobane seo e ka ba go itirela molaba. “Le se ke la ipotša la re setšhaba seo se le feta ka bontši, le gore le ka se kgone go se leleka. Le se ke la ba boifa; gopolang seo Morena Modimo wa lena a se dirilego kgoši ya Egepeta le setšhaba sa gagwe ka moka. Gopolang dikotlo tšela tše šoro tše le di bonego ka mahlo a lena, le mehlolo le dimakatšo, le maatla a magolo le bonatla bjoo ka bjona Morena Modimo wa lena a le ntšhitšego Egepeta. Ditšhaba tše ka moka tše bjale le di boifago o tla di fediša bjalo ka ge a fedišitše Baegepeta. O tla ba a ba tlaletša mme a fediša bao ba tšhabilego mme ba utamilego. Le se ke la boifa ditšhaba tše. Morena Modimo wa lena o na le lena; ke Modimo yo mogolo yo a tšhabegago. O tla leleka ditšhaba tše bosele ge le tsena. Le se ba fediše ka nako e tee, gore diphoofolo tša naga di se ate mme ya ba kotsi go lena. Morena o tla gafela manaba a lena diatleng tša lena, mme a ba tlaletša kudu go fihlela ba fedišwa. O tla gafela magoši a bona diatleng tša lena. Le tla a bolaya, gomme a lebalwa. Ga go yo a tlago kgona go le thibela; le tla bolaya yo mongwe le yo mongwe. Le tšhumeng medimo ya bona ya diswantšho. Le se ke la duma silibera goba gauta ye medimo yeo e manegilwego ka yona mme la e tšea. Ge le ka dira bjalo, di tla le tlišetša kotlo, ka gobane Morena o hloile dilo tša medimo ya diswantšho. Le se ke la tliša modimo wo mongwenyana wa seswantšho mengwakong ya lena; ge le ka o tliša gona le tla ikapeša thogako ye e lego godimo ga yona. Le swanetše go hlaswa medimo yeo ya diswantšho le e šišingwe, ka gobane e rogakilwe ke Morena.” “Le hlokomeleng gore le phethe melao yohle ye ke le laetšego yona lehono gore le tle le phele, le ate, mme le thope naga yeo Morena a e enetšego borakgolokhukhu ba lena. Gopolang ka moo Morena Modimo wa lena a le hlahlilego leetong lela le letelele go putla lešoka mo mengwageng ye ye masome a mane, a le romela mathata go le kokobetša le go le leka, gore a tle a tsebe se se lego ka dipelong tša lena, ge eba le tla phetha ditaelo tša gagwe. O le kokobeditše ka go le bolaiša tlala, mme ka morago a le fa manna gore le je, dijo tše lena le borakgolokhukhu ba lena le bego le sa di tsebe. Seo o se diretše go le ruta gore motho ga a phele ka bogobe fela, eupša o phela ka se sengwe le se sengwe se Modimo a se bolelago. Mengwageng yeo ye masome a mane diaparo tša lena ga se tša ka tša hlagala, goba la ruruga maoto. Lemogang gore Morena Modimo wa lena o a le phošolla mme a le otla ka mokgwa wo tatagobana a godišago bana ba gagwe ka wona. Ka gona, dirang ka mo Morena a le laetšego: Le phetheng melao ya gagwe, gomme le mmoifeng. Morena Modimo wa lena o le goroša nageng ye e nonnego – naga ye e nago le dinoka le methopo le meela ya ka fase ga mobu ye e phulegago meeding le dithabeng; naga ya mabele le garase, diterebe, mago, digarenate, dienywa tše botsebotse tša mohlware, le todi ya dinose. Moo le ka se tsoge le bolailwe ke tlala goba la hloka selo. Matlapa a gona a na le tshipi, le dithabeng tša gona le ka epa mphiri. Ge le eja le khora le leboge Morena Modimo wa lena ka baka la naga yeo e nonnego ye a le filego yona.” “Le hlokomeleng gore le se ke la lebala Morena Modimo wa lena; le se ke la lesa go phetha melao ya gagwe ka moka ye ke le filego yona lehono. Ge le eja le khora mme le agile mengwako ye mebotse le dula ka go yona, ge dikgomo tša lena le dihuswane, le silibera le gauta, le tšohle tše e lego tša lena di atile, le bone gore le se ikgodiše mme la lebala Morena Modimo wa lena yo a le ntšhitšego Egepeta moo le bego le le makgoba. O le hlahlile go putla lešoka lela le legologolo la go tšhoša moo go bego go le dinoga tša go bolaya le diphepheng. Moo nageng ya go omelela ya go hloka meetse o le phuletše meetse leswikeng le lethatathata. Lešokeng a le fa manna gore le je, dijo tše borakgolokhukhu ba lena ba bego ba sa di tsebe. A le romela mathata go le kokobetša le go le leka, gore mafelelong a tle a le direle tše botse. Ka gona, le se ke la tsoga le gopotše gore le ikhumišitše ka maatla a lena le go tia ga lena. Le gopoleng gore ke Morena Modimo wa lena yo a le fago maatla a go itirela lehumo. O dira seo ka gobane o botegetše kgwerano ye a e dirilego le borakgolokhukhu ba lena ka keno, mme o sa botegetše kgwerano yeo le lehono. Le se ke la tsoga le lebetše Morena Modimo wa lena, goba la retologela go medimo ye mengwe go e obamela le go e direla. Ge le ka dira seo, gona ke a le sebotša lehono gore ka kgonthe le tla fedišwa. Ge le sa theetše Morena, gona le tla fedišwa go no swana le ditšhaba tšela a tlago di fediša ge le tsena.” “Theetšang, lena Baisraele! Lehono le tla tshela noka ya Jordane la thopa naga ya ditšhaba tše kgolo gape tše maatla go le feta. Metse ya tšona ke ye megolo, ya merako ye e fihlago legodimong. Batho ba gona ke Baanake, ke ba batelele, ba ditšitširipa, gomme le a tseba ebile le kwele gore ga go yo a ka lwago le bona. Eupša lehono le tla bona gore Morena Modimo wa lena ke yena a tlago sepela pele ga lena a le bjalo ka mollo wo o laumago. O tla ba fenya ge le le gare le tsena, gore le tle le ba leleke mme le ba fediše ka bjako, ka moo a le holofeditšego ka gona. “Ka morago ga ge Morena Modimo wa lena a le leleketše bona, le se ke la ipotša la re o le gorošitše mo go tlo thopa naga ye ka gobane e be e le swanetše. Aowa, Morena o tla le lelekela batho ba ka gobane ke ba babe. Ga se ka baka la gore le lokile mme le dira se se lokilego ge Morena a le lesa le thopa naga ya bona. O tla ba leleka ka gobane ke ba babe, le ka gobane o ikemišeditše go phetha se a se enetšego borakgolokhukhu ba lena, Abrahama le Isaka le Jakobo. Le tsebe gabotse gore Morena ga a le fe naga ye e nonnego ye ka baka la gore e a le swanela. Gabotse lena le setšhaba sa melala ye methata. “Le se ke la tsoga le lebetše ka moo le befedišitšego Morena kua lešokeng. Go tloga ka letšatši lela le tloga Egepeta go fihlela ka letšatši le le fihla mo, le mo tsogetše maatla. Le gona kua thabeng ya Sinai le befedišitše Morena – la mmefediša mo e lego gore o be a ka le fediša. Ke ile ka namela thaba go yo amogela matlapa ao go ona go bego go ngwadilwe kgwerano ye Morena a e dirilego le lena. Ka dula moo matšatši a masome a mane le mašego a ona ke sa je, ke sa nwe. Ke moka Morena a mpha matlapa a mabedi ao go ona a bego a ngwadile ka seatla sa gagwe tše a le boditšego tšona a le gare ga mollo ka letšatši lela le bego le bokane kua thabeng. Ka morago ga matšatši ao a masome a mane le mašego a ona Morena a mpha matlapa a mabedi ao go ona a bego a ngwadile kgwerano. “Ke moka Morena a re go nna: ‘Theoga thaba ka pelapela, ka gobane setšhaba sa gago se o se ntšhitšego Egepeta se senyegile mme se dirile tše mpe. Ba šetše ba fapogile go tšeo ke ba laetšego tšona, mme ba itiretše modimo wa seswantšho.’ “Morena a ba a re go nna: ‘Ke tseba ka mo setšhaba se se nago le melala ye methata ka gona. O se ke wa nthibela. Ke ikemišeditše go ba fediša gore go se sa ba le yo a ba gopolago. Ke gona ke tlago go dira tatagosetšhaba se segolo se maatla go ba feta.’ “Ka fao ke ile ka retologa ka theoga thaba, ke swere matlapa ale a mabedi ale go ona go bego go ngwadilwe kgwerano. Thaba e be e tuka mollo. Ke ile ka bona gore le akgofišitše la phamoga tseleng ye Morena Modimo wa lena a le filego yona, le gore le mo fošeditše ka go itirela modimo wa seswantšho wa powana ka tshipi ye e tološitšwego. Ka gona ka lahlela matlapa ale fase moo mahlong a lena mme a pšhatlega. Ka buša ka itahlela fase ka sefahlego pele ga Morena ka fetša matšatši a masome a mane le mašego a ona ke sa je, ke sa nwe. Seo ke be ke se dira ka gobane le fošeditše Morena mme le mmefedišitše. Ke be ke boifa pefelo ya Morena ye šoro, ka gobane o be a tuka bogale mo e lego gore o be a ka le fediša; fela gapegape Morena o ile a ntheetša. Morena o ile a befelelwa le Arone mo e lego gore o be a ka mmolaya, ka gona ka rapelela Arone ka yona nako yeo. Ke ile ka tšea selo seo le bego le dirile sebe ka sona – powana yeo ya tshipi – ka se lahlela mollong. Ke ile ka e pšhatlaganya, ka e šila ya ba lerole, ka tšhela lerole leo ka moeleng wo o bego o theoga thabeng. “Le ile la befediša Morena Modimo wa lena le mola le le kua Tabera le Masa, le kua Kibrote-Taaba. Le mola a le romile go tloga Kadeshe-Barnea a le laetše gore le yo thopa naga ye a bego a le fa yona, le ile la mo tsogela maatla; ga se la ka la mo tshepha goba la mo theetša. E sa le go tloga mola ka le tsebago, le tsogetše Morena maatla. “Ka gona ke ile ka hlwa ke itahletše fase ka sefahlego pele ga Morena matšatši ao a masome a mane le mašego a ona, ka gobane o be a itše o tla le feleletša. Ka rapela ka re: ‘Morena, Mong wa ka, hle, se fediše setšhaba se e tlogago e le sa gago, setšhaba se o se phološitšego mme wa se ntšha Egepeta ka maatla a gago a magolo le go tia. Gopola bahlanka ba gago, Abrahama le Isaka le Jakobo, gomme o se ke wa šetša bonganga le bokgopo le sebe sela sa setšhaba se. Go sego bjalo, Baegepeta ba tla re o paletšwe ke go goroša setšhaba sa gago nageng ye o ilego wa ba tshephiša yona. Ba tla re o ntšhitše setšhaba sa gago wa se iša lešokeng go yo se bolaya, ka gobane o be o se hloile. Gabotsebotse se ke setšhaba se e tlogago e le sa gago, se o se ntšhitšego Egepeta ka maatla a gago a magolo le go tia.’ ” “Morena a re go nna: ‘Betla matlapa a mabedi a go swana le ale a pele; o betle le polokelo ya kota. O tle go nna thabeng, mme ke tla ngwala matlapa ao melao ye ke bego ke e ngwadile matlapeng ale wa go a pšhatla, gomme o a bee ka moo polokelong.’ “Ka gona ke ile ka betla polokelo ya dikota tša mogohlo, ka betla le matlapa a mabedi a go swana le ale a pele, gomme ka a tšea ka namela thaba. Gomme Morena a ngwala matlapa ao ona mantšu ale a bego a a ngwadile pele, Melao ye Lesome yeo a le filego yona ge a be a bolela a le gare ga mollo ka letšatši lela le bego le bokane kua thabeng. Morena o ile a mpha matlapa ao, gomme ka retologa ka theoga thaba. Ka moo Morena a laetšego ka gona ka a bea ka polokelong yela ke e dirilego, mme go tloga ka nako yeo go fihlela le bjale a sa le ka moo.” Baisraele ba ile ba tloga didibeng tše e bego e le tša Jaakane, gomme ba ya Mosere. Moo Arone o ile a hlokafala gomme a bolokwa, mme Eleasara, morwa wa gagwe, a mo tšea legato ya ba moprista. Go tloga moo ba ya Hore-Gidgade mme ka morago ba fetela Jotobatha, felo mo go bego go na le meetse a mantši. Kua thabeng Morena o ile a bea banna ba kgoro ya Lefi gore ba rwale Polokelo ya Kgwerano go mo hlankela e le baprista, le gore ba šegofatše ka leina la gagwe. Gomme le bjale ba sa dira dilo tše. Ke ka baka leo kgoro ya Lefi e sego ya ka ya fiwa naga bjalo ka ge dikgoro tše dingwe di ile tša e fiwa; seo ba se amogetšego e bile boprista bja Morena, ka moo Morena Modimo wa lena a ba tshephišitšego ka gona. “Ke dutše thabeng matšatši a masome a mane le mašego a ona, bjalo ka mola pele. Morena a ntheetša gape, mme a dumela gore a ka se le bolaye. A mpotša gore ke tle ke le ete pele, gore le tle le thope naga ye a enetšego borakgolokhukhu ba lena gore o tla le fa yona.” “Bjale, lena Baisraele, theetšang se Morena Modimo wa lena a se nyakago go lena: Ga go se sengwe gape se Morena a se nyakago ge e se go mmoifa, le go dira tšohle tše a di laelago. Le mo rate mme le mo direle ka dipelo tša lena ka moka le ka moya wa lena ka moka, gomme le phetheng melao ya gagwe yohle. Ke le fa yona lehono gore e tle e le thuše. Le ona magodimo a godimodimo ke a Morena; lefase le lona ke la gagwe le tšohle tše di lego go lona. Eupša Morena o be a rata borakgolokhukhu ba lena mo e lego gore o kgethile lena gare ga ditšhaba ka moka, mme le sa le setšhaba sa gagwe se a se kgethilego. Ka gona, go tloga bjale le theeletšeng Morena mme le se ke la hlwa le eba le melala ye methata. Morena Modimo wa lena o ka godimo ga medimo ka moka le ka godimo ga maatla ka moka. Ke yo mogolo yo maatla le yo a boifegago. Ga a kgetholle motho, le gona ga a amogele letsogolekobong. O hlokomela gore ditšhuana le bahlologadi ba swarwe gabotse; o rata bafaladi mme o ba fa dijo le diaparo. Ka gona, le rate bafaladi bao, ka gobane lena beng le kile la ba bafaladi kua Egepeta. Le boife Morena Modimo wa lena, mme le direle yena a nnoši. Le mmotegeleng, mme le ene ka leina la gagwe fela. Mo tumišeng; ke Modimo wa lena, mme le bone ka mahlo a lena dilo tše kgolo tše di makatšago tše a le diretšego tšona. Ge borakgolokhukhu ba lena ba eya Egepeta, e be e le ba masome a a šupago fela. Eupša bjale Morena Modimo wa lena o le atišitše la ba bjalo dinaledi tša legodimo.” “Le rateng Morena Modimo wa lena, gomme ka mehla le phetheng melao le melawana ya gagwe ka moka. Gopolang lehono se le ithutilego sona ka tše Morena a le diretšego tšona. E bile lena, e sego bana ba lena, ba le diretšwego dilo tše. Le bone bogolo bja Morena, le maatla a gagwe, le go tia ga gagwe, le mehlolo ya gagwe. Le bone tše a di dirilego kgoši ya Egepeta le naga ya yona yohle. Le bone ka moo Morena a swieletšego madira a Baegepeta, gotee le dipere tša bona le makoloi a bona a ntwa, ka go di kgamiša meetse ka Lewatleng la Mahlaka ge ba be ba le rakediša. Le tseba tše Morena a le diretšego tšona lešokeng pele ga ge le fihla mo. Le gopola se a se dirilego Datane le Abiramo, barwa ba Eliaba, ba kgoro ya Rubene. Mahlong a setšhaba ka moka lefase le ile la palega la ba metša, gotee le malapa a bona, le mešaša ya bona, le bahlanka ba bona ka moka, le diruiwa tša bona. Ke lena ba le bonego dilo tšeo tše kgolo ka moka tše Morena a di dirilego.” “Le phethe ditaelo tšohle tše ke le fago tšona lehono. Ke moo le tlago kgona go tshelela mošola mme la thopa naga ye le batametšego go tsena go yona. Gomme le tla dula nako ye telele nageng ya mokhora le monono ye Morena a enetšego borakgolokhukhu ba lena gore o tla e fa bona le ditlogolo tša bona. Naga ye le batametšego go e thopa ga e swane le naga ya Egepeta moo le tšwago gona. Kua ge le bjetše peu le be le swanetše go šoma ka boima go nošetša mašemo; eupša naga ye le batametšego go tsena go yona ke naga ya dithaba le meedi, naga ye e nošetšwago ke pula. Morena Modimo wa lena o hlokometše naga ye mme o e šetša ngwaga ka moka. “Ka gona, le phethe ka potego ditaelo tše ke le fago tšona lehono, e lego go rata Morena Modimo wa lena, le go mo direla ka dipelo tša lena ka moka le ka moya wa lena ka moka. Ge le ka dira bjalo o tla neša pula nageng ya lena ge e nyakega, lehlabula le seruthwane, gore go tle go be le mabele le beine le makhura a mohlware, le bjang bja diruiwa tša lena. Le tla ba le dijo tše di lekanego. Le hlokomele gore le se ke la arošwa go Morena la obamela medimo ye mengwe la e direla. Ge le ka dira bjalo, Morena o tla le galefela. O tla thibela pula, gomme lefase la lena le tla omelela mo e lego gore dibjalo di ka se mele. Gomme le tla hwa ka pela nageng ye botse ye a le fago yona. “Le loteng tše ke le laetšego tšona ka dipelong tša lena mme le di boloke. Le di tlemelele matsogong a lena le be le di rwale diphatleng tša lena e le digopotšo. Le di rute bana ba lena. Le boleleng ka tšona ge le le gae le ge le le maetong, ge le khutša le ge le šoma. Le di ngwaleng direpoding tša mengwako ya lena, le dikgorong tša lena. Ke moo lena le bana ba lena le tlago dula nako ye telele nageng yeo Morena Modimo wa lena a enetšego borakgolokhukhu ba lena gore o tla le fa yona. Le tla dula moo go yona ge legodimo le lefase di sa le gona. “Le phethe ka potego ditaelo tšohle tše ke le fago tšona: Le rateng Morena Modimo wa lena, le phethe tšohle tše a le laelago tšona, mme le mmotegeleng. Ke moo a tlago leleka ditšhaba tšeo ka moka ge le le gare le goroga, gomme le tla thopa naga yeo e lego ya ditšhaba tše kgolo tše maatla go le feta. Mobu ka moka wo le sepelago go wona e tla ba wa lena. Naga ya lena e tla tloga lešokeng ka borwa ya fihla thabeng ya Lebanone ka leboa, ya tloga le nokeng ya Yufratese ka bohlabela, ya fihla Lewatleng la Mediteraniene ka bodikela. Mo gongwe le mo gongwe mo le yago mo nageng yeo, Morena Modimo wa lena o tla dira gore batho ba le boife, bjalo ka ge a le tshephišitše, gomme ga go yo a kago kgona go le thibela. “Lehono ke le fa sebaka sa gore le kgethe tšhegofatšo goba thogako – ke tla le fa tšhegofatšo ge le ka phetha ditaelo tša Morena Modimo wa lena tše ke le fago tšona lehono, eupša thogako e tla le tlela ge le ka se phethe ditaelo tše mme la fapoga le khunamela medimo ye mengwe ye le sego la ka la e khunamela. Ge Morena a le goroša nageng ye le ilego go e thopa, le bege tšhegofatšo yeo le le thabeng ya Gerisime, mme le bege thogako le le thabeng ya Ebale. Dithaba tše pedi tše di ka bodikela bja noka ya Jordane nageng ya Bakanana, bao ba dutšego moeding wa Jordane. Di ka bodikela, kgauswi le mehlare ye mekgethwa ya More ye e bapilego le motse wa Gilgale. Le kgauswi le go tshela noka ya Jordane le go thopa naga ye Morena Modimo wa lena a le fago yona. Ge le e thopile mme le dutše go yona, le hlokomeleng gore le phethe melao le melawana ka moka ye ke le fago yona lehono.” “Še melao le melawana ye le swanetšego go e phetha ge le sa dutše nageng ye Morena, Modimo wa borakgolokhukhu ba lena, a le fago yona gore le e tšee. Nageng ye le e thopilego le senyeng mafelo ka moka ao go ona baditšhaba ba le ba rakilego ba bego ba khunamela medimo ya bona godimo ga dithaba tše telele, godimo ga meboto, le ka fase ga mehlare ye metala. Le phušoleng dialetare tša bona, le pšhatlaganyeng le dikokwane tša bona tša maswika tša borapedi. Le tšhumeng dikota tša bona tša borapedi, le remeng le medimo ya bona ya diswantšho, gore e tle e se ke ya tsoga e khunametšwe gape mo mafelong ao. “Le se ke la khunamela Morena Modimo wa lena ka tsela ye batho ba ba khunamelago medimo ya bona. Mo nageng ya dikgoro tša lena tšohle Morena o tla kgetha felo moo le swanetšego go tla pele ga gagwe mme la mo direla. Moo le dire dihlabelo tša lena tša go tšhungwa ka moka le dihlabelo tša lena tše dingwe, le neele le karolo ya lesome ya lena, dikabelo tša lena, dimpho tše le ennego go di fa Morena, dikabelo tša lena tša boithaopo, le maitšibolo a dikgomo le a dihuswane tša lena. Moo pele ga Morena Modimo wa lena yo a le šegofaditšego, lena le malapa a lena le tla ja la ipshina ka dilo tše botse tše le di šometšego. “Ge nako yeo e fihla le se ke la dira ka moo le bego le dira ka gona. Go fihlela bjale yo mongwe le yo mongwe o be a dira ka moo a ratago ka gona, ka gobane le be le se la tšwe le goroga nageng ye Morena Modimo wa lena a le fago yona, moo le ka dulago ka khutšo. Ge le tshetše noka ya Jordane, le tla dula nageng yeo Morena a le fago yona. O tla dira gore manaba a lena ohle a se sa le tshwenya, mme le tla dula ka khutšo. Felo moo Morena a tlago go kgetha gore a khunamelwe gona ke mo le swanetšego go tliša tšohle tše ke le laetšego tšona: dihlabelo tša lena tša go tšhungwa ka moka le dihlabelo tša lena tše dingwe, karolo ya lesome ya lena, le dikabelo tša lena, le dimpho tše dibotsebotse tšela le ennego go di fa Morena. Le thabeng moo pele ga gagwe gotee le bana ba lena, bahlanka ba lena, le Balefi ba ba dulago metseng ya lena; le gopoleng gore Balefi ga ba tle go arolelwa naga. Le se ke la dira dihlabelo tša lena mo gongwe le mo gongwe moo le ratago; le di direng fela mo Morena a tlago go kgetha nageng ya dikgoro tša lena. Ke fao fela mo le swanetšego go dira dihlabelo tša lena tša go tšhungwa ka moka, le go dira dilo ka moka tše ke le laetšego tšona. “Morena o tla le šegofatša gomme la ba le diruiwa tša go hlaba, la ja nama mo gongwe le mo gongwe mo le dutšego gona. Le ka ja tše ntši ka moo Morena a le fago ka gona. Ka moka ga lena, ba ba hlwekilego le ba ba sego ba hlweka, le ka di ja, ka wona mokgwa woo le bego le tla ja nama ya tshephe goba ya kgama. Eupša le se ke la ja bobete bja tšona; le bo tšholleleng fase bjalo ka meetse. Mafelong ao le dulago go ona le se ke la ja se le se abetšego Morena, e ka ba karolo ya lesome ya mabele a lena, goba ya beine ya lena, goba ya makhura a lena a mohlware, goba maitšibolo a dikgomo le a dihuswane tša lena, goba dimpho tše le ennego go di fa Morena, goba dimpho tša lena tša boithaopo, goba dikabelo tše dingwe. Lena le bana ba lena, gotee le bahlanka ba lena le Balefi ba ba dulago metseng ya lena, le jeleng dikabelo tše pele ga Morena Modimo wa lena fela, lefelong la tirelo le Morena a tlago le kgetha. Gomme moo le thabele tšohle le di dirilego. Le hlokomele gore le se ke la lahla Balefi ge le sa dula nageng ya lena. “Ge Morena Modimo wa lena a katološa naga ya lena bjalo ka ge a le holofeditše, le ka jela nama mo gongwe le mo gongwe mo le nyakago go e jela gona. Ge lefelo leo la tirelo le le kgole le lena, gona nako ye nngwe le ye nngwe ge le nyaka, le ka hlaba dikgomo goba dihuswane tše Morena a le filego tšona mme la ja nama gae, ka moo ke le boditšego ka gona. Yo mongwe le yo mongwe yo a hlwekilego goba yo a sego a hlweka a ka ja nama yeo, ka moo a bego a tla ja nama ya tshephe goba ya kgama. Se le swanetšego go se hlokomela ke gore le se ke la ja nama ye e sa nago le madi, ka gobane bophelo bo mading, mme le se ke la ja bophelo bjo bo lego nameng. Le se ke la ja bobete; le bo tšholleleng fase bjalo ka meetse. Ge le ka phetha taelo ye Morena o tla thaba gomme tšohle di tla le atla, lena le ditlogolo tša lena. Dikabelo tša lena tše kgethwa le dimpho tše le ennego go di fa Morena le di išeng felo ga tirelo moo Morena a tlago go kgetha. Moo le direng dihlabelo tša go tšhungwa ka moka godimo ga aletare ya Morena. Le direng le dihlabelo tšela le jago nama ya tšona, mme la tšhollela madi aletareng. Le botegeleng go phetha tšohle tše ke le laetšego tšona, gomme tšohle di tla le atla, lena le ditlogolo tša lena go ya go ile, ka gobane le tla be le dira se se lokilego, se se kgahlago Morena Modimo wa lena.” “Morena Modimo wa lena o tla fediša ditšhaba tše le yago go di hlasela la di amoga naga, gomme le tla e thopa la dula go yona. Ka morago ga ge Morena a fedišitše ditšhaba tšeo, le hlokomele gore le se ke la latela ditlwaedi tša bona tša sedumedi, ka gobane seo e ka ba go itanya ka molaba. Le se ke la nyakišiša gore ba be ba khunamela medimo ya bona bjang gore le lena le tle le khunamele ka wona mokgwa woo. Le se ke la khunamela Morena Modimo wa lena ka mo ba khunamelago medimo ya bona, ka gobane ge ba khunamela medimo yeo ya bona ba dira dilo tšohle tša bohlola tše Morena a di hloilego. Ba bile ba dira bana ba bona dihlabelo mellong godimo ga dialetare tša bona. “Tšohle tše ke le laetšego tšona le di phethe ka potego; le se ke la di oketša goba la di fokotša. “Moprofeta goba mohlatholledi wa ditoro a ka le tshephiša mohlolo goba semaka, gore a le aroše le khunamele medimo ye le sego la ka la e khunamela, le e direle. Le ge seo a le tshephišago sona se ka direga, le se ke la mo šetša. Morena Modimo wa lena o šomiša yena go le leka, go bona ge eba le rata Morena ka dipelo tša lena ka moka le ka moya wa lena ka moka. Le lateleng Morena mme le mmoifeng. Le mo theetšeng gomme le phetheng ditaelo tša gagwe; le mo direleng mme le mmotegeleng. Moprofeta goba mohlatholledi wa ditoro yo a le botšago gore le tsogele Morena maatla, Morena yo a le phološitšego Egepeta moo le bego le le makgoba, yena le mmolaye. Motho wa mohuta woo ke yo mobe, gomme o leka go le aroša bophelong bjo Morena Modimo wa lena a le laetšego gore le bo phele. O swanetše go bolawa, gore le ikhutše bobe bjo. “Ge morwarrago wa setsiba goba wa letswele, goba morwago, goba morwediago, goba mosadi wa gago, yena moratiwa wa gago, goba mogwerago wa go wa le go tsoga a ka go hlohleletša ka sephiring gore o khunamele medimo ye mengwe ye wena le borakgolokhukhu ba gago le se la kago la e khunamela, medimo ya ditšhaba tše di dulago kgauswi le lena, goba ya tše di dulago kgole le lena, o se ke wa dumela goba wa mo theetša. O se ke wa mo gaugela goba wa mo kwela bohloko, le gona o se ke wa mo šireletša. O mmolaye tho. O be wa pele go mmolaya ka maswika, mme ba bangwe le bona ba mmolaye ka maswika. Le mo kgatleng ka maswika go fihlela a ehwa. O lekile go le aroša go Morena Modimo wa lena yo a le phološitšego Egepeta moo le bego le le makgoba. Ke moo Baisraele ka moka ba tlago di kwa, ba boifa, mme gwa se sa ba le yo a dirago taba ye mpe ya mohuta woo. “Ge le ka re le dutše metseng ye Morena Modimo wa lena a le fago yona, la kwa gore dihwirihwiri tše dingwe tša go tšwa setšhabeng sa lena di arošitše batho ba motse wa gabobona gore ba khunamele medimo ye le sego la ka la e khunamela, le nyakišišeng gabotsebotse, gomme ge e le gore ke therešo gore bokgopo bjoo bo diregile, gona le bolayeng batho ka moka motseng woo gotee le dikgomo tša bona ka moka. Le senyetšeng motse woo sa ruri. Le kgobokanyeng lebaleng la motse dithoto ka moka tša batho ba ba dulago moo. Gomme le tšhume motse le tšohle tše di lego go wona e le kabelo ya Morena Modimo wa lena. Motse o swanetše go tlogelwa e le marope go ya go ile, mme o se ke wa tsoga o tsošološitšwe. Le se ke la ipolokela selo sefe le sefe se se gafetšwego go senywa, gore Morena a se hlwe a le galefetše o šoro, eupša a le gaugele. O tla le kwela bohloko mme a le atiša, ka moo a enetšego borakgolokhukhu ba lena, ge le ka phetha ditaelo tša gagwe ka moka tše ke le fago tšona lehono, mme la dira se a se nyakago.” “Ke lena setšhaba sa Morena Modimo wa lena. Ka gona, ge le ilela bahu, le se ke la iphatša goba la ipoola meriri ya ka godimo ga phatla. Le setšhaba se sekgethwa sa Morena Modimo wa lena; o le kgethile gore le be setšhaba se e lego sa gagwe gare ga ditšhaba ka moka tša lefase.” “Le se ke la ja selo se Morena a begilego gore ke makgapa. Diphoofolo tše le ka di jago: kgomo, nku, pudi, kgama, tshephe, tholo, phala, phalafala, phuthi le letlabo – diphoofolo tše di nago le ditlhako tša mapharo gape di otlago. Eupša go diphoofolo tše di otlago goba di nago ditlhako tša mapharo le ile kamela le mmutla le pela. Tšona le di tšee gore ga tša hlweka; di a otla eupša ga di ne ditlhako tša mapharo. Le ile kolobe, ka gobane le ge e na le ditlhako tša mapharo, ga e otle, mme le e tšee gore ga se ya hlweka Le se ke la ja ye nngwe ya diphoofolo tše, goba la kgwatha ditoto tša tšona. “Diphedi tšohle tša ka meetseng tše di nago le mafegwana le magapi le ka di ja, eupša tšohle tše di se nago mafegwana le magapi le se ke la di ja; le di tšee gore ga se tša hlweka. “Le ka ja nonyana ye nngwe le ye nngwe ye e hlwekilego. Tše le sego la swanela go di ja ke lenong, ntšhu, leaka ka mehuta ya lona, pekwa ka mehuta ya yona, legokobu ka mehuta ya lona, mpšhe, leribiši ka mehuta ya lona, segotšane ka mehuta ya sona, kokolohute, mogole, mašianoke ka mehuta ya yona, kukuku le mmankgaganyane. *** *** *** *** *** *** “Diphedinyana ka moka tše di nago le mafego ga tša hlweka; le se ke la di ja. Le ka ja sephedinyana se sengwe le se sengwe se se hlwekilego. “Le se ke la ja phoofolo ye e ikhwetšego ka boyona. Le ka e fa bafaladi ba ba dulago gare ga lena ba e ja, goba le ka e rekišetša bafaladi ba bangwe. Eupša lena le setšhaba se sekgethwa sa Morena Modimo wa lena. “Le se ke la apea kwanyana goba putšanyane ka maswi a mmagoyona.” “Le beeleng karolo ya lesome thoko – ya lesome ya tšeo mašemo a lena a di ntšhago ngwaga ka ngwaga. Gomme le yeng lefelong leo Morena Modimo wa lena a le kgethilego gore a khunamelwe go lona; mme moo pele ga gagwe le je dikarolo tša lesome tša mabele, tša beine, tša makhura a mohlware, le maitšibolo a dikgomo le a dinku tša lena. Le direng se, gore le tle le ithute go boifa Morena Modimo wa lena ka mehla. Ge le dula kgole mo e lego gore le šitwa ke go rwala dikarolo tša lesome tša tšeo Morena a le šegofaditšego ka tšona la di iša lefelong la tirelo, gona le rekiše ditšweletšwa tšeo tša lena, mme le tšeeng tšhelete ya gona le yeng nayo lefelong leo la tirelo. Ka yona le rekeng se le se nyakago, e ka ba nama ya kgomo, ya sehuswane, beine, goba bjala, mme lena le ba malapa a lena le di jeng moo pele ga Morena Modimo wa lena, le thabeng. “Le se ke la lahla Balefi bao ba dulago metseng ya lena; ga ba na naga ye e lego ya bona. Mafelelong a ngwaga wo mongwe le wo mongwe wa boraro le tlišeng dikarolo tša lesome tša dibjalo tša lena ka moka mme le di bolokeng metseng ya lena. Dijo tšeo ke tša Balefi, ka ge ba se ne naga, le bafaladi le ditšhuana le bahlologadi ba ba dulago metseng ya lena. Ba swanetše ba tle ba tšee tše ba di hlokago. Ge le dira bjalo, Morena Modimo wa lena o tla le šegofatša go tšohle tše le di dirago.” “Mafelelong a ngwaga wo mongwe le wo mongwe wa bošupa le phumoleng melato ya bao le ba adimilego tšhelete. Go dirwe ka mokgwa wo: Yo a adimilego Moisraele wa gabo tšhelete a phumole molato woo; a se ke a leka go tšea tšhelete yeo, ka gobane Morena ka boyena o begile gore molato woo o phumotšwe. Le ka gapeletša bafaladi go buša tše le ba adimilego tšona, eupša ba gabolena bona le ba lese le tše le ba adimilego tšona. “Morena Modimo wa lena o tla le šegofatša nageng ye a le fago yona. Go ka se be le o tee wa batho ba gabolena yo a tlago diila ge le ka mo theeletša, la phetha ka tlhokomelo tšohle tše ke le laelago tšona lehono. Morena o tla le šegofatša, bjalo ka ge a le holofeditše. Le tla adima ditšhaba tše ntši tšhelete, eupša lena le ka se adingwe; le tla laola ditšhaba tše ntši, fela lena ga go setšhaba se se tlago le laola. “Ge Moisraele wa gabolena motseng wo mongwe nageng ye Morena Modimo wa lena a le fago yona a hloka, gona le se ke la thatafatša dipelo la mo tima. Le lokologeng mme le mo adime ka moo a hlokago ka gona. Le se ke la gana go mo adima se sengwe e le fela ka gobane ngwaga wa go phumolwa ga melato o batametše. Le se ke la ba le kgopolo yeo ye mpe. Ge le ka gana go mo adima, o tla lla ka lena go Morena, gomme la rwešwa molato. Le mo feng ka tokologo le ka go hloka bojato, mme Morena o tla le šegofatša go tšohle tše le di dirago. Ka mehla go tla ba le Baisraele ba ba ba diilago, ba hlokago, ka gona ke le laela gore le beng le botho go bona.” “Ge Moisraele wa gabolena, monna goba mosadi, a ithekišitše go wena gore e be lekgoba, o mo lokolle ka morago ga ge a go diretše mengwaga ye e selelago. Ge ngwaga wa bošupa o fihla, o mo lese a sepele a lokologile. Ge o mo lokolla o se ke wa mo lesa a sepela a se a khuparela selo. O mo fe tše ntši go tšeo Morena a go šegofaditšego ka tšona – dihuswane, le mabele le beine. O gopole gore le be le le makgoba kua Egepeta gomme Morena Modimo wa lena a le lokolla, ke ka moo lehono ke go layago ka mokgwa wo. “Fela ge lekgoba la gago le sa nyake go tloga, le go rata, wena le ba lapa la gago, mme a iketlile ka lapeng la gago, gona o mo iše lemating la ngwako wa gago mme moo o mo phule tsebe ka tšhwana e tsenelele lemating; ke gona e tlago ba lekgoba la gago la bophelo ka moka. Le lekgoba la gago la mosadi o le dire ka wona mokgwa woo. O se ke wa tsota ge o lokolla lekgoba; o sa nyakang ka gore o go diretše mengwaga ye e šupago o mo lefa seripa sa mogolo wa mohlanka yo a thwetšwego? Le direng bjalo, gomme Morena Modimo wa lena o tla le šegofatša go tšohle tše le di dirago.” “Le hlaoleleng Morena Modimo wa lena maitšibolo ka moka a matona a dikgomo le a dihuswane; le se ke la šomiša dikgomo tšeo, goba la kota dihuswane tšeo. Ngwaga wo mongwe le wo mongwe lena le ba malapa a lena le di hlabeng, le di jeng pele ga Morena felong ga tirelo. Eupša ge diruiwa tšeo di ka ba le bosodi, ge di golofetše, goba di foufetše, goba di na le bosodi bjo bongwe bjo bogolo, le se ke la direla Morena Modimo wa lena dihlabelo ka tšona. Le ka ja diruiwa tše bjalo gae. Ka moka ga lena, ba ba hlwekilego le ba ba sego ba hlweka, le ka di ja, go no swana le ge le eja tshephe goba kgama. Eupša bobete bja tšona le se ke la bo ja; le bo tšholleleng fase bjalo ka meetse.” “Le hlompheng Morena Modimo wa lena ka go keteka Monyanya wa Paseka ka kgwedi ya Abibi; e be e le bošego kgweding yeo ge a le ntšha Egepeta. Le yeng lefelong la tirelo mme moo le hlabe dihuswane le dikgomo tša Paseka go hlompha Morena Modimo wa lena. Ge le eja dijo tše, le se ke la ja dinkgwa tše di dirilwego ka komelo. Matšatši a a šupago le jeng dinkgwa tše di dirilwego ntle le komelo, ka gobane le ile la swanela go tloga Egepeta ka lephakuphaku. Le jeng dinkgwa tšeo, dinkgwa tša tlaišego, gore ge le sa phela le fele le gopola letšatši lela ka lona le tšwilego Egepeta. Matšatši a a šupago go se be le o tee nageng ya lena yoo go ka hwetšwago komelo ngwakong wa gagwe; le nama ya seruiwa se se hlabilwego mantšiboa a letšatši la mathomo e swanetše go lewa bjona bošegong bjoo. “Le hlabeng diruiwa tša Paseka lefelong la tirelo fela, e sego mo gongwe nageng ye Morena Modimo wa lena a tlago le fa yona. Le di hlabe ge letšatši le dikela, e lego yona nako ye le tlogilego ka yona Egepeta. *** Le di apee, mme le di je lefelong la tirelo; mme mosong wa letšatši le le latelago le boeleng gae. Matšatši a a selelago a a latelago le jeng dinkgwa tše di se nago komelo, gomme ka letšatši la bošupa le phuthegeleng go khunamela Morena Modimo wa lena, mme le se ke la šoma ka letšatši leo.” “Le baleng dibeke tše di šupago go tloga ka nako ye le thomago go buna mabele, mme le keteke Monyanya wa Puno go godiša Morena Modimo wa lena ka go mo tlitšetša kabelo ya boithaopo go ya ka mo a le šegofaditšego ka gona. Le thabeng moo pele ga Morena gotee le bana ba lena, bahlanka ba lena, Balefi, bafaladi, ditšhuana le bahlologadi ba ba dulago metseng ya lena. Le direng seo lefelong la tirelo. Gopolang gore le be le le makgoba Egepeta, ka gona le hlokomeleng gore le phethe ditaelo tše.” “Ka morago ga ge le bunne mabele a lena, le pitlile le diterebe tša lena, le keteke Monyanya wa Mešaša matšatši a a šupago. Le ipshineng ka wona le bana ba lena, bahlanka ba lena, Balefi, bafaladi, ditšhuana le bahlologadi ba ba dulago metseng ya lena. Le hlompheng Morena Modimo wa lena ka go keteka monyanya wo matšatši a a šupago lefelong la tirelo. Le thabeng, ka gobane Morena o le šegofaditše ka puno le ka modiro wa lena. “Banna ka moka ba setšhaba sa lena ba tle go khunamela Morena makga a mararo ka ngwaga lefelong la tirelo: ka Monyanya wa Paseka, ka Monyanya wa Puno, le ka Monyanya wa Mešaša. Monna a se ke a tla go Morena a se a swara selo. Yo mongwe le yo mongwe a tliše mpho ka moo a kgonago ka gona go ya ka mo Morena Modimo wa lena a mo šegofaditšego ka gona.” “Kgorong ye nngwe le ye nngwe ya tše lesome le tše pedi le beeng baahlodi le bahlankedi motseng wo mongwe le wo mongwe wo Morena Modimo wa lena a tlago le fa wona. Banna ba ba swanetše go ahlola batho ntle le go kgetholla. Ba se ke ba hloka toka goba ba kgetholla batho; ba se ke ba amogela tsogolekobong, ka gobane dimpho di foufatša mahlo, ešita le a banna ba bohlale, gomme tša ba dira gore ba phoše ge ba ahlola. Ka mehla le latele toka, yona fela, gore le tle le thope naga ye Morena Modimo wa lena a le fago yona, mme le tle le fele le dutše moo. “Ge le agela Morena Modimo wa lena aletare, le se ke la hloma kota ya borapedi ka thoko. Le kokwane ya borapedi ya leswika le se ke la e aga; Morena o di hloile.” “Le se ke la direla Morena Modimo wa lena sehlabelo ka poo goba ka kwanyana goba ka putšane ye e nago le bosodi bjo bongwenyana; seo e ka ba makgapha go Morena. “Ge le ka kwa gore motseng wo mongwe wa lena monna yo mongwe goba mosadi o dirile sebe pele ga Morena ka go tshela kgwerano ya gagwe ka go khunamela medimo ye mengwe, goba letšatši, goba ngwedi, goba dinaledi, a di direla, a fapana le taelo ya Morena, ge le ka kwa taba ya mohuta woo, le e nyakišišeng gabotsebotse. Ge eba ke therešo gore makgapha a mohuta woo a dirilwe mo nageng ya Israele, gona le tšee motho yoo le mo ntšhetše ka ntle ga motse mme le mmolaye ka maswika. Eupša motho a bolawe fela ka bohlatse bja dihlatse tše pedi goba tše tharo; a se ke a bolawa ka bohlatse bja hlatse e tee fela. Go thome dihlatse go mo kgatla, mme setšhaba ka moka se latele se mo kgatle. Ka tsela ye le ikhutše bobe bjoo. “Ge go ka direga gore melato ye mengwe e be ya go palela baahlodi ba motse, bjalo ka melato ye e fapafapanego ya polao, goba ya ditokelo tša motho, goba ya kgobatšo, le yeng felo ga tirelo, le fihle le botše baprista ba Balefi le moahlodi yo a lego modirong molato wa lena, mme bona ba ahlole molato woo. Ba tla ahlola ka mo ba bonago ka gona, mme le dire ka moo ba le botšago ka gona. Le amogeleng kahlolo ya bona mme le phetheng ditaelo tša bona gabotsebotse. Yo a ka ngangabalago a se theeletše moahlodi goba moprista yo a lego modirong, a bolawe. E be go fediša bobe bjo mo go Baisraele. Ke mo yo mongwe le yo mongwe a tlago kwa ka taba yeo mme a boifa, gwa se be le be le yo a ngangabalelago go dira taba ya mohuta woo.” “Ge le tšere naga ye Morena Modimo wa lena a tlago le fa yona gomme le dutše go yona, le ka nyaka go ba le kgoši bjalo ka ditšhaba ka moka tše di bapilego le lena. Le hlokomeleng gore monna yo le mmeago kgoši ke yena yo Morena a mo kgethilego. E swanetše go ba yo mongwe wa setšhaba sa gabolena; le se ke la bea mofaladi kgoši. Kgoši a se ke a ba le dipere tše ntši, goba a roma batho Egepeta go yo reka dipere tša go oketša tše a nago natšo, ka gobane Morena o itše setšhaba sa gagwe se se ke sa tsoga se boetše fao. Kgoši a se be le basadi ba bantši, gore a se aroge go Morena; le gona a se ke a ikhumiša ka silibera le gauta. Ge e šetše e le kgoši a ingwalollele puku ya melao ya Modimo le ditaelo tša gagwe tše di ngwalolotšwego pukung ya mathomo ye e swerwego ke baprista ba Balefi. A sware puku yeo, a e bale ka mehla bophelo bja gagwe ka moka, gore a tle a ithute go boifa Morena le go phetha ka potego tšohle tše di ngwadilwego ka go yona. Seo se tla mo dira gore a se ke a ikgopola gore o phala Baisraele ba gabo, le gore a se ke a tshela le e tee ya ditaelo tša Morena. Ke moo yena le ditlogolo tša gagwe ba tlago buša naga ya Israele nako ye telele.” “Kgoro ya boprista ya Lefi e se ke ya fiwa karolo ya naga bjalo ka Baisraele ba bangwe. Ba swanetše go phela ka dikabelo le dihlabelo tše dingwe tše di fiwago Morena. Ba se ke ba ba le naga bjalo ka dikgoro tše dingwe; sa bona ke go ba baprista ba Morena, ka moo Morena a ba tshephišitšego ka gona. “Ge motho a dira sehlabelo ka poo, goba ka kwanyana, goba ka putšane, baprista ba fiwe legetla, le mehlagare ya ka fase, le mogodu. Ba fiwe karolo ya mathomo ya mabele, ya beine, ya makhura a mohlware, le ya boya bja nku. Dikgorong tša lena ka moka Morena o kgethile kgoro ya Lefi gore yona le ditlogolo tša yona di mo hlankele e le baprista go ya go ile. “Molefi yo mongwe le yo mongwe ge a rata a ka tloga motseng wa gabo mo nageng ya Israele a tla felo ga tirelo, gomme a direla moo e le moprista wa Morena Modimo wa gagwe, go swana le Balefi ba ba direlago moo. O swanetše go fiwa dijo tše di lekanago le tša bapristakayena, go sa lebelelwe bontši bja bohwa bja gagwe.” “Ge le gorogile nageng ye Morena Modimo wa lena a le fago yona, le se ke la latela mekgwa ya bohlola ya ditšhaba tše di lego fao. Go se be le yo a dirago sehlabelo ka morwagwe goba morwediagwe mollong, goba yo a dirišago ditaola, goba bodupe, goba bonoge, goba boloi, goba meupo, goba malopo, goba wa badimo. Morena Modimo wa lena o hloile batho ba ba dirago dilo tše tša bohlola, mme ke ka baka leo a lelekago ditšhaba tšeo nageng yeo ge le goroga. Le botegeleng Morena Modimo wa lena ka dipelo tša lena ka moka.” “Ditšhaba tše le tlago di raka nageng ya tšona di latela dikeletšo tša didupe le bao ba dirišago ditaola, eupša lena Morena Modimo wa lena ga a le dumelele go dira tše bjalo. Lena, o tla le romela moprofeta yo a swanago le nna a etšwa setšhabeng sa gabolena, mme yena le swanetše go mo theeletša. “Mohlang wola le bokane thabeng ya Sinai le ile la kgopela gore ga le sa nyaka go kwa Morena a bolela, goba go hlwa go sa bona mollo wo mogolo woo, ka gobane le be le boifa gore le tla hwa. Ka gona Morena a re go nna: ‘Se ba se kgopetšego ke se sebotse. Ke tla ba romela moprofeta yo a swanago le wena a etšwa setšhabeng sa gabobona. Ke tla mmotša se a swanetšego go se bolela, mme o tla ba botša tšohle tše ke ba laelago tšona. O tla bolela ka leina la ka, mme ke tla otla yo mongwe le yo mongwe yo a ganago go mo theetša. Eupša ge moprofeta yo mongwe a ka ba le sebete sa go bolela se sengwe ka leina la ka mola ke se ka mo laela go se bolela, a bolaelwe taba yeo, mme ka wona mokgwa woo moprofeta yo mongwe le yo mongwe yo a bolelago se sengwe ka leina la medimo ye mengwe, le yena a bolawe.’ “Le ka ipotšiša gore le tla tseba bjang ge eba molaetša wa moprofeta ga o tšwe go Morena. Ge moprofeta a bolela se sengwe ka leina la Morena mme se a se bolelago sa se ke sa direga, gona ga se molaetša wa Morena. Moprofeta yoo o boletše ka boyena, gomme ga le a swanela go mo tšhaba.” “Ge Morena Modimo wa lena a fedišitše ditšhaba tšeo a le fago naga ya tšona, gomme le tšere metse ya bona le mengwako mme le dutše fao, le aroleng naga yeo dilete tše tharo, seleteng se sengwe le se sengwe go be le motse wo motho yo a bolailego yo mongwe a ka tšhabelago go wona gabonolo. *** Ge motho a ka bolaya yo mongwe ka phošo e se lenaba la gagwe, a ka tšhabela go wo mongwe wa metse ye mme a bolokega. Mohlala šo: Ge banna ba babedi ba ka ya sethokgweng mmogo go yo rema mehlare, mme ya re ge yo mongwe wa bona a rema mohlare, selepe sa tshwamoga mphenyeng mme sa bolaya yo mongwe yola, motho yoo a ka tšhabela go wo mongwe wa metse ye meraro ye mme a bolokega. Ge go ka ba le motse o tee fela, mohlomongwe tsela ya go ya moo e ka ba ye telele kudu, gomme wabo yo a nago le boikarabelo bja go lefeletša polao yeo a ka mo swara tseleng, mme ka go befelwa a bolaya motho yola a se nago molato. Gabotsebotse ke kotsi fela ge a bolaile motho yo e bego e se lenaba la gagwe. Ke ka baka leo ke le laelago gore le beeleng metse ye meraro thoko. “Ge Morena Modimo wa lena a katološa naga ya lena bjalo ka ge a enetše borakgolokhukhu ba lena gore o tla e katološa, gomme a le file naga ka moka ye a ba tshephišitšego yona, gona le kgetheng metse ye mengwe ye meraro gape. O tla le fa naga ye ge le ka dira tšohle tše ke le laelago tšona lehono, le gona la rata Morena Modimo wa lena mme la phela go ya ka ditaelo tša gagwe. Le direng bjalo gore batho ba ba se nago molato ba se ke ba hwa, le gore le se be le molato wa go ba bolaya nageng ye Morena a le fago yona. “Fela ge motho a ka bolaya lenaba la gagwe ka boomo le ka maikemišetšo, gomme a tšhabela go wo mongwe wa metse ye, baetapele ba motse wa gabo ba mo tšee ba mo gafele wabo yo a nago le boikarabelo bja go lefeletša polao yeo, gore a tle a bolawe. Le se ke la mo gaugela, gobane mo go Baisraele motho ga se a swanela go bolawa a se na molato. Seo le se direle gore tšohle di tle di le atle.” “O se ke wa ikokoletša karolo ya gago ya naga ka go šuthiša mollwane wa moagišani wa gago woo o hlomilwego kgale nageng ye Morena Modimo wa gago a tlago le fa yona. “Hlatse e tee ga ya lekana go rweša motho molato; bonnyane e be dihlatse tše pedi tše di hlatselago gore motho o na le molato. Ge motho a ka leka go kweša yo mongwe bohloko ka go mo rweša molato ka boomo, bobedi bja bona ba swanetše go ya lefelong la tirelo gomme ba ahlolwe ke baprista le baahlodi ba ba ahlolago ka nako yeo. Baahlodi ba lebeledišiše molato woo gabotse; gomme ge motho yoo a pharile Moisraele yo mongwe yoo wa gabo ka molato, o swanetše go otlwa ka kotlo yeo motho yoo a pharilwego ka molato a bego a tla otlwa ka yona. Ka tsela ye le ikhutše bobe bjoo. Ke moo ba bangwe ba tlago re go di kwa ba boifa, gomme ga go yoo a tlago tsoga a dirile taba ye mpe ya mohuta woo gape. Melatong ya mohuta woo le se ke la gaugela motho le gannyane; kotlo e be bophelo ka bophelo, leihlo ka leihlo, leino ka leino, seatla ka seatla, le lenao ka lenao.” “Ge le eya ntweng go yo lwa le manaba a lena mme la bona dikoloi tša ntwa le dipere le madira a a le fetago, le se ke la ba boifa. Morena Modimo wa lena yo a le ntšhitšego Egepeta o tla ba le lena. Pele ga ge le thoma go lwa, moprista a tle ka pele gomme a re go madira: ‘Lena banna ba Israele, theetšang! Lehono le tsena ntweng. Le se ke la boifa manaba a lena, goba la nolega moko, goba la tlalelwa. Morena Modimo wa lena o ya le lena, mme o tla dira gore le fenye.’ “Gomme balaodi ba bolele le banna ba re: ‘A mo go na le yo a sa tšogo aga ngwako, gomme a sego a tšwa a o kgakola? Ge eba o gona, a a boele gae, ka gore ge a ka bolawa ntweng, yo mongwe o tla kgakola ngwako wa gagwe. A go na le yo a sa tšogo lema serapa sa merara, fela a sego a ka a ba le sebaka sa go buna diterebe tša sona? Ge eba o gona, a a boele gae, ka gore ge a ka bolawa ntweng, yo mongwe o tla loma dienywa tša sona. A go na le mo yo a beeleditšego mosadi? Ge eba o gona, a a boele gae, ka gore ge a ka bolawa ntweng, yo mongwe o tla nyala mosadi yola a mmeeleditšego.’ “Balaodi ba iše pele ba re go bona: ‘A go na le yo a boifago gape a nolegilego moko? Ge eba o gona, a a boele gae, ka gore o tla nola ba bangwe moko.’ Ge balaodi ba feditše go bolela le madira, go kgethwe baetapele ba sekgao se sengwe le se sengwe. “Ge le eya go hlasela motse, sa pele le feng batho ba wona sebaka sa go ineela. Ge ba ka bula dikgoro tša motse gomme ba ineela, ka moka e swanetše go ba makgoba a lena mme ba le direle mediro ka kgapeletšo. Eupša ge batho ba motse woo ba sa nyake go ineela, ba ikgethela go hlabana, le o dikanetše ka madira a lena. Ge Morena Modimo wa lena a ka le kgontšha go o thopa, le bolayeng banna ka moka go wona. Fela le ka itšeela basadi, bana, diruiwa le se sengwe le se sengwe motseng woo. Le ka šomiša tšohle tše e lego tša manaba a lena. Morena o le file tšona. Ke ka moo le swanetšego go dira metse yeo e lego kgolekgole le naga ye le tlago dula go yona. “Eupša ge le thopa metse nageng ye Morena Modimo wa lena a le fago yona, le bolayeng se sengwe le se sengwe se se phelago. Le fediše batho taa: Bahete, Baamore, Bakanana, Baperise, Bahibe le Bajebuse, bjalo ka ge Morena a le laetše. Le ba bolayeng, gore ba se ke ba tla ba le diriša sebe pele ga Morena Modimo wa lena go le ruta gore le dire dilo tša bohlola ka moka tše ba di dirago tirelong ya medimo ya bona. “Ge le hlasela motse gore le o thope, le se ke la rema mehlare ya wona ya dienywa, le ge go dikanetša motse moo go ka tšea nako ye telele. Le jeng dienywa, fela le se ke la senya mehlare yeo; yona ga se manaba a lena. Le ka rema mehlare ye mengwe ye e sego ya dienywa mme la šomiša yona go aga tše madira a tlago di namela ge a hlasela motse go fihlela o thopiwa.” “Ge motho a ka hwetšwa a bolailwe nageng mo lefaseng le Morena Modimo wa lena a yago go le fa lona, gomme la se tsebe gore o bolailwe ke mang, baetapele ba lena le baahlodi ba tšwe mme ba ye ba ele bokgole bja go tloga moo setopo se hweditšwego gona go ya motseng wo mongwe le wo mongwe wa kgauswi le felo fao. Baetapele ba motse wo o lego kgauswikgauswi le moo setopo seo se hweditšwego gona ba kgethe kgomo ya sethojana ye e sego ya ka ya panwa. Ba e theošetše kgauswi le nokana ye e sa pšhego, moo mobu o sego wa ka wa lengwa goba wa bjalwa, gomme moo ba e robe molala. Baprista ba Balefi le bona ba ye gona, ka gobane ba swanetše go ahlola molato wo mongwe le wo mongwe wo go wona go bilego ntwa le go tšholla madi. Morena Modimo wa lena o ba kgethile gore ba mo direle, ba be ba šegofatše ka leina la gagwe. Ka morago baetapele ka moka ba motse wo o lego kgauswikgauswi le moo setopo se hweditšwego gona ba hlapele diatla godimo ga kgomo yeo ba re: ‘Motho yo ga se a bolawa ke rena, ebile ga re tsebe gore o bolailwe ke mang. Morena, lebalela setšhaba sa gago sa Israele se o se phološitšego Egepeta. Re lebalele mme o se ke wa re fega molato polaong ye ya motho yo a se nago molato.’ Ka fao, ka ge le dirile se Morena a se nyakago, le ka se fegwe molato polaong yeo.” “Ge Morena Modimo wa lena a le kgontšhitše go fenya ntweng mme la tšea mathopša, gomme mo gare ga ona yo mongwe wa lena a bona mosadi yo mobotse yo a mo kganyogago mme a nyakago go mo nyala, a mo iše lapeng la gagwe mme moo mosadi a ipoole hlogo, a ithipe dinala, a apole diaparo tše a thopilwego ka tšona, gomme a apare tše dingwe. A dule lapeng la gagwe gomme a llele batswadi ba gagwe kgwedi ka moka; ka morago ga moo a ka mo nyala, a robala naye. Mme ere ge a se sa mo kgahla, a mo lokolle, a mo lese a ikele mo a ratago. Ka ge monna yoo a mo gobošitše ka go mo gapeletša nyalo, a se ke a mo swara bjalo ka lekgoba, goba a mo rekiša.” “Ge monna a na le basadi ba babedi gomme bobedi bja bona ba mmelegela barwa, fela morwa wa pele ya se be ngwana wa mosadi wa mmamoratwe, ge monna yoo a arolela bana ba gagwe thoto ya gagwe, a se ke a kgetholla morwa wa mmamoratwe ka go mo fa karolo ye e lebanego morwa wa pele wa mosadi yo a sa ratwego. O swanetše go fa morwa wa gagwe wa pele karolo ya dithoto tša gagwe gabedi, le ge e se morwa wa mmamoratwe. Monna yoo o swanetše go tseba morwa wa gagwe wa mathomo gomme a mo fe karolo yeo e lego ya gagwe ka molao.” “Ge monna a na le morwa wa senganga yo a mo tsogelago maatla, morwa yo a sa theeletšego batswadi ba gagwe le ge ba mo kgala, batswadi ba gagwe ba mo iše kgorong go baetapele ba motse wa gabobona. Ba botše baetapele ba re: ‘Morwa wa rena o ngangabetše, o re tsogela maatla, gomme o gana go re theeletša; o senya tšhelete ebile ke letagwa.’ Banna ba motse ba mmolaye ka maswika, mme ka go dira bjalo le ikhutše bobe bjo. Yo mongwe le yo mongwe mo nageng ya Israele o tla kwa se se diregilego mme a boifa.” “Ge motho a obile molato mo a lebanego ke kotlo ya lehu, mme a bolawa a lekeleditšwe koteng, setopo sa gagwe se se ke sa lala moo. O swanetše go bolokwa ka lona letšatši leo, ka gobane setopo se se fegilwego koteng se rogakilwe ke Morena. Le bolokeng setopo seo gore le se ke la kgotlela naga ye Morena Modimo wa lena a le fago yona. “Ge o ka bona seruiwa sa Moisraele wa geno se timela, o se ke wa se hlokomologa; se boetše go yena. Eupša ge mong wa sona a dula kgole, goba o sa tsebe gore ke sa mang, gona o ye naso gae. Ge mong wa sona a etla a se nyaka, o mo neele sona. O dire bjalo le ge o ka hwetša pokolo, goba seaparo, goba se sengwe le se sengwe se Moisraele wa geno a ka bago a se timeditše. “Ge o ka bona pokolo goba kgomo ya Moisraele wa geno e wele fase, o se ke wa e hlokomologa; o mo thuše le tsoše phoofolo yeo. “Basadi ba se ke ba apara diaparo tša banna, le banna ba se ke ba apara diaparo tša basadi, ka gobane Morena Modimo wa lena o hlaswa batho ba ba dirago tše bjalo. “Ge o ka hwetša sehlaga sa nonyana mohlareng goba fase le tshadi ya ntshe e alametše mae goba mafotwana, o se ke wa tšea nonyana yeo. O ka tšea mafotwana, eupša nonyana o e lese e itshepelele, gore o tle o phele bophelo bjo botelele bja katlego. “Ge o aga ngwako wo mofsa, o raretše magomo a tlhaka ka mmotwana, ke moo o ka se bego le molato ge motho a ka wa mme a hwa. “O se ke wa bjala sebjalo se sengwe serapeng se o se bjetšego merara, gore o se tlo iletšwa diterebe le dibjalo tšeo tše dingwe. “O se ke wa pana pholo le pokolo gotee wa lema ka tšona. “O se ke wa apara seaparo se se dirilwego ka go logaganya boya bja nku le leokodi. “O rokelele mašaphu dikhutlong tše nne tša diaparo tša gago.” “Ge monna a ka nyala mosadi a robala naye, ka morago a re yena ga a sa mo nyaka, ka gona a mo phara ka melato ya maaka, a re o be a kile a robala le monna yo mongwe pele ba nyalana, batswadi ba kgarebe yeo ba tšee lešela le le nago le madi leo monna yoo a robetšego le kgarebe yeo go lona ge ba sa tšo nyalana, leo le laetšago gore kgarebe yeo e be e se ya ka ya robala le monna, mme ba le tliše kgorong pele ga baetapele ba motse. Tatagokgarebe a re go bona: ‘Ke neetše monna yo morwedi wa ka ya ba mosadi wa gagwe, mme bjale ga a sa mo nyaka. O mo pharile ka melato ya maaka, a re o be a kile a robala le monna pele yena a mo nyala. Fela bohlatse šebo bja gore morwedi wa ka o be a se a ka a robala le monna; lebelelang lešela le la madi le ba robetšego go lona ge ba seno nyalana!’ Baetapele ba motse ba tšee monna yoo ba mo itie. Ba be ba mo lefiše dipapetlana tša silibera tše lekgolo mme ba di neele tatagokgarebe, ka gobane monna yoo o gobošitše kgarebe ya Moisraele. Go feta moo kgarebe yeo e fele e le mosadi wa gagwe; a se ke a tsoga a mo hladile ge a sa phela. “Eupša ge taba yeo e le therešo gomme go se bohlatse bja gore kgarebe yeo e be e se ya ka ya robala le monna, gona ba swanetše go ntšhetša kgarebe yeo ntle mojakong wa ngwako wa tatagoyona, moo banna ba motse wa gabo ba mmolaye ka maswika. O dirile taba ya go leša dihlong gare ga batho ba gaborena ka go robala le monna ka ngwakong wa tatagwe mola a se a nyalwa. Ka tsela ye le ikhutše bobe bjo. “Ge monna a ka swarwa a robetše le mosadi wa monna yo mongwe, bobedi bja bona ba swanetše go bolawa. Ka tsela ye le ikhutše bobe bjo. “Ge monna a ka swarwa ka motseng a robetše le kgarebe ye e beeleditšwego ke monna yo mongwe, bobedi bja bona le ba iše kgorong ya motse, le ba bolaye ka maswika. Kgarebe e bolawe ka gobane e se ya ka ya hlaba mokgoši ya nyaka thušo le ge e be e le ka motseng moo e ka bego e kwelwe. Mme monna yoo yena a bolawe ka gobane a gobošitše mosadi wa Moisraele wa gabo. Ka tsela ye le ikhutše bobe bjo. “Ge monna a ka kata kgarebe kua nageng mola kgarebe yeo e beeleditšwe ke monna yo mongwe, gona go bolawe monna yoo fela; kgarebe e se ke ya dirwa selo, ka gobane ga se ya dira sebe se a swanetšego go bolaelwa sona. Molato wo o swana le wa ge monna yo mongwe a ka hlasela yo mongwe mme a mmolaya. Monna yoo o katile kgarebe kua nageng mola e beeleditšwe, mme le ge e be e lla e nyaka thušo, e hlokile wa go e thuša. “Ge monna a ka swarwa a kata kgarebe ye e sego ya beeletšwa, a lefe tatagokgarebe magadi ka dipapetlana tša silibera tše masome a a fetšago seatla, mme kgarebe yeo e be mosadi wa gagwe, ka gobane o mo gobošitše. A se ke a tsoga a mo hladile ge a sa phela. “Monna a se ke a goboša tatagwe ka go robala le yo mongwe wa basadi ba tatagwe.” “Monna yo a kgatletšwego goba yo a ripegilego bopele a se ke a balwa le setšhaba sa Morena. “Lehlakanasela goba yo mongwe wa ditlogolo tša lona, le wa moloko wa lesome, a se ke a balwa le setšhaba sa Morena. “Moamone goba Momoaba, goba yo mongwe wa ditlogolo tša bona, le wa moloko wa lesome, a se ke a balwa le setšhaba sa Morena. Ba ganne go le fa dijo le meetse ge le be le le tseleng ya go tšwa Egepeta, le gona ba ile ba thwala Bileamo, morwa wa Beore, wa motse wa Petore kua Mesopotamia, gore a le rogake. Fela Morena Modimo wa lena a se ke a theetša Bileamo, eupša a fetoša thogako yeo tšhegofatšo, ka gobane o be a le rata. Ge le sa phela le se ke la tsoga le dirile selo go thuša ditšhaba tše, goba go di humiša. “Le se ke la nyatša Baedomo; ke bomorwarragolena; le Baegepeta le se ke la nyatša; le kile la dula nageng ya bona. Go tloga go moloko wa boraro go iša pele ditlogolo tša bona di ka balwa le setšhaba sa Morena.” “Ge le hlomile mešaša nakong ya ntwa, le swanetše go tšhabana le se sengwe le se sengwe se se ka le tšhilafatšago. Ge monna a ka tšhilafala ka gobane a lorile mme a ntšha matšhedi bošego, o swanetše go tšwa mešašeng mme a dule ka ntle ga yona. Mathapama a hlape, gomme ge letšatši le diketše a ka boa mešašeng. “Le swanetše go ba le lefelo ka ntle ga mešaša moo le ka yago gona ge le nyaka go ithoma. Gare ga ditlabakelo tše le di swerego go be le phata gore, ge le eya go ithoma, le epe molete ka yona mme le phušetše mantle. Ka mehla mešaša ya lena e swanetše go fele e hlweketše tirelo, ka gobane Morena Modimo wa lena o na le lena mešašeng ya lena go le šireletša le go le dira gore le fenye manaba a lena. Morena a se ke a bona ditšhila mešašeng ya lena, gomme a le furalela.” “Ge lekgoba le ka tšhaba go mong wa lona gomme la tla go lena gore le le šireletše, le se ke la le boetša morago. Lekgoba leo le ka dula go wo mongwe wa metse ya lena wo lona le o kgethago, gomme le se ke la le hlakiša. “Moisraele, monna goba mosadi, e se ke ya ba segwebakathobalo sa tempele. Le gona, tšhelete ye e hweditšwego ka tsela ye e se ke ya tlišwa ngwakong wa Morena Modimo wa lena go phethagatša keno. Morena o hloile digwebakathobalo tša tempele. “Ge le adima Baisraele ba gabolena tšhelete, goba dijo, goba selo sefe le sefe, le se ke la ba tsoma mašokotšo. Le ka tsoma mašokotšo go bafaladi, eupša Baisraele ba gabolena le se ke la ba tsoma ona. Le phetheng taelo ye, gomme Morena Modimo wa lena o tla šegofatša tšohle tše le di dirago nageng ye le yago go e thopa. “Ge le enetše Morena Modimo wa lena, le se ke la tshela keno ya lena; Morena o tla nyaka gore le phethe keno yeo, gomme ke sebe go se e phethe. Ga se sebe go se enele Morena, eupša ge o ka ena ka go ithatela, o hlokomele gore o phethe keno yeo. “Ge o sepela ka tsela ye e putlago serapa sa merara sa Moisraele wa geno, o ka ja diterebe ka moo o nyakago ka gona, eupša o se ke wa duta selo ka ntlatlana. Ge o sepela ka tsela ye e putlago tšhemong ya mabele ya Moisraele wa geno, o ka ja magollelo ka moka ao o ka a thaolago ka diatla, eupša o se ke wa ripa mabele ka sekele.” “Ge monna a ka nyala mosadi mme ka morago a kwa a se sa mo nyaka, ka gobane a lemogile se sengwe go yena se se lešago dihlong, a ngwale lengwalo la tlhalo, a le fe mosadi yoo, gomme a mo rake lapeng la gagwe. Bjale ge mosadi yoo a ka nyalwa ke monna yo mongwe, gomme le yena monna yoo a kwa a se sa mo rata, le yena a ngwale lengwalo la tlhalo, a mo fe lona, mme a mo rake lapeng la gagwe, goba le yena monna yoo wa bobedi a hwa, gona monna yola wa gagwe wa pele a se ke a mo nyala gape; o swanetše go mo tšea gore o kgotletšwe. Ge a ka mo nyala gape, taba yeo e tla ba makgapha go Morena. Le se ke la dira sebe sa go šiiša ka tsela yeo nageng ye Morena Modimo wa lena a le fago yona.” “Ge monna a sa tšo nyala, a se ke a išwa ntweng goba mošomong ofe le ofe wa setšhaba; a khutšišwe modirong ngwaga o tee, gore a tle a kgone go dula gae mme a thabiše mosadi wa gagwe. “Ge o adima motho selo, a se ke a se beeletša ka tšhilo le lwala, le ge e le tšhilo fela, ka gore o tla be o tšeela ba lapa la gagwe dilo tša bona tša go iphediša. “Yo a ka utswago Moisraele wa gabo mme a mo swara gampe, goba a mo rekiša gore e be lekgoba, a bolawe. Ka go dira bjalo le ikhutše bobe bjo. “Ge o swerwe ke bolwetši bja letlalo bja go go tšhilafatša, o hlokomele go dira ka moo baprista ba Balefi ba go botšago ka gona; o phethe ditaelo tše ke ba filego tšona. Le gopoleng seo Morena Modimo wa lena a se dirilego Miriamo tseleng ge le etšwa Egepeta. “Ge o adima motho selo, o se ke wa tsena ngwakong wa gagwe go yo tšea kobo ye a beeletšago molato woo ka yona; o eme ka ntle mme a go tlišetše kobo yeo ka boyena. Ge e le modiidi o se ke wa robala le yona; o e boetše go yena ge letšatši le dikela, gore a tle a kgone go robala ka yona. Ke moo a tlago go leboga, mme wena wa ba o dirile se Morena Modimo wa gago a bonago e le toka. “O se ke wa pata mohlanka yo o mo thwetšego wa modiidi, wa mohloki, e ka ba Moisraele wa geno, goba mofaladi yo a dulago go wo mongwe wa metse ya lena. Letšatši le lengwe le le lengwe pele ga ge letšatši le dikela o mo lefe, ka ge a dirile mošomo wa letšatši leo; ke modiidi mme o hloka tšhelete. Ge o ka se mo lefe, o tla llela go Morena ka baka la gago, mme wena o tla ba le molato wa sebe. “Batswadi ba se bolaelwe melato ye e obilwego ke bana ba bona, le bana ba se bolaelwe melato ye e obilwego ke batswadi ba bona; motho a bolaelwe fela molato wo o obilego ke yena mong. “O se ke wa amoga mofaladi le tšhuana ditokelo tša bona, goba wa tšea seaparo sa mohlologadi ya ba peeletšo ya se a se adimilego go wena. O gopole gore o be o le lekgoba Egepeta, le gore Morena Modimo wa gago o ile a go lokolla; ke ka fao ke go fago taelo ye. “Ge o ka re o buna wa lebala ngata mašemong, o se ke wa boela morago go yo e tšea; e swanetše go tlogelelwa bafaladi le ditšhuana le bahlologadi, gore Morena Modimo wa gago a tle a go šegofatše go tšohle tše o di dirago. Ge o hlohlorile dienywa tša mehlware ya gago, o se ke wa boela go yo budutša tšeo di ka bago di sa šetše mehlareng; ke tša bafaladi le ditšhuana le bahlologadi. Ge o futše diterebe tša merara ya gago, o se ke wa boela go yo budutša tšeo di šetšego; ke tša bafaladi le ditšhuana le bahlologadi. O se ke wa lebala gore o be o le lekgoba Egepeta; ke ka baka leo ke go fago taelo ye. “Ge Baisraele ba babedi ba ka išana kgorong go yo sekišwa, mme yo mongwe a se bonwe molato mola yo mongwe a bonwa molato, ge wa molato a ahloletšwe go itiwa, moahlodi o swanetše go mo patlamiša mme a dire gore a otlwe ka kgati pele ga gagwe. Palo ya dikgati e ye ka molato wo a o obilego. A ka otlwa dikgati tše masome a mane, eupša e sego go feta fao; go feta fao e ka ba go mo kokobetša phatlalatša. “O se ke wa tlema pholo molomo ge o fola mabele ka yona.” “Ge barwa ba motho ba agile felo gotee mme yo mongwe wa bona a hwa a se ne morwa, gona mosadi wa gagwe a se ke a nyalwa ke yo mongwe yo e sego wa lapa leo; ke tshwanelo ya morwarragomohu go tsenela mosadi yoo. Morwa wa mathomo yo ba mmelegago a tšewe gore ke morwa wa mohu yola, gore lešika la lapa la gagwe le se timelele mo go Baisraele. Eupša ge morwarragomohu a sa nyake go tsenela mosadi yoo, mosadi o swanetše go ya go bagolo kgorong ya motse mme a re: ‘Morwarragomogatšake ga a nyake go phetha tshwanelo ya gagwe; o gana go tsoša lapa la morwarragwe gare ga Baisraele.’ Ke moo bagolo ba motse ba swanetšego go bitša monna yoo mme ba boledišane le yena. Ge a ka fela a sa gana go mo tsenela, gona mohlologadi yoo wa morwarragwe a ye go yena moo pele ga bagolo bao ba motse, a mo role seeta mme a mo tshwele ka mare sefahlegong, a re: ‘Se ke se se hlagelago monna yo a ganago go tsošetša morwarragwe lapa.’ Lapa la monna yoo le tsebje mo go Baisraele e le ‘lapa la morolwaseeta’.” “Ge banna ba babedi ba elwa gomme mosadi wa yo mongwe wa bona a leka go thuša monna wa gagwe ka go swara monna yo mongwe yoo ka mapele, le se ke la šokela mosadi yoo; le mo ripe seatla. “Le se ke la hlalefetšana ge le šomiša dikeloboima le dikelo. *** Le šomiše dikeloboima le dikelo tša mmakgonthe tše di tshephegago, gore le tle le phele nako ye telele nageng ye Morena Modimo wa lena a le fago yona. Morena o hlaswa batho ba ba hlalefetšago.” “Gopolang seo Baamaleke ba le dirilego sona ge le be le etšwa Egepeta. Ba ile ba se ke ba boifa Modimo, mme ba le hlasela ka nthago ge le be le lapile le se na le maatla, mme ba bolaya bohle ba ba bego ba ikgoga ka morago. Ka gona, ge Morena Modimo wa lena a le file naga yeo mme a le khutšišitše manaba ka moka ao a bapilego le lena, le boneng gore le bolaye Baamaleke ka moka, gore go se ke gwa ba le motho yo a ka hlwago a sa ba gopola. Le se ke la lebala!” “Ge le thopile naga ye Morena Modimo wa lena a le fago yona mme le dutše go yona, motho a tšee dithakangwaga tše dingwe tša dibjalo tšohle tše a di bunnego a di nokele ka serotong, mme a di iše lefelong la tirelo le Morena a le kgethilego. A ye go moprista yo a lego modirong ka nako yeo mme a re go yena: ‘Bjale ke begela Morena Modimo wa gago gore ke tsene nageng ye a enetšego borakgolokhukhu ba rena gore o tla re fa yona.’ “Moprista a tšee seroto go yena, mme a se bee pele ga aletare ya Morena Modimo wa motlišadithakangwaga yoo. Mme moo pele ga Morena yena a bolele mantšu a: ‘Rakgolokhukhu wa ka e be e le Moaramo yo a ralalago. O ile a falaletša lapa la gagwe Egepeta. Ba be ba se nene ge ba eya moo, eupša e ile ya ba setšhaba se segolo se maatla. Baegepeta ba ile ba re swara gampe, ba re gatelela mme ba re gapeletša go šoma sekgoba. Ka gona ra llela Morena, Modimo wa borakgolokhukhu ba rena. Yena a re kwa mme a bona go tlaišega ga rena le mathata a rena le go šokiša ga rena. Ka maatla a gagwe a magolo le go tia ga gagwe a re ntšha Egepeta. O ile a dira mehlolo le dimakatšo, le dilo tše di tšhošago. O re tlišitše mo mme a re fa naga ye ya mokhora le monono. Bjale šemo, ke tliša go Morena dithakangwaga tše dingwe tša puno ye a mphilego yona.’ “Ka morago ga moo a bee seroto fase pele ga Morena mme a mo obamele fao. A thabele dilo tše botse tše Morena Modimo wa gagwe a filego yena le lapa la gagwe; mme Balefi le bafaladi bao ba dulago gare ga lena le bona ba thabe le yena. “Ngwaga wo mongwe le wo mongwe wa boraro ke ngwaga wa karolo ya lesome. Ka ngwaga woo o ntšhe karolo ya lesome ya dibjalo tša gago, o e fe Balefi, bafaladi, ditšhuana le bahlologadi, gore motseng wo mongwe le wo mongwe ba tle ba be le tšohle tše ba di hlokago tša go ja. Ge le dirile seo, le re go Morena: ‘Ke ntšhitše karolo yela ye kgethwa ka lapeng la ka ka e fa Balefi, bafaladi, ditšhuana le bahlologadi, ka moo o ntaetšego ka gona. Ga se ka tshela goba ka lebala ye nngwe ya ditaelo tša gago mabapi le karolo ya lesome. Ga se ka ja se sengwe sa yona ke iletše; ga se ka ntšha se sengwe sa yona ngwakong wa ka ke tšhilafetše; ebile ga se ka dira se sengwe sa yona sedimo. Ke go theeleditše, Morena Modimo wa ka; ke dirile tšohle tše o ntaetšego tšona mabapi le karolo ya lesome. Okamela fase o le lefelong la gago le lekgethwa legodimong gomme o šegofatše setšhaba sa gago sa Israele; o šegofatše le naga ye ya mokhora le monono ye o re filego yona, bjalo ka ge o e enetše borakgolokhukhu ba rena.’ “Lehono Morena Modimo wa lena o le laela gore le phethe melao le melawana ya gagwe ka moka; ka gona le e phethe ka go e botegela ka dipelo tša lena ka moka le ka moya wa lena ka moka. Lehono le dumetše gore Morena ke Modimo wa lena; le tshephišitše gore le tla mo theeletša, le tla phetha melao ya gagwe ka moka, le gore le tla dira tšohle tše a le laelago tšona. Lehono Morena o le tšere gore le setšhaba se e lego sa gagwe, ka moo a le holofeditšego, gomme o le laela gore le phethe melao ya gagwe ka moka. Ditšhaba ka moka tše a di bopilego o tla dira gore le di fete ka maatla, mme le tla mo tumiša la mo godiša. Le tla ba setšhaba se sekgethwa sa Morena, bjalo ka ge a le holofeditše.” Moshe a bolela le setšhaba sa Israele a na le baetapele ba sona a re: “Le phethe ditaelo ka moka tše ke le fago tšona lehono. Mohla le tshela noka ya Jordane le tsena nageng ye Morena Modimo wa lena a le fago yona, le tseme matlapa a magolo, le a tlotše ka motaga, mme le ngwale melao ye le dithuto tše ka moka go ona. Ge le tsene nageng ya mokhora le monono yeo Morena, Modimo wa borakgolokhukhu ba lena, a le holofeditšego yona, mme le le ka mošola wa Jordane, le tsemeng matlapa ao thabeng ya Ebale, bjalo ka ge ke le laela lehono, mme le a tlotšeng ka motaga. Le ageng aletare moo ka maswika a a sego a betlwa ka selo sa tshipi, ka gobane aletare ye le e agelago Morena Modimo wa lena e swanetše go agwa ka maswika a a sego a betlwa. Moo le dire dihlabelo tša go tšhungwa ka moka, le dire le dihlabelo tša kagišano le di jeng, gomme le thabeng fao pele ga Morena Modimo wa lena. Moo matlapeng a a tloditšwego ka motaga le ngwaleng mantšu ohle a melao ya Modimo gabotse.” Ke gona Moshe a boletšego le setšhaba ka moka sa Israele a na le baprista ba Balefi a re: “Homolang, setšhaba sa Israele, le ntheetšeng. Lehono le setšhaba sa Morena Modimo wa lena; ka gona le mo theeletšeng, le phetheng le melao le melawana ya gagwe ye ke le fago yona lehono.” Ke moo Moshe a boditšego setšhaba sa Israele a re: “Ge le tshetše Jordane, dikgoro tše di latelago di eme thabeng ya Gerisime ge setšhaba se šegofatšwa: ya Simeone, ya Lefi, ya Juda, ya Isakara, ya Josefa, le ya Benjamene. Gomme dikgoro tše di latelago di eme thabeng ya Ebale ge setšhaba se rogakwa: ya Rubene, ya Gade, ya Asere, ya Sebulone, ya Dane, le ya Naftali. Balefi ba goe ba re go Baisraele ka moka: “ ‘Go rogakwe motho yo a dirago modimo wa seswantšho ka leswika, goba ka kota, goba ka tshipi, selo se se dirilwego ke motho, mme a se khunamela sephiring; Morena o hlaswa medimo ya diswantšho.’ “Setšhaba ka moka se fetole se re: ‘Amene!’ “ ‘Go rogakwe motho yo a nyatšago tatagwe goba mmagwe.’ “Setšhaba ka moka se fetole se re: ‘Amene!’ “ ‘Go rogakwe motho yo a ikokoletšago karolo ya gagwe ya naga ka go šuthiša mollwane wa Moisraele wa gabo.’ “Setšhaba ka moka se fetole se re: ‘Amene!’ “ ‘Go rogakwe motho yo a tšeišago sefofu tsela ye e sego yona.’ “Setšhaba ka moka se fetole se re: ‘Amene!’ “ ‘Go rogakwe motho yo a amogago mofaladi goba tšhuana goba mohlologadi ditokelo tša gagwe.’ “Setšhaba ka moka se fetole se re: ‘Amene!’ “ ‘Go rogakwe motho yo a gobošago tatagwe ka go robala le mosadi wa tatagwe.’ “Setšhaba ka moka se fetole se re: ‘Amene!’ “ ‘Go rogakwe motho yo a gotago phoofolo.’ “Setšhaba ka moka se fetole se re: ‘Amene!’ “ ‘Go rogakwe motho yo a robalago le kgaetšedi ya gagwe ya setsiba, goba kgaetšedi ya gagwe ya letswele.’ “Setšhaba ka moka se fetole se re: ‘Amene!’ “ ‘Go rogakwe motho yo a robalago le matswalagwe.’ “Setšhaba ka moka se fetole se re: ‘Amene!’ “ ‘Go rogakwe motho yo a bolayago yo mongwe sephiring.’ “Setšhaba ka moka se fetole se re: ‘Amene!’ “ ‘Go rogakwe motho yo a rekwago gore a bolaye motho yo a se nago molato.’ “Setšhaba ka moka se fetole se re: ‘Amene!’ “ ‘Go rogakwe motho yo a sa phethego melao ye ya Modimo.’ “Setšhaba ka moka se fetole se re: ‘Amene!’ ” “Ge le ka tloga le theetša Morena Modimo wa lena mme la botegela go phetha ditaelo ka moka tša gagwe tše ke le fago tšona lehono, o tla dira gore le fete ditšhaba tšohle tša lefase ka maatla. Le theetše Morena Modimo wa lena, gomme ditšhegofatšo tše ka moka e tla ba tša lena, tša le aparela: “Morena o tla le šegofatša ge le le metseng ya lena le mašemong a lena. “Morena o tla le šegofatša ka bana ba bantši, ka dibjalo tše ntšintši, le ka dikgomo le dihuswane tše ntši. “Morena o tla šegofatša dišego tša lena le dinkgwa tša le di apeago. “Morena o tla šegofatša tšohle tše le di dirago. “Morena o tla dira gore le fenye manaba ge a le hlasela. Ba tla le hlasela ba etšwa ka thoko e tee, eupša ge ba le tšhaba ba tla phatlalalela mathokong ohle. “Morena Modimo wa lena o tla šegofatša mediro ya lena mme a tlatša dišego tša lena ka mabele. O tla le šegofatša nageng ye a le fago yona. “Ge le ka theeletša Morena Modimo wa lena mme la dira tšohle tše a le laelago tšona, o tla le dira setšhaba se sekgethwa sa gagwe, bjalo ka ge a le enetše. Ke moo ditšhaba ka moka lefaseng di tlago bona gore Morena o le dirile setšhaba sa gagwe, mme di tla le boifa. Morena o tla le fa bana ba bantši, diruiwa tše ntši, le dibjalo tše ntši nageng ye a e enetšego borakgolokhukhu ba lena. O tla neša pula lebakeng la yona e etšwa polokelong ye kgolo kua legodimong, a šegofatša mešomo ya lena ka moka, gore le kgone go adima ditšhaba tše ntši, mme lena le se ke la adingwa selo go tšona. Morena Modimo wa lena o tla dira setšhaba sa lena ketapele gare ga ditšhaba, e sego balatedi; le tla atlega ka mehla mme le ka se tsoge le šitilwe ke selo, ge le ka botegela go phetha ditaelo tša gagwe ka moka tše ke le fago tšona lehono mme la di latela. Fela le se ke la tsoga le di tshetše ka mokgwa wo mongwenyana, goba la khunamela medimo ye mengwe la e direla.” “Eupša ge le ka se theetše Morena Modimo wa lena, la se botegele go phetha ditaelo tša gagwe ka moka le melao ye ke le fago yona lehono, dithogako tše ka moka di tla le wela, tša le aparela: “Morena o tla le rogaka ge le le metseng ya lena le mašemong a lena. “Morena o tla rogaka dišego tša lena le dinkgwa tše le di apeago. “Morena o tla le rogaka ka go le fa bana ba ba sego nene, le dibjalo tše di fokolago, le dikgomo le dihuswane tše e sego tše kae. “Morena o tla rogaka tšohle tše le di dirago. “Ge le ka dira tše mpe mme la tlogela Morena, o tla le aparetša thogako, kgakanego le mathata go tšohle tše le di dirago, go fihlela le fedišwa taa ka pela. O tla dira gore malwetši a leuba a le hlomare go fihlela go se sa na le o tee wa lena yo a šetšego nageng ye le batametšego go e thopa. Morena o tla le otlaka ka bolwetši bja mafahla le bja letadi le ka dirurugi; o tla romela komelelo le phori le boore go bolaya dibjalo tša lena. Dilo tše mpe tše di tla le hlomara go fihlela le ehwa. Leratadima le ka se le nešetše pula, mme naga ya lena e tla omelela ya thatafala bjalo ka tshipi. Bakeng sa pula Morena o tla romela madimo a lerole le madimo a lešabašaba, go fihlela le fedišwa. “Morena o tla dira gore manaba a lena a le fenye. Le tla ba hlasela le etšwa ka thoko e tee, eupša ge le ba tšhabela le tla phatlalalela mathokong ohle, gomme batho ba mebušo ka moka ya lefase ba tla tšhoga ge ba bona seo se le hlagelago. Ditopo tša lena di tla lewa ke manong le dibata, mme go ka se be le yo a di rakago. Morena o tla le ntšha dišo, bjalo ka ge a di ntšhitše Baegepeta. O tla le otla ka mantsho le lekhwekhwe mme a dira gore mebele ya lena e hlohlone, gomme la se alafege. Morena o tla le gafiša; o tla le otlaka ka bofofu le kgakanego. Le tla sepela le phophola mosegare wo monana bjalo ka sefofu. Le ka se atlege go tše le di dirago. Le tla fela le gateletšwe le pateletšwa, gomme go ka se be le motho yo a tlago le thuša. “Motho o tla beeletša kgarebe, fela yo mongwe a kata kgarebe yeo. Motho o tla aga ngwako, fela a se ke a tsoga a dutše ka go wona. Motho o tla lema serapa sa merara, fela a se ke a tsoga a lle diterebe tša sona. Dikgomo tša lena di tla bolawa le lebeletše, fela la se je le nthathana ya nama ya tšona. Le tla amogwa dipokolo tša lena le lebeletše, mme tša se tsoge di boeditšwe go lena. Dihuswane tša lena di tla fiwa manaba a lena, mme gwa hlokega le motho yo a le thušago. Barwa le barwedi ba lena ba tla fiwa bafaladi le lebeletše. Letšatši le lengwe le le lengwe le tla ba hlologela, eupša la se kgone go ba lamolela. Setšhaba se šele se tla tšea dibjalo ka moka tše le šomilego ka boima go di bjala, mola lena le fela le hlakišwa le swerwe gampe. Ditlaišego tše le tlago di bona di tla le gafiša. Morena o tla le otla ka dišo tše bohloko tša go se alafege mangweleng le maotong; di tla le pipa mebele go tloga hlogong go iša maotong. “Morena o tla le tšea le kgoši ya lena a le iša kgole nageng e šele, yeo lena le borakgolokhukhu ba lena le bego le sa e tsebe. Moo le tla khunamela medimo ye e dirilwego ka dikota le ka maswika. Dinageng tšeo Morena a tlago le šwalalanyetša go tšona batho ba tla gakgamala ge ba bona tšeo di le hlagelago; ba tla le sega, ba le kwera. “Le tla gaša peu ye ntši, eupša la hwetša fela puno ye nnyane, ka gobane tšie e tla ja dibjalo tša lena. Le tla lema dirapa tša merara, la di hlokomela, eupša le ka se bune diterebe tša tšona goba la nwa beine ya tšona, ka gobane diboko di tla ja merara yeo. Mehlware e tla mela gohle nageng ya lena, eupša le tla hloka le lerothi la makhura a mohlware, ka gobane dienywa tša mehlare yeo di tla hlohlorega. Le tla ba le barwa le barwedi, eupša le tla ba amogwa, ka gobane ba tla išwa bothopša. Mehlare ya lena ka moka le dibjalo di tla lewa ke dikhunkhwane. “Bafaladi ba ba dulago nageng ya lena ba tla ba le maatla go ya pele, mola lena a le felela. Bona ba tla le adima tšhelete, eupša lena le ka se kgone go ba adima. E tla ba babuši mme lena la ba balatedi. “Dikotsi tše ka moka di tla le wela, tša le hlomara, tša le gomarela go fihlela le fedišwa, ka gobane ga se la theeletša Morena Modimo wa lena mme la phetha melao le melawana ye a le filego yona. E tla ba bohlatse go ya go ile gore Modimo o ahlotše lena le ditlogolo tša lena. Morena o le šegofaditše kudu go tšohle, eupša le šitilwe ke go mo direla ka lethabo le ka dipelo tše tšhweu. Ka gona le tla direla manaba ao Morena a tlago le romela ona. Le tla swarwa ke tlala le lenyora, la ba la sepela le hlobotše – la hloka tšohle. Morena o tla le gatelela kudu go fihlela le fedišwa. O tla le tlišetša setšhaba se etšwa magomong a lefase sa lwa le lena, setšhaba se polelo ya sona le sa e tsebego. Ba tla le kgoulogela bjalo ka ntšhu. Ba tla le galefela mme ba hloka lešoko go yo mongwe le yo mongwe wa lena, mofsa goba motšofadi. Ba tla ja diruiwa le dibjalo tša lena, gomme le tla bolawa ke tlala la ba la ya ga maotwanahunyela. Ba ka se le tlogelele le ge e le mabejana, goba beine, goba makhura a mohlware, goba dikgomo, goba dihuswane, ka fao le tla hwa. Ba tla dikanetša motse wo mongwe le wo mongwe nageng ye Morena Modimo wa lena a le fago yona, go fihlela merako ye e tiilego ya go ya godimo ye le e tshephilego e kgerešwa. “Ge manaba a lena a dikaneditše metse ya lena, le tla hloka dijo la ba la ja bana bao Morena Modimo wa lena a le filego bona. Ešita le monna wa maitshwaro, yo boleta gare ga lena, o tla gakanega a ba a ja bana ba gagwe ba bangwe, ka gobane a hloka le nthathana ya sejo. Nama yeo a ka se e arogane le morwarragwe goba le mosadi wa gagwe yo a mo ratago, goba le yo mongwe wa bana ba gagwe bao ba sa šetšego. *** Le mosadi wa maitshwaro, yo boleta, yo a sego a ka a sepela ka dinao a ya felo, o tla dira bjalo. Ge manaba a dikaneditše motse wa gabo, o tla swarwa ke tlala a ba a jela leseana la gagwe ka sephiring le le sa tšwago go belegwa, a ba a fetetša le mohlana wa gagwe. A ka se di arogane le mogatšagwe yo a mo ratago, goba le yo mongwe wa bana ba gagwe. *** “Ge le sa botegele go phetha ditaelo tšohle tša Modimo tše di ngwadilwego mo pukung ye, le sa boife Modimo wa lena yo a tumišegago gape a boifegago, gona o tla le romela, lena le ditlogolo tša lena, malwetši a mabe a a sa alafegego, le mauba a mašorošoro ao a ka se thibelegego. O tla le tšhela gape malwetši ka moka a a tšhabegago ale le a bonego Egepeta a go se fole. O tla le romela le malwetši a mehuta ka moka le mauba ao a sego a ngwalwa mo pukung ye ya melao ya Modimo le dithuto tša gagwe, go fihlela le fedišwa. Le ge le ka ba ba bantši bjalo ka dinaledi tša legodimo, go tla phologa ba se ba kae fela mo go lena, ka gobane ga se la theeletša Morena Modimo wa lena. Bjalo ka ge Morena a kgahlilwe ke go le atla le go le atiša, o tla kgahlwa ke go le lobiša le go le fediša. Le tla tomolwa nageng ye le batametšego go e thopa. “Morena o tla le šwalalanyetša ditšhabeng ka moka, mathokong ohle a lefase, mme moo le tla khunamela medimo ye e dirilwego ka dikota le ka maswika, medimo ye lena goba borakgolokhukhu ba lena le bego le sa e tsebe. Ga go moo le tlago hwetša khutšo, ga go lefelo le le tlago le bitša la lena; Morena o tla le thothometša ka letšhogo, a le nola moko, a le fetša maatla. Le tla ba kotsing ka mehla. Bošego le mosegare le tla aparelwa ke letšhogo mme le tla phela le boifa lehu. Dipelo tša lena di tla thebatheba ka poifo, le mahlo a lena a tla bona tlaišego tše šoro. Ka baka leo mosong le tla duma ge nkabe e le mantšiboa, gomme mantšiboa la duma ge nkabe e le mosong. Morena o tla le boetša Egepeta ka maselawatle, le ge ke ile ka re le ka se tsoge le ile moo gape. Moo le tla leka go ithekiša go manaba a lena gore le be makgoba, eupša ga go yo a tlago nyaka go le reka.” Šea mabaka a kgwerano yeo Morena a laetšego Moshe gore a e dire le setšhaba sa Israele nageng ya Moaba; tše ka moka e be e le go tlaleletša kgwerano ye Morena a e dirilego nabo thabeng ya Sinai. Moshe o ile a bokanya setšhaba ka moka sa Israele mme a re go sona: “Le iponetše ka a lena mahlo seo Morena a se dirilego kgoši ya Egepeta le bakgomana ba gagwe le naga ya gagwe ka moka. Le bone dikotlo tšela tše šoro le mehlolo le dimakatšo tše kgolo tše Morena a di dirilego. Eupša go fihlela le lehono ga se a le dira gore le kwešiše se le se bonego. Mo mengwageng ye masome a mane ya ge Morena a le hlahla lešokeng, diaparo le dieta tša lena ga se tša ka tša hlagala. Le be le hloka bogobe bjo le ka bo jago, le ge e le beine ye le ka e nwago, goba bjala, fela Morena o ile a le fa dilo tše le di hlokago gore a tle a le rute gore ke Modimo wa lena. Gomme ge re etla felo fa, Kgoši Sihone wa Heshbone le Kgoši Ogo wa Bashane ba ile ba re hlasela. Fela re ile ra ba fenya, ra tšea naga ya bona mme ra e arolela kgoro ya Rubene le ya Gade le seripa sa kgoro ya Manase. Le botegele go phetha mabaka ka moka a kgwerano ye, gore le tle le atlege go tšohle tše le di dirago. “Lehono le eme pele ga Morena Modimo wa lena, ka moka ga lena – baetapele ba lena le bakgomana, le banna ba lena, bana ba lena, basadi ba lena, le bafaladi ba ba dulago gare ga lena bao ba le rwalelelago dikgong, ba le gelago le meetse. Le eme mo lehono go tsena mo kgweranong ye Morena Modimo wa lena a e dirago le lena, le go itlema ka keno go phethagatša mabaka a yona, gore Morena bjale a le tiišetše gore le setšhaba sa gagwe mme yena ke Modimo wa lena, bjalo ka ge a le holofeditše, a enetše le borakgolokhukhu ba lena, Abrahama le Isaka le Jakobo. Ga se lena le nnoši bao Morena a dirago le lena kgwerano ye le mabaka a yona. O e dira le rena bohle ba re emego fa pele ga gagwe lehono, le tšona ditlogolo tša rena tše di sego tša tšwe di belegwa. “Le a tseba gore re be re phela bjang Egepeta, le gore go putla dinaga tša ditšhaba tše dingwe go be go le bjang. Le bone medingwana ya bona ye e selekišago ya go dirwa ka dikota, ka maswika, ka silibera, le ka gauta. Le hlokomeleng gore go se ke gwa ba le monna, goba mosadi, goba lapa, goba kgoro ye e lego fa lehono yeo e furalelago Morena Modimo wa rena mme ya khunamela medimo ya ditšhaba tše dingwe. Seo se ka ba bjalo ka modu wo o melago ya ba semela se se galakago sa mpholo. Le hlokomeleng gore go se ke gwa ba le o tee wa lena yo a rego go kwa mabaka a kgwerano, a fela a sa iphora gore tšohle di tla mo atla le ge a ka ngangabala a dira tša boithatelo. Seo e ka ba kotsi go batho le dilo go swana. Morena a ka se lebalele motho wa mohuta woo, eupša o tla mo tukela bogale, gomme dithogako ka moka tše di ngwadilwego mo pukung ye di tla mo wela, go fihlela Morena a timeletša leina la gagwe lefaseng. Morena o tla mo kgetholla dikgorong ka moka tša Baisraele, gomme a mo tlišetša dikotsi go ya ka dithogako ka moka tša kgwerano ye e ngwadilwego mo pukung ye ya melao ya Morena. “Mo melokong ya lena ya ka moso ditlogolo tša lena le bafaladi ba ba tšwago dinageng tša kgole ba tla bona dikotsi le malwetši ao Morena a a tlišeditšego naga ya lena. Naga e tla ba lehwafa ya se ntšhe selo, ya pipetšwa ke tshebela le letswai; ga go se se ka bjalwago goba se se ka melago go yona, ešita le bjona bjang bo ka se mele moo. Naga ya lena e tla ba bjalo ka motse wa Sodoma le wa Gomora, wa Adma le wa Tseboime, yeo Morena a e ribegeditšego ge a be a befetšwe kudu. Ke moo ditšhaba tšohle di tlago botšiša tša re: ‘Ke ka baka lang Morena a dirile naga ya bona dilo tše? Ke go reng a ile a befelwa o šorošoro ka mokgwa wo?’ Phetolo e tla ba go re: ‘Ke ka gobane setšhaba se se tshetše kgwerano ye yena Morena, Modimo wa borakgolokhukhu ba bona, a bego a e dirile le bona ge a ba ntšha Egepeta. Ba obamile ba direla medimo ye mengwe yeo ba bego ba sa e tsebe, medimo ye Morena a rilego ba se ke ba e direla. Ka gona Morena o ile a befelelwa setšhaba sa gagwe mme a tlišetša naga ya bona dikotsi tše ka moka tše di ngwadilwego mo pukung ye. Morena o ile a befelwa kudu, mme ge a befetšwe o šoro bjalo, a ba lahlela nageng e šele moo le lehono ba sa lego gona.’ “Go na le dilo tšeo Morena Modimo wa rena a sego a di utolla, eupša o utolotše melao ye ya gagwe, gomme rena le ditlogolo tša rena re swanetše go e phetha go ya go ile.” “Bjale ke le file go ikgethela tšhegofatšo goba thogako. Ge dilo tše ka moka di le hlagetše gomme le dutše gare ga ditšhaba tše Morena Modimo wa lena a le šwalalantšego natšo, le tla gopola se ke se boletšego. Ge lena le ditlogolo tša lena le ka sokologela go Morena, mme ka dipelo tša lena ka moka le ka moya wa lena ka moka la phetha ditaelo tša gagwe tše ke le fago tšona lehono, gona Morena Modimo wa lena o tla le šokela. O tla le buša ditšhabeng tšeo a le šwalalanyeditšego go tšona, mme a le atlegiša gape. Le ge le ka šwalalanyetšwa mafelong a lefase, Morena Modimo wa lena o tla le kgobokanya gona moo mme a le buša, gore le tle le tšee naga ye borakgolokhukhu ba lena ba kilego ba e thopa. Gomme o tla le atlegiša a ba a le atiša go feta ka moo borakgolokhukhu ba lena ba kilego ba ba ka gona. Morena Modimo wa lena o tla dira gore lena le ditlogolo tša lena le mo theeletše, gore le tle le mo rate ka dipelo tša lena ka moka le ka moya wa lena ka moka, mme le tle le fele le dula moo nageng yeo. Dithogako tše ka moka o tla di lebiša go manaba a lena le go bao ba le hloilego gape ba le hlomerego, mme le tla boela la mo theeletša la phetha ditaelo tša gagwe ka moka tše ke le fago tšona lehono. Morena o tla le atla go tšohle tše le di dirago; le tla ba le bana ba bantši le diruiwa tše ntši, gomme mašemo a lena a tla le ntšhetša puno ye botse. O tla thabela go le atla bjalo ka ge a be a thabetše go atla borakgolokhukhu ba lena, eupša le tla swanelwa ke go mo theeletša le go phetha melao le melawana ya gagwe ye e ngwadilwego mo pukung ye ya dithuto tša gagwe. Le tla swanelwa ke go sokologela go yena ka dipelo tša lena ka moka le ka moya wa lena ka moka. “Taelo ye ke le fago yona lehono ga se ye thata kudu, ebile ga e kgole le lena. Ga e kua legodimong mo le ka ba la botšiša la re: ‘Ke mang a tlago re namelela a re fegollela yona, gore re tle re e kwe re e phethe?’ Le gona ga e ka mošola wa lewatle mo le ka ba la botšiša la re: ‘Ke mang yo a tlago tshela lewatle a yo re tšeela yona, gore re tle re e kwe mme re e phethe?’ Aowaa, e kgauswikgauswi le lena. Le a e tseba mme le ka e bolela ka hlogo, ka gona e phetheng. “Lehono ke le fa go kgetha botse goba bobe, bophelo goba lehu. Ge le ka phetha ditaelo tša Morena Modimo wa lena tše ke le fago tšona lehono, ge le ka mo rata, la mo theeletša, mme la latela melao le melawana ya gagwe, gona le tla atlega mme la ba setšhaba se sentši. Morena Modimo wa lena o tla le šegofatša nageng ye le batametšego go e thopa. Eupša ge le ka se mo theeletše, la gana go mo theetša, la foraforetšwa la direla medimo ye mengwe, ke le botša e sa le gonabjale gore le tla fedišwa taa. Le ka se phele nako ye telele nageng yela ya mošola wa Jordane ye le batametšego go e thopa. Bjale ke le fa go ikgethela bophelo goba lehu, tšhegofatšo ya Modimo goba thogako ya gagwe, gomme ke bitša legodimo le lefase go tlo hlatsela gore le kgetha eng. Kgethang bophelo, gore lena le ditlogolo tša lena le tle le phele. Le rateng Morena Modimo wa lena, le mo theeletšeng, mme le mmotegeleng, gore le tle le dule nako ye telele nageng ye a enetšego borakgolokhukhu ba lena, Abrahama le Isaka le Jakobo, a re o tla ba fa yona.” Moshe a tšwela pele le go bolela le setšhaba sa Israele a re: “Bjale ke na le mengwaga ye lekgolo le masome a mabedi, mme ga ke sa kgona go ba moetapele wa lena. Ntle le fao, Morena o mpoditše gore nka se tshele noka ya Jordane. Morena Modimo wa lena ka boyena o tla sepela pele ga lena mme a fediša ditšhaba tše di dulago moo, gore le tle le dule nageng ya tšona, gomme Joshua e tla ba moetapele wa lena, bjalo ka ge Morena a boletše. Morena o tla dira batho ba moo se a se dirilego Sihone le Ogo, dikgoši tša Baamore, mola a ba fediša le naga ya bona. Morena o tla ba gafela go lena, mme le ba dire tšohle tše ke le laetšego tšona. Le beng le sebete, le tie. Le se ke la ba boifa, gobane Morena Modimo wa lena o tla ba le lena. A ka se le lahle goba a le tlogela.” Ke moka Moshe a bitša Joshua mme a re go yena pele ga setšhaba ka moka sa Israele: “O be le sebete o tie; ke wena o tlago eta setšhaba se pele gore se thope naga ye Morena a enetšego borakgolokhukhu ba sona a re o tla ba fa yona. Morena ka boyena o tla go eta pele mme a ba le wena. A ka se go lahle goba a go tlogela, ka gona o se ke wa boifa goba wa nolega moko.” Ka gona Moshe a ngwala melao yeo ya Modimo mme a e fa baprista ba Balefi, bao modiro wa bona e bego e le go rwala Polokelo ya Kgwerano ya Morena, a e fa le baetapele ba Baisraele. A ba laya a re: “Mafelelong a ngwaga wo mongwe le wo mongwe wa bošupa, e lego ngwaga wo ka wona melato e phumolwago, le baleng melao ye ka go hlaboša lentšu Monyanyeng wa Mešaša. Le e baleleng setšhaba sa Israele ka moka ge se etla go khunamela Morena Modimo wa lena felong ga tirelo. Le kgobokanyeng setšhaba – banna le basadi le bana – le bafaladi ba ba dulago metseng ya lena, gore yo mongwe le yo mongwe a e kwe mme a ithute go boifa Morena Modimo wa lena, le go botegela go phetha melao yeo ka moka. Ka tsela ye ditlogolo tša lena tše di sego tša ka tša kwa melao ya Morena Modimo wa lena di tla e kwa. Ka fao ba tla ithuta go mmoifa ge ba sa phela nageng ye le batametšego go e thopa mošola wa Jordane.” Ke moo Morena a itšego go Moshe: “Nako ya gago ya go ithobalela e batametše. Bitša Joshua mme o tsene le yena ka Tenteng ya bodulo bja ka, gore ke tle ke mmotše tše a swanetšego go di dira.” Moshe le Joshua ba tsena ka Tenteng, gomme Morena a iponatša go bona fao ka thololo ya leru ye e bego e eme mojakong wa Tente. Morena a re go Moshe: “O kgauswi le go ikela go borakgolokhukhu ba gago, gomme ge o šetše o ithobaletše, setšhaba se se ka se sa mpotegela mme ba tla lahla kgwerano ye ke e dirilego le bona. Ba tla ntlogela ba khunamela medimo e šele ya naga ye ba batametšego go tsena go yona. Ge ba dira bjalo ke tla ba galefela, ka ba furalela, ka ba tlogela. Ba tla welwa ke dikotsi tše ntši le mathata a mantši, mme ke moo ba tlago lemoga gore dilo tše di ba hlagetše ka gobane nna, Modimo wa bona, ke be ke se sa na le bona. Mme ka nako yeo ke tla gana go ba thuša, ka gobane ba dirile tše mpe ba ba ba khunamela medimo ye mengwe. “Bjale ngwala kopelo ye. O e rute setšhaba sa Israele gore e tle e be hlatse ya go ba tšwa. Ke tla ba goroša nageng yela ya mokhora le monono, bjalo ka ge ke enetše borakgolokhukhu ba bona. Moo ba tla ja ba khora, mme ba phela ka boiketlo. Eupša ba tla mphuralela ba khunamela medimo ye mengwe. Ba tla nnyatša mme ba lahla kgwerano ya ka, gomme ba tla welwa ke dikotsi tše ntši le mathata. Eupša kopelo ye e tla no fela e sa opelwa ke ditlogolo tša bona, gomme e tla ba hlatse ya go ba tšwa. Le gonabjale, pele ga ge ke ba goroša nageng ye ke ennego go ba fa yona, ke tseba seo ba se gopolago.” Ka lona letšatši leo Moshe a ngwala kopelo yeo gomme a e ruta setšhaba sa Israele. Ke moo Morena a boditšego Joshua, morwa wa Nunu, a re: “O be le sebete, o tie. O tla goroša Baisraele nageng ye ke ennego go ba fa yona, gomme ke tla ba nago.” Moshe a ngwala melao ya Modimo pukung, a hlokomela gore a se ke a tlogela selo. Ge a feditše a re go baprista ba Balefi, bao modiro wa bona e bego e le go rwala Polokelo ya Kgwerano ya Morena: “Tšeang puku ye ya melao le e bee ka thoko ga Polokelo ya Kgwerano ya Morena Modimo wa lena, gore e tle e dule e le moo e le hlatse ya go tšwa setšhaba sa gagwe. Nna ke tseba ka moo ba ngangabalago ka gona le ka moo ba tsogelago Morena maatla. Ge ba tsogetše Morena maatla ke sa phela, ke sa na le lena, mohlang ke ehwa gona go tla ba bjang? Kgobokanya mantona a dikgoro ka moka le bakgomana pele ga ka, gore ke tle ke ba botše taba tše; ke tla bitša legodimo le lefase gore e tle e be dihlatse tša ka. Ke tseba gore ge ke hwile, setšhaba e tla ba se sebe mme ba tlogela tše ke ba rutilego tšona. Gomme mabakeng a a tlago ba tla hlagelwa ke dikotsi, ka gobane ba tla be ba selekile Morena ka go dira tše a di ganago.” Ke moka Moshe a reta kopelo ye setšhaba sohle sa Israele se theeditše a re: “Legodimo, ntlhwaele tsebe ke bolele, lefase, theetša se ke se bolelago. Thuto ya ka e tla sarasara bjalo ka pula, polelo ya ka ya ikala fase boka phoka. Mantšu a ka a tla na bjalo ka pula mabjanyeng a mananana, bjalo ka pula ya modupi dimeleng tše boletiana. Ke tla reta leina la Morena. A setšhaba sa gagwe se mo godiše. “Morena ke molwedi wa lena yo maatla; se a se dirago ke se se phethegilego, ditsela tšohle tša gagwe di lokile; Modimo wa lena o a botega, ga a dire tše mpe; o dira tše di lokilego le gona di lebanego. Eupša lena ga le mmotegele, ga le a swanela go ba setšhaba sa gagwe; le setšhaba se sebe sa baradia. Na ye ke yona tsela ye le swanetšego go swara Morena ka yona, lena setšhaba sa ditlatla, sa go hloka kgopolo? Na ga se Tatagolena, Mmopi wa lena, yo a le dirilego setšhaba? “Gopolang tša bogologolo, mehleng kgalekgale; botšišang botatagolena ba le botše tše di diregilego; botšišang bakgalabje ba le anegele tša botala. Yogodimodimo o abetše ditšhaba dinaga tša tšona; o arogantše merafe, o beetše ditšhaba mellwane. Setšhaba se sengwe le se sengwe o se abetše morongwamohlokomedi, ditlogolo tša Jakobo tšona a di kgetha ya ba setšhaba sa gagwe. “O ba hweditše ba tlaruma le lešoka, leganata la go hloka bophelo, la go tšutla madimo. A ba šireletša, a ba hlokomela, a ba leta ka mo motho a letago ngwana yo e lego mmamoratwe. Bjalo ka ntšhu ge e rutantšha matswianyana a yona go fofa, e akalela ka godimo ga ona, ya a kuka ka polokego ka mafego a yona a phurologilego, Morena o hlokometše Baisraele. Morena o hlahlile setšhaba sa gagwe a nnoši, a sa thušwe ke modimo o šele. “O ba dirile gore ba buše dinaga tša meboto, mme ba je se se metšego mašemong. O ba fepile ka mamapo a ka gare ga marako, a mediša mehlware ya bona mengeng ya maswika a mathata. O ba file dithatha tša dikgomo le maswi a dihuswane; ba be ba na le dinku le dipudi le dikgomo tše kaonekaone, le mabele a mabotsebotse, le beine ye e di phalago ka moka. “Setšhaba sa Morena sa re go huma sa mo tšhela dithole; ba akola ba nona, ya ba dimphosonono. Ba lahla Modimo, Mmopi wa bona, ba nyatša Mophološi wa bona yo maatla. Go khunamela medimo e šele ga bona gwa tsebafiša Morena; makgapha a ba a dirago a mo seleka, Ba direla meoya ye mebe dihlabelo, ba se di direle Modimo, ba di direla medimo ye mefsa ye Baisraele ba bego ba sa e tsebe, medimo ye borakgolokhukhu ba bona ba sego ba ka ba e boifa. Ba lebala Modimo wa bona, yena Mophološi wa bona yo maatla, yena Motswadi wa bona. “Ge Morena a di bona, a befelwa, mme a lahla barwa le barwedi ba gagwe. A re: ‘Nka se sa ba thuša; ke gona ke tlago bona se se tlago ba hlagela, sona setšhaba se sebe seo sa go se mpotegele. Ka medimo ya bona ya diswantšho ba ntlhohlile, ba nthumola ka dilo tšeo tša bona ba rego ke medimo, dilo tše gabotsebotse e sego medimo. Ka gona, ka setšhaba se bona ba rego ga se setšhaba nna ke tla ba hlohla; ke tla ba rumola ka setšhaba sa ditlatla. Pefelo ya ka e tla lauma bjalo ka mollo, mme ya tšhuma tšohle lefaseng. E tla ba ya fihla lefaseng la ka fase, mme ya tšhuma medu ya dithaba. “ ‘Ke tla ba tlišetša dikotsi tše di sa felego, ka ba lwantšha ka mesebe ya ka yohle. Ba tla hwa ka tlala le malwetši a letadi; ba tla hwa ba bolawa ke malwetši a mašorošoro. Ke tla ba romela dibata gore di ba hlasele, le dinoga tša mpholo gore di ba lome. Mekgotheng ba tla bolawa ke manaba, ka mengwakong ba aparelwa ke poifo. Masogana le dikgarebe ba tla bolawa; masea le bakgalabje le bona ba ka se šale. Ke be ke re nka ba feleletša sa ruri, gore ba se sa gopolwa ke motho, eupša ke be nka se lese manaba a bona a itheta a re a fentše setšhaba sa ka, mola e le nna ka bonna ke ba fentšego.’ “Baisraele ke setšhaba se se hlokago tlhaologanyo, ga ba na le kwešišo le gannyane. Ba šitwa ke go bona gore ke ka baka lang ba fentšwe, ga ba kwešiše seo se hlagilego. Ke ka baka lang ba sekete ba fentšwe ke o tee, mme ba dikete tše lesome ba tšhabile ba babedi fela? Morena Modimo wa bona o be a ba tlogetše; Modimo wa bona yo maatla o be a ba gafetše manabeng a bona. Manaba a bona a tseba gore medimo ya bona e a fokola, ga se ye maatla bjalo ka Modimo wa Baisraele. Manaba a bona ke a kgopo bjalo ka badudi ba Sodoma le ba Gomora. Merara ya bona e enywa diterebe tše di galakago tša mpholo, beine ya bona ke mpholo wa dinoga. “Morena o gopola tšeo manaba a bona a di dirilego; o emetše fela nako ye botse ya go ba otla. Morena o tla itefeletša a otla manaba ao; nako e tla tla ya gore ba we; letšatši la go phuhlama ga bona le kgauswi; tše di tlago ba wela di a akgofa. Morena o tla hlakodiša setšhaba sa gagwe ge a bona gore se feletšwe ke maatla. O tla šokela bao ba mo hlankelago ge a bona gore ka moka ga bona ba fentšwe. Ke gona Morena a tlago botšiša setšhaba sa gagwe a re: ‘A medimo ye maatla yela le bego le e botile e kae? Le e fepile ka makhura a dihlabelo tša lena, la e noša dikabelo tša lena tša dino. A e tle e le thuše bjale; a e tle e le šireletše. “ ‘Bjale bonang, nna ke nnoši ke Modimo; ga go modimo yo mongwe ka ntle le nna. Ke a bolaya, ebile ke a phediša, ke a gobatša, ka ba ka fodiša, mme ga go yo a ka kgonago go nthibela go se ke se dirago. Ke emiša letsogo ka ena ke le Modimo yo a phelago go ya go ile, gore ke tla lootša tšhoša ya ka ye e bekenyago, ka dira gore manaba a otlwe. Ke tla itefeletša go ona, ka otla bona bao ba ntlhoilego. Mesebe ya ka e tla rotha madi a bona, le tšhoša ya ka ya ja bohle bao ba lwago le nna. Nka se šadiše le o tee wa manaba a ka; le tšona dikgobadi le bao ba thopilwego ba tla hwa.’ “Lena ditšhaba, retang setšhaba sa Morena – o lefeletša madi a bahlanka ba gagwe. O itefeletša manabeng a gagwe mme a lebalela setšhaba sa gagwe le naga ya gagwe dibe tša bona.” Moshe le Joshua, morwa wa Nunu, ba ile ba opelela kopelo ye godimo gore setšhaba sa Israele se e kwe. Ge Moshe a feditše go botša setšhaba ditaba tše ka moka, o ile a re: “Le hlokomeleng gore le phethe melao ye ka moka ye ke le filego yona lehono. Le e ruteng bana ba lena, gore le bona ba tle ba botegele melao yeo ka moka ba e phethe. Melao ye ga se ya lefeela; ke yona bophelo bja lena. Le e phethe mme le tla phela nako ye telele nageng yela ya mošola wa Jordane ye le batametšego go e thopa.” Ka lona letšatši leo Morena a re go Moshe: “Yaa dithabeng tša Abarime, nageng ya Moaba, go lebana le motse wa Jeriko; o namele thaba ya Nebo mme o bogele naga ya Kanana yeo ke lego kgauswi le go e fa setšhaba sa Israele. O tla hlokafalela thabeng yeo wa ikela go borakgolokhukhu ba gago bjalo ka ge morwarrago Arone a hlokafaletše thabeng ya Hore, ka gobane bobedi bja lena ga se la mpotegela pele ga Baisraele. Ge le be le le kua meetseng a Meriba, kgauswi le motse wa Kadeshe lešokeng la Tsine, ga se la ntlhompha pele ga setšhaba. O tla bona naga yeo o se kgole le yona, eupša o ka se tsene moo nageng yeo ke e fago setšhaba sa Israele.” Šedi ditšhegofatšo tše Moshe, monna wa Modimo, a šegofaditšego setšhaba sa Israele ka tšona pele ga ge a ehwa. Morena o tšwile thabeng ya Sinai; o rotogile bjalo ka letšatši godimo ga Edomo, mme mahlasedi a gaša setšhaba sa gagwe a etšwa thabeng ya Parane. Barongwa ba dikete tše lesome ba be ba na le yena, mollo wo o laumago o le ka letsogong la gagwe la go ja. Morena o rata setšhaba sa gagwe mme o šireletša bao ba ineetšego go yena. Ka gona re obama maotong a gagwe, ra amogela ditaelo tša gagwe, e le melao ye Moshe a re filego yona – dilo tše bohlokwahlokwa tša setšhaba sa rena. Morena e bile kgoši ya setšhaba sa gagwe sa Baisraele, ge dikgoro le baetapele ba bona ba bokane mmogo. Moshe a bolela ka ba kgoro ya Rubene a re: “A Rubene a se ke a ba a hwa, gore batho ba gagwe ba se fokotšege.” Ka ba kgoro ya Juda a re: “Morena, theetša sello sa bona; ba kopanye gape le dikgoro tše dingwe. Ba lwele Morena, mme o ba thuše manabeng a bona.” Ka ba kgoro ya Lefi a re: “Wena, Morena, utollela Balefi, bahlanka ba gago ba ba botegago, thato ya gago ka Urime le Tumime; o ba lekile kua Masa, wa ngangišana le bona kua meetseng a Meriba. Ba laeditše go go tshephagalela kudu go feta ka moo ba tshephagalelago batswadi ba bona, goba bomorwarragobona, goba bana ba bona. Ba phethile ditaelo tša gago; ba botegetše kgwerano ya gago. Ba tla ruta setšhaba sa gago ditaelo tša gago; ba tla tšhuma seorelo pele ga gago, ba ba ba dira dihlabelo tša go tšhungwa ka moka aletareng ya gago. Morena, thuša kgoro ya bona gore e gole e be le maatla; thabela seo ba se dirago. Roba manaba a bona le bahloi ba bona dikgwele, gore ba se sa kgona go emelela.” Ka ba kgoro ya Benjamene a re: “Ye ke kgoro ye Morena a e ratago gape a e šireletšago; o ba leta letšatši ka moka, gomme o dula gare ga bona.” Ka ba kgoro ya Josefa a re: “A Morena a šegofatše naga ya bona ka pula, mpho ya legodimo, le ka phoka, le ka meetse a a tšwago ka fase ga lefase. A naga ya bona e šegofatšwe ka dienywa tše di budušitšwego ke borutho bja letšatši, le ka dienywa tše kaonekaone tša sehla se sengwe le se sengwe. A dithaba tša kgalekgale le meboto ya bona ya go ya go ile di pipše ke dienywa tše bosebose. A naga ya bona e tlale tšohle tše botse, e šegofatšwe ke Morena yo botho, yo a boletšego a le ka gare ga mošwana wo o tukago mollo. A ditšhegofatšo tše di tle kgorong ya Josefa, ka gobane e bile moetapele gare ga bomorwarragwe. Josefa o bonala bjalo ka kgoši; ke leitšibolo la poo la tatagwe; naka tša gagwe di bjalo ka tša nare. Dinaka tšeo ke batho ba diketekete ba Manase, le ba masome a diketekete ba Efraime. Ka tšona o gonyolla ditšhaba mme o di kgoromeletša magomong a lefase.” Ka ba kgoro ya Sebulone le ya Isakara a re: “A Basebulone ba atlege kgwebong ya bona le ditšhaba tša mošola wa mawatle, mme mahumo a Isakara a oketšege mo gae. Ba biletša ditšhaba thabeng ya bona, mme moo ba dira dihlabelo tše Modimo a di nyakago, ka gobane ba hwetša lehumo la bona lewatleng le lešabašabeng la lebopong.” Ka ba kgoro ya Gade a re: “Retang Modimo yo a ba filego naga ye kgolo. Gade o lalela bjalo ka taugadi, o nyaka go thaola letsogo goba hlogo. Ba itšeetše seripa se se kaonekaone sa naga; ba filwe karolo ya moetapele. Ba phethile ditaelo tša Morena le melao ya gagwe ge baetaepele ba Baisraele ba be ba bokane mmogo.” Ka ba kgoro ya Dane a re: “Dane ke tau ya lerojana; o taboga a etšwa Bashane.” Ka ba kgoro ya Naftali a re: “Naftali o šegofaditšwe kudu ke Morena yo botho; letsha la Genesarete le naga ya ka borwa bja lona ke ya bona.” Ka ba kgoro ya Asere a re: “Asere o šegofaditšwe go feta ba dikgoro tše dingwe. A e be yena mmamoratwe gare ga bomorwarragwe, mme naga ya gagwe e hume ka makhura a mohlware. A metse ya gagwe e šireletšwe ka mapheko a tshipi le a mphiri, mme ka mehla a dule a bolokegile.” Lena setšhaba sa Israele, ga go modimo yo a swanago le Modimo wa lena, Modimo yo a rokamego letagong go putla legodimo, yo a nametšego maru go tlo le thuša. Modimo ka mehla e bile Mošireletši wa lena; matsogo a gagwe a neng le neng ke boitshwarelelo bja lena. O lelekile manaba a lena ge le goroga, mme a le botša gore le ba fediše ka moka. Ka gona ditlogolo tša Jakobo di dula di iketlile, di dula di bolokegile nageng ye e tletšego mabele le beine, moo legodimo le kolobišago lefase ka phoka. Lena Baisraele, le ba mahlatse bjang! Ke mang yo a swanago le lena – setšhaba se se phološitšwego ke Morena? Morena ke kotse ya lena le tšhoša ya lena go le šireletša le go le dira bafenyi. Manaba a lena a tla tla go lena a phophotha, mme le tla ba gatakela fase. Moshe a rotoga a etšwa melaleng ya Moaba a ya thabeng ya Nebo, ntlhohlong ya thaba ya Pisga ka bohlabela bja Jeriko, mme moo Morena a mmontšha naga ka moka, e lego selete sa Gileade go ya leboa go fihla motseng wa Dane; selete ka moka sa Naftali; selete sa Efraime le sa Manase; selete sa Juda go ya bodikela go fihla Lewatleng la Mediteraniene; karolo ya ka borwa ya Juda, le molala wo o tlogago Tsoare go ya Jeriko, motse wa mehlare ya mepalema. Ke gona Morena a itšego go Moshe: “Ye ke naga ye ke enetšego Abrahama le Isaka le Jakobo gore ke tla e fa ditlogolo tša bona. Ke go bontšhitše yona, eupša nka se go goroše fao.” Ka gona Moshe, mohlanka wa Morena, a hlokafalela moo nageng ya Moaba, bjalo ka ge Morena a be a boletše. Morena a mmoloka ka moeding kua Moaba, go lebana le motse wa Bethe-Peore, eupša le go fihla le lehono ga go yo a tsebago gabotsebotse mo a bolokilwego gona. Moshe o be a na le mengwaga ye lekgolo le masome a mabedi ge a ehwa; o be a sa tiile, le mahlo a gagwe a sa bona gabotse. Setšhaba sa Israele sa mo llela matšatši a masome a mararo melaleng ya Moaba. Joshua, morwa wa Nunu, o be a tletše bohlale, ka gobane Moshe o be a mmeile moetapele legatong la gagwe. Baisraele ba be ba theetša Joshua mme ba phetha ditaelo tše Morena a ba filego tšona ka Moshe. Mo go Baisraele ga se gwa ka gwa ba le moprofeta yo a swanago le Moshe; Morena o be a bolela le yena ba lebantše difahlego. Ga go moprofeta yo mongwe yo a kilego a dira mehlolo le dimakatšo tša go swana le tše Morena a rometšego Moshe go tlo di dira go kgoši ya Egepeta le bakgomana ba yona, le naga ya gona ka moka. Ga go moprofeta yo mongwe yo a kilego a kgona go dira dilo tše kgolo tše di tšhošago tše Moshe a di dirilego Baisraele ka moka ba lebeletše. Ge Moshe, mohlanka wa Morena, a hwile, Morena o ile a bolela le modiredi wa Moshe, Joshua, morwa wa Nunu, a re: “Mohlanka wa ka, Moshe, o hwile. Bjale itokiše, wena le setšhaba ka moka sa Israele, le tsheleng noka ye ya Jordane le tseneng nageng ye ke le fago yona. Bjalo ka ge ke boditše Moshe, ke le file naga ka moka ye le tlago sepela go yona. Mellwane ya lena e tla tloga lešokeng la ka borwa, ya fihla dithabeng tša Lebanone ka leboa; ka bohlabela e tla tloga nokeng ye kgolo ya Yufratese, ya putla naga ya Bahete, ya fihla Lewatleng la Mediteraniene ka bodikela. Joshua, ga go yo a ka tsogago a go fentše ge o sa phela. Ke tla ba nago bjalo ka ge ke bile le Moshe. Ke tla ba le wena ka mehla; nka se tsoge ke go tlogetše. O be le sebete, o tie, ka gobane ke wena o tlago thopela setšhaba se naga ye, ye ke ilego ka enela borakgolokhukhu ba sona gore ke tla se fa yona. Fela o be le sebete, o tie, mme o hlokomele gore o phele ka melao ka moka ye mohlanka wa ka, Moshe, a go filego yona. O se ke wa e tshela le gatee, gore o tle o atlege mo gongwe le mo gongwe mo o yago gona. Puku ye ya melao e balwe ka mehla tirelong ya lena. O ithute yona bošego le mosegare gore o tle o kgone go phela ka se sengwe le se sengwe se se ngwadilwego go yona. Ke moo o tlago atlega wa tšwelela. A ke re ke go laetše gore o be le sebete, o tie! O se ke wa boifa goba wa nolega moko, ka gobane nna, Morena Modimo wa gago, ke na le wena gohle mo o yago gona.” Ke moo Joshua a laetšego baetapele gore ba sepele le mešaša mme ba botše setšhaba ba re: “Lokišang mefago, ka gobane ka morago ga matšatši a mararo le tlile go tshela noka ya Jordane go yo thopa naga ye Morena Modimo wa lena a le fago yona.” Joshua a re go kgoro ya Rubene le ya Gade le go seripa sa kgoro ya Manase: “Gopolang ka mo Moshe, mohlanka wa Morena, a le boditšego gore Morena Modimo wa lena o tla le fa naga ye ya ka bohlabela bja Jordane gore e be legae la lena. Basadi ba lena le bana le diruiwa ba ka šala mo nageng ye Moshe a le filego yona. Eupša madira a lena a a itlhametšego ntwa ona a tshele pele ga Baisraele ba gabolena go ba thuša, go fihlela ba thopa naga ye Morena Modimo wa lena a ba filego yona. Ge Morena a gorošitše dikgoro tše dingwe tša Israele bjalo ka lena, gona le ka boa la tla la itulela mo nageng ya lena ye Moshe, mohlanka wa Morena, a le filego yona, ka mo bohlabela bja Jordane.” Ba fetola Joshua ba re: “Re tla dira tšohle tše o re boditšego tšona, ra ya gohle mo o re laelago gona. Re tla go theeletša, bjalo ka ge ka mehla re be re theeletša Moshe. A Morena Modimo wa gago a be le wena bjalo ka ge a bile le Moshe! Yo a nyatšago se o se bolelago goba a sa phethego ye nngwe ya ditaelo tša gago a bolawe. Tabakgolo ke gore o be le sebete, o tie!” Joshua a roma dihlodi tše pedi ka sephiring go tloga mešašeng kua Megohlong a re di yo hlola naga, gagologolo motse wa Jeriko. Ge ba fihla gona, ba ile ba ya ngwakong wa segwebakathobalo seo leina la sona e bego e le Rahaba gore ba robale moo. Kgoši ya Jeriko ya kwa gore Baisraele ba bangwe ba tlile bošego bjoo go tlo hlola naga. Ka gona a roma batseta go Rahaba gore ba mmotše ba re: “Banna bao ba lego ngwakong wa gago ba tlile go hlola naga ka moka. Ba ntšhe!” Mosadi yoo a ba fetola a re: “Ke therešo, banna ba bangwe ba ile ba tla ngwakong wa ka, fela ga se ka ka ka tseba gore ba tšwa kae. Ba sepetše ge letšatši le dikela, ge kgoro ya motse e tswalelwa. Ga se ka ba botšiša gore ba ya kae, fela ge le ka ba šala morago ntle le go diega, le ka ba swara tseleng.” Rahaba o be a nameditše dihlodi tšela ka godimo ga tlhaka ya ntlo, gomme a di utile ka fase ga mahlaka a leokodi ao a bego a a beile fao. *** *** Batseta bale ba kgoši ba tšwa motseng, mme kgoro ya tswalelwa. Ba nyaka dihlodi tšela tša Baisraele go ba go yo fihla moo tsela e tshelago Jordane. Pele ga ge dihlodi tšela di robala, Rahaba a namelela tlhakeng gomme a re go tšona: “Ke a tseba gore Morena o le file naga ye. Re a boifa. Yo mongwe le yo mongwe nageng ye o le tšhogile. Re kwele ka moo Morena a ilego a omiša Lewatle la Mahlaka ge le fihla gona le etšwa Egepeta. Re kwele ka moo le bolailego Sihone le Ogo, dikgoši tše pedi tša Baamore, ka bohlabela bja Jordane. Ge re ekwa taba tšeo re ile ra boifa; yo mongwe le yo mongwe o nolegile moko ka baka la lena. Morena Modimo wa lena ke Modimo kua godimo legodimong le mo fase lefaseng. Bjale enang ka Morena gore le tla dira lapa la ka ka botho bjalo ka ge ke le dirile ka botho, mme le mphe sešupo se se kgodišago gore le tla phološa tate le mme le dikgaetšedi le bomogolwake le banabešo le malapa a bona ka moka. Le se ke la re lesa re bolawa!” Banna bao ba re go yena: “A Modimo a re bolaye ge re ka se le phološe! Ge o ka se bolele se re bego re se dira, re go holofetša gore re tla go swara setho ge Morena a re neela naga ye.” Rahaba o be a dula ngwakong wo o kgohlaganego le morako wo o dikaneditšego motse, ka gona a fološetša banna bao ka ntle ka lefasetere ka thapo. A re: “Le yeng kua nageng ya dithaba gore banna bale ba le hlomerego ba se ke ba le hwetša. Le utameng moo matšatši a mararo go fihlela ba boa. Ka morago ga fao gona le ka ikela mo le yago gona.” Banna bao ba re go yena: “Re ka se tshele keno ye o re enišitšego yona. Sese se o swanetšego go se dira: Ge re šwahlela naga ye ya geno, o tlemelele thapo ye ye khubedu lefasetereng le o re fološitšego ka lona. O kgobokanye tatago le mmago le dikgaetšedi le bohle ba lapa la tatago ka mo ngwakong wa gago. Ge yo mongwe a ka tšwa ka mo ngwakong mme a bolawa, molato e tla ba wa gagwe, gomme re ka se bonwe molato tabeng yeo; eupša ge yo mongwe yo a lego ka mo ngwakong le wena a ka kwešwa bohloko, yeo e tla ba phošo ya rena. Fela ge o ka botša yo mongwe se re bego re se dira mo, gona re ka se tlemege go phetha keno ye o re enišitšego yona.” Rahaba a dumela gomme a ba lesa ba sepela. Ge ba sepetše a tlemelela thapo yela ye khubedu lafasetereng. Dihlodi tšeo tša ya nageng ya dithaba mme tša utama gona. Banna bale ba bego ba ba hlomere ba ile ba ba nyaka nageng ka moka matšatši a mararo, fela ba se ke ba ba hwetša; ka fao ba ipoelela Jeriko. Ke moo dihlodi tšela tše pedi di theogilego moo nageng ya dithaba, tša tshela noka, mme tša gomela go Joshua. Tša mmotša tšohle tše di ba hlagetšego tša re: “Re na le therešo ya gore Morena o re file naga yela ka moka. Le gona batho ba gona ka moka ba a re tšhoga.” Ka letšatši le le latelago Joshua le setšhaba ka moka sa Israele ba tsoga e sa le bošego, ba tloga mešašeng ya kua Megohlong mme ba ya Jordane, moo ba hlomilego mešaša ba letela go tshela noka. Ka morago ga matšatši a mararo baetapele ba sepela le mešaša ka moka gomme ba re go setšhaba: “Ge le bona baprista ba rwele Polokelo ya Kgwerano ya Morena Modimo wa lena, le rutlolleng mešaša mme le ba latele. Ba tla le laetša tsela ka gobane ga se la ka la putla mo. Eupša le se ke la batamela Polokelo ya Kgwerano; le beng bokgole bjo e ka bago kilometara ka morago ga yona.” Joshua a botša setšhaba a re: “Itlhwekišeng, ka gobane ka moswane Morena o tla dira mehlolo gare ga lena.” Ka morago a botša baprista gore ba tšee Polokelo ya Kgwerano mme ba sepele nayo pele ga setšhaba. Ba dira ka moo a ba botšago ka gona. Morena a re go Joshua: “Se ke se dirago lehono se tla dira gore setšhaba ka moka sa Israele se thome go go hlompha o le motho yo mogolo, gomme ba tla bona gore ke na le wena bjalo ka ge ke be ke na le Moshe. Botša baprista ba ba rwelego Polokelo ya Kgwerano gore ge ba fihla ka nokeng, ba tsene ka meetseng mme ba eme kgauswi le lebopo.” Ke moo Joshua a itšego go setšhaba: “Tlang mo mme le kweng se Morena Modimo wa lena a se bolelago. Ge le goroga, ka kgonthe o tla leleka Bakanana, Bahete, Bahibe, Baperise, Bagirgashe, Baamore le Bajebuse. Le tla tseba gore Modimo yo a phelago o gare ga lena ge Polokelo ya Kgwerano ya Morena wa lefase ka moka e tshela Jordane pele ga lena. Bjale kgethang banna ba lesome le ba babedi, kgorong ye nngwe le ye nngwe ya Israele le kgethe o tee. Ge baprista ba ba rwelego Polokelo ya Morena wa lefase ka moka ba tsenya maoto a bona ka meetseng, Jordane e ka se sa ela, gomme meetse a a tšwago tletlolo a tla bokana felo gotee a dira leboto.” E be e le nako ya go buna, mme noka e be e tletše. Ge setšhaba se tloga mešašeng go tshela Jordane, baprista ba ile ba sepela pele ga sona ba rwele Polokelo ya Kgwerano. Ge baprista ba seno tsena ka meetseng, *** meetse a ile a se sa ela gomme a bokana go fihla tletlolotletlolo kua Adamo, motse wo o lego ka thoko ga Tsaretane. Moela wa go theogela Lewatleng le le Hwilego o ile wa kgaotša go ela, gomme setšhaba sa kgona go tshela noka kgauswi le Jeriko. Ge ba putla mobung wo o omilego, baprista ba ba bego ba rwele Polokelo ya Kgwerano ya Morena ba be ba eme mobung wo o omilego ba sa šuthe gare ga Jordane, go fihlela setšhaba ka moka se tshetše. Ge setšhaba ka moka se tshetše Jordane Morena a re go Joshua: “Kgetha banna ba lesome le ba babedi, kgorong ye nngwe le ye nngwe le kgethe o tee, gomme o ba laele gore ba tšee matlapa a lesome le a mabedi gare ga noka ya Jordane, gona mola baprista ba bego ba eme gona. O ba botše ba tshele ba rwele matlapa ao mme ba a role moo le tlago lala gona bošego bja lehono.” Ke moo Joshua a biditšego banna bale ba lesome le ba babedi a go ba kgetha, mme a re go bona: “Theogelang ka Jordane le etile Polokelo ya Kgwerano ya Morena Modimo wa lena pele. Yo mongwe le yo mongwe wa lena a šikare letlapa legetleng, le lengwe le le lengwe le emele kgoro e tee ya Israele. Matlapa a a tla gopotša Baisraele seo Morena a se dirilego. Ka moso ge bana ba lena ba le botšiša gore matlapa a a šupang go lena, le ba botše gore meetse a Jordane a ile a ema a se sa ela ge Polokelo ya Kgwerano ya Morena e tshela noka. Matlapa a a tla gopotša setšhaba sa Israele ka mehla ka ga seo se diragetšego fa.” Banna bao ba dira seo Joshua a se laetšego. Bjalo ka ge Morena a boditše Joshua ba ile ba tšea matlapa a lesome le a mabedi gare ga Jordane, le lengwe le le lengwe le emela kgoro e tee ya Israele, ba a iša moo ba tlago robala gona, mme ba a rola fao. Joshua le yena a hloma matlapa a lesome le a mabedi gare ga Jordane, moo baprista bale ba bego ba rwele Polokelo ya Kgwerano ba bego ba eme gona. Matlapa ao le bjale a sa le fao. Baprista bao ba ile ba ema gare ga Jordane go fihlela se sengwe le se sengwe se dirwa seo Morena a laetšego Joshua gore setšhaba se se dire. Seo ke se Moshe le yena a ilego a se botša Joshua. Setšhaba se ile sa itlhaganela sa tshela. Ge ka moka ba tshetše, baprista ba ba bego ba rwele Polokelo ya Kgwerano ya Morena ba tshela setšhaba se ba lebeletše. Banna ba kgoro ya Rubene le ba Gade le ba seripa sa kgoro ya Manase ba tshela pele ga setšhaba ka moka ba itlhametše ntwa, bjalo ka ge Moshe a be a ba boditše. Fao pele ga Morena banna ba e ka bago ba dikete tše masome a mane ba tshelela molaleng wo o lego kgauswi le Jeriko ba itlhametše ntwa. Se Morena a se dirilego letšatši leo se ile sa dira gore setšhaba sa Israele se hlomphe Joshua mme se mo tšee gore ke motho yo mogolo. Ba mo hlomphile bophelong bja gagwe ka moka, bjalo ka ge ba be ba hlompha Moshe. Ke moo Morena a boditšego Joshua gore a laele baprista ba ba rwelego Polokelo ya Kgwerano gore ba rotoge ba tšwe ka nokeng ya Jordane. Joshua a dira bjalo. Ge baprista ba rotogetše mo go omilego, noka ya thoma go ela gape, mme ya falalela ka ntle ga mabopo a yona bjalo ka pele. Setšhaba se tshetše Jordane ka letšatši la lesome la kgwedi ya mathomo, gomme sa hloma mešaša kua Gilgale, ka bohlabela bja Jeriko. Moo Joshua a tsema matlapa ale a lesome le a mabedi a ba bego ba a tšere ka nokeng ya Jordane. Ka morago ga moo a re go setšhaba sa Israele: “Ka moso ge bana ba lena ba le botšiša gore matlapa a a šupa eng, le ba botše ka tiragalo ya ge Baisraele ba tshela Jordane mobung wo o omilego. Le ba botše gore Morena Modimo wa lena o le gopišeditše meetse a Jordane go fihlela ge le tshetše, bjalo ka ge a gopišitše Lewatle la Mahlaka go fihlela ge re le tshetše, gore ditšhaba tšohle tša lefase di tsebe ka mo Morena e lego yo maatla, le gore le boife Morena Modimo wa lena go ya go ile.” Magoši ka moka a Baamore ka bodikela bja Jordane le magoši ka moka a Bakanana go ipata le Lewatle la Mediteraniene a ile a kwa gore Morena o gopišitše Jordane go fihlela setšhaba sa Israele se e tshetše. Ba ile ba boifa mme ba nolega moko ka baka la go tšhaba Baisraele. Ka yona nako yeo Morena a botša Joshua a re: “Itirele dithipa ka magakabje, gomme o bolotše Baisraele. Ba boele e be setšhaba se se bolotšego.” Ka gona Joshua a dira dithipa tšeo gomme a ba bolotša felo fa go bitšwago Mmotong wa Lebollo. Ge setšhaba sa Israele se tloga Egepeta banna ka moka ba be ba šetše ba boloditšwe. Fela mo mengwageng ye masome a mane ye setšhaba se e feditšego ge se putla lešoka, ga go mošemanyana yo a kilego a bolotšwa. Le gona go ya mafelelong a nako yeo banna ka moka ba ntwa bao ba tšwilego Egepeta ba be ba šetše ba hwile, ka gobane ba be ba ile ba se theeletše Morena. Bjalo ka ge a be a enne, ga se ba ka ba dumelelwa go bona naga yela ya mokhora le monono ye a bego a enetše borakgolokhukhu ba bona gore o tla ba fa yona. *** *** Barwa ba banna bao ba be ba se ba bolotšwa ge ba ralala le lešoka. Ke wona moloko woo wo mofsa wo Joshua a o boloditšego. Ka morago ga ge a ba boloditše setšhaba ka moka sa dula mešašeng go fihlela dintho di fodile. Morena a re go Joshua: “Lehono ke le tlošitše kgobogo ya go ba makgoba Egepeta.” Ke ka baka leo felo fao go ilego gwa fiwa leina la Gilgale, bjalo ka ge le lehono go sa bitšwa ka leina leo. Ge Baisraele ba hlomile mešaša Gilgale molaleng kgauswi le Jeriko, ba ile ba swara Monyanya wa Paseka mantšiboeng a letšatši la lesome le metšo ye mene la kgwedi. Ka lona letšatši le le latelago ba ja dijo tše di lemilwego Kanana: dinkgwa tše di se nago komelo, le dithuthupe tša mabele. Ka morago ga moo manna a ile a se sa wa, gomme Baisraele ba se sa ba nao. Go thoma ka nako yeo ba ile ba ja dijo tše di lemilwego Kanana. Ge Joshua a le kgauswi le Jeriko, ka bjako o ile a bona monna a eme pele ga gagwe a swere tšhoša. Joshua a ya go yena, a mmotšiša a re: “A o yo mongwe wa bahlabani ba rena, goba o lenaba?” Monna yoo a mo fetola a re: “Ga ke yo mongwe wa bao o ba boletšego. Ke mo ka gobane ke le molaodi wa madira a Morena.” Joshua a itahlela fase ka sefahlego, a re: “Mong wa ka, a o na le se o nyakago go mpotša sona, nna, mohlanka wa gago?” Molaodi wa madira a Morena a re: “Rola dieta tša gago; o eme felo mo gokgethwa.” Gomme Joshua a dira ka moo a botšwago ka gona. Dikgoro tša Jeriko di be di dula di tswaletšwe di kgontšwe gore Baisraele ba se ke ba tsena. Go be go se yo a ka kgonago go tsena goba go tšwa motseng. Morena o ile a re go Joshua: “Ke gafela motse wa Jeriko le kgoši ya wona le bahlabani ba wona ba bogale ka moka diatleng tša gago. Wena le bahlabani ba gago le dikologe motse gatee ka letšatši matšatši a a selelago. Baprista ba ba šupago ba sepele pele ga Polokelo ya Kgwerano yo mongwe le yo mongwe wa bona a swere phalafala. Ka letšatši la bošupa wena le bahlabani ba gago le dikologe motse gašupa mola baprista ba letša diphalafala. Ge le ekwa ba letša diphalafala gatee nako ye telele, bahlabani ka moka ba goe, mme morako wa motse o tla kgerega. Ke moka ba šwahlele motse, mongwe le mongwe a tloga mo a emego gona.” Ka gona Joshua a bitša baprista a re go bona: “Rwalang Polokelo ya Kgwerano; ba ba šupago ba lena ba sepele pele ga yona ba swere diphalafala.” A laela bahlabani ba gagwe gore ba dikologe motse, bahlabani ba ka pele ba sepele pele ga Polokelo ya Kgwerano ya Morena. Bjalo ka ge Joshua a laetše, bahlabani ba ka pele ba sepela pele ga baprista ba ba bego ba letša diphalafala; ka morago ga bona gwa tla baprista ba ba rwelego Polokelo ya Kgwerano, gwa latela bahlabani ba ka morago. Nako yeo ka moka diphalafala di be di letšwa. *** Fela Joshua o be a laetše banna ba gagwe gore ba se ke ba goa, ba se ke ba bolela selo, go fihlela ge a ba laela gore ba goe. Ka gona a roma sehlopha seo sa banna gore se rwale Polokelo ya Kgwerano ya Morena se dikologe motse gatee. Ka morago ba boela mešašeng mme ba robala gona. Ka letšatši le le latelago Joshua a tsoga e sa le bošego, gomme baprista le bahlabani ba dikologa motse gape ba latelana bjalo ka maabane a gona: gwa thoma bahlabani ba ka pele, gwa tla baprista ba ba šupago ba ba letšago diphalafala tše di šupago, gwa latela baprista ba ba rwelego Polokelo ya Kgwerano, mme mafelelong gwa tla bahlabani ba ka morago. Nako yeo ka moka diphalafala di be di letšwa. *** Ka letšatši leo la bobedi ba dikologa motse gatee gape, mme ba boela mešašeng. Ba ile ba dira bjalo matšatši a a selelago. Ka letšatši la bošupa ba tsoga ge letšatši le hlaba, mme ba dikologa motse gašupa ka wona mokgwa wola. E bile letšatši leo fela leo ka lona ba dikologilego motse gašupa. Ka lekga la bošupa ge ba rarela, ge baprista ba batametše go letša diphalafala, Joshua a laela bahlabani ba gagwe a re: “Goang! Morena o le file motse wo! Thubang motse wo, le bolaye batho le diphoofolo tša wona e le kabelo go Morena. Le phološe fela Rahaba, segwebakathobalo, le bohle ba ba nago le yena ka ntlong, ka gobane o utile dihlodi tša rena. Fela lena le ileng tšohle tše di swanetšego go fedišwa, gore le se itlholele matshwenyego le dikotsi mo mešašeng ya Baisraele. Eupša se sengwe le se sengwe se se dirilwego ka silibera, goba gauta, goba mphiri, goba tshipi se hlaoletšwe Morena. Se swanetše go bewa ka polokelong ya Morena.” Ka gona baprista ba letša diphalafala. Ge bahlabani ba seno di kwa ba goa, gomme morako wa kgerega. Ke moo bahlabani ka moka ba šwahletšego motse mme ba o thopa. Ba bolaya yo mongwe le yo mongwe motseng, banna le basadi, bafsa le batšofadi, ka tšhoša. Ba bolaya le dikgomo le dinku le dipokolo. Ke moo Joshua a boditšego banna bale ba babedi ba e bego e le dihlodi a re: “Yaang ngwakong wa segwebakathobalo sela, mme le mo ntšheng gotee le ba ba nago le yena, bjalo ka ge le enne.” Ka gona ba ya ba ntšha Rahaba gotee le tatagwe le mmagwe le dikgaetšedi le bohle ba ba nago le yena. Ba tšea lapa leo labo ka moka ba le iša mo go bolokegilego kgauswi le mešaša ya Israele. Ka morago ba tšhuma motse thokgethokge gotee le se sengwe le se sengwe go wona, ntle le dilo tše di dirilwego ka gauta, goba silibera, goba mphiri, goba tshipi. Dilo tše ba ile ba di bea polokelong ya Morena. Ge e le Rahaba, segwebakathobalo sela, le meloko yabo ka moka, Joshua o ile a ba phološa, ka gobane Rahaba o be a ile a uta dihlodi tšela tše pedi tše Joshua a bego a kile a di roma Jeriko. Ditlogolo tša Rahaba di dutše gare ga Baisraele go fihlela le lehono. Ka nako yeo Joshua a eniša setšhaba a re: “Yo a kago leka go tsošološa motse wa Jeriko o tla lebanwa ke thogako ya Morena. “Yo a kago o thea o tla lahlegelwa ke morwa wa gagwe wa leitšibolo; yo a ka agago dikgoro tša wona o tla lahlegelwa ke morwa wa gagwe wa phejane.” Ka gona Morena a ba le Joshua, gomme setumo sa gagwe sa phatlalala nageng ka moka. Baisraele ba ile ba se botegele Morena ba tshela taelo ya gagwe ya gore ba se ke ba tšea selo se se bego se swanetše go fedišwa. Monna yo mongwe yo a bego a bitšwa Akane o ile a tshela taelo yeo, ka fao Morena a tukela Baisraele bogale. Akane e be e le morwa wa Karmi, Karmi morwa wa Sabdi, wa kgorwana ya Serage, ya kgoro ya Juda. Joshua o ile a roma banna ba bangwe go tloga Jeriko go ya Ai, motse wa ka bohlabela bja Bethele, kgauswi le Bethe-Abene. A ba botša gore ba ye ba hlole naga yeo. Ge ba e hlotše, ba boa ba begela Joshua ba re: “Ga go nyakege gore ka moka re ye. Romela fela bahlabani ba e ka bago ba dikete tše pedi goba tše tharo, gomme ba tla thopa Ai. O se ke wa lapiša madira ka moka ka leeto la go yo hlabana; ga se motse wo mogolo.” Ka gona bahlabani ba e ka bago ba dikete tše tharo ba hlasela Ai, eupša ba gapeletšega go tšhaba. Banna ba Ai ba rakediša Baisraele go tloga kgorong ya motse go ba go yo fihla kua go epšago maswika, gomme ba bolaya ba e ka bago ba masome a mararo le metšo ye e selelago tseleng ge ba theoga mmoto. Baisraele ba nolega moko, mme ba boifa. Joshua le baetapele ba Baisraele ba gagola diaparo tša bona ka manyami, ba itahlela fase ka difahlego pele ga Polokelo ya Kgwerano ya Morena, gomme ba patlama go fihlela mantšiboa, ba itšhetše dihlogo ka mobu go laetša manyami a bona. Ke moo Joshua a itšego: “Joo, Morena, Mong wa ka! O reng o tshedišitše setšhaba se noka ya Jordane? Kgane o be o re tshedišetša go tlo re gafela diatleng tša Baamore gore ba re fediše? Nkabe re no itulela ka mošola wa Jordane. A nka reng, Mong wa ka, ka gore Baisraele ba tšo tšhaba manaba a bona? Bakanana le bohle ba ba agilego mo nageng ba tla kwa taba ye. Ba tla re dikanetša gomme ba re fediša! Bjale ke eng se o tlago se dira gore batho ba se ke ba go nyatša?” Morena a re go Joshua: “Tsoga! Ke ka baka lang o itahletše fase ka sefahlego? Baisraele ba dirile sebe! Ba lahlile kgwerano yela ba e dirilego le nna ye ke ba laetšego gore ba e botegele. Ba tšere tše dingwe tša dilo tšela di ilego tša gafelwa go fedišwa. Ba di utswitše, gomme ba ipolokela tšona ka sephiring le dilo tša bona. Lebaka ke lona leo ge Baisraele ba šitwa ke go ema ba fenya manaba a bona. Ba a ba tšhaba, ka gobane bona ka bobona ba gafetšwe go fedišwa! Nka se sa ba le lena go iša pele, ge e se ge le ka fediša dilo tše le laetšwego gore le se ke la di tšea! Tsoga! Hlwekiša setšhaba gomme o se lokišetše go tla pele ga ka. Ba botše gore ba itokišetše go tla go nna ka moswane, ka gobane nna, Modimo wa Baisraele, ke re: ‘Baisraele, le swere dilo tše dingwe tše ke le laetšego gore le di fediše! Le ka se kgone go ema la fenya manaba a lena ge le sa tloše dilo tšeo!’ Ka gona mosong le batamele pele ga ka, kgoro ka kgoro. Kgoro yeo ke e ntšhago ka matengwa e batamele, kgorwana ka kgorwana. Kgorwana ye ke e ntšhago e batamele, lapa ka lapa. Lapa le ke le ntšhago le batamele, monna ka monna. Monna yo a ka hwetšwago a swere phahlo ye e gafetšwego go fedišwa a tšhungwe, gotee le lapa la gagwe le tšohle tše e lego tša gagwe, ka gobane o dirile taba ya dihlong mo go Baisraele, mme o lahlile kgwerano ya ka.” Joshua a tsoga e sa le bošego mosong wo o latelago, gomme a tliša Baisraele, kgoro ka kgoro. Gwa swarwa kgoro ya Juda. A tliša ba dikgorwana tša Juda, gomme gwa tanywa kgorwana ya Serage. A tliša ba kgorwana ya Serage, lapa ka lapa, gomme gwa swarwa lapa la Sabdi. A tliša lapa la Sabdi, monna ka monna, gomme gwa ntšhwa Akane. E be e le morwa wa Karmi, Karmi morwa wa Sabdi, wa kgorwana ya Serage, ya kgoro ya Juda. Joshua a re go yena: “Ngwanaka, bolela therešo mo pele ga Morena, Modimo wa Israele, mme o ipolele. Mpotše bjale se o se dirilego. O se ke wa leka go nkutela sona.” Akane a mo fetola a re: “Ee, ke dirile sebe pele ga Morena, Modimo wa Israele, mme se ke se dirilego sese: Gare ga dilo tše re di thopilego ke ile ka bona seaparo se sebotse sa Sebabilonia, le silibera ya dikilokramo tše e ka bago tše pedi, le setena sa gauta sa boima bja go feta seripagare sa kilokramo. Ke ile ka di duma, ka di tšea. O tla di hwetša ke di epetše ka mošašeng wa ka, silibera e le ka fase.” Ka gona Joshua a roma batseta ba bangwe ba kitimela mošašeng, mme ba hwetša gore ka therešo dilo tšela tša go gafelwa go fedišwa di epetšwe ka fao, silibera e le ka fase. Ba di ntšha ka mošašeng, ba di iša go Joshua le go Baisraele ka moka, gomme ba di phatlalatša pele ga Morena. Joshua gotee le setšhaba ka moka sa Israele ba tšea Akane le silibera yela le seaparo sela le setena sela sa gauta le barwa le barwedi ba gagwe le dikgomo tša gagwe le dipokolo le dihuswane le mošaša wa gagwe, le se sengwe le se sengwe se e bego e le sa gagwe, ba di iša Moeding wa Matshwenyego. Ke moo Joshua a itšego: “Ke ka baka lang o re tlišeditše matshwenyego a mabjalo? Morena bjale o tla go tlišetša wena matshwenyego.” Setšhaba ka moka sa bolaya Akane ka maswika; ba bolaya le ba lapa la gagwe gotee le thoto ya gagwe, mme ba ba tšhuma. Ba dira mokgobo wo mogolo wa maswika godimo ga gagwe wo o sa lego moo le lehono. Ke ka baka leo felo fao go sa bitšwago Moedi wa Matshwenyego. Ka gona Morena a se sa tuka bogale. Morena a re go Joshua: “Tloga le bahlabani ka moka le rotogele Ai. O se ke wa boifa goba wa nolega moko. Ke tla gafela kgoši ya Ai le setšhaba sa gagwe le motse le naga ya gagwe diatleng tša gago. O dire Ai le kgoši ya yona se o se dirilego Jeriko le kgoši ya yona, fela fao le ka itšeela dithoto le diruiwa. Le ba laleleng ka morago ga motse.” Ka gona Joshua a itokišetša go ya Ai le bahlabani ba gagwe ka moka. A hlaola bahlabani ba dikete tše masome a mararo, ba bagale madireng a gagwe, mme a ba ntšha mešašeng bošego. A ba laela a re: “Le ba laleleng ka morago ga motse, fela e sego kgole kudu le wona; le dule le itokišeditše go hlasela. Nna le bahlabani ba ka re tla batamela motse. Ge bahlabani ba Ai ba etla go lwa le rena, re tla tšhaba, bjalo ka mola lekgeng la pele. Ba tla re rakediša go fihlela ge re ba išitše kgole le motse. Ba tla gopola gore re a ba tšhaba, bjalo ka mola ga pele. Ke moka lena le tšwe mo le laletšego gona le thope motse. Morena Modimo wa lena o tla le gafela wona. Ka morago ga ge le tšere motse woo le o tšhumeng, bjalo ka ge Morena a laetše. Ke ka moo ke le laelago ka gona.” Ka gona Joshua a ba ntšha mešašeng, gomme ba ya mo ba yogo lalela ntshe mme ba leta ba le fao, ka bodikela bja Ai, gare ga Ai le Bethele. Joshua yena a robala mešašeng. Eitše e sa le bošego Joshua a tsoga mme a rapa dira. Yena le baetapele ba Baisraele ba eta bahlabani pele go ya Ai. Bahlabani ba ba bego ba na le yena ba ya ka pele ga motse mme ba hloma mešaša ka thoko ya ka leboa, bona le Ai ba kgaoganywa ke moedi. A tšea banna ba e ka bago ba dikete tše tlhano a dira gore ba lalele ka bodikela bja motse, gare ga Ai le Bethele. Bahlabani ba ile ba beakanyetšwa ntwa ka mokgwa wo: mešaša ye mentši e ile ya ba ka bohlabela bja motse, mme bahlabani ba ba šetšego ba ba ka bodikela. Joshua a robala ka moeding. Ge kgoši ya Ai e bona bahlabani ba Joshua, e ile ya itlhaganela – yena le bahlabani ba gagwe ka moka ba tsoga e sa le bošego ba tšwa ba leba moeding wa Jordane go yo lwa le Baisraele lona lefelong lela ba go lwa nabo pele. O be a sa tsebe gore o laletšwe ka morago ga motse. Joshua le bahlabani ba gagwe bohle ba dira mo nkego ba boela morago, mme ba tšhaba ba leba lešokeng. Bahlabani ka moka motseng ba be ba biditšwe gore ba ba rakediše, gomme ge ba rakediša Joshua, ba katologa motse. Bahlabani ka moka ba Ai ba rakediša Baisraele. Motse wa tlogelwa o ahlame. Ke moo Morena a itšego go Joshua: “Šupa Ai ka lerumo la gago; ke e gafela diatleng tša gago.” Joshua a dira ka moo a botšwago ka gona, gomme ge a seno emiša seatla, bahlabani bale ba bego ba laletše ba ema ka potlako, ba kgorogela motseng, ba o thopa. Ba o tšhuma ka bjako. Ge bahlabani ba Ai ba lebelela morago, ba bona muši o kuelelela godimo. Go be go se moo ba ka tšhabelago gona, ka gobane Baisraele ba ba bego ba tšhabetše lešokeng bjale ba ile ba retologa gore ba ba hlasele. Ge Joshua le bahlabani ba gagwe ba bona gore bale ba bangwe ba thopile motse le gore motse o a swa, ba retologa mme ba thoma go bolaya bahlabani ba Ai. Baisraele bale ba lego motseng ba theoga go tlo kopana le madira a gabobona. Ka gona bahlabani ba Ai ba ikhwetša ba dikologilwe ke Baisraele ka mathoko ohle, mme ba bolawa ka moka. Ga go yo a ilego a phonyokga goba a tšhaba ka ntle le kgoši ya Ai. Yena o ile a thopša, mme a išwa go Joshua. Baisraele ba bolaya yo mongwe le yo mongwe wa manaba lešokeng mola ba ilego ba ba rakedišetša gona. Ka morago Baisraele ba gomela Ai mme ba bolaya yo mongwe le yo mongwe fao. Joshua a fela a šupile Ai ka lerumo la gagwe, mme a se ke a le iša fase go fihlela ge batho bohle fao ba bolailwe. Bohle ba ba bolailwego tšatšing leo, banna le basadi, e be e le ba dikete tše lesome le tše pedi, badudi bohle ba Ai. *** Baisraele ba itšeela fela diruiwa le thoto ye e thopilwego motseng, bjalo ka ge Morena a boditše Joshua. Joshua a tšhuma Ai, mme a e tlogela e le maroperope. E sa le ka mokgwa woo le lehono. A lekeletša kgoši ya Ai koteng, gomme a lesa setopo sa gagwe se lekeletše fao go fihlela mantšiboa. Ge letšatši le dikela Joshua a laela gore setopo seo se tlošwe, gomme se ile sa lahlelwa kgorong ya motse. Ba dira mokgobo wo mogolo wa matlapa godimo ga sona woo o sa lego moo le lehono. Mehleng yeo Joshua a agela Morena, Modimo wa Israele, aletare thabeng ya Ebale. A e aga go ya ka ditaelo tše Moshe, mohlanka wa Morena, a ilego a di fa Baisraele, bjalo ka ge go bolelwa melaong ya Moshe go re: “E be aletare ye e agilwego ka matlapa ao a sego a betlwa ka dilo tša tshipi.” Ba direla Morena dihlabelo tša go tšhungwa ka moka godimo ga yona, ba tliša le dihlabelo tša bona tša kagišano. Moo Joshua a ngwalolla melao ye e ngwadilwego ke Moshe, a e ngwalolla matlapeng Baisraele ba mo lebeletše. Baisraele ka moka le baetapele ba bona le balaodi le baahlodi gotee le bafaladi ba ba lego gare ga bona ba ile ba ema ka mahlakoreng a mabedi a Polokelo ya Kgwerano ya Morena, ba lebane le baprista ba Balefi bao ba bego ba e rwele. Seripa sa setšhaba sa ema se lebane le thaba ya Gerisime, mme se sengwe se lebane le thaba ya Ebale, bjale ka ge Moshe, mohlanka wa Morena, a be a kile a ba laela gore ba dire ge nako e fihla ya gore ba amogele tšhegofatšo. Ke moka Joshua a bala melao ka moka ka go hlaboša lentšu, gammogo le ditšhegofatšo le dithogako, bjalo ka ge di ngwadilwe ka pukung ya melao. Wo mongwe le wo mongwe wa melao ya Moshe wa balwa ke Joshua pele ga setšhaba ka moka se se bego se akaretša basadi le bana, gotee le bafaladi ba ba bego ba dula gare ga bona. Go fenya ga Baisraele go ile gwa tsebja ke magoši ka moka a ka bodikela bja Jordane – kua dithabeng le nagengtlase le go ipata le molala wa lebopong la Lewatle la Mediteraniene go ya leboa go ba go fihla Lebanone; ao e be e le magoši a Bahete, Baamore, Bakanana, Baperise, Bahibe le Bajebuse. Ka moka ga bona ba kopana ba ipopa gore ba yo lwa le Joshua le Baisraele. Batho ba Gibeone ba e bego e le Bahibe ba kwa se Joshua a se dirilego Jeriko le Ai, gomme ba kwana go mo radia. Ba ile ba ya ba tšea dijo, gomme ba rweša dipokolo tša bona mekotla ya maratha le makuka a beine ao a pharilwego digaswa. Ba apara diaparo tša mankgeretla mme ba rwala dieta tše di onetšego tše di rokilwego. Dinkgwa tša bona tša mefago di be di omeletše, di rathagane. Ba ya go Joshua mešašeng kua Gilgale gomme ba re go yena le go banna ba Israele: “Re tlile mo re etšwa nageng ya kgole. Re nyaka gore le dire kwano le rena.” Eupša banna ba Israele ba re: “Ke ka baka lang re swanetše go dira kwano le lena? Mogongwe le dula gona mo kgauswi.” Banna bao ba re go Joshua: “Re diatleng tša gago.” Joshua a ba botšiša a re: “A ke lena bomang? Le tšwa kae?” Ke moo ba rilego go yena: “Re tšwa nageng ya kgole kudu, morena, ka gobane re kwele ka Morena Modimo wa gago. Re kwele ka tšohle tše a di dirilego Egepeta le se a se dirilego dikgoši tšela tše pedi tša Baamore kua bohlabela bja Jordane: Kgoši Sihone wa Heshbone le Kgoši Ogo wa Bashane, yo a bego a dula Ashtarote. Baetapele ba rena le batho ka moka ba ba dulago nageng ya rena ba ile ba re botša gore re tšee mefago re tle re le gahlanetše. Re boditšwe gore re ipee diatleng tša lena mme re le kgopele gore le dire kwano le rena. Bona dinkgwa tša rena. Ge re thoma leeto la go tlo le gahlanetša mme re tloga gae le tšona, di be di sa le di borutho. Bjale bonang! Di omeletše ebile di rathagane. Ge re tlatša makuka a a beine e be e sa le a mafsa, eupša bjale bonang! A gagogile. Diaparo tša rena le dieta di onaditšwe ke leeto la rena le letelele.” Banna ba Israele ba amogela ye mengwe ya mefago yeo ya bona, fela ba se ke ba botšiša Morena ka taba yeo. Ka gona Joshua a dira kwano ya khutšo le bona ya go re a ba lese ba phele. Baetapele ba setšhaba sa Israele ba ba enela gore ba tla botegela kwano yeo. Ka morago ga matšatši a mararo ge kwano yeo e dirilwe, Baisraele ba kwa gore ka kgonthe batho bale ba dula mo kgauswi. Ka gona setšhaba sa Israele sa fetela pele, gomme ka morago ga matšatši a mararo ba fihla metseng ye batho bale ba bego ba dula go yona: Gibeone, Kefira, Beerote le Kiriate-Jearime. Eupša Baisraele ba šitwa ke go ba bolaya, ka gobane baetapele ba bona ba be ba ba enetše ka leina la Morena, Modimo wa Israele. Setšhaba ka moka sa tla sa ngongoregela baetapele ka taba ye, eupša bona ba ba fetola ba re: “Re ba enetše ka leina la Morena, Modimo wa Israele. Bjale re ka se kgone go ba kweša bohloko. Re swanetše go ba lesa ba phele ka baka la keno ya rena; ge re ka se ba lese Modimo o tla re otla. Ba leseng ba phele, fela ba tla swanelwa ke go re rwalelela dikgong le go re gela meetse.” Gwa ba ka mo baetapele ba boletšego ka gona. Joshua a laela gore batho ba Gibeone ba tlišwe go yena, gomme a ba botšiša a re: “Ke ka baka lang le re radiile la re botša gore le tšwa kgole kudu, mola e le gore le dula gona mo? Ka gobane le dirile taba yeo, le rogakilwe! Ka mehla le tla ba makgoba a go rwalela dikgong le a go ga meetse a sekgethwa sa Modimo wa ka.” Ba mo fetola ba re: “Re dirile taba ye, morena, ka gobane re ile ra kwa gore ka nnete Morena Modimo wa lena o ile a laela mohlanka wa gagwe, Moshe, gore a le fe naga ye ka moka, le go bolaya batho ba ba dulago go yona ge le goroga. Re dirile taba yeo ka gobane re be re tšhogile kudu – re boifa gore re tlile go bolawa. Bjale re diatleng tša gago; dira ka rena ka moo o bonago go swanetše.” Ka gona Joshua a ba šireletša, gomme Baisraele ba se ke ba ba bolaya. Eupša ka lona letšatši leo a ba dira barwaledi ba dikgong le bagi ba meetse a setšhaba sa Israele le a aletare ya Morena. Le lehono ba sa dira mošomo woo felong fao Morena a kgethago gore a khunamelwe gona. Adoni-Tsedeke, kgoši ya Jerusalema, o ile a kwa gore Joshua o thopile motse wa Ai, a o thubaganya, a ba a bolaya kgoši ya gona le batho ba gona gotee le diphoofolo, ka mo a dirilego Jeriko le kgoši ya gona. A kwa le gore batho ba Gibeone ba dirile khutšo le Baisraele, le gore ba dula gare ga bona. Batho ba Jerusalema ba ile ba tšhoga kudu, ka gobane motse wa Gibeone e be e le wo mogolo go lekana le metse ye e bego e na le magoši; o be o feta Ai, gomme banna ba wona e le bagale. Ka gona Adoni-Tsedeke a romela molaetša go Kgoši Hohamo wa Hebrone, le go Kgoši Piramo wa Jarmute, le go Kgoši Jafia wa Lakishe, le go Kgoši Debire wa Eglone, a re: “Tlang le nthušeng go hlasela motse wa Gibeone, ka gobane batho ba gona ba dirile khutšo le Joshua le Baisraele.” Magoši a a mahlano a Baamore, kgoši ya Jerusalema le ya Hebrone le ya Jarmute le ya Lakishe le ya Eglone, ba bokana gotee le madira a bona, ba dikanetša Gibeone mme ba e hlasela. Banna ba Gibeone ba romela molaetša go Joshua mešašeng kua Gilgale ba re: “Se re tlogele, rena, bahlanka ba gago! Tlaa ka pela o tle o re thuše! Re phološe! Magoši ka moka a Baamore a nageng ya dithaba a kopane gomme a re hlasetše!” Ka gona Joshua le madira a gagwe ka moka, gotee le bagale ka moka, ba tloga Gilgale. Morena a re go Joshua: “O se ke wa ba boifa. Ke šetše ke ba gafetše diatleng tša gago. Ga go le o tee wa bona yo a tlago go ema pele.” Bošego ka moka Joshua le madira a gagwe ba sepela go tloga Gilgale go yo fihla Gibeone, gomme a hlasela Baamore ba sa itebetše. Morena a ba dira gore ba tlalelwe ge ba bona madira a Israele. Baisraele ba ba fenya fenyang kua Gibeone, mme ba ba rakediša go ba theoša sefata sa thaba kua Bethe-Horone, ba lwa nabo go ya borwa go ba go yo fihla Aseka le Makeda. Ge Baamore ba tšhaba Baisraele ba theoga ka sefata, Morena a dira gore sefako se sekotokoto se ba nele tseleng ka moka go ya Aseka. Sefako sa bolaya batho ba bantši go feta bao ba bolailwego ke Baisraele. Ka letšatši leo Morena a gafetšego Baamore diatleng tša Baisraele, Joshua o ile a kgopela Morena thušo. Mo pele ga Baisraele a re: “Letšatši, ema felo gotee ka godimo ga Gibeone; ngwedi, ema ka godimo ga moedi wa Ayalone.” Letšatši la ema felo gotee, le kgwedi ya se ke ya šutha go fihlela setšhaba se fentše manaba a sona. Taba ye e ngwadilwe mo Pukung ya Moloki. Letšatši la ema felo gotee gare ga leratadima, gomme la diega go dikela ya ba nke ke letšatši ka moka. Go be go se gwa ka gwa ba le letšatši la go swana le leo, mme ka morago ga se gwa ka gwa ba le letšatši la go swana le lona, moo Morena a amogetšego kgopelo ya motho. Morena o be a hlabanela Baisraele. Ka morago ga fao Joshua le madira a gagwe ba boela mešašeng kua Gilgale. Dikgoši tšela tše tlhano tšona di be di tšhabile gomme di utamile ka leweng kua Makeda. Joshua a botšwa gore dikgoši tšela tše tlhano di hweditšwe di utamile ka leweng. Yena a re: “Kgokološetšang matlapa a magolo moo molomong wa lewa. Le beeng baleti moo, fela lena le se ke la dula gona. Le hlomareng manaba gomme le ba hlasele ka morago; le se ke la ba lesa ba boela metseng ya bona! Morena Modimo wa lena o ba gafetše diatleng tša lena.” Joshua le bahlabani ba Baisraele ba ba bolaya ka bontši, le ge ba bangwe ba bona ba ile ba kgona go tšhabela ka metseng ya bona ye e ageleditšwego ka merako gomme ba se bolawe. Ke moka bahlabani bohle ba Joshua ba gomela go yena ba bolokegile mešašeng kua Makeda. Go ile gwa se sa ba le motho yo a bolelago ka go lwa le Baisraele. Ke moka Joshua a re: “Bulang mojako wa lewa mme le ntšheng magoši ao a mahlano le a tlišeng go nna.” Ka gona lewa la bulwa, gomme ba ntšha kgoši ya Jerusalema le ya Hebrone le ya Jarmute le ya Lakishe le ya Eglone mme ba di iša go Joshua. Ke moo Joshua a bokanyeditšego banna ka moka ba Israele go yena, mme a laela balaodi ba ba bego ba ile le yena gore ba tle ba gate dikgoši tšela melala ka dinao. Ba tla ba ba gata melala. Ke gona Joshua a itšego go balaodi ba gagwe: “Le se ke la boifa goba la nolega moko. Le beng le sebete, le tie, ka gobane Morena o tlile go dira manaba a lena ka moka ka mokgwa wo.” Ke moka Joshua a bolaya magoši ale mme a a lekeletša dikoteng tše tlhano, moo ditopo tša bona di bilego fao go fihlela mathapama. Ge letšatši le dikela, Joshua a laela gore ditopo tša bona di kgokollwe mme di lahlelwe ka leweng lela ba bego ba utamile ka go lona. Matlapa a magolo a bewa molomong wa lewa, mme a sa le moo le lehono. Joshua a hlasela motse wa Makeda mme a o thopa le kgoši ya gona ka letšatši leo. A bolaya batho ka moka motseng; gwa se be le yo a šalago. A dira kgoši ya Makeda se a se dirilego kgoši ya Jeriko. Ka morago ga moo Joshua le madira a gagwe ba tloga Makeda ba ya motseng wa Libna, gomme ba o hlasela. Motse woo le kgoši ya wona le wona Morena a o gafela diatleng tša Baisraele. Ba se ke ba šadiša motho, eupša ba bolaya yo mongwe le yo mongwe go wona. Ba dira kgoši ya ntshe se ba se dirilego kgoši ya Jeriko. Ka morago ga moo Joshua le madira a gagwe ba tloga Libna ba ya motseng wa Lakishe, ba o dikanetša mme ba o hlasela. Morena a gafela Lakishe diatleng tša Baisraele ka letšatši la bobedi la ntwa. Ka wona mokgwa woo ba dirilego kua Libna ba ile ba se ke ba šadiša motho, eupša ba bolaya yo mongwe le yo mongwe motseng. Kgoši Horamo wa Gesere a tla go thuša ba Lakishe, eupša Joshua a mo fenya gotee le madira a gagwe, mme a se šadiše motho wa bona a phela. Go tloga moo Joshua le madira a gagwe ba tloga Lakishe ba ya motseng wa Eglone, ba o dikanetša mme ba o hlasela. Ba o thopa ka lona letšatši leo, gomme ba bolaya bohle fao, ba o dira se ba se dirilego Lakishe. Ka morago ga moo Joshua le madira a gagwe ba tloga Eglone ba namela dithaba ba ya motseng wa Hebrone, ba o hlasela mme ba o thopa. Ba bolaya kgoši le bohle motseng woo, gotee le metseng ya kgauswi. Joshua a thubaganya motse, a bolaya le bohle motseng, ka wona mokgwa wola a dirilego Eglone. Gwa se be le o tee go wona yo a šalago. Ke moo Joshua le madira a gagwe ba ilego motseng wa Debire, ba o hlasela. Ba o thopa gotee le kgoši ya gona le metse ka moka ya kgauswi. Ba bolaya bohle fao. Joshua a dira Debire le kgoši ya gona se a se dirilego Hebrone le Libna le magoši a gona. Ka mokgwa wo mobjalo a fenya badudi ba dinaga tšohle, e lego ba naga ya dithaba, ba naga ye e omilego ya ka borwa, ba nagatlase, le ba metheogeng ya dithaba, le magoši a bona. O ile a se ke a šadiša motho; yo mongwe le yo mongwe a bolawa. Se e be e le seo Morena Modimo wa Israele a se laetšego. Dintwa tša Joshua di ile tša mo tloša Kadeshe-Barnea ka borwa tša mo iša Gasa kgauswi le lebopo la lewatle, le tikologong ka moka ya Goshene, tša ba tša mo iša leboa go fihla Gibeone. Joshua o ile a fenya magoši a ka moka le dinaga tša bona ka lesolo le tee, ka gobane Morena Modimo wa Israele o be a lwela Baisraele. Ka morago ga moo Joshua le madira a gagwe ba boela mešašeng kua Gilgale. Ge Jabine, kgoši ya Hatsore, a ekwa ka go fenya moo ga Baisraele, o ile a romela molaetša go Jobabe, kgoši ya Madone, le go kgoši ya Shimrone le go ya Akshafo, le go magoši a nageng ya dithaba ka leboa, le a ka moeding wa Jordane ka borwa bja letsha la Genesarete, le a nagengtlase, le a mebotong ya Doro, lebopong la lewatle. A o romela le go Bakanana ba ka moeding wa Jordane, le ba lebopong la lewatle, le go Baamore, le go Bahete, le go Baperise, le go Bajebuse nageng ya dithaba, le go Bahibe bao ba bego ba dula patogeng ya thaba ya Hermone, nageng ya Mitsepa. Bona ba tla le bahlabani ba bona ka moka – ya ba madira a banna ba bantši bjalo ka dithorwana tša lešabašaba lebopong la lewatle. Ba be ba na le dipere tše ntšintši le makoloi a ntwa. Magoši a ka moka a kopana mme ba kgobokana, ba hloma mešaša kua letsheng la Meromo gore ba tle ba lwe le Baisraele. Morena a re go Joshua: “O se ke wa ba boifa. Ka yona nako ye ka moswane ke tla be ke ba gafetše go Baisraele, gomme ka moka ba tla bolawa. O ripe dipere tša bona mešifa, o tšhume le makoloi a bona a ntwa.” Ka gona Joshua le bahlabani ba gagwe ka moka ba ba hlasela ba sa itebetše kua letsheng la Meromo. Morena a ba gafela diatleng tša Baisraele; ba ba hlasela mme ba ba rakediša go ya leboa go yo fihla Sidone ye Kgolo le Misrefote-Maime, le go ya bohlabela go yo fihla moeding wa Mitsepa. Ba ba fetša lai gwa se sadišwe le o tee. Joshua a ba dira seo Morena a mo laetšego sona: a ripa dipere tša bona mešifa, a tšhuma le makoloi a bona a ntwa. Ke moka a boela morago, a thopa motse wa Hatsore mme a bolaya kgoši ya gona. Mehleng yeo Hatsore e be e le ketapele ya mebušo yeo ka moka. Ba bolaya bohle fao; gwa se be le sephedi se se šalago, le motse wa tšhungwa. Joshua a thopa metse yeo ka moka le dikgoši tša gona, a bolaya bohle, ka moo Moshe, mohlanka wa Morena, a laetšego ka gona. Eupša Baisraele ba se ke ba tšhuma le o tee wa metse ye e bego e agilwe godimo ga marope, ntle le Hatsore, yeo Joshua a e tšhumilego. Baisraele ba tšea dilo tše bohlokwa ka moka le diruiwa metseng yeo, mme ba ipolokela tšona. Eupša ba bolaya batho bohle, gwa se be le yo a šalago. Morena o be a laetše Moshe, mohlanka wa gagwe; Moshe yena a laela Joshua, mme Joshua a phetha ditaelo, a dira tšohle tše Morena a bego a di laetše Moshe. Joshua a thopa naga tšeo ka moka – naga ya dithaba, le nagatlase ya ka leboa le ya ka borwa, tikologo ka moka ya Goshene, naga ye e omilego ya ka borwa bja yona, gotee le moedi wa Jordane. Dinaga tšeo di be di tloga Thabeng ye e se nago Mehlare ye e rotogelago Edomo, di fihla Baale-Gade ka leboa, ka moeding wa Lebanone ka borwa bja thaba ya Hermone. Joshua o lwele le magoši a dinaga tše lebaka le letelele, mme mafelelong a ba thopa ka moka a ba bolaya. *** Ga se gwa ba le motse wo o dirago kwano le Baisraele, ntle le Gibeone, moo go bego go dula Bahibe. Ba metse ye mengwe ka moka ba ile ba fenywa ntweng. Morena a ba thatafatša dipelo gore ba lwe le Baisraele, gore ba tle ba fedišetšwe sa ruri le gore bohle ba bolawe ntle le kwelobohloko. Se e be e le seo Morena a se laetšego Moshe. Mehleng yeo Joshua a tloga a yo fediša morafe wa ditšitširipa wo o bego o bitšwa Baanake wa go dula kua nageng ya dithaba – motseng wa Hebrone, wa Debire, wa Anabe, le nageng ya dithaba yohle ya Juda le ya Israele. Joshua a ba fedišetša sa ruri le metse ya bona. Gwa se ke gwa ba le Moanake yo a tlogelwago nageng ya Israele. Fela kua Gasa le Gathe le Ashdode gwa tlogelwa ba se ba kae. Joshua a thopa naga ka moka, bjalo ka ge Morena a laetše Moshe. A e fa Baisraele ya ba lefa la bona, mme a e arola dikarolo, kgoro ye nngwe le ye nngwe ya ba le karolo ya yona. Ka gona naga ya lala. Setšhaba sa Israele se be se šetše se thopile naga ya ka bohlabela bja Jordane mme se dutše go yona, go tloga nokaneng ya Arnone go akaretša moedi wa Jordane go ya leboa go yo fihla thabeng ya Hermone. Ba ile ba fenya dikgoši tše pedi; yo mongwe e be e le Sihone, kgoši ya Baamore, yo a bego a buša Heshbone. Mmušo wa gagwe o be o tloga Aroere, ka thoko ga moedi wa nokana ya Arnone, le motseng wo o lego gare ga moedi, go akaretša seripagare sa naga ya Gileade go yo fihla nokaneng ya Jaboko, mollwaneng wa Amone; le ka bohlabela bja moedi wa Jordane, go tloga letsheng la Genesarete go ya borwa go fihla Bethe-Jeshimote, ka bohlabela bja Lewatle le le Hwilego, le go fetela patogeng ya thaba ya Pisga. Ba ile ba fenya le Kgoši Ogo wa Bashane, yo e bego e le yo mongwe wa ba mafelelo wa Barafa; o be a buša kua motseng wa Ashtarote le wa Edrei. Mmušo wa gagwe o be o akaretša thaba ya Hermone, le motse wa Salka, le naga ka moka ya Bashane go yo fihla mollwaneng wa Bageshure le Bamaaka le seripa sa Gileade, go yo fihla nageng ya Kgoši Sihone wa Heshbone. Dikgoši tše pedi tše di ile tša fenywa ke Moshe le setšhaba sa Israele. Moshe, mohlanka wa Morena, a tšea naga ya bona a e fa kgoro ya Rubene le ya Gade le seripa sa kgoro ya Manase. Joshua le setšhaba sa Israele ba ile ba fenya dikgoši ka moka tša nageng ye e lego ka bodikela bja Jordane, go tloga Baale-Gade moeding wa Lebanone go yo fihla ka borwa Thabeng ye e se nago Mehlare ye e rotogelago Edomo. Joshua a arola naga ye go ya ka dikgoro tša bona, gomme a ba fela yona sa ruri. Seripa se se be se akaretša naga ya dithaba, le nagatlase, le moedi wa Jordane, le metheoga ya dithaba, le naga ye e omilego ya ka borwa. Naga ye e be e kile ya ba ya Bahete, ya Baamore, ya Bakanana, ya Baperise, ya Bahibe, le ya Bajebuse. Setšhaba sa Israele se ile sa fenya magoši a metse ye: Jeriko, Ai, kgauswi le Bethele, Jerusalema, Hebrone, Jarmute, Lakishe, Eglone, Gesere, Debire, Gedere, Horma, Arade, Libna, Adulamo, Makeda, Bethele, Tapuage, Hefere, Afeke, Sharone, Madone, Hatsore, Shimrone-Merone, Akshafo, Taanake, Megido, Kedeshe, Jokneamo, kua Karmele, Doro, kua lebopong la lewatle, Goime, kua Galilea, le Tirtsa. Ka moka ke magoši a masome a mararo le o tee. Joshua bjale o be a tšofetše kudu. Morena a re go yena: “O tšofetše kudu, eupša go sa na le naga ye kgolo ye e swanetšego go thopša: naga ka moka ya Filistia le Geshure, gotee le naga ka moka ya Baaba go ya borwa. Naga ya go tloga moetšaneng wa Shihore, mollwaneng wa Egepeta, go ya leboa go yo fihla mollwaneng wa Ekrone e be e tšewa gore ke ya Bakanana; babuši ba Bafilista ba be ba dula Gasa, Ashdode, Ashkelone, Gathe le Ekrone. Go sa na le naga ya Bakanana ka moka, le Meara ye e lego ya Basidone, go fihla Afeke, mollwaneng wa Baamore; naga ya Bagebale; naga ka moka ya Lebanone go ya bohlabela, go tloga Baale-Gade patogeng ya thaba ya Hermone, go ya sefateng sa Hamate. Naga ye e akaretša naga ka moka ya Basidone, ba ba dulago nageng ya dithaba ya gare ga dithaba tša Lebanone le Misrefote-Maime. Nna ke tla leleka ditšhaba tše ka moka ge setšhaba sa Israele se goroga. O swanetše go arolela Baisraele naga ye, ka mo ke go laetšego ka gona. Bjale ge, arolela dikgoro tše dingwe tše senyane le seripa sela se sengwe sa kgoro ya Manase, gore e be lefa la bona.” Kgoro ya Rubene le ya Gade le seripa se sengwe sa kgoro ya Manase di be di šetše di hweditše naga ye Moshe, mohlanka wa Morena, a ilego a di fa yona; naga ye e be e le ka lehlakoreng la ka bohlabela la noka ya Jordane. Naga ya bona e be e fihla kua Aroere, ka thoko ga moedi wa nokana ya Arnone, le motseng wa gare ga moedi, mme e akaretša molala ka moka go tloga Medeba go fihla Dibone. E be e fihla mollwaneng wa Amone, gomme e akaretša metse ka moka ye e bego e bušwa ke Kgoši Sihone wa Baamore, yo a bego a buša a le Heshbone. E be e akaretša Gileade, le dilete ka moka tša Geshure le Maaka, le thaba ya Hermone ka moka, le Bashane ka moka go yo fihla Salka. E be e akaretša mmušo wa Ogo, yo a bego a kile a buša a le Ashtarote le Edrei. Ogo e be e le wa mafelelo wa Barafa. Moshe o be a fentše ditšhaba tše, mme a di lelekile nageng. Le ge go le bjalo, Baisraele ba ile ba se ke ba leleka batho ba Geshure le ba Maaka; ba sa dula gare ga Baisraele le lehono. Moshe o be a se a fa kgoro ya Lefi naga. Bjalo ka ge Morena a ile a botša Moshe, ba be ba tlile go amogela karolo ye e lego ya bona ya dihlabelo le dikabelo tše di bego di tlile go tšhumelwa Morena Modimo wa Israele aletareng. Moshe o be a file dikgorwana tša kgoro ya Rubene seripa sa naga. Naga ya bona e be e fihla Aroere, ka thoko ga moedi wa nokana ya Arnone, le motseng wa gare ga moedi, gomme e akaretša molala ka moka go fihla Medeba. E be e akaretša Heshbone le metse ka moka ya moo molaleng: Dibone, Bamothe-Baale, Bethe-Baale-Meone, Jahatse, Kedemote, Mefaate, Kiriathaime, Sibma, Tserete-Shahare thabeng ye e lego molaleng, Bethe-Peore, metheoga ya thaba ya Pisga, le Bethe-Jeshimote. E be e akaretša metse ka moka ya molaleng, le mmušo ka moka wa Kgoši Sihone wa Baamore, yo a bego a kile a buša a le Heshbone. Moshe o ile a mo fenya, a fenya le babuši ba Midiane: Ebi, Rekeme, Tsure, Hure le Reba. Ka moka ga bona e be e le dintona tša Kgoši Sihone. Gare ga bao setšhaba sa Israele se ba bolailego go be go le sedupe sela, Bileamo, morwa wa Beore. Jordane e be e le mollwane wa ka bodikela wa kgoro ya Rubene. Yeo e be e le metse le metsana ye e ilego ya fiwa dikgorwana tša kgoro ya Rubene. Moshe o be a file le dikgorwana tša kgoro ya Gade seripa sa naga. Naga ya bona e be e akaretša Jasere le metse ka moka ya Gileade, le seripa sa naga ya Amone go yo fihla Aroere, ye e lego ka bohlabela bja Raba; naga ya bona e be e tloga Heshbone e fihla Ramate-Mitsepa le Betonime, e tloga Mahanaime e fihla mollwaneng wa Lo-Dabare. Ka moeding wa Jordane e be e akaretša Bethe-Haramo, Bethe-Nimra, Sukote le Safone, ke go re naga ye e šetšego ya mmušo wa Kgoši Sihone wa Heshbone. Mollwane wa bona wa ka bodikela e be e le noka ya Jordane go ya leboa go yo fihla letsheng la Genesarete. Ye e be e le metse le metsana ye e bego e filwe dikgorwana tša kgoro ya Gade. Moshe o be a file dikgorwana tša seripa sa kgoro ya Manase karolo ya naga. Naga ya bona e be e fihla Mahanaime gomme e akaretša Bashane ka moka – mmušo wohle wa Ogo, kgoši ya Bashane, gotee le metse ye masome a a selelago, e lego metse ka moka ya Jaire kua Bashane. E be e akaretša seripagare sa Gileade, e akaretša le Ashtarote le Edrei, le metse ya mmušo wa Ogo kua Bashane. Yona e ile ya fiwa seripagare sa dikgorwana tše di tšwilego go Makire, morwa wa Manase. Ke ka moo Moshe a arotšego naga ya ka bohlabela bja Jeriko le Jordane ka gona kua melaleng ya Moaba. Eupša Moshe o ile a se ke a arolela ba kgoro ya Lefi naga. Morena o ile a ba botša gore ya bona karolo ke seripa sa dihlabelo le dikabelo tše di fiwago yena Morena Modimo wa Israele. Naga ya Kanana ka bodikela bja Jordane e ile ya arolelwa dikgoro tša Israele ka mokgwa wo: Moprista Eleasara le Joshua, morwa wa Nunu, le dihlogo tša malapa a dikgoro tša Baisraele ba ile ba arolela setšhaba naga. Bjalo ka ge Morena a be a laetše Moshe, dinaga tša dikgoro tše senyane le seripa sa kgoro se tee sa ka bodikela bja Jordane di ile tša abja ka go dira matengwa. Moshe o be a šetše a aroletše dikgoro tšela tše dingwe tše pedi le seripa sela sa kgoro naga ya ka bohlabela bja Jordane. Ditlogolo tša Josefa di be di arotšwe dikgoro tše pedi, e lego Manase le Efraime. Le ge go le bjalo, Moshe ga se a arolela Balefi seripa se sengwenyana sa naga. Bakeng sa seo ba ile ba newa metse ye ba tlago dula go yona, le mafulo a dikgomo le dihuswane tša bona. *** Setšhaba sa Israele se ile sa arola naga ka moo Morena a laetšego Moshe. Ka letšatši le lengwe batho ba bangwe ba kgoro ya Juda ba ile ba tla go Joshua kua Gilgale. Kalebe, Mokenase, morwa wa Jefune, a re go yena: “O tseba se Morena a se boditšego Moshe, monna wa Modimo, kua Kadeshe-Barnea ka nna le wena. Ke be ke na le mengwaga ye masome a mane ge Moshe, mohlanka wa Morena, a nthoma go tloga Kadeshe-Barnea go tlo hlola naga ye. Ke ile ka mmoela le pego ya ka mo ke bonego ditaba. Banna ba ba bego ba ile le nna ba ile ba nola setšhaba moko. Eupša nna ke be ke botile Morena Modimo wa ka ka pelo ya ka yohle. Ka ge ke dirile bjalo, Moshe o ile a nkenela gore nna le bana ba ka re tla fiwa naga yeo ke e sepetšego gore e be lefa la rena go ya go ile. Fela bjale, bona. Ke mengwaga ye masome a mane a metšo ye mehlano ge Morena a boditše Moshe taba yeo. Ke mehleng yela Baisraele ba be ba sa putla lešoka, gomme Morena o mphedišitše go fihla bjale bjalo ka ge a boletše. Ntebelele! Ke na le mengwaga ye masome a seswai le metšo ye mehlano, gomme le lehono ke sa na le maatla go no swana le mohlang wola Moshe a nthoma. Ke sa tiile mo e lego gore nka ya ntweng, goba ka dira se ke se ratago. Bjale ge, mphe naga ye ya dithaba yeo Morena a nkholofeditšego yona ka letšatši lela rena le dihlodi tšela tše dingwe re begela Moshe tše re di bonego. Wena ka noši o bone gore morafe wa ditšitširipa wo o bitšwago Baanake o dula fao, metseng ye megolo ye e ageleditšwego ka merako. Mohlomongwe Morena o tla ba le nna mme ka ba leleka, bjalo ka ge a boletše.” Joshua a šegofatša Kalebe, morwa wa Jefune, gomme a mo fa motse wa Hebrone. Hebrone e sa le lefa la ditlogolo tša Kalebe, Mokenase, morwa wa Jefune, go fihla le lehono, ka gobane o ile a bota Morena Modimo wa Israele ka pelo ya gagwe ka moka. Pele ga fao Hebrone e be e bitšwa motse wa Arba. Arba e be e le yena mohlomphegi yo mogolo gare ga Baanake. Ka morago ga moo naga e ile ya lala. Dikgorwana tša kgoro ya Juda di ile tša hwetša seripa se se latelago sa naga: Naga yeo e be e eya borwa go fihla lešing la ka borwaborwa la lešoka la Tsine, mollwaneng wa Edomo. Mollwane wo wa ka borwa o be o tloga magomong a ka borwa a Lewatle le le Hwilego, o leba borwa go tloga Sefateng sa Diphepheng mme o fetela Tsine. O be o eya borwa bja Kadeshe-Barnea, o feta Hetserone go yo fihla Adara, o tepogela go leba Karka, o fetela Atsmone, mme o latela nokana ya mollwaneng wa Egepeta, o eya Lewatleng la Mediteraniene, moo o bego o felela gona. Woo e be e le mollwane wa ka borwa wa Juda. Mollwane wa ka bohlabela e be e le Lewatle le le Hwilego go ya godimo go yo fihla moo Jordane e tšhollelago meetse ka go lona. Mollwane wa ka leboa o be o thoma moo mme o leba Bethe-Hogla, o fetela leboa la Bethe-Araba. O be o rotogela letlapeng la Bohane, morwa wa Rubene, o tloga Moeding wa Matshwenyego o eya Debire, mme o tepogela leboa go leba Gilgale, ye e lebanego le sefata sa Adumime ka thoko ya ka borwa ya leope. Go tloga moo o be o eya methopong ya Ene-Shemeshe, o tšwela pele go ya mothopong wa Rogele, mme wa rotoga ka moedi wa Hinomo motheogeng wa ka borwa wa mmoto wo go wona go bego go le motse wa Bajebuse wa Jerusalema. Go tloga moo mollwane o be o tšwela pele o namelela godimo ga thaba ka lehlakoreng la ka bodikela la moedi wa Hinomo, kua magomong a ka leboa a molala wa Refaime. Go tloga moo o be o eya methopong ya Neftoage mme o tšwela pele go ya metseng ye e lego kgauswi le thaba ya Efrone. Moo o be o tepoga go ya Baala, goba Kiriate-Jearime, fao o dikologela bodikela bja Baala go ya nageng ya dithaba ya Edomo, wa tla ka metheogeng ya ka leboa ya thaba ya Jearime, goba Kesalone, go theoga go fihla Bethe-Shemeshe, mme wa tšwela pele wa feta Timna. Fao mollwane o be o tšwela pele o leba metheogeng ye e lego ka leboa la Ekrone, wa tepogela go ya Shikarone, wa feta thaba ya Baala, mme wa fetela Jabne. O be o felela Lewatleng la Mediteraniene, leo le bego le dira mollwane wa ka bodikela. Batho ba dikgorwana tša Juda ba be ba dula ka gare ga mellwane yeo. Bjalo ka ge Morena a be a laetše Joshua, seripa sa naga ya Juda se ile sa fiwa Kalebe, morwa wa Jefune. A abelwa Hebrone, motse wa Arba, tatagoAnake. Kalebe o ile a raka ditlogolo tša Anake motseng woo – e lego kgorwana ya Sheshai, le ya Ahimane, le ya Talmai. Go tloga moo a yo hlasela batho ba ba bego ba dula Debire. Motse wo o be o bitšwa Kiriate-Sefere. Kalebe a re: “Monna yo a ka thopago Kiriate-Sefere ke tla mo neela morwedi wa ka, Aksa, gore e be mosadi wa gagwe.” Otniele, morwa wa Kenase, ngwanaboKalebe, o ile a thopa motse woo. Ka gona Kalebe a mo neela Aksa, morwediagwe, gore e be mosadi wa gagwe. Ge ngwetši e goroga mošašeng wa Otniele, yena a e tutuetša gore e kgopele tatagoyona tšhemo. Aksa a fologa pokolo, gomme Kalebe a mmotšiša gore o nyaka eng. Yena a mo fetola a re: “Mphe mpho ya taelano. Ka ge karolo ye o mphilego yona e le nageng ye e omilego, mphe le methopo.” Ka gona Kalebe a mo fa methopo ya ka godimo le ya ka fase. Še naga ye dikgorwana tša kgoro ya Juda di e amogetšego. Metse ya ka borwaborwa ye e bego e le ya bona, ya kgauswi le Edomo, e be e le Kabtsiele, Edere, Jagure, Kina, Dimona, Adada, Kedeshe, Hatsore, Jitnane, Sife, Teleme, Bealote, Hatsore-Hadata, Keriote-Hetserone, goba Hatsore, Amamo, Shema, Molada, Hatsare-Gada, Heshmone, Bethe-Pelete, Hatsare-Shuale, Beresheba le metsana ya yona, Baala, Ijimi, Etseme, Eltolade, Kesile, Horma, Tsikelage, Madimana, Sansana, Bethe-Lebaote, Shilehime, Aine le Rimone, ka moka e le metse ye masome a mabedi a metšo ye senyane, gotee le metsana ya yona. Metse ye e lego nagengtlase e be e le Eshtaolo, Tsora, Ashna, Sanoa, Ene-Ganime, Tapuage, Enaime, Jarmute, Adulamo, Soko, Aseka, Shaharaime, Aditaime, Gedera le Gederotaime, e le metse ye lesome le metšo ye mene, gotee le metsana ya yona. Ye mengwe metse e be e le Tsenane, Hadasha, Migdale-Gade, Dileane, Mitsepa, Jokotiele, Lakishe, Botsekate, Eglone, Kabone, Lagmase, Kitlishe, Gederote, Bethe-Dagone, Naama le Makeda, e le metse ye lesome le metšo ye e selelago, gotee le metsana ya yona. Ye mengwe metse e be e le Libna, Etere, Ashane, Jiftage, Ashna, Netsibe, Keila, Akesibe le Maresha, e le metse ye senyane, gotee le metsana ya yona. Wo mongwe motse e be e le Ekrone le metse le metsana ya wona, ye mengwe metse le metsana e le ya kgauswi le Ashdode, go tloga Ekrone go ya Lewatleng la Mediteraniene. Ye mengwe metse e be e le Ashdode le Gasa, le metse le metsana ya yona, go ba go yo fihla nokaneng ya mollwaneng wa Egepeta le lebopong la Lewatle la Mediteraniene. Kua nageng ya dithaba metse e be e le Shamire, Jatire, Soko, Dana, Kiriate-Sana, goba Debire, Anabe, Eshtemo, Anime, Goshene, Holone le Gilo, e le metse ye lesome le motšo o tee, gotee le metsana ya yona. Ye mengwe metse e be e le Arabe, Duma, Eshane, Janime, Bethe-Tapuage, Afeka, Humta, Hebrone le Tsiore, e le metse ye senyane, gotee le metsana ya yona. Ye mengwe metse e be e le Maone, Karmele, Sife, Juta, Jesriele, Jokodeamo, Sanoage, Kaine, Gibea le Timna, e le metse ye lesome, gotee le metsana ya yona. Ye mengwe metse e be e le Halhule, Bethe-Tsure, Gedoro, Maarate, Bethe-Anote le Eltekone, e le metse ye e selelago, gotee le metsana ya yona. Ye mengwe metse e be e le Kiriate-Baale, goba Kiriate-Jearime, le Raba, e le metse ye mebedi, gotee le metsana ya yona. Kua lešokeng metse e be e le Bethe-Araba, Midine, Sekaka, Nibshane, Motse wa Letswai, le Engedi, e le metse ye e selelago, gotee le metsana ya yona. Fela batho ba Juda ba ile ba se ke ba kgona go leleka Bajebuse, bao ba bego ba dula Jerusalema. Bajebuse ba sa dula fao le batho ba Juda. Mollwane wa naga ye e aroletšwego ditlogolo tša Josefa o be o thoma nokeng ya Jordane kgauswi le Jeriko, lefelong la ka bohlabela bja methopo ya Jeriko, mme o leba lešokeng. O be o tloga Jeriko o rotogela nageng ya dithaba go ba go yo fihla Bethele. Go tloga Bethele o be o eya Luse, o fetela Atharote, moo go bego go dula Baaraki. Go tloga moo o be o eya bodikela tikologong ya Bajaflete, go ba go yo fihla tikologong ya Bethe-Horone ya ka Tlase. Go tloga moo o be o tšwela pele o eya Gesere, mme wa felela Lewatleng la Mediteraniene. Ditlogolo tša Josefa, kgoro ya Efraime le seripa sa kgoro ya Manase sa ka bodikela, ba ile ba fiwa naga ye. Naga ya dikgorwana tša Baefraime e bile ka mokgwa wo: Mollwane wa bona wa ka bohlabela o be o tloga Atrote-Adare go yo fihla Bethe-Horone ya ka Tletlolo, mme go tloga moo o be o eya Lewatleng la Mediteraniene. Motse wa Mikemetate o be o le ka leboa la bona. Ka bohlabela bja moo mollwane o be o mena legopo go leba Taanate-Shilo, mme o e feta ka bohlabela go ya Janoage. Ke mo o bego o theoga go tloga Janoage go ya Atharote le Naara, o fihla Jeriko mme o felela Jordane. Mollwane o be o eya bodikela go tloga Tapuage go ya nokaneng ya Kana, mme o felela Lewatleng la Mediteraniene. Ye ke naga ye e ilego ya fiwa dikgorwana tša kgoro ya Efraime, gotee le metse le metsana ye e filwego Baefraime ye e bego e le ka gare ga mellwane ya naga ya Manase. Fela ba ile ba se ke ba leleka Bakanana ba ba bego ba dula Gesere, ka gona Bakanana bao ba ile ba dula gare ga Baefraime go fihlela le lehono, eupša ba ile ba gapeletšwa go šoma e le makgoba. Seripa sa naga se ile sa arolelwa dikgorwana tše di tšwilego go morwa wa Josefa wa mathomo. Makire, yo e bego e le yena morwa wa mathomo wa Manase, e bile tatagoGileade, gomme e be e le mogale ntweng, ka gona naga ya Gileade le ya Bashane di ile tša arolelwa yena. Tše dingwe dikgorwana tša Manase tše di ilego tša fiwa naga šedi: Abiesere, Heleke, Asriele, Shekeme, Hefere le Shemida. Ke tše di reetšwego barwa ba Manase, morwa wa Josefa, bao e bego e le dihlogo tša malapa. Tselofohade, morwa wa Hefere, Hefere morwa wa Gileade, Gileade morwa wa Makire, Makire morwa wa Manase, o ile a se ke a ba le barwa, a ba le barwedi fela. Maina a bona e be e le Magla, Noa, Hogla, Milka le Tirtsa. Bona ba ile ba ya go moprista Eleasara le go Joshua, morwa wa Nunu, le go baetapele ba re: “Morena o laetše Moshe go re fa karolo ya naga, go swana le meloko ya borena ya banna.” Ka gona, bjalo ka ge Morena a laetše, ba ile ba fiwa karolo ya naga go swana le bomorwarragotatagobona. Ke ka moo Manase a ilego a fiwa dikarolo tše lesome, go sa balwe Gileade le Bashane ka bohlabela bja Jordane, ka ge ditlogolo tša gagwe tša basadi gotee le barwa ba gagwe ba ile ba arolelwa naga. Naga ya Gileade e ile ya arolelwa ditlogolo tša Manase tše di šetšego. Naga ya Manase e be e tloga Asere e fihla Mikemetate, ka bohlabela bja Shekeme. Go tloga moo mollwane o be o eya borwa go akaretša batho ba Ene-Tapuage. Naga ya Tapuage e be e le ya Manase, eupša motse wa Tapuage, wo o lego mollwaneng, e le wa ditlogolo tša Efraime. Mollwane o be o theogela nokaneng ya Kana. Metse ye e bego e le ka borwa bja nokana ye e be e le ya ba Efraime, le ge e be e le ka nageng ya Bamanase. Mollwane wa Bamanase o be o tšwela pele ka lehlakoreng la ka leboa la nokana, mme o felela Lewatleng la Mediteraniene. Baefraime ba be ba le ka thoko ya borwa, mme Bamanase ba le ka thoko ya leboa, Lewatle la Mediteraniene e le mollwane wa bona wa ka bodikela. Baasere ba be ba le ka thoko ya leboabodikela, mme Baisakara ba le ka thoko ya leboabohlabela. Ka gare ga naga ya Isakara le ya Asere Bamanase ba be ba filwe motse wa Bethe-Sheane le wa Jibleamo, gotee le metsana ye e bego e e dikologile, le Doro, Endoro, Taanake, Megido, le metsana ye e bego e e dikologile. Fela kgoro ya Manase ga se ya ka ya kgona go leleka batho bao ba bego ba dula metseng yeo, ka gona Bakanana ba ile ba ikgethela go dula moo. Le ge Baisraele ba eba le maatla go feta pele, ga se ba ka ba raka Bakanana ka moka, eupša ba ile ba ba gapeletša go ba šomela. Ditlogolo tša Josefa di ile tša re go Joshua: “Ke ka baka lang o re file fela karolo e tee ya naga? Re setšhaba se sentši, ka gobane Morena o re šegofaditše.” Joshua a ba fetola a re: “Ge eba le le setšhaba se sentši gomme naga ya dithaba ya Efraime e sa le lekane, gona eyang sethokgweng le ikgoreleng lefelo nageng ya Baperise le Barafa.” Bona ba mo fetola ba re: “Naga ye ya dithaba ga se ye kgolo mo e ka re lekanago, fela Bakanana ba kua melaleng ba na le makoloi a ntwa a tshipi, le bale ba kua Bethe-Sheane le metsaneng ye e e dikologilego, le ba kua molaleng wa Jesriele le bona ba nao.” Joshua a re go ba kgoro ya Efraime le go ba seripa sa kgoro ya Manase sa ka bodikela: “Le tloga le le ba bantši, gomme le na le maatla kudu. Le tla fiwa karolo ye nngwe. Naga ya dithaba e tla ba ya lena. Le ge e le sethokgwa le e kgore mme selete sohle e tla ba sa lena. Ge e le Bakanana bona le ba leleke, le ge ba ka hlwa ba na le makoloi a ntwa a tshipi, mme ba na le maatla.” Setšhaba ka moka sa Israele se ile sa bokana kua Shilo, mme sa hloma Tente ya bodulo bja Morena ge se seno thopa naga. Go be go sa na le dikgoro tše di šupago tša setšhaba sa Israele tšeo di bego di se tša tšwe di arolelwa karolo ya naga. Ka gona Joshua a re go setšhaba sa Israele: “A le tlile go tšea nako ye kaakang le tšwafa go thopa naga ye Morena, Modimo wa borakgolokhukhu ba lena, a le filego yona? Mpheng banna ba bararo kgorong ye nngwe le ye nngwe. Ke tla ba roma nageng ka moka go yo lekanya le go ngwala naga ye ba ratago gore e be ya bona. Ka morago ba boe go nna. Naga yeo ba swanetše go e arogana, e tšwe diripa tše di šupago; ba Juda ba dule nageng ya bona ka borwa, mme ba Josefa ba dule go ya bona ka leboa. Le ngwaleng dikarolo tše di šupago tše mme le di tlišeng go nna. Ke moo ke tlago dira matengwa ka le botšišetša Morena Modimo wa rena. Balefi bona ba ka se fiwe karolo ya naga bjalo ka lena ka moka, ka gobane karolo ya bona ke go hlankela Morena e le baprista ba gagwe. Gomme ge e le kgoro ya Gade le ya Rubene le seripa sa kgoro ya Manase sa ka bohlabela bona ba šetše ba hweditše dikarolo tša bona ka bohlabela bja Jordane tšeo Moshe, mohlanka wa Morena, a ba filego tšona.” Banna bao ba ile ba wela tsela go yo lekanya le go ngwala naga ge Joshua a ba laetše a re: “Yang nageng ka moka le e lekanyeng, le e ngwale, mme le boeleng mo go nna. Ka morago ke tla dira matengwa go le botšišetša Morena mo Shilo.” Ka gona banna bao ba ya nageng ka moka, mme ba thala ka moo ba e arotšego diripa tše di šupago, ba ngwala le lenaneo la metse ya gona. Ke moo ba boetšego go Joshua mešašeng kua Shilo. Joshua a dira matengwa go ba botšišetša Morena, gomme a fa ye nngwe le ye nngwe ya dikgoro tša Israele karolo ya naga. Naga ye e ilego ya ba ya dikgorwana tša kgoro ya Benjamene e bile ya mathomo ya go arolwa. Naga ya bona e be e ikadile gare ga ya ba kgoro ya Juda le ya ba Josefa. Ka leboa mollwane wa bona o be o thoma Jordane mme wa rotoga mototolo wa ka leboa la Jeriko, wa leba bodikela go putla naga ya dithaba go yo fihla lešokeng la Bethe-Abene. Go tloga moo mollwane o be o eya mototolong wa ka borwa bja Luse ye gape e bitšwago Bethele, mme wa theogela Atrote-Adare, godimo ga thaba ka borwa bja Bethe-Horone ya ka Tlase. Fao mollwane o be o phamogela ka thoko ye nngwe, o mena legopo go ya borwa go tloga ka thoko ya bodikela ya thaba ye, mme wa ya Kiriate-Baale goba Kiriate-Jearime, ye e lego ya kgoro ya Juda. Wo e be e le mollwane wa ka bodikela. Mollwane wa ka borwa o be o thoma ka mafelelong a Kiriate-Jearime mme o eya methopong ya Neftoage. Moo o be o theogela patogeng ya thaba ye e okametšego moedi wa Hinomo, ka mafelelong a ka leboa a molala wa Barafa. Go tloga moo o be o eya borwa ka moedi wa Hinomo, motheogeng wa ka borwa wa mmoto wa Jebuse, go ya mothopong wa Rogele. Moo o be o tepogela leboa go ya Ene-Shemeshe mme o fetela pele go ya Gelilote, go lebana le sefata sa Adumime. Go tloga moo mollwane o be o theogela letlapeng la Bohane, morwa wa Rubene, gomme wa feta ka leboa la motheoga wo o okametšego moedi wa Jordane. Moo o be o theogela ka moeding, o feta ka leboa la mototolo wa Bethe-Hogla, mme o felela ka leboa Lewatleng le le Hwilego leo noka ya Jordane e tšhollelago metse ka go lona. Wo e be e le mollwane wa ka borwa. Jordane e be e le mollwane wa ka bohlabela. Ye e be e le mellwane ya naga ye dikgorwana tša kgoro ya Benjamene di ilego tša e fiwa. Metse ye e bego e le ya dikgorwana tša kgoro ya Benjamene e be e le Jeriko, Bethe-Hogla, Emeke-Ketsitse, Bethe-Araba, Tsemaraime, Bethele, Abime, Para, Ofra, Kefare-Amoni, Ofni le Geba, e le metse ye lesome le ye mebedi, gotee le metsana ya yona. Ye mengwe metse e be e le Gibeone, Rama, Beerote, Mitsepa, Kefira, Motsa, Rekeme, Jirpeele, Tarala, Tsela, Elefe, Jebuse, goba Jerusalema, Gibea le Kiriate-Jearime, e le metse ye lesome le ye mene, gotee le metsana ya yona. Ye ke naga ye dikgorwana tša kgoro ya Benjamene di e filwego. Naga ye e ilego ya ba ya dikgorwana tša kgoro ya Simeone e bile ya bobedi ya go arolwa. Naga ya bona e be e tsena ka gare ga naga ye e aroletšwego ba kgoro ya Juda. E be e akaretša Beresheba, Sheba, Molada, Hatsare-Shuale, Baala, Etseme, Eltolade, Betule, Horma, Tsikelage, Bethe-Markabote, Hatsare-Susime, Bethe-Lebaote le Sharuhene, e le metse ye lesome le ye meraro, gotee le metsana ya yona. Ye mengwe metse e be e le Aine, Rimone, Etere le Ashane, e le metse ye mene, gotee le metsana ya yona. Metsana ye e be e akaretša metsana ka moka ye e bego e dikologile metse ye go yo fihla Baalate-Bere, goba Ramate, ka borwa. Yeo e be e le naga ye dikgorwana tša kgoro ya Simeone di ilego tša e fiwa. Ka ge karolo ye e ilego ya ba ya ba Juda e be e le ye kgolo go feta ka moo go bego go nyakega ka gona, seripa sa naga ya yona se ile sa fiwa ba kgoro ya Simeone. Naga ye e ilego ya ba ya dikgorwana tša kgoro ya ba Sebulone e bile ya boraro ya go arolwa. Naga ye ba ilego ba e fiwa e be e fihla Saride. Go tloga moo mollwane o be o eya bodikela go yo fihla Marala, o kgotla Dabeshete le nokana ye e lego ka bohlabela bja Jokneamo. Ka thoko yela ya Saride o be o eya bohlabela go fihla mollwaneng wa Kislote-Taboro, gomme go tloga moo o eya Daberate, mme o rotogela Jafia. Go tloga moo o be o leba bohlabela, wa fihla Gathe-Hefere le Ete-Katsine, o phamogela go ya Nea, o fetela Rimone. Ka leboa mollwane o be o phamogela go ya Hanatone, mme o felela kua moeding wa Jiftage-Ele. O be o akaretša Katate, Nahalale, Shimrone, Jidala le Betlelehema, e le metse ye masome a mabedi gotee le metsana ya yona. Metse ye le metsana ya yona e be e le nageng ye dikgorwana tša kgoro ya Sebulone di e filwego. Naga ye e ilego ya ba ya dikgorwana tša kgoro ya Isakara e bile ya bone ya go arolwa. Naga ya gona e be e akaretša Jesriele, Kesulote, Shuneme, Hafaraime, Shione, Anahara, Rabite, Kishione, Ebetse, Remete, Ene-Ganime, Ene-Hada le Bethe-Patsetse. Mollwane o be o kgotla Taboro, Shahatsaime le Bethe-Shemeshe, o felela kua Jordane. O be o akaretša metse ye lesome le ye e selelago gotee le metsana ya yona. Metse ye le metsana ya yona e be e le ka nageng ye dikgorwana tša kgoro ya Isakara di e filwego. Naga ye e ilego ya ba ya dikgorwana tša kgoro ya Asere e bile ya bohlano ya go arolwa. Naga ya gona e be e akaretša Helkate, Hali, Betene, Alameleke, Amade le Mishale. Ka bodikela e be e kgotla Karmele le Shihore-Libnate. Ge mollwane o tepogela bohlabela o be o eya Bethe-Dagone, o kgotla Sebulone le moedi wa Jiftahele o eya leboa Bethe-Emeke le Neiele. O be o tšwela pele o eya Kabulu, Abdone, Rehobo, Homone le Kana, go yo fihla Sidone ye Kgolo. Ke moo mollwane o bego o tepogela Rama, o fihla motseng wo o ageleditšwego ka morako wa Tirose; ke gona o bego o tepogela Hosa, mme o felela kua Lewatleng la Mediteraniene. O be o akaretša Mahalebe, Akesibe, Uma, Afeke le Rehobo, e le metse ye masome a mabedi le ye mebedi, gotee le metsana ya yona. Metse ye le metsana ya yona e be e le ka nageng ye dikgorwana tša kgoro ya Asere di e filwego. Naga ye e ilego ya arolelwa dikgorwana tša kgoro ya Naftali e bile ya boselela ya go arolwa. Mollwane wa yona o be o tloga Helefe, o eya mohlareng wa moeike kua Tsaananime, go tloga Adami-Neke le Jabneele go yo fihla Lakume, mme o felela kua Jordane. Moo mollwane o be o tepogela bodikela go ya Asnote-Tabore; go tloga moo o eya Hukoko, o kgotla Sebulone ka borwa, Asere ka bodikela, le Jordane ka bohlabela. Metse ye e bego e ageleditšwe ka merako e be e le Tsidime, Tsere, Hamate, Rakate, Genesarete, Adama, Rama, Hatsore, Kedeshe, Edrei, Ene-Hatsore, Jirone, Migdale-Ele, Horeme, Bethe-Anate le Bethe-Shemeshe, e le metse ye lesome le metšo ye senyane, gotee le metsana ya yona. Metse ye le metsana ya yona e be e le ka nageng ye e filwego dikgorwana tša kgoro ya Naftali. Naga ye e ilego ya ba ya dikgorwana tša kgoro ya Dane e bile ya bošupa ya go arolwa. Naga ya yona e be e akaretša Tsora, Eshtaolo, Ire-Shemeshe, Shaalbine, Jitla, Elone, Timna, Ekrone, Elteke, Gibetone, Baalate, Jehude, Bene-Berake, Gate-Rimone, Me-Jarkone le Rakone, gotee le naga ye e dikologilego Jopa. Ge batho ba Dane ba lahlegetšwe ke naga ya bona, ba ile ba ya motseng wa Lesheme mme ba o hlasela. Ba o thopa, ba bolaya batho ba gona, mme ya ba wa bona. Ba dula go wona, mme ba fetoša leina la Lesheme ba re ke Dane, ba o reela rakgolokhukhu wa bona, Dane. Metse ye le metsana ya yona e be e le ka nageng ye dikgorwana tša kgoro ya Dane di e filwego. Ge setšhaba sa Israele se feditše go arola naga, se ile sa fa Joshua, morwa wa Nunu, seripa sa naga. Bjalo ka ge Morena a laetše, ba ile ba mo fa motse wo a o kgopetšego, e lego Timnate-Serage, nageng ya dithaba ya Efraime. O ile a tsošološa motse woo mme a dula go wona. Moprista Eleasara le Joshua, morwa wa Nunu, le mantona a dikgorwana tša dikgoro tša Israele ba ile ba aba dikarolo tšeo tša naga ka go dira matengwa ba di botšišetša Morena kua Shilo, mojakong wa Tente ya bodulo bja gagwe. Ka tsela ye ba fetša go arola naga. Morena o ile a laela Joshua gore a botše setšhaba sa Israele a re: “Kgethang metse ya botšhabelo ye ke laetšego Moshe gore a le botše ka yona. Motho yo a bolailego yo mongwe ka phošo, a ka tšhabela go yona mme a phonyokga motho yo a nyakago go lefeletša mohu yoo. A ka tšhabela go wo mongwe wa metse yeo, a ya kgorong ya motse mme a hlathollela baetapele seo se diregilego. Ka morago ga moo ba mo amogele a tsene motseng, mme ba mo fe moo a kago dula gona. Ge motho yo a nyakago go lefeletša mohu a ka mo latiša go fihla fao, batho ba motse woo ba se ke ba mo gafela yena. Ba mo šireletše ka gobane o bolaile Moisraele wa gabo ka phošo, e se ka baka la gore o be a mo hloile. O swanetše go dula moo motseng go fihlela ge a sekišitšwe phatlalatša, le go fihlela ge yo e lego Moprista yo Mogolo ka nako yeo a hwile. Ke gona mmolai yoo a kago boela lapeng la gagwe motseng wa gabo woo a tšhabilego go wona.” Ka gona, ka bodikela bja Jordane ba hlaola Kedeshe kua Galilea, nageng ya dithaba ya Naftali; Shekeme kua nageng ya dithaba ya Efraime, le Kiriate-Arba, ke go re Hebrone, kua nageng ya dithaba ya Juda. Ka mošola wa Jordane, ka bohlabela bja Jeriko, ba ile ba kgetha Betsere molaleng wa lešoka nageng ya Rubene; ba kgetha Ramote kua Gileade, ka nageng ya Gade, le Golane kua Bashane, ka nageng ya Manase. Ye e be e le metse ya botšhabelo ye e kgethetšwego setšhaba ka moka sa Israele le bafaladi ba ba dulago gare ga bona. Yo a bolailego motho ka phošo o be a ka tšhabela go yona gore a se ke a bolawa ke motho yo a nyakago go lefeletša mohu; o be a ka se bolawe ntle le go šekišwa phatlalatša. Dihlogo tša malapa a Balefi a ile a tla go moprista Eleasara le go Joshua, morwa wa Nunu, le go dihlogo tša malapa a dikgoro ka moka tša Israele. Ba re go bona moo Shilo, nageng ya Kanana: “Morena o laetše Moshe gore le re fe metse ye re ka dulago go yona, gotee le naga ye e e dikologilego ya phulo ya maruo a rena.” Ka gona setšhaba sa Israele sa fa Balefi metse ye mengwe le mo ba fudišago gona dinageng tša sona, go ya ka taelo ya Morena. Malapa a kgorwana ya Kehate e bile a mathomo a go fiwa metse. Malapa a ditlogolo tša moprista Arone a ile a fiwa metse ye lesome le ye meraro nageng ya Juda le ya Simeone le ya Benjamene. Ba ba šetšego ba kgorwana ya Kehate ba ile ba fiwa metse ye lesome nageng ya Efraime le ya Dane le ya seripa sa kgoro ya Manase sa ka bodikela. Kgorwana ya Gershone e ile ya arolelwa metse ye lesome le ye meraro nageng ya Isakara le ya Asere le ya Naftali le ya seripa sa kgoro ya Manase sa ka bohlabela, se se bego se le ka Bashane. Malapa a kgorwana ya Merari a ile a arolelwa metse ye lesome le ye mebedi nageng ya Rubene le ya Gade le ya Sebulone. Ka go dira matengwa setšhaba sa Israele se ile sa fa Balefi metse ye le phulo ya yona, bjalo ka ge Morena a laetše Moshe se setšhaba se swanetšego go se dira. Šea maina a metse ya naga ya Juda le ya Simeone yeo e ilego ya fiwa ditlogolo tša Arone tše e bego e le tša kgorwana ya Kehate, ditlogolwana tša Lefi. Metse ya bona e bile ya mathomo ya go arolwa. Ba ile ba fiwa motse wa Arba – Arba e be e le tatagoAnake – wo bjalo o bitšwago Hebrone, kua nageng ya dithaba ya Juda, gotee le naga ye e e dikologilego ya phulo. Le ge go le bjalo, mašemo a motse gotee le metsana ya wona a be a šetše a filwe Kalebe, morwa wa Jefune. Ditlogolo tša moprista Arone di ile tša fiwa metse ye e latelago go tlaleletša Hebrone, wo mongwe wa metse ya botšhabelo: Libna, Jatire, Eshtemoa, Holone, Debire, Aine, Juta le Bethe-Shemeshe, gotee le phulo ya yona, e le metse ye senyane ya kgoro ya Juda le ya Simeone. Nageng ya Benjamene ba ile ba fiwa metse ye mene, e lego Gibeone, Geba, Anathote le Alemete, gotee le phulo ya yona. Metse ye e ilego ya fiwa baprista, ditlogolo tša Arone, ka moka e be e le ye lesome le ye meraro, gotee le phulo ya yona. Malapa a mangwe a kgorwana ya Balefi ya Kehate a ile a fiwa metse ye mengwe nageng ya Efraime. Ba ile ba fiwa metse ye mene le phulo ya yona, e lego wa Shekeme kua nageng ya dithaba ya Efraime, wo e bego e le wo mongwe wa metse ya botšhabelo, le wa Gesere, le wa Kibtsaime, le wa Bethe-Horone. *** Nageng ya Dane ba ile ba fiwa metse ye mene, e lego Elteke, Gibetone, Ayalone le Gate-Rimone, le phulo ya yona. Nageng ya seripa sa kgoro ya Manase sa ka bodikela ba ile ba fiwa metse ye mebedi, e lego Taanake le Gate-Rimone, le phulo ya yona. Metse ye e ilego ya fiwa malapa a a kgorwana ya Kehate ka moka e be e le ye lesome, gotee le phulo ya yona. Sehlopha se sengwe sa Balefi, e lego kgorwana ya Gershone, se ile sa fiwa metse ye mebedi nageng ya seripa sa kgoro ya Manase sa ka bodikela, e lego Golane, kua Bashane, wo mongwe wa metse ya botšhabelo, le Ashtarote, le phulo ya yona. Nageng ya Isakara ba ile ba fiwa metse ye mene, e lego Kishione, Daberate, Jarmute le Ene-Ganime, le phulo ya yona. Nageng ya Asere ba ile ba fiwa metse ye mene, e lego Mishale, Abdone, Helkate le Rehobo, le phulo ya yona. Nageng ya Naftali ba ile ba fiwa metse ye meraro, e lego Kedeshe kua Galilea, wo mongwe wa metse ya botšhabelo, Hamote-Doro le Kartane, le phulo ya yona. Metse ye e ilego ya fiwa malapa a a fapanego a kgorwana ya Gershone ka moka e be e le ye lesome le ye meraro, le phulo ya yona. Balefi ba ba šetšego, e lego kgorwana ya Merari, ba ile ba fiwa metse ye mene nageng ya Sebulone, e lego Jokneamo, Karta, Dimna le Nahalale, le phulo ya yona. Nageng ya Rubene ba ile ba fiwa metse ye mene, e lego Betsere, Jahatse, Kedemote le Mefaate, le phulo ya yona. Kgorong ya Gade ba ile ba fiwa metse ye mene, e lego Ramote, kua Gileade, wo mongwe wa metse ya botšhabelo, Mahanaime, Heshbone le Jasere, le phulo ya yona. Ka gona metse ye e ilego ya fiwa kgorwana ya Merari ka moka e be e le ye lesome le ye mebedi. Metse ye e ilego ya fiwa Balefi nageng ya setšhaba sa Israele ka moka e be e le ye masome a mane a metšo ye seswai, le phulo go dikologa motse wo mongwe le wo mongwe. *** Ka fao Morena a neela Baisraele naga yela a bego a enetše borakgolokhukhu ba bona gore o tla ba fa yona. Ge ba e thopile, ba ile ba dula fao go yona. Morena a ba khutšiša nageng ka moka, bjalo ka ge a be a enetše borakgolokhukhu ba bona. Ga go le o tee wa manaba a bona yo a ilego a ba kgona, ka gobane manaba ohle a bona Morena o be a a gafetše diatleng tša bona. Morena o ile a phethagatša tšohle tše botse tše a di holofeditšego setšhaba sa Israele; gwa se ke gwa šala le se tee. Joshua a kgobokanya batho ba kgoro ya Rubene le ya Gade le ba seripa sa kgoro ya Manase sa ka bohlabela. A re go bona: “Le dirile tšohle tše Moshe, mohlanka wa Morena, a laetšego gore le di dire, gomme le phethile ditaelo tša ka ka moka. Ebile nako ye telele ya go fihlela le lehono le sa tlogele Baisraele ba gabolena. Le phethile ditaelo tša Morena Modimo wa lena ka šedi. Bjale, Morena Modimo wa lena o khutšišitše Baisraele ba gabolena bjalo ka ge a ba holofeditše. Ka gona, boelang nageng ye e lego ya lena, naga yela ya ka mošola wa Jordane yela Moshe, mohlanka wa Morena, a le filego yona. Le hlokomeleng gore le phethe molao wo Moshe a le laetšego wona: le rateng Morena Modimo wa lena, le dire thato ya gagwe, le phethe melao ya gagwe, le mmotegele, mme le mo direle ka dipelo tša lena ka moka le ka moya wa lena ka moka.” Joshua a ba šegofatša a ba gomišetša gae, a ba a re go bona: “Le boela gae le humile kudu ka diruiwa tše ntšintši, ka silibera, gauta, mphiri, tshipi, le diaparo tše ntši. Le aroleleng Baisraele ba gabolena tše le di thopilego manabeng a lena.” Ke moka ba boela gae. Moshe o be a file seripa se sengwe sa kgoro ya Manase naga ka bohlabela bja Jordane, kua Bashane, mme Joshua yena a file seripa se sengwe naga ka bodikela gotee le dikgoro tše dingwe. *** *** Ka gona batho ba kgoro ya Rubene le ya Gade le ba seripa sa kgoro ya Manase sa ka bohlabela ba boela gae. Ba tlogela batho ba bangwe ba Israele kua Shilo, nageng ya Kanana, mme ba thoma leeto la go ya nageng ya Gileade, nageng ya bona yeo ba bego ba e thopile bjalo ka ge Morena a ba laetše ka Moshe. Ge batho ba kgoro ya Rubene le ya Gade le ba seripa sa kgoro ya Manase sa ka bohlabela ba fihla Gelilote ka lehlakoreng la ka bodikela la Jordane, ba ile ba aga aletare ye kgolo ye motho a e bonago a le kgole go ipata le noka. Baisraele ba ile ba kwa go thwe: “Theetšang! Batho ba kgoro ya Rubene le ya Gade le ba seripa sa kgoro ya Manase sa ka bohlabela ba agile aletare kua Gelilote, ka lehlakoreng la ka mošono wa Jordane!” Ge setšhaba sa Israele se ekwa taba ye, se ile sa bokana ka moka kua Shilo gore se yo lwa le bona. Ke moka sa roma Finease, morwa wa moprista Eleasara, go batho ba kgoro ya Rubene le ya Gade le ba seripa sa kgoro ya Manase sa ka bohlabela, nageng ya Gileade. Baetapele ba lesome ba ya le Finease; kgorong ye nngwe le ye nngwe ya ka bodikela gwa tšwa o tee yo e lego hlogo ya lapa kgorwaneng ya gabo. Ba ya nageng ya Gileade go batho ba Rubene le ba Gade le ba seripa sa kgoro ya Manase sa ka bohlabela, mme ba botšiša legatong la setšhaba ka moka sa Morena ba re: “Ke ka lebaka lang le hlanogela Morena Modimo wa Israele ka mokgwa wo? Le reng le kgeloga, le tsogela Morena maatla ka go ikagela aletare ye? Gopolang sebe sa rena kua Peore, mola Morena a otla setšhaba sa gagwe ka bolwetši bja leuba! Le bjale sebe seo se sa re kgomaretše. A sebe seo se be se sa lekana? A bjale lena le tlile go mo hlanamela? Ge le ka tsogela Morena maatla lehono, ka moswane o tla befelelwa yo mongwe le yo mongwe mo go Baisraele. Bjale ge, ge naga ya lena e tšhilafetše, tlaang ka mošono nageng ya Morena mo go lego Tente ya bodulo bja gagwe, le duleng le rena. Fela le se ke la tsogela Morena maatla goba la tsogela rena maatla ka go ikagela aletare ye nngwe ntle le aletare ya Morena Modimo wa rena. Gopolang ka moo Akane, morwa wa Serage, a kilego a gana go phetha taelo ya mabapi le dilo tše di gafetšwego go fedišwa; setšhaba ka moka sa Israele se ile sa otlelwa taba yeo. Ga se ya ba Akane a nnoši yo a ilego a hwa ka baka la sebe sa gagwe.” Batho ba kgoro ya Rubene le ya Gade le ba seripa sa kgoro ya Manase sa ka bohlabela ba araba dihlogo tša malapa a dikgoro tša ka bodikela tša Israele ba re: “Modimo wa medimo ke yena Morena! Modimo wa medimo ke yena Morena! O tseba gore ke ka baka lang re dirile taba ye, mme re nyaka gore le lena le tsebe. Ge e ka ba re tsogetše Morena maatla mme ga se ra mmotegela, le se ke la re lesa re phela! Ge e ka ba re furaletše Morena ra ikagela aletare ya dihlabelo tša go tšhungwa ka moka, le go tšhumela dikabelo tša bupi le dihlabelo tša kagišano godimo ga yona, gona yena Morena a re otle. Se re se dirile ka gobane re be re boifa gore ka moso ditlogolo tša lena di tla re go tša rena: ‘Le amana bjang le Morena, Modimo wa Israele? Morena o dirile Jordane mollwane gare ga rena le lena batho ba Rubene le ba Gade. Lena ga le amane le Morena.’ Ka go realo ditlogolo tša lena di ka dira gore ditlogolo tša rena di lese go khunamela Morena. Ka gona re agile aletare, e se ya dihlabelo tša go tšhungwa ka moka goba ya dihlabelo tše dingwe, eupša re e agetše gore e be sešupo go batho ba rena le ba lena, le go meloko ya ka moso, sa gore gabotsebotse re tloga re direla Morena ka dihlabelo tša rena tša go tšhungwa ka moka le ka dihlabelo tša kagišano le ka dihlabelo tše dingwe. Seo e be e le go thibela ditlogolo tša lena gore di se ke tša tla tša re ditlogolo tša rena ga di amane le Morena. Re ile ra gopola gore ge seo se ka direga, ditlogolo tša rena di tla kgona go re: ‘Bonang! Borakgolokhukhu ba rena ba dirile aletare go no swana le aletare ya Morena. E be se ya dihlabelo tša go tšhungwa ka moka goba ya dihlabelo tše dingwe, eupša e be e le sešupo go batho ba rena le ba lena.’ Ruri, re ka se tsogele Morena maatla goba ra mo furalela lehono ka go aga aletare ya dihlabelo tša go tšhungwa ka moka, goba ya dikabelo tša bupi, goba ya dihlabelo tše dingwe. Re ka se age aletare ye nngwe ka ntle le aletare ya Morena Modimo wa rena yeo e emego pele ga Tente ya bodulo bja gagwe.” Moprista Finease le baetapele ba setšhaba ba lesome ba ba bego ba na le yena, dihlogo tša malapa a dikgoro tša ka bodikela, ba kwa se batho ba kgoro ya Rubene le ba ya Gade le ba seripa sa kgoro ya Manase sa ka bohlabela ba se bolelago, mme ba kgotsofala. Finease, morwa wa moprista Eleasara, a re go bona: “Bjale re a tseba gore Morena o na le rena, ka gobane se le se dirilego e be e se go se mmotegele. Ka gona le phološitše setšhaba sa Israele kotlong ya Morena.” Ke gona Finease le baetapele bale ba tlogilego go batho ba Rubene le ba Gade nageng ya Gileade, ba gomela Kanana, go setšhaba sa Israele, gomme ba ba begela taba yeo. Baisraele ba kgotsofala, gomme ba reta Morena. Ba ile ba se sa bolela ka go yo lwa le bona le go ripitla naga ye batho ba Rubene le ba Gade ba bego ba dutše go yona. Batho ba Rubene le ba Gade ba ile ba re: “Aletare ye ke bohlatse go rena ka moka gore Morena ke Modimo.” Ka fao ba e rea leina la “Bohlatse”. Ka morago ga nako ye telele go tloga moo Morena a khutšiša Baisraele manaba a bona ao a bego a bapile le bona. Ka nako yeo Joshua o be a tšofetše kudu, ka gona a kgobokanya Baisraele ka moka, bagolo, baetapele, baahlodi le balaodi ba setšhaba, a re: “Ke tšofetše kudu bjale. Le bone tšohle tše Morena Modimo wa lena a di dirilego ditšhaba tše ka moka ka baka la lena. Morena Modimo wa lena ke yena a le lwetšego. Bonang, ke aroletše dikgoro tša lena naga ya ditšhaba tše di sa šetšego, gotee le ya ditšhaba ka moka tše ke šetšego ke di fedišitše, go tloga nokeng ya Jordane ka bohlabela go fihla Lewatleng la Mediteraniene ka bodikela. Morena Modimo wa lena o tla ba raka ge le goroga, mme o tla ba leleka pele ga lena. Le tla thopa naga ya bona, bjalo ka ge Morena Modimo wa lena a le holofeditše. Ka gona, le hlokomeleng gore le tloge le phetha tšohle tše di ngwadilwego ka pukung ya melao ya Moshe mme le se di tlogele le gatee. Le se ke la hlokomologa seripa se sengwenyana sa yona, ke moo le ka se kego la tla la nyalelana le ditšhaba tše tša go šala gare ga lena, goba la bitša maina a medimo ya tšona, goba la ena ka ona, goba la direla medimo yeo, goba la e obamela. Eupša Morena Modimo wa lena le mo kgomareleng bjalo ka ge le mo kgomaretše go fihla bjale. Morena o lelekile ditšhaba tše kgolo tše maatla ge le goroga, gomme ga go yo a kgonnego go le thibela. O tee wa lena a ka rakediša banna ba sekete, ka gobane Morena Modimo wa lena o a le lwela, bjalo ka ge a le holofeditše. Ka gona, hlokomelang gore le rate Morena Modimo wa lena. Ge le ka tsoga le mo furaletše gomme la kgomarelana le mašaledi a ditšhaba tšeo ao a sa lego gare ga lena mme la nyalelana le ona, gona le tsebeng ka kgonthe gore Morena Modimo wa lena a ka se sa leleka ditšhaba tšeo ge le goroga. Eupša e tla ba molaba le sefu go lena le kgati mekokotlong ya lena, le meetlwa ka mahlong a lena, go fihlela go se sa šetše motho wa lena mo nageng ye ye botse ye Morena Modimo wa lena a le filego yona. “Bjale nako ya ka ya go hwa e fihlile. Yo mongwe le yo mongwe o tseba ka pelong ya gagwe le moyeng wa gagwe gore Morena Modimo wa lena o le file dilo tše botse ka moka tše a le holofeditšego tšona. Se sengwe le se sengwe se a le holofeditšego sona se phethegile; ga go le kholofetšo e tee ye e sego ya phethega. Eupša bjalo ka ge Morena Modimo wa lena a phethile tšohle tše botse tše a le holofeditšego tšona, tše mpe tše a itšego o tla le dira tšona le tšona o tla di phetha go fihlela a le fediša nageng ye ye botse ye a le filego yona. Ge le ka se botegele kgwerano ye Morena Modimo wa lena a le laetšego gore le e botegele, mme la obamela medimo ye mengwe la e direla, gona o tla le tukela bogale a le otla, mme la fedišwa ka bjako nageng ye botse ye a le filego yona.” Joshua a kgobokanya dikgoro ka moka tša Israele kua Shekeme. A bitša bagolo, baetapele, baahlodi le balaodi ba Israele, gomme ba tla pele ga Modimo. Joshua a re go setšhaba ka moka: “Sese se Morena Modimo wa Israele a se bolelago: ‘Kgalekgale borakgolokhukhu ba lena ba be ba dula ka mošola wa noka ya Yufratese mme ba khunamela medimo ye mengwe. Yo mongwe wa borakgolokhukhu bao e be e le Terage, tatagoAbrahama le Nahoro. Ke ile ka tšea Abrahama, rakgolokhukhu wa lena, nageng yela ya ka mošola wa Yufratese ka mo sepediša a putla naga ka moka ya Kanana. Ke ile ka mo fa ditlogolo tše ntši. Ka mo fa Isaka, gomme Isaka yena ka mo fa Jakobo le Esau. Ke file Esau naga ya dithaba ya Edomo, fela Jakobo le bana ba gagwe ba ile ba theogela Egepeta. Gomme ke ile ka roma Moshe le Arone, ka tliša dikotlo Egepeta. Ka morago ka le ntšha; ke ntšhitše borakgolokhukhu ba lena Egepeta, mme Baegepeta ba ba hlomara ka makoloi a ntwa le banamedi ba dipere. Eupša ge le fihla Lewatleng la Mahlaka le ile la ntelela le nyaka thušo, gomme ka bea leswiswi kgathe ga lena le Baegepeta. Ka dira gore lewatle le thenkgologele godimo ga Baegepeta le ba khupetše. Le tseba seo ke se dirilego naga ya Egepeta. “ ‘Le phetše lešokeng nako ye telele. Ka morago ka le fihliša nageng ya Baamore bao ba bego ba dula ka thoko ya bohlabela bja Jordane. Ba ile ba lwa le lena, eupša ka ba gafela diatleng tša lena. Le thopile naga ya bona, gomme ka ba fediša ge le goroga. Kgosi Balaka wa Moaba, morwa wa Tsiporo, o ile a lwa le Baisraele. A romela molaetša go Bileamo, morwa wa Beore, a mo kgopela gore a le rogake. Eupša ka se ke ka theetša Bileamo, ka gona a le šegofatša, mme ka tsela yeo ka le phološa go Balaka. Le ile la tshela Jordane mme la tla Jeriko. Banna ba Jeriko ba lwa le lena, mme Baamore, Baperise, Bakanana, Bahete, Bagirgashe, Bahibe le Bajebuse le bona ba lwa le lena. Eupša ka ba gafela diatleng tša lena. Ge le goroga ke ile ka ba tsenya tlalelong gore ke tle ke leleke dikgoši tšela tše pedi tša Baamore. Ditšhoša tša lena le mesebe ga se tša ka tša šoma selo fao. Ke le file naga ye le sego la ka la e lema, le metse ye le sego la ka la e aga. Bjale le dula moo mme le ja dienywa tša merara le tša mehlware ye le sego la e bjala.’ ” Joshua a tšwela pele a re: “Bjale ge, boifang Morena mme le mo direleng ka botlalo le ka potego. Tlošang medimo ye borakgolokhukhu ba lena ba bego ba tlwaetše go e direla kua Mesopotamia le kua Egepeta, mme le direleng Morena fela. Ge le sa rate go mo direla, ikgetheleng lehono gore le tla direla mang: medimo ye borakgolokhukhu ba lena ba bego ba e direla kua Mesopotamia, goba medimo ya Baamore bao le dulago nageng ya bona bjale. Ge e le nna le lapa la ka, re tla direla Morena.” Setšhaba sa mo fetola sa re: “Re ka se tsoge re tlogetše Morena ra direla medimo ye mengwe! Morena Modimo wa rena ke yena a re ntšhitšego, rena le botatagorena, bokgobeng kua Egepeta, gomme re iponetše ka borena mehlolo ye a e dirilego. O re bolokile gohle mo re ilego ra ya gona gare ga ditšhaba ka moka tšeo re putlilego go tšona. Le ge re goroga mo nageng ye, Morena o lelekile Baamore ka moka bao ba bego ba dula mo. Ka gona le rena re tla direla Morena, ka gobane ke yena Modimo wa rena.” Joshua a re go setšhaba: “Fela le ka no se kgone go direla Morena, ka gobane ke Modimo yo mokgethwa gomme a ka se le lebalele dibe le makgopo a lena. A ka se kgotlelele medimo ye mengwe, gomme ge le ka mo tlogela la direla medimo e šele, o tla le hlanamela, a le otla. O tla le fediša, le ge a be a le loketše pele.” Setšhaba sa re go Joshua: “Aowa! Re ka se mo tlogele. Ka nnete re tla mo direla.” Joshua a re go bona: “Le dihlatse lena beng gore le kgethile go direla Morena.” Bona ba re: “Ee, re dihlatse.” Joshua a re: “Gona lahlang medimo e šele ye e lego gare ga lena, gomme le ineeleng go Morena Modimo wa Israele.” Setšhaba sa re go Joshua: “Re tla direla Morena Modimo wa rena, ra phetha ditaelo tša gagwe.” Ka gona, ka letšatši leo, Joshua a dira kgwerano le Modimo legatong la setšhaba, gomme moo Shekeme a ba fa melao le ditaelo tše ba swanetšego go di phetha. A ngwala ditaelo tšeo ka pukung ya melao ya Modimo. Ka morago a tšea letlapa le legolo a le tsema ka fase ga mohlare wa moeike ka sekgethweng sa Morena. A re go setšhaba ka moka: “Letlapa le e tla ba hlatse ya rena. Lona le kwele tšohle tše Morena a re boditšego tšona. Ka fao e tla ba hlatse ya go le kgala gore le se ke la se botegele Modimo wa lena.” Ke moka Joshua a laelana le setšhaba, gomme yo mongwe le yo mongwe a ipoelela ga gagwe. Ka morago ga moo Joshua, morwa wa Nunu, mohlanka wa Morena, a hlokafala a na le mengwaga ye lekgolo le ye lesome. Ba mmoloka nageng ya gagwe kua Timnate-Serage, nageng ya dithaba ya Efraime, ka leboa la thaba ya Gaashe. Mola Joshua a sa phela setšhaba sa Israele se be se direla Morena, mme le ka morago ga lehu la gagwe ba ile ba tšwela pele le go mo direla ge bagolo bale ba bonego tšohle tše Morena a di diretšego Baisraele ba sa phela. Mašapo a Josefa ao setšhaba sa Israele se tlilego nao ge se etšwa Egepeta a ile a bolokwa kua Shekeme, karolong ya tšhemo yela Jakobo a bego a e rekile go barwa ba Hamore, tatagoShekeme, ka dipapetlana tše lekgolo tša silibera. Tšhemo yeo e ile ya ba bohwa bja ditlogolo tša Josefa. Eleasara, morwa wa Arone, o ile a hlokafala mme a bolokwa kua Gibea, motse wo o bego o filwe Finease, morwa wa gagwe, kua nageng ya dithaba ya Efraime. Ka morago ga lehu la Joshua setšhaba sa Israele se ile sa botšiša Morena sa re: “Ke efe ya dikgoro tša rena ye e swanetšego go ba ya mathomo ya go yo hlasela Bakanana?” Morena a ba fetola a re: “Kgoro ya Juda a e ye pele. Ke ba gafela naga ye.” Batho ba Juda ba re go batho ba Simeone: “Yaang le rena nageng yeo re aroletšwego yona, mme re lweng le Bakanana mmogo. Ka morago re tla ya le lena nageng yeo le e aroletšwego.” Ka gona kgoro ya Simeone le ya Juda tša ya ntweng mmogo. Morena a gafela Bakanana le Baperise diatleng tša bona, gomme ba fenya banna ba dikete tše lesome kua Beseke. Ba hwetša Adoni-Beseke moo mme ba lwa le yena. O ile a tšhaba, fela ba mo rakediša, ba mo swara, mme ba mo ripa menwana ye megolo ya maoto le ya diatla. Adoni-Beseke a re: “Magoši a masome a a šupago ao a ripilwego menwana ye megolo ya maoto le ya diatla a be a topa marathana ka fase ga tafola ya ka. Bjale Modimo o ntirile se ke ilego ka ba dira sona.” A išwa Jerusalema moo a hwetšego gona. Banna ba Juda ba ile ba hlasela Jerusalema mme ba e thopa. Ba bolaya batho ba yona mme ba tšhuma motse woo. Ka morago ga moo ba tšwela pele go yo lwa le Bakanana bao ba bego ba dula nageng ya dithaba le nagengtlase le nageng ya ka borwa ye e omilego. Ba hlasela Bakanana ba ba bego ba dula motseng wa Hebrone wo o bego o bitšwa Kiriate-Arba. Moo ba fenya kgorwana ya Sheshai le ya Ahimane le ya Talmai. Go tloga moo banna ba Juda ba hlasela motse wa Debire, woo ka nako yeo o bego o bitšwa Kiriate-Sefere. Yo mongwe wa bona yo a bitšwago Kalebe a re: “Monna yo a ka hlaselago Kiriate-Sefere mme a e thopa ke tla mo fa morwedi wa ka, Aksa, gore e be mosadi wa gagwe.” Otniele, morwa wa Kenase, ngwanaboKalebe, a thopa motse woo, ka gona Kalebe a mo neela Aksa, morwediagwe, gore e be mosadi wa gagwe. Ge ngwetši e goroga mošašeng wa Otniele, yena a e tutuetša gore e kgopele tatagoyona tšhemo. Aksa a fologa pokolo, gomme Kalebe a mmotšiša gore o nyaka eng. Yena a mo fetola a re: “Mphe mpho ya taelano. Ka ge karolo ye o mphilego yona e le nageng ye e omilego, mphe le methopo.” Ka gona Kalebe a mo fa methopo ya ka tletlolo le ya ka tlase. Ditlogolo tša ratswalagoMoshe, Mokene, di ile tša tloga le batho ba kgoro ya Juda Jeriko, motseng wa mehlare ya mepalema, tša ya nageng ye e omilego, ka borwa bja Arade kua Juda. Moo tša dula gare ga Baamaleke. Batho ba kgoro ya Juda ba ile ba ya le ba kgoro ya Simeone, gomme ba fenya Bakanana bao ba bego ba dula motseng wa Tsefate. Ba o pšhatla mme ba o rea leina la Horma. Morena a thuša batho ba Juda, gomme ba thopa naga ya dithaba. Eupša ba se ke ba thopa Gasa goba Ashkelone goba Ekrone, goba dinaga tše di bego di bapile le tšona. Batho bao ba bego ba dula moo go ipata le lebopo la lewatle ba be ba na le makoloi a ntwa a tshipi; ka gona batho ba Juda ba se ke ba kgona go ba leleka. *** Bjalo ka ge Moshe a be a laetše, Hebrone e ile ya fiwa Kalebe, yo a ilego a leleka dikgorwana tše tharo tša Anake motseng. Eupša batho ba kgoro ya Benjamene ba se ke ba leleka Bajebuse ba ba bego ba dula Jerusalema. Go tloga ka nako yeo Bajebuse ba dutše le batho ba Benjamene moo. Batho ba kgoro ya Efraime le ba ya Manase ba ile ba yo hlasela motse wa Bethele, woo mehleng yeo o bego o bitšwa Luse. Morena a ba thuša. Ba romela dihlodi motseng. *** Dihlodi tšeo tša bona monna a etšwa moo motseng, gomme tša re go yena: “Re laetše felwana moo re ka tsenago gona, mme re tla go dira ka botho.” Ka fao monna yoo a ba laetša, gomme banna ba kgoro ya Efraime le ba ya Manase ba bolaya bohle moo motseng, ntle le monna yola le ba kgorwana ya gabo ka moka. Ka morago monna yoo a ya nageng ya Bahete, a aga motse fao, mme a o rea leina la Luse, leo le bjale e sa lego leina la wona. Kgoro ya Manase e ile ya se ke ya leleka batho bao ba bego ba dula metseng ya Bethe-Sheane, Taanake, Doro, Jibleamo, Megido, le metsaneng ya kgauswi le yona; Bakanana ba ile ba ikgethela go dula moo. Ge Baisraele ba eba le maatla go feta pele, ba ile ba gapeletša Bakanana go ba šomela, fela ba se ke ba ba leleka ka moka. Kgoro ya Efraime e ile ya se ke ya leleka Bakanana ba ba bego ba agile motseng wa Gesere, ka gona Bakanana ba no fela ba dula moo le bona. Kgoro ya Sebulone e ile ya se ke ya leleka batho motseng wa Kitrone le go wa Nahalole. Bakanana bao ba ile ba no fela ba dula moo nabo, gomme ba gapeletšwa gore ba ba šomele. Kgoro ya Asere e ile ya se ke ya raka batho ba ba bego ba agile motseng wa Ako, wa Sidone, wa Mahalebe, wa Akesibe, wa Helba, wa Afeke, le wa Rehobo. Batho ba Asere ba ile ba dula le Bakanana ba agišana nabo, ka ge ba ile ba se ke ba ba leleka. Kgoro ya Naftali e ile ya se ke ya leleka batho ba ba bego ba dutše motseng wa Bethe-Shemeshe le wa Bethe-Anate. Ba ile ba dula le Bakanana ba agišana nabo, eupša ba ba gapeletša gore ba ba šomele. Baamore ba ile ba thibelela batho ba kgoro ya Dane kua nageng ya dithaba, mme ba se ke ba ba lesa ba theogela molaleng. Baamore ba ikgethela go dula kua Ayalone le Shaalbime le thabeng ya Herese, eupša batho ba kgoro ya Efraime le ba ya Manase ba ba gatelela, gomme ba ba gapeletša gore ba ba šomele. Ka leboa la Sela mollwane wa Baedomo o be o putla Sefateng sa Diphepheng. Morongwa wa Morena o kile a tloga Gilgale a ya Bokime gomme a re go Baisraele: “Ke le ntšhitše Egepeta ka le tliša nageng ye ke e enetšego borakgolokhukhu ba lena, ka re: ‘Nka se tsoge ke fedišitše kgwerano ya ka le lena, fela le lena le se ke la dira kgwerano le batho ba ba dulago mo nageng ye. Le phušole dialetare tša bona.’ Eupša ga se la dira se ke le boditšego sona. Le diretšeng? Ka baka leo, bjale ke le botša gore nka se leleke batho ba ge le le gare le tsena. E tla ba manaba a lena, mme le tla goketšwa ke ge ba khunamela medimo ya bona.” Ge morongwa a fetša go realo, setšhaba sa Israele ka moka sa thoma go hlaboša mantšu sa lla, mme ke ka moo felo fao go bitšwago Bokime. Ba ile ba direla Morena dihlabelo fao. Joshua o ile a laelana le Baisraele, mme yo mongwe le yo mongwe a boela karolong ya gagwe ya naga a dula go yona. Ge Joshua a be a sa phela, setšhaba sa Israele se be se direla Morena, mme le ka morago ga lehu la gagwe ba ile ba tšwela pele le go mo direla ge bagolo bale ba bonego dilo ka moka tše kgolo tše Morena a di diretšego Baisraele ba sa phela. Mohlanka wa Morena, Joshua, morwa wa Nunu, o ile a hlokafala a na le mengwaga ye lekgolo le lesome. A bolokwa karolong ya gagwe ya naga kua Timnate-Herese, nageng ya dithaba ya Efraime, ka leboa la thaba ya Gaashe. Moloko woo ka moka le wona o ile wa hwa, gomme moloko wo o o latelago wa lebala Morena le seo a se diretšego Baisraele. Gomme setšhaba sa Israele sa dira sebe pele ga Morena, sa thoma go direla boBaale. Ba furalela Morena, Modimo wa borakgolokhukhu ba bona, yo a ba ntšhitšego Egepeta, mme ba thoma go khunamela medimo ye mengwe, medimo ya ditšhaba tšeo di bego di bapile le bona. Ba e obamela mme ba rumola Morena. Ba furalela Morena mme ba direla boBaale le boAstarte. Ka gona Morena a ba tukela bogale, mme a ba gafela diatleng tša bahlakodi bao ba ilego ba ba tšeela dithoto tša bona. A lesa manaba ao a bapilego le bona a ba fenya, mme ba se sa kgona go itšhireletša. Ka nako ye nngwe le ye nngwe ge ba eya ntweng, Morena o be a ba hlanamela, bjalo ka ge a be a ile a ena. Ba ile ba ba matshwenyegong a magolo. Ka gona Morena a ba fa baetapele ba go ba phološa go bahlakodi ba bona. Eupša baetapele bao ba ba hlokomologa. Baisraele ba se botegele Morena, eupša ba obamela medimo ye mengwe. Botatagobona bona ba be ba phetha ditaelo tša Morena, fela moloko wo wona wa phakiša wa lesa go di phetha. Nako ye nngwe le ye nngwe ge Morena a ba fa moetapele, o be a mo thuša mme a phološa setšhaba manabeng a sona ge yena moetapele yoo a sa phela. Morena o be a ba šokela ka gobane ba be ba tsetla ge manaba a bona a ba tshwenya a ba gateletše. Eupša ge moetapele yoo a ehwa, batho ba be ba boela ditseleng tša bona tša kgale mme ba itshwara gampe go feta botatagobona. Ba be ba obamela medimo ye mengwe ba e direla, mme ba ngangabala ba itshepelela ka ditsela tša bona tše mpe. Morena o be a tukela Baisraele bogale gomme a re: “Setšhaba se se lahlile kgwerano ye ke laetšego borakgolokhukhu ba bona gore ba e botegele. Ka gobane ga se ba ntheeletša, nka se sa leleka le se tee sa ditšhaba tše di bego di sa le mo nageng ge Joshua a ehwa. Ke tla ba leka ka ditšhaba tše, gore ke bone ge eba ba tla sepela ka ditsela tša ka bjalo ka borakgolokhukhu ba bona.” Ka gona Morena a lesa ditšhaba tšeo tša dula moo nageng. A se ke a ba gafela diatleng tša Joshua, goba a ba leleka ka pela ka morago ga lehu la gagwe. Ka gona, Morena a šadiša ditšhaba tše dingwe moo nageng go leka Baisraele ba ba bego ba sa tsebe dintwa tšela tša Kanana. O ile a dira seo e le fela go ruta moloko wo mongwe le wo mongwe wa Baisraele ntwa, gagologolo bao ba bego ba se ba ka ba ya ntweng. Ba ba ilego ba leswa moo nageng e be e le ba metse ye mehlano ya Bafilista, Bakanana ka moka, Basidone, le Bahibe ba ba bego ba dula thabeng ya Lebanone, go tloga thabeng ya Baale-Hermone go ba go yo fihla sefateng sa Hamate. E be e tla ba go leka Baisraele gore Morena a bone ge eba ba tla phetha ditaelo tše a di filego borakgolokhukhu ba bona ka Moshe, goba ba ka se di phethe. Ka fao setšhaba sa Israele sa dula gare ga Bakanana, Bahete, Baamore, Baperise, Bahibe le Bajebuse. Ba nyalelana le bona, mme ba khunamela medimo ya bona. Setšhaba sa Israele se ile sa dira sebe pele ga Morena Modimo wa sona, sa mo lebala sa khunamela boBaale le dikota tša borapedi. Ka gona Morena a befelelwa Baisraele mme a lesa Kgoši Kushane-Rishataime wa Mesopotamia a ba thopa, mme a ba buša mengwaga ye seswai. Ke mo Baisraele ba lletšego Morena, mme yena a ba romela motho yo a ilego a ba lokolla. Yena e be e le Otniele, morwa wa Kenase, ngwanaboKalebe. Moya wa Morena wa mo aparela, gomme ya ba moetapele wa Baisraele. Otniele a ya ntweng, gomme Morena a gafela kgoši ya Mesopotamia diatleng tša gagwe. Go ile gwa ba le khutšo nageng mengwaga ye masome a mane. Ka morago Otniele a hwa. Setšhaba sa Israele se ile sa dira sebe gape pele ga Morena. Ka baka la taba yeo Morena a dira gore Kgoši Eglone wa Moaba a be le maatla go feta Baisraele. Eglone a bokanya Baamone le Baamaleke; bona ba fenya Baisraele gomme ba thopa Jeriko, motse wa mehlare ya mepalema. Baisraele ba hlankela Eglone mengwaga ye lesome le ye seswai. Ka morago ba llela Morena, gomme yena a ba romela monna wa go tla go ba lokolla. Yoo e be e le Ehude, monna wa nngejane, morwa wa Gera, wa kgoro ya Benjamene. Setšhaba sa Israele sa romela diloba go Kgoši Eglone wa Moaba ka yena. Ehude o be a itiretše tšhoša ya magale a mabedi, mme botelele bja yona e ka ba disentimetara tše masome a mane le tše di selelago. O be a e tlemelela ka lehlakoreng la gagwe la go ja, ka gare ga diaparo tša gagwe. A iša diloba tšeo go Eglone yo e bego e le monna wa go nona kudu. Ge Ehude a seno mo fa diloba tšeo o ile a tloga le banna bale ba bego ba di rwele ge ba boela gae. Fela yena a ba gomela mo go bego go le medimo ya go betlwa ka maswika, kgauswi le Gilgale, mme a boela go Eglone a re: “Kgoši, ke go swaretše molaetša wa ka thopeng.” Ka gona kgoši a laela bahlanka ba gagwe a re: “Re tlogeleng re nnoši!” Mme ka moka ga bona ba tšwa. Bjale, ge kgoši a sa dutše a nnoši ka phapošing ya gagwe ye e fodilego ya kua tlhakeng ya ntlo, Ehude a mmatamela a re: “Ke go swaretše molaetša wo o tšwago go Modimo.” Kgoši a ema ka maoto. Ka letsogo la nngele Ehude a ntšha tšhoša yela moo lehlakoreng la gagwe la go ja mme a e tsotsometša dimpeng tša kgoši. Tšhoša ka moka ya sobelela le maswaro, mme mabipi a e pipetša ka gobane Ehude o ile a se ke a e ntšha dimpeng tša kgoši. Tšhoša yeo ya tšwelela ka morago. Ke moo Ehude a tšwetšego mathuding, a tswalela mejako, a e kgonya, mme a tloga. Bahlanka bale ba tla ba hwetša mejako e kgontšwe, fela ba no gopola gore kgoši o ka gare, o sa ithoma. Ba ile ba leta moo go fihlela ba thoma go belaela, mme ge ba bona a sa bule mejako, ba tšea sekgonyo ba e kgonyolla. Ba makala ba bona mong wa bona fao, a rapaletše fase a hwile. Ehude o ile a tloga mola ba sa letile, a sepela a ba a feta mola go bego go le medimo ya go betlwa ka maswika mme a tšhabela Seira. Ge a fihla moo a letša phalafala nageng ya dithaba ya Efraime go biletša banna ba Israele ntweng, mme a ba eta pele ba theoga dithaba. A re go bona: “Ntateleng! Morena o gafetše Bamoaba, manaba a lena, diatleng tša lena.” Ka gona ba latela Ehude ba theoga mme ba thopa madibogo a Jordane; ba se ke ba lesa le monna o tee a tshela. Tšatši leo ba bolaya bahlabani ba e ka bago ba dikete tše lesome ba Bamoaba ba go tia ba dinatla; gwa se be le o tee wa bona yo a phologago. Baisraele ba fenya Bamoaba tšatši leo, gomme gwa ba le khutšo nageng mengwaga ye masome a seswai. Moetapele yo a ilego a latela Ehude e bile Shamgare, morwa wa Anate. Le yena o ile a phološa Baisraele ka go bolaya Bafilista ba makgolo a a selelago ka phata ya go gapa dipholo. Ka morago ga ge Ehude a hwile, setšhaba sa Israele se ile sa dira sebe gape pele ga Morena. Ka gona Morena a ba gafela diatleng tša Jabine, kgoši ya Mokanana, yo a bego a buša a le motseng wa Hatsore. Molaodi wa madira a gagwe e be e le Sisera, yo a bego a dula kua Haroshete-ya-Baditšhaba. Jabine o be a na le makoloi a ntwa a tshipi a makgolo a senyane, gomme a gateletše setšhaba sa Israele ka sehlogo mengwaga ye lesome. Ke mo Baisraele ba lletšego Morena gore a ba thuše. Bjale Debora, mosadi wa Lapidote, e be e le moprofeta wa mosadi, gomme a ahlola Baisraele mehleng yeo. O be a fela a dula ka fase ga mohlare wa mopalema wo o bego o bitšwa mopalema wa Debora, gare ga Rama le Bethele, nageng ya dithaba ya Efraime, mme setšhaba sa Israele se etla moo go yena gore a se ahlole. Ka letšatši le lengwe a roma motho go yo bitša Barake, morwa wa Abinoamo, wa motse wa Kedeshe kua Naftali, mme a re go yena: “Morena Modimo wa Israele o a go laela o re: ‘Tšea banna ba dikete tše lesome kgorong ya Naftali le go ya Sebulone mme o ba ete pele go ya thabeng ya Taboro. Ke tla tliša Sisera, molaodi wa madira a Jabine, go tlo lwa nago kua nokaneng ya Kishone. O tla be a na le makoloi a gagwe a ntwa le madira a gagwe, fela ke tla mo gafela diatleng tša gago.’ ” Ke moo Barake a mo fetotšego a re: “Ke tla ya ge o eya le nna, eupša ge o sa ye le nna, gona nka se ye.” Debora a mo fetola a re: “Go lokile, ke tla ya nago, fela go ka se tumišwe wena ka baka la go fenya moo, ka gobane Morena o tla gafela Sisera diatleng tša mosadi.” Ka gona Debora a tloga a ya Kedeshe a na le Barake. Barake a laela kgoro ya Sebulone le ya Naftali gore di ye Kedeshe, gomme a latelwa ke banna ba dikete tše lesome. Debora o be a na le yena. Ka yona nako yeo Hebere, Mokene, o be a hlomile mošaša wa gagwe go batamela moo Kedeshe, kgauswi le mohlare wa moeike kua Tsaananime. O be a tlogile go Bakene ba bangwe, ditlogolo tša Hobabe, molamo wa Moshe. Ge Sisera a ekwa gore Barake o rotogetše thabeng ya Taboro, a laela gore makoloi a gagwe a ntwa a makgolo a senyane le bahlabani ba gagwe ka moka ba tloge Haroshete-ya-Baditšhaba ba ye nokaneng ya Kishone. Ke moo Debora a itšego go Barake: “Sepela! Morena o go etile pele! Lehono o gafetše Sisera diatleng tša gago.” Ka gona Barake a fologa thaba ya Taboro le bahlabani ba gagwe ba dikete tše lesome. Ge Barake a hlasela ka madira a gagwe, Morena a gakantšha Sisera le makoloi a gagwe ohle a ntwa le bahlabani ba gagwe ka moka. Sisera a fologa koloi ya gagwe ya ntwa gomme a tšhaba ka maoto. Barake a rakediša makoloi ao a ntwa le madira go ba go yo fihla Haroshete-ya-Baditšhaba, gomme madira ka moka a Sisera a bolawa. Gwa se ke gwa šala motho. Sisera o ile a tšhabela mošašeng wa Jaele, mosadi wa Hebere, Mokene, ka gobane Kgoši Jabine wa Hatsore o be a sa lwe le lapa la Hebere. Jaele o ile a tšwa go yo gahlanetša Sisera gomme a re go yena: “Tsena, mong wa ka; tsena ka mošašeng wa ka. O se ke wa boifa.” Ka gona a tsena, mme a mo uta ka morago ga seširo. Sisera a re go yena: “Hle, mphe meetse a go nwa; ke swerwe ke lenyora.” Jaele a khuromolla lekuka la maswi, a mo noša, mme a mo uta gape. Ke moo Sisera a mmoditšego a re: “Ema kua mojakong wa mošaša, gomme ge motho a ka tla mo mme a go botšiša ge eba ga go motho mo, o re: ‘Aowa.’ ” Sisera o be a lapile moo e lego gore o ile a napa a ya ka boroko. Ke mo Jaele a tšerego notwana le sebapola sa tente, a nanyetša go Sisera, mme a mmolaya ka go kokotela sebapola sela gare ga leihlo le tsebe go fihlela se phuleletša hlogo e bile se tsenelela fase. Ge Barake a re o hlomere Sisera, Jaele a tšwela ntle go yo mo gahlanetša gomme a re go yena: “Tlaa mo! Ke tla go laetša monna yo o mo nyakago.” Ka gona Barake a tsena ka moo mošašeng le Jaele, mme a hwetša Sisera a rapaletše fase a hwile, sebapola sela sa tente se sa tseneletše hlogong ya gagwe. Letšatšing leo Modimo a goboša Jabine, kgoši ya Mokanana, pele ga Baisraele. Ba ile ba fela ba mo hlasela go fihlela yena le madira a gagwe ba fedišwa. Ka letšatši leo Debora le Barake, morwa wa Abinoamo, ba opela kopelo ye: Retang Morena! Baetapele ba etile Baisraele pele; setšhaba se ithaopile sa lwa. Theetšang, lena magoši! Nkweng, lena babuši! Nna ke tla opelela Morena, ka leletša Morena, Modimo wa Israele, diletšo. Morena, ge o tloga dithabeng tša Seire, ge o gwataka o etšwa seleteng sa Edomo, lefase le ile la šikinyega, legodimo la neša pula. Ee, meetse a tšhologela fase a etšwa marung. Dithaba tša šikinyega pele ga Morena wa Sinai, pele ga Morena Modimo wa Israele. Mehleng ya Shamgare, morwa wa Anate, mehleng ya Jaele, ditsela tše kgolo di be di se sa šomišwa, mme basepedi ba tšea ka tsejana tša ka thoko. Metse ya Israele e be e le marope; e be e se ne motho go fihlela ge nna, Debora, ke etla, ke etla bjalo ka mmagoBaisraele. Go bile ntwa nageng ge Baisraele ba ikgethela medimo ye mefsa. A go na le yo a kilego a rwala kotse goba lerumo banneng ba dikete tše nne ba Israele? Ka mehla ke fela ke gopotše balaodi ba madira ba Israele, ke gopotše batho ba ba ithaopilego. Retang Morena! Di naganeng, lena ba le namelago dipokolo tše tšhweu, le dutše mašeleng a disala, le lena ba le tlemegilego go sepela ka maoto gohle mo le yago. Theetšang! Bageledi ba meetse didibeng ba anega tša go fenya ga Morena, go fenya ga setšhaba sa Israele! Ke moo setšhaba sa Morena se ilego dikgorong tša metse ya sona. Hlabelela, Debora, hlabelela! Hlabelela! Opela kopelo! Hlabelela! Emelela, Barake, morwa wa Abinoamo, eta mathopša a gago pele a sepele! Ke gona mašaledi a theogetšego go baetapele ba ona; setšhaba sa Morena sa tla go yena se itokišeditše ntwa. Ba tlile ba etšwa go Efraime, ba tla ka moeding ka morago ga kgoro ya Benjamene le batho ba yona. Balaodi ba madira ba tlile ba etšwa Makire, baetapele ba madira ba etšwa go Sebulone. Mantona a Isakara a tlile le Debora; ee, Baisakara ba ile ba tla, Barake le yena. Ba mo latetše ba kgeregela moeding. Eupša kgoro ya Rubene ya no ba fela le maikemišetšo a magolo. Ke ka baka lang ba ile ba šala merakeng ba theeditše badiši ge ba letša dinakana? Ee, kgoro ya Rubene ya no ba fela le maikemišetšo a magolo. Kgoro ya Gade e ile ya iketla ka bohlabela bja Jordane, kgoro ya Dane yona ya fela e le kua maselawatleng. Kgoro ya Asere e ile ya fela e dutše kua lebopong la lewatle, ba itulela kua go emago maselawatle. Eupša batho ba Sebulone le ba Naftali ba ile ba ipea kotsing ya go bolawa. Kua Taanake, go ipata le moela wa Megido, dikgoši di ile tša tla tša lwa; magoši a Kanana a lwa, fela ba se ke ba tloga le silibera. Dinaledi di lwele di le legodimong; di be di swere ditsela tša tšona di elwa le Sisera. Nokana ya Kishone e ile ya ba gogola, nokana ya kgale, Kishone. Ke tla gwatakela pele ke sa šie! Ke moo dipere di tlilego di kgatha, di kgatha di kiba fase ka ditlhako. Morongwa wa Morena a re: “Rogakang Merose, rogakang, rogakang ba ba dulago moo! Ga se ba tla go thuša Morena, ba tla e le bahlabani go tlo mo lwela.” Mošegofatšwa gare ga basadi ke Jaele, mosadi wa Hebere, Mokene; ke mošegofaditšwa gare ga basadi ba ba dulago ka mešašeng. Sisera o kgopetše meetse, yena a mo fa maswi; o mo file lebebe ka sebjana se sebotse. Ka seatla se sengwe a tšea sebapolatente, ka sa la go ja a swara notwana ya mošomi; a kokotela Sisera gomme a mo pšhatla hlogo; a mo phuleletša gare ga leihlo le tsebe. Sisera a phuhlama ka matolo, a wa fase mme a totompala maotong a Jaele. A phuhlama fase ka matolo maotong a gagwe, mme a wa; a wela fase, a hwa. MmagoSisera a lebelela ntle ka lefasetere, a balabala a lebeletše ka nthoba a re: “Koloi ya gagwe ya ntwa e reng e diegile? Ke ka baka lang dipere tša gagwe di sa boe ka pela?” Magarebe a bohlalehlale a mo fetola, gomme yena a ipotša leboelela a re: “Ba sa nyaka fela tše ba ka di thopago ba di abagana, mosetsana o tee goba ba babedi mohlabaning yo mongwe le yo mongwe, lešela la mebalabala la Sisera, mašela a melogelelo a molala wa mohumagadi.” A manaba a gago a hwe ka wona mokgwa woo, Morena, ba ba go ratago bona tage bjalo ka letšatši ge le hlaba ka letago! Go ile gwa ba le khutšo nageng mengwaga ye masome a mane. Setšhaba sa Israele sa boela sa dira sebe pele ga Morena, ka gona a ba gafela diatleng tša Bamidiane mengwaga ye e šupago. Bamidiane ba be ba na le maatla go feta Baisraele, ka gona setšhaba sa Israele sa ba utamela ka mefomeng le ka meleteng le ka dibong kua dithabeng. Nako ye nngwe le ye nngwe ge Baisraele ba bjetše dibjalo, Bamidiane ba be ba etla le Baamaleke le ditšhaba tša kua lešokeng gomme ba ba hlasele. Ba be ba hloma mešaša ya bona moo nageng ya Baisraele, ba senye dibjalo go ya borwa go ba go yo fihla Gasa. Ba be ba tšea dinku, dikgomo le dipokolo ka moka, mme ba sa šadišetše Baisraele selo se ba ka phelago ka sona. Ba be ba etla le diruiwa tša bona le ditente, mme e be leru le nkego ke tšie. Bona le dikamela tša bona e be e le ba bantšintši ba sa balege. Ba be ba etla ba senye naga, gomme Baisraele ba sa kgone go ba thibela. Ke mo Baisraele ba lletšego Morena gore a ba thuše. Ge setšhaba sa Israele se llela Morena se nyaka thušo ka baka la Bamidiane, Morena o ile a ba romela moprofeta yo a ilego a re go bona: “Morena, Modimo wa Israele, o re: ‘Nna ke le ntšhitše bokgobeng kua Egepeta. Ke le phološitše go Baegepeta le go bagateledi ba lena mo nageng ye. Ke ba lelekile ge le goroga, mme ka le fa naga ya bona. Ke le boditše gore ke nna Morena Modimo wa lena, le gore le se ke la khunamela medimo ya Baamore bao le dulago nageng ya bona. Eupša ga se la ntheetša.’ ” Ke moo morongwa wa Morena a tlilego a dula ka fase ga moeike kua Ofra, wo e bego e le wa Joase, monna wa kgorwana ya Abiesere. Morwa wa gagwe, Gideone, o be a fola mabele ka bopitlelong bja diterebe, gore Bamidiane ba se ke ba mmona. Morongwa yoo wa Morena a iponagatša go yena fao, a re: “Morena o na le wena, wena monna yo bogale, yo maatla!” Gideone a re go yena: “Morena, nke ke botšiše: Ke ka baka lang dilo tše ka moka di re hlagetše ge eba Morena o na le rena? A e kae mehlolo yela ka moka ye botatagorena ba re boditšego gore o be a e dira ge a be a ba ntšha Egepeta? Morena o re hlanogetše mme o re gafetše diatleng tša Bamidiane.” Ke moo Morena a retologetšego go yena a re: “Sepela ka maatla a a gago o yo phološa Baisraele go Bamidiane. O rongwa ke nna.” Gideone a mo fetola a re: “Aowi, Mong wa ka, nka phološa Baisraele bjang? Kgorwana ya gešo ke yona ye nnyane kudu mo kgorong ya Manase, mme le nna ke mofokotšana ka lapeng lešo.” Morena a mo fetola a re: “O tla kgona, ka gobane ke tla go thuša. O tla fenya Bamidiane gabonolo mo nkego ka moka ga bona ke motho o tee.” Gideone a mo fetola a re: “Ge ke go kgahla, ntaetše gore ka nnete o Morena. Hle, o se ke wa tloga mo go fihlela ke go tlišetša kabelo ya dijo.” Morena a re: “Ke tla dula mo go fihlela o boa.” Ka gona Gideone a tsena ka ngwakong wa gagwe, a apea putšane, a dira le dinkgwa tše di se nago komelo ka bupi bja dikilokramo tše lesome. A solela nama yeo ntlatleng, mme moro a o tšela ka moruswing, gomme a di tliša go morongwa wa Morena ka fase ga mohlare wa moeike, a mo fa tšona. Morongwa a re go yena: “Bea nama le dinkgwa mo letlapeng le, gomme o tšhele moro wo godimo ga tšona.” Gideone a dira bjalo. Morongwa wa Morena a obeletša lepara le a bego a le swere a kgwatha nama yela le dinkgwa tšela ka ntlha ya lona. Mollo wa tšwa moo letlapeng wa tšhuma nama le dinkgwa. Morongwa a napa a timelela. Ke mo Gideone a lemogilego gore ke morongwa wa Morena yo a mmonego, mme ka letšhogo a re: “Morena, Mong wa ka, ke bone morongwa wa gago ke lebantše sefahlego le yena!” Fela Morena a re go yena: “Bea pelo. O se boife. O ka se hwe.” Gideone a agela Morena aletare fao, mme a e rea leina la “Morena Mompeapelo”. Le bjale e sa le gona kua motseng wa Ofra, wo o lego wa kgorwana ya Abiesere. Bošego bjoo Morena a re go Gideone: “Tšea poo ya tatago le poo ye nngwe ye e nago le mengwaga ye e šupago, o phušole aletare ye tatago a e agetšego Baale mme o reme kota ya borapedi ye e ipatilego le aletare. O agele Morena Modimo wa gago aletare ye botse godimo ga ntotoma yeo. Gomme o tšee poo yela ya bobedi o ntirele sehlabelo sa go tšhungwa ka moka ka yona, mollo wa ntshe o o gotše ka kota yela ya borapedi ye o e remilego.” Ka gona Gideone a tšea ba lesome ba bahlanka ba gagwe mme a dira se Morena a mmoditšego sona. Ka ge a be a boifa batho ba lapa labo le batho ba motse woo ga se a dira taba yeo mosegare, o ile a e dira bošego. Ge batho ba motse ba tsoga e sa le bošego ka letšatši le le latelago, ba hwetša aletare yela ya Baale e kgerešitšwe le kota yela ya borapedi e remilwe, mme poo yela ya bobedi e tšhumilwe godimo ga aletare ye e agilwego moo. Ba botšišana ba re: “Ke mang a dirilego taba ye?” Ba nyakišiša gomme ba hwetša gore ke Gideone, morwa wa Joase. Ke moo ba itšego go Joase: “Ntšhetša morwa wa gago mo ntle, gore re tle re mmolaye! O phušotše aletare ya Baale gomme a rema kota ya borapedi ye e bego e ipatile le yona.” Eupša Joase a re go bohle ba ba bego ba mo tomoletše mahlo: “Kgane lena le ema le Baale? A le tloga le mo emelela? Yo mongwe le yo mongwe yo a mo emelelago o tla bolawa pele ga ge letšatši le hlaba. Ge Baale e le modimo, a a itšhireletše. Ke aletare ya gagwe ye e phušotšwego.” Go tloga tšatši leo Gideone a tsebja ka la Jerubaale, ka gobane Joase o ile a re: “A Baale a itšhireletše; ke aletare ya gagwe ye e kgerešitšwego.” Ke moka Bamidiane bohle le Baamaleke le batho ba ditšhaba tša lešokeng ba kgobokana, ba tshela noka ya Jordane, mme ba hloma mešaša molaleng wa Jesriele. Maatla a Morena a aparela Gideone. A letša phalafala gore banna ba Abiesere ba mo latele. A roma batseta nageng ka moka ya kgoro ya Manase go ba bitša gore le bona ba mo latele. A roma le batseta kgorong ya Asere le ya Sebulone le ya Naftali, mme le bona ba tla go mo tlatša. Ke moo Gideone a itšego go Modimo: “O re o nyaka go phološa Baisraele ka nna. Go lokile, ke bea boya bja nku mo seboeng. Ge ka moswane e ka ba boya fela bjo bo wetšwego ke phoka, e sego le mobu, gona ke tla tseba gore o tloga o nyaka gore ke phološe Baisraele, bjalo ka ge o boletše.” Seo se ile sa direga. Ge Gideone a tsoga e sa le bošego ka letšatši le le latelago, a pitla boya bjola, gomme a gamola phoka ye ntši meetse ao a tlala sebjana. Ke moo Gideone a itšego go Modimo: “O se mpefelelwe; a ke no bolela gatee fela gape. Hle, a ke leke gatee fela gape ka boya bjo. Bjale lekga le a boya bo ome, mme mobu ka moka o kolobe.” Bošego bjoo Modimo a dira sona seo. Mosong wo o latelago boya bjola bo be bo omile, eupša mobu o kolobišitšwe ke phoka. Ka letšatši le lengwe Gideone le banna ba gagwe ka moka ba tsoga e sa le bošego ba hloma mešaša go ipata le mothopo wa Harode. Mešaša ya Bamidiane e be e le molaleng go ya leboa, go ipata le mmoto wa More. Morena a re go Gideone: “O nnyaketše banna ba bantši kudu go fenya Bamidiane. Ba ka tla ba gopola gore ba fentše ka bobona, mme ba se ke ba nkgodiša ka go fenya moo. Begela banna o re: ‘Yo a tšhogilego le yo a nago le boi, a a gomele gae, gomme rena re tla šala mo thabeng ya Gileade!’ ” Ka gona banna ba dikete tše masome a mabedi le tše pedi ba boela gae, mme gwa šala ba dikete tše lesome. Ke moo Morena a itšego go Gideone: “E sa le ba bantši kudu. Ba iše meetseng, gomme ke tla go hlaolela bona moo. Ge ke go boditše gore monna wa goregore a ye nago, a ka ya, ge ke go boditše gore wa goregore a se ke a ya nago, a se ke a ya.” Gideone a iša banna meetseng, gomme Morena a re go yena: “Hlaola yo mongwe le yo mongwe yo a kgaphetšago meetse ka leleme bjalo ka mpša go bao ba nwago meetse ba khunamile ka matolo.” E ile ya ba banna ba makgolo a mararo bao ba ilego ba ga meetse ka diatla mme ba a nwa ka lekgapšakgapša. Ba bangwe ka moka ba khunama ka matolo ba nwa. Morena a re go Gideone: “Ke tla le phološa ka gafela Bamidiane diatleng tša gago ka banna ba makgolo a mararo bao ba nwelego meetse ka lekgapšakgapša. Ba bangwe ka moka a ba boele malapeng a bona.” Ka gona Gideone a boetša Baisraele bale ka moka gae, ntle le bale ba makgolo a mararo, ba ba ilego ba tšea mefago ka moka le diphalafala. Mešaša ya Bamidiane e be e le molaleng, ka fase ga ya bona. Bošegong bjoo Morena a laela Gideone a re: “Tsoga o hlasele mešaša; ke e gafela diatleng tša gago. Eupša ge o boifa go hlasela, theogela kua mešašeng le mohlanka wa gago, Pura. O tla kwa se ba se bolelago, mme wa ba le sebete sa go ba hlasela.” Ka gona Gideone le mohlanka wa gagwe, Pura, ba theogela lešing la mešaša ya manaba a bona. Bamidiane le Baamaleke le ditšhaba tša lešokeng ba be ba ikadile molaleng bjalo ka tšie, mme ba na le dikamela tše ntši bjalo ka dithorwana tša lešabašaba lebopong la lewatle. Ya re ge Gideone a fihla fao a kwa monna yo mongwe a botša mogwera wa gagwe toro ya gagwe. O be a re: “Ke lorile senkgwa sa garase se kgokologela ka mešašeng ya rena mme se thula wo mongwe wa mešaša ya rena. Sa o phethola mme wa phuthagana fase.” Mogwera yoo wa gagwe a mo fetola a re: “Toro yeo ga go se sengwe seo e se šupago ge e se tšhoša ya Gideone, Moisraele, morwa wa Joase! Modimo o gafetše Bamidiane le mešaša ya bona ka moka diatleng tša gagwe!” Ge Gideone a ekwa tša toro ya monna yoo le gore e šupa eng, a obamela Morena. Ke moka a boela mešašeng ya Baisraele a re: “Tsogang! Morena o gafetše mešaša ya Bamidiane diatleng tša lena!” O ile a arola banna ba gagwe ba makgolo a mararo dihlopha tše tharo, gomme a neela monna yo mongwe le yo mongwe phalafala le moruswi wo o nago le serumola ka gare ga wona. A re go bona: “Ge ke fihla lešing la mešaša yela, le ntebeleleng, gomme le direng seo ke se dirago. Ge nna le sehlopha sa ka re letša diphalafala, le lena le letše tša lena le rarela mešaša ka moka, gomme le goe le re: ‘Ya Morena le ya Gideone!’ ” Gideone le banna ba gagwe ba lekgolo ba fihla lešing la mešaša pejana ga bošegogare, ge baleti ba seno tlošana. Ke moo ba leditšego diphalafala mme ba pšhatla meruswi ye ba bego ba e swere, mme le dihlopha tšela tše dingwe tše pedi tša dira bjalo. Ka moka ba swara dirumola ka diatla tša nngele, diphalafala ba di swara ka tša la go ja, ba goa ba re: “Tšhoša ya Morena le ya Gideone!” Monna yo mongwe le yo mongwe a ema felo ga gagwe ba dikaneditše mešaša, gomme madira ka moka a manaba a tšhaba a tladitše lešata. Ge banna ba Gideone ba letša diphalafala tša bona, Morena a dira gore manaba a hlaselane ka ditšhoša tša ona. A tšhabela thoko ya Tsereda go ba go yo fihla Bethe-Shita, go yo fihla le motseng wa Abele-Mehola, kgauswi le Tabate. Banna ba kgoro ya Naftali le ba ya Asere le ba diripa ka dipedi tša kgoro ya Manase ba bitšwa, gomme ba rakediša Bamidiane. Gideone a roma batseta nageng ka moka ya dithaba ya Efraime gore ba re: “Theogang le tle le lwe le Bamidiane. Le leteng noka ya Jordane le meedi ya yona go ba go yo fihla Bethe-Bara, go thibela Bamidiane gore ba se ke ba di tshela.” Banna ba Efraime ba ile ba kgobokanywa, gomme ba leta noka ya Jordane le meedi ya yona go ba go yo fihla Bethe-Bara. Ba thopa dikgoši ka dipedi tša Bamidiane, Orebe le Seebe; ba bolaya Orebe kua letlapeng la Orebe, mme Seebe ba mmolaya kua bopitlelong bja diterebe bja Seebe. Ba ile ba tšwela pele le go rakediša Bamidiane, gomme ba tliša hlogo ya Orebe le ya Seebe go Gideone, yoo bjale a bego a le ka bohlabela bja Jordane. Ke moka banna ba Efraime ba re go Gideone: “Ke ka baka lang o se wa re bitša ge o eya go lwa le Bamidiane? O reng o re swere ka mokgwa wo?” Ba mo sola kudu. Eupša yena a ba fetola a re: “Se ke se dirilego ga se selo ge se bapetšwa le seo se dirilwego ke lena. Le bonnyane bjo lena batho ba Efraime le bo dirilego bo feta se kgorwana ya gešo ka moka e se dirilego. Modimo o dirile gore le kgone go bolaya magoši a Bamidiane, Orebe le Seebe. A nna ke kgonne go dira eng se se ka bapetšwago le seo?” Ge a realo pefelo ya bona ya okobala. Ka nako yeo Gideone le banna ba gagwe ba makgolo a mararo ba be ba fihlile nokeng ya Jordane gomme ba šetše ba e tshetše. Ba be ba lapile, eupša ba sa rakediša manaba. Ge ba fihla kua Sukote, Gideone a re go banna ba motse woo: “Hle, faang banna ba ka dinkgwanyana. Ba lapile, mme ke rakediša Sebage le Tsalmuna, magoši a Bamidiane.” Eupša baetapele ba motse wa Sukote ba re: “Ke ka lebaka lang re swanetše go fa madira a gago dijo? Ga šešo wa thopa Sebage le Tsalmuna.” Ka gona Gideone a re: “Go lokile. Ge Morena a gafetše Sebage le Tsalmuna diatleng tša ka, ke tlilo le ngwapa ka meetlwa le mengana ya lešoka!” Ke moo Gideone a fetetšego Penuele mme a kgopela batho ba moo se a se kgopetšego batho ba Sukote, eupša banna ba moo Penuele le bona ba fetola go no swana le bale ba kua Sukote. Ka gona a re go bona: “Ge ke boa ke fentše, ke tlile go phušola sebo sa lena!” Sebage le Tsalmuna ba be ba le kua Karkoro le madira a bona. Madireng ka moka a banna ba ditšhaba tša lešokeng go ile gwa šala fela ba e ka bago ba dikete tše lesome le tše tlhano; go be go bolailwe bahlabani ba dikete tše lekgolo le tše masome a mabedi. Gideone o ile a tšea ka tsela ya ba ba dulago mešašeng, ka bohlabela bja Nobage le Jogoboha, gomme a hlasela madira ao a sa itebetše. Magoši ka mabedi a Bamidiane, Sebage le Tsalmuna, ba ile ba tšhaba, eupša yena a ba rakediša, a ba thopa, gomme a tlaletša madira a bona ka moka. Ge Gideone a boa ntweng ka tsela ya sefata sa Herese, a thopa lesogana la Sukote mme a le botšišiša. Lesogana leo la ngwalela Gideone maina a baetapele le bagolo ba masome a a šupago le ba ba šupago ba Sukote. Ke moka Gideone a ya go banna ba Sukote gomme a re: “Sebage le Tsalmuna šeba, bona bale le bego le nkodutla ka bona le re ke ka baka lang re swanetše go fa bahlabani ba gago ba ba lapilego dijo ba šešo ba thopa Sebage le Tsalmuna.” Ke moka a tšea meetlwa le mengana ya lešoka a ngwapa baetapele ba Sukote. A phušola le sebo sa kua Penuele gomme a bolaya banna ba motse woo. Ke gona Gideone a botšišitšego Sebage le Tsalmuna a re: “Banna ba le ba bolailego kua Taboro, le reng ka bona?” Bona ba mo fetola ba re: “Ba be ba swana nago – yo mongwe le yo mongwe wa bona o be a swana le morwa wa kgoši.” Gideone a re: “E be e le bomorwarre, bana ba mme. Ka Morena yo a phelago, ke be nka se le bolaye ge nkabe le lena le ba lesitše ba phela.” Ke moka a re go Jetere, morwa wa gagwe yo mogolo: “Ba bolaye!” Eupša mošemane yoo a se ke a khwamola tšhoša ya gagwe. O ile a dikadika, ka gobane e be e sa le mošemane. Ke moo Sebage le Tsalmuna ba itšego go Gideone: “Tlaa, re bolaye ka bowena. Monna o bolawa ke monna.” Ka gona Gideone a ba bolaya gomme a tšea dikgabišo tše di bego di le melaleng ya dikamela tša bona. Baisraele ba re go Gideone: “Baa mmuši wa rena, wena le ditlogolo tša gago. O re phološitše go Bamidiane.” Gideone a ba fetola a re: “Nna nka se be mmuši wa lena, le morwa wa ka e ka se be mmuši wa lena. Mmuši wa lena e tla ba Morena.” A tšwela pele a re: “A ke le kgopeleng selo se tee. Yo mongwe le yo mongwe wa lena a a mphe mangina a a a thopilego.” Bamidiane, bjalo ka batho bohle ba ba phelago lešokeng, ba be ba rwala mangina a gauta. Batho ba mo fetola ba re: “Re thabela go go neela ona.” Ba ala kobo, gomme yo mongwe le yo mongwe a bea go yona mangina a a a thopilego. Mangina ao a gauta ao Gideone a a amogetšego e be e le a boima bjo e ka bago bja dikilokramo tše masome a mabedi, ntle le dikgabišo melaleng ya dikamela, le mekgabo ya batho ya ditsebe, le diaparo tša bohubedu bja moretele tšeo magoši a Bamidiane a bego a di apara, goba dipheta tšeo di bego di le melaleng ya dikamela tša bona. Gideone a dira sekhunamelwa sa go swana le seaparo sa moprista ka gauta yeo, gomme a se bea motseng wa gabo wa Ofra. Baisraele ka moka ba kgeloga go Modimo mme ba ya fao go khunamela sekhunamelwa seo. Sona ya ba molaba go Gideone le ba lapa la gagwe. Ke ka mo Bamidiane ba ilego ba fenywa ke Baisraele mme ya se sa ba setšhaba se se boifegago. Go ile gwa ba khutšo nageng mengwaga ye masome a mane, go fihlela Gideone a ehwa. Gideone o ile a boela motseng wa gabo a yo dula gona. A ba le barwa ba masome a a šupago, ka gobane o be a na le basadi ba bantši. O be a bile a na le motlabo kua Shekeme; yena a mmelegela morwa, gomme Gideone a mo rea leina la Abimeleke. Gideone, morwa wa Joase, o ile a hwa a godile kudu, gomme a bolokwa lebitleng la Joase, tatagwe, kua Ofra, e lego motse wa kgorwana ya Abiesere. Ge Gideone a seno hwa, setšhaba sa Israele se ile sa boela sa kgeloga go Modimo mme sa khunamela boBaale. Ba ile ba dira Baale-wa-Kgwerano modimo wa bona mme ba se ke ba gopola Morena Modimo wa bona, yo a bego a ba phološitše manabeng a bona ka moka a a bego a bapile le bona. Le ge Gideone a be a diretše Baisraele tše botse ka moka, bona ga ba ka ba swara lapa la gagwe gabotse. Abimeleke, morwa wa Gideone, o ile a ya motseng wa Shekeme, moo go bego go dula bomalomeagwe le meloko ye mengwe ka moka ya bommagwe, gomme a ba botša gore ba botšiše batho ka moka ba Shekeme ba re: “Le kgetha eng go tše pedi tše: go bušwa ke barwa ka moka ba masome a a šupago ba Gideone, goba go bušwa ke motho o tee fela? Gopolang gore Abimeleke ke madi a bolena.” Meloko yeo ya bommagwe ya mmolelela le batho ba Shekeme ka taba yeo, gomme bona ba kgetha go latela Abimeleke ka gobane e be e le moloko wa bobona. Ba mo fa dipapetlana tša silibera tše masome a a šupago tše di tšwago tempeleng ya Baale-wa-Kgwerano, mme ka tšhelete yeo a gwaletša dihwirihwiri tše dingwe gore di mo latele. A ya lapeng la tatagwe kua Ofra, mme moo a bolaya bomorwarragwe, barwa ba Gideone, ba masome a a šupago godimo ga letlapa le tee. Eupša Jotamo, morwa wa Gideone wa phejane, a utama gomme a se ke a bolawa. Ke moka batho bohle ba Shekeme le ba Bethe-Milo ba kgobokana gomme ba ya mohlareng wa moeike wo o lego kgauswi le kokwane ya leswika ya borapedi kua Shekeme, mme moo ba bea Abimeleke kgoši. Ge Jotamo a ekwa taba yeo, a ya thabeng ya Gerisime mme a ema ka godimo ga yona, a ba goeletša a re: “Ntheetšeng, lena batho ba Shekeme, gore Modimo le yena a le theetše! Kgale mehlare e kile ya kgobokana go tla ipeela kgoši. Ya re go mohlare wa mohlware: ‘Baa kgoši ya rena.’ Mohlware wa e fetola wa re: ‘Ge ke tla ba kgoši ya lena ke swanetše go lesa go ntšha makhura a ka ao a šomišetšwago go hlompha medimo le batho.’ Ke moo mehlare e itšego go mogo: ‘Tlaa o be kgoši ya rena.’ Mogo wa e fetola wa re: ‘Ge ke tla ba kgoši ya lena ke swanetše go lesa go enywa dikenywa tša ka tše botse tše di tsefago.’ Ka fao mehlare ya re go morara: ‘Tlaa o be kgoši ya rena.’ Morara wa e fetola wa re: ‘Ge ke tla ba kgoši ya lena ke swanetše go lesa go ntšha beine ya ka yeo e thabišago medimo le batho.’ Ka gona, mehlare ka moka ya re go mošwana: ‘Tlaa o be kgoši ya rena.’ Mošwana wa e fetola wa re: ‘Ge le phegeletše go mpea kgoši ya lena, gona tlaang le dule morithing wa ka. Ge le gana, ke tla lauma mollo, wa tšhuma mesedere ya Lebanone.’ ” Jotamo a tšwela pele a re: “Bjale, afa le be le tloga le tiišitše le sa swaswe ge le bea Abimeleke kgoši? A le ile la swara Gideone gabotse ka moo go bego go swanetše ka gona mme la dira le ba lapa la gagwe ka botho? Gopolang gore tate o ile a le lwela. A ipea kotsing ya lehu gore a le phološe go Bamidiane. Fela lena lehono le tsogetše lapa la tate maatla. Le bolaile barwa ba gagwe, banna ba masome a šupago, godimo ga letlapa le tee – fela ka gobane Abimeleke, morwa wa gagwe yo a belegwego ke mohlanka wa gagwe wa mosetsana, ke moloko wa bolena, le mmeile kgoši ya Shekeme. Bjale ge, ge se le se dirilego Gideone le lapa la gagwe lehono le se dirile le tiišitše le sa swaswe, gona thabelang Abimeleke mme le yena a le thabele. Fela ge go se bjalo, gona mollo a o laume o etšwa go Abimeleke mme o tšhume banna ba Shekeme le ba Bethe-Milo. A mollo o laume o etšwa go banna ba Shekeme le ba Bethe-Milo mme o tšhume Abimeleke.” Jotamo a re go realo a tšhaba a yo dula Beere, ka ge a be a boifa Abimeleke, morwarragwe. Abimeleke o ile a buša Israele mengwaga ye meraro. Ka morago Morena a dira gore Abimeleke le badudi ba Shekeme ba hloyane, mme badudi bao ba tsogela Abimeleke maatla, e le gore Abimeleke le badudi ba Shekeme, bao ba mo hlohleleditšego go bolaya barwa ba Gideone ba masome a a šupago, ba tle ba lefe molato wa bona. Batho ba Shekeme ba ile ba bea banna godimo ga dithaba gore ba lalele Abimeleke, gomme bona ba hlakola yo mongwe le yo mongwe yo a fetago fao. Abimeleke yena o ile a sebelwa gore o laletšwe. Gaale, morwa wa Ebede, a tla Shekeme le bomorwarragwe, gomme batho ba Shekeme ba mo tshepha. Ka moka ba tšwa ba ya dirapeng tša merara mme ba fula diterebe ba dira beine ka tšona, gomme ba dira monyanya. Ba tsena ka tempeleng ya modimo wa bona moo ba ja, ba nwa, gomme ba rogaka Abimeleke. Gaale a re: “Na re batho ba babjang mo Shekeme? Ke ka baka lang re hlankela Abimeleke? Gabotsebotse ke yena mang? Kgane ga se morwa wa Gideone? Gomme Sebule ke ntona ya gagwe, fela rena re reng re swanetše go mo hlankela? Hlankelang rakgolokhukhu wa lena, Hamore, yo a hlomilego kgorwana ya lena! Nke nkabe ke le moetapele wa batho ba! Ke be ke tla tloša Abimeleke! Ke be ke tla re go yena: ‘Oketša madira a gago, tšwela ntle o lwe!’ ” Sebule, mmuši wa motse, o ile a befelwa ge a ekwa se Gaale a se boletšego. A roma batseta go Abimeleke kua Aruma gore ba re go yena: “Gaale, morwa wa Ebede, le bomorwarragwe ba tlile mono Shekeme, gomme ba hudua motse gore o go tsogele maatla. Bjale ge, wena le bahlabani ba gago le tloge e le bošego le yo utama kua nageng. Ka moswane le tsoge ge letšatši le hlaba mme le phakiše le hlasele motse. Ke moo e tlago re ge Gaale le banna ba gagwe ba etšwa go tlo lwa le lena, la hlabana le bona ka moo le ka kgonago ka gona.” Ka gona Abimeleke le banna ba gagwe ka moka ba sepela bošego mme ba yo lalela Shekeme ka dihlopha tše nne. Ge Abimeleke le banna ba gagwe ba bona Gaale a etšwa mme a ema kgorong ya motse, ba utologa. Gaale a ba bona mme a re go Sebule: “Bona! Banna šebale ba theoga dintlhohlong tša dithaba!” Sebule a mo fetola a re: “O bona merithi ya dithaba o hloma nke ke batho.” Gaale a bolela gape a re: “Bona! Banna šebale ba theoga patogeng ya thaba mme sehlopha se sengwe se theoga ka tsela ye e tšwago mohlareng wa moeike wa didupe!” Ke moo Sebule a itšego go yena: “Bo kae boikgantšho bjola bja gago, wena yola wa go re ke ka baka lang re swanetše go hlankela Abimeleke yo? Šebao banna ba o bego o ba nyatša. Bjale tšwela ntle o lwe nabo.” Gaale a eta banna ba Shekeme pele mme a tšwa a lwa le Abimeleke. A tšhaba, gomme Abimeleke a mo rakediša. Ba bantši ba bolawa, le gona kua kgorong ya motse. Abimeleke a ya a dula Aruma, gomme Sebule a raka Gaale le bomorwarragwe moo Shekeme gore ba se hlwe ba kgona go dula moo. Ka letšatši le le latelago Abimeleke a kwa gore batho ba Shekeme ba itokišetša go ya mašemong, ka gona a tšea banna ba gagwe, a ba arola dihlopha tše tharo, ba lalela batho bao mašemong. Ge a bona batho ba etšwa motseng, a tsupologa mo a bego a ba laletše gona go yo ba bolaya. Ge Abimeleke le sehlopha sa gagwe ba hlaganela pele go yo thiba kgorong ya motse, dihlopha tše dingwe tše pedi tša hlasela batho mašemong tša ba bolaya ka moka. Ntwa ya tšea letšatši ka moka. Abimeleke a thopa motse, a bolaya batho ba ona, a o phušola, mme a gaša mobu wa gona ka letswai. Ge batho ka moka sebong sa Shekeme ba ekwa taba yeo, ba tšhabela ka sebong sa tempele ya Baale-wa-Kgwerano. Abimeleke a botšwa gore ba kgobokane fao, ka gona a namela thaba ya Tsalmone le banna ba gagwe. Moo a tšea selepe, a rema lekala la mohlare, mme a le šikara. A botša banna ba gagwe gore ba phakiše le bona ba dire ka mokgwa woo. Ka gona monna yo mongwe le yo mongwe a rema lekala mme ba latela Abimeleke, ba kgobela makala ao mola sebong. Ba se tšhuma batho bale ba le ka gare, mme batho ka moka ka sebong ba hwa, banna le basadi ba e ka bago ba sekete. Ke moka Abimeleke a ya Tebetse, a dikanetša motse woo mme a o thopa. Go be go le tora ye e tiilego fao, gomme badudi bohle ba motse, banna le basadi ka moka, ba tšhabela go yona. Ba itswalelela ka moo mme ba rotogela kua tlhakeng ya yona. Abimeleke a tla toreng yeo, a e hasela, mme a batamela mojakong wa yona go yo e tšhuma ka mollo. Eupša mosadi yo mongwe a mo foša ka tšhilo, mme ya mo itia hlogo ya mo pšhatla legata. Ka bjako Abimeleke a bitša morwaladibetša wa gagwe a mo laela a re: “Khwamola tšhoša ya gago o mpolaye. Ga ke nyake gore batho ba tle ba re ke bolailwe ke mosadi.” Ka gona morwaladibetša yoo a mo phuleletša ka tšhoša, gomme a hwa. Ge Baisraele ba bona gore Abimeleke o hwile, ka moka ba boela gae. Ka tsela ye Modimo a lefiša Abimeleke ka setopo bošula bjo a bo dirilego tatagwe ka go bolaya bomorwarragwe ba masome a a šupago. Modimo o ile a dira le gore batho ba Shekeme ba tlaišege ka baka la bobe bja bona, bjalo ka ge Jotamo, morwa wa Gideone, a boletše mola a ba rogaka. Ka morago ga lehu la Abimeleke, Tola, morwa wa Puba, Puba morwa wa Dodo, a tšwelela go tlo lokolla Baisraele. Yena e be e le wa kgoro ya Isakara mme a dula kua Shamire, nageng ya dithaba ya Efraime. E bile moetapele wa Baisraele mengwaga ye masome a mabedi le metšo ye meraro. A hwa, a bolokwa kua Shamire. Ka morago ga Tola go ile gwa latela Jaire, Mogileade. Yena ya ba moetapele wa Baisraele mengwaga ye masome a mabedi le metšo ye mebedi. O be a na le barwa ba masome a mararo bao ba bego ba namela dipokolo tše masome a mararo. Ba be ba na le metse ye masome a mararo nageng ya Gileade, ye le bjale e sa bitšwago metse ya Jaire. Jaire a hwa mme a bolokwa kua Kamone. Baisraele ba dira sebe gape pele ga Morena ka go khunamela boBaale le boAstarte, gotee le medimo ya Siria, ya Sidone, ya Moaba, ya Amone, le ya Filistia. Ba furalela Morena mme ba lesa go mo khunamela. Ka gona Morena a galefela Baisraele gomme a lesa Bafilista le Baamone ba ba fenya. E ile ya ba mengwaga ye lesome le ye seswai ditšhaba tšeo di gateletše ebile di tlaiša Baisraele ka moka ba ba dulago nageng ya Baamore ka bohlabela bja noka ya Jordane kua Gileade. Baamone ba ile ba ba ba tshela Jordane go yo lwa le kgoro ya Juda, le ya Benjamene, le ya Efraime. Baisraele ba ba manyaming a magolo. Ke moo ba lletšego Morena ba re: “Re dirile sebe pele ga gago ka go go furalela, wena, Modimo wa rena, gomme ra khunamela boBaale.” Morena a ba fetola a re: “Baegepeta, Baamore, Baamone, Bafilista, Basidone, Baamaleke le Bamaone ba be ba le gateletše mehleng ye e fetilego, gomme la ntelela. A ga se ka le phološa go bona? Le ge go le bjalo, le mphuraletše la khunamela medimo ye mengwe, ka gona nka se le phološe gape. Sepelang le yo llela medimo ye le ikgethetšego yona. A e le phološe ge le tsena bothateng.” Eupša setšhaba sa Israele sa re go Morena: “Re dirile sebe. Re dire se o se ratago, fela hle, lehono gona re phološe!” Ka gona ba tloša medimo ya bona e šele mme ba khunamela Morena, gomme yena a se hlwe a kgotlelela go bona masetlapelo a Baisraele. Baamone ba itokišetša ntwa mme a hloma mešaša Gileade. Baisraele ba kgobokana gomme ba hloma mešaša Mitsepa kua Gileade. Moo baetapele ba dikgoro tša Baisraele ba botšišana ba re: “Ke mang yo a tlago re eta pele ntweng ya rena le Baamone? Yena yoo e tla ba mmuši wa bohle ba ba dulago mo Gileade.” Jefta, mohlabani yo bogale wa Gileade, e be e le morwa wa segwebakathobalo. Gileade, tatagwe, o be a na le barwa ba bangwe le mosadi wa gagwe, gomme bona ge ba godile, ba raka Jefta gae. Ba re go yena: “O ka se fiwe bohwa bja tatagorena; o morwa wa mosadi o šele.” Jefta a tšhaba go bomorwarragwe a yo dula nageng ya Tobe. Moo a kalatša dihwirihwiri tše dingwe, gomme tša tšama di hula batho naye. Ka morago ga matšatši Baamone ba yo lwa le Baisraele. Ge go le gare go lwewa, baetapele ba Gileade ba ya go tšea Jefta nageng ya Tobe. Ba re: “Tlaa o be molaodi wa rena ge re elwa le Baamone.” Jefta a ba fetola a re: “Le ile la ntlhoya la ba la nthaka lapeng la tate. Ke ka baka lang le etla go nna bjale ge le le bothateng?” Bona ba re go yena: “Re tlile go wena ka gobane re nyaka gore o ye le rena go yo lwa le Baamone, le gore o be mmuši wa batho ka moka ba Gileade.” Jefta a re go bona: “Ge le re ke boele gae go yo lwa le Baamone, gomme Morena a dira gore re ba fenye, ke tla ba mmuši wa lena.” Ba mo fetola ba re: “Re a dumela. Morena ke hlatse ya rena.” Ka gona Jefta a sepela le baetapele ba Gileade, gomme setšhaba sa mo dira mmuši le moetapele. Jefta, sela a se boditšego baetapele ba Gileade a se boeletša kua Mitsepa pele ga Morena. A roma batseta go kgoši ya Baamone gore ba re go yena: “O re bakiša eng? Ke ka baka lang o šwahletše naga ya rena?” Kgoši ya Baamone ya fetola batseta ba Jefta ya re: “Mola Baisraele ba etšwa Egepeta ba ile ba tšea naga ya ka go tloga nokaneng ya Arnone go fihla nokaneng ya Jaboko le nokeng ya Jordane. Bjale le swanetše go mpušetša naga yeo le sa lwe.” Jefta a roma batseta gape go kgoši ya Baamone gore ba mo fetole ba re: “Ga se therešo gore Baisraele ba tšere naga ya Bamoaba goba naga ya Baamone. Se se diregilego ke gore mohla Baisraele ba tloga Egepeta ba ile ba putla lešoka go yo fihla kgogometšaneng ya Akaba mme ba fihla Kadeshe. Ba roma batseta go kgoši ya Edomo gore ba yo kgopela tumelelo ya go putla nageng ya gagwe. Eupša kgoši ya Edomo ya se ke ya ba dumelela. Ba ile ba kgopela le kgoši ya Moaba, fela le yena a se ke a ba dumelela gore ba putle nageng ya gagwe. Ka gona Baisraele ba dula Kadeshe. Go tloga moo ba tšwela pele ba putla lešoka, ba rarela naga ya Edomo le ya Moaba go fihlela ge ba fihla ka lehlakoreng la ka bohlabela la Moaba, ka mošola wa nokana ya Arnone. Ba hloma mešaša gona, eupša ba se ke ba tshela nokana ya Arnone ka gobane e be e le mollwane wa Moaba. Ke moka Baisraele ba roma batseta go Sihone, kgoši ya Baamore yo a bego a buša a le Heshbone, mme ba mo kgopela tumelelo ya go putla nageng ya gagwe ge ba eya nageng ya bona. Eupša Sihone a se ke a dumelela Baisraele ba putla. A rapa madira a gagwe ka moka, a hloma mešaša kua Jahatse, gomme a hlasela Baisraele. Eupša Morena Modimo wa Israele a gafela Sihone le madira a gagwe diatleng tša Baisraele. Ka gona Baisraele ba thopa naga ka moka ya Baamore bao ba bego ba dula nageng yeo. Ba tšea naga ka moka ya Baamore go tloga nokaneng ya Arnone ka borwa go fihlela go ya Jaboko ka leboa, le go tloga lešokeng ka bohlabela go fihla Jordane ka bodikela. Ka gona e bile Morena Modimo wa Israele yo a leleketšego setšhaba sa gagwe, Baisraele, Baamore. Bjale wena o tlile go leka go ithopela yona? O ka itotela se modimo wa gago, Kemoshe, a go filego sona. Fela le rena re tlile go itotela se Morena Modimo wa rena a re filego sona. A o gopola gore o phala Balaka, morwa wa Tsiporo, kgoši ya Moaba? Ga ke re ga se a ka a fapana le Baisraele? Kgane o kile a lwa le rena? Ke mengwaga ye makgolo a mararo Baisraele ba dutše Heshbone le Aroere le metsaneng ya yona, le metseng ka moka ye e lego mabopong a nokana ya Arnone. Ke ka baka lang o se wa tšea metse yeo nako ye ka moka? Ga se nna ke go fošeditšego. Ke wena o mphošetšago ka go lwa le nna. Morena ke moahlodi. O tla ahlola lehono gore ba phošo ke bafe, Baisraele goba Baamone.” Eupša kgoši ya Baamone ya se ke ya ela molaetša wa Jefta hloko. Ke moo moya wa Morena o ilego wa aparela Jefta. A putla naga ya Gileade le ya Manase mme a gomela motseng wa Mitsepa kua Gileade, gomme a fetela Amone. A holofetša Morena a re: “Ge o ka tloga o gafela Baamone diatleng tša ka, ke tla go direla sehlabelo sa go tšhungwa ka moka ka motho yo e tlago ba wa pele go tšwa lapeng la ka go tlo nkgahlanetša, ge ke boa ke fentše. E tla ba wa Morena.” Ka gona Jefta a tshela noka go yo lwa le Baamone, gomme Morena a gafela Baamone diatleng tša gagwe. A hlasela metse ye masome a mabedi go tloga Aroere go ya tikologong ya Minite, le go yo fihla Abele-Keramime. Gwa bolawa batho ba bantši kudu, gomme Baamone ba fenywa ke Baisraele. Ge Jefta a boela gae Mitsepa, morwedi wa gagwe a tšwa go tlo mo gahlanetša a bina a letša moropa. E be e le ngwana a nnoši wa gagwe; a se ne morwa goba morwedi yo mongwe. Ge a mmona a gagola diaparo tša gagwe ka manyami, a re: “Joo, morwedi wa ka! O nkweša bohloko kudu! Ke ka baka lang e swanetše go ba wena yo a ntlišetšago bošula? Ke enetše Morena, gomme nka se kgone go hlanama!” Morwedi wa gagwe a re go yena: “Ge o enetše Morena, dira se o boletšego gore o tla ntira sona, ka ge Morena a go lefeleditše go Baamone, manaba a gago.” Eupša a kgopela tatagwe a re: “Ntirele selo se tee se: Ntese dikgwedi tše pedi, gore ke sepele le bagwera ba ka re yo ralala dithabeng mme re ilele ge ke swanetše go hwa ke se ka ka ka nyalwa.” O ile a mo lokolla gore a sepele mme a ye dikgwedi tše pedi. Yena le bagwera ba gagwe ba namela dithaba mme ba lla ka gobane o be a tlile go hwa a se a nyalwa, le gona a se ne ngwana. Ka morago ga dikgwedi tše pedi a boela go tatagwe. Tatagwe a dira se a se enetšego Morena, gomme morwediagwe a hwa a se a ka a robala le monna. Setlwaedi sa Baisraele sa gore makgarebe a fele a etšwa matšatši a mane ngwaga wo mongwe le wo mongwe go yo ilela morwedi wa Jefta wa Gileade se thomile gona moo. Banna ba kgoro ya Efraime ba ile ba rapa dira; ba tshela noka ya Jordane ba fihla Tsafone, gomme ba re go Jefta: “Ke ka baka lang o tshetše mollwane wa lwa le Baamone ntle le go re bitša gore re ye le wena? Re tla go tšhumelela ka mo ngwakong wa gago!” Eupša Jefta a re go bona: “Nna le setšhaba sa ka re ile ra fapana kudu le Baamone. Ke ile ka le bitša, eupša la se ke la tla go mphološa diatleng tša bona. Ge ke bona le sa tle, ka ipea kotsing ya lehu ka tshela mollwane go yo lwa le bona, gomme Morena a ba gafela diatleng tša ka. Bjale le reng le etla go lwa le nna?” Ke moo Jefta a kgobokantšego banna ka moka ba Gileade, a lwa le banna ba kgoro ya Efraime mme a ba fenya. Baefraime ba be ba ile ba re: “Lena Bagileade le le dulago gare ga Baefraime le Bamanase, ke lena batšhabi kgorong ya Efraime!” Gore Baefraime ba se ke ba tšhaba, Bagileade ba ile ba thopa madibogo a Jordane. Ge Moefraime yo a bego a leka go tšhaba a kgopela tumelelo ya go tshela, banna ba Gileade ba be ba mmotšiša ba re: “A o Moefraime?” Ge a be a ka re: “Aowa,” ba be ba mmotša ba re: “Nke o re ‘Shibolete’.” Fela yena o be a re “Sibolete”, ka gobane o be a sa kgone go bitša lentšu leo gabotse. Ke moo ba bego ba mo swara ba mmolaye fao go le lengwe la madibogo a Jordane. Mehleng yeo go ile gwa bolawa Baefraime ba dikete tše masome a mane le tše pedi. Jefta o ile a eta Baisraele pele mengwaga ye e selelago. Ka morago ga moo a hwa, gomme a bolokwa motseng wa gabo kua Gileade. Ge Jefta a hwile, Ibetsane wa Betlelehema o ile a eta Baisraele pele. O be a na le barwa ba masome a mararo le barwedi ba masome a mararo. Barwedi ba gagwe o ile a ba nyadiša banna bao e sego ba kgorwana ya gagwe, gomme a yo tšea basetsana ba masome a mararo dikgorwaneng tše dingwe gore ba tle ba nyalwe ke barwa bao ba gagwe. Ibetsane o ile a eta Baisraele pele mengwaga ye e šupago. Ka morago ga moo a hwa, gomme a bolokwa Betlelehema. Ge a hwile, Elone wa kgoro ya Sebulone a eta Baisraele pele mengwaga ye lesome. Ka morago ga mo a hwa, gomme a bolokwa kua Ayalone, nageng ya Sebulone. Ge Elone a hwile, Abdone, morwa wa Hilele wa Piratone, a eta Baisraele pele. O be a na le barwa ba masome a mane le ditlogolo tše masome a mararo bao ba bego ba sepela ka dipokolo tše masome a a šupago. Abdone o ile a eta Baisraele pele mengwaga ye seswai. Ka morago ga moo a hwa, gomme a bolokwa Piratone, nageng ya Efraime ya dithaba ya Baamaleke. Baisraele ba ile ba dira sebe gape pele ga Morena, gomme yena a dira gore Bafilista ba ba buše mengwaga ye masome a mane. Mehleng yeo go be go na le monna yo a bitšwago Manoa, wa motse wa Tsora. E be e le wa kgoro ya Dane. Mosadi wa gagwe e be e le moopa. Morongwa wa Morena a iponagatša go yena gomme a re: “Ga se wa ka wa belega, eupša o tla ima mme wa ba le morwa. O itlhokomele o se ke wa nwa beine goba bjala, goba wa ja sejo se se iletšwago, ka gobane o tla ima, wa tla wa belega ngwana wa mošemane. O se ke a kotwa moriri, ka gobane go tloga matswalong a gagwe o tla abelwa Morena ya ba Monasire. O tla thoma go phološa Baisraele go Bafilista.” Ke moo mosadi yoo a ilego go monna wa gagwe a re go yena: “Go be go tlile monna wa Modimo mo go nna, mme a boifiša bjalo ka Morongwa wa Modimo. Ga se ka mmotšiša gore o tšwa kae, le gona ga se a mpotša leina la gagwe. Fela se a mpoditšego sona ke gore ke tla ima ka ba le ngwana wa mošemane. O mpoditše le gore ke se ke ka nwa beine goba bjala, goba ka ja sejo se se iletšwago, ka gobane mošemane yoo o tla abelwa Modimo ya ba Monasire bophelo bja gagwe ka moka.” Ke moo Manoa a rapetšego Morena a re: “Hle, Mong wa ka, dira gore monna yola wa Modimo yo o bego o mo romile a tle gape go rena mme a re botše gore re swanetše go dira eng ka mošemanyana yoo ge a tswetšwe.” Modimo o ile a dira se Manoa a se kgopetšego, mme Morongwa wa Modimo a boela go mosadi yola ge a sa dutše kua mašemong. Manoa, monna wa gagwe, o be a se na le yena, ka gona mosadi a kganyelela go yena mme a re: “Bona! Monna yola a bego a tlile go nna letšatši lela o iponagaditše go nna gape.” Manoa a ema mme a latela mosadi wa gagwe. A ya go monna yoo mme a mmotšiša a re: “A ke wena monna yola a boletšego le mosadi wa ka?” Monna yoo a mo fetola a re: “Ee.” Ke moo Manoa a mmotšišitšego a re: “Ge se o se boletšego se phethegile, mošemanyana yoo o swanetše go dira eng? A o swanetše go phela bjang?” Morongwa a mo fetola a re: “Mosadi wa gago o swanetše go hlokomela gore a dire tšohle tše ke mmoditšego tšona. A se ke a ja selo se se tšwago morareng; a se ke a nwa beine goba bjala, goba a ja sejo se se iletšwago. O swanetše go dira tšohle tše ke mmoditšego tšona.” Manoa o be a sa tsebe gore monna yoo ke Morongwa wa Morena, ka gona a re go yena: “Hle, o se ke wa sepela gonabjale. A re go apeele putšane.” Eupša Morongwa wa Morena a re: “Le ge nka dula, nka se je dijo tša gago. Fela ge o nyaka go dira sehlabelo sa go tšhungwa ka moka, se tšhumele Morena.” *** Manoa a mo fetola a re: “Re botše leina la gago, gore re tle re kgone go go hlompha ge seo o se boletšego se phethegile.” Morongwa wa Morena a mmotšiša a re: “Ke ka baka lang o nyaka go tseba leina la ka? Ke leina le le makatšago.” Ka gona Manoa a tšea putšane le kabelo ya bupi a di tšhuma aletareng ya matlapa, a di tšhumela Morena yo a dirago dimakatšo. Ge kgabo e laumela godimo e etšwa aletareng, Manoa le mosadi wa gagwe ba bona Morongwa wa Morena a rotogela legodimong a le moo kgabong ya mollo. Ke gona Manoa a lemogilego gore monna yola ke Morongwa wa Morena, mme yena le mosadi wa gagwe ba itahlela fase ka difahlego. Ba ile ba se hlwe ba bona Morongwa yoo wa Morena gape. *** Manoa a re go mosadi wa gagwe: “Ka kgonthe re tlile go hwa, ka gobane re bone Modimo!” Eupša mosadi a mo fetola a re: “Ge Morena a be a nyaka go re bolaya, a ka be a se a amogela sehlabelo le kabelo ya rena; a ka be a se a re laetša dilo tše ka moka goba a re botša dilo tše a re boditšego tšona bjale.” Mosadi yoo o ile a belega ngwana wa mošemane gomme a mo rea leina la Simsone. Lesoganyana la gola gomme Morena a le šegofatša. Moya wa Morena wa thoma go mo tutuetša ge a le mešašeng ya Dane gare ga Tsora le Eshtaolo. Ka letšatši le lengwe Simsone a theogela Timna, moo a ilego a bona mosetsana yo mongwe wa Mofilista. O ile a boela gae gomme a re go tatagwe le mmagwe: “Go na le mosetsana yo mongwe wa Mofilista kua Timna yo ke mo kganyogilego. Sepelang le yo nkgopelela yena; ke nyaka go mo nyala.” Eupša tatagwe le mmagwe ba mmotšiša ba re: “Ke ka lebaka lang o ka ya wa nyala mosadi kua Bafilisteng o tseba ba sa bolle? A ga o kgone go hwetša ngwanenyana mo kgorwaneng ya gaborena, gare ga setšhaba sa gaborena?” Fela Simsone a re go tatagwe: “Ke yena yo ke nyakago gore o nkgopelele yena. O a nkgahla.” Batswadi ba gagwe ba be ba sa tsebe gore Simsone o tutuetšwa ke Morena gore a dire taba yeo, ka gobane Morena o be a nyaka lebaka la go lwa le Bafilista. Ka nako yeo Bafilista ba be ba buša Baisraele. Ka gona Simsone a theogela Timna a na le tatagwe le mmagwe. Ge ba sepela ba putla dirapa tša merara fao, gwa rotoga tau ya lerojana e rora e etla go mo hlasela. Ka bjako moya wa Morena wa tiiša Simsone, gomme a gagoganya tau yela ka diatla a se a swara selo, mo nkego ke putšane. Eupša a se ke a botša batswadi ba gagwe seo a se dirilego. Ke moka a ya a bolela le mosetsana yola, gomme mosetsana a mo kgahlela pele. Ka morago ga matšatši a se makae Simsone a boela go yo mo nyala. Tseleng a phamogela ka thoko go yo bona tau yela a e bolailego, gomme a makala ge a hwetša motšhitšhi wa dinose le mamapo ka gare ga setoto sela. A rafela dinose tšeo diatleng gomme a tšama a eja. A ya go tatagwe le mmagwe a ba fa mamapo a mangwe. Ba a a ja, fela Simsone a se ke a ba botša gore o rafile mamapo ao ka setotong sa tau. Tatagwe a ya ga bokgarebe, gomme Simsone a dira monyanya moo. Seo e be e le setlwaedi sa thaka ya tshogana. Ge Bafilista ba mmona, ba tliša masogana a masome a mararo go tlo dula le yena. Simsone a re go bona: “A ke le hlabeleng nyepo. Ke tla fa yo mongwe le yo mongwe wa lena seaparo le diaparo tša botšhepi ge le ka kgona go nnyepollela yona pele ga ge matšatši a a šupago a monyanya a feta. Ge le ka se kgone, gona yo mongwe le yo mongwe wa lena o swanetše go mpha diaparo tšeo.” Bona ba re: “Re hlabele nyepo ya gago, re e kwe.” Simsone a re: “Thai! “Dijo di tšwile mojing; bose bo tšwile senatleng.” Ka morago ga matšatši a mararo ba be ba sešo ba nyepolla nyepo yela. Ka letšatši la bone ba re go mosadi wa Simsone: “Goketša monna wa gago gore a re nyepollele nyepo yeo. Ge o ka se dire bjalo re tla go tšhuma ka mollo le ngwako wa tatago. Le re laleditše gore le tle le re hule. A ga go bjalo?” Ka gona mosadi wa Simsone a ya go yena a lla a re: “Ga o nthate! O ntlhoile! O hlabetše masogana a gešo nyepo gomme nna ga se wa nnyepollela yona!” Simsone a re: “Bona, le tate le mme ga se ka ba nyepollela yona. Ke ka baka lang ke swanetše go e nyepollela wena?” Mosadi a lla moo pele ga gagwe matšatši ao a šupago a monyanya. Fela ka letšatši la bošupa Simsone a mo nyepollela nyepo yeo ka gobane o be a mo phegeletše kudu. Mosadi yola a ya a botša Bafilista. Ka gona, ka letšatši la bošupa, pele ga ge Simsone a tsena ka phapošing ya malao, banna ba motse woo ba re go yena: “Ke eng se se ka phalago todi ka bose? Ke eng se se ka fetago tau ka maatla?” Simsone a ba fetola a re: “Ge le ka be le se la lema ka sethole sa ka, le ka be le se la nyepolla nyepo ya ka.” Ke moka moya wa Morena wa mo tiiša, mme a theogela Ashkelone moo a ilego a bolaya banna ba masome a mararo, a ba apola diaparo tša botšhepi, a di neela banna bale ba nyepolotšego nyepo yela. Ka morago ga moo a gomela gae a befedišitšwe ke seo se diregilego, mme mosadi wa gagwe a neelwa monna yo e bego e le lekgetla la gagwe moo monyanyeng. Ka morago ga matšatši Simsone a yo bona mosadi wa gagwe nakong ya ge go bunwa korong, mme a mo išetša le putšane. A re go tatago mosadi wa gagwe: “Ke nyaka go yo bona mosadi wa ka ka phapošing ya gagwe.” Eupša yena a se ke a mo dumelela gore a tsene ka moo. A re go Simsone: “Ke ile ka gopola gore ga o sa mo nyaka le gatee, ka gona ka mo fa mogwera wa gago. Fela ngwanabo yo monnyane ke yo mobotse go mo feta. O ka tšea yena sebakeng sa yola.” Simsone a re: “Bjale gona nka se be le molato wa se ke tlago se dira Bafilista!” Ka gona a ya a swara diphukubje tše makgolo a mararo, a di tlemaganya mesela ka dipedi ka dipedi, mme moo mahutong a tlemelela dithutse. A tšhuma dithutse tšeo mme a lesa diphukubje tša tšhabela mašemong a Bafilista a korong. Ka tsela ye a se ke a tšhuma fela korong ye e bego e bunnwe, eupša a tšhuma le ye e bego e sa le lehlakeng, gotee le dirapa tša merara le tša mehlware. Ge Bafilista ba botšiša gore ke mang yo a dirilego taba yeo, ba kwa gore e dirilwe ke Simsone ka gobane ratswalagwe, monna wa Timna, o neetše mogwera wa Simsone mosadi yola wa Simsone. Ka gona Bafilista ba ya ba tšhuma mosadi yoo a hwa, ba ba ba tšhuma le ngwako wa tatagwe. Simsone a re go bona: “Ea, le dira ka mokgwa wo! Ke ena gore nka se lese go le otla go fihlela ke lefeleditše batho bao ka lena!” A ba hlasela ka bogale mme a bolaya ba bantši ba bona. Ke moo a tlogilego a yo itulela ka mphatšeng legageng kua Ethamo. Bafilista ba tla ba hloma mešaša Juda, gomme ba itokišetša go hlasela motse wa Lehi. Banna ba Juda ba ba botšiša ba re: “Ke ka baka lang le nyaka go re hlasela?” Bona ba ba fetola ba re: “Re tlile go swara Simsone gore re mo dire se a re dirilego sona.” Ka gona banna ba dikete tše tharo ba Juda ba ya mphatšeng kua Ethamo gomme ba re go Simsone: “A ga o tsebe gore Bafilista ba a re buša? O re dirile eng?” Simsone a ba fetola a re: “Ke ba dirile se ba ntirilego sona.” Banna bao ba re: “Re tlile mo go tlo go tlema, gore re tle re go gafele diatleng tša bona.” Simsone a re: “Nkeneleng gore lena ka bolena le ka se mpolaye.” Bona ba re: “Go lokile, re tlilo go tlema fela mme ra go gafela go bona. Re ka se go bolaye le gatee.” Ka gona ba mo tlema ka dithapo tše pedi tše mpsha mme ba boa naye mphatšeng. Ge a fihla Lehi, Bafilista ba tla ba kganyelela go yena ba mo goelela. Ka bjako maatla a Morena a mo tiiša, gomme a thaola dithapo tšela di bego di mo tlemile diatla le matsogo mo nkego o thaola tlhale ye e swelego. Ke moo a bonego mohlagare wa pokolo ye e sa tšogo hwa. A inama a o topa, gomme a bolaya banna ba sekete ka wona. Ka fao Simsone a opela a re: “Ka mohlagare wa pokolo ke bolaile banna ba sekete; ka mohlagare wa pokolo ke ba bolaile thoo.” Ka morago ga moo a lahla mohlagare wola. Felo fao taba yeo e diregilego gona go ile gwa rewa leina la Ramate-Lehi. Gomme Simsone a swarwa ke lenyora kudu, ka gona a llela Morena a re: “Ke wena o dirilego gore nna, mohlanka wa gago, ke fenye batho ba ka mokgwa wo mogolo wo; a bjale ke tlile go hwa ka lenyora mme ka thopša ke Bafilista ba ba go se bolle?” Ka fao Morena a pharola sekhese sa moo Lehi mme sa tšwa meetse. Simsone a a nwa mme a thoma go ikwa a le kaone kudu. Ka gona mothopo woo wa rewa leina la Hakore; le bjale o sa le gona moo Lehi. Simsone o etile Baisraele pele mengwaga ye masome a mabedi mehleng ya ge Bafilista ba buša naga. Ka letšatši le lengwe Simsone a ya motseng wa Bafilista wa Gasa, moo a ilego a bona segwebakathobalo mme a yo robala naso. Batho ba Gasa ba lemoga gore Simsone o fao, ka gona ba dikanetša felo moo mme ba mo lalela bošego ka moka kua kgorong ya motse. Ba lala ba homotše bošego ka moka, ka dipelong ba re: “Re tla letela go fihlela ge go esa, gomme ra mmolaya.” Eupša Simsone a robala fela go fihlela bošegogare. Ke moka a tsoga, a swara mamati a kgoro ya motse a a tomola gotee le dikota tša ona le lepheko. A di šikara gomme a di rwala go ba go yo fihla mmotong wo o okametšego Hebrone. Ka morago ga moo Simsone o ile a ratana le mosadi yo mongwe yo a bego a dula moeding wa Soreke; leina la gagwe e be e le Delila. Magoši a mahlano a Bafilista a ya go mosadi yoo a re: “Goketša Simsone a go botše gore ke ka baka lang a tiile ka mokgwa wo, le gore re ka mo fenya bjang; re tle re mo tleme re mo fetše maatla. Yo mongwe le yo mongwe wa rena o tla go fa dipapetlana tše makgolo a lesome le motšo o tee tša silibera.” Ka gona Delila a re go Simsone: “Hle, mpotše gore ke eng se se go dirago gore o be le maatla ka mokgwa wo. Ge motho a nyaka go go tlema le go go fetša maatla, a ka dira bjang?” Simsone a mo fetola a re: “Ge ba ka ntlema ka mašika a a šupago a mafsa a mosebe a a sego a oma, ke tla felelwa ke maatla bjalo ka mang le mang.” Ka gona magoši ale a Bafilista a tlišetša Delila mašika a a šupago a mafsa a mosebe a a sego a oma, gomme yena a tlema Simsone ka ona. A bea banna ba bangwe ka phapošing ye nngwe gore ba dule ba mo laletše, mme a goa a re: “Simsone! Bafilista ba go wela godimo!” Fela Simsone a thaoganya mašika ale gabonolo bjalo ka tlhale e kgaogago ge e ekwa mollo. Ka gona ba no fela ba sa tsebe sephiri sa maatla a gagwe. Delila a re go Simsone: “Bona, o ntirile setlatla wa se mpotše therešo. Hle, mpotše gore motho a ka go tlema ka eng.” Simsone a mo fetola a re: “Ge ba ka ntsirimetša ka dithapo tše mpsha tše di sego tša ka tša šomišwa, ke tla felelwa ke maatla bjalo ka motho yo mongwe le yo mongwe.” Ka gona Delila a tšea dithapo tše mpsha gomme a mo tlema. A goa a re: “Simsone! Bafilista ba go wela godimo!” Banna bale ba be ba letetše ka phapošing ye nngwe. Eupša Simsone a thaoganya dithapo tšela matsogong a gagwe bjalo ka tlhale. Delila a re go Simsone: “O sa ntira setlatla ga o mpotše therešo. Mpotše gore motho a ka go tlema ka eng.” Simsone a mo fetola a re: “Ge o ka logelela dintšhuthana tše di šupago tša moriri wa ka selogelong, mme wa di kokotela lebotong ka phatša, ke tla felelwa ke maatla bjalo ka motho mang le mang.” Ke moo Delila a mo robaditšego, a tšea dintšhuthana tša moriri wa gagwe tše di šupago, mme a di logelela selogelong. A di kokotela ka phatša mme a goa a re: “Simsone! Bafilista ba go wela godimo!” Eupša o ile a tsoga mme a tomola phatša le selogelo sela. Ka gona Delila a re go yena: “O reng o re o a nthata, etšwe o sa nthate? O ntirile setlatla gararo mme le bjale ga se wa mpotša gore ke eng se se go dirago gore o be le maatla ka mokgwa wo.” O ile a fela a mmotšiša, letšatši ka letšatši. Simsone a tenwa la go hwa ka ge Delila a fela a mo šetše morago ka taba yeo mo e lego gore mafelelong o ile a mmotša therešo a re: “Moriri wa ka ga se wa ka wa kotwa. Ke abetšwe Modimo ka ba Monasire go tloga matswalong a ka. Ge nka kotwa moriri, ke tla lahlegelwa ke maatla mme a mphelela bjalo ka mang le mang.” Ge Delila a bona gore o mmoditše therešo, a romela molaetša go magoši ale a Bafilista a re: “Nke le boeng la mafelelo. O mpoditše therešo.” Ke moo ba ilego ba tla ba swere tšhelete yela. Delila a robaditše Simsone diropeng tša gagwe mme a bitša monna yo mongwe a tla a mo kota dintšhuthana tše di šupago tša moriri. Ke moo Delila a thomilego go mo tlaiša, ka gobane o be a feletšwe ke maatla. A goa a re: “Simsone! Bafilista ba go wela godimo!” O ile a tsoga mme a re ka pelong: “Ke tla tlemologa mme ka lokologa go no swana le mehleng.” O be a sa tsebe gore Morena o mo tlogetše. Bafilista ba mo swara mme ba mo gonya mahlo. Ba mo iša Gasa, ba mo tlema ka diketane tša mphiri, gomme ba mo šidiša ka mehla tšhilong ya ka kgolegong. Fela moriri wa gagwe wa thoma go mela gape. Dikgoši tšela tša Bafilista di ile tša kopana go tlo bina monyanya le go direla modimo wa bona, Dagone, sehlabelo se segolo. Ba be ba opela ba re: “Modimo wa rena o gafetše Simsone, lenaba la rena, diatleng tša rena!” Ba be ba ipshina ba re: “Bitšang Simsone, a tle a re tloše bodutu!” Ge ba ntšhitše Simsone ka kgolegong, ba ile ba mo dira gore a ba tloše bodutu, mme ba mo emiša gare ga dikokwane. Ge batho ba mmona, ba ile ba reta modimo wa bona ba re: “Modimo wa rena o gafetše lenaba la rena diatleng tša rena; ke lona le le sentšego naga ya rena mme le bolailego batho ba bantši ba gaborena!” *** Simsone a re go mošemane yo a bego a mo hlahla ka letsogo: “Anke ke phophole dikokwane tše di swerego moago wo. Ke nyaka go ithekga ka tšona.” Moago woo o be o tletše banna le basadi. Magoši a Bafilista ka mahlano a be a le ka moo, gomme le tlhakeng go be go le banna le basadi ba e ka bago ba dikete tše tharo ba bogetše Simsone ge a ba tloša bodutu. Ke moo Simsone a rapetšego a re: “Morena, Mong wa ka, hle, nkgopole; hle, Modimo, mphe maatla a ka gape lekga le tee fela, gore ka kotlo e tee ye ke itefeletše go Bafilista ka ge ba nkgontše mahlo ka mabedi.” Ka gona Simsone a swara dikokwane tše pedi tša gare tše di swerego moago. A kgorometša ye nngwe ka letsogo la go ja, ye nngwe ka la nngele, mme a goa a re: “A ke hwe le Bafilista!” A kgorometša ka maatla a gagwe ka moka, gomme moago wola wa wela dikgoši tšela tše tlhano le batho bohle ba ba bego ba le ka moo. Simsone a bolaya batho ba bantši ge a ehwa go feta ba a ba bolailego bophelong bja gagwe. Bomorwarragwe le bohle ba lapa labo ba ile ba theoga ba tlo mo tšea. Ba gomela naye morago gomme ba mmoloka gare ga Tsora le Eshtaolo ka lebitleng la Manoa, tatagwe. E be e bile moetapele wa Baisraele mengwaga ye masome a mabedi. Go kile gwa ba le monna yo mongwe yo leina la gagwe e bego e le Mika. Yena o be a dula nageng ya dithaba ya Efraime. A re go mmagwe: “Nako yela o utsweditšwe dipapetlana tša silibera tše makgolo a lesome le motšo o tee, o ile wa rogaka lehodu la gona. Ke go kwele ge o le rogaka. Tšhelete yela še! Ke nna yo ke bego ke e tšere.” Mmagwe a re: “A Morena a go šegofatše, morwa wa ka!” O ile a bušetša mmagwe tšhelete yeo, mme mmagwe a re: “Go thibela thogako yela gore e se ke ya wela morwa wa ka, silibera yeo ke e abela Morena gore ka yona go manegwe seswantšho sa kota se se betlilwego. Ka gona, bjale ke go neela dipapetlana tše tša silibera.” Ke moo Mika a di bušeditšego go mmagwe. Mmagwe a tšea tše makgolo a mabedi a di fa morudi wa tshipi, yo a ilego a dira modimo wa seswantšho, a o betla ka kota mme a o manega ka silibera yela. O ile wa bewa ka ngwakong wa Mika. Yo Mika o be a na le lefelo la gagwe la tirelo. O ile a dira medimo ye mengwe ya diswantšho le seaparo se sekgethwa, gomme a bea yo mongwe wa barwa ba gagwe moprista wa gagwe. Go be go se na kgoši mo Israele mehleng yeo; yo mongwe le yo mongwe o be a dira ka moo a ratago ka gona. Ka yona nako yeo go be go na le lesogana la Molefi le le bego le falaletše motseng wa Betlelehema, nageng ya Juda. Le ile la tloga Betlelehema go yo nyaka mo le ka dulago ntshe. Ge le ralala le ile la ba la fihla lapeng la Mika, nageng ya dithaba ya Efraime. Mika a le botšiša a re: “A o tšwa kae?” Lesogana leo la mo fetola la re: “Ke nna Molefi yo a tšwago Betlelehema, nageng ya Juda. Ke nyaka mo nka dulago gona.” Mika a re: “Dula mo ga ka. Baa moeletši le moprista wa ka, gomme ke tla go fa dipapetlana tša silibera tše lesome ka ngwaga, le diaparo le dijo.” Lesogana leo la Molefi la dumela go dula ka ga Mika gomme la ba bjalo ka morwa wa gagwe. Mika a mmea moprista wa gagwe, mme yena a dula ka lapeng la Mika. Mika a re: “Bjale ka gore moprista wa ka ke Molefi, ke tseba gore Morena o tla ntšhegofatša.” Mehleng yeo go be go se na kgoši mo Israele. Ba kgoro ya Dane ba be ba sa inyakela naga ye ba ka dulago go yona, ka gobane ba be ba se ba tšwa ba arolelwa naga gare ga dikgoro tša Israele. Ka gona batho ba Dane ba kgetha banna ba bahlano ba bogale malapeng ka moka a kgoro yeo, gomme ba ba roma go tloga motseng wa Tsora le wa Eshtaolo ba ba laela gore ba yo lekola naga. Ge ba fihla nageng ya dithaba ya Efraime ba lala lapeng la Mika. Ge ba sa le moo ba lemoga mmolelo wa lesogana lela la Molefi, gomme ba ya go lona ba le botšiša ba re: “A o dirang fa? Ke mang yo a go tlišitšego mo?” Yena a ba fetola a re: “Ke kwane le Mika, mme o nthwetše gore ke be moprista wa gagwe.” Bona ba re go yena: “Hle, botšiša Morena ge eba re tla atlega leetong la rena.” Moprista a ba fetola a re: “Le se ke la tshwenyega ka selo. Morena o le hlokometše mo leetong le.” Ka gona banna bale ba bahlano ba tloga ba ya motseng wa Laishe. Ba bona ka moo batho ba moo ba phelago ba bolokegile ka gona, go swana le Basidone. Ba be ba sa gonone selo le gona ba se ne borumolane; gare ga bona go se seganka se se gatelelago motho ka se sengwenyana. Ba be ba dula kgolekgole le Basidone gomme ba sa dirišane le batho ba bangwe. Ge banna bale ba bahlano ba boela Tsora le Eshtaolo, banna ba gabobona ba ile ba ba botšiša gore ba bone bjang. Bona ba ba fetola ba re: “A re yeng re yo hlasela Laishe! Re bone naga yeo, gomme ke ye botse kudu. Le reng le dikadika? Itlhaganeleng! A re tseneng nageng yeo mme re e thopeng! Ge le fihla kua le tla bona gore batho ba gona ba dutše ba iketlile. Ke naga ye kgolo ye e sa hlokego selo, mme Modimo o le gafetše yona.” Ka gona banna ba makgolo a a selelago ba kgoro ya Dane ba tloga Tsora le Eshtaolo ba itlhametše ntwa. Ba rotoga mme ba hloma mešaša ka bohlabela bja Kiriate-Jearime kua Juda. Ke ka lebaka leo felo fao go sa bitšwago mešašeng ya Dane. Go tloga moo ba tšwela pele mme ba fihla kgauswi le lapa la Mika, nageng ya dithaba ya Efraime. Ke moka banna bale ba bahlano ba ba bego ba kile ba tla go hlola naga ya go dikologa Laishe, ba re go banna ba gabobona: “Afa le a tseba gore ka ngwakong wo mongwe gona mo go na le modimo wa seswantšho wa kota wo o manegilwego ka silibera, le medimo ye mengwe ya diswantšho, le seaparo se sekgethwa? Bjale ge, le a tseba se le swanetšego go se dira.” Ka gona ba phamogela lapeng la Mika, ngwakong wo go wona go bego go dula lesogana lela la Molefi, mme ba le dumediša. Madira ale a makgolo a a selelago a Dane ona a be a eme kua kgorong a itlhametše ntwa. Dihlodi tšela di fetšago seatla tša leba ka ngwakong mme tša tšea modimo wola wa seswantšho wa kota wo o manegilwego ka silibera, le medimo ye mengwe ya diswantšho, le seaparo se sekgethwa, mola moprista a eme kua kgorong le banna bale ba makgolo a a selelago ba ba itlhamilego. Ge banna bale ba tsena ka ngwakong wa Mika mme ba tšea dilo tšela tša gagwe tše kgethwa, moprista a ba botšiša a re: “A le dirang?” Bona ba re: “Homola! Se hlwe o bolela! Sepela le rena o be moeletši le moprista wa rena. A ga o nyake go ba moprista wa kgoro ka moka ya Israele go ena le gore o be moprista wa lapa la monna o tee?” Seo se ile sa thabiša moprista, ka gona a tšea dilo tšela tše kgethwa a sepela nabo. Ba ile ba retologa ba sepela, bana le diruiwa le tšohle tša bona di etile pele. Ba be ba šetše ba le kgole le lapa leo ge Mika a bitša baagišani ba gagwe gore ba ye ntweng le yena. Ba ile ba swara banna bale ba Dane tseleng gomme ba ba hlabela lešata. Banna ba Dane ba retologa ba botšiša Mika ba re: “A molato ke eng? Ke ka baka lang o rapile lekoko le lekaaka le?” Mika a ba fetola a re: “A le rang ge le re: ‘Molato ke eng?’ Le tšere moprista wa ka le medimo ye ke e dirilego mme la sepela! A nna ke šaletšwe ke eng?” Banna ba Dane ba re: “Go kaone o ikhomolele; go sego bjalo gona o tla ferehla banna ba mme ba go bolaya gotee le ba lapa la gago.” Ge ba seno realo ba sepela. Mika a bona gore ba mo feta ka maatla, ka gona a retologa a ipoelela gae. Ka morago ga ge banna ba Dane ba tšere moprista le dilo tšela tše kgethwa tše Mika a di dirilego, ba ya ba hlasela Laishe, motse wola wa batho ba go se gonone selo ba go se be le borumolane, wo o bego o le molaleng wo go wona go bego go le Bethe-Rehobo. Ba bolaya badudi ba moo mme ba tšhuma motse woo. Gwa se ke gwa ba le yo a ba hlakodišago, ka gobane Laishe e be e le kgole le Sidone mme batho ba gona ba sa dirišane le batho ba bangwe. Banna ba Dane ba ile ba aga motse woo ka lefsa, mme ba dula go wona. *** Ba fetoša leina la wona la Laishe ba re ke Dane, ba o reela rakgolokhukhu wa bona, Dane, morwa wa Jakobo. Banna ba Dane ba hloma modimo wola wa seswantšho gore ba o khunamele, gomme Jonathane, morwa wa Gershome, setlogolo sa Moshe, ya ba moprista wa kgoro ya Dane, mme ditlogolo tša gagwe ya ba baprista ba bona go fihlela batho bao ba išwa bothopša. Modimo wola wa seswantšho wa Mika o ile wa no fela o le moo nako ka moka ya ge Tente ye Modimo a bego a khunamelwa go yona e sa le Shilo. Mehleng yeo, pele ga ge nageng ya Israele go eba le kgoši, go be go na le Molefi yo mongwe yo a bego a falaletše kua kgole nageng ya dithaba ya Efraime. O ile a tšea mosetsana kua Betlelehema, nageng ya Juda, gore e be motlabo wa gagwe, fela mosetsana a mo ngala, a boela lapeng la tatagwe kua Betlelehema, mme a dula gona dikgwedi tše nne. Ke moka monna yoo a mo latela go yo mo goketša gore a boele go yena. O ile a tšea mohlanka wa gagwe le dipokolo tše pedi. Mosetsana yoo a tsenya Molefi yola ka ngwakong, gomme ge tatagomosetsana a bona monna yoo, a mo amogela ka lethabo. A phegelela gore a dule, gomme a dula le bona matšatši a mararo. Molefi yo le mosetsana ba be ba eja, ba enwa, ba robala fao. Mosong wa letšatši la bone ba tsoga e sa le bošego mme ba itokišetša go sepela. Fela tatagomosetsana a re go Molefi: “Jaa dijonyana pele. Di tla go lapološa. Ka morago ga moo le ka itshepelela.” Ka gona banna bao ba babedi ba dula fase ba ja, ba nwa mmogo. Ke moo tatagomosetsana a itšego go Molefi: “Hle, robala mo o lale o iketlile.” Molefi a ema a re ke a sepela, eupša tatagomosetsana a mo tutuetša gore a dule, ka gona a robala moo gape. Ya re e sa le bošego mosong wa letšatši la bohlano Molefi a thoma gore ke a itokišetša go sepela, fela tatagomosetsana a re: “Hle, jaa dijo. Ema go fihlela ka merithi.” Ka gona banna bao ba babedi ba ja mmogo. Ge monna yola le motlabo wa gagwe le mohlanka wa gagwe ba thoma gape gore ba a tloga, tatagomosetsana a re: “Bona, letšatši le šetše le ile bjale; lala mo. Leswiswi le tla swara gonabjale; dula mo o iketle. Ka moswane o ka tsogela tseleng wa boela gae.” Eupša monna yola o be a sa nyake go robala moo gape, ka gona yena le motlabo wa gagwe ba wela tsela le mohlanka wa bona le dipokolo tša bona tše pedi tše di saleditšwego. E be e šetše e le mantšiboa ge ba fihla kgauswi le motse wa Jebuse, ke go re Jerusalema, ka gona mohlanka a re go mong wa gagwe: “Hle, a re phamogeng re robaleng mo motseng wo wa Bajebuse.” *** Eupša mong wa gagwe a re: “Re ka se phamogele motseng woo badudi ba wona e sego Baisraele. A re feteng re yeng pejana re yo robala Gibea goba Rama.” *** Ka gona ba sepela ba feta Jebuse ba tšwela pele le leeto la bona. Letšatši le be le dikela ge ba fihla Gibea nageng ya kgoro ya Benjamene. Ba ile ba aroga tsela go yo robala moo. Ba tsena motseng mme ba dula lepatlelong la motse, eupša gwa se be le yo a ba biletšago lapeng la gagwe gore ba robale gona. Ge ba sa le moo gwa rotoga mokgalabje yo mongwe yo a bego a tšo hlwa mašemong. Motho yoo ka setlogo e be e le wa naga ya dithaba ya Efraime, fela bjale a falaletše mo Gibea. Batho ba bangwe moo e be e le ba kgoro ya Benjamene. Mokgalabje yoo o ile a bona mosepedi yola moo kgorong ya motse gomme a mmotšiša a re: “A o tšwa kae? O ya kae?” Molefi yoo a mo fetola a re: “Re be re ile kua Betlelehema, nageng ya Juda, mme bjale re tseleng ya go ya gae kua kgole nageng ya dithaba ya Efraime. Ga go yo a re filego marobalo lapeng la gagwe, le ge re itshwaretše ditlhaka le bjang bja dipokolo tša rena; re swere le senkgwa le beine tše di lekanego nna le motlabo wa ka le mohlanka wa ka. Re na le tšohle tše re di nyakago.” Mokgalabje yoo a re: “A re yeng lapeng la ka. Ke tla le fa se le ka se hlokago; le se lale mo lepatlelong la motse.” Ka gona a ba iša ga gagwe, a fepa dipokolo tša bona. Ba re go hlapa maoto ba ja, ba nwa. Ba rile ba sa iketlile gwa tšwelela banna ba dihlola, ba dikanetša ngwako, gomme ba thoma go opaopa lemating. Ba re go mokgalabje yola: “Ntšha monna yola a tlilego nago mo gae. Re nyaka go mo robala!” Fela mokgalabje yola a tšwela ntle gomme a re go bona: “Aowa, banna ba gešo! Hle, se direng taba ya bohlola ka mokgwa wo! Monna yo ke moeng wa ka. Bonang mo! Motlabo wa gagwe šo, le morwedi wa ka yo a sego a ka a robala le monna šo. Ereng ke le ntšhetše bona gonabjale, le robale bona, mme le direng ka bona se le se ratago. Fela monna yo le se ke la mo dira taba yeo ya bohlola.” Eupša banna bao ba se ke ba mo theetša. Ka gona Molefi a swara motlabo yola wa gagwe a mo ntšhetša ntle go bona. Ba mo kata, ba dira ka yena se ba se ratago bošego ka moka, mme ba mo lesa ge go esa. Ka mahube mosadi yola a tla a wela lemating la ngwako wa mokgalabje yola, ka moo monna wa gagwe a bego a le ka gona. O be a sa le moo ge letšatši le hlaba. Ge monna wa gagwe a tsoga mosong woo mme a bula lemati gore a wele tsela, a hwetša motlabo yola wa gagwe a rapaletše pele ga ngwako, diatla tša gagwe di obeletše lemati. A re: “Tsoga, re sepele.” Eupša gwa hlokega karabo. Ka gona a tšea mohu yoo a mo nametša pokolo gomme a swara leeto la gagwe la go ya gae. Ge a fihla, a tsena ka ngwakong, a tšea thipa. A tšea setopo sela sa motlabo wa gagwe a se ripaganya diripa tše lesome le tše pedi, gomme a romela seripa kgorong ye nngwe le ye nngwe ya Israele. Yo mongwe le yo mongwe yo a di bonego o ile a re: “Ga se ra ka ra kwa taba ya mohuta wo! Ga se gwa ka gwa direga taba ye e swanago le ye go tloga mola Baisraele ba tlogago Egepeta. Naganang ka taba ye, le bolele se re ka se dirago.” Baisraele ka moka, go tloga Dane go fihla Beresheba, le go tloga nageng ya Gileade, ba ile ba emaema. Ba bokana pele ga Morena kua Mitsepa ka pelo e tee. Baetapele ba dikgoro ka moka tša Israele ba be ba le gona moo kgobokanong ye ya setšhaba sa Modimo, gomme go be go na le bahlabani ba go sepela ka maoto ba dikete tše makgolo a mane. Babenjamene ba kwa gore Baisraele ba bangwe ba bokane kua Mitsepa. Baisraele ba re: “Re laodišetšeng tša tiragalo ye mpe ye.” Molefi yola motlabo wa gagwe a bolailwego a re: “Nna le motlabo wa ka re ile ra fihla Gibea, nageng ya Benjamene, ra lala gona. Bošego banna ba Gibea ba tla ba ntlhasela, gomme ba dikanetša ngwako. Ba be ba ikemišeditše go mpolaya; bakeng sa go mpolaya ba kata motlabo wa ka, mme a hwa. Ke ile ka tšea setopo sa gagwe, ka se ripaganya, gomme ka romela seripa kgorong ye nngwe le ye nngwe ya Israele. Batho bao ba dirile taba ye mpe ya bohlola mo nageng ya Israele. Bjale ge bohle le kgobokane mo lena Baisraele, rerišanang ka taba ye le kwane.” Setšhaba ka moka sa emelela mmogo sa re: “Go se be le o tee wa rena yo a yago gae, e ka ba mošašeng goba ka ngwakong. Sese se re tlago se dira motse wa Gibea: Re tla dira matengwa a go kgetha batho ba ba tlago hlasela Gibea. Monna o tee go ba lesome mo nageng ya Israele o tla swarela madira dijo, mme ba bangwe bona ba tla ya ba otla Gibea ka baka la taba ye mpe ye ba e dirilego mo Israele.” Ka gona banna ka moka ba Israele ba bokana ka morero o tee – go hlasela motse woo. Dikgoro tša Baisraele tša roma batseta nageng ka moka ya kgoro ya Benjamene gore ba re go bona: “Ke molato mang wo le o obilego wo? Bjale ge, re gafeleng dihlola tšeo tša Gibea gore re tle re di bolaye mme re tloše bobe bjo mo Israele.” Eupša Babenjamene ba se ke ba theetša Baisraelekabona. Ba ile ba tšwa metseng yohle ya Benjamene ba tla Gibea go tlo lwa le dikgoro tše dingwe ka moka tša Israele. Tšatšing leo ba rapa bahlabani ba dikete tše masome a mabedi a metšo ye e selelago metseng ya bona. Ntle le bao, baagi ba Gibea ba kgobokanya banna ba ba kgethilwego ba makgolo a a šupago bao ba bego ba šomiša matsogo a nngele. Yo mongwe le yo mongwe wa bona o be a kgona go foša leswika ka seragamabje a itia kgomo lenaka gomme a ka se tsoge a le phošitše. *** Baisraele ba bangwe bona ba rapa bahlabani ba ba hlahlilwego ba dikete tše makgolo a mane. Baisraele ba ile ba ya felo ga tirelo kua Bethele, gomme fao ba botšiša Modimo ba re: “A ke kgoro efe ye e swanetšego go hlasela Babenjamene pele?” Morena a ba fetola a re: “Ke kgoro ya Juda.” Ka gona Baisraele ba tšwa dira mosong wa le le latelago, gomme ba hloma mešaša kgauswi le motse wa Gibea. Ge ba yo hlasela madira a Benjamene, ba ile ba beakanya bahlabani gabotse go lebana le motse. Madira a Benjamene a tšwa motseng, mme tšatši leo ba bolaya bahlabani ba Baisraele ba dikete tše masome a mabedi a metšo ye mebedi. Ke moo Baisraele ba ilego felo ga tirelo mme ba lla pele ga Morena go fihlela mantšiboa. Ba mmotšiša ba re: “A re swanetše go yo lwa le bomorwarragorena Babenjamene gape?” Morena a ba fetola a re: “Ee.” Ka gona madira a Baisraele a ba le mafolofolo, gomme ba bea bahlabani ba bona gabotse gona mola ba bego ba ba beile maabane a ntshe. *** Ba yo hlasela madira a Babenjamene lekga la bobedi. Le ka lekga le Babenjamene ba tšwa Gibea gomme tšatši leo ba bolaya bahlabani ba Baisraele ba ba hlahlilwego ba dikete tše lesome le tše seswai. Ke moo Baisraele – setšhaba ka moka – ba ilego Bethele, mme ba fihla ba lla. Ba dula moo pele ga Morena ba ikonne dijo go fihlela mantšiboa. Ba dira dihlabelo tša kagišano le tša go tšhungwa ka moka pele ga Morena. Polokelo ya Kgwerano ya Modimo e be e dula moo Bethele mehleng yeo, gomme e hlokometšwe ke Finease, morwa wa Eleasara, Eleasara morwa wa Arone. Setšhaba se ile sa botšiša Morena sa re: “Na re tšwe dira gape re yo lwa le bomorwarragorena, Babenjamene, goba re lese?” Morena a ba fetola a re: “Tšwaang dira. Ka moswane ke tla ba gafela diatleng tša lena.” *** Ka gona Baisraele ba bea balaledi go dikologa Gibea. Ka lekga le la boraro, ge ba etla go lwa le Babenjamene, ba bea bahlabani ba bona go lebana le Gibea, bjalo ka makgeng a pele. Babenjamene ba tšwa go tlo lwa, gomme ba išwa kgole le motse. Bjalo ka maloba ba ile ba thoma go bolaya Baisraele ba bangwe molaleng, tseleng ya go ya Bethele le tseleng ya go ya Gibea. Ba bolaya Baisraele ba e ka bago ba masome a mararo. Babenjamene ba re: “Re ba fentše bjalo ka maloba.” Baisraele ba be ba kwane gore ba katakate gore ba ba tloše motseng ba ba iše kua ditseleng. Ka gona, ge bontši bja madira a Baisraele bo gomela morago mme bo ipopa gape kua Baale-Tamare, banna bale ba bego ba dikaneditše Gibea ba rutlologa mo ba bego ba laletše ntshe mola molaleng wa motse. Banna ba dikete tše lesome bao ba hlaotšwego go Baisraele ka moka ba hlasela Gibea, gomme ntwa ya ba ye šoro. Babenjamene ba be ba sa lemoge gore ba batametše go fedišwa. Morena a gafela Babenjamene diatleng tša Baisraele. Tšatšing leo Baisraele ba bolaya manaba a dikete tše masome a mabedi le tše tlhano le lekgolo, gomme Babenjamene ba lemoga gore ba fentšwe. Bontši bja madira a Baisraele bo ile bja boela morago ka gobane bo be bo tshephile banna ba ba bego ba laletše go dikologa Gibea. Banna bao ba ile ba kganyelela Gibea ka bjako; ba bolaya yo mongwe le yo mongwe fao. Bontši bja madira a Baisraele le banna bale ba bego ba laletše ba be ba kwane ka sešupo. Ge ba bona leru le legolo la muši le kuelela motseng, Baisraele bale ba bego ba le kua go lwewago gona ba be ba swanetše go retologa. Ka nako yeo Babenjamene ba be ba šetše ba bolaile Baisraele bale ba masome a mararo. Ka pelong ba be ba re: “Ruri, re tloga re ba fentše bjalo ka maloba.” Gwa napa gwa bonagala sešupo sela; leru la muši la thoma go kuelelela godimo le etšwa motseng. Babenjamene ba lebelela morago, gomme ba makala ge ba bona motse ka moka o lauma kgabo ya mollo. Ke mo Baisraele ba retologilego, gomme Babenjamene ba thoma go tlalelwa ka gobane ba ile ba lemoga gore ba kgauswi le go fedišwa. Ba tšhaba Baisraele ba leba lešokeng, eupša ba se ke ba phologa. Ba gakanega gare ga bontši bja madira le banna bale ba bego ba etšwa motseng, gomme ba fedišwa. Baisraele ba dikanetša manaba a bona, gomme ba ba rakediša go tloga moo ba bego ba khuditše gona go ba go yo fihla ka bohlabela bja Gibea, ba tšama ba ba bolaya. Go ile gwa bolawa bahlabani ba Babenjamene ba dikete tše lesome le tše seswai, bohle e le bahlabani ba bagale. Ba bangwe ba retologa ba tšhabela lešokeng kua letlapeng la Rimone. Ditseleng tše kgolo go ile gwa bolawa ba dikete tše tlhano ba bona. Baisraele ba rakediša ba ba šetšego go yo fihla Gidomo, ba bolaya ba dikete tše pedi. Babenjamene ba ba bolailwego mohlang woo e bile ba dikete tše masome a mabedi le tše tlhano, ka moka ga bona e le bahlabani ba bogale. Fela banna ba makgolo a a selelago ba ile ba kgona go tšhabela lešokeng letlapeng la Rimone, gomme ba dula moo dikgwedi tše nne. Baisraele ba boa ba hlasela Babenjamene bale ba bangwe, gomme ba bolaya se sengwe le se sengwe se ba se hwetšago – batho, gotee le diruiwa. Ba tšhuma motse wo mongwe le wo mongwe moo tikologong yeo. Mola Baisraele ba be ba bokane kua Mitsepa ba ile ba enela Morena ba re: “Ga go le o tee wa rena yo a tlago dumelela Mobenjamene go nyala morwedi wa gagwe.” Setšhaba sa Israele sa ya Bethele gomme sa dula fao pele ga Modimo go fihlela mantšiboa. Ba hlaboša mantšu ba lla gabohloko ba re: “Morena Modimo wa Israele, ke ka baka lang taba ye e diregile, ge kgoro ya Benjamene e nyaka go timelela mo Israele?” Ka le le latelago setšhaba sa tsogela go aga aletare moo, sa dira dihlabelo tša kagišano le tša go tšhungwa ka moka. Ba botšišana ba re: “Mo go dikgoro ka moka tša Israele ke ofe yo a ilego a se ye kopanong pele ga Morena kua Mitsepa?” Ba be ba enne ba tiišitše gore yo a bego a se a ya Mitsepa o tla bolawa. Setšhaba sa Israele se ile sa šokela bomorwarragosona Babenjamene, gomme sa re: “Lehono Baisraele ba lahlegetšwe ke ye nngwe ya dikgoro tša bona. Re tla dira eng gore banna ba Benjamene ba ba šetšego re ba hweletše basadi? Ke rena re enetšego Morena gore re ka se ba fe barwedi ba rena.” Ge ba botšišana ge eba go na le yo mongwe wa dikgoro tša Israele yo a ilego a se ke a ya kopanong yela ya kua Mitsepa, ba ile ba lemoga gore ga go le o tee wa Jabeshe kua Gileade yo a bego a ile; ge go bitšwa madira ka maina ga go le o tee wa Jabeshe yo a ilego a araba. Ka gona kopano yeo ya roma banna ba dikete tše lesome le tše pedi ba bogale ba yona mme ya ba laela ya re: “Sepelang le yo bolaya badudi bohle ba kua Jabeshe, gammogo le basadi le bana. Le bolayeng banna le bašemane ka moka, le mosadi yo mongwe le yo mongwe yo a kilego a robala le monna.” Gare ga batho ba Jabeshe ba ile ba hwetša makgarebe a makgolo a mane a a sego a ka a robala le banna, ka gona ba ba tliša mešašeng kua Shilo, motse wo o lego nageng ya Kanana. Ke moka kopano ya roma batseta go Babenjamene ba ba bego ba le letlapeng la Rimone, gomme ba ba begela gore ba fediša ntwa. Babenjamene ba ile ba boa, gomme Baisraele ba bangwe ba ba fa basetsana bale ba Jabeshe bao ba bego ba se ba ba bolaya. Eupša ba be ba sa ba lekane. Setšhaba sa šokela Babenjamene ka gobane Morena o be a sentše seboka sa dikgoro tša Israele. Ka gona baetapele ba kopano yeo ba re: “Basadi ka moka kgorong ya Benjamene ba bolailwe. Re ka dirang go hweletša banna ba ba šetšego basadi? Baisraele ga se ba swanela go lahlegelwa ke ye nngwe ya dikgoro tša bona tše lesome le tše pedi. Re swanetše go loga maano a gore kgoro ya Benjamene e fele e phela, eupša re ka se ba dumelele gore ba nyale barwedi ba rena, ka gobane re rogakile yo mongwe le yo mongwe wa rena yo a dumelelago Mobenjamene go nyala yo mongwe wa barwedi ba gagwe.” Ke moka ba re: “Bonang, ngwaga ka ngwaga go na le monyanya wa Morena kua Shilo.” Shilo e ka leboa la Bethele, ka borwa bja Lebona, ka bohlabela bja tsela ye e lego gare ga Bethele le Shekeme. Ba ile ba re go Babenjamene: “Sepelang le yo lalela kua dirapeng tša merara mme le ntšhe mahlo dinameng. Ge basetsana ba Shilo ba etšwa go tlo bina nakong ya monyanya, le tsupologeng dirapeng tša merara. Yo mongwe le yo mongwe wa lena a ithopele mosadi go basetsana bao, gomme a boele naye nageng ya Benjamene. Ge botatagobona goba dikgaetšedi tša bona ba ka tla go lena ba belaela, le re go bona: ‘Hle, re leseng re duleng nabo, ka gobane ga se ra ba tšea go lena ntweng gore e be basadi ba rena. Gomme ka ge le se la re fa bona, ga le na le molato wa go tshela keno yela ya lena.’ ” Babenjamene ba dira bjalo; yo mongwe le yo mongwe wa bona a ikgethela mosadi go basetsana ba ba bego ba bina kua Shilo gomme a mo tšhabiša. Ke gona ba boetšego nageng ya bona, ba tsošološa metse ya bona, mme ba dula moo. Ka yona nako yeo Baisraele ba bangwe le bona ba tloga, gomme monna yo mongwe le yo mongwe a ipoelela kgorong ya gabo, le lapeng la gagwe, karolong ye a e abetšwego ya naga. Go be go se kgoši mo Israele mehleng yeo. Yo mongwe le yo mongwe o be a dira boithatelo. Mehleng ya ge naga ya Israele e sa bušwa ke baahlodi, go ile gwa wa tlala nageng. Ka gona, monna yo mongwe wa motse wa Betlelehema, nageng ya Juda, a tloga le mosadi le barwa ba gagwe ba babedi go yo diilela nageng ya Moaba. Leina la monna yoo e be e le Elimeleke, la mosadi e le Naume. Barwa ba bona ba babedi e be e le Maglone le Kilione. E be e le ba kgorwana ya Efrata ya Betlelehema, nageng ya Juda. Ge ba sa le moo Moaba, Elimeleke a hwa, gomme Naume a šala a le noši le barwa ba gagwe ba babedi. Bona ba nyala basadi ba Bamoaba; leina la yo mongwe e be e le Orpa, la yo mongwe e le Rute. Ge ba dutše fao mengwaga ye e ka bago ye lesome, Maglone le Kilione le bona ba hwa, gomme Naume a tlogelwa a le nošinoši – a se na barwa, a se na le monna. Ya re ge Naume a sa le nageng ya Moaba, a kwa gore Morena o atlile setšhaba sa Israele ka go se fa puno ye botse; ka gona a itokišetša go tloga Moaba le betši ba gagwe. Ba tloga mmogo go boela nageng ya Juda, fela ge ba le tseleng, Naume a re go betši ba gagwe ba babedi a re: “Ipoeleleng magae le yo itulela malapeng a bolena. Hle, Morena a le dire ka botho bjalo ka ge le lena le dirile bao ba hwilego ka botho, mme le nna la ntira ka botho. Le gona, hle, a Morena a thuše yo mongwe le yo mongwe wa lena le nyalwe gape, le age metse.” Ka gona Naume a ba atla a ba šadiša gabotse. Eupša bona ba lla, ba re go yena: “Aowa hle! Re tla ya nago go batho ba geno.” Fela Naume a ba fetola a re: “Anke le gomeng hle, bana ba ka. Ke ka lebaka lang le nyaka go ya le nna? Na ke sa kgona go belega barwa ba ba tlago le nyala? Ipoeleleng gae; nna ke itšofaletše, nka se hlwe ke sa nyalwa gape. Le ge e be nka hutša go nyalwa bjona bošego bjo gomme ka ima ka ba le barwa, a le be le ka letela ge ba godile gore ba le nyale? A seo se be se ka le thibela go nyalwa ke ba bangwe? Aowa, bana ba ka, le a tseba gore ga go kgonege. Ke setlega pelo kudu ka lena; nna Morena o mphularetše.” Ba napa ba lla go fetišiša. Gomme Orpa a atla matswalagwe a laelana naye, a boela gae. Rute yena a gomarela matswalagwe. Ka gona Naume a re go yena: “Rute, ngwanaka, ngwaneno o ipoeletše gae setšhabeng sa gabo le go modimo wa gabo. Le wena ipoelele gae le yena.” Fela Rute a mo fetola a re: “Hle, se phegelele go nkgopela go go gomela. Ntumelele ke sepele nago. Mo o yago gona le nna ke tla ya; mo o dulago ntshe le nna ke tla dula gona. Batho ba geno e tla ba batho ba gešo, mme Modimo wa gago e tla ba Modimo wa ka. Mo o tlago hwela gona le nna ke tla hwela ntshe, mme ke gona moo ke tlago bolokwa ntshe. Go na le gore ke kgaogane le wena e se ka lehu, Morena a ka upša a nkotla ka kotlo e šorošoro.” Ge Naume a bona gore Rute o tloga a feditše le pelo go ya naye, a se hlwe a mo phegelela. Bobedi bja bona ba sepela ba ba ba fihla Betlelehema. Ge ba fihla, motse ka moka wa huduega mme basadi ba botšišana ba re: “A ruri yo ke yena Naume yola?” Yena a ba fetola a re: “Se mpitšeng Naume, mpitšeng Mara, ka gobane Ramaatlaohle o ntirile tše di galakago kudu. Ge ke tloga mo ke be ke na le tša ka, eupša Morena o mpušitše ke le fela. A ruri le ka hlwa le mpitša Naume mola Morena Ramaatlaohle a ntšwile mme a ntlhokofaditše?” Ke ka moo Naume a boilego ka gona a etšwa nageng ya Moaba le Rute, ngwetši ya gagwe ya Momoaba. Ba gorogile Betlelehema ge batho ba thoma go buna garase. Go be go na le monna yo mongwe wa leloko la boElimeleke, mogatšaNaume. Yena o be a bitšwa Boase. E be e le monna wa mohumi wa maemo. Rute a re go Naume: “E re ke ye mašemong ke yo budutša ka morago ga yo a ka ntšhokelwago.” Naume a mo fetola a re: “Sepela, ngwanaka.” Ka fao Rute a ya mašemong mme a sepela ka morago ga babuni a tšama a budutša. A ikhwetša a le tšhemong ya Boase wa leloko la boElimeleke. Ka morago ga lebaka yena Boase a fihla a etšwa Betlelehema. A dumediša babuni a re: “Morena a be le lena!” Bona ba mo fetola ba re: “Morena a go šegofatše!” Boase a botšiša mohlapetši wa babuni a re: “A kgadi yela ke ya ga mang?” Yena a mo fetola a re: “Ke kgadi yela ya Momoaba ye e tlilego le Naume ge a boa nageng ya Moaba. O nkgopetše gore ke mo dumelele go budutša le go kgobela ka morago ga babuni. E sa le le hlaba a ikeme go fihlela bjale ge a no khutšanyana mola mošašaneng.” Ke mo Boase a rilego go Rute: “E re ke go botše, ngwanaka. O se hlwe o eya go budutša tšhemong ye nngwe ge e se go ye. Itseparele gona fa, o batamele basadi ba ba šomago mo. O lebeledišiše moo banna ba bunago, mme o ipate le basadi. Ke laetše banna gore ba se ke ba go tshwenya. Ge o swerwe ke lenyora, o ye o nwe kua meeteng ya meetse ao badiredi ba a gelego.” Rute a khunama, a itahlela fase ka sefahlego, a re go Boase: “Ke ka baka lang o ntlhokomela, o ntebelela ka botho mola ke le motho o šele?” Boase a mo fetola a re: “Ba mpoditše tšohle tše o di diretšego matswalago go tloga mola mogatšago a hlokafalago. Ke tseba ka mo o tlogetšego tatago le mmago le naga ya geno, le ka mo o tlilego go dula setšhabeng se o bego o sa tsebe tša sona. A Morena a go putse go tšeo o di dirilego. Anke Morena Modimo wa Israele yo o tlilego go yena go šireletšwa ke diphego tša gagwe a go putse ka mo go tletšego.” Rute a mo fetola a re: “O yo botho kudu go nna, mong wa ka. O nkhomoditše wa nkuša pelo le ge ke se yo mongwe wa badiredi ba gago.” Ka nako ya dijo Boase a re go Rute: “Batamela mono o tšee lerathana la senkgwa o šebe ka morong wa beine.” Ka fao a dula le bašomi, gomme Boase a mo hlallela dipale. A ja a khora, a ba a šadiša tše dingwe. Ka morago ga ge Rute a boetše go budutša, Boase a laela bašomi a re: “Le mo lese a topatopele le gare ga mekgobo ya diako, mme le se ke la mo kgalema. Le tšame le uša diako tše dingwe ka boomo, a tle a topatope. Gomme le se ke la mo omanya.” Ka gona Rute a budutša tšhemong yeo go fihlela mathapama, mme ge a fotše a nyaka go tlatša seroto. A rwala mabele a gagwe a boela motseng, a bontšha matswalagwe mabudutša ao. A mo fa le tšela di šetšego ge a eja. Matswalagwe a mmotšiša a re: “Na o hlwele o budutša kae lehono? O be o šoma tšhemong ya mang? A Modimo a šegofatše monna yo a go šeditšego.” Ke moo Rute a boditšego matswalagwe a re: “Lehono ke hlwele ke šoma tšhemong ya monna yo ba rego ke Boase.” Naume a re go ngwetšiagwe: “A a šegofatšwe ke Morena yo ka mehla a phethago dikholofetšo tša gagwe go ba ba phelago le go ba ba hwilego!” A tšwela pele a re: “Monna yoo ke moloko wa kgauswi le rena, ke yo mongwe wa bao ka segagešo ba swanetšego go re babalela.” Ke moo Rute a itšego: “O ile a ba a re go nna: ‘O fele o ipata le badiredi ba ka go fihlela ba fetša go buna.’ ” Naume a re go Rute, ngwetšiagwe: “Ee, ngwanaka, ge o ka ya tšhemong ya motho yo mongwe mohlomongwe ba ka go tshwenya. Go kaone ge o ka itšhomela le basadi ba tšhemong ya Boase.” Ke ka moo Rute a šomilego le bona ka go budutša go fihlela ba fetša go buna garase le korong. Gomme a fela a ituletše le matswalagwe. Ka tšatši le lengwe Naume, matswale wa Rute, a re go Rute: “Ngwanaka, ga ke re ke swanetše go go hweletša monna gore o tle o age motse o ikhutše? Gape monna yo, Boase, yo o šomilego le badiredi ba gagwe, ke moloko wa borena. Bjale theetša gabotse. Bošego bja lehono Boase o tla be a ološa garase seboeng. Ka gona o hlape, o tlole ka dinkgabose, mme o apare gabotse. Ke moka o theogele seboeng, fela o se ke wa iponatša go yena go fihlela ge a feditše go ja le go nwa. Ge a yo robala o diše moo a robalago ntshe. Gomme o ye, o mo apole kobo maotong, o robale. Ke moo a tlago go botša gore o dire eng.” Rute a mo fetola a re: “Ke tla dira tšohle tše o mpotšago tšona.” Ka gona Rute a theogela seboeng mme a dira ka moka tšeo matswalagwe a mo laetšego tšona. Ya re ge Boase a feditše go ja le go nwa, a thabile, a ya go robala sethaleng sa garase. Rute a nanyetša go yena, a mo apola kobo maotong mme a robala. Ka bomašegogare Boase a phafoga. Ge a fetoga a bona mosadi a robetše maotong a gagwe. A mmotšiša a re: “O mang?” Rute a mo fetola a re: “Ke nna Rute, mong wa ka. Ka ge o le motsenedi, hle, ntsenele, nna, molata wa gago.” Boase a re: “Morena a go šegofatše, ngwanaka! O laetša gore o tloga o botegela lapa lešo ka seo o se dirago bjale go fetiša ka moo o diretšego matswalago. Ga wa ikganyogela lesogana la mohumi goba la modiidi. Bjale, ngwanaka, se boife! Mang le mang mo motseng wa gešo o tseba ge o le mosadi wa mmakgonthe. Ke tla dira tšohle tše o nkgopelago tšona. Ke therešo ke motsenedi, mme ke swanetše go go tsenela. Fela go sa na le monna yo e lego motsenedi wa kgauswi go mpheta. Lala mo bošego ka moka, mme ge go sele re tla nyakišiša ge e ka ba o tla go tsenela. Ge go ka ba bjalo, go lokile. Eupša ge go ka se be bjalo, gona ke ena ka Modimo yo a phelago gore ke tla go tsenela. Bjale ithobalele fa go fihlela go esa.” Ka gona a robala moo maotong a Boase go fihlela go esa. Fela a tsoga e sa le ka maswiswana gore a se ke a bonwa, ka gobane Boase o be a sa rate gore yo mongwe a tsebe gore Rute o letše fao seboeng. Boase a re go yena: “Ala kobo ya gago fase o e swareletše.” Rute a dira bjalo, gomme Boase a mo elela garase ye e ka bago diroto tše pedi, a mo rweša yona. Rute a napa a rotogela motseng a rwaleletše. Ge a fihla gae matswalagwe a mmotšiša a re: “Gomme o sepetše bjang, ngwanaka?” Rute a mmotša tšohle tše Boase a mo diretšego tšona. A ba a re: “O ntšheletše šuba se sa garase gomme a re go nna: ‘O se ke wa boela go matswalago o akga diatla.’ ” Matswalagwe a re go yena: “Bjale o iketle, o se ke wa fela pelo, ngwanaka, go fihlela o bona gore taba ye e tla feletša kae. Boase a ka se khutše lehono pele a phetha taba ye.” Boase a ya kgorong ya motse, a fihla a dula fao. Ke moka motsenedi yola Boase a mmoletšego a feta moo, gomme Boase a mmitša a re: “Anke o fetele mono, morwarre, o dule fa.” Ka gona monna yoo a fetela thoko yeo a dula. Boase a kgobokanya bakgomana ba lesome ba motse, gomme a ba kgopela gore le bona ba dule fase moo. Ge ba dutše, Boase a bolela le motsenedi a re: “Bjale ka gore yola Naume o tšo boa nageng ya Moaba, o rekiša mogola wola wa Elimeleke, moloko wa borena, nna ke ile ke tle ke go lome tsebe. Bjale ge, ge o nyaka mogola woo, o reke banna le bakgomana ba ba dutšego mo ba le gona. Fela ge o sa o nyake, hle, ntsebiše, ka gobane mo ditabeng tše go tla wena pele, gwa tsebo latela nna.” Monna yoo a re: “Ke tla o reka.” Ke moo Boase a itšego: “Bjale ge, tšatšing leo o rekago mogola woo go Naume, o tla be o tšea le Rute, mohlologadi wa Momoaba, gore o tle o tswale mojalefa go tsošetša mohu leina.” Monna yoo a mo fetola a re: “Ge go le bjalo, gona nka se ithekele mogola woo, ka gobane o ka se tle o eba bohwa bja bana ba ka. Wena ithekele wona. Nna nka se kgone.” Mehleng yeo e be e le setlwaedi setšhabeng sa Israele gore ge motho a rekolla karolo ya gabo ya naga, goba a e neela yo mongwe, a role seeta sa gagwe a se neele yoo mongwekayena. Wo e be e le mokgwa wa Baisraele wa go tiišetša taba. Ka fao ge monna yola a re go Boase: “Wena ithekele wona,” o ile a rola seeta sa gagwe a mo neela sona. Ke moo Boase a ilego a bolela le bakgomana le batho ka moka a re: “Lena le dihlatse lehono tša gore ke rekile tšohle go Naume tše e bego e le tša Elimeleke, le tšohle tša Kilione le Maglone. Le gona Rute, Momoaba, mohlologadi wa Maglone, ke a mo tšea e ba mogatšake gore ke tle ke tswale mojalefa go tsošetša mohu leina, gore leina la gagwe le se ke la timelela lelokong la gabo le motseng wa gabo. Lena le dihlatse lehono.” Bakgomana le bohle ba bangwe kgorong ba re: “Ee, re dihlatse. A Morena a atle mosadi yoo o mo gorošago lapeng la gago, a be bjalo ka Ragele le Lea, bao bobedi ba bilego le thari, ba thea setšhaba sa Israele. Anke o be senatla kgorwaneng ya Efrata, gomme le leina la gago le tume motseng wa Betlelehema. A bana bao Morena a tlago go fa bona ka mosadi yo mofsa yoo ba age lapa la gago bjalo ka lapa la Peretse, morwa wa Juda ka Tamare.” Ka fao Boase a goroša Rute ya ba mosadi wa gagwe. A tsena dikobong naye; Morena a mo atla, a ima, gomme a belega ngwana wa mošemane. Basadi ba motse ba re go Naume: “Reta Morena! O go file setlogolo lehono sa go go babalela. A mošemanyana yo a tume go Baisraele! Ngwetši ya gago e a go rata, mme go wena e phala le barwa ba motho ba ba šupago. Bjale o go belegetše setlogolo sa go go hlogiša lefsa, le go go fepa ge o tšofetše.” Naume a tšea ngwana, a mmea difarong, gomme a iphepela yena. Basadi ba baagišani ba rea mošemanyana leina la Obede. Ba tšama ba botša mang le mang ba re: “Naume o belegetšwe ngwana wa mošemane!” Obede e bile tatagoIsai yo e bilego tatagoDafida. Bjale le ke lešika la leloko go tloga go Peretse go fihla go Dafida: Peretse ke tatagoHetserone; Hetserone ke tatagoRamo; Ramo ke tatagoAminadaba; Aminadaba ke tatagoNagshone; Nagshone ke tatagoSalmone; Salmone ke tatagoBoase; Boase ke tatagoObede; Obede ke tatagoIsai; Isai ke tatagoDafida. Go be go na le monna yo mongwe yo leina la gagwe e bego e le Elkana, a etšwa nageng ya dithaba ya Efraime. E be e le wa kgoro ya Efraime, gomme a dula motseng wa Rama. E be e le morwa wa Jerohamo, Jerohamo morwa wa Elihu, gomme e le wa lapa la Tohu, seripa sa kgorwana ya Tsufe. Elkana o be a na le basadi ba babedi, Hanna le Penina. Penina o be a na le bana, eupša Hanna a se na le ngwana. Ngwaga wo mongwe le wo mongwe Elkana o be a tloga Rama a yo khunamela Morena Ramaatlaohle, le go mo direla dihlabelo kua Shilo, moo Hofni le Finease, barwa ba babedi ba Eli, e bego e le baprista ba Morena. Nako ye nngwe le ye nngwe ge Elkana a dira sehlabelo, o be a efa Penina karolo e tee ya nama, mme yo mongwe le yo mongwe wa bana ba gagwe le yena a fiwa ya gagwe karolo. Gomme le ge a be a rata Hanna kudu o be a mo fa karolo e tee fela, ka gobane Morena o be a mo hlokišitše bana. Penina, mogaditšong wa gagwe, o be a mo kweša bohloko kudu gore a mo nyamiše, ka gobane Morena o be a mo dirile moopa. Taba yeo e ile ya hlaga ngwaga ka ngwaga; nako ye nngwe le ye nngwe ge ba ile ngwakong wa Morena, Penina o be a šulafatša Hanna kudu mo e lego gore o be a lla mme a gana go ja dijo. Elkana, monna wa gagwe, o be a mmotšiša a re: “Hanna, o llela eng? Ke ka baka lang o sa je? O reng o dula o nyamile? A go wena nna ga ke phale barwa ba motho ba lesome?” Ka letšatši le lengwe, ge ba feditše go ja ka ngwakong wa Morena kua Shilo, Hanna a emelela. O be a nyamile kudu, mme a lla gabohloko ge a rapela Morena. Ka yona nako yeo moprista Eli o be a dutše setulong sa gagwe mojako. *** Hanna a ena a re: “Morena Ramaatlaohle, ntebelele, nna, mohlanka wa gago! Bona bothata bja ka mme o nkgopole! Hle, se ntebale! Ge o ka mpha ngwana wa mošemane, ke tshephiša gore ke tla mo abela wena bophelo bja gagwe ka moka, le gore a ka se tsoge a kotilwe moriri.” Hanna o ile a rapela Morena nako ye telele, gomme Eli a lebeletše molomo wa gagwe. O be a rapela ka setu; melomo ya gagwe e be e benyabenya, eupša a sa ntšhe lentšu. Ka gona Eli a gopola gore o tagilwe, gomme a re go yena: “Nke o tlogele botagwa bjoo bja gago! Sepela o yo fodiša hlogo!” Mosadi a mo fetola a re: “Aowa, ga se ka tagwa, mong wa ka. Ga se ka nwa! Ke no ba fela mosadi yo a nyamilego, gomme ke be ke tšhollela matshwenyego a ka go Morena. O se ke wa ntshema mosadi wa lefeela. Ke be ke rapela ka mokgwa woo gobane ke bothateng mme ke nyamile kudu.” Eli a re: “Itshepelele ka khutšo, mme Modimo wa Israele a go fe se o se kgopetšego.” Mosadi a mo fetola a re: “Nke o fele o nkgopola ka botho.” Gomme a tloga, a ja dijo, mme a se hlwe a nyamile. Mosong wa le le latelago Elkana le ba lapa la gagwe ba tsoga e sa le bošego, mme ge ba seno khunamela Morena, ba boela Rama. Elkana a robala le mosadi wa gagwe, Hanna, gomme Morena a kwa thapelo ya Hanna. Ka gona a ima, mme a belega ngwana wa mošemane. A mo rea leina la Samuele, mme a le hlatholla a re: “Ke mo kgopetše go Morena.” Nako e ile ya fihla gape ya gore Elkana le ba lapa la gagwe ba ye Shilo, mme ba yo direla Morena sehlabelo sa ngwaga ka ngwaga, le go phetha keno ya gagwe. Eupša ka lekga leo Hanna a se ke a ya. O ile a botša monna wa gagwe a re: “Ge ngwana a se no tshwa letswele, ke tla mo iša ngwakong wa Morena moo a tlago dula bophelo bja gagwe ka moka.” Elkana a mo fetola a re: “Go lokile, dira se o bonago se swanetše; šala mo gae go fihlela o mo tshweša. Gomme Morena a dire gore keno ya gago e phethege.” Ka gona Hanna a šala gae a fepa ngwana wa gagwe. O rile go mo tshweša letswele a mo iša Shilo, a ya le powana ya mengwaga ye meraro, serotwana sa dikilokramo tše lesome tša bupi, le lekuka la beine. A tšea Samuele, le ge e be e sa le yo monnyane, a mo iša ngwakong wa Morena kua Shilo. Ba re go hlaba powana yeo, ba iša ngwana yoo go Eli. Hanna a re go yena: “Mong wa ka, afa o sa nkgopola gore ke nna mosadi yola a kilego a ema fa kgauswi le wena a rapela Morena. Ke be ke mo kgopela yena ngwana yo, gomme o mphile se ke bego ke se kgopela. Ka gona nna ke mo abela Morena. Bophelo bja gagwe ka moka e tla ba wa Morena.” Ya ba ba khunamela Morena fao. Hanna a rapela a re: “Morena o nthabišitše kudu; o mphile maatla a magolo! Ke sega manaba a ka; ke kwa bose ka gobane Modimo o ntlhakodišitše! Ga go yo mokgethwa go swana le Morena; ee, ga go yo a swanago le yena, ga go mošireletši yo bjalo ka Modimo wa rena. Tlogelang go bolela ka go ikgogomoša; lesang go bolela ka matepe, gobane Morena ke Modimo, Motsebatšohle, mme o ela tše batho ba di dirago. Mara a dinatla a robegile, bafokodi bona ba ba le maatla. Batho ba ba bego ba khora bjale ba šomela dijo, eupša bale ba bego ba swarwa ke tlala ga e sa ba swara. Moopa o belege bana ba ba šupago, fela mmagobabantši ga a sa šaletšwe le ke o tee. Morena o a bolaya, ebile o a phediša; o theošetša batho bodulabahu, ebile o ntšha batho gona. O diitša batho ba bangwe, ba bangwe a ba humiša; o kokobetša ba bangwe, ba bangwe a ba godiša. O tsoša bafokodi leroleng, a ntšha bahloki mathateng a bona. O ba dudiša le bakgomana, a ba bea maemong a hlomphegago. Dikokwane tša lefase ke tša Morena; o le agile godimo ga tšona. O šireletša ba ba mmotegelago, eupša ba babe ba bolaelwa swiswing. Motho ga a atlege ka maatla a gagwe. Ba ba ngangišanago le Morena ba tla fedišwa; o tla ba tsošetša modumo wa tladi a le legodimong. Morena o tla ahlola lefase ka moka; o tla fa kgoši ya gagwe maatla, o tla dira gore kgoši ya gagwe ye a e kgethilego e fenye.” Ya ba Elkana o ipoelela gae Rama, eupša mošemanyana Samuele a šala Shilo mme a hlankela Morena a hlokometšwe ke moprista Eli. Barwa ba Eli e be e le batho ba babe. Ba be ba sa re selo ka Morena goba ka melao mabapi le tše di nyakwago ke baprista setšhabeng. E be e re ge motho a direla Modimo sehlabelo, mohlanka wa moprista a tle ka lešimelo la ntlha tše tharo. E re nama e sa apeilwe, a sobeletše lešimelo ka pitšeng, goba ka moruswing, goba ka lekopelong, goba ka paneng, gomme se lešimelo le boago naso e be sa moprista. Baprista ba be ba dira ka mokgwa woo Moisraeleng yo mongwe le yo mongwe yo a bego a etla Shilo go tlo dira sehlabelo. Le pele ga ge makhura a tšhungwa, mohlanka wa moprista o be a etla go modirasehlabelo a re: “Mphe nama ye moprista a tlago e beša; ga a nyake ge o mo fa nama ye e apeilwego, o nyaka nama ye tala.” Ge motho yoo a be a ka mo fetola a re: “A go tšhungwe makhura pele, ke gona o kago tšea se o se nyakago,” mohlanka wa moprista o be a re: “Aowa! Mphe yona gonabjale! Ge o sa mphe, ke tla e tšea ka kgang!” Sebe se sa barwa ba Eli e be e le se sešorošoro mahlong a Morena, ka gobane ba be ba sa hlomphe dihlabelo tša Morena. Mošemanyana Samuele yena o ile a tšwela pele le go hlankela Morena, a apara seaparo se sekgethwa sa lešela. Ngwaga ka ngwaga mmagwe o be a mo rokela seaparwana mme a mo išetša sona ge a eya le monna wa gagwe go yo dira sehlabelo sa ngwaga wo mongwe le wo mongwe. Ke moo Eli a bego a šegofatša Elkana le mosadi wa gagwe, mme a re go Elkana: “A Morena a go fe bana ba bangwe ka mosadi yo go ema legatong la yo o mo abetšego yena.” Ka morago ga moo ba be ba boela gae. Morena o ile a šegofatša Hanna, gomme a ba le barwa ba bangwe ba bararo le barwedi ba babedi. Mošemanyana Samuele a gola a hlankela Morena. Eli bjale o be a tšofetše kudu. O be a fela a ekwa tšohle tše barwa ba gagwe ba di dirago Baisraele, le gore ba be ba robala le basadi ba ba bego ba šoma mojakong wa Tente ya bodulo bja Morena. Ka gona a re go bona: “Ke ka baka lang le dira dilo tše? Yo mongwe le yo mongwe o mpotša ka tše mpe tše le di dirago. Aowa, barwa ba ka! Taba ye ke kwago setšhaba sa Morena se e bolela ga e botse. Ge motho a ka phošetša yo mongwe, Modimo a ka mmolelela; fela ke mang yo a ka bolelelago motho yo a phošetšago Morena?” Eupša ba be ba sa theetše tatagobona, ka gobane Morena o be a ikemišeditše go ba bolaya. Mošemanyana Samuele yena a fela a gola mme a ratwa ke Morena le ke batho. Moprofeta yo mongwe a tla go Eli a mmotša gore Morena o re: “A ga ke re ke ikutolletše rakgolokhukhu wa gago, Arone, le lapa la gagwe mola e be e le makgoba a kgoši ya Egepeta? Dikgorong ka moka tša Israele ka kgetha lapa la gagwe go ba baprista ba ka, go ntlhankela aletareng, go tšhuma seorelo, le go apara seaparo se sekgethwa pele ga ka. Gomme ka ba fa tokelo ya go itšeela karolo ya dihlabelo le ya dikabelo tše di tšhungwago aletareng. Ke ka baka lang bjale le na le megabaru dihlabelong le dikabelong tše ke di nyakago setšhabeng sa ka? Ke ka baka lang wena o hlompha barwa ba gago go feta nna ka go ba lesa ba inontšha ka ditho tše kaonekaone tša dihlabelo le dikabelo ka moka tše setšhaba sa ka se nkabelago tšona? Nna, Morena Modimo wa Israele, ke boletše mehleng ye e fetilego gore ba lapa la gago le ba kgorwana ya geno ba tla ntlhankela e le baprista nakong tšohle. Eupša bjale ke re ba ka se hlwe ba ntlhankela. Ke tla hlompha bao ba ntlhomphago, ba ba nnyatšago ka ba nyatša. Bona, nako e etla yeo ka yona ke tlago bolaya masogana ka moka a lapa leno, le a kgorwana yeno, gore go se ke gwa ba le monna lapeng leno yo a tlago phela a ba a tšofala. O tla tshwenyega mme wa hufegela tšohle tše ke tlago šegofatša batho ba bangwe ba Israele ka tšona, fela ga go le o tee wa lapa leno yo a tlago tsoga a phetše a ba a tšofala. Le ge go le bjalo, ke tla phediša o tee wa ditlogolo tša gago, mme o tla ntlhankela e le moprista. Eupša ke tla mo foufatša a ba a ota go fihlela a ehwa, gomme ditlogolo tša gago tše dingwe tšona di tla bolawa e sa le bannatia. Se se tlago hlagela barwa ba gago ka babedi, Hofni le Finease, e tla ba sona sešupo go wena – ka bobedi ba tla hwa ka letšatši le tee. Ke tla kgetha moprista yo a tlago mpotegela mme a dira tšohle tše ke nyakago a di dira. Ke tla mo fa ditlogolo tša go botega tše ka nako tšohle di tlago ntlhankela pele ga kgoši ye ke e kgethilego. Yo mongwe le yo mongwe wa ditlogolo tša gago yo a tlago phologa o tla tlemega go ya go moprista yoo go mo kgopela tšheletiana le dijonyana, a kgopela le gore a tsenywe sehlopheng se sengwe sa baprista, gore a tle a fiwe sejonyana.” Mehleng yeo, ge mošemane Samuele a hlankela Morena a hlokometšwe ke Eli, melaetša ya Morena e be e se ye mekae, le dipono tše di tšwago go yena di bonwa ka sewelo. Bošego bjo bongwe Eli, yo bjale a bego a šetše a foufala, o be a robetše ka phapošing ya gagwe; Samuele o be a robetše ka sekgethweng, mo go bego go le Polokelo ya Kgwerano. Pele ga ge letšatši le hlaba, mola mabone a sehlomamabone a sa tuka, Morena a bitša Samuele. Yena a araba a re: “Tama!” gomme a kganyelela go Eli a re: “O mpiditše, mme ke nna yo.” Eupša Eli a mo fetola a re: “Ga se ka go bitša; boela malaong a gago.” Ka gona Samuele a boela malaong. Morena a bitša Samuele gape. Mošemane o be a sa tsebe gore ke Morena, ka gobane Morena o be a se a ka a mmolediša. Ka gona a tsoga, a ya go Eli mme a re: “O mpiditše, mme ke nna yo.” Eupša Eli a mo fetola a re: “Ngwanaka, ga se ka go bitša; boela malaong.” *** Morena a bitša Samuele la boraro; yena a tsoga, a ya go Eli mme a re: “O mpiditše, mme ke nna yo.” Ke moo Eli a lemogilego gore ke Morena yo a bitšago mošemane, ka gona a re go yena: “Boela malaong, gomme ge o ka bitšwa, o re: ‘Bolela, Morena, mohlanka wa gago o theeditše.’ ” Ka gona Samuele a boela malaong. Morena a tla a ema fao, mme a bitša bjalo ka pele a re: “Samuele! Samuele!” Samuele a mo fetola a re: “Bolela; mohlanka wa gago o theeditše.” Morena a re go yena: “Bona, ke tlile go dira taba ye e šiišago setšhabeng sa Israele ye motho yo a e kwago a tlago gakgamala. Ka letšatši leo ke tla phetha tšohle tše ke itšego ke tla di dira lapa la Eli; ke tla di thoma ka ba ka di phetha. Ke šetše ke mmoditše gore ke tlile go otla lapa la gagwe go ya go ile ka gobane barwa ba gagwe ba mpoletše gampe. Eli o tsebile gore ba dira taba yeo, eupša a se ke a ba kgala. Ka gona ke enela lapa la gagwe gore ga go sehlabelo goba kabelo ye e tlago tsoga e kgonne go ba boelanya le nna ka baka la sebe se.” Samuele a robala go fihlela ge go esa; ke moka a tsoga, a bula mejako ya ngwako wa Morena. O be a boifa go botša Eli pono yeo. Eli a mmitša a re: “Samuele, ngwanaka!” Samuele a araba a re: “Tama!” Eli a mmotšiša a re: “Morena o go boditše eng? O se ke wa nkutela selo. Modimo o tla go otla o šorošoro ge o ka se mpotše se sengwe le se sengwe se a se boletšego.” Ka gona Samuele a mmotša se sengwe le se sengwe, a se ke a uta selo. Eli a re: “Ke yena Morena; a a dire se a bonago se lokile.” Samuele a gola, Morena a ba le yena mme a dira gore tšohle tše Samuele a di bolelago di phethege. Ka fao setšhaba ka moka sa Israele, go tloga Dane go yo fihla Beresheba, sa tseba gore ka kgonthe Samuele ke moprofeta wa Morena. Morena a no fela a iponagatša Shilo, ka gobane ke gona moo Shilo mo a ilego a iponagatša go Samuele mme a bolela naye. Ge Samuele a bolela, se a se bolelago se be se ama Baisraele ka moka. Mehleng yeo Bafilista ba ile ba rapa dira go yo lwa le Baisraele, ka gona Baisraele ba tšwa ba yo lwa le bona. Baisraele ba hloma mešaša ya bona kua Ebenesere, mme Bafilista ba hloma ya bona Afeke. Bafilista ba ipopa dihlophahlopha gore ba hlasele Baisraele, gomme ka morago ga ntwa ye šoro ba ba fenya mme ba bolaya banna ba e ka bago ba dikete tše nne moo go bego go lwelwa gona. Ge mašaledi a boa mešašeng, baetapele ba Israele ba re: “Ke ka baka lang Morena a lesitše Bafilista ba re fenya lehono? A re yeng re yo tšea Polokelo ya Kgwerano ya Morena kua Shilo, gore a tle a ye le rena gomme a re phološe manabeng a rena.” Ka gona ba roma batseta kua Shilo gore ba yo tšea Polokelo ya Kgwerano ya Morena, yeo e emelago setulo sa bogoši sa Morena Ramaatlaohle gape e letilwego ke bakerubi. Gomme barwa bale ba babedi ba Eli, Hofni le Finease, ba tla le Polokelo ya Kgwerano. Ge Polokelo ya Kgwerano e fihla mešašeng, Baisraele ba ile ba goa kudu ka lethabo, lefase la ba la šišinyega. Bafilista ba kwa legoa leo gomme ba re: “Theetšang legoa lela kua mešašeng ya Baheberu! A e ka ba le šupa eng?” Ge ba ekwa gore Polokelo ya Kgwerano ya Morena e tlile mešašeng ya Baheberu, ba ile ba boifa gomme ba re: “Medimo e tlile mešašeng ya bona! Ke moka re hwile! Ga se ra ka ra hlagelwa ke taba ya mohuta wo! Re hwile la pitšana! Ke mang yo a kago re phološa go medimo yeo ye maatla? Ke yona medimo yela e ilego ya bolaya Baegepeta kua lešokeng! Tiang maatla, Bafilista, le lweng senna, gore re se tlo ba makgoba a Baheberu, bjalo ka ge le bona e be e le makgoba a rena. Ka gona lwaang senna!” Bafilista ba ile ba lwa ka bogale, ba fenya Baisraele, mme bona ba tšhabela magaeng a bona. Go ile gwa bolawa batho ba bantši – bahlabani ba Baisraele ba ba sepelago ka maoto ba dikete tše makgolo a mararo. Polokelo ya Kgwerano ya Morena ya thopša, le barwa ba Eli, Hofni le Finease, ba bolawa ka babedi ga bona. Monna yo mongwe wa kgoro ya Benjamene o ile a kganyela go tloga moo go bego go lwelwa gona go ba go yo fihla Shilo le lona letšatši leo. Go laetša manyami a gagwe, o be a gagotše diaparo tša gagwe, a itšhetše hlogo ka mobu. Eli, yo a bego a swere pelo ka seatla mabapi le Polokelo ya Kgwerano, o be a dutše setulong ka thoko ga tsela, a beile mokganya phatleng. Monna yoo a gaša taba tšeo motseng, gomme yo mongwe le yo mongwe a lla a nyamile. Eli a kwa sello seo gomme a botšiša a re: “A lešata le ke la eng?” Monna yoo a kitimela go Eli go yo mmotša. Eli bjale o be a na le mengwaga ye masome a senyane a metšo ye seswai, mme a tomogile mahlo, a šetše a foufala. Monna yoo a re: “Ke nna motho yo a tšhabilego ntweng mme ke kitimile go ba go tlo fihla mo le lehono.” Eli a mmotšiša a re: “Go diregile eng, ngwanaka?” Mmegi yoo a mo fetola a re: “Baisraele ba fentšwe ke Bafilista mme ba tšhaba; re fentšwe o šoro! Ntle le moo, barwa ba gago, Hofni le Finease, ba bolailwe, gomme le Polokelo ya Kgwerano ya Modimo e thopilwe!” Ge monna yoo a bolela ka Polokelo ya Kgwerano, Eli a wa ka sa morago setulong sa gagwe ka thoko ga lesoro la kgoro. O be a tšofetše a bile a nonne mo a ilego a re ge a ewa a thokgega molala, mme a hwa. O be a bile moetapele wa Baisraele mengwaga ye masome a mane. Ngwetši ya Eli, mosadi wa Finease, o be a imile, gomme nako ya gore a belege e batametše. Ge mosadi yoo a ekwa gore Polokelo ya Kgwerano ya Modimo e thopilwe, le gore ratswalagwe le monna wa gagwe ba hwile, ka bjako a swarwa ke lešoko, mme a belega. Ge a ehwa, basadi ba ba bego ba mmelegiša ba re go yena: “Tia maatla! O belege morwa!” Eupša a se ke a ba šetša, le gona a se ba fetole. A rea mošemane yoo leina la Ikabode, a hlatholla a re: “Letago la Modimo le tlogetše Baisraele;” o be a šupa go thopša ga Polokelo ya Kgwerano le lehu la ratswalagwe le monna wa gagwe. O ile a re: “Letago la Modimo le tlogetše Baisraele, ka gobane Polokelo ya Kgwerano ya Morena e thopilwe.” Ka morago ga ge Bafilista ba thopile Polokelo ya Kgwerano, ba ile ba e rwala go tloga Ebenesere ba e iša motseng wa bona wa Ashdode, ba e tsenya ka tempeleng ya modimo wa bona, Dagone, ba e bea ka thoko ga seswantšhobopša seo. Ya re e sa le bošego mosong wo o latelago batho ba Ashdode ba hwetša seswantšhobopša sela sa Dagone se wele fase ka sefahlego pele ga Polokelo ya Kgwerano ya Morena. Ka gona ba se emiša ba se boetša madulong a sona. E sa le bošego mosong wo o latelago ba hwetša seswantšhobopša sela se wele gape pele ga Polokelo ya Kgwerano. Ka lekga le hlogo ya sona le matsogo ka mabedi di be di konogile di le kua mojako; go šetše sebelebele fela. Ke ka baka leo le lehono baprista ba Dagone le barapedi ba gagwe ka moka ba ba tsenago ka tempeleng ya gagwe kua Ashdode, ba tabogago felo fao, ba sa go gate. Morena o ile a otla batho ba Ashdode o šoro mme a ba tšhoša. A otla bona le batho ba tikologo yeo ka go ba dira gore ba tšwe dikutu. Ge ba bona se se diregago ba re: “Modimo wa Israele o a re otla, o otla le modimo wa rena, Dagone. Re ka se lese Polokelo ya Kgwerano gore e hlwe e dutše mo.” Ka fao ba roma batseta ba kgobokanya magoši ka moka a Bafilista, mme ba ba botšiša ba re: “Na re dire eng ka Polokelo ya Kgwerano ya Modimo wa Israele?” Magoši a ba fetola a re: “E išeng kua Gathe.” Ka gona ba e iša Gathe. Ge e seno fihla fao motse woo le wona Morena a o otla, gomme a tsoša kgakanego ye kgolokgolo. A ba otla ka dikutu tše di ilego tša aparela batho ka moka motseng, ba bagolo le ba bannyane. Ka gona ba romela Polokelo ya Kgwerano Ekrone; eupša ge e fihla moo, batho ba lla ba re: “Ba tlišitše Polokelo ya Kgwerano ya Modimo wa Israele mo go tlo re bolaya ka moka!” Ka gona magoši ka moka a Bafilista a bitšwa gape gomme batho ba re go ona: “Boetšang Polokelo ya Kgwerano ya Israele ga gaboyona, gore e se ke ya re bolaya ya bolaya le ba malapa a rena.” Go ile gwa ba le tlalelo ye kgolokgolo motseng ka moka ka gobane Modimo o be a ba otla o šoro. Le bao ba ilego ba se ke ba hwa ba ile ba tšwa dikutu, mme ba llela medimo ya bona gore e ba thuše. Ka morago ga ge Polokelo ya Kgwerano ya Morena e bile Filistia dikgwedi tše di šupago, batho ba ile ba bitša baprista le boreatseba, ba ba botšiša ba re: “Na re ka dirang ka Polokelo ya Kgwerano ya Morena? Ge re e boetša mo e tšwago re e boetše le eng?” Bona ba ba fetola ba re: “Ge le bušetša Polokelo ya Kgwerano ya Modimo wa Israele morago, le e bušetšeng le seloba se le mo lobago ka sona go lefa molato wa lena. Polokelo ya Kgwerano e se ke ya boela morago ntle le mpho. Ke mo le tlago fola, gomme la tseba gore ke ka baka lang a ile a fela a le otla.” Batho ba botšiša ba re: “Re ka mo romela seloba mang?” Ba ba fetola ba re: “Bopang diswantšho tše di fetšago seatla tša dikutu, le magotlo a mahlano ka gauta; kgoši ye nngwe le ye nngwe ya Bafilista e emelwe ke sekutu se tee le legotlo le tee. Lena le dikgoši tša lena le wetšwe ke bolwetši bo tee. Bopang diswantšho tšeo tša dikutu le tša magotlo ao a senyago naga ya lena, gomme le hlompheng Modimo wa Israele. Mohlomongwe a ka lesa go le otla, le go otla medimo ya lena le naga ya lena. Ke ka baka lang le ngangabala bjalo ka kgoši ya Egepeta le Baegepeta. Ga ke re Modimo o ile a ba dira ditlatla ba ba ba lesa Baisraele ba tloga Egepeta? Ka gona, betlang koloi ye mpsha, le tšee dikgomo tše pedi tša ditswetši tše di sego tša ka tša rwala joko; le di paneng koloing gomme le gapeleng mamane a tšona ka lešakaneng. Le tšeeng Polokelo ya Kgwerano ya Morena le e beeng ka koloing, mme ka polokelwaneng ye e bapetšego nayo le nokeleng diswantšhobopša tšela tša gauta tše le mo romelago tšona e le seloba sa go lefa molato wa lena. Le lese dikgomo di goge koloi di sepele ka yona di se na motho. Gomme le e lebeleleng ge e sepela; ge e ka leba nageng ya gaboyona, motseng wa Bethe-Shemeshe, seo se tla be se šupa gore ke Modimo wa Baisraele yo a re otlilego ka kotlo ye šorošoro ye. Eupša ge e ka se lebe gona, gona re tla tseba gore ga se kotlo ya gagwe; e bile fela selo se se nogo itlhagela.” Ba ile ba dira se ba se botšwago: Ba tšea dikgomo tše pedi tša ditswetši ba di pana koloing, mme ba tswalelela mamane a tšona ka lešakaneng. Ba bea Polokelo ya Kgwerano ka koloing, gotee le polokelwana yela e swerego diswantšhobopša tša gauta tša magotlo le tša dikutu. Dikgomo tšela tša wela tsela ye kgolo ya go ya Bethe-Shemeshe mme tša leba gona, tša se ke tša aroga tsela yeo. Di be di tšama di lla. Magoši ale a Bafilista a ile a di latela go ba go yo fihla mollwaneng wa Bethe-Shemeshe. Batho ba Bethe-Shemeshe ba be ba buna mabele ka moeding, mme ya re ge ba emiša mahlo ba bona Polokelo ya Kgwerano. Ba thaba kudu ge ba e bona. Koloi yeo ya tla tšhemong ya monna yo mongwe yo a bitšwago Joshua, yo a bego a dula Bethe-Shemeshe, gomme ya ema fao, kgauswi le letlapa le legolo. Batho bao ba phaphaganya koloi yeo mme ba direla Morena sehlabelo sa go tšhungwa ka moka ka dikgomo tšela. Balefi ba kuka Polokelo ya Kgwerano ya Morena le polokelwana yela ya diswantšhobopša tša gauta, ba di bea mola letlapeng le legolo. Ka morago batho ba Bethe-Shemeshe ba direla Morena dihlabelo tša go tšhungwa ka moka le dihlabelo tše dingwe. Magoši ale a mahlano a Bafilista a be a ba lebeletše ge ba dira seo, gomme a boela Ekrone ka lona letšatši leo. Bafilista ba ile ba romela Morena diswantšhobopša tšela tše tlhano tša gauta e le seloba sa go lefa molato wa bona, se sengwe se emela motse wa Ashdode, se sengwe wa Gasa, se sengwe wa Ashkelone, se sengwe wa Gathe, mme se sengwe se emela wa Ekrone. Ba romela le magotlo a gauta, le lengwe le le lengwe le emela motse o tee wa metse ye e bego e bušwa ke dikgoši tše tlhano tša Bafilista, metse ye e bego e ageleditšwe ka merako, le metsana ye e bego e se ya ageletšwa. Letlapa lela le legolo tšhemong ya Joshua wa Bethe-Shemeshe, leo go lona ba ilego ba bea Polokelo ya Kgwerano ya Morena, le sa le moo e le bohlatse bja seo se diregilego. Morena o ile a bolaya ba masome a a šupago ba banna ba Bethe-Shemeshe ka gobane ba ile ba hlodimela ka Polokelong ya Kgwerano. Gomme batho ba lla ka gobane Morena a bolaile banna ba bantši o kaalo. Ka gona banna ba Bethe-Shemeshe ba re: “Ke mang yo a ka phologago pele ga Morena, Modimo yo mokgethwa yo? Re ka mo iša kae gore re ikhutše yena?” Ba roma batseta go batho ba Kiriate-Jearime gore ba re go bona: “Bafilista ba bušitše Polokelo ya Kgwerano ya Morena. Theogang le tle le e tšeeng.” Ke moo batho ba Kiriate-Jearime ba tšerego Polokelo ya Kgwerano ya Morena ba e iša ngwakong wa monna yo leina la gagwe e bego e le Abinadaba, yo a bego a dula mmotong. Ba šegofatša morwa wa gagwe, Eleasara, gore a e hlokomele. Polokelo ya Kgwerano ya Morena e ile ya dula Kiriate-Jearime nako ye telele – mengwaga ye masome a mabedi. Ka nako yeo Baisraele ka moka ba be ba llela Morena gore a ba thuše. Samuele a re go setšhaba sa Israele: “Ge le tloga le sokologela go Morena ka dipelo tša lena ka moka, gona tlošang medimo e šele ka moka le diswantšho tša Astarte, modimo wo motshadi. Dulang le ineetše Morena mme le khunamele yena a nnoši, gomme o tla le phološa diatleng tša Bafilista.” Ka gona Baisraele ba tloša medimo ya bona ya diswantšho ya Baale le Astarte, gomme ba khunamela Morena a nnoši. Ke moo Samuele a biditšego Baisraele ka moka a re ba gahlane kua Mitsepa, a re: “Ke tla le rapelela go Morena fao.” Ka gona ka moka ba kgobokana kua Mitsepa. Ba ga meetse ba a tšhollela fase e le kabelo go Morena, gomme ba ikona dijo letšatši leo ka moka. Ba re: “Re dirile sebe pele ga Morena.” Ke gona kua Mitsepa moo Samuele a bego a rarolla diphapano tša Baisraele. Ge Bafilista ba ekwa gore Baisraele ba kgobokane kua Mitsepa, magoši ale a Bafilista a tla le banna ba ona go tlo ba hlasela. Baisraele ba kwa taba yeo mme ba boifa, gomme ba re go Samuele: “O se ke wa kgaotša go rapela Morena Modimo wa rena gore a re namolele go Bafilista.” Samuele a tšea kwanyana ye e sa anyago a direla Morena sehlabelo sa go tšhungwa ka moka ka yona. Ke moo a rapetšego Morena gore a thuše Baisraele, gomme Morena a kwa thapelo ya gagwe. Ge Samuele a sa dira sehlabelo, Bafilista ba batamela Baisraele go ba hlasela; eupša ka yona nako yeo Morena a ba tsošetša modumo wo o swanago le wa tladi. Ba gakanega mme ba fenywa ke Baisraele. Baisraele ba tloga Mitsepa gomme ba rakediša Bafilista ba tšama ba ba bolaya ba ba gomela ge ba fihla tlase ga motse wa Bethe-Kare. Ka morago ga moo Samuele a tšea letlapa, a le tsema gare ga Mitsepa le Shene, mme a re: “Morena o re thušitše go fihlela bjale,” gomme a le rea leina la “Letlapa la Thušo”. Ka gona Bafilista ba fenywa, gomme Morena a ba thibela go šwahlela naga ya Israele ge Samuele a sa phela. Metse ka moka ye Bafilista ba bego ba e thopile kgathe ga Ekrone le Gathe e ile ya ba ya Baisraele gape, ka fao Baisraele ba lokolla naga ya bona ka moka. Ntle le fao go ile gwa ba le khutšo gare ga Baisraele le Bakanana. Samuele o bušitše Baisraele bophelo bja gagwe ka moka. Ngwaga wo mongwe le wo mongwe o be a eya Bethele, Gilgale le Mitsepa, mme moo mafelong ao a rarolla diphapano. Ka morago o be a boela ga gabo kua Rama moo le gona e bego e eba moahlodi. Kua Rama o ile a agela Morena aletare. Ge Samuele a tšofala, o ile a dira barwa ba gagwe baahlodi ba setšhaba sa Israele. Morwa wa gagwe wa leitšibolo o be a bitšwa Joele, mme yo monnyane a bitšwa Abia; bona e be e le baahlodi Beresheba. Eupša ba ile ba se ke ba etša tatagobona; ba ile ba kgahlwa ke go ikgobokanyetša tšhelete fela, ka gona ba amogela tsogolekobong mme ba se ke ba ahlola melato ka botshephegi. Ke moo baetapele ka moka ba Israele ba kopanego, ba ya go Samuele kua Rama, gomme ba re go yena: “Bona, o a tšofala, mme barwa ba gago ga ba dire bjalo ka wena. Ka gona, bea kgoši gore e re buše, re tle re swane le ditšhaba tše dingwe.” Samuele a nyamišwa ke kgopelo yeo ya bona ya gore ba be le kgoši; ka gona a rapela Morena, gomme Morena a re: “Theetša tšohle tše setšhaba se go botšago tšona. Ga se sa gana wena, se ganne nna gore ke se ke ka hlwa ke le kgoši ya sona. E sa le go tloga mola ke ba ntšhago Egepeta ba a ntlhanogela mme ba khunamela medimo ye mengwe; gomme bjale le wena ba go dira se ba ntirilego sona ka mehla. Ka gona, ba direle se ba se kgopelago, eupša o ba botše tsebegokwa mme o ba hlathollele tše kgoši e tlago ba nyaka tšona.” Samuele a bolela le setšhaba se se bego se mo kgopela gore se be le kgoši, a se botša tšohle tše Morena a mmoditšego tšona. A ba hlathollela a re: “Tše kgoši ya lena a tlago le nyaka tšona šedi: O tla dira barwa ba lena bahlabani; ba bangwe e tla ba bahlabani ba dikoloi tša gagwe tša ntwa, ba bangwe ya ba bahlabani ba go namela dipere, mme ba bangwe ya ba ba go eta koloi ya gagwe ya ntwa pele ba kitima. O tla dira ba bangwe ba bona balaodi ba bahlabani ba sekete, mme ba bangwe ya ba balaodi ba ba masome a mahlano. Barwa ba lena ba tla tlemega go mo lemela mašemo, ba mmunela dibjalo, ba ba ba mo direla dibetša le ditlabakelo tša makoloi a gagwe a ntwa. Barwedi ba lena ba tla swanela go mo direla ditlolo tša go nkga bose, ba ba ba mo šomela e le baapei ba dinama le ba dinkgwa. O tla tšea mašemo a lena a go nona, le dirapa tša lena tša merara le tša mehlware, a di fa bahlankedi ba gagwe. O tla tšea karolo ya lesome ya mabele le ya diterebe tša lena, a di fa bakgomana le bahlankedi ba bangwe. O tla tšea bahlanka ba lena le dikgomo tša lena tša go nona le dipokolo tša lena, a di šomiša medirong ya gagwe. O tla tšea karolo ya lesome ya mehlape ya lena. Gomme le lena ka bolena le tlilo ba makgoba a gagwe. Ge nako yeo e fihla, le tla lla ka kgoši ya lena yoo lena le ikgethetšego yena, eupša Morena a ka se theetše dillo tša lena.” Setšhaba sa se ke sa kwa Samuele, eupša sa re: “Aowaowaa! Re nyaka kgoši gore re tle re swane le ditšhaba tše dingwe, re be le kgoši ya rena ye e re bušago gape e re etago pele ge re etšwa dira le ge re hlabana ntweng.” Samuele a theetša tšohle tše ba di bolelago, gomme a ya a botša Morena. Morena a mo fetola a re: “Dira se ba se nyakago o ba beele kgoši.” Ke moo Samuele a boditšego baetapele ba Israele gore ba boele gae. Go be go na le monna wa mohumi wa go hlomphega yo leina la gagwe e bego e le Kishe, wa kgoro ya Benjamene; e be e le morwa wa Abiele, Abiele morwa wa Tserore, mme e le wa lapa la Bekorate, seripa sa kgorwana ya Afiage. O be a na le morwa yo a bitšwago Saulo, lesogana la go bopega. Saulo e be e le yo motelele kudu – Baisraele ba bateleletelele ba mo goma magetleng; le gona e be e le yo mobotse go ba phala ka moka. Dipokolo tše dingwe tša ditshadi tša Kishe di ile tša timela, ka gona yena a re go Saulo: “Hle, tšea yo mongwe wa bahlanka le yo nyaka dipokolo tšeo.” Ba ile ba putla naga ya dithaba ya Efraime le selete sa Shalisha, eupša ba se ke ba di bona; ka fao ba tšwela pele ba putla selete sa Shaalime, fela dipokolo tšeo di be di se gona moo. Ke moka ba putla naga ya Benjamene, mme le moo ba se ke ba di hwetša. Ge ba fihla seleteng sa Tsufe, Saulo a re go mohlanka wa gagwe: “A re gomele gae; ge re sa gome, tate o tla lesa go gopola ka dipokolo, a thoma go tshwenyega ka rena.” Mohlanka yoo a mo fetola a re: “Ema gannyane! Mo motseng wo go na le monna yo mokgethwa yo a hlomphiwago kudu, ka gobane se sengwe le se sengwe se a se bolelago se a direga. A re ye go yena; mohlomongwe a ka re botša mo re kago hwetša dipokolo tšeo.” Saulo a mmotšiša a re: “Ge re ka ya go yena re tla mo fa eng? Ga re sa šaletšwe ke dijo ka mekotleng ya rena, gomme ga re ne mpho ye re ka mo fago yona. Bjale re tla mo leboga ka eng?” Mohlanka yoo a mo fetola gape a re: “Ke swere papetlana ye nnyane ya silibera. Ke tla mo fa yona, gomme a re botša mo re ka di hwetšago gona.” Saulo a mo fetola a re: “O gopotše gabotse! A re ye.” Ka gona ba ya motseng woo monna yola yo mokgethwa a bego a dula go wona. Ge ba sa rotoga mmoto ba eya motseng, ba gahlana le basetsana ba bangwe ba etšwa motseng ba eya go ga meetse. Ba ba botšiša ba re: “A mmoni o gona?” Mehleng yeo moprofeta o be a bitšwa mmoni, gomme ge motho a nyaka keletšo go Modimo, o be a re: “A re ye go mmoni.” *** *** Basetsana bao ba mo fetola ba re: “Ee, o gona. Gabotsebotse o no ba pejana ga lena. Ge le ka sepediša, le ka mo swara tseleng. Ge le tsena motseng, le tla mo hwetša. O fihlile mo motseng lehono ka gobane batho ba tlilo dira sehlabelo kua mmotong. Batho ba ba laleditšwego ba ka se thome go ja a se a fihla moo, ka gobane o swanetše go šegofatša sehlabelo pele. Ge le ka ya gonabjale, le tla mo hwetša a se a tšwa a rotogela mmotong go yo ja.” *** Ka gona Saulo le mohlanka wa gagwe ba sepela ba tsena motseng, gomme ya re ge ba tsena, ba bona Samuele a etšwa a ba lebantše a eya felong fao ga tirelo. Bjale maabane a ntshe Morena o be a ile a re go Samuele: “Ka moswane ka tšona nako tše ke tla romela monna wa kgoro ya Benjamene go wena; o mo tlotše gore e be mmuši wa setšhaba sa ka sa Israele, gomme o tla ba phološa go Bafilista. Ke bone tlaišego ya setšhaba sa ka, ebile ke kwele dillo tša sona ge se llela thušo.” Ge Samuele a bona Saulo, Morena a re go yena: “Šoo monna yo ke go boditšego ka yena. O tla buša setšhaba sa ka.” Ke moo Saulo a ilego go Samuele yo a bego a sa le lesorong la kgoro ya motse, a mmotšiša a re: “Hle, nke o mpotše gore a mmoni o dula kae.” Samuele a mo fetola a re: “Ke nna mmoni. Nketeng pele le rotogeleng kua felong ga tirelo. Bobedi bja lena le swanetše go ja le nna lehono. Ka moswane mosong ke tla araba dipotšišo tša lena ka moka mme ka le lesa la itshepelela. Ge e le dipokolo tše di timetšego matšatši a mararo a a fetilego, le se ke la tshwenyega ka tšona; di šetše di hweditšwe. Eupša ke mang yo a nago le tše bohlokwahlokwa mo go Baisraele? Ke wena – wena le ba lapa la tatago.” Saulo a mo fetola a re: “Nna ke wa kgoro ya Benjamene, kgorwana ye nnyannyane mo Israele, gomme lapa lešo ke la mafelelofelelo mo kgorong yeo. Bjale ke ka baka lang o bolela le nna ka mokgwa wo?” Ke moo Samuele a tšerego Saulo le mohlanka wa gagwe a ba iša phapošing ya bojelo, gomme a ba dudiša madulong a ka pele ga a baeng bao e bego e ka ba ba masome a mararo. Samuele a re go moapei: “Tliša nama yela ke go filego yona, yela ke go boditšego gore o e beele ka thoko.” Ka gona moapei a tliša serope ka moka gomme a se bea pele ga Saulo. Samuele a re: “Še nama ye ke go beetšego yona. E je. Ke go beetše yona ge ke laletša batho, gore o tle o e je ka yona nako ye.” Ka gona Saulo a ja le Samuele mohlang woo. Ge ba theogile felong ga tirelo ba tsene motseng, Samuele a bolela le Saulo tlhakeng ya ntlo. Ya re e sa le ka maswiswana Saulo le mohlanka wa gagwe ba sa tsoga tlhakeng ya ntlo, Samuele a bitša Saulo moo a re: “Hle, tsoga ke go felegetše.” Saulo a tsoga, mme yena le Samuele ba tšwa ba leba mokgotheng. Ge ba fihla mafelelong a motse, Samuele a re go Saulo: “Botša mohlanka wa gago a sepelele pele ga rena.” Mohlanka a sepela, mme Samuele a kgopela Saulo a re: “Ema mo gannyane, gore ke go botše se Modimo a se boletšego.” Ke moo Samuele a tšerego sedibelwana sa makhura a mohlware gomme a se tšhela hlogong ya Saulo, a mo atla, a re: “Morena o go tlotša gore o be mmuši wa setšhaba sa gagwe sa Israele. O tla se buša mme wa se šireletša manabeng a sona a a bapilego le sona. Gomme sešupo sa gore Morena o kgethile wena gore o be mmuši wa setšhaba sa gagwe sese: Ge o tlogelana le nna lehono, o tla gahlana le banna ba babedi kgauswi le lebitla la Ragele kua Tseltsage, nageng ya Benjamene. Ba tla go botša gore dipokolo tšela o bego o di nyaka di hweditšwe, ka gona tatago ga a sa tshwenyegile ka tšona eupša o tshwenyegile ka wena, gomme o dula a botšiša a re: ‘A ke tla dirang mabapi le morwa wa ka?’ Go tloga moo o fetele pele go yo fihla mohlareng wo mogolo kua Taboro, mme moo o tla gahlana le banna ba bararo ba eya go direla Modimo sehlabelo kua Bethele. Yo mongwe wa bona o tla be a gapa diputšane tše tharo, yo mongwe a swere dinkgwa tše tharo, mme wa boraro a swere lekuka la beine. Ba tla go dumediša ba go botšiša maphelo, ba go fa dinkgwa tše pedi, mme o di amogele. Go tloga moo o tla ya mmotong wa Modimo kua Gibea, moo go lego mešaša ya Bafilista. Kgorong ya motse o tla gahlana le sehlopha sa baprofeta ba theoga mmotong ba letša diharepa, meropa, dinaka le dikgapa. Ba tla be ba bina ba goa. Ke moka moya wa Morena o tla go laola, mme le wena wa thoma go bina le go goa le bona, wa fetoga motho o šele. Ge tšeo di hlaga, o dire se o bonago se lebane, ka gobane Modimo o na le wena. O tloge pele o ye Gilgale, mme nna ke tla tla ka morago ka gahlana nago moo, ka dira dihlabelo tša go tšhungwa ka moka le tša kagišano. O letele matšatši a a šupago fao go fihlela ke etla ke go botša se o swanetšego go se dira.” Ge Saulo a retologa a tloga go Samuele, Modimo a mo fetoša motho o šele. Ka lona tšatši leo se sengwe le se sengwe se Samuele a mmoditšego sona sa phethagala. Ge Saulo le mohlanka wa gagwe ba fihla Gibea, a gahlanetšwa ke sehlopha sa baprofeta. Ka bjako moya wa Modimo wa mo laola, mme le yena a thoma go bina le go goa le bona. Batho ba ba bego ba mo tseba ba rile go mmona a dira dilo tšeo ba botšišana ba re: “Na morwa wa Kishe o hlagetšwe ke eng? Kgane Saulo le yena o fetogile moprofeta?” Monna yo mongwe yo a bego a dula moo a botšiša a re: “A baprofeta ba bangwe ba bona ba reng – na bona le re botatagobona ke bomang?” Ke ka moo go hlolegilego polelo ye e rego: “Kgane Saulo le yena o fetogile moprofeta?” Ge Saulo a feditše go bina le go goa, o ile a ya aletareng kua mmotong. Ramogolo wa Saulo a botšiša Saulo le mohlanka yola a re: “A le be le le kae?” Saulo a mo fetola a re: “Re be re nyaka dipokolo tšela. Re ile ge re sa di bone, ra ya go Samuele.” Ramogolwagwe a re: “Nke o mpotše gore o ile a le botša eng.” Saulo a mo fetola a re: “O re boditše gore dipokolo tšeo di hweditšwe;” eupša a se ke a botša ramogolwagwe se Samuele a se boletšego mabapi le gore yena e tlile go ba kgoši. Samuele a kgobokanya setšhaba pele ga Morena kua Mitsepa gomme a re go sona: “Morena Modimo wa Israele o re: ‘Ke le ntšhitše Egepeta ka le phološa go Baegepeta le ditšhabeng tše dingwe ka moka tše di bego di le gatelela. Ke nna Modimo wa lena yo a le hlakodišago matshwenyegong le manyaming a lena ka moka, eupša lehono le nkganne mme le nkgopetše gore ke le fe kgoši. Go lokile ge, kgobokanang pele ga Morena ka dikgoro le ka dikgorwana.’ ” Ke moo Samuele a laetšego kgoro ye nngwe le ye nngwe gore e batamele, gomme matengwa a ntšha kgoro ya Benjamene. Ke moka Samuele a batametša malapa a kgoro ya Benjamene, gomme matengwa a ntšha lapa la Matri. Ke moka banna ba lapa la Matri ba batamela, gomme matengwa a ntšha Saulo, morwa wa Kishe. Ba ile ba mo nyaka, gomme ya re ge ba sa mmone, ba botšiša Morena ba re: “A yoo Saulo o se tla?” Morena a ba fetola a re: “Saulo šole o utamile gare ga merwalo.” Ka gona ba kitima ba yo mo utolla ba mo emiša gare ga setšhaba. Baisraele ba bateleletelele ba be ba mo goma magetleng. Samuele a re go setšhaba: “Šo monna yo Morena a mo kgethilego! Ga go le o tee gare ga rena yo a swanago le yena.” Setšhaba ka moka sa goa sa re: “A kgoši a re phelele!” Samuele a hlathollela setšhaba tše ba swanetšego go di direla kgoši, le tše kgoši e swanetšego go ba direla tšona. A di ngwala ka pukung ye a ilego a e bea ka Felong mo Gokgethwa. Gomme a ba botša gore ba ye gae. Saulo le yena a boela Gibea, ga gabo. Banna ba bangwe ba sebete bao Modimo a bego a ba dirile gore ba mo dumele, ba ya le yena. Fela batho ba bangwe ba mafeelana ba re: “A le re yena moesa yo a ka re hlakodiša?” Ba nyatša Saulo gomme ba se ke ba mo tlišetša le ge e le mphonyana. Eupša yena a se ke a tshwenyega ka bona. Kgoši Nahashe wa Amone o ile a tšwa dira mme a hloma mešaša ya gagwe gore a tle a hlasele motse wa Jabeshe, nageng ya Gileade. Banna ba Jabeshe ba re go Nahashe: “Hle, kwana le rena, mme re tla ba batho ba gago.” Nahashe a ba fetola a re: “Ke tla kwana le lena ge le ka dumela gore ke gonye yo mongwe le yo mongwe wa lena leihlo la la go ja. Ka go dira bjalo ke tla goboša Baisraele ka moka.” Baetapele ba Jabeshe ba re: “Re fe matšatši a a šupago gore re rome batseta nageng ya Israele ka moka. Ge go se yo a ka re thušago, gona re tla ineela go wena.” Batseta bao ba fihla Gibea, moo Saulo a bego a dula gona, gomme ya re ge ba bega taba yeo, batho ba hlaboša mantšu ba lla. E be e le gona Saulo a gorogago a etšwa mašemong a gapa dipholo tša gagwe, gomme a botšiša a re: “A molato ke eng? Ke ka baka lang batho ba lla?” Ba mmotša se batseta ba ba tšwago Jabeshe ba se begilego. Ge Saulo a ekwa seo, moya wa Modimo wa mo laola, gomme a galefa kudu. A tšea dipholo tše pedi a di ripaganya, gomme a roma batseta gore ba iše diripana tšeo nageng ka moka ya Israele mme ba botše batho ba re: “Yo a sa latelego Saulo le Samuele ge ba eya ntweng – dipholo tša gagwe di tla ripaganywa ka mokgwa wo!” Setšhaba sa Israele se be se boifa se Morena a ka se dirago, gomme ka moka ga bona ba tšwa e le seboka, gwa se šale motho. Saulo a ba kgobokanya kua Beseke: ya ba ba dikete tše makgolo a mararo ba ba tšwago Israele le ba dikete tše masome a mararo ba ba tšwago Juda. Ba re go batseta bale ba go tšwa Jabeshe: “Le botšeng batho ba gabolena gore pele ga mosegare wa sekgalela ka moswane ba tla phološwa.” Ge batho ba Jabeshe ba ekwa molaetša woo, ba thaba gomme ba re go Nahashe: “Ka moswane re tla ineela go wena, gomme wa dira se o se ratago ka rena.” Ka letšatši le le latelago ka masa Saulo a arola banna ba gagwe dihlopha tše tharo, mme ya re ka mahube ba šwahlela mešaša ya manaba gomme ba hlasela Baamone. Ba ba bolaya go fihlela mosegare wa sekgalela. Bao ba phonyokgilego ba šwalalana, monna yo mongwe le yo mongwe a tšhaba a nnoši. Ke moo banna ba Israele ba itšego go Samuele: “A ba kae batho bale ba itšego Saulo ga a swanela go ba kgoši ya rena? Re gafele bona, re ba bolaye!” Eupša Saulo a re: “Ga go bolawe motho lehono, ka gobane le ke letšatši leo ka lona Morena a hlakodišitšego Baisraele.” Gomme Samuele a re go setšhaba: “Ka moka ga rena a re yeng Gilgale re yo bea Saulo gape kgoši ya rena.” Ka gona ka moka ga bona ba ya Gilgale, gomme moo ba bea Saulo kgoši ka felo mo gokgethwa. Ba dira dihlabelo tša kagišano, gomme Saulo le setšhaba ka moka sa Israele ba bina monyanya wo mogolo wa go bea kgoši. Samuele a re go setšhaba sa Israele: “Ke dirile se le nkgopetšego gore ke se dire. Ke le file kgoši ye e tlago le buša, mme bjale e tla le eta pele. Ge e le nnaena, ke godile ke itšofaletše, fela barwa ba ka ba na le lena. Ke bile moetapele wa lena go tloga bofseng bja ka go fihlela bjale. Ke nna yo. Ge eba go na le phošo ye nkilego ka e dira, mpegeng gonabjale mo pele ga Morena le kgoši ye a e kgethilego. Kgane nkile ka tšea kgomo goba pokolo ya yo mongwe? A nkile ka phošetša motho goba ka gatelela motho? Ke mang yo nkilego ka amogela tsogolekobong go yena gore ke tle ke se mmone molato? Ge eba nkile ka dira se sengwe sa tšeo, ke tla lefa seo ke se tšerego.” Setšhaba sa mo fetola sa re: “Aowa, ga se wa ka wa re phošetša goba wa re gatelela; ga se wa ka wa amoga motho selo.” Samuele a re: “Morena le kgoši ye a e kgethilego ke dihlatse lehono tša gore le hweditše ke se na molato le gatee.” Ba mo fetola ba re: “Ee, Morena ke hlatse ya rena.” Samuele a tšwela pele a re: “Morena ke yena yo a beilego Moshe le Arone baetapele, ebile ke yena yo a ntšhitšego borakgolokhukhu ba lena Egepeta. Bjale emang mo le lego gona, mme ke tla le bega go Morena ka go le gopotša ditiro ka moka tše maatla tše Morena a di dirilego go phološa lena le borakgolokhukhu ba lena. Ge Jakobo le ba lapa la gagwe ba eya Egepeta gomme Baegepeta ba ba gatelela, borakgolokhukhu ba lena ba ile ba llela Morena, mme yena a roma Moshe le Arone, ba ba ntšha Egepeta mme ba ba dudiša mo nageng ye. Eupša batho bao ba ile ba lebala Morena Modimo wa bona, ka fao a lesa kgoši ya Moaba le Sisera, molaodi wa madira a motse wa Hatsore, le Bafilista ba elwa le borakgolokhukhu ba lena, mme a ba gafela diatleng tša bona. Ke gona ba lletšego Morena ba re: ‘Re dirile sebe, ka gobane re go tlogetše, Morena, ra khunamela medimo ya diswantšho, Baale le Astarte. Re hlakodiše manabeng a rena, gomme re tla go khunamela.’ Gomme Morena a ba romela Gideone, ka morago Barake, ka morago Jefta, mme la mafelelo a romela nna. Yo mongwe le yo mongwe wa rena o le hlakodišitše manabeng a lena, mme la phela le bolokegile. Eupša ya re ge le bona gore Kgoši Nahashe wa Amone o batametše go le hlasela, la re go nna: ‘Re nyaka go bušwa ke kgoši,’ le ge Morena Modimo wa lena e be e le kgoši ya lena. “Bjale kgoši ye le e kgethilego še; le e kgopetše, gomme bjale Morena o le file yona. Tšohle di tla le atla ge le ka hlompha Morena Modimo wa lena, la mo direla, la mo theetša, la phetha le ditaelo tša gagwe, le gona lena le kgoši ya lena la mo latela. Eupša ge le sa theetše Morena le sa phethe ditaelo tša gagwe, o tla le emela ka maoto bjalo ka ge a ile a emela borakgolokhukhu ba lena ka maoto. Ka gona, emang mo le lego gona, gomme le tla bona mohlolo wo mogolo wo Morena a tlago o dira. Ga ke re ga se nako ya pula? Fela ke tla rapela Morena, gomme yena o tla romela ledimo le pula. Ge seo se direga le tla lemoga gore le dirile sebe se segolo pele ga Morena ge le mo kgopela kgoši.” Ka gona Samuele a rapela Morena, gomme ka lona tšatši leo Morena a romela ledimo le pula. Ke moo setšhaba ka moka se boifilego Morena le Samuele, gomme sa re go Samuele: “Hle, re rapelele go Morena Modimo wa gago, rena bahlanka ba gago, gore re se ke ra hwa. Bjale re lemoga gore ntle le dibe tša rena tšohle, re dirile sebe se sengwe ka go kgopela gore re be le kgoši.” Samuele a ba fetola a re: “Le se ke la boifa. Le ge le dirile taba ye mpe ka mokgwa wo, le se ke la fularela Morena, eupša le mo direle ka dipelo tša lena ka moka. Le se ke la arogela go medimo ya lefeela; e ka se le thuše goba ya le phološa, ka gobane ga se ya therešo. Morena, ka baka la leina la gagwe le legolo, a ka se le lahle, ka gobane o ikemišeditše go le dira setšhaba sa gagwe. Ge e le nna ke re go fošetša Morena ka go lesa go le rapelela a go be kgole le nna. A ke upše ke le rute se sebotse se se loketšego gore le se dire. Boifang Morena gomme le mo direleng ka potego, le mo direleng ka dipelo tša lena ka moka. Gopolang tše kgolo tše a le diretšego tšona. Eupša ge le ka fela le dira sebe, lena le kgoši ya lena le tla fedišwa.” *** Saulo o ile a hlaola banna ba dikete tše tharo, a šala le ba dikete tše pedi kua Mikimase le nageng ya dithaba ya Bethele, gomme a romela ba sekete se tee le morwa wa gagwe, Jonathane, kua Gibea, nageng ya kgoro ya Benjamene. Banna ba bangwe bona Saulo a ba romela gae. Jonathane o ile a bolaya Bafilista ba ba bego ba hlomile mešaša kua Geba, gomme Bafilista ka moka ba kwa taba yeo. Ke moo Saulo a laetšego gore phalafala e letšwe nageng ka moka go biletša Baheberu ntweng. Baisraele ka moka ba botšwa gore Saulo o bolaile Bafilista ba ba bego ba hlomile mešaša, le gore Bafilista ba ba hloile. Ka gona banna ba tla pitšong go tlo kopana naye kua Gilgale. Bafilista ba kgobokanela go tlo lwa le Baisraele; ba be ba na le makoloi a ntwa a dikete tše masome a mararo, bahlabani ba ba nametšego dipere ba dikete tše di selelago, le bahlabani ba bantšintši ba ba sepelago ka maoto ba ba lekanago le dithorwana tša lešabašaba lebopong la lewatle. Ba ya Mikimase, ka bohlabela bja Bethe-Abene, gomme ba hloma mešaša fao. Baisraele ge ba bona gore ba tlaletšwe gomme ga go se ba ka se dirago, ba utama ka maweng le ka meleteng le ka dimphatšeng le ka dibong le ka megobeng ye e omilego; ba bangwe ba tshela noka ya Jordane ba tsena nageng ya Gade le ya Gileade. Saulo yena o be a sa le Gilgale, gomme banna ba ba bego ba na le yena ba be ba thothomela ka letšhogo. O ile a letela Samuele matšatši a a šupago, ka ge Samuele a be a mo laetše bjalo, eupša Samuele o be a se a tšwe a etla Gilgale. Bahlabani ba thoma go tlogela Saulo, ka gona a re go bona: “Ntlišetšeng dihlabelo tša go tšhungwa ka moka le dihlabelo tša kagišano.” O ile a dira sehlabelo sa go tšhungwa ka moka, gomme ge a re ke a feleletša, Samuele a fihla. Saulo a tšwela ntle go mo gahlanetša mme a mo amogela, eupša Samuele a re: “A o dirile eng?” Saulo a mo fetola a re: “Bahlabani ba be ba ntlogela, gomme le wena ga se wa fihla ka nako yela o bego o ile o tla fihla ka yona; ntle le moo, Bafilista ba kgobokana kua Mikimase. Ka fao, ke ile ka re ka pelong: ‘Bafilista ba tlilo ntlhasela mo Gilgale ke sešo ka kgopela Morena gore a nthuše.’ Ka gona ka beta pelo ka dira sehlabelo.” Samuele a mo fetola a re: “O dirile taba ya botlaela. Ga se wa phetha taelo ye Morena Modimo wa gago a go filego yona. Ge nkabe o ile wa e phetha, o be a tla dira gore wena le ditlogolo tša gago le buše Israele go ya go ile. Eupša bjale pušo ya gago e ka se swarelele. Ka gobane wena ga se wa dira se Morena a go laetšego sona, yena o tla inyakela monna yo a mo kgahlago, mme a mmea mmuši wa setšhaba sa gagwe.” Samuele a tloga Gilgale a sepela. Batho ka moka ba latela Saulo ge a eya go kopana le madira a gagwe. Ba tloga Gilgale ba ya Gibea nageng ya Benjamene. Saulo a lekola bahlabani ba gagwe, banna ba e ka bago ba makgolo a a selelago. Saulo le morwa wa gagwe, Jonathane, le banna ba bona ba hloma mešaša Geba, nageng ya Benjamene; mešaša ya Bafilista e be e le kua Mikimase. Bahlabani ba Bafilista ba tšwa mešašeng ya bona go yo ba hlasela ka dihlopha tše tharo: sehlopha se sengwe sa leba Ofra, nageng ya Shuale, se sengwe sa ya thoko ya Bethe-Horone, mme se sengwe sa ya mollwaneng wo o okametšego moedi wa Tseboime le lešoka. Go be go se barulatshipi nageng ya Israele, ka gobane Bafilista ba be ba itaile gore ba ka se dumelele Baheberu ba dira ditšhoša le marumo. Baisraele ba be ba swanetše go ya go Bafilista go yo looletšwa megoma ya dipholo le ya diatla, dilepe le disekele; tefo e be e le papetlana ye nnyane ya silibera ge go lootšwa dilepe le ge go tsenywa ntlhana ya tshipi phateng ya go gapa dikgomo, gomme e le dipapetlana tše pedi ge go lootšwa megoma ya dipholo le megoma ya diatla. Ka gona, ge go tsogile ntwa go be go se le o tee wa bahlabani ba Baisraele yo a bego a swara tšhoša goba lerumo ntle le Saulo le morwa wa gagwe, Jonathane. Bafilista ba ile ba romela sehlopha sa bahlabani go yo šireletša sefata sa Mikimase. Ka letšatši le lengwe Jonathane a re go lesogana le le bego le mo rwalela dibetša: “A re putle mešaša ya Bafilista.” Eupša Jonathane a se ke a botša Saulo, tatagwe, yo a bego a hlomile mošaša ka fase ga mohlare wa mogarenate kua Migrone, kgauswi le Gibea; o be a na le banna ba e ka bago ba makgolo a a selelago. Gare ga bona go be go le Ahia yo a bego a swere seaparo se sekgethwa. Ahia e be e le morwa wa Ahitube, ngwanaboIkabode, yo e bego e le morwa wa Finease, morwa wa Eli, moprista wa Morena kua Shilo. Banna bao ba be ba sa tsebe gore Jonathane o sepetše. Kua sefateng sa Mikimase, se Jonathane a bego a swanetše go putla go sona go yo fihla mešašeng ya Bafilista, go be go le marako a mabedi a dintsupi ka mo le ka mo ga sefata: le lengwe le be le bitšwa Botsetse, mme le lengwe le bitšwa Senne. Le lengwe le be le le ka thoko ya leboa ya sefata, le lebane le Mikimase, mme le lengwe le le ka thoko ya borwa, le lebane le Geba. Jonathane a re go lesogana lela: “A re tshelele mola mešašeng ya Bafilista bale ba go se bolle. Mohlomongwe Morena a ka re thuša, gobane ga go se se ka mo šitišago go namolela batho, ka ba bantši goba ka ba ba sego nene.” Lesogana leo la mo fetola la re: “Se sengwe le se sengwe se o ratago go se dira, ke eme le wena.” Jonathane a re: “Go lokile. Re tla putlela mola mme ra dira gore Bafilista ba re bone. Ge ba ka re botša gore re ba letele ba tle go rena, gona re tla ema mo re lego gona. Fela ge ba ka re botša gore re rotogele go bona, gona re tla ya, ka gobane seo e tla ba sešupo sa gore Morena o ba gafetše diatleng tša rena.” Ka gona ba dira gore Bafilista ba ba bone, gomme Bafilista ba re: “Bonang! Baheberu ba bangwe ba tšwa ka meleteng ye ba bego ba utamile ka go yona!” Ke moo ba goeletšego Jonathane le lesogana lela ba re: “Rotogelang mono! Le tla re hwetša!” Jonathane a re go lesogana lela: “Ntšhale morago. Morena o ba gafetše diatleng tša Baisraele.” Jonathane a namelela ka matsogo le maoto, gomme lesogana lela la mo latela. A hlasela Bafilista a ba uša fase mme lesogana la ba bolaya. Moo polaong yeo ya mathomo Jonathane le lesogana lela ba ile ba bolaya banna ba e ka bago ba masome a mabedi felwaneng mo e ka bago seripa sa botelele bja tšhemo. Bafilista ka moka ba ba bego ba le kua nageng ba tšhoga; bašwahledi le bahlabani ba ba bego ba le mešašeng ba thothomela ka letšhogo; lefase la šikinyega, gomme gwa ba le tlalelo ye kgolo. Banna ba Saulo bao ba bego ba letile kua Gibea, nageng ya Benjamene, ba bona Bafilista ba tšhaba ba eya tlase le tletlolo. Ka fao Saulo a re go banna ba gagwe: “Balang bahlabani mme le boneng yo a sego gona.” Ba dira bjalo gomme ba hwetša gore Jonathane le lesogana le le bego le mo rwalela dibetša ga ba gona. Saulo a re go moprista Ahia: “Tliša seaparo se sekgethwa mo!” Ka letšatši leo Ahia o be a se swere pele ga banna ba Israele. Ya re Saulo a sa bolela le moprista, kgakanego ka mešašeng ya Bafilista ya golela pele le pele, ka gona Saulo a re go yena: “Ga go nako ya go nyakišiša thato ya Morena!” Ke moo yena le banna ba gagwe ba ipeakantšego ba ya ntweng, gomme moo ba hwetša Bafilista ba elwa seng sa bona kgakanegong ye kgolokgolo. Baheberu ba bangwe bao pele ba bego ba ile ba ema le Bafilista mme ba ya nabo mešašeng, ba ile ba ba hlanogela mme ba ikopanya le Saulo le Jonathane. Ba bangwe ba ba bego ba utamile nageng ya dithaba ya Efraime, ba kwa gore Bafilista ba a tšhaba, ka gona le bona ba ba rakediša mme ba lwa le bona go ba go yo fihla ka thoko yela ya Bethe-Abene. Morena a phološa Baisraele tšatši leo. Saulo o ile a kgareetša Baisraele kudu tšatši leo. O be a ba tlemile ka keno a re: “Go rogakwe yo a kago ja sejo se sengwenyana lehono pele ga ge ke itefeletša go manaba a ka.” Ka gona letšatši ka moka gwa se be le motho yo a latswago senjonyana. Ka moka ga bona ba ile ba fihla dithokgweng gomme ba hwetša mamapo a dinose mo gongwe le mo gongwe. Dithokgwa di be di tletše mamapo, eupša gwa se ke gwa ba le yo a a išago molomong ka gore ba be ba boifa thogako ya Saulo. Fela Jonathane o be a se a kwa tatagwe ge a tlema banna ka keno yela; ka gona a obeletša lepara le a bego a le swere a le korobetša lemapong, gomme a ja todi. Gatee fela a kwa a lapologile. Eupša yo mongwe wa banna a re: “Tatago o re tlemile ka keno ye bogale a re: ‘Go rogakwe yo a kago ja sejo se sengwenyana lehono.’ Ke ka baka leo banna ba ilego ba fokola.” Jonathane a mo fetola a re: “Ke taba ye šorošoro bjang ye tate a e dirilego batho ba gaborena! Bonang gore ke lapologile bjang ka gobane ke latswitše totšana! Go ka be go bile kaone kudu lehono ge banna ba ka be ba lle dijo tše ba di tšerego ge ba fenya manaba a bona. Ba ka be ba bolaile Bafilista ba bantšintši go feta mo!” Tšatši leo Baisraele ba ile ba fenya Bafilista, ba lwa go tloga Mikimase go yo fihla Ayalone. Ka nako yeo Baisraele ba be ba fokodišwa ke tlala kudu, ka gona ba kgorogela tše ba bego ba di thopile manabeng a bona, ba tšea dihuswane le dikgomo, ba di hlaba semeetseng, mme ba ja nama yeo e sa na le madi. Banna ba bangwe ba botša Saulo ba re: “Bona, batho ba dira sebe pele ga Morena ka go ja nama ye e sa nago le madi.” Saulo a re: “Ga le botegele Morena! Kgokološetšang letlapa le legolo go nna ka bjako.” A ba a re: “Šwalalanang le batho mme le ba botše gore ka moka ba tliše dihuswane le dikgomo tša bona mo. Ba swanetše go di hlabela mo mme ba di je; ga ba swanela go dira sebe pele ga Morena ka go ja nama ye e sa nago le madi.” Ka gona bošego bjoo yo mongwe le yo mongwe a tliša kgomo mme a e hlabela moo. Saulo a agela Morena aletare; ya ba ya mathomo ya tše a ilego a di aga. Saulo a re go banna ba gagwe: “A re theogeng re hlomareng Bafilista bošego, re ba šwahleleng go fihlela ka mahube mme re ba bolaye ka moka.” Bona ba mo fetola ba re: “Dira se o bonago se lokile.” Fela moprista a re: “A re nyakišišeng thato ya Modimo pele.” Ka gona Saulo a botšiša Modimo a re: “Na ke rakediše Bafilista? A o tla ba gafela diatleng tša rena?” Eupša tšatši leo Modimo a se ke a mo fetola. Ke moo Saulo a itšego go balaodi ba madira: “Tlaang mo le nyakišišeng le boneng gore ke sebe sefe se se dirilwego lehono. Ka Morena yo a phelago, yo a phološago Baisraele, monna yo a nago le molato o tla bolawa, le ge e ka ba morwa wa ka, Jonathane.” Fela gwa se ke gwa ba le yo a mo fetolago. Ke moo Saulo a itšego go bona: “Ka moka ga lena emelang mola, gomme nna le Jonathane re tla ema mo.” Banna ba mo fetola ba re: “Dira se o bonago se lokile.” Saulo a re go Morena Modimo wa Israele: “Morena, ke ka baka lang o se wa nkaraba, nna, mohlanka wa gago, lehono? Morena Modimo wa Israele, ge molato e le wa ka goba e le wa Jonathane, araba ka Urime, eupša ge e le wa bahlabani ba gago ba Israele, araba ka Tumime.” Karabo e ile ya šupa Jonathane le Saulo, mme banna ba tšwa molatong. Ke moo Saulo a itšego: “Šupang wa phošo mo go nna le morwa wa ka, Jonathane.” Gomme gwa šupša Jonathane. Ka gona Saulo a botšiša Jonathane a re: “A o dirile eng?” Jonathane a mo fetola a re: “Ke latswitše totšana ntlheng ya lepara le ke le swerego. Ke nna yo – nka no bolawa.” Saulo a re go yena: “A Modimo a mpolaye ge wena, Jonathane, o ka se bolawe!” Eupša banna ba re go Saulo: “Na Jonathane a ka bolawa mola e le yena a dirilego gore Israele e fenye ka mokgwa wo mogolo wo? Aowaa! Re ena ka Morena yo a phelago gore a ka se lahlegelwe le ke ntsana ya moriri wa hlogo. Se a se dirilego lehono se dirilwe ka thušo ya Modimo.” Ka gona banna ba hlakodiša Jonathane mme a se ke a bolawa. Ka morago ga moo Saulo a tlogela go rakediša Bafilista, gomme Bafilista ba gomela nageng ya bona. Ge Saulo e seno ba kgoši ya Israele, o ile a lwa le manaba a gagwe ka moka ka mathoko ohle: batho ba Moaba, ba Amone, le ba Edomo, magoši a Tsoba, le Bafilista. Mo gongwe le mo gongwe mo a lwago o be a fenya. O ile a lwa ka bogale gomme a ba a fenya le bona batho ba Amaleke. A phološa le Baisraele diatleng tša bahlakodi ba bona. Barwa ba Saulo e be e le Jonathane, Jishbi le Malkishua. Barwedi ba gagwe e be e le ba babedi: yo mogolo o ile a rewa leina la Merabe, mme yo monnyane a rewa la Migale. Mosadi wa gagwe e be e le Ahinoamo, morwedi wa Ahimaatse; molaodi wa madira a gagwe e le Abnere, morwa wa Nere, rangwane wa Saulo. Kishe, tatagoSaulo, le Nere, tatagoAbnere, e be e le barwa ba Abiele. Bophelong ka moka bja Saulo Baisraele ba be ba elwa le Bafilista o šoro. Ka gona, mo Saulo a bego a hwetša monna yo a tiilego goba yo bogale, o be a mo tsenya madireng a gagwe. Samuele o ile a re go Saulo: “Ke nna yo Morena a nthomilego go tlo go tlotša gore o be kgoši ya Israele. Bjale theetša se Morena Ramaatlaohle a se bolelago. Yena o tlile go otla batho ba Amaleke ka gobane borakgolokhukhu ba bona ba ile ba thibela Baisraele ge ba etšwa Egepeta. Sepela o yo hlasela Baamaleke, mme tšohle tše ba nago natšo o di fediše. O se ke wa šadiša selo; o bolaye banna, basadi, bana le masea; dikgomo, dihuswane, dikamela le dipokolo.” Saulo a kgobokanya madira a gagwe gomme a a beakanya kua Telaime: go be go na le bahlabani ba ba sepelago ka maoto ba dikete tše makgolo a mabedi ba ba tšwago Israele le ba dikete tše lesome ba ba tšwago Juda. Ke moka yena le banna ba gagwe ba ya motseng wa Amaleke gomme ba ba lalela ka molapong. Saulo a roma tshebi ya dira go Bakene, batho bao borakgolokhukhu ba bona e itšego ya ba ba botho go Baisraele ge ba etšwa Egepeta, ya ba botša ya re: “Sepelang le tlogeleng Baamaleke, gore ke se ke ka tla ka le feleletša le bona.” Ka gona Bakene ba tloga. Saulo a thopa Baamaleke go tloga Habila go yo fihla Shure, ka bohlabela bja Egepeta; a swara kgoši Agaga a phela gomme a bolaya setšhaba sa gagwe ka moka. Eupša Agaga Saulo le banna ba gagwe ba se ke ba mmolaya; le dihuswane le dikgomo le dikgapana le diphookwana tše di nonnego ba se ke ba di bolaya, le selo se sengwe le se sengwe se e bego e le se sebotse; ba ile ba bolaya fela tše di nyatšegago le tše ba sa di ratego. Morena a re go Samuele: “Ke a itshola ge ke ile ka dira Saulo kgoši; o ntlhanametše gomme o nyaditše ditaelo tša ka.” Samuele a befelwa, gomme bošego ka moka a phophotha go Morena. Ya re e sa le bošego ka le le latelago a tloga a yo nyaka Saulo. A kwa gore Saulo o ile motseng wa Karmele moo a bego a ikagetše segopotšo, gomme a ba a fetela Gilgale. Samuele a ya go Saulo mme Saulo a mo dumediša a re: “Morena a go šegofatše, Samuele! Ke phethile taelo ya Morena.” Samuele a mmotšiša a re: “Ke go reng bjale ke ekwa dikgomo le dihuswane di lla?” Saulo a mo fetola a re: “Banna ba ka ba di thopile go Baamaleke. Ba tšere dikgomo le dihuswane tše kaonekaone gore ba tle ba direle Morena Modimo wa gago sehlabelo ka tšona, mme tše dingwe tšona re di bolaile thoo.” Samuele a re go yena: “Homola, ke go botše se Morena a mpoditšego sona bošegong bjo bo fetilego.” Saulo a re: “Mpotše.” Samuele a re: “Le ge o itšea gore ga se wena wa selo, a ga o yena moetapele wa dikgoro tša Israele? Morena o go tloditše gore o be kgoši ya Israele, gomme a go roma a re o yo fediša badiradibe bale ba Amaleke. O go boditše gore o lwe le bona go fihlela o ba bolaya ka moka. Ke ka baka lang bjale, o se wa phetha ditaelo tša gagwe? Ke ka baka lang o akgofetše go thopa thoto, mme ka go dira bjalo wa dira se se nyamišago Morena?” Saulo a mo fetola a re: “Ke tloga ke phethile ditaelo tša Morena. Ke tšwile bjalo ka ge a mpoditše, ka boa le kgoši Agaga, gomme Baamaleke ka ba bolaya ka moka. Eupša banna ba ka ga se ba bolaya dihuswane le dikgomo tše kaonekaone tše ba di thopilego; bakeng sa seo, ba di tlišitše mo Gilgale go tlo direla Morena Modimo wa gago sehlabelo ka tšona.” Samuele a re: “A ke eng seo se kgahlago Morena kudu: go phetha ditaelo tša gagwe, goba go mo direla dihlabelo tša go tšhungwa ka moka le dihlabelo tše dingwe? Go kaone go mo theetša go na le gore o mo direle sehlabelo ka dikgapa tše kaonekaone. Go mo tsogela maatla ke mo gobe bjalo ka boloi, gomme go ikgogomoša ke sebe go swana le go rapela medimo e šele. Ka gobane o ganne taelo ya Morena, le yena o go ganne mme o ka se hlwe o le kgoši.” Saulo a mo fetola a re: “Ee, ke dirile sebe. Ga se ka phetha taelo ya Morena le tša gago ditaelo. Ke boifile banna ba ka mme ka dira se ba se nyakago. Eupša bjale ke a go kgopela, ntebalele sebe seo mme o boele le nna Gilgale, gore ke yo khunamela Morena.” Samuele a mo fetola a re: “Nka se boele nago. O ganne taelo ya Morena mme bjale le yena o go ganne, mme o ka se hlwe o le kgoši ya Israele.” Ke moo Samuele a retologilego a re ke a tloga, eupša Saulo a mo swara ka morumo wa seaparo, gomme wa gagoga. Samuele a re go yena: “Morena o gagotše bogoši bja Israele go wena lehono mme o bo neetše monna yo mongwe wa geno yo a go phalago. Modimo yo Baisraele ba ikgantšhago ka yena ga a bolele maaka goba a itshola. Ga se yena motho – ga a hlanoge.” Saulo a mo fetola a re: “Ke dirile sebe. Fela se ntlhompholle mo pele ga baetapele ba banna ba ka le pele ga Baisraele ka moka. Boela morago le nna gore ke yo khunamela Morena Modimo wa gago.” Ka gona Samuele a boela le yena Gilgale, gomme Saulo a khunamela Morena. Samuele a re: “Tlišang Kgoši Agaga mo go nna.” Agaga a tla go yena a thabile a ipotša a re: “Ka therešo bohloko bja lehu bo fetile!” Eupša Samuele a re: “Bjalo ka ge tšhoša ya gago e lobišitše basadi bana, bjale mmago le yena o tla loba ngwana.” Gomme a ripaganya Agaga pele ga aletare kua Gilgale. Ka morago Samuele a ya Rama, gomme Kgoši Saulo a ya gae kua Gibea. Samuele o ile a se hlwe a bonana le Saulo go fihlela a ehwa; le ge go le bjalo o ile a fela a nyamile ka baka la gagwe. Gomme Morena a itshola ge a ile a dira Saulo kgoši ya Israele. Morena a re go Samuele: “O tla fela o nyamišitšwe ke Saulo go fihlela neng? Ke mo lahlile mme e ka se hlwe e le kgoši ya Israele. Fela bjale tlatša lenaka la gago makhura a mohlware mme o ye Betlelehema go monna yo mongwe yo leina la gagwe e lego Isai, ka gobane ke kgethile yo mongwe wa barwa ba gagwe gore e be kgoši.” Samuele a mmotšiša a re: “A nka napa ka ya? Gape ge Saulo a ka e kwa, o tla mpolaya!” Morena a mo fetola a re: “O gape kgomo ya sethole gomme o bolele gore o tlile moo go tlo direla Morena sehlabelo. O laletše Isai moo sehlabelong, gomme ke tla go botša se o swanetšego go se dira. O tlotše monna yo ke tlago go laetša yena gore e be kgoši.” Samuele a dira se Morena a mmoditšego sona gomme a ya Betlelehema, moo a ilego a gahlanetšwa ke baetapele ba motse ba thothomela mme ba mmotšiša ba re: “A o re etetše ka khutšo, mmoni?” Yena a ba fetola a re: “Ee, ke tlile go direla Morena sehlabelo. Itlhwekišeng mme le yeng le nna sehlabelong.” O ile a botša le Isai le barwa ba gagwe gore ba itlhwekiše, gomme a ba laletša gore ba tle sehlabelong. Ge ba fihla, Samuele a bona Eliaba, morwa wa Isai, mme a ipotša a re: “Monna yo a emego fa pele ga Morena ka nnete ke yena yo a mo kgethilego gore a tlotšwe.” Eupša Morena a re go yena: “O se ke wa šetša seemo sa gagwe goba botelele bja gagwe. Ke mo nyaditše, ka gobane ga ke lebelele se se lebelelwago ke motho. Motho o lebelela sebopego, eupša nna ke lebelela pelo.” Ke moo Isai a biditšego morwa wa gagwe, Abinadaba, gomme a mo tliša go Samuele. Eupša Samuele a re: “Aowa, le yena Morena ga se a mo kgetha.” Ke moka Isai a tliša Shama. Samuele a re: “Aowa, le yena Morena ga se a mo kgetha.” Ka yona tsela yeo Isai a tliša ba ba šupago ba barwa ba gagwe go Samuele. Gomme Samuele a re go yena: “Aowa, Morena ga se a kgetha motho go ba ba lego mo.” Ke moo a botšišitšego Isai a re: “A ga o sa na le barwa ba bangwe?” Isai a mo fetola a re: “Go sa na le wa mafelelo, eupša yena o dišitše dinku.” Samuele a re: “Roma motho a yo mmitša. Re ka se dule ra ja a sešo a tla.” Ka gona Isai a roma motho gore a yo mmitša. Yena e be e le lesogana le le bopegilego le le phedilego gabotse, la mahlo a mabotse. Morena a re go Samuele: “Yo ke yena – mo tlotše!” Samuele a tšea lenaka la makhura a mohlware gomme a tlotša Dafida pele ga bomorwarragwe. Ka bjako moya wa Morena wa laola Dafida mme wa ba le yena go tloga ka letšatši leo. Ya ba gona Samuele a boelago Rama. Moya wa Morena wa tlogela Saulo, gomme moya wo mobe wo o rometšwego ke Morena wa mo tlaiša. Bahlanka ba gagwe ba re go yena: “Re a tseba gore moya wo mobe wo o rometšwego ke Morena o a go tlaiša. Ka gona, mong wa rena, re laele, rena bahlanka ba gago, gore re yo nyaka monna yo a tsebago go letša harepa. Ke mo e tlago re ge moya wo mobe o go tlela, monna yoo a letša harepa ya gagwe, gomme wa ba kaone.” Saulo a re go bona: “Nnyakeleng monna yo a tsebago go letša harepa gabotse mme le mo tlišeng go nna.” Yo mongwe wa masogana a kgoro ya gagwe a re: “Isai, wa motse wa Betlelehema, o na le morwa yo e lego seletši. Le gona ke monna yo bogale yo a bopegilego, mohlabani wa mmakgonthe le seboledi sa paale. Morena o na le yena.” Ka gona Saulo a roma batseta go Isai gore ba re: “Nthomele Dafida, morwa wa gago, yo a dišago dihuswane.” Isai a romela Dafida go Saulo le putšane, le pokolo e rwele dinkgwa, le lekuka la beine. Dafida a fihla go Saulo gomme a thoma go mo hlankela. Saulo a mo rata kudu, gomme ya ba morwaladibetša wa gagwe. Ke moo Saulo a romilego motseta go Isai a re: “A Dafida a fele a ntlhankela, ka gobane ke a mo rata.” Go tloga ka nako yeo, ge moya wo mobe wo o rometšwego ke Modimo o tlela Saulo, Dafida o be a tšea harepa ya gagwe a e letše. Moya wo mobe o nape o tloge, gomme Saulo a kwe a imologile mme a be kaone. Bafilista ba ile ba kgobokanela ntwa kua Soko, motseng wa Juda; ba hloma mešaša lefelong le le bitšwago Efese-Damime, kgathe ga Soko le Aseka. Saulo le Baisraele ba kgobokana mme ba hloma mešaša molaleng wa Ela, moo ba ilego ba ipeakanyetša go lwa le Bafilista. Bafilista ba ema mmotong wo mongwe gomme Baisraele ba ema go wo mongwe, ba kgaogantšwe ke moedi. Monna yo mongwe yo leina la gagwe e bego e le Goliate, wa motse wa Gathe, a tšwa mešašeng ya Bafilista. Yena e be e le mohlabani wa nkgwete. Botelele bja gagwe e be e ka ba dimetara tše tharo, gomme a apere seaparo sa boitšhireletšo sa mphiri sa dikgapetla seo se bego se imela dikilokramo tše e ka bago tše masome a mahlano a metšo ye e šupago, le kefa ya mphiri. Meomo ya gagwe le yona e be e šireleditšwe ka dišireletši tša mphiri, gomme a šikere letsolo la mphiri. Theko ya lerumo la gagwe e be e lekana le mpheng wa mogoma, gomme bogale bja lona bja tshipi bo imela dikilokramo tše e ka bago tše di šupago. Mohlabani o be a sepela pele ga gagwe a mo swaretše kotse. Goliate o ile a ema mme a goelela Baisraele a re: “A le dirang moo etšwe le foletše ntwa? Nna ke Mofilista, lena makgoba tenang a Saulo! Kgethang yo mongwe wa banna ba lena gore a theoge a tle a lwe le nna. Ge a ka lwa le nna a mpolaya, re tla ba makgoba a lena; eupša ge nka lwa le yena ka mmolaya, le tla ba makgoba a rena. Gonabjale ke hlohla lena madira a Baisraele, ke re ntšhang yo a kago lwa le nna!” Ge Saulo le banna ba gagwe ba ekwa seo, ba boifa ba tšhoga kudu. Dafida e be e le morwa wa Isai, yo e bego e le Moefrata wa Betlelehema kua Juda. Isai o be a na le barwa ba seswai, gomme ka nako ye Saulo e le kgoši, o be a šetše a tšofetše kudu. Barwa ba gagwe ba bararo ba bagolo ba be ba ile le Saulo ntweng. Mogolo wa bona e be e le Eliaba, yena a hlatlangwa ke Abinadaba, mme wa boraro e le Shama. Dafida e be e le phejane, gomme ge barwa bale ba bararo ba bagolo ba na le Saulo, yena o be a fela a ba tlogela mme a boela Betlelehema go yo diša dihuswane tša tatagwe. Goliate o ile a hlohla Baisraele matšatši a masome a mane mesong le mantšiboa. Ka letšatši le lengwe Isai a re go Dafida: “Tšea tekanyo ya ntlatla ya dithuthupe tše tša mabele le dinkgwa tše lesome tše, gomme o itlhaganele o di iše go bomorwarrago kua mešašeng. O tšee le ditšhese tše tše lesome o di iše go molaodi wa ba sekete. O bone ge bomorwarrago ba sa iketlile, mme o boe le se sengwenyana sa go laetša gore o ba bone le gore ba sa phela gabotse. Kgoši Saulo le bomorwarrago le Baisraele ka moka ba molaleng wa Ela ba lwa le Bafilista.” Dafida a tsoga e sa le bošego ka letšatši le le latelago, a tlogela dihuswane le modiši, a tšea dijo tšela, gomme a tloga bjalo ka ge Isai a mo laetše. A fihla mešašeng ka nako ye Baisraele ba bego ba etšwa ba eya mo ba bego ba folela ntwa gona, ba hlaba mokgoši wa ntwa. Madira a Bafilista le a Baisraele a ile a ema maemong a ona a ntwa a lebane. Dafida a tlogela dijo tšela le mohlokomedi wa dithoto, a kganyelela madireng a gabo, a ya go bomorwarragwe, gomme a ba botšiša gore ba phela bjang. Ya re a sa bolela le bona, Goliate a tšwa madireng a Bafilista mme a hlohla Baisraele bjalo ka ge a be a tlwaetše. Gomme Dafida a mo kwa. Ge Baisraele ba bona Goliate, ba tšhaba ba tšhogile. Ba botšana ba re: “Nke le mmoneng! Kwaang mahlapa a gagwe! Kgoši Saulo o tla fa monna yo a kago mmolaya moputso wo mogolo; kgoši o tla ba a fa monna yoo morwedi wa gagwe gore e be mosadi wa gagwe, le gona o tla ntšha ba lapa la tatagwe metšhelong.” Dafida a botšiša banna ba ba bego ba le kgauswi le yena a re: “A monna yo a ka bolayago Mofilista yo mme a lokolla Israele tabeng ye ya dihlong le re o tla putswa ka eng? Gabotsebotse, Mofilista yo wa go se bolle ke yena mang yo a ka nyatšago madira a Modimo yo a phelago?” Bona ba mmotša ka mo monna yo a ka bolayago Goliate a tlago putswa ka gona. Morwarrago Dafida yo mogolo, Eliaba, a mo kwa a bolela le banna bao. A befelelwa Dafida gomme a re: “O nyakang mo? Ke mang a šetšego le dihuswanyana tšela kua lešokeng? Ke tseba makokwana le mahlajana a gago, mošaa! O tlile fela go tlo bogela ntwa!” Dafida a mmotšiša a re: “A bjale ke dirile eng? Ke be ke no botšiša fela.” O ile a retologela go monna yo mongwe mme a mmotšiša yona potšišo yela, gomme ge a botšiša ba bangwe, o be a fetolwa ka wona mokgwa wola. Banna ba bangwe ba kwa se Dafida a se bolelago, gomme ba botša Saulo, yo a ilego laela gore a bitšwe. Dafida a re go Saulo: “Mong wa ka, go se ke gwa ba le yo a boifago Mofilista yo! Nna ke tla ya ka lwa naye.” Saulo a mo fetola a re: “Aowa. O ka lwa naye bjang? Wena o no ba mošemanyana, mme yena e bile mohlabani bophelo bja gagwe ka moka!” Dafida a re: “Nna, mohlanka wa gago, ke diša dihuswane tša tate. Nako efe le efe ge tau goba bere e swere kwanyana goba putšane, ke e šala morago, ka lwa nayo, ka phološa seruiwa seo ganong la yona. Gomme ge tau goba bere yeo e ntlhasela ke e swara ka megolo, ka e betha ka e bolaya. Ke bolaile ditau le dibere, gomme Mofilista yo wa go se bolle, yo a nyaditšego madira a Modimo yo a phelago, le yena ke tla mo dira sona seo. Morena yo a mphološitšego ditaung le dibereng, o tla mphološa le go Mofilista yo.” Saulo a mo fetola a re: “Go lokile. Sepela, mme Morena a be le wena.” Saulo a apeša Dafida diaparo tša gagwe tša ntwa: a mo rweša kefa ya mphiri, a mo apeša seaparo sa boitšhireletšo. Dafida a kgokelela tšhoša ya Saulo seaparong sa boitšhireletšo, eupša a se ke a kgona go sepela ka tšona, ka gobane o be a se a di tlwaela. A re go Saulo: “Ga ke kgone go sepela ke apere dilo tše. Ga se ka di tlwaela.” Ka gona a di apola ka moka. A tšea molamo wa gagwe wa go diša, a topa maswika a a fetšago seatla a boreledi ka molapong mme a a nokela ka mokotlaneng wa gagwe wa go ya madišong. A tšwa a batamela Goliate a swere seragamabje sa gagwe ka seatla. Mofilista yola a thoma go sepela a lebile Dafida, moswari wa kotse ya gagwe a sepela pele ga gagwe. O ile a fela a batamela, gomme ge a bona Dafida gabotse, a mo nyatša ka gobane e be e no ba mošemanyana yo mmotsana yo boletiana. A re go Dafida: “O swaretše mang molamo woo? A o gopola gore ke nna mpša?” Gomme a rogaka Dafida ka medimo ya gagwe. A ba a re: “Tlaa, mme ke tla fa manong le dibata setopo sa gago.” Dafida a mo fetola a re: “O tla go nna ka tšhoša le lerumo le letsolo, eupša nna ke tla go wena ka leina la Morena Ramaatlaohle, Modimo wa Baisraele, yo o mo nyaditšego. Lehono le Morena o tla go gafela diatleng tša ka; ke tla go fenya mme ka go ripa hlogo. Gomme ke tla fa manong le dibata ditopo tša bahlabani ba Bafilista. Ke mo lefase ka moka le tlago tseba gore Baisraele ba na le Modimo, mme yo mongwe le yo mongwe fa o tla bona gore Morena ga a iše felo ka ditšhoša le marumo go phološa setšhaba sa gagwe. Ke mofenyi ntweng, gomme o tla le gafela diatleng tša rena.” Goliate a thoma go batamela Dafida gape, gomme ka bjako Dafida a kitimela moo ntwa e bego e tla lwelwa gona. A tsenya seatla ka mokotlaneng wa gagwe a ntšha leswika, a betša Goliate ka lona ka seragamabje. Leswika la mo tia phatla, la mo pšhatla lešapo la hlogo, gomme Goliate a wela fase ka sefahlego. Ka gona Dafida a fenya Goliate, a mmolaya ka seragamabje le leswika a se a swara tšhoša. A kganyelela go yena, a mo emelela a hwanyolla tšhoša ya Goliate segatleng sa yona, gomme a mo ripa hlogo a mmolaya. Ge Bafilista ba bona gore mogale wa bona o hwile, ba tšhaba. Banna ba Israele le ba Juda ba hlahlamologa, ba goa mme ba ba kitimiša go ba go yo fihla Gathe le dikgorong tša Ekrone. Ditopo tša Bafilista tša rapalala tseleng ka moka ye e yago Shaharaime, go ba go yo fihla Gathe le Ekrone. Ge Baisraele ba boa ba tšo leleka Bafilista o šoro, ba thopa thoto ka moka mešašeng ya bona. Dafida a tšea hlogo ya Goliate a e iša Jerusalema, eupša dihlabani tša Goliate a di bea ka go wa gagwe mošaša. E ile ya re mola Saulo a bona Dafida a etšwa a yo lwa le Goliate, Saulo a botšiša Abnere, molaodi wa madira a gagwe, a re: “Abnere, a lesogana le ke morwa wa mang?” Abnere a mo fetola a re: “Ruri, ga ke tsebe, kgoši.” Saulo a re: “Gona sepela o yo botšiša.” Ka gona ge Dafida a boa a tšo bolaya Goliate, Abnere a mo iša go Saulo. Dafida o be a sa swere hlogo ya Goliate. Saulo a mmotšiša a re: “Lesogana, a o morwa wa mang?” Dafida a mo fetola a re: “Ke nna morwa wa mohlanka wa gago, Isai, wa Betlelehema.” Ge Dafida a feditše go bolela le Saulo, o ile a thopa pelo ya Jonathane, morwa wa Saulo, gomme Jonathane a thoma go mo rata bjalo ka ge a ithata. Saulo a tšea Dafida a dula le yena go tloga letšatši leo gomme a se ke a mo lesa a boela ga gabo. Jonathane a enela Dafida gore e tla ba mogwera wa gagwe wa go ya go ile ka baka la gore o be a mo rata kudu. A apola seaparo se a bego a se apere a se fa Dafida, gotee le seaparo sa gagwe sa boitšhireletšo le yona tšhoša ya gagwe le bora le lepanta. Dafida o ile a fenya dintweng tšohle tše Saulo a bego a mo romela go tšona, ka gona Saulo a mo dira yo mongwe wa balaodi ba madira a gagwe. Taba yeo ya kgahla setšhaba ka moka le bahlankedi ba Saulo. Ge Dafida a boa a tšo bolaya Goliate, bahlabani le bona ba boela gae, basadi ba motse wo mongwe le wo mongwe wa Israele ba tšwa go tlo gahlanetša Kgoši Saulo. Ba be ba opela ba hlaba mekgolokwane, ba bina, ba letša meropa le diharepa. Ge ba bina ba be ba opela ka go hlatlolana ba re: “Saulo o bolaile dikete, eupša Dafida o bolaile dikete tše masomesome.” Saulo o ile a se ke a rata taba yeo, gomme a befelwa kudu. A re: “Dafida ba re o bolaile dikete tše masomesome, eupša ge e le nna ba re ke bolaile dikete fela. Morago ga mo ba tla mmea kgoši!” Ka fao go tloga ka letšatši leo a tsebafela Dafida mme a mo lebelela ka leihlo le lebe. Ka letšatši le le latelago moya wo mobe wo o tšwago go Morena wa laola Saulo, gomme a goelela ka ngwakong wa gagwe bjalo ka segafa. Dafida o be a letša harepa, bjalo ka mehleng, gomme Saulo a swere lerumo. Saulo a re ka pelong: “Ke tla mo phuleletša ka mo pataganya le leboto,” gomme a mmetša gabedi ka lerumo, eupša Dafida a le phema makga ao a mabedi. Saulo o be a boifa Dafida ka gobane Morena o be a na le Dafida, fela yena Morena a mo tlogetše. Ka gona Saulo a mo tloša go yena mme a mo dira molaodi wa banna ba sekete. Dafida o be a eta banna ba gagwe pele ntweng, gomme a atlega go tšohle tše a di dirago, ka gobane Morena o be a na le yena. Saulo a bona go atlega ga Dafida gomme a thoma go mmoifa go fetišiša. Eupša yo mongwe le yo mongwe mo Israele le Juda o be a rata Dafida, ka gobane e be e le moetapele yo a atlegago kudu. Saulo a re go Dafida: “Morwedi wa ka yo mogolo, Merabe, šo. Ke tla go fa yena gore e be mosadi wa gago ge o ka ntlhankela o le mohlabani yo bogale yo a botegago, gomme wa lwa dintwa tša Morena.” Saulo o be a gopola gore ka tsela yeo Bafilista ba tla bolaya Dafida, mme gwa se hlwe go nyakega gore a mmolaye ka boyena. Dafida a mo fetola a re: “Ke nna mang? Gona kgorwana ya gešo le lapa lešo ke eng mo nka bago mokgonyana wa kgoši?” Eupša ge nako e fihla ya gore Merabe a fiwe Dafida, o ile a fiwa monna yo mongwe yo leina la gagwe e bego e le Adriele wa kua Mehola. Migale, morwedi yo mongwe wa Saulo, yena o be a rata Dafida, gomme ya re ge Saulo a ekwa taba yeo, a thaba. A re ka pelong: “Ke tla fa Dafida Migale; ke tla mo thea ka yena mme a bolawa ke Bafilista.” Ka gona lekga la bobedi Saulo a re go Dafida: “O tla ba mokgonyana wa ka.” A laela bahlankedi ba gagwe gore ba botše Dafida thopeng ba re: “O kgahla kgoši gomme bahlankedi ba gagwe ka moka ba a go rata; bjale ke nako ye botse ya gore o nyale morwedi wa gagwe.” Ka gona ba botša Dafida taba yeo, gomme yena a ba fetola a re: “Ga se selo se sennyane go ba mokgonyana wa kgoši, gomme nna ke no ba modiitšana le motho yo e sego wa selo.” Bahlankedi ba botša Saulo se Dafida a se boletšego, gomme Saulo a ba laela gore ba botše Dafida ba re: “Kgoši ga a go nyake magadi ge e se fela dintlhana tša merotwana ya Bafilista ba o ba bolailego ba lekgolo, gore a itefeletše manabeng a gagwe.” Ke ka moo Saulo a bego a rerile gore Dafida a bolawe ke Bafilista ka gona. Bahlankedi ba Saulo ba begela Dafida se Saulo a se boletšego, gomme Dafida a kgahlwa ke go ba mokgonyana wa kgoši. Pele ga ge letšatši le le beetšwego monyanya le fihla, Dafida le banna ba gagwe ba ya ba bolaya Bafilista ba makgolo a mabedi. A iša dintlhana tša merotwana ya bona go kgoši a mo fa tšona ka moka, gore e tle e be mokgonyana wa gagwe. Ka gona Saulo a tlemega go neela Dafida morwedi wa gagwe, Migale, gore e be mosadi wa gagwe. Saulo a bona gabotsebotse gore Morena o na le Dafida, le gore Migale, morwedi wa gagwe, o rata Dafida. Ka gona a boifa Dafida kudukudu gomme ya ba lenaba la gagwe bophelong bja gagwe ka moka. Balaodi ba Bafilista ba be ba fela ba etšwa dira, eupša ntweng ye nngwe le ye nngwe Dafida o be a atlega kudu go feta balaodi ka moka ba madira ba Saulo. Ka baka la taba yeo Dafida o ile a tuma kudu. Saulo o ile a botša morwa wa gagwe, Jonathane, le bahlankedi ba gagwe ka moka gore o ikemišeditše go bolaya Dafida. Eupša Jonathane o be a rata Dafida kudu, ka gona a re go yena: “Tate o leka go go bolaya. Hle, ka moswane e sa le bošego o hlokomele; o ye lefelwaneng la go utama mme o dule fao. Ke tla tla ka ema le tate kua nageng mo o utamilego gona, gomme ka bolela le yena mabapi le wena. Ge a ka mpotša se sengwe, ke tla go tsebiša.” Jonathane a bolela tše botse ka Dafida go Saulo a re: “A kgoši a se ke a dira mohlanka wa gagwe, Dafida, bobe. Ga se a ka a go phošetša le gatee; bakeng sa seo, se sengwe le se sengwe se a kilego a se dira se go hotše kudu. O ile a ipea kotsing ya lehu a bolaya Goliate, mme Morena a dira gore Baisraele ba fenye o šoro. O ile wa thaba ge o bona seo. Bjale o reng o nyaka go phošetša motho yo a se nago molato a etša Dafida ka go mmolaya ntle le lebaka?” Saulo a kgotsofatšwa ke seo Jonathane a se boletšego, gomme a ena ka leina la Morena gore a ka se bolaye Dafida. Ka gona Jonathane a bitša Dafida a mmotša tšohle; a mo iša go Saulo, gomme Dafida a hlankela kgoši bjalo ka pele. Go ile gwa tsoga ntwa le Bafilista gape. Dafida a ba hlasela mme a ba fenya o šoro mo e lego gore ba ile ba tšhaba. Ka letšatši le lengwe moya wo mobe wo o romilwego ke Morena wa tlela Saulo. O be a dutše ka ngwakong wa gagwe a swere lerumo la gagwe ka seatla, gomme Dafida a le fao a letša harepa. Saulo a leka go phuleletša le go pataganya Dafida le leboto ka lerumo, fela Dafida a phema, gomme lerumo la tsenelela lebotong. Dafida a tšhaba le bjona bošego bjoo. Saulo a romela banna gore ba yo leta ngwako wa Dafida le gore ba mmolaye mosong wo o latelago. Migale, mosadi wa Dafida, a re go yena: “Ge o ka se tšhabe bošego bjo, ka moswane o tla be o hwile.” A mo theoša ka lefasetere, gomme a hlanola direthe a tšhaba. Ke moo Migale a tšerego modimo wa seswantšho wa lapa, a o robadiša malaong, a o apeša hlogo ka tuku ya boya bja pudi, mme a o pipa ka kobo. Ge banna ba Saulo ba etla go tšea Dafida, Migale a ba botša gore o a babja. Eupša Saulo a re ba boele morago ba yo bona Dafida ka bobona. A ba laela a re: “Le mo rwaleng ka malao a gagwe le mo tliše mo gore ke mmolaye.” Ba tsena ka gare gomme ba hwetša modimo wola wa seswantšho wa lapa malaong o apešitšwe tuku hlogong. Saulo a botšiša Migale a re: “Ke ka baka lang o nthadiile ka mokgwa wo ka go thuša lenaba la ka gore le tšhabe?” Migale a mo fetola a re: “O ile a re o tla mpolaya ge nka se mo thuše gore a tšhabe.” Dafida o ile a tšhaba a ya go Samuele kua Rama, gomme a mmotša tšohle tše Saulo a mo dirilego tšona. Ke moo yena le Samuele ba ilego Nayote mme ba dula fao. Saulo a botšwa gore Dafida o Nayote kua Rama, ka gona a romela banna gore ba yo mo swara. Ba bona sehlopha sa baprofeta se bina se goa, Samuele e le moetapele wa sona. Ke moo moya wa Modimo o tlilego go banna ba Saulo, gomme le bona ba thoma go bina le go goa. Ge Saulo a ekwa taba yeo, a romela batseta ba bangwe, gomme le bona ba thoma go bina le go goa. A romela batseta la boraro, gomme le bona ba dira bjalo. Ke moo yena ka boyena a ilego Rama. Ge a fihla sedibeng se segolo kua Seku, a botšiša gore Samuele le Dafida ba kae, gomme a botšwa gore ba kua Nayote. Ge a le tseleng a eya gona, moya wa Modimo le yena wa mo laola, gomme a bina a goa go ba go yo fihla Nayote. A apola diaparo mme a bina a goa pele ga Samuele, gomme a rapalala a se a apara selo letšatši leo le bošego bjoo ka moka. Ke ka moo go hlolegilego polelo ye e rego: “Kgane Saulo le yena o fetogile moprofeta?” Dafida a tšhaba Nayote kua Rama gomme a ya go Jonathane. A mmotšiša a re: “A ke dirile eng? Ke molato ofe wo ke o obilego? Ke phošo efe ye ke e dirilego tatago gore a nyake go mpolaya?” Jonathane a mo fetola a re: “Aowaowaa, a ka se tsoge a go bolaile! Tate o mpotša tšohle tše a di dirago, tše kgolo le tše nnyane, gomme a ka se nkutele taba ye. Ga se therešo!” Dafida a mo fetola a re: “Tatago o tseba gabotse gore wena o a nthata, gomme o ikemišeditše gore a se ke a go tsebiša se a nyakago go se dira, ka gobane o ka kwa bohloko kudu. Ke ena ka Morena yo a phelago le ka wena gore ke kgauswikgauswi le lehu!” Jonathane a re: “Ke tla dira se sengwe le se sengwe se o se nyakago.” Dafida a mo fetola a re: “Ka moswane ke Monyanya wa Lebalana, gomme ke tlemegile go yo ja le kgoši. Eupša ntumelele gore ke yo utama kua nageng go fihlela mantšiboa a letšatši la go hlwa gosasa. Ge tatago a ka lemoga gore ga ke gona, o mmotše gore ke kgopetše tumelelo go wena gore ke itlhaganele ke ye gae Betlelehema, ka gobane kua ke nako ya sehlabelo sa ngwaga ka ngwaga sa lapa lešo ka moka. Ge a ka re: ‘Go lokile,’ nna, mohlanka wa gago, ke tla phologa; eupša ge a ka befelwa kudu, o tsebe gore o ikemišeditše go mpolaya. Hle, o nthuše ka mokgwa woo, ka gobane re enne pele ga Morena. Eupša ge eba ke na le molato, mpolaye ka bowena! Ke go reng go hlwa o re o nkiša go tatago gore ke yo bolawa?” Jonathane a mo fetola a re: “O se ke wa bolela taba ya mohuta woo! Ge nkabe ke tseba gabotsebotse gore tate o ikemišeditše go go bolaya, a o ra gore ke be nka se go botše?” Ke moo Dafida a mmotšišitšego a re: “Ke tla botšwa ke mang ge tatago a go fetotše a befetšwe?” Jonathane a mo fetola a re: “A re tšwe re ye kua nageng.” Ka gona ba ya, gomme Jonathane a re go Dafida: “A Morena Modimo wa Israele e be hlatse ya rena! Ka nako ye bosasa le ka letšatši le le latelago leo ke tla botšiša tate. Ge e le yo botho go wena, ke tla roma motho go wena a tlo go tsebiša. Ge a ikemišeditše go go bolaya, a Morena a mpolaye thoo ge nka se go tsebiše taba yeo gomme ka go tšhabiša o bolokegile. A Morena a be le wena bjalo ka ge a be a na le tate! Ge ke sa phela o nthate bjalo ka ge Morena a re rata; eupša ge ke hwile, o rate ba lapa la ka go ya go ile ka wona mokgwa woo, le ge Morena a šetše a fedišitše manaba a gago ka moka.” Ke ka mo Jonathane a tiišitšego kgwerano le ba lapa la Dafida. A ba a re: “Morena a otle manaba a Dafida.” Gapegape Jonathane a kgopela Dafida gore a ene gore o a mo rata, gobane yena o be a rata Dafida bjalo ka ge a ithata. A re go yena: “Ka gore ka moswane ke Monyanya wa Lebalana, go tla lemogwa gore ga o gona dijong, ka gobane madulong a gago go tla be go se na motho. Ka la go latela la ka moswane o theoge o ye lefelong lela wa go ka wa utama go lona ka nako yela, gomme o utame kgauswi le leswika la gona. Ke moka nna ke tla thunyetša mesebe ye meraro ka thoko ga leswika leo mo nkego go na le se ke se thunyago. Ke moka ka botša mohlanka wa ka gore a ye a e nyake. Gomme ge nka re go yena: ‘Bona, mesebe yela e ka mono ga gago; e tope,’ ke go re o bolokegile gomme o ka tšwa. Ke ena ka Morena yo a phelago gore o ka se hlagelwe ke kotsi. Eupša ge nka re go yena: ‘Mesebe yela e ka kua ga gago,’ gona o tloge, ka gobane Morena o tla be a re o sepele. Ge e le keno yela ya ka le wena, hlatse ya yona ya go ya go ile ke Morena.” Ka gona Dafida a utama kua nageng. Monyanyeng wa Lebalana Kgoši Saulo a tla dijong gomme a dula madulong a gagwe a ka mehla go ipata le leboto. Abnere a dula kgauswi le yena, gomme Jonathane a dula go lebana le yena. Madulong a Dafida gwa se ke gwa ba le motho, eupša Saulo a se ke a bolela selo ka letšatši leo, ka gobane o be a gopola a re: “Mohlomongwe o hlakane le seila, mme o tloga a tšhilafetše.” Ka letšatši le le latelago, letšatši la ka morago ga la Monyanya wa Lebalana, madulong a Dafida go be go se na motho gape, gomme Saulo a botšiša Jonathane a re: “Ke ka lebaka lang Dafida a se a tla dijong maabane le lehono?” Jonathane a mo fetola a re: “O nkgopetše gore ke mo dumelele a ye Betlelehema. O rile: ‘Hle, ntumelele ke ye, ka gobane lapa lešo le dira sehlabelo kua gae, gomme morwarre o ntaetše gore ke be gona. Ka gona, ge eba o mogwera wa ka, ntese ke yo bona meloko yešo.’ Lebaka ke lona leo ge o bona a se madulong a gagwe dijong.” Saulo a tukela Jonathane bogale gomme a re go yena: “Ngwana yo mobe wa mosadi wa senganga! Bjale ke a tseba gore o ema le Dafida mme o a ikgoboša gotee le yena yola mmago! Na ga o bone gore ge morwanyana yola wa Isai a sa phela mo lefaseng o ka se tsoge o bile kgoši ya naga ye? Napa o ntšhe banna ba mo late gomme wena o mo tliše mo – yena o swanetše go bolawa!” Jonathane a mo fetola a re: “Ke ka baka lang a swanetše go hwa? O dirile eng?” Saulo ge a ekwa tšeo a mmetša ka lerumo a re o a mo hlaba, gomme Jonathane a bona gore tatagwe o tloga a ikemišeditše go bolaya Dafida. Jonathane a emelela a tloga dijong a tuka bogale, gomme a se ke a ja selo letšatši leo – letšatši la bobedi la Monyanya wa Lebalana. O be a nyamile kudu ka baka la Dafida, ka gobane Saulo o be a mo rogile. Mosong wa le le latelago Jonathane a ya kua nageng go yo gahlana le Dafida, bjalo ka ge ba be ba kwane. A tloga le mošemane yo monnyane, gomme a re go yena: “Kitima o ye o tope mesebe ye ke tlago e thunya gonabjale.” Mošemanyana yoo a kitima, gomme Jonathane a thunyetša mosebe ka kua pele ga gagwe. Ge mošemanyana yola a fihla felo fa mosebe o wetšego gona, Jonathane a mo goeletša a re: “Mosebe o kua pele! Kitima kudu o itlhaganele!” Mošemane a topa mosebe wola gomme a gomela go mong wa gagwe a sa tsebe gore taba yeo e šupa eng; go be go tseba Jonathane le Dafida fela. Ke moo Jonathane a neetšego mošemane yola dibetša tša gagwe mme a mmotša gore a di boetše motseng. Ge mošemane a sepetše, Dafida a emelela kgauswi le leswika, a obama a itahlela fase ka sefahlego gararo. Bobedi bja bona, yena le Jonathane, ba be ba lla ge ba atlana; manyami a Dafida a be a bile a feta a Jonathane. Ke moo Jonathane a itšego go Dafida: “Modimo a be le wena. Morena o tla dira gore nna le wena le ditlogolo tša ka le tša gago re boloke keno ye nna le wena re e enetšego sa ruri ka leina la Morena.” Ke gona Dafida a tlogilego, gomme Jonathane a boela motseng. Dafida a ya go moprista Ahimeleke kua Nobo. Ahimeleke a tšwa a thothomela a tlile go mo gahlanetša gomme a mmotšiša a re: “O reng o tlile mo o le noši?” Dafida a mo fetola a re: “Ke tlile mo ka ditaba tša kgoši. O mpoditše gore ke se ke ka tsebiša motho se a nthomilego gore ke tle ke se dire. Ge e le banna ba ka bona, ke ba boditše gore ba nkgahlanetše lefelong le lengwe. Bjale ge, a o na le se o ka mphago sona? Hle, mphe dinkgwa tše di fetšago seatla goba se sengwenyana se o nago naso.” Moprista a re: “Ga ke sa na le dinkgwa tša mehleng; tše ke nago natšo ke dinkgwa tše kgethwa fela; o ka di tšea ge eba banna ba gago ga se ba robala le basadi kgauswinyana.” Dafida a mo fetola a re: “Aowa, ga se ba robala le basadi. Banna ba ka ka mehla ba fela ba itlhwekiša ge re etšwa ka ditaba tša ka mehla; bjale ba ka se itlhwekiše bjang lehono mola re bile re tšwile ka ditaba tše e sego tša mehleng!” Ka gona moprista a fa Dafida dinkgwa tšela tše kgethwa, ka gobane dinkgwa tše a bego a na le tšona e be e le fela tše di abetšwego Modimo, tše di bego di tlošitšwe tafoleng ye kgethwa mme legatong la tšona go beilwe tše di sa fišago. Mookamedi wa badiši ba maruo a Saulo, Doege, wa Edomo, o be a le moo ka letšatši leo, ka gobane o be a tlile go phetha tshwanelo ya sedumedi. Dafida a re go Ahimeleke: “A ga o na le lerumo goba tšhoša ye o ka mphago yona? Ditaelo tša kgoši di ntlošitše ka lephakuphaku ka ba ka hloka le nako ya go tšea tšhoša ya ka goba dibetša tše dingwe.” Ahimeleke a mo fetola a re: “Ke na le tšhoša ya Goliate, Mofilista, yola o mmolailego molaleng wa Ela; e ka mola morago ga seaparo se sekgethwa, e phuthetšwe ka lešela. Ge o e nyaka, e tšee – ke sona sebetša se nnoši mo.” Dafida a re: “Mphe yona. Ga go tšhoša ye e phalago yeo!” Ka gona Dafida a tloga a tšhaba Saulo, gomme a ya go Kgoši Akishe wa Gathe. Bakgomana ba Kgoši Akishe ba mmotšiša ba re: “A motho yo ga se Dafida, kgoši ya naga ya gabo? Yo ke monna yola basadi ba bego ba bina ba opela ka yena ba hlatlolana ba re: ‘Saulo o bolaile dikete, eupša Dafida o bolaile dikete tše masomesome.’ ” Ge Dafida a ekwa tše ba di bolelago, a thoma go boifa Kgoši Akishe kudu. Ka gona nako ye nngwe le ye nngwe ge ba le gona, Dafida o be a dira mo nkego ga a tšee gabotse mme a itshwara bjalo ka segafa ge ba leka go mo kgala; o be a ngwalangwala mo mamating a dikgoro tša motse gomme a intšha diteta di elela maledung. Ka gona Akishe a re go bakgomana ba gagwe: “Bonang! Monna yo o a gafa! Ke ka baka lang le mo tlišitše go nna? Ga ke re ke šetše ke na le digafa tše ntši mo? Bjale ke ka baka lang le ntlišetša se sengwe gape gore se tle se ntshwenye ka bogafa bja sona ka mo lapeng la ka?” Dafida a tšhaba motseng wa Gathe a ya leweng kgauswi le motse wa Adulamo. Ge bomorwarragwe le ba bangwe ka moka ba lapa ba ekwa gore o fao, ba yo dula naye. Batho ba ba bego ba le mathateng, le bao ba bego ba palelwa ke go lefa melato ya bona, le bao ba bego ba ngongorega ba ile ba ya go yena, ya ba banna ba e ka bago ba makgolo a mane, gomme yena ya ba moetapele wa bona. Go tloga moo Dafida a ya Mitsepa kua Moaba gomme a re go kgoši ya Moaba: “Hle, dumelela tate le mme ba tle ba dule nago go fihlela ke tseba se Modimo a tlilego go ntirela sona.” Ka gona Dafida a šadiša batswadi ba gagwe le kgoši ya Moaba, gomme ba dula moo nako ka moka ya ge Dafida a sa utamile ka sebong. Eupša moprofeta Gade a tla go Dafida mme a re: “O se ke wa dula mo; napa o tloge o ye nageng ya Juda.” Ka gona Dafida a tloga a ya sethokgweng sa Herete. Ka letšatši le lengwe Saulo o be a le Gibea, a dutše ka fase ga mohlare wa motamariske mmotong a swere lerumo la gagwe, gomme balaodi ka moka ba madira a gagwe ba eme kgauswi le yena. O ile a botšwa gore Dafida le banna ba gagwe ba bonwe, mme a re go balaodi ba gagwe: “Theetšang, lena banna ba Benjamene! A le gopola gore morwanyana yola wa Isai a ka tla a le fa mašemo le dirapa tša merara ka moka ga lena, gomme a dira yo mongwe le yo mongwe wa lena molaodi wa ba lekgolo goba wa ba sekete? A leo ke lona lebaka le le le dirago gore ka moka ga lena le ntakane? Ga go yo a kilego a ntoma tsebe gore morwa wa ka o gwerane le Dafida. Ga go yo a nkwelago bohloko gare ga lena goba yo a ntshebelago gore Dafida, mohlanka wa ka, ka nako ye o nyaka nthobana ya go mpolaya, le gore morwa wa ka o mo hlohleletša go dira taba yeo!” Doege o be a eme moo le balaodi ba madira a Saulo, gomme a re: “Ke bone Dafida nako yela a be a ile go Ahimeleke, morwa wa Ahitube, kua Nobo. Ahimeleke o ile a botšiša Morena se Dafida a swanetšego go se dira, gomme ka morago ga moo a fa Dafida mphago le tšhoša ya Goliate, Mofilista.” Ka gona Kgoši Saulo a roma batho gore ba yo bitša moprista Ahimeleke le meloko ya gagwe ka moka, bao le bona e bego e le baprista kua Nobo, gomme ba tla go yena. Saulo a re go Ahimeleke: “Theetša, wena morwa wa Ahitube!” Ahimeleke a re: “Ke theeditše, mong wa ka.” Saulo a mmotšiša a re: “Ke ka baka lang wena le Dafida le ntakane? Ke ka baka lang o mo file mphago le tšhoša, mme wa botšiša Modimo se a swanetšego go se dira? Bjale o nkemetše ka maoto gomme o nyaka nthobana ya go mpolaya!” Ahimeleke a mo fetola a re: “Dafida ke mohlankedi yo a go botegelago go feta bahlankedi ba gago ka moka. Ke mokgonyana wa gago, molaodi wa baleti ba gago, mme o hlompšha kudu kgorong ya mošate. Ee, ke botšišitše Modimo se a swanetšego go se dira, gomme e be e se la mathomo le gatee. Ge e le mabapi le go go lakana gona, kgoši a se ke a rweša mohlanka wa gagwe molato, goba a rweša yo mongwe melokong yešo molato. Ga ke tsebe selo ka taba yeo!” Kgoši a re: “Ahimeleke, o swanetše go hwa, wena le meloko ya geno ka moka.” Ke moo a itšego go baleti ba ba bego ba eme kgauswi le yena: “Bolayang baprista ba Morena! Ba lakane le Dafida gomme ba se ntome tsebe gore o tšhabile, le ge ba be ba tseba taba yeo nako ye ka moka.” Eupša baleti ba gana nnang go bolaya baprista ba Morena. Ka gona Saulo a re go Doege: “Wena ba bolaye!” Gomme Doege a ba bolaya ka moka. Ka letšatši leo a bolaya baprista ba masome a seswai a metšo ye e fetšago seatla, bao ba bego ba apara seaparo se sekgethwa. Saulo a laela le gore le batho ba bangwe ka moka ba Nobo, motse wa baprista, ba bolawe: banna le basadi, bana le masea, dikgomo, dipokolo le dinku – batho ba bolawa ka moka le diphoofolo. Eupša Abiatare, morwa yo mongwe wa Ahimeleke, a phologa, gomme a tšhabela go Dafida. A mmotša ka moo Saulo a bolailego baprista ba Morena ka gona. Dafida a re go yena: “Ke ile ge ke bona Doege kua tšatši lela, ka tseba gore ruri o ile go botša Saulo. Ka gona ke na le molato ge meloko ya geno ka moka e bolailwe. Dula le nna gomme o se ke wa boifa. Saulo o nyaka go bolaya nna le wena bobedi bja rena, eupša ge o na le nna o tla bolokega.” Dafida a kwa gore Bafilista ba hlasela motse wa Keila mme ba utswa mabele diboeng. Ka gona a botšiša Morena a re: “A nka ya ka hlasela Bafilista?” Morena a mo fetola a re: “Ee. Ba hlasele gomme o phološe ba Keila.” Eupša banna ba Dafida ba re go yena: “Ge ešita mo Juda re phela ka go boifa, re ka napa ra kgona go tšwa ra ya Keila mme ra hlasela madira a Bafilista!” Ka gona Dafida a botšiša Morena gape, gomme Morena a re go yena: “Sepela o yo hlasele Keila, ka gobane ke tla gafela Bafilista diatleng tša gago.” Ka gona Dafida le banna ba gagwe ba ya Keila mme ba hlasela Bafilista; ba ba bolaya ka bontši gomme ba thopa maruo a bona. Ke ka mokgwa woo Dafida a ilego a phološa ba motse woo. Mola Abiatare, morwa wa Ahimeleke, a tšhabela go Dafida kua Keila, o ile a tloga le seaparo se sekgethwa. Saulo a botšwa gore Dafida o ile Keila, gomme a re: “Modimo o mo gafetše diatleng tša ka, ka gobane o itswaleletše ka ge a tsene motseng wo dikgoro tša wona di nago le ditswalelo le mapheko.” Ka gona Saulo a rapa madira a gagwe gore a ye ntweng mme a theogele Keila, a dikanetše Dafida le banna ba gagwe. Ge Dafida a ekwa gore Saulo o itokišetša go mo hlasela, a re go moprista Abiatare: “Tliša seaparo se sekgethwa mo.” Ke moo Dafida a itšego: “Morena Modimo wa Israele, ke tloga ke kwele gore Saulo o itokišetša go tla mo Keila go tlo senya motse wo ka baka la ka, nna, mohlanka wa gago. Na baetapele ba Keila ba tla nkgafela go Saulo? A ka nnete Saulo o tla tla, bjalo ka ge ke kwele? Morena Modimo wa Israele, nke o mphetole!” Morena a mo fetola a re: “Saulo o tla tla.” Dafida a mmotšiša gape a re: “A bjale baetapele ba Keila ba tla gafela nna le banna ba ka diatleng tša gagwe?” Morena a mo fetola a re: “Ba tla le gafela.” Ka gona Dafida le banna ba gagwe – ba e ka bago ba makgolo a a selelago – ba tloga Keila ka bjako mme ba ithalalela le naga. Ge Saulo a ekwa gore Dafida o tšhabile Keila, a se hlwe a eya gona. Dafida o ile a phela ka dibong kua nageng ya dithaba, lešokeng la Sife. Saulo o be a mo nyaka ka mehla, eupša Modimo a se ke a gafela Dafida diatleng tša gagwe. Dafida a bona gore Saulo o tloga a nyaka go mmolaya. Dafida o be a le Horesha, kua lešokeng kgauswi le Sife. Jonathane a ya go yena fao gomme a mo kgothaletša go Modimo ka go mmotša gore Modimo o tla mo šireletša, a re go yena: “O se ke wa boifa. Tate Saulo a ka se go sware. Yena o tseba gabotse gore wena o tla ba kgoši ya Israele, le gore nna ke tla go latela ka maemo.” Bobedi bja bona ba dira kgwerano pele ga Morena. Dafida a šala Horesha, gomme Jonathane a ya gae. Batho ba bangwe ba Sife ba ya go Saulo kua Gibea gomme ba re: “Dafida o utamile nageng ya rena ka dibong kua Horesha thabeng ya Hakila, ka karolong ya ka borwa ya lešoka la Judea. Re a tseba, kgoši, gore o tloga o nyaka go mo swara; ka gona tlaa nageng ya rena, gomme rena re tla mo gafela diatleng tša gago.” Saulo a ba fetola a re: “A Morena a le šegofatše ka ge le nkwela bohloko! Sepelang le yo nyakišiša gape; le boneng gabotsebotse mo a lego gona, le gore ke mang yo a mmonego fao. Ke kwa gore ke moradiana kudu. Le nyakišišeng ka tlhokomelo mafelo ao a utamago go ona, mme ge le se no a tseba gabotse le tle le mpegele. Ke gona ke tlago ya le lena, gomme ge a sa le seleteng seo, ke tla mo tsoma go fihlela ke mo hwetša, le ge e ka ba ke tla tlemega go putuka dikgorwana ka moka tša Juda.” Ka gona ba tloga ba boela Sife ba etile Saulo pele. Dafida le banna ba gagwe ba be ba le lešokeng la Maone, ka moeding wo o se nago meetse karolong ya ka borwa ya lešoka la Judea. Saulo le banna ba gagwe ba ile ba tšwa go yo nyaka Dafida, eupša Dafida a sebelwa taba yeo gomme a ya lerakong lešokeng la Maone a fihla a dula gona. Ge Saulo a ekwa taba yeo, a šala Dafida morago. Saulo le banna ba gagwe ba be ba le ka lehlakoreng le lengwe la thaba, Dafida le banna ba gagwe ba le ka go le lengwe. Ba be ba itlhaganetše gore ba šie Saulo le banna ba gagwe bao ba bego ba ba potapota gore ba ba sware. Ka yona nako yeo gwa fihla motseta gomme a re go Saulo: “Boa ka pela! Bafilista ba šwahlela naga!” Ka gona Saulo a lesa go rakediša Dafida gomme a yo lwa le Bafilista. Ke ka baka leo felo fao go bitšwago Lerako la Kgaoganyo. Dafida a tloga a ya seleteng sa Engedi, moo a ilego a dula ka dibong. Ge Saulo a boa a tšo lwa le Bafilista, o ile a botšwa gore Dafida o lešokeng la Engedi. A tšea bahlabani ba dikete tše tharo ba a ba kgethilego mo Israele mme a tšama a nyaka Dafida le banna ba gagwe ka bohlabela bja Marako a Dikome. A fihla leweng le lengwe kgauswi le meraka ya dinku ka thoko ga tsela, gomme a tsena ka moo leweng go yo ithoma. Lewa leo e be e le lona lela Dafida le banna ba gagwe ba bego ba utamile ka go lona ba le kua moseoseo. Banna ba Dafida ba re go yena: “Bona, lehono ke letšatši lela Morena a bego a go botša lona ge a re: ‘Ke tla gafela lenaba la gago diatleng tša gago mme o le dire se o ratago go le dira sona.’ ” Dafida a khukhuna gomme a ripa morumo wa seaparo sa Saulo, Saulo a sa tsebe. Eupša letswalo la Dafida la thoma go mo tshwenya, gomme a re go banna ba gagwe: “A Morena a nthibele go gobatša mong wa ka, yo a mo kgethilego gore e be kgoši! Ga ke a swanela go mo gobatša le gannyane, ka gobane ke motlotšwa wa Morena!” Ka gona Dafida a kgala banna ba gagwe gore ba se ke ba hlasela Saulo. Saulo a emelela, a tšwa ka leweng, mme a wela tsela. Ke moo Dafida a ilego a mo šala morago mme a mo goeletša a re: “Kgoši ya ka!” Saulo a retologa, gomme Dafida a khunama, a obamiša sefahlego a re: “Ke ka lebaka lang o theetša batho ba ba rego ke leka go go kweša bohloko? O ka bona ka bowena gore gonabjale ka mo leweng Morena o go gafetše diatleng tša ka mo nkego o re ke go bolaye, eupša ke go kwetše bohloko mme ka re nka se gobatše mong wa ka le gannyane, ka gobane ke motlotšwa wa Morena. Lebelela, tate, bona morumo wa seaparo sa gago wo ke o swerego! Nkabe ke go bolaile, eupša ka no ripa morumo wo. Ka gona, iponele ka bowena mme o lemoge gore le gatee ga se ka ikemišetša go go gobatša goba go go tsogela maatla. O a ntsoma gore o mpolaye le ge ke se ka go phošetša. A Morena a ahlole gore ke mang yo a nago le phošo, nna goba wena! A Morena a ntefeletše ka wena; ge e le nna nka se go kweše bohloko le gatee. O tseba seema sa kgale se se rego: ‘Bobe bo dirwa fela ke batho ba babe.’ Ka gona nna nka se go kweše bohloko. Na kgoši ya Israele o hlomere mang? O rakedišang? O rakediša mpša ye e hwilego, letsetsenyana le tee! Moahlodi e tla ba Morena, mme a ahlola gore ke mang yo a nago le phošo, nna goba wena. O tla lebeledišiša taba ye, a ntšhireletša, mme a mphološa go wena.” Ge Dafida a feditše go bolela, Saulo a re: “A e tloga e le wena, Dafida, ngwanaka?” Gomme a thoma go lla. Ke moo a itšego go Dafida: “O mphala ka go loka. O bile yo botho go nna mola nna ke go dirile bobe! Lehono o laeditše gabotse gore o ntoketše, ka gobane ga se wa mpolaya, le ge Morena a be a nkgafetše diatleng tša gago. Kgane motho a ka re go swara lenaba la gagwe a le lesa le sepela a se a le kweša bohloko? Morena a go šegofatše ka baka la seo o ntiretšego sona lehono! Bjale ke gona ke bonago gabotse gore o tla ba kgoši ya Israele, le gore bogoši bo tla tšwela pele ge o sa buša. Fela nkenele ka leina la Morena gore o ka se bolaye ditlogolo tša ka, gore leina la ka le tle le se fedišwe.” Dafida a mo enela gore a ka se di bolaye. Ke moo Saulo a boetšego gae, gomme Dafida le banna ba gagwe ba boela sebong sa bona. Samuele o ile a hwa, gomme Baisraele ka moka ba kgobokana ba mo llela. Ka morago ba mmoloka ga gabo kua Rama. Ka morago ga fao Dafida a ya lešokeng la Parane. Go be go na le monna yo mongwe wa kgorwana ya Kalebe yo a bego a bitšwa Nabale. Yena o be a etšwa motseng wa Maone, mme a na le naga kgauswi le motse wa Karmele. E be e le monna wa mohumi kudu, a na le dinku tše dikete tše tharo le dipudi tše sekete. Abigaile, mosadi wa gagwe, e be e le yo mobotse a hlalefile, mola Nabale yena e le monna yo sehlogo le wa mekgwa ye mebe. E rile ge Nabale a kota dinku tša gagwe kua Karmele, *** Dafida a kwa taba yeo a le kua lešokeng. Ka gona a roma masogana a lesome a ba laela gore ba ye Karmele, gomme ge ba fihla go Nabale ba fihliše madume a gagwe go yena. A ba laela gore ba re go yena: “Nke o ka fela o atlega! Wena gotee le ba lapa la gago le iketle, le tšohle tše e lego tša gago di šegofatšwe. Ke kwele gore o kota dinku tša gago, gomme ke nyaka gore o tsebe gore badiši ba gago ba bile le rena mme ga se ra ka ra ba tshwenya. Banna ba ka ga se ba ka ba ba utswetša selo nakong ka moka ya ge ba le Karmele. Ba botšiše, gomme ba tla go botša. Masogana a ka a tlile ka letšatši la monyanya, gomme ke go kgopela gore o ba amogele gabotse. Hle, faa bahlanka ba gago le nna, Dafida, morwago, se o ka re fago sona.” Banna ba Dafida ba fihliša molaetša woo go Nabale ka leina la Dafida. Ke moka ba leta, gomme Nabale mafelelong a ba araba a re: “Dafida ke selo mang? Ke mang yena yoo morwa wa Isai? Mehleng yeno naga ye e tletše makgoba a a tšhabago! Nka se tšee dinkgwa tša ka le meetse le diruiwa tše ke di hlabetšego bakoti ba dinku tša ka, ka di fa banna ba ba tšwago mo ke sa go tsebego!” Banna ba Dafida ba boela go yena mme ba mmotša se Nabale a se boletšego. Dafida a re go bona: “Tlemelelang ditšhoša tša lena!” Gomme ka moka ba di tlemelela. Dafida le yena a tlemelela ya gagwe tšhoša, mme a tloga le ba e ka bago ba makgolo a mane, a tlogela ba makgolo a mabedi gore ba šale le dithoto. Yo mongwe wa bahlanka ba Nabale a re go Abigaile, mosadi wa Nabale: “A o kwele? Dafida o romile batseta a le lešokeng gore ba tle ba dumediše mong wa rena, eupša yena a ba fotlela, le ge ba be ba re swere gabotse ruri; ga se ba ka ba re tshwenya, gomme nako ka moka ge re be re šika le bona kua nageng re fudiša dihuswane, ga se ra ka ra lahlegelwa ke selo. Ba be ba re šireletša bošego le mosegare nako yeo ka moka ya ge re be re na le bona re dišitše mehlape ya rena. Hle, gopodišiša taba ye mme o bone se o kago se dira. Taba ye e ka wetša mong wa rena le lapa la gagwe ka moka kotsing ye kgolo. O na le hlogo ye thata mo e lego gore ga a nyake go theetša motho!” Abigaile a itlhaganela a tšea dinkgwa tše makgolo a mabedi, makuka a mabedi a beine, nama ya nku tše tlhano ye e budulego, dithuthupe tša dikilokramo tše lesome le tše di šupago, diphaphathi tše lekgolo tša makwapi a diterebe le diphaphathi tše makgolo a mabedi tša makwapi a mago, gomme a di nametša dipokolo. A re go bahlanka: “Etang pele gomme nna ke tla le latela.” Eupša a se ke a botša monna wa gagwe selo. Abigaile o be a nametše pokolo ya gagwe mo tsela e potologago thabana, ge ka bjako a gahlana le Dafida le banna ba gagwe ba etla go yena. Dafida o be a eleletša a re: “Ke ka lefela ge ke be ke šireletša thoto ya monna yola mo lešokeng! Ga go selo sa gagwe se se ilego sa utswiwa, gomme bjale o nteboga ka mokgwa wo! A Modimo a mpolaye thoo ge nka se bolaye banna bao ka moka pele ga ge letšatši le hlaba!” Ge Abigaile a bona Dafida, o ile a fologa ka bjako mme a obama, a itahlela fase ka sefahlego pele ga gagwe, a re go yena: “Hle, theetša se nna, mohlanka wa gago, ke se bolelago! A molato wo o rwalwe ke nna, mong wa ka. Nke o hlokomologe Nabale, ke selo fela! E no ba seo leina la gagwe le se rago – setlatla! Ke be ke se gona ge bahlanka ba gago ba goroga, mong wa ka. Gomme bjale ke ena ka Morena yo a phelago le ka wena gore ke Morena yo a go thibetšego go itefeletša wa bolaya manaba a gago. Nke manaba a gago le bohle ba ba nyakago go go kweša bohloko ba otlwe bjalo ka Nabale. Hle, mong wa ka, amogela seloba se ke go tlišeditšego sona, mme o se fe banna ba gago. Hle, ntebalele ge eba ke dirile phošo, nna, mohlanka wa gago. Morena o tla go dira kgoši, le tšona ditlogolo tša gago, ka gobane o lwa dintwa tša gagwe, gomme o ka se dire selo se sebe ge o sa phela. Ge motho a ka go hlomara a nyaka go go bolaya, Morena Modimo wa gago o tla go boloka, wena, mong wa ka, bjalo ka ge motho a boloka selo se bohlokwa. Ge e le manaba a gago ona, o tla a lahlela kgole, bjalo ka motho ge a foša letlapa ka seragamabje. Gomme mohla Morena a go direla tše botse ka moka tše a go holofeditšego tšona mme a go dira kgoši ya Israele, gona, mong wa ka, o ka se hlwe o itshola goba o ipona molato, mong wa ka, ge o bolaetše batho lefeela goba ge o itefeleditše. Gomme ge Morena a go šegofatša, mong wa ka, hle, o se ke wa ntebala, nna, mohlanka wa gago.” Dafida a re go yena: “A go retwe Morena Modimo wa Israele, yo lehono a go rometšego go tlo nkgahlanetša! A Modimo a go šegofatše ka baka la ge o gopotše gabotse, le ka baka la seo o se dirilego lehono ka go nthibela go oba molato wa go tšholla madi, le ka go nthibela go itefeletša ka bonna. Morena o nthibetše go go kweša bohloko. Eupša ke ena ka Modimo yo a phelago wa Israele gore mola o se ke wa itlhaganela go tla go nkgahlanetša, banna ba Nabale ka moka ba be ba tla be ba hwile mosong wa bosasa!” Ke moo Dafida a amogetšego tše Abigaile a bego a mo tlišeditše tšona, gomme a re go yena: “Boela gae mme o se ke wa tshwenyega. Ke kwele se o se bolelago mme ke tla dira se o se kgopelago.” Abigaile a boela go Nabale, yo a bego a le gae a dirile monyanya wo o swanelago kgoši. O be a tagilwe kudu mme a thabile, ka gona Abigaile a se ke a mmotša selo go fihlela mosong wa letšatši le le latelago. Ya re ge a tšwilwe ke bjala, Abigaile a mmotša tšohle. Pelo ya gagwe ya ema mme a repha ditho ka moka. Ka morago ga matšatši a e ka bago a lesome Morena a otla Nabale gomme a hwa. Ge Dafida a ekwa gore Nabale o hwile a re: “A go retwe Morena! O ntefeleditše go Nabale ka ge a nthogile, mme o thibetše nna, mohlanka wa gagwe, go dira phošo. Morena o otlile Nabale ka baka la bobe bja gagwe.” Ke moo Dafida a romilego bahlanka ba gagwe go Abigaile ka ditaba tša lenyalo. Bahlanka bao ba ya go Abigaile kua Karmele mme ba re go yena: “Dafida o re romile gore re tle re go tšee o yo ba mosadi wa gagwe.” Abigaile a obama, mme a re: “Ke nna mohlanka wa gagwe wa go hlapiša bahlanka ba gagwe maoto.” A itokiša ka pela mme a namela pokolo ya gagwe. A felegetšwa ke bahlanka ba gagwe ba basadi ba bahlano gomme a sepela le bahlanka ba Dafida, mme ya ba mosadi wa gagwe. Dafida o be a nyetše Ahinoamo wa Jesriele, gomme bjale Abigaile le yena ya ba mosadi wa gagwe. Ge e le Migale, morwedi yola wa Saulo yo e bego e le mosadi wa Dafida, Saulo o be a šetše a mo neetše Palti, morwa wa Laishe, yo e bego e le wa motse wa Galime. Banna ba bangwe ba Sife ba tla go Saulo kua Gibea gomme ba mmotša gore Dafida o utamile mmotong wa Hakila ka lešing la lešoka la Juda. Saulo a napa a ya lešokeng la Sife le bahlabani ba dikete tše tharo ba ba kgethilwego go yo nyaka Dafida, gomme a hloma mešaša ka thokong ga tsela mmotong wa Hakila. Dafida o be a sa le lešokeng, gomme ge a ekwa gore Saulo o tlile go mo nyaka, a roma dihlodi mme a kwa gore Saulo o tloga a le fao. Ka ntle le go senya sebaka a yo bontšhiša felo fao Saulo le Abnere, morwa wa Nere, molaodi wa madira a Saulo, ba bego ba robetše gona. Saulo o be a robetše gare ga mešaša, gomme banna ba gagwe ba hlomile ya bona mešaša go mo dikologa. Dafida a botšiša Ahimeleke, Mohete, le Abishai, morwarragoJoaba, mmagobona e be e le Tseruya, a re: “Ke mang mo go lena ba babedi a tlago ya le nna go Saulo kua mešašeng?” Abishai a mo fetola a re: “Ke tla ya nago.” Ka gona bošego bjoo Dafida le Abishai ba tsena mešašeng ya Saulo mme ba hwetša Saulo a robetše gare ga mešaša, lerumo la gagwe le tsemilwe fase kgauswi le hlogo ya gagwe. Abnere le madira ba be ba robetše ba mo dikologile. Abishai a re go Dafida: “Lehono Modimo o gafetše lenaba la gago diatleng tša gago. Bjale a ke mo thothobetše gatee fela ntle le go boeletša ka lerumo le phuleletše fase.” Eupša Dafida a re: “O se ke wa mmolaya! Ke mang yo a ka kwešago motlotšwa wa Morena bohloko mme a se ke a otlwa?” A ba a re: “Ka Morena yo a phelago ke a tseba gore yena Morena o tla bolaya Saulo ge nako ya gagwe ya gore a ikhwele ka boyena e fihla, goba ge a ehwa ntweng. Morena a nthibele go kweša motlotšwa wa gagwe bohloko! Tšea lerumo leo la gagwe le legapa la gagwe la meetse, re sepele.” Ka gona Dafida a tšea lerumo le legapa mola kgauswi le hlogo ya Saulo, gomme yena le Abishai ba tloga. Ga go yo a ilego a bona goba a tseba se se diregilego, goba a phafoga – ka moka ba be ba swerwe ke boroko, ka gobane Morena o be a ba swarišitše boroko bjo bogolo. Ke moo Dafida a tsheletšego ka mošola wa moedi, a ema godimo ga thaba a le kgolekgole le bona, gomme a goeletša bahlabani ba Saulo le Abnere a re: “Abnere! O a nkwa na?” Abnere a mmotšiša a re: “Ke wena mang o goeletšago mme o hlodiago kgoši?” Dafida a mo fetola a re: “Abnere, a ga se wena motho yo mogologolo mo Israele? Bjale ke ka baka lang o sa šireletše kgoši, mong wa gago? Gonabjale yo mongwe o be a tsene moo mešašeng go tlo bolaya yoo mong wa gago. Ga se wa dira mošomo wa gago, Abnere! Ke ena ka Morena yo a phelago gore ka moka ga lena le swanetše go bolawa, ka gobane ga se la šireletša mong wa lena, motlotšwa wa Morena. Bonang! Lerumo la kgoši le kae? A legapa lela la meetse le bego le le theng ga hlogo ya gagwe lona le kae?” Saulo a tseba lentšu la Dafida gomme a mmotšiša a re: “Dafida, a ke wena, ngwanaka?” Dafida a mo fetola a re: “Ee, kgoši.” A iša pele a re: “Ke ka baka lang, mong wa ka, o sa ntlhomere, nna, mohlanka wa gago? Ke dirile eng? Ke molato ofe wo ke o obilego? Kgoši, theetša se ke tlago se bolela. Ge eba ke Morena yo a go hlohleletšago gore o ntlhomare, gona mo neele sebego; eupša ge eba ke batho ba ba dirago seo, a Morena a ba rogake, ka gobane ba nthaka nageng ya Morena gore ke ye nageng ye go yona nka khunamelago fela medimo e šele. O se ke wa dira gore ke bolawe nageng e šele, kgole le Morena. Ke ka baka lang kgoši ya Israele a tlile go bolaya letsetsenyana le tee? Ke ka baka lang a ntsoma bjalo ka kgwale dithabeng?” Saulo a mo fetola a re: “Ke dirile phošo. Boa, Dafida, ngwanaka! Nka se tsoge ke go kwešitše bohloko gape, ka gobane o ntšhoketše bošegong bjo. Ke dirile tša botlaela, ka phoša kudu ke sa lemoge!” Dafida a mo fetola a re: “Lerumo la gago šele, kgoši. A yo mongwe wa banna ba gago a tle ka mošono a le tšee. Morena o putsa ba ba botegago gape ba lokilego. Lehono o ile a go gafela diatleng tša ka, fela ka se rate go go kweša bohloko, wena kgoši, motlotšwa wa Morena. Bjalo ka ge ke go šoketše lehono, a le nna Morena a ntšhokele gomme a ntokolle mathateng ka moka!” Saulo a re go Dafida: “Modimo a go šegofatše, ngwanaka! O tla atlega go tšohle tše o di dirago!” Ka gona Dafida a swara tsela ya gagwe, gomme Saulo le yena a boela gae. Dafida o ile a eleletša a re: “Ka letšatši le lengwe Saulo o tla mpolaya. Ga go se nka se dirago ge e se go tšhabela Filistia. Ke moo Saulo a tlago lesa go hlwa a nnyaka mo Israele, mme ke tla phologa.” Ke gona Dafida le banna ba gagwe ba makgolo a a selelago ba tsheletšego go Akishe, morwa wa Maoko, kgoši ya Gathe. Dafida le banna ba gagwe ba dula moo Gathe le malapa a bona. Dafida o be a na le basadi ba gagwe ka babedi, Ahinoamo wa Jesriele, le Abigaile, mohlologadi wa Nabale, wa Karmele. Ge Saulo a ekwa gore Dafida o tšhabetše Gathe, a lesa go mo nyaka. Dafida a re go Akishe: “Ge ke go kgahla a ke o mphe motse wo monnyane wo nka dulago go wona. Ke go reng ge nna, mohlanka wa gago, ke dula le wena mo motseng wa mošate?” Ka gona Akishe a mo fa motse wa Tsikelage mohlang woo, gomme ke ka lebaka leo Tsikelage e bilego motse wa dikgoši tša Juda go fihlela le lehono. Dafida o dutše fao Filistia ngwaga le dikgwedi tše nne. Mehleng yeo Dafida le banna ba gagwe ba be ba fela ba hlasela batho ba Geshure le ba Gesere le ba Amaleke, bao ba bego ba agile go tloga Telamo go yo fihla Shure le go yo fihla Egepeta. Yena le banna ba gagwe ba be ba bolaya banna ka moka le basadi ba gona, gomme ba tšea dihuswane, dikgomo, dipokolo, dikamela, le tšona diaparo. Ke moka a boele go Akishe, mme Akishe a mmotšiše a re: “A o tšo hula kae lehono?” Gomme Dafida a mmotše gore o tšwa ka borwa bja naga ya Juda, goba nageng ya kgorwana ya Jeragmeele, goba nageng yeo Bakene ba dulago go yona. Dafida o be a sa lese monna goba mosadi a phela gore a thopelwe Gathe, gore go se ke gwa ba le yo a ka begago seo Dafida le banna ba gagwe ba se dirilego. Seo ke se Dafida a se dirilego nako yeo ka moka ya ge a sa dula Filistia. Eupša Akishe o be a tshepha Dafida gomme a ipotša a re: “O hloilwe kudu ke Baisraele, setšhaba sa gabo, mo e lego gore e tla ba mohlanka wa ka bophelo bja gagwe ka moka.” Ka morago ga lebaka Bafilista ba rapa madira a bona gore ba lwe le Baisraele, gomme Akishe a re go Dafida: “O a tseba gore wena le banna ba gago le swanetše go re thikiša.” Dafida a mo fetola a re: “Go bjalo. Wena o tla bona se mohlanka wa gago a tlago se dira.” Akishe a re: “Go lokile. Ke go dira moleti wa ka wa ka mehla.” Bjale Samuele o be a šetše a hwile, gomme Baisraele ka moka ba mo lletše mme ba mmolokile motseng wa gabo wa Rama. Saulo o be a rakile dinoge le didupe Israele. Madira a Bafilista a ile a bokana, a tsena nageng ya Israele gomme a hloma mešaša kgauswi le motse wa Shuneme; Saulo a rapa bahlabani ka moka ba Baisraele gomme ba hloma mešaša thabeng ya Gilboa. Ge Saulo a bona madira a Bafilista, a boifa mme a thothomela a tšhogile. Ka fao a botšiša Morena gore a dire eng. Eupša Morena a se ke a mo fetola, le ge e le ka ditoro, goba ka Urime le Tumime, goba ka baprofeta. Ke moo Saulo a laetšego bahlankedi ba gagwe a re: “Nnyakeleng mosadi wa senoge, gomme ke tla ya ka mmotšiša.” Ba mmotša ba re: “Go na le yo mongwe kua Endoro.” Ka gona Saulo a itlhama ka mokgwa wa go gakantšha, a apara diaparo tše dingwe, mme ge leswiswi le swere a ya le banna ba gagwe ba babedi go mosadi yoo. A re go yena: “Mpotšišetše bahu gomme o mpotše se se tlilego go direga. Bitša mohu yo ke tlago go botša leina la gagwe.” Mosadi yoo a mo fetola a re: “O tseba gabotse se Kgoši Saulo a se dirilego, ka mo a rakilego dinoge le didupe mo Israele. Ke ka baka lang bjale o nyaka go nthea gore ke bolawe?” Ke moo Saulo a ennego a re: “Ka Morena yo a phelago o ka se kwešwe bohloko ka baka la taba ye.” Mosadi a mmotšiša a re: “A ke go rotošetše mang?” Saulo a mo fetola a re: “Nthotošetše Samuele.” Ge mosadi yoo a bona Samuele, o ile a hlaboša lentšu a lla a re go Saulo: “Ke ka baka lang o nthadiile? Ke wena Kgoši Saulo!” Kgoši a re go yena: “O se ke wa boifa! A o bona eng?” Mosadi a mo fetola a re: “Ke bona moya wa mohu o rotoga o etšwa fase.” Saulo a mmotšiša a re: “O swana le eng?” Mosadi a mo fetola a re: “Go rotoga mokgalabje. O apere seaparo se setelele.” Ke moo Saulo a tsebilego gore ke Samuele, gomme a obama, a itahlela fase. Samuele a re go Saulo: “Ke ka baka lang o ntshwenya ka go ntira gore ke rotoge?” Saulo a mo fetola a re: “Ke bothateng bjo bogolo! Bafilista ba ntšwetše dira, le Modimo o ntahlile. Ga a sa nkaraba, le ge e le ka baprofeta, le ge e le ka ditoro. Ka gona ke biditše wena gore o tle o mpotše gore ke dire eng.” Samuele a re: “O mpotšišetšang mola Morena a go lahlile mme a fetogile lenaba la gago? Morena o go dirile se a go boditšego sona ka nna: O go amogile mmušo gomme o o file Dafida, ka gobane ga se wa phetha taelo ya Morena wa fediša Baamaleke le tšohle tše e bego e le tša bona. Ke ka baka leo bjale Morena a go dirago dilo tše. O tla gafela wena le Baisraele diatleng tša Bafilista. Ka moswane wena le barwa ba gago le tla be le na le nna, gomme le gona Morena o tla gafela madira a Baisraele diatleng tša Bafilista.” Gatee fela Saulo a wa fase, a rapalala moo a tšhošitšwe kudu ke seo Samuele a se boletšego. O be a se na maatla, ka gobane o be a se a ja selo letšatši ka moka le bošego ka moka. Mosadi yola a ya go yena gomme a bona gore o tšhogile kudu, ka gona a re go yena: “Bona, nna, mohlanka wa gago, ke gafile bophelo bja ka ka dira seo o nkgopetšego sona. Bjale hle, le wena dira se ke go kgopelago sona. A ke go apeele dijo o je, gore o tle o be le maatla a go sepela.” Saulo a gana a re a ka se je selo. Eupša bahlankedi ba gagwe le bona ba mo tutuetša gore a je. Mafelelong a dumela, a tsoga mme a dula malaong. Mosadi yola a akgofa a hlaba namane ye e nonnego ye e bego e le mo gae. Ke moka a tšea bupi, a bo duba, mme a apea dinkgwa tše di se nago komelo. A bea dijo tšeo pele ga Saulo le bahlankedi ba gagwe, mme ba ja. Gomme ba tloga bjona bošego bjoo. Bafilista ba bokanya madira a bona kua Afeke, mola Baisraele ba hlomile mešaša kua sedibeng molaleng wa Jesriele. Magoši a Bafilista a sepela ka dikgao tša ona tša banna ba lekgolo le ba sekete; Dafida le banna ba gagwe ba be ba sepela ka morago le Kgoši Akishe. Balaodi ba madira ba Bafilista ba ba bona gomme ba botšiša ba re: “A Baheberu ba ba nyakang mo?” Akishe a ba fetola a re: “Yo ke Dafida, mohlankedi wa Kgoši Saulo wa Israele. E šetše e le nako ye telele bjale a na le nna. Ga se a ka a dira se nka mmonago molato ka sona go tloga ka lona letšatši lela a go tla go nna.” Eupša balaodi ba Bafilista ba befelelwa Akishe gomme ba re go yena: “Boetša moesa yoo motseng wo o mo filego wona. O se ke wa mo lesa a ya ntweng le rena; a ka re hlanamela ge go lwewa. A ka utswa pelo ya mong wa gagwe bjang ge e se ka go bolaya banna ba rena? Ntle le fao, yo ke Dafida, monna yola basadi ba bego ba opela ka yena ba bina ba re: ‘Saulo o bolaile dikete, eupša Dafida o bolaile dikete tše masomesome.’ ” Akishe a bitša Dafida a re go yena: “Ke ena ka Morena yo a phelago gore o mpotegetše; gomme go lokile ge o eya le nna wa hlabana ntweng ye. Ga go phošo ye ke ilego ka go bona yona go tloga ka letšatši lela wa go tla go nna. Eupša magoši ale a mangwe ga a go dumelele. Ka gona, ipoelele gae ka khutšo, gomme o se ke wa dira selo se se ka ba kgopišago.” Dafida a mo fetola a re: “A ke obile molato ofe? Ge go se phošo ye o kilego wa mpona yona, nna, mohlanka wa gago, go tloga ka letšatši lela ka go thoma go go hlankela, ke ka baka lang ke sa ye le wena, kgoši, mong wa ka, mme ka lwa le manaba a gago?” Akishe a mo fetola a re: “Ke a tseba gore o botega bjalo ka morongwa wa Morena. Eupša magoši ale a mangwe a boletše gore o se ke wa ya le rena ntweng. Ka gona, ka moswane ge go esa, wena le bao le tlogetšego Saulo mme la tla go nna, le tsogeng ka maswiswana mme le tlogeng ge go sela sa ruri.” Ka gona Dafida le banna ba gagwe ba thoma leeto ka moswane wa ntshe e sa le bošego ba boela Filistia, gomme Bafilista ba tšwela pele ba ya Jesriele. Ka morago ga matšatši a mabedi Dafida le banna ba gagwe ba fihla motseng wa bona wa Tsikelage. Baamaleke ba be ba šwahletše selete sa ka borwa sa Juda mme ba hlasela Tsikelage. Ba be ba tšhumile motse mme ba thopile basadi ka moka; ba be ba se ba bolaya motho, fela ba tšere batho bohle ge ba tloga. Ge Dafida le banna ba gagwe ba fihla, ba ile ba hwetša gore motse o tšhumilwe, le gore basadi ba bona le barwa le barwedi ba thopilwe. Dafida le banna ba gagwe ba hlaboša mantšu ba lla mme ba se ke ba homola go fihlela ba sa hlwe ba kgona go lla. Le bona basadi ba Dafida ka babedi, Ahinoamo le Abigaile, ba be ba thopilwe. Dafida bjale o be a le bothateng bjo bogolo, ka gobane banna ba gagwe ka moka ba be ba huduegile moyeng ge ba lahlegetšwe ke bana ba bona, mme ba šetše ba rera go mo kgatla ka maswika; eupša yena a ithekga ka Morena Modimo wa gagwe. Dafida a re go moprista Abiatare, morwa wa Ahimeleke: “Hle, ntlele le seaparo se sekgethwa.” Abiatare a mo tlišetša sona. Dafida a botšiša Morena a re: “A nka hlomara bašwahledi bale? A ke tla ba swara?” Morena a mo fetola a re: “Ba hlomare; ka nnete o tla ba swara mme wa phološa mathopša.” Ka gona Dafida le banna ba gagwe ba makgolo a a selelago ba wela tsela, gomme ge ba fihla nokaneng ya Besore, ba bangwe ba bona ba šala moo. Dafida a fela a swere tsela le banna ba makgolo a mane; ba bangwe bale ba makgolo a mabedi ba be ba lapile mo e lego gore ba ile ba šitwa ke go tshela nokana yeo, ka gona ba šala fao. Banna ba ba bego ba na le Dafida ba hwetša mošemane wa Moegepeta kua nageng gomme ba mo tliša go Dafida. Ba mo fa dijo le meetse le phaphathi ya makwapi a mago le diphaphathi tše pedi tša makwapi a diterebe. Ge a lle, a tielela gape. O be a se a ka a ja goba a nwa selo matšatši a mararo le mašego a ona. Dafida a mmotšiša a re: “Mong wa gago ke mang? O tšwa kae?” Mošemane a mo fetola a re: “Ke nna Moegepeta, lekgoba la monna wa Moamaleke. Mong wa ka o ntlogetše matšatši a mararo a go feta ka gore ke be ke babja. Re be re tšo šwahlela naga ya Bakereti karolong ya ka borwa ya Juda le naga ya kgorwana ya Kalebe, mme ra tšhuma Tsikelage.” Dafida a mmotšiša a re: “A o ka nkiša go bašwahledi ba gona?” Mošemane a mo fetola a re: “Nka go iša ge o ka nkenela ka leina la Modimo gore o ka se mpolaye goba wa mpušetša go mong wa ka.” Gomme a iša Dafida go bona. Bašwahledi ba be ba šwalalane le naga yeo, ba eja, ba enwa, mme ba keteka ka thoto ye ntšintši ye ba bego ba tšo e thopa Filistia le Juda. Ka letšatši le le latelago ka mahube Dafida a ba hlasela mme a lwa le bona go fihlela mantšiboa. Ntle le masogana a makgolo a mane ao a ilego a namela dikamela a tšhaba, go ile gwa se ke gwa phologa motho. Dafida a phološa batho bohle le dilo tšohle tše Baamaleke ba bego ba di thopile, gotee le basadi bale ba gagwe ka babedi; gwa se ke gwa ba le se a sa se hwetšego. Dafida a buša barwa le barwedi ba banna ba gagwe ka moka, le thoto ka moka ye Baamaleke ba bego ba e tšere. A buša le dihuswane le dikgomo tšohle; banna ba gagwe ba gapa diruiwa ka moka kua pele ga gagwe gomme ba re: “Tše ke tša Dafida!” Ke moo Dafida a boetšego go banna bale ba makgolo a mabedi bao ba bego ba lapile kudu go ka sepela le yena mme ba šala nokaneng ya Besore. Ba ile ba tla go gahlanetša Dafida le banna ba gagwe, gomme yena a ba batamela a ba botšiša gore ba šetše bjang. Eupša banna ba bangwe ba babe ba go se re selo ba ba bego ba ile le Dafida ba re: “Ga se ba ya le rena, ka gona ga go thoto ye re ba fago yona. Ba ka tšea basadi le bana ba bona ba sepela.” Eupša Dafida a ba fetola a re: “Bagešo, le se ke la dira bjalo ka tše Morena a re filego tšona! O re bolokile gomme a gafela bašwahledi diatleng tša rena. Ga go yo a ka kwanago le seo le se bolelago! Ka moka re swanetše go abelana ka go lekana: yo a šetšego le dithoto o fiwa kabelo ya go lekana le ya yo a tšwago ntweng.” Dafida a dira taba yeo molao, gomme wa phethwa ke Baisraele go tloga wona mohlang woo. Ge Dafida a boile Tsikelage o ile a romela thoto ye nngwe go bagwera ba gagwe, baetapele ba Juda, a re: “Ye ke mpho ya lena ye e tšwago thotong ye re e tšerego go manaba a Morena.” A e romela go batho ba Bethele, le ba Ramate karolong ya ka borwa ya Juda, le go ba motse wa Jatire, le wa Aroere, le wa Sifmote, le wa Eshtemoa, le wa Rakale; a e romela le go kgorwana ya Jeragmeele, le go Bakene, le go batho ba motse wa Horma, le wa Boro-Ashane, le wa Athake, le wa Hebrone. A e romela le mafelong a mangwe ka moka ao yena le banna ba gagwe ba bego ba kile ba ralala go ona. Bafilista ba ile ba lwa le Baisraele thabeng ya Gilboa. Baisraele ba bantši ba bolawa moo, gomme ba ba šetšego ba tšhaba. Eupša Bafilista ba rakediša Saulo le barwa ba gagwe, e lego Jonathane, Abinadaba le Malkishua, gomme ba bolaya barwa bao. Ntwa ya ba ye šoro mo go bego go le Saulo, gomme ge boramesebe ba mmatamela mo ba kago mo thunya ka mesebe, a thothomela kudu. A re go morwaladibetša wa gagwe: “Hwanyolla tšhoša ya gago o mphuleletše ka yona, gore ke se ke ka tla ka phuleletšwa ke Bafilista ba ba go se bolle, gomme ba nkwera.” Eupša morwaladibetša yoo a boifa kudu go ka dira taba yeo. Ka gona Saulo a tšea tšhoša ya gagwe ka boyena a itahlela go yona. Ge morwaladibetša yoo a bona gore Saulo o hwile, le yena a itahlela godimo ga ya gagwe tšhoša mme a hwa le Saulo. Ke ka moo Saulo le barwa ba gagwe ka bararo le morwaladibetša yola ba hwilego ka gona; le banna ka moka ba Saulo ba hwa ka letšatši leo. Ge Baisraele ba ka mošola wa moedi wa Jesriele le ba ka bohlabela bja noka ya Jordane ba ekwa gore madira a Baisraele a tšhabile, le gore Saulo le barwa ba gagwe ba bolailwe, ba tlogela metse ya bona mme ba tšhaba. Ke moo Bafilista ba tlilego mme ba dula go yona. Ka letšatši le le latelago la ntwa Bafilista ba yo hula ditopo, gomme ba hwetša setopo sa Saulo le tša barwa ba gagwe ka bararo di rapaletše thabeng ya Gilboa. Ba ripa Saulo hlogo, ba mo apola diaparo tša gagwe tša ntwa, gomme ba roma batseta nageng ka moka ya Filistia go tsebagatša ka ditempeleng tša medimo ya bona le go botša batho ba gabobona gore Baisraele ba fentšwe. Ka morago ba bea dibetša tša Saulo ka tempeleng ya modimo wo motshadi, Astarte, gomme ba kokotela setopo sa gagwe lebotong la motse wa Bethe-Sheane. Ge batho ba Jabeshe kua Gileade ba ekwa seo Bafilista ba se dirilego Saulo, banna bohle ba bogale ba wela tsela gomme ba sepela bošego ka moka ba ya Bethe-Sheane. Ba fegolla setopo sa Saulo le tša barwa ba gagwe lebotong, ba di bušetša Jabeshe, gomme ba di tšhuma moo. Ba tšea mašapo a tšona ba a boloka ka fase ga mohlare wa motamariske ka gare ga motse, mme ba ikona dijo matšatši a a šupago. Ka morago ga lehu la Saulo Dafida o ile a boa a tšo fenya Baamaleke, gomme a dula Tsikelage matšatši a mabedi. Ka letšatši le le latelago gwa tla lesogana le lengwe le etšwa mešašeng ya Saulo. Go laetša gore le be le nyamile, le be le gagotše diaparo tša lona mme le itšhetše hlogo ka mobu. La ya go Dafida gomme la obama, la itahlela fase. Dafida a le botšiša a re: “A o tšwa kae?” Lesogana la re: “Ke tšhabile mešašeng ya Baisraele.” Dafida a re: “Mpotše se se diregilego.” Lesogana la mo fetola la re: “Madira a rena a tšhabile ntweng, gomme banna ba rena ba bantši ba bolailwe. Saulo le morwa wa gagwe, Jonathane, le bona ba bolailwe.” Dafida a mmotšiša a re: “A o tseba bjang gore Saulo le Jonathane ba hwile?” Lesogana la mo fetola la re: “Ke rile ke le thabeng ya Gilboa ka bona Saulo a itshwareletše ka lerumo la gagwe mme makoloi a ntwa a manaba le banamedi ba dipere ba šetše ba mmatamela. Ke moka Saulo a retologa, a mpona, gomme a mpitša. Ka mo fetola ka re: ‘Tama!’ A mpotšiša gore ke nna mang, gomme ka mmotša gore ke nna Moamaleke. Ke moo a itšego: ‘Tlaa mo o mpolaye! Ke gobetše kudu, gomme ke kgauswi le go hwa.’ Ka gona ka ya go yena ka mmolaya, ka gobane ke be ke tseba gore o tla no ikhwela ge a ka wa. Ke moka ka mo rola mphapahlogo wa bogoši le mpshiri letsogong, gomme ke di tlišitše go wena, mong wa ka.” Dafida a gagola diaparo tša gagwe a nyamile, gomme le banna ba gagwe ka moka ba dira bjalo. Ba hlokofala ba lla gomme ba ikona dijo go fihlela mantšiboa ka baka la Saulo le Jonathane le setšhaba sa Morena sa Israele, ka gobane go be go bolailwe ba bantši ntweng. Dafida a botšiša lesogana leo le bego le mmoditše ditaba tšeo a re: “A o tšwa kae?” Lesogana la mo fetola la re: “Ke nna mofaladi wa Moamaleke.” Dafida a mmotšiša a re: “Go tlile bjang gore o be le sebete sa go bolaya kgoši, motlotšwa wa Morena?” Ke moo Dafida a biditšego yo mongwe wa banna ba gagwe a re: “Mmatamele o mmolaye!” Monna yoo a itia Moamaleke yola a mmolaya, gomme Dafida a re go yena: “O ipolaile. O ikgogoletše magala hlogong ka go bolela gore o bolaile kgoši, motlotšwa wa Morena.” Dafida a llela Saulo le morwa wa gagwe, Jonathane, ka kopelo ye ya mesebe gomme a laela gore e rutwe batho ba Juda. Yona e ngwadilwe mo Pukung ya Moloki. “Mebotong ya Israele dikgwari tša rena di bolailwe! Bagale ba rena ba wele bjang! Le se ke la di bega kua Gathe goba la di kwalakwatša mekgotheng ya Ashkelone, gore basadi ba Filistia ba se ke ba kgahlega, barwedi ba bahetene ba hlalala. “A go se ke gwa na pula goba gwa wa phoka dithabeng tša Gilboa; a mašemo a gona ka mehla e be mahwafa! Gobane dikotse tša bagale di gatakilwe moo tša tšhilafatšwa; kotse ya Saulo ga e sa tlotšwa makhura. Mosebe wa Jonathane o be o tšwelelela, tšhoša ya Saulo e sa boe fela mading a ba ba bolailwego, e ntšha mabipi a ba maatla. “Saulo le Jonathane, batho ba go ratega ba go thabiša, ba bile mmogo bophelong, mmogo le lehung; ba be ba šia manong ka lebelo, ba tiile go feta ditau. “Basadi ba Israele, llelang Saulo! O le apešitše diaparo tše botse tše khubedu, a di rokelela dikgabišo tša gauta. “Bagale ba rena ba wele bjang ntweng! Jonathane o bolailwe, o rapaletše mebotong. “Ke manyaming ka baka la gago, ngwanešo Jonathane; ke be ke go rata kudu! O mmakaditše ka lerato la gago, la go phala le lerato la basadi. “Bagale ba rena ba wele bjang! Beng ba marumo ba bolailwe.” Ka morago ga tšeo Dafida a botšiša Morena a re: “A nka yo dula motseng wo mongwe wa Juda?” Morena a mo fetola a re: “Ee.” Dafida a mmotšiša gape a re: “Ke ye motseng ofe?” Morena a re: “Hebrone.” Ka gona Dafida a ya Hebrone, a tloga le basadi ba gagwe ka babedi: Ahinoamo, yo a bego a etšwa Jesriele, le Abigaile, mohlologadi wa Nabale, yo a bego a etšwa Karmele. A tšea le banna ba gagwe le malapa a bona, gomme a yo dula metseng ye e bapilego le Hebrone. Ke moka banna ba Juda ba tla Hebrone mme ba tlotša Dafida gore e be kgoši ya Juda. Ge Dafida a ekwa gore batho ba Jabeshe kua Gileade ba bolokile Saulo, a roma banna ba bangwe kua gore ba ba botše ba re: “Nke Morena a le šegofatše ka ge le botegetše mong wa lena, Saulo, ka go mmoloka. Gomme bjale a Morena e be yo botho go lena mme a le botegele. Le nna ke tla le swara gabotse ka baka la seo le se dirilego. Tiang maatla le beng ba bogale! Mabu a utswitšwe Israele, gomme batho ba Juda ba tloditše nna gore ke be kgoši ya bona.” Molaodi wa madira a Saulo, Abnere, morwa wa Nere, o be a tšhabetše ka mošola wa Jordane kua Mahanaime le Ishboshete, morwa wa Saulo. Moo Abnere a bea Ishboshete kgoši ya naga ya Gileade le ya Asere le ya Jesriele le ya Efraime le ya Benjamene – gabotsebotse a mmea kgoši ya Baisraele ka moka. O be a na le mengwaga ye masome a mane ge a bewa kgoši ya Israele, gomme a buša mengwaga ye mebedi. Eupša kgoro ya Juda e ile ya botegela Dafida, gomme yena a buša Juda a le Hebrone mengwaga ye e šupago le seripa. Abnere le bahlankedi ba Ishboshete ba tloga Mahanaime ba ya motseng wa Gibeone. Joaba, yo mmagwe e bego e le Tseruya, le bahlankedi ba bangwe ba Dafida ba ya ba gahlana nabo kua mogobeng, moo ka moka ba ilego ba dula fase, sehlopha se sengwe se le ka thoko ye ya mogobe mme se sengwe se le ka thoko yela se lebane le sona. Abnere a re go Joaba: “A go tšwe masogana a mangwe mahlakoreng ka mabedi gore a lwe ka marumo.” Joaba a mo fetola a re: “Go lokile.” Ka gona banna ba lesome le ba babedi ba ba emetšego Ishboshete le kgoro ya Benjamene ba lwa le banna ba lesome le ba babedi ba Dafida. Monna yo mongwe le yo mongwe a swara yo a lwago naye ka hlogo gomme a mo tsetsemetša ka tšhoša lehlakoreng, mme banna bao ba masome a mabedi le ba bane ba bolayana. Ka gona felo fao kua Gibeone go bitšwa “Molala wa Ditšhoša”. Ka morago gwa tsoga ntwa ye šoro, gomme Abnere le Baisraele ba fenywa ke banna ba Dafida. Barwa ba Tseruya ka bararo ba be ba le moo, Joaba, Abishai le Asahele. Asahele, yo a bego a na le lebelo la tshephe, o ile a thoma go lelekiša Abnere, a kitima a mo lebantše. Abnere a lebelela morago mme a re: “Asahele, a ke wena?” Asahele a mo fetola a re: “Ee, ke nna.” Abnere a re: “Tlogela go ntelekiša! Rakediša yo mongwe wa bahlabani mme o thope se a nago le sona.” Eupša Asahele a se ke a dumela go mo tlogela. Abnere a re go yena gape: “Tlogela go ntelekiša! Ke ka baka lang o nkgapeletša gore ke go bolaye? Ke tla lebelelana bjang le Joaba, morwarrago?” Eupša Asahele a gana go mo tlogela; ka gona Abnere a kutologela morago ka lerumo la gagwe, a mo phuleletša dimpa gore lerumo le be le tšwelelele ka mokokotlong. Asahele a wa fase a hwela gona moo, gomme mang le mang yo a fetago fao a bego a rapaletše gona, o be a ema moo a mo llela. Eupša Joaba le Abishai ba kitimiša Abnere, gomme ge letšatši le dikela ba fihla mmotong wa Ama, wo o lego ka bohlabela bja Giage tseleng ya lešoka la Gibeone. Banna ba kgoro ya Benjamene ba kgobokana ba ema le Abnere godimo ga mmoto. Abnere a goelela Joaba a re: “A re tla jana ka marumo go fihlela neng? Ga o bone gore mafelelong e tla ba fela manyami? Re bana ba motho. O tla laela neng banna ba gago gore ba se hlwe ba re rakediša?” Joaba a mo fetola a re: “Ke ena ka Modimo yo a phelago gore mola o se ke wa bolela, banna ba ka ba be ba tla le rakediša go fihlela ka moswane mosong.” Ke moo Joaba a leditšego phalafala, gomme banna ba gagwe ka moka ba ema ba se hlwe ba rakediša Baisraele; ka gona ntwa ya fela. Abnere le banna ba gagwe ba putla moedi wa Jordane bošego bjoo ka moka; ba tshela noka yeo mme ba sepela mosong ka moka wa letšatši le le latelago, ba ba fihla Mahanaime. Ge Joaba a lesa go ba rakediša, o ile a kgobokanya banna ba Dafida ka moka gomme a lemoga gore ba lesome le ba senyane ga ba gona, ka ntle le Asahele. Bahlabani ba Dafida ba be ba bolaile banna ba makgolo a mararo le masome a a selelago ba Abnere ba kgoro ya Benjamene. Joaba le banna ba gagwe ba tšea setopo sa Asahele gomme ba se boloka ka lebitleng la lapa labo kua Betlelehema. Ka morago ba sepela bošego ka moka, mme ge go esa ba fihla Hebrone. Ntwa ya bahlabani ba ba bego ba eme le lapa la Saulo le bao ba bego ba eme le la Dafida e ile ya tšea nako ye telele. Ge Dafida a tia maatla go iša pele, bao ba lwago le yena bona ba be ba fokola go ya pele. Dafida o ile a belegelwa barwa ba ba selelago ge a le Hebrone. Bona šeba ka go latelana ka matswalo: Amnone, yo mmagwe e bego e le Ahinoamo, wa go tšwa Jesriele; Kileabe, yo mmagwe e bego e le Abigaile, mohlologadi wa Nabale, wa go tšwa Karmele; Absalomo, yo mmagwe e bego e le Maaka, morwedi wa Kgoši Talmai wa Geshure; Adonia, yo mmagwe e bego e le Hagite; Shefatia, yo mmagwe e bego e le Abitala; Jitreamo, yo mmagwe e bego e le Egla. Barwa ba ba gagwe ba belegwe Hebrone. Ge madira a Dafida le ao a bego a eme le lapa la Saulo a elwa, Abnere o ile a ba le maatla kudu gare ga balatedi ba Saulo. Ka letšatši le lengwe Ishboshete, morwa wa Saulo, a bona Abnere molato a re o robala le motlabo wa Saulo, Ritsepa, morwedi wa Aya. Taba yeo ya befediša Abnere kudu. A galefela Ishboshete a re: “A o gopola gore nka kgalwa ke wena? Na ke nna ditšhila? Ke nna selo fela? Go tloga mathomong ke botegetše lapa la Saulo, tatago, le bona bomorwarragwe le bagwera ba gagwe, mme ke go thušitše gore o se ke wa fenywa ke Dafida; gomme lehono o mpona molato ka mosadi wa mosadisadi! Morena o enetše Dafida gore o tla amoga Saulo le ditlogolo tša gagwe mmušo gomme a bea Dafida kgoši ya naga ka moka ya Israele le ya Juda, go tloga Dane go ba go yo fihla Beresheba. Bjale a Modimo a mpolaye thoo ge nka se phethe taba yeo!” *** Ishboshete o be a boifa Abnere kudu mo e lego gore o ile a se ke a iphetolela. Abnere a roma batseta go Dafida gore ba re go yena: “A naga ye ga se ya gago? Kwana le nna, gomme ke tla go thuša gore o gogolele Baisraele ka moka go wena.” Dafida a mo fetola a re: “Go lokile! Ke tla kwana le wena ge o ka dira taba e tee ye: O swanetše go tliša Migale, morwedi wa Saulo, go nna ge o etla go mpona.” Gomme Dafida le yena a roma batseta go Ishboshete gore ba re go yena: “Nneele mosadi wa ka, Migale. Ke mo nyetše ka dintlhana tše lekgolo tša merotwana ya Bafilista.” Ka gona Ishboshete a roma banna gore ba yo mo tšea go Paltiele, monna wa gagwe, morwa wa Laishe. Paltiele a šala Migale morago go ba go yo fihla motseng wa Bahurime a tšama a lla. Eupša ge Abnere a re: “Boela gae,” o ile a boela. Abnere a ya go baetapele ba Israele a re go bona: “Ke kgale le dutše le nyaka gore Dafida e be kgoši ya lena. Bjale ge, phethang taba yeo ka gobane le Morena o itše: ‘Ke tla phološa setšhaba sa ka sa Israele go Bafilista le go manaba a sona ka Dafida, mohlanka wa ka.’ ” Abnere a ba a bolela le batho ba kgoro ya Benjamene, mme a tsebo ya Hebrone go yo botša Dafida seo batho ba Benjamene le ba Israele ba se dumetšego. Ge Abnere a fihla go Dafida kua Hebrone le banna ba masome a mabedi, Dafida a ba direla monyanya. Abnere a re go Dafida: “Bjale a ke yo botša Baisraele ka moka gore ba tle ba kgobokane go wena, kgoši, mong wa ka. Ba tla kwana le wena mme o tla hwetša se o se nyakago, e lego go buša naga ye ka moka.” Dafida a laelana le Abnere mme Abnere a tloga a se a tshwenywa ke motho. Ka morago Joaba le bahlabani ba bangwe ba Dafida ba goroga ba etšwa go hula, ba swere thoto ye ntši. Abnere yena o be a sa hlwe a le moo Hebrone le Dafida, ka gobane Dafida o be a laelane le yena mme yena a sepetše a se a tshwenywa ke motho. Ge Joaba a fihla le banna ba gagwe, o ile a botšwa gore Abnere o be a tlile go Kgoši Dafida mme kgoši o laelane naye a sepela a se a tshwenywa ke motho. Ka gona Joaba a ya go kgoši a re go yena: “A o dirile eng? Abnere o be a tlile go wena – ke ka baka lang o mo lesitše a no itshepelela? O be a tlile mo go tlo go foraforetša, le go tlo nyakišiša se sengwe le se sengwe se o se dirago, le go tseba mo gongwe le mo gongwe mo o sepelelago gona. Wena o tseba taba yeo gabotse!” Ge Joaba a seno tloga go Dafida, o ile a roma batseta gore ba late Abnere, gomme ba mo gomiša a le sedibeng sa Sira; eupša Dafida o be a sa tsebe selo ka taba yeo. Ge Abnere a fihla Hebrone, Joaba a mo iša thokwana kgorong ya motse, mo nkego o nyaka go bolela le yena thopeng, gomme moo a mo hlaba dimpa. Ka gona Abnere a bolawa ka gobane a bolaile Asahele, morwarragoJoaba. Ge Dafida a ekwa ditaba tšeo a re: “Morena o a tseba gore nna le batho ba ka ga re na le molato wa go bolaya Abnere le gatee. A kotlo ya polao ye e wele godimo ga Joaba le lapa la gagwe ka moka. Molokong wo mongwe le wo mongwe a go be le monna lapeng la gagwe yo a nago le bolwetši bja tšhofela, goba yo a swerwego ke bolwetši bjo bobe bja letlalo, goba yo e lego segole, goba yo a bolawago ntweng, goba yo a diilago!” Ka gona Joaba le Abishai, morwarragwe, ba lefeletša morwarragobona Asahele, yoo Abnere a mmolailego ntweng kua Gibeone. Ke moka Dafida a laela Joaba le banna ba gagwe gore ba gagole diaparo tša bona, ba apare diaparo tša go ilela, ba llele Abnere. Gomme ge ba eya go mmoloka Kgoši Dafida o be a šetše leako morago. Abnere a bolokwa Hebrone, gomme kgoši a hlaboša lentšu a lla lebitleng, mme setšhaba ka moka le sona sa lla. Kgoši a hlaba sefela sa go llela Abnere a re: “Abnere, o reng o hwile bjalo ka sekebeka? O be o se wa tlengwa matsogo, o se wa kgokwa maoto ka diketane; o hwile bjalo ka yo a bolailwego ke dikebeka!” Gomme batho ba mo llela go feta pele. Letšatši ka moka batho ba kgopela Dafida gore a je, eupša yena a ena a re: “A Modimo a mpolaye thoo ge nka lahlela lerathana la senkgwa goba la sejo se sengwenyana ganong pele ga ge letšatši le dikela!” Ge setšhaba ka moka se bona a dira bjalo, sa thaba. Gabotsebotse, se sengwe le se sengwe se kgoši a bego a se dira ba be ba se thabela. Batho bohle ba Juda le ba Israele ba lemoga ka tšatši leo gore polao ya Abnere ga e ame kgoši. Kgoši a re go bahlankedi ba gagwe: “A ga le bone gore letšatši le go wele moetapele yo mogolo mo Israele? Le ge ke le kgoši ke tloditšwe, ke ikwa ke fokola lehono. Barwa ba ba Tseruya ba sehlogo, ba a mpalela. A Morena a otle mmolai yoo go ya ka mo go mo lebanego.” Ge Ishboshete, morwa wa Saulo, a ekwa gore Abnere o bolailwe kua Hebrone, o ile a nolega moko gomme setšhaba ka moka sa Israele sa tšhoga kudu. Ishboshete o be a na le bahlankedi ba babedi bao e bego e le baetapele ba dihlopha tša bathopi. Bona e be e le Baana le Rekabe, barwa ba Rimone, wa kua Beerote, nageng ya Benjamene. Beerote e balwa le Benjamene. Badudi ba motse woo ba mathomo ba ile ba tšhabela Gitaime mme ba falalela gona go tloga ka yona nako yeo. Setlogolo se sengwe sa Saulo e be e le Mefiboshete, morwa wa Jonathane, yoo a bego a na le mengwaga ye e fetšago seatla ge Saulo le Jonathane ba bolawa. Ge ditaba tša kua Jesriele tša go bolawa ga bona di kwala, mofepi wa gagwe o ile a mo kuka a tšhaba; eupša o be a itlhaganetše mo e lego gore o ile a mo uša, gomme ngwana a golofala maoto. Rekabe le Baana ba ile ba ya ngwakong wa Ishboshete ba fihla moo mosegare wo mogolo, ge a sa robetše boroko bja mosegare. Ba tsena ka ngwakong nke ba tlile go tšea mabele, gomme ba mo hlaba dimpa, ba tšhaba. Ba be ba tsene ka ngwakong ka phapošing ya gagwe ya go robala moo a bego a swerwe ke boroko, mme ba mmolaya. Ke moka ba mo ripa hlogo ba tloga nayo, ba sepela bošego ka moka ba putla moedi wa Jordane. Ba bea hlogo yela pele ga Kgoši Dafida kua Hebrone gomme ba re go yena: “Hlogo ya Ishboshete, morwa wa lenaba la gago, le le bego le leka go go bolaya, še. Lehono Morena o dirile gore kgoši, mong wa rena, a lefeletšwe go Saulo le go ditlogolo tša gagwe.” Dafida a ba fetola a re: “Ke ena ka Morena yo a phelago, yo a mphološitšego dikotsing ka moka: Motseta yola wa go tla go nna kua Tsikelage mme a mpegela lehu la Saulo o be a gopola gore o bega taba ye botse. Ke ile ka mo swara ka mmolaya. Woo e bile moputso wo ke ilego ka mo putsa ka wona ka ge a begile taba yeo ya gagwe ye botse! Go tla ba mo gošoro bjang go banna ba babe ba ba bolayago motho yo a se nago molato a ithobaletše ka ngwakong wa gagwe! Bjale ke tla mo lefeletša ka lena, ka le fediša lefaseng!” Dafida a laela bahlabani ba gagwe gore ba bolaye Rekabe le Baana mme ba ba ripa matsogo le maoto, ba a lekeletša kgauswi le mogobe kua Hebrone. Ba tšea hlogo ya Ishboshete ba e boloka lebitleng la Abnere moo Hebrone. Dikgoro ka moka tša Israele tša tla go Dafida kua Hebrone tša re go yena: “Re madi eno. Mehleng ye e fetilego, le mola Saulo e sa le kgoši ya rena, o be o eta Baisraele pele ntweng. Morena o rile go wena: ‘Ke wena o swanetšego go diša setšhaba sa ka sa Israele; ke wena o swanetšego go ba mmuši wa sona.’ ” Ka gona baetapele ka moka ba Israele ba tla go Kgoši Dafida kua Hebrone. Yena a dira kgwerano le bona pele ga Morena, ba mo tlotša gomme ya ba kgoši ya Israele. Dafida o be a na le mengwaga ye masome a mararo ge e eba kgoši, gomme a buša mengwaga ye masome a mane. O bušitše Juda a le Hebrone mengwaga ye e šupago le seripa, gomme a buša Israele ka moka le Juda a le Jerusalema mengwaga ye masome a mararo a metšo ye meraro. Kgoši Dafida le banna ba gagwe ba ile ba tšwa dira ba yo hlasela Jerusalema. Bajebuse bao ba bego ba dula moo ba gopola gore Dafida a ka se kgone go thopa motse woo, ka gona ba re go yena: “O ka se tsene ka mo; le tšona difofu le digole di tla go thibela.” Eupša Dafida o ile a thopa sebo sa bona sa Sione, gomme sa tsebja ka la “Motse wa Dafida”. Tsatši leo Dafida a re go banna ba gagwe: “Yo mongwe le yo mongwe yo a nyakago go hlasela Bajebuse a a tsene ka nthoba ya meetse, a bolaye digole le difofu tšeo Dafida a di hloilego hloihloi.” Ke ka fao go hlagilego seka se se rego: “Difofu le digole di ka se tsene ngwakong wa Morena.” Ka morago ga go thopa sebo Dafida o ile a dula ka go sona mme a se rea leina la “Motse wa Dafida”. A aga motse go se potologa, a thoma felo mo naga e bego e lekelelantšwe a aga go ya ka gare. Maatla a gagwe a ile a fela a oketšega, ka gobane Morena Modimo Ramaatlaohle o be a na le yena. Kgoši Hiramo wa Tirose o ile a roma batseta gore ba kwane le Dafida; a mo romela dikota tša mosedere le babetli gotee le babetli ba matlapa gore a ikagele ntlo. Ka gona Dafida a lemoga gore Morena o mo tiišeditše bogošing bja Israele, le gore o atlegiša mmušo wa gagwe ka baka la setšhaba sa Morena sa Israele. Ge Dafida a tlogile Hebrone a ile Jerusalema, o ile a tšea metlabo ye mengwe le basadi fao, gomme a ba le barwa le barwedi ba bangwe. Moo Jerusalema a belegelwa bana ba ba latelago: Shamua, Shobabe, Nathane, Solomone, Jibehara, Elishua, Nefege, Jafia, Elishama, Eliada le Elifelete. Bafilista ba ile ba botšwa gore Dafida o tloditšwe ya ba kgoši ya Israele, ka gona madira a bona a tšwa go yo mo thopa. Ge Dafida a ekwa taba yeo, a theogela sebong. Bafilista ba fihla molaleng wa Barafa gomme ba ipeakanyetša ntwa moo. Dafida a botšiša Morena a re: “A ke hlasele Bafilista? A o tla ba gafela diatleng tša ka?” Morena a mo fetola a re: “Ee, ba hlasele! Ruri, ke tla ba gafela diatleng tša gago!” Ka gona Dafida a ya Baale-Peratsime gomme moo a fenya Bafilista. A re: “Morena o gogotše manaba a ka bjalo ka lefula.” Ka fao felo moo go bitšwa Baale-Peratsime. Ge Bafilista ba tšhaba ba ile ba tlogela medimo ya bona ya diswantšho, gomme Dafida le banna ba gagwe ba e tšea. Bafilista ba goma ba ya molaleng wa Barafa mme ba ipeakanyetša ntwa gape moo. Gapegape Dafida a botšiša Morena, yo a ilego a mo fetola a re: “O se ke wa ba hlasela o le mo, fela o ba pote ka morago mme o itokišetše go ba hlasela o le kua mehlareng ya mekgokgopha. Ge o ekwa mešito godimo ga mehlare, gona o hlasele ka bjako, ka gobane ke tla be ke go etile pele go yo fenya madira a Bafilista.” Dafida a dira se Morena a mo laetšego sona, gomme a rakediša Bafilista go tloga Geba go ba go yo fihla Gesere. Gapegape Dafida a kgobokanya bahlabani ba ba kgethilwego mo Israele, ya ba banna ba dikete tše masome a mararo. A ba eta pele ba ya Baala kua Juda go yo tšea Polokelo ya Kgwerano ya Modimo moo, ye e bego e abetšwe Morena Ramaatlaohle, yoo setulo sa gagwe sa bogoši se lego ka godimo ga bakerubi. Ba ile ba e tšea lapeng la Abinadaba mmotong, gomme ba e bea ka koloing ye mpsha. Usa le Agio, barwa ba Abinadaba, ba be ba hlahla koloi, Agio a e etile pele. Dafida le Baisraele ka moka ba be ba bina ba opela ka mafolofolo go godiša Morena. Ba be ba letša diletšo tša dikgapa, diharepa, meropa, ditlhawatlhwadi le masenkana. Ge ba fihla seboeng sa Nakone, dipholo tša thetšwa, gomme Usa a iša letsogo a swareletša Polokelo ya Kgwerano ya Modimo. Gatee fela Morena Modimo a galefela Usa gomme a mmolaela go se hlomphe moo ga gagwe. Usa a hwela moo ka thoko ga Polokelo ya Kgwerano, gomme felo fao gwa bitšwa Peretse-Usa go tloga mohlang woo. Dafida a ferekana ka gobane Morena a otlile Usa a galefile. A boifa Morena mme a re: “A bjale Polokelo ya Kgwerano e tla tla go nna bjang?” Ka gona a se hlwe a nyaka go e iša ga gagwe Jerusalema, eupša a e aroša tsela mme a e iša lapeng la Obede-Edomo, motho wa motse wa Gathe. E ile ya dula moo dikgwedi tše tharo, gomme Morena a šegofatša Obede-Edomo le lapa la gagwe. Kgoši Dafida a kwa gore ka lebaka la Polokelo ya Kgwerano, Morena o šegofaditše lapa la Obede-Edomo le tšohle tše e lego tša gagwe; ka gona a e tšea lapeng la Obede-Edomo a e iša Jerusalema ka lethabo le legolo. Ka morago ga ge banna ba ba bego ba rwele Polokelo ya Kgwerano ba sepetše magato a a selelago, Dafida a ba emiša ge a sa direla Morena sehlabelo ka poo le namane ye e nonnego. A bina ka mafolofolo go godiša Morena, a tšwere fela seaparo se sekgethwa lethekeng. Gomme yena le Baisraele ka moka ba iša Polokelo ya Kgwerano Jerusalema ka megobo ya lethabo le mollo wa diphalafala. Ge Polokelo e gorošwa motseng, Migale, morwedi wa Saulo, a lebelela ka lefasetere gomme a bona Kgoši Dafida a tšama a taboga a bina go hlompha Morena, mme a mo nyatša kudu. Ba tsenya Polokelo, ba e bea madulong a yona ka tenteng yeo Dafida a e hlometšego yona. Ke moka a direla Morena dihlabelo tša go tšhungwa ka moka le dihlabelo tša kagišano. Ge a feditše go dira dihlabelo tšeo, a šegofatša setšhaba ka leina la Morena Ramaatlaohle, gomme a ba fa dijo ka moka ga bona. A fa monna le mosadi yo mongwe le yo mongwe mo Israele senkgwa, le nama ya go bešwa, le phaphathi ya makwapi a diterebe. Ke moka yo mongwe le yo mongwe a boela gae. Ka morago ga moo, ge Dafida a eya gae go yo šegofatša ba lapa la gagwe, Migale a tšwa go tlo mo gahlanetša. A re: “Kgoši ya Israele lehono o itiretše leina le legolo! O itlhobotše a se ne dihlong bjalo ka setlaela mahlong a basetsana ba makgoba ba bahlankedi ba gagwe!” Dafida a mo fetola a re: “Ke be ke bina go tumiša Morena yo a nkgethilego a mpea moetapele wa setšhaba sa gagwe sa Israele bakeng sa tatago le lapa la gagwe. Gomme ke tla fela ke bina go godiša Morena, ka ikgoboša le go feta mo, ka ipona ke se selo, eupša basetsana bale o ba bolelago bona ba tla ntšeela godimo!” Migale, morwedi wa Saulo, a se ke a ba le ngwana go fihlela a ehwa. Kgoši Dafida o be a dutše gabotse mošate, gomme Morena a dira gore manaba a gagwe ka moka a se ke a hlwa a mo tshwenya. Ke moo kgoši a itšego go moprofeta Nathane: “Nnaena šefa ke dutše ka ngwakong wo o agilwego ka dikota tša mosedere, eupša Polokelo ya Kgwerano ya Modimo yona e beilwe ka tenteng!” Nathane a mo fetola a re: “Dira se o se gopotšego, ka gobane Morena o na le wena.” Eupša bošegong bjoo Morena a re go Nathane: “Sepela o yo botša Dafida, mohlanka wa ka, gore ke re go yena: ‘Ga se wena o tlago nkagela tempele ye ke tlago dula ka go yona. Go tloga ka nako yela ka go ntšha setšhaba sa Israele Egepeta go fihlela bjale, ga se ka ka ka dula ka tempeleng; ke raletše mo gohle ke le ka tenteng. Mesepelong ya ka ka moka le setšhaba sa Israele ga se ka ka ka botšiša yo mongwe wa baetapele ba ke bego ke ba bea badiši ba setšhaba sa ka gore ke ka baka lang ba sa nkagele tempele ka dikota tša mosedere.’ “Ka gona botša Dafida, mohlanka wa ka, gore nna, Morena Ramaatlaohle, ke re go yena: ‘Ke go tšere o diša dinku madišong ka go bea mmuši wa setšhaba sa ka sa Israele. Ke bile nago mo gongwe le mo gongwe mo o ilego wa ya gona, mme ke fentše manaba a gago ka moka ge o a hlasela. Ke tla go dira gore o tume bjalo ka baetapele ba bagolo mo lefaseng. Ke kgethetše setšhaba sa ka sa Israele naga gomme ka se tsema go yona, moo se kago dula ntle le go hlwa se tšhošetšwa. E sa le go tloga mola ba tsenago mo nageng ye mehleng yela ya baahlodi ba gatelelwa ke batho ba babe, eupša seo se ka se hlwe se direga. Ke go holofetša gore ke tla dira gore manaba a gago ka moka a se sa go tshwenya, mme ka go fa ditlogolo. *** Ge o hlokafetše mme o bolokilwe le borakgolokhukhu ba gago, ke tla bea yo mongwe wa barwa ba gago kgoši mme ka tiiša mmušo wa gagwe. Ke yena yo a tlago nkagela tempele, gomme ke tla hloma bogoši bja lešika la gagwe ka bo dira gore e be bja neng le neng. Ke tla ba tatagwe, mme yena ya ba morwa wa ka. Ge a phoša ke tla mo otla bjalo ka tatagongwana ge a otla ngwana wa gagwe; ke tla šomiša batho go mo otla. Eupša nka se lese go mmotegela bjalo ka ge ke ile ka lesa go botegela Saulo, yoo ke mo tlošitšego gore wena o tle o be kgoši. O tla fela o na le ditlogolo, gomme ke tla dira gore mmušo wa gago e be wa neng le neng. Bogoši bjeno bo ka se tsoge bo fedile.’ ” Nathane o ile a botša Dafida tšohle tše Modimo a mo utolletšego tšona. Ke moka Kgoši Dafida a tsena ka Tenteng ya bodulo bja Morena, a dula fase mme a rapela a re: “Ga ke a swanela tše o šetšego o ntiretše tšona, Morena, Mong wa ka, le lona lapa la ka ga le a di swanela. Le ge go le bjalo, tšeo ga se ya ba selo mahlong a gago, Morena, Mong wa ka; o tšwetše pele o bolela tše botse tša mehleng ye e tlago mabapi le ditlogolo tša ka, nna, mohlanka wa gago. Tšeo ke taba tše kgolo bjang go ka di holofetša motho, Morena, Mong wa ka! Go feta moo a nka go botša eng? O a ntseba, nna, mohlanka wa gago. O dirile dilo tše kgolo tše ka gobane o be o nkholofeditše tšona, le ka gore o be o rata gore o nthute. Ka gona o yo mogolo bjang, Morena Yogodimodimo! Ga go yo a swanago le wena; go ya ka tšohle tše re di kwelego re a tseba gore ke wena o nnoši o lego Modimo. Ga go setšhaba se sengwe lefaseng se se swanago le sa Israele, se o se phološitšego bokgobeng go tlo se dira setšhaba sa gago. Dilo tše kgolo tše di tšhošago tše o ba diretšego tšona di go tumišitše. O lelekile ditšhaba tše dingwe le medimo ya tšona ge setšhaba sa gago se goroga, setšhaba se o se lokolotšego Egepeta gore e be sa gago. O dirile Baisraele setšhaba sa gago go ya go ile, gomme wena, Morena, wa ba Modimo wa bona. “Bjale, Morena Modimo, phethagaletša sa ruri tše o di boletšego mabapi le nna, mohlanka wa gago, le ditlogolo tša ka, gomme o dire se o boletšego gore o tla se dira. O tla tuma, gomme batho ka mehla ba tla re: ‘Morena Ramaatlaohle ke Modimo wa Israele.’ Gomme o tla boloka mmušo wa ka ka dinako ka moka. Morena Ramaatlaohle, Modimo wa Israele, ke na le sebete sa go go rapela ka thapelo ye ka gobane o nkutolletše taba tše ka moka, nna, mohlanka wa gago, gomme o mpoditše gore o tla dira ditlogolo tša ka dikgoši. “Bjale ge, Morena, Mong wa ka, ke wena Modimo; ka mehla o phetha dikholofetšo tša gago, gomme o nkholofeditše taba ye e makatšago ye. Ke go kgopela gore o šegofatše ditlogolo tša ka gore di fele di ipshina ka botho bja gago. Wena, Morena, Mong wa ka, o rile o tla di šegofatša, gomme tšhegofatšo ya gago e tla ba go tšona go ya go ile.” Ka morago ga lebaka Kgoši Dafida a hlasela Bafilista gape, a ba fenya, gomme a fediša mmušo wa bona nageng. Ke moka a hlasela Bamoaba. A laela gore mathopša a patlame fase, gomme sehlopheng se sengwe le se sengwe sa ba bararo a bolaya ba babedi. Ka gona Bamoaba ya ba batho ba gagwe, gomme ba lefa metšhelo go yena. A fenya le kgoši ya naga ya Tsoba, Hadade-Esere, morwa wa Rehobo, ge Hadade-Esere a sa le tseleng ya go yo tsošološa mmušo wa gagwe kua nokeng ya Yufratese. Dafida a thopa bahlabani ba gagwe ba sekete le makgolo a a šupago ba go namela dipere, le ba dikete tše masome a mabedi ba maoto. A ripa dipere ka moka tša dikoloi tša ntwa mešifa, ge e se tše lekgolo. Ge Baaramo ba Damaskose ba romela madira go tlo thuša kgoši Hadade-Esere, Dafida a ba hlasela, gomme a bolaya banna ba dikete tše masome a mabedi le tše pedi. A hloma mešaša ya bahlabani moo nageng ya bona, gomme bona ya ba batho ba gagwe, ba lefa metšhelo go yena. Morena a dira gore Dafida a fenye mo gongwe le mo gongwe mo a lwago gona. Dafida a thopa dikotse tša gauta tše di bego di swerwe ke bahlankedi ba Hadade-Esere, gomme a di iša Jerusalema. A tšea le mphiri wo montšintši kua Tebage le Berothai, metse ye e bego e bušwa ke Hadade-Esere. Kgoši Toi wa Hamate a kwa gore Dafida o fentše madira a Hadade-Esere ka moka. Ka gona a roma morwa wa gagwe, Joramo, go yo dumediša Kgoši Dafida le go mo lebogiša ka ge a fentše Hadade-Esere yo Toi a lwelego naye gantši. Joramo a išetša Dafida dimpho tše di dirilwego ka gauta, silibera le mphiri. Kgoši Dafida a di abela Morena, gotee le silibera le gauta ye a e tšerego ditšhabeng tše a di fentšego – Baedomo, Bamoaba, Baamone, Bafilista le Baamaleke – gammogo le seripa sa thoto ye a e tšerego go Hadade-Esere. Dafida a fela a tuma go iša pele ge a tšo bolaya Baedomo ba dikete tše lesome le tše seswai Moeding wa Letswai. A hloma mešaša ya bahlabani nageng ya Edomo ka moka, gomme batho ba gona ya ba ba gagwe. Morena a dira gore Dafida a fenye mo gongwe le mo gongwe mo a lwago gona. Dafida o bušitše Israele ka moka gomme a hlokomela gore setšhaba sa gagwe ka mehla se swarwe ka tshwanelo le ka toka. Joaba, yo mmagwe e bego e le Tseruya, e be e le molaodi wa madira; Joshafate, morwa wa Ahilude, e le mongwaledi wa mmušo; Tsadoko, morwa wa Ahitube, le Ahimeleke, morwa wa Abiatare, e be e le baprista; Seraya e be e le mongwaledi wa kgoši; Benaya, morwa wa Joyada, e be e le mohlokomedi wa baleti ba Dafida, gomme barwa ba Dafida e le baprista. Ka letšatši le lengwe Dafida o ile a botšiša a re: “A go sa na le yo mongwe yo a šetšego wa lapa la Saulo? Ge eba o gona, ke nyaka go mo dira ka botho ka baka la Jonathane.” Go be go na le mošomedi wa lapa la Saulo yo leina la gagwe e bego e le Tsiba, gomme yena a botšwa gore a ye go Dafida. Kgoši a mmotšiša a re: “A ke wena Tsiba?” Tsiba a mo fetola a re: “Ee, mong wa ka.” Kgoši a mmotšiša a re: “A go sa na le yo mongwe yo a šetšego wa lapa la Saulo yo nka mo dirago ka botho, bjalo ka ge ke tshephišitše Modimo?” Tsiba a mo fetola a re: “Go sa na le morwa wa Jonathane. O golofetše maoto.” Kgoši a mmotšiša a re: “A o kae?” Tsiba a mo fetola a re: “O lapeng la Makire, morwa wa Amiele, kua Lo-Dabare.” Ka gona Kgoši Dafida a roma batseta gore ba yo mo tšea. Ge Mefiboshete, morwa wa Jonathane, yena setlogolo sa Saulo, a fihla, o ile a obama, a itahlela fase ka sefahlego. Dafida a re go yena: “Mefiboshete!” Yena a araba a re: “Ke nna yo, mohlanka wa gago.” Dafida a re go yena: “O se ke wa boifa. Ke tla ba yo botho go wena ka baka la Jonathane, tatago. Ke tla go bušetša naga ka moka ye e bego e le ya rakgolwago, Saulo, gomme ka mehla re tla jela mogopong o tee.” Mefiboshete a obama gape a re: “Nna, mohlanka wa gago, ke lefeelafeela, ke no ba mpša ye e hwilego! Ke go reng o le yo botho go nna ka mokgwa wo?” Kgoši a bitša Tsiba, mohlanka wa Saulo, a re go yena: “Ke fa Mefiboshete, setlogolo sa mong wa gago, se sengwe le se sengwe se e bego e le sa Saulo le lapa la gagwe. Wena le barwa ba gago le bahlanka ba gago le mo lemele mašemo a e bego e le a lapa la mong wa gago, Saulo, gomme le gorošeng puno gore ba lapa la gagwe ba tle ba be le dijo. Eupša Mefiboshete yena ka mehla o tla jela mogopong o tee le nna.” Tsiba o be a na le barwa ba lesome le ba bahlano le bahlanka ba masome a mabedi. Tsiba a mo fetola a re: “Ke tla dira tšohle tše kgoši a ntaelago tšona.” Ka gona Mefiboshete a ja le kgoši mo nkego le yena ke morwa wa kgoši. O be a na le ngwana wa mošemane yo leina la gagwe e bego e le Mika. Batho ka moka ba lapa la Tsiba ya ba bahlanka ba Mefiboshete. Ka gona Mefiboshete, yo a bego a golofetše maoto, a dula Jerusalema, gomme a ja le kgoši ka mehla. Ka morago ga lebaka Kgoši Nahashe wa Amone a hwa, gomme morwa wa gagwe, Hanune, ya ba kgoši. Kgoši Dafida a re: “Ke nyaka go kwana le Hanune bjalo ka ge Nahashe, tatagwe, a be a kwana le nna.” Ka gona Dafida a roma batseta gore ba ye maemong. Ge ba fihla Amone, baetapele ba Baamone ba re go kgoši: “A o gopola gore ke gona go hlompha tatago ge Dafida a romile batho ba go tlo go lliša? Aowaowaa! O ba romile mo go tlo hlola motse le go o lekola gore a tle a o pšhatle!” Hanune a swara batseta ba Dafida, a ba boola maledu ka thoko, a ripa diaparo tša bona mathekeng, mme a ba šupa tsela. Ba ile ba lewa ke dihlong kudu go ka boela gae. Ge Dafida a ekwa seo se diregilego, a laela batseta gore ba ba botše gore ba dule Jeriko gomme ba se ke ba boa go fihlela maledu a bona a hlogile gape. Baamone ba lemoga gore ba rumotše Dafida, ka gona ba thwala bahlabani ba go sepela ka maoto ba Basiria ba dikete tše masome a mabedi ba Bethe-Rehobo le Tsoba, le banna ba dikete tše lesome le tše pedi ba Tobe, le kgoši ya Maaka le banna ba gagwe ba sekete. Dafida a kwa taba yeo gomme a romela Joaba go yo lwa le bona ka madira, e le bahlabani ba bogale ka moka. Baamone ba tšwa motseng wa bona gomme ba ipeakanya kgorong. Ba bangwe bona, e lego Basiria le banna ba Tobe le ba Maaka, ba ema thoko ye nngwe kua nageng. Joaba a bona gore madira a manaba a tlile go mo hlasela ka pele le ka morago, ka gona a kgetha bahlabani ba bogalegale ba Baisraele, a ba emiša go lebana le Basiria. Madira a a šetšego a a nea Abishai, morwarragwe, gore a a laole, gomme Abishai a a emiša go lebana le Baamone. Joaba a re go yena: “Ge o bona gore Basiria ba a mphenya, o tle o nthuše, gomme ge Baamone ba go fenya, ke tla tla ka go thuša. O tie gomme re lwele setšhaba sa gaborena le metse ya Modimo wa rena ka bogale. Gomme a Morena a dire se a se nyakago!” Joaba le banna ba gagwe ba batamela gore ba hlasele, gomme Basiria ba hlanola direthe. Ge Baamone ba bona Basiria ba tšhaba, le bona ba tšhaba Abishai mme ba boela motseng. Joaba a tlogela Baamone a gomela Jerusalema. Basiria ba lemoga gore ba fentšwe ke Baisraele, ka gona ba bokanya madira a bona. Kgoši Hadade-Esere a laela gore Basiria ba ba bego ba le ka bohlabela bja noka ya Yufratese ba bitšwe, gomme ba fihla Helamo ba laolwa ke Shobake, molaodi wa madira a Kgoši Hadade-Esere. Ge Dafida a ekwa taba yeo, a bokanya madira ka moka a Baisraele, a tshela noka ya Jordane gomme a ya Helamo, moo Basiria ba bego ba ipeakantše ba lebane le yena. Ntwa ya thoma, gomme Basiria ba tšhaba Baisraele. Dafida le banna ba gagwe ba bolaya basepediši ba dikoloi tša ntwa tša Basiria ba makgolo a a šupago, le banamedi ba dipere ba dikete tše masome a mane, gomme ba gobatša Shobake, molaodi wa madira a manaba, yoo a ilego a hwela moo lebaleng la ntwa. Ge magoši a e bego e le a Hadade-Esere a lemoga gore a fentšwe ke Baisraele, a kwana le bona gore naga e lale mme ya ba batho ba bona. Gomme Basiria ba tšhaba go hlwa ba thuša Baamone. Seruthwane se se latelago, nakong yeo ka yona magoši gantši a yago ntweng, Dafida o ile a ntšha Joaba le balaodi ba gagwe le madira ka moka a Baisraele; ba fenya Baamone mme ba dikanetša motse wa Raba. Eupša Dafida yena o be a šetše Jerusalema. Ka letšatši le lengwe, ka merithi ye megolo, Dafida a tsoga malaong a gagwe gomme a namelela tlhakeng ya ngwako wa mošate. Ge a sepelasepela moo godimo, a bona mosadi a hlapa. E be e le yo mobotsebotse. Ka gona a roma motseta gore a yo botšiša gore ke mang, gomme a kwa gore ke Batseba, morwedi wa Amiele, mosadi wa Uria, Mohete. Dafida a roma batseta gore ba ye ba mo tšee; ba mo tliša go yena, gomme a robala le yena. Batseba o be a sa tšo fetša go itlhwekiša ka ge a be a bone kgwedi. Ka morago a ipoelela gae. Ge go fetile lebaka a lemoga gore o imile, gomme a roma motho go Dafida gore a mo tsebiše. Ke moo Dafida a romilego motseta go Joaba a re: “Nthomele Uria, Mohete.” Ka gona Joaba a mo romela yena. Ge Uria a fihla, Dafida a mmotšiša ge eba Joaba le madira ba sa phela gabotse, le gore a ntwa e tšwela pele bjang. Ke moo a itšego go Uria: “Sepela gae o yo khutša gannyane.” Uria a tloga, gomme Dafida a romela mpho lapeng la gagwe. Eupša Uria a se ke a ya gae; o ile a ithobalela kgorong ya mošate le baleti ba kgoši. Ge Dafida a ekwa gore Uria ga se a ka a ya gae, a mmotšiša a re: “O sa tšwa leetong le letelele; ke ka baka lang o se wa ya gae?” Uria a mo fetola a re: “Banna ba Israele le ba Juda ba phela ka mešašeng, gomme Polokelo ya Kgwerano e na le bona; molaodi wa ka, Joaba, le bahlanka ba gago ba hlomile mešaša kua mabaleng. A nka ya gae bjang ka ya ka ja, ka nwa, mme ka robala le mosadi wa ka? Ke ena ka wena, kgoši, gore nka se tsoge ke dirile taba yeo!” Ka gona Dafida a re: “Gona dula mo letšatši ka moka, gomme ka moswane re tla laelana wa boela morago.” Ka gona Uria a dula Jerusalema letšatši leo le le le latelago. Dafida a mo laletša gore a tle dijong tša mantšiboa. Ba ja gomme a mo tagiša bjala. Eupša le bjona bošegong bjoo Uria a se ke a ya gae; o ile a ithobalela mola a bego a robetše gona le baleti ba kgoši. Mosong wo o latelago Dafida a ngwalela Joaba lengwalo gomme a le romela ka Uria. A ngwala a re: “Bea Uria ka pele, moo ntwa e galefilego kudu, gomme lena le katakateng gore a bolawe.” Ka gona, ya re ge Joaba a sa dikaneditše motse, a romela Uria lefelong le a bego a tseba gore fao go na le manaba a bogale. Madira a manaba a tšwa motseng gomme a lwa le madira a Joaba; balaodi ba bangwe ba madira a Dafida ba bolawa, gomme gwa bolawa le Uria. Ke moo Joaba a romilego motho go Dafida go yo mmegela tša ntwa, gomme a laela motseta yoo a re: “Ka morago ga ge o begetše kgoši tša ntwa ka moka, a ka befelwa gomme a go botšiša a re: ‘Ke ka baka lang le ile la batamela motse kudu go lwa le bona? A le be le sa lemoge gore ba tla thunya metsi ba le morakong wa motse? A ga le sa gopola ka moo Abimeleke, morwa wa Gideone, a bolailwego ka gona? E bile kua Tebetse moo mosadi a ilego a lahlela tšhilo ka morako gomme a mmolaya. Ke ka baka lang ge le ile la batamela morako ka mokgwa woo?’ Ge kgoši a ka go botšiša taba yeo, o mmotše o re: ‘Mohlanka wa gago, Uria, Mohete, le yena o bolailwe.’ ” Ka gona motseta yoo a ya go Dafida gomme a mmotša se Joaba a mo laetšego gore a se bolele. A re: “Manaba a rena a be a re feta ka maatla gomme ba tšwa motseng go tlo lwa le rena nageng, eupša re ile ra ba gomišetša kgorong ya motse. Ke moo ba thunyeditšego metsi go rena ba le morakong, gomme bahlanka ba bangwe ba kgoši ba bolawa; mohlanka wa gago, Uria, Mohete, le yena o bolailwe.” Dafida a re go motseta yoo: “O tiiše Joaba maatla gomme o mmotše gore a se ke a tshwenyega, ka gobane motho a ka se tsebe gore go ile go hwa mang ntweng. O mmotše gore a hlasele motse ka maatla gomme a o thope.” Ge Batseba a ekwa gore monna wa gagwe o bolailwe, o ile a mo llela. Ge nako ya go ilela e fetile, Dafida a laela gore a tlišwe mošate; ya ba mosadi wa gagwe gomme a mmelegela morwa. Eupša Morena a se ke a thabela seo Dafida a bego a se dirile. Morena a roma moprofeta Nathane go Dafida. Nathane a ya go yena a re: “Go be go na le banna ba babedi ba ba bego ba dula motseng o tee; yo mongwe e be e le mohumi, yo mongwe e le modiidi. Monna yo a humilego o be a na le dikgomo le dihuswane tše ntšintši, mola monna wa modiidi yena a be a se na selo, ge e se kwanyana e tee fela ya tshatšana ye a bego a e rekile. O be a e hlokomela, gomme ya gola lapeng la gagwe le bana ba gagwe. O be a e fepa ka dijo tša gagwe, a e noša ka senwelo sa gagwe, mme a e fara diropeng. Kwanyana yeo e be nke ke morwedi wa gagwe. Ka letšatši le lengwe moeng o ile a etela monna yola wa mohumi. Mohumi a se ke a rata go hlabela moeng seruiwa sa gagwe se sengwe – a mo hlabela kwanyana yela ya monna wa modiidi.” Dafida a galefela monna yoo wa mohumi kudu gomme a re: “Ke ena ka Morena yo a phelago gore monna yo a dirilego taba yeo o swanetše go bolawa! Ka ge a dirile taba yeo ya sehlogo o swanetše go lefa gane seo a se tšerego.” Nathane a re go Dafida: “Monna yoo ke wena! Gomme se Morena Modimo wa Israele a se bolelago sese: ‘Ke nna ke go beilego kgoši ya Israele, gomme ke nna ke go phološitšego go Saulo. Ke go file mmušo wa gagwe le basadi ba gagwe; ke go beile kgoši ya Israele le Juda. Ge eba tšeo di be di se tša lekana, nkabe ke go okeleditše ka tše ntši go feta moo. Ke ka baka lang ge o nyaditše ditaelo tša ka? Ke ka baka lang o dirile taba ye mpe ye? O dirile gore Uria a bolawe ntweng; o dirile gore Baamone ba mmolaye, gomme wena wa tšea mosadi wa gagwe! Bjale, molokong wo mongwe le wo mongwe go tla ba le ditlogolo tša gago tše dingwe tše di hwago lehu la lerumo, ka gobane o nnyaditše wa tšea mosadi wa Uria. Ke a go botša ke re ke tla dira gore yo mongwe wa lapa la gago a go tlišetše matshwenyego. O tla be o lebeletše ge ke go amoga basadi ba gago mme ke ba fa monna yo mongwe; gomme yena o tla robala le bona mosegare wo monana. Wena o dirile sebe sephiring, eupša nna ke tla dira gore taba yeo e direge mosegare wo mogolo gore Baisraele ka moka ba di bone.’ ” Dafida a re: “Ke dirile sebe pele ga Morena.” Nathane a mo fetola a re: “Morena o a go lebalela; o ka se hwe. Eupša ka gobane o nyaditše Morena kudu ka go dira taba ye, ngwana wa gago o tla hwa.” Ke moka Nathane a boela gae. Morena a dira gore ngwana yola mosadi wa Uria a mmelegetšego Dafida a babje kudu. Dafida a rapela Morena gore ngwana a fole. O be a ikona dijo, gomme bošego bjo bongwe le bjo bongwe a tsena phapošing ya gagwe mme a patlama lebatong bošego ka moka. Bakgomana ba gagwe ba be ba eya go yena ba mo kgopela gore a tsoge, eupša yena a gana, mme le ge go iwa dijong a sa ye. Ka morago ga matšatši a a šupago ngwana yoo a hwa, gomme bakgomana ba Dafida ba boifa go mmotša taba yeo. Ba ile ba re: “Ge ngwana a sa phela, Dafida o be a sa re šetše ge re bolela naye. A re tla mmotša bjang gore ngwana wa gagwe o hwile? A ka ikgobatša ka mokgwa wo mongwenyana!” Ge Dafida a ba bona ba sebasebelana, a lemoga gore ngwana o hwile. Ka gona a ba botšiša a re: “A ngwana o hwile?” Ba mo fetola ba re: “Ee, o hwile.” Dafida a tsoga lebatong, a hlapa, a tlola, mme a apara diaparo tše dingwe. Ke moka a ya go khunamela Morena ka ngwakong wa yena Morena. Ge a fihla mošate, a kgopela dijo, gomme ge di tlišitšwe a ja. Bakgomana ba gagwe ba re go yena: “Taba ye e a re makatša. Ge ngwana a sa phela, o be o mo llela gomme o ikona dijo; eupša ge a seno hwa, o tsogile wa ja!” Dafida a ba fetola a re: “Ee, ke be ke ikona dijo ke lla ge a sa phela. Ke be ke gopola gore Morena o tla nkgaugela gomme a se ke a lesa ngwana a ehwa. Eupša bjale ka gore o hwile, ke tla be ke sa ikonelang dijo? Kgane nka mmuša a phele gape? Ka letšatši le lengwe ke tla ya moo a lego ntshe, eupša yena a ka se tsoge a boetše go nna.” Ke moo Dafida a homoditšego mosadi wa gagwe, Batseba. A robala naye, gomme a belega morwa; Dafida a mo rea leina la Solomone. Morena a rata mošemanyana yoo gomme a laela moprofeta Nathane go mo rea leina la Jedidia, ka gobane Morena a be a mo rata. Joaba o be a sa tšwela pele a hlasela motse wa Raba, mošate wa naga ya Amone, gomme a šetše a batametše go o thopa. A roma batseta go Dafida gore ba mmegele ba re: “Ke hlasetše motse wa Raba gomme ke thopile lehlakore leo meetse a tšwago go lona. Bjale bokanya madira a gago ao a šetšego, o hlasele motse mme o o thope ka bowena. Ga ke nyake gore go tle go bolelwe gore o thopilwe ke nna.” Ka gona Dafida a bokanya madira a gagwe, a ya motseng wa Raba, a o hlasela mme a o fenya. Hlogong ya modimo wa seswantšho wa Baamone, Milkomo, Dafida a tšea mphapahlogo wa gauta wa boima bjo e ka bago dikilokramo tše masome a mararo wo o nago le legakabje. A ithweša wona hlogong. A tšea le thoto ye ntšintši motseng, gomme a laela batho ba wona gore ba šome ka disaga le ka megoma ya tshipi le ka dilepe, gomme a ba gapeletša go dira ditena. O ile a dira sona seo go batho ba metse ye mengwe ka moka ya Baamone. Ka morago yena le banna ba gagwe ba boela Jerusalema. Ka morago ga tšeo gwa hlaga tše di latelago. Absalomo, morwa wa Dafida, o be a na le kgaetšedi ye botse ye leina la yona e bego e le Tamare. Amnone, yo mongwe wa barwa ba Dafida, o ile a mo duma. A mo duma kudu a ba a babja, ka gobane o be a bona gore a ka se kgone go kopana naye sephiring; Tamare o be a se a ka a robala le monna, ka gona a ganetšwa go kopana le banna. Eupša Amnone o be a na le mogwera yo leina la gagwe e bego e le Jonadaba, morwa wa Shama, morwarragoDafida; yena e be e le monna wa mahlajana. Jonadaba a re go Amnone: “Ke wena morwa wa kgoši, fela letšatši le lengwe le le lengwe ke go bona o nyamile. A molato ke eng?” Amnone a mo fetola a re: “Ke duma Tamare, kgaetšedi ya Absalomo, morwarre ka malapa.” Jonadaba a re go yena: “Itire mo nkego o a babja, gomme o robale. Ge tatago a tlilo go bona, o re go yena: ‘Hle, kgopela kgaetšedi ya ka, Tamare, gore a tle a nteše dijo. Ke nyaka gore a apeele dijo tšeo fa mo ke tlago kgona go mmona, gomme a mphe tšona ka boyena.’ ” Ka gona Amnone a dira mo nkego o a babja, gomme a ithobadiša. Kgoši Dafida a yo mmona, gomme Amnone a re go yena: “Hle, dumelela kgaetšediaka, Tamare, a tle a ntirele dinkgwana di se kae fa mo nka mmonago, mme a nteše tšona ka seatla sa gagwe.” Ka gona Dafida a roma motho go Tamare ka mošate gore ba re go yena: “Yaa ngwakong wa Amnone, kgaetšediago, mme o mo apeele dijo.” Tamare a ya moo gomme a hwetša Amnone a patlamile. A tšea bupi a bo duba, gomme a bopa dinkgwana moo Amnone a bego a kgona go mmona. Ke moka a paka dinkgwana tšeo, gomme a tšea pane a di kgotholela sebjaneng gore Amnone a di je, eupša a gana go di ja. A re: “Lena ba bangwe ka moka tšwaang” – gomme ka moka ga bona ba tšwa. Ke moo a itšego go yena: “Tliša dinkgwana tšeo mo malaong a ka gomme o nteše tšona ka seatla sa gago.” Tamare a tšea dinkgwana tšela a ya go yena. Ge a sa mo fa tšona, Amnone a mo swara mme a re: “Tlaa o robale le nna!” Tamare a re: “Aowa, kgaetšedi, hle, o se ke wa nkata! Taba yeo e a šiiša, ga e dirwe mo Israele! Ke tla sepela bjang gare ga batho? Gomme ge e le wena o tla goboga kudu mo Israele. Hle, bolela le kgoši, mme ke tloga ke kgolwa gore o tla go neela nna.” Eupša Amnone a se ke a mo theetša; gomme ka ge a be a na le maatla go feta Tamare, a mo uša a mo robala. Ka morago ga moo Amnone a hloya Tamare kudukudu; bjale o ile a mo hloya kudu go feta ka moo a bego a mo rata pele. A re go yena: “Tšwaa!” Tamare a mo fetola a re: “Aowaa, go nthaka ka mokgwa wo ke bobe bjo bogolo go feta bjo o sa tšwago go ntira bjona.” Eupša Amnone a se ke a mo theetša; o ile a bitša mohlanka wa gagwe a re: “Tloša mosadi yo mo pele ga ka! Mo kgoromeletše ntle mme o notlele lemati!” Mohlanka a mo ntšhetša ntle gomme a notlela lemati. Tamare o be a apere seaparo se setelele sa matsogo a matelele, seaparo sa mehleng sa matšatšing ao sa morwedi wa kgoši yo a sego a tšwa a nyalwa. O ile a itšhela hlogo ka melora, a gagola seaparo sela sa gagwe, gomme a sepela a ithwele megono a lla. Ge Absalomo, kgaetšedi ya gagwe, a mmona, a mmotšiša a re: “Na Amnone o go tshwentše? Hle, kgaetšedi, o se ke wa iša pelo mafiša ka taba yeo. Ke kgaetšedi ya gago ka malapa, ka gona o se ke wa botša motho taba yeo.” Ka fao Tamare a dula ngwakong wa Absalomo, a šulafetše a le bodutwaneng. Ge Kgoši Dafida a ekwa seo se diregilego, a befelwa kudu. Absalomo a hloya Amnone kudu ka ge a katile kgaetšedi ya gagwe, Tamare, mo e lego gore o ile a se ke a hlwa a mmolediša. Ka morago ga mengwaga ye mebedi Absalomo o be a kota dinku tša gagwe kua Baale-Hatsore, kgauswi le motse wa Efraime, gomme a laletša barwa ba kgoši ka moka. A ya go Kgoši Dafida a re: “Kgoši, ke kota dinku tša ka. Wena le bahlankedi ba gago a re yeng le nna moo monyanyeng woo.” Kgoši a mo fetola a re: “Aowa, ngwanaka. O tla senyegelwa kudu ge re ka ya ka moka.” Absalomo a fela a mo phegeletše, eupša kgoši a se ke a dumela, mme a kgopela Absalomo gore a sepele. Fela Absalomo a re: “Go lokile, gona lesa mogolwake Amnone a ye.” Kgoši a mmotšiša a re: “Ke ka baka lang a swanetše go ya?” Eupša Absalomo a fela a mo phegeletše go fihlela Dafida a laela Amnone le barwa ba gagwe ba bangwe gore ba ye le Absalomo. Absalomo a dira mokete wa segoši, gomme a laela bahlanka ba gagwe a re: “Le dišeng ge Amnone a nwele kudu, gomme ge ke re: ‘Mmolayeng!’ le mmolaye. Le se ke la boifa – e tla be e le nna ke itšego le mmolaye. Le beng ba bogale mme le se ke la dikadika!” Ka gona bahlanka bao ba phetha ditaelo tša Absalomo ba bolaya Amnone. Gomme barwa ba bangwe ba Dafida ba namela dimeila tša bona ba tšhaba. Ge ba sa le tseleng ba eya gae, Dafida a botšwa gore Absalomo o bolaile barwa ba kgoši ka moka – ga go le o tee wa bona yo a šetšego. Kgoši a emelela, a gagola diaparo tša gagwe ka manyami, gomme a patlama fase. Bakgomana ba ba bego ba le fao le yena le bona ba gagola diaparo tša bona. Eupša Jonadaba, morwa wa Shama, morwarragoDafida, a re: “Mong wa ka, ga se gwa bolawa barwa ba gago ka moka. Ke Amnone fela yo a hwilego. O be o ka no bona ka go lebelela Absalomo sefahlego gore o be a feditše le pelo go dira taba ye go tloga ka letšatši lela Amnone a ilego a kata kgaetšedi ya gagwe, Tamare. Ka gona, kgoši, o se ke wa kgolwa pego ye e rego barwa ba gago ka moka ba hwile; ke Amnone fela yo a bolailwego.” Ka nako yeo ke ge Absalomo a tšhabile. Go sa le bjalo, mohlabani yo a bego a letile motse a bona lešaba le legolo le theoga thabeng ka tsela ye e tšwago Horonaime. A ya go kgoši a mmegela seo a se bonego. Jonadaba a re go yena: “Bao ke barwa ba kgoši ba etla, bjalo ka ge nna, mohlanka wa gago, ke boletše ka re ba tla tla.” Ge a seno fetša go bolela, barwa ba Dafida ba tsena; ba thoma go lla, gomme Dafida le bakgomana ba gagwe le bona ba lla gabohloko. Absalomo o be a tšhabile a ile go kgoši ya Geshure, Talmai, morwa wa Amihude, gomme a dula moo mengwaga ye meraro. Dafida a llela morwa wa gagwe, Amnone, nako ye telele; *** eupša ge a fetša go mo llela, a golelwa Absalomo, morwa wa gagwe, kudu. Joaba o be a tseba gore Kgoši Dafida o goletšwe Absalomo kudukudu, ka gona a roma motho go yo bitša mosadi yo bohlale yo a bego a dula Tekoa. Ge mosadi yoo a fihla, Joaba a re go yena: “Itire mo nkego o dillong; o apare diaparo tša go ilela, gomme o se ke wa tlola. O itshware bjalo ka mosadi yo a bilego dillong nako ye telele. O ye go kgoši o mmotše se ke go botšago gore o se bolele.” Ke moka Joaba a mmotša se a swanetše go se bolela. Mosadi yoo a ya go kgoši, a obama, a itahlela fase ka sefahlego, a re: “Nthuše, kgoši!” Kgoši a mmotšiša a re: “O nyaka eng?” Mosadi a mo fetola a re: “Ke nna mosadi wa mohlologadi. Ke hlokafaletšwe ke monna. Nna, mohlanka wa gago, ke be ke na le barwa ba babedi, gomme ka letšatši le lengwe ba lwa kua nageng mo go bego go se yo a ka ba namolago, mme yo mongwe a bolaya yo mongwe. Gomme bjale, meloko ya ka ka moka e ntlhanogetše, nna, mohlanka wa gago, mme ba nyaka gore ke ba neele morwa wa ka, gore ba mmolaye ka ge a bolaile ngwanabo. Ge ba ka dira taba yeo, ke tla šala ke se na le mojalefa. Ba tla tima mollwana wa ka wo o sa šetšego, gomme monna wa ka a tla a hloka morwa yo a tlago tsoša leina la gagwe.” Kgoši ya mo fetola ya re: “Boela gae, gomme ke tla hlokomela taba ye.” Mosadi a re: “Kgoši, mong wa ka, se o ka se dirago, molato e tla ba wa ka le lapa lešo; wena le lapa la mošate le ka se be le molato.” Kgoši a mo fetola a re: “Ge yo mongwe a ka go tšhošetša, o mo tliše go nna, gomme a ka se tsoge a go tshwentše gape.” Mosadi a re: “Hle, kgoši, rapela Morena Modimo wa gago, gore moloko wešo yo a swanetšego go lefeletša lehu la morwa wa ka a se ke a oba molato wo mogolo ka go bolaya morwa wa ka yo mongwe.” Dafida a mo fetola a re: “Ke ena ka Morena yo a phelago gore morwa wa gago a ka se kwišwe bohloko le gatee.” Mosadi a re: “Hle, kgoši, nna, mohlanka wa gago, a ke go botšiše tabanyana e tee fela.” Kgoši a mo fetola a re: “Go lokile.” Mosadi a re go yena: “Ke ka baka lang o diretše setšhaba sa Modimo phošo ye kaaka ye? Ga se wa dumelela morwa wa gago gore a boe kua a tšhabetšego ntshe, gomme o ipona phošo ka seo o sa tšwago go se bolela. Re tla hwa ka moka; re bjalo ka meetse a a tšhologetšego fase, ao a ka se kgobokanywego gape. Le Modimo ga a nyake gore motho a bolawe, fela o loga maano a gore yo a kgetholotšwego ke batho yena a se ke a mo kgetholla. Bjale, se se ntlišitšego go tlo bolela nago, kgoši, mong wa ka, ke gore batho ba ntšhošitše, ka gona ka ipotša ka re ke tla bolela nago; mohlomongwe o tla dira se ke se kgopelago. Ke ile ka gopola gore o tla ntheetša, wa mphološa go yoo a lekago go bolaya morwa wa ka mme ka go dira bjalo a re fediša setšhabeng sa Modimo. Ke ipoditše gore se o tlago bolela, kgoši, mong wa ka, se tla mpea pelo, ka gobane kgoši o bjalo ka morongwa wa Modimo, mme o kgona go kgetholla botse le bobe. A Morena Modimo wa gago a be le wena!” Kgoši a mo fetola a re: “Ke tlilo go botšiša potšišo, gomme o se ke wa nkutela selo.” Mosadi a mo fetola a re: “O ka mpotšiša se o se nyakago, kgoši.” Kgoši a mmotšiša a re: “A ga se Joaba a go dirišago dilo tše?” Mosadi a mo fetola a re: “Ke ena ka bophelo bja gago, kgoši, gore ga go ka moo nka se fetolego potšišo ya gago. Gabotsebotse mohlanka wa gago, Joaba, ke yena yo a mpoditšego gore ke dire eng, le gore ke bolele eng. Eupša o dirile ka mokgwa woo gore a tle a rarolle taba ye. Kgoši ke yo bohlale bjalo ka morongwa wa Modimo, gomme o tseba tšohle tše di diregago.” Ka morago kgoši ya re go Joaba: “Ke itherile gore ke tla dira se o se nyakago. Sepela o yo tšea lesogana lela, Absalomo, o mmušetše mo.” Joaba a obama, a itahlela fase ka sefahlego pele ga Dafida, a mo šegofatša. A re: “Bjale ke a tseba gore ke a go kgahla, ka gobane o dumetše se ke se kgopetšego.” Ke moka a emelela a ya Geshure gomme a bušetša Absalomo Jerusalema. Le ge go le bjalo, kgoši a laela gore Absalomo a se ke a dula ngwakong wa kgoši. A re: “Ga ke nyake go mmona.” Ka gona Absalomo a dula ka ngwakong wa gagwe gomme a se ke a tla go kgoši. Go be go se na monna mo Israele yo a bego a tumišwa ka go bopega gabotse bjalo ka Absalomo; o be a sa solege felo mmeleng. O be a kota hlogo gatee ka ngwaga ge moriri wa gagwe o gotše kudu mme o mo imela. Ge o kotilwe o be o imela go feta dikilokramo tše pedi go ya ka kelo ya mošate ya boima. Absalomo o be a na le barwa ba bararo le morwedi yo mobotse yo leina la gagwe e bego e le Tamare. Absalomo o ile a dula mengwaga ye mebedi Jerusalema a sa bone kgoši. Ke moka a roma motho go yo bitša Joaba gore a tle a mo yele go kgoši, eupša Joaba a se ke a tla. Absalomo a roma motho gape go yena, gomme le gona Joaba a gana go tla. Ka gona Absalomo a re go bahlanka ba gagwe: “Bonang, tšhemo ya Joaba e beelane mellwane le ya ka, gomme o lemile mabele. Sepelang le yo tšhuma tšhemo yeo.” Ka gona ba ya ba e tšhuma. Joaba a ya ngwakong wa Absalomo gomme a mmotšiša a re: “Ke ka baka lang bahlanka ba gago ba tšhumile tšhemo ya ka?” Absalomo a mo fetola a re: “Ke ka gobane ga se wa tla ge ke roma batho go wena. Ke be ke nyaka gore o ye go kgoši gomme o mpotšišetše yena o re: ‘Ke ka baka lang ke tlogile Geshure ka tla mo? Nkabe go bile kaone mola ke no itulela kua.’ ” Gomme Absalomo a tšwela pele a re: “Ke nyaka go ya go kgoši, gomme ge e le gore ke na le molato, gona a mpolaye.” Ka gona Joaba a ya go Kgoši Dafida a mmotša se Absalomo a se boletšego. Ka fao kgoši a roma motho gore a bitše Absalomo. Absalomo a ya go yena mme a obama pele ga gagwe. Kgoši a mo amogela a mo atla. Ka morago ga tšeo Absalomo a inyakela koloi le dipere, le banna ba go sepela pele ga gagwe ba e ka bago ba masome a fetšago seatla. O be a tsoga e sa le bošego gomme a ye go ema ka thoko ga tsela kua kgorong ya motse. Ge motho a etla moo ka molato wo a nyakago gore kgoši a o ahlole, Absalomo o be a mmitša gomme a mmotšiše gore o tšwa kae. E re ge monna yoo a mmoditše kgoro ye a tšwago go yona, Absalomo a re: “Bona, molao o kwana le wena, fela ga go moemedi wa kgoši yo a tlago ahlola molato wa gago.” Gomme a tlaleletše ka go re: “Nke nkabe ke le moahlodi wa naga ye! Ke moo yo mongwe le yo mongwe yo a nago le taba a bego a tla tla go nna, mme ka mo ahlola ka toka.” Ge motho yoo a batamela Absalomo gore a obame pele ga gagwe, Absalomo o be a iša letsogo, a mo sware, mme a mo atle. Absalomo a dira seo go Moisraele yo mongwe le yo mongwe yo a tlelago go ahlolwa ke kgoši, ka gona a ba utswa dipelo. Ka morago ga mengwaga ye mene Absalomo a re go Kgoši Dafida: “Morena, a ke ye Hebrone ke yo phetha keno ye ke e enetšego Morena. Mola ke sa dula Geshure kua Siria ke ile ka enela Morena gore ruri ge a ka mpušetša Jerusalema, ke tla tla ke mo khunamela kua Hebrone.” Kgoši a re: “O sepele gabotse.” Ka gona Absalomo a ya Hebrone. Gomme a roma batseta dikgorong ka moka tša Israele gore ba bege ba re: “Ge le ekwa phalafala e lla, le goeng le re: ‘Absalomo ke kgoši kua Hebrone!’ ” Go be go na le banna ba makgolo a mabedi bao ba bego ba laleditšwe ke Absalomo mme ba sepetše naye go tloga Jerusalema; ba be ba sa tsebe selo ka maano a Absalomo mme ba ile moo ka go se feme selo. Gomme ya re mola Absalomo a sa dira dihlabelo, a roma motho motseng wa Gilo gore a yo bitša Ahitofele, yo e bego e le yo mongwe wa baeletši ba Kgoši Dafida. Maano a go theola Dafida setulong a ba le maatla, gomme balatedi ba Absalomo ba oketšega. Motseta o ile a begela Dafida a re: “Baisraele ba ema le Absalomo.” Ka gona Dafida a re go bahlankedi ba gagwe ka moka ba ba bego ba na le yena Jerusalema: “Re swanetše go tšhaba gonabjale ge re nyaka go phologa go Absalomo! Itlhaganeleng! Go sego bjalo o tla fihla mo gonabjale gomme a re fenya mme a bolaya yo mongwe le yo mongwe mo motseng!” Bona ba mo fetola ba re: “Ee, kgoši, mong wa rena. Re itokišeditše go dira se sengwe le se sengwe se o se bolelago.” Ka gona kgoši a tloga, a sepela le ba lapa la gagwe ka moka le bahlankedi ba gagwe, ntle le metlabo ye lesome ye a ilego a e šadiša go hlokomela mošate. Ge kgoši le banna ba gagwe ka moka ba etšwa motseng, ba ile ba ema ngwakong wa mafelelo. Bahlankedi ba gagwe ka moka ba ema kgauswi le yena ge baleti ba kgoši ba feta pele ga gagwe. Bahlabani ba makgolo a a selelago bao ba mo latetšego go tloga Gathe le bona ba feta, gomme kgoši a re go Itai, moetapele wa bona: “Ke ka baka lang o sepela le rena? Boela morago gomme o yo dula le kgoši ye mpsha. Ke wena mofaladi, morakiwa yo a lego kgole le naga ya gabo. O dutše mo lebakana le lekopana fela, bjale go ka se be botse gore ke go iše kua le kua. Le mo ke yago ga ke go tsebe. Boela morago le batho ba geno, gomme hle, a Morena e be yo botho go wena mme a go botegele.” Eupša Itai a mo fetola a re: “Kgoši, ke go enela ka Morena yo a phelago gore ka mehla ke tla ya nago mo o yago gona, le ge e ka hlwa e le lehung.” Dafida a mo fetola a re: “Go lokile. Fetela pele.” Ka gona Itai a fetela pele le banna ba gagwe ka moka le basadi le bana ba bona. Batho ba be ba lla ka go hlaboša mantšu ge balatedi ba Dafida ba tloga. Kgoši a tshela moedi wa Kidrone, banna ba gagwe ba mo latela, gomme ba tšwa mmogo ba leba lešokeng. Moprista Tsadoko o be a le moo a na le Balefi ba ba rwelego Polokelo ya Kgwerano ya Modimo. Ba e bea fase gomme ba se ke ba e kuka gape go fihlela batho ka moka ba tšwile motseng. Moprista Abiatare le yena o be a le gona. Ke moka kgoši a re go Tsadoko: “Boetša Polokelo ya Kgwerano motseng. Ge ke kgahla Morena, ka letšatši le lengwe o tla mpuša a tlo mpontšha yona gotee le felo mo e dutšego ntshe. Eupša ge ke sa mo kgahle – gona go lokile, a a dire ka nna se a se ratago.” A tšwela pele a re go Tsadoko: “Bona, tloga le Ahimaatse, morwago, le Jonathane, morwa wa Abiatare, o ipoelele motseng, o se ke wa boifa selo. Nna ke tla be ke letetše matšibogong a noka kua lešokeng go fihlela le mpotša tše di diregago.” Ka gona Tsadoko le Abiatare ba boetša Polokelo ya Kgwerano Jerusalema, gomme ba dula fao. Dafida a namela Thaba ya Mehlware a lla; o be a se a rwala dieta, a bile a ikhurumeditše hlogo, e le sešupo sa manyami. Bohle ba ba bego ba mo latela le bona ba be ba ikhurumeditše dihlogo ba lla. Ge Dafida a botšwa gore Ahitofele o tsene mpherefereng wa Absalomo, a rapela a re: “Hle, Morena, phuhlamiša dikeletšo tša Ahitofele.” Ge Dafida a fihla kua godimo ga thaba moo go bego go le lefelo la tirelo, Hushai, Moaraki, a mo gahlanetša a gagotše diaparo tša gagwe mme a itšhetše hlogo ka mobu. Dafida a re go yena: “O ka se nthuše ka selo ge o ka sepela le nna, eupša o ka nthuša ka go boela motseng mme wa botša Absalomo gore bjale o tla mo direla ka potego bjalo ka ge o be o direla tatagwe. Gomme o leke ka moo o ka kgonago go gana keletšo ye nngwe le ye nngwe ye Ahitofele a e rotošago. Moprista Tsadoko le moprista Abiatare ba tla be ba le gona; o ba botše se sengwe le se sengwe se o se kwago mošate. Ba na le barwa ba bona, Ahimaatse le Jonathane, gomme o ka roma bona go nna ba tliša ditaba ka moka tše o di kwago.” Ka gona Hushai, mogwera wa Dafida, a boela motseng ge Absalomo a sa goroga. Ge Dafida a theogile thaba gannyane, ka bjako a gahlanetšwa ke Tsiba, mohlanka wa Mefiboshete, yo a bego a gapa dipokolo di se kae tše di rwelego dinkgwa tše makgolo a mabedi, le diphaphathi tše lekgolo tša makwapi a diterebe, le tše lekgolo tša dienywa tša selemo, le lekuka la beine. Kgoši Dafida a mmotšiša a re: “A o ile go dira eng ka dilo tše ka moka?” Tsiba a mo fetola a re: “Dipokolo tše di tla namelwa ke ba lapa la kgoši; ge e le dinkgwa le dienywa tšona e tla ba dijo tša banna ba gago, mme beine ya ba ya batho ba ba ka lapago kua lešokeng.” Kgoši a mmotšiša a re: “Mefiboshete, setlogolo sa mong wa gago, Saulo, o kae?” Tsiba a mo fetola a re: “O ituletše Jerusalema ka gobane o kgolwa gore bjale Baisraele ba tla bušetša mmušo wa rakgolwagwe Saulo go yena.” Kgoši a re go Tsiba: “Tšohle tše e bego e le tša Mefiboshete ke tša gago.” Tsiba a mo fetola a re: “Thobela. Anke ka mehla ke fele ke kgahla kgoši, mong wa ka!” Ge Kgoši Dafida a fihla kua Bahurime, yo mongwe wa meloko ya Saulo, Shimi, morwa wa Gera, a tšwa go tlo mo gahlanetša, a tšama a mo rogaka. Shimi a thoma go foša Dafida le bahlankedi ba gagwe ka maswika, le ge Dafida a be a dikaneditšwe ke banna ba gagwe le baleti. Shimi a mo rogaka a re: “Tloga! Tloga mo! Mmolai yo! Sekebeka tena! O amogile Saulo mmušo, gomme bjale Morena o a go otla ka ge o bolaile lešaba le lekaaka la lapa la Saulo. Morena o neetše morwa wa gago, Absalomo, mmušo, mme wena o lahlegile, mmolai tena!” Abishai, yo mmagwe e bego e le Tseruya, a re go kgoši: “Kgoši, o reng o lesa mpša ye e hwilego ye e go rogaka? A ke ye ke e ripe hlogo!” Kgoši a re go Abishai le Joaba, morwarragwe: “Ga se taba ya lena ye! Ge a nthogaka ka gobane Morena a mmoditše gore a nthogake, ke mang yo a ka botšišago gore o direlang taba yeo?” Gomme Dafida a re go Abishai le go bahlankedi ba gagwe ka moka: “Ge ešita yo e lego morwa wa ka tiitii e le yena yo a lekago go mpolaya, le ka napa la makatšwa ke Mobenjamene yo a nthogakago yo? Morena o mmoditše gore a nthogake; ka gona mo leseng. Mohlomongwe Morena o tla bona tlaišego ya ka gomme a ntšhegofatša bakeng sa go rogakwa mo.” Ka gona Dafida le banna ba gagwe ba fela ba swere tsela. Shimi a ba šala morago, a hlahla le patoga; o be a tšama a rogaka a ba foša ka maswika a ba tšitla ka mobu. Kgoši le banna ba gagwe ka moka ba be ba lapile ge ba fihla Jordane gomme ba khutša fao. Absalomo le Baisraele ka moka ba ba bego ba na le yena ba tsena Jerusalema, Ahitofele a na le bona. Ge Hushai, mogwera wa Dafida, a gahlana le Absalomo, o ile a goa a re: “A kgoši e re phelele! A kgoši e re phelele!” Absalomo a mmotšiša a re: “A ga o sa botegela mogwera wa gago, Dafida? Ke ka baka lang o se wa sepela le yena?” Hushai a mo fetola a re: “Aowa, ke be nka se kgone! Nna ke ema le yo a kgethilwego ke Morena, le ke batho ba, le ke Baisraele ka moka. Ke tla dula nago. Kgane ke mang yo ke swanetšego go mo hlankela? A ke re ke wena, morwa wa mong ka? Bjalo ka ge ke hlanketše tatago, bjale ke tla hlankela wena.” Ke moo Absalomo a retologetšego go Ahitofele, a re: “Bjale ka gore re mo, re eletšeng gore re dire eng.” Ahitofele a re go Absalomo: “Yaa go robala le metlabo ya tatago ye a e tlogetšego mo gore e hlokomele mošate. Ke moo yo mongwe le yo mongwe mo Israele a tlago tseba gore o kgopišitše tatago, gomme balatedi ba gago ba tia maatla.” Ka gona ba hlomela Absalomo mošaša godimo ga tlhaka ya ngwako wa mošate, gomme a tsena bohle ba mo lebeletše a robala le metlabo ya tatagwe. Keletšo ye nngwe le ye nngwe ya Ahitofele mehleng yeo e be e amogelwa mo nkego ke lentšu la Modimo; bobedi bja bona, Dafida le Absalomo, ba be ba latela dikeletšo tšeo. Go se gwa iša kae Ahitofele a re go Absalomo: “A ke kgethe banna ba dikete tše lesome le tše pedi, gomme ke hlomare Dafida bošegong bja lehono. Ke tla mo hlasela mola a lapile mme a nolegile moko. O tla tšhoga mme banna ba gagwe ka moka ba tšhaba. Ke tla bolaya kgoši fela, gomme ka bušetša banna ba gagwe ka moka go wena. Lehu la motho yo o nyakago go mmolaya, e lego Kgoši Dafida, le tla dira gore batho ba gagwe bohle ba eme le wena, gomme setšhaba ka moka sa iketla.” Keletšo yeo ya thabiša Absalomo le baetapele ba Baisraele ka moka. Absalomo a re: “Bjale bitša Hushai gomme re tle re kwe gore yena o tla reng.” Ge Hushai a fihla, Absalomo a mmotša se Ahitofele a ba boditšego sona, gomme a re: “Na re dire ka mokgwa woo? Ge o sa kwane le taba yeo, re botše gore re dire eng.” Hushai a mo fetola a re: “Keletšo ye Ahitofele a go filego yona lehono ga se ya loka. O a tseba gore tatago le banna ba gagwe ke bahlabani ba bogale mme ke ba bašoro bjalo ka bere ya tshadi e utsweditšwe bana ba yona. Tatago ke mohlabani wa mahlwaadibona, gomme ga a dule le banna ba gagwe bošego. Gonabjale mohlomongwe o utamile ka leweng goba felwana mo gongwe. Ge Dafida a se na go thoma go bolaya banna ba gago, yo mongwe le yo mongwe yo a kwago taba yeo o tla re banna ba gago ba fentšwe. Ke moo le banna ba bogalegale, bao ba sa boifego selo bjalo ka ditau, ba tlago boifa ka gobane yo mongwe le yo mongwe mo Israele o a tseba gore tatago ke mohlabani yo mogolo, le gore banna ba gagwe ke bahlabani ba bogale. Keletšo ya ka ke gore o kgobokanye Baisraele ka moka mathokong ohle a naga, ka bontši bja go lekana le dithorwana tša lešabašaba lebopong la lewatle, gomme wena ka bowena o ba ete pele ntweng. Re tla hwetša Dafida moo a lego gona, gomme ra mo wela godimo bjalo ka phoka ge e ewa fase. Yena le banna ba gagwe ga go le o tee yo a tlago phologa. Ge a ka tšhabela ka motseng wo mongwe, Baisraele ka moka ba tla tliša dithapo gomme ba gogolela motse woo ka moeding. Ga go le leswika le tee leo le tlago šadišwa.” Absalomo le Baisraele ka moka ba re: “Keletšo ya Hushai e phala yela ya Ahitofele.” Morena o be a beakantše gore keletšo ye botse ya Ahitofele e se ke ya latelwa, gore a tle a wetše Absalomo kotsing. Ke moo Hushai a boditšego moprista Tsadoko le moprista Abiatare keletšo ye a e filego Absalomo le baetapele ba Baisraele, le keletšo yeo Ahitofele a ba filego yona. Hushai a tlaleletša ka go re: “Bjale phakišang! Romelang molaetša go Dafida gore a se ke a robala matšibogong a noka kua lešokeng, eupša a tshele noka ka pele, gore yena le banna ba gagwe ba se ke ba tla ba bolawa ka moka.” Jonathane, morwa wa Abiatare, le Ahimaatse, morwa wa Tsadoko, ba be ba letetše kua mothopong wa Rogele ka gore ba be ba tšhaba go ka bonwa ba tsena motseng. Modiredi wa mosetsana o be a fela a eya a ba botša seo se diregago, gomme bona ba fela ba yo botša Kgoši Dafida. Eupša ka letšatši le lengwe mošemanyana yo mongwe a ba bona, gomme a botša Absalomo; ka gona ba itlhaganela ba ya ba utama ka ngwakong wa monna yo mongwe kua Bahurime. O be a na le sediba ka kgorong ya gagwe, gomme ba theogela ka moo sedibeng. Mosadi wa monna yoo a tšea sepipetši, a se ala godimo ga sediba seo gomme a tšitlanya mabele godimo ga sona, gore go se be yoo a lemogago. Bahlankedi ba Absalomo ba tla moo ngwakong woo gomme ba botšiša mosadi yoo ba re: “A Ahimaatse le Jonathane ba kae?” Mosadi yoo a ba fetola a re: “Ba tshetše noka.” Banna bao ba ba nyaka eupša ba se ke ba ba bona, ka fao ba boela Jerusalema. Ge ba tlogile, Ahimaatse le Jonathane ba tšwa ka moo sedibeng gomme ba ya ba begela Kgoši Dafida ditaba tšeo. Ba mmotša se Ahitofele a ikemišeditšego sona ka yena, mme ba re: “Itlhaganele o tshele noka.” Ka gona Dafida le banna ba gagwe ba thoma go tshela Jordane, gomme ge letšatši le hlaba ke ge ka moka ba tshetše. Ge Ahitofele a bona gore keletšo ya gagwe ga se ya latelwa, a saletša pokolo ya gagwe gomme a gomela motseng wa gabo. Ge a abagantše thoto ya gagwe, a iphega. A bolokwa ka lebitleng la lapa. Dafida o be a šetše a fihlile motseng wa Mahanaime ka nako ye Absalomo le Baisraele ba tshela Jordane. Absalomo o be a beile Amasa molaodi wa madira legatong la Joaba. Amasa e be e le morwa wa Jetere, Moishmaele; mmagwe e be e le Abigaile, morwedi wa Nahashe, Abigaile e be e le ngwanaboTseruya, mmagoJoaba. Absalomo le banna ba gagwe ba ile ba hloma mešaša nageng ya Gileade. Ge Dafida a fihla Mahanaime, a gahlanetšwa ke Shobi, morwa wa Nahashe, wa motse wa Raba kua Amone, le Makire, morwa wa Amiele, wa Lo-Dabare, le Barsilai, wa Roglime kua Gileade. Ba tla le meruswi le dipitša le tša go robala, ba tlišetša le Dafida le banna ba gagwe mabele, garase, bupi, dipale, dinawa, dihlodi, todi, tšhise, lebebe le dihuswane. Ba be ba tseba gore Dafida le banna ba gagwe ba tla be ba swerwe ke tlala le lenyora, mme ba lapile kua lešokeng. Kgoši Dafida a kgobokanya banna ba gagwe, a ba arola dihlopha tša dikete le tša makgolo, gomme a ba beela balaodi. Ke moka a ba ntšha motseng ka dihlopha tše tharo; sa pele se laolwa ke Joaba, sa bobedi se laolwa ke Abishai, monnagoJoaba, sa boraro se laolwa ke Itai wa Gathe. Gomme kgoši a re go banna ba gagwe: “Nna ka bonna ke tla ya le lena.” Bona ba mo fetola ba re: “O se ke wa ya le rena. Rena manaba a ka se re ele hloko ge ka moka re ka tšhaba, goba le ge seripa sa rena se ka bolawa; eupša wena o lekana le ba dikete tše lesome ba rena. Go kaone ge o ka itšhalela mo motseng gomme wa re romela thušo.” Kgoši a ba fetola a re: “Ke tla dira se le bonago se lokile.” Ke mo a ilego a ema ka thoko ga kgoro mola banna ba gagwe ba etšwa ka dihlopha tša dikete le tša makgolo. A laya Joaba le Abishai le Itai a re: “Ka baka la ka hle, le sware lesogana leo, Absalomo, gabotse.” Gomme madira ka moka a kwa Dafida ge a laya balaodi ba ona ka tsela yeo. Madira a Dafida a tšwa a ya nageng gomme a lwa le Baisraele sethokgweng sa Efraime. Baisraele ba fenywa ke banna ba Dafida; ba ile ba fenywa o šorošoro, gwa bolawa banna ba dikete tše masome a mabedi tšatši leo. Ntwa ya ikala le naga, gomme banna ba bantšintši ba hwa kua sethokgweng go feta bao ba bolailwego ntweng. Absalomo a gahlana le banna ba bangwe ba Dafida a sa itebetše. O be a nametše meila, gomme ge e feta ka fase ga mohlare wo mogolo wa moeike, a tanywa ka hlogo gare ga makala. Meila ya fela e kitima, gomme Absalomo a šala a lekeletše. Monna yo mongwe wa Dafida a mmona gomme a begela Joaba a re: “Ke bone Absalomo a lekeletše mohlareng wa moeike!” Joaba a mo fetola a re: “Ge e le gore o mmone, ke ka baka lang o se wa mmolaya gona moo? Nna nkabe ke go file dipapetlana tše lesome tša silibera le lepanta la botšhepi.” Eupša monna yoo a mo fetola a re: “Le ge nkabe o mphile dipapetlana tše sekete tša silibera, ke be nka se kgwathe morwa wa kgoši. Ka moka re kwele kgoši ge a laya wena le Abishai le Itai a re: ‘Ka baka la ka hle, le hlokomele lesogana leo, Absalomo.’ Eupša mola ke nyatše kgoši gomme ke bolaye Absalomo, kgoši a ka be a kwele taba yeo – o kwa taba ye nngwe le ye nngwe – gomme o ka be o se wa ntšhireletša.” Joaba a re: “Ga ke tle go hlwa ke senya nako le wena.” A tšea marumo a mararo a thothobetša Absalomo sefega a sa phela, a lekeletše mohlareng wa moeike. Ke moo bahlabani ba bangwe ba Joaba ba lesome ba dikaneditšego Absalomo mme ba mo feleletša. Joaba a laela gore phalafala e letšwe go emiša ntwa, gomme madira a gagwe a gomela Baisraele a boa. Ba tšea setopo sa Absalomo, ba se lahlela ka moleteng wo o išago fase kua sethokgweng, gomme ba se kgatlelela ka morako wo mogolo wa matlapa. Baisraele ka moka ba tšhaba, yo mongwe le yo mongwe a tšhabela lapeng la gagwe. Ge Absalomo a sa phela o ile a ikagela sehlwaseeme kua Molaleng wa Kgoši, ka gobane o be a se na le morwa yo a tlago tšwetša leina la gagwe pele. Ka gona o ile a reela sehlwaseeme seo leina la gagwe, gomme go fihlela le lehono se sa tsebja ka la Sehlwaseeme sa Absalomo. Ahimaatse, morwa wa Tsadoko, a re go Joaba: “A ke kganyelele go kgoši ke yo mmotša ditaba tše botse tša go re Morena o mmolokile manabeng a gagwe.” Joaba a re: “Aowa, lehono ga go taba tše botse tše o kago yo di bega. Ka letšatši le lengwe o ka ya, eupša e sego lehono, ka gobane go hwile morwa wa kgoši.” Ke moka a re go lekgoba la gagwe la Moetopia: “Sepela o yo botša kgoši se o se bonego.” Lekgoba la obama pele ga Joaba mme la tlogelela ka lebelo. Ahimaatse a fela a phegeletše a re: “Ga ke na taba le gore ke tla hlagelwa ke eng; le nna ntumelele ke yo bega ditaba tše.” Joaba a mmotšiša a re: “Ke ka baka lang o nyaka go ya, ngwanaka? O ka se ke wa putswa ka selo ka baka la gona.” Ahimaatse a bolela gape a re: “Ga ke na taba le gore ke tla hlagelwa ke eng; ke a ya.” Joaba a re: “Gona sepela.” Ka gona Ahimaatse a kganyela a theoga ka tsela ye e putlago moedi wa Jordane, gomme a feta lekgoba lela. Dafida o be a dutše magareng ga kgoro ya ka gare le ya ka ntle ya motse. Mohlapetši a namelela morakong a ema godimo ga tlhaka ya kgoro; ge a lebelela a bona monna a kitima a nnoši. A hlaeletša kgoši fase a mmotša, mme kgoši a re: “Ge a le noši o tliša ditaba tše botse.” Mokganyedi yola a fela a batamela. Ke moo mohlapetši yola a bonego yo mongwe monna a kitima a nnoši, gomme a hlaeletša moleti wa kgoro kua fase a re: “Bona! Yo mongwe monna šole o a kganyela!” Kgoši a mo fetola a re: “Yoo le yena o tliša taba tše botse.” Mohlapetši a re: “Ke a bona gore monna yola wa pele o kganyela bjalo ka Ahimaatse, morwa wa Tsadoko.” Kgoši a re: “Ahimaatse ke monna wa go loka, gomme o tliša taba ye botse.” Ahimaatse a tamiša kgoši, a mo obamela, gomme a re: “A go tumišwe Morena Modimo wa gago, ka gobane banna bale ba bego ba go tsogela maatla o ba gafetše diatleng tša gago.” Kgoši a mmotšiša a re: “A lesogana lela, Absalomo, le sa phela gabotse?” Ahimaatse a mo fetola a re: “Mong wa ka, ge Joaba, molaodi wa madira a gago, a nthoma, ke bone mpherehlakana wo mogolo, eupša ka se ke ka bona gore ke wa eng.” Kgoši a re: “Emela mola.” Gomme a ya a ema gona. Ka morago gwa fihla lekgoba lela la Moetopia gomme la re go kgoši: “Ke swaretše kgoši ditaba tše botse! Lehono Morena o fentše bohle bao ba bego ba go tsogela maatla!” Kgoši a mmotšiša a re: “A lesogana lela, Absalomo, le sa phela gabotse?” Lekgoba la mo fetola la re: “Kgoši, mong wa ka, ke duma ge nkabe se se mo hlagetšego se ka hlagela manaba a gago ka moka, le bohle bao ba go tsogelago maatla.” Kgoši a kwa bohloko kudukudu. A namelela ka phapošing ye e lego ka godimo ga kgoro gomme a lla. Ge a sepela o be a tšama a lla a re: “Joo ngwanaka! Ngwanaka Absalomo! Absalomo, ngwanaka! Nkabe e be nna ke hwago sebakeng sa gago, ngwanaka! Absalomo, ngwanaka!” Joaba o ile a botšwa gore Dafida o llela Absalomo, ebile o mo iletše. Ka gona lethabo la go fenya la fetogela madira ka moka a Dafida manyami letšatši leo, ka gobane ba be ba kwele gore kgoši o llela morwa wa gagwe. Ba ile ba boela motseng ba homotše, ba le bjalo ka bahlabani ba ba lewago ke dihlong ka gore ba tšo tšhaba ntweng. Kgoši a ipipa sefahlego gomme a hlaboša lentšu a lla a re: “Joo ngwanaka! Ngwanaka Absalomo! Absalomo, ngwanaka!” Joaba a ya ngwakong wa kgoši gomme a re go yena: “Lehono o lešitše banna ba gago dihlong – banna ba ba phološitšego wena le barwa ba gago le barwedi ba gago le basadi ba gago le metlabo ya gago. O hloile bao ba go ratago mme o rata bao ba go hloilego! Lehono o laeditše gore balaodi ba madira a gago le banna ba gago ga se selo go wena. Ke a bona gore o be o tla thaba ge Absalomo a ka be a phela lehono gomme rena ka moka re hwile. Bjale tsoga o yo kgothatša banna ba gago. Ke ena ka leina la Morena gore ge o ka se ye, banna ba gago ka moka ba tla go tlogela bjona bošego bjo. Bjoo e tla ba bobe bjo bogologolo bjo e sa lego e eba wena o sego wa ka wa bo bona.” Ke moo kgoši a tsogilego gomme a ya a dula lesorong la kgoro ya motse. Banna ba gagwe ba kwa gore kgoši o fao, gomme ba mo kgobokanela ka moka. Baisraele ka moka ba be ba tšhabile, yo mongwe le yo mongwe a tšhabetše lapeng la gagwe. Nageng ka moka ba ile ba thoma go lwa seng sa bona. Ba botšana ba re: “Kgoši Dafida o re bolokile manabeng a rena. O re phološitše go Bafilista, eupša bjale o tšhabile Absalomo mme o tšwile mo nageng ye. Re be re tloditše Absalomo gore e be kgoši ya rena, eupša o bolailwe ntweng. A bjale re reng re no itulela re sa bušetše Dafida mo?” Ditaba tšeo Baisraele ba bego ba di bolela tša fihla ditsebeng tša Kgoši Dafida. Ka gona yena a roma moprista Tsadoko le moprista Abiatare gore ba yo botšiša baetapele ba Juda ba re: “Ke ka baka lang le eba ba mafelelo go thuša go bušetša kgoši mošate ga gagwe? Ke lena bomorwarre, re madi a tee; ke ka baka lang le swanetše go ba ba mafelelo go mpušetša moo?” Dafida a ba botša le gore ba re go Amasa: “Ke wena madi ešo. Go tloga bjale ke go bea molaodi wa madira sebakeng sa Joaba. A Modimo a mpolaye thoo ge nka se go bee yena!” Mantšu ao a Dafida a dira gore banna ka moka ba Juda ba eme naye ka botlalo, gomme ba mo romela molaetša wa gore a boe le bahlankedi ba gagwe ka moka. Tseleng ya ge a boela morago a gahlanetšwa ke banna ba Juda ba ba bego ba tlile Gilgale go tlo mo tshediša noka. Ka yona nako yeo Shimi, Mobenjamene, morwa wa Gera wa Bahurime, a potlakela Jordane go yo gahlanetša Kgoši Dafida. O be a na le banna ba sekete ba kgoro ya Benjamene. Gomme Tsiba, mohlanka wa lapa la Saulo, le yena a tla le barwa ba gagwe ba lesome le ba bahlano le bahlanka ba masome a mabedi, mme ba fihla Jordane pele ga ge kgoši a fihla. Ba tshela noka go tlo tshediša ba mošate le go dira tšohle tše kgoši a di nyakago. Ge kgoši a sa itokišetša go tshela, Shimi a itahlela fase pele ga gagwe, a re: “Kgoši, hle, lebala phošo yela ka go e dira tšatši lela o tloga Jerusalema. O se ke wa ntshwara ka pelo ka yona goba wa hlwa o sa e gopola. Ke a tseba, nna, mohlanka wa gago, gore ke dirile sebe, gomme lebaka ke lona leo ge ke le wa mathomo wa dikgoro tša ka leboa wa go tlo gahlanetša kgoši lehono.” Abishai, morwa wa Tseruya, a re: “Shimi o swanetše go bolawa ka gobane o rogakile yo Morena a mo tloditšego gore e be kgoši.” Eupša Dafida a re go Abishai le go Joaba, morwarragwe: “Tša ka ga di le ame, lena barwa ba Tseruya. Na ge le realo ga le lwe le nna? Ke nna yo bjale ke lego kgoši ya Israele gape, gomme ga go Moisraele yo a tlago bolawa lehono.” Gomme a re go Shimi: “Ke a go enela gore o ka se bolawe.” Ke moo Mefiboshete, setlogolo sa Saulo, a theogilego go tlo gahlanetša kgoši. O be a se a ka a hlapa maoto, goba a kota maledu, goba a hlatswa diaparo tša gagwe go tloga ka nako yela kgoši a tlogilego Jerusalema go fihlela ge a boa a bolokegile. Ge Mefiboshete a fihla a etšwa Jerusalema a tlile go gahlanetša kgoši, kgoši a re go yena: “Mefiboshete, lebaka ke eng o se wa sepela le nna?” Mefiboshete a mo fetola a re: “Bjalo ka ge o tseba, kgoši, ke golofetše. Ke boditše mohlanka wa ka gore a saletše pokolo ya ka gore ke e namele ke sepele le wena, eupša o ntahleditše. O ntshentše leina go wena, kgoši, eupša wena o bjalo ka morongwa wa Modimo, ka gona dira se o bonago se lokile. Lapa la tate ka moka le be le lebanwe ke go bolawa ke wena, kgoši, eupša nna o mpeile le bao ba jago le wena. Ga ke na le tokelo ya go ka kgopela se sengwe gape go wena, kgoši.” Kgoši a mo fetola a re: “O boletše, go lekane. Ke rerile gore wena le Tsiba le arolelaneng thoto ya Saulo.” Mefiboshete a mo fetola a re: “A Tsiba a tšee thoto yeo ka moka. Nna go ntekane ge kgoši a boetše mo gae a bolokegile.” Barsilai, Mogileade, le yena o be a tlile a etšwa Rogelime go tlo felegetša kgoši go mo tshediša Jordane. Barsilai e be e le mokgalabje kudu, a na le mengwaga ye masome a seswai. O be a humile kudu, gomme e le yena a bego a efa kgoši dijo mola kgoši a sa dula kua Mahanaime. Kgoši a re go yena: “Yaa le nna Jerusalema, gomme ke tla go fepa.” Eupša Barsilai a mo fetola a re: “Ga ke sa na matšatši a mantši a go phela; ke go reng ke swanetše go ya Jerusalema le wena, kgoši? Ke šetše ke na le mengwaga ye masome a seswai, gomme ga ke sa thabišwa ke selo. Ga ke sa kwa bose bja seo ke se jago goba seo ke se nwago, le mantšu a baopedi ba banna le ba basadi ga ke sa kgona go a kwa. Ke tla no go imela, wena kgoši. Nna, mohlanka wa gago, ke tla go felegetša gannyane ka go tshediša noka ya Jordane. Ga ke a swanela moputso wo mogolo ka mokgwa woo. Hle, a ke ipoelele gae mme ke yo ikhwela kgauswi le lebitla la batswadi ba ka. Kimehamo, mohlanka wa gago, šo; sepela naye, kgoši, mme o mo direle se o bonago se lokile.” Kgoši a mo fetola a re: “Ke tla sepela le yena gomme ka mo direla se sengwe le se sengwe se o se nyakago. Gomme ke tla go direla tšohle tše o nkgopelago tšona.” Ke moo Kgoši Dafida le banna ba gagwe ka moka ba tshetšego Jordane. A atla Barsilai, a mo šegofatša, gomme Barsilai a ipoelela gae. Ge kgoši a tshetše a felegeditšwe ke banna ka moka ba Juda le seripa sa banna ba Israele, a leba Gilgale, mme Kimehamo a sepela le yena. Baisraele ka moka ba ya go kgoši gomme ba re go yena: “Kgoši, ke ka baka lang bomorwarragorena, banna ba Juda, ba ile ba gopola gore ba na le tokelo ya go go tšea le go felegetša wena le lapa la gago le banna ba gago, ba go tshediša Jordane?” Banna ba Juda ba ba fetola ba re: “Re dirile taba yeo ka gobane kgoši ke yo mongwe wa rena. Ka gona se re se dirilego se ka le befediša bjang? Ga se a lefela dijo tša rena goba a re fa selo.” Baisraele ba ba fetola ba re: “Kgoši Dafida ke wa rena galesome go feta lena, le ge e ka hlwa e le yo mongwe wa lena. Ke ka baka lang le re nyatša? Le se ke la lebala gore e bile rena ba mathomo ba go rera go yo buša kgoši!” Eupša banna ba Juda ba bolela ka bogale go feta banna ba Israele. Moo Gilgale go be go na le monna yo mongwe yo mobe yo leina la gagwe e bego e le Sheba, morwa wa Bikri, wa kgoro ya Benjamene. O ile a letša phalafala, a goelela a re: “Ga re iše felo ka Dafida! Ga ra hlakanela selo le morwanyana yoo wa Isai! Banna ba Israele, a re ikeleng gae!” Ka gona banna ba Israele ba tlogela Dafida ba sepela le Sheba, eupša banna ba Juda bona ba fela ba botegela Dafida mme ba mo latela go tloga Jordane go yo fihla Jerusalema. Ge Dafida a fihla mošate ga gagwe kua Jerusalema, a tšea metlabo yela ye lesome ye a ilego a e tlogela gore e hlokomele mošate, gomme a e bea ka ngwakong wo o letilwego. A fela a ba hlokomele ka tše ba di nyakago, eupša a se ke a robala nabo. Ba ile ba dula thokwana bophelo bja bona ka moka, ba phela bjalo ka bahlologadi. Kgoši a re go Amasa: “Kgobokanya banna ba Juda mme o tle nabo mo go hlwa bosasa.” Amasa a yo ba bitša, eupša a se ke a boa ka nako yela kgoši a e beilego. Ka gona kgoši a re go Abishai: “Sheba o tla re swariša bothata bja go feta bjo Absalomo a bego a re swarišitše bjona. Tloga le banna ba ka o mo hlomare gore a se tsene metseng ye e ageleditšwego ka merako mme ya ba gona ge a re timeletše.” Ka gona banna ba Joaba le baleti ba kgoši le bahlabani ba bangwe ka moka ba tloga Jerusalema gore ba hlomare Sheba. Ge ba fihla lerakong le legolo kua Gibeone ba gahlana le Amasa. Joaba o be a apere tša ntwa le tšhoša e le ka segatleng sa yona se se tlemeletšwego lepanteng la gagwe. Ge a batamela Amasa tšhoša yela ya wa. Joaba a re go Amasa: “Go bjang, mogwerake?” Gomme a mo swara ka maledu ka seatla sa la go ja gore a mo atle. Amasa o be a se a gopola go phema tšhoša ye Joaba a bego a e swere ka seatla se sengwe, gomme Joaba a mo tsetsemetša dimpa ka yona, dikateng tša gagwe tša kgothogela fase. A hwa ka pelapela, mo e lego gore Joaba o ile a se ke a mmoeletša. Ke moo Joaba le Abishai, morwarragwe, ba tšwetšego pele ba hlomara Sheba. Yo mongwe wa banna ba Joaba a ema kgauswi le setopo sa Amasa, a goelela a re: “Yo mongwe le yo mongwe yo a emego le Joaba le Dafida a a latele Joaba!” Setopo sa Amasa seo se bego se ripitla mading se be se rapaletše gare ga tsela. Monna yo mongwe wa Joaba a bona gore yo mongwe le yo mongwe o ema fao, ka gona a goga setopo seo moo tseleng a se iša ka thoko gomme a se pipa ka kobo. Ka morago ga ge setopo seo se tlošitšwe moo tseleng, yo mongwe le yo mongwe a latela Joaba go hlomara Sheba. Sheba o ile a putla dinaga tša dikgoro ka moka tša Israele gomme a fihla motseng wa Abele-Bethe-Maaka; batho ka moka ba kgorwana ya Bikri ba kgobokana mme ba mo šala morago ba tsena motseng. Banna ba Joaba ba fihla ba dikanetša motse woo. Ba kgobela dintotoma tša mobu go ipata le morako wa motse, ba ba ba thoma go epa morako woo go o uša. Go be go na le mosadi yo bohlale ka moo motseng yo a ilego a goa a le godimo ga morako a re: “Theetšang! Theetšang! Botšang Joaba a tle mo; ke nyaka go bolela le yena.” Joaba a batamela, gomme mosadi a mmotšiša a re: “A ke wena Joaba?” Yena a mo fetola a re: “Ee, ke nnaena.” Mosadi a re: “Theetša se nna, mohlanka wa gago, ke se bolelago.” Joaba a mo fetola a re: “Ke theeditše.” Mosadi a re: “Kgale batho ba be ba tlwaetše go re: ‘Sepelang le yo kgopela maele motseng wa Abele’; e be e le ka mo ba hwetšago tharollo. Wo wa rena ke motse wo mogolo, ke wo mongwe wa metse ya khutšo le potego go fetišiša mo Israele. Ke ka baka lang o leka go o fediša? A o nyaka go pšhatla se e lego sa Morena?” Joaba a mo fetola a re: “Le gatee! Le gatee nka se ke ka pšhatlaganya motse wa lena ka o fediša! Ga go bjalo. Monna yo leina la gagwe e lego Sheba, morwa wa Bikri, yo a tšwago nageng ya dithaba ya Efraime, o tsošeditše Kgoši Dafida mpherefere. Re neeleng monna yoo a nnoši, gomme ke tla tloga mo motseng wo.” Mosadi a re: “Re tla go lahlela hlogo ya gagwe ka morako.” Ke moo a ilego go batho ba motse ka leano leo la gagwe, gomme ba ripa Sheba hlogo ba e lahlela Joaba ka kua ga morako. Joaba a letša phalafala e le sešupo sa gore banna ba gagwe ba tlogele motse woo. Gomme a boela Jerusalema go kgoši. Joaba o be a laola madira a Israele; Benaya, morwa wa Joyada, o be a hlokometše baleti ba Dafida; Adoniramo o be a laola mediro ya kgapeletšo; Joshafate, morwa wa Ahilude, e be e le mongwaledi wa mmušo; Sheba e be e le mongwaledi wa kgoši; Tsadoko le Abiatare e be e le baprista, mme Ira wa motse wa Jaire le yena e le moprista wa Dafida. Mehleng ya pušo ya Dafida go ile gwa wa tlala ye šoro ye e ilego ya tšea mengwaga ye meraro. Ka gona Dafida a boledišana le Morena ka tlala yeo, gomme Morena a re: “Saulo le lapa la gagwe ba na le molato wa polao; o bolaile batho ba Gibeone.” Batho ba Gibeone e be e se Baisraele; e be e le mašaledi a Baamore ao Baisraele ba ilego ba a enela gore ba tla a šireletša, eupša Saulo o ile a leka go ba feleletša ka baka la ge a be a nyaka gore naga yohle ya Kanana e laolwe ke Baisraele le Bajuda. Ka gona Dafida a bitša batho ba Gibeone a re go bona: “Ke le direle eng? Ke nyaka go lefeletša phošo yela la go ka la e dirwa, gore le tle le šegofatše setšhaba sa Morena.” Bona ba mo fetola ba re: “Phapano ya rena le Saulo le lapa la gagwe e ka se fedišwe ka silibera le gauta, le gona ga re nyake go bolaya Moisraele le o tee.” Dafida a ba botšiša a re: “Bjale le re ke le direle eng?” Bona ba mo fetola ba re: “Saulo o be a logile maano a go re feleletša gore re se hlwe re eba gona nageng yohle ya Israele. Ka gona re neele ditlogolo tša gagwe tša banna tše di šupago, gomme re tla ba lekeletša pele ga Morena kua Gibea, motse wa gaboSaulo, kgoši yela e kgethilwego ya Morena.” Kgoši a ba fetola a re: “Ke tla le neela bona.” Fela Dafida, ka baka la keno ye a itlemilego le Jonathane ka yona pele ga Morena, a šadiša morwa wa Jonathane, Mefiboshete, setlogolo sa Saulo. A tšea Armoni le Mefiboshete, barwa ba babedi ba Ritsepa, morwedi wa Aya, bao a ba belegetšego Saulo, le barwa ba bahlano ba morwedi wa Saulo, Merabe, bao a ba belegetšego Adriele, morwa wa Barsilai, yo a bego a etšwa Mehola. Dafida a ba neela batho ba Gibeone. Bona ba ba lekeletša godimo ga thaba pele ga Morena, gomme ba ba šupago bao ba hwa gotee. E be e le nakong ya ge go thongwa go bunwa garase ge ba bolawa. Ke moo motlabo wa Saulo, Ritsepa, morwedi wa Aya, a tšerego masaka a a ala letlapeng lela ditopo di bego di le go lona, gomme a dula fao go tloga mathomong a ge go bunwa go fihlela ge dipula di ena. Mosegare o be a raka manong moo ditopong, gomme bošego a raka dibata. Ge Dafida a ekwa se Ritsepa a se dirilego, o ile a yo tšea mašapo a Saulo le a Jonathane, morwa wa Saulo, go batho ba Jabeshe kua Gileade. Bona ba be ba a utswitše lebaleng kua Bethe-Sheane moo Bafilista ba ilego ba lekeletša ditopo tšeo ka letšatši lela ba bolaya Saulo thabeng ya Gilboa. Dafida a laela gore go tšewe mašapo a Saulo le a Jonathane mme go kgobokanywe le a banna bale ba šupago ba go lekeletšwa. Ba boloka mašapo a Saulo le a Jonathane lebitleng la tatagoSaulo, Kishe, kua Tsela, nageng ya Benjamene, ba dira tšohle tše kgoši a di laetšego. Gomme ka morago ga moo Modimo a kwa dithapelo tša bona ge ba rapelela naga. Go ile gwa tsoga ntwa ye nngwe ya Bafilista le Baisraele, gomme Dafida le banna ba gagwe ba ya ba lwa le Bafilista. Ntweng yeo Dafida a lapa. Tšitširipa ye leina la yona e bego e le Jishbi-Benobo, yo a bego a swere lerumo la mphiri la boima bja dikilokramo tše tharo le seripa, a hlometše tšhoša ye mpsha lethekeng, a gopola gore a ka bolaya Dafida. Eupša Abishai, morwa wa Tseruya, a thuša Dafida, a hlasela tšitširipa yeo gomme a e bolaya. Ke moo banna ba Dafida ba enišitšego yena Dafida gore a se tsoge a ile le bona gape ntweng. Ba re: “Ke wena lebone la Israele, gomme o se ke wa dira gore lebone leo le tingwe.” Ka morago ga fao gwa ba le ntwa le Bafilista kua Gobo, moo Sibekai wa Husha a ilego a bolaya tšitširipa ye leina la yona e bego e le Sipai. Gwa tsoga ntwa ye nngwe gape le Bafilista kua Gobo, gomme Elhanane, morwa wa Jaire wa Betlelehema, a bolaya Goliate wa Gathe, yo theko ya lerumo la gagwe e bego e lekana le mpheng wa mogoma. Ka morago gwa ba le ntwa ye nngwe kua Gathe, moo go bego go le tšitširipa ye teleletelele. O be a na le menwana ye e selelago seatleng sa go ja le ye e selelago seatleng sa nngele, gomme le maotong ka mabedi a na le ye e selelago. O ile a rumola Baisraele, gomme Jonathane, morwa wa Shama, morwarragoDafida, a mmolaya. Ba bane bao e be e le ditlogolo tša ditšitširipa tša Gathe, gomme ba ile ba bolawa ke Dafida le banna ba gagwe. Ge Morena a phološitše Dafida go Saulo le manabeng a gagwe ka moka, Dafida a mo opelela kopelo ye: Morena ke setšhabelo sa ka; ke sebo sa ka le mophološi wa ka. Ke Modimo wa ka le botšhabelo bjo ke tšhabelago go bjona. Ke kotse ya ka, ebile ke montlhabanedi, ke bokhuto bja ka. Ke yena botšhabelo bja ka le mophološi wa ka, o mphološa dintweng. Ke bitša Morena yo a lebanwego ke go tumišwa, a mphološa manabeng a ka. Ke be ke dikaneditšwe ke maphoto a lehu, ke tšhošwa ke tahlego nkego mafula. Ke be ke rarilwe ke ditlemo tša bodulabahu, mme ke theilwe ka melaba ya lona lehu. Tlalelong yeo ya ka ka bitša Morena, ka bitša Modimo wa ka. A kwa lentšu la ka a le Tempeleng ya gagwe; a theetša ge ke mo llela. Lefase la šišinyega, la thothomela, metheo ya legodimo ya reremela, ya tekateka, ka gobane Modimo o be a befetšwe. A thuntšha muši wa dinko, molomong wa gagwe gwa lauma kgabo, magalamahubedu a tšhologa go yena. A sekamiša legodimo a theogela fase, maru a masomaso a le ka fase ga maoto a gagwe. O fofile a rwelwe ke mokerubi, a bonwa a le diphegong tša phefo; a ipipeditše ka leswiswi; a dikaneditšwe ke marumaso a a tletšego meetse. Mo seetšeng sa go tšwa go yena gwa tšwa magadima. Morena a kidimetša legodimong, gwa kwala lentšu la Ramadulagodimo. A betša mesebe ya gagwe a šwalalanya manaba a gagwe; a bekentšha magadima, a ba tšhoša ba tšhaba. Lebato la lewatle la šala molaleng, metheo ya lefase ya apoga ge Morena a kgala manaba a gagwe, mme a ba tšubotla ka ledimo. Morena a obelela ka letsogo a le godimo a ntshwara; a nkinola bodibeng. O mphološitše manabeng a ka a maatla le go bantlhoi bohle – ba be ba mpheta kudu ka maatla. Mola ba ntlhasela ke ile ka ba bothateng, eupša Morena ya ba lehlotlo la ka. O ile a nntšha kotsing; a mphološa ka gobane ke be ke mo kgahla. Morena o mputsa go ya ka go loka ga ka; o a ntšhegofatša ka gobane ga ke ne molato. Ke obametše melao ya Morena; ga se ka hlanamela Modimo wa ka. Ke phethile melao ya gagwe ka moka; ga se ka nyatša ditaelo tša gagwe. O tseba gore ga ke na phošo, le gore ke ithibetše go dira tše mpe. Morena o mputsetša go loka ga ka, ka ge a bona go se phošo ye ke e dirilego. Wena, Morena, o botegela bagoboti, ebile o lokela bao ba lokilego. O hlweketše bao ba hlwekilego, mme go baikaketši o itira moikaketši. O phološa baikokobetši, o kokobetša baikgantšhi. Wena, Morena, o lebone la ka; o raka leswiswi le le ntikaneditšego. O mpha maatla a go hlasela manaba a ka, le a go tshela morako wa motse wa bona. Ditiro tša Modimo yo di lokile kudu, mantšu a gagwe a hlwekile. O bjalo ka kotse go bohle bao ba nyakago a ba šireletša. Morena a le noši ke Modimo; Modimo a nnoši ke setšhabelo sa rena. Modimo yo ke botšhabelo bja ka bjo maatla; o nthuša go phela ke se na bosodi. O nkgontšha go kitima bjalo ka tshephe; o nkemiša ke fentše kua mebotong. O nthuta go lwa gore ke tle ke šomiše mosebe wo maatlamaatla. Wena, Morena, o a ntšhireletša wa mpoloka; ka thušo ya gago ke na le seriti. O nkgontšhitše go tšhabela manaba a ka, gomme ga se ka thetšwa. Ke lelekiša manaba a ka ka a fenya; ga ke gome ke sešo ka a feleletša. Ke a ba kgitla mme ga ba kgone go tsoga; ba rapalala pele ga ka. O mpha maatla a ntwa, wa nkgontšha go fenya manaba a ka. O dira gore manaba a ka a tšhabe pele ga ka, le gore ke feleletše bantlhoi. Ba takataketša mahlo, eupša ba hloka molamoledi; ba llela Morena, eupša ga a ba fetole. Ke a ba šilaganya ba fetoga lerole; ke a ba šilašila ka ba gataka bjalo ka leraga mekgotheng. O mphološitše diphapanong tša setšhaba sa ka, wa ntšhireletša gore ke tle ke buše ditšhaba; setšhaba se ke bego ke sa se tsebe bjale ke sa ka. Bašele ba ithapeletša go nna; ge ba ekwa ke bolela, ba a ntheetša. Ba nolega moko gomme ba tšwa dibong tša bona ba thothomela. Morena o a phela! Tumišang mošireletši wa ka! Godišang Modimo mošireletši yo a mphološitšego! O ntefeletša manabeng a ka; o mphenyetša ditšhaba, gomme o mphološa manabeng a ka. Wena, Morena, o gafela manaba a ka diatleng tša ka, wa mphološa banneng ba dintwa. Ka gona ke go reta gare ga ditšhaba; ke go opelela ditumišo. Modimo o kgontšha kgoši ya gagwe go fenyetša manaba a gagwe sa ruri; o rata Dafida, motlotšwa wa gagwe, le ditlogolo tša gagwe go ya go ile. Mantšu a Dafida a mafelelo šea: “Yo a bolelago ke Dafida, morwa wa Isai, monna yo Modimo a ilego a mo dira yo mogolo, yo Modimo wa Jakobo a mo tloditšego gore e be kgoši, gape yo e bego e le mohlami wa dikopelo tše botse tša Israele. “Moya wa Morena o bolela ka nna; molaetša wa gagwe o ka molomong wa ka. Modimo wa Israele o boletše; mošireletši wa Israele o rile go nna: ‘Kgoši ye e bušago ka toka, ye e bušago ka go hlompha Modimo, e bjalo ka letšatši le le hlabago legodimong, legodimo le le se nago maru, e etša letšatši le le medišago bjang lefaseng ka seetša sa lona ge pula e seno na.’ “Gomme ke ka moo Modimo a tlago šegofatša ditlogolo tša ka, ka gobane o dirile kgwerano ya go ya go ile le nna, kwano ye e ka se tsogego e tshetšwe, kgwerano ye e hlamilwego gabotse. Seo ke tšohle tše ke di nyakago; seo e tla ba phološo ya ka, gomme ka kgonthe Modimo o tla botegela kgwerano yeo. Eupša batho ba babe bona ba bjalo ka meetlwa ye e lahlilwego; ga go yo a ka e kgwathago ka diatla. Motho o swanetše go šomiša selo sa tshipi goba theko ya lerumo; yona e tla tšhungwa thokgethokge mo e lego gona.” Bahlabani ba Dafida ba bagale šeba: Wa mothomo e be e le Joshebe-Bashebete, Mohakmone, yo e bego e le moetapele wa “Bararo”; o ile a lwa le banna ba makgolo a seswai ka lerumo la gagwe gomme a ba bolaya ka moka ntweng e tee. Wa bobedi wa “Bararo” bao ba bagale e be e le Eleasara, morwa wa Dodo, wa kgorwana ya Ahoage. Ka letšatši le lengwe yena le Dafida ba ile ba lwa le Bafilista ba ba bego ba kgobokanetše go lwa. Baisraele ba ile ba katakata, eupša yena a ema senna a lwa le Bafilista go fihlela letsogo la gagwe le ehwa bogatšu mme a sa hlwe a kgona go lesa tšhoša ya gagwe. Tšatši leo Morena a fentšha Baisraele fenyang. Ge ntwa e seno fela Baisraele ba boela go Eleasara, e le fela go thopela ditopo. Wa boraro wa “Bararo” bao ba bagale e be e le Shama, morwa wa Age, wa Harare. Bafilista ba be ba kgobokane kua Lehi, moo go bego go le tšhemo ya dihlodi. Baisraele ba tšhaba Bafilista, eupša Shama a ema senna moo tšhemong a e šireletša, mme a bolaya Bafilista. Morena a fentšha Baisraele fenyang tšatšing leo. Ge go batametše lebaka la go buna, ba bararo ba “Ba Masome a Mararo” ba ile ba theogela leweng la Adulamo, moo Dafida a bego a le gona, mola sehlopha sa Bafilista se be se hlomile mešaša ka molaleng wa Barafa. Ka nako yeo Dafida o be a le ka sebong thabeng, gomme sehlopha sa Bafilista se be se thopile Betlelehema. Dafida a kwa a nyoretšwe meetse a gabo gomme a re: “Nke nkabe motho a yo nkgela meetse sedibeng sa lesorong la kgoro ya Betlelehema!” Bahlabani bale ba bararo ba bagale ba šwahla mešaša ya Bafilista, ba yo ga meetse sedibeng seo, gomme ba a tlišetša Dafida. Fela a se ke a a nwa, eupša a a tšholla ya ba kabelo go Morena a re: “Morena, nka se ke ka nwa meetse a! Ge nka a nwa go ka swana le ge ke enwa madi a banna ba, bona ba ilego ba ipea kotsing ya lehu.” Ka gona a gana go a nwa. Tšeo e bile ditiro tše bogale tša bahlabani bao ba bararo ba bagale. Abishai, yo morrwarragwe e bego e le Joaba, mmagobona e le Tseruya, e be e le moetapele wa “Bagale ba Masome a Mararo”. O ile a lwa le banna ba makgolo a mararo ka lerumo, a ba bolaya, gomme a thoma go tuma gare ga bao “Ba Masome a Mararo”. Ke yena a bego a tumile kudu moo gare ga “Ba Masome a Mararo” gomme e ile ya ba moetapele wa bona, eupša o be a se a tuma bjalo ka “Bararo” bale. Benaya, morwa wa Joyada, wa go tšwa Kabtsiele, e be e le mohlabani yo mongwe yo bogale; o dirile ditiro tše ntši tše kgolo, go balwa le go bolaya bahlabani ba babedi ba bagolo ba Bamoaba. O kile a theogela ka moleteng ka letšatši la leswela, a bolaya tau. Le gona o kile a bolaya monna yo mongwe wa tšitširipa wa Moegepeta yo a bego a swere lerumo. Benaya a mo hlasela ka molamo, a ubula lerumo lela seatleng sa Moegepeta, a mmolaya ka lona. Tšeo e bile ditiro tše bogale tša Benaya yo le yena a bego a tumile gare ga “Ba Masome a Mararo”. O ile a tuma kudu gare ga bona, eupša a se swane le “Bararo” bale. Dafida a mmea mohlokomedi wa baleti ba gagwe. Ba bangwe ba “Ba Masome a Mararo” šeba: Asahele, morwarragoJoaba Elhanane, morwa wa Dodo, wa Betlelehema Shama le Elika ba Harode Heletse wa Pelete Ira, morwa wa Ikeshe, wa Tekoa Abiesere wa Anathote Sibekai wa Husha Tsalmone wa Ahoage Maharai wa Netofa Helede, morwa wa Baana, wa Netofa Itai, morwa wa Ribai, wa Gibea kua Benjamene Benaya wa Piratone Hidai wa dinokaneng kgauswi le Gaashe Abialbone wa Araba Asmabethe wa Bahurime Eliagaba wa Shaalbone Barwa ba Jashene Jonathane Shama wa Harare Ahiamo, morwa wa Sharare, wa Harare Elifelete, morwa wa Ahasbai, wa Maaka Eliamo, morwa wa Ahitofele, wa Gilo Hetsero wa Karmele Paarai wa Arabe Jigale, morwa wa Nathane, wa Tsoba Bani wa Gade Tseleke wa Amone Nagrai wa Beerote, morwaladibetša wa Joaba Ira le Garebe ba Jatire Uria, Mohete. Bahlabani ba bagale ka moka e be e le ba masome a mararo le ba ba šupago. Morena a galefela Baisraele gape, gomme a hlohleletša Dafida gore a ba tshwenye. A re go yena: “Sepela o bale batho ba Israele le ba Juda.” Ka gona Dafida a laela Joaba, molaodi wa madira a gagwe, a re: “Sepela le balaodi ba gago le ye dikgorong ka moka tša Israele, go akaretša naga ka moka, gomme le baleng setšhaba. Ke nyaka go tseba gore ke ba bakae.” Joaba a mo fetola a re: “Kgoši, a Morena Modimo wa gago a atiše setšhaba sa Israele galekgolo, gomme nke o ka phela gore o tle o bone ge a ba atiša bjalo. Bjale ke ka baka lang kgoši a nyaka go bala batho?” Eupša kgoši a gapeletša Joaba le balaodi ba gagwe gore ba phethe taelo ya gagwe; ba tloga go yena gomme ba ya go bala setšhaba sa Israele. Ba ile ba tshela noka ya Jordane mme ba hloma mešaša ka borwa bja Aroere, motse wo o lego ka moeding, nageng ya Gade. Go tloga moo ba ya Jasere, mme ba ya le kua Gileade le Kadeshe, nageng ya Bahete. Ke moka ba ya Dane, mme go tloga Dane ba arogela Sidone. Go tloga moo ba ya motseng wa Tirose wo o ageleditšwego ka morako, ba fetela le metseng ya Bahibe le ya Bakanana, ba feleletša ka go ya Beresheba, ka thokong ya ka borwa ya Juda. Ka gona, ka morago ga dikgwedi tše senyane le matšatši a masome a mabedi ba boela Jerusalema ba sepetše naga ka moka. Ba ile ba begela kgoši palo ya banna ba e ka bago bahlabani: dikete tše makgolo a seswai mo Israele, le tše makgolo a mahlano mo Juda. Eupša ya re ge Dafida a badile setšhaba, letswalo la thoma go mo ja, gomme a re go Morena: “Ke dirile sebe se segolo ka taba ye! Hle, ntebalele. Ke dirile tša botlaela.” Morena a re go Gade, moprofeta wa Dafida: “Sepela o yo botša Dafida gore a ikgethele se tee dilong tše tharo tše ke tlago mmotša tšona. Ke tla dira se a se kgethago.” Ka moswane ge Dafida a tsoga, *** Gade a ya go yena a mmotša se Morena a se boletšego, gomme a mmotšiša a re: “A o kgetha eng? Mengwaga ye meraro ya tlala nageng ya gago, goba dikgwedi tše tharo o fenywa ke manaba a gago, goba matšatši a mararo a bolwetši bja leuba nageng ya gago? Bjale gopodišiša taba ye, gomme o mpotše gore ke fetole yo a nthomilego ke reng.” Dafida a mo fetola a re: “Ke mo tlalelong ye kgolo! Eupša ga ke nyake go otlwa ke batho. A Morena e be yena yo a re otlago, ka gobane o na le kgaugelo.” Ka gona Morena a tliša bolwetši bja leuba mo Israele bjo bo ilego bja thoma mosong woo go fihlela ka nako ye a e beilego. Nageng ka moka gwa hwa Baisraele ba dikete tše masome a a šupago. Ya re ge morongwa wa Morena a emiša letsogo gore a fediše Jerusalema, Morena a kwela batho bohloko gomme a re go morongwa yo a bego a ba bolaya: “Ema! Go lekane!” Morongwa o be a le seboeng sa Arauna, Mojebuse. Dafida a bona morongwa yo a bego a bolaya batho, gomme a re go Morena: “Ke nna yo ke dirilego sebe. Ke nna yo ke phošitšego. Batho ba bona ba dirile eng? Otla nna le lapa la ka.” Ka lona letšatši leo Gade a ya go Dafida a re go yena: “Rotogela mola seboeng sa Arauna gomme o agele Morena aletare fao.” Dafida a phetha taelo ya Morena gomme a ya fao bjalo ka ge Gade a mmoditše. Arauna ge a gadima tlase a bona kgoši le bahlankedi ba gagwe ba rotogela go yena. A mo obamela mme a mmotšiša a re: “Kgoši, mong wa ka, o reng o tlile go nna, mohlanka wa gago?” Dafida a mo fetola a re: “Ke tlile go reka seboa sa gago gore ke agele Morena aletare gore bolwetši bja leuba bo emišwe.” Arauna a re: “Se tšee, kgoši, o direle Morena sehlabelo ka dikgomo tše di mo kgahlago. Dikgomo tše o ka direlago Morena dihlabelo tša go tšhungwa ka moka ka tšona šedi; dijoko tša tšona šedi le selei sa go fola, o ka di dira dikgong. Tšohle tše, mong wa ka, ke go fa tšona, kgoši. A Morena Modimo wa gago a amogele sehlabelo sa gago.” Eupša kgoši a mo fetola a re: “Aowa, ke tla di reka ka theko ya tšona. Nka se direle Morena Modimo wa ka dihlabelo ka tše ke sego ka di lefela selo.” Gomme a reka seboa le dikgomo ka dipapetlana tša silibera tše masome a mahlano. A napa a agela Morena aletare, gomme a dira dihlabelo tša go tšhungwa ka moka le tša kagišano. Morena a kwa thapelo ya gagwe, gomme bolwetši bjoo bja leuba mo Israele bja emišwa. Bjale Kgoši Dafida o be a tšofetše kudu, gomme le ge bahlanka ba gagwe ba be ba mo pipa ka dikobo, o be a sa ruthele. Ka gona bahlankedi ba gagwe ba re go yena: “Kgoši, mong wa rena, a re go nyakele mosetsana wa kgarebe yo a tlago go hlankela mme a go hlokomela. O tla robala o mo gokaretše, gomme a go ruthetša.” Ba ile ba nyaka mosetsana yo mobotse mo Israele ka moka, ba mo hwetša kua Shuneme gomme ba mo tliša go kgoši. Leina la gagwe e be e le Abishaga. E be e le yo mobotsebotse gomme yena a hlankela kgoši a mo hlokomela, eupša kgoši a se ke a mo robala. Adonia, morwa wa Dafida le Hagite, o be a hlatlama Absalomo mme a na le sebopego se sebotsebotse. Dafida o be a se a ka a mo omanyetša selo. Adonia o be a ipona mo e lego gore o be a gopola gore e ka ba kgoši. O ile a inyakela dikoloi tša ntwa le dipere le bafelegetši ba banna ba masome a a fetšago seatla. *** A bolela le Joaba, yo mmagwe e bego e le Tseruya, le moprista Abiatare, gomme bona ba dumela go mo thuša tabeng yeo. Eupša moprista Tsadoko le Benaya, morwa wa Joyada, le moprofeta Nathane le Shimi le Rei le baleti ba Dafida ba ile ba se ke ba ema le Adonia. Ka letšatši le lengwe Adonia a dira sehlabelo kua Letlapeng la go Šutha, kgauswi le mothopo wa Rogele, ka dihuswane, dikgomo, le mamane a a nonnego. A laletša barwa ba bangwe ba Dafida le bahlankedi ba kgoši bao ba bego ba etšwa Juda gore ba tle monyanyeng woo wa gagwe, eupša a se ke a laletša Solomone, morwarragwe, goba moprofeta Nathane, goba Benaya, goba baleti ba kgoši. Ke mo Nathane a ilego go Batseba, mmagoSolomone, gomme a mmotšiša a re: “Afa o kwele gore Adonia, morwa wa Hagite, o ipeile kgoši? Gomme Kgoši Dafida ga a tsebe selo ka taba yeo! Ge o nyaka go phologa le go phološa Solomone, morwa wa gago, ke go eletša gore o ye go Kgoši Dafida ka pelapela o mmotšiše o re: ‘Kgoši, mong wa ka, a ga se wa ka wa nkenela, nna, mohlanka wa gago, gore morwa wa ka, Solomone, o tla go latela ya ba kgoši, mme ke yena a tlago dula setulong sa gago sa bogoši? A bjale ke go reng Adonia e le kgoši?’ ” Gomme Nathane a tšwela pele a re: “E tla re ge o sa bolela le kgoši, ka tsena mme ka tiišetša taba tšeo.” Ka gona Batseba a ya go bona kgoši ka phapošing ya kgoši ya malao. Kgoši o be a tšofetše kudu, gomme Abishaga, mosetsana wa Shuneme, a mo hlokometše. Batseba a khunama, a obama, a itahlela fase pele ga kgoši, gomme kgoši a mmotšiša a re: “A o nyaka eng?” Batseba a mo fetola a re: “Mong wa ka, o nkenetše ka leina la Morena Modimo wa gago gore morwa wa ka, Solomone, ruri e tla ba yena a dulago setulong sa gago sa bogoši. Fela Adonia e šetše e le kgoši, gomme ga o tsebe selo ka taba yeo. Yena o dirile sehlabelo ka dikgomo tše ntši le dihuswane le mamane a a nonnego, gomme o laleditše barwa ba gago le moprista Abiatare le Joaba, molaodi wa madira a gago, gore ba ye monyanyeng woo, eupša ga se a laletša morwa wa gago, Solomone. Kgoši, setšhaba ka moka sa Israele se lebeletše wena gore o se botše gore ke mang yo a tlago go latela bogošing. Ge o ka se se botše, ge o ehwa mo, nna le morwago, Solomone, re tlilo swarwa bjalo ka basenyi.” Batseba o be a sa bolela le kgoši ge Nathane a fihla mošate. Kgoši a botšwa gore moprofeta o tlile, gomme Nathane a tsena mme a obama pele ga kgoši. Ke moka a re: “Kgoši, mong wa ka, kgane ke wena o begilego gore Adonia ke yena a tlago go latela bogošing mme a dula setulong sa gago sa bogoši? Lona lehono le o tšwile a yo dira sehlabelo ka dikgomo tše ntši le dihuswane le mamane a a nonnego. O laleditše barwa ba gago ka moka le Joaba, molaodi wa madira a gago, le moprista Abiatare, gomme gonabjale ba ja monyanya le yena mme ba goa ba re: ‘A Kgoši Adonia a re phelele!’ Eupša nna, mohlanka wa gago, ga se a ntaletša, goba a laletša moprista Tsadoko, goba Benaya, goba Solomone. Na taba ye e dumeletšwe ke wena, kgoši, gomme wa hloka le go botša le bona bahlankedi ba gago gore ke mang yo a tlago go latela bogošing?” Kgoši Dafida a re: “Mpiletšeng Batseba.” Batseba a tsena a ema pele ga gagwe. Ke moka a re go yena: “Ke go enela ka Morena yo a phelago, yo a mphološitšego mathateng a ka ka moka, gore lehono ke tla phetha keno yela ke go enetšego yona ka leina la Morena Modimo wa Israele, gore morwa wa gago, Solomone, ke yena a tlago dula setulong sa ka sa bogoši.” Batseba a khunama, a obama, a itahlela fase pele ga kgoši, mme a re: “A kgoši, mong wa ka, a re phelele go ya go ile!” Ke moo Kgoši Dafida a laetšego gore Tsadoko le Nathane le Benaya ba bitšwe. Ge ba tsene, a re go bona: “Sepelang le baleti ba ka, gomme le nametšeng morwa wa ka, Solomone, meila yela ya ka, mme le mo felegetšeng le theogeleng mothopong wa Gihone, moo Tsadoko le Nathane ba mo tlotše gore e be kgoši ya Israele. Ka morago le letše phalafala mme le goe le re: ‘A Kgoši Solomone a re phelele!’ Le rotogeng le mo šetše morago ge a etla go dula setulong sa ka sa bogoši. Ke yena e tlago ba kgoši legatong la ka, ka gobane ke kgethile yena gore e be mmuši wa Israele le Juda.” Benaya a mo fetola a re: “Go tla dirwa bjalo, gomme Morena Modimo wa kgoši, mong wa ka, a tiišetše taba ye. Bjalo ka ge Morena a bile le wena, kgoši, nke a be le Solomone, gomme a dire gore mmušo wa gagwe o tume le go feta wa gago.” Ka gona Tsadoko le Nathane le Benaya le baleti ba kgoši ba nametša Solomone meila ya Kgoši Dafida, ba mo felegetša mothopong wa Gihone. Tsadoko a tšea lenaka la makhura a mohlware le a bego a le tšere ka Tenteng ya bodulo bja Morena, gomme a tlotša Solomone. Ba letša phalafala, gomme batho ka moka ba goa ba re: “A Kgoši Solomone a re phelele!” Ke mo setšhaba ka moka se boilego se mo šetše, ba goa ka lethabo mme ba letša dinakana, ba tsošitše mogobo wo o bego o dumiša lefase. Ya re mola Adonia le baeng ba gagwe ba sa feleletša monyanya, ba kwa mogobo woo. Joaba ge a ekwa phalafala, a botšiša a re: “A lešata lela kua motseng ke la eng?” Ge a sa bolela, Jonathane, morwa wa moprista Abiatare, a fihla. Adonia a re: “Tsena! Wena o motho wa go phafoga – o swanetše go ba o tliša taba tše botse.” Jonathane a mo fetola a re: “Aowaowaa! Mong wa rena, Kgoši Dafida, o beile Solomone kgoši. O romile Tsadoko le Nathane le Benaya le baleti ba kgoši go mo felegetša. Ba mo nameditše meila ya kgoši, gomme Tsadoko le Nathane ba mo tloditše mothopong wa Gihone gore e be kgoši. Ka morago ba tsena motseng ba goa ka lethabo, gomme batho bjale ba tia mekgolokwane. Ke lona lešata leo le sa tšwago go le kwa. Solomone bjale ke kgoši. Go feta moo, bakgomana ba mošate ba ile ba tsena go tlo lebogiša Kgoši Dafida, gomme ba re: ‘A Modimo wa gago a dire Solomone gore a tume kudu le go feta wena, le mmušo wa gagwe o atlege kudu le go feta wa gago.’ Kgoši o ile a obama malaong a gagwe mme a rapela a re: ‘A go tumišwe Morena Modimo wa Israele, yo lehono a beilego yo mongwe wa barwa ba ka setulong sa ka sa bogoši, gomme le nna a mphediša gore ke tle ke bone taba ye!’ ” Ke moo baeng ba Adonia ba emeletšego ka letšhogo ba tloga, yo mongwe le yo mongwe a ikela lapeng la gagwe. Adonia a boifa Solomone kudu, ka gona a ya Tenteng ya bodulo bja Morena, a swara dinakana tša aletare. Kgoši Solomone a botšwa gore Adonia o a mmoifa, le gore o swere dinakana tša aletare, le gore o re: “Ke nyaka gore Kgoši Solomone a nkenele pele gore a ka se mpolaye.” Solomone a fetola a re: “Ge a ka mpotegela, gona le ntsana ya moriri wa hlogo ya gagwe e ka se kgwathwe; eupša ge a ka se mpotegele, gona o tla hwa.” Ke moo Kgoši Solomone a laetšego gore Adonia a theošwe aletareng. Adonia a ya go kgoši gomme a obama pele ga gagwe, mme kgoši a re go yena: “O ka ikela gae.” Ge Dafida a batametše go hwa, o ile a fa morwa wa gagwe, Solomone, ditaelo tša mafelelo a re: “Nako ya ka ya go hwa e fihlile. O tie o eme senna, gomme o dire se Morena Modimo wa gago a go laelago sona. O phethe melao ya gagwe ka moka le ditaelo tša gagwe, bjalo ka ge di ngwadilwe melaong ya Moshe, gore mo gongwe le mo gongwe mo o yago o atlege go tšohle tše o di dirago. Ge o ka theetša Morena, yena o tla phetha se a ntshephišitšego sona mola a mpotša gore ditlogolo tša ka di tla buša Israele ge di ka hlokomela go phetha ditaelo tša gagwe ka potego ka dipelo le ka moya wa bona ka moka. “Go sa na le se sengwe gape. O sa gopola se Joaba a ntirilego sona ka go bolaya balaodi bale ba babedi ba madira a Israele, Abnere, morwa wa Nere, le Amasa, morwa wa Jetere. O gopola ka moo a ba bolailego ka gona mehleng ya khutšo a lefeletša batho bao ba ba bolailego mehleng ya ntwa. O tšholotše madi a a se nago molato gomme bjale ke nna ke šikerego boikarabelo bja se a se dirilego, le gona ke nna ke tlaišegago ka baka la taba yeo. O dire se o bonago se lokile; o swanetše go mmolaya le ge bjale a tšofetše. “Eupša o be yo botho go barwa ba Barsilai wa Gileade gomme o ba hlokomele, ka gobane le bona ba ile ba ntshwara gabotse ge ke be ke tšhaba Absalomo, morwarrago. “Gape go na le Shimi, morwa wa Gera, wa motse wa Bahurime kua Benjamene. O ile a nthogaka gampe tšatši lela ke eya Mahanaime, fela ge a nkgahlanetša kua nokeng ya Jordane, ke ile ka mo enela ka leina la Morena gore nka se mmolaye. Eupša wena o se ke wa mo lesa a sa otlwe. O yo bohlale mme o tla tseba se o swanetšego go mo dira sona; o mmolaye, le ge bjale a tšofetše.” Dafida o ile a hlokafala gomme a bolokwa motseng wa Dafida. O be a bile kgoši ya Israele mengwaga ye masome a mane, a bušitše mengwaga ye e šupago a le Hebrone, le mengwaga ye masome a mararo a metšo ye meraro a le Jerusalema. Solomone a latela Dafida, tatagwe, gomme a tielela bogošing. Ke moo Adonia, yo mmagwe e bego e le Hagite, a ilego go Batseba, mmagoSolomone. Batseba a mmotšiša a re: “A o nketetše fela?” Adonia a mo fetola a re: “Ee, fela ke na le tabanyana.” Batseba a re: “Bolela.” Adonia a re: “O a tseba gore ke be ke swanetše go ba kgoši, le gore yo mongwe le yo mongwe mo Israele o be a gopotše bjalo. Eupša go diregile ka mokgwa wo mongwe, gomme morwarre e bile yena e bago kgoši, ka gobane seo e be e le thato ya Morena. Gomme bjale ke kgopela selo se tee; hle, o se ke wa se gana.” Batseba a mmotšiša a re: “Ke eng?” Adonia a mo fetola a re: “Hle, kgopela Kgoši Solomone – ke a tseba gore ya gago kgopelo a ka se e gane – gore a mphe Abishaga, mosetsana wa Shuneme, e be mosadi wa ka.” Batseba a mo fetola a re: “Go lokile. Ke tla go bolelela le kgoši.” Ka gona Batseba a ya go kgoši go yo bolelela Adonia. Kgoši a emelela a dumediša mmagwe, a mo obamela. Ke moka a dula setulong sa gagwe sa bogoši gomme a laela gore setulo se sengwe se tlišwe, mme mmagwe a dula go sona ka letsogong la gagwe la go ja. Mmagwe a re: “Ke na le tabana ye nnyane ye ke tlilego go go kgopela yona; hle, o se ke wa e gana.” Solomone a mmotšiša a re: “Ke efe, mme? Nka se e gane.” Mmagwe a mo fetola a re: “Dumelela gore Adonia, morwarrago, a fiwe Abishaga e be mosadi wa gagwe.” Kgoši a mmotšiša a re: “Ke ka baka lang o nkgopela gore ke mo fe Abishaga? Go no swana le gore o ka nkgopela gore ke mo fe le sona setulo se sa bogoši. Gabotsebotse ke mogolwake, gomme moprista Abiatare le Joaba ba eme le yena!” Ke moo Solomone a ennego ka leina la Morena a re: “A Modimo a mpolaye thoo ge nka se lefiše Adonia kgopelo ye ka setopo! Morena o ntiišeditše setulong sa bogoši sa tate, Dafida; o phethile tshephišo ya gagwe gomme o neetše nna le ditlogolo tša ka mmušo. Ke ena ka Morena yo a phelago gore Adonia o tla bolawa lona lehono le!” Ka gona Kgoši Solomone a roma Benaya, mme Benaya a yo bolaya Adonia. Kgoši Solomone a re go moprista Abiatare: “Ikele mašemong a gago kua Anathote. O lebanwe ke go bolawa, eupša nka se go bolaye lehono, ka gobane o be o hlokometše Polokelo ya Kgwerano ya Morena ge o be o sa na le tate, Dafida, mme le wena o tlaišegile naye mathateng a gagwe ka moka.” Ke moka Solomone a raka Abiatare modirong wa go ba moprista wa Morena, gomme a phethagatša se Morena a se boletšego kua Shilo ka moprista Eli le ditlogolo tša gagwe. Joaba a kwa taba ye. O be a ema le Adonia, eupša a se a ka a ema le Absalomo. Ka gona a tšhabela Tenteng ya bodulo bja Morena gomme a swara dinakana tša aletare. Ge Kgoši Solomone a ekwa gore Joaba o tšhabetše ka Tenteng ya bodulo bja Morena le gore o aletareng, a roma motseta go yena go yo mmotšiša gore ke ka baka lang a tšhabetše aletareng. Joaba a fetola ka go re o tšhabetše go Morena ka gobane a be a boifa Solomone. Ka gona Kgoši Solomone a roma Benaya go yo bolaya Joaba. A ya Tenteng ya bodulo bja Morena gomme a re go Joaba: “Kgoši o go laela gore o tšwe ka moo.” Joaba a mo fetola a re: “Aowa, ke tla hwela gona ka mo.” Benaya a gomela go kgoši gomme a mmegela se Joaba a se boletšego. Solomone a mo fetola a re: “Dira ka mo a bolelago. O mmolaye o mmoloke. Ke moo nna goba setlogolo sefe le sefe sa tate se ka se hlwego se šikere boikarabelo bja se Joaba a se dirilego ge a bolaya banna ba ba se nago molato. Morena o tla otla Joaba ka ge a bolaile banna ba babedi tate, Dafida, a sa tsebe. Banna bao ba be ba se na le molato, le gona ba mo phala ka go loka. Bona e be e le Abnere, molaodi wa madira a Israele, le Amasa, molaodi wa madira a Juda. Kotlo ya go bolawa ga bona e tla wela Joaba le ditlogolo tša gagwe go ya go ile. Eupša Morena ka mehla o tla šegofatša ditlogolo tša Dafida tše di dulago setulong sa gagwe sa bogoši.” Ka gona Benaya a ya Tenteng ya bodulo bja Morena, a bolaya Joaba, gomme a bolokwa nageng ya gagwe kua lešokeng. Kgoši a dira Benaya molaodi wa madira legatong la Joaba, gomme a bea moprista Tsadoko sebakeng sa Abiatare. Ke moo kgoši a laetšego gore Shimi a bitšwe, gomme a re go yena: “Ikagele ngwako mo Jerusalema. O dule go wona gomme o se ke wa tšwa motseng wa ya felo mo gongwe. Ge o ka tsoga o tšwile gomme wa tshela nokana ya Kidrone, o nape o tsebe gore o tla bolawa thoo, gomme molato ya ba wa gago.” Shimi a mo fetola a re: “Go lokile, kgoši, mong wa ka, ke tla dira se o se bolelago.” Ka gona a dula Jerusalema nako ye telele. Fela ka morago ga mengwaga ye meraro makgoba a mabedi a Shimi a tšhabela go kgoši ya Gathe, Akishe, morwa wa Maaka. Ge Shimi a ekwa gore makgoba ao a kua Gathe, a saletša pokolo ya gagwe gomme a ya go Kgoši Akishe kua Gathe go yo nyaka makgoba ao. O ile a a hwetša mme a boa le ona. Ge Solomone a ekwa seo Shimi a se dirilego, a laela gore a bitšwe, gomme a re go yena: “Ke ile ka go eniša ka leina la Morena gore o se ke wa tšwa Jerusalema wa ya mo gongwe. Gomme ka go botša gore ge o ka tsoga o dirile bjalo, o nape o tsebe gore o tla bolawa thoo. A ga se wa dumela taba yeo gomme wa mpotša gore o nkwele? Bjale ge, ke ka baka lang o tshetše keno ya gago mme wa nyatša taelo ya ka? O tseba gabotse bobe ka moka bjo o bo dirilego tate, Dafida. Morena o tla go otlela taba yeo. Eupša nna o tla ntšhegofatša mme a dira gore mmušo wa Dafida o tie go ya go ile.” Ke moo kgoši a laetšego Benaya gore a bolaye Shimi, gomme yena a tšwa a mmolaya. Ke ge bjale Solomone a swere mmušo a o tiišitše. Solomone o ile a itlemaganya le kgoši ya Egepeta ka go nyala morwedi wa gagwe. A goroša mosadi yoo gore a tle a dule motseng wa Dafida go fihlela ge a feditše go aga mošate ga gagwe le Tempele le morako wa go dikologa Jerusalema. Morena o be a sešo a agelwa tempele, ka fao batho ba be ba sa dira dihlabelo dintotomeng tše go tšona ba khunamelago medimo ya diswantšho. Solomone o be a rata Morena mme a phetha ditaelo tša Dafida, tatagwe, eupša o be a sa hlaba diruiwa mme a dira dihlabelo ka tšona dintotomeng tšeo. Ka nako ye nngwe o ile a ya Gibeone go yo dira dihlabelo, ka gobane moo ke mo go bego go le ntotoma ya go tuma kudu. O be a šetše a kile a dira dihlabelo tša go tšhungwa ka moka tše ntšintši moo mabakeng a a fetilego. Bošegong bjoo Morena a iponagatša go yena torong gomme a re: “Mpotše se o nyakago gore ke go fe sona.” Solomone a re: “Ka mehla o be o botegela tate, Dafida, mohlanka wa gago, kudu, gomme yena o be a go hlompha, a go botegela, mme a go tshepha. Gomme o tšwetše pele le go mo rata kudu, wa ba wa mo fa morwa yo lehono a bušago legatong la gagwe. Wena, Morena Modimo, o dirile gore ke be kgoši ke latele tate, le ge ke le yo monnyane kudu gomme ke sa tsebe go buša. Ke nna yo gare ga setšhaba se o se kgethilego, setšhaba se sentši mo e lego gore se ka se balwe. Ka gona mphe bohlale gore ke kgone go buša setšhaba sa gago ka toka, le go kgethologanya botse le bobe. Ge o ka se mphe, nka kgona bjang go buša setšhaba se sa gago se sentši?” Morena a kgahlwa ke ge Solomone a kgopetše seo, ka gona a re go yena: “Ka gobane o kgopetše bohlale bja go buša le go ahlola ka toka go na le go phela lebaka le letelele, goba mahumo, goba lehu la manaba a gago, ke tla go fa se o se kgopetšego. Ke tla go fa bohlale bjo bontši le kwešišo go feta bohle ba ba kilego ba ba gona, goba ba kago tsoga ba bile gona. Ke tla go fa le se o sego wa se kgopela: Bophelong bja gago ka moka o tla ba le mahumo le seriti go feta magoši ka moka. Gomme ge o ka ntlhompha wa phetha melao ya ka le ditaelo tša ka bjalo ka Dafida, tatago, ke tla go phediša galelele.” Solomone a phafoga gomme a lemoga gore Modimo o be a bolela naye torong. Ke moo a ilego Jerusalema mme a ema pele ga Polokelo ya Kgwerano ya Morena, a direla Morena dihlabelo tša go tšhungwa ka moka le dihlabelo tša kagišano. Ka morago ga moo a direla bahlankedi ba gagwe ka moka monyanya. Ka letšatši le lengwe digwebakathobalo tše pedi di ile tša tla go Kgoši Solomone. Yo mongwe wa bona a re: “Mong wa ka, nna le mosadi yo re dula ka ngwakong o tee, gomme ke ile ka belega mošemanyana ka ngwakong woo mosadi yo a le gona. Ka letšatši la boraro ke belege, le yena a belega mošemanyana. Re be re le babedi fela ka ngwakong woo – go se motho yo mongwe. Bošegong bjo bongwe o ile a phekgogela godimo ga lesea la gagwe a sa ikwe, gomme a le pitlaganya, la hwa. A tsoga bošegogare, a tšea ngwana wa ka lehlakoreng la ka mola ke sa ile ka boroko a mo iša malaong a gagwe; ke moka a bea ngwana yola wa go hwa malaong a ka. Ya re ge go sele ka tsoga ke re ke amuša lesea, ka tšhoga le hwile. Ke ile ka le lebeledišiša gabotse, gomme ka lemoga gore ga se la ka.” Eupša mosadi yola yo mongwe a re: “Aowaa! Ngwana yo a phelago ke wa ka, gomme yo a hwilego ke wa gago!” Mosadi yola wa pele a mo fetola a re: “Aowaowaa! Ngwana yo a hwilego ke wa gago, mme yo a phelago ke wa ka!” Ba ile ba phegišana ka mokgwa woo pele ga kgoši. Ke moo Kgoši Solomone a itšego: “Mongwe le yo mongwe o re ngwana yo a phelago ke wa gagwe mme yo a hwilego ke wa yo mongwe.” A laela gore go tlišwe tšhoša, gomme ge e tlišitšwe a re: “Pharolang ngwana yo a phelago ka bogare gomme le neele mongwe le mongwe seripa sa ngwana yoo.” Yo e tlogago e le mmagolesea leo a botša kgoši a hlomogetše morwa wa gagwe pelo a re: “Hle, mong wa ka, se bolaye ngwana yo! Mo fe yena!” Eupša mosadi yo mongwe yola a re: “A se fiwe nna goba yena; a a pharolwe!” Ke moo Solomone a itšego: “Se bolayeng ngwana yoo! Mo neeleng mosadi yola wa pele – ke yena e tlogago e le mmagongwana yo.” Ge setšhaba sa Israele se ekwa kahlolo yeo ya Solomone, ka moka sa mo hlompha kudu, ka gobane se ile sa thoma go bona gore Modimo o mo file bohlale bja go ahlola. Solomone e be e le kgoši ya naga ya Israele ka moka, mme bahlankedi ba gagwe ba bagolo šeba: Moprista e be e le Asaria, morwa wa Tsadoko; bangwaledi ba kgoši e le Elihorefe le Ahia, barwa ba Shisha; mongwaledi wa mmušo e le Joshafate, morwa wa Ahilude; molaodi wa madira e le Benaya, morwa wa Joyada; baprista e le Tsadoko le Abiatare; molaodi wa babušiši ba dilete e le Asaria, morwa wa Nathane; moeletši wa kgoši e le moprista Sabude, morwa wa Nathane; mohlokomedi wa bahlanka ba mošate e le Ahishare; mohlokomedi wa mediro ya kgapeletšo e le Adoniramo, morwa wa Abda. Solomone a bea banna ba lesome le ba babedi babušiši ba dilete mo Israele. Ba be ba swanetše go tlišetša kgoši le lapa la gagwe tša go ja tše di tšwago dileteng tša bona, monna yo mongwe le yo mongwe a tliša tša go ja kgweding e tee ka ngwaga. Maina a bahlankedi bao ba lesome le ba babedi le a dilete tše ba bego ba di hlokometše šea: Bene-Hure o be a hlokometše naga ya dithaba ya Efraime; Bene-Dekere motse wa Makatse le wa Shaalbime le wa Bethe-Shemeshe le wa Elone le wa Bethe-Hanane; Bene-Hesede motse wa Arubote le wa Soko le naga ka moka ya Hefere; Bene-Abinadaba, yo a bego a nyetše Tafate, morwedi wa Solomone, selete ka moka sa Doro; Baana, morwa wa Ahilude, motse wa Taanake le wa Megido le naga ka moka ya Bethe-Sheane, kgauswi le motse wa Tsaretane, ka borwa bja motse wa Jesriele, go yo fihla motseng wa Abele-Mehola le motseng wa Jokneamo; Bene-Gebere motse wa Ramote kua Gileade, le metse ya Gileade ye e lego ya kgorwana ya Jaire, setlogolo sa Manase, le selete sa Argobe kua Bashane, metse ye megolo ye masome a a selelago ye e ageleditšwego ka merako le ka mapheko a mphiri masorong a dikgoro tša yona; Ahinadaba, morwa wa Ido, selete sa Mahanaime; Ahimaatse, yo a bego a nyetše Basemate, morwedi yo mongwe wa Solomone, naga ya Naftali; Baana, morwa wa Hushai, naga ya Asere le motse wa Bealote; Joshafate, morwa wa Paruage, naga ya Isakara; Shimi, morwa wa Ela, naga ya Benjamene; Gebere, morwa wa Uri, selete sa Gileade, se se bego se ile sa bušwa ke Kgoši Sihone wa Baamore le Kgoši Ogo wa Bashane. Ka ntle ga bao ba lesome le ba babedi go be go na le mmušiši o tee wa naga ka moka. Batho ba Juda le ba Israele e be e le ba bantši bjalo ka dithorwana tša lešabašaba lebopong la lewatle; ba be ba eja, ba enwa, mme ba ipshina. Mmušo wa Solomone o be o akaretša ditšhaba ka moka go tloga nokeng ya Yufratese go fihla nageng ya Filistia le mollwaneng wa Egepeta. Ba be ba lefa metšhelo go yena, gomme ya ba batho ba gagwe bophelong bja gagwe ka moka. Dijo tše Solomone a bego a di tlišetšwa letšatši le lengwe le le lengwe e be e le mekotla ye masome a a selelago le metšo ye e selelago ya bupi bja mathume, le ye lekgolo le masome a mararo a metšo ye mebedi ya bupi bjo e sego bja mathume; dikgomo tše lesome tše di nontšhitšwego ka šakeng, le tše masome a mabedi tša go fudišwa šokeng, le dihuswane tše lekgolo, ntle le dikgama, ditshephe, ditholo le dikgogo tše di nontšhitšwego. Solomone o be a buša naga ka moka ya ka bodikela bja noka ya Yufratese, go tloga Tifsage go yo fihla motseng wa Gasa. Magoši ka moka a ka bodikela bja Yufratese a be a bušwa ke yena, mme yena a kwana le ditšhaba ka moka tše a bego a beelane mellwane natšo. Bophelong bja gagwe bjohle batho ka moka ba Juda le ba Israele ba be ba dula ba bolokegile, lapa le lengwe le le lengwe le na le dirapa tša lona tša merara le tša mego. Solomone o be a na le mašakana a dikete tše masome a mane a dipere tša gagwe tša dikoloi tša ntwa, le dipere tše dikete tše lesome le tše pedi tša ntwa. Babušiši ba gagwe ba dilete ba lesome le ba babedi ba be ba mo tlišetša dijo tša gagwe le tša ba ba jago mošate, yo mongwe le yo mongwe ka kgwedi ye a e beetšwego; ka mehla ba be ba tliša tšohle tše di nyakegago. Mmušiši yo mongwe le yo mongwe o be a tliša le digarase le ditlhaka moo di bego di nyakega gona, di nyakelwa dipere tša dikoloi tša ntwa le tša dikoloi tša merwalo. Modimo o ile a fa Solomone bohlale bjo bogolo le kwešišo ye e sego ya mehleng, le tsebo ye kgolo ye e sa lekanywego. Solomone e be e le yo bohlale go feta banna ba bohlale ba bohlabela le ba bohlale ba Egepeta. E be e le yo bohlalehlale go feta batho ka moka: yo bohlale go feta Ethane, Moesrage, le Hemane le Kalkolo le Darda, barwa ba Maholo, gomme a tuma dinageng tše di beelanego mellwane naye. O ile a hlama diema tše dikete tše tharo le dikopelo tše sekete le tše tlhano. A bolela ka mehlare le dimela, go tloga ka mesedere ya Lebanone go fihla ka mehisopo ye e melago mabotong; a bolela ka diphoofolo, dinonyana, digagabi le dihlapi. Dikgoši lefaseng ka moka di ile tša kwa ka bohlale bja gagwe mme tša romela batho go tla go mo theetša. Kgoši Hiramo wa Tirose e bile mogwera wa Dafida nako yohle ya ge Dafida a sa phela, gomme a re go kwa gore Solomone o hlatlame tatagwe bogošing, a roma batseta go yena. Solomone a romela Hiramo molaetša wo: “O a tseba gore ka lebaka la dintwa tše di bego di sa fele tše tate, Dafida, a bego a di hlabana le manaba a dinaga tše di bego di bapile le yena, o ile a palelwa ke go aga tempele ya go khunamela Morena Modimo wa gagwe, go fihlela Morena a gafetše manaba ao diatleng tša gagwe. Eupša bjale Morena Modimo wa ka o mphile khutšo ka mathoko ohle. Ga ke na le manaba, gomme ga go sešupo sa gore nka hlaselwa. Morena o tshephišitše tate, Dafida, a re: ‘Morwa wa gago, yo ke tlago mmea kgoši ge wena o ile, o tla nkagela tempele.’ Gomme bjale ke ikemišeditše go aga tempele yeo ya go khunamela Morena Modimo wa ka. Ka gona romela banna ba gago Lebanone gore ba yo nthemela mesedere. Banna ba ka ba tla šoma le bona, gomme ke tla lefa banna ba gago ka moo o nyakago ka gona. Bjalo ka ge o tseba gabotse, banna ba ka ga ba tsebe go rema mehlare go swana le ba gago.” Hiramo a thaba kudu ge a ekwa molaetša woo wa Solomone, gomme a re: “Retang Morena lehono ka ge a file Dafida morwa yo bohlale gore a mo hlatlame bogošing bja setšhaba seo se segolo!” Ke gona Hiramo a rometšego Solomone molaetša wo: “Ke kwele molaetša wa gago gomme ke ikemišeditše go dira se o se kgopelago. Ke tla rema mesedere le mephaene. Banna ba ka ba tla theoša dikota tšeo Lebanone ba di iša ka lewatleng, gomme moo ba di tlemaganya gore ba tle ba di phaphamatše ba di theoše le lebopo go fihla mo o di nyakago gona. Fao banna ba ka ba tla di tlemolla, gomme ba gago ba di hlokomela. Wena ke be nka nyaka ge o ka fa banna ba ka dijo.” Ka gona Hiramo a thuša Solomone ka dikota tša mesedere le tša mephaene tše a bego a di nyaka, gomme Solomone a thuša Hiramo ka mekotla ye dikete tše masome a mane le tše nne ya mabele, le dikete tše nne le makgolo a mane a dilitara tša makhura a mohlware ngwaga ka ngwaga go fepa banna ba gagwe. Morena a fa Solomone bohlale ka mo a mo tshephišitšego ka gona. Hiramo le Solomone ba phedišana ka khutšo, ba ba ba dira kgwerano. Kgoši Solomone a tšea banna ba dikete tše masome a mararo nageng ya Israele ka moka a ba dira ba go šoma ka kgapeletšo, gomme a bea Adoniramo mohlokomedi wa bona. A ba arola dihlopha tše tharo tša banna ba dikete tše lesome sengwe le sengwe, gomme sengwe le se sengwe se be se tšea kgwedi e tee Lebanone, gomme se tšea dikgwedi tše pedi se boile se le gae. Solomone o be a bile a na le banna ba dikete tše masome a seswai kua nageng ya dithaba ba betla matlapa, le ba dikete tše di šupago ba go a rwala, gomme a ba beela baokamedi ba dikete tše tharo le makgolo a mararo go lekola modiro wa bona. Ka taelo ya Kgoši Solomone ba betla matlapa a mabotse a magolo a motheo wa Tempele. Bašomi ba Solomone le ba Hiramo le banna ba motse wa Gebale ba ile ba betla matlapa le dikota tša go aga Tempele. Ka ngwaga wa makgolo a mane le masome a seswai ka morago ga ge setšhaba sa Israele se hudugile Egepeta, ngwageng wa bone wa ge Solomone a buša Israele, ka kgwedi ya bobedi, kgwedi ya Sibe, Solomone a thoma go aga Tempele. Ka gare e be e le dimetara tše 27,6 botelele, le tše 9,2 bophara, le tše 13,8 bogodimo. Phapoši ya matsenong e be e le ka pele e le dimetara tše 4,6 go iša ka gare le dimetara tše 9,2 bophara, e na le bophara bja go lekana le bja Tempele ka moka. Maboto a Tempele a be a diretšwe mašoba a a pheketšwego ka maphekwana. Go kgohlagana le leboto ka ntle ka mahlakoreng le ka morago ga Tempele go be go agilwe ngwako wa mabato a mararo go ya godimo. Lebato la ka fase e be e le la bophara bja dimetara tše 2,3, la gare e le la bophara bja dimetara tše 2,8, gomme la ka godimo e le la dimetara tše 3,2 bophara. Leboto la Tempele godimo ga lebato le lengwe le le lengwe e be e le le lesesenyane go la ka fase ga lona, gore mabato a kgone go dula go lona ntle le go thekgwa ka dikokwane. *** Matlapa ao Tempele e bego e agilwe ka ona a be a betlilwe kua bobetlelong, ka gona ga se gwa ka gwa ba le lešata le le dirwago ka dinotwana, ditšhisela, goba dikgerekgere tše dingwe tša tshipi ge Tempele e agwa. Mojako wa lebato la ka fase la ngwako o be o le ka lehlakoreng la ka borwa la Tempele, gomme go na le manamelo a ntikodiko a go ya lebatong la bobedi le la boraro. Ya re ge Kgoši Solomone a feditše go aga Tempele, a tsenya siling ya dikota le diphaphathi tša mosedere. Ngwako wa go kgohlagana le Tempele o be o na le mabato a go ba le maboto a dimetara tše 2,3 bogodimo. O ile wa agwa go kgomagana le maboto a Tempele, gomme wa swaraganywa le maboto ao ka dikota tša mosedere. Morena a re go Solomone: “Ge o ka phetha melao le ditaelo tša ka ka moka, ke tla phetha se ke se tshephišitšego Dafida, tatago. Ke tla dula gare ga setšhaba sa ka sa Israele, gomme nka se tsoge ke se tlogetše.” Ka gona Solomone a fetša go aga Tempele. Maboto a ka gare a be a manegilwe ka diphaphathi tša mosedere go tloga lebatong go iša silinyeng, gomme lebato le dirilwe ka mophaene. Phapoši ya ka gare, ye e bitšwago Felo mo Gokgethwakgethwa, e ile ya agwa kua mosego ga Tempele. E be e le ya dimetara tše 9,2 botelele, mme e kgaotšwe ka diphaphathi tša mosedere tše di tlogago lebatong di fihla silinyeng. Phapoši ye e lego pele ga Felo mo Gokgethwakgethwa e be e le ya dimetara tše 18,4 botelele. Diphaphathi tša mosedere di be di kgabišitšwe ka diswantšho tša mesehlo ya maraka le tša matšoba a a sego a khukhuša; bokagare ka moka bo be bo manegilwe ka dipapetla tša mosedere, gore maswika a maboto a se ke a bonala. Kua mosego ga Tempele go be go agilwe phapoši ya ka gare gore go tle go bewe Polokelo ya Kgwerano ya Morena ka gona. Phapoši yeo ya ka gare e be e le ya dimetara tše 9,2 botelele, tše 9,2 bophara, le tše 9,2 bogodimo, ka moka e manegilwe ka gauta ye e sego ya tswakwa. Aletare ye e bego e le ka pele ga phapoši yeo e be e manegilwe ka diphaphathi tša mosedere. Bokagare bja Tempele bo be bo manegilwe ka gauta ye e sego ya tswakwa, gomme diketane tša gauta di lekeleditšwe go putla mojako wa phapoši yeo ya ka gare, ye le yona e bego e manegilwe ka gauta. Bokagare ka moka bja Tempele bo be bo manegilwe ka gauta, gotee le aletare ye e bego e le Felong mo Gokgethwakgethwa. Bakerubi ba babedi ba be ba betlilwe ka kota tša mohlware gomme ba beilwe ka Felo mo Gokgethwakgethwa, yo mongwe le yo mongwe wa bona e le wa dimetara tše 4,6 go ya godimo. Bobedi bja bona ba be ba lekana ba bile ba swana. Yo mongwe le yo mongwe o be a na le mafego a mabedi, lefego le lengwe le le lengwe e le la dimetara tša 2,3 botelele, ka go realo sebaka sa go tloga ntlheng ya lefego le lengwe go ya go le lengwe e le dimetara tše 4,6. *** *** Ba ile ba bewa go bapela ka Felo mo Gokgethwakgethwa, gore mafego a mabedi a bona ao a phurulogetšego ka gare a kgwathane gare ga phapoši, mme a mangwe a mabedi ao a phurulogetšego ka ntle a kgwathe maboto. Bakerubi bao ba babedi ba be ba manegilwe ka gauta. Maboto a phapoši ye kgolo le a phapoši ya ka gare ka moka a be a kgabišitšwe ka diswantšho tše di sehlilwego tša bakerubi le tša mehlare ya mepalema, le tša matšoba a a sego a khukhuša. Lebato le lona le be le manegilwe ka gauta. Mamati a mabedi a go betlwa ka dikota tša mohlware a be a tsentšwe mojakong wa Felo mo Gokgethwakgethwa; dikota tša mojako ka godimo di be di dirile ntlha. Mamati a be a kgabišitšwe ka diswantšho tše di sehlilwego tša bakerubi le tša mepalema le tša matšoba a a sego a khukhuša. Mamati le bakerubi le mepalema di be di manegilwe ka gauta. Mojako wa phapoši ye kgolo o ile wa betlelwa dikota tše nne tša mohlware mme tša dira dikhutlo tše nne. Go ile gwa ba le mamatipedi a mabedi a mophaene a a dikologago ka dipinagare, gomme a kgabišitšwe ka mesehlo ya bakerubi le ya mepalema le ya matšoba a a sego a khukhuša. Mesehlo yeo e be e manegilwe ka gauta ye tshesenyane. Go ile gwa agwa kgoro ya ka gare pele ga Tempele. Kgoro yeo e be e dikologilwe ke maboto a a nago le molokoloko wa dikota tša mosedere godimo ga molokoloko wo mongwe le wo mongwe wa boraro wa matlapa a a betlilwego. Motheo wa Tempele o ile wa thewa ka kgwedi ya Sibe, ngwageng wa bone wa pušo ya Solomone. Ka kgwedi ya seswai, kgwedi ya Bulo, ngwageng wa lesome le motšo o tee wa pušo ya Solomone, Tempele ya phethwa ka gohle, ka wona mokgwa woo e bego e akantšwe ka gona. E be e tšere Solomone mengwaga ye e šupago go e aga. Solomone o ile a ikagela le ngwako, gomme wona wa mo tšea mengwaga ye lesome le ye meraro. Ngwako wa sethokgwa sa Lebanone e be e le wa dimetara tše 46 botelele le dimetara tše 23 bophara le dimetara tše 13,8 bogodimo. O be o na le melokoloko ye meraro ya dikokwane tša mosedere, molokolokong wo mongwe le wo mongwe e le tše lesome le metšo ye mehlano, mme mapheko a mosedere a di phekile. Siling e be e le ya mosedere e putla diphapoši tša polokelo tše di bego di thekgilwe ke dikokwane tšeo. *** Mabotong a ka mahlakoreng go be go na le melokoloko ye meraro ya mafasetere. Mejako le mafasetere di be di na le dikota tša dikhutlo tše nne, gomme melokoloko yeo ye meraro ya mafasetere lebotong le lengwe le le lengwe e be e lebane le ya ka lehlakoreng le lengwe. Phapoši ya Dikokwane e be e le ya dimetara tše 23 botelele le dimetara tše 13,8 bophara. E be e na le mathudi ao a thekgilwego ke dikokwane ka pele. Phapoši ya Setulo sa Bogoši, ye gape e bego e bitšwa Phapoši ya Kahlolo, moo Solomone a bego a ahlolela melato gona, e be e na le maboto ao a pipilwego ka diphaphathi tša mosedere go tloga lebatong go fihlela mahlomong. Ngwako wa Solomone ka kgorong ye nngwe ka morago ga Phapoši ya Kahlolo o be o agilwe bjalo ka meago ye mengwe. O ile a agela le mosadi wa gagwe, morwedi wa kgoši ya Egepeta, ngwako wa mohuta woo. Meago ye ka moka, gotee le kgoro ye kgolo, e be e agilwe ka matlapa a mabotsebotse go tloga metheong go fihla tlhakeng. Matlapa ao a be a betlilwe bobetlelong mme a ripilwe ka tekanyo, bokagare le bokantle bja wona bo redimošitšwe ka disaga. Metheo e be e agilwe ka matlapa a mabotse a magolo, a mangwe a ona e le a dimetara tše 4,7 botelele, mme a mangwe e le a dimetara tše 3,7 botelele. Godimo ga ona go be go na le matlapa a mangwe a mabotse a ripilwe ka tekanyo, le dikota tša mosedere. Kgoro ye kgolo ye e bego e dikologile Tempele, le kgoro ya ka gare ga Tempele, le phapoši ya matsenong a Tempele di be di na le maboto a molokoloko wa dikota tša mosedere godimo ga molokoloko wo mongwe le wo mongwe wa boraro wa matlapa a a betlilwego. Kgoši Solomone a laela gore go bitšwe monna yo mongwe yo leina la gagwe e bego e le Hiramo, a dula motseng wa Tirose. Yena e be e le sekgwari sa mediro ya mphiri. Tatagwe, yo a bego a šetše a hlokafetše, e be e le wa Tirose, mme le yena e bile sekgwari medirong ya mphiri; mmagoHiramo e be e le wa kgoro ya Naftali. Hiramo e be e le makgone yo bohlale wa tsebo. O ile a dumela kgopelo ya Kgoši Solomone ya gore a tle a hlokomele mediro ka moka ya mphiri. Hiramo o ile a dira dikokwane tše pedi tša mphiri, ye nngwe le ye nngwe ya ba ya dimetara tše 8,3 bogodimo le dimetara tše 5,5 tikologo. A dira le dihlogwana tše pedi tša mphiri, ye nngwe le ye nngwe ya ba ya dimetara tše 2,3 bogodimo, gore di tle di bewe godimo ga dikokwane. Karolo ya ka godimodimo ya kokwane ye nngwe le ye nngwe e be e kgabišitšwe ka diketane tše di logagantšwego, le melokoloko ye mebedi ya digarenata tša mphiri. Dihlogwana tšeo di be di bopegile bjalo ka matšoba, e le tša dimetara tše 1,8 bogodimo, gomme di beilwe karolong ya kgokolo ye e bego e le ka godimo ga diketane. Go be go na le digarenate tše makgolo a mabedi ka melokoloko ye mebedi go rarela hlogwana ye nngwe le ye nngwe. Hiramo a bea dikokwane tšeo tše pedi tša mphiri pele ga mojako wa Tempele; ya ka lehlakoreng la ka borwa ya rewa leina la Jakine, gomme ya ka leboa ya rewa leina la Boase. Dihlogwana tša go bopega bjalo ka matšoba tša mphiri di be di le godimo ga dikokwane. Ka gona mošomo wa go dira dikokwane wa phethwa. Hiramo a bopa legopo la nthetelego la mphiri, ya ba la dimetara tše 2,3 go iša fase, le dimetara tše 4,6 boahlamo, le dimetara tše 13,8 bontikodiko. Go rarela morumo wa legopo ka fase go be go na le melokoloko ye mebedi ya maraka a mphiri e le a lesome disentimetareng tše dingwe le tše dingwe tše 46, a bopeletšwe e le selo se tee le legopo. Legopo le be le rwelwe ke dikgomo tše lesome le tše pedi tša mphiri tše di bego di lebeletše ka mathoko ohle: tše tharo di lebeletše leboa, tše tharo bodikela, tše tharo borwa, tše tharo bohlabela. Mphiri wa legopo o be o na le bokoto bja dimilimetara tše 74. Morumo wa lona o be o swana le morumo wa nkgo, o ahlamela ka ntle bjalo ka matlakala a letšoba. Legopo le be le swara dilitara tše dikete tše masome a mane le tše nne. Hiramo a dira le dikoloyana tša mphiri tše lesome; ye nngwe le ye nngwe e be e le ya dimetara tše 1,8 botelele le dimetara tše 1,8 bophara le dimetara tše 1,4 bogodimo. Di be di dirilwe ka diphaphathi tše di bego di hlomilwe ka diforeimeng; diphaphathi di be di na le diswantšho tša ditau le tša dikgomo le tša bakerubi, gomme godimo ga diforeime, ka godimo le ka fase ga ditau le dikgomo, go be go na le diswantšho tša dinkokoma tša dikgare. Koloyana ye nngwe le ye nngwe e be e na le maotwana a mphiri a mane le diase tša mphiri. Dikhutlong tše nne go be go na le dikokwane tša mphiri tša go thekga sebjana; dikokwane di be di kgabišitšwe ka diswantšho tša dinkokoma tša dikgare. Ka godimo go be go na le foreime ya nthetelego ya go swarelela sebjana. Yona e be e tšwelelela ka godimo disentimetara tše 46 go tloga godimo ga koloyana, mme e tsenelela disentimetara tše 23 ka gare ga yona. E be e na le mesehlo go e dikologa. Diphaphathi tša dikoloyana di be di lekalekana ka mathoko ohle e se dinthetelego. Maotwana a dikoloyana tšeo e be e le a disentimetara tše 69 bogodimo; a be a le ka fase ga diphaphathi, gomme diase e le selo se tee le dikoloyana. Maotwana ao a be a swana le maotwana a koloi ya ntwa; diase tša ona, dirime, dipeke le dihapo – ka moka e le tša mphiri. Go be go na le dikokwane tše nne dikhutlong tša ka fase tša koloyana ye nngwe le ye nngwe tše e bego e le selo se tee le koloyana. Go be go na le morumo wa disentimetara tše 23 go rarela karolo ya ka godimo ya koloyana ye nngwe le ye nngwe; dikokwane tša wona le diphaphathi e be e le selo se tee le koloyana. Dikokwane le diphaphathi di be di kgabišitšwe ka diswantšho tše di sehlilwego tša bakerubi le tša ditau le tša mehlare ya mepalema, mo gongwe le mo gongwe mo go bego go na le sebaka sa tšona, gotee le tša dikgare go dikologa. Ke ka moo dikoloyana di ilego tša dirwa ka gona; ka moka di be di bopilwe go swana, gomme di lekana. Hiramo a dira le dibjana tše lesome, koloyana ye nngwe le ye nngwe ya ba le sa yona. Sebjana se sengwe le se sengwe e be e le sa dimetara tše 1,8 boahlamo, gomme se swara dilitara tše 880. A bea dikoloyana tše tlhano ka lehlakoreng la ka borwa la Tempele, gomme tše dingwe tše tlhano a di bea ka lehlakoreng la ka leboa; legopo a le bea sekhutlong sa ka borwabohlabela. Hiramo a dira le dipitša, digarafo le meruswi. A phetha modiro wo Kgoši Solomone a bego a mo file wona wa Tempele ya Morena. Tše a di dirilego šedi: dikokwane tše pedi dihlogwana tše pedi tša go bopega bjalo ka meruswi tša godimo ga dikokwane diketane tše di logagantšwego hlogwaneng ye nngwe le ye nngwe digarenate tše makgolo a mane tša mphiri ka melokoloko ye mebedi ya tše lekgolo molokolokong o tee go raretša diketane hlogwaneng ye nngwe le ye nngwe dikoloyana tše lesome meruswi ye lesome legopo dikgomo tše lesome le tše pedi tša mphiri tše di thekgilego legopo dipitša, digarafo le meruswi Ditlabakelo tše ka moka tša Tempele tše Hiramo a di diretšego Kgoši Solomone e be e le tša mphiri wo o phadimišitšwego. *** *** *** *** *** Kgoši o ile a laela gore ka moka di bopše bobopelong gare ga Sukote le Tsaretane, ka moeding wa Jordane. Solomone ga se a ka a dira gore ditlabakelo tšeo tša mphiri di elwe boima, ka gobane e be e le tše ntši kudu, ka gona boima bja tšona ga se bja ka bja tsebja. Solomone a laela le gore Tempele e direlwe ditlabakelo tša gauta: aletare, tafola ya dinkgwa tše di abelwago Modimo, dihlomamabone tše lesome tše di bego di tsemilwe pele ga Felo mo Gokgethwakgethwa, tše tlhano ka lehlakoreng la ka borwa le tše tlhano ka go la ka leboa; matšoba, mabone le ditlao; meruswana, ditimamabone, meruswi, dipane tša seorelo, le dibjana tša magala; le digono tša mamati a ka Felo mo Gokgethwakgethwa le tša mamati a ka ntle a Tempele. Ditlabakelo tše ka moka di be di dirilwe ka gauta. Ge Kgoši Solomone a feditše modiro ka moka wa Tempele, o ile a bea dilo tšohle tše Dafida, tatagwe, a bego a di abetše Morena, ka diphapošing tša polokelo tša Tempele – silibera, gauta le dilo tše dingwe. Kgoši Solomone a bitša bagolo ka moka ba Israele le baetapele ba dikgoro le mantona a dikgorwana gore ba tle go yena Jerusalema, ba tle ba tšee Polokelo ya Kgwerano ya Morena kua Sione, motseng wa Dafida, ba e tliše Tempeleng. Ka moka ba kgobokana nakong ya Monyanya wa Mešaša kgweding ya bošupa ya Etanime. Ge bagolo ka moka ba Israele ba fihla, baprista ba rwala Polokelo ya Kgwerano ba e iša Tempeleng. Balefi le baprista ba thothela le Tente ya bodulo bja Morena le ditlabakelo tša yona ka moka Tempeleng. Kgoši Solomone le setšhaba ka moka sa Israele ba kgobokana pele ga Polokelo ya Kgwerano, gomme ba dira dihlabelo ka dihuswane le dikgomo tše ntši – ya ba tše ntši kudu mo di bego di ka se balwe. Ya ba gona baprista ba rwalago Polokelo ya Kgwerano ba e tsenya ka Tempeleng, ba e bea mo e swanetšego go dula gona ka Felo mo Gokgethwakgethwa, ka fase ga mafego a bakerubi. Mafego a bona a a phurulogilego a khupetša Polokelo le mapara ao e bego e rwalwa ka ona. Dintlha tša mapara di be di bonala fela ge motho a eme go lebana thwii le Felo mo Gokgethwakgethwa, e sego ge a eme mo gongwe. Mapara ao a sa le moo le lehono. Go be go se na selo se sengwe ka gare ga Polokelo ya Kgwerano ntle le matlapa a mabedi ao Moshe a bego a a beile ka fao kua thabeng ya Sinai, ge Morena a dira kgwerano le setšhaba sa Israele ge se etšwa Egepeta. Ge baprista ba etšwa ka Tempeleng, gateetee Tempele ya tlala leru la seetša se se fahlago sa letago la Morena, gomme ba se kgone go boela ka gare go yo dira mešomo ya bona. Ke moo Solomone a rapetšego a re: “Wena, Morena, o hlomile letšatši legodimong, le ge go le bjalo o kgethile go dula marung a maso. Bjale ke go agetše Tempele ya segoši, bodulo bjo o tlago dula ka go bjona go ya go ile.” Ya re setšhaba se sa eme fao, Kgoši Solomone a retologa a lebana naso, gomme a se šegofatša. A re: “Retang Morena Modimo wa Israele! O phethile se a se holofeditšego tate, Dafida, mola a re: ‘Go tloga ka nako yela ke ntšha setšhaba sa ka Egepeta ga se ka ka ka kgetha motse wo mongwe mo nageng ya Israele ka moka wo go wona go kago agwa tempele ye nkago khunamelwa go yona. Eupša ke kgethile wena, Dafida, gore o buše setšhaba sa ka.’ ” Solomone a tšwela pele a re: “Tate, Dafida, o ile a gopola go aga tempele moo go tlago khunamelwa Morena Modimo wa Israele, eupša Morena a re go yena: ‘Ke gabotse ge o nyaka go nkagela tempele, fela e ka se agwe ke wena. Ke morwa wa gago, morwa yo a tlago tswalwa ke wena, yo a tlago aga tempele ya ka.’ “Gomme bjale Morena o phethile se a mo holofeditšego sona. Ke hlahlame tate ka ba kgoši ya Israele, gomme ke agile Tempele yeo go yona go tlago khunamelwa Morena Modimo wa Israele. Ebile ke beakantše lefelo ka Tempeleng la Polokelo ya Kgwerano ye e swerego matlapa a kgwerano ye Morena a e dirilego le borakgolokhukhu ba rena ge a ba ntšha Egepeta.” Ka morago Solomone a ya a ema pele ga aletare setšhaba ka moka se mo lebeletše, a emiša matsogo a rapela a re: “Morena Modimo wa Israele, ga go modimo yo a swanago le wena godimo legodimong le fase lefaseng! O botegela kgwerano ya gago le setšhaba sa gago gomme wa se rata ka leratorato ge se phela se go hlompha ka dipelo tša sona ka moka. O phethile se o se holofeditšego tate, Dafida; lehono lentšu le lengwe le le lengwe le phethagaditšwe. Gomme bjale, Morena Modimo wa Israele, ke rapela gore o phethe le sela o se holofeditšego tate mola o mmotša gore ka mehla go tla ba le yo mongwe wa ditlogolo tša gagwe yo a bušago naga ya Israele, ge fela ba ka go theeletša gabotse go no swana le yena. Bjale ge, wena Modimo wa Israele, hle, phethagatša tšohle tše o di holofeditšego tate, Dafida, mohlanka wa gago. “Fela kgane o ka kgona go dula lefaseng, wena Modimo? Le lona legodimo la godimodimo ga se la go lekana, mme bjale Tempele ye ke e agilego ye yona e ka go lekana bjang? Morena Modimo wa ka, ke nna mohlanka wa gago. Theetša thapelo le sello sa ka, gomme o phethe tše ke go kgopelago tšona lehono. Diša Tempele ye bošego le mosegare, lona lefelo le o le kgethilego gore o khunamelwe go lona. O nkwe ge ke rapela ke lebeletše Tempeleng ye. O kwe dithapelo tša ka le dikgopelo tša setšhaba sa gago ge se rapela se lebeletše lefelong le. O re kwe legaeng la gago legodimong, gomme o re lebalele. “Ge motho a ka belaelwa gore o phošeditše yo mongwe gomme a tlišwa aletareng ya gago ka mo Tempeleng ye gore a tle a ene gore ga a ne molato, wena Morena, o theetše o le legodimong gomme o ahlole bahlanka ba gago. O otle yo a nago le molato ka mo go mo swanetšego, gomme o lokolle yo a se nago molato. “Ge setšhaba sa gago sa Israele se fentšwe ke manaba a sona ka gobane se dirile dibe pele ga gago, gomme ge ba sokologela go wena, ba bolela ba ipobola gore o Modimo wa bona, mme ba etla mo Tempeleng ye, ba go rapela ba re o ba lebalele, o ba theetše o le legodimong. O lebalele setšhaba sa gago dibe tša sona, gomme o ba boetše nageng ye o e filego borakgolokhukhu ba bona. “Ge o sa neše pula ka gobane setšhaba sa gago se dirile dibe pele ga gago, gomme ge ba sokologa dibeng tša bona ka gobane o ba otla, ba lebelela Tempeleng ye, ba go rapela, mme ba ipobola gore o Modimo wa bona, o ba theetše o le legodimong. O lebalele kgoši le setšhaba sa Israele dibe tša bona. O ba rute go dira se se lokilego. Gomme hle, Morena, o neše pula mo nageng ye ya gago ye o e filego setšhaba sa gago gore e be lefa la sona go ya go ile. “Ge go wele tlala goba bolwetši bja leuba nageng, goba ge mabele a tšhungwa ke diphefo goba a lewa ke phori goba segongwane goba bojane, goba ge setšhaba sa gago se hlaselwa ke manaba a sona, goba ge go le bolwetši bjo bošoro goba bjo bongwenyana gare ga bona, o theetše dithapelo tša bona. Ge yo mongwe wa setšhaba sa gago sa Israele a ka otlollela matsogo Tempeleng ye a rapela a kgopela ka pelo ye e nyamilego kudu, o kwe thapelo ya gagwe. O ba theetše o le bodulong bja gago legodimong, o ba lebalele, gomme o ba thuše. Ke wena o nnoši o tsebago boitsholo bjo bo lego ka pelong ya motho. O sware motho yo mongwe le yo mongwe ka mo go mo swanetšego, gore setšhaba sa gago se tle se go theetše ka dinako ka moka tša ge se sa dula nageng ye o e filego borakgolokhukhu ba rena. “Ge motho o šele yo a dulago nageng ya kgole a ka kwa go tuma ga gago le dilo tše kgolo tše o di diretšego setšhaba sa gago, gomme a tla go go khunamela le go rapela mo Tempeleng ye, *** o theetše thapelo ya gagwe o le legodimong, moo o dulago gona. O dire se a go kgopelago sona, gore ditšhaba tša lefase ka moka di tle di go tsebe mme di go theetše, bjalo ka setšhaba sa gago sa Israele. Ke moo di tlago tseba gore Tempele ye ke e agilego ke felo mo o swanetšego go khunamelwa gona. “Ge o laela setšhaba sa gago gore se yo lwa le manaba a sona, gomme se go rapela mo gongwe le mo gongwe mo se lego gona se lebeletše motseng wo o o kgethilego wo le Tempeleng ye ke go agetšego yona ye, o theetše dithapelo tša sona. O ba kwe o le legodimong, gomme o dire gore ba fenye. “Ge setšhaba sa gago se dira dibe pele ga gago – gape ga go motho yo a sa dirego sebe – gomme ya re ge o befetšwe wa ba gafela manabeng a bona gomme bathopi bao ba bona ba ba iša nageng ye nngwe, ya kgole goba ya kgauswi, o theetše dithapelo tša bona. Ge ba ka itshola ba le moo nageng yeo gomme ba go rapela, ba ipolela gore ba dirile dibe, ba phošitše, ba na le molato, o kwe dithapelo tša bona, hle, Morena. Ge mo nageng yeo ba ka sokologa ka dipelo tša bona ka moka le ka moya wa bona ka moka, gomme ba go rapela ba lebeletše nageng ye o e filego borakgolokhukhu ba rena ye, motseng wo o o kgethilego wo, le Tempeleng ye ke go agetšego yona ye, gona o theetše dithapelo tša bona. O ba kwe o le bodulong bja gago legodimong ge ba go kgopela tebalelo, gomme o ba šokele. O ba lebalele dibe tša bona le dikarogo tšohle tša bona, gomme o dire gore manaba a bona a ba sware ka botho. Ke setšhaba sa gago se o se ntšhitšego Egepeta, mola moubeng wo o fišago wa go tološa tshipi. “A ka mehla o lebelele setšhaba sa gago sa Israele le kgoši ya sona ka botho ge ba go kgopela, gomme o kwe thapelo ya bona nako ye nngwe le ye nngwe ge ba go llela. O ba kgethile gare ga ditšhaba ka moka gore e be ba gago, bjalo ka ge o ba boditše ka mohlanka wa gago, Moshe, ge wena, Morena, Mong wa rena, o ntšha borakgolokhukhu ba rena Egepeta.” Ge Solomone a feditše go rapela Morena, a emelela mo a bego a khunamile a emišitše matsogo pele ga aletare. A hlaboša lentšu a šegofatša setšhaba ka moka se se bego se kgobokane fao a re: “Retang Morena yo a filego setšhaba sa gagwe khutšo, bjalo ka ge a boletše. Ditshephišo tše botse ka moka tše a di boletšego ka mohlanka wa gagwe, Moshe, o di phethile. A Morena Modimo wa rena a be le rena bjalo ka ge a bile le borakgolokhukhu ba rena; a a se ke a tsoga a re tlogetše goba a re lahla; a a re dire gore re mo theetše, gore ka mehla re tle re phele ka mo a nyakago re phela ka gona, gomme re phethe melao le ditaelo ka moka tše a di filego borakgolokhukhu ba rena. A Morena Modimo wa rena a gopole thapelo ye bošego le mosegare, gotee le dilo tše ke mo kgopetšego tšona lehono. A ka mehla a šokele setšhaba sa Israele le kgoši ya sona, a ba fe tše ba di nyakago letšatši le lengwe le le lengwe. Ka gona ditšhaba ka moka tša lefase di tla tseba gore ke Morena fela e lego Modimo – ga go na le yo mongwe gape. A lena, setšhaba sa gagwe, ka mehla le botegeleng Morena Modimo wa rena, le phethe melao le ditaelo tša gagwe ka moka, bjalo ka lehono.” Ke moo Kgoši Solomone le Baisraele ka moka ba ba bego ba na le yena ba diretšego Morena dihlabelo. Yena a dira dihlabelo ka dikgomo tše dikete tše masome a mabedi le tše pedi le dihuswane tše dikete tše lekgolo le tše masome a mabedi e le dihlabelo tša kagišano. Ka gona kgoši le setšhaba ka moka ba kgethwafatša Tempele. Ka lona letšatši leo a kgethwafatša le bogare bja kgoro, e lego sekgoba se se lego pele ga Tempele, gomme moo a dira dihlabelo tša go tšhungwa ka moka, le dikabelo tša bupi, a di dira le ka makhura a diruiwa tša dihlabelo tša kagišano. O ile a dira dihlabelo tšeo moo ka gobane aletare ya mphiri e be e le ye nnyane go ka swara dihlabelo tšeo ka moka. Gona moo Tempeleng Solomone le setšhaba ka moka sa Israele ba keteka Monyanya wa Mešaša matšatši a a šupago. Go be go tlile lešaba le lentši la batho ba go tšwa kgole bjalo ka sefateng sa Hamate, go yo fihla mollwaneng wa Egepeta. Ka letšatši la seswai Solomone a bušetša setšhaba magaeng a sona. Ka moka ba mo reta ba ya gae ba thabile ka baka la tšohle tše Morena a šegofaditšego mohlanka wa gagwe, Dafida, le setšhaba sa gagwe sa Israele ka tšona. Ge Kgoši Solomone a feditše go aga Tempele le mošate le se sengwe le se sengwe se a bego a nyaka go se dira, Morena a iponagatša go yena gape, bjalo ka ge a be a ile a iponagatša go yena kua Gibeone. A re go yena: “Ke kwele thapelo ya gago. Ke kgethwafaditše Tempele ye o e agilego gore e be felo mo ke swanetšego go khunamelwa gona go ya go ile. Ke tla e diša gomme ka e hlokomela ka dinako tšohle. Ge o ka ntlhankela ka potego le botshephegi bjalo ka Dafida, tatago, ge o ka phetha melao ya ka mme wa dira tšohle tše ke go laelago tšona, ke tla phetha se ke se holofeditšego Dafida, tatago, mola ke mmotša gore naga ya Israele ka mehla e tla bušwa ke ditlogolo tša gagwe. Eupša ge wena goba ditlogolo tša gago le ka ntlhanogela, ge le ka nyatša melao le ditaelo tše ke le filego tšona, gomme la khunamela medimo e šele, ke moo ke tlago tloša setšhaba sa ka sa Israele nageng ye ke se filego yona. Ke tla tlogela le yona Tempele ye ke e kgethwafaleditšego gore e be lefelo le ke swanetšego go khunamelwa go lona. Batho mo gohle ba tla kwera naga ya Israele gomme ba e nyatša. Tempele ye e tla ba morope, gomme yo mongwe le yo mongwe yo a fetago mo o tla gakgamala a kgotsa ka molodi, a botšiša a re: ‘Ke ka baka lang Morena a dirile naga ye le Tempele ye ka mokgwa wo?’ Batho ba tla mo fetola ba re: ‘Ke ka gobane ba tlogetše Morena Modimo wa bona, yo a ntšhitšego borakgolokhukhu ba bona Egepeta. Ba ile ba kgomarela medimo ye mengwe ba e khunamela ba e hlankela. Ke ka lona lebaka leo Morena a ba tlišeditšego madimabe a.’ ” Solomone o tšere mengwaga ye masome a mabedi a aga Tempele le mošate, ga gagwe. Kgoši Hiramo wa Tirose a mo thuša ka mesedere le mephaene le gauta ka moo a bego a nyaka ka gona. Ge mošomo wo o feditšwe, Kgoši Solomone a fa Hiramo metse ye masome a mabedi seleteng sa Galilea. Hiramo a ya go e bona, fela a se ke a e rata. Ka gona a re go Solomone: “Warra, a ke metse mang ye o mphilego yona?” Ka lebaka leo tikologo yeo e sa bitšwa Kabule. Hiramo o be a rometše Solomone dikilokramo tše dikete tše tharo le makgolo a a selelago tša gauta. Kgoši Solomone o ile a gapeletša batho go aga Tempele le mošate, le go lekelelanya naga ka thokong ya ka bohlabela ya motse, le go aga morako wa motse. Le gona a gapeletša batho go tsošološa motse wa Hatsore le wa Megido le wa Gesere. Kgoši ya Egepeta e be e kile ya hlasela motse wa Gesere mme ya o thopa, ya bolaya Bakanana ba ba bego ba dula moo, gomme ya o tšhuma. Ka morago ya o fa morwedi wa yona ge a nyalwa ke Solomone, mme Solomone a o tsošološa. Kgoši Solomone a gapeletša batho le go tsošološa Bethe-Horone ya ka Tlase, le Baalate le Tamare kua lešokeng la Juda, le metse ka moka ya go bolokela, le metse ya banamedi ba dipere le ya ba dikoloi tša gagwe tša ntwa, le tše dingwe tše a bego a nyaka go di aga Jerusalema, le kua Lebanone, le mo gongwe le mo gongwe mmušong wa gagwe. Moo medirong ya gagwe Solomone o be a gapeletša ditlogolo tša batho ba Kanana bao Baisraele ba bego ba se ba ba bolaya ge ba thopa naga ya bona. Bona e be e le Baamore, Bahete, Baperise, Bahibe le Bajebuse, bao ditlogolo tša bona e sa lego makgoba le lehono. *** Fela Solomone a se ke a dira Baisraele makgoba; bona a ba dira bahlabani, bahlankedi, balaodi ba madira, barwaladikotse, balaodi ba dikoloi tša ntwa, le banamedi ba dipere. Go be go na le balaodi ba bagolo ba makgolo a mahlano le masome a mahlano ba ba bego ba hlokometše baagi ba Solomone. Solomone o ile a lekelelanya naga ya ka bohlabela bja motse ka morago ga ge mosadi wa gagwe, morwedi wa kgoši ya Egepeta, a tlogile motseng wa Dafida a ile mošate wo Solomone a mo agetšego wona. Gararo ka ngwaga Solomone o be a dira dihlabelo tša go tšhungwa ka moka le dihlabelo tša kagišano aletareng ye a bego a e agetše Morena. Le gona o be a tšhumela Morena seorelo. Ke ka mo a bego a phetha modiro wa Tempeleng. Kgoši Solomone o be a dira le maselawatle kua Etsione-Gebere, kgauswi le Elate, lebopong la kgogometšana ya Akaba, kua nageng ya Edomo. Kgoši Hiramo a romela banna ba bangwe ba tsebo ba ba bego ba šoma maselawatleng a gagwe gore ba yo šoma le banna ba Solomone. Bona ba sepela ka maselawatle ba ya nageng ya Ofire, gomme ba tlišetša Solomone gauta ya dikilokramo tše dikete tše lesome le tše pedi le makgolo a a selelago. Kgošigadi ya Sheba e ile ya kwa go tuma ga Solomone, gomme ya tla Jerusalema go tlo mo leka ka dipotšišo tše thata. A tla le bafelegetši ba gagwe ba bantši, gotee le dikamela tše di rwelego dinoko le magakabje le gauta ye ntšintši. Ge a kopana le Solomone a mmotšiša dipotšišo ka moka tše a bego a di gopotše. Solomone a di fetola ka moka; gwa se be le ye e mo šitago. Kgošigadi ya Sheba a kwa bohlale bja Solomone gomme a bona le mošate wo a o agilego. A bona dijo tše di solwago tafoleng ya Solomone, le ka moo bakgomana ba gagwe ba dulago ka go latelana ka gona, le ka moo badiredi ba gagwe ba solelago batho dijo tafoleng, le diaparo tša go swana tše ba di aparago, le bao ba tlišago dino, le dihlabelo tše a di dirago ka Tempeleng. A šala a eme madi a maketše. A re go Kgoši Solomone: “Tše ke di kwelego nageng ya gešo ka mediro ya gago le ka bohlale bja gago ke therešo! Fela ke be nka se kgolwe mola ke se ke ka tla go tlo iponela tšohle ka bonna. Eupša tše ke di kwelego le go ba seripa ga se seripa sa dilo tše; bohlale bja gago le lehumo la gago di feta kudu seo ke se kwelego. Ba mahlatse ke basadi ba gago! Gomme bahlankedi ba gago le bona ba na le mahlatse ka ge ba phela ba go hlankela mme ba ekwa dipolelo tša gago tša bohlale! A go retwe Morena Modimo wa gago! O laeditše ka mo o mo kgahlago ka gona ka go go bea kgoši ya Israele. Ka gobane Morena o rata Baisraele go ya go ile, o go beile kgoši ya bona gore o tle o phethe molao le toka.” O ile a fa Kgoši Solomone dimpho tšela a bego a tlile natšo: gauta ya dikilokramo tše dikete tše tharo le makgolo a a selelago, le dinoko tše ntšintši, le magakabje. O be a mo file dinoko tše ntšintši go feta tše di ilego tša hlwa di sa tlišwa Jerusalema. Maselawatle a Hiramo, ale a go tliša gauta ye e tšwago Ofire, a ile a tla le dikota tše ntšintši tša mojunipere le magakabje. Solomone a dira maitshwarelelo manamelong ka Tempeleng le ka ngwakong wa gagwe ka dikota tšeo, a dira le diharepa le dikgapa tša baopedi. E be e le dikota tše botsebotse tša mojunipere tše di bego di se tša ka tša tlišwa Israele; ga go dikota tše di swanago natšo tše di ilego tša tsoga di bonwe gape. Kgoši Solomone o ile a fa kgošigadi ya Sheba se sengwe le se sengwe se a ilego a se kgopela, go sa balwe le dimpho tše dingwe tša mehleng tše a bego a mo file tšona ka bontši. Ke moka kgošigadi le bafelegetši ba gagwe ba boela nageng ya Sheba. Ngwaga ka ngwaga Kgoši Solomone o be a tlišetšwa gauta ya dikilokramo tše e ka bago tše dikete tše masome a mabedi go tlaleletša metšhelo ye e bego e lefša ke bagwebi, le dipoelo tša kgwebo, le diloba tše di bego di lefša ke magoši a Arabia le babušiši ba dilete tša Israele. Solomone o ile a dira dikotse tše kgolo tše makgolo a mabedi, gomme ye nngwe le ye nngwe a e manega ka gauta ya dikilokramo tše e ka bago tše di šupago. A dira le dikotse tše nnyane tše makgolo a mararo, gomme a manega ye nngwe le ye nngwe ya tšona ka gauta ya kilokramo e tee le seripa. Dikotse tšeo ka moka di ile tša bewa ka Ngwakong wa sethokgwa sa Lebanone. A betla le setulo se segolo sa bogoši se se manegilwego ka gauta ye botsebotse ye e hlometšwego diripana tša meno a tlou. Go be go na le manamelo a a selelago go rotogela setulong seo, go na le seswantšhobopša sa tau mafelelong a lenamelo le lengwe le le lengwe, ka moka e le ditau tše lesome le tše pedi. Ka morago ga setulo go be go na le diswantšhobopša tša dihlogo tša dipowana, gomme ka thoko ye nngwe le ye nngwe ya matsogo a sona ka mabedi go na le seswantšhobopša sa tau. Go be go se gwa ka gwa betlwa setulo sa bogoši sa go swana le sona mebušong ka moka. *** Dinwelo tša Solomone ka moka di be di dirilwe ka gauta, le ditlabakelo ka moka tša ka Ngwakong wa sethokgwa sa Lebanone e be e le tša gauta ye e sego ya tswakwa. Ga go silibera ye e ilego ya šomišwa, ka gobane mehleng ya Solomone silibera e be e se selo se bohlokwa. O be a na le maselawatle a magolo a a bego a sepela le maselawatle a Hiramo. Ka morago ga mengwaga ye meraro maselawatle a gagwe a be a boela gae a tliša gauta, silibera, meno a ditlou, dikgabo le ditšhwene. Kgoši Solomone o be a humile ebile e le yo bohlale go feta magoši ka moka, gomme batho ka moka ba lefase ba nyaka go tlo mmona gore ba kwe bohlale bjo Modimo a mo filego bjona. Yo mongwe le yo mongwe yo a tlago o be a mo tlela le mpho – dilo tša silibera, goba tša gauta, goba diaparo, goba dibetša, goba dinoko, goba dipere, goba dimeila. Go be go eba ka mokgwa woo ngwaga wo mongwe le wo mongwe. Solomone o be a na le dikoloi tša ntwa tše sekete le makgolo a mane, le banamedi ba dipere ba dikete tše lesome le tše pedi. O ile a bea banamedi ba dipere Jerusalema le metseng ye e bego e na le dikoloi tša ntwa. Nakong ya ge a buša, silibera Jerusalema e be e le ye ntši bjalo ka maswika, le mesedere e tletše bjalo ka mego ya nagengtlase. Dipere tša Solomone di be di rekwa Mutsri le Silisia ke barekedi ba kgoši mme tša tlišwa Israele. Dikoloi tša ntwa tšona di be di rekwa Egepeta. Barekedi bao ba be ba rekišetša le magoši a Bahete le a Basiria dipere le dikoloi tša ntwa, ba rekiša koloi ya ntwa dipapetlana tša silibera tše makgolo a a selelago, gomme pere ba e rekiša tše makgolo le masome a mahlano. Solomone o ile a rata basadi ba šele ba bantši. Ntle le morwedi wa kgoši ya Egepeta o ile a nyala basadi ba Bahete le basadi ba go tšwa Moaba le Amone le Edomo le Sidone. A ba kgomarela le ge Morena a be a laetše Baisraele gore ba se ke ba nyalelana le ditšhaba tšeo, ka gobane ba ka kgelošetša Baisraele medimong ye mengwe. Solomone o ile a nyala barwedi ba magoši ba makgolo a a šupago, a ba a ba le metlabo ye makgolo a mararo. Ba mo aroša go Modimo, gomme ka nako ye a tšofala ba be ba šetše ba mo gogetše medimong e šele. O be a sa khunamele Morena Modimo wa gagwe ka botlalo, a sa swane le Dafida, tatagwe. O be a khunamela Astarte, modimo wo motshadi wa Basidone, le Milkomo, modimo yo a hlaswegago wa Baamone. A dira dibe pele ga Morena, gomme a se ke a mo latela ka pelo ka moka, a se swane le Dafida, tatagwe. A aga ntotoma ye go yona go khunamelwago Kemoshe, modimo yo a šišimišago wa Bamoaba, le ye go khunamelwago Milkomo, modimo yo a selekišago wa Baamone, godimo ga thaba ka bohlabela bja Jerusalema. A aga le dintotoma tša moo basadi ba gagwe ba šele ba bego ba tšhuma diorelo, gomme ba direla medimo ya bona dihlabelo. Le ge Morena Modimo wa Israele a be a iponagaditše go Solomone gabedi gomme a mo laetše gore a se ke a khunamela medimo e šele, Solomone o ile a se ke a theetša Morena, eupša a mo hlanogela. Ka gona Morena a befelelwa Solomone *** gomme a re go yena: “Ka gobane o lahlile kgwerano ya ka ka boomo gomme wa nyatša ditaelo tša ka, ruri, ke tla go amoga mmušo ka o neela yo mongwe wa bahlankedi ba gago. Fela, ka baka la Dafida, tatago, nka se dire taba yeo o sa phela, eupša ke tla e dira ge go buša morwa wa gago. Gomme nka se mo amoge mmušo ka moka; ke tla mo šadišetša kgoro e tee ka baka la Dafida, mohlanka wa ka, le ka baka la Jerusalema, motse wo ke ikgethetšego wona.” Ka gona Morena a dira Hadade, mokgomana wa Edomo, lenaba la Solomone. Mehleng ya pele, mola Dafida a fentše batho ba Edomo, Joaba, molaodi wa madira a gagwe, o ile a ya moo go yo boloka bahu. Yena le banna ba gagwe ba dula moo Edomo dikgwedi tše di selelago, gomme ka nako yeo ba bolaya banna bohle fao, *** ntle le Hadade le bahlanka ba bangwe ba tatagwe ba Baedomo, bao ba ilego ba tšhabela Egepeta. Mehleng yeo Hadade e be e sa le ngwana. Ba ile ba tloga Midiane ba ya Parane, gomme moo banna ba bangwe ba ba tlatša. Ke moka ba sepela ba yo fihla Egepeta, gomme fao ba ya go kgoši. Yena a fa Hadade naga le ngwako le dijo. Hadade a kgahla kgoši kudu mo kgoši a ilego a mo fa mosadi. Mosadi yoo e be e le moratho wa Mohumagadi Tagpenese, mosadi wa gagwe. Yena a belegela Hadade morwa, Genubate, yo a ilego a godišwa ke mohumagadi mošate, moo a bego a dula le barwa ba kgoši. Ge Hadade a ekwa a le Egepeta gore Dafida o ithobaletše, le gore Joaba, molaodi wa madira, le yena o hwile, a kgopela kgoši a re: “A ke boele nageng ya gešo.” Kgoši a mmotšiša a re: “Ke eng se o se hlokago mo go nna ge e bile o nyaka go boela ga geno?” Hadade a fetola kgoši a re: “Aowa, ga ke hloke selo; fela eno ntesa ke sepele.” Gomme a boela nageng ya gabo. Ge Hadade e le kgoši ya Edomo o be a hlaswa Baisraele, a ba tlišetša mathata. Modimo o ile a dira le Resone, morwa wa Eliada, lenaba la Solomone. Resone o be a tšo tšhaba go mong wa gagwe, Kgoši Hadade-Esere wa Tsoba, gomme a kgobokanya banna ba bangwe ya ba lekoko la bašwahledi, mme yena ya ba moetapele wa lona. Seo se diregile ka morago ga ge Dafida a bolaile Hadade-Esere le bathuši ba gagwe ba Basiria. Resone le banna ba gagwe ba ile ba tloga ba yo dula Damaskose, moo banna ba gagwe ba ilego ba mmea kgoši. E bile lenaba la Israele mehleng ya Solomone. Monna yo mongwe yo e ilego ya ba lenaba la Solomone e be e le yo mongwe wa bahlankedi ba gagwe, Jerobeamo, morwa wa Nebate, wa Tsereda kua Efraime. Mmagwe e be e le mohlologadi yo leina la gagwe e bego e le Tserua. Ditaba tša mpherefere wa gagwe šedi: Solomone o be a lekelelanya naga ka bohlabela bja Jerusalema a bile a thiba nthoba morakong wa motse wa Dafida. Jerobeamo e be e le lesogana la seroto, gomme ge Solomone a bona ka moo a šomago kudu ka gona, a mmea mohlokomedi wa mediro ka moka ya kgapeletšo nageng ya kgoro ya Manase le ya Efraime. Ka letšatši le lengwe ge Jerobeamo a etšwa Jerusalema, moprofeta Ahia wa Shilo a gahlana naye a nnoši tseleng kua nageng. Ahia a apola seaparo se sefsa se a bego a se apere, a se gagoganya diripana tše lesome le tše pedi, gomme a re go Jerobeamo: “Itšeele diripana tše lesome, ka gobane Morena Modimo wa Israele o re go wena: ‘Ke tlilo gagola bogoši diatleng tša Solomone, gomme wena ka go fa dikgoro tše lesome. Solomone o tla šala le kgoro e tee ka baka la Dafida, mohlanka wa ka, le ka baka la Jerusalema, motse wo ke ikgethetšego wona nageng ya Israele ka moka. Ke tlile go dira seo ka gobane Solomone o ntlhanogetše a khunamela medimo e šele: Astarte, modimo wo motshadi wa Basidone; Kemoshe, modimo wa Bamoaba, le Milkomo, modimo wa Baamone. Solomone ga se a dira se ke se nyakago; o dirile dibe pele ga ka, gomme ga se a phetha melao le ditaelo tša ka, ka gona a se swane le Dafida, tatagwe. Fela nka se amoge Solomone bogoši ka moka, gomme ke tla dira gore a fele a buša bophelong bja gagwe ka moka. Taba yeo ke tla e dira ka baka la Dafida, mohlanka wa ka, yo ke mo kgethilego le gona a phethilego melao le ditaelo tša ka. Ke tla amoga morwa wa Solomone bogoši gomme wena ka go fa dikgoro tše lesome, eupša morwa wa Solomone ke tla mo fa kgoro e tee, gore ka mehla ke tle ke be le lehlasetšana la Dafida, mohlanka wa ka, mo Jerusalema, motse wo ke ikgethetšego gore ke khunamelwe go wona. Jerobeamo, wena ke tla go bea kgoši ya Israele, gomme wa buša naga ka moka ye o e nyakago. Ge o ka dira tšohle tše ke go laelago tšona, wa phetha melao ya ka, gomme wa dira tše ke di nyakago ka go phetha ditaelo tša ka, wa swana le Dafida, mohlanka wa ka, ke tla ba le wena ka mehla. Ke tla go bea kgoši ya Israele gomme ka dira gore le ditlogolo tša gago di tle di buše legatong la gago, bjalo ka ge ke diretše Dafida. Ka baka la sebe sa Solomone ke tla kokobetša ditlogolo tša Dafida, fela nka se di kokobeletše sa ruri.’ ” Ka fao Solomone a leka go bolaya Jerobeamo, eupša yena a tšhabela go Kgoši Shishake wa Egepeta gomme a dula moo go fihlela Solomone a ehwa. Tše dingwe tše Solomone a di dirilego, bophelo le bohlale bja gagwe, ka moka di ngwadilwe mo go Ditaba tša Solomone. E bile kgoši ya naga ya Israele ka moka Jerusalema mengwaga ye masome a mane. A ithobalela mme a bolokwa motseng wa Dafida, gomme morwa wa gagwe, Rehabeamo, a mo hlatlama bogošing. Rehabeamo o ile a ya Shekeme, moo batho ka moka ba ka leboa la Israele ba bego ba kgobokane go tlo mmea kgoši. Ge Jerobeamo, morwa wa Nebate, yo a bego a tšhabile Kgoši Solomone mme a le Egepeta, a ekwa ditaba tše, a tloga fao a boela gae. Batho ba dikgoro tša ka leboa ba roma batseta go yo mmitša, gomme ba ya go Rehabeamo mmogo ba re go yena: “Tatago, Solomone, o be a re swere ka makgwakgwa gomme a re rwešitše merwalo ye boima. Ge o ka re fokoletša merwalo ye gomme wa re phediša ka boiketlo, re tla fela re le batho ba gago.” Yena a ba fetola a re: “Le boeng ge go fetile matšatši a mararo.” Ka gona ba tloga. Kgoši Rehabeamo a boledišana le bakgalabje ba e bego e le baeletši ba tatagwe Solomone a ba botšiša a re: “A le nkeletša gore ke arabe batho ba bjang?” Bona ba mo fetola ba re: “Ge o nyaka go ba kgoši ya setšhaba se le go se direla, o bolele le bona ka botho, gomme ka mehla ba tla go hlankela ka potego.” Eupša yena a tšeiša keletšo yeo ya bakgalabje phefo, gomme a ikela go masogana ao a gotšego nao a bjale e bego e le baeletši ba gagwe. A ba botšiša a re: “A batho ba ba nkgopelago gore ke ba fokoletše merwalo ke reng go bona?” Ba mo fetola ba re: “Sese se o swanetšego go ba botša sona: ‘Monwana wa ka wo monnyane ke wo mokoto go feta letheka la tate!’ O ba botše o re: ‘Tate o be a le rwešitše merwalo ye boima; nna ke tla e dira ye boima go feta moo. O be a le otla ka kgati; nna ke tla le otlaka ka tshelane!’ ” Ka letšatši la boraro Jerobeamo le setšhaba ka moka ba boela go Kgoši Rehabeamo, bjalo ka ge a be a ba laetše. Kgoši a nyatša keletšo yela ya bakgalabje gomme a bolela le setšhaba ka bogale, ka moo masogana a bego a mo eleditše ka gona. O ile a re: “Tate o be a le rwešitše merwalo ye boima; nna ke tla e dira ye boima go feta moo. O be a le otla ka kgati; nna ke tla le otlaka ka tshelane!” Morena o be a dirile gore go be ka mokgwa woo gore a tle a phethagatše se a bego a se boditše Jerobeamo, morwa wa Nebate, ka moprofeta Ahia wa Shilo. Lebaka ke lona leo ge kgoši a ile a hlokomologa se setšhaba se bego se se kgopetše. Ge setšhaba se bona gore kgoši ga a kwane le se ba se kgopelago, ba goa ba re: “Ga re sa iša felo ka Dafida le lapa la gagwe! Ba kile ba re direla eng? Banna ba Israele, a re yeng gae! A lapa la Dafida le itebalebele!” Ka gona batho ba Israele ba ya ga gabobona, ba lesa Rehabeamo e le kgoši ya batho ba naga ya Juda fela. Ka morago Kgoši Rehabeamo a roma Adoniramo, yo a bego a hlokometše mediro ya kgapeletšo, gore a ye go Baisraele, eupša ba mmolaya ka maswika. Ge Rehabeamo a bona seo a tshela ka tswati a namela koloi ya gagwe ya ntwa, gomme a tšhabela Jerusalema. E sa le go tloga ka yona nako yeo batho ba Mmušo wa ka Leboa wa Israele ba lwa le ba mmušo wa Dafida. Ge batho ba Israele ka moka ba ekwa gore Jerobeamo o tšo boa Egepeta, ba ile ba kgobokana, ba mmitša gomme ba mmea kgoši ya Israele. E bile fela ba kgoro ya Juda ba ba ilego ba no šala ba botegela ditlogolo tša Dafida. Ge Rehabeamo a fihla Jerusalema, o ile a rapa bahlabani ba dikete tše lekgolo le tše masome a seswai ba bogalegale kgorong ya Juda le ya Benjamene. O be a ikemišeditše go yo lwa le dikgoro tša ka leboa tša Israele gore e be kgoši ya tšona gape. Eupša Modimo a botša moprofeta Shemaya gore a botše Rehabeamo le batho ka moka ba kgoro ya Juda le ya Benjamene le ba ba šetšego gare ga bona a re: “Le se ke la hlasela bomorwarragolena, batho ba Israele. Ikeleng gae ka moka ga lena. Se se diregilego ke thato ya ka.” Ka moka ba ile ba phetha se Morena a se laetšego, ba boela gae. Kgoši Jerobeamo wa Israele o ile a tsošološa motse wa Shekeme, nageng ya dithaba ya Efraime, gomme a dula moo lebakanyana. Ka morago a tloga moo gomme a yo tsošološa motse wa Penuele. O ile a ipotša a re: “Ka moo go lego ka gona bjale, ge batho ba ka ba ka fela ba eya Jerusalema go yo direla Morena dihlabelo ka Tempeleng, ba tla botegela Kgoši Rehabeamo gape gomme nna ba mpolaya.” *** Ge a gopodišitše taba ye a dira dipowana tše pedi tša gauta, gomme a re go batho ba gagwe: “Ke kgale le bolawa ke mosepelo wa go ya Jerusalema go yo rapela. Lena batho ba Israele, še medimo ya lena ye e le ntšhitšego Egepeta!” O ile a bea powana ye nngwe kua Bethele mme ye nngwe a e bea Dane. Gomme batho ba dira seboka go yo rapela kua Bethele le kua Dane. Jerobeamo a ba a aga dintotoma tše go tšona go khunamelwago medimo ya diswantšho, gomme a kgetha baprista bathong ba e bego e se ba kgoro ya Lefi. Jerobeamo a ba a hloma letšatši la monyanya wa sedumedi ya ba la lesome le metšo ye mehlano la kgwedi ya seswai, monyanya wa go swana le wa kua Juda. A direla dipowana tšela tša gauta dihlabelo godimo ga aletare ya kua Bethele, gomme gona moo a bea baprista ba go hlankela medimo ya diswantšho dintotomeng tše a bego a di agile. Gomme ka letšatši la lesome le metšo ye mehlano la kgwedi ya seswai, letšatši le le bego le beilwe ke yena mong, a ya Bethele mme a fihla a dira sehlabelo aletareng e le go beela batho ba Israele letšatši la monyanya. Moprofeta yo mongwe yo a tšwago Juda a tla Bethele a laetšwe ke Morena, gomme a fihla gona Jerobeamo a sa eme aletareng go dira sehlabelo. A rogaka aletare ka moo a bego a laetšwe ke Morena a re: “Aletare, aletare tena, Morena o re: ‘Bona, leloko la Dafida le tla belega morwa yo a tlago bitšwa Josia. Godimo ga gago o tla bolaela baprista ba ba hlankelago medimo ya diswantšho kua dintotomeng, ba ba dirago dihlabelo godimo ga gago, mme o tla tšhumela mašapo a batho godimo ga gago.’ ” Moprofeta a tšwela pele a re: “Aletare ye e tla kgerešwa, gomme melora ye e lego godimo ga yona e tla gašanywa. Seo e tla ba sešupo sa gore Morena o boletše ka nna.” Ge Kgoši Jerobeamo a ekwa seo, a mo šupa ka monwana a re: “Swarang monna yoo!” Gatee fela letsogo la kgoši la hwa gomme a šitwa ke go le boetša morago. Aletare yela ya kgerega ka bjako gomme melora ya gašanywa fase, bjalo ka ge moprofeta a boletše ka leina la Morena. Kgoši Jerobeamo a re go moprofeta: “Hle, mphophothele go Morena Modimo wa gago o nthapelele yena, o mo kgopele gore a mphodiše letsogo!” Moprofeta a rapela Morena, gomme letsogo la kgoši la fola. Ke moo kgoši a itšego go moprofeta: “A re ye ka gae o yo ja dijo. Ke tla go putsetša se o se dirilego.” Moprofeta a mo fetola a re: “Le ge o ka nkarolela thoto ya gago ka bogare, nka se ye nago. Nka se je dijo goba ka nwa meetse felo fa. Morena o ntaetše gore ke se ke ka ja goba ka nwa selo, le gore ke se ke ka boela gae ka tsela ye ke tlilego ka yona.” Ka gona o ile a se ke a boa ka tsela ye a tlilego ka yona, eupša a tšea ka tsela ye nngwe. Mehleng yeo go be go na le moprofeta yo mongwe wa mokgalabje a dula Bethele. Barwa ba gagwe ba ile ba tla ba mmotša se moprofeta yoo wa Juda a se dirilego Bethele tšatši leo, le se a se boditšego Kgoši Jerobeamo. Moprofeta yoo a ba botšiša a re: “A o tšere ka tsela efe ge a tloga?” Ba mo laetša tsela ya gona gomme a ba botša gore ba mo saleletše pokolo ya gagwe. Ba mo saleletša yona, gomme a e namela, a wela tsela yela a šala moprofeta yola wa Juda morago, gomme a mo hwetša a dutše ka fase ga mohlare wa moeike. A mmotšiša a re: “A ke wena moprofeta wa go tšwa Juda?” Monna yola a mo fetola a re: “Ke nna.” A re go yena: “A re ye gae o yo ja le nna.” Eupša moprofeta yo wa go tšwa Juda a mo fetola a re: “Nka se boele le wena gageno goba ka ya ka ga gago. Nka se je goba ka nwa selo le wena mo, ka gobane Morena o ntaetše gore ke se ke ka ja goba ka nwa selo, le gore ke se ke ka boela gae ka tsela ye ke tlilego ka yona.” Ke moo moprofeta yoo wa mokgalabje wa Bethele a itšego go yena: “Le nna ke moprofeta bjalo ka wena, gomme ka taelo ya Morena morongwa o mpoditše gore ke go iše ga ka gomme ke go sware gabotse.” Fela moprofeta yoo wa mokgalabje o be a bolela maaka. Ka gona moprofeta wa Juda a ya ga moprofeta wa mokgalabje gomme a ja dijo naye. Ya re ba sa ja, Morena a fa moprofeta wa mokgalabje molaetša wa go ya go moprofeta wa Juda, gomme yoo a goelela a re: “Morena o re o mo nyaditše, ga se wa dira se a go laetšego sona. O boile wa ja dijo felo fa a go laetšego gore o se ke wa ja gona. Ka baka la taba ye o tla bolawa, gomme setopo sa gago se ka se bolokwe ka lebitleng la lapa leno.” Ge ba fetša go ja, moprofeta wa mokgalabje a saletša pokolo ya moprofeta wa Juda, gomme moprofeta wa Juda a tloga. Tseleng a gahlana le tau gomme ya mmolaya. Setopo sa gagwe sa rapalala moo tseleng, pokolo le tau yela di se emeleditše. Banna ba bangwe ba re ba feta moo ba se bona; ba bona le tau yeo e eme fao. Ba fetela Bethele gomme ba fihla ba bega se ba se bonego. Ge moprofeta yola wa mokgalabje a ekwa taba yeo, a re: “Yoo ke moprofeta yo a nyaditšego taelo ya Morena! Ka gona Morena o mo gafetše tau gore e mo hlasele e mmolaye, bjalo ka ge Morena a boletše.” Gomme a re go barwa ba gagwe: “Saletšang pokolo ya ka.” Ba e saletša, mme a e namela a tloga; a hwetša setopo sa moprofeta yola se rapaletše tseleng, pokolo le tau yela di sa se emeleditše. Tau e be e se ya ja setopo goba ya hlasela pokolo. Moprofeta yoo a tšea setopo sela a se nametša pokolo yeo, gomme a se bušetša Bethele gore a tle a mmoloke mme a mo ilele. A mmoloka ka lebitleng labo, gomme yena le barwa ba gagwe ba mo ilela ba re: “Joo, ngwanešo, joo!” Ka morago ga poloko moprofeta a re go barwa ba gagwe: “Ge ke hwile le mpoloke ka mo lebitleng le, gomme le mpee kgauswi le yena. Mantšu ao moprofeta yo a boletšego ka taelo ya Morena a rogaka aletare ya Bethele le mafelo ka moka a tirelo dintotomeng tšeo go tšona go bego go khunamelwa medimo ya diswantšho metseng ya Samaria, ruri a tla phethagala.” Kgoši Jerobeamo wa Israele o ile a no fela a ganeletše ditseleng tša gagwe tše mpe, gomme a no fela a sa kgetha baprista malapeng ao e bego e se a kgoro ya Lefi gore ba direle dialetareng tše a di agilego dintotomeng tšeo go tšona go khunamelwago medimo ya diswantšho. Yo mongwe le yo mongwe yo a nyakago o be a mmea moprista. Sebe se sa gagwe se ile sa uša mmušo wa gagwe, sa ba sa hlolela leloko labo go fedišwa. Ka yona nako yeo morwa wa Kgoši Jerobeamo, Abia, a babja. Jerobeamo a re go mosadi wa gagwe: “Hle, apara diaparo tša go ikgakantšha gore o se ke wa tsebja, gomme o ye Shilo, moo go dulago moprofeta Ahia yola a kilego a re ke tla ba kgoši ya Israele. O mo yele le dinkgwa tše lesome le dikuku le legapa la todi ya dinose. O tla go botša se se tlago hlagela ngwana yo.” Ka gona mosadi a ya lapeng la Ahia kua Shilo. Ahia o be a šetše a foufetše ka baka la botšofadi. Morena o be a mmoditše gore mosadi wa Jerobeamo o tseleng go tlo mmotšiša ka morwa wa gagwe yo a babjago. Gomme Morena a botša Ahia gore a reng. Mosadi wa Jerobeamo ge a fihla o be a ikgakantšhitše. Eupša ge Ahia a mo kwa a tsena ka sefero, a re: “Tsena, ke a tseba gore o mosadi wa Jerobeamo. Ke ka baka lang o ikgakantšha? Ke laetšwe go go tsebiša ditaba tše mpe. Sepela o botše Jerobeamo gore Morena Modimo wa Israele o re: ‘Ke go dirile yo mogolo setšhabeng ka go bea mmuši wa setšhaba sa ka sa Israele. Ke gagotše mmušo diatleng tša ditlogolo tša Dafida gomme ka o fa wena. Eupša ga se wa ba bjalo ka mohlanka wa ka, Dafida, yo a bego a mpotegela ka botlalo, a phetha ditaelo tša ka, gomme a dira fela tše di lokilego. O dirile dibe tše kgolokgolo go feta bao ba bušitšego pele ga gago. O ntahlile gomme wa mpefediša ka go dira medimo ya diswantšho le diswantšhobopša tša tshipi mme wa e khunamela. Ka baka la seo ke tla tliša bošula lapeng la gago, ka bolaya ditlogolo tša gago ka moka ga tšona. Ke tla swielela lapa leno ka moka bjalo ka motho a swiela boloko. Meloko yeno ye e hwelago mo motseng e tla lewa ke dimpša, gomme ba ba hwelago kua nageng ba tla lewa ke manong. Ke realo, nna, Morena.’ ” Ahia a tšwela pele a botša mosadi wa Jerobeamo a re: “Bjale boela gae. Ge o seno tsena motseng ngwana wa gago o tla hwa. Batho ba Israele ka moka ba tla mo llela, mme ba mmoloka. E tla ba yena a nnoši wa lapa la Jerobeamo yo a tlago bolokwa, ka gobane ke yena fela yo Morena Modimo wa Israele a bonego se sebotse go yena. Morena o tla bea kgoši mo Israele ye e tlago fediša lapa la Jerobeamo ka pelapela, ntle le go senya sebaka. Morena o tla otla Israele, gomme Israele e tla tekateka bjalo ka lehlakanoka moeleng. O tla tomola batho ba Israele nageng ye botse ye a e filego borakgolokhukhu ba bona, a ba šwalalanyetša ka mošola wa noka ya Yufratese, ka gobane ba mmefedišitše ka go hloma dikota tša borapedi. Morena o tla gafa Israele ka gobane Jerobeamo o dirile sebe, a diriša le batho ba Israele dibe.” Mosadi wa Jerobeamo o ile a boela Tirtsa. Ya re ge a tsena ka ngwakong, ngwana a hwa. Batho ba Israele ba mo llela gomme ba mmoloka, bjalo ka ge Morena a boletše ka mohlanka wa gagwe, moprofeta Ahia. Tše dingwe tše Jerobeamo a di dirilego, dintwa tše a di lwelego le ka moo a bušitšego ka gona, ka moka di ngwadilwe mo go Ditaba tša magoši a Israele. Jerobeamo o bušitše mengwaga ye masome a mabedi le metšo ye mebedi. A ithobalela le botatagwe, mme Nadaba, morwa wa gagwe, a mo hlatlama bogošing. Rehabeamo, morwa wa Solomone, o be a na le mengwaga ye masome a mane le motšo o tee ge e eba kgoši ya Juda, gomme a buša mengwaga ye lesome le ye e šupago Jerusalema, motse wo Morena a o kgethilego nageng ka moka ya Israele gore e be felo mo a swanetšego go khunamelwa gona. MmagoRehabeamo e be e le Naama wa Amone. Batho ba Juda ba dira dibe pele ga Morena, ba mo rumola go feta borakgolokhukhu ba bona ka dibe tše bona ba di dirilego. Ba ikagela dintotoma tše go tšona ba khunamelago medimo ya diswantšho, ba hloma le dikokwane tša maswika tša borapedi le dikota tša borapedi kua mebotong ye e phagamego, le ka fase ga mehlare ya merithi ye megolo. Le gona go be go na le digwebakathobalo tša banna mafelong a go khunamela medimo ya diswantšho nageng ya Juda. Batho ba Juda ba be ba dira makgapa ka moka a a bego a dirwa ke ditšhaba tše Morena a di lelekilego nageng yeo ge Baisraele ba goroga. Ka ngwaga wa bohlano wa pušo ya Rehabeamo, Kgoši Shishake wa Egepeta a hlasela Jerusalema. A tšea matlotlo ka moka a ka Tempeleng le a mošate; a tšea dilo ka moka, gammogo le dikotse tša gauta tšela Solomone a bego a di dirile. Legatong la tšona, Kgoši Rehabeamo a dira dikotse tša mphiri gomme a di nea balaodi ba baleti ba masoro a mošate. Nako ye nngwe le ye nngwe ge kgoši a eya Tempeleng, baleti ba be ba tšea dikotse tšeo gomme ba di boetša ka phapošing ya baleti. Tše dingwe tše Kgoši Rehabeamo a di dirilego di ngwadilwe mo go Ditaba tša magoši a Juda. Mehleng yeo ka moka Rehabeamo le Jerobeamo ba be ba fela ba elwa seng sa bona. Rehabeamo a ithobalela le botatagwe, gomme a bolokwa mabitleng a bona motseng wa Dafida, mme morwa wa gagwe, Abia, a mo hlatlama bogošing. Ka ngwaga wa lesome le metšo ye seswai wa pušo ya Kgoši Jerobeamo wa Israele, Abia e ile ya ba kgoši ya Juda, gomme a buša mengwaga ye meraro Jerusalema. Mmagwe e be e le Maaka, morwedi wa Absalomo. A dira tšona dibe tšela tatagwe a bego a di dira, gomme a se ke a botegela Morena Modimo wa gagwe ka botlalo, bjalo ka rakgolokhukhu wa gagwe, Dafida. Eupša ka baka la Dafida, Morena Modimo wa Abia a mo fa lebone Jerusalema, e lego morwa gore a mo hlatlame, le gore a tiiše motse wa Jerusalema. Morena o ile a dira seo ka gobane Dafida o be a dirile tše di kgahlago yena Morena. Bophelong bja gagwe ka moka o be a se a ka a tshela tše Morena a bego a mo laetše tšona, ge e se fela tabeng ya Uria, Mohete. Abia le Jerobeamo ba be ba fela ba elwa nakong ka moka ya pušo ya Abia. Tše dingwe tše Abia a di dirilego di ngwadilwe mo go Ditaba tša magoši a Juda. Abia a ithobalela le botatagwe, gomme a bolokwa motseng wa Dafida, mme Asa, morwa wa gagwe, a mo hlatlama bogošing. Ngwageng wa masome a mabedi wa pušo ya Jerobeamo wa Israele, Asa e ile ya ba kgoši ya Juda, gomme a buša mengwaga ye masome a mane le motšo o tee Jerusalema. Makgolwagwe e be e le Maaka, morwedi wa Absalomo. Asa a dira tše di kgahlago Morena, a etša Dafida, rakgolokhukhu wa gagwe. A raka digwebakathobalo ka moka tša banna le tša basadi nageng ya Juda mafelong a tirelo a medimo ya diswantšho, a tloša le medingwana ya diswantšho ye bao ba bušitšego pele ga gagwe ba bego ba e dirile. O ile a amoga Maaka, makgolwagwe, maemo a bohumagadi, ka gobane o be a betlile seswantšho se se šišimišago sa Ashera, modimo wo motshadi. Asa a rema seswantšho seo gomme a se tšhuma moeding wa Kidrone. Le ge Asa a ile a se ke a phušola dintotoma tšeo go tšona go bego go khunamelwa medimo ya diswantšho, o ile a botegela Morena bophelong bja gagwe ka moka. Tšohle tše tatagwe a bego a di abetše Morena o ile a di bea ka Tempeleng, gotee le dilo tša gauta le tša silibera tše yena mong a bego a di file Morena. Kgoši Asa wa Juda le Kgoši Basha wa Israele ba be ba fela ba elwa nakong ka moka ya pušo ya bona. Basha o ile a hlasela Juda gomme a thoma go tiiša Rama gore a tle a thibele batho go ya Juda le go tšwa gona. Ka gona Kgoši Asa a tšea silibera yohle gotee le gauta ka moka ye e bego e šetše ka ngwakong wa polokelo wa Tempele le wa mošate, a e romela ka bahlankedi ba gagwe Damaskose go Kgoši Benhadade wa Siria, morwa wa Tabrimone, setlogolo sa Hesione. A re ba mmotše ba re: “A re tsošološe kwano yela ya botatagorena. Silibera ye le gauta ye ke mpho ya gago. Bjale lesa go kwana le Kgoši Basha wa Israele gore a tle a gapeletšege go ntšha madira a gagwe nageng ya ka.” Kgoši Benhadade a dumela se Asa a se kgopelago, gomme a romela balaodi ba gagwe ba madira le madira a bona go yo hlasela metse ya Israele. Ba thopa Iyone, Dane, Abele-Bethe-Maaka, tikologo yohle ya kgauswi le letsha la Genesarete, le naga ka moka ya Naftali. Ge kgoši Basha a ekwa se se diregilego, a lesa go tiiša Rama gomme a boela Tirtsa. Ke moka Kgoši Asa a laela gore yo mongwe le yo mongwe nageng ka moka ya Juda a thothe maswika le dikota tše Basha a bego a tiiša Rama ka tšona. Asa a tiiša Mitsepa, a tiiša le Geba, motse wo o lego nageng ya Benjamene, ka dilo tšeo. Tše dingwe tše Kgoši Asa a di dirilego, ditiro tša bogale bja gagwe le metse ye a e tiišitšego, ka moka di ngwadilwe mo go Ditaba tša magoši a Juda. Fela botšofading bja gagwe o ile a swarwa ke bolwetši bja maoto. Asa a ithobalela le botatagwe, gomme a bolokwa mabitleng a bona motseng wa Dafida, mme Joshafate, morwa wa gagwe, a mo hlatlama bogošing. Ngwageng wa bobedi wa pušo ya Kgoši Asa wa Juda, Nadaba, morwa wa Kgoši Jerobeamo, e ile ya ba kgoši ya Israele, gomme a buša mengwaga ye mebedi. A dira dibe pele ga Morena go no swana le tatagwe, a diriša le batho ba Israele dibe. Basha, morwa wa Ahia, wa kgoro ya Isakara, a logela Nadaba maanomabe mme a mmolaya ge Nadaba le madira a gagwe ba dikaneditše motse wa Gibetone kua Filistia. Taba yeo e diregile ngwageng wa boraro wa pušo ya Kgoši Asa wa Juda. Ka gona Basha a hlatlama Nadaba bogošing bja Israele. A napa a thoma go bolaya batho ka moka ba lapa la Jerobeamo. Ba lapa ka moka la Jerobeamo ba bolawa go ya ka seo Morena a se boletšego ka mohlanka wa gagwe, moporofeta Ahia wa Shilo; a se ke a šadiša le o tee. Seo se ile sa direga ka gobane Jerobeamo a be a befedišitše Morena Modimo wa Israele ka dibe tše a ilego a di dira, le tše a ilego a di diriša batho ba Israele. Tše dingwe tše Nadaba a di dirilego di ngwadilwe mo go Ditaba tša magoši a Israele. Kgoši Asa wa Juda le Kgoši Basha wa Israele ba be ba fela ba elwa nakong ka moka ya ge ba buša. Ngwageng wa boraro wa pušo ya Kgoši Asa wa Juda, Basha, morwa wa Ahia, e ile ya ba kgoši ya Israele ka moka, gomme a buša a le Tirtsa mengwaga ye masome a mabedi le metšo ye mene. A dira dibe pele ga Morena go no swana le Jerobeamo, a diriša le batho ba Israele dibe. Morena a bolela le moprofeta Jehu, morwa wa Hanani, a re a botše Basha a re: “O be o se selo, eupša ke go beile moetapele wa batho ba ka ba Israele. Gomme bjale o dirile bjalo ka Jerobeamo, wa diriša le batho ba ka dibe. Dibe tša bona di mpefedišitše, ka gona ke tla go swielela le ba lapa la gago bjalo ka ge ke swieletše Jerobeamo. Ba lapa la gago ba ba hwelago mo motseng ba tla lewa ke dimpša, mme ba ba hwelago kua nageng ba tla lewa ke manong.” Tše dingwe tše Basha a di dirilego le ditiro tša bogale bja gagwe ka moka di ngwadilwe mo go Ditaba tša magoši a Israele. Basha a ithobalela le botatagwe, gomme a bolokwa Tirtsa, mme Ela, morwa wa gagwe, a mo hlatlama bogošing. Molaetša wo wa Morena mabapi le Basha le lapa la gagwe o ile wa tlišwa ke moprofeta Jehu ka baka la dibe tše Basha a bego a di dirile pele ga Morena. O ile a befediša Morena e sego fela ka tše mpe tše a di dirilego go swana le Kgoši Jerobeamo, eupša le ka baka la gore o ile a bolaya ba lapa la Jerobeamo ka moka. Ngwageng wa masome a mabedi a metšo ye e selelago wa pušo ya Asa wa Juda, Ela, morwa wa Basha, ya ba kgoši ya Israele, gomme a buša a le Tirtsa mengwaga ye mebedi. Simri, mohlankedi yo mongwe wa gagwe yo a bego a laola sekgao se sengwe sa dikoloi tša ntwa, a loga maanomabe a go bolaya Kgoši Ela. Ka letšatši le lengwe Ela o be a enwa a šetše a tagwa kua Tirtsa, lapeng la Artsa, yo a bego a hlokometše mošate. Simri a tsena ka ngwakong woo, a mmolaya, mme a mo hlatlama bogošing. Taba ye e diregile ngwageng wa masome a mabedi a metšo ye e šupago wa pušo ya Kgoši Asa wa Juda. Ge Simri a seno dula setulong sa bogoši o ile a bolaya batho ka moka ba lapa la Basha. Moloko wo mongwe le wo mongwe wa monna le bao ba bego ba ka lefeletša ba lapa la gagwe le bagwera ba bona ba bolawa. Ka gona Simri a bolaya ba lapa ka moka la Basha go ya ka se Morena a se boletšego ka moprofeta Jehu a lwantšha Basha. Ka baka la go khunamela medingwana ya diswantšho ga bona le ka baka la go diriša batho ba Israele dibe, Basha le morwa wa gagwe, Ela, ba be ba befedišitše Morena Modimo wa Israele. Tše dingwe tše Ela a di dirilego di ngwadilwe mo go Ditaba tša magoši a Israele. Ngwageng wa masome a mabedi a metšo ye e šupago wa pušo ya Kgoši Asa wa Juda, Simri a buša Israele a le Tirtsa matšatši a a šupago. Madira a Israele a be a dikaneditše motse wa Gibetone kua Filistia, gomme ge ba ekwa gore Simri o logetše kgoši maanomabe mme o mmolaile, ba bea Omri, molaodi wa bona, kgoši ya batho ba Israele ka lona letšatši leo kua mešašeng. Omri le madira a gagwe ba tloga Gibetone mme ba yo dikanetša Tirtsa. Ge Simri a bona gore motse o wele, a tsena ka sebong sa ka gare sa mošate, a tšhuma ngwako wa mošate a le ka gare ga wona, mme a bolawa ke mollo woo. Taba yeo e hlotšwe ke dibe tša gagwe. A dira tše mpe pele ga Morena, a diriša le batho ba Israele dibe go no swana le Jerobeamo. Tše dingwe tše Simri a di dirilego, gotee le maanomabe a gagwe, di ngwadilwe mo go Ditaba tša magoši a Israele. Batho ba Israele ba be ba tšwile diripa tše pedi: Ba bangwe ba be ba nyaka go bea Tibni, morwa wa Ginate, kgoši, ba bangwe ba nyaka Omri. Mafelelong bao ba nyakago Omri ba oketšega. Tibni a hwa gomme Omri ya ba kgoši. Ka gona ngwageng wa masome a mararo a motšo o tee wa pušo ya Kgoši Asa wa Juda, Omri ya ba kgoši ya Israele, gomme a buša mengwaga ye lesome le ye mebedi. A buša a le Tirtsa mengwaga ye e selelago, gomme ka morago a reka mmoto wa Samaria go monna yo a bitšwago Shemere ka dipapetlana tše dikete tše di selelago tša silibera. Omri a aga motse moo, gomme a o rea leina la Samaria, a o reela Shemere, yo e bego e le mong wa mmoto woo pele. Omri o ile a dira dibe pele ga Morena go feta bohle ba ba bušitšego pele ga gagwe. Go no swana le Jerobeamo o ile a befediša Morena Modimo wa Israele ka dibe tša gagwe, le ka go diriša batho dibe ka go khunamela medingwana ya diswantšho ga bona. Tše dingwe tše Omri a di dirilego le ditiro tša bogale bja gagwe di ngwadilwe mo go Ditaba tša magoši a Israele. Omri a ithobalela le botatagwe, mme a bolokwa Samaria, gomme Ahaba, morwagwe, a mo hlatlama bogošing. Ngwageng wa masome a mararo a metšo ye seswai wa pušo ya Kgoši Asa wa Juda, Ahaba, morwa wa Omri, ya ba kgoši ya Israele, gomme a buša mengwaga ye masome a mabedi le metšo ye mebedi a le Samaria. A dira dibe pele ga Morena go feta bohle ba ba bušitšego pele ga gagwe. A dira dibe bjalo ka Kgoši Jerobeamo gomme yena a fetelela mme a nyala Isebele, morwedi wa Kgoši Etbaale wa Sidone, gomme a khunamela Baale a mo hlankela. A agela Baale tempele kua Samaria gomme a mo direla aletare, a e bea ka moo tempeleng. A hloma le kota ya borapedi. A dira dilo tše ntši a befediša Morena Modimo wa Israele go feta magoši ka moka a Israele ao a bušitšego pele ga gagwe. Mehleng ya ge a buša, Hiele wa Bethele o ile a tsošološa Jeriko. Bjalo ka ge Morena a be a boletše ka Joshua, morwa wa Nunu, Hiele a hwelwa ke morwa wa leitšibolo, Abiramo, ge a bea motheo wa morako wa Jeriko, a ba a hwelwa ke morwagwe wa mafelelo, Segube, ge a aga dikgoro tša motse. Moprofeta yo a bitšwago Eliya wa Tishbe kua Gileade o ile a re go Kgoši Ahaba: “Ke ena ka Morena, Modimo yo a phelago wa Israele, yo ke mo hlankelago, gore mo mengwageng ye go ka se be le phoka goba pula ge e se ge di laetšwe ke nna.” Ke moo Morena a itšego go Eliya: “Tloga felo fa o ye bohlabela mme o utame kgauswi le nokana ya Kerite, ka bohlabela bja Jordane. O nwe meetse nokaneng yeo, gomme ke laetše magokobu gore a go tlišetše dijo fao.” Eliya a phetha taelo yeo ya Morena gomme a ya a dula nokaneng ya Kerite. A nwa meetse nokaneng yeo, gomme magokobu a mo tlišetša senkgwa le nama mosong wo mongwe le wo mongwe le mantšiboeng a mangwe le a mangwe. Ka morago ga nako nokana yela ya pšha ka baka la go hlokega ga pula. Ke moka Morena a re go Eliya: “Bjale yaa motseng wa Tsarepate kgauswi le Sidone gomme o dule gona. Ke laetše mohlologadi yo mongwe yo a dulago gona gore a go fe dijo.” Ka gona Eliya a ya Tsarepate, gomme ge a fihla kgorong ya motse, a bona mohlologadi a topelela dikgonyana. A re go yena: “Hle, sepela o yo nkgela meetse ka segwana.” Gomme ge a eya go a ga, Eliya a mo goeletša a re: “Hle, o nape o ntlele le lerathana la senkgwa!” Mohlologadi a mo fetola a re: “Ke ena ka Morena Modimo wa gago yo a phelago gore ga ke na le senkgwa le se sennyane. Selo se ke nago le sona ke fela legoswana la butswana ka serotwaneng, le lerothi la makhura a mohlware ka moetaneng. Ke tlile mo gore ke tle ke topelele dikgonyana ke di iše ka gae, gomme ke yo bo apeela nna le morwa wa ka. Re tla re go ja dijonyana tšeo ya ba moka, ra ikhwela ka tlala.” Eliya a re go yena: “O se ke wa tshwenyega. Sepela o yo apea dijo tšeo tša gago. Eupša pele o nkapeele senkgwana ka tše o nago natšo, o ntlišetše sona, gomme ka morago o ikapeele le morwago tše di šetšego. Gobane Morena Modimo wa Israele o re: ‘Serotwana sa gago se ka se hloke bupi, le moetana wa gago o ka se fele makhura pele ga ge letšatši leo nna, Morena, ke nešago pula ka lona le fihla.’ ” Mohlologadi a ya a dira ka moo Eliya a mmoditšego ka gona, gomme yena le morwagwe le Eliya ba ba le dijo tše di lekanego letšatši ka letšatši nako ye telele. Bjalo ka ge Morena a boletše ka Eliya, serotwana se ile sa se ke sa hloka bupi, le moetana wa se fele makhura. Ka morago ga lebaka mosadi yoo wa mohlologadi, yena monglapa, a babjetšwa ke morwa yola; bolwetši bja befa go ya pele, a ba a hwa. Mohlologadi a re go Eliya: “Monna wa Modimo, bona se o ntirile sona! A o tlile mo gore o gopotše Modimo dibe tša ka mme o hlolele ngwanake lehu?” Eliya a re: “Nneele mošemanyana yo.” A mo tšea difarong tša mmagwe, a mo kuka a rotogela le yena ka phapošing ya ka godimo ye a bego a dula ka go yona, mme a mo kwaetša malaong a gagwe. Ke moka a rapela ka go hlaboša lentšu a re: “Morena Modimo wa ka, ke ka baka lang o dirile mohlologadi yo taba ye šoro ka mokgwa wo? E bile yo botho go nna le ge ke le motho o šele. Bjale o ka napa wa bolaya morwa wa gagwe?” Ke moo Eliya a patlamego gararo godimo ga mošemanyana yola mme a rapela a re: “Morena Modimo wa ka, dira gore ngwana yo a boele a phele!” Morena a kwa thapelo ya Eliya; ngwana a thoma go buša moya gape mme a phela. Eliya a tšea mošemane a theogela le yena ka mola mmagwe a bego a le ka gona a mo neela yena, a re: “Bona, morwago o a phela!” Mmagwe a mo fetola a re: “Bjale ke a tseba gore o monna wa Modimo, le gore se Morena a se bolelago ka wena ke therešo.” Ka morago ga lebaka, ngwageng wa boraro wa komelelo, Morena a re go Eliya: “Sepela o iponatše go Kgoši Ahaba, gomme ke tla neša pula.” Ka gona Eliya a tloga. Tlala nageng ya Samaria e be e le ye kgolo kudu, ka gona Ahaba a bitša Obadia, yo a bego a hlokometše mošate. Obadia o be a botegela Morena kudu, gomme ge Isebele a bolaya baprofeta ba Morena, Obadia o ile a tšea ba lekgolo ba bona a ba uta ka maweng ka dihlopha tše pedi tša ba masome a mahlano, gomme a fela a ba fa dijo le meetse. Ahaba a re go Obadia: “A re sepele le naga re ye methopong ka moka le dinokeng ka moka. Mohlomongwe re ka hweletša dipere le dimeila bjang bja go di phediša, gore re se gapeletšego go bolaya diruiwa tša rena tše dingwe.” Ba arolelana naga, ba kwana mo mongwe le mongwe a swanetšego go yo hlola gona. Ahaba a leba thokong ye nngwe, Obadia le yena a leba thokong ye nngwe. Ge Obadia a le tseleng, ka bjako a gahlana le Eliya. A mo tseba, a itahlela fase ka sefahlego mme a mmotšiša a re: “Eliya, mong wa ka, a ruri ke wena?” Eliya a mo fetola a re: “Ee, ke nna. Sepela o yo botša kgoši, mong wa gago, gore ke mo.” Obadia a mo fetola a re: “Ke dirile eng ge o nkgafela diatleng tša Kgoši Ahaba gore a mpolaye? Ke ena ka Modimo yo a phelago, yena Modimo wa gago, gore ga go naga yeo kgoši a sego a ka a roma batseta go yo go nyaka go yona. Ge mmuši wa naga yeo a bega gore ga o gona nageng ya gagwe, mmuši yoo o be a enišwa le setšhaba sa gagwe gore ka kgonthe ga wa hwetšwa fao. Gomme bjale o nyaka gore ke ye ke mmotše gore o gona mo? Go tla direga eng ge nka re ge ke seno tloga mo moya wa Morena wa go iša lefelong le lengwe le le sa tsebjego? Gomme ge ke botša Ahaba gore o mo eupša a se ke a go hwetša, o tla mpolaya. Gopola gore ke botegetše Morena go tloga bofseng bja ka. A ga se wa kwa gore mola Isebele a bolaya baprofeta ba Morena ke ile ka uta ba lekgolo ba bona ka maweng ka dihlopha tše pedi tša ba masome a a fetšago seatla, ka ba fa dijo le meetse? Ka gona o ka napa wa ntaela gore ke yo botša kgoši gore o mo? O tla mpolaya!” Eliya a mo fetola a re: “Ka Morena Ramaatlaohle yo ke mo hlankelago, ruri ke tla iponatša go kgoši lehono.” Ka gona Obadia a ya go Kgoši Ahaba a fihla a mmotša, gomme Ahaba a tloga a yo gahlanetša Eliya. Ge Ahaba a mmona a re: “Kganthe ke wena, moferekanyi wa Israele tena!” Eliya a mo fetola a re: “Moferekanyi ga se nna – ke wena le lapa la tatago. Le tlogetše ditaelo tša Morena mme la khunamela medimo ya diswantšho ya Baale. Bjale laela batho ba Israele ka moka gore ba tle ba kopane le nna kua thabeng ya Karmele. Le baprofeta ba Baale ba makgolo a mane le masome a mahlano, le ba Ashera, modimo wo motshadi, ba makgolo a mane ba ba hlokometšwego ke Mohumagadi Isebele le bona ba tle.” Ka gona Ahaba a bitša Baisraele ka moka le baprofeta ba Baale gore ba tle ba kopane thabeng ya Karmele. Eliya a batamela batho a re: “Le tla lesa neng go ba diphiri tša mekokamebedi? Ge Morena e le Modimo, mo khunameleng; eupša ge Baale e le Modimo, gona khunamelang yena!” Fela batho ba se ke ba re selo. Ke moo Eliya a itšego: “Ke nna moprofeta ke nnoši wa Morena yo ke šetšego, eupša go na le baprofeta ba Baale ba makgolo a mane le masome a mahlano. Tlišang dipoo tše pedi; a baprofeta ba Baale ba kgethe e tee, ba e bolaye, ba e phakologanye, gomme ba e bee godimo ga dikgong, eupša ba se ke ba gotetša mollo. Le nna ke tla dira ka wona mokgwa woo ka poo yela ye nngwe. Ka morago baprofeta ba Baale ba rapele modimo wa bona, mme nna ke tla rapela Morena, gomme yo a arabago ka go romela mollo, ke yena Modimo.” Batho ba goa ba re: “Go lokile!” Ke gona Eliya a itšego go baprofeta ba Baale: “Ka ge le le ba bantši, ikgetheleng poo, go thome lena go hlaba. Le rapeleng modimo wa lena, eupša le se ke la gotetša dikgong.” Ba tšea poo yela ba ikgethetšego yona, ba e dira ka mo go kwanwego ka gona, gomme ba rapela Baale go fihlela mosegare wo mogolo. Ba goa ba re: “Re arabe, Baale!” Gomme ba fela ba bina ba dikologa aletare ye ba e agilego. Fela gwa se be le karabo le ge e le modungwana wo o tšwago go yena. Mosegare wo mogolo Eliya a thoma go ba gegea a re: “Goeletšang kudu ka gobane ke modimo! Mohlomongwe o sa ile le menagano goba o sa ile kgakala, mo gongwe o sa ile maeto! Goba mohlomongwe o robetše mme go nyakega gore le mo tsoše!” Ka gona baprofeta bao ba rapela ba hlaboša mantšu kudu, ba ba ba itshega ka ditšhoša le ka marumo go ya ka tlwaelo ya tumelo ya bona, go fihlela ba ela madi. Ge letšatši le tshela mokokotlo wa kgomo ba thoma go fafatla ba tladitše mašata go fihlela mathapama ka nako ya sehlabelo sa mantšiboa, fela gwa se be le karabo le ge e le modungwana wo o kwalago, gwa se direge selo. Ke moo Eliya a itšego go batho: “Mpatameleng!” Gomme ka moka ba mmokanela. A thoma go aga aletare ya Morena ye e bego e phušotšwe. A tšea matlapa a lesome le a mabedi, go ya ka dikgoro tše lesome le tše pedi tše di reetšwego barwa ba Jakobo, monna yola Morena a itšego o tla bitšwa Israele. Ka matlapa ao a tsošološa aletare ya tirelo ya Morena. A epa molete go e dikologa, ya ba molete wo o ka tšhelwago dilitara tše lesome le tše tlhano tša meetse. Ka morago a bea dikgong aletareng, a phakologanya poo gomme a e bea godimo ga dikgong tšeo. A re: “Tlatšang meeta ye mene ka meetse gomme le a tšheleng godimo ga sehlabelo le godimo ga dikgong.” Ba dira bjalo, gomme a re: “Tšhelang gape!” Mme ba dira ka moo a bolelago. A re: “A tšheleng la boraro” – gomme ba dira bjalo. Meetse a elela ka mathoko a aletare gomme a tlala molete wola. Ka nako ya kabelo ya bupi ya mantšiboa moprofeta Eliya a ya aletareng gomme a rapela a re: “Hle, Morena, Modimo wa Abrahama le Isaka le Jakobo, a go tsebje lehono gore wena o Modimo wa Israele, le gore nna ke mohlanka wa gago, mme tše ka moka ke di dirile ka taelo ya gago. Nkarabe, Morena, nkarabe, gore batho ba ba tle ba tsebe gore wena, Morena, o Modimo, le gore o ba boetša go wena.” Morena a theoša mollo gomme wa tšhuma sehlabelo le dikgong le matlapa le mobu, mme wa latswalatswetša le meetse ale a ka moleteng. Ge batho ba bona seo ba itahlela fase ka difahlego, ba goa ba re: “Morena ke yena Modimo! Morena ke yena Modimo!” Eliya a ba laela a re: “Swarang baprofeta ba Baale! Le se ke la lesa le o tee wa bona a tšhaba!” Batho ba ba swara ka moka, gomme Eliya a ba eta pele ba theogela nokeng ya Kishone mme ba fihla ba ba bolaya. Ke moo Eliya a itšego go Kgoši Ahaba: “Bjale sepela o yo ja. Ke kwa modumo wa pula.” Ya re Ahaba a sa ile go ja, Eliya a namelela godimodimo ga thaba ya Karmele moo a ilego a kotama, a tsenya hlogo gare ga matolo. A re go mohlanka wa gagwe: “Sepela o yo lebelela ka thoko ya lewatle.” Mohlanka a ya a ba a boa mme a re: “Ga se ka bona selo.” Eliya o ile a mo roma gašupa gore a ye a lebelele. Ka lekga la bošupa a boa a re: “Ke bone lerunyana le lennyane le le sa fetego seatla sa motho le rotoga lewatleng.” Eliya a laela mohlanka wa gagwe a re: “Yaa go Kgoši Ahaba o mmotše gore a namele koloi ya gagwe ya ntwa mme a boele gae pele ga ge pula e mo thibela.” Ya re ba sa bolela legodimo la pipša ke maru a maso, phefo ya thoma go tšutla, gomme pula ye kgolo ya na. Ahaba a namela koloi ya gagwe mme a wela tsela ya go boela morago Jesriele. Eliya a tlelwa ke maatla a Morena; a tlema diaparo tša gagwe lethekeng gomme a kitima pele ga Ahaba leeto ka moka la go ya Jesriele. Kgoši Ahaba a botša mosadi wa gagwe, Isebele, tšohle tše Eliya a di dirilego, le ka moo a bolailego baprofeta ka moka ba Baale ka tšhoša. Isebele a romela molaetša go Eliya a re: “A medimo e mpolaye thoo ge ka nako ye ka moswane nka se go dire sona sela o se dirilego baprofeta.” Eliya a boifa mme a tšhaba, gore a se ke a tla a bolawa; a tšea mohlanka wa gagwe mme a ya Beresheba kua Juda. A tlogela mohlanka yoo moo, a tsena lešokeng mme a sepela letšatši ka moka. A fihla mohlašaneng gomme a dula fase moriting wa wona mme a duma ge a ka hwa. A rapela a re: “Ga ke sa kgona, Morena. Tšea moya wa ka; ga ke phale botate ka selo.” A rapalala ka moo fase ga mohlašana, gomme a swarwa ke boroko. Ka bjako morongwa a mo kgwatha a re: “Tsoga o je.” Eliya a lebelela ka gohle, gomme a bona senkgwa se se bešitšwego maswikeng a a tšhumilwego ka mollo, le legapana la meetse kgauswi le hlogo ya gagwe. A ja, a nwa, mme a robala gape. Morongwa wa Morena a boa mme a mo tsoša la bobedi a re: “Tsoga o je, gore leeto le se tlo go palela.” Eliya a tsoga, a ja, a nwa, gomme dijo tšeo tša mo fa maatla a a lekanego go sepela matšatši a masome a mane go ya Sinai, thabeng ya Modimo. Moo a fihla a tsena ka leweng gore a lale a robetše ka gona. Ka bjako Morena a mmotšiša a re: “Eliya, a o dira eng mo?” Eliya a mo fetola a re: “Morena Modimo Ramaatlaohle, ke hlanketše wena ka mehla, wena o nnoši. Batho ba Israele bona ba lahlile kgwerano ya bona le wena; ba phušotše dialetare tša gago, le gona ba bolaile baprofeta ba gago ka moka. Ke nna ke nnoši yo ke šetšego, mme le nna ba leka go mpolaya!” Morena a re go yena: “Tšwaa mme o eme pele ga ka godimo ga thaba.” Morena a feta a etilwe pele ke ledimo le legolo le le bego le pharola dithaba, le pšhatlaganya marako, eupša Morena o be a se moo phefong yeo. Ledimo le ile la se hlwe le tšutla, gomme ka morago gwa ba le tšhišinyego ya lefase, eupša Morena o be a se moo tšhišinyegong yeo. Ka morago ga tšhišinyego gwa ba le mollo, eupša Morena o be a se moo mollong woo. Gomme ka morago ga mollo gwa kwala lentšu la Morena a bolelela fase mola go ile tuu. Ge Eliya a ekwa lentšu leo, a ipipa sefahlego ka seaparo sa gagwe gomme a tšwa a ema mojakong wa lewa. Lentšu la re go yena: “Eliya, a o dira eng mo?” A fetola a re: “Morena Modimo Ramaatlaohle, ke hlanketše wena ka mehla, wena o nnoši. Batho ba Israele bona ba lahlile kgwerano ya bona le wena; ba phušotše dialetare tša gago, le gona ba bolaile baprofeta ba gago ka moka. Ke nna ke nnoši yo ke šetšego, mme le nna ba leka go mpolaya!” Morena a re: “Boela lešokeng kgauswi le Damaskose, ka morago o tsene motseng gomme o tlotše Hasaele e be kgoši ya Siria; o tlotše le Jehu, morwa wa Nimshi, e be kgoši ya Israele, o be o tlotše le Elisha, morwa wa Shafate, wa Abele-Mehola, gore a go hlatlame e be moprofeta. Yo a ka phologago mme a se bolawe ke Hasaele o tla bolawa ke Jehu, gomme yo a phologago go Jehu o tla bolawa ke Elisha. Le ge go le bjalo ke tla šadiša batho ba dikete tše di šupago mo Israele, bohle ba ba mpotegelago mme ba sego ba obamela Baale goba ba atla seswantšhobopša sa gagwe.” Eliya o ile a tloga gomme a hwetša Elisha a lema ka sepane sa dipholo; go be go na le dipane tše lesome le se tee pele ga gagwe, mme yena a lema ka sa mafelelo. Eliya a apola seaparo sa gagwe mme a se apeša Elisha. Ke moo Elisha a tlogetšego dipholo tša gagwe, a kitima ka morago ga Eliya, a re: “A ke yo laela tate le mme gomme ka morago ke tla sepela nago.” Eliya a mo fetola a re: “Go lokile, boela morago. Ga ke go thibele.” Ke gona Elisha a boetšego sepaneng sa gagwe sa dipholo, a di hlaba, gomme a apea nama ya tšona, mollo a o gotša ka dilo tša go lema. A fa magagabo nama yela, gomme ba e ja. Ka morago a tloga a latela Eliya ya ba mothuši wa gagwe. Kgoši Benhadade wa Siria o ile a rapa madira a gagwe ka moka, gomme a kwana le babuši ba bangwe ba masome a mararo a metšo ye mebedi. A rotogela motseng wa Samaria, a o dikanetša a o hlasela. A roma batseta ka motseng go Kgoši Ahaba wa Israele gore ba mmotše ba re: “Kgoši Benhadade o nyaka gore o mo neele silibera le gauta ya gago, basadi ba gago ba ba botse le bana ba gago ba ba kaonekaone.” Ahaba a ba fetola a re: “Botšang mong wa ka, Kgoši Benhadade, gore ke a dumela; a ka ntšea le tšohle tše e lego tša ka.” Ka morago batseta bale ba boelela go Ahaba le molaetša wo mongwe wo o tšwago go Benhadade wa go re: “Ke go boditše gore o nneele silibera le gauta, le basadi le bana ba gago. Bjale, ke tla romela banna ba ka go tlo putuka lapa la gago le malapa a bakgomana ba gago gore ba tšee se sengwe le se sengwe se ba bonago se na le mohola. Ba tla ba moo ka nako tšona tše ka moswane.” Kgoši Ahaba a bitša baetapele ka moka ba naga mme a re: “Le a bona gore monna yo o nyaka go re hula. O nthometše molaetša wa gore o nyaka basadi ba ka le bana, le silibera ya ka le gauta, gomme ka dumela.” Baetapele le batho ba mo fetola ba re: “O se ke wa theetša se a se bolelago; o se ke wa ineela.” Ka gona Ahaba a fetola batseta ba Benhadade a re: “Botšang kgoši, mong wa ka, gore ke dumetše taelo ya gagwe ya pele, eupša ya bobedi yona e tla mpalela.” Batseta ba tloga mme ba boa le molaetša wo mongwe wo o tšwago go Benhadade wa go re: “Ke tla tliša banna ba ba bantši moo e lego gore ba tla thuba motse wo wa gago, mme ya re le ge ba thotha thogorogo ya wona ya se ba lekane. A medimo e mpolaye thoo ge nka se dire bjalo!” Kgoši Ahaba a ba fetola a re: “Botšang Kgoši Benhadade gore mohlabani wa mmakgonthe o itheta ge a boa ntweng, e sego a sa ya.” Benhadade a botšwa phetolo yeo ya Ahaba ge babuši bale ba bangwe ba bego ba ema le yena ba enwa ka mešašeng ya bona. A laela banna ba gagwe gore ba eme gabotse ba itokišetše go hlasela motse. Ka yona nako yeo moprofeta yo mongwe a ya go Kgoši Ahaba a re go yena: “Morena o re: ‘Ga ke re o a a bona madira ao a mantšintši ao a hlahlamologago? Ke tla a gafela diatleng tša gago lehono, gomme o tla tseba gore ke nna Morena.’ ” Ahaba a mmotšiša a re: “A re tla ba fenya ka bomang?” Moprofeta a mo fetola a re: “Morena o re ka bahlabani ba masogana ba ba laolwago ke babuši ba dilete.” Kgoši a mmotšiša a re: “A ke mang yo a swanetšego go hlasela pele?” Moprofeta a mo fetola a re: “Ke wena.” Ka gona kgoši a rapa bahlabani ba masogana ba ba bego ba laolwa ke babuši ba dilete, ya ba banna ba makgolo a mabedi le masome a mararo le ba babedi ka moka. Ya ba gona a rapago madira a Baisraele, ya ba banna ba dikete tše šupago. Ya re mosegare wo mogolo, mola Benhadade le babuši bale ba emago le yena ba masome a mararo le ba babedi ba sa nwa ba tagilwe ka mešašeng ya bona, ba thoma go hlasela. Bahlabani ba masogana ba tšwa pele. Dihlodi tše di bego di romilwe ke Benhadade tša mmegela gore bahlabani ba bangwe ba tšwa Samaria. Yena a re: “Ba swareng ba sa phela, le ge eba ba tlile go lwa goba ba tlile go phophotha.” Bahlabani bao ba masogana ba hlasela pele ba šetšwe morago ke madira a Baisraele, gomme yo mongwe le yo mongwe a bolaya monna yo a bego a elwa naye. Basiria ba tšhaba mme Baisraele ba ba lelekiša, gomme Benhadade yena a phologa ka go tšhaba ka pere a na le banamedi ba bangwe ba dipere. Kgoši Ahaba a tšwa motseng, a thopa dipere le dikoloi tša ntwa, gomme a fenya Basiria o šoro. Ke moo moprofeta yola a ilego go Kgoši Ahaba a re: “Boela morago o yo hlama madira a gago, gomme o lebeledišiše gabotse se o swanetšego go se dira, ka gobane kgoši ya Siria o tlile go hlasela gape seruthwane se se tlago.” Bahlankedi ba Kgoši Benhadade ba re go yena: “Medimo ya Israele ke medimo ya dithaba, mme ke ka lona lebaka leo ge Baisraele ba re fentše. Eupša ruri re tla ba fenya ge re ka lwa le bona mo melaleng. Bjale tloša babuši bale ba masome a mararo le ba babedi maemong a bona a go laola madira, mme legatong la bona o bee balaodi ba gago. Ka morago o rape madira a mantši a go lekana le ale a fentšwego, le dipere le dikoloi tša ntwa tša go lekana le tšela tša pele. Re tla lwa le Baisraele melaleng, mme ka lekga le re tla ba fenya.” Kgoši Benhadade a dumela gomme a dira se ba se bolelago. Seruthwane se se latelago a rapa banna ba gagwe gomme a leba le bona motseng wa Afeke go yo hlasela Baisraele. Baisraele ba be ba bokane ba itlhamile, ba swere le mefago; ba ile ba yo ba gahlanetša mme ba hloma mešaša ka dihlopha tše pedi ba lebane le Basiria. Baisraele ba be ba le bjalo ka mehlape ye mebedi ye mennyane ya dipudi ge ba bapetšwa le Basiria ba ba bego ba ikadile le naga. Moprofeta yo mongwe a ya go Kgoši Ahaba a re: “Morena o re: ‘Ka gobane Basiria ba re ke nna Modimo wa dithaba fela e sego wa melala, ke tla gafela madira a bona a mantši diatleng tša gago, gomme wena le batho ba gago le tla tseba gore ke nna Morena.’ ” Go ile gwa tšea matšatši a a šupago Basiria le Baisraele ba dutše mešašeng ya bona ba lebane. Ka letšatši la bošupa ba thoma go lwa, gomme tšatši leo Baisraele ba bolaya Basiria ba dikete tše lekgolo. Mašaledi a tšhabela ka motseng wa Afeke, moo merako ya motse e ilego ya wela ba dikete tše masome a mabedi a metšo ye e šupago. Benhadade le yena o ile a tšhabela motseng gomme a utama ka phapošing ya mosego ya ntlo. Bahlankedi ba gagwe ba ya go yena ba re: “Re kwele gore dikgoši tša Baisraele di na le lešoko. Re dumelele gore re ye go kgoši ya Israele re apere tša go ilela mme re itatile dihlogo ka dithapo; mohlomongwe a ka go lesa wa phela.” Ka gona ba apara tša go ilela mme dihlogong ba itata ka dithapo, ba ya go Ahaba ba re: “Mohlanka wa gago, Benhadade, o go kgopela gore o mo lese a phele.” Ahaba a ba fetola a re: “Kganthe o sa phela? Gona ke gabotse! O bjalo ka morwarre!” Bahlankedi ba Benhadade ba bona mantšu ao e le a mabotse, gomme ge Ahaba a re “morwarre” ba napa ba tšeela lentšu leo godimo ba re: “O a rereša, Benhadade ke morwarrago!” Ahaba a re: “Mo tlišeng go nna.” Ge Benhadade a fihla, Ahaba a mmotša gore a tle a namele le yena koloi ya gagwe ya ntwa. Benhadade a re go yena: “Ke tla go neela metse yela tate a e thopilego go tatago, gomme o ka itlhomela lefelo la dikgwebo kua Damaskose, bjalo ka ge tate a be a itlhometše lona mo Samaria.” Ahaba a mo fetola a re: “Ge o realo gona ke tla go lokolla.” A dira kwano le yena gomme a mo lesa a sepela. Ka taelo ya Morena moprofeta yo mongwe wa sehlopha sa baprofeta a laela moprofeta wa gabo gore a mo itie. Fela yoo a gana, ka gona a re go yena: “Ka gobane o nyaditše taelo ya Morena, tau e tla go bolaya ge o seno tloga mo go nna.” Gomme ge a seno tloga, tau ya tšwelela ya mmolaya. Moprofeta yola a ya go monna yo mongwe mme a re: “Ntitie!” Yoo monna a dira bjalo; a mo itia kudu mme a mo gobatša. Moprofeta yoo a itlemelela sefahlego ka lešela gore a se ke a tsebja, gomme a tloga a yo dula tseleng a letetše ge kgoši ya Israele e tlile go feta moo. Ge kgoši e feta, moprofeta a mo goelela a re: “Kgoši, ke be ke elwa ntweng ge mohlabani yo mongwe a tliša lethopša go nna mme a re: ‘O diše monna yo; ge a ka tšhaba o tla lefa molato woo ka setopo goba ka dipapetlana tše dikete tše tharo tša silibera.’ Eupša ke ile ka swarwa ke mešongwana ye mengwe, gomme monna yoo a tšhaba.” Kgoši a mo fetola a re: “O ikahlotše, gomme o swanetše go lefa molato woo.” Moprofeta yola a gagola lešela lela sefahlegong sa gagwe, gomme kgoši a lemoga gore ke yo mongwe wa baprofeta. Moprofeta a re go kgoši: “Morena o re: ‘Ka gobane o lesitše monna yo ke laetšego gore a bolawe a sepele, o tla lefa molato woo ka setopo, gomme batho ba gago ba tla fenywa ka ge o se wa dira setšhaba sa gagwe batho ba gago.’ ” Kgoši a boela ga gabo, Samaria, a huduegile moyeng mme a befetšwe kudu. Go ipata le mošate, ga Kgoši Ahaba kua Jesriele, go be go na le serapa sa merara e le sa monna yo leina la gagwe e bego e le Nabote. Ka letšatši le lengwe Ahaba a re go Nabote: “Mphe serapa sa gago sa merara; se ipatile le mošate, gomme ke nyaka go se dira serapa sa merogo. Legatong la sona ke tla go fa serapa se sengwe sa merara se se se phalago, goba, ge o nyaka, ke tla se reka ka theko ye e bonalago.” Nabote a mo fetola a re: “Serapa se ke bohwa bja borakgolokhukhu ba ka. A Morena a nthibele gore ke go neele sona!” Ahaba a ya gae a nyamile a befedišitšwe ke seo Nabote a mmoditšego sona. A ya a robala malaong a gagwe, a lebelela lebotong, gomme a gana dijo. Mosadi wa gagwe, Isebele, a ya go yena, a mmotšiša a re: “Ke ka baka lang o nyamile ka mokgwa wo? Ke go reng o sa je?” Ahaba a mo fetola a re: “Ke ka baka la seo Nabote a mpoditšego sona. Ke mo kgopetše gore a nthekišetše serapa sa gagwe sa merara, goba, ge a nyaka, ke mo fe serapa se sengwe sebakeng sa sona, fela yena a mpotša gore a ka se mphe sona!” Isebele a mo fetola a re: “Ga ke re kgoši ya Israele ke wena? Tsoga malaong, thaba, o je. Nna ke tla go hweletša serapa seo sa Nabote!” Isebele a ngwala mangwalo ka leina la Ahaba, a a kiba ka sekibo sa kgoši, gomme a a romela go baetapele le go bakgomana ba moo Jesriele. Mangwalo ao a be a re: “Tsebagatšang letšatši la go ikona dijo, kgobokanyang batho, gomme le dudišeng Nabote madulong a ka pele. Le nyakeng banna ba babedi ba dinokwane le ba lebanye naye, gomme ba mo phare ka molato wa go re o rogakile Modimo le kgoši. Ka morago le mo ntšhe motseng le mmolaye ka maswika.” Baetapele le bakgomana ba Jesriele ba dira se Isebele a ba laetšego sona. Ba bea letšatši la go ikona dijo, ba bokanya batho, gomme ba dudiša Nabote madulong a ka pele. Dinokwane tšela tše pedi tša dula go lebana naye, tša mo rweša molato phatlalatša tša re o rogakile Modimo le kgoši; ka gona a ntšhwa motseng, a bolawa ka go kgatlwa ka maswika. Isebele a tsebišwa gore Nabote o bolailwe. Ge Isebele a seno kwa taba yeo, a re go Ahaba: “Sepela o yo itšeela serapa sela sa merara se Nabote a gannego go go rekišetša sona, ka gobane ga a sa phela – o hwile.” Gatee fela Ahaba a ya serapeng seo sa merara go yo itšeela sona. Ke moo Morena a itšego go moprofeta Eliya wa Tishbe: “Yaa go Kgoši Ahaba wa Samaria. O tla mo hwetša serapeng sa merara sa Nabote moo a theogetšego ntshe go yo ipha sona. O mmotše gore nna, Morena, ke re go yena: ‘A o ka re go bolaya motho wa ba wa tšea le se e lego sa gagwe?’ O mo tsebiše gore nna ke re: ‘Gona mola lefelong lela dimpša di latswitšego madi a Nabote le a gago madi di tla a latswa!’ ” Ge Ahaba a bona Eliya o ile a re: “Wa tla wa nkhwetša, wena lenaba la ka?” Eliya a mo fetola a re: “Ee, ke go hweditše. O ineetše go dira tše e lego tše mpe pele ga Modimo. Ka gona Morena o re go wena: ‘Ke tla go dira bošula. Ke tla go swielela, ka fediša le mošemane le monna yo mongwe le yo mongwe lapeng la gago – bafsa le batšofadi. Lapa la gago le tla swana le lapa la Kgoši Jerobeamo, morwa wa Nebate, le la Kgoši Basha, morwa wa Ahia, ka gobane o mpefedišitše ka go diriša batho ba Israele dibe.’ Mabapi le Isebele gona, Morena o re dimpša di tla ja setopo sa gagwe morakong wa motse wa Jesriele. Yo mongwe le yo mongwe wa meloko ya gago yo a hwelago motseng o tla lewa ke dimpša, gomme yo a hwelago nageng o tla lewa ke manong.” Ga se gwa ka gwa ba le motho yo a kilego a ineela go dira tše mpe pele ga Morena bjalo ka Ahaba, go tšeo ka moka a hlohleletšwa ke mosadi wa gagwe, Isebele. O be a dira dibe tša go leša dihlong kudu ka go khunamela medimo ya diswantšho, bjalo ka Baamore bale Morena a ilego a ba leleka nageng ge Baisraele ba goroga. Ya re ge Eliya a fetša go bolela, Ahaba a gagola diaparo tša gagwe. A ikona dijo, a apola diaparo tšela a apara tša go ilela; o be a robala ka tšona mme a sepela a nyamile. Morena a re go moprofeta Eliya: “Na o bone ka moo Ahaba a ikokobeditšego ka gona pele ga ka? Ka gobane o dirile seo nka se dire bošula a sa phela; ke tla bo tliša lapeng la gagwe mehleng ya morwa wa gagwe.” Ka morago ga moo go ile gwa tšea mengwaga ye mebedi Israele le Siria di sa lwe, eupša ngwageng wa boraro Kgoši Joshafate wa Juda a etela Kgoši Ahaba wa Israele. Ahaba a botšiša bahlankedi ba gagwe a re: “Ke ka baka lang re se ra ka ra itapiša ka go lokolla motse wa Ramote kua Gileade diatleng tša kgoši ya Siria? Ke wa rena!” Gomme a botšiša Joshafate a re: “Na o ka se ye le nna go hlasela Ramote?” Joshafate a mo fetola a re: “Go lokile, re tla ya bohle, le bahlabani ba ka ba maoto le ba go namela dipere le bona ba ba itokišeditše ntwa bjalo ka ba gago. Eupša a re nyakišiše keletšo ya Morena pele.” Ka gona Ahaba a bitša baprofeta; bona e be e ka ba ba makgolo a mane, gomme a ba botšiša a re: “Na nka ya ka hlasela motse wa Ramote, goba ke lese?” Ba mo fetola ba re: “O hlasele. Morena o tla o gafela diatleng tša gago.” Joshafate a mmotšiša a re: “Na ga go na moprofeta yo mongwe yoo ka yena re ka kwago se Morena a se bolelago?” Ahaba a mo fetola a re: “Go sa na le moprofeta yo mongwe, Mika, morwa wa Jimla. Eupša yena ke mo hloile, ka gobane ga a ke a mporofetela se sebotse; ka mehla o mporofetela se sebe.” Joshafate a mo fetola a re: “O se ke wa bolela ka mokgwa woo!” Ke moo Ahaba a biditšego mohlankedi yo mongwe wa mošate gomme a mo laela gore a yo tšea Mika ka pela. Magoši a mabedi ao a be a apere diaparo tša ona tša bogoši mme a dutše ditulong tša bogoši kua seboeng ka ntlenyana ga kgoro ya Samaria, gomme baprofeta ka moka ba porofeta moo pele ga bona. Yo mongwe wa bona, Tsedekia, morwa wa Kenaana, a dira manaka a tshipi gomme a re go Ahaba: “Morena o re: ‘Ka manaka a o tla hlaba Basiria wa ba fenyetša sa ruri.’ ” Baprofeta ba bangwe ka moka ba realo, ba re: “Hlasela motse wa Ramote gomme o tla fenya. Morena o tla o gafela diatleng tša gago.” Go sa le bjalo mohlankedi yo a bego a ile go tšea Mika a re go yena: “Baprofeta ba bangwe ka moka ba porofetile gore kgoši o tla atlega, gomme go tla ba kaone ge le wena o ka realo.” Eupša Mika a mo fetola a re: “Ke ena ka Morena yo a phelago gore ke tla bolela se yena Morena a mpotšago sona!” Ge a fihla go Kgoši Ahaba, kgoši a mmotšiša a re: “Mika, a nna le Kgoši Joshafate re ka ya ra hlasela motse wa Ramote, goba re lese?” Mika a mo fetola a re: “Hlaselang, gomme le tla fenya! Morena o tla o gafela diatleng tša gago, kgoši.” Eupša Ahaba a re: “Ke go botše gakae gore ge o bolela le nna ka leina la Morena o bolele therešo?” Mika a mo fetola a re: “Ke bona madira a Israele a šwalalane mebotong bjalo ka dinku tše di se nago modiši. Gomme Morena o rile: ‘Banna ba ga ba ne moetapele; a ba ikele gae ka khutšo.’ ” Ahaba a re go Joshafate: “A ga se ka go botša gore ga a ke a mporofetela se sebotse? Ka mehla o mpotša se sebe!” Mika a tšwela pele a re: “Bjale theetša se Morena a se bolelago! Ke bone Morena a dutše setulong sa gagwe sa bogoši legodimong, barongwa ba gagwe ka moka ba eme ka mathoko. Morena a ba botšiša a re: ‘Ke mang yo a tlago goketša Ahaba gore a ye a bolawe kua Ramote?’ Barongwa ba bangwe ba bolela se, ba bangwe ba bolela sela. Mafelelong gwa tšwelela moya wa ema pele ga Morena wa re: ‘Nna ke tla mo goketša.’ Morena a o botšiša a re: ‘Bjang?’ Moya wa mo fetola wa re: ‘Ke tla ya ka dira gore baprofeta ka moka ba Ahaba ba bolele maaka.’ Morena a re: ‘Sepela o yo mo goketša. O tla atlega.’ ” Gomme Mika a feleletša ka go re: “Seo ke se se diregilego. Morena o dirile gore baprofeta ba ba gago ba go botše maaka. Eupša yena o go reretše kotsi.” Ke moo moprofeta Tsedekia a batametšego Mika, a mo itia sefahlego ka ntahle, a mmotšiša a re: “Ke go tloga neng moya wa Morena o ntlogetše mme o bolela le wena?” Mika a mo fetola a re: “Seo o tla se tseba ge o tsena ka phapošing ya moseo o yo utama.” Ke gona Kgoši Ahaba a laetšego yo mongwe wa bahlankedi ba gagwe a re: “Swara Mika o mo iše go Amone, ramotse, le go Joase, morwa wa ka. O ba botše gore ba mo lahlele kgolegong, ba mo fe dijo tše nnyane le metse a mannyane go fihlela ke boa ke bolokegile.” Mika a hlaboša lentšu a re: “Ruri, ge o ka boa o bolokegile, gona Morena o tla be a se a bolela ka nna!” A feleletša ka go re: “Yo mongwe le yo mongwe a sware se ke se boletšego!” Kgoši Ahaba wa Israele le Kgoši Joshafate wa Juda ba ya go hlasela motse wa Ramote kua Gileade. Ahaba a re go Joshafate: “Ge re tsena ntweng ke tla ikgakantšha, eupša wena o apare diaparo tša gago tša bogoši.” Ka gona kgoši ya Israele ya tsena ntweng e ikgakantšhitše. Kgoši ya Siria e be e laetše balaodi ba yona ba masome a mararo le ba babedi ba dikoloi tša ntwa gore ba se ke ba hlasela motho ge e se kgoši ya Israele. Ka gona ge ba bona Kgoši Joshafate ka moka ba gopola gore ke yena kgoši ya Israele, gomme ba phamoga go yo mo hlasela. Eupša ge a goa, ba lemoga gore ga se kgoši ya Israele, gomme ba se hlwe ba mo hlomara. Mohlabani yo mongwe wa Mosiria, ka go se tsebe gore motho yo a mo lebantšego ke mang, a thunya motsi mme wa hlaba Kgoši Ahaba mahlakanong a seaparo sa gagwe sa boitshireletšo. Kgoši a goeletša mootledi wa koloi ya gagwe ya ntwa a re: “Ke gobetše! Retologa o nntšhe ntweng!” Ntwa e be e le ye šoro mo e lego gore Kgoši Ahaba o ile a hlwa a emišitšwe ka koloing ya gagwe ya ntwa a lebane le Basiria. Madi a a tšwago nthong ya gagwe a elela ka koloing, gomme mantšiboa a hwa. Ge letšatši le nyaka go dikela, madira a Baisraele a hlabelwa mokgoši wa go re: “A monna yo mongwe le yo mongwe a boele nageng ya gabo, motseng wa gabo!” Kgoši Ahaba a hwa ka mokgwa woo. Setopo sa gagwe sa išwa Samaria mme sa bolokwa moo. Koloi ya gagwe ya ntwa ya hlatswetšwa mogobeng wa Samaria, moo digwebakathobalo di bego di hlapa gona, gomme dimpša tša latswa madi a gagwe, ka moo Morena a bego a boletše. Tše dingwe tše Kgoši Ahaba a di dirilego, gotee le ditaba tša ngwako wa gagwe wo o bego o kgabišitšwe ka nakatlou, le metse ka moka ye a e agilego, di ngwadilwe mo go Ditaba tša magoši a Israele. Ka morago ga lehu la gagwe Ahasia, morwa wa gagwe, a mo hlatlama bogošing. Ngwageng wa bone wa pušo ya Kgoši Ahaba wa Israele, Joshafate, morwa wa Asa, e ile ya ba kgoši ya Juda a na le mengwaga ye masome a mararo a metšo ye e fetšago seatla, gomme a buša a le Jerusalema mengwaga ye masome a mabedi a metšo ye mehlano. Mmagwe e be e le Asuba, morwedi wa Shilehi. Go no swana gabotse le Asa, tatagwe, o ile a dira tše di kgahlago Morena; eupša dintotoma tšeo go tšona go bego go khunamelwa medimo ya diswantšho o ile a se ke a di phušola, gomme batho ba no fela ba dira dihlabelo le go tšhuma seorelo moo. Joshafate a kwana le kgoši ya Israele gore ba se ke ba tsogelana maatla. Tše dingwe tše Joshafate a di dirilego, le ditiro tša bogale bja gagwe, le dintwa tša gagwe di ngwadilwe mo go Ditaba tša magoši a Juda. O ile a raka digwebakathobalo ka moka tša banna le tša basadi nageng ya Juda mafelong a tirelo a medimo ya diswantšho tše di bego di sa šetše go tloga matšatšing a Asa, tatagwe. Naga ya Edomo e be e se na le kgoši; e be e bušwa ke mmušiši yo a bego a beilwe ke kgoši ya Juda. Kgoši Joshafate o ile a dira maselawatle a magolo a go tshelela nageng ya Ofire go yo tšea gauta, eupša a thokgega kua Etsione-Gebere mme a se ke a tshela lewatle. Kgoši Ahasia wa Israele a ithaopa go mo thuša a re: “A ka moso banna ba ka ba sepele le ba gago ka maselawatle.” Fela Joshafate a gana. Joshafate a ithobalela le botatagwe, gomme a bolokwa mabitleng a bona motseng wa Dafida, gomme Joramo, morwa wa gagwe, a mo hlatlama bogošing. Ngwageng wa lesome le metšo ye e šupago wa pušo ya Kgoši Joshafate wa Juda, Ahasia, morwa wa Ahaba, e ile ya ba kgoši ya Israele, gomme a buša a le Samaria mengwaga ye mebedi. A dira dibe pele ga Morena go swana le Ahaba, tatagwe, le Isebele, mmagwe, le Kgoši Jerobeamo, yo a dirišitšego batho ba Israele dibe. O be a khunamela Baale a mo hlankela, gomme a befediša Morena Modimo wa Israele, go no swana le tatagwe. Ge Kgoši Ahaba wa Israele a hwile, naga ya Moaba e ile ya tsogela Israele maatla. Kgoši Ahasia wa Israele o ile a wa ka lefasetere la phapoši ya ka godimo ya mošate kua Samaria, gomme a gobala o šoro. Ka gona a roma batseta gore ba yo botšiša Baale-Sebubu, modimo wa motse wa Bafilista wa Ekrone, ge eba o tla fola. Eupša morongwa wa Morena a laela Eliya, moprofeta wa Tishbe, gore a ye a gahlanetše batseta ba Kgoši Ahasia, a re go bona: “Ke ka baka lang le yo botšiša Baale-Sebubu, modimo wa Ekrone? A ke ka gobane le gopola gore ga go Modimo mo Israele? Botšang kgoši gore Morena o re: ‘O ka se tsoge malaong a o robetšego go ona; ruri o tla hwa!’ ” Eliya a dira bjalo ka ge Morena a laetše, gomme batseta bale ba boela go kgoši. Kgoši a ba botšiša a re: “Le reng le goma?” Bona ba mo fetola ba re: “Re gahlaneditšwe ke monna yo mongwe, gomme a re botša gore re gome re tle re go botše gore Morena o re go wena: ‘Ke ka baka lang o roma batseta gore ba yo botšiša Baale-Sebubu, modimo wa Ekrone? A ke ka baka la gore o gopola gore ga go Modimo mo Israele? O ka se tsoge malaong a o robetšego go ona; ruri o tla hwa!’ ” Kgoši a ba botšiša a re: “Monna yoo e be e le motho wa mohuta mang?” Bona ba mo fetola ba re: “O be a apere seaparo sa matlalo a diphoofolo, a se tlemile lethekeng ka lerala.” Kgoši a kgotsa a re: “Ke Eliya!” Ke moo a romilego molaodi le bahlabani ba masome a a fetšago seatla gore ba yo tšea Eliya. Molaodi yoo a rotogela go yena moo a bego a dutše godimodimo ga thabana gomme a re go yena: “Monna wa Modimo, kgoši o re o theoge.” Eliya a mo fetola a re: “Ge eba ke nna monna wa Modimo, a mollo o theoge legodimong mme o go tšhume le banna ba gago!” Gomme mollo wa theoga wa tšhuma molaodi yola le banna ba gagwe. Kgoši a roma molaodi yo mongwe le banna ba gagwe ba masome a mahlano. Molaodi yoo a rotoga a fihla a re go Eliya: “Monna wa Modimo, kgoši o re o theoge ka pela!” Eliya a mo fetola a re: “Ge eba ke nna monna wa Modimo, a mollo o theoge legodimong mme o go tšhume le banna ba gago!” Gomme mollo wa Modimo wa theoga wa tšhuma molaodi le banna ba gagwe. Kgoši a roma molaodi yo mongwe le banna ba masome a mahlano gape. Molaodi yoo a namela thabana, a fihla a khunama pele ga Eliya, a mo kgopela a re: “Monna wa Modimo, hle, ntšhokele, o šokele le banna ba ba masome a mahlano, o se ke wa re bolaya! Balaodi bale ba bangwe ba babedi le banna ba bona ba bolailwe ka mollo wo o tšwago legodimong; fela hle, nna nke o nkgaugele!” Morongwa wa Morena a re go Eliya: “Theoga naye, o se ke wa mmoifa.” Ka gona Eliya a ya le molaodi yoo go kgoši mme a re go yena: “Morena o re: ‘Ka gobane o romile batseta gore ba yo botšiša Baale-Sebubu, modimo wa Ekrone, mo nkego ga go Modimo mo Israele yo o ka mmotšišago, o ka se tsoge malaong a o robetšego go ona; ruri o tla hwa!’ ” Ahasia o ile a hwa, bjalo ka ge Morena a be a boletše ka Eliya. O be a se na le morwa, ka gona Joramo, morwarragwe, a mo hlatlama bogošing ngwageng wa bobedi wa pušo ya Joramo, morwa wa Joshafate, kgoši ya Juda. Tše dingwe tše Kgoši Ahasia a di dirilego di ngwadilwe mo go Ditaba tša magoši a Israele. Nako e ile ya fihla ya gore Morena a rotošetše Eliya legodimong ka ledimo. Eliya le Elisha ba tloga Gilgale, gomme tseleng Eliya a re go Elisha: “Hle, šala mo; Morena o ntaetše gore ke ye Bethele.” Eupša Elisha a mo fetola a re: “Ke ena ka Morena yo a phelago le ka wena gore nka se go tlogele.” Ka gona ba ya Bethele. Sehlopha sa baprofeta se se bego se dula moo sa ya go Elisha sa mmotšiša sa re: “Afa o a tseba gore Morena o tlile go go amoga mong wa gago lehono?” Elisha a ba fetola a re: “Ee, ke a tseba, eupša homolelang taba yeo.” Ke gona Eliya a itšego go Elisha: “Hle, šala mo; Morena o ntaetše gore ke ye Jeriko.” Eupša Elisha a mo fetola a re: “Ke ena ka Morena yo a phelago le ka wena gore nka se go tlogele.” Ka gona ba ya Jeriko. Sehlopha sa baprofeta se se bego se dula moo sa ya go Elisha sa mmotšiša sa re: “Afa o a tseba gore Morena o tlile go go amoga mong wa gago lehono?” Elisha a ba fetola a re: “Ee, ke a tseba. Eupša homolelang taba yeo.” Ke moo Eliya a itšego go Elisha: “Hle, šala mo; Morena o ntaetše gore ke ye nokeng ya Jordane.” Eupša Elisha a mo fetola a re: “Ke ena ka Morena yo a phelago le ka wena gore nka se go tlogele.” Ka gona ba tšwela pele, gomme baprofeta ba masome a mahlano ba sehlopha sela ba mo šala morago go ya Jordane. Eliya le Elisha ba ema nokeng, gomme baprofeta bale ba ema kgojana le bona. Ke moo Eliya a apotšego seaparo sa gagwe, a se phutha, mme a itia meetse ka sona; meetse a arogana, gomme yena le Elisha ba tshelela ka mošola ba sepela mo go omilego. Moo Eliya a re go Elisha: “Mpotše gore ke go direle eng pele ga ge o amogwa nna.” Elisha a mo fetola a re: “Ake o mphe karolo ya maatla a gago gabedi.” Eliya a mo fetola a re: “O kgopetše selo se sethata. Fela o tla se fiwa ge o ka mpona ge o amogwa nna; ge o ka se mpone, gona o ka se se fiwe.” Ba be ba tšama ba bolela ge ka bjako koloi ya mollo ya ntwa ye e bego e gogwa ke dipere tša mollo e ba tsena gare, gomme Eliya a rotošetšwa legodimong ka ledimo. Elisha a e bona mme a goeletša Eliya a re: “Tate! Tate! O be o šireletša Israele bjalo ka dikoloi tša ntwa le banamedi ba dipere!” Ya re ge Elisha a sa hlwe a bona Eliya, a gagola seaparo sa gagwe diripa tše pedi a nyamile. Ka morago a topa seaparo sa Eliya se se welego, gomme a boela morago a ema lebopong la Jordane. A itia meetse ka seaparo sela sa Eliya mme a re: “Morena, Modimo wa Eliya, o kae?” Ke moo a iteilego meetse gape gomme a arogana, yena a tshelela ka mošola. Baprofeta bale ba masome a mahlano ba Jeriko ba mmona gomme ba re: “Maatla a Eliya a go Elisha!” Ba ya go mo gahlanetša, ba obama pele ga gagwe, mme ba re: “Re bahlanka ba gago ba masome a mahlano mo, ka moka re banna ba ba tiilego. A re yeng re yo nyaka mong wa gago. Mohlomongwe moya wa Morena o mo tšere wa mo lahla thabeng ye nngwe goba ka moeding wo mongwenyana.” Elisha a ba fetola a re: “Aowa, le se ke la ya.” Eupša ba fela ba phegeletše go fihlela ge a tenega mme a ba lesa ba eya. Banna bao ba masome a mahlano ba ya ba mo nyaka matšatši a mararo, eupša ba se mo hwetše. Ke moo ba boetšego go Elisha yo a bego a šetše kua Jeriko, gomme yena a re go bona: “A ga se ka le botša gore le se ke la ya?” Banna ba bangwe ba Jeriko ba ile ba ya go Elisha ba re: “Mong wa rena, bjalo ka ge o bona, motse wo wa rena o dutše gabotse, eupša meetse a gona ga se a loka, ka gona dibjalo tša mo di dira gore basadi ba gome tseleng, le diruiwa di folotše.” Elisha a re: “Tšhelang letswai ka sebjaneng se sefsa, le se tlišeng go nna.” Ba se tliša go yena, gomme a ya mothopong wa moo a tšhela letswai lela ka moo meetseng, a re: “Morena o re: ‘Ke alafa meetse a, mme a ka se hlwe a sa tliša dinkhu le dipholotšo.’ ” Gomme meetse ao a alafega go tloga ka letšatši leo, bjalo ka ge Elisha a be a boletše. Elisha a tloga Jeriko a leba Bethele, gomme tseleng bašemane ba bangwe ba tšwa motseng woo mme ba thoma go mo kwera ba re: “Rotogela mono, ralefatla tena! Rotogela mono!” Elisha a retologa, a ba lebelela, gomme a ba rogaka ka leina la Morena. Ke moo dibere tše pedi tša ditshadi di tšwelego sethokgweng mme tša rathaganya ba masome a mane le ba babedi ba bona. Elisha a fetela thabeng ya Karmele, gomme ka morago a boela Samaria. Ngwageng wa lesome le metšo ye seswai wa pušo ya Kgoši Joshafate wa Juda, Joramo, morwa wa Ahaba, ya ba kgoši ya Israele, gomme a buša a le Samaria mengwaga ye lesome le ye mebedi. A dira dibe pele ga Morena, eupša e be e se yo mobe bjalo ka tatagwe goba mmagwe; o ile a pšhatla kokwane ya leswika ye tatagwe a bego a e agetše go khunamela Baale. Le ge go le bjalo, o ile a fela a ganeletše dibeng tša Kgoši Jerobeamo, morwa wa Nebate, yo a bego a diriša Baisraele dibe; a se ke a di tlogela. Kgoši Mesha wa Moaba o be a ruile dinku, gomme ngwaga wo mongwe le wo mongwe a loba kgoši ya Israele ka dikwanyana tše dikete tše lekgolo le boya bja dikgapa tše dikete tše lekgolo. Eupša ge Kgoši Ahaba wa Israele a hwile, Kgoši Mesha o ile a tsogela Israele maatla. Gateetee Kgoši Joramo a tloga Samaria mme a rapa madira a gagwe ka moka. A roma batseta go Kgoši Joshafate wa Juda gore ba re go yena: “Kgoši ya Moaba e ntsogetše maatla; a o ka se ye le nna ge ke yo lwa le yena?” Kgoši Joshafate a fetola a re: “Ke tla go thuša. Nna ke lokile ge wena o itokišitše, le bahlabani ba ka ba maoto le ba go namela dipere ba itokišitše. Re tla tšea ka tsela efe ge re yo hlasela?” Joramo a mo fetola a re: “Re tla tšea ka tsela ye e putlago lešoka la Edomo.” Ka gona Kgoši Joramo le kgoši ya Juda le ya Edomo ba wela tsela. Ge ba sepetše matšatši a a šupago, ba felelwa ke meetse a madira le a diruiwa tše ba bego ba di gapa. Joramo a re: “Aowii! Morena o re kgobokanyeditše go tlo re gafela diatleng tša kgoši ya Moaba ka bararo ga rena!” Kgoši Joshafate a botšiša a re: “A go na le moprofeta mo yo re ka tsebago keletšo ya Morena ka yena?” Molaodi yo mongwe wa madira a Kgoši Joramo a mo fetola a re: “Elisha, morwa wa Shafate, o gona mo. E be e le mothuši wa Eliya.” Kgoši Joshafate a re: “Yoo yena o bolela fela se se tšwago go Morena.” Ka gona magoši ao a mararo a ya go Elisha. Yena a re go kgoši ya Israele: “Ke ka baka lang ke swanetše go go thuša? Sepela o yo kgopela keletšo go baprofeta bao tatago le mmago ba bego ba eya go bona.” Joramo a mo fetola a re: “Aowa! Ke Morena yo a gafetšego rena dikgoši tše tharo diatleng tša kgoši ya Moaba.” Elisha a mo fetola a re: “Ke ena ka Morena Ramaatlaohle yo a phelago gape ke mo hlankelago gore ke be nka se go thuše ka selo ge nkabe ke sa hlomphe yo o dirilego seboka naye, e lego Kgoši Joshafate wa Juda. Bjale nnyakeleng moletši wa harepa.” Ya re ge moletši yoo a letša harepa ya gagwe, maatla a Morena a tlela Elisha gomme yena a re: “Morena o re: ‘Epang mekero ka mo leopeng le le omilego le. Le ge go se pula ye e nago goba moya wo o fokago, leope le le tla tlala meetse, gomme lena le dikgomo tša lena le diruiwa tša lena tša go rwala merwalo le tla ba le meetse a mantši a go nwa.’ ” Elisha a tšwela pele a re: “Fela tšeo e tla be e sa le dinyane go Morena – o tla ba a gafela Bamoaba diatleng tša lena. Le tla fenya metse ya bona ka moka ye mebotsebotse ye e ageleditšwego ka merako; le tla rema mehlare ya bona ka moka ya dienywa, la šiba methopo ya bona ka moka, la ba la senya mašemo a bona ka moka a a nonnego ka go a lahlela maswika.” Mosong wa le le latelago, ka nako ya ge go neelwa kabelo ya bupi, gateetee meetse a ela a etšwa ka thoko ya Edomo, gomme a pipetša naga. Ge Bamoaba ba ekwa gore magoši a mararo ao a tlile go ba hlasela, banna ka moka ba ba bego ba ka kgona go lwa, go tloga ka masogana go fihlela ka bakgalabje, ba ile ba bitšwa gomme ba išwa mollwaneng. Ge ba tsoga mosong wo o latelago, letšatši le be le taga godimo ga meetse gomme le a dirile mo nkego ke a mahubedu bjalo ka madi. Bamoaba ba goa ba re: “Ke madi! Dihlopha tšela tše tharo tša manaba ruri di lwele seng sa tšona gomme di bolayane! A re yeng re yo hula mešaša ya bona!” Eupša ge ba fihla mešašeng Baisraele ba ba hlasela gomme ba ba rakediša. Ba tšama ba bolaya Bamoaba go fihlela ba tsena nageng ya Moaba, mme ba phušola metse ya bona. Ge Baisraele ba feta tšhemo ye e nonnego yo mongwe le yo mongwe wa bona o be a lahlela leswika go yona go fihlela ge mašemo ka moka a tletše maswika; ba ile ba ba ba šiba methopo, ba rema le mehlare ya dienywa. Mafelelong gwa šala fela motse wa mošate wa Kire-Herese, gomme boraseragamabje ba o dikanetša ba o hlasela. Ge kgoši ya Moaba a bona gore o a fenywa, a tšea banna ba ba lwago ka ditšhoša ba makgolo a a šupago a leka go šwahla manaba gore a tšhabele go kgoši ya Siria, eupša a šitwa. Ka gona a tšea morwa wa gagwe yo mogolo, yo a bego a tlile go mo hlatlama bogošing, a mmolaya mme a direla modimo wa Moaba sehlabelo ka yena. Baisraele ba selekega kudu mme ba katoga motse, ba boela nageng ya gabobona. Mohlologadi wa monna yo mongwe yo e bego e le wa sehlopha sa baprofeta o kile a ya go Elisha a re: “Mong wa ka, monna wa ka o hlokafetše! Bjale ka ge o tseba, e be e le motho yo a boifago Modimo, eupša bjale motho yo monna wa ka a bego a lle molato go yena o tlile go tšea barwa ba ka ka babedi gore e be makgoba go lefa molato wola.” Moprofeta a mmotšiša a re: “Ke go direle eng? Mpotše gore ke eng se o nago naso kua gae.” Mosadi a mo fetola a re: “Ke tloga ke se na selo, ntle le moetana wa makhura a mohlware.” Elisha a re go yena: “Sepela go baagišani ba gago o adime meeta ye mentši ye e se nago selo ye o ka e hwetšago. Ke moka o tsene ka ngwakong le barwa ba gago, o tswalele lemati, gomme o tšhele makhura ka moo meeteng. O bee wo mongwe le wo mongwe ka thoko ge o seno tlala.” Ka gona mosadi a tsena ka ntlong ya gagwe le barwa ba gagwe, a tswalela lemati, a tšea moetana wola wa makhura a mohlware, gomme a tšhela makhura ka meeteng mola barwa ba gagwe ba e tliša go yena. Ge meeta ka moka e tletše, mmagobona a ba botšiša ge eba go sa na le ye mengwe gape. Yo mongwe wa barwa ba gagwe a mo fetola a re: “Woo e be e le wa mafelelo.” Gomme makhura a se hlwe a etšwa ka moetaneng. Mosadi a boela go moprofeta Elisha mme Elisha a re go yena: “Rekiša makhura ao a mohlware gomme o lefe melato ya gago ka moka, mme o tla šalelwa ke tšhelete ye e lekanego ye wena le barwa ba gago le kago phela ka yona.” Ka letšatši le lengwe Elisha a ya Shuneme, moo go bego go dula mosadi wa go hlomphega. Mosadi yoo a kgopela Elisha gore a tle a je nabo, gomme go tloga tšatši leo nako ye nngwe le ye nngwe ge a tlile Shuneme o be a eja ngwakong wa mosadi yoo. Mosadi a re go monna wa gagwe: “Ke na le nnete ya gore monna yo a tlago mo gantši ke monna yo mokgethwa wa Modimo. A re age phapoši ye nnyane tlhakeng ya ntlo, re tsenye malao le tafola le setulo le lebone ka go yona, gomme a ka dula ka gona nako ye nngwe le ye nngwe ge a re etetše.” Ka letšatši le lengwe Elisha a ya Shuneme gape gomme a namelela ka phapošing ya gagwe go yo khutša. A botša mohlanka wa gagwe, Gehasi, gore a yo bitša mosadi yola. Ge mosadi a fihla mo Elisha a bego a kgona go mmona, Elisha a re go Gehasi: “Mmotšiše gore ke mo direle eng go mo leboga ka ge a itapišitše a re fa tše re di hlokago. Mohlomongwe a ka nyaka gore ke mo yele go kgoši goba go molaodi wa madira ke mmolelele tabanyana ye nngwe.” Mosadi a mo fetola a re: “Ke thobile kgobe ka mootlwa mo bathong ba gešo.” Elisha a botšiša Gehasi a re: “Ke mo direle eng bjale?” Gehasi a mo fetola a re: “Ke selo se tee fela – ga a ne morwa, gomme monna wa gagwe ke motho yo a tšofetšego.” Elisha a re: “Mmotše a batamele mo.” Mosadi a batamela a ema mojako, mme Elisha a re go yena: “Išago ka nako tše o tla be o na le morwa.” Mosadi a goa a re: “Eyaeye! Hle, mong wa ka, o se ke wa mphora – o monna wa Modimo!” Eupša mosadi yoo a ima, gomme a tla a belega morwa ka yona nako yela Elisha a bego a e boletše. Ya re ge mošemane yoo a hlalefile, tšatši le lengwe a ya go tatagwe yo a bego a le mašemong le babuni. Ka bjako mošemane a re: “Hlogo! Ke opša ke hlogo!” Tatagwe a re go yo mongwe wa bahlanka: “Kuka mošemane o mo iše go mmagwe.” Mohlanka a kuka mošemane a mmoetša go mmagwe, yo a ilego mo fara go fihlela mosegare wo mogolo, mme ka nako yeo mošemane a hwa. Mmagwe a mo kuka a mo rotošetša ka phapošing ya Elisha, a mmea malaong, a tswalela lemati mme a tloga. Ke moo a biditšego monna wa gagwe mme a re go yena: “Romela mohlanka mo, a tle le pokolo ya tshadi. Ke nyaka go ya go moprofeta Elisha. Ke tla boa ka pela.” Monna wa gagwe a mmotšiša a re: “Ke ka baka lang o nyaka go ya lehono? Ga se Sabatha goba Monyanya wa Lebalana.” Mosadi a mo fetola a re: “Se tshwenyege.” Ke moka a saletša pokolo yela gomme a laela mohlanka a re: “Kitimiša pokolo o itlhaganele mme o se ke wa nkemiša, ge e se ge ke go botša gore o nkemiše.” Ka gona a wela tsela a leba thabeng ya Karmele, moo Elisha a bego a le gona. Elisha a mmona a etla a sa le kgole, gomme a re go mohlanka wa gagwe, Gehasi: “Bona, mosadi yola wa Shuneme šole! Mo hlaganele mme o mmotšiše ge eba o sa iketlile, yena le monna wa gagwe le morwa wa gagwe.” Mosadi a botša Gehasi gore tšohle di sa sepela gabotse, eupša ge a fihla go Elisha a obama pele ga gagwe a mo swara ka dinao. Gehasi o be a šetše a nyako mo kgoromeletša thoko ge Elisha a re: “Mo tlogele. A ga o bone gore o nyamile kudu? Gomme Morena ga se a mpotša selo ka taba yeo.” Mosadi a re go yena: “Mong wa ka, a nkile ka go kgopela morwa? A ga se ka go botša gore o se ke wa mphora?” Elisha a re go Gehasi: “Itlhaganele! Tšea lepara la ka o sepele. Ge o ka gahlana le motho o se ke wa ema wa mo dumediša, gomme ge a ka go dumediša o se ke wa ema wa mo fetola. Ge o fihla ngwakong wa mosadi o rapalatše lepara la ka godimo ga mošemane.” Mosadi a re go Elisha: “Ke ena ka Morena yo a phelago le ka wena gore ke tla goma ge fela wena o na le nna!” Ka gona bobedi bja bona ba thoma leeto la go boela morago. Gehasi a ba eta pele gomme a fihla a rapalatša lepara la Elisha godimo ga ngwana, eupša gwa se ke gwa ba lentšu goba se sengwenyana se se laetšago gore o a phela. Ka gona Gehasi a boela morago go yo gahlanetša Elisha mme a re: “Mošemane ga se a tsoga.” Ge Elisha a fihla a tsena ka phapošing yeo a nnoši, gomme a bona mošemane a rapaletše malaong a hwile. A tswalela lemati gomme a rapela Morena. Ke moka a patlama godimo ga mošemane, a bea molomo wa gagwe godimo ga molomo wa mošemane, le mahlo godimo ga a mošemane, le diatla godimo ga tša mošemane. Ge a sa patlame ka mokgwa woo moo godimo ga mošemanyana, mmele wa mošemanyana wa thoma go ruthela. Elisha a emelela, a sepelasepela ka phapošing, gomme ka morago a boela a patlama godimo ga gagwe. Mošemane a ithimola gašupa gomme a ponyologa. Elisha a bitša Gehasi a mmotša gore a bitše mmagomošemane. Ge mmagwe a tsena ka gare, Elisha a re go yena: “Tšea morwa wa gago šoo.” Mosadi a obama a itahlela fase maotong a Elisha, mme a tšea morwa wa gagwe a tloga. Go kile gwa re go wele tlala nageng ka moka Elisha a boela Gilgale. Ya re ge a ruta sehlopha sa baprofeta, a botša mohlanka wa gagwe gore a hlatlege pitša ye kgolo a ba apeele dijo. Yo mongwe wa baprofeta a ya nageng go yo nyaka semela se sengwenyana sa go tšhelwa ka moo dijong. Eupša a hwetša thaka ya naga mme a kgola maraka a yona, a a tlatša seaparo sa gagwe. A boa nao mme a a kgabelela ka mola dijong a sa tsebe gore ke dilo mang. Dijo tšela tša solelwa banna bale, eupša ya re ge ba seno thoma go di ja, ba goa ba re go Elisha: “Di tšhetšwe mpholo!” gomme ba se ke ba di ja. Elisha a kgopela bupi, a bo tšhela ka mola pitšeng, mme a re: “Ba soleleng dijo gape.” Gomme ba kwa di se na le molato. Ka letšatši le lengwe gwa tla monna yo mongwe a etšwa Baale-Shalisha, a tlišetša Elisha dinkgwa tše masome a mabedi tše di dirilwego ka garase ya mathomo ya go bunwa wona ngwaga woo, le diako tša mabele tše di bego di sa tšwa go thenwa. Elisha a botša mohlanka wa gagwe gore dijo tšeo a di fe sehlopha sela sa baprofeta, eupša yena a mo fetola a re: “Dijo tše ga tša lekana banna ba ba lekgolo!” Elisha a re: “Ba fe tšona ba je, ka gobane Morena o re ba tla ja ba ba ba di šadiša.” Ka gona mohlanka a ba fa dijo tšela, gomme bjalo ka ge Morena a boletše, ka moka ba ja mme gwa ba gwa šala tše dingwe. Naamane, molaodi wa madira a Siria, o be a hlomphega mme a godišwa ke kgoši ya Siria, ka gobane ka yena Morena o be a dirile gore madira a Siria a fenye. E be e le mohlabani yo mogolo, eupša a swerwe ke bolwetši bja letlalo bja go mo tšhilafatša. Mehleng yeo Basiria ba be ba fela ba eya go hlasela Baisraele ka dihlophana, gomme ya re ka nako ye nngwe ba thopa mosetsana yo monnyane wa Moisraele, yoo a ilego a hlankela mosadi wa Naamane. Ka letšatši le lengwe a re go monggadi wa gagwe: “Nke nkabe mong wa ka a eya go moprofeta yo a dulago Samaria! Yena o be a tla mo fodiša bolwetši bja gagwe.” Ge Naamane a ekwa taba yeo, a ya go kgoši a mmotša se mosetsana yoo a se boletšego. Kgoši a re: “Yaa go kgoši ya Israele mme o mo fe lengwalo le.” Ka gona Naamane a tloga, a swere dipapetlana tša silibera tša boima bja dikilokramo tše makgolo a mararo, le dipapetlana tše dikete tše di selelago tša gauta, le diaparo tše lesome tša botšhepi. Lengwalo le Naamane a bego a le swere le be le re: “Ka lengwalo le ke go tsebiša mohlankedi wa ka, Naamane. Ke mo rometše go wena gore o mo fodiše bolwetši bja gagwe.” Ge kgoši ya Israele a seno bala lengwalo leo, a gagola diaparo tša gagwe a re: “Kgoši ya Siria o reng a re ke fodiše monna yo? A ke nna Modimo, yena a nago le maatla a go bolaya goba a go phediša? Go molaleng gore o nyaka go lwa le nna!” Ge moprofeta Elisha a ekwa se se diregilego, a roma motho gore a re go kgoši: “Ke ka baka lang o tshwenyegile? Nke o romele monna yoo go nna gore a tle a tsebe gore go na le moprofeta mo Israele!” Ka gona Naamane a ya le dipere tša gagwe le koloi ya gagwe ya ntwa, a fihla a ema mojakong wa ngwako wa Elisha. Elisha a roma motseta ka ntle gore a mmotše a yo hlapa mmele gašupa nokeng ya Jordane, gomme o tla fola a hlweka. Eupša Naamane a tloga a fufuletšwe, a re: “Ke be ke re o tla tšwa, a ema mme a rapela Morena Modimo wa gagwe, a emiša letsogo la gagwe ka godimo ga mo go lego bolwetši mme a mphodiša! Ntle le fao, na noka ya Abana le ya Parpare kua Damaskose ga di phale dinoka ka moka tša Israele? Nkabe ke hlapile go tšona mme ka fola!” Bahlanka ba gagwe ba mmatamela ba re: “Morena, ge moprofeta a ka be a go boditše gore o dire selo se sethata, o ka be o se dirile. Bjale ke ka baka lang o sa no hlapa, bjalo ka ge a boletše, gomme wa fola?” Ka gona Naamane a theogela Jordane, a korobela ka meetseng gašupa, ka moo Elisha a laetšego ka gona. Nama ya gagwe ya boela ya hlweka ya swana le ya ngwana yo monnyane. A gomela go Elisha le bafelegetši ba gagwe ka moka a re: “Bjale ke a tseba gore ga go modimo wo mongwe lefaseng ka moka ntle le Modimo wa Israele; ka gona hle, anke o amogele mpho ya ka, nna, mohlanka wa gago.” Elisha a mo fetola a re: “Ke ena ka Morena yo a phelago, yo ke mo hlankelago, gore nka se amogele mpho yeo.” Naamane a phegelela gore a e amogele, eupša Elisha a fela a gana. Ka gona Naamane a re: “Ge o sa amogele mpho ya ka, gona a ke tšee mobu wo o ka rwalwago ke dimeila tše pedi ke o iše gae, ka gobane go tloga bjale nka se direle modimo wo mongwe dihlabelo tša go tšhungwa ka moka goba dihlabelo tše dingwe ntle le Morena. Ka gona Morena a ntebalele ge ke felegetša kgoši ya ka tempeleng ya Rimone ke khunamela modimo yoo. Nke Morena a ka ntebalela!” Elisha a re: “O sepele gabotse!” Gomme Naamane a tloga. O be a sa tšwa go tloga ge Gehasi, mohlanka wa Elisha, a bolela ka pelong a re: “Mong wa ka o lesitše Naamane a sepela yena a se a amogela selo sa tše Mosiria yola a bego a di tlišitše. Ke ena ka Morena yo a phelago gore ke tla mo kitimela ka yo tšea se sengwenyana go yena.” Ka gona a šala Naamane morago. Ge Naamane a bona monna a mo kganyelela, a fologa koloi ya gagwe ka pela gore a yo mo gahlanetša, mme a mmotšiša a re: “A go na le molato?” Gehasi a mo fetola a re: “Aowaa. Fela mong wa ka o nthomile gore ke tle ke go botše gore gonabjale go fihlile ba babedi ba sehlopha sa baprofeta ba kua nageng ya dithaba ya Efraime, gomme o nyaka gore o ba fe dipapetlana tša silibera tša boima bja dikilokramo tše masome a mararo, le diaparo tše pedi tša botšhepi.” Naamane a mo fetola a re: “Hle, tšea dipapetlana tša silibera tša boima bja dikilokramo tše masome a a selelago.” Naamane a phegelela gore a di amogele, a nokela silibera ka mekotleng ye mebedi, a tlema mekotla yeo, a e neela ba babedi ba bahlanka ba gagwe gotee le diaparo tše pedi tša botšhepi, mme a re ba ete Gehasi pele. Ge ba fihla mmotong Gehasi a tšea mekotla yela ye mebedi a e iša ka ngwakong wa Elisha. Ka morago a tšwa a yo botša bahlanka bale ba Naamane gore ba boele morago. A boela go Elisha ka ngwakong gomme Elisha a mmotšiša a re: “A o tšwa kae, Gehasi?” Gehasi a mo fetola a re: “Aowi, nna, mohlanka wa gago, ga ke tšwe felo.” Eupša Elisha a re: “A ke be ke se gona moo ka monagano ge monna yola a fologa koloi ya gagwe, a retologa a go gahlanetša? Na se ke sona sebaka sa go amogela tšhelete le diaparo, dirapa tša mehlware le tša merara, dihuswane le dikgomo, goba bahlanka? Bjale bolwetši bja Naamane bo tla go swara, gomme wena le ditlogolo tša gago le tla ba nabjo go ya go ile!” Ge Gehasi a tloga o be a na le bolwetši bjoo – letlalo la gagwe e le le lešweu bjalo ka lehlwa. Ka letšatši le lengwe sehlopha sa baprofeta se Elisha a bego a se okametše se ile sa tla go yena sa re: “Felo fa re dulago gona ke mo gonnyane kudu! Re dumelele gore re ye Jordane, yo mongwe le yo mongwe wa rena a reme kota, re age felo mo re ka dulago gona.” Elisha a ba fetola a re: “Go lokile.” Yo mongwe wa bona a mo kgopela gore a ye le bona; a dumela, gomme ba tloga mmogo. Ge ba fihla Jordane ba thoma go rema dikota. Ya re ge yo mongwe wa bona a rema mohlare, selepe sa gagwe sa tshwamoga sa wela ka meetseng. A llela Elisha a re: “Joo, mong wa ka! Ke selepe sa go adingwa!” Elisha a mmotšiša a re: “Na se wetše kae?” Monna yoo a mo laetša felo fao, gomme Elisha a rema phata, a e lahlela ka moo meetseng mme a dira gore selepe se phaphamale. Elisha a re: “Se ntšhe.” Monna yoo a obelela ka letsogo a se tšea. Kgoši ya Siria e be e elwa le Baisraele. Ya boledišana le balaodi ba madira a yona gomme ya kgetha lefelo le e tlago hloma mešaša go lona. Elisha a roma motho go kgoši ya Israele gore a e sebele gore e se ke ya feta felo fao, ka gobane Basiria ba be ba theogela gona. Ka gona kgoši ya Israele ya sebela batho ba ba dulago moo, gomme ba dula ba phafogile. Elisha o ile a sebela kgoši makga a mmalwa. Kgoši ya Siria ya befelwa kudu ka taba yeo; a bitša balaodi bale a ba botšiša a re: “Ke mang wa lena yo a emago le kgoši ya Israele?” Yo mongwe wa bona a mo fetola a re: “Ga a gona, kgoši, mong wa ka! Ke moprofeta Elisha yo a lego Israele yo a botšago kgoši ya Baisraele se o se bolelago le ka phapošing ya gago ya go robala.” Kgoši a re: “Sepelang le yo nyakišiša gore o kae, gomme ke tla romela banna go yo mo thopa.” Ya re ge a botšwa gore Elisha o Dotane, a romela madira a mantši fao ka dipere le makoloi a ntwa. Ba fihla motseng bošego mme ba o dikanetša. Mosong wa le le latelago e sa le bošego mohlanka wa Elisha a tsoga, a tšwa ka ngwakong, gomme a bona madira a Basiria ka dipere le makoloi a bona a ntwa a dikaneditše motse. A boela go Elisha mme a kgotsa a re: “Joo, mong wa ka! A re ka dira eng?” Elisha a mo fetola a re: “O se ke wa boifa. Re na le batho ba bantši ba ba emego le rena go feta ba ba emego le bona.” Ke moo a rapetšego a re: “Hle, Morena, mo ponyolle mahlo mme a bone!” Morena a kwa thapelo ya gagwe, gomme mohlanka wa Elisha a bona thaba e tletše dipere le makoloi a ntwa a mollo go dikologa Elisha. Ge Basiria ba hlasela, Elisha a rapela a re: “Hle, Morena, foufatša banna ba!” Morena a kwa thapelo ya gagwe gomme a ba foufatša. Ke gona Elisha a itšego go bona: “Le tšere ka tsela ye e sego yona; wo ga se motse wo le o nyakago. Ntšhaleng morago mme ke tla le iša go monna yo le mo nyakago.” Gomme a ba iša Samaria. Ge ba seno tsena motseng Elisha a rapela a re: “Ba bule mahlo, Morena, mme ba bone.” Morena a ba bula mahlo, a dira gore ba boele ba bone, gomme ba ikhwetša ba le ka gare ga motse wa Samaria. Ya re ge kgoši ya Israele e bona Basiria, ya botšiša Elisha ya re: “Na ke ba bolaye, tate? Ke ba bolaye?” Elisha a mo fetola a re: “Aowaa! Le bahlabani ba o ba thopilego ntweng ga o ba bolaye. Ba fe sa go ja le sa go nwa, mme o ba lese ba boele go kgoši ya bona.” Ka gona kgoši ya Israele ya ba fa dijo tše ntši, gomme ge ba lle, ba nwele, a re ba gomele go kgoši ya bona. Go tloga tšatši leo Basiria ba se hlwe ba hlasela naga ya Israele. Ka morago ga lebaka Kgoši Benhadade wa Siria a rapa madira a gagwe ka moka go yo lwa le Israele, gomme a dikanetša motse wa Samaria. Ka baka la go dikanetšwa moo dijo tša hlokega kudu ka motseng moo e lego gore hlogo ya pokolo e be e rekwa ka dipapetlana tša silibera tše masome a seswai, mme dikramo tše makgolo a mabedi tša morole wa maeba di rekwa ka dipapetlana tše di fetšago seatla tša silibera. Kgoši ya Israele e be e sepela godimo ga morako wa motse ge mosadi a goeletša a re: “Nthuše, kgoši, mong wa ka!” Kgoši ya mo fetola ya re: “Ge Morena a sa go thuše, a nna nka go thuša ka eng? A ke na le mabele goba beine? Molato ke eng?” Mosadi a mo fetola a re: “Ka letšatši le lengwe mosadi yo o ile a re re je ngwana wa ka, mme re tle re je wa gagwe ka letšatši le le latelago. Ka gona ra apea morwa wa ka ra mo ja. Ka le le latelago ka mmotša gore a tliše morwa wa gagwe re mo je, eupša o be a mo utile!” Ya re ge kgoši a ekwa taba yeo, a gagola diaparo tša gagwe, a fela a sepela godimo ga morako, gomme batho ba kgona go bona gore o apere masaka ka gare. A goa a re: “A Modimo a mpolaye thoo ge Elisha, morwa wa Shafate, a ka se ripše molala lehono!” A napa a roma motseta go Elisha. Elisha o be a le gae a na le bagolo ba bangwe ba ba bego ba mo etetše. Pele ga ge motseta wa kgoši a fihla, Elisha a re go bagolo bao: “Mmolai yola o romela motho yo mongwe gore a tle a mpolaye! Bjale, ge a fihla mo, le tswaleleng lemati mme le se ke la mo lesa a tsena. Kgoši ka boyena o mo šetše morago.” O be a se a tšwa a fetša go bolela ge kgoši a fihla mme a re: “Ke Morena yo a re tlišeditšego bothatha bjo! Ke ka baka lang ke swanetše go fela ke mo letetše gore a dire se sengwe?” Elisha a mo fetola a re: “Theetša se Morena a se bolelago! Ka nako ye bosasa o tla kgona go reka bupi bja dikilokramo tše tharo goba mabele a dikilokramo tše di selelago ka papetlana e tee ya silibera mo Samaria.” Molaolamadira yo e bego e le mošikalekgoši a re go Elisha: “Seo se ka se direge, ke ra le ge Morena a be a ka bula magodimo a neša pula gonabjale!” Elisha a mo fetola a re: “O tla bona taba yeo ka a gago mahlo, eupša o ka se je le lerathana la dijo tšeo.” Go be go na le banna ba bane ka ntle ga kgoro ya Samaria ba ba bego ba swerwe ke bolwetši bja letlalo bja go ba tšhilafatša. Bona ba botšana ba re: “Ke ka baka lang re dutše mo go fihlela re tlile go hwa? Ga go thuše selo go tsena motseng ka gobane ka moo re ya go hwa ka tlala; eupša ge re ka dula mo, le gona re tla hwa. Ka gona a re yeng mešašeng ya Basiria; ge eba ba ka re lesa re phela, re tla phela; ge eba ba ka re bolaya, re tla ikhwela.” Ka fao ya re ka maswiswana ba ya mešašeng ya Basiria, eupša ge ba fihla mathomong a mešaša ba hwetša go se motho. Morena o be a dirile gore Basiria ba kwe modumo wo nkego ke wa madira a mantšintši a ba batamela ka dipere le ka makoloi a ntwa, gomme Basiria ba gopola gore kgoši ya Israele e thwetše kgoši ya Bahete le kgoši ya Baegepeta le madira a tšona gore ba tle ba ba hlasele. Ka gona Basiria ba be ba tšhabile ge leswiswi le thoma go swara, gore ba se ke ba tla ba bolawa, ba tlogetše mešaša ya bona, dipere le dipokolo. Ba tlogetše mešaša e le bjalo. Ge banna bale ba bane ba fihla mathomong a mešaša, ba ile ba tsena ka mošašeng wo mongwe, ba ja, ba nwa se se bego se le fao, ba tšea silibera le gauta le diaparo tše ba di hweditšego gomme ba tloga ba ya ba di uta; ka morago ba boa, ba tsena ka go wo mongwe mošaša ba tšea dilo, le tšona ba di uta. Fela ba botšana ba re: “Se re se dirago ga sa loka! Re na le taba tše botse eupša re ikhomoletše! Ge re ka leta go fihlela ge letšatši le hlaba, ruri re tla otlwa. A re yeng gonabjale re yo bega taba tše mošate!” Ka gona ba tloga mešašeng ya Basiria ba boela Samaria, gomme ba goeletša baleti ba kgoro ba re: “Re tšwa mešašeng ya Basiria gomme ga se ra bona monna goba ra kwa motho a bolela; dipere le dipokolo di be di sa tlemilwe, le mešaša e be e sa no ba ka mokgwa wo Basiria ba e tlogetšego ka gona.” Baleti ba goa ba bega taba yeo, gomme ya ba ya fihlišwa mošate. E be e le bošego, eupša kgoši a tsoga malaong gomme a re go bahlankedi ba gagwe: “Ke le botša se Basiria ba se naganago. Ba tseba tlala ye e lego mo, ka gona ba tlogetše mešaša ya bona gore ba yo utama kua nageng. Ba gopola gore ge re tšwile motseng re ile go nyaka dijo, ba tla re swara ba se re bolaye, mme ba tsena motseng.” Yo mongwe wa bahlankedi ba gagwe a re: “A re romeng banna ka dipere tše tlhano go tše di sa šetšego mo motseng gore ba yo bona se se diregilego. Ge ba ka bolawa go tla no swana le lešaba le le šetšego le ikhwetše.” Ba kgetha banna bao, gomme kgoši a ba roma ka dikoloi tše pedi tša ntwa, a ba laela gore ba ye ba bone se se hlagetšego madira a Basiria. Banna bao ba sepela go ba go yo fihla Jordane, gomme ba hwetša tsela ka moka e tletše diaparo le ditlabakelo tše Basiria ba di lahlilego ge ba tšhaba ba gakanegile. Ka morago ba boa ba begela kgoši. Batho ba Samaria ba kgeregela ntle mme ba hula mešaša ya Basiria. Gomme bupi bja dikilokramo tše tharo goba mabele a dikilokramo tše di selelago a rekwa ka papetlana e tee ya silibera, ka moo Morena a boletšego ka gona. Kgoši ya Israele e be e beile molaolamadira yo e bego e le mošikalekgoši molaodi wa kgoro ya motse. Monna yoo a gatakwa ke batho moo mme a hwa, bjalo ka ge Elisha a be a boletše mola kgoši a tlile go yena. Elisha o be a boditše kgoši a re: “Bosasa ka tšona nako tše bupi bja dikilokramo tše tharo goba mabele a dikilokramo tše di selelago a tla rekwa ka papetlana e tee ya silibera.” Molaodi yo o be a mo fetotše ka go re: “Seo se ka se direge, ke ra le ge Morena a be a ka bula magodimo a neša pula gonabjale!” Gomme Elisha o be a mo fetotše ka go re: “O tla iponela ka bowena, eupša o ka se je le lerathana la dijo tšeo.” Seo ke sona se ilego sa mo hlagela – o ile a gatakwa ke batho kgorong ya motse mme a hwela moo. Bjale Elisha o be a boditše mosadi yola a bego a dula Shuneme, yo a ilego a tsoša morwa wa gagwe a hwile, gore Morena o romela tlala ye e tlago tšea mengwaga ye e šupago nageng, le gore a tloge le lapa la gagwe a diilele mo a ka hwetšago madulo. Mosadi yoo o be a dirile ka moo a laetšwego ka gona, a tlogile le lapa la gagwe go yo diilela Filistia mengwaga ye e šupago. Ya re ge mengwaga yeo e fetile, a boela Israele gomme a ya go kgoši go yo kgopela gore ngwako wa gagwe le tšhemo ya gagwe di boetšwe go yena. A hwetša kgoši a bolela le Gehasi, mohlanka wa Elisha; kgoši o be a nyaka go tseba ka ga mehlolo ya Elisha. Mola Gehasi a sa botša kgoši ka moo Elisha a kilego a tsoša motho a hwile, mosadi yola a llela kgoši ka ga ngwako wa gagwe le tšhemo ya gagwe. Ke moo Gehasi a itšego go kgoši: “Mosadi yoo šo, le morwa yoo wa gagwe a tsošitšwego a hwile šo, kgoši, mong wa ka!” Ke moka kgoši a botšiša mosadi yoo ditaba tšeo gomme yena a tiišetša se Gehasi a se boletšego. Ka gona kgoši a bitša mohlankedi yo mongwe a mmotša gore a boetše go mosadi tšohle tše e bego e le tša gagwe, gotee le puno ya tšhemo ya gagwe ya mengwageng ye e šupago ge a be a se gona. Elisha o ile a ya Damaskose ka nako ye Kgoši Benhadade wa Siria a babja. Ge kgoši a botšwa gore Elisha o moo, a re go Hasaele, yo mongwe wa bahlankedi ba gagwe: “Iša mpho go moprofeta gomme o mo kgopele gore a botšiše Morena ge eba ke tla fola goba nka se fole.” Ka gona Hasaele a rwala dilo tše kaonekaone tša mehutahuta tša Damaskose ka dikamela tše masome a mane, gomme a ya go Elisha. Ge Hasaele a fihla go yena, a re: “Mohlanka wa gago, Kgoši Benhadade wa Siria, o nthomile gore ke tle ke go botšiše ge eba o tla fola goba a ka se fole.” Elisha a mo fetola a re: “Morena o nkutolletše gore ruri o tla hwa, fela sepela go yena mme o mmotše gore o tla fola.” Ke moo Elisha a ilego a selekega a mo tseparela ka mahlo go fihlela Hasaele a sa hlwe a kgona go iketla. Ke moka Elisha a thoma go rothiša megokgo. Hasaele a mmotšiša a re: “O llelang, mong wa ka?” Elisha a mo fetola a re: “Ke lla ka gobane ke tseba dilo tše šorošoro tše o tlago di dira setšhaba sa Israele. O tla tšhuma dibo tša bona, wa bolaya masogana a bona, wa pšhatlaganya bana ba bona, gomme wa phula baimana ba bona dimpa.” Hasaele a mmotšiša a re: “A nka ba le maatla a makaalo bjang? Ga ke selo – ke mpša fela!” Elisha a mo fetola a re: “Morena o nkutolletše gore wena o tlile go ba kgoši ya Siria.” Hasaele a boela go Benhadade yo a ilego a mmotšiša a re: “A Elisha o go boditše eng?” Hasaele a mo fetola a re: “O mpoditše gore ruri o tla fola.” Eupša ka letšatši le le latelago Hasaele a tšea lepai, a le ina ka meetseng, a le gatelela sefahlegong sa kgoši, mme kgoši a hwa. Gomme Hasaele a hlatlama Benhadade bogošing bja Siria. Ngwageng wa bohlano wa ge Joramo, morwa wa Ahaba, e le kgoši ya Israele, Joramo, morwa wa Joshafate, ya ba kgoši ya Juda a na le mengwaga ye masome a mararo a metšo ye mebedi, gomme a buša mengwaga ye seswai a le Jerusalema. Ka gobane mosadi wa gagwe e be e le morwedi wa Ahaba, o ile a tšea ka tsela ye mpe ya magoši a Israele go no swana le ba lapa la Ahaba, a dira dibe pele ga Morena, eupša Morena a se nyake go feleletša batho ba Juda, ka gobane o be a tshephišitše Dafida, mohlanka wa gagwe, gore ditlogolo tša gagwe di tla buša ka mehla. Mehleng ya ge go buša Joramo, Edomo e ile ya tsogela Juda maatla mme ya ipeela kgoši ya yona. Ka gona Joramo a tšwa ka makoloi a gagwe a ntwa ka moka a leba Tsaire moo madira a Baedomo a ilego a ba dikanetša gona. Bošego yena le balaodi ba gagwe ba dikoloi tša ntwa ba ba šwahla, mme madira a gagwe a tšhabela malapeng a ona. Edomo ya se hlwe e bušwa ke Juda go tloga mohlang woo. Yona mehleng yeo motse wa Libna le wona wa tsoša mpherefere. Tše dingwe tše Joramo a di dirilego di ngwadilwe mo go Ditaba tša magoši a Juda. Joramo a ithobalela le botatagwe, gomme a bolokwa mabitleng a bona motseng wa Dafida, gomme Ahasia, morwa wa gagwe, a mo hlatlama bogošing. Ngwageng wa lesome le metšo ye mebedi wa ge Joramo, morwa wa Ahaba, e le kgoši ya Israele, Ahasia, morwa wa Joramo, ya ba kgoši ya Juda a na le mengwaga ye masome a mabedi le metšo ye mebedi, gomme a buša a le Jerusalema ngwaga o tee. Mmagwe e be e le Athalia, setlogolo sa Kgoši Omri wa Israele. Ka ge Ahasia e be e le leloko la Kgoši Ahaba ka nyalo, o ile a tšea ka tsela ye mpe ya ba lapa la Ahaba, gomme a dira dibe go no swana le ba lapa la Ahaba. Kgoši Ahasia o ile a thuša Kgoši Joramo wa Israele go lwa le Kgoši Hasaele wa Siria. Madira a kopana Ramote kua Gileade, gomme Joramo a gobala ntweng. A boela motseng wa Jesriele gore dintho tša gagwe di fole, gomme Ahasia a mo etela moo. Go sa le bjalo moprofeta Elisha a bitša o tee wa baprofeta ba bafsa sehlopheng sa gagwe a re go yena: “Itokiše mme o ye Ramote kua Gileade. O tšee sedibelo se sa makhura a mohlware, gomme ge o fihla moo o nyake Jehu, morwa wa Joshafate, Joshafate morwa wa Nimshi. O mo aroganye le bagwera ba gagwe, o mo iše ka phapošing ya mosego, o mo tšhele ka makhura a a mohlware hlogong mme o mmotše gore Morena o re: ‘Ke go tlotša gore o be kgoši ya Israele.’ O nape o bule lemati o tšhabe, o se ke wa dikadika.” Ka gona moprofeta yo mofsa a ya Ramote moo a ilego a hwetša balaodi ba madira ba swere lekgotla. A re: “Molaodi, ke go swaretše molaetša.” Jehu a mmotšiša a re: “O ra mang mo go rena?” Moprofeta a mo fetola a re: “Ke ra wena, molaodi.” Ke moo bobedi bja bona ba tsenego ka ngwakong, gomme moprofeta yoo a tšhela Jehu ka makhura ale a mohlware hlogong mme a re go yena: “Morena Modimo wa Israele o re: ‘Ke go tlotša gore o be kgoši ya setšhaba sa ka sa Israele. O fediše lapa la Ahaba, mong wa gago, gore ke tle ke otle Isebele ka ge a bolaile baprofeta ba ka le bahlanka ba ka ba bangwe. Lapa ka moka la Ahaba le ditlogolo tša gagwe le swanetše go hwa; ke tla bolaya bohle ba e lego banna lapeng labo, bafsa le bakgalabje. Ke tla swara lapa labo go swana le ka moo ke ilego ka swara lapa la Kgoši Jerobeamo wa Israele, le la Kgoši Basha wa Israele. Isebele a ka se bolokwe; setopo sa gagwe se tla lewa ke dimpša mašemong a motse wa Jesriele.’ ” Ge moprofeta a seno realo a bula lemati a tšhaba. Jehu a boela go balaodi bale ba bangwe, gomme ba mmotšiša ba re: “Na di sa go sepelela gabotse? A segafa sela se be se tletše eng go wena?” Jehu a mo fetola a re: “Lena ka noši le tseba monna yola le dipolelwana tša gagwe.” Eupša bona ba re: “O ne maaka! Re botše!” Jehu a re: “O mpoditše gore Morena o re o ntloditše gore ke be kgoši ya Israele.” Gatee fela balaodi bale ba ala diaparo tša bona manamelong gore Jehu a tle a eme godimo ga tšona, gomme ba letša diphalafala ba goa ba re: “Jehu ke kgoši!” Ke moo Jehu a logilego maano a go bolaya Kgoši Joramo, yo a bego a le Jesriele, moo a bego a ile gore a alafiwe dintho tše a di ntshitšwego ntweng ya kua Ramote mola a elwa le Kgoši Hasaele wa Siria. Ka gona Jehu a re go balaodi bale ba bego ba na le yena: “Ge eba le ema le nna le hlokomeleng gore go se ke gwa tšwa motho Ramote a yo botša batho kua Jesriele.” *** Ke moo a nametšego koloi ya gagwe ya ntwa a tloga a leba Jesriele. Joramo o be a se a tšwa a fola, gomme Kgoši Ahasia wa Juda o be a le moo a mo etetše. Mohlapetši yo a bego a eme godimo ga tora kua Jesriele a bona Jehu le banna ba gagwe ba etla. A goelela a re: “Ke bona sehlopha sa banna se etla!” Joramo a mo fetola a re: “Roma monna ka pere go yo ba botšiša gore ba tla ka khutšo goba ka ntwa na.” Motseta a namela pere a ya go Jehu gomme a fihla a re go yena: “Kgoši o nyaka go tseba ge eba o tla go yena ka khutšo goba ka ntwa.” Jehu a mo fetola a re: “Yeo ga se taba ya gago! Wena ntšhale morago!” Mohlapetši yola wa godimo ga tora a bega gore motseta yola o fihlile sehlopheng sela, eupša ga a boe. Motseta yo mongwe a rongwa, gomme a botšiša Jehu yona potšišo yela. Jehu a mo fetola a re: “Yeo ga se taba ya gago! Wena ntšhale morago!” Mohlapetši a bega gape gore motseta yoo o fihlile sehlopheng sela, eupša ga a boe. A tlaleletša ka go re: “Moetapele wa sehlopha sa gona o otlela dipere tša koloi ya gagwe ya ntwa bjalo ka segafa, go no swana le Jehu!” Kgoši Joramo a re: “Lokišang koloi ya ka ya ntwa!” Ya lokišwa gomme yena le Kgoši Ahasia ba tšwa motseng go yo gahlanetša Jehu, yo mongwe le yo mongwe a nametše koloi ya gagwe ya ntwa. Ba gahlana le yena tšhemong yela e bego e kile ya ba ya Nabote. Joramo a mmotšiša a re: “Na o tla ka khutšo?” Jehu a mo fetola a re: “Go ka ba khutšo bjang mola re sa na le boloi le go khunamela medimo e šele, dilo tše di thomilwego ke Isebele, mmago?” Joramo a goa ge a retolla koloi ya gagwe ya ntwa a tšhaba a re: “Ke go uša mmušo, Ahasia!” Jehu a ntšha mosebe wa gagwe, a thunya Joramo a mo hlaba mokokotlong, mosebe wa phuleletša pelong. Joramo a wela ka koloing ya gagwe a hwa, gomme Jehu a re go mothuši wa gagwe, Bidkare: “Tšea setopo sa gagwe o se lahlele ka tšhemong ye e bego e le ya Nabote. Gopola gore mola nna le wena re be re nametše dipere re latela Ahaba, tatagoKgoši Joramo, Morena o ile a ahlola Ahaba a re: ‘Ke bone go bolawa ga Nabote le barwa ba gagwe maabane. Gomme ke tlile go ba lefeletša gona mo tšhemong ye.’ ” Jehu a re go mothuši wa gagwe: “Ka gona tšea setopo sa Joramo o se lahlele ka tšhemong ye e bego e le ya Nabote, gore go tle go phethagatšwe se Morena a se boletšego.” Ge Kgoši Ahasia a bona seo se diregilego, a tšhaba ka koloi ya gagwe ya ntwa a leba motseng wa Bethe-Hagane a lelekišwa ke Jehu. Jehu a re go banna ba gagwe: “Le yena mmolayeng!” Gomme ba mo gobatša ka koloing ya gagwe ya ntwa tseleng ya go rotogela Gure, kgauswi le motse wa Jibleamo. Eupša a fela a sa kgona go tšwela pele go ba go fihla motseng wa Megido, moo a ilego a hwela gona. Bahlankedi ba gagwe ba tšea setopo sa gagwe ba se boetša Jerusalema ka koloi ya ntwa. Ba mmoloka mabitleng a botatagwe motseng wa Dafida. Ahasia e be e bile kgoši ya Juda ngwageng wa lesome le motšo o tee wa ge Joramo, morwa wa Ahaba, e le kgoši ya Israele. Jehu o ile a fihla Jesriele. Isebele, ge a kwele se se diregilego, a ithakga mahlo ka pilo, a beakanya moriri wa gagwe gabotse, gomme a okamela fase ka lefasetere a le ka ngwakong wa mošate. Ya re ge Jehu a tsena ka kgoro, Isebele a mo goelela a re: “A o sa phela gabotse Simri, wena mmolai wa mong wa gago!” Jehu a lebelela godimo ka lefasetere gomme a goa a re: “Ke mang yo a emago le nna? Ke mang?” Bahlankedi ba babedi goba ba bararo ba mošate ba mo okamela ka lefasetere, gomme Jehu a re go bona: “Mo kgoromeletšeng fase!” Ba mo kgoromeletša fase, gomme madi a gagwe a gaša morako le dipere. Jehu a gataka setopo sa gagwe ka dipere le koloi ya gagwe ya ntwa, a tsena ka mošate, gomme a ja dijo. Ka morago ga moo a re: “Tšeang mosatšanyana yola wa go rogakwa le mmolokeng; gape ke morwedi wa kgoši.” Eupša banna ba ba ilego ba tšwa go yo mmoloka ba se ke ba hwetša selo ntle le legata le diatla le maoto. Ge ba begela Jehu taba yeo, yena a re: “Seo ke se Morena a itšego se tla direga ge a bolela ka mohlanka wa gagwe, Eliya, a re: ‘Dimpša di tla ja setopo sa Isebele mašemong a motse wa Jesriele. Mašaletšana a tla šwalalana moo bjalo ka morole, gore motho a se hlwe a kgona go a tseba.’ ” Go be go na le ditlogolo tša Kgoši Ahaba tše masome a a šupago tše di bego di dula motseng wa Samaria. Jehu a ngwala mangwalo mme a a romela go babuši ba motse, le go baetapele, le go bagodiši ba ditlogolo tša Ahaba. Lengwalo leo le be le re: “Le bahlokomedi ba ditlogolo tša kgoši gomme le na le dikoloi tša ntwa le dipere le dibetša le motse wo o ageleditšwego ka morako. Ka gona, ge le seno amogela lengwalo le, le kgethe yo a ka kgonago go buša go phala ba bangwe gare ga ditlogolo tša kgoši, le mmee kgoši gomme le lweng le mo šireletšeng.” Babuši ba Samaria ba tšhoga kudu ba re: “A re ka lwa bjang le Jehu ge go paletšwe Kgoši Joramo le Kgoši Ahasia?” Ka gona mohlankedi yo a hlokometšego mošate le yo mongwe yo a hlokometšego motse le baetapele le bagodiši ba ditlogolo tša Ahaba ba romela Jehu molaetša wo: “Rena re bahlanka ba gago gomme re tla dira tšohle tše re di laelwago ke wena. Gomme yo mongwe motho re ka se mmee kgoši. Dira se o bonago se lokile.” Jehu a ba ngwalela lengwalo le lengwe le le rego: “Ge le ema le nna gomme le re le tla dira tšohle tše ke le laelago tšona, gona le tlišeng dihlogo tša ditlogolo tša Kgoši Ahaba go nna kua Jesriele ka nako ye ka moswane.” Ditlogolo tše masome a a šupago tša Kgoši Ahaba di be di hlokometšwe ke banna ba maemo ba Samaria ba ba bego ba ba godiša. Ge baetapele ba Samaria ba seno amogela lengwalo la Jehu, ba bolaya ditlogolo tšela tša Ahaba tše masome a a šupago ka moka ga tšona, ba bea dihlogo tša bona ka dirotong, gomme ba di romela go Jehu kua Jesriele. Ya re ge Jehu a botšwa gore dihlogo tša ditlogolo tša Ahaba di tlišitšwe, a laela gore di dirwe mekgobo ye mebedi kgorong ya motse, le gore di tlogelwe moo go fihlela mosong wa le le latelago. Ka moswane wa ntshe e sa le bošego a tšwa a ya kgorong gomme a re go batho ba ba bego ba le moo: “Ke nna yo ke logilego maano a go bolaya Kgoši Joramo gomme ka mmolaya; ga le na le molato tabeng yeo. Fela bjale yo a bolailego batho ba ka moka ke mang? Taba ye e laetša gore tšohle tše Morena a di boletšego ka ga ditlogolo tša Ahaba di tla direga. Morena o dirile se a se boletšego ka moprofeta wa gagwe, Eliya.” Jehu a bolaya le meloko ye mengwe ya Ahaba ye e bego e dula Jesriele, gotee le bahlankedi ba bagolo ba Ahaba ka moka le bagwera le baprista ba gagwe, gwa se be le o tee wa bona yo a šalago. Jehu a tloga Jesriele a leba Samaria. Tseleng, felo fa go bitšwago Bethe-Ekede, moo badiši ba bego ba fela ba kopana gona, a gahlana le meloko ya mohu Kgoši Ahasia wa Juda gomme a ba botšiša a re: “A le bomang?” Ba mo fetola ba re: “Re meloko ya Ahasia. Re ya Jesriele go yo etela bana ba Mohumagadi Isebele le ba lapa la mošate ka moka.” Jehu a laela banna ba gagwe a re: “Ba tšeeng ba phela!” Ba ba swara, gomme ba ba bolaela kgauswi le molete gona moo. Ka moka e be e le batho ba masome a mane a metšo ye mebedi, gomme le o tee wa bona a se ke a šadišwa. Jehu a tšwela pele le leeto gomme tseleng a gahlanetšwa ke Jonadaba, morwa wa Rekabe. Jehu a re go mo dumediša a re: “A o ema le nna bjalo ka ge nna ke ema nago?” Jonadaba a mo fetola a re: “Ee, ke ema nago.” Jehu a re: “Gona ntshware ka seatla.” Ba swarana ka diatla, gomme Jehu a mo nametša koloi ya gagwe ya ntwa a re: “A re ye le nna o yo bona ka moo ke ineetšego Morena ka gona.” Gomme ba sepela ka koloi ya ntwa mmogo ba ya Samaria. Ge ba fihla moo, Jehu a bolaya meloko ya Ahaba ka moka, a se ke a šadiša motho. Seo ke se Morena a bego a boditše Eliya gore se tla direga. Jehu a bokanya batho ba Samaria mme a re: “Kgoši Ahaba o be a direla modimo Baale gannyane, eupša nna ke tla mo direla kudu. Bokanyang baprofeta ba Baale ka moka le barapedi bohle ba gagwe le baprista ba gagwe ka moka. Go se ke gwa šala motho; ke tlile go direla Baale sehlabelo se segolo, gomme yo a ka se tlego o tla bolawa.” Ao e be e le maano a Jehu gore a tle a bolaye barapedi ka moka ba Baale. Ke moo Jehu a rilego: “A go bewe letšatši la tirelo ya go hlompha Baale!” Letšatši leo la bewa, gomme Jehu a tsebiša batho ka moka nageng ya Israele. Bohle ba ba khunamelago Baale ba tla; le o tee wa bona a se ke a šala. Ka moka ba tsena ka tempeleng ya Baale, ba e tlala rwe. Gomme Jehu a laela motho yo a bego a hlokometše diaparo tše kgethwa gore a di ntšhe mme a di neele barapedi. Ka morago Jehu a tsena ka tempeleng le Jonadaba, morwa wa Rekabe, gomme a re go batho ka moo: “Le boneng gore ka moka ga lena ba le lego ka mo le barapedi ba Baale; go se be le morapedi wa Morena.” Ke moo yena le Jonadaba ba tsenego go yo direla Baale dihlabelo tša go tšhungwa ka moka le dihlabelo tše dingwe. O be a beile banna ba masome a seswai ka ntle ga tempele gomme a ba laetše a re: “Le bolayeng batho ba ka moka; yo a lesago yo mongwe wa bona a tšhaba o tla bolawa!” Ge Jehu a seno dira dihlabelo, a re go baleti le balaodi ba madira: “Tsenang le ba bolayeng ka moka; le se ke la lesa le o tee a tšhaba!” Ba tsena ba ntšhitše ditšhoša, ba ba bolaya ka moka, gomme ba gogela ditopo ka ntle. Ka morago ba fetela pele ba tsena ka sekgethweng sa ka gare ga tempele, ba ntšha kokwane ya borapedi ye e bego e le ka moo, ba e tšhuma. Ya ba gona go fediša kokwane ya borapedi le tempele, gomme marope a tempele ba a fetoša boithomelo bjo bo sa lego gona le lehono. Ke ka moo Jehu a ilego a fediša go direlwa ga Baale mo Israele. Eupša a se ke a tlogela sebe sa Kgoši Jerobeamo, yo a ilego a dira gore Israele e rapele dipowana tša gauta tše a bego a di hlomile kua Bethele le kua Dane. Morena a re go Jehu: “O dirile ditlogolo tša Ahaba se ke bonago se lokile le tšohle tše ke bego ke nyaka gore o ba dire tšona. Ka gona ke go holofetša gore ditlogolo tša gago e tla ba dikgoši tša Israele go iša molokong wa bone.” Eupša Jehu a se ke a phetha melao ya Morena Modimo wa Israele ka pelo ya gagwe ka moka; yena o ile a se ke a tlogela dibe tša Jerobeamo yo a bego a diriša Baisraele dibe. Mehleng yeo Morena a thoma go fokotša naga ya Israele. Kgoši Hasaele wa Siria a thopa naga ya Israele ka moka ka bohlabela bja Jordane, go ba go fihla motseng wa Aroere, nokaneng ya Arnone; naga ye e be e akaretša naga ya Gileade le ya Bashane, moo kgoro ya Gade le ya Rubene le seripakgoro sa Manase sa ka bohlabela di bego di dula gona. Tše dingwe tše Jehu a di dirilego, gotee le ditiro tša bogale bja gagwe, di ngwadilwe mo go Ditaba tša magoši a Israele. O ile a ithobalela le botatagwe, mme a bolokwa Samaria, gomme morwa wa gagwe, Joahase, a mo hlatlama bogošing. Jehu o be a bušitše Israele a le Samaria mengwaga ye masome a mabedi a metšo ye seswai. Ya re ge Athalia, mmagoKgoši Ahasia, a ekwa gore morwa wa gagwe o bolailwe, a laela gore meloko ka moka ya lapa la mošate e bolawe. Ya ba fela Joase, morwa wa Ahasia, yo a phologago. O be a tlile go bolawa le ba bangwe, eupša Josheba, rakgadiagwe, yo e bego e le morwedi wa Kgoši Joramo le kgaetšedi ya Ahasia ka malapa, a mo tšhabiša ka sephiri. Mosadi yoo a mo tšea le mofepi wa gagwe a mo iša ka phapošing ya go bolokela malao ka Tempeleng, gomme a mo uta gore Athalia a se ke a mmona, ka gona a se ke a bolawa. Josheba a hlokomela mošemane yoo mengwaga ye e selelago a mo utile ka Tempeleng, ge go sa buša Mohumagadi Athalia. Eupša ka ngwaga wa bošupa moprista Joyada a laela gore go bitšwe balaodi ba baleti ba Athalia le ba mošate, gomme a ba botša gore ba tle Tempeleng, moo a ilego a dira kwano le bona gomme a ba eniša gore ba dire se a bego a ikemišeditše go se dira. A ba laetša Joase, morwa wa Kgoši Ahasia, gomme a ba laela a re: “Ge le fihla modirong ka letšatši la Sabatha, le ikaroleng dihlopha tše tharo. Sehlopha sa mathomo se lete mošate; sa bobedi se eme lesorong la Sure, mme sa boraro se eme lesorong ka morago ga baleti ba bangwe. Tempele yona e letwe ka mokgwa wo: Dihlopha tše pedi tše di tlogago modirong ka Sabatha di lete Tempele gore di šireletše kgoši. Le leteng Kgoši Joase le ntšhitše ditšhoša, mme le yeng le yena mo gongwe le mo gongwe mo a yago gona. Yo a ka le batamelago a bolawe.” Balaodi ba phetha ditaelo tša Joyada gomme ba tliša banna ba bona go yena – ba ba tlogago modirong ka Sabatha le ba ba tsenago ka letšatši leo. A neela balaodi bao marumo le dikotse tše e bego e le tša Kgoši Dafida mme di bolokilwe ka Tempeleng, gomme a bea banna bao ba ntšhitše ditšhoša ba teile lenaka ka pele ga Tempele ba goma ka aletare, gore ba šireletše kgoši. Ka morago Joyada a ntšha Joase ka Tempeleng, a mo rweša mphapahlogo, gomme a mo fa puku ya melao ye e laolago bogoši. Ke moka Joase a tlotšwa mme a bewa kgoši. Batho ba tia magoswi ba goa ba re: “A kgoši a re phelele!” Mohumagadi Athalia a kwa lešata le le bego le tladitšwe ke baleti le batho, ka gona a hlaganela Tempeleng moo lešaba le bego le kgobokane gona. Moo a bona kgoši ye mpsha e eme kgauswi le kokwane ya mojakong wa Tempele, bjalo ka ge e be e le setlwaedi. Balaodi le baletši ba diphala ba be ba eme le yena, gomme batho ka moka ba tia mekgolokwane ba letša diphala. Athalia a gagola diaparo tša gagwe mme a goelela a re: “Ke go uša mmušo! Ke go uša mmušo!” Joyada o be a sa nyake gore Athalia a bolaelwe ka kgorong ya Tempele, ka gona a laela balaodi ba madira a re: “Mo ntšhetšeng ntle a fete ka gare ga melokoloko ya baleti, gomme le bolayeng yo mongwe le yo mongwe yo a ka lekago go mo phološa.” Ba mo swara, ba mo iša mošate, gomme ba mmolaela moo Lesorong la Dipere. Moprista Joyada a diriša Kgoši Joase le setšhaba kgwerano le Morena ya gore e tla ba setšhaba sa Morena; a ba a diriša kgoši le setšhaba ye nngwe kgwerano. Ka morago setšhaba sa ya tempeleng ya Baale gomme sa e phušola; ba pšhatlaganya dialetare le medimo ya diswantšho, gomme ba bolaya Mathane, moprista wa Baale, pele ga dialetare tšeo. Joyada a bea baleti Tempeleng, gomme yena le balaodi le baleti ba kgoši le baleti ba mošate ba felegetša kgoši go tloga Tempeleng go ya mošate, ba latelwa ke setšhaba ka moka. Joase a tsena ka Lesoro la Baleti gomme a dula setulong sa bogoši. Setšhaba ka moka sa thaba mme motse bjale wa iketla ka ge Athalia a be a bolailwe mošate. Joase e bile kgoši ya Juda a na le mengwaga ye e šupago ngwageng wa bošupa wa pušo ya Kgoši Jehu wa Israele, gomme a buša a le Jerusalema mengwaga ye masome a mane. Mmagwe e be e le Tsibia wa motse wa Beresheba. Bophelong bja gagwe ka moka o be a dira tše di kgahlago Morena, ka gobane moprista Joyada o be a mo laya. Le ge go le bjalo o ile a se ke a phušola dintotoma tšeo go tšona go bego go khunamelwa medimo ya diswantšho, gomme batho ba no tšwela pele le go dira dihlabelo le go tšhuma diorelo moo. Joase a bitša baprista gomme a ba laela gore ba boloke tšhelete ye batho ba e lefago ge ba tliša dihlabelo ka Tempeleng, e lego tšhelete ye e lefiwago ke motho ge a tliša sehlabelo sa mehleng le ye e ntšhwago e le mpho ya boithaopo. Moprista yo mongwe le yo mongwe o be a swanetše go amogela tšhelete ye e tlišwago ke bao a ba thušago go dira dihlabelo, gomme ka tšhelete yeo go be go swanetše go lokišwa Tempele mo e senyegilego gona. Eupša le ngwageng wa masome a mabedi a metšo ye meraro wa pušo ya Joase baprista ba be ba se ba tšwa ba lokiša Tempele. Ka gona Joase a bitša Joyada le baprista ba bangwe, a ba botšiša a re: “Ke ka baka lang le sa lokiše Tempele? Go tloga bjale le se ke la amogela tšhelete go bao ba e tlišago ge eba ka yona le ka se lokiše Tempele.” Baprista ba dumela gore ba ka se amogele tšhelete yeo ka ge ba sa lokiše Tempele. Ke moka Joyada a betla polokelo ya tšhelete a phula sekhurumelo sa yona lešoba, gomme a e bea ka thoko ga aletare, ka go la go ja ge motho a tsena ka Tempeleng. Baprista ba ba bego ba diša mojako wa Tempele ba be ba tšea tšhelete ka moka ye e ntšhwago ke batho ba ba tlago Tempeleng, gomme ba e nokele ka moo polokelong. Ge baprista bao ba bona gore tšhelete ke ye ntši ka polokelong, mongwaledi wa mošate le Moprista yo Mogolo ba be ba etla, ba e tlemelele ka mekotleng, ba ye go e bala. Ge ba e badile, ba be ba e neela banna ba ba bego ba hlokometše modiro wa ka Tempeleng, gomme bona ba lefe babetli, baagi, le ba go lokiša merako ya Tempele, le babetli ba maswika, ba be ba reke dikota le maswika a a betlilwego a a bego a šomišwa go lokiša Tempele le tšohle tše di bego di nyakega. Le ge go le bjalo ga se gwa ka gwa tološwa ye nngwe ya tšhelete yeo gore go dirwe meruswana ya silibera, meruswi, ditimamabone, diphala, goba sebjana se sengwenyana sa silibera goba sa gauta. Tšhelete yeo ka moka ya lefa bašomi, ya ba ya reka tša go lokiša Tempele. Banna ba ba bego ba hlokometše modiro ba be ba tshephega, ka gona go be go sa nyakege gore ba hlwe ba botšišwa ka ditšhelete tšeo. Tšhelete ya dihlabelo tša tefelo ya dibe le ya dihlabelo tša tshwarelo ya dibe e be e sa nokelwe ka moo polokelong; e be e le ya baprista. Mehleng yeo Kgoši Hasaele wa Siria a hlasela motse wa Gathe gomme a o thopa; a napa a ikemišetša go yo hlasela Jerusalema. Kgoši Joase wa Juda a tšea dikabelo tše ba ba bušitšego pele ga gagwe, e lego Joshafate le Joramo le Ahasia, ba bego ba di abetše Morena, a di oketša ka tša gagwe le ka gauta ka moka ye e bego e le ka dipolokelong tša Tempele le tša mošate, gomme a di romela ka moka ya ba seloba sa Kgoši Hasaele. Hasaele a napa a tloga Jerusalema le madira a gagwe. Tše dingwe tše Kgoši Joase a di dirilego di ngwadilwe mo go Ditaba tša magoši a Juda. Bahlankedi ba Kgoši Joase ba ile ba loga maano a go mmolaya, gomme ba babedi ba bona, e lego Josakare, morwa wa Shimate, le Josabade, morwa wa Shomere, ba mmolaya ngwakong wo o agilwego setsheng se se lekelelantšwego, ka thoko ya bohlabela bja Jerusalema, tseleng ye e theogelago Sila. Joase a bolokwa le botatagwe motseng wa Dafida, gomme Amatsia, morwa wa gagwe, a mo hlatlama bogošing. Ngwageng wa masome a mabedi a metšo ye meraro wa ge Joase, morwa wa Ahasia, a buša Juda, Joahase, morwa wa Jehu, e ile ya ba kgoši ya Israele, gomme a buša a le Samaria mengwaga ye lesome le ye e šupago. Go no swana le Kgoši Jerobeamo o ile a dira dibe pele ga Morena, a diriša le Baisraele dibe, mme a fela a di kgomaretše. Ka gona Morena a tukela Baisraele bogale, gomme a ba gafela diatleng tša Kgoši Hasaele wa Siria le morwa wa gagwe, Benhadade, mehleng ya pušo ya Joahase. Eupša Joahase a kgopela kgaugelo go Morena, gomme Morena, ka ge a be a bona bošoro bjo kgoši ya Siria e bego e gateletše Baisraele ka bjona, a kwa thapelo ya gagwe. Morena a romela Baisraele mohlakodiši yo a ilego a ba lokolla go Basiria, gomme Baisraele ba phela ka khutšo go swana le pele. Eupša ba se ke ba tlogela dibe tšela Kgoši Jerobeamo a bego a ba diriša tšona, gomme ba no fela ba di dira; le gona kota ya borapedi ye e bego e le Samaria ba se ke ba e rema. Joahase o be a se na le madira ao a šetšego ntle le banamedi ba dipere ba masome a mahlano, le dikoloi tša ntwa tše lesome, le banna ba go sepela ka maoto ba dikete tše lesome, ka gobane kgoši ya Siria o be a bolaile ba bangwe, a ba gataketše fase bjalo ka lerole. Tše dingwe tše Joahase a di dirilego, gotee le ditiro tša bogale bja gagwe, di ngwadilwe mo go Ditaba tša magoši a Israele. O ile a ithobalela le botatagwe, mme a bolokwa Samaria, gomme morwa wa gagwe, Joase, a mo hlatlama bogošing. Ngwageng wa masome a mararo a metšo ye e šupago wa pušo ya Kgoši Joase wa Juda, Joase, morwa wa Joahase, e ile ya ba kgoši ya Israele, gomme a buša a le Samaria mengwaga ye lesome le ye e selelago. Le yena a dira dibe pele ga Morena go swana le Kgoši Jerobeamo yo a dirišitšego Baisraele dibe. Tše dingwe tše Joase a di dirilego, gotee le bogale bja gagwe ge a elwa le Kgoši Amatsia wa Juda, di ngwadilwe mo go Ditaba tša magoši a Israele. Joase o ile a ithobalela le botatagwe, mme a bolokwa mabitleng a mošate Samaria, gomme morwa wa gagwe, Jerobeamo, a mo hlatlama bogošing. Moprofeta Elisha o ile a swarwa ke bolwetši bjo bo bego bo tlile go mmolaya, gomme Kgoši Joase wa Israele a tla go mmona. A lla a re go yena: “Tate! Tate! O be o šireleditše Israele bjalo ka dikoloi tša ntwa le banamedi ba dipere!” Elisha a mmotša a re: “Tšea bora le mesebe.” Joase a di tšea gomme Elisha a mo laela gore a itokišetše go thunya. Kgoši a dira bjalo, gomme Elisha a bea diatla tša gagwe godimo ga diatla tša kgoši. Elisha a mo laela gore a bule lefasetere le le lebeletšego ka thoko ya Siria. Kgoši a le bula, gomme Elisha a re go yena: “Thunya mosebe woo!” Ge kgoši a seno o thunya, moprofeta a goa a re: “Ke wena mosebe wa Morena, woo ka wona a tlago fenya Siria. O swanetše go lwa le Basiria kua Afeke go fihlela o ba fediša.” Ke moka Elisha a botša kgoši gore a tšee mesebe yela ye mengwe a tie fase ka yona. Kgoši a tia fase ka yona gararo, gomme a lesa. Taba yeo ya befediša Elisha, gomme a re go yena: “O be o swanetše go ba o teile fase gahlano goba gatshela, ke moo o bego o tla fenyetša Basiria sa ruri; eupša bjale o tla ba fenya gararo fela.” Elisha a hwa gomme a bolokwa. Ngwaga wo mongwe le wo mongwe makoko a bahlakodi ba Bamoaba a be a šwahlela naga ya Israele. Ya re ka letšatši le lengwe batho ba bangwe ba Israele ba sa boloka mohu, ba bona le lengwe la makoko ao. Ba lahlela setopo sela ka lebitleng la Elisha gomme ba tšhaba. Ge setopo sela se seno kgwatha mašapo a Elisha, monna yola a boela a phela gomme a emelela. Kgoši Hasaele wa Siria o ile a gatelela Baisraele nakong ka moka ya pušo ya Joahase, eupša Morena a ba šokela mme a ba gaugela. A se ke a ba lesa ba fedišwa, gomme a ba thuša ka baka la kgwerano ya gagwe le Abrahama le Isaka le Jakobo. Ga se a ka a lahla setšhaba sa gagwe go fihlela le bjale. Ge Kgoši Hasaele wa Siria a hwile, morwa wa gagwe, Benhadade, a mo hlatlama bogošing. Ke moka Kgoši Joase wa Israele a fenya Benhadade gararo, gomme a thopolla metse yela e bego e thopilwe ke Benhadade nakong yela ya pušo ya Joahase, tatagoJoase. Ngwageng wa bobedi wa ge Joase, morwa wa Joahase, e le kgoši ya Israele, Amatsia, morwa wa Joase, e ile ya ba kgoši ya Juda a na le mengwaga ye masome a mabedi a metšo ye e fetšago seatla, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Joadane wa Jerusalema. O be a dira tše di kgahlago Morena, eupša a se ke a swana le Kgoši Dafida, rakgolokhukhu wa gagwe, fela yena a itirela tše di bego di dirwa ke Joase, tatagwe. A se ke a phušola dintotoma tšeo go tšona go bego go khunamelwa medimo ya diswantšho, gomme batho ba no tšwela pele le go dira dihlabelo le go tšhuma diorelo moo. Ge Amatsia a seno tielela bogošing, o ile a bolaya bahlankedi bale ba go bolaya tatagwe. Fela a se ke a bolaya bana ba bona, eupša a phetha se Morena a se laetšego setšhaba melaong ya Moshe ge a re: “Batswadi ba se ke ba bolaelwa melato ye e obilwego ke bana ba bona, le bana ba se ke ba bolaelwa melato ye e obilwego ke batswadi ba bona; motho a bolaelwe fela molato wo o obilwego ke yena mong.” Amatsia o ile a bolaya bahlabani ba dikete tše lesome ba Baedomo kua Moeding wa Letswai; a thopa motse wa Sela ntweng gomme a o rea leina la Jokotiele, leina le e sa lego la wona le lehono. Ka morago Amatsia a roma batseta go Kgoši Joase wa Israele, a mo hlohla gore ba lwe. Eupša Kgoši Joase a mo fetola ka go re: “Mohlašana wa mošwana wa dithaba tša Lebanone o kile wa romela molaetša go mosedere wa moo wa re: ‘Faa morwa wa ka morwediago gore a mo nyale.’ Gwa tla phoofolo ya naga gomme ya gatakanya mošwana wola. Bjale Amatsia, o tloga o fentše Baedomo, ka gona o na le makoko, o a ikgogomoša. Ipshine ka setumo sa gago mme o itulele moo lapeng la gago. Ke ka baka lang o tsoša mpherefere wo o tlago tlišetša wena le batho ba gago mahlomola?” Eupša Amatsia a di tšeiša phefo, ka gona Kgoši Joase a tšwa dira le banna ba gagwe gomme a lwa le yena Bethe-Shemeshe kua Juda. Bajuda ba fenywa, gomme bahlabani ba bona ka moka ba tšhabela malapeng a bona. Joase a thopa Amatsia, a fetela Jerusalema, a kgereša morako wa motse go tloga lesorong la Efraime go fihla Lesorong la Sekhutlong, sebaka sa dimetara tše e ka bago tše makgolo a mabedi. A tšea silibera le gauta ka moka ye a e hweditšego, ditlabakelo ka moka tša ka Tempeleng, le mahumo ka moka a mošate, gomme a di iša Samaria. A tšea le mathopša. Tše dingwe tše Joase a di dirilego, gotee le bogale bja gagwe ge a elwa le Kgoši Amatsia wa Juda, di ngwadilwe mo go Ditaba tša magoši a Israele. Joase o ile a ithobalela le botatagwe, mme a bolokwa mabitleng a mošate motseng wa Samaria, gomme morwa wa gagwe, Jerobeamo, a mo hlatlama bogošing. Kgoši Amatsia wa Juda a phela mengwaga ye mengwe ye lesome le ye mehlano ka morago ga lehu la Kgoši Joase wa Israele. Tše dingwe tše Amatsia a di dirilego di ngwadilwe mo go Ditaba tša magoši a Juda. Jerusalema go ile gwa logwa maanomabe a go bolaya Amatsia, ka gona a tšhabela motseng wa Lakishe, eupša manaba a gagwe a mo lata moo gomme a mmolaya. Setopo sa gagwe sa rwalwa ka koloi ya dipere sa boetšwa Jerusalema, mme a bolokwa mabitleng a botatagwe motseng wa Dafida. Ya ba gona batho ba Juda ba beago Usia, morwagwe wa mengwaga ye lesome le ye e selelago, kgoši. Usia a thopa motse wa Elate gomme a o tsošološa ge tatagwe a hwile. Ngwageng wa lesome le metšo ye mehlano wa ge Amatsia, morwa wa Joase, e le kgoši ya Juda, Jerobeamo, morwa wa Joase wa Israele, e ile ya ba kgoši ya Israele, gomme a buša a le Samaria mengwaga ye masome a mane a motšo o tee. A dira dibe pele ga Morena, a se ke a tlogela dibe tša Kgoši Jerobeamo, morwa wa Nebate, yoo a dirišitšego Israele dibe. A thopa naga ka moka ye e bego e kile ya ba ya Israele, go tloga sefateng sa Hamate go fihlela Lewatleng le le Hwilego. Se e be e le se Morena Modimo wa Israele a se boletšego ka mohlanka wa gagwe, moprofeta Jona, morwa wa Amithai, yo a tšwago Gathe-Hefere. Morena a bona tlaišego ye kgolokgolo ya Baisraele; ka moka ga bona ba be ba tshwenyega gomme go se motho le o tee yo a ka ba thušago. Fela Morena o be a se a rera go fedišetša Baisraele sa ruri, ka gona a ba hlakodiša ka Kgoši Jerobeamo, morwa wa Joase. Tše dingwe tše Jerobeamo a di dirilego, dintwa tša bogale bja gagwe, le ka mokgwa woo a ilego a boetša motse wa Damaskose le wa Hamate go naga ya Israele, ka moka di ngwadilwe mo go Ditaba tša magoši a Israele. Jerobeamo a ithobalela le botatagwe, mme a bolokwa mabitleng a mošate, gomme morwa wa gagwe, Sakaria, a mo hlatlama bogošing. Ngwageng wa masome a mabedi le metšo ye e šupago wa pušo ya Kgoši Jeroboamo wa Israele, Usia, morwa wa Amatsia, e ile ya ba kgoši ya Juda a na le mengwaga ye lesome le ye e selelago, gomme a buša a le Jerusalema mengwaga ye masome a mahlano a metšo ye mebedi. Mmagwe e be e le Jekolia wa Jerusalema. O be a dira tše di kgahlago Morena, go no swana le tatagwe. Eupša dintotoma tšeo go tšona go bego go khunamelwa medimo ya diswantšho a se di phušole, gomme batho ba no tšwela pele le go dira dihlabelo le go tšhuma diorelo fao. Morena a otla Usia ka bolwetši bja letlalo bja go mo tšhilafatša bjo bo ilego bja mo swara go fihlela a ehwa. O be a dula ka ngwakong wa thokwana a lesišitšwe mediro ka moka ya bogoši, Jotamo, morwagwe, e le mohlokomedi wa mošate, a bile a buša naga. Tše dingwe tše Usia a di dirilego di ngwadilwe mo go Ditaba tša magoši a Juda. Usia a ithobalela le botatagwe, mme a bolokwa mabitleng a bona motseng wa Dafida, gomme Jotamo, morwagwe, a mo hlatlama bogošing. Ngwageng wa masome a mararo a metšo ye seswai wa pušo ya Kgoši Usia wa Juda, Sakaria, morwa wa Jeroboamo, ya ba kgoši ya Israele, gomme a buša a le Samaria dikgwedi tše di selelago. Yena, go no swana le ba ba bušitšego pele ga gagwe, a dira dibe pele ga Morena. A se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. Shalume, morwa wa Jabeshe, a loga maanomabe a go bolaya Kgoši Sakaria, gomme a mo hlasela a mmolaya kua Jibleamo, mme a mo hlatlama bogošing. Tše dingwe tše Sakaria a di dirilego di ngwadilwe mo go Ditaba tša magoši a Israele. Ka gona gwa phethega se Morena a bego a se holofeditše Kgoši Jehu ge a re: “Ditlogolo tša gago e tla ba dikgoši tša Israele go fihlela molokong wa bone.” Ngwageng wa masome a mararo a metšo ye senyane wa pušo ya Kgoši Usia wa Juda, Shalume, morwa wa Jabeshe, ya ba kgoši ya Israele, gomme a buša a le Samaria kgwedi e tee. Menaheme, morwa wa Gadi, a tloga Tirtsa a ya Samaria, a hlasela Shalume a mmolaya, gomme a mo hlatlama bogošing. Tše dingwe tše Shalume a di dirilego, gotee le ditaba tša maanomabe a gagwe, di ngwadilwe mo go Ditaba tša magoši a Israele. Ge Menaheme a le tseleng a etšwa Tirtsa, o ile a thuba motse wa Tapuage a fediša badudi ba wona, a ba a senya naga ye e o dikologilego, ka gobane motse woo o ile wa se ke wa ineela go yena. A ba a phula baimana ba gona ka moka dimpa. Ngwageng wa masome a mararo a metšo ye senyane wa pušo ya Kgoši Usia wa Juda, Menaheme, morwa wa Gadi, ya ba kgoši ya Israele gomme a buša a le Samaria mengwaga ye lesome. A dira dibe pele ga Morena, a se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. Mehleng ya gagwe Tiglate-Pilesere, kgoši ya Asiria, a hlasela Israele, gomme Menaheme a mo neela silibera ya dikilokramo tše dikete tše masome a mararo gore a mo thuše go tiiša mmušo wa Menaheme mo nageng. Menaheme a kgobokanya tšhelete yeo ka go gapeletša mohumi yo mongwe le yo mongwe wa Israele go ntšha dipapetlana tša silibera tše masome a mahlano. Ka gona Tiglate-Pilesere a ipoelela nageng ya gabo. Tše dingwe tše Menaheme a di dirilego di ngwadilwe mo go Ditaba tša magoši a Israele. O ile a ithobalela le botatagwe, gomme morwa wa gagwe, Pekagia, a mo hlatlama bogošing. Ngwageng wa masome a mahlano wa pušo ya Kgoši Usia wa Juda, Pekagia, morwa wa Menaheme, ya ba kgoši ya Israele, gomme a buša a le Samaria mengwaga ye mebedi. A dira dibe pele ga Morena, a se ke a tlogela dibe tša Kgoši Jerobeamo, morwa wa Nebate, yo a dirišitšego Baisraele dibe. Molaodi wa madira a Pekagia, e lego Pekage, morwa wa Remalia, a loga maanomabe, a hlasela Pekagia ka sebong sa ka gare sa mošate kua Samaria, a thušwa ke banna ba masome a a fetšago seatla ba Gileade, a mmolaya, gomme a mo hlatlama bogošing. Tše dingwe tše Pekagia a di dirilego di ngwadilwe mo go Ditaba tša magoši a Israele. Ngwageng wa masome a mahlano a metšo ye mebedi wa pušo ya Kgoši Usia wa Juda, Pekage, morwa wa Remalia, ya ba kgoši ya Israele, gomme a buša a le Samaria mengwaga ye masome a mabedi. A dira dibe pele ga Morena, gomme a se ke a tlogela dibe tša Kgoši Jerobeamo yo a dirišitšego Baisraele dibe. Ke ge Pekage e le kgoši ge Tiglate-Pilesere, kgoši ya Asiria, a thopa motse wa Iyone, le wa Abele-Bethe-Maaka, le wa Janoage, le wa Kedeshe, le wa Hatsore, le naga ya Gileade le ya Galilea le naga yohle ya Naftali, gomme a thopa batho ba moo a ba iša Asiria. Ngwageng wa masome a mabedi wa ge Jotamo, morwa wa Usia, e le kgoši ya Juda, Hosea, morwa wa Ela, a logela Kgoši Pekage maanomabe, a mo hlasela, a mmolaya, gomme a mo hlatlama bogošing. Tše dingwe tše Pekage a di dirilego di ngwadilwe mo go Ditaba tša magoši a Israele. Ngwageng wa bobedi wa pušo ya Pekage, morwa wa Remalia, Jotamo, morwa wa Usia, ya ba kgoši ya Juda a na le mengwaga ye masome a mabedi a metšo ye e fetšago seatla, gomme a buša a le Jerusalema mengwaga ye lesome le ye e selelago. Mmagwe e be e le Jerusha, morwedi wa Tsadoko. Jotamo a dira tše di kgahlago Morena, go no swana le Usia, tatagwe. Eupša dintotoma tšeo go tšona go bego go khunamelwa medimo ya diswantšho a se ke a di phušola, mme batho ba no tšwela pele le go dira dihlabelo le go tšhuma diorelo moo go tšona. Ke Jotamo yoo a ilego a aga kgoro ye e lebeletšego leboa ya Tempele. Tše dingwe tše Jotamo a di dirilego di ngwadilwe mo go Ditaba tša magoši a Juda. Mehleng ya gagwe Morena o ile a romela Kgoši Retsine wa Siria le Kgoši Pekage, morwa wa Remalia, go tlo hlasela Juda. Jotamo a ithobalela le botatagwe, gomme a bolokwa mabitleng a bona motseng wa Dafida, mme morwa wa gagwe, Ahase, a mo hlatlama bogošing. Ngwageng wa lesome le metšo ye e šupago wa ge Pekage, morwa wa Remalia, e le kgoši ya Israele, Ahase, morwa wa Jotamo, ya ba kgoši ya Juda a na le mengwaga ye masome a mabedi, gomme a buša a le Jerusalema mengwaga ye lesome le ye e selelago. A se ke a dira tše di kgahlago Morena, bjalo ka rakgolokhukhu wa gagwe, Dafida; eupša yena a itirela tše mpe tše di bego di dirwa ke magoši a Israele. A ba a direla medimo ya diswantšho sehlabelo ka morwa wa gagwe, a etša ditlwaedi tša makgapa tša batho bale Morena a ba rakilego nageng ge Baisraele ba goroga. Ahase a dira dihlabelo, a tšhuma le diorelo dintotomeng tšeo go tšona go bego go khunamelwa medimo ya diswantšho, dithabaneng, le ka fase ga mehlare ka moka ya merithi ye megolo. Kgoši Retsine wa Siria le Kgoši Pekage wa Israele ba hlasela Jerusalema mme ba e dikanetša, eupša ba šitwa ke go fenya Ahase. Ka tšona nako tšeo Kgoši Retsine a thopollela Baedomo motse wa Elate mme a raka Bajuda ba ba bego ba dula moo. Baedomo ba tla ba dula Elate go fihlela le lehono. Ahase a roma batseta go Tiglate-Pilesere, kgoši ya Asiria, gore ba mmotše ba re: “Ke nna mohlanka wa gago le morwa wa gago. Tlaa o ntlhakodiše go kgoši ya Siria le go ya Israele bao ba ntlhaselago.” Ahase a tšea gauta le silibera ka Tempeleng le ka polokelong ya mošate a di romela go kgoši e le seloba. Tiglate-Pilesere a kwana le kgopelo ya Ahase, a ya le madira a gagwe Damaskose, a thopa motse woo, a bolaya Kgoši Retsine gomme a iša batho ba ntshe bothopša kua Kire. Ge Kgoši Ahase a eya Damaskose go Kgoši Tiglate-Pilesere, o ile a bona aletare fao gomme a romela moprista Uria meelo ya yona ya mmakgonthe le seswantšhobopša sa yona ka moo e bego e tloga e le ka gona. Ka gona Uria a aga aletare ye e bego e swana le yona swaniswani, a ba a e fetša pele ga ge Ahase a boa. Ge Ahase a boa Damaskose a hwetša aletare yeo e fedile, gomme a neela dihlabelo tša go tšhungwa ka moka le dikabelo tša bupi godimo ga yona, a tšhela le beine godimo ga yona ya ba kabelo ya seno, a ba a e foka ka madi a dihlabelo tša gagwe tša kagišano. Aletare ye e abetšwego Morena ya mphiri e be e le gare ga aletare ye mpsha le Tempele, ka gona Ahase a e šuthišetša ka lehlakoreng la ka leboa la aletare ya gagwe. Ya ba o laela Uria o re: “Godimo ga aletare ye ya ka ye kgolo o dire dihlabelo tša go tšhungwa ka moka tša mosong le dikabelo tša mantšiboa tša bupi, le dihlabelo tša go tšhungwa ka moka, le dikabelo tša bupi tša kgoši le tša setšhaba, le dikabelo tša seno tša setšhaba. O e foke ka madi a diruiwa tšohle tše go dirwago dihlabelo ka tšona. Eupša ge e le aletare ya mphiri yona o e lese, nna ke tla bona gore ke tla dira eng ka yona.” Uria a dira ka moo kgoši a laetšego ka gona. Kgoši Ahase a ripa diforeime tša dikoloyana tša mphiri tše di bego di šomišwa ka Tempeleng, gomme a tloša dibjana tše di bego di le godimo ga tšona; a tloša le legopo lela la mphiri mekokotlong ya dikgomo tše lesome le tše pedi tša mphiri, a le bea godimo ga madulo a a bego a le agetše ona ka matlapa. Gore a tle a kgahle kgoši ya Asiria a tloša mathudi a a bego a le ka Tempeleng ao kgoši a bego a putla ka go ona ka letšatši la Sabatha, a thiba le mojako wa kgoši wa go tsena ka Tempeleng. Tše dingwe tše Kgoši Ahase a di dirilego di ngwadilwe mo go Ditaba tša magoši a Juda. Ahase a ithobalela le botatagwe, mme a bolokwa mabitleng a bona motseng wa Dafida, gomme morwa wa gagwe, Hiskia, a mo hlatlama bogošing. Ngwageng wa lesome le metšo ye mebedi wa pušo ya Kgoši Ahase wa Juda, Hosea, morwa wa Ela, ya ba kgoši ya Israele, gomme a buša a le Samaria mengwaga ye senyane. A dira dibe pele ga Morena, eupša e sego go swana le magoši a a bušitšego Israele pele ga gagwe. Kgoši Salmanasere wa Asiria a mo tšwela dira; Hosea a ineela go yena gomme a mo ntšhetša diloba ngwaga ka ngwaga. Fela ka ngwaga wo mongwe Hosea a roma batseta go So, kgoši ya Egepeta, a mo kgopela gore a mo thuše gore a se hlwe a bušwa ke Salmanasere, gomme a napa a lesa go ntšha diloba tšela tša ngwaga ka ngwaga. Ge Salmanasere a ekwa taba tšeo, a swara Hosea a mo tswalelela kgolegong. Ke moo Salmanasere a hlasetšego Israele gomme a dikanetša Samaria. Ngwageng wa boraro wa go dikanetšwa fao, wo e bego e le ngwaga wa senyane wa pušo ya Hosea, kgoši ya Asiria ya thopa Samaria, ya iša Baisraele bothopša kua Asiria, ya dudiša ba bangwe ba bona motseng wa Halage, ba bangwe nokeng ya Habore, seleteng sa Gosane, gomme ba bangwe ya ba dudiša metseng ya Media. Samaria e ile ya wa ka gobane Baisraele ba be ba dira dibe pele ga Morena Modimo wa bona yo a ba hlakodišitšego go kgoši ya Egepeta mme a ba ntšha Egepeta. Ba be ba khunamela medimo ye mengwe, ba latela ditlwaedi tša ditšhaba tše Morena a di rakilego ge setšhaba sa gagwe se goroga, ba bile ba ithuta mekgwa ye mebe ya magoši a Israele. Baisraele ba be ba bolela Morena Modimo wa bona gampe. Ba ikagela dintotoma tšeo go tšona ba bego ba khunamela medimo ya diswantšho metseng ya bona ka moka, go tloga ka metsana ya ditora tša tlhapetšo go fihla ka metse ye megolo ye e ageleditšwego ka merako. Ba hloma dikokwane tša borapedi tša maswika le dikota tša borapedi mebotong yohle ye e phagamego, le ka fase ga mehlare yohle ya merithi ye megolo, gomme ba tšhuma diorelo dintotomeng tšohle tšeo go tšona ba bego ba khunamela medimo ya diswantšho, ba dira tše di bego di dirwa ke ditšhaba tšela Morena a go di ntšha nageng. Ba rumola Morena ka ditiro ka moka tša bona tše mpe, gomme ba tshela molao wa Morena wo o rego ba se ke ba khunamela medimo ya diswantšho. Morena o be a rometše baboni le baprofeta ba gagwe ka moka gore ba botše Baisraele le Bajuda ba re: “Sokologang ditseleng tša lena tše mpe gomme le phetheng ditaelo tša ka tše di lego melaong ye ke e filego borakgolokhukhu ba lena, ka ba ka e fetišetša go lena ka bahlanka ba ka, baprofeta.” Eupša ba se ke ba theetša; ba ngangabala bjalo ka borakgolokhukhu ba bona, bale ba go se ke ba tshepha Morena Modimo wa bona. Ba gana ditaelo tša gagwe le kgwerano ye a e dirilego le borakgolokhukhu ba bona, le gona ba se theetše ge a ba kgala. Ba khunamela medimo ya diswantšho ya lefeela gomme le bona ya ba mafeela, ba latela mekgwa ya ditšhaba tše di bapilego le bona, ba tshela taelo ya Morena ye e rego ba se ke ba dira tše ba di dirago. Ba tshela melao ka moka ya Morena Modimo wa bona, ba ba ba bopa dipowana tše pedi ka tshipi, ba di khunamela; ba betla le kota ya borapedi, ba obamela dinaledi, ba khunamela le Baale. Ba direla medimo e šele dihlabelo ka barwa le barwedi ba bona; ba ya go dinoge le go didupe, gomme ba ikgafela go dira tše mpe pele ga Morena, mme ka go dira bjalo ba mo rumola. Morena a galefela Baisraele gomme a ba raka pele ga gagwe, a šadiša fela mmušo wa Juda. Eupša le sona setšhaba sa Juda se be se sa phethe melao ya Morena Modimo wa sona; ba ile ba tšea mekgwa yela ya batho ba Israele. Morena a lahla Baisraele ka moka, a ba kokobetša mme a ba gafela diatleng tša bašwahledi go fihlela ge a ba raka pele ga gagwe. Ka morago ga ge Morena a kgaogantše Baisraele le lapa la bogoši la Dafida, Baisraele ba ile ba bea Jerobeamo, morwa wa Nebate, kgoši ya bona. Jerobeamo a ba aroša go Morena gomme a ba diriša dibe tše mpempe. Ba latela Jerobeamo gomme ba se ke ba tlogela dibe tše a bego a di dira, go fihlela ge Morena a ba raka pele ga gagwe bjalo ka ge a be a ba boditše ka bahlanka ba gagwe, baprofeta. Ka gona batho ba Israele ba išwa bothopša kua Asiria moo ba sa dulago gona le lehono. Kgoši ya Asiria ya tšea batho motseng wa Babilone, le wa Kuta, le wa Aba, le wa Hamate, le wa Sefarabaime ya ba dudiša metseng ya Samaria, moo go bego go dutše Baisraele ba ba bego ba thopilwe. Ba tšea metse yeo gomme ba dula go yona. Ge ba thoma go dula moo, ba se ke ba boifa Morena, ka gona a romela ditau mme tša bolaya ba bangwe ba bona. Kgoši ya Asiria ya botšwa gore batho ba a ba dudišitšego metseng ya Samaria ga ba tsebe ka moo ba swanetšego go direla Modimo wa naga yeo ka gona, ka fao Modimo woo o rometše ditau mme di a ba bolaya. Ka gona kgoši ya ntšha taelo ya go re: “Tšeang yo mongwe wa baprista ba re ba thopilego kua le mmušetše gona gore a yo dula gona a rute batho ba fao ka moo Modimo wa naga yeo a swanetšego go direlwa ka gona.” Ka gona moprista yo mongwe yo a bego a thopilwe Samaria a tloga a yo dula Bethele fao a ilego a ruta batho ka mo Morena a swanetšego go khunamelwa ka gona. Eupša merafe ye e bego e dutše Samaria ya tšwela pele le go itirela medimo ya yona ya diswantšho, gomme ba e bea ka ditempelaneng dintotomeng tša go agwa ke Baisraele, tšeo go tšona go bego go khunamelwa medimo ya diswantšho. Morafe wo mongwe le wo mongwe wa itirela medimo ya wona ya diswantšho motseng wo o bego o dula go wona: Batho ba Babilone ba dira diswantšhobopša tša modimo wa go bitšwa Sukote-Benote; batho ba Kuta ba dira tša Nergale; ba Hamate tša Ashima; ba Aba tša Nibihase le tša Tartake; gomme ba Sefarabaime bona ba direla medimo ya bona, Adrameleke le Anameleke, dihlabelo ka bana ba bona. Batho ba le bona ba be ba boifa Morena, gomme ba no ikgethela mang le mang gare ga bona gore e be moprista wa go hlankela medimo ya diswantšho ditempelaneng tša dintotomeng, le go ba direla dihlabelo moo. Ka gona ba be ba khunamela Morena ba bile ba khunamela medimo ya bona go ya ka ditlwaedi tša ditšhaba tše ba bego ba etšwa go tšona. Le lehono ba sa latela ditlwaedi tšeo tša bona tša kgale. Ga ba khunamele Morena goba ba phetha melao le ditaelo tše a di filego ditlogolo tša Jakobo yo a mo reetšego leina la Israele. Morena o be a dirile kgwerano le bona mme a ba laetše a re: “Le se ke la khunamela medimo ye mengwe; le se ke la e obamela, goba la e rapela, goba la e direla dihlabelo. Le khunameleng nna, Morena, yo ke le ntšhitšego Egepeta ka maatla a magolo le go tia ga ka; le obameleng nna gomme le direleng nna dihlabelo. Ka mehla le phetheng melao le ditaelo tše ke le ngwaletšego tšona. Le se ke la khunamela medimo ye mengwe, le gona le se ke la lebala kgwerano ye ke e dirilego le lena. Le se ke la khunamela medimo ye mengwe, eupša le khunameleng nna fela, Morena Modimo wa lena, mme ke tla le hlakodiša manabeng a lena.” Fela ba ile ba se ke ba theetša, ba no tšwela pele le go latela ditlwaedi tša bona tša kgale. Ka gona batho bao ba be ba boifa Morena, ba bile ba khunamela medimo ya bona ya diswantšho; gomme le lehono ditlogolo tša bona di sa tšwela pele le go dira bjalo. Ngwageng wa boraro wa ge Hosea, morwa wa Ela, e le kgoši ya Israele, Hiskia, morwa wa Ahase, ya ba kgoši ya Juda a na le mengwaga ye masome a mabedi a metšo ye e fetšago seatla, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Abi, morwedi wa Sakaria. Hiskia a dira tše di kgahlago Morena, a swana le Kgoši Dafida, rakgolokhukhu wa gagwe. A phušola dintotoma tšeo go tšona go bego go khunamelwa medimo ya diswantšho, a kgereša dikokwane tša maswika tša borapedi, a rema le dikota tša borapedi. A pšhatlaganya le noga yela ya mphiri ye e bego e dirilwe ke Moshe e bitšwa Nehushtane. Go fihlela ka nako yeo setšhaba sa Israele se be se e hlompha ka go e tšhumela diorelo. Hiskia yena a bota Morena Modimo wa Israele; Juda e be e se ya ka ya ba le kgoši ye e swanago le yena pele ga gagwe, mme le ka morago ya se ke ya ba gona. Yena o ile a kgomarela Morena a se ke a mo tlogela le gatee, a phetha ditaelo ka moka tše Morena a bego a di file Moshe. Ka gona Morena a ba le yena, gomme a atlega go tšohle tše a di dirago. A tsogela kgoši ya Asiria maatla gomme a gana go ineela go yona. A fenya Bafilista gomme a šwahlela metsana ya bona ya ditora tša tlhapetšo le metse ye megolo ye e ageleditšwego ka merako, go ba go yo fihla le Gasa le tikologong ya yona. Ngwageng wa bone wa pušo ya Hiskia, wo e bego e le ngwaga wa bošupa wa ge Hosea e le kgoši ya Israele, Kgoši Salmanasere wa Asiria o ile a hlasela Israele gomme a dikanetša motse wa Samaria. Ngwageng wa boraro a o thopa; woo e be e le ngwaga wa boselela wa pušo ya Hiskia, e bile e le ngwaga wa senyane wa pušo ya Hosea. Kgoši ya Asiria ya thopa Baisraele ya ba iša Asiria, gomme ya dudiša ba bangwe ba bona motseng wa Halage, ba bangwe nokeng ya Habore, seleteng sa Gosane, gomme ba bangwe ya ba dudiša metseng ya Media. Motse wa Samaria o ile wa wa ka gobane Baisraele ba be ba sa theeletše Morena Modimo wa bona, eupša ba be ba lahla kgwerano ye a bego a e dirile le bona, gomme ba nyatša melao ka moka ye e bego e beilwe ke Moshe, mohlanka wa Morena. Ba be ba hlokomologile melao yeo, ba sa e phethe. Ngwageng wa lesome le metšo ye mene wa pušo ya Kgoši Hiskia, Sanheribe, kgoši ya Asiria, a hlasela metse ya Juda ye e ageleditšwego ka merako, gomme a e thopa. Hiskia a roma batseta go Sanheribe, yo a bego a le Lakishe, gore ba mmotše ba re: “Ke go phošeditše; hle, gomela morago, gomme ke tla go loba ka se o se nyakago.” Kgoši a ba fetola ka go re Hiskia a mo romele silibera ya dikilokramo tše dikete tše senyane, le gauta ya dikilokramo tše makgolo a senyane. Hiskia a mo romela silibera ka moka ya ka Tempeleng le ya polokelo ya mošate; a ba a gopa le gauta ya mamating a Tempele le gauta ye yena mong a bego a manegile dikota tša mejako ka yona, a e romela go Sanheribe. Kgoši ya Asiria ya romela madira a mantši a tloga Lakishe go yo hlasela Hiskia kua Jerusalema; a be a laolwa ke balaodi ba gagwe ba bararo ba bagologolo. Ge ba fihla Jerusalema ba dula tseleng ye e bapetšego le tšhemo ya mohlatswi wa mašela, kgauswi le mokero wo o tlišago meetse a a tšwago letshaneng la ka godimo. Ke moo ba romilego batho go yo bitša Kgoši Hiskia, gomme bahlankedi ba bararo ba gagwe ba tšwa go yo ba gahlanetša. Bona e be e le Eliakime, morwa wa Hilkia, yo a bego a hlokometše mošate, le Shebna, mongwaledi wa mošate, le Joage, morwa wa Asafo, mongwaledi wa mmušo. Yo mongwe wa balaodi ba Baasiria a ba botšiša a re: “Kgošikgolo, kgoši ya Asiria, o nyaka go tseba gore ke eng se se dirago gore Hiskia a itshephe ka mokgwa wo. A Hiskia o gopola gore a ka boledišana le rena mola a swanetše go loga maano a ntwa le go rapa madira a gagwe? A o be a gopola gore o tla thušwa ke mang ge a be a tsogela Asiria maatla? O tshephile Egepeta gore e tla mo thuša, eupša go bota Egepeta go bjalo ka ge motho a ka tšea lehlaka a hlotlela ka lona – le tla thokgega la mo hlaba seatla. Kgoši ya Egepeta e bjalo ge motho a e tshephile.” Molaodi yoo wa Moasiria a tšwela pele a re: “Kgane le nyaka go mpotša gore le tshephile Morena Modimo wa lena? A ga se tšona dintotoma tše a khunamelwago go tšona le dialetare tša gagwe tše yena Hiskia a di kgerešitšego ge a botša batho ba Juda le ba Jerusalema gore ba direle fela aletareng ye e lego Jerusalema? Ke nyaka gore a phegišane le mong wa ka, kgoši ya Asiria, ka tsela ye: Ke tla mo fa dipere tše dikete tše pedi ge a ka kgona go ba le banna ba bakao ba ba tlago di namela! A bjale a ka kgona bjang go fenya molaodi yo monnyannyane ka maemo wa Moasiria? Gomme le ge go le bjalo o sa botile Egepeta gore e mo romele dikoloi tša ntwa le banamedi ba dipere! A o gopola gore ke hlasetše motse wo go tlo o senya e se thato ya Morena? Ke Morena ka boyena yo a mpoditšego gore ke hlasele naga ye ke e senye.” Eliakime le Shebna le Joage ba re go molaodi yoo: “Hle, mong wa rena, bolela le rena ka Searamo. Re a se tseba. O se ke wa bolela Seheberu; batho ba ba lego godimo ga morako ba a go kwa.” Molaodi yoo a ba fetola a re: “A le gopola gore mong wa ka o nthomile go tlo botša lena le mong wa lena fela dilo tše? Aowaowaa, ke botša le batho bale ba dutšego godimo ga morako, bao, bjalo ka lena, ba tlago ba ba ja mantle a bona, ba nwa le mehlapologo ya bona.” Ke moo molaodi a emeletšego gomme a goeletša ka Seheberu a re: “Theetšang se kgošikgolo, kgoši ya Asiria, e le botšago sona! O le botša gore le se ke la lesa Hiskia a le lahletša. Hiskia a ka se le phološe. Le gona le se ke la mo lesa a le goketša gore le tshephe Morena ge a re: ‘Ruri, Morena o tla re phološa, le gona motse wo o ka se gafelwe diatleng tša kgoši ya Asiria.’ Le se ke la theetša Hiskia. Kgoši ya Asiria e le laela gore le tšwe motseng gomme le ineele. Ka moka ga lena le tla dumelelwa go ja diterebe tše di tšwago merareng ya lena, le mago a mego ya lena, le go nwa meetse a didiba tša lena, go fihlela ge kgoši a le khudušetša nageng ye e swanago le ya lena kudu, moo go lego dirapa tša merara gore le be le beine, le mabele gore le be le bogobe; ke naga ya makhura a mohlware le todi ya dinose. Ge le ka dira se a se bolelago, le ka se hwe, le tla phela. Le se ke la theetša Hiskia ge a le fora a re: ‘Morena o tla re hlakodiša.’ Na medimo ya dinaga tše dingwe yona e kile ya phološa dinaga tša yona go kgoši ya Asiria? A e kae bjale medimo ya Hamate le ya Arpade? E kae medimo ya Sefarabaime le ya Hena le ya Aba? A go na le medimo ye e kilego ya phološa motse wa Samaria? Ke ofe modimo wo o kilego a phološa naga ya wona go kgoši ya rena? Bjale go ka kgonega bjang gore Morena a phološe Jerusalema?” Batho ba no ikhomolela bjalo ka ge Kgoši Hiskia a be a ba boditše, ba se ke ba fetola. Ke moo Eliakime le Shebna le Joage ba gagotšego diaparo tša bona ba nyamile, gomme ba ya ba begela kgoši se molaodi yola wa Asiria a se boletšego. Ge Kgoši Hiskia a ekwa ditaba tšeo, a gagola diaparo tša gagwe ka manyami, a apara diaparo tša go ilela, gomme a ya Tempeleng ya Morena. A roma Eliakime, mohlankedi yo a bego a hlokometše mošate, le Shebna, mongwaledi wa mošate, le baprista ba bagolo go moprofeta Jesaya, morwa wa Amotse. Le bona ba be ba apere diaparo tša go ilela. A ba laela gore ba botše Jesaya ba re: “Lehono ke letšatši la tlalelo; re a otlwa gomme re a gobošwa. Re swana le mosadi yo a batametšego go belega, eupša a fedile maatla. Kgoši ya Asiria e rometše molaodi wa yona yo mogolo go tlo roga Modimo yo a phelago. Nke Morena Modimo wa gago a kwe maroga a gomme a otle bao ba a boletšego. Ka gona re rapelele go Modimo, rena mašaledi a Bajuda.” Ge Jesaya a seno kwa molaetša wa Kgoši Hiskia, a mo fetola ka go re Morena o re: “O se ke wa tšhošwa ke mantšu ao Baasiria ba nkgobošitšego ka ona. Ke tla dira gore kgoši ya Asiria e kwe pego ye e tlago e tlaletša, mme ya boela nageng ya gaboyona, gomme ka dira gore e bolawe moo.” Molaodi yola wa Moasiria a kwa gore kgoši ya gabo e tlogile Lakishe gomme e lwa le ba motse wa Libna; ka gona a ya moo go yo bolela le yena. Kgoši ya Baasiria ya kwa gore madira a Baegepeta a tseleng go tlo ba hlasela, mme a etilwe pele ke Kgoši Tirihaka wa Etopia. Ka gona yena a roma batseta ka lengwalo go Kgoši Hiskia wa Juda, a re go yena: “Modimo yo o mo tshephilego o go boditše gore Jerusalema e ka se gafelwe diatleng tša ka, fela o se ke wa forwa ke Modimo yoo wa gago. O kwele ka bowena tše magoši a Asiria a di dirilego dinaga ka moka – a sentše gohle! A o gopola gore wena o ka phologa? Borakgolokhukhu ba ka ba fedišitše motse wa Gosane, wa Harane, le wa Retsefo, ba bolaya batho ba Edene ba ba bego ba dula Telasare, mme le o tee wa medimo ya bona a se kgone go ba phološa. A kae magoši a motse wa Hamate, wa Arpade, wa Sefarabaime, wa Hena, le wa Aba?” Kgoši Hiskia a tšea lengwalo leo go batseta, a le bala. Ke moka a ya Tempeleng, a le phutholla moo pele ga Morena, gomme a rapela a re: “Wena Morena Modimo wa Israele, o dutšego setulong sa gago sa bogoši ka godimo ga bakerubi, ke wena o nnoši o lego Modimo, o bušago mebušo ka moka ya lefase. O hlodile legodimo le lefase. Bjale, Morena, lebelela tše di re hlagelago. Theetša dilo ka moka tše Sanheribe a go rogago ka tšona, wena Modimo yo a phelago. Ke therešo, Morena, gore magoši a Asiria a fedišitše ditšhaba le dinaga tša tšona, a tšhuma medimo ya tšona; a kgona go e senya ka ge e be e se medimo le gatee, eupša e le dibetlwa tša kota le tša leswika tše di dirilwego ke batho. Bjale Morena Modimo wa rena, re phološe go Baasiria gore mebušo ka moka ya lefase e tle e tsebe gore ke wena o nnoši, Morena, o lego Modimo.” Ke moo Jesaya a romilego motseta go Kgoši Hiskia, a mmotša gore Morena o kwele thapelo ya kgoši gomme o re: “Sione e a go nyatša, wena Sanheribe, e sema nke e go kwela bohloko ge o boela morago. *** A o be o roga mang, o goboša mang? Ke mang yo o bego o mo goelela, o mo hlohla? Na tšeo o be o di dira nna, Mokgethwa wa Israele? O romile batseta ba gago gore ba tle ba ikgantšhe pele ga ka ba re: ‘Ka makoloikoloi a ka a ntwa ke nameletše godimodimo ga dithaba, mafelelong a dithaba tša Lebanone. Ke remile mesedere ye meteleletelele le mephaene ye mebotsebotse, ka tsenelela garegare ga sethokgwa. Nna ke epile didiba, ka nwa meetse a dinaga di šele. Maoto a ka a gatakile noka ya Naele a e omiša.’ “A ga se wa ka wa kwa gore ke beakantše taba tšeo kgale, ke kgalekgale ke di rerile? Bjale ke di phethagaditše; ke go file maatla a go fetoša metse ye e ageleditšwego ka merako mekgobo ya thogorogo. Batho ba ba bego ba dula go yona ba ile ba hlephiša matsogo; ba tšhoga mme ba lewa ke dihlong. Ba swana le dimelana tšhemong, goba bjanyana bjo botalana tlhakeng ge bo tšhungwa ke phefo ye e fišago ya bohlabela. “Fela ke tseba se sengwe le se sengwe mabapi le wena; ke tseba se o se dirago le mo o yago ntshe. Ke tseba ka moo o ntukelago bogale ka gona. Ke kwele bogale bjoo le boikgogomošo bja gago, gomme bjale ke tla go tsenya mogala nkong le lepheko ka ganong, ka go gomiša ka yona tsela yela o tlilego ka yona.” Ke moo Jesaya a itšego go Kgoši Hiskia: “Sešupo sa tše di tlago direga sese: Lenyaga le išago le tla ja mabele a a imelelago ka boona, eupša ka ngwaga wa boraro le tla kgona go ipšalela mabele la ba la tla la a buna, la bjala merara la ba la tla la ja dienywa tša yona. Mašaledi a Juda a tla boela a tseneletša medu fase mme a enywa dienywa. Go tla ba le mašaledi Jerusalema le baphologi thabeng ya Sione, ka gobane Morena o ikemišeditše go phethagatša seo. “Tše Morena a di boletšego mabapi le kgoši ya Asiria šedi: ‘A ka se tsene mo motseng wo goba a o thunya le ka mosebe o tee. Ga go bahlabani ba ba tlago tla motseng wo ba swere dikotse, le gona ga go madira a a tlago kgobela ntotoma ya mobu ya go o hlasela. O tla boela morago ka yona tsela ye a tlilego ka yona, eupša mo motseng wo a ka se tsene. Ke realo, nna, Morena. Ke tla phemela motse wo mme ka o phološa, gore ke tle ke hlomphiwe, le gore ke tle ke phethe se ke se tshephišitšego mohlanka wa ka, Dafida.’ ” Bošegong bjoo morongwa wa Morena a ya mešašeng ya Baasiria mme a bolaya bahlabani ba dikete tše lekgolo le tše masome a seswai le tše tlhano. Ka mahube a letšatši le le latelago ba be ba rapaletše moo, ka moka e le ditopo! Ke moo kgoši ya Asiria, Sanheribe, a gomilego a boela Ninibe. Ka letšatši le lengwe ge a sa rapela ka tempeleng ya modimo wa gagwe, Nisroko, barwa ba gagwe, Adrameleke le Saretsere, ba mmolaya ka ditšhoša, gomme ba tšhabela nageng ya Ararate. Morwa wa gagwe yo mongwe, Esarhadone, a mo hlatlama bogošing. Mehleng yeo Kgoši Hiskia a swarwa ke bolwetši gomme a nyako hwa. Moprofeta Jesaya, morwa wa Amotse, a ya go yena a re: “Morena o re: ‘Beakanya tša lapa la gago, ka gobane o ka se fole; o tla hwa.’ ” Hiskia a phekgoga a lebelela lebotong gomme a rapela a re: “Hle, Morena, gopola gore ke go hlanketše ka potego le botshephegi, le gore ka mehla ke dirile tše o bego o nyaka ke di dira.” Gomme a thoma go lla gabohloko. Jesaya a tloga go kgoši, eupša ya re pele ga ge a putla ka kgorong ya ka gare ya mošate, Morena a mmotša gore a boele go Hiskia, mmuši wa setšhaba ba Morena, a re go yena: “Nna, Morena, Modimo wa rakgolokhukhu wa gago, Dafida, ke kwele thapelo ya gago mme ke bone megokgo ya gago. Ke tla go fodiša, gomme ka letšatši la boraro o tla ya Tempeleng. Ke tla go phediša mengwaga ye mengwe ye lesome le metšo ye mehlano. Ke tla hlakodiša wena le motse wo wa Jerusalema go kgoši ya Asiria. Ke tla šireletša motse wo gore ke tle ke godišwe, le gore ke tle ke phethe se ke se tshephišitšego mohlanka wa ka, Dafida.” Ka morago Jesaya a botša bahlokomedi ba kgoši gore ba tšee sekgomaretši sa phaphathi ye e dirilwego ka mago a a omišitšwego, ba se phare sekakung sa kgoši, gomme kgoši o tla fola. Kgoši Hiskia a mmotšiša a re: “A sešupo ke eng sa gore Morena o tla mphodiša, le gore ka letšatši la boraro ke tla kgona go ya Tempeleng?” Jesaya a mo fetola a re: “Morena o tla go laetša sešupo sa gore yena o tla phetha se a se boletšego. A o nyaka gore morithi wo o lego mo manamelong a o ye pele dikgato tše lesome goba o ye morago dikgato tše lesome?” Hiskia a mo fetola a re: “Ga go thata go dira gore morithi o ye pele dikgato tše lesome! A o boele morago dikgato tše lesome.” Jesaya a rapela Morena, gomme Morena a dira gore morithi o boele morago dikgato tše lesome manamelong ao a bego a agilwe ke Kgoši Ahase. Yona mehleng yeo kgoši ya Babilonia, Merodaka-Baladane, morwa wa Baladane, a kwa gore Kgoši Hiskia o be a babja. Ka gona a mo ngwalela lengwalo a ba a mo romela le mpho ka batseta. Hiskia a amogela batseta bao gomme a ba laetša polokelo ya mahumo a gagwe ka moka ye e bego e boloketše silibera le gauta le dikhanakhana le dinkgabose le dibetša tša ntwa le dilo ka moka ka mengwakong ya gagwe ya polokelo. Gwa se ke gwa ba le selo ka ngwakong wa kgoši le mmušong wa gagwe ka moka se a sa ba laetšego sona. Ke moo moprofeta Jesaya a ilego go Kgoši Hiskia a mmotšiša a re: “A banna bale ba tšwa kae, le gona ba go boditše eng?” Hiskia a mo fetola a re: “Ba tšwa nageng ya kgole, Babilonia.” Jesaya a mmotšiša a re: “A ba boneng mo mošate?” Hiskia a mo fetola a re: “Ba bone se sengwe le se sengwe. Ga go se ke sego ka ba laetša sona ka mengwakong ya ka ya polokelo.” Ke moo Jesaya a itšego go kgoši: “Morena o re nako e etla yeo ka yona se sengwe le se sengwe mo mošate, ga gago, e lego tšohle tše borakgolokhukhu ba gago ba di bolokilego go fihlela lehono, di tlago thothelwa Babilonia. Go ka se šadišwe selo. Mo go ditlogolo tša gago go tla thopša ba bangwe gomme ya ba baamogwabonna ba go šoma ngwakong wa kgoši ya Babilonia.” Kgoši Hiskia o ile a gopola gore se Jesaya a se bolelago se šupa gore go tla ba le khutšo le polokego nakong ya ge yena Hiskia a sa phela, ka gona a mo fetola a re: “Taba ye o mpoditšego yona e etšwa go Morena e lokile.” Tše dingwe tše Kgoši Hiskia a di dirilego, ditiro tšohle tša bogale bja gagwe, le ka moo a agilego letamo a ba a epa mokero wa meetse gore o tsenye meetse ka motseng, ka moka di ngwadilwe mo go Ditaba tša magoši a Juda. Hiskia a ithobalela le botatagwe, gomme Manase, morwa wa gagwe, a mo hlatlama bogošing. Manase o be a na le mengwaga ye lesome le metšo ye mebedi ge e eba kgoši ya Juda, gomme a buša a le Jerusalema mengwaga ye masome a mahlano a metšo ye mehlano. Mmagwe e be e le Heftsiba. Manase a latela ditlwaedi tša makgapa tša ditšhaba tše Morena a di rakilego nageng ge setšhaba sa gagwe se goroga; ka go dira bjalo a dira dibe pele ga Morena. A tsošološa dintotoma tšela go tšona go bego go khunamelwa medimo ya diswantšho tšela Hiskia, tatagwe, a bego a di phušotše; a aga dialetare tšeo go tšona go bego go khunamelwa Baale, a ba a betla kota ya borapedi, a etša Kgoši Ahaba wa Israele. Le gona Manase o be a obamela dinaledi, a di khunamela. A aga dialetare tša medimo e šele ka Tempeleng, felo mola Morena a itšego ke moo a swanetšego go khunamelwa gona. Ka dikgorong ka pedi tša Tempele a aga dialetare tšeo go tšona go bego go khunamelwa dinaledi. A dira sehlabelo ka morwa wa gagwe. A šomišana le baloi le didupe, a ba a dirišana le dinoge le ba malopo. A dira dibe ka kudu pele ga Morena, a mo rumola. A hloma seswantšhobetlwa sa modimo wo motshadi, Ashera, ka Tempeleng, felo mola Morena a itšego go Dafida le go Solomone, morwa wa gagwe: “Gona mo Jerusalema, ka mo Tempeleng ye, ke felo fa ke go kgethilego nageng ka moka ya dikgoro tše lesome le tše pedi tša Israele gore ke mo ke swanetšego go khunamelwa gona go ya go ile. Gomme ge setšhaba sa Israele se ka phetha ditaelo tša ka ka moka ka potego, sa phetha le melao yohle ye mohlanka wa ka, Moshe, a ba filego yona, gona nka se ba lese ba lelekwa nageng ye ke e filego borakgolokhukhu ba bona.” Eupša batho ba Juda ba se ke ba theetša Morena, gomme Manase a ba diriša dibe tše kgolo go feta le tšela tša ditšhaba tše Morena a ilego a di fediša nageng yeo ge setšhaba sa gagwe se tsena go yona. Morena a bolela ka bahlanka ba gagwe, baprofeta, a re: “Kgoši Manase o dirile makgapa a, a dira dilo tše mpe go feta tše Bakanana ba bego ba di dira, gomme ka medimo ya gagwe ya diswantšho a diriša batho ba Juda dibe. Ka gona nna, Morena Modimo wa Israele, ke tla tlišetša Jerusalema le Juda mahlomola ao yo mongwe le yo mongwe yo a a kwago a tlago gakgamala. Ke tla otla Jerusalema bjalo ka ge ke otlile Samaria, bjalo ka ge ke otlile Kgoši Ahaba wa Israele le ditlogolo tša gagwe. Ke tla fediša batho ba Jerusalema ka moka, Jerusalema ya šala e se na le selo, e le bjalo ka sebjana se motho a se fadilego a se ribega. Ke tla lahla mašaledi ao a phologilego ka a gafela manabeng a bona ao a tlago ba fenya mme a senya naga ya bona. Setšhaba sa ka ke tla se dira se ka gobane se dirile dibe pele ga ka mme sa nthumola go tloga ka nako yela borakgolokhukhu ba sona ba etšwa Egepeta, go fihlela le lehono.” Ka ntle ga go diriša batho ba Juda dibe pele ga Morena, Manase o ile a bolaya batho ba bantši ba ba se nago molato mo e lego gore mekgotha ya Jerusalema e ile ya tlala madi. Tše dingwe tše Manase a di dirilego, gammogo le dibe tša gagwe, di ngwadilwe mo go Ditaba tša magoši a Juda. Manase a ithobalela le botatagwe, gomme a bolokwa ka serokolong sa mošate, serokolo sa Usa, mme morwa wa gagwe, Amone, a mo hlatlama bogošing. Amone o be a na le mengwaga ye masome a mabedi le metšo ye mebedi ge e eba kgoši ya Juda, gomme a buša a le Jerusalema mengwaga ye mebedi. Mmagwe e be e le Meshulemete, morwedi wa Harutse, wa motse wa Jotoba. O ile a dira dibe pele ga Morena, go no swana le Manase, tatagwe. A dira tšohle tše tatagwe a bego a di dira, a ba a khunamela medimo ya diswantšho ye tatagwe a bego a e khunamela. A furalela Morena, Modimo wa borakgolokhukhu ba gagwe, a nyatša ditaelo tša gagwe. Bahlankedi ba Amone ba ile ba mo logela maanomabe gomme ba mmolaya mošate. Batho ba Juda ba bolaya batho bale ba bolailego Amone, gomme ba bea morwa wa gagwe, Josia, kgoši. Tše dingwe tše Amone a di dirilego di ngwadilwe mo go Ditaba tša magoši a Juda. Amone o ile a bolokwa ka lebitleng la gagwe ka serokolong sa Usa, gomme morwa wa gagwe, Josia, a mo hlatlama bogošing. Josia o be a na le mengwaga ye seswai ge e eba kgoši ya Juda, gomme a buša a le Jerusalema mengwaga ye masome a mararo a motšo o tee. Mmagwe e be e le Jedida, morwedi wa Adaya, wa motse wa Botsekate. Josia o ile a dira tše di kgahlago Morena; a etša rakgolokhukhu wa gagwe, Dafida, ka ditiro, a se ke a phamoga ditseleng tša Dafida. Ngwageng wa lesome le metšo ye seswai wa ge go buša Kgoši Josia, kgoši o ile a roma mongwaledi wa kgoro, Shafane, morwa wa Atsalia, setlogolo sa Meshulamo, Tempeleng a mo laela a re: “Yaa go Moprista yo Mogolo, Hilkia, gomme o mmotše gore a bale tšhelete ye baprista ba ba letilego mojako wa Tempele ba e kgobokantšego go batho. O mmotše gore a tšee tšhelete yeo a e fe banna ba ba hlokometšego go lokišwa ga Tempele. Ba lefe babetli le baagi le babetli ba matlapa, ba be ba reke dikota le matlapa a a betlilwego ao a šomišwago ge ba lokiša Tempele. Banna bao ba hlokometšego modiro ba a botega, ka gona o se ke wa hlwa o tshwenyega ka go ba botšiša ka tšhelete yeo.” Ke moka Hilkia a botša Shafane gore o hweditše puku ya melao ya Morena ka Tempeleng. A mo fa puku yeo gomme Shafane a e bala. Ke moo a boetšego go kgoši, a mmegela a re: “Bahlanka ba gago ba tšere tšhelete yeo e bego e le ka Tempeleng ba e neetše banna ba ba hlokometšego modiro wa go lokiša Tempele.” A ba a re: “Mo ke swere puku ye Hilkia a nneetšego yona.” Ge kgoši a ekwa tše di balwago ka pukung yeo, a gagola diaparo tša gagwe a tshwenyegile, gomme a laela moprista Hilkia, le Ahikamo, morwa wa Shafane, le Akboro, morwa wa Mika, le Shafane, mongwaledi wa kgoro, le Asaya, mohlanka wa kgoši, a re: “Sepelang le yo mpotšišetša, nna le batho ka moka ba Juda, go Morena ka seo puku ye e se rutago. Morena o re tukela bogale ka gobane borakgolokhukhu ba rena ga se ba dira tše puku ye e rego di swanetše go dirwa.” Hilkia, Ahikamo, Akboro, Shafane le Asaya ba ya go mosadi yo a bitšwago Hulda, moprofeta yo a bego a dula karolong ye mpsha ya Jerusalema. Monna wa gagwe, Shalume, morwa wa Tikba, setlogolo sa Hasra, o be a hlokometše diaparo tša ka Tempeleng. Ba mmotša se se diregilego, gomme a ba botša gore ba boele go kgoši, ba fihle ba mmotše gore Morena Modimo wa Israele o re: “Ke tlile go tlišetša Jerusalema le batho ba yona ka moka mahlomola, bjalo ka ge go ngwadilwe ka pukung ye kgoši a e badilego. Ba mphuraletše gomme ba diretše medimo ye mengwe dihlabelo, mme ba nthumotše ka tšohle tše ba di dirilego. Ke tukela Jerusalema bogale gomme bogale bjoo bo ka se fele. Ge e le kgoši yena le mmotše gore nna, Morena Modimo wa Israele, ke re: O theeditše se se ngwadilwego ka pukung, wa ba le pelo ye boleta mme wa ikokobetša pele ga ka, wa gagola diaparo tša gago, wa lla ge o ekwa ka moo ke rego ke tla otla Jerusalema le batho ba yona. Ke tla e dira gore e šiiše, e be felo fao leina la gona batho ba tlago le diriša ge ba rogaka. Eupša ke kwele thapelo ya gago, gomme mahlomola a ke tlago a tlišetša Jerusalema a ka se tle pele o ithobalela le botatago. Ke tla go dira gore o bolokwe ka khutšo.” Banna bao ba boela go Kgoši Josia ba mmotša ditaba tšeo. Kgoši Josia a bitša baetapele ka moka ba Juda le Jerusalema, gomme ba ya Tempeleng mmogo ba na le baprista le baprofeta le batho bohle, ba bagolo le ba bannyane. Kgoši a ba balela ditaba tšohle tša puku ya kgwerano ye e hweditšwego ka Tempeleng. A ema kokwaneng ya magoši mme a dira kgwerano le Morena gore o tla mo hlompha, a phetha melao le ditaelo tša gagwe ka pelo ya gagwe ka moka le ka moya wa gagwe ka moka, le gore o tla dira se kgwerano yeo e se nyakago bjalo ka ge go ngwadilwe ka pukung. Gomme le setšhaba ka moka sa itlema ka kgwerano yeo. Ke moo Josia a laetšego Moprista yo Mogolo, Hilkia, le baprista ba ba mo thušago le baleti ba mojako wa Tempele gore ba ntšhe dilo ka moka ka Tempeleng tše di bego di šomišwa ge go khunamelwa Baale, le modimo wo motshadi, Ashera, le dinaledi. Kgoši a tšhuma dilo tšeo ka moka ka ntle ga motse ka moeding wa Kidrone, mme a laela gore melora yeo e yo tšhollelwa Bethele. Baprista bao magoši a Juda a bego a ba beile gore ba dire dihlabelo dintotomeng tšeo go tšona go bego go khunamelwa medimo ya diswantšho metseng ya Juda le tikologong ya Jerusalema a ba ntšha modirong – baprista ka moka ba ba bego ba direla Baale le letšatši le ngwedi le dinaledi tšohle dihlabelo. A tloša seswantšhobetlwa sa modimo wo motshadi, Ashera, Tempeleng, a se ntšha motseng a se iša moeding wa Kidrone, a se tšhuma, a se šila ya ba lerole mme a le gaša mabitleng a setšhaba. A phušola diphapoši tša ka Tempeleng tšeo ka go tšona go bego go dula digwebakathobalo tša banna tša ka tempeleng. Ke gona ka moo basadi ba bego ba loga diaparo tše di bego di šomišwa tirelong ya Ashera. A tliša baprista ba ba bego ba le metseng ya Juda Jerusalema, gomme nageng ka moka a tšhilafatša dintotoma tše ba bego ba dira dihlabelo go tšona metseng, go tloga Geba go yo fihla Beresheba. Le tše di bego di le dikgorong lesorong la Joshua, ramotse, la ka letsogong la nngele la kgoro ye kgolo ge motho a tsena motseng, a di phušola. Baprista bao ba ile ba se ke ba dumelelwa go dira mošomo wa boprista ka Tempeleng, eupša dinkgwa tše di se nago komelo ba be ba ka di ja le baprista ba bangwe. Kgoši Josia a tšhilafatša le Tofete, lefelo la tirelo la modimo wa seswantšho ka moeding wa Bene-Hinomo, gore go se ke gwa hlwa go eba le motho yo a direlago modimo Mologo sehlabelo sa go tšhungwa ka moka ka morwa goba morwedi wa gagwe. A tloša le dipere tšeo magoši a Juda a bego a di neetše letšatši, gomme a tšhuma dikoloi tše di bego di šomišwa tirelong yeo. Tšona di be di le ka kgorong ya Tempele lesorong kgauswi le ngwakwana wa Netane-Meleke, mohlankedi yo mogolo. Kgoši Josia a kgereša dialetare tše magoši a Juda a bego a di agile tlhakeng ya mošate godimo ga phapoši ya ka godimo ya Kgoši Ahase, gotee le dialetare tše di bego di agilwe ke Kgoši Manase ka dikgorong ka dipedi tša Tempele; a pšhatlaganya dialetare tšeo ya ba thogorogo, gomme a e tšhollela ka moeding wa Kidrone. Josia a tšhilafatša dialetare tše Kgoši Solomone a bego a di agile ka bohlabela bja Jerusalema, ka borwa bja Thaba ya Mehlware, e le tša tirelo ya medimo ya bohlola ya diswantšho – Astarte, modimo wo motshadi wa Sidone, Kemoshe, modimo wa Moaba, le Milkomo, modimo wa Amone. Kgoši Josia a pšhatlaganya dikokwane tša borapedi tša maswika, a rema dikota tša borapedi, gomme felo mo di bego di hlomilwe gona a go khupetša ka mašapo a batho. Josia a phušola ntotoma yeo go yona go bego go khunamelwa medimo ya diswantšho kua Bethele ye e bego e agilwe ke Kgoši Jerobeamo, morwa wa Nebate, yo a dirišitšego Israele dibe. Josia a kgereša aletare ya gona, a pšhatlaganya matlapa a yona, mme a a šilaganya ya ba lerole; a ba a tšhuma le kota ya borapedi. Ge a retologa a bona mabitla a mangwe mola thabeng; a laela gore a fatollwe mme mašapo a a lego ka go ona a tšhungwe aletareng. Ka tsela yeo a tšhilafatša aletare, a dira sela moprofeta a bego a kile a se bolela monyanyeng mola Kgoši Jerobeamo a eme manamelong a aletare. Kgoši Josia a lebelela ka gohle gomme a bona lebitla la moprofeta yola a bego a kile a bolela taba yeo. A botšiša a re: “Lela ke lebitla la mang?” Batho ba Bethele ba mo fetola ba re: “Ke lebitla la moprofeta wa Juda yo a boletšego dilo tše o di dirilego aletare ye lehono.” Josia a re: “Yena mo tlogeleng. Mašapo a gagwe a se ke a šuthišwa.” Ka gona mašapo a gagwe a se ke a kgwathwa, le ona ale a moprofeta yo a bego a etšwa Samaria. Motseng wo mongwe le wo mongwe wa Israele Kgoši Josia a thuba ditempelana ka moka tša dintotomeng tša go agwa ke magoši a Israele tšeo go tšona go bego go khunamelwa medimo ya diswantšho, gomme ka tšona a rumotše Morena. Dintotoma tšeo ka moka a di dira tše a bego a di dirile dintotoma tša kua Bethele. Godimo ga dialetare tša dintotoma tšeo a bolaya baprista ba ba bego ba hlankela medimo ya diswantšho dintotomeng, a ba a tšhuma mašapo a batho godimo ga dialetare tšeo. Ya ba gona a boelago Jerusalema. Kgoši Josia a laela batho ba Juda gore ba keteke Monyanya wa Paseka go hlompha Morena Modimo wa bona, bjalo ka ge go ngwadilwe pukung ya kgwerano. Go be go se gwa ka gwa ba le Paseka ya go swana nayo ye e bego e kile ya ketekwa ke kgoši ye nngwe ya Israele goba ya Juda go tloga mehleng yela setšhaba se sa bušwa ke baahlodi. Eupša bjale, mo ngwageng wa lesome le metšo ye seswai wa pušo ya Josia, Paseka yeo ya ketekwa Jerusalema. Gore Kgoši Josia a tle a kgone go phetha melao ye e ngwadilwego pukung ye Moprista yo Mogolo, Hilkia, a e hweditšego ka Tempeleng, o ile a tloša dinoge, le didupe, le medimo ya malapa, le medingwana ya diswantšho, le dilo ka moka tša tirelo ya medingwana ya diswantšho Jerusalema le nageng ya Juda ka moka. Go be go se gwa ka gwa ba le kgoši ye e swanago le yena ye e bego e sokologetše go Morena ka pelo ya yona ka moka, le ka moya wa yona ka moka, le ka maatla a yona ka moka, e phetha melao yohle ya Moshe; le gona ga se gwa ka gwa hlwa go eba le kgoši ye e swanago le yena. Eupša Morena o be a tukela Juda bogale bjo bošoro ka baka la tšeo Kgoši Manase a bego a mo rumotše ka tšona, gomme le bjale bogale bjoo bo be bo se bja okobala. Morena a re: “Ke tla dira batho ba Juda se ke se dirilego ba Israele: Ke tla raka batho ba Juda pele ga ka mme ka lahla Jerusalema, motse wo ke o kgethilego, le Tempele, felo fao ke itšego ke moo ke swanetšego go khunamelwa gona.” Tše dingwe tše Kgoši Josia a di dirilego di ngwadilwe mo go Ditaba tša magoši a Juda. Mola Josia e sa le kgoši, Kgoši Neko wa Egepeta o ile a tšwa dira a ya nokeng ya Yufratese go yo thuša kgoši ya Asiria. Kgoši Josia a leka go thibela madira ao a Egepeta kua Megido, gomme a bolawa ge ntwa e seno thoma. Bahlankedi ba gagwe ba rwala setopo sa gagwe ka koloi ya ntwa ba se iša Jerusalema, moo a ilego a bolokwa ka lebitleng la gagwe. Batho ba Juda ba kgetha morwa wa gagwe, Joahase, mme ba mo tlotša ya ba kgoši. Joahase o be a na le mengwaga ye masome a mabedi a metšo ye meraro ge e eba kgoši ya Juda, gomme a buša a le Jerusalema dikgwedi tše tharo. Mmagwe e be e le Hamutale, morwedi wa Jeremia, wa motse wa Libna. A dira dibe pele ga Morena go swana le borakgolokhukhu ba gagwe. Pušo ya gagwe e ile ya felela ge Kgoši Neko wa Egepeta a mo golega kua Ribla nageng ya Hamate, mme a ntšhiša batho ba Juda seloba sa silibera ya dikilokramo tše dikete tše tharo, le sa gauta ya dikilokramo tše masome a mararo a metšo ye mene. Kgoši Neko a bea morwa wa Josia, Eliakime, kgoši ya Juda go hlatlama Josia, gomme a fetoša leina la gagwe a re ke Joyakime. Joahase yena a išwa Egepeta ke Kgoši Neko, gomme a hwela gona. Kgoši Joyakime o ile a ntšhiša batho motšhelo go ya ka tše ba nago le tšona, gore a tle a kgoboketše tšhelete ya seloba se se bego se nyakwa ke kgoši ya Egepeta. Joyakime o be a na le mengwaga ye masome a mabedi a metšo ye mehlano ge e eba kgoši ya Juda, gomme a buša a le Jerusalema mengwaga ye lesome le o tee. Mmagwe e be e le Sebuda, morwedi wa Pedaya, wa motse wa Ruma. Joyakime a dira dibe pele ga Morena, go swana le borakgolokhukhu ba gagwe. Mehleng ya ge go buša Joyakime, Kgoši Nebukadnesare wa Babilonia o ile a hlasela Juda, gomme Joyakime a gapeletšega go mo loba mengwaga ye meraro; ka morago a mo tsogela maatla. Morena a romela bašwahledi ba Bababilonia le ba Basiria le ba Bamoaba le ba Baamone go yo lwa le Joyakime le go fediša batho ba Juda, bjalo ka ge a be a boletše ka bahlanka ba gagwe, baprofeta. Seo sa direga fela ka taelo ya Morena, gore a tle a rake batho ba Juda pele ga gagwe ka baka la dibe ka moka tše Kgoši Manase a bego a di dirile, gagolo le ka baka la madi a a se nago molato ao a a tšholotšego gore a be a tlale Jerusalema. Morena a se ke a lebalela Manase tabeng yeo. Tše dingwe tše Joyakime a di dirilego di ngwadilwe mo go Ditaba tša magoši a Juda. Joyakime a ithobalela le botatagwe, gomme morwa wa gagwe, Joyakine, a mo hlatlama bogošing. Kgoši ya Egepeta le madira a yona ya se ke ya hlwa e tloga Egepeta gape, ka gobane kgoši ya Babilonia bjale e be e laola naga ka moka ye e bego e le ya Egepeta, go tloga nokeng ya Yufratese go yo fihla mollwaneng wa ka leboa wa Egepeta. Joyakine o be a na le mengwaga ye lesome le ye seswai ge e eba kgoši ya Juda, gomme a buša a le Jerusalema dikgwedi tše tharo. Mmagwe e be e le Nehushta, morwedi wa Elnathane wa Jerusalema. Joyakine a dira dibe pele ga Morena, go swana le tatagwe. E bile mehleng ya pušo ya gagwe moo madira a Babilonia a ilego a tla Jerusalema a e dikanetša, a laolwa ke balaodi ba madira ba Kgoši Nebukadnesare. Yona nakong yeo Nebukadnesare a tla Jerusalema ka boyena, gomme Kgoši Joyakine, le mmagwe, le bahlankedi ba gagwe, le balaodi ba madira a gagwe, le bahlankedi ba mošate ba ineela go Bababilonia. Ngwageng wa seswai wa pušo ya Nebukadnesare, Nebukadnesare a thopa Joyakine gomme a thothela mahumo ka moka a ka Tempeleng le a mošate Babilonia. Bjalo ka ge Morena a be a boletše, Nebukadnesare a pšhatla dibjana ka moka tša gauta tše di bego di dirilwe ke Kgoši Solomone e le tša go šomišwa ka Tempeleng. A thopa batho ba Jerusalema, le balaodi ba madira, le bagale, gomme ka moka ya ba ba dikete tše lesome. A thopa le banna ka moka ba tsebo ya mediro, gammogo le barulatshipi, a šadiša fela badiidi kua Juda. Nebukadnesare a iša Joyakine bothopša kua Babilone gotee le mmagwe le basadi ba gagwe le bahlankedi ba mošate le baetapele ba Juda. A iša banna ka moka ba maemo Babilonia, ka moka ya ba ba dikete tše di šupago, le banna ba sekete ba tsebo ya mediro, gammogo le barulatshipi, ka moka ga bona e le banna ba bogale ba ba loketšego ntwa. Nebukadnesare a bea Matania, rangwane wa Joyakine, kgoši ya Juda, gomme a fetoša leina la gagwe a re ke Tsedekia. Tsedekia o be a na le mengwaga ye masome a mabedi a motšo o tee ge e eba kgoši ya Juda, gomme a buša a le Jerusalema mengwaga ye lesome le o tee. Mmagwe e be e le Hamutale, morwedi wa Jeremia, wa motse wa Libna. Kgoši Tsedekia a dira dibe pele ga Morena, go swana le Kgoši Joyakime. Morena a galefela batho ba Jerusalema le ba Juda moo e lego gore o ile a ba raka pele ga gagwe. Tsedekia o ile a tsogela Kgoši Nebukadnesare wa Babilonia maatla, ka gona Nebukadnesare a tla ka madira a gagwe ka moka, a hlasela Jerusalema ka letšatši la lesome la kgwedi ya lesome ya ngwaga wa senyane wa pušo ya Tsedekia. Ba hloma mešaša ka ntle ga motse, ba kgobela ntotoma ya mobu go o dikologa, mme ba o dikanetša go fihlela ka ngwaga wa lesome le o tee wa pušo ya Tsedekia. Ka letšatši la senyane la kgwedi ya bone ya wona ngwaga woo, ge tlala e befile moo e lego gore go be go se gwa šala selo sa go ja, morako wa motse wa kgerešwa. Le ge Bababilonia ba be ba dikaneditše motse, bahlabani ka moka ba ile ba tšhaba bošego. Ba tšea ka tsela ya serapa sa mošate, ba tšwa ka kgoro ye e kgomaganyago maboto a mabedi a serapa seo, gomme ba tšhabela thoko ya moedi wa Jordane. Eupša madira a Bababilonia a rakediša Kgoši Tsedekia, ba mo swara melaleng ya kgauswi le Jeriko, bahlabani ba gagwe ka moka ba šwalalane ba mo tlogetše. Tsedekia a išwa go Kgoši Nebukadnesare yo a bego a le motseng wa Ribla, gomme moo Nebukadnesare a mo ahlola. Barwa ba gagwe ba bolawa a lebeletše; ya ba gona Nebukadnesare a laelago gore Tsedekia a gonywe mahlo. A mo tlema ka diketane, gomme a mo iša Babilone. Ka letšatši la bošupa la kgwedi ya bohlano ya ngwaga wa lesome le metšo ye senyane wa pušo ya Kgoši Nebukadnesare wa Babilonia, Nebusaradane, mohlankedi wa gagwe yo e bego e le molaodi wa baleti ba kgoši, a tsena Jerusalema. A tšhuma Tempele le mošate le nywako le meago ka moka ye megolo Jerusalema, gomme bahlabani ba gagwe ba kgereša morako wa motse. Ke moka Nebusaradane a thothela batho ba ba bego ba šetše motseng Babilonia, le banna ba tsebo ya mediro ba ba bego ba sa šetše, le bao ba bego ba šetše ba ineetše go Bababilonia. Eupša a šadiša badiidi ba bangwenyane nageng ya Juda gore ba šome mašemong le ka dirapeng tša merara. Bababilonia ba pšhatlaganya dikokwane tša mphiri le dikoloyana tša ka Tempeleng, gotee le legopo le legolo la mphiri, gomme ba iša mphiri wa gona ka moka Babilone. Ba thotha le dibjana tša go olelela melora, digarafo, ditimamabone, meruswi, le ditlabakelo ka moka tša mphiri tše di bego di šomišwa tirelong ya Tempeleng. Ba thotha dilo ka moka tše di bego di dirilwe ka gauta goba silibera, gammogo le dibjana tša magala le meruswi ya go foka madi. Mphiri wa dikokwane ka dipedi le wa dikoloyana le wa legopo le legolo, e lego dilo tše Kgoši Solomone a bego a di diretše Tempele, e be e le wo boima kudu go ka o ela. Dikokwane tšeo tše pedi di be di swana: ye nngwe le ye nngwe e be e le ya dimetara tše 8,3 go ya godimo, mme e na le hlogwana ya mphiri ka godimo ya bogodimo bja dimetara tše 2,3. Go rarela hlogwana ye nngwe le ye nngwe go be go na le ntikodiko ya mphiri ye e bego e kgabišitšwe ka diswantšho tša digarenate tša mphiri. Nebusaradane, molaodi wa baleti ba kgoši, a thopa Seraya, Moprista yo Mogolo, le Sofonia, moprista yo a bego a mo latela ka maemo, le baprista ba bararo ba ba bego ba leta mejako ya Tempele. Motseng a tšea molaodi wa madira, le baeletši ba bahlano ba kgoši ba ba bego ba sa le motseng, le mongwaledi wa molaodi yo mogolo yo a bego a hlokometše go rapa dira, le banna ba bangwe ba maemo ba masome a a selelago. Nebusaradane a ba iša go kgoši ya Babilonia yo a bego a le motseng wa Ribla nageng ya Hamate. Moo kgoši a laela gore ba itiwe, ba bolawe. Ke ka moo batho ba Juda ba thothilwego nageng ya bona ba išwa bothopša. Kgoši Nebukadnesare wa Babilonia a bea Gedalia, morwa wa Ahikamo, setlogolo sa Shafane, mmušiši wa naga ya Juda, gore a buše batho ka moka bao ba bego ba se ba išwa Babilonia. Ge balaodi ka moka ba madira a Bajuda le bahlabani ba ba bego ba tšhabile ba ekwa taba yeo, ba ikopanya le Gedalia kua Mitsepa. Bahlankedi bao e be e le Ishmaele, morwa wa Netania, Johanane, morwa wa Kareage, Seraya, morwa wa Tanhumete, wa motse wa Netofa, le Jaasania wa Maaka. Gedalia a re go bona: “Ke le enela gore bahlankedi ba Bababilonia ba ka se le tshwenye. Dulang mo nageng ye, le hlankele kgoši ya Babilonia, gomme tšohle di tla le lokela.” Eupša ka kgwedi ya bošupa ya ngwaga woo Gedalia a beilwego mmušiši ka wona, Ishmaele, morwa wa Netania, setlogolo sa Elishama, yo mongwe wa ba lapa la mošate, a ya Mitsepa le banna ba lesome, ba hlasela Gedalia mme ba mmolaya. Ba ba ba bolaya le Baisraele le Bababilonia bao ba bego ba na le yena moo. Ke gona Baisraele ka moka, ba bagolo le ba bannyane, gotee le balaodi ba madira ba tlogilego ba ya Egepeta, ka gobane ba be ba boifa Bababilonia. Ka ngwaga wo Ebile-Merodaka e bilego kgoši ya Babilonia ka wona o ile a ntšha Kgoši Joyakine wa Juda kgolegong. Seo se diregile ka letšatši la masome a mabedi a metšo ye e šupago la kgwedi ya lesome le metšo ye mebedi ya ngwaga wa masome a mararo a metšo ye e šupago ka morago ga ge Joyakine a thopilwe. Ebile-Merodaka a mo swara gabotse, gomme a mmea maemong a a hlomphegago go feta a dikgoši tše dingwe tše e bego e le mathopša le yena kua Babilonia. A ba a mo apola diaparo tša gagwe tša kgolego, gomme a ja dijo le kgoši bophelo bja gagwe ka moka. Ka mehla o be a fiwa tše di nyakegago tša letšatši ka letšatši. Adamo e bile tatagoSete, Sete ya ba tatagoEnose, Enose ya ba tatagoKenane, Kenane ya ba tatagoMahalalele, Mahalalele ya ba tatagoJerede. Jerede e bile tatagoEnoko, yo e bilego tatagoMetushelage; Metushelage ya ba tatagoLamege, yo e bilego tatagoNoa. Barwa ba Noa e bile Seme, Hamo le Jafeta. Barwa ba Jafeta šeba: Gomere, Magogo, Madai, Jabane, Tubale, Mesheke le Tirase. Ditlogolo tša Gomere e bile Ashkenase le Rifate le Togarma. Ditlogolo tša Jabane e bile Elisha le Tarshishe le batho ba Saeprose le ba Rodose. Barwa ba Hamo šeba: Kushe, Egepeta, Libia le Kanana. Ditlogolo tša Kushe e bile Seba, Habila, Sabta, Rama le Sabteka. Ditlogolo tša Rama e bile Sheba le Dedane. Kushe o ile a ba le morwa yo leina la gagwe e ilego ya ba Nimrode; yena ya ba mogale wa mathomo lefaseng. Ditlogolo tša Egepeta e bile batho ba Lidia, ba Anamo, ba Lehaba, ba Naftuage, ba Patruse, ba Kasluage, le ba Kreta bao go bona go tšwilego Bafilista. Barwa ba Kanana šeba: Sidone, wa mathomo, le Hete; ya ba ya ba rakgolokhukhu wa Bajebuse, Baamore, Bagirgashe, Bahibe, Baaraki, Basine, Baarbade, Batsemare le Bahamate. Barwa ba Seme šeba: Elamo, Ashure, Arpakshade, Lude, Aramo, Utse, Hule, Getere le Mashe. Arpakshade e bile tatagoShelage, yo e bilego tatagoEbere. Ebere o bile le barwa ba babedi; yo mongwe o ile a bitšwa Pelege, ka gobane mehleng ya gagwe batho ba lefase ba be ba arogane, mme yo mongwe yena a bitšwa Jokotane. Ditlogolo tša Jokotane e bile Almodade, Shelefo, Hatsarmabete, Jerage, Hadoramo, Usale, Dikla, Obale, Abimaele, Sheba, Ofire, Habila le Jobabe. Tatelano ya ba lešika go tloga ka Seme go fihla ka Abramo e ka tsela ye: Seme, Arpakshade, Shelage, Ebere, Pelege, Regu, Seruge, Nahoro, Terage le Abramo, yo a tsebjago le ka la Abrahama. Barwa ba Abrahama e be e le Isaka le Ishmaele. Šea maina a barwa ba Ishmaele ka go latelana ga bona: Wa mathomo e be e le Nebayote, gwa latela Kedara, Adbeele, Mibisamo, Mishma, Duma, Masa, Hadade, Tema, Jeture, Nafishe le Kedema. Abrahama o be a na le motlabo yo leina la gagwe e bego e le Ketura. Yena o ile a mmelegela barwa ba ba latelago: Simrane, Jokoshane, Medane, Midiane, Jishbake le Shuage. Barwa ba Jokoshane e be e le Sheba le Dedane, gomme ba Midiane e le Efa, Efere, Enoko, Abida le Eldaa. Abrahama e bile tatagoIsaka, gomme barwa ba Isaka ya ba Esau le Jakobo. Barwa ba Esau e be e le Elifase, Reuele, Jeushe, Jalamo le Korage. Barwa ba Elifase e be e le Temane, Omare, Tsefo, Gatamo, Kenase, Timna le Amaleke. Gomme barwa ba Reuele ya ba Nahate, Serage, Shama le Misa. Barwa ba Seire e be e le Lotane, Shobale, Tsibone, Ana, Dishone, Etsere le Dishane. Barwa ba Lotane e be e le Hori le Hemamo. Lotane o be a na le kgaetšedi yo leina la gagwe e bego e le Timna. Barwa ba Shobale e be e le Albane, Manahate, Ebale, Shefi le Onamo. Barwa ba Tsibone e be e le Aya le Ana. Morwa wa Ana ya ba Dishone, mme Dishone yena ya ba tatagoHemdane, Eshbane, Jitrane le Kerane. Barwa ba Etsere e be e le Bilhane, Saabane le Jakane. Barwa ba Dishane e be e le Utse le Arane. Magoši a a latelago a bušitše naga ya Edomo ka go latelana mehleng yela go se gwa tšwa go eba le kgoši mo Israele: Bela, morwa wa Beore, wa go dula Dinhaba Jobabe, morwa wa Serage, wa Botsra Hushamo wa selete sa Temane Hadade, morwa wa Bedade, wa Abite, yo a ilego a fenya Bamidiane ntweng nageng ya Moaba Samla wa Masreka Shaulo wa Rehobote-lebopong-la-Yufratese Baale-Hanane, morwa wa Akboro Hadade wa go dula Pagu, yo mosadi wa gagwe e bego e le Mehetabele, morwedi wa Matrede, setlogolo sa Me-Sahabe *** *** *** *** *** *** *** Ge Hadade a hwile go ile gwa buša mantona a a latelago: Timna, Alba, Jetete, Oholibama, Ela, Pinone, Kenase, Temane, Mibitsare, Magadiele le Iramo. Jakobo o be a na le barwa ba ba latelago: Rubene, Simeone, Lefi, Juda, Isakara, Sebulone, Dane, Josefa, Benjamene, Naftali, Gade le Asere. Juda o be a na le barwa ba bahlano. Mosadi wa gagwe wa Mokanana, Bateshua, o ile a mmelegela barwa ba bararo, e lego Ere, Onane le Shela. Morwa wa gagwe wa leitšibolo, Ere, e be e le yo mobe moo Morena a ilego a ba a mmolaya. Ngwetši wa gagwe, Tamare, a mmelegela Peretse le Serage. *** Barwa ba Peretse e bile Hetserone le Hamule. Serage o be a na le barwa ba ba fetšago seatla, e lego Simri, Ethane, Hemane, Kalkolo le Darda. Morwa wa Simri e be e le Karmi, mme Akane, morwa wa Karmi, o ile a hlolela setšhaba sa Israele mathata ka go ipha thoto ye e bego e gafetšwe go fedišwa. Morwa wa Ethane e be e le Asaria. Barwa ba Hetserone e be e le Jeragmeele, Ramo le Kalebe. Ramo e ile ya ba tatagoAminadaba, Aminadaba a belega Nagshone, moetapele wa kgoro ya Juda, yena a tswala Salmone, Salmone a belega Boase, Boase ya ba tatagoObede, mme Obede a tswala Isai. Isai o be a na le barwa ba ba šupago. Bona šeba ka go hlatlamana ga bona: Eliaba, Abinadaba, Shama, Netanele, Radai, Otseme le Dafida. Dikgaetšedi tša bona e be e le Tseruya le Abigaile. Barwa ba Tseruya e be e le Abishai, Joaba le Asahele. Abigaile o ile a nyalwa ke Jetere, setlogolo sa Ishmaele, mme ba ba le morwa yo a ilego a rewa leina la Amasa. Morwa wa Hetserone, Kalebe, o ile a nyala Asuba, gomme a ba le morwedi yo leina la gagwe e ilego ya ba Jeriote. Jeriote yena a ba le barwa ba bararo, e lego Jeshere, Shobabe le Ardone. Asuba o ile a hwa, gomme Kalebe a nyala Efrata, mme ba ba le morwa yo leina la gagwe e ilego ya ba Hure. Morwa wa Hure e bile Uri, gomme setlogolo sa gagwe ya ba Betsaliele. Ge Hetserone a na le mengwaga ye masome a a selelago o ile a nyala morwedi wa Makire, tatagoGileade. Ba ba le morwa yo leina la gagwe e ilego ya ba Segube, mme Segube a ba le morwa yo a ilego a bitšwa Jaire. Jaire o be a na le metse ye masome a mabedi a metšo ye meraro nageng ya Gileade. Eupša mmušo wa Geshure le wa Aramo e ile ya thopa metse ye masome a a selelago moo, gotee le metse ya Jaire le ya Kenate, le metse ye e lego kgauswi. Batho ka moka ba ba bego ba dula moo e be e le ditlogolo tša Makire, tatagoGileade. Ka morago ga lehu la Hetserone, Kalebe, morwa wa gagwe, a nyala Efrata, mosadi wa tatagwe. Ba ba le morwa yo leina la gagwe e bilego Ashure, yo a ilego a hloma motse wa Tekoa. Barwa ba Jeragmeele, morwa wa pele wa Hetserone, le mosadi wa gagwe, Ahia, e be e le Ramo, wa leitšibolo, le Buna le Orene le Otseme. Barwa ba Ramo e be e le Maatse, Jamine le Ekere. Jeragmeele o be a na le mosadi yo mongwe yo a bitšwago Atara, gomme ba ba le morwa, Onamo. *** Barwa ba Onamo e be e le Shamai le Jada, gomme ba Shamai ya ba Nadaba le Abishure. Abishure o ile a nyala mosadi yo leina la gagwe e bego e le Abigaile, gomme yena a mmelegela Agbane le Molide. Barwa ba Nadaba, morwarragoAbishure, e be e le Selede le Apaime, eupša Selede a hwa a se na bana. Apaime e bile tatagoJishi, Jishi ya ba tatagoSheshane, mme Sheshane ya ba tatagoAglai. Barwa ba Jada, morwarragoShamai, e be e le Jetere le Jonathane, eupša Jetere a hwa a se na le bana. Barwa ba Jonathane e be e le Pelete le Sasa. Bao ka moka e be e le ditlogolo tša Jeragmeele. Sheshane o be a se ne barwa, a na le barwedi fela. O be a na le mohlanka wa Moegepeta yo leina la gagwe e bego e le Jareha. A mo nyadiša morwedi yo mongwe wa gagwe. Ba ba le morwa yo leina la gagwe e bilego Athai. Go tloga go Athai go fihla go Elishama moloko o latelana ka mokgwa wo: Athai, Nathane, Sabade, Eflale, Obede, Jehu, Asaria, Heletse, Elasa, Sismai, Shalume, Jekamia le Elishama. Morwa wa leitšibolo wa Kalebe, morwarragoJeragmeele, o be a bitšwa Mesha. Mesha e bile tatagoSife, yo e ilego ya ba tatagoMaresha, yo e bilego tatagoHebrone. Barwa ba Hebrone e be e le Korage, Tapuage, Rekeme le Shema. Shema e bile tatagoRahamo le rakgolo wa Jorokoamo. Rekeme, morwarragoShema, e bile tatagoShamai, yo e ilego ya ba tatagoMaone, yo e bilego tatagoBethe-Tsure. Kalebe o be a na le motlabo yo leina la gagwe e bego e le Efa, gomme yena a mmelegela Harane, Motsa le Gasese. Harane le yena a ba le morwa yo a bitšwago Gasese. Monna yo mongwe yo leina la gagwe e bego e le Jadai o be a na le barwa ba ba latelago: Regeme, Jotamo, Geshane, Pelete, Efa le Shaafo. Kalebe o be a na le motlabo wo mongwe, Maaka, yo a ilego a belega Shebere le Tirihana. Ka morago a ba le barwa ba bangwe, e lego Shaafo, yo a hlomilego motse wa Madimana, le Sheba, yo a hlomilego motse wa Makabena le wa Gibea. Le gona Kalebe o ile a ba le morwedi yo a ilego a bitšwa Aksa. Ba ba latelago le bona ke ditlogolo tša Kalebe: Hure e be e le leitšibolo la Kalebe le mosadi wa gagwe, Efrata. Morwa wa Hure, Shobale, o ile a hloma Kiriate-Jearime, morwa wa gagwe wa bobedi, Salmone, a hloma Betlelehema, gomme morwa wa gagwe wa boraro, Harefe, a hloma Bethe-Gadere. Shobale, mohlomi wa Kiriate-Jearime, e bile rakgolokhukhu wa batho ba Reaya, le wa karolo ya badudi ba Manahate, le wa dikgorwana tše di latelago tše di bego di dula Kiriate-Jearime: Bajetere, Bapute, Bashumate le Bamishra. Batho ba motse wa Tsora le wa Eshtaolo e be e le ba dikgorwana tše. Salmone, mohlomi wa Betlelehema, e bile rakgolokhukhu wa batho ba Netofa, ba Atharote-Bethe-Joaba le ba Tsora, ba e bego e le karolo ya Bamanahate. Ba dikgorwana tše di latelago tša bakgoni ba go ngwala le go ngwalolla ba be ba dula motseng wa Jabetse: Batirate, Bashimate le Basukate. E be e le Bakene ba ba hlomilego Bethe-Rekabe, ba etšwa Hamate. Bana bao Dafida a ba belegetšwego ge a be a sa le Hebrone šeba ka go hlatlamana ga bona: Amnone, yo mmagwe e bego e le Ahinoamo wa Jesriele Daniele, yo mmagwe e bego e le Abigaile wa Karmele Absalomo, yo mmagwe e bego e le Maaka, morwedi wa Kgoši Talmai wa Geshure Adonia, yo mmagwe e bego e le Hagite Shefatia, yo mmagwe e bego e le Abitala Jitreamo, yo mmagwe e bego e le Egla *** *** Ba ba selelago bao ba belegetšwe Hebrone nakong ya mengwaga ye e šupago le dikgwedi tše di selelago yeo ka yona Dafida a bušitšego a le fao. Ge a le Jerusalema o bušitše mengwaga ye masome a mararo a metšo ye meraro, gomme moo a belegelwa barwa ba bantši. Mosadi wa gagwe, Batseba, morwedi wa Amiele, o ile a mmelegela barwa ba bane, e lego Shima, Shobabe, Nathane le Solomone. Dafida o bile le barwa ba bangwe ba senyane, e lego Jibehara, Elishua, Elpelete, Noga, Nefege, Jafia, Elishama, Eliada le Elifelete. Ntle le barwa bao ka moka, Dafida o be a na le barwa ba bangwe le metlabo ya gagwe. Le gona o be a na le morwedi yo leina la gagwe e bego e le Tamare. Lešika la Kgoši Solomone le kgokagane ka mokgwa wo: Solomone, Rehabeamo, Abia, Asa, Joshafate, Joramo, Ahasia, Joase, Amatsia, Usia, Jotamo, Ahase, Hiskia, Manase, Amone le Josia. Josia o be a na le barwa ba bane, e lego Johanane, Joyakime, Tsedekia le Joahase. Joyakime o bile le barwa ba babedi, e lego Joyakine le Tsedekia. Šedi ditlogolo tša Kgoši Joyakine yo a ilego a thopša ke Bababilonia. Barwa ba Joyakine e be e le Sealtiele, Malkiramo, Pedaya, Shenatsare, Jekamia, Hoshama le Nedabia. Barwa ba Pedaya e be e le Serubabele le Shimi. Barwa ba Serubabele e be e le Meshulamo le Hanania, Shelomite e le kgaitšedi ya bona. O bile le barwa ba bangwe ba bahlano, e lego Hashuba, Ohele, Berekia, Hasadia le Jushabe-Hesede. Barwa ba Hanania e be e le Pelatia le Jeshaya. Jeshaya e bile tatagoRefaya, yo e bilego tatagoArnane, Arnane tatagoObadia, Obadia tatagoShekania. Shekania o bile le barwa ba ba selelago, e lego Shemaya, Hatushe, Jigale, Bariage, Nearia le Shafate. Nearia o bile le barwa ba bararo, e lego Elioenai, Hiskia le Asrikamo. Elioenai o bile le barwa ba ba šupago, e lego Hodabia, Eliashibe, Pelaya, Akube, Johanane, Delaya le Anani. Ditlogolo tše dingwe tša Juda šedi: Peretse, Hetserone, Karmi, Hure le Shobale. Shobale e bile tatagoReaya, yo e bilego tatagoJahate; Jahate ya ba tatagoAhumai le Lahade, borakgolokhukhu ba batho ba ba bego ba dula Tsora. Hure e be e le morwa wa leitšibolo wa Efrata, gomme ditlogolo tša gagwe di hlomile motse wa Betlelehema. Hure o bile le barwa ba bararo, e lego Ethamo, Penuele le Esere. Barwa ba Ethamo e be e le Jesriele, Jishma le Jidbashe, Hatseleleponi e le kgaitšedi ya bona. Penuele o ile a hloma motse wa Gedoro, Etsere yena a hloma wa Husha. *** Ashure, yo a hlomilego motse wa Tekoa, o be a na le basadi ba babedi, e lego Hela le Naara. Naara a mmelegela barwa ba: Ahusamo, Hefere, Temni le Ahashtari. Hela a belega barwa ba: Tserete, Jitsara le Etnane. Kotse e be e le tatagoAnube le Tsobeba, e bile e le rakgolokhukhu wa dikgorwana tše di tšwilego go Aharehele, morwa wa Harumo. Go be go na le monna yo a bitšwago Jabetse, yo a bego a hlomphega kudu lapeng labo. Mmagwe o be a mo reetše leina la Jabetse, ka gobane go belegwa ga gagwe go be go bile bohloko kudu. Eupša Jabetse a rapela Modimo wa Israele a re: “Ntšhegofatše kudu, Modimo, gomme o nkokeletše naga. Baa le nna mme o ntšhireletše go tšohle tše mpe gore di se ke tša nkweša bohloko.” Gomme Modimo a mo fa se a se kgopetšego. Kelube, morwarragoShuha, o be a na le morwa, Mehire. Mehire ya ba tatagoEshtone, yo a ilego a ba le barwa ba: Bethe-Rafa, Paseage le Tehina. Tehina e bile mohlomi wa motse wa Nahashe. Ditlogolo tša batho ba di be di dula Reka. Barwa ba Kenase e be e le Otniele le Seraya. Otniele ya ba tatagoHatate le Meonotai. Meonotai e bile tatagoOfra. Seraya a tswala Joaba, yo e bilego mohlodi wa mešomo ya Moeding wa Batsebamediro-ya-diatla, fao batho ba ntshe e bego e le bašomi ba bokgoni. Kalebe, morwa wa Jefune, o be a na le barwa ba bararo, e lego Iru, Ela le Naama. Gomme Ela ya ba tatagoKenase. Barwa ba Jehalelele e be e le Sife, Sifa, Tiria le Asariele. Esra o be a na le barwa ba: Jetere, Merede, Efere le Jalone. Merede a nyala Bitia, morwedi wa kgoši ya Egepeta, gomme ba ba le morwedi, Miriamo, le barwa ba maina a bona e bego e le Shamai le Jishbage. Jishbage o ile a hloma motse wa Eshtemoa. Merede le yena a nyala mosadi wa kgoro ya Juda, gomme ba ba le barwa ba: Jerede, yo a hlomilego motse wa Gedoro, Hebere, mohlomi wa motse wa Soko, le Jekutiele, mohlomi wa motse wa Sanoage. *** Hodia o ile a nyala kgaetšedi ya Nahamo. Ditlogolo tša bona tša tswala ba kgorwana ya Garme ba ba bego ba dula motseng wa Keila, le ba kgorwana ya Maaka ba ba bego ba dula motseng wa Eshtemoa. Shimone o be a na le barwa ba: Amnone, Rina, Benhanane le Tilone. Barwa ba Jishi e be e le Sohete le Bensohete. Shela e be e le yo mongwe wa barwa ba Juda. Ditlogolo tša gagwe tše dingwe e be e le Ere, yo a hlomilego motse wa Leka, le Lada, mohlomi wa motse wa Maresha, le ba kgorwana ya balogi ba mašela, ba ba bego ba dula motseng wa Bethe-Ashbea, le Jokime le batho ba ba bego ba dula motseng wa Koseba, le Joase le Sarafo, bao ba ilego ba nyala basadi ba Bamoaba mme ba boela Betlelehema. Ditaba tše di bolelwago mo ke tša kgale kudu. E be e le babopi ba dipitša ba go šomela kgoši, mme ba dula motseng wa Netaime le wa Gedera. Simeone o be a na le barwa ba: Nemuele, Jamine, Jaribe, Serage le Shaulo. Morwa wa Shaulo e be e le Shalume, setlogolo sa gagwe e le Mibisamo, mme setlogolwana sa gagwe e le Mishma. Go tloga go Mishma lešika le be le theogela go Hamuele, Sakure le Shimi. Shimi o be a na le barwa ba lesome le ba ba selelago le barwedi ba ba selelago, eupša bomorwarragwe ba be ba se na le bana ba bantši, gomme kgoro ya Simeone ya se ke ya gola bjalo ka ya Juda. Go ba go fihla mehleng ya Kgoši Dafida ditlogolo tša Simeone di be di dula metseng ye e latelago: Beresheba, Molada, Hatsare-Shuale, Bilha, Etseme, Eltolade, Bethuele, Horma, Tsikelage, Bethe-Markabote, Hatsare-Susime, Bethe-Biri le Shaharaime. Ba be ba dula le metseng ye mengwe ye mehlano: Ethamo, Aine, Rimone, Togene le Ashane, le metseng ye e bapilego le yona, go ba go yo fihla motseng wa Baale. Ao ke mananeo a ba a ngwadilego a malapa a bona le a mafelo ao ba ilego ba dula go ona. Banna ba ba latelago e be e le mantona a dikgorwana tša bona: Meshobabe, Jamleke, Josha, morwa wa Amatsia, Joele, Jehu, morwa wa Joshibia, Joshibia morwa wa Seraya, Seraya morwa wa Asiele, Elioenai, Jaakoba, Jeshohaya, Asaya, Adiele, Jesimiele, Benaya, Sisa, morwa wa Shifi, Shifi morwa wa Alone, Alone morwa wa Jedaya, Jedaya morwa wa Shimri, Shimri morwa wa Shemaya Ka gobane malapa a bona a ile a gola kudu, *** *** *** *** ba ile ba ikala ba ba ba nyaka go fihla Gerare, mme ba fudiša dihuswane tša bona ka thoko ya bohlabela bja moedi wo motse woo o lego ka go wona. Ba hwetša mafulo a mabotse a go nona moo nageng yeo e bego e ikadile, e letše. Batho bao ba bego ba kile ba dula moo e be e le Bahamo. Mehleng ya Kgoši Hiskia wa Juda banna ba go bolelwago ka bona fa ba ile ba ya Gerare mme moo ba hlasela mešaša ya Bahamo, ba hlasela le Bameune ba ba bego ba dula moo. Ba ba fediša taa, mme ba dulela moo sa ruri ka gobane go be go na le phulo ya dihuswane tša bona. Ba bangwe ba makgolo a a fetšago seatla ba kgoro ya Simeone ba ile ba ya nageng ya dithaba ya Edomo. Ba be ba etilwe pele ke Pelatia, Nearia, Refaya le Usiele, barwa ba Jishi. Moo ba bolaya mašaledi a Baamaleke, gomme ba dula ntshe go tloga ka nako yeo. Tše ke ditlogolo tša Rubene, yena wa mathomo go barwa ba Jakobo. Ka ge a be a kile a robala le yo mongwe wa metlabo ya tatagwe, o ile a se ke a ngwadišwa gore ke morwa wa mathomo, gomme ditokelo tša morwa wa leitšibolo tša fiwa barwa ba Josefa. Le ge go le bjalo e bile kgoro ya Juda ye e ilego ya ba le maatla go feta tše dingwe mme ya tswala mmuši wa dikgoro ka moka, eupša ditokelo tša morwa wa leitšibolo tšona ya ba tša Josefa. Rubene, yena yo mogolo go barwa ba Jakobo, o bile le barwa ba: Enoko, Palu, Hetserone le Karmi. Šedi ditlogolo tša Joele go tloga molokong wo mongwe go iša go ye mengwe ye e o latelago: Shemaya, Gogo, Shimi, Mika, Reaya, Baale le Beera. Kgoši ya Asiria, Tiglate-Pilesere, o ile a iša Beera, moetapele wa kgoro, bothopša. *** *** Mananeo ao a ngwadilwego a malapa a lokologanya mantona a dikgorwana mo kgorong ya Rubene ka tsela ye: Jeiele, Sakaria le Bela, morwa wa Asase. Asase yo e be e le morwa wa Shema, wa kgorwana ya Joele. Ba kgorwana ye ba be ba dula Aroere le go tloga moo go fihla Nebo le Baale-Meone. Ba be ba na le mehlape ye mentši nageng ya Gileade, ka gona ba dula seleteng sa go ya ka bohlabela go fihla mathomong a lešoka le le yago nokeng ya Yufratese. Mehleng ya Kgoši Saulo kgoro ya Rubene e ile ya hlasela Bahagare, ya ba fenya, gomme ya thopa karolo ya ka bohlabela ka moka ya naga ya bona kua Gileade. Kgoro ya Gade e be e dula ka leboa la kgoro ya Rubene, nageng ya Bashane. Naga ya bona e be e fihla le Salka. Joele e bile yena mohlodi wa kgorwana ya ntshe ye kgolo, gomme Shafamo a hlola ye e e latelago. Janai le Shafate e bile bahlodi ba dikgorwana tše dingwe kua Bashane. Ba bangwe ba kgoro ye e be e le ba dikgorwana tše di šupago tše: Mikaele, Meshulamo, Sheba, Jorai, Jakane, Sia le Ebere. E be e le ditlogolo tša Abihaile, morwa wa Huri, yoo borakgolokhukhu ba gagwe ba bego ba latelana ka mokgwa wo: Jaroage, Gileade, Mikaele, Jeshishai, Jagdo, Buse. Ahi, morwa wa Abdiele, e be e le setlogolo sa Guni, gomme e le ntona ya dikgorwana tšeo. Ba be ba dula nageng ya Gileade le ya Bashane, le metseng ya Bashane, le nageng ka moka ya mafulo ya Sharone. Ditaba tše ka moka di ngwadilwe mehleng ya Kgoši Jotamo wa Juda le ya Kgoši Jerobeamo wa Israele. Kgorong ya Rubene le ya Gade le seripakgorong sa Manase sa ka bohlabela go be go na le bahlabani ba 44 760 ba ba hlahlilwego gabotse go šomiša dikotse, ditšhoša le mesebe, mme ba loketše ntwa. Ba ile ba tšwa dira go yo lwa le kgoro ya Bahagare le ya Jeture le ya Nafishe le ya Nodaba. Ba bota Modimo mme ba mo rapela gore a ba thuše, gomme a kwa dithapelo tša bona mme a gafela Bahagare le ba seboka sa bona diatleng tša bona. Ba ba thopela dikamela tše dikete tše masome a mahlano, le dihuswane tše makgolo a mabedi le tše masome a mahlano, le dipokolo tše dikete tše pedi, le mathopša a dikete tše lekgolo. Ba bolaya manaba a mantši ka gobane ntwa yeo e be e lwewa ka thato ya Modimo. Gomme ba dula nageng yeo go ba go fihla ka nako ya bothopša. Batho ba seripakgoro sa Manase sa ka bohlabela ba ile ba dula nageng ya Bashane go yo fihla Baale-Hermone le Senire le thabeng ya Hermone, gomme setšhaba sa bona sa oketšega. Ba ba latelago e be e le mantona a dikgorwana tša bona: Efere, Jishi, Eliele, Asriele, Jeremia, Hodabia le Jagdiele. Ka moka ga bona e be e le bahlabani ba bogale, baetapele ba go tuma ba dikgorwana tša bona. Eupša batho bao ba ile ba se ke ba botegela Modimo wa borakgolokhukhu ba bona, gomme ba mo furalela ba khunamela medimo ya ditšhaba tše Modimo a di lelekilego nageng ge bona ba goroga. Ka gona Modimo a hlohleletša Kgoši Pule wa Asiria, yo a bego a tsebja le ka la Tiglate-Pilesere, gore a hlasele naga ya bona. A iša ba kgoro ya Rubene le ya Gade le ba seripakgoro sa Manase sa ka bohlabela bothopša, gomme a ba dudišetša sa ruri kua Halage, Habore le Hara, le nokeng ya Gosane. Lefi o be a na le barwa ba: Gershone, Kehate le Merari. Kehate o be a na le barwa ba: Amramo, Jitsara, Hebrone le Usiele. Amramo o bile le barwa ba: Arone le Moshe, le morwedi o tee, Miriamo. Arone o bile le barwa ba: Nadaba, Abihu, Eleasara le Ithamara. Ditlogolo tša Eleasara go tloga molokong wo mongwe go iša go ye mengwe ye e o latelago šedi: Finease, Abishua, Buki, Usi, Seragia, Merayote, Amaria, Ahitube, Tsadoko, Ahimaatse, Asaria, Johanane, Asaria, yo a bego a šoma ka Tempeleng ye Kgoši Solomone a bego a e agile Jerusalema, Amaria, Ahitube, Tsadoko, Shalume, Hilkia, Asaria, Seraya, Jotsadaka. Kgoši Nebukadnesare o ile a thopa Jotsadaka gotee le batho ba bangwe ba Juda le ba Jerusalema bao Morena a ilego a ba romela bothopša. Lefi o be a na le barwa ba: Gershone, Kehate le Merari. Gershone e bile tatagoLibni le Shimi; Kehate ya ba tatagoAmramo, Jitsara, Hebrone le Usiele, gomme Merari ya ba tatagoMagli le Mushi. Ditlogolo tša Gershone go tloga molokong wo mongwe go iša go ye mengwe ye e o latelago šedi: Libni, Jahate, Sima, Joage, Ido, Serage, Jeatrai. Tše ke ditlogolo tša Kehate go tloga molokong wo mongwe go iša go ye mengwe ye e o latelago: Aminadaba, Korage, Asire, Elkana, Abiasafo, Asire, Tahate, Uriele, Usia, Shaulo. Elkana o bile le barwa ba: Amasai le Ahimote. Ditlogolo tša Ahimote go tloga molokong wo mongwe go iša go ye mengwe ye e o latelago šedi: Elkana, Tsufe, Nahate, Eliaba, Jerohamo, Elkana. Samuele o be a na le barwa ba babedi: Joele, leitšibolo, le Abia, monnagwe. Tše ke ditlogolo tša Merari go tloga molokong wo mongwe go iša go ye e o latelago: Magli, Libni, Shimi, Usa, Shima, Hagia, Asaya. Ba ke banna ba Kgoši Dafida a ilego a ba bea bahlokomedi ba moopelo lefelong la tirelo kua Jerusalema ka morago ga ge Polokelo ya Kgwerano e seno išwa gona. Ba be ba šielana ka go tla mošomong Tenteng ya bodulo bja Morena pele ga ge Kgoši Solomone a aga Tempele. Ba malapa a bao ba bego ba swere mošomo wo ba be ba latelana ka mokgwa wo: Kgorwana ya Kehate: Hemane, moetapele wa sehlopha sa baopedi sa mathomo, e be e le morwa wa Joele. Lešika la gagwe le be le swaragane go fihlela go Jakobo ka tsela ye: Hemane, Joele, Samuele, Elkana, Jerohamo, Eliele, Toage, Tsufe, Elkana, Mahate, Amasai, Elkana, Joele, Asaria, Sofonia, Tahate, Asire, Abiasafo, Korage, Jitsara, Kehate, Lefi, Jakobo. Asafo e be e le moetapele wa sehlopha sa bobedi sa baopedi. Lešika la gagwe le be le swaragane go fihlela go Lefi ka mokgwa wo: Asafo, Berekia, Shima, Mikaele, Maasea, Malkia, Etni, Serage, Adaya, Ethane, Sima, Shimi, Jahate, Gershone, Lefi. Ethane wa kgorwana ya Merari e be e le moetapele wa sehlopha sa boraro sa baopedi. Lešika la gagwe le be le swaragane go fihlela go Lefi ka mo go latelago: Ethane, Kishi, Abdi, Maluke, Hashabia, Amatsia, Hilkia, Amtsi, Bani, Shemere, Magli, Mushi, Merari, Lefi. Balefi ba gabobona ba ile ba fiwa mediro ye mengwe lefelong la tirelo. Arone le ditlogolo tša gagwe ba be ba tšhuma diorelo, le gona ba tšhuma dihlabelo aletareng. Ba be ba hlokometše tirelo ka moka ka Felong mo Gokgethwakgethwa, ba bile ba hlokometše go boelanya setšhaba sa Israele le Modimo. Ba be ba dira tšeo ka moka go ya ka moo Moshe, mohlanka wa Modimo, a bego a ba laetše ka gona. Lešika la ditlogolo tša Arone šele: Eleasara, Finease, Abishua, Buki, Usi, Seragia, Merayote, Amaria, Ahitube, Tsadoko, Ahimaatse. Naga ye e aroletšwego ditlogolo tša Arone tša kgorwana ya Kehate e bile karolo ya mathomo ya naga ye e abetšwego Balefi ka matengwa. Karolo yeo e be e akaretša Hebrone nageng ya Juda, le phulo go e dikologa. Eupša mašemo le metse ye e bego e le ya Hebrone di ile tša fiwa Kalebe, morwa wa Jefune. Metse ye e ilego ya fiwa ditlogolo tša Arone še: wa Hebrone, motse wa botšhabelo, wa Jatire, wa Libna, wa Eshtemoa, wa Holone, wa Debire, wa Ashane, le wa Bethe-Shemeshe, le phulo ya yona. *** *** Nageng ya Benjamene ba ile ba fiwa metse ye e latelago le phulo ya yona: Geba, Alemete le Anathote. Metse yeo ya bona yohle e be e le ye lesome le metšo ye meraro yeo ba malapa a bona ba bego ba ka dula go yona. Metse ye lesome nageng ya seripakgoro sa Manase sa ka bodikela e ile ya abelwa ba bangwe ba kgorwana ya Kehate ka matengwa, lapa ka lapa. Ba ile ba abela kgorwana ya Gershone, lapa ka lapa, metse ye lesome le metšo ye meraro nageng ya Isakara, le ya Asere, le ya Naftali, le ya seripakgoro sa Manase sa kua Bashane. Ka yona tsela yeo, metse ye lesome le metšo ye mebedi nageng ya Rubene, le ya Gade, le ya Sebulone ya abelwa kgorwana ya Merari, lapa ka lapa. Ka mokgwa woo setšhaba sa Israele sa abela Balefi metse, gammogo le phulo go dikologa metse yeo. Metse ya nageng ya Juda, le ya Simeone, le ya Benjamene ye e sa tšwago go balwa ka maina le yona e ile ya abja ka matengwa. Malapa a mangwe a kgorwana ya Kehate a ile a fiwa metse le phulo nageng ya Efraime, e lego motse wa Shekeme wa botšhabelo nageng ya dithaba ya Efraime, wa Gesere, wa Jokmeamo, wa Bethe-Horone, wa Ayalone, le wa Gate-Rimone. Nageng ya seripakgoro sa Manase sa ka bodikela ba fiwa motse wa Anere le wa Bileamo le phulo go dikologa metse yeo. Malapa a kgorwana ya Gershone a ile a abelwa metse ye le phulo ya yona go e dikologa: Nageng ya seripakgoro sa Manase sa ka bohlabela ba fiwa wa Golane kua Bashane, le wa Ashtarote. Nageng ya Isakara ba abelwa wa Kedeshe, wa Daberate, wa Ramote, le wa Ene-Ganime. Nageng ya Asere ba newa wa Mishale, wa Abdone, wa Hukoko, le wa Rehobo. Nageng ya Naftali ba fiwa wa Kedeshe kua Galilea, wa Hamone, le wa Kiriathaime. Malapa a mangwe a kgorwana ya Merari a ile a abelwa metse ye le phulo go e dikologa: Nageng ya Sebulone ba fiwa wa Rimone le wa Taboro. Nageng ya Rubene, ka bohlabela bja noka ya Jordane go lebana le Jeriko, ba abelwa wa Betsere molaleng, wa Jahatse, wa Kedemote, le wa Mefaate. Nageng ya Gade ba newa wa Ramote kua Gileade, wa Mahanaime, wa Heshbone, le wa Jasere. Isakara o be a na le barwa ba bane, e lego Tola, Pua, Jashube le Shimrone. Tola o bile le barwa ba: Usi, Refaya, Jeriele, Jagmai, Jibsamo le Shemuele. E be e le dihlogo tša malapa a kgorwana ya Tola, mme e le bahlabani ba bogale. Mehleng ya Kgoši Dafida ditlogolo tša bona e be e le tše 22 600. Morwa wa Usi e be e le Jisragia. Jisragia le barwa ba gagwe ba bane, Mikaele, Obadia, Joele le Jishia, ka moka e be e le dihlogo tša malapa. Ba ile ba ba le basadi ba bantši le bana mo e lego gore ditlogolo tša bona di ile tša ba le bahlabani ba 36 000. Mananeo a malapa ka moka a kgoro ya Isakara a be a na le bahlabani ba 87 000 ba bogale. Benjamene o be a na le barwa ba bararo, e lego Bela, Bekere le Jediaele. Bela o bile le barwa ba bahlano, e lego Etsebone, Usi, Usiele, Jerimote le Iri. Bona e bile dihlogo tša malapa kgorwaneng yeo, mme ka moka ga bona e be e le bahlabani ba bogale. Ditlogolo tša bona e be e le tše 22 034 mananeong a bona a a ngwadilwego. Bekere o be a na le barwa ba: Semira, Joase, Eliesere, Elioenai, Omri, Jeremote, Abia, Anathote le Alemete. Mananeo a a ngwadilwego a ditlogolo tša bona ka malapa a be a na le bahlabani ba bogale ba 20 200. Morwa wa Jediaele e be e le Bilhane, gomme Bilhane a ba le barwa ba: Jeushe, Benjamene, Ehude, Kenaana, Setane, Tarshishe le Ahishahara. Bona e be e le dihlogo tša malapa kgorwaneng yeo, gomme ka moka ga bona e le bahlabani ba bogale. Gare ga ditlogolo tša bona go be go na le banna ba 17 200 ba ba ka yago ntweng. Shupime le Hupime, barwa ba Iri, le bona e be e le ba kgorwana ye. Hushime e be e le morwa wa Dane. Naftali o be a na le barwa ba: Jagtsiele, Guni, Jetsere le Shalume. E be e le ditlogolo tša Bilha. Mosadi wa Manase o ile a mmelegela Asriele, gomme motlabo wa gagwe wa Moaramo yena a belega Makire. Makire e bile tatagoGileade. O ile a nyakela Hupime mosadi, a ba a nyakela le Shupime. Leina la kgaetšedi ya gagwe e be e le Maaka. Morwa wa bobedi wa Makire e bile Tselofohade, mme yena a ba le barwedi fela. Maaka, mosadi wa Makire, o ile a belega barwa ba maina a bona e bego e le Perese le Serese. Serese a ba le barwa ba: Ulamo le Rekeme. Ulamo a ba le morwa yo leina la gagwe e bego e le Bedane. Tšeo ka moka ke ditlogolo tša Gileade, morwa wa Makire, setlogolo sa Manase. Kgaetšedi ya Gileade, Molekete, o ile a ba le barwa ba: Ishehode, Abiesere le Magla. Shemida o bile le barwa ba: Agiane, Shekeme, Likhi le Aniamo. Šedi ditlogolo tša Efraime go tloga molokong wo mongwe go iša go ye mengwe ye e o latelago: Shutelage, Berede, Tahate, Sabade le Shutelage. Efraime o bile le barwa ba bangwe ka ntle le Shutelage. Bona e be e le Esere le Elade bale ba go bolawa ge ba tlile go utswa dikgomo tša badudi ba mathomo ba Gathe. Tatagobona Efraime a ba ilela matšatši a mantši, gomme bomorwarragwe ba tla go mo homotša. A robala le mosadi wa gagwe gape, mme mosadi a ima, a ba le morwa. Ba mo rea leina la Beria ka baka la madimabe ao a ilego a wela lapa la bona. Efraime o be a na le morwedi yo leina la gagwe e bego e le Sheera. Yena o ile a aga motse wa Bethe-Horone ya ka Tletlolo le wa Bethe-Horone ya ka Tlase, le wa Usene-Sheera. Efraime a ba le morwa yo mongwe gape yo leina la gagwe e bego e le Refage, yo ditlogolo tša gagwe e bilego Reshefo, Telage, Tahane, Ladane, Amihude, Elishama, Nunu le Joshua. Naga ya bona ye ba bego ba dula go yona e be e akaretša Bethele le metse ya gona, go ya bohlabela go ba go yo fihla Naara, le bodikela go ba go yo fihla Gesere le metse ya gona. Le gona e be e akaretša motse wa Shekeme le wa Aya, le metse ye e bapilego le yona. Ditlogolo tša Manase di be di laola motse wa Bethe-Sheane, wa Taanake, wa Megido, le wa Doro, le metse ye e bapilego nayo. Yeo ke metse yeo ditlogolo tša Josefa, morwa wa Jakobo, di bego di dutše go yona. Asere o bile le barwa ba: Jimna, Jishba, Jishbi le Beria, le kgaetšedi ya bona, Serage. Barwa ba Beria e be e le Hebere le Malkiele. Malkiele o ile a hloma motse wa Birsaite. Hebere e bile tatagoJaflete le Shomere le Hotamo le Shuage, kgaetšedi ya bona. Jaflete o bile le barwa ba: Pasake, Bimhale le Ashbate. Shomere o ile a ba le barwa ba: Roga, Jehuba le Aramo. Hotamo, morwarragwe, o bile le barwa ba: Tsofage, Jimna, Sheleshe le Amale. Ditlogolo tša Tsofage e bile Suage, Harnefere, Shuale, Beri, Jimra, Betsere, Hode, Shama, Shilsha, Jitrane le Beera. Ditlogolo tša Jetere e bile Jefune, Pispa le Ara, mme tša Ula ya ba Arage, Haniele le Ritsia. Bao ka moka e bile ditlogolo tša Asere. E be e le dihlogo tša malapa, bagale ba ba hlaotšwego, le gona e le mantona a go tuma. Gare ga ditlogolo tša Asere tše di bego di ngwadišitšwe mananeong ao go be go na le banna ba dikete tše masome a mabedi le tše di selelago ba ba ka yago ntweng. Benjamene o be a na le barwa ba ba fetšago seatla. Bona šeba ka go hlatlamana ga bona: Bela, Ashbele, Agrage, Noha le Rafa. Barwa ba Bela e be e le Adara, Gera, Abihude, Abishua, Naamane, Ahoage, Gera, Shefufane le Huramo. Barwa ba Ehude e be e le Naamane, Ahiya le Gera. E be e le dihlogo tša malapa ao a bego a dula Geba, fela a hudušetšwa Manahate. Gera, tatagoUsa le Ahihude, e bile yena yo a ba hudušitšego. *** Shaharaime o ile a hlala basadi ba gagwe, Hushime le Baara. Ka morago, ge a dula nageng ya Moaba, Hodeshe, mosadi wa gagwe yo mongwe, a mmelegela barwa ba: Jobabe, Tsibia, Mesha, Malkamo, *** Jeutse, Sakea le Mirma. Barwa ba gagwe ka moka e ile ya ba dihlogo tša malapa. Le Hushime, mosadi wa gagwe yo mongwe, a mmelegela barwa, e lego Abitube le Elpaale. Elpaale o bile le barwa ba: Ebere, Mishamo le Shemede. E bile Shemede yo a ilego a aga motse wa Ono le wa Lodo le metsana ya yona. Beria le Shema, dihlogo tša malapa a bao ba bego ba dula motseng wa Ayalone, ba ile ba raka batho ba ba bego ba agile motseng wa Gathe. Barwa ba Beria e be e le Agio, Shashake, Jeremote, Sebadia, Arade, Edere, Mikaele, Jishpa le Joha. Tše dingwe ditlogolo tša Elpaale e be e le Sebadia, Meshulamo, Hiski, Hebere, Jishmerai, Jislia le Jobabe. Tše dingwe ditlogolo tša Shimi e be e le Jakime, Sikri, Sabdi, Elienai, Tsiletai, Eliele, Adaya, Beraya le Shimrate. Tše dingwe ditlogolo tša Shashake e be e le Jishpane, Ebere, Eliele, Abdone, Sikri, Hanane, Hanania, Elamo, Antotia, Jifdea le Penuele. Tše dingwe ditlogolo tša Jerohamo e be e le Shamsherai, Sheharia, Athalia, Jaareshia, Eliya le Sikri. Bao e be e le dihlogo tša malapa go ya ka go latelana ga borakgolokhukhu ba bona, e le baetapele ba go dula Jerusalema. Jeiele o ile a hloma motse wa Gibeone gomme a dula moo. Mosadi wa gagwe e be e le Maaka, gomme morwa wa gagwe wa mathomo e le Abdone. Barwa ba gagwe ba bangwe e be e le Tsure, Kishe, Baale, Nere, Nadaba, Gedoro, Agio, Sekere le Miklote, tatagoShima. Le bona ba be ba dula Jerusalema, kgauswi le malapa a mangwe a kgorwana ya gabobona. Nere e be e le tatagoKishe, gomme Kishe e le tatagoKgoši Saulo. Saulo o ile a ba le barwa ba: Jonathane, Malkishua, Abinadaba le Eshbaale. Jonathane e bile tatagoMeribe-Baale, yo e ilego ya ba tatagoMika. Mika o be a na le barwa ba: Pitone, Meleke, Tagrea le Ahase. Ahase e be e le tatagoJoada, yo e bego e le tatagoAlemete, Asmabethe le Simri. Simri e be e le tatagoMotsa, Motsa e le tatagoBina, Bina e le tatagoRafa, Rafa a tswetše Elasa, mme Elasa a tswetše Atsele. Atsele o be a na le barwa ba ba selelago, e lego Asrikamo, Bokru, Ishmaele, Shearia, Obadia le Hanane. Esheke, morwarragoAtsele, o be a na le barwa ba bararo, e lego Ulamo, Jeushe le Elpelete. Barwa ba Ulamo e be e le bahlabani ba bogale le boramesebe ba go phala ba bangwe. O be a na le barwa le ditlogolo tše ntši – e le ba lekgolo le masome a a fetšago seatla. Bao ka moka e be e le ba kgoro ya Benjamene. Setšhaba ka moka sa Israele se be se ngwadišitšwe ka malapa a sona, se ngwadilwe ka Pukung ya magoši a Israele. Batho ba Juda ba be ba thopetšwe Babilonia ka baka la go se botegele Modimo. Ba mathomo ba go boela malapeng a bona metseng ya gabobona e be e le bathofela le baprista le Balefi le bašomi ba ka Tempeleng. Batho ba kgoro ya Juda le ya Benjamene le ya Efraime le ya Manase ba ile ba ya ba dula Jerusalema. E ile ya ba batho ba makgolo a a selelago a masome a senyane ba kgoro ya Juda ba ba ilego ba dula Jerusalema. Moetapele wa ditlogolo tša Peretse, morwa wa Juda, e be e le Utai, morwa wa Amihude, le setlogolo sa Omri. Omri e be e le morwa wa Imri, gomme Imri e le morwa wa Bani. Moetapele wa ditlogolo tša Shela, morwa wa Juda, e be e le Asaya, yo e bego e le hlogo ya lapa labo. Moetapele wa ditlogolo tša Serage, morwa wa Juda, e be e le Jeuele. *** *** Batho ba ba latelago ba kgoro ya Benjamene ba be ba dula Jerusalema: Salu, morwa wa Meshulamo, setlogolo sa Hodabia, setlogolokhukhu sa Senua Jibnea, morwa wa Jerohamo Ela, morwa wa Usi, le setlogolo sa Mikiri Meshulamo, morwa wa Shefatia, setlogolo sa Reuele, setlogolokhukhu sa Jibnia *** E be e le batho ba makgolo a senyane le masome a a fetšago seatla le metšo ye e selelago ba kgoro yeo ba ba bego ba dula moo. Banna bao ka moka e be e le dihlogo tša malapa. Baprista ba ba latelago ba be ba dula Jerusalema: Jedaya, Joyaribe le Jakine Asaria, morwa wa Hilkia, mohlankedi yo mogolo ka Tempeleng, yoo borakgolokhukhu ba gagwe ba bangwe e bego e le Meshulamo, Tsadoko, Merayote le Ahitube Adaya, morwa wa Jerohamo, yoo borakgolokhukhu ba gagwe ba bangwe e bego e le Pashure le Malkia Masai, morwa wa Adiele, yoo borakgolokhukhu ba gagwe ba bangwe e bego e le Jagsera, Meshulamo, Meshilemote le Imere *** *** Baprista ba e bego e le dihlogo tša malapa e be e le ba sekete le makgolo a a šupago le masome a a selelago. E be e le bakgoni ba mediro ya ka Tempeleng. Balefi ba ba latelago ba be ba dula Jerusalema: Shemaya, morwa wa Hashube, yoo borakgolokhukhu ba gagwe ba bangwe e bego e le Asrikamo le Hashabia, ba kgorwana ya Merari Bakbakare, Hereshe le Galale Matania, morwa wa Mika, yoo borakgolokhukhu ba gagwe ba bangwe e bego e le Sikri le Asafo Obadia, morwa wa Shemaya, yoo borakgolokhukhu ba gagwe ba bangwe e bego e le Galale le Jedutune Berekia, morwa wa Asa, le setlogolo sa Elkana, yoo a bego a dula nageng ye e bego e le ya motse wa Netofa *** *** Baleti ba masoro a Tempele ba ba latelago ba be ba dula Jerusalema: Shalume, Akube, Talmone le Ahimane. Shalume e be e le moetapele wa bona. Pele ga moo ba dikgorwana tša bona ba be ba beilwe ka bohlabela bja Lesoro la Kgoši, e le bona baleti ba masoro a mešaša ya Balefi. Shalume, morwa wa Kore le setlogolo sa Abiasafo, le banna ba gabo ba kgorwana ya Korage ba be ba beilwe baleti ba mojako wa Tente ya bodulo bja Morena, bjalo ka borakgolokhukhu ba bona mola ba be ba sa hlokometše mešaša ya Morena. Finease, morwa wa Eleasara, e be e kile ya ba molaodi wa bona. A Morena a be le yena. Sakaria, morwa wa Meshelemia, le yena e be e le moleti wa mojako wa Tente ya bodulo bja Morena. Go ile gwa kgethwa banna ba makgolo a mabedi le lesome le metšo ye mebedi gore ba lete matseno le masoro. Ba be ba ngwadišitšwe go ya ka metse ye ba bego ba dula go yona. E bile Kgoši Dafida le Samuele, mmoni, bao ba ilego ba bea borakgolokhukhu ba bona maemong ao a bona. Bona le ditlogolo tša bona ba ile ba tšwela pele le go leta masoro a Tempele ye e bego e bitšwa Tente. Go be go na le lesoro ka mathokong ka mane: ka leboa, le ka borwa, le ka bohlabela, le ka bodikela, gomme lesoro le lengwe le le lengwe le na le moleti yo mogolo. Baleti bao ba be ba thušwa ke meloko ya bobona ye e bego e dula metsaneng ya bona. Bona ba be ba swanetše go šielana ka go tla modirong wa bona wa go leta – yo mongwe le yo mongwe a swanetše go ba modirong matšatši a a šupago. Baleti bao ba bagolo ba bane e be e le Balefi mme e le bona ba hlokometšego tšohle. Le gona ba be ba hlokometše diphapoši tša Tempele, le thoto yeo e bego e beilwe ka go tšona. Ba be ba dula kgauswi le Tempele, ka gobane e be e le modiro wa bona go e leta le go bula masoro mosong wo mongwe le wo mongwe. Balefi ba bangwe ba be ba hlokometše dibjana tše di bego di šomišwa dihlabelong. Ba be ba di bala ge ba di ntšha le ge ba di tsenya nako ye nngwe le ye nngwe ge di šomišitšwe. Ba bangwe ba be ba hlokometše ditlabakelo tše dingwe le dilo tše kgethwa, le bupi le beine le makhura a mohlware le seorelo le dinoko. Eupša go hlakahlakantšha dinoko e be e le mošomo wa baprista. Molefi yo leina la gagwe e bego e le Matitia, morwa wa mathomo wa Shalume, wa kgorwana ya Korage, o be a hlokometše go apea dinkgwa tše di neelwago Morena. Ba kgorwana ya Kehate ba be ba hlokometše go apea dinkgwa tše kgethwa tša Tempele tšatši le lengwe le le lengwe la Sabatha. Dihlogo tše dingwe tša malapa a Balefi di be di hlokometše go opela ka Tempeleng. Ba be ba dula ka diphapošing tše dingwe tša Tempele, gomme ba sa dire mediro ye mengwe ka gobane ba be ba hlokomela moopelo bošego le mosegare. Banna ba e be e le dihlogo tša malapa a Balefi go ya ka go latelana ga borakgolokhukhu ba bona. E be e le baetapele ba ba bego ba dula Jerusalema. Jeiele o ile a hloma motse wa Gibeone gomme a dula gona. Mosadi wa gagwe e be e le Maaka. Morwa wa gagwe wa leitšibolo e be e le Abdone, mme barwa ba gagwe ba bangwe e le Tsure, Kishe, Baale, Nere, Nadaba, Gedoro, Agio, Sakaria le Miklote, tatagoShima. Bona ba be ba dula Jerusalema, kgauswi le malapa a mangwe a kgorwana ya gabobona. Nere e bile tatagoKishe, mme Kishe ya ba tatagoSaulo. Saulo o ile a ba le barwa ba: Jonathane, Malkishua, Abinadaba le Eshbaale. Jonathane e bile tatagoMeribe-Baale, yo e ilego ya ba tatagoMika. Mika o be a na le barwa ba: Pitone, Meleke, Tagrea le Ahase. Ahase e bile tatagoJoada yo e ilego ya ba tatagobarwa ba: Alemete, Asmabethe le Simri. Simri e bile tatagoMotsa, Motsa ya ba tatagoBina, Bina ya ba tatagoRefaya, Refaya ya ba tatagoElasa, mme Elasa ya ba tatagoAtsele. Atsele o be a na le barwa ba ba selelago, e lego Asrikamo, Bokru, Ishmaele, Shearia, Obadia le Hanane. Bafilista ba ile ba lwa le Baisraele thabeng ya Gilboa. Baisraele ba bantši ba bolawa moo, gomme ba ba šetšego ba tšhaba. Eupša Bafilista ba rakediša Saulo le barwa ba gagwe, Jonathane, Abinadaba le Malkishua. Moo go bego go le Saulo ntwa e be e le ye šoro, gomme ge boramesebe ba mmatamela mo ba kago mo thunya ka mesebe, a thothomela kudu. A re go morwaladibetša wa gagwe: “Hwanyolla tšhoša ya gago o mphuleletše ka yona, gore Bafilista ba ba go se bolle ba se ke ba tla ba bapala ka nna.” Eupša morwaladibetša yoo a boifa kudu go ka dira taba yeo. Ka gona Saulo a tšea tšhoša ya gagwe ka boyena a itahlela godimo ga yona. Ge morwaladibetša yoo a bona gore Saulo o hwile, le yena a itahlela godimo ga ya gagwe tšhoša mme a hwa. Ka gona Saulo le barwa ba gagwe ka bararo ba hwa mmogo gomme ya ba mafelelofelelo a mmušo wa gagwe. Ge Baisraele ba ba bego ba dula ka moeding wa Jesriele ba ekwa gore madira a tšhabile, le gore Saulo le barwa ba gagwe ba hwile, ba tlogela metse ya bona ba tšhaba. Bafilista ba tla ba dula go yona. Ka letšatši le le latelago la ntwa Bafilista ba yo hula ditopo, gomme ba hwetša setopo sa Saulo le tša barwa ba gagwe di rapaletše thabeng ya Gilboa. Ba mo apola diaparo tša gagwe tša ntwa, ba tšea hlogo ya gagwe le dibetša ba di romela ka batseta nageng ya Filistia ba di šikiša le naga, ba botša medimo ya bona ya diswantšho le batho ba gabobona gore Baisraele ba fentšwe. Ba bea dibetša tša gagwe ka tempeleng ye nngwe ya bona, gomme ba kokotela hlogo ya gagwe ka tempeleng ya Dagone, modimo wa bona. Ge batho ka moka ba Jabeshe kua Gileade ba ekwa se Bafilista ba se dirilego Saulo, banna bohle ba bagale ba ya ba tšea setopo sa Saulo le tša barwa ba gagwe ba di tliša Jabeshe. Ba di boloka fao ka fase ga mohlare wa moeike, gomme ba ikona dijo matšatši a a šupago. Lehu la Saulo le hlotšwe ke go se botegele Morena ga gagwe, a nyatša ditaelo tša gagwe, le gona a kile a nyaka keletšo go meoya ya bahu bakeng sa gore a botšiše Morena. Ka gona Morena a mmolaya gomme mmušo a o fa Dafida, morwa wa Isai. Setšhaba ka moka sa Israele se ile sa ya go Dafida kua Hebrone sa re go yena: “Re madi eno. Mehleng ye e fetilego, le mola Saulo e sa le kgoši ya rena, o be o eta setšhaba sa Israele pele ntweng. Ebile Morena Modimo wa gago o rile go wena: ‘Ke wena o swanetšego go diša setšhaba sa ka; ke wena o swanetšego go ba mmuši wa sona.’ ” Ka gona baetapele ka moka ba Israele ba tla go Kgoši Dafida kua Hebrone. Yena a dira kgwerano le bona pele ga Morena, ba mo tlotša gomme ya ba kgoši ya Israele, bjalo ka ge Morena a be a holofeditše ka Samuele. Kgoši Dafida le Baisraele ka moka ba ya ba hlasela Jerusalema. Ka nako yeo motse woo o be o sa tsebja ka leina la Jebuse, gomme Bajebuse, badudi ba mathomo moo nageng yeo, ba be ba sa agile moo. Bajebuse ba botša Dafida gore a ka se tsene motseng, eupša Dafida a thopa sebo sa bona sa Sione, gomme sa tsebja ka la “Motse wa Dafida”. Yena a re: “Motho wa mathomo yo a kago bolaya Mojebuse e tla ba moetapele le molaodi wa madira a ka!” Joaba, yo mmagwe e bego e le Tseruya, a hlasela pele gomme ya ba molaodi. Ka baka la gore Dafida o ile a yo dula ka sebong seo, se ile sa bitšwa “Motse wa Dafida”. O ile a tsošološa karolo ya motse ya go se potologa, a thoma felo mo naga e bego e lekelelantšwe, gomme Joaba a tsošološa ye nngwe ye e šetšego. Maatla a Dafida a fela a oketšega ka gobane Morena Ramaatlaohle o be a na le yena. A ke maina a bagale ba Dafida ba bagolo bao, gammogo le setšhaba ka moka sa Israele, ba ilego ba ema naye gore e be kgoši, bjalo ka ge Morena a be a boletše gore e tla ba kgoši. Bona ba ile ba fela ba mo thekgile kudu mmušong wa gagwe. Wa mathomo e be e le Jashobamo wa kgorwana ya Hakmone, moetapele wa “Bararo”. O ile a lwa le banna ba makgolo a mararo ka lerumo la gagwe gomme a ba bolaya ka moka ntweng e tee. Wa bobedi gare ga “Bararo” bao ba bagale e be e le Eleasara, morwa wa Dodo, wa kgorwana ya Ahoage. Yena o ile a lwa le Bafilista ntweng ya Pase-Damime a na le Dafida. O be a le ka tšhemong ya garase ge Baisraele ba thoma go tšhaba, eupša yena le banna ba gagwe ba ema gare ga tšhemo ba bolaya Bafilista mme ba šireletša tšhemo. Morena a fentšha Baisraele fenyang. Ka letšatši le lengwe bagale ba bararo ba bagolo ba “Ba Masome a Mararo” ba ya go Dafida leswikeng kgauswi le lewa la Adulamo, mola sehlopha sa Bafilista se hlomile mešaša molaleng wa Barafa. Ka nako yeo Dafida o be a le ka sebong thabeng, gomme sehlopha sa Bafilista se thopile Betlelehema. Dafida a kwa a nyoretšwe meetse a gabo mme a re: “Nke nkabe motho a yo nkgela meetse sedibeng sa lesorong la kgoro ya Betlelehema!” Bahlabani bale ba bararo ba bagale ba šwahla mešaša ya Bafilista, ba yo ga meetse sedibeng seo, gomme ba a tlišetša Dafida. Fela a se ke a a nwa, eupša a a tšholla ya ba kabelo go Morena gomme a re: “A Modimo a se ntumelele go nwa meetse a! Ge nka a nwa go ka swana le ge ke enwa madi a banna ba ba ilego ba ipea kotsing ya lehu ba!” Ka gona a gana go a nwa. Tšeo e bile ditiro tše bogale tša bahlabani bao ba bararo ba bagale. Abishai, morwarragoJoaba, e be e le moetapele wa “Bagale ba Masome a Mararo”. O ile a lwa le banna ba makgolo a mararo ka lerumo la gagwe, a ba bolaya, gomme a thoma go tuma gare ga bao “Ba Masome a Mararo”. Ke yena a bego a tumile kudu moo gare ga “Ba Masome a Mararo” gomme e ile ya ba moetapele wa bona, eupša o be a se a tuma go swana le “Bararo” bale. Benaya, morwa wa Joyada, wa go tšwa Kabtsiele, e be e le mohlabani yo mongwe yo bogale; o dirile ditiro tše ntši tše kgolo, go balwa le go bolaya bahlabani ba babedi ba bagolo ba Bamoaba. O kile a theogela ka moleteng ka letšatši la lehlwa a bolaya tau. Le gona o kile a bolaya monna yo mongwe wa tšitširipa wa Moegepeta wa go feta dimetara tše pedi ka botelele, yo a bego a itlhamile ka lerumo leo theko ya lona e bego e lekana le mpheng wa mogoma. Benaya a mo hlasela ka molamo, a ubula lerumo lela seatleng sa Moegepeta, a mmolaya ka lona. Tšeo e bile ditiro tše bogale tša Benaya yo le yena a bego a tumile gare ga “Ba Masome a Mararo”. O ile a tuma kudu gare ga bona, eupša a se swane le “Bararo” bale. Dafida o ile a mmea mohlokomedi wa baleti ba gagwe. Bahlabani ba bangwe ba bagale šeba: Asahele, morwarragoJoaba Elhanane, morwa wa Dodo, wa Betlelehema Shamote wa Harode Heletse wa Pelete Ira, morwa wa Ikeshe, wa Tekoa Abiesere wa Anathote Sibekai wa Husha Ilai wa Ahoage Maharai wa Netofa Helede, morwa wa Baana, wa Netofa Itai, morwa wa Ribai, wa Gibea kua Benjamene Benaya wa Piratone Hidai wa dinokaneng kgauswi le Gaashe Abiele wa Arba Asmabethe wa Bahurime Eliagaba wa Shaalbone Jashene wa Gisone Jonathane, morwa wa Shage, wa Harare Ahiamo, morwa wa Sakara, wa Harare Elifale, morwa wa Ure Hefere wa Mekera Ahia wa Pelone Hetsero wa Karmele Naarai, morwa wa Esbai Joele, morwarragoNathane Mibihara, morwa wa Hagare Tseleke wa Amone Nagrai, morwaladibetša wa Joaba, wa Beerote Ira le Garebe ba Jatire Uria, Mohete Sabade, morwa wa Aglai Adina, morwa wa Shisa, moetapele kgorong ya Rubene, le sehlopha sa gagwe sa bahlabani ba masome a mararo Hanane, morwa wa Maaka Joshafate wa Mitine Usia wa Ashtarote Shama le Jeiele, barwa ba Hotamo, ba Aroere Jediaele le Joha, barwa ba Shimri, ba Titse Eliele wa Mahaba Jeribai le Joshabia, barwa ba Elnaamo Jitma wa Moaba Eliele, Obede le Jaasiele ba Tsoba. Mola Dafida a sa dula kua Tsikelage, mo a bego a ile gona ge a tšhabile Kgoši Saulo, o ile a tlatšwa ke bagale ba ba ilego ba mo thuša dintweng, banna ba kgoro ya Benjamene, ye e bego e le ya gaboSaulo. Ba be ba kgona go thunya mesebe le diragamabje ka matsogo a go ja le a nngele. Balaodi ba bona e be e le Ahiesere le Joase, barwa ba Shemaa wa Gibea. Bahlabani bao šeba: Jesiele le Pelete, barwa ba Asmabethe Beraka le Jehu ba Anathote Jishmaya wa Gibeone, mogale gare ga “Ba Masome a Mararo”, yo e bego e le yo mongwe wa baetapele ba bona Jeremia, Jahasiele, Johanane, le Josabade wa Gedera Elusai, Jerimote, Bealia, Shemaria, le Shefatia wa Harife Elkana, Jishia, Asarele, Joesere le Jashobamo ba kgorwana ya Korage Joela le Sebadia, barwa ba Jerohamo wa Gedoro. *** *** *** *** Šea maina a bagale ba bagolo ba ba bego ba loketše ntwa ba kgoro ya Gade ba ba ilego ba tlatša Dafida mola a le sebong sa lešokeng. E be e le bakgoni ba go swara dikotse le marumo, difahlego tša bona di be di tšhoša bjalo ka sa tau, mme ba na le lebelo la tshephe. Ka maemo ba be ba latelana ka mokgwa wo: Esere, Obadia, Eliaba, Mishmana, Jeremia, Athai, Eliele, Johanane, Elsabade, Jeremia le Makabanai. *** *** *** *** Banna ba bangwe ba kgoro yeo ya Gade e be e le balaodi ba bagolo, yo mongwe le yo mongwe a laola banna ba sekete, ba bangwe e le balaodi ba bannyane, yo mongwe le yo mongwe a laola banna ba lekgolo. Kgweding ya pele ya ngwaga wo mongwe ka nako ye noka ya Jordane e tletše wa go falala ba kile ba e tshela, ba raka batho ba ba bego ba dula melaleng ya ka bohlabela le ya ka bodikela bja noka. Ka nako ye nngwe banna ba bangwe ba kgoro ya Benjamene le ya Juda ba kile ba ya sebong se Dafida a bego a le ka go sona. Yena a tšwa a yo ba gahlanetša gomme a re: “Ge eba le tlile ka maikemišetšo a mabotse go tlo nthuša, ke le amogela ka pelo ya ka ka moka. Eupša ge le tlilo nkeka mme la nkgafela manabeng a ka, etšwe ke se ka phošetša motho, Modimo wa borakgolokhukhu ba rena o tla bona taba yeo gomme a le otla.” Moya wa Modimo wa aparela yo mongwe wa bona, Amasai, yo ka morago e ilego ya ba moetapele wa “Ba Masome a Mararo”, gomme a goelela a re: “Ke rena ba gago Dafida! Re eme nago, morwa wa Isai! Nke o atlege, go atlege le yo a emego nago, ka gobane Modimo wa gago o a go thuša!” Dafida a ba amogela gomme a ba dira balaodi ba madira a gagwe. Bahlabani ba bangwe ba go tšwa kgorong ya Manase ba ile ba itliša go Dafida ge a be a etla le Bafilista go tlo lwa le Kgoši Saulo. Eupša o ile a se ke a thuša Bafilista, ka gobane dikgoši tša bona di be di rile go rerišana tša mo gomisetša Tsikelage, ka ge di be di boifa gore a ka ba eka go Saulo, mong wa gagwe. Bahlabani ba ba tšwago kgorong ya Manase ba ba ilego ba itliša go Dafida ge a boa, šeba: Adnage, Josabade, Jediaele, Mikaele, Josabade, Elihu le Tsiletai. Ka moka ga bona mo kgorong ya Manase ba be ba laola dikgao tša banna ba sekete. Ba ile ba thuša Dafida e le balaodi ba madira a gagwe, ka gobane ka moka ga bona e be e le bagale ba bagolo. Ka morago ya ba balaodi madireng a Israele. Letšatši le lengwe le le lengwe go be go itliša banna go Dafida, ka gona madira a gagwe ya ba a mantšintši. Mola Dafida a le Hebrone bahlabani ba bantši ba ba itlhametšego ntwa ba ile ba tla go yena go mmea kgoši legatong la Saulo, go ya ka taelo ya Morena. Palo ya bona e be e le ka mokgwa wo: ba kgoro ya Juda: banna ba ba itlhametšego ntwa ba dikete tše di selelago le makgolo a seswai ba swere dikotse le marumo; ba kgoro ya Simeone: bagale ba bagolo ba ntwa ba dikete tše di šupago le lekgolo; ba kgoro ya Lefi: banna ba dikete tše nne le makgolo a a selelago; Joyada, molaodi wa kgorwana ya Arone, gotee le bao ba bego ba na le yena ba dikete tše tharo le makgolo a a šupago; ba gaboTsadoko, mogale yo mogolo wa lesogana: balaodi ba masome a mabedi a metšo ye mebedi; ba kgoro ya Benjamene, yona kgoro ya gaboSaulo: banna ba dikete tše tharo; bontši bja batho ba Benjamene bo ile bja no fela bo botegela Saulo; ba kgoro ya Efraime: bagale ba bagolo ba dikete tše masome a mabedi le makgolo a seswai ba go tuma dikgorwaneng tša gabobona; ba seripa sa kgoro ya Manase sa ka bodikela: banna ba dikete tše lesome le tše seswai ba ba bego ba kgethilwe gore ba yo bea Dafida kgoši; ba kgoro ya Isakara: baetapele ba makgolo a mabedi, gotee le banna ba ba bego ba laolwa ke bona; baetapele ba ba be ba tseba se Baisraele ba bego ba swanetše go se dira le nako ye botse ya go se phetha; ba kgoro ya Sebulone: banna ba ba itlhamilego ba dikete tše masome a mahlano, ba go se dikadikele ntwa, ba rutilwego go lwa ka dihlabani tša mehutahuta; ba kgoro ya Naftali: balaodi ba sekete, gotee le banna ba dikete tše masome a mararo le tše di šupago ba ba itlhamilego ka dikotse le marumo; ba kgoro ya Dane: banna ba ba hlahlilwego go tša ntwa ba dikete tše masome a mabedi le tše seswai le makgolo a a selelago; ba kgoro ya Asere: banna ba ba bego ba rutantšheditšwe ntwa, e le bokomana madulaabapile, ba dikete tše masome a mane; ba dikgoro tša ka bohlabela bja Jordane – kgoro ya Rubene, kgoro ya Gade, le seripa sa kgoro ya Manase sa ka bohlabela: banna ba dikete tše lekgolo le tše masome a mabedi, ba ba bego ba rutilwe go lwa ka dihlabani tša mehutahuta. *** *** *** *** *** *** *** *** *** *** Bahlabani bao ka moka ba ile ba ya Hebrone ba beakanyeditšwe ntwa, ba bile ba tshwetše mare diatleng gore ba yo bea Dafida kgoši ya Israele ka moka. Baisraele ba bangwe ka moka le bona ba be ba na le morero o tee woo wa go mmea kgoši. Ba ile ba tšea matšatši a mararo moo ba na le Dafida, ba eja, ba enwa tše ba gabobona ba bego ba ba file tšona. Meloko ya bobona e ile ya tla e etšwa le kua kgole kgorong ya Isakara, le ya Sebulone, le ya Naftali e tliša dijo ka bontši ka dipokolo, dikamela, dimeila le dipholo, e le bupi, diphaphathi tša makwapi a mago le tša makwapi a diterebe, beine, le makhura a mohlware, le dikgomo le dihuswane gore ba tle ba hlabe, gobane Baisraele ba be ba thabile. Kgoši Dafida o ile a rerišana le balaodi ka moka ba ba bego ba laola dikgao tša banna ba sekete le tša banna ba lekgolo. Ke moka a re go setšhaba ka moka sa Israele: “Ge eba le dumela le gona e le thato ya Morena Modimo wa rena, a re romeng batseta bathong ba bangwe ba gaborena ba ba lego nageng ka moka ya Israele, le go baprista le go Balefi metseng ya bona, gomme ba ba botše gore ba kgobokane mo le rena. Ke gona re tlago ya ra tšea Polokelo ya Kgwerano ya Modimo wa rena, yeo re bego re sa tshwenyege ka yona mola Saulo e sa le kgoši.” Setšhaba sa kgahlwa ke kgopolo yeo gomme sa e dumela. Ka gona Dafida a rapa pitšo ya setšhaba ka moka sa Israele, go tloga mollwaneng wa Egepeta go fihla sefateng sa Hamate, gore go tle go yo tšewa Polokelo ya Kgwerano kua Kiriate-Jearime e tlišwe Jerusalema. Dafida le setšhaba ba ya motseng wa Baala, ke go re Kiriate-Jearime, nageng ya Juda, go yo tšea Polokelo ya Kgwerano ya Modimo, yeo e bego e abetšwe Morena yoo setulo sa gagwe sa bogoši se lego ka godimo ga bakerubi. Ba ntšha Polokelo yeo ya Kgwerano ngwakong wa Abinadaba ba e nametša koloi ye mpsha. Usa le Agio ba be ba hlahla koloi, mola Dafida le setšhaba ka moka ba bina ka mafolofolo a magolo go godiša Modimo. Ba be ba opela ba bile ba letša diletšo tša dikgapa, diharepa, meropa, masenkana le diphala. Ge ba fihla seboeng sa Kidone, dipholo tša thetšwa, gomme Usa a otlolla letsogo a swareletša Polokelo ya Kgwerano. Gatee fela Morena a galefela Usa gomme a mmolaela go kgwatha Polokelo yeo. A hwela moo pele ga Modimo, ka gona lefelo leo la bitšwa Peretse-Usa go tloga tšatši leo. Dafida a ferekana ka gobane Morena o be a otlile Usa a galefile. Dafida a boifa Modimo mme a re: “A bjale nka tliša bjang Polokelo ya Kgwerano go nna?” Ka gona Dafida a se ke a e iša Jerusalema. A e arošetša lapeng la monna yo mongwe yo leina la gagwe e bego e le Obede-Edomo, wa motse wa Gathe. E ile ya dula moo dikgwedi tše tharo, gomme Morena a šegofatša lapa la Obede-Edomo le tšohle tše a bego e na le tšona. Kgoši Hiramo wa Tirose a roma batseta gore ba yo kwana le Dafida; a mo romela dikota tša mosedere le babetli gotee le babetli ba matlapa gore a ikagele ntlo, ka gona Dafida a lemoga gore Morena o mo tiišeditše bogošing bja Israele, le gore o atlegiša mmušo wa gagwe ka baka la setšhaba sa Morena sa Israele. Moo Jerusalema Dafida o ile a nyala basadi ba bangwe gape, gomme a ba le barwa le barwedi ba bangwe. Gona moo a belegelwa bana ba ba latelago: Shamua, Shobabe, Nathane, Solomone, Jibehara, Elishua, Elpelete, Noga, Nefege, Jafia, Elishama, Beeliada le Elifelete. Ge Bafilista ba ekwa gore Dafida bjale o tloditšwe ya ba kgoši ya naga ka moka ya Israele, madira a bona ohle a tšwa go yo mo tsoma. Dafida a kwa taba yeo mme a tloga a yo gahlana le bona. Bafilista ba fihla molaleng wa Barafa gomme ba ipeakanyetša ntwa moo. Dafida a botšiša Modimo a re: “A ke hlasele Bafilista? A o tla ba gafela diatleng tša ka?” Morena a mo fetola a re: “Ee, ba hlasele! Ke tla ba gafela diatleng tša gago!” Bafilista ba ya Baale-Peratsime gomme Dafida a ba fenya moo. A re: “Modimo o gogotše manaba a ka ka seatla sa ka bjalo ka lefula.” Ka gona felo fao go bitšwa Baale-Peratsime. Ge Bafilista ba tšhaba ba ile ba tlogela medimo ya bona ya diswantšho, gomme Dafida a laela gore e tšhungwe. Bafilista ba boela molaleng mme ba ipeakanyetša ntwa gape. Gapegape Dafida a botšiša Modimo, gomme yena a mo fetola a re: “O se ke wa ba hlasela o le mo, fela o ba potologe mme o itokišetše go ba hlasela o le kua mehlareng ya mekgokgopha. Ge o ekwa mešito godimo ga mehlare, gona o hlasele, ka gobane ke tla be ke sepela pele ga gago go yo fenya madira a Bafilista.” Dafida a dira se Modimo a mo laetšego sona, gomme a rakediša Bafilista go tloga Gibeone go ba go yo fihla Gesere. Go tuma ga Dafida gwa tsebega nageng ye nngwe le ye nngwe, gomme Morena a dira gore ditšhaba tšohle di mmoife. Dafida o ile a ikagela mengwako motseng wa Dafida. A ba a lokiša lefelo la Polokelo ya Kgwerano ya Modimo, gomme a hloma tente fao gore Polokelo e tle e bewe ka go yona. Ke moka a re: “Ke Balefi fela ba ba swanetšego go rwala Polokelo ya Kgwerano, ka gobane ke bona ba Morena a ba kgethilego gore ba e rwale, le gona ba mo hlankele go ya go ile.” Ka gona Dafida a bothela setšhaba ka moka sa Israele Jerusalema gore go tle go tlišwe Polokelo ya Kgwerano lefelong le a e lokišeditšego lona. Ka morago a bitša ditlogolo tša Arone le Balefi. Ba kgorwana ya Kehate gwa tla Uriele a ukametše banna ba lekgolo le masome a mabedi ba kgorwana ya gabo; ba kgorwana ya Merari gwa tla Asaya a ukametše banna ba makgolo a mabedi le masome a mabedi; ba kgorwana ya Gershone gwa tla Joele a ukametše banna ba lekgolo le masome a mararo; ba kgorwana ya Elitsafane gwa tla Shemaya a ukametše banna ba makgolo a mabedi; ba kgorwana ya Hebrone gwa tla Eliele a ukametše banna ba masome a seswai, gomme ba kgorwana ya Usiele gwa tla Aminadaba a ukametše banna ba lekgolo le ba lesome le ba babedi. Dafida a bitša moprista Tsadoko le moprista Abiatare le Balefi ba: Uriele, Asaya, Joele, Shemaya, Eliele le Aminadaba. A re go bona: “Ke lena baetapele ba dikgorwana tša Balefi. Itlhwekišeng le Balefi ba gabolena, gore le tle le kgone go goroša Polokelo ya Kgwerano ya Morena Modimo wa Israele lefelong le ke e lokišeditšego lona. Ka ge le se la e rwala la mathomo, Morena Modimo wa rena o ile a re otlela go se mo direle ka moo re bego re swanetše go phetha ka gona.” Ke moka baprista le Balefi ba itlhwekiša gore ba tle ba yo tšea Polokelo ya Kgwerano ya Morena Modimo wa Israele. Balefi ba e rwala ka dikota magetleng, ka moo Morena a bego a laetše ka Moshe. Dafida a laela baetapele ba Balefi gore ba bee Balefi ba bangwe baopedi ba go opela dikoša tša lethabo ba di letša ka diletšo tša diharepa, dikgapa le masenkana. Ba kgetha banna ba ba latelago dikgorwaneng tša bao ba bego ba hlokometše moopelo gore ba letše diletšo tša masenkana a mphiri: Hemane, morwa wa Joele, Asafo, morwa wa Berekia, wa leloko la gabo, le Ethane, morwa wa Kushaya, wa kgorwana ya Merari. Ba bea Balefi ba ba latelago gore e be sehlopha sa bobedi gore ba ba thuše ka go letša dikgapa tša medumo ye mesesane: Sakaria, Jaasiele, Shemiramote, Jeiele, Uni, Eliaba, Maasea le Benaya. Ba bea Balefi ba ba latelago gore ba letše dikgapa tša medumo ye mekoto: Matitia, Elifelehu, Miknea, Asasia, le baleti ba masoro a Tempele, e lego Obede-Edomo le Jeiele. *** *** *** *** Kenania o ile a bewa gore a hlokomele baopedi ba Balefi ka ge e be e le seopedi. Berekia le Elkana gotee le Obede-Edomo le Jehia bona ba bewa gore e be baleti ba Polokelo ya Kgwerano. Baprista ba ba latelago ba bewa baletši ba diphala pele ga Polokelo ya Kgwerano: Shebania, Joshafate, Netanele, Amasai, Sakaria, Benaya le Eliesere. *** Ka gona Kgoši Dafida le baetapele ba Israele le balaodi ba madira ba ya ngwakong wa Obede-Edomo ba tšea Polokelo ya Kgwerano ba thabile. Ba dira sehlabelo ka dipoo tše di šupago le dikgapa tše di šupago ka ge Modimo a thušitše Balefi ba ba bego ba rwele Polokelo ya Kgwerano ya Morena. Dafida o be a apere seaparo sa lešela le boletiana; baopedi le Kenania, moetapele wa bona, le Balefi ba ba bego ba rwele Polokelo le bona ba be ba apere bjalo. Dafida yena o be a apere le seaparo se sekgethwa. Ka gona Baisraele ka moka ba rotoga ka megobo ya lethabo, go letšwa diletšo tša diphalafala, diphala, masenkana, diharepa le dikgapa. Ge Polokelo e gorošwa motseng, Migale, morwedi wa Saulo, a lebelela ka lefasetere mme a bona Kgoši Dafida a bina a taboga, gomme a mo nyatša kudu. Ba iša Polokelo ya Kgwerano tenteng ye Dafida a bego a e hlometše yona, gomme ba e bea ka moo. Ka morago ba direla Modimo dihlabelo tša go tšhungwa ka moka le dihlabelo tša kagišano. Ge Dafida a feditše go dira dihlabelo, a šegofatša setšhaba ka leina la Morena, gomme a ba fa dijo bohle. A fa monna le mosadi yo mongwe le yo mongwe mo Israele senkgwa, le nama ya go bešwa, le phaphathi ya makwapi a diterebe. Dafida a bea Balefi ba bangwe gore ba hlankele Morena Modimo wa Israele pele ga Polokelo ya Kgwerano ka go mo reta, go mo tumiša, le go mo godiša. Asafo a bewa moetapele, gomme Sakaria a bewa mothuši wa gagwe. Jeiele, Shemiramote, Jehiele, Matitia, Eliaba, Benaya, Obede-Edomo, le Jeiele ba be ba swanetše go letša diharepa le dikgapa. Asafo o be a swanetše go letša diletšo tša masenkana, gomme baprista ba babedi, Benaya le Jaasiele, ba swanetše go letša diphala leboelela pele ga Polokelo ya Kgwerano. Ka lona tšatši leo ya ba la mathomo ge Dafida a abela Asafo le Balefi ba gabo mošomo wa go tumiša Morena ka dikopelo. Lebogang Morena, le mo rapele; begelang ditšhaba ditiro tša gagwe. Mo opeleleng le mo tumiše, le anege mehlolo yohle ya gagwe. Mo tumišeng ka ge e le Yomokgethwa; bohle ba ba mo khunamelago a ba hlalale! Nyakang thušo go Morena, le dule le mo khunamela. Lena bana ba Jakobo, mohlanka wa Morena, lena ditlogolo tša Israele le kgethilwego, gopolang mehlolo ye Morena a e dirilego, dimakatšo le dikahlolo tša gagwe. *** Morena ke yena Modimo wa rena; ke yena a ahlolago lefase ka moka. Gopolang kgwerano ya Modimo go ya go ile, e lego se a se holofeditšego meloko ye sekete, kgwerano ye a e dirilego le Abrahama, keno ye a e enetšego Isaka. Morena a tlišetša kgwerano ya ba molao go Jakobo, kgwerano ye e tlago dulela sa ruri go yena Israele. A re: “Ke tla go fa naga ya Kanana, ya ba lefa le ke go abelago lona.” Ke ge e sešo ya ba ba bantši, e le ba mmalwa fela, le gona e le bafaladi mo nageng, ba ralala le ditšhaba, ba tloga mmušong wo mongwe ba eya go wo mongwe. Eupša Morena a se dumelele motho go ba gatelela; a kgala magoši e le go ba šireletša a re: “Batlotšwa ba ka le se ba dire selo; baprofeta ba ka le se ba kweše bohloko.” Opelelang Morena, lena bohle ba lefase! Letšatši ka letšatši tsebagatšang gore o re phološitše. Begelang ditšhaba letago la gagwe, le batho ka moka dimakatšo tša gagwe. Morena ke yo mogolo gomme o tumišega kudu; o boifega go feta medimo ka moka. Gobane medimo ka moka ya ditšhaba tše dingwe ke lefeela, eupša Morena o hlodile magodimo. Letago le borena di mo go yena, Tempele ya gagwe e tletše maatla le lethabo. Retang Morena, lena ditšhabatšhaba, retang letago le maatla a gagwe. Retang leina la Morena la letago; tšeang sehlabelo le tleng pele ga gagwe. Le obame pele ga Yomokgethwa ge a hlaga ka botšhepi bja bokgethwa bja gagwe; thothomelang pele ga gagwe, lena batho ba lefase ka moka! Lefase le tsemilwe gomme le ka se šuthišwe. A legodimo le thabe, a lefase le hlalale! A di botše ditšhaba gore Morena ke kgoši. A lewatle le rore le tšohle tše di lego ka go lona; a naga e goe ka lethabo, le tšohle tše di lego mo go yona! Mehlare ya dithokgwa e tla hlaba mekgolokwane pele ga Morena, gobane o tlilo ahlola lefase. Retang Morena ka gobane ke yo botho; lerato la gagwe ke la go ya go ile. Mo kgopeleng le re: “Re phološe, wena Modimo, Mophološi wa rena; re kgobokanye; re hlakodiše ditšhabeng tše dingwe, gore re tle re go tumiše, wena Yomokgethwa, re ikgantšhe ka ditiro tša gago tše di makatšago.” A go tumišwe Morena Modimo wa Israele go tloga le go tloga, le go iša go sa felego! Setšhaba ka moka sa re: “Amene! Retang Morena!” Kgoši Dafida o ile a bea Asafo le Balefi ba gabo gore ka mehla ba hlokomele tirelo ye e swarwago lefelong la Polokelo ya Kgwerano. Ba be ba swanetše go phetha mediro ya bona moo letšatši ka letšatši. Obede-Edomo, morwa wa Jedutune, le banna ba masome a a selelago le metšo ye seswai ba kgorwana ya gabo ba be ba swanetše go ba thuša. Hosa le Obede-Edomo ba be ba leta masoro. Moprista Tsadoko le baprista ba gabobona ba be ba hlokometše tirelo ya Morena lefelong la tirelo la ntotomeng kua Gibeone. Mosong wo mongwe le wo mongwe le mantšiboa ba be ba swanetše go dira dihlabelo tša go tšhungwa ka moka aletareng go ya ka tšohle tše di ngwadilwego mo melaong ye Morena a e filego Baisraele. Ba ba bego ba na le bona moo e be e le Hemane le Jedutune le ba bangwe ba ba bego ba kgethilwe ba bolelwa ka maina gore ba tumiše Morena ka dikopelo, ka gobane kgaugelo ya gagwe ke ye e sa felego. Hemane le Jedutune ba be ba hlokometše le diphala le masenkana le diletšo tše dingwe tše di bego di letšwa ge dikopelo tša tumišo di opelwa. Ba kgorwana ya Jedutune ba be ba leta lesoro. Ka morago yo mongwe le yo mongwe a ikela gae, gomme Dafida le yena a ya gae go yo šegofatša ba lapa la gagwe. Kgoši Dafida bjale o be a dula mošate. Ka letšatši le lengwe a roma motho gore a yo bitša moprofeta Nathane gomme a re go yena: “Mo nna ke dula ka ngwakong wo o agilwego ka dikota tša mosedere, eupša Polokelo ya Kgwerano ya Morena yona e beilwe ka tenteng!” Nathane a mo fetola a re: “Dira se o se gopotšego, ka gobane Modimo o na le wena.” Eupša bošegong bjoo Modimo a re go Nathane: “Sepela o yo botša Dafida, mohlanka wa ka, gore ke re go yena: ‘Ga se wena o tlago nkagela tempele ye ke tlago dula ka go yona. Go tloga ka nako yela ka go ntšha setšhaba sa Israele Egepeta go fihlela bjale, ga se ka ka ka dula ka tempeleng; ka mehla ke be ke dula ka ditenteng gomme ke sepela le dinaga. Mesepelong ya ka ka moka le setšhaba sa Israele ga se ka ka ka botšiša yo mongwe wa baetapele ba ke ba laetšego gore ba diše setšhaba sa ka gore ke ka baka lang a sa nkagele tempele ka dikota tša mosedere.’ “Ka gona botša Dafida, mohlanka wa ka, gore nna, Morena Ramaatlaohle, ke re go yena: ‘Ke nna ke go tšerego madišong o diša dinku ka go dira mmuši wa setšhaba sa ka sa Israele. Ke bile nago mo gohle mo o ilego wa ya gona, gomme ka fenya manaba a gago ka moka ge o a hlasela. Ke tla go dira gore o tume go swana le baetapele ba bagolo mo lefaseng. Ke kgethetše setšhaba sa ka sa Israele naga gomme ke se hlomile go yona moo ba kago dula ba se hlwe ba tšhošetšwa. E sa le go tloga mola ba tsenago mo nageng ye mehleng yela ya baahlodi ba gateletšwe ke batho ba babe, fela taba yeo e ka se direge gape. Ke tla kokobetša manaba a gago ka moka gomme ka go fa ditlogolo. *** Ge o hlokafetše mme o bolokilwe le borakgolokhukhu ba gago, ke tla bea yo mongwe wa barwa ba gago kgoši gomme ka tiiša mmušo wa gagwe. Ke yena yo a tlago nkagela tempele, gomme ke tla hloma bogoši bja lešika la gagwe ka bo dira gore e be bja neng le neng. Ke tla ba tatagwe, gomme yena ya ba morwa wa ka. Nka se lese go mmotegela bjalo ka ge ke ile ka lesa go botegela yo a bušitšego pele ga gago. Ke tla mo fa maemo a go ya go ile setšhabeng sa ka le mmušong wa ka. Bogoši bja lešika la gagwe bo ka se tsoge bo fedile.’ ” Nathane a botša Dafida tšohle tše Modimo a mo utolletšego tšona. Ka morago Kgoši Dafida a tsena ka Tenteng ya bodulo bja Morena, a dula fase mme a rapela a re: “Ga ke a swanela tše o šetšego o ntiretše tšona, Morena Modimo, gomme le lona lapa la ka ga le a di swanela. Le ge go le bjalo, tšeo ga se ya ba selo mahlong a gago, Modimo, wa tšwela pele wa bolela tše botse tša mehleng ye e tlago mabapi le ditlogolo tša ka, nna, mohlanka wa gago; gomme wena, Morena Modimo, o šetše o ntšea gore ke motho yo mogolo. A nka hlwa ke sa go botša eng! O ntseba gabotse, gomme le ge go le bjalo o a ntlhompha, nna, mohlanka wa gago. O ratile go direla nna, mohlanka wa gago, dilo tšeo tše kgolo, le go nkutollela bogolo bja ka bja ka moso. Morena, ga go yo a swanago le wena; go ya ka tšohle tše re di kwelego re a tseba gore ke wena o nnoši o lego Modimo. Ga go setšhaba se sengwe lefaseng se se swanago le sa Israele se o se phološitšego bokgobeng go tlo se dira setšhaba sa gago. Dilo tše kgolo tše di šiišago tše o di dirilego mola o leleka ditšhaba tše dingwe ge setšhaba sa gago se o se lokolotšego Egepeta se goroga, di dirile gore o tume. O dirile Baisraele setšhaba sa gago go ya go ile, gomme wena, Morena, wa ba Modimo wa bona. “Bjale, Morena, phethagaletša sa ruri tše o di boletšego mabapi le nna, mohlanka wa gago, le ditlogolo tša ka, gomme o dire tše o itšego o tla di dira. Ke moo batho ba tlago go tshepha mme wa tuma kudu ka mehla, gomme ba re: ‘Morena Ramaatlaohle ke Modimo wa Israele.’ Le gona o tla boloka bogoši bja lešika la ka go ya go ile. Ke na le sebete sa go go rapela ka thapelo ye, Modimo wa ka, ka gobane o nkutolletše dilo tše nna, mohlanka wa gago, wa ba wa mpotša gore o tla dira ditlogolo tša ka dikgoši. Bjale ge, Morena, Modimo ke wena, gomme o nkholofeditše taba ye e makatšago ye. O kgahlilwe ke go šegofatša ditlogolo tša ka gore di fele di ipshina ka botho bja gago. Wena, Morena, o ba šegofaditše, gomme tšhegofatšo ya gago e tla ba go bona go ya go ile.” Ka morago ga lebaka Kgoši Dafida a hlasela Bafilista gape gomme a ba fenya. A ba amoga motse wa Gathe le metsana ye e bapilego le wona. A fenya le Bamoaba, mme bona ya ba batho ba gagwe, ba tšhela metšhelo go yena. Ka morago Dafida a hlasela Kgoši Hadade-Esere wa naga ya Tsoba, kgauswi le naga ya Hamate, ge Hadade-Esere a sa le tseleng go yo leka go thopa selete sa nokeng ya Yufratese. Dafida a thopa dikoloi tša gagwe tša ntwa tše sekete, le banamedi ba dipere ba dikete tše di šupago, le bahlabani ba go sepela ka maoto ba dikete tše masome a mabedi. A ripa dipere ka moka tša dikoloi tša ntwa mešifa ge e se tše lekgolo. Basiria ba Damaskose ba romela madira go tlo thuša Kgoši Hadade-Esere, fela Dafida a a hlasela, a bolaya banna ba dikete tše masome a mabedi le tše pedi. Ka morago a hloma mešaša ya bahlabani nageng ya bona, gomme ya ba batho ba gagwe, ba mo ntšhetša metšhelo. Morena a dira gore Dafida a fenye mo gongwe le mo gongwe mo a lwago gona. Dafida a thopa dikotse tša gauta tše di bego di swerwe ke bahlankedi ba Hadade-Esere, gomme a di iša Jerusalema. A tšea le mphiri wo montšintši kua Tibehate le Kune, metse ye e bego e bušwa ke Hadade-Esere. Ka morago Solomone o ile a tla a bopa legopo le dikokwane le dibjana tša Tempele tša mphiri ka mphiri woo. Kgoši Toi wa Hamate a kwa gore Dafida o fentše madira ka moka a Hadade-Esere. Ka gona a roma morwa wa gagwe, Joramo, go yo dumediša Kgoši Dafida le go mo lebogiša ka ge a fentše Hadade-Esere yo Toi a bego a be a šetše a lwele naye gantši. Joramo a išetša Dafida dimpho tše di dirilwego ka gauta, ka silibera, le ka mphiri. Kgoši Dafida a di abela Morena gotee le silibera le gauta ye a e thopilego go Baedomo le Bamoaba le Baamone le Bafilista le Baamaleke. Abishai, yo mmagwe e bego e le Tseruya, o ile a fenya Baedomo Moeding wa Letswai, gomme a bolaya ba dikete tše lesome le metšo ye seswai. A hloma mešaša ya bahlabani nageng ya Edomo, gomme batho ba moo ya ba ba Kgoši Dafida. Morena a dira gore Dafida a fenye mo gongwe le mo gongwe mo a lwago gona. Dafida a buša naga yohle ya Israele, gomme a hlokomela gore setšhaba sa gagwe ka mehla se swarwe ka tshwanelo le ka toka. Joaba, yo mmagwe e bego e le Tseruya, e be e le molaodi wa madira; Joshafate, morwa wa Ahilude, e be e le mongwaledi wa mmušo; Tsadoko, morwa wa Ahitube, le Ahimeleke, morwa wa Abiatare, e be e le baprista. Seraya e be e le mongwaledi wa kgoši; Benaya, morwa wa Joyada, e be e le mohlokomedi wa baleti ba Dafida, gomme barwa ba Kgoši Dafida e le bakgomana ba bagolo mmušong. Ka morago ga lebaka Kgoši Nahashe wa Amone a hwa, gomme morwa wa gagwe, Hanune, ya ba kgoši. Kgoši Dafida a re: “Ke nyaka go kwana le Hanune ka gobane Nahashe, tatagwe, o be a kwana le nna.” Ka gona Dafida a roma batseta gore ba ye maemong. Ge ba fihla nageng ya Amone go Kgoši Hanune go tlo mo lliša, baetapele ba Baamone ba re go kgoši: “A o gopola gore ke gona go hlompha tatago ge Dafida a romile batho ba go tlo go lliša? Le gateetee! O ba romile mo go tlo hlola naga le go e lekola gore a tle a e menole!” Hanune a swara batseta bale ba Dafida, a ba boola maledu, a ripa diaparo tša bona dinokeng, gomme a ba šupa tsela. Ba be ba lewa ke dihlong kudu go ka boela gae. Ge Dafida a ekwa gore go diregile eng, a roma batho go yo ba botša gore ba dule Jeriko mme ba se ke ba boa go fihlela maledu a bona a hlogile gape. Baamone ba lemoga gore ba befedišitše Dafida. Ka gona ba ntšha silibera ya dikilokramo tše dikete tše masome a mararo go thwala banamedi ba dipere le dikoloi tša ntwa tša Basiria kua Mesopotamia le tša mebušo ya Siria, e lego wa Maaka le wa Tsoba. Ba thwala madira a Maaka le kgoši ya naga yeo le dikoloi tša ntwa tše dikete tše masome a mararo le tše pedi, gomme ba tla ba hloma mešaša pele ga motse wa Medeba. Baamone le bona ba tšwa metseng ya bona gomme ba itokišetša ntwa. Ge Dafida a ekwa taba yeo, a romela Joaba le madira go yo lwa le bona. Ka moka ga bona e be e le bahlabani ba bogale. Baamone ba tšwa motseng wa bona mme ba ipeakanya kgorong, gomme magoši a a bego a tlile go thuša a ema thoko ye nngwe kua nageng. Joaba a bona gore madira a manaba a mo potile ka pele le ka morago, ka gona a kgetha bahlabani ba bogalegale ba Baisraele a ba beakanya go lebana le Basiria. Madira a a šetšego a a nea Abishai, morwarragwe, gore a a laole, gomme Abishai a a beakanya go lebana le Baamone. Joaba a re go yena: “Ge o bona gore Basiria ba a mphenya, o tle o nthuše, gomme ge Baamone ba go fenya, ke tla tla ka go thuša. O tiiše, re be le sebete, re lwele setšhaba sa gaborena le metse ya Modimo wa rena ka bogale. Gomme a thato ya Morena e direge.” Joaba le banna ba gagwe ba batamela gore ba hlasele, gomme Basiria ba hlanola direthe. Ge Baamone ba bona Basiria ba tšhaba, le bona ba tšhaba Abishai ba boela motseng. Ke moo Joaba a ipoeletšego Jerusalema. Basiria ba lemoga gore ba fentšwe ke Baisraele, ka gona ba roma batseta go yo bitša Basiria ba ba bego ba le ka bohlabela bja noka ya Yufratese, gomme ba tla ba laolwa ke Shobake, molaodi wa madira a Kgoši Hadade-Esere. Ge Dafida a ekwa taba yeo, a kgobokanya madira ka moka a Baisraele, a tshela Jordane, gomme a ba beakanya gore ba lwe le Basiria. Ntwa ya thoma, gomme Basiria ba tšhaba Baisraele. Dafida le banna ba gagwe ba bolaya baotledi ba dikoloi tša ntwa tša Basiria ba dikete tše di šupago, le bahlabani ba go sepela ka maoto ba dikete tše masome a mane. Ba bolaya le Shobake, molaodi wa madira a Siria. Ge magoši a a bego a bušwa ke Hadade-Esere a lemoga gore a fentšwe ke Baisraele, a kwana le Dafida gore ntwa e fele, gomme ba napa ba ba batho ba gagwe. Basiria ba se hlwe ba rata go thuša Baamone gape. Seruthwane se se latelago, nakong ya ngwaga ye ka yona magoši gantši a yago ntweng, Joaba a tšwa ka madira a yo senya naga ya Baamone; eupša Kgoši Dafida yena o be a šetše Jerusalema. Ba dikanetša motse wa Raba, ba o hlasela mme ba o thubaganya. Hlogong ya Milkomo, modimo wa seswantšho wa Baamone, Dafida a tšea mphapahlogo wa gauta wa boima bjo e ka bago dikilokramo tše masome a mararo wo o nago le legakabje, a ithweša wona hlogong. A ba a thopa le thoto ye ntšintši motseng. A laela batho ba motse woo gore ba šome ka disaga le ka megoma ya tshipi le ka dilepe. A dira sona seo go batho ba metse ye mengwe ka moka ya Baamone. Ka morago yena le banna ba gagwe ba boela Jerusalema. Go ile gwa tsoga ntwa ya Baisraele le Bafilista kua Gesere. Ke ntweng yeo moo Sibekai wa Husha a ilego a bolaya tšitširipa ye leina la yona e bego e le Sipai, gomme Bafilista ba fenywa. Ka morago gwa tsoga ntwa ya Baisraele le Bafilista gape, gomme Elhanane, morwa wa Jaire, a bolaya Lagmi, morwarragoGoliate wa Gathe, yo theko ya lerumo la gagwe e bego e lekana le mpheng wa mogoma. Ntwa ye nngwe ya tsoga kua Gathe, moo go bego go le tšitširipa ye teleletelele ya menwana ye e selelago diatleng ka pedi le ye selelago maotong ka mabedi. A rumola Baisraele, gomme Jonathane, morwa wa Shama, morwarragoDafida, a mmolaya. Dinatla tšeo tša go bolawa ke Dafida le banna ba gagwe e be e le ditlogolo tša ditšitširipa tša kua Gathe. Sathane o kile a tsogela setšhaba sa Israele maatla gomme a hlohleletša Dafida gore a bale setšhaba. Dafida a laela Joaba le balaodi ba bangwe a re: “Sepelang le yo bala Baisraele ka moka go tloga Beresheba go ba go yo fihla Dane, gomme le tle le mpegele gore ke tsebe gore ke ba bakae.” Joaba a mo fetola a re: “A Morena a atiše setšhaba sa Israele galekgolo! Kgoši, mong wa ka, ka moka ke bahlanka ba gago. Ke ka baka lang o nyaka go dira taba yeo mme wa obiša setšhaba molato?” Eupša kgoši a gapeletša Joaba gore a phethe taelo yeo ya gagwe. Joaba a tšwa a sepela le naga ka moka ya Israele, mme ka morago a boela Jerusalema. A begela Kgoši Dafida palo ya banna ba e ka bago bahlabani: Baisraele ba dikete tše makgolo a lesome le le le tee, le Bajuda ba dikete tše makgolo a mane le tše masome a a šupago. Ka ge Joaba a be a tenwa ke taelo yeo ya kgoši o ile a se ke a bala banna ba kgoro ya Lefi le ya Benjamene. Modimo a selekwa ke seo se dirilwego, ka gona a otla Baisraele. Dafida a re go Modimo: “Ke dirile sebe se segolo ka taba ye! Hle, ntshwarele. Ke dirile taba ya botlatla.” Ke moo Morena a itšego go Gade, moprofeta wa Dafida: “Sepela o yo botša Dafida gore a ikgethele e tee tabeng tše tharo tše ke tlago mmotša tšona. Ke tla dira se a tlago se kgetha.” Gade a ya go Dafida, a mmotša se Morena a se boletšego, a ba a mmotšiša a re: “O kgetha eng mo go tše tharo tše: mengwaga ye meraro ya tlala, goba dikgwedi tše tharo o tšhaba manaba a gago a a go hlomerego a nyaka go go bolaya, goba matšatši a mararo ao ka ona o tlago hlaselwa ka tšhoša ya Morena, le bolwetši bja leuba nageng ya gago, mola morongwa wa gagwe yena a le gare a lobiša gohle nageng ya Israele? Bjale gopodišiša taba tše, gomme o mpotše gore ke fetole yo a nthomilego ke reng.” Dafida a fetola Gade a re: “Ke mo tlalelong ye kgolo! Eupša ga ke nyake go otlwa ke batho. A Morena e be yena yo a nkotlago, ka gobane o na le kgaugelo.” Ka gona Morena a romela bolwetši bja leuba setšhabeng sa Israele, gomme gwa hwa batho ba dikete tše masome a a šupago. Ka morago a roma morongwa gore a yo fediša Jerusalema, eupša ya re a sa bolaya batho ba Jerusalema Morena a di bona gomme a kwela batho bohloko, a re go yena: “Ema! Go lekane!” Morongwa yoo o be a eme seboeng sa Arauna, Mojebuse. Dafida a lebelela godimo, a bona morongwa yoo a eme moyeng a swere tšhoša ka letsogo a šupile Jerusalema ka yona. Ke moka Dafida le baetapele ba setšhaba ba itahlela fase ka difahlego ba apere tša go ilela. Dafida a rapela Modimo a re: “Ke nna yo ke dirilego sebe. Ke nna yo ke phošitšego. Ke nna yo ke laetšego gore setšhaba se balwe. Batho ba bona ba dirile eng? Morena wa ka, hle, otla nna le lapa la ka, o se ke wa otla setšhaba se sa gago ka bolwetši bjo bja leuba.” Morongwa wa Morena a botša Gade gore a laele Dafida gore a ye a agele Morena aletare seboeng sa Arauna. Dafida a ya moo seboeng bjalo ka ge Gade a be a mmoditše a laetšwe ke Morena. Moo seboeng Arauna o be a fola mabele. Ge a retologa a bona morongwa, gomme barwa ba gagwe ba bane ba ba bego ba na le yena ba utama. Kgoši Dafida a tla go Arauna; Arauna ge a gadima a mmona. A tloga seboeng a yo obamela Dafida. Dafida a re go yena: “Nthekišetše seboa sa gago gore ke tle ke kgone go agela Morena aletare go sona gomme ke fediše bolwetši bja leuba. Ke tla go lefa theko ya sona.” Arauna a re: “Se tšee, kgoši, mong wa ka, gomme o dire se o se nyakago ka sona. Dikgomo šedi tše o kago dira dihlabelo tša go tšhungwa ka moka ka tšona, le selei sa go fola sese se o kago dira dikgong ka sona, le mabele a o kago dira kabelo ya dijo ka ona šea. Tšohle tše ke go fa tšona.” Kgoši a mo fetola a re: “Aowaa, ke tla go lefa theko ya tšona. Nka se direle Morena sehlabelo ka dilo tša gago ke se ka di reka ka selo.” Gomme a reka seboa go Arauna ka dipapetlana tša gauta tše makgolo a a selelago. A agela Morena aletare fao gomme a dira dihlabelo tša go tšhungwa ka moka le tša kagišano. A rapela, gomme Morena a mo araba ka go romela mollo o etšwa legodimong wa tšhuma dihlabelo tšeo moo aletareng. Morena a botša morongwa yola gore a boetše tšhoša ya gagwe segatleng, gomme morongwa a e boetša. Dafida a bona ka seo gore Morena o kwele thapelo ya gagwe, ka gona a fela a dira dihlabelo aletareng seboeng sa Arauna. Tente ya bodulo bja Morena ye Moshe a bego a e dirile kua lešokeng le aletare ya dihlabelo di be di sa le lefelong la tirelo ntotomeng kua Gibeone ka nako yeo; eupša Dafida o be a sa kgone go ya gona go yo khunamela Morena, ka gobane o be a boifa tšhoša ya morongwa wa Morena. Ka gona Dafida a re: “Mo ke mo go tlago ba Tempele ya Morena Modimo. Ye ke aletare ye setšhaba sa Israele se tlago dira dihlabelo godimo ga yona.” Kgoši Dafida a laela bafaladi ka moka bao ba bego ba dula nageng ya Israele gore ba kgobokane, gomme a ba fa mošomo. Ba bangwe ba bona ba betla maswika a go tlo aga Tempele. A tliša tshipi ye ntši ya go tlo dira dikokotela le ditswalelo tša masoro le dikgwega, le mphiri wo montši wo o bego o ka se elwe. Le gona go be go na le dikota tša mosedere tše motho a bego a ka se di bale, ka gobane batho ba Tirose le ba Sidone ba be ba di tlišetša Dafida ka bontši. Dafida ka pelong a re: “Tempele ye morwa wa ka, Solomone, a tlago e agela Morena e swanetše go ba ye botsebotse mme e tume lefaseng ka moka. Eupša e sa le yo mofsa gomme ga a ne temogo, ka gona a e be nna ke mo nyakelago tša go e aga.” Ka fao Dafida a kgobokanya dikago tše ntši pele ga ge a ehwa. A roma motseta gore a bitše Solomone, morwagwe, gomme a mo laela gore a agele Morena Modimo wa Israele tempele. Dafida a re go yena: “Morwa wa ka, ke be ke nyakile go aga tempele gore ke hlomphe Morena Modimo wa ka. Eupša Morena a mpotša gore ke bolaile batho ba bantši, le gore ke lwele dintwa tše kgolo. Ka gona, ka baka la madi a mantši a ke a tšholotšego a se ke a rata gore nna ke mo agele tempele. A re go nna: ‘O tla ba le morwa yo e tlago ba motho wa khutšo, ka gobane ke tla dira gore a phele ka khutšo le manaba a gagwe ka moka a a mo potapotilego. Leina la gagwe e tla ba Solomone, ka gobane pušong ya gagwe ke tla dira gore Israele e be le khutšo le boiketlo. Yena o tla nkagela tempele. E tla ba morwa wa ka, gomme nna ka ba tatagwe. Ba lešika la gagwe ba tla buša Israele go ya go ile.’ ” Dafida a tšwela pele a re: “Bjale, ngwanaka, a Morena Modimo wa gago a be le wena gomme a phethe kholofetšo ya gagwe, mme a go atlegiše o mo agele tempele. Hle, a Morena Modimo wa gago a go fe tlhaologanyo le bohlale gore o tle o buše Israele ka go phetha melao ya gagwe. Ge o ka botegela go phetha melao le ditaelo tše Morena a di filego Baisraele ka Moshe, o tla atlega. O be le sebete, o tie, gomme o se ke wa boifa goba wa nolega moko. Ge e le mabapi le Tempele gona, ke itapišitše ka kgobokanya gauta ya dikilokramo tše dimilione tše tharo le silibera ya dikilokramo tše dimilione tše masome a mararo gore di tle di šomišwe ge go agwa Tempele. Ntle le moo, go sa na le mphiri le tshipi ye ntši ye e ka se elwego. Le gona ke na le dikota le maswika, eupša o swanetše go di oketša. O na le bašomi ba bantši: banna ba ba kago šoma kua meepong ya maswika, babetli ba maswika le ba dikota, le banna ba bantši ba ba kgonago dilo tša mehutahuta bao ba ka šomago ka gauta, silibera, mphiri le tshipi. Bjale thoma modiro, gomme Morena a be le wena.” Dafida a laela baetapele ka moka ba Israele gore ba thuše Solomone. A re: “Morena Modimo wa lena o bile le lena gomme o dirile gore le be le khutšo ka gohle. O gafetše ditšhaba tše di bego di dula mo nageng ye diatleng tša ka, gomme bjale ditšhaba tšeo di fentšwe ke Morena le ke lena, setšhaba sa gagwe. Bjale le ineeleng go Morena Modimo wa lena ka dipelo tša lena ka moka le ka moya wa lena ka moka. Thomang go aga ngwako wo mokgethwa wa Morena Modimo, gore le tle le tsenye Polokelo ya Kgwerano ya Morena gotee le dibjana tše dingwe tše kgethwa ka gare ga ngwako woo le tlago o agela go khunamela Morena ka go wona.” Ge Dafida a šetše a tšofetše kudu, o ile a bea morwa wa gagwe, Solomone, kgoši ya Israele. Kgoši Dafida a kgobokanya baetapele ka moka ba Baisraele le baprista le Balefi. A bala Balefi ka moka ba banna ba mengwaga ye masome a mararo le go feta fao. Ka moka ga bona ya ba ba dikete tše masome a mararo le tše seswai. Kgoši a bea ba dikete tše masome a mabedi le tše nne bahlokomedi ba mediro ya Tempele, ba dikete tše di selelago bangwaledi le baahlodi ba melato, ba dikete tše nne baleti ba masoro, le ba dikete tše nne batumiši ba Morena ba go letša diletšo tše kgoši a bego a di nyaketše morero woo. Dafida a arola Balefi dihlopha tše tharo go ya ka dikgorwana tša bona tše di latelago: ya Gershone, ya Kehate, le ya Merari. Gershone o be a na le barwa ba babedi, e lego Ladane le Shimi. Ladane a ba le barwa ba bararo, e lego Jehiele, Setamo le Joele, ba e ilego ya ba mantona a dikgorwana tše di tšwilego go Ladane. Shimi o ile a ba le barwa ba bararo, e lego Shelomite, Hasiele le Harane. Shimi o be a na le barwa ba bane. Bona šeba ka go hlatlamana ga bona: Jahate, Sisa, Jeushe le Beria. Jeushe le Beria ba ile ba se ke ba ba le ditlogolo tše ntši, ka fao ba balwa gore ke kgorwana e tee. *** Kehate o be a na le barwa ba bane, e lego Amramo, Jitsara, Hebrone le Usiele. Barwa ba Amramo e bile Arone le Moshe. Arone le ditlogolo tša gagwe ba ile ba hlaolelwa gore ba tle ba dire modiro wa ka Felo mo Gokgethwakgethwa go ya go ile, gore ba tšhume seorelo tirelong ya Morena, gore ba mo hlankele, le gore ba šegofatše batho ka leina la gagwe go iša ka go sa felego. Eupša barwa ba Moshe, monna wa Modimo, bona ba be ba balwa le Balefi. Moshe o be a na le barwa ba: Gershome le Eliesere. Moetapele wa barwa ba Gershome e be e le Shubaele. Eliesere o be a na le morwa o tee fela, Rehabia, eupša Rehabia yena a ba le ditlogolo tše ntši gomme ya ba hlogo ya tšona. Jitsara o be a na le morwa, Shelomite, yena lentona la kgorwana yeo ya Kehate. Hebrone a ba le barwa ba bane, e lego Jeria, Amaria, Jahasiele le Jekamamo. Usiele o be a na le barwa ba babedi, e lego Mika le Jishia. Merari o be a na le barwa ba: Magli le Mushi. Magli a ba le barwa ba: Eleasara le Kishe, fela Eleasara yena a hwa a se ne morwa, a na le barwedi fela. Barwedi ba gagwe ba nyalwa ke barwa ba Kishe, rangwane wa bona. Mushi o ile a ba le barwa ba bararo, e lego Magli, Edere le Jeremote. Tšeo ke tšona ditlogolo tša Lefi ka dikgorwana le dihlogo tša malapa, yo mongwe le yo mongwe wa bona a ngwadišitšwe ka leina la gagwe. Mang le mang wa bona, wa mengwaga ye masome a mabedi le go feta fao, o be a na le se a swanetšego go se dira modirong wa Tempele ya Morena. Dafida a re: “Morena Modimo wa Israele o agišitše setšhaba sa gagwe nageng ye, mme yena o tla dula mo Jerusalema go ya go ile. Ka gona go ka se hlwe go sa nyakega gore Balefi ba rwale Tente ya bodulo bja Morena le ditlabakelo ka moka tše di šomišwago tirelong.” Go ya ka ditaelo tša Dafida tša mafelelo Balefi ka moka ba be ba ngwadišetšwa modiro ge ba na le mengwaga ye masome a mabedi, gomme ba fiwa mediro ye: go thuša baprista ba lešika la Arone tirelong ya Tempeleng, go hlokomela dikgoro le diphapoši tša Tempele, le go hlwekišetša dilo tšohle tše kgethwa tirelo; go hlokomela dinkgwa tše di abetšwego Morena, bupi bja dikabelo tša bupi, dinkgwana tša diphaphathiana tše di dirilwego ntle le komelo, dikabelo tša go pakwa, le bupi bjo bo hlakantšwego le makhura a mohlware; go ela dihlabelo le dikabelo tša Tempeleng; go tumiša le go godiša Morena mesong le mantšiboeng a mangwe le a mangwe, le ge dihlabelo tša Morena di tšhungwa ka Sabatha le ka Monyanya wa Lebalana le menyanyeng ye mengwe. Go ile gwa bewa melao ya gore Balefi ba ba swanetšego go dira modiro woo ka dinako tše di beilwego e be ba bakae. Balefi ba fiwa modiro wa go hlankela Morena go ya go ile. Ba ile ba fiwa mošomo wa go hlokomela Tente ya bodulo bja Morena le Tempele, le go thuša meloko ya bona, e lego baprista ba lešika la Arone, tirelong ya ka Tempeleng. Ditlogolo tša Arone le tšona di ile tša arolwa dihlopha. Arone o be a na le barwa ba: Nadaba, Abihu, Eleasara le Ithamara. Nadaba le Abihu ba ile ba hlokafala ba se na bana pele tatagobona a hlokafala. Ka gona bomorwarragobona, Eleasara le Ithamara, ya ba baprista. Kgoši Dafida a beakanya ditlogolo tša Arone ka dihlopha go ya ka mediro ya bona, a thušwa ke Tsadoko, setlogolo sa Eleasara, le Ahimeleke, setlogolo sa Ithamara. Ditlogolo tša Eleasara di ile tša arolwa dihlopha tše lesome le tše di selelago, mola tša Ithamara tšona di arolwa tše seswai. Seo se ile sa dirwa ka gobane go be go na le dihlogo tša malapa tše ntši gare ga ditlogolo tša Eleasara. Ka ge go be go na le bahlankedi ba Tempele le baetapele go tša sedumedi gare ga ditlogolo tša Eleasara le tša Ithamara, mediro e be e abaganwa ka go dira matengwa. Ditlogolo tša Eleasara le tša Ithamara di be di šielana ka go dira matengwa. Ka morago di be di ngwadišwa ke Shemaya, morwa wa Netanele, yena mongwaledi wa Molefi. Kgoši le bakgomana ba gagwe le moprista Tsadoko le Ahimeleke, morwa wa Abiatare, le dihlogo tša malapa a baprista le tša malapa a Balefi, ka moka ba be ba eba gona ge ba ngwadišwa. Dihlopha tšeo tša malapa tše masome a mabedi a metšo ye mene di be di latelana ka mokgwa wo ge di abagana mediro: 1 Joyaribe 2 Jedaya 3 Harime 4 Seorime 5 Malkia 6 Miyamine 7 Hakotse 8 Abia 9 Jeshua 10 Shekania 11 Eliashibe 12 Jakime 13 Hupa 14 Jeshebabe 15 Bilga 16 Imere 17 Hesire 18 Pitsetse 19 Petagia 20 Jeheskele 21 Jakine 22 Gamule 23 Delaya 24 Maasia *** *** *** *** *** *** *** *** *** *** Ba be ba šielana ka mokgwa woo ge ba yo phetha mediro ya bona ya ka Tempeleng. Mediro yeo e be e hlomilwe ke rakgolokhukhu wa bona, Arone, ka moo Morena Modimo wa Israele a bego a mo laetše ka gona. Tše ke dihlogo tše dingwe tša malapa a lešika la Lefi: Shubaele, setlogolo sa Amramo; Jegdeya, setlogolo sa Shubaele; Jishia, setlogolo sa Rehabia; Shelomite, setlogolo sa Jitsara, Jahate, setlogolo sa Shelomite; Jeria, Amaria, Johasiele le Jekamamo, barwa ba Hebrone, ka go hlatlamana ga bona; Mika, setlogolo sa Usiele; Shamire, setlogolo sa Mika; Sakaria, setlogolo sa Jishia, morwarragoMika; Magli, Mushi le Jaasia, ditlogolo tša Merari. Jaasia o ile a ba le barwa ba: Shohamo, Sakure le Ibri. Magli a ba le barwa ba: Eleasara le Kishe. Eleasara a se ke a ba le barwa, fela Kishe a ba le morwa, e lego Jeragmeele. *** Mushi o ile a ba le barwa ba: Magli, Edere le Jeremote. Ao e be e le malapa a Balefi. Hlogo ya lapa le lengwe le le lengwe gotee le yo mongwe wa bomorwarragwe ba be ba dira matengwa gore ba bone gore ke mediro efe ye e kgethetšwego bona, go no swana le ka moo meloko ya bobona, e lego baprista ba lešika la Arone, e bego e dira ka gona. Kgoši Dafida le Tsadoko le Ahimeleke le dihlogo tša malapa a baprista le a Balefi ba be ba eba gona ge go dirwa matengwa. Kgoši Dafida le baetapele ba tirelo ba ile ba kgethela dikgorwana tše di latelago ditirelo tša thapelo: Asafo, Hemane le Jedutune. Ba be ba swanetše go bega se Modimo a se nyakago mola ba letša dikgapa, diharepa le masenkana. Le le latelago ke lenaneo la batho ba ba bego ba kgethetšwe ditirelo tša thapelo le modiro wo sehlopha se sengwe le se sengwe se bego se swanetše go o dira: Barwa ba Asafo: Sakure, Josefa, Netania le Asarela. Ba be ba laolwa ke Asafo yo a bego a bega se Modimo a se nyakago nako ye nngwe le ye nngwe ge kgoši a laela. Barwa ba ba selelago ba Jedutune: Gedalia, Tseri, Jesaya, Shimi, Hashabia le Matitia. Ba be ba laolwa ke tatagobona yo a bego a bega se Modimo a se nyakago a letša sekgapa, le gona a reta Morena mme a mo tumiša. Barwa ba Hemane: Bukia, Matania, Usiele, Shubaele, Jerimote, Hanania, Hanani, Eliata, Gidalthi, Romanti-Esere, Joshbekasha, Maloti, Hotire le Mahasiote. Modimo o ile a fa Hemane, moprofeta wa kgoši, barwa bao ba lesome le metšo ye mene le barwedi ba bararo, ka moo a bego a boletše ka gona, gore a tle a dire gore Hemane a be le serithi. Barwa bao ba gagwe ka moka ba be ba letša diharepa le dikgapa le masenkana ge go opelwa tirelong ya Tempele. Ba be ba laolwa ke yena tatagobona. Ge e le Asafo le Jedutune le Hemane bona ba be ba laolwa ke kgoši. Banna ba ba masome a mabedi a metšo ye mene, ka moka e be e le ditsebi tša mediro ya tšona, gomme Balefi ba gabobona e le diopedi tše di rutilwego. Ka moka e be e le banna ba makgolo a mabedi le masome a seswai le metšo ye seswai. Ba be ba dira matengwa gore ba tle ba tsebe gore mang o swanetše go dira modiro ofe, bafsa le batšofadi, batsebi ba mediro le ba ba sa ithutago. Banna ba ba makgolo a mabedi le masome a seswai le metšo ye seswai ba be ba arotšwe ka malapa a bona e le dihlopha tše masome a mabedi a metšo ye mene tša banna ba lesome le ba babedi, sehlopha se sengwe le se sengwe se hlokometšwe ke moetapele wa sona. Ba be ba šielana ka modiro ka tsela ye: 1 Josefa wa lapa la Asafo 2 Gedalia 3 Sakure 4 Tseri 5 Netania 6 Bukia 7 Asarela 8 Jesaya 9 Matania 10 Shimi 11 Usiele 12 Hashabia 13 Shubaele 14 Matitia 15 Jerimote 16 Hanania 17 Joshbekasha 18 Hanani 19 Maloti 20 Eliata 21 Hotire 22 Gidalthi 23 Mahasiote 24 Romanti-Esere Ye ke mediro ya banna ba e bego e le baleti ba Tempele. Kgorwaneng ya Korage e be e le Meshelemia, morwa wa Kore, wa lapa la Asafo. O be a na le barwa ba ba šupago. Šeba ka go hlatlamana ga bona: Sakaria, Jediaele, Sebadia, Jatniele, Elamo, Johanane le Elioenai. Le gona go be go le Obede-Edomo yo Modimo a mo šegofaditšego ka go mo fa barwa ba seswai. Šeba ka go hlatlamana ga bona: Shemaya, Josabade, Joage, Sakara, Netanele, Amiele, Isakara le Peuletai. Morwa wa Obede-Edomo, Shemaya, o ile a ba le barwa ba: Otni, Rafaele, Obede le Elsabade. E be e le banna ba ba bušago kgorwaneng ya gabobona ka baka la bogale bja bona bjo bogolo. BomorwarragoShemaya, e lego Elihu le Semakia, le bona e be e le bagale. *** Lapa la Obede-Edomo le be le na le banna ba bogale ba masome a a selelago le metšo ye mebedi ba mafolofolo mošomong wo. Lapa la Meshelemia lona le be le na le banna ba dinatla ba lesome le metšo ye seswai. Kgorwaneng ya Merari e be e le Hosa, yo a bego a na le barwa ba bane, e lego Shimri, yo tatagwe a ilego a mmea moetapele le ge e be e se leitšibolo, Hilkia, Tebalia le Sakaria. Ka moka ga bona e be e le banna ba lesome le metšo ye meraro ba lapa la Hosa ba e bego e le baleti ba Tempele. Baleti ba Tempele ba be ba arotšwe dihlopha, go ya ka malapa a bona, gomme ba be ba fiwa mediro Tempeleng ka wona mokgwa wo Balefi ba bangwe ba bego ba fiwa mediro. Lapa le lengwe le le lengwe, le legolo le le lennyane, le be le dira matengwa go bona gore ke lesoro lefe le le swanetšego go le leta. Matengwa a lesoro la ka bohlabela a swara Shelemia, gomme morwa wa gagwe, Sakaria, monna yo ka mehla a bego a na le dikeletšo tše botse, yena a swarwa ke a lesoro la ka leboa. Obede-Edomo a tanywa ke matengwa a lesoro la ka borwa, gomme barwa ba gagwe bona ba swarwa ke a diphapoši tša bobolokelo. Shupime le Hosa ba tanywa ke matengwa a lesoro la ka bodikela le la Shalekete tseleng ye e rotogago. Baleti ba be ba leta ka go šielana. Tsatši le lengwe le le lengwe baleti ba ba selelago ba be ba leta ka bohlabela, ka leboa ba bane, le ka borwa ba bane. Baleti ba bane ba be ba bewa diphapošing tša bobolokelo letšatši ka letšatši, ba babedi phapošing ye nngwe le ye nngwe. Kgauswi le kgoro ya ka bodikela go be go le baleti ba bane go ipata le tsela, mme ba babedi ba le kgorong yeo. Ke ka moo kgorwana ya Korage le ya Merari di bego di abetšwe mediro ka gona. Balefi ba bangwe ba gabobona ba be ba hlokometše polokelo ya Tempele le dikabelo tše di filwego Modimo. Ladane, yo mongwe wa barwa ba Gershone, e bile rakgolokhukhu wa malapa a mangwe gotee le la Jeiele, morwagwe. Barwa ba bangwe ba babedi ba Ladane, Setamo le Joele, ba be ba hlokometše polokelo ya Tempele. Go ditlogolo tša Amramo le tša Jitsara le tša Hebrone le tša Usiele, Shubaele wa kgorwana ya Gershome, morwa wa Moshe, e be e le yena yo mogolo a hlokometše polokelo ya Tempele. Ba lešika la Balefi ba gabo ba be ba tswalana le Eliesere ka Shelomite, morwa wa Sikri, Sikri morwa wa Joramo, Joramo morwa wa Jesaya, Jesaya morwa wa Rehabia, Rehabia morwa wa Eliesere. Shelomite le ba lapa la gagwe ba be ba hlokometše dikabelo ka moka tše Kgoši Dafida, le dihlogo tša malapa, le balaodi ba madira a sekete le ba a lekgolo, le balaodi ba bangwe ba bego ba di abetše Modimo. Ba ile ba tšea tše dingwe tše ba di thopilego ntweng ba di beela gore di šomišwe ka Tempeleng. Shelomite le ba lapa la gagwe ba be ba hlokometše tšohle tše di bego di beetšwe go šomišwa ka Tempeleng, gotee le dikabelo tše di bego di tlišitšwe ke moprofeta Samuele, le Kgoši Saulo, morwa wa Kishe, le Abnere, morwa wa Nere, le Joaba, morwa wa Tseruya. Gare ga ditlogolo tša Jitsara, Kenania le barwa ba gagwe ba ile ba fiwa mediro ye e bego e sa amane le Tempele. E ile ya ba bangwaledi le baahlodi ba melato setšhabeng sa Israele. Gare ga ditlogolo tša Hebrone, Hashabia le ba makgolo a lesome le a a šupago ba meloko yabo, ka moka e le banna ba bokgoni, ba ile ba bewa go hlokomela tša sedumedi le tša pušo ka bodikela bja noka ya Jordane. Ka moka ga bona e be e le banna ba bokgoni medirong yeo. Jeria e be e le moetapele wa ditlogolo tša Hebrone. Ngwageng wa masome a mane wa ge Dafida e le kgoši go ile gwa nyakišišwa lešika le ditlogolo tša Hebrone, gomme bagale ba bagolo ba lapa leo ba hwetšwa ba dula kua Jasere, nageng ya Gileade. Kgoši Dafida a kgetha dihlogo tša malapa tša bokgoni tše dikete tše pedi le makgolo a a šupago melokong ya Jeria, gomme a ba bea gore ba hlokomele tša selegae le tša pušo mo Israele ka bohlabela bja noka ya Jordane, e lego naga ya Rubene le ya Gade le ya seripakgoro sa Manase sa ka bohlabela. Le ke lenaneo la dihlogo tša malapa le balaodi ba bahlabani ba sekete le ba lekgolo le bahlankedi ba bona ba ba bego ba laola mediro ya mmušo. Kgwedi ye nngwe le ye nngwe ya ngwaga sehlopha se sengwe sa banna ba dikete tše masome a mabedi a metšo ye mene se be se tsena modirong se laolwa ke molaodi wa kgwedi yeo. Ba ba latelago e be e le balaodi ka go šielana ka dikgwedi: Kgwedi ya mathomo: Jashobamo, morwa wa Sabdiele, yena e be e le wa kgorwana ya Peretse, gomme e le molaodi wa balaodi ba kgwedi yeo Kgwedi ya bobedi: Dodai, setlogolo sa Ahoage, letsogo la gagwe e be e le Miklote Kgwedi ya boraro: Benaya, morwa wa moetapele wa baprista, Joyada. Benaya e be e le mogale wa “Ba Masome a Mararo”, e bile e le moetapele wa bona. Morwa wa gagwe, Amisabade, le yena o ile a mo latela ya ba molaodi wa sehlopha seo Kgwedi ya bone: Asahele, morwarragoJoaba. Sebadia, morwagwe, o ile a mo latela Kgwedi ya bohlano: Shamhute, setlogolo sa Jitsara Kgwedi ya boselela: Ira wa Tekoa, morwa wa Ikeshe Kgwedi ya bošupa: Heletse, Moefraime wa Pelone Kgwedi ya seswai: Sibekai wa Husha, e be e le wa kgorwana ya Serage Kgwedi ya senyane: Abiesere wa Anathote, nageng ya kgoro ya Benjamene Kgwedi ya lesome: Maharai wa Netofa, e be e le wa kgorwana ya Serage Kgwedi ya lesome le e tee: Benaya wa Piratone, nageng ya kgoro ya Efraime Kgwedi ya lesome le tše pedi: Heldai wa Netofa, yena e be e le setlogolo sa Otniele *** *** *** *** *** *** *** *** *** *** Le ke lenaneo la baokamedi ba dikgoro tša Israele Kgoro Mookamedi Rubene Eliesere, morwa wa Sikri Simeone Shefatia, morwa wa Maaka Lefi Hashabia, morwa wa Kemuele Arone Tsadoko Juda Elihu, yo mongwe wa bomorwarragoKgoši Dafida Isakara Omri, morwa wa Mikaele Sebulone Jishmaya, morwa wa Obadia Naftali Jerimote, morwa wa Asriele Efraime Hoshea, morwa wa Asasia Seripakgoro sa Manase sa ka bodikela Joele, morwa wa Pedaya Seripakgoro sa Manase sa ka bohlabela Jido, morwa wa Sakaria Benjamene Jaasiele, morwa wa Abnere Dane Asarele, morwa wa Jerohamo *** *** *** *** *** *** Kgoši Dafida o ile a se ke a bala batho ba ba bego ba se ba fihlela mengwaga ye masome a mabedi le motšo o tee, ka baka la gore Morena o be a itše o tla atiša setšhaba sa Israele bjalo ka dinaledi legodimong. Joaba, yo mmagwe e bego e le Tseruya, o ile a thoma go bala setšhaba, eupša a se ke a fetša, ka gobane Modimo o ile a galefela Baisraele ka ge Dafida a be a laetše gore ba balwe, ka gona gwa se ke gwa ngwalwa ka pukung ya ditaba tša mmušo wa Kgoši Dafida gore ke ba bakae. Asmabethe, morwa wa Adiele, o be a hlokometše mahumo a kgoši ao a bego a le mošate; Jonathane, morwa wa Usia, o be a hlokometše mahumo a kgoši ao a bego a le metseng le metsaneng le dibong; Esri, morwa wa Kelube, o be a hlokometše ba ba šomago mašemong; Shimi wa Rama o be a hlokometše dirapa tša merara; Sabdi wa Shefamo o be a hlokometše diterebe tša go dira beine; Baale-Hanane wa Gedere o be a hlokometše mehlware le mego nagengtlase; Joase o be a hlokometše makhura a mohlware a a bolokilwego; Shitrai wa Sharone o be a hlokometše dikgomo tša molaleng wa Sharone; Shafate, morwa wa Adlai, o be a hlokometše dikgomo tša melaleng ye mengwe; Obile, Moishmaele, o be a hlokometše dikamela; Jegdeya wa Meronote o be a hlokometše dipokolo; Jasise, Mohagare, o be a hlokometše dihuswane. *** *** *** *** *** *** Rangwane wa Dafida, Jonathane, e be e le moeletši yo bohlale wa go rutega. Yena le Jehiele, morwa wa Hakmone, ba be ba hlokometše go ruta barwa ba kgoši. Ahitofele e be e le moeletši wa kgoši, gomme Hushai, Moaraki, e le mogwera yo mogolo wa kgoši. Ka morago ga lehu la Ahitofele, Abiatare le Joyada, morwa wa Benaya, e ile ya ba baeletši ba kgoši. Joaba e be e le molaodi wa madira. Kgoši Dafida o ile a laela bahlankedi ba Israele ka moka gore ba kgobokane Jerusalema. Ka gona bahlankedi ka moka ba dikgoro, le bahlankedi ba ba bego ba hlokometše mediro ya mmušo, le balaodi ba bahlabani ba sekete le ba lekgolo, le bahlapetši ba thoto le diruiwa tša kgoši le tša barwa ba gagwe, gotee le bahlankedi ba mošate, bagale le banna ka moka ba maemo, ba kgobokana Jerusalema. Dafida a ema pele ga bona mme a bolela le bona a re: “Bomorwarre, setšhaba sa gešo, ntheetšeng! Ke be ke gopotše go agela Polokelo ya Kgwerano, e lego bogato bja Morena Modimo wa rena, ngwako wo e kago dula ka go wona go ya go ile. Ke be ke beakantše tša go aga tempele gore ke mo godiše, eupša a se ke a ntumelela, ka gobane ke nna motho yo a hlabanego kudu gomme ke bolaile batho ba bantši. Morena Modimo wa Israele o nkgethile gare ga ba lapa lešo bohle gore ke buše setšhaba sa Israele bophelong bja ka ka moka. O kgethile kgoro ya Juda gore go yona go tšwe kgoši, gomme mo kgorong ya Juda a kgetha lapa la tate. Gare ga bomorwarre a kgahlwa ke go dira nna kgoši ya Israele ka moka. O mphile barwa ba bantši, gomme gare ga bona ka moka a kgetha Solomone gore a dule setulong sa bogoši bja Morena a buše Israele. “Morena o rile go nna: ‘Solomone, morwa wa gago, ke yena yo a tlago aga Tempele ya ka le dikgoro tša yona. Ke mo kgethile gore e be morwa wa ka, gomme nna ke be tatagwe. Ge a ka phetha melao le ditaelo tša ka ka mehla, go swana le ge a di phetha bjale, ke tla hloma mmušo wa gagwe go ya go ile.’ “Bjale ge, mo pele ga lena, Baisraele ka moka, lena setšhaba sa Morena, ke le kgopela Modimo a nkwa gore le phethe ka tlhokomelo tšohle tše Morena Modimo wa rena a re laetšego tšona, gore le tle le fele le dutše nageng ye ya gagwe ye botse, le gore le tle le kgone go e tlogelela ditlogolo tša lena go ya go ile.” Gomme a re go Solomone: “Wena ngwanaka, o hlomphe Modimo wa tatago mme o mo direle ka pelo ya gago ka moka le ka mafolofolo. Morena o lekodišiša se se lego ka dipelong tša batho ka moka, gomme o tseba megopolo yohle. Ge o ka ya go yena, o tla go amogela, eupša ge o ka mo tlogela, o tla go lahlela sa ruri. Bona, Morena o kgethile wena gore o age Tempele ya gagwe ye kgethwa. Bjale ge, thoma gonabjale gomme o e age ka mafolofolo!” Dafida a fa Solomone seswantšhothalwa sa phapoši ya matsenong a Tempele le diphapoši tše dingwe, e lego tša go bolokela, tša ka godimo, tša mosego, le tša Felo mo Gokgethwakgethwa, moo dibe di lebalelwago gona. A mo fa le seswantšhothalwa sa tšohle tše a bego a di gopotše ka dikgoro, le diphapoši tša go di dikologa, le tša polokelo ya Tempele, le tša dimpho tše di abetšwego Morena. Dafida a mo fa le seswantšhothalwa sa baprista le Balefi ka madulo medirong ya bona, le seswantšhothalwa sa bona sa go dira modiro wa Tempele, le sa dibjana ka moka tša Tempele. A mo fa le kelo ya gauta le silibera ya go dira dibjana tšeo, le kelo ya gauta le silibera ya go dira dihlomamabone le mabone a tšona, le ya ditafola tša silibera, le ya tafola ye nngwe le ye nngwe ya gauta ye go bego go bewa dinkgwa tše di abetšwego Modimo godimo ga yona. A mo fa le kelo ya gauta ye e sego ya tswakwa ya go dira diforoko tša mašimelo, le meruswi, le diphafana, le kelo ya gauta le silibera ya go dira dinwelo, le kelo ya gauta ye e sego ya tswakwa ya go dira aletare ya seorelo, le ya go dira koloi, e lego bakerubi ba ba phurolotšego diphego tša bona ka godimo ga Polokelo ya Kgwerano ya Morena gore ba e khupetše. Kgoši Dafida a re: “Tšeo ka moka di mo seswantšhothalweng se se thadilwego go ya ka mo Morena ka boyena a nkutolletšego ka gona.” Kgoši Dafida a re go Solomone, morwagwe: “O be le sebete, o tie. Thoma modiro gomme o se ke wa boifa goba wa nolega moko, ka gobane Morena Modimo wa ka o na le wena. A ka se go lahle, ebile a ka se go tlogele, eupša o tla ba le wena go fihlela ge o fetša modiro wo o swanetšego go dirwa wa Tempele ya gagwe. Baprista le Balefi ba filwe mediro ye ba swanetšego go e dira ka Tempeleng. Bašomi ba ba kgonago mediro ka moka ba fišegela go go thuša, gomme batho ka moka le baetapele ba bona ba laolwa ke wena.” Kgoši Dafida a re go batho ka moka ba ba bego ba kgobokane moo: “Solomone ke yena yo Modimo a mo kgethilego, eupša e sa le yo monnyane gomme ga a ne boitemogelo. Modiro wo o swanetšego go dirwa ke wo mogolo, ka gobane wo ga se mošate wa batho, eupša ke Tempele ya Morena Modimo. Ke lekile ka maatla go kgobokanya dikago tša Tempele – gauta, silibera, mphiri, tshipi, dikota, dikarneliene le magakabje a go hlomelwa lebotong, matlapana a go dira diswantšho, magakabje a mangwe a mehutahuta, le dimabole tše ntši. Ka ntle le tšeo ka moka tše ke di kgobokantšego, ke ntšhitše silibera le gauta ye e lego ya ka, ka gobane ke rata Tempele ya Modimo. Ke ntšhitše gauta ye botsebotse ya dikilokramo tše dikete tše masome a senyane, le silibera ye e hlwekišitšwego ya dikilokramo tše dikete tše makgolo a mabedi le tše lesome tša go kgabiša maboto a Tempele, le tša dilo ka moka tše bakgoni ba mešomo ya mehutahuta ba swanetšego go di dira. Bjale na ga go sa na le yo mongwe yo a ka ithaopago a fa Morena mpho ye kgolo?” Gwa ithaopa mantona a dikgorwana, le baetapele ba dikgoro, le balaodi ba bahlabani ba sekete le ba lekgolo, le bahlokomedi ba mediro ya mošate ba ntšha tše di latelago tša modiro wa Tempele: gauta ya dikilokramo tše dikete tše lekgolo le tše masome a mahlano le masome a seswai le metšo ye mene, le silibera ya dikilokramo tše dikete tše makgolo a mararo, le mphiri wa dikilokramo tše dikete tše makgolo a mahlano le tše masome a mane, le tshipi ya dikilokramo tše dimilione tše tharo. Bao ba bego ba na le magakabje ba ile ba a tsenya ka polokelong ya Tempele ye e bego e hlokometšwe ke Jeiele wa kgorwana ya Gershone. Setšhaba se ile sa fa Morena ka go ithaopa ka dipelo tše tšhweu, gomme sa thaba ge go ile gwa ntšhwa ka tsela yeo. Kgoši Dafida le yena a thaba kudu. Moo pele ga pitšo yeo ka moka Kgoši Dafida a reta Morena a re: “Morena, Modimo wa rakgolokhukhu wa rena, Jakobo, a go retwe wena go ya go ile. O yo mogolo, yo maatla, wa letago, wa setumo le borena. Dilo tšohle legodimong le lefaseng ke tša gago, gomme ke wena Kgoši, o Mmuši yo mogolo wa dilo ka moka. Lehumo le tlhomphego di tšwa go wena; o Mmuši wa tšohle. Maatla le bonatla di tšwa go wena; le gona o kgona go godiša le go tiiša batho ka moka. Bjale, Modimo wa rena, re a go leboga, gomme re reta leina la gago la letago. “Fela nna le setšhaba sa ka re ka se kgone go go fa selo, ka gobane tšohle di tšwa go wena, gomme re no buša se e bego e le sa gago; ka gobane mo pele ga gago re bafaladi le bašele bjalo ka borakgolokhukhu ba rena. Matšatši a rena a bjalo ka morithi wo o fetago, gomme ga re kgone go phelela sa ruri. Morena Modimo wa rena, re kgobokantše thoto ye ka moka go tlo go agela Tempele go godiša leina la gago le lekgethwa; e tšwa go wena, gomme ka moka ga yona ke ya gago. Modimo wa ka, ke tseba gore o fetleka megopolo ya batho, gomme wa kgahlwa ke bao ba tshephegago. Nna ke ithaopile ka go fa dilo tše ka moka ka pelo ya ka yohle, gomme ke thabetše go bona le ka moo setšhaba sa gago se se kgobokanego fa se go filego dimpho ka boithaopo. Morena, Modimo wa borakgolokhukhu ba rena, Abrahama, Isaka le Jakobo, dula o swareletše botshephegi bjo ka dipelong tša setšhaba sa gago, gomme o retollele dipelo tša bona go wena. Dira gore Solomone, morwa wa ka, a phethe ka pelo ye tšhweu se sengwe le se sengwe se o se laelago, le gore a age Tempele ye ke šetšego ke e kgobokanyeditše dikago tše.” Ka morago ga moo Dafida a laela batho ka moka ba ba bego ba kgobokane moo a re: “Bjale retang Morena Modimo wa lena!” Gomme kgobokano ka moka ya reta Morena, Modimo wa borakgolokhukhu ba bona, ba khunama, ba itahlela fase pele ga Morena le pele ga kgoši ya bona. Ka letšatši le le latelago ba direla Morena dihlabelo tša go tšhungwa ka moka le dihlabelo tše dingwe ka dipoo tše sekete, le dikgapa tše sekete, le dikwanyana tše sekete, mmogo le dikabelo tša tšona tša dino. Ba dira le tše dingwe dihlabelo tše dintši ba di direla Baisraele ka moka. Ka letšatši leo ba thaba kudu ge ba eja, ba enwa pele ga Morena. Gomme ba bea Solomone kgoši la bobedi. Ka leina la Morena ba mo tlotša gore e be mmuši wa bona, mme Tsadoko ba mo tlotša gore e be moprista. Ka gona Solomone a hlatlama Dafida, tatagwe, bogošing bjo Morena a bego a bo hlomile. Solomone e be e le kgoši ye e atlegago, gomme setšhaba ka moka sa Israele se mo hlompha. Bahlankedi ka moka le bahlabani, le bona barwa ba Dafida ba bangwe ba holofetša gore ba tla botegela Solomone ge e le kgoši. Morena a dira gore Solomone a hlomphege kudu setšhabeng sa Israele ka moka, gomme a mo fa serithi se segolo sa bogoši sa go feta sa magoši ka moka a a bego a kile a buša Israele. Dafida, morwa wa Isai, o ile a buša setšhaba sa Israele ka moka mengwaga ye masome a mane. O bušitše mengwaga ye e šupago a le Hebrone, gomme a buša ye masome a mararo a metšo ye meraro a le Jerusalema. O hlokafetše a tšofetše kudu, a humile e le ruri, e bile a hlomphega kudu, gomme Solomone, morwa wa gagwe, a mo hlatlama bogošing. Ditaba tša Kgoši Dafida go tloga mathomong a pušo ya gagwe go iša mafelelong di ngwadilwe ka pukung ya moprofeta Samuele, le ya moprofeta Nathane, le ya moprofeta Gade. Ka dipukung tšeo go ngwadilwe tšohle tša bogoši bja gagwe le tša maatla a gagwe a bogoši, le dilo ka moka tše di ilego tša mo hlagela, le tšeo di ilego tša hlagela Baisraele le mebušo ye e bapilego le bona. Solomone, morwa wa Kgoši Dafida, o ile a tia mmušong wa Israele, gomme Morena Modimo wa gagwe a ba le yena mme a mo dira yo maatla kudu. Kgoši Solomone a laela balaodi ba bahlabani ba ba dikete le ba ba makgolo, le baahlodi ba melato, le dihlogo ka moka tša malapa, le baetapele ka moka, le setšhaba ka moka gore ba ye le yena lefelong la tirelo ntotomeng ye e kgobetšwego kua Gibeone. Ba ya moo ka gobane ke mo go bego go le Tente ya bodulo bja Morena ye Moshe, mohlanka wa Morena, a bego a e dirile kua lešokeng. Polokelo ya Kgwerano yona e be e le kua Jerusalema, e beilwe ka tenteng ye Kgoši Dafida a bego a e hlomile ge a tšo tšea Polokelo kua Kiriate-Jearime. Aletare ya mphiri ye e bego e dirilwe ke Betsaliele, morwa wa Uri, Uri morwa wa Hure, le yona e be e le kua Gibeone ka pele ga Tente ya bodulo bja Morena. Kgoši Solomone le setšhaba ka moka ba kgopela keletšo go Morena fao. Solomone a dira dihlabelo tša go tšhungwa ka moka ka diruiwa tše sekete godimo ga aletare yeo ya mphiri moo Tenteng pele ga Morena. Bošego bjoo Modimo a iponagatša go Solomone gomme a mmotšiša a re: “O nyaka gore ke go fe eng?” Solomone a mo fetola a re: “Ka mehla o be o botegela tate Dafida kudu, gomme bjale o dirile gore ke mo hlatlame bogošing. Hle, Morena Modimo, phethagatša se o se holofeditšego tate. O ntirile kgoši ya setšhaba se sentši bjalo ka lerole la lefase, ka gona mphe bohlale le tsebo ye e nyakegago gore ke se buše. Go sego bjalo nka kgona bjang go buša setšhaba se sa gago se segolo?” Modimo a fetola Solomone a re: “O kgethile gabotse. Bakeng sa go kgopela lehumo goba thoto goba tlhomphego goba lehu la manaba a gago goba le ge e le bophelo bjo botelele, o kgopetše bohlale le tsebo gore o tle o kgone go buša setšhaba sa ka, se ke go beilego kgoši ya sona. Ka gona ke tla go fa bohlale le tsebo. Gomme godimo ga tšeo ke tla go fa lehumo le thoto le tlhomphego, tše go sego kgoši ye e kilego ya ba le tšona goba ye e tlago tsoga e bile le tšona.” Solomone a tloga lefelong la tirelo ntotomeng ye e kgobetšwego kua Gibeone, mo go bego go le Tente ya bodulo bja Morena, gomme a gomela Jerusalema. A buša Baisraele a le fao. A kgobokanya madira a dikoloi tša ntwa tše makgolo a lesome le a mane le banamedi ba dipere ba dikete tše lesome le tše pedi. A bea banamedi ba dipere Jerusalema le metseng ye e bego e na le dikoloi tša ntwa. Mehleng ya pušo ya gagwe silibera le gauta e be e le tše ntši mo Jerusalema bjalo ka maswika, gomme mesedere e le ye mentši bjalo ka mego ya nagengtlase. Dipere tša Solomone di be di rekwa Mutsri le Silisia ke bagwebi ba kgoši, mme di tlišwa Israele. Dikoloi tša ntwa di be di rekwa Egepeta. Bagwebi bao le gona ba be ba rekišetša magoši a Bahete le a Basiria dipere le dikoloi tša ntwa, ba rekiša koloi ya ntwa dipapetlana tša silibera tše makgolo a a selelago, gomme pere e le dipapetlana tše lekgolo le masome a mahlano. Kgoši Solomone o ile a fetša ka gore o tla aga Tempele yeo Morena a bego a tla khunamelwa go yona, le go ikagela mošate. A ntšha banna ba dikete tše masome a a šupago gore ba rwale dikago, le ba dikete tše masome a seswai gore ba betle maswika dithabeng. Ka moka ga bona ba be ba okametšwe ke banna ba dikete tše tharo le makgolo a a selelago. Solomone a roma batseta go Kgoši Hiramo wa Tirose gore ba yo mmotša ba re: “Dirišana le nna bjalo ka ge o be o dirišana le tate, Kgoši Dafida, mola o mo rekišetša dikota tša mosedere gore a ikagele mošate. Ke aga tempele go hlompha Morena Modimo wa ka. E tla ba felo mo gokgethwa moo go tlago tšhumelwa seorelo sa go nkga bose, moo go tlago dula go beakantšwe dinkgwa tše kgethwa, le moo go tlago dirwa dihlabelo tša go tšhungwa ka moka mosong wo mongwe le wo mongwe le mantšiboeng a mangwe le a mangwe, le ka Disabatha, ka Menyanya ya Lebalana, le ka matšatši a menyanya ye mengwe ya Morena Modimo wa rena. Tšeo ka moka ke tše Morena a laetšego Baisraele gore ba di dire go ya go ile. Tempele ye ke tlago e aga e tla ba ye kgolo, ka gobane Modimo wa rena ke yo mogologolo go feta medimo ka moka. Gabotsebotse ga go yo a ka agelago Modimo tempele, ka gobane le bjona bogolo le bophara bja magodimo ga bo mo lekane. Bjale nna ke mang yo nka agelago Morena tempele, ge e se fela go aga lefelwana la go mo tšhumela seorelo? Bjale nthomele monna yo e lego sethakga sa go tloka, sa go šoma ka gauta, ka silibera, ka mphiri, ka tshipi, le ka lešela la bohubedu bja go retela, le la bohubedu bja madi, le la botala bja legodimo. O tla šoma le bakgoni ba Juda le ba Jerusalema bao tate, Dafida, a ba kgethilego. Ke tseba ka moo banna ba gago ba kgonago go rema mehlare ka gona, ka fao nthomele dikota tša thaba ya Lebanone tša mosedere, tša mophaene, le tša mojunipere. Banna ba ka ba tla thušana le ba gago go nthemela dikota tše ntšintši, ka gore tempele ye ke nyakago go e aga e tla ba ye kgolo ye botsebotse. Ke tla go romela mekotla ye dikete tše masome a mane le tše nne ya mabele, le garase ye kaalo, le dilitara tša beine tše dikete tše makgolo a mane le tše masome a mane, le tše kaalo tša makhura a mohlware, tšeo ka moka e le dijo tša banna ba gago bao ba remago dikota ba di kgobokanya.” Kgoši Hiramo a fetola Solomone ka lengwalo a re: “Ka gobane Morena o rata setšhaba sa gagwe, o go dirile kgoši ya sona. A go retwe Morena Modimo wa Israele, Mohlodi wa legodimo le lefase! O file Kgoši Dafida morwa yo bohlale, yo a nago le kwešišo le tsebo, yo a tlago agela Morena tempele, a ba a ikagela mošate. Ke go romela mokgoni wa mediro ya diatla yo bohlale wa sethakga yo leina la gagwe e lego Huramo. Mmagwe e be e le wa kgoro ya Dane, gomme tatagwe e le motho wa Tirose. Ke sekgwari sa go šoma ka gauta, ka silibera, ka mphiri, ka tshipi, ka maswika le ka dikota. O kgona go šoma ka lešela la bohubedu bja moretele le la botala bja legodimo, le la bohubedu bja madi, le ka lešela le boletiana. O kgona go tloka ka mekgwa ye e fapanego, le go dira mokgabišo wo mongwe le wo mongwe wo a botšwago gore a o dire. A a šome le bakgoni ba gago le bao ba bego ba šomela mong wa ka, Kgoši Dafida, tatago. Bjale hle, re romele mabele, garase, beine le makhura a mohlware, dilo tšela o re holofeditšego tšona. Ge e le rena re tla rema mesedere ye o e nyakago dithabeng tša Lebanone, ra tlemaganya dikota tšeo, ra di phaphamatša lewatleng go yo fihla Jopa. Go tloga moo o ka di iša Jerusalema.” Kgoši Solomone o ile a bala bafaladi ka moka ba ba bego ba dula nageng ya Israele, bjalo ka ge Dafida, tatagwe, a ile a ba bala. Go be go na le bafaladi ba dikete tše lekgolo le tše masome a mahlano le tše tharo le makgolo a a selelago mo Israele. A ntšha ba dikete tše masome a a šupago gore ba rwale dikago, ba dikete tše masome a seswai gore ba betle maswika dithabeng, gomme a ba beela baokamedi ba dikete tše tharo le makgolo a selelago. Kgoši Dafida, tatagoSolomone, o be a šetše a beakantše lefelo la Tempele. Lefelo leo le be le le mo Jerusalema, thabeng ya Moria, moo Morena a bego a kile a iponagatša go yena seboeng sa Arauna, Mojebuse. Kgoši Solomone a thoma moago kgweding ya bobedi ya ngwaga wa bone wa ge e le kgoši. Dikelo tše Kgoši Solomone a ilego a aga Tempele ka tšona šedi: Botelele e be e le dimetara tše 27,6, bophara e le dimetara tše 9,2 go ya ka meelo ye metala. Phapoši ya matsenong e be e le ya bophara ka moka bja Tempele, e le dimetara tše 9,2, gomme bogodimo e le dimetara tše 55,2. Bokagare bja phapoši yeo bo be bo manegilwe ka gauta ye e sego ya tswakwa. Phapoši ye kgolo e be e manegilwe ka diphaphathi tša mosedere, mme tšona di manegilwe ka gauta ye botsebotse ye go yona go bego go tlokilwe mehlare ya mepalema le diketane. Kgoši a kgabiša Tempele ka maswikana a bohlokwa a mabotse le ka gauta ye e tšwago nageng ya Parbaime. A šomiša gauta go manega maboto a Tempele, mahlomo, direpodi le mamati. Mo mabotong bašomi ba tloka diswantšho tša bakerubi. Phapoši ya ka gare ye e bego e bitšwa Felo mo Gokgethwakgethwa e be e le ya botelele bja dimetara tše 9,2, le bophara bja dimetara tše 9,2, bjo e bego e le bophara bja Tempele. Go ile gwa šomišwa gauta ya dikilokramo tše dikete tše lesome le tše seswai tša gauta go manega maboto a Felo mo Gokgethwakgethwa; gwa šomišwa gauta ya dikramo tše makgolo a mahlano le masome a a šupago go dira dikokotela, gomme maboto a diphapoši tša ka godimo le ona a be a manegilwe ka gauta. Le gona kgoši a laela bašomi ba gagwe gore ba bope diswantšhobopša tša bakerubi ba babedi ka tshipi, ba ba manege ka gauta, gomme ba ba bee ka Felong mo Gokgethwakgethwa moo ba ilego ba emišwa ba bapetše ba lebeletše mojako. Mokerubi yo mongwe le yo mongwe o be a na le diphego tše pedi, lefego le tee e le la botelele bja dimetara tše 2,3. Mafego ao a be a phurologile gomme a kgwathana gare ga phapoši mme a fihla mabotong ka mathokong a mabedi a phapoši, a phurologile go putla bophara bja phapoši bja dimetara tše 9,2. *** *** Seširo sa Felo mo Gokgethwakgethwa se be se dirilwe ka lešela la mmala wa botala bja legodimo, le la bohubedu bja go retela, le la bohubedu bja madi, le ka lešela le boletiana, gomme godimo ga seširo seo go na le merokelelo ya diswantšho tša bakerubi. Kgoši o ile a dira dikokwane tše pedi, ye nngwe le ye nngwe ya ba ya botelele bja dimetara tše 16,1, gomme a di hloma pele ga Tempele. Ye nngwe le ye nngwe e be e na le hlogwana ya botelele bja dimetara tše 2,3. Karolo ya ka godimodimo ya dikokwane e be e kgabišitšwe ka diswantšho tša diketane tše di logagantšwego, le diswantšho tša digarenate tše lekgolo tša mphiri di kgomareditšwe moo diketaneng. Dikokwane tšeo di be di hlomilwe ka mathoko a mojako wa Tempele; ya ka thoko ya ka borwa e ile ya rewa leina la Jakine, gomme ya ka leboa ya rewa la Boase. Kgoši Solomone o ile a laela gore go dirwe aletare ya mphiri ya botelele le bophara bja dimetara tše 9,2, le bogodimo bja dimetara tše 4,6. A bopa le legopo la nthetelego ka mphiri wo o tološitšwego la dimetara tše 2,3 go iša fase, le boahlamo bja dimetara tše 4,6, le bontikodiko bja dimetara tše 13,8. Go dikologa karolo ya fase ka moka ya legopo go be go na le melokoloko ye mebedi ya dikgabišo. Dikgabišo tšeo e be e le tša sebopego sa dikgomo tše di bopilwego e le selo se tee le legopo. Disentimetareng tše dingwe le tše dingwe tše masome a mane le metšo ye e selelago go be go na le dikgomo tše lesome le tše pedi. Legopo leo le be le rwelwe ke dikgomo tše lesome le tše pedi tša mphiri tše di bego di lebeletše ka mathoko ohle, tše tharo di lebeletše leboa, tše tharo bodikela, tše tharo borwa, tše tharo bohlabela. Mathoko a legopo e be e le a bokoto bja dimilimetara tše masome a a šupago le tše nne. Morumo wa lona o be o swana le morumo wa nkgo, o ahlametše ka ntle bjalo ka matlakala a letšoba. Legopo leo le be le swara meetse a dilitara tše dikete tše masome a a selelago le metšo ye e selelago. Ba dira le dibjana tše lesome, tše tlhano ya ba tša ka thoko ya ka borwa bja Tempele, mme tše tlhano ya ba tša ka leboa la yona. Dibjana tšeo e be e tla tla e eba tša go tšokoletša ditho tša diruiwa tše di bego di tla tšhungwa e le dihlabelo. Meetse a ka legopong le legolo e be e le ao baprista ba hlapago ka ona. Ba dira dihlomamabone tše lesome tša gauta go ya ka moo di bego di fela di dirwa ka gona, le ditafola tše lesome, gomme ba di bea ka phapošing ye kgolo ya Tempele, ba bea dihlomamabone tše tlhano le tafola tše tlhano ka thoko ye nngwe le ye nngwe. Ba dira le meruswi ye lekgolo ya gauta. *** Ba dira kgoro ya ka gare ya baprista, le kgoro ya ka ntle. Mamati a mejako ya gare ga dikgoro tšeo a be a manegilwe ka mphiri. Legopo le ile la bewa ka borwabohlabela bja Tempele. Huramo a dira le dipitša, digarafo le meruswi. A fetša mediro ye e latelago ye a ilego a e direla Kgoši Solomone Tempeleng: dikokwane tše pedi dihlogwana tše pedi tša go bopega bjalo ka meruswi tša godimo ga dikokwane diketane tše di logagantšwego hlogwaneng ye nngwe le ye nngwe digarenate tše makgolo a mane tša mphiri ka melokoloko ye mebedi ya tše lekgolo molokolokong go raretša diketane hlogwaneng ye nngwe le ye nngwe dikoloyana tše lesome meruswi ye lesome legopo dikgomo tše lesome le tše pedi tša mphiri tše di thekgilego legopo dipitša, digarafo le mašimelo Huramo, mokgoni wa mediro ya diatla wa sethakga, a direla Kgoši Solomone dilo tšeo ka moka ka mphiri wo o phadimišitšwego, gore di tle di šomišwe ka Tempeleng ya Morena. *** *** *** *** *** Kgoši a laela gore ka moka ga tšona di bopše gare ga Sukote le Tsereda ka moeding wa Jordane, moo mobu e bego e le wo montši. Go ile gwa dirwa dilo tše ntšintši mo e lego gore go ile gwa se ke gwa ba le yo a elago boima bja mphiri wo o ilego wa šomišwa. Kgoši Solomone a laela le gore Tempele e direlwe ditlabakelo tša gauta, e lego aletare le ditafola tša dinkgwa tše di abelwago Modimo; dihlomamabone le mabone a gauta ye e sego ya tswakwa ao a bego a swanetše go tuka pele ga Felo mo Gokgethwakgethwa, go ya ka moo go bego go laetšwe ka gona; dikgabišo tša matšoba, mabone, le ditlao tše di bego di dirilwe ka gauta ye e hlwekilego kudu; ditimamabone, meruswi, dipane tša seorelo, le dibjana tša magala. Tše ka moka di be di dirilwe ka gauta ye e sego ya tswakwa. Mamati a ka ntle a Tempele le a Felo mo Gokgethwakgethwa a be a manegilwe ka gauta. Ge Kgoši Solomone a feditše modiro ka moka Tempeleng, a tšea dilo ka moka tše Kgoši Dafida, tatagwe, a bego a di abetše Morena – silibera, gauta, le dilo tše dingwe, a di bea ka diphapošing tša go bolokela tša Tempele. Kgoši Solomone a bitša bagolo ka moka ba Israele, le baetapele ba dikgoro, le mantona a dikgorwana gore ba kgobokane Jerusalema ba tle ba yo tšea Polokelo ya Kgwerano ya Morena Sione, motseng wa Dafida, ba e tliše Tempeleng. Ka moka ba kgobokana ka nako ya Monyanya wa Mešaša, kgweding ya bošupa. Ge bagolo ka moka ba Israele ba fihla, Balefi ba rwala Polokelo ya Kgwerano ba e iša Tempeleng. Baprista bona ba thothela Tente ya bodulo bja Morena le ditlabakelo tša yona ka moka Tempeleng. Kgoši Solomone le setšhaba ka moka sa Israele ba kgobokana pele ga Polokelo ya Kgwerano, gomme ba dira dihlabelo ka dihuswane le dikgomo tše ntšintši tše di sa balegego. Baprista ba rwala Polokelo ya Kgwerano ba e tsenya ka Tempeleng, mme ba e bea moo e swanetšego go dula gona ka Felo mo Gokgethwakgethwa, ka fase ga mafego a bakerubi. Mafego a tšona a a phurologilego a khupetša Polokelo le mapara a yona a go e rwala. Dintlha tša mapara ao di be di bonala fela ge motho a eme go lebana thwii le Felo mo Gokgethwakgethwa, e sego ge a eme mo gongwe. Mapara ao a sa le moo le lehono. Go be go se selo se sengwe ka gare ga Polokelo ya Kgwerano ntle le matlapa ale a mabedi ale Moshe a bego a a beile ka gona kua thabeng ya Sinai, ge Morena a dira kgwerano le setšhaba sa Israele mola se etšwa Egepeta. Baprista ba ba bego ba le gona ka moka ba be ba itlhwekišitse, go sa lebelelwe gore ke ba dihlopha dife. Gomme diopedi ka moka tša Balefi, Asafo, Hemane le Jedutune, le ba dikgorwana tša bona, ba be ba apere diaparo tša lešela le boletiana. Balefi ba be ba eme kgauswi le lehlakore la ka bohlabela la aletare ka diletšo tša masenkana le diharepa le dikgapa, ba na le baprista ba lekgolo le masome a mabedi bao ba bego ba letša diphala. Baopedi ba be ba opela mola baletši ba letša diphala, masenkana le diletšo tše dingwe ba kwana gabotse le baopedi. Baopedi bao ba be ba reta Morena mme ba mo tumiša ba re: “Retang Morena ka gobane ke yo botho, lerato la gagwe ke la neng le neng.” Ya re ge baopedi ba thoma go opela, Tempele ya tlala leru la seetša se se fahlago sa letago la Morena, gomme ba šitwa go tšwela pele. Kgoši Solomone a rapela a re: “Morena, o rile o rata go dula marung a maso. Bjale ke go agetše Tempele ya segoši, bodulo bjo o tlago dula ka go bjona go ya go ile.” Setšhaba ka moka sa Israele se be se eme moo. Kgoši a retologa a lebana naso gomme a se šegofatša. A re: “A go retwe Morena Modimo wa Israele! O phethile se a kilego a se holofetša tate, Dafida, mola a mmotša a re: ‘Go tloga ka nako yela ka go ntšha setšhaba sa ka Egepeta ga se ka ka ka kgetha motse wo mongwe mo nageng ya Israele ka moka wo go wona go kago agwa tempele moo nkago khunamelwa gona, le gona ga se ka ka ka kgetha motho gore a ete setšhaba sa ka sa Israele pele. Eupša bjale ke kgethile Jerusalema gore e be lefelo leo ke tlago khunamelwa go lona, mme ke kgethile le wena, Dafida, gore o buše setšhaba sa ka.’ ” Solomone a tšwela pele a re: “Tate, Dafida, o ile a gopola go aga tempele moo go tlago khunamelwa Morena Modimo wa Israele, eupša Morena a re go yena: ‘Ke gabotse ge o nyaka go nkagela tempele, fela e ka se agwe ke wena. Ke morwa wa gago, morwa yo a tlago tswalwa ke wena, yo a tlago aga tempele ya ka.’ “Bjale Morena o phethile se a mo holofeditšego sona. Ke hlatlame tate ka ba kgoši ya Israele, gomme ke agile Tempele moo go tlago khunamelwa Morena Modimo wa Israele. Ka Tempeleng ke beile Polokelo ya Kgwerano ye e swerego matlapa a kgwerano ye Modimo a e dirilego le setšhaba sa Israele.” Ka morago Solomone a ya a ema pele ga aletare setšhaba ka moka se mo lebeletše, a emiša matsogo a rapela. O be a dirile serokamelo sa mphiri gomme a se beile gare ga kgoro. E be e le sa dimetara tše 2,2 botelele, le tše 2,2 bophara, gomme bogodimo e le dimetara tše 1,4. A namela serokamelo seo, a khunama moo mang le mang a bego a kgona go mmona, gomme a emišetša matsogo legodimong. A rapela a re: “Morena Modimo wa Israele, legodimong le lefaseng ga go modimo yo a swanago le wena. O botegela kgwerano ya gago le setšhaba sa gago, gomme o se rata ka leratorato ge se phela se go hlompha ka dipelo tša sona ka moka. O phethile se o se holofeditšego tate, Dafida; lehono lentšu le lengwe le le lengwe le phethagaditšwe. Bjale, Morena Modimo wa Israele, ke rapela gore o phethe le sela o se holofeditšego tate mola o mmotša gore ka mehla go tla ba le yo mongwe wa ditlogolo tša gagwe yo a bušago naga ya Israele, ge e le gore ba phetha melao ya gago ka tlhokomelo go no swana le Dafida. Bjale ge, Morena Modimo wa Israele, hle, phethagatša tšohle tše o di holofeditšego Dafida, mohlanka wa gago. “Kgane o ka kgona go dula lefaseng gare ga batho, wena Modimo? Le lona legodimo la godimodimo ga se la go lekana, mme bjale Tempele ye ke e agilego ye yona e ka go lekana bjang? Morena Modimo wa ka, ke nna mohlanka wa gago. Theetša thapelo ya ka le sello sa ka, gomme o phethe tše ke go kgopelago tšona. O diše Tempele ye bošego le mosegare, lefelo le o le kgethilego gore o khunamelwe go lona. O nkwe ge ke rapela ke lebeletše Tempeleng ye. O kwe dithapelo tša ka le dikgopelo tša setšhaba sa gago sa Israele ge se rapela se lebeletše lefelong le. O re kwe o le bodulong bja gago legodimong, mme o re lebalele. “Ge motho a phošeditše yo mongwe gomme a tlišwa aletareng ya gago ka mo Tempeleng ye gore a tle a ene gore ga a ne molato, wena Morena, o theetše o le legodimong gomme o ahlole bahlanka ba gago. O itefeletše go yo a nago le molato mme o mo otle ka mo go mo swanetšego, gomme o lokolle yo a se nago molato. “Ge setšhaba sa gago sa Israele se fentšwe ke manaba a sona ka gobane se go phošeditše, gomme ge se sokologela go wena se bolela se ipobola gore o Modimo wa sona, mme se etla mo Tempeleng ye se go rapela se re o se lebalele, o se theetše o le legodimong. O lebalele setšhaba sa gago dibe tša sona, mme o se boetše nageng ye o e filego sona le borakgolokhukhu ba sona. “Ge o sa neše pula lebaka e le gore setšhaba sa gago se dirile dibe pele ga gago, mme ge se sokologa dibeng tša sona ka gobane o se otla, se lebelela Tempeleng ye se go rapela, se ipobola gore o Modimo wa sona, o se theetše o le legodimong. O lebalele kgoši le setšhaba sa Israele dibe tša bona. O ba rute go dira tše di lokilego. Gomme hle, Morena, o neše pula mo nageng ye ya gago ye o e filego setšhaba sa gago gore e be lefa la sona go ya go ile. “Ge go wele tlala goba bolwetši bja leuba nageng, goba ge mabele a tšhungwa ke phefo, goba a lewa ke phori, goba segongwane, goba bojane, goba ge setšhaba sa gago se hlaselwa ke manaba a sona, goba ge go wele bolwetši bjo bošoro goba bjo bongwenyana gare ga sona, o theetše dithapelo tša sona. Ge motho yo mongwe goba setšhaba sa gago sohle sa Israele se ka otlollela matsogo Tempeleng ye se rapela se kgopela ka dipelo tše di nyamilego, se tshwenyegile, o kwe thapelo ya bona. O ba theetše o le bodulong bja gago legodimong, o ba lebalele. Ke wena o nnoši o tsebago boitsholo bjo bo lego ka pelong ya motho. O sware motho yo mongwe le yo mongwe ka mo go mo swanetšego, gore setšhaba sa gago se tle se go theetše mme se phethe ditaelo tša gago ka dinako ka moka tša ge se sa dula nageng ye o e filego borakgolokhukhu ba rena. “Ge motho o šele yo a dulago nageng ya kgole a ka tla go rapela mo Tempeleng ye ka baka la go tuma ga gago le dilo tše kgolo tše o di diretšego setšhaba sa gago, o theetše thapelo ya gagwe o le legodimong mo o dulago gona. O dire se a go kgopelago sona, gore ditšhaba tša lefase ka moka di tle di go tsebe mme di go theetše, bjalo ka setšhaba sa gago sa Israele. Ke moo di tlago tseba gore Tempele ye ke e agilego ke felo fa o swanetšego go khunamelwa gona. “Ge o laela setšhaba sa gago gore se yo lwa le manaba a sona, gomme se go rapela mo se ka bago se le gona se lebeletše motseng wo o o kgethilego wo le Tempeleng ye ke go agetšego yona ye, o theetše dithapelo tša sona. O ba kwe o le legodimong, gomme o dire gore ba fenye. “Ge setšhaba sa gago se go phošeditše – gape ga go motho yo a sa dirego dibe – gomme ya re ge o befetšwe wa ba gafela manabeng a bona mme bathopi bao ba bona ba ba iša nageng ye nngwe, ya kgole goba ya kgauswi, o theetše dithapelo tša setšhaba sa gago. Ge ba ka itshola ba le moo nageng yeo gomme ba go rapela ba ipolela gore ba dirile dibe ba phoša ba ba le molato, o kwe dithapelo tša bona, hle, Morena. Ge moo nageng yeo ba ka sokologa ka dipelo tša bona ka moka le ka moya wa bona ka moka, gomme ba go rapela ba lebeletše nageng ye o e filego borakgolokhukhu ba rena, motse wo o o kgethilego wo, le Tempele ye ke go agetšego yona ye, gona o theetše dithapelo tša bona. O ba kwe o le bodulong bja gago legodimong ge ba go kgopela tebalelo, gomme o ba šokele. “Bjale hle, Modimo wa ka, re lebelele mme o theetše dithapelo tše di dirwago mo lefelong le. Emelela bjale, Morena Modimo, mme o ye lefelong la gago la go khutša ka Tempeleng; o ye le Polokelo ya Kgwerano, sešupo sa maatla a gago. A batho ba hwetše phološo go baprista ba gago, gomme bao ba go botegelago ba thabe ka baka la go loka ga gago. Morena Modimo, o se ke wa lahla kgoši, motlotšwa wa gago. Gopola dilo tše o di holofeditšego Dafida, mohlanka wa gago.” Ge Kgoši Solomone a fetša thapelo ya gagwe, mollo o ile wa theoga legodimong wa tšhuma dihlabelo tše di bego di dirilwe, mme ka nako yeo seetša se se fahlago sa letago la Morena sa tlala Tempele. Ka gobane Tempele e be e tletše seetša se se fahlago, baprista ba ile ba šitwa ke go tsena ka go yona. Ge setšhaba sa Israele se bona mollo woo o theoga legodimong gomme seetša sela se tlala Tempele, ba khunama lebatong la maswika, ba obamiša difahlego ba rapela Morena, ba mo tumiša ka baka la go loka ga gagwe le kgaugelo ya gagwe ye e sa felego. Ke moka Solomone le setšhaba ka moka ba direla Morena dihlabelo. A dira dihlabelo ka dikgomo tše dikete tše masome a mabedi le tše pedi le dihuswane tše dikete tše lekgolo le tše masome a mabedi. Ka gona yena le setšhaba ka moka ba kgethwafatša Tempele. Baprista ba be ba eme mafelong a ba a abetšwego, gomme Balefi ba ema ba lebane le bona ba tumiša Morena ka diletšo tše Kgoši Dafida a bego a laetše gore di dirwe, mme ba opela kopelo ye: “Lerato la gagwe ke la go sa felego!” ka moo ba bego ba laetšwe ke Dafida. Baprista ba be ba letša diphala mola setšhaba ka moka se eme. Solomone a kgethwafatša bogare bja kgoro, e lego sekgoba se se lego pele ga Tempele, gomme moo a dira dihlabelo tša go tšhungwa ka moka le dikabelo tša bupi; a di dira le ka makhura a diruiwa tša dihlabelo tša kagišano. A dira seo ka gobane aletare ya mphiri ye a bego a e dirile e be e sa lekane dihlabelo tšeo ka moka. Solomone le setšhaba ka moka sa Israele ba keteka Monyanya wa Mešaša matšatši a a šupago. Go be go tlile lešaba le lentši la ba ba tšwago kua sefateng sa Hamate le go fihla mollwaneng wa Egepeta. Ba be ba feditše matšatši a a šupago ba kgethwafatša aletare, le a mangwe a a šupago ba bina monyanya. Ka letšatši la mafelelo ba bina monyanya wa go feleletša, gomme ka letšatši la masome a mabedi le metšo ye meraro la kgwedi ya bošupa Solomone a re batho ba boele magaeng a bona. Ba be ba thabile ba kgahlilwe ke dilo tše botse tše Morena a bego a di file Dafida le Solomone le Baisraele, setšhaba sa Modimo. Ge Kgoši Solomone a feditše go aga Tempele le mošate, a atlegile dilong ka moka tše a bego a nyaka go di dira, Morena a iponagatša go yena bošego. A re go yena: “Ke kwele thapelo ya gago, gomme ke kgethile Tempele ye gore e be lefelo le nkago direlwa dihlabelo go lona. Ge ke tswaletše magodimo pula e sa ne, goba ke rometše tšie gore e tle e je dibjalo, goba ke ušitše bolwetši bja leuba setšhabeng sa ka, ge ba ka nthapela ba ikokobetša ba tla go nna gomme ba tlogela ditsela tša bona tše mpe, gona ke tla ba kwa ke le legodimong, ka ba lebalela dibe, gomme ka boetša naga ya bona sekeng sa yona. Bjale ke tla diša Tempele ye gomme ka theetša dithapelo tša batho ba ba rapelago mo. Mme bjale ke kgethile Tempele ye ka e kgethwafatša gore e be lefelo le ke tlago khunamelwa go lona go ya go ile. Ke tla e diša ka e hlokomela ka mehla yohle. Ge o ka ntirela ka potego bjalo ka Dafida, tatago, wa phetha melao ya ka mme wa dira tšohle tše ke go laetšego tšona, gona ke tla tiiša mmušo wa gago ka moo ke holofeditšego Dafida, tatago, mola ke mmotša gore Israele ka mehla e tla bušwa ke ditlogolo tša gagwe. Eupša ge wena le setšhaba sa gago le ka ntlhanogela la tlogela melao le ditaelo tše ke le filego tšona, mme la obamela medimo e šele, gona ke tla le tumola nageng ye ke le filego yona, mme ka lahla Tempele ye ke e kgethwafaditšego gore e be felo mo ke tlago khunamelwa gona. Batho mo gohle ba tla e kwera mme ba e nyatša. “Tempele ye bjale e hlomphega kudu, eupša ge tšeo di diregile mang le mang yo a fetago mo go yona o tla tlabega mme a botšiša a re: ‘Ke ka baka lang Morena a dirile naga ye le Tempele ye ka mokgwa wo?’ Batho ba tla fetola ba re: ‘Ke ka lebaka la gore setšhaba seo se ile sa lahla Morena, Modimo wa borakgolokhukhu ba sona, yo a ntšhitšego borakgolokhukhu ba bona Egepeta. Se ile sa kgomarela medimo ye mengwe sa e khunamela, sa e hlankela. Ke ka lona lebaka leo Morena a se tlišeditšego madimabe a.’ ” Solomone o ile a tšea mengwaga ye masome a mabedi a aga Tempele le mošate, ga gagwe. A tsošološa le metse ye Kgoši Hiramo a bego a mo file yona, gomme a dudiša Baisraele ba bangwe go yona. A thopa motse wa Hamate-Tsoba gomme a tiiša motse wa Tadmoro kua leganateng le metse ka moka ya bobolokelo ye a ilego a e aga nageng ya Hamate. Solomone a tsošološa le metse ye e latelago: Bethe-Horone ya ka Tletlolo le Bethe-Horone ya ka Tlase, metse ye e bego e ageleditšwe ka merako ya masoro ao a phekelwago, motse wa Baalate, le metse ka moka ya bobolokelo, le metse ka moka ye dikoloi tša gagwe tša ntwa le banamedi ba dipere ba bego ba le go yona. A aga le tšohle tše a bego a nyaka go di aga Jerusalema le kua Lebanone, le gohle mmušong wa gagwe. Solomone, moo medirong ya gagwe, a gapeletša ditlogolo tša batho ba Kanana bao Baisraele ba bego ba se ba ba bolaya mola ba thopa naga ya bona. Bona e be e le Bahete, Baamore, Bahibe le Bajebuse, bao ditlogolo tša bona e sa lego makgoba le lehono. *** Baisraele bona ba ile ba se ke ba gapeletšwa mediro yeo, fela ba dirwa bahlabani, balaodi ba madira, balaodi ba dikoloi tša ntwa, le banamedi ba dipere. Go be go na le balaodi ba bagolo ba makgolo a mabedi le masome a a fetšago seatla ba ba bego ba hlokometše mediro ya kgapeletšo. Solomone a tloša mosadi wa gagwe, morwedi wa kgoši ya Egepeta, motseng wa Dafida, a mo iša ngwakong wo a bego a mo agetše wona. A re: “Mosadi wa ka a ka se dule ka ntlong ya Dafida, kgoši ya Israele, ka gobane mo Polokelo ya Kgwerano e kilego ya ba gona ke mo gokgethwa.” Ke moka Solomone a direla Morena dihlabelo aletareng ye a bego a e agile pele ga Tempele. A dira dihlabelo tša go tšhungwa ka moka go ya ka se melao ya Moshe e se nyakago tšatšing le lengwe le le lengwe le lekgethwa e lego ka Disabatha, ka Menyanya ya Lebalana, le ka menyanya ye meraro ya ngwaga ka ngwaga – Monyanya wa Dinkgwa tše di se nago komelo, Monyanya wa Puno, le Monyanya wa Mešaša. Ka go phetha ditaelo tše di beilwego ke Dafida, tatagwe, o ile a beakanya mediro ya letšatši ka letšatši ya baprista le Balefi ba ba bego ba swanetše go tumiša Morena ka dikopelo, le go thuša baprista medirong ya bona. A beakanya le baleti ba masoro a dikgoro tša Tempele ka dihlophanahlophana lesorong le lengwe le le lengwe, go ya ka ditaelo tša Dafida, monna wa Modimo. Ditaelo tše Dafida a bego a di file baprista le Balefi mabapi le mengwako ya polokelo le dilo tše dingwe di ile tša phethwa, gwa se tshelwe le e tee. Ka nako yeo ke ge mešomo ka moka ya Solomone e phethilwe, go tloga ge go bewa motheo wa Tempele ya Morena go fihlela ge e feleletšwa. Ka morago Solomone a ya Etsione-Gebere le Elate, maemakepe a lebopong la kgogometšana ya Akaba, nageng ya Edomo. Kgoši Hiramo a mo romela maselawatle ka banna ba gagwe a otlelwa ke boramawatle ba gagwe ba tsebo. Ba sepela ka ona ba na le bahlankedi ba Solomone ba ya nageng ya Ofire. Ge ba boa ba tlela Solomone gauta ya dikilokramo tše dikete tše lesome le tše tharo le tše makgolo a mahlano. Kgošigadi ya Sheba e ile ya kwa go tuma ga Kgoši Solomone, gomme ya tla Jerusalema go tlo mo leka ka dipotšišo tše thata. A tla le bafelegetši ba gagwe ba bantši, gotee le dikamela di rwele dinoko, le magakabje, le gauta ye ntšintši. Ge a kopana le Solomone a mmotšiša dipotšišo ka moka tše a bego a di gopotše. Solomone a di fetola ka moka; gwa se be le ye e mo palelago. Kgošigadi ya Sheba ya kwa bohlale bja Solomone mme ya bona le mošate wo a o agilego. A bona dijo tše di solwago tafoleng ya Solomone, le ka moo bakgomana ba gagwe ba dulago ka go latelana ka gona, le ka moo badiredi ba gagwe ba solelago batho dijo tafoleng, le diaparo tša go swana tše ba di aparago, le bao ba tlišago dino, le diaparo tša bona tša go swana, le dihlabelo tše a di dirago ka Tempeleng. A šala a eme madi a maketše. A re go kgoši: “Tše ke di kwelego nageng ya gešo ka mediro ya gago le ka bohlale bja gago ke therešo! Ke be ke sa kgolwe tše ba mpotšago tšona go fihlela ge ke tlile ke iponetše ka bonna. Eupša tše ke di kwelego le go ba seripa ga se seripa sa bohlale bja gago. O yo bohlale le go feta ka moo batho ba bolelago ka gona. Ba mahlatse ke banna ba gago! Gomme bahlankedi ba gago le bona ba na le mahlatse ka ge ba phela ba go hlankela mme ba ekwa dipolelo tša gago tša bohlale! A go retwe Morena Modimo wa gago! O laeditše ka mo o mo kgahlago ka gona ka go go bea kgoši gore o tle o buše ka leina la gagwe. Ka gobane Morena o rata setšhaba sa Israele mme o rata go se boloka go ya go ile, o go beile kgoši ya sona gore o tle o phethe molao le toka.” Kgošigadi ya Sheba ya fa Kgoši Solomone dimpho tšela a bego a tlile natšo: gauta ya dikilokramo tše dikete tše tharo le makgolo a a selelago, dinoko tše ntšintši, le magakabje. Ga se gwa ka gwa ba le dinoko tše botse go feta tše kgošigadi ya Sheba e ilego ya di fa Kgoši Solomone. Banna ba Kgoši Hiramo le ba Kgoši Solomone bale ba go tliša gauta ya kua Ofire, ba ile ba tliša le dikota tša mojunipere le magakabje. Solomone a dira manamelo a Tempele le a ngwako wa gagwe ka dikota tšeo, a dira le diharepa le dikgapa tša baopedi ka tšona. Go be go se gwa ka gwa bonwa manamelo le diletšo tša mohuta woo nageng ya Juda. Kgoši Solomone a fa Kgošigadi ya Sheba tšohle tše a ilego a di kgopela. Tšeo ka moka e be e le go tlaleletša tše a bego a mo file tšona go leboga dimpho tše kgošigadi a bego a mo tletše natšo. Ka morago kgošigadi le bafelegetši ba gagwe ba gomela nageng ya Sheba. Ngwaga wo mongwe le wo mongwe Kgoši Solomone o be a tlišetšwa gauta ya dikilokramo tše dikete tše lesome le tše senyane le makgolo a senyane le masome a seswai, go tlaleletša metšhelo ye e bego e lefša ke bagwebi le barekiši. Magoši a Arabia le babušiši ba dilete tša Baisraele le bona ba be ba mo tlišetša silibera le gauta. Solomone o ile a laela gore go dirwe dikotse tše kgolo tše makgolo a mabedi, ye nngwe le ye nngwe ya manegwa ka gauta ye e tswakilwego ya dikilokramo tše e ka bago tše di šupago, le dikotse tše nnyane tše makgolo a mararo, ye nngwe le ye nngwe ya manegwa ka gauta ye e tswakilwego ya dikilokramo tše e ka bago tše tharo le seripa. Ka moka a di bea ka Ngwakong wa sethokgwa sa Lebanone. Kgoši a betla le setulo sa bogoši se segolo se se manegilwego ka gauta ye e sego ya tswakwa a se hlomela diripana tša meno a tlou. Go be go na le manamelo a a selelago a a namelelago setulong sa bogoši, gomme go kgomagana le sona go na le bogato bja maoto bjo bo manegilwego ka gauta. Ka mathoko se be se na le matsogo a mabedi, gomme go ipata le letsogo le lengwe le le lengwe go na le seswantšhobopša sa tau. Manamelong go be go na le diswantšhobopša tše lesome le tše pedi tša tau, se tee se le ka thoko ye nngwe le ye nngwe ya lenamelo le lengwe le le lengwe. Go be go se gwa ka gwa betlwa setulo sa bogoši sa mohuta woo mebušong ka moka. Dinwelo ka moka tša Kgoši Solomone di be di dirilwe ka gauta, le ditlabakelo ka moka tša ka Ngwakong wa sethokgwa sa Lebanone e le tša gauta ye e sego ya tswakwa. Silibera e be e se selo se bohlokwa mehleng ya Solomone. O be a na le maselawatle ao a yago Tarsose le a Kgoši Hiramo. Ka morago ga mengwaga ye meraro maselawatle ao a magolo a be a tliša gauta, silibera, meno a tlou, le dikgabo le ditšhwene. Kgoši Solomone o be a humile ebile e le yo bohlale go feta dikgoši tšohle tša lefase. Magoši ka moka a be a nyaka go tlo mmona gore a kwe bohlale bjo Modimo a bego a mo file bjona. Yo mongwe le yo mongwe yo a tlago o be a tlela Solomone le dimpho, e lego dilo tša silibera, goba tša gauta, goba diaparo, goba dibetša, goba dinoko, goba dipere, goba dimeila. Seo se be se direga ngwaga wo mongwe le wo mongwe. Le gona Kgoši Solomone o be a na le mašakana a dikete tše nne a dipere le dikoloi tša tšona tša ntwa, le banamedi ba dipere ba dikete tše lesome le tše pedi. O ile a bea banamedi ba bangwe Jerusalema, mme ba bangwe a ba bea metseng ye e nago le dikoloi tša ntwa. E be e le yena mmuši yo mogolo wa magoši ka moka a nageng ya go tloga nokeng ya Yufratese go ba go yo fihla Filistia le mollwaneng wa Egepeta. Mehleng ya pušo ya gagwe silibera e be e le ye ntši Jerusalema bjalo ka maswika, le mesedere e le ye mentši bjalo ka mego ya nagengtlase. Solomone o be a rekelwa dipere kua Mutsri le dinageng ka moka, gomme di tlišwa go yena. Ditaba tše dingwe tša Solomone go tloga mathomong a pušo ya gagwe go iša mafelelong di ngwadilwe mo go Ditaba tša moprofeta Nathane, le mo go Profeto ya Ahia wa Shilo, le mo go Dipono tša moprofeta Jedo tše le gona di amago le tša pušo ya Kgoši Jerobeamo, morwa wa Nebate. Solomone o bušitše naga ya Israele ka moka a le Jerusalema mengwaga ye masome a mane. A ithobalela gomme a bolokwa motseng wa Dafida, mme morwa wa gagwe, Rehabeamo, a mo hlatlama bogošing. Rehabeamo o ile a ya Shekeme moo batho ka moka ba Israele ya ka leboa ba bego ba kgobokanetše go tlo mmea kgoši. Ge Jerobeamo, morwa wa Nebate, yo a bego a ile Egepeta a tšhabile Kgoši Solomone, a ekwa taba tše, o ile a boela gae. Batho ba dikgoro tša ka leboa ba roma batseta gore ba yo mmitša, gomme ba ya mmogo go Rehabeamo ba re go yena: “Tatago o be a re swere ka makgwakgwa gomme a re rwešitše merwalo ye boima. Ge o ka re fokoletša merwalo ye mme wa re phediša ka boiketlo, re tla fela re le batho ba gago.” Rehabeamo a ba fetola a re: “Le boeng ge go fetile matšatši a mararo.” Ka gona ba tloga. Kgoši Rehabeamo a boledišana le bakgalabje ba e bego e le baeletši ba Solomone, tatagwe. A ba botšiša a re: “A le nkeletša gore ke arabe batho ba bjang?” Bona ba mo fetola ba re: “Ge o ka ba yo botho go bona gomme wa leka go ba thabiša ka go bolela le bona ka botho, ba tla go hlankela ka potego ka mehla.” Eupša Rehabeamo yena a tšeiša keletšo yeo ya bakgalabje phefo, gomme a ikela go masogana ao a bego a godile le yena, ba bjale e bego e le bona baeletši ba gagwe. A ba botšiša a re: “Batho ba ba nkgopelago gore ke ba fokoletše merwalo ke reng go bona?” Bona ba mo fetola ba re: “Se o swanetšego go ba botša sona sese: ‘Monwana wa ka wo monnyane ke wo mokoto go feta letheka la tate.’ O ba botše o re: ‘Tate o be a le rwešitše merwalo ye boima; nna ke tla e dira ye boima go feta moo. O be a le otla ka kgati; nna ke tla le otlaka ka tshelane!’ ” Ka letšatši la boraro Jerobeamo le setšhaba ka moka ba boela go Kgoši Rehabeamo bjalo ka ge a be a ba laetše. Kgoši a tlogela keletšo yela ya bakgalabje gomme a bolela le batho ka bogale, ka moo a bego a eleditšwe ke thaka tša gagwe ka gona. A re: “Tate o be a le rwešitše merwalo ye boima; nna ke tlile go e dira ye boima go feta moo. O be a le otla ka kgati; nna ke tlile go le otlaka ka tshelane!” Modimo o be a dirile gore go be ka mokgwa woo gore a tle a phethagatše se a bego a se boditše Jerobeamo, morwa wa Nebate, ka moprofeta Ahia wa Shilo. Ke ka baka leo kgoši a ilego a se ke a kwana le se setšhaba se se kgopelago. Ge setšhaba se bona gore kgoši ga a kwane le se ba se kgopelago, ba goa ba re: “Ga re sa iša felo ka Dafida le ba lapa la gagwe! Ba kile ba re direla eng? Banna ba Israele, a re ikeleng magae! A lapa la Dafida le itebalebele!” Ka gona batho ba Israele ba ya magae, ba lesa Rehabeamo e le kgoši ya bao ba dulago nageng ya Juda fela. Ka morago Kgoši Rehabeamo a roma Adoniramo, yo a bego a hlokometše mediro ya kgapeletšo, go Baisraele, eupša bona ba mmolaya ka maswika. Ge Rehabeamo a bona seo a tshela ka tswati a namela koloi ya gagwe ya ntwa, gomme a tšhabela Jerusalema. E sa le go tloga ka yona nako yeo batho ba Mmušo wa ka Leboa wa Israele ba lwa le ba mmušo wa Dafida. Ge Kgoši Rehabeamo a fihla Jerusalema o ile a rapa bahlabani ba bogalegale ba kgoro ya Benjamene le ya Juda ba dikete tše lekgolo le masome a seswai. O be a ikemišeditše go yo lwa le dikgoro tša ka leboa tša Israele gore e be kgoši ya tšona gape. Eupša Morena a laela moprofeta Shemaya gore a botše Kgoši Rehabeamo le batho ka moka ba kgoro ya Juda le ya Benjamene a re: “Le se ke la hlasela bomorwarragolena, batho ba Israele. Yaang gae ka moka ga lena. Se se diregilego ke thato ya ka.” Ka moka ba phetha se Morena a ba laetšego sona gomme ba se ke ba yo lwa le Jerobeamo. Rehabeamo a dula Jerusalema gomme a laela gore metse ye e latelago ya Juda le ya Benjamene e ageletšwe ka merako: Betlelehema, Ethamo, Tekoa, Bethe-Tsure, Soko, Adulamo, Gathe, Maresha, Sife, Adoraime, Lakishe, Aseka, Tsora, Ayalone le Hebrone. A laela gore e tiišwe kudu ka merako gomme a bea molaodi go wo mongwe le wo mongwe wa yona; metseng yeo ka moka a boloka dijo, makhura a mohlware, le beine, le dikotse le marumo. Ka mokgwa woo a kgona go fela a buša kgoro ya Juda le ya Benjamene. Baprista le Balefi ba huduga nageng ka moka ya Israele ba tla nageng ya Juda. Balefi ba tlogela mafelo a phulo le magae a bona mme ba thothela Juda le Jerusalema, ka gobane Kgoši Jerobeamo wa Israele le ba ba ilego ba mo hlatlama bogošing ba be ba sa ba dumelele go dira mediro ya bona ya baprista ba Morena. Jerobeamo a ipeela baprista ba gagwe gore ba hlankele medimo ya diswantšho ye e bego e khunamelwa dintotomeng, le gore ba rapele meoya ye mebe le diswantšhobopša tša dipowana. Dikgorong ka moka tša Israele batho ba ba bego ba tloga ba nyaka go direla Morena Modimo wa Israele, ba ile ba latela Balefi ba hudugela Jerusalema, gore ba tle ba kgone go direla Morena, Modimo wa borakgolokhukhu ba bona, dihlabelo. Seo se ile sa tiiša mmušo wa Juda, gomme ba thekga Rehabeamo, morwa wa Solomone, mengwaga ye meraro ba phela ka moo ba bego ba phela ka gona mola ba sa bušwa ke Kgoši Dafida le Kgoši Solomone. Rehabeamo o ile a nyala Mahalate yo tatagwe e bego e le Jerimote, morwa wa Dafida, gape yo mmagwe e bego e le Abihaile, morwedi wa Eliaba le setlogolo sa Isai. Barwa ba bona ya ba Jeushe, Shemaria le Sahamo. Ka morago a nyala Maaka, morwedi wa Absalomo, gomme ba ba le barwa ba: Abia, Athai, Sisa le Shelomite. Basadi ba Rehabeamo e be e le ba lesome le ba seswai, gomme metlabo ya gagwe e le ye masome a a selelago. A ba le barwa ba masome a mabedi a metšo ye seswai, le barwedi ba masome a a selelago. O be a rata Maaka go feta basadi ba gagwe ba bangwe le metlabo, gomme Abia, morwa wa gagwe, Rehabeamo a mo dira yo mogolo barweng ba gagwe ka moka, a ba a mo kgetha gore a tle a mo hlatlame bogošing. Gomme a loga maano, a dira barwa ba gagwe dintona metseng ye e ageleditšwego ka merako nageng ya Juda le ya Benjamene ka moka. A ba fa thoto ye ntši, a ba nyalela le basadi ba bantši. Ge Rehabeamo a seno tielela bogošing, yena le setšhaba sa gagwe ba ile ba lahla melao ya Morena. Ngwageng wa bohlano wa pušo ya gagwe ba otlelwa go se botegele Morena moo. Kgoši Shishake wa Egepeta a hlasela Jerusalema ka madira a dikoloi tša ntwa tše makgolo a lesome le a mabedi, le banamedi ba dipere ba dikete tše masome a a selelago, le bahlabani ba bantši ba go se balwe, gare ga bona go na le ba Libia, ba Sukote, le ba Etopia. A thopa metse ya Juda ye e ageleditšwego ka merako, a ba a fihla Jerusalema. Moprofeta Shemaya a ya go Kgoši Rehabeamo le go baetapele ba Juda ba ba bego ba kgobokane Jerusalema ba tšhabile Shishake. A re go bona: “Morena o re: ‘Le ntahlile, ka gona le nna ke le lahletše diatleng tša Shishake.’ ” Kgoši le baetapele ba dumela gore ba dirile dibe, gomme ba re: “Morena o re dira se se re swanetšego.” Ge Morena a bona gore ba a itshola a re go Shemaya: “Ka gobane ba ipona molato, nka se ba fediše, eupša ke tla ba phološa ka pela. Nka se otle batho ba Jerusalema ka Shishake ke ba galefetše, fela e tla ba bahlanka ba gagwe, gomme ba tseba gore go hlankela nna le go hlankela babuši ba lefaseng go fapana bjang.” Kgoši Shishake a hlasela Jerusalema gomme a tšea matlotlo a ka Tempeleng le a mošate. A tšea dilo ka moka, gotee le dikotse tša gauta tšela di bego di dirilwe ke Kgoši Solomone. Legatong la tšona Rehabeamo a dira dikotse tša mphiri a di nea balaodi ba baleti ba masoro a mošate. Nako ye nngwe le ye nngwe ge kgoši a eya Tempeleng, baleti ba be ba etla ba swere dikotse tšeo, gomme ka morago ba di boetše ka phapošing ya baleti. Ka gobane Rehabeamo o ile a itshola, Morena o ile a se ke a hlwa a mo galefetše, ka gona a se ke a fedišetša bogoši bja gagwe sa ruri. Le gona batho ba Juda ba be ba sa dira tše dingwenyana tše di kgahlago Morena. Rehabeamo o bušitše a le Jerusalema gomme a tielela bogošing. O be a na le mengwaga ye masome a mane a motšo o tee ge e eba kgoši, gomme a buša a le Jerusalema mengwaga ye lesome le ye e šupago. Jerusalema e be e le motse wo Morena a ikgethetšego wona nageng ya Israele ka moka gore a khunamelwe go wona. MmagoRehabeamo e be e le Naama, a etšwa nageng ya Amone. Rehabeamo o ile a dira dibe ka gobane o be a sa leke go dira thato ya Morena. Ditiro tšohle tša Rehabeamo go tloga mathomong a pušo ya gagwe go fihla mafelelong, le ditaba tša lapa la gagwe di ngwadilwe mo go Ditaba tša moprofeta Shemaya le mo go Ditaba tša moprofeta Ido. Rehabeamo le Jerobeamo ba be ba no fela ba tsogelana maatla. Rehabeamo o ile a hwa gomme a bolokwa mabitleng a botatagwe motseng wa Dafida, mme Abia, morwa wa gagwe, a mo hlatlama bogošing. Ngwageng wa lesome le metšo ye seswai wa pušo ya Kgoši Jerobeamo wa Israele, Abia e ile ya ba kgoši ya Juda, gomme a buša mengwaga ye meraro a le Jerusalema. Mmagwe e be e le Mikaya, morwedi wa Uriele, wa motse wa Gibea. Abia le Jerobeamo ba ile ba tsoša ntwa. Abia a tšwa dira ka bahlabani ba bogale ba ba kgethilwego ba dikete tše makgolo a mane, Jerobeamo yena a yo mo gahlanetša ka ba dikete tše makgolo a seswai. Madira ao a kopana nageng ya dithaba ya Efraime. Kgoši Abia a namela thaba ya Tsemaraime gomme a goeletša Jerobeamo le Baisraele a re: “Ntheetšeng! Ga ke re le a tseba gore Morena Modimo wa Israele o dirile kgwerano ya go ya go ile le Dafida, a fa yena le ditlogolo tša gagwe bogoši bja Israele go ya go ile? Jerobeamo, morwa wa Nebate, mohlankedi wa Solomone, o ile a tsogela Solomone, kgoši ya gagwe, morwa wa Dafida, maatla. Ka morago a kgobokanya lekoko la dihwirihwiri, gomme ba patla Rehabeamo, morwa wa Solomone, yo e bego e sa le yo monnyane, a se ne temogo, mme a sa kgone go ba thibela. Bjale le leka go lwa le mmušo wa Morena wo a o filego ditlogolo tša Dafida. Le na le madira a mantšintši, le gona le na le dipowana tša gauta tše Jerobeamo a di bopilego gore e be medimo ya lena. Le rakile baprista ba Morena, ditlogolo tša Arone, la raka le Balefi. Legatong la bona le beile baprista ka mokgwa woo ditšhaba tše dingwe di dirago. Yo mongwe le yo mongwe yo a tlago le poo goba dikgapa tše di šupago o ipea moprista wa dilo tšeo tša lena tše le rego ke medimo. “Eupša rena Morena e sa le Modimo wa rena, gomme ga se ra mo tlogela. Baprista ba e lego ditlogolo tša Arone ba hlankela Morena, gomme Balefi ba a ba thuša. Mosong wo mongwe le wo mongwe le mantšiboeng a mangwe le a mangwe ba mo thuntšhetša seorelo, ba mo direla le dihlabelo tša go tšhungwa ka moka. Ba beakanya dinkgwa tafoleng ye e hlwekilego, gomme mantšiboeng a mangwe le a mangwe ba tšhuma mabone sehlomamaboneng sa gauta. Rena re dira tše Morena a re laetšego tšona, eupša lena le mo tlogetše. Morena ke yena moetapele wa rena gomme baprista ba gagwe ba gona mo ba swere diphala, ba šetše ba itokišeditše go di letša gore re thome go lwa le lena. Setšhaba sa Israele, le se ke la lwa le Morena, Modimo wa borakgolokhukhu ba lena! Le ka se ke la mo fenya!” Jeroboamo o be a šetše a laetše bahlabani ba gagwe ba bangwe gore ba potologe madira a Juda ba yo a lalela ka morago, mola ba ba šetšego ba lebane le bona. Batho ba Juda ba retologa gomme ba bona gore ba dikaneditšwe. Ba llela Morena gore a ba thuše, gomme baprista ba letša diphala. Bahlabani ba Juda ba hlaba mokgoši wa ntwa gomme ba hlasela ba etilwe pele ke Abia, mme Modimo a fenya Jerobeamo le madira a Israele. Modimo a gafela madira a Israele go a Juda, gomme ona a tšhaba. Abia le madira a gagwe ba fenya madira a Israele o šoro – gwa bolawa bahlabani ba Israele ba bakaonekaone ba dikete tše makgolo a a fetšago seatla. Ka gona batho ba Juda ba fenya ba Israele, ka tsela yeo ba ba kokobetša, ka gobane Bajuda ba be ba tshephile Morena Modimo wa borakgolokhukhu ba bona. Abia a hlomara madira a Jerobeamo gomme a thopa metse ye mengwe ya gagwe, e lego Bethele, Jeshana le Efrone, le metsana ye e lego kgauswi le yona. Jerobeamo a se hlwe a kgonne go tielela gape nakong ya ge go sa buša Abia. Morena a mo hlolela lehu la tšhoganetšo. Ge e le Abia yena a fela a tia maatla. A nyala basadi ba lesome le metšo ye mene, mme a ba le barwa ba masome a mabedi a metšo ye mebedi, le barwedi ba lesome le metšo ye e selelago. Ditaba tše dingwe tša Abia, tše a di boletšego le tše a di dirilego, di ngwadilwe mo go Ditaba tša moprofeta Ido. Kgoši Abia a hwa gomme a bolokwa mabitleng a botatagwe motseng wa Dafida. Asa, morwa wa gagwe, a mo hlatlama bogošing, gomme ge go buša Asa naga ya lala mengwaga ye lesome. Asa a kgahla Morena Modimo wa gagwe ka go dira tše di lokilego le tše botse. A tloša dialetare di šele, a ba a phušola dintotoma tšeo go tšona go bego go khunamelwa medimo ya diswantšho, a pšhatla le dikokwane tša maswika tša borapedi, a rema le dikota tša borapedi. A laela batho ba Juda gore ba dire se Morena, Modimo wa borakgolokhukhu ba bona, a se nyakago, le gore ba latele dithuto ba phethe le ditaelo tša gagwe. Ka gobane a ile a phušola dintotoma tšeo go tšona go khunamelwago medimo ya diswantšho, a ba a tloša le dialetare tša seorelo metseng ka moka ya Juda, naga e ile ya lala mehleng ya pušo ya gagwe. Ka baka leo a ageletša metse ya Juda ka merako, gomme nakong yeo gwa se be le ntwa, ka gobane Morena o be a mo file khutšo. A re go batho ba Juda: “A re tiišetšeng metse ka go e ageletša ka merako le go aga ditora tša tlhapetšo le masoro a a kago phekelwa. Naga ye e sa le ya rena gobane re dirile se Morena Modimo wa rena a se nyakago. O re bolokile ka mathokong ohle.” Ka gona ba di aga gomme ba atlega. Kgoši Asa o be a na le bahlabani ba dikete tše makgolo a mararo ba Juda ba ba itlhamilego ka dikotse le marumo, le ba dikete tše makgolo a mabedi le tše masome a seswai ba Benjamene ba ba itlhamilego ka dikotse le mara. Ka moka ga bona e be e le banna ba bogale. Moetopia yo mongwe yo leina la gagwe e bego e le Serage o kile a hlasela Juda ka madira a dikete tše sekete le ka dikoloi tša ntwa tše makgolo a mararo, gomme a ba a yo fihla Maresha. Asa a tšwa dira go yo lwa le yena, gomme dihlopha tšeo tše pedi tša ipeakanyetša ntwa ka moeding wa Tsefata, kgauswi le Maresha. Asa a rapela Morena Modimo wa gagwe a re: “Morena, ga go yo a swanago le wena yo a ka thušago ba ba fokolago go ba ba nago le maatla. Hle, bjale re thuše, wena Morena Modimo wa rena, ka gobane re botile wena, gomme ka leina la gago re tlile go lwa le madira a a mantšintši. Morena, o Modimo wa rena; a go se be le motho yo a go fenyago.” Morena a fenya madira a Baetopia ge Asa le madira a Juda ba ba hlasela. Ba tšhaba, gomme Asa le madira a gagwe ba ba rakediša go ba go yo fihla Gerare. Go ile gwa bolawa Baetopia ba bantšintši mo e lego gore bahlabani bao ba ile ba šitwa ke go bokana ba lwa. Ba ile ba fenywa ke Morena le madira a gagwe, gomme madira a Juda a tšea thoto tše ntši. Ka morago ba senya metse ya tikologong ya Gerare, ka gobane batho ba moo ba be ba tšhošitšwe ke Morena. Madira a Juda a hula metse yeo ka moka gomme a thopa thoto ye ntši. Ba hlasela le mešaša ya badiši, ba thopa dihuswane le dikamela tše ntši. Ka morago ba boela Jerusalema. Moya wa Modimo wa aparela Asaria, morwa wa Odede, gomme a yo gahlanetša Kgoši Asa. A goelela a re: “Ntheetše, Kgoši Asa, le lena batho ka moka ba Juda le ba Benjamene! Morena o tla ba le lena ge le lena le na le yena. Ge le mo nyaka, o tla dira gore le mmone, eupša ge le ka mo tlogela, le yena o tla le tlogela. Baisraele ba phela nako ye telele ka ntle le Modimo wa mmakgonthe, ka ntle le baprista ba go ba ruta, ka ntle le molao. Eupša ge mathata a ba tlela, ba be ba sokologela go Morena Modimo wa Israele. Ba be ba mo nyaka mme a dire gore ba mo hwetše. Mehleng yeo go be go se na motho yo a ka yago felo a bolokegile, ka gobane nageng ye nngwe le ye ye nngwe go be go na le meferefere. Ditšhaba di be di hlaselana, le metse e hlaselana, ka gobane Modimo o be a ba gakantšhitše ka matshwenyego a mantši. Eupša lena le tie, le se ke la nolega moko. Le tla putsetšwa tše le di dirilego.” Ge Kgoši Asa a ekwa profeto yeo ya Asaria, morwa wa Odede, a tia maatla. A tloša medimo yohle ya makgapa nageng ya Juda le ya Benjamene le metseng ye a bego a e thopile nageng ya dithaba ya Efraime. A ba a tsošološa aletare ya Morena ye e bego e le ka kgorong ya Tempele. Bafaladi ba bantši ba kgoro ya Efraime le ya Manase le ya Simeone ba ile ba ngwegela go Asa, ka gobane ba be ba lemogile gore Morena o na le yena. Asa a ba botha ka moka gammogo le batho ba Juda le ba Benjamene. Ba kgobokana Jerusalema kgweding ya boraro ya ngwaga wa lesome le metšo ye mehlano wa ge Asa e le kgoši. Ka letšatši leo ba direla Morena dihlabelo ka diruiwa tše dingwe tše ba bego ba di thopile, e lego dikgomo tše makgolo a a šupago le dihuswane tše dikete tše di šupago. Ba dira kgwerano ye ka yona ba ilego ba itlema gore ba tla dira se Morena, Modimo wa borakgolokhukhu ba bona, a se nyakago, ka dipelo le moya wa bona ka moka. Yo mongwe le yo mongwe, mofsa goba motšofadi, monna goba mosadi yo a bego a sa mo khunamele, o be a swanetše go bolawa. Ba enela Morena ka legoa le legolo gore ba tla boloka kgwerano yeo, gomme ba goa ba letša diphala le diphalafala. Setšhaba ka moka sa Juda se be se thabile ka gobane se be se dirile kgwerano yeo ka dipelo tša sona ka moka. Ba thabela go khunamela Morena, gomme yena a ba amogela mme a ba hlatlola manabeng a bona ka mathoko ohle. Kgoši Asa a tloša Maaka, makgolwagwe, maemong a gagwe a makgolo wa kgoši ka gobane o be a betlile seswantšho se se lešago dihlong sa Ashera, modimo wo motshadi. Asa a se rema, a se rathaganya, gomme a se tšhuma ka moeding wa Kidrone. Le ge Asa a ile a se ke a phušola dintotoma tšeo go tšona go bego go khunamelwa medimo ya diswantšho, o ile a botegela Morena bophelong bja gagwe ka moka. Tšohle tše tatagwe a bego a di abetše Modimo o ile a di bea ka Tempeleng gotee le dilo tša gauta le tša silibera tše yena ka boyena a bego a di file Morena. Gwa se hlwe go eba le ntwa go fihlela ka ngwaga wa masome a mararo le metšo ye mehlano wa pušo ya gagwe. Ngwageng wa masome a mararo le metšo ye e selelago wa pušo ya Kgoši Asa wa Juda, Kgoši Basha wa Israele a šwahlela Juda, gomme a thoma go tiiša motse wa Rama gore a tle a thibele batho gore ba se ke ba ya goba ba tšwa nageng ya Juda. Ka gona Asa a tšea silibera le gauta polokelong ya Tempele le ya mošate gomme a di romela Damaskose go Kgoši Benhadade wa Siria, a re: “A re tsošološe kwano yela ya botatagorena. Silibera le gauta šedio. Bjale lesa go kwana le Kgoši Basha wa Israele, gore a tle a gapeletšege go tloša madira a gagwe mo nageng ya ka.” Benhadade a dumela se Asa a se kgopelago, gomme a romela balaodi ba madira a gagwe le madira a bona gore ba yo hlasela metse ya Israele. Ba thopa Iyone, le Dane, le Abele-Bethe-Maaka le metse ka moka ya Naftali yeo go bego go bolokelwa dithoto go yona. Ge Kgoši Basha a ekwa taba yeo a lesa go ageletša Rama, a tlogela modiro woo wa gagwe. Ke moo Kgoši Asa a kgobokantšego banna nageng ya Juda ka moka mme a ba laela gore ba thothe matlapa le dikota tše Basha a bego a ageletša Rama ka tšona, gomme ba di šomiša go ageletša motse wa Geba le wa Mitsepa. Mehleng yeo moprofeta Hanani a ya go Kgoši Asa a re go yena: “Ka gobane o ile wa bota kgoši ya Siria bakeng sa go tshepha Morena Modimo wa gago, madira a kgoši yeo a go phonyokgile. Ga ke re Baetopia le Balibia ba be ba na le madira a mantši le dikoloi tše ntšintši tša ntwa le banamedi ba dipere ba bantšintši? Fela ka gobane o ile wa bota Morena, yena o ile a ba gafela diatleng tša gago. Morena o phela a lebeledišitše lefase ka moka go maatlafatša bao ba mo tshephilego ka dipelo tša bona ka moka. Wena o dirile tša botlatla, gomme go tloga bjale o tla phela o elwa.” Seo sa galefiša Asa gomme a tsenya moprofeta yoo kgolegong. Yona mehleng yeo Asa a thoma go gatelela ba bangwe ba setšhaba. Ditaba ka moka tša Asa, go tloga mathomong a pušo ya gagwe go iša mafelelong, di ngwadilwe mo go Ditaba tša magoši a Juda le a Israele. Ngwageng wa masome a mararo le metšo ye senyane wa ge e le kgoši, o ile a swarwa ke bolwetši bjo bošoro bja maoto; eupša le ka yona nako yeo a se ke a nyaka thušo go Morena, a e nyaka go dingaka. Ka ngwaga wa masome a mane le motšo o tee wa pušo ya gagwe a hwa, gomme a ithobalela le botatagwe. A bolokwa ka lebitleng la letlapa le a bego a ipetletše lona motseng wa Dafida. Ba mmea leakong le le bego le tšhetšwe dinoko le ditlolo tša mehutahuta tša go nkga bose. Ba gotša mollo wo mogologolo go mo hlompha. Joshafate a hlatlama Asa, tatagwe, bogošing, gomme a tiiša Juda gore a tle a kgone go itšhireletša go Israele. A bea bahlabani metseng ya Juda ye e ageleditšwego ka merako le kua nageng le metseng ye Asa a bego a e thopile nageng ya Efraime. Morena a ba le Joshafate ka gobane bophelo bja gagwe bo be bo swana le bja tatagwe bja mathomong. O be a sa khunamele Baale, a khunamela Modimo wa tatagwe, a phetha ditaelo tša gagwe, gomme a sa itshware ka moo magoši a Israele a bego a itshwara ka gona. Morena a tiiša Joshafate mmušong wa Juda, gomme batho ba gagwe ka moka ba mo tlišetša diloba mme a huma le dinala, a hlomphega kudu. A fišegela go phetha thato ya Morena, gomme a phušola dintotoma tšohle tšeo go tšona go bego go khunamelwa medimo ya diswantšho, a tloša le dikota tša borapedi mo Juda. Ngwageng wa boraro wa pušo ya gagwe a romela bahlankedi ba ba latelago gore ba yo ruta metseng ya Juda: Benhaile, Obadia, Sakaria, Netanele le Mikaya. Ba be ba na le Balefi ba: Shemaya, Netania, Sebadia, Asahele, Shemiramote, Jonathane, Adonia, Tobia le Tobo-Adonia, le baprista ba: Elishama le Joramo. Ba tšea puku ya melao ya Morena gomme ba putla metseng ka moka ya Juda, ba e ruta batho. Morena a dira gore batho ba mebušo ka moka ya dinaga tše di bapilego le naga ya Juda ba boife go lwa le Kgoši Joshafate. Bafilista ba bangwe ba tlišetša Joshafate silibera ye ntši le diloba tše dingwe, gomme Baarabia ba mo tlišetša dikgapa tše dikete tše di šupago le makgolo a a šupago, le diphooko tše dikete tše di šupago le makgolo a a šupago. Ka gona Joshafate a gola a ba le maatla kudu. A aga dibo le metse ya polokelo nageng ya Juda, gomme metseng yeo a bolokela dithoto ka bontši. A bea bahlabani ba bogale Jerusalema go ya ka dikgorwana tša bona. Adna e be e le molaodi wa madira a dikgorwana tša Juda, gomme a na le bahlabani ba bogale ba dikete tše makgolo a mararo ba a bego a ba laola. Yo a mo latelago ka maemo e be e le Johanane, a na le bahlabani ba dikete tše makgolo a mabedi le tše masome a seswai, mme wa boraro e le Amatsia, morwa wa Sikri, a na le bahlabani ba dikete tše makgolo a mabedi. Amatsia o be a ithaopile go hlankela Morena. Molaodi wa madira a dikgorwana tša Benjamene e be e le Eliada, mohlabani yo bogale, yo a bego a laola banna ba dikete tše makgolo a mabedi ba ba itlhamilego ka dikotse le mara. Yo a mo latelago ka maemo e be e le Josabade, a na le banna ba dikete tše lekgolo le tše masome a seswai ba ba itlhametšego ntwa gabotse. Banna bao ba be ba hlankela kgoši kua Jerusalema, gomme godimo ga moo a bea bahlabani ba bangwe metseng ye mengwe ye e ageleditšwego ka merako nageng ya Juda ka moka. Ge Kgoši Joshafate wa Juda a humile le dinala mme a hlomphega kudu o ile a nyalelana le Kgoši Ahaba. Ka morago ga mengwaga e se mekae Joshafate a ya motseng wa Samaria go yo etela Ahaba. Ahaba a hlabela Joshafate le bao ba bego ba mo felegeditše dihuswane le dikgomo tše ntši. A goketša Joshafate gore a ye le yena go yo hlasela motse wa Ramote kua Gileade. A re go yena: “Na o ka se ye le nna go hlasela Ramote?” Joshafate a mo fetola a re: “Go lokile, re tla ya bohle, le bahlabani ba ka ba itokišeditše ntwa bjalo ka ba gago. Re tla ikopanya le lena ntweng.” Gomme a tlaleletša ka go re: “Eupša a re nyakišiše keletšo ya Morena pele.” Ka gona Ahaba a bitša baprofeta ba makgolo a mane, gomme a ba botšiša a re: “A nka yo hlasela motse wa Ramote, goba ke se ke ka ya?” Ba mo fetola ba re: “O hlasele. Modimo o tla o gafela diatleng tša gago.” Eupša Joshafate a ba botšiša a re: “Na ga go sa na le moprofeta yo mongwe yoo ka yena re ka kwago se Morena a se bolelago?” Ahaba a mo fetola a re: “Go sa na le o tee, Mika, morwa wa Jimla. Eupša yena ke mo hloile, ka gobane ga a ke a mporofetela se sebotse; ka mehla o mporofetela se sebe.” Joshafate a mo fetola a re: “O se ke wa bolela ka mokgwa woo!” Ke moo Kgoši Ahaba a biditšego mohlankedi yo mongwe wa mošate gomme a mo laela gore a yo tšea Mika ka pela. Magoši a mabedi ao a be a dutše ditulong tša ona tša bogoši seboeng ka ntlenyana ga lesoro la Samaria, a apere diaparo tša ona tša bogoši, gomme baprofeta bao ka moka ba porofeta moo pele ga bona. Yo mongwe wa bona, Tsedekia, morwa wa Kenana, a dira manaka a tshipi gomme a re go Ahaba: “Morena o re: ‘Ka manaka a o tla hlaba Basiria wa ba fenyetša sa ruri.’ ” Baprofeta ba bangwe ka moka le bona ba realo, ba re: “Hlasela motse wa Ramote gomme o tla fenya. Morena o tla o gafela diatleng tša gago.” Go sa le bjalo mohlankedi yola a bego a ile go tšea Mika a re go yena: “Baprofeta ba bangwe ka moka ba porofetile gore kgoši o tla atlega, gomme go tla ba kaone ge le wena o ka realo.” Eupša Mika a mo fetola a re: “Ka Morena yo a phelago, ke tla bolela se Modimo wa ka a mpotšago sona!” Ge a fihla go Kgoši Ahaba, kgoši a mmotšiša a re: “Mika, a nna le Kgoši Joshafate re ka ya ra hlasela motse wa Ramote goba ke lese?” Mika a mo fetola a re: “O hlaseleng, gomme le tla fenya. Morena o tla o gafela diatleng tša lena.” Eupša Ahaba a re: “Ke go botše gakae gore ge o bolela le nna ka leina la Morena o bolele therešo?” Mika a mo fetola a re: “Ke bona madira a Israele a phatlaletše le meboto bjalo ka dinku tše di se nago le modiši. Gomme Morena o rile: ‘Banna ba ga ba ne moetapele; a ba ipoelele gae ka khutšo.’ ” Ahaba a re go Joshafate: “A ga se ka go botša gore ga a ke a mporofetela se sebotse? Ka mehla o mpotša se sebe!” Mika a tšwela pele a re: “Bjale theetša se Morena a se bolelago! Ke bone Morena a dutše setulong sa gagwe sa bogoši legodimong barongwa ba gagwe ka moka ba mo eme ka mathoko. Morena a ba botšiša a re: ‘Ke mang yo a tlago goketša Ahaba gore a ye a bolawe kua Ramote?’ Barongwa ba bangwe ba bolela se, ba bangwe ba bolela sela. Mafelelong gwa tšwelela moya wa ema pele ga Morena, wa re: ‘Nna ke tla mo goketša.’ Morena a o botšiša a re: ‘Bjang?’ Moya woo wa mo fetola wa re: ‘Ke tla ya ka dira gore baprofeta ka moka ba Ahaba ba bolele maaka.’ Morena a re: ‘Sepela o yo mo goketša. O tla atlega.’ ” Gomme Mika a feleletša ka go re: “Seo ke se se diregilego. Morena o dirile gore baprofeta ba ba gago ba go botše maaka. Eupša yena o go reretše kotsi!” Ke moo moprofeta Tsedekia a batametšego Mika, a mo itia sefahlego ka ntahle, mme a mmotšiša a re: “Ke go thoma neng moya wa Morena o ntlogetše gomme o bolela le wena?” Mika a mo fetola a re: “Seo o tla se tseba ge o tsena ka phapošing ya mosego o yo utama.” Ke gona Kgoši Ahaba a laetšego yo mongwe wa bahlankedi ba gagwe a re: “Swara Mika o mo iše go Amone, ramotse, le go Joase, morwa wa ka. O ba botše gore ba mo lahlele kgolegong, ba mo fe dijo tše nnyane le meetse a mannyane go fihlela ke boa ke bolokegile.” Mika a hlaboša lentšu a re: “Ruri, ge o ka boa o bolokegile, gona Morena o tla be a se a bolela ka nna!” Gomme a feleletša ka go re: “Yo mongwe le yo mongwe a sware se ke se boletšego!” Kgoši Ahaba wa Israele le Kgoši Joshafate wa Juda ba yo hlasela motse wa Ramote kua Gileade. Ahaba a re go Joshafate: “Ge re tsena ntweng, nna ke tla ikgakantšha, eupša wena o apare diaparo tša gago tša bogoši.” Ka gona kgoši ya Israele ya ikgakantšha, gomme yena le Joshafate ba tsena ntweng. Kgoši ya Siria e be e laetše balaodi ba dikoloi tša yona tša ntwa gore ba hlasele kgoši ya Israele fela – e sego motho yo mongwe. Ka gona ge ba bona Kgoši Joshafate, ka moka ba gopola gore ke yena kgoši ya Israele, gomme ba mo ageletša gore ba mo hlasele. Eupša Joshafate a goa, gomme Morena a mo thuša, a goketša bahlasedi gore ba lebe thoko. Balaodi ba dikoloi tša ntwa ba lemoga gore ga se yena kgoši ya Israele, gomme ba se hlwe ba mo hlomere. Mohlabani yo mongwe wa Mosiria a thunya motsi mme wa hlaba Kgoši Ahaba mahlakanong a seaparo sa gagwe sa boitšhireletšo, mohlabani yoo a sa tsebe gore yo a mo lebantšego ka motsi ke mang. Ahaba a goeletša mootledi wa koloi ya gagwe ya ntwa a re: “Ke gobetše! Retologa o nntšhe ntweng!” Ge ntwa e befela pele, Kgoši Ahaba a hlwa a emišitšwe ka koloing ya gagwe a lebane le Basiria. Ya re ge letšatši le dikela a hwa. Kgoši Joshafate wa Juda a boela mošate Jerusalema a bolokegile. Moprofeta yo mongwe, Jehu, morwa wa Hanani, a tšwa motseng go yo mo gahlanetša, gomme a re go yena: “Na o gopola gore go lokile go thuša ba babe le go rata bao ba hloilego Morena? Ka baka la se o se dirilego, Morena o go galefetše. Le ge go le bjalo, go sa na le tše dibotse tše o di dirilego. O tlošitše dikota tša borapedi, o lekile le go dira tše Modimo a di nyakago.” Le ge Kgoši Joshafate bjale a be a dula Jerusalema o be a fela a sepela setšhabeng sa gagwe, a tloga Beresheba a fihla nageng ya dithaba ya Efraime a sokollela setšhaba go Morena, Modimo wa borakgolokhukhu ba sona. A bea baahlodi motseng wo mongwe le wo mongwe wa Juda wo o ageleditšwego ka morako, gomme a ba laya a re: “Le hlokomeleng ge le seka melato, ga le ahlolele batho, eupša le ahlolela Morena, gomme yena o na le lena ge le ahlola. Le boifeng Morena gomme le šomeng ka tlhokomelo, ka gobane Morena Modimo wa rena ga a kgotlelele ge toka e kgopamišwa, ge batho ba kgethologanywa, goba ge ba amogela tsogolekobong.” Motseng wa Jerusalema Kgoši Joshafate a bea Balefi ba bangwe le baprista le mantona a mangwe a dikgorwana gore e be baahlodi melatong ya go tshela melao ya Morena, goba diphapanong tša batho ba motse. A ba laya a re: “Le swanetše go phethagatša mediro ya lena le boifa Morena, le mmotegela mme le ineetše go yena. Ge batho ba gabolena ba ba tšwago metseng ya bona ba etla go lena ka molato wa polao goba wa go tshela molao wo mongwenyana goba taelo, le ba laye gore ba itshware gabotse ge molato o sekwa, gore ba se ke ba ikobela molato go Morena. Ge le ka se ba laye, gona Morena o tla le galefela, a galefela le setšhaba sa gabolena. Eupša ge le ka ba laya gona le ka se obe molato. Amaria, Moprista yo Mogolo, ke yena e tlago ba moahlodi yo mogolo melatong ya sedumedi, gomme Sebadia, morwa wa Ishmaele, mmušiši wa Juda, yena ya ba yo mogolo melatong ya selegae. Balefi bona ba swanetše go bona gore merero ya kgoro e sepele gabotse. Le tiišeng le phethe ditaelo tše, gomme Morena a be le ba ba lokilego!” Ka morago ga lebaka madira a Moaba le a Amone gotee le Bameune ba bangwe ba hlasela Juda. Batseta ba bangwe ba tla ba begela Kgoši Joshafate ba re: “Madira a mantši a tšwa ka mošola wa Lewatle le le Hwilego go tlo go hlasela. Ba šetše ba le kua Hatsetsone-Thamare.” Leo ke leina le lengwe la Engedi. Joshafate a tšhoga gomme a ikemišetša go kgopela keletšo go Morena. Ke moka a bea letšatši la go ikona dijo nageng ka moka. Batho ba Juda ba tšwa metseng ya bona yohle ba yo kgobokana Jerusalema gore ba kgopele thušo go Morena, gomme bona le batho ba Jerusalema ba bokana ka kgorong ye mpsha ya Tempele. Kgoši Joshafate a ya a ema pele ga bona, a rapela a re: “Wena Morena, Modimo wa borakgolokhukhu ba rena, o buša ditšhaba ka moka tša lefase o le legodimong. O na le maatla mme o yo mogolo, gomme ga go yo a ka lwago le wena. O Modimo wa rena. Ge setšhaba sa gago sa Israele se etla mo nageng ye, o lelekile batho ba ba bego ba dula mo gomme wa fa ditlogolo tša Abrahama, mogwera wa gago, naga ye gore e be ya bona go ya go ile. Ba dutše mo gomme ba aga Tempele gore ba go hlomphe, ba re ge o ba tlišetša bothata – e ka ba ntwa gore o ba otle, goba bolwetši bja leuba, goba tlala – ba tla ema mo pele ga Tempele ye, pele ga gago, ka gobane ke moo o khunamelwago gona. Ba tla go rapela mathateng a bona, gomme o tla ba kwa, wa ba phološa. “Bjale batho ba Amone le ba Moaba le ba Edomo ba re hlasetše. Ge borakgolokhukhu ba rena ba etšwa Egepeta, ga se wa ba dumelela gore ba tsene dinageng tšeo, ka gona ba ba šikologile gomme ba se ke ba ba fediša. Bjale bona ba re putsa ka go re ntšha nageng ye o re filego yona. Modimo wa rena, nke o ba otle, ka gobane rena ga re na maatla pele ga madira a mantši a a re hlaselago a. Ga re tsebe se re kago se dira, eupša re lebeletše wena gore o re thuše.” Banna ka moka ba Juda le basadi le bana gotee le batšofadi ba be ba eme moo Tempeleng. Moya wa Morena wa aparela Molefi yo mongwe yo a bego a le gona moo lešabeng. Leina la gagwe e be e le Jahasiele, morwa wa Sakaria, Sakaria morwa wa Benaya, Benaya morwa wa Jeiele, Jeiele morwa wa Matania, Matania setlogolo sa Asafo. Jahasiele a re: “Wena kgoši le lena batho ka moka ba Juda le ba Jerusalema, ntheetšeng! Morena o re le se ke la boifa goba la nolega moko ka baka la madira a mantši a, ka gobane ntwa ye e laolwa ke Modimo, e sego lena. Le ba hlaseleng ka moswane ge ba rotoga ka sefata sa Tsitse. Le tla gahlana nabo mafelelong a moedi wo o yago lešokeng la Jeruele. Ntwa ye le ka se e lwe. Lena le no ema maemong a lena le letele; le tla bona manaba a lena Morena a le fenyeditše ona. Lena batho ba Juda le ba Jerusalema, le se ke la dikadika, goba la boifa, goba la nolega moko. Ka moswane le tšweng le yeng ntweng, gomme Morena o tla ba le lena!” Ke moo Kgoši Joshafate a obamilego, gomme batho ka moka ba obama mme ba rapela Morena. Batho ba kgorwana ya Balefi ya Kehate le ya Korage ba emelela ba goa ba tumiša Morena Modimo wa Israele. Mosong wa le le latelago batho ba tšwa ba ya lešokeng kgauswi le Tekoa. Ge ba tloga, Joshafate a ema a re go bona: “Banna ba Juda le ba Jerusalema, ntheetšeng! Tshephang Morena Modimo wa lena, gomme le tla tia. Le kgolweng se baprofeta ba gagwe ba le botšago sona, gomme le tla atlega.” Ge Joshafate a boledišane le batho, a laela baopedi ba bangwe gore ba apare diaparo tše ba bego ba di apara menyayeng ye mekgethwa, le gore ba ete madira pele ba opele ba re: “Retang Morena! Lerato la gagwe ke la neng le neng!” Ge ba thoma go opela, Morena a tsenya madira ale a Baamone le a Bamoaba le a Baedomo kgakanegong, gomme ba fenywa. Baamone le Bamoaba ba hlasela Baedomo ba ba swielela; ka morago ba thoma go fedišana seng sa bona. Ge madira a Juda a fihla mmotong wa tlhapetšo kua lešokeng, ba ukamela manaba gomme ba bona ka moka ga ona a rapaletše fase a hwile. Go be go se gwa phologa motho. Joshafate le madira a gagwe ba batamela go tlo tšea thoto ya manaba ao, gomme ba hwetša diruiwa tše ntši tša go rwala le tša go namelwa, le thoto le diaparo le dilo tše bohlokwa. Ba tšea matšatši a mararo ba kgobokanya dithoto tšeo, eupša e be e le tše ntši mo e lego gore ba ile ba se ke ba kgona go di tšea ka moka. Ka letšatši la bone ba kgobokana molaleng wa Beraka gomme ba tumiša Morena ka baka la tšohle tše a di dirilego. Ke ka fao molala woo o bitšwago “Beraka”. Joshafate a eta madira a gagwe pele ba boela Jerusalema ka megobo, ka gobane Morena o be a fentše manaba a bona. Ge ba fihla motseng ba ya Tempeleng go letšwa diharepa le dikgapa le diphala. Setšhaba se sengwe le se sengwe se se ilego sa kwa gore Morena o fentše manaba a Israele se ile sa tšhoga, ka gona Joshafate a buša ka khutšo, gomme Modimo a mo dira gore a bolokege ka mathoko ohle. Joshafate e be e bile kgoši ya Juda a na le mengwaga ye masome a mararo a metšo ye mehlano, gomme a bušitše a le Jerusalema mengwaga ye masome a mabedi a metšo ye mehlano. Mmagwe e be e le Asuba, morwedi wa Shilehi. Go no swana gabotse le Asa, tatagwe, o ile a dira tše di kgahlago Morena, eupša dintotoma tšeo go tšona go bego go khunamelwa medimo ya diswantšho a se ke a di phušola. Le ge go le bjalo batho ba ile ba se ke ba thoma go khunamela Morena, Modimo wa borakgolokhukhu ba bona, ka botlalo. Tše dingwe tše Joshafate a di dirilego, go tloga mathomong a pušo ya gagwe go iša mafelelong, di ngwadilwe mo go Ditaba tša Jehu, morwa wa Hanani, gomme tšona ke karolo ya Ditaba tša magoši a Israele. Ka nako ye nngwe Kgoši Joshafate wa Juda o ile a kwana le Kgoši Ahasia wa Israele, yo a bego a dira dilo tše ntši tše mpe. Ba dira maselawatle a magolo kua Etsione-Gebere. Eupša Eliesere, morwa wa Dodaba, wa motse wa Maresha, a kgala Joshafate a re: “Ka gobane o kwane le Ahasia, Morena o tla senya tše le di dirilego.” Gomme maselawatle ale a thokgega mme a se ke a kgona go ya Tarsose. Joshafate a ithobalela le botatagwe, mme a bolokwa le bona motseng wa Dafida, gomme Joramo, morwa wa gagwe, a mo hlatlama bogošing. Joramo, morwa wa Kgoši Joshafate wa Juda, o be a na le bomorrwarragwe ba ba latelago: Asaria, Jehiele, Sakaria, Asariahu, Mikaele le Shefatia. Tatagobona o ile a ba fa gauta le silibera ye ntši le dilo tše dingwe tše ntši tše bohlokwa, gomme yo mongwe le yo mongwe wa bona a mmea mohlokomedi wa motse wa Juda wo o ageleditšwego ka morako. Eupša ka gobane Joramo e be e le leitšibolo, Joshafate a mo dira mohlatlami wa gagwe bogošing. Ge Joramo a tieletše bogošing, a bolaya bomorwarragwe ka moka le baetapele ba bangwe ba Baisraele. Joramo ya ba kgoši a na le mengwaga ye masome a mararo a metšo ye mebedi, gomme a buša a le Jerusalema mengwaga ye seswai. A latela mohlala wo mobe wa Kgoši Ahaba le dikgoši tše dingwe tša Israele, ka gobane o be a nyetše morwedi yo mongwe wa Ahaba. A dira dibe pele ga Morena, eupša Morena o be a sa nyake go fediša pušo ya ba lapa la Dafida, ka gobane a be a dirile kgwerano le Dafida gomme a mo holofeditše gore ditlogolo tša gagwe di tla buša go ya go ile. Ge go buša Joramo, Baedomo ba ile ba tsogela Bajuda maatla gomme ba ipeela kgoši ya bona. Ka gona Joramo a tloga le balaodi ba madira a gagwe ka dikoloi tša ntwa gomme ba hlasela Edomo. Moo bahlabani ba Edomo ba ba dikanetša, fela ya re bošego ba ba šwahla. Edomo ya se hlwe e bušwa ke Juda go tloga ka nako yeo. Yona mehleng yeo motse wa Libna le wona wa tsoša mpherefere ka gobane Joramo a be a tlogetše Morena, Modimo wa borakgolokhukhu ba gagwe. Le gona o be a kgobetše dintotoma tšeo go tšona go bego khunamelwa medimo ya diswantšho dithabeng tša Juda, gomme a dira gore batho ba Juda le ba Jerusalema ba se botegele Morena, a ba aroša go yena. Moprofeta Eliya a ngwalela Joramo lengwalo a re: “Morena, Modimo wa Dafida, rakgolokhukhu wa gago, o go tšwile ka gobane ga se wa latela mohlala wa tatago, Kgoši Joshafate, goba wa rakgolwago, Kgoši Asa. Bakeng sa seo wena o latetše mohlala wa magoši a Israele gomme wa dira gore batho ba Juda le ba Jerusalema ba se hlwe ba botegela Modimo, ka wona mokgwa wo Ahaba le ba ba mo hlatlamego bogošing ba dirilego gore Baisraele ba se ke ba hlwa ba botega. Ebile o bolaile bomorrwarrago ba e bego e le batho ba go go phala. Ka baka la taba yeo Morena o tla otla setšhaba sa gago le bana ba gago le basadi ba gago o šoro, gomme a senya dithoto tša gago. Wena ka bowena o tla swarwa ke bolwetši bjo bošoro bja mala bjo bo tlago gola letšatši ka letšatši go fihlela mala a gago a etšwa.” Morena a hlohleletša Bafilista le Baarabia ba ba bego ba dula kgauswi le moo go bego go dutše Baetopia ba bangwe gore ba yo lwa le Bajuda. Ba hlasela Bajuda, ba thopa dithoto ka moka tša mošate, ba thopa le basadi le barwa ba kgoši ka moka ntle le Ahasia, morwa wa gagwe wa mafelelo. Ka morago ga tšeo ka moka, Morena a otla kgoši ka bolwetši bjo bo sa alafegego bja mala. Bja tšea mengwaga ye mebedi bo golela pele go fihlela ge mala a gagwe a etšwa mme kgoši a hwa a ekwa bohloko bjo bošoro. Batho ba gagwe ba se ke ba gotša mollo wo mogolo wa go mo llela bjalo ka ge ba ile ba direla borakgolokhukhu ba gagwe. Joramo e be e bile kgoši a na le mengwaga ye masome a mararo a metšo ye mebedi, gomme a bušitše a le Jerusalema mengwaga ye seswai. Ga go yo a ilego a nyama ge a hwile. Ba mmoloka motseng wa Dafida, eupša e sego mabitleng a mošate. Lekoko le lengwe la Baarabia le be le ile la šwahlela naga ya Juda gomme la bolaya barwa ka moka ba Joramo ntle le Ahasia, morwa wa gagwe wa mafelelo. Ka gona batho ba Jerusalema ba bea Ahasia kgoši legatong la tatagwe. Ahasia e bile kgoši a na le mengwaga ye masome a mabedi a metšo ye mebedi, gomme a buša a le Jerusalema ngwaga o tee. Ahasia le yena a latela mohlala wa ba lapa la Kgoši Ahaba, ka gobane Athalia, mmagwe, morwedi wa Kgoši Ahaba le setlogolwana sa Kgoši Omri wa Israele, e be e le yena a mo eletšago go dira dilo tše mpe. *** A dira dibe pele ga Morena bjalo ka ba lapa la Ahaba, ka gobane ka morago ga lehu la tatagwe ba bangwe ba bona e ile ya ba baeletši ba gagwe, gomme ba mo senyetša bogoši. O ile a latela dikeletšo tša bona, a tšwa dira le Kgoši Joramo wa Israele, morwa wa Ahaba, go yo lwa le Kgoši Hasaele wa Siria. Madira a thulana Ramote kua Gileade, gomme Joramo a gobala moo ntweng. A gomela motseng wa Jesriele gore a yo tšwa a fola dintho, mme Ahasia a mo etela moo. Modimo a dira gore Ahasia a yo bona Joramo, ka gobane o be a ratile gore a yo bolawa. Ge Ahasia a sa le moo, yena le Joramo ba tšwa go yo gahlanetša Jehu, morwa wa Nimshi, yo Morena a bego a mo kgethile gore a feleletše ba lapa la Ahaba. Ge Jehu a sa phetha kotlo ya Modimo ya lapa leo, o ile a gahlana le sehlopha sa baetapele ba Juda le barwa ba bomogolwaAhasia ba ba bego ba felegeditše Ahasia leetong leo. Jehu a ba bolaya. Gwa nyakwa Ahasia, gomme a hwetšwa a utamile Samaria. A išwa go Jehu gomme a bolawa. Eupša go mmoloka gona ba mmoloka ka ge e be e le setlogolo sa Kgoši Joshafate, yo a bego a khunamela Morena ka pelo ya gagwe ka moka. Go ile gwa se šale motho wa lapa la Ahasia yo e bego e ka ba kgoši. Ya re ge Athalia, mmagoKgoši Ahasia, a ekwa gore morwagwe o bolailwe, a laela gore ba lapa la mošate wa Juda ba bolawe ka moka. Ahasia o be a na le kgaetšedi ka malapa, Josheba, yo a bego a nyetšwe ke moprista yo a bitšwago Joyada. Ka sephiri Josheba a tšhabiša morwa yo mongwe wa Ahasia, Joase, a mo tloša go barwa ba bangwe bao ba bego ba tlile go bolawa, gomme a mo iša le mofepi ka phapošing ya go bolokela malao ka Tempeleng. Ka go fela a mo utile o ile a mo phološa diatleng tša Athalia. Josheba le monna wa gagwe ba hlokomela mošemanyana yoo mengwaga ye e selelago ba mo utile ka Tempeleng ge go sa buša Mohumagadi Athalia. Ge moprista Joyada a seno letela mengwaga ye e selelago, a beta pelo a loga maano. A kwana le balaodi ba ba latelago ba ba lekgolo: Asaria, morwa wa Jerohamo, Ishmaele, morwa wa Johanane, Asaria, morwa wa Obede, Maasea, morwa wa Adaya, le Elishafate, morwa wa Sikri. Ba sepela le metse ya Juda ka moka, ba kgobokanya Balefi le mantona a dikgorwana, gomme ba boela nabo Jerusalema. Ka moka ba bokana ka Tempeleng gomme moo ba dira kgwerano le Joase, morwa wa kgoši. Joyada a re go bona: “Šo morwa wa kgoši ye e hlokafetšego. Bjale e tla ba kgoši, bjalo ka ge Morena a boletše mabapi le ditlogolo tša Dafida. Se le swanetšego go se dira sese: Ge baprista le Balefi ba tsena modirong ka letšatši la Sabatha, karolo ya boraro ya bona e lete masoro a dikgoro tša Tempele, karolo ye nngwe ya boraro e lete ngwako wa kgoši, gomme ba ba šetšego ba bewe Lesorong la Motheo. Batho ka moka ba bokane ka kgorong ya Tempele. Go se ke gwa ba le yo a tsenago ka Tempeleng ntle le baprista le Balefi ba ba lego modirong. Bona ba ka tsena ka gobane ba neetšwe Morena, fela batho ba bangwe ka moka ba phethe ditaelo tša Morena gomme ba be ka ntle. Balefi ba dikologe kgoši ba mo lete ba swere dihlabano tša bona, gomme ba ye le yena gohle mo a yago gona. Yo mongwe yo a ka lekago go tsena ka Tempeleng a bolawe.” Balefi le batho ba Juda ka moka ba phetha ditaelo tšohle tša Joyada. Joyada a se ke a lokolla banna bale go ya gae ge ba etšwa modirong ka Sabatha, ka gona balaodi bale ba tšea banna ba bona go ba ba tsenago modirong gotee le go ba ba tšwago. Joyada a neela bahlankedi marumo le dikotse le dikotsana tšela e bego e le tša Kgoši Dafida mme di bolokilwe ka Tempeleng. A bea banna ba ba swerego matsolo ba teile lenaka pele ga Tempele ba tietše aletare gare, gore ba šireletše kgoši. Ke moka Joyada a eta Joase pele a mo ntšha ka Tempeleng, a mo rweša mphapahlogo, gomme a mo neela puku ya melao ye e laolago bogoši. Ya ba ge ba mmea kgoši. Moprista Joyada le barwa ba gagwe ba tlotša Joase, gomme ba goa ba re: “A kgoši a re phelele!” Athalia a kwa mešito ya batho ba kitimela Tempeleng ba tiela kgoši mekgolokwane, ka gona le yena a itlhaganela a ya ntshe. Fao a bona kgoši ye mpsha kgorong ya Tempele e eme ka thoko ga kokwane ya magoši e dikologilwe ke balaodi ba madira le baletši ba diphala. Setšhaba ka moka se be se thabile se letša diphala, gomme baopedi ba Tempeleng ba hlabelela ka diletšo tša bona. A gagola diaparo tša gagwe ka manyami, gomme a goa a re: “Ke go uša mmušo! Ke go uša mmušo!” Joyada a se ke a rata gore Athalia a bolaelwe Tempeleng, ka gona a bitša balaodi ba madira gomme a re go bona: “Mo tlošeng a putle gare ga melokoloko ya baleti, gomme le bolayeng yo mongwe le yo mongwe yo a ka lekago go mo phološa.” Ba mo swara, ba mo iša mošate, gomme ba mmolaela moo Lesorong la Dipere. Moprista Joyada a dira kgwerano le Kgoši Joase le setšhaba gore yena le kgoši le setšhaba e tla ba setšhaba sa Morena. Setšhaba ka moka sa ya tempeleng ya Baale gomme ba e kgereša. Ba phušola dialetare le medimo ya diswantšho moo, mme ba bolaela Mathane, moprista wa Baale, fao pele ga dialetare tšeo. Joyada a bea baprista le Balefi gore ba hlokomele modiro wa Tempele. Ba be ba swanetše go phetha mediro ye ba e filwego ke Kgoši Dafida, le go tšhuma dihlabelo tše di direlwago Morena go ya ka melao ya Moshe. Le gona ba be ba hlokometše moopelo le menyanya ka taelo ya Dafida. Joyada a bea baleti masorong a dikgoro tša Tempele gore go se ke gwa tsena motho yo a tšhilafetšego. Balaodi ba madira, le baetapele ba setšhaba, le bahlankedi ba bagolo, le setšhaba ka moka ba dira molokoloko ba ya le Joyada go yo tšea kgoši Tempeleng ba mo tliša mošate. Ba tsena ka Lesoro la ka Tletlolo, gomme ba dudiša kgoši setulong sa bogoši. Setšhaba ka moka se be se thabile, gomme bjale motse o fodile ka ge Athalia a be a bolailwe. Joase e bile kgoši ya Juda a na le mengwaga ye e šupago, gomme a buša a le Jerusalema mengwaga ye masome a mane. Mmagwe e be e le Tsibia wa motse wa Beresheba. Joase a dira tše di kgahlago Morena ge moprista Joyada a sa phela. Joyada a mo nyalela basadi ba babedi, gomme bona ba mmelegela barwa le barwedi. Ka morago Joase a tlelwa ke mogopolo wa go lokiša Tempele. A bokanya baprista le Balefi gomme a ba laela gore ba ye metseng ya Juda ba kgobokanye tšhelete go Baisraele ka moka gore go tle go lokišwe Tempele ngwaga ka ngwaga. A ba botša gore ba itlhaganele, eupša Balefi ba diega; ka gona a bitša Joyada, moetapele wa bona, a mmotšiša a re: “Ke ka baka lang o se wa hlokomela gore Balefi ba ntšhiše batho ba Juda le ba Jerusalema lekgetho le Moshe, mohlanka wa Morena, a le nyakilego go Baisraele go hlokomela Tente ya bodulo bja Morena?” Balatedi ba Athalia, mosadi yola yo mobe, ba be ba sentše Tempele ba bile ba šomišitše dilo tše kgethwa tirelong ya Baale. Kgoši a laela Balefi gore ba betle polokelo ya lekgetho mme ba e bee lesorong la Tempele. Ba roma batseta gohle motseng wa Jerusalema le nageng ya Juda gore yo mongwe le yo mongwe a tliše lekgetho go Morena lela Moshe, mohlanka wa Morena, a bego a le beetše setšhaba kua lešokeng. Taba yeo ya kgahla batho le baetapele ba bona, gomme ba tliša makgetho a bona go fihlela ba felelela. Letšatši le lengwe le le lengwe Balefi ba be ba tšea polokelo ba e iša go baleti ba mošate ba ba bego ba e hlokometše. Nako ye nngwe le ye nngwe ge e na le tšhelete ye ntši, mongwaledi wa mošate le moemedi wa Moprista yo Mogolo ba be ba ntšha tšhelete yeo gomme ba boetše polokelo madulong a yona. Ka tsela yeo ba kgobokanya tšhelete ye ntši. Kgoši le Joyada ba be ba tšea tšhelete yeo ba e neela bao ba bego ba hlokometše go lokiša Tempele, gomme bona ba thwala babetli le babetli ba maswika, le batho ba go šoma ka tshipi le ka mphiri gore ba lokiše Tempele. Bašomi ba šoma ka maatla, ba tšwela pele gabotse gomme ba boetša Tempele seemong sa yona. Ka tsela yeo ya tia go swana le pele. Ge ba feditše go lokiša Tempele, gauta le silibera ye e šetšego e ile ya fiwa kgoši le Joyada, bona ba dira meruswi le dibjana tša tirelo le tša dihlabelo ka gauta le silibera yeo. Ge Joyada a sa phela, dihlabelo di be di dirwa ka mehla Tempeleng. Ge a tšofetše kudu, a na le mengwaga ye lekgolo le masome a mararo, a hlokafala. Ba mmoloka mabitleng a mošate motseng wa Dafida, ka go leboga mediro ye a e diretšego setšhaba sa Israele le Modimo le Tempele. Eupša ge Joyada a seno hlokafala, baetapele ba Juda ba tla ba loba Kgoši Joase mme ba mo aroša, a theetša bona. Ka gona batho ba se hlwe ba khunamela Morena, Modimo wa borakgolokhukhu ba bona, ka Tempeleng, gomme ba thoma go khunamela dikota tša borapedi le medimo ya diswantšho. Molato woo wa bona wa dira gore Morena a tukele naga ya Juda le motse wa Jerusalema bogale. Morena a roma baprofeta gore ba ba kgale ba boele go yena, eupša batho ba gana go theetša. Ke moo moya wa Morena o ilego wa aparela Sakaria, morwa wa moprista Joyada. A ema moo batho ba bego ba kgona go mmona, a goa a re: “Morena Modimo o botšiša gore ke ka baka lang le tshetše ditaelo tša gagwe. O re le ka se ke la atlega! Le mo hlanogetše, ka gona le yena o le hlanogetše!” Batho ba mo lakana gomme ba mmolaya ka maswika kgorong ya Tempele ba laetšwe ke kgoši. Kgoši o be a itebaditše potego yela tatagoSakaria, Joyada, a bego a mo hlankela ka yona, ka fao a laela gore Sakaria a bolawe. Ge Sakaria a ehwa, a goa a re: “A Morena a bone seo se dirwago gomme a lefeletše!” Ge seruthwane sa ngwaga woo se fihla, madira a Siria a hlasela Juda le Jerusalema, ba bolaya baetapele bohle, gomme ba romela tše ba di thopilego ka moka go kgoši ya bona kua Damaskose. Madira ao a Siria e be e se a mantši, eupša Morena a dira gore ba fenye madira a mantši a Juda ka gobane setšhaba seo se be se hlanogetše yena Morena, Modimo wa borakgolokhukhu ba sona. Ka tsela yeo Kgoši Joase a otlwa. O ile a gobatšwa o šoro, gomme ge manaba a boela morago, bahlankedi ba gagwe ba babedi ba mo logela maanomabe mme ba mmolaya malaong a gagwe go lefeletša go bolawa ga morwa wa moprista Joyada. A bolokwa motseng wa Dafida, eupša e sego mabitleng a mošate. Bao ba ilego ba mo logela maanomabe e be e le Sabade, morwa wa mosadi wa Moamone yo leina la gagwe e bego e le Shimate, le Josabade, morwa wa mosadi wa Momoaba yo leina la gagwe e bego e le Shomere. Tlhathollo ya Puku ya Dikgoši e na le ditaba tša barwa ba Joase, le diprofeto tše ntši tše a ilego a kgalengwa ka tšona, le ditaba tša ka moo a ilego a tsošološa Tempele. Amatsia, morwa wa gagwe, a mo hlatlama bogošing. Amatsia e bile kgoši a na le mengwaga ye masome a mabedi a metšo ye mehlano, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Joadane wa Jerusalema. O be a dira tše di kgahlago Morena, eupša a sa di dire ka pelo ya gagwe ka moka. Ge a seno tielela bogošing, o ile a bolaya bahlankedi bale ba go bolaya tatagwe. Eupša a se ke a bolaya bana ba bona, fela a phetha se Morena a se laetšego setšhaba melaong ya Moshe a re: “Batswadi ba se ke ba bolaelwa melato ya bana ba bona, bana le bona ba se ke ba bolaelwa melato ya batswadi ba bona; motho a bolaelwe fela molato wo o obilwego ke yena mong.” Kgoši Amatsia a kgobokanya banna ka moka ba kgoro ya Juda le ya Benjamene, a ba bea ka dihlophanahlophana tša madira go ya ka dikgorwana tša bona, gomme a ba beela balaodi ba bahlabani ba ba dikete le ba ba makgolo. O be a kgobokantše banna ka moka ba mengwaga ye masome a mabedi le go feta fao. Ka moka ya ba ba dikete tše makgolo a mararo. E be e le bahlabani ba ba kgethilwego, ba itokišeditše ntwa, ba rutilwe go lwa ka marumo le dikotse. Go ba oketša a thwala bahlabani ba dikete tše lekgolo ba Israele, a ba lefa ka silibera ya dikilokramo tše dikete tše tharo. Eupša moprofeta yo mongwe a ya go yena a re: “O se ke wa tšea bahlabani ba ba Israele. Morena ga a eme le banna ba ba Mmušo wa ka Leboa le bona Baefraime ba. Mohlomongwe o gopola gore ba tla go tiiša ntweng, eupša ke Modimo yo a nago le maatla a go dira gore motho a fenye goba a fenywe, gomme o tla dira gore manaba a gago a go fenye.” Amatsia a botšiša moprofeta a re: “Bjale silibera yela ke šetšego ke ba lefile yona?” Moprofeta a mo fetola a re: “Morena a ka go bušetša ya go feta yeo!” Ka gona Amatsia a hlaola madira ale a go a thwala, gomme a a botša gore a boele ga gaboona. Ba boela morago ba tuketše batho ba Juda bogale. Amatsia a itiiša maatla gomme a eta madira a gagwe pele ba ya Moeding wa Letswai. Fao ba lwa gomme ba bolaya bahlabani ba Baedomo ba dikete tše lesome, ba ba ba thopa ba bangwe ba dikete tše lesome. Ba iša mathopša godimo ga legaga motseng wa Sela, gomme ba ba kgoromeletša fase ba pšhatlaganywa ke maswika. Bahlabani bale ba Israele, bale Amatsia a go se ba dumelele go ya ntweng le yena, bona ba ile ba hlasela metse ya Juda gare ga Samaria le Bethe-Horone, ba bolaya banna ba dikete tše tharo, ba thopa le thoto ye ntši. Ge Amatsia a fentše Baedomo o ile a boa le medimo ya bona ya diswantšho, a e ipeela yona, a e tšhumela le diorelo. Taba yeo ya galefiša Morena, ka gona a roma moprofeta go Amatsia gore a mmotšiše a re: “Ke ka baka lang o khunamela medimo e šele ye e paletšwego le ke go phološa batho ba yona diatleng tša gago?” Amatsia a mo tsena ganong a re: “Kgane re go beile moeletši wa kgoši? Homola, go sego bjalo o tla bolawa!” Moprofeta yola pele ga ge a homola a re: “Bjale ke a tseba gore Modimo o rerile go go feleletša, ka ge o dirile taba ya mohuta wo mme wa hlokomologa keletšo ya ka.” Kgoši Amatsia wa Juda le baeletši ba gagwe ba kwana gore ba hlasele Israele. Ka gona a roma batseta go Kgoši Joase wa Israele yo e bego e le morwa wa Joahase le setlogolo sa Jehu, a mo hlohla a re: “Tlaa re lwe!” Joase a fetola Amatsia ka go re: “Mohlašana wa mošwana wa dithaba tša Lebanone o kile wa romela molaetša go mosedere wa moo wa re: ‘A morwa wa ka a nyale morwedi wa gago.’ Gwa tla phoofolo ya naga gomme ya gatakanya mošwana wola. Bjale Amatsia, o ikgogomoša ka go re o fentše Baedomo, ka gona o na le makoko. Eupša nna ke re itulele moo lapeng la gago. Ke ka baka lang o tsoša mpherefere wo o tlago tlišetša wena le batho ba gago mahlomola?” Fela Amatsia a di tšeiša phefo. E be e le thato ya Morena gore Amatsia a fenywe, ka gobane yena le ba lapa la gagwe ba be ba khunamela medimo ya diswantšho ya Baedomo. Ka gona Kgoši Joase wa Israele a tšwa dira a yo lwa le Kgoši Amatsia wa Juda. Ba gahlana kua Bethe-Shemeshe nageng ya Juda, madira a Juda a fenywa, gomme yo mongwe le yo mongwe a tšhabela ga gagwe. Joase a thopa Amatsia gomme a mo iša Jerusalema. Moo a kgereša morako wa motse go tloga Lesorong la Efraime go fihla Lesorong la Sekhutlong, sebaka sa dimetara tše e ka bago tše makgolo a mabedi. A boela Samaria le gauta ka moka le silibera ya ka Tempeleng, le ditlabakelo ka moka tša ka Tempeleng tše di bego di hlokomelwa ke ditlogolo tša Obede-Edomo, le mahumo a mošate. A thopa le batho. Kgoši Amatsia wa Juda a phela mengwaga ye lesome le ye mehlano ka morago ga ge Kgoši Joase wa Israele a hwile. Tše dingwe tše Amatsia a di dirilego, go tloga mathomong go iša mafelelong a pušo ya gagwe, di ngwadilwe mo go Ditaba tša magoši a Juda le a Israele. Go tloga ka yona nako yela Amatsia a hlanogetšego Morena o ile a dula a logetšwe maanomabe Jerusalema. Mafelelong a tšhabela motseng wa Lakishe, eupša manaba a gagwe a mo latelela moo gomme a mmolaya. Setopo sa gagwe sa išwa Jerusalema ka koloi ya dipere, gomme sa bolokwa mabitleng a botatagwe motseng wa Dafida. Setšhaba ka moka sa Juda sa kgetha Usia, morwa wa Amatsia, wa mengwaga ye lesome le ye e selelago, gore a hlatlame tatagwe bogošing. Ke ka morago ga lehu la Amatsia moo Usia a thopilego Elate gape, gomme a tsošološa motse woo. Usia ya ba kgoši a na le mengwaga ye lesome le metšo ye e selelago, gomme a buša a le Jerusalema mengwaga ye masome a mahlano a metšo ye mebedi. Mmagwe e be e le Jekolia wa Jerusalema. A dira tše di kgahlago Morena, a swana le tatagwe. Ge Sakaria, motho yo a bego a mo ruta go hlompha Modimo, a sa phela, o be a khunamela Morena ka potego, gomme Modimo a mo atla. Usia a yo lwa le Bafilista. A kgereša morako wa motse wa Gathe le wa Jamnia le wa Ashdode, gomme a aga metse ye mengwe kgauswi le Ashdode le nageng yohle ya Filistia. Modimo a mo thuša gore a fenye Bafilista, le Baarabia ba ba dulago Guru-Baale, le Bameune. Baamone ba loba Usia, gomme a ba le maatla kudu, setumo sa gagwe sa ba sa fihla Egepeta. Usia a aga tora ya go tia Jerusalema Lesorong la Sekhutlong le Lesorong la Moeding le moo morako o bego o mena legopo. A ba a aga le ditora tša tlhapetšo kua melaleng, a epa le didiba tše ntši ka gobane o be a na le mehlape ye mentši nagengtlase le kua melaleng. Ka ge a be a rata temo o be a na le balemi le bašomi ba dirapa tša merara kua nageng ya dithaba le kua nageng ye e nonnego. O be a na le madira ao a bego a dula a itokišeditše ntwa. A be a badilwe mme a arogantšwe ka dihlophanahlophana ke Jeiele, mongwaledi, le Maasea, mohlankedi, ba hlokometšwe ke Hanania, yo mongwe wa bahlankedi ba bagolo ba kgoši. Madira a be a laolwa ke mantona a dikgorwana a dikete tše pedi le makgolo a a selelago. Mantona ao a be a laola bahlabani ba dikete tše makgolo a mararo le tše di šupago le makgolo a mahlano bao ba bego ba kgona go lwela kgoši ka bogale. Usia a fa madira dikotse, marumo, dikefa tša tshipi, diaparo tša boitšhireletšo, mara le mesebe, le maswika a diragamabje. Motseng wa Jerusalema ditsebi tša gagwe tša dira dilo tša go thunya metsi le tša go kgokološa maswika a magolo ditoreng le dikhutlong tša morako wa motse. Setumo sa gagwe sa aparela gohle, gomme a ba le maatla kudu ka gobane Modimo o be a mo thuša. Eupša ge Kgoši Usia a eba le maatla o ile a thoma go ikgogomoša, gomme taba yeo ya mo senyetša bogoši. A nyatša Morena Modimo wa gagwe ka go tsena ka Tempeleng go tšhuma seorelo aletareng ya diorelo. Moprista Asaria a mo latela a na le baprista ba masome a seswai ba sebete go yo mo thibela. Ba re: “Usia, ga se wena o ka tšhumelago Morena seorelo, gobane beng ba modiro wo ke baprista, ditlogolo tša Arone. Tloga fa felong mo gokgethwa. O nyaditše Morena Modimo, gomme ga a sa tlo go godiša.” Usia o be a eme ka moo Tempeleng ka thoko ga aletare ya diorelo a swere setšhumeladiorelo. Ya re a sa galefetše baprista bjalo, a tšwa dišo phatleng tša bolwetši bja letlalo bja go mo tšhilafatša baprista ba lebeletše. Asaria le baprista bale ba bangwe ba re go bona bolwetši bjoo phatleng ya kgoši ba tšhoga, gomme ba mo raka ka Tempeleng. Le yena a tšwa ka pela, ka gobane Morena o be a mo otlile. Bolwetši bjoo bja swara Kgoši Usia bophelong bja gagwe ka moka gomme a tšhilafala go fihlela a ehwa. O be a phela ka ngwakong wa thokwana, a sa dumelelwe go tsena ka Tempeleng, gomme ka mošate go laola Jotamo, morwa wa gagwe, e le yena a bušago naga. Moprofeta Jesaya, morwa wa Amotse, o ile a ngwala dilo ka moka tše Kgoši Usia a ilego a di dira nakong ya pušo ya gagwe. Usia a ithobalela le botatagwe gomme a bolokwa mabitleng a mošate. Fela ka baka la bolwetši bjola bja gagwe a se ke a bolokwa karolong ya dikgoši. Jotamo, morwa wa gagwe, a mo hlatlama bogošing. Jotamo e ile ya ba kgoši a na le mengwaga ye masome a mabedi a metšo ye mehlano, gomme a buša a le Jerusalema mengwaga ye lesome le ye e selelago. Mmagwe e be e le Jerusha, morwedi wa Tsadoko. A dira tše di kgahlago Morena, go no swana le Usia, tatagwe. Fela yena a se ke a dira sebe sela sa tatagwe sa go tšhuma seorelo ka Tempeleng. Eupša setšhaba sona sa fela se tšwela pele le go dira dibe. E bile Jotamo yo a ilego a aga Lesoro la ka Tletlolo la Tempele, gomme a dira modiro wo mogolo karolong ya Jerusalema ye e bitšwago Ofele. Dithabeng tša Juda o ile a aga metse, gomme ka dithokgweng a aga dibo le ditora. A lwa le kgoši ya Amone le madira a yona gomme a a fenya. A laela Baamone gore ba mo lobe mengwaga ye meraro ka silibera ya dikilokramo tše dikete tše tharo, le mabele a dikilokramo tše milione, le garase ye kaalo. Jotamo a ba le maatla ka gobane o be a theeletša Morena Modimo wa gagwe ka potego. Ditiragalo tše dingwe tša pušo ya Jotamo, le dintwa tše a di lwelego le dilo tše a di dirilego, ka moka di ngwadilwe mo go Ditaba tša magoši a Israele le a Juda. Jotamo e bile kgoši a na le mengwaga ye masome a mabedi a metšo ye mehlano, gomme a buša a le Jerusalema mengwaga ye lesome le ye e selelago. O ile a ithobalela le botatagwe gomme a bolokwa motseng wa Dafida, mme Ahase, morwa wa gagwe, a mo hlatlama bogošing. Ahase e ile ya ba kgoši a na le mengwaga ye masome a mabedi, gomme a buša a le Jerusalema mengwaga ye lesome le ye e selelago. O be a sa dire tše di kgahlago Morena, a sa swane le Kgoši Dafida, rakgolwagwe, eupša a latela mohlala wa magoši a Israele. A dira diswantšhobopša tša tshipi tša Baale, a tšhuma seorelo moeding wa Bene-Hinomo. A ba a direla medimo ya diswantšho dihlabelo ka barwa ba gagwe, a etša ditlwaedi tša makgapa tša ditšhaba tšela Morena a di rakilego nageng ge Baisraele ba goroga. Ahase a fela a dira dihlabelo, a tšhuma le seorelo dintotomeng tšeo go tšona go bego go khunamelwa medimo ya diswantšho, le ka fase ga mehlare ka moka ya merithi ye megolo. Ka gobane Kgoši Ahase o be a dira dibe, Morena Modimo wa gagwe o ile a mo gafela diatleng tša kgoši ya Siria, gomme ya mo fenya, ya thopa Bajuda ba bantši ya ba iša Damaskose. Morena a ba a dira gore Pekage, kgoši ya Israele, morwa wa Remalia, a fenye Ahase mme a bolaye bahlabani ba bogale ba Juda ba dikete tše lekgolo le tše masome a mabedi ka letšatši le tee. Morena, Modimo wa borakgolokhukhu ba bona, a dira gore taba yeo e hlagele batho ba Juda ka gobane ba be ba mo furaletše. *** Mogale yo mongwe wa Moisraele yo leina la gagwe e bego e le Sikri a bolaya Maasea, morwa wa Ahase, le Asrikamo, mohlokomedi wa ka mošate, le Elkana, yo a bego a latela kgoši ka maemo. Madira a Baisraele a ile a thopa basadi le bana ba dikete tše makgolo a mabedi le ge Bajuda e be e le batho ba gabobona, gomme ba ba iša Samaria gotee le thoto ye ntši. Monna yo mongwe yo a bitšwago Odede, moprofeta wa Morena, o be a dula motseng wa Samaria. Yena a gahlanetša madira ale a Baisraele ge a batametše go tsena motseng, gomme a re: “Morena, Modimo wa borakgolokhukhu ba lena, o be a befeletšwe batho ba Juda gomme a ba gafela diatleng tša lena, fela bjale o kwele ka moo le ba bolailego ka sehlogo ka gona. Bjale le sa ikemišeditše go dira banna le basadi ba Jerusalema le ba Juda makgoba a lena. Ga ke re le lena le oba melato pele ga Morena Modimo wa lena? Ntheetšeng! Mathopša a ke bana ba bolena. A ba sepele, go sego bjalo Morena o tla le galefela gomme a le otla.” Baetapele ba bane ba Mmušo wa ka Leboa, e lego Asaria, morwa wa Johanane, Berekia, morwa wa Meshilemote, Jehiskia, morwa wa Shalume, le Amasa, morwa wa Hadelai, le bona ba se kwane le se madira a se dirago. Ba re: “Le se ke la tliša mathopša ao mo! Re šetše re obile molato wo mogolo pele ga Morena, gomme ra mmefediša. Bjale le nyaka go godiša sebe le molato wa rena.” Ka gona madira a neela batho le baetapele ba bona mathopša ale le thoto, gomme banna bale ba bane ba bewa gore ba fe mathopša a a sego a apara selo diaparo tša go tšwa thotong yela e thopilwego. Ba fa le mathopša ka moka diaparo le dieta, ba ba fa le dijo le dino, gomme ba ba tlotša ka makhura a mohlware mo ba kwelego bohloko. Ba ba bego ba lapile kudu ba ile ba nametšwa dipokolo, gomme mathopša ka moka a boetšwa Jeriko, motseng wa mehlare ya mepalema, go magagabobona. Ka morago Baisraele ba boela Samaria. Baedomo ba šwahlela naga ya Juda gape gomme ba thopa batho. Ka gona Kgoši Ahase a kgopela kgoši ya Asiria gore e mo thuše. *** Ka nako yeo Bafilista ba be ba šwahlela metse ya nagengtlase le ya ka borwa bja Juda. Ba thopa motse wa Bethe-Shemeshe, wa Ayalone, wa Gederote, wa Soko, wa Timna, wa Gimso, le metsana ye e bego e bapile le yona, gomme ba dula go yona. Ka gobane Kgoši Ahase wa Juda o be a lesitše setšhaba sa gagwe se itirela tše se di ratago ka ge a be a sa botegele Morena, Morena o ile a dira gore Bajuda ba fenywe. Bakeng sa go tlo thuša Ahase, Kgoši Tiglate-Pilesere wa Asiria a tla a mo hlasela gomme a mo tlišetša mathata. Ka gona Ahase a tšea dilo tše bohlokwa tša Tempele le tša mošate, le tša malapa a baetapele ba setšhaba, a loba kgoši yeo ka tšona, fela le seo sa se ke sa thuša selo. Le ka yona nako yeo ya ge Ahase a pitlagantšwe ke mathata, o ile a no tšwela pele le go se botegele Morena. A direla medimo ya Basiria ba ba bego ba mo fentše dihlabelo. A re: “Medimo ya Siria e thušitše magoši a Siria, ka gona ge nka e direla dihlabelo, le nna e ka nthuša.” Taba yeo ya uša yena le setšhaba sa gagwe. A kgobokanya le ditlabakelo tša Tempele a di pšhatlaganya. A tswalela Tempele gomme a aga dialetare sekhutlong se sengwe le se sengwe sa mekgotha ya Jerusalema. Motseng wo mongwe le wo mongwe wa Juda a kgobela dintotoma tšeo go tšona go bego go khunamelwa medimo ya diswantšho, moo diorelo di bego di swanetše go tšhumelwa medimo yeo. Ka go dira bjalo a befediša Morena, Modimo wa borakgolokhukhu ba gagwe. Ditiragalo tše dingwe tša pušo ya gagwe le dilo ka moka tše a di dirilego, go tloga mathomong a pušo ya gagwe go iša mafelelong, di ngwadilwe mo go Ditaba tša magoši a Juda le a Israele. Kgoši Ahase a ithobalela le botatagwe gomme a bolokwa Jerusalema, eupša e sego mabitleng a mošate. Morwa wa gagwe, Hiskia, a mo hlatlama bogošing. Hiskia e bile kgoši ya Juda a na le mengwaga ye masome a mabedi a metšo ye mehlano, gomme a buša a le Jerusalema mengwaga ye masome a mabedi a metšo ye senyane. Mmagwe e be e le Abia, morwedi wa Sakaria. O be a dira tše di kgahlago Morena, a etša Kgoši Dafida, rakgolwagwe. Hiskia o ile a bula mejako ya Tempele gape kgweding ya mathomo ya ngwaga wo e bilego kgoši ka wona, gomme a laela gore Tempele e lokišwe. A kgobokanya baprista le Balefi ka kgorong ya ka bohlabela ya Tempele, gomme a bolela le bona moo a re: “Ntheetšeng, lena Balefi! Ineeleng go Morena, gomme le hlwekišeng Tempele ya Morena, Modimo wa borakgolokhukhu ba lena. Tše di tšhilafatšago Tempele le di ntšhetšeng ntle. Borakgolokhukhu ba rena ba be ba sa botegele Morena Modimo wa rena, ba dira tše di sa mo kgahlego. Ba be ba mo tlogetše gomme ba fularetše lefelo le a dulago ka go lona. Ba tswaletše mejako ya Tempele, ba tima mabone, gomme ba se ke ba tšhuma seorelo goba ba dira dihlabelo tša go tšhungwa ka moka ka Tempeleng ya Morena Modimo wa Israele. Ka baka la taba yeo Morena a galefela batho ba Juda le ba Jerusalema, gomme se a ba dirilego sona sa tšhoša batho, sa ba gakgamatša, sa ba sa dira gore ba ba kwere. Taba yeo le e bona gabotse. Ke ka baka leo botatagorena ba bolailwego ntweng, gomme barwa le barwedi le basadi ba rena ba thopša. “Bjale ke ikemišeditše go dira kgwerano le Morena Modimo wa Israele, gore a se ke a hlwa a re galefetše. Bana ba ka, le se ke la hlwa le senya sebaka. Ke lena ba Morena a le kgethilego gore le mo hlankele ka Tempeleng, le mo tšhumele seorelo ka moo, le be le hlahleng batho ge ba tlile go mo khunamela.” Balefi ba ba latelago ba be ba le moo: Ba kgorwana ya Kehate e be e le Mahate, morwa wa Amasai, le Joele, morwa wa Asaria Ba kgorwana ya Merari e be e le Kishe, morwa wa Abdi, le Asaria, morwa wa Jehalelele Ba kgorwana ya Gershone e be e le Joage, morwa wa Sima, le Edene, morwa wa Joage Ba kgorwana ya Elitsafane e be e le Shimri le Jeiele Ba kgorwana ya Asafo e be e le Sakaria le Matania Ba kgorwana ya Hemane e be e le Jehiele le Shimi Ba kgorwana ya Jedutune e be e le Shemaya le Usiele *** *** Banna bao ba kgobokanya Balefi ba gabobona, gomme ka moka ga bona ba itlhwekiša. Ke moka ba thoma go hlwekiša Tempele, bjalo ka ge kgoši, yo a bego a dira ka moo Morena a bego a laetše ka gona, a be a ba boditše. Baprista ba tsena ka Tempeleng gore ba e hlwekiše, gomme tšohle tše di bego di tšhilafetše ba di ntšhetša ka kgorong ya Tempele. Go tloga moo Balefi ba di ntšha motseng ba di iša moeding wa Kidrone. Modiro woo o be o thomilwe ka letšatši la pele la kgwedi ya mathomo, gomme ka letšatši la seswai ba be ba feditše modiro ka moka gotee le phapoši ya matsenong a Tempeleng. Ka morago ba šoma matšatši a mangwe a seswai go fihlela ka la lesome le metšo ye e selelago la kgwedi, ba beakanyetša Tempele tirelo. Balefi ba begela Kgoši Hiskia ba re: “Re feditše go hlwekiša Tempele yohle, gotee le aletare ya dihlabelo tša go tšhungwa ka moka, le tafola ya dinkgwa tše kgethwa, le ditlabakelo tša tšona ka moka. Le gona ditlabakelo ka moka tše Kgoši Ahase a di tšhilafaditšego mengwageng yela a buša a sa botegele Modimo, re di boeditše sekeng sa tšona gomme re di kgethwafaditše gape.” Ka le le latelago Kgoši Hiskia a tsoga e sa le bošego a kgobokanya baetapele ba motse, ba ya le yena Tempeleng. Ba tšea dipoo tše di šupago, dikgapa tše di šupago, dikwanyana tše di šupago le diphooko tše di šupago go dira sehlabelo sa go tloša dibe tša ba lapa la mošate le tša batho ba Juda, le go hlwekiša Tempele ka tšona. Kgoši a botša baprista, ditlogolo tša Arone, gore ba dire dihlabelo ka diruiwa tšeo aletareng. Gwa hlabja dipoo tšeo pele, gwa latela dikgapa, gwa latela dikwanyana, mme baprista ba ageletša madi ba a foka aletareng. Mafelelong ba iša diphooko tšela go kgoši le go barapedi ba bangwe, gomme ka moka ba bea diatla godimo ga tšona. Ka morago baprista ba di hlaba, gomme ba tšhollela madi a tšona aletareng ya ba sehlabelo sa go boelanya setšhaba ka moka le Modimo, ka gobane kgoši o be a laetše gore setšhaba sa Israele ka moka se direlwe sehlabelo sa go tloša dibe le sa go tšhungwa ka moka. Kgoši a bea Balefi ka Tempeleng ba swere masenkana, diharepa le dikgapa go ya ka moo Morena a bego a laetše Kgoši Dafida ka Gade, moprofeta wa kgoši, le ka moprofeta Nathane. Diletšo tše ke tšela Kgoši Dafida a bego a laetše gore di šomišwe. Baprista le bona ba be ba eme fao ba swere diphala. Hiskia a laela gore go dirwe dihlabelo tša go tšhungwa ka moka, gomme ge dihlabelo tšeo di thoma go dirwa, batho ba tumiša Morena ka kopelo, mme baletši ba thoma go letša diphala le diletšo tše dingwe. Yo mongwe le yo mongwe yo a bego a le moo a obama, gomme gwa opelwa gwa letšwa le diphala go fihlela dihlabelo ka moka di tšhumilwe. Ke moka Kgoši Hiskia le bohle ba ba bego ba na le yena ba khunama ba obamela Modimo. Kgoši le baetapele ba botša Balefi gore ba tumiše Morena ka dikopelo tša Dafida le tša moprofeta Asafo. Ka gona ka moka ba opela ka lethabo ge ba khunamile ba obametše Modimo. Hiskia a botša batho a re: “Bjale ka gobane le ineetše Morena, tlišang dihlabelo e be tša go mo leboga.” Ba di tliša, gomme ba bangwe ba bona ba ithaopa ba tliša diruiwa gore e be dihlabelo tša go tšhungwa ka moka. Ba tliša dikgomo tše masome a a šupago, dikgapa tše lekgolo, le dikwanyana tše makgolo a mabedi gore ba direle Morena dihlabelo tša go tšhungwa ka moka ka tšona. Ba tliša le dikgomo tše makgolo a a selelago le dihuswane tše dikete tše tharo ya ba dihlabelo tše kgethwa. Ka ge go be go se baprista ba ba lekanego go hlaba diruiwa tšeo ka moka, Balefi ba ile ba ba thuša go fihlela modiro ka moka o phethilwe, le baprista ka moka ba itlhwekišitše. Balefi ba be ba phala baprista ka go botegela go itlhwekiša. Go tlaleletša dihlabelo tšeo tše ntši tša go tšhungwa ka moka tše baprista ba bego ba swanetše go di dira, ba be ba swanetše go tšhuma makhura a dihlabelo tša kagišano, le go tliša dikabelo tša seno tše di bego di abiwa le dihlabelo tša go tšhungwa ka moka. Ka mokgwa woo tirelo ya Tempeleng ya thongwa gape. Kgoši Hiskia le setšhaba ka moka ba be ba thabetše ge Modimo a be a ba beakanyeditše dilo tšeo, ka gobane taba yeo e be e diregile ka bjako. Setšhaba se be se sa kgone go keteka Monyanya wa Paseka ka nako ye e beilwego ya kgwedi ya mathomo, ka gobane baprista ba ba bego ba itlhwekišitše ba be ba se ba lekana, le gona setšhaba se be se se sa kgobokana Jerusalema. Ka gona Kgoši Hiskia le bahlankedi ba gagwe le batho ka moka ba Jerusalema ba kwana gore ba keteke monyanya woo kgweding ya bobedi, gomme kgoši a roma batseta go batho ka moka ba Israele le ba Juda. A ba a ngwalela le kgoro ya Efraime le ya Manase mangwalo, a ba laletša gore ba tle Tempeleng Jerusalema go tlo keteka Paseka go hlompha Morena Modimo wa Israele. *** *** Taba yeo ya kgahla kgoši le batho bohle ba Jerusalema, ka gona ba laletša Baisraele ka moka, go tloga Dane go ba go yo fihla Beresheba, gore ba tle ba kgobokane Jerusalema gomme ba keteke Paseka go ya ka melao ya Moshe, ka gobane mehleng yeo setšhaba se be se sa keteke Paseka mmogo. Dikitimi tša iša mangwalo nageng ka moka ya Juda le ya Israele di laetšwe ke kgoši le bahlankedi ba yona, a a rego: “Lena setšhaba sa Israele, le phologile diatleng tša Basiria. Bjale retologelang go Morena, Modimo wa Abrahama le Isaka le Jakobo, gomme le yena o tla retologela go lena. Le se ke la swana le borakgolokhukhu ba lena le Baisraele ba gabolena bao ba bego ba sa botegele Morena Modimo wa bona. O ile a ba otla o šoro bjalo ka ge le bona. Le se ke la ba le melala ye methata bjalo ka bona, eupša le theetšeng Morena. Tlaang Tempeleng Jerusalema, Tempele ye Morena Modimo wa lena a e kgethwafaleditšego sa ruri, gomme le mo khunamele gore a se ke a hlwa a le galefetše. Ge le ka boela go Morena, gona bao ba thopilego meloko ya bolena le bana ba lena ba tla ba šokela gomme ba ba lesa ba boela mo gae. Morena Modimo wa lena ke yo botho mme o na le lešoko, gomme ge le ka boela go yena, o tla le amogela.” Dikitimi tšeo tša ya motseng wo mongwe le wo mongwe nageng ya kgoro ya Efraime le ya Manase, go ba go yo fihla kgorong ya Sebulone, eupša batho ba ba sega ba ba kwera. Le ge go le bjalo go be go na le ba bangwe ba kgoro ya Asere le ya Manase le ya Sebulone ba ba ilego ba ikokobetša ba tla Jerusalema. Modimo le yena a tlemaganya batho ba Juda ka maatla a gagwe gore ba dire thato ya gagwe ka go phetha ditaelo tša kgoši le bahlankedi ba yona. Lešaba le legolo la bokana Jerusalema kgweding ya bobedi gore ba tle ba keteke Monyanya wa Dinkgwa tše di se nago komelo. Ba tšea dialetare ka moka tše di bego di šomišwa Jerusalema go dira dihlabelo le go tšhuma seorelo ba di lahlela ka moeding wa Kidrone. Gomme ka letšatši la lesome le metšo ye mene la kgwedi yeo ba hlaba dikwanyana tša sehlabelo sa Paseka. Baprista le Balefi ba ba bego ba se ba hlweka ba lewa ke dihlong mo e lego gore ba ile ba itlhwekišetša Morena, gomme bjale ba kgona go dira dihlabelo tša go tšhungwa ka moka ka Tempeleng. Ba dula madulong a bona ka Tempeleng go ya ka mo go laetšwego ka gona mo melaong ya Moshe, monna wa Modimo. Balefi ba fa baprista madi a dihlabelo tšeo, gomme bona ba a foka aletareng. Ka ge batho ba bantši ba be ba se ba hlweka, Balefi ba ile ba ba ema legato ba hlaba dikwanyana tša Paseka gore e be tše kgethwa go Morena. Ntle le fao ba bantši ba ba bego ba etšwa kgorong ya Efraime le ya Manase le ya Isakara le ya Sebulone ba be ba se ba itlhwekiša, gomme ba keteka Paseka ka bošaedi. Kgoši Hiskia a ba rapelela a re: “Wena Morena yo botho, Modimo wa borakgolokhukhu ba rena, hle, lebalela ba ba go khunamelago ka dipelo tša bona ka moka, le ge ba se ba hlweka.” Morena a kwa thapelo ya Hiskia; a lebalela setšhaba gomme a se ke a se otla. Gwa tšea matšatši a a šupago batho ba ba bego ba kgobokane Jerusalema ba keteka Monyanya wa Dinkgwa tše di se nago komelo ka lethabo le legolo, gomme letšatši le lengwe le le lengwe Balefi le baprista ba tumiša Morena ka diletšo tša medumo ye megolo. Hiskia a reta Balefi ka baka la ge ba ile ba sepediša tirelo ya Morena ka bokgoni. Ka morago ga matšatši ale a šupago ao ka ona ba ilego ba dira dihlabelo tša kagišano ba tumiša Morena, Modimo wa borakgolokhukhu ba bona, ka moka ba ikemišetša go bina monyanya matšatši a mangwe a a šupago. Ka gona ba bina monyanya woo ka lethabo. Kgoši Hiskia a ntšha dipoo tše sekete le dihuswane tše dikete tše di šupago gore batho ba di hlabe ba je, gomme bahlankedi le bona ba ntšha dipoo tše dingwe tše sekete le dinku tše dikete tše lesome. Baprista ba bantši ba itlhwekiša. Yo mongwe le yo mongwe a thaba – batho ba Juda, baprista le Balefi, batho ba ba bego ba dutše Israele, le bafaladi ba ba bego ba dutše Israele le Juda. Motse wa Jerusalema wa tlala lethabo, ka gobane taba ya mohuta woo e be e se ya ka ya dirwa motseng woo go tloga mehleng ya Kgoši Solomone, morwa wa Dafida. Baprista le Balefi ba kgopela Morena gore a šegofatše setšhaba. Modimo a kwa dithapelo tša bona a le legaeng la gagwe le lekgethwa legodimong, gomme a di amogela. Ge monyanya o fedile, batho ka moka ba Israele ba ba bego ba tlile monyanyeng ba ya metseng ya Juda ba kgereša dikokwane tša maswika tša borapedi, ba rema dikota tša borapedi, ba phušola dintotoma tšeo go tšona go bego go khunamelwa medimo ya diswantšho, ba kgereša le dialetare tša medimo yeo. Le nageng ya Efraime le ya Manase ba dira bjalo. Ge ba sentše dilo tšeo ka moka bohle ba boela gae. Kgoši Hiskia a fa baprista le Balefi mediro ya bona ka mo yo mongwe le yo mongwe go bego go mo lebane. Ye mengwe ya mediro yeo e be e le go dira dihlabelo tša go tšhungwa ka moka le dihlabelo tša kagišano, go hlokomela mediro ya ka Tempeleng, le go tumiša le go leboga ka dikarolong tše di fapanego tša Tempele. Mehlapeng ya gagwe a ntšha diruiwa tša dihlabelo tša go tšhungwa ka moka mosong wo mongwe le wo mongwe, le mantšiboeng a mangwe le a mangwe, le tše di bego di hlabja ka Sabatha le ka Monyanya wa Lebalana le ka menyanya ye mengwe ye e nyakwago ke melao ya Morena. Godimo ga moo kgoši a botša batho ba Jerusalema gore ba tliše dihlabelo le dikabelo tše ba bego ba swanetše go di fa baprista le Balefi, gore nako ka moka ba tle ba hlokomele tšeo di nyakwago ke melao ya Morena. Ge taba yeo e seno begwa, setšhaba sa Israele sa tliša dimpho tše ntši tša mabele a mabotsebotse, beine ye e di phalago ka moka, makhura a mohlware a makaonekaone, todi ye bosebose, le tše dingwe tše di bunnwego ka mašemong, gomme ba tliša le dikarolo tša lesome tše ntši tša tšohle tše ba nago natšo. Batho ka moka ba ba bego ba dula metseng ya Juda ba tliša dikarolo tša lesome tša dikgomo tša bona le dihuswane tša bona, ba tliša le dimpho tše dingwe tše ntši tše ba ilego ba di abela Morena Modimo wa bona. Dimpho tšeo tša thoma go tlišwa kgweding ya boraro, mme tša bokanywa mekgobokgobo dikgwedi tše nne tše di latelanago. Ge Kgoši Hiskia le bahlankedi ba gagwe ba bona bontši bja dimpho tšeo di ntšhitšwego, ba tumiša Morena le setšhaba sa gagwe sa Israele. Kgoši a botšiša baprista le Balefi ka dimpho tšeo, gomme Moprista yo Mogolo, Asaria, setlogolo sa Tsadoko, a re go yena: “Go tloga mola setšhaba se thomago go tliša dimpho tša sona Tempeleng, re ja re khora ebile re šadiša tše ntši. Re na le tšona ka bontši ka gobane Morena o šegofaditše setšhaba sa gagwe.” Kgoši a laela gore ba lokiše phapoši tša go bolokela ka Tempeleng, gomme ba bea dimpho ka moka le dikarolo tša lesome ka moo ka botshephegi. Molefi yo mongwe yo leina la gagwe e bego e le Konania a bewa mohlokomedi wa dimpho tšeo, gomme Shimi, morwarragwe, a bewa letsogo la gagwe. Balefi ba bangwe ba kgethwa gore ba hlokomele dimpho tšeo ba laolwa ke Konania le Shimi. Bona e be e le Jehiele, Asasia, Nahate, Asahele, Jerimote, Josabade, Eliele, Jismakia, Mahate le Benaya. Tšeo ka moka tša dirwa ka taelo ya Kgoši Hiskia le Moprista yo Mogolo, Asaria. Kore, morwa wa Jimna, Molefi yo e bego e le moleti lesorong la ka bohlabela la Tempele, o be a hlokometše dimpho tše di bego di abelwa Morena, a di abaganya. Metseng ye mengwe mo go bego go dula baprista o be a thušwa ke Balefi ba ba latelago: Edene, Minyamine, Jeshua, Shemaya, Amaria le Shekania. Ba be ba abela Balefi ka moka dijo ka botshephegi go ya ka moo mediro ya bona e bego e le ka gona, e sego go ya ka dikgorwana. Ba abela le banna ka moka ba mengwaga ye masome a mararo goba ya go feta fao ba ba bego ba na le mediro ya tšatši le lengwe le le lengwe ka Tempeleng go ya ka maemo a bona. Baprista ba be ba ngwadišitšwe go ya ka dikgorwana tša bona, gomme Balefi ba mengwaga ye masome a mabedi goba go feta fao bona ba ngwadišitšwe ka dihlopha tša mešomo. Ka moka ga bona ba be ba ngwadišitšwe gotee le bafepša ba bona – basadi, barwa le barwedi – ka gobane go be go nyakega gore ba dule ba itokišeditše go phetha mešomo ya bona ye mekgethwa. Le baprista, ditlogolo tša Arone, ba ba bego ba dula kgauswi le phulo ya metse ye ba bego ba e filwe, ba be ba hlokometšwe. Motseng wo mongwe le wo mongwe go be go na le banna ba ba beilwego gore ba abele banna ka moka dijo mo malapeng a baprista le Balefi ka moka ba ba bego ba ngwadišitšwe ka dikgorwana tša bona. Gohle nageng ya Juda, Kgoši Hiskia a dira tše di lokilego le tše di kgahlago Morena Modimo wa gagwe, gomme a mmotegela. O ile a atlega ka gobane tšohle tše a ilego a di direla Tempele, le tše a ilego a di dira ka go phetha melao le ditaelo tša Morena o be a di dira gore a phethe thato ya Modimo, le gona a di dira ka pelo ya gagwe ka moka. Ka morago ga ditiragalo tšeo tša go botegela Morena tša Kgoši Hiskia, Sanheribe, kgoši ya Asiria, a hlasela Juda. A dikanetša metse ya merako gomme a laela madira a gagwe gore a šwahle merako. Ge Hiskia a bona gore Sanheribe o ikemišeditše le go hlasela Jerusalema, yena le bahlankedi le balaodi ba gagwe ba eletšana gore ba šibe methopo ka ntle ga motse, gore ge Baasiria ba batamela Jerusalema ba tle ba hloke meetse. Banna bao ba kwana le yena, ba kgobokanya batho ba bantši gomme ba šiba methopo ka moka le mekero ya tikologong ya Jerusalema. *** Kgoši a tiišetša dibo tša motse ka go lokiša morako, ka go godiša ditora tša tlhapetšo, le ka go aga morako wa ka ntle. A ba a tiiša dibo tše di bego di agilwe mo naga e bego e lekelelantšwe motseng wa Dafida. Le gona a laela gore go dirwe matsolo a mantši le dikotse. A bea balaodi ba madira gore ba laole banna ba motse, gomme a laela banna bao gore ba kgobokane lepatlelong la lesorong la motse. A ba tutuetša a re: “Le beng le sebete, le tie mme le se ke la boifa kgoši ya Asiria goba madira a mantši a a nago le ona. Yo a emego le rena o feta ba ba emego le yena ka maatla. Yena o na le maatla a motho, eupša rena re na le Morena Modimo wa rena go re thuša le go hlabana dintwa tša rena.” Batho ba tiišwa maatla ke mantšu ao a kgoši. Ka morago ga lebaka, ge Sanheribe le madira a gagwe ba sa le Lakishe, a roma batseta go Hiskia le go batho ka moka ba Juda ba ba bego ba na le yena Jerusalema, gore ba yo ba botša ba re: “Nna, Sanheribe, kgoši ya Asiria, ke botšiša gore ke eng se le se tshephilego ge le fela le dutše mo Jerusalema mola motse woo o dikaneditšwe. Hiskia o le botša gore Morena Modimo wa lena o tla le phološa diatleng tša rena, eupša Hiskia o a le lahletša mme o tla dira gore le hwe ka tlala le lenyora. Ke yena yo a phušotšego dintotoma tšeo go tšona go bego go khunamelwa Morena, a kgereša le dialetare tša gagwe, mme ka morago a botša batho ba Juda le ba Jerusalema gore ba khuname pele ga aletare e tee, le gore ba tšhume seorelo go yona fela. A ga le tsebe se nna le borakgolokhukhu ba ka re se dirilego ditšhaba tše dingwe? Na medimo ya ditšhaba tšeo e kile ya phološa dinaga tša tšona go kgoši ya Asiria? Ke ofe wa medimo yeo ka moka ya ditšhaba tšeo borakgolokhukhu ba ka ba di fedišitšego o kilego wa phološa setšhaba sa wona diatleng tša rena? Bjale ke eng se se le dirago gore le gopole gore Modimo wa lena o ka le phološa? Ka gona Hiskia a se ke a le fora goba a le lahletša ka mokgwa woo. Le se ke la mo kgolwa! Ga go le modimo o tee wa setšhaba se sengwe wo o kilego wa kgona go phološa setšhaba sa wona diatleng tša ka, goba diatleng tša borakgolokhukhu ba ka. Ka gona Modimo woo wa lena ruri o ka se le phološe!” Batseta ba Asiria ba ba ba tšwela pele le go roga Morena Modimo le Hiskia, mohlanka wa Morena. Lengwalo le kgoši ya Asiria e bego e le ngwadile le be le nyatša Morena Modimo wa Israele. Lona le be le re: “Medimo ya ditšhaba tše dingwe ga se ya ka ya phološa ditšhaba tša yona diatleng tša ka, gomme le wona Modimo wa Hiskia o ka se phološe batho ba wona diatleng tša ka.” Batseta bao ba goa mantšu ao ka Seheberu gore ba tšhoše batho ba Jerusalema bao ba bego ba nametše morako wa motse, ba ba nole moko gore ba tle ba thope motse ntle le bothata. Ba bolela ka Modimo wa Jerusalema ka wona mokgwa woo ba bego ba bolela ka medimo ya ditšhaba tše dingwe, medimo ya diswantšho ye e bego e dirilwe ke batho. Ke moo Kgoši Hiskia le moprofeta Jesaya, morwa wa Amotse, ba rapetšego Modimo ba mo llela gore a ba thuše. Morena a roma morongwa yo a ilego a bolaya bahlabani ka moka le balaodi le baetapele ba madira a Asiria. Ka gona Kgoši Sanheribe a boela Asiria a lewa ke dihlong. Ka letšatši le lengwe ge a tsena ka tempeleng ya modimo wa gagwe, barwa ba gagwe ba bangwe ba mmolaya ka ditšhoša tša bona. Ka tsela yeo Morena a hlakodiša Kgoši Hiskia le batho ba Jerusalema diatleng tša Sanheribe, kgoši ya Asiria, le manabeng a mangwe a bona. A dira gore batho ba phele ka khutšo le dinaga ka moka tše di bapilego nabo. Batho ba bantši ba tlišetša Morena dikabelo Jerusalema, le Hiskia ba mo tlišetša dimpho tše bohlokwa, gomme go tloga ka yona nako yeo ditšhaba ka moka tša hlompha Hiskia. Mehleng yeo Kgoši Hiskia a babja a ba a nyako hlokafala. A rapela, mme Morena a bolela le yena, a mo fa sešupo sa semaka sa gore o tla fola. Eupša Hiskia a thoma go ikgogomoša, ka gona a se ke a leboga Morena ka baka la taba yela ye botse a mo diretšego yona; gomme seo sa dira gore Morena a galefele yena le batho ba Juda le ba Jerusalema. Eupša mafelelong Hiskia le batho ba Jerusalema ba ikokobetša, ka fao Morena a se ke a ba otla ge Hiskia a sa phela. Kgoši Hiskia o ile a huma kudu, gomme yo mongwe le yo mongwe a mo hlompha. A ikagela diphapoši tša go bolokela gauta, silibera, maswikana a bohlokwa, dinoko, dikotse le dilwanalwana tše dingwe tša go kganyogega. Godimo ga moo, o be a agetšwe diphapoši tša go bolokela mabele, beine le makhura a mohlware, a agetšwe le mašaka a dikgomo le a dihuswane. O ile a ikagela le metse, a rua le dihuswane le dikgomo tše ntši, gobane Modimo o be a mo file thoto ye ntšintši. Kgoši Hiskia ke yena yo a ilego a thiba moela wa ka godimo wa mothopo wa Gihone, a epa mokero, a sepediša meetse ka wona, a a theošetša bodikela motseng wa Dafida. Hiskia o ile a atlega go tšohle tše a di dirago, eupša mola baemedi ba Babilonia ba tlile go botšiša ka ga semaka sela se bego se diregile nageng, Modimo o ile a mo lesa gore a inaganele, e le fela go mo leka gore a tsebe tše di lego ka pelong ya gagwe. Tše dingwe tše Kgoši Hiskia a di dirilego, le go botegela Morena ga gagwe, di ngwadilwe mo pukung ya Pono ya moprofeta Jesaya, morwa wa Amotse, le mo go Ditaba tša magoši a Juda le a Israele. Hiskia a ithobalela le botatagwe gomme a bolokwa morotogeng wa go ya mabitleng a mošate. Batho ka moka ba Juda le ba Jerusalema ba mo hlompha lehung la gagwe. Morwa wa gagwe, Manase, a mo hlatlama bogošing. Manase o be a na le mengwaga ye lesome le metšo ye mebedi ge e eba kgoši ya Juda, gomme a buša a le Jerusalema mengwaga ye masome a a fetšago seatla le metšo ye e fetšago seatla. Manase a latela mekgwa ya bohlola ya ditšhaba tše Morena a bego a di rakile nageng ge setšhaba sa gagwe se goroga. A tsošološa dintotoma tšela go tšona go bego go khunamelwa medimo ya diswantšho tšela Hiskia, tatagwe, a bego a di phušotše. A aga dialetare tše go tšona go bego go khunamelwa Baale, a ba a betla dikota tša borapedi, le gona a obamela dinaledi a di hlankela. A aga dialetare tša medimo e šele ka Tempeleng Jerusalema, motse wola Morena a bego a itše ke moo a tlago khunamelwa gona go ya go ile. Ka dikgorong ka pedi tša Tempele a aga dialetare tšeo go tšona go bego go khunamelwa dinaledi. A dira dihlabelo ka barwa ba gagwe ka moeding wa Hinomo. A šomišana le baloi le didupe, a ba a dirišana le dinoge le ba malopo. A dira dibe kudu pele ga Morena, a mo rumola. A hloma seswantšhobetlwa ka Tempeleng, felo mola Modimo a itšego go Dafida le go Solomone, morwa wa gagwe: “Mo Jerusalema, gona ka mo Tempeleng ye, ke felo fa ke go kgethilego nageng ka moka ya dikgoro tše lesome le tše pedi tša Israele gore ke mo ke tlago khunamelwa gona go ya go ile. Gomme ge setšhaba sa Israele se ka phetha ditaelo tša ka ka moka ka potego, sa phetha le melao ka moka le ditaelo tše Moshe, mohlanka wa ka, a ba filego tšona, gona nka se ba lese ba lelekwa nageng ye ke e abetšego borakgolokhukhu ba bona.” Manase a diriša batho ba Juda le ba Jerusalema dibe tše kgolo le go feta le tšela tša ditšhaba tše Morena a ilego a di fediša nageng yeo ge setšhaba sa gagwe se tsena go yona. Le ge Morena a ile a bolela le Manase le setšhaba sa gagwe, ba ile ba se ke ba theetša. Ka gona Morena a dira gore balaodi ba madira a Asiria ba hlasele Juda. Ba swara Manase, ba mo hlaba ka dikgwega, ba mo tlema ka diketane tša mphiri, gomme ba mo iša Babilone. Moo tlaišegong yeo a ikokobetša kudu pele ga Morena Modimo wa gagwe le wa borakgolokhukhu ba gagwe, mme a mo kgopela gore a mo thuše. Modimo a kwa thapelo ya Manase mme a e araba ka go mmoetša Jerusalema le ka go dira gore a buše gape. Taba yeo ya kgodiša Manase gore Morena ke Modimo. Ka morago ga moo Manase a agela motse wa Dafida morako wa ka ntle ka bodikela bja mothopo wa Gihone ka moeding, go ya Lesorong la Dihlapi, go dikologa karolo ya motse ye e bitšwago Ofele. A iša morako woo godimo kudu. A bea balaodi ba madira metseng ka moka ya Juda ye e ageleditšwego ka merako. A tloša medimo e šele ka Tempeleng le seswantšhobetlwa se a bego a se beile ka go yona, le dialetare tša medimo ya diswantšho tše di bego di le mmotong wo go wona go bego go le Tempele, le mafelong a mangwe mo Jerusalema; a lahla dilo tše ka moka ka ntle ga motse. A ba a lokiša aletare ya Morena, gomme a dira dihlabelo tša kagišano le tša tebogo godimo ga yona. A laela batho ka moka ba Juda gore ba khunamele Morena Modimo wa Israele. Le ge batho ba ile ba no fela ba dira dihlabelo mafelong a mangwe a tirelo, ba be ba di direla Morena fela. Tše dingwe tše Manase a di dirilego, le thapelo ye a rapetšego Modimo wa gagwe ka yona, le melaetša ya baprofeta ba ba boletšego le yena ka leina la Morena Modimo wa Israele, ka moka di ngwadilwe mo go Ditaba tša magoši a Israele. Thapelo ya kgoši le ka moo Modimo a ilego a e kwa ka gona le dibe ka moka tše a ilego a di dira pele ga ge a sokologa – go se botege ga gagwe, le moo a bego a kgobetše dintotoma tšeo go tšona go bego go khunamelwa medimo ya diswantšho, a hlomile le dikota tša borapedi le medimo ya diswantšho – ka moka di ngwadilwe mo go Ditaba tša baprofeta. Manase a ithobalela le botatagwe gomme a bolokwa ka ngwakong wa mošate, mme morwa wa gagwe, Amone, a mo hlatlama bogošing. Amone o be a na le mengwaga ye masome a mabedi a metšo ye mebedi ge e eba kgoši ya Juda, gomme a buša a le Jerusalema mengwaga ye mebedi. Bjalo ka Manase, tatagwe, a dira dibe pele ga Morena, gomme a dira dihlabelo a di direla medimo ya diswantšho ye tatagwe a bego a e dirile, a ba a e obamela. Eupša yena a se ke a swana le tatagwe, a se ke a ikokobetša pele ga Morena; a dira dibe le go feta le yena tatagwe. Bahlankedi ba Amone ba mo logela maanomabe gomme ba mmolaela ka ngwakong wa mošate. Batho ba Juda ba bolaya babolai ba Amone ka moka, gomme ba bea morwa wa gagwe, Josia, kgoši. Josia o be a na le mengwaga ye seswai ge e eba kgoši ya Juda, mme a buša a le Jerusalema mengwaga ye masome a mararo a motšo o tee. A dira tše di kgahlago Morena; a latela mohlala wa rakgolokhukhu wa gagwe, Kgoši Dafida, a se ke a aroga ditseleng tša gagwe. Ka ngwaga wa seswai wa ge Josia e le kgoši, e sa le lesogana, a thoma go fišegela go tseba Modimo wa rakgolokhukhu wa gagwe, Kgoši Dafida. Ka morago ga mengwaga ye mene a thoma go phušola dintotoma tšeo go tšona go bego go khunamelwa medimo ya diswantšho, a rema le dikota tša borapedi le medimo ye mengwe ka moka ya diswantšho Juda le Jerusalema. A laela gore dialetare tša Baale di kgerešwe, le dialetare tša seorelo tše di bego di le godimo ga dialetare tša Baale di pšhatlwe. Dikota tša borapedi le medimo ye mengwe ka moka ya diswantšho le tšona tša šilaganywa, mme lerole la tšona la gašanywa mabitleng a batho ba ba bego ba di direla dihlabelo. A tšhuma mašapo a baprista ba medimo ya diswantšho godimo ga dialetare tšela ba bego ba khunamela medimo yeo go tšona. Ka go dira tšeo ka moka a hlwekiša Juda le Jerusalema. A dira sona seo metseng ka moka ya naga ya Manase le ya Efraime le ya Simeone, le go yo fihla Naftali le maropeng a a lego kgauswi le metse yeo. Nageng ka moka ya Mmušo wa ka Leboa a kgereša dialetare, a rema le dikota tša borapedi, a šila medimo ya diswantšho, a pšhatlaganya le dialetare tšohle tša seorelo. Ke moka a boela Jerusalema. Ngwageng wa lesome le metšo ye seswai wa pušo ya Kgoši Josia, ge kgoši a sa hlwekiša naga le Tempele, o ile a roma banna ba ba latelago gore ba yo lokiša Tempele ya Morena Modimo wa gagwe: Shafane, morwa wa Atsalia, Maasea, ramotse wa Jerusalema, le Joage, morwa wa Joahase, mohlankedi yo mogolo. Ba neela Hilkia, Moprista yo Mogolo, tšhelete ye baleti ba masoro ba Balefi ba bego ba e kgobokeditše ka Tempeleng. E be e e etšwa go batho ba Efraime le ba Manase le go batho ba bangwe ka moka ba Mmušo wa ka Leboa, le go batho ba Juda, le ba Benjamene, le ba Jerusalema. Tšhelete yeo ka morago e ile ya neelwa banna ba ba bego ba hlokometše go lokiša Tempele, gomme bona ba e neela babetli le baagi gore ba reke matlapa le dikota tša mahlomo, ba lokiše meago ye magoši a Juda a bego a e lesitše ya onala. Banna ba ba bego ba dira modiro woo ba be ba botega. Ba be ba hlokometšwe ke Balefi ba: Jahate le Obadia, ba kgorwana ya Merari, le Sakaria le Meshulamo, ba kgorwana ya Kehate. Balefi bao ka moka e be e le diletši tša dikgwari. Balefi ba bangwe ba be ba hlokometše batho ba go thotha dikago, ba hlokometše le bašomi medirong ye e fapanego, mme ba bangwe ba swara dipuku, ba bangwe e le baleti, bangwe e le bahlankedi. Ge tšhelete yela e ntšhwa ka phapošing ya polokelo, Hilkia a hwetša puku ya melao ya Morena, melao ye Modimo a bego a ile a e fa setšhaba ka Moshe. Hilkia a re go Shafane: “Ke hweditše puku ya melao ka mo Tempeleng!” A neela Shafane puku yeo, gomme Shafane a e iša go kgoši. A mmegela a re: “Rena bahlankedi ba gago re dira tšohle tše o re laetšego tšona. Re tšere tšhelete yela e bego e le ka Tempeleng gomme re e neetše bahlokomedi le bašomi.” A napa a tsebiša kgoši a re: “Hilkia o nneetše puku še.” Gomme a e balela kgoši. Ge kgoši a ekwa puku yeo e balwa, a gagola diaparo tša gagwe a huduegile moyeng, gomme a laela Hilkia le Ahikamo, morwa wa Shafane, le Abdone, morwa wa Mika, le Shafane, mongwaledi wa kgoro, le Asaya, mohlankedi wa kgoši, a re: “Sepelang le yo mpotšišetša Morena, le botšišetšeng le batho ba ba sa šetšego mo Israele le Juda. Le nyakišišeng ka ga dithuto tša puku ye. Morena o re galefetše ka gobane borakgolokhukhu ba rena ga se ba phetha ditaelo tša gagwe, le gona ga se ba dira tše di ngwadilwego ka mo pukung ye.” Ka taelo ya kgoši, Hilkia le bao ba bangwe ba ya ba botšiša Hulda, moprofeta wa mosadi, yo a bego a dula karolong ye mpsha ya Jerusalema. Monna wa gagwe, Shalume, morwa wa Tikba, setlogolo sa Hasra, o be a hlokometše diaparo tša ka Tempeleng. Ba botša Hulda se se diregilego, gomme yena a ba botša gore ba boele go kgoši ba mmotše gore Morena Modimo wa Israele o re: “Ke tlile go tlišetša Jerusalema le batho ba motse woo mahlomola, e lego dithogako ka moka tše di ngwadilwego ka pukung ye e baletšwego kgoši. Ba mphuraletše gomme ba direla medimo ye mengwe dihlabelo, gore ba nthumole ka tšohle tše ba di dirago. Ke tukela Jerusalema bogale, gomme bogale bjoo bo ka se fele. Ge e le kgoši yena, le mmotše gore Morena Modimo wa Israele o re: ‘O kwele tše di ngwadilwego ka pukung, gomme wa ba le pelo ye boleta mme wa ikokobetša pele ga ka, wa gagola diaparo tša gago, wa lla ge o ekwa ka moo ke rego ke tla otla Jerusalema le batho ba motse woo ka gona. Ke kwele thapelo ya gago, gomme mahlomola a ke tlago a tlišetša Jerusalema a ka se tle pele o ithobalela le botatago. Ke tla dira gore o ithobalele ka khutšo.’ ” Banna bale ba boela go Kgoši Josia ba mmotša taba tšeo. Kgoši Josia a kgobokanya baetapele ka moka ba Juda le ba Jerusalema, gomme ba ya Tempeleng mmogo ba na le baprista le Balefi le batho bohle ba Juda le ba Jerusalema, ba bagolo le ba bannyane. Kgoši a ba balela puku ka moka ya kgwerano ye e bego e hweditšwe ka Tempeleng. A ema mo go bego go ema magoši gomme a tsošološa kgwerano pele ga Morena gore o tla mo theetša, a phetha le melao le ditaelo tša gagwe ka pelo ya gagwe ka moka le ka moya wa gagwe ka moka, le gore o tla phetha tše kgwerano e di nyakago, bjalo ka ge go ngwadilwe ka pukung yeo. A eniša yo mongwe le yo mongwe Jerusalema le nageng ya Benjamene gore o tla phetha kgwerano. Ka gona batho ba Jerusalema ba phetha tše kgwerano ye ba e dirilego le Modimo wa borakgolokhukhu ba bona e di nyakago. Kgoši Josia a fediša dilo tšohle tša bohlola tše di bego di le nageng ya Israele, mme a laela gore batho ka moka ba Israele ba khunamele Morena Modimo wa borakgolokhukhu ba bona. Gomme ge a sa phela ba ile ba no fela ba theetša Morena. Kgoši Josia o ile a keteka Monyanya wa Paseka Jerusalema go hlompha Morena; ka letšatši la lesome le metšo ye mene la kgwedi ya mathomo ba hlaba diruiwa tša monyanya woo. A abela baprista mediro ye ba bego ba swanetše go e phetha ka Tempeleng, gomme a ba tutuetša gore ba e phethe gabotse. Balefi, batho ba go ruta Baisraele, bona ba ba bego ba abetšwe Morena, a ba laela a re: “Tsenyang Polokelo ye kgethwa ya Kgwerano ka Tempeleng ye Kgoši Solomone, morwa wa Dafida, a e agilego. Le se sa e rwalarwala, eupša le hlankele Morena Modimo wa lena le setšhaba sa gagwe sa Israele. Le emeng maemong a lena ka Tempeleng ka dikgorwana, go ya ka mediro ye le e abetšwego ke Kgoši Dafida le morwa wa gagwe, Kgoši Solomone, gomme le ipeakanye ka mokgwa wo e lego gore dikgorwana tša lena di tla kgona go šielana ka go thuša malapa a setšhaba sa Israele. Le hlabe dikwanyana le dipudi tša Paseka. Le itlhwekišeng gomme le lokišeng dihlabelo, gore Baisraele ba gabolena ba tle ba phethe ditaelo tše Morena a ba filego tšona ka Moshe.” Kgoši Josia a ntšha dikgapana le dipudi tše dikete tše masome a mararo mehlapeng ya gagwe, gore ka tšona go direlwe bohle ba ba bego ba le gona dihlabelo tša Paseka. A ntšha le dikgomo tše dikete tše tharo gore setšhaba se di hlabe ka Paseka. Bahlankedi ba gagwe le bona ba ithaopa ba ntšhetša setšhaba le baprista le Balefi diruiwa. Gomme bahlankedi ba ba bego ba hlokometše Tempele, Hilkia, Sakaria le Jehiele, ba fa baprista dihuswane tše dikete tše pedi le makgolo a a selelago, le dikgomo tše makgolo a mararo gore e be tša dihlabelo tša Paseka. Baetapele ba Balefi, Konania, gammogo le Shemaya le Netanele, bomorwarragwe, le Hashabia le Jeiele le Josabade ba ntšha dihuswane tše dikete tše tlhano le dikgomo tše makgolo a mahlano gore Balefi ba dire dihlabelo tša Paseka ka tšona. Ge tšohle di lokišeditšwe Paseka, baprista le Balefi ba ema maemong a bona, bjalo ka ge kgoši a be a ba laetše. Ge dikgapana le dipudi di hlabilwe, Balefi ba di bua, gomme ba neela baprista madi a tšona. Baprista ba foka madi ao aletareng. Ke moka ba abela setšhaba diruiwa tša dihlabelo tša go tšhungwa ka moka, ka dihlopha tša malapa, gore ba tle ba dire dihlabelo ka tšona go ya ka ditaelo tše di ngwadilwego melaong ya Moshe. Le dikgomo ba di dira bjalo; Balefi ba beša dihlabelo tša Paseka mollong, go ya ka ditaelo, gomme ba apea dihlabelo tše kgethwa ka dipitša le dipitšana le meruswi, gomme ba fa setšhaba dinama tšeo ka potlako. Ka morago ga fao Balefi ba ikapeela dinama, ba apeela le baprista, ditlogolo tša Arone, ka gobane baprista ba be ba tšhuma dihlabelo tša go tšhungwa ka moka, ba tšhuma le makhura a dihlabelo tšeo, ba be ba šoma mošomo woo go fihlela bošego. Baopedi ba kgorwana ya Balefi ya Asafo ba be ba eme maemong a bona go ya ka ditaelo tša Kgoši Dafida, le tša Asafo, le tša Hemane, le tša Jedutune, moprofeta wa kgoši. Baleti ba masoro a Tempele ba ile ba se ke ba tloga modirong wa bona, ka gobane Balefi ba bangwe ba ile ba ba lokišetša Paseka. Ka gona tirelo yohle ya Morena ya phethwa, e lego go keteka Monyanya wa Paseka le go dira dihlabelo tša go tšhungwa ka moka aletareng, ka moo Kgoši Josia a bego a laetše ka gona. Batho ka moka ba Israele ba ba bego ba le gona ba keteka Paseka le Monyanya wa Dinkgwa tše di se nago komelo matšatši a a šupago. Go tloga mehleng ya moprofeta Samuele Paseka e be e se ya ka ya ketekwa ka mokgwa woo. Dikgošing tša pele go be go se kgoši ye e bego e kile ya keteka Paseka go swana le ye e ilego ya ketekwa ke Kgoši Josia le baprista le Balefi le batho ba Juda, le ba Israele ka moka ba ba bego ba le gona, le ba Jerusalema. Paseka yeo ba ile ba e keteka ngwageng wa lesome le metšo ye seswai wa pušo ya Josia. Ka morago ga ge Kgoši Josia a lokišitše Tempele, Kgoši Neko wa Egepeta a tšwa dira go yo lwa le badudi ba Karkemishe, nokeng ya Yufratese. Josia le yena a mo tšwela dira, eupša Neko a roma batseta go yena gore ba mmotše ba re: “Ntwa ye ke e lwago ga e ame wena, kgoši ya Juda. Lehono ga se ka tlela go lwa le wena, eupša ke tletše go lwa le manaba a ka, gomme Modimo o mpoditše gore ke akgofe. Modimo o eme le nna, ka gona o se ke wa nthibela; go sego bjalo o tla go bolaya.” Eupša Josia o be a ikemišeditše go lwa. A gana go kwa se Modimo a bego a se bolela ka Kgoši Neko, ka gona a apara diaparo tša gore a se ke a tsebja, gomme a yo lwa le yena molaleng wa Megido. Ge go lwewa boramesebe ba Baegepeta ba hlaba Kgoši Josia ka metsi. Yena a laela bahlanka ba gagwe a re: “Ntlošeng mo; ke gobetše kudu!” Ba mo kuka koloing ya gagwe ya ntwa, ba mmea ka koloing ye nngwe ye a bego a na le yona fao, gomme ba mo iša Jerusalema. Fao a hwa mme a bolokwa mabitleng a botatagwe. Batho ka moka ba Juda le ba Jerusalema ba mo ilela. Moprofeta Jeremia a hlamela Kgoši Josia kopelo ya sello. Ya ba setlwaedi sa baopedi ba banna le ba basadi mo Israele go opela kopelo yeo ge ba mo llela. Kopelo yeo e ngwadilwe Pukung ya dikopelo tša Dillo. Tše dingwe tše Josia a di dirilego – go botegela Morena ga gagwe, go phetha melao ya Morena, le ditaba tša gagwe go tloga mathomong a pušo ya gagwe go iša mafelelong – ka moka di ngwadilwe mo go Ditaba tša magoši a Israele le a Juda. Batho ba Juda ba kgetha morwa wa Josia, Joahase, gomme ba mmea kgoši Jerusalema. Joahase o be a na le mengwaga ye masome a mabedi a metšo ye meraro ge e eba kgoši ya Juda, gomme a buša a le Jerusalema dikgwedi tše tharo. Kgoši Neko wa Egepeta a mo amoga bogoši, gomme a laela gore Juda e lobe ka silibera ya dikilokramo tše dikete tše tharo, le gauta ya dikete tše masome a mararo. Neko a bea Eliakime, ngwanaboJoahase, kgoši ya Juda le Jerusalema, gomme a fetoša leina la gagwe a re ke Joyakime. A iša Joahase Egepeta. Joyakime o be a na le mengwaga ye masome a mabedi a metšo ye mehlano ge e eba kgoši ya Juda, gomme a buša a le Jerusalema mengwaga ye lesome le o tee. A dira dibe pele ga Morena Modimo wa gagwe. Kgoši Nebukadnesare wa Babilonia a hlasela naga ya Juda, a thopa Joyakime, gomme a mo iša Babilonia a tlemilwe ka diketane tša mphiri. Nebukadnesare a tšea dibjana tše dingwe tša ka Tempeleng a di iša mošate ga gagwe kua Babilone. Tše dingwe tše Joyakime a di dirilego, gotee le ditlwaedi tša gagwe tša bohlola le tše mpe tše a di dirilego, di ngwadilwe mo go Ditaba tša magoši a Israele le a Juda. Morwa wa gagwe, Joyakine, a mo hlatlama bogošing. Joyakine o be a na le mengwaga ye lesome le ye seswai ge e eba kgoši ya Juda, gomme a buša a le Jerusalema dikgwedi tše tharo le matšatši a lesome. Le yena a dira dibe pele ga Morena. Ge seruthwane se fihla, Kgoši Nebukadnesare a thopa Joyakine a mo iša Babilonia gotee le dilo tše bohlokwa tša ka Tempeleng. Ke moka a bea Tsedekia, rangwane wa Joyakine, kgoši ya Juda le Jerusalema. Tsedekia o be a na le mengwaga ye masome a mabedi a motšo o tee ge e eba kgoši ya Juda, gomme a buša a le Jerusalema mengwaga ye lesome le o tee. A dira dibe pele ga Morena gomme a se ke a ikokobetša ge moprofeta Jeremia a bolela le yena a romilwe ke Morena. Tsedekia a tsogela Kgoši Nebukadnesare maatla. Nebukadnesare o be a mo gapeleditše go ena ka leina la Modimo gore o tla mmotegela. Tsedekia o ile a fela a na le molala wo mothata, a ngangabetše, a gana go boela go Morena Modimo wa Israele. Baetapele ba Juda le baprista le batho, le bona ba be ba sa botegele Morena, ba latela mekgwa ya bohlola ya ditšhaba tše di bapilego le bona. Gomme ba tšhilafatša Tempele ye Morena a bego a e kgethwafaditše. Morena, Modimo wa borakgolokhukhu ba bona, o be a se a ka a kgaotša go romela baprofeta go tlo kgala setšhaba sa gagwe, ka gobane o be a nyaka go se lota le go boloka Tempele. Eupša bona ba be ba kwera batseta bao ba Modimo, ba nyatša mantšu a gagwe, ba bile ba sega baprofeta ba gagwe, go fihlela mafelelong Modimo a galefela setšhaba sa gagwe moo e lego gore se ile sa hloka phološo. Ka gona Morena a tliša kgoši ya Babilonia gore e tle e ba hlasele. Kgoši yeo ya bolaya masogana a Juda, le gona ka mola Tempeleng. A se ke a šokela motho, masogana goba dikgarebe, batšofadi le dikoka – bohle Modimo a ba gafela diatleng tša yona. Kgoši ya Babilonia ya hula Tempele, le polokelo ya Tempele, le mahumo a kgoši le a bahlankedi ba gagwe, gomme ya tšea tšohle ya gomela natšo Babilone. A tšhuma Tempele le motse thokgethokge, gotee le mengwako ya kgoši le dithoto ka moka tša motse tše bohlokwa, gomme a kgereša le morako wa wona. A thopa mašaledi ka moka a batho a a iša Babilonia, moo ba ilego ba hlankela yena le ditlogolo tša gagwe e le makgoba go fihlela ge go hlongwa mmušo wa Persia. Ka tsela yeo gwa phethega se Morena a bego a se boletše ka moprofeta Jeremia mola a re: “Naga e tla dula e le marope mengwaga ye masome a a šupago ya go tlala, gore e tle e lefiwe ka ge e be e sa khutšišwe ka mengwaga ya Sabatha.” Ngwageng wa pele wa ge Korese wa Persia e le kgoši, Morena o ile a phetha se a bego a se boletše ka moprofeta Jeremia. A tutuetša Korese gore a begele batho ba mmušo wa gagwe ka moka le ka mangwalo a re: “Kgoši Korese wa Persia o a bega o re: ‘Morena, Modimo wa legodimo, o mpeile mmuši wa lefase ka moka gomme o ntaetše gore ke mo agele tempele kua Jerusalema, nageng ya Juda. Bjale, ka moka ga lena bao le lego setšhaba sa Modimo, sepelang gona, gomme Morena Modimo wa lena a be le lena.’ ” Ka ngwaga wa pele wa ge Korese wa Persia e le kgoši, Morena o ile a phetha se a bego a se boletše ka moprofeta Jeremia. A tutuetša Korese gore a begele batho ba mmušo wa gagwe ka moka le ka mangwalo a re: “Kgoši Korese wa Persia o a bega o re: ‘Morena, Modimo wa legodimo, o mpeile mmuši wa lefase ka moka gomme o ntaetše gore ke mo agele tempele kua Jerusalema, nageng ya Juda. A Modimo a be le lena bohle ba le lego setšhaba sa gagwe. Le swanetše go ya Jerusalema gomme le tsošološe Tempele ya Morena Modimo wa Israele, Modimo yo a khunamelwago Jerusalema. Mašaledi ka moka a setšhaba sa gagwe, mo gongwe le mo gongwe mo a falaletšego gona, a thušwe ke batho ba ba dulago le ona ka silibera le gauta, mefago le diruiwa, gotee le dikabelo tša boithaopo tša Tempele ya Modimo kua Jerusalema.’ ” Ke moo mantona a dikgorwana tša kgoro ya Juda le ya Benjamene, baprista le Balefi, le yo mongwe le yo mongwe yoo Modimo a bego a mo tutueditše, a ilego a itokišetša go yo aga Tempele ya Morena Jerusalema. Batho ka moka ba ba bego ba dula kgauswi le bona ba ba tiiša maatla ka go ba fa dibjana tša silibera, gauta, mefago, diruiwa, dilo tše dingwe tše bohlokwa, le dikabelo tša Tempele. Korese a ba neela dibjana tšela Kgoši Nebukadnesare a bego a di tšere ka Tempeleng kua Jerusalema a di beile ka tempeleng ya medimo ya gagwe. A di nea Mitredate, ramatlotlo wa mošate, yo a ilego a ngwala lenaneo la tšona, gomme a le neela Sheshbatsare, mmušiši wa naga ya Juda. Dilo tšeo šedi: meruswi ya dihlabelo ya gauta 30 meruswi ya dihlabelo ya silibera 1 000 meruswi ye mengwe 29 meruswana ya gauta 30 meruswana ya silibera 410 dibjana tše dingwe 1 000 *** Dibjana ka moka tša gauta le tša silibera tšeo Sheshbatsare a ilego a di tšea ge a tloga Babilone le mathopša a mangwe ba eya Jerusalema e be e le 5 400. Mathopša a mantši a Juda a ile a tloga nageng ya Babilonia a boela Jerusalema le nageng ya Juda ka moka, yo mongwe le yo mongwe a ya motseng wa gabo. Kgoši Nebukadnesare wa Babilonia o be a ile a ba thopela gona Babilonia. Ge ba boa baetapele ba bona e be e le Serubabele, Jeshua, Nehemia, Seraya, Reelaya, Mordekai, Bilshane, Mispare, Bigbai, Rehume le Baana. Lenaneo la dikgorwana tša Israele gotee le bontši bja batho ba tšona bao ba ilego ba boa bothopša šele: Paroshe – 2 172 Shefatia – 372 Ara – 775 Pahate-Moaba, ditlogolo tša Jeshua le Joaba – 2 812 Elamo – 1 254 Satu – 945 Sakai – 760 Bani – 642 Bebai – 623 Asgade – 1 222 Adonikamo – 666 Bigbai – 2 056 Adine – 454 Atere, yo a bego a tsebja le ka la Hiskia – 98 Betsai – 323 Jora – 112 Hashumo – 223 Gibare – 95 *** *** *** *** *** *** *** *** *** *** Batho bao borakgolokhukhu ba bona ba bego ba dula metseng ye e latelago pele ba thopša le bona ba ile ba boa: Betlelehema – 123 Netofa – 56 Anathote – 128 Asmabethe – 42 Kiriate-Jearime, Kefira le Beerote – 743 Rama le Geba – 621 Mikimase – 122 Bethele le Ai – 223 Nebo – 52 Magabishe – 156 Elamo ye nngwe – 1 254 Harime – 320 Lodo, Hadide le Ono – 725 Jeriko – 345 Senaa – 3 630 *** *** *** *** *** *** *** *** *** *** Le ke lenaneo la dikgorwana tša baprista tše di ilego tša boa bothopša: Jedaya, ditlogolo tša Jeshua – 973 Imere – 1 052 Pashure – 1 247 Harime – 1 017 *** *** *** Dikgorwana tša Balefi tše di ilego tša boa bothopša šedi: Jeshua le Kadmiele, ditlogolo tša Hodabia – 74 Baopedi ba ka Tempeleng, ditlogolo tša Asafo – 128 Baleti ba masoro a Tempele, ditlogolo tša Shalume, Atere, Talmone, Akube, Hatita le Shobai – 139 *** *** Tše ke dikgorwana tša bašomi ba ka Tempeleng tšeo di ilego tša boa bothopša: Tsiha, Hasufa le Tabaote, Kerose, Sia le Padone, Lebana, Hagaba le Akube, Hagabe, Shamlai le Hanane, Gidele, Gahara le Reaya, Retsine, Nekoda le Gasamo, Usa, Paseage le Besai, Asna, Bameune le Banefuse, Bakbuke, Hakufa le Harahure, Batslute, Mehida le Harsha, Barkose, Sisera le Temage, Netsiage le Hatifa *** *** *** *** *** *** *** *** *** *** Dikgorwana tša bahlanka ba Solomone tše di ilego tša boa bothopša šedi: Sotai, Soferete le Peruda, Jaala, Darkone le Gidele, Shefatia, Hatile, Pokerete-Tsebaime le Ami *** *** Ditlogolo ka moka tša bašomi ba ka Tempeleng le tša bahlanka ba Solomone tšeo di ilego tša boa bothopša e be e le tše makgolo a mararo le masome a senyane le metšo ye mebedi. Go be go na le batho ba makgolo a a selelago le masome a mahlano a metšo ye mebedi bao e bego e le ba kgorwana ya Delaya, ya Tobia, le ya Nekoda ba ba bego ba tlogile motseng wa Tele-Melage le wa Tele-Harsha le wa Kerube le wa Adane le wa Imere; eupša ba be ba se ne bohlatse bja gore ke ditlogolo tša Baisraele. *** Ba dikgorwana tše di latelago tša baprista ba ile ba hloka maina a borakgolokhukhu ba bona lenaneong le le ngwadilwego la malapa: Habaya, Kotse le Barsilai. Rakgolokhukhu wa kgorwana ya baprista ya Barsilai o be a nyetše mosadi wa go tšwa kgorwaneng ya Barsilai wa Gileade, gomme a bitšwa ka leina la kgorwana ya boratswalagwe. Ka ge ba be ba sa kgone go laetša gore borakgolokhukhu ba bona ke bomang, ba ile ba se ke ba amogelwa bopristeng. *** Mmušiši wa Bajuda o ile a ba botša gore ba se ke ba ja dijo tše di abetšwego Modimo, go fihlela go eba le moprista yo a ka šomišago Urime le Tumime. Mathopša ka moka ao a ilego a boa e be e le a 42 360. Bahlanka ba bona ba banna le ba basadi – 7 337 Baopedi ba banna le ba basadi – 200 Dipere – 736 Dimeila – 245 Dikamela – 435 Dipokolo – 6 720 *** *** *** Ge mathopša a fihla Jerusalema, mola Tempele ya Morena e bego e le gona, baetapele ba bangwe ba dikgorwana ba ile ba ntšha dikabelo tša boithaopo go thuša gore Tempele e agwe ka lefsa gona mola e bego e agilwe pele. Ba ile ba ntšhetša modiro woo ka moo ba bego ba kgona ka gona, gomme gauta ya ba ya dikilokramo tše makgolo a mahlano a metšo ye lesome le ye mebedi, silibera ya ba ya dikilokramo tše dikete tše pedi le makgolo a seswai le masome a a šupago a metšo ye mehlano, diaparo tša baprista ya ba tše lekgolo. Baprista le Balefi le ba bangwe ba setšhaba ba dula Jerusalema le tikologong ya motse woo; baopedi le baleti ba masoro a Tempele le bašomi ba ka Tempeleng ba dula metseng ya kgauswi; Baisraele ba bangwe ka moka bona ba dula metseng yeo borakgolokhukhu ba bona ba bego ba dula go yona. Kgweding ya bošupa setšhaba sa Israele se be se dutše metseng ya sona. Ke moka sa phuthegela Jerusalema, gomme Jeshua, morwa wa Jotsadaka, le baprista ba bangwe, le Serubabele, morwa wa Sealtiele, gotee le meloko yabo, ba aga aletare ya Modimo wa Israele ka lefsa, gore ba tle ba tšhumele dihlabelo godimo ga yona go ya ka ditaelo tšela di ngwadilwego ka melaong ya Moshe, monna wa Modimo. Le ge mathopša a a boilego a be a boifa batho ba ba bego ba dula moo nageng, a ile a aga aletare ka lefsa gona mola e bego e agilwe pele. Ka morago ga moo ba thoma gape go dira dihlabelo tša go tšhungwa ka moka tša mehleng tša mesong le tša mantšiboa godimo ga yona. Ba bina Monyanya wa Mešaša go ya ka mo go ngwadilwego ka gona; letšatši le lengwe le le lengwe ba dira dihlabelo tše di nyakegago letšatšing leo; gomme godimo ga moo ba dira dihlabelo tša go tšhungwa ka moka le tša Monyanya wa Lebalana le tša menyanya ye mengwe ka moka ya ka mehla ye go yona go bego go khunamelwa Morena. Ba mo abela le dikabelo ka moka tšeo di bego di abelwa yena ka boithaopo. Le ge batho ba be ba sešo ba thoma go aga Tempele ka lefsa, ba ile ba thoma go tšhumela Morena dihlabelo ka letšatši la pele la kgwedi ya bošupa. Setšhaba se ile sa lefa babetli ba maswika le ba dikota ka tšhelete, sa ba sa romela dijo le dino le makhura a mohlware motseng wa Tirose le wa Sidone gore batho ba gona ba thothe dikota tša mesedere Lebanone, ba di tliše Jopa ka go di phaphamatša ka lewatleng. Tšeo ka moka di be di dirwa ka tumelelo ya Korese, kgoši ya Persia. Gomme ka kgwedi ya bobedi ya ngwaga wo ba boetšego mola Tempele e bego e le gona kua Jerusalema, ba thoma modiro. Serubabele le Jeshua le batho ba gabobona ka moka le baprista le Balefi, gabotsebotse mathopša ka moka ao a bego a boetše Jerusalema, ba thoma modiro woo. Balefi ka moka, go tloga ka ba mengwaga ye masome a mabedi le ya go feta fao, ba bewa bahlokomedi ba modiro wa go aga Tempele ka lefsa. Jeshua, Molefi, barwa ba gagwe le meloko, le Kadmiele le barwa ba gagwe, ba kgorwana ya Hodabia, le bona e ile ya ba bahlokomedi ba modiro wa go aga Tempele ka lefsa. Ba be ba thušwa ke Balefi ba kgorwana ya Henadade. E rile ge baagi ba feditše motheo wa Tempele, baprista ba ema maemong a bona ba apere diaparo tša bona, ba swere diphala, gomme Balefi ba kgorwana ya Asafo bona ba ema fao ka diletšo tša masenkana. Ba reta Morena go ya ka ditaelo tša Kgosi Dafida. Ba be ba tumiša Morena ka dikopelo ba mo leboga ba re: “Morena ke yo botho, gomme o gaugela Baisraele go ya go ile.” Setšhaba ka moka sa gobela mogobo wa go reta Morena, ka gobane motheo wa Tempele o be o phethilwe. Baprista ba bantši le Balefi le mantona a dikgorwana, bale ba batala ba bego ba bone Tempele ya pele, ba ile ba lla ba hlabošitše mantšu ge ba lebeletše motheo wa Tempele ye o agwa. Eupša bontši bja lešaba bjona bo ile bja goa ka lethabo. Motho o be a sa kgone go kwa gore lešateng leo lethabo ke lefe, sello ke sefe, ka gobane lešata e be e le le legolo mo e lego gore le be le kwala kgole. Manaba a batho ba Juda le ba Benjamene a ile a kwa gore batho bale ba boilego bothopša ba aga Tempele ya Morena Modimo wa Israele ka lefsa. Ke moka ba ya go Serubabele le go mantona a dikgorwana, ba re: “A re le agišeng Tempele. Re khunamela yena Modimo yo le lena le mo khunamelago, gomme e sa le re mo direla dihlabelo go tloga ka nako yela Esarhadone, kgoši ya Asiria, a re romela gore re tle re dule mo.” Serubabele le Jeshua le mantona a dikgorwana ba re go bona: “Ga re nyake go agela Morena Modimo wa rena Tempele le lena. Re tla e aga ka borena, bjalo ka ge Korese, kgoši ya Persia, a re laetše.” Ke moo batho bao ba bego ba dula nageng yeo ba lekilego go nola Bajuda moko le go ba tšhoša gore ba se ke ba aga Tempele. Le gona ba fa bahlankedi ba mmušo wa Persia tsogolekobong gore ba thibele moago woo. Ba tšwela pele le go dira seo nakong ka moka ya pušo ya Korese, go fihlela ge go buša Dariose. Mathomong a pušo ya Kgoši Zerksese manaba a batho ba ba bego ba dutše nageng ya Juda le Jerusalema a ile a tliša lengwalo la go re ba na le molato. Ya re gape ge go buša Artazerksese, kgoši ya Persia, Bishelamo le Mitredate le Tabeele, gotee le ba ba kwanego le bona, ba ngwalela kgoši lengwalo. Lona le be le ngwadilwe ka Searamo, gomme la swanela go fetolelwa lelemeng la gabo kgoši ge le balwa. Mmušiši Rehume le mongwaledi wa selete, Shimshai, le bona ba ngwalela Artazerksese lengwalo le le latelago mabapi le Jerusalema: “Lengwalo le le tšwa go Rehume, mmušiši, le Shimshai, mongwaledi wa selete, le ba ba kwanego le bona, e lego baahlodi, le bahlankedi ba bangwe ka moka, bao pele ba bego ba dula Ereke le Babilone le Susa, nageng ya Elamo, gotee le ditšhaba tše dingwe tše Asenapare, kgoši ye kgolo ya go hlomphega, a di išitšego bothopša metseng ya Samaria le mafelong a mangwe a selete sa Yufratese-Bodikela.” Tše di bego di ngwadilwe lengwalong leo šedi: “Lengwalo le le ngwaletšwe wena, Kgoši Artazerksese, le tšwa go rena, bahlanka ba gago, banna ba Yufratese-Bodikela. “Re tsebiša wena, kgoši, gore Bajuda ba ba tlilego mo ba etšwa dileteng tša gago tše dingwe ba dutše Jerusalema, gomme ba tsošološa motse wola wo mobe wa meferefere. Ba thomile go tsoša merako – ba šetše ba feditše go thea metheo. Bjale kgoši, ge motse wo o ka tsošološwa mme merako ya ona ya fela, batho ba tlilo lesa go ntšha metšhelo, gomme tšhelete ya mošate ya fokotšega. Bjale ka gobane re fepša ka tša mošate, le gona ga go a re swanela go no lebelela kgoši a gobošwa, re tsebiša kgoši taba ye gore go nyakišišwe ka dipukung tša ditaba tša mehleng ya borakgolokhukhu ba gago. Ge o ka nyakišiša o tla hwetša gore motse wo e bile wa meferefere go tloga kgale, gomme o be o fela o tshwenya magoši le babušiši ba dilete. Badudi ba wona ka mehla ba be ba tsoša meferefere. Ke ka baka leo motse wo o ilego wa thubja. Ka gona, kgoši, re bona gore ge motse wo o ka tsošološwa gomme merako ya wona ya fela, selete sa Yufratese-Bodikela e ka se sa ba sa gago.” Kgoši yena a ba fetola ka lengwalo a re: “Rehume, mmušiši, le Shimshai, mongwaledi wa selete, le ba le dirišanago le bona ba ba dulago Samaria le dinageng tše dingwe tša selete sa Yufratese-Bodikela, ke re madume. “Lengwalo le le nngwaletšego lona le fetoletšwe lelemeng la gešo, ba mpalela lona. Ke laetše gore go nyakišišwe, gomme go hweditšwe gore go tloga kgale Jerusalema e be e fela e tsogela magoši maatla, le gore ka mehla e be e fela e tsoša meferefere le dikhuduego. Felo moo ke mo go kilego gwa buša magoši a maatla, gomme a buša selete ka moka sa Yufratese-Bodikela, metšhelo le makgetho di ntšhetšwa ona. Ka gona le swanetše go laela banna bao gore ba lese go tsošološa motse woo go fihlela ke ntšha taelo. Le dire taba yeo ka pela, gore ke se sa senyegelwa.” Ge Rehume le Shimshai le ba ba dirišanago le bona ba seno balelwa lengwalo leo la go tšwa go Artazerksese, ba itlhaganela ba ya Jerusalema gomme ba gapeletša Bajuda ka marumo gore ba lese go tsoša motse. Modiro wa go tsošološa Tempele o ile wa leswa, wa dula o le bjalo go fihlela ka ngwaga wa bobedi wa pušo ya Dariose, kgoši ya Persia. Mehleng yeo baprofeta ba bangwe, Hagai le Sakaria, morwa wa Ido, ba ile ba thoma go porofeta Bajuda bao ba bego ba dula nageng ya Juda le Jerusalema ka leina la Modimo wa Israele. Ge Serubabele, morwa wa Sealtiele, le Jeshua, morwa wa Jotsadaka, ba ekwa tše di bolelwago, ba ile ba tšwela pele le go aga Tempele ya Jerusalema ka lefsa, gomme baprofeta bao ba babedi ba ba thuša. Ke moka Tatenai, mmušiši wa Yufratese-Bodikela, le Shetare-Bosnai, le bahlankedi ba bangwe bjalo ka bona ba ya Jerusalema ba ba botšiša ba re: “Ke mang yo a le laetšego gore le age Tempele ye le be le e feleletše ka go e kgabiša ka dikota?” Ba ba botšiša le maina a banna ka moka bao ba bego ba ba agiša Tempele. Eupša Modimo o be a lebeletše baetapele ba Bajuda ka botho, ka gona bahlankedi bao ba Bapersia ba kwana gore ba se ke ba ba thibela go fihlela ba ngwalela Dariose gomme a ba fetola. Pego ye ba ilego ba e ngwalela kgoši e be e re: “Kgoši Dariose, o re phelele! “Kgoši, tseba gore re ile ra ya seleteng sa Juda, gomme ra hwetša Tempele ya Modimo yo mogolo e agiwa ka lefsa ka maswika a magolo le dikota tše di ageletšwego mabotong. Modiro woo o dirwa ka tlhokomelo gomme o tšwela pele gabotse. “Re ile ra botšiša baetapele ba setšhaba gore ke mang yo a ba laetšego go tsoša Tempele le go e feleletša ka go e kgabiša ka dikota. Re ba botšišitše le maina a bona, gore re tle re go tsebiše ka lengwalo gore baetapele ba modiro wo ke bomang. “Ba ile ba re fetola ba re: ‘Rena re bahlanka ba Modimo wa legodimo le lefase, gomme re tsoša Tempele ye kgalekgale e ilego ya agwa ya phethwa ke kgoši ye kgolo ya Israele. Fela ka gobane borakgolokhukhu ba rena ba ile ba galefiša Modimo wa legodimo, yena o ile a ba gafela diatleng tša Nebukadnesare, Mokaldea, kgoši ya Babilonia. Tempele ye o ile a e kgereša gomme setšhaba a se iša bothopša Babilonia. Ya re ka ngwaga wa mathomo wa ge Korese e le kgoši ya Babilonia, yena Korese a laela gore Tempele e tsošološwe. A ntšha dibjana tša Tempele tša gauta le tša silibera tšela Nebukadnesare a bego a di tšere Tempeleng ya Jerusalema a di beile ka tempeleng ya Babilonia. A di neela Sheshbatsare, monna yo a bego a mmeile mmušiši wa naga ya Juda. Kgoši a mmotša gore a di bušetše Tempeleng ya Jerusalema, gomme a age Tempele yeo ka lefsa moo e bego e le gona. Ka gona Sheshbatsare a tla a aga motheo wa yona; e sa le go tloga ka nako yeo Tempele e agiwa, mme le bjale ga sešo ya fela.’ “Bjale ge, ge o rata kgoši, a go nyakišišwe ka dipukung tša mošate moo Babilone, gore go bonwe ge eba Korese o kile a laela gore Tempele ye ya mo Jerusalema e tsošološwe, gomme o re tsebiše, kgoši, gore thato ya gago ke eng mabapi le taba yeo.” Ka gona Kgoši Dariose a laela gore go nyakišišwe ka dipukung tša mošate tšeo di bego di lotilwe motseng wa Babilone. Eupša e ile ya ba motseng wa Ekbatana wo o bego o ageleditšwe ka morako, seleteng sa Media, mo go ilego gwa hwetšwa lengwalo leo go lona go bego go ngwadilwe ditaba tše di latelago: “Kgoši Korese, ngwageng wa mathomo wa pušo ya gagwe, o ile a laela gore ngwako wa Modimo, wo o lego Jerusalema, o tsošološwe e be felo mo go dirwago dihlabelo gape. Tempele yeo e swanetše go agwa mola metheong ya yona ye metala, gomme e be ya bogodimo bja dimetara tše 27,6 le bophara bja dimetara tše 27,6. Maboto a yona a agwe ka go tsenya dikota godimo ga molokoloko wo mongwe le wo mongwe wa boraro wa maswika. Gomme ditshenyegelo di lefše ka ditšhelete tša mošate. Le dibjana tša gauta le tša silibera tšeo Kgoši Nebukadnesare a di tšerego ka Tempeleng ya Jerusalema a di tliša Babilone, di swanetše go bušetšwa madulong a tšona ka Tempeleng Jerusalema.” Ke moo Dariose a ba fetotšego ka lengwalo a re: “Wena Tatenai, mmušiši wa Yufratese-Bodikela, le Shetare-Bosnai, le ba ba dirišanago le lena ba ba lego Yufratese-Bodikela, le kgaoganeng le Tempele, le gona le leseng modiro woo o tšwele pele o sa šitišwe ke selo. Le tlogeleng mmušiši wa naga ya Juda le baetapele ba Bajuda ba tsošološe Tempele ya Modimo mola e bego e le gona. Ka lengwalo le ke le laela gore le ba thuše go e aga ka lefsa. Ditshenyegelo tša bona di lefše ntle le go dikadika ka ditšhelete tša mošate tše di tšwago metšhelong ya Yufratese-Bodikela, gore mošomo woo o tle o se kgaotšwe. Letšatši ka letšatši le se ke la lesa go fa baprista ba ba lego Jerusalema se sengwe le se sengwe seo ba le botšago gore ba a se nyaka: dipowana goba dikgapa goba dikwanyana tšeo ka tšona ba kago direla Modimo wa legodimo dihlabelo tša go tshungwa ka moka, goba mabele, goba letswai, goba beine, goba makhura a mohlware. Seo se swanetše go dirwa gore ba tle ba kgone go dira dihlabelo tše di tlago kgahla Modimo wa legodimo, le gore ba tle ba kgone go rapelela nna le barwa ba ka gore yena a re šegofatše. Le gona ke laela gore yo a ka nyatšago taelo ye, go ntšhwe lehlomo ntlong ya gagwe, le betlwe ntlha mme a phuleletšwe ka lona. Gomme ntlo ya gagwe e dirwe sethobolo. A Modimo yo a kgethilego Jerusalema gore e be lefelo leo a khunamelwago go lona a uše dikgoši tšohle le ditšhaba tšohle tše di nyatšago taelo ye ka mokgwa wo mongwenyana, gomme di leka go fediša Tempele ya moo. Taelo ye e ntšhitšwe ke nna, Dariose. E swanetše go phethwa ka tlhokomelo.” Mmušiši Tatenai le Shetare-Bosnai le bahlankedi ba bangwe bjalo ka bona ba dira ka moo kgoši a laetšego ka gona. Baetapele ba Bajuda ba tšwela pele gabotse le moago wa Tempele, ba ntše ba tutuetšwa ke moprofeta Hagai le moprofeta Sakaria. Ba phetha Tempele ka moo ba bego ba laetšwe ke Modimo wa Baisraele le ke Dariose le Korese le Artazerksese, magoši a Persia. Ba fetša Tempele ka letšatši la boraro la kgwedi ya Adara, ka ngwaga wa boselela wa ge Kgoši Dariose a buša. Setšhaba sa Baisraele – baprista le Balefi le ba bangwe bohle bao ba bego ba boile bothopša – ba napa ba bula Tempele ka lethabo. Ge e bulwa ba ile ba dira dihlabelo ka dipoo tše lekgolo le dikgapa tše makgolo a mabedi le dikwanyana tše makgolo a mane; ba dira le dihlabelo tša tshwarelo ya dibe ka diphooko tše lesome le tše pedi. Kgoro ye nngwe le ye nngwe ya Israele ya emelwa ke phooko. Le gona ba ile ba beakanya baprista le Balefi gore ba yo swara ditirelo tša ka Tempeleng ya Jerusalema, go ya ka ditaelo tše di lego ka pukung ya Moshe. Batho bao ba bego ba boile bothopša ba ile ba bina Monyanya wa Paseka ka letšatši la lesome le metšo ye mene la kgwedi ya pele ya ngwaga wo o latelago. Baprista le Balefi ka moka ba be ba itlhwekišitše gomme bjale ba hlweketše tirelo. Balefi ba hlabela batho bohle bao ba bego ba boile bothopša dikwanyana tša Paseka, ba hlabela le baprista, le bona ba itlhabela tšona. Dihlabelo tšeo di ile tša lewa ke Baisraele ka moka bao ba bego ba boile bothopša, le bohle bao ba bego ba ikgaogantše le mekgwa ye mebe ya baditšhaba bao ba bego ba dula moo nageng, mme ba tlile go khunamela Morena Modimo wa Israele. Ba ile ba bina Monyanya wa Dinkgwa tše di se nago komelo matšatši a a šupago ka lethabo. Ba be ba thabile ka gore Morena o be a dirile gore kgoši ya Asiria e ba sekegele pelo, e ba thuše mo mošomong wa bona wa go tsošološa Tempele ya Modimo wa Israele. Ka morago ga mengwaga ye mentši Artazerksese e ile ya ba kgoši ya Persia. Mehleng ya gagwe gwa ba le monna yo mongwe yo a bitšwago Esra. Yena o be a latišiša borakgolokhukhu ba gagwe go yo fihla ka Arone, Moprista yo Mogolo, ka mokgwa wo o latelago: Esra e be e le morwa wa Seraya, Seraya morwa wa Asaria, Asaria morwa wa Hilkia, Hilkia morwa wa Shalume, Shalume morwa wa Tsadoko, Tsadoko morwa wa Ahitube, Ahitube morwa wa Amaria, Amaria morwa wa Asaria, Asaria morwa wa Merayote, Merayote morwa wa Seragia, Seragia morwa wa Usi, Usi morwa wa Buki, Buki morwa wa Abishua, Abishua morwa wa Finease, Finease morwa wa Eleasara, Eleasara morwa wa Arone. Esra e be e le serutegi se segolo sa melao ye Morena Modimo wa Israele a bego a e file Moshe. Ka ge Esra a be a šegofaditšwe ke Morena Modimo wa gagwe, kgoši o be a mo fa tšohle tše a bego a mo kgopela tšona. Ya re ka ngwaga wa bošupa wa pušo ya Artazerksese, Esra a tloga Babilonia a leba Jerusalema a na le sehlopha sa Baisraele. Sehlopha seo se be se na le baprista le Balefi le baopedi ba ka Tempeleng le baleti ba masoro a Tempele le bašomi ba ka Tempeleng. *** Ba tloga Babilonia ka letšatši la pele la kgwedi ya mathomo, gomme ba fihla Jerusalema ka letšatši la pele la kgwedi ya bohlano, ka gobane Modimo o be a na le yena. *** Esra o be a ikgafetše go ithuta melao ya Morena le go ruta setšhaba sa Israele ditaelo le melawana ya yona. Artazerksese o ile a fa Esra, moprista, serutegi se segolo sa melao le ditaelo tše Morena a bego a di file Israele, lengwalo. Lona le be le re: “Lengwalo le le tšwa go Artazerksese, kgoši ya dikgoši, gomme le ya go Esra, moprista, serutegi sa melao ya Modimo wa legodimo. “Ke laela gore Baisraele bohle mmušong wa ka le baprista ba bona le Balefi ba ba ratago go boela Jerusalema, ba dumelelwe go sepela nago. Nna le baeletši ba ka ba ba šupago re go roma Jerusalema le nageng ya Juda, gore o yo lebeledišiša ka moo melao ya Modimo wa gago yeo o e swerego e phethwago ka gona. O tšee dimpho tša gauta le tša silibera tše nna le baeletši ba ka re ithaopilego ra di fa Modimo wa Israele yo Tempele ya gagwe e lego kua Jerusalema. O tšee le silibera le gauta ka moka ye o tlago e kgoboketša seleteng sohle sa Babilonia, gotee le dimpho tše batho ba Israele le baprista ba bona ba tlago ithaopa ba di fa Tempele ya Modimo wa bona kua Jerusalema. “Tšhelete yeo le e šomiše ka tlhokomelo, gomme ka yona le reke dipoo le dikgapa le dikwanyana gotee le bupi le beine, mme le dire dihlabelo ka tšona godimo ga aletare ya Tempeleng kua Jerusalema. Silibera le gauta ye e šetšego wena le baprista ba bangwe le ka e šomiša go dira se le bonago se na le mohola, go ya ka thato ya Modimo wa lena. Le abele Modimo kua Jerusalema dibjana tšohle tše le di neetšwego gore le di šomiše ditirelong tša Tempeleng. Gomme le dilo tše dingwe tše le di nyakelago Tempele le ka di reka ka tšhelete ya mošate. “Ke laela boramatlotlo ka moka ba ba dulago Yufratese-Bodikela gore ba fe Esra, moprista le serutegi sa melao ya Modimo wa legodimo, se sengwe le se sengwe se a se kgopelago, ba se ke ba ntšha silibera ya go feta ya dikilokramo tše dikete tše tharo, le mabele a go feta tše dikete tše lesome, le beine ya go feta ya dilitara tše dikete tše pedi le makgolo a mabedi, le makhura a mohlware a dilitara tše dikaalo. Letswai le a le nyakago lona le se ke la elwa. Le mo fe ka mafolofolo se sengwe le se sengwe seo Modimo wa legodimo a se nyakelago Tempele ya gagwe, gore Modimo a se ke a tsoga a nkgalefetše goba a galefetše bao ba tlago ntlhatlama bogošing. Le se ke la ntšhiša baprista, Balefi, baopedi, baleti, bašomi, goba mang le mang yo a direlago Tempele yeo se sengwenyana, metšhelo. “Wena, Esra, o šomiše bohlale bjo o bo filwego ke Modimo, gomme o kgethe babušiši le baahlodi gore ba buše batho ka moka ba Yufratese-Bodikela bao ba phethago melao ya Modimo wa gago. Ba ba sa tsebego melao yeo o ba rute yona. Yo mongwe le yo mongwe yo a sa phethego melao ya Modimo wa gago goba ya mmušo a otlwe ka pela – a bolawe, goba a rakwe nageng, goba a lefe ka tšhelete, goba a lahlelwe kgolegong.” Esra a re: “A go retwe Morena, Modimo wa borakgolokhukhu ba rena! O dirile gore kgoši a ikemišetše go hlompha Tempele ya Morena kua Jerusalema ka mokgwa wo mobjalo. Modimo o dirile gore kgoši le baeletši ba gagwe le bahlankedi bohle ba maatla ba ntebelele ka botho; Morena Modimo wa ka o ntšhegofaditše gomme a mpha maatla a go kgobokanya mantona a dikgorwana a Israele gore a boele le nna morago.” Šea mantona a dikgorwana le ba mašika a bona ba ba bego ba le bothopša kua Babilonia ba ba ilego ba boela Jerusalema gammogo le Esra mehleng ya ge Artazerksese e le kgoši: Gershome, wa kgorwana ya Finease Daniele, wa kgorwana ya Ithamara Hatushe, morwa wa Shekania, wa kgorwana ya Dafida Sakaria, wa kgorwana ya Paroshe, a na le banna ba lekgolo le masome a fetšago seatla ba kgorwana ya gagwe; ba be ba ngwadišitšwe ka mašika a bona Elioenai, morwa wa Seragia, wa kgorwana ya Pahate-Moaba, a na le banna ba makgolo a mabedi Shekania, morwa wa Jahasiele, wa kgorwana ya Satu, a na le banna ba makgolo a mararo Ebede, morwa wa Jonathane, wa kgorwana ya Adine, a na le banna ba masome a mahlano Jeshaya, morwa wa Athalia, wa kgorwana ya Elamo, a na le banna ba masome a a šupago Sebadia, morwa wa Mikaele, wa kgorwana ya Shefatia, a na le banna ba masome a seswai Obadia, morwa wa Jehiele, wa kgorwana ya Joaba, a na le banna ba makgolo a mabedi le lesome le metšo ye seswai Shelomite, morwa wa Josifia, wa kgorwana ya Bani, a na le banna ba lekgolo le masome a a selelago Sakaria, morwa wa Bebai, wa kgorwana ya Bebai, a na le banna ba masome a mabedi a metšo ye seswai Johanane, morwa wa Katane, wa kgorwana ya Asgade, a na le banna ba lekgolo le ba lesome Elifelete le Jeiele le Shemaya, ba kgorwana ya Adonikamo, ba na le banna ba masome a a selelago; bona ba ile ba boa ka morago ga lebaka Utai le Sakure, ba kgorwana ya Bigbai, ba na le banna ba masome a a šupago *** *** *** *** *** *** *** *** *** *** Ke ile ka bokanya sehlopha seo kgauswi le mokero wo o elelago motseng wa Ahaba, gomme ra hloma mešaša, ra dula moo matšatši a mararo. Ka bona gore sehlopheng seo go na le baprista, eupša ga go na Balefi. Ka bitša baetapele ba: Eliesere, Ariele, Shemaya, Elnathane, Jaribe, Elnathane, Nathane, Sakaria le Meshulamo, gammogo le morutiši Joyaribe le morutiši Elnathane. Ka ba roma go Ido, moetapele wa Bajuda ba ba dulago Kasifia, gore ba yo kgopela yena le badirišani ba gagwe, e lego bašomi ba ka Tempeleng, gore ba re romele batho ba ba ka šomago ka Tempeleng ya Modimo wa rena. Ka ge Modimo a be a re šegofaditše ba ile ba re romela Sherebia, monna wa temogo, Molefi wa kgorwana ya Magli, gomme yena a tla le barwa ba gagwe le banababo ba lesome le metšo ye e šupago. Ba ile ba romela le Hashabia le Jeshaya, ba kgorwana ya Merari, gotee le ba masome a mabedi ba meloko ya bobona. Le gona go be go na le bašomi ba ka Tempeleng ba makgolo a mabedi le masome a mabedi bao borakgolokhukhu ba bona ba bego ba sa le ba kgethwa ke Kgoši Dafida le bahlankedi ba gagwe gore ba thuše Balefi. Ka moka ga bona ba be ba ngwadišitšwe ka maina. Gona moo mokerong wa Ahaba ke ile ka laela gore bohle re ikone dijo, gore re ikokobetše pele ga Modimo wa rena re mo kgopele gore a re šireletše leetong, rena le bana le batšofadi gotee le dithoto tšohle tša rena. Ke ile ka lewa ke dihlong go kgopela kgoši gore a re fe madira le banamedi ba dipere bao ba tlago tšama ba re šireletša manabeng leetong la rena, ka gobane ke be ke mmoditše gore Modimo wa rena o loketše yo mongwe le yo mongwe yo a mmotago, eupša o galefela mang le mang yo a mo furalelago, gomme o a mo otla. Ka gona ra ikona dijo, ra rapela gore Modimo a re šireletše, mme yena a kwa dithapelo tša rena. Gare ga baetapele ba baprista ke ile ka kgetha Sherebia le Hashabia le ba bangwe ba lesome. Ka napa ka ela silibera le gauta le dibjana tše kgoši le baeletši ba gagwe le bahlankedi le Baisraele ba ba bego ba le bothopša ba bego ba di abile gore di tle di šomišwe ka Tempeleng, ka di neela baprista. Tše ke ilego ka ba fa tšona šedi: silibera ya dikilokramo tše dikete tše lesome le tše senyane le makgolo a mahlano dibjana tša silibera tše lekgolo tša dikilokramo tše masome a a selelago gauta ya dikilokramo tše dikete tše tharo meruswi ya gauta ye masome a mabedi ya dikilokramo tše seswai le seripa meruswi ye mebedi ye mebotse ya mphiri ye e phadimišitšwego ya go lekana le meruswi ya gauta ka theko *** Ka re go bona: “Lena le ba bakgethwa go Morena, Modimo wa borakgolokhukhu ba lena, gomme le tšona dibjana ka moka tša silibera le tša gauta tše di abetšwego yena e le dimpho tša boithaopo ke tše dikgethwa. Le di lote gabotse go fihlela ge le goroga Tempeleng. Fao le di ele ka diphapošing tša Tempele gomme le di neele baetapele ba baprista le ba Balefi le mantona a dikgorwana a setšhaba sa Israele kua Jerusalema.” Ka gona baprista le Balefi ba amogela silibera le gauta le dibjana gore ba di iše Tempeleng Jerusalema. E be e le ka letšatši la lesome le metšo ye mebedi la kgwedi ya mathomo ge re tloga mokerong wa Ahaba re leba Jerusalema. Modimo wa rena a re šireletša, a re boloka gore re se hlaselwe ke manaba, le gore re se lalelwe tseleng. Ge re fihla Jerusalema ra khutša matšatši a mararo. Ka letšatši la bone ra ya Tempeleng, ra ela silibera le gauta le dibjana, gomme ra di neela moprista Meremote, morwa wa Uria. Yena o be a na le Eleasara, morwa wa Finease, gotee le Balefi ba: Josabade, morwa wa Jeshua, le Noadia, morwa wa Binui. Tšohle di ile tša balwa, tša elwa, gomme boima bja tšona bja ngwalwa le semeetseng. Ke moka bohle bao ba bego ba boile bothopša ba direla Morena Modimo wa Israele dihlabelo. Ba direla Baisraele bohle dihlabelo tša go tšhungwa ka moka ka dipoo tše lesome le tše pedi. Ba hlaba le dikgapa tše masome a senyane le metšo ye e selelago, le dikwanyana tše masome a a šupago a metšo ye e šupago, le tšona ya ba dihlabelo tša go tšhungwa ka moka. Ba dira le sehlabelo sa tshwarelo ya dibe ka diphooko tše lesome le tše pedi. Diruiwa tšeo ka moka ya ba tša go direla Morena sehlabelo sa go tšhungwa ka moka. Ba ile ba tšea le lengwalo lela ba go le fiwa ke kgoši, ba le neela babušiši le bahlankedi ba selete sa Yufratese-Bodikela, gomme bona ba napa ba thuša setšhaba le ka tša tirelo ya sona ya Tempeleng. Ka morago ga tšeo ka moka baetapele ba setšhaba sa Israele ba ile ba tla ba mpotša gore setšhaba le baprista le Balefi ga se ba ikgetholla go ditšhaba tša dinaga tša kgauswi, e lego Amone le Moaba le Egepeta, goba go Bakanana le Bahete le Baperise le Bajebuse le Baamore. Ba be ba dira tšona dilo tšela tša makgapha tše di bego di dirwa ke ditšhaba tšeo. Bajuda ba be ba nyala basadi ba merafe yeo, ka gona setšhaba se sekgethwa sa Modimo sa tswakana nayo. Baetapele le bahlankedi e be e le bona dithwadi moo tabeng yeo ya go se botegele Modimo. Ge ke ekwa seo ka ikgagolela diaparo tša ka gare le seaparo sa ka ntle, ka itumola moriri le maledu, ka dula fase ke gakanegile kudu. Batho ka moka bao ba bego ba tšhošitšwe ke seo Modimo wa Israele a bego a se boletše mabapi le go se botege ga bao ba bego ba boile bothopša, ba ile ba thoma go nkgobokanela. Ka dula moo ke gakanegile kudu go fihlela ka nako ye go dirwago sehlabelo sa mantšiboa. Ya re ge nako yeo e fihla, ka emelela moo ke bego ke itshola gona, ke sa apere diaparo tšela di gagogilego, ka khunama ka rapela ke emišeditše matsogo go Morena Modimo wa ka. Ka re: “Joo, Modimo, ke lewa ke dihlong, ke tšhaba le go emiša sefahlego pele ga gago. Dibe tša rena di hlatlagane, di re pipile dihlogo; molato wa rena o phagame o fihla magodimong. Ge e sa le go tloga mehleng ya borakgolokhukhu ba rena go fihlela gonabjale, rena setšhaba sa gago re dira dibe kudu. Ka baka la dibe tša rena, rena le magoši a rena le baprista re gafetšwe diatleng tša magoši a dinaga di šele, ra bolawa, ra hlakolwa, ra ba ra ba mathopša. Re gobošitšwe la go lahlwa, gomme le bjale re sa gobošwa. Bjale wena, Morena Modimo wa rena, o re šoketše lebakanyana fela, gomme wa dira gore ba bangwe ba rena ba phologe bokgobeng, mme ba tle ba dulele sa ruri mo felong mo gokgethwa. O tsošološitše bophelo bja rena wa bo mpshafatša le ge re be re le bokgobeng. Re be re le makgoba, eupša wa se re tlogele bokgobeng. O dirile gore magoši a Persia a re šokele gomme a re dumelele gore re phele lefsa, le gore re tsoše Tempele ya gago ye e bego e le marope, le gore re tle re bolokege mo Juda le Jerusalema. “Eupša bjale, Modimo wa rena, re ka hlwa re sa reng ka morago ga tše di šetšego di diregile? Re boeleditše re tshetše ditaelo tša gago tše o re filego tšona ka baprofeta, bahlanka ba gago. Ba re boditše gore naga ye re yago go yona ke naga ye e sego ya hlweka, ka gore batho ba ba dulago go yona ba e tladitše ditiro tša makgapha le tša bohlola ka moka. Ba re boditše gore ge re nyaka go tia le go ipshina ka monono wa naga yeo le go e tlogelela ditlogolo tša rena go ya go ile, re se ke ra tsoga re nyalelane le batho ba gona, goba re ba thušitše go atlega le go phela gabotse. Ešita le ka morago ga tšohle tše di re hlagetšego ka baka la dibe tša rena le melato ya rena, re tseba gore wena, Modimo wa rena, o re otlile gannyane go fetwa ke ka moo re bego re swanela, gomme o re lesitše ra ba le mašaledi a. Bjale re ka thoma bjang go tshela melao ya gago mme ra nyalelana le batho ba ba dirago bohlola bjoo? Ge re ka dira bjalo o tla re galefela mo e lego gore o tla re fediša taa, gomme wa se lese motho e eba lešaledi goba a phologa. Wena, Morena Modimo wa Israele, o dira ka toka, gomme o re phološitše, ra ba mašaledi le lehono. Re ipolela molato wa rena go wena, ka gobane ka baka la molato wo wa rena ga go yo a ka emago pele ga gago.” Eitše ge Esra a sa itahletše fase a rapela pele ga Tempele a lla a bolela dibe tše, Baisraele ba bantšintši, banna le basadi le bana, ba mo kgobokanela, ba lla gabohloko. Shekania, morwa wa Jehiele, wa kgorwana ya Elamo, a re go Esra: “Re hlanogetše Modimo wa rena ra nyala basadi ba šele, fela kholofelo e sa le gona ya gore Baisraele ba tšwe molatong wo. Bjale a re eneng pele ga Modimo wa rena gore re tla bušetša basadi ba le bana ba bona morago. Re tla dira se wena, mong wa ka, le ba bangwe ba ba phethago ditaelo tša Modimo ba re eletšago gore re se dire. Re tla dira seo melao ya Modimo e se nyakago. Taba yeo e magetleng a gago. Re ema le wena, ka gona tia maatla o e phethe!” Ka gona Esra a thoma go eniša baetapele ba baprista le ba Balefi le ba setšhaba ka moka gore ba tla dira seo Shekania a se boletšego. A napa a tloga pele ga Tempele a tsena ka phapošing ya Johanane, morwa wa Eliashibe, gomme a lala a lla ka baka la go se botege ga mathopša. A se ke a ja goba a nwa selo. Baetapele ba setšhaba ba laela gore go rongwe batseta Jerusalema le nageng ya Juda ka moka gore ba botše batho ka moka bao ba boilego bothopša ba tle ba kopane Jerusalema. Batseta bao ba laelwa gore ba ba tsebiše le gore ge motho a ka se tle moo gwa ba gwa feta matšatši a mararo, se sengwe le se sengwe se e lego sa gagwe se tla thopša, gomme yena o tla kgaolwa setšhabeng. *** Moo matšatšing ao a mararo, ka letšatši la masome a mabedi la kgwedi ya senyane, banna bohle ba ba dulago nageng ya Juda le ya Benjamene ba tla Jerusalema gomme ba kgobokana ka kgorong ya Tempele. Pula e be e ena kudu, gomme batho ba thothomela ka baka la yona le ka baka la bogolo bja molato. Moprista Esra a ema a re go bona: “Ga se la botega gomme le godišeditše Baisraele molato ka go nyala basadi ba ditšhaba di šele. Bjale ge, ipoleleng dibe tša lena go Morena, Modimo wa borakgolokhukhu ba lena, gomme le direng se se mo kgahlago. Ikaroganyeng le batho ba naga ye le basadi ba lena ba ditšhaba di šele.” Batho ba mo fetola ba goa ba re: “Go lokile! Re swanetše go dira se o se bolelago. Fela re ba bantši le gona pula e na kudu. Re ka se eme mo ntle. Taba ye e ka se phethwe ka tšatši le tee goba a mabedi, ka gobane re ba bantši kudu bao re dirilego sebe se. Baetapele ba rena a ba šale Jerusalema ba hlokomele taba ye. Gomme yo mongwe le yo mongwe yo a nago le mosadi wa setšhaba se šele a tle ka nako ye e beilwego, gotee le baetapele le baahlodi ba motse wa gabo. Ka tsela ye kgalefo ya Modimo tabeng ye e tla široga.” Go ile gwa se be le yo a ganago leano leo, ge e se Jonathane, morwa wa Asahele, le Jagsera, morwa wa Tikba, mme bona ba be ba tlatšwa ke Meshulamo le Shabetai wa Molefi. Mathopša ao a bego a boile a ile a kwana le leano leo, ka gona moprista Esra a ikgethela banna gare ga mantona a dikgorwana, gomme a ba ngwala ka maina. Ya re ka letšatši la pele la kgwedi ya lesome ba thoma go nyakišiša, gomme kgweding tše tharo tše di latelago ke ge ba nyakišišitše banna ka moka ba ba bego ba nyetše basadi ba šele. Le ke lenaneo la banna ba ba bego ba na le basadi ba šele: Baprista e be e le ba ba latelago, gomme ba ngwadišitšwe ka dikgorwana tša bona: Kgorwana ya Jeshua le banababo, barwa ba Jotsadaka: Maasea, Eliesere, Jaribe le Gedalia. Ba ile ba tshepiša gore ba tla bušetša basadi ba bona morago, gomme ba dira sehlabelo sa dibe tša bona ka kgapa. Kgorwana ya Imere: Hanani le Sebadia Kgorwana ya Harime: Maasea, Eliya, Shemaya, Jehiele le Usia Kgorwana ya Pashure: Elioenai, Maasea, Ishmaele, Nathaniele, Josabade le Elasa Balefi: Josabade le Shimi le Kelaya, yo a bego a bitšwa le ka la Kelita, le Petagia le Juda le Eliesere Baopedi: Eliashibe Baleti ba masoro a Tempele: Shalume le Teleme le Uri Baisraele ba bangwe: Kgorwana ya Paroshe: Ramia, Jisia, Malkia, Miyamine, Eleasara, Malkia le Benaya Kgorwana ya Elamo: Matania, Sakaria, Jehiele, Abdi, Jeremote le Eliya Kgorwana ya Satu: Elioenai, Eliashibe, Matania, Jeremote, Sabade le Asisa Kgorwana ya Bebai: Johanane, Hanania, Sabai le Atelai Kgorwana ya Bani: Meshulamo, Maluke, Adaya, Jashube, Sheale le Jeremote Kgorwana ya Pahate-Moaba: Adna, Kelale, Benaya, Maasea, Matania, Betsaliele, Binui le Manase Kgorwana ya Harime: Eliesere, Jisia, Malkia, Shemaya, Simeone, Benjamene, Maluke le Shemaria *** Kgorwana ya Hashumo: Matenai, Matata, Sabade, Elifelete, Jeremai, Manase le Shimi Kgorwana ya Bani: Maadai, Amramo, Uele, Benaya, Bedia, Keluhi, Bania, Meremote, Eliashibe, Matania, Matenai le Jaasai *** *** *** Kgorwana ya Binui: Shimi, Shelemia, Nathane, Adaya, Makanadibai, Shashai, Sharai, Asarele, Shelemia, Shemaria, Shalume, Amaria le Josefa *** *** *** *** Kgorwana ya Nebo: Jeiele, Matitia, Sabade, Sebina, Jadai, Joele le Benaya Banna bao ka moka ba be ba nyetše basadi ba šele. Ba ile ba ba hlala, gomme ba ba bušetša morago le bana ba bona. Tše ke ditaba tša Nehemia, morwa wa Hakalia. Ka kgwedi ya Kislebe, ngwageng wa masome a mabedi wa ge Artazerksese e le kgoši ya Persia, nna, Nehemia, ke be ke le Susa, motsengmošate. Hanani, yo mongwe wa bomorwarre, a tla le banna ba bangwe ba etšwa Juda, gomme ka ba botšiša ka Jerusalema le ka Bajuda ba gaborena ba ba bego ba boile bothopša Babilonia. Ba mpotša gore mašaledi ao a boetšego nageng ya bona a phela ka bothata kudu, le gore batho ba šele ba ba agišanego le bona ba a ba nyatša. Ba ile ba mpotša le gore merako ya Jerusalema a kgeregile, le gore masoro a tšhumilwe. Ge ke ekwa tšeo ka dula fase ka lla. Ka tšea matšatši ke nyamile, ke sa je selo. Ka rapela Modimo ka re: “Joo, Morena Modimo wa legodimo, o yo mogolo, o a boifega! O botegela kgwerano ya gago le bao ba go ratago gape ba phethago ditaelo tša gago. Ntebelele, Morena, gomme o theeletše thapelo ya ka ge ke rapelela bahlanka ba gago, Baisraele, bošego le mosegare. Ke ipolela gore rena setšhaba sa Israele re dirile dibe. Le nna le bešo re dirile dibe. Re go phošeditše kudu, gomme ga se ra phetha melao le ditaelo tše o re filego tšona ka Moshe, mohlanka wa gago. Bjale gopola se o kilego wa se botša Moshe wa re: ‘Ge lena setšhaba sa Israele le sa mpotegele ke tla le gašanya le ditšhaba. Eupša ge le ka sokologela go nna gomme la dira tše ke le laetšego tšona, ke tla le kgoboketša ka le bušetša moo ke go kgethilego gore ke khunamelwe gona, le ge le gašane go fihla mafelelong a lefase.’ “Morena, ba ke bahlanka ba gago, ke setšhaba sa gago se o se hlakodišitšego ka maatla a gago a magolo le bonatla. Hle, nke o theeletše thapelo ya ka le dithapelo tša bahlanka ba gago bohle bao ba ratago go go boifa. Nke o nkatle lehono gomme o dire gore kgoši e be yo botho go nna.” Mehleng yeo ke be ke le wa go fa kgoši beine. Ka le lengwe la matšatši ge go šetše go fetile dikgwedi tše nne, ka kgwedi ya Nisane, ya re ge Kgoši Artazerksese a le dijong, ka mo išetša beine. O be a se a ka a mpona ke nyamile, ka gona a mpotšiša a re: “Ke ka baka lang o nyamile? Ga o lwale; ka gona o swanetše go ba o tshwentšwe ke se sengwe.” Ke ile ka tšhoga, ka mo fetola ka re: “Kgoši o re phelele go ya go ile! Nka se nyame bjang ge motse wo go wona go bolokilwego borakgolokhukhu ba ka e le marope, le masoro a wona a swele thokgethokge?” Kgoši a mpotšiša a re: “Bjale o kgopelang?” Ka rapela Modimo wa legodimo, gomme ka napa ka re go kgoši: “Ge ke go kgahla, kgoši, gomme o dumela se ke se kgopelago, ntumelele ke ye nageng ya Juda, motseng woo go wona go bolokilwego borakgolokhukhu ba ka, gore ke yo o tsošološa.” Kgoši a mpotšiša mohumagadi a dutše le yena a re: “O tla tšea nako ye kaakang o ile, gomme wa boa neng?” Ge ke seno mmotša a dumela. Ke moka ka mo kgopela gore ge a dumela a mphe mangwalo a ke tlago a iša go babušiši ba selete sa Yufratese-Bodikela, ao a ba laelago gore ba ntumelele go ya nageng ya Juda. Ka ba ka kgopela le lengwalo la go ya go Asafo, mohlokomedi wa sethokgwa sa mošate, la go mo laela gore a mphe dikota tša masoro a sebo sa Tempele, le tša merako ya motse, le tša ntlo yeo ke bego ke tla dula ka go yona. Kgoši a mpha tšohle tše ke ilego ka di kgopela, ka gore Modimo o be a na le nna. Kgoši a roma balaodi ba madira le banamedi ba dipere gore ba ye le nna, mme ka napa ka wela tsela ya go ya Yufratese-Bodikela. Ge ke fihla moo ka nea babušiši mangwalo a go tšwa go kgoši. Eupša Sanbalate, wa motse wa Bethe-Horone, le Tobia, mohlankedi wa selete sa Amone, ba kwa gore go tlile motho yo mongwe go tlo hola setšhaba sa Israele, gomme ba befelwa kudu. Ge ke fihla Jerusalema ka tšea matšatši a mararo ke sa botše motho se Modimo a ntutueditšego gore ke se direle motse woo. Bošego ka tsoga ka tloga le banna ba se bakae. Seruiwa se re ilego ra tloga naso e be e le fela pokolo ye ke bego ke e nametše. E be e sa le bošego ge ke etšwa motseng ka Lesoro la Moeding ke feta Mothopong wa Mamokebe ke leba Lesorong la Sethobolong, ka tšama ke lebeledišiša merako ye e kgerešitšwego ya motse le masoro a a swelego. Ka fetela Lesorong la Mothopong le Mogobeng wa Kgoši. Pokolo yeo ke bego ke e nametše ya thibelwa ke thogorogo, ka fao ka rotoga ka moedi wa Kidrone, ke tšama ke lekola morako. Ke moka ka boela motseng, gomme ka tsena ka Lesoro la Moeding. Bahlankedi ba moo ba be ba sa tsebe gore ke be ke ile kae, le gore ke be ke ile go dira eng. Ke be ke sešo ka botša Bajuda ba gešo selo – baprista, bakgomana, bahlankedi, goba mang le mang yo a bego a tlilo thuša modirong. Bjale ya ba gona ke ba botšago ke re: “Bonang mathata a re lego mo go ona ka ge motse wa Jerusalema e le marope, le masoro a wona a swele! A re tsošološeng merako ya motse gomme re ikhutšeng go goboga.” Ke ile ka ba botša le ka moo Modimo a bilego le nna ka gona, le seo kgoši a mpoditšego sona. Bona ba mphetola ba re: “A re thomeng go aga!” Ba napa ba ipeakanyetša modiro woo wo mobotse. Ge Sanbalate le Tobia gotee le Moarabia yo a bego a bitšwa Gesheme ba ekwa seo re ikemišeditšego go se dira, ba re nyefola ba re kwera ba re: “Ke eng se le se dirago? Kgane le rata go tsogela kgoši maatla?” Ka ba fetola ka re: “Modimo wa legodimo o tla re atla. Rena, bahlanka ba gagwe, re yo thoma go aga. Ga go se e lego sa lena fa Jerusalema, ga go buše lena felo fa, ebile ga se marope a lena.” Eliashibe, Moprista yo Mogolo, gotee le baprista ba gabo ba ile ba tsošološa Lesoro la Dihuswane, ba le kgakola ka go le šegofatša, gomme ba le tsenya ditswalelo. Ba kgakola morako go fihla Toreng ya Lekgolo le Toreng ya Hananele ka tirelo. Banna ba Jeriko ba aga karolo ye e latelago yeo. Sakure, morwa wa Imri, a aga karolo ye e latelago ya banna ba Jeriko. Ba kgorwana ya Senaa ba aga Lesoro la Dihlapi. Ba hloma dikota tša lona gomme ba le tsenya ditswalelo, ba le direla mapheko le mašoba a ona. Meremote, morwa wa Uria, setlogolo sa Kotse, a aga karolo ye e latelago. Meshulamo, morwa wa Berekia, setlogolo sa Meshesabele, a aga karolo ye e latelago ya Meremote. Tsadoko, morwa wa Baana, a aga karolo ye e latelago ya Meshulamo. Banna ba Tekoa ba aga karolo ye e latelago ya Tsadoko, fela baetapele ba motse ba gana go dira mošomo woo wo boima ba bego ba o filwe ke bahlokomedi. Joyada, morwa wa Paseage, le Meshulamo, morwa wa Besodia, ba tsošološa Lesoro le Letala. Ba hloma dikota tša lona gomme ba le tsenya ditswalelo, ba di direla mapheko le mašoba a ona. Melatia wa Gibeone le Jadone wa Meronote le banna ba bangwe ba Gibeone le ba Mitsepa ba tsošološa karolo ye e latelago ya bona, go yo fihla ntlong ya mmušiši wa Yufratese-Bodikela. Usiele, morwa wa Harahaya, yo e bego e le morudi wa gauta, a aga karolo ye e latelago ya bona. Hanania, yo e bego e le modiri wa ditlolo tša go nkga bose, a aga karolo ye e latelago ya Usiele, a e tsošološa go yo fihla Morakong wa Phaphathi. Refaya, morwa wa Hure, yo e bego e le mmušiši wa seripagare sa selete sa Jerusalema, a aga karolo ye e latelago ya Hanania. Jedaya, morwa wa Harumafo, a aga karolo ye e lego kgauswi le ntlo ya gagwe. Hatushe, morwa wa Hashabnea, a aga karolo ye e latelago ya Jedaya. Malkia, morwa wa Harime, le Hashube, morwa wa Pahate-Moaba, ba aga karolo ye e latelago ya Hatushe gotee le Tora ya Dionto. Shalume, morwa wa Loheshe, mmušiši wa karolo ye nngwe ya selete sa Jerusalema, a aga karolo ye e latelago ya bona. Barwedi ba gagwe ba ile ba mo thuša mošomong woo. Hanune le batho ba motse wa Sanoage ba tsošološa Lesoro la Moeding. Ba le tsenya ditswalelo, ba di direla mapheko le mašoba a ona, gomme ba tsoša morako botelele bja dimetara tše makgolo a mane le masome a a selelago go yo fihla Lesorong la Sethobolong. Malkia, morwa wa Rekabe, mmušiši wa Bethe-Kereme, a tsošološa Lesoro la Sethobolong. A le tsenya ditswalelo, gomme ba di direla mapheko le mašoba a ona. Shalume, morwa wa Kolohose, mmušiši wa selete sa Mitsepa, a tsošološa Lesoro la Mothopong. A le direla tlhaka, a le tsenya ditswalelo, gomme a di direla mapheko le mašoba a ona. Mogobeng wa Mokero a aga morako kgauswi le serapa sa mošate, go yo fihla magatong a a theogago a tloga motseng wa Dafida. Nehemia, morwa wa Asbuke, mmušiši wa seripagare sa selete sa Bethe-Tsure, a aga karolo ye e latelago ya Shalume go yo fihla go lebana le mabitla a ba lapa la Dafida, le go yo fihla mogobeng le ntlong ya bahlabani. Balefi ba ba ilego ba tsošološa dikarolo tša morako šeba: Rehume, morwa wa Bani, o ile a aga karolo ye e latelago ya Nehemia; Hashabia, mmušiši wa seripagare sa selete sa Keila, a agela batho ba gagwe karolo ye e latelago ya Rehume; Binui, morwa wa Henadade, mmušiši wa seripagare sa bobedi sa selete sa Keila, a aga karolo ye e latelago ya Hashabia; Esere, morwa wa Jeshua, mmušiši wa Mitsepa, a aga karolo ye e latelago ya Binui go lebana le morotoga wa go ya bobolokelong bja dibetša, go yo fihla sekhutlong sa morako; Baruke, morwa wa Sabai, a aga karolo ye e latelago ya Esere, go yo fihla seferong sa lapa la Eliashibe, Moprista yo Mogolo; Meremote, morwa wa Uria, setlogolo sa Kotse, a aga karolo ye e latelago ya Baruke, go yo fihla ka mafelelong a ntlo ya Eliashibe. Baprista ba ba ilego ba tsošološa dikarolo tše di latelago tša morako šeba: Baprista ba tikologong ya Jerusalema ba ile ba aga karolo ye e latelago ya Meremote; Benjamene le Hashube ba aga karolo ye e latelago ya baprista, ye e bego e le go lebana le ntlo ya bona; Asaria, morwa wa Maasea, setlogolo sa Anania, a aga karolo ye e latelago ya Benjamene le Hashube, ye e bego e le go lebana le ntlo ya gagwe; Binui, morwa wa Henadade, a aga karolo ye e latelago ya Asaria, go tloga ntlong ya Asaria go yo fihla sekhutlong sa morako; Palale, morwa wa Usai, a aga karolo ye e latelago ya Binui, go thoma sekhutlong sa morako le toreng ya ntlo ya ka godimo ya kgoši kgauswi le kgoro ya baleti; Pedaya, morwa wa Paroshe, a aga karolo ye e latelago ya Palale, go yo fihla ka bohlabela, go lebana le Lesoro la Meetse le tora ye telele go feta meago ye mengwe. Karolo ye e be e le kgauswi le karolo yela ya motse e bego e bitšwa Ofele, mola go bego go dula bašomi ba ka Tempeleng. *** Banna ba Tekoa ba aga karolo ye e latelago ya Pedaya, ya ba ya bobedi ya bona, go tloga go lebana le tora yela ya go feta meago ye mengwe go yo fihla morakong wa Ofele. Baprista ba bangwe ba aga karolo ye e latelago ya banna ba Tekoa, go tloga Lesorong la Dipere go ya leboa, yo mongwe le yo mongwe a aga go lebana le ntlo ya gagwe. Tsadoko, morwa wa Imere, a aga karolo ye e latelago ya bona, ye e bego e lebane le ntlo ya gagwe. Shemaya, morwa wa Shekania, yena moleti wa Lesoro la ka Bohlabela, a aga karolo ye e latelago ya Tsadoko. Hanania, morwa wa Shelemia, le Hanune, morwa wa boselela wa Tsalafo, ba aga karolo ye e latelago ya Shemaya, ya ba ya bobedi ya bona. Meshulamo, morwa wa Berekia, a aga karolo ye e latelago ya bona go lebana le phapoši ya gagwe. Malkia, morudi wa gauta, a aga karolo ye e latelago ya Meshulamo go yo fihla ntlong yela ya bašomi ba Tempeleng le babapatši; yona e be e lebane le Lesoro la Kgobokanyo ya Bahlabani, le go yo fihla phapošing ye e bego e le godimo ga sekhutlo sa morako. Barudi ba gauta le babapatši bona ba aga karolo ya mafelelo, go tloga phapošing yela ya sekhutlong go yo fihla Lesorong la Dihuswane. Ge Sanbalate a ekwa gore rena Bajuda re thomile go tsošološa morako, a tlala pelo a galefa, gomme a re kwera. A bolela pele ga bagwera ba gagwe le madira a Basamaria a re: “Etse Majudanyana a a re a dirang? Na a ikemišeditše go tsošološa motse wo? Kgane a gopola gore ka go dira dihlabelo a ka fetša mošomo wo ka letšatši le tee? Kgane ba ka tšošološa maswika a go aga thogorogong ye e tšhumilwego?” Tobia o be a eme gona moo kgauswi le yena, gomme a mo tlatša a re: “Se ba ka se agago le phukubje e ka se kgereša.” Ka rapela ka re: “Jonna, Modimo wa rena, ekwa ka moo ba re kwerago ka gona. A dikwero tšeo di boele go bona. A ba hlakolwe tšohle tše ba nago le tšona, ba be ba išwe bothopša nageng e šele. O se ke wa phumola molato wa bona, o se ke wa ba lebalela sebe sa bona, ka gobane ba rogile rena bao re agago.” Fela rena ra no tšwela pele le go tsošološa morako, gomme go se gwa ya kae ra be re agile go fihla bogareng bja bogodimo bja wona, ka gore batho ba be ba šoma ka dipelo tša bona ka moka. Eupša Sanbalate le Tobia le batho ba Arabia le ba Amone le ba Ashdode ba kwa gore re šetše re tšwele tema ge re tsošološa morako wa Jerusalema, le gore mo go kgeregilego go a thibja, gomme ba tlala pelo kudu. Ka gona ka moka ga bona ba lakana go tlo hlasela Jerusalema le go ferekanya batho, eupša rena ra rapela Modimo wa rena, gomme ra bea banna gore ba lete motse bošego le mosegare. Bajuda ba be ba hlamile kopelo ba e opela ba re: “Re lapišwa ke go rwala merwalo; thogorogo yona e sa le ye ntši. Re ka se kgone go tsošološa morako wo.” Manaba a rena a be a gopola gore re ka se a bone goba ra tseba se a se dirago go fihlela ge a re hlasela, a re bolaya mme a emiša mošomo wa rena. Bajuda ba ba bego ba agile le manaba a rena ba be ba fela ba etšwa mafelong a a fapafapanego ba tlilo re botša gore re boele go bona. Eupša nna ka neela setšhaba sa gešo ditšhoša le marumo le mesebe, gomme ka ba bea ka dikgorwana ka morago ga morako, ba iphihlile moo morako o bego o sešo wa fela. Ke ile ka bona gore setšhaba se tshwenyegile, ka gona ka se botša le bakgomana le bahlankedi ba sona ka re: “Le se ke la boifa manaba a rena. Gopolang gore Morena ke yo mogolo, gomme le hlabanele batho ba gabolena le bana ba lena le basadi ba lena le magae a lena.” Manaba a rena a ile a kwa gore re lemogile maano ao ba bego ba a loga, gomme ba tseba gore Modimo o sentše morero woo wa bona. Ka moka ga rena ra napa ra boela morakong, yo mongwe le yo mongwe a ya modirong wa gagwe. Go tloga mohlang woo sekgao se sengwe sa banna ba ka sa šoma, mola se sengwe se itlhamile ka marumo le dikotse le mesebe se apere diaparo tša ntwa. Baetapele ba rena ba be ba kwana le batho ba ba agago morako. Ba ba bego ba rwala dikago ba be ba šoma ka letsogo le lengwe, ka le lengwe ba swara letsolo, gomme bohle ba ba bego ba aga ba be ba tlemeletše ditšhoša mathekeng. Monna yo a bego a swanetše go hlabela batho mokgoši ka phalafala o be a ema kgauswi le nna. Ke ile ka botša setšhaba le bakgomana le baetapele ka re: “Mošomo ke o mogolo mme o nabile mo e lego gore re arogane kudu mo morakong. Mo le kwago phalafala e lla le re phalalele. Modimo wa rena o tla re lwela.” Ka baka leo tšatši le lengwe le le lengwe, go tloga ka masa go fihlela bošego ge dinaledi di bonala, sekgao se sengwe sa rena se be se šoma morakong, mola se sengwe se letile ka marumo. Ka nako yeo ka botša setšhaba gore mookamedi yo mongwe le yo mongwe wa bona gotee le mothuši wa gagwe ba robale Jerusalema, gore ba lale ba re letile bošego gomme mosegare ba hlwe ba šoma. Le bošego nna le meloko yešo le bahlanka ba ka le bao ba bego ba dula ba ntetile re be re sa apole diaparo. Bohle re be re dula re swere dibetša tša rena. Ka nako ye nngwe banna le basadi ba bantši ba setšhaba ba kile ba ngongoregela Bajuda ba gabobona. Ba bangwe ba re: “Re atetšwe ke thari, re nyaka mabele gore re je, re phele.” Ba bangwe ba re: “Re ile ra tlemega go beeletša mabele ka mašemo a rena le dirapa tša rena tša merara le dintlo tša rena gore re se bolawe ke tlala.” Ba bangwe le bona ba re: “Re ile ra gapeletšega go adima tšhelete gore re tle re ntšhetše mašemo a rena le dirapa tša rena tša merara motšhelo wa mošate. Re batho ba tee le Bajuda ba gaborena. Kgane bana ba rena ga ba swane le ba bona? Eupša rena ba rena re tlemegile go ba dira makgoba. Barwedi ba rena ba bangwe ba šetše ba rekišitšwe ya ba makgoba. Gomme re a hlaka ka gore mašemo a rena le dirapa tša rena tša merara e šetše e le tša ba bangwe.” Ge ke ekwa dillo tšeo tša bona ka befelwa kudu, gomme ka lebeledišiša taba yeo gabotse, ka omanya bakgomana le bahlankedi ba setšhaba ka re go bona: “Le jeletša batho ba gabolena!” Ka ba rapela pitšo ye kgolo ka re: “Re lekile ka mo re ka kgonago ka gona go rekolla batho ba gabolena ba Bajuda bao ba bego ba ithekišitše ditšhabeng di šele. Bjale le gapeletša batho ba gabolena gore ba ithekiše, gore le bona re tle re ba rekolle!” Bakgomana ba homola ba hloka se ba ka se bolelago. Ke moka ka re: “Se le se dirago ga se botse! Le swanetše go boifa Modimo le dire tše di lokilego. Ke mo le ka se kego la re segiša baditšhaba, manaba a rena. Nna ka noši le meloko yešo le bahlanka ba ka re adimile batho tšhelete le mabele. Bjale a re se ke ra nyaka gore ba buše tše ba di adimilego go rena. Phumolang melato ya bona – tšhelete goba mabele goba beine goba makhura a mohlware – le be le ba bušetše ka bjako mašemo a bona le dirapa tša bona tša merara le tša mehlware le dintlo tša bona!” Bakgomana ba mphetola ba re: “Re tla dira ka moo o bolelago ka gona. Re tla bušetša dilo tšeo, le gona re ka se ba seke tše ba di adimilego.” Ka napa ka bitša baprista, gomme ka eniša bakgomana mo pele ga bona gore ba tla phetha taba yeo. Ke moo ke hlohlorilego lepanta la ka la lešela, ka re: “Ke ka mokgwa wo Modimo a tlago hlohlora yo mongwe le yo mongwe wa lena yo a ka se phethego se a ennego gore o tla se dira. Modimo o tla mo amoga ntlo ya gagwe le tšohle tše a nago le tšona, a mo tlogela a se ne selo.” Bohle ba ba bego ba le fao ba mphetola ba re: “Amene!” gomme ba tumiša Morena. Bakgomana ba phetha se ba se holofeditšego. Mengwageng yohle ye lesome le ye mebedi ya ge ke be ke le mmušiši wa naga ya Juda, go tloga ka ngwaga wa masome a mabedi wa ge Artazerksese e le kgoši go fihlela ka ngwaga wa gagwe wa masome a mararo le metšo ye meraro, nna le meloko yešo ga se ra ka ra ja dijo tše di fiwago babušiši. Babušiši ba ba bilego gona pele ga ka ba be ba imetša batho gomme ba ba ntšhiša dipapetlana tša silibera tše masome a mane ka letšatši, e le tša dijo le beine. Ešita le bahlankedi ba bona ba be ba gatelela batho. Eupša nna ga se ka ba gatelela, ka gobane ke be ke boifa Modimo. Ke be ke tloga ke ikgafetše go tsošološa morako, gomme ka se ithekele le seripa se sengwenyana sa naga. Bahlanka ba ka ka moka ba be ba nthuša moo mošomong woo. Bajuda ba lekgolo le ba masome a mahlano le bahlankedi ba bona ba be ba fela ba eja le nna, ke sa bale ba ba bego ba nketela ba etšwa ditšhabeng tše di bego di bapile le rena. Tšatši le lengwe le le lengwe ke be ke hlaba kgomo le dinku tše di nonnego tše di selelago le dikgogo tše dintši, gomme ka tšatši le lengwe le le lengwe la lesome ke be ke efa batho dibeine tše ntši tša mehutahuta. Eupša ke be ke tseba ka moo setšhaba se bego se imelwa ka gona, ka gona ka se ke ka ntšhiša batho motšhelo wo o ntšhetšwago babušiši. Ke a go rapela hle, Modimo, o ntebelele ka botho ka baka la tšohle tše ke di diretšego setšhaba se. Sanbalate le Tobia le Gesheme, Moarabia, le manaba a rena a mangwe ba kwa gore re feditše morako, le gore ga o sa ne dikgala, le ge mamati a masoro ona re be re sešo ra a tsenya. Ka gona Sanbalate le Gesheme ba nthomela motseta ba re ke tle ke gahlane nabo motseng wo mongwe kwa molaleng wa Ono. Ke ka moo ba bego ba nyaka go ntira bobe ka gona. Nna ka roma batseta gore ba ba botše ba re: “Ke dira mošomo wo mogolo gomme nka se kgone go theogela moo. Nka se emiše mošomo gore ke tlo gahlana le lena.” Ba ile ba nthomela motseta ka mokgwa wo makga a mane, gomme nna nako le nako ke ba fetola ka mokgwa wo o swanago. Ke moo Sanbalate a romilego mohlanka wa gagwe lekga la bohlano ka yona taba yela. Ka lekga le o be a swere le lengwalo le le sego la tswalelwa. Lona le be le re: “Go na le mabarebare ditšhabeng tše di bapilego le lena a go re wena le setšhaba sa Bajuda le nyaka go tsoša mpherefere, gomme ke ka baka leo le tsošološago morako woo. Gesheme o tiišetša gore mabarebare ao a gona. Go bolelwa le gore wena o rera go ipea kgoši, le gore o beile baprofeta ba bangwe gore ba begele batho fao Jerusalema gore ke wena kgoši ya Juda. Ga go ka moo kgoši a ka se kego a kwa taba yeo, ka gona etla re boledišane ka yona.” Ke ile ka mo fetola ka re: “Ditaba tše o di bolelago le gatee ga se nnete. Tšohle ke tše o ithometšego tšona.” Gape ba be ba leka go re tšhošetša gore re lese mošomo. Nna ka rapela ka re: “Bjale hle, Modimo, ntiiše!” Ke ile ka yo etela Shemaya, morwa wa Delaya, setlogolo sa Mehetabele, yo a bego a ganetšwa go tloga lapeng la gagwe. Yena a re go nna: “A re yo khuta ka Tempeleng ka Felong mo Gokgethwa gomme re kgonye mamati, ka gore ba tlilo go bolaya. Ba tlilo go bolaya e le bošego.” Nna ka mo fetola ka re: “Na motho yo a swanago le nna a ka tšhaba? A ka khuta ka Tempeleng gore a phologe? Yeo taba nka se e dire.” Ke ile ka lemoga gore Shemaya o be a se a laelwa ke Modimo, eupša a rekilwe ke Tobia le Sanbalate gore a tle a ntshebele taba ye ka mokgwa woo. Ba be ba mo rekile gore a tle a ntšhošetše ke dire sebe, gore ba tle ba kgone go ntshenya leina gomme ba nkgoboše. Ka rapela ka re: “Hle, Modimo, o se ke wa lebala tše Tobia le Sanbalate ba di dirilego, gomme o ba otle. Gopola le moprofeta yola wa mosadi, Noadia, le baprofeta bale ba bangwe ba go leka go ntšhošetša.” Morako ka moka o ile wa phethwa ka morago ga matšatši a masome a mahlano le a mabedi, ka letšatši la masome a mabedi le metšo ye mehlano la kgwedi ya Elulo. Ya re ge manaba a rena ohle a ekwa taba yeo, le ditšhaba ka moka tše di bapilego le rena di bona gore modiro o phethilwe, tša lewa ke dihlong kudu, ka gobane di ile tša lemoga gore mošomo woo o dirilwe ka thušo ya Modimo. Nakong yeo ka moka bakgomana ba Bajuda ba be ba fela ba ngwalelana le Tobia. Batho ba bantši nageng ya Juda ba be ba kwana naye kudu ka baka la gore ratswalagwe, Shekania, morwa wa Ara, e be e le Mojuda. Godimo ga moo, morwa wa gagwe, Johanane, o be a nyetše morwedi wa Meshulamo. Meshulamo e be e le morwa wa Berekia. Batho ba be ba fela ba bolela pele ga ka ka dilo tše dibotse tše Tobia a bego a di dirile, le gona ba mmotša tšohle tše ke di boletšego. Gomme Tobia a fela a nngwalela a leka go ntšhošetša. E rile ge morako o šetše o tsošološitšwe ka tsenya ditswalelo masorong, gomme baleti ba masoro a dikgoro tša Tempele le baopedi ba ka Tempeleng le Balefi ba bangwe ba bewa medirong ya bona. Ke ile ka bea morwarre, Hanani, le Hanania, molaodi yo mogolo wa sebo, gore ba laole motse wa Jerusalema. Hanania e be e le monna wa go tshephega, wa go boifa Modimo go feta ba bantši. Ka ba laya gore mesong masoro a Jerusalema a se ke a bulwa go fihlela ge go šetše go ruthetše, le gore a tswalelwe a kgonywe pele ga ge baleti ba tšhaiša modirong. Ka ba laya le gore ba kgethe baleti gare ga batho ba Jerusalema, baleti bao ba lete mafelong ao go letwago motse go ona, le gore ba bangwe ba lete pele ga dintlo tša bona. Jerusalema e be e le motse wo mogolo wo o ikadilego, eupša go se batho ba bantši ba ba dulago go wona, le gona go sešo gwa tsošološwa dintlo tše dintši. Modimo a ntutuetša gore ke kgobokanye setšhaba le bakgomana ba sona le bahlankedi, gomme ke lebeledišiše ka dipukung tše go tšona go ngwadilwego malapa. Ke ile ka hwetša lengwalo leo go lona go bego go ngwadilwe bale ba go boa bothopša pele. Tše di bego di ngwadilwe ka lengwalong leo ke tša go re: Mathopša a mantši a ile a tloga seleteng sa Babilone a boela Jerusalema le nageng ya Juda, yo mongwe le yo mongwe a ya motseng wa gabo. Ba malapa a bona ba be ba dutše Babilonia go tloga mola Kgoši Nebukadnesare a ba thopago. Baetapele ba bona e be e le Serubabele, Jeshua, Nehemia, Asaria, Raamia, Nahamani, Mordekai, Bilshane, Misperete, Bigbai, Nehume le Baana. Šedi dikgorwana tša Israele le palo ya bao ba ilego ba boa bothopša kgorwaneng ye nngwe le ye nngwe: Paroshe – 2 172 Shefatia – 372 Arage – 652 Pahate-Moaba, ditlogolo tša Jeshua le Joaba – 2 818 Elamo – 1 254 Satu – 845 Sakai – 760 Binui – 648 Bebai – 628 Asgade – 2 322 Adonikamo – 667 Bigbai – 2 067 Adine – 655 Atere, yo a bego a tsebja le ka la Hiskia – 98 Hashumo – 328 Betsai – 324 Harife – 112 Gibeone – 95 *** *** *** *** *** *** *** *** *** *** Batho bao borakgolokhukhu ba bona ba bego ba ile ba dula metseng ye e latelago le bona ba ile ba boa: Betlelehema le Netofa – 188 Anathote – 128 Bethe-Asmabethe – 42 Kiriate-Jearime, Kefira lei Beerote – 743 Rama le Geba – 621 Mikimase – 122 Bethele le Ai – 123 Nebo ye nngwe – 52 Elamo ye nngwe – 1 254 Harime – 320 Jeriko – 345 Lodo, Hadide le Ono – 721 Senaa – 3 930 *** *** *** *** *** *** *** *** *** *** Tše ke dikgorwana tša baprista tšeo di ilego tša boa bothopša: Jedaya, ditlogolo tša Jeshua – 973 Imere – 1 052 Pashure – 1 247 Harime – 1 017 *** *** *** Dikgorwana tša Balefi tšeo di ilego tša boa bothopša šedi: Jeshua le Kadmiele, ditlogolo tša Hodabia – 74 Baopedi ba ka Tempeleng, ditlogolo tša Asafo – 148 Baleti ba masoro a dikgoro tša Tempele, ditlogolo tša Shalume, Atere, Talmone, Asube, Hatita le Shobai – 138 *** *** Tše ke dikgorwana tša bašomi ba ka Tempeleng tšeo di ilego tša boa bothopša: Tsiha, Hasufa le Tabaote, Kerose, Sia le Padone, Lebana, Hagaba le Salmai, Hanane, Gidele le Gahara, Reaya, Retsine le Nekoda, Gasamo, Usa le Paseage, Besai, Bameune le Banefuse, Bakbuke, Hakufa le Harahure, Batslute, Mehida le Harsha, Barkose, Sisera le Temage, Netsiage le Hatifa *** *** *** *** *** *** *** *** *** *** Dikgorwana tša bahlanka ba Solomone tšeo di ilego tša boa bothopša šedi: Sotai, Soferete le Perida, Jaala, Darkone le Gidele, Shefatia, Hatile, Pogerete-Tsebaime le Amone. *** *** Ditlogolo ka moka tša bašomi ba ka Tempeleng le tša bahlanka ba Solomone tše di ilego tša boa bothopša e be e le tše makgolo a mararo le masome a senyane le metšo ye mebedi. Ba makgolo a a selelago le masome a mane le metšo ye mebedi e be e le ba dikgorwana tša Delaya, Tobia le Nekoda, gomme ba be ba tlogile motseng wa Tele-Melage le wa Tele-Harsha le wa Kerube le wa Adone le wa Imere; eupša ba be ba se ne bohlatse bja gore ke ditlogolo tša Baisraele. *** Ba dikgorwana tše di latelago tša baprista ba ile ba hloka maina a borakgolokhukhu ba bona lenaneong le le ngwadilwego la malapa: Habaya, Kotse le Barsilai. Rakgolokhukhu wa kgorwana ya baprista ya Barsilai o be a nyetše mosadi wa kgorwana ya Barsilai wa Gileade, gomme a bitšwa ka leina la kgorwana ya boratswalagwe. Ka ge ba be sa kgone go laetša gore borakgolokhukhu ba bona ke bomang, ba ile ba se ke ba amogelwa bopristeng. *** Mmušiši wa Bajuda o ile a ba botša gore ba se ke ba ja dijo tše di abetšwego Modimo go fihlela go eba le moprista yo a ka šomišago Urime le Tumime. Mathopša ka moka ao a ilego a boa e be e le a dikete tše masome a mane le tše pedi le makgolo a mararo le masome a a selelago. Bahlanka ba bona ba banna le ba basadi – 7 337 Baopedi ba banna le ba basadi – 245 Dipere – 736 Dimeila – 245 Dikamela – 435 Dipokolo – 6 720 *** *** *** Batho ba ba ilego ba thuša go tsošološa Tempele ka dimpho šeba: Mmušiši – gauta ya dikilokramo tše 8,4 meruswi ye 50 diaparo tše 530 tša baprista Mantona a dikgorwana – gauta ya dikilokramo tše 168 silibera ya dikilokramo tše 1 210 Batho ba bangwe bohle – gauta ya dikilokramo tše 168 silibera ya dikilokramo tše 1 110 diaparo tše 67 tša baprista *** *** Baprista le Balefi le baleti ba masoro a Tempele le baopedi le batho ba bangwe ba setšhaba le bašomi ba ka Tempeleng – batho ka moka ba Israele – ba ile ba dula metseng le metsaneng ya Juda. Ka kgwedi ya bošupa setšhaba sa Israele se be se dutše metseng ya sona. Ya re ka letšatši la mathomo la kgwedi yeo bohle ba kgobokana Jerusalema ka lepatlelong la Lesorong la Meetse. Ba kgopela Esra, moprista le serutegi sa melao ye Morena a e filego setšhaba sa Israele ka Moshe, gore a tliše puku ya melao. Ka gona Esra a e tliša moo setšhaba se bego se kgobokane gona – banna le basadi le bana ba ba bego ba godile mo ba ka kwešišago. Gona moo lepatlelong la lesorong a balela batho melao go tloga ka mahwibi go fihlela mosegare wo mogolo, mme bona ba hlwaile ditsebe ba theeditše. Esra o be a eme sethaleng se se bego se agetšwe mohla woo. Ka lehlakoreng la gagwe la go ja go be go eme banna ba ba latelago: Matitia, Shema, Anaya, Uria, Hilkia le Maasea; gomme ka go la nngele go eme ba ba latelago: Pedaya, Mishaele, Malkia, Hashumo, Hashbadana, Sakaria le Meshulamo. Ge Esra a eme moo sethaleng a okametše batho, bona ba be ba mo tseparetše ka mahlo. Ya re ge a phutholla puku ba emelela. Esra a tumiša Morena, Modimo yo mogolo, gomme batho ka moka ba emišetša matsogo godimo ba re: “Amene! Amene!” Ba khunama ba obamiša difahlego pele ga Morena. Ka morago ba emelela, gomme Balefi ba ba latelago ba ba hlathollela melao: Jeshua, Bani, Sherebia, Jamine, Akube, Shabetai, Hodia, Maasea, Kelita, Asaria, Josabade, Hanane le Pelaya. Ba bala puku ya melao ya Modimo ba hlabošitše mantšu ba e fetolela Searamong, ba ba ba e hlatholla gore batho ba e kwešiše. Ge batho ba ekwa melao e balwa ba ile ba lla. Ka gona Nehemia, yo e bego e le mmušiši, le Esra, moprista le serutegi sa melao, gotee le Balefi bao ba bego ba hlatholla melao ba botša setšhaba ka moka ba re: “Lehono ke letšatši le lekgethwa la Morena Modimo wa lena; ka gona le se ke la ilela goba la lla. Bjale eyang gae le yo keteka. Le abele bao ba se nago selo dijo le beine ya lena. Lehono ke letšatši le lekgethwa la Morena wa rena, ka gona le se ke la hlonama. Go thabela Morena go tla le šireletša.” Balefi ba fela ba botša batho gore ba homole, ba se ke ba hlonama ka letšatši leo le lekgethwa. Ka morago batho bohle ba ikela magae gomme ba ja, ba nwa, ba thabile, mme ba abela ba bangwe tše ba nago le tšona, ka gore ba be ba kwešišitše tše ba bego ba di boditšwe. Ka letšatši le le latelago mantona a dikgorwana, gotee le baprista le Balefi, ba ya go Esra go yo ithuta dithuto tša melao ya Modimo. Ba lemoga gore melao yela Morena a ba filego yona ka Moshe e laela gore setšhaba sa Israele se dule ka mešašeng ka nako ya Monyanya wa Mešaša. Ka gona ba roma batseta motseng wa Jerusalema le metseng ye mengwe gore ba botše batho ba re: “Eyang dithabeng le tle le makala a mehlware le a memirte le a mepalema le a mehlare ya matlakala a a swaraganego, mme le age mešaša go ya ka ditaelo tše di ngwadilwego melaong ya Modimo.” Ka gona setšhaba sa tla le makala gomme sa aga mešaša godimo ga ditlhaka tše di ikadilego tša dintlo tša bona, le ka malapeng a bona, le ka dikgorong tša Tempele, le mapatlelong a motse Lesorong la Meetse le Lesorong la Efraime. Batho bohle bao ba bego ba boile bothopša ba aga mešaša gomme ba dula ka go yona. Ya ba la mathomo monyanya wo o binwa ka mokgwa woo go tloga mehleng yela ya Joshua, morwa wa Nunu, gomme go thabilwe kudu. Go tloga ka letšatši la mathomo la monyanya go fihlela ka la mafelelo ba be ba bala seripa sa melao ya Modimo. Ba ile ba bina monyanya matšatši a a šupago, gomme ka la seswai ba swara tirelo ya go feleletša, ka moo go laelwago ka gona melaong. Ka letšatši la masome a mabedi le metšo ye mene la yona kgwedi yeo setšhaba sa Israele sa kgobokana go tlo ikona dijo le go itshola ka baka la dibe tša sona. Ba be ba šetše ba ikgetholotše go batho ba šele. Ba apara diaparo tša go ilela, gomme ba itšhela dihlogo ka mobu ba nyamile. Ba ema ba ipolela dibe tša bona le tša borakgolokhukhu ba bona. *** Ba balelwa melao ya Morena Modimo wa bona diiri tše e ka bago tše tharo, gomme diiri tše dingwe tše tharo ba ipolela dibe tša bona, ba ba ba khunamela Morena Modimo wa bona. Go be go na le sethala sa Balefi, gomme godimo ga sona go eme Jeshua, Bani, Kadmiele, Shebania, Buni, Sherebia, Bani le Kenani. Ba hlaboša mantšu ba rapela Morena Modimo wa bona. Balefi ba ba latelago ba ile ba botša batho gore ba tumiše Morena: Jeshua, Kadmiele, Bani, Hashabnea, Sherebia, Hodia, Shebania le Petagia. Ba re: “Emang le tumišeng Morena Modimo wa lena wa go ya go ile! A go retwe leina la gagwe la letago le ge ditumišo tša batho di ka se mo lekane.” Balefi bao ba rapela ba re: “Wena Morena, ke wena fela o lego Morena; o dirile magodimo a godimodimo le dinaledi tša legodimo, lefase le tšohle tše di lego go lona, mawatle le tšohle tše di lego ka go ona; tšohle o di file bophelo. Dietša tša legodimo di a go obamela. Ke wena Morena Modimo o kgethilego Abramo, wa mo ntšha Ure kua Babilonia, wa fetoša leina la gagwe ya ba Abrahama. O bone e le wa go go botegela, gomme wa dira kgwerano le yena. Wa holofetša go mo fa naga ya Bakanana le ya Bahete le ya Baamore le ya Baperise le ya Bajebuse le ya Bagirgashe, gore e be naga yeo go yona go tla dulago ditlogolo tša gagwe. Wa phetha se o se boletšego ka ge o botega. “O bone ditlaišego tša borakgolokhukhu ba rena kua Egepeta; wa kwa sello sa bona kua Lewatleng la Mahlaka. O diretše kgoši le bahlankedi ba gagwe ka moka le batho ba naga ya gagwe mehlolo ye makatšago, ka gobane o be o tseba ka moo ba bego ba ikgogomošetša setšhaba sa gago ka gona. Wa itirela leina le le lehono o sa tumilego ka lona. O fatotše lewatle pele ga setšhaba sa gago, gomme sa tshela mo go omilego. Bahlomari ba bona wa ba lahlela meetseng a išago bjalo ka leswika mawatleng a magolo. O ile wa ba hlahla ka thololo ya leru mosegare, gomme bošego wa ba bonegela tsela ka thololo ya mollo. O theogetše kua thabeng ya Sinai, wa bolela le setšhaba sa gago o le legodimong gomme wa se fa ditaelo tše di lokilego, melao ya mmakgonthe, le melawana ye mebotse. Wa ba ruta go hlompha Disabatha tša gago tše dikgethwa, gomme wa ba fa melao le ditaelo tša gago ka Moshe, mohlanka wa gago. “Mola ba swerwe ke tlala wa ba fa senkgwa sa go tšwa legodimong, wa ba fa meetse a tšwago leswikeng ge ba swerwe ke lenyora. O ba boditše gore ba tšee naga yela o bego o enne go ba fa yona. Fela borakgolokhukhu ba rena ba ile ba ikgogomoša, ba ba le melala ye methata gomme ba se phethe ditaelo tša gago. Ba gana go go theeletša; ba lebala mehlolo yela o ba diretšego yona. Ba ngangabala ba ikgethela moetapele gore a ba gomišetše bokgobeng Egepeta. Eupša wena o Modimo yo a lebalelago; o na le lešoko le kwelobohloko, ga o befelwe ka pela. O ba gaugetše kudu, gomme wa se ke wa ba tlogela. Le mola ba itiretše powana ka gauta ye e tološitšwego, mme ba re ke modimo wo o ba ntšhitšego Egepeta, ba go nyatša kudu, Morena, ga se wa ba tlogela lešokeng, ka gobane kgaugelo ya gago ke ye kgolo. Thololo yela ya leru ya se ba tlogele gore e ba šupetše tsela mosegare, le yela ya mollo ya se ba lahle gore e ba bonegele tsela bošego. O ba rutile ka moya wa gago wa go loka, wa ba fepa ka manna, wa ba fa le meetse a go nwa. Mengwageng ye masome a mane lešokeng o ba babaletše ka dijo, ba se hloke selo; diaparo tša bona di sa hlagale, le maoto a bona a sa ruruge. “O gafetše ditšhaba le mebušo diatleng tša bona, dinaga tše di bapilego le bona. Ba thopa naga ya Heshbone, ye e bego e bušwa ke Sihone, le naga ya Ogo, kgoši ya Bashane. Wa ba atišetša bana bjalo ka dinaledi tša legodimo, gomme wa ba goroša nageng ye o holofeditšego borakgolokhukhu ba bona gore ba tla e thopa. Ba tšea naga ya Kanana; wa fenya badudi ba naga yeo ge setšhaba sa gago se goroga. Wa gafela magoši a Kanana le batho ba ona diatleng tša sona, gore se dire ka bona tše di se ratago. Setšhaba sa gago sa thopa metse ye e ageleditšwego ka merako le naga ye e nonnego, sa tšea le dintlo tše di tletšego mahumo, didiba tše di epilwego, dirapa tša merara, mehlware, le mehlare ye mengwe ye mentši ya dikenywa. Ba ja ba khora, ba nona; ba phela bophelo bja manongonongo ka tšohle tše dibotse tše o ba filego tšona. “Fela setšhaba sa gago se ile sa go nyatša, sa go tsogela maatla; sa itebatša melao ya gago. Sa bolaya baprofeta ba go ba kgala gore ba boele go wena. Ba go nyatša kudu, ka gona wa ba gafela diatleng tša manaba a bona gomme a ba gatelela. Ge ba le matshwenyegong ba ile ba llela wena, gomme wa ba kwa o le legodimong. Ka lešoko la gago le legolo wa ba romela bahlakodiši ba go ba phološa manabeng a bona. Ge go eba le khutšo gape, ba boeletša ba dira dibe. Wa ba gafela diatleng tša manaba a bona gape, a ba buša. Eupša ya re ge ba boeletša ba llela go wena, wa ba kwa o le legodimong, gomme wa ba hlakodiša gantši ka lešoko la gago le legolo. Wa ba kgala gore ba phethe melao ya gago gape. Eupša bona ka boikgogomošo ba nyatša ditaelo tša gago, etšwe go phetha melao ya gago e le yona tsela ya go iša bophelong. Ba ba le melala ye methata, ba ngangabala, ba gana go go theeletša. Gwa feta mengwaga ye mentši o sa ba felele pelo. O tutueditše baprofeta ba gago gore ba ba kgale, eupša setšhaba sa gago se be se ithibile ditsebe, ka gona wa lesa ditšhaba tše dingwe tša ba fenya. Fela ka lešoko la gago le legolo wa se ba fediše taa, le gona wa se ba tlogele. O Modimo wa kgaugelo le lešoko! “Wena Modimo, Modimo wa rena, o yo mogolo bjang! O a boifega, o yo maatla gakaakang! O botegela kgwerano ya gago, ka mehla o a gaugela. Go tloga ka nako yela magoši a Asiria a bego a re gateletše go fihlela gonabjale, na re tlaišitšwe bjang! Gopola ditlaišego tša magoši a rena le bakgomana ba rena le baprista ba rena le baprofeta ba rena le borakgolokhukhu ba rena, gotee le setšhaba sa gaborena ka moka! O dirile ka toka go re otla; o be o botega le ge rena re be re dira tše kgopo. Borakgolokhukhu ba rena le magoši a rena le bakgomana ba rena le baprista ba rena ga se ba phetha melao ya gago. Ga se ba theeletša ditaelo tše o bego o ba kgala ka tšona. Ka botho bjo bogolo bja gago magoši a be a buša setšhaba sa gago, mola ba dula nageng ye e ikadilego ya monono yela o bego o ba file yona; eupša bona ba se tlogele mediro ya bona ye mebe mme ba se go khunamele. Gomme bjale re makgoba mo nageng ye o e filego borakgolokhukhu ba rena gore ba je dikenywa tša yona, ba ipshine ka monono wa yona; ruri, re makgoba mo go yona! Naga e na le puno ye ntši, gomme yona e ya magošing a o re beetšego ona ka ge re dirile dibe. Ba dira ka rena le ka diruiwa tša rena tše ba di ratago, gomme re tlaišega kudu!” Ka baka la tšohle tše di hlagilego, rena, setšhaba sa Israele, re dira kwano ya go ngwalwa, gomme baetapele ba rena le Balefi ba rena le baprista ba rena ba e gatiša ka dikibo tša bona. Wa mathomo wa go e gatiša e bile Mmušiši Nehemia, morwa wa Hakalia, gomme gwa latela Tsedekia. Ba ba latelago le bona ba ile ba e gatiša ka dikibo tša bona: Baprista: Seraya, Asaria le Jeremia, Pashure, Amaria le Malkia, Hatushe, Shebania le Maluke, Harime, Meremote le Obadia, Daniele, Ginetone le Baruke, Meshulamo, Abia le Miamine, Maasia, Bilga le Shemaya. *** *** *** *** *** *** Balefi: Jeshua, morwa wa Asania, Binui wa kgorwana ya Henadade, Kadmiele, Shebania le Hodia, Kelita, Pelaya le Hanane, Mika, Rehobo le Hashabia, Sakure, Sherebia le Shebania, Hodia, Bani le Beninu. *** *** *** *** Baetapele ba setšhaba: Paroshe le Pahate-Moaba, Elamo, Satu le Bani, Buni, Asgade le Bebai, Adonia, Bigbai le Adine, Atere, Hiskia le Asure, Hodia, Hashumo le Betsai, Harife, Anathote le Nebai, Magapiashe, Meshulamo le Hesire, Meshesabele, Tsadoko le Jadua, Pelatia, Hanane le Anaya, Hosea, Hanania le Hashube, Losheshe, Pilha le Shobeke, Rehume, Hashabna le Maasea, Ahia, Hanane le Anane, Maluke, Harime le Baana. *** *** *** *** *** *** *** *** *** *** Rena setšhaba sa Israele, baprista, Balefi, baleti ba masoro a dikgoro tša Tempele, baopedi, bašomi ba ka Tempeleng, gotee le bohle bao, ka baka la go phetha melao ya Modimo ba ikgaogantšhitšego le ba ditšhaba di šele ba ba dulago nageng ya rena, rena, gotee le basadi ba rena le bana ba rena ka moka ba ba godilego mo ba ka kwešišago, re ena le bomorwarragorena, baetapele ba rena, gore re tla phela ka melao ya Modimo ye a re filego yona ka Moshe, mohlanka wa gagwe; le gore re tla dira tšohle tše Morena, Mong wa rena, a re laelago tšona; le gore re tla phetha melao yohle ya gagwe le ka moka tše a di nyakago. Ge re ka se phethe keno ye re otlwe ka thogako. Re ka se nyalelane le ba ditšhaba di šele ba ba dulago mo nageng ya rena. Ge bašele bao ba ka tla ba bapatša mabele goba se sengwe go rena ka letšatši la Sabatha goba ka letšatši le lengwe le lekgethwa, re ka se ba rekele. Ka ngwaga wo mongwe le wo mongwe wa bošupa re ka se leme mašemo, le gona re tla phumola melato ka moka. Yo mongwe le yo mongwe wa rena o tla ntšhetša Tempele ya Modimo wa rena silibera ya dikramo tše nne ka ngwaga. Tirelo ya Tempeleng re tla e ntšhetša dilo tše di latelago: dinkgwa tše dikgethwa, kabelo ya bupi ya ka mehla, diruiwa tša dihlabelo tša ka mehla tša go tšhungwa ka moka, dihlabelo tša Disabatha le tša Menyanya ya Lebalana le tša menyanya ye mengwe, le dihlabelo tše dikgethwa, le dihlabelo tša tshwarelo ya dibe tša go re boelanya le Modimo, gotee le se sengwe le se sengwe se se nyakegago Tempeleng. Rena setšhaba, baprista le Balefi, ngwaga wo mongwe le wo mongwe re tla dira matengwa gore re tsebe gore ke dikgorwana dife tše di swanetšego go iša dikgong Tempeleng ka dinako tše di beilwego, gore ka tšona go gotšwe mollo wa go tšhuma dihlabelo tše di direlwago Morena Modimo wa rena, go ya ka moo melao ya Modimo e nyakago ka gona. Ngwaga ka ngwaga re tla iša kabelo ya mabele a dithakangwaga Tempeleng, le ya dikenywa tše di butšwago pele tša mehlare ya rena yohle. Maitšibolo a rena a bašemane le a dikgomo le a dihuswane tša rena re tla a iša go baprista Tempeleng, gomme moo ra a abela Modimo, bjalo ka ge melao ya gagwe e re botša. Ngwaga wo mongwe le wo mongwe re tla išetša baprista ka Tempeleng maupi a a dubilwego a mathomo a mabele a mafsa, gotee le dikabelo tša rena tše dingwe tša beine le tša makhura a mohlware le tša mehuta yohle ya dikenywa tša rena. Balefi ba re ba ntšhetšago karolo ya lesome metseng ya gaborena ya temo re tla ba išetša dikarolo tša lesome tša tše re di bunago. Baprista, ditlogolo tša Arone, ba swanetše go ba le Balefi ge dikarolo tša lesome di ntšhwa, gomme karolo ya lesome ya tšohle tše ba di ntšhitšego Balefi ba e iše ka diphapošing tša Tempele tša go bolokela, gore di yo šomišwa ka Tempeleng. Balefi le Baisraele ka moka ba iše dikabelo tša mabele, tša beine, le tša makhura a mohlware ka diphapošing tša go bolokela, moo go bewago dibjana tša Tempele, le moo baprista ba ba lego modirong le baleti ba masoro a dikgoro tša Tempele le baopedi ba ka Tempeleng ba dulago gona. Re ka se itebatše ntlo ya Modimo wa rena. Baetapele ba ile ba dula Jerusalema, gomme batho ba bangwe ka moka ba dira matengwa go kgetha lapa le tee malapeng a mangwe le a mangwe a lesome gore le yo dula motseng wo mokgethwa wa Jerusalema, mola batho ba bangwe ka moka ba swanetše go dula metseng ye mengwe. Setšhaba sa reta mang le mang yo a ilego a ithaopa a yo dula Jerusalema. Metseng ye mengwe baprista, Balefi, bašomi ba ka Tempeleng, le ditlogolo tša bahlanka ba Solomone, le Baisraele ba bangwe ka moka ba be ba itulela malapeng a bona metseng ya gabobona. Maina a baetapele ba selete sa Juda ba ba bego ba agile Jerusalema šea: Ba kgoro ya Juda: Athaya, morwa wa Usia, le setlogolo sa Sakaria. Sakaria e be e le morwa wa Amaria, Amaria morwa wa Shefatia, Shefatia morwa wa Mahalelele. Bao ka moka e be e le ditlogolo tša Peretse. Maasea, morwa wa Baruke, le setlogolo sa Kolohose. Kolohose e be e le morwa wa Hasaya, Hasaya morwa wa Adaya, Adaya morwa wa Joyaribe, Joyaribe morwa wa Sakaria. Bao ka moka e be e le ditlogolo tša Shela. Ditlogolo tša Peretse tše di bego di agile Jerusalema e be e le tše makgolo a mane le masome a a selelago a metšo ye seswai. E be e le banna ba bogale. Ba kgoro ya Benjamene: Salu, morwa wa Meshulamo, le setlogolo sa Joede. Joede e be e le morwa wa Pedaya, Pedaya morwa wa Kolaya, Kolaya morwa wa Maasea, Maasea morwa wa Itiele, Itiele morwa wa Jeshaya. Gabai le Salai, bomorwarragoSalu. Ba kgoro ya Benjamene ka moka ba ba bego ba dula Jerusalema e be e le ba makgolo a senyane le masome a mabedi le metšo ye seswai. Joele, morwa wa Sikri, e be e le molaodi wa bona, gomme Juda, morwa wa Hasenua, e le letsogo la ramotse wa Jerusalema. Baprista: Jedaya, morwa wa Joyaribe, le Jakine. Seraya, morwa wa Hilkia, le setlogolo sa Meshulamo. Meshulamo e be e le morwa wa Tsadoko, Tsadoko morwa wa Merayote, Merayote morwa wa Ahitube, Moprista yo Mogolo. Ba makgolo a seswai le masome a mabedi le metšo ye mebedi ba kgorwana ye ba be ba šoma ka Tempeleng. Adaya, morwa wa Jerohamo, le setlogolo sa Pelalia. Pelalia e be e le morwa wa Amtsi, Amtsi morwa wa Sakaria, Sakaria morwa wa Pashure, Pashure morwa wa Malkia. Ba makgolo a mabedi le masome a mane a metšo ye mebedi ba kgorwana ye e be e le dihlogo tša malapa. Amashesai, morwa wa Asarele, le setlogolo sa Aksai. Aksai e be e le morwa wa Meshilemote, Meshilemote e le morwa wa Imere. Ba lekgolo le masome a mabedi a metšo ye seswai e be e le banna ba bogale. Molaodi wa bona e be e le Sabdiele, wa lapa le le tsebegago kudu. Balefi: Shemaya, morwa wa Hashube, le setlogolo sa Asrikamo. Asrikamo e be e le morwa wa Hashabia, Hashabia morwa wa Buni. Shabetai le Josabade, baetapele ba bangwe ba Balefi; bona ba be ba hlokometše mošomo wa ka ntle ga Tempele. Matania, morwa wa Mika, le setlogolo sa Sabdi. Sabdi e be e le morwa wa Asafo. Matania e be e le moopediši wa ka Tempeleng, gomme o be a hlabeletša ge go opelwa thapelo ya tumišo. Bakbukia, yo e bego e le letsogo la Matania. Abda, morwa wa Shamua, le setlogolo sa Galale. Galale e be e le morwa wa Jedutune. Balefi ka moka ba ba bego ba dula motseng wo mokgethwa wa Jerusalema e be e le ba makgolo a mabedi le masome a seswai a metšo ye mene. Baleti ba masoro a dikgoro tša Tempele: Akube le Talmone le meloko ya bobona, ka moka e le ba lekgolo le masome a a šupago a metšo ye mebedi. Baisraele, baprista, le Balefi ba bangwe ka moka ba ile ba dula malapeng a bona metseng ye mengwe ya selete sa Juda. Bašomi ba ka Tempeleng ba ile ba dula karolong ye nngwe ya Jerusalema ye e bitšwago Ofele, gomme ba šoma ba hlokometšwe ke Tsiha le Gishpa. Mookamedi wa Balefi bao ba bego ba dula Jerusalema e be e le Usi, morwa wa Bani, le setlogolo sa Hashabia. Hashabia e be e le morwa wa Matania, Matania morwa wa Mika. Usi e be e le wa kgorwana ya Asafo, kgorwana yela e bego e hlokometše moopelo ditirelong ka Tempeleng. Go be go na le melawana ya mošate ye e bego e laela ka moo dikgorwana di bego di swanetše go šielana ka go opela ka Tempeleng tšatši le lengwe le le lengwe. Petagia, morwa wa Meshesabele, wa kgorwana ya Serage ya kgoro ya Juda, e be e le moemedi wa kgoši ya Persia setšhabeng sa Israele. Batho ba bantši ba be ba dula metsaneng ye e bego e le kgauswi le mašemo a bona. Ba kgoro ya Juda bona ba be ba dula Kiriate-Arba le Dibone le Kabtsiele le metsaneng ye e bego e le kgauswi le metse yeo. Ba be ba dula le metseng ye e latelago: Jeshua, Molada, Bethe-Pelete, Hatsare-Shuale, Beresheba, le metsaneng ye e bego e le kgauswi le metse yeo. Ba be ba dula le metseng ye: Tsikelage, Mekona, le metsaneng ya motse woo, le Ene-Rimone, Tsora, Jarmute, Sanoage, Adulamo, le metsaneng ye e bego e le kgauswi le metse yeo. Ba be ba dula le motseng wa Lakishe le mašemong a a lego kgauswi le wona, le motseng wa Aseka le metsaneng ya wona. Ka tsela yeo batho ba Juda ba be ba agile go tloga Beresheba go yo fihla moeding wa Hinomo. Ba kgoro ya Benjamene ba be ba dula Geba, Mikimase, Ai, Bethele, le metsaneng ya kgauswi le motse woo. Ba be ba dula le metseng ye: Anathote, Nobo, Anania, Hatsore, Rama, Gitaime, Hadide, Tseboime, Nebalate, Lodo, Ono, le Moeding wa Batsebamediro-ya-diatla. Dihlopha tše dingwe tša Balefi tše di bego di agile seleteng sa Juda di ile tša laelwa gore di yo dula le ba kgoro ya Benjamene. Maina a a latelago ke a baprista le a Balefi ba ba ilego ba boa bothopša le Serubabele, morwa wa Sealtiele, le Moprista yo Mogolo, Jeshua: Baprista: Seraya, Jeremia le Esra, Amaria, Maluke le Hatushe, Shekania, Rehume le Meremote, Ido, Ginetoi le Abia, Miamine, Maadia le Bilga, Shemaya, Joyaribe le Jedaya, Salu, Amoko, Hilkia le Jedaya. Banna ba e be e le baetapele gare ga baprista ba gabobona mehleng ya Jeshua. *** *** *** *** *** Balefi: Banna ba ba latelago ba be ba hlokometše go tumiša Modimo ka dikopelo: Jeshua, Binui, Kadmiele, Sherebia, Juda le Matania. Bakbukia, Uni, le Balefi ba bangwe bjalo ka bona e be e le sehlopha sa go hlatlolana le bahlabeledi. Jeshua e bile tatagoJoyakime, Joyakime ya ba tatagoEliashibe, Eliashibe ya ba tatagoJoyada, Joyada ya ba tatagoJonathane, Jonathane ya ba tatagoJadua. Mehleng ya ge Joyakime e le Moprista yo Mogolo baprista ba ba latelago e be e le mantona a dikgorwana tša baprista: Moprista Kgorwana Meraya Seraya Hanania Jeremia Meshulamo Esra Johanane Amaria Jonathane Maluke Josefa Shebania Adna Harime Helkai Merayote Sakaria Ido Meshulamo Ginetone Sikri Abia ... Miniamine Piltai Maadia Shamula Bilga Jonathane Shemaya Matenai Joyaribe Usi Jedaya Kalai Salai Ebere Amoko Hashabia Hilkia Netanele Jedaya *** *** *** *** *** *** *** *** *** Dihlogo tša malapa a Balefi le a baprista di be di ngwadišitšwe mehleng ya Baprista ba Bagolo ba ba latelago: Eliashibe, Joyada, Johanane le Jadua. Go ngwadišwa moo go ile gwa fetšwa mola Dariose e le kgoši ya Persia. Eupša dihlogo tša malapa a Balefi di ile tša ngwadišwa ka dipukung tša ditaba tša mmušo go goma ka nako ya Johanane, setlogolo sa Eliashibe. Balefi ba be ba arotšwe dihlopha tše pedi. Sehlopha sa mathomo e be e le Hashabia, Sherebia, Jeshua, Binui le Kadmiele, ba e bego e le dihlogo tša Balefi. Sa bobedi e le Balefi ba bangwe. Dihlopha tše tše pedi di be di tumiša Modimo ebile di mo leboga ka go hlatlolana go ya ka ditaelo tša Kgoši Dafida, monna wa Modimo. Baleti ba masoro a dikgoro tša Tempele ba ba latelago ba be ba leta diphapoši tša go bolokela, tše di bego di le masorong a dikgoro tša Tempele: Matania, Bakbukia, Obadia, Meshulamo, Talmone le Akube. Banna ba ba phetše mehleng ya Joyakime, morwa wa Jeshua, le setlogolo sa Jotsadaka, le mehleng ya Mmušiši Nehemia le ya Esra, moprista le serutegi sa melao ya Modimo. E rile ge morako wa motse wa Jerusalema o kgakolwa, Balefi ba nyakwa gohle moo ba bego ba dula gona, ba tlišwa gore ba tle ba kgakole morako le ba bangwe ka lethabo ka dikoša tša tebogo le ka diletšo tša masenkana le diharepa le dikgapa. Malapa a baopedi ba Balefi a ile a kgobokana a etšwa metsaneng ye a bego a ikagetše yona go dikologa Jeruselema, le metsaneng ye e bego e le tikologong ya Netofa, le motseng wa Bethe-Gilgale le wa Geba le wa Asmabethe. Baprista le Balefi ba ile ba itlhwekiša, ba hlwekiša le setšhaba le masoro le morako wa motse. Ke ile ka nametša baetapele ba Juda morako, gomme ba hlokomela dihlopha tše pedi tše kgolo tša baopedi ge di dikologa motse di leboga Modimo. Sehlopha sa mathomo se ile sa leba ka letsogong la go ja se sepela godimo ga morako go ya Lesorong la Sethobolong. Joshaya o be a šetše baopedi morago, mme yena a latelwa ke seripa sa baetapele ba Juda. Bona ba be ba šetšwe morago ke baprista ba ba latelago ba ba letša diphala: Asaria, Esra, Meshulamo, Juda, Benjamene, Shemaya le Jeremia. Bao ba latelwa ke Sakaria, morwa wa Jonathane, le setlogolo sa Shemaya. Shemaya e be e le morwa wa Matania, Matania e le morwa wa Mikaya, Mikaya e le morwa wa Sakure, Sakure e le morwa wa Asafo. *** *** Yena o be a šetšwe morago ke ba kgorwana ya gabo, e lego Shemaya, Asarele, Milalai, Kilalai, Maai, Netanele, Juda le Hanani. Bona ba be ba letša diletšo tšela Kgoši Dafida, monna wa Modimo, a bego a laetše gore di letšwe. Esra, serutegi, o be a etile sehlopha se pele. Kua Lesorong la Mothopong ba hlatloga ka manamelo a go ya motseng wa Dafida, ba feta ka godimo ga mošate ka morotoga wo o yago morakong, ba ya Lesorong la Meetse ka bohlabela bja motse. Sehlopha sela se sengwe sa baopedi bao ba bego ba leboga Modimo sa leba ka letsogong la nngele se sepela godimo ga morako, gomme nna ka se šala morago ke na le seripa sa batho. Ra sepela ra feta Tora ya Dionto, ra fihla Morakong wa Phaphathi; go tloga moo ra yo feta Lesorong la Efraime le Lesorong le Letala le Lesorong la Dihlapi le Toreng ya Hananele le Toreng ya Lekgolo, ra yo fihla Lesorong la Dihuswane. Ra ema Lesorong la Baleti. Ka morago dihlopha tšela tše pedi tša baopedi tše di bego di leboga Modimo tša yo ema ka Tempeleng. Ka ntle le baetapele bao ba bego ba le sehlopheng sa ka, re be re na le baprista ba ba latelago ba ba bego ba letša diphala: Eliakime, Maasea, Miniamine, Mikaya, Elioenai, Sakaria le Hanania; gomme ba be ba šetšwe morago ke Maasea, Shemaya, Eleasara, Usi, Johanane, Malkia, Elamo le Esere. Baopedi bao ba bego ba opedišwa ke Jisragia ba be ba hlabošitše mantšu kudu. Mohlang woo go ile gwa dirwa dihlabelo tše dintši, gomme batho ba thaba ka gobane Modimo o be a ba thabišitše kudu. Basadi le bana le bona ba be ba thabile, gomme megobo ya bona e kwagala kgole. Matšatšing ao go ile gwa bewa banna ba go hlokomela diphapoši tša go bolokela dikabelo tša Tempele, gotee le dikarolo tša lesome le dithakangwaga tša mabele le tša dikenywa. Banna bao ba be ba swanetše go bea dikabelo tša go tšwa ka mašemong a metse tše di bego di fiwa baprista le Balefi go ya ka melao ya Modimo ka moo diphapošing tšeo. Batho ba naga ya Juda ba ntšha dikabelo ka mafolofolo, ka gobane ba be ba thabile ka ge baprista le Balefi ba be ba dira mediro ya bona gabotse. Baprista le Balefi ba be ba swara ditirelo tša tlhwekišo le ditirelo tše dingwe tše di bego di laetšwe ke Modimo. Baopedi ba ka Tempeleng le baleti ba masoro a dikgoro tša Tempele le bona ba be ba dira mešomo ya bona go ya ka ditaelo tša Kgoši Dafida le tša Solomone, morwagwe. Le kgale, mehleng ya Kgoši Dafida le Asafo, go be go na le baopediši ba dikoša tša go tumiša le go leboga Modimo. Mehleng ya Serubabele le mehleng ya Nehemia, Baisraele ka moka ba be ba ntšha dikabelo letšatši le lengwe le le lengwe, e le tša go fepa baopedi le baleti ba masoro a dikgoro tša Tempele. Batho ba be ba ntšhetša Balefi dikabelo tše dikgethwa, gomme Balefi bona ba di abelana le baprista. E rile ka lona tšatši leo ge melao ya Moshe e balelwa batho, gwa fihlwa moo go ngwadilwego gore Moamone goba Momoaba a se ke a tsoga a dumeletšwe go tsena phuthegong ya Modimo. Seo e be e le ka baka la gore Baamone le Bamoaba ba ile ba se fe Baisraele dijo le meetse mola ba le leetong la go tšwa Egepeta. Bona ba ile ba reka Bileamo gore a rogake Baisraele, eupša Modimo wa rena a fetoša thogako yeo tšhegofatšo. Ge Baisraele ba ekwa molao woo o balwa ba kgetholla batho ba šele ka moka setšhabeng. Moprista Eliashibe, yo a bego a hlokometše diphapoši tša go bolokela tša Tempele, o be a kwana le Tobia go tloga kgale. Ka gona a mo fa phapoši ye kgolo yela pele e bego e le ya go bolokela dikabelo tša bupi, diorelo, dibjana tša ka Tempeleng, dikabelo tše di filwego baprista, le dikarolo tša lesome tša mabele le tša beine le tša makhura a mohlware tše molao o laelago gore di fiwe Balefi le baopedi ba ka Tempeleng le baleti ba masoro a dikgoro tša Tempele. Ge tšeo di direga nna ke be ke se gona Jerusalema, ka gobane ka ngwaga wa masome a mararo a metšo ye mebedi wa ge Artazerksese e le kgoši ya Babilone ke be ke boetše go kgoši. Ka morago ga lebaka ka kgopela kgoši gore ke tloge, gomme ka boela Jerusalema. Moo ke ile ka hwetša taba ye mpe ye e bego e dirilwe ke Eliashibe wa go fa Tobia phapoši ka kgorong ya Tempele. Ka tuka bogale kudu gomme ka lahlela thoto yohle ya Tobia ntle. Ka laela gore diphapoši di hlwekišwe, le gore ditlabakelo tša Tempele le dikabelo tša bupi le diorelo di bušetšwe ka moo. Ke ile ka kwa le gore baopedi le Balefi ba ba bego ba šoma ka Tempeleng ba tlogile Jerusalema ba ipoeletše mašemong a bona, ka gobane batho ba be ba sa ba abele dijo tše di ba lebanego. Ka kgalema bahlankedi ka ge ba se ba šetša Tempele. Ka nama ka bušetša Balefi le baopedi bale Tempeleng, gomme ka ba fa mešomo ya bona gape. Ke moka batho bohle ba Juda ba thoma gape go tliša dikarolo tša lesome tša mabele le tša beine le tša makhura a mohlware diphapošing tša Tempele tša go bolokela. Ka bea banna ba ba latelago gore ba hlokomele diphapoši tša go bolokela: Shelemia, moprista, le Tsadoko, mongwaledi, le Pedaya, Molefi. Hanane, morwa wa Sakure, le setlogolo sa Matania, yena ya ba mothuši wa bona. Go be go tsebega gore banna bao ba a tshephega ge ba abela Balefi ba bangwe dijo. Hle, Modimo wa ka, o nkgopole mabapi le dilo tše. O se ke wa lesa mediro ye ya lerato ye ke e diretšego Tempele le tirelo ya yona e phumoga. Matšatšing ao ke ile ka bona batho nageng ya Juda ba pitla diterebe ka maoto ka letšatši la Sabatha. Ba bangwe ba be ba nametša dipokolo tša bona mabele, beine, diterebe, mago, gotee le dilo tše dingwe, ba di tliša Jerusalema; ka ba kgala gore ba se rekiše selo ka Sabatha. Banna ba bangwe ba Tirose ba be ba dula Jerusalema, gomme ba tliša dihlapi le dilo tša mehutahuta motseng, ba di rekišetša batho ba Juda ka Sabatha. Ka sola baetapele ba Bajuda ka re: “Le reng le dira taba ye mpe ye? Le tšhilafatša letšatši la Sabatha. Se ke sona se borakgololokhukhu ba lena ba se dirilego, gomme Modimo wa rena a tlišetša rena le motse wo wa rena dilo tše mpe tše. Bjale lena le sa okeletša Baisraele bogale bja Modimo ka go tšhilafatša Sabatha!” Ka gona ka laela gore masoro a motse a tswalelwe mathomong a Sabatha se sengwe le se sengwe, ge leswiswana le thoma go swara, gomme a se ke a bulwa gape go fihlela ge Sabatha se fetile. Ka bea banna ba ka ba bangwe masorong go hlokomela gore go se tsenywe selo motseng ka letšatši la Sabatha. Ke gakaenyana moo babapatši ba dilo tša mehutahuta ba ilego ba lala ka ntle ga morako wa motse e le Labohlano. Ka ba kgala ka re: “Le reng le lala ka ntle ga morako? Ge le ka boeletša ke tla le tloša ka kgang.” Go tloga mohlang woo ba napa ba se sa boa ka letšatši la Sabatha. Ka laela Balefi gore ba itlhwekiše, le gore ba yo leta masoro gomme ba hlokomele gore Sabatha e hlomphiwe. Hle, Modimo, le mo tabeng ye o nkgopole, mme o ntšhokele ka lerato la gago le legolo. Ka nako yeo ka lemoga le gore banna ba bangwe ba Bajuda ba nyetše basadi ba Baashdode, ba Baamone, le ba Bamoaba. Bana ba bona ba bangwe ba be ba bolela Seashdode goba dipolelo tše dingwe, gomme ba sa kgone polelo ya rena. Ka omanya banna bao, ka ba rogaka, ka betha ba bangwe ba bona, ka ba tumola le meriri. Ka re ba ene ka leina la Modimo gore bona goba bana ba bona ba ka se sa tsoga ba nyalelane le ba ditšhaba di šele. Ka re: “Ke basadi ba ditšhaba di šele ba ba ilego ba diriša Solomone dibe. Ditšhabeng ka moka go be go se kgoši ye e lekanago le yena. Modimo o be a mo rata gomme a mo dirile kgoši ya Israele ka moka, le ge go le bjalo a dira sebe se. Kgane le rena re dire tše mpe tše le di dirago, re se botegele Modimo wa rena ka go nyala basadi ba šele?” Joyada e be e le morwa wa Eliashibe, Moprista yo Mogolo, eupša morwa yo mongwe wa Joyada a nyala morwedi wa Sanbalate wa motse wa Bethe-Horone; ka gona ka raka Joyada Jerusalema. Hle, Modimo, gopola ka moo batho bao ba tšhilafaditšego boprista le kgwerano ye o e dirilego le baprista le Balefi. Ka mokgwa woo ka hlwekiša setšhaba ka se lahliša dilo tšohle tša ditšhaba di šele. Ka beela baprista le Balefi melawana, gore yo mongwe le yo mongwe a tle a tsebe mošomo wa gagwe. Ka laela gore batho ba tliše dikgong tša go gotša mollo wa go tšhuma dihlabelo ka dinako tše di beilwego, le gore ba tliše dikabelo tša bona tša mabele a a bunwago pele le dikenywa tše di butšwago pele. O gopole dilo tše ka moka, hle, Modimo, gomme o ntire tše botse. Kgoši Zerksese o be a buša dilete tše 127, go tloga India go ba go yo fihla Etopia, a le setulong sa gagwe sa bogoši kua Susa, motsemošate. *** Ka ngwaga wa boraro wa pušo ya gagwe a direla babušiši ba gagwe ka moka le bahlanka monyanya. Madira a Persia le a Media a be a le gona, gotee le bakgomana le bahlankedi ba dilete tša gagwe. A ba bontšha mahumo a kgoro ya mošate gotee le botse bja yona le bogolo bja bogoši bja gagwe matšatši a mantši, e lego a lekgolo le masome a seswai. Ka morago ga moo a direla banna ka moka, bahumi le badiidi, ba motsemošate Susa monyanya. Wona wa tšea matšatši a a šupago o swaretšwe lebaleng le le lego ka serapeng sa mošate. Kgoro ya gona e be e kgabišitšwe ka digaretene tša lešela la mmala wo mošweu le wo serolane tše di kgokeletšwego mefsiring ya silibera mo dikokwaneng tša magakabje ka dithapo tša lešela le boletiana la bohwibidu bja moretele. Ditulo tša gauta le silibera di be di beilwe lebaleng leo lebato la lona le bego le batetšwe ka magakabje, maswikana a mahwibidu, perela le thekoise. Dino di be di tlišwa ka dinwelo tše di sa swanego tša gauta, gomme beine ya mošate e le ye ntši. Motho o be a sa lekanyetšwe dino; kgoši o be a laetše bahlanka ba mošate gore yo mongwe le yo mongwe a nwe ka mo a ratago ka gona. Ka kua lapeng la mošate Mohumagadi Bashti le yena o be a diretše basadi monyanya. Ka letšatši la bošupa la monyanya, ge kgoši a ikhoretše dino, a bitša banna ba ba šupago ba ba amogilwego bonna ba e bego e le bahlanka ba gagwe ba bagolo, Mehumane, Biseta, Harbona, Bigta, Abagtha, Setare le Karkase. A ba laela gore ba tliše Mohumagadi Bashti a rwele mphapahlogo wa gagwe wa bogoši. Gape mohumagadi yoo e be e le mosadi yo mobotse, gomme kgoši a nyaka go kgantšhetša bakgomana le baeng ba gagwe ka moka botse bja gagwe. Eupša ya re ge bahlanka bao ba botša Mohumagadi Bashti se kgoši a se laetšego, yena a gana go tla. Gomme seo sa befediša kgoši kudu. Kgoši o be a tlwaetše go kgopela keletšo ye e nepagetšego mabapi le ditaba tša molao le toka; ka gona a bitša baeletši ba gagwe bao ba bego ba tseba ditaba. Ba a bego a atiša go kgopela keletšo go bona e be e le Karshena, Shetare, Admatha, Tarshishe, Merese, Marsena le Memugane, bona bakgomana ba ba šupago ba Persia le Media ba e bego e le ba maemo a godimo mmušong. A re go banna bao: “Nna, Kgoši Zerksese, ke romile bahlanka ba ka go Mohumagadi Bashti gore ba yo mmotša taelo ya ka, fela yena o ganne go e phetha! Ka molao re dira eng ka yena?” Ke moo Memugane a begetšego kgoši le bakgomana ba gagwe a re: “Mohumagadi Bashti ga se a phošetša kgoši fela, o phošeditše le bakgomana ba gagwe – gabotsebotse o phošeditše banna bohle mmušong wohle wa kgoši. Mosadi yo mongwe le yo mongwe o tla thoma go nyatša monna wa gagwe ge a ekwa se mohumagadi a se dirilego. Ba tla re: ‘Kgoši Zerksese o laetše Mohumagadi Bashti gore a tle go yena, gomme yena a gana.’ Ge basadi ba bakgomana ba mošate wa Persia le Media ba ekwa se mohumagadi a se dirilego, ba tla botša banna ba bona taba ye pele ga ge le tšatši le dikela. Basadi mo gohle ba ka se sa hlompha banna ba bona, mme banna ba tla ba galefela. Ge kgoši a dumela, a a bee molao wo o rego Bashti a se sa tsoga a tlile pele ga kgoši. A a laele gore molawana woo o ngwalwe melaong ya Persia le Media gore o se ke wa tsoga o fetošitšwe. Gomme madulo a gagwe a bogoši a a fe mosadi yo mongwe yo a mo phalago. Ge molao wo wa kgoši o begwa gohle mmušong wo mogolo wo, mosadi yo mongwe le yo mongwe o tla hlompha monna wa gagwe ka tshwanelo, le ge monna yoo e le mohumi goba modiidi.” Kgoši le bakgomana ba gagwe ba ile ba kgahlwa ke keletšo yeo, gomme kgoši a dira se Memugane a se boletšego. A romela mangwalo seleteng se sengwe le se sengwe sa kgoši ka mmolelo le mongwalelo wa sona, a a rego monna yo mongwe le yo mongwe a laole lapa la gagwe, gomme se a se bolelago se phethwe. Ka morago, le mola kgalefo ya kgoši e šetše e okobetše, yena o ile a no fela a gopola se Bashti a kilego a se dira le se a ilego a se bega ka ga yena. Ka gona bahlanka ba bangwe ba kgoši ba bagolo ba re: “Ke eng o sa ntšhe lesolo wa tsoma dikgarebe tše botsana? O ka bea batseta seleteng se sengwe le se sengwe sa mmušo wa gago gore ba tliše dikgarebjana tše botsana ngwakong wa basadi mo Susa, motsemošate. O ba fe Hegai, moamogwabonna yo a hlokometšego basadi ba gago, gore a ba šetše, gomme ba fiwe ditlolo tša go ithakga. O tšee ngwanenyana yo o mo ratago kudu o mo dire mohumagadi legatong la Bashti.” Kgoši a bona keletšo yeo e lokile, gomme a e amogela. Gona moo Susa go be go dula Mojuda yo mongwe yo a bego a bitšwa Mordekai, morwa wa Jaire; yena e be e le wa kgoro ya Benjamene, gomme borakgolokhukhu ba gagwe ba bangwe e le Kishe le Shimi. Mola Kgoši Nebukadnesare wa Babilone a thopa Joyakine wa Juda, kgoši ya Jerusalema, gotee le sehlopha sa mathopša, Mordekai le yena o be a le gare ga mathopša ao. O ile a tšea Estere, morwedi wa rangwaneagwe, a mo godiša bjalo ka ngwana wa gagwe ge batswadi ba gagwe ba hlokafetše. Leina la gagwe la Seheberu e be e le Hadasa. E be e le mosetsana yo mobotse wa go bopega. Ge kgoši a seno bea molao wo mofsa banenyana ba bantši ba tlišwa Susa, Estere o be a le gare ga bona. Le yena a tlišwa mošate gomme a hlokomelwa ke Hegai yo a bego a hlokometše ngwako wa basadi. Hegai a rata Estere ka gore o be a mo kgahla. Ka ntle le go senya sebaka, a mo fa ditlolo tša go thakga letlalo, gotee le dijo tše di swanetšego. A mo nea madulo a mabotsebotse moo ngwakong wa basadi, gomme a kgetha dikgarebe tše di šupago moo mošate gore di mo hlankele. Go ya ka keletšo ya Mordekai, Estere o be a utile gore ke yena Mojuda. Tšatši le lengwe le le lengwe Mordekai o be a fela a itshepetšatshepetša pele ga kgoro ngwakong wa basadi, gore a bone gore Estere o phela bjang, le gore go tla direga eng ka yena. Basadi ba ile ba tšea ngwaga ba ithakga ka ditlolo – dikgwedi tše di selelago tša mathomo ba be ba tlola ka makhura a mira, gomme tše dingwe tše selelago ba tlola ka balsamo le ditlolo tše dingwe. Ka morago ga moo banenyana ba išwa go Kgoši Zerksese ka o tee ka o tee. Ge ngwanenyana a etšwa ka ngwakong wa basadi a eya go kgoši, o be a dumeletšwe go apara se a se ratago. O be a eya mantšiboa, gomme mosong a išwe ngwakong wo mongwe wa basadi, a hlokometšwe ke Shaashegase, moamogwabonna yo a bego a hlokomela metlabo ya kgoši. O be a sa boelele go kgoši, ge e se ge a kgahlile kgoši moo e kago mmitša ka leina. Nako ya gore Estere a ye go kgoši ya fihla. Estere yo e be e le morwedi wa Abihaile, rangwane wa Mordekai yo a mo godišitšego bjalo ka morwedi wa gagwe. Yena o be a kgahla batho ka moka ba ba mmonago. Ge nako ya gore a ye e fihla, o ile a apara tšona tšela Hegai, moamogwabonna yo a bego a hlokometše ngwako wa basadi, a mmoditšego gore a di apare. E be e le ka ngwaga wa bošupa ge Zerksese e le kgoši, ka kgwedi ya lesome ya Tebete, ge Estere a tlišwa go kgoši mošate. Kgoši a mo rata go feta basadi ba gagwe ka moka; gomme a mo kganyoga, a ba a kgahlwa ke yena go feta banenyana bale ba bangwe bohle. A mo rweša mphapahlogo wa bogoši gomme a mmea mohumagadi legatong la Bashti. Ka morago kgoši a direla Estere monyanya wo mogolo, gomme a laletša bakgomana le bahlanka ba gagwe. A bega gore letšatši leo ke letšatši la boikhutšo mmušong wa gagwe ka moka, gomme a abela batho dimpho tša segoši. Ka nako yeo kgoši o be a šetše a beile Mordekai molaodi wa mošate. Estere yena o be a sešo a utolla gore ke yena Mojuda. Mordekai o be a mo laile gore a se botše motho, gomme yena a mo theeletša bjalo ka ge a be a mo theeletša go tloga bjaneng mola a sa mo godiša. Nakong ya ge Mordekai e le molaodi wa mošate, Bigtana le Tereshe, baamogwabonna ba babedi ba mošate ba ba bego ba hlapetša mejako ya go tsena ka diphapošing tša kgoši, ba thoma go hloya Kgoši Zerksese gomme ba loga maano a go mmolaya. Mordekai a kwa taba ye gomme yena a e botša Mohumagadi Estere, yo a ilego a botša kgoši se Mordekai a se kwelego. Go ile gwa nyakišišwa gomme gwa hwetšwa gore taba yeo ke therešo, ka gona banna bao ba babedi ba fegwa koteng. Kgoši a laela gore taba yeo e ngwalwe ka pukung ya ditaba tša mmušo wa gagwe. Ka morago ga lebaka Kgoši Zerksese a hlatlošetša monna yo mongwe wa go bitšwa Hamane maemong a botonakgolo. Hamane yo e be e le morwa wa Hamedatha, Moagaga. Kgoši o ile a laela bahlanka ba gagwe ka moka gore ba hlomphe Hamane ka go mo khunamela le go mo obamela. Ka moka ba ile ba dira bjalo ka ntle ga Mordekai, yo a ilego a gana. Bahlanka ba bangwe ba mošate ba mmotšiša gore o ganelang go phetha taelo ya kgoši; gomme letšatši le lengwe le le lengwe ba fela ba mmotša taba yeo, fela yena a se ba theeletše. O be a ba fetola a re: “Ke nna Mojuda, gomme nka se khunamele Hamane.” Bona ba nama ba botša Hamane, ba maketše gore na o tla kgotlelela se Mordekai a se dirago. Hamane o ile a galefa ge a lemoga gore Mordekai o gana go mo khunamela le go mo obamela, gomme ge a ekwa gore Mordekai ke Mojuda, a ikemišetša go otla le Bajuda ba bangwe, e sego Mordekai a nnoši. Ka gona a loga maano a go bolaya Mojuda yo mongwe le yo mongwe mo mmušong wa Persia ka moka. Ka ngwaga wa lesome le metšo ye mebedi wa pušo ya Kgoši Zerksese, kgweding ya mathomo ya Nisane, Hamane a laela gore go dirwe matengwa, ona a be a bitšwa “purime”, gore a tsebe kgwedi le letšatši le le swanetšego la go phetha morero woo wa gagwe. Gwa ntšhwa letšatši la lesome le metšo ye meraro la kgwedi ya lesome le metšo ye mebedi, kgwedi ya Adara. Ke moo Hamane a boditšego kgoši a re: “Go na le setšhaba se sengwenyana se se gašanego le ditšhaba tše di lego dileteng ka moka tša mmušo wa gago. Ba na le mekgwa ye e sa swanego le ya ditšhaba tše dingwe. Godimo ga moo ga ba phethe melao ya mmušo wa kgoši; ka gona, ga wa swanela go ba lesa. Ge o dumela, kgoši, a go bewe molao wa go re ba fedišwe. Ge o ka dira seo, ke tla tliša silibera ya dikilokramo tše dikete tše makgolo a mararo matlotlong a mošate tša go sepediša ditaba tša mmušo.” Kgoši a khwamola palamonwana ya gagwe ye e bego e tlokilwe sekibo sa mošate a e nea Hamane, lenaba la Bajuda, morwa wa Hamedatha, Moagaga. Kgoši a re go yena: “Tšhelete yeo itshwarele yona; setšhaba seo sona o dire ka sona se o se ratago.” Ka gona, ka letšatši la lesome le metšo ye meraro la kgwedi ya mathomo, Hamane a bitša bangwaledi ba kgoši a ba botša pego ye e swanetšego go fetolelwa mebolelong le mengwalong yohle ye e šomišwago mmušong wa kgoši, le go romelwa go dintona, balaodi le bakgomana ka moka. Pego ye e ile ya phatlalatšwa ka leina la Kgoši Zerksese, gomme ya kibja ka palamonwana ya gagwe. Dikitimi di ile tša fihliša pego yeo seleteng se sengwe le se sengwe sa mmušo. Yona e be e re Bajuda ka moka – ba bafsa le ba bagolo, basadi le bana – ba fedišwe ka letšatši le tee, letšatši la lesome le metšo ye meraro la kgwedi ya Adara. Ba bolawe ntle le lešoko, gomme dithoto tša bona di thopše. Pego yeo e be e swanetše go dirwa molao mme e begwe phatlalatša seleteng se sengwe le se sengwe, gore mang le mang a be a itokišitše ka letšatši leo. Ka taelo ya kgoši molao woo o ile wa begwa phatlalatša Susa, motsemošate, gomme dikitimi tša akgofa tša iša pego yeo dileteng tšohle. Kgoši le Hamane bona ba itulela ba nwa, mola motse wa Susa o le gare o huduega. Ge Mordekai a ekwa tšohle tše di diregilego, a gagola diaparo tša gagwe ka manyami. A apara diaparo tša go ilela, a itšhela hlogo ka melora gomme a sepela le motse a hlabošitše lentšu a lla gabohloko, a ba a fihla lesorong la kgoro ya mošate. Fela a se ke a tsena, ka gobane go be go se motho yo a dumeletšwego go tsena ka kgoro ya mošate a apere diaparo tša go ilela. Dileteng ka moka mo pego yeo ya kgoši e bego e tsebagaditšwe gona go be go kwala sello se segolo gare ga Bajuda. Ba itima dijo, ba lla ba golola, gomme ba bantši ba apara diaparo tša go ilela ba patlama meloreng. E rile ge badiredi ba Estere ba basadi le baamogwabonna ba gagwe ba mmotša se Mordekai a se dirago, yena a tshwenyega kudu. A romela Mordekai diaparo gore a di apare mme a apole tšeo tša go ilela, fela Mordekai a di gana. Ke moo Estere a biditšego Hatake, yo mongwe wa baamogwabonna ba mošate yo a beilwego ke kgoši gore a hlankele Estere, a mo laela gore a ye go Mordekai go yo nyakišiša gore se a se dirago se šupa eng, le gore ke ka baka lang a se dira. Gomme Hatake a ya go Mordekai lepatlelong la motse kua lesorong la kgoro ya mošate. Mordekai a mo laodišetša tšohle tše di mo hlagetšego, le gore Hamane o re o tla tliša tšhelete ye kaakang matlotlong a mošate ge Bajuda ka moka ba ka bolawa. A neela Hatake lengwalo le le ngwalolotšwego la pego ye e tsebagaditšwego kua Susa ye e rego Bajuda ba fedišwe. Mordekai a mo kgopela gore a le bontšhe Estere, a mo hlathollele gore ditaba di eme bjang, a be a mmotše gore a ye go kgoši a mo rapele mme a mo kgopele gore a šokele setšhaba seo sa gaboyena Estere. Hatake a dira bjalo, gomme Estere a re a boele go Mordekai a mmotše a re: “Ge motho ofe le ofe, monna goba mosadi, a ka tsena ka lapeng go yo bona kgoši a se a bitšwa, o a bolawa. Woo ke molao; mang le mang o a o tseba, go thoma ka bahlanka ka moka ba kgoši go fihla ka batho ba dilete tša gagwe. Go na le tsela e tee fela yeo ka yona motho a ka phemago molao wo: Ge kgoši a ka šupa motho ka molamo wa gagwe wa bogoši wa gauta, gona motho yoo a ka se bolawe. Eupša e šetše e le kgwedi nna ke se ka bitšwa.” Ge Mordekai a ekwa se Estere a se boletšego, a roma batseta gore ba mo eletše ba re: “O se ke wa gopola gore ka gore o wa mošate wena o ka se bolawe le Bajuda ba bangwe, gobane le ge o ka no ikhomolela gonabjale, Bajuda ba tla thušwa ke legodimo ba phologa; eupša wena o tla hwa, gomme lapa la tatago la felelela. Gomme go tseba mang – mohlomongwe bohumagadi o bo beetšwe yona nako ye!” Estere a roma batseta go Mordekai gore ba mo fetole ba re: “Sepela o bothe Bajuda ka moka ba ba lego motseng wa Susa. Le itime dijo ka baka la ka. Le se je, le se nwe matšatši a mararo le mašego a ona. Le nna gotee le badiredi ba ka ba basadi re tla itima. Ka morago ga moo ke tla ya go kgoši, le ge molao o gana. Ge eba ka go dira bjalo ke tla hwa, gona ke tla no hwa.” Ke moka Mordekai a tloga a yo dira tšohle tše Estere a mmoditšego gore a di dire. Ka letšatši la boraro la ge Estere a itima dijo, a apara diaparo tša gagwe tša bohumagadi gomme a tsena ka lapeng la mošate, a ya a ema moo a lebane le phapoši ye setulo sa bogoši se se bego se le ka go yona. Kgoši yena o be a le ka gare, a dutše setulong sa gagwe sa bogoši a lebane le mojako. Ya re ge kgoši a bona Mohumagadi Estere a eme lapeng, a mo lebelela ka botho gomme a mo šupa ka molamo wa bogoši wa gauta. Ke moka Estere a batamela a kgwatha ntlha ya wona. Kgoši a napa a mmotšiša a re: “Molato ke eng, Mohumagadi Estere? Mpotše se o se nyakago, gomme o tla se fiwa le ge e ka ba seripa sa mmušo wa ka.” Estere a mo fetola a re: “Ge o dumela, kgoši, o tle le Hamane lehono monyanyeng wo ke go direlago wona.” Kgoši a nama a laela Hamane gore a tle ka pela, gore ba tle ba phethe se Estere a se kgopetšego. Ka gona kgoši le Hamane ba ya monyanyeng woo ga Estere. Ya re ge go nwewa beine kgoši a re go Estere: “Mpotše se o se nyakago, gomme o tla se fiwa. Ke tla go fa se o se kgopelago, le ge e ka ba seripa sa mmušo wa ka.” Estere a mo fetola a re: “Ge o le yo botho go nna, kgoši, mo e lego gore o ka mpha se ke se kgopelago, gona o tle le Hamane bosasa monyanyeng wo mongwe wo ke tlago le direla wona. Ke ka nako yeo moo ke tlago go botša, kgoši, se ke se nyakago.” Ge Hamane a tloga moo monyanyeng o be a thabile, pelo ya gagwe e le ye tšhweu. Eupša a bona Mordekai lesorong la kgoro ya mošate, gomme ya re ge Mordekai a sa emelele, le gona a sa bontšhe gore o a mo hlompha, a mo tukela bogale. Eupša a no itshwara, a ya gae. A laletša bagwera ba gagwe gore ba tle lapeng la gagwe, gomme a kgopela Sereshe, mosadi wa gagwe, gore a be nabo. O ile a ba kgantšhetša ka moo a humilego, ka moo a nago le barwa ba bantši, ka moo kgoši a mo hlatlošeditšego maemong a godimo, le ka moo yena a fetago bakgomana le bahlanka ba kgoši ka gona. Hamane a tšwela pele a re: “Go feta moo, Mohumagadi Estere ga se a direla motho monyanya ge e se nna fela le kgoši, gomme le bosasa re sa laleditšwe. Eupša tšeo ka moka ga di nkgotsofatše ge ke sa bona Lejuda lela ba rego ke Mordekai le dutše lesorong la kgoro ya mošate.” Ke moo mosadi le bagwera bale ba gagwe ka moka ba mmoditšego ba re: “A go epelwe kota ya botelele bja dimetara tše masome a mabedi le metšo ye meraro. Ke moo bosasa mosong o ka kgopelago kgoši gore Mordekai a fegwe go yona, ka morago wa ya monyanyeng o thabile.” Hamane a bona taba yeo e le ye botse, gomme a laela gore kota yeo e epelwe. Bjona bošegong bjoo kgoši a lala a se a robala, ka gona a laela gore puku ya ditaba tša mmušo e tlišwe go yena gomme a e balelwe. Karolong ye e ilego ya balwa go be go na le ditaba tša ka moo Mordekai a kilego a utolla maanomabe a go bolaya kgoši, maanomabe a Bigtana le Tereshe, baamogwabonna ba babedi ba mošate bale ba bego ba leta diphapoši tša kgoši. Kgoši a botšiša a re: “Na Mordekai re ile ra mo hlompha ra ba ra mo putsa bjang tabeng yeo?” Bahlanka ba gagwe ba mo fetola ba re: “Ga se a ka a direlwa selo.” Kgoši a ba botšiša a re: “Kgane go na le yo mongwe wa bakgomana mo mošate?” Gomme Hamane o be a sa tšo fihla kgorong. Yena o be a tlile go kgopela kgoši gore Mordekai a fegwe koteng yeo e bego e šetše e epetšwe. Ka gona bahlanka ba mo fetola ba re: “Hamane o gona mo mme o nyaka go go bona.” Kgoši a re: “A a tsene.” Ke moo Hamane a tsenego, gomme kgoši a re go yena: “Go na le motho yo mongwe yo ke tlogago ke nyaka go mo hlompha. A motho yoo ke mo direle eng?” Hamane a ipotšiša a re: “Na e ka ba mang yo kgoši a nyakago go mo hlompha ka mokgwa wo? Ke nna, ga go yo mongwe.” Ke gona a fetotšego kgoši a re: “A diaparo tša bogoši di tlišetšwe monna yoo, tšona diaparo tše wena mong o di aparago. A pere ya gago e rwešwe sekgabišo sa bogoši. *** Bjale o laele yo mongwe wa bakgomana ba gago ba bagolo gore a apeše monna yoo diaparo tšeo, a mo hlahle a mo putliše lepatlelo la motse monna yoo a nametše pere yela. Gomme ge ba putla mokgomana yoo a tšame a goa a re: ‘Bonang ka moo kgoši a putsago monna yo a ratago go mo hlompha!’ ” Gomme kgoši a re go Hamane: “Itlhaganele o yo tšea diaparo tšeo le pere, gomme o hlomphe Mordekai, Mojuda, ka go mo direla tšohle tše o di boletšego. O tla mo hwetša a dutše lesorong la kgoro ya mošate.” Ke moka Hamane a yo tšea diaparo tšeo le pere. A apeša Mordekai diaparo tšeo, gomme Mordekai a namela pere yela, mme Hamane a mo putliša lepatlelo la motse a goa a re: “Bonang ka moo kgoši a putsago monna yo a ratago go mo hlompha!” Ka morago ga moo Mordekai a gomela lesorong la kgoro ya mošate, mola Hamane yena a potlakela lapeng la gagwe a ikhurumeditše hlogo a nyamile. A fihla a botša mosadi wa gagwe le bagwera bale ba gagwe ka moka tšohle tše di mo hlagetšego. Ke moo mosadi le bagwera bale ba gagwe ba mahlajana ba itšego go yena: “Ke gona ge o thoma go ušwa ke Mordekai. Yena ke Mojuda, gomme o ka se mo kgone. Ruri, o ka se mo dire selo.” Ba re ba sa bolela, baamogwabonna ba mošate ba tsena ba itlhaganetše ba tlile go iša Hamane monyanyeng ga Estere. Ka gona kgoši le Hamane ba yo ja le Estere la bobedi. Ya re ge go nwewa beine kgoši a botšiša Estere gape a re: “Bjale ge, Mohumagadi Estere, o nyaka eng? Mpotše, gomme o tla fiwa se o se kgopelago, le ge e ka ba seripa sa mmušo.” Mohumagadi Estere a mo fetola a re: “Ge eba ke go kgahla ebile o dumela go theeletša kgopelo ya ka ya bošuana, kgoši, ke no kgopela gore nna le setšhaba sa gešo re phele. Nna le setšhaba sa gešo re rekišitšwe gore re fedišwe. Gomme ge nkabe re rekišitšwe gore re be makgoba nkabe ke ile ka ikhomolela; eupša re šetše re le kgauswi le go fedišwa, go swielelwa, gomme lenaba leo le ka se kgone go lefa kgoši tahlegelo yeo.” Ke moo Kgoši Zerksese a botšišitšego Mohumagadi Estere a re: “Ke mang yo a ka bago le bogajana bja go dira taba ya mohuta woo? Na monna yoo o kae?” Estere a mo fetola a re: “Motlaiši le lenaba la rena ke yena monna yo mobe yo, Hamane!” Hamane a gakanega pele ga kgoši le mohumagadi. Ke moo kgoši a emeletšego a galefile, gomme a tšwela ntle a ya ka serapeng sa mošate. Hamane a bona gore kgoši o ikemišeditše go mo otla ka baka la bobe bjoo; ka gona yena a šala a kgopela Mohumagadi Estere gore a se ke a bolawa. Hamane o be a sa tšo itahlela fase setulong se Estere a bego a dutše go sona a kgopela tshwarelo, ge kgoši a boela ka phapošing a etšwa ka serapeng. Ge kgoši a bona seo a goa a re: “Na monna yo o nyaka go kata mohumagadi gona mo pele ga ka, ka lapeng la ka?” Kgoši a sa tšo bolela bjalo ya ba baamogwabonna ba khurumetša Hamane hlogo. Gomme yo mongwe wa bona yo a bitšwago Harbona a re: “Gape Hamane ebile o epetše kota kua ga gagwe ya go tlo fega Mordekai yo a kilego a begela Estere gore kgoši o tlile go bolawa. Botelele bja yona ke dimetara tše masome a mabedi le metšo ye meraro.” Kgoši a ba laela a re: “Fegang Hamane go yona!” Ka gona Hamane a fegwa koteng ye a bego a e epetše gore a tle a fege Mordekai go yona. Ya ba gona pefelo ya kgoši e okobalago. Ka lona letšatši leo Kgoši Zerksese a fa Mohumagadi Estere thoto ka moka ya Hamane, lenaba lela la Bajuda. Estere a botša kgoši gore Mordekai ke leloko labo, gomme go tloga tšatšing leo Mordekai a dumelelwa gore a tle pele ga kgoši. Kgoši a khwamola palamonwana ya gagwe ye e nago le sekibo sa gagwe, yela a bego a e amogile Hamane, gomme a e nea Mordekai. Estere a bea Mordekai mohlokomedi wa thoto yela ya Hamane. Estere a bolela le kgoši gape a itahletše maotong a gagwe mme a lla. A mo kgopela gore a dire se sengwenyana go thibela maanomabe ale Hamane, Moagaga, a bego a a logetše Bajuda. Kgoši a mo šupa ka molamo wa gagwe wa gauta, ka gona yena a ema a re: “Ge eba o dumela, kgoši, mme ke go kgahla, le ge eba o bona e le taba ye e lokilego, gona a go ngwalwe pego go thibela gore ditaelo tša Hamane di se ke tša phethwa, ditaelo tšela morwa wa Hamedatha, Moagaga, a di ntšhitšego tša gore Bajuda ka moka mmušong wa kgoši ba fedišwe. Nka kgotlelela bjang ge kotsi ye e ka wela setšhaba sa gešo, gomme le yona meloko yešo ya bolawa?” Ke moo Kgoši Zerksese a boditšego Mohumagadi Estere le Mordekai, Mojuda, a re: “Bonang, ke fegile Hamane ka baka la maanomabe a a bego a ikemišeditše go a dira Bajuda, gomme Estere ke mo file thoto ya gagwe. Eupša pego ye e ntšhitšwego ka leina la kgoši gomme e gatišitšwe ka sekibo sa mošate e ka se kgone go hlanošwa. Fela lena le ka no ngwalela Bajuda se le se ratago; ebile le ka no se ngwala ka leina la ka la ba la gatiša ka sekibo sa mošate.” Seo se diregile ka letšatši la masome a mabedi le metšo ye meraro mo kgweding ya boraro, kgwedi ya Sibane. Mordekai o ile a bitša bangwaledi ba kgoši gomme ba ngwalela Bajuda, babušiši, balaodi le bakgomana ba dilete tšela tše 127, go tloga India go ba go yo fihla Etopia. Mangwalo ao a be a ngwaletšwe selete se sengwe le se sengwe ka polelo ya sona le mongwalelo wa sona, le Bajuda ka polelo ya bona le mongwalelo wa bona. Mordekai a dira gore mangwalo ao a ngwalwe ka leina la Kgoši Zerksese, gomme a a gatiša ka sekibo sa mošate. A išwa ke banamedi ka dipere tša mošate tša lebelo. Mangwalo ao a be a re kgoši o dumelela Bajuda motseng wo mongwe le wo mongwe gore ba ka kgobokana gore ba tle ba itšhireletše. Ge ba ka hlaselwa ke banna ba ba itlhamilego ba setšhaba se sengwenyana, seleteng sefe le sefe, ba ka itwela mme ba ba fediša gotee le basadi le bana ba bona; ba ka ba swielela ba ba thopela dithoto. Tumelelo yeo e be e swanetše go phethagatšwa dileteng ka moka tša kgoši ka lona letšatši lela le kgethetšwego go feleletša Bajuda, e lego la lesome le metšo ye meraro la Adara, kgwedi ya lesome le metšo ye mebedi. Pego yeo e be e swanetše go phatlalatšwa e le molao gomme e tsebagatšwe bathong bohle dileteng ka moka, gore ge letšatši leo le fihla e be gobane Bajuda ba itokišeditše go itefeletša manabeng a bona. Ka taelo ya kgoši banamedi ba ile ba namela dipere tša mošate gomme ba tloga ka lebelo la pekwa. Pego yeo e ile ya phatlalatšwa le gona kua Susa, motsemošate. Mordekai a tloga mošate a apere diaparo tša bogoši tša mmala wa serolana le wo mošweu, le seaparo sa lešela le boletiana la bohwibidu bja moretele, a rwele le mphapahlogo wo mogolo wa gauta. Ke moo motse wa Susa o ilego wa goa ka lethabo le mekgolokwane. Bajuda ba be ba tletše lethabo, dipelo tša bona di edile, ba imologile, ba šetše ba ikwa ba fentše. Metseng yohle le dileteng tšohle, kae le kae mo pego yeo ya kgoši e ilego ya balwa gona, Bajuda ba ile ba ba le letšatši la go khutša la lethabo. Ba keteka monyanya ba thabile. Gabotsebotse batho ba bangwe ba bantši ba ile ba ipitša Bajuda, ka gobane bjale ba be ba ba boifa. Letšatši la lesome le metšo ye meraro la kgwedi ya Adara leo ka lona pego ya mošate e bego e swanetše go phethagatšwa, letšatši leo manaba a Bajuda a bego a holofetše gore a tla ba fenya ka lona, le ile la fihla. Eupša bakeng sa seo Bajuda ba ile ba fenya bona. Karolong ya Bajuda motseng wo mongwe le wo mongwe mmušong bona ba ile ba kgobokana gore ba hlasele mang le mang yo a lekago go ba kweša bohloko. Batho mo gohle ba be ba ba tšhaba, go se yo a ka ba fenyago. Gabotsebotse bakgomana ka moka dileteng – babušiši, balaodi le baemedi ba mošate – ba ile ba thuša Bajuda ka gobane ba be ba boifa Mordekai. Go be go tsebega mmušong ka moka gore Mordekai bjale ke monna yo a nago le maatla mošate, mme maatla ao a sa oketšega. Ka gona Bajuda ba dira se ba se ratago ka manaba a bona. Ba ba hlasela ka ditšhoša, ba ba bolaya, ba ba fediša. Kua Susa, gona motsemošate, Bajuda ba ile ba bolaya batho ba makgolo a mahlano. Gare ga bona go be go na le barwa ba lesome ba Hamane, morwa wa Hamedatha, lenaba lela la Bajuda. Bona e be e le Parshandata, Dalfone, Aspatha, Porata, Adalia, Aridatha, Parmashta, Arisai, Aridai le Bayesata. Fela ba ile ba se thope selo. *** *** *** Ka lona tšatši leo kgoši a begelwa gore mo Susa go bolailwe batho ba bakae. Gomme yena a re go Mohumagadi Estere: “Motseng wa Susa o nnoši Bajuda ba bolaile batho ba makgolo a mahlano, ge go balwa le barwa bale ba Hamane ba lesome. Kua dileteng gona ke gore ba dirile eng! Bjale ke eng se o se kgopelago? Ke tla go fa sona. Mpotše se o sa se nyakago, gomme o tla se fiwa.” Estere a mo fetola a re: “Ge eba o dumela, kgoši, a Bajuda ba mo Susa ka moswane ba dire gape se ba ilego ba dumelelwa go se dira lehono. Gomme o laele gore ditopo tša barwa ba Hamane di fegwe koteng yela.” Kgoši a ntšha taelo yeo, gomme pego yeo ya ntšhwa Susa. Ditopo tša barwa ba Hamane ba lesome tša fegwa. Ka letšatši la lesome le metšo ye mene la kgwedi ya Adara, Bajuda ba Susa ba kgobokana la bobedi, gomme ba bolaya batho ba bangwe gape ba makgolo a mararo moo motseng. Le ka lona letšatši leo ba ile ba se ke ba thopa selo. Bajuda ba kua dileteng le bona ba ile ba kgobokana gomme ba itšhireletša. Ba itlhatlola manaba ka go bolaya bahloi ba bona ba dikete tše masome a a šupago le tše tlhano. Eupša ba se ke ba thopa selo. E be e le ka letšatši la lesome le metšo ye meraro la Adara. Ka letšatši le le latelago, la lesome le metšo ye mene, ba se sa bolaya batho, eupša ya ba letšatši la lethabo le go keteka monyanya. Bajuda ba motse wa Susa bona ba dira letšatši la lesome le metšo ye mehlano letšatši la go khutša, ka gore ba be ba bolaile manaba a bona ka letšatši la lesome le metšo ye meraro le la lesome le metšo ye mene, gomme ba khutša ka la lesome le metšo ye mehlano. Ke ka baka leo Bajuda ba ba dulago metseng ye mennyane ba tšeago letšatši la lesome le metšo ye mene la kgwedi ya Adara letšatši la lethabo la go khutša, la go keteka monyanya le go fana dimpho tša dijo. Mordekai o ile a dira gore ditiragalo tšeo di ngwalwe gomme a romela mangwalo go Bajuda ka moka, ba kgole le kgauswi, dileteng ka moka tša kgoši. A ba botša gore ngwaga wo mongwe le wo mongwe ba hlomphe letšatši la lesome le metšo ye mene le la lesome le metšo ye mehlano la Adara e le matšatši a go khutša. Ao e bile matšatši ao ka ona Bajuda ba ilego ba itlhatlola manaba a bona; yeo e bile yona kgwedi ye ka yona nako ya manyami le dillo e ilego ya fetošwa nako ya lethabo le tlhalalo. Ba ile ba botšwa gore ba boloke matšatši a ka go thaba le go keteka, le gore ba fane dimpho tša dijo, mme bahloki ba fiwe le dimpho tše dingwe. Ka gona Bajuda ba dira tše Mordekai a ba boditšego tšona ka lengwalo leo, gomme monyanya woo ya ba setlwaedi sa ngwaga ka ngwaga. Hamane, morwa wa Hamedatha, Moagaga, yo e bego e le lenaba la Bajuda, o be a dirile matengwa goba “purime”, ka moo a bego a bitšwa ka gona, gore a tsebe letšatši le ka lona a bego a ka fediša Bajuda; o be a logile maano a go ba swielela. Eupša Estere a ya go kgoši, gomme kgoši a ntšha mangwalo gore Hamane a dirwe bobe bjo a bego a logile maano a go bo dira Bajuda – yena le barwa ba gagwe ba fegwa koteng. Ke ka baka leo matšatši ao a go khutša a bitšwago Purime. Ka baka la lengwalo la Mordekai le ka baka la tšohle tšeo di ilego tša ba hlagela, Bajuda ba ile ba dira molao wo o sa fetošwego wa go tlema bona le ditlogolo tša bona gotee le mang le mang yo e ka bago Mojuda, gore ngwaga ka ngwaga ka nako ye e swanetšego, matšatši ao a mabedi a fele a hlompšha ka moo Mordekai a laetšego ka gona. Go ile gwa tlengwa gore lapa le lengwe le le lengwe la Mojuda wa moloko wo mongwe le wo mongwe wa ka moso dileteng tšohle le metseng yohle le gopole le be le hlomphe matšatši ao a Purime go ya go ile. Mohumagadi Estere, morwedi wa Abihaile, le yena o ile a ngwala lengwalo a na le Mordekai, a tiišetša lela la go bolela ka Purime leo Mordekai a bego a ile a le ngwala pele. Lengwalo leo la ngwalelwa Bajuda ka moka, gomme la ngwalollwa la romelwa dileteng ka moka tše 127 tša mmušo wa Persia. Lona le be le re Bajuda ba be le khutšo le polokego, gomme le laya bona le ditlogolo tša bona gore ba hlomphe matšatši a Purime ka nako ye e swanetšego, go no swana le ge pele ba be ba ipeetše melao ya go itima dijo le ya dinako tša mahloko. Seo se ile sa laelwa ke Mordekai le Mohumagadi Estere ka babedi. Taelo ye ya Estere yeo e bego e tiišetša melao ya Purime e ile ya ngwalwa ka pukung. Kgoši Zerksese o ile a gapeletša batho ba dilete tša lebopong la lewatle modiro gotee le ba bogareng bja naga mmušong wa gagwe. Dilo ka moka tše kgolo tše di makatšago tše a di dirilego, gammogo le ditaba ka moka tša ka moo a hlatlošeditšego Mordekai maemong a godimo, di ngwadilwe ka pukung ya ditaba tša magoši a Persia le Media. Mordekai, Mojuda, e be e le yena yo mogolo, a latela Kgoši Zerksese ka maemo. Bajuda ba gabo ba be ba mo hlompha ba bile ba mo rata, ka gobane o be a šomela go hola setšhaba seo sa gabo le go bolokega ga ditlogolo tša sona ka moka. Go kile gwa ba le monna yo mongwe yo leina la gagwe e bego e le Jobo, a dula nageng ya Utse. E be e le monna yo a se nago bosodi, wa go loka le wa go boifa Modimo, gomme a sa dire tše mpe. O be a na le barwa ba ba šupago le barwedi ba bararo, a ruile dihuswane tše dikete tše di šupago, dikamela tše dikete tše tharo, dikgomo tše sekete, le dipokolo tše makgolo a mahlano. Le gona o be a na le bahlanka ba bantšintši, gomme a humile go feta batho ba Bohlabela ka moka. Barwa ba Jobo ba be ba na le setlwaedi sa go šielana ka go direlana monyanya ka malapeng a bona, gomme ba laletša le dikgaetšedi tša bona tše tharo gore di tle di je, di nwe nabo. E be e re ge matšatši a monyanya wo mongwe le wo mongwe a fetile, Jobo a bitše bana ba gagwe go tlo direla yo mongwe le yo mongwe wa bona sehlabelo gore a ba hlwekiše. O be a tsoga e sa le bošego a dire dihlabelo tšeo, ka ge a be a gopola gore mohlomongwe ba ka no ba ba rogile Modimo ka phošo. E rile ge letšatši le fihla la gore dibopiwa tša legodimong di tle pele ga Morena, Sathane le yena a tla le tšona. Morena a mmotšiša a re: “Na o tšwa kae?” Sathane a mo fetola a re: “Ke be ke itshepelela le lefase, ke eya kua le kua.” Morena a mmotšiša a re: “Afa o bone Jobo, mohlanka wa ka? Lefaseng ka moka ga go motho yo a swanago le yena, wa go se be le bosodi, wa go loka, wa go mpoifa, le wa go se dire tše mpe.” Sathane a mo fetola a re: “Na o ra gore Jobo a ka go boifela lefeela? Ga ke re ke wena o dulago o mo šireleditše ka gohle, yena le lapa la gagwe gotee le tšohle tše a nago le tšona. O šegofaditše tšohle tše a di dirilego, gomme mehlape ya gagwe ya ata kudu. Eupša ge o ka mo tšeela tšohle tše a nago le tšona o tla go roga mahlong!” Ke moo Modimo a rilego go Sathane: “Go lokile ge, tšohle tše a nago le tšona di diatleng tša gago, fela yena mong o se ke wa mo dira selo.” Sathane a nama a tloga. Ya re ka tšatši le lengwe ge bana ba Jobo ba le monyanyeng ka lapeng la mogolwabona, gwa tla motseta go Jobo, a re: “Re be re lema ka dipholo gomme dipokolo tšona di fula kgauswi. Gateetee ke ge Basheba ba re wela godimo gomme ba di thopa tšohle. Ba bolaya bahlanka ba gago ka moka ka ditšhoša. Ke nna fela ke tšhabilego gore ke tle ke go tsebiše.” Ya re a sa bolela, gwa fihla yo mongwe, a re: “Legadima le rathile dihuswane la di bolaya gotee le badiša. Ke nna fela ke tšhabilego gore ke tle ke go tsebiše.” Ya re a sa bolela, gwa tla yo mongwe, a re: “Makoko a mararo a Bakaldea a re hlasetše, a thopa dikamela, a bolaya le bahlanka ba gago bohle ka ditšhoša. Ke nna fela ke tšhabilego gore ke tle ke go tsebiše.” Ya re a sa bolela, yo mongwe a fihla, a re: “Bana ba gago ba be ba le monyanyeng ga morwago yo mogolo ge go etla ledimo la go tšwa lešokeng. La šikinya ntlo yohle, gomme ya ba wela godimo, ya ba bolaya ka moka. Ke nna fela ke tšhabilego gore ke tle ke go tsebiše.” Ke moka Jobo a emelela, a gagola diaparo tša gagwe a nyamile. A ipoola hlogo, a itahlela fase ka sefahlego, a rapela a re: “Ke tlile lefaseng ke le fela, gomme ke tla tloga lefaseng ke le fela. Morena o be a file, mme bjale o tšere. A a retwe!” Le ge Jobo a hlagetšwe ke dilo tšeo ka moka, ga se a ka a dira sebe ka go sola Modimo. E rile ge letšatši le fihla la gore dibopiwa tša legodimong di tle gape pele ga Morena, Sathane le yena a buša a tla le tšona. Morena a mmotšiša a re: “Na o tšwa kae?” Sathane a mo fetola a re: “Ke be ke itshepelela le lefase, ke eya kua le kua.” Morena a mmotšiša a re: “Afa o bone Jobo, mohlanka wa ka? Lefaseng ka moka ga go motho yo a swanago le yena, wa go se be bosodi, wa go loka, wa go mpoifa, le wa go se dire tše mpe. Wena o ile wa ntlhohleletša gore ke mo tlišetše masetlapelo go se na le lebaka, le ge go le bjalo Jobo o sa kgotleletše boloking bja gagwe.” Ke moo Sathane a mo fetotšego a re: “Moleko woo e be e le molekwana – motho a ka lahla tšohle tše a nago le tšona ge a šetše a rapeletša go phela. Fela ge o ka mo kweša bohloko mmeleng, gona o tla go rogaka mahlong!” Ke ge Morena a re go Sathane: “Go lokile ge, o diatleng tša gago, fela o se ke wa mmolaya.” Ke moka Sathane a tloga moo pele ga Morena, a yo ntšha Jobo dišo tše šoro, go tloga ka monwana wa leoto go fihla ka hlogo. Jobo a tloga a yo dula sethobolong, a tšea lengetana a ingwaya ka lona. Mosadi wa gagwe a mmotšiša a re: “Na o sa fela o kgotleletše boloking bja gago? Rogaka Modimo o ikhwele!” Jobo a mo fetola a re: “O bolela bjalo ka mosadi wa setlaela! Na re ka amogela dilo tše dibotse go Modimo, tše mpe tšona ra di gana?” Le ge Jobo a be a ekwa bohloko, o ile a se ke a dira sebe ka go bolela gampe ka Modimo. Ge bagwera ba Jobo ba bararo ba ekwa masetlapelo a gagwe ka moka, ba ile ba kwana go tloga magaeng a bona go yo mo kwela bohloko le go mo homotša. Bona e be e le Elifase wa go tšwa Temane, le Bildade wa go tšwa Shuage, le Tsofare wa go tšwa Naama. Ya re ba sa le kgole ba bona Jobo, fela ba se mo tsebe. Ge ba seno mo tseba, ba thoma go lla ba golola, ba gagola diaparo tša bona, gomme ba gašetša mobu godimo wa ba tšhela dihlogo. Ke moka ba dula fase gona moo le yena matšatši a a šupago le mašego a ona, ba sa bolele selo, ka gore ba be ba bona gore o kwa bohloko kudu. Ka morago ga moo Jobo a thoma go bolela, a rogaka letšatši le a tswetšwego ka lona a re: “A letšatši le ke tswetšwego ka lona le timelele, le bjona bošego bjo ke imilwego ka bjona! Letšatši leo a e be leswiswi, Modimo wa magodimong a se sa le šetša, le seedi se se ke sa le hlabela. A le tšewe ke leswiswi le lesoleso; le khupetšwe ke maru a maso, le aparelwe le ke phifalo ya letšatši. Bošego bjoo a bo tlošwe ke leswiswi, gomme bo se sa balwa le matšatši a ngwaga; bo se ke bja hwetšwa dikgweding tša ngwaga. Ee, ka bjona a go se tswalwe ngwana, go se ke gwa kwagala mekgolokwane. Tšatši leo a le rogakwe ke barogakamatšatši ba ba kgonago go hlohleletša Lebiathane. Bošego bjoo a bo fifalelwe ke naledi tša masa, bo letele letšatši ge le hlaba eupša le se hlabe; a bo se ke bja hlabelwa ke mahwibi, ka ge bo ntesitše ke tswalwa, mme bo ntsentše mathateng. “Ke reng ke se ka ikhwela ge ke tswalwa, ka hema la mafelelo ge ke belegwa? Mma o be a mpharelang difarong? O be a nnyantšhetšang letswele? Ge nkabe ke ikhwetše ka nako yeo, nkabe ke robetše ke iketlile, ke ithobaletše ka khutšo le magoši le bakgomana ba ba ilego ba tsošološa marope. Nkabe ke ithobaletše le babuši ba ba bego ba na le gauta, ba tladitše dintlo tša bona silibera. Ke be ke reng ke sa be bjalo ka sefolotšana se se bolokwago ka lephakuphaku, ka ba bjalo ka lesea le le sa kago la bona seedi? Gape ka lebitleng bakgopo ga ba sa dira tše mpe, le ba ba feletšwego ke maatla ba khutša gona. Ešita le dibofša moo di a iketla, ga go na le yo a di gapeletšago go šoma. Ke mo go dulago batho ka moka, ba bagolo le ba banyenyane; le makgoba ke moo a lokologago gona. “Batho ba phedišetšwang mahlomoleng? Seetša se reng se fiwa ba ba nyamilego? Ba duma lehu, fela ga le ba tlele; ba le nyaka go feta lehumo le le fihlilwego. Ba ka thaba ba hlalala ge ba ka be ba ka bolokwa. Ke go reng seetša se fiwa motho yo a se sa dumago go phela, motho yo Modimo a mo thibetšego tsela tšohle? Bakeng sa go ja ke a lla, metsetlo ya ka ga e fele, e bjalo ka meetse a a elago. Tše ke di boifago ke tšona tše di ntlhagelago; tše ke di tšhabago di a ntlela. Ga ke na boiketlo, ga ke na khutšo, le poifo ga e ntlogele.” Ke mo Elifase wa go tšwa Temane a fetotšego Jobo a re: “Kgane o ka selekega ge nka boledišana le wena? Fela ga ke sa kgona go homola. O be o ruta batho ba bantši, o tiiša ba ba nolegilego moko. Ba ba lego mathateng o be o ba kgothatša; ba ba lapilego o ba lapološa. Bjale ge mathata a wela wena, o felelwa ke tshepo, o a gakanega. Ga ke re go boifa Modimo wa gago ke sona se o se botilego, le go hloka bosodi ga gago ke sona se o se tshepilego? Nke o gopodišiše mo: Na o gona mohlokabosodi goba moloki yo a kilego a fedišwa? Nna se ke se tsebago ke gore bomolemabobe ba go bjala le mathata ba buna tšona tšeo. Bona bao Modimo o ba bolaya a befetšwe, a ba fediša a ba galefetše. Bakgopo bao ba a bopa, ba rora boka ditau; eupša Modimo o homotša tawana tšeo, o di kgola meno. Ba hwa bjalo ka tau tše di hlokago sa go ja, bana ba bona ba gašagana. “Nkile ka sebelwa taba ka tsebeng. Ya ntlhoba boroko bjalo ka segateledi, mola batho ba robetše bja matlogadibešong. Ka thothomela ka letšhogo, mmele wohle wa ka wa roromela. Phefšana ye tshesane ya mphorola sefahlego; ka kgaoga letswalo, moriri wa ba wa tširoga. Ka bona selotsoko se eme pele ga ka, fela ke sa se hlathe. Ge go rile tuu, ka kwa lentšu le re: ‘Kgane motho wa nama e ka ba moloki pele ga Modimo, goba a hloka bosodi pele ga Mmopi wa gagwe? Gape le batseta ba gagwe ba legodimong yena ga a ba tshepe; ee, le mo go barongwa o hwetša ba bosodi. Bjale a ka napa a tshepa ba ba dulago ka dintlong tša mobu, dibopiwa tša letsopa, bona ba ba pitleletšegago bjalo ka tšhwele? Motho le mo hlabela a phela, la dikela a hwile. O timelela sa ruri go se yo a lemogago. O loba tšohle tše a nago le tšona, a hwe a se na bohlale.’ “Goelela, o kwe ge o ka arabja. Morongwa ke ofe yo o ka mo llelago? Go phela ka metsoto ke botlaela, go lakalela ke go hloka tlhaologanyo. Nkile ka bona lešilo le iketlile, eupša ka se diege go lakaletša lapa la lona madimabe. Bana ba lona ga ba na tšhireletšo; kgorong ya tsheko ba a tšeatšewa, ba hloka moemeledi. Monatlala o ja tše di bunnwego ke lešilo – ešita le mabudutša a go tšwa ka mašohlošohlong – monyoriwa yena a hufegela lehumo la lona. Manyami ga a mele mobung, le mathata ga a hloge fase. Ke motho yo a tswalelwago mathata, go no swana le dihlase ge di thanya mollong. “Ge nkabe e le nna wena, nkabe ke bolela le Modimo, ka mmegela taba ya ka, yena Modiradikgolo tše di sa kwešišegego, le mehlolo ye e sa balegego, yena Monešapula lefaseng, yena Monošetšamašemo. Ruri, Modimo ke Mophagamišabanyatšegi, ke Mohlakodišaballi. O senya bomenyetša bja baradia, gore ba se atlege go tše ba di dirago. O tanya dihwirihwiri ka maano a tšona, gore tše ba di dirago di se tšwelele. Le mosegare bona ba mo leswiswing, le ge tadi e amuša ba phophola boka bošego. Bahloki Modimo o ba phefiša mahlapa a bona, a ba hlakodiša le tlhaselong ya diganka. Ya ba lona lehutšo la bahlaki, le go hlokišwa molomo ga bakgopo. “Yo lehlogonolo ke wa go kgalwa ke Modimo; ka gona o se gane go solwa ke Ramaatlaohle. Modimo o re go gobatša, a be a fodiše; a re go hlokofatša, a be a thobe. O go hlakodiša kotsing gantšintši, a go phološe bošuleng. Ge tlala e wele, wena a ka se go lese e go bolaya, le ntweng o tla go phefiša lehu. Modimo o tla go šireletša go ba ba go sebago, gomme ge masetlapelo a go wela, o tla go hlakodiša. Dikgaphamadi le tlala wena o tla di sega, wa se tšhabe le diphoofolo tša naga. Mašemo a gago a ka se be le maswika, le diphoofolo tša naga di ka se go hlasele. O tla bona lapa la gago le iphelela ka boiketlo; wa hwetša le diruiwa tša gago di le ka moka mafulong a tšona. O tla bona ditlogolwana tša gago di ata, di ntšifala bjalo ka bjang nageng. O tla ikela lebitleng o tšofetše, o etša mabele a a išwago seboeng a budule. Tšeo ke tše re di nyakišišitšego, mme go no ba bjalo; le wena di ele hloko, o di bee ka pelong.” Jobo a fetola Elifase a re: “Ge nkabe masetlapelo a ka le mathata a elwa, a be a tla feta lešabašaba la lewatle ka boima; ke ka baka leo ke tšhogilego ke boletše. Ramaatlaohle o ntlhabile ka mesebe, mpholo wa yona wa ntsenelela mmeleng. Modimo o ntebantšhitše ka tše di ntšhošago. “Kgane pitsi e ka lla e na le mafulo, kgomo yona e ka bokolela e le mafulong? Sejo sa bohla sona a se ka jega se se se tšhelwe letswai? Mothubi wa lee wona kgane o na le leno? Dijo tše dibjalo ga ke nyake le go di kgoma, di a ntšhišimiša. “Modimo o reng a sa mphe se ke se kgopelago? Ke eng a sa mphe se ke se nyakago, e lego gore a kgahlwe ke go mpheleletša, a nkiše seatla, a mpolaye? Se se bego se ka nkwiša pelo, gomme ka kganakgana ke thabile le ge bohloko bjona bo be bo ka se okobale, ke gore ditaelo tša Yomokgethwa tšona ga se nke ke di gane. Na maatla a ka a kaakang, ge go thwe ke kgotlelele? Go se fele pelo ga ka go tla nthušang ke se na le se ke se holofelago? Kgane ke bopilwe ka leswika, goba mmele wa ka ke wa tshipi? Ga ke sa na le maatla a go itlhakodiša; ga go motho yo a ka nthušago. “Ge motho a itlhobogile o lokelwa ke go bewa pelo ke bagwera, ešita le ge a se sa hlompha Modimo. Eupša lena, banabešo, le nthadiile, la etša dinokana tše di pšhago. Tšona di dubišwa ke lehlwa mola ka godimo le tologa. Ge go fiša di a gwama; ge thwagadima e iphile maatla, di a pšha. Basepelakadikamela ba phamoga tsela ba nyaka dinokana tšeo; ba gerema le lešoka ba ba ba hwa. Basepelakadikamela ba kua Sheba ba a di nyaka; baeti ba Tema ba holofetše tšona. Ba nyamišwa ke go hloka se ba bego ba se holofetše; ge ba fihla go tšona ba a swaba. Lena ke le swantšha le dinokana tšeo; le mpona molahlego gomme le a ntšhaba. Kgane nkile ka re go lena: ‘Mpheng sa go re le go re,’ goba ka re: ‘Nkalaletšeng motho ka maruo a lena,’ goba ka re: ‘Ntamoleleng lenaba,’ goba ka re: ‘Ntlhakodišeng diatleng tša diganka’? “Nthuteng, ke tla homola, le ntemošeng mo ke fošitšego gona. Mantšu a nnete a a kgodiša, eupša lena, go ntshola ga lena go tla thušang? Na le nyaka go mphošolla go tše ke di bolelago, goba le tšeiša mantšu a moitlhobogi phefo? Lena tšhiwana le ka e bapatša, la rekiša le mogwera wa lena ka theko ye kgolo. Hle, nke le ntebeleleng, gobane taba di mahlong, mme nka se le aketše. Bjale go lekane, le se tšwele pele; le se nkgopiše, gobane nna ga ke ne molato. Kgane go na le se sempe se ke se boletšego? A le re ga ke kgone go lemoga madimabe ge a nkwela?” “Ga ke re sa motho mo lefaseng ke go šekela? Kgane bophelo bja gagwe ga bo etše bja mothwalwa? Bo swana le bja lekgoba le le dumago moriti; bo bjalo ka bja mothwalwa yo a letetšego mogolo, gomme sa ka ke go phelela lefeela dikgwedi ka go latelana ga tšona; ke beetšwe mašego a tlaišego. Ge ke robetše ke fela ke re: ‘Go tla sa neng?’ Eupša bošego e ba bjo botelele, ke lala ke hlobaela gwa ba gwa sa. Mmele wa ka o nyeuma diboko, letlalo la ka le apere magogo a dišo; dišo tša ka di a palega di dutle boladu. Matšatši a ka a kitima ka lebelo la mmutla, a feta ke itlhobogile. “Hle, Modimo, gopola gore bophelo bja ka ke lefeela; dilo di ka se sa ntokela. Bjale o a mpona, fela o ka se sa mpona; o tla re ge o lebelela, ya ba ga ke sa le gona. Bjalo ka ge leru le re go apoga le ele ruri, yo a theogetšego bodulabahu le yena o ela ruri. Ga a ke a sa boela ka lapeng la gagwe; o lebalwa ke ba ba bego ba mo tseba. Ke ka baka le ke sa kgonego go homola, ke nyakago go bolela ka baka la ge ke tlaišegile kudu, ke balabala ka ge ke tsota. “Na o ntišeditšeng? Kgane ke nna lewatle goba mmamogašwa? Ge ke re ke patlama malaong ke a ehuga gore ke hlatlolwe bohloko bja ka, wena o ntšhošetša ka ditoro, o ntlaletša ka dipono, ke be ke bone go kgangwa go le kaone go phala go phela ke tlaišega. Go phela go ntenne; nka se phelele ruri. Ntlogele, bophelo bja ka ke lefeela. “Motho ke eng, ge o bile o mo tšeela godimo gakaaka, ge o bile o mo ela hloko? O mo lekola mosong wo mongwe le wo mongwe, wa mo leka motsotso wo mongwe le wo mongwe. O reng o sa ntlhokomologe gosenene gore ke dio metša mare? Ge eba ke dira sebe, ke go senyetšang, wena Moletabatho? O reng o ntebantše? Ke ka baka la eng ke le morwalo wa go go imela? Ke eng o sa ntshwarele ge ke tshela molao wa gago, wa ntloša molato? Etse kgauswinyana ke tla be ke ikhwetše, wa nnyaka, ya ba ga ke sa le gona.” Ke moka Bildade wa go tšwa Shuage a fetola Jobo a re: “Na o tla bolela taba tše go fihlela neng? O tla fetša neng go fafatla? Kgane Modimo a ka kgopamiša toka, goba a lesa go dira tše di lokilego? Ge eba bana ba gago ba mo fošeditše, gona o ba otlile ka mo go lebanego. Bjale ge, wena retologela go yena, o mo phophothe. Ge o ka hloka bosodi wa ba yo a lokilego, Modimo o tla go phafogela a go thuša, a tsoša lapa la gago ka mo go swanelago. Tšela o bego o na le tšona pele e tla ba dinyane ge di bapetšwa le tše o tlago ba natšo ka moso. “Nke o botšiše ka bohlale bja bale ba kgale, o gopodišiše tše borakgolokhukhu ba rena ba bego ba di ruta batho. Rena re dio ba ba maabane, ga re tsebe selo; lefaseng re feta bjalo ka moriti. Bona ba tla go ruta, ba go botša tše di tšwago bohlaleng bja bona ba re: “ ‘Na mohlahla o ka mela mo go sego mohlaka? A lehlakanoka lona le ka mela mo go se nago meetse? Ge meetse a ka pšha, o omelela e sa le lekgaba o sešo wa segwa, dimela tše dingwe e sa le tše ditala.’ Bohle ba ba itebatšago Modimo le bona ba ba bjalo; ke ka mo le mohlokamodimo a felelwago ke tshepo ka gona. O botile bobi, o ikantše letata la segoko. Ge a ka ithekga ka lona, le ka se mo thekge; ge a ka itshwarelela ka lona, le tla kgaoga. “Mohlokamodimo o atlega boka semela ge tšatši le hlabile, se se tsemago mahlogedi ka serokolong, se medu ya sona e tatetšago mokgobo wa maswika, e pharolago le moago wa maswika. Eupša ge o ka se tumola, ga go yo a ka tsebago ge se kile sa ba moo. Agaa, mohlokamodimo lethabo la gagwe ke la mohuta woo; o tla tšewa ke yo mongwe legato. “Modimo yena ga a lahle mohlokabosodi, ebile ga a thuše badiratšempe. O tla buša a go dira gore o sege o be o gobele megobo. Bahloi ba gago bona ba tla segwa ke batho, le magae a bakgopo a ka se sa ba gona.” Jobo a fetola Bildade a re: “Ee, ke a tseba gore go bjalo. Eupša motho wa nama a ka se seke taba le Modimo. Ge a ka re o tšea kgang le yena, a ka se fetole le e tee ya dipotšišo tša gagwe tše sekete. Modimo ke Rabohlale yo maatla; ke mang yo a ka mo ngangišago? O šuthiša dithaba a se a di laletša, a di phethola a befetšwe. O šikinya lefase a le tloša madulong, gomme dikokwane tša lona tša tekateka. O thibela letšatši go hlaba; ke yena Mmipadinaledi. O phurulotše leratadima a nnoši, a gatakela maphoto a lewatle, yena Mmopi wa boThutlwa le boKgogamašego le boSelemela le tše dingwe dinaledi tša ka borwa. Ke yena Modiri wa dikgolo tše di sa kwešišegego le mehlolo ye e sa balegego. “Ge a feta pele ga ka, ga ke mmone; ge a tabola, le gona ga ke lemoge. O ubula motho selo, a ka thibelwa ke mang? A ka botšišwa ke mang a re: ‘O dirang?’ Modimo ge a befetšwe o befetšwe; o rapaladitše bathuši ba mmamogašwa Rahaba. Bjale nna ke mang, nkago fetolana le yena? Mantšu a go mo kgona nka a hlaola bjang? Le ge ke se na molato bjale, nka se fetolane le yena; sa ka ke go kgopela yena, moahlodi wa ka, gore a nkgaugele. Le ge nkabe nka mo iša tshekong mme a ya, ga ke kgolwe gore a ka ntheeletša, yena yo a nthoboketšago ka madimo, a nkokeletšago dintho go se na lebaka. Ga a mphe le sebaka sa go buša moya, o mphediša gabohloko. Ge e le go ya ka maatla, yo maatla ke yena. Ge e le go išwa tshekong, a ka išwa ke mang? Le ge ke se na molato bjale, dipolelo tša ka eka di a ntšwa; le ge ke se na bosodi bjale, yena o ntshema wa molato. Nna ga ke na bosodi, fela ga ke sa na taba; ke tennwe ke go phela. Go swana fela. Ke ka baka leo ke rego moloki le yo kgopo o ba fediša go swana. Ge mohlokamolato a welwa ke kotsi, Modimo o sega moitlhobogi yoo. Ge mmušo wa naga o thopilwe ke bakgopo, Modimo o foufatša baahlodi ba yona. Ntle le yena ke ge e ka ba mang? “Matšatši a ka a feta ka lebelo la go feta la mokitimi; a ntšhabela ke se na boiketlo. A kitima ka lebelo la maselawatle a mahlakanoka, a etša ntšhu ge e kgoulogela nama. Ge ke re ke itebatša ditlaišego tša ka ka go ediša sefahlego le go phuthologa, e ba gona ke tšhošwago ke mahloko a ka ohle, gobane ke tseba ge wena Modimo o mpona molato. Bjale ge eba ke tlilo bonwa molato, ke sa itshwenyetšang? Le ge nka hlapa ka lepate, ka ikgohla diatla ka mogohlo, wena o tla ntahlela ka gare ga ditšhila, ka šišingwa le ke dikobo tša ka. Ge nkabe Modimo e le motho, nkabe ke fetolana naye, ra sekišwa mmogo. Eupša ga go yo a ka re lamolago, ga go yo a ka re ahlolago ka babedi, gore a lese go nkotla, le go boifega ga gagwe go se ntšhoše. Le ge go le bjalo, ke bolela ke sa boife, gobane ga ke ka mo ke gopolelwago ka gona.” “Ke tennwe ke go phela; ke tla phula pelo maroba, ka tšholla sello sa ka, ka ge ke tsota. Ke tla kgopela Modimo ka re: Hle, o se ntahle, mpotše se ke go fošeditšego ka sona. Na o bona e le tshwanelo go nkgatelela, go nyatša se se dirilwego ke wena mong, wa kgahlwa ke merero ya bakgopo? Kgane mahlo a gago ke mahlo a nama, o bona dilo bjalo ka batho? Na bophelo bja gago ke bjo bokopana go etša bja motho? Na bophelo bja gago bo fela ka pela bjalo ka bja motho? Bjale o reng o hlomere bokgopo bja ka, o šetše dibe tša ka morago, etšwe o tseba gore molato wona ga ke nawo, le gore ga go yo a kago ntamolela go wena? “Ke dirilwe ke wena, wa mpopa ka diatla tša gago, gomme bjale o a boa o a mpheleletša. Gopola gore o mpopile ka letsopa. Kgane o nyaka go mphetoša lerole gape? A ke re ke wena o ntšholotšego boka lebese, wa nkgahliša bjalo ka mafsi a makgahla? Wa ntshwaraganya ka marapo le mešifa, wa nkapeša nama le letlalo. O dirile gore ke belegwe, wa fela o nthata, wa ntlhokomela ka go mpabalela. Fela bjale ke a tseba gore ka pelong o be o ntaletše, o loga maano a go tlo nkweša bohloko. O be o ntebeletše gore ke dire sebe, gore o tle o gane go ntshwarela. Ge eba ke na le molato, ga ka le bona; le ge eba ke se ne molato, ke šitwa go lebanya mahlo le batho, ke gobogile, ke tlaišega kudu. Ge ke re ke tsoša hlogo, o ntsoma bjalo ka tau; o dira le ka dimakatšo gore o nkgobatše. O dula o nkhweletša bohlatse bja go ntahla; o nkgalefela o eya pele, o fela o ntlhasela leboelela. “O reng o ntesitše ke belegwa? Nke nkabe ke ikhwetše pele ke bonwa. Ge nkabe ke hwile ke sa tšo belegwa, ka bolokwa, go ka be go swana le ge ke sa ka ba gona. A ke re matšatši a ka ga a sa le nene? Ntlogele ge, ke phuthologe gannyane, pele ke ikela nageng ya leswiswi le lesoleso, moo nka se sa tsogago ke boile, nageng ya kgampipi le tlhakantswiki, moo seetša se swanago le leswiswi.” Gwa fetola Tsofare wa go tšwa Naama a re: “Na sefafatlane se ga se arabiwe? Kgane moratharathi ke yena moloki? Na o gopola gore ditšiebadimo tša gago di ka no homolelwa? Kgane o bona nke o ka kodutla Modimo, wa se ganetšwe ke motho? Etse o ipotša gore se o se bolelago ke nnete, le gore mahlong a Modimo ga o na bosodi. Nke nkabe Modimo a go fetola, a phegišana le wena! Nke nkabe a go botša diphiri tša bohlale, gobane bohlale bja Modimo ke bjo bo makatšago. Ke mo o bego o tla lemoga gore Modimo o go otla gosenene go feta ka mo go go swanelago. “Kgane o ka kwešiša diphiri tša Modimo, wa kwešiša bohlale bja Ramaatlaohle ka botlalo? Bo phagame go feta magodimo – kgane wena o ka bo fihlelela? Bo iša go feta bodulabahu – na o ka bo fihlelela? Bo nabile go feta lefase, ebile bo ikadile go feta lewatle. Ge Modimo a ka tla a go swara a go iša tshekong, ke mang yo a ka mo thibelago? Baikaketši Modimo o a ba tseba; o lebelediša mediro ya bona ye mebe. Setlaela se ka se kgone go hlalefa, bjalo ka ge pitsi le yona e ka se tswalwe e le motho. “Ge o ka sokologela go Modimo, wa otlolla matsogo a gago wa mo rapela; ge o ka tlogela go dira dibe, wa se dumelele bobe ka lapeng la gago, ke mo o tlago ba o hloka bosodi, wa kgona go lebanya mahlo le batho, wa ba le maatla, wa se boife. O tla nama wa lebala mahloko a gago, wa a gopola e le fela lefula le le fetilego. Bophelo bja gago bo tla taga go feta letšatši la mosegare wa sekgalela; manyami a gago a tla go tlogela go etša leswiswi ge le tlogela masa. O ka se sa boifa selo, gobane o tla be o na le tše o di holofetšego; Modimo o tla go šireletša, wa robala o iketlile. O tla ithobalela go se yo o mmoifago; ba bantši ba tla nyaka go ithatiša wena. Yo kgopo yena o tla timelelwa ke sefahlego, le botšhabelo o tla bo hloka. Sa gagwe e tla ba go letela lehu fela.” Ke moka Jobo a ba fetola a re: “Aowii, gape batho ke bolena. Mohla le ehwa, le bohlale e tla be e le gona ge bo hwile. Fela le nna ke na le tlhaologanyo bjalo ka lena; ga le mphete ka selo. Kgane taba tše ke mang yo a sa di tsebego? Etse bjale ke segwa le ke bagwera ba ka; ba a nkgegea, etšwe ke lokile, ke se ne bosodi, nna yo ke bego ke rapela Modimo, gomme yena a nkwe. Lena le iketlilego le a nnyatša, ke nna wa madimabe; le e nametša thaba e hlotša. Bahlakodi ba dula ba iketlile; ba go rumola Modimo le bona ba dula ba bolokegile, bona ba ba bonago nke ba ka mo laola. Ge o ka botšiša dikgomo di tla go botša, dinonyana le tšona di tla go begela; wa botšiša digagabi di tla go hlalošetša; dihlapi le tšona di tla go anegela – tšohle di tseba ge di bopilwe ke Morena. Bophelo bja diphedi tšohle le bja motho bo diatleng tša gagwe. A ke re motho o senka mantšu ka ditsebe, mola ka leleme a kwelela dijo? “La hlogoputswa le na le bohlale; gape go phela galelele go tswala kwešišo. Modimo yena o na le bohlale le maatla; o na le keletšo le temogo. Ge a hlahlamola, moagalefsa a ka se be gona; a tsenya motho kgolegong, gwa hlokega mohlakodiši. Modimo a se neše pula, gwa wa komelelo; a thibolla meetse, gwa tla dikgogola. “Modimo ke senatla, Mailagofenywa; moradia le moradiwa ba laolwa ke yena. Baeletši o ba amoga bohlale, gomme balaodi a ba fetole ditlaela. O tloša magoši madulong, a ba dira dibofša. O kokobetša baprista, le dinatla o a di wiša. Batho ba ba botilwego o ba thiba molomo, le bohlogoputswa o ba tlaetša menagano. Bakgoma o ba nyatšiša batho, mme dinatla a di hlokiša maatla. O utolla diphiri tša ka maswiswing, gomme swiswi le lesoleso a le hlabišetša seedi. O godiša ditšhaba, a buše a di fediše. O atiša ditšhaba, a tle a di lahletše. Baetapele ba naga o ba tlaetša menagano, a ba raladiša le mašoka a a se nago ditsela. Ba phophola leswiswing mo go sego seetša, o ba thekesediša bjalo ka ditagwa.” “Tšohle tše ke šetše ke ile ka di bona ka a ka mahlo, ka di kwa ka tša ka ditsebe, ka di kwešiša. Tše le di tsebago le nna ke a di tseba. Ga le mphale ka selo. Yo ke ratago go bolela naye ke Ramaatlaohle. Ke nyaka go ngangišana le yena Modimo ka taba ye ya ka. Lena le bipa go se tsebe selo ga lena ka maaka. Le etša dingaka tše di sa kgonego go alafa. Etse ge le ka ikhomolela motho a ka no re le hlalefile. “Nke le ntheeletše ge ke ala taba ya ka, le ele hloko se ke se bolelago. Na le re le bolelela Modimo ka go bolela tše kgopo? Kgane le re maaka a lena a tla mo hola? Kgane le leka go mo emelela ka go mo rerelela tshekong? Na ge Modimo a ka le sekiša le ka loka? Kgane le gopola gore le ka fora Modimo, go etša ge le fora batho? O tla le kgalema gabohloko, ge eba le kgetholla ka sephiring. Na bogoši bja gagwe bo ka se le tšhoše? Go tšhabega ga gagwe gona a go ka se le boifiše? Maele a lena ke matlakala fela; boitšhireletšo bja lena bo nyaoga bjalo ka letsopa. Bjale homolang, go bolele nna, gomme se se ntlhagelago se ntlhagele. “Ke ikemišeditše go tshela ka tswati, ka ipea kotsing ya lehu. Le ge Modimo a mpolaya ke tla no mmota; boitshwaro bja ka ke tla bo emela mo go yena. Seo ke se se tlago mphološa, gobane yo kgopo a ka se lebane le yena. Theeletšang gabotse tše ke le botšago tšona, gomme tlhalošo ya ka le e ele hloko. Ke itokišeditše go bega taba ya ka, gobane ke tseba ge ke tla hwetšwa ke se ne molato. “Ke mang yo a nyakago go sekišana le nna? Ge eba o gona, ke tla homola, ka ikhwela. Modimo, ke taba tše pedi tše ke kgopelago gore o se ntire tšona; ke mo nka se lekego go go khutela. Tšona ke gore o lese go nkotla, le gona o se sa ntšhoša. “Mpee molato, mme ke tla iphetolela; goba a go bolele nna, mme wena o mphetole. Melato ya ka le dibe tša ka ke tše kae? Mpotše diphošo le dibe tše ke di dirilego. “O reng o nkgerula? Ke eng o ntshema lenaba? Kgane o nyaka go ntšhoša? Nna ke dio ba letlakala la go tšewa ke phefo. Na o nyaka go ntlhomara ke le serite sa go omelela? “O mphara ka melato ye boima, o nkotlela dibe tša bofseng bja ka, o mpataganya maoto ka dikota, o diša tšohle tše ke di dirago, o lekola le mesepelo ya ka. Ka gona, ke senyega bjalo ka kota ye e bodilego, ke etša seaparo se se llwego ke tšhwele.” “Motho, motswalwakemosadi, matšatši a gagwe ga a nene, le gona a tletše matshwenyego. O gola bjalo ka leloba, a ba a pona; o feta ka lebelo bjalo ka moriti, ya ba o ile. Yo mobjalo o mmea leihlo, wa mo tliša tshekong pele ga gago. Ke mang yo a ka ntšhago botse bobeng? Ga a gona. O beetše motho matšatši a go phela; ke wena o mmaletšego dikgwedi, wa ba wa mmeela mellwane ye a ka se kgonego go e tshela. Bjale ge, mo hlokomologe, o se mo emeletše; mo lese a phele bophelo bja gagwe go fihlela bofelong, go etša mothwalwa yo a šomelago mogolo wa letšatši. “Mohlare le ge o remilwe, go ka holofelwa gore o tla phela gape wa hloga. Le ge medu ya wona e ka tšofala, le thito ya wona ya hwela ka mobung, ge o ekwa monola o a hloga, wa hloga le makala bjalo ka semela se sefsa. Motho yena ge a ehwa, ga a sa ne maatla. O re go hwa, a be kae? “Bjalo ka ge letsha le epšha, le noka e a fokotšega, ya ba ya gopa. Le motho ge a hwile ga a sa tsoga. Bahu ba tla no dula ba hwile ge leratadima le sa le gona. “Nke nkabe o mphihla kua bodulabahu, o nkhutiša go fihlela kgalefo ya gago e okobala, o mpeela nako ya go tlo nkgopola! Ge nkabe motho a re go hwa a tle a tsoge gape, ke mo ke bego ke tla kgotlelela bophelo bjo bja ka bja matshwenyego, ka ba ka tla ka imollwa go bjona. O be o tla tla wa mpitša, nna ka go araba; o be o tla duma go mpona, nna, sebopiwa sa gago. Kganthe gonabjale o beile mesepelo ya ka yohle leihlo; o be o tla lesa go latišiša dibe tša ka; o be o tla ntshwarela dikarogo tša ka, wa di lebala; o be o tla khupetša bokgopo bja ka. “Bjalo ka ge thaba e re go kgerega e pšhatlagane, mme matlapa a tloge madulong a ona, bjalo ka ge meetse a kgobola maswika, le pula ya matlorotloro e gogola mobu, le wena ke ka mo o fedišago lehutšo la motho ka gona. O fenya motho ya ba moka, ya ba ge a ile. Ge a ehwa o mo senya sefahlego, wa mo raka. Bana ba gagwe ba rwešwa diala yena a sa tsebe; le go gobošwa ba gobošwa a sa lemoge. Bohloko o kwa bja mmele wa gagwe; o lla ge bohloko bo ama yena fela.” Gwa fetola Elifase wa go tšwa Temane a re: “Na mohlalefi wa go swana nago a ka bolela ditšiebadimo tša mohuta wo, dilo tša go hloka mahlakantšho, a ikemelela ka mantšu a a se nago mohola, le ka dipolelo tša lefeela ka mokgwa wo? Le go boifa Modimo ga o sa mmoifa; o mo nagana gannyane. O boledišwa ke bokgopo bja gago; ke ka baka le o bolelago ka leleme le boreledi ka mokgwa wo. O ahlolwa ka mantšu a gago, ga o ahlolwe ke nna; gabotsebotse o a itšwa. “Kgane ke wena wa mathomo wa go tswalwa? Na o be o le gona pele ga ge Modimo a dira meboto? Na Modimo o kile wa mo tšea ka tsebe a bolela lekgotleng la gagwe? Kgane bohlale ke bja gago o nnoši? Ke eng se o se tsebago rena re sa se tsebe? O kwešiša eng se rena re sa se kwešišego? Rena se re se tsebago ke bohlale bjo re bo rutilwego ke diputswa tša gaborena, banna ba ba tswetšwego pele ga tatago. “O reng o gana re go homotša ka boleta legatong la Modimo? O reng o tshelwa ke pelo; mahlo ona o a tomoletšeng? O reng o galefetše Modimo, o mmolela ka mokgwa wo? “Na ruri o gona motho yo a se nago bosodi? Kgane motho, motswalwakemosadi, e ka ba moloki? Gape le barongwa Modimo ga a ba tshepe; mo go yena le magodimo ga se a hlweka. Bjale motho wa go šišimiša le go senyega, motho wa go nwa bokgopo boka meetse, yena a ka mo semang? “Theeletša, ke go botše ke go anegele tše ke di bonego, ke tše di tšwago go banna ba bohlale, tše ba sa kago ba di fihlelwa ke botatagobona. Ke botatagobona fela ba ba ilego ba fiwa naga – gwa hlokega mofaladi. “Motho yo mokgopo, wa go gatelela bangwe, o dula a le mahlokong bophelong bjohle bja gagwe, mengwageng yohle ye a e beetšwego. O kwa mašata a go tšhoša; le ge a sa iketlile o khukhunetšwa ke mmolai. O lebanwe ke go bolawa ka tšhoša; ga a sa tshepa gore a ka tšwa swiswing leo. O a tseba gore o tla bolawa kgauswinyana; o lebanwe ke go lewa ke manong. O tšhošwa ke leswiswi le le mo tlelago. Masetlapelo le mahlomola a mmoifiša bjalo ka kgoši ye e nyakago go hlasela. “Ke ka gobane o šupile Modimo ka monwana, o nyaditše Ramaatlaohle. O mo hlasetše a sa tšhabe selo, a swere kotse ya gagwe ye koto. O šušumogile sefahlego ka go nona, le letheka la gagwe le wele maphethe. “Yoo ke yena yo a tlago dula maropeng, dintlong tše di sa dulwego ke motho, tše di tlilego go ba marope. A ka se dule e le mohumi; lehumo la gagwe le ka se swarelele; le moriti wa gagwe o ka se sa bonala mo lefaseng. A ka se kgone go phonyokga leswiswi. O tla ba bjalo ka sehlare seo matlakala a sona a fišitšwego ke mollo, seo maloba a sona a tšerwego ke phefo. A se ke a iphora a bota lefeela, ka gobane lefeela e tla ba wona moputso wa gagwe. O tla pona nako ya gagwe e sešo ya tla, a šwaba bjalo ka lekala, a se sa talafala. O tla ba bjalo ka morara woo dikenywa tša wona di hlohloregago e sa le matata; o tla etša mohlware wo o thinthegago maloba. “Bahlokamodimo ga ba be le ditlogolo; le dintlo tše ba di agilego ka tsogolekobong di tla tšhungwa ka mollo. Ba lakana go hlola mathata, ba dire tše mpe; ba tletše bomenetša ka dipelong.” Ke moka Jobo a ba fetola a re: “Dipolelo tša mohuta wo ke di kwele gantši; ka moka ga lena ga le bahomotši ba selo. Na ditšiebadimo tše le di bolelago ga di fele? Gona wena o hlohlwa ke eng go mphetola? Ge nkabe le le nna, le nna nkabe ke bolela tše le di bolelago; nkabe ke le patla ka dipolelo, ke šikinya hlogo, ke le gegea. Nkabe ke le tiiša ka dikeletšo, ka le bea pelo ka tše ke di bolelago. “Eupša le ge ke bolela, bohloko bja ka ga bo ntlogele; go homola le gona ga go bo okobatše. Ruri, wena Modimo, bjale o mpheditše maatla; o šwalalantše bešo. O ntšhošobantšhitše, gomme bathong seo ke bohlatse bja go ntšwa ga gago. Go gwamelwa ga ka batho ba go bona e le sešupo sa gore ke na le molato. Modimo o nkgagola a galefile; o ntomantšhetša meno ka lehloyo; lenaba la ka le a nkgerula. Batho ba nkahlameletše go nkwametša, ba ntshetla sefahlego ba mpokanetše. Modimo o nkgafetše bathong ba babe; o ntahletše diatleng tša bakgopo. Ke be ke phela ke iketlile, eupša Modimo a ntshwara ka molala, a nkgohlonya, a nthobaroba. O ntebantšha ka mesebe, a ntlhasela ka yona, ya mpharola dipshio a sa ntšhokele, le santlhoko sa ka sa tšhologela fase. O ntlhasela bjalo ka mohlabani, a nkgobatša a sa fetše. “Ke apara diaparo tša go ilela tše ke ithoketšego tšona; ke rapalala fase ke nolegile moko. Mahlo a ka a hwibiditšwe ke sello, mme a tatilwe ke thiti, etšwe ke se ne molato wa borumolani, mme Modimo ke mo rapela ke tiišitše. “Wena, lefase, se ute bošula bjo ke fošeditšwego ka bjona! Ge ke llela toka o se dumele ke homotšwa! Le gonabjale ke na le hlatse legodimong; yena Moemedi wa ka o kua godimo. Bagwera ba ka ba a nkodutla, gomme ke llela Modimo ka meokgo, ka ge ke nyaka yo a ka mphophothelago go yena, bjalo ka motho ge a phophothela yo mongwe. Gobane ga ke sa šaletšwe ke mengwaga ye mekae pele ke swara tsela ya boelaruri. Ke nolegile moko, ke kgauswi le go hwa; se se ntšhaletšego ke lebitla. Ke dula ke kwerwa, ke lebeletše ge ba mphediša gabohloko. Ke a rereša; nkgolwe, hle, Modimo. Yo mongwe yo a ka tiišetšago se ke se bolelago ke mang, ntle le wena? O ba šitišitše go nagana gabotse; ka gona o ka se ba lese ba mphenya. Kgane motho a ka ja thoto ya gagwe le bagwera, mola bana ba gagwe ba bolawa ke tlala? Modimo o dirile gore batho ba mphare dika; ke nna setshwelwakamare. Manyami a ka a nyaka le go mphoufatša; ditho tšohle tša ka di sesefetše wa moriti. Se ke se se tlabilego baloki; ba ba se nago molato ba a ntlhanogela, ba re ke nna mohlokamodimo. Baloki ba swere tsela; bahlokamolato ba tielela ba tšwela pele. Ka moka ga lena etlang le leke gape; mohlale mo gare ga lena nka se mo hwetše. “Matšatši a ka a iketše; merero ya ka le ditumo di phuhlame. Bagwera ba ka bona ba re ditlaišego tša ka di tla mphetogela lethabo. Seetša serakaleswiswi se batametše. Ge nkabe nka holofela go yo phela bodulabahu le go yo ikalela moo leswiswing, ka bitša lebitla tate, diboko ka re ke bomma le bokgaetšedi. Ke be ke tla be ke sa botile eng? A ke mang yo a ka tsebago se nka se holofelago? Na kholofelo e ka ya le nna bodulabahu? Kgane nka theogela gona mmogo le yona?” Gwa fetola Bildade wa go tšwa Shuage a re: “Na le tla fetša neng go balabala ka mokgwa wo? Naganang gabotse, re tle re kgone go boledišana. Le reng le re swantšha le diphoofolo ka botlaela? Kgane ge o ikgobatša o tletše pelo, o re batho ba ngale lefaseng, goba maswika a tlošwe madulong a ona ka baka la gago? “Owaa! Yo kgopo o timelwa ke lebone, le kgabo ya mollo wa gagwe e ka se sa mmonegela. Seetša sa ka mošašaneng wa gagwe se fifetše; lebone le le bego le mmonegela le timile. Go gwataka mola ga gagwe go fedile, go šetše fela go kakaila; o a wa – gomme mahlale a ja mong. O wela sefung a sa lemoge; o phonkgela ka gare ga moreo. Molaba o mo tanya serethe, sefu se a mo swara. Mo fase go theilwe molaba, o beetšwe moutlo mo tseleng. “O dikaneditšwe ke dilo tša go šiiša, di mo hlomara gohle mo a yago gona. Tlala e mo fetša maatla, masetlapelo a a mo lalela. Bolwetši bja go šiiša bo mo hlagatša letlalo, bo mmodiša ditho. O ubulwa mošašaneng wo a bego a bolokegile ka go wona; o a phamolwa a išwa go kgoši ya lehu. Ge mošašana wa gagwe o seno šašetšwa ka tshebela, o tla dulwa ke ba bangwe, ka ge e se sa le wa gagwe. Ba lapa la gagwe ba hwile, bana ba gagwe ba iketše. Go tuma mola ga gagwe ga gabo le nageng tše dingwe go fedile; ga go sa na yo a mo gopolago. O tla rakwa lefaseng la ba ba phelago; o tla rakwa seetšeng a lahlelwa leswiswing. Ga a na bana goba ditlogolo tšhabeng sa gabo; ka lapeng la gagwe ga go yo a šetšego. Go tloga bohlabela go fihla bodikela ba ba kwago tša pheletšo ya gagwe ba tla šia, ba thothomela ka letšhogo. Ee, tšeo ke tše di lebanego bakgopo; ke yona pheletšo ya ba ba se nago taba le Modimo.” Ge Jobo le bagwera ba gagwe ba bararo ba šetše ba boledišane nako ye telele, Jobo a ba fetola a re: “Le tla lesa neng go nkweša bohloko le go ntlhaba ka mantšu? Nako le nako le dula le nthoga, ga le ne dihlong tša go bolela le nna gampe. Le ge eba ka nnete ke dirile phošo, seo ga se taba ya lena. Etse le gopola gore le a mphala, ebile le bona matshwenyego a ka e le bohlatse bja gore ke dirile sebe. Bjale ge, tsebang gore ke Modimo yo a mphošeditšego, ke yena a nkweditšego molabeng. Le ge ke hlaba mokgoši, ga ke thušwe ke motho; le ge ke goelela ke llela toka, ga go na yo a nkwago. Modimo o nthibetše tsela ka morako gore ke se fete, tsela tša ka di aparetšwe ke leswiswi. O nkamogile lehumo lohle, gomme a fediša setumo sa ka. O nthobarobile gohle gore ke felelele. O tumola kholofelo ya ka boka mohlare. Modimo o ntukela bogale, o mpala le manaba a gagwe. O romela madira a gagwe go tlo ntlhasela, ba bopa dintotoma gore ba ntlhasele, ba hloma mešaša ba a ntikanetša. “Modimo o dirile gore batho ba gešo ba ntahle; ke nna mošele go ba ba bego ba ntseba; meloko yešo e ntahlile, bagwera ba ka ba ntebetše. Bale ba bego ba falaletše go nna le badiredi ba ka ba basetsana ba mpona ke le mošele, ba ntshema motšwantle. Ge ke bitša mohlanka ga a arabe, le ge ke mo rapela gore a ntlhankele. Mosadi wa ka o nkgelwa ke moya wa ka, le lefetla la ka le nkgela banabešo. Bana ba banyenyane le bona ba a nnyatša, gomme ge ke leka go emelela, ba a nkwera. Bagwera ba ka ba bagolo ba a ntšhišingwa; bale ke bego ke ba rata ba mphuraletše. Bolwetši bja ka bo nkotišitše kudu, go phologa ga ka e bile ka mahlatse. “Ntšhokeleng, ntšhokeleng hle, bagwera! Modimo o nkotlile o šoro. Le reng le ntlhomere bjalo ka Modimo? Kgane ga se la ikgotsofatša ka go nkweša bohloko? “Nke nkabe mantšu a ka a ngwalwa ka pukung, goba a tlokwa letlapeng ka tshipi, a tlatšwa ka morodi gore e be a go dulela sa ruri. Fela ke a tseba gore mafelelong Modimo o tla nkemelela ge a ahlola lefase. Le ka morago ga ge letlalo la ka le llwe ke bolwetši, ke tla bona Modimo ke sa phela. Ke tla iponela yena ka mahlo a ka, gomme yena e ka se be mošele. Ke mo hlolosetše ka pelo ya ka ka moka. “Ge le ka re: ‘A re mo hlomareng, re mmoneng molato masetlapelong a a gagwe,’ gona le tsebeng gore tšhoša e le emetše. Gobane ge Modimo a galefetše modiradibe, o mmolaya ka tšhoša. Ka fao tsebang gore moahlodi o gona.” Gwa fetola Tsofare wa go tšwa Naama a re: “Ke fišegela go go fetola; ke ka baka le ke felago pelo. Gape ge o realo o a nthoga, fela go go fetola go ka se mpalele. “Kgane ga o tsebe gore go tloga kgale, mola motho a bewa lefaseng, ga go yo kgopo yo a kilego a iketla go ya kae, le gore lethabo la mohlokamodimo ke la lebakanyana fela? Le ge a ka akalala go fihla leratadimeng, a kgoma maru ka hlogo, o tla ba a senyega bjalo ka mantle a gagwe. Ba ba bego ba mo tseba ba tla botšiša gore na o nyameletše kae. O tla timelela bjalo ka toro, gomme a se sa bonwa ke motho. O tla nyamelela bjalo ka pono ya bošego. Ba ba bego ba mmona ba ka se sa mmona, le ba lapa la gagwe ba ka se sa mmona. Bana ba gagwe ba tla kgopela go badiidi, gomme yena o tla lefa lehumo le a le hweditšego ka boradia. Maatla ale a gagwe a bosogana a tla ya naye lebitleng. “Bobe bo be bo mo tsefela ka ganong, a bo latswa ka leleme; a bile a bo khupa ka molomo, a bo moma le ka legano. Eupša ka mpeng bo a mo fetogela, bja mo dira tša bohloko bja noga. Yo kgopo o tla hlatša tša manoni tše a di meditšego; ke Modimo yo a tlago mo hlatšiša tšona. Se yo kgopo a se meditšego se swana le bohloko bja peetla, se tla mmolaya bjalo ka ge nke o lomilwe ke noga. A ka se sa ipshina ka makhura a mohlware, goba ka todi le makgahla. O tla swanela go bušetša tše a iphilego tšona, gomme a ka se kgone go ikhola ka tšona, a ka se ipshine ka lehumo le a le hweditšego ka kgwebo, ka gobane o be a gatelela bahloki, a se na taba le bona, a bile a ipha dintlo tše di agilwego ke ba bangwe. Ka ge e be e le ramegabaru, mahumo a gagwe a ka se mo hlakodiše. Ge a eja o be a sa šadiše, ka baka leo katlego e tla mo felela. E tla re a ntše a na le tšohle tše a di nyakago, a hlagelwa ke mathata, a welwa ke madimabe a mehutahuta. E tla re a sa ja, Modimo a mo otla a mo galefetše. Kgalefo yeo e tla ba nke ke dijo tše a mo soletšego tšona. O tla re ke tšhabela sebetša sa tshipi, a hlabja ka mosebe wa mphiri, wa mo phuleletša santlhoko, ntlhana ya wona ya go phadima ya tšwelela mokokotlong wa gagwe, gomme a welwa ke poifo ye kgolo. Leswiswi le leso ke se a se beetšwego; o tla tšhungwa ke mollo wo o sego wa gotšwa ke motho, wa feleletša tšohle tša ka mokutwaneng wa gagwe. Legodimo le tla utolla bokgopo bja gagwe, gomme lefase la hlatsela ka go mo tšwa. Ntlo ya gagwe e tla gogolwa ke lefula ge tšatši la kgalefo ya Modimo le fihla. “Se ke se Modimo a se abelago yo kgopo, ke lona lefa le a mo fago lona.” Jobo a fetola a re: “Le theeletšeng gabotse se ke se bolelago; ke ka mo ke nyakago le nkhomotša. Le se mphelele pelo ge ke bolela; e tla re ge ke feditše la kgona le nkgegea. “Kgane yo ke llago ka yena ke motho wa nama? Bjale nka se fele pelo bjang? Le ntheeletšeng gabotse, mme e tla be e sa le le ahlama ka letšhogo. Ge ke gopola se se ntlhagetšego, ke a gakanega, ka tširoga. “Bakgopo ba reng ba phela, ba ba ba tšofala e le boramaemo ba maatla? Ba ba le bana le ditlogolo, di be di gole ba sa phela. Ka magaeng a bona go a iketlwa, ga ba phele ka poifo, ga ba otlwe ke Modimo. Dipoo tša bona di goela wa go tswadiša, ditshadi di tswala di sa folotše. Ba lesa bana ba bona ba tshelatshela, ba ithalokela bjalo ka diputšane. Ba letša dikoša ka meropa le dikgapa; ba thekelela koša ya dinaka. Bakgopo ba iphelela bophelo bja katlego, ba ba ba ikhwela ntle le go kwa bohloko. “Eupša ba botša Modimo ba re: ‘Re tlogele; ga re nyake go tseba ka mo o ratago re phela ka gona. Ramaatlaohle yena ke mang, ge e bile re swanetše go mo hlankela? Go mo rapela gona go re holang?’ A ke re katlego ba ikhweleditše yona ka bobona? Fela dikgopolo tša bona nna ga ke kwane natšo. “A ke re bakgopo ga ba atiše go khukhunetšwa ke lehu, goba go welwa ke kotsi? Na Modimo yena a ka otla bakgopo a ba galefetše, gomme a ba tšea bjalo ka phefo ge e tšea mabebe, goba bjalo ka mooko o tšewa ke ledimo? “Lena le re Modimo o otla bana ka baka la dibe tša botatabo. A go otlwe modiradibe ka boyena, a ikwele. Modiradibe a a ithwalele kotlo ya gagwe; a a ikwele kgalefo ya Ramaatlaohle. Na ge motho a feletšwe ke matšatši a go phela, o sa na le taba le ba lapa la gagwe? Kgane motho a ka ruta Modimo, yena wa go ahlola le dibopiwa tša legodimo? “Yo mongwe motho o hwa e le senatla, a iketlile, a se na mathata, a fepegile, a phedile gabotse. Yo mongwe o hwa a tsota, a se a ka a iketla. Tabakgolo ke gore bobedi bja bona ba a hwa; bobedi ba a bolokwa; bobedi ba nyeuma diboko. “Nna tše le di naganago ke a di tseba, le maanomabe a le ntogelago ona. Le a botšiša le re: ‘O kae motse wa mokgomana yola, le kae legae la yo kgopo yola?’ Na ga le ke le botšiša basepedi? Kgane ga le ba kgolwe ge ba le botša tše ba di bonego, ba re ka letšatši la kotsi go babalelwa yo kgopo, o hlakodišwa ge letšatši la kgalefo ya Modimo le fihla. Ke mang yo a ka mo kgalago mahlong, a mo solela maitshwaro a gagwe? Ke mang yo a ka lefeletšago ditiro tša gagwe? Ge a išitšwe dirapeng, lebitla la gagwe le a letwa. O etwa pele ke lešaba le le sa balegego; o šalwa morago ke ba bangwe ba bantši; o khurumetšwa ka makwate a moedi a sa mo imele. “Bjale lena le ka napa la mpea pelo ka ditšiebadimo tše tša lena? Tšohle tše le di bolelago ga se nnete.” Gwa fetola Elifase wa go tšwa Temane a re: “Na motho wa nama a ka hola Modimo ka eng? Ešita le yo bohlalehlale, ke eng se a ka mo holago ka sona? Kgane ge o dira tše di lokilego o hola Ramaatlaohle? Ge o phela ntle le bosodi gona go tla mo thušang? Kgane Modimo a ka go sola ka ge o mmoifa, a go iša tshekong? Aowa, ke ka baka la bokgopo bjo o bo dirilego; ke ka gobane o dirile dibe tše dintši. O šaeditše ka ge o rile ge o adima magageno dilo, wa nyaka peeletšo ya tšona; wa ba tšeela diaparo, wa ba tlogela ba itlhobotše. Ga se wa fa ba ba lapilego meetse a go nwa; o timile le ba ba swerwego ke tlala dijo. Ka go fadiša maatla o iphile naga, wa bea mogwerago go yona. O bušeditše bahlologadi gae ba kadietša diatla, wa ba wa hula le ditšhiwana. Ke ka baka leo o wetšwego ke madimabe, wa aparelwa ke poifo ka bjako, wa ba mo leswiswing, wa se bone selo; wa tšewa ke lefula. “Ga ke re Modimo o dula godimo magodimong? Bona gore dinaledi di godimodimo bjang. Eupša wena o re: ‘Modimo o tsebang? A ka ahlola batho bjang a širilwe ke leswiswi le lesoleso? O širilwe ke marumaso ge a le gare a sepela mollwaneng mokgahlo ga leratadima le lefase.’ “Na o nyaka go ganelela bophelong bjola bja kgale bja go phelwa ke bakgopo? Gape bona ba ile ba gogolwa ke lefula nako ya bona e sešo ya fihla. Ke bona ba go re go Modimo: ‘Re tlogele. O ka re dirang, wena Ramaatlaohle?’ Etšwe e le yena a tladitšego magae a bona mahumo. Fela dikgopolo tša bona nna ga ke kwane natšo. Baloki ge ba bona bakgopo ba otlwa ba a kgahlega, le ba ba se nago molato ba a ba sega. Ba re: ‘Manaba a rena a fedišeditšwe sa ruri, gomme tše a bego a na le tšona di llwe ke mollo.’ “Bjale ge, boelana le Modimo, o kwane naye, ke mo o tlago buša wa iketla. Amogela thuto yeo a go fago yona; o lote mantšu a gagwe ka pelong ya gago. Ge o ka boela go Ramaatlaohle, o tla go bušetša sekeng. Ge o ka fediša bobe bjo bo dirwago ka ga gago, ge o ka lahla gauta ye o nago le yona, wa lahla le ye e tšwago Ofire, wa e lahlela lekgwareng ka nokaneng, Ramaatlaohle e tla ba yena gauta le silibera ya gago ye bohlokwa. Ke mo a tlago go thabiša, yena Ramaatlaohle, wa lebana le Modimo o sa itshetshengwe. Ge o mo rapela o tla go kwa, wena o tla kgona go phetha dikeno tša gago. Ge o ikemišeditše go dira selo, o tla se kgona; tsela ya gago e tla bonegelwa ke seetša. Ge Modimo a kokobetša bakgopo, wena o tla re ke ka baka la boikgantšho bja bona; baikokobetši bona o a ba phološa. Modimo o tla hlakodiša yo a se nago molato, gomme wena o tla go hlakodiša ge o dira tše di lokilego.” Jobo a mo fetola a re: “Sello sa ka ke sa go tsogela Modimo maatla, ke golola ke sa kgone go kgaotša. Nke nkabe ke tseba mo nka mo hwetšago gona, gore ke ye moo a dulago gona. Ke be ke tla mo hlalošetša taba ya ka, ka mo alela maiphetolelo a ka ka botlalo. Ke be ke tla tseba gore o mphetola bjang, ka leka go kwešiša se a mpotšago sona. Kgane o be a tla mpatla ka maatla ge re tšere kgang? Aowa, o be a tla ntheeletša. Nna, ka ge ke le moloki, ke be ke tla mo phophotha; o be a ka se mpone molato. “Ge ke mo nyaka ka bohlabela, ga ke mo hwetše; ge ke mo nyaka ka bodikela, le gona ga ke mmone. Ge a le mošomong ka leboa, ga ke mmone; ge a retologela ka borwa, ga ke lemoge. Eupša magato ohle a ka o a a tseba; ge a ka nteka o tla nkhwetša ke hlwekile bjalo ka gauta. Tsela ya gagwe ke e latetše gabotse, gomme ka se phamoge mo go yona. Ga se nke ka tshela melao ya gagwe; tše a di boletšego ke di lotile ka pelong. “Ge a ikemišeditše go dira selo, ke mang yo a ka mo hlanamišago? O dira se a se ratago. Tše a mpeakanyeditšego tšona o tla di phetha; merero ye mebjalo ke ye mentši. Ke ka baka leo ke tšhogilego ge ke le pele ga gagwe; ge ke nagana ka yena ke kwa ke boifa. Modimo o nnotše moko; Ramaatlaohle o ntšhošitše. Ke paletše leswiswi, eupša bjale ga ke sa bona ka baka la lona leswiswi.” “Ke eng Ramaatlaohle a sa bee dinako tša go ahlola bakgopo? Bahlankedi ba gagwe ba reng ba letela matšatši a kotlo ya bakgopo, eupša ba sa a bone? “Bakgopo ba fela ba katološa mellwane; ba utswa diruiwa tša bangwe, ba di fudiša le tša bona. Ba ipha dipokolo tša ditšhiwana, ba swara le dipoo tša bahlologadi, go fihlela bahlologadi bao ba lefa melato ya bona. Ba kgorometša bahloki mo tseleng gore ba ba šutelele; le gona bahlaki ba mo nageng ba phela ka go iphihlela bona. “Badiidi ba tlemega go yo nyaka dijo lešokeng bjalo ka dipitsi; leganata le ba fa dijo tša bana ba bona. Ba tlemega go šomela batho ba bangwe ka go ba bunela mašemo; ba utswa diterebe mašemong a motho yo kgopo. Bošego ba lala ba se ne tša go apara, ba hloka tša go itšhireletša phefo. Ba thapišwa ke dipula dithabeng; ba ipata le magaga ba nyaka botšhabelo. “Masea ao a se nago botatagoona bakgopo ba a dira makgoba, ba thopela bahloki bana gore ba lefe melato ya bona ka bona. Bahloki ba sepela ba hlobotše, ba se ne diaparo; ba rwele mabele ba swerwe ke tlala. Ba hlotla makhura a mohlware mokgahlo ga mehlare, ba pitla diterebe ka maoto ba sa inyorolle ka matutu a tšona. Metseng go golola ba ba hwago, ba ba gobetšego ba lla ba nyaka thušo, eupša Modimo ga a ele thapelo tša bona hloko. “Go na le batho ba go gana seedi; ba go se se kwešiše, ba go gana go hlahlwa ke sona. Mmolai o tsoga ka masa, a yo bolaya modiidi le mohloki; bošego o a utswa. Sehlotlolo se letela gore šwahlane e sware; se ipotša se ikhurumetša sefahlego ka lešela se re: ‘Nka se tsebje ke motho.’ Mahodu a šwahlela ka dintlong bošego, eupša mosegare ba a khuta ba tšhaba seetša. Ka moka ga ona ba tšhaba seetša sa mosegare, ge e le leswiswi lona ga ba le boife. “Bakgopo ba gogolwa ke mafula, le mašemo a bona a rogakilwe ke Modimo; batho ga ba sa šoma ka merareng ya bona. Badiradibe ba metšwa ke bodulabahu, bjalo ka lehlwa ge le metšwa ke komelelo le phišo. Bakgopo ba lebalwa le ke bommagobona; diboko di ipshina ka bona, ga ba sa gopolwa ke motho. Ke ka mo bokgopo bo fedišwago bjalo ka mohlare wo o welego. Lebaka ke gore ba be ba swere basadi ba meopa gampe, ba se na botho go bahlologadi. Modimo o fediša diganka ka maatla a gagwe; ge a thoma go otla bakgopo bona ga ba kgolwe gore ba tla phela. O ba lesa ba ipea pelwanatšhwaana ya tšhireletšego, kganthe o dula a ba beile leihlo. Bakgopo ba tuma lebakanyana, ya ba ga ba sa le gona; ba a kokobetšwa, ba pona bjalo ka bjang, ba etša seako sa lebele se se ripilwego. Ge eba go se bjalo, ke mang yo a ka rego ke na le maaka, goba a re tše ke di bolelago ga se selo?” Bildade wa go tšwa Shuage a fetola a re: “Modimo ke kgoši, bogoši le tlhompho ke tša gagwe; o hlola khutšo kua godimo legodimong. Ke mang yo a kago bala makoko a barongwa? Ke mang yo seetša sa Modimo se sa mo hlabelego? Na motho wa nama e ka ba moloki pele ga Modimo? Kgane motswalwakemosadi a ka hlweka? Mahlong a Modimo le ngwedi ga o tage, le dinaledi ga di hloke bosodi. Bjale motho wa nama, yena e lego seboko, a ka hlweka bjang?” Jobo a fetola Bildade a re: “Etse ga se ka ge o nthušitše, nna mohlokamaatla! Ke re wa tla wa nthuša, nna mofokotšana! Ga se ka ge o nkeleditše, nna moitlhokelatsebo wa batho! Gape o mphile maele a mantši! Etse mantšu a a gago a lebantšhitšwe go mang? Ke mang wa go go tutuetša go bolela ka mokgwa wo? “Meoya ya bahu e thothomela ka letšhogo ka fase ga lefase; meetse le diphedi tša ka gare di a boifa. Bodulabahu bo bulegetše Modimo; felo moo ga tahlego ga go mo širegele. Ke yena a phurolotšego leratadima la ka leboa sebakabakeng, a lekeletša lefase lefaufaung. Ke Modimo yo a phuthelago meetse ka maru, mme maru ona a se palešwe ke boima. O šireletša ngwedi wo o tletšego ka go o apeša leru la gagwe. O hlomile bogomapono bja nthetelego godimo ga phamphamadiba, ya ba mollwane mokgahlo ga seetša le leswiswi. Ge a kgalema dikokwane tše di thekgilego leratadima, di thothomela ka letšhogo. Ka maatla a gagwe o bilošitše lewatle; ka bokgoni bja gagwe o pšhatlagantše mmamogašwa Rahaba. Ka phefo ya gagwe o apotše leratadima, gomme ka letsogo la gagwe o hlabile mmamogašwa o tšhaba. Tšeo ke ditšhupo tša maatla a gagwe, gomme tše rena re di kwago ka yena ke sehebehebe fela. Kgane ke mang yo a tsebago maatla a magolo a Modimo?” Jobo a tšwela pele le go ala taba ya gagwe a re: “Ke ikana ka Modimo yo a phelago, yo a ntlhokišago toka, yena Ramaatlaohle yo a ntsotišago, ke re ge ke sa buša moya, ge yena Modimo a sa mphediša, ganong ga ka go ka se tšwe bobe, le leleme la ka le ka se bolele maaka. Nka se tsoge ke rile lena le a rereša; ke tla ba ka hwa ke re ga ke ne molato. “Ke tla dula ke ntše ke re ke lokile, nka se lese go realo; gape ga ke itshetshengwe. “Nke nkabe lenaba la ka le otlwa bjalo ka bakgopo; nke nkabe sera sa ka se otlwa bjalo ka batho ba babe. Na lehutšo la mohlokamodimo ke eng, ge Modimo a mo amoga bophelo, a mo lesa a ehwa? Na ge a tlelwa ke mathata Modimo a ka kwa sello sa gagwe? Nkabe e sa le a thabela Ramaatlaohle, a rapela yena Modimo a sa kgaotše. “Nke ke le rute bogolo bja maatla a Modimo, ke se le fihlele tšeo yena Ramaatlaohle a ikemišeditšego tšona. Fela a ke lese, ka ge le iponetše ka bolena. Bjale le reng le bolela ditšiebadimo tše? “Se ke se Modimo a se abelago bakgopo; ke lona lefa le diganka le le fiwago ke Ramaatlaohle. Le ge ba na le bana ba bantši, bana bao ba tlilo bolawa ntweng; le ditlogolo tša bona di tla hloka dijo. Ba ba šetšego ba tla bolawa ke leuba, gomme bahlologadi ba bona ba ka se ba ilele. Bakgopo le ge ba ka ba le silibera ye ntšintši le mekgobokgobo ya diaparo, di tla aparwa ke molokitsoko, silibera e tla tšewa ke yo a se nago molato. Dintlo tše di agwago ke bakgopo di swana le bobi bja segoko; di bjalo ka mošašana wa moleti wa mašemo. Bakgopo ba robala e le bahumi, e be la mafelelo; ge ba tsoga lehumo la bona le tla be le nyameletše. “Tše di šiišago di ba wela boka lefula, gomme bošego ba tšewa ke ledimo. Phefo ya bohlabela e ba ubula ka gae, ya ba fefeula, mme ya ba ge ba ile. E ba tšubotla e sa ba šokele, bona ba leka go tšhaba parapara. Yona e ba opela diatla ge e ba hlothola magaeng a bona.” “Go na le moo go epšago silibera; go na le mafelo moo go hlwekišwago gauta. Tshipi e epša mobung, mphiri wona o hwetšwa ka go tološa borale. Batho ba bonega leswiswi. Ba putuka matlapa ka maswiswing a masomaso, ka fase ga lefase. Ba epa mekoti ya meepo kgole le mo go dulago batho, ba lebalwa le ke bafeti ba tsela. Ke moo ba šomago gona kgole le batho, ba šikinyega ba lekeletše ka dithapo. Godimo ga lefase go mela tša go lewa, eupša ka fase ga lona go a biloga, go swana le ka gare ga mollo. Maswika a lefase a swere magakabje a botala bja leratadima, a swere le dithorwana tša gauta. Tsela ya go ya meepong ga e tsebje le ke ntšhu, le pekwa ga se ya ka ya e bona. Ga go sebata se se kilego sa gata moo, goba tau ye e kilego ya sepela gona. “Batho ba epa maswika a bothatathata, ba phekgola le dithaba ka medu. Ge ba le gare ba phula tsela maswikeng, ba hwetša magakabje a mehutahuta. Mo go rothago meetse ba a go thiba, gomme se se utegilego ba se tliša nyanyeng. Eupša bohlale bo hwetšwa kae? Tlhaologanyo yona e humanega kae? “Ga go tsebje ke motho wa nama; ga bo hwetšwe lefaseng mo go dulago batho. Lewatle le re: ‘Bohlale ga bo na le nna;’ le phamphamadiba e re: ‘Ka gare ga ka bohlale ga bo gona.’ Ga bo rekwe ka gauta ye e sego ya tswakwa, goba ka silibera. Le gauta ye e tšwago Ofire e ka se lekantšhwe le bjona, ešita le magakabje a bohlokwahlokwa. Bo phala gauta le galase ka mohola, ebile bo ka se rekwe le ka moruswi wa gauta ye e hlwekišitšwego. Bohlale bo phala pheta ya thaga, le legakadima le perela. Bo phala legakabje la Etopia ka mohola; le gauta ye e sego ya tswakwa e ka se lekantšhwe nabjo. “Bjale bohlale bo tšwa kae, ge? Tlhaologanyo yona e humanega kae? Ga go sephedi se se kago bona bohlale, ešita le yona nonyana e ka se bo bone. Felo ga tahlego le lehu di re: ‘Rena re di kwa fela ka mabarebare.’ “Ke Modimo a nnoši yo a tsebago tsela ya go ya go bohlale, yo a tsebago mo bo hwetšwago gona, ka gore yena o bona mellwane ya lefase, o bona tšohle tša ka fase ga leratadima. Mola Modimo a efa phefo maatla, a beela le lewatle magomo; mola a beela pula melao ya go na, a phulela legadima tsela, ke gona a hlodilego bohlale, a bo lebelela, a bo sekaseka. “A botša batho a re: ‘Go boifa Morena ke bjona bohlale; go tlogela bobe ke yona tlhaologanyo.’ ” Jobo a tšwela pele le go ala taba ya gagwe a re: “Nke nkabe nka swana le pele, mola ke hlokomelwa ke Modimo. Ke mola lebone la gagwe le mponegela, ke sepela ka seedi sa gagwe leswiswing. Ke matšatšing ale dilo di sa ntshepelela gabotse, mola Modimo a ntotetše legae. Ke mola Ramaatlaohle a sa na le nna, ke sa farafarilwe ke bana ba ka. Ke mola lebese le ntlalela mo nkego meetse a go hlapa maoto, le mehlware ya ka e sa mela makgwareng, mme e etšwa makhura a mantši. Mola ke sa fela ke eya kgorong pitšong ya bagolo ba motse, ke dula fase madulong a ka lepatlelong, masogana ge a mpona a be a ntšhutelela, le bakgalabje ba emelela ka go ntlhompha. Bahlomphegi ba be ba homola, ba sa bolele; baetapele le bona ba ikhomolela, ba re tuu. “Bohle ba ba kwago tša ka ba be ba re ke lehlogonolo; ba ba mponago ba nthetela tiro tša ka. Gobane ke be ke thuša mohlaki ge a llela thušo, le tšhiwana ge e hloka mothuši. Ke be ke lakaletšwa ditšhegofatšo ke motho ge a ehwa, mohlologadi yena ke mo thabiša. Ka mehla ke be ke phethagatša toka le tshwanelo. E be e le nna mahlo a difofu, le maoto a digole. Ke be ke le tatagobadiidi, ke emelela bašele ba ba lego tlalelong. Badiratšempe ke be ke ba kgola meno, ke hlakodiše batho ba ba lego ka maganong a bona. “Ka gona ke be ke ipotša gore matšatši a ka a atile boka lešabašaba, le gore ke tla hwela ka ga ka ke iketlile; ke re ke tla swana le mohlare woo medu ya wona e dulago e nabetše meetseng, le makala a wona a thapišwago ke phoka; ke re ke tla dula ke retwa, ke bile ke sa felelwe ke maatla. Ge ke bolela, batho ba be ba ntheeletša ka hloko, ba ekwa maele a ka ba homotše; gomme ge ke fetša, ba sa be le sa go tlaleletša. Mantšu a ka a be a nwelela go bona boka marothi a pula. Ba be ba a letela mo nkego ke pula, ba ahlama nke ba nyoretšwe pula ya tsheola. Ke be ke ba segiša ge ba nolega moko, gomme sefahlego sa ka se se edilego se ba bea pelo. Ke be ke ba laola, ke ba tšeela sephetho, ke ba eta pele boka kgoši ge e eta bahlabani pele, ke bile ke ba bea pelo ge ba nyamile.” “Eupša bjale ke segwa ke bao e lego bana go nna, bao botatabo ke bego ke ba nyatša, ke sa rate le go ba dudiša le dimpša tša go diša dihuswane tša ka. E be e le dikoka tše di ka se kego tša ntirela selo. Ba be ba gwameditšwe ke tšhego le tlala; bošego ge ba le mašokeng, kgole le mo go dulago batho, ba phuphura medu ye e omeletšego. Ba be ba ekga merogwana ya lešoka, medu ya mehlopi e le dijo tša bona. Ba be ba rakwa bathong ka go kgadimolwa mo nkego ke mahodu. Ba be ba swanela go phela ka magageng le ka mešimeng le ka maweng. Ba be ba lla bjalo ka dipitsi, ba ipopa dikgororwana ka gare ga dithokgwana. E be e le makokwana a mašilo, digoboga tše di lelekilwego nageng ya gabotšona. “Gomme bjale ba nkopela koša, ba mphara dika. Ba a ntšhišingwa, ba nkema phaphi; ga ba dikadike go ntshwela sefahlego ka mare. Ka ge Modimo a mpheditše maatla, a nkokobeditše, bona ba namile ba ntlhasela ba sa itshware. Lekoko le le ntlhasela le etšwa ka lehlakoreng la la go ja; ba a nkgorometša, ba itokišetša go mpheleletša. Ba nthibela tsela, ba leka go mphetšiša, ebile ga go motho yo a ba thibelago. Ba tsena mo nkego go phutšwe lešoba morakong, ba šwahlela ge morako o kgerega. Ke wetšwe ke tše di šiišago, seriti sa ka se ntlogile mo nkego se tšerwe ke phefo, le go atlega mola ga ka go apogile boka leru. “Bjale šemo ke hwa bosele; ke imetšwe ke ditlaišego tša ka. Bošego ke lala ke opša ke marapo, bohloko bjo ke bo kwago ga bo okobale. Modimo o nkgoga ka sekgapha, o šošobantšha le diaparo tša ka. O ntahletše ka lerageng, ke fetogile lerole le molora. “Ke a go llela, Modimo, eupša ga o nkarabe; le ge ke emelela ke rapela ga o nkele hloko. O ntshwere gasehlogo; o ntlhomere ka maatla ohle a gago. O lesa phefo gore e ntšee; o nkutlautla gare ga ledimo le le tšubotlago. Ke a tseba gore o nkiša lehung moo go yago batho bohle. Gape motho ge a tlaletšwe ga a hlaselwe, ge a llela thušo a le mathateng. Kgane ke be ke sa lle le ba ba lego mathateng, goba ke sa kwele bahloki bohloko? Ke be ke holofetše go ba mahlatse, eupša ke wetšwe ke madimabe; ke be ke letetše seetša, fela ka tlelwa ke leswiswi. Ke ferekane, ga ke na khutšo; ke welwa ke ditlaišego letšatši ka letšatši. Ke phela ke nyamile, ke se na lethabo; ge ke ema kgorong ke ge ke kgopela thušo. Ke lla sello sa bošiwana, sa bophukubje le bompšhe. Ke ifetše letlalo, ebile le a hlobega; mmele wa ka o a fiša ka baka la letadi. Se bjale se ntšhaletšego ke go letša sefela sa mahloko ka sekgapa, le kopelo ya manyami ka kwadi.” “Ke ikanne gore nka se tsoge ke dumile kgarebe ge ke e lebeletše. “Ke eng se Modimo Yogodimo a se abelago motho? Ke eng se Ramaatlaohle wa magodimong a mmeetšego sona? Na dikotsi ga di wele bakgopo, madimabe ona ga a wele badiratšempe? Kgane Modimo ga a tsebe tše ke di dirago, goba ga a mpale magato? “Kgane nkile ka radia motho, goba ka potlakela go hlalefetša bangwe? Nke Modimo a nkele ka seelo se se sa jabetšego, gomme o tla bona gore ga ke na molato. Ge eba ke phamogile tseleng ye e lokilego, goba ke lakilwe ke tše ke di bonego, ge eba diatla tša ka di tšhilafaditšwe ke sebe, gona tše ke di bjalago a di lewe ke bangwe, le tše di mmelelago di tumolwe. “Ge eba nkile ka duma mosadi wa mongwe, gomme ka mo lalela mojako, gona mosadi wa ka a a yo šilela monna yo mongwe, gomme banna ba bangwe ba robale naye. Gobane ge nkabe nkile ka dira bohlola bjoo, nkabe ke obile molato wo o swanelago kotlo. Bo ka swana le mollo wo o tšhumago go fihla bodulabahu, wo o ka laumišago tšohle tše ke nago le tšona. “Mola mohlanka wa ka yo mongwe wa monna goba wa mosadi a ntsošetša tshele, ke be ke theeletša, ke mo direla ka mo go lebanego. Ge nkabe ke be ke sa dire bjalo, ke be nka lebelela Modimo bjang? Ke be nka fetola bjang ge Modimo a ntshekiša? A ke re yena Modimo yo a mpopilego ka popelong ya mma, o bopile le bona bahlanka ba ka? “Ga se nke ke gane go thuša badiidi; bahlologadi ga se nke ke ba hlokiše lehutšo. Ga se nke ke je nthathana ya ka ke nnoši ke sa e ngwathelane le tšhiwana. Go tloga bofseng bja ka ke godišitše ditšhiwana boka tatagotšona; go tloga bjaneng bja ka ke hlokometše bahlologadi. “Ge ke be ke bona mošaparegi a ebela a se ne diaparo, goba mohloki wa go se be le nkgeretlana ya kobo, ke be ke mo fa diaparo tše borutho tša boya, boya bja dinku tša mohlape wa ka, mme yena a nteboge ka pelo ka moka. “Ge eba nkile ka šupa tšhiwana ka monwana, ke fadiša ba go ema le nna kgorong, gona letsogo la ka a le robje sefakeng, segetla sa ka se kgaolwe legetleng. Ka ge ke be ke boifa kotlo ya Modimo le bogoši bja gagwe, ke be nka se dire taba ye bjalo. “Ga se nke ke bote gauta, ka ikanya gauta ye e hlwekišitšwego goba ka ikgantšha ka leruo la ka le lentši, goba ka thoto ye ke ikgobokeleditšego yona. Go bona letšatši, sephadimaletago, goba wona ngwedi wa letopanta, seputlalerata, ga se gwa ka gwa nkutswa pelo gore ke be ke budulele dilo tšeo katlo. Ge nkabe nkile ka dira bjalo, nkabe ke obile molato wo o swanelago kotlo, gobane ke be ke tla be ke latotše Modimo yo godimo. “Ga se nke ke thabele madimabe a lenaba la ka, goba ka hlalala ge a wetšwe ke masetlapelo. Ga se nke ke dire sebe ka go mo lakaletša lehu. Bahlanka ba ka ba a tseba gore ka ga ka motho o be a eja a tlatša mpa. Basepedi ba be ba amogelega ka ga ka; bafeti ke be ke sa ba latše ntle. “Nna ga se nke ke bipe dibe tša ka ka etša batho ba bangwe, ka fihla bokgopo bja ka, e le ge ke tšhaba gore batho ba tla reng, ke tšhaba le go kodutlwa ke ba gešo. Ga se nke ke homole, goba ka se tšwe ka gae. “Nke nkabe taba ya ka e ka theeletšwa! Tše ke di boletšego tše ke a di emela. A Ramaatlaohle a mphetole. “Nke nkabe momphari a na le bohlatse bja lengwalo. Ke be ke tla le phara magetleng; ke be ke tla le rwala hlogong boka mphapahlogo. Ke be ke tla botša Modimo tšohle tše ke di dirilego, ka mmatamela ke sa šie. “Ge eba tšhemo ye ke e lemago e mpea melato, ge eba bolemi bja yona bo a lla, ge eba ke lle dibjalo tša yona ke se ka di lefela, gomme ka bolaiša beng ba yona tlala, gona, bakeng sa korong a ke melelwe ke ditshehlo, bakeng sa mabele ke melelwe ke sekoro.” Ke ka mo go felelago dipolelo tša Jobo. Ka ge Jobo a be a sa ipone molato, banna bao ba bararo ba ile ba lesa go fetolana naye. Eupša Elihu, morwa wa Barakele wa ga Buse, wa kgorwana ya Ramo, o ile a galefela Jobo ka ge Jobo a ipona yo a lokilego, a bona yo a sego a loka e le Modimo. A galefela le bagwera bale ba gagwe ba bararo ka ge ba paletšwe ke go fetolana naye, ya ba mo nkego Modimo ke yena a nago le phošo. Ka ge Elihu e be e le yena yo monyenyane go bona, o ile a letela gore bohle ba fetše go bolela. Ge a bona gore banna bao ba bararo ga ba kgone go ngangišana le Jobo, a galefa, gomme a thoma go bolela a re: “Nna ke yo monyenyane, lena le ba bagolo, ka gona ke be ke inyatša ke bile ke šia go le botša tše ke di naganago. Ke ikgadile ka re a go bolele lena ba bagolo, lena diputswa le tšweletše bohlale bja lena. Gape se se kgontšhago motho go kwešiša, ke moya wo Ramaatlaohle a mo tsentšego wona. Bohlale ga se bja batšofadi fela; ga se bakgalabje fela ba go kwešiša go loka. Ke ka baka leo ke rego ntheeletšeng, le nna ke le botše se ke se naganago. “Ke be ke le theeleditše ke sa le felele pelo, ke le hlwaetše tsebe mola le ngangišana, le akanya se le nyakago go se bolela. Ke be ke le theeleditše gabotse, fela go hlokegile wa go phala Jobo ka dipolelo; le paletšwe ke go mo ganetša. Ka fao le se re lena bohlale le bo hweditše, la re Jobo o tla kgonwa ke Modimo, a ka se kgonwe ke motho. Nnaena Jobo ga sešo a bolela a ntebantšhitše, gomme nna nka se mo fetole bjalo ka lena. “Šeba ba gakanegile, ga ba kgone go mo fetola; ga ba na mantšu. Bjale na nka napa ka dio itulela ge bona ba homotše, ge ba ikemetše ba se ne polelo? Le nna a ke lahlele la bošiwana, ke bolele se ke se naganago. Tše nka le botšago tšona ke tše dintši; ke ikwa ke hlohleletšega go bolela. Ka teng ga ka nke go bela beine ye e sa tšogo hlotlwa, ye e palešago makuka a mafsa. A ke bolele ke kgebiše pelo; a ke ahlame ke fetole. Nka se emelele motho, nka se gegee motho. Go gegea ga ke go kgone, gomme le ge nkabe nka gegea, Mmopi wa ka a ka akgofa a ntloša tšatšing.” “Bjale ge, Jobo, o ntheeletše gabotse, tšohle tše ke di bolelago o di hlwaele tsebe. Bona mo, bjale ke tla ahlama, ka bolela ditšwaganong tša ka. Ke bolela ke tiišitše, gomme ke bolela therešo. Ke hlodilwe ke moya wa Modimo, moya wa Ramaatlaohle o a mphediša. “Ge o kgona o nkganetše, o itokiše, o mphetole, o be komana, madulaabapile. Nna le wena re a swana mahlong a Modimo; ka babedi re bopilwe ka letsopa. Ka gona o se ke wa ntšhaba, nka se go tlišetše mathata. “Gape o boletše ke go kwa, ke kwele tše o di bolelago. O rile: ‘Nna ga ke na bosodi, ga se ka tshela molao, ga ke ne molato, ga se ka dira tše kgopo. Eupša Modimo o mpala magato, gomme o ntshema lenaba la gagwe. O mpatagantše maoto ka dikota, o ntišitše mesepelong ya ka yohle.’ “Fela nna ke a go botša, Jobo, o a foša, gobane Modimo o feta motho ka bogolo. O reng o sola Modimo, o re ga a fetole motho ge a mmotšiša? Modimo o bolela ka mekgwa ye mentši, le ge batho ba sa lemoge. O bolela ka ditoro le ka dipono bošego, mola batho ba ile ka boroko malaong a bona. O ba kweša se a se bolelago, a ba tšhošetše ka go ba kgala, gore a ba tlogediše sebe, le gore ba se ikgogomoše. Ke ka mo a ba phefišago lebitla, a ba hlakodišago lehung la lerumo. Le gona o kgala batho ka ditlaišo tša bolwetši, ka bohloko bjo bo sa okobalego mmeleng, molwetši a be a šišingwe dijo, ešita le tše dibosebose. A fetoge lekhoro, mme marapo a thome go tšwelela. A be kgauswi le go ikela bohunamatolo, lefaseng la ba ba ithobaletšego. “Mohlomongwe morongwa yo mongwe wa ba sekete, ba ba gopotšago batho ditshwanelo, a ka tlo mo hlakodiša, ya ba mophophothethedi wa gagwe. O tla mo šokela a re: ‘Mo hlakodiše a se ye bohunamatolo, ke mo hweleditše seloba.’ Mmele wa gagwe o tla mpshafala wa tia gape; yena o tla boela sekeng sa bofseng bja gagwe. Ge a rapela, o tla kgahla Modimo; o tla tla pele ga Modimo a thabile; Modimo o tla mmušetša sekeng sa gagwe. Motho yoo o tla ipolela phatlalatša a re: ‘Ke dirile dibe. Ga se ka dira tše di lokilego, eupša Modimo ga se a nkotla ka mo go ntebanego. O mphološitše gore ke se ye bohunamatolo, gomme le gonabjale šemo ke sa phela.’ “Tšeo ka moka ke tše Modimo a di dirago motho leboelela, e le gona go mo hlakodiša lehung, gore a tle a ipshine ka bophelo. “Bjale, Jobo, ekwa se ke go botšago sona; o homole, o ntese ke bolele. Fela ge o na le taba, o e ntšhe; o bolele, gobane nka thaba ge o ka mpontšha gore ga o na molato. Eupša ge o se na polelo, o ntheeletše; o homole, mme ke tla go ruta se e lego bohlale.” Elihu a tšwela pele a re: “Ekwang se ke se bolelago, lena dihlalefi, ntlhwaeleng tsebe, lena ditsebi. Mantšu a senkwa ka tsebe, bjalo ka ge dijo di kwelelwa ka leleme. A re ikgetheleng se se lokilego, re tsebeng se e lego tshwanelo. Gobane Jobo o re: ‘Nna ga ke ne molato, Modimo ke yena a ntlhokišago toka. Ke dirwa wa maaka, kganthe ke nepile, ke gobaditšwe wa go se alafege, etšwe ke se ka dira sebe.’ “Kgane o gona motho wa go etša Jobo, wa go gegea bangwe sesolo bjalo ka ge a enwa meetse, wa go šika le badiratšempe, wa go sepela le bakgopo? O re ga go hole motho selo go leka go kgahla Modimo. “Ntheeletšeng, lena banna ba go kwešiša! Modimo a ka se dire se sekgopo, Ramaatlaohle a ka se dire phošo. O otlela batho tše ba di dirilego, o ba swara ka mo go ba swanelago. Ruri, Modimo ga a dire phošo, Ramaatlaohle ga a kgopamiše toka. Kgane ke mang yo a mmeilego Mohlokomedi wa lefase? Ke mang yo a mmeilego Mmuši wa lefase lohle? Ge Modimo a ka amoga batho moya wa gagwe, a o bušetša go yena mong, bohle ba ka hwa ka bjako, ba boela mobung. “Ge o na le kwešišo, o ntheeletše; se ke go botšago sona o se hlwaele tsebe. Kgane mohloi wa toka e ka ba mmuši? Na Moloki, yena Ramaatla, wena o ka mmona molato, yena yo a ka rego go kgoši: ‘Lefeelana towe!’ goba a re go bakgomana: ‘Bakgopo ke lena!’ yena yo a sa rerelego bahlomphegi, a sa bebego bahumi go feta badiidi, ka ge bohle ba hlodilwe ke yena? Ba hwa ka bjako, bošegogare. Bahlomphegi bao ba re go hwa batimelele; gape Modimo o tloša mogateledi gabonolo. O lebelela mesepelo ya motho, o mmala magato. Ga go leswiswi le leso mo badiratšempe ba ka khutago gona. Modimo ga a beele motho nako ya go tlo mo ahlola kgorong. O pšhatlaganya boramaatla ntle le go nyakišiša, a bea ba bangwe legatong la bona. Ka ge a tseba tše ba di dirago, o a ba wiša mme a ba pšhatlaganya bošego. O ba otlela bokgopo bja bona batho ka moka ba lebeletše, ka ge ba kgelogile, ba se na taba le ditaelo tša gagwe. Ba dirile gore bahloki ba llele Modimo, gomme yena a kwa ge bahlaki bao ba mo llela. “Fela ge Modimo a ka se dire selo, ke mang yo a ka mo solago? Ge a ka iphihla, o tla bonwa ke mang? O bea mohlokamodimo mmuši wa setšhaba ka moka, ya ba moreo go sona. *** “Ge motho a ka botša Modimo a re: ‘Ke lahleditšwe, nka se sa dira sebe; nthute se ke sa se tsebego; ge eba ke dirile sebe, nka se sa boeletša’ – na wena o bona nke Modimo o swanetše go otla motho yo mobjalo? Ka ge e le wena o ganago se se dirwago ke Modimo, ke wena o swanetšego go kgetha, e sego nna. Bolela se Modimo a swanetšego go se dira. “Fela ba ba kwešišago le ba bohlale ba ba nkwago ba tla re: ‘Jobo o boledišwa ke go se tsebe, polelo tša gagwe ga di re selo.’ A Jobo a lekwe gasehlogo, ka gobane o fetola bjalo ka yo kgopo. Sebe sa gagwe o se oketša ka go gwaba; o nganga ka mokgwa wo pele ga rena, a duletše go roga Modimo.” Elihu a tšwela pele a re: “Na o bona nke ga o foše, Jobo, ge o re o lokile pele ga Modimo, ge o botšiša Modimo o re: ‘Na go nkholang, ke tla boelwa ke eng ge ke sa dire sebe?’ Nna ke tlile go go fetola, wena le bagwera ba gago. “Lebelela leratadima, o bone gore maru a phagame bjang ka godimo ga gago! Ge o dira sebe, na o se senyetša Modimo? Kgane ge o tshela molao leboelela, seo se a mo ama? Ge o dira sa go loka, gona o mo holang? Ke eng se sebotse se o mo direlago sona? Gape bokgopo bja gago bo senyetša fela mothokawena, le go loka ga gago go hola yena fela. “Batho ge ba tlaišwa kudu ba a lla; ba llela go hlakodišwa go mogateledi yo maatla. Ga go be le yo a botšišago a re: ‘Modimo, Mmopi wa rena, o kae, yena wa go re kgothatša ge re le mathateng, yo a re filego bohlale bja go feta bja diphoofolo tša naga, bja go feta bja dinonyana tše di fofago?’ Ke ka fao e rego ge ba llela Modimo a se ba fetole, ka ge e le batho ba babe ba go ikgantšha. Gape Modimo ga a theeletše sello sa sehlodimare, Ramaatlaohle ga a šetše sello se sebjalo. “Bjale wena a ka go theeletša bjang o re ga o mmone, o re taba ya gago e mo go yena, mme wena o emetše yena fela, goba ge o re Modimo ga a otle motho a galefile, ga a na taba ge motho a mo tsogela maatla? Etse go balabala go ka se go hole ka selo, Jobo; o fafatla bjalo o se na se o se tsebago.” Elihu a iša pele a re: “Se mphelele pelo, ntheeletše gosenene ke go sedimoše, ke go botše tše dingwe legatong la Modimo, ke go bontšhe ka tsebo ya ka ye e nabilego gore Mmopi wa ka o lokile. Ruri, ga go sa maaka se ke tlilego go botša sona; tseba gore o bolela le monna yo bohlalehlale. “Le ge Modimo e le yo maatlamaatla, ga a hlokomologe motho; ke senatla sa go kwešiša sengwe le sengwe. Ga a lese bakgopo ba phela, kganthe badiidi bona o ba dira ka toka. O hlokomela baloki, a ba dudiša le dikgoši, ba buša galelele. Fela ge ba thoma go ikgogomoša, ba kgokwa ka diketane, ba golegwa ka ditlaišo, ya ba gona a ba bontšhago dibe le dikarogo, e lego boikgogomošo bja bona. O ba dira gore ba mo theeletše ge a ba eletša gore ba tlogele bobe. Ge ba ka mo theeletša, ba mo direla, ba tla phela bophelo bja boiketlo le katlego. Eupša ge ba ka se mo theeletše, gona ba tla hwa lehu la lerumo, ba hwa ba sa tsebe selo. “Bahlokamodimo bona ba na le letsoto; le ge Modimo a ba otla, ga ba ithapeletše go yena. Ba hwa e sa le ba bafsa, ba hwa lehu la dihlong. Modimo o hlakodiša bahlaki mehlakong ya bona, o šomiša ditlaišego gore ba mo theeletše. “Le wena o tla go ntšha ditlaišegong, a go bea polokegong; bojelong bja gago go tla kgobelelwa dijo tše bose. Eupša bjale o ahlolwa o otlwa bjalo ka bakgopo, o otlwa ka mmetela. O se goketšwe ke mahumo, goba wa kgelošwa ke bontši bja tsogolekobong. O ka se intšhe mahlokong ka sello le ge o ka leka ka maatla ohle a gago. O se dume gore bošego bo tle, nako yeo ditšhaba di tlago hwa ka yona. O itote gore o se kgelogele bokgopong, gobane ditlhokofatšo tše tša gago ke tša go go thibela gore o se arogele go bjona. “Se lebale bogolo bja maatla a Modimo. Morutiši, moswananaye ke mang? Ke mang yo a ka mmotšago gore a dire eng, goba a re go yena: ‘O fošitše’? O se lebale go reta ditiro tša gagwe tše batho ba di opetšego ka mehla. Batho bohle ba a di bona, le ge ba di bonela kgole. Bogolo bja gagwe ke phetatlhaologanyo, le botala bja gagwe ga bo latišišege. “Ke yena a tšeago meetse lewatleng, a fetošago pula kgodi. O tloromiša pula ya go tšwa marung, gomme ya nela batho ka medupi. Ke mang yo a tsebago go thiba ga maru, le go ratha ga ditladi leratadimeng, kua go dulago Modimo? O pekenya legadima gohle leratadimeng; o khurumetša madiba a lewatle. Ke gona ka mo a fepago batho, a ba fago dijo tše dintši. O swara legadima ka diatla, a le laela go ratha mo a nyakago. Modumo o bega pula ya matlakadibe, le dikgomo di dupelela gore e etla. “E a ntšhoša, mme pelo ya ka e thebatheba ka maatla. Ekwang mokidimetšo wa lentšu la Modimo; theeletšang mopopodumo wa molomo wa gagwe! O o kwagatša gohle leratadimeng, legadima la gagwe le gadima gohle lefaseng, gwa latela modumo wo o kidimetšago, Modimo a popoduma ka lentšu la bogoši, legadima lona le le gare le pekenya. Ge Modimo a popoduma, go direga dimakatšo; o dira dikgolo tše re sa di kwešišego. O laela lehlwa gore le we lefaseng, le dipula tša matlorotloro gore di ne. O kgaotša mediro ya batho, gore bohle ba lemoge ya gagwe. Diphoofolo di ya ka dirobeng tša tšona, tša iphihla gona ka moo matšabeng a tšona. Ledimo le hlaga le etšwa ka borwa, botšididi bja tlišwa ke diphefo tša ka leboa. Modimo a hema, o kgahliša meetse, ona a fetoga ya ba leswika. O hupiša maru meetse, legadima la gagwe la phatlala marung. Ke yena Mmilošamaru, maru, maphethataelo tša gagwe gohle lefaseng. O a šomiša go otla batho, goba go neša pula lefaseng, goba go bontšha lerato la gagwe. “Iketle, Jobo, o theeletše; o ele dimakatšo tša Modimo hloko. Kgane o tseba ka mo Modimo a laolago maru, goba ka mo a gadimišago legadima la go tšwa go ona? Na o tseba mophaphamalo wa maru, wona mohlolo wa bothakgathakga bja Modimo? Wena o kgomarelwago ke diaparo ka sethitho ge phefo ya ka borwa e tšhuma naga, na o ka ala leratadima bjalo ka Modimo, lona le thatafetšego boka seipone sa tshipi? Re botše se re ka se botšago Modimo, ge; re ka se phegišane naye re sa tsebe taba. Na se ke se bolelago ke sa go begelwa Modimo? Kgane Modimo o swanetše go begelwa ge motho a bolela? “Go na le nako ye seedi se timelelago ka marung; ka morago go tle phefo ya go tšea maru. Ka leboa go bonala seetša sa mmala wa gauta; Modimo o aparetšwe ke letago le le gakgamatšago. Ramaatlaohle ga re kgone go mmatamela. Ke yo maatla kudu, o re phala bohle ka go loka, ga a sekamiše toka. Ke ka baka leo batho ba mo hlomphago, botsebanyane bona o a ba hlokomologa.” Ke moka Morena a fetola Jobo a le ledimong a re: “Ke wena mang o ka solago maikemišetšo a ka, o sa kwešiše selo ka ona? Bjale ge, ke tla go botšiša dipotšišo, gomme wena o ngatetše senna, o nthute. Na o be o le kae ge ke hloma metheo ya lefase? Ge eba o a tseba gore le hlolegile bjang, mpotše. Ke mang yo a rerilego gore e tla ba le le kaakang? A ke re wena o a tseba! Ke mang yo a gogilego thapo ya meelo ya lona? A mahlomelo a lona a epetšwe go eng? Wa go bea leswika la motheo wa lona yena ke mang? Mohlang woo dinaledi tša masa di be di duduetša mmogo, le dibopiwa tšohle tša legodimong di goa ka lethabo. Ke mang wa go tswalela lewatle ka mabati mola le thibologa popelong ya lefase? Ke nna ke apešitšego lewatle maru, ka le phuthela ka leswiswi. Ke beetše lewatle mellwane, ka le phekela mabati. Ka le botša ka re: ‘Ema fa, se fetele pele! Maphoto a gago a maatla a gome fa.’ Jobo, kgane mola wa tswalwago o kile wa botša letšatši gore le hlabe, goba wa bontšha masa gore a thome kae? O kile wa laela gore a tšee lefase a le thinthe bakgopo? Mosegare o fetoša sebopego sa lefase boka letsopa le le kibilwego ka sekibo, dithaba tša bonala bjalo ka memeno ya kobo. Letšatši ge le hlaba le raka bošego, gomme bakgopo ba šitwa go tšwela pele le bokgopo. “Na o kile wa ya methopong ya bodiba bja lewatle, goba wa sepela godimo ga lebato la lona? Na o kile wa bontšhwa dikgoro tša bodulabahu, goba wa bona difero tša gona tša leswiswi? Kgane o a lemoga gore lefase ke le legolo bjang? Bolela ge eba o a tseba. “A o tseba tsela ya go ya moo seedi se dulago gona, le gore a leswiswi lona le dula kae? Na o ka di beela mellwane, goba wa di gomišetša mo di tšwago? Aowi, o ka kgona – a ke re o tswetšwe ge lefase le hlolwa, gomme o wa kgalekgale? Na o kile wa fihla mo ke bolokelago lehlwa, goba mo sefako se beilwego gona? Ke di boloketše mehla ya mathata, le nako ya tlhabano le ntwa. Kgane o tseba tsela ya go ya mo go hlabago letšatši, mo phefo ya bohlabela e tšwago gona ya aparela lefase? “Ke mang yo a buletšego pula ya matlorotloro lešoba, a phuletšego le maru a ditladi tsela, gore pula e ne le mo go se nago motho, goba lešokeng mo go se nago le batho? Ke mang wa go nošetša naga ye e nyorilwego ye e se nago selo, gore bjang bo hloge? Kgane pula e na le tatagoyona, goba phoka e tswetšwe ke mang? Ke mang mmago kgapetla ya meetse? Šobane yona e belegwe ke mang? Tšona di fetotšago meetse leswika, di kgahlišago le lewatle ka godimo. “Kgane wena o ka kgokaganya Selemela goba wa bofologanya Kgogamašego? Na o ka sepetša dinaledi ka go latelana ga tšona, goba wa šupetša Bere le Berana tsela? Kgane o tseba melao ye e beetšwego leratadima, goba o ka dira gore e buše le lefase? “Na o ka goelela maru, gore a go thapiše ka pula? “Kgane o ka laela legadima gore le rathe? Na ge o le bitša le ka tla la re: ‘Ratha ka nna’? Ke mang yo a filego tlhahlamedupi bohlale, goba a neilego mokoko tsebo? Ke mang sehlalefi sa go kgona go bala maru? Ke mang a sekamišago metšega yeo ya leratadima, gore pula e bopaganye lerole makwate a go momagana? “Kgane ke wena o tsomelago tau phoofolo, goba o khorišago tawana ye e swerwego ke tlala, ge di khukhuna ka magolong a tšona, goba di laletše ka sethokgweng? Ke mang yo a fago legokobu dijo ge le eya kua le kua le nyaka diyamaleng, mafotwana a lona a ntelela?” “Na o tseba gore pudi ya naga e tswala neng? Kgama yona o kile wa e bona e šokwa? Na o tseba gore di duša dikgwedi tše kae? O tseba le letšatši la tšona la go tswala? Di a kwatama tša tswala, ya ba gona go ithola morwalo. Bana ba tšona ba a tia, ba golela šokeng; ba di tlogela, ba se sa boela go tšona. “Etse yo a lesitšego pitsi e gerema le naga ke mang? Ke mang yo a kgokolotšego pokolo ya naga yeo? Gape ke nna ke dirilego lešoka legae la yona, melala ya letswai ya ba bodulo bja yona. Ga e tshwenywe ke mašata a ka motseng, le dikgalemo tša mootledi ga di e ame. Dithaba ke mafulo a yona, moo e tsomago botalanyana ya ja. “Kgane nare e ka go šomela? Na ka šakeng la gago e ka lala? Afa o ka e kgoka ka kgole wa e lemiša, goba ya go hlagolela mašemo? Na o ka ikanya yona ka ge e na le maatla a mantši, goba ya go direla mediro ye boima? Kgane o ka e bota gore e tla go bunela, ya go kgobokeletša mabele seboeng? “Mpšhe e phuphusela ka lethabo, go etša bomogolodi le bopekwa. Mae e a tlogela mobung gore a alamelwe ke mobu. Ga e nagane gore a ka pšhatlwa ka leoto, goba a gatwa ke phoofolo ya naga. E tlaiša matswiana a yona mo nkego ga se a yona, ga e ne taba le gore e itshwenyeditše lefeela. Ke nna, Modimo, ke e hlokišitšego bohlale, ka e hlokiša le tlhaologanyo. Eupša ge e kitima e phaphamaditše diphego, e sega pere le monamedi wa yona. “Kgane pere e filwe ke wena maatla, goba ke wena o e kgabišitšego molala ka moetse? Kgane ke wena o e tabogišago sa tšie? Gape e a ikgogomoša, mme e tšhoša batho ka go letša dinko. E kiba fase ka dingatha ka moeding e thabile; e itlhaganetše go yo gahlana le dibetša. Poifo ga e e tsebe, go šia nkhokho, ga e tšhabe tšhoša. Mesebe e tšhekgereganya ka kgotlopong mokokotlong wa yona, go phadima tšhoša le marumo a monamedi. E re go thothomela ka phišegelo ya ja fase ka lebelo; ge phalafala e lla ga e sa swarega. Nako le nako ge phalafala e galagala, pere e a lla; e dupelela ntwa e sa le kgole; e kwa le ditaelo tša balaodi le mekgoši ya ntwa. “Na ke ka bohlale bja gago ge pekwa e kgona go fofela godimo, le go akalatša diphego ya fofela borwa? Na lenong le laelwa ke wena go akalala la fofela godimo, la aga sehlaga malekelekeng a dithaba? Etse le ikagela sehlaga maswikeng, ntlhora ya thaba ke sona sebo sa lona. Le le gona moo le tsoma sa go ja; mahlo a lona a se bona se le kgole. Mafotwana a lona le ona a ja sa madi; moo go lego setopo ke moo go bago manong.” Morena a fetola Jobo ka go mmotšiša a re: “Na wena, morumolani, o nyaka go ngangišana le Ramaatlaohle? Ge o sola Modimo, fetola!” Ke moka Jobo a fetola Morena a re: “Morena, ke nna yo monyenyane kudu – ke ge nka iphetolela ka reng? Ke a ikhomolela ke re tuu. Ke šetše ke boletše le go feta ka mo ke bego ke swanetše.” Ke mo Morena a fetotšego Jobo gape a le ledimong a re: “Bjale ge, ke tla go botšiša dipotšišo, gomme wena o ngatetše senna, o nthute. Na o sa leka go bontšha gore ga se ka loka, ke na le phošo, mme yo a lokilego ke wena? A o lekana le nna ka maatla, goba o ka dira modumo ka lentšu le le swanago le la ka? Gona dula le seriti le setumo seo sa gago; o tšhepe ka bogoši le letago la gago. Lebelela baikgogomoši bohle, o ba tukele bogale, gomme o ba kokobetše. Ee, ba lebelele, gomme o ba iše fase; gatakela bakgopo mo ba lego gona. Ka moka o ba epele mobung; o ba tswalelele bodulabahu. Ke mo le nna ke tlago go reta, ka dumela gore o fentše ka bowena. “Bona Behemote; e hlodilwe ke nna go etša wena. E fula bjang bjalo ka kgomo. Lethekeng ke mo go letšego maatla a yona; digobeng tša mpa ga se maatla, ga se maatla! Mosela ke ntepepe boka mosedere, ditšhika tša dirope di logagane. Marapo a yona nke mapara a mphiri, manotlo nke mapara a tshipi. “Ke yona ya semaka diphoofolong tša ka tšohle; e fenywa fela ke Mmopi wa yona. Dijo e di hwetša dithabeng moo go ralokago phoofolo tšohle tša naga. E patlama ka fase ga mesibihla, ya khuta le ka gare ga mahlakanoka mehlakeng. E iphihla meriting ya mesibihla; e bobama mepopolireng ya noka. Ga e tšhabe noka ge e šutša; ga e tšhoge le ge Jordane e e hlatšetša ka molomong. Ke mang yo a ka lebanago nayo a e swara, goba a e phulela segalanko? “Na Lebiathane o ka e goga ka kobi ya dihlapi, goba wa e kgoka leleme ka thapo? A o ka e tsenya segalanko, goba wa e phuleletša mohlagare ka kobi? Na e ka go kgopela leboelela gore o e šokele, goba ya ithapeletša go wena? Kgane o ka lakana le yona, wa e dira lekgoba la gago go ya go ile? Na o ka e raloša bjalo ka nonyana, wa e kgokela banenyana ba gago? Na barekiši ba ka e bapatša goba ba e arolela babapatši? Kgane o ka e hlaba mmele wohle ka matsolo, goba wa e phuleletša hlogo ka tšhoša? Nke o e kgome, o ka se sa boeletša; ntwa ya gona o ka se tsoge o e lebetše.” “Yo a ka rego o a e hlasela o tla palelwa; go no e bona fela go mo nola moko. Ge e rumotšwe e a gakala; bjale nnaena ke mang yo a ka lwago le nna? Ke mang moehlasedi, mošayakgobalo? Lefaseng ka moka ga a gona. “A ke go botše ka ga ditho tša yona le ka ga maatla a yona a magolo, le ka ga mmele wa yona wo o tiilego. Ke mang yo a ka e hlobolago dikgapetla, goba a phuleletša letlalo la yona le lekoto? Ke mang yo a ka e ahlamišago mehlagare ye e metšego meno a go tšhoša? Mokokotlo wa yona ke molokoloko wa dikotse tša go swaragana, tša go tia boka leswika. Di swaragane tsiritsiri mo moya o ka se tšwego mokgahlo ga tšona. Di kgohlagane, gomme ga di amologane. Ge Lebiathane e ethimola go benya seetša; mahlo a yona a hwibitše boka mahwibi. Ka molomong wa yona go tšwa dikgabo, go thanya le dihlase tša mollo. Ka dinkong tša yona go thunya muši boka mollong wa dihlaka wo go apeilwego pitša ka wona. Mohemo wa yona o tšhuma hlaga, ka molomong wa yona go tšwa kgabo. E na le molala wo maatla; e tšhoša ba ba gahlanago nayo. Digoba tša yona di momagane, di thatafetše, ke dipotongwane. Pelo ya yona e tiile bjalo ka leswika, ke ye thata go swana le lwala. Ge e tsoga go boifa le dinatla, di katakata di tšhogile. Ge o e hlaba ka tšhoša ga o e dire selo, le ge e le lerumo, goba mosebe, goba letsolo. Go yona tshipi e kobega bjalo ka lehlokwa, mphiri e o sema kotana ye e bodilego. Mosebe ga o kgone go e tšhabiša; maswika a seragamabje go yona ke ditete. Go yona dithoka e dio ba mahlaka; ge e fošwa ka matsolo e a itshegela. Magapi a mpa ya yona a etša dinkgetlwana tša mangeta; e rapalala lerageng bjalo ka selei. E fehla phamphamadiba ya e etša pitša ge e bela; e biloša lewatle la ba bjalo ka setlolo se se apeilwego. Mo e fetilego gona e šadiša mohlala wa go phadima, ya fetoša phamphamadiba lephilo le lešweu. Lefaseng ga go selo sa go swana nayo; ke sebopiwa se se hlokago poifo. E nyatša phoofolo tšohle le tša go ikgogomoša; ke yona kgoši ya diphoofolo tšohle tša go ikgantšha tša nageng.” Ke moka Jobo a fetola Morena a re: “Ke a tseba gore o kgona dilo tšohle; ga go selo se o ka rego o nyaka go se dira sa go palela. O mpotšišitše wa re: ‘Ke wena mang o ka solago maikemišetšo a ka o sa kwešiše selo ka ona?’ Ke be ke sa tsebe, ke bolela tše ke sa di kwešišego, dimakatšo tše ke sa di hlaologanyego. O mpoditše gore ke theeletše ge o bolela, le gore o tla mpotšiša dipotšišo, mme nna ka go ruta. Ke be ke kwele ka wena ka go anegelwa, eupša bjale ke iponetše wena ka a ka mahlo. Ka gona ke inyatša ka tše ke di boletšego, gomme ke ipona molato ke le leroleng le moloreng.” Ya re ge Morena a feditše go bolela le Jobo a re go Elifase wa go tšwa Temane: “Wena le bagwera ba gago ka babedi ke le galefetše ka gobane ga se la bolela nnete ka nna, la etša Jobo, mohlanka wa ka. Bjale ge, tšeang dipoo tše di šupago le dikgapa tše di šupago le di iše go Jobo, gomme le itirele sehlabelo ka tšona. Jobo o tla le rapelela, gomme yena thapelo ya gagwe ke tla e kwa, mme ka se le dire se se swanelago botlaela bja lena. Lena ga se la bolela therešo ka nna, la swana le yena.” Elifase le Bildade le Tsofare ba ile ba dira seo Morena a bego a ba boditše sona, gomme Morena a kwa thapelo ya Jobo. Ge Jobo a rapeletše bagwera bao ba gagwe ka bararo, Morena a mo atla gape, gomme a mo fa thoto ya go lekana le yela ya pele ge e balwa gabedi. BomorwarragoJobo ka moka le dikgaetšedi le bagwera ba gagwe ba pele ba tla go mo etela, gomme ba ja le yena monyanyeng wa gagwe ka lapeng. Ba mo kwela bohloko mme ba mo homotša masetlapelong ale Morena a bego a mo tlišeditše ona. Yo mongwe le yo mongwe wa bona a mo fa tšhelete le palamonwana ya gauta. Bjale Morena a šegofatša Jobo kudu go feta pele. A rua dihuswane tše dikete tše lesome le tše nne, le dikamela tše dikete tše di selelago, le dikgomo tše dikete tše pedi, le dipokolo tše sekete. A ba le barwa ba ba šupago le barwedi ba bararo. A thea morwedi wa gagwe wa mathomo leina la Jemima, wa bobedi ya ba Ketsia, gomme wa boraro ya ba Kerene-Hapuka. Barwedi ba Jobo ba be ba phala basadi bohle ba naga yeo ka botse. Tatagobona o ile a ba abela lefa bjalo ka dikgaetšedi tša bona. Ka morago ga moo Jobo a phela mengwaga ye lekgolo le masome a mane, a ba a ba le ditlogolo le ditlogolwana. Ke moka a ikhwela a šetše a tšofetše kudu, a kgotsofetše. Go lehlogonolo motho, moganakeletšo ya bakgopo, yo a sa tšeego ka tsela ya badiradibe, a sa ikopanyego le ba ba kwerago Modimo. Sa gagwe ya ba go thabela melao ya Morena, le go ithuta yona bošego le mosegare. O bjalo ka mohlare mobjalwamoeleng; wa enywa dikenywa lebakeng la gona, le gona wa se pone matlakala. Go tšohle tše a di dirago o a atlega. Bakgopo bona le gatee ga ba bjalo; ba swana le mooko motšewakephefo. Ba tla bonwa molato ke Modimo kahlolong; badiradibe ba ka se kgobokane gotee le badiratoka. Ee, Morena o hlokomela badiratoka; badiradibe bona ba tla fedišwa. Ditšhaba di reng di tsoša marole? Merafe e reng e dulela serepa sa lefeela? Magoši a lefase a tsoša mpherefere; babuši ba lakana Morena, le motlotšwa wa gagwe ba a mo lakana. Ba re: “A re itokolleng kgatelelong ya bona; re kgaoleng dithapo tše ba re bofilego ka tšona, re di lahleng.” Mong wa bohle o ba sega a dutše setulong sa gagwe sa bogoši legodimong; o a ba kwera. Ya ba o bolela le bona a galefile; o ba tšhoša a ba befeletšwe. O re: “Ke nna ke hlomilego kgoši ya ka Sione, thabeng ya ka ye kgethwa.” Kgoši o re: “A ke le botše se se begilwego ke Morena. O mpoditše a re: ‘O morwa wa ka; lehono ke go tswetše. Nkgopele, mme ke tla go fa ditšhaba; lefase ka moka e tla ba la gago. O tla ba robaganya ka patla ya tshipi; o tla ba pšhatlaganya bjalo ka pitša.’ ” Bjale ge, lena dikgoši, lemogang seo. Ithuteng, lena babuši ba lefase. Direlang Morena le mmoifa; mo khunameleng le thothomela, gore a se tlo le galefela mme la hwa. Go lehlogonolo ba ba tšhabelago go yena. Morena, manaba a ka a atile e le ruri; ba ba ntsogelago maatla ga ba kaaka. Ke ba bantši ba ba mpolelago ba re: “Modimo a ka se mo hlakodiše.” Sela Fela wena, Morena, o ntšhireletša ka mathoko ohle; o mpušetša seriti, wa dira gore batho ba buše ba ntlhomphe. Ge ke llela Morena, o nkaraba thabeng ya gagwe ye kgethwa. Sela Ke a sekama ka robala, ka ba ka tsoga, gobane Morena o lala a ntšhireleditše. Ga ke tšhoge diketekete tša batho bao ba ntikaneditšego. Nanoga, Morena! Modimo wa ka, ntlhakodiše! Manaba ohle a ka o a kgitla mohlagare ka letswele, wa kgola bakgopo meno. Phološo e tšwa go wena, Morena; anke o šegofatše setšhaba sa gago. Sela Ge ke go kgopela thušo, o nthuše, hle, Modimo, Moemedi wa ka. Mola ke le tlalelong o ntlhakodišitše. Bjale nkgaugele, o nkwe, hle, ge ke go rapela. Lena boramaemo, le tla feletša kae le go mpolela gampe? Le tla rata lefeela le maaka go fihlela neng? Sela Tsebang gore Morena o direla mmotegi wa gagwe dimakatšo; ge ke mo kgopela thušo, o a nkwa. Le ge le galefile le se dire sebe; le nagantšhiše taba ye ka dikobong, mme le se dire selo. Sela Le neele dihlabelo tše di laetšwego, gomme le bote Morena. Ke ba bantši ba ba rego: “Nke nkabe re ka atlega! Nke o re edišetše sefahlego, Morena!” Fela nna lethabo le o mphilego lona le feta la ba ba bolailego mabele le beine. Gomme bjale ke robala boroko ka re kgu; gobane ke wena fela o ntudišago ka boiketlo, Morena. Morena, o ntlhwaele tsebe, ke a go rapela; o ele mefegelo ya ka hloko. O ntheeletše ge ke go llela, wena Kgoši ya ka le Modimo wa ka, gobane ke wena yo ke go rapelago. O kwa lentšu la ka mosong, Morena; ke go neela thapelo ya ka e sa le gosasa, gomme ka letela gore o nkarabe. Ga o Modimo wa go kgahlwa ke bokgopo; modiradibe ga a dule le wena. Baikgogomoši ga o nyake le go ba bona; bakgopo ka moka o ba hloile. Ba maaka o a ba fediša; babolai le dihwirihwiri o a ba šišingwa. Fela, ka baka la lerato la gago le legolo, nna ke kgona go tsena ka ntlong ya gago; ke kgona go go khunamela Tempeleng ya gago ye kgethwa ke go hlompha. Morena, o ntlhahle ka go loka ga gago, ka gobane manaba a ka a ntaletše; o ntokišetše tsela ya gago gore ke tšee ka yona. Tše di bolelwago ke manaba a ka ga di tshephagale; sa bona ke go nagana tshenyo fela. Dipolelo tša bona di a bolaya, ba na le maleme a boreledi. Ba sekiše o ba otle, Modimo; a ba ipolae ka maanomabe a bona. Ba rake mo pele ga gago ka baka la dibe tša bona tše dintši, gobane ba go tsogela maatla. Bohle ba ba tšhabelago go wena a ba thakgale, a ba fele ba hlalala. O šireletše ba ba go ratago, gore ba thakgale ka baka la gago. Ba ba lokilego o a ba šegofatša, Morena; o ba šireletša ka kotse ya botho bja gago. Morena, hle, o se nkgale o befetšwe; o se nkotle o nkgalefetše. Ntšhokelwe Morena, gobane ke fedile maatla. Mphodiše, Morena, gobane bolwetši bo nthenne ditho la go hwa. Nna ke ikwa ke hlakahlakane e le ruri. Na o tla diega go fihlela neng, Morena? Boa, o ntlhakodiše, Morena; etla o mphološe lehung ka leratorato la gago. Kua boyabahu ga o gopolwe ke motho; kgane ke mang yo a go tumišago bodulabahu? Nna ke lapišitšwe ke mefegelo ya ka; mosamelo wa ka ke o thapiša mašego ohle ka meokgo; malao a ka ke a kolobiša ka dikeledi. Mahlo a ka a fifatšwa ke mahloko; a gohlomeditšwe ke ge ke atetšwe ke manaba. Ntlogeleng, bakgopo bohle tenang, gobane sello sa ka Morena o se kwele. O nkwele ge ke mo llela, gomme o tla mpha se ke se kgopelago. Manaba a ka ohle a tla inyatša a tšhogile kudu; a tla goma le semeetseng a jewa ke dihlong. Morena, Modimo wa ka, ke tšhabela go wena; ntlhakodiše, o ntamolele go bohle ba ba ntlhomarago, gore ba se tlo nkgarola bjalo ka tau; ka hloka molamoledi ge ke garolwa bjalo. Morena, Modimo wa ka, ge eba ke dirile se sebe, ge eba ke rumotše mogwera wa ka, ge eba ke hlakotše sera sa ka ntle le lebaka – ge eba ke dirile ye nngwe ya taba tše – *** gona lenaba la ka a le ntlhomare le ntshware; a le nkgatakele fase le mpolae, le nkokobeletše sa ruri. Sela Morena, tsoga ka bogale, o tsogele manaba a a nkgalefetšego. Tsoga, Modimo wa ka, wena o laetšego gore go dirwe ka toka, ka gona ditšhaba a di go bokanele, o di buše o le ka godimo. Ke wena Moahlodi wa ditšhaba. O nkahlole ka toka, gobane ke lokile, ga ke ne molato. Fediša bobe bja bakgopo, gomme baloki o ba tiiše, wena Modimo wa go loka, o lekolago menagano le dipelo. Modimo ke Mošireletši wa ka, o phološa ba ba lokilego. Modimo ke Moahlodi wa go loka, gomme ga a lese go otla bakgopo. Ge motho a sa sokologe, Modimo o tla mo lootšetša tšhoša. O mo ngangela bora bja dula bo lokile. O mo lokišetša dibolai tša kotsi, a thuma mesebe ya gagwe. Bonang ka mo yo kgopo a imilego bobe; o ithwele bokgopo, a belega boradia. O epela batho molete, a ba a ntšha mabu, fela gwa wela yena mong ka go wona. Gape moepamokoti o a ikepela, le mokgakgati o a ikgela. Nna ke tla tumiša Morena ka baka la toka ya gagwe; ke tla opelela Morena ditumišo, yena Yogodimodimo. Morena, Mong wa rena, leina la gago ke le legolo bjang lefaseng lohle! Tše o di hlomilego legodimong di taga bjang! Bana le masea ba reta maatla a gago, ba hlokiša balwantšhi ba gago melomo, manaba a gago le baitefeletši. Ge ke lebelela leratadima, mošomo wa diatla tša gago, ngwedi le dinaledi tše o di beilego madulong, ke re motho ke eng ge o bile o mo gopola, motho wa lešidi ge o mmabalela? Eupša o mo hlaeditše gannyane a se lekane le wena; o mo godišitše ka letago le tlhompho. O mmeile mmuši wa mediro yohle ya atla tša gago; wa mo dira molaodi wa tšohle: dihuswane le dikgomo tšohle, ešita le diphoofolo tša naga, le dinonyana tša legodimo, le dihlapi tša lewatle, le nyabanyaba ka moka ka mawatleng. Morena, Mong wa rena, leina la gago ke le legolo bjang lefaseng lohle! Ke tla go tumiša ka pelo ya ka ka moka, wena, Morena; ke tla laodiša mehlolo yohle ya gago. Ke tla thaba ka gobela ka baka la tše o ntiretšego tšona; ke tla go opelela tumišo, wena Yogodimodimo. Ge o tšwelela, manaba a ka a a goma, a wela fase, a hwa. O šeditše gore ke direlwe ka toka tshekong; o dutše setulong sa gago sa kahlolo, o le Moahlodi wa go se kgetholle. O kgalemile baditšhaba, wa fediša bakgopo, mme ba ka se hlwe ba gopolwa. Manaba a ka a fedišeditšwe sa ruriruri. O pšhatlagantše metse ya bona, mme ga e sa tlo gopolwa. Eupša Morena ke Kgoši go ya go ile; setulo sa gagwe sa bogoši o se beetše go ahlola. O sekiša batho ba lefase ka toka; o ahlola ditšhaba a sa kgethologanye. Morena ke setšhabelo sa bao ba gateletšwego; ke sebo mabakeng a mathata. Bao ba go khunamelago ba go botile; bao ba go kgopelago thušo ga o ba lahletše, Morena. Opelelang Morena yo a bušago Sione ditumišo! Begelang ditšhaba dilo tše Morena a di dirilego. Modimo o gopola bao ba tlaišwago; ga a hlokomologe dillo tša bona, o lefeletša ba ba bolailwego. Ntšhokelwe, Morena! Bona ka moo bantlhoi ba ntlaišago ka gona. Ke wena o ntlhakodišago lehung, gore ke eme pele ga batho ba Jerusalema, ke ba anegele tšohle tše ke go tumišago ka tšona, ke hlalalele ge o mphološitše. Baditšhaba ba wetše ka moleteng wo ba o epilego; ba itantše dinao ka moreo wo ba o reilego. Morena o ikutolotše ka dikahlolo tša go loka; bakgopo bona ba tantšwe ke ditiro tša bona. Higayone. Sela Bodulabahu ke boyo bja bakgopo, ke bja ditšhaba tšohle tše di itebatšago Modimo. Bahloki ba ka se hloke ka mehla; bahlaki ba ka se dule ba holofetše lefeela. Nanoga, Morena! O se nyatšwe ke motho! Bokanya baditšhaba pele ga gago o ba sekiše. Ba tsentšhe letšhogo, Morena; ba lemoše gore ke batho ba nama. Sela Morena, o reng o emela kgole? O reng o iphihla mohla wa mathata? Bakgopo ka go ipona ba tlaiša bahlaki; ba ba tanya ka maanomabe a ba ba logetšego ona. Ba ikgantšha ka ditumo tša bona tše mpe; ba megabaru ba rogaka Morena ba mo nyefola. Ba bolela ba šinyaletše ba re: “Modimo ga a lefeletše.” Menaganong ya bona ye mebe ga ba bee Modimo felo. Ba atlega go tšohle tše ba di dirago. Ga ba nagane ka dikahlolo tša Modimo; ba nyatša manaba a bona ohle. Motho wa bona o ipotša a re: “Nna nka se palelwe; nka se tsoge ke wetše mathateng.” Magano a bona a tletše mahlapa le boradia le ditšhošetšo. Ge ba bolela, ba tshwa mantšu a mabe le a makgopo. Ba lalela batho kgauswi le metse; ba bolaya ba ba se nago molato ka go ba khukhunetša. Ba lalela bahlokamahlatse. Ba batalala bjalo ka tau ka serobeng. Ba lalela bahlaki gore ba ba sware. Ba ba tanya ka difu tša bona ba ba goga. Ba hlasela bahlokamahlatse ba ba pšhatlaganya, ba ba hlasela gasehlogo. Motho wa bona o gopola gore Modimo ga a di šetše. O ikhurumeditše sefahlego, a ka se mmone le gatee. Nanoga, Morena! Hle, Modimo, tsenya letsogo; baikokobetši bona o se ba lebale! Bakgopo ba reng ba nyatša Modimo, motho wa bona a gopola gore yena Modimo a ka se mo otle? Eupša wena, Modimo, o a di bona; matshwenyego le mahlomola o a ela hloko, wa a fediša. Mohlokamahlatse o bota wena; ka mehla Mothuši wa ditšhiwana ke wena. Robaganya yo kgopo le yo mobe maatla; mo otlele bokgopo bja gagwe go fihlela a se sa bo dira. Morena ke Kgoši go iša go sa felego; baditšhaba ba rakilwe nageng ya gagwe. Morena, o kwele dillo tša banyatšegi; o tla ba bea pelo, wa kwa dillo tša ditšhiwana le tša ba ba gateletšwego, wa ba lamolela, gore ba se sa tšhošwa ke motho mo lefaseng. Nna ke tšhabela go Morena. Le reng le re go nna: “Fofela dithabeng bjalo ka nonyana, gobane bakgopo ba nganga bora bja bona, ba lebantšha baloki ka mesebe go ba tsetsemetša ka leswiswing. Ge dilo di šetše di hlakahlakane, ke eng se moloki a ka hlwago a sa se dira?” Morena o ka Tempeleng ya gagwe ye kgethwa; setulo sa gagwe sa bogoši se legodimong. O lebeletše batho ba lefase; o a ba lebelediša a bona tše ba di dirago. O lekodišiša moloki le mokgopo go swana; ntwadumela yena o mo hloile. O nešetša bakgopo magala a a tukago le tshebela; ya bona kabelo ke phefo ye e fišago. Morena o lokile mme o rata boloki; baloki ba tla dula le yena. Thuša hle, Morena, gobane ga go sa na le morapedi yo a šetšego; babotegi ga ba sa le gona mo bathong. Batho bohle ba botšana maaka; ba na le maleme a boreledi, ba hloka botshepegi. Nke Morena a fediše bohle ba maleme a boreledi le baikgogomoši ba go re: “Maleme a rena a a re thekga; re itaola ka go bolela; kgane ke mang yo a ka re laolago?” Morena o re: “Ka gobane bahlaki ba a hlakolwa, bagatelelwa ba a tsetla, bjale ke tla di tsena, ka hlakodiša ba ba nyoretšwego tlhakodišo.” Tše di bolelwago ke Morena di hlwekile; di hlwekišitšwe go no swana le silibera ye e hlwekišitšwego sebešong gašupa. Bakgopo ba tsatsanka mo gohle, tše mpe di retwa ke batho. Fela rena, o a re lota, Morena, o re šireletša ka mehla go ba babjalo. Morena, o tla ntebala go fihlela neng? E tla ba go ya go ile na? A o tla mphuralela go fihlela neng? Ke tla khupela bohloko go fihla neng? Ke tla phela ke nyamile letšatši ka letšatši go fihlela neng? Manaba a ka a tla ntaola go fihlela neng? Ntebelele hle, Morena, Modimo wa ka, mme o nkarabe ge ke go rapela. Ntapološe gore ke se nape ka hwa, gore lenaba la ka le se re: “Ke mo swinne!” gore dira tša ka di se thabele go wa ga ka. Ge e le nna ke itshepetše lerato la gago, kilaphetogo; ke tla hlalalela ge o ntlhakoditše. A ke go opelele, Morena, gobane o ntoketše. Mašilo ka pelong a re: “Modimo ga a gona.” Ba dira bokgopo le tše di šiišago – ga go le o tee modiratoka. Morena yena o lebeletše batho a le legodimong, gore a bone ge eba go na le wa temogo, yo a mo khunamelago. Eupša bohle ba kgelogile, ka moka ba senyegile. Ga go le o tee modiratoka, ee, le o tee ga a gona. Morena o a botšiša o re: “A badirakgopo bohle ba ga ba tsebe selo? Ba phela ka go radia setšhaba sa ka, le gona ga ba nthapele, nna, Morena.” Eupša ba tla thothomela ka letšhogo, gobane Modimo o ema le baloki. Badirakgopo ba leka go folodiša merero ya batlaišegi, fela botšhabelo bja batlaišegi bao ke Morena. A Sione go tšwe phološo ya Israele! Mohla Morena a bušetšago setšhaba sa gagwe sekeng sa sona, ditlogolo tšeo tša Jakobo di tla gobela megobo; setšhaba sa Israele se tla hlalala. Morena, ka Tempeleng ya gago go ka tsena mang? Ke mang a ka rapelago Sione, thabeng ya gago ye kgethwa? Ke yo a phelago a se ne bosodi, a dirago tše di lokilego, a bolelago therešo ka pelo ya gagwe ka moka, a sa senyego batho maina. Ke yo a sa phošetšego bagwera ba gagwe, le gona a sa tšamego a seba batho. Ke yo a nyatšago bao ba lahlwago ke Modimo, eupša bao ba boifago Morena bona a ba hlomphago, yo ka mehla a phethago se a se tshephišitšego, le ge e ka ba se sethata bjang le bjang. Ke yo a sa adimišego tšhelete ka go e tswadiša, yo a sa rekwego go phara yo a se nego molato. Yo mobjalo a ka se tlalelwe. Ntšhireletše, Modimo, gobane ke tšhabela go wena. Ke botša Morena ke re: “Mong wa ka ke wena; ga go se se nkgahlago ntle le wena.” Bakgethwa ba ba lego mo nageng ke dinatla; ke bona ba ba nkgahlago kudu. Bao ba kitimelago medingwana ba itlišetša mathata a mantši. Nna nka se phase medingwana ya bona; le maina a yona nka se a bitše. Morena, ke wena lefa la ka; tšohle tše ke di hlokago ke di fiwa ke wena. Bophelo bja ka bo ka diatleng tša gago. O ntira gore ke ipshine ka bophelo; o dira gore bo ntsefele e le ruri! Ke reta Morena yo a nkeletšago; le bošego letswalo la ka le a ntemoša. Ke dula ke tseba gore Morena o na le nna; ka ge a le kgauswi, nka se thedimoge. Ka gona ke thabile, ke hlaletše, mme ke ikwa ke bolokegile, ka gobane o ka se nkgafele bodulabahu; o ka se lese mmotegi wa gago a eya boyabahu. O ntlhahla tseleng ya bophelo; ge ke na le wena ke thakgala kudu. O nthabiša go ya go ile. Morena, nkwe ge ke llela toka; ela sello sa ka hloko. Nkwe ge ke go rapela ke hlokofetše. O nkahlole ka go nkemelela; o bone se e lego nnete. Le ge o ka ntekola ka pelong, wa ntlhahloba bošego, wa mphetleka, o ka se hwetše ke nagana tše mpe. Ga se nke ka bolela tše mpe bjalo ka ba bangwe. Ke phethile taelo ya gago; ga se ka dira tša bokebeka. Ke sepetše tseleng ya gago ka mehla, mme ga se ka ka ka aroga go yona. Modimo, nna ke a go rapela, gobane ke wena o nkarabago. Ka gona ntshekegele tsebe, o theetše mantšu a ka. Re bontšhe lerato la gago le le makatšago, wena Mophološi wa ba ba tšhabelago manaba go wena. Ntšhireletše bjalo ka ge o šireletša tlhaka ya leihlo la gago; nkutamiše ka fase ga phego tša gago ge bakgopo ba ntlhasela. Manaba a ntikaneditše, a nyaka go mpolaya. Ga ba ne lešoko, ba bolela ka matepe. Bjale ba ntikaneditše, ba nyaka sebaka sa go mpapola. Ba etša tau ye e nyakago go gagola phoofolo; ba bjalo ka ditawana tše di bataletšego ka dirobeng tša tšona. Nanoga, Morena, o hlasele manaba a ka o a fenye! Ntlhakodiše go bakgopo ka tšhoša ya gago; ntlhakodiše go batho ba nama ka seatla sa gago, ke ra batho ba nama bao ba nago le tšohle tše motho a ka di nyakago mo lefaseng. O a ba humiša, le bana ba bona ke bomonakhora, le bona ba tlogelela bana ba bona lehumo. Ka ge ke lokile ke tla kgona go go bona, mme ge ke tsoga ka kgotsofatšwa ke go ba le wena. mme a re: Ke go rata bjang, Morena, wena maatla a ka! Morena ke setšhabelo sa ka; ke sebo sa ka le mophološi wa ka. Ke Modimo wa ka le botšhabelo bjo ke tšhabelago go bjona. Ke kotse ya ka, ebile ke montlhabanedi, ke bokhuto bja ka. Ke bitša Morena yo a lebanwego ke go tumišwa, a mphološa manabeng a ka. Ke be ke rarilwe ke ditlemo tša lehu; ke tšhošwa ke tahlego ye nkego mafula. Ke be ke tateditšwe ke dithapo tša bodulabahu, mme ke theilwe ka melaba ya lona lehu. Tlalelong yeo ya ka ka bitša Morena, ka bitša Modimo wa ka gore a nthuše. A kwa lentšu la ka a le Tempeleng ya gagwe, a theetša ge ke mo llela. Lefase la šišinyega, la roromela, metheo ya dithaba ya reremela, ya tekateka, ka gobane Modimo o be a befetšwe. A thuntšha muši ka dinko; molomong wa gagwe gwa lauma kgabo; magalamahubedu a tšhologa go yena. A sekamiša legodimo a theogela fase, maru a masomaso a le ka fase ga maoto a gagwe. O fofile a rwelwe ke mokerubi, a akaletše ka diphego tša phefo; a ipipeditše ka leswiswi; a dikaneditšwe ke marumaso a a tletšego meetse. Mo letagong la gagwe gwa tšwa sefako le magadima go putla maru. Morena a kidimetša legodimong, gwa kwala lentšu la Ramadulagodimodimo. A betša mesebe ya gagwe, a šwalalanya manaba a gagwe; a bekentšha magadima a ba tšhoša ba tšhaba. Lebato la lewatle la šala molaleng, metheo ya lefase ya apoga ge wena, Morena, o kgala manaba a gago mme o ba tšubotla ka ledimo. Nna a nkobelela ka letsogo a le godimo a ntshwara; a nkinola bodibeng. A mphološa manabeng a ka a maatla le go bantlhoi bohle – ba be ba mpheta kudu ka maatla. Mola ba ntlhasela ke ile ka ba bothateng, eupša Morena ya ba lehlotlo la ka. O ile a nntšha kotsing; a mphološa ka gobane ke be ke mo kgahla. Morena o mputsa go ya ka go loka ga ka; o a ntšhegofatša ka gobane ga ke na molato. Ke obametše melao ya Morena; ga se ka hlanamela Modimo wa ka. Ke phethile melao ya gagwe ka moka; ga se ka nyatša ditaelo tša gagwe. O tseba gore ga ke na phošo, le gore ke ithibetše go dira tše mpe. Morena o mputsetša go loka ga ka, ka ge a bona go se phošo ye ke e dirilego. Wena, Morena, o botegela bagoboti, ebile o lokela bao ba lokilego. O hlweketše bao ba hlwekilego, mme go baikaketsi o itira moikaketši. O phološa baikokobetši, o kokobetša baikgantšhi. Wena, Morena, o mphediša ka boiketlo; wena, Modimo wa ka, o ntlošetša mathata a ka ka moka. O mpha maatla a go hlasela manaba a ka, le a go tshela morako wa motse wa bona. Ditiro tša Modimo yo di lokile kudu, mantšu a gagwe a hlwekile. O bjalo ka kotse go bohle bao ba nyakago a ba šireletša. Morena a le noši ke Modimo; Modimo a nnoši ke setšhabelo sa rena. Modimo yo o a ntiiša, o nthuša go phela ke se na bosodi. O nkgontšha go kitima bjalo ka tshephe; o nkemiša ke fentše kua mebotong. O nthuta go lwa gore ke tle ke šomiše mosebe wo maatlamaatla. Wena, Morena, o a ntšhireletša wa mpoloka; o nthekga ka maatla a gago; ka thušo ya gago ke na le seriti. O nkgontšhitše go tšhabela manaba a ka, gomme ga se ka thetšwa. Ke lelekiša manaba a ka ka a swara; ga ke gome ke sešo ka a feleletša. Ke a ba kgitla mme ba se kgone go tsoga; ba rapalala pele ga ka. O mpha maatla a ntwa, wa nkgontšha go fenya manaba a ka. O dira gore manaba a ka a hlanole direthe, le gore bantlhoi ke ba feleletše. Ba hlaba mokgoši, eupša ba hloka molamoledi; ba llela Morena, eupša ga a ba fetole. Ke a ba šilaganya ba fetoga lerole la go tšewa ke phefo; ke ba gataka bjalo ka leraga mekgotheng. O mphološitše diphapanong tša setšhaba sa ka, wa ntira mmuši wa ditšhaba; setšhaba se ke bego ke sa se tsebe bjale ke sa ka. Bašele ba ithapeletša go nna; ge ba ekwa ke bolela, ba a ntheetša. Ba nolega moko gomme ba tšwa dibong tša bona ba thothomela. Morena o a phela! Tumišang mošireletši wa ka! Godišang Modimo yo a mphološitšego! O ntefeletša manabeng a ka; o mphenyetša ditšhaba, gomme o mphološa manabeng a ka. Wena Morena, o gafela manaba a ka diatleng tša ka, wa mphološa banneng ba dintwa. Ka gona ke go reta gare ga ditšhaba; ke go opelela ditumišo. Modimo o kgontšha kgoši ya gagwe go fenyetša manaba a gagwe sa ruri; o rata Dafida, motlotšwa wa gagwe, le ditlogolo tša gagwe go ya go ile. Magodimo a anega letago la Modimo; leratadima le kwalakwatša mediro ya atla tša gagwe. Letšatši le e anegela la go le latela, le bošego bo e begela bjo bongwe. Ga go kwale polelo goba mantšu, le wona modumo ga o gona; eupša molaetša wa magodimo o ya lefaseng lohle, le mantšu a ona a fihla magomong a lefase. Letšatši lona Modimo o le agetše ngwako leratadimeng, le tšwa bjalo ka monyadi a tsatsanka a etšwa ntlong; le etša sekitimi se phalela lebelo. Le hlaba ka thoko ye nngwe ya legodimo, la kgokologela ka go ye nngwe. Ga go se se ka utamelago phišo ya lona. Melao ya Morena ke ye e phethegilego, e tsošološa motho. Ditaelo tša Morena di a botega, di lemoša ba ba se nago temogo. Melao ya Morena e lokile, e thabiša motho. Ditaelo tša Morena di kwešišega gabotse, di ediša monagano wa motho, Go boifa Modimo go lokile; ke ga go ya go ile. Dikahlolo tša Morena di nepagetše; ka moka ke tša toka. Di kganyogega go fetiša gauta, go fetiša le gauta ye ntši ye bohlokwahlokwa; di bose go phala le todi ya nose, todi ye e rothago lemapong. Di laya nna, mohlanka wa gago, ka go di hlompha ke bona moputsomogolo. Ke mang yo a ka iponago diphošo? Hle, Morena, ntebalele le tše ke sa di tsebego! Nthibele le go dira dibe ka boomo; tšona di se ke tša mpuša. Ke gona ke tlago hloka bosodi, ka se go tsogele maatla. Anke o kgahlwe ke mantšu a ka le dikgopolo tša ka, wena Morena, setšhabelo sa ka, wena Mophološi wa ka! Anke Morena a go arabe tšatšing la tlalelo! Modimo wa Jakobo a go šireletše! Anke a go thuše a le Felong mo Gokgethwa; a go thekge a le thabeng ya Sione. Anke a gopole dibego tša gago ka moka, a thabele le dihlabelo tša gago. Sela Anke a go nee tše o di dumago, a dire gore le diakanywa tšohle tša gago di atlege. Ke mo re tlago hlalalela ge o fentše, ra hlomela Modimo wa rena difoka. Anke Morena a go fe tšohle tše o di kgopelago! Bjale ke tseba gore Morena o dira gore motlotšwa wa gagwe a fenye; o mo araba a dutše legodimong la gagwe le lekgethwa, mme ka ditiro tša gagwe tše maatla o mo dira gore a fenye. Batho ba bangwe ba botile dikoloi tša ntwa, bangwe ba botile dipere tša bona; ge e le rena re botile Morena Modimo wa rena. Bona ba a thetšwa ba wa, fela rena re ema re hlophologile, re tiile. Morena, dira gore kgoši a fenye, le rena ge re go bitša o re arabe. Morena, kgoši o thabile, gobane wena o yo maatla; o thabile kudu ka ge o mo dirile gore a fenye. O mo file se a bego a se duma; se a bego a se kgopela wa se mo ganele sona. Sela O mo tletše ka ditšhegofatšo tše kgolo, wa ba wa mo rweša mphapahlogo wa gauta ye e sego ya tswakwa. O ikgopeletše bophelo bjo botelele, mme wa mo fa bjona; wa mo phediša nako ye telele e le ruri. O mo thušitše gore a be le seriti se segolo; o mo file botšhepi le borena. Ditšhegofatšo tša gago di mo okametše go ya go sa felego, mme ge o le gona o a thaba. Kgoši o botile Morena; ka baka la leratorato la Yogodimodimo a ka se tekateke. Wena, kgoši, o tla fihlelela manaba a gago ka moka; ka maatla a gago o tla fenya bagohloi. Mohlang o tšwelela o tla ba fediša mo nkego ba swa sebešong. Morena o tla ba fediša a befetšwe, mme ba jewa ke mollo. Wena, kgoši, o tla fediša bana ba bona lefaseng; ditlogolwana tša bona o tla di tloša bathong. Le ge ba go lakana, ba go logela maanomabe, ba ka se atlege. Ge o ba šupa ka mesebe, o tla dira gore ba tšhabe. Re go tumišetša bogolo bja gago, Morena. Re tla opela ra tumiša maatla a gago! Modimo wa ka, Modimo wa ka, o ntlogeletšeng? Ke golola ke nyaka thušo, eupša o no fela o le kgole le nna. Mosegare ke hlwa ke go llela, Modimo wa ka, eupša ga o nkarabe; le bošego ke lala ke go llela, eupša khomotšo ga ke e hwetše, etšwe o dutše sa borena o le Mokgethwa, moo go kwalago direto tša Israele. Borakgolokhukhu ba rena ba be ba go botile, mme wena o ba hlakodiša. Ba be ba go llela mme ba phološwa, ba go botile mme ba sa swabišwe. Ge e le nnayena ga ke sa le motho, ke no ba seboko, ke nyatšwa ke batho, ke hlaswa ke setšhaba sa gešo. Ba ba mponago ka moka ba a nkwera; ba šonya melomo ba šišinya dihlogo ba re: “Yena o botile Morena. A a mo hlakodiše, a mo phološe ge eba o a mo rata!” Ke wena o dirilego gore ke belegwe, ke iketle difarong tša mma. Ke botile wena go tloga mola ke belegwago, go tloga mola mma a mpelegago o bile Modimo wa ka. Hle, se nkatologe, ditlaišego di kgauswi! Ga go yo a ka nthušago. Manaba a mantši a ntikaneditše bjalo ka dipoo, a ntikologile boka dipoo tše šiišago tša Bashane. A nkahlamela bjalo ka tau ye e gabutlago e rora. Ke bjalo ka meetse a a tšhologilego; marapo a ka ka moka a a kgwelekgwehla; pelo ya ka e tologa bjalo ka moti. Magalagapa a ka a gagaletše boka lekopelo, leleme le kgomaretše mehlagare. O nthapaladitše gore ke hwele thogorogong. Lekoko la dikebeka le ntikologile, le ntikaneditše bjalo ka dimpša. Ba ntlema maoto le matsogo; ke kgona go ipala marapo. Manaba a ka a ntomoletše mahlo. Ba abelana diaparo tša ka, kobo ya ka ba e direla matengwa. Hle, wena Morena, se nkatologe! Wena maatla a ka, phakiša o nthuše! Ntlhakodiše go ba ba ntlhaselago ka ditšhoša, o mphološe dimpšeng tšeo. Ntlhakodiše molomong wa ditau tše, o mphološe le manakeng a tšona dinare tše. Morena, o kwele thapelo ya ka; ke tla anegela magagešo tše o ntiretšego tšona. Ke tla go reta phuthegong ka re: “Mo reteng, lena bahlanka ba Morena! Mo hlompheng, lena ditlogolo tšohle tša Jakobo! Mo khunameleng, lena setšhaba ka moka sa Israele! Ga a lahle motlaišegi, ga a mo hlokomologe ditlaišegong tša gagwe. Ga a mo furalele, fela ge a mo llela o a mo thuša.” Phuthegong ka moka ke tla go tumiša ka baka la tše o di dirilego; ke tla go direla dihlabelo tše ke go tshephišitšego tšona mahlong a ba ba go khunamelago. Badiidi ba tla ja nama ya tšona go khora, bao ba tlago go Morena Tempeleng ba tla mo reta. Nke ba atlege go ya go ile! Batho ba lefase ka moka ba tla dumela go Morena, ba sokologela go yena; ditšhaba tšohle di tla mo khunamela, ka gobane ke kgoši, o a di buša. Bahumi ka moka ba tla mo obamela; bohle ba ba boelago leroleng ba tla mo khunamela. Le ba ba sa tlago tswalwa ba tla mo hlankela, le ditlogolo tša bona tša anegelwa tša Morena, le tšona tša anegela tše di tlago ba di tswetšwe tša re: “Morena o phološitše setšhaba sa gagwe.” Morena ke modiši wa ka; ga ke hloke selo. O nkhutšiša mafulong a matala; o nkiša meetseng a makhutšo. O a ntapološa, o ntshepediša ka tsela tše di lokilego ka baka la leina la gagwe. Le ge nka sepela molapong wo o šiišago, nka se boife selo, gobane wena, Morena, o na le nna. O ntšhireletša ka molamo wa gago, ka lepara la gago wa ntlhahla. O ntirela monyanya manaba a ka a ntebeletše; o nkamogela mo nkego ke moeng yo mogolo, wa ntlaletša senwelo wa go falala. Ke a tseba gore botho le lerato la gago di tla ba le nna bophelong bja ka ka moka, gomme ke tla dula ka ngwakong wa gago ge ke sa phela. Lefase ke la Morena le tšohle tše di lego go lona; lefase ke la gagwe le tšohle tše di phelago go lona. O le theile godimo ga mawatle, o le agile godimo ga phamphamadiba. Ke mang yo a ka namelago thaba ya Morena? Ke mang a ka tsenago ka Tempeleng ya gagwe ye kgethwa? Ke yo a dirago tše di lokilego, a nago le pelo ye botse. Ke yo a sa amanego le bofora, a sa enego ka maaka. Yena Morena o tla mo šegofatša; Modimo, Mophološi wa gagwe kahlolong, o tla re ga a ne molato. Ba babjalo ke ba ba tlago go Modimo, ba ba ipegago go Modimo wa Jakobo. Bulegang go ahlama, lena dikgoro; ipuleng, lena mamati a bogologolo, gore Kgoši ye kgolo e tsene! Ke mang Kgoši ye kgolo yeo? Ke Morena yo maatla le yo bogale, Morena, yena mogale ntweng. Bulegang go ahlama, lena dikgoro; ipuleng, lena mamati a bogologolo, gore Kgoši ye kgolo e tsene! Le re ke mang Kgoši ye kgolo yeo? Morena Ramaatlaohle – ke yena Kgoši ye kgolo yeo. Ke a go rapela, Morena; ke botile wena, Modimo wa ka. Nke ke se segišwe batho; se dumelele manaba a ka a ntshega. Bohle ba ba go botilego ba ka se segišwe batho; ba ba go hlanamelago ka go se šetše bona ba tla segišwa batho. Morena, ntsebiše thato ya gago; o nthute ka mo o ratago gore ke phele ka gona. O ntlhahle gore ke phele ka therešo ya gago; o nthute, gobane o Modimo, Mophološi wa ka. Ka mehla ke botile wena. Morena, gopola botho bja gago le leratorato la gago, e lego tšona dilo tša kgale. O lebale dibe tša ka tša bofseng le dikarogo. Fela nna, Morena, o nkgopole ka leratorato la gago le botho bja gago. Morena ke yo botho, o a botega; ka gona o bontšha badiradibe tsela. O etetša baikokobetši tseleng ya go loka, mme a ba ruta thato ya gagwe. Ka leratorato la gagwe le potego o etetša bohle ba ba botegelago kgwerano ya gagwe gape ba phethago ditaelo tša gagwe. Ka ge o le Morena wa lešoko, o ntshwarele bokgopo bja ka le ge e le bjo bogolo. Ge motho a theeletša Morena, Morena o mo ruta ka mo a swanetšego go phela. Ka mehla o tla atlega, le ditlogolo tša gagwe e tla ba bengnaga. Morena o kwana le ba ba mo theeletšago, mme o ba tsebiša kgwerano ya gagwe. Ke dula ke lebeletše Morena ke re a nthuše, gobane ke yena fela yo a kago ntanyolla sefung. Retologela go nna o nkgaugele, gobane nna ke mmotlana ebile ke a hlaka. Ntamolele ditlalelong tša ka, o nntšhe mathateng. Šetša mohlako le ditlaišego tša ka, mme o ntebalele dibe tša ka ka moka. Bona boati bja manaba a ka; ba ntlhoile o šoro. Ntšhireletše o mphološe; o se ntese ke segwa ke batho, gobane ke tšhabela go wena. Anke go hloka bosodi ga ka le go loka ga ka go ntote, gobane ke botile wena. Hle, Modimo, phološa setšhaba sa Israele ditlalelong tšohle tša sona! Kahlolo ya gago a e nthekge, Morena, gobane ke phela ke se na bosodi, mme ke botile wena ke sa tekateke. Ntlhahlobe o ntekole, Morena; ntlhwekiše pelo le menagano. Leratorato la gago le a nketetša; ke phela go ya ka therešo ya gago. Ga ke ikopanye le baradia; ga ke sepele le baikaketši. Ke hloile go dula le batho ba babe, ebile ga ke ikopanye le bakgopo. Morena, ke hlapa diatla go itatola molato, le gona ke dikologa aletare ya gago ke go rapela ke opela sefela sa tebogo, ke bile ke anega mehlolo ya gago. Morena, ke rata ngwako wo o dulago go wona, felo mo go dulago letago la gago. Hle, o se mpheleletše gotee le badiradibe, o se ntloše tšatšing le babolai. Ke bona ba ba dirago tša bokebeka, ba ba phelago ka tsogolekobong. Ge e le nna ke phela ke se na bosodi. Hle, nkgaugele mme o mphološe! Ke iketlile, mme ke tla reta Morena ke na le phuthego yohle ya gagwe. Morena ke seetša sa ka le Mophološi wa ka – nka se boife motho. Morena ke botšhabelo bja ka – nka se tšhoge motho. Ge batho ba babe ba ntlhasela gore ba mpolaye, e lego bona batlaiši le manaba a ka, go thetšwa bona ba wa. Le ge madira a ka ntikanetša, nka se ke ka boifa; le ge manaba a ka ntlhasela, ke tla no fela ke botile Modimo. Ke selo se tee se ke se kgopetšego Morena, seo ke sona ke tlago se nyaka: ke go ba ka ngwakong wa Morena bophelo bja ka ka moka, go bogela botho bja gagwe, le go kgahlwa ke bjona. Mohla wa matshwenyego o tla ntšhireletša ka ngwakong wa gagwe, o tla nkutamiša ka Tempeleng ya gagwe ka bolokega; o tla nkuka a mpea godimo ga lerako. Ka gona ke tla fenya manaba a a ntikologilego; ke tla duduetša mekgolokwane ke dira dihlabelo Tempeleng; ke tla opela ke tumiša Morena! Ntshekegele tsebe, Morena, ge ke go llela, nkgaugele o nkarabe! Ke gopola taelo ya gago ye e rego: “Tlaang le nkhunamele.” Ka gona ke tletše go go khunamela, wena Morena. O se ke wa nkhutela, hle! O se ke wa nthaka o nkgalefetše, nna, mohlanka wa gago. O hlwa o nthuša; hle, se ntlogele, se ntahle, wena Modimo, Mophološi wa ka! Le ge tate le mme ba ka ntahla, Morena yena o tla mpabalela. Nthute ditsela tša gago, Morena, mme o ntlhahle tseleng ya polokego, gore manaba a ka a se atlege. Hle, se nkgafele thatong ya manaba a ka, gobane dihlatse tšeo tša maaka di nkemetše ka maoto, di ntsošetša mpherefere. Ge nkabe ke se ka dumela gore ke tla bona botho bja Morena mo bophelong bjo nkabe ke hwile. Bota Morena! O se ke wa tlalelwa! Ee, bota Morena. Morena, wena Montšhireletši, ke a go bitša, o se nkhomolele. Ge o sa nkarabele, ke tla ba bjalo ka ba ba theogelago bodulabahu. Hle, o nkwe ge ke go llela ke nyaka thušo, ke phagamišeditše matsogo Felong mo Gokgethwakgethwa ga Tempele ya gago. O se mpheleletše le bakgopo, batho ba ba dirago tše mpe, ba ba bolelago gabotse le bangwekabona, etšwe pelo tša bona di tletše bobe. Ba otle ka baka la tše ba di dirilego, ka baka la mediromebe ya bona. Ba otle ka baka la ditiro tša bona; ba dire se se ba lebanego. Ga ba šetše ditiro tša Morena, goba tše Morena a di hlodilego; ka gona yena o tla ba fediša, a se sa ba tsoša. A go retwe Morena! O nkwele ge ke mo llela ke nyaka thušo. Morena o mpha maatla, ebile ke kotse ya ka. Ke botile yena, o a nthuša; ka gona ke a gobela, ke mo reta ka sefela. Morena o fa setšhaba sa gagwe maatla. Motlotšwa wa gagwe o tšhabela go yena mme a phološwa. Phološa setšhaba sa gago, Morena, o šegofatše bao e lego ba gago. Eba modiša wa bona, o ba babalele go ya go ile. Retang Morena, lena dibopiwa tša legodimong! Mo reteleng letago la gagwe le maatla a gagwe! Retang Morena wa letago ka mo go mo lebanego. Obamelang Morena le apere diaparo tše dikgethwa! Modumo wa Morena o kwala godimo ga mawatle; Modimo wa letago o a duma; Morena o duma ka godimo ga phamphamadiba. Modumo wa Morena ke wo maatla; modumo wa Morena ke wa borena. Modumo wa Morena o robaganya mehlare ya mesedere, Morena o robaganya le mesedere ya Lebanone. O kganakgantšha dithaba tša Lebanone boka namane; Sirione o e tlolatlodiša boka pholwana ya nare. Modumo wa Morena o gadimiša dikgadima. Modumo wa Morena o reketliša lešoka; o reketliša lešoka la Kadeshe. Modumo wa Morena o tswadiša tshephe; o hlobodiša mehlare ya šala e le fela. Mola Tempeleng ya gagwe bohle ba re: “A go tumišwe Modimo!” Morena o buša phamphamadiba; o buša e le kgoši go ya go ile. A Morena a fe setšhaba sa gagwe maatla, a se šegofatše a dire gore se iketle. Ke a go tumiša, Morena, gobane o mphološitše lehung, wa se dumelele manaba a ka go ntshega. Ke go lletše, Morena Modimo wa ka, mme wa mphodiša bolwetšing. O nkgomišitše ke eya bodulabahu, Morena. Ke be ke le gare ga bao ba theogelago go baithobaledi, eupša wena wa nntšha. Opelelang Morena ditumišo, lena babotegi ba gagwe! Tumišang yena Mokgethwa! Bogale bja gagwe ke bja lebakanyana fela, botho bja gagwe bjona ke bja bophelo ka moka. Le ge mantšiboa motho a ka robala a lla, mosong o tsoga a thabile. Mola ke sa iketlile ke ile ka ipotša ka re: “Nka se tsoge ke tshwentšwe ke selo.” Ka botho bja gago, Morena, o ile wa ntiiša boka thaba; fela ka morago wa tla wa mphuralela, mme ka boifa. Ke ile ka go bitša, Morena; ke ile ka go rapela ka re: “Lehu la ka le tla go hola ka eng? Ke ra ge nka ikela bodulabahu? Kgane bahu ba kgona go go reta? A ba ka bega potego ya gago? Nkwe, Morena, gomme o nkgaugele! Nthuše, hle, Morena!” Sello sa ka o se fetošitše mogobelo; o nkapotše diaparo tša go ilela, wa nkapeša lethabo, gore ke go opelele ditumišo ke sa homole. Morena Modimo wa ka, ke tla go reta go iša go sa felego. Ke tšhabela go wena, Morena, ke se tsoge ke jelwe ke dihlong. O ntlhakodiše ka maatla a gago a go phološa. Ntlhwaele tsebe! Ntlhakodiše ka pela! Eba mošireletši wa ka yo ke tšhabelago go yena, le sebo sa go ntšhireletša. O mošireletši wa ka le sebo sa ka. Ka ge o ntlhokomela, o tla ntlhahla wa nketetša. Ntanyolle sefung se ba ntheilego ka sona. gobane ke wena setšhabelo sa ka. Ke gafela moya wa ka diatleng tša gago, gobane o tla mphološa, Morena. wena Modimo yo a botegago. Nna ke hloile ba ba khunamelago medingwana ya lefeela; ke botile Morena. Ke tla thaba ka gobela ka baka la leratorato la gago, gobane o bone mohlako wa ka, wa ntlhokomela ke le ditlaišegong. Ga se wa nkgafela diatleng tša manaba a ka; o ntumeletše go ya boratapelo. Ntšhokele, Morena, gobane ke mo tlalelong. Mahlo a ka a gohlometše ka baka la sello; ke lapile mmele le moya. Mahloko a mphokoleditše bophelo, mefegelo e nthipetše mengwaga. Ke fokodišitšwe ke mohlako, le marapo a ka a a opa. Manaba a ka ka moka a a nnyatša, gagolo ba e lego baagišani ba ka; ba ba ntsebago ba a mpoifa; ge ba mpona mekgotheng, ba a ntšhaba. Bohle ba itebadišitše nna mo nkego ke hwile; ke bjalo ka selotsoko se se lahlilwego. Ke kwa sehebehebe sa ba bantši ba ba ntikaneditšego mme se a ntšhoša. Ba ntogela maano, ba lakana go mpolaya. Fela nna ke botile wena, Morena, ke re: “O Modimo wa ka.” Bophelo bja ka bo laolwa ke wena; ntlhakodiše diatleng tša manaba a ka, le go tša bantlhomari. Nke o nkedišetše sefahlego sa gago, nna, mohlanka wa gago; ntlhakodiše ka leratorato la gago. A bakgopo ba se ntshege, Morena, ka gobane ke a go bitša. A e be bona ba ba segwago; a ba ye bodulabahu ka setu. Thiba boramaaka bao melomo ba go bolela baloki ka lenyatšo, ba bolediša matepe le boikgogomošo. Botho bja gago bo kaakang bjo o bo beetšego ba ba go boifago! O bo bontšha ba ba tšhabelago go wena, gore batho bohle ba bo bone. O ba khutiša pele ga gago ba bolokega, gore ba se lakanwe ke batho; o ba fihla ka botšhabelong, gore ba se rogwe ke batho. Retang Morena, gobane ge ke be ke le tlalelong o ile a mpontšha lerato la gagwe ka mokgwa wo o makatšago. Ke be ke tšhogile ke re o nthakile pele ga gago. Eupša o kwele sello sa ka mola ke go llela ke nyaka thušo. Ratang Morena, lena bohle ba le mmotegelago. Morena o šireletša babotegi ba gagwe; baikgogomoši bona o ba dira go feta tše di ba swanetšego. Tiang maatla, betang dipelo, lena bohle ba le botilego Morena! Go lehlogonolo motho yo a lebaletšwego dikarogo, yo a swaretšwego dibe. Go lehlogonolo motho yo Morena a sa mmonego molato, yo a se nego bofora. Mola ke sa ipolele dibe tša ka, marapo a ka a be a fokola, ka gobane ke be ke ehlwa ke lla letšatši ka moka. O nkotlile bošego le mosegare, Morena; ke be ke feletšwe ke maatla bjalo ka meetse ge a pšhešwa ke phišo ya selemo. Ke ile ka ipolela dibe pele ga gago, ka se ute bobe bja ka. Ke ithaopile ka ipolela makgopo a ka go wena, mme wena wa ntebalela melato yeo. Ke ka baka leo mmotegi mang le mang a swanetšego go go rapela mehleng ya mathata. Ge matshwenyego a etla bjalo ka mafula a magolo, a ka se mo fihlele. Ke khuta ka wena, o ntšhireletša mathateng. Ke duduetša mekgolokwane ka ge o mphološitše. Morena o re: “Ke tla dira gore o kwešiše, ka go bontšha tsela ye o swanetšego go e tšea. Ke tla go eletša, ka go hlokomela.” Le se ke la šilofala boka pere le meila, tšona di sepetšwago ka ditomo le maleisele gore di laolege. Yo kgopo o atelwa ke bohloko, eupša yo a botilego Morena yena o aparelwa ke lerato la gagwe, kilaphetogo. Lena baloki, thabang le gobele ka ge le le ba Morena! Bohle ba dipelo tša go loka, thakgalang! Lena ba go loka, hlalalang ka ge le le ba Morena! Go mo reta go swanela baloki. Retang Morena ka sekgapa, le mo opeleleng le letša harepa ya metato ye lesome! Mo opeleleng sefela se sefsa; letšang diletšo tša metato ka bothakga, le gobele ka lethabo! Mantšu a Morena a a tshephagala, le mediro ya gagwe ka moka e a botega. Morena o rata tša go loka le tše dibotse; leratorato la gagwe le tletše lefase. Magodimo a hlodilwe ka taelo ya Morena; letšatši le ngwedi le dinaledi di hlodilwe ka lentšu la gagwe. O kgobokantše meetse a mawatle felo gotee; a tswalelela madiba a mawatle ka dikheseng. A lefase lohle le boife Morena! A badudi bohle ba lefase ba mo hlomphe! Gobane o rile ge a bolela la hlolega; ge a laela, la ba gona. Morena o šitiša merafe maikemišetšong a yona; o thibela ditšhaba mererong ya tšona. Eupša maikemišetšo a Morena ona a tieletše ruri; menagano ya gagwe e tieletše go ya go ile. Go lehlogonolo setšhaba se Modimo wa sona e lego Morena; go lehlogonolo setšhaba se a ikgethetšego sona. Morena o lebelela a le legodimong, mme o bona batho bohle. O lebelela badudi bohle ba lefase a dutše setulong sa gagwe sa bogoši, yena yo a bopago megopolo ya bona ka moka, a tsebago tšohle tše ba di dirago. Kgoši ga e fenye ntweng ka madira a mantši, le mohlabani ga a phološwe ke bonatla bja gagwe. Ke lefeela go ikanya go phološwa ke pere; le ye e tiilego e ka se phološe motho. Ke Morena yo a babalelago ba ba mmoifago, bao ba botilego lerato la gagwe, kilaphetogo, gore a ba phološe lehung, a ba babalele mehleng ya tlala. Rena re holofetše Morena; ke yena Mothuši le Mošireletši wa rena. Re thaba ka gobane re le ba gagwe, ka gobane re tshephile yena Mokgethwa. Morena, anke leratorato la gago le be le rena, ka ge re botile wena. Ke tla tumiša Morena ka mehla; nka se ke ka kgaotša go mo reta. Ke tla mo tumiša; baikokobetši ba tla di kwa mme ba thaba. A re reteng Morena re le mmogo, re mo tumišeng re le gotee! Ke kgopetše Morena thušo, mme a nkaraba; o ntlhakodišitše mo go tše ke bego ke di boifa. Mo lebeleleng mme le tla ela difahlego, la se lewe ke dihlong. Nna ke mohlaki yo ke bego ke bitša Morena, mme a nkwa, a ntlhakodiša ditlaišegong tša ka tšohle. Bao ba obamelago Morena ba hlapetšwa ke morongwa wa gagwe gabotse, mme o ba phološa kotsing. Lebeledišišang le itemogele gore Morena ke yo botho bjang. Go lehlogonolo motho yo a tšhabelago go yena. Boifang Morena, lena bakgethwa ba gagwe, gobane ba ba mmoifago ga ba hloke selo. Le ditawana di fela di hloka dijo di bolawa ke tlala, eupša bao ba kgopelago Morena ga go se sebotse se ba se hlokago. Tlaang le ntheeletše, lena banabešo, ke le rute go boifa Morena. Na le rata go ipshina ka bophelo? Le nyaka go phela galelele ka lethabo? Gona le itlhokomele gore le se bolele tše mpe, le gore le se radie batho. Le tlogele tše mpe le dire tše dibotse; le katanele khutšo mme le e phegelele. Morena o bea baloki leihlo, le dillo tša bona o di hlwaela tsebe. Badiratšekgopo bona o a ba lwantšha, gore lefaseng ba se sa gopolwa. Baloki ba llela Morena gore a ba thuše, mme o a ba kwa. O ba ntšha ditlaišegong tša bona ka moka. Morena o kgauswi le bao ba nolegilego moko; o phološa bao ba feletšwego ke tshepo. Moloki o atelwa ke madimabe, eupša Morena o mo ntšha go ona ka moka; Morena o mo šireletša mmele wohle; ga go lerapo la gagwe le le robegago. Bakgopo ba bolawa ke bobe bja bona; bahloyabaloki ba tla otlelwa molato wa bona. Morena o tla phološa bahlankedi ba gagwe, mme bohle ba ba humelago ka yena ba ka se otlelwe melato ya bona. Phegiša bao ba mphegišago, Morena, o lwe le ba ba lwago le nna! Tšea thebe le kotse o tle o nthuše. Itlhame ka lerumo le semagagane, o lwe le bao ba ntlhomerego. O mpotše o re: “Mohlakodiši wa gago ke nna.” Anke bao ba lekago go mpolaya ba segišwe batho, ba gobošwe. Anke bao ba ntakanago ba katakate ka dihlong. Ge morongwa wa Morena a ba lelekiša, a ba swane le mooko wo o tšewago ke phefo. A tsela ya bona e be le leswiswi le matheledi ge morongwa wa Morena a le gare a ba hlomere. Ba nthea ka sefu ke se ka ba dira selo; ba nkepela mokoti ke se na molato gore ba ntshware. Kotsing a go wele bona ba sa itebetše; ba tanywe ke sefu sa bona, ba wele ka mokoting wo ba o epilego. Ke mo ke tlago thabišwa ke ditiro tša Morena, ka ipshina gobane Morena o tla be a mphološitše. Ke tla botšiša Morena ke feleletše ka re: “Ke mang wa go swana nago, wena wa go hlakodiša mohlaki go yo a mo hlakišago, wa go phološa mohloki go yo a mo hlakolago?” Dihlatse tša maaka di a mphara; ba ntshekiša ka tše ke sa di tsebego. Ba ntefeletša botse ka bobe; ba a ntalela gore ba mpolaye, etšwe nna mola ba be ba babja ke be ke apara diaparo tša mogohla, ke itlhokofatša ka go itima dijo, ke ba rapelela ke sa kgaotše, ke etša ge ke rapelela mogwera goba ngwanešo. Ke sepela ke iname ke hloname bjalo ka motho a llela mmagwe. Ge ke kgopša, ba be ba thaba, ba mpokanela; ke gegewa le ke bahlasedi ba ke sa ba tsebego ba sa kgaotše. Ba nkgobotla ka dikwero bjalo ka batho ba ba sa tsebego Modimo; ba ntomantšhetša meno. O tla bogela go fihla neng, Morena? Ntlhakodiše ge ba ntlhasela; mphološe dibateng tše! Ke mo ke tlago go leboga phuthegongkgolo, ka go tumiša ke na le mašabašaba. Ba e lego manaba a ka ke se ka ba dira selo, o se ba dumelele go ntshega; ba ba ntlhoilego ke se na molato, o se ba lese ba nkgerula. Ga ba bolele le batho gabotse; sa bona ke go lakana go radia baratakhutšo nageng ye. Ba ntlhabela lešata ba re: “Agaa! Swine! Re go hweditše!” Eupša wena, Morena, o iponetše. Ka gona se homole, se nkeme kgole, Morena! Phafoga, o nkemelele, Modimo wa ka le Mong wa ka, o mpolelele tabeng ya ka. Ntamolele, ka ge o ahlola ka toka, wena, Morena Modimo wa ka; o se ba lese ba ntshega! O se ba lese ba itshema ba re: “Agaa, o swinegile!” goba ba re: “Re mo fedišitše!” A bao ba ntshegago ka madimabe a ka go segwe bona mme ba lewe ke dihlong mmogo. A bao ba ipotšago gore ba a mphala ba welwe ke dihlong le bogoboga. A bao ba bego ba duma gore ke se bonwe molato, ba gobele ka lethabo ba sa kgaotše go re: “Morena ke yo mogolo, yena yo a kgahlwago ke katlego ya mohlanka wa gagwe!” Ke mo ke tlago bega go loka ga gago, ka go reta letšatši ka moka. Sebe se bolela le yo kgopo ka pelong ya gagwe, yena ga a boife Modimo. Gobane motho, ka go ikgogomoša kudu, o hloma nke dibe tša gagwe di ka se tsebje goba tša hloiwa. Polelo tša gagwe ke tše mpe tša boradia; ga a sa dira tša tlhaologanyo le tše dibotse. O loga maanomabe le ge a robetše; boitshwaro bja gagwe ke bjo bobe; ga a gane tše kgopo. Morena, leratorato la gago le fihla magodimong; potego ya gago e fihla marung. Go loka ga gago go phagame boka thaba tše kgolo; dikahlolo tša gago di tebile bjalo ka phamphamadiba. Wena, Morena, o babalela batho le diphoofolo. Modimo, leratorato la gago ga se ka bohlokwa! Batho ba nama ba tšhabela ka fase ga diphego tša gago. Ba khora dijo tše ntši tša ka lapeng la gago; o ba noša moeleng wa gago wa meetse a mabose. O mothopo wa bophelo; rena re bonegelwa ke seetša sa gago. Dula o rata ba ba go khunamelago; ba ba lokilego o fele o ba dira ka botho. Se lese baikgogomoši ba ntlhasela, goba bakgopo ba ntelekiša. Bona moo badiratšempe ba welego! Šebao ba rapaletše, go tsoga nkhokho! Tša batho ba babe di se go tshwenye; se tsebafele ba ba dirago tše kgopo, gobane ba tla omelela ka pela bjalo ka bjang; ba tla pona bjalo ka dimela tše ditala. Wena, bota Morena, o dire tše di lokilego; o itulele mo nageng ya geno o iketle. O ithabiše ka Morena, mme yena o tla go fa tše o di kgopelago. Dula o ipeile ka diatleng tša Morena; o mmotile mme yena o tla go phethela. O tla dira gore go hloka molato ga gago go tage bjalo ka seetša sa mosegare, le go loka ga gago go tage bjalo ka letšatši mosegare wa sekgalela. Ge o le pele ga Morena o se mo felele pelo wa mo kgareetša; tša yo a atlegago di se go tshwenye, ešita le tša yo a tšwelelago ka maanomabe a gagwe. Tlogela go befelwa, o ile go galefa; o se tlale pelo, gobane go ka go šaetšiša. Yo mobe o tla fedišwa; wa go bota Morena yena e tla ba mong wa naga. Kgauswinyana yo kgopo a ka se sa ba gona; o ka mo nyaka eupša o ka se mo hwetše. Moikokobetši yena e tla ba mong wa naga, a ipshina ka boiketlo bjo bogolo. Yo kgopo o logela moloki maanomabe, mme o mo lomantšhetša meno. Mong wa bohle o sega yo kgopo, gobane o tseba ge yo mobjalo a tla di bona. Yo kgopo o hwanyola tšhoša, a nganga bora go bolaya mohlaki le mohloki, le go kgebetla wa tsela tša go loka. Fela go tla hlabja yena ka tšhoša ya gagwe, gwa robaganywa le bora bja gagwe. Leruonyana la moloki le phala lehumo la yo kgopo, gobane yo kgopo o tla fetšwa maatla, kganthe moloki yena o thekgwa ke Morena. Morena o babalela ba ba se nago bosodi, mme e tla ba bona bengnaga go ya go ile. Ba ka se lewe ke dihlong mabakeng a mathata; ba tla ja ba khora nakong ya tlala. Yo kgopo yena o tla bolawa, le manaba a Morena a tla fela bjalo ka bjang bja phulo, bjalo ka muši. Yo kgopo o adima a sa buše; moloki yena ke wa go fa kudu. Bašegofatšwa ba Morena e tla ba bona bengnaga; barogakwa bona ba tla fedišwa. Morena o etetša motho yo a mo kgahlago ka maitshwaro, gomme o a mo thekga. Le ge a ka wa, a ka se wele ruri, gobane Morena o mo swere ka seatla. Le ge nkile ka ba yo mofsa mme bjale ke tšofetše, ga se nke ka bona moloki a lahlilwe, goba ditlogolo tša gagwe di kgopela diyamaleng. Ka mehla o adima batho ka pelo ye tšhweu, le ditlogolo tša gagwe ke mahlogonolo go yena. Tlogela tše mpe o dire tša go loka, mme o tla ba le bodulo go ya go ile, gobane Morena o rata toka, mme ba ba mmotegelago ga a ba lahle; o ba šireletša ka mehla. Ditlogolo tša bakgopo tšona di tla fedišwa. Baloki e tla ba bona bengnaga, mme ba dula go yona go ya go ile. Dipolelo tša moloki ke tša bohlale, mme o bolela tše di lokilego. O lota melao ya Modimo wa gagwe ka pelong, ka gona o tseba ka mo a swanetšego go phela. Yo kgopo o lalela moloki a leka go mmolaya, eupša Morena ga a mo tlogele a wela diatleng tša gagwe, goba a mo lesa a tšwiwa tshekong. Bota Morena, o phethe ditaelo tša gagwe, mme o tla go godiša ka go go fa naga; o tla bogela bakgopo ge ba fedišwa. Nkile ka bona yo kgopo wa kgowa; o be a iphagamišitše nke ke mosedere wa Lebanone. Ka tla ka re ke feta fao, ka hwetša a se sa le gona; ka mo nyaka ka se mmone. Šetša mohlokabosodi, ela morapedi hloko; motho wa khutšo o ba le ditlogolwana; ba go tshela molao wa Modimo bona ba fedišetšwa sa ruri, le ditlogolwana tša bakgopo di a bolawa. Morena ke mohlakodiši wa baloki; ke yena setšhabelo sa bona ge ba le tlalelong. O a ba thuša a ba lamolela; o ba lamolela go bakgopo; o ba hlakodiša ka ge ba tšhabela go yena. Morena, hle, o se nkgale o befetšwe; o se nkotle o nkgalefetše. Mesebe ya gago e nkgontlhetše, o nkotlile gabohloko. Ka ge o nkgalefetše ke tšwile dišo gohle mmeleng, ke opša le ke marapo ka baka la dibe tša ka. Ke kgangwa ke makgopo a ka; ke morwalo wo o mpalelago. Dišo tša ka di a nkga, di dutla boladu ka baka la botlaela bja ka. Ke kudupane, ke kokoropane, ke hlwa ke lla letšatši ka moka. Ke tletše dišo gohle mmeleng; mmele wa ka o a fiša ka letadi. Ke feletšwe ke maatla, ke nolegile moko, ke tsetlišwa ke manyami. Mong wa ka, o tseba tlhologelo tša ka, o kwa metsetlo ya ka. Pelo ya ka e thebatheba kudu, ke feletšwe ke maatla, le mahlo a ka a fifetše. Bagwera le bakgotse ba ka ba nkatologile ka baka la bolwetši bja ka; le ba gešo ga ba mpatamele. Ba ba ratago go mpolaya ba a nthea; ba ba ratago go ntira gampe ba a ntakana, ba hlwa ba duletše go nthera. Nna ke bjalo ka setholo, ga ke kwe selo; ke swana le semumu, sona se sa kgonego go bolela. Ke bjalo ka motho yo a sa iphetolelego, ka ge a sa kgone go kwa. Le ge go le bjalo, ke botile wena, Morena; mme wena, Mong wa ka, wena Modimo wa ka, o tla nkaraba. Ke a go kgopela, se ba lese ba ntshega, bona ba ba ikgantšhetšago nna ge ke thedimoga. Ke kgauswi le go wa, mme bohloko ga bo nkatologe. Ke ipolela bokgopo bja ka, ke tshwenyegile ka baka la dibe tša ka. Ba e lego manaba a ka ntle le lebaka ba tiile; ke ba bantši ba ba ntlhoilego ba se na lebaka. Bao ba lefeletšago botse ka bobe ba a ntsota ka ge ke dira tše di lokilego. Se ntlogele, Morena, se nkeme kgole, Modimo wa ka! Itlhaganele o nthuše, Mong wa ka, Mophološi wa ka! Ka pelong ke rile: “Ke tla itlhokomela maitshwarong, ka se bolele se sebe; nka se bolele selo ke na le yo kgopo.” Ke ile ka homola ka re tuu, ka se bolele selo, eupša ya ba lefeela. Tlaišego ya ka yona ya nkgolela. Ka tlalelana ge ke ntše ke tsetla ka mefegelo, ka ba ka šitwa go itshwara, mme ka botšiša ka re: “Morena, ntsebiše pheletšo ya ka, le gore nako ye e ntšhaletšego ke ye kaakang. Ntemoše bokopana bja matšatši a ka.” O mpeetše bophelo bjo bokopana; bophelo bja ka o bona e se selo. Motho wa nama ke lefeelafeela. Sela Bophelo bja motho bo bjalo ka moriti wo o fetago; tše a itapišago ka tšona ke lefeela. O ikgobelela mahumo, a sa tsebe moji. Bjale nna ke sa lebeletšeng, Mong wa ka? Yo ke mo holofetšego ke wena. Mphološe dikarogong tša ka ka moka. O se lese ditlatla di nkwera. Ke tla homola, nka se bolele selo, gobane ke wena o ntirilego gore ke tlaišege ka mokgwa wo. Se hlwe o ntlaiša. Ke šetše ke hlagaditšwe ke mekeketo ya gago. O kgalema motho ka go mo otlela bokgopo bja gagwe; o fediša se a se ratago ya ba nke se lewa ke tšhwele. Motho ke lefeelafeela. Sela Ekwa thapelo ya ka, Morena; ntheeletše ge ke go llela. O se hlokomologe sello sa ka, gobane ke mofaladi nageng ya gago, ke mofeti bjalo ka borakgolokhukhu ka moka. Tlogela go mpea leihlo gore ke iketle pele ke itshepelela, ka se sa ba gona. Ke be ke letile Morena ka tlhologelo, mme a ntlhwaela tsebe, a nkwa ge ke mo llela. A nntšha moleteng wa tahlego, moo tebetebeng ya leraga, a mpea sebong, a ntshepediša mo go omilego. A mpha kopelo ye mpsha, sereto sa Modimo wa rena. Ba bantši ba tla re go kwa kopelo ya ka ba gakgamala, ba tshepha Morena. Go lehlogonolo motho yo a tshephilego Morena, yo a sa fadišego baikgogomoši, goba ba ba itharetšago ka bofora. Morena Modimo wa ka, mehlolo ye o e dirilego ga e kaaka. Merero ya gago ke ya go re hola. Moswananago ga a gona. Ge nka re ke a e anega goba ke bolela ka yona, e ka mpatla ka bontši bja yona. Wena ga o kgahlwe ke dihlabelo le dikabelo tša bupi; ga o nyake dihlabelo tša go tšhungwa ka moka, goba dihlabelo tša go tloša dibe. Bakeng sa tšeo o mphile ditsebe tša go kwa. Ke ka baka leo nna ke rilego: “Bona, ke ikemišeditše go phetha tše ke di laetšwego ka pukung ya melao ya gago. Ke thabela go dira tše di kgahlago wena, Modimo wa ka. Melao ya gago e ka pelong ya ka.” Ge phuthego e kgobokane ka bontši, ke e anegela taba ye botse ya gore o mphološitše. O a tseba, Morena, gore nka se lese go e anegela. Ga se ka uta gore ke phološitšwe ke wena. Ka mehla ke anega tša potego ya gago le phološo. Ge phuthego ya gago e kgobokane ka bontši, ke be ke sa lese go e begela tša leratorato la gago le tša potego ya gago. Morena, etse o ka se lese go ntšhokela; o tla fela o ntotile ka lerato le potego ya gago. Ke dikaneditšwe ke mathata a mantši – ke a mantši mo ke šitwago go a bala! Makgopo a ka a ntshwere, mme ga ke sa kgona go bona tsela. A feta le meriri ya ka ka bontši, mme ke nolegile moko. Hle, Morena, ntlhatlole! Itlhaganele o nthuše! A ba inyatše ba itshesengwe bohle ba ba lekago go mpolaya. A ba katakate ba gobogile ba ba ntlholelago mathata. A ba gakantšhwe ke go fenywa ba ba rego go nna: “Agaa! Swine!” Bohle ba ba go nyakago a ba thabe ba gobele ka ge e le ba gago. Bohle ba ba hloloselago go phološwa ke wena a ka mehla ba re: “Morena ke yo mogolo!” Nnaena ke mohlaki ebile ke mohloki, eupša wena, Mong wa ka, ga o ntebale. Ke wena Mothuši wa ka le Mophološi wa ka; se diege, hle, Modimo wa ka! Go lehlogonolo motho yo a hlokomelago bahlaki; Morena o tla mo hlakodiša mohla a wetšego mathateng. Morena o tla mo šireletša a mo phediša; o tla mo letla mo nageng ye; a ka se mo lahletše manabeng. Ge a babja, Morena o tla mo thekga, a mo fodišetša sa ruri. Nna ke ile ka re: “Morena, ntšhokele o mphodiše, le ge ke go fošeditše.” Manaba a ka a mpolela a mphelela pelo, a re: “E bago o tla hwa neng, a lebalwa?” Motho wa bona ge a etla go ntlhola o a ikgakantšha; o tlela fela go bona seemo sa ka se sebe, se e rego ge a etšwa a se phatlalatše ka ntle. Bohle ba ba ntlhoilego ba a ntsheba. Ka dipelo ba ntlhobogile, ba re: “O babja la go hwa; ge a rapaletše bjalo a ka se sa tsoga.” Ke hlanametšwe le ke yo ke bego ke re ke mogweragwera, yo ke bego ke ntšhana naye sa inong, yo a bego a eja le nna mogopong o tee. Ntšhokele, Morena, o mphodiše, mme nna ke tla itefeletša go bona. Ge lenaba la ka le ka se mphenye, ke mo ke tlago tseba gore ke a go kgahla. O nthekga ka ge ke se na bosodi; o dula o mpeile kgauswi le wena. A go tumišwe Morena Modimo wa Israele, go tloga neng le neng, le go iša go sa felego. Amene! Amene! Bjalo ka kgama ge e llela meetse a meela, le nna ke llela go wena, Modimo. Ke nyoretšwe Modimo, Modimo yo a phelago; ke tla ya neng go itlhagiša pele ga gagwe? Bošego le mosegare ke a lla, mme megokgo ke tšona dijo tša ka; nako yohle manaba a ka a mpotšiša a re: “O kae Modimo wa gago?” Ke setlega pelo ge ke gopola tša mola ke sa fela ke eya ntlong ya Modimo le lešaba, ke le eta pele; re le lešaba la lethabo, re opela re reta Modimo. Wena pelo ya ka, o reng o hlokofetše gakaaka? O reng o ferekane? Tshepha Modimo, gobane ke tla buša ka mo tumiša, yena Mophološi le Modimo wa ka. Pelo ya ka e hlokofetše, ka gona ke a go gopola, Morena, ke le mošono wa Jordane, thabeng ya Hermone le ya Mitsare, moo methopo e bitšanago gona ka medumo ya diphororo tša gago. O ntlišeditše mahloko bjalo ka maphoto a meetse ge a pipa motho. Mosegare Morena o tla nthata ka lerato la gagwe, kilaphetogo, bošego ka mo opelela ke mo leboga; ke tla rapela yena Modimo yo a mphedišago. Go Modimo, montwedi, ke re: “O reng o ntebetše? Ke ka baka lang ke sa tlaišwa, ke gateletšwe ke manaba?” Mahlapa a bona a nkweša bohloko ge ba ntomela ba fela ba re: “O kae Modimo wa gago?” Wena pelo ya ka, o reng o hlokofetše gakaaka? O reng o ferekane? Tshepha Modimo, ka gobane ke tla buša ka mo tumiša, yena Mophološi le Modimo wa ka. Modimo, kahlolong mpege go se be le molato, mme o nkemelele go ba ba sa go khunamelego; ntlhakodiše go baaketši bao ba kgopo! Gape setšhabelo sa ka ke wena; bjale o reng o ntahlile? Ke ka baka lang ke sa tlaišwa, ke gateletšwe ke manaba? Nthomele seetša sa gago le therešo ya gago, di ntlhahle di mpušetše thabeng ya gago ye kgethwa, bodulong bja gago. E be gona ke batamelago aletare ya gago, Modimo, ke tle go wena o nthabišago kudu. Ke letše sekgapa sa ka ke go opelele ditumišo, wena Modimo, Modimo wa ka! Wena pelo ya ka, o reng o hlokofetše gakaaka? O reng o ferekane? Tshepha Modimo, gobane ke tla buša ka mo tumiša, yena Mophološi wa ka, Modimo wa ka. Re ikwetše ka tša rena ditsebe, Modimo; borakgolokhukhu ba re boditše ba re o dirile ditiro tše dikgolo mehleng ya bona, mehleng yela ya kgale: O rakile baditšhaba ka maatla a gago, naga wa e fa borakgolokhukhu; wa dira baditšhaba bošula, borakgolokhukhu bona wa ba atla. Naga ye ga se ba e thopa ka tšhoša, goba ba fenya ka a bona maatla, eupša e bile ka maatla a gago a magolo, le go ba lokela ga gago, ka gobane ba be ba go kgahla. O kgoši ya ka, wena Modimo; o kgontšha ditlogolo tša Jakobo go fenya. Ka maatla a gago re katelela manaba a rena; re ba gatakela re laelwa ke wena. Nna ga ke bote mosebe, le tšhoša e ka se ntlhakodiše. Yo a re phološitšego manabeng a rena ke wena, ke wena o dirilego gore ba inyatše. Re hlwela go go tumiša letšatši ka moka; re go reta go ya go ile. Sela Eupša bjale o re ngadile, o re kokobeditše, ga o sa tšwa dira le rena. O re katakatišitše re lebane le manaba a rena, mme ba re thopela dithoto. O re lesitše re hlabja bjalo ka dinku, wa re gašanya le ditšhaba di šele. Setšhaba sa gago o se rekišitše ka theko ya go se re selo, mme wa se boelwe ke selo thekišong yeo. O re segiša ba ba bapilego le rena; re fetogile dikwero le dikgegeo go baagišani. O re pharile seka ditšhabeng; ba ditšhaba ba re šišinyetša dihlogo ka lenyatšo. Letšatši ka moka ke hlwa ke inyatša, dihlong di nkhurumeditše sefahlego, ka ge ke ekwa bakodutli le barogi ba ka, ka baka la tše ke di dirilwego ke manaba le baitefeletši ba ka. Tše ka moka di re hlagetše le ge re se ra go lebala, goba ra lahla kgwerano ye o e dirilego le rena. Ga se ra go nyatša, goba ra aroga tseleng ya gago. Eupša o re ripitletše ka meleteng ya diphukubje, wa ba wa re ribega ka leswiswi le leso. Ge re ka be re ile ra lesa go khunamela Modimo wa rena ra rapela modimo o šele, ga ke re wena, Modimo, o ka be o ile wa lemoga, ka ge o tseba diphiri tša pelo? Fela ke ka baka la gago ge re bolawa ka mehla, re swerwe bjalo ka dinku di eya go hlabja. Phafoga, Mong wa rena! O reng o robetše? Tsoga! Se re ngalele sa ruri! O reng o re furaletše, o lebala ka mo re tlaišwago le ka mo re gateletšwego ka gona? Re sobeletše lerupurupung, re rapaletše fase. Nanoga, o re thuše! Re phološe, ka ge o re rata ka lerato, kilaphetogo. Pelo ya ka e runyarunya mantšu a mabotse ge ke opelela kgoši koša; leleme la ka nke ke pene ya mongwadimakgone. Wena ka botse o phala batho ka moka, mantšu a botho a falala molomong wa gago, ka gona Modimo o go šegofaleditše saruri. Itlhame ka tšhoša ya gago, wena kgoši ye maatla, o apare tša letago le bogoši bja gago. Tšwela pele ka koloi ya gago ya ntwa, o yo fenya ka maatla a bogoši o lwele therešo le toka! Ka maatla a gago o tla fenya o fentše! Metsi ya gago e bogale e phuleletša pelo tša manaba, ditšhabatšhaba tša wela pele ga gago. Bogoši bjo Modimo a go filego bjona e tla ba bja go ya go ile. O buša setšhaba sa gago ka toka; o rata toka, o hloile bobe. Ke ka baka leo Modimo, yena Modimo wa gago, a go kgethilego mme a go tšhollela lethabo go feta a mangwe magoši. Diaparo tša gago ka moka di tšhetšwe senkgabose sa mira le sa sekgopha le sa kasia. Baletši ba go tloša bodutu ka diletšo tša bona dintlong tša gago tša bogoši tše di kgabišitšwego ka nakatlou. Kgorong ya mošate go na le barwedi ba magoši. Mmakgoši o ipatile le wena ka letsogong la go ja, o tšhephile ka diala tša gauta ye bohlokwahlokwa. Ngwetši, ntheeletše o hlwaye tsebe: Ba geno le meloko yeno o ba lebale. Ke mo botse bja gago bo tlago kgahla kgoši; ke yena mong wa gago, o mo hlomphe. Batho ba Tirose ba tla go tlišetša dimpho; bahumi ba tla leka go ithatiša wena. Morwedi wa kgoši o gona ka mošate – ga se botse ke tlaang le bone! Kobo ya gagwe e logilwe ka tlhale ya gauta. O gorošwa go kgoši a apere kobo ya mebalabala, a latelwa ke bafelesetši, bagwera ba gagwe; le bona ba tlišwa go kgoši. Ba a gorošwa ba tsenywa ka mošate ka lethabo le mekgolokwane. Wena kgoši, barwa ba gago ba tla buša legatong la borakgolokhukhu ba gago, o tla ba bea babuši ba lefase ka moka. Ka koša ye ya ka o tla tumišwa ke meloko le meloko; ka gona o tla retwa ke ditšhaba go ya go ile. Modimo ke setšhabelo sa rena le maatla a rena; ke komana madulaabapile mabakeng a mathata. Ka gona, le ge lefase le ka šikinyega, le dithaba tša kgeregela ka garegare ga lewatle; le ge mawatle a ka rora a galefile, le dithaba tša thothomedišwa ke kgalefo yeo, re ka se tšhoge. Sela Go na le noka ye nngwe yeo dinokana tša yona di thabišago motse wa Modimo, le ngwako wo mokgethwa wa Yogodimodimo. Modimo o mo motseng woo, gomme wona o ka se thubje. Yena o tla tlo o phalalela ge letšatši le hlaba. Modimo o kwatša lentšu la gagwe – ditšhaba di a gakanega, mebušo e nyaka go wa, lefase le a fedišwa. Sela Morena Ramaatlaohle o na le rena; Modimo wa Jakobo ke setšhabelo sa rena! Etlang le bone ditiro tša Morena, dimakatšo tše a di dirago lefaseng! O fediša dintwa lefaseng ka moka; o roba mara, a robaganya le marumo, dikoloi tša ntwa a di tšhuma ka mollo. O re: “Lesang go lwa, mme le tsebe gore ke nna Modimo. Ke nna Kokamaditšhaba, ke nna Kokamalefase.” Morena Ramaatlaohle o na le rena; Modimo wa Jakobo ke setšhabelo sa rena! Opang magoswi, lena ditšhaba tšohle! Retang Modimo ka megobo! Morena, yena Yogodimodimo, yo a gakgamatšago, ke Kgoši ye kgolo ye e bušago lefase ka moka. O re fenyetša baditšhaba; merafe o re gafela yona. O re kgethetše naga ya rena, lefa leo ditlogolo tša Jakobo, bona baratwa ba gagwe, di ikgantšhago ka lona. Modimo o rotoga ka megobo, Morena o hlatloga ka segalo sa phalafala! Opelelang Modimo tumišo; mo opeleleng! Opelelang Kgoši ya rena tumišo; mo opeleleng! Gobane Modimo ke kgoši ya lefase lohle; mo reteng ka ditumišo! Modimo o buša ditšhaba; o dutše setulong sa gagwe se sekgethwa. Babuši ba ditšhaba ba kgobokana le setšhaba sa Modimo wa Abrahama. Magoši a lefase ke a gagwe; o phagame e le ruri. Morena ke yo mogolo, a a retwe gagolo motseng wa Modimo wa rena. Thaba ya gagwe ye kgethwa e botse e phagame, mme e kgahla batho bohle ba lefase. Thaba ya Sione ka leboaboa ke bodulo bja Kgoši ye kgolo. Ka gare ga dibo tša motse Modimo o iponagaditše gore ke yena setšhabelo. Magoši a rapane mme a hlasela mmogo. Ba re go bona motse, ba tlabega, ba boifa, ba tšhaba. Ba swarwa ke poifo le tlalelo semeetseng go etša mosadi ge a šokwa; go etša ge o pšhatlaganya maselawatle a magolo ka phefo ya bohlabela. Tše re bego re di kwa bjale re di bone ka borena motseng wa Morena Ramaatlaohle, wa yena Modimo wa rena. O tla lota motse wo go ya go ile. Sela Modimo, re gopola leratorato la gago re le ka Tempeleng ya gago. Setumo sa gago se aparetše lefase lohle, mme o retwa gohle lefaseng. O buša ka toka. Batho ba Sione ba thabile; metse ya Juda le yona e gobela dikahlolo tša gago. Dikologang Sione, le bale ditora tša yona. Le bone merako ya yona, le boge dibo tša yona, gore le tle le anegele ba meloko ya ka moso gore tšeo ke tša go dirwa ke Modimo, yena Modimo wa rena go ya go ile; o tla re eta pele. Pesalome ye ke ya go opelwa ka modumo wa kopelo “Lehu”. Theeletšang, lena ditšhaba ka moka! Ekwang, lena badudi bohle ba lefase, lena boramaemo le lena banyatšegi, lena bahumi le lena badiidi mmogo! Ke tla bolela tša bohlale; ke tla nagana tša tlhaologanyo. Ke tla ela maele hloko; ke tla nyepolla nyepo ya ka ke letša sekgapa. Ke tla be ke boifelang ge ke le tlalelong, ge ke dikaneditšwe ke bomokadikadi wa morara, ke ra tšona dikhorane tša go ipota, tša go kgantšha mahumohumo a tšona? Motho a ka se kgone go ithekolla, a lefa Modimo se a ka itokollago ka sona, gobane tefo ya bophelo bja motho ke ye ntši kudu, gomme e ka se lekane go mo kgontšha go phelela ruri gore a se tsoge a hwile. Ke taba ye e tsebjago gabotse gore bahlale ba hwa go no swana le mašilo le ditlatla, mahumo a bona ba a tlogelele bangwe. Mabitla ke legae la bona go ya go ile; ke bodulo bja bona go iša le go iša, etšwe dinaga di be di theeletšwe bona. Motho, le ge a ka ba le mahumo, ga a phelele ruri, o hwa go no swana le diphoofolo. Se se lebanego ba ba ipotilego le ba ba kwanago le polelo tša bona Sela ke go hwa bjalo ka dinku; lehu e tla ba modiša wa bona, baloki e tla ba bona babuši ba bona; ba tla bola ka pela bodulabahu kgole le magae a bona a mabotse. Nna Modimo o tla ntlhakodiša maatleng a bodulabahu, o tla mphamola gona. O se inyatše ge o bona motho a huma, ge lehumo la gagwe le ata, gobane mohla a ehwa a ka se tloge le selo; a ka se ye le mahumo a gagwe ka lebitleng. Le ge motho a ipona a na le mahlatse ge a sa phela, mme a retwa ka gobane a atlega, o tla no ya mo borakgolokhukhu ba gagwe ba ilego gona, bona ba ba ka se sa tsogago ba bone seetša. Mohumi yo a hlokago kwešišo o hwa bjalo ka diphoofolo. Modimo Ramaatla, yena Morena, o a bolela; o bitša lefase lohle, go tloga bohlabatšatsi go ya bodikelatšatši. Modimo o taga a le Sione, motseng wo mobotsebotse. Modimo wa rena o etla, gomme a ka se homole; o etilwe pele ke mollo wo o laumago; o dikaneditšwe ke ledimo le le tšubutlago. O bitša legodimo kua godimo, o bitša le lefase go tlo hlatsela tshekong ya setšhaba sa gagwe. O re: “Nkgobokeletšeng babotegi ba ka, ba ba tiišeleditšego kgwerano le nna ka sehlabelo.” Magodimo a bega go loka ga gagwe, gobane Modimo ka noši ke moahlodi. Sela “Theeletša, wena setšhaba sa ka, ke a bolela; ke tla go latofatša, wena Israele. Ke nna Modimo, Modimo wa gago. Ga ke go kgalele dihlabelo tša gago, goba dihlabelo tša ditšhungwakamoka tše o felago o ntlišetša tšona. Powana ya šaka la gago ga ke e nyake, le ge e le phooko ya mehlape ya gago, gobane phoofolo tšohle tša sethokgwa ke tša ka, le dibata tše diketekete dithabeng. Ke tseba dinonyana tšohle tša thaba, le diphedi tšohle tša lešoka ke tša ka. “Ge nkabe ke swerwe ke tlala ke be nka se botše wena, gobane lefase ke la ka le tšohle tša lona. Kgane nna ke ja nama ya dipoo, goba ke nwa madi a diphooko? Ditebogo a e be sona sehlabelo sa gago se o se neelago Modimo, gomme o phethe dikeno tše o di anetšego Yogodimodimo. Ke mo ke tlago go hlakodiša ge o mpitša mohla wa mathata, gomme wena o tla ntlhompha.” Fela go yo kgopo Modimo o re: “O reng o bolela melao ya ka, o bile o ikamanya le kgwerano ya ka, etšwe o gana go solwa ke nna, o bile o nyatša ditaelo tša ka? Ge o kopana le lehodu o gwerana nalo, le diotswa o kgotsana le tšona. “O bolela tše mpe o sa itshware; o dula o radia batho ka dipolelo tša gago. O dulela go bolela ngwaneno gampe le go seba ngwana wa mmago. Na o re ke homole ge o dira tša mohuta wo? Kgane o bona nke ke swana le wena? Nna ke go sola ke go botša mahlong. “Gopodišiša taba ye, wena wa go itebatša nna; go sego bjalo ke tla go rathaganya mme wa hloka mohlakodiši. Yo a ntlhomphago ke yo a nneelago sehlabelo sa tebogo, gomme yo ke tlago mo phološa ke yo a itlhokomelago mesepelong.” Ntšhokelwe hle, Modimo, ka ge o nthata ka leratorato. Phumola dibe tša ka ka kgaugelo ya gago ye kgolo. Ntlhatswe bokgopo bja ka, o ntire yo a hlatswitšwego sebe. Diphošo tša ka ke a di tseba, le sebe sa ka ke dula ke se gopola. Ke phošeditše wena, wena fela, mme ke dirile se o bonago e le se sebe. Ka gona go a swanela ge o nkahlola. Go lebane ge o mpona molato. Ke tswetšwe ke le yo kgopo, ke imilwe ke le modiradibe. Ka ge therešo e le se se go kgahlago pelong ya motho, nthute ka pelong ka mo ke swanetšego go phela. Ntlhwekiše sebe ka hisopo, ke mo ke tlago hlweka. Ntlhapiše ke tage go feta leswela. Nke o nkweše mekgolokwane ke boele ke thabe, mme le ge o nthobagantše marapo ke tla buša ka thaba. Budulala o se hlwe o bona dibe tša ka, mme o phumole bokgopo bja ka bjohle. Modimo, hle, mpopele pelo ye e hlwekilego, mme o ntsenye moya wo mofsa wa potego. Se nthake pele ga gago; se nkamoge moya wa gago wa bomodimo. Buša o mphe lethabo la motho yo o mo phološitšego, mme o dire gore ke rate go go theeletša, ke gona ke tlago ruta batshelamolao ditaelo tša gago, mme badiradibe bao ba sokologela go wena. Ntokolle molatong wa polao, Modimo, wena Modimo, Mophološi wa ka, gore ke opelele go loka ga gago. Mong wa ka, nthuše gore ke bolele ke lokologile, ke mo ke tlago go tumiša. Wena ga o nyake dihlabelo; ge o be o di nyaka, nkabe ke go direla tšona; ga o kgahlwe le ke dihlabelo tša go tšhungwa ka moka. Modimo, sa ka sehlabelo ke boitsholo bja nnete; motho yo a ikokobetšago mme a itsholelago dibe tša gagwe ga o mo lahle. Eba yo botho go Sione ka lešoko la gago; tsošološa merako ya Jerusalema. Ke gona o tla kgahlwago ke dihlabelo tše di laetšwego tša go tšhungwa ka moka, le dipoo tša hlabja aletareng ya gago. O reng o ikgantšha ka bobe, seoka? Tseba, lerato la Modimo ke la ka mehla. O loga maano a go lahletša bangwe; leleme la gago le bogale boka legare, mokadikadi wa morara towe! O rata bobe go feta bolo, le go bolela maaka go feta therešo. Sela O rata polelo tša go ferekanya batho, mpheane towe! Ka gona, Modimo o tla go fedišetša ruri; o tla go komola a go goga ka ga gago, a go tloša go baphedi mo lefaseng. Sela Baloki ge ba di bona ba tla gakgamala, wena ba tla go sega ba re: “Owaa! Šoowe motho wa go se tšhabele go Modimo, motho wa go ikanya mahumo a gagwe, wa go dira dithoto tša gagwe botšhabelo.” Nnaena, ka ntlong ya Modimo, ke bjalo ka mohlware wo motalana; ke botile lerato la gagwe, kilaphetogo; ke le botile go ya go ile. Morena, ke tla dula ke go tumiša ka baka la tše o di dirilego; ke tla anega botho bja gago ke na le babotegi ba gago. Mašilo ka pelong a re: “Modimo ga a gona.” Ba dira tše kgopo le tše di šiišago – ga go le o tee wa go dira tše di lokilego. Modimo yena o lebeletše batho a le legodimong go bona ge eba go na le wa kwešišo, yo a mo khunamelago. Eupša bohle ba kgelogile, ka moka ba senyegile. Ga go le o tee wa go dira tše di lokilego, ee, le o tee ga a gona. Modimo o a botšiša o re: “Na badirakgopo ga ba na temogo? Ba phela ka go radia tšhaba sa ka, le gona ga ba nthapele, nna, Modimo.” Eupša ba tla thothomela ka letšhogo, etšwe go se na sa go tšhoša. Modimo o tla gašanya marapo a bao ba dikaneditšego setšhaba sa gagwe. Setšhaba sa gagwe sona se tla ba hlabiša dihlong ka ge Modimo a ba lahlile. A Sione go tšwe phološo ya Israele! Mohla Modimo a bušetšago setšhaba sa gagwe sekeng sa sona, ditlogolo tšeo tša Jakobo di tla thakgala, setšhaba sa Israele se tla hlalala. Mphološe ka bogolo bja gago, hle, Modimo; ka maatla a gago a ke ahlolwe ka maleba. Ekwa thapelo ya ka, hle, Modimo; tše ke di bolelago o di hlwaele tsebe, gobane baipoti ba ntsogetše maatla; dikgowa di nyaka go mpolaya, batho ba go se nagane ka Modimo. Fela nna ke thušwa ke yena Modimo; Mong wa ka ke yena momphediši. A Modimo a ntefeletše manabeng a ka ka bobe bjo ba ntirilego bjona. A a ba fediše ka ge a botega. Ke tla ithaopa ka go neela sehlabelo, Morena; ke tla go leboga ka ge o le yo botho. O ntlhakodišitše mathateng ohle, ka bogela manaba a ka a fentšwe. Modimo, ekwa thapelo ya ka, o se ntlhokomologe ge ke go llela. Ntheeletše, mme o nkarabe; ke tsieditšwe ke mathata. Ke gakantšhitšwe ke legoa la manaba a ka le kgatelelo ya bakgopo; ba nkgobelela dithogako, ba nkgalefetše, ba ntlhoile. Pelo ya ka e thebatheba kudu; ke swerwe ke poifo ya lehu. Ke tsenwe ke letšhogo, ke a thothomela, ke swere pelo ka seatla, gomme ke re: “Nke nkabe ke na le diphego boka leeba, ka fofa ka ya go ikhutša. Nkabe ke fofela kgole, ka yo itulela lešokeng. Sela Ke be ke tla ikhweletša boširelo ka bjako, ka širela phefo ye e tšubutlago le ledimo.” Morena, raraganya manaba a ka polelong a gakanege, gobane nna ke bona dikgaruru le diphapano motseng. Bošego le mosegare ba dikologa motse godimo ga morako wa wona; motse o tsenwe ke bokgopo le mathata. Batho ba lobišwa thoto tša bona; lepatlelong la motse go rena kgatelelo le boradia. Ge nkabe ke gobošwa ke lenaba, ke be nka kgotlelela; ge nkabe ke kgantšhetšwa ke montwantšhi, ke be nka mo khutela. Eupša taba ye ke e dirwa ke wena, thaka, wena, mogwera, wena, mokgotse, wena o bego o ntšhana le nna sa inong; wena o bego o sepetšana le nna re le molokolokong kua ntlong ya Modimo. A manaba a ka a khukhunetšwe ke lehu; a ba theogele bodulabahu ba sa phela, gobane ka magaeng a bona le ka dipelong go tletše bobe. Nnaena ke ipiletša Modimo, gomme yena Morena o tla mphološa. Mosong le mosegare le mantšiboa ke dulela go balabala ke fegelwa, gomme yena o kwa lentšu la ka. Dintweng tše ke di lwago le manaba a mantši o tla mpuša ke phologile. Modimo yo e sa lego a buša bogologolo Sela o tla nkwa a ba kokobetša, ka ge ba sa sokologe, le gona ba sa mmoife. Mogwera yola wa ka o hlasetše bakgotse ba gagwe; o tshetše dikeno tša gagwe. Leleme la gagwe le boreledi go feta sereledi, mola ka pelong e le ntwadumela; mantšu a gagwe a boleta go feta makhura, etšwe e le ditšhoša tša go hlaba. Maima a gago o a rolele Morena, gomme yena o tla go babalela. Gape a ka se lese mooki a thetšwa. Modimo, babolai le dihwirihwiri o tla ba lahlela bodulabahu; ba hwa e sa le ba bafsa. Nnaena ke botile wena. Ntšhokele, hle, Modimo, gobane ke a gatakelwa; bantwantšhi ba duletše go ntlaiša. Manaba a ka a hlwela go nkgatakela; wena Yogodimodimo, ba ba ntwantšhago ga ba kaaka. Ge ke ikwa ke boifa, ke bota wena. Ke botile Modimo yo ke mo tumišago ka baka la tše a nkholofeditšego tšona, gomme ga ke boife selo – motho wa nama yena a ka ntirang? Manaba a ka a hlwela go ntlhaba ka mantšu; sa bona ke go hlwa ba ntakana. Ba ntulela ka dihlophana ba ntalela; ba beile mesepelo ya ka leihlo, ba faletše go ntloša tšatšing. Na ba ka phonyokga ka mesebelele ya bona? Hle, Modimo, thenola baditšhaba bao. O tseba ka mo ke tshwenyegilego ka gona. Tšhela meokgo ya ka ka lekukeng la gago. A ke re e ngwadilwe pukung ya gago? Mohla ke go bitša, manaba a ka a tla katakata. Se ke se tsebago ke gore Modimo o ema le nna. Ke botile Modimo yo ke mo tumišago ka baka la tše a nkholofeditšego tšona; ke botile Morena yo ke mo tumišago ka baka la tše a nkholofeditšego tšona, gomme ga ke boife selo – motho wa nama yena a ka ntirang? *** Ke tla phetha tše ke go anetšego tšona, Modimo; ke tla go neela sehlabelo sa tebogo, ka gobane o ntlhakodišitše lehung, wa nthekga gore ke se thedimoge, ke phele mo lefaseng ke bonegetšwe ke wena. Ntšhokele, hle, Modimo, ntšhokele, gobane ke tšhabela go wena. Ke tla khuta ka fase ga diphego tša gago go fihlela ge kotsi e fetile. Ke bitša Modimo, Ragodimodimo, Modimo yo a mphethelago tšohle. O nthuša a le legodimong, a mphološa; a goboša ba ba ntlhomarago. Sela Modimo o nthuša ka leratorato la gagwe le potego ya gagwe. Ke dikaneditšwe ke manaba, ditau dijabatho, baisa ba meno nke marumo le mesebe, ba maleme maetša tšhoša tše bogale. Modimo, bontšha bogolo bja gago magodimong a godimodimo, letago la gago le aparele lefase lohle. Manaba a ka a ntheile ka sefu, ke tlaišegile kudu. Ba nkepetše mokoti tseleng, eupša go wetše bona ka gare. Sela Ke itiišitše pelo, Modimo, ke itiišitše pelo. Ke tla opela ke go tumiša. A ke itsogele! A ke tsoge ka mahwibi ke letša harepa le sekgapa. Morena, ke tla go tumiša ditšhabeng, ke tla go reta merafeng, gobane leratorato la gago ga le kaaka, le phagame go fihla magodimong, le potego ya gago e fihla marung. Modimo, bontšha bogolo bja gago magodimong a godimodimo, letago la gago le aparele lefase lohle. Hee, lena ba maatla! Afa le ahlola ka toka? Le sekiša batho ka maleba? Ga go bjalo! Etse ka dipelo le rera bokgopo. Ke lena le tsošago kgaruru mo nageng. Bakgopo ba tswalwa le bokgopo; ba kgeloga go tloga tswalong, ba a aka. Ba na le bohloko go swana le noga; ba ithiba ditsebe boka peetla ya setholo ye e sa kwego lentšu la moupadinoga, ešita le ge e ka ba moupimakgona. Hle, Modimo, ba kgole meno; kgola tawana tše meno, Morena. A ba nyamelele boka meetse a sephalo, ba pone sa bjang bjo bo gataketšwego. A ba tologe ba etše kgopa ge e gagaba, ba etše sefolotšana, sona se sa bonego letšatsi. E tla re ba sešo ba lemoga, ba rengwa boka moselaphala; Modimo o tla ba gogola ka ledimo a ba galefetše ba sa phela. Moloki o tla thabela go bona badiradibe ba otlwa. O tla hlapa maoto ka madi a bakgopo. Batho ba tla re: “Ruri, moloki o lefeleditšwe; ka kgonthe o gona Modimo wa go ahlola lefaseng.” Modimo wa ka, ntamolele manabeng a ka; mphahlele go ba ba ntsogetšego maatla. Ntlhakodiše go badirakgopo, o ntamolele go babolai. Šebao, ba ntaletše gore ba mpolaye; dioka di ntlhasela ke se ka tshela molao goba ka dira sebe, Morena. Ba potlakela go mpotapota, etšwe go se phošo ye ke e dirilego. Morena Modimo Ramaatlaohle, Modimo wa Israele, tsoga o tle o nkgahlanetše, mme o iponele. Tsoga, o otle baditšhaba bohle; o se šokele le o tee wa majelathoko a. Sela *** Ba lala ba boa mašego, ba rora boka dimpša, ba tšhakatšhaka le motse. Šebao, ba tshwa mahlapa ka melomo; tše ba di bolelago ga di phediše, eupša ba ipotša ge Modimo a sa ba kwe. Fela wena o a ba sega, Morena, ditšhaba ka moka o a di kwera. Nna ke tshephile wena, maatla a ka, gobane o botšhabelo bja ka, wena Modimo. Modimo wa ka o nthata ka leratorato; o tla tla a nthuša, ka thabela go fenywa ga manaba a ka. O se ba bolaye, hle, Modimo, gore setšhaba sa ka se se ba lebale. O ba gašanye le naga ka maatla a gago, gomme o ba wiše, Morena, wena kotse ya rena. Sengwe le sengwe se ba se bolelago ke sebe; ka gona a ba tanywe ke boikgogomošo bja bona, ka baka la mahlapa le maaka a bona. Ba fediše o ba galefetše, ba fediše molokwanarite; ke mo bohle ba tlago tseba gore ga Jakobo le go fihla magomong a lefase go buša Modimo. Sela Ba lala ba boa mašego, ba rora boka dimpša, ba tšhakatšhaka le motse. Ba putlaputla ba nyaka diyamaleng; ge ba se ba khore ba lale ba popoduma. Nnaena la gago lerato, kilaphetogo, ke tla le bega ka pelo ye tšhweu, gobane o bile sebo sa ka, o bile botšhabelo bja ka mola ke tlaletšwe. Wena maatla a ka, ke tla go opelela tumišo, gobane o sebo sa ka, wena Modimo; o Modimo yo a nthatago ka leratorato. Modimo, o re lahlile wa re ripitla; o be o re galefetše, bjale upša o re boele. O šikintše lefase wa le pharola; hle, bjale le thibe menga, gobane le a tekateka. O swarišitše tšhaba sa gago bothata, wa re thekesediša mo nkego re tagilwe. Ba ba go boifago bona o ba hlometše sefoka gore ba tšhabele mesebe go sona. Sela Re hlakodiše ka maatla a gago, o kwe thapelo ya rena, gore baratiwa ba gago ba phologe. Modimo o boletše ka Felong mo Gokgethwa a re: “Ke tla abaganya naga ya Shekeme ke thabile, ka arolanya moedi wa Sukote. Naga ya Gileade ke ya ka, le ya Manase; ya Efraime ke kuane ya ka ya tshipi, gomme ya Juda ke molamo wa ka wa bolaodi. Ya Moaba yona ke sehlapelo sa ka, gomme ya Edomo ke ya go lahlela dieta tša ka; ya Filistia ke tla e gobela megobo ya phenyo.” Ke mang yo a tlago nkiša motseng wo o ageleditšwego? Ke mang yo a tlago nkiša Edomo ge e se wena, Modimo, yo o re lahlilego, wena yo o se sa tšwago dira le rena? Hle, re thuše go lwa le manaba a rena, gobane thušo ya motho yona ke lefeela. Ge re na le Modimo re tla lwa senna; ke yena yo a tlago re gatakelela manaba. Hle, Modimo, ekwa sello sa ka, theeletša thapelo ya ka. Ke go bitša ke nolegile moko ke le magomong a lefase. Nnametše letlapa le le phagamego, le ke palelwago ke go le namela. Gobane ke wena setšhabelo sa ka; o sebo se se tiilego sa go ntšhireletša manabeng. Nke nkabe ke dulela ruri ka mošašeng wa gago; nke diphego tša gago e ka ba botšhabelo bja ka. Sela O amogetše dikeno tše ke go anetšego tšona, Modimo, gomme o mphile lefa la bao ba go boifago. Okeletša kgoši matšatši, o mo dire gore a fele a phela. A a buše go ya go ile a šegofatšwa ke wena, hle, Modimo; o mo šireletše ka leratorato la gago le potego. Ke mo ke tlago go opelela ditumišo ka mehla ke ntše ke phetha dikeno tša ka letšatši ka letšatši. Go Modimo fela ke mo ke hwetšago khutšo; ke yena yo a mphološago. Ke yena fela sebo sa ka le Mophološi, ke yena setšhabelo sa ka, nka se tsoge ke thetšitšwe. Na le tla tlogela neng go ntshola, go nkgwaela ke iphokolela boka leboto la go sekama, ke swana le lešaka la maswika le le kgeregago? Se ba se lakanago ke go nntšha seriti; ba kgahlwa ke bofeane. Ba ntheta ka melomo, mola ka dipelo ba ntswirinya. Sela Nna khutšo ke e hwetša go Modimo fela, ke yena yo ke mo tshephilego. Ke yena fela sebo sa ka le Mophološi, ke yena setšhabelo sa ka, mme nka se thetšwe. Modimo ke Mophološi wa ka yo a mphago seriti; ke yena sebo sa ka se se tiilego, ke setšhabelo sa ka. Mo tshepheng ka mehla, lena setšhaba; mo aleleng mathata ohle a lena; ke yena setšhabelo sa rena. Bathofela ga se selo, ba maemo ke lefeela; ge o ba ela, ba bofefo, ba le mmogo boima bja bona bo fetwa ke bja lefofa. Le se ikanye go thopela batho, la bota go holega ka bohlakodi. Ge le ka atelwa ke lehumo, le se bee pelo tša lena go lona. Modimo o kile a re a bolela ka kwa taba tše pedi: ya gore maatla ke a gagwe gomme lerato la gagwe, yena Mong wa ka, ga le fetoge, le ya gore o putsa bohle go ya ka ditiro tša bona. Modimo, o Modimo wa ka, mme ke go hlologetše; ke go hlologetše ka pelo ya ka ka moka. Ke go nyoretšwe bjalo ka motho a nyorilwe nageng ye e omilego ya lehwafa, ya go hloka meetse. Ke nyaka go go bona ka Tempeleng ya gago ye kgethwa, go bona maatla le letago la gago. Lerato la gago, kilaphetogo, le phala le bjona bophelo, ka gona ke tla go tumiša. Ke tla go reta ka mehla ge ke sa phela; ke tla emiša diatla ke go tumiša. Pelo ya ka e tla ipshina bjalo ka ya motho yo a khošego tša monyanya, mme ka go reta ka mekgolokwane. Ge ke patlame malaong ke a go gopola; bošego bjohle ke lala ke nagana ka wena, gobane o nthušitše ka mehla. Ke tla goa ke thabile ke šireleditšwe ke wena. Ke a go kgomarela, mme wena o nthekga ka letsogo la gago le le tiilego. Bao ba lekago go mpolaya go tla kodumela bona fasefase bodulabahu. Ba tla bolawa ka tšhoša, ba lewa ke diphukubje. Kgoši yona e tla thabišwa ke tše e di diretšwego ke Modimo, mme bohle ba ba enago ka leina la Modimo ba tla ikgantšha ka yena, eupša ba maaka bona ba tla thibja melomo. Hle, Modimo, nkwe ge ke go llela; ke tšhaba lenaba, ntšhireletše ke se bolawe. Ntšhireletše ge bakgopo ba ntakane, ge badiratšempe ba tsoša mašata. Ke bona ba go lootša maleme boka ditšhoša, ba hlaba ka mantšu a bohloko a nkego mesebe. Ba thuntšha mohlokabosodi ba mo laletše; ba mo thuntšha ka potlako ba sa boife. Ge ba loga maanomabe ba a hlohleletšana; ba lakana go thea difu ba sa bonwe, ba re: “Re tla bonwa ke mang?” Ba a lakana ba re: “Re logile maanomaano.” Ruri, tša ka monaganong le tša ka pelong ya motho ga di tsebje. Fela Modimo o ba thuntšha ka mesebe, mme ba ikhwetša ba gobetše. Ba itahla ka tše ba di bolelago, mme bohle ba ba ba bonago ba šikinya dihlogo ba kgotsa. Batho bohle ba tla gakgamala, ba bega ditiro tša Modimo, mme ba kwešiša gore o di diretšeng. Baloki ba tla thabela tše di dirilwego ke Morena mme ba tšhabela go yena; bohle ba dipelo tše di lokilego ba tla mo reta. Modimo, go tumišwa go lebane wena kua Sione; ke wena o lebanwego ke go phethelwa dikeno, wena yo o kwago dithapelo. Batho bohle ba tla tla go wena ka baka la dibe tša bona. Re imelwa ke dikarogo tša rena, eupša wena o re lebalela tšona. Ba lehlogonolo ke ba o ba kgethago, ba o ba batametšago go tlo dula ka dikgorong tša gago. Nke re ka khorišwa tša ka ntlong ya gago, tša Tempele ya gago ye kgethwa. Wena, Modimo, Morephološi, o re araba ka go re hlakodiša ka ditiro tše di makatšago. Batho bohle lefaseng le moše wa mawatle a kgole ba botile wena. Ka maatla a gago o hlomile dithaba, ya ba sešupo sa bonatla bja gago. O homotša medumo ya lewatle le ya maphoto a lona; o fediša meferefere ya ditšhaba. Badudi bohle ba lefase ba gakgamatšwa ke mehlolo ya gago; o dira gore bohle ba gobele ka thabo, go tloga bohlabela go iša bodikela. O šetša lefase wa le nontšha; o le humiša e le ruri. Dinoka tše dikgolo di a tlala; o fa batho mabele, wa ba lokišetša temo ka tsela ye: O nošetša boleme, wa thapiša makwate, wa thapiša temo ka dipula tša medupi, wa e šegofaletša dibjalo. O re hlagišetša puno ya mmakgonthe ka botho bja gago. Gohle mo go fihlago wena go bolailwe mabele. Lešokeng mafulo ga a kaaka, le meboto e apere thabo. Melala e ikadile ka dihuswane, le meedi e ithakgile ka mabele. Go a opelwa, go a gobelwa. Lena badudi bohle ba lefase, gobelelang Modimo ka thabo! Opelelang go mo tumiša; mo godišeng ka direto. Botšang Modimo le re: “Di gakgamatša bjang ditiro tša gago! Ka baka la maatla a gago a magolo manaba a gago a ithapeletša go wena. Batho bohle ba lefase ba a go khunamela, ba go opelela direto, ba go opelela ditumišo.”Sela Etlang le boneng ditiro tša Modimo, ditiro tše di makatšago a di diretšego batho: O kile a gopiša lewatle gwa šala naga ya go oma. Setšhaba sa gagwe se kile sa tshela noka ka maoto; gona moo ra thabišwa ke se a se dirilego. O buša go ya go ile ka maatla a gagwe. Ditšhaba o di beile leihlo. Diganka a di se mo tsogele maatla.Sela Lena ditšhaba, retang Modimo wa rena; a go galagale ditumišo tša lena. Ke yena yo a re phedišago, gomme ga a re lese re thedimoga. Modimo, o ile wa re hlahloba, wa re hlwekiša boka silibera. O ile wa re lesa re tanywa ke sefu, wa re rweša morwalo wo boima. Wa lesa batho ba re gataka godimo, ra feta gare ga mollo le gare ga meetse, fela wa re ntšha wa re hlakodiša. Ke tla iša dihlabelo tša ditšhungwakamoka ka ntlong ya gago; ke tla go phethela dikeno tša ka tšeo ke go tshephišitšego tšona mola ke le tlalelong. Ke tla go neela dihlabelo tša ditšhungwakamoka ka diruiwa tša manoni, ka go tšhumela le dihlabelo tša dikgapa, gomme muši wa tupa. Ke tla go neela dihlabelo tša dipoo le tša diphooko. Etlang le kwe, lena bohle ba le boifago Modimo, gomme ke tla le botša tše a ntiretšego tšona. Ke mo lletše ka wa ka molomo, ka mo tumiša ka tše ke di bolelago. Ge nkabe ke be ke kgahlwa ke go nagana bokgopo, Mong wa ka a ka be a ile a se ntheeletše. Eupša ruri Modimo o nkwele, o ntheeleditše ge ke mo rapela. A go retwe Modimo yo a ilego a se gane thapelo ya ka, goba a ntlhokiša leratorato la gagwe. Re šokele hle, Modimo, mme o re šegofatše; re lebelele ka botho, Sela gore lefase le tle le tsebe thato ya gago, le gore ditšhaba tšohle di tle di lemoge gore o re phološitše. A ditšhaba di go rete, wena Modimo; a ditšhaba ka moka di go rete! Merafe a e hlalale, e opele ka lethabo, ka gobane o ahlola batho ka toka, o hlahla ditšhaba tšohle lefaseng. Sela A ditšhaba di go rete, wena Modimo; a ditšhaba ka moka di go rete! Naga e re tšwetše puno; ke ka mo Modimo, yena Modimo wa rena, a re šegofaditšego. Modimo o a re šegofatša; a batho ka moka gohle lefaseng ba mmoife. Ge Modimo a emelela, manaba a gagwe a a phatlalala. O ba nyametša boka muši ge o nyamela; bjalo ka motu ge o tološwa ke mollo, bakgopo le bona ba hwa bjalo pele ga Modimo. Baloki bona ba a thaba, ba hlalala pele ga gagwe, ba gobela megobo ba thakgetše. Opelelang Modimo, le mo opeleleng direto, monamelamaru le mo kgoreleng tsela. Leina la gagwe ke Morena; gobang mogobo mo pele ga gagwe! Ke yena raditšhiwana, molotabahlologadi; o madulong a gagwe a makgethwa. Balahlegi o ba dudiša ka magaeng, bagolegwa o a ba lokolla a ba atla, mola dinganga tšona di dula lesehleng. Modimo, mola o etšwa o etile setšhaba sa gago pele, mola o phatša lešoka, Sela lefase le ile la šikinyega, legodimo la tloromiša pula ge Modimo a etla, yena wa Sinai, Modimo wa Baisraele. O ile wa tloromiša pula ya medupi, wa lapološa naga ya gago ye e omilego. Setšhaba sa gago sa dula go yona; ka botho bja gago, wena Modimo, wa babalela bahlaki. Mong wa rena a bega taba, ya phatlalatšwa ke basadi ka bontši e re: “Magoši le madira a bona ba a tšhaba, ba a tšhaba!” Basadi kua gae ba abaganya dithebola tše bjalo ka diswantšhobopša tša maeba tše di manegilwego diphego ka silibera, le mafofa ka gauta ya motswako, ge banna bona ba ipatlametše kua mašakeng. Mohla wola Ramaatlaohle a phatlalatša magoši nageng, thabeng ya Tsalmone go ile gwa wa lehlwa. Na e kaakang thaba ya Bashane! Ruri, ke thaba ya dintlhoratlhora! Hee, wena thaba, radintlhoratlhora, o reng o gerula thaba ye Modimo a ikgethetšego go dula go yona? Morena o tla dula gona go ya go ile. Ge Modimo, Mong wa bohle, a etla ka sekgethwakgethweng sa gagwe a etšwa Sinai, dikoloi tša gagwe tša ntwa di be di sa balwe, e le diketekete. Wena, Morena Modimo, o rotogetše thabeng ye e phagamego gore o tle o be le bodulo; wa tloga le mathopša a mantši, wa amogela dimpho, ešita le tša batho ba dinganga. A go tumišwe Mong wa bohle, yo a re pepago letšatši ka letšatši, yena Modimo, Morephološi. Modimo wa rena ke wa go re phološa; Morena, Mong wa rena, o re hlakodiša lehung. Modimo o tla pšhatla manaba a gagwe dihlogo, e lego banna ba ditšhitšhi bao ba ganelelago tseleng tša bona tše mpe. Mong wa bohle o rile: “Ke tla ba gomiša Bashane; ke tla ba gomiša ka bodibeng bja lewatle, gore o ine maoto mading a bona, le dimpša tša gago di a latswe ka mo di ratago.” Modimo, batho ba hlalela melokoloko ya gago, melokoloko ya Modimo wa ka, Kgoši ya ka, ge a eya Felong ga gagwe mo Gokgethwa. Baopedi ba etile pele, baletši ba ka morago, mo gare ke banenyana ba go letša meropa. Tumišang Modimo le na le phuthego yohle ya gagwe! Retang Morena, lena ditlogolo tša Jakobo. Šebaowe ba kgorwana ya Benjamene, ba eteletše pele; ba latelwa ke baetapele ba Juda ba ba hlabilego legoa, gwa latela baetapele ba Sebulone le ba Naftali. Bontšha maatla a gago, Modimo, ona maatla ale o a šomišeditšego go re thuša o le Tempeleng ya gago Jerusalema, moo magoši a go tlišetšago diloba. Kgalema sebata sela sa lehlakanoka; kgalema ditšhaba, e lego mohlape wa dipoo le manamane, tša ba ba go khunamelago ba swere dibego tša silibera. Phatlalatša ditšhaba tša bontwadumela! Go tla tla batseta ba go tšwa Egepeta; Baetopia ba tla lotšha Modimo. Opelelang Modimo, lena mebušo ya lefase; le opeleleng Mong wa bohle direto, yena monamelaratadima, ratadima la kgale. Theeletšang ge a kwatša lentšu le maatla. Begang maatla a Modimo; bogoši bja gagwe bo okametše Baisraele, gomme maatla a gagwe a kua leratadimeng. Modimo o a boifiša ge a ikutolla sekgethweng sa gagwe, yena Modimo wa Baisraele! Ke yena a fago setšhaba sa gagwe maatla le bonatla. A go tumišwe Modimo! Ntlhakodiše, hle, Modimo, gobane meetse a mpoa ka megolo. Ke sobelela tebetebeng ya leraga, gomme ke hloka mo ke gatago gona. Ke ka gare ga bodiba, gomme ke gogotšwe ke mafula. Ke lapišitšwe ke go lla, le lentšu le hwile; mahlo a ka a fifaditšwe ke go letela wena, Modimo wa ka. Ba go ntlhoyela lefeela ba atile go feta le meriri ya ka. Ba e lego manaba a ka ntle le lebaka ke dikokotla tše di faletšego go mpolaya. Ba nkgapeletša go bušetša tše ke sego ka di utswa. Yo a tsebago bošilo bja ka ke wena, Modimo; diphošo tša ka di ka se go utegele. Mong wa ka, Morena Ramaatlaohle, ba ba botilego wena a ke se ba segiše batho. Badiredi ba gago ke se ba nyatšiše batho, wena Modimo wa Baisraele. Ke ka baka la gago ge ke rogwa ke batho; ke ka baka la gago ge ke nyatšwa. Ke šetše ke le mothofela go ba gešo; go bana ba mma ke nna mošele. Ke jewa ke go fišegela ntlo ya gago; mahlapa a bahlapaodi ba gago a wela nna godimo. Ge ke itima dijo ke lla, ke a kodutlwa. Ge ke apara diaparo tša go ilela, seo se dira gore ke pharwe dika. Go ba ba hlwago ba dutše masorong a motse kgang ke nna; ešita le ditagwa di nkopela koša. Ge e le nna, Morena, ke rapela wena; o nkarabe ka nako ye e go kgahlago, o nkarabe ka go nthuša ka mehla, ka ge o na le lerato le legolo. O ntlhakodiše, ke se nanganele lerageng, o ntamolele go ba ba ntlhoilego, o ntlhakodiše madibeng a meetse. A ke se gogolwe ke mafula; ke se kwametšwe ke bodulabahu; ke se ye molete mohlaelathupa. Morena, ka ge o nthata ratirati, o nkarabe; o ntebelele ka lešoko la gago le legolo. Se iphihlele nna, mohlanka wa gago, gobane ke mo tlalelong; o se diege go nkaraba. Mpatamele, o mphološe, o ntlhakodiše manabeng a ka. O tseba ka mo ke rogwago ka gona, ka mo ke segišwago batho ka gona, le ka mo ke gobošwago ka gona; manaba a ka ohle o a a tseba. Mahlapa a ntlhabile pelo, ke nolegile moko. Ke be ke hutša monkwelabohloko, ka mo hloka; ke be ke lebeletše monkhomotši, a se be gona. Ba ntšheletše mpholo ka dijong, ya re ge ke nyorilwe ba mpha sa bodila gore ke nwe. A didimo tša bona di ba fetogele difu, bona le bangwathišani ba bona, mme di ba iše tahlegong. A ba fifale mahlo go fihlela ba se sa bona, ba kudupantšhwe mekokotlo go ya go ile. Ba otle o ba galefetše, o ba kgakganetše ka pefelo ya gago. Mešaša ya bona a e ngalwe, makuba a bona a hloke badudi. Ba hlomara yo o šetšego o mo otlile; ba o ba hlokofaditšego ba ba dulela serepa. Ba bee molato godimo ga wo mongwe, mme o se ba phološe. Maina a bona a a phumolwe pukung ya ba ba phelago; ba se ngwalwe le ba ba lokilego. Ge e le nna, ke a tlaišega, ke bohlokong; nke o mphološe mme o ntšhireletše, Modimo. Ke tla tumiša Modimo ka kopelo; ke tla mo reta ka go mo leboga. Seo ke se se tlago mo kgahla go feta go mo neela sehlabelo sa poo, powana ya dinaka le ngatha tša mapharo. Baikokobetši ge ba di bona ba tla thaba; lena ba go khunamela Modimo, tiang maatla. Morena o theeletša bahloki, le batho ba gagwe ba ba lego kgolegong ga a ba nyatše. A legodimo le lefase di mo tumiše, le mawatle le diphedi tšohle tše di lego ka go ona, gobane Modimo o tla hlakodiša Sione, a tsošološa metse ya Juda. Setšhaba sa gagwe se tla dula gona sa ithopela naga. Ditlogolo tša bahlanka ba gagwe di tla e abelwa ya ba lefa la bona; ba ba mo ratago ba tla dula go yona. Modimo, phakiša o tle o mphološe! Morena, itlhaganele o tle o nthuše! A ba inyatše ba itshesengwe ba ba lekago go mpolaya. A ba katakate ba gobogile ba ba ntlholelago mathata. A ba gomišetšwe morago ba fentšwe ba ba rego go nna: “Agaa! Swine!” Bohle ba ba go nyakago a ba thabe ba gobele ka ge e le ba gago. Bohle ba ba hloloselago go phološwa ke wena a ka mehla ba re: “Modimo ke yo mogolo!” Nnaena ke mohlaki ebile ke mohloki; itlhaganele o tle go nna, hle, Modimo! Ke wena Mothuši wa ka le Mophološi wa ka; se diege, hle, Morena! Ke tšhabela go wena, Morena, ke se tsoge ke hlabilwe ke dihlong. Ntlhakodiše mme o ntote ka maatla a gago a go phološa! Ntlhwaele tsebe o mphološe! Eba mošireletši wa ka yo ke tšhabelago go yena ka mehla. O ikemišeditše go mphološa, gobane o mošireletši wa ka le sebo sa ka. Modimo wa ka, ntlhakodiše diatleng tša bakgopo, dinaleng tša badiratšempe, bona bagateledi, gobane nnaena ke tshephile wena, Mong wa ka, wena, Morena. E sa le ke go tshepha go tloga bjaneng bja ka. E sa le ke ithekga ka wena go tloga mola ke tswalwa; ke wena o mpabaletšego go tloga tswalong; nka se lese go go tumiša. Ba bantši ba mpona ke le sehlola, fela wena o setšhabelotia sa ka. Ga ke kgaotše go go tumiša, ke hlwela go anega letago la gago. Se re bjale ge ke tšofetše wa ntahla; se re bjale ge ke fela maatla wa ntlogela, gobane manaba a ka a a nthera; bao ba nyakago go mpolaya ba a ntakana. Ba re: “Modimo o mo lahlile, a re mo hlomareng re mo sware; ga a sa na mohlakodiši.” Hle, Modimo, o se nkeme kgole; Modimo wa ka, phakiša o tle o nthuše! Ba ba mpharago a ba segišwe batho; a ba fedišwe; ba ba lekago go ntshenyetša a ba aparelwe ke thogako le kgobogo. Nnaena ke tla dula ke tshephile wena; ke tla go tumiša ke ntše ke eya. Ke tla hlwa ke laodiša ditiro tše o re phološitšego ka tšona, etšwe nka se kgone go di bala. Ke tla tla ke laodiša ditiro tša gago tše maatla, wena, Mong wa ka, wena, Morena; ke tla go opelela ditumišo, ka ge moloki e le wena fela. Modimo, o ntaodišeditše mehlolo ya gago go tloga bjaneng bja ka, mme le bjale ke sa e anegela batho. Bjale ge ke šetše ke tšofetše ke le hlogoputswa o se ntahle, hle, Modimo, ke be ke tle ke anegele ba meloko yohle ya ka moso maatla a gago. Modimo, toka ya gago e fihla magodimong. Ke mang wa go swana nago, Modimo, wena Modiradikgolo? O ntlišeditše ditlaišego tše dintši tše bohloko, fela o tla buša wa mmaatlafatša, wa mphološa lehung. O tla mpušetša maemong a bohlomphegi, gomme wa nkhomotša gape. Ke mo ke tlago go tumiša ka harepa, wena, Modimo wa ka, ka ge o botega. Ke tla go leletša sekgapa ke go opelela ditumišo, wena Mokgethwa wa Israele. Ke tla go gobela megobo ke go leletša diletšo, gobane o mphološitše. Ke tla anegela batho go loka ga gago, ka gobane bale ba bego ba leka go ntshenyetša, o tla ba segiša batho mme wa ba leša dihlong. Modimo, ruta kgoši go ahlola ka tshwanelo boka wena; ruta mongmabu gore a loke bjalo ka wena, gore a tle a buše tšhaba sa gago ka toka, le bahlaki ba gago ka tshwanelo. A dithaba le meboto di tlišetše setšhaba katlego, ka ge se phetha thato ya gago. A kgoši a lwele ditokelo tša bahlaki mo setšhabeng; a a hlakodiše bahloki, a roboketše bagateledi. Go tloga molokong wo mongwe go ya go wo mongwe a a phele galelele bjalo ka letšatši, goba ngwedi wo o dulago o taga. A a be bjalo ka pula ye e nošetšago hlaga, a etše medupi ye e tloromelago lefase. A toka e ate pušong ya gagwe, le batho ba iketle ba be ba atlege go ya go ile. A a buše go tloga lewatleng go ya go le lengwe, le go tloga nokeng ya Yufratese go yo fihla magomong a lefase. A merafe ye e ralalago le mašoka e mo khunamele, le manaba a gagwe a bethiše mosela fase. A magoši a Tarshishe le a dihlakahlakeng a mo lobe; a marena a Sheba le a Seba le a dihlakahlakeng a mo lobe. A magoši ohle a mo khunamele, a ditšhaba tšohle di mo hlankele. O hlakodiša bahloki ba ba mo llelago, le bahlaki ba ba hlokago mothuši. O šokela bafokodi le bahloki, o hlakodiša badiidi. O ba hlakodiša kgatelelong le kgaphamading, o ba šireletša gore ba se bolawe. A kgoši a re phelele! A a fiwe gauta ya Sheba! A a rapelelwe motšhaotšhele, a kgopelelwe ditšhegofatšo ka mehla! A nageng ya gaborena go bolawe mabele; a maphama a dithaba a alwe ke ona. A puno ya gona e swane le ya Lebanone. A metse e tlale batho boka naga ge e hlogile bjang. A kgoši a se tsoge a lebetšwe; a a gopolwe ka mehla, go ya le go hlaba ga matšatši. Ditšhaba tšohle di tla šegofatšwa ka yena, gomme tša mmitša yo lehlogonolo. A go retwe Morena Modimo, Modimo wa Baisraele! Ke yena a nnoši a dirago mehlolo. A go tumišwe Modimo go ya go ile, ka ge e le yena wa letago! A letago la gagwe le tlale lefase. Amene! Amene! Ke ka mo go felelago dithapelo tša Dafida, morwa wa Isai. Ruri, Modimo o loketše Baisraele, o loketše ba pelo tše di hlwekilego. Nna ke nyakile ke feletšwe ke tshepo ya gore Modimo o lokile, ka ba ka thoma go belaela, gobane ke be ke hufegela baikgantšhi, ke bona ka mo bakgopo ba atlegago ka gona. Ga ba na sa go ba kweša bohloko, ba a letlega, ba ja gabotse. Ga ba na mathata bjalo ka batho ba bangwe, ebile ga ba tlaišwe ke selo go etša bangwe. Ba apara boikgantšho boka pheta, le kgaphamadi go etša kobo. Ba khutlogile mahlo ka go nona, ba dula ba bolela ka dipelo. Sa bona ke go gegea batho le go ba senya maina; ba bolela ka boikgantšho le tšhošetšo. Ba bolela bobe ka Modimo wa legodimong, le motho yo mongwe le yo mongwe ba mmolela gampe. Ke ka baka leo badumedi ba kgelogelago go bona, ba inyorollago ka tšohle tše ba di bolelago. Ba re: “Modimo a ka di tseba bjang? Ragodimodimo a ka lemošwa ke eng?” Ke ka mo bakgopo ba lego ka gona; ke bomohlokamathata ba go ikgobelela mahumo. Bjale go nthušang go itlhwekiša pelo le go ipea kgole le sebe? Ke hlwela go bethwa letšatši ka moka; ka mehla ke tsoga ke solwa. Ge nkabe nkile ka re: “Ke tla bolela bjalo ka bona,” ke be ke tla be ke hlanametše batho ba gago. Ke lekile go nagana ka taba ye gore ke e kwešiše, fela ya ntšhita, ka ba ka ya Felong mo Gokgethwa ga Modimo, ya ba gona ke lemogago se se tlago ba hlagela. Ruri, wena o ba beile matheleding, wa ba thedimoša ba wa, ba hwa. Ba swieletšwe ka go ponya ga leihlo, ba fedišwa taa ka dikotsi tša bjako. Morena, ba etša toro ge motho a phafogile; wena ge o phafoga o phaela toro yeo thoko. Mola ka pelo ke tsota, mola ke kgopišegile kudu, ke be ke šilofetše, ke sa kwešiše selo, mme ke go dira tša bophoofolo. Fela ke dula ke na le wena, mme wena o dula o ntshwere ka seatla sa la go ja. O ntlhahla ka keletšo ya gago; ka morago o tla nkamogela wa nkgodiša. Ke eng se ke nago naso legodimong ntle le wena? Gomme ge wena o le wa ka, lefaseng ga go sa na se ke se nyakago. Le ge nka palelwa mmeleng le moyeng, Modimo yena ke maatla a ka; ke wa ka go ya go ile. Ba ba lego kgole le wena ba tla tlošwa tšatšing; bohle ba ba sa go botegelego o tla ba fediša. Nnaena ke loketšwe ke go ba kgauswi le Modimo. Mong wa ka, Morena, ke yena setšhabelo sa ka, gomme ke tla anega ditiro tšohle tša gagwe. Modimo, o reng o re lahletše ruri? Mohlape wo o o dišago o reng o o tukela bogale? Gopola setšhaba se o iphilego sona kgale, setšhaba se o se phološitšego ya ba lefa la gago. Gopola thaba ya Sione ye o tlilego wa dula go yona. Tabetša mašope a a kgale; manaba a rena a sentše tšohle tša ka Tempeleng. Manaba a gago a be a gobela ka kua Tempeleng; ba hlomile difoka tša bona ka gona e le sešupo sa gore ba fentše. E be nke ke batho ba ba remago dihlare ka sethokgweng. Ba phaphile disetwa tšohle tša kota ka dilepe le ka dinoto. Ba latswitše Tempele ya gago ka mollo; ba e kgereša, ba goboša bodulo bja gago. Ka dipelong ba re: “A re ba gateleleng setee!” Ba tšhuma mafelo ohle a go rapela Modimo mo nageng. Ga re sa na dišupo tša go tšwa go Modimo; ga go sa na baprofeta, gomme ga go yo a tsebago gore go tla feletša kae. Modimo, manaba a tla go nyefola go fihla neng? Kgane a tla go roga go ya go ile? O reng o phuthile matsogo? A fediše! Gape wena, Modimo, o kgoši ya ka ya kgale; o be o re phološa manabeng mo nageng ya rena. O ile wa aroganya lewatle ka maatla a gago, wa pšhatla bontatauwane ba lewatle dihlogo ka meetseng. Kgolomodumo o e pšhatlile dihlogo, wa fepa diphoofolo tša lešoka ka yona. Ke wena o phutšego methopo le dinokana, meela ya kgale yona wa e pšheša. Mosegare ke wa gago, le bošego ke bja gago; letšatši le ngwedi di hlodilwe ke wena. Ke wena yo o beetšego lefase mellwane yohle; selemo le marega di hlodilwe ke wena. Morena, se lebale ka mo manaba a go nyefolago, ka mo setšhaba sa mašilo se go hlomphollago. Setšhaba sa gago se se itlhakelago o se se gafele manaba a sehlogo; bahlakišwa ba gago o se ba lebalele sa ruri. Gopola kgwerano ya gago, gobane gohle nageng go tletše magolo a bahlakodi. Bagatelelwa ba se bušetšwe morago ka dihlong; a bahlaki le bahloki ba go tumiše. Nanoga, Morena, o ikemelele; gopola ge mašilo a hlwela go go nyefola. Se hlokomologe mekgobotlo ya manaba a gago; lešata la dira tša gago le fela le kwagala. Re a go leboga, Modimo, re a go leboga! Re a go rapela, ebile re anega mehlolo ya gago. Modimo o re: “Ke tla bea nako ya go tlo ahlola ka toka. Ge lefase le šikinyega le badudi bohle ba lona, ke nna ke swarelelago dikokwane tša lona ka di tiiša. Sela Baikgantšhi ke ba boditše ka re: Le se ikgantšhe; bakgopo ka re go bona: Le se fadišetše batho maatla. Le se kgantšhetše batho maatla le tepelela; le se bolele ka matepe.” Go se bone motho molato ga se ga motšwabohlabela goba motšwabodikela, ebile ga se ga motšwašokeng. Ke ga Modimo, yo e lego yena moahlodi; yo a bonago bangwe molato, bangwe a se ba bone molato. Morena o swere senwelo ka seatla, se tletše motswako wo bogale wa beine. O e tšhelela bakgopo bohle ba lefase mme ba e nwa, ba e kgarihlela. Ge e le nna nka se lese go bolela ka Modimo wa Jakobo; ke tla mo opelela ditumišo. Bakgopo o tla ba amoga maatla; baloki bona ba tla a okeletšwa. Kwa Juda Modimo o tumile; o a hlompšha kwa Israele, o na le legae kwa Saleme; kwa Sione o na le bodulo. Ke gona mo a robilego mesebe ye nkego tladi, le kotse le tšhoša le dihlabano tše dingwe tša ntwa. Sela Wena o taga bjang na! O tumišega e le ruri ge o etšwa dithabeng tša go sa felego. Bagale ba dinatla ba hlakotšwe; ba ithobaletše bja mafelelo boroko, go itwela go ba paletše. Wa kgalema manaba, wena Modimo wa Jakobo, pere le koloi ya ntwa di wela fase. Gape Motšhabegi ke wena; ke mang a kago lebana nago o befetšwe? O kwatša kahlolo o le legodimong, lefase la boifa la hloka molomo ge wena o emelela o kwatša kahlolo, go hlakodiša banyatšegi bohle ba lefase. Sela Kgalefo ya batho e go fetogela tumišo; ba ba phonyokgilego kgalefo ya gago ba tla go bokanela. Ikaneleng Morena Modimo wa lena, mme le phethe keno tša lena; a bao ba mo dikologilego ba mo lobe, yena Motšhabegi. O kokobetša babuši ba ba ikgogomošago, mme o tšhoša magoši a lefase. Sela Ke llela Modimo ke goelela; ke llela Modimo ke goelela, mme o a nkwa. Ge ke tlaletšwe ke rapela Morena; ke lala ke otlolotše matsogo ke sa lape, fela ke hloka wa go mpea pelo. Ge ke gopola Modimo ke a fegelwa; ge ke mo nagantšhiša, ke nolega moko. Sela O ntlhoba boroko; ke a balabala ke šitwa le ke go bolela. Ke gopola tša mehla yela ya kgale; ke eleletša tša mengwaga ya bogologolo. Ke lala ke nagana kudu, ke balabala ke re: *** “Kgane Morena o tla re lahlela ruri? Afa re tla hlwa re sa mo kgahla? Na e ka ba o leseditše ruri go re rata? Na a ka napa a se phethe se a se holofeditšego? Kgane o lebetše go gaugela? Na ge a galefile o gana go re šokela?” Sela Ka phetha ka go re: “Se se nkwešago bohloko ke gore Ragodimodimo ga a sa ne maatla.” Sela Morena, ke gopola tiro tša gago tše dikgolo; ke nagana ka mehlolo ya gago ya bogologolo. Ke nagana ka tšohle tše o di dirilego; ke gopodišiša ditiro tša gago tše maatla. Modimo, tšohle tše o di dirago ke tše dikgethwa. Ke ofe modimo wo mogolo go etša wena? Ke wena Modimo, Modiramehlolo; o bontšhitše baditšhaba maatla a gago. O phološitše setšhaba sa gago ka maatla a gago a magolo, tšona ditlogolo tša Jakobo le Josefa. Sela Meetse a rile go go bona, wena Modimo, meetse a rile go go bona a thothomela ka poifo, phamphamadiba le yona ya biloga. Maru a tloromiša pula, legodimo la kidimetša; magadima a gago a pekenya ka mathoko ohle. Mokidimetšo wa tladi ya gago wa ratha, gomme magadima a bonega lefase; lefase la thothomela, la rekareka. Wa putla lewatle o sepela, wa tshela meetsemagolo, fela mohlala wa gago wa se bonagale. Wa hlahla setšhaba sa gago boka modiša wa mohlape, mohlape wo o hlokometšwego ke Moshe le Arone. Lena setšhaba sa ka, theeletšang tše ke le rutago tšona; tše ke di bolelago le di ele hloko. Ke tla bolela le lena ka diema, ka bola phiri tša mehleng ya kgale. Tše re di kwelego re bile re di tseba, tše re di boditšwego ke borakgolokhukhu re ka se di fihlele ditlogolo tša bona; re tla botša ba moloko wa ka moso ditiro tše dikgolo tša Morena, le maatla a gagwe, le mehlolo ye a e dirilego. O file ditlogolo tša Jakobo taelo, o hlometše tšhaba sa Israele molao, a laela borakgolokhukhu gore ba o rute bana ba bona, gore meloko ya ka moso e tle e o tsebe, o tsebje ke bana ba ba sa tlilogo belegwa; le bona ba tle ba o botše ba bona bana, gore le bona ba tle ba bote Modimo, ba se lebale ditiro tša gagwe, ba phethe ditaelo tša gagwe, ba se etše borakgolokhukhu ba bona, ya ba moloko wa dinganga, wa kgang, moloko wo o se nago maikemišetšo, wa go se botegele Modimo. Baefraime ba ba itlhamilego ka mesebe ba ile ba tšhaba mohla wa ntwa. Ba hlanamela kgwerano ya bona le Modimo, ba gana go phetha melao ya gagwe. Ba itebatša ditiro tša gagwe tše dikgolo, yona mehlolo yela a ilego a ba bontšha yona. A dira mehlolo molaleng wa Tsoane kwa Egepeta borakgolokhukhu ba bona ba lebeletše. A aroganya lewatle a ba tshediša; a emiša meetse boka leboto. Mosegare a ba etetša ka leru, bošego ka moka a ba bonegela ka seetša sa mollo. A pharola matlapa lešokeng, a ba noša ba kgolwa, meetse a nkego a phamphamadiba. A ntšha meela letlapeng, a ediša meetse a nkego dinoka. Le ge go le bjalo ba no fela ba mo fošetša, ba rumola Ragodimodimo kwa lešokeng. Ba hlohla Modimo ka boomo ka go mo kgopela dijo tše di nyakwago ke bona. Ba bolela Modimo gampe ba re: “Afa Modimo a ka kgona go re fa dijo mo lešokeng? Leswika lona o rile go le betha la phulega meetse, dinoka tša falala. Na le bogobe a ka kgona go bo fa setšhaba sa gagwe, le nama sa ja?” Morena o rile go ba kwa a ba galefela; ditlogolo tšeo tša Jakobo a di hlasela ka mollo, a tukela Baisraele bogale, ka ge ba be ba sa mo dumele, ba sa tshephe gore a ka ba hlakodiša. Le ge go le bjalo, a laya leratadima kua godimo gomme a le bula mejako. A ba nešetša manna ya ba dijo tša bona, e le mabele a go tšwa legodimong. Batho ba ja sejo sa barongwa, a ba fa mphago wo montši. A fokiša phefo ya bohlabatšatši sebakabakeng; a tsoša le ya borwa ka maatla a gagwe. A ba nešetša nama ye ntši ye nkego lerole, e le dinonyana tše dintši boka lešabašaba lebopong la lewatle. A di wišetša ka mešašeng ya bona, le go dikologa mekutwana ya bona. Ka fao ba ja ba khora, Modimo a ba file tše ba bego ba di nyaka. Fela bona ba di galala. E rile ba sa ja, a ba galefela, a bolaya dikokotla gare ga bona, a rapalatša dinatla tša masogana a Israele. Le ge go le bjalo, batho ba no tšwela pele le go dira dibe; ba se dumele mehlolo ya gagwe. Ka gona a ba hlokiša mohola bophelong, a ba bolaya ka lephakuphaku. E be e re ge a bolaile ba bangwe, ba ba šetšego ba sokologele go yena, ba itshole mme ba mo khunamele gape, ba lemoge gore Modimo ke sebo sa bona, le gore yena, Ragodimodimo, ke Molopolli wa bona. Fela ba leke go mo radia ka dipolelo, ba mmotša maaka. Ba be ba sa mmotegele, ba sa botegele le kgwerano ya gagwe. Fela a ba gaugele, a ba swarele molato wa bona, a se ke a ba fediša. Gantši ge a galefile o be a itshwara, a sa fenywe ke kgalefo ya gagwe. A sa lebale gore ke batho ba nama; ba swana le phefo ye e iphetelago e sa boe. Ke gantši ba mo rumola kua lešokeng, ba mo nyamiša kwa leganateng. Ba mo hlohla leboelela, ba kweša Mokgethwa wa Israele bohloko. Ba be ba lebala maatla a gagwe, le mohla wola a ba hlakodiša manabeng a bona, mola a ipontšha ka go dira dimakatšo, ka go dira mehlolo molaleng wa Tsoane kua Egepeta. A fetoša dinoka le dinokana tša Egepeta madi, gore Baegepeta ba se kgone go nwa meetse a gona. A ba romela diboba tša ba loma, le digwagwa tša ba senyetša. Mašemo a bona a a gafela bojane; tše ba di bjetšego a di leša segongwane. Merara ya bona a e rothotha ka sefako, mego a e gwamiša ka šobane. Dikgomo tša bona tša keketwa ke sefako, dihuswane tša rathwa ke legadima. A ba tlaletša ka go ba tukela bogale le pefelo, a ba romela barongwa ba ba bolayago. A se thibele bogale bja gagwe, le lehu a se ba phefiše lona, a upša a ba gafela mauba. A bolaya maitšibolo ohle a bona Egepeta, maitšibolo a bona mešašeng ya Hamo. Setšhaba sa gagwe sona a se bulela boka dinku, a se etetša lešokeng bjalo ka mohlape. A ba eta pele a ba šireleditše, ba sa boife selo; manaba a bona ona a a ribegetša ka lewatle. A ba iša nageng ya gagwe ye kgethwa, nagathota ye a ithopetšego yona. A raka ditšhaba ge Baisraele ba etla; kgoro tšohle tša Israele a di elela naga, a di bea magaeng a ditšhaba tšela. Fela bona ba fela ba hlohla Modimo, Ragodimodimo; ba mo rumola ba gana go phetha melao ya gagwe. Ba kgeloga ba hloka botshephegi go etša borakgolokhukhu ba bona; ba ba bjalo ka mosebe wo o nyefilego. Ba mo rumola ka go khunamela medingwana dintotomeng, mme medingwana yeo ya mo hufegiša. Ge a di bona a galefa, mme setšhaba sa gagwe a se lahlela sa ruri. A furalela bodulo bja gagwe kua Shilo, wona mošaša wo a bego a dula le batho ka go wona. A lesa manaba a thopa Polokelo ya gagwe ya Kgwerano, e lego sona sešupo sa maatla le letago la gagwe. A galefela setšhaba sa gagwe, mme bona bao e lego lefa la gagwe a ba lesa ba bolawa ka tšhoša. Masogana a bona a metšwa ke mollo, makgarebe a bona a hloka banyadi. Baprista ba gabobona ba bolawa ka tšhoša, fela bahlologadi ba bona ba se dumelelwe go ba ilela. Ke mo yena Mong wa bohle a phafogilego mo nkego o tsoga borokong; a etša senwi se se tlogwago ke botagwa. A lwa le manaba a gagwe, a ba gomišetša morago, a ba segiša batho go ya go ile. A lahla ditlogolo tša Josefa, le kgoro ya Benjamene a se ikgethele yona. A ikgethela kgoro ya Juda le thaba ya Sione, e lego thaba ye a e ratago. A ikagela Tempele ye e phagamego go fihla leratadimeng; a e hloma ya tiela ruri go etša lefase. A ikgethela Dafida gore e be mohlanka wa gagwe; a mo tšea a le merakeng ya dinku. A mo tlogediša dinku tša ditswetši, gore a tle a mo dišiše setšhaba sa gagwe, tšona ditlogolo tša Jakobo, Baisraele, lona lefa la gagwe. Dafida a ba diša ka boikgafo, a ba hlahla ka temogo. Modimo, baditšhaba ba šwahletše ka nageng ya gago; ba hlompholotše Tempele ya gago ye kgethwa; Jerusalema ba e fetotše mašope. Ditopo tša bahlanka ba gago ba di lahletše manong; ba gafetše ditopo tša babotegi ba gago dibata. Madi a bona a etša meetse go dikologa Jerusalema, gomme wa go ba boloka a hlokega. Re segwa ke ditšhaba tše di agišanego le rena, re fetogile dikwero le dikgegeo go ba ba bapilego le rena. O tla re galefela go fihlela neng, Morena? Na e tla ba go ya go ile? Kgane bogale bja gago bo tla no fela bo re tukela boka mollo? Kgalefo ya gago e thenolele godimo ga ditšhaba tše di sa go dumelego, le mebušo ya ba ba sa go rapelego. Gobane ke bona ba go re fediša, rena ditlogolo tša Jakobo, mme ba senya naga ya gaborena. O se re otlele dibe tša borakgolokhukhu ba rena; re šokele, gobane re feletšwe ke tshepo. Re thuše, hle, Modimo, Mophološi wa rena, gore re tle re go godiše; re phološe, o re swarele dibe tša rena, ka ge o le Modimo wa lešoko. Baditšhaba ba reng ba re botšiša ba re: “Modimo wa lena o kae?” Re bone ge o ba tsebiša gore o lefeletša bahlanka ba gago ka ge ba ba bolaile. Nke o ele dillo tša mathopša hloko, gomme ba ba ahloletšwego lehu o ba phološe ka maatla a gago a magolo. Ditšhaba tše di agišanego le rena o di lefiše gašupa nyefolo ye ba go nyefotšego ka yona, Morena. Ke mo rena, setšhaba sa gago, mohlape wo o o dišago, re tlago go leboga go iša le go iša, ra anegela ditlogolo le ditlogolwana tša rena ka mo o swanelwago ke go tumišwa ka gona. Re hlwaele tsebe, hle, Modiša wa Israele. Wena wa go etetša ditlogolo tša Josefa boka mohlape, wena o dutšego godimo ga bakerubi, iponatše ka letago go ba kgoro ya Efraime, le ya Benjamene, le ya Manase. Utolla maatla a gago o tle o re thuše. Boela o re atle, hle, Modimo, o re edišetše sefahlego, ke mo re tlago phologa. Morena, Modimo Ramaatlaohle, na o tla re galefela go fihlela neng, rena setšhaba sa gago se se go rapelago? Etse o re file meokgo ya ba dijo tša rena, wa re noša yona ka bontši. O re fetotše sebakwa sa ditšhaba tše di bapilego le rena; re kodutlwa ke manaba a rena. Boela o re atle, hle, Modimo Ramaatlaohle, o re edišetše sefahlego, ke mo re tlago phologa. O epolotše morara Egepeta, wa tla wa o bjala mo o bego o rakile ditšhaba gona. Wa o kgorela lebala mo o bego o o bjala gona, medu ya swara, gomme wa tlala naga. Dithaba tša apešwa ke moriti wa wona, mesedere ya go letla ya pipša ke dikala tša wona. Wa letla dikala tša fihla lewatleng, mahlogedi a wona le wona a fihla nokeng. O reng o kgerešitše morako wa wona, gore bafeti ba tsela ba tle ba o kge dikenywa? Dikolobe tša naga di a o senya; o lewa ke diphoofolo tša lešoka. Re boele, hle, Modimo Ramaatlaohle; okamela mono fase o le legodimong, o bone morara wo, mme o boele o o babalele. Šireletša se o se bjetšego ka seatla sa gago. Ba ba o remilego mme ba o fiša o ba tomolele mahlo o ba fediše. Šireletša setšhaba se o se kgethilego, sona setšhaba se o itiišeditšego sona, ke mo re ka se sa go furalelago. Re lote re phele, ke mo re tlago go rapela. Boela o re atle, hle, Morena, Modimo Ramaatlaohle; o re edišetše sefahlego, ke mo re tlago phela. Hlalalelang Modimo, yena e lego maatla a rena; gobelang Modimo wa Jakobo megobo. Kgerešang koša, le pidinyeng meropa; letšang koša ye bose ka dikgapa le diharepa. Kgabubudišang phalafala ge ngwedi o dutše le ge o ile swiswing – mohla wa monyanya wa rena. Gobane ye ke taelo mo go Baisraele, ke molao wa Modimo wa Jakobo. Modimo o o beetše ditlogolo tša Josefa e le taelo mola a hlasela naga ya Egepeta. Ke kwa lentšu le ke sa le tsebego le re: “Ke le rotše morwalo magetleng, seroto sela la kgona go se bea fase. Mola le tlaletšwe le be le ntelela, mme nna ke le hlakodiša. Ke ile ka le araba ke iphihlile ka lerung la mekidimetšo. Ke ile ka le leka kua meetseng a Meriba. Sela Lena tšhaba sa ka, theeletšang ge ke le laya. Lena Baisraele, nke nkabe le ka theeletša! Le se khunamele medimo ye mengwe; le se obamele medimo e šele. Ke nna Morena Modimo wa lena yo ke le ntšhitšego nageng ya Egepeta. Ke tla le fa tše le di hlokago. “Fela setšhaba sa ka sa se ntheeletše, Baisraele ba gana go nkwa. Ka gona nna ka ba lesa ba gogwa ke bonganga bja bona. Nke nkabe tšhaba sa ka se ntheeletša, nke nkabe Baisraele ba phetha thato ya ka! Ke be ke tla potlaka ka hlasela bahloi ba bona, ka kokobetša manaba a bona. Bantlhoi ba be ba tla ithapeletša go nna, eupša kotlo ya bona e be e ka se fele. Tšhaba sa ka sona ke be ke tla se fepa ka dijo tše dibotse, ka ba khoriša le todi, setšwamaswikeng.” Modimo o ya madulong a gagwe kgorong ya medimo, o ahlola a dikaneditšwe ke medimo. O re: “Le tla feletša kae le go ahlola sepitša, le rerelela bakgopo? Sela Lwelang ditokelo tša bafokodi le ditšhiwana, le ahloleng bahlaki le bahloki ka toka. Hlakodišang bafokodi le badiidi, le ba phološeng dinaleng tša bakgopo. “Eupša ga le tsebe ebile ga le kwešiše selo, le ebela swiswing, etšwe metheo ya lefase e tekema. Le ge ke ile ka le botša ka re: ‘Ke lena medimo, bohle le barwa ba Ragodimodimo,’ le tla hwa bjalo ka batho ba nama, go no swana le mmuši ofe le ofe.” Tsoga, Modimo, o sekiše lefase, gobane tšhaba tšohle ke tša gago. Modimo, o se homole; o se re tuu, hle, Modimo, o se ke wa dio lebelela! Bona ka mo manaba a gago a tsošitšego mpherefere, le ka mo bahloi ba gago ba go rumolago ka gona. Ba dulela tšhaba sa gago serepa; ba lakana ba ba šireleditšwego ke wena. Ba re: “A re yeng go fediša tšhaba se, gore Baisraele ba se sa gopolwa!” Ba lakane, ba kwane; ba ipopile seboka sa go go lwantšha. Ke batho ba Edomo le Baishmaele, batho ba Moaba le Bahagare, batho ba Gebale le ba Amone le ba Amaleke le ba Filistia le badudi ba Tirose. Ešita le Baasiria ba ikopantše nabo gore ba tlaleletše ditlogolo tšeo tša Lota. Sela Ba dire se o ilego wa se dira Bamidiane, le Sisera le Jabine kua nokeng ya Kishone, ba ba ilego ba fedišwa kua Endoro, ya ba mmutedi wa go nontšha mobu. Bakgomana ba bona o ba dire sa Orebe le Seebe, baetapele ba bona ba etše Sebage le Tsalmuna, bona ba kilego ba re: “A re ithopeleng naga ya Modimo!” Modimo wa ka, ba dire sa ditlhoka ledimong, a ba etše mooko ge o tšewa ke phefo. Go etša mollo ge o fiša sethokgwa, go swana le kgabo ge e tšhuma hlaga dithabeng, le wena ba hlomare ka ledimo la gago, o ba tšhoše ka sefefogadi sa gago. Dira gore ba inyatše gore ba tle ba thome go go nyakišiša, wena Morena. A ba segišwe batho mme ba dule ka poifo. A ba lešwe dihlong, ba hwe. A ba tsebe ge wena fela o bitšwago Morena, o le Kokamababuši lefaseng lohle. Ke rata Tempele ya gago bjang, wena Modimo Ramaatlaohle! Ke a duma ebile ke hlologetše kudu go ba ka kgorong ya Tempele ya Morena. Ke hlabela Modimo yo a phelago mekgolokwane ka pelo ya ka ka moka. Ešita le diphorogohlo di agile dihlaga, le dipeolane di na le magae; di fepa mafotwana a tšona ka go ona kgauswi le dialetare tša gago, wena, Morena Ramaatlaohle, Kgoši ya ka le Modimo wa ka. Go lehlogonolo ba ba phelago Tempeleng ya gago; ba ba dulago ba go reta gona. Sela Go lehlogonolo ba o lego maatla a bona, ba ba fišegelago go tšea leeto la go yo go direla thabeng ya Sione. Ge ba tshela moedi wa Mekgokgopha wona o phulega methopo; pula ya tsheola e a o talafatša. Ba tia maatla ba tieletše leetong la bona; ba tla hlaga pele ga Modimo kua Sione. Kwaa thapelo ya ka, Morena Modimo Ramaatlaohle. E theetše, wena Modimo wa Jakobo! Hlokomela mošireletši wa rena, hle, Modimo; eba yo botho go kgoši ye o e beilego ye. Go hlwa tšatši le tee ka kgorong ya Tempele ya gago go phala go hlwa matšatši a sekete mogongwenyana. Nka upša ka ema mojako wa Modimo wa ka, go na le gore ke dule malapeng a bakgopo. Morena ke Mophediši le Mošireletši wa rena; o a re gaugela, a dira gore re hlomphege. Badiraboloki ga a ba kone tše botse. Modimo Ramaatlaohle, go lehlogonolo bao ba go botago! Morena, o be o loketše badudi ba naga ya gago, wa buša mathopša, ditlogolo tša Jakobo. O be o phumolela tšhaba sa gago molato wa sona, o be o ba swarela dibe tša bona tšohle. O be o tlogela go ba galefela, o lesa go ba tukela bogale. Boela o re atle, Modimo Mophološi wa rena, o lese go tenwa ke rena. Kgane o tla re galefela go ya go ile? Na kgalefo ya gago e ka se tsoge e okobetše? Na o ka se re tsošološe gape, gore rena, tšhaba sa gago, re tle re thabele se o re diretšego sona? Re bontšhe leratorato la gago, Morena; re thuše mme o re phološe. A ke kwe se Modimo, Morena, a se bolelago: O holofetša tšhaba sa gagwe khutšo, bona bao ba mmotegelago; a ba se boele go tša bošilo. Ruri, o ikemišeditše go phološa ba go mmoifa, gore mo nageng ya gaborena batho ba bone letago la gagwe. Lerato le le sa fetogego le potego di tla kopana; toka le khutšo di tla gokarelana. Potego e tla hloga lefaseng, toka e tla okamela fase e le legodimong. Morena o tla re atla, mme naga ya rena e tla re tšwela dikenywa. Toka e tla mo eta pele, ya mo kgorela ditsela. Morena, ntlhwaele tsebe o nkarabe, gobane ke mohlaki ebile ke mohloki. Ntlhakodiše lehung, gobane ke a go botegela. Mphološe, nna, mohlanka wa gago yo ke go botilego. O Modimo wa ka, ntšhokele, hle, Mong wa ka, gobane letšatši lohle ke a go llela. Nthabiše, nna, mohlanka wa gago, gobane ke go hlolosetše kudu, Mong wa ka. Wena, Mong wa ka, o yo botho, o wa go swarela; bohle ba ba go rapelago o ba rata kudu ka leratorato. Hle, Morena, ntheeletše ge ke go rapela; nkele hloko ge ke go llela. Ge ke le mathateng ke llela wena, ka gobane o a ntheeletša. Modimo, moswananago ga a gona, Mong wa ka, le wa go dira tše di dirwago ke wena ga a gona. Ditšhaba tšohle, dihlolwakewena, di tla tla tša go khunamela, tša go hlompha, Mong wa ka. Gobane o senatla, Ramehlolo; ke wena fela o lego Modimo. Morena, nthute tše o nyakago ke di dira, gore ke phele ka nnete ya gago. Ntlhahle gore ke go boife ka pelo ka moka. Ke tla go tumiša, wena Modimo, Mong wa ka, ka pelo ya ka yohle, ka go hlompha go ya go ile, gobane leratorato le o nthatago ka lona ke le legolo, mo o bilego o ntlhakodiša sekoting sa bodulabahu. Modimo, diganka di ntsogetše maatla; ke tsongwa ke lekoko la dikgowa, batho ba ba sa išego felo ka wena. Fela, Mong wa ka, o Modimo wa lerato le lešoko, Rapelotelele, Ralerato le Rapotego. Retologela go nna o nkgaugele, o ntiiše, nna, mohlanka wa gago; o mphološe, ka gobane ke go direla boka mma mola a be a go direla. Mpontšhe sešupo sa botho bja gago; bantlhoi ba inyatše ge ba bona gore wena, Morena, o nthušitše, o nkhomoditše. Morena o theile motse wa gagwe thabeng ye kgethwa. O rata motse wa Jerusalema go feta metse yohle ya ditlogolo tša Jakobo. O go bolela ka tše di makatšago, wena motse wa Modimo. Sela Baegepeta le Bababilone ke ba bala le ditšhaba tše di rego ke Modimo. Batho ba Filistia le ba Tirose le ba Etopia ba be ba tsebja ba tswaletšwe Jerusalema. Mabapi le Sione go tla thwe: “Batho ka moka ke ba gona kua; ke motse wo o tiišitšwego ke Yogodimodimo.” Mohla Morena a ngwala ditšhaba ka maina a tšona, o tla re yo o tswaletšwe Jerusalema. Sela Diopedi le dibini di re: “Ke wena mothopo wa tšohle tše dibotse tše re nago le tšona.” Morena Modimo, Mophološi wa ka, ke go llela bošego le mosegare. Ekwa thapelo ya ka; ntheeletše ge ke go llela. Ke wetšwe ke masetlapelo a mantši, mo ke ilego ka ba kgauswi le lehu. Ke balwa le ba ba theogelago go baithobaledi, le maatla a mpheletše. Ke bjalo ka ba ba lahlilwego gare ga bahu; ke etša babolawa ba ba rapaletšego ka mabitleng, ke swana le ba o se sa ba gopolago, bao ba tšwilego pabalelong ya gago. O ntahletše ka lebitleng fasefase; o nkgohlomeditše ka sekoting sa leswiswi. Kgalefo ya gago e a nkimela, ke pipilwe ke mafula a yona. O nkgaogantše le bagwera ba ka, wa dira gore ba ntšhišingwe; ke tswaleletšwe ka mo ke palelwago ke go tšwa. Mahlo a ka a lapišitšwe ke matshwenyego; ke go llela letšatši ka letšatši; ke emiša matsogo ke go rapela. Kgane ba ba hwilego o ba direla mehlolo? Na bahu ba ka tsoga ba go tumiša? Kgane leratorato la gago go bolelwa ka lona ka mabitleng, goba yona potego ya gago kua tahlegong? Na mehlolo ya gago e tsebja ka maswiswing, goba yona toka ya gago nageng ya ba ba lebetšwego? Morena, nna ke llela wena, ke go rapela e sa le gosasa. Morena, na o ntahlelang? O reng o mphuralela? E sa le ke hlaka go tloga bjaneng ka ba ka nyaka le go hwa. O ntlaišitše ka tše di šiišago, ke fedile. Ke imelwa ke kgalefo ya gago; ka ditlhaselo tša gago tše di šiišago o a mpheleletša. Di mpotapota boka meetse letšatši ka moka; di mpokanela ka mathoko ohle. O nkgaogantše le bagwera le bakgotse, gomme bjale wa ka mokgotse ke leswiswi. Morena, lerato la gago, kilaphetogo, ke tla le opela go ya go ile; ke tla begela batho potego ya gago ka mehla. Ke rile: “Lerato la gago ke la go ya go ile; o hlomile potego ya gago leratadimeng.” Wena wa re: “Ke dirile kgwerano le mokgethwa wa ka; ke ikanne go Dafida, mohlanka wa ka, ka re: ‘Ke tla lotola bogoši bja gago ka mehla; pušo yeno e tla dulela sa ruri.’ ” Sela Magodimo a reta mehlolo ya gago, Morena, le potego ya gago sebokeng sa barongwa. Kgane ke mang kua magodimong yo a kago bapetšwa le Morena? Ke mang gare ga dihlolwa tšeo tša legodimo yo a swanago le Morena, Modimo, Mmoifegi gare ga barongwa, senatla, Motšhabegi gare ga bohle ba ba mo potapotilego? Morena, Modimo Ramaatlaohle, ke mang mokawena? O Ramaatla, Morena, mme potego ya gago ke yona kobo ya gago. O buša lewatle le le gaketšego; o homotša maphoto a a fadilego. O pšhatlagantše mmamogašwa Rahaba, wa o bolaya; o šwalalantše manaba a gago ka maatla a gago a magolo. Legodimo le lefase ke tša gago; ke wena Mothei wa tšona le tšohle tše di lego mo go lona. O Mohlodi wa leboa le borwa; thaba ya Taboro le ya Hermone di go gobela megobo. O tiile e le ruri! Ke wena Ramaatla! Pušo ya gago e hlomilwe ka toka le molao; lerato le potego di bonagala ditirong tšohle tša gago. Go lehlogonolo setšhaba se se tsebago go go reta, se se phelago se kgahla wena, Morena. Se hlaladišwa ke wena letšatši lohle; toka ya gago e se kgontšha go hlompšha. Se a go reta ka ge o se tiiša; ka botho bja gago o re kgontšha go fenya. Mong wa kgoši ya rena ke Morena; mong wa mošireletši yo wa rena ke Mokgethwa wa Israele. O kile wa botša bahlanka ba gago ka pono ba ba botegago wa re: “Ke thušitše mogaletsoko; ke hlomphile yo ke mo kgethilego setšhabeng. Ke hweditše Dafida, mohlanka wa ka, ka mo tlotša ka makhura a ka a makgethwa. Ke tla fela ke mo thekgile ka maatla a ka, mme ona a tla mo tiiša. Manaba a gagwe a ka se kgone go mo khukhunetša, bakgopo ba ka se mo kgone. Ke tla ripitla dira tša gagwe a lebeletše; ke tla swielela ba ba mo hloilego. Ke tla dula ke mo rata, ke mmotegela; ke tla mo kgontšha go fenya. Ke tla mo okeletša mmušo wa tloga Lewatleng la Mediteraniene, wa yo fihla nokeng ya Yufratese. O tla re go nna: ‘O tate, o Modimo wa ka, o sebo se ke tšhabelago go sona.’ Ke tla mo fa maemo a leitšibolo, ka mo dira kgoši ya go feta magoši a lefase. Ke tla dula ke mo rata, ke botegela kgwerano ya ka le yena. Ke tla lotola bogoši bja gagwe ka mehla; ke tla dira gore pušo ya gagwe e swarelele e etše leratadima. “Fela ge ditlogolo tša gagwe di ka nyatša melao ya ka, tša se phele go ya ka mo ke ba laetšego, ge ba ka tshela ditaelo tša ka, ba se phethe melao ya ka, gona ke tla ba otlela dikarogo tša bona gabohloko; ke tla ba hlasela bokgopong bja bona ka dikotlo. Fela Dafida yena nka se lese go mo rata, goba ka lesa go mmotegela. Nka se nyatše kgwerano ya ka le yena, goba ka hlanamela tše ke mo tshephišitšego tšona. “Ke ikanne ka nna mong ke lego yo mokgethwa, gatee ya ba moka, gomme Dafida nka se tsoge ke mo forile. Ke ikanne ka re: Bogoši bja gagwe ke bja go ya go ile, setulo sa gagwe sa bogoši se tla no ba pele ga ka bjalo ka letšatši. Bogoši bja gagwe bo tla dulela ruri boka ngwedi, yona hlatse ye e tshephegago ya leratadimeng.” Sela Fela bjale o galefetše motlotšwa wa gago, wa mo nyatša wa mo lahla. O furaletše kgwerano ya gago le mohlanka wa gago, wa hlompholla kgare ya gagwe, wa e lahlela fase. O kgerešitše merako ya motse wa gagwe, mme dibo tša gagwe wa di fetola mašope. Bafeti bohle ba tsela ba a mo hlakola; o fetogile dikwero go baagišani. O kgontšhitše manaba a gagwe go mo fenya; o ba thabišitše ka moka. O mo dirile gore a fenywe; wa se mo thuše ntweng. Botšhepi bja gagwe o bo fedišitše, wa lahlela setulo sa gagwe sa bogoši fase. O mo tšofaditše e sešo ya ba nako, wa mo apeša kgobogo. Sela O tla iphihla go fihlela neng, Morena? Go ya go ile? O tla tuka bogale go fihlela neng? O se lebale boripana bja bophelo bja ka. Go bopa motho ga gago go holang? Ke mang yo a kago phela a se hwe? Ke mang yo a kago itlhakodiša naleng tša lehu? Mong wa rena, le kae lerato lela la gago la kgale, lela wa go ikanela lona go Dafida ka ge o mmotegela? O se lebale ka mo ke hlapaolwago ka gona, nna, mohlanka wa gago, ka mo ke rwelego mahlapa a ditšhaba, ao manaba a gago a rumolago motlotšwa wa gago ka ona, Morena. A mo rumola gohle mo a yago gona. A go tumišwe Morena go ya go ile! Amene! Amene! Wena Morena, o bile setšhabelo sa rena go tloga melokong ya kgalekgale. Pele o bopa dithaba, o hlola le lefase, o be o le Modimo wa neng le neng, gomme o Modimo go ya go ile. O laela motho gore a boele a be se a bego a le sona; o mo fetoša lerole gape. Mengwaga ye sekete go wena e swana le letšatši la maabane le le fetilego ka pela; e bjalo ka seripana sa nako ya bošego. O re gogola bjalo ka lefula; re feta lefaseng bjalo ka toro. Re bjalo ka mphoka wo o hlogago mosong, wa gola wa thunya matšoba, mantšiboa wa pona wa omelela. O re fediša ka pefelo ya gago; re tšhošwa ke ge o tuka bogale. O bea makgopo a rena pele ga gago, dibe tša rena tša sephiring wa di anega mo o kgonago go di bona. Bophelo bja rena bo kgaotšwa ke pefelo ya gago; bo fela bjalo ka tshebelano. Re phela mengwaga ye masome a a šupago, ye masome a seswai ke ge re na le lerapo; go le bjalo bontši bja yona ke ya tapišego le tlaišego; bophelo bo fela ka pela, ya ba gona ge re ile. Ke mang yo a kilego a kwa bogale bja pefelo ya gago? Ke mang yo a tsebago gore kgalefo ya gago e boifega bjang? Re rute gore bophelo bja rena ke bjo bokopana bjang, gore re tle re hlalefe. A o tla re befelelwa go fihla neng, Morena? Hle, šokela bahlanka ba gago! Mosong wo mongwe le wo mongwe o re tlatše leratorato la gago, gore re dule re opela mme re thabile bophelong bja rena ka moka. Re fe lethabo le le lekanago le mathata ale o ilego wa re rweša ona mengwageng yela ya masetlapelo a rena. Nke rena, bahlanka ba gago, re bone ditiro tša gago, le ditlogolo tša rena di bone letago la gago le legolo. Morena, Modimo wa rena, re lebelele ka botho; re atle go tše re di dirago; hle, go tše re di dirago re atle! Yo a lego ka lehwafeng la Ramadulagodimo, a dulago a šireleditšwe ke Ramaatlaohle, a ka re go yena: “Ke wena setšhabelo sa ka le sebo sa ka; o Modimo yo ke mmotilego.” Gobane ke yena a go phefišago mereo ya barei le malwetši a mašoro. O go šireletša ka diphego tša gagwe; o bolokega ge o hlokometšwe ke yena. O botegela go go šireletša le go go phemela. O ka se boife dikotsi tša bošego, goba go hlaselwa mosegare, le ge e le mauba a a welago batho bošego, goba malwetši a a bolayago mosegare. Le ge ba sekete ba ka bolawa kgauswi le wena, ba dikete tše lesome ka mathoko ohle a gago, wena o ka se kgwathwe ke selo. O tla no lebelela ka mahlo, wa bona ka moo bakgopo ba otlwago ka gona, ka gobane Morena ke setšhabelo sa gago, Yogodimodimo o mo dirile sebo sa gago. O ka se welwe ke kotsi, goba lapa la gago la welwa ke leuba. Modimo o tla laela barongwa ba gagwe gore ba go hlokomele, ba go šireletše gohle mo o yago gona. Ba tla go kuka gore o se thetšwe ke maswika. O tla gata ditau le dinoga, wa gataka ditawana le dipeetla. Modimo o re: “Ke tla phološa yo a nthatago, ka šireletša yo a ntlhomphago. Ge a nthapela ke tla mo kwa; ge a le mathateng ke tla ba le yena. Ke tla mo hlakodiša, ka mo hlompha. Ke tla mo kgotsofatša ka bophelo bjo botelele; ke tla mo thabiša ka go mo phološa.” Ke mo gobotse go go leboga, Morena, le go go opelela ditumišo, wena Ragodimodimo, le go bega leratorato la gago e sa le gosasa, le go anega potego ya gago bošego ka moka ke letša harepa, harepa ya metato ye lesome, ke letša le sekgapa. Gobane wena, Morena, o nthakgaditše ka ditiro tša gago; ke hlalalela tše o di dirilego. Morena, mediro ya gago ke ye megolo bjang! Menagano ya gago ga se ka go iša. Tšeo ke tše mašilo a sa di tsebego; ditlaela ga di di kwešiše. Le ge bakgopo ba hloga bjalo ka sekoro, le badiradibe ka moka ba atlega, sa bona ke go tlo fedišetšwa sa ruri. Eupša wena, Morena, o yo o phagamego go ya go ile. Bona manaba a gago, Morena! Ka kgonthe manaba a gago a a hwa; badirakgopo bohle ba a phatlalatšwa. Nnaena o mphile maatla a nkego a nare; o nthakgaditše gape. Manaba a ka ke a lebelela ka lenyatšo. Badirakgopo ba go ntakana ke ba kwele. Baloki bona ba tla atlega boka mepalema; ba tla letla bjalo ka mesedere ya Lebanone. Ba tsemilwe ka ntlong ya Morena, ba tla atlega dikgorong tša Tempele ya Modimo wa rena. Le ge e šetše e le diputswa, ba tla no fela ba tiile, ba le bjalo ka mehlare ye metala. Seo e tla ba sešupo sa go loka ga Morena. Ke yena sebo sa ka, gomme mo go yena ga go bokgopo. Morena ke kgoši, o apere borena; Morena o tšhepile, maatla ke lepanta la gagwe. O tsemile lefase madulong a lona, gomme le ka se šikinyege. Setulo sa gago sa bogoši se tsemilwe mathomong; wena o bile gona go tloga le go tloga. Phamphamawatle e a rora, Morena; e hlaboša modumo e bopa. Modumo wa meetsemagolo ke wo maatla; wa maphoto a lewatle ke wo maatla le go fetiša; eupša Morena wa legodimo yena ke yo maatla phetelela. Wena melao ya gago e tiile, ga e fetoge; Morena, ntlo ya gago e swanelwa ke bokgethwa go ya go ile. Morena, Modimo wa pušeletšo, wena, Modimo wa tefeletšo, iponatše ka letago. Ke wena Moahlodi wa batho bohle; nanoga, o itefeletše go baikgogomoši ka mo go ba swanelago. Na bakgopo ba tla kgaotša neng go hlalala? Ba tla kgaotša neng, Morena? Badirakgopo bohle ba bolediša mereba ba sa kgaotše; ba bolela ka go kganya. Ba gatakela tšhaba sa gago, Morena; ba gatelela ba e lego lefa la gago. Ba bolaya mohlologadi le mofaladi, le tšhiwana ba e tloša tšatšing, ba re: “Morena ga a di bone; Modimo wa Jakobo ga a lemoge.” Na le tlaeletšeng, lena ba setšhaba sa ka? Le tla hlalefa neng, mašilo tenang? Na mmopatsebe a ka napa a palelwa ke go kwa? Modiraleihlo a ka šitwa bjang ke go bona? Na molai wa ditšhaba a ka napa a se di otle, mola e le yena a rutago batho tsebo? Morena o tseba menagano ya batho; o tseba ge e se na mohola. Go lehlogonolo yo a rutwago ke wena, Morena; go lehlogonolo yo o mo rutago ka molao wa gago. O mo šireletša gore a se welwe ke kotsi, ge yo kgopo yena a epelwa molete. Morena a ka se lahle tšhaba sa gagwe; a ka se tlogele ba e lego lefa la gagwe. Baahlodi ba tla buša ba ahlola ka tshwanelo, gomme baloki bohle ba amogela kahlolo tše bjalo. Ke mang yo a tlago nthikiša bakgopo? Ke mang yo a tlago nthuša go lwa le badiratšempe? Ge nkabe ke se thušwe ke Morena, nkabe ke tšhwile ka ikela nageng ya setu. Ge ke be ke ekwa gore ke a thedimoga, o be o nthekga ka leratorato la gago, Morena. Ge ke be ke balabala kudu ka pelo, o be o nkhomotša. Na o ka šomišana le baahlodi ba babe, ba ba fetolago bobe molao? Ba lakana go bolaya moloki, mohlokamolato ba mo ahlolela lehu. Nnaena botšhabelo bja ka ke Morena; Modimo wa ka ke sona sebo sa ka. O tla ba lefetša bobe bja bona, a ba fediša ka baka la bokgopo bja bona. Morena, Modimo wa rena, o tla ba swielela. Tlaang re tumišeng Morena ka go mo hlabela mekgolokwane! A re mo gobeleng megobo, yena leswika le le re phološago! A re lebaneng naye, re opeleng dikopelo tša tebogo, mme re mo reteng ka dikopelo tša lethabo! Gobane Morena ke Modimo yo maatla, ke Kgoši ye kgolo ya medimo yohle. Lefase ka moka ke la gagwe – go tloga ka fasefase ga lona go fihlela dintlhoreng tša dithaba. Lewatle ke la gagwe, le dirilwe ke yena, le lefase ke la gagwe, o le bopile ka diatla tša gagwe. Tlaang re obameng re mo direleng; a re khunameng pele ga Morena, Mmopi wa rena! Gobane ke yena Modimo wa rena; re setšhaba se a se hlokometšego, re mohlape wo a o fudišago. Nke nkabe le ka mo theetša lehono ge a re: “Le se ke la ngangabala bjalo ka borakgolokhukhu ba lena kua Meriba, bjalo ka mohla wola wa kua Masa lešokeng. Fao ke mo ba kilego ba ntlhohla dipolelo ba nteka, le ge ba be ba bone tše ke ba diretšego tšona. E bile mengwaga ye masome a mane ke tennwe ke setšhaba seo. Ka ba ka re: ‘Ga ba ke ba mpotegela. Ba gana go phetha ditaelo tša ka.’ Ka gona, ka ikana ke galefile ka re: ‘Ba ka se tsoge ba tsene nageng ye ke bego ke ile go ba khutšiša go yona.’ ” Opelelang Morena kopelo ye mpsha! Opelelang Morena, lena bohle ba lefase! Opelelang Morena le mo tumišeng! Letšatši ka letšatši tsebagatšang gore o re phološitše. Begelang ditšhaba letago la gagwe, le batho ka moka dimakatšo tša gagwe. Morena ke yo mogolo mme o tumišega kudu; o boifega go feta medimo ka moka. Gobane medimo yohle ya ditšhaba tše dingwe ke lefeela, eupša Morena yena o hlodile magodimo. Letago le bogoši di mo go yena, Tempele ya gagwe e tletše maatla le lethabo. Retang Morena, lena ditšhabatšhaba, retang letago le maatla a gagwe. Retang leina la Morena la letago; tšeang sehlabelo le tleng ka dikgorong tša gagwe. Le obame pele ga Yomokgethwa ge a hlaga; thothomelang pele ga gagwe, lena batho bohle ba lefase. Botšang ditšhaba ka moka le re: “Morena ke kgoši! Lefase le tsemilwe mme le ka se šutišwe. Morena o tla ahlola ditšhaba ka toka.” A legodimo le thabe, lefase le hlalale; a lewatle le rore le tšohle tše di lego ka go lona. Naga a e goe ka lethabo, le tšohle tše di lego mo go yona! Mehlare ya dithokgwa e tla hlaba mekgolokwane pele ga Morena, gobane o tlilo ahlola lefase. O tla buša ditšhaba tša lefase ka toka le go se kgetholle. Morena ke kgoši, lefase a le gobele! Dihlakahlaka a di thabe ka bontši bja tšona! O apešitšwe ke marumaso. Pušo ya gagwe e theilwe ka toka le molao. O etilwe pele ke mollo wo o tšhumago manaba a a mo dikaneditšego. Magadima a gagwe a bonegela lefase; lefase la re go di bona la thothomela. Dithaba di tologa boka motu pele ga Morena, pele ga Morena wa lefase lohle. Magodimo a bega go loka ga gagwe; ditšhaba tšohle di bogela letago la gagwe. Bakhunamelamedingwana bohle, bao ba go ikgantšha ka dititikwane tša bona, ba segwa ke batho. Medimo ka moka e a mo khunamela. Batho ba Sione ba re go di kwa ba thaba; le metse ya Juda ya gobela dikahlolo tša gago, Morena. Gobane wena, Morena, o Kokamababuši lefaseng ka moka; medimo yohle o e feta kgole. Morena o rata bahloyabobe; o lotola ba ba mmotegelago; o ba hlakodiša dinaleng tša bakgopo. Seedi ke sa go tlela baloki, le lethabo ke la go tlela ba dipelo tše di lokilego. Hee, lena baloki, hlalalelang tše di dirilwego ke Morena! Tumišang yena Mokgethwa! Opelelang Morena kopelo ye mpsha, gobane o dirile mehlolo. O fentše ka maatla a gagwe, maatla a gagwe a makgethwa. Morena o tsebaditše go fenya ga gagwe; go loka ga gagwe a go utollela ditšhaba. O gopotše lerato la gagwe, kilaphetogo, le go botegela tšhaba sa Israele ga gagwe. Batho mo gohle ba bone go fenya ga Modimo wa rena. Gobelang Morena megobo, lena ba lefase lohle! Hlalalang, le gobele le opela. Opelelang Morena le letša dikgapa; letšang dikopelo ka dikgapa le ka diphala le ka diphalafala. Gobelang Morena, Kgoši ya rena, megobo. A lewatle le rore le tšohle tše di lego ka go lona, le lefase le bohle ba ba dulago mo go lona. Dinoka a di ope diatla, le dithaba di gobele megobo mmogo pele ga Morena, gobane o tlilo ahlola lefase. O tla ahlola lefase ka toka, ditšhaba a di ahlola a sa kgetholle. Morena ke kgoši, ditšhaba di a thothomela; o dutše ka godimo ga bakerubi; lefase le a tekema. Morena ke yo mogolo kua Sione, o okametše ditšhaba tšohle. A di go rete, wena senatla, Motšhabegi. Ke wena Mokgethwa! Maatla ke a gago, wena Kgoši, Moratatoka; o dirile gore baahlodi ba ahlole ba sa kgetholle, wa swara Baisraele ka toka le ka tshwanelo. Godišang Morena Modimo wa rena, le mo khunameleng ka go itahlela maotong a gagwe. Ke yena Mokgethwa! Moshe le Arone e be e le bangwe ba baprista ba gagwe, Samuele e le yo mongwe wa barapedi ba gagwe. Ge ba mo llela o be a ba theeletša. O be a bolela nabo a le thololong ya leru; ba phetha melao le ditaelo tše a ba filego tšona. Morena, Modimo wa rena, o be o ba kwa; go bona o be o le Modimo wa tshwarelo, le ge o be o ba otlela dibe tša bona. Godišang Morena Modimo wa rena; le mo khunameleng thabeng ya gagwe ye kgethwa, gobane Morena Modimo wa rena ke yo mokgethwa. Hlabelang Morena mekgolokwane, lena bohle ba lefase! Direlang Morena ka lethabo; tlaang pele ga gagwe le duduetša! Tsebang gore Morena ke yena Modimo. O re bopile gomme ke rena ba gagwe; ke rena setšhaba sa gagwe, re mohlape wa gagwe. Tsenang ka masoro a Tempele ka ditebogo, tsenang ka dikgorong tša yona ka dikopelo tša tumišo. Mo lebogeng le mo reteng. Gobane Morena ke yo botho; lerato la gagwe ke la neng le neng, potego ya gagwe ke ya go ya go ile. Ke tla opela leratorato la gago le toka ya gago. Ke tla go opelela ditumišo, Morena. Ke tla phela ka hloko ke se na bosodi. O tla tla neng go nna? Ke tla phela ka pelo ye e hlwekilego ka ga ka. Nka se gabe selo se sebe; ke hloile ditiro tša bakgelogi, di ka se nkgomarele. Nka se be le pelompe; bokgopo ga ke tsenelane nabjo. Mosebabangwe ke tla mo thiba molomo; moikgantšhi le ramakokwana ba a ntsheleka. Ge e le bašomedi, nna ke ikgethela ba ba botegago mo lefaseng; ba ba hlokago bosodi ke bona ba ba tlago ntšhomela. Moradia yena ka ga ka a ka se dule; mpheane a ka se itebanye le nna. Mosong wo mongwe le wo mongwe ke tla bolaya bakgopo mo nageng, gore ke fediše badiratšempe bohle mo motseng wa Morena. Morena, nke o kwe thapelo ya ka, mme sello sa ka se go fihlele. O se iphihlele nna ge ke le tlalelong; o ntlhwaele tsebe; o se ntiegele ge ke go llela. Bophelo bja ka bo fela bjalo ka muši; mmele wa ka o fiša bjalo ka mollo. Ke itlhobogile, ke ikwa ke omeletše bjalo ka hlaga; ke feletšwe le ke tumo ya dijo. Ke tsetlela godimo; ke šetše ke le marapo fela. Ke swana le leribiši la leganata; ke etša makgohlo ka mašopeng. Ga ke sa swarwa ke boroko; ke bodutung go swana le nonyana tlhakeng ya ntlo. Manaba a ka a hlwela go nthumola; ba go nkgegea ba rogana ka nna. Ka ge o mpefeletšwe o bile o nkgalefetše, molora ke sona sejo sa ka, seno sa ka se tswakane le meokgo, gobane o ile wa ntopa wa ntahlela fase. *** Matšatši a ka a go phela a etša meriti ye e theago; ke pona bjalo ka bjang. Eupša wena, Morena, o buša go ya go ile; setumo sa gago ke sa go sa felego. O tla nanoga wa šokela Sione, gobane ke nako ya go e gaugela, ke nako. Bahlanka ba gago ba kgahlwa ke maswika a yona; ba a šokwa ge e phušogile. Baditšhaba ba tla boifa Morena, le magoši ohle a lefase a tla gakgamatšwa ke letago la gagwe. Mohla Morena a tsoša Sione, o tla tšwelela ka letago la gagwe. O tla theeletša dithapelo tša bahloki, a ka se di tšeiše phefo. Tše di latelago a di ngwalelwe moloko wa ka moso, gore tšhaba se se sa tlilogo hlolwa se tle se tumiše Morena: Morena o lebelela fase a le bodulong bja gagwe bjo bokgethwa kua godimo; o okamela lefaseng a le legodimong, gore a kwe metsetlo ya dibofša, le gore a lokolle baahlolelwalehu. Ke ka baka leo a tlago begwa Sione, a tlago retwa Jerusalema, mohla ditšhaba le mebušo di phuthega gore di khunamele Morena. Nna o nkamogile maatla ke sa le yo mofsa; o mphokoleditše nako ya go phela. Ke moka ka re: “Hle, Modimo wa ka, o se ntšee ke sa le yo mofsa, wena yo mengwaga ya gago e golago le meloko.” Lefase e sa le o le thea kgalekgale, le magodimo o a bopile ka tša gago diatla. Ona a tla feta, fela wena o tla šala; ohle a tla hlagala bjalo ka seaparo; o a lahla boka seaparo sa leratha, gomme a feta. Fela wena o dula o sa fetoge, le mengwaga ya gago ga e fele. Bana ba bahlanka ba gago ba tla lotega, le ditlogolo tša bona di tla no phela di na le wena. A ke rete Morena! A ke tumiše leina la gagwe le lekgethwa ka pelo ya ka ka moka. A ke rete Morena, ke se lebale tše a ntirelago tšona: O ntebalela makgopo a ka ka moka; o mphodiša malwetši a ka ohle. O ntlhakodiša lehung; o a ntlhompha, a nthata, a ntšhokela. Bophelong bja ka ka moka o mpha tše botse ka bontši, gore ke no fela ke tiile, ke le yo mofsa bjalo ka ntšhu. Morena o fa bagatelelwa ditshwanelo tša bona, o ba ahlola ka toka. O tsebišitše Moshe maikemišetšo a gagwe, o laeditše Baisraele ditiro tša gagwe. Morena o na le kgaugelo le lešoko; ga a befelwe ka pela, mme o tletše leratorato. Ga a dule a kgalemela motho; ga a befelwe go ya go ile. Ga a re otle go ya ka moo re sentšego ka gona, goba a itefeletša ka baka la dibe tša rena le makgopo a rena. Bjalo ka ge legodimo le katologile lefase kudu, ba ba mmoifago le bona o ba rata kudu. Bjalo ka ge bohlabela bo tlogelane le bodikela, le rena o re tlogelanya le dibe tša rena. Morena o hlokomela bao ba mmoifago, go swana le tatagobana ge a hlokomela bana ba gagwe. O tseba se re bopilwego ka sona – ga a lebale gore re lerole. Motho o phela nako ye kopana go swana le bjang, o bjalo ka letšoba la naga le le khukhušago. Ge phefo ye e tšhumago e foka, le a hwa, la timelela. Eupša bao ba boifago Morena bona o ba rata go ya go ile, mme o botegela meloko ya bao ba botegelago kgwerano ya gagwe, gape ba phethago ditaelo tša gagwe ka potego ka go latelana ga meloko. *** Morena o beile setulo sa gagwe sa bogoši legodimong; ke kgoši ya tšohle. Retang Morena, lena barongwa ba gagwe, lena bagale ba maatla, ba le phethago ditaelo tša gagwe, le theetšago se a se bolelago. Retang Morena, lena dibopiwa tšohle tša legodimo; lena bahlanka ba gagwe ba le dirago thato ya gagwe! Retang Morena, lena dibopiwa tša gagwe ka moka gohle mo a bušago gona. A ke rete Morena! A ke rete Morena! Wena Morena, Modimo wa ka, o yo mogolo kudu! O apere bogoši le letago; o apara seetša bjalo ka kobo. O phurolotše leratadima bjalo ka tente, wa aga legae godimo ga meetse a ka godimo. Maru o a dira koloi ya gago ya ntwa, mme o namela diphego tša phefo. Diphefo o di dira batseta ba gago, mola magadima e le bahlanka ba gago. O tsemile lefase metheong ya lona, mme le ka se tsoge le šuthile. O le apešitše lewatle bjalo ka seaparo, mme meetse a khupetša dithaba. A a tšhaba ge o a kgalemela; a ela ka lephakuphaku ge a ekwa modumo wa lentšu la gago. A ela a tloga le dithabeng a theogela ka meeding, lefelo leo o a kgethetšego lona. O a beetše mollwane wo a ka se kego a o tshela; a ka se tsoge a khupeditše lefase gape. O ediša meetse a methopo ka meeding, le dinoka tša ela mokgahlo ga dithaba. Meetse a tšona a nwewa ke diphoofolo tšohle tša naga; ke moo dipitsi di itimolago lenyora gona. Mehlareng ya kgauswi le dinoka dinonyana di ikagela dihlaga, tša letša melodi makaleng. O nešetša dithaba pula e etšwa legodimong, mme lefase la nwa meetse a yona go kgolwa. O hlogišetša dikgomo bjang, motho wa mo medišetša dibjalo, gore a tle a hwetše dijo mobung, a itirele beine ya go mo thabiša, le makhura a mohlware a go mo ediša sefahlego, le dijo tša go mo tiiša maatla. Mesedere ya Lebanone e nelwa ke pula ya matlorotloro – ke mehlare ya gago, Morena, ye o e bjetšego. Ke fao dinonyana di ikagelago dihlaga; megolodi e aga dihlaga mehlareng ya mephaene. Maolo a magolo ke gagabodikome, mme marako ke botšhabelo bja dipela. O bopile ngwedi ya ba taetšamabaka; letšatsi le tseba nako ya lona ya go dikela. O hlola leswiswi ya ba bošego, gwa tšwa phoofolo tšohle tša naga. Ditawana di a rora ge di tsoma, di nyaka dijo tše di di fiwago ke Modimo. Ge letšatši le hlaba di boela morago, tša yo patlama ka digoleng tša tšona. Ya ba gona batho ba yago medirong ya bona, ba hlwa ba šoma go fihlela mantšiboa. Morena, tše o di dirilego ga se ka bontši! Tšohle o di dirile ka bohlale; lefase le tletše dibopiwa tša gago. Go na le lewatle, ke le legolo le ikadile, ka go lona go na le diphedi tše ntšintši, tše kgolo le tše nnyane. Maselawatle a sepela godimo ga lona, le Lebiathane, mamokebe wola o o bopilego, o bapala ka go lona. Tšohle di lebeletše wena gore o di fe dijo ka nako ye e swanetšego. Wa di fa tšona, di a ja; wa di fepa, di ja go khora. Wa di furalela, di a boifa; wa di amoga moya, di a hwa, tša boela leroleng mo di tšwago gona. Eupša wa di budulela, di phela gape; mobung le gona o tsoša bophelo ka bofsa. A letago la Morena e be la go ya go ile! A Morena a kgahlwe ke tše a di hlodilego! Yo e rego ge a lebelela lefase, la šikinyega; e rego ge a kgwatha dithaba, tša tupa muši. Ke tla opelela Morena bophelong bja ka ka moka; ge ke sa phela ke tla opelela Modimo wa ka ditumišo. A a kgahlwe ke kopelo ya ka; nna ke thabela tše Morena a di dirilego. A badiradibe ba fedišwe lefaseng; bakgopo a ba se hlwe ba le gona. A ke rete Morena! Retang Morena! Lebogang Morena, le mo rapele; begelang ditšhaba ditiro tša gagwe. Mo opeleleng le mo tumiše, le anege mehlolo yohle ya gagwe. Mo tumišeng ka ge e le yo mokgethwa; bohle ba ba mo khunamelago a ba hlalale. Nyakang thušo go Morena, le dule le mo khunamela. Lena ditlogolo tša Abrahama, mohlanka wa Morena, lena bana ba Jakobo le kgethilwego, gopolang mehlolo ye Morena a e dirilego, dimakatšo le dikahlolo tša gagwe. *** Morena ke yena Modimo wa rena; ke yena a ahlolago lefase ka moka. Kgwerano ya gagwe ga a e lebale, e lego se a se holofeditšego meloko ye sekete, kgwerano ye a e dirilego le Abrahama, keno ye a e enetšego Isaka. A tiišetša kgwerano ya ba molao mo go Jakobo, kgwerano ye e tlago dulela sa ruri go yena Israele, a re: “Ke tla go fa naga ya Kanana, ya ba lefa le ke go abelago lona.” Ke ge e sešo ya ba ba bantši, e le ba mmalwa fela, le gona e le bafaladi mo nageng, ba ralala le ditšhaba, ba tloga mmušong wo mongwe ba eya go wo mongwe. Fela Morena a se dumelele motho go ba gatelela, a kgala magoši e le go ba šireletša a re: “Le se kgome batlotšwa ba ka; baprofeta ba ka le se ba kweše bohloko.” A wiša tlala mo nageng; dijo ka moka tša fela. A roma monna a ba etelela pele, e lego Josefa, yo a bego a rekišitšwe ya ba lekgoba. A kgokwa maoto ka diketane, a tlengwa le molala, go fihlela go phethega se a se boletšego. Lentšu la Modimo la mo hlatsela gore o rerešitše. Ke mo kgoši a laetšego gore a kgokollwe; a lokollwa ke yena mmuši wa ditšhaba. A mmea molaodi ka lapeng la gagwe, ya ba mohlokomedi wa thoto yohle ya gagwe, gore a laole bahlankedi ba ka mošate ka mo a bonago go lebane, le gore a rute bakgomana bohlale. Ya ba gona Israele a yago Egepeta, ee, Jakobo a falalela nageng ya Hamo. Morena a atiša tšhaba sa gagwe, gomme a se tiiša go feta manaba a sona. A hloiša tšhaba sa gagwe manaba, a a dira gore a sware bahlanka bao ba gagwe ka bomenetša. A roma Moshe, mohlanka wa gagwe, le Arone yo a bego a mo kgethile. Ba dira mehlolo gare ga manaba, le dimakatšo nageng ya Hamo. A romela leswiswi mme la swara, fela ba gana. A fetola meetse a bona madi, mme a bolaya hlapi tša bona. Naga ya bona ya tlala digwagwa, ešita le ka diphapošing tša mošate. A laela gore diboba le menang di tle, mme tša tlala naga. A ba nešetša sefako bakeng sa pula, le magadima a ratha mo nageng ya bona. A rothotha merara le mego ya bona, a ratha le mehlare ya naga ya bona. A laela tšie gore e tle, gwa nyeuma metšhitšhi ya bojane. Ya ja dimela lailai mo nageng, e lego dibjalo tšohle tša bona. A bolaya maitšibolo ohle mo nageng, maitšibolo ka moka a bona. Ke moka a huduša Baisraele ba rwaleletše silibera le gauta, dikgorong tša bona go se na yo a šalelago. Baegepeta ba thaba ge Baisraele ba tloga, gobane ba be ba ba boifa kudu. Morena a ba apeša leru la ba khurumetša, bošego a ba bonegela ka mollo. Ya re ge ba kgopela a tliša dikhwiri, a ba khoriša ka dijo tša legodimong. A pharola leswika, meetse a falala, a ela lešokeng bjalo ka noka. Ke ka gobane a be a se a lebala kholofetšo ye kgethwa ye a e filego Abrahama, mohlanka wa gagwe. A huduša setšhaba sa gagwe ka tlhalalo, bona ba a ba kgethilego a ba ntšha ka megobelo. A ba fa dinaga tša baditšhaba, ba tšea le tše merafe ye mengwe e ikhweleditšego tšona ka bothata, gore ba phethe ditaelo tša gagwe, ba hlomphe melao ya gagwe. Retang Morena! Retang Morena! Mo tumišeng ka gobane ke yo botho; lerato la gagwe ke la go ya go ile. Ke mang yo a ka anegago ditiro tša gagwe tše maatla? Ke mang yo a ka begago ditumišo tša gagwe ka botlalo? Go lehlogonolo ba ba phethago taelo tša gagwe, ba ka mehla ba dirago tše di lokilego. Morena, o nkgopole ge o dira tšhaba sa gago ka botho; o mpale le bona ge o ba phološa, gore ke bone katlego ya ba o ba kgethilego, gore ke thabe le tšhaba sa gago se se thabilego, gore ke ikgantšhe ka wena le ba e lego ba gago. Re dirile dibe ra etša borakgolokhukhu ba rena; re ikobetše molato. Borakgolokhukhu ba rena kua Egepeta ba be ba sa hlathe mehlolo ya gago, ba be ba sa nagane ka lerato la gago le o ba bontšhitšego lona gantšintši, ba go tsogela maatla kua lebopong la Lewatle la Mahlaka. Le ge go le bjalo, Morena a fela a ba phološa ka ge e le Modimo, gore a ba bontšhe maatla a gagwe. A kgalema Lewatle la Mahlaka, la pšha; a ba sepetša ka bodibeng boka mo go omilego. A ba hlakodiša dinaleng tša bahloi ba bona, a ba phološa diatleng tša manaba a bona. Meetse a khupetša manaba ao, gwa se šale le o tee. Ke mo setšhaba se dumetšego tše a ba holofeditšego tšona, gomme sa mo opelela ditumišo. Fela ba lebala ka pela tše a ba diretšego tšona; ba se letele maele a go tšwa go yena. Ba laolwa ke ditumo tša bona šokeng, gomme ba leka Modimo leganateng. Yena a ba fa se ba se kgopelago, kganthe o tla ba tlišetša le bolwetši bja go ba otiša. Kua mešašeng ba be ba tsebafela Moshe, le yena Arone, mokgethwa wa Morena. Ke mo lefase le pharogilego la metša Datane a wela; le Abiramo a ribegetšwa le lekokwana la gagwe. Gwa tuka mollo ka gare ga lekokwana leo, bakgopo bao ba tšhungwa ke kgabo ya wona. Ba bopa powana kua thabeng ya Horebe, ba khunamela seswantšhobopša seo. Bakeng sa go khunamela Modimo yo a swanelwago ke go tumišwa, ba khunamela seswantšho sa poo ye e fulago bjang. Ba lebala Modimo, Mophološi wa bona, yena wa go dira tše dikgolo kua Egepeta, wa go dira mehlolo nageng yeo ya Hamo, le tše di gakgamatšago Lewatleng la Mahlaka. Yena a re o a ba fediša, eupša Moshe, yo Modimo a mo kgethilego, a ba phophothela, gore a se sa ba fediša a ba galefetše. Ba galala naga ye botse ka ge ba be ba sa kgolwe se a ba holofeditšego sona. Ba munamuna ba le mešašeng ya bona, ba se theeletše tše Modimo a di bolelago. Ke ge a ikana go bona a emišitše letsogo a re o tla ba lesa ba hwela lešokeng, ditlogolo tša bona a di phatlalatša le dinaga, a di lesa di hwela baditšhabeng. Ba khunamela Baale, modimo wa Bapeore; ba ja didimo tša medingwana ya go se phele. Ba rumola Morena ka ditiro tša bona, mme ba tsenwa ke bolwetši bja leuba. Finease a nanoga a otla basenyi; ya ba gona leuba le kgaotšago. Se Finease a se dirilego sa bonwa se lokile go iša go sa felego. Kua meetseng a Meriba ba ile ba galefiša Morena, Moshe a ba a senyegelwa ke ditaba ka baka la bona. Ba be ba mo tenne mo a ilego a ba a phonyokgwa ke leleme. Le gona ba be ba se ba fediša baditšhaba ka mo Morena a bego a ba laetše; ba nyalelana le bona, ba phela bjalo ka bona. Ba khunamela medingwana ya bona, mme yona ya ba mereo go bona. Ba direla bademone didimo ka barwa le barwedi ba bona. Ba bolaya bana ba ba se nago molato ka go direla medingwana ya Kanana didimo ka barwa le barwedi ba bona. Ba itšhilafatša ka ditiro tše dibjalo, gomme ka mediro ya bona ba bontšha go se botegele Modimo. Ka gona Morena a galefela tšhaba sa gagwe; a šišimišwa ke ba e lego lefa la gagwe. A ba gafela ditšhaba, gomme ba bušwa ke dira tša bona. Manaba a bona a ba gatelela, a ba šitiša go tsoša hlogo. Ke gantši a ba hlakodiša, eupša bona ba mo tsogela maatla ka boomo; ba bolawa ke bokgopo bja bona. Le ge go le bjalo, ge a ekwa ba lla ba le tlalelong, o be a ba šokela. Ka baka la bona a se lebale kgwerano ya gagwe, a upša a ba hlomogela pelo, ka ge a ba rata kudu. A dira gore bathopi bohle ba bona ba ba kwele bohloko. Re phološe, Morena, Modimo wa rena; re kgoboketše re boe ditšhabeng, gore re tle re go tumiše, wena Yomokgethwa, re ikgantšhe ka ditiro tša gago tše di makatšago. A go tumišwe Morena Modimo wa Israele, go tloga le go tloga, le go iša go sa felego! A setšhaba ka moka se re: “Amene!” Retang Morena! Retang Morena, gobane ke yo botho; lerato la gagwe ke la go ya go ile. A ba realo, baphološwa ba Morena, bona ba go phološwa maatleng a manaba a bona, bao a ba kgobokeditšego go tšwa mafaseng, go tšwa bohlabela le bodikela, leboa le borwa. Bangwe ba be ba ebela le lešoka leganateng, ba sa bone tsela ya go ya motseng mo ba kago dula gona. Ba be ba swarwa ke tlala le lenyora, gomme ba felelwa ke maatla. Ke mo ba bego ba llela Morena ba gakanegile, gomme a ba hlakodiše tlalelong ya bona. A ba tšeiša ka tsela ya nnete, ya go ba iša motseng mo ba kago dula gona. A ba rete Morena ka baka la lerato la gagwe, kilaphetogo, le mehlolo ye a e direlago batho. O kgodiša yo a swerwego ke lenyora, mme monatlala o mo khoriša tše dibose. Bangwe ba be ba dula swiswing le lesoleso, ba tlemilwe ka diketane mme ba tlaišwa kudu, ka ge ba be ba nyaditše taelo tša Modimo, ba ganne le leano la yena Ragodimodimo. Yena a ba nyamiša dipelo ka go ba šomiša gaboima; ya re ge ba thetšwa, ba hloka mothuši. Ke mo ba lletšego Morena ba gakanegile, gomme yena a ba hlakodiša tlalelong ya bona. A ba ntšha swiswing le lesoleso, a kgaola ditlemo tša bona. A ba rete Morena ka baka la leratorato la gagwe, le tše dikgolo tše a di direlago batho. Gobane o robagantše dikgoro tša metse tša mphiri, a robaganya le mapheko a tšona a tshipi. Bangwe ba be ba šilofatšwa ke go hlokomologa melao ya Modimo, gomme ba otlwe ka baka la bokgopo bja bona. Ba be ba šišingwa sejo sefe le sefe, ba eba kgauswi le go hwa. Ke mo ba bego ba llela Morena ba gakanegile, gomme a ba hlakodiše tlalelong ya bona. O be a ba fodiša ka taelo fela, gomme a ba hlakodiše lehung. A ba rete Morena ka baka la leratorato la gagwe, le mehlolo ye a e direlago batho. A ba mo direle dihlabelo tša tebogo, ka megobo ba bege tše a di dirilego. Bangwe ba be ba thala mawatleng ka maselawatle, ba gweba ka go rwala diphahla ka tšona. Ba be ba bona tiro tša Morena, dimakatšo tša gagwe phampheng ya bodiba, tša ge a laela, mme go tsoga ledimo, la galefiša maphoto. Boralewatle ba be ba fefeulelwa godimodimo sebakeng, ba boe ba lahlelwe fase bodibeng, mme kotsing tše bjalo ba itlhoboge. Ba be ba tlaruma, ba thekesela boka ditagwa, gomme bokgoni bja bona bo sa ba thuše ka selo. Ke mo ba bego ba llela Morena ba gakanegile, gomme a ba ntšhe tlalelong ya bona. A homotša ledimo, gomme maphoto ale a se sa gakala. Ba thaba ge go thotše, gomme a ba iša boemakepeng bjo ba bo nyakago. A ba rete Morena ka baka la lerato la gagwe, kilaphetogo, le mehlolo ye a e direlago batho. A ba mo tumiše phuthegong ya setšhaba sa gagwe, ba mo rete lekgotleng la ba bagolo. O pšheša dinoka ya ba lešabašaba fela, meela ya meetse ya oma. Mobu wa go nona o o fetola lehwafa ka baka la bokgopo bja badudi ba moo. Leganata o le fetola megobe, lekwala a le fetola methopo ya meetse. Ba ba hlokago dijo o ba dudiša moo, ba ikagela motse ya ba bodulo bja bona. Ba lema mašemo ba bjala le merara, mme ba buna gagolo. A ba šegofatša mme ba ata kudu; a ba okeletša le maruo. Fela palo ya bona e ile ya fokotšega, mme ba nyamišwa ke go imelwa ke dikotsi le mahloko. Babuši a ba nyatšiša batho, a ba raladiša le mašoka a a se nego ditsela. Bahloki bona a ba ntšha mahlomoleng a bona, a ba atišetša meloko ya etša dihuswane. Baloki ge ba di bona ba thaba, bakgopo bona ba hloka molomo. Ba ba hlalefilego a ba šetše taba tše, gomme ba nagane leratorato la Morena. Ke itiišitše pelo, Modimo. Ke tla opela ke go tumiša; ruri, seo ke se ke tlago se dira. A ke tsoge ka mahwibi ke letša harepa le sekgapa. Morena, ke tla go tumiša ditšhabeng; ke tla go reta merafeng, gobane leratorato la gago, kilaphetogo, ga le kaaka, le phagame go feta magodimo, le potego ya gago e fihla marung. Modimo, bontšha bogolo bja gago magodimong a godimodimo; letago la gago a le aparele lefase lohle. Re hlakodiše ka maatla a gago; ekwa thapelo ya ka, gore baratiwa ba gago ba phologe. Modimo o boletše ka sekgethweng sa gagwe a re: “Ke tla abaganya naga ya Shekeme ke thabile, ka arolanya moedi wa Sukote. Naga ya Gileade ke ya ka, le ya Manase; ya Efraime ke kuane ya ka ya tshipi, gomme ya Juda ke molamo wa ka wa bolaodi. Ya Moaba yona ke sehlapelo sa ka, gomme ya Edomo ke ya go lahlela dieta tša ka; ya Filistia ke tla e gobela megobo ya phenyo.” Ke mang yo a tlago nkiša motseng wo o ageleditšwego ka morako? Ke mang yo a tlago nkiša Edomo, ge e se wena, Modimo, yo o re lahlilego, wena yo o se sa tšwago dira le rena? Hle, re thuše ge re elwa le manaba a rena, gobane thušo ya motho yona ke lefeela. Ge re na le Modimo re tla lwa senna; ke yena yo a tlago re gatakelela manaba. Modimo, wena Motumišwa wa ka, se nkhomolele. Bakgopo le ba maaka ba a mphara, ba mpega ka taba tša maaka. Ba nkgobotla ka taba tša lehloyo, ba nthumola ntle le lebaka. Lerato la ka ba le lefa ka go ntlhoya, le ge nna ke ba rapelela. Ba mpušetša botse ka bobe, lerato ba mpušetša lona ka lehloyo. Ba re: “Mmeele yo kgopo gore a mmege a eme kgauswi le yena. Ge a sekišwa a bonwe molato; le thapelo ya gagwe e tšewe e le bosenyi. Matšatši a gagwe a a fokotšege, le modiro wa gagwe o tšewe ke mongwe. Bana ba gagwe a e be ditšhiwana, le mosadi wa gagwe e be mohlologadi. Bana ba gagwe a e be bakgopedi ba go ebela, ba ba rakilwego magaeng a bobona a a fetogilego mašope. A a hulwe thoto yohle ke moadimi wa gagwe, mme tše a di šometšego di thopše ke bašele. A a hloke wa go mmotegela, le ditšhiwana tša gagwe di hloke mošokedi. A ditlogolo tša gagwe di fedišwe, mme leina la bona le phumolwe molokong wo o tlago. A Morena a se lebale dikarogo tša borakgolokhukhu ba gagwe, le mmagwe a se ke a phumolelwa dibe tša gagwe. A Morena a dule a gopola dibe tša bona, ge e le bona beng a ba lebalele sa ruri. “Motho yoo ga se a ka a rata go ba le botho; sa gagwe e be e le go hlomara le go bolaya mohlaki le mohloki le ba ba hlomogilego dipelo. O be a rata go roga batho – le yena a a rogwe; o be a sa kwane le go šegofatša bangwe – le yena tšhegofatšo a a e hloke! Go roga batho e be e le sona seaparo sa gagwe; a maroga a gagwe a mmoele, a nwelele go yena boka meetse; a a tsenelele marapong a gagwe go etša makhura. A a mo tate boka kobo ye a e aparago, a etše lepanta le a ipofago ka lona mehleng.” Bantlhoi a Morena a ba otle ka mokgwa woo, bona ba ba mpolelago gampe. Fela wena, Morena, Mong wa ka, o ntire ka mo go lebanego; ka ge o nthata mme o ntoketše, o mphološe. Gobane nna ke mohlaki, ke a itlhokela, mme ke hlomogile pelo. Ke feta boka moriti wo o theago, ke hlohlorilwe bjalo ka tšie. Dikhuru tša ka di a ntatola ka ge ke hloka dijo; ke gwametše, ke otile. Ba ba mponago ba a nkgegea, ba šikinya dihlogo ba nnyefola. Nthuše, hle, Morena, Modimo wa ka; ntlhakodiše ka ge o nthata ka leratorato. A ba lemoge ge tšeo e le mediro ya gago; ba tsebe ge di dirilwe ke wena, Morena. Le ge ba ntswirinya, wena o tla ntšhegofatša; ge ba ntlhasela, ba segwe ke batho, gomme nna, mohlanka wa gago, ke tla thaba. Bantlhoi a ba apešwe dihlong, ba phuthelwe ka kgobogo boka ka kobo. Nna ke tla tumiša Morena ke ahlame; ke tla mo reta ke le ka gare ga lešaba, gobane o lamolela mohlaki, o mo lwela go ba ba ka mo tšwago. Morena o rile go kgoši, mong wa ka: “Dula ka letsogong la ka la mmagoja ke be ke tle ke go fenyetše manaba a gago.” Morena o tla atiša pušo ya gago a le Tempeleng ya gagwe a re: “Buša manaba a gago.” Mohla o rapa dira setšhaba sa gago se tla ithaopa. Masogana a gago a tla tla go wena a itlhamile ka tša ntwa ye kgethwa, a tsarogile phoka ya masa. Morena o ikanne gomme a ka se hlaname; o rile: “O moprista go ya go ile wa boprista bja go swana le bja Melkitsedeke.” Morena o go thuša ntweng; mohla a galefile o pšhatlaganya magoši. O tla ahlola ditšhaba a ba a di otla, gwa tlala ditopo; o tla fediša babuši gohle lefaseng. Kgoši e tla nwa ka nokaneng ya kgauswi ga tsela, a re go lapologa a lwa mme a fenya. Retang Morena! A ke tumiše Morena ka pelo ya ka yohle ke le mo sehlopheng sa ba ba lokilego, ke le mo phuthegong ya tšhaba sa gagwe. Mediro ya Morena ke ye megolo; e swanelwa ke go nagantšhišwa ke bohle ba e ba kgahlago. Tše a di dirago ke tša bothakga le bogoši, le go loka ga gagwe ke ga go ya go ile. Morena o re gopotša mehlolo ya gagwe; ke yena wa botho le wa kgaugelo. Ba ba mmoifago o ba fa dijo, ga a lebale kgwerano ya gagwe. O bontšhitše tšhaba sa gagwe maatla ao a šomago ka ona ka go se fa dinaga tša baditšhaba. O a botega, o lokile go tšohle tše a di dirago; ditaelo tša gagwe tšohle di a tshephega. Di duletše sa ruri, di swanetše go phethwa ka potego le ka go loka. O phološitše setšhaba sa gagwe; o se laetše go botegela kgwerano ya gagwe go ya go ile. Ke yo mokgethwa, o a tšhabega! Go boifa Morena ke ona mathomo a bohlale; ba temogo ke bohle ba ba phelago bjalo. O tumišwa go ya go ile. Retang Morena! Go lehlogonolo motho yo a boifago Morena, yo a kgahlwago kudu ke go phetha melao ya gagwe. Ditlogolo tša gagwe e tla ba tše maatla mo lefaseng; e tla ba moloko wo lehlogonolo wa baloki. Ka ga gagwe go tla ba le mahumo le maruo, le go loka ga gagwe go tla dulela sa ruri. Mo go baloki o taga boka seedi leswiswing; ke yo botho, ke wa lešoko le wa go loka. Yo a adimago bangwe a sa dikadike; yo a phethago taba tša gagwe ka mo go mo lebanego, tša gagwe di a mo lokela. A ka se tsoge a paletšwe go tše a di dirago; moloki o gopolwa go ya go ile. Ga a tšhošwe ke taba tše bohloko; o na le sebete, o botile Morena. O beta pelo, ga a boife selo, a be a fetše ka go bogela manaba a gagwe a fentšwe. Ke mafakudu wa bahloki; go loka ga gagwe ke ga go ya go ile. E tla ba yo maatla, wa go hlomphega. Yo kgopo a di bona, a lomantšha meno, a tšewa ke pelo, a nyamelela; gape bakgopo ga ba ke ba tšwelela ditumong tša bona. Retang Morena! Lena bahlanka ba Morena, mo reteng! A go tumišwe Morena go tloga bjale go ya go ile. Go tloga bohlabatšatši go ya bodikelatšatši a go tumišwe yena Morena. Morena o okametše ditšhaba tšohle, letago la gagwe le okametše magodimo. Ke mang wa go lekana le Morena, Modimo wa rena, e lego yena Ramadulagodimo, yena wa go okamela legodimo le lefase, mme a di bonela fasefase? O tsoša mohlaki leroleng, le mohloki o mo ntšha mathateng a gagwe, a mo dudiša le bakgomana, bakgomana ba tšhaba sa gagwe. O fa mosadi wa moopa maduledi ka gae, a mo dira mmagobana yo a thabilego. Retang Morena! Ge Baisraele ba tloga Egepeta, ge ditlogolo tša Jakobo di tloga morafeng wola wa go bolela leleme le šele, Juda e ile ya ba tšhaba se sekgethwa sa Modimo, Israele ya ba mmušo wa gagwe. Lewatle le rile go di bona la tšhaba, Jordane ya katakata ka sa morago. Dithaba tša tsheletshela boka dikgapa, meboto ya kganakgana boka dikwanyana. Wena lewatle, o tšhabelang? Wena Jordane, o reng o katakata? Lena dithaba, le reng le tsheletshela boka dikgapa? Lena meboto, ke eng le kganakgana boka dikwanyana? Wena lefase, thothomela ge go etla Mong wa gago, ee, ge go etla Modimo wa Jakobo, yena a fetolago leswika mogobe wa meetse, legakabje a le fetola sediba. O se tumiše rena, Morena, o se tumiše rena, o itumiše, wena mong, o itumišetše lerato la gago, kilaphetogo, le potego ya gago. Baditšhaba ba reng ba botšiša ba re: “Etse Modimo wa bona o kae?” Gape rena Modimo wa rena o legodimong; o dira tšohle tše a di ratago. Ya bona medimo ke ya silibera le gauta; ke ya go bopša ke batho ka diatla. E na le melomo, fela ga e bolele; e na le mahlo, fela ga e bone. E na le ditsebe, eupša ga e kwe; e na le dinko, eupša ga e dupe. E na le diatla, fela ga e sware; e na le maoto, fela ga e sepele; ga e kgone le ka go ntšha modungwana ka megolo ya yona. Babopi ba yona ba tla swana nayo, le bohle ba ba e botilego. Lena, Baisraele, botang Morena; ke yena Mothuši le Mofahledi wa lena. Lena lešika la Arone, botang Morena; ke yena Mothuši le Mofahledi wa lena. Lena ba go boifa Morena, mmoteng; ke yena Mothuši le Mofahledi wa lena. Morena ga a re lebale, gomme o tla re šegofatša; o tla šegofatša Baisraele; a šegofatša le lešika la Arone. O tla šegofatša ba ba mmoifago, ba bagolo le ba banyenyane. A Morena a le atiše, lena le bana ba lena. A Morena a le šegofatše, yena a hlodilego legodimo le lefase. Legodimo ke la Morena a nnoši, lefase lona o le file batho. Ga se bahu ba ba tumišago Morena, ga se ba ba iketšego nageng ya setu; ke rena ba re phelago ba re tlago tumiša Morena, go tloga bjale go ya go ile. Retang Morena! Nna Morena ke a mo rata, gobane ge ke mo llela o a nkwa. Ke tla no dula ke mo rapela ge ke sa phela, ka gobane o ntlhwaela tsebe. Ke be ke rarilwe ke ditlemo tša lehu, ke dikaneditšwe ke poifo ya bodulabahu, ke tlaletšwe ke bile ke gakanegile. Ke mo ke lletšego Morena ka re: “Ke a go rapela, Morena, ntlhakodiše!” Morena ke Mogaugedi ebile ke Moloki, Modimo wa rena ke wa lešoko. Morena o babalela ba ba sa kgonego go ithuša; nna o mphološitše ke šetše ke itlhobogile. A ke boele ke fole maswafo, gobane Morena o ntoketše. O ntlhakodišitše lehung, a mphumola le meokgo, a ba a mphefiša go kgopša. Ke tla dula ke hlokometšwe ke Morena ge ke sa le nageng ya ba ba phelago. Tumelo yona ga se ya ka ya mphelela, le mola ke ekwa gore bjale gona go padile. Ge ke boifa bjalo, ka re: “Motho wa nama yena ga a tshephagale!” Morena ke tla mo leboga bjang ka baka la tšohle tše a ntiretšego tšona? Ke tla mo neela seloba sa seno sa go mo leboga ka ge a mphološitše. Ke tla phetha dikeno tša ka ke bonwa ke tšhaba sohle sa gagwe. Lehu la ba ba botegelago Morena ga se taba ye nnyane go yena. Mmalo, Morena, ke nna mohlanka wa gago, ke go hlankela boka mma yo a bego a go hlankela. O ntlemolotše ditlemong tša lehu. Ke tla go neela sehlabelo sa tebogo, ka go rapela. Ke tla phetha dikeno tša ka ke bonwa ke tšhaba sohle sa Morena ka kgorong tša Tempele ya gagwe, ke le ka gare ga gago, wena Jerusalema. Retang Morena! Retang Morena, lena ditšhaba tšohle! Mo reteng, lena merafe ka moka! Gobane o re rata kudu ka lerato la gagwe, kilaphetogo; o re botegela go ya go ile. Retang Morena! Retang Morena, gobane ke yo botho; lerato la gagwe ke la go ya go ile. Baisraele a ba re: “Lerato la gagwe ke la go ya go ile.” Ba lešika la Arone a ba re: “Lerato la gagwe ke la go ya go ile.” Ba ba boifago Morena a ba re: “Lerato la gagwe ke la go ya go ile.” Mola ke le tlalelong ke ile ka rapela Morena, gomme a nkwa, a ntlhatlola. Ka ge Morena a na le nna ga ke boife; motho wa nama yena a ka ntirang? Morena o na le nna gore a nthuše; ka gona ke tla bogela manaba a ka a fentšwe. Go kaone go khuta ka Morena, go na le go ikanya motho wa nama. Go kaone go khuta ka Morena, go na le go ikanya babuši. Ke be ke dikaneditšwe ke baditšhaba bohle, mme ka ba phaya ka thušo ya Morena. Ba be ba ntikaneditše ba ntsentšhitše gare, fela ka ba phaya ka thušo ya Morena. Ba be ba mpokanela bjalo ka dinose, fela ba lauma ka pela boka mollo wa mašaša a meetlwa, mme ka ba phaya ka thušo ya Morena. Ba be ba ntlhasela wa go mphekeetša, fela Morena a nthuša. Nna ke maatlafatšwa ke Morena, o a ntiiša; ke yena Mohlakodiši wa ka. Baloki ba gobela ka mekutwaneng ya bona ka ge ba fentše, ba re: “Modimo o dira dimaka ka maatla a gagwe. Ka maatla a gagwe o re kgontšhitše go fenya; Modimo o dira dimaka ka maatla a gagwe.” Nna nka se hwe, ke tla phela, ka bega ditiro tša Morena. Morena o nkotlile gabohloko, fela ga se a mpolaya. Mpuleleng dikgoro tša toka, ke tsene ke rete Morena. Kgoro ya Morena še, ke mo go tsenago baloki. Ke a go reta, ka ge o nkwele mme o mphološitše. Leswika le baagi ba le nyaditšego e bile lona la sekhutlo. Ke se se dirilwego ke Morena, se a re tlaba ge re se bona. Le ke letšatši le le beilwego ke Morena; a re hlalaleng, re gobeleng go lona! Re a go rapela, hle, Morena, re phološe; nke o re atle, re a go kgopela. A go retwe yo a tlago a romilwe ke Morena; re le šegofatša re le ka ntlong ya Morena. Morena ke Modimo, o re loketše; swarang makala ka diatla, le thome go keteka; le sepele le dikologa aletare. O Modimo wa ka, ke a go tumiša; Modimo wa ka, ke tla go reta. Tumišang Morena, gobane ke yo botho; lerato la gagwe ke la go ya go ile. Go lehlogonolo ba ba phelago ba se na bosodi, ba ba phelago ka melao ya Morena. Go lehlogonolo ba ba phethago ditaelo tša gagwe, ba ba mo hlomphago ka pelo tša bona ka moka, ba ebilego ba sa dire tše mpe, ba tšeago ka tsela ya Morena. Morena, o re file ditaelo tša gago, gore re botegele go di phetha. Nke nka phetha ditaelo tša gago ke sa tekateke. Ge melao yohle ya gago nka e ela hloko, gona nka se lewe ke dihlong. Ke tla go tumiša ka pelo ye e hlwekilego ke ntše ke ithuta go phetha ditaelo tša gago tše di lokilego. Ke tla phetha ditaelo tša gago; o se tsoge o ntahlile! Mofsa a ka phela bjang bophelo bjo bo hlwekilego? A ka bo phela ka go phetha taelo tša gago. Nna ke leka go go direla ka pelo ya ka yohle; o se ntese ke phamoga melaong ya gago. Dikholofetšo tša gago ke di lotile ka pelong, gore ke se go fošetše. A go tumišwe wena, Morena; nthute ditaelo tša gago. Ditaelo tše o re filego tšona ke a di touta. Ke kgahlwa ke go phela ka ditaelo tša gago, go etša ge ke kgahlwa ke lehumo le legolo. Ke tla akanya ka ditaelo tša gago; ka ela ditsela tša gago hloko. Ke thakgalela ditaelo tša gago, nka se lebale se o se boletšego. O ntire ka botho, nna, mohlanka wa gago, ke mo ke tlago phela ke phetha tše o di boletšego. Mpudulle, ke bone dimaka tše di lego melaong ya gago. Le ge ke le mofeti mo lefaseng, o se mphihlele melao ya gago. Ka mehla ke fišegela go tseba tše o re laelago tšona. Baikgogomoši o a ba sola, bona bomorogakwa, e lego ba ba phamogago melaong ya gago. Ntloše kgobogo le nyatšego, gobane ditaelo tša gago ke a di phetha. Le ge babuši ba ka kopana ba ntakana, nna, mohlanka wa gago, ke tla dula ke akanya ditaelo tša gago. Ke kgahlwa ke ditaelo tša gago; ke tšona baeletši ba ka. Ke rapaletše fase leroleng; ntsoše go ya ka mo o nkholofeditšego. Ke go boditše tša bophelo bja ka, wa nkwa; bjale ge, nthute ditaelo tša gago. Nthuše go kwešiša ditaelo tša gago, gore ke nagane ka dimakatšo tša gago. Ke lala ke welawetšwa ke manyami; mmaatlafatše ka mo o nkholofeditšego. O mphephiše go dira tša boradia; hle, o nthuše go phetha melao ya gago. Ke ikgethetše go phela ke go botegela; ke phela go ya ka melao ya gago. Ke kgomaretše ditaelo tša gago, Morena, a ke se lewe ke dihlong. Ke tla phetha melao ya gago ka mafolofolo, gobane o nkgontšha go phela ke sa ipelaele. Morena, nthute go phetha taelo tša gago, ke mo ke tlago phela ka tšona go fihlela mafelelong. Ntlhalošetše melao ya gago, gomme ke tla e phetha ka pelo ya ka yohle. Nkgontšhe go phela ka melao ya gago, gobane ke sona se se nkgahlago. Ntire gore ke dume go phetha ditaelo tša gago go na le gore ke nyake lehumo. Mphephiše go šetša tše di se nago mohola; o nthatiše go phela go ya ka thato ya gago. O phethe se o nkholofeditšego sona, nna, mohlanka wa gago, sona se o se holofetšago ba ba go boifago. O mphephiše dikwero tše ke di tšhabago. Ditaelo tša gago di lokile. Bona ka mo ke hlologetšego ditaelo tša gago; anke o ntsošološe ka go loka ga gago. Ntemoše lerato la gago, kilaphetogo, o mphološe ka mo o nkholofeditšego. Ke mo ke tlago kgona go fetola ba ba nkgowelago, ka gobane ke ikantše tše o nkholofeditšego tšona. O nkgontšhe go bolela therešo ka mehla, ka gobane ke holofetše ditaelo tša gago. Ka mehla ke tla phetha melao ya gago; ke tla e phetha go ya go ile. Ke tla phela ka bolokologi bjo bo feletšego, ka gobane ke rata go phetha taelo tša gago. Ditaelo tša gago ke tla di begela magoši, gomme nka se lewe ke dihlong. Melao ya gago ke ipshina ka yona, ka gobane ke a e rata. Ke hlompha melao ya gago, yona ke e ratago; le ditaelo tša gago ke nagana ka tšona. O se lebale se o nkholofeditšego sona, nna, mohlanka wa gago; ke sona se se mphilego lehutšo. Ge ke le tlalelong, se se nkhomotšago ke gore se o nkholofeditšego sona se a mphediša. Baikgogomoši ba nkwera ba sa fetše, fela nna ga ke aroge melaong ya gago. Ge ke gopola ditaelo tša gago tša kgale, Morena, ke beega pelo. Bakgopo ge ba furalela melao ya gago, ba nkgalefiša e le ruri. Mola ke sa le mofaladi ke be ke hlama dikopelo ka ditaelo tša gago. Bošego ke lala ke go nagana, Morena, melao ya gago ke tla e phetha. Go nna go phetha taelo tša gago ke bjona bophelo. Morena, nna ke re sa ka ke go phetha tše o re laetšego tšona. Ke go kgopela ka pelo ya ka yohle ke re nkgaugele, bjalo ka ge o nkholofeditše. Ke ile ka lekola mesepelo ya ka, mme ka boela ditaelong tša gago. Ke itlhaganela ke sa diege go phetha melao ya gago. Le ge nka tanywa ke difu tša bakgopo, melao ya gago yona nka se e lebale. Ke tsoga le mašegogare, gore ke go tumiše ka baka la ditaelo tša gago tša go loka. Nna ke gwerana le bohle ba ba go boifago, ba ba phethago taelo tša gago. Morena, lefase le tletše leratorato la gago; nke o nthute ditaelo tša gago. O ntirile ka botho, Morena, nna, mohlanka wa gago, go ya ka mo o nkholofeditšego ka gona. Nke o nthute gore ke be le temogo le tsebo, gobane ke tshephile melao ya gago. Mola o sešo wa nkotla ke be ke fela ke etšwa tseleng; fela bjale ke šetša kholofetšo ya gago. Wena o yo botho, mme o modirakabotho; nke o nthute ditaelo tša gago. Baikgogomoši ba mphara ka maaka, etšwe ke phetha taelo tša gago ka pelo yohle. Bona ba retetše dipelo, nnaena ke kgahlwa ke melao ya gago. Go otlwa ga ka go nkhotše, ka ge go nthutile ditaelo tša gago. Melao ye o e beilego e bohlokwa go feta gauta le silibera ye ntšintši. O ntlhodile, o mpopile ka tša gago diatla; mphe tlhaologanyo, gore ke ithute melao ya gago. Ba ba go boifago ba tla thabela go mpona, ka gobane ke ikanya se se boletšwego ke wena. Morena, ke a tseba gore ditaelo tša gago di lokile, le gore le ge o nkotla o a botega. Nkhomotše ka leratorato la gago, go ya ka mo o nkholofeditšego ka gona, nna, mohlanka wa gago. Ntšhokele, gomme ke tla phela, gobane ke kgahlwa ke melao ya gago. Baipoti a ba segišwe batho ka ge ba mphara ka maaka; nnaena ke tla nagana ka melao ya gago. Ba ba go boifago a ba tle go nna, ke ra ba ba tsebago ditaelo tša gago. A ke phethe ditaelo tša gago ka botlalo, ke mo nka se lewego ke dihlong. Ke hlologetše kudu gore o mphološe; ke holofetše se o se boletšego. Mahlo a ka a lapišitšwe ke go hlwa ke lebeletše gore o tla tla o mphološa, ke re: “Etse o tla tla o nkhomotša neng?” Le ge ke etša lekuka ka moraleng, ditaelo tša gago tšona ga ke di lebale. Ke go letele go fihlela neng, nna, mohlanka wa gago? Ba go ntlhomara o tla ba otla neng? Baipoti ba go hlokomologa melao ya gago ba nkepetše melete. Melao ya gago yohle e a tshephega. Nthuše, gobane batho ba ntlhomere. Ba nyakile go mpheleletša mo lefaseng, fela ga se ka furalela melao ya gago. Ka leratorato la gago o ntsošološe, gore ke phethe tše o ntaetšego tšona. Tše o di boletšego, Morena, ke tša go ya go ile, di tieletše kua legodimong. O botega go tloga molokong wo mongwe go ya go wo mongwe. Lefase le beilwe ke wena madulong, la tielela. Dilo tšohle di dutše ka go tielela le lehono, ka ge di laetšwe ke wena, gobane tšohle di a go hlankela. Ge nkabe ke be ke sa kgahlwe ke melao ya gago, nkabe ke ile ka hwela mohlakong wa ka. Ditaelo tša gago nka se di lebale, gobane ke tšona tše o ntsošološago ka tšona. Nna ke wa gago – ntlhakodiše, gobane ke lekile go phetha taelo tša gago. Bakgopo ba a ntalela gore ba mpolaye, eupša nna ke tla fela ke šeditše taelo tša gago. Ke lemogile gore phethego yohle e na le mafelelo, kganthe melao ya gago yona ga e na mafelelo. Melao ya gago ga se ge ke e rata! Ke hlwela go e akanya letšatši lohle. Melao ya gago e a ntlhalefiša ka phala manaba, ka gobane e dula e le mo go nna. Nna ke phala barutiši ba ka ka moka ka temogo, ka ge ke akanya taelo tša gago. Ke kwešiša go phala batšofadi, gobane ke phetha taelo tša gago. Ke ila tšohle tše mpe, gobane ke rata go phetha tše o di boletšego. Taelo tša gago ga ke di hlokomologe, gobane ke di rutilwe ke wena ka sebele. Dikholofetšo tša gago ga se ka bose; di phala le todi ya dinose. Nna temogo ke e hwetša taelong tša gago; ka gona ke hloile boradia bjohle. Lentšu la gago ke lebone la go ntlhahla, ke seetša tseleng ya ka. Ke ikanne, gomme nka se hlaname, ka re ke tla phetha taelo tša gago, ke tše di lokilego. Ke tlaišegile e le ruri, Morena; ntsošološe go ya ka mo o nkholofeditšego. Morena, amogela thapelo ya ka ya go go tumiša, gomme o nthute ditaelo tša gago. Ke dula ke ikemišeditše go ba kotsing ya lehu, fela melao ya gago yona ga ke e lebale. Bakgopo ba ntheile ka sefu, fela ga ke aroge ditaelong tša gago. Ditaelo tša gago ke leruo la ka la go ya go ile; ke tšona di nthabišago. Ke ikgafetše go phetha ditaelo tša gago; ke tla phela ka tšona go fihlela mafelelong. Ke hloile bommapelopedi, eupša melao ya gago yona ke a e rata. Wena o bokhuto bja ka le boširelo; ke holofetše se o se boletšego. Ntlogeleng, badiratšempe tenang, gore ke phethe melao ya Modimo wa ka. Nthuše ka mo o nkholofeditšego ka gona, gomme ke tla phela. Ka ge ke botile wena, o se ntshwabiše. Nthekge, ke mo ke tlago phologa, ka dula ke ela taelo tša gago hloko. Bohle ba ba phamogago taelong tša gago o a ba lahla, gobane mahlajana a bona ke lefeela. Bakgopo bohle ba lefase go wena ke maphoko; ka gona nna ke rata taelo tša gago. Ke thothomedišwa ke go go boifa, le dikahlolo tša gago ke a di tšhaba. Ke dirile tše di lebanego le tše di lokilego; o se nkgafele diatleng tša bankgateledi. Nkholofetše gore tšohle di tla ntokela, nna, mohlanka wa gago; o se lese baikgogomoši ba nkgatelela. Mahlo a ka a lapišitšwe ke go hlwa ke lebeletše gore o tla tla o mphološa, bjalo ka ge o nkholofeditše, gobane o a tshephagala. Ntshware go ya ka lerato la gago, kilaphetogo, mme o nthute ditaelo tša gago. Ke nna mohlanka wa gago; ntemoše gore ke hlaologanye ditaelo tša gago. Morena, ke nako ya gore o otle ba ba tshelago melao ya gago. Ditaelo tša gago ke di rata go phala gauta, go phala gauta ye e sego ya tswakwa. Ke ka baka leo ke bonago taelo tšohle tša gago di lokile go felelela; ke hloile ditsela tšohle tša boradia. Taelo tša gago di a makatša, ke ka baka leo ke di phethago. Kutollo ya tše o di boletšego e a sedimoša; ba go hlalefetšega gabonolo e a ba hlalefiša. Ke fišegela ditaelo tša gago, ke di hlologela kudu. Retologela go nna o nkgaugele, go etša ge o gaugela ba ba go ratago. Ntlhahle bophelong bjalo ka ge o nkholofeditše; o se ntlogele ke bušwa ke bobe. Ntamolele go ba ba ntlhakišago, gore ke tle ke phethe taelo tša gago. Nke o nkedišetše sefahlego sa gago, nna, mohlanka wa gago, mme o nthute ditaelo tša gago. Ke ediša meokgo boka dinoka, ka ge batho ba sa phethe melao ya gago. Wena o lokile, Morena, le dikahlolo tša gago ke tšona. Ditaelo tša gago di lokile, di tshephagala e le ruri. Ke a selekega ka ge manaba a ka a hlokomologa tše o di boletšego. O tshephagala ruri go se o nkholofeditšego sona, gomme nna, mohlanka wa gago, ke a se rata. Nna ga ke selo, ke a nyatšega, fela ditaelo tša gago ga ke di hlokomologe. Toka ya gago ke ya go ya go ile, le melao ya gago ke ya therešo. Ke wetšwe ke tlalelo le kgakanego, fela ke thabišwa ke melao ya gago. Taelo tša gago di loketše sa ruri; nkgontšhe go di kwešiša, gomme ke tla phela. Ke go rapela ka pelo ka moka; nkwe, hle, mme ke tla phetha taelo tša gago. Ke a go rapela, ntlhakodiše, ke tle ke phethe taelo tša gago. Ke go llela e sa le ka mahube; ke botile se o nkholofeditšego sona. Ke lala ke hlobaela bošego ka moka, ke akanya ka se o nkholofeditšego sona. Morena, nke o ntheeletše ka leratorato la gago; o ntsošološe ka ditaelo tša gago. Bantlhomari ba mpatamela ka bomenetša; ke bona ba ba lego kgole le melao ya gago. Fela wena, Morena, o kgauswi, le melao yohle ya gago ke ya nnete. Ke kgale ke tsebile ka taelo tša gago gore o di beile gore e be tša go ya go ile. Hle, mpone ge ke tlaišega mme o ntlhatlole, gobane melao ya gago ga ke e hlaetše mahlo. Mpolelele molatong wa ka mme o ntlhakodiše, o ntsošološe go ya ka mo o nkholofeditšego. Bakgopo bona ga o ba hlakodiše mathateng, gobane ga ba phethe taelo tša gago. Lešoko la gago ke le legolo, Morena, o ntsošološe ka ditaelo tša gago. Le ge ke atetšwe ke bantlhomari le manaba, ga ke aroge ditaelong tša gago. Bahlokatumelo ge ke ba bona ba a ntšhišimiša, gobane ga ba phethe ditaelo tša gago. Morena, bona ka mo ke ratago taelo tša gago; o ntsošološe ka leratorato la gago. Therešo ke moko wa tšohle tše o di boletšego, le ditaelo tšohle tša gago di lokile ebile ke tša go ya go ile. Le ge babuši ba ntlhomara ntle le lebaka, ke gakgamatšwa ke tše o di boletšego. Ke thabela kholofetšo ya gago go etša yo a thabelago dithebola tše dintši. Ke hloile maaka ebile a a ntšhišimiša, kganthe melao ya gago yona ke a e rata. Ke go tumiša gašupa ka letšatši, ke go tumišetša ditaelo tša gago tše di lokilego. Boiketlo bja nnete ke bja ba ba ratago melao ya gago, gomme bona ga ba na sa go ba thetša. Morena, nna ke letetše go phološwa ke wena, gomme melao ya gago ke a e phetha. Ke phetha ditaelo tša gago, gomme ke di rata e le ruri. Ke lotola ditaelo le melao ya gago, gobane mesepelo yohle ya ka o a e tseba. Morena, sello sa ka a se go fihlele, o nthuše go kwešiša go ya ka mo o nkholofeditšego. Anke o kwe thapelo ya ka, o mphološe ka mo o ntshephišitšego. Molomong wa ka go tla tšwa tumišo, gobane o nthuta taelo tša gago. Ke tla opela mabapi le kholofetšo ya gago, gobane melao yohle ya gago e lokile. O dule o ikemišeditše go nthuša, gobane ke ikgethetše taelo tša gago. Ke hlologetše go phološwa ke wena, Morena, melao ya gago ke sona se se nthabišago. A ke phele gore ke go tumiše, gomme ditaelo tša gago di nthuše. Ke hlahlatha boka nku ye e timetšego; etla o nnyake, nna, mohlanka wa gago, gobane melao ya gago ga ke e hlokomologe. Ge ke le tlalelong ke llela Morena, gomme o a nthuša. Morena, ntlhakodiše go ba maaka le go baradia. Baradia tenang, Morena o tla le dirang, ge e se go le otla gabohloko? O tla le tsotsometša ka mesebe ya dintlha ya mohlabani, a le fiša le ka magala a mollo. Go dula gare ga lena go nna go gobe go no swana le go falalela Mesheke, goba go dula le batho ba Kedara. E šetše e le kgale kudu ke dula le batho ba ba hloilego khutšo. Nna ke rata khutšo, fela ge ke bolela ka yona, bona ba nyaka ntwa. Ke lelalela kua dithabeng; ke botile go thušwa ke mang? Ke botile go thušwa ke Morena, Mohlodi wa legodimo le lefase. A ka se go lese o kgopša; Mošireletši wa gago ga a potume. Ee, Mošireletši wa Israele ga a potume, le gona ga a robale. Morena ke Mošireletši wa gago; o šika le wena go go leta. Letšatši le ka se go dire selo mosegare, le ge e le wona ngwedi bošego. Morena o tla go šireletša kotsing tšohle, o tla šireletša bowena bja gago ka moka. O tla go šireletša mayong le maboong a gago, gonabjale le go ya go ile. Ke ile ka thaba ge ba re go nna: “A re yeng ntlong ya Morena.” Gomme bjale šemo re fihlile, re eme ka dikgorong tša gago, wena Jerusalema. Jerusalema ke motse wo o tsošološitšwego, wa dintlo tša lenaneo le lebotse le peakanyo. Woo dikgoro tša Israele di rotogelago go wona, dikgoro tša Morena, go mo tumiša ka moo a laetšego Baisraele ka gona. Ke mo go bego go dula magoši, ditlogolo tša Dafida, ge ba be ba ahlola batho ba bona. Kgopelelang Jerusalema khutšo, le re: “Ba ba go ratago a ba iketle.” Ka gare ga gago a go be le khutšo, le boiketlo bo be ka dintlong tša gago. Ka baka la meloko yešo le bagwera ba ka ke re go Jerusalema: “Khutšo a e be go wena!” Ka baka la ntlo ya Morena Modimo wa rena ke go kgopelela tše dibotse. Ke lelalela go wena o bušago o le legodimong. Rena re lebeletše Morena Modimo wa rena, re letetše gore a re gaugele. Re etša bahlanka ge ba lebeletše seatla sa mong wa bona, goba modiredi wa ngwanenyana ge a lebeletše seatla sa mong wa gagwe wa mosadi. Re gaugele, Morena, re gaugele, gobane re gobošitšwe go feta tekanyo. Re segilwe go feta tekanyo ke ba ba nago le sa bona, ra gobošwa go feta tekanyo ke ba ba ikgantšhago. Ge nkabe Morena a se eme le rena – a Baisraele ba realo, ba re: “Ge nkabe Morena a se eme le rena mola manaba a be a re hlasela, nkabe ba re kwameditše re phela, ge ba be ba re tukela bogale; nkabe morwalela o re gogotše, nkabe lefula le re pipeditše; ee, meetse a sephalo nkabe a re pipeditše.” A re tumišeng Morena, yo a sa kago a ba lesa ba re rwaetša. Re phonyokgile boka nonyana seropong sa mothei; seropo sa re go robega, ra phonyokga. Thušo ya rena e tšwa go Morena, yena Mohlodi wa legodimo le lefase. Ba ba botilego Morena ba etša thaba ya Sione, yona e sa šikinyegego, e ka se kego ya timelela. Bjalo ka ge Jerusalema e dikaneditšwe ke dithaba, tšhaba sa Morena le sona se dikaneditšwe ke yena, gonabjale le go iša go sa felego. Bakgopo ba ka se fele ba buša naga ya baloki; ge ba ka e buša baloki ba ka no wela bokgopong. Morena, dira baloki ka botho, e lego ba pelo tše dibotse. Ba ba kgelogetšego tseleng tša manyokenyoke bona Morena o tla ba fediša mmogo le badiratšekgopo. Israele a go rene khutšo! Mola Morena a re bušetša Sione re etšwa bothopša, e be nke re a lora. Re be re sega re gobela; ke ge baditšhaba ba re: “Morena o ba diretše tše dikgolo.” Le bjale, Morena o re diretše tše dikgolo, gomme ra thakgala. Morena, re bušetše nageng ya gaborena, go etša ge o bušetša meela leganateng. Ba ba bjalago ba lla, ba tla buna ba gobela. Yo a yago mašemong a lla a rwele peu, o tla boa a gobela a rwele puno. Ntlo ya se agwe ke Morena, baagi ba yona ba itapišetša lefeela; motse wa se šireletšwe ke Morena, baleti ba wona ba o letela lefeela. Ke lefeela ge le itapiša ka tša go iphediša, le tsoga e sa le bošego, le diega go robala; gobane Morena, bao a ba ratago, o ba direla ba ntše ba robetše. Gape bana ke mpho ya Morena; dikgohlwana ke moputso wa go tšwa go yena. Barwa bao motho a ba tswalago e sa le yo mofsa ba swana le mesebe atleng sa mogale. Go lehlogonolo monna wa kgotlopo ye e tletšego mesebe ya mohuta woo. A ka se boife ge a rerišana le manaba kgorong ya motse. Go lehlogonolo bohle ba ba boifago Morena, ba ba sepelago ka tsela tša gagwe. Wena o tla ja tše o di šometšego; o yo lehlogonolo gomme o tla atlega. Mosadi wa gago o tla etša morara wo o enywago ka lapeng la gago; bana ba gago ba tla swana le mahlogedi a mohlware ge ba potapotile tafola ya gago. Ruri, motho yo a boifago Morena o tla šegofatšwa ka tsela yeo. Morena a go šegofatše a le Sione! Nke o ka bona katlego ya Jerusalema mehleng yohle ya ge o sa phela. O phele go fihlela o bona ditlogolwana tša gago. Israele a go rene khutšo! Manaba a ka e sa le a ntshwara gasehlogo go tloga bjaneng bja ka – a Baisraele ba realo, ba re: “Manaba a ka e sa le a ntshwara gasehlogo go tloga bjaneng bja ka, fela ke ba paletše. Mokokotlo wa ka ba o kgathile, ba o fetoša boleme. Morena o lokile, o ntokolotše go bakgopo.” A bahloi bohle ba Sione ba segišwe batho, ba bušetšwe morago. A ba etše bjang bjo bo metšego tlhakeng, bjo bo ponago bo sešo bja gola. Ga bo be le mosegi, ga bo be le wa go bo bofa digola. Ga go mofeti yo a tlago ba dumediša a re: “Morena a le šegofatše! Re le šegofatša leineng la Morena.” Morena, ke go bitša ke le fasefase sekoting sa dibe tša ka. Ekwa sello sa ka, hle, Mong wa ka; ntlhwaele tsebe ge ke go kgopela thušo! Ge o ka be o eya le makgopo a rena, Morena, ke mang yo a ka bego a ka phela, Mong wa ka? Eupša o re swarela dibe, gore re tle re go boife. Ke dula ke letetše go thušwa ke Morena, ke letetše ka mafolofolo, ke emetše gore go phethege se a se boletšego. Ke dula ke letetše Morena go feta bahlapetši ba ba letago masa, ee, bahlapetši ba ba letago masa. Israele, holofela Morena, gobane lerato la gagwe ga le fetoge, gomme o dula a itokišeditše go phološa. O tla phološa Baisraele makgopong a bona. Morena, nna ga ke ikgantšhe, goba ka hlaetša ba bangwe mahlo. Ga ke ipofe ka dilo tše di mphetago, goba tša go nkgakgamatša. Nka upša ka thekga ditho ke ikhomoletše, ka fola maswafo go etša lesea le le tshwešitšwego letswele difarong tša mmalo. Baisraele, botang Morena, go tloga bjale le go ya go ile. Morena, gopola Dafida le mathata a gagwe ohle. Gopola se a ikannego ka sona, a ikana go wena, Ramaatla wa Jakobo, a re: “Nka se tsene ka ntlong ya ka goba ka robala malaong a ka, ke tla itima boroko, ešita le gona go potuma, go fihlela ke hweletša Morena bodulo, moago wa yena Ramaatla wa Jakobo.” Kua Efrata re kwele ka Polokelo ya Kgwerano, ra e hwetša mašemong a kua Jaare. A re yeng bodulong bja Morena go mo khunamela gona. Morena, eya bodulong bjoo bja gago, o ye le Polokelo ya Kgwerano, e lego sona sešupo sa maatla a gago. A baprista ba gago ka mehla ba dire tše di lokilego, ba ba go botegelago le bona ba gobele. Ka baka la Dafida, mohlanka wa gago, o se gane motlotšwa wa gago. Morena o ikanne a tiišitše go Dafida, ebile a ka se hlaname, o rile: “Ke tla bea yo mongwe wa barwa ba gago kgoši ya go go hlatlama. Ge bana ba gago ba ka botegela kgwerano ya ka le ditaelo tše ke ba fago tšona, le bona bana ba bona ba tla go hlatlama go ya go ile.” Ruri, Morena o ikgethetše Sione; o kganyogile gore e be bodulo bja gagwe, a re: “Bjo ke bjona bodulo bja ka go ya go ile; mo ke mo ke nyakago go dula gona go ya ka mo ke ratilego. Ke tla atla ba Sione ka tšohle tše ba di hlokago, bahloki ba gona ka ba khoriša dijo. Baprista ba gona ke tla ba atla go tšohle tše ba di dirago; bampotegedi ba gona ba tla gobela ba hlaletše. Mo ke mo ke tlago bea setlogolo sa Dafida kgošikgolo, ke gona mo ke tlago lotola bogoši bja motlotšwa wa ka. Manaba a gagwe ke tla a apeša kgobogo, eupša yena mmušo wa gagwe ke tla o atla.” Go botse ebile go kgahliša bjang ge ba leloko ba phedišana ka boiketlo! Go etša makhura a go nkga bose hlogong ya Arone, ge a elela maledung, maledung a gagwe, a elela le molaleng wa seaparo sa gagwe. Go bjalo ka phoka ya thaba ya Hermone ye e welago dithabeng tša Sione; gape moo ke mo Morena a šegofatšago batho ka go ba fa bophelo bja go ya go ile. Etlang le tumišeng Morena, lena bahlanka bohle ba gagwe le lalago le letetše ka ntlong ya gagwe. Phagamišetšang matsogo Tempeleng le tumišeng Morena. A Morena, yena Mohlodi wa legodimo le lefase, a go šegofatše a le Sione. Retang Morena, retang leina la Morena! Mo reteng, lena bahlanka ba gagwe, lena le letetšego ka ntlong ya gagwe, ka dikgorong tša Tempele ya yena Modimo wa rena! Retang Morena, gobane ke yo botho; mo opeleleng ditumišo, gobane o lokile. O ikgethetše Baisraele, ditlogolo tša Jakobo, ya ba lefa la gagwe. Ruri, nna ke tseba ge e le yo mogolo; Mong wa rena o feta medimo yohle. O dira se a se ratago legodimong le lefaseng, ka lewatleng le ka madibeng a lona. Ke yena a hlomago maru kua bogomapono, o neša pula ya dikgadima, o fokiša phefo go tšwa mo a e bolokago gona. Ke yena wa go gagara maitšibolo a Egepeta, a batho le a diruiwa. Ke gona mo a dirilego mehlolo le dimakatšo tša go otla kgoši le bahlankedi bohle ba yona. A gagara ditšhaba tše dintši, a bolaya le magoši a maatla. Ke bona boSihone, kgoši ya Baamore, le Ogo, kgoši ya Bashane, le magoši ohle a Kanana. Naga tša bona a di abela Baisraele, tšhaba sa gagwe, ya ba lefa la bona. Morena, ke wena wa go sa felego; o tumile go ya go ile. Morena o dira tšhaba sa gagwe ka toka, o šokela bahlanka ba ba gagwe. Medingwana ya baditšhaba ke ya silibera le ya gauta; ke ya go bopša ke batho ka diatla. E na le melomo, fela ga e bolele; e na le mahlo, fela ga e bone. E na le ditsebe, eupša ga e kwe; go hema le gona ga e heme. Babopi ba yona ba tla swana nayo, le bohle ba ba e botilego. Lena tšhaba sa Israele, retang Morena! Lena lešika la Arone, retang Morena! Lena lešika la Lefi, retang Morena! Lena ba go boifa Morena, mo reteng! Mo Sione a go retwe Morena, yena wa go dula Jerusalema. Retang Morena! Lebogang Morena, gobane ke yo botho, gobane lerato la gagwe ke la go ya go ile. Lebogang Modimo wa medimo, gobane lerato la gagwe ke la go ya go ile. Lebogang Morena wa marena, gobane lerato la gagwe ke la go ya go ile. Ke yena fela a dirago mehlolomegolo, gobane lerato la gagwe ke la go ya go ile. O dirile magodimo ka tlhaologanyo, gobane lerato la gagwe ke la go ya go ile. O adile lefase godimo ga phamphamadiba, gobane lerato la gagwe ke la go ya go ile. O dirile dietša tše dikgolo, gobane lerato la gagwe ke la go ya go ile. Letšatši a le direla go bonega mosegare, gobane lerato la gagwe ke la go ya go ile. Ngwedi le dinaledi ya ba tša go bonega bošego, gobane lerato la gagwe ke la go ya go ile. O otlile Baegepeta ka go ba bolaela maitšibolo, gobane lerato la gagwe ke la go ya go ile. A huduša Baisraele mo go bona, gobane lerato la gagwe ke la go ya go ile. A ba ntšha ka seatla se maatla le ka letsogo le le tiilego, gobane lerato la gagwe ke la go ya go ile. A arola Lewatle la Mahlaka ka bogare, gobane lerato la gagwe ke la go ya go ile. A fetiša Baisraele gare ga lona, gobane lerato la gagwe ke la go ya go ile. A wetša kgoši ya Egepeta le madira a gagwe ka go lona, gobane lerato la gagwe ke la go ya go ile. A hlahla tšhaba sa gagwe go putla lešoka, gobane lerato la gagwe ke la go ya go ile. A garara dikgoši tše dikgolo, gobane lerato la gagwe ke la go ya go ile. A bolaya magoši a go tuma, gobane lerato la gagwe ke la go ya go ile. Ke bona boSihone, kgoši ya Baamore, gobane lerato la gagwe ke la go ya go ile, le boOgo, kgoši ya Bashane, gobane lerato la gagwe ke la go ya go ile. Naga tša bona a di abela Baisraele, bahlanka ba gagwe, gobane lerato la gagwe ke la go ya go ile. Ya ba lefa la bona, gobane lerato la gagwe ke la go ya go ile. O re gopotše re le banyatšegi, gobane lerato la gagwe ke la go ya go ile. A re phamola manabeng a rena, gobane lerato la gagwe ke la go ya go ile. O fepa diphedi tšohle ka dijo, gobane lerato la gagwe ke la go ya go ile. Lebogang Modimo wa legodimong, gobane lerato la gagwe ke la go ya go ile. Dinokeng tša Babilone ke mo re bego re dula gona, re lla ge re gopola Sione. Mepopolireng ya gona ke mo re bego re fega dikgapa tša rena. Gona moo ke mo bathopi ba rena ba bego ba re re ba opelele sefela; bathopi bao ba rena ba re re ba thabiše, ba re: “Re opeleleng sefela sa Sione.” Na re ka napa ra opela sefela sa Morena nageng e šele? Ge eba nka go lebala, wena Jerusalema, gona ke hwe letsogo la go ja. Leleme la ka le nkgomarele magalapa, ge eba nka go lebala, ke ra ge eba e se wena o nthabišago go feta tšohle. Morena, gopola Baedomo mola ba thopa Jerusalema ba re: “E kgerešeng! E kgerešeng go fihla ka metheo!” Wena motse wa Babilone, o lebanwego ke go kgerešwa, go lehlogonolo yo a go lefetšago se o re dirilego sona. Go lehlogonolo yo a tlago go phamola masea a gago, a a pšhatlaganya leswikeng. Morena, ke go reta ka pelo yohle; ke go opelela ditumišo pele ga medimo. Ke khunama ke lebeletše Tempeleng ya gago ye kgethwa, ke go tumiša ka baka la leratorato la gago le go botega ga gago. Kholofetšo yela ya gago e feta le setumo sa gago. Ge ke be ke go llela o ile wa nkwa, wa ntiiša, wa mmaatlafatša. Dikgoši tšohle tša lefase di tla go tumiša, Morena, ge di ekwa dikholofetšo tša gago. Ba tla opelela ditiro tša gago ba re: “Letago la Morena ke le legolo ruri!” Le ge o phagame gakaaka banyatšegi o a ba šetša; baikgogomoši bona o ba tseba ba sa le kgole. Ge ke dikaneditšwe ke mathata, o a ntlhakodiša; ge ke galefetšwe ke manaba, o a ntšhireletša; o mphološa ka maatla a gago. Morena o tla mphethela tšohle. Morena, leratorato la gago ke la go ya go ile. Tše o di dirilego o se di hlokomologe. Morena, o ntekotše mme o a ntseba. O tseba tšohle tše ke di dirago; o tseba tša pelo ya ka o le kgole. O laola mesepelo ya ka le marobalo a ka; ditsela tša ka o di tseba gabotse. Le pele ga ge ke ahlama, Morena, o tseba ka botlalo se ke tlago se bolela. O ntikaneditše ka gohle; o mpontšha gore ke nna wa gago. Go kwešiša taba ye go a mpalela, go šita tlhaologanyo ya ka. Na nka go tšhabela kae? Ke kae mo nka go khutelago gona? Ge nka rotogela legodimong, ke yo hwetša o le gona; ge nka yo patlama bodulabahu, o tla be o le gona kua. Ge nka fofela kua bohlabatšatši, goba ka yo dula ka mafelelong a bodikelatšatši, le gona moo o tla ntlhahla ka seatla sa gago, o tla ntshwara ka seatla sa la go ja. Le ge nka re leswiswi le mpipe, goba seetša e be bošego go ntikologa, go wena leswiswi ga le fifale, le bošego bo taga bjalo ka mosegare – go wena leswiswi le swana le seetša. Ditho tša ka tšohle di hlodilwe ke wena; ke wena o di kgomagantšego ka popelong ya mma. Ke go reta ka ge o mpopile ka mo go makatšago gape go tlabago; ditiro tša gago di a makatša. Seo ke se ke se tsebago gabotse. Mola ke bopša ka sephiring, mola ditho tša ka di kgomaganywa ka hloko ka popelong ya mma, ga go na le le tee la marapo a ka le o bego o sa le bone. O mpone le pele ke belegwa. Matšatši ohle a ka a go phela a be a šetše a ngwadilwe ka pukung ya gago, go sešo gwa tšwelela le le tee la ona. Aowii, Modimo, tše o di naganago nna di a mpalela; ga se ka bontši! Ge nka re ke a di bala, di feta dithorwana tša lešabašaba. Ge ke fetša, ke tla ikhwetša ke sa na le wena. Joo, Modimo, nke nkabe o bolaya bakgopo! Nke nkabe babolai ba ntlogela! Ba bolela tše kgopo ka wena; ba bolela leina la gago ba sa le hlomphe. Mmalo, Morena, nka nama ka se hloye ba ba go hloilego? Nka nama ka se šišingwe ba ba go tsogelago maatla? Ke ba hloile hloihloi, gobane le nna ke manaba a ka. Mphetleke, Modimo, o tsebe pelo ya ka; ntekole, o bone khuduego ka go nna. Ntebelele ge ke na le bobe, gomme o nkiše tseleng ya go sa felego. Morena, ntamolele go bakgopo, o mphepiše batho ba šiši. Ke ba ba akanyago tše mpe ka dipelong, ba ba hlolago diphapano ka mehla. Ba lootša maleme a bona a ba bjalo ka a dinoga; ka ganong ga bona go tšwa bohloko bja mokopa. Sela Morena, mphahlele bakgopo; ntamolele go batho ba šiši, ba ba lakanago go mphereketša. Baikgogomoši ba ntheile ka difu tša dithapo; ba ntheetše mereo tseleng, ba ntheile ka melaba. Sela Nna ke botša Morena ke re: “Ke wena Modimo wa ka.” Morena, hle, o nkwe ge ke go kgopela. Morena, Mong wa ka, wena Mohlakodišitia wa ka, ke wena o ntšhireletšago ntweng. Morena, bakgopo o se ba dumelele tše ba di nyakago; maanomabeng a bona ba se atlege, e ka tla ya ba bona bafenyi. Sela A ba boelwe ke bobe bjo ba mpolelago ka bjona. A ba welwe ke magala, ba lahlelwe ka mekoting ya leraga, moo ba ka se kgonego go tšwa. Raleleme o mo hlokiše bodulo nageng ye; rašiši a a welwe ke mašula ka go latelana. Nna ke tseba ge Morena a šetša gore mohlaki le mohloki ba direlwe ka toka. Baloki ba tla go tumiša e le ruri; bahlokabosodi ba tla phela ba na le wena. Morena, ke a go llela; hle, nanoga, o tle go nna; nkwe ge ke go llela. A thapelo ya ka e go kgahle go etša seorelo; ge ke phagamišitše matsogo a swane le sehlabelo sa mantšiboa. Morena, o se ntese ke bolela tše di sego tša swanela, goba ke bolela ka lephakuphaku. Ntote ke se rate go dira tše mpe, ka dira bošaedi ka boomo le badirakgopo; ke se je menyanyeng ya bona. Go otlwa le go kgalwa ke moloki ka lerato ga ke go gane; eupša go hlompšha ke bakgopo gona ke go gana nnako; ke tla no ba rapelela le ge ba ntira gampe. Mohla babuši ba bona ba thetheošwa malekelekeng, ke mohla ba tlago dumela gore ke boletše nnete. Marapo a bona a gašagane mojako wa bodulabahu, a swana le dinkgetlwana tša tšhilo ye e pšhatlaganego fase. Nnaena mahlo a ka a lebeletše wena, Morena, Mong wa ka; nna ke khuta ka wena, o se ntlogele ke ehwa. Ntšhireletše difung tše ba ntheilego ka tšona, melabeng ya bona badirakgopo bao. Bakgopo a ba tanywe ke melaba ya bona; ge e le nna ke iphetele sesolo. Ke llela Morena ke goeletša, ke re a nkgaugele. Ke mmegela dillo tša ka tšohle, ke mmotša mathata a ka. Ge ke šetše ke nolega moko, o tseba se ke swanetšego go se dira. Tseleng ye ke sepelago go yona, manaba a ka a ntheile ka sefu. Ge ke gadima ka thoko, ke bona go se monthuši; ga ke na botšhabelo, ga ke na montšhetši. Ke llela wena, Morena, ke re: “O botšhabelo bja ka. O wa ka, Morena, ke le mo lefaseng.” Ela sello sa ka hloko, gobane ke feletšwe ke tshepo. Ntlhakodiše go bantlhomari, ka ge ba mpalela. O nntšhe ka kgolegong, gore ke tle ke go tumiše; ke mo baloki ba tlago go bokanela, ka ge o ntoketše. Morena, ekwa thapelo ya ka; ntheeletše ge ke go llela; o nkarabe ka ge o botega ebile o le yo botho. O se ntshekiše, nna, mohlanka wa gago, gobane mo pele ga gago ga go motho mohlokabosodi. Sera sa ka se ntlhomere se nkgatakela fase; se mphediša swiswing boka ba ba hwilego kgale. Ke nolegile moko, ebile ke šetše ke itlhobogile. Ke elelwa tša mehleng ya kgale, ke gopola ditiro tšohle tša gago; tše o kilego wa di dira ga ke di lebale. Ke phagamiša matsogo ke go rapela; ke go nyoretšwe boka naga e nyoretšwe meetse. Morena, akgofa o nthuše, ke go hlolosetše; se iphihlele nna, ka tla ka ba bjalo ka ba ba theogelago bodulabahu. Mo mosong o nkgopotše leratorato la gago, ka gobane nna ke botile wena. O mpontšhe tsela ye ke swanetšego go tšea ka yona, gobane ke go hlolosetše e le ruri. O ntlhakodiše manabeng a ka, ka ge nna ke khuta ka wena. O nthute go phetha thato ya gago, gobane ke wena Modimo wa ka. Moya wa gago o lokile; a ke sepetšwe ke wona tseleng ye e lokilego. O ntote ke phele, Morena, ka ge o le Morena wa lešoko, mme o ntlhakodiše tlaišegong ya ka ka botho bja gago. Ka ge o nthata ka leratorato la gago, o tloše manaba a ka tšatšing; bagateledi ba ka o ba fediše molokwanarite, ka gobane ke mohlanka wa gago. A go tumišwe Morena, yena setšhabelo sa ka, yena a nthutago go lwa ntwa, yena a ntlwaetšago go hlabana. Ke yena mošireletši wa ka le sebo sa ka; ke botšhabelo bja ka le mophološi wa ka; ke kotse ya ka, ke sefahlelo sa ka; o mpea mmuši wa ditšhaba. Morena, motho ke selomang, ge o bile o mo šetša; ke ra motho wa nama, ge o bile o mo ela hloko? Gape motho ga se selo; nako ya gagwe e feta bjalo ka moriti. Morena, sekamiša legodimo, o theogele fase; kgwatha dithaba, di tupe muši. Gadimiša magadima, o šwalalanye manaba; betša mesebe ya gago, ba hlanole direthe. Otlolla diatla o le moo godimo, o nkinole bodibeng, o mphološe; ntlhakodiše dinaleng tša bašele, bona ba go dula ba bolela maaka, ba a bolela le ka go ikana. Modimo, a ke go opelele sefela se sefsa, ke go opelele ke letša harepa ya metato ye lesome, wena o kgontšhago magoši go fenya, wena Mohlakodiši wa Dafida, mohlanka wa gago. Mphološe go bakgopo ba ba nyakago go mpolaya; ntlhakodiše dinaleng tša bašele, bona ba go dula ba bolela maaka, ba a bolela le ka go ikana. *** A barwa ba rena ba godišwe bjalo ka dimelana tše di nošetšwago; barwedi ba rena ba etše dikokwane tša dikhutlo tše di kgabišitšwego ka meseto, tše di thekgilego ntlo ya mošate. A matlolo a rena a tlale dijo tša mehutahuta, dihuswane tša rena di tswale ka diketekete kua mafulong a gaborena. A dikgomo tša rena di none, le rena re se hlaselwe ra išwa bothopša. A go hlokege sello mapatlelong a rena. Go lehlogonolo tšhaba se se šegofatšwago bjalo; go lehlogonolo tšhaba seo Morena e lego yena Modimo wa sona. Wena Modimo wa ka, wena Kgoši, a ke go tumiše, ke go rete go ya go ile. Ke tla go tumiša ka mehla; ke tla go godiša go ya go ile. Morena ke yo mogolo, a a retwe gagolo; bogolo bja gagwe ke phetatlhaologanyo. Meloko ka go hlatlamana e tla reta mediro ya gagwe, ya bega le ditiro tša gagwe tše maatla. Ba tla anega letago la gago le bogoši bja gago, le ditiro tša gago tše di makatšago. Ba tla anega maatla a gago ao ka ona o dirago ditiro tša go gakgamatša, gomme nna ke tla bega bogolo bja gago. Ba tla tsebagatša botho bjo bogolo bja gago, ba gobela go loka ga gago. Morena o na le kgaugelo le lešoko; ga a befelwe ka pela, mme o tletše leratorato. O loketše dihlolwa tša gagwe ka moka, mme o di šokela tšohle. Dihlolwa tša gago ka moka di tla go tumiša; ba ba go botegelago le bona ba tla go reta. Ba tla anega letago la gago le bogoši bja gago, ba bega le maatla a gago, gore bohle ba tsebe tiro tša gago tše maatla, le letago la gago le bogoši bja gago. Bogoši bja gago ke bja go ya go ile, le mmušo wa gago ke wa go dulela ruri melokong ka moka. Morena o botegela dikholofetšo tšohle tša gagwe, le gona o na le botho go tšohle tše a di dirago. Morena o thekga bohle ba ba wago; o kgothatša bohle ba ba nyamilego. Diphedi tšohle di go lebelela di holofetše, gomme o di fa dijo lebakeng la gona. O khuporolla seatla sa gago, wa fa diphedi tšohle tše di di nyakago. Morena o lokile go tšohle tše a di dirago; o na le botho medirong ya gagwe ka moka. Morena o kgauswi le bohle ba ba mo llelago, ke ra ba ba mo llelago ka mmannete. O phethagatša ditumo tša ba ba mmoifago; ba ba mo llelago o a ba kwa mme a ba hlakodiša. Morena o babalela bohle ba ba mo ratago; bakgopo ka moka bona o a ba fediša. Nna ke tla tumiša Morena; batho bohle a ba mo tumiše go ya go ile, ka ge e le yo mokgethwa. Retang Morena! A ke tumiše Morena! Ke tla mo reta bophelong bja ka ka moka; ge ke sa phela ke tla opelela Modimo wa ka ditumišo. Le se ke la ikanya babuši, batho ba nama, ba go se kgone go phološa. Motho wa nama ge a ehwa o boela mobung; ke mohla merero ya gagwe e phuhlamago. Go lehlogonolo yo a thušwago ke Modimo wa Jakobo, yo a botilego Morena Modimo wa gagwe, yena yo a hlodilego legodimo le lefase le lewatle le tšohle tše di lego ka go ona. Ka mehla o a botega. Ba ba gateletšwego o ba dira ka toka, ba ba swerwego ke tlala o ba fa dijo. Morena o lokolla bagolegwa, o budulla difofu, o kgothatša ba ba nyamilego, o rata baloki. Morena o babalela bafaladi, ke mmabaledi wa ditšhiwana le bahlologadi, mola bakgopo bona a ba kgopamišetša ditsela. Morena o tla buša go ya go ile; Modimo wa gago, wena Sione, o tla buša ka go sa felego. Retang Morena! Retang Morena! Ke mo gobotse go opelela Modimo wa rena ditumišo; go a kgahliša ebile go a swanela go mo reta. Morena o tsošološa Jerusalema; o kgoboketša mathopša a Israele. O homotša ba ba nyamilego, o ba kgothatša manyaming a bona. O beile dinaledi ka palo ya tšona, a thea ye nngwe le ye nngwe leina. Mong wa rena ke yo mogolo, yo maatlamaatla, bohlale bja gagwe ga bo elwe. Morena o babalela banyatšegi, bakgopo bona o a ba kokobetša. Opelelang Morena sefela sa tebogo, le opelele Modimo wa rena le letša sekgapa. O pipa leratadima ka maru, o nešetša lefase pula, o mediša bjang mebotong. O fa diphoofolo dijo tša tšona, le mafotwane a magokobu ge a lla. Ga a iše felo ka maatla a pere, le a mohlabani ga a mo kgahle; o kgahlwa ke ba ba mmoifago, ba ba botilego rato la gagwe, kilaphetogo. Reta Morena, wena Jerusalema! Tumiša Modimo wa gago, wena Sione! Gobane ke yena a dudišago batho ba gagwe ka boiketlo; ke yena a šegofatšago badudi ba gago. Ke yena a tlišago khutšo nageng ya lena, gape a le khorišago ka dijo tše bosebose. O ntšha ditaelo tša gagwe lefaseng, gomme di fihla ka pela. O neša lehlwa la šweufala bjalo ka leokodi; šobane o e gaša bjalo ka molora. O neša sefako se sekoto; botšididi bja sona bo ka kgotlelelwa ke mang? A ntšha taelo, tšeo ka moka tša tologa; a fokiša phefo, meetse a tšona a ela. Tše a di laetšego o di tsebiša Bajakobo, ee, bona Baisraele ditaelo le melao ya gagwe o ba begela tšona. Ga go tšhaba se sengwe se a se diretšego bjalo, gomme taelo tša gagwe bona ga ba di tsebe. Retang Morena! Retang Morena! Retang Morena le le magodimong; mo reteng, lena le lego godimo. Mo reteng, lena barongwa ka moka; mo reteng, lena dihlolwa tša legodimong. Mo reteng, lena letšatši le ngwedi; mo reteng, lena dinaledi tšohle le phadimago. Mo reteng, lena magodimo a godimodimo, le lena meetse a ka godimo ga leratadima. Tšohle a di rete Morena, yo e rilego ge a laela, tša hlolega. O di beetše ruri madulong a tšona ka taelo ya go ya go ile. Retang Morena mo lefaseng, lena bommamogašwa le lena diphamphamadiba tšohle; lena magadima le sefako le lehlwa le kgodi, le lena madimo, le kwago taelo tša gagwe; lena dithaba le meboto yohle, le lena meremelewa le mesedere yohle; lena phoofolo tša nageng le diruiwa; lena digagabi le dinonyana tša go fofa, lena magoši a lefase le lena merafe yohle; lena babuši le lena balaodi ba lefaseng; lena masogana le lena makgarebe; lena batšofadi le lena bafsa. Bohle a ba rete Morena; ke yena fela a phagamego, bogoši bja gagwe bo okametše lefase le legodimo. O tiišitše Baisraele, tšhaba sa gagwe, bona ka moka ba ba mmotegelago, sona tšhaba se se lego kgauswi le yena, gore se mo rete. Retang Morena! Retang Morena! Opelelang Morena sefela se sefsa; opelang sereto sa gagwe le le phuthego ya ba ba mmotegelago. Baisraele a ba thabele Mmopi wa bona; ba Sione a ba gobele Kgoši ya bona megobo; a ba mo rete ba opela; ba mo opelele ba letša meropa le dikgapa. Gobane Morena o kgahlwa ke tšhaba sa gagwe; baikokobetši o ba godiša ka go ba phološa. Ba ba mmotegelago a ba hlalale ba mo godiše; a ba mo thabele ba le malaong a bona. A ba mo rete ba goeletša, ba swere tšhoša tša magalemabedi go itefeletša go baditšhaba; go otla merafe e šele, le go bofa dikgoši tša bona ka diketane, le babuši ba bona ka ditshipi, le go ba otla ka mo go laetšego Modimo, ya ba gona go godiša bohle ba ba mmotegelago. Retang Morena! Retang Morena! Retang Modimo ka Ntlongkgethwa ya gagwe! Mo reteng ka fase ga leratadima la gagwe le legolo! Mo reteleng tše maatla tše a di dirilego, mo reteleng maatla a gagwe a magolo! Mo reteng ka diphalafala, mo reteng ka diharepa le dikgapa! Mo reteng ka meropa le megobo, mo reteng ka dikwadi le dinaka! Mo reteng ka masenkana a medumomebotse, mo reteng ka masenkana a magolo! Tšohle tše di phelago a di rete Morena! Retang Morena! Tše ke diema tša Kgoši Solomone wa Israele, morwa wa Dafida. Ke diema tše di tlago go thuša go lemoga bohlale le dikeletšo tše botse, le go kwešiša dika tše di nyakago tsebo ya mmakgonthe. Di ka go ruta go phela ka bohlale le ka moo o ka botegago ka gona, wa dira dilo ka toka, wa se kgethologanye batho. Di ka hlalefiša ba ba se nago tsebo, gape tša ruta bafsa kwešišo le temogo. Dihlalefi le tšona a di theetše mme di oketše tsebo ya tšona, gomme bao ba rutegilego ba tla hlahlwa, gore ba tle ba kwešiše diema le dika tše ba bohlale ba di bolelago, le dithai tša bona. Go boifa Morena ke ona mathomo a bohlale. Ditlatla di nyatša bohlale, di gana go rutwa. Ngwanaka, o ele tše tatago a go rutago tšona hloko, o se hlokomologe tše o di rutwago ke mmago. Dithuto tša bona di tla go dira mothomotho bjalo ka ge kefa ye botse goba pheta e swanela motho. Ngwanaka, ge badiradibe ba go gokagoketša, o gane. Mohlomongwe ba ka re: “Yaa le rena re yo lalela motho yo re ka mmolayago! Re kgahlwa ke go khukhunela ba ba se nago molato. Re tla ba hwetša ba phela gabotse ba iketlile, gomme re ba bolayeng ba swane le ba ba theogelago bodulabahu! Re tla hwetša mahumo a mehutahuta, gomme ra tlatša nywako ya rena ka dithebola! Yaa le rena, gomme re tla abelana dilo tšeo le wena.” O se ke wa sepela le batho ba mohuta woo, ngwanaka, o ba tšhabe! Ba kitimela go dira dilo tše mpe, ba itlhaganela le go bolaya motho. Ga go thuše selo go rea molaba mola nonyana ye o nyakago go e tanya e o bona, eupša bona ka bobona ba itheela molaba, molaba woo o tlago ba tanya. Ka wona mokgwa woo mohlakodi o bolawa ke se a se hlakotšego – seo ke se se hlagelago mang le mang yo a hlakolago. Theetšang! Bohlale bo goeletša mekgotheng, bo hlaboša lentšu mapatlelong, bo bitša bo le dikhutlong tša mekgotha ye megolo le masorong a motse bo re: “Lena bahlokatsebo! Le tla rata go hloka tsebo go fihla neng? Lena bakweri, le tla lesa neng go kgahlwa ke dikwero? Lena ditlatla, le tla tlogela neng go nyatša tsebo? Le theetšeng ge ke le kgala; ke tla le fa bohlale bja ka ka bontši, ka le ruta tše ke di tsebago. Ke kgale ke le bitša, eupša lena le a gana; ke le bitša le ka letsogo, go se yo a ntšhetšago. Le hlokomologile dikeletšo tša ka gomme la gana ge ke le sola. Ka gona ge le welwa ke masetlapelo, nna ke tla le sega. Ke tla le kwera ge le swarwa ke letšhogo, ge letšhogo le le wela bjalo ka magadima, ge tahlego e le tlela boka ledimo gomme le gakanegile le tlaletšwe. Ke mo le tlago mpitša, eupša ka se arabe; le tla nnyaka, eupša le ka se nkhwetše. Le be le hloile tsebo, le ikgethetše go se boife Morena. Le be le sa nyake keletšo ya ka, le gona le nnyatša ka mehla ge ke le sola. Ka fao le tla hwetša se se le swanetšego, gomme la šišingwa maanonyana ale a lena. Batho ba go hloka tsebo ba bolawa ke go gana bohlale. Mašilo a fedišwa ke go se šetše ga ona. Eupša yo a ntheetšago o tla dula a bolokegile. O tla iketla a se boife kotsi.” Ngwanaka, ge o ka amogela dikeletšo tša ka, wa se lebale ditaelo tša ka, wa hlwaela bohlale tsebe, wa leka go bo hlaologanya, ge o ka duma go ba le temogo, wa fišegela go ba le kwešišo, ge o ka nyaka bohlale boka silibera, wa bo tsoma bjalo ka lehumo le le fihlilwego, gona o tla tseba gore go boifa Morena ke go reng, le go tseba Modimo o tla go lemoga, gobane ke Morena yo a fago motho bohlale; tsebo le kwešišo di tšwa go yena. O atla baloki, o šireletša bahlokabosodi. O hlokomela gore go dirwe ka toka, o leta bao ba mmotegelago. Ge o ka theetša o tla kwešiša toka le tshwanelo le se e lego sa maleba – o tla tšea ka tsela tše di lokilego. O tla ba yo bohlale, gomme tsebo e tla go thabiša. Tebeledišišo e tla go lotola; kwešišo e tla go šireletša. Bohlale bo tla go phemiša tsela ye mpe le batho ba boradia – batho ba ba hlanametšego bophelo bja go loka gore ba phele leswiswing la sebe, batho ba ba kgahlwago ke go dira tše mpe, ba ba thabišwago ke bošaedi bja bokgopo, batho ba ba sepelago ka tsela tše kgopamego ba ba dirago tše di tšwilego tseleng. Bo tla go phemiša mosadi wa go hloka maitshwaro, seotswa sa leleme le boreledi, yo a sa botegelego monna yo a mo nyetšego e sa le lekgarebe, a lebalago keno ye a e ennego pele ga Modimo wa gagwe. Go ya ga gagwe ke go ipolaya, go ya gona ke go ya bodulabahu. Bohle ba ba mo etelago ga ba boe. Ga ba boele tseleng ya bophelo. Ka fao, o sepele tseleng ya baloki, o se aroge mmileng wa bona. Baloki ba tla fela ba dutše mo nageng, go yona bahlokabosodi ba tla dula ba le gona. Bakgopo bona ba tla fedišwa go yona; bahlokapotego ba tla tumolwa go yona boka sekoro. Ngwanaka, o se lebale tše ke go rutilego tšona, o fele o gopola ditaelo tša ka, gobane di tla go okeletša bophelo bja katlego. O se lese go ba le leratorato le potego; o ikgabiše ka tšona bjalo ka pheta molaleng, o di boloke ka pelong ya gago. Ge o ka dira bjalo o tla kgahla Modimo le batho, wa ba le seriti mo go bona. O tshephe Morena ka pelo ya gago ka moka. O se ke wa tshepha kwešišo ya gago. O gopole Morena dilong tšohle tše o di dirago, gomme yena o tla go lokišetša ditsela. O se ke wa iphora wa re o hlalefile, eupša o boife Morena, gomme o gane go dira tše mpe. Go dira bjalo e tla ba mo nkego ke sehlare se se fodišago, sa go lapološa mmele. O hlomphe Morena ka go mo fa kabelo ya tše o nago natšo, le ya tšohle tše kaonekaone tše o di bunago tšhemong ya gago. Ke moo dišego tša gago di tlago tlala mabele, gomme le mapitlelo a gago a diterebe a tla falala beine. Ngwanaka, ge Morena a go otla o se ke wa belaela, le ge a go kgala o se ke wa tsota, gobane Morena o kgala yo a mo ratago, bjalo ka ge tatagongwana a kgala morwagwe yo a mo kgahlago. Go lehlogonolo motho yo a ikhweletšago bohlale, yo a ikhweletšago kwešišo. Bohlale bo na le poelo go feta silibera, mohola wa bjona o phala wa gauta. Bohlale bo feta magakabje ka bohlokwa; ga go se o ka se nyakago, ngwanaka, se se swanago nabjo. Bo go fa bophelo bjo botelele ka letsogo la go ja, mme ka la nngele bja go fa mahumo le tlhomphego. Bohlale bo dira gore motho a tsefelwe ke bophelo, le gore a phele a bolokegile. Yo a nago le bohlale o phela gabotse; ba lehlogonolo ke ba ba bo kgomarelago. Morena o theile lefase ka bohlale, mme ka tlhaologanyo a bea leratadima madulong a lona. O aroganya phamphamadiba ka tsebo ya gagwe; o neša pula ka maru. Ngwanaka, o itshwarelele ka bohlalehlale le tebeledišišo; dilo tše di se ke tša ba tša go tšhabela. Di tla go phediša, wa ikgabiša ka tšona bjalo ka pheta molaleng. Ke mo o tlago phela o šireletšegile, wa se kgopše. Ge o robala o ka se boife, ge o robetše o tla robala boroko. O ka se šie go welwa ke madimabe, goba kotsi ye e welago bakgopo, gobane Morena o tla go lotola, a go phemiša sefu. O se time motho se sebotse se a se hlokago, ge o ka kgona go mo thuša. O se re go motho: “Sepela, o boe gosasa ke tla go fa,” etšwe o na le se a se kgopelago. Mongwekawena yo a phelago nago a go tshephile o se mo logele maanomabe. O se rumole motho a se a go dira se sebe. O se hufegele kgowa, le gona o se tšee le ka e tee ya tsela tša gagwe, gobane Morena o šišingwa modiratšempe, kganthe moloki yena o a mo tshepha. Lapa la yo kgopo le rogakilwe ke Morena, mola la baloki lona a le šegofaditše. Bakodutli o a ba kodutla, kganthe baikokobetši bona o ba direla tše dibotse. Ba bohlale ba itirela seriti, mola mašilo sa bona e le bogoboga. Bana ba ka, le theetšeng tše tatagolena a le rutago tšona. Le theetšeng, gore le tle le hlalefe. Tše ke le rutago tšona di lokile, ka gona le se di furalele. Nna ka noši ke be ke le mošemanyana, ke rutwa ke tate, ke le mmamoratwa, motswalwanoši wa mma. Tate o be a nthuta a re: “O gopole tše ke go botšago tšona. O phethe taelo tša ka, mme o tla phela. O ikhweletše bohlale le temogo. O se lebale goba wa furalela tše ke di bolelago. O se lahle bohlale, gomme bo tla go šireletša; o bo rate, gomme bo tla go boloka. Mathomo a bohlale ke go inyakela bjona; o ikhweletše kwešišo ka tšohle tše o nago natšo. O godiše bohlale, gomme bo tla go godiša. O bo gokarele, gomme bo tla go fa seriti. Bo tla go rweša seala hlogong; bo tla go rweša mphapahlogo wo mobotse.” O ntheetše, ngwanaka. O amogele dikeletšo tša ka, gomme o tla phela galelele. Ke tla go bontšha tsela ya bohlale; ke tla go sepetša tseleng ya boloki. Ge o sepela o ka se šitišwe ke selo, le ge o kitima o ka se thetšwe. Ka mehla o kgomarele tše ke go laelago tšona, di se go phonyokge. Bophelo bja gago bo itshwarelele ka tšona – o di hlokomele gabotse. O se tšee ka tsela ya bakgopo, o se sepele mmileng wa ba babe. O o šikologe, o se tšee ka wona; o o furalele, o itshepelele. Ba babe ga ba robale ge ba se ba dira se sebe. Ge ba se ba senyetša motho, ba lala ba hlobaela. Ba ja bokgopo bjalo ka bogobe, ba nwa šiši bjalo ka beine. Tsela ya baloki e swana le mahwibi a masa, ao seetša sa ona se tagago se keka, go fihlela letšatši le hlaba. Tsela ya bakgopo yona e swana le leswiswi la kgampi; ga ba tsebe se se tlago ba thetša. O hlokomele tše ke go botšago tšona, ngwanaka, o hlwaele dipolelo tša ka tsebe. O se ke wa di lebala; o di boloke ka pelong ya gago. Di phediša ba ba di kwago, di ba phediša gabotse mmeleng le moyeng. Se bohlokwa go feta tšohle ke go itota go tše o di naganago, gobane ke tšona di laolago bophelo bja gago. O ile go bolela maaka; polelo tša boradia di se tšwe go wena. O lebelele pele o yago, o ipeakanyetše tša ka moso. O itokišetše tše o nyakago go di dira, ke mo o tlago tšea magato a maleba. O se aroge tseleng ye e lokilego wa phamogela felo; o ikgaoganye le bobe. Ngwanaka, ela bohlale bja ka hloko; hlwaya tsebe, o kwe tša tlhaologanyo ya ka. Ke mo o tlago tseba go dira ka tebeledišišo, wa bolela ka tsebo. Melomo ya seotswa e rotha todi; leleme la gagwe le boreledi go feta makhura a mohlware, eupša mafelelo a tša gagwe a baba wa lengana; o gobatša bjalo ka tšhoša ya magalemabedi. O theošetša motho bodulabahu; tsela ye a sepelago ka yona e iša lehung. Ga a swarelele tseleng ye e išago bophelong; tsela tša gagwe di manyokenyoke, fela yena ga a lemoge. Bjale o ntheetše, ngwanaka, o phethe tše ke go botšago tšona. O se batamele mosadi wa mohuta woo; o se sepelele kgauswi le mojako wa ngwako wa gagwe, gore seriti se o bego o na le sona se se fiwe bangwe, mme wena wa loba mengwaga ya bofsa bja gago ka yena mohlokalešoko yoo. Bašele ba tla ithabiša ka mahumo a gago, gomme tšeo o di katanetšego ya ba tša yo mongwe. Mafelelong a bophelo bja gago, mola o fela nama tša mmele, o tla tsetla wa re: “Ke be ke reng ke hloya go kgalwa, le go solwa ke go nyatša? Ke be ke sa theetše ba ba nthutago; ba ba ntayago ke be ke sa ba hlwaele tsebe. Ke nyakile go welwa ke kotsi ya mafelelo phuthegong.” Mosadi wa gago ke sediba, ke mothopo wa meetse a a hlwekilego; o inyorolle ka yena fela. O reng o nyaka go tšhollela bonna bja gago basading ba bangwe, wa senya peu ya gago go metlabo? O e šomiše go mosadi wa gago fela, e sego go ba bangwe. A sediba sa gago, yena mosadi yo o mo nyetšego o sa le lesogana, se atlege; o ithabiše ka yena, yena wa botse bja kgama, wa go bopega a etša kome. A matswele a gagwe a go kgotsofatše ka mehla; ka mehla lerato la gagwe le go thabiše. Ngwanaka, o reng o ka thabišwa ke seotswa? O reng o ka gokarela mosadi wa monna yo mongwe? Morena o bona tšohle tše motho a di dirago; o lebeletše mesepelo yohle ya gagwe. Yo kgopo o tanywa ke dikarogo tša gagwe, o tlengwa ke molaba wa dibe tša gagwe. O tla hwa a bolawa ke go hloka boitshwaro; a timetšwa ke botlatla bja gagwe bjo bogolo. Ngwanaka, ge o itlemile go lefela motho molato wa gagwe ge yena a palelwa, ge o ikanne go lefela motho yo a jetšego molato mpeng, ge o tantšwe ka tše o di boletšego, ge mantšu a gago e bile moreo go wena, gona o wetše ka diatleng tša motho yoo. Go intšha bothateng, ngwanaka, o dire ka mokgwa wo: O akgofe o ye go yena, o mo rapele. O se robale, o dule o phafogile. O itlhakodiše bjalo ka tshephe go motsomi, goba bjalo ka nonyana sefung sa morei. Wena sebodu, eya makekeng, o bone ka mo a phelago ka gona, gomme o ithute ka ona. Le ge a se ne moetapele, goba molaodi, goba mmuši, a ipolokela dijo selemo; a ikgobokeletša mefago ge go bunwa. Sebodu towe, o tla robala go fihlela neng? O tla tsoga neng? Sona se fetola ka go re: “Ke sa nyaka go robala gannyane, ke bo re šwaa, ke phuthe matsogo, ke bo fokotše gosenene.” Ge o ka no pompala, bodiidi bo tla go phuthuma bjalo ka mohlakodi, mohlako wa go tsetsela bjalo ka mokgopedi. Motho wa senokwane, wa sehwirihwiri, ke yo a tšamago a bolela maaka, yo a kobonyago bangwe ka leihlo, a ngwalangwala fase ka leoto, a šupašupa batho ka monwana; ke yo a dulago a loga maanomabe ka pelo ya bomenetša, a lweša batho. Ke ka baka leo a tlago khukhunetšwa ke madimabe, gateetee a hwa la pitšana. Go na le dilo tše tshelelago tše Morena a di hloilego, gabotsebotse ke tše di šupago tše di mo šišimišago: ke boikgogomošo, le go bolela maaka, le go bolaya ba ba se nago molato; ke go loga maanomabe, le lephakuphaku la go dira tše mpe; ke hlatse ya maaka, seaketšabatho, le twešameloko. Ngwanaka, o phethe taelo tša tatago, le tše o di rutwago ke mmago o se di hlokomologe. O dule o di bolokile ka pelong ya gago, o ikgabiše ka tšona bjalo ka pheta molaleng. Di tla go hlahla ge o sepela, tša go leta ge o robetše, tša bolela nago ge o tsoga. Ditaelo tša tatago ke lebone, tše o di rutwago ke mmago ke seetša; go solwa ke bona ke tsela ya bophelo. Ke tša go go phemiša seotswa, mosadi wa leleme le boreledi wa monna yo mongwe. O se goketšwe ke botse bja mosadi yoo, wa tanywa ke melebelelo ya gagwe. Segwebakathobalo le ka senkgwa motho a ka se reka, kganthe seotswa sona se inyakela lehumo la motho. Kgane motho a ka gogolela mollo difarong a se tšhume diaparo tša gagwe? Na motho a ka gata magala a se swe dinao? Di bjalo tša yo a robalago le mosadi wa monna yo mongwe. Yo a mo kgomago a ka se re phankga. Lehodu la go utswa dijo go ntšha tlala maleng batho ga ba le sole; eupša ge le ka swarwa le lefišwa gašupa, le ge e ka ba ka thoto yohle ya lapa la lona. Ge e le monna yo a otswago, yena o itlhokiša tlhaologanyo. Taba ya mohuta wo e dirwa fela ke moipolai. O tla papatlwa, a hlomphollwa; o tla gobošetšwa sa ruri; gobane lehufa le galefiša monna; ge a itefeletša ga a na lešoko. Ga a amogele phophotho, ga a fepeletšege, ešita le ge e ka ba ka mpho ye kaakang. Ngwanaka, o gopole tše ke go botšago tšona, ditaelo tša ka o se di lebale. O di phethe, gomme o tla phela; tše ke go rutago tšona o di hlokomele bjalo ka tlhaka ya leihlo la gago. O dule o di gopotše, o di bolokile ka pelong ya gago. Bohlale o bo tšee e le kgaetšedi ya gago, mme temogo e be moloko weno. Di tla go phemiša mosadi wa seotswa, mosadi wa go hloka maitshwaro, wa leleme le boreledi. Ka tšatši le lengwe ke be ke ukametše ka ntle ka lefasetere la ngwako wa ka, ka bona batho ba bantši ba go tšeatšeega; gare ga masogana ka bona le lengwe le e bego e le setlatla. Le be le sepela mokgotheng, kgauswi le magahlano a ona ao go ona go bego go dula mosadi yo mongwe. Lesogana leo le be le tšere ka tsela ye e fetago ngwakong wa mosadi yoo e le mantšiboa, leswiswana le swara. Mosadi a le gahlanetša; o be a apere bjalo ka segwebakathobalo gomme a na le mahlajana. E be e le mosadi wa go se šie, wa go itaola, wa go se dule ka gae. O be a hwetšwa mekgotheng le mabaleng a motse, a dula a letile le magahlanong a mekgotha. O ile u ubarela lesogana lela, a le atla, a le lebelela ka mahlong, mme a re: “Lehono ke ile ka swanela go dira dihlabelo tša ka tša kagišano, ke phetha dikeno tša ka, gomme ke sa na le nama ya dihlabelo tšeo ka gae. Ka gona ke tšwile ngwakong wa ka ke tlilo go gahlanetša. Ke be ke nyaka go go bona, gomme bjale ke go hweditše. Ke adile dikobo tša mebalabala tša Egepeta malaong a ka. Ke tšhetše marobalo ao senkgabose sa mira, sa sekgopha le sa sinamone. Tlaa re yo lala re ipshina ka lerato go fihlela go esa! A re yo thabišana ka go kgomana. Mogatšake ga a gona mo gae; o ile kgole. O sepetše le tšhelete ye ntši gomme o tla tšea beke tše pedi a se gona.” Ka gona mosadi a gokagoketša lesogana lela ka dipolelo tša gagwe tše ntši tše boreledi, a le foraforetša ka leleme la gagwe le boleta. Lesogana la napa la sepela le yena bjalo ka pholo ye e išwago tlhabong, bjalo ka kgama ye e gogwago ka thapo ge e išwa moo e tlago hlabja pelo ka lerumo, la swana le nonyana ye e hlaganelago ka sefung – le sa tsebe gore le a ipolaya. Bjale, bana ba ka, ntheetšeng! Hlokomelang se ke se bolelago. Le se ke la lesa mosadi yoo a thopa dipelo tša lena; le se ke la amana le yena ka selo. O ušitše banna ba bantši, o išitše ba bantšintši tahlegong. Ge o eya ngwakong wa gagwe, o tseleng ya go ya bodulabahu. Ke tsela ya go kgaoletša ye e išago lehung. Theetšang! Bohlale bo a bitša, tlhaologanyo e a goeletša! Bohlale bo eme kua godimo ga meboto kgauswi le tsela, le kua magahlanong a mebila. Bo bitša bo le ka ntle ga dikgoro tša motse, ka thoko ga masoro bo re: “Hee, ke bitša lena banna! Ke goeletša yo mongwe le yo mongwe lefaseng. Lena bahlokatemogo, ithuteng go ba le kwešišo. Lena ditlatla, ithuteng go ba le kgopolo. Theetšang, gobane mantšu a ka ke a therešo; ge ke bula molomo ke bolela tša go loka. Ganong ga ka go tšwa nnete; ke ila go bolela bobe. Se sengwe le se sengwe se ke se bolelago ke therešo; ga go seo e lego maaka goba seo se lahletšago. Go motho wa tlhaologanyo taba tše di bonala gabotse; go yo a nago le tsebo taba tše di a kwešišega. Ikgetheleng dithuto tša ka, e sego silibera, ikgetheleng tsebo go na le gauta ye botsebotse. “Ke nna Bohlale, ke phala le magakabje; ga go se le ka se nyakago, bana ba ka, se se ka swantšhwago le nna. Nna, Bohlale, ke na le tlhaologanyo; ke na le tsebo, gomme ke kgona go itokišetša tše di sa tlago. Go boifa Morena ke go hloya bobe; ke hloile boikgogomošo le boikgantšho, tsela tše mpe le mantšu a boradia. Ke a eletša gomme ka atlega. Ke na le tlhaologanyo, le gona ke tiile. Ke thuša magoši go buša; babuši ba bea melao ya toka ka thušo ya ka. Babuši bohle lefaseng – magoši le balaodi – ba buša ka go thušwa ke nna. Ke rata ba ba nthatago; ba ba nnyakago ba a nkhwetša. Ke na le mahumo le tlhompho, le thoto ye e sa onalego, gotee le katlego. Se o se hwetšago go nna se phala le gauta ye e sego ya tswakwa; se ke se fago motho se phala le silibera ye e hlwekilego. Ke sepela tseleng ya toka; ke latela ditsela tša go loka, ke fa ba ba nthatago mahumo, ka tlatša le dišego tša bona. “Morena o mpopile pele ga dilo ka moka, kgalekgale, pele a hlola tšohle. Ke bopilwe mathomongthomong, mathomong pele lefase le hlolwa. Ke belegwe pele mawatle a magolo a eba gona, pele methopo ya meetse e phulega. Ke tswetšwe pele ga ge dithaba di hlongwa madulong a tšona, pele ga ge meboto e bopša, pele ga ge Modimo a hlola lefase le melala ya lona, le pele ga ge dithorwana tša mathomo tša mobu di hlolwa. Ke be ke le gona ge a bea leratadima madulong a lona, ge a dira mo go gomago mahlo ka lewatleng, ge a bea maru legodimong, ge a phula methopo ya mawatle. A laela meetse a lewatle gore a se ke a kuboga go feta ka moo a a laetšego ka gona, a tshela mellwane ya ona. Ke be ke le gona ge a hloma metheo ya lefase. Ke be ke le kgauswi ga gagwe bjalo ka ngwana yo e lego mmamoratwa. Ke be ke mo thabiša letšatši ka letšatši; ka mehla ke be ke thaba ge ke na le yena – ke thabela lefase le a le hlodilego, ke kgahlwa ke batho ba lona. “Bjale, masogana, ntheetšeng. Go lehlogonolo ba ba dirago tše ke di bolelago. Theetšang tše le di rutwago mme le tla ba ba bohlale; le se ke la di hlokomologa. Go lehlogonolo yo a ntheetšago, yo a dulago mojako wa ngwako wa ka letšatši ka letšatši, a letetše seferong sa lapa la ka. Motho yo a nthwetšego o hwetša bophelo, gomme o tla kgahla Morena. Yo a palelwago ke go nkhwetša, o tla hwa la pitšana. Bohle ba ba ntlhoilego ba rata lehu.” Bohlale o ikagetše ngwako, a o betlela dikokwane tše di šupago. O hlabile dikgomo, o natefišitše beine ya gagwe, o adile bojelo. O romile bahlanka ba gagwe ba banenyana gore ba yo hlaeletša batho ba le serokameng sa motse ba re: “Etlang mono, lena le sa lemogego tša bophelo!” Go bahlokatlhaologanyo a re: “Etlang, re jeng dijo tše ke le apeetšego tšona, re nweng le beine ye ke e natefišitšego. Tlogelang bošilo, gomme le tla phela. Tšeang ka tsela ya temogo.” Mokgalamogegei o ikobela mahlapa; mosolayokgopo o ipakela maroga. O se kgale mogegei, o tla go hloya; o kgale mohlalefi, o tla go rata. Ruta mohlalefi, o tla hlalefa le go feta; ruta moloki, temogo ya gagwe e tla oketšega. Mathomo a bohlale ke go boifa Morena; go tseba Mokgethwa ke yona temogo. Ge o na le bohlale o tla phela galelele, o tla okeletšwa mengwaga ya go phela. Bohlale bja gago bo hola wena mong, go gegea ga gago go tla babela wena. Mmabotlatla ke mosadi wa lešatana, ke semaumau sa go se tsebe selo. O kokomala mojako wa ngwako wa gagwe, setulong se se lego serokameng sa motse. O hlaeletša bafeti ba tsela, ba ba ikelago mo ba yago gona, o re: “Etlang mono, lena le sa lemogego tša bophelo!” Go bahlokatlhaologanyo a re: “Meetse go tsefa a a utswitšwego, le selewathopeng se a natefa.” Mašilo ga a tsebe ge lehu le a laletše moo, le gore baeng ba gagwe ba theogetše fasefase bodulabahu. Tše ke diema tša Solomone; Ngwana yo bohlale o thabiša tatagwe, wa setlatla yena o nyamiša mmagwe. Lehumo la bohwirihwiri ga le hole motho ka selo, go loka gona go mo hlakodiša lehung. Moloki Morena ga a mmolaiše tlala, bakgopo bona o ba tima tše ba di nyakago. Bobodu bo diitša motho, kganthe go katana go a mo humiša. Yo a bunago ka nako ya gona ke yo bohlale, raboroko wa ge go bunwa yena ke mahlabišadihlong. Modimo o šegofatša moloki. Molomo wa yo kgopo o khupile bošoro. Moloki o šala a gopolwa ka tebogo; yo kgopo yena sa gagwe ke go lebalwa. Motho yo bohlale o dumela go laiwa, lešilo la go ratharatha lona le a itahla. Yo a phelago ka botshephegi ga a boife selo, kganthe sehwirihwiri sona se tla senoga. Yo a gegeago batho ka leihlo o a ba nyamiša, yo a kgalago batho a sa šie o tliša poelano. Polelo tša moloki di tsošološa motho, molomo wa yo kgopo wona o khupile bošoro. Lehloyo le hlola mpherefere, eupša lerato le pipa melato ka moka. Motho yo bohlale o bolela tše di kwagalago, eupša wa go itlhokiša tlhaologanyo o lebanwe ke thupa. Ba bohlale ba ipolokela tsebo, polelo tša lešilo tšona di hlola mathata ka pela. Lehumo la mohumi ke boširelo bja gagwe boka motse wo o ageleditšwego ka morako, bodiidi bja modiidi bjona ke tahlego ya gagwe. Moputso wa moloki ke bophelo, poelo ya yo kgopo yona ke kotlo. Yo a theetšago ge a kgalwa o tla phela, eupša yo a hlokomologago kgalemo o tla timela. Yo a utago lehloyo la gagwe ke moradia, wa lesebo yena ke setlatla. Go bolela kudu go ka diriša motho sebe, yo a balago mantšu a gagwe ke yena yo bohlale. Polelo tša moloki ke silibera ye e hlwekišitšwego, dikgopolo tša yo kgopo ga di hole go ya kae. Polelo tša moloki di hola ba bantši, lešilo lona le bolawa ke go hloka tlhaologanyo. Ke tšhegofatšo ya Morena ye e tlišetšago motho mahumo; go katana ga gagwe go ka se mo okeletše selo. Setlatla se kgahlwa ke go dira tše mpe, wa tlhaologanyo yena o kgahlwa ke bohlale. Se yo kgopo a se tšhabago ke sona se mo welago, baloki bona ba fiwa tše ba di nyakago. Ge ledimo le feta, le feta le yo kgopo, moloki yena ga le mo dire selo. Sebodu se tena mothwadi wa sona bjalo ka ge matšhidi a šiiša motho meno, le muši o fahla motho ka mahlong. Yo a boifago Morena o okeletšwa matšatši, yo kgopo yena o a a fokoletšwa. Se baloki ba se holofetšego ke lethabo, se bakgopo ba se holofetšego sona ga se tšwelele. Morena o šireletša baloki, bona bao ba phethago thato ya gagwe; badiratšempe bona o a ba fediša. Baloki ba ka se tlošwe mo nageng, bakgopo bona ba ka se dulele ruri. Moloki o bolela ka bohlale, yo kgopo yena o tla ripša leleme. Moloki o tseba go bolela tše di kgahlišago, yo kgopo yena o bolela tše mpe fela. Morena o hloile kelo ya boradia, o thabela ye e nepagetšego. Baikgogomoši ba tla gobošwa; ba bohlale ke baikokobetši. Baloki ba etetšwa ke botshephegi bja bona, ba go se botege bona ba fedišwa ke bokgopo bja bona. Lehumo le ka se hole motho ka selo ka tšatši la kahlolo, eupša go loka go tla mo hlakodiša lehung. Go loka ga mohlokabosodi go mo lokišetša ditsela, yo kgopo yena o ipolaya ka bokgopo bja gagwe. Go loka ga baloki go a ba phološa, ba go se botege bona ba tanywa ke megabaru ya bona. Yo kgopo a hwa, kholofelo ya gagwe e hwa naye; go tshepha mahumo ga gagwe go ka se mo thuše ka selo. Moloki o hlakodišwa mathateng, go ona gwa tsena yo kgopo. Dipolelo tša mohlokamodimo di a bolaya, moloki yena o phološwa ke tsebo ya ponelopele. Ge baloki ba atlega, motse o a thaba; ge bakgopo ba ehwa, go kwala mekgolokwane. Motse o a tuma ge baloki ba o reta, kganthe o gobošwa ke dipolelo tša bakgopo. Yo a senyago ba bangwe maina ke setlatla; yo a nago le tlhaologanyo o a ikhomolela. Yo a ratago lesebo o utolla diphiri, kganthe yo a tshephegago yena o a di boloka. Tšhaba sa go hloka ketapele se a thubega; baeletši ba bantši ba a se lotola. Yo a itlemago go lefela motho molato ge mongmolato a palelwa, o ipea mathateng. Yo a ganago go itlema o a itota. Mosadi yo botho o hlompšha ke batho; monna yo sehlogo yena sa gagwe ke go ikgobokeletša mahumo. Motho wa go loka o a ikhola, yo pelompe yena ke moipolai. Mogolo wa yo kgopo ga o swarelele, yo a dirago tša go loka yena o tla fiwa moputso wo o sa felego. Yo a kgotleletšego go dira tša go loka o tla phela, yo a šetšego tše mpe morago yena o tla hwa. Morena o sišingwa ba pelo tše mpe, ba ba phelago ba se na bosodi bona ba a mo kgahla. Ruri, ba babe ba tla otlwa, baloki bona ba tla phologa. Mosadi wa setswatswa ge a hloka maitshwaro o swana le lengina la gauta nkong ya kolobe. Ditumo tša baloki di tla le dilo tše dibotse, lehutšo la bakgopo lona le galefiša Modimo. Go na le bomafakudu ba go no atelwa ke leruo, le dingame tša go atelwa ke bodiidi. Mafakudu o a atlega, mokgodišabangwe le yena o a kgodišwa. Mokgobamabele wa go gana go a rekiša o rogwa ke batho; mmapatšamabele yena o lakaletšwa mahlatse. Mogabadibotse o kgahla Modimo, molotadimpe yena o boelwa ke tše mpe. Mmotamahumo o fetša ka go wa, moloki yena o atlega boka mahlare a matala. Yo a hlokomologago lapa la gagwe o a le diitša, lešilo le fetša ka go ba mohlanka wa yo bohlale. Go loka go a phediša, kgaruru yona e a bolaya. Ge moloki a hwetša se se mo lebanego mo lefaseng, yo kgopo le modiradibe bona ba ka šitwa bjang! Yo a ratago go kgalwa ke yo a ratago go tseba; yo a ganago go kgalwa yena ke setlatla. Morena o kgahlwa ke moloki, wa go loga maanomabe yena o a mo tšwa. Bokgopo ga bo lote motho, boloki bjona bo na le tšhireletšo. Mosadisadi ke seala sa monna wa gagwe; wa go leša monna wa gagwe dihlong yena ke bolwetši bo jago monna marapo. Baloki ba rera tša go loka, bakgopo bona ba rera tša boradia. Polelo tša bakgopo di a bolaya, tša baloki tšona di a phološa. Bakgopo ba a fedišwa ya ba moka, malapa a baloki ona a dula a le gona. Rabohlale o retelwa bohlale bja gagwe, rapelompe yena sa gagwe ke go nyatšwa. Monyatšegi wa go ba le lekgoba o phala moiponi wa go hloka dijo. Moloki o hlokomela diruiwa tša gagwe, yo kgopo yena ga a na taba le tšona. Moitemelatšhemo o bolaya mabele, molatamafeela yena o itlhokiša tlhaologanyo. Bakgopo ba nyaka fela go dira tše mpe, baloki bona ga ba šikinyege. Yo kgopo o tanywa ke polelo tša gagwe tše mpe, moloki yena o intšha mathateng. Motho o atlega ka tše a di bolelago; o boelwa ka tše a di dirago. Lešilo le gopola gore le dira tše di nepagetšego, yo bohlale yena o kwa dikeletšo. Lešilo le bontšha go ngala ka pela, yo bohlale yena o nyatša maroga. Hlatse ye e tshephegago e bolela bohlatse bja nnete, ya maaka yona e bolela bohlatse bja bofora. Polelo ya yo a sa kgethego mantšu e ka gobatša motho bjalo ka tšhoša, ya yo bohlale yona e a fodiša. Therešo ke ya go ya go ile, maaka ona ga a swarelele. Pelong tša ba ba logago maanomabe go letše boikaketši, badiraleago bona ba na le lethabo. Baloki ga ba hlagelwe ke se sebe, bakgopo bona ba welwa ke masetlapelo a mantši. Morena o šišingwa ba ba bolelago maaka, ba ba tshephegago bona o a ba thabela. Go yo bohlale tsebo ke thopa, ditlatla tšona di phatlalatša bošilo bja tšona. Ba ba kalokanago ba tla buša, dibodu tšona e tla ba makgoba. Mathata a imela motho, mantšu a botho ona a a mo thabiša. Moloki o hlahla wa gabo tseleng, bakgopo ya bona tsela e a ba timetša. Sebodu ga se hwetše seo se se nyakago, yo a katanago yena o ikhweletša lehumo le legolo. Go phetha thato ya Modimo ke tsela ya go iša bophelong, go kgeloga gona go iša lehung. Ngwana yo bohlale o kwa kgalo ya tatagwe, mokodutli yena ga a kwe ge a kgalwa. Motho o atlega ka tše a di bolelago, mohlokabotshephegi yena ke ntwadumela. Moitotapolelong o tla phologa, moitebalapolelong yena ke moipolai. Sebodu ga se hwetše senyakwa sa sona, mokalokani yena o ikhweletša tšohle tše a di nyakago. Moloki o hloile maaka, yo kgopo yena o dira mahlabišadihlong le manyala. Go phetha thato ya Modimo go šireletša mohlokabosodi, bokgopo bjona bo wiša modiradibe. Ba bangwe ba itshema bahumi ba se na selo, bangwe bona ba itshema badiidi ba humile le dinala. Mohumi o itokolla ka lehumo la gagwe, modiidi ga a ke a tšhošetšwa ke motho. Baloki ba etša seetša se se tagago kudu, bakgopo bona ba bjalo ka lebone le le timago. Wa mereba o hlola kgakgano fela, yo bohlale yena o kwa dikeletšo. Lehumo letlabonolo le nyamelela gabonolo; lehumo letlabosele lona le a ata. Seletelwa se se sa phethagalego se a nyamiša, senyakwa se motho a se hwetšago sona se a thabiša. Monyatšakeletšo o a itahla, mophethataelo yena o tla putswa. Thuto tša yo bohlale di tsošološa motho, di mo phemiša lehu. Wa tlhaologanyo o ratwa ke batho, tsela ya bahlokabotshephegi e tla ba lahletša. Yo bohlale o dira tšohle ka tsebo, setlatla sona se phatlalatša botlatla. Motseta wa go se tshephagale o tliša mathata, wa go tshephagala yena o bušetša dilo sekeng. Moganagokgalwa o tla diila a ba a goboga, mokwatsholo yena o a hlompšha. Senyakwa se motho a se hwetšago se a mo thabiša. Lešilo le gana go tlogela bobe. Šika le ba bohlale, o hlalefe; mokgonanalemašilo ke moipolai. Badiradibe ba hlomarwa ke madimabe, baloki bona ba putswa ka tše dibotse. Motho wa go loka o tlogelela ditlogolo bohwa; lefa la modiradibe lona e tla ba la moloki. Mašemo a a kgathilwego a ka tlišetša badiidi mabele a mantši; moo go sego toka badiidi ba amogwa mabele ao. Yo a sa otlego morwagwe ga a mo rate; yo a ratago morwagwe o a mo kgala. Baloki ba ba le dijo tše di lekanego, bakgopo bona ba dula ba bolawa ke tlala. Lapa le agwa ke mosadi yo bohlale, wa lešilo yena o ithubela lona. Mohlokabosodi o boifa Morena, wa tselakgopo yena o a mo nyatša. Lešilo le ipolaya ka dipolelo tša lona, yo bohlale yena o itšhireletša ka tše a di bolelago. Ge go se dipholo tša go lema, legopo ga le be le dijo; ge dipholo di le gona, puno e ba ye ntši. Hlatsepotegi ke ye e sa bolelego maaka, hlatse ya maaka yona ke seaketšabatho. Mokodutli le ge a ka tsoma bohlale a ka se bo hwetše; wa tlhaologanyo yena tsebo o e hwetša gabonolo. O se batamele lešilo, gobane ga go sa tlhaologanyo se le ka go botšago sona. Bohlale bja setsebi ke go tseba tsela ya sona; bošilo bja lešilo bjona bo a le timetša. Go setlatla sehlabelo sa dibe ke metlae; moloki o kgahla Modimo. Bohloko bo kwewa ke mong wa bjona, lethabo le lona ke la mothabi. Lapa la yo kgopo le tla fedišwa, la moloki lona le tla atlega. Go na le tsela ye e bonalago nke e lokile, fela mafelelong e iša lehung. Motho a ka no kwa bohloko ka pelong le ge a sega; lethabo le ka no felela ka manyami. Mokgelogi o tla otlelwa tše a di dirilego, moloki le yena o tla putsetšwa ditiro tša gagwe. Mohlokatemogo go tša bophelo ke madumelatšohle, yo bohlale yena o ipala magato. Yo bohlale ke wa go ba le hlokomelo, a šikologa bobe; lešilo lona le šwahlela fela le itshephile. Sefeladipelwana o dira tša bošilo; wa šedi yena o dula a fodišitše hlogo. Lefa la bomohlokatemogo go tša bophelo ke bošilo, ba bohlale bona ba putswa ka tsebo. Ba babe ba tla khunamela ba go loka, bakgopo ba tla obama masorong a baloki. Modiidi o hloiwa le ke moagišani, mohumi yena o ratwa ke ba bantši. Yo a nyatšago mongwekayena o dira sebe; go lehlogonolo yo a šokelago bahlaki. A ke re mologamaanomabe ke motimedi? Moreradibotse yena o a ratwa, a botwa ke batho. Go katana go tlišetša motho moputso, go etiša leleme pele gona go a mo diitša. Moputso wa ba bohlale ke lehumo, wa mašilo wona ke bošilo. Hlatsethereši e ka hlakodiša motho lehung, ya maaka hlatse yona ke moeki. Ka go boifa Morena motho o a bolokega, le bana ba gagwe ba ba le botšhabelo. Go boifa Morena go tsošološa motho, go mo phemiša lehu. Bogolo bja kgoši bo ya le bontši bja tšhaba sa gagwe; go fokotšega ga sona go feleletša ka go wa ga gagwe. Wa go diega go befelwa ke yo bohlale, sefelafeladipelwana yena ke lešilošilo. Bopelotšhweu bo hleka mmele wa motho; lehufa lona ke bolwetši bja go ja marapo. Mohlakišabahlaki o nyefola Mmopi wa bona, mošokelabadiidi yena o hlompha Morena. Yo kgopo o ipolaya ka ditiro tša gagwe tše mpe, moloki yena o šireletšwa ke boloki bja gagwe. Motho wa tlhaologanyo o nagana tše bohlale; ditlatla ga di tsebe selo ka bohlale. Go loka go godiša setšhaba, sebe sona se goboša setšhaba. Kgoši e kgahlwa ke mohlankedi wa go kgona; e galefela molešadihlong. Phetolo ye boleta e okobatša pefelo, mantšu a a kgopišago wona a a e gakatša. Polelo tša ba bohlale di ratiša batho tsebo, melomong ya ditlatla gona go tšhologa tša bošilo. Mahlo a Morena a mo gohle, a lebeletše ba babe le ba ba lokilego. Mantšu a go bea motho pelo a a mo tsošološa, a bofora ona a mo ferehla moyeng. Setlatla se itebatša tše tatagosona a se rutilego tšona, yo bohlale yena o dumela go kgalwa. Ka ngwakong wa moloki go tlala thoto, thoto ya yo mobe yona e tsenya mong mathateng. Tsebo e gašwa ke batho ba bohlale, ga e kwalakwatšwe ke ditlatla. Dihlabelo tša bakgopo di šišingwa ke Morena, dithapelo tša baloki tšona di a mo kgahla. Morena o hlaswa tsela ya yo kgopo, o rata yo a dirago tše di lokilego. Moarogi o tla otlwa gabohloko; mohloyatsholo o tla hwa. Ge Morena a tseba tša bodulabahu le tša kua tahlegong, tša ka pelong ya motho tšona di ka mo palela bjang? Mokodutli ga a nyake go kgalwa, le maele ga a a nyake go ba bohlale. Ge motho a thabile o ediša sefahlego, manyami ona a šegamiša motho. Wa tlhaologanyo ke wa go nyaka go tseba, lešilo lona le kgotsofala ka bošilo. Mohlaki o phela ka mohlako, ralethabo yena o phela a nyakaletše. Mohloki yo a boifago Morena o phala mohumi wa go balabadišwa ke mahumo a gagwe. Go šeba ka morogo le ba o ratanago nabo, go phala go ja dimakhura le ba o hloyanego nabo. Mofelapelwana o hlola phapano, mopelotelele yena o a e lamola. Sebodu sa gagwe ke mathata mo gohle, moloki yena ga a be le ona. Ngwana yo bohlale o thabiša tatagwe, wa setlatla yena o nyatša mmagwe. Moitlhokišatlhaologanyo o kgahlwa ke tša botlaela, wa tlhaologanyo yena o dira tša go loka. Wa go se kgopele maele o palelwa mererong, wa go a kgopela yena o a atlega. Go kgahliša bjang go bolela sa maleba ka nako ya gona! Mohlale o tšea ka tsela ya go rotošetša bophelong, ya ba ge a phema go theogela bodulabahu. Morena o pšhatla magae a baikgogomoši, dithetemotse tša bahlologadi tšona o a di šireletša. Morena o šišingwa maanomabe, dipolelo tša leago tšona di a mo kgahla. Moikhumišakaboradia o hlolela lapa la gagwe go šekeletšwa, moilatsogolekobong yena o tla phela. Moloki o nagana pele a fetola, yo kgopo yena o kgabakgaba tše mpe ka ganong. Morena o katologa bakgopo, baloki bona o kwa thapelo tša bona. Motho o thabišwa ke go edišetšwa sefahlego; taba tše dibotse di mo tiiša moko. Moamogelatsholo o dula le ba bohlale. Maganagokgalwa ke moipolai, moamogelatsholo yena o okeletšwa kwešišo. Go boifa Morena ke go ithuta bohlale; pele motho a ka hlompšha o swanetše go ikokobetša. Motho a ka no ba le maikemišetšo, fela molaodi wa tše di tlago hlaga ke Morena. Motho a ka no gopola gore tšohle tše a di dirago di lokile, kganthe yo a elago maikemišetšo ke Morena. Gafela Morena tše o di dirago, gomme o tla atlega mererong ya gago. Dilo tšohle di na le se Morena a di hloletšego sona, le bakgopo ba hloletšwe tšatši la masetlapelo. Morena o šišingwa moikgogomoši, ruri, yo mobjalo a ka se phonyokge kotlo. Motho o swarelwa dibe ka go rata Morena le go mmotegela; ka go mmoifa motho o phema bobe. Ge motho a phela ka go kgahla Morena, Morena o mo phediša le manaba a gagwe ka khutšo. Bonnyane o bo hwetšago ka toka bo phala bontši o bo hwetšago ka boradia. Motho a ka itherela boyo, fela ke Morena yo a mo etetšago. Kgoši e bolela ka maatla a go tšwa go Modimo; tša gagwe dikahlolo di lokile. Morena o nyaka ge go šomišwa kelo ya nnete; ke yena a beago seroto. Magoši a šišingwa ditiro tše mpe, gobane toka ke yona e tiišago mmušo. Mokgahlakgoši ke mmolelatherešo; moratwakekgoši ke wa polelo tše di lokilego. Kgalefo ya kgoši e ka hlola lehu; yo bohlale o a e tima. Botho bja kgoši bjona bo a phediša, bo bjalo ka maru, manešapulayatsheola. Go huma ka bohlale go phala go huma ka gauta; go ba le kwešišo go phala go ba le silibera. Baloki ba phela ka go šikologa bobe; yo a itotago maitshwarong o tla phela. Boikgogomošo bo iša motho tahlegong; boikgodišo bo feleletša ka go wiša motho. Go ikokobetša le baikokobetši go phala go abelana phahlanahlakola le baikgogomoši. Mošetšakeletšo o a atlega; go lehlogonolo yo a tshephago Morena. Motho yo bohlale re ra wa kwešišo; mmoledi wa sethakga ke wa go kgodiša batho. Tlhaologanyo e kgontšha mohlaologanyi go ipshina ka bophelo; mašilo a bolawa ke bošilo bja ona. Yo bohlale o nagana pele a bolela; ka gona polelo ya gagwe e a kgodiša. Polelo tše bose di swana le mamapo a dinose – a a natefago ka ganong, gape a fepago mmele. Go na le tsela ye e bonalago nke e lokile, fela mafelelong e iša lehung. Diyamaleng di hlohleletša mošomi go šoma, gobane o šomišwa ke tlala. Senokwane se loga maanomabe; ganong se tshwa polelo tše di fišago boka mollo. Moradia o hlola phapano; wa lesebo o lweša bagwera ba go ntšhana sa inong. Ntwadumela o goketša batho, a ba tšeiša ka tsela tša go se loke. Motho wa go budulala o nagana bomenemene; sepetlamelomo o rera bobe. Moriri wo mošweu ke seala, ke moputso wa ba ba phelago ka go loka. Motho wa pelotelele o phala mogale; wa go se tshelwe ke pelo o phala wa go thopa motse. Batho ba ka no dira matengwa, eupša sephetho se tšewa ke Morena. Go ja nthathana ya molatšana o iketlile go phala go ja dimakhura ka lapeng la diphapano. Mohlanka yo bohlale o laola ngwanamalešadihlong, ya ba mojabohwa le barwa ba monglapa. Silibera e hlwekišwa ka go tološwa ka pitšeng; gauta e hlwekišwa ka go tološwa moubelong, kganthe pelo ya motho yona e hlahlobja ke Morena. Modiratšempe o theeletša polelo tše mpe, wa maaka o hlwaela lesebo tsebe. Mokweramodiidi o nyefola Mmopi wa gagwe, mothabelamadimabe a mongwe a ka se phonyokge kotlo. Ditlogolwana ke diala tša diputswa, barwa le bona ba itheta ka botatabo. Polelo ye botse e rona lešilo, maaka le ona a rona mokgomana. Tsogolekobong mofi wa lona o re ke pheko, o re le mo kgontšha tše a di dirago. Molebalelaphošo ke wa go nyaka kwano; motsošološaphošo yena o lweša bantšhanasainong. Monatlhaologanyo o kwa kgalemo, lešilo lona le palela le thupa tše lekgolo. Yo kgopo o kgonetše go tsoša mmudubudu, eupša o tla otlwa gasehlogo. Go gahlana le bere ye e hlakotšwego bana go phala go gahlana le lešilo le tša bošilo bja lona. Yo a lefetšago botse ka bobe, bobe bo ka se tloge ka ga gagwe. Go rumolana go swana le go phulela meetse mosele; wena o tloge ntwa e sešo ya thoma. Wa go lokafatša yo kgopo le wa go tšwa moloki ba šišimiša Morena ka babedi. Go thušang go fa lešilo tšhelete ya go lefela thuto, mola le sa nyake thušo? Mogwera ke yo a go botegelago ka nako tšohle; morwarragomotho o ema naye mathateng. Mohlokatlhaologanyo o itlema go lefela motho melato ge mongmelato a palelwa; o ikana go lefela yo a jetšego molato mpeng. Yo a ratago go kgopiša batho o rata diphapano; yo a ikgogomošago o a ipolaya. Senokwane ga se atlege; mpheane le yena o wela kotsing. Motswalasetlatla o rwele bothata; tatagolešilo ga a na lethabo. Motho wa go thakgala ke yo a phetšego gabotse; wa go nolega moko yena ga a na maatla. Yo kgopo o amogela tsogolekobong gore go menolwe toka. Monatlhaologanyo o ikemišetša go dira tša bohlale, lešilo lona ga le na maikemišetšo. Ngwana yo e lego setlaela o nyamiša tatagwe, o kweša mmagwe bohloko bjo bogolo. Go lefiša mohlokamolato ga se gwa loka; go betha mokgomana ga go a lebana. Motsebi ga se wa go balabala, wa go se felafele pelo ke yena wa kwešišo. Le lešilo ge le ikhomoletše le ka sengwa yo bohlale; ge le momile molomo go ka thwe le ne tlhaologanyo. Tšhikanoši ke wa go nyaka go dira boithatelo, o gana maele ka moka a mabotse. Setlatla ga se tshwenyegele go kwešiša ba bangwe, se rata fela go bolela tše se di naganago. Bokgopo bo sepela le lenyatšo, tlhomphologo e sepela le kgobogo. Polelo ya yo bohlale e ka teba bjalo ka bodiba; e ka ba bjalo ka noka ye e elago, e ka ba mothopo wa bohlale. Go emelela monamolato tshekong, e le ge o lahla mohlokamolato, ke phošo. Polelo tša setlatla di hlola phapano, di se bakela go itiwa. Lešilo le ipolaya ka dipolelo tša lona, le tanywa ka tše le di bolelago. Lesebo la mpheane le bose, le etša seakolo se se kwametšwago. Motho wa sebodu ke yo mobe, o bjalo ka motšitlanyi. Morena o bjalo ka tora ye e tiilego yeo moloki a ka tšhabelago go yona a bolokega. Mohumi o bona lehumo la gagwe e le motse wo o ageleditšwego, e le morako wo mogolo wo o mo šireleditšego. Go ikgogomoša ke go ikiša tahlegong; ge o nyaka go hlompšha o ikokobetše. Yo a arabago a se a kwa potšišo o dira tša bošilo le tša go rumolana. Monakgotlelelo ga a fekeetšwe ke bolwetši, eupša ge a nolegile moko a ka swarelela bjang? Monatlhaologanyo o fišegela go tseba; yo bohlale o dula a hlwaetše tša tsebo tsebe. Mpho e phulela moabi wa yona tsela, e mo fihliša go ba ba nago le maatla. Mmolelapele tshekong o a kgolwa, go fihlela ge go etla wa go mo sekišiša. Taba ya banna ba maatla ba ba lwago ka kgorong ya tsheko e ka ahlolwa ka go direlwa matengwa. Ngwanabomotho a kgopišwa, ga a tsenege, o feta le motse wo o ageleditšwego ka go se tsenege, wa fapana naye, o gana poelano. Motho a ka iphediša ka tše a di bolelago, a ka ikhweletša dijo ka go ba seboledi. Lehu le bophelo di laolwa ke go bolela ga motho; yo a bolelago kudu o tla ikobela. Yo a nyetšego mosadi ke yo lehlogonolo, o thabelwa ke Morena. Sa modiidi ke go kgopela, fela mohumi a fetole ka sekgapho. Bagwera ba bangwe ba a lahletšana, ba bangwe bona ba tshephagala go feta bana ba motho. Modiidi yo a hlokago bosodi o phala moradia wa lešilo. Mahlahla a mohlokatsebo ga a na mohola; lephakuphaku le a lahletša. Motho o itahla ka botlatla bja gagwe, gomme a sole Morena. Lehumo le gokela motho bagwera ba bantši; modiidi yena o tšhabelwa ke wa gagwe mogwera. Hlatse ya maaka ga e pheme kotlo, ramaaka ga a ke a phonyokga. Ba bantši ba leka go ithatiša ba bagolo; yo a sa timanego batho ba ikgweranya naye. Modiidi o hloiwa le ke banababo, bagwera ba gagwe le bona ba mo katologa le go feta. Le ge a ithapeletša go bona, ga go thuše selo. Moithati o katanela go hwetša bohlale, moitapišetšakwešišo le yena o a atlega. Hlatse ya maaka ga e pheme kotlo; ramaaka yena o tla bolawa. Go phela ka matsaka go rona lešilo, lekgoba lona ge le laola bakgomana le ronwa le go feta. Motho yo bohlale o pelotelele; bothakga bja gagwe ke ge a sa latišiše dikgopi. Kgalefo ya kgoši e etša go bopa ga tau, kgaugelo ya gagwe yona nke ke phoka bjanyeng. Ngwana yo e lego setlaela o tsenya tatagwe mathateng; mosadi wa go ngamola hlogo ke kgwara bjalo ka meetse a a rothago tlhakeng ya go dutla. Lapa le lehumo ke bohwa bja go tšwa go batswadi ba motho, mosadi wa go loka yena o tšwa go Morena. Bobodu bo robatša motho boroko bjo bogolo, sebodu se phela se bolawa ke tlala. Yo a phethago taelo tša Morena o a itota; yo a sa di šetšego yena o a ipolaya. Yo a fago modiidi selo o adima Morena, gomme Morena o tla mo putsa. O kgale ngwanagago go sa holofetša, fela o se galefe wa go mmolaya. Mofelafelapelo o tla ipona; wa mo hlakodiša gatee, o tla swanela go mo hlakodiša gape. Theeletša maele, o eletšege, gore ka moso o be yo bohlale. Motho a ka no ikemišetša dilo tše di fapafapanego, fela thato go phethega ya Morena. Se se rategago mothong ke lerato la kilaphetogo; go ba ramaaka go phalwa ke go diila. Yo a boifago Morena o a atlega; o robala a sa hlobaele, a sa welwe ke madimabe. Sebodu se ngwatha bogobe ka mogopong, fela sa tšwafa go iša seatla ka ganong. Otla mokodutli, e be go lemoša mohlokatsebo go tša bophelo; mohlalefi wa go kgalwa o hlalefa le go feta. Motlaišatatagwe le morakammagwe ke mohlabišadihlong wa manyala. Ngwanaka, ge o ka ithiba ditsebe ge o rutwa, o ka se be le tsebo. Hlatse ye mpe e menola toka. Yo kgopo o kgabakgaba bokgopo ka ganong. Bakodutli ba beetšwe kotlo, mašilo le ona a beetšwe go itiwa mokokotlo. Beine e fa motho makoko, bjala bo hlola mašata. Mang le mang yo a tagwago ke setlatla. Kgalefo ya kgoši e swana le go bopa ga tau; yo a mo galefišago o a ipolaya. Go se itsenye diphapanong ke go ipha seriti; ke setlaela fela se se ikgalefišago. Sebodu ga se leme ka nako ya gona; ka gona, ge se re ke yo buna ga se hwetše selo. Menagano ya motho ga e fihlelelwe, e etša meetse ka bodibeng; ke fela wa temogo yo a ka kgonago go mo utolliša yona. Ba bantši ba ipitša babotegi, eupša na o gona yo a tlogago a tshephega? Yo a dirago tše di lokilego, mohlokabosodi, bana ba gagwe ba na le mahlatse. Kgoši ge a ahlola o hlokola tšohle tše e lego diphošo. Na o gona yo a ka rego ga a itshesengwe, o tlošitše dibe tša gagwe? Morena o šišingwa dikelo tša boradia. Ngwana o tsebja ka mediro ya gagwe; o ipontšha ka maitshwaro gore o hlwekile, o lokile. Tsebe ye e kwago le leihlo le le bonago, ka dipedi di dirilwe ke Morena. O se rate boroko, gore o se tlo diila; o tsaroge phoka, o tle o atelwe ke tša go ja. Moreki o a galala o re: “Ke llwe! Ke llwe!” Eupša ge a tloga o tšama a itheta ka theko ye a e hweditšego. Go tseba se o se bolelago go phala gauta le magakabje a mantši. Yo a itlemago go lefela mošele molato ge yena mongmolato a palelwa, a amogwe kobo, e swarwe go fihlela mošele yoo a lefa molato wa gagwe. Motho o ipshina ka sejo se a se hweditšego ka boradia, eupša ka morago a kwe nke o ja lekgwara. Kgopela maele mererong ya gago, gomme o tla atlega; le ntweng ge o eya o theeletše keletšo tše dibotse. Mpheane ga a kgone go uta sephiri; o se ikopanye le difafatlane. Yo a rogago tatagwe goba mmagwe o tla bolawa a ba bjalo ka lebone le le timago swiswing. Bohwa bo hweditšwego ka lephakuphaku mathomong, mafelelong ga bo atle motho. O se ke wa re: “Ke tla itefeletša;” tshepha Morena, mme yena o tla go lamolela. Morena o šišingwa dikelo tša boradia; dikelo tša bofora ga se di loke. Bophelo bja motho bo laolwa ke Morena; bjale motho a ka kwešiša bjang tše di mo hlagelago? Go abela Morena mpho ka lephakuphaku ke go ithea, ge eba ka morago o tla itsholela keno yeo ya gago. Kgoši ye bohlale e hlokola bakgopo, ya ba otla e se na lešoko. Letswalo la motho ke lebone la Morena, le lekola boteng bja pelo ya motho. Kgoši e lotwa ke lerato le potego, pušo ya yona e thekgwa ke toka. Boikgantšho bja masogana ke maatla a bona, seala sa diputswa sona ke moriri wo mošweu. Kotlo ye bohloko e lahliša motho bobe; thupa e ruta motho maitshwaro a mabotse. Morena o laola monagano wa kgoši bjalo ka ge a laola moela wa meetse, a o lebiša mo a ratago gona. Motho a ka no gopola gore tšohle tše a di dirago di lokile, kganthe yo a elago maikemišetšo ke Morena. Go phethagatša toka le tshwanelo go kgahla Morena go phala go mo direla dihlabelo. Ka mehla bakgopo ba a ikgogomoša, ba a ikgantšha, gomme seo ke sebe. Dikakanyo tša motho wa seroto di mo tlišetša mokhora, lepotlapotla lona le boelwa ke bohloki. Humo le hwetšwago ka boradia le nyamelela wa phefo, le bea motho kotsing ya lehu. Bakgopo ba gogolwa ke šiši ya bona, ka ge ba gana go dira tše di lokilego. Sekebeka se sepela tsela di manyokenyoke, mohlokamolato yena o dira tše di lokilego. Go dula nkhutlwaneng ya tlhaka go phala go dula le mosadi wa go ngamola hlogo. Yo kgopo o dula a duma go dira tše mpe; ga a na botho. Go otlwa ga mokodutli e ba go lemoša mohlokatsebo go tša bophelo. Go ruta yo bohlale ke go mo okeletša tsebo. Modimo, Moloki, o beile lapa la yo kgopo leihlo, o le fediša molokwanarite. Moithibatsebe wa ge go lla modiidi, le yena ge a lla a ka se kwewe. Mpho ya ka sephiring e okobatša kgalefo; neo ye e fihlilwego ka seaparong e fokotša bogale. Ge go dirwa ka toka moloki o a thaba, kganthe badiratšempe bona ba a tšhoga. Yo a se sa dirago tša tlhaologanyo o tla felela bodulabahu. Morataboithabišo o dula a diila; moratabeine wa go rata le menyaka le yena ga a hume. Bakgopo le ba go se tshephege ba welwa ke madimabe, baloki le batshephegi bona ba a šireletšwa. Go iphelela lešokeng go phala go dula le mosadi wa go ngamola hlogo, wa swele. Ka lapeng la yo bohlale go letše lehumo le dinkgabose, lešilo lona le senya tšhelete la šala le le fela. Yo a phegelelago go dira ka toka le lerato, o tla phela ka boiketlo, o tla swarwa gabotse, a hlomphiwa. Molaodi yo bohlale a ka thopa motse wa bagale, a phušola sebo se ba se tshephilego. Yo a itotago ge a bolela o phema mathata. Mokodutli ke motho wa mereba le boikgogomošo, wa go ikgantšha kudu. Motho wa sebodu ke moipolai, ka ge a gana go šoma. O hlwela go duma dilo letšatši ka moka; moloki yena o a fa, ga a timane. Morena o šišingwa dihlabelo tša bakgopo, gagolo ge ba di dira ka maanomabe. Hlatse ya maaka e tla kgaotšwa polelong; bohlatse bja motho yo a theeletšago potšišo gabotse, bjona bo a amogelwa. Moloki o tseba taba tša gagwe, yo kgopo yena ke tsebanyane fela. Morena ga a kgonwe ka bohlale, goba ka kwešišo, goba ka maano. Pere e ka tlwaeletšwa tšatši la ntwa, eupša phenyo e tšwa go Morena. Go tuma go phala go huma kudu, go hlomphega go phala silibera le gauta. Bahumi le badiidi ba swana ka taba ye: ka moka ba bopilwe ke Morena. Yo bohlale o bona kotsi e sa tla gomme a e pheme, mohlokatsebo yena o leba go yona gomme a wele. Go ikokobetša le go boifa Morena go tlišetša motho lehumo, le tlhompego, le bophelo. Moipabaledi o phema meetlwa le melaba ye e lego tseleng ya yo kgopo. Ruta ngwana tsela ya go phela, gomme bophelong bja gagwe ka moka a ka se e lahle. Mohumi o laola badiidi, moadingwa ke lekgoba la moadimi. Mobjalabokgopo o welwa ke madimabe, ya ba ge batho ba ikhuditše bogale bja gagwe. Mafakudu o a šegofatšwa, ka ge dijo tša gagwe a di ngwathelana le bahloki. Raka mokweri, kgang e fele, go fele le phapano le tlhomphollo. Yo a ratago boloki, wa polelo tša botho, kgoši e tla ba mogwera wa gagwe. Morena o šetša gore tsebo e lotolwe; polelo tša ba go se tshephege o a di phuhlamiša. Sebodu se re: “Ka ntle go ne tau! Nka bolawa kua mekgotheng!” Polelo tša seotswa ke molete wa go iša; yo a galefetšwego ke Morena o wela ka gare ga wona. Go seleka ke mokgwa wa ngwana, gomme go kgonwa ke thupa ya tsholo. Yo a ikhumišago ka go ja badiidi matsogo, goba a fago bahumi dimpho, o tla diila. Hlwaya tsebe o theeletše polelo tša borabohlale; thuto ya ka o e ele hloko. Ge o ka di boloka ka pelong, tša dula di le molomong wa gago, o tla ipshina ka tšona. Ke ruta wena lehono, gore o phele o botile Morena. Ke go ngwaletše diema tše masome a mararo tša go go eletša le go go okeletša tsebo, gore o tle o lemoge se se lokilego le se e lego therešo; ke mo e tlago re ge o romilwe wa boa le pego ya nnete. O se hlalefetše modiidi ka ge e le modiidi, le mohlaki o se mo tšeatšee kgorong. Gobane bona bao tabeng ya bona ba tla bolelelwa ke Morena, bahlakodi le bona Morena o tla ba hlakola bophelo. O se gwerane le sefelapelwana; o se sepelelane le motho wa pelwana ye nyennyane, ka gore o ka tla wa tlwaela mekgwa ya gagwe, mme wa šitwa ke go e lahla. O se itleme go lefela motho molato wa gagwe ge yena a palelwa; o se ikane go lefela motho yo a jetšego molato mpeng, ka gore ge o ka šitwa ke go lefa, ba ka go amoga le bolao bja gago, wa šala o robetše fase. O se šuthiše mollwane wa gago wa bogologolo wo o tsemilwego ke borakgolokhukhu ba gago. Sekgoni sa modiro ke sa go direla magoši, e sego bathofela. Ge o eja le mmuši o ele hloko tše di lego pele ga gago. O itshware ge o itseba o na le bojelo. O se dume dijo tše bose tše a go soletšego tšona; a ka no ba a go theile. O be yo bohlale – o se itapišetše lehumo. E ka re o sa ikweša lona la go tšwa ka diatleng, mo nkego le metše diphego, la fofela leratadimeng boka ntšhu. O se je dijo tša ngame; o se dume dijo tše bose tše a go soletšego tšona, gobane o dula a bala tshenyegelo ya gagwe go tšona; o bjalo. Le ge a re: “A re je! A re nwe!” ka pelong ga a realo. O tla hlatša le nthathana ye o e llego, gomme mantšu a gago a tebogo a tla be a lobile. O se bolele le setlaela taba tše thata, gobane se ka se di kwešiše. O se šuthiše mollwane wa gago wa bogologolo, goba wa selela ka tšhemong ya tšhuana. Gape Mošireletši wa bona ke yo maatla, gomme tabeng ye ya bona ba tla bolelelwa ke yena. Tše o di rutwago o di ele hloko, o hlwaele yo a go rutago tsebo tsebe. O se dikadike go kgala ngwana; thupa e ka se mmolaye, e tla mo hlakodiša gore a se ye bodulabahu. Ngwanaka, ge o ka ba yo bohlale nka thaba kudu. Ke tla hlalala ge o bolela tše di lokilego. O se ke wa duma badiradibe; wena o dule o boifa Morena. Ge go ka ba bjalo, gona bokamoso bja gago bo tla kgahliša, le kholofelo ya gago e ka se be ya lefeela. O theeletše, ngwanaka, o be yo bohlale, o sepele tseleng ye e lokilego. O se tlwaelane le ditagwa goba dijagobe. Ditagwa le dijagobe di tla diila; raboroko o tla apara maratha. O theetše tatago yo a go tswetšego, le mmago ge a tšofetše o se mo nyatše. O ikhweletše therešo le bohlale le thuto le kwešišo, mme o se ke wa di lahla. Tatagongwana wa go loka o hlalala gagolo, motswadi wa ngwana yo bohlale o a mo thabela. Le wena tatago le mmago a ba go thabele, mmago yo a go belegego a hlalale. O ntheetše gabotse, ngwanaka, o kgahlwe ke mokgwa wo ke phelago ka wona. Segwebakathobalo ke molete wa go iša, seotswa ke mokoti wo o pitlaganego. Basadi bao ba lalela batho bjalo ka mohlakodi, ba febiša banna ba bantši. Yo madimabe ke mang? Selewakeletswalo ke mang? Setagwa sa dintwa ke mang? Mmalabadi ke mang? Dintho tša maitirelo ke tša mang? Yo mahlomahubedu ke mang? Ke ba go lala ba galampela mabjala, ba go hlwa ba ekwa tatso ya metswako ya madila. O se gokwe ke bohwibidu bja beine ge e tsetsema ka senwelong, le ge e theogela gamonate. Ka morago o ikwa nke o lomilwe ke noga ya mpholo, nke o tshwetšwe ke petla ka bohloko. O bona dilo di šele tše di sego gona; monagano wa gago le polelo ya gago di a hlakahlakana. O ikwa nke o ka gare ga lewatle, nke o patlame godimo ga dithapo tša leselawatle. O re: “Ke swanetše go ba ke itiilwe ka se gobatšwe. Ke swanetše go ba ke papatlilwe ke sa kwe. Ke tla tsoga neng ka yo tšea se setee?” O se ke wa duma batho ba babe, goba wa šika le bona. Se ba se naganago ke šiši fela; ba bolela fela ka tša go hlola mathata. Lapa le thewa ka kwešišo, la agwa ka bohlale. Ke ka tsebo ge diphapoši tša lona di tlala diphahla tša mehutahuta tše bohlokwa, tša go kgahliša. Monna yo bohlale ke kwankwetla; monaletsebo o feta senatla ka maatla. Gape ntwa e kgonwa ka go itokišetša yona gabotse; go fenya go fenywa ka maele a baeletši ba bantši. Go lešilo bohlale ke phetatlhaologanyo; ge le le kgorong ga le bolele. Yo a dulago a rera tše mpe batho ba mmitša ramaanomabe. Go akanya tša bošilo ke sebe; batho ka moka ba šišingwa mokodutli. Ge o se na sebete nakong ya tlalelo go ra gore ga o na maatla a selo. O phološe ba ba gogiwago ba yo bolawa; o hlakodiše ba ba totobišetšwago polaong. Ge o ka re: “Ke be ke sa tsebe,” Molekolapelo o tla bona gore o bolela maaka. Yo a go dišago o tla tseba; gape o putsetša motho mediro ya gagwe. Ngwanaka, o je todi ya dinose, e lokile. Bjalo ka ge todi ya mamapo e le bose lelemeng, tseba gore le bohlale bo bjalo mothong. Ge o ka bo hwetša o tla ba le bokamoso bjo bo kgahlišago, le kholofelo ya gago e ka se be ya lefeela. O se lalele moloki ka ga gagwe boka yo kgopo, goba wa thopa tša lapa la gagwe. Moloki le ge a ka wa leboelela o a tsoga, yo kgopo yena o phekgolwa ke madimabe. O se thabele go wa ga lenaba la gago, goba wa thakgala ge a kgopša. Morena a ka go bona mme a se kgahlege, a lesa go mo otla. O se ferekane ka baka la badiratšempe, goba wa duma bakgopo. Motho yo mobe a ka se atlege; yo kgopo a ka se phele go ya kae. O boife Morena, ngwanaka, o boife le kgoši. O se tlwaelane le bao ba ba tsogelago maatla; ba babjalo ba ka khukhunetšwa ke madimabe. Kgane ke mang yo a tsebago madimabe a ba ka a tlišetšwago ke Morena le kgoši? Tše dingwe diema tša bahlale šedi: Go ahlola sepitša ga se gwa loka. Moahlodi yo a rego go wa molato: “Ga o na molato!” o tla rogwa ke batho; setšhaba se tla mo sola. Baahlodi ba ba otlago banamolato ba tla atlega; ditšhegofatšo di tla ba atela. Yo a fetolago a sa itome leleme ke mogwera wa mmakgonthe. Feleletša modiro wa gago wa ka ntle, o kgathe le mašemo a gago, o kgone o ikagela ntlo. O se be hlatse ya go tšwa motho o se na lebaka; o se radie batho ka tše o di bolelago. O se re: “Ke tla mo dira se a ntirilego sona! Ke tla itefeletša!” Nkile ka feta tšhemong ya sebodu, le serapeng sa merara sa moitlhokišatlhaologanyo yoo. Ka bona go medile ditshehlo mo gohle, bogopa le bjona bo nabile, le morako o kgeregile. Ka re go di bona ka gopodišiša, mme ka ithuta taba ye e rego: Go robala gannyane, wa bo re šwaa, wa phutha matsogo, wa bo fokotša gosenene – ge o ka no pompala bjalo, bodiidi bo tla go phuthuma bjalo ka mohlakodi, mohlako wa go tsetsela bjalo ka mokgopedi. Tše dingwe diema tša Solomone tše di ngwalolotšwego ke bahlankedi ba Hiskia, kgoši ya Juda, šedi: Modimo o hlomphelwa ge a bipa ditaba; magoši a hlomphelwa ge a bipolla ditaba. Tša ka pelong ya kgoši ga di tsebje, di etša go akalala ga legodimo le boteng bja lefase. Hlokolang silibera, makgone a bope se sengwe ka yona. Ntšhang yo kgopo ka mošate, kgoši e tle e buše ka toka. Se ithete pele ga kgoši goba wa ipea le ba maemo. Go kaone ge o ka botšwa gore o ye madulong a ka pele, go na le gore o kokobetšwe pele ga bakgomana. O se kitimele kgorong ya tsheko go yo bega se o se bonego; o tla reng ge hlatse ye nngwe e ka go bontšha gore o fošitše? *** Ge o sekišana le moagišani kgorong, sephiri sa mongwe sona o se se utolle. Ka gore ge a ka tseba a ka go sola, wa napa wa kgomarelwa ke bogoboga. Lentšu le le boletšwego ka nako ye e lebanego le etša mekgabišo ya diapola tša gauta tše di tlokilwego sebjaneng sa silibera. Go motho wa tsebe go kgalwa ke motho yo bohlale go etša lengina la gauta goba sekgabišo sa gauta. Morongwammotegi o lapološa baromi ba gagwe go etša lehlwa le le timolago phišo nakong ya ge go bunwa. Mokgantšhampho tša molomo o swana le maru le phefo ye e sa tlišego pula. Bopelotelele bo kgona le babuši; leleme le boleta le fetša manganga. Morafadinose o di ja ka tekanyo; sejagobe se kgonwa ke go hlatša. Se etele moagišani kgafetšakgafetša, ka gore o ka mo tena a ba a go hloya. Mpharamongwe o bjalo ka thoka, goba tšhoša, goba mosebe wa mantsi. Go ikanya sefelele tlalelong ke go sohla ka ino la go bola, goba go gata ka leoto la go hlotša. Go opelela mojapelo koša ya lethabo go etša go apola motho kobo mohla go tonya, goba go tšhaša ntho ka sekanama. Ge lenaba la gago le swerwe ke tlala o le fe dijo; ge le nyorilwe o le fe meetse le nwe. Ka mokgwa woo o tla le leša dihlong, gomme Morena o tla go putsa. Lesebo le hlola kgalefo bjalo ka ge phefo e tšwago ka leboa e hlola pula. Go itulela nkhutlwaneng ya tlhaka go phala go dula le mosadi wa go ngamola hlogo. Ditaba tše di thabišago tša go tšwa nagakgole di etša meetsematonya go yo a nyorilwego. Moloki yo a palelwago ke yo kgopo o swana le sediba se se dubegilego, goba mothopo wo o hlapetšwego. Go ja dinose kudu ga se gwa loka; go ithatiša batho go feta tekanyo le gona go bjalo. Motho yo a tshelwago ke pelo o kotsing go swana le motse wo manaba a o kgerešitšego merako. Tlhompho e rona lešilo bjalo ka lehlwa ge le rona selemo, goba pula ge e rona nako ya puno. Maroga a ka se kweše motho bohloko, ge e se fela ge a mo swanela. A swana le thaga ye e se nago sehlaga, le peolwane ye e fofago. Pere e lebanwe ke tshelane, pokolo e lebanwe ke mogala, lešilo le lebanwe ke thupa mokokotlong. O se arabe lešilo ka mokgwa wa bošilo, wa tlo swana nalo. O arabe lešilo ka mokgwa wa bošilo, gore le se tlo itshema yo bohlale. Go laeletša taba ka lešilo ke go ipolaya, ke go ipiletša mathata. Diema tše di tšwago molomong wa lešilo ga di na mohola, di bjalo ka maoto a segole a a rephilego. Go hlompha lešilo ga go bontšhe tlhaologanyo, go swana le go bofelela leswikana seragamabjeng. Diema tše di tšwago molomong wa lešilo di a segiša; di swana le setagwa se se phepelago ka lehlakhu la meetlwa. Ramesebe yo a thuntšhago bafeti a sa kgethe o etša mothwalasetlatla goba mothwalasetagwa. Lešilo le le boeletšago go dira bošilo bja lona le swana le mpša ye e boelago go ja mahlatša a yona. Go na le kholofelo ya gore lešilo le ka kaonafala go phala moitshemabohlale. Sebodu se re: “Kua tseleng go na le tau, e ebela mekgotheng!” Se duletše go pshikologa bolaong bja sona, bjalo ka lebati ge le bulega digonong tša lona. Se ngwatha bogobe ka mogopong, fela se tšwafa go iša seatla ka ganong. Se itshema yo bohlale go feta batho ba šupago ba ba kgonago go fetola ka tlhokomelo. Go itsenya diphapanong tša ba bangwe go swana le go swara mpšapheti ka ditsebe. Yo a rego go radia motho a re: “Ke be ke swaswa,” o swana le segafi se se betšago dirumola, goba mesebe le ye e bolayago. *** Ge go se na dikgong, mollo o a tima; ge go se na lesebo, diphapano di a fela. Bjalo ka ge ka dikgong go gotšwa mollo, ka malahla o kgohletšwa, radintwa le yena sa gagwe ke go fehla ntwa. Lesebo la mpheane le bose, le etša seakolo se se kwametšwago. Motho wa leleme le boreledi, wa pelo ye mpe, o swana le lengetana le le ritetšwego ka selo sa mmala wa silibera. Wa lehloyo a ka ikgakantšha ka leleme le boreledi, etšwe ka pelong a fihlile bofora. Le ge a bolela ka boleta, o se mo tshephe, gobane o dula a rera bobe ka pelong. Le ge lehloyo la gagwe le ka iphihla ka bofora, bokgopo bja gagwe bo tla feleletša bo tšweletše nyanyeng. Yo a epelago bangwe mokoti go tla wela yena ka gare. Yo a kgokološago leswika le tla pšhatla yena. Ramaaka o hloya ba a ba pharago; wa leleme le boreledi o a lahletša. O se kgantšhe tša gosasa, gobane ga o tsebe tše di tlago nalo. O se ithete, o retwe ke bangwe; o tumišwe ke batho, e sego wena mong. Leswika le boima, le lešabašaba le a šita, eupša go rumolwa ke lešilo go imela le go feta. Pefelo e sehlogo, kgalefo le yona e a senya; lehufa lona le senya le go feta. Go kgala motho serokaphatla go phala go se mo kgale etšwe o mo rata. Go kgopišwa ke mogwera wa gago ga go tsotiše; go gokarwa ke lenaba la gago gona go a belaetša. Ge o khoše o šišingwa le todi ya dinose; ge o swerwe ke tlala, le tše galakago di bose. Monna yo a furalelago lapa la gagwe o swana le nonyana ye e ngalago sehlaga. Dinkgabose le diorelo di thabiša motho, mahloko ona a a mo nyamiša. O se tlogelane le mogwera wa gago goba wa tatago. O se itlwaetše go ya ga ngwaneno ge o le mathateng; motho yo a dulago kgauswi le wena o phala ngwaneno yo a dulago kgole. Ngwanaka, eba yo bohlale, gomme ke tla thaba; ke tla kgona go fetola ba ba ntsholago. Yo bohlale o bona kotsi e sa tla, a e pheme; mohlokatsebo yena o leba go yona, a wela. Yo a itlemilego go lefela mošele molato ge mošele a palelwa, o mo amoge kobo; a swarelwe le sebeeletšo sa gagwe. Modumedišamoagišani ka lešata e sa le ka meso batho ba tla re o a mo roga. Mosadi wa go ngamola ke kgwara bjalo ka meetse a a rothago tlhakeng ya go dutla ge pula e ena. Yo a rego a ka mo homotša, go swana le ge a ka re a ka homotša phefo, goba a ka khuparela makhura ka seatla. Tshipi e lootšwa ka ye nngwe, motho le yena o betlwa ke batho. Mohlokomelamogo o ba le mago a go ja, mohlokomelamong o a hlompšha. Bjalo ka ge motho a ipona sefahlego ka meetseng, ka pelong o ipona boyena bja gagwe. Bjalo ka ge bodulabahu le tahlego di sa tenwe ke bahu, ditumo tša motho le tšona ga di tenwe ke dinyakwa tša tšona. Bjalo ka ge silibera e hlwekišwa ka go tološwa ka pitšeng, le gauta e hlwekišwa ka go tološwa moubelong, motho le yena o lekwa ka go retwa. Lešilo le ge o ka le setla le mabele, bošilo bja lona bo ka se le tloge. O emaemele dihuswane tša gago, le mehlape ya gago o e hlokomele gabotse, ka gobane lehumo ga le dulele sa ruri, le bogoši ga bo dulele sa ruri. Ge phulo e fedile mme bjang bo hloga ka bofsa, le bja dithabeng bo kgewa, o ka loga diaparo ka boya bja dinku tša gago, wa ba wa reka naga ka tšhelete ye o rekišago dipudi tša gago ka yona. Maswi a dipudi a tla lekana go fepa wena, le ba lapa la gago, le bahlanka ba gago ba basetsana. Yo kgopo o tšhaba go se na yo a mo rakedišago, moloki yena ke yo bogale bjalo ka tau. Ge go tsogile mpherefere setšhabeng, boetapele bo bakwa ke ba bantši. Naga e lala ge e na le moetapele wa bohlale, wa tsebo. Kgoši, sehlakišabadiidi, e etša pula ya matlakadibe, segogoladibjalo. Bakgopo ba retwa ke ba ba tshelago melao ya Morena, ba lwantšhwa ke ba ba e phethago. Ba babe ga ba tsebe se e lego toka, ba ba khunamelago Morena bona ba kwešiša tšohle. Modiidi wa go hloka bosodi o phala mohumi yo kgopo. Ngwana wa tlhaologanyo o phetha melao ya Morena; mogweranaledijagobe yena o leša tatagwe dihlong. Yo a ikokeletšago lehumo ka go adimiša tšhelete a e tswadiša go feta tekanyo, o e kgobokeletša yo a tlago e fa badiidi. Yo a ithibago ditsebe gore a se kwe melao ya Morena, le dithapelo tša gagwe di šišimiša Morena. Yo a arošetšago moloki tseleng tše mpe, go tla wela yena moreong woo wa gagwe. Bahlokabosodi bona ba tla atlega. Mohumi o ipona e le yo bohlale, o lemogwa ke modiidi wa tlhaologanyo. Ge baloki e eba baetapele, go a hlalalwa, fela ge bakgopo e eba baetapele, batho ba a khuta. Mmipadibetšagagwe a ka se atlege; yo a ipolelago tšona a ba a di tlogela, yena Modimo o tla mo gaugela. Go lehlogonolo yo a boifago Morena ka mehla; yo a retelago a sa mmoife yena o tla welwa ke masetlapelo. Mmuši yo kgopo wa setšhaba se se hlakago o bjalo ka tau ye e bopago, ke bere ye e hlaselago. Mmuši, mohlokatlhaologanyo, o hlakiša setšhaba kudu; yo a hloilego poelo ya bomenetša o phela galele. Mmolai o tla phela a tšhaba go fihlela a ehwa; go se be le yo a mo thibelago. Mohlokabosodi o a lotega; motšeakatselakgopo yena o wa ka bjako. Moitemelatšhemo o bolaya mabele, molatamafeela yena o bolawa ke tlala. Motshephegi o atlega kudu; mopotlakelagohuma ga a pheme kotlo. Go ahlola sepitša ke phošo, fela baahlodi ba bangwe ba rekwa ka sejonyana go dira phošo yeo. Ramegabaru o potlakela go huma, a sa lemoge gore se se mo letetšego ke bodiidi. Mosolamotho o feleletša ka go lebogwa go phala mogegeamotho. Yo a rego go hlakola batswadi ga se phošo ga a fapane le babolai. Ramegabaru o hlohleletša phapano. Yo a atlegago ke yo a tshephago Morena. Moipoti ke setlaela, modirakabohlale yena o a lotega. Yo a fago badiidi a ka se hloke selo; yo a sa ba šetšego yena o tla rogwa ke badiidi ba bantši. Ge bakgopo e eba baetapele, batho ba a khuta; ge ba bolawa, baloki ba ba ema legato. Senganga, sešitabakgadi, se tla hwa sa hwelela ka bjako. Ge baloki e eba baetapele setšhaba se a hlalala; ge bakgopo e eba baetapele setšhaba se a golola. Moratabohlale o thabiša tatagwe; yo a kitimago le digwebakathobalo yena o a itobiša. Ge kgoši e buša ka toka, naga e a lala, eupša ge e tšhediša batho metšhelo ye boima, e bolaya setšhaba. Yo a kuruetšago mogwera o mo theela molaba. Yo kgopo o tanywa ke dibe tša gagwe, moloki yena o ikopelela a thabile. Moloki o tseba ditokelo tša badiidi, yo kgopo yena ditokelo tše bjalo ga a di tsebe. Bakodutli ba hlola mpherefere motseng, ba bohlale bona ba kokobetša kgalefo. Ge yo bohlale a sekišana le setlaela, sona se a mo roga, sa mo sega se sa fetše. Ba go rata go tšholla madi ba hloile mohlokabosodi, baloki bona ba a mo šireletša. Setlaela se hlatša kgalefo ya sona, yo bohlale yena o thekga ditho, a e bipa. Ge mmuši a theeletša ditaba tša maaka, bahlanka ba gagwe ka moka ba fetelwa ke bokgopo. Modiidi le mohlakiši wa gagwe ba swana ka selo se tee – bobedi ba kgontšhwa ke Morena go phela. Ge kgoši e šetša gore badiidi ba direlwe ka toka, e tla buša nako ye telele. Thupa le go kgalwa di a hlalefiša; ngwana wa go itaola o leša mmagwe dihlong. Ge bakgopo e le baetapele, bosenyi bo a ata; baloki ba tla ba bona ge ba phuhlama. O kgale ngwana wa gago ka thupa, o tla ikhutša; ka moso o tla go thabiša. Ge setšhaba se se sa begelwa thato ya Modimo, se tšwa tseleng. Go lehlogonolo yo a phethago melao ya Modimo. Lekgoba ga le kgalwe ka molomo fela, gobane le ge le kwešiša se le se botšwago, le ka no se phethe. Go na le kholofelo ya gore lešilo le ka kaonafala go phala motšhogaaboletše. Lekgoba le le fepetšwago go tloga bjaneng, le feleletša le tšwile ka diatleng. Motho wa pelwana ye nnyane o hlola diphapano; sefelapelwana se dira dibe tše dintši. Moikgogomoši o ipakela go kokobetšwa; moikokobetši yena o a hlompšha. Moabelanalelehodu tše di utswitšwego ke wa go se itlhokomele – o re go kwa moutswetšwa a rogaka, a no ikhomolela. Go tšhaba batho e ka ba sefu; yo a botago Morena yena o lotegile. Ba bantši ba nyaka go ratwa ke kgoši; ke go Morena fela mo motho a ka hwetšago toka. Motho yo a sego a loka o šišingwa ke baloki, le moloki o šišingwa ke yo kgopo. Tše ke dipolelo tša Agure, morwa wa Jake, wa go tšwa Masa. Yena o boditše Itiele le Ukale a tiišitše a re: “Nna ke lešilo la mašilo, ga ke na tlhaologanyo ya setho. Ga se ka ithuta bohlale, le yena Mokgethwa ga ke mo tsebe. Ke mang yo a kilego a rotogela legodimong a ba a theoga? Ke mang yo a kilego a khuparela phefo ka diatla? Ke mang yo a kilego a phuthela mawatle ka lešela? Ke mang yo a beilego mellwane ya lefase? Ke mang? Morwa wa gagwe yena ke mang? Mpotšeng ge le tseba. “Modimo o tshephagala go tšohle tše a di bolelago. Ke kotse ya ba ba tšhabelago go yena. O se oketše tše a di boletšego, ka gore a ka go sola, a bona o le wa maaka.” Ke go kgopela dilo tše pedi; o se ntime tšona pele ke ehwa: Boradia le maaka o di tloše di be kgole le nna; o se ke wa ntiitša goba wa nkhumiša. O mphe dijo tše di ntekanego, gobane ge nka ba le dijo tše dintši, nka tla ka go latola ka re ga ke go hloke. Le gona, ge nka diila nka utswa, mme ka go hlompholla, wena, Modimo wa ka. O se sebe lekgoba go mong wa lona, ka gore le ka go roga, wa lefa ka setopo. Go na le mohuta wa batho ba ba rogakago botatagobona, le gona ba bolelago bommagobona gampe. Go na le mohuta wa batho ba ba iponago ba hlwekile, etšwe ba se ba hlatswiwe tšhila ya dibe tša bona. Go na le mohuta wa batho ba ba iponago kudu, ba ba lebelelago batho ka go ba nyatša. Go na le mohuta wa batho ba meno a nkego ditšhoša, a nkego dithipa a go garola badiidi lefaseng, le go fediša bahloki bathong. Kgofa e na le barwedi ba babedi ba ba kgopelago ba re: “Mphe! Mphe!” Go na le dilo tše tharo tše di sa kego di kgotsofala, gabotsebotse ke tše nne tše di sa kego di re: “Go lekane!” – ke bodulabahu, le mosadi wa moopa, le naga ye e sa kwelelego meetse, le mollo wa hlaga wo o sa kego o re: “Go lekane!” Yo a kwerago tatagwe, goba a ganago go phetha taelo ya mmagwe, o tla gonywa mahlo ke magokobu, a lewa ke manong. Go na le dilo tše tharo tše di ntlabago kudu, gabotsebotse ke tše nne tše ke sa di kwešišego: ke ka mo nong e fofago sebakabakeng, le noga e sepelago letlapeng, le leselawatle le sepelago lewatleng, le monna le mosadi ba thomago go ratana. Tša mosadi wa seotswa šedi: O re go otswa a hlape, mme a re: “Nna ga se ka dira phošo!” Go na le dilo tše tharo tše di dirago gore lefase le roromele, gabotsebotse ke tše nne tše lefase le sa di kgotlelelego: ke lekgoba le e bago kgoši, le setlaela se se sosomatšwago ke mokhora, le mosadi wa mohloiwa yo a nyalwago, le lekgoba la mosetsana le le amogago mong wa lona monna. Go na le diphedi tše nne mo lefaseng tše e lego tše nnyane, eupša e lego tše bohlalehlale: Makeke: ke mohuta wo o sego wa tia, eupša a ipolokela dijo selemo; dipela: le tšona ke mohuta wo o sego wa tia, eupša di ikagela legae ka gare ga maswika; tšie: ga e ne kgoši, eupša ka moka e fofa ka serupa; mokgaditswane: le ka seatla o ka o swara, eupša o hwetšwa le ka mengwakong ya mošate. Go na le diphedi tše tharo tša go šataka ka bothakga; gabotsebotse ke tše nne tša go gwataka ka bokgwari: ke tau, phoofolo ye e tiilego go feta tšohle, ye e se nago se e se tšhabago; ke mokoko wo o gwantago; ke phoko, le kgoši ge e etile batho ba yona pele. Ge eba o kile wa ba setlaela, wa ikgodiša mme wa loga maanomabe, tlogela! Go thitha maswi ke go ntšha sereledi; go itia motho nko ke go mo ntšha mokola; go hlohleletša kgalefo ke go hlola phapano. A ke maele ao Lemuele, kgoši ya Masa, a lailwego ke mmagwe ka ona: “Hee, wena, morwaka, wena, morwaka, mmelegwakenna, wena, morwaka, momphiwakakeno, ke go botšeng? O se ke wa ipheleletša ka basadi, goba wa iphetša maatla a bonna ka bona bomawišadikgoši. “Go nwa beine go rona dikgoši, Lemuele, go a di rona; le go nyorelwa bjala ga go swanele babuši. Ge ba nwele ba lebala molao, ba se šetše gore bahlaki ba direlwe ka toka. Bjala a bo fiwe yo a lego makgatheng, le yo a fifetšego pelo. Bona a ba inwele, ba itebatše mohlako wa bona, ba se sa gopola manyami a bona. “Wena o be molomo wa ba ba sa kgonego go ipolelela; o emele bahlaki bohle ba ba amogwago ditokelo tša bona. O ba bolelele, o be o ba ahlolele ka toka. O šetše gore bahlaki le bahloki ba direlwe ka toka.” Ke mo go thata kudu go hwetša mosadi wa soroto! Ke yo bohlokwa kudu go feta le magakabje. Monna wa gagwe o a mmota, ka gobane mosadi yoo o oketša thoto ya gagwe. O direla monna wa gagwe tše botse fela, e sego tše mpe, bophelong bja gagwe ka moka. O nyaka boya bja nku le leokodi, a ipshina ka go di loga. O tliša dijo tša kgole gae bjalo ka maselawatle a bagwebi. O tsoga e sa le bošego gore a apeele ba lapa la gagwe dijo, le gore a botše badiredi ba gagwe ba basetsana tše ba swanetšego go di dira. O lekola tšhemo gomme a e reka, a bjala merara ka tšhelete ye a e šometšego. O šoma kudu gomme ke seroto. O tseba theko ye e swanetšego tše a di rekago le tše a di dirago, gomme o šoma a goteditše lebone go fihlela mašegogare. O ohla tlhale, a itogela lešela. Ke mafakudu go badiidi, ga a kone bahloki. Ga a tshwenyege ge lehlwa le ewa, ka gobane ba lapa la gagwe ba na le diaparo tše borutho. O loga mašela a malao; o apara diaparo tša lešela le boletiana tša bohubedu bja go retela. Monna wa gagwe o a tsebega kgorong, moo a dulago le bagolo ba setšhaba. Mosadi yoo o roka diaparo a di rekiša, mapanta o a rekišetša bagwebi. Ke yo maatla mme o a hlomphega; ga a boife tša matšatši a a tlago. Ka mehla o bolela tša bohlale, o ruta bana ba gagwe ka botho. O hlokometše tša lapa la gagwe gabotse, ga a je dijo tša bobodu. Bana ba gagwe ba a mo reta, monna wa gagwe o a mo tumiša. O re: “Basadi ba diroto ke ba bantši, eupša wena o ba phala ka moka.” Botsoro bo a fora, botse bo a fela, eupša yo a swanetšego go retwa ke mosadi yo a boifago Morena. Mo reteng ka tše a di dirago. A a retwe ke batho kgorong! Šedi dipolelo tša Mmoledi, morwa wa Dafida. Mmoledi yo e be e le kgoši kua Jerusalema. Yena o re: “Tšohle ke lefeela, lefeela la mafeela, tšohle ke lefeela. Etse motho o boelwa ke eng ge a dulela go itapiša ka go šoma mo lefaseng? Moloko ge o tloga go tla wo mongwe, eupša lefase lona ga le fetoge. Letšatši le a hlaba la ba la yo sobela, la boela mo le tšwago gona le lapile, gore le yo hlaba gape. Phefo e fokela borwa, ya retologa ya fokela leboa; e dikologa ka mokgwa woo e etšwa mo e thomilego gona. Dinoka tšohle di elela ka lewatleng, eupša lewatle ga le tlale. Meetse a lona a boela mo dinoka di thomegago gona, gomme a elela ka lewatleng gape. Dillo ka moka di a lapiša – ke tapišego ye motho a sa kgonego go e hlaloša. Mahlo a rena ga a lapišwe ke go bona; ditsebe tša rena ga di tenwe ke go kwa. Tše di kilego tša hlaga di tla no hlaga gape. Tše di kilego tša dirwa di tla buša tša dirwa. Ga go na selo se sefsa lefaseng ka moka. Ge go ka hlaga se sengwenyana se motho a ka rego: ‘Bonang, se selo ke se sefsa!’ nnete ke gore se šetše se kile sa hlaga mehleng ya kgale, re sešo ra belegwa. Ga go motho yo a gopolago tše di kilego tša hlaga mehleng ye e fetilego, ebile ka moso ga go yo a tlago gopola tše di hlagago go tloga bjale go fihlela mehleng yeo ya ka moso.” Nna, Mmoledi, ke be ke le kgoši ya Israele motseng wa Jerusalema. Ka ikemišetša gore ke tla lebeledišiša dilo tšohle tše di dirwago mo lefaseng, mme ka ithuta tšona ka bohlale. Eupša woo ke mošomo wo o tlaišago wo Modimo a o filego motho gore a o dire. Tšohle tše di dirwago mo lefaseng ke di bone, gomme ke le botša gore ke lefeela. Di swana le go phuthela phefo ka kobo. Tše di kgopamego ga di otlollege, tše di sego gona di ka se balwe. Nkile ka ipotša ka re: “Ke nna monna wa maemo, ke hlalefile go phala magoši ohle a a kilego a buša a le Jerusalema. Ke tseba gabotsebotse se bohlale le tsebo di lego sona.” Ke be ke ikemišeditše go ithuta gore na tsebo le botlaela di fapana bjang, le gore bohlale le bogafi di a swana na. Eupša ka lemoga gore le seo ke go phuthela phefo ka kobo. Ge o le bohlale kudu ke mo o bago le mathata a mantši; ge o tseba kudu ke gona o tlaišegago le go feta. Ka pelong ke ile ka re: “A ke leke go ithabiša, ke kwe gore boipshino bo bjang.” Eupša taba yeo le yona ka hwetša e le lefeela. Ka re: “Disego ke bošilo, gomme boithabišo bjona bo holang?” Ka ipotšiša gore na ge nka itapološa ka beine ke ntše ke tsoma bohlale, ge nka iphediša bjalo ka lešilo go fihlela ke tseba mokgwa wo mobotse wo ka wona motho a ka phelago bophelo bjo bokopana bjo bja lefaseng, go ka ba bjang. Ke ile ka dira mediro ye megolo: ka ikagela dintlo, ka ba ka ipšalela merara. Ka itirela dirapa le dirokolo, ka bjala mehlare ya dikenywa tša mehutahuta. Ka ikepela megobe ya go nošetša sethokgwana seo sa mehlašana ye menana. Ka ithekela makgoba a banna le a basadi, ka ba le makgoba a mangwe a a tswaletšwego ka ga ka. Ka ba le leruo le lentši la dikgomo le dihuswane ka fetiša bohle ba ba kilego ba dula mo Jerusalema pele ga ka. Ka ikgobelela le silibera le gauta, mahumo a ke a hweditšego magošing le dileteng. Ka ikhweletša baopedi ba banna le ba basadi, le basadi ba bantši bao ke bego ke ipshina le bona. Ka gona, ka huma kudu ka ba ka tuma go feta bohle ba bilego gona mo Jerusalema pele ga ka, gomme bohlale bja ka bja nkhola kudu. Ka se itime selo go tšohle tše ke di dumago. Gwa se be le boipshino bjo ke itlhaetšago bjona, gobane go nna kalokano e be e le boipshino, gomme tšeo ka moka e be e le moputso wa kalokano ya ka. Eupša ya re ge ke nagantšhiša tšohle tše ke di dirilego, le ka mo ke katanetšego go di dira, ka lemoga gore tšohle ke lefeela. Di swana le go phuthela phefo ka kobo, ga di na mohola. Ya ba gona ke nagantšhišago bohlale le bošilo le botlaela. Gobane ke eng se sengwe se kgoši e ka se dirago, ge e se gona go dira tše di dirilwego ke ba e ba hlatlamago? Ke mo ke lemogilego gore bohlale bo phala bošilo, go etša seetša ge se phala leswiswi. Yo bohlale o tseba mo a yago gona, kganthe lešilo lona le sepela leswiswing. Fela ke lemogile le gore bobedi bja bona pheletšo ya bona ke e tee. Ka gona, ka pelong ka re: “Pheletšo ya lešilo le nna e ntebane. Gomme bjale go ba bohlale ga ka go mpušeditšeng?” Ka ba ka iphetola, ka re se le sona ke lefeela. Yo bohlale, go no swana le lešilo, a ka se gopolwe go ya go ile, ka gobane matšatšing a a tlago ka babedi ba tla be ba lebetšwe. Yo bohlale o tla hwa go no swana le lešilo. Ke ka baka leo ke ilego ka hloya go phela, ka ge tšohle tše di bego di dirwa di be di nkweša bohloko, gobane tšohle ke lefeela, di swana le go phuthela phefo ka kobo. Ke ile ka tenwa ke tšohle tše ke bego ke katanela go di dira, ka ge ke be ke swanetše go di tlogelela montlhatlami, gomme go tseba mang gore yena e tla ba yo bohlale goba lešilo? Fela taba ke gore tšohle tše ke katanego go di dira ka maatla a ka le ka bohlale bja ka mono lefaseng e tlilo ba tša gagwe. Seo le sona ke lefeela. Ke mo ke ilego ka itlhoboga ge ke nagana ka tšohle tše ke katanego go di dira. Gobane motho le ge a ka šomela selo ka bohlale le ka tsebo le ka temogo, o tla no se tlogelela yo a sego a se šomela. Le yona taba ye ke lefeela, ebile e tloga e le ye mpe. Motho go mo holang go katana le go kalokana a itapiša mo lefaseng? Bophelo bjohle bja gagwe ke bja manyami, le maitapišo a gagwe a mo tlišetša boitlhobogo. Ešita le bošego ga a kgone go fodiša hlogo. Bophelo bja mohuta wo le bjona ke lefeela. Motho ge a na le sa go ja, le sa go nwa, le go ipshina ka tše a di šometšego gaboima, ga se ka baka la gore a lokile. Ke lemogile gore tšeo le tšona di tšwa go Modimo. Kgane ke mang yo a ka bago le sa go ja le sa go ipshina a sa se fiwe ke Modimo? Yo a kgahlago Modimo, Modimo o mo fa bohlale le tsebo le lethabo; kganthe modiradibe yena o mo fa modiro wa go kgobelela le go bokelela mahumo, e le a go tlo tlogelelwa yo a kgahlago Modimo. Gomme le yona taba ye ke lefeela. E no swana le go phuthela phefo ka kobo. Dilo ka moka di na le lebaka la tšona, tšohle di na le nako ye di e beetšwego ke Modimo lefaseng. Go na le nako ya go tswalwa le nako ya go hwa; nako ya go bjala le nako ya go tumola; nako ya go bolaya le nako ya go alafa; nako ya go phušola le nako ya go aga; nako ya go nyama le nako ya go thaba; nako ya go ilela le nako ya go bina; nako ya go lahla maswika le nako ya go a kgoboketša; nako ya go gokarelana le nako ya go se gokarelane; nako ya go nyaka le nako ya go lahlegelwa; nako ya go lota le nako ya go lahla; nako ya go kgeila le nako ya go roka; nako ya go homola le nako ya go bolela; nako ya go rata le nako ya go hloya; nako ya ntwa le nako ya boiketlo. Mohola wa maitapišo a mošomi ke eng? Ke a bona gore Modimo o file batho mešomo ye e lapišago gore ba e dire. O beetše selo se sengwe le se sengwe nako ye e se swanelago. O file batho temogo ya gore nako ga e fele, eupša a se dire gore ba kgone go kwešiša ka botlalo tše a di dirago ka yona nako ye e sa felego yeo. Ka gona ke lemogile gore se motho a ka se dirago ke fela go thakgala le go itirela tše dibotse a sa phela. Le gona motho o swanetše gore a je, a nwe, mme a ipshine ka tše a di šometšego gaboima. Go ipshina moo ke mpho ya Modimo. Ke tseba gore sengwe le sengwe se Modimo a se dirago ke sa go ya go ile. Se ka se oketšwe goba sa fokotšwa. Seo Modimo o se direla gore motho a mmoife. Se se diregago goba se ka diregago se šetše se kile sa direga. Modimo o dira gore dilo di hlage leboelela. Gapegape ke lemogile gore mo lefaseng bokgopo bo hwetšwa mo toka le nnete di swanetšego go ba gona. Ka pelong ka re: “Modimo ke yena a tlago ahlola moloki le yo kgopo, gobane dilo tšohle le mediro yohle di beetšwe ke yena nako.” Ka fetša ka go re: “Modimo o leka batho gore ba tle ba lemoge gore ga ba phale diphoofolo,” gobane se se hlagelago diphoofolo, le batho se a ba hlagela – motho o hwa go no swana le phoofolo. Dilo tše ka dipedi di hema moya o tee. Motho ga a phale phoofolo ka selo, ka ge dilo tšohle di feta. Motho le phoofolo di felela felo gotee – mobung. Ka dipedi di tšwa go wona, mme ka dipedi di tla boela go wona. Kgane ke mang yo a tsebago ge moya wa motho o rotogela godimo, wa phoofolo o theogela fase mobung? Ke mo ke lemogilego gore ga go se sekaone go phala ge motho a ithabiša ka tše a di šomilego, gobane go mo lebane. Kgane ke mang yo a ka mmotšago se se tlago hlaga ge a hwile? Ka buša ka nagana ka mo batho ba hlakišwago ka gona mo lefaseng. Bahlakišwa ba be ba lla, eupša mohomotši a se gona; ba se na wa go ba homotša, ka ge bahlakiši ba bona e le diganka. Ke mo ke naganego gore ba ba hwilego ba na le mahlatse, ka gobane ba ithobaletše, ba na le mahlatse go phala ba ba sa phelago. Eupša ba ba phalago bao bohle ke ba ba se ba kago ba tswalwa, ba ba se ba kago ba bona dilo tše mpe tše di dirwago mo lefaseng. Ke lemogile le gore batho ba katanela go tšwelela ka ge ba tsebafelana. Gomme le sona seo ke lefeela, se swana le go phuthela phefo ka kobo. Lešilo le phutha matsogo, gomme le hwa lehu la tlala. Go kgotsofatšwa ke bonnyane bjo o nago nabjo go phala go katana kudu, gona go swanago le go phuthela phefo ka kobo. Sengwe se ke lemogilego gore ke lefeela lefaseng ke mmotlana, mohlokamorwa, mohlokamorwarragwe. Fela ke madulaakatana, a sa kgotsofale ka ruo la gagwe. O ipotšiša a re: “Ke katanela mang, ge ke itlhokiša boipshino bjale?” Seo le sona ke lefeela, ke go itapišetša lešidi. Babedi ba phala o tee, gobane ge ba katana mmogo ba tla tšwelela. Mongwe ge a wele o tla tsošwa ke mongwekayena; kganthe motee ge a wele, ke dibonwakeyena, gobane yena o tla hloka motsoši. Le marobalong, ge babedi ba robetše mmogo ba a ruthetšana; motee yena a ka ruthela bjang? Motee a ka fenywa ke mohlasedi, eupša babedi ba ka mo palela. Gape thapo ya melogo ye meraro ga e kgaoge fela. Lesogana la go itlhakela eupša le hlalefile le phala kgoši ya mokgalabje ya lešilo, ye e se sa dumelago go eletšwa. Lona le ka no ba le etšwa kgolegong go tlo ba kgoši, le ge le tswaletšwe mohlakong mmušong wa kgoši yela. Ke ile ka bona bohle ba go phela lefaseng ba ema le lesogana leo la go hlatlama kgoši. La buša batho ba ba sa balwego, fela ba go tla ka morago ba se le rate. Ye taba le yona ke lefeela, e dio ba go phuthela phefo ka kobo. Ge o eya ntlong ya Modimo o itlhokomele. Go yela go theeletša go phala go yo dira dihlabelo bjalo ka mašilo a go se lemoge sebe se a se dirago. O nagane pele o bolela, gomme o se potlakele go tshepiša Modimo. Yena o kua legodimong, kganthe wena o mo lefaseng; ka gona, o se ke wa bolela go feta ka mo o swanetšego. Ge o balabala kudu o tla lora ditoro tše mpe, le ge o bolela kudu o tla no fela o bolela tša botlaela. Ka gona, ge o enetše Modimo keno, o hlaganele go e phetha, gobane yena ga a kgahlwe ke mašilo. Wena o phethe se o ikannego ka sona. Go kaone gore o se ikane go na le gore o re go ikana o se phethe keno ya gago. O se ke wa dirišwa ke dipolelo tša gago sebe, mo o ka bago wa tla wa botša motseta wa Modimo gore ga se wa dira ka boomo. O reng o dira gore Modimo a go galefele, a fediše tše o di dirilego? Go lora kudu ga go hole selo, gomme go bolediša motho kudu. Wena sa gago a e be go boifa Modimo. Ge o ka bona badiidi ba gateletšwe ebile ba hlokišwa toka le ditshwanelo mo nageng ya geno, o se makale, gobane mohlankedi yo mongwe le yo mongwe o emelelwa ke mookamedi wa gagwe, gomme ka babedi ga bona ba emelelwa ke bahlankedi ba ba ba okametšego. Se se holago naga kudu ke ge kgoši ya gona e rata temo. Motho yo a ratago tšhelete o dula a e galala; yo a ratago lehumo ga a ke a ipshina ka lona. Seo le sona ke lefeela. Yo a atelwago ke lehumo o atelwa le ke baji ba lona. Ga le mo hole ka selo, ge e se go le boga. Mošomi o robala boroko, le ge a eja ka bosese, goba a khora. Mohumi yena o ja go feta tekanyo mo e lego gore o šitwa ke go robala. Go na le taba ya go kweša bohloko kudu ye ke e bonago mo lefaseng: Motho o ikgobokeletša lehumo, mme le tle le mo tlišetše masetlapelo; a le lobe ka madimabe. A re go tswala morwa a hloke se a ka mo šadišetšago sona. Bjalo ka ge a tswetšwe a le fela, o tla tloga a le fela. Le ge a katane bjang le bjang, ga go se a ka tlogago le sona. Se sengwe sa go kweša bohloko kudu ke ge motho a tloga ka mokgwa wola a tlilego ka wona. Go katana go mo thušitše eng? E dio ba go phuthela phefo ka kobo. Godimo ga moo bophelo bja gagwe o bo phetše bošuleng le mahlokong a mantši a balabala, a selekegile kudu. Ka gona nna ke fetša ka go re: Se se loketšego motho gape se mo lebanego ke go ja le go nwa le go ipshina ka tše a di katanetšego bophelong bjo bokopana bjo Modimo a mo filego bjona, ka ge go mo lebane. Ge Modimo a file motho mahumo le thoto mme a mo dumeletše go ipshina ka tšona, le go leboga tše a di filwego, le go ipshina ka tše a di katanetšego, tšeo ke mpho ye e tšwago go Modimo. Ka ge Modimo a mo phediša ka lethabo, a ka se hlwe a hlobaetšwa ke bokopana bja bophelo bjono. Go na le ye nngwe taba ye e kwešago batho bohloko ye ke e bonago mo lefaseng: Ke ge Modimo a efa motho lehumo le thoto le bohlomphegi – tšohle tše motho a di nyakago – fela a se ke a mo dumelela go ipshina ka tšona, di lewe ke motho o šele. Ye taba ke lefeela, ke masetlapelo a magolo. Le ge motho a ka tswala bana ba lekgolo a ba a phela nako ye telele, le ge a ka tšofala bjang le bjang, ge a se a ka a ipshina ka menate ya bophelo le gona a se a bolokwa gabotse, gona ke re o phalwa le ke sefolotšana; gobane go tswalwa ga sona ga go thuše selo, ga se bone seetša, le go rewa leina ga se rewe, le letšatši ga se le bone, ga se tsebe selo, fela se ikhuditše go phala yena. Yena, le ge a be a ka phela mengwaga ye sekete a e boeletša a sa ipshine ka bophelo, a ke re o ya felo gotee le sefolotšana? Motho o itapiša go dio hwetša diyamaleng, le ge go le bjalo ga a khore. Na mohlalefi o phala setlaela ka eng? Modiidi yena go mo thušang go tseba go phedišana le batho? Go kgotsofala ka tše o nago natšo go kaone go phala go ba le pelo ye telele, gobane go ba le megabaru le gona ke lefeela, ke go phuthela phefo ka kobo. Tšohle tše di lego gona di šetše di theilwe maina, le gona go a tsebja gore motho ke motho, mme a ka se sekišane le yo a mo fetago ka maatla. Go bolela kudu ke go itshwenya, gomme go hola motho ka eng? Kgane ke mang yo a tsebago tše di holago motho bophelong bjo bokopana bjo bja go se re selo, bja go feta bjalo ka moriti? Ke mang yo a ka mmotšago se se tlago hlaga mo lefaseng ge yena a hwile? Seriti se phala senkgabose sa theko ye kgolo, le letšatši la go hwa ga motho le phala la go tswalwa ga gagwe. Go ya lapeng la mahloko go phala go ya go la monyanya, ka gobane ba ba phelago ba swanetše go dula ba ikgopotša gore lehu ke mafelelo a bohle. Manyami a phala lesego; motho le ge a bonala a nyamile, ka pelong a ka no ba a thabile. Wa go dula a nagana ka lethabo ke setlaela. Wa go nagana ka lehu yena ke mohlalefi. Go solwa ke mohlalefi go phala go retwa ke ditlatla. Lesego la lešilo le swana le go thathapa ga meetlwa sebešong. Le sona seo ke lefeela. Kgatelelo e ka diriša mohlalefi tša bošilo. Tsogolekobong le sentšha motho. Mathomo a selo a phalwa ke mafelelo a sona. Bopelotelele bo phala boikgogomošo. Se phakiše go ngongorega; go ba le metsoto ke botlaela. O se ke wa re: “Mehleng yeno go reng go phalwa ke mehleng yela?” Yeo ga se potšišo ye bohlale. Bohlale, go no swana le bohwa, ke selo se sebotse, gomme bo hola bohle ba ba phelago. Bjalo ka ge tšhelete e šireletša motho, bohlale le bjona bo bjalo. Go tseba go na le mohola wa go re bohlale bo lota mong wa bjona. Akanya tše Modimo a di dirilego. Kgane ke mang yo a ka otlollago se se kgopamišitšwego ke Modimo? Ge go iketlilwe o thabe, gomme ge go etla bothata o gopole gore boiketlo le bothata di romelwa ke Modimo. Ke ka baka leo motho a sa kgonego go tseba se se tlago mo hlagela. Bophelong bjo bja ka bja go se re selo ke bone dilo tše dintši – moloki o a hwa etšwe a lokile, gwa re yo kgopo a šale a phela etšwe e le yo mobe. Ka gona, o se ke wa loka go feta tekanyo, goba wa hlalefa go feta tekanyo – o tla be o ipolaelang? Le gona o se ke wa ba yo mobe kudu, goba wa ba setlaela – o tla be o hwela eng nako ya gago e sešo ya fihla? Ke mo gobotse go phetha taelo yela ya mathomo, o sa tlogele ye ya bobedi. Gomme yo a boifago Modimo o tla atlega go tšona ka dipedi. Motho yo bohlale o holega kudu ka bohlale bja gagwe go feta motse wo o holegago ka balaodi ba lesome. Ruri, mo lefaseng ga go mothomoloki modiratšebolo yo a sa kego a dira sebe. O se ke wa šetša se sengwe le se sengwe se se bolelwago ke batho, ka gore o ka tla wa kwa le ge mohlanka wa gago a go roga, gobane ka pelong o a tseba gore le wena ke gantši o roga batho. Tšohle tše ke di lekotše ka temogo ya ka. Ke be ke nyaka go ba yo bohlale, eupša ka palelwa. Tše di hlagilego kgale di kgole, di tebile, ga di kwešišege – di ka fihlelelwa ke mang? Fela nna ke ile ka ikgafela go tseba le go nyakišiša; ka ikemišetša go tsoma bohlale le temogo, ka hwetša gore bokgopo ke botlaela, le bošilo ke bogafi. Ka lemoga ge se se fetišago lehu ka bohloko e le mosadi yo lerato la gagwe e lego moreo le moutlo, yo matsogo a gagwe nkego ditlemo. Yo a kgahlago Modimo o phonyokga mosadi yoo, modiradibe yena o a mo tanya. Mmoledi o re: Seo ke se ke se lemogilego ka go bapiša sengwe le sengwe gore ke tle ke kwešiše ka mo dilo di lego ka gona. Seo e lego kgale ke se nyaka mme ke se ka hlwago ke se hwetša sese: Gare ga batho ba sekete, monna wa nnete ke hweditše o tee; ge e le mosadi wa nnete mo gare ga bao bohle, yena ke mo hlokile. Se ke ithutilego sona fela sese: Modimo o hlodile batho ba lokile, eupša bona ba itirela mathaithai a mantši. Ke mang yo a swanago le monna yo bohlale? Yo a kgonago go hlatholla dilo yena ke mang? Bohlale bja motho bo mo ediša sefahlego, bo mo dira le gore a se šinyalale. Phetha taelo ya kgoši, ka gobane o ikanne ka Modimo. O se potlakele go tloga go kgoši. O se ngangabale tabeng ye mpe, ka gobane kgoši e dira se e se ratago. Lentšu la kgoši le agelwa lešaka, kgane ke mang yo a ka mo sekišago ge a dira tša gagwe? Yo a phethago melao ya gagwe a ka se tsene mathateng; motho yo bohlale le yena o tseba nako ya gona le mokgwa. Dilo tšohle di na le nako ya tšona le mokgwa wa go di dira, le ge motho yena a tshwenywa kudu ke go se tsebe tša ka moso, ka ge go se yo a ka mmotšago tšona. Ga go motho yo a ka thibelago lehu la gagwe, goba a diegiša letšatši la gagwe la go hwa. Ge go lwewa ga go mohlabani yo a dumeletšwego go ya gae, le modiratšekgopo a ka se phološwe ke bokgopo bja gagwe. Tšeo ka moka ke di bone ge ke ntše ke nagana ka tšohle tše di dirwago mo lefaseng, ge motho a laola yo mongwe, a mo hlakiša. Ke bone le bakgopo ba yo bolokwa mabitleng, mola baloki bona ba tloga motseng mme ba lebalwa. Seo le sona ke lefeela. Ka ge disenyi di diegelwa go otlwa, batho ba ikgafela bosenyi. Modiradibe o senya gantšintši mme a no tšwela pele le go phela, fela nna ke tseba gore ba ba theeletšago Modimo ke bona ba ba tlago phela gabotse ka baka la tlhompho ya bona. Fela yo kgopo yena di ka se mo sepelele gabotse, le bophelo bja gagwe bo ka se telefale bjalo ka moriti, ka ge a sa theeletše Modimo. Go na le se sengwe sa lefeela mo lefaseng: Nako ye nngwe moloki o hlagelwa ke se se swanetšego yo kgopo, yo kgopo a hlagelwe ke se se swanetšego moloki. Nna ke re seo le sona ke lefeela. Ka gona, ke re go botse ge batho ba ithabiša, gobane mo lefaseng ga go se sekaone go phala go ja, le go nwa, le go ithabiša. Se sona a ka se kgona ge a sa ntše a katana bophelong bjo a bo filwego ke Modimo mo lefaseng. Ka mehla ge ke be ke re ke leka go tseba bohlale le go lebelela tše batho ba di dirago mo lefaseng ba itlhokiša boroko bošego le mosegare, ke be ke bona tšohle tše Modimo a di dirago, le gore ga go yo a ka kwešišago tše di diregago mo lefaseng. Le ge motho a ka leka bjang le bjang a ka se kgone. Mohlalefi le ge a ka re o a tseba a ka se kwešiše. Tše ka moka ke di nagantšhitše kudu, gomme ka lemoga gore batho ba go loka le ba bohlale gotee le mediro ya bona ba laolwa ke Modimo. Motho ga a tsebe ge eba o tla swarwa ka lerato goba ka lehloyo. Tšohle tše di hlagelago batho ke lefeela, ka ge ka moka ba hlagelwa ke tše di swanago: moloki, yo kgopo, yo a dirago tše botse, le yo mobe, mohlweki le yo e sego mohlweki, moišasehlabelo le yo e sego moišasehlabelo. Se se hlagelago moloki le modiradibe se a mo hlagela; wa go ikana o hlagelwa ke se se hlagelago wa go šia go ikana. Yeo ke ye nngwe ya taba tše mpe tše di diregago mo lefaseng, ge bohle ba lebanwa ke tše di swanago. Le gona dipelo tša bona di dula di tletše bobe le bošilo bophelong bja bona ka moka, mme ka morago ba hwe. Fela motho ge a sa ntše a phela mo lefaseng o na le kholofelo; mpša ye e phelago e phala tau ye e hwilego. Ba ba phelago ba a tseba gore ba tlilo hwa, ba ba hwilego bona ga ba tsebe selo. Ga go moputso wo ba sa o letetšego; ba lebetšwe širešire. Lerato la bona le lehloyo la bona le mafolofolo a bona ke kgale di hwile. Ba ka se sa tsoga ba kgathile tema go tšohle tše di dirwago mo lefaseng. Ge go le bjalo, gona wena eya o itšele dijo tša gago o thabile, o inwele beine ya gago o thakgetše, gobane Modimo o šetše a kgahlilwe ke mediro ya gago. O dule o apere diaparo tše ditšhweu, o inathiše hlogo ka makhura. Ge o sa ntše o phela bophelo bjo bja go se re selo bjo Modimo a go filego bjona mo lefaseng, o ithabiše le mosadi wa gago yena yo o mo ratago. O ithabiše le yena bophelong bja gago ka moka bja matšatši a go se re selo, ka gobane woo ke wona moputso wa maitapišo a gago ge o sa phela mo lefaseng. Tšohle tše o ka ikhwetšago o di dira, o di dire ka mafolofolo, ka gobane kua bodulabahu o yago gona ga go na go šutha, goba go nagana, goba go tseba, goba go hlalefa. Se sengwe se ke se lemogilego mo lefaseng ke gore ba lebelo ga se bona bao ka mehla ba thopago sefoka, le bagale ga se bona bafenyi ka mehla; ba bohlale ga se bona bao ka mehla ba nago le tša go ja; lehumo ga se la ba tlhaologanyo ka mehla, le ba ba nago le tsebo ga se bona bao ka mehla ba ratwago. Sengwe le sengwe se tlela motho ka nako le sebaka sa gona. Gape motho ga a tsebe gore ya gagwe nako e tla neng. Bjalo ka ge hlapi e swarwa ka lelokwa le e ka se le phonyokgego, le nonyana e tanywa ka sefu, motho le yena o tanywa ke madimabe ge a mo wela. Se sengwe se ke se lemogilego mo lefaseng ke ka moo bohlale bo tšewago ka gona, gomme ka bona e le taba ye bohlokwa. Go kile gwa ba le motsana wo o se nago le batho ba bantši. Wa hlaselwa ke kgoši ye maatla. Ya o dikanetša, ya bopelela dintotoma tša mobu go o dikologa. Gona moo motsaneng go be go dula monna yo mongwe wa modiidi, fela e le yo bohlale. A phološa motsana woo ka bohlale bja gagwe, eupša ka morago a se sa gopolwa ke motho. Ke mo ke ilego ka bona gore bohlale bo phala maatla, le ge bohlale bja modiidi bo nyatšwa, le dipolelo tša gagwe di sa šetšwe ke motho. Go theeletša monna yo bohlale yo a bolelelago fase go phala go theeletša mmuši yo a hlabago mašata gare ga mašilo. Bohlale bo phala marumo, mosenyi o tee yena a ka senya dilo tše dintši tše dibotse. Gape dintši tše di hwilego di bodiša senkgabose sa raditlolo, sa nkga, gomme le botlaela bjo bonyenyane bo fekeetša bohlale le tlhompho. Motho yo bohlale o kganyoga tše di lokilego, mola setlaela sona se kganyoga tše di sego tša loka. Botlaela bja gagwe bo bonagala le ge a sepela ka tsela, mme o bontšha mang le mang gore ke setlaela. Ge mmuši wa gago a ka go galefela, o se ke wa ngala modiro, gobane go itshwara go phephiša motho diphošo tše dikgolo. Go na le bobe bjo ke bo lemogilego mo lefaseng, phošo ye e felago e dirwa ke babuši: mašilo a bewa maemong a godimo, mola bahumi bona ba le maemong a fase. Ke hlwa ke bona makgoba a sepela ka dipere, mola bakgomana bona ba sepela ka maoto mo nkego ke makgoba. Moepamolete a ka wela go wona, le mokgerešamorako a ka longwa ke noga. Moepamaswika a ka gobatšwa ke maswika, mophaphadikgong le yena a ka gobatšwa ke tšona. Yo a remago ka selepe se se kubegilego a sa se lootše, o swanetše go ikokoropa. Gape motho o tšweletšwa ke bohlale bja gagwe. Ge noga e ka kobola e sešo ya upiwa, moupi o tla loba moputso. Dipolelo tša mohlalefi di a kgahliša, mola mantšu a setlaela ona a bolaya mmoledi wa ona. Setlaela ge se bolela se thoma ka tša bošilo, sa feleletša ka tša botlatlatlatla. Se bolela motšhaotšhele. Ga go motho yo a tsebago tša ka moso. Kgane ke mang yo a ka botšago motho se se tlago hlaga ge a hwile? Semaumau se lakalela modiro wo boima, le tsela ya go ya motseng ga se e tsebe. Go madimabe naga ye e bušwago ke kgoši ya mošemanyana, yeo bakgomana ba yona ba ketekago e sa le gosasa. Fela ye lehlogonolo naga ke yeo kgoši ya yona e lego kgoši ka madi, yeo bakgomana ba yona ba ketekago ka nako ye e lebanego, bao ba nwelago go itapološa, e sego go tagwa. Tlhaka ya ntlo e wela ka gare ka baka la bobodu bja mong; e nela ka baka la ge yena e le naladiarotha. Menyanya e direlwa boipshino, le beine e thakgatša batho, fela tšohle di nyaka tšhelete. O se bolele kgoši gampe, ešita le ka pelong ya gago, le mohumi o se mmolele gampe, ešita le ka phapošing ya gago ya go robala; gobane nonyana ye e fofago e ka go tšea lentšu, ramafofa a ka yo go boletša. Rekiša thoto ya gago ya kgwebo moše wa mawatle, mme mafelelong o tla boelwa. Arolela thoto ya gago ya kgwebo mafelong a mmalwa – a ke re a mantši – ka gobane ga o tsebe madimabe ao a ka hlagago mo lefaseng. Ge maru a hlomile, a neša pula lefaseng. Sehlare ge se wetše ka thoko ye goba ka thoko yela, se rapalala moo se wetšego gona. Yo a lebelelago phefo a ka se bjale, le yo a lebelelago maru a ka se bune. Bjalo ka ge o sa tsebe gore bophelo bo tsena bjang ngwaneng ka popelong ya mmagwe, le modiro wa Modimo, Mohlodi wa tšohle, ga o o tsebe. Bjala peu ya gago e sa le gosasa, le mathapama o se ke wa khutša, gobane ga o tsebe ye e tlago mela, goba ge eba di tla mela gabotse ka dipedi. Seedi se bose, le go bona letšatši go a thabiša. Ge motho a phetše mengwaga ye mentši, a a e thabele yohle, fela a gopole gore ye a sa tlilego go e fetša a hwile le yona ke ye mentši. Tšohle tše di sa tlago go hlaga ke lefeela. Wena mofsa, ipshine bofseng bja gago. Ithabiše o sa lekanetše. Dira tše o di ratago le tše di go kgahlago tše o di bonago. Fela o gopole gore Modimo o tlilo go sekišetša tšohle tše o di dirilego. O se ke wa tshwenywa ke selo pelong, o šikologe malwetši, gobane bofsa le botse ke lefeela. Ka gona gopola Mmopi wa gago o sa le yo mofsa, go sešo gwa tla matšatši ale a mathata le mengwaga yeo ka yona o tlago re: “Ga ke ipshine ka bophelo.” Ke mohlang o tla bego o fifaletšwe ke seedi sa letšatši le sa ngwedi le sa dinaledi, gomme wa pipelwa legodimo ke maru pula e khutše. Ke mohlang matsogo a gago a o bego o itšhireletša ka ona a tlago thothomela, le maoto a gago a bjale a sa tiilego, a tlago kgopama. Meno o tla be o šaletšwe ke makatana a go se kgone go sohla dijo, le mahlo a se sa bona gabotse. Ditsebe tša gago di tla be di se sa kwa mašata a ka mokgotheng. O ka se sa kgona go kwa modumo wa tšhilo ge e šila; o tla phafoga ka nako ya ge dinonyana di thoma go lla, gomme le koša o ka se sa ekwa gabotse. O ka se rate go namela mmoto, gomme go sepela ka mokgotheng e tla ba kotsi go wena. Moriri wa gago e tla ba wo moputswa. O tla sepela ka go ikgoga. Kganyogo yohle e tla be e se sa le gona. Motho o ya bokhutšong bja gagwe bja mafelelo, mekgotheng gwa kgitlwa dillo. Ge motho a ehwa go swana le mogala wa silibera ge o kgaoga, le lebone la gauta ge le ewa le pšhatlega, goba thapo ya sediba ge e kgaoga, le kgapana ya meetse ge e pšhatlagana. Mmele wa motho o tla boela leroleng mo o tšwago gona, mme moya wa gagwe wa gomela go Modimo yo a mo filego wona. Mmoledi o re: “Tšohle ke lefeela, lefeela la mafeela.” Mmoledi o be a sa nagane fela ka tša bohlale, eupša o be a ruta batho le tsebo. O be a ithuta diema mme a lebeledišiša gore di bolela nnete goba ga di bolele nnete. Le gona o ile a hlama diema tše dingwe tše dintši. Mmoledi yo o lekile go nyaka mantšu a a kgahlišago, a ngwala mantšu ao a go loka le a therešo. Mantšu a batho ba bohlale a bjalo ka mapara a dintlha ao badiša ba gapago dikgomo ka ona, gomme diema tše di kgobokantšwego di tsenelela mogopolong wa motho go swana le dimapolo tše di kokotetšwego. Di tšwa go Modimo, yena Modiša o tee. Ngwanaka, go na le se sengwe se ke nyakago go go eletša mabapi le sona. Go ngwala dipuku ga go fele, le gona go ithuta kudu go lapiša motho. Taba ya mafelelo mo go tšohle tšeo še: Boifa Modimo, o phethe melao ya gagwe, ka gobane seo se ama batho ka moka. Modimo o tlilo sekišetša batho tšohle tše ba tla bego ba di dirile, tša go loka le tša go se loke, ešita le tše ba di dirago ka sephiring. Kopelo ya Solomone ye botsebotse. Nke o nkatle leboelela, gobane lerato la gago le phala beine ka bose. Senkgabose sa gago se a ratega; wena o senkgabose se se tšhologilego. Ke ka baka leo o ratwago ke makgarebe. Ntšee, re kitime mmogo. Kgoši, nkiše ka diphapošing tša gago. A re hlalale re thabe mmogo, re rete rato la gago go phala beine. Ga go makatše ge o ratwa ke makgarebe ohle! Lena makgarebe a Jerusalema, nna le ge ke fifaditšwe ke letšatši ke botse; ke fifetše wa mešaša ya Kedara, eupša ke botse wa diširo tša ga Solomone. Se nkgeruleleng go fifala ga ka ge ke fifaditšwe ke letšatši. Dikgaetšedi tša ka di be di dula di nkgalefetše, di ntlhokomediša dirapa tša merara, mme nako ya go hlokomela sa ka serapa, ke ra nako ya go itlhokomela, nnamong, ke e hloka. Mpotše, hle, wena ke go ratago ratirati, mo o fudišago dihuswane tša gago, mo o di robatšago gona mosegare. Ke reng ke swanetše go ebela le mehlape ya badiša ba bangwe ke go nyaka? Ge o sa go tsebe, wena wa go phala basadi bohle ka botse, sepela o latele dihuswane; diša dihuswanyana tša gago merakeng ya badiša. Wena, moratiwa, go nna o etša pere ya tshadi ge e kitimiša dipere tša dipoo madi, dipere tša dikoloi tša Farao tša ntwa. Dithama tša gago di kgabišitšwe ke mangina, molala wa gago o kgabišwe ke dipheta. Rena re tla go direla mangina a gauta a a kgabišitšwego ka dipheta tša silibera. E tla re ge kgoši a sekame bosekamong, gwa kwagala monkgo wa senkgabose sa ka. Moratiwa wa ka o nkga bose bjalo ka mira ge a patlame kgareng ya ka. Moratiwa wa ka o nkga bose go swana le matšoba ge a khukhuša ka dirapeng tša merara tša Engedi. Na o botse bjang, moratiwa, o botse bjang! Mahlo a gago ga se ka go taga bjalo ka a leeba! Yo mobotse ke wena, moratiwa; o nkgahla e le ruri! Re patlame bjanyengbotala; mesedere ke dikota tša ntlo ya rena, mephaene ke mahlomo a rena. Ke nna tšoba la naga mo Sharone, ke nna tšoba la molapo. Moratiwa wa ka gare ga makgarebe nke ke letšoba gare ga meetlwa. Moratiwa wa ka gare ga masogana o etša moapola gare ga mehlare ya sethokgwa. Ke ipshina ka go dula moriting wa mohlare wo, le dikenywa tša wona di a ntsefela. O ntlišitše ntlong ya menyaka, a mpea pelo ka lerato la gagwe. Ntapološeng ka makwapi a diterebe, le mmaatlafatšeng ka diapola, gobane ke lwatšwa ke lerato. O nthekgile hlogo ka la nngele, gomme ka la go ja o nkgokere. Nkaneleng ka ditshephe le dikgama, lena makgarebe a Jerusalema, gore le ka se re tutuetše go ratana – rena re tla ratana ka borena. Theeletšang! Ke kwa lentšu la moratiwa wa ka. Šolee! O tla a taboga kua dithabeng, a tshela le mebotong! Moratiwa wa ka nke ke tshephe, o swana le kgamana. Šolee! O eme ka morago ga morako. O hlodimela ka lefasetere, o leka go lebelela ka seširo. Moratiwa wa ka o bolela le nna. Emelela, hle, moratiwa; masebotsana wa ka, etla. Marega a fetile, dipula di khudile, di iketše. Kua nageng matšoba a thuntše. Nako ya go opela e fihlile, le nageng ya rena go lla mekuru. Mago a thoma go butšwa; matšoba a merara a nkgiša moya bose. Emelela, hle, moratiwa; masebotsana wa ka, etla. O swana le leeba le le khutago ka mphatšeng. Nke ke bone sebopego sa gago se sebotsana, ke kwe lentšwana la gago le lebosana. Re tanyetšeng diphukubje, diphukubjana tšela di re senyetšago dirapa tša merara, gobane merara ya rena e thuntše. Moratiwa wa ka ke wa ka, le nna ke wa gagwe. O thabišwa ke ge a le gare ga matšoba go fihlela phefšana ya masa e foka, mme leswiswi le apoga. Boa, moratiwa wa ka, o etše tshephe, o swane le kgamana dithabeng tša maswika a magolo. Pele ge ke robetše bošego ke be ke lora yo ke mo ratago, ke lora ke mo nyaka, ke sa mmone. Ke lora ke tsoga borokong ke thetha le motse, ke ralala le mekgotha le mapatlelo, ke nyaka yo ke mo ratago; ke mo nyaka, fela ke sa mmone. Baleti ba motse ba ba sepelago le wona ba gahlana le nna. Ka ba botšiša ka re: “Na ga se la bona moratiwa wa ka?” Ge ke seno tloga go bona ka mo hwetša. Ka mo swara ka se mo lese, go fihlela ke mo iša go mma ka ntlong, ka phapošing ya yo a mpelegego. Nkaneleng ka ditshephe le dikgama, lena basadi ba Jerusalema, gore le ka se re tutuetše go ratana – rena re tla ratana ka borena. Ke eng sela se tšwago lešokeng nke ke mokubega wa muši, se nkgago bose bja mira le bja seorelo, le bja dinkgabose tša mehutahuta tša go rekišwa ke babapatši? Ke Solomone o tla a rwelwe ka setulo sa gagwe sa bogoši; bahlabani ba masometshela ke bona baleti ba gagwe, ke ba bangwe ba bagalegale mo Israele. Bohle ke bakgoni ba tšhoša; ke batsebi ba ntwa. Mongwe le mongwe o itlhamile ka tšhoša, ba itokišeditše go lwantšha bahlasedi ba bošego. Kgoši Solomone o rwelwe ka setulo sa gagwe sa bogoši se a laetšego gore a se direlwe ka dikota tša sethokgwa sa Lebanone. Dikota tša go thekga tlhaka ya sona di manegilwe ka silibera; boithekgo bja sona bo manegilwe ka gauta; mosamelo wa sona o apešitšwe lešela la bohwibidu bja moretele. Bokagare bja sona bo kgabišitšwe gabotse ke makgarebe a Jerusalema, e le sešupo sa lerato la bona. Lena basadi ba Sione, etlang le bone Kgoši Solomone. O rwele mphapahlogo wo a o rwešitšwego ke mmagwe tšatšing lela a nyala, mohlang wola a nyakaletše. Na o botse bjang, moratiwa, o botse bjang! Mahlo a gago ga se ka go taga ka lešireng la gago, a etša a leeba! Moriri wa gago o tlolatlola bjalo ka mohlape wa dipudi ge o theoga thabeng ya Gileade. Meno a gago a šweufetše bjalo ka dinku tše di sa tšogo kotwa tša hlapišwa. A bapetše ka go lekanela, ga go le le kgolegilego. Dipounama tša gago di swana le thapo ye khwibidu; molomo wa gago ga se ka botse. Dithama tša gago ka lešireng di swana le bokagare bja garenate. Molala wa gago nke ke tora ya Dafida ye e agilwego ka go hlatlaganya maswika; pheta ya gago e etša dikotse tše sekete tše di leketlago toreng yeo, e le tša bagale. Matswele a gago ka mabedi a swana le dikgamana tša mafahla tše di fulago gare ga matšoba. Ke tla dula thabeng ya mira, gona mmotong wa seorelo, go fihlela phefšana ya masa e foka, le leswiswi le apoga. O botse mo gohle, moratiwa, ga go mo o hlaelelwago gona. A re tloge mo dithabeng tša Lebanone, hle, mmeeletšwa wa ka; a re tloge mo Lebanone. Theoga ntlhoreng ya thaba ya Amana, ntlhoreng ya Senire le ya Hermone, matšabeng a ditau, thabeng tša dinkwe. O nkutswitše pelo, moratiwa, mmeeletšwa wa ka, o nkutswitše pelo ka go nkgadima, le ka pheta e tee ya moruka wa gago. Lerato la gago le nkgahla kudu, moratiwa, mmeeletšwa wa ka. Lerato la gago le phala beine ka bose; monkgo wa senkgabose sa gago o phala wa ditlolo tšohle. Mmeeletšwa wa ka, dipounama tša gago di rotha todi; leleme la gago nke ke todi le maswi. Diaparo tša gago di nkga bose wa dimela tša Lebanone. Moratiwa, mmeeletšwa wa ka, ke serapana se se tswaletšwego, ke serapana sa legora, mothopo wo o ageleditšwego. Mahlogedi a gago nke tšhemo ya megarenate ye e enywago dikenywa tše dibosebose. Hena le narete di mela gona, le safrone le kalamose le sinamone, le dimela tša mehutahuta tša diorelo, le tša mira le tša dikgopha, le tše dingwe tša go dira ditlolo tše dibotse kudu. Wena o mothopo wa go nošetša dirapa, o sediba sa meetse a a elago, o moela wo o phororago thabeng tša Lebanone. Tsoga, wena phefo ya leboa! Etla, wena phefo ya borwa! Fokang ka serapaneng sa ka, le phatlalatše monkgo wa sona wo mobose. Moratiwa wa ka a a tle ka serapaneng sa gagwe, a je dikenywa tše dibosebose. Ke tlile serapaneng sa ka, moratiwa, mmeeletšwa wa ka. Ke kga mira wa ka le dinoko; ke ja mamapo le todi ya ka; ke nwa beine ya ka le maswi. Ejang, bagwera, le nweng, le phonkgele maratong! Le ge ke be ke robetše pelo yona e be e hlobaela, ka kwa moratiwa a kokota. Mpulele, moratiwa, leebana la ka, wena wa lebopo le le se nago bosodi. Hlogo ya ka e wetšwe ke phoka, le leetse la ka le boeditšwe ke monola wa bošego. Ke šetše ke apotše; o ra gore ke boele ke apare? Ke šetše ke hlapile maoto; o ra gore ke a tšhilafatše gape? E rile ge moratiwa a tsenya seatla lešobeng la lebati, pelo ya ka ya thebatheba ka lethabo. Ka tsoga ke re ke yo mmulela. Diatla tša ka tša rotha mira, wa elela menwaneng, o etšwa mokgokong wa sekgonyo sa lebati. Ka bulela moratiwa wa ka, fela ya ba o tlogile, o ile. Ke be ke mo thabetše mola a bolela. Ka yo mo nyaka, fela ka mo hloka; ka mmitša, a se nkarabe. Ka bonwa ke baleti ba motse ge ba o potologa; ba nkeketa ba nkgobatša; baleti bao ba morako ba nkamoga tšajana ya ka. Lena basadi ba Jerusalema, nkaneleng gore ge le ka bona moratiwa wa ka, le tla mmotša gore ke lwatšwa ke lerato. Na moratiwa wa gago o phala bangwe ka eng, wena wa go phala basadi bohle ka botse? Moratiwa wa gago o phala bangwe ka eng, ge o re re go anele bjalo? Moratiwa wa ka o edile sefahlego, o phedile gabotse; o phala ba diketekete. Sefahlego sa gagwe ke sa mmala wa mphiri, se boreledi; moriri wa gagwe ke leetse, wa boso bja legokobu. Mahlo a gagwe a taga bjalo ka a maeba dinokaneng tše di elago, maeba a a hlapišwago ka lebese a eme kgauswi le mothopo wa meetse a mantši. Dithama tša gagwe di nkga bose bjalo ka serapa sa dinoko. Dipounama tša gagwe nke ke matšoba, di rotha mira. Matsogo a gagwe a bopegile, o apere maseka a a kgabišitšwego ka magakabje. Mmele wa gagwe o botse boka nakatlou ye e tlokilwego ka mabenyabje. Maoto a gagwe ke dikokwane tša mmabole tše di hlometšwego mekotianeng ya gauta ye e sego ya tswakwa. O bopegile wa dithaba tša Lebanone tša mesedere ye e letlilego. Molomo wa gagwe o ntsefela kudu ge ke mo atla, gomme tšohle tša gagwe di a dumiša. Lena makgarebe a Jerusalema, moratiwa wa ka, yena mogwera wa ka, o bjalo. Hee, wena wa go phala basadi bohle ka botse, moratiwa wa gago o ile kae? Re botše tsela ye a tšerego ka yona, gore re tle re go nyakiše yena. Moratiwa wa ka o ile serapeng sa gagwe moo go nago le dimelana tša dinoko, go ya go thaba gona le go kga matšoba. Nna ke wa moratiwa wa ka, moratiwa wa ka le yena ke wa ka. O thabišwa ke ge a le gare ga matšoba. Hee, moratiwa, o botse bjalo ka motse wa Tirtsa, o botse go etša wa Jerusalema, wa go gakgamatša boka madira a a swerego difoka. Tlogela go ntebelela, gobane o a nkgakantšha. Moriri wa gago o tlolatlola bjalo ka mohlape wa dipudi ge o theoga thabeng ya Gileade. Meno a gago a šweufetše bjalo ka dinku tša ditshadi tše di sa tšogo hlapišwa. Ka moka a bapetše ka go lekanela, ga go le le kgolegilego. Dithama tša gago ka lešireng nke bokagare bja garenate. Le ge bahumagadi ba kgoši e le ba masometshela, metlabo e le ye masomeseswai, mathari e le a a sa balwego, nna wa ka ke o tee; ke yena leebana la ka, yena wa lebopo le le se nago bosodi. Ke morwedi a le tee wa mmagwe, ke yena mmamoratwe wa mmagwe. Mathari ge a mmona a re ke yo lehlogonolo, bahumagadi le metlabo ya kgoši ba a mo reta. Ke mang yo wa go tšwelela bjalo ka masa? O botse go swana le ngwedi, o taga go etša letšatši, o gakgamatša boka madira a a swerego difoka. Ke theogetše mono serapeng sa mehlare ya dikoko, ka tlo bona mahlogedi ka moeding, ka tlo bona ge merara e khukhuša, le megarenate ge e thunya. Ke rile ke sa itebetše ka ikwa nke ke nametše koloi ya Aminadibe ya ntwa. Retologa, retologa, kgarebe ya Shulamo, retologa, retologa, gore re go bogele! Le reng le nyaka go mpogela ke bina ka gare ga melokoloko ye mebedi ya dibini? Wena kgarebe la mošate, nao tša gago ga se ka botse ge o apere dieta, le matheka a gago a botse boka lebenyabje le le dirilwego ke sethakga. Mokhubo wa gago e dio ba sebjana sa nkgokolwana se se sa kgarihlwego beine ya leno. Mpana ya gago nke mokgobo wa mabele wo o dikaneditšwego ke matšoba. Matswele a gago ka mabedi a swana le dikgamana tša mafahla. Molala wa gago e dio ba tora ya nakatlou. Mahlo a gago a etša megobe ya motse wa Heshbone, ya kgauswi ga lesoro la Bate-Rabime. Nko ya gago nke tora ye e lego godimo ga Lebanone, ye e lebanego le Damaskose. Hlogo ya gago e leletše go etša thaba ya Karmele. Leetse la gago le tsetsema bjalo ka lešela la bohwibidu bja moretele; botse bja lona bo goka kgoši. O yo mobotse, moratiwa, o nkgahla e le ruri, wena mmalethabo! Seemo sa gago ke sa mopalema, matswele a gago nke dintšhuhlana tša dikenywa tša wona. Ke ile ka gopola gore ke namele mopalema woo ke sware dintšhuhlana tšeo. Matswele a gago go nna a a be bjalo ka dintšhuhlana tša diterebe, lehema la gago e be monkgo wo mobose wa diapola, gomme molomo wa gago e be beine ye bosebose. Beine yeo e ele bosele e etšwa dipounameng tša ka le menong, e elele go moratiwa wa ka. Nna ke wa moratiwa wa ka, gomme o duma go mphopholaphophola. Etla, moratiwa, re ye lešokeng, re lale re le kua matšobeng. Re tsogele dirapeng tša merara, re yo bona ge merara e khukhuša, goba e paleša, le ge megarenate e thunya. Ke gona mo ke tlago go bontšha gore ke a go rata. Go kwagala monkgo wa dikenywa tša moratišo, le dikenywa tše dibosebose, tša mongwaga le tša ngwagola, di mo kgauswi le ga gešo. Ke go beetše tšona, moratiwa. Nke nkabe o le kgaetšedi ya ka ye e nyantšego letswele la mma. Gona ke be nka re ge ke kopana nago, ka go atla mme ka se solwe ke motho. Ke be ke tla go iša lapeng la mma, mo o bego o tla nthuta tša lerato. Ke be ke tla go fa beine ya leno, le matutu a digarenate tša ka, gore o nwe. O nthekgile hlogo ka la nngele, gomme ka la go ja o nkgokere. Nkaneleng, lena makgarebe a Jerusalema, gore le ka se re tutuetše go ratana – rena re tla ratana ka borena. Ke mang yo wa go tšwa lešokeng a ithekgile ka moratiwa wa gagwe? Ke go tsošitše o le ka fase ga moapola moo mmago, yena motswadi wa gago, a ilego a thoma go šokwa a le gona. Nkapare molaleng goba monwaneng bjalo ka papetlana ya go šupetša gore ke wa gago, gobane lerato le ne maatla, le etša lehu; tumo ga e ne kwelobohloko, e swana le bodulabahu. Lerato ke mollo wo o laumago kgabo, le tuka bjalo ka mollo wo o galefilego. Maphaaphaa a meetse a ka se le time, le tšona dinoka di ka se le tšee. Le ge motho a ka re o le reka ka mahumo ohle a gagwe, o tla nyatšwa kudu. Re na le kgaetšedinyana, ke gona e thoka matswele. Na re mo direle eng mohla a gokwa ke masogana? Ge a ka ikageletša ka morako, re tla o hlomela sekgabiso sa silibera; eupša ge a ka etša lesoro le le ahlamego, re tla le pheka ka diphaphathi tša mesedere. Nna ke morako, matswele a ka ke ditora tša wona; ka gona moratiwa wa ka o mpona ke le wa go mo kgotsofatša. Solomone o be a na le serapa sa merara kua Baale-Hamone. A se hirišetša bahlokomedi, mohiri ka hlogwana a lefa papetlana tše sekete tša silibera, a lefela tše a di bunnego. Serapa sa ka, sa ka tiitii, se re nna wee! Wena, Solomone, o ka no itshwarela dipapetlana tšeo tša gago tše sekete, le bahlokomedi ba itshwarela tša bona tše makgolo a mabedi. Wena, modulakaserapeng, bagwera ba ka ba nyaka go go kwa o bolela; a ke kwe lentšu la gago! Kitima, moratiwa, o etše tshephe, o swane le kgamana dithabeng tša dinoko. Pukung ye go hwetšwa melaetša ye Modimo a ilego a e botša Jesaya, morwa wa Amotse, mabapi le Juda le Jerusalema mehleng ya Usia, Jotamo, Ahase le Hiskia, magoši a Juda. Morena o rile: “Lena magodimo, theeletšang, lena mafase, hlwayang tsebe! Ke fepile bana ka ba godiša, eupša bjale bona ba ntsogetše maatla. Dikgomo di tseba mong wa tšona, le dipokolo di tseba moo mong wa tšona a di fudišago gona. Eupša Baisraele bona ga ba ntsebe, setšhaba sa ka ga se kwešiše selo!” Jonna, morafe wo mobe, setšhaba se se imelwago ke dibe tša sona, moloko wo o dirago tše mpe le tša bokgopo! Le tlogetše Morena, le nyaditše Modimo yo mokgethwa wa Israele, la mo furalela. Le reng le fela le ngangabetše? Na le sa nyaka go bethwa kae? Ga ke re dihlogo tša lena ke dintho fela, le mebele ya lena e a fokola? Go tloga ka monwana wa leoto go fihla hlogong ga go mo go rego tswee. Mebele ya lena e tletše megogoma, matetelo, le dintho tše di sa tšwago madi. Dintho tša lena ga se tša hlatswiswa goba tša tlengwa. Ga se tša tlotšwa ka makhura. Naga ya lena e fetošitšwe lešoka, le metse e tšhumilwe thokgethokge. Mašemo a lena a sentšwe ke bašele lena le ba lebeletše, gomme ba fediša se sengwe le se sengwe. Motse wa Jerusalema o šetše o nnoši, o bjalo ka motse wo o dikaneditšwego ke manaba; o a tekateka, o etša mošašana wa mohlapetši ka serapeng sa merara, goba mohlahlana wa moleti wa bošego ka tšhemong ya magapu. Ge nkabe Morena Ramaatlaohle a se re šadišetše mašaledi a se makae, re ka be re fedišitšwe bjalo ka Sodoma le Gomora. Jerusalema, babuši ba gago le setšhaba sa gago ba swana le bale ba Sodoma le ba Gomora. Wena o theeletše se Morena a go botšago sona, o ele hloko se Modimo wa rena a go rutago sona. Morena o re: “Dihlabelo ka moka tše le ntirelago tšona ga se selo! Dihlabelo tša go tšhungwa ka moka tše le di dirago ka dikgapa le ka makhura a dikgomo tša lena tše le di nontšhitšego di ntenne. Madi a dipoo le a dikgapana le a diphooko tša lena ga a nthabiše. Ke mang a le kgopetšego go ntlišetša dihlabelo tše ge le etla go nkhunamela? Le kgopetšwe ke mang go gatagata ka Tempeleng ya ka? Le se sa ntlišetša dikabelo tše tša go se be le mohola! Monkgo wa diorelo tše le di tšhumago o a ntšhišimiša. Menyanya ya lena ya Lebalana le Disabatha tša lena le dipitšo tša lena tša diphuthego ga ke di kgotlelele; dikopano tšeo di senywa ke dibe tša lena. Ke hloile Menyanya ya lena ya Lebalana le menyanya ya lena ye mengwe; ke morwalo wo o nkimelago gomme o ntapišitše. “Ge le emiša matsogo le rapela ke tla ikhupetša mahlo. Le ge le ka rapela bjang le bjang nka se le theeletše, ka gore diatla tša lena di tletše madi. Hlapang le itlhwekišeng! Tlogelang tše mpe tše ke bonago le di dira. Lesang go dira tše kgopo, le ithuteng go dira tše di botse. Dirang tše di lokilego, solang bao ba gatelelago ba bangwe, thušang ditšhuana ge di tlile tshekong, le emelele bahlologadi.” Morena o re: “Bjale etlang re sekišaneng molato wa lena. Le ge le hwibitše perr ka dibe tša lena, le tla šweufala twaa! Le ge le re hwibii, le tla šweufala pšoo! Ge le ka dumela go ntheeletša, le tla ja dijo tše bose tša naga ya lena. Eupša ge le ka gana, la fela le ntsogetše maatla, gona ke lena le tlago lewa ke tšhoša, ka gobane go boletše nna, Morena.” Joo, motse wola o bego o botega bjale o fetogile sefebe! Pele e be e le motse wa toka; go wona go be go letše boloki. Eupša bjale o tletše babolai fela. Jerusalema, o kile wa ba bjalo ka silibera, eupša bjale o manyedi; o be o swana le bjala bjo bogale, eupša bjale o tšhetšwe meetse. Baetapele ba gago ke batsošameferefere le bagwera ba mahodu; ka moka ga bona ba gabile tsogolekobong gomme ba ithatela fela dimpho. Ga ba rerelele ditšhuana tshekong goba ba theeletša ge bahlologadi ba bega melato ya bona. Bjale ge, theeletšang se Morena Ramaatlaohle, Mong wa lena, Modimo yo maatla wa Israele, a se bolelago: “Ke tla tshwela kgalefo ya ka godimo ga bao ba ntshwenyago, ka itefeletša ka lena manaba a ka. Ke tlilo le otla. Ke tla le hlwekiša boka tshipi moubelong, gomme ka le ntšha tšhila yohle. Ke tla le beela babuši bjalo ka pele, ka le fa baeletši bjalo ka mathomong. Ke gona Jerusalema e tlago bitšwa motse wa toka, felo ga potego.” Jerusalema e tla phološwa ka go otlwa, gomme bao ba sokologelago go Morena bona ba tla phološwa ka toka ya Morena. Eupša ba ba mo tsogelago maatla le badiradibe o tla ba pšhatlaganya mmogo; o tla bolaya yo mongwe le yo mongwe yo a mo hlanamelago. Le tla lewa ke dihlong ka ge le kile la rapela mehlare, la gagabiša mahlo ka baka la dirapa tše le bego le di khunamela go na le gore le khunamele nna. Le tla omelela bjalo ka mohlare wo o ponago matlakala, la ba bjalo ka serapa se se sa nošetšwego. Bjalo ka ge mooko o tšhungwa ke tlhase, dinatla le tšona di tla fedišwa ke mediro ya tšona ye mebe, gwa se be le motho yo a timago mollo woo. Wo ke molaetša wo Modimo a o boditšego Jesaya, morwa wa Amotse, mabapi le Juda le Jerusalema: Nako e etla yeo ka yona thaba ye Tempele e agilwego godimo ga yona e tla bago ye e phagamego go feta dithaba ka moka, ya okamela meboto yohle. Ditšhaba ka moka di tla e kgeregela, gomme merafe ye mentši ya re: “A re rotogeleng thabeng ya Morena re yeng Tempeleng ya Modimo wa Israele. O tla re ruta tše a nyakago re di dira; ra phela ka moo a nyakago ka gona, gobane Morena o ruta a le Sione, o bolela a le Jerusalema.” O tla ahlola ditšhaba, a kgaola ditshele merafeng ye mentši. Batho ba tla kgatla ditšhoša ya ba megoma, gomme marumo ya ba ditsedi. Ditšhaba di ka se sa lwa, di ka se sa ithuta go lwa. Bjale etlang, lena ditlogolo tša Jakobo, le sepeleng seetšeng seo Morena a re fago sona. Joo, Modimo, o lahlile setšhaba sa gago, ditlogolo tša Jakobo! Naga e tletše bodupe bja bohlabela le malopo a go swana le a Bafilista. Nageng ka moka go agile bafaladi. Naga e tletše silibera le gauta, gomme mahumo a Juda ga a fele. E tletše dipere, gomme dikoloi tša bona tša ntwa ke tše dintšintši. Naga ya bona ke medimo fela, gomme ba khunamela dilo tše ba itiretšego tšona ka diatla. Ka tsela ye batho ba itirile banyatšegi, ba ikgobošitše. Morena, o se ke wa ba swarela! Lena batho, tšhabelang ka maweng, khutang ka meleteng le tšhabeng kgalefo ya Morena le letago la gagwe le le fahlago! Letšatši le etla leo ka lona boikgogomošo bja motho bo tlago fedišwa, le boikgantšho bja gagwe bja kokobetšwa. Mohlang woo go tla godišwa Morena fela. Ka tšatši leo Morena Ramaatlaohle o tla kokobetša bohle ba maemo, bohle ba go ikgogomoša le ba go ikgantšha. O tla fediša mesedere ka moka ye metelele ya go letla ya Lebanone, le meeike yohle nageng ya Bashane. O tla phušola dithaba ka moka tše di phagamego le meboto yohle ye megolo, le ditora ka moka tše ditelele gotee le merako ka moka ye e tiišitšwego. O tla nweletša maselawatle ohle a magolo a mabotse. Boikgogomošo bja motho bo tla fedišwa, boikgantšho bja gagwe bo tla kokobetšwa. Medimo e tla timelela sa ruri, gomme gwa godišwa Morena fela tšatši leo. *** Batho ba tla tsena ka maweng le ka meleteng ba tšhaba kgalefo ya Morena le letago la gagwe le le fahlago, ge a etla go šikinya lefase. Ge letšatši leo le fihla, ba tla lahla medimo ya gauta le ya silibera ye ba itiretšego yona, gomme ba e tlogelela dirunya le bomankgagane. Ge Morena a tliša tšhikinyego ya lefase, batho ba tla tšhabela ka maweng le ka dimphatšeng ba tšhaba kgalefo ya gagwe le letago la gagwe le le fahlago. Le se sa tshepha motho wa nama – ga se selo! Bjale tsebang gore Mong wa lena, yena Morena Ramaatlaohle, o kgauswi le go amoga badudi ba Jerusalema le ba Juda batho bohle ba ba ba botilego, le dilo tšohle tše ba ikantšego tšona. O tlilo ba amoga meetse le dijo ka moka, bagale le bahlabani, baahlodi le baprofeta, didupe le bagolo ba setšhaba, balaodi ba madira le baetapele ba setšhaba, baeletši le bakgoni ba mediro ya diatla, le boramaselamose ba bagolo. Morena o tla bea bašemane baetapele ba setšhaba, mme ba matepe ya ba babuši ba sona. Setšhaba se tla phenkgišana, motho a bakišana le wa gabo. Bafsa ba tla nyatša ba bagolo go bona, gomme ba e sego selo ba tla nyatša bahlomphegi. Nako e etla yeo ka yona motho a tlago swara morwarragwe a re: “Wena seaparo o na le sona, ka gona eba moetapele wa rena mo mabakeng a mabe a.” Eupša yena o tla hlaboša lentšu a re: “Aowaowaa, nna nka se kgone go le hlokomela. Le nna ka ga ka ga ke ne dijo le diaparo. Le se ntire moetapele wa lena!” Ee, Jerusalema e a tekateka, Juda e a wa, ka gobane setšhaba se tsogetše Morena maatla ka mantšu le ka ditiro yena a se lebeletše. Morena o tla ba bona molato ka ge ba be ba kgetholla batho tshekong. Ba dira dibe pepeneneng bjalo ka batho ba Sodoma. Ba lahlegile; ba ikgogoletše magala hlogong. Begang gore baloki tša bona di tla sepela gabotse. Ba tla ipshina ka tše ba di šometšego. Eupša bakgopo bona ba lahlegile. Tše ba di dirilego ba bangwe bjale ba tla dirwa tšona. Baadimiši ba ditšhelete ba amoga setšhaba sa ka dilo ka moka, batho ba ba nyakago mašokotšo a mantšintši ba gatelela batho ba ka. Lena setšhaba sa ka, baetapele ba lena ba a le timetša, ba le rarakanyetša ditsela. Morena o šetše a itokišeditše go sekiša setšhaba sa gagwe, o kgauswi le go se ahlola. Morena o thoma go ahlola bagolo le baetapele ba setšhaba. O ba bona molato o re: “Le hutše dirapa tša merara, gomme tše le di amogilego badiidi di ka malapeng a lena. Le reng le gatelela setšhaba sa ka, le hula badiidi? Go bolela nna, Mong wa lena, Morena Ramaatlaohle.” Morena o rile: “Ke tlilo otla basadi ba Jerusalema ka gobane ba a ikgantšha, ba sepela ba šinyaletše. Ba goketša banna, ba sepela ba ipona ba letša maseka a maoto. Nna, Morena, ke tla ba boola dihlogo ba šala ba se ne moriri.” *** Letšatši le etla leo ka lona Morena a tlago apola basadi ba Jerusalema tšohle tše ba ikgabišago ka tšona – maseka a maoto, mefapahlogo, dipheta tša melala, mangina, le maseka a matsogo. O tla ba amoga mašira, dikgabišo tša moriri, mefiri ya maoto, mapanta a botšhepi, dinkgabose, maralana a diatla, dipalamonwana, mefiri ya dinko, diaparo tša menyanya, diaparo tše telele, dikobo, dikhwama, diipone, diaparo tše boletiana, dituku tša hlogo le dituku tše dingwe. Bakeng sa go nkga bose ba tla nkga lefetla; bakeng sa mapanta ba tla ipofa ka dithapo; bakeng sa leetse ba tla tšwa mafatla; bakeng sa diaparo tše boleta ba tla apara tša go ba gohla tša go ilela, mme bakeng sa go ba ba babotse ba tla ba le mabadi a bokgoba. Banna ba motse ba tla bolawa ka tšhoša, gomme bagale ba hwela ntweng. Dikgoro tša motse di tla golola tša ilela, mme motse ka bowona wa swana le mosadi yo a pharamego fase a tlogetšwe ke batho ka moka. Ge nako yeo e fihla, basadi ba ba šupago ba tla swara monna o tee ba re: “Re tla iphepa ra ikapeša, fela re dumelele gore re re o monna wa rena, gore re ikhutše kgobogo ya ge re se ra nyalwa.” Nako e etla yeo ka yona tšohle tše Morena a di medišitšego nageng di tlago gola ya ba tše dibotse. Mašaledi a Israele ka moka a tla thaba a ikgodiša ka dibjalo tše di kgahlišago tša mašemo a ona. Mang le mang yo e lego lešaledi Sione, a šetšego Jerusalema, yo Modimo a mo kgethilego gore a phologe, o tla bitšwa yo mokgethwa. Morena o tla ahlola setšhaba, gomme a se hlwekiša ka moya wa gagwe wo o tšhumago, a hlatswa Jerusalema ditšhila le madi a a se nago molato ao a ilego a tšhollwa fao. Ke gona Morena a tlago hloma leru mosegare, le muši le seetša sa mollo wo o laumago bošego godimo ga thaba ya Sione le godimo ga mafelo ao batho ba kgobokanago go ona. Letago la Morena le tla šireletša motse wohle. E tla ba moriti wa motse ge letšatši le fiša, gomme la o dira felo mo go bolokegilego, mo go tšhabelwago ledimo le pula. Anke ke opele kopelo mabapi le yo ke mo ratago, kopelo ya yo ke mo ratago malebana le serapa sa gagwe sa merara: O be a na le serapa sa merara mmotong wa mobu wo nonnego. A lema serapa, a epolla maswika; a bjala merara ye mebotse. A aga tora gare go se hlapetša, a epa le bopitlelo bja diterebe. A fišegela gore serapa se enywe diterebe tše dibotse, eupša sona sa enywa diterebe tša go bola. Bjale yo ke mo ratago o re: “Lena badudi ba Jerusalema le lena batho ba Juda, nke le nkahloleng, le ahloleng le serapa sa ka sa merara. Kgane go sa na le se sengwe se ke sego ka se direla serapa sa ka? Bjale ke ka baka lang se entšwe diterebe tša go bola, ya se be tše dibotse bjalo ka ge ke be ke fišegela? “Bjale ke le botša se ke tlago se dira serapa se sa ka: Ke tla hlahlamolla legora la sona ka le tšhuma, ka kgereša morako wa sona gomme ka se lesa se gatakelwa. Ke tla se ngala, nka se kgothe merara goba ka e hlagolela, gomme mehlašana ya meetlwa le mabjang di tla mela go sona. Ke tla laela maru gore a se ke a se nešetša pula.” Serapa se sa merara sa Morena Ramaatlaohle ke setšhaba sa Israele; merara ye a e bjetšego gore se tle se mo kgahle ke batho ba Juda. O be a fišegela gore ba dire toka, eupša bona ba dira tša go se loke. O be a holofetše gore ba tla dira boloki, eupša bonang, bao ba dirilwego go se loke ba tsošitše sello. Le lahlegile, lena le ikokeletšago dintlo, la ikokeletša le mašemo go fihlela go se sa na le mo go šetšego, mme naga ka moka e le ya lena le le noši. Ke kwele Morena Ramaatlaohle a ena a re: “Dintlo tšeo tše dintši tše dikgolo tše dibotse e tla ba marope a a rego hoo. Ditemeng tša matšatši a lesome tša serapa sa merara go tla ntšhwa moruswi o tee fela wa beine. Mokotla wa peu o tla ntšha ntlatlana e tee fela ya mabele.” Go madimabe lena le tsogelago bjaleng, ya ba ya ba mašegogare le duletše botagwa. Menyanyeng ya lena go letšwa dikgapa le diharepa le meropana le dinaka; beine yona le nayo, eupša mošomo wa Morena wona ga le o šetše, modiro wa gagwe ga le o hlokomele. Ka baka leo, ka gobane setšhaba sa ka ga se nyake go ntseba, se tla išwa bothopša. Baetapele ba lena ba tla hwa ka tlala, gomme bathofela bona ba hwa ka lenyora. Bodulabahu bo nyaka go ba kwametša, bo ahlamišitše legano go feta tekanyo. Bo kwametša bakgomana ba motse wa Jerusalema le lešaba la wona le le tladitšego lešata. Bohle ba tla gobošwa, baikgogomoši ba kokobetšwa. Morena Ramaatlaohle o laetša bogolo bja gagwe ka go dira toka, gomme o bontšha gore ke yo mokgethwa ka go ahlola ka tshwanelo. Dikwanyana di tla fula maropeng a metse go no swana le ge di fula nageng, mme le diputšane tša go nona tša iphulela moo. Le lahlegile, lena le itlemagantšego le bobe ka boradia bja lena, lena le kgomaganego le dibe tša lena bjalo ka kgomo ye e gogago koloi. Le re: “Morena a a phakiše a dire ka pela se a nyakago go se dira, re se bone. Modimo yo mokgethwa wa Israele a a phethe ka pela se a ikemišeditšego sona, re se tsebe.” Go madimabe lena le rego bobe ke botse, mme botse ke bobe. Le fetoša leswiswi seetša, seetša la se fetoša leswiswi. Le dira se se babago se sebose, mme se sebose la se dira se se babago. Le lahlegile, lena le iponago le le ba bohlale, le gopolago gore le na le kwešišo. Go madimabe lena bagale madileng, lena bakgoni ba go hlakanya mabjala ka dipitšeng. Eupša le lokolla motho yo a nago le molato ka tsogolekobong, mme yo a se nago molato la mo tima ditshwanelo tša gagwe. Bjalo ka ge mollo o fiša dikutwana tša mahlaka mme hlaga e lorela kgabong, le tla fedišwa taa go swana le medu ye e bodilego le matšoba a a omeletšego mme a tšewago ke phefo. Tšeo di tla direga ka gobane le lahlile melao ya Morena Ramaatlaohle, le nyaditše tše Modimo yo mokgethwa wa Israele a re rutilego tšona. Ka gona Morena o ile a galefela setšhaba sa gagwe, gomme a emiša letsogo a se otla. Dithaba di ile tša šikinyega, ditopo le tšona tša tlogelwa mekgotheng bjalo ka ditlakala. Le ge go le bjalo kgalefo ya Morena ga se ya okobala, eupša letsogo la gagwe o sa le emišeditše go otla. Morena o hlomile sefoka o bitša setšhaba sa kgole. O se bitša ka molodi gore se tle se etšwa magomong a lefase. Gomme šebao, ba tla ba kitima ka lebelo! Ga go yo a lapilego, ga go yo a thetšwago. Ga ba potume, ga ba swarwe ke boroko. Ga go yo a sego a tiiša lepanta, ga go yo a kgaogetšwego ke lerala la dieta. Mesebe ya bona ke ye bogale, le mara a bona a ngangegile. Ditlhako tša dipere tša bona ke tše thata boka leswika, le maotwana a dikoloi tša bona tša ntwa a thwethwa ka lebelo bjalo ka sesesedi. Ba rora bjalo ka ditau, ba bopa boka ditawana tše di bolailego phoofolo ge di e gogagogela mo go sego yo a ka di amogago yona. Mohlang woo ba tla rorela Israele bjalo ka lewatle. Bonang, naga ke leswiswi le masetlapelo fela! Seetša se fifatšwa ke maru a maso. Ka ngwaga wo Kgoši Usia a hlokafetšego ka wona ke ile ka bona Morena a dutše setulong sa bogoši se se phagamego kudu, morumo wa seaparo sa gagwe o tletše Tempele. Mo a bego a dutše gona go be go eme barongwa ba ba laumago kgabo, yo mongwe le yo mongwe wa bona a na le diphego tše di selelago. Ka tše pedi a ikhurumeditše sefahlego, ka tše pedi maoto, gomme tše dingwe tše pedi e le tša go fofa. Ba be ba goeletšana ba re: “Yo mokgethwa, yo mokgethwa, yo mokgethwa ke Morena Ramaatlaohle! Letago la gagwe le tletše lefase!” Mantšu a bona a ile a šikinya direpodi tša Tempele, le Tempele ya tlala muši. Ke moka ka re: “Joo, nna ngwana wa batho! Ke lahlegile ka ge ka mehla tše ke di bolelago e le sebe, le gona ke dula le batho bao tše ba di bolelago e lego sebe; gomme bjale ke bone Kgoši, Morena Ramaatlaohle, ka mahlo a ka!” Ke ge yo mongwe wa barongwa bao a fofela go nna, a swere legala le a le tšerego aletareng ka sepatišo. A nkgoma molomo ka lona a re: “Legala le le go kgwathile melomo, ka gona ga o sa na le molato, o swaretšwe dibe.” Ke moka ka kwa Morena a re: “Nka roma mang? Motseta wa rena e tla ba mang?” Ka fetola ka re: “Nna nka ya! Roma nna!” Ka gona a nthoma gore ke yo botša setšhaba ke re: “Go kwa le tla kwa, eupša le ka se kwešiše. Go bona le tla bona, eupša le ka se hlaologanye.” Ya ba o re go nna: “Retetša setšhaba se dipelo, o se thibe ditsebe, o se foufatše, gore se se kgone go bona le go kwa le go kwešiša, gore ba se sokologele go nna gomme ba fodišwa.” Ka mmotšiša ka re: “Morena, na ba tla ba ka mokgwa wo go fihlela neng?” Yena a mphetola a re: “Go fihlela metse e thubilwe, e se na le motho, dintlo di se ne batho, naga e fetogile lešoka; go fihlela nna, Morena, ke išitše setšhaba kgole gomme naga yohle e le lešoka. Le ge mo nageng go ka šala motho o tee mo go ba lesome, le yena o tla bolawa; o tla swana le kutu ya moeike goba mohlare wo mongwe wo mogolo wo o remilwego.” Kutu yeo e emela go thoma ka lefsa ga setšhaba sa Modimo. Mehleng ya ge Kgoši Ahase, morwa wa Jotamo le setlogolo sa Usia, a buša naga ya Juda, go ile gwa tsoga ntwa. Retsine, kgoši ya Siria, gotee le Pekage, morwa wa Remalia, kgoši ya Israele, ba ile ba hlasela motse wa Jerusalema, fela ba palelwa ke go o thopa. Ge kgoši ya Juda a ekwa gore madira a Siria a šetše a le ka nageng ya Israele, yena le setšhaba sa gagwe ba tšhoga kudu ba ba ba thothomela bjalo ka mehlare e tšokotšwa ke phefo sethokgweng. Morena a re go Jesaya: “Tšea morwago, Sheare-Jashube, o yo gahlanetša Kgoši Ahase. O tla gahlana le yena tseleng ye e bapetšego le tšhemo ya mohlatswi wa mašela, mafelelong a mokero wo o tlišago meetse a a tšwago letshaneng la ka godimo. O mmotše gore a phafoge, a thekge ditho, a se ke a boifa goba a nolega moko ka baka la kgalefo ya Kgoši Retsine le Basiria ba gagwe, le ya Pekage, morwanyana yola wa Remalia. Ba swana le dirumola tše pedi tše di thunyago muši. Basiria le setšhaba sa Israele gotee le kgošinyana yela ya sona, Pekage, ba go lakane. Ba nyaka go hlasela Juda gore ba e fenye, ba arolelane naga, gomme ba bee morwa wa Tabeale kgoši. “Eupša nna, Morena, ke re seo se ka se tsoge se diregile, ka baka la gore maatlana a Siria a lekana le a Damaskose, mošate wa yona, gomme le ona maatlana a Damaskose a lekana le a Retsine, kgoši ya Siria. Ge e le Israele yona, mengwageng ye masome a a selelago a metšo ye mehlano e tla ba e pšhatlagane, e se sa le setšhaba. Maatlana a Israele a lekana le a Samaria, mošate wa yona, gomme le ona maatlana a Samaria a lekana le a Pekage, kgošinyana yela ya Israele. “Ge le sa kgolwe, le ka se kgotlelele.” Morena a buša a laela Jesaya gore a botše Ahase gape a re: “Kgopela Morena Modimo wa gago gore a go fe sešupo. E ka ba sa go tšwa fase bodulabahu, goba sa go tšwa godimodimo.” Ahase a mo fetola a re: “Nka se kgopele sešupo; nka se leke Morena.” Ge a realo Jesaya a mo fetola a re: “Bjale ge, theeletša, wena setlogolo sa Kgoši Dafida. A ga wa kgotsofala ge o tena batho – kgane o rata go tena le Modimo? Gona Morena, Mong wa bohle, o tla go fa sešupo ka boyena: Kgarebe e imile gomme e tla belega morwa ya mo thea leina la Imanuele. Ge a šetše a godile, a tseba go gana bobe le go kgetha botse, o tla ja lebebe le dinose. Le pele ga moo dinaga tša magoši a mabedi ao a le tšhošago kudu di tla be di tlogetšwe ke batho ba tšona. “Morena o tlilo tlišetša wena le setšhaba sa gago le lapa lohle la mošate mehla ye mebe ye le sego la ka la e bona go tloga mola mmušo wa Israele o aroganago le wa Juda – o tlilo le tlišetša kgoši ya Asiria. “Mehleng yeo Morena o tla bitša Baegepeta ka molodi gore ba tle bjalo ka dintšhi ba etšwa mathomong a dinokana tša Naele, le Baasiria gore ba tle bjalo ka dinose ba etšwa nageng ya bona. Ka moka ba tla bokana ka melapong le ka dimphatšeng tša maswika le mehlašaneng yohle ya meetlwa le mafulong ka moka. “Mehleng yeo Morena o tla le boola dihlogo ka legare le a tlago le adima kua mošola wa noka ya Yufratese. Legare leo ke kgoši ya Asiria. “Mehleng yeo motho yo a kgonnego go šala le lethole le tee le dihuswane tše pedi fela, di tla šiša mo e lego gore o tla ja lebebe. Le bohle ba e lego mašaledi nageng ba tla ja lebebe le dinose. “Mehleng yeo serapa se sengwe le se sengwe sa merara ye sekete, se se ka rekwago ka dipapetlana tše sekete tša silibera, se tla mela mehlašana ya meetlwa le mabjang. Batho ba tla yo tsoma gona ka mesebe. Ee, naga yohle e tla tlala mehlašana ya meetlwa. Meboto yohle yeo batho ba bego ba lema go yona ka megoma ya diatla e tla tlala meetlwa le mabjang mo e lego gore motho a ka se ye gona. E tla ba mafulo a dikgomo, gomme dinku tša gatakela felo fao.” Morena a re go nna: “Tšea papetla ye kgolo gomme godimo ga yona o ngwale ka mokgwa woo mang le mang a ka kgonago go bala. O re: ‘Thopelo le tšeelo di kgauswi.’ Ke nyaka gore banna ba babedi ba ba tshephegago, e lego moprista Uria le Sakaria, morwa wa Jeberekia, e be dihlatse tša ka.” Ka morago ka robala le mosadi wa ka, gomme a ima, a belega morwa. Ke moka Morena a re go nna: “Mo thee leina la ‘Thopelo-le-tšeelo-di-kgauswi’. Pele ngwana yoo a kgona go re ‘mma’ goba ‘tate’, lehumo la Damaskose le thoto ya Samaria di tla thopša ke kgoši ya Asiria.” Morena a bolela le nna gape a re: “Ka gobane batho ba ba ganne meetse a a elago gabotse a mokero wa Shiloage, gomme ba nolega moko ge Kgoši Retsine le Kgoši Pekage ba etla, nna, Morena, ke tla tliša kgoši ya Asiria le madira a yona ka moka go hlasela naga ya Juda. Ba tla e aparela bjalo ka meetse a maatla a noka ya Yufratese ge a falala ka mariba a yona, a elela ka mathoko ohle. Ba tla gogola Juda ka lefula le le falalago la go goma ka megolo, le khupetša se sengwe le se sengwe. “Ba tla aparela naga ya gago ka moka, wena Imanuele.” Dirang tše mpe, lena ditšhaba, le tle le pšhatlaganywe! Theeletšang, lena dinaga tša kgole tša lefase. Itokišetšeng go lwa, le tle le pšhatlaganyweng! Ke re itokišeng, le tle le pšhatlaganywe! Logišanang maano, eupša a tla folotša. Le ka rerišana, eupša go ka se hole selo, ka gobane Modimo o na le rena. Morena a ntaya ka maatla a gagwe a magolo a re ke se ke ka dira dilo tše setšhaba sa Israele se bego se di dira. A re: “Wena le balatedi ba gago le se ke la loga maanomabe le setšhaba se, le gona le se ke la boifa goba la tšhaba tše ba di boifago. Nna, Morena Ramaatlaohle, ke nna le swanetšego go ntlhompha ka ge ke le yo mokgethwa; le swanetše go boifa nna gomme le ntšhabe. Ke tla ba botšhabelo bja lena, eupša go batho ba mmušo wa Juda le wa Israele ke tla ba leswika le le ba thetšago, lebje le le ba kgopago; go badudi ba Jerusalema ke tla ba molaba le sefu. Ba bantši ba tla kgopša ba wa; ba tla wela melabeng, ba tanywa difung; ba tla pšhatlaganywa.” Lena balatedi ba ka, le hlokomele mme le lote dithuto tše Modimo a nthutilego tšona. Morena o khutetše setšhaba sa gagwe, eupša nna ke mmotile, ke mo holofetše. Bona nna le bana bao Morena a mphilego bona re dihlatse setšhabeng sa Israele tša Morena Ramaatlaohle yo a dulago thabeng ya Sione. Eupša batho ba tla le botša gore le kgopele dikeletšo go dinoge tše di letšago metswiri le didupe tše di bobolago. Ba re: “Gape setšhaba se swanetše go kgopela dikeletšo go medimo ya sona, le go nyakela ba ba phelago dikeletšo go ba ba hwilego.” Lena le ba fetole le re: “Boelang go tše Morena a le rutago tšona le tše di bolelwago mabapi le yena. Bao ba sa kwanego le tšona ba lahlegile.” Ba tla gerema le naga ba nolegile moko, ba swerwe ke tlala. Ge setšhaba se ekwa tlala se tla befelwa sa roga kgoši ya sona le Modimo wa sona. Se tla lebelela godimo, sa lebelela le fase, gomme sa bona fela matshwenyego le leswiswi le lesoleso le le šiišago le se gapelwago go lona. Go ka se sa ba le leswiswi nageng ya matshwenyego. Pele Morena o be a kokobeditše naga ya kgoro ya Sebulone le ya Naftali, fela mehleng ye e tlago o tla dira gore dinaga tšeo di hlomphege go tloga Mediteraniene go ya bohlabela nageng ye e lego ka mošola wa noka ya Jordane, go fihlela Galilea, mo go bego go dula le ditšhaba di šele. Setšhaba se se bego se sepela swiswing se bone seetša se segolo. Batho ba ba bego ba dutše nageng ya moriti wo moso, ba hlabetšwe ke seetša. O atišitše setšhaba, Morena; o se thabišitše kudu. Ba thabile pele ga gago, ba swana le batho ba ba thabetšego go buna, goba go arolelana dithebola. Gobane o robile joko ye e bego e ba imela, le thupa ye ba bego ba bethwa ka yona magetla. O fentše setšhaba se se bego se gateletše batho ba gago, boka mola o fenya Bamidiane. Dieta tša manaba tše di dirago mogwaša, le diaparo tša ona tše di thankgetšego madi di tla fišwa, di tla lewa ke mollo. Re tswaletšwe ngwana! Re filwe morwa! E tla ba moaparankwe. O tla bitšwa: Moeletši yo a makatšago, Modimo yo maatla, Tate wa go sa felego, Kgoši ya khutšo. Mmušo wa gagwe o tla oketšega; khutšo ya wona ke ya go ya go ile, O tla dula setulong sa bogoši sa Kgoši Dafida, a hloma mmušo wa gagwe a o thekga ka go buša ka tshwanelo le toka, go tloga bjale go iša go sa felego. Maikemišetšo a Morena Ramaatlaohle ke go dira tšeo ka moka. Mong wa bohle o ahlotše batho ba mmušo wa Israele, gomme kahlolo yeo e tla betha bona ditlogolo tša Jakobo dihlogo. Setšhaba ka moka sa Israele, le bona ba ba dulago Samaria, ba tla tseba gore seo se dirilwe ke yena. Bjale ba a ikgogomoša ba a ikgantšha ba re: “Meago ya mobu e wele, eupša rena re tla e tsošološa ka maswika a a betlilwego. Mego ya naga e remilwe, eupša re tla aga ka dikota tša mesedere.” Morena o hlohleleditše manaba a Retsine gore a ba hlasele, o hlohleletša le batlaiši ba bona ba bangwe. Siria ka bohlabela le Filistia ka bodikela di gabutlile Israele. Le ge go le bjalo kgalefo ya Morena ga se ya okobala; letsogo la gagwe o sa le emišeditše go otla. Setšhaba sa Israele ga se sa sokologela go yoo a se otlilego; ba sa fela ba sa khunamele Morena Ramaatlaohle. Ka letšatši le tee Morena o tla otla baetapele ba Israele le setšhaba ka moka; o tla se ripa hlogo le mosela. Hlogo ke bakgalabje ba ba hlomphegago, gomme mosela ke baprofeta ba ba rutago maaka. Bona bao ba etilego setšhaba se pele ba se lahleditše, gomme ba ba etilwego pele ba gakanegile. Ka gona Mong wa bohle a ka se gaugele masogana goba a šokela bahlologadi le ditšhuana, ka gobane setšhaba ka moka se kgole le Modimo, ke se sebe, gomme tšohle tše se di bolelago ke tše mpe. Le ge go le bjalo kgalefo ya Morena ga se ya okobala; letsogo la gagwe o sa le emišeditše go otla. Bokgopo bja setšhaba bo tuka bjalo ka mollo wo o tšhumago mehlašana ya meetlwa le mabjang. Bo lauma boka mollo wa hlaga wo o tupago mekubego ya muši. Ka ge Morena Ramaatlaohle a galefile, kotlo ya gagwe e tšhuma naga bjalo ka mollo, batho nke ke dikgong; ga go yoo a šetšago yo mongwe. Nageng ka moka batho ba topa ka mo le ka mo se se ka lewago, eupša ba no fela ba swerwe ke tlala, ba sa khore, motho a be a je ngwana wa gagwe! Kgoro ya Manase le ya Efraime di a hlaselana, gomme mmogo di hlasela Juda. Le ge go le bjalo kgalefo ya Morena ga se ya okobala; letsogo la gagwe o sa le emišeditše go otla. Le lahlegile, lena le beago melao ye mebe ye e gatelelago setšhaba sa ka. Ke ka moo le thibelago badiidi ge ba etla tshekong, la ba amoga ditokelo tša bona. Ke ka tsela yeo le tlaišago bahlologadi le ditšhuana ka yona, la ba amoga dithoto tša bona. Le tla dirang ge Modimo a tlilo le otla? Le tla dirang ge a le tlišetša masetlapelo a go tšwa nageng ya kgole? Le tla tšhabela go mang gore a le thuše? Mahumo a lena le tla a fihla kae? Ga le sa šaletšwe ke selo ntle le go inama la ba mathopša goba le hwela ntweng. Le ge go le bjalo kgalefo ya Morena e ka se okobale; letsogo la gagwe o tla fela a le emišeditše go otla. Morena o re: “Joo, Asiria! Ke šomiša Asiria bjalo ka patla le phata go otla bao ke ba galefetšego. Ke romeletša Baasiria go setšhaba se se ganago nna, Modimo wa sona; ke ba laela gore ba yo hlasela setšhaba se ke se tukelago bogale. Ke ba roma gore ba yo se hula, ba se thopele, mme ba se gatake bjalo ka leraga mekgotheng.” Eupša kgoši ya Asiria yona ga e gopole ka mokgwa woo, ga se ya ikemišetša go dira seo. E ikemišeditše go senya, go fediša ditšhaba tše dintši. O a ikgantšha o re: “Babuši ba dilete tša ka ke dikgoši ka moka! Ke fentše motse wa Kalene le wa Karkemishe, motse wa Hamate le wa Arpade. Ke fentše Samaria le Damaskose. Ke ile ka emiša letsogo ka thopa mebušo yeo ya go khunamela medingwana e šele, medimo ya diswantšhobetlwa ye mentši go feta ya Jerusalema le ya Samaria. Ke pšhatlagantše Samaria le medimo yohle ya yona ya diswantšho, gomme Jerusalema le medimo ya yona ya diswantšho ke tla di dira sona seo.” Eupša Mong wa bohle o re: “Ge ke fetša tšohle tše ke di dirago thabeng ya Sione le motseng wa Jerusalema, ke tla otla kgoši ya Asiria ka baka la go ikgantšha le go ikgogomoša ga gagwe.” Kgoši ya Asiria e a ikgantšha e re: “Ke dirile dilo tšeo ka a ka maatla le bohlale bja ka, ka gore nna ke yo bohlale. Ke tlošitše mellwane ya ditšhaba, ka ba ka thopa matlotlo a tšona. Ke fentše badudi ba fao bjalo ka nkgwete. Ditšhaba tša lefase di be di swana le sehlaga sa nonyana, gomme nna ka tšea mahumo a tšona bjalo ka mae ka sehlageng se se ngadilwego. Gwa se be le lefego le le rego phuruphuru la go ntšhošetša, goba molongwana wo o rego tswiritswiri!” Eupša Morena o re: “Na selepe se ka nyatša moremi? A saga e ka itheta go feta mosagi. Lepara le ka se rethe motho yo a le topago, le patla ga e emiše yo a e swerego.” Mong wa bohle, Morena Ramaatlaohle, o tlilo otiša Basiria bao bjale ba jago ba khora. Bahlomphegi gare ga bona ba tla tšhungwa ka teng ke mollo wo o sa timego. Modimo, seetša sa Israele, o tla fetoga mollo. Modimo yo mokgethwa wa Israele e tla ba kgabo ya mollo, yeo ka letšatši le tee e tlago fiša ya fediša mehlašana ya meetlwa le mabjang, e lego banyatšegi gare ga bona. Dithokgwa le dirapa tša mehlare ya dikenywa, e lego bahlomphegi, ba tla swa thokgethokge bjalo ka molwetši yo a kgaogago. Go tla šala batho ba ba sego nene mo e lego gore le mošemanyana a ka ba bala. Nako e etla yeo ka yona mašaledi a Israele le ditlogolo tša Jakobo tše di phonyokgilego ba ka se sa botago setšhaba se se ilego sa ba hlasela. Morena Modimo yo mokgethwa wa Israele ba tla tshepha yena ka nnete. Mašaledi a tla boela go Modimo wa ona yo maatla, ona mašaledi a setšhaba sa Israele. Le ge gonabjale setšhaba se lekana le dithorwana tša lešabašaba la lewatle ka bontši, go tla boa fela mašaletšana. Se šetše se ahloletšwe go fedišwa, ebile go a se swanela. Ee, Mong wa bohle, Morena Ramaatlaohle, o ikemišeditše go fediša naga yohle. Mong wa bohle, Morena Ramaatlaohle, o re go setšhaba sa gagwe se se dulago Sione: “Le se ke la tšhaba Baasiria, le ge ba le gateletše bjalo ka Baegepeta mehleng yela. Kgauswinyana nka se sa le galefela, gomme ke tla tukela bona bogale ka ba fediša. Nna, Morena Ramaatlaohle, ke tla ba otla ka tshelane ya ka, ka etša mola ke fenya Bamidiane letlapeng la Orebe. Ke tla emiša lepara la ka ka godimo ga lewatle ka betha Asiria go swana le mola ke itia Egepeta. Ge nako yeo e fihla ke tla le lokolla jokong ya Asiria, ye e bego e le morwalo magetleng a lena. Kgatelelo yeo e tla fedišwa ke mokhora wa lena, batho ba Juda.” Manaba a wetše motse wa Ai godimo! A putlile Migrone! A tlogetše merwalo ya ona Mikimase! A tshetše sefata gomme a re: “A re yeng re yo lala Geba.” Batho ba motse wa Rama ba a thothomela, le batho ba Gibea, motse wa Kgoši Saulo, ba tšhabile. Hlabang mokgoši, lena batho ba Galime! Theeletšang, lena badudi ba Laesha! Lena ba Anathote, arabang mokgoši woo! Batho ba Madimena ba ipha lešoka, ba Gebime ba a khuta. Lehono manaba a motseng wa Nobo, gomme gona moo ba rethela thaba ya Sione matswele, thaba ye motse wa Jerusalema o agilwego godimo ga yona. Mong wa bohle, Morena Ramaatlaohle, o tla ba remaganya bjalo ka makala a mohlare. Batho ba maemo ba tla bolawa, gomme bahlomphegi ba kokobetšwa. Morena o tla ba rema bjalo ka mehlare ye megolo ya sethokgweng, Yomaatla o tla ba uša boka mehlare ye metelele ya Lebanone. Lešika la bogoši la Dafida le swana le mohlare wo o remilwego; bjalo ka ge mahlogedi a hloga kutung goba medung, le ditlogolong tša Dafida go tla tšwa kgoši ye mpsha. Moya wa Morena o tla dula mo go yena, wa mo fa bohlale le kwešišo, tlhaologanyo le maatla. O tla tseba thato ya Morena, gomme a mmoifa, a kgahlwa ke go dira tše Morena a di ratago. A ka se ahlole ka tebelelo ya mahlo goba a sekiša ka go kwa pudi ya tsela; o tla ahlola bahloki ka toka, le bahlaki ka boloki. Ka taelo ya gagwe batho ba tla otlwa; ge a laela, ba babe ba tla bolawa. O tla buša setšhaba sa gagwe ka toka le botshephegi. Phiri e tla dula le kwanyana, le nkwe ya robala le putšane. Namane le tawana di tla iphepa mmogo, gomme mošemanyana yo monyenyane ya ba modiša wa tšona. Kgomo le bere di tla fula gotee, mme namane tša tšona tša robala mmogo. Tau e tla fula bjang bjalo ka kgomo. Lesea le tla raloka moleteng wa letsolobolo, wa go tshwa letswele a tsenya seatla ka moleteng wa petla. Sione, thabeng ye kgethwa ya Modimo, go ka se dirwe tše mpe goba gwa gobatšanwa, ka gobane naga e tla be e tletše batho ba ba tsebago Morena bjalo ka ge lewatle le tletše meetse. Lebaka le etla leo ka lona kgoši ye mpsha ya lešika la bogoši la Dafida e tlago ba bjalo ka sefoka go ditšhaba. Ba tla mo kgobokanela, gomme mošate, ga gagwe, wa hlomphega kudu. Ge nako yeo e fihla Morena o tla boeletša a otlolla letsogo a lokolla mašaledi a setšhaba sa gagwe Asiria, Egepeta, Patrose, Etopia, Elamo, Babilonia, Hamate, le dinageng tša lebopong la lewatle, le dihlakahlakeng. Morena o tla emiša sefoka, a bontšha ditšhaba gore o kgoboketša batho ba ba gašanego ba Israele le ba ba phatlaletšego ba Juda, gomme o ba kgobokanya ba etšwa mafelong a kgolekgole a lefase. Israele e ka se sa tsebafela Juda. Manaba a Juda a tla fedišwa, gomme Juda e ka se sa ba sera sa Israele. Batho ba Juda le ba Israele ba tla ipopa ba wela Bafilista godimo metheogeng ya ka bodikela, ba šwahlela le batho ba ba dulago ka bohlabela. Ba tla tšea naga ya Edomo le ya Moaba; Baamone e tla ba batho ba bona. Morena o tla omiša kgogometšana ya Suez, a omiša le noka ya Yufratese ka phefo ya go fiša, a šadiša fela meetšana ya yona ye e šupago, gomme motho a kgona go tshela a apere dieta. Go tla ba le tselakgolo ya go tšwa Asiria ya mašaledi a Israele ao a sa lego nageng yeo, go swana le ya borakgolokhukhu ba bona mola ba etšwa Egepeta. Ge nako yeo e fihla le tla opela la re: “Ke a go tumiša, Morena! O be o ntukela bogale, eupša bjale ga o sa nkgalefetše, fela o a nkhomotša. Modimo ke Mophološi wa ka; ke tla mo tshepha mme nka se boife. Morena o a ntiiša o mpha maatla; ke yena Mophološi wa ka. Ka ge ba ba nyorilwego ba thabela meetse a sediba, le setšhaba sa Modimo se thabela go phološwa ke yena.” Mehleng yeo le tla opela la re: “Lebogang Morena! Mo rapeleng! Begelang ditšhaba tšohle mediro ya gagwe! Di botšeng gore ke yo mogolo bjang! Tumišang Morena ka ge a dirile dilo tše kgolo! Lefaseng ka moka a go begwe ditaba tšeo. Bohle ba ba dulago Sione a ba hlabe mekgolokwane, ba duduetše! Modimo yo mokgethwa wa Israele ke yo mogolo, mme o dula gare ga setšhaba sa gagwe.” Molaetša wo Jesaya, morwa wa Amotse, a o boditšwego ke Modimo mabapi le motse wa Babilone šo: Hlomang sefoka sa ntwa godimo ga thaba ye e se nago mehlare! Hlabelang bahlabani mokgoši, le ba hlaeletše gore ba tle ba hlasele dikgoro tša motse woo wa go ikgantšha. Morena o rapile madira a gagwe a a ikgantšhago ka bogolo bja gagwe gore ba lwe ntwa ye kgethwa, ba otle bao a ba galefetšego. Ekwang modumo dithabeng! Ke wa lešaba la batho, ke modumo wa mebušo le ditšhaba tše di kgobokanago. Morena Ramaatlaohle o rapa madira a gagwe. Ba tla ba etšwa dinageng tša kgolekgole, tša magomong a lefase. Ka bona Morena o tlilo senya naga yohle a tuka bogale. Bokolelang! Letšatši la Morena le kgauswi, tšatši leo ka lona Ramaatlaohle a tlago senya naga. Matsogo a bohle a tla repha ka baka la letšhogo; yo mongwe le yo mongwe o tla nolega moko. Batho ka moka ba tla tšhoga kudu, ba swarwa ke bohloko go swana le mosadi ge a šokwa. Ba tla lebelelana ba tlabegile, ba inamišitše difahlego ba nyamile. Letšatši la Morena le etla – tšatši leo le lešoro la go tuka bogale le go galefa ga gagwe moo go šiišago. Lefase le tla fetošwa lešoka, gomme badiradibe bohle ba fedišwa. Dinaledi le dihlopha tša tšona di ka se sa taga, letšatši le tla hlaba le fifetše; kgwedi e ka se be le seetša. Morena o re: “Ke tla tliša masetlapelo lefaseng gomme ka otla bakgopo ka baka la dibe tša bona. Ke tla fediša boikgantšho bja ba ba ikgogomošago, ka kokobetša boikgodišo bja bagateledi. Ke tla dira gore mašaledi a se be nene bjalo ka gauta ye e sego ya tswakwa, a hlokege bjalo ka gauta ya Ofire. Ke tla thothomediša magodimo, lefase la šikinyega la šutha madulong a lona ka baka la go befelwa ga ka, nna, Morena Ramaatlaohle, mohla ke bontšha go tuka bogale ga ka. “Bafaladi ba ba dulago Babilone ba tla tšhabela dinageng le ditšhabeng tša gabobona, ba phatlala bjalo ka ditshephe ge di kitimišwa, bjalo ka dinku tše di se nago modiši. Yo a ka hwetšwago o tla hlabja, yo a ka swarwago o tla bolawa ka tšhoša. Bana ba bona ba tla pšhatlaganywa, magae a hulwa, le basadi ba bona ba katwa bona ba lebeletše. “Ke hlohleletša Bamidiane gore ba hlasele Babilone. Ga ba ne taba le silibera, le gauta ga e ba lake. Ba tla fediša masogana ka mesebe. Ba ka se kwele bana bohloko, le masea a go nkga mekgato ba ka se a šokele. Babilonia ke sethakga sa mebušo, ke boikgantšho bja Bakaldea. Eupša nna, Morena, ke tla pšhatlaganya motse wa Babilone go swana le mola ke pšhatlaganya Sodoma le Gomora! Ga go yo a tlago tsoga a dutše gona gape; le ka morago ga meloko ye mentši go tla be go sa dule motho. Ga go Moarabia yo a ka hlwago a sa hloma mošaša wa gagwe gona, goba modiši yo a ka tsogago a fudišitše mohlape wa gagwe fao. E tla ba felo mo go phelago diphoofolo tša lešoka le moo maribiši a agago dihlaga tša ona. Dimpšhe di tla dula gona, le meoya ye mebe ye nkego ke dipudi tša naga e tla tlolatlola le marope. Diphiri di tla lla dibong tša motse le diphukubje mešate mo go bego go ketekwa. Nako ya Babilone e fihlile! Matšatši a yona ga a sa tlo diega.” Morena o tla boeletša a šokela ditlogolo tša Jakobo, a ikgethela setšhaba seo sa Israele. O tla ba dudiša nageng ya bona gape, gomme bafaladi ba tla tla ba dula le bona, ba ikopanya nabo. Ditšhaba di tla thuša setšhaba sa Israele go boela nageng ya sona, gomme gona moo nageng ye Morena a ba filego yona ditšhaba di tla hlankela Baisraele e le makgoba. Bale ba kilego ba thopa Baisraele bjale ba tla thopša ke bona, gomme setšhaba sa buša bale ba kilego ba se gatelela. Morena o tla imolla lena setšhaba sa Israele matshwenyegong le mahlokong a lena, le modirong wo boima wo le bego le gapeletšwa go o dira. Ge a dira bjalo lena le tla gegea kgoši ya Babilonia ka koša la re: “Agaa, yeo ke yona pheletšo ya mogateledi! Kgatelelo e fedile! Morena o fedišitše maatla a babuši ba babe ba ba bego ba dula ba gateletše ditšhaba ka bogale; ba di hlakiša ba befetšwe, gomme ba sa lese go hlomara ba ba ba fentšego. Bjale lefase lohle le hlomotšwe mootlwa, le iketlile, bohle ba letša mekgolokwane. Mephaene le mesedere ya Lebanone e thabetše se se hlagetšego kgoši, e re: ‘Ka ge kgoši a se sa le gona ga go sa tlo ba le yo a re remago!’ “Bodulabahu bo ferehlegile, bo itokišetša go amogela kgoši ya Babilonia. Meoya ya bale ba bego ba na le maatla lefaseng e a huduega. Meoya ya dikgoši e emelela ditulong tša yona tša bogoši. Yohle e a mo dumediša e re: ‘Ea, kganthe le wena o fokotše bjalo ka rena! O swana le rena! O be o hlompšha ka modumo wa diharepa, eupša bjale o theošeditšwe mono bodulabahu. Bolao le kobo ya gago ke diboko.’ “Hee, kgoši ya Babilonia! Wena mphatlalatšane, naledi ya masa, o napile o wele o etšwa legodimong! Bjale o pšhatlagane fase, wena mafenyaditšhaba. O be o ipotša o re o namelela legodimong, o yo bea setulo sa gago sa bogoši ka godimo ga dinaledi tša godimodimo. O re o tla dula o le kgoši godimo ga thaba yela medimo e kgobokanago go yona ka leboa. O be o re o tla namelela ka godimo ga maru wa swana le Ramaatlaohle. Eupša o kgoromeleditšwe mono fasefase bodulabahu. “Bahu ba tla go tomolela mahlo, ba go lebeledišiša ba re: ‘Afa yo ke yena yola wa go šikinya lefase, a thothomediša le mebušo? A ga se yena yola wa go pšhatlaganya metse gomme a fetoša lefase lešoka? Afa ke yena yola a bego a sa lokolle dibofša tša gagwe, a di lesa tša ikela gae?’ Magoši ohle a lefase – yo mongwe le yo mongwe wa bona – o ithobaletše ka lebitleng la gagwe la segoši, eupša wena ga se wa bolokwa, setopo sa gago se lahlilwe gore se bole. Se khupeditšwe ke ditopo tša bahlabani ba ba bolailwego ka tšhoša ba lahlelwa ka moleteng wa maswika, gomme se a gatakelwa. Ka gobane o sentše naga ya gago gomme wa bolaya le setšhaba sa gago, o ka se bolokwe bjalo ka magoši a mangwe. Ga go na le o tee wa ba lapa leno le lebe yo a tlago šala. Thomang go bolaya barwa ba kgoši ye; ba swanetše go hwa ka baka la dibe tša borakgolokhukhu ba bona. Ga go na le o tee wa bona yo a tlago emelela a thopa lefase goba a le tlatša metse.” Morena Ramaatlaohle o re: “Ke tla hlasela motse wa Babilone ka o pšhatlaganya. Nka se tlogele selo – bana goba ditlogolo goba mašaledi afe le afe. Go bolela nna, Morena. Babilone ke tla e fetoša mohlaka mo go tlago dula bomašianoke. Ke tla swiela Babilone ka leswielo la go gogola se sengwe le se sengwe. Go bolela nna, Morena Ramaatlaohle.” Morena Ramaatlaohle o enne a re: “Tše ke di gopotšego di tla direga. Tše ke ikemišeditšego go di dira di tla phethagala. Ke tla fediša Baasiria nageng ya ka ya Israele, gomme ka ba gatakela godimo ga dithaba tša ka. Ke tla rola setšhaba sa ka joko ya Baasiria le merwalo ye ba bego ba e rwele magetleng. Tšeo ke tše ke ikemišeditšego go di dira lefase, gomme letsogo la ka ke le emišeditše go otla ditšhaba.” Morena Ramaatlaohle o ikemišeditše go dira tšeo – ke mang yo a ka mo thibelago? O emišeditše letsogo la gagwe go otla – ke mang a ka le išago fase? Molaetša wo o ilego wa begwa ka ngwaga wo Kgoši Ahase a hwilego ka wona šo: Lena batho ka moka ba Filistia, patla yela le bego le bethwa ka yona e robegile, eupša le se ke la thaba. Noga e tswala mokopa bjalo ka ge semela se hloga modung, gomme leeng la wona go thwathwašwa mmamokebe. Morena e tla ba modiši wa badiididiidi gare ga setšhaba sa gagwe, gomme bahloki o tla dira gore ba dule ba bolokegile. Eupša lena Bafilista o tla le fediša ka tlala, gomme go ka se šale motho gare ga lena. Gololang le lle, lena metse ya Bafilista! Nolegang moko bohle! Lerole le tla le etšwa ka leboa – ke madira a a tlago ka lekoko. Na batseta ba go tšwa Filistia re tla ba botša eng? Re tla ba botša gore Morena o hlomile Sione, le gore bahlaki gare ga setšhaba sa gagwe ba tla tšhabela gona. Molaetša mabapi le Moaba šo: Motse wa Are le wa Kire e fedišwa bošego bo tee, ke setu fela nageng ya Moaba. Batho ba Dibone ba pharile mmoto go yo lla tempeleng ya bona. Bamoaba ba llela motse wa Nebo le wa Medeba. Bohle ba bootše meriri le maledu ka manyami. Ba apere diaparo tša go ilela mekgotheng; godimo ga ditlhaka tša dintlo le mapatlelong a motse batho ba a golola, ba lla gabohloko. Batho ba Heshbone le ba Elale ba ithwele megono, sello sa bona se kwagala le kua Jahatse. Le bahlabani ba a bokolela, ba a thothomela. Pelo ya ka e llela Moaba! Batho ba tšhabetše motseng wa Tsoare le go wa Eglathe-Shelishia. Bangwe ba tšama ba lla le morotoga wa Luhite; bangwe ba tšhabela Horonaime ba ntše ba kgitla sello. Nokana ya Nimrime e pšhele, bjang bja thoko ga yona bo ponne, le mabjanyana a mafsa a omeletše, ga go botalanyana bjo bo sa šetšego. Batho ba tshela Nokana ya Mepopoliri, ba tšhaba ba rwele dithoto tše ba di hlakodišitšego le tše ba bego ba ipoloketše tšona. Gohle mellwaneng ya Moaba ke sello fela, se kwagala le motseng wa Eglaime le go wa Beere-Elime. Motseng wa Dibone noka e re hwibii ka madi; le ge go le bjalo Modimo o sa tlilo o tlišetša mahlomola a mangwe. Mašaledi a Moaba a tla fedišwa bjalo ka phoofolo e roboketšwa ke tau. Bamoaba ba rometše mmuši wa Jerusalema seloba sa kwanyana ba le motseng wa Sela lešokeng. Ba kgobokana maribeng a nokana ya Arnone, ba ya kua le kua boka dinonyana tše di rakilwego ka sehlageng sa tšona. Ba re go batho ba Juda: “Re botšeng se re swanetšego go se dira. Re šireletšeng manabeng bjalo ka mohlare wa moriti wo mogolo mosegare wo monana. Re khutišeng, rena re šwalalanego; le se ke la re eka, rena batšhabi. Re dumeleleng go dula nageng ya lena, re šireletšeng go babolai ba rena.” Mogateledi ga a sa le gona, basenyi ba naga ba timeletše, ba tlogile nageng. Yo mongwe wa ditlogolo tša Dafida e tla ba kgoši ka kgaugelo ya Morena, gomme mmušo wa gagwe wa tia. O tla nyaka toka, a fišegela gore e be gona. Setšhaba sa Juda se re: “Re kwele ka boikgogomošo bja Bamoaba – ba ikgantšha kudu! Re kwele ka go kganya le go ipona ga bona, eupša tše ba ikgantšhago ka tšona ke maaka.” Bamoaba ba tla itelela. Bohle ba tla lla ge ba gopola diphaphathi tšela tša makwapi a diterebe tša motse wa Kire-Herese. Ka nnete ba tla welwa ke manyami. Mehlare ya dikenywa dirapeng tša Heshbone le merara ya Sibma e ponne; le beine ya gona ya go tuma e ušitše babuši ba ditšhaba. Merara yeo e be e fihla Jasere, mahlogedi a yona a nabela bohlabela lešokeng, a iketlile a tshela Lewatle le le Hwilego ka bodikela. Bjale ke llela merara ya Sibma go swana le ge ke llela Jasere. Ke tšhela lena Heshbone le Elale ka megokgo, ka gobane ga le sa na le puno ye e thabišago ba go pitla diterebe ka maoto. Lethabo le megobo di fedile mašemong ale a go nona; mašata le mekgolokwane ga di sa kwala dirapeng tša merara, bopitlelong ga go yo a pitlago diterebe ka maoto; Morena o fedišitše mekgolokwane ya bona. Ka gona ke llela Moaba le batho ba Kire-Herese go swana le motho ge a letša sefela sa poloko ka sekgapa. Bamoaba ba itapiša ka go ya dintotomeng le ka ditempeleng tša bona moo ba khunamelago medimo ya diswantšho, eupša seo se ka se ba hole selo. Ao ke mantšu a Morena a a boletšego pele mabapi le Moaba. Gomme bjale Morena o re: “Mo mengwageng ye meraro fela bogolo bja Moaba bo tla be bo nyatšega. Le ge bjale batho ba gona e le ba bantši, mašaledi a ka se be a makae, gomme le ona a ka se be le maatla.” Morena o re: “Damaskose e ka se sa ba motse; e tla fetoga marope. Metse ya Siria e tla tlogelelwa sa ruri. E tla ba phulo ya mehlape ya diruiwa, gomme ga go yo a tlago e raka. Israele e tla hloka boitšhireletšo, Damaskose le yona e ka se sa ipuša. Mašaledi a Basiria a tla goboga boka setšhaba sa Israele.” O realo, Morena Ramaatlaohle. Morena o re: “Mehleng yeo bogolo bja Israele bo tla fokola, gomme bodiidi bja ema bohumi legato. Israele e tla swana le tšhemo ye mabele a yona a thennwego, ya ba bjalo ka ge diako di bududitšwe molaleng wa Barafa. Mašaledi a setšhaba a ka se be nene – Israele e tla etša mohlware wo o hlothilwego dikenywa ka moka, gwa šala tše pedi goba tše tharo makaleng a ka godimodimo, goba tše e sego tše kae makaleng a gare. Ke realo, nna, Morena Modimo wa Israele.” Matšatšing ao batho ba tla lebelela Mmopi wa bona ba nyaka thušo, ba tla emišetša mahlo go Mokgethwa wa Israele. Ba ka se sa ikanya dialetare tše ba di agilego ka diatla, goba ba bota mediro ya diatla tša bona, e lego dikota tša borapedi, le dialetare tša go tšhumela diorelo. Mehleng yeo metse ya bona ye e ageleditšwego ka merako e tla tlogelwa ya ba marope bjalo ka metse yela Bahibe le Baamore ba go e tlogela ge ba tšhaba setšhaba sa Israele. Lena Baisraele le lebetše Modimo yo a le hlakodišitšego; yo a le šireleditšego bjalo ka leswika, ga se la ka la mo gopola. Ka gona le itemetše dirapa tša modimo o šele, la bjala le dibjalo gore le tle le o khunamele ka moo. Fela le ge dibjalo tšeo di be di ka mela tša gola le wona mosong wo di bjetšwego ka wona, le be le tla no se bune selo. Go tla ba fela le matshwenyego le mahloko a go se fele. Joo, ditšhabatšhaba di tsošitše modumo, modumo wo nkego ke wa lewatle; merafe e dira mogwaša, mogwaša wa maphoto a lewatle. Ditšhaba di tla bjalo ka maphoto a a pšhatlaganago, eupša Modimo o a di kgalemela tša tšhabela kgole, tša tšewa ke phefo bjalo ka mooko ge motho a fola mabele mmotong, goba matlakala ge a tšewa ke ledimo. Mantšiboa di a tšhoša, pele tšatši le hlaba ga di sa le gona. Ke tšona tše di tlago hlagela bao ba re hlakolago, ba re hulago. E lahlegile naga ya go phuphusela diphego ya ka mošola wa dinoka tša Etopia. Nageng yeo go tšwa batseta ka magopo a mahlaka, ba sepela ka noka ye kgolo ya Naele. Boelang ga gabolena, lena batseta ba lebelo! Gomelang nageng ya lena ye e arotšwego ke dinoka, setšhabeng sa lena se se tiilego sa diganka, bathong ba gabolena ba batelele ba letlalo le boreledi, setšhabeng se se boifšago kgole le kgauswi. Theeletšang, lena batho bohle ba lefase! Lena ba le agilego lefaseng! Mohla sefoka se hlomilwe godimo ga dithaba le se lebelele, le theeletšeng ge phalafala e lla. Gobane Morena o rile go nna: “Ke tla lebelela fase ke le legodimong, ke homotše boka phoka ge e ewa mašegong a a tutetšego a sehla sa go buna; ke iketlile boka letšatši le le hlabilego mme le ruthetše. Pele ga ge go fulwa diterebe ge matšoba ohle a hlohloregile, gomme diterebe di butšwa, manaba a tla fediša Baetopia gabonolo bjalo ka ge motho a kgotha morara ka mphaka. Ditopo tša bona di tla gafelwa manong le dibata. Manong a tla di ja selemo, dibata tša di ja marega.” Nako e etla yeo ka yona setšhaba se se tiilego sa diganka, sa batho ba batelele ba letlalo le boreledi, se se boifšago kgole le kgauswi, se se dulago mo nageng ye ya go arolwa ke dinoka, se tlago loba Morena Ramaatlaohle. Ba tla tla thabeng ya Sione moo Morena Ramaatlaohle a khunamelwago gona. Molaetša wa Morena mabapi le Egepeta šo: Morena o tla Egepeta a nametše leru la lebelo. Medimo ya diswantšho ya Egepeta e a tekateka ge a fihla, gomme batho ba Egepeta ba nolega moko. Morena o re: “Ke tla lweša Moegepeta le Moegepeta, motho le ngwanabo, motho le mongkayena. Motse o tla lwa le wo mongwe, mmušo wa lwa le mmušo. Ke tla gakantšha Baegepeta mererong ya bona, gomme ba nolega moko. Ba tla kgopela medimo ya bona ya diswantšho, le ba malopo, le dinoge, le didupe gore ba ba eletše. Baegepeta ke tla ba gafela go mmuši wa sehlogo, kgoši ye šoro, gore e ba buše. Ke realo, nna, Morena Ramaatlaohle.” Meetse a Naele a tla thoma go gopa go fihlela e pšhetše sa ruri. Mekero ya yona e tla nkga ge e gopa e epšha. Mahlakanoka le mehlahla di tla pona; dimela tša molomong wa Naele le dibjalo tša ka mathoko a noka yeo di tla omelela tša tšewa ke phefo. Bathei ba dihlapi ba tla lla – bohle ba ba phelago ka go tanya dihlapi ba tla ilela, ba ba tlwaetšego go lahlela malokwa ka meetseng ba tla bolawa ke tlala. Baohli ba tlhale ba tla lewa ke dihlong, le balogi ba gakanega, ba kwa bohloko; ba ba thwetšwego ba tla nyama. Ruri, baetapele ba motse wa Tsoane ke mašilo! Bahlale ba bagolo ba kgoši ya Egepeta ba mo eletša tša botlaela. A bjale le ka botša kgoši bjang gore bona ke ditlogolo tša banna ba bohlale le tša magoši a bogologolo? Wena kgoši ya Egepeta, dihlalefi tšela tša gago di kae? A di go botše se Morena Ramaatlaohle a ikemišeditšego go se dira naga ya Egepeta. Baetapele ba Tsoane ke ditlatla, ba Memfise ba tšwile tseleng. Dihlogo tšeo tša Baegepeta di arošitše setšhaba. Morena o dirile gore dikeletšo tša bona di gakantšhe kgoši. Ka gona Egepeta e dira tše di phošagetšego fela; e thedimoga bjalo ka setagwa ge se thedimoga mahlatšeng a sona. Ga go le o tee Egepeta, mohumi goba modiidi, mohlomphegi goba monyatšegi, yo a kago thuša naga yeo. Nako e etla yeo ka yona Baegepeta ba tlago boifa bjalo ka basadi; ba thothomela ba tšhogile ge ba bona Morena Ramaatlaohle a ba rethela matswele. Juda e tla ba setšhoša go Egepeta; nako le nako ge Baegepeta ba gopotšwa Juda ba tla thothomela ka baka la se Morena Ramaatlaohle a ikemišeditšego go ba dira sona. Mohla nako yeo e fihla, leleme la Seheberu le tla bolelwa metseng ye mehlano Egepeta. Batho ba fao ba tla ena ka leina la Morena Ramaatlaohle. Wo mongwe wa metse yeo o tla bitšwa “Motse wa Letšatši”. Ge nako yeo e fihla go tla ba le aletare ya Morena nageng ya Egepeta, le kokwane ya leswika ye e abetšwego yena mollwaneng wa naga yeo. E tla ba tšona dišupo tša go ba gona ga Morena Ramaatlaohle Egepeta. Ge batho ba fao ba gateletšwe gomme ba llela Morena gore a ba thuše, o tla ba romela mohlakodiši yo a tlago ba lwela a ba phološa. Morena o tla ikutolla setšhabeng sa Egepeta, gomme ke gona ba tlago mo tseba ba mo loba ka go mo tlišetša dihlabelo le dikabelo tša bupi. Ba tla mo enela gomme ba phetha dikeno tšeo. Morena o tla otla Baegepeta ka bolwetši, mme ka morago ga moo, ge ba sokologela go yena ba mo rapela, a ba kwa, a ba fodiša. Ge nako yeo e fihla go tla ba le tsela ye kgolo ye e tlogago Egepeta e eya Asiria. Batho ba dinaga tšeo ba tla etelana, gomme ditšhaba tšeo tše pedi tša rapela mmogo. Ka nako yeo Israele e tla gwerana le Egepeta le Asiria, mme kgwerano yeo ya ba lehlogonolo la lefase ka moka. Morena Ramaatlaohle o tla šegofatša ditšhaba tša dinaga tšeo a re: “Ke a go šegofatša, wena Egepeta, setšhaba sa ka, wena Asiria, setšhaba se ke se hlodilego, le wena Israele, setšhaba sa ka se ke se kgethilego.” Molaodi wa madira a Asiria o ile a hlasela motse wa Bafilista wa Ashdode, a laetšwe ke Sargone, kgoši ya Asiria, gomme a o fenya. Mengwageng ye meraro pele ga moo Morena o be a laetše Jesaya, morwa wa Amotse, gore a role dieta, a apole le seaparo sa go ilela se a bego a se apara. Yena a dira bjalo, gomme a sepela a hlobotše a sa rwale le dieta. Ya re ge Ashdode e thopilwe, Morena a re: “E šetše e le mengwaga ye meraro mohlanka wa ka, Jesaya, a sepela a se a rwala dieta. Se ke sešupo sa tše di tlago hlagela Egepeta le Etopia. Kgoši ya Asiria e tla gapa mathopša a dinaga tšeo e a hlobodišitše. Ba bagolo le ba bannyane ba tla sepela ba hlobotše, ba se ba rwala le dieta, le marago a bona a le kgakala, gomme ba goboša Egepeta. Bao ba bego ba botile Etopia ba bile ba ikgantšha ka Egepeta ba tla gakanega, ba lewa ke dihlong. Ge nako yeo e fihla batho ba ba dulago lebopong la Filistia ba tla re: ‘Bonang se se hlagetšego batho bale re bego re botile gore ba tla re šireletša go kgoši ya Asiria! A bjale rena re ka phologa bjang?’ ” Molaetša wa Morena mabapi le Babilone, lešoka la kgauswi le lewatle, šo: Masetlapelo a tla bjalo ka ledimo le le putlago lešoka, a etšwa nageng ye e boifegago. Ke bone pono ya tše šoro, pono ya go lahletšana le go senya. Lena madira a Elamo, hlaselang! Lena a Media, dikanetšang metse! Modimo o tla fediša metsetlo ye e tlišwago ke Babilone. Tše ke di bonego le gona ke di kwelego di ntlabile, di ntlholetše letšhogo le go kwa bohloko, bohloko bja go etša bja mosadi yo a šokwago. Ke gakanegile, ke thothomela ka letšhogo. Ka mehla ke be ke thabela ge leswiswana le swara, eupša lehono le ntlišeditše letšhogo. Moo ponong ke bona dijo di sotšwe, magogwa a adilwe gore go dulwe. Go a lewa, go a nwewa. Gateetee go kwagala taelo e re: “Balaodi ba madira, tlotšang dikotse ka makhura!” Ke moka Morena a re go nna: “Sepela o yo bea moleti, o mmotše a bege tše a di bonago. Ge a bona banna ba etla ka babedi ka babedi ba nametše dipere, le ba ba nametšego dipokolo le dikamela, a ba lebelele gabotsebotse.” Moleti o a goelela o re: “Morena, ka mehla ke dula ke letile mo, bošego le mosegare.” Šebao ba etla ge! Ba nametše dipere ba tla ka babedi ka babedi. Moleti o a bega o re: “O fentšwe, motse wa Babilone o fentšwe! Medingwana ya ona e pšhatlagantšwe.” Lena setšhaba sa ka sa Israele, le fotšwe la feferwa bjalo ka mabele, eupša tše ke di kwelego go Morena Ramaatlaohle, Modimo wa Israele, ke le begetše tšona. Molaetša wa Morena mabapi le Edomo šo: Go na le yo a mpitšago kua Edomo a re: “Hee, moleti, bošego bo tla feta neng? Mpotše gore go tla sa neng.” Nna ka mo fetola ka re: “Masa ona a etla, eupša bošego bo tla tla gape. Ge o nyaka go mpotšiša gape, o boe o tle o botšiše.” Molaetša wa Morena mabapi le Arabia šo: Lena basepedi ba Badedane, lena le lalago ka mehlašaneng le dikamela tša lena nageng ya Arabia, išetšang ba ba nyorilwego meetse. Le lena ba naga ya Tema, yelang batšhabi le dijo. Gobane ba tšhabile ditšhoša tše di hwanyolotšwego le mesebe ye e ngangilwego, le mathata a ntwa. Ya ba Morena o re go nna: “Mo ngwageng o tee fela bogolo bja Bakedara bo tla be bo fedišitšwe. Boramesebe ke bona bagale ba Kedara, eupša go tla šala ba se bakae fela. Ke realo, nna, Morena Modimo wa Israele.” Molaetša wa Morena mabapi le Moedi wa Pono šo: Na go diregang? Ke go reng batho bohle ba motse ba keteka godimo ga ditlhaka tša dintlo? Motse o tletše lešata, batho ba a goa ba thabile. Banna ba gabolena ba ba hwilego ntweng ye ga se ba bolawa ka lerumo goba ba hwa ba itwela. Baetapele ba lena ka moka ba ile ba tšhaba gomme ba thopša ntle le go thunywa ga mosebe. Batho ba gabolena ka moka bao ba ilego ba hwetšwa ba ile ba thopša, le ge ba be ba tšhabetše kgole. Bjale ge, lebelelang thoko, ke lle gabohloko; ke nyaka go llela batho ba gešo ka moka ba ba bolailwego. Le se ke la leka go nkhomotša. Ye ke mehla ya go tlalelwa le go fenywa le go gakanega Moeding wa Pono, gomme Mong wa bohle, Morena Ramaatlaohle, o re tlišeditše yona. Merako ya motse wa gaborena e kgerešitšwe, gomme bao ba llelago go thušwa ba kwagala dithabeng. Bahlabani ba go tšwa nageng ya Elamo ba tlile ba nametše dikoloi tša ntwa le dipere, ba itlhamile ka mesebe. Ba go tšwa nageng ya Kire ba be ba swere dikotse tša bona. Meedi ye e nonnego ya Juda e be e tletše dikoloi tša ntwa; bahlabani ba ba nametšego dipere ba eme pele ga dikgoro tša Jerusalema. Boitšhireletšo bja Juda bja pšhatlagana. Ge tšeo di diregile le ile la bota dibetša tše di bego di le ka Ngwakong wa sethokgwa sa Lebanone. Le gona la bona gore menga ya merako ya Jerusalema ke ye mentši. La lekola dintlo tša Jerusalema, gomme tše dingwe la di kgereša gore le hwetše maswika a go tsošološa merako ya motse. Le ile la aga letamo ka gare ga motse gore le tle le thibele meetse a a tšwago mogobeng wo motala. Fela Modimo yo a hlotšego dilo tše go tloga kgale, yo a di dirilego, la se mo ele hloko. *** *** Ka nako yeo Mong wa bohle, Morena Ramaatlaohle, o be a le bitša gore le lle le ilele ka go boola dihlogo le go apara diaparo tša go ilela. Eupša lena la thaba la ipshina, la hlaba dikgomo le dihuswane, la ja nama la nwa le beine, la re: “A re jeng, re nwe, ka gobane gosasa re tla be re hwile!” Morena Ramaatlaohle ka boyena o mpoditše a re: “Ba ka se tsoge ba lebaletšwe bobe bjo go fihlela ba ehwa. Ke realo, nna, Morena Ramaatlaohle, Mong wa bohle.” Mong wa bohle, Morena Ramaatlaohle, o mpoditše gore ke ye go Shebna, mookamedi wa tša mošate, ke mmotšiše ke re: “O gopola gore o mang wena? Na o re o dirang ge o ipetlela lebitla letlapeng mmotong? Mothwana tena, Morena o tla go swara a go phuthaganya, a go lahlela nageng ye e nabilego. O tla hwela gona kgauswi le dikoloyana tša ntwa tše o bego o ikgantšha ka tšona. O goboša lapa la mong wa gago. *** Morena o tla go kgorometša bookameding, a go tloša mošomong wa gago.” Morena a re go Shebna: “Ka nako yeo ke tla bitša Eliakime, mohlanka wa ka, morwa wa Hilkia. Ke tla mo apeša seaparo le lepanta la gago, ka mmea mookamedi legatong la gago. E tla ba motswadi bathong ba Jerusalema le ba Juda. Ke tla mo dira yo a hlatlamago kgoši, setlogolo sa Dafida, ka maemo. Ke yena a tlago dumelela motho go tsena mošate goba a mo ganetša. Ke tla mo tiiša maemong a gagwe bjalo ka sebapola se se kokotetšwego lebotong gabotse, gomme lapa labo la hlompšha ka yena. “Eupša ba lapa labo le meloko yabo ba tla mo imela. Ba tla ithekga ka yena bjalo ka dipitša le dibjana ge di lekelela sebapoleng se se kokotetšwego lebotong. Ka nako yeo sebapola sela sa go kokotelwa gabotse se tla nyefa, sa robega, sa wela fase, mme tšohle tše di bego di fegilwe go sona tša pšhatlagana.” O realo, Morena. Molaetša wa Morena mabapi le Tirose šo: Bokolelang, lena baotledi ba maselawatle a a lego gare ga lewatle! Motse wa gabolena wa Tirose o sentšwe; dintlo tša wona le boemakepe di pšhatlilwe. Le kwa ditaba tšeo ge le tšo boa Saeprose. Makalang, lena bagwebi ba motse wa Sidone, lena badudi ba naga ya lebopong ya Fenikia! Le be le tlišetša Sidone tšhelete ka go tshela lewatle la yo reka le rekiša mabele a Egepeta a go bunwa nokeng ya Naele, le ka go yo gweba le ditšhaba tše dingwe. Wena motse wa Sidone, lewa ke dihlong! Lewatle le motse wo mofsa wa Tirose di a belaela di re: “Ga se ra ka ra šokwa ra belega bana. Ga se ra ka ra godiša barwa le barwedi.” Le bona Baegepeta ba tla ba bohlokong kudu ge ba ekwa gore Tirose e pšhatlagantšwe. Bokolelang, lena batho ba Fenikia! Tshelang lewatle le tšhabele Tarshishe! Na e ka ba wo ke wona motse wola wa mekgolokwane wa Tirose, wa go agwa kgale? E ka ba ke motse wola wa go romela batho ba wona mošola wa lewatle go yo laola ditšhaba tša moo? Ke mang yo a logilego maano a go pšhatla motse wa Tirose, motse wo wa go buša dinaga tše ntši, woo bagwebi ba wona e bego e le dikgošana, bahlomphegi lefaseng? Morena Ramaatlaohle ke yena a logilego maano ao. O dirile seo gore a kokobetše baikgogomoši, le gore a goboše bahlomphegi bao. Sepelang le yo lema, lena batho ba Tarshishe, ka gobane ga le sa na le boemakepe. Morena o emišitše letsogo ka godimo ga lewatle, gomme o thothomediša mebušo. O laetše gore dibo tša Fenikia di thubje. Wena motse wa Sidone, o ka se sa thaba, gomme batho ba gago ba gateletšwe. Le ge ba ka tšhabela Saeprose, manaba a bona a tla no ba latelela gona. Ke Bababilonia, e sego Baasiria, bao ba ilego ba dikanetša motse wa Tirose, ba thuba dibo tša wona, ba fetoša motse marope, mme diphoofolo tša lešoka tša phela gona. Bokolelang, lena baotledi ba maselawatle a a lego gare ga lewatle! Motse wola wa lena wa go tia o pšhatlagantšwe. Nako e etla yeo ka yona Tirose e tlago lebalwa mengwaga ye masome a a šupago, e lego mengwaga ya go phela ga kgoši. Ge mengwaga yeo e fetile, Tirose e tla dira bjalo ka segwebakathobalo mo košeng ye e rego: Tšea sekgapa sa gago o sepele le motse, wena sefebe o lebetšwego! Letša gabotse, o opele kudu gore banna ba go bone gape. Ge mengwaga yeo ye masome a a šupago e fetile, Morena o tla šetša motse wa Tirose gape, mme wona wa boela wa gweba bjalo ka pele, wa dumelela mebušo yohle ya lefase go gweba le wona. Tšhelete yeo motse woo o e hwetšago ka mokgwa woo e tla fiwa Morena. E ka se bolokwe, eupša bao ba khunamelago Morena ba tla reka dijo ka bontši le diaparo tša botšhepi ka yona. Morena o tla senya tšohle lefaseng, a le tlogela le se ne selo. O tla hlakahlakanya lefase, gomme a phatlalatša batho. Bohle ba tla hlagelwa ke masetlapelo a a swanago – moprista le setšhaba, lekgoba le mong wa lona, moreki le morekiši, moadimi le moadingwa, mokolotiwa le mokoloti. Lefase le tla hulelwa sa ruri, la tlogelwa le se na le seloselo. Ka ge go boletše Morena, tšeo di tla direga. Lefase le omile, naga e sehlafetše. Lefase ka moka le galogile; legodimo le lefase di senyegile. Batho ba tšhilafaditše lefase ka go tshela melao ya Modimo le kgwerano yela ya go ya go ile. Ka gona Modimo o rogakile lefase, a le senya. Batho ba lona ba otlelwa tše ba di dirilego, ba a fokotšega mme ba ba šalago ga ba nene. Merara e a pona, gomme beine ga e sa hwetšwahwetšwa. Bohle ba ba bego ba dula ba thabile, bjale ba nyamile, gomme dikoša tšela tša lethabo le mekgolokwane, tša dikgapa le tša meropa, di fedile. Ge go nwewa ga go sa opelwa; batho ga ba sa ipshina ka bjala. Mekgotheng ya motse ga go sa le motho; motse o huduegile gomme batho ba itswaleletše ka dintlong gore go se ke gwa tsena motho. Lešata mekgotheng ke fela la batho ba ba nyakago beine. Lethabo le tlogile; nageng ga go sa ne boipshino. Motse ke marope, le kgoro ya wona e robagantšwe. Tšeo ke tše di tlago hlagela ditšhaba lefaseng ka moka. Go tla swana le mola mehlware e hlohlorwa dikenywa, le mola diterebe tše di bego di šetše, di fulwa. Mašaledi a tla hlaba mekgolokwane. Ba ka bodikela ba tla goa ka ga bogolo bja Morena, le ba ka bohlabatšatši ba mo hlompha. Batho ba ba dulago lebopong ba tla godiša Morena Modimo wa Israele. Re tla kwa dikoša tše di tšwago magomong a lefase di re: A go tumišwe Israele, šetšhaba se se lokilego! Eupša nnaena ke lahlegile! Ke a fela, ke a felela! Boradia bo sa tšwela pele, le bonokwane bo a gola. Lena batho bohle ba lefase, letšhogo le melete le melaba di le emetše! Yo a ka rego o a tšhaba ge a ekwa mokgoši wa yoo a tšhogilego, o tla wela ka moleteng; ge a ka tšwa ka moleteng, o tla tanywa ke molaba. Go tla na dipula tša matlorotloro, mme metheo ya lefase ya tekateka. Lefase lona le tla šikinyega kudu la pharoga. Le tla thekesela bjalo ka setagwa goba mohlahlana wo o tšewago ke ledimo. Lefase le imelwa ke dibe tša lona; le tla phuhlama gomme la se sa tsoga. Nako e etla yeo ka yona Morena a tlago otla barongwa ba babe godimo le magoši lefaseng. Modimo o tla kgoboketša magoši bjalo ka dibofša tše di tsentšwego ka moleteng. O tla ba hlahlela kgolegong yeo go fihlela ge ba tlile go otlwa ka morago ga nako ye telele. Ngwedi o ka se sa taga, le letšatši le tla fifala, ka gobane Morena Ramaatlaohle e tla be e le kgoši, a buša a le thabeng ya Sione, motseng wa Jerusalema, gomme baetapele ba setšhaba sa gagwe ba tla bona letago la gagwe. Morena, o Modimo wa ka; ke tla go godiša, ka go tumiša. O dirile dimakatšo; o botegile wa phetha merero ye o e rerilego kgale. O dirile metse mekgobo ya maswika, metse ye e ageleditšwego ka merako wa e fetoša marope. O pšhatlagantše mešate ya manaba a rena, mme e ka se tsoge e tsošološitšwe. Ditšhaba tše maatla di tla go hlompha; o tla boifša metseng ya ditšhaba tše sehlogo. O bile sebo sa badiidi le bahloki matshwenyegong a bona. O ba šireleditše madimong, wa ba moriti wa bona tšatšing la go fiša. Banna ba sehlogo ba hlasela bjalo ka pula ya ledimo ya marega, bjalo ka phišo nageng ye e omilego. Eupša wena, Morena, o homotša mašata a manaba a rena, le dikoša tša banna ba sehlogo, bjalo ka leru ge le timola phišo ya letšatši. Morena Ramaatlaohle o tla direla ditšhaba tšohle tša lefase monyanya mo thabeng ye ya Sione, monyanya wa dijo tše bosebose le beine ye bogale. Gona mo o tla fediša manyami ao a bego a aparetše ditšhaba tšohle. Morena, Mong wa bohle, o tla fedišetša lehu sa ruri! O tla phumola meokgo mahlong a bohle, gomme a tloša go goboga ga setšhaba sa gagwe lefaseng ka moka. O realo, Morena. Mehleng yeo batho ba tla re: “Yo ke Modimo wa rena! Re be re botile yena gore a re phološe. Ke yena Morena! Re be re mmotile, gomme bjale a re iketleng, re thabeng, ka gobane o re phološitše.” Morena o tla šireletša thaba ye ya Sione, eupša batho ba Moaba bona ba tla gatakwa bjalo ka mooko ge o gatakelwa bolokong ka moleteng. Ba tla leka go tšwa ka moo bolokong ka go akga matsogo bjalo ka motho yo a tuntelago, eupša Modimo o tla ba gatelela fase le ge ba akga matsogo ka mokgwa woo. O tla thubaganya metse ya Moaba ye e ageleditšwego ka merako ye e phagamego, a e pšhatlaganya. Nako e etla yeo ka yona nageng ya Juda go tlago opelwa kopelo ye: Motse wa rena o tiile! Modimo o re šireletša ka merako le dibo tša wona! Bulang dikgoro tša motse gore setšhaba se se lokilego se tsene, setšhaba se se botegelago Modimo. Yo a sa tekatekego maikemišetšong a gagwe, wena, Morena, o mo phediša ka khutšo ya mmakgonthe, ka ge a botile wena. Botang Morena go ya go ile, ka mehla ke yena Mošireletši wa lena. O kokobeditše baikgogomoši; a thubaganya motse wo go wona go sa fihlwego, a o pšhatlaganya ya ba molala. Bale ba bego ba gateletšwe, ba a o gatakela, badiidi ba sepela godimo ga wona. Tsela ya baloki e lekanetše; wena, Morena, o ba lekalekanyetša tselana. Re dira tše o re laetšego tšona, re itshephile wena; re nyaka wena kudu, re hlologetše go go rapela. Bošego ke lala ke go gopotše, mosong ke tsoga ke go hlolosetše. Mohla o ahlola lefase le batho ba lona, bohle ba tla ithuta se toka e lego sona. Le ge o loketše batho ba babe, bona ga ba ithute go dira tše di lokilego. Ešita le mo nageng ya ba ba lokilego, bona ba sa dira tše di tšwilego tseleng, ba gana go dumela gore wena o yo mogolo. Manaba a gago ga a tsebe ge o tla a otla. A ba bone ka moo o ratago setšhaba sa gago, gomme ba lewe ke dihlong. Ba tšhume ka mollo. Wena, Morena, o tla re atla; tšohle tše re di kgonnego re di kgontšhitšwe ke wena. Morena Modimo wa rena, re kile ra bušwa ke bangwe, eupša re reta wena fela o le Morena wa rena. Bjale ba hwile, mme ba ka se sa phela; ba ka se sa tsoga bahung, gobane o ba otlile wa ba fediša. Ba ka se sa gopolwa ke motho. Morena, o atišitše setšhaba sa gaborena kudu, wa oketša naga ya sona ka mathoko ohle. Ka ge o dirile bjalo o a retwa. O otlile setšhaba sa gago, Morena, gomme sona sa go rapela se le mahlokong. Ge re be re le pele ga gago, re be re lla bjalo ka moimana yo a inyokanyokago ge a swerwe ke lešoko la pelego. Re be re šokwa re ekwa bohloko, eupša ra se belege selo. Naga ya rena ga se ra e hlakodiša; ga se ra fenya manaba a rena, manaba a a tšwago dinageng di šele. Bahu ba gaborena ba tla buša ba phela! Ditopo tša bona di tla tsoga. Lena le ithobaletšego mabitleng, tsogang le goeng ka lethabo. Bjalo ka ge phoka ya gago ya mosong, Morena, e nošetša naga, le wena o tla tsoša ba ba hwilego kgale. Lena, setšhaba sa ka, tsenang ka diphapošing tša lena, le tswaleleng mejako, le iphihleng sebakanyana go fihlela Modimo a se sa galefile. Bonang, Morena o tla a etšwa bodulong bja gagwe, o tlilo otla batho ba lefase ka ge ba dira dibe. Ba ba bolailwego sephiring ba tla utollwa, lefase le ka se sa khupetša ba ba bolaetšwego go lona. Mohlang woo Morena o tla hlaba Lebiathane, mmamogašwa wa lebelo wa go tshophagana, ka tšhoša ya gagwe ye šoro, ye e tiilego ye kgolo; a bolaya wona mmamokebe wa lewatle. Ka letšatši leo le opele le re Morena o tla bolela mabapi le serapa sa gagwe se sebotse sa merara a re: “Ke nna mohlokomedi wa sona, ke dula ke se nošetša. Ke se leta bošego le mosegare gore go se be le yo a se senyago. Ga ke sa galefetše serapa sa ka. Ge nkabe se na le mehlašana ya meetlwa le mabjang, nkabe ke di epa ka di tšhuma lorelore. Fela ge eba manaba a setšhaba sa ka a nyaka gore ke a šireletše, gona a ba kwane le nna. Ee, a ba kwane le nna.” Ka moso Baisraele ba tla melela sa ruri nageng ya bona, ditlogolo tša Jakobo di tla atlega, gomme lefase ka moka la holega. Kgane Morena o kile a otla Baisraele bjalo ka ge a otlile baotli ba bona? Goba bona ba kile ba bolawa ka bontši boka babolai ba bona? Morena o otlile setšhaba sa gagwe gannyane ka go se iša bothopša. A ba tšeiša ledimo le lešoro la bohlabela. Eupša Baisraele ba tla swarelwa dibe fela ge ba ka šilaganya maswika a dialetare tša medimo ya diswantšho, a ba bjalo ka motaga wo o šitšwego, gwa se sa ba le dialetare tša diorelo, goba dikota tša borapedi. Motse wola o bego o tiile, bjale o tlogetšwe o nnoši; ga o sa na le batho, o bjalo ka lešoka. O fetogile phulo ya dikgomo, felo mo di robalago gona ge di kgothile mehlašana. Makala a mehlare a a omelela a robega, mme basadi ba a tla ba a rwalela dikgong. Ka ge setšhaba sa Israele se sa kwešiše, Modimo, Mohlodi wa sona, a ka se se šokele, Mmopi wa sona, a ka se se gaugele. Mohlang woo Morena o tla kgoboketša setšhaba sa gagwe ka o tee ka o tee, go tloga Yufratese go yo fihla mollwaneng wa Egepeta, bjalo ka motho ge a hlokola mabele. Ka letšatši leo go tla letšwa phalafala ye kgolo, gwa bitšwa Baisraele ka moka ba ba išitšwego bothopša Asiria le Egepeta. Ba tla tla ba khunamela Morena thabeng ya gagwe ye kgethwa, Jerusalema. Jonna, baetapele ba Israele ba go ikgogomoša ba ditagwa, ba ba aperego mefapahlogo ya matšoba! Beine e ba rapaladitše fase. Seriti sa Samaria, motse wola wo mobotse wo o ukametšego moedi wo o nonnego, se tloga bjalo ka matšoba a mefapahlogo yela ge a pona. Morena o na le molaolamadira yo mogolo wa maatla yo a tlago hlasela batho ba Mmušo wa ka Leboa. Yena o tla tla bjalo ka sefako se se senyago, bjalo ka pula ya matlorotloro, boka lefula le maatla le le gogolago, mme a ba wela godimo a ba fenya. O tla kokobetša baetapele bao ba go ikgogomoša ba ditagwa. Seriti sela se tlogago sa motse wa go ikgantšha wa Samaria se tla fela bjalo ka mago a dithakangwaga a a lewago ka pela ge a seno fulwa. Mehleng yeo Morena Ramaatlaohle o tla ba bjalo ka mphapahlogo wo mobotse wa matšoba wo o aperwego ke mašaledi a setšhaba sa gagwe. Baahlodi o tla ba dira gore ba ahlole ka toka, bahlabani a ba fa bogale bja go gomišetša manaba kgorong ya motse. Baprista le baprofeta le bona ba thekesedišwa ke botagwa. Ba nwa beine ye ntši le bjala mo e lego gore ba tlaruma ba gakanegile. Baprofeta ba tagwa kudu mme ba šitwa ke go kwešiša dipono tše di tšwago go Modimo, le baprista ba tagwa mo e lego gore ba palelwa ke go ahlola melato. Bonwelo bja bona bo tletše mahlatša, ga go na le moo go hlwekilego. Ba a nnyatša ba re: “Monnana yo o re a ka ruta bomang? Ke bomang ba ba nyakago go kwa taba tša gagwe? Di loketše fela masea a a sa tšogo tshwešwa letswele, a a sa nkgago mekgato. O leka go re kgala ka go re šupetša mantšu ka le tee ka le tee, le lefoko le lengwe le le lengwe, le melao ka o tee ka o tee.” Ge le sa ntheeletše, Modimo o tla le otla ka batho ba naga ye nngwe ba go bolela leleme le šele. O boletše le lena a re: “Le khutšeng, le phomoleng nageng ya lena, mme ba ba lapilego le bona le ba khutšišeng.” Eupša lena la gana go mo theeletša. Ke ka baka leo Morena a tlago le ruta mantšu ka le tee ka le tee, le lefoko le lengwe le le lengwe, le melao ka o tee ka o tee. Ke moo le tlago re ge le sepela la wa ka sa morago, la gobala, la tanywa, la thopša. Bjale ge, lena bannana ba go ikgodiša, lena le bušago setšhaba se mo Jerusalema, theeletšang se Morena a se bolelago. Le itheta ka go re le lakane le lehu, le kwane le bodulabahu, le gore ge manaba a etla bjalo ka lefula le le gaketšego, lena a ka se le hlasele ka gobane le tla phološwa ke maaka le boradia bja lena. Bjale ge, Morena, Mong wa bohle, o re: “Ke thea motheo wa go tia Sione. Sekhutlong sa wona ke tsenya leswika le lethata. Ka gona yo a dumelago go Morena a ka se boife selo. Toka e tla ba yona thapo ya go ela botelele bja motheo, gomme boloki ya ba thapo ya go aga go ya godimo.” Sefako se tla gogola maaka a le bego le itšhireletša ka ona, mme mafula a khupetša botšhabelo bjola bja lena. Go lakana le lehu mola ga lena go tla fedišwa, le kwano ya lena le bodulabahu e ka se swarelele. Ge manaba a etla a tla le gataka. Nako le nako ge a feta a tla le hlasela. Seo se tla direga mosong wo mongwe le wo mongwe, le bošego le mosegare. Se sengwe le se sengwe se le se kwago go baprofeta se tla le tšhoša. Le tla etša monna yo a ka lekago go robala malaong a seripana, a se kgone go naba, a apere lepai le lennyane la go mo hlaela. Morena o tla lwa bjalo ka mola a elwa thabeng ya Peratsime le moeding wa Gibeone, gore a tle a dire se a nyakago go se dira, le ge se bonala se tlaba. O tla phetha modiro wa gagwe, le ge o sa kwešišege. Le se sege ge ke le botša taba tše! Ge le ka sega go phonyokga go tla le thatafalela. Morena Ramaatlaohle o mpoditše gore o ikemišeditše go fediša lefase ka moka. Theeletšang se ke se bolelago; elang hloko se ke le botšago sona. Kgane molemi o lema mašemo a gagwe a a lokišetša go bjala goba a a hlagola go ya go ile? Ga ke re ge a lekaneditše mobu o bjala peu ya lenonya le ya mphogo, o rothetša peu ya korong le ya garase, gomme ka mathoko ga tšhemo a bjala mabele? O kgona modiro woo wa gagwe, gobane o o rutilwe ke Modimo. Ga a fole lenonya ka selei, goba mphogo ka go o gatiša koloi, eupša lenonya o le fola ka patla, mphogo ka morogo. Ga a pšhatle mabele ka go a fola go ya go ile. Le ge a a gatiša koloi le dipere, ga a pšhatle dithoro tša ona. Go fola ka mokgwa woo le gona molemi o go rutilwe ke Morena Ramaatlaohle. Maano a Modimo ke a a makatšago, a phethega gabotsebotse. Jonna, Jerusalema, sebešo sa Modimo, motse wo Dafida a bego a hlomile mešaša go wona! Mengwaga a e tle ka go latelana ga yona, le menyanya ya yona ya ngwaga ka ngwaga e tle bjalo, eupša ka morago Modimo o tla tliša mathata motseng wo o bitšwago “Sebešo sa Modimo”. Go tla ba le dillo le mahloko, gomme motse ka moka o tla swana le sebešo se mollo o laumago go sona. Modimo o tla dira gore manaba a hlome mešaša go o dikologa, a o dikanetše, a age ditora tša go o hlasela. Jerusalema e tla swana le moya wa mohu yo a bolelago ka go bobola ka fase ga mobu, a sebaseba a le ka mobung. Jerusalema, manaba a gago ka bontši a a tšwago dinageng di šele a tla budulwa bjalo ka lerole, gomme madira a bona a sehlogo a tšewa ke phefo bjalo ka mooko. Ka pelapela Morena Ramaatlaohle o tla le hlakodiša ka medumo ye e šiišago le ditšhišinyego tša lefase, le ka madimo le ka mollo wo o laumago. Ke moo madira ohle a a hlaselago motse wa Jerusalema, sebešo sa Modimo, a o tsenyago mathateng, le dibolai tša bona le ditora tša tlhaselo di tla timelelago bjalo ka toro, bjalo ka pono ya bošego. Ditšhaba tšohle tše di lwago le Jerusalema di tla etša motho yo a bolawago ke tlala, yo a lorago a eja, gomme a tsoge a sa swerwe ke tlala, goba tša swana le motho yo a nyorilwego, yo a lorago a enwa meetse, gomme a tsoge a sa swerwe ke lenyora. Lebelelanang le gakanegile! Iphoufatšeng le dule le foufetše! Tagwang le se la nwa beine! Thekeselang le se la nwa bjala! Morena o le potumišitše la swarwa ke boroko kudu. Modimo o khupeditše baprofeta mahlo, bona e lego mahlo a lena; o pipile baboni dihlogo, bona e lego dihlogo tša lena. Se pono ye nngwe le ye nngwe ya baprofeta e se šupago le ka se se tsebe; e tla swana le lengwalo le le tswaletšego. Ge motho a ka le fa yo mongwe yo a kgonago go bala, a re a mmalele lona, o tla re a ka se kgone ka gobane le tswaletšwe. Ge a ka le fa motho yo a sa kgonego go bala a re a mmalele lona, o tla re yena ga a kgone go bala. Morena o rile: “Setšhaba se se re se a nthapela, eupša e no ba ka molomo fela – dipelo tša bona di kgole le nna. Sedumedi sa bona ke melawana ya batho ye ba e tsebago ka hlogo. Ka gona ke tla boeletša ka ba otla leboelela ka tše ba sa di kwešišego. Ba bohlale ba tla lahlegelwa ke bohlale bja bona, ba kwešišo ba se sa kwešiša selo.” Ba lahlegile bao ba lekago go khutišetša Morena maano a bona gore a se ke a a tseba! Tše ba di dirago ba di dira sephiring, gomme ba gopola gore ga go yo a ba bonago goba a tsebago se ba se dirago. Ka mehla ba phethola dilo mo nkego letsopa le ka re ke lona mmopi. Na pitša e ka re go mmopi wa yona: “Ga se wa mpopa”? Kgane se se bopilwego sona se ka re go modiri wa sona: “Ga o tsebe se o se dirago”? Kgauswinyana sethokgwa sa Lebanone se tla fetoga tšhemo ye e nonnego, gomme tšhemo ye e nonnego ya ba selo se se tlwaelegilego go no swana le sethokgwa. Ge letšatši leo le fihla ditholo di tla kgona go kwa ge di balelwa puku, le difofu tše go tšona e bego e le leswiswi le boso fela di tla bona. Baikokobetši ba tla buša ba thaba ba reta Morena, mme badiidi ba tumiša Modimo yo mokgethwa wa Israele. Bagateledi ba tla fedišwa, mme ba ba nyefolago Modimo, le badiradibe ka moka ba bolawa. Modimo o tla fediša ba ba pharago ba bangwe ka maaka, ba ba dirago gore ba ba nego molato ba se ke ba otlwa, le ba ba bolelago maaka gore ba ba se nego molato ba se ahlolwe ka toka. Bjale ge, Morena yo a ntšhitšego Abrahama nageng ya gabo o re go ditlogolo tša Jakobo: “Lena setšhaba sa ka, le ka se sa lewa ke dihlong la galoga difahlego. Ge le bona bana ba ke tlago le fa bona, le tla nkgodiša nna, Modimo yo mokgethwa wa Israele, mme la mpoifa. Ba ba tlogetšego Modimo ba tla ithuta go kwešiša, gomme ba ba ngongoregago ba tla rutwa ba kwešiša.” Morena o boletše a re: “Ba ba bušago Juda ba lahlegile, ka gobane ba itshwere bjalo ka bana ba ba tsogelago motswadi maatla. Ba phetha maano a bona ba se ba kwana le nna, le gona ba dira kwano le dinaga tše dingwe nna ke sa rate. Ka fao ba pharelela sebe godimo ga se sengwe. Ba theogela Egepeta go yo nyaka thušo ba se ba nkgopela gore ke ba eletše. Ba nyaka gore Egepeta e ba šireletše, le gore kgoši ya Egepeta e be botšhabelo bja bona. Eupša ka morago ba tla lewa ke dihlong tša ge ba ile ba tšhabela go yena, mme ba goboga ka ge ba ile ba re Egepeta e ba šireletše. Le ge batseta ba bona ba šetše ba fihlile Egepeta motseng wa Tsoane le wa Hanese, batho ba Juda ba tla lewa ke dihlong ba goboga ka ge ba botile setšhaba se se sa ba holego goba sa ba thuša ka selo.” Modimo o bolela mabapi le diphoofolo tša lešoka la ka borwa o re: “Batseta ba sepela nageng ye e boifišago, moo go nago le ditau le mekopa le bommamokebe. Ba išetša setšhaba se se sa ba holego ka selo dimpho tše bohlokwa ka dipokolo le dikamela tša bona. Tše Egepeta e ba thušago ka tšona ga se selo le gatee. Ka gona ke e theile leina la Mabogolaadutše.” Modimo o mpoditše gore ke ngwale ditiro tše mpe tša setšhaba letlapeng ke na le bona, gore e tle e be bohlatse ka moso go ya go ile, ka gobane ke setšhaba sa melala ye methata, sa go bolela maaka, sa go gana go phetha melao ya Morena. Ba botša baboni ba re ba se ke ba bona dipono. Go baprofeta ba re: “Le se ke la re ruta gore tše di lokilego ke eng. Re botšeng tše di re kgahlago; le se ke la re botša melaetša ya mmannete ya Modimo. Se re emeng pele, tlogang! Ga re nyake go kwa selo ka Modimo yoo wa lena yo mokgethwa wa Israele.” Eupša yena Modimo yo mokgethwa wa Israele o re: “Tše ke le botšago tšona le a di gana, gomme le botile kgatelelo le boradia, le di tshephile. Le ne molato. Le etša leboto le le ilego godimo, le le pharogilego mme le sekametšego ka ntle le nyaka go wa; gateetee le tla wa. Le tla pšhatlagana bjalo ka pitša gwa ba gwa se šale le lengetana la go tšea magala sebešong, goba la go ga meetse ka sedibeng.” Morena, Mong wa bohle, Modimo yo mokgethwa wa Israele, o botša setšhaba o re: “Ge le ka boela go nna gomme la ntshepha le ikhomoletše, le tla phološwa la tia.” Eupša lena le a gana. Le re le ka tšhabela manaba a lena ka dipere. Ka gona le tla rakedišwa. Le gopola gore le tla namela dipere tša lebelo, eupša tša ba ba le hlomerego e tla ba tša lebelo go di feta. Ba sekete ba lena ba tla tšhaba ge mohlabani o tee wa manaba a ba batamela, gomme bahlabani ba bahlano ba tla le tšhabiša. Go madira a lena go ka se šale motho; go tla šala fela sefoka godimo ga mmoto, goba kotana ya sefoka godimo ga thaba. Le ge go le bjalo, Morena o letetše go tlo le gaugela. O itokišeditše go le šokela, ka gobane ka mehla o dira tše di lokilego. Ba lehlogonolo ke ba ba botilego yena! Lena setšhaba seo Modimo wa sona a dulago Sione, lena le agilego Jerusalema, le ka se sa lla. Ruri, Morena o tla le šokela ge le mo llela; ge a le kwa o tla le araba. Morena o tla le sepetša mathateng, eupša yena ka sebele o tla le ruta, a ka se sa iphihla, mme le tla mmona ka mahlo a lena. Ge le phamoga tsela le eya ka thoko efe le efe, le tla kwa lentšu ka morago ga lena le re: “Tsela ke ye. Tšeang ka yona.” Le tla tšhilafatša diswantšhobetlwa le diswantšhobopša tša lena tša tshipi ka go di golla gauta le silibera ye di ritetšwego ka yona. Le tla e šila, la e lahla bjalo ka matšhila la re: “Ga ke sa le nyaka!” Ge le bjetše dipeu Morena o tla le nešetša pula, gomme tše le di bunago e tla ba tše dintši tše di nonnego, le diruiwa tša lena di tla ba le phulo ye ntši. Dipholo le dipokolo tše le lemago ka tšona di tla fiwa mabele a a feferilwego mme a tšhetšwego letswai. Mohla dibo tša manaba a lena di thopšago mme bahlabani ba ona ka moka ba bolawago, dithabeng le mebotong ka moka go tla ba le meela ya meetse. Ngwedi o tla taga bjalo ka letšatši, gomme letšatši le tla taga gašupa go feta mehleng, la swana le seetša sa matšatši a a šupago. Tše ka moka di tla direga ge Morena a bofa dintho tše a di ntšhitšego setšhaba sa gagwe gomme a di alafa. Letago la Morena le bonala le etla le sa le kgole. Mollo le maru a maso di šupa gore o galefile. O bolela a befetšwe kudu, gomme mantšu a gagwe a tšhuma bjalo ka mollo. O romela phefo ya go senya bjalo ka noka ye e falalago e gomago batho ka megolo. Phefo yeo e tšea ditšhaba bjalo ka mooko ka leselong. Morena o kgoka ditšhaba ka thapo melaleng a di timetša. Eupša lena, setšhaba sa Modimo, le tla opela go swana le bošegong bja monyanya wo mokgethwa. Le tla ipshina bjalo ka ba ba yago Tempeleng ya Morena, setšhabelo sa Israele, gotee le ba ba letšago dinaka. Morena o tla kwagatša lentšu la gagwe la bogoši, a ba a bonagatša ka moo a fedišago manaba a gagwe ka gona a galefile. Go tla ba le mollo wo o laumago le dipula tša matlorotloro le tša ditladi le difako. Baasiria ba tla tšhoga kudu ge ba ekwa lentšu la Morena, le ge a ba otla. Ge Morena a ba otla leboelela, setšhaba sa gagwe sona se tla letša meropa le dikgapa. Modimo o tla lwa le Baasiria a ba fediša taa. Ke kgale felo mo go tlago gotšwa mollo wo mogolo gwa tšhumelwa kgoši ya Asiria go lokišitšwe. Ke molete wo o išago, wa go ahlama, gomme mollo o goditšwe ka dikgong tše dintši. Morena o goteditše dikgong tšeo ka moya wa gagwe wo o tukago mollo. Ba lahlegile ba ba yago Egepeta go nyaka thušo! Ba botile maatla a Egepeta – dipere, dikoloi tše dintši tša ntwa, le banamedi ba dipere ba bantšintši. Ga se ba bota Morena, Modimo yo mokgethwa wa Israele, goba ba nyaka thušo go yena. Le ge go le bjalo yena o tseba se a se dirago! O tliša masetlapelo. O phetha se a ikemišeditšego sona, a otla bakgopo le bathuši ba bona. Baegepeta ga se medimo – ke batho ba nama. Dipere tša bona ke dipere bjalo ka tše dingwe – ga se meoya. Ge Morena a emiša letsogo gore a otle, setšhaba sa Egepeta se se thekgilego sa Israele se tla thetšwa, gomme sa Israele sa wa, tša fedišwa mmogo. Morena o mpoditše a re: “Bjalo ka ge tau e bopa ge e swere phoofolo ye e e bolailego, e sa tšhabe mašata le mekgoši ya badiša ba bantši, le nna, Morena Ramaatlaohle, ga go se se tlago nthibela gore ke theoge ke tle ke šireletše thaba ya ka ya Sione. Bjalo ka ge nonyana e fofafofa go dikologa sehlaga sa yona, le nna, Morena Ramaatlaohle, ke tla šireletša Jerusalema ka e lwela, ka e phološa.” Morena o rile: “Lena setšhaba sa Israele, le ntsogetše maatla kudu, fela bjale boelang go nna! Nako e etla yeo ka yona yo mongwe le yo mongwe wa lena a tlago lahla medimo ye e mo dirišago dibe ye a e dirilego ka silibera le gauta. Asiria e tla thopša ka ntwa, fela e sego ya batho – ke Modimo yo a tlago e hlasela. Baasiria ba tla tšhaba ntweng gomme masogana a bona a thopša a dirwa makgoba. Kgoši ya bona e tla tšhaba e tšhogile kudu, bakgomana ba tla tšhoga ba ba ba tlogela difoka tša bona.” O realo Morena yo mollo wa gagwe wa dihlabelo o tukago thabeng ya Sione, motseng wa Jerusalema. Ka moso go tla buša kgoši ya toka, le bakgomana ba go buša ka molao. Mongwe le mongwe wa bona o tla etša boširelo phefong le botšhabelo dipuleng tša magadima. Ba tla ba bjalo ka dinokana nageng ye e omilego, bjalo ka moriti wa letlapa le legolo leganateng. Batho ba tla bona mediro ya Modimo, ba kwešiša le melaetša ya gagwe. Ba ba welago dilo godimo ba tla thoma go nagana gabotse pele ba di dira. Ba ba sa kgonego go itlhaloša gabotse, ba tla kgona go bolela ba kwešišega. Setlaela se ka se sa sengwa mohlomphegi, goba moradia a tšewa gore ke motho wa maemo. Lešilo le bolela tša bošilo gomme le nagana go dira tše mpe, mme la di dira. Le bolela tše di selekago Morena. Ga le ke le efa ba ba swerwego ke tlala dijo, goba ba ba nyorilwego meetse. Sehwirihwiri se šoma ka mathaithai; se loga maano a go tsenya bahloki mathateng ka maaka, le ge ba le tshekong. Mothomotho yena o nagana merero ye mebotse fela, gomme o emela tše di lokilego. Lena basadi le phelago bophelo bja go se šetše bja go hloka mathata, theeletšang se ke se bolelago! Išago ka nako tše le tla be le gakanegile, ka gobane go tla be go se diterebe goba dikenywa tše dingwe tše le ka di fulago. Le be le phela bophelo bja go se šetše bja go hloka mathata, eupša bjale thothomelang le tetemele ka poifo! Hlobolang le apareng diaparo tša go ilela. Itshetleng dihuba le llele mašemo a a nonnego le merara ye e enywago, ka gobane naga ya setšhaba sa gešo e mela mehlašana ya meetlwa le ditshehlo. Llelang malapa ka moka mo batho ba bego ba dula ba thabile, le motse wo o bego o tlala mekgolokwane. Ešita le lapa la mošate le šetše le tlogetšwe, mme motse wo o bego o na le batho ba bantši ga o sa na le motho. Le seripa sa motse se se bego se bitšwa Ofele le tora ya tlhapetšo ya moo e tla ba marope go ya go ile. Dipitsi di tabogataboga moo, le diruiwa di fula gona. Go tla ba bjalo go fihlela Modimo a re tšhollela moya wa gagwe. Lešoka le tla fetoga tšhemo ye e nonnego, gomme tšhemo ye e nonnego ya ba selo se se tlwaelegilego go no swana le sethokgwa. Nageng ka moka go tla ahlolwa ka nnete le ka toka. Ka ge mang le mang a tla dira tše di lokilego, go tla ba le khutšo le phomolo le polokego go ya go ile. Setšhaba sa Modimo se tla dula nageng ye e letšego, gomme magae a tla bolokega a iketla. Eupša sefako se tla hlohlora dithokgwa, le motse wa thubega. Mehleng yeo batho ba tla thaba kudu ge ba na le meetse a mantši a dibjalo, ba fudiša dikgomo le dipokolo tša bona mo ba ratago. Manaba a rena a lahlegile! Ba be ba senyetša batho, etšwe bona ba sa senyetšwe; ba eka, le ge bona ba sa ekwe. Eupša nako ya bona ya go senya le go eka e tla feta, gomme e tla ba bona ba senyetšwago gape ba ekwago. Morena, re gaugele, re tshephile wena. O re šireletše tšatši le lengwe le le lengwe, gomme ge re le mathateng o re hlakodiše. Ge o re lwela ditšhaba di tšhaba mašata a ntwa, tša gašana. Dithoto tša bona di a thopša tša gogolwa bjalo ka tšie. Di kgeregelwa bjalo ka segongwane ge se kgeregela mabele. Morena o phagame, gobane o dula kua godimo. O tla aparetša Jerusalema ka toka le tshwanelo, a ba a tlišetša setšhaba boiketlo. Ka mehla o šireletša setšhaba sa gagwe gomme o se fa bohlale le tsebo. Se bohlokwa mo go bona ke go boifa Morena. Ekwang bagale ba lla ka ntle ga mešaša ya manaba ba kgopela thušo! Batseta bale ba go yo phophotha ba lla gabohloko. Ditselakgolo di wetše kgwahlana, ga di ne basepedi. Dikwano di a hlanamelwa, gomme dihlatse tše di bego di le gona di a nyatšwa. Ga go na le yo a hlompšhago. Naga e tlogetšwe, mašemo a letše. Dithokgwa tša Lebanone di a pona, moedi wo o nonnego wa Sharone nke ke lešoka, gomme Bashane le thabeng ya Karmele mehlare e hlohlorega matlakala. Morena o botša ditšhaba o re: “Bjale ke tla thoma go otla. Ke tla le bontšha gore ke tiile bjang. Le loga maano a lefeela, gommme tšohle tše le di dirago ga di ne mohola. Le ikgogolela magala hlogong. Le tla foforega bjalo ka maswika a a fišitšwego go dira motaga, la ba bjalo ka mehlašana ya meetlwa ye e remilwego ya tšhungwa thokgethokge. Lena ba kgole, ekwang tše ke di dirilego; le lena ba kgauswi, dumelang gore ke nna yo maatla.” Badiradibe ba Sione ba ba hlanametšego Morena ba thothomela ka letšhogo. Ba re: “Kahlolo ya Modimo e swana le mollo wo o tukago go ya go ile. Ke mang mo gare ga rena yo a ka phonyokgago mollo wo mobjalo?” Go ka phonyokga mmoledi le modiri wa tše di lokilego, wa go gana go putsetšwa go tšhošetša batho, moilatsogolekobong, moithibaditsebe gore a se šomišane le babolai, moponyamahlo ka ge a sa kgahlwe ke tše mpe. Yo mobjalo o tla lotega, a bolokega go no swana le ge a le ka sebong sa maswika. O tla ba le dijo le meetse a go nwa. Ka moso le tla bona kgoši ye kgolo e buša naga ye e ikadilego. Ge le gopola ka moo le bego le boifa batho ba šele, e lego batšhediši le dihlodi tše di bego di bala ditora, le ka se sa tšhoga. Le ka se sa bona batho ba šele bale ba go ipona, ba go bolela leleme le nkego le a koakoetša, le le sa le kwešišego. Bonang Sione, motse wa menyanya ya rena ya sedumedi! Bonang Jerusalema! E tla ba bodulo bjo bo lotegilego. E tla swana le tente ye e sa tlošwego, ye dikokwane tša yona di sa kego di tumolwa, ye dithapo tša yona di sa kgaogego. Morena o tla re bontšha letago la gagwe. Jerusalema go tla ba le dinokana le dinoka tše dikgolo, eupša maselawatle a ntwa le a mangwe a magolo a ka se sepele ka dinokeng tšeo. Gobane Morena ke Moahlodi wa rena, ke Mmuši wa rena, e bile ke Kgoši ya rena, o tla re phološa. Manaba a tla ba bjalo ka leselawatle leo dithapo tša lona di nyefilego di sa kgonego go swarelela kota ya diseila, leo sefoka sa lona se timetšego. Re tla thopela leselawatle leo mo e lego gore le digole di tla hwetša kabelo. Go ka se be le motho nageng ya gaborena yo a ka hlwago a sa re o a lwala, le batho ka moka ba tla swarelwa dibe. Etlang, lena merafe, le kwe! Lena ditšhaba, theeletšang! Lefase lohle le bohle ba ba dulago go lona a ba kwe! Morena o galefetše ditšhaba tšohle le madira a tšona. O ba ahloletše gore ba bolawe thoo. Ditopo tša bona di ka se bolokwe, monkgo wa tšona o tla tlala naga; dithaba di tla ela madi. Letšatši, ngwedi le dinaledi di tla šilagana ya ba lerole. Leratadima le tla menwa bjalo ka lengwalo, le dinaledi di tla fifala go etša matlakala a morara ge a galoga, goba mago ge a šwaba. Morena o hwanyolotše tšhoša ya gagwe legodimong, gomme bjale o tla hlaba Baedomo, setšhaba sela a se ahloletšego lehu, ka yona. Tšhoša ya gagwe e tla tlala madi a bona, ya kgamathela makhura bjalo ka madi a dikwanyana le a dipudi, le makhura a dipshio tša dikgapa tše go dirwago dihlabelo ka tšona. Morena o tla dira sehlabelo sa mohuta woo ka Baedomo motseng wa Botsra; o tla bolaya batho ba bantši nageng ya Edomo. Ba tla wa bjalo ka dinare le dipowana, gomme lefase la kolobišwa ke madi, la ba la tshotshoma makhura. Yeo ke yona nako ye ka yona Morena a tlago emela Sione, gomme a e lefeletša manabeng a yona. Dinoka tša Edomo di tla fetoga moti, gomme mobu wa gona wa fetoga tshebela. Naga yohle e tla swa bjalo ka moti. E tla swa bošego le mosegare, gomme ya thunya muši go ya go ile. Naga e tla lobela sa ruri, gomme go ka se sa tsoga go bile le yo a putlago fao. Maribiši le dihlong di tla dula nageng yeo, le magokobu a phela gona. Morena o tla e dira leganata leo go lona go sa dulego motho. Go ka se be le kgoši ya go buša naga, le baetapele ka moka ba tla be ba fedile. Meetlwa le ditshehlo le botšhatšhabogopa di tla mela ka mešate le ka metseng ye e ageleditšwego ka merako, gomme ke moo go tlago phela diphukubje le dimpšhe. Mahlalerwa le diphiri di tla kopana gona, le meoya ye mebe ye nkego ke dipudi tša naga e tla bitšana fao. Gona moo go tla tla modimotsela wa bošego a nyaka moo a ka khutšago gona. Mokopa o tla ba le molete fao, wa beela mae, wa a thwathwaša, mme wa hlokomela bana ba wona. Manong a tla kgobokana gona ka le tee ka le tee. Nyakang ka pukung ya Morena, le bale se se ngwadilwego ka moo. Ga go na le se tee sa diphedi tše se se ka se bego gona nageng yeo, le gona ga go le se tee se se tlago hloka mogatša. Morena o laetše gore go be bjalo; yena ka noši o tla di kgobokanya. Ke Morena yo a tlago di abela naga, a fa sephedi se sengwe le se sengwe karolo. Di tla phela moo nageng neng le neng, mme naga yeo ya ba ya tšona go ya go ile. Lešoka le naga ye e omilego di tla thaba, leganata le tla ipshina, mme matšoba a khukhuša moo. Leganata le tla thunya matšoba, la opela la goa ka lethabo; le tla kgabišwa boka dithaba tša Lebanone, la nontšhwa bjalo ka mašemo a Karmele le a Sharone. Setšhaba sa Modimo sona se tla bona letago la Morena le bogolo bja Modimo wa sona. Tiišang diatla tše di rephilego; tiišang le dikhuru tše di fokolago di thothomela. Botšang ba dipelo tše dinyenyane le re: “Ebang le sebete, le se ke la boifa! Modimo o tlilo le hlakodiša, o tlilo le lefeletša manabeng a lena.” Mahlo a difofu a tla bona, ditsebe tša ditholo tša kwa. Dihlotša di tla tshelatshela bjalo ka kgama, le dimumu tša duduetša di thabile. Didiba di tla phulega leganateng, meela ya tšwa nageng ye e omilego. Lešabašaba la go fiša le tla fetoga letsha, le naga ye e omilego ya ba methopo ya meetse. Mo go bego go phela diphukubje go tla mela mehlahla le mahlakanoka. Go tla ba le tselakgolo gona, ya bitšwa “Tsela ya Bokgethwa”. Yo a sego a hlweka a ka se tšee ka yona – e tla ba ya setšhaba sa Morena. Ditlaela di ka se tlarume go yona. Tau e ka se gate go yona, le dibata tše dingwe di ka se be gona. Bahlakodišwa ba Morena bona ba tla ya gae ka tsela yeo. Ba tla tsena Jerusalema ba goa ka lethabo, ba hlaba mekgolokwane ba thabile. Ba tla iketla go ya go ile, manyami le metsetlo tša felela sa ruri. Ngwageng wa lesome le metšo ye mene wa pušo ya Kgoši Hiskia wa Juda, Sanheribe, kgoši ya Asiria, o ile a hlasela metse ya Juda ye e ageleditšwego ka merako, gomme a e thopa. A romela madira a mantši a tloga Lakishe go yo hlasela Hiskia kua Jerusalema; a be a laolwa ke molaodi wa madira a gagwe yo mogolo. Molaodi yoo a dula tseleng ye e bapetšego le tšhemo ya mohlatswi wa mašela, kgauswi le mokero wo o tlišago meetse a a tšwago letshaneng la ka godimo. Bahlankedi ba bararo ba Hiskia ba tšwa go yo mo gahlanetša. Bona e be e le Eliakime, mohlokomedi wa mošate, morwa wa Hilkia, Shebna, mongwaledi wa mošate, le Joage, mongwaledi wa mmušo, morwa wa Asafo. Molaodi yola wa Baasiria a re go bona: “Kgošikgolo, kgoši ya Asiria, o nyaka go tseba gore ke eng se se dirago gore Hiskia a itshephe ka mokgwa wo. Na Hiskia o gopola gore a ka boledišana le rena mola a swanetše go loga maano a ntwa le go rapa madira a gagwe. A o be a gopola gore o tla thušwa ke mang ge a be a tsogela Asiria maatla? O tshephile Egepeta gore e tla mo thuša, eupša go bota Egepeta go bjalo ka ge motho a ka tšea lehlaka a hlotlela ka lona – le tla robega la mo hlaba seatla. Kgoši ya Egepeta e ka mokgwa woo ge motho a e tshephile.” Molaodi yoo wa Moasiria a tšwela pele a re: “Kgane le nyaka go mpotša gore le tshephile Morena Modimo wa lena? Na ga se tšona dintotoma tše a khunamelwago go tšona le dialetare tša gagwe tše yena Hiskia a di kgerešitšego ge a botša batho ba Juda le ba Jerusalema gore ba direle fela aletareng ye e lego Jerusalema? Ke nyaka gore a phegišane le mong wa ka, kgoši ya Asiria, ka tsela ye: Ke tla mo fa dipere tše dikete tše pedi ge eba o na le banna ba bakaaka ba ba tlago di namela! A bjale a ka kgona bjang go fenya molaodi yo monyenyane ka maemo wa Moasiria? Gomme le ge go le bjalo o sa botile Egepeta gore e mo romele dikoloi tša ntwa le banamedi ba dipere. Kgane le gopola gore ke hlasetše motse wo go tlo o senya e se thato ya Morena? Ke Morena ka boyena yo a mpoditšego gore ke hlasele naga ye ke e senye.” Eliakime, Shebna, le Joage ba re go molaodi yoo: “Hle, mong wa rena, bolela le rena ka Searamo. Re a se tseba. O se ke wa bolela ka Seheberu. Batho ba ba lego godimo ga morako ba a go kwa.” Molaodi yoo a ba fetola a re: “Na le gopola gore mong wa ka o nthomile go tlo botša lena le mong wa lena fela dilo tše ka moka? Aowaowaa, ke botša le batho bale ba dutšego godimo ga morako, bao ba tlago ba ba ja mantle a bona, ba ba ba nwa mehlapologo ya bona, go swana le lena.” Ke moo molaodi a emeletšego gomme a goeletša ka Seheberu a re: “Theeletšang se kgošikgolo, kgoši ya Asiria, a le botšago sona! O le botša gore le se ke la lesa Hiskia a le lahletša. Hiskia a ka se le phološe. Le gona le se ke la mo lesa a le goketša gore le tshephe Morena ge a re: ‘Ruri, Morena o tla re phološa, le gona motse wo o ka se gafelwe diatleng tša kgoši ya Asiria.’ Le se ke la theeletša Hiskia. Kgoši ya Asiria e le laela gore le tšwe motseng le ineele. Ka moka ga lena le tla dumelelwa go ja diterebe tše di tšwago merareng ya lena le mago a mego ya lena, le go nwa meetse a didiba tša lena – go fihlela ge kgoši a le hudušetša nageng ye e swanago le ya lena kudu, moo go nago le dirapa tša merara gore le be le beine, le mabele gore le be le bogobe. Le se ke la lesa Hiskia a le fora a re: ‘Morena o tla re hlakodiša.’ Kgane medimo ya dinaga tše dingwe yona e kile ya phološa dinaga tša yona go kgoši ya Asiria? A e kae bjale medimo ya Hamate le ya Arpade? E kae medimo ya Sefarabaime? Na go na le medimo ye e kilego ya phološa Samaria? Ke ofe modimo wo o kilego wa phološa naga ya wona go kgoši ya rena? Bjale go ka kgonega bjang gore Morena a phološe Jerusalema?” Batho ba no ikhomolela bjalo ka ge Kgoši Hiskia a be a ba boditše; ba se ke ba fetola. Ke moo Eliakime le Shebna le Joage ba gagotšego diaparo tša bona ba nyamile, gomme ba ya ba begela kgoši tše molaodi yola wa Moasiria a di boletšego. Ge Kgoši Hiskia a ekwa ditaba tšeo, a gagola diaparo tša gagwe ka manyami, a apara diaparo tša go ilela, gomme a ya Tempeleng ya Morena. A roma Eliakime, mohlokomedi wa mošate, le Shebna, mongwaledi wa mošate, le baprista ba bagolo go moprofeta Jesaya, morwa wa Amotse. Le bona ba be ba apere diaparo tša go ilela. A ba laela gore ba botše Jesaya ba re: “Lehono ke letšatši la tlalelo; re a otlwa gomme re a gobošwa. Re swana le mosadi yo a batametšego go belega, eupša a fedile maatla. Kgoši ya Asiria e rometše molaodi wa madira a yona yo mogolo go tlo roga Modimo yo a phelago. Nke Morena Modimo wa gago a kwe mahlapa a gomme a otle bao ba a boletšego. Ka gona re rapelele go Modimo, rena mašaledi a batho ba Juda.” Ge Jesaya a se no kwa se Kgoši Hiskia a se boletšego, a mo fetola a re Morena o re: “O se ke wa tšhošwa ke mantšu ao Baasiria ba nkgobošitšego ka ona. Ke tla dira gore kgoši ya Asiria e kwe pego ye e tlago e tlaletša mme e boele nageng ya gaboyona, gomme ka dira gore a bolawe moo.” Molaodi yola wa Moasiria a kwa gore kgoši ya gabo e tlogile Lakishe gomme e lwa le ba motse wa Libna; ka gona a ya moo go yo bolela le yena. Kgoši ya Baasiria ya kwa gore madira a Baegepeta a tseleng go tlo ba hlasela, mme a etilwe pele ke Kgoši Tirihaka wa Etopia. Ka gona yena a roma batseta ka lengwalo go Kgoši Hiskia wa Juda, a re go yena: “Modimo yo o mo tshephilego o go boditše gore Jerusalema e ka se gafelwe diatleng tša ka, fela o se ke wa forwa ke Modimo yoo wa gago. O kwele ka bowena tše magoši a Asiria a di dirilego dinaga ka moka – a sentše gohle! Kgane o gopola gore wena o ka phologa? Borakgolokhukhu ba ka ba ile ba fediša motse wa Gosane, wa Harane, le wa Retsefo, gomme ba bolaya le batho ba Edene ba ba bego ba dula Telasare, mme le o tee wa medimo ya bona wa se kgone go ba phološa. E kae kgoši ya motse wa Hamate, le ya motse wa Arpade, le ya motse wa Sefarabaime, le ya motse wa Hena, le ya motse wa Aba?” Kgoši Hiskia a tšea lengwalo leo go batseta a le bala. Ke moka a ya Tempeleng a le phutholla moo pele ga Morena, gomme a rapela a re: “Wena Morena Ramaatlaohle, Modimo wa Israele, o dutšego setulong sa gago sa bogoši ka godimo ga bakerubi, ke wena o nnoši o lego Modimo, o bušago mebušo ka moka ya lefase. Bjale Morena, lebelela tše di re hlagelago. Theeletša dilo ka moka tše Sanheribe a go rogago ka tšona, wena Modimo yo a phelago. Ke therešo, Morena, gore magoši a Asiria a fedišitše ditšhaba tšohle le dinaga tša tšona, a fiša medimo ya tšona; a kgona go e senya, ka ge e be e se medimo le gatee, eupša e le dilo tša kota le tša leswika tše di betlilwego ke batho. Bjale, Morena Modimo wa rena, re phološe go Baasiria gore mebušo ka moka ya lefase e tle e tsebe gore ke wena o nnoši, Morena, o lego Modimo.” Ke moo Jesaya a romilego motseta go Kgoši Hiskia, a mmotša gore Morena o kwele thapelo ya kgoši gomme o re: “Sione e a go nyatša, wena Sanheribe; e sema nke e go kwela bohloko ge o boela morago. Na o be o roga mang, o goboša mang? Ke mang yo o bego o mo goelela, o mo hlohla? Na tšeo o be o di dira nna, Mokgethwa wa Israele? O romile batseta ba gago gore ba tle ba ikgantšhe pele ga ka ba re: ‘Ka makoloikoloi a ka a ntwa ke nameletše ka godimodimo ga dithaba, mafelelong a dithaba tša Lebanone. Ke remile mesedere ye meteleletelele le mephaene ye mebotsebotse, ka tsenelela garegare ga sethokgwa ka ba ka fihla dintlheng tša kgolekgole tša dithaba. Ke nna ke epilego didiba, ka nwa meetse a dinaga di šele. Ke gatakile noka ya Naele ka maoto ka e pšheša.’ “Na ga se wa ka wa kwa gore ke nna ke beakantšego taba tšeo kgale, ke kgalekgale ke di rerile? Bjale ke di phethagaditše. Ke go file maatla a go fetoša metse ye e ageleditšwego ka merako mekgobo ya thogorogo. Batho ba ba bego ba dula go yona ba ile ba rephiša matsogo, ba tšhoga mme ba lewa ke dihlong. Ba swana le dimelana tšhemong, goba bjanyana bjo botalana tlhakeng ge bo tšhungwa ke phefo ye e fišago ya bohlabela. “Fela se sengwe le se sengwe mabapi le wena ke a se tseba – se o se dirago le mo o yago gona. Ke tseba le ka moo o ntukelago bogale ka gona. Ke kwele bogale bjoo le boikgogomošo bja gago, gomme bjale ke tla go tsenya segalanko le lepheko ka ganong, ka go gomiša ka yona tsela ye o tlilego ka yona.” Ke moo Jesaya a rilego go Kgoši Hiskia: “Sešupo sa tše di tlago direga sese: Lenyaga le išago le tla ja mabele a a imelelago ka boona, eupša ka ngwaga wa boraro le tla kgona go ipšalela mabele, la ba la tla la a buna, la bjala merara, la ba la tla la ja dikenywa tša yona. Mašaledi a Juda a tla boela a atlega boka dimela tše di tseneletšago medu fase tša enywa dikenywa. Go tla ba le mašaledi Jerusalema le baphologi thabeng ya Sione, ka gobane Morena Ramaatlaohle o ikemišeditše go phethagatša seo. “Tše Morena a di boletšego mabapi le kgoši ya Asiria šedi: ‘A ka se tsene motseng wo, goba a thuntšha le ka mosebe o tee. Ga go bahlabani ba ba tlago tla motseng ba swere dikotse, le gona ga go madira a a tlago kgobela ntotoma ya mobu gore a o hlasele. Yena o tla boela morago ka yona tsela ye a tlilego ka yona, eupša mo motseng wo a ka se tsene. Ke realo, nna, Morena. Ke tla phemela motse wo mme ka o phološa gore ke tle ke hlomphiwe, le gore ke tle ke phethe se ke se tshephišitšego mohlanka wa ka, Dafida.’ ” Ke moka morongwa wa Morena a ya mešašeng ya Baasiria mme a bolaya bahlabani ba dikete tše lekgolo le tše masome a seswai le tše tlhano. Ka mahwibi a letšatši le le latelago ba be ba rapaletše moo, ka moka e le ditopo. Ke moo Sanheribe, kgoši ya Asiria, a gomilego a boela Ninibe. Ka letšatši le lengwe ge a sa rapela ka tempeleng ya Modimo wa gagwe, Nisroko, barwa ba gagwe, Adrameleke le Saretsere, ba mmolaya ka ditšhoša, gomme ba tšhabela nageng ya Ararate. Morwa wa gagwe yo mongwe, Esarhadone, a mo hlatlama bogošing. Mehleng yeo Kgoši Hiskia a lwala mme a nyako hwa. Moprofeta Jesaya, morwa wa Amotse, a ya go yena a re: “Morena o re: ‘Beakanya tša lapa la gago, ka gobane o ka se fole; o tla hwa.’ ” Hiskia a phekgoga a lebelela lebotong gomme a rapela a re: “Hle, Morena, gopola gore ke go hlanketše ka potego le botshephegi, le gore ka mehla ke dirile tše o bego o nyaka ke di dira.” Gomme a thoma go lla gabohloko. Ke moka Morena a laela Jesaya gore a boele go Hiskia a yo mmotša a re: “Nna, Morena, Modimo wa rakgolokhukhu wa gago, Dafida, ke kwele thapelo ya gago mme ke bone meokgo ya gago; ke tla go lesa wa phela mengwaga ye mengwe ye lesome le ye mehlano. Ke tla hlakodiša wena le motse wo wa Jerusalema go kgoši ya Asiria. Ke tla šireletša motse wo.” Jesaya a mo fetola a re: “Morena o tla go laetša sešupo sa gore yena o tla phetha se a se boletšego. O tla dira gore moriti wo o lego mo manamelong a a agilwego ke Kgoši Ahase o boele morago ka dikgato tše lesome.” Gomme moriti wa boela morago dikgato tše lesome. Ge Hiskia a fodile, o ile a ngwala kopelo ye ya go tumiša Morena: Ke be ke re ke ya bodulabahu ke sa le yo mofsa, ke kgaoletšwe mengwaga ya bophelo bja ka. Ke be ke re nka se sa bona Morena lefaseng le la ba ba phelago, goba motho wa nama mo lefaseng. Ke re ke amogwa bophelo; bo tlošwa go nna bjalo ka mošaša wa modiša ge o tumolwa o tlošwa. Ke re bophelo bja ka bo a phuthwa bja kgaolwa boka mologi ge a ripa lešela selogelong. Bošego le mosegare ke be ke re Modimo o a mpheleletša. Bošego ka moka ke be ke lala ke lla ke nyaka thušo; Modimo a nthoba marapo bjalo ka tau. Bošego le mosegare ke be ke re Modimo o a mpheleletša. Lentšu la ka le be le fokola bjalo ka la peolane, ke lla bjalo ka leeba. Mahlo a ka a be a lebelela godimo ka go lapa. Ka re hle, Morena, nkimolle bothateng bjo. Ke be nka reng? Ke be nka botša Morena eng ka gobane ke yena a bego a ntirile dilo tše? Ke be ke tla no kgotlelela ka phela, le ge pelo ya ka e be e le bohloko. Mong wa ka, ke phelela wena, wena fela; hle, mphodiše o mphediše. Bohloko bja ka bjo bogolo bo nthušitše. O nthatile mme wa ntlhakodiša lehung, wa ntshwarela dibe tša ka tšohle. Bodulabahu bo ka se go rete, bahu ba ka se go tumiše. Ba ba hwilego ba ka se tshephe go botega ga gago. Ba ba phelago bona ba a go godiša, ba bjalo ka nna ge ke go tumiša bjale. Bana ba botšwa ke botatabo gore o a botega. Morena, o mphodišitše. Re tla letša dikwadi ra go tumiša Tempeleng ya gago bophelong bjohle bja rena. Yona mehleng yeo kgoši ya Babilonia, Merodaka-Baladane, morwa wa Baladane, a kwa gore Kgoši Hiskia o be a lwala. Ka gona a mo ngwalela lengwalo, a mo romela le mpho ka batseta. Hiskia a amogela batseta bao, gomme a ba bontšha polokelo ya mahumo a gagwe ye e bego e boloketše silibera le gauta, dikhanakhana le dinkgabose, le ngwako wa gagwe wa dibetša tša ntwa ka moka, le dilo tšohle ka mengwakong ya gagwe ya polokelo. Gwa se ke gwa ba le selo ka ngwakong wa kgoši le mmušong wa gagwe ka moka se a sa ba bontšhego sona. Ke moo moprofeta Jesaya a ilego go Kgoši Hiskia a mmotšiša a re: “Banna bale ba tšwa kae, le gona ba go boditše eng?” Hiskia a mo fetola a re: “Ba be ba tlile go nna ba etšwa nageng ya kgole, Babilonia.” Jesaya a mmotšiša a re: “Ba boneng mo mošate?” Hiskia a mo fetola a re: “Ba bone se sengwe le se sengwe. Ga go se ke sego ka ba bontšha sona ka mengwakong ya ka ya polokelo.” Ke moo Jesaya a rilego go kgoši: “Morena Ramaatlaohle o re nako e etla yeo ka yona se sengwe le se sengwe mo mošate, e lego tšohle tše borakgolokhukhu ba gago ba di bolokilego go fihlela lehono, di tlago thothelwa Babilonia. Go ka se šadišwe selo. Mo go ditlogolo tša gago go tla thopša ba bangwe, gomme ya ba baamogwabonna ba go šoma mošate wa Babilonia.” Kgoši Hiskia o ile a gopola gore se Jesaya a se bolelago se šupa gore go tla ba le khutšo le polokego nakong ya ge yena Hiskia a sa phela, ka gona a mo fetola a re: “Taba ye o mpoditšego yona e etšwa go Morena e lokile.” Modimo wa rena o re: “Homotšang setšhaba sa ka, se homotšeng! Beang batho ba Jerusalema pelo! Le ba botše gore ba tlaišegile, go lekane, ba lefeleditše dibe tša bona. Ke ba otlile kudu go lekana dibe tša bona.” Motho o a goelela o re: “Phulelang Morena tsela lešokeng! Lekaneletšang Modimo wa rena tselakgolo nageng ye e omilego! Tšheletšang meedi yohle; lekanetšang dithaba le meboto yohle. Mebotwana e lekanetšwe e be molala, mme mo go sego gwa lekanela go lekanetšwe. Ke gona letago la Morena le tlago utollwa, mme batho bohle ba le bona mmogo. O realo, Morena.” Motho o a goelela o re: “Bega!” Ka botšiša ka re: “Ke bege eng?” A re: “Bega gore batho ka moka ba bjalo ka bjang; ba hwa ka pela boka matšoba a naga. Mabjang a a omelela, matšoba a a pona, ge Morena a tliša phefo ye e a fokago. Gabotsebotse batho le bona ba bjalo ka bjang, ga ba phele nako ye telele. Ke therešo, mabjang a a omelela, le matšoba a a pona, eupša lentšu la Modimo wa rena lona ke la neng le neng.” Jerusalema, rotogela thabeng ye e phagamego, o bege ditaba tše dibotse. Sione, hlaboša lentšu o goelele, o bege ditaba tše dibotse! Bolela o se ke wa boifa. Botša ba metse ya Juda gore Modimo wa bona o etla! Morena, Mong wa bohle, o tlilo buša e le yo maatla, a tla le setšhaba se a se hlakodišitšego. O tla fudiša mohlape wa gagwe boka modiša; o tla kgoboketša dikwanyana, a di kuka, a di gokarela, a eta bommagotšona pele a iketlile. Na ke mang yo a ka elago lewatle ka magoswi, goba a lekantšha legodimo ka diatla? Ke mang yo a ka tšhelago mobu wohle wa lefase ka serotwaneng, goba a ela dithaba le meboto ka keloboima? Ke mang yo a ka botšago Morena se a swanetšego go se dira? Ke mang yo a ka mo rutago goba a mo eletša? Kgane Modimo o rerišana le mang gore a ithute a kwešiše ka mo dilo di swanetšego go dirwa, le gore a be le tsebo le kwešišo? Go Modimo ditšhaba ga se selo, di swana le lerothi la meetse morumong wa motšega, goba lerojana le le lego godimo ga keloboima; dihlakahlaka tša kgole di bofefo bjalo ka lerole. Diphoofolo tša dithokgwa tša Lebanone ga se tša lekana go direla Modimo wa rena sehlabelo, le mehlare ya gona ga e nene go dira dikgong tša sehlabelo. Go yena ditšhaba ka moka ga se selo, ke lefeela, ga di gona. Na Modimo a ka bapetšwa le mang? A ka swantšhwa le eng? Ga a swane le seswantšhobopša se se dirilwego ke morulatshipi, a se manega ka gauta, a se kgabiša ka diketane tša silibera. Mohloki yo a se nego silibera goba gauta, o kgetha kota ye e sa bolego. A nyaka mmetli wa sethakga, o mmetlela modimo wa seswantšho wo o sa tekatekego. Na ga le tsebe? Ga se la kwa? Kgane ga se la botšwa kgale? Ga le kwešiše gore lefase le thomile bjang? Le dirilwe ke yo a dulago setulong sa bogoši ka godimo ga lefase; batho ba ba lego ka fase ba bonala nke ke ditšhošane. O phurolotše leratadima bjalo ka lešela, boka mošaša wo go dulwago ka go wona. O wiša babuši, a fetoša baetapele lefeela. Ba swana le dimela tše di sa tšwago go bjalwa, goba peu ye e sa tšwago go gašwa; ge e re e a mela, Morena a tliša phefo, ya di tšhuma, tša tšewa ke ledimo bjalo ka mahlaka. Na Modimo yo mokgethwa a ka swantšhwa le mang? Kgane go na le yo a swanago naye? Lebelelang godimo! Ke mang yo a hlodilego dinaledi tše le di bonago? Yena yo a di etago pele bjalo ka madira, o tseba gore ke tše kae, gomme o di bitša ka maina. Maatla a gagwe le bonatla ke tše dikgolo – ga go na le naledi e tee ye e ka timelago! Lena Baisraele, bjale ke ka baka lang le ngongorega? Le reng le balabala, lena ditlogolo tša Jakobo, le re Morena ga a tsebe matshwenyego a lena, le re Morena ga a ne taba ge le hlokišwa toka? Kgane ga le tsebe? Ga se la kwa? Morena ke Modimo wa go ya go ile, Mohlodi wa lefase lohle. Ga a lape, ga a felelwe ke maatla. Tlhaologanyo ya gagwe ga e fihlelwe. O lapološa bao ba lapilego, bao ba fokolago a ba fa maatla. Bafsa le bona ba a lapa ba fele maatla. Masogana le ona a a thetšwa a we. Eupša bao ba tshephilego Morena ba tla lapologa, ba se sa felelwa ke maatla, ba swana le dintšhu tše di akalalago. Ba tla kitima ba se lape, ba sepela ba sa fele maatla. Modimo o re: “Homolang le theeletše, lena dinaga tša kgole! Itokišetšeng go bega taba ya lena kgorong ya tsheko; batamelang, le tla fiwa sebaka sa go bolela. A re yeng kgorong mmogo. “Ke mang wa go hlohleletša mofenyi wa bohlabela yo a fenyago gohle mo a yago gona? Ke mang yo a gafelago ditšhaba go yena, a dirago gore a gatakele magoši? Ka tšhoša ya gagwe o ba fetoša lerole. Mesebe ya gagwe e ba phatlalatša bjalo ka mooko ge o tšewa ke phefo. O a ba hlomara a ba bolaya, a fetela pele a se a gobatšwa, a tšea ka ditsela tše a bego a sa di tsebe. Ke mang yo a dirilego gore tše di hlage? Ke mang yo a hlodilego ditšhaba kgale? Ke nna, Morena – ke nna Mathomo, ebile ke nna Mafelelo. “Batho ba dinaga tša kgole ba bone tše ke di dirilego; ba a boifa mme ba a thothomela. Ka gona ba a kgobokana, ba a tla. Ba tutuetšana seng sa bona ba re: ‘Tiang maatla!’ Morulatshipi o tiiša morulagauta maatla. Yo a kgolokago modimo wa seswantšho ka noto o tutuetša yo a dirago dikokotela. O re: ‘Se se lomagantšwego se ke se sebotse.’ Ke moka ba o kokotela madulong a wona gore o se ke wa wa. “Eupša lena Baisraele, bahlanka ba ka, bana ba Jakobo, ke lena setšhaba se ke se kgethilego, ditlogolo tša Abrahama, mogwera wa ka. Ke le tšere magomong a lefase, ke le biditše le le dikhutlong tša kgolekgole, ka re go lena: ‘Le bahlanka ba ka.’ Ga se ka le nyatša, eupša ke le kgethile. Le se ke la boifa – ke na le lena! Le se ke la lealea – ke nna Modimo wa lena! Ke a le tiiša, ke a le thuša, ke a le šireletša, ke le hlakodiša ka maatla a ka. “Ba ba le galefetšego ba tla gobošwa ba lewa ke dihlong, ba fetoga lefeela. Ba ba lwago le lena ba tla hwa. Ge le ba nyaka le ka se ba bone, ka gore ba tla be ba ile. Manaba a lena a tla fela. Gobane nna, Morena Modimo wa lena, ke a le tiiša, ke le hlahla ka letsogo ke re: ‘Se boifeng, ke a le thuša.’ ” Morena o re: “Le se ke la boifa, lena setšhabana se se fokolago sa Israele, ke a le thuša. Nna, Modimo yo mokgethwa wa Israele, ke Mohlakodiši wa lena. Ke tla dira gore le be bjalo ka selei se sefsa sa bogale sa go fola. Ka sona le tla fola dithaba la di šilaganya, meboto la e fetoša mooko. Le tla di fefera, tša tšewa ke phefo, tša gašanywa ke ledimo. Eupša lena le tla goa ka lethabo, ka gobane nna ke Modimo wa lena. Le tla ikgantšha ka nna, Modimo yo mokgethwa wa Israele. “Setšhaba sa ka se a hlaka, se a diila, se nyaka meetse eupša ga a gona; ba omile megolo ka lenyora. Nna, Morena, ke tla ba fa tše ba di kgopelago. Nna, Modimo wa Israele, nka se ba lahle. Ke tla phula dinoka mebotong ye e sa melego selo, le methopo melaleng. Ke tla fetoša leganata megobe, mme naga ye e omilego ya ba methopo ya meetse. Ke tla mediša mesedere leganateng, le megohlo le memirte le mehlware. Ke tla bjala mehlare ye mentši nageng ye e omilego – mephaene ya mehutahuta le mesaeprese. Ke tla dira dilo tše gore batho ba di bone ba di tsebe mme ba gopodišiše gore di dirilwe ke nna, Morena. Ba tla kwešiša gore Modimo yo mokgethwa wa Israele ke yena a dirilego dilo tše.” Morena, Kgoši ya ditlogolo tša Jakobo, o re: “Lena medimo ya baditšhaba, hlalošetšang kgoro taba ya lena; e botšeng mabaka a lena! Batamelang le re botše tše di sa tlago, tše di tlago hlaga ka moso, gore mola di direga re tle re di tsebe. Hlalošetšang kgoro ditiragalo tše di fetilego, le re botše gore di šupa eng. Re botšeng gore ka moso go tla hlaga eng – ke gona re tlago tseba gore ke lena medimo! Dirang se sengwenyana se sebotse goba se sebe; ke gona re tlago tšhoga ra taditetša mahlo! Lena ga le selo, tše le di dirago le tšona ke lefeela, le barapedi ba lena ba a šišimiša! “Ke biditše monna wa bohlabela ka leina; ke mo hlohleleditše gore a hlasele a etšwa ka leboa. O gatakela babuši a ba swantšha le leraga, go swana le mmopi ge a duba letsopa. Ke mang gare ga lena yo a kilego a bolela taba ye ra e tseba e se tla, ra tla ra re o nepile? Ga go le o tee wa lena yo a kilego a e bolela; ga go motho le o tee yo a kilego a kwa le bolela taba ye! Nna, Morena, ke bile wa mathomo wa go e begela batho ba Sione; ke romile motseta Jerusalema gore a re: ‘Bonang! Batho ba gabolena ba etla!’ Ge ke iša mahlo go medimo, gwa se be le o tee wa go re selo; gwa se be le o tee wa go nkaraba ge ke botšiša. Medimo ye ka moka ga yona ke lefeela; ga e kgone go dira selo le gatee – medimo ye ya diswantšho ga se selo, ga e ne maatla le gannyane.” Morena o re: “Bonang mohlanka wa ka yo ke mo tiišago, mokgethiwa wa ka yo a nkgahlago. Ke mo tladitše moya wa ka, gomme o tla begela ditšhaba maikemišetšo a ka. A ka se hlabe lešata goba a hlaboša lentšu, a ka se bolelele godimo mekgotheng. Lehlaka le le thokgegilego a ka se le robele sa ruri, goba a tima lebone le le tukago gannyane. O tla tliša toka ya go ya go ile. A ka se lape goba a nolega moko, go fihlela a hlomile toka lefaseng. Dinaga tša kgole di letetše go rutwa ke yena.” Modimo o hlodile magodimo mme a a phurolla; o adile lefase le tšohle tše di metšego go lona; o fa batho ba ba lego go lona bophelo, o phediša badudi ba lona. Bjale Morena yo a hlodilego dilo tše o re go mohlanka wa gagwe: “Nna, Morena, ke go biditše go ya ka toka, ka go fa maatla, ka go šireletša. Ka wena ke tla dira kgwerano le ditšhaba, ka tlišetša batho seetša. O tla budulla difofu mahlo, wa lokolla dibofša dikgolegong tša leswiswi. “Ke nna fela ke lego Morena Modimo wa gago. Ga go modingwana yo mongwe yo nkago mo fa letago la ka; le go tumišwa ga ka nka se go fe medimo ya diswantšho. Tše ke boletšego pele gore di tla hlaga, šedi di phethegile. Bjale ke tla le botša tše difsa le pele di thoma go direga.” Opelelang Morena kopelo ye mpsha; mo tumišeng, lena bohle ba lefase! Mo reteng, lena le sepelago ka maselawatle, le lena dibopiwa tšohle tša lewatle. Mo opeleleng, lena dinaga tša kgole, le lena badudi ba tšona! Leganata le metse ya lona a di goe; batho ba metsana ya Kedara a ba mo rete! Ba ba dulago motseng wa Sela a ba goe ka lethabo godimo ga dithaba! Ba ba dulago nageng tša kgole a ba rete Morena ba mo tumiše! Morena o yo lwa bjalo ka mohlabani; o fišegela go lwa bjalo ka mogale. O a goa, o hlaba mokgoši wa ntwa; o fadišetša manaba a gagwe maatla. Modimo o re: “Ke kgale ke ikhomoletše, ke kgokile pelo, ke rile tuu. Eupša bjale ke tla goa, ka šutša ka hemelana go swana le mosadi ge a belega. Ke tla phušola dithaba le meboto, ka omeletša dimela. Ke tla gopiša dinoka, ka pšheša megobe. “Ke tla hlahla difofu tša ka ditseleng tše ba sa di tsebego, ka ba sepediša mebileng ye ba sego ba ka ba sepela go yona. Ke tla fetoša leswiswi le ba lego go lona seetša, gomme ka ba lekaneletša naga ya makukuno. Tšeo ke tše ke le holofetšago tšona, gomme ke tla di phetha. Ba ba botilego diswantšho tše di betlilwego, ba rego diswantšho tše di bopilwego ke medimo ya bona, ba tla lewa ke dihlong, ba inamiša dihlogo.” Morena o re: “Theeletšang, lena le sa ratego go kwa. Lebelelang gabotse, lena le sa nyakego go bona. Na go na le yo a foufetšego go feta mohlanka wa ka, goba yo e lego setholo go feta motseta wa ka? Ga go yo a foufetšego bjalo ka mogwera wa ka, goba yo a sa bonego boka mohlanka wa ka. Lena Baisraele le bone dilo tše ntši, fela ga se la ithuta selo ka tšona. Tsebe tša lena di bulegile, eupša ga le kwe.” Ka ge Morena a lokile, o fišegela gore setšhaba sa gagwe se hlomphe dithuto tša gagwe se di tšeele godimo. Eupša bjale setšhaba sa gagwe se hutšwe, se thopetšwe; ba tlemilwe ka meleteng, ba utilwe le ka dikgolegong. Ba ile ba hlakolwa ba hulwa, eupša ba hloka mohlakodiši. Ke mang gare ga lena yo a tlago theeletša taba tše? Ke mang yo a tlago theeletša gabotse go tloga lehono? Ke mang yo a gafetšego Baisraele go bahlakodi, ditlogolo tša Jakobo go bathopedi? A ga se Morena ka boyena yo re mo senyeditšego? Re be re sa rate go phela ka moo a bego a nyaka ka gona, le gona re sa phethe ditaelo tša gagwe. Ka gona o ile a re otla o šoro, a re tlaiša ka ntwa. Kgalefo ya gagwe e be e tuka bjalo ka mollo, e aparetše setšhaba sa Israele ka moka, eupša rena ra se tsebe se se diregago, ra se ithute selo tabeng tšeo. Lena Baisraele, Morena yo a le hlodilego, yo a le bopilego, lena ditlogolo tša Jakobo, o re: “Le se ke la boifa – ke le hlakodišitše. Ke le biditše ka leina la Israele – le ba ka. Ge le tshela noka ye e išago, ke tla ba le lena; matshwenyego a lena a ka se le tšee bjalo ka lefula. Ge le putla mollo le ka se tlaboge, gobane nna ke Morena Modimo wa lena, Modimo yo mokgethwa wa Israele, yo a le phološago. Ke tla loba ka Egepeta gore ke le lokolle; ke tla gafa Etopia le Seba legatong la lena. Ke tla loba ka batho le tšona ditšhaba gore ke le phološe, ka gobane le ba bohlokwa go nna mme ke le tšeela godimo, ke a le rata. Le se ke la boifa – ke na le lena. “Ke tla kgobokanya batho ba gabolena ba etšwa bohlabatšatši, ka bušetša ditlogolo tša lena gae go tloga bodikelatšatši. Ke tla botša leboa gore le ba lokolle, ka botša le bodikela gore bo se ba thibele. Lesang setšhaba sa ka se tloge nageng tša kgole, dikhutlong tša lefase. Ke setšhaba sa ka, ke se hlodile, ka se bopa gore se tumiše nna.” Morena o re: “Biletšang setšhaba sa ka kgorong ya tsheko. Ba na le mahlo, eupša ba foufetše; ba na le ditsebe, eupša ke ditholo! Ditšhaba ka moka di kgobokane kgorong ya tsheko, merafe e bokane ka moo. Ke medimo efe ya tšona ye e kago bolela tša ka moso? Ke efe ye e boletšego tše di fetilego? Nke medimo yeo e bitše dihlatse tša yona go bontšha gore e a rereša, le gore e bege gore e boletše nnete. “Lena setšhaba sa Israele, le dihlatse tša ka; ke le kgethile gore le be bahlanka ba ka, gore le tle le ntsebe mme le ntumele, gomme le kwešiše gore ke nna fela ke lego Modimo. Ka ntle le nna ga go modimo wo mongwe; ga se a ka a ba gona, ebile a ka se tsoge a bile gona. “Ke nna fela ke lego Morena, ke nna fela nkago le phološa. Ke boletše pele ka bega tše di tlago direga, ka morago ka le phološa. Ga go modimo o šele gare ga lena wo o kilego wa dira tšeo; lena le dihlatse tša ka. Ke nna Modimo, gomme ka mehla ke tla no ba yena. Ga go yo a kago hlakodiša yo ke mo otlago; se ke se dirilego sona ke mang yo a kago se dirolla?” Modimo yo mokgethwa wa Israele, Morena yo a le phološago, o re: “Gore ke tle ke le hlakodiše, ke tla romela madira a go lwa le Babilone; gomme Bababilone ka moka ba leka go tšhaba ka maselawatle ale ba bego ba ikgantšha ka ona. Ke nna Morena Modimo wa lena yo mokgethwa, ke le bopile, lena Baisraele, gomme ke nna Kgoši ya lena.” O realo, Morena, Mophulatsela lewatleng, Mmulammila gare ga maphoto a magolo; yo a dirilego gore madira a maatla a tšwe, madira a dikoloi tša ntwa le dipere. A wele ohle, a ka se sa tsoga, a tingwa bjalo ka lebone. Morena o tšwela pele o re: “Le se ke la itshwarelela ka tše di fetilego, goba la dula le gopola tša kgale. Bonang, ke tla dira se sefsa; se šetše se tšwelela gonabjale – le a iponela ka bolena! Ke tla phula tsela lešokeng, ka ediša dinoka nageng ye e omilego. Diphukubje le dimpšhe le diphoofolo tše dingwe tša naga di tla ntlhompha ge ke ediša dinoka leganateng, gore ke noše setšhaba se ke se kgethilego meetse. Ke setšhaba se ke ipopetšego sona, gomme se tla bega letago la ka.” Morena o re go setšhaba sa gagwe: “Eupša le be le sa nthapele, lena Baisraele; ebile le sa itapiše ka go nkhunamela, lena ditlogolo tša Jakobo. Le be le sa ntirele dihlabelo tša go tšhungwa ka moka ka dihušwane, le gona le sa ntlhomphe ka dihlabelo tše dingwe tša lena. Ke be ke sa le gapeletše go ntlišetša dikabelo tša bupi, le gona ke sa le lapiše ka go le kgopela gore le ntšhumele diorelo. Le be le sa nthekele diorelo, goba la nkhoriša ka makhura a diruiwa tša lena. Sa lena e bile go nkimetša dibe tša lena, le go ntapiša ka makgopo a lena. Le ge go le bjalo, nna ke Modimo yo a le swarelago dibe, gomme ke dira seo ka gobane ke nna Modimo wa kgaugelo. Nka se sa gopola dibe tša lena. “A re yeng kgorong ya tsheko; le nkgopotše se se lokilego se le kilego la se dira! Le bolele le bontšhe gore ga le ne molato! Rakgolokhukhu wa lena wa pele o be a dira dibe; baetapele ba lena ba be ba mphošetša. Ka gona ke ba kokobeditše, bona setšhaba sa ka se sekgethwa, ka le tlišetša le masetlapelo, ka ba ka dira gore le rogakwe.” Morena o re: “Bjale theeletšang, lena Baisraele, bahlanka ba ka, lena setšhaba sa ka se ke se kgethilego, lena ditlogolo tša Jakobo. Ke nna Morena yo ke le bopilego, yo ke le hlodilego; ke le thušitše go tloga mola le tswalwa. Le se boife, le bahlanka ba ka. Le setšhaba se se lokilego, se ke se kgethilego. “Naga ye e omilego ke tla e tšhollela meetse, ka neša pula tša matlorotloro nageng ye e nyorilwego. Bana ba lena ke tla ba tšhela moya wa ka, ditlogolo tša lena ka di šegofatša kudu. Ba tla atlega bjalo ka mohlare wo o iketlilego, boka meretlwanokana ya kgauswi le meela ya meetse. “Motho o tla re: ‘Nna ke wa Morena,’ yo mongwe a re yena ke wa setšhaba sa Israele. Yo mongwe o tla ngwala leina la Morena seatleng, a ipitša wa setšhaba sa Modimo.” Morena, Kgoši ya Baisraele, Mohlakodiši wa bona, yena Morena Ramaatlaohle, o re: “Ke nna Mathomo, ebile ke nna Mafelelo, ga go modimo ka ntle le nna. Kgane ke mang yo a ka dirago tše ke di dirilego? Ke mang yo a ka bego a porofetile a mpotša tšohle tše di bego di tlilo direga, go tloga gona kua mathomothomong go iša go sa felego? Setšhaba sa ka, le se ke la boifa la gakanega! Le a tseba gore go tloga kgalekgale ke boletše tšohle tše di bego di tlilo direga, gomme lena le dihlatse tša ka. Na go na le Modimo wo mongwe? Ruri, ga o gona modingwana wo mongwe wo maatla wo ke o tsebago.” Bohle ba ba dirago medimo ya diswantšho ke dilofela, le yona medingwana yeo ya bona ba e ratago ga e ne mohola. Ba ba rapelago medingwana yeo ba foufetše, ga ba tsebe selo; ba tla lešwa dihlong. Go dira seswantšhobopša ka tshipi mme wa se rapela wa re ke modimo go holang? Mang le mang yo a se khunamelago o tla goboga. Ba ba dirago medimo ya diswantšho ke batho ba nama. A ba kgoboketšwe ba sekišwe – ba tla tšhoga mme ba lewa ke dihlong. Morulatshipi o tšea tshipi a e kgatlakgatla mollong ka marago a selepe. Ka diatla tše di tiilego o kgatla tshipi yeo ka dinoto tša mehutahuta, a dira modimo wa seswantšho. Ge a ntše a šoma o swarwa ke tlala, a felelwe ke maatla; ge a sa nwe meetse o a lapa. Mmetli o ela kota ka thapo. O thala seswantšho godimo ga yona ka mošidi, a e swayaswaya, a e betla ka dipetlwane gomme a e ntšha seswantšho se sebotse sa motho wa monna, a tla a se bea ka ntlong. A ka rema mesedere goba meeike ya mehutahuta, goba a ipšalela mohlare wo mongwe ka sethokgweng. A ka no bjala le morula gomme pula ya o godiša. Motho o dira dikgong ka kota ye nngwe ya mohlare, a gotša mollo a o ora, goba a apea bogobe; ka ye nngwe a itirela modingwana a o obamela. Ka ye nngwe kota o gotša mollo a beša nama, a e ja, a khora. O a ikomoša a re: “Agaa, ke ruthetše! Mollo wo ga se ka bose!” Ka kota ye nngwe ye e šetšego o betla modimo wa seswantšho, a khunamela pele ga wona, a o obamela, a o rapela a re: “O modimo wa ka – mphološe!” Batho ba mohuta woo ga ba tsebe ebile ga ba kwešiše se ba se dirago. Morena o ba khupeditše mahlo, a ba retetša le dipelo gore ba se kwešiše. Mmetli wa medimo ya diswantšho ga a iše taba ye hlogong; le gona ga a ne tsebo le kwešišo ya go re: “Etse dikota tše dingwe ke goditše mollo ka tšona ka apea bogobe ka beša le nama, ka ja. Ka kota ye nngwe ye e šetšego ka betla seswantšho se sa go šišimiša. Bjale nka napa ka khunamela kota ya kotakota?” Go dira bjalo go no swana le go koma melora. Menagano ya motho yoo ya go iphora e mo lahleditše mo e lego gore a ka se sa thušega. Ga a lemoge gore seswantšhobetlwa se a se swerego ga se modimo le gatee. Morena o re: “Lena Baisraele, ditlogolo tša Jakobo, gopolang taba ye: Le bahlanka ba ka. Ke le hloletše gore le be bahlanka ba ka, gomme nka se tsoge ke le lebetše. Ke fedišitše bokgopo bja lena bjalo ka kgodi, le dibe tša lena bjalo ka leru. Boelang go nna ka gobane ke nna ke le phološitšego.” Hlabang mekgolokwane, lena magodimo, ka gore Morena o phološitše setšhaba sa gagwe! Duduetšang lena magolobitla a lefase! Goang ka lethabo, lena dithaba, gotee le lena mehlare yohle ya sekgwa, ka gobane Morena o phološitše ditlogolo tša Jakobo, gomme a ikgethwafatša setšhabeng sa Israele. “Ke nna Morena, Mophološi wa lena; ke nna ke le hlodilego. Ke nna Morena, Mohlodi wa dilo tšohle. Ke nna ke le noši ke phurulotšego magodimo; ge ke ala lefase ga go yo a nthušitšego. Didupe ke di fetoša mašilo, mehlolo ya baprofeta ba maaka ke e dira lefeela. Ke bontšha gore bahlale ba a phoša, le gore bohlale bja bona ke botlaela. Eupša tše di bolelwago ke mohlanka wa ka ke a di tšweletša, le maikemišetšo a ka ale a begelwago ke batseta ba ka ke a a phethagatša. Ke botša Jerusalema gore batho ba tla buša ba dula gona, le metse ya Juda gore e tla agwa ka lefsa. Marope a yona ke tla dira gore a tsošološwe. Ke laela lewatle gore le pšhe, ke gopiša le dinoka. Ke botša Korese ke re: ‘Ke wena o tlago ba mohlokomedi wa setšhaba sa ka; o tla dira tše ke nyakago gore o di dire: O tla laela gore Jerusalema e tsošološwe, le gore metheo ya Tempele e agwe.’ ” Morena o beile Korese kgoši, a ba a mmea mofenyi wa ditšhaba le wa go amoga dikgoši maatla; Morena o tla mmulela dikgoro tša metse – di ka se dule di tswaletšwe. Morena o botša Korese yo o re: “Nna ka noši ke tla go lokišetša tsela, ka lekanetša meboto. Ke tla robaganya dikgoro tša mphiri, ka pšhatlaganya le maphika a tšona a tshipi. Ke tla go fa matlotlo a a tšwago mafelong a leswiswi, le mahumo a a fihlilwego; ke gona o tlago tseba gore ke nna Morena, le gore Modimo wa Israele o go bitša ka leina. Ke go bea mothuši wa Baisraele, bahlanka ba ka, e lego setšhaba se ke se kgethilego. Ke go bitša ka maina a a hlomphegago, etšwe o sa ntsebe. “Ke nna Morena – ga go Modimo wo mongwe. Ke tla go tiiša, le ge o sa ntsebe. Seo ke se direla gore go tloga bohlabatšatši go fihlela bodikela batho ka moka ba tsebe gore Morena ke nna, le gore ga go Modimo wo mongwe. Ke nna ke dirago seetša, gape ke hlolago leswiswi; ke nna ke tlišago tšhegofatšo, ka hlola le masetlapelo. Ke nna Morena ke dirago dilo tše ka moka. Ke tla romela boloki bo etšwa legodimong bjalo ka pula ya matlorotloro; lefase le tla bo amogela ka lethabo, gomme la hlogiša phologo le toka. Ke nna Morena ke tlago phethagatša tšeo.” Kgane pitša e ka ngangišana le mmopi wa yona, pitša ya go swana le tše dingwe? A letsopa le ka botšiša mmopi gore o dirang? Na pitša e ka belaela ya re mmopi wa yona ga a kgone? A lesea le ka botšiša tatagolona la re: “Ke eng se o se tswetšego?” goba la botšiša mmagolona la re: “O belege eng?” Morena, Modimo yo mokgethwa wa setšhaba sa Israele, yo a se hlodilego, o re: “Le ka no mpotšiša tša ka moso, eupša bana ba ka bona, mediro ya diatla tša ka, ga le a swanela go mpotšiša ka bona. Ke nna ke hlodilego lefase, le batho ba ba dulago go lona ke ba bopile. Ke phurolotše magodimo ka diatla tše tša ka; ke nna ke laolago letšatši le ngwedi le dinaledi. Nna ka noši ke hlohleleditše Korese gore a dire ka boloki. Tsela tšohle tše a tšeago ka tšona ke tla di lekanetša. O tla tsošološa Jerusalema, motse wa ka, mme a lokolla setšhaba sa ka bothopša. Ga se a rekwa goba a amogetšwa tsogolekobong go dira taba tše.” O realo, Morena Ramaatlaohle. Morena o re go Baisraele: “Thoto ya Egepeta le tšhelete ya Etopia e tla ba tša lena, gomme banna bale ba batelele ba Seba e tla ba makgoba a lena; ba tla le šala morago ba tlemilwe ka diketane. Ba tla le khunamela ba bega ba re: ‘Ruri, Modimo o na le lena; ka ntle le yena ga go Modimo wo mongwe. Modimo wa Israele, Mophološi wa setšhaba sa gagwe, ke Modimo yo a iphihlago. Bao ba dirago medimo ya diswantšho ba tla lewa ke dihlong; ka moka ga bona ba tla gobošwa. Eupša Baisraele bona ba phološwa ke Morena, gomme go phološwa ga bona e tla ba ga go ya go ile; setšhaba sa bona se ka se tsoge se llwe ke dihlong goba se gobošitšwe.’ ” Morena o hlodile magodimo – ke yena e lego Modimo! O hlodile lefase mme a le bopa, a le tiiša madulong a lona. Ga se a le hlolela go se dulwe ke motho, eupša o le diretše batho. Ke yena a rego: “Ke nna Morena, gomme ga go modimo wo mongwe. Ga se ka bolela sephiring, leswiswing. Ga se ka botša setšhaba sa Israele gore se nnyake se sa nkhwetše. Ke nna Morena, gomme ke bolela therešo; ke tsebiša setšhaba gore tše di lokilego ke eng.” Morena o re: “Kgobokanang, lena mašaledi a ditšhabatšhaba, lena le šetšego ge mmušo wa Babilonia o fedišwa; batamelang le hlagiše taba ya lena kgorong ya tsheko! Batho ba ba felago ba rwala medimo ya bona ya diswantšhobetlwa phatlalatša, gomme ba rapela medimo ye e ka se kego ya ba phološa – bona bao ga ba tsebe selo! Etlang le bege taba ya lena kgorong; baboleledi ba lena a ba rerišane. Ke mang yo a kilego a bolela se se tlago hlaga? Ke mang yo a se begilego kgale? Na ga se nna, Morena? Ntle le nna ga go Modimo wo mongwe. Ke nna fela Modimo wa toka yo a phološago setšhaba sa gagwe. “Retologelang go nna le phološwe, lena batho ba lefase lohle! Ke nna fela Modimo yo a lego gona. Se ke le holofetšago sona ka keno ke therešo, gomme se ka se fetoge. Ke a ikana ke re: Batho ka moka ba tla tla ba khunama pele ga ka, ba ikana gore ba tla mpotegela. “Ba tla tla go nna ba re toka le maatla di hwetšwa fela mo go nna; eupša bohle ba ba nkgalefetšego ba tla gobošwa. Nna, Morena, ke tla phološa ditlogolo tšohle tša Jakobo, gomme tšona di tla ntheta.” “Seswantšho sa Bele, modimo wa Babilone, se pšhatlagane, le sa Nebo se sekame. Diswantšho tša medimo yeo di be di fela di kukwa ka tlhompho, eupša bjale di rwalwa ka dipokolo, ke merwalo diruiweng tše di šetšego di lapile. Medimo yeo e wele, ye mengwe e pšhatlagane; e paletšwe ke go iphološa – e a thopša, e a thothwa. “Ntheeletšeng, lena ditlogolwana tša Jakobo, lena mašaledi a setšhaba sa Israele. Ke le hlokometše go tloga ge le belegwa. Ke nna Modimo wa lena, gomme ke tla le hlokomela go fihlela le tšofala, meriri ya lena e eba ye meputswa. Le hlodilwe ke nna gomme ke tla le hlokomela; ke tla le thuša, ka le hlakodiša.” Morena o a botšiša o re: “Le ntshwantšha le mang? Kgane go na le yo a swanago le nna? Batho ba ntšha gauta ka dikhwameng tša bona, ba ela silibera ka keloboima. Ba thwala morulagauta go bopa modimo wa seswantšho; ke moka ba khuname ba o rapele! Ba a o kuka, ba o atha; ba o hloma madulong, wa ema moo, wa se šuthe mo o lego gona. Ge motho a o rapela ga o mo fetole, goba wa mo hlakodiša ge a le tlalelong. “Gopodišišang tšeo, lena le ntsogelago maatla; elang hloko tše ke di dirilego. Gopolang tše di hlagilego pele, tše di diregilego kgale; dumelang gore Modimo ke nna fela, le gore yo mongwe wa go etša nna ga a gona. Ke begile mathomong tše di tlago hlaga mafelelong; ke boletše kgale tše di tlago direga, ka re merero ya ka e tla phethega, ke tla dira tšohle tše ke ratago go di dira. Ke bitša monna wa go tšwa nageng ya kgole ya bohlabela; o tla theoga bjalo ka lenong, a phetha tše ke ikemišeditšego tšona. Ruri, ke tla phetha tše ke di boletšego, ka dira tše ke ikemišeditšego tšona. “Ntheeletšeng, lena setšhaba se se ngangabetšego, se se gopolago gore go hlakodišwa ga sona go kgole. Ke tla le phološa kgauswinyana – go ka se tšee sebaka. Nka se diege go le hlakodiša. Ke tla phološa Jerusalema, ka thakga Baisraele.” Morena o re: “Wena Babilone, theoga setulong sa gago sa bogoši o dule fase leroleng. O kile wa ba bjalo ka kgarebe, wa ba motse wo o sa kago wa senywa, eupša bjale ga o sa le yo boletiana, ga o sa le seithati. Tšea tšhilo o šile bupi! Khupolla lešira, o apole le diaparo tša gago tša botšhepi! Gara dithetho tša gago o tshele dinoka! O tla hlobolwa, wa bonelwa ke batho. Ke tla itefeletša, gomme ka se thibelwe ke motho.” Modimo yo mokgethwa wa Israele o a re phološa, leina la gagwe ke Morena Ramaatlaohle. Morena o re go Babilone: “Dula fase o ikhomolele, o ye leswiswing; o ka se sa bitšwa mohumagadi wa ditšhaba! Ke be ke galefetše setšhaba sa ka; ke se swere bjalo ka ge e ka ga e sa le sa ka; ka se gafela diatleng tša gago, gomme wa se se šokele; le batšofadi wa ba swara gampempe. O be o gopola gore o tla ba mohumagadi go ya go ile, gomme o sa šetše ditaba tše, o sa gopodišiše ka moo di tlago felela ka gona. “Theeletša, wena mmalethabo, o dulago o lotegile. O gopola gore ke wena Modimo, gomme ga go yo a swanago nago. O be o hloma e ka o ka se tsoge o bile mohlologadi, goba o lobile bana ba gago. Eupša dilo tše ka dipedi di tla go hlagela ka bogale ka ponyo ya leihlo, ka letšatši le tee. Le ge o ka šomiša dipheko tša mehutahuta le meupo ye bogale, o tla no hlokofalelwa ke monna le bana. “O be o tshephile bobe bja gago, bohlale le tsebo ya gago di go lahleditše, wa iphora wa re: ‘Ke nna Modimo, ga go yo a swanago le nna.’ Fela o tla welwa ke masetlapelo, wa se tsebe le pheko ye o ka a thibelago ka yona. Kotsi e tla go phuthumetša, wa se kgone go e phepha. Mathata a o sego wa ka wa a gopola a tla go wela godimo. Šomiša dipheko le meupo ya gago, tše o di dirišitšego go tloga bjaneng. Mohlomongwe di ka ba le ka mo di ka go thušago ka gona; mo gongwe o ka tšhošetša manaba a gago. O itapišitše ka go loga maano a mantši. Boradinaledi ba gago bjale a ba tle ba go eletše – batho bale ba go ithuta dinaledi, ba go arolanya leratadima, bao kgwedi ka kgwedi ba go botšago tše di tlago go hlagela. “Ba tla swana le mahlaka, mme mollo wa ba tšhuma. Ba ka se kgone go iphološa – mollo woo e ka se be wa go orwa le go dulelwa. Ka tsela yeo o tla lahlegelwa ke bona boradinaledi bale o bego o rerišana nabo, ebile o dirišana le bona go tloga bjaneng bja gago. Yo mongwe le yo mongwe wa bona o tla tšea ya gagwe tsela, gomme ga go yo a tlago šala a go phološa.” Theeletšang, lena ditlogolo tša Jakobo, lena le ipitšago setšhaba sa Israele, lena peu ya Juda: Le ikana ka leina la Morena, le re le khunamela Modimo wa Israele, etšwe le sa rereše, le se la tiiša. Le ge go le bjalo le sa ipitša badudi ba motse wo mokgethwa, le re le botile Modimo wa Israele, yo leina la gagwe e lego Morena Ramaatlaohle. Morena o re go Baisraele: “Ke le boditše kgale tše di bego di tlile go direga, ka di bega – gateetee ka di phetha. Ke tsebile gore le tla ngangabala, la ba le melala ye methata bjalo ka tshipi, la hloka dihlong ka dibe tša lena. Ka le botša e sa le pele tše di tlago le hlagela ka moso, ka le begela ditiragalo di sešo tša phethagala, ya ba go le thiba melomo gore le se re di dirilwe ke medimo ya lena, goba di phethagaditšwe ke diswantšhobopša le diswantšhobetlwa tša lena. “Bonang, tšohle tše ke di boletšego pele di hlagile; le swanetše go dumela gore ke boletše nnete. Go tloga bjale ke tlilo le botša tše difsa tša ka moso, diphiri tše le sa di tsebego. Bjale ke gona ke di dira – ga se ka di dira pele; ga se la ka la kwa tša go swana le tše. Ge nkabe le kile la di kwa, le be le ka re le a di tseba. Ke tsebile gore ga le tshephege, le gore ke kgale le ntsogela maatla. Ke ka baka leo le sego la kwa goba la tseba selo ka dilo tše di sego tša ka tša fihla ditsebeng tša lena. “Gore batho ba tle ba nkgodiše, le ge ke galefile bjalo ke a itshwara, mme ga ke le fediše. Ke le lekile mollong wa matshwenyego, bjalo ka silibera ge e tološwa. Fela ka hwetša le se ne mohola. Tše ke di dirago ke tše di holago nna mong – nka se lese leina la ka le hlomphollwa, goba ka lesa yo mongwe a godišwa ka mo go swanetšego nna fela.” Morena o re: “Ntheeletšeng, lena Baisraele, setšhaba se ke se biditšego, lena ditlogolo tša Jakobo! Ke nna Modimo, ke nna Mathomo, ebile ke nna Mafelelo; ke nna fela ke lego Modimo! Ka atla tša ka ke beile lefase metheong ya lona, ka phurolla le legodimo. Ge ke bitša lefase le legodimo di tla ka pela tša ema mmogo. “Kgobokanang bohle le ntheeletše! Ke ofe wa medimo wo o bego o ka porofeta gore monna yo ke mo kgethilego yo o tlilo hlasela Babilone? O tla be a dira se ke se nyakago go Bababilonia. Ke nna ke di boletšego mme ka mmitša; ka dira gore leina la gagwe le tsebege, gomme o tla atlega. “Bjale ge, mpatameleng le kwe se ke se bolelago. Go tloga mathomong ke be ke bolela phatlalatša; ge di thoma go direga ke be ke le gona.” Bjale Morena, Mong wa bohle, o ntsentše moya wa gagwe, mme a nthoma. Modimo yo mokgethwa wa Israele, Mophološi wa lena, o re: “Ke nna Morena Modimo wa lena yo ke nyakago go le ruta tše di tlago le hola, yo ke nyakago go le sepetša tseleng ye le swanetšego go tšea ka yona. “Nke nkabe le theeleditše ditaelo tša ka! Ke mo ditšhegofatšo di ka bego di eletše go lena bjalo ka noka. Go hlakodišwa ga lena go ka be go ile gwa swana le maphoto a lewatle ge a eya lebopong. Ditlogolo tša lena e ka be e le tše ntši bjalo ka lešabašaba, bana ba lena ba atile bjalo ka dithorwana tša lona, gomme ke be ke tla dira gore ba se fedišwe.” Itlhaganeleng le tloge Babilone! Goang, le phatlalatšeng taba tše ka lethabo; di gašeng gohle le re: “Morena o hlakodišitše Baisraele, bahlanka ba gagwe!” Mola Morena a sepetša setšhaba sa gagwe lešokeng, sona se be se sa swarwe ke lenyora. O ile a se phulelela meetse leswikeng, a pharola letlapa gomme meetse a ela. “Bakgopo bona ba ka se bolokege,” o realo, Morena. Ntheeletšeng, lena ba dinaga tša kgole! Mpheng tsebe, lena ditšhaba tše di dulago kgakala! Morena o nkgethile pele ke belegwa, a ntira mohlanka wa gagwe ge ke seno tswalwa. Mantšu a ka a a dira bogale boka tšhoša. A mphihla ka seatleng sa gagwe. A ntira ka swana le mosebe wo bogale, a ntsenya ka kgotlopong ya gagwe. A re go nna: “Lena Baisraele, le bahlanka ba ka; ka baka la lena batho ba tla nkgodiša.” Nna ka re: “Ke itapišeditše lefeela. Ke sentše maatla a ka, eupša ga se ka phetha selo.” Le ge go le bjalo, ke botile gore Morena o tla ema le nna; o tla mputsetša tše ke di dirago. Morena o mpopile pele ke belegwa gore ke tle ke be mohlanka wa gagwe, ke bušetše setšhaba sa gagwe go yena, ke mo kgobokanyetše sona. Morena o a ntlhompha; ke yena maatla a ka. Morena o rile go nna: “Mohlanka wa ka, ke go beetše modiro wo mogolo. Sa gago ga se fela go tlo bušetša mašaledi a Israele nageng ya ona le go a boetša sekeng sa ona, eupša ke tla go dira seetša sa ditšhaba gore bohle ba lefaseng ba phološwe ka wena.” Modimo yo mokgethwa, Mophološi wa Israele, o botša monyatšwanyatšwa, mošišingwakeditšhaba, mohlanka wa babuši, o re: “Ge magoši a go bona o godišitšwe gape, a tla ema a go hlompha; le bakgomana ge ba go bona, ba tla obama.” Tšeo di tla direga ka gobane Morena o kgethile mohlanka wa gagwe, le ka gore Modimo yo mokgethwa wa Israele o a botega. Morena o re go setšhaba sa gagwe: “Ge nako ye ke ratago go le phološa ka yona e fihla, ke tla kwa dillo tša lena ka le thuša. Ke tla le šireletša, gomme ka dira kgwerano le ditšhaba ka lena. Ke tla buša ka le dudiša nageng ya lena ye bjale e sentšwego, gomme ka dira gore le e bušetše sekeng sa yona. Dibofša ke tla di botša ka re: ‘Lokologang!’ Go ba ba lego swiswing ke tla re: ‘Tšwelang ntle seetšeng!’ Ba tla swana le diruiwa tše di fulago ditseleng le mebotong ye e sego ya mela selo. Ba ka se sa swarwa ke tlala goba lenyora. Letšatši le phišo ye kgolo di ka se ba tšhume, ka ge ba tla be ba hlahlwa ke yo a ba ratago. O tla ba iša methopong ya meetse a iketlile. “Ke tla phula tsela ya go putla dithaba, ka lekaneletša setšhaba sa ka ditselakgolo. Ba bangwe ba setšhaba sa ka ba tla tla ba etšwa kgole, bangwe ba etšwa leboa le bodikela, bangwe ba etšwa Aswane ka borwa.” Goang ka lethabo, lena magodimo! Letša mokgolokwane, wena lefase! Dithaba a di duduetše ka gobane Morena o tlilo homotša setšhaba sa gagwe; o tla se šokela ka ge se tlaišega. Eupša ba Jerusalema bona ba re: “Morena o re lahlile! Mong wa rena o re lebetše.” Fela Morena yena o re: “Kgane mosadi a ka lebala lesea la gagwe, a se rate ngwana yo a mmelegego? Le ge eba a ka mo lebala, nna nka se tsoge ke lebetše lena, setšhaba sa ka. Wena Jerusalema, nka se tsoge ke go lebetše! Ke ngwadile leina la gago ka diatleng tša ka. Merako ya gago ke dula ke e gopotše. “Ba ba tlago go go aga ka lefsa ba kgauswi le go tla, gomme babolai le bafediši ba gago ba tla tloga. Lebelela ka gohle o bone tše di diregago! Batho ba gago ba a kgobokana – ba boela go wena. Ke ikana ke le Modimo yo a phelago, ke re batho ba gago ba tla go kgabiša boka monyadiwa ge a kgabišitšwe ka dikgabišo. “Naga ya geno e be e hlakotšwe, e sentšwe e le marope, eupša bjale e ka se lekane bao ba tlago dula go yona. Bale ba go go pšhatla ba tla ba kgole le wena. Ka letšatši le lengwe batho ba gago ba ba tswetšwego bothopša ba tla re go wena: ‘Naga ye ga ya re lekana – re okeletše yona gore re tle re be le madulo!’ Ke moka wena o tla ipotšiša wa re: ‘Ke mang yo a re tswaletšego bana ba ka moka? Etse ba ka ke ba lobile, mme ka se sa ba le ba bangwe! Ga ke re ke be ke rakilwe mme ke thopilwe – bjale ke mang yo a godišitšego bana ba? Ke be ke tlogetšwe ke le tee – bjale bana ba ba tšwa kae?’ ” Morena, Mong wa bohle, o re go setšhaba sa gagwe: “Ke tla hlaeletša ditšhaba, ka emišetša merafe sefoka gore ba tliše bana ba gago gae ka lerato. Go lena magoši a tla swana le bahlokomedi ba bana, bommakgoši ba ba bjalo ka baledi. Ba tla le obamela ba le hlompha ka boikokobetšo. Ke gona le tlago tseba gore Morena ke nna; yo a botilego go thušwa ke nna a ka se lewe ke dihlong.” Kgane o ka amoga mogale tše a di thopilego? Afa lethopša la mogateledi lona le ka tšhaba? Morena o a fetola o re: “Go tlilo ba ka wona mokgwa woo. Mogale o tla amogwa lethopša la gagwe, mogateledi le yena o tla tšeelwa tše a di thopilego. Ke tla lwa le ba ba lwago le lena, le bana ba lena ka ba hlakodiša. Ke tla dira gore bagateledi ba lena ba bolayane, ba tla phegelela go bolayana mo nkego ba tagilwe. Ke mo batho ka moka ba tlago tseba gore ke nna Morena, Mophološi le Molokolodi wa lena. Ba tla lemoga gore ke nna Modimo yo maatla wa Israele.” Morena o re: “Na le nagana gore ke rakile setšhaba sa ka bjalo ka monna ge a hlala mosadi wa gagwe? Bjale lengwalo la tlhalo le kae ge? Kgane le gopola gore ke le rekišitše la ba makgoba go swana le monna yo a rekišago bana ba gagwe gore e be makgoba? Aowaa, bokgobeng le be le išwa ke dibe tša lena; le ile la rakwa ka baka la melato ya lena. “Ke ka baka la eng setšhaba sa ka se ile sa se ke sa dira selo mola ke ile go yo ba phološa? Ba be ba reng ba sa arabe ge ke ba bitša? Kgane ga ke ne maatla a go ba phološa? Na ga ke kgone go ba hlakodiša? Nka kgalema lewatle ka le pšheša, gomme dinoka ka di fetoša leganata, dihlapi tša tšona tša hwa, tša nkga ka ge go se ne meetse. Nka apeša leratadima boso, ya nke ke ge le iletše.” Morena, Mong wa bohle, o nthutile gore ke bolele eng, ke tle ke kgone go fa ba ba lapilego mafolofolo. Mosong wo mongwe le wo mongwe o dira gore ke hlwaye tsebe ke theeletše tše a nthutago tšona. Morena o ntirile gore ke kwešiše, gomme nna nka se mo tsogele maatla, goba ka gana. Ba ba nkotlago ke ba hloboletše mokokotlo, ka ba lesa ba nthoga ba ntumola le maledu, ka se široše sefahlego ge ba ntshwela ka mare. Eupša mahlapa a bona a ka se ntire selo, ka ge ke thušwa ke Morena, Mong wa bohle. Ke beta pelo ka a kgotlelela; ke tseba gore nka se goboge, ka gobane Modimo o kgauswi, gomme o tla bontšha gore ga ke ne molato. Ke mang yo a ka lekago go mphara ka molato? A a ye le nna kgorong ya tsheko! Ke mang yo a ka phegišanago le nna? A a bege molato wo a mpharago ka wona! Morena, Mong wa bohle, ka boyena o ema le nna – bjale ke mang yo a ka mponago molato? Bohle ba ba mpharago ka molato ba tla timelela bjalo ka lešela le le llwego ke tšhwele. Lena ba le boifago Morena gape le theeletšago mantšu a mohlanka wa gagwe – le ge le sepela swiswing le sa bone seetša, le tshephe Morena, le bote Modimo wa lena. Lena ka moka le epelago ba bangwe melete, lena beng le tla wela ka meleteng yeo. Morena ka boyena o tla phethagatša taba ye; le tla welwa ke masetlapelo a mašoro. Morena o re: “Ntheeletšeng, lena le nyakago go phološwa, lena le tlago go nna gore ke le thuše. Gopodišišang borakgolokhukhu ba lena, bona e lego leswika le le betlilwego go lona, le molete wo le epilwego go wona. Gopolang rakgolokhukhu wa lena, Abrahama, le Sara, makgolokhukhu wa lena. Mola ke bitša Abrahama o be a se ne ngwana, eupša ka mo šegofatša mme ka mo atišetša ditlogolo. “Ke tla homotša Jerusalema, gomme ba ba dulago maropeng a yona ka ba bea pelo. Le ge naga ya yona e le leganata, ke tla e fetoša serapa sa Edene; le ge e le lešoka, ke tla e dira sona serapa seo sa Modimo. Go tla ba le lethabo le boipshino, gwa kwala dikoša tša ditebogo le medumo ya diletšo. “Ntheeletšeng, lena setšhaba sa ka, le mpheng tsebe, lena morafe wa ka. Ke ruta ditšhaba; melao ya ka e tla ba tlišetša seetša. Ke batametše go ba phološa; nako ya gore ke fenye e kgauswi. Ke tla ahlola ditšhaba ka maatla a ka. Dinaga tša kgole di botile nna, di holofetše gore ke tla di phološa. Lelalelang magodimong, le be le lebelele fase lefaseng! Magodimo a tla timelela bjalo ka muši, lefase le tla hlagala boka seaparo, gomme badudi ba lona ka moka ba tla hwa bjalo ka dilabi. Eupša nna ke tla ba hlakodišetša sa ruri; toka ya ka e tla bonagala go ya go ile. “Ntheeletšeng, lena le tsebago tše di lokilego, lena le swerego dithuto tša ka ka dihlogo. Le se ke la boifa ge batho ba le roga, goba la kwa bohloko ge ba le nyefola. Ba tla timelela bjalo ka diaparo tše di llwego ke tšhwele! Eupša nna ke tla ba hlakodišetša sa ruri; toka ya ka e tla bonagala go ya go ile.” Morena, tsoga o re thuše! Re hlakodiše ka maatla a gago, go swana le mehleng yela ya kgale, mabakeng ale a pele. Ga ke re ke wena yola wa go phuleletša Rahaba, wa ripaganya mmamokebe woo wa ka lewatleng? Gape ke wena wa go pšheša lewatle, meetse a bodiba bjo bogolo, gomme wa phula tsela mo go bego go le meetse, gore bale o bego o ba phološa ba kgone go tshela. Bao o ba hlakodišitšego ba tla boela Jerusalema ka lethabo, ba hlaba mekgolokwane ba thabile; ba tla iketla go ya go ile, manyami le metsetlo tša felela sa ruri. Morena o re: “Ke nna ke le homotšago. Motho wa nama le mmoifelang, yena a hwago bjalo ka bjang? Kgane le lebetše Morena yo a le bopilego, yo a phurolotšego magodimo gomme a bea metheo ya lefase? Ke ka baka lang le swanetše go phela le boifa bogale bja bao ba le gatelelago, bao ba itokišeditšego go le fediša? Bogale bja bona bo ka se sa le dira selo. Bao ba tlemilwego ka diketane ga ba sa le kgole le go lokollwa; ba ka se hwele kgolegong, gape ba ka se hloke dijo. “Ke nna Morena Modimo wa lena; ke biloša lewatle gomme maphoto a lona a duma. Ke nna Morena Ramaatlaohle! Ke phurolotše magodimo, ka bea le metheo ya lefase; ke botša ba Jerusalema ke re: ‘Le setšhaba sa ka! Ke le dirile batseta ba ka, gomme ke le šireletša ka seatla.’ ” Wena Jerusalema, tsoga! Phafoga, o emelele! O nwele beine ya kotlo, beine ye Morena a go filego yona a galefile; o e kgaritlile gomme ya go thekesediša. Ga go le o tee wa badudi ba gago yo a go hlahlago. Gare ga bao ba godilego go wena ga go yo a go swerego ka letsogo a go thuša. Masetlapelo a ka mabedi a go wetše: Naga ya geno e sentšwe ke ntwa, le setšhaba sa geno se bolailwe ke tlala. O tla kwelwa ke mang bohloko? Ke mang yo a tlago go homotša? Batho ba gago ba idibetše; ba rapaletše gohle magahlanong a mekgotha; ba bjalo ka phuti ye e tantšwego. Modimo o ba kgadile kudu, Morena o ba otlile gabohloko a galefile. Lena batho ba Jerusalema ba le tlaišwago, lena ba le thekeselago bjalo ka ditagwa, Morena Modimo wa lena o a le emelela o re: “Ke tloša senwelo sela ke le filego sona ke galefile. Le ka se sa nwa beine yela ya go le thekesediša. Ke tla e fa bale ba bego ba le tshwenya, ba le patlamiša mekgotheng, ba le gataka bjalo ka mobu.” Wena Jerusalema, tsoga! Tsoga, o tie gape! Wena Sione, motse wo mokgethwa wa Modimo, apara diaparo tša botšhepi! Moditšhaba le yo a sego a hlweka a ka se sa tsena go wena. Ithinthe lerole, wena Jerusalema, itokolle bokgobeng! Emelela o dule setulong sa gago sa bogoši! Tlemollang ditlemo tše le tlemilwego melala ka tšona, lena mathopša a Sione! Morena o re go setšhaba sa gagwe: “Mola le eba makgoba ga se la rekwa ka tšhelete; ka gona le ka se rekollwe ka yona. Ge le falalela Egepeta e be e le ka go rata ga lena; Asiria yona e ile ya le gatelela e se ya swanela. Bjale sona seo ke se se diregilego kua Babilonia: le lena le mathopša, fela ga se la rekwa ka tšhelete. Ba ba le bušago ba a le kgadimola gomme ba nkgoboša ka mehla. Mabakeng a a tlago le tla dumela gore ke nna Modimo, le gore ke boletše le lena, ka ba ka ikutolla go lena.” Go botse bjang go bona motseta a etla a theoga dithabeng a re tlela le ditaba tše dibotse, ditaba tša khutšo! O bega go fenya ntweng, o botša batho ba Sione o re: “Modimo wa lena ke Kgoši!” Baleti ba motse ba hlaboša mantšu, ba goa mmogo ka lethabo. Ba bona Morena ka a bona mahlo ge a boela Sione. Hlabang mekgolokwane, lena marope a Jerusalema! Morena o tlilo hlakodiša motse wo, mme a homotša setšhaba sa gagwe. Morena o tlilo dira taba ye kgolo ka maatla a gagwe a makgethwa ditšhaba di lebeletše; batho ba dinaga tša kgole ba tla bona ge a phološa setšhaba sa gagwe. Hudugang! Hudugang! Le tlogeng Babilonia, lena barwadi ba dibjana tša Tempele! Le se kgome selo se se sego sa hlweka; le dule le itlhwekišitše gomme le huduge. Bjale le ka se tloge ka lepotlapotla; le tla be le sa tšhabe. Morena o tla le eta pele, gomme yena Modimo wa Israele a ba a le leta a le šetše morago. Morena o re: “Mohlanka wa ka o tla atlega modirong wa gagwe; o tla hlompšha, a godišwa kudu. Batho ba bantši ba ile ba kgotsa ge ba mmona; o be a sentšwe sefahlego e bile nke ga se motho, a gobaditšwe mme a sa swane le batho. Eupša bjale ditšhaba tše dintši di tla mo makala, le magoši a hloka molomo ge a mmona. Ba tla bona tše ba bego ba se ba di botšwa, ba kwešiša tše ba bego ba se ba di kwa.” Setšhaba sa fetola sa re: “Ke mang yo a bego a ka dumela tše bjale re di begago? Le gona ke mang yo a bego a ka bona gore tše ke ditiro tša Morena? Mohlanka wa gagwe o godile pele ga gagwe bjalo ka lehlogedi, boka modu wo o melago mobung wo o omilego. O be a se ne seriti le gona e se yo mobotse mo re bego re ka mo šetša. Mo go yena go be go se se se re kgahlago, mo re bego re ka mo kganyoga. Re be re mo nyatša, re mo gana; o be a phela a tlaišwa, a tlwaetše go kwešwa bohloko. Go be go se na le motho yo a ratago go mo lebelela – re mo nyatša mme re sa mo šetše. “Eupša mahloko ao a bego a lebane rena a kwelwe ke yena; ditlaišego tše di bego di re swanetše di wetše yena, mola rena re be re gopola gore o otlwa ke Modimo ka matshwenyego ao. Eupša o hlabilwe ka baka la dibe tša rena, a otlwa ka baka la makgopo a rena. Rena re ile ra boelanywa le Modimo ka go otlwa moo ga gagwe, ra fodišwa ke dintho tša gagwe. Ka moka re be re swana le dinku tše di timelago, mongwe le mongwe a eya mo a ratago gona. Eupša Morena a mo rweša makgopo a rena bohle. “O ile a swarwa gampe, eupša yena a ikokobetša, a se ke a re selo. A etša kwanyana ye e išwago tlhabong, a ikhomolela bjalo ka nku ye e kotwago – a se ke a bolela selo. O ile a swarwa, a ahlolwa, a tšewa a yo bolawa, mme le o tee wa batho ba mehleng yeo a se ele tša go bolawa ga gagwe hloko. Le ge ba be ba rerile go mmoloka le disenyi, o ile a bolokwa ka lebitleng la mohumi. O be a se a ka a oba molato goba a bolela maaka.” Morena o re: “E be e le thato ya ka gore go bolawe yo ke dirilego gore a tlaišwe; lehu la gagwe e bile sehlabelo sa tebalelo ya dibe. Ka gona o tla phela nako ye telele, a ba a bona ditlogolo tša gagwe, mme nna ka phethagatša merero ya ka ka yena. Ka morago ga go tlaišwa le go bolawa o tla buša a phela. O tla tseba gore ga se a tlaišetšwa lefeela. Mohlanka wa ka yo a se nago bosodi o tla otlwa legatong la ba bantši, mme, ka baka la gagwe, ka ba swarela. Ka gona ke tla dira gore a godišwe, a dule le banna ba go hlomphega. O gafile bophelo bja gagwe ka go rata, a tlaišwa bjalo ka disenyi, le ge a be a rwele dibe tša ba bantši, mme a rapela gore badiradibe ba swarelwe.” Wena Jerusalema, o be o swana le mosadi wa moopa, mosadi yo a sa belegego. Eupša bjale opela ka lethabo, o duduetše o hlaba le mekgolokwane. Wena o bego o le noši o tla ba le bana ba bantši, wa fetiša le mosadi yo a nago le monna. Katološa tente ye o dulago ka go yona ka go phurolla seila ya yona, o telefatše dithapo, o tiiše le dikokotela. Wena Jerusalema, o tla oketša naga ya gago ka mathoko ohle; ditlogolo tša gago di tla thopa naga ye bjale e dutšwego ke ditšhaba tše dingwe. Metse ye bjale e lego marope e tla dulwa ke batho. O se ke wa boifa, ka gobane o ka se sa gobošwa, o ka se lešwe dihlong gape. O tla lebala ge o kile wa goboga mola o sa le yo mofsa; o ka se sa gopola kgobogo yela ya bohlologadi bja gago. Mmopi wa gago o tla ba bjalo ka monna wa gago; leina la gagwe ke Morena Ramaatlaohle. Mophološi wa gago ke Modimo yo mokgethwa wa Israele; ke yena Modimo wa lefase ka moka. Wena Israele, o swana le mosadi yo mofsa yo a lahlilwego ke monna gomme a nyamile kudu. Eupša Morena o go bitša gore o boele go yena mme o re: “Ke ile ka go lahla lebakanyana fela; bjale ke tla go iša gae ke go rata kudu. Ke ile ka go furalela lebakanyana ke sa selekegile; bjale ke tla go rata go ya go ile.” O realo, Morena, Mophološi wa gago. O tšwela pele o re: “Mehleng ya Noa ke ile ka ena gore nka se sa tsoga ke tlišitše meetsefula lefaseng. Bjale ke ena le gore nka se sa go galefela gape goba ka go kgalemela. Le ge dithaba di ka šutha, meboto ya šikinyega, nna nka se tsoge ke lesitše go go rata. Ke go holofetša gore ke tla phela le wena ka khutšo go ya go ile.” O realo, Morena, morati wa gago. Morena o re: “Jonna, wena Jerusalema, motse wo o tlaišegago, o sa kgonego go itwela, o hlokago mohomotši! Ke tla aga metheo ya gago ka maswika a bohlokwa a botala bja legodimo, ka swaraganya maswika a leboto ka leraga le le tiilego. Ke tla aga dibo tša gago ka magakabje a mahwibidu, difero ka di aga ka magakadima, gomme merako ya gago yona ya ba ya mabenyabje. “Nna ka noši ke tla ruta setšhaba sa gago, ka se tlišetša boiketlo le katlego. O tla tiišwa ka toka. O ka se boife go gatelelwa, ebile o ka se tsoge o tšhošeditšwe. Ge manaba a ka go hlasela a tla be a se a hlohleletšwa ke nna. O tla fenya bao ba lwago nago. “Ke nna ke bopilego morulatshipi yo a butšwetšago mollo, gomme a dira dibetša ka bokgoni bja gagwe. Le mohlabani yo a bolayago ka dibetša tšeo o bopša ke nna. Eupša wena ga go sebetša se o tlago hlaselwa ka sona sa go gobatša. Bohle bao ba go pharago ka molato tshekong o tla ba bontšha gore ke bona ba nago le molato. Ke ka moo ke tlago dira gore bahlanka ba ka ba bolokege, ka dira le gore ba fenye.” O realo, Morena. Morena o re: “Etlang, bohle lena le nyorilwego – meetse šea! Etlang, lena le se nego tšhelete – rekang mabele le je! Ee, etlang le reke beine le maswi – ga go lefiwe selo! Le senyetšang tšhelete ka tše di sa khorišego? Le reng le reka dijo ka meputso ya lena etšwe di sa le khoriše? Ekwang nna mme le phethe tše ke le botšago tšona, ke mo le tlago ipshina ka dijo tše dibosebose. “Ntlhwaeleng ditsebe, lena setšhaba sa ka, le tle go nna; le ntheeletše, gomme le tla phela! Ke tla dira kgwerano ya go ya go ile le lena, gomme ka le fa ditšhegofatšo tše di sa felego, tše ke di holofeditšego Dafida. Ke ile ka mo dira moetapele le molaodi wa ditšhaba, gomme ka yena ka ba bontšha maatla a ka. Bjale le tla bitša ditšhaba tše le bego le sa di tsebe, mme le tšona di sa le tsebe; di tla tla go lena di kitima! Tšeo di tla direga ka gobane nna, Morena Modimo wa lena, Modimo yo mokgethwa wa Israele, ke tla dira gore le hlomphege.” Retologelang go Morena a sa le file sebaka; mo rapeleng a sa le kgauswi. Bakgopo a ba lahle ditiro tša bona, ba babe ba tlogele megopolo ya bona. A ba sokologele go Morena, mme yena o tla ba šokela; ba retologele go Modimo wa rena, ka gobane o swarela batho dibe gantšintši. Morena o re: “Megopolo ya ka ga e swane le ya lena, le ditsela tša ka di fapana le tša lena. Bjalo ka ge magodimo a phagame kudu ka godimo ga lefase, ka wona mokgwa woo ditsela le megopolo ya ka di ka godimo ga tša lena. “Lentšu la ka le bjalo ka pula le lehlwa, tšona di nago di etšwa godimo. Ga di boele morago, di fela di thapiša lefase, di hlogiša dibjalo, tša medišetša balemi peu mme tša tlišetša batho dijo. Ke ka moo lentšu le ke le bolelago le tlago ba ka gona – lona le ka se palelwe ke go dira se ke ratago gore le se dire; gape le tla atlega go tše ke le romago gore le di dire. “Lena le tla tšwa motseng wa Babilone ka lethabo; la iketla le etetšwa. Dithaba le meboto di tla duduetša ge le batamela, le mehlare ya naga e tla phaphatha diatla e thabile. Mephaene e tla mela mo bjale go metšego mehlašana ya meetlwa, legatong la ditshehlo go tla mela memirte. Seo e tla ba sešupo sa go ya go ile se se ka se senyegego, ya ba segopotšo sa tše di dirilwego ke nna, Morena.” Morena o re go setšhaba sa gagwe: “Le phethe ditaelo tša ka, le dire tše di lokilego, ka gobane ga ke sa le kgole le go le phološa; kgauswinyana le tla bona gore ke a le hlakodiša. Yo lehlogonolo ke yo ka mehla a hlomphago Sabatha, yo a sa šomego ka letšatši le, le gona a sa kego a dira tše mpe.” Motho o šele yo e bago wa setšhaba sa Morena a se ke a re: “Gape nna Morena a ka se ntumelele gore ke rapele le setšhaba sa gagwe.” Moamogwabonna a se ke a gopola gore ka ge a sa kgone go ba le bana, a ka se tsoge e bile yo mongwe wa setšhaba sa Modimo. Monna yo mobjalo Morena o re go yena: “Ge o ka hlompha Sabatha, le gona wa dira tše di nkgahlago, wa botega ka go boloka kgwerano ya ka, gona o tla gopolwa nako ye telele ka Tempeleng ya ka le setšhabeng sa ka go feta ge o ka be o bile le barwa le barwedi. O ka se tsoge o lebetšwe.” Le gona Morena o re go batho ba šele bao e bago ba setšhaba sa Modimo, bao ba mo ratago mme ba mo hlankelago, bao ba hlomphago Sabatha mme ba botegago ka go boloka kgwerano ya gagwe: “Ke tla le iša Sione, thabeng ya ka ye kgethwa, ka le thakga ka ntlong ya ka ya thapelo, gomme ka amogela dihlabelo tše le di dirago aletareng ya ka. Tempele ya ka e tla bitšwa ntlo ya thapelo ya batho ba ditšhaba ka moka.” Morena, Mong wa bohle, yo a bušeditšego setšhaba sa gagwe sa Israele gae se etšwa bothopša, o holofeditše gore o tla tliša batho ba ditšhaba tše dingwe ya ba ba sona. Morena o botša manaba a setšhaba sa Israele gore a tle bjalo ka dibata mme a se metše. O re: “Baetapele bohle ba ba swanetšego go botša setšhaba sa ka gore kotsi e etla, ba foufetše, ga ba bone kotsi yeo. Ba swana le dimpša tše e lego dimumu tše di sa kgonego go goba – di nogo patlama tša lora. Ga se ka go rata boroko! Ba swana le dimpša tše di sa kego di khora. Baetapele ba ba hloka kwešišo. Yo mongwe le yo mongwe wa bona o dira se a se ratago, gomme o nyaka fela go ikhola. Ditagwa tše di re: ‘A re yeng re yo tšea beine, re tle re nweng le bjala bjo bogale ka moo re ratago ka gona. La gosasa e tla ba letšatši le legolo kudu go swana le la lehono.’ ” Moloki o ikhwela ka pela, gwa se be le yo a elago lehu la gagwe hloko. Batho ba go botegela Modimo ba ithobalela e se nako, gwa se be le yo a di kwešišago. Eupša lehu leo la bona le ba khutšiša masetlapelo a a ka tlago. Bao ba dirago tše di lokilego lehu le ba tlišetša khutšo le boiketlo. Etlang mo le ahlolwe, lena bana ba didupe, ditlogolo tša diotswa le tša difebe. Le kwera mang, lena badiradibe tenang? Le petlela mang melomo le mo ntšhetša maleme, lena bafori tenang? Le khunamela medimo ya tswala ka go robalana meriting ka fase ga mehlašana yeo ya lena le rego ke ye mekgethwa. Le dira dihlabelo ka bana ba lena ka dimphatšeng tša maswika maribeng a dinoka. Le khunamela maswika a boreledi gona moo la re maswika ao ke yona medimo. Le a tšhelela beine la re ke kabelo ya seno, mme la a tlišetša le dikabelo tša bupi. Na le gopola gore tšeo di a nkgahla? Le namelela godimo ga dithaba tše di phagamego go yo robalana le go yo dira dihlabelo. Le bea medimo ya lena ya diswantšho ye e ponokago ka morago ga mabati. Le ala malao, la hlobola la tsena ka dikobong la robalana le bao le ba fago tšhelete gore ba le robale. Go robalana moo le go rata kudu. Ka go dira bjalo le a ntlogela. Le tlola ka setlolo se sentši, la itšhela ka dinkgabose, la nama la yo khunamela Mologo, modimo wa seswantšho. Ge le nyaka medimo ye le kago e khunamela, le roma batseta kgole, ešita le gona bodulabahu. Le ge le lapišwa ke go nyaka medimo ye mengwe, ga le lahle. Le re medimo yeo ya lena ye e ponokago e le fa maatla, ka gona le no kgotlelela. Morena o re: “Medingwana yeo ke dilo mang mo le kago e šia la e boifa gore le be le mpotše maaka le ntebale? Na le lesitše go mpoifa ka baka la ge ke ile ka no ikhomolela nako ye telele? Etse le gopola gore tše le di dirago di lokile, fela nna ke tla utolla gore dilo tšeo ke tše mpe, mme medingwana ya lena e ka se kgone go le thuša. Ge le lla le nyaka thušo, a medingwana yeo ya lena ye mentši e le thuše! Phefo e tla e phamola, moya wa e tšea! Eupša bao ba botilego nna bona ba tla dula mo nageng ye gomme ba nkhunamela Sione, thabeng ya ka ye kgethwa.” Morena o re: “Setšhaba sa ka a se boele go nna! Phulang tsela le e lokiše! Tlošang tše di kago ba šitiša go sepela tseleng! “Ke nna Modimo yo mokgethwa yo a lego godimodimo, yo a phelago go ya go ile. Ke dula godimo felo mo gokgethwa, fela le go batho ba ba feletšwego ke kholofelo ba nolegile moko le gona ke a dula, gore ke tle ke ba tsošološe ke ba tiiše. Nka se fele ke tšere kgang le setšhaba sa ka goba ka ba galefela sa ruri. Ge nka dira bjalo batho ba ke ba phedišitšego ba ba tla hwa. Ke be ke ba galefetše ka baka la dibe le megabaru ya bona; ka gona ka ba otla ka ba lahla. Eupša bona ba no fela ba kgelogile ba itirela tše ba di ratago. “Ke bone tše ba di dirago, fela ke tla ba alafa. Ke tla ba etetša, gomme ba ba llago ka ba homotša. Ke dira gore ba nteboge ka ge ke ba phološitše ka moka, ba be le khutšo – ba kgole le ba kgauswi. Ke tla alafa setšhaba sa ka. Eupša batho ba babe bona ba swana le lewatle le le bilogago le sa okobale, leo maphoto a lona a kubugago a ntšha tšhila le malele. Bakgopo le bona ga ba ne khutšo.” O realo, Morena. Morena o re: “Goelela kudu bjalo ka phalafala ge e lla! Botša setšhaba sa ka sa Israele makgopo a sona, o tsebiše ditlogolo tša Jakobo dibe tša bona. Ba nkhunamela ka mehla mme ba re ba nyaka go tseba ditsela tša ka. Ba re ba nyaka gore ke ba beele melao ya go loka, le gona ba kgahlwa ke go nkhunamela, bjalo ka setšhaba se se dirago tše di lokilego, se se sa tlogelego Modimo wa sona.” Setšhaba se a botšiša se re: “Re ikonelang dijo ge eba Morena ga a re ele hloko? Go thušang go ikokobetša ka mokgwa wo ge eba yena a se ne taba?” Morena o re go bona: “Taba ke gore le re mola le ikona dijo ya ba le phetha le a lena mabaka, le gona le uthautha badiredi ba lena. Go ikona dijo ga lena go a le galefiša, la tsoša ditshele, la lwa. Ge le ikona dijo ka mokgwa woo nka se kwe dithapelo tša lena. Ge le ikona le ikweša bohloko, la inamiša dihlogo la swana le mohlahla, gomme la ala diaparo tša go ilela le melora la robala godimo ga tšona. Na seo e ka ba ke sona se le se bitšago boikono? Le bona nke nka kgahlwa ke seo? “Boikono bjo ke bo nyakago šebo: Tlemollang makgoba a le a gateletšego, lokollang ba le ba dirilego makgoba le se na tokelo. Bagatelelwa a ba hunologe. Efang ba ba swerwego ke tlala dijo, gomme badiidi ba ba se nago magae le ba amogele ka malapeng a lena. Batho ba ba se nego diaparo le ba fe tšona, le meloko ya lena le se ke la gana go e thuša. “Ke moo go le phološa ga ka go tlago le hlabela bjalo ka letšatši, gomme dintho tša lena tša fola ka pela. Ke tla le eta pele ke le Mophološi wa lena, gomme letago la ka la le šireletša le le šetše morago. Ge le rapela ke tla le kwa. Ge le ntelela le nyaka thušo ke tla le araba. “Ge le ka lesa go gatelela batho le go ba šupa ka menwana le go bolela tše mpe; ge le ka fepa ba ba swerwego ke tlala gomme la khoriša ba ba itlhakelago, gona leswiswi le le lego go lona le tla fetoga seetša sa mosegare. Ke tla le eta pele ka mehla, ka le khoriša nageng ya komelelo. Ke tla dira gore le kgwahle. Le tla swana le serapa se se nošetšwago gabotse, le mothopo wo o sa pšhego. Batho ba gabolena ba tla tsošološa marope ale a kgale, ba aga godimo ga metheo yela ye metala. Le tla tsebja le le batho ba ba ilego ba tsošološa merako, ba aga ka lefsa dintlo tše di bego di phušotšwe.” Morena o re: “Ge le ka kgethwafatša Sabatha gomme la se bapatše selo ka lona letšatši leo, ge le ka kgahlwa ke Sabatha la e tšeela godimo, la e hlompha ka go se dire tše le di dirago ka matšatši a mangwe, la se tšwetše dipapatšo tša lena pele, le gona la se tšee magang a lefeela ka letšatši le, gona le tla ipshina ka go ntlhankela. Ke tla dira gore le hlomphiwe lefaseng ka moka, gomme le tla iketla nageng ye ke e filego Jakobo, rakgolokhukhu wa lena. Ke realo, nna, Morena.” Le se gopole gore Morena ga a ne maatla a go kgona go le thuša, goba o thibane ditsebe mo e lego gore a ka se kwe dillo tša lena! Taba ke gore molato wa lena o le aroganya le Modimo, gomme ke ka baka la dibe tša lena ge a sa le kwe. Diatla tša lena di thankgetše madi, le dira tše mpe fela. Le bolela maaka, le sebelana tša bokgopo. Le sekišana melato kgorong ya tsheko ka ntle le toka; le ge le phophotha le bolela maaka. Le tshephile boradia le bohwirihwiri gore le tšwelele melatong ya lena. Le loga maanomabe a go tsenya ba bangwe mathateng, mme la ba dira tše mpe. Maanomabe a lena a bjalo ka letata, a ne kotsi go swana le mokopa. Yo a ka jago mae a wona o tla hwa. Ge motho a ka gata lee la wona go tla tšwa mokopana! Eupša maanomabe ao a lena a ka se le hole ka selo, a swana le seaparo se se logilwego ka letata la segokgo. Seaparo seo motho a ka se se apare. Mediro ya lena ke ye mebe mme le tlwaetše go dira tše šoro. *** Le dula le gopola go dira tše mpe mme le fišegela go di dira. Ge le nyaka go bolaya motho yo a se nego molato ga le be le pelopedi. Gohle mo le fihlago gona le a lobiša la senya, gomme mo le lego gona ga go motho yo a iketlago. Ga le ke le phetha melao; le tšea ka tsela ya baradia, gomme mang le mang yo a radiago batho o dula a foa. Setšhaba se re: “Bjale re a tseba gore lebaka ke eng ge Modimo a sa re phološe go bao ba re gatelelago. Re letetše gore go se, eupša e sa no ba bošego; re holofetše gore re tla sepela seeding, eupša ke leswiswi fela. Re phophola le leboto bjalo ka difofu, re etša batho ba ba se nago difahlego. Re kgopša mosegare wo monana mo nkego ke bošego; bjalo ka ge nke re šetše re le leswiswing la bodulabahu. Bohle re bokolela bjalo ka dibere, re lla bjalo ka maeba re nyamile. Re letetše gore Modimo a re hlakodiše, eupša ga go nko ye e tšwago lemina; re holofetše gore o tla re phološa, fela ga go direge selo. “Morena, melato ye re go šitetšego ka yona ke ye e sa balwego. Dibe tša rena di a re tšwa. Makgopo a rena ohle re a tseba gabotse: Re go tsogetše maatla, ra go latola, ra tšea ka tsela e šele. Re be re gateletše batho mme re go furaletše. Megopolo ya rena ga se yona; dipolelo tša rena ke maaka. Re gana toka mme le tshwanelo ga re e amogele, le kgorong ya mošate nnete e a šarakantšhwa, se se lokilego ga se gona. Therešo e a hlokega, gomme yo a tlogelago go dira tše kgopo o swarwa gampe.” Morena o bone dilo tšeo gomme o selekilwe ke go hloka toka ga setšhaba. O tlabilwe ke ge a bona go se yo a ka thušago bagatelelwa. Ka gona yena ka noši o tla ba hlakodiša. O tla apara toka ya ba seaparo sa boitšhireletšo, le phološo ya ba mongatse wa tshipi. O tla apara phišegelo ya go lefeletša setšhaba sa gagwe. O tla tukela manaba a gagwe bogale, a ba otlela tše ba di dirilego, ešita le ba ba dulago mabopong a kgole. Go tloga bohlabatšatši go iša bodikela batho ba tla mmoifa, ba boifa le bogoši bja gagwe. O tla tla bjalo ka lefula la meetse le le gapšago ke ledimo. Morena o re go setšhaba sa gagwe: “Ke tla tla Jerusalema go tlo le phološa, lena ditlogolo tša Jakobo tšeo di sokologilego dibeng tša tšona. Le gona ke dira kgwerano le lena; yona še: Ke le file moya wa ka le dithuto tša ka go ya go ile, gomme go tloga bjale le swanetše go ntheeletša le go ruta bana ba lena le ditlogolo tša lena gore ba ntheeletše le ka moso.” Jerusalema, tsoga o bonegelwe, ka gobane seetša sa gago se tlile! Letago la Morena le go hlabetše! Lefase le ditšhaba tše dingwe di tla aparelwa ke leswiswi, eupša wena seetša sa Morena se tla go hlabela; letago la gagwe le tla bonagala go wena. Ditšhaba di tla tla seetšeng sa gago, magoši le ona a tla tla mohla letšatši la gago le hlaba. Lebelela ka gohle o bone tše di diregago: Batho ba gago ba kgobokanela go tla gae! Barwa ba gago ba tla tla ba etšwa kgole; barwedi ba gago ba tla kukwa bjalo ka bana. O tla bona dilo tšeo mme wa ediša sefahlego; o tla hemelana ka lethabo, pelo ya gago ya thebatheba kudu. Mahumo a ditšhaba a tla tlišwa go wena; matlotlo a bona a tla tla a etšwa mošola wa lewatle. Melokoloko ye metelele ya dikamela e tla tla e etšwa Midiane le Efa. E tla tloga Sheba e rwele gauta le diorelo. Batho ba tla bega ditiro tše dikgolo tša Morena ka lethabo. Dihuswane tšohle tša Kedara le dikgapa tša Nebayote di tla tlišwa go wena, ya ba tša go dira dihlabelo tša go kgahla Morena aletareng ya gagwe. Morena o tla thakga Tempele ya gagwe le go feta pele. A tšwa kae maselawatle a a tlago ka lebelo bjalo ka maru, a phaphasedišago diseila boka maeba ge a boela dihlageng tša ona? A tšwa mabopong a kgole, a etilwe pele ke maselawatle a magolo, a tliša setšhaba sa Modimo gae. A tla a rwele silibera le gauta go hlompha Morena, Modimo yo mokgethwa wa Israele, ka gobane o dirile gore setšhaba sa gagwe se hlomphiwe. Morena o re go Jerusalema: “Batho ba šele ba tla tsošološa merako ya gago, gomme magoši a bona a tla go hlankela. Ke go otlile ke befetšwe, eupša bjale ke tla go thabela ka go šokela. Dikgoro tša gago di tla dula di butšwe, bošego le mosegare di ka se tswalelwe, gore magoši a ditšhaba a go tlišetše mahumo a tšona a etile batho ba bona pele. Eupša ditšhaba le mebušo ye e sa go hlankelego di tla fedišwa taa. “Dikota tša mephaene ya mehutahuta le mesaeprese, e lego tšona dikota tše dibotsebotse tša dithokgwa tša Lebanone, di tla tlišwa go wena, Jerusalema, go tlo kgabiša Tempele ya ka, gore go thakgwe bogato bjoo bja dinao tša ka. Barwa ba bagateledi ba gago ba tla tla ba go khunamela, ba go hlompha. Bohle ba ba bego ba go nyatša ba tla tla ba khunamela Modimo maotong a gago. Ba tla go bitša ‘Motse wa Modimo, Sione ya Modimo yo mokgethwa wa Israele’. “O ka se sa tlogelwa, wa hloiwa, goba wa hloka batho. Ke tla go dira motse wo mobotse wo o hlomphegago wa go ya go ile, motse wa lethabo neng le neng. Ditšhaba le magoši di tla go hlokomela bjalo ka mmagongwana ge a nyantšha lesea la gagwe. O tla tseba gore nna, Morena, ke Mophološi wa gago, le gore Modimo yo maatla wa Jakobo ke Mohlakodiši wa gago. “Ke tla go tlišetša gauta gore e tšee mphiri legato, ka tliša silibera le mphiri gore di tšee tshipi le kota legato, mme tshipi ya tšea leswika legato. Babuši ba gago ba ka se sa go gatelela; ke tla dira gore ba buše ka khutšo le toka. Go ka se sa kwagala motho a hlasela yo mongwe, goba manaba a senya nageng ya gago. Merako ya gago e tla go šireletša, wa tuma ka baka la dikgoro tša gago. “O ka se sa bonegelwa ke letšatši mosegare le ngwedi bošego; nna, Morena, ke tla ba seedi sa gago sa neng le neng; sona se tla dira gore o bonale o le motse wo mobotsebotse. Seedi sa gago se ka se fete bjalo ka sa letšatši ge le dikela, goba sa ngwedi ge o ehwa – nna, Morena, ke tla ba seedi sa gago sa go ya go ile. Matšatši a gago a go ilela a tla feta. Batho ba gago ka moka ba tla dira tše di lokilego, mme naga ya ba ya bona go ya go ile. Ke tla dira gore ba dulele sa ruri go yona, ke ba bopile gore bogolo bja ka bo bonwe. Monyatšegi setšhabeng o tla tswala ba sekete, yo a fokolago a tswala setšhaba se segolo. Nna, Morena, ke tla phethagatša dilo tše ka pela ge nako ya tšona e fihla!” Moya wa Morena, Mong wa bohle, o na le nna. Yena o mpeile gore ke yo begela baikokobetši ditaba tše dibotse, ke bee ba ba nyamilego pelo, ke begele dibofša khunologo, le ba ba lego kgolegong tokologo. O nthomile go bega gore nako e fihlile ya gore Morena a phološe setšhaba sa gagwe mme a se lefeletše manabeng a sona. O nthomile go homotša bohle ba ba iletšego, le go išetša ba ba llago kwa Sione lethabo. Ba ka se sa itšhela dihlogo ka mobu, goba ba apara diaparo tša go ilela, eupša ba tla apara tša botšhepi, mme ba tlola ka dinkgabose. Ba tla opela ditumišo bakeng sa go nyama. Ba tla swana le mehlare ye Morena a e bjetšego ka boyena. Ba tla dira tše di lokilego, mme ba reta Modimo ka baka la tše a di dirilego. Ba tla tsošološa meago yela e phušotšwego mehleng ya pele. Lena setšhaba sa ka, bašele ba tla le dišetša mehlape, ba le lemela mašemo, ba le hlokomelela le dirapa tša merara. Le tla tsebja le le baprista ba Morena, bahlanka ba Modimo wa rena. Le tla ipshina ka mahumo a ditšhaba, gomme la ikgantšha ka ona. Bakeng sa go lewa ke dihlong le tla hlomphega kudu, mme bakeng sa go goboga la duduetša, ka ge Morena a le šegofaditše. Le tla dula nageng ya lena, gomme moo thoto tša lena tša oketšega gabedi; lethabo la lena e tla ba la go ya go ile. Morena o re: “Ke rata toka mme ke hloile bohlakodi le bokgopo. Ke tla botegela go putsa setšhaba sa ka, gomme ka dira kgwerano ya go sa felego le sona. Ditlogolo tša bona di tla tuma gare ga ditšhaba; mang le mang yo a di bonago o tla dumela gore ke tšona setšhaba se ke se šegofaditšego.” Re thabetše kudu tše Morena a di dirilego. Re swana le monyadi ge a apara diaparo tša botšhepi, goba monyadiwa ge a apara dipheta tša gagwe. Modimo o re apešitše phologo le tlhakodišo. Ruri, bjalo ka ge lešoka le hlogiša dimela, bjalo ka ge peu e mela mme e gola, le serapa se mediša peu, Morena, Mong wa bohle, o tla re phološa gomme ditšhaba tšohle di tla mo tumiša. Ke tla dula ke tutuetša Jerusalema, nka se homole pele Sione e phološwa. Ge seo se direga, letšatši le lefsa le tla hlabela Jerusalema, gomme tlhakodišo ya yona ya bonega bjalo ka serumola se se tukago. Wena, Jerusalema, ditšhaba di tla bona ge o hlakodišwa! Magoši ohle a tšona a tla bona letago la gago. O tla thewa leina le lefsa, leina le o le filwego ke Modimo ka noši. O tla swana le mphapahlogo wo mobotse ka diatleng tša Morena, goba seala sa bogoši ka seatleng sa gagwe. O ka se sa bitšwa “Molahlwa”, le naga ya geno e ka se sa bitšwa “Motlogelwa”. Leina la gago le lefsa e tla ba “Mokgahla-Modimo”. Naga ya geno go tla thwe ke “Monyalwa”, ka gobane o kgahla Modimo, gomme nageng ya geno o tla swana le monyadi. Bjalo ka ge lesogana le nyala kgarebe, yo a go agilego o tla go nyala. Bjalo ka ge monyadi a thabela monyadiwa wa gagwe, le wena Modimo wa gago o tla go thabela. Mo merakong ya gago, Jerusalema, ke beile baleti; bošego le mosegare ga se ba swanela go homola. Ba swanetše go gopotša Morena dikholofetšo tša gagwe ba sa kgaotše. Ba swanetše go mo šala morago go fihlela a tsošološa motse wa Jerusalema, mme a o dira motse wo lefase le o retago. Morena o ikanne, gomme ka maatla a gagwe a magolo o tla phetha keno ye: “Nka se sa lesa mabele a lena e eba dijo tša manaba a lena, mme le bašele ba ka se sa le nwela beine ye le itapišitšego ka go e dira. Eupša lena le bunnego mabele le tla a ja, la reta Morena. Lena le futšego diterebe le tla nwa beine ka dikgorong tša Tempele ya ka.” Etšwang motseng, lena batho ba Jerusalema, etšwang le yo phulela magagabolena a a boago tsela! Phulang tselakgolo, e phuleng, le tlošeng maswika! Hlomang sefoka, gore batho ba Juda ba ba lego ditšhabeng tše dingwe ba se bone! Morena o begela lefase ka moka o re: “Botšang batho ba Jerusalema gore Morena o tlilo le phološa, o tla le batho ba a ba hlakodišitšego.” Le tla bitšwa “Setšhaba se Sekgethwa”, “Bahlakodišwa-ke-Morena”. Jerusalema yona e tla bitšwa “Mmamoratwe wa Morena”, “Motse wo Modimo a sego a o lahla”. “Ke mang yoo a tlago a etšwa motseng wa Botsra kwa Edomo? Ke mang yoo wa go apara mabaibai a mahwibidu, a ganka ka maatla a magolo?” “Ke Morena, yo a nago le maatla a go phološa, o tlilo bega go hlakodiša ga gagwe.” “Ke eng, Morena, diaparo tša gago di thankgetše bohwibidu bjalo ka tša monna yo a pitlago diterebe ka maoto gore a dire beine?” Morena a fetola a re: “Nna ke pitla diterebe ka maoto ke nnoši, ke sa thušwe ke motho wa tšhaba tše dingwe. Ke ba gatakile ke befetšwe, ka ba pšhatla ke galefile, gomme madi a bona a tšhela diaparo tša ka ka moka a di thankgetša. Ke be ke feditše le pelo gore bjale ke nako ya go lefeletša setšhaba sa ka manabeng a sona; ke nako ya go se hlakodiša. Ke ile ka lebelela kua le kua – gwa se be le yo a nthušago; ka tlabja ke ge ke se ne mothuši. Eupša ka tiišwa ke go tlala pelo, mme ka phološa setšhaba ka maatla a ka. Ke gatakile setšhaba ka setšhaba ke galefile, ka di robaganya ke tuka bogale. Madi a tšona a elela fase.” Ke tla bega potego ya Morena. Ke a mo reta ka baka la tšohle tše a re diretšego tšona. E bile yo botho kudu go Baisraele, ka ge a na le lešoko le kgaugelo ye kgolo. Morena o rile: “Gape se ke setšhaba sa ka; se ka se mphore.” Ka gona a se hlakodiša matshwenyegong ohle a sona. Yo a ba hlakodišitšego ga se motseta wa Morena goba morongwa, eupša ke Morena ka noši. Ke yena a ba phološitšego, ka ge a be a ba rata mme a ba kwela bohloko. O ba hlokometše go tloga kgale, eupša bona ba mo tsogela maatla, ba mo nyamiša moyeng. Ka gona ya ba lenaba la bona mme a lwa nabo. Fela ba ile ba gopola tša mabakeng a kgale, ba gopola matšatši a Moshe, mohlanka wa Morena, mme ba re: “Bjale ge, Morena yola wa go phološa badiša ba mohlape wa gagwe lewatleng, e lego baetapele ba setšhaba, o kae? O kae Morena yola a ba filego moya wa gagwe? O kae yena Morena yola ka maatla a gagwe a dirilego tše dikgolo ka Moshe, a aroganya meetse a lewatle gomme a sepetša setšhaba sa gagwe meetseng a a išago, gore a itirele leina la go ya go ile?” Ge Morena a ba putliša lewatle ba be ba gwataka bjalo ka dipere lešokeng, ba sa kgopše ke selo. *** Bjalo ka ge dikgomo di eya moeding wa phulo, Morena le yena o ile a khutšiša setšhaba sa gagwe. A se hlahla ka mokgwa woo gore a itirele leina le legolo. Morena, nke o re lebelele o le moo legodimong, moo o dulago bokgethweng le letagong la gago. Afa o re fišegela pelo? Ditiro tša gago tše dikgolo di kae? O se re time lerato le lešoko la gago. Ke wena tatagorena. Abrahama o re ngadile, Jakobo le yena o re ganne, eupša wena, Morena, o Tatagorena, o Mophološi wa rena wa kgale. O reng o re lesa re aroga tseleng tša gago? O reng o re thatafatša dipelo ka mo re bilego re sa go boife? Boa, hle, ka baka la bahlanka ba gago, ka baka la dikgoro tša gago tša Israele. Rena, setšhaba sa gago se sekgethwa, re ile ra rakwa ke manaba a rena lebakanyana; ba ile ba gataka Felo ga gago mo Gokgethwa. O re swere bjalo ka ge nke ga se wa ka wa ba mmuši wa rena, bjalo ka ge nke ga re setšhaba sa gago. Nke nkabe o pharola legodimo wa theoga! Ke mo dithaba di bego di tla šikinyega ge o batamela. Etla ka pela bjalo ka mollo ge o fiša mašašana, o tle ka maatla boka mollo ge o bediša meetse. Etla o utolle maatla a gago manabeng a gago, gore ditšhaba di thothomele pele ga gago! Go kile gwa ba le nako mola o etla o dira dilo tše di šiišago tše re bego re se ra di letela; dithaba di be di šikinyega pele ga gago. Ga go yo a kilego a bona goba a kwa ka Modimo wa go swana le wena, wa go direla ba ba mo holofelago mediro ye mebjale. O loketše bao ba kgahlwago ke go dira tše di lokilego, ba ba go gopolago ge ba bona tše o di dirago. O be o re galefetše, eupša rena ra no fela re dira dibe; le ge go le bjalo o be o re phološa ka mehla. Ka baka la dibe tša rena, bohle re swana le motho yo a tšhilafetše; ešita le tšona ditiro tša rena tše dibotsebotse ke makgapa bjalo ka diaparo tše di tšhilafetšego. Ka baka la dibe tša rena re swana le matlakala a a omeletšego; makgopo a rena a re budula bjalo ka phefo. Ga go yo a go rapelago; ga go yo a fišegelago go tla go wena gore o mo thuše. O iphihletše rena gomme wa re gafela makgopong a rena. Eupša o Tatagorena, Morena. Rena re swana le letsopa, gomme wena o swana le mmopi. O re bopile, ka fao o se ke wa re galefela kudu, goba wa gopola dibe tša rena go ya go ile. Nke o bone, ka moka ga rena re setšhaba sa gago. Metse ya gago ye mekgethwa nke ke lešoka; Jerusalema le thaba ya Sione ke marope a a tlogetšwego, le Tempele ya rena, lona lefelo lela le lekgethwa le lebotse, mola borakgolokhukhu ba rena ba bego ba go reta gona, e fišitšwe ka mollo. Meago ka moka yela re bego re e rata ke marope. Aowii, Morena, na o ka fela o phuthile matsogo dilo di le ka mokgwa wo, wa dio lebelela ka mahlo, wa re tlaiša go feta tekanyo? Morena o rile: “Ke be ke emetše gore setšhaba sa ka se nkgopele keletšo, eupša sona sa se nkgopele. Ke be ke letetše gore ba nkhwetše, eupša bona ba se nnyake. Ge nkabe setšhaba se se nthapele, ke be ke tla se fetola ka re: ‘Ke nna yo, ke tla le thuša.’ Fela bona ba ile ba se ke ba nthapela. Ka mehla ke be ke itokišeditše go amogela setšhaba se sa ka sa go ngangabala, se se dirago tše mpe gape se itšeelago ka tsela ya sona. Ba fela ba nthumola ba sa lewe ke dihlong. Ba dira dihlabelo tša medimo ya diswantšho ka dirapeng tše ba rego ke tše dikgethwa, gomme ba tšhuma le diorelo godimo ga dialetare tša medimo yeo ya diswantšho. Ba khukhuna le mabitla, ba lala ka maweng gore ba bolele le meoya ya bahu. Ba ja kolobe, ba nwa le moro wa nama ya go bola ya dihlabelo. Ba re go batho ba bangwe: ‘Emang gona moo, le se ke la re batamela! Rena re ba bakgethwa – ga se la swanela go re kgoma!’ Nna batho ba babjalo ba a nkgalefiša, nka se lese go ba tukela bogale bjalo ka mollo wo o sa timego. “Ke šetše ke feditše le pelo ka moo ke tlago ba otla ka gona, gomme ke ngwadile kotlo yeo ya bona. Nka se ba lese ba tšwela pele ka tsela ye, eupša ke tla ba otla ka mo go lekanego dibe tša bona le tša borakgolokhukhu ba bona. Ba tšhumetše medimo ya diswantšho diorelo dithabeng, mme ba nkgoboša ka go direla medimo yeo dihlabelo mebotong. Ka gona ke tla ba otla ka mo go lekanego tše ba di dirilego mabakeng a a fetilego.” Morena o re: “Ga go motho yo a lahlago ntšhuhla ka moka ya diterebe ge e sa na le diterebe tše di lokilego; a ka upša a dira beine ka tšona. Le nna setšhaba sa ka nka se se lahle ka moka – ke tla phološa ba ba ntlhankelago. Ke tla dira gore kgorong ya Juda go tšwe ditlogolo, gomme tšona di tla tšea naga ya ka ya dithaba. Batho ba ka ba ke ba kgethilego, ba ba ntlhankelago, ba tla dula moo. Ba tla nkhunamela gomme ba yo fudiša dihuswane tša bona molaleng wa Sharone ka bodikela, le dikgomo tša bona Moeding wa Matshwenyego ka bohlabela. “Eupša go lena le ntlogetšego, lena le itebatšago Sione, thaba ya ka ye kgethwa, gomme le tlišetšago Gade, modimo wa mahlatse, dikabelo tša dijo, le tšhollelago Meni, modimo wa tše di hlagelago motho, dikabelo tša seno, go ka se be bjalo. Se se tlago le hlagela ke go bolawa ka tšhoša, ka gobane mola ke le bitša ga se la nkaraba, le mola ke bolela ga se la theeletša. Le ile la dira tše mpe mme la ikgethela tše di sa nkgahlego. Ke ka baka leo ke le botšago gore bao ba ntlhankelago ba tla ba le dijo le dino tše di lekanego, eupša lena le tla bolawa ke tlala la swarwa le ke lenyora. Ba tla thaba, eupša lena le tla lewa ke dihlong. Ba tla duduetša ba thabile, eupša lena le tla lla le nyamile, la golola le ekwa bohloko. Ba ke ba kgethilego ba tla rogaka ka maina a lena. Nna, Morena, Mong wa bohle, ke tla le bolaya. Eupša bahlanka ba ka bona ke tla ba thea leina le lefsa. Nageng ya lena yo a kgopelago tšhegofatšo o tla kgopela go šegofatšwa ka leina la ka, nna Modimo, Mmotegi. Yo a enago o tla ena ka leina la ka, nna Modimo, Mmotegi. Matshwenyego a lena a mabakeng a a fetilego ke tla be ke a lebetše, ke se sa a gopola.” Morena o re: “Ke hlola legodimo le lefase le lefsa. Ditiragalo tše di fetilego di tla lebalelwa sa ruri. Thabang go ya go ile le hlabe mekgolokwane ka baka la tše ke di hlolago. Jerusalema ye mpsha ye ke e hlolago e tla tlala lethabo, gomme batho ba yona ba tla ipshina. Le nna ka noši ke tla goa ka lethabo ka baka la Jerusalema ka thabela batho ba yona. Go ka se kwagale motho yo a llago goba yo a hlabago mokgoši fao. Bana ba ka se sa hwa e sa le masea, gomme batho ba tla phela go fihlela e eba diputswa. Ba ba tlago fihlela lekgolo la mengwaga ba tla tšewa gore e sa le ba bafsa. Yo a hwago pele ga moo e tla be e le gore o rogakilwe ka baka la dibe tša gagwe. Motho o tla aga ntlo, a dula ka go yona – ya se dulwe ke yo mongwe; a bjala merara, a ja dikenywa tša yona – tša se lewe ke yo mongwe. Batho bao ba ka ke ba kgethilego ba tla phela nako ye telele bjalo ka mehlare. Ba tla ipshina ka tšeo ba di šometšego. *** Ba tla atlega mešomong ya bona, le bana ba bona ba ka se welwe ke dikotsi. Ke setšhaba sa ka; ke tla ba šegofatša gammogo le ditlogolo tša bona. E tla re pele ba thoma go rapela ka ba araba; ya re ba sa rapela ka phetha tše ba di kgopelago. Phiri e tla fula le kwanyana; tau ya fula bjang bjalo ka kgomo, le noga e ka se sa loma. Sione, thabeng ya ka ye kgethwa, go ka se dirwe tše mpe goba gwa gobatšanwa.” Morena o re: “Legodimo ke setulo sa ka sa bogoši, mme lefase ke bogato bja ka. Ka gona, ke ntlo mang ye le kago nkagela yona? Ke ngwako mang wo le kago nkagela ka dula ka go wona? Etse ke nna ka noši ke hlodilego legodimo le lefase, mme tša ba gona! Batho ba ba nkgahlago ke ba ba ikokobetšago gape ba itsholago, ke ba ba phethago melao ya ka. “Setšhaba se dira dihlabelo se sa ntšhetše. Ka gona, yo a dirago sehlabelo ka poo go nna o swana le yo a bolayago yo mongwe; yo a dirago sehlabelo ka kwanyana o swana le yo a robago mpša molala; yo a neelago kabelo ya bupi o swana le yo a dirago sehlabelo ka madi a kolobe; yo a ntšhumelago seorelo o swana le yo a khunamelago modimo wa seswantšho. Ba dira tše ba di ratago, gomme ba kgahlwa ke go khunamela medimo ya diswantšho ya go sišimiša. Ka gona ke tla dira gore ba welwe ke masetlapelo le dilo tše ba di tšhabago, ka gobane mola ke ba bitša ga go yo a ilego a nkaraba, goba a theeletša mola ke bolela. Ba ile ba dira tše mpe mme ba ikgethela tše di sa nkgahlego.” Theeletšang se Morena a se bolelago, lena le phethago melao ya gagwe: “Ka ge le ntheeletša ba bangwe ba gabolena ba le hloile mme ba a le kgetholla. Ba a le kwera ba re: ‘Nke Morena a bontšhe bogolo bja gagwe gomme a le phološe, gore re tle re le bone le thabile!’ Eupša ke bona beng ba ba tlago lewa ke dihlong! Theeletšang! Lešata lela le kwagalago motseng, modumo wola o tšwago ka Tempeleng, ke modumo wa Morena ge a lefiša manaba a gagwe ka baka la tše ba di dirilego! “Jerusalema e swana le mosadi wa go no belega a se a ka a šokwa, yo a tswalago morwa a se a ka a kwa bohloko. Kgane o gona yo a kilego a kwa goba a bona taba ya mohuta woo? Na badudi ba naga ba kile ba tswalwa ka tšatši le tee? Goba setšhaba sona se kile sa hlolega ka nako e tee? Jerusalema e ka se šokwe go ya kae pele setšhaba se tswalwa. Kgane le gopola gore nka thoma modiro wa go belegiša mme ka se o feleletše? A nka dira gore Jerusalema e thome go belega ka buša ka thiba popelo?” Go botšiša Morena Modimo. Thabang le Jerusalema, le hlabe mekgolokwane, lena bohle le ratago motse wo! Hlalalang kudu le wona, lena ka moka le kilego la o ilela! Le tla ipshina ka katlego ya wona, bjalo ka lesea le le nyanyago letswele la mmagolona la khora. Morena o re: “Ke tla le tlišetša boiketlo bjo bo sa kgaotšego, bjo bo swanago le noka ge e dula e ela meetse; mahumo a ditšhaba a tla elela go lena bjalo ka noka ye e falalago. Le tla swana le ngwana yo a nyantšhwago ke mmagwe, a pepulwa, a farwa difarong. Ke tla le homotša kwa Jerusalema, bjalo ka mosadi ge a homotša ngwana wa gagwe. Ge le bona tšeo di direga le tla thaba. Le tla phela gabotse bjalo ka bjang bjo bofsa. Ke moo nna, Morena, ke tlago bontšha bahlanka ba ka maatla a ka ka go ba hlakodiša, ka ba ka ba bontšha ka moo ke galefetšego manaba a ka ka gona.” Morena o tla tla ka mollo le ka dikoloi tša gagwe tša ntwa tša lebelo bjalo ka ledimo, gore a tle a laetše ka moo a tukelago manaba a gagwe bogale ka gona. O tla itefeletša ka batho bohle ba lefase. Ba a ba bonago molato o tla ba bolaya ka tšhoša le ka mollo, mme go tla hwa ba bantši. Morena o re: “Bao ba itlhwekišago ka moo moetapele wa bona a ba botšago ka gona, gore ba yo khunamela medimo ya diswantšho ka dirapeng tše ba rego ke tše dikgethwa, bao ba jago kolobe le magotlo le tše dingwe dilo tša go šišimiša, ba tla bolawa mmogo. Ke tseba megopolo ya bona le ditiro tša bona. Nako e etla yeo ka yona ke tlago kgoboketša ditšhaba tšohle tše di bolelago maleme a mehutahuta. Ge ba kgobokana ba tla bona maatla a ka, gomme ba tseba gore ke nna ke ba otlago. “Eupša mašaledi a bona a mangwe ke tla a roma ditšhabeng le bathong ba mabopong a kgole ba ba sešogo ba kwa setumo sa ka, le gona ba sešogo ba bona maatla a ka: Ke tla ba roma Tarshishe, Libia, Lidia le bakgoni ba yona ba mesebe, le Tubale, le Gerike. Ba tla begela ditšhaba tšeo bogoši bja ka. Ba tla tliša banna ba gabolena ka moka ba etšwa ditšhabeng ba abetšwe nna. Ba tla ba tliša thabeng ya ka ye kgethwa kwa Jerusalema ba ba nameditše dipere le dimeila le dikamela le dikoloi tša ntwa le dikoloi tše dingwe, go no swana le Baisraele ge ba tliša dikabelo tša bupi Tempeleng ka dibjana tše di hlwekilego. Ba bangwe ba bona ke tla ba bea baprista le Balefi. “Bjalo ka ge legodimo le lefsa le lefase le lefsa tše ke di hlolago e tla ba tša neng le neng di hlokometšwe ke nna, ka wona mokgwa wo mobjalo ditlogolo tša lena le leina la lena e tla ba tša go ya go ile. Ka monyanya wo mongwe le wo mongwe wa Lebalana le ka Sabatha se sengwe le se sengwe batho ba ditšhaba tšohle ba tla tla go nkhunamela ka Tempeleng ya ka Jerusalema.” O realo, Morena. “Ge ba tloga ba tla bona ditopo tša bao ba ilego ba ntsogela maatla. Diboko tše di di jago di ka se tsoge di hwile, le mollo wo o di tšhumago o ka se tsoge o timilwe. Go bona ditopo tšeo go tla šišimiša batho ka moka.” Puku ye e laodiša tše di boletšwego ke Jeremia, morwa wa Hilkia. Hilkia yena e be e le yo mongwe wa baprista ba motse wa Anathote, nageng ya Benjamene. Morena o boletše le Jeremia ka ngwaga wa lesome le metšo ye meraro wa ge Josia, morwa wa Amone, e le kgoši ya Juda, a tla a bolela le yena gape mola Joyakime, morwa wa Josia, e le kgoši. O be a fela a bolela le yena go fihlela mafelelong a ngwaga wa lesome le motšo o tee wa pušo ya Tsedekia, morwa wa Josia. Ka kgwedi ya bohlano ya ngwaga woo batho ba Jerusalema ba ile ba thopša. Morena o ile a re go nna: “Ke tsebile pele ke go bopa gore o tla ba eng, ka go kgethwafatša pele o tswalwa ke mmago, ka go dira moprofeta wa ditšhaba.” Nna ka mo fetola ka re: “Aowii, Morena, Mong wa bohle, nna ga ke kgone polelo ka gobane ke sa le yo mofsa.” Eupša Morena a re go nna: “O se ke wa re o sa le yo mofsa, gobane o tla ya go batho ka moka bao ke go romago go bona, wa ba botša tšohle tše ke go laelago tšona. O se ke wa ba tšhaba, ka gobane ke tla ba le wena gore ke go šireletše. Ke realo, nna, Morena!” Ke moka Morena a obeletša letsogo, a nkgoma molomo, a re go nna: “Bona, mantšu a o swanetšego go a bolela ke a tsenya ka molomong wa gago. Lehono ke go fa maatla a go hlahlamolla le go uša, a go fediša le go menola, a go aga le go hloma ditšhaba le mebušo.” Morena a mpotšiša a re: “Na o bonang?” Nna ka mo fetola ka re: “Ke bona lekala la mooka, mophafogapele.” Morena a re: “O bone gabotse. Ke dula ke phafogetše go phetha tše ke di boletšego.” Ke mo Morena a boletšego le nna la bobedi a re: “Na o bonang gape?” Ka mo fetola ka re: “Ke bona pitša ye e belago e le ka leboa e sekametše ka thoko yeno.” Yena a re go nna: “Masetlapelo a tla tšhologela godimo ga bohle ba ba dulago mo nageng ye a etšwa ka thoko ya leboa, ka gobane ke bitša ditšhaba tša mebušo ka moka leboa gore di tle. Magoši a tšona a tla hloma ditulo tša ona tša bogoši masorong a dikgoro tša Jerusalema le go dikologa merako ya yona, le metseng ye mengwe ya Juda. Ke tla otla setšhaba sa ka ka baka la dibe tša sona; se ntlogetše sa direla medimo ye mengwe dihlabelo, sa itirela medimo ya diswantšho gomme sa e obamela. Wena itokiše, o yo ba botša tšohle tše ke go laelago gore o ba botše tšona. O se ke wa ba boifa; ge o ka ba boifa, gona ge o na le bona ke tla go boifiša go fetiša. “Bjale bona, mang le mang mo nageng ye o tla lwa nago – magoši a Juda, bakgomana, baprista le setšhaba. Eupša lehono ke go fa maatla a go ba kgotlelela: O tla ba bjalo ka motse wo o ageleditšwego ka morako, goba kokwane ya tshipi, goba ka leboto la mphiri. Ba ka se go fenye ka gobane ke tla ba nago gore ke go šireletše. Ke realo, nna, Morena.” Morena o ntaetše gore ke yo bega molaetša wo Jerusalema gore o kwewe ke batho ka moka. Morena o re: “Ke gopola ka mo le bego le mpotegela ge le sa le ba bafsa, ka mo le bego le nthata ge re sa tšo nyalana, ka mo le bego le ntatela go putla lešoka moo go sa bjalwego selo. Le be le le ba ka fela, lena Baisraele; le be le le bjalo ka dithakangwaga tša dibjalo tša ka. Bohle ba ba le kwešago bohloko ba be ba ikobela molato, ba welwa ke madimabe. Ke realo, nna, Morena.” Kwaang molaetša wa Morena, lena ditlogolo tša Jakobo, lena dikgoro tša Baisraele. Morena o re: “Borakgolokhukhu ba lena ba mpone molato ofe, ge ba bile ba ntlogela ba yo khunamela medingwana ya lefeela, mme le bona ya ba mafeela? Ga se ba ka ba botšiša ba re: ‘O kae Morena yo a re ntšhitšego nageng ya Egepeta, a re hlahla ge re putla lešoka, naga ya lesehla, ya maope, naga ya go omelela, ya go šiiša, moo go sa fetego motho, moo go sa phelego motho?’ Ke le tlišitše nageng ye e nonnego gore le tle le ipshine ka dibjalo tša yona, le ka tše dingwe tša yona tše dibotse. Eupša ge le fihla le tšhilafaditše naga ya ka, naga ye ke le filego yona la e dira makgapa. Baprista ga se ba botšiša ba re: ‘Morena o kae?’ Batsebi ba melao ya ka ba be ba sa ntsebe. Babuši ba be ba gana go bušwa ke nna, baprofeta ba porofeta ka go hlohleletšwa ke Baale, gomme ba khunamela medingwana ya lefeela.” Morena o re: “Ka gona ke tla le bona molato gape, ka o bona le ditlogolo tša lena. Tshelang lewatle le ye sehlakahlakeng sa Saeprose, le yo bona ge eba taba ya mohuta wo e kile ya direga, le be le rome batho nageng ya Kedara ba yo lebelediša, gore na se gona setšhaba se se kilego sa bapatša medimo ya sona, le ge e be e se medimo ya nnete. Eupša setšhaba sa ka sona se mpapaditše, nna, Modimo wa sona wa letago, sa tšea medimo ya lefeela. Ka gona, lena magodimo, tšhogang taba ye, le thothomele kudu, ka gore setšhaba sa ka se dirile dibe tše pedi: Ba ntahlile, nna, mothopo wa meetse a a phedišago, ba iphatela didiba, didiba tše di palegago, tša se be le meetse le gatee.” “Kgane Baisraele ke makgoba, goba ba tswaletšwe bokgobeng? Bjale ba reng ba thopilwe? Manaba a bona a ba rorela bjalo ka ditau, a ba rorela kudu; ba fetošitše naga ya bona leganata, le metse ya bona ke mašope, ga e sa na badudi. Ee, batho ba Memfise le ba Tagpanese ba ba hutše. Lena Baisraele, ke lena le itlholetšego dilo tše ka go mphuralela, nna, Morena Modimo wa lena, ge ke be ke le hlahla tseleng. Go tla le thušang go ya Egepeta go nwa meetse a Naele? Le tla boelwa ke eng ge le ile Asiria go nwa meetse a Yufratese? Bobe bja lena beng ke bjona bo tlago le otla, gomme go kgeloga ga lena go tla le tšwa. Le tla tseba la ba la bona gore ke phošo, ebile go baba bjang go furalela nna, Morena Modimo wa lena, le go se sa mpoifa. Ke realo, nna, Mong wa bohle, Morena Ramaatlaohle.” Morena Ramaatlaohle o re: “Lena Baisraele, ke kgale le nnyatša, le gana go ntlhompha le go nkhunamela. Mebotong yohle ye e phagamego le ka fase ga mehlare yohle ye metala le khunametše medimo ya tswala. Ke le bjetše boka morara wo mobotsebotse wa go tšwa peung ye kaonekaone. Bjale go tlile bjang gore le fetoge le be bjalo ka morara wo o bodilego wa naga? Le ge le ka hlapa le tiišitše ka disepe tša mehutahuta, sepatso sa molato wa lena ke tla no se bona. Ke realo, nna, Morena. Le reng le re ga se la itšhilafatša, ebile le re ga se la ka la khunamela boBaale? Lebelelang ka mo le ilego la itshwara ka gona ka moeding; lemogang tše le di dirilego. Le be le swana le kamela ya sethole ye e palešitšego mme e tšhakatšhaka, e kitimela lešokeng, e dupa moya e lemaletšwe. Ke mang yo a ka e kgonago ge e palešitše? Dipoo tše di e nyakago ga di hlwe di itapiša ka go e šala morago; e ipha tšona ka nako ya yona ya go goelwa. Lena Baisraele, le se hlagatše dieta tša lena, goba la ikomeletša megolo le šetše medimo e šele morago. Eupša lena le re: ‘Aowa, re ka se lese! Medimo e šele re e ratile, gomme re tla no e šala morago.’ ” Morena o re: “Bjalo ka ge lehodu le lewa ke dihlong ge le hweleleditšwe, le tšhaba sa Israele se tla lewa ke dihlong – magoši a bona le bakgomana, le baprista ba bona le baprofeta, bona ba rego go kota: ‘O tatagorena,’ ba rego go leswika: ‘O re tswetše.’ Se se tla direga ka ge ba mphuraletše, ba sa sokologele go nna. Eupša ge ba le mathateng ba re: ‘Tlaa o re hlakodiše!’ “E kae medimo yela le itiretšego yona? Ge le le mathateng a e be yona e le hlakodišago, ge eba e a kgona, gobane le na le medimo ya go lekana le metse ya lena ka bontši, lena batho ba Juda. Le reng le mpea molato? Bohle le ntsogetše maatla. Ke le otlile, gwa se thuše selo. Le ganne ke le kgala. Bjalo ka tau ye e gaketšego le bolaile baprofeta ba lena ka tšhoša. Lena setšhaba sa Israele, ekwang se ke le botšago sona. Kgane ke be ke le bjalo ka lešoka mo go lena, ke swana le naga ya lešobohlo? Bjale ge, lena tšhaba sa ka, le reng le nyaka go itirela se le se ratago, le re le ka se boele go nna? Kgane lethari le ka lebala magakabje a lona, goba ngwetši e ka lebala lešira la yona? Eupša setšhaba sa ka sona ke kgale kudu se ntebetše. Ga ke re le tseba gabotse mo metlabo ya lena le ka e hwetšago gona! Ke ka baka leo le tlwaetšego go dira tše mpe. Merumo ya diaparo tša lena e thankgetše madi a bahlaki ba ba se nago molato, ba le se la kago la ba swara ba šwahlela ka dintlong tša lena. “Le ge go le bjalo le re: ‘Rena ga re ne molato; ruri, Morena ga a sa re galefetše.’ Eupša nna, Morena, ke tla le sekiša ka gobane le re ga se la dira dibe. Ge le sa hwetše thušo setšhabeng se sengwe, le geremela go se sengwe. Egepeta e tla le swabiša, bjalo ka ge le ile la swabišwa ke Asiria. Le lena le tla boa Egepeta le rwele megono. Ba le ba botilego ke ba ganne, nna, Morena; le ka se holege ka selo sa go tšwa go bona.” Morena o re: “Ge monna a ka hlala mosadi wa gagwe, gomme mosadi yoo a mo tlogela a nyalwa ke yo mongwe monna, monna yola a ka se sa kgona go mo tšea gape. Seo se ka tšhilafatša naga e le ruri. Eupša lena Baisraele, le robetše le metlabo ye mentši, gomme bjale le nyaka go boela go nna! Lebelelang kua godimo ga meboto. Kgane go na le felo mo metlabo ya lena e sego ya ka ya robala le lena? Le be le e lalela ka thoko ga tsela bjalo ka Moarabia ge a lalela batho lešokeng. Le kgotletše naga ka bofebe le bokgopo bja lena. Ke ka baka leo le bego le hloka dipula tša matlorotloro, le ditsheola tša selemo di sa ne. Ebile le be le swana le sefebe, le sa inyatše. Le be le se na dihlong. “Gomme ke gonabjale mo le rego go nna: ‘O Tatagorena, gomme o re ratile go tloga bjaneng bja rena. O ka se fele o re befeletšwe; o ka se re galefele go ya go ile.’ Ke seo le bego le se bolela, lena Baisraele, gomme go dira tše mpe e le wona mokgwa wa lena.” Mola Josia e le kgoši Morena o ile a re go nna: “Afa o bone tše Baisraele bao ba bakgelogi ba bego ba di dira? Ba be ba eya dithabeng tšohle tše di phagamego, le ka fase ga mehlare yohle ye metala, ba fihle ba febe. Ke be ke gopola gore ge ba seno dira dilo tše ka moka ba tla boela go nna. Eupša ga se ba boa, gomme le batho ba Juda, bona bongwanabobona ba go se botege, ba di bone. Ba bone le gore ke hladile Baisraele ba bakgelogi, ka ba fa lengwalo la tlhalo ka baka la bootswa bja bona. Eupša batho ba Juda, bona bongwanabobona ba go se botege, ba se boife, le bona ba dira tša bofebe. Ba tšhilafaditše naga ka go feba ba sa inyatše, ba khunamela maswika le dikota, ya ba gona go otswa ga bona. Ka morago ga tšeo ka moka batho ba Juda ba go se botege, bona bongwanabo Baisraele, ba itira tše nkego ba boela go nna, mokagona e se ka dipelo tša bona ka moka. Ke realo, nna, Morena.” Ke moka Morena a mpotša gore batho ba Israele ba bakgelogi ga ba na molato go swana le ba Juda ba go se botege. A mpotša gore ke yo kwalakwatša molaetša ke lebeletše leboa, ke re: Morena o re: “Lena batho ba Israele ba bakgelogi, sokologang. Nka se sa le galefela, ka gobane ke na le kgaugelo; ga ke galefe go ya go ile. Lena dumelang fela gore le na le molato wa go kgeloga go Morena Modimo wa lena. Ipoleleng gore le be le khunamela medimo e šele ka fase ga mehlare yohle ye metala, le gore le be le sa ntlhomphe. Ke realo, nna, Morena. “Lena setšhaba sa bakgelogi, sokologang; ke nna Mong wa lena. Ke tla tšea o tee wa lena motseng wo mongwe le wo mongwe, ka tšea ba babedi kgorwaneng ye nngwe le ye nngwe, gomme ka le iša thabeng ya Sione. Ke tla le fa babuši ba go le buša ka mo ke nyakago ka gona, gomme ba tla le buša ka bohlale le tlhaologanyo. E tla re ge le šetše le atile mo nageng yeo, batho ba se sa bolela ka Polokelo ya Kgwerano. Ba ka se sa nagana ka yona goba ba e gopola; le go e nyaka ba ka se sa e nyaka, le gona ba ka se dire ye nngwe. Ka nako yeo Jerusalema e tla bitšwa ‘Setulo sa bogoši sa Morena’, gomme ditšhaba tšohle di tla kgobokana gona go nkhunamela. Ba ka se sa ngangabalela go dira tše mpe tše ba di ratago. Batho ba Israele ba tla kopana le ba Juda, gomme ba tla boa mmogo ba tšwa nageng ya ka leboa ba boela nageng ye ke e abetšego borakgolokhukhu ba lena gore e be lefa la bona.” Morena o re: “Lena Baisraele, ke be ke ratile go le tšea le le bana ba ka, ka le fa naga ye e kgahlišago, naga ye botsebotse go phala dinaga tša ditšhaba tšohle. Ke be ke gopotše gore le tla mpitša Tatagolena, mme la se sa tsoga le ntlhanametše. Eupša ga se la mpotegela, le editše mosadi wa go se botegele monna wa gagwe. Ke realo, nna, Morena.” Go kwagala sello kua mebotong: ke sa setšhaba sa Israele se lla se rapela, ka gobane ba phetše bophelo bjo bobe, gomme ba lebetše Morena Modimo wa bona. Morena o re: “Lena setšhaba sa bakgelogi, sokologang, ke le alafe bolwetši bja bokgelogi bja lena.” Etse le re: “Ke rena ba, re tla go wena, gobane o Morena Modimo wa rena. Go loba medimo ya diswantšho kua mebotong le dithabeng ka mašata ga se gwa re thuša selo. Ke Morena Modimo wa rena yo a phološago Baisraele. E sa le go tloga bjaneng bja rena Baale, modimo wa go leša dihlong, a kwametša tšohle tše di katanetšwego ke borakgolokhukhu ba rena – dihuswane tša bona, le mehlape ya bona, barwa le barwedi ba bona. A re duleng fase re inyatšeng, kgobogo e be kobo ya rena, gobane re fošeditše Morena Modimo wa rena, rena gotee le borakgolokhukhu ba rena; re be re sa hlomphe Morena Modimo wa rena.” Morena o re: “Lena setšhaba sa Israele, ge le nyaka go sokologa, gona sokologelang go nna. Ge le ka tloša medimo ya lena ya diswantšho ya go šišimiša ka se sa e bona mme la se sa kgeloga, ge le ikana le tiišitše le eya ka toka le sa bolele maaka le re: ‘Ka Morena yo a phelago’, gona ditšhaba di tla šegofatšana di bitša leina la ka, tša ikgantšha ka nna.” Morena o re go batho ba Juda le go badudi ba Jerusalema: “Kgathang megola ya lena, le se ke la bjala ka mašohlošohlong a meetlwa. Ineeleng nna, Morena, le se sa ngangabala, lena batho ba Juda le lena badudi ba Jerusalema. Ge le ka se dire bjalo pefelo ya ka e tla lauma bjalo ka mollo ka baka la dilo tše mpe tše le di dirilego. E tla lauma, gomme ya hloka motimi.” Begang mo nageng ya Juda, go kwagale le Jerusalema, le re: “Letšang phalafala nageng ka moka! Hlabang mokgoši, le re: ‘Kgobokanang, re tšhabeleng metseng ye e ageleditšwego ka merako!’ Hlomang difoka go šupa tsela ya go ya Sione! Tšhabelang metseng! Le se diege! Ke tliša madimabe le bošula bjo bogolo go tšwa leboa. Bjalo ka tau ye e tsupologago boutamong, mofedišaditšhaba le yena o swere tsela, o tlilo senya naga ya lena. Metse ya lena e tla tlogelwa e le mašope, gomme ga go yo a tlago dula go yona. Ka gona aparang tša go ilela, le lle, le golole, ka gore pefelo ye e šiišago ya Morena ga se ya re tlogela.” Morena o re: “Tšatšing leo magoši le bakgomana ba tla nolega moko; baprista ba tla tšhoga, le baprofeta ba tla tlabega.” Ke mo ke ilego ka re: “Jonna, Morena, Mong wa ka, o forile setšhaba se e le ruri, le batho ba Jerusalema! O rile go tla ba le khutšo, eupša ke tšhoša ye e lego megolong ya bona.” Mehleng yeo setšhaba se le batho ba Jerusalema ba tlilo botšwa gore go foka phefo ye e fišago ya go tšwa mebotong ya lešoka e fokela go bona. E ka se be phefo ya go hlokola le go fefera. Phefo yeo ya go tla ka taelo ya Morena e tla ba ye kgolo kudu go feta ye. Bjale ke Morena ka noši yo a sekišago setšhaba sa gagwe. Bonang, manaba a rotoga bjalo ka maru. Dikoloi tša ntwa nke ke sesasedi, le dipere tša bona ke maphefo go feta ntšhu. Re lahlegile! Re hwile! Hlatswa bokgopo pelong ya gago, wena Jerusalema, gore o tle o phologe. O tla feletša kae le go nagana tše mpe? Mokgoši wa taba tše mpe o kwagala o etšwa motseng wa Dane, o hlabja o etšwa le nageng ya Efraime ya dithaba, o re: Begelang ditšhaba, le tsebišeng le batho ba Jerusalema le re badikanetši ba etla ba tšwa nageng ya kgole. Ba tla kgeregela metse ya Juda ka megobo, gomme ba tla dikanetša Jerusalema bjalo ka baleti ba tšhemo, ka gobane batho ba gona ba gana go bušwa ke Morena. O realo, yena Morena. Lena batho ba Juda, le ipaketše taba tše ka maitshwaro a lena le ka ditiro tša lena. Ke bokgopo bja lena bjo bo le hloletšego ditlaišego tše, bjo bo le tsetsemeditšego pelo. Jonna, joo! Ke kudupantšhwa ke go lakalela! Jonna, bohloko bja pelo ya ka! Pelo ya ka e thebatheba ka maatla! Ga ke kgone go homola ka gore ke kwa phalafala e galagala, le mokgoši wa ntwa. Madimabe a tla a šalane morago; naga yohle e hlagaditšwe. Mešaša ya rena e thubja ka bjako; re loba mekutwana ya rena. Ke tla bona sefoka sa ntwa go fihla neng, le go kwa le kgalagalo ya phalafala? Morena o re: “Setšhaba sa ka se dira tša botlaela; ga ba ntsebe. Ba swana le bana ba ditlatla; ga ba ne kwešišo. Ke bakgoni ba tše mpe, ba go palelwa ke tše di lokilego.” Ka lebelela lefase – le be le sa dulwe, le se na selo; ka lebelela leratadima – le be le se na seetša. Ka lebelela dithaba – di be di šikinyega, le meboto yohle e roromela. Ka bona gore ga go na batho; ešita le dinonyana di be di fofile. Naga ya go nona e be e fetogile leganata; metse ya yona e le mašope ka baka la kgalefo ye e šiišago ya Morena. Morena o rile naga ka moka e tlilo ba lešoka, eupša a ka se e fediše taa. Ke ka baka leo lefase le tlilogo ilela, legodimo la fifala. Go boletše Morena. O feditše le pelo gomme a ka se hlaname, goba a boela morago. Ge boradipere le boramesebe ba hlaba mokgoši, badudi ba metse yohle ba a tšhaba. Ba bangwe ba nyabanyabela ka dithokgweng, bangwe ba pharihlela magageng. Metse yohle e a ngalogwa, gomme ga go dule motho go yona. Jonna, Jerusalema, o lebanwe ke go thubja! O dirang? O reng o apara bohwibidu? O reng o ikgabiša ka dikgabišo tša gauta? O reng o tlola mahlo? Owaa, go ikgabiša ga gago ke ga lefeela! Metlabo ya gago e a go nyatša, gomme e nyaka go go bolaya. Ke kwa sello boka sa mosadi yo a šokwago, sello boka sa mosadi yo a itšibolago. Ke sello sa Jerusalema, e a fegelwa, e otlolla matsogo e re: “Ke a hwa! Ke hloka tšhireletšo ke le pele ga bampolai!” Šikang le mekgotha ya Jerusalema! Lebelelang ka gohle, le iponeleng ka bolena! Išang mahlo mapatlelong, le bone ge eba le ka hwetša motho o tee yo a dirago tše di lokilego le gona a tshephegago. Ge le ka mo hwetša, Morena o tla swarela Jerusalema dibe tša yona. Le ge le ikana le re: “Ka Morena yo a phelago”, le ikana ka maaka. Kgane Morena ga a nyake botshephegi? O le otlile, fela la se kwe bohloko; a nyaka go le fediša, eupša la no gana go kgalwa. Le be le ithatafaditše dipelo, le gana go sokologa. Ke mo ka pelong ke ilego ka re: “Ba ke bathwana ba go hloka tsebo. Ba dira tša botlaela; ga ba tsebe se Morena a se nyakago, se Modimo wa bona a nyakago gore ba se dire. Ke tla ya go ba bagolo ka bolela le bona. Gape bona ba tseba se Morena a se nyakago, se Modimo wa bona a nyakago gore ba se dire.” Eupša bohle ba ganne go bušwa ke Morena, gomme ba gana go mo theeletša. Ke ka baka leo ditau tša go tšwa ka sethokgweng di tlago ba bolaya; diphiri tša go tšwa lešokeng di tla ba kgabutlanya, le dinkwe di tla ba lalela metseng ya bona. Yo a tšwelago ka ntle o tla kgabutlanywa, ka gobane ke gantši ba tsogela Morena maatla, le go kgeloga ga bona go be go atile. Morena a botšiša a re: “Ke ka baka lang ke swanetše go swarela setšhaba sa ka dibe tša sona? Gape ba ntlhanametše ba ikana ka medimo ye e lego lefeela. Ke ba atlile, eupša bona ba no otswa, ba ehlwa ka malapeng a digwebakathobalo. Ba be ba le bjalo ka dipere tša dipoo tše di gakalelago go goela; mongwe le mongwe a duma mosadi wa yo mongwe. Nka nama ka se ba otlele bohlola bjo, ka se itefeletše ka setšhaba sa mohuta wo? Ke tla laela manaba go tsena ka dirapeng tša merara tša setšhaba sa ka gore a reme merara, fela e sego go e feleletša. Ke tla ba botša gore ba kgaole makala a merara, ka gore makala ao ga se a ka. Batho ba Israele le ba Juda ba ntlhanametše e le ruri. Ke realo, nna, Morena.” Setšhaba sa Morena se mo latotše sa re: “A ka se dire selo. Re ka se be mathateng; re ka se welwe ke ntwa goba tlala.” Ba boletše gore baprofeta ke difafatlane fela, mme tše ba di bolelago ga se molaetša wa Morena. A matšhošetši a bona a wele bona beng! Ke ka baka leo Morena Modimo Ramaatlaohle a rego go nna: “Ka ge batho ba ba boletše taba tša mohuta wo, ke tla dira gore mantšu a ka e be mollo ka molomong wa gago. Batho e tla ba dikgong, gomme mollo o tla ba ja. “Lena setšhaba sa Israele, ke tliša setšhaba sa go tšwa kgole go tlo le hlasela. Ke setšhaba se se tiilego, setšhaba sa kgale, setšhaba seo polelo ya sona le sa e tsebego gape le sa e kwešišego. Boramesebe ba bona ke ditsebi, ka moka ga bona ke bahlabani ba maatla. Ba tlilo kwametša tše le di bunnego le dijo tša lena; ba tlilo bolaya barwa le barwedi ba lena, le dihuswane le dikgomo tša lena, ba ba ba senya merara le mego ya lena. Metse ya go ageletšwa ka merako ye le e botilego e tla pšhatlaganywa ke madira a bona. “Le ge go le bjalo, le mehleng yeo nka se feleletše setšhaba sa ka molokwanarite. Ge ba botšiša gore ke ka baka lang nna, Morena Modimo wa lena, ke dirile dilo tše ka moka, o ba botše gore bjalo ka ge ba ile ba ntlhanamela mme ba hlankela medimo e šele nageng ye e lego ya bona, ka mokgwa wo mobjalo ba tlilo hlankela batho ba šele nageng ye e sego ya bona.” “Tsebišang ditlogolo tša Jakobo, begelang setšhaba sa Juda le re: Ekwang taba ye, lena setšhaba sa ditlatla se se se nago tlhaologanyo, se se nago le mahlo, eupša se sa bone; se nago le ditsebe, eupša se sa kwe. Na ga se la swanela go ntšhaba? Kgane ga se la swanela go thothomela pele ga ka? Etse ke nna ke dirilego lešabašaba mollwane wa lewatle, legora la go ya go ile leo lewatle le ka se kego la le tshela. Lewatle le ge le ka gakala bjang, le ka se tshele lešukuhledi le; maphoto le ge a ka poruma, a ka se le šwahle. Eupša setšhaba se sona se ngangabetše se gana go bušwa ke nna; se arogile sa ntlogela. Ga ba sa gopola go ntlhompha, nna, Morena Modimo wa bona, ke ba nešetšago dipula, kgogolamooko le tsheola ka nako ya tšona, ke ba tlišetšago sehla sa go buna ngwaga ka ngwaga. Dikarogo le dibe tša bona di ba hlokišitše dilo tšeo tše dibotse. “Mo setšhabeng sa ka go na le batho ba kgopo; ba lalela motho bjalo ka barei ba dinonyana, eupša ya bona melaba ke ya go thea batho. Bjalo ka ge serobe se tlala dinonyana, dintlo tša bona le tšona di tletše tše ba di thopilego. Ke ka baka leo e lego ba maatla, ba bahumi, ba go nona le go phadima. Mediro ya bona ye mebe ga e na magomo. Ga ba šetše gore ditšhiwana di direlwe ka toka, fela ba no atlega. Tshekong ga ba emele bahloki. “Eupša nna, Morena, nka napa ka se ba otlele dilo tše dibjalo, ka se itefeletše ka setšhaba sa mohuta wo? Go direga taba ya go selekiša, ya go tena mo nageng: Baprofeta ba porofeta maaka, baprista ba buša go ya ka taelo ya baprofeta, gomme setšhaba sa ka se rata gona. Eupša ba tlilo dirang ge tšohle tšeo di fihla mafelelong?” Lena Babenjamene, tšhabang, le tšwe Jerusalema, le itote, le yo letša phalafala kua Tekoa, gomme le gotše mollo e be sešupo sa ntwa kua Bethe-Kereme, gobane masetlapelo le tshenyo ye kgolo di etla di tšwa leboa. Motse wa Sione o swana le morwedi yo mobotse wa seithati, fela ke tla o fediša; magoši le madira a ona ba tla tla go o hlasela. Ba tla hloma mešaša ya bona go dikologa motse, gomme yo mongwe le yo mongwe o tla šwahlela karolo ye nngwe ya wona. Magoši ao a tla re: “Itokišetšeng go hlasela Jerusalema! Itokišeng, re yo hlasela mosegare!” Eupša a mangwe a tla re: “Aowii, tšatši le šetše le thapame, le meriti ya mathapama e lelefetše. Itokišeng, re tle re hlaseleng bošego, re pšhatlaganyeng dibo tša motse wo.” Morena Ramaatlaohle o laetše magoši a gore a reme dihlare, a kgobele mokgobo wa mobu go dikanetša Jerusalema. A re: “Wo ke motse wo o swanetšego go otlwa, ka gobane o tletše batho ba go gatelela ba bangwe. Bjalo ka ge meetse a sediba a sa pšhe, bobe bja Jerusalema le bjona bo ka se fele. Ke kwa šiši le tshenyo mo motseng; ke bona fela malwetši le dintho. Lena batho ba Jerusalema, eletšegang, go sego bjalo gona ke tla le ngala, ka fetoša motse wa lena mašope, felo moo go sa dulego motho.” Morena Ramaatlaohle a re go nna: “Mašaledi a setšhaba sa Israele a tla hlakolwa dithoto tša ona a ba bjalo ka serapa sa merara se se kgobišitšwego. Ka gona o hlakodiše bohle ba o ka kgonago go ba hlakodiša.” Nna ka mo fetola ka re: “Ke mang yo a kago ntheeletša ge ke bolela nabo ke ba eletša? Ba thibane ditsebe mme ga ba kgone go theeletša; ba nyatša lentšu la gago, ga ba le thabele. Ka gona, Morena, le nna ke ba galefetše go no swana nago, gomme ga ke sa kgona go itshwara.” Ya ba Morena o re go nna: “Hlatšetša kgalefo ya ka godimo ga bana mebileng, ešita le godimo ga dihlopha tša masogana. Banna le basadi ba bona ba tla thopša, diputswa ešita le bona batšofaditšofadi. Magae a bona gotee le mašemo le basadi ba bona di tla fiwa bangwe. Ke tlilo otla badudi ba naga ye, ka gobane ka moka ga bona, ba go nyatšega le ba go hlomphega, ke ba megabaru; le baprofeta le baprista ba hlalefetša batho. Ba dira tše nkego dintho tša setšhaba sa ka e dio ba go kgoboga fela. Ba re: ‘Tšohle di lokile,’ etšwe go se go loke selo. Ba be ba swanetše go inyatša ka ge ba dirile dilo tše tša go šišimiša. Fela le gatee ga ba inyatše, le dihlong ga ba natšo. Ka gona, ba tla wa ba etša ba ba welego; ge ke ba otla, e tla napa ya ba pheletšo ya bona. Ke realo, nna, Morena.” Morena o rile go setšhaba sa gagwe: “Emang magahlanong a ditsela le lebeleleng. Botšišang batho ditsela tša bogologolo, le kgethe ye kaonekaone. Le tšeeng yona, gomme le tla phela le iketlile.” Fela bona ba re: “Aowa, ga re nyake!” Gomme Morena a bea balebeledi gore ba theeletše mollo wa phalafala. Le bona ba re: “Ga re nyake.” Ka gona Morena a re: “Theeletšang, lena ditšhaba, tsebang se se tlago hlagela setšhaba sa ka lena ka moka. Theeletša, wena lefase! Ke fediša setšhaba se e le kotlo ya maanonyana a bona, ka gobane ga se ba phetha tše ke ba laetšego tšona, le thuto ya ka ba e ganne. Kgane seorelo sa go tšwa Sheba se ba ntlišetšago sona, goba senkgabose sa go tšwa lefaseng la kgole ke na le taba natšo? Dihlabelo tša bona tša ditšhungwakamoka ga ke di amogele, le tše dingwe dihlabelo tša bona ga di nkgahle. Ka gona, setšhaba se ke tla se beela dikgopi tša go ba kgopa. Botatagobana le barwa ba bona, le baagišani le bagwera ba bona ba tla hwa.” Morena o re: “Setšhaba se se tšwago nageng ye nngwe ka leboa se etla; morafe wo maatla kua kgolekgole o itokišetša ntwa. Ba itlhamile ka mesebe le marumo; ke ba sehlogo, ga ba na lešoko. Ba kwagala bjalo ka lewatle le le bopago ge ba nametše dipere tša bona. Ba itokišeditše go lwa le wena, motse wa Sione.” Batho ba Jerusalema ba re: “Ditaba tšeo re di kwele, gomme re rephile matsogo; re aparetšwe ke tlalelo, re šokwa wa mosadi ge a belega. Le se tšwele ka ntle nageng, goba la sepela ditseleng, ka gobane manaba a rena a itlhamile ka dihlabano gomme a re tšhoša ka gohle.” “Lena setšhaba sa gešo, aparang tša go ilela, le pshikologeng meloreng. Kgitlang sello se bohloko bjalo ka yo a hwetšwego ke morwagwe a nnoši, ka gobane yo a tlilego go re fediša o tla re hlasela ka bjako. Wena Jeremia, ke go beile mohlahlobi wa setšhaba sa ka; ke tla go tiiša. O nyakišiše o be o hlahlobe tše ba di dirago. Bohle ke dinganganganga, ba tšama ba senya batho maina, ke ba thata bjalo ka mphiri le tshipi, bohle ke ba kgopo. Mouba o butšwetša ka maatla go tšhuma morodi ka mollo; motološi o šomela lefeela, ka gobane manyedi a a ganelela. Baisraele ba ba bitšwa siliberatahlwa, ka gobane nna, Morena, ke ba lahlile.” Morena o ile a nthoma lesorong la Tempele leo batho ba Juda ba bego ba tsena ka lona go yo mo khunamela. A mpotša gore ke eme moo gomme ke bege tšeo yena Morena Ramaatlaohle, Modimo wa Israele, a bego a nyaka go ba botša tšona, ke re: “Tlogelang mekgwa le ditiro tša lena, gomme ke tla le lesa la fela le dula mo nageng ye. *** *** Lesang go dumela mantšu a bofora ao a hlwago a bolelwa a go re: ‘Re bolokegile! Ye ke Tempele ya Morena, ye ke Tempele ya Morena, ye ke Tempele ya Morena.’ ” Morena o re: “Lahlelang sa ruri mekgwa le ditiro tša lena, le tloge le phedišana ka toka. Lesang go gatelela bafaladi, ditšhiwana le bahlologadi. Tlogelang go bolaya ba ba se nago molato mo nageng ye, le go khunamela medimo ye mengwe, ka gobane seo se tla le tlišetša masetlapelo. Ge le ka dira tše ke le botšago tšona, ke tla le lesa la fela le dutše mo nageng ye le e fetšwego ke borakgolokhukhu ba lena sa ruri. “Bonang, le botile mantšu a bofora ao a ka se le holego ka selo. Le a utswa, le a bolaya, le a otswa, le ena ka maaka, le direla Baale dihlabelo, le khunamela le medimo ye pele le bego le sa e tsebe. Le dira tšona dilo tše ke di šišingwago tše, ya ba gona le tlago pele ga ka ka Tempeleng ye ke swanetšego go khunamelwa go yona, la re: ‘Re bolokegile!’ Kgane Tempele ye ya ka ke legolo la bahlakodi? Nna tše le di dirago ke di bone. Ke realo, nna, Morena! Eyang lefelong la ka kua Shilo, lela pele ke bego ke le kgethile gore ke khunamelwe go lona, gomme le bone se ke se dirilego lefelo leo ka baka la bokgopo bja setšhaba sa Israele. Le dirile dibe tše ka moka, nna ka bolela le lena leboelela, la se ntheeletše; ka le bitša, la se nkarabe. Ka gona seo ke se dirilego Shilo ke tla se dira Tempele ye ya ka ye le e botilego, le lefelo le ke le filego borakgolokhukhu ba lena. Ke tla le raka la tloga mahlong a ka bjalo ka ge ke ile ka raka bana ba bolena, setšhaba ka moka sa Israele.” Morena a re: “O se ke wa rapelela setšhaba se. O se ke wa ba llela goba wa ba kgopelela selo; o se ke wa ba phophothela go nna, ka gobane nka se go theeletše. Kgane ga o bone tše ba di dirago metseng ya Juda le mekgotheng ya Jerusalema? Bana ba rwalela dikgong, banna ba gotša mello, gomme basadi ba duba bupi bja go apeela modimo wa mosadi dinkgwana wo ba o bitšago Mohumagadi wa Legodimo. Le gona ba tšhelela medimo ye mengwe dikabelo tša dino gore ba nkgopiše. Na gabotse ba kgopiša nna? Aowa, ba a ikgopiša bona beng, mme bona beng ba a ikgoboša. Ka gona, nna Morena, Mong wa bohle, ke re ke tla tšhollela pefelo ya ka le kgalefo godimo ga naga ye. Ke tla di tšhollela godimo ga batho le diphoofolo, le godimo ga mehlare ya naga, le dibjalo tša ka mašemong. Kgalefo ya ka e tla lauma ya se tingwe ke motho. “Nna, Morena Ramaatlaohle, Modimo wa Israele, ke re le dire dihlabelo tša go tšhungwa ka moka le dihlabelo tše dingwe, mme nama ya dihlabelo tša go tšhungwa ka moka le yona le ka no e ja. Borakgolokhukhu ba lena ga se nke ka ba laela selo mabapi le dihlabelo tša go tšhungwa ka moka, goba dihlabelo tša mohuta wo mongwenyana mola ke ba ntšha Egepeta. Se ke ba laetšego sona ke go ntheeletša, gore ke tle ke be Modimo wa bona, mme bona e be setšhaba sa ka. Le gona ke ile ka ba botša gore ba phele ka mo ke ba laetšego ka gona, gore ba tle ba atlege. Eupša bona ba ile ba se ke ba ntlhwaela tsebe, ba se ke ba ntheeletša. Ba ile ba ngangabala ba itirela tše ba bego ba ikemišeditše tšona ka dipelongmpe tša bona, mme seemo sa bona sa befela pele bakeng sa go kaonafala. Go tloga tšatšing lela borakgolokhukhu ba lena ba etšwa Egepeta go fihlela lehono, ke ile ka no fela ke roma bahlanka ba ka, baprofeta, go lena ka matšatši. Fela bona ba ile ba se ke ba ntlhwaela tsebe, ba se ke ba ntheeletša. Eupša ba ngangabala go feta borakgolokhukhu ba bona. “Ka baka leo, o ba botše ditaba tše ka moka, eupša bona ba ka se go theeletše; ge o ba bitša ba ka se arabe. O ba botše gore ke bona setšhaba sa go se ntheeletše, nna, Morena Modimo wa bona, setšhaba sa bomaganagokgalwa, sa go se botege. Ebile potego ga go sa bolelwa ka yona”. Morena o re: “Lena batho ba Jerusalema, ipooleng meriri le e lahle. Hlabang sefela sa mahloko godimo ga meboto, ka gobane nna, Morena, ke lahlile setšhaba se sa go nkgalefiša, ka se tlogela. “Batho ba Juda ba dirile taba ye ke bonago e le ye mpe. Ba beile medimo ya bona ya diswantšho ya go šišimiša Tempeleng mo ke swanetšego go khunamelwa gona, ba e tšhilafatša. Kua moeding wa Hinomo ba bopile ntotoma ye e bitšwago Tofete, gore ba tle ba dire dihlabelo ka barwa le barwedi ba bona mollong. Ga se ba laelwe ke nna go dira taba yeo, le go e nagana ga se nke ke e nagane. Ka gona, nako e tla tla mohla ntotoma yeo e ka se sa bitšwago Tofete, le moedi woo o ka se sa bitšwago moedi wa Hinomo, eupša o tla bitšwago Moedi wa Polao. Ba tla boloka batho gona, ka gobane go tla be go se sa na le mo ba kago ba boloka. Ditopo tša setšhaba se e tla ba dijo tša manong le dibata, gomme go ka se be le wa go di tšhoša. Metseng ya Juda le mekgotheng ya Jerusalema ke tla fediša mekgolokwane ya lethabo le tlhalalo, le ya mekete ya lenyalo, gobane naga ye e tla fetoga leganata.” Morena o re: “Mehleng yeo marapo a magoši a Juda le a bakgomana ba gona, gotee le a baprista le a baprofeta le a batho ba bangwe bao ba bego ba dula Jerusalema a tla epollwa mabitleng a ona. A tla gašanywa fase pele ga letšatši le ngwedi le dinaledi, tšona dilo tše batho ba bego ba di rata mme ba di hlankela, tše ba bego ba kgopela maele go tšona ba bile ba di khunamela. A ka se kgoboketšwe a bolokwa, eupša a tla swana le dišu nageng. Gape mašaledi a setšhaba se, ao a dulago mafelong ao ke ba šwalalanyeditšego go ona, a tla bona go le kaone go hwa go na le gore ba fele ba phela. Ke realo, nna, Morena Ramaatlaohle.” Morena o ntaetše gore ke re go bona: “Na ge motho a wele ga a tsoge? Ge motho a arogile tseleng ga a boele mo a arogilego gona? Bjale ge, lena setšhaba, le reng le ngangabaletše go kgeloga? Le kgomaretše medimo ya lena ya diswantšho gomme le gana go boela go nna. Ke be ke hlwaile tsebe, fela ga le bolele therešo. Ga go le o tee gare ga lena yo a itsholelago bokgopo bja gagwe a re: ‘Joo, na ke dirileng!’ Mongwe le mongwe o itirela se a se ratago bjalo ka pere ye e kitimelago ntweng. Ešita le mogolodi o tseba sehla sa wona; mokgorwane le peolwane le leakabosane le tšona di tseba nako ya go ya phuphu. Eupša lena, setšhaba sa ka, ga le tsebe melao ya ka. Le reng le re le hlalefile ka ge le na le melao ya ka, etšwe bangwadi ba yona ba go se botege ba e semile ya maaka? Dihlalefi di tla lešwa dihlong; ge ba swerwe ke manaba ba tla gakanega. Ba ganne tše ke di boletšego; bjale ke bohlale mang bjo ba nago nabjo? Ka gona, basadi ba bona ke tla ba fa banna ba bangwe, le mašemo a bona ka a fa batho ba bangwe, ka gobane ka moka ga bona, ba go nyatšega le ba go hlomphega, ke ba megabaru; le baprofeta le baprista ba hlalefetša batho. Ba dira tše nkego dintho tša setšhaba sa ka e dio ba go kgoboga fela. Ba re: ‘Tšohle di lokile,’ etšwe go se na se se lokilego. Ba be ba swanetše go inyatša ka ge ba dirile dilo tše tša go šišimiša; fela le gatee ga ba inyatše, le dihlong ga ba natšo. Ka gona, ba tla wa ba etša ba ba welego; ge ke ba otla e tla nama ya ba pheletšo ya bona. Ke realo, nna, Morena. “Ke be ke nyakile go ba kgoboketša bjalo ka monna ge a kgoboketša tše a di bunnego; eupša ba swana le morara wo o sa enywego, ba etša mogo wo o sa enywego, le matlakala a ponne. Ka gona, ke tla ba lesa ba fenywa ke manaba a bona.” Bona ba re: “Re sa duletšeng? A re yeng, re tšhabeleng metseng ye e ageleditšwego ka merako re yo hwela gona. Morena Modimo wa rena o re gafetše go hwa; o re file meetse a mpholo gore re nwe, ka ge re mo fošeditše. Re be re holofetše go hwetša khutšo, fela go padile; re holofetše gore mathata a tla fela, eupša ke gona re welwa ke tše di šiišago. Dipere tša manaba tša go letša dinko di šetše di kwagala ka motseng wa Dane; naga yohle e a thothomela ge dipere tša bona di lla. Ba tlile go senya naga le tšohle tše di lego go yona, le motse le badudi ba wona.” Morena o re: “Tsebang, ke tla le romela dinoga tša mpholo tše di sa upegego, gomme di tla le loma.” Ke wetšwe ke manyami a a sa ntlogelego; pelo ya ka e bohloko. Theeletšang! Nageng yohle ke kwa setšhaba sa ka se lla se re: “Kgane Morena ga a sa le mo Sione? Na kgoši ya Sione ga e sa le gona?” Morena a fetola a re: “Lena le nthumoletšeng ka medingwana ya lena ya diswantšho, le ka medimo e šele ya lefeela?” Setšhaba se re: “Go buna go fedile, le selemo se fetile, eupša ga sešo ra hlakodišwa.” Ka ge setšhaba sa ka se nyamile, le nna ke nyamile, ke bohlokong; ke rarilwe ke kgakanego. Na go ne sehlare kua Gileade? Na ngaka yona ga e gona? Bjale go tla bjang ge setšhaba sa ka se ile sa se fodišwe? Nke hlogo ya ka e ka be e le sediba sa meetse, mme mahlo a ka e le mothopo wa meokgo; ke mo ke bego ke tla lla bošego le mosegare, ke llela ba gaborena ba ba gagarilwego. Nke nkabe ke na le ntlo ya basepedi kua lešokeng; ke be ke tla tlogela tšhaba sa gešo ka ya gona, gobane bohle ke diotswa, ke lekoko la baeki. Mantšu a bona a hlaba bjalo ka mesebe; batho ba naga ye ba rata maaka go feta nnete. Morena o re: “Ba dira dilo tše mpe ka go latelana ga tšona, gomme ga ba ntsebe.” Motho a itote, a se tshephe mogweragwe, a se tshephe ngwanabo, gobane ngwanabomotho ke moradia bjalo ka Jakobo, mogwera o senya mogwera leina. Bohle ba radia bagwera ba bona, gomme ga go yo a bolelago therešo; ba itlwaeditše go bolela maaka, ebile ga ba nyake go itshola. Ba hlakiša batho leboelela, le boradia bja bona bo a latelana. Morena o re ga ba rate go mo tseba. Ke ka baka leo Morena Ramaatlaohle a rego: “Ke tla ba hlwekiša ka ba ka ba leka. Setšhaba sa ka se dirile tše mpe – ke ge nka hlwa ke sa dirang ka bona? Maleme a bona ke mesebe ye e bolayago; ba dula ba bolela tša boradia. Ka molomo motho o bolela gabotse le mongwekayena, mola ka pelong a mo theile. Na nka napa ka se ba otlele dilo tše dibjalo? Go botšiša nna, Morena. Nka napa ka se itefeletše ka setšhaba sa mohuta wo?” Ke ile ka re: “Ke tla hlaba mokgoši ke llela dithaba, ka opelela mafulo a lešoka sefela sa mahloko, ka gobane a swele, gomme ga go motho yo a putlago go ona. Mollo wa dikgomo ga o sa kwagala; dinonyana le diphoofolo di tšhabile, di ile.” Morena o re: “Ke tla fetoša Jerusalema mašope, ya ba segola sa diphukubje; metse ya Juda ke tla e fetoša lešoka, felo mo go sa phelego motho.” Ke ile ka botšiša ka re: “Ke mang yo a hlalefilego go kwešiša taba ye? Morena o e hlalošeditše mang gore a e botše ba bangwe? Naga e reng e senyegile, e swele bjalo ka lešoka le le tšhumilwego, mme go se motho yo a e putlago?” Morena a fetola a re: “Ke ka baka la ge ba tlogetše melao ye ke ba beetšego yona. Ga se ba ntheeletša goba ba dira tše ke ba laetšego tšona. Ba ngangabaletše go dira tše ba di ratago, le gona ba khunamela boBaale go ya ka moo borakgolokhukhu ba bona ba ba lailego ka gona. Ka gona, nna, Morena Ramaatlaohle, Modimo wa Israele, ke re: Ke tla ba leša lengana, ka ba ka ba noša meetse a mpholo. Ke tla ba šwalalanyetša ditšhabeng tšeo bona goba borakgolokhukhu ba bona ba bego ba sa di tsebe, ka ba romela madira a ba hlomara go fihlela ke ba feleletša.” Morena Ramaatlaohle a re: “Lemogang tše di diregago! Bitšang basadi ba go lla ba tle; bitšang ba ba kgonago sello.” Setšhaba sa re: “Ba botšeng ba itlhaganele ba tle ba re opelele sefela sa mahloko, mahlo a rena a be a ele meokgo, le dintši tša rena di thapišwe ke go lla.” Gobane mokgoši wa sello o kwagala o etšwa Sione o re: “Joo, re lobile! Re lewa ke dihlong e le ruri, gobane go huduga nageng ya gaborena go re lebane, ka ge re kgerešeditšwe dintlo.” Lena basadi, le theeletšeng tše di bolelwago ke Morena, le ele mantšu a gagwe hloko. Le ruteng barwedi ba lena go golola, le lena le rutaneng sefela se sa mahloko: “Lehu le re tsenetše ka maroba, la tsena ka dibong tša rena; le ripitletše bana mekgotheng, la ripitlela le masogana mapatlelong.” Morena o ntaile gore ke bolele tše a mpoditšego tšona, a re: “Ditopo di tla rapalala boka dišu nageng, boka dingatana tša mabele tše di tlogetšwego ke babuni, tše di sa kgoboketšwego ke motho.” Morena o re: “Mohlale a se kgantšhe bohlale bja gagwe, le senatla se se kgantšhe maatla a sona, le mohumi a se kgantšhe lehumo la gagwe. Ge motho a nyaka go kgantšha, a a kgantšhe go nkwešiša le go ntseba ga gagwe, gobane ke nna Morena yo a dirago ka leratorato, yo a phethagatšago toka le tshwanelo mo lefaseng. Tšeo ke tše di nkgahlago. Ke realo, nna, Morena.” Morena o re: “Nako e etla ge ke tlilo otla bohle ba ba bolotšego nameng fela, e lego batho ba Egepeta, le ba Juda, le ba Edomo, le ba Amone, le ba Moaba, le ba go boola tlopo ba go dula lešokeng. Gobane ditšhaba tšeo ka moka gotee le sona setšhaba ka moka sa Israele ga se ba bolla pelong, ke go re ga ba ntlhomphe.” Lena setšhaba sa Israele, ekwang se Morena a le botšago sona: Yena o re: “Le se itlwaetše mekgwa ya ditšhaba tše dingwe; le se tšhoge ge le bona dika kua leratadimeng, ke ra le ge ditšhaba tše dingwe di ka tšhoga. Ditlwaedi tša sedumedi tša ditšhaba tšeo ga di na mohola. Mohlare o rengwa ka sethokgweng, kota ya betlwa ke mmetli ka petlwane, ya kgabišwa ka silibera le gauta. E kokotelwa fase ka dibapola le noto gore e se we. Medimo ya diswantšho ye mebjalo e swana le setšhoša ka tšhemong ya magapu; ga e kgone go bolela; e a kukwa ka ge e sa kgone go sepela. Le se ke la e boifa, gobane ga e kgone go gobatša motho, goba go mo direla se sebotse.” Morena, ga go moswananago; o yo mogolo, o senatla, o Ramaatla. Ke mang yo a ka se go hlomphego, wena Kgoši ya ditšhaba tšohle? O lebanwe ke go hlomphiwa. Ga go moswananago gare ga borabohlale bohle ba merafe, le gare ga batho ba mebušo yohle ya bona. Bohle ke ditlatla, ga se ba hlalefe. Tše batho ba di rutilwego ke medimo ya diswantšho, ga di na mohola, ke kota fela. Medimo ya bona ya diswantšho e ritetšwe ka silibera ye e batilwego ya go tšwa Tarshishe, le ka gauta ya go tšwa Ufase; yeo ke mediro ya bomorulatshipi le bomorulagauta; e apešitšwe diaparo tša bohwibidu bja go retela, le tša bohwibidu bja madi. Tšohle di logilwe ke dithakga. Morena yena ke Modimo wa nnete; ke Modimo yo a phelago, ke kgoši ya go ya go ile. Ge a befetšwe lefase le a thothomela; ditšhaba di ka se kgotlelele pefelo ya gagwe. Le botše batho gore medimo ye e sego ya dira magodimo le lefase e tlilo fedišwa lefaseng ka fase ga magodimo. Morena o hlodile lefase ka maatla a gagwe, ka bohlale bja gagwe a le thekga, ka tlhaologanyo ya gagwe a phurolla magodimo. Ge a popoduma, meetse a ka godimo ga lefaufau a a bopa; o rotoša mouwane mafelong a kgolekgole a lefase. O gadimiša legadima puleng, a bulela phefo mo a e bolokago gona. Batho ge ba di bona ba tlaela ba sa di kwešiše; morulagauta yo mongwe le yo mongwe o inyatša ka medimo ya gagwe ya diswantšho, ka ge diswantšhobopša tšeo tša gagwe e le tša bofora, di sa phele. Ga di na mohola, ke diswantšhobopša tša go segiša. Mohla Morena a etla go di otla di tla fedišwa. Morena, yena e lego kabelo ya Jakobo, ga a swane le medimo yeo ya diswantšho, gobane ke yena Mmopatšohle, gomme Baisraele ke sona setšhaba sa gagwe. Leina la gagwe ke Morena Ramaatlaohle. Lena batho ba Jerusalema, le dikaneditšwe! Šikarang merwalo ya lena, gobane Morena o re: “Ga bjale, lena badudi ba naga ye, ke tlilo le lahlela kgole; ke tla le tlišetša masetlapelo gore le sokologele go nna.” Batho ba Juda ba a lla ba re: “Joo, na re gobetše bjang! Dintho tša rena ga di fole. Gabotse re be re gopola gore ge eba ye ke yona kotlo ya rena, re be re ka e kgotlelela. Ditente tša rena di hlahlamolotšwe; dithapo ka moka tša go di hloma di kgaotšwe. Bana ba rena ba re tlogetše, ga ba sa phela, ga go sa ne yo a ka re hlomelago ditente, ga go wa go kgokelela digareteine tša tšona.” Ka fetola ka re: “Baetapele ba rena ba tlaetše; ga ba kgopele Morena gore a ba eletše. Ke ka baka leo ba paletšwego, le batho ba gabobona ba šwalalantšwego. Theeletšang! Go kwagala lešata! Ke lešata le le tšwago nageng ya ka leboa, lešata la bao ba tlilogo fetoša metse ya Juda mašope le digola tša diphukubje.” Morena, ke a tseba gore ga go motho yo a laolago tše di tlago mo hlagela, ga go motho yo a laolago bophelo bja gagwe. Morena, o re kgaleme, fela e sego go feta tekanyo, e sego o befetšwe, ka gore e ka ba gona go re ripitlela. Galefela ditšhaba tše di sa go tsebego, le ditšhaba tše di sa go khunamelego, gobane ba re bolaile, rena ditlogolo tša Jakobo; ba re bolaile, ba re fetša molokwanarite; naga ya gaborena ba e fetoša leganata. Morena a re go nna, Jeremia: “Ekwa tše kgwerano e di bolelago, o di botše batho ba Juda le badudi ba Jerusalema. O ba botše gore nna, Morena, Modimo wa Israele, ke re: ‘Morogakwa ke yo a sa phethego tše di laelwago ke kgwerano ye. Ke kgwerano ye ke e dirilego le borakgolokhukhu ba lena mola ke ba ntšhitše Egepeta, e lego wona moubelo wa go fiša wa go tološa tshipi. Ka ba botša gore ba ntheeletše le gore ba dire tšohle tše ke bego ke ba laetše tšona; ke mo e tlago ba setšhaba sa ka, mme nna ka ba Modimo wa bona. Ke gona ke tlago phetha se ke se enetšego borakgolokhukhu ba bona gore ke tla ba fa naga ya mokhora le monono, yeo le lehono e sa lego ya bona.’ ” Nna ka fetola ka re: “Amene, Morena.” Ya ba Morena o re go nna: “O bege molaetša wo metseng ya Juda le mekgotheng ya Jerusalema, o re: Ekwang tše kgwerano ye e di bolelago mme le di phethe. Mola ke ntšha borakgolokhukhu ba lena Egepeta ke ile ka ba laya tsebegokwa gore ba ntheeletše, gomme ka phegelela go laya setšhaba go fihlela le lehono. Eupša bona ba ile ba se ke ba ntlhwaela tsebe, ba se ke ba ntheeletša. Ba ile ba no ngangabala, ba latela ditumompe tša bona. Ka gona ka ba tlišetša dikotlo tše di ngwadilwego mo kgweranong. Ke be ke ba laetše gore ba botegele kgwerano, eupša bona ba se e botegele.” Ke moka Morena a re go nna: “Batho ba Juda le ba Jerusalema ba ntakane. Ba boetše dibeng tša borakgolokhukhu ba bona, bale ba gannego go dira tše ke bego ke ba laetše tšona; le bona ba latela medimo ye mengwe ba e loba. Batho ba Israele le ba Juda ba lahlile kgwerano yela ke ilego ka e dira le borakgolokhukhu ba bona. Bjale ge, nna, Morena, ke re ke tlilo ba tlišetša masetlapelo ao ba ka se a phonyokgego. Le ge ba llela thušo go nna nka se ba theeletše. Ke mo badudi ba metse ya Juda le ba Jerusalema ba tla yago go medimo yeo ba e direlago dihlabelo, gomme ba llela thušo go yona. Eupša ruri medimo yeo e ka se ba hlakodiše ge ba welwa ke masetlapelo ao. Batho ba Juda ba na le medimo ya go lekana le metse ya bona ka bontši, gomme Baale, modimo wa go leša dihlong, yena ba mo agetše dialetare tša sehlabelo tša go lekana le mekgotha ya Jerusalema ka bontši. Bjale ge, wena setšhaba se o se ke wa se rapelela. O se ke wa ba llela goba wa ba kgopelela selo, gobane ge ba le bothateng mme ba nkgopela gore ke ba thuše, nka se ba theeletše.” Morena o re: “Lena setšhaba sa ka se ke se ratago, ka Tempeleng ya ka gona le yelang, etšwe le ntherile? Kgane le ka thibela masetlapelo ka go ikana le ka go dira dihlabelo? Na yeo ke taba ye e ka le thabišago? Ke be ke le reile leina la ‘Mohlwaremotala wo mobotse wa dikenywa tše bose’, eupša ke tla o tšhuma matlakala ka mollo modumong wo o rathathago, wa swa le makala. “Ke nna, Morena Ramaatlaohle, ke filego lena batho ba Israele le ba Juda naga; eupša bjale ke le hlolela madimabe ka baka la tše mpe tše le di dirilego, la nthumola ka go direla Baale dihlabelo.” Morena o ile a ntemoša gore manaba a ka a ntakane, a ba a ntsebiša melaka ya bona. Nna ke be ke swana le kwanyana ye e se nago maseme ye e išwago go hlabja, gomme ke sa tsebe gore go lakanwe nna. Ba be ba re: “A re remeng mohlare o sa entšwe; a re mmolayeng gore a se sa gopolwa ke motho.” Ke mo ke ilego ka rapela ka re: “Morena Ramaatlaohle, wena Moahlodi wa toka, o lekolago menagano le dipelo tša batho, taba ya ka ke e file wena; ka gona, nke ke bone ge o ntefeletša go batho ba.” Banna ba Anathote ba be ba nyaka go mpolaya; ba ile ba ba ba mpotša gore ge nka no fela ke bega molaetša wa Morena ba tla mpolaya. Ka gona, Morena Ramaatlaohle a bolela ka bona a re: “Ke tla ba otla! Masogana a bona a tla bolawa ka tšhoša; barwa le barwedi ba bona ba tla hwa ka tlala. *** Ga go yo a tlago šala, gobane mohla ke otla banna ba Anathote e tla ba masetlapelo.” Morena, ge nka phegišana nago kgorong ya tsheko, wa nnete e tla ba wena. Fela ke swanetše go no botšiša mabapi le ditaba tša toka. Ke ka baka la eng bakgopo ba atlega, le baradia bohle ba phela ba iketlile? O ba dudiša mo ba iketlilego, ba atlega. Ka mehla ba bolela ka wena, etšwe ba se ne taba le wena. Nna o a ntseba, Morena, o a mpona; o lekola ka moo ke go ratago ka gona. Goga bakgopo ba boka dinku tše di yago go hlabja; o ba kgetholle o ba beele letšatši la go hlabja ga bona. Naga e tla omelela go fihlela neng, le bjang bja naga yohle bo tla pona go fihlela neng? Diphoofolo le dinonyana di a hwa ka baka la bokgopo bja badudi ba naga, bao ba rego: “Modimo ga a bone tše re di dirago.” Morena a re: “Ge o lapišwa ke go šiana le batho, dipere tšona o ka šiana natšo bjang? Ge o ikwa o lotegile fela mo go nago le batho, ka sethokgweng sa Jordane o tla ikwa bjang? Ešita le banabeno, maloko a lapa leno, ba go hlanametše; le bona ba goa ba re o bolawe. O se ke wa ba tshepha, le ge ba bolela le wena gabotse.” Morena a re: “Ke hlanametše setšhaba sa ka; ke lahlile setšhaba se ke ikgethetšego sona. Ba ke ba ratago ke ba gafetše diatleng tša manaba a bona. Setšhaba se ke ikgethetšego sona se mphetogetše tau ya ka sethokgweng; ba a nthorela, ka gona ke ba hloile. Setšhaba se ke ikgethetšego sona ke se bona e le phiri, se dikaneditšwe ke manong a go ja nama. Eyang le bitše dibata tšohle di tle di je! Babuši ba bantši ba sentše serapa sa ka sa morara; ba gataketše tšhemo ya ka; ba fetotše naga ya ka ye botse lešoka. Ba e fetotše lešoka; go e bona e le ka mokgwa wo go nkweša bohloko. Naga yohle e fetotšwe lešoka, fela ga go tshwenye motho. Mebotong yohle ya lešoka go tlile bathopi. Ke hlotše ntwa gore e tle e senye naga yohle; ga go motho yo a phelago boiketlong. Setšhaba sa ka se bjetše mabele, eupša sa buna dikoro; ba itapišeditše lefeela. Tše ba di bunnego di ba leša dihlong, ka ge Morena a ba otlile a ba galefetše.” Morena ge a bolela ka ditšhaba tšohle tše di agelanego le Baisraele, tše di sentšego naga ye a ba filego yona, o re: “Ke tla tloša ditšhaba tšeo dinageng tša tšona, ka tloša le batho ba Juda go tšona. Eupša ge ke seno ba tloša ke tla ba šokela; ke tla bušetša yo mongwe le yo mongwe nageng ya gabo le lefaseng la gabo. Ge ba ka amogela setšo sa setšhaba sa ka ka dipelo tša bona ka moka gomme ba ena ba re: ‘Ka Morena yo a phelago’ – go swana le mola ba kile ba ruta setšhaba sa ka go ena ka Baale – gona ba tla fela ba dutše gare ga setšhaba sa ka. Fela ge setšhaba se sengwe se ka se ntheeletše, gona ke tla se tlošetša sa ruri ka se fediša. Ke realo, nna, Morena.” Morena o mpoditše gore ke yo ithekela borokgwana bja ka gare mme ke bo apare; eupša a ntaya gore ke se ke ka bo hlatswa. Ka gona ka bo reka, bjalo ka ge Morena a ntaetše, ka bo apara. Morena a bolela le nna gape a re: “Eya nokeng ya Yufratese gomme o ute borokgwana bjoo bja ka gare ka mongeng wa letlapa.” Ke moka ka yo bo uta kgauswi le Yufratese, bjalo ka ge a ntaetše. Ge go fetile lebaka le letelele Morena a mpotša gore ke boele Yufratese, ke yo tšea borokgwana bja ka gare bjola a ntaetšego gore ke bo ute gona. Ka gona ka boela morago, gomme ka fihla ka fata moo ke bego ke bo utile gona ka bo ntšha. Fela bo be bo senyegile bo se sa na mohola. Ya ba Morena o bolela le nna gape o re: “Ke gona ka mo ke tlago fediša boikgantšho bja Juda le boikgogomošo bjo bogolo bja Jerusalema. Setšhaba se se sebe se gana go ntheeletša. Ba ne kgang. Ba itirela se ba se ratago; ba ya medimong ye mengwe go e loba le go e khunamela. Ka baka leo, ba tlilo swana le borokgwana bjoo bja ka gare bja go se be le mohola. Bjalo ka ge borokgwana bja ka gare bo kgomarela motho lethekeng, ke be ke holofetše gore batho bohle ba Israele le ba Juda ba tla nkgomarela. Ke be ke direla gore e tle e be setšhaba sa ka, gomme ba ntsebagatše ditšhabeng tše dingwe, ba nthete, ba be ba ntumiše; fela bona ga se ba theeletša. Ke realo, nna, Morena.” “Botša setšhaba sa Israele gore Morena Modimo wa bona o re dipitša tšohle di bopetšwe go tšhelwa beine. Bona ba tla go fetola ba re ba a tseba gore dipitša tšohle di bopetšwe go tšhelwa beine. Ke moo o swanetšego go ba botša gore nna, Morena, ke re bohle ba ba agilego nageng ye, magoši, bona e lego ditlogolo tša Dafida, le baprista, le baprofeta, le badudi bohle ba Jerusalema ke tla ba tagiša beine. Ka morago ke tla ba pšhatla ka go ba thulantšha, ka thulantšha barwa le botatagobona. Ke tla ba fediša ke se na lešoko, le kwelobohloko, le kgaugelo.” Hlwayang tsebe le theeletše, le se ikgogomoše, gobane Morena o a bolela. Hlomphang Morena Modimo wa lena pele leswiswi le swara, pele swahlane e tšeatšea. Le tla re le letetše seedi a se fetoša monyama, ya ba leswiswi la kgampipi. Ge le sa theeletše, ke tla lla ke iphihlile, ke llišwa ke boikgogomošo bja lena; ke tla lla gabohloko ke ediša meokgo, ka ge setšhaba sa Morena se thopilwe. Morena a re go nna: “O botše kgoši le mmagokgoši gore ba fologe ditulong tša bona tša bogoši, gobane kgare tša bona tše dibotse di wele hlogong. Metse ya Juda ya ka borwa e dikaneditšwe; ga go motho yo a kago e hlakodiša. Batho bohle ba Juda ba thopilwe, ka moka ba išitšwe bothopša.” Jerusalema, lebelela! Manaba a gago a etla a tšwa leboa! Se kae setšhaba sela o bego o se filwe gore o se diše bjalo ka mohlape, sona sela o bego o ikgantšha ka sona? O tla reng ge batho bale o ba tlwaeditšego go ba badirišananago ba se bea babuši ba gago? O tla swarwa ke lešoko bjalo ka mosadi a belega. Ge o ka ipotšiša gore ke ka baka la eng o otlwa ka mokgwa wo, o tsebe gore ke ka baka la bontši bja dibe tša gago, ge o ile wa apolwa mesese mme wa katwa. Kgane motho yo moso a ka iphetola mmala, goba nkwe ya itloša mebalabala? Ge eba go ka kgonega, gona le wena o itlwaeditšego go dira tše mpe o ka kgona go dira tše di lokilego. Morena o re: “Ke tla phatlalatša badudi ba gago ba phatlalala bjalo ka mooko wo o gogolwago ke phefo ya leganata. Ke sona se se go lebanego, ke sona se ke ikemišeditšego go go dira sona, ka gobane o ntebetše mme wa bota medimo ye e sego ya nnete. Nna mong ke tla go apola mesese ka go khurumetša sefahlego ka yona gore o bonelwe ke batho. Ke go bone kua mebotong lešokeng o otswa, o duma tša bohlola, o gweba ka thobalo mo go lešago dihlong. Joo, Jerusalema, o yo madimabe! Ge o sa itlhwekiše o yo feletša kae?” Mabapi le komelelo Morena o rile go Jeremia: “Naga ya Juda e iletše; metse ya gona e a loba, batho ba gona ba rapaletše fase, ba nyamile, gomme Jerusalema go kwagala sello. Bahlomphegi ba roma bahlanka ba bona go ga meetse; bona ge ba fihla didibeng ga ba a hwetše; ba boa ka metšega e le fela. Ba tlabegile, ba gakanegile, ba rwele megono. Ka ge go se pula mme lefase le omile, balemi ba tlabegile, ba rwala megono. Kua nageng phala ya tshadi e re go tswala ya tlogela phalana, ka gobane ga go na bjang. Dipitsi di eme mebotong, di fegelwa boka diphukubje; di gohlometše mahlo ka ge di hloka phulo.” Le ge dibe tša rena di re tšwa, re thuše hle, Morena, ka ge o na le kgaugelo. Ke gantši re kgeloga; re go fošeditše. Wena o botilwego ke Baisraele, wena o ba hlakodišago tlalelong, o reng o itira moeng nageng ya rena, o itira mosepedi, mophirimalelwagatee? O reng o etša monna yo a khukhuneditšwego, o swana le mogale yo a sa kgonego go hlakodiša motho? Gape wena, Morena, o na le rena, gomme rena re setšhaba sa gago, o se re tlogele. Morena o boletše ka setšhaba se a re: “Se ba se ratago ke go kgeloga, gomme ga ba itshware. Ka gona ga ba nkgahle. Bjale nka se lebale makgopo a bona, ke tla ba otlela dibe tše ba di dirilego.” Morena a re go nna: “O se ke wa ba phophothela. Le ge ba ka ikona dijo, nka se ba theeletše ge ba llela thušo; gomme le ge ba ka ntirela dihlabelo tša go tšhungwa ka moka le dikabelo tša bupi, ba ka se nkgahle, ke tla ba bolaya ka tšhoša, le ka tlala, le ka leuba la bolwetši.” Nna ka re: “Morena, Mong wa rena, baprofeta ba botša setšhaba gore go ka se we ntwa goba tlala, ka gore wena o tla dira gore batho ba iketle go ya go ile nageng ye.” Morena yena a fetola a re: “Baprofeta bao ba bolela maaka ka leina la ka; ga se ba rongwa ke nna, le gona nna ga se ka ba laela selo goba ka bolela le bona. Dipono tše ba bolelago le lena ka tšona ga se tšona; go porofeta ga bona ke dilo tše ba di naganago tše di se nago mohola. Ka gona, nna, Morena, ke re: Baprofeta bao ba bolelago ka leina la ka etšwe ba se ba rongwa ke nna mme ba re ntwa le tlala di ka se wele naga ye, ke bona ba ba tlago bolawa ka ntwa le ka tlala. Le bona batho bao ba boditšwego ditaba tše ke baprofeta ba ba tla bolawa ka ntwa le ka tlala. Ditopo tša bona di tla lahlelwa mekgotheng ya Jerusalema, gomme ga go yo a tlago ba boloka, bona le basadi ba bona le barwa ba bona le barwedi ba bona. Ke tla ba otlela bokgopo bja bona.” Morena o ntaetše gore ke botše setšhaba ke re: “Mahlo a ka a ela meokgo bošego le mosegare, ga ke kgaotša sello, gobane setšhaba sa gešo se gobetše gabohloko, se tšwile dintho tše dikgolo. Ge ke eya nageng ke bona ditopo tša bao ba bolailwego ka tšhoša; ge ke tsena motseng ke bona batho ba ehwa ba bolawa ke tlala. Baprofeta le baprista ba tšwela pele le mešomo ya bona gohle nageng, eupša ga ba tsebe se ba se dirago.” Na o namile o lahletše batho ba Juda sa ruri? Batho ba Sione o a ba šišingwa? O re gobaleditšeng gakaaka mo e bilego re sa kgone go fola? Re be re holofetše go hwetša khutšo, fela go padile; re holofetše gore mathata a tla fela, eupša ke gona re welwa ke tše di šiišago. Morena, re lemoga bokgopo bja rena, le bobe bja borakgolokhukhu ba rena; re go fošeditše. Ka ge o le Modimo wa kgaugelo, o se re lahle; o se hlompholle motse wo go wona go lego setulo sa gago sa bogoši. O re gopole, o se senye kgwerano yela wa go e dira le rena. Kgane medingwana ya lefeela ya baditšhaba e ka neša pula? Afa leratadima lona le ka neša medupi? Kgane ga e nešwe ke wena, Morena, Modimo wa rena? Re botile wena, ka gobane ke wena o e nešago. Ke moka Morena a re go nna: “Le ge nkabe e le Moshe le Samuele ba ba emego fa ba nthapela, ke be nka se šokele setšhaba se. Ba tloše mo pele ga ka; a ba sepele! Ge ba go botšiša gore ba ye kae, o ba botše gore nna ke re: “Ba ba lebanwego ke leuba la bolwetši, leubeng! Ba ba lebanwego ke go bolawa ka tšhoša, tšhošeng! Ba ba lebanwego ke go hwa ka tlala, tlaleng! Ba ba lebanwego ke go thopša, bothopšeng! “Nna, Morena, ke tla laela dilo tše nne gore di ba otle: tšhoša, gore e ba bolaye; dimpša, gore di gogagoge ditopo tša bona; manong le dibata, gore di je ditopo tša bona lai. Ke tla dira gore batho ba mebušo yohle ya lefase ba ba tšhoge ka baka la tše Manase, morwa wa Hiskia, a kilego a di dira kua Jerusalema mola e le kgoši ya Juda.” Morena o re: “Le tla šokelwa ke mang, lena batho ba Jerusalema? Ke mang yo a tlago le llela? Ke mang yo a tlago phamogela go lena a le botšiša maphelo? Lena le nkganne, le mphuraletše. Ke ka baka leo ke otlolotšego letsogo la ka ka le fediša; ke be ke lapišitšwe ke go le šokela. Ke le feferile ka leselo mo metseng ya lena ka le bolaela bana, ka le gagara, lena setšhaba sa ka, ka ge le sa tlogele mekgwa ya lena. Bahlologadi ba gabolena ba oketšegile, ba feta dithorwana tša lešabašaba la lewatle. Ke bolaile masogana a gabolena mosegare wa sekgalela, gomme ka kweša bommabo bohloko. Ke tla dira gore ba welwe ke tlalelo le letšhogo ka bjako. Mmagobana yo a hwetšwego ke bana ba ba šupago o akgegile, o a fegelwa. Mosegare o mo fetogetše leswiswi; o šuletšwe, o a inyatša. Ke tla dira gore manaba a lena a bolaye mašaletšana a lena. Ke realo, nna, Morena.” Nna ke madimabe bjang, mma, ge o ile wa mpelega ka ba motho wa lešutu le tshele nageng ka moka! Ga se nke ke adime goba ke adingwe tšhelete, le ge go le bjalo mang le mang o a nthoga. Morena, ge eba ruri ga se ka go hlankela gabotse, ge eba ga se nke ke phophothele manaba a ka mola a le mathateng le tlalelong, gona dithogako tša bona a di tšwelele. Na o gona motho yo a ka robago tshipi, kudu tshipi ya go tšwa leboa, goba a roba mphiri? Morena a re: “Ke tla lesa manaba a thopa mahumo le matlotlo a lena, gore ke le otlele dibe tše le di dirilego nageng ka moka ya lena. Ke tla dira gore le hlankele manaba a lena lefaseng le le sa le tsebego, ka gobane kgalefo ya ka e tuka bjalo ka mollo, gomme e tla tuka go ya go ile.” Ke moo ke ilego ka re: “Go tseba wena, Morena. O nkgopole mme o nthuše. O ntefeletše go ba ba ntlhomerego. O se mphelele pelo wa mpolaya. O se lebale gore ke rogakwa ka baka la gago. Mola o bolela le nna ke be ke go hlwaela tsebe. Ke nna wa gago, wena Morena, Modimo Ramaatlaohle, gomme ke ka baka leo mantšu a gago a nthabišago, ka hlalala. Ga se nke ka hlwela go dula le bakodutli ka ipshina nabo. Ke hlohleleditšwe ke wena ka itulela ke nnoši, ya ba taba ya go ntlatša pelo. Bjale ke ka baka la eng ke dula ke tlaišegile? Ntho ya ka e reng e sa alafege ya fola? Kgane o nyaka go ntshwabiša wa etša nokana ye e pšhago selemo?” Morena a mphetola a re: “Ge o ka boa ke tla go amogela, gomme o tla ba mohlanka wa ka gape. Ge o ka bega molaetša wo o kwagalago, e sego wo o se nago mohola, gona o tla ba molomo wa ka. Setšhaba se tla boela go wena, ya se be wena o boelago go sona. Ke tla go dira gore o be bjalo ka morako wo o tiilego wa mphiri go bona. Ba tla lwa le wena, eupša ba ka se go fenye, ka gobane ke na le wena gore ke go phološe, ke go hlakodiše. Ke realo, nna, Morena. Ke tla go hlakodiša diatleng tša batho ba babe, ka go phološa dinaleng tša ba sehlogo.” Morena a bolela le nna a re: “O se ke wa tšea mosadi goba wa ba le bana nageng ye. E re ke go botše se se tlago hlagela bana ba ba tswalelwago fa, se tlago hlagela le bommabo le botatabo. Ba tla hwa ba bolawa ke malwetši a mašoro, gomme ba ka se llelwe goba ba bolokwa ke motho – e tla ba nke ke dišu nageng. Ba tla bolawa ka tšhoša, goba ba hwa lehu la tlala, gomme ditopo tša bona di tla lewa ke manong le dibata.” Morena a tšwela pele a re: “O se ke wa tsena ka lapeng leo go lona go hlobošwago, goba wa ya go hloboga mohu, goba wa ya matshedišong. Nka se sa atla setšhaba se ka boiketlo, goba ka se rata, goba ka se šokela. Ba bagolo le ba banyenyane ba tla hwela mo nageng ye, eupša ba se bolokwe, ba se ilelwe. Ga go yo a tlago ikgaya goba a ipoola hlogo e le go ba ilela. Ga go yo a tlago solela molli dijo e le go mo homotša ka ge a hlokafaletšwe; ga go yo a tlago mo fa sa go nwa e le go mo homotša, ešita le ge a hlokafaletšwe ke tatagwe goba mmagwe. “O se ke wa tsena ka lapeng leo go lona go ketekwago. O se ke wa dula fase wa ja goba wa nwa le bona, gobane nna, Morena Ramaatlaohle, Modimo wa Israele, ke re ke tla fediša mekgolokwane ya lethabo le tlhalalo, le ya mekete ya lenyalo. Taba tše di tla direga lena ba le dulago mo le sa phela, mme le tla di bona. “Ge o ba botša tšeo ka moka ba tla go botšiša gore ke ka baka la eng ke rile ke tla ba tlišetša masetlapelo a makaaka. Ba tla botšiša gore ba sentšeng, sebe se ba fošeditšego Morena Modimo wa bona ka sona ke sefe. Ke mo wena o swanetšego go ba botša gore Morena o rile: ‘Ke ge borakgolokhukhu ba lena ba ile ba mphuralela ba ya go hlankela medimo ye mengwe, ba e khunamela. Ba ile ba ntlhanamela ba se phethe melao ya ka. Eupša lena le dirile tše mpe go feta le borakgolokhukhu ba lena. Bohle le ngangabaletše go dira tše mpe tše le di ratago, le gana go ntheeletša. Ka baka leo, ke tla le leleka nageng ye ka le iša nageng ye lena le borakgolokhukhu ba lena le sa e tsebego. Ke gona moo le tlago khunamela medimo ye mengwe bošego le mosegare, gobane nka se le gaugele.’ ” Morena o re: “Nako e etla mohla batho ba ka se sa ikanago ka nna ba re: ‘Ka Morena yo a phelago, yo a ilego a ntšha setšhaba sa Israele nageng ya Egepeta.’ Ba tla ikana ka nna ba re: ‘Ka Modimo yo a phelago, yo a ilego a ntšha setšhaba sa Israele nageng ya ka leboa le dinageng tšohle tše dingwe tše ke bego ke ba leleketše go tšona.’ Ke tla ba bušetša nageng ya bona, nageng ye ke ilego ka e fa borakgolokhukhu ba bona.” Morena o re: “Ke ya go bitša baswari ba dihlapi ba bantši gore ba tle ba sware setšhaba se. Ka morago ke tla ya go bitša batsomi ba bantši gore ba tle ba ba tsome dithabeng tšohle le mebotong yohle le gona ka magageng, gobane se sengwe le se sengwe se ba se dirago ke a se bona. Ga go se se nkhutetšego; dibe tša bona ke di bona ka a ka mahlo. Ke tla ba otlela bokgopo bja bona le dibe tša bona gabedi, ka ge ba tšhilafaditše naga ya ka ka medimo ya diswantšho ya go šišimiša ya go etša ditopo, le gona ba beile medingwana ya makgapha mo gohle nageng ye ke e filego setšhaba sa ka.” Morena, wena maatla a ka le sebo sa ka, wena botšhabelo bja ka ge ke le tlalelong, ditšhaba di tla tla go wena di etšwa mafelelong a lefase, tša re: “Borakgolokhukhu ba rena ba be ba na le medimo ya bofora fela, medimo ya diswantšho ya lefeela ye e se nago mohola. Kgane motho a ka itirela medimo? Gape e ka se be medimodimo.” Morena o re: “Bjale ge, ke tla bontšha ditšhaba maatla a ka le bonatla la mafelelo; ke mo ba tla tsebago gore leina la ka ke Morena.” “Sebe sa batho ba naga ya Juda se ngwadilwe ka tshipi; se tlokilwe ka ntlha ya taamane dipelong tša bona le manakaneng a dialetare tša bona. Le bana ba bona ba sa gopola dialetare tša bona le dikota tša borapedi tše di lego kgauswi le mehlare ye metala mebotong ya go phagama le dithabeng kua nageng. Ke tlilo dira gore le thopelwe mahumo le matlotlo ohle ka baka la dibe tše le di dirilego nageng ka moka ya lena. Le tla swanela go tlogela naga ye ke le filego yona, molato e le wa lena, gomme ke tla dira gore le hlankele manaba a lena nageng ye le sa e tsebego, gobane le kgohleditše pefelo ya ka ya tuka bjalo ka mollo, gomme e tla tukela sa ruri.” Morena o re: “Morogakwa ke yo a botilego batho, yo a botilego maatla a motho wa nama, ke yo a mphuralelago, nna, Morena. O swana le mohlašana leganateng, wo o melago lesehleng la lešoka, tswaing, mo go sa dulego motho; ga a na le mahlatse. “Go lehlogonolo yo a botilego nna, Morena, yo a ithekgilego ka nna. O bjalo ka mohlare wo o bjetšwego kgauswi le moela, wo medu ya wona e nabelago meetseng. Ga o tšhoge phišo, gomme matlakala a wona a dula e le a matala; le ka ngwaga wa komelelo ga o tshwenyege, ga o lese go enywa. “Menagano ya motho e radia go feta tšohle, ke ye kgopo; e ka kwešišwa ke mang? Ke nna, Morena, ke lekolago menagano, ke hlahlobago dipelo tša batho, gore ke putse motho yo mongwe le yo mongwe ka se se mo lebanego, go ya ka tšeo a di dirago.” Motho yo a ikhweletšago mahumo ka boradia o swana le kgwale ye e thwathwašago mae ao a sego a bewa ke yona. O tla loba mahumo a gagwe e sa le yo mofsa, gomme a feletša e le lešilo. Setsha sa Tempele ya rena se swana le setulo sa kgoši se se phadimago, seo e sa lego se bewa bophagamong go tloga mathomong. Morena, wena Mmotwa wa Baisraele, bohle ba ba go tlogelago o a ba swabiša. Ba ba go furalelago ba tla hwelela bjalo ka maina a a ngwadilwego mobung, ka ge ba tlogetše wena, Morena, mothopo wa meetse a a phedišago. Morena, mphodiše, gomme ke tla fola; mphološe, gomme ke tla phologa. Ke wena ke go retago! Batho ba re go nna: “A kae matšhošetši ale a Morena? A a a tliše!” Eupša ga se nke ke go hlohleletše gore o ba tlišetše masetlapelo. Ga se ka ba lakaletša nako ye ya go itlhoboga. Morena, seo se tsebja ke wena; o tseba se ke se boletšego. O se ke wa ntšhoša; ge masetlapelo a etla ke wena botšhabelo bja ka. O swabiše bantlhomari, e sego nna. A go tšhoge bona, e sego nna. O ba tlišetše masetlapelo, o ba otle o be o ba boeletše. Morena a re go nna: “Eya o eme Lesorong la Setšhaba, leo magoši a Juda a tsenago gape a tšwago ka lona; go tloga moo o ye masorong a mangwe a Jerusalema. O botše magoši le batho bohle ba Juda le badudi bohle ba Jerusalema ba ba tsenago ka masoro a gore ba theeletše se ke se bolelago. O ba botše gore ge eba ba rata go phela ba se ke ba rwala morwalo ka letšatši la Sabatha, goba ba tsena nawo ka masoro a Jerusalema, goba ba tšwa ka dintlong tša bona ba rwele selo ka letšatši la Sabatha. Ba se ke ba šoma ka letšatši la Sabatha; ba le hlomphe e le letšatši le lekgethwa, bjalo ka ge ke ile ka laela borakgolokhukhu ba bona. Borakgolokhukhu ba bona ba ile ba se ntheeletše, ba se ntshekegele tsebe. Bona ba ile ba ngangabala, ba se ntlhomphe, ba gana go kgalwa ke nna. “Ge setšhaba se se ka tloga se ntlhompha, ba se tsene ka masoro a motse ba rwele morwalo ka letšatši la Sabatha, ba hlompha Sabatha e le letšatši le lekgethwa, gomme ba se dire mošomo ofe le ofe, ke gona magoši le bakgomana ba ba bušago e le ditlogolo tša Dafida ba tlago tsena ka masoro a motse wo. Ba tla namela dikoloi tša ntwa gotee le batho ba Juda le badudi ba Jerusalema, ba namela le dipere, gomme motseng wo wa Jerusalema go tla dula go na le batho. Batho ba tla tla ba etšwa metseng ya Juda le tikologong ya Jerusalema; ba tla tšwa nageng ya Benjamene, le nagengtlase, le seleteng sa dithaba, le seleteng sa ka borwa se se omilego. Ba tla tliša dihlabelo tša go tšhungwa ka moka le dihlabelo tše dingwe, le dikabelo tša bupi le diorelo, le tšona dikabelo tša tebogo kua Tempeleng ya ka. Eupša ge ba ka se ntheeletše, ba se hlomphe Sabatha e le letšatši le lekgethwa, ba tsena ka masoro a Jerusalema ba rwele morwalo ka letšatši leo, ke tla gotša mollo wa hloka motimi masorong a Jerusalema, wa fiša dintlo tša mošate mo motseng.” Morena a re go nna: “Eya lapeng la mmopi wa dipitša, gomme moo ke tla go botša se o swanetšego go se botša setšhaba sa Israele.” Ka fao ka ya gona gomme ka hwetša mmopi a le modirong wa gagwe wa go bopa. Ge a be a ka re a bopa pitša ya se bopege gabotse, o be a tšea letsopa leo a bope ye nngwe ye e mo kgahlago. Ke moo Morena a rilego go nna: “Lena setšhaba sa Israele, kgane nna ga ke kgone go le dira seo mmopi a se dirilego letsopa lela? Bjalo ka ge mmopi a dira letsopa se a se ratago, le nna ke le dira se ke se ratago. Ge ka nakwana nka re ke yo hlahlamolla goba ke yo uša goba ke yo fediša setšhaba se sengwe goba mmušo, fela setšhaba seo sa tlogela bokgopo bja sona, gona nka se ba dire bošula bjo ke bego ke ikemišeditše bjona. Eupša ge nka re ke re ke yo hloma goba ke yo aga setšhaba goba mmušo, fela setšhaba seo sa se ntheeletše, mme sa dira tše ke bonago e le tše mpe, gona nka se se direle tše dibotse tše ke bego ke ikemišeditše go se direla tšona. Bjale ge, o botše batho ba Juda le badudi ba Jerusalema gore ke ba logela maano, ke ba obela masetlapelo. O ba botše gore ba lese go phela bophelo bjo bobe – ba lahle mekgwa le ditiro tša bona. Bona ba tla go fetola ba re: ‘Aowaa, go ka se re hole selo. Rena re tla dira se re se ratago; ka moka ga rena re tla ba le manganga, ra ba ba babe ka moo re ratago ka gona.’ ” Ka gona Morena o re: “Botšišang ditšhabeng tšohle ge eba go na le yo a kilego a kwa taba ya mohuta wo. Setšhaba sa Israele se dirile taba ye e šiišago! Kgane magaga a dithaba tša Lebanone a ke a hloke lehlwa? Melapo ya gona ye e tonyago ye e tšwago kgole yona e ke e pšhe? Eupša setšhaba sa ka sona se ntebetše; se tšhumela medimo ya lefeela diorelo. Medimo yeo e ba šitišitše go nkhunamela ka botlalo go etša ge ba be ba nkhunamela pele; ba phamogile tseleng ya mmakgonthe. Ba dirile gore naga ye e šiiše, e kwerwe go ya go ile. Bohle ba ba iphetelago ba tla tšhošwa ke se ba se bonago; ba tla šikinya dihlogo ba tlabegile. Ke tla tšitlanya setšhaba ka manaba, sa ba bjalo ka lerole le le tšewago ke phefo ya bohlabela. Ke tla ba furalela; nka se ba thuše ge masetlapelo a ba wela.” Ke moo setšhaba se rilego: “A re lakaneng Jeremia! Go tla no fela go na le baprista ba go re ruta, le banna ba bohlale ba go re eletša, le baprofeta ba go bega molaetša wa Modimo. A re mo tanyeng ka tše a di boletšego, gomme re lese go mo theeletša.” Ka gona nna ka rapela ka re: “Morena, nke o ele se ke se bolelago hloko, o kwe tše manaba a ka a di bolelago. Na e ka ba go loka go lefiwa ka bobe? Gape bona ba nkepetše molete gore ke wele ka go wona. Gopola ka moo ke ilego ka tla go wena ka ba rerelela gore o se sa ba galefela. Eupša bjale, Morena, bolaya bana ba bona ka tlala; ba bolawe ge ntwa e tsogile. A basadi ba bona ba hwelwe ke bana, le gona e be bahlologadi. A banna ba hwe ka bolwetši bja leuba, masogana a bolawe ntweng. A setšhaba se tle se goe se lle ge bahlakodi ba hula malapa a sona se sa itebetše. Ba nkepetše molete gore ke wele ka go wona, ba theile le melaba gore e ntanye. Eupša wena Morena o tseba maano ohle a bona a go mpolaya. O se ke wa ba swarela molato wa bona, goba wa ba lebalela sebe sa bona. A ba ušwe fase pele ga gago, gomme o ba otle o galefile.” Morena a re go nna: “Eya go reka pitša. O tšwele ka ntle ga motse o ye moeding wa Hinomo wo o lego kgauswi le Lesoro la Mangetana o felesetšwa ke ba bangwe ba bagolo ba setšhaba le baprista ba bangwe ba bagolo. Moo o fihle o bege molaetša wo ke tlago go fa wona. *** O re: Lena magoši a Juda le lena badudi ba Jerusalema, ekwang se Morena Ramaatlaohle, Modimo wa Israele, a se bolelago. O tlilo tlišetša lefelo le masetlapelo a magolo moo e lego gore mang le mang yo a kwago tša ona o tla gakgamala. Taba yeo o tla e dira ka gobane batho ba mo tlogetše mme ba dirile felo mo lefelo la go khunamela medimo e šele. Ba tšhumetše medimo ye mengwe dihlabelo gona – medimo ye bona le borakgolokhukhu ba bona le magoši a Juda ba bego ba sa e tsebe. Ba tladitše lefelo le madi a bahlokamolato, gomme ba bopetše Baale dintotoma gore ba tle ba tšhumele bana ba bona gona e be dihlabelo. Ba dirile se a sego a ba laela sona, goba a se bolela, goba a se nagana. Ka gona, go tla tla nako yeo lefelo le le ka se sa bitšwago Tofete goba moedi wa Hinomo, le tla bitšwa Moedi wa Polao. Gona fa ke mo a tlago fetoša maano a batho ba Juda le ba Jerusalema difefe. O tla lesa manaba a bona, e lego batho ba ba nyakago go ba bolaya, ba ba gagara ntweng. Ditopo tša bona o tla di gafela manong le dibata gore di di je. Motse wo o tla o thuba wa tšhoša batho, mme mofeti yo mongwe le yo mongwe o tla gakgamala, a kgotsa ka molodi tshenyo yeo ye kgolo. Manaba a tla dikanetša motse a leka go bolaya batho ba wona. Go dikanetšwa moo go tla šiiša mo e lego gore o tla dira gore batho ba gona ba je bana ba bona; ba tla jana seng. “Ke moka o pšhatle pitša yela pele ga banna bao ba go feleseditšego, gomme o ba botše gore nna, Morena Ramaatlaohle, ke re: ‘Ke tla pšhatlaganya batho ba le motse wo bjalo ka motho ge a pšhatlaganya pitša mo e ka se sa kgonago go momaganywa gape. Batho ba tla ipolokela bahu ba bona gona moo Tofete, ka gobane go tla be go se sa na bobolokelo bjo bongwe. Nna Morena ke re ke tla dira motse wo le badudi ba wona tša Tofete. Dintlo tša Jerusalema le dintlo tša magoši a Juda, gabotsebotse dintlo tšohle tšeo godimo ga ditlhaka tša tšona letšatši le ngwedi le dinaledi di bego di tšhumelwa diorelo, gape tšeo godimo ga tšona medimo ye mengwe e bego e tšhollelwa seno e le kabelo – tšohle di tla be di tšhilafetše go etša Tofete.’ ” Jeremia a napa a tloga Tofete moo Morena a bego a mo romile gore a ye go bega molaetša wa gagwe. A fihla a ema ka kgorong ya Tempele a botša batho bohle gore Morena Ramaatlaohle, Modimo wa Israele, o rile: “Motse wo le metsana yohle ya kgauswi le wona ke tla e tlišetša masetlapelo ohle a ke a boletšego, ka gobane batho ba gona ba ngangabetše, ba ganne go kwa tše ke bego ke ba botša tšona.” Moprista Pashure, morwa wa Imere, e be e le mohlankedimogolo wa ka Tempeleng. Ge a ekwa Jeremia a bega ditaba tše, a laela gore a bethwe, a be a tlengwe maoto dikoteng lesorong la Benjamene la ka godimo Tempeleng. Mosong wa letšatši le le latelago, ge Pashure a seno lokolla Jeremia, Jeremia a re go yena: “Morena ga a sa go bitša ka la Pashure, o go bitša ka la ‘Poifokagohle’, ka gobane yena o rile: ‘Ke tla go dira moipoifi wa go boifša le ke bagwera ba gago ka moka, gomme ba tla bolawa ke manaba ka tšhoša o lebeletše. Ke yo gafela batho ka moka ba Juda diatleng tša kgoši ya Babilonia, yena a ba thopela Babilone, goba a ba bolaya. Le gona ke tla lesa manaba a bona a thopa lehumo lohle la motse wo, gomme a thopa le dithoto tšohle tša wona, le dilo tšohle tše bohlokwa, ešita le mahumo ohle a magoši a Juda, a thotha tšohle a di iša Babilonia. Ge e le wena, Pashure, le bohle ba lapa la gago le tla thopša la išwa Babilonia. O tla hwela gona, wa bolokwa gona, wena le bagwera ba gago ka moka bao o ba boditšego maaka o re o boditšwe ke nna.’ ” Morena, o mphoraforeditše, gomme ka foraforetšega. O tiile go mpheta, gomme o mphentše. Bohle ba a ntshega, ba nkwera letšatši lohle. Nako le nako ge ke bolela ke hlaba mokgoši ke re: “Ke a hlaselwa, ba a mpolaya!” Morena, ka mehla ke a kwerwa, ke a nyatšwa, ka gobane ke bega tše o mpoditšego tšona. Eupša ge ke re: “Ke tla itebatša Morena gomme ka se sa bolela ka leina la gagwe,” gona molaetša wa gago o ba bjalo ka mollo wo o tukago ka tengteng ga ka. Ke lapišitšwe ke go meletša, le ge ke re ke a leka ke a palelwa. Ke kwa ba bantši ba botšana ka sehebehebe ba re: “Mo gohle ke letšhogo! A re mmegeng go baokamedi!” Ešita le bagwera ba ka ka moka ba letetše gore ke palelwe ke boprofeta. Ba re: “Mohlomongwe a ka šaetša dipolelong. Ke moo re ka mo swarago ra itefeletša.” Eupša wena, Morena, o ema le nna, o tiile mme o senatla, gomme bantlhomari ba tla kgopša, ba ka se atlege. Ba tla lewa ke dihlong kudu, ka gore ba ka se tšwelele. Kgobogo ya bona e ka se tsoge e lebetšwe. Fela wena, Morena Ramaatlaohle, o leka batho ka toka; o tseba tša ka dipelong le megopolong ya bona. Ka gona a ke go bone o itefeletša manabeng a ka, gobane diatleng tša gago ke gafetše taba ya ka. Opelelang Morena! Retang Morena! O hlakodišitše bagatelelwa diatleng tša ba babe. A go rogakwe letšatši le ke tswetšwego ka lona! A letšatši leo mma a ntswetšego ka lona le hloke tšhegofatšo! A go rogakwe monna yo a thabišitšego tate kudu ka go mmegela a re: “O belegetšwe ngwana wa mošemane!” Monna yoo a a swane le metse yela Morena a ilego a e fediša a se ne lešoko. Ka masa a a kwe dillo tša bakwešwabohloko, gomme mosegare wo mogolo a kwe phalafala ya ntwa, ka ge a se a mpolaya pele ke belegwa, popelo ya mma ya ba lebitla la ka, mma ya ba moimana go ya go ile. Ke tswaletšwe eng ge e se matshwenyego le dipelaelo gore ke goboge bophelong bja ka? Kgoši Tsedekia wa Juda o ile a roma Pashure, morwa wa Malkia, le moprista Sofonia, morwa wa Maasea, go Jeremia a mo kgopela a re: “Nke o re botšišetše go Morena gore na go tlilo diregang, ka gobane Nebukadnesare, kgoši ya Babilonia, o lwa le rena. Mohlomongwe Morena a ka re direla mohlolo wa gagwe wo mongwenyana bjalo ka ge a fela a re direla, wa go dira gore Nebukadnesare a re tlogele.” Jeremia a ba fetola ka go re: “Le botše Tsedekia gore Morena Modimo wa Israele o re: ‘Ke tlilo fenya madira a gago ao a lwago le kgoši ya Babilonia le madira a gagwe ao a le dikaneditšego ka ntle ga morako. Ke tla kgobela dibetša tša madira a gago gare ga motse. Nna ka sebele ke tla lwa le lena ka maatla a ka ka moka ke galefile ebile ke befetšwe o šoro. Ke tla bolaya badudi ba motse wo; batho le diphoofolo di tla bolawa ke leuba le lešoro la bolwetši. Ya ba gona ke gafelago wena, Kgoši Tsedekia wa Juda, le bahlanka ba gago, le mašaledi a motse wo a a phologilego leubeng le ntweng le tlaleng diatleng tša Kgoši Nebukadnesare wa Babilonia le go tša manaba a lena a a nyakago go le bolaya. Nebukadnesare o tla le bolaya. A ka se le šokele, goba a le babalela, goba a le hlomogela pelo. Ke realo, nna, Morena.’ ” Ka morago ga moo Morena a ntaela gore ke tsebiše setšhaba ke re: “Theeletšang! Nna Morena ke re ikgetheleng tsela ye e išago bophelong, goba ye e išago lehung. Yo a šalago mo motseng o tla bolawa ka tšhoša, goba ka tlala, goba ka leuba la bolwetši. Eupša yo a ka tšwelago ntle a ineela go Bababilonia bao bjale ba le dikaneditšego o tla iphološa, a ka se bolawe. Ke ikemišeditše go se babalele motse wo, eupša go o fediša. O tla gafelwa go kgoši ya Babilonia, gomme yena o tla o tšhuma thokgethokge. Ke realo, nna, Morena.” Morena a mpotša gore ke re go ba lapa la mošate wa naga ya Juda: “Lena ditlogolo tša Dafida, ekwang se nna, Morena, ke se bolelago. Le šetše gore go dirwe toka ka mehla. Le lamolele mohlalefetšwa go mohlalefetši wa gagwe, gore tše mpe tše le di dirago di se laumiše kgalefo ya ka bjalo ka mollo wa go hloka motimi. *** Ke lwa nago, wena Jerusalema, kokamamoedi, selalatlapeng. Wena o re ga go yo a kago go hlasela goba a šwahla dibo tša gago. Fela nna ke tlilo go otla ka mo go swanelago ditiro tša gago. Ke tla tšhuma sethokgwa sa gago ka mollo mme wona wa fiša sengwe le sengwe se se o dikologilego. Ke realo, nna, Morena.” Morena a mpotša gore ke ye mošate, ga kgoši ya Juda, ke fihle ke re: “Ekwa gore Morena o reng, wena kgoši ya Juda o bušago o le setlogolo sa Dafida, wena le bahlanka ba gago le setšhaba sa gago se se tsenago ka dikgoro tša mošate. O re: ‘Le direng tše di lokilego le tše di swanelago; le lamolele mohlalefetšwa go mohlalefetši wa gagwe; le se gatelele goba la hlakiša mofaladi, goba tšhiwana, goba mohlologadi, le gona le se bolaye ba ba se nago molato mo mošate. Ge ruri le ka dira ka mo ke le laetšego ka gona, gona ditlogolo tša Dafida di tla tšwela pele le go buša. Gomme bona le bahlanka ba bona le setšhaba sa bona ba tla fela ba tsena ka dikgoro tša mošate wo ba nametše dikoloi tša ntwa, ba nametše le dipere. Eupša ge le ka se phethe ditaelo tša ka, gona ke ikana gore mošate wo o tla fetoga mašope.’ Ke realo, nna, Morena. “Go nna, motse wa mošate, ga kgoši ya Juda, ke wo mobotse bjalo ka naga ya Gileade le ntlhora ya dithaba tša Lebanone; eupša ke tla o fetoša leganata, ka o fetoša motse wa go hloka badudi. Ke tla roma banna ba go yo o pšhatla. Mongwe le mongwe o tla ya a swere selepe a phapha dikota tša wona tše dibotse tša mosedere, a di lahlela mollong. “Ka morago batho ba bantši ba ditšhaba ba tla feta kgauswi le motse wo, mme ba botšišana gore go tlile bjang gore nna, Morena, ke dire taba ya mohuta wo motseng wo wo mogolo. Gomme ba tla fetolana ka gore ke ka baka la ge ba furaletše kgwerano ya ka le lena, nna, Morena Modimo wa lena, la khunamela medimo ye mengwe la e hlankela.” Se lleleng yola a hwilego goba la mo ilela; eupša llelang gabohloko yola a ilego bothopša, gobane a ka se sa boa a tla bona naga ye a tswaletšwego go yona. Mabapi le Shalume, morwa wa Josia, kgoši ya Juda, yena Shalume yo a bušago legatong la tatagwe, mme bjale a tlogilego mo, Morena o re: “A ka se sa boa, gobane o tla hwela nageng yeo a thopetšwego go yona, gomme a ka se sa tsoga a bone naga ye.” Go madimabe motho yo a ikagelago ntlo ka bohwirihwiri, le diphapoši tša yona tša ka godimo ka boradia; yo a dirago gore mogagabo a šomele lefeela, a sa mo lefe. Go madimabe yo a rego: “Ke tla ikagela ntlo ya kgoparara ya diphapoši tše dikgolo tša ka godimo.” Ke moka a e tsenya mafasetere, a e kgabiša ka diphaphathi tša mosedere, gomme a e tlotša bohwibidu. Na go rata mesedere ga gago go ka go dira kgoši ye kaone? Tatago o be a phela a iketlile, a dira tše di lokilego le tše di swanelago, mme a atlega. O be a šetša gore bahlaki le bahloki ba direlwe ka toka, gomme a phela ka boiketlo. Montlhankedi o phela ka mokgwa woo. O realo, Morena. Eupša wena sa gago ke fela go ikhola, le go bolaya ba ba se nago molato, le go gatelela ba bangwe ka šiši. Ka baka leo, Morena o bolela ka morwa wa Josia, Joyakime, kgoši ya Juda, o re: “Ge a hwile batho ba ka se mo llele ba re: ‘Jonna, ngwanešo! Jonna, kgaetšedi!’ Ba ka se mo llele ba re: ‘Jonna, mong wa ka! Jonna, kgoši ya ka!’ O tla bolokwa bjalo ka pokolo – o tla gogoišwa a yo lahlelwa ka ntle ga masoro a Jerusalema.” Namelang thaba tša Lebanone le yo lla. Eyang nageng ya Bashane le yo hlaba mokgoši, le goelele le le dithabeng tša Abarime, ka gobane bathuši ba lena ba bolailwe. Morena o boletše le lena mola le sa atlega, eupša la gana go mo theeletša. Seo ke se le se dirilego go tloga bjaneng bja lena; le be le sa theeletše Morena. Baetapele ba lena ba tla ubulwa ke ledimo, bathuši ba lena ba tla išwa bothopša, motse wa lena o tla gobošwa wa lešwa dihlong ka baka la tše mpe tše le di dirilego. Lena le itotago ka dintlong tša lena tša mesedere ya Lebanone, mohla le swerwe ke bohloko bja go etša bja mosadi yo a swerwego ke lešoko la pelego le tla tsetla bjang! Morena a re go Joyakine, morwa wa Kgoši Joyakime wa Juda: “Ruri, ka ge ke le Morena yo a phelago, le ge o ka be o le palamonwana ya boitsebišo mo seatleng sa ka sa go ja, ke be ke tla go khwamola, ka go gafela batho ba ba nyakago go go bolaya, batho ba o ba boifago, e lego Nebukadnesare, kgoši ya Babilonia, le madira a gagwe. Ke tla le lelekela nageng e šele, wena le mmago, nageng ye le sego la tswalelwa go yona, gomme le tla hwela gona. Le tla duma go boela nageng ye, eupša le ka se boele.” Na Kgoši Joyakine o swana le lengeta la pitša ye e phumegilego mme ya lahlwa, le le sa nyakwego ke motho? Na ke ka baka leo yena le bana ba gagwe ba rakwago mme ba lahlelwa nageng ye ba sa e tsebego? Hee, wena naga! Naga wee! Naga wee! Ekwa gore Morena o reng. O re: “Monna yo o tlilo loba bana ba gagwe, ya ba motho mohlokakatlego. A ka se be le setlogolo sa go buša naga ya Juda e le wa lešika la Dafida.” Go madimabe baetapele ba setšhaba sa Morena! Ba swana le badiša bao ba phatlalatšago mohlape mme ba o lesa o bolawa. Mabapi le badiša bao modiro wa bona e lego go hlokomela setšhaba sa gagwe, Morena Modimo wa Israele o re: “Ga se la hlokomela mohlape wa ka; le o šwalalantše, le o lelekile. Bjale ke tla le otlela bokgopo bjo le bo dirilego. Ke tla kgoboketša mašaledi a mohlape wa ka dinageng tšohle tše ke o swalalanyeditšego go tšona, ka o bušetša lešakeng la ona. O tla ata, o tla oketšega. Ke tla o nyakela badiša ba go o hlokomela. O ka se sa boifa goba wa gakanega goba wa timela. Ke realo, nna, Morena.” Morena o re: “Go tla tla nako yeo ka yona ke tlago fa setšhaba sa ka setlogolo sa Dafida se se lokilego gore e be kgoši. Kgoši yeo e tla buša ka bohlale gomme ya dira tše di swanetšego le tše di lokilego nageng ka moka. Mehleng ya pušo ya gagwe batho ba Juda ba tla bolokega, le batho ba Israele ba tla dula ba iketlile. O tla bitšwa ‘Morena Morephološi’. ” Morena o re: “Go tla tla nako yeo ka yona batho ba ka se sa enago ka nna, Morena yo ke phelago, yo ke ntšhitšego setšhaba sa Israele nageng ya Egepeta. Eupša ba tla ena ka nna, Morena yo ke phelago, yo ke ba ntšhitšego nageng ya ka leboa le dinageng ka moka moo ke bego ke ba šwalalanyeditše gona. Ke gona ba tlago dula nageng ye ya bona.” Mabapi le baprofeta Jeremia o re: “Ke ferekane kudu, ke thothomela mmele wohle. Ka baka la Morena, ka baka la mantšu a gagwe a makgethwa, ke bjalo ka monna yo a tagilwego, monna yo a gampetšego beine. Naga e tletše diotswa; batho ba phela bophelo bjo bobe, ba šomiša maatla a bona gampe. Ka baka la thogako ya Morena naga e iletše, gomme le mafulo a lešoka a omeletše.” Morena o re: “Baprofeta le baprista ba ntlhokomologile; ke fela ke ba bona ba dira tše mpe ka Tempeleng ya ka. Tsela ya bona e tla ba thedimoša; ke tla ba kgorometša ba le leswiswing ba wela fase. Mohla ke ba otla ke tla ba tlišetša masetlapelo. Ke realo, nna, Morena. Ke bone baprofeta ba Samaria ba dira taba ya go selekiša: Ba porofeta ba hlohleletšwa ke Baale, gomme ba timetša setšhaba sa ka sa Israele. Eupša tše ke di bonego di dirwa ke ba Jerusalema tšona di a tšhoša: Ba a otswa, ba dula ba bolela maaka; ba hlohleletša ba go dira tše kgopo gore ba se lese go di dira. Bohle go nna ba swana le badudi ba Sodoma; badudi ba Jerusalema ke ba swantšha le ba Gomora. “Ka baka leo, seo nna, Morena Ramaatlaohle, ke se bolelago mabapi le baprofeta sese: Ke tla ba leša lengana, ka ba ka ba noša meetse a mpholo, ka gobane baprofeta ba Jerusalema ba botša batho mo gohle nageng gore ba kgeloge. “Nna, Morena Ramaatlaohle, ke re: Le se ke la theeletša se baprofeta ba se bolelago; ba le holofetša tše di sego gona. Ba bolela ka dipono tše ba inaganelago tšona, e sego tše di boletšwego ke nna. Ba fela ba botša bao ba nnyatšago ba re dilo di tla ba lokela, ba botša le bohle ba ba ngangabalelago go dira se ba se ratago, ba re ba ka se welwe ke madimabe.” Ke mang gare ga baprofeta ba yo a kilego a ba lekgotleng la Morena a mmona, a ba a kwa tše a di bolelago? Ke re ke mang gare ga bona yo a kilego a ela dipolelo tšeo tša gagwe hloko mme a di theeletša? Kgalefo ya gagwe ke ledimo, ke sesasedi se se gaketšego, se se tlago se tšubutla ka godimo ga bakgopo, gomme e ka se kgaotše pele a phetha tšohle tše a nyakago go di phetha. Lena seo le tla se lemoga ge nako e fihla. “Baprofeta ba ga se ba rongwa ke nna, ba iketše ka bobona ba kitima. Ga se ka ba fa molaetša, eupša ba no bolela ka leina la ka. Ge ba ka be ba bile lekgotleng la ka ba ka be ba begetše setšhaba sa ka molaetša wa ka, gomme ba ka be ba se tlogedišitše mekgwa ya sona ye mebe le tše mpe tše se di dirago. “Na ke nna Modimo ge ke le kgauswi fela, ga se nna Modimo le ge ke le kgole? Na motho a ka khuta mo nka se kego ka mmona? Kgane ga ke mo gohle legodimong le lefaseng? Ke kwele tše baprofeta bao ba go bolela maaka ka leina la ka ba di boletšego, ba re nna ke ba file melaetša ya ka ditorong tša bona. Na baprofeta bao ba tla feletša kae le go kgahlwa ke go porofeta maaka le go bega boikaketši bja bona? Ba gopola gore ditoro tše ba di botšanago di tla dira gore setšhaba sa ka se ntebale, bjalo ka ge borakgolokhukhu ba bona ba ile ba ntebala, ba thoma go khunamela Baale. Moprofeta ge a lorile o swanetše go bolela gore ke toro fela, eupša moprofeta yo a kwelego molaetša wa ka o swanetše go o bega ka potego. Mooko ke eng ge o bapetšwa le mabele? Ke realo, nna, Morena. Molaetša wa ka o swana le mollo, ke realo, nna, Morena, o bjalo ka noto ye e pšhatlaganyago maswika. Nna, Morena, ke re ke tenwa ke baprofeta bao ba bolelago tšeo di bolelwago ke ba bangwe mme ba di bega gore ke wona molaetša wa ka. Ebile ke lwa le baprofeta bao ba bolelago tša bona mme ba re di tšwa go nna. Ke realo, nna, Morena. Nna, Morena, ke re ke lwa le baprofeta bao ba bolelago ditoro tša maaka. Ba anega ditoro tšeo gomme ba timetša setšhaba sa ka ka maaka le boikgantšho. Nna ga se ka ba roma goba ka ba laela selo, gomme ga ba thuše setšhaba se ka selo. Ke realo, nna, Morena.” Morena a re go nna: “Jeremia, ge setšhaba se goba moprofeta goba moprista a go botšiša a re: ‘Molaetša wa Morena o reng?’ wena o mmotše o re: ‘Lena le morwalo wa Morena, gomme yena o tlilo le rola.’ Ge yo mongwe wa setšhaba sa ka goba moprofeta goba moprista a ka bolela mantšu a go re: ‘morwalo wa Morena’, ke tla mo otla, yena le ba lapa la gagwe. Se ba swanetšego go se dira ke gore mongwe le mongwe a botšiše bagwera le meloko yabo a re: ‘Na Morena o arabile bjang? Na Morena o rileng?’ Ka gona ba name ba se sa bolela mantšu a go re: ‘morwalo wa Morena’, ka gobane ge motho a ka a bolela, mantšu ao a gagwe e tla ba morwalo go yena. Setšhaba se fapošitše mantšu a Modimo wa sona, Modimo yo a phelago, Morena Ramaatlaohle. Wena Jeremia, botšiša baprofeta o re: ‘Morena o le arabile bjang? Morena o rileng?’ Gomme ge ba ka se phethe taelo ya ka, ba no fela ba re ‘morwalo wa Morena’, gona o ba botše gore ka nnete ke tla ba topa ka ba lahlela kgole le nna, bona gotee le motse wo ke o filego bona le borakgolokhukhu ba bona. Ke tla dira gore ba lewe ke dihlong go ya go ile, kgobogo ya bona e se ke ya tsoga e lebetšwe.” Morena a mpontšha dirotwana tše pedi tša mago di beilwe pele ga Tempele ya gagwe. E be e le ka morago ga ge Nebukadnesare, kgoši ya Babilonia, a seno thopa Joyakine, kgoši ya Juda, morwa wa Joyakime, kua Jerusalema a mo iša Babilone gotee le baetapele ba Juda, le bakgoni ba mediro ya diatla, le barulatshipi. Se sengwe serotwana se be se swere mago a mabotsebotse, a nkego dithakangwaga; se sengwe se be se swere mago a go se tsebalege, a go se jege. Morena a napa a re go nna: “Jeremia, o bonang?” Nna ka mo fetola ka re: “Mago. A e lego a mabotse ke a mabotse kudu, gomme a go se tsebalege e tloga e le a a sa tsebalegego, le go jega a ka se jege.” Ke moo Morena a rilego go nna: “Nna, Morena Modimo wa Israele, ke bona mathopša a Juda ao ke a tlošitšego mo ka a iša nageng ya Babilonia a swana le mago a a mabotse, gomme ke tla ba yo botho go bona. Ke tla dula ke ba hlokometše ka tla ka ba bušetša mo nageng ye. Ke tla ba phediša, ka se ba fediše; ke tla ba hloma, ka se ba tumole. Ke tla ba lemoša gore ke nna Morena. Ke gona e tlago ba setšhaba sa ka, gomme nna ka ba Modimo wa bona, ka gobane ba tla be ba boetše go nna ka dipelo tša bona ka moka. “Ge e le Kgoši Tsedekia wa Juda le bakgomana ba gagwe le mašaledi a Jerusalema ao a šetšego nageng ye goba a ilego Egepeta – nna, Morena, ke tla ba swara bjalo ka mago a go se tsebalege, a go se jege. Ke tla ba tlišetša masetlapelo a mašoro mo e lego gore ditšhaba ka moka tša lefase di tla tšhoga. Batho ba tla ba kwera, ba ba phara dika, ba ba kodutla, gomme gohle mo ke ba šwalalanyetšago gona leina la bona ya ba motswiri. Ke tla ba bolaya ka tšhoša le ka tlala le ka leuba la bolwetši go fihlela go se sa na le o tee wa bona mo nageng ye ke e filego bona le borakgolokhukhu ba bona.” Ka ngwaga wa bone wa ge Joyakime, morwa wa Josia, e le kgoši ya Juda, Jeremia o ile a fiwa molaetša ke Morena mabapi le batho bohle ba Juda. E be e le ka ngwaga wa mathomo wa ge Nebukadnesare e le kgoši ya Babilonia. A botša batho ka moka ba Juda le ba Jerusalema a re: “Mengwageng ye masome a mabedi le metšo ye meraro go tloga ka ngwaga wa lesome le metšo ye meraro wa ge Josia, morwa wa Amone, e le kgoši ya Juda go fihlela le lehono le, Morena o be a bolela le nna, gomme nna ga se nke ke lese go le botša se a se boletšego. Eupša lena ga se la di ela hloko. Le be le sa theeletše le bile le sa šetše, ešita le ge Morena a be a fela a le romela bahlanka ba gagwe, baprofeta. Ba be ba le botša gore le tlogele tsela ya lena ye mpe le dilo tše mpe tše le di dirago, gore le tle le fele le dula mo nageng ye Morena a le fetšego yona sa ruri, lena le borakgolokhukhu ba lena. Ba be ba le botša gore le se ke la ya go medimo e šele la e hlankela, la e khunamela, la seleka Morena ka dilo tše le di dirilego ka diatla, gore a se tlo le hlokofatša. Eupša yena Morena o re ga se la mo theeletša, le mo selekile ka dilo tše le di dirilego ka diatla, mme la ikobela madimabe. “Ka baka leo, Morena Ramaatlaohle o re: ‘Ka ge le se la ntheeletša ke yo bitša ditšhaba tšohle kua leboa gotee le mohlanka wa ka, Nebukadnesare, kgoši ya Babilonia. Ke tla ba tliša mo gore ba lwe le badudi ba naga ye, ba be ba lwe le ditšhaba tše di bapilego nabo. Ke tlilo ba fediša taa, mme batho ba tla tšhoga ba gakgamala ge ba di bona. Dinaga tša bona di ka se sa dulwa ke batho. Ke realo, nna, Morena. Ke tla fediša mekgolokwane ya bona ya lethabo le tlhalalo, le menyanya ya lenyalo, le go šilwa go ka se sa šilwa, le seedi sa lebone se ka se sa ba gona. Naga ye e tla fetoga leganata gomme batho ba tla tšhoga ge ba e bona; ditšhaba tše di e dikologilego di tla hlankela kgoši ya Babilonia mengwaga ye masome a a šupago. Ka morago ga moo ke tla otla kgoši ya Babilonia le setšhaba sa gona ka baka la sebe sa bona. Ke tla hlokiša naga yeo badudi go ya go ile. Ke tla e dira tšohle tše ke boletšego gore ke tla e dira tšona, tšohle tše di ngwadilwego ka pukung ye, tše Jeremia a di porofetetšego ditšhaba tšohle. Ke tla itefeletša ka Bababilonia ka baka la tše ba di dirilego, gomme ditšhaba tše dintši le magoši a maatla ba tla ba dira makgoba.’ ” Morena Modimo wa Israele a re go nna: “Tšea senwelo se sa beine se tletšego kgalefo ya ka, o yo se noša ditšhaba tšohle tše ke go romago go tšona. Ge ba se nwele ba tla thekesela, le gona ba tla ba bjalo ka digafi ka baka la manaba a ke a romago gore a lwe nabo.” Ka gona ka tšea senwelo seo ka seatleng sa Morena, ka yo se noša ditšhaba tšohle tše Morena a bego a nthomile go tšona. Jerusalema le metse ya naga ya Juda, gotee le magoši a yona le baetapele ka ba noša sona gore ba fedišwe, gore ba ba di bonago ba tšhoge, ba gakgamale, ba be ba rogake ka maina a metse yeo le magoši le baetapele ba gona – bjalo ka ge go sa le bjalo le lehono. Ba bangwe ba ke ilego ka ba noša sona šeba: Kgoši ya Egepeta, le bahlanka ba gagwe, le bakgomana ba gagwe, le setšhaba sa gagwe ka moka; mahlakanasela ohle a Egepeta; magoši ka moka a naga ya Utse; magoši ka moka a metse ya Bafilista ya Ashkelone, le ya Gasa, le ya Ekrone, le mašaledi a Ashdode; batho ba Edomo, le ba Moaba, le ba Amone; magoši ka moka a Tirose le a Sidone; magoši ka moka a dinaga tša Lewatle la Mediteraniene; metse ya Dedane, le ya Tema, le ya Buse; batho ka moka ba go kota tlopo; magoši ka moka a Arabia; magoši ka moka a mahlakanasela a a dulago leganateng; magoši ka moka a Simri, le a Elamo, le a Media; magoši ka moka a leboa, a kgole le a kgauswi, ba nwe ka go šielana. Ba mebušo yohle ya lefase ka moka ba ile ba swanela go nwa senwelo seo. Mafelelong se tla nwewa ke kgoši ya Sheshake. *** *** *** *** *** *** *** Ke ge Morena a re go nna: “Botša ditšhaba gore nna, Morena Ramaatlaohle, Modimo wa Israele, ke ba laela gore ba nwe, ba tagwe, ba be ba hlatše; ba tla wela fase mme ba palelwa ke go tsoga, ka baka la manaba a ke a romago gore a lwe nabo. Gomme ge ba ka gana go tšea senwelo seo ka seatleng sa gago ba se nwa, gona o ba botše gore Morena Ramaatlaohle o re le tla ba la se nwa. Motse wo e lego wa ka ke thoma go o tlišetša masetlapelo. Kgane bona ba gopola gore ba ka se otlwe? Ba tla otlwa, gobane ke tla roma manaba go yo lwa le bohle ba ba lego lefaseng. Ke realo, nna, Morena Ramaatlaohle. “Batho ba o ba begele tšohle tše ke di boletšego, o re: “ ‘Morena o tla bopa a le godimo, a duma a le bodulong bja gagwe bjo bokgethwa. O tla bopela setšhaba sa gagwe; o tla hlaba mokgoši boka ba ba pitlago diterebe ka maoto, a o hlabela badudi bohle ba lefase, gomme mokgoši wa gona o tla kwala le mafelelong a lefase. Morena o sekiša ditšhaba. O tla iša batho bohle tshekong, bakgopo a ba bolaya ka tšhoša. O realo, Morena.’ ” Morena Ramaatlaohle o re masetlapelo a tla wela ditšhaba ka go latelana ga tšona, gomme le ledimo le legolo le tsogile kua mafelelong a lefase. Mohlang woo ditopo tša bao ba bolailwego ke Morena di tla gašagana go tloga khutlong ye nngwe ya lefase go yo fihla go ye nngwe. Ga go yo a tlago ba ilela, le gona ditopo tša bona di ka se kgoboketšwe goba tša bolokwa. E tla ba nke ke dišu nageng. Gololang, lena baetapele, lena badiša ba setšhaba, le hlaboše lentšu! Ilelang mme le pshikologeng leroleng. Nako ya gore le šwalalanywe mme le kgabetlelwe e fihlile, gomme le tla kgabetlelwa bjalo ka dinku tša dikgapa tše dibotsebotse. Badiša bao ba ka se hwetše botšhabelo; baetapele ba ba setšhaba ba ka se phonyokge. Ekwang badiši bao ba a lla; baetapele bao ba setšhaba ba a golola ka gobane Morena o fediša setšhaba sa bona. O lobiša naga ye e iketlilego a galefile. O tlogetše setšhaba sa gagwe boka tau ye e tlogelago seroba sa yona, gobane naga ya bona e fetogile lešoka ka baka la masetlapelo a ntwa gotee le kgalefo ye šoro ya Morena. E rile ge Joyakime, morwa wa Josia, a sa tšo bewa kgoši ya Juda, Morena a re go Jeremia: “Ema ka lapeng la Tempele ya ka o begele batho ba ba tlago go rapela ba etšwa metseng ya Juda tšohle tše ke go laetšego tšona gore o ba botše. O se ke wa tlogela selo. *** Mohlomongwe setšhaba se ka go theeletša gomme sa tlogela mekgwa ya sona ye mebe. Ke mo ke tlago lesa masetlapelo a ke ikemišeditšego go ba otla ka ona ka baka la mediro ya bona ye mebe.” Morena a mpotša gore ke botše setšhaba ke re: “Nna, Morena, ke rile le ntheeletše le phethe melao ye ke le beetšego yona, le šetše tše di boletšwego ke bahlanka ba ka, baprofeta, bao ke bego ke fela ke ba roma go lena. Ga se la phetha tše ba le boditšego tšona. Ge le ka no se di phethe, gona Tempele ye ke tla e dira se ke se dirilego Shilo, gomme ditšhaba tšohle tša lefase di tla kgatla motswiri ka leina la motse wo.” Baprista le baprofeta le setšhaba ka moka ba ile ba kwa Jeremia ge a bolela ditaba tšeo ka Tempeleng ya Morena, gomme ge a fetša go bolela tšohle tše Morena a bego a mo laetše go di botša setšhaba, baprista le baprofeta le setšhaba ka moka ba mo swara ba re: “O swanetše go bolawa! Ke go reng ge o bolela ka leina la Morena o re Tempele ye e tla swana le Shilo, le gona motse wo e tla ba mašope, gwa se dule motho go wona?” Ya ba setšhaba se mmokanela gona moo Tempeleng ya Morena. E rile ge baetapele ba Juda ba ekwa se se diregilego, ba rotoga mošate ba ya Tempeleng gomme ba fihla ba dula Lesorong le Lefsa. Baprista le baprofeta ba nama ba re go baetapele le go setšhaba ka moka: “Monna yo o lebanwe ke go ahlolelwa lehu, ka gobane o porofetetše motse wo tše mpe. Le mo kwele ka tša lena ditsebe.” Ke mo Jeremia a rilego go baetapele ka moka le setšhaba ka moka: “Nna ke romilwe ke Morena gore ke porofete tšohle tše le kwelego ke di bolela ka Tempeleng ye le motseng wo. Ka gona, sokologang mekgweng ya lena ye mebe le go tše mpe tše le di dirago, gomme le theeletše Morena Modimo wa lena. Ke mo a tlago lesa masetlapelo ao a le boditšego gore o tla le otla ka ona. Ge e le nna, ke diatleng tša lena! Dirang ka nna se le bonago gore se lokile ebile se a swanela. Fela le tsebe gore ge le ka mpolaya, lena le badudi ba motse wo le tla be le ikobela molato wa go bolaya monna yo a se nago molato, ka gobane gabotsebotse yo a nthomilego go le botša taba tše ka moka ke Morena.” Ke mo baetapele le setšhaba ka moka ba boditšego baprista le baprofeta ba re: “Monna yo o boletše le rena ka leina la Morena Modimo wa rena; ga se a swanela go bolawa.” Bagolo ba bangwe ba setšhaba ba ema, ba re go batho ka moka ba ba bego ba kgobokane: “Mola Hiskia e le kgoši ya Juda, moprofeta Mika wa Moreshete o kile a botša setšhaba ka moka sa Juda gore Morena Ramaatlaohle o rile: “ ‘Sione e tla lengwa boka tšhemo, Jerusalema e tla fetoga mašope, le thaba ya Tempele e tla ba mmoto wa sethokgwa.’ “Kgane Kgoši Hiskia le setšhaba ka moka sa Juda ba ile a bolaya Mika? Na Hiskia ga se a boife Morena, a ithapeletša go yena, mme Morena a lesa masetlapelo ao a bego a ba boditše gore o tla ba otla ka ona? Bjale ge, rena re šetše re ikobela masetlapelo a a šiišago.” Go be go na le yo mongwe monna ba re ke Uria, morwa wa Shemaya, wa go tšwa Kiriate-Jearime, yo a bego a porofetela motse wo le naga ye tše mpe ka leina la Morena tša go swana le tše di bego di porofetwa ke Jeremia. Ge Kgoši Joyakime le madira a gagwe le bakgomana bohle ba ekwa tše Uria a di boletšego, kgoši a nyaka go bolaya Uria. Eupša Uria a re go kwa a tšhoga, gomme a tšhabela Egepeta. Kgoši Joyakime a roma Elnathane, morwa wa Akboro, le banna ba bangwe Egepeta ba go mo felesetša. Ba fihla ba swara Uria gona kua Egepeta, ba mo tliša go Kgoši Joyakime. Yena a laela gore a bolawe ka tšhoša, mme setopo sa gagwe se lahlelwe ka mabitleng a go bolokela bathofela. Eupša Jeremia o ile a se gafelwe setšhaba gore se mmolaye, ka gobane Ahikamo, morwa wa Shafane, o be a ema le yena. E rile ge Tsedekia, morwa wa Josia, a sa tšo bewa kgoši ya Juda, Morena a laela Jeremia gore a itirele joko ya go ba le marala, gomme a e rwale molaleng. A mo laela gore a romele molaetša go kgoši ya Edomo, le go ya Moaba, le go ya Amone, le go ya Tirose, le go ya Sidone ka batseta ba bona bao ba bego ba tlile Jerusalema go bona Tsedekia, kgoši ya Juda. Morena Ramaatlaohle, Modimo wa Israele, a mmotša gore a ba laele gore ba tsebiše magoši a bona gore Morena o rile: “Ka maatla a ka a magolo le bonatla ke hlodile lefase le batho le diphoofolo tšohle tše di phelago lefaseng, gomme maatla a ke a fa yo ke mo ratago. Ke nna ke gafetšego dinaga tše ka moka diatleng tša mohlanka wa ka, Nebukadnesare, kgoši ya Babilonia, ke mo file le diphoofolo tša naga gore di mo šomele. Ditšhaba tšohle di tla mo loba, tša loba le morwagwe le setlogolo sa gagwe go fihlela go etla nako ya gore setšhaba sa gagwe se otlwe. Ke gona setšhaba seo sa gagwe se tlago loba ditšhaba tše maatla le dikgoši tše dikgolo. “Eupša ge go ka ba le setšhaba goba mmušo wo o ganago go loba Nebukadnesare, kgoši ya Babilonia, goba go ithweša joko ya gagwe, gona ke tla otla setšhaba seo ka ntwa le ka tlala le ka leuba la bolwetši, ka ba ka se feleletša ka seatla sa Nebukadnesare. Le se ke la theeletša baprofeta ba gabolena, goba didupe tša gabolena, goba balori ba gabolena, goba dinoge tša gabolena, goba baloi ba gabolena, bona batho ba ba le botšago gore le ka se lobe kgoši ya Babilonia. Ba le porofetela maaka gore le tle le thopelwe kgole le naga ya gabolena. Ke tla le raka, gomme la fedišwa. Eupša setšhaba se se ka ithwešago joko ya kgoši ya Babilonia sa mo loba, ke tla se lesa sa no fela se dutše nageng ya sona, sa e lema gomme sa phela go yona. Ke realo, nna, Morena.” Le Kgoši Tsedekia wa Juda ke ile ka mmotša bjalo, ka re: “Ithweše joko ya kgoši ya Babilonia. O lobe yena le setšhaba sa gagwe, gomme o tla phela. Ke ka baka la eng ge wena le setšhaba sa gago le swanetše go bolawa ka tšhoša, goba ka tlala, goba ka leuba la bolwetši? Etse seo ke se Morena a rilego se tla hlagela setšhaba sefe le sefe se se sa lobego kgoši ya Babilonia. Le se ke la theeletša baprofeta ba ba le botšago gore le ka se mo lobe, gobane ba le porofetela maaka. Morena ka boyena o boletše gore ga se ba rongwa ke yena, le gore ba porofeta maaka ka leina la gagwe. Ka gona, yena o tla le šwalalanya, gomme le tla bolawa, lena le baprofeta ba ba le porofetelago.” Ke moka ka botša baprista le setšhaba sohle gore Morena o re: “Le se ke la theeletša baprofeta ba ba rego thoto ya ka Tempeleng ya ka e tla tloga e bušwa Babilonia. Ba le porofetela maaka. Le se ke la ba theeletša! Lobang kgoši ya Babilonia gomme le tla phela! Ke ka baka la eng ge motse wo o swanetše go ba mašope? Ge eba ruri ke baprofeta, le gona ge eba ba na le molaetša wa ka, a ba nkgopele, nna, Morena Ramaatlaohle, gore thoto ye e šetšego ka Tempeleng ya ka le ka mošate, ga kgoši ya Juda, le ka motseng wa Jerusalema e se thopelwe Babilonia. “Mola Kgoši Nebukadnesare a thopa kgoši ya Juda, Joyakine, morwa wa Joyakime, le bakgomana ka moka ba Juda le ba Jerusalema a ba iša Babilonia, o ile a šadiša dikokwane, le legopo le legolo, le dikoloyana, le thoto ye nngwenyana ye e bego e tlogetšwe ka motseng wo. *** “Mabapi le thoto ye e šetšego ka Tempeleng ya ka le ka mošate, ga kgoši ya Juda, le ka motseng wa Jerusalema, nna, Morena Ramaatlaohle, Modimo wa Israele, ke re: E tla thopelwa Babilonia, ya dula gona go fihlela ge ke e lata. Ke tla e bušetša ka motseng wo. Ke realo, nna, Morena.” Go be go na le moprofeta yo mongwe wa go tšwa Gibeone yo leina la gagwe e bego e le Hanania, morwa wa Asure. Ka wona ngwaga woo, ka kgwedi ya bohlano ya ngwaga wa bone wa ge Tsedekia e le kgoši, o ile a bolela le Jeremia ka Tempeleng ya Morena, a mmotša pele ga baprista le batho ka moka ba ba bego ba le moo gore Morena Ramaatlaohle, Modimo wa Israele, o re: “Ke amogile kgoši ya Babilonia maatla. Pele mengwaga ye mebedi e fela, thoto ka moka ya ka Tempeleng ya ka yeo Kgoši Nebukadnesare a e tšerego mo a e iša Babilonia ke tla be ke e bušitše. Ke tla buša le kgoši ya Juda, Joyakine, morwa wa Joyakime, gotee le mathopša ohle a Juda a a išitšwego Babilone. Ee, ke tla amoga kgoši ya Babilonia maatla. Ke realo, nna, Morena.” Ke moka moprofeta Jeremia a botša moprofeta Hanania pele ga baprista le batho ka moka bao ba bego ba eme ka Tempeleng ya Morena a re: “Nke go ka ba bjalo! A Morena a dire bjalo! A a phethagatše tše o di porofetilego mme a buše thoto ya Tempele ya gagwe, le mathopša ohle a a lego Babilonia a a bušetše mo. Nke o hlwaye tsebe, o kwe tše ke go botšago tšona, wena le batho ka moka. Go tloga mehleng yela ya bogologolo baprofeta ba ba bilego gona pele ga ka le wena ba be ba porofetela dinaga tše dintši le mebušo ye maatla dintwa le masetlapelo le mauba a bolwetši. Moprofeta yo a porofetago boiketlo o lemogwa gore ka nnete ke moprofeta yo a romilwego ke Morena ge fela tše a di porofetilego di hlaga.” Ke moo moprofeta Hanania a tšerego joko yela molaleng wa moprofeta Jeremia, a e robaganya, gomme a bolela pele ga batho ka moka a re: “Morena o rile joko yeo Kgoši Nebukadnesare wa Babilonia a e rwešitšego ditšhaba tšohle melaleng o tla e roba ka wona mokgwa wo, gomme seo o tla se dira go sešo gwa feta mengwaga ye mebedi.” Ke moka moprofeta Jeremia a tloga. Ka moragonyana ga ge moprofeta Hanania a robile joko ye a bego a e tšere molaleng wa moprofeta Jeremia, Morena a laela Jeremia gore a yo botša Hanania a re: “Morena o rile ge e le joko ya kota yona o ka no kgona go e roba, eupša yena o tla dira ya tshipi legatong la yona. Morena Ramaatlaohle, Modimo wa Israele, o rile o tla rweša ditšhaba tše ka moka joko ya tshipi melaleng, gomme tšona di tla šomela Nebukadnesare, kgoši ya Babilonia. O tla dira gore le diphoofolo tša naga di šomele Nebukadnesare.” Ke mo moprofeta Jeremia a boditšego moprofeta Hanania a re: “Theeletša, wena Hanania! Ga se wa rongwa ke Morena, gomme o dira gore batho ba ba dumele maaka. Ka gona Morena o re o tla go tloša tšatšing. Ka wona ngwaga wo o tla hwa ka gobane o boditše batho gore ba kgeloge go Morena.” Moprofeta Hanania a hwa ka kgwedi ya bošupa ya wona ngwaga woo. Moprofeta Jeremia o ile a ngwalela mašaledi a bagolo ba setšhaba kua bothopša lengwalo a le Jerusalema; a le ngwalela le baprista, le baprofeta, le setšhaba ka moka se Nebukadnesare a bego a se thopile Jerusalema a se iša Babilonia. Lengwalo leo o le ngwadile ka morago ga ge Kgoši Joyakine, le mmagwe, le bakgomana ba mošate, le baetapele ba Juda le ba Jerusalema, le bakgoni ba mediro ya diatla, le barulatshipi ba seno tloga Jerusalema. A le fa Elasa, morwa wa Shafane, le Gemaria, morwa wa Hilkia, bao Kgoši Tsedekia a bego a ba roma go Kgoši Nebukadnesare wa Babilonia. Lona le be le re: “Morena Ramaatlaohle, Modimo wa Israele, o botša bohle bao a ba lesitšego ba thopša Jerusalema ba išwa Babilonia o re: ‘Le ikagele dintlo le itulele. Le leme dirapa le je dibjalo tša tšona. Le nyale, le be le bana. Le nyadiše bana ba lena gore le bona ba tle ba be le bana. Le ate, le se fokotšege. Le šomele go hola metse yeo ke le lesitšego le thopelwa go yona. Le e rapelele go nna, ka gobane ge e holega, le lena le tla holega. Nna, Morena Ramaatlaohle, Modimo wa Israele, ke le laya gore le se ke la forwa ke baprofeta le didupe ba ba lego gare ga lena. Ditoro tša bona le se ke la di ela hloko, gobane ba le porofetela maaka ka leina la ka. Ga se ba rongwa ke nna. Ke realo, nna, Morena.’ “Morena o re: ‘Mola mengwaga ye masome a a šupago ya Babilonia e fetile, ke tla le šetša, ka phetha se ke le holofeditšego sona ka le bušetša mo. Ke nna fela ke tsebago merero ye ke le reretšego yona, merero ya katlego, e sego ya tahlego, merero ya bokamoso bjo bo holofetšago. Ke mo e tlago re ge le nkgopela, le etla le nthapela, nna ka le theeletša. E tla re ge le nnyaka, la nkhwetša, ge eba le nnyaka ka dipelo tša lena ka moka. Ee, ke re le tla nkhwetša, gomme ke tla le atla gape. Ke tla le kgoboketša ka le ntšha ditšhabeng tšohle le mafelong ohle moo ke le raketšego gona, ka le bušetša nageng ye ke le ntšhitšego go yona ge le thopša. Ke realo, nna, Morena.’ “Le re Morena o le file baprofeta kua Babilonia. Mabapi le kgoši ye e bušago setšhaba seo Dafida a bego a se buša, le bohle ba ba dulago motseng wo, ke go re meloko ya bolena ye e ilego ya se išwe bothopša le lena, Morena Ramaatlaohle o re: ‘Ke tla ba tlišetša ntwa le tlala le leuba la bolwetši, gomme ke tla dira gore ba swane le mago ao a bodilego wa go se lewe. Ke tla ba hlomara ka tšhoša le ka tlala le ka leuba la bolwetši, gomme ditšhaba tšohle tša lefase di tla tšhoga. Ditšhaba tšohle tše ke tla bego ke ba raketše go tšona di tla rogaka ka leina la bona, tša tšhošwa tša ba tša gakgamatšwa ke tše di ba hlagetšego, tša ba kwera. Tšeo di tla ba hlagela ka ge ba se ba theeletša molaetša wo ke bego ke fela ke ba romela wona ka bahlanka ba ka, baprofeta. Ba ganne go ba theeletša. Bjale ge, lena mathopša ohle ke le tlošitšego Jerusalema ka le iša Babilonia, theeletšang se nna, Morena, ke se bolelago.’ “Morena Ramaatlaohle, Modimo wa Israele, o bolela mabapi le Ahaba, morwa wa Kolaya, le Tsedekia, morwa wa Maasea, bao ba le porofetelago maaka ka leina la gagwe. O rile o tla ba gafela diatleng tša Kgoši Nebukadnesare wa Babilonia, gomme yena o tla ba bolaya le lebeletše. Batho bale ba go thopša Juda ba išwa Babilonia ge ba nyaka go rogaka motho ba tla re: ‘Morena a go dire se kgoši ya Babilonia a kilego a se dira Tsedekia le Ahaba: a ba beša ba phela.’ Ba dirile taba ya bohlola – ba otswa le basadi ba baagišani ba bona, ba ba ba bolela maaka ka leina la Morena ba se ba laelwa ke yena. Yena o tseba tše ba di dirilego, ebile ke hlatse. Ke realo, nna, Morena.” Morena Ramaatlaohle, Modimo wa Israele, o ile a mpha molaetša wa go ya go Shemaya wa Nehelamo, yo a bego a ngwaletše batho ka moka ba Jerusalema le moprista Sofonia, morwa wa Maasea, le baprista ba bangwe ka moka, ka leina la gagwe. Ka lengwalong leo Shemaya o be a ngwaletše Sofonia a re: *** “Morena o go dirile moprista legatong la Joyada gore Tempele ya Morena e be le mohlankedi. Segafi se se itirago moprofeta o se tleme maoto le molala dikoteng. Bjale o reng o se wa kgala Jeremia wa Anathote, yo a dikilego a le porofetela, ka ge a re rometše molaetša Babilonia wa gore re sa tlilo tšea nako ye telele re le mathopša, le gore re ikagele dintlo re itulele, re leme dirapa, re je dibjalo tša tšona?” Moprista Sofonia o ile a balela moprofeta Jeremia lengwalo leo. Ke moka Morena a botša Jeremia gore a romele molaetša wo go mathopša ohle: “Mabapi le Shemaya wa Nehelamo nna, Morena, ke re ke tla mo otla, yena le ditlogolo tša gagwe. Le ge a se a rongwa ke nna o le porofetetše, gomme a le dira gore le dumele maaka. Ga go le o tee wa leloko labo yo a tlago šala mo setšhabeng se. Tše dibotse tše ke tlago di direla setšhaba sa ka a ka se di bone, ka ge a boditše batho gore ba kgeloge go nna. Ke realo, nna, Morena.” Morena Modimo wa Israele o rile go Jeremia: “Tšohle tše ke go boditšego tšona di ngwale ka pukung, *** ka gobane nako e etla ya gore ke tle ke kgoboketše setšhaba sa ka, sa Israele le sa Juda, ditšhaba tšeo di lego bothopša. Ke tla ba bušetša nageng ye ke e filego borakgolokhukhu ba bona, gomme ba tla e tšea gape ya ba ya bona. Ke realo, nna, Morena.” Morena o re go setšhaba sa Israele le sa Juda: “Ke kwele sello sa letšhogo, go na le poifo, e sego khutšo. Eyang le boneng ka bolena, le ipotšiše: Kgane monna a ka belega ngwana? Bjale ke reng ke bona banna ka moka ba itshwere matheka boka mosadi a belega? Bohle ba reng ba sehlefetše? Letšatši le le šiišago le etla; la go swana nalo ga le gona; ke nako ya masetlapelo go ditlogolo tša Jakobo, eupša di tla hlakodišwa.” Morena Ramaatlaohle o re: “Mohla tšatši leo le etla ke tla roba joko ye e lego melaleng ya bona, ka kgaola le ditlemo tša bona, gomme e ka se sa ba makgoba a bafaladi. Ba tla ntlhankela, nna, Morena Modimo wa bona, ba hlankela le setlogolo sa Dafida se ke tlago se bea kgoši ya bona. “Ka gona, lena ditlogolo tša mohlanka wa ka, Jakobo, se boifeng; lena setšhaba sa Israele, se tšhogeng. Ke tla le phološa nageng yeo ya kgole, ka hlakodiša ditlogolo tša lena nageng yeo ya bothopša. Le tla boa la phela le iketlile; le tla bolokega, gwa se be le yo a le boifišago. Ke na le lena gore ke le hlakodiše. Ke tla fediša ditšhaba tšohle tše ke le šwalalanyeditšego go tšona, fela lena nka se le fediše. Go le otla gona nka se lese, fela e tla ba ka toka. Ke realo, nna, Morena.” Morena o re: “Dintho tša lena ke ditlhokakalafo, dikgobadi tša lena ga di fole. Ga go yo a le direlago selo, dišo tša lena ke ditlhokasehlare, di ka se fole. Baratiwa bohle ba lena ba le lebetše; ga ba sa ne taba le lena, ka gobane ke le hlasetše bjalo ka lenaba; kotlo ya lena e bile ye sehlogo, ka ge dibe tša lena e le tše dintši, le molato wa lena e le wo mogolo. Le reng le golodišwa ke dintho tša lena? Bohloko bja lena ke tlhokasehlare. Ke le otlile ka mokgwa wo ka ge dibe tša lena e le tše dintši, le molato wa lena e le wo mogolo. Le ge go le bjalo, bohle ba ba le rwaetšago sa dibata, le bona ba tla rwaetšwa; manaba ohle a lena a tla thopša. Balehlakiši le bona ba tla hlakišwa, balehlakodi le bona ba tla hlakolwa. Ke tla le fodiša dintho, ka le bušetša sekeng, le ge le bitšwa ‘Molahlwane’, ‘Sione mohlokamošetši’. Ke realo, nna, Morena.” Morena o re: “Ke tla atla dikgorwana tša ditlogolo tša Jakobo gape, ka šokela lapa le lengwe le le lengwe; Jerusalema e tla agwa ka lefsa mašopeng a yona; sebo sa yona se tla agwa mo se swanetšego go ba gona. Badudi ba gona ba tla gobela dikoša tša tebogo; ba tla goa ka lethabo. Ke tla ba atiša, ba se fokotšege. Ke tla ba fa seriti, ba se nyatšege. Bana ba bona ba tla etša pele; ke tla tiiša setšhaba sa bona gape, ka otla bohle ba ba se hlakišago. Kgoši ya bona e tla tšwa go bona, mmuši wa bona o tla tšwa setšhabeng sa gabobona. Ke tla mmatametša, a ba kgauswi le nna. Na ke mang yo a ka mpatamelago a se hwe? Ke realo, nna, Morena. Bona e tla ba setšhaba sa ka, gomme nna ka ba Modimo wa bona.” Kgalefo ya Morena ke ledimo, ke sesasedi se se gaketšego, se se tlago le tšubutla ka godimo ga bakgopo, gomme e ka se kgaotše pele a phetha tšohle tše a nyakago go di phetha. Lena seo le tla se lemoga ge nako e fihla. Morena o re: “Go tla tla nako yeo ka yona ke tlago ba Modimo wa dikgoro tšohle tša Israele, gomme bona e tla ba setšhaba sa ka. Kua lešokeng ke ile ka šokela batho bale ba go phonyokga ntweng. Mohla setšhaba sa Israele se le leetong la go ya bokhutšong nageng ya sona, ke ile ka iponagatša go sona ke le kgole. Lena setšhaba sa Israele, ka ge e sa le ke le rata go tloga mathomong, le bjale ke tla no fela ke le botegetše. Wena moratiwa wa ka, setšhaba sa Israele, ke tla buša ka go tsošološa wa tsosološega. O tla swanelwa ge o letša meropa ya gago, o yo bina le bao ba thabilego. Lena setšhaba sa Israele, le tla buša la lema dirapa tša merara dithabeng tša Samaria, gomme bao ba di lemago ba tla ja diterebe tša gona. Ee, nako e batametše yeo ka yona bafeti ba tlago goeletša ba le dithabeng tša Efraime ba re: ‘A re rotogeleng Sione, go Morena Modimo wa rena!’ ” Morena o re: “Hlabelang ditlogolo tša Jakobo mekgolokwane, dudueletšang setšhaba se se tumilego go feta tše dingwe! Kwatšang koša ya lena ya go reta ya go re: ‘Morena o hlakodišitše setšhaba sa gagwe, mašaledi a Israele!’ Ke tla ba buša nageng ya ka leboa, ka ba kgoboketša le nageng tša kgolekgole. Difofu le digole tša bona di tla tla nabo, le baimana le bao ba belegago. Ba tla boa e le lešaba le legolo. Setšhaba sa ka se tla boa se lla, se rapela ge se boa se etetšwa ke nna. Ke tla se lebiša meeleng ya meetse, ke ba sepetša tseleng ye boreledi mo ba ka se kego ba kgopša, ka gobane go Israele ke swana le motswadi, gomme Efraime ke morwa wa ka wa leitšibolo.” Morena o re: “Lena ditšhaba, ekwang tše Morena a di bolelago, gomme le di tsebagatše dihlakahlakeng tša kgole le re: ‘Nna ke šwalalantše setšhaba sa ka, ke tla se kgoboketša, ka se diša bjalo ka modiša ge a diša mohlape wa gagwe. Ke hlakodišitše ditlogolo tša Jakobo, ke di phološitše setšhabeng se se di fetago ka maatla. Ba tla tla ba hlaba mekgolokwane thabeng ya Sione, ba thabile kudu ka baka la botho bja ka – ka ge ke ba file mabele, beine le makhura a mohlware, dikwanyana, diputšane le manamane. Ba tla swana le serapa se se nošetšwago gabotse; ba ka se sa hloka selo. Ke moo banenyana ba tlago ipshina ka go bina; masogana le bakgalabje le bona ba tla thaba. Ke tla ba homotša, ka fetoša sello sa bona lethabo, matshwenyego a bona ka a fetoša boiketlo. Ke tla khoriša baprista ka dijo tša manoni, ka šegofatša setšhaba sa ka kudu. Ke realo, nna, Morena.’ ” Morena o re: “Kua Rama go kwagala lentšu, sello sa masetlapelo sa go golola. Ragele o llela bana ba gagwe; o gana go homotšwa, gobane ga ba sa le gona. Hle, homola, o phumole meokgo. O tla putsetšwa tše o di diretšego bana ba gago; ba tla boa ba etšwa nageng ya manaba. Go sa na le se sengwenyana se o ka se holofelago; bana ba gago ba tla boela gae. Ke realo, nna, Morena. “Ke kwa batho ba Efraime ba bolela ka bohloko ba re: “ ‘Joo, Morena o re otlile, re otlilwe bjalo ka pholwana ye e sego ya tlwaetšwa. Re bušetše go wena mme re tla boa, ka gobane ke wena Morena Modimo wa rena. Re ile ra go furalela, eupša ra ba ra itshola. Ka morago ge ge o re lemošitše bošaedi bja rena, re ile ra inamiša difahlego ka dihlong. Re be re inyatša re hlabja ke dihlong, ka gobane re dirile dibe re sa le bana.’ “Israele, ga ke re o morwa wa ka yo ke mo ratago, ngwana yo a nkgahlago? Ka mehla ge ke bolela leina la gago ke go gopola ka lerato. Pelo ya ka e nagana wena; ruri, ke tla go šokela. Itlhomele dišupatsela, o swaye tselakgolo ye o tšeago ka yona, o lebelediše wona mmila woo. Boang, lena setšhaba sa Israele, boelang metseng ye le e tlogetšego ye. Le tla ba pelopedi go fihla neng, bakgelogi tenang? Ke dirile se sengwenyana se sefsa, go swana le mosadi ge a šireletša monna.” Morena Ramaatlaohle, Modimo wa Israele, o re: “Mohla ke bušetša setšhaba nageng ya sona, se tla buša sa bolela nageng ya Juda le metseng ya yona sa re: “ ‘Nke Morena a go šegofatše, wena thaba ye kgethwa, felo mo gokgethwa mo a dulago gona.’ “Batho ba tla dula nageng ya Juda le metseng yohle ya yona gotee le balemi le badiša le mehlape ya bona. Ke tla lapološa ba ba lapilego, ka khoriša bohle ba ba swerwego ke tlala. Ka gona motho o tla re: ‘Ke ile ka robala, ka tsoga, ka lebaleba, ka kwa ke lapologile.’ “Nna, Morena, ke re nako e etla yeo ka yona ke tlago tlatša naga ya Israele le ya Juda batho le diphoofolo. Gomme bjalo ka ge ke ile ka phafogela go kweša setšhaba sa ka bohloko, go se hlahlamolla, go se uša, go se pšhatla le go se fediša, ka wona mokgwa woo ke tla phafogela go se hloma le go se aga. Ge nako yeo e fihlile batho ba ka se sa re: “ ‘Botatagobana ba lle diterebe tše bodila, meno gwa šia a bana.’ “Eupša ka nako yeo yo a jago diterebe tše bodila, meno go tla šia a gagwe; motho o tla bolawa ka baka la sa gagwe sebe.” Morena o re: “Nako e etla yeo ka yona ke tlago dira kgwerano ye mpsha le setšhaba sa Israele le sa Juda. Yona e ka se swane le yela ke ilego ka e dira le borakgolokhukhu ba bona mohla wola ke ba swere ka seatla ke ba ntšha nageng ya Egepeta. Le ge ke be ke le bjalo ka mogatšabona, ke bona ba ilego ba lahla kgwerano yeo.” Morena o re: “Bjale kgwerano ye ke tlago e dira le setšhaba sa Israele matšatšing a a tlago še: Ke tla tsenya molao wa ka ka teng ga bona, ka ba ka o ngwala dipelong tša bona. Ke tla ba Modimo wa bona, gomme bona e tla ba setšhaba sa ka. Motho a ka se sa swanela go ruta mogagabo goba morwarragwe a re: ‘Tseba Morena,’ ka gobane bohle ba tla be ba ntseba, banyatšegi le bahlomphegi. Ke tla ba swarela bokgopo bja bona, gomme nka se sa gopola dibe tša bona. Ke realo, nna, Morena.” Morena o hlabiša letšatši gore e be seedi mosegare, o laela ngwedi le dinaledi gore di tage bošego. O ferehla lewatle mme maphoto a rora; leina la gagwe ke Morena Ramaatlaohle. Yena Morena yo o holofetša gore ge a sa phethagatša dilo tšeo, Israele e tla no fela e le setšhaba sa gagwe. Ge eba ka moso legodimo kua godimo le ka elwa, le metheo ya lefase mo fase ya nyakišišwa, le nna nka lahla setšhaba sa Israele ka baka la tšohle tše ba di dirilego. O realo, Morena. Morena o re: “Nako e etla yeo ka yona Jerusalema yohle e tlago tsošološetšwa nna go tloga Toreng ya Hananele go ya bodikela go yo fihla Lesorong la Sekhutlo. Gomme mollwane o tla tšwela pele go tloga moo ka bodikela go yo fihla mmotong wa Garebe, gomme wa phamogela Goa. Moedi wohle moo go bolokelwago bahu le mo go tšhollwago melora ya aletare gotee le mašemo ka moka a a lego mokgahlo ga motse le nokana ya Kidrone go yo fihla Lesorong la Dipere, e tla šegofaletšwa nna. Jerusalema e ka se sa tsoga e kgerešitšwe goba e phušotšwe.” Morena o boletše le moprofeta Jeremia ka ngwaga wa lesome wa ge Tsedekia e le kgoši ya Juda, woo gape e bego e le wa lesome le metšo ye seswai wa ge Nebukadnesare e le kgoši. Mehleng yeo madira a kgoši ya Babilonia a be a dikaneditše Jerusalema, gomme Jeremia a tswaleletšwe ka kgorong ya kgolego ye e bego e le ka mošate, ga kgoši ya Juda. Kgoši Tsedekia wa Juda o be a mo golegile, a ba a mmotšiša gore ke ka baka la eng a porofeta a re Morena o rile: “Ke tlilo gafela kgoši ya Babilonia motse wo, yena a o thopa, gomme Kgoši Tsedekia wa Juda a ka se phonyokge Bababilonia. O tla gafelwa diatleng tša kgoši ya Babilonia; o tla bolela naye ka boyena, a mmona ba tomolelane mahlo. Kgoši ya Babilonia e tla iša Tsedekia Babilonia, a dula gona go fihlela ke mo otla. Le ge a ka lwa le Bababilonia a ka se ba fenye. Ke realo, nna, Morena.” Jeremia a re: “Morena o mpoditše gore Hanamele, morwa wa rangwane, Shalume, o tla tla go nna go nkgopela gore ke reke tšhemo ya gagwe kua Anathote, ka ge ke le moloko wabo wa kgauswi gomme ke na le tokelo ya go ithekela yona. Ke moka, bjalo ka ge Morena a be a boletše, Hanamele a tla go nna kua kgorong ya kgolego, a nkgopela gore ke reke tšhemo ya gagwe ye e bego e le gona Anathote, seleteng sa Benjamene, ka ge ke be ke le moloko wabo wa kgauswi gomme ke na le tokelo ya go ithekela yona. Ka napa ka lemoga gore ye ke taelo ya Morena. Ka gona ka reka tšhemo yeo go Hanamele, morwa wa rangwane, gomme ka mo elela tšhelete ya gona, ya ba dipapetlana tše lesome le tše di šupago tša silibera. Ka ngwala lengwalo la theko, ka le kiba ka sekibo sa ka, ka bitša dihlatse tša ngwala maina a tšona go lona, gomme ka ela tšhelete ya gona ka kelo. Ka tšea mangwalo ao a theko ka mabedi – le le kibilwego ka sekibo mme le swerego setlamo le mabaka a sona, le lela la go se kibje – gomme ka a fa Baruke, morwa wa Neria, setlogolo sa Magasea. Ka mo fa ona pele ga Hanamele, morwa wa rangwane, le pele ga dihlatse tšela tša go hlatsela lengwalo la theko, le pele ga Bajuda ba ba bego ba dutše kgorong. Ka botša Baruke pele ga bona ka re: ‘Morena Ramaatlaohle, Modimo wa Israele, o go laela gore o tšee mangwalo a a theko, la go kibja le la go se kibje, o a bee ka sebjaneng sa letsopa gore a tle a lotege nako ye telele. Morena Ramaatlaohle, Modimo wa Israele, o re dintlo le mašemo le dirapa tša merara di tla buša tša rekwa mo nageng ye.’ ” Ka morago ga ge ke seno fa Baruke, morwa wa Neria, lengwalo la theko, ka rapela ka re: “Morena, Mong wa ka, ke wena o dirilego magodimo le lefase ka maatla a gago a magolo le bonatla; ga go se se go palelago. Diketekete tša batho o di bontšha leratorato, eupša le gona o otla bana ka baka la dibe tša batswadi ba bona. O Modimo yo mogolo yo maatla; leina la gago o Morena Ramaatlaohle. Merero ya gago ke ye megolo, o dira tše maatla; o bona tšohle tše batho ba di dirago, gomme wa ba putsa go ya ka ditiro tša bona. O ile wa dira mehlolo le dimakatšo kua Egepeta, gomme wa tšwela pele le go di dira gare ga Baisraele le gare ga ditšhaba tše dingwe go fihlela le lehono, gomme ke ka baka leo bjale o tumilego. Ka mehlolo le dimakatšo le ka maatla a gago a magolo le bonatla le ka go tšhoša manaba a rena o ile wa ntšha setšhaba sa gago sa Israele Egepeta. Wa ba fa naga ye ya mokhora le monono, bjalo ka ge o be o enetše borakgolokhukhu ba bona. Eupša ya re ge ba fihla mo nageng ye mme ba e thopa, ba se go theeletše, ba se phethe melao ya gago; ba se dire tše o bego o ba laetše tšona. Ka gona wa ba tlišetša masetlapelo a ka moka. “Motse o dikaneditšwe ka dintotoma tša mobu gore o thopše. Ntwa le tlala le leuba la bolwetši di tla dira gore motse o wele diatleng tša Bababilonia ba ba lwago nawo. Tšela o di boletšego bjale di a phethega, bjalo ka ge le wena o iponela. Le ge go le bjalo, Morena, Mong wa ka, ke wena o ntaetšego gore ke reke tšhemo yela pele ga dihlatse, le ge motse o le kgauswi le go gafelwa diatleng tša Bababilonia.” Ke mo Morena a rilego go Jeremia: “Ke nna Morena, Modimo wa batho ka moka. Kgane go na le se se ntšhitago? Ka gona, nna, Morena, ke re ke tlilo gafela motse wo diatleng tša Bababilonia le go tša Nebukadnesare, kgoši ya Babilonia, mme o tla o thopa. Bababilonia ba ba lwago le motse wo ba tla fihla ba o tšhuma ka mollo gotee le dintlo tšeo beng ba tšona ba bego ba tšhumela Baale diorelo godimo ga ditlhaka tša tšona, ba bile ba tšhelela medimo e šele dino e le kabelo godimo ga tšona, ya ba ge ba ntsheleka. Batho ba Israele le ba Juda, ge e sa le go tloga mathomong a ditšhaba tše, sa bona e bile go dira tše mpe pele ga ka; batho ba Israele sa bona e bile go ntsheleka ka tše ba di dirago. Batho ba motse wo ba mpefedišitše, ba nkgalefiša go tloga mola o agwago. Ke ikemišeditše go o fediša ka baka la tše mpe ka moka tše di dirilwego ke batho ba Israele le ba Juda, gotee le magoši le baetapele ba bona, le baprista le baprofeta ba bona, le batho bohle ba Juda le badudi ba Jerusalema gore ba nkgalefiše. Ba mphuraletše, ga ba sokologele go nna; gomme le ge ke be ke hlwa ke ba ruta, ba be ba gana go ntheeletša le go kgalwa. Ba ile ba ba ba bea medimo ya bona ya diswantšho ya go šišimiša ka Tempeleng mo ke swanetšego go khunamelwa gona, ba e tšhilafatša. Ba bopetše Baale dintotoma ka moeding wa Hinomo, gore ba tle ba direle modimo wa seswantšho, Mologo, dihlabelo ka barwa le barwedi ba bona. Ga se nna ke ba laetšego go dira taba ye, le go nagana ga se nke ke nagane gore ba ka dira taba ya mohuta wo, gomme ba diriša batho ba Juda sebe.” “Ka gona, mabapi le motse wo le rego o tla gafelwa diatleng tša kgoši ya Babilonia ka ntwa le ka tlala le ka leuba la bolwetši, nna, Morena Modimo wa Israele, ke re: Bona, ke yo kgoboketša batho ka ba ntšha dinageng tšohle tše ke ba raketšego go tšona ke selekegile, ke befetšwe, ke bile ke galefile kudu, gomme ke yo ba bušetša felong fa mme ka ba dudiša mo ba bolokegile. Ke gona e tlago ba setšhaba sa ka, mme nna ka ba Modimo wa bona. Ke tla dira gore ba mpoife ka dipelo tša bona ka moka ba sa kgeloge, e le gore go tle go holege bona le ditlogolo tša bona. Ke tla dira kgwerano ya go ya go ile le bona ya gore nka se tsoge ke lesitše go ba direla tše dibotse, gomme ke tla dira gore ba mpoife, ba se sa mphuralela. Ke tla kgahlwa ke go ba direla tše dibotse, gomme ke tla ba dudišetša sa ruri mo nageng ye ke thabile kudu. “Nna, Morena, ke re: Bjalo ka ge ke ile ka tlišetša setšhaba se masetlapelo a ka moka, ka mokgwa wo mobjalo ke yo ba fa tšohle tše dibotse tše ke ba holofetšago tšona. Mo nageng ye lena le rego go tlilo swana le lešokeng, naga ya hloka batho le diphoofolo, gape le rego e tlilo gafelwa diatleng tša Bababilonia, nna ke re mašemo a a sa tlilo buša a rekwa. Batho ba tla a reka ka tšhelete, mangwalo a theko a tla ngwalwa, a kibja sekibo, a hlatselwa ke dihlatse seleteng sa Benjamene, metseng ya kgauswi le Jerusalema, le metseng ya Juda, le metseng ya dithabeng, le go ya nagengtlase, le go ya seleteng sa ka borwa se se omilego, gobane ke tla ba atla gape. Ke realo, nna, Morena.” Ge Jeremia a sa golegilwe ka kgorong ya mošate, Morena a buša a bolela naye a re: “Nna, Morena, yo ke dirilego lefase, nna, Morena, yo ke le bopilego ka le bea madulong, nna, yo leina la ka e lego Morena, ke re: Ntlhaeletše, mme ke tla go araba; ke tla go botša dilo tše dikgolo le tše o sa di kwešišego, tše o sa di tsebego. Mabapi le dintlo tša motse wo le tša magoši a Juda tšeo di lego kgauswi le go hlahlamollwa gore go agwe merako ka tšona ya go le šireletša go bahlasedi ba ba le hlaselago ba le dintotomeng tša mobu, nna, Morena Modimo wa Israele, ke re: Bahlabani ba go lwa le Bababilonia ba etla, gomme dintlo tše di tla tlala ditopo tša bao ke yago go ba bolaya ke befetšwe, ke galefile, gobane motse wo ke o furaletše ka baka la tše mpe tše badudi ba wona ba di dirilego. Fela ke tla alafa motse wo le badudi ba wona ka ba fodiša. Ke tla ba tlišetša boiketlo bja mmakgonthe le polokego. Ke tla atla batho ba Juda le ba Israele gape, gomme ka ba tsošološa ba swana le pele. Ke tla ba hlatswa dibe tše ba mphošeditšego ka tšona, ka ba swarela makgopo ohle a ba nkgopišitšego ka ona ba nthumola. Jerusalema e tla ba felo mo go nthabišago le mo ke retwago gona, le mo ke ikgantšhago ka gona, gomme seo se tla tsebja ke ditšhaba tšohle tša lefase; di tla boifa tša thothomela ge di ekwa ka tšohle tše dibotse tše ke di direlago batho ba Jerusalema, le ka katlego ye ke e tlišetšago motse wo.” Morena o re: “Lena le re felo mo go swana le lešoka, ga go batho goba diphoofolo tše di phelago gona. Eupša nna ke re metseng ya Juda le mekgotheng ya Jerusalema ye e se nago selo, go sego batho goba diphoofolo, go sa tlilo kwala mekgolokwane ya lethabo le tlhalalo, le ya menyanya ya manyalo, gwa kwala le mantšu a baopedi ba tliša dikabelo tša tebogo Tempeleng ya ka. Ba tla be ba opela ba re: “ ‘Retang Morena Ramaatlaohle, gobane ke yo botho, gomme lerato la gagwe ke la go ya go ile.’ Ke tla atla naga ye bjalo ka mohlamonene. Ke realo, nna, Morena!” Morena Ramaatlaohle o re: “Mo nageng ye ya go swana le lešoka ya go se dulwe ke batho le diphoofolo, le metseng yohle ya gona go tla buša gwa ba le mafulo mo badiša ba ka robatšago dihuswane tša bona gona. Kua metseng ya dithabeng, le go ya nagatlase, le go ya seleteng sa ka borwa se se omilego, le seleteng sa Benjamene, le metseng ya kgauswi le Jerusalema le go ya Juda badiša ba tla buša ba bala dihuswane tša bona. Ke realo, nna, Morena.” Morena o re: “Nako e etla mohla ke tlago phethagatša se ke se holofeditšego batho ba Israele le ba Juda. Mehleng yeo kgoši ke tla bea setlogolo sa Dafida se se lokilego. Kgoši yeo e tla dira tše di swanelago le tše di lokilego mo nageng. Batho ba Juda ba tla phološwa, ba Jerusalema le bona ba tla phela ba bolokegile. Motse wo o tla bitšwa ‘Morena Morephološi’. Nna, Morena, ke holofetša gore ka mehla go tla dula go na le setlogolo sa Dafida se se tlago ba kgoši ya Israele, gape go tla dula go na le baprista ba Balefi ba ba ntlhankelago gape ba dirago dihlabelo tša go tšhungwa ka moka, le dikabelo tša bupi, le dihlabelo tše dingwe.” Morena a re go Jeremia: “Nna, Morena, ke re: Ge eba le ka senya kgwerano ye ke e dirilego le letšatši goba ye ke e dirilego le bošego, gore letšatši le bošego di se sa ba gona ka nako ya tšona, gona le kgwerano ye ke e dirilego le Dafida, mohlanka wa ka, e ka senyega, mme yena a se be le setlogolo sa go mo hlatlama bogošing, kgwerano ye ke e dirilego le baprista ba Balefi ba ba ntlhankelago le yona e ka senyega. Ke tla atiša ditlogolo tša mohlanka wa ka, Dafida, le Balefi ba go ntlhankela, gore go se kgonege go ba bala bjalo ka ge go sa kgonege go bala dinaledi tša legodimo, goba dithorwana tša lešabašaba la lebopo la lewatle.” Morena a re go Jeremia: “Afa o lemogile ka mo batho ba ba rego nna ke ngadile Baisraele le Bajuda, yona meloko ye mebedi ye ke ikgethetšego yona? Ka gona ba nyatša setšhaba sa ka, gomme ga ba sa se tšea e le setšhaba. Nna, Morena, ke re ge nkabe ke se ka dira kgwerano le letšatši le bošego, ke se ka bea melao ye e laolago leratadima le lefase, gona ke be nka lahla ditlogolo tša Jakobo le tša mohlanka wa ka, Dafida, ka se kgethe yo mongwe wa ditlogolo tša gagwe gore a buše ditlogolo tša Abrahama le tša Isaka le tša Jakobo. Ke tla šokela setšhaba sa ka, ka se atla gape.” Morena o ile a bolela le Jeremia mola Nebukadnesare, kgoši ya Babilonia, le madira a gagwe ba hlasela Jerusalema le metsana ya kgauswi, ba thušwa ke madira a go tšwa ditšhabeng le merafeng ka moka ye e bušwago ke yena. Morena Modimo wa Israele a mmotša gore a ye a botše Tsedekia, kgoši ya Juda, a re: “Nna, Morena, ke tla gafela motse wo diatleng tša kgoši ya Babilonia, gomme yena o tla o tšhuma ka mollo. Wena o ka se mo tšwe ka diatleng; o tla thopša, wa gafelwa go yena. O tla mmona o tomalelane naye mahlo gomme wa bolela naye ka bowena, ya ba gona o yago Babilonia. Wena Tsedekia, kgoši ya Juda, theeletša se nna, Morena, ke go holofetšago sona. Se ke se bolelago ka wena ke gore o ka se bolawe ntweng. O tla ithobalela ka khutšo, gomme bjalo ka ge borakgolokhukhu ba gago bao e bego e le magoši pele ga gago ba be ba tšhumelwa diorelo, ka mokgwa wo mobjalo le wena o tla tšhumelwa diorelo. Ba tla go llela ba re: ‘Jonna, mong wa rena!’ Seo ke se le se holofetšwago ke nna, Morena.” Ke moka moprofeta Jeremia a botša Tsedekia, kgoši ya Juda, taba tšeo ka moka Jerusalema, mola madira a kgoši ya Babilonia a hlasetše motse. Madira ao a be a hlasetše le Lakishe le Aseka, yeo e bego e le yona fela metse ye e sa šetšego gare ga metse ya Juda ye e ageleditšwego ka merako. Kgoši Tsedekia le batho ka moka ba Jerusalema ba be ba kwane go lokolla makgoba a bona a Baheberu, a banna le a basadi, gore go se sa ba le yo a šomelwago ke lekgoba le e lego Mojudakayena. Baetapele bohle le batho bohle ba ba bego ba kwane gore yo mongwe le yo mongwe o tla lokolla lekgoba la gagwe, la monna goba la mosadi, le gore ba ka se sa tsoga ba ba dirile makgoba gape. Ba ile ba ya ka kwano yeo, ba ba lokolla. Eupša ka morago ba ile ba hlanama, ba ba buša, ba ba gapeletša go ba makgoba gape. Ke mo Morena a boditšego Jeremia gore a botše setšhaba gore yena Morena Modimo wa Israele o re: “Ke dirile kgwerano le borakgolokhukhu ba lena mola ke ba ntšha Egepeta mo e bego e le makgoba. Ke ba boditše gore ka ngwaga wo mongwe le wo mongwe wa bošupa motho mang le mang wa bona a lokolle Moheberukayena yo a ithekišitšego go yena ya ba lekgoba mme a mo šomela mengwaga ye e selelago. Eupša borakgolokhukhu ba lena ba ile ba se nkele hloko goba ba ntheeletša. Ga se kgale le hlaname le dirile tše di nkgahlago ka go lokolla Bajudakalena, la dira kgwerano pele ga ka ka Tempeleng moo ke swanetšego go khunamelwa gona. Eupša ya re ka morago la hlanama gape gomme la nkgoboša. Ka moka ga lena le bušitše makgoba ale le bego le a lokolotše go ya ka mo a bego a nyakile, la a gapeletša go ba makgoba a lena gape. Bjale ge, nna, Morena, ke re le nnyaditše ka go se lokolle Bajudakalena. Go lokile ge, nna ke tla le lokolla gore le bolawe ntweng, le bolawe le ka leuba la bolwetši, le ka tlala. Ke tla dira gore batho ba mebušo yohle ya lefase ba tšhošwe ke tše ke tlago le dira tšona. Baetapele ba Juda le ba Jerusalema, gotee le bahlanka ba ka mošate, le baprista, le batho ka moka ba naga ye ba ile ba dira kgwerano le nna ka go sepela magareng a mahlakore a mabedi a namane ye ba bego ba e pharotše ka bogare. Eupša ba lahlile kgwerano ye ba e dirilego pele ga ka, ba se phethe ditaelo tša yona. Ka gona batho ba ke tla ba dira se ba ilego ba se dira namane. *** Ke tla ba gafela diatleng tša manaba a bona ao a nyakago go ba bolaya, gomme ditopo tša bona di tla jewa ke manong le dibata. Tsedekia, kgoši ya Juda, le bakgomana ba gagwe le bona ke tla ba gafela diatleng tša manaba a bona ao a nyakago go ba bolaya, ka ba gafela madireng ao a kgoši ya Babilonia a sa tšogo boela morago ga gaboona. Ke tla laela gore ba boele mo motseng wo. Ba tla o hlasela, ba o thopa, ba o tšhuma ka mollo. Ke tla dira gore metse ya Juda e be bjalo ka lešoka, mo go sa dulego motho. Ke realo, nna, Morena.” Mola Joyakime, morwa wa Josia, e le kgoši ya Juda, Morena o ile a re go Jeremia: “Eya go ba kgorwana ya Rekabe o yo boledišana le bona, e be o ba tliša ka phapošing ye nngwe ya Tempele ya ka, mme o ba tšhelele beine.” Ka gona ka tšea bohle ba kgorwana ya Rekabe, e lego Jaasania, morwa wa Jeremia yo mongwe yo e bego e le morwa wa Habatsinya, gotee le bomorwarragwe le barwa ba gagwe ka moka, ka ba tliša Tempeleng ya Morena. Ka ba iša ka phapošing ya barutiwa ba Hanane, monna wa Modimo, morwa wa Jigdalia. Phapoši ye e be e le ka godimo ga phapoši ya Maasea, morwa wa Shalume, yo e bego e le moletamojako wa Tempele, mme e le kgauswi le phapoši ya bahlankedi ba bangwe. Ka napa ka bea dinkgo tše di tletšego beine, le dinwelo pele ga bona Barekabe bao, gomme ka re go bona: “Enwang beine še.” Bona ba mphetola ba re: “Ga re nwe beine. Rakgolokhukhu wa rena, Jonadaba, morwa wa Rekabe, o re boditše gore rena le ditlogolo tša rena re se ke ra tsoga re nwele beine. O re boditše le gore re se ke ra ikagela dintlo, goba ra lema mašemo, le gona re se ke ra bjala dirapa tša merara goba ra ba le tšona. O re laile gore ka mehla re dule ka mešašeng, gore re tle re phele galele nageng ye re falaletšego go yona ye. Re phethile ditaelo tšohle tše rakgolokhukhu wa rena, Jonadaba, morwa wa Rekabe, a re filego tšona. Ga re ke re enwa beine, ešita le basadi ba rena, le barwa ba rena, le barwedi ba rena. Ga re ikagele dintlo tša go dula – re itulela ka mešašeng – le gona ga re ne dirapa tša merara, goba mašemo, goba peu. Re phethile tšohle tše rakgolokhukhu wa rena, Jonadaba, a re laetšego tšona. *** Eupša mola Nebukadnesare, kgoši ya Babilonia, a šwahlela naga ye, re ile ra kwana go tla Jerusalema gore re tšhabele madira a Bababilonia le a Basiria. Ke ka baka leo re dulago mo Jerusalema.” Ke moka Morena Ramaatlaohle, Modimo wa Israele, a botša Jeremia gore a ye go batho ba Juda le ba Jerusalema, a fihle a re: “Nna, Morena, ke botšiša gore le reng le gana go laiwa ke nna le go theeletša tše ke le botšago tšona. *** Ditlogolo tša Jonadaba, morwa wa Rekabe, di phetha taelo ya gagwe ya gore ba se ke ba nwa beine, gomme le lehono ga ba e nwe, ba phetha taelo ya rakgolokhukhu yo wa bona. Eupša nna ke boletše le lena leboelela le sa ntheeletše. Ke ile ka phegelela go le romela bahlanka ba ka, baprofeta, gomme ba le botša gore le sokologe ditseleng tša lena tše mpe le dire tše di lokilego, le gore le se khunamele medimo e šele la e loba. Ke mo le tlago fela le dutše nageng ye ke e filego lena le borakgolokhukhu ba lena. Eupša ga se la nkela hloko goba la ntheeletša. Ditlogolo tša Jonadaba di swere taelo ye di e filwego ke rakgolokhukhu wa tšona, eupša lena ga se nke le ntheeletše. Bjale ge, nna, Morena Ramaatlaohle, Modimo wa Israele, ke tla tlišetša lena batho ba Juda le ba Jerusalema masetlapelo ohle a ke a boletšego, ka gobane le ganne go ntheeletša ge ke bolela le lena, la se nkarabe le ge ke le bitša.” Ke mo Jeremia a boditšego ba kgorwana ya Rekabe gore Morena Ramaatlaohle, Modimo wa Israele, o re: “Ka ge le phethile molao wa rakgolokhukhu wa lena, Jonadaba, la phetha le ditaelo tšohle tša gagwe, la dira tšohle go ya ka mo a laetšego ka gona, nna, Morena Ramaatlaohle, Modimo wa Israele, ke re Jonadaba, morwa wa Rekabe, o tla fela a na le setlogolo sa monna sa go ntlhankela.” Ka ngwaga wa bone wa ge Joyakime, morwa wa Josia, e le kgoši ya Juda, Morena o ile a re go Jeremia: “Tšea puku o ngwale mantšu ohle a ke go boditšego ona ka ga Israele le Juda le ditšhaba tšohle. O ngwale tšohle tše ke go boditšego tšona go tloga ka nako yela ke thomilego go bolela le wena mola Josia e le kgoši, go fihlela bjale. Mohlomongwe ge batho ba Juda ba ekwa ka ga masetlapelo a ke ikemišeditšego go ba otla ka ona, ba tla tlogela ditsela tša bona tše mpe. Ke moo ke tlago ba swarela bokgopo le dibe tša bona.” Ka gona Jeremia a bitša Baruke, morwa wa Neria, mme a mmiletša mantšu ohle a Morena a bego a mmoditše ona. Gomme Baruke a a ngwala ka moka pukung. Ka morago Jeremia a re go yena: “Ga ke sa dumeletšwe go tsena ka Tempeleng. Eupša wena o ye gona ge batho ba ikona dijo gape. O hlaboše lentšu o ba balele puku yeo gore ba kwe mantšu ao Morena a mpoditšego ona ale o a bileditšwego ke nna, le gore batho ka moka le ba Juda ba ba tlilego ba etšwa metseng ya bona ba kgone go a kwa. Mohlomongwe ba ka phophotha go Morena gomme ba tlogela ditsela tša bona tše mpe, ka gobane Morena o rile o tla ba otla o šoro a ba galefetše.” Ka gona Baruke a dira se Jeremia a mmoditšego sona – a bala puku ya mantšu ao a Morena ka Tempeleng. Ka kgwedi ya senyane ya ngwaga wa bohlano wa ge Joyakime e le kgoši ya Juda, setšhaba sa ikona dijo pele ga Morena. Go ikona dijo moo go ile gwa phethwa ke bohle ba ba bego ba dula Jerusalema, le bohle ba ba bego ba tlile moo ba etšwa metseng ya Juda. Ya re mola batho ka moka ba theeleditše, Baruke a ba balela puku ya mantšu a Jeremia ka Tempeleng, a le ka phapošing ya Gemaria, morwa wa Shafane, mongwaledi wa kgoro. Phapoši yeo ya gagwe e be e le ka kgorong ya ka godimo, kgauswi le mojako wa Lesoro le Lefsa la Tempele. Mikaya, morwa wa Gemaria le setlogolo sa Shafane, a kwa Baruke a bala mantšu ohle a Morena pukung. A nama a ya ka mošate, phapošing ya mongwaledi wa kgoro, moo bakgomana ka moka ba bego ba dutše kgotla. Elishama, mongwaledi wa kgoro, Delaya, morwa wa Shemaya, Elnathane, morwa wa Akboro, Gemaria, morwa wa Shafane, Tsedekia, morwa wa Hanania, le bakgomana ka moka ba be ba le gona. Mikaya a ba botša tšohle tše a kwelego Baruke a di balela setšhaba. Ke moka bakgomana ba roma Jehudi go yo botša Baruke gore a tliše puku yela a e baletšego setšhaba. Jehudi e be e le morwa wa Netania, Netania morwa wa Shelemia, Shelemia morwa wa Kushi. Baruke a ba tlišetša puku yela. Bona ba re: “Hle, dula fase, o re balele puku yeo.” Baruke a ba balela yona. Ge a seno e bala, bona ba lebelelana ba tšhogile, mme ba re go Baruke: “Ruri, taba ye re swanetše go e begela kgoši.” Ba napa ba mmotšiša ba re: “Hle, nke o re botše gore go tlile bjang gore o ngwale dilo tše ka moka. Kgane Jeremia o go bileditše tšona?” Baruke a ba fetola a re: “Jeremia o mpileditše mantšu ohle, gomme nna ka a ngwala mo pukung ye ka enke.” Ke moo ba rilego go yena: “Wena le Jeremia sepelang le yo iphihla. Go se ke gwa tseba motho mo le lego gona.” Bakgomana ba bea puku yela ka phapošing ya Elishama, mongwaledi wa kgoro, mme ba ya kgorong ya kgoši, moo ba ilego ba begela kgoši ditaba tšeo ka moka. Kgoši a nama a roma Jehudi go yo tšea puku yeo. A e tšea ka phapošing ya Elishama, gomme a e balela kgoši le bakgomana bohle ba ba bego ba eme pele ga gagwe. E be e le marega, ka kgwedi ya senyane ya Sejuda, gomme kgoši a dutše mollong ka ngwakong wa gagwe wa marega. E be e re ge Jehudi a fetša go bala diripa tše tharo goba tše nne, kgoši a di ripaganye ka mphaka wo o bego o šomišwa ke bangwaledi, gomme a di lahlele mollong. A tšwela pele le go dira bjalo go fihlela puku yohle e swele. Eupša yena kgoši le bakgomana ba gagwe ba ba ilego ba kwa mantšu ao ga se ba ka ba boifa goba ba gagola diaparo tša bona ba nyamile. Le ge Elnathane, Delaya le Gemaria ba be ba rapela kgoši gore a se ke a fiša puku yeo, yena o ile a se ke a ba ela hloko. Ka morago a laela Jeragmeele, morwagwe, le Seraya, morwa wa Asriele, le Shelemia, morwa wa Abdeele, gore ba yo swara Jeremia le Baruke, mongwaledi wa gagwe. Eupša Morena o be a ba fihlile. Ka morago ga ge Kgoši Joyakime a fišitše puku yela mantšu a yona Jeremia a bego a a bileditše Baruke, Morena a botša Jeremia gore a tšee puku ye nngwe a ngwale go yona se sengwe le se sengwe se se bego se ngwadilwe ka go yela ya pele. Morena a laela le gore a botše kgoši a re: “O fišitše puku yela, wa ba wa botšiša Jeremia gore ke ka baka lang a ngwadile gore ruri kgoši ya Babilonia e tla tla go senya naga ye, mme ya bolaya batho ba yona le diruiwa. Bjale ge, mabapi le Kgoši Joyakime, nna, Morena, ke re ga go setlogolo sa gagwe se se tlago tsoga e bile kgoši mmušong wa Dafida. Setopo sa gagwe se tla lahlelwa moo se tlago tšhungwa ke letšatši mosegare, sa welwa ke tšhwaane bošego. Ke tla otla yena le ditlogolo tša gagwe le bakgomana ba gagwe ka baka la bokgopo bja bona. Bona le badudi ba Jerusalema le batho ba Juda ga se ba šetša ge ke ba kgala; ka gona ke tla ba tlišetša masetlapelo ale ke ba boditšego ona ka moka.” Ke moka Jeremia a tšea puku ye nngwe, a e neela Baruke, mongwaledi wa gagwe, yo a ilego a ngwala mantšu a Jeremia a bego a mmiletša ona. A ngwala se sengwe le se sengwe se se bego se le ka pukung yela ya go fišwa ke kgoši, le melaetša ya go swana le yela a bego a e bileditšwe ke Jeremia. Nebukadnesare, kgoši ya Babilonia, a bea Tsedekia, morwa wa Josia, kgoši ya naga ya Juda legatong la Joyakine, morwa wa Joyakime. Tsedekia le bahlanka ba gagwe le batho ba naga yeo ba ile ba se theeletše tše Morena a ba botšago tšona ka moprofeta Jeremia. Kgoši Tsedekia a roma Jukale, morwa wa Shelemia, le moprista Sofonia, morwa wa Maasea, go moprofeta Jeremia, ba fihla ba re: “Nke o re rapelele go Morena Modimo wa rena.” O be a sešo a išwa kgolegong, a sa itshepelela ka go rata gare ga batho. Madira a Babilonia a be a dikaneditše Jerusalema, eupša ge ba ekwa gore madira a Egepeta a tshetše mollwane wa Egepeta, ba boela morago. Ke mo Morena Modimo wa Israele a boditšego Jeremia gore a botše banna bale ba babedi gore ba yo botša kgoši ya Juda ye e bego e ba romile go yena go kgopela maele ba re: “Madira a kgoši ya Egepeta ao a lego tseleng go tlo le thuša a tlilo boela nageng ya gaboona, nageng ya Egepeta. Ya ba gona go boago Bababilonia, ba hlasela motse, ba o thopa, gomme ba o tšhuma ka mollo. Nna, Morena, ke le botša gore le se ke la iphora ka go gopola gore Bababilonia ba ka se boe, gobane go boa gona ba tla boa. Le ge le be le ka fenya madira ohle a Bababilonia a a lwago le lena, gwa šala fela dikgobadi tše di ithobaletšego ka mešašeng, tšona dikgobadi tšeo di be di tla tsoga tša tšhuma motse wo ka mollo.” Madira a Bababilonia a ile a boela morago a tloga Jerusalema ka gobane madira a kgoši ya Egepeta a be a batametše. Ka gona, Jeremia ge a re o tloga Jerusalema o ya seleteng sa Benjamene go yo rerišana le meloko yabo ka tša go aba bohwa bja gabo, ge a fihla lesorong la Benjamene, molaodi wa baletalesoro, yo leina la gagwe e bego e le Jiria, morwa wa Shelemia, Shelemia morwa wa Hanania, a mo thibela a re: “Etse o tšhabela go Bababilonia!” Jeremia a mo fetola a re: “Ke maaka! Nna ga ke tšhabele go Bababilonia.” Eupša Jiria a se mo theeletše. A mo swara a mo iša go ba bagolo. Bona ba mo galefela, ba laela gore a bethwe mme a tswalelelwe ka ntlong ya Jonathane, mongwaledi wa kgoro, yo ntlo ya gagwe e bego e dirilwe kgolego. A tsenywa ka phapošing ya ka tlase mme a dula ka moo nako ye telele. Ka morago Kgoši Tsedekia a roma batho gore ba yo mo tšea, gomme a fihla a mmotšiša ka sephiring kua mošate a re: “Kgane o na le molaetša wa go tšwa go Morena?” Jeremia a mo fetola a re: “Ke nawo.” A ba a tlaleletša ka go re: “Wena o tla gafelwa diatleng tša kgoši ya Babilonia.” A mmotšiša a re: “Ke go senyeditše ka eng, wena le bahlanka ba gago, le setšhaba se ge e bile le nkgolegile? Ba kae baprofeta bale ba lena ba go le botša gore kgoši ya Babilonia e ka se le hlasele, lena goba naga ya lena? Bjale ge, kgoši, mong wa ka, ke a go rapela, hle, amogela kgopelo ya ka. Se mpušetše ga mongwaledi Jonathane, ka gore nka hwela gona.” Ka gona, Kgoši Tsedekia a laela gore Jeremia a tswalelelwe ka kgorong ya mošate. A dula gona, gomme tšatši le lengwe le le lengwe a fiwa senkgwa sa go tšwa go baapei ba dinkgwa. Gwa ba bjalo, go fihlela go se sa na le senkgwa moo motseng. Shefatia, morwa wa Mathane, le Gedalia, morwa wa Pashure, le Jukale, morwa wa Shelemia, le Pashure, morwa wa Malkia, ba ile ba kwa gore Jeremia o be a botša setšhaba a re Morena o re: “Yo a ka šalago mo motseng o tla bolawa ka tšhoša, goba ka tlala, goba ka leuba la bolwetši. Eupša yo a ka tšwago motseng a yo ineela go Bababilonia a ka se bolawe; o tla iphološa gomme a phela.” A ba a ba botša le gore Morena o re: “Ruri, motse wo o tla gafelwa diatleng tša madira a kgoši ya Babilonia, gomme bona ba tla o thopa.” Ke mo mantona a setšhaba a ilego go kgoši, a fihla a re: “Monna yo o swanetše go bolawa, gobane ka go bolela ka mokgwa wo o nola bahlabani ba ba šetšego mo motseng moko, setšhaba sohle le sona o se nola moko. Ga a lakaletše setšhaba sa gaborena boiketlo, o se lakaletša madimabe.” Kgoši Tsedekia a ba fetola a re: “Šoowege, dirang ka yena se le se ratago; nna nka se kgone go le thibela.” Ka gona ba tšea Jeremia ba yo mo tsenya ka dithapo ka sedibeng sa Malkia, morwa wa kgoši, se se bego se le ka kgorong ya kgolego. Ka moo sedibeng go be go se na meetse, ge e se leraga, gomme Jeremia a sobelela ka gare ga lona. Ebedmeleke wa Etopia, moamogwabonna yo a bego a šoma ka mošate, a kwa gore ba tsentše Jeremia ka moo sedibeng. Ka nako yeo ke ge kgoši a swere lekgotla kua lesorong la Benjamene. Ka fao Ebedmeleke a tšwa ka mošate, a yo bolela le kgoši a re: “Kgoši, mong wa ka, banna ba ba dirile Jeremia taba ye mpe ka go mo lahlela ka sedibeng. O tla hwela gona ka tlala, ka ge go se sa na le dijo ka mo motseng.” Ke mo kgoši a laetšego Ebedmeleke gore a ye le banna ba bararo go ntšha Jeremia ka moo sedibeng pele a ehwa. Ka gona Ebedmeleke a ya le banna bao ka phapošing ya bobolokelo ya mošate, a yo tšea diaparo tša maratha, a di tsenyetša Jeremia ka moo sedibeng ka dithapo. A mmotša gore a beeletše dithapo ka diaparo tšeo tša maratha ka mahwafeng. Jeremia a dira bjalo, gomme ba mo goga ka dithapo ba mo ntšha ka moo sedibeng. A bewa gape ka kgorong ya kgolego. Ka le lengwe la matšatši Kgoši Tsedekia a laela gore Jeremia a tlišwe go yena kua lesorong la boraro la go tsena ka Tempeleng ya Morena, gomme a re go yena: “Go na le taba ye ke nyakago go go botšiša yona, gomme o se ke wa mphihlela selo.” Jeremia a mo fetola a re: “A ke re ge nka go botša o tla mpolaya? Ge nka go eletša le gona o ka se ntheeletše.” Ke ge Kgoši Tsedekia a enela Jeremia ka sephiring a re: “Ka Morena yo a phelago, yena Morephediši, nka se go bolaye goba ka go gafela diatleng tša banna ba ba nyakago go go bolaya.” Ke moka Jeremia a botša Tsedekia gore Morena Modimo Ramaatlaohle, Modimo wa Israele, o re: “Ge o ka ineela go balaodi ba madira a kgoši ya Babilonia o tla phologa, le motse wo o ka se tšhungwe ka mollo. Wena le lapa la gago le tla phologa. Eupša ge o ka se ineele go bona, gona motse wo o tla gafelwa diatleng tša Bababilonia, ba o tšhuma ka mollo, le wena o ka se ba tšwe ka diatleng.” Kgoši a mo fetola a re: “Ke tšhaba batho ba Juda ba ba ineetšego go Bababilonia. Nka no gafelwa diatleng tša bona mme ka tlaišwa.” Jeremia a re: “O ka se gafelwe diatleng tša bona. Ke go kgopela gore o phethe tše ke go botšago gore Morena o go laela tšona, gomme o ka se hlagelwe ke selo, o tla phela. Eupša Morena o mpontšhitše mo ponong se se tlago go hlagela ge o ka gana go ineela. Mo ponong yeo ke bone basadi ka moka ba ba šetšego mošate, ga kgoši ya Juda, ba išwa go balaodi ba kgoši ya Babilonia. Ge ba eya ba be ba re: ‘Bagwera ba gago ba o ba botilego ba go arošitše, ba go paletše. Gomme bjale ge o tantšwe ka lerageng ka maoto, ba go tlogetše.’ ” Jeremia a iša pele a re: “Basadi ba gago le bana ba tla ntšhwa ba išwa go Bababilonia, gomme le wena ka noši o ka se phonyokge Bababilonia bao. O tla thopša ke kgoši ya Babilonia, gomme motse wo o tla tšhungwa ka mollo.” Tsedekia a re go yena: “O se ke wa botša motho tše re di boletšego, gore o se tlo bolawa. Ge mantona a setšhaba a ka kwa gore ke be ke bolela le wena, mme a tla go wena a go botšiša gore na re be re bolela eng, a tla go holofetša gore ba ka se go bolaye ge o ka se ba fihlele selo. Wena o no ba botša gore o be o nkgopela gore ke se ke ka go bušetša ga Jonathane gore o hwele gona.” Ka kgonthe mantona ale ka moka a ile a tla a botšiša Jeremia, gomme yena a ba fetola ka ona mantšu ale kgoši a mmoditšego ona. Ba napa ba lesa go mmotšiša, ka gobane tše ba bego ba di bolela go be go se yo a bego a di tšere ka tsebe. Gomme Jeremia a bewa ka kgorong ya mošate go fihlela letšatši le Jerusalema e thopilwego ka lona. Ka kgwedi ya lesome ya ngwaga wa senyane wa ge Tsedekia e le kgoši ya Juda, Nebukadnesare, kgoši ya Babilonia, a tla motseng wa Jerusalema le madira a gagwe ka moka, gomme a o dikanetša. Ka tšatši la senyane la kgwedi ya bone ya ngwaga wa lesome le motšo o tee wa ge Tsedekia e le kgoši, morako wa motse wa phulwa. Ge motse wa Jerusalema o thopša, bahlankedi ba bagolo ka moka ba kgoši ya Babilonia ba ile ba tlo dula Lesorong la Gare. E be e le Nergale-Saretsere le Shamgare-Nebu le Sare-Sekime, molaodi yo mogolo, le Nergale-Saretsere yo mongwe, yo le yena e bego e le molaodi yo mogolo, le ba bangwe bahlankedi ba kgoši ya Babilonia. Ge Kgoši Tsedekia le bahlabani ba gagwe ka moka ba bona tše di diregago, ba tšhaba motseng bošego, ba tšwa ka tsela ya go leba serapeng sa mošate, ba tšwa ka lesoro le le lego mokgahlo ga merako yeo ye mebedi, gomme ba tšhabela thokong ya moedi wa Jordane. Eupša madira a Babilonia a ba hlomara mme a swara Tsedekia kua melaleng ya kgauswi le Jeriko, a mo thopa. Ba mo iša go Nebukadnesare, kgoši ya Babilonia, yo a bego a le motseng wa Ribla kua seleteng sa Hamate, gomme gona moo Nebukadnesare a mo ahlola. Moo Ribla a bolaya barwa ba Tsedekia, yena Tsedekia a lebeletše, a bolaya le bahlomphegi bohle ba naga ya Juda. Ka morago ga moo a laela gore Tsedekia a gonywe mahlo a be a kgokwe ka diketane mme a išwe Babilonia. Bababilonia ba tšhuma mošate le dintlo tša batho ka mollo, ba ba ba kgereša merako ya Jerusalema. Nebusaradane, molaodi wa baleti ba kgoši, a thopa mašaledi a motse a a iša Babilonia le bao ba bego ba ineetše go yena, gotee le mašaledi a setšhaba. Nageng ya Juda a šadiša badiidi ba bangwenyana, ba go hloka le pudi ya leleme le letala, ya ba o ba fa dirapa tša merara le mašemo. Nebukadnesare, kgoši ya Babilonia, a laela Nebusaradane, molaodi wa baleti ba kgoši, mabapi le Jeremia a re: “Mo tšee, o mo hlokomele gabotse. O se ke wa mo kweša bohloko, eupša o mo direle se a se nyakago.” Ka gona Nebusaradane gotee le balaodi ba bagolo, boNebushasbane, le Nergale-Seretsere, le balaodi ka moka ba kgoši ya Babilonia, ba roma batho ba yo tšea Jeremia kgorong ya mošate. Ba bea Gedalia, morwa wa Ahikamo, setlogolo sa Shafane, gore a mo hlokomele mme a šetše gore a fihle gae a lotegile. Ka gona Jeremia a yo dula le batho ba gabo. Ge Jeremia a sa golegilwe ka kgorong ya mošate Morena o ile a mmotša gore a botše Ebedmeleke yola wa Moetopia gore yena Morena Ramaatlaohle, Modimo wa Israele, o re: “Motse wo ke tlilo o tlišetša masetlapelo bjalo ka ge ke boletše, e sego katlego. Taba ye e tla phethagala o lebeletše. Mohlang woo wena ke tla go hlakodiša, nna, Morena, wa se gafelwe diatleng tša banna bao o ba tšhabago. Ke tla go phološa, wa se bolawe ka tšhoša. O tla phologa ka gobane o mpotile. Ke realo, nna, Morena.” Morena a bolela le Jeremia ka morago ga ge Nebusaradane, molaodi wa baleti ba kgoši, a mo lokolotše kua Rama. O be a išitšwe gona a kgokilwe ka diketane gotee le batho ka moka ba go tšwa Jerusalema le Juda ba ba bego ba išwa Babilonia e le dibofša. Molaodi yoo wa baleti ba kgoši a laela gore Jeremia a tlišwe go yena, mme a re go yena: “Morena Modimo wa gago ke yena a rilego o tla tlišetša naga ye masetlapelo a, gomme bjale o dirile se a rilego o tla se dira ka baka la ge le mo fošeditše, le se la mo theeletša. Ke ka baka leo le wetšwego ke masetlapelo a. Fela wena lehono ke go bofolla diketane diatleng. Ge o rata go ya Babilonia le nna, a re ye, gomme ke tla go hlokomela. Eupša ge o sa rate, o ka no itšhalela. Naga še e ikadile, gomme o ka no ya mo o ratago.” Ya re pele Jeremia a sepela, Nebusaradane a re: “O ka no boela go Gedalia, morwa wa Ahikamo, setlogolo sa Shafane, yoo kgoši ya Babilonia a mmeilego mmušiši metseng ya naga ya Juda. O ka no itulela le yena wa iphelela le batho ba gona, goba wa ikela mo gongwe le mo gongwe mo o bonago o ka ya gona.” A napa a mo fa mphago le mphonyana, a mo lesa a wela tsela. Jeremia a ya go dula le Gedalia, morwa wa Ahikamo, motseng wa Mitsepa, mme a iphelela le batho bao ba bego ba šetše nageng ya Juda. Balaodi ba bangwe ba madira a naga ya Juda le bahlabani ba bona ba be ba sa le kua šokeng. Ba ile ba kwa gore kgoši ya Babilonia e beile Gedalia, morwa wa Ahikamo, mmušiši wa naga, ebile o mmeile mohlokomedi wa banna le basadi le bana ba e lego badiididiidi mo nageng, ba ba sego ba thopelwa Babilonia. Ka gona, Ishmaele, morwa wa Netania, le Johanane le Jonathane, barwa ba Kareage, le Seraya, morwa wa Tanhumete, le barwa ba Efai wa Netofa, le Jaasania wa Maaka ba ya le bahlabani ba bona go Gedalia kua Mitsepa. Gedalia, morwa wa Ahikamo, setlogolo sa Shafane, a re go bona: “Ke bolela ke tiišitše ke re le se ke la tšhaba go hlankela Bababilonia. Dulang mo nageng ye, le hlankele kgoši ya Babilonia, gomme le tla iketla. Ge e le nna, ke tla dula Mitsepa ka le bolelela go Bababilonia ge ba etla mo. Ge e le lena, le bune diterebe, le dikenywa tša lehlabula, le dikenywa tša mohlware, le di tšhele ka dinkgong tša lena, mme le dule metseng yeo le e thopilego.” Batho ba Juda ka moka ba ba bego ba le Moaba, le gare ga Baamone, le Edomo, le dinageng tše dingwe ba kwa gore kgoši ya Babilonia e dumeletše batho ba bangwe ba Juda gore ba šale moo, le gore o beile Gedalia mmuši wa bona. Ka gona ba boa mafelong ohle ao ba bego ba šwalalanyeditšwe go ona, mme ba tla nageng ya Juda go Gedalia kua Mitsepa, gomme moo ba buna diterebe le dikenywa tše dintši tša lehlabula. Johanane, morwa wa Kareage, le balaodi ka moka ba madira ba ba bego ba sa le kua šokeng ba tla go Gedalia kua Mitsepa gomme ba re go yena: “Afa o a tseba gore Baalise, kgoši ya Baamone, o romile Ishmaele, morwa wa Netania, gore a tle a go bolaye?” Eupša Gedalia a se ba kgolwe. Ke mo Johanane a boletšego naye ka sephiring a re: “Ntumelele ke yo bolaya Ishmaele, gomme go ka se tsebe motho gore o bolailwe ke mang. Yena o reng a nyaka go go bolaya, gore batho bohle ba Juda ba ba phelago le wena ba šwalalane, le gore bohle ba ba šetšego mo Juda ba bolawe?” Eupša Gedalia a mo fetola a re: “O se ke wa ba wa dira taba yeo. Se o se bolelago ka Ishmaele ga se nnete!” Ka kgwedi ya bošupa ya ngwaga woo Ishmaele, morwa wa Netania, setlogolo sa Elishama, wa lapa la mošate yo e bego e le yo mongwe wa balaodi ba madira a kgoši, a tla go Gedalia, morwa wa Ahikamo, motseng wa Mitsepa, a na le banna ba lesome. Ya re ge ba le dijong mmogo Ishmaele le banna bale ba gagwe ba lesome ba emelela, ba hlasela Gedalia ka ditšhoša, ba mmolaya, yena yo kgoši ya Babilonia a bego a mmeile mmuši wa naga. Ishmaele a bolaya le batho ba Juda bao ba bego ba na le Gedalia moo Mitsepa, le bahlabani ba Bababilonia bao ba bego ba le moo. Ka letšatši le le latelago, pele go tseba motho ka go bolawa ga Gedalia, gwa tla banna ba masome a seswai, ba bangwe ba etšwa Shekeme, bangwe Shilo, bangwe Samaria. Ba be ba ipootše maledu, ba ikgagoletše diaparo, ba bile ba ikgaile. Ba be ba iša dikabelo tša bupi le diorelo go di neela ka Tempeleng ya Morena. Ka gona Ishmaele a tloga Mitsepa go yo ba gahlanetša a tšama a lla. Ge a fihla go bona a re: “A re yeng ga Gedalia, morwa wa Ahikamo.” Ya re ge ba šetše ba le ka gare ga motse, Ishmaele le banna ba ba bego ba na le yena ba ba bolaya, gomme ba lahlela ditopo tša bona ka sekoting. Ba lesome mo sehlopheng seo ba ile ba re go Ishmaele: “Hle, o se ke wa re bolaya! Re na le mabele le garase le makhura a mohlware le todi, mme dilo tšeo re di fihlile kua šokeng.” Ka gona a ba lesa, a se ba bolaye mmogo le bangwekabona. Sekoti seo ka go sona Ishmaele a ilego a lahlela ditopo tša banna bale a ba bolailego ke sela se segolo sa go epša ke Kgoši Asa mola a hlaselwa ke Kgoši Basha wa Israele. Ishmaele a se tlatša ka ditopo tša bao a ba bolailego. Ke moka a thopa barwedi ba kgoši le mašaledi ka moka a batho ba Mitsepa bao Nebusaradane, molaodi wa baleti ba kgoši, a bego a ba beetše Gedalia, morwa wa Ahikamo, gore e be mohlokomedi wa bona. Ishmaele a ba thopa, a tloga nabo a re o ya go Baamone. Johanane, morwa wa Kareage, le balaodi bohle ba madira bao ba bego ba na le yena ba kwa dilo tšohle tše mpe tše Ishmaele a di dirilego. Ka gona ba tšea bahlabani ka moka ba bona ba yo lwa le yena, ba mo swara mogobeng wo mogolo wa kua Gibeone. Bohle ba ba bego ba na le Ishmaele, bao a bego a ba thopile Mitsepa, ge ba bona Johanane le balaodi bohle ba madira bao ba bego ba na le yena, ba thaba; ba retologa ba boela go Johanane. Eupša Ishmaele le banna ba gagwe ba seswai ba phonyokga Johanane ba tšhabela go Baamone. Johanane le balaodi bohle ba madira ba ba bego ba na le yena ba nama ba tšea batho bao Ishmaele a bego a ba thopile kua Mitsepa ge a seno bolaya Gedalia, morwa wa Ahikamo, e lego bahlabani le basadi le bana le baamogwabonna, bao Johanane a bego a tšo ba gomiša Gibeone. Ba be ba boifa Bababilonia ka gore Ishmaele o be a bolaile Gedalia, yoo kgoši ya Babilonia e bego e mmeile mmuši wa naga. Ka fao ba tloga ba re ba ya Egepeta gore ba tšhabele Bababilonia. Mo tseleng ba ile ba ema bophirimalelong bja Kimehamo, kgauswi le Betlelehema. Ke moka balaodi bohle ba madira, go balwa le Johanane, morwa wa Kareage, le Asaria, morwa wa Hoshaya, le batho ka moka, ba go nyatšega le ba go hlomphega, ba batamela moprofeta Jeremia, ba re go yena: “Hle, dira se re go kgopelago sona! Re rapelele go Morena Modimo wa gago, rena ka moka re šetšego. Re be re le ba bantši, eupša bjale ba re šetšego ga re nene, bjalo ka ge le wena o iponela. Rapela Morena Modimo wa gago, gore a re bontšhe tsela ye re swanetšego go tšea ka yona, le se re swanetšego go se dira.” Moprofeta Jeremia a ba fetola a re: “Go lokile. Ke tla rapela Morena Modimo wa lena, go ya ka mo le nkgopelago, gomme sengwe le sengwe se a se bolelago ke tla le botša sona. Nka se le fihlele selo.” Bona ba re go Jeremia: “Re itlema go phetha tšohle tše Morena Modimo wa gago a go laelago gore o re botše tšona. Ge re ka se di phethe Morena a re tšwe, gobane yena ke hlatse ya nnete ye e tshephegago. Re tla phetha ditaelo tša Morena Modimo wa rena, yena yo re go kgopelago gore o re rapelele go yena ge di re kgahla le ge di sa re kgahle, gore tšohle di tle di re atle.” Ge go fetile matšatši a lesome Morena a bolela le Jeremia; ka gona Jeremia a bitša Johanane, morwa wa Kareage, le balaodi bohle ba madira bao ba bego ba na le yena, le batho ka moka, ba go nyatšega le ba go hlomphega. A re go bona: “Morena Modimo wa Israele, yo le nthomilego gore ke iše kgopelo ya lena go yena, o re: ‘Ge le ka fela le dutše mo nageng ye ke tla le phediša ka se le fediše; ke tla le hloma ka se le tumole, gobane ke itshola ka baka la masetlapelo a ke le otlilego ka ona. Le se sa tšhaba kgoši ya Babilonia ye gabjale le e tšhabago. Nna, Morena, ke re le se sa mmoifa, gobane ke na le lena go le phološa le go le hlakodiša diatleng tša gagwe. Ke tla le šokela gore le yena a le šokele mme a le lese le ipoelele nageng ya gabolena.’ “Eupša ge le ka no fela le re: ‘Ga re nyake go dula mo nageng ye,’ e le ge le sa theeletše Morena Modimo wa lena, le ge le ka re: ‘Aowa, re tla ikela nageng ya Egepeta mo re ka se kego ra hlaselwa, goba ra kwa phalafala ya ntwa, goba ra bolawa ke tlala, moo ke mo re nyakago go dula gona,’ gona Morena Ramaatlaohle, Modimo wa Israele, o re go lena, mašaledi a Juda: ‘Ge eba le tloga le ikemišeditše go falalela Egepeta, gona ntwa ye le e tšhabago e tla le hwetša gona kua Egepeta, le tlala ye le e boifago e tla le hlomara le le Egepeta, gomme le tla hwela gona. Batho ka moka ba ba ikemišeditšego go falalela Egepeta ba tla bolawa ka tšhoša, goba ka tlala, goba ka leuba la bolwetši. Go ka se phologe le o tee, le o tee wa bona a ka se phonyokge masetlapelo a ke tlago ba tlišetša ona.’ “Morena Ramaatlaohle, Modimo wa Israele, o re: ‘Bjalo ka ge ke ile ka tšhollela pefelo le kgalefo ya ka godimo ga batho ba Jerusalema, le lena, ge le ka ya Egepeta, ke tla tšhollela kgalefo ya ka godimo ga lena. Batho ba tla rogaka ka leina la lena; ba tla tšhoga ge ba le bona; ba le kgatlela motswiri, ba le kodutla. Le ka se sa tsoga le bone felo fa.’ “Morena o le boditše, lena mašaledi a Juda, gore le se ke la ya Egepeta. Tsebang gore lehono ke le kgadile. Ge le be le nkgopela le re: ‘Re rapelele go Morena Modimo wa rena; tšohle tše a tlago re laela tšona o re botše, gomme re tla di phetha,’ le be le ikgakantšha. Gomme bjale ke le boditše tšona, eupša la nyatša se sengwe le se sengwe se Morena Modimo wa rena a nthomilego gore ke le botše sona. Bjale ge, tsebang gore le ya go bolawa ka tšhoša, goba ka tlala, goba ka leuba la bolwetši nageng ye le nyakago go falalela go yona.” E rile ge Jeremia a fetša go botša setšhaba tšohle tšela Morena Modimo wa bona a bego a mo romile gore a ye go ba botša tšona, Asaria, morwa wa Hoshaya, le Johanane, morwa wa Kareage, gotee le banna bale ka moka ba mereba ba re go yena: “O bolela maaka! Morena Modimo wa rena ga se a go roma gore o tle o re botše gore re se ke ra falalela Egepeta. Baruke, morwa wa Neria, o go hlohleleditše gore o lwe le rena, gore o re gafele diatleng tša Bababilonia gore ba re bolaye, goba ba re thopele Babilonia.” Ka gona Johanane le balaodi bohle ba madira le batho ka moka ba ile ba se phethe taelo ya Morena ya gore ba dule nageng ya Juda. Johanane le balaodi ka moka ba madira ba napa ba tšea bohle ba ba šetšego Juda, e lego bohle ba ba bego ba tšo boa ditšhabeng tšeo ba bego ba šwalalanyeditšwe go tšona, gore ba tle ba dule nageng ya Juda: banna, le basadi, le bana, le barwedi ba kgoši, le bohle bao Nebusaradane, molaodi wa baleti ba kgoši, a bego a ba beetše Gedalia, morwa wa Ahikamo, setlogolo sa Shafane, gore e be mohlokomedi wa bona, go balwa le moprofeta Jeremia, le Baruke, morwa wa Neria. Ba ile ba nyatša taelo ya Morena, ba ya Egepeta, ba ba ba yo fihla Tagpanese. Moo Morena a re go Jeremia: “Tšea maswika a magolo o a epele ka leraga lebaleng la ditena le le lego pele ga lesoro la go tsena ka moagong wa mmušo mo Tagpanese, gomme o dire gore ba bangwe ba batho ba Juda ba go bone ge o a epela. O name o ba botše gore nna, Morena Ramaatlaohle, Modimo wa Israele, ke re ke tla bitša mohlanka wa ka, Nebukadnesare, kgoši ya Babilonia, a tla mo, gomme yena o tla bea setulo sa gagwe sa bogoši godimo ga maswika a ke go laetšego gore o a epele, a hloma mošaša wa gagwe ka godimo ga ona. Nebukadnesare o tla tla a fenya Baegepeta. Batho ba ba lebanwego ke go hwa ka leuba la bolwetši ba tla hwa ka lona, ba ba lebanwego ke go thopša ba tla thopša, le ba ba lebanwego ke go bolawa ka tšhoša ba tla bolawa ka yona. O tla tšhuma ditempele tša medimo ya Egepeta ka mollo, gomme kgoši ya Babilonia e tla tšhuma medimo ya bona goba ya e thopa. Bjalo ka ge modiša a rona dinta diaparong tša gagwe, kgoši ya Babilonia le yena o tla tloša tšohle nageng ya Egepeta, gomme a tloga gona e le mofenyi. O tla pšhatlaganya dikokwane tša borapedi tša maswika Heliopolise kua Egepeta, a ba a tšhuma ditempele tša medimo ya Baegepeta ka mollo.” Morena a bolela le Jeremia mabapi le batho ka moka ba Juda ba ba dulago nageng ya Egepeta, motseng wa Migdolo, le wa Tagpanese, le wa Memfise, le seleteng sa Patrose, a re: “Nna, Morena Ramaatlaohle, Modimo wa Israele, ke re: Le iponetše masetlapelo ka moka a ke a tlišeditšego Jerusalema le metse ka moka ya Juda. Le gonabjale e sa le matoko, ga go motho yo a dulago go ona, ka gobane batho ba gona ba be ba dira tše mpe, ba nthumola ka go direla medimo ye mengwe dihlabelo, ba loba medimo yeo bona goba lena goba borakgolokhukhu ba lena ba bego ba sa e tsebe. Ke be ke fela ke le romela bahlanka ba ka, baprofeta, ke le botša ke re: Hle, le se dire bohlola bjo ke bo hloilego bjo. Fela lena le be le sa ntheeletše, le sa ntlhwaele tsebe la tlogela bokgopo bja lena bja go direla medimo ye mengwe dihlabelo. Ka baka leo, nna ka tšhollela pefelo le kgalefo ya ka godimo ga metse ya Juda le mekgotheng ya Jerusalema, tša tšhuma metse yeo ka mollo. Ya šala e le matoko mo go sa dulego motho, gomme le lehono e sa le ka wona mokgwa woo. “Ka gona ge, nna, Morena Modimo Ramaatlaohle, Modimo wa Israele, ke le botšiša gore le reng le itlišetša masetlapelo a makaaka le bolaiša banna le basadi le bana le masea a mo Juda, gore go se šale motho wa lena? Le nthumolelang ka go itirela medimo ya diswantšho, le direla medimo ye mengwe dihlabelo mo Egepeta, mo le falaletšego gona? Kgane seo le se direla go ipolaya fela, gore ditšhaba tšohle mo lefaseng di tle di rogake ka leina la lena, di le kwere? Na le lebetše makgopo ohle ale a dirilwego ke borakgolokhukhu ba lena, le magoši a Juda, le basadi ba bona, le lena le basadi ba lena nageng ya Juda le mekgotheng ya Jerusalema? Eupša le go fihlela lehono ga le itshole, ga le mpoife, ga le phethe melao le ditaelo tše ke di filego lena le borakgolokhukhu ba lena. “Ka gona, nna, Morena Ramaatlaohle, Modimo wa Israele, ke re ke ikemišeditše go le tlišetša masetlapelo ka fediša batho ba Juda. Batho ba Juda ba ba šetšego mme ba ikemišeditšego go falalela nageng ya Egepeta bona ke tla ba fediša. Ka moka ga bona, ba bagolo le ba banyenyane, ba tla bolawa nageng ya Egepeta ka tšhoša goba ka tlala. Batho ba tla rogaka ka leina la bona, ba tla tšhoga ge ba ba bona, ba tla ba kgatlela motswiri, ba ba kodutla. Ke tla otla ba ba dulago nageng ya Egepeta, bjalo ka ge ke ile ka otla badudi ba Jerusalema – ka go ba bolaya ka tšhoša, le ka tlala, le ka leuba la bolwetši. Ga go le o tee wa mašaledi a Juda yo a falaletšego Egepeta yo a tlago phonyokga goba a phologa. Ba ka se boele Juda mo ba dumago go yo dula gona gape, ge e se fela bafaladi ba se ba kae.” Ke mo banna ka moka bao ba bego ba tseba gore basadi ba bona ba ile ba direla medimo ye mengwe dihlabelo, gotee le basadi bohle bao ba bego ba eme moo, ke go re batho bohle bao ba bego ba dula Patrose, nageng ya Egepeta – e le lešaba le legolo la batho – ba ilego ba re go Jeremia: “Tše o rego Morena o go laetše gore o re botše tšona ga re di amogele. Rena re tla dira tšohle tše re rilego re tla di dira. Re tla direla modimo wa mosadi, Mohumagadi wa Legodimo, dihlabelo, gomme re tla mo tšhelela kabelo ya dino, go no swana le ka mo borakgolokhukhu ba rena, le kgoši ya rena, le baetapele ba rena ba bego ba dira kua metseng ya Juda le mekgotheng ya Jerusalema. Mehleng yeo re be re na le dijo tše dintši, re atlegile le gona re se ne mathata. Eupša mola ra lesago go direla Mohumagadi wa Legodimo dihlabelo le go mo tšhelela dikabelo tša dino, ga re sa ba le selo, le batho ba gaborena ba bolawa ka tšhoša le ka tlala.” Gomme basadi ba tlaleletša ka go re: “Kgane o bona nke mola re direla modimo wa mosadi, Mohumagadi wa Legodimo, dihlabelo, re o tšhelela kabelo ya dino, re o apeela dinkgwana tša go swana nawo, banna ba rena ba be ba sa tsebe?” Ke moka Jeremia a botša lešaba le le bego le le moo, banna le basadi, ba go mo fetola ka mokgwa woo, a re: “Ge e le dihlabelo tše lena le borakgolokhukhu ba lena, le magoši a lena, le baetapele ba lena, le batho ba naga ye le bego le di dira metseng ya Juda le mekgotheng ya Jerusalema – na le bona nke Morena o be a se sa di gopola, goba o be a di lebetše? Lehono naga ya lena ke leganata, e a tšhoša, gomme batho ba rogaka ka leina la yona; ga go motho yo a dulago mo go yona, gobane Morena o be a se sa kgona go kgotlelela tše mpe le tša go šišimiša tše le bego le di dira. Masetlapelo a a gonabjale a le wetše ka baka la ge le diretše medimo ye mengwe dihlabelo mme la senyetša Morena, la se mo theeletše la se phethe melao ya gagwe le ditaelo tša gagwe.” Jeremia o ile a botša setšhaba ka moka, kudu basadi, a re: “Theeletšang se Morena a se bolelago, lena batho bohle ba Juda le lego mo nageng ya Egepeta: Morena Ramaatlaohle, Modimo wa Israele, o re: ‘Lena le basadi ba lena le phethile tše le rilego le tla di phetha. Le rile le tla phetha tše le ikanetšego tšona, e lego go direla Mohumagadi wa Legodimo dihlabelo, le go mo tšhelela dikabelo tša dino. Go lokile, ge, phethang tše le ikanetšego tšona, di phetheng! Fela bjale lena batho bohle ba Juda le lego mo Egepeta, ntheeletšeng nna, Morena. Ke ikana ka nna mong ke re: Mo nageng ya Egepeta go ka se sa ba le Mojuda yo a tlago ikana ka nna a re: “Ka Mong wa rena, Morena yo a phelago!” Ke tla dira gore le se ke la atlega, le upše le sotlege. Lena batho bohle ba Juda le lego mo nageng ya Egepeta le tla bolawa ka tšhoša goba ka tlala go fihlela go se sa šetše motho wa lena. Ke malotwana fela ao a ka se bolawego ka tšhoša mme a tloga Egepeta a boela Juda. Ya ba gona mašaledi ohle a batho ba Juda a a falaletšego Egepeta a tlago tseba gore mantšu go phethagala a mang, a ka goba a bona. Nna, Morena, ke tla le bontšha sešupo sa gore ke tla le otla gona mo lefelong le, gore le tsebe gore se ke le boditšego sona se tla phethagala. Ke tla gafela Kgoši Hofra wa Egepeta diatleng tša manaba a gagwe ao a nyakago go mmolaya, go no swana le ge ke ile ka gafela Tsedekia, kgoši ya Juda, diatleng tša Nebukadnesare, kgoši ya Babilonia, yo e bego e le lenaba la gagwe le le bego le nyaka go mmolaya.’ ” Ka ngwaga wa bone wa ge Joyakime, morwa wa Josia, e le kgoši ya Juda, Baruke a ngwala tše Jeremia a bego a mo laela tšona ka pukung. Ya ba Jeremia o mmotša a re: “Morena Modimo wa Israele o re: ‘Wena Baruke, o re: Jonna! Morena o nkokeleditše matshwenyego ka manyami. Ke lapišitšwe ke mefegelo ya ka, le khutšo ga ke e hwetše!’ “Morena o mpoditše gore ke go botše gore o re yena o hlahlamolla se a se agilego, ebile o tumola se a se bjetšego. Seo o tla se dira mo nageng yohle. Kgane wena o nyaka go swarwa ka mokgwa wo mongwenyana wo mokaone? O se nyake bjalo. Morena o tlišetša batho bohle masetlapelo, eupša wena o tla go phološa lehung kae le kae mo o yago gona. O realo, yena Morena.” Morena o boletše le moprofeta Jeremia mabapi le ditšhaba. Tša Egepeta šedi: Ka ngwaga wa bone wa ge Joyakime, morwa wa Josia, e le kgoši ya Juda, Nebukadnesare, kgoši ya Babilonia, o ile a fenya madira a Kgoši Neko wa Egepeta kua motseng wa Karkemishe, go bapela le noka ya Yufratese. Gomme mabapi le madira ao a Kgoši Neko Morena o re: “Tšeang dithebe le dikotse tša lena le lebe ntweng! Lena banamedi, apešang dipere tša lena ditomo le di namele! Emang senna le rwele dikefa tša ntwa! Lootšang marumo a lena, aparang tša ntwa!” Morena o a botšiša o re: “Na ke bonang? Ba boela morago ba gakanegile. Dioka tša gabobona di gomišwa di fentšwe; di tšhaba parapara, le morago ga di lebelele, di tšhogile. Dikitimi di šitwa ke maoto; dioka ga di kgone go tšhaba. Ka leboa, lešing la Yufratese, di a kgopša tša wa. Ke mang yo wa go korologa boka noka ya Naele, boka dinoka tše di bilogago? Ke Egepeta, e korologa boka Naele, boka dinoka tše di bilogago. Egepeta e rile: ‘Ke tla korologa ka khupetša lefase; ke tla fediša metse le badudi ba yona. Phalalang, lena banamedi ba dipere! Hlaselang, lena banamedi ba dikoloi tša ntwa! A dioka di šwahlele: banna ba go tšwa Etopia le Libia ba swere dikotse, le boramesebe ba go tšwa Lidia.’ ” Le ke letšatši la Mong wa bohle, Morena Ramaatlaohle; ke letšatši la go itefeletša, la go itefeletša manabeng a gagwe. Tšhoša ya gagwe e tla ba ja ya ba ya khora, ya nwa madi a bona go fihlela e kgolwa, gobane Mong wa bohle, Morena Ramaatlaohle, o dira sehlabelo ka manaba a gagwe ka leboa, nokeng ya Yufratese. Lena Baegepeta, rotogelang Gileade le yo epa dihlare! Dihlare tšohle tša lena ga di thuše selo; ga go se se kago le alafa. Ditšhaba di kwele go nyatšega ga lena; sello sa lena se kwagala mo gohle; dioka di a thetšana, tša wela fase. E rile ge Nebukadnesare, kgoši ya Babilonia, a etla go hlasela naga ya Egepeta, Morena a bolela le moprofeta Jeremia a re: “Begelang Baegepeta, le tsebišeng ba Migdolo, le ba Memfise, le ba Tagpanese, le re: ‘Emang senna, gobane baagišani ba lena ba tlilo bolawa ka tšhoša! Modimo wa lena, Apise, o tšhabelang? Poo yeo ya lena e reng e sa itsemelele? Ke ka gobane Morena o e kgoromeditše.’ Bahlabani ba thwalwa ba lena ba kgopilwe, ba wa; ba botšana ba re: ‘A re boeleng go batho ba gaborena, nageng ye re tswaletšwego go yona, re phonyokgeng tšhoša ya lenaba!’ “Theang kgoši ya Egepeta leina la ‘Ralešatana Moipolai’. Nna, Kgoši, Morena Ramaatlaohle, ke re: Ruri, monnatsoko o etla, o bjalo ka thaba ya Taboro, kokamadithaba; o etša thaba ya Karmele, kokamalewatle. Itokišetšeng go ba mathopša, lena badudi ba Egepeta! Memfise e tla ngalwa, ya ba matoko, ya hloka badudi. Egepeta e bjalo ka sethole se se nonnego, se se longwago ke seboba sa go tšwa ka leboa. Le bahlabani ba bona ba ba thwetšwego ke Baegepeta ba tšhoga fela, ba etša dinamane tše di nonnego. Ga se ba ka ba ema ba lwa; bohle ba retologile ba tšhaba. Letšatši la go lahlega ga bona le be le fihlile, yona nako ya go otlwa ga bona. Baegepeta ba šutša boka noga e tšhaba, manaba a bona a tla ka bontši. A ba hlasela ka dilepe bjalo ka baremi ba dihlare. Nna, Morena, ke re ba tla rema sethokgwa sa bona le ge e le lesodi la go tsikana, gobane ba feta le tšie ka bontši, ga ba balege. Baegepeta ba a nyatšwa; ke ba gafela setšhaba sa ka leboa.” Morena Ramaatlaohle, Modimo wa Israele, o re: “Ke yo otla Amone, modimo wa Thebese, gammogo le kgoši ya Egepeta le medimo ya gona, le magoši a mangwe a gona, le ba ba mmotilego. Ke tla ba gafela diatleng tša bao ba nyakago go ba bolaya, e lego Nebukadnesare, kgoši ya Babilonia, le balaodi ba madira a gagwe. Eupša ka morago batho ba tla buša ba dula Egepeta gape, go no swana le pele. Ke realo, nna, Morena.” “Lena ditlogolo tša mohlanka wa ka, Jakobo, le se ke la boifa, lena setšhaba sa Israele, le se ke la tšhoga. Ke tla le hlakodiša gonamoo nageng ya kgole; bana ba lena ke tla ba phološa nageng yeo ba thopetšwego go yona. Le tla boa la dula le iketlile; le tla bolokega, mme la se tšhošwe ke motho. Nna, Morena, ke re lena ditlogolo tša mohlanka wa ka, Jakobo, le se boife, gobane ke na le lena. Ke tla fediša ditšhaba tšohle tše ke le šwalalanyeditšego go tšona, eupša lena nka se le fediše. Go le otla gona nka se go lese, fela e tla ba ka toka.” Pele ga ge kgoši ya Egepeta e hlasela Gasa, Morena o ile a bolela le Jeremia mabapi le Bafilista. A re: “Bona! Meetse a etla a tšwa ka leboa, a ela bjalo ka noka ye e tletšego. A tla khupetša naga le tšohle tše di lego go yona, metse le badudi ba yona. Batho ba tla llela thušo, le badudi ba naga yohle ba golola ge ba ekwa mešito ya dipere tša manaba, le tlhekgetlhekge ya dikoloi tša ntwa, le tsitsiritsiri ya maotwana a tšona. Botatagobana ga ba hlokomele bana ba bona; matsogo a bona a rephile, ka gobane nako e fihlile ya go fediša Bafilista le bohle ba ba sa kgonago go thuša ba Tirose le ba Sidone. Nna, Morena, ke tla fediša Bafilista le mašaledi a go tšwa sehlakahlakeng sa Kreta. Batho ba Gasa ba manyaming, ba bootše dihlogo. Ashkelone le gona go homotšwe. Lena ditlogolo tša Baanake, le tla ilela ka go ikgaya go fihlela neng? Wena tšhoša ya Morena, o tla khutša neng? Boela ka segatleng sa gago, o eme, o khutše! Eupša e ka khutša bjang ge e lailwe ke nna? Ke e laile gore e hlasele Ashkelone le batho ba ba dulago lebopong.” Morena Ramaatlaohle, Modimo wa Israele, o kwela Moaba bohloko o re: “Jonna, motse wa Nebo o ripitlilwe! Kiriataime e thopilwe, e leša dihlong; sebo sa yona se kgerešitšwe, le sona se leša dihlong. Botse bja Moaba bo ile. Kua Heshbone go lakanwe go fediša setšhaba sa Moaba. Motse wa Madimene o tla thubja; madira a tla o hlasela. Theeletšang, batho ba Horonaime ba a goa ba re: ‘Re a welwa! Re a fedišwa!’ “Naga ya Moaba e lobile; bana ba yona ba a lla. Ba rotoga mokonya wa Luhite, ba lla gabohloko. Sello sa masetlapelo se kwagala tseleng ye e theogelago Horonaime. Ba re: ‘Phakišang, tšhabang le itote! Kitimang bjalo ka pitsi lešokeng!’ “Moaba, ka ge o botile dibo tša gago le lehumo, le wena o tla thopša; modimo wa gago, Kemoshe, o tla išwa bothopša gotee le baprista le badiredi ba gagwe. Metse yohle e tla fedišwa, gwa se phonyokge le o tee; dimela tša moedi le tša molala di tla tšhungwa ka mollo, le batho ba gona ba bolawa ka tšhoša, bjalo ka ge nna, Morena, ke boletše. Hlomelang naga ya Moaba swika la lebitla, gobane e kgauswi le go senywa. Metse ya yona e tla šala e le matoko, gwa se sa dula motho go yona.” Go rogakwe yo a itšimeletšago go dira modiro wa Morena! Go rogakwe yo a sa kgebetlego manaba a gagwe ka tšhoša! “Setšhaba sa Moaba e sa le se phela se iketlile go tloga bjaneng, ga se sa ka sa thopša. Se swana le bjala bjo bo sa lego morokong bo sešogo bja hlotlwa bja tšhelwa ka dipitšeng. Ga se bja lahlegelwa ke mohlodi le monkgo wa bjona. “Bjale ge, nna, Morena, ke re nako e etla yeo ka yona ke tlago roma batho go yo tšholla Moaba bjalo ka bjala. Ba tla thenola dipitša tša gagwe, ba di pšhatlaganya. Ke moo Bamoaba ba tlago inyatša ka modimo wa bona, Kemoshe, go no swana le Baisraele mola ba inyatša ka Bethele, modimo wo ba bego ba o botile. “Le reng le re: ‘Rena re dioka, re banna ba bogale’? Nna, Kgoši yo leina la ka ke lego Morena Ramaatlaohle, ke re: Manaba a sentše naga ya Moaba, a hlasela le metse ya gona, mme masogana a yona a dinatla a tla bolawa. Naga ya Moaba e kgauswi le go lobišwa; masetlapelo a yona a e tlela ka lebelo. “Llelang setšhaba seo, lena baagišani bohle ba sona, lena bohle le tsebago setumo sa sona. Ereng: ‘Jo, pušo ya sona ye maatla e hwile! Setumo sa sona le maatla ga di sa le gona!’ Lena badudi ba Dibone, theogang madulong a lena a bohlomphegi, le pharame fase leroleng; mofediši wa Moaba o le hlasetše, o hlahlamolotše dibo tša lena. Lena badudi ba Aroere, emang kgauswi le tsela le lebeleledišiše; botšišang banna le basadi ba ba tšhabago gore na go hlagileng. Bona ba tla le fetola ba re: ‘Moaba e wele, e gobošitšwe; llang le golole! Hlehlang le nokana ya Arnone le bega gore Moaba e fedišitšwe!’ “Kotlo e tletše metse ya kua molaleng: Holone, Jahatse, Mefaate, Dibone, Nebo, Bethe-Diblathaime, Kiriathaime, Bethe-Gamuele, Bethe-Meone, Keriote le Botsra. Kotlo e wetše metse yohle ya naga ya Moaba, kgole le kgauswi. Maatla a Moaba a lobile; go tia ga gagwe go fedišitšwe. Ke realo, nna, Morena.” “Nošang batho ba Moaba bjala gore ba tagwe, ka gore ba ganne go bušwa ke nna. A ba pshikologe ka gare ga mahlatša a bona, mme le bona ba segwe ke batho. Lena Bamoaba, ga ke re le be le sega setšhaba sa Israele? Kgane ba kile ba swarwa le mahodu, mo le ka bago la ba šikinyetša dihlogo ge le bolela ka bona? “Lena badudi ba Moaba, tlogang metseng ya lena le yo dula magageng! Etšang leeba le le ikagelago sehlaga legageng. Re kwele ka boikgogomošo bja Bamoaba – gape ga se ka ge ba ikgantšha! Re kwele ka go kganya le go ipona ga bona, le makoko a bona, le boikgodišo bja bona. Nna, Morena, makokwana a bona ke a a tseba. Tše ba ikgantšhago ka tšona ke maaka, le tše ba di dirago ga di na mohola. Ka gona ke llela naga ya Moaba, ke llela batho bohle ba Moaba, ke llela batho ba Kire-Herese. Ke llela batho ba Sibma le go feta ba Jasere. Wena motse wa Sibma, o etša morara wo makala a wona a letlilego go tshela Lewatle le le Hwilego le go yo fihla Jasere. Eupša bjale dikenywa tša gago tša lehlabula le diterebe tša gago di lobile. Naga ya go nona ya Moaba e lahlegetšwe ke lethabo le tlhalalo. Ke thibetše beine go rotha e etšwa bopitlelong bja diterebe; ga go yo a pitlago diterebe ka maoto a hlaba mokgoši. “Batho ba Heshbone le ba Elale ba hlaba mokgoši, gomme mokgoši wa bona o kwagala le Jahatse; o kwewa ke batho ba Tsoare, mme o kwagala le Horonaime le Eglathe-Shelishia. Ešita le nokana ya Nimrime e pšhele. Ke tla thibela batho ba Moaba gore ba se sa dira dihlabelo tša go tšhungwa ka moka kua dintotomeng, le gore ba se sa direla medimo ya bona dihlabelo. Ke realo, nna, Morena. “Ka gona, ke llela naga ya Moaba le batho ba Kire-Herese go swana le motho ge a letša sefela sa poloko ka kwadi, ka gobane dithoto tše ba bego ba di hlakodišitše di ile. Ka moka ga bona ba bootše dihlogo, ba kotile le maledu. Bohle ba ikgaile diatleng, gomme yo mongwe le yo mongwe o apara tša go ilela. Ditlhakeng tšohle tša dintlo tša Moaba le mapatlelong go kwagala sello fela, ka gore ke pšhatlile Moaba boka pitša ye e sa nyakwego ke motho. Ke realo, nna, Morena. Batho ba Moaba ba nolegile moko bjang! Ba a golola! Ba katakata ka dihlong. Ditšhaba tšohle tše di bapilego nayo di a e kodutla gomme Moaba e a di tšhoša.” Morena o re: “Setšhabatsoko se tla tla sa phuthuma Moaba boka ntšhu, sephurolladiphego. Metse le dibo di tla thopša. Tšatšing leo bagale ba Moaba ba tla boifa go swana le mosadi ge a belega. Bamoaba ba tla fedišwa, ya se sa ba setšhaba, ka gobane ba ganne go bušwa ke nna. Poifo le melete le difu di le emetše, lena badudi ba Moaba. Ke realo, nna, Morena. Yo a tšhabelago tše di boifišago o tla gohlomela ka moleteng; yo a tšwago ka moleteng o tla tanywa ke sefu. Dilo tše ke tla di tlišetša Bamoaba ka ngwaga wa go otlwa ga bona. Ke realo, nna, Morena. Batšhabi ba ba lapilego ba khuta Heshbone, eupša Heshbone le mošate, ga Kgoši Sihone, di tšhungwa ka mollo. Mollo o tšhuma baikgantšhi ba Moaba. Jonna, lena setšhaba sa Moaba! Le ba madimabe, lena tšhaba sa modimo Kemoshe, gobane barwa le barwedi ba lena ba thopilwe. “Eupša ge nako e fihla Bamoaba ba ba lego bothopša ke tla ba kgoboketša. Ke realo, nna, Morena.” Ke ka moo Morena a rego Bamoaba ba tla otlwa ka gona. Mabapi le Baamone Morena o re: “Kgane Israele ga a sa na bana? Ga a na mojalefa? Bjale modimo Milkomo o reng a thopile naga ya kgoro ya Gade, mme batho ba wona ba dula metseng ya wona? Fela nna, Morena, ke re go tla tla nako ya gore ke hlabele batho ba motse wa Raba wa Baamone mokgoši wa ntwa, gomme wona e tla šala e le matoko, le metsana ya wona e tla šala e tšhumilwe ka mollo. Ya ba gona Baisraele ba amogago bale ba go ba thopela naga ya bona. Ke realo, nna, Morena. Lena batho ba Heshbone, gololang, gobane motse wa Ai o thubilwe! Lena basadi ba Raba, hlabang mokgoši! Aparang tša go ilela, le lle! Tlarumang mašakeng a dihuswane! Milkomo, modimo wa lena, o tla išwa bothopša gotee le baprista le badiredi ba wona. Le reng le ikgantšha ka meeding ya lena ya monono, bakgelogi tenang? Etse le botile mahumo a lena, mme le re: ‘Ke mang yo a ka re hulago ona?’ Nna, Mong wa bohle, Morena Ramaatlaohle, ke re ke tla dira gore baagišani bohle ba lena ba le tšhoše. Le tla šwalalanywa, mme mongwe le mongwe o tla tšhaba, a leka go iphološa, gomme batšhabi ba hloka mokgoboketši. “Eupša ka morago ke tla kgoboketša Baamone ba ba lego bothopša. Ke realo, nna, Morena.” Mabapi le Baedomo Morena o re: “Na ga go sa na ba bohlale moo Temane? Kgane dihlalefi tša bona ga di sa ba eletša? Na e ka ba bohlale bja bona bo nyameletše? Lena batho ba Dedane, retologang le tšhabe! Khutang mo go sa fihlwego! Ke ya go fediša ditlogolo tša Esau, ka gobane nako ya gore ke ba otle e fihlile. Ge bafudi ba diterebe ba ka tsena ka dirapeng tša lena, na ba ka se tlogele mabudutša? Mahodu ona ge a ka tla bošego, na a ka se utswe se a se ratago? Eupša nna ke hlakotše ditlogolo tša Esau, gomme ka fenyekolla le bokhuto bja bona gore ba se sa kgona go khuta. Setšhaba sa Edomo se fedišitšwe, bomorwarragobona le baagišani ba bona ba fedišitšwe – ga ba sa le gona. Šadišang ditšhiwana tša gabolena le nna, gomme ke tla di hlokomela. Bahlologadi ba gabolena a ba bote nna. “Ge ešita le bale ba bego ba se ba swanela go otlwa ba ile ba otlwa, na wena o gopola gore o tla phonyokga kotlo? Le gatee; o swanetše go otlwa! Nna, Morena, ke re ke ikanne gore motse wa Botsra o tla fetoga setšhoša, batho ba tla o kwera, e tla ba mašope, ba le kgatlela motswiri. Metse yohle ya kgauswi e tla fetoga matoko go ya go ile.” Ke ile ka re: “Ke amogetše molaetša wa go tšwa go Morena. O romile motseta gore a tle a botše ditšhaba gore di rape madira, di itokišetše ntwa, di hlasele Edomo. Edomo, Morena o tla go nyenyefatša gare ga ditšhaba tšohle, wa nyatšwa ke batho. Ga go motho yo a go tšhabago ka mo wena o gopolago ka gona. O forilwe ke boikgogomošo bja gago, wena o phelago magageng, o tsoramego ntlhohlong ya thaba. Le ge o agile malekelekeng boka ntšhu, Morena o tla go thenkgolla moo. O realo, Morena.” Morena o re: “Edomo e tla fetoga setšhoša. Mofeti wa tsela o tla gakgamala, a kgotsa masetlapelo ohle a yona. Se se ilego sa hlagela Sodoma le Gomora mola yona metse yeo gotee le ya kgauswi le yona e fedišwa, ke sona se se tlago hlagela Edomo mo e lego gore go ka se sa tsoga go phetše motho moo, go ka se sa tsoga go dutše motho. Ke realo, nna, Morena. Ke tla ragoga bjalo ka tau ye e tšwago ka sethokgweng sa Jordane e hlasela dihuswane mafulong a kgauswi le moela. Ke tla tla ka leleka Baedomo nageng ya bona. Ke gona moetapele yo ke mo kgethago a tlago buša setšhaba. Ke mang yo a swanago le nna? Ke mang yo a ka ntshekišago? Ke moetapele mang yo a ka lwago le nna? Ka gona, theeletšang maano ao ke a logetšego Baedomo le se ke ikemišeditšego go se dira badudi ba motse wa Temane: Le bana ba bona ba tla gogoišwa, gomme setšhaba sohle se tla tšhoga. Mohla Edomo e ewa, go tla kwagala modumo wa go rekemiša lefase, gomme mokgoši o tla kwagala le go fihla Lewatleng la Mahlaka. Setšhabatsoko se tla tla sa phuthuma Botsra bjalo ka ntšhu ye e phurulotšego diphego. Mohlang woo dioka tša Edomo di tla boifa bjalo ka mosadi ge a belega.” Mabapi le Damaskose Morena o re: “Badudi ba Hamate le ba Arpade ba gakanegile ka gobane ba kwele mašula. Ba tshwenyegile, ga ba na maduledi, ba etša lewatle le le sa tholego. Batho ba Damaskose ba nolegile moko mme ba itokišetša go hlanola direthe, ba gakanegile. Ba swerwe ke tlalelo le dihlabi bjalo ka mosadi ge a belega. Motse wola wa go tuma wo o bego o dula o thabile, o ngadilwe. Nna, Morena Ramaatlaohle, ke re: Mohlang woo masogana a wona a tla bolaelwa mabaleng a motse, bahlabani bohle le bona ba tla bolawa. Ke tla tšhuma morako wa Damaskose ka mollo, wa fiša le dibo tša Kgoši Benhadade.” Mabapi le kgoro ya Kedara le mebušo ya ba Hatsore ye e bego e fentšwe ke Nebukadnesare, kgoši ya Babilonia, Morena o re: “Eyang le hlaseleng Bakedara, le fediše ba kgoro yeo ya ka bohlabela! Ba thopeleng mešaša, le dihuswane, le digareteine tša mešaša, gotee le dithoto tšohle. Le gape dikamela tša bona, le ba goelele le re: ‘Le dikaneditšwe ke tše di šiišago!’ “Lena setšhaba sa Hatsore, nna, Morena, ke le botša gore le tšhabele kgole, mme le khute mo go sa fihlwego, gobane Nebukadnesare, kgoši ya Babilonia, o le logetše maanomabe. Yaang le hlasele setšhaba sela se sa iketlile, se sa lotegile. Motse wa bona ga o ne dikgoro le mapheko, le gona ba dula ba le noši. “Dikamela le bontši bja mehlape ya bona di tla thopša. Bomokotatlopo ke tla ba šwalalanyetša mathokong ohle, gomme ka ba tlišetša masetlapelo a go tšwa gohle. Hatsore e tla fetošwa segola sa diphukubje, lešoka la go ya go ile. Go ka se sa tsoga go phetše motho moo, go ka se sa tsoga go dutše motho.” Ge Tsedekia a seno bewa kgoši ya Juda, Morena a bolela le Jeremia ka naga ya Elamo. Yena Morena Ramaatlaohle a re: “Ke tla bolaya boramesebe ka moka ba ba dirilego gore Elamo e be ye maatla ka mokgwa wo. Ke tla tšutliša madimo Elamo a etšwa ka mathoko ohle, gomme ke tla šwalalanyetša batho ba gona mafelong ohle, go fihlela go se na setšhaba seo bafaladi ba sona ba sego ba ya go sona. Ke tla dira gore batho ba Elamo ba tšhabe manaba a bona ao a ratago go ba bolaya. Nna, Morena, ke re ke tla tlišetša batho ba Elamo masetlapelo ke galefile, ka ba romela madira a ba bolaya ka tšhoša go fihlela ke ba feleletša. Nna, Morena, ke re ke tla bolaya kgoši ya bona le baetapele, gomme ka hloma setulo sa ka sa bogoši Elamo. Eupša ge nako e fihla Baelamo ba ba lego bothopša ke tla ba kgoboketša. Ke realo, nna, Morena.” Mabapi le motse wa Babilone le naga ya Babilonia Morena o boletše ka molomo wa moprofeta Jeremia a re: “Tsebišang ditšhaba, di begeleng! Hlomang sefoka le begeng ditaba! Le se ke la di fihla, le re: ‘Babilone e a thopša! Modimo wa yona, Bele, o a nyatšwa! Modimo wa yona, Merodake, o nolega moko! Medimo ya diswantšho ya Babilone e a gobošwa! Dipheko tša gona di a pšhatlaganywa!’ “Setšhaba sa go tšwa ka leboa se tletše go tlo hlasela naga ya Babilonia, gomme se tlo e fetoša lešoka. Batho ba tla tšhaba gotee le diphoofolo, gomme ga go yo a tlago dula moo.” Morena o re: “Mohla nako yeo e fihla batho ba Israele le ba Juda ba tla tla ba lla, ba nnyaka, nna, Morena Modimo wa bona. Ba tla botšiša tsela ya go ya Sione, ba napa ba leba gona. Ba tla itlemaganya le nna go ya go ile ka setlemo se se ka se kego sa kgaoga. “Setšhaba sa ka se be se le bjalo ka dinku tše badiša ba tšona ba di timeditšego kua dithabeng. Ba gerema le dithaba le meboto bjalo ka dinku tše di gakilwego ke lešaka. Ba be ba hlaselwa ke bohle ba ba ba hwetšago. Manaba a bona a re: ‘Se re se dirilego ga se phošo, ka gobane bona ba fošeditše Morena, yena toka ya ka mehla, yo borakgolokhukhu ba bona ba bego ba mmotile.’ “Tšhabang le tloge Babilonia! Etšwang ka nageng ya Bababilonia, le be bjalo ka diphooko tše di etilego mohlape pele! Ke ya go hlohleletša ditšhaba tše maatla tše di itirilego seboka tša hlasela Babilonia di etšwa nageng ya ka leboa. Di tla ema ka lethete go hlasela naga yeo mme tša e fenya. Ke bagale ba bokgoni, ba go thunya mesebe ka go nepa. Babilonia e tla thopelwa, gomme bohle ba ba e thopelago ba tla tšea tšohle tše ba di nyakago. Ke realo, nna, Morena.” “Lena bahudi ba tšhaba sa ka, le thabile, le a ipshina, le kgana bjalo ka sethole bjanyeng, le letša dinko bjalo ka pere, eupša mmagolena Babilone o tla kokobetšwa, a gobošwa. Bababilonia e tla ba setšhaba se se nyatšegago gare ga tšona ka moka; Babilonia e tla fetoga lešoka le le omilego mme le se nago meetse. Ka baka la go galefa ga ka ga go motho yo a tlago dula Babilone; e tla ba mašopešope; mofetagona o tla gakgamala, a kgotsa masetlapelo ohle a yona. “Lena boramesebe bohle, emang ka lethete go dikologa Babilone. Thuntšhang motse wa Babilone ka mesebe yohle ya lena, ka gobane wona o mphošeditše, nna, Morena. O hlabeleng mokgoši ka mathoko ohle! Bjale Babilone e ineetše. Dibo tša yona di pšhatlagantšwe; merako ya yona e kgerešitšwe. Ke itefeletša ka Bababilonia. Ka gona le lena itefeletšeng ka bona, le ba sware ka moo le bona ba ilego ba swara ba bangwe ka gona. Le bolayeng mobjadi yo mongwe le yo mongwe nageng ya Babilonia, le mmunakasekele nakong ya puno. Mofaladi yo mongwe le yo mongwe o tla boela go ba gabo; motho yo mongwe le yo mongwe o tla tšhabela nageng ya gabo go phonyokga tšhoša ya manaba.” “Setšhaba sa Israele se bjalo ka dinku tše di lelekišitšwego mme tša šwalalanywa ke ditau. Pele ba ile ba hlaselwa ke kgoši ya Asiria, ba tla ba hlaselwa ke Nebukadnesare, kgoši ya Babilonia. Ka baka la taba yeo nna, Morena Ramaatlaohle, Modimo wa Israele, ke tla otla kgoši ya Babilonia le naga ya gagwe ka mokgwa wo ke otlilego kgoši ya Asiria ka wona. Ke tla bušetša setšhaba sa Israele nageng ya sona bjalo ka dinku ge di bušetšwa mafulong a tšona. Ba tla ja tše di bjalwago thabeng ya Karmele le seleteng sa Bashane, ba tla ja ba khora le tše di bjalwago nageng ya dithaba ya Efraime le ya Gileade. Mohla nako yeo e fihla Baisraele ba ka se hwetšwe ba na le molato, le Bajuda ba ka se hwetšwe ba dirile sebe, ka gobane ke tla lebalela bao ke sego ka ba lesa ba bolawa. Ke realo, nna, Morena.” Morena o re: “Hlaselang batho ba naga ya Merataime le badudi ba Pekode. Ba gagareng molokwanarite. Le phetheng tšohle tše ke le laelago tšona. Ke realo, nna, Morena. Legoa la ntwa le a kwagala mo nageng, gomme naga yohle e a senywa. Babilonia, noto ya lefase lohle, ga se ka ge e robegile! Ditšhaba di tšhošitšwe ke se se hlagetšego naga yeo. Wena, Babilonia, etse o be o nthumola, ka gona o tantšwe ke sefu se ke go theilego ka sona, le ge moka o be o sa tsebe. Ke butše bobolokelo bja ditlhabano tša ka, ka ntšha dibetša tša ge ke galefile, ka gobane nna, Mong wa bohle, Morena Ramaatlaohle, ke na le mošomo wo ke swanetšego go o phetha kua Babilonia. E hlaseleng le etšwa ka mathoko ohle, mme le bule matlolo a yona! Le kgobeleng tše le e hutšego tšona di swane le mekgobo ya mabele! Le senyeng naga! Le se tlogeleng selo! Le bolayeng bahlabani ba gona ka moka! A ba bolawe! Batho ba Babilonia ke ba madimabe gobane tšatši la bona le fihlile, yona nako ya gore ba otlwe.” “Ekwang ka mo batšhabi le bafaladi ba go tšwa nageng ya Babilonia ba begago motseng wa Jerusalema gore Morena Modimo wa rena o lefeletša tše Bababilonia ba di dirilego Tempele ya gagwe. “Rapang boramesebe, bohle ba ba kgonago go šomiša bora le mosebe, gore ba hlasele motse wa Babilone. Dikanetšang motse mme go se phonyokge motho. Le o lefeletše tše o di dirilego, gomme le o sware ka mo o ilego wa swara batho ka gona, ka gobane o be o nkganyetša, nna, Mokgethwa wa Israele. Ka gona, mohlang woo masogana a wona a tla bolawa mabaleng a motse, le bahlabani bohle le bona ba tla fedišwa. Ke realo, nna, Morena. “Nna, Mong wa bohle, Morena Ramaatlaohle, ke lwa nago, mmamakokwana towe! Letšatši la gago le fihlile, yona nako ya gore o otlwe. Mmamakokwana towe, o tla thetšwa wa gatlagana fase, gomme ga go yo a tlago go tsoša. Ke tla tšhuma metse ya gago, gomme tšohle tše di go dikaneditšego di tla fedišwa.” Morena Ramaatlaohle o re: “Setšhaba sa Israele se gateletšwe, ešita le sona sa Juda. Bathopi ba bona ba ba dišitše kudu, gomme ba ba ganetša go tloga. Eupša Mohlakodiši wa bona ke yo maatla, leina la gagwe ke Morena Ramaatlaohle. Yena ka boyena o tla ba lwela gore ba dule nageng ya bona ka khutšo, badudi ba Babilonia bona khutšo ba e hloke.” Morena o re: “Tšhoša a e šupe Babilonia, e šupe badudi ba Babilonia, e šupe babuši ba yona le bahlale ba bona. Tšhoša a e šupe didupe tša yona, gore di se sa dupelela. Tšhoša a e šupe dioka tša yona, di tšhoge. Tšhoša a e šupe dipere le dikoloi tša yona, le bahlabani ba yona ba ba thwetšwego, ba hloke maatla ba etše basadi. A molaodi a šupe matlotlo a yona ka tšhoša gore a thopše. Komelelo a e wele naga ya gona gore dinoka tša yona di pšhe, ka gobane Babilonia ke naga ya medimo ya diswantšho, gomme medimo yeo ya go šiiša e hlakantšha Bababilonia hlogo. “Ke ka baka leo felo moo go tlago phela diphaga le diphukubje, le dimpšhe di tla dula gona. Batho ba ka se sa tsoga ba dutše gona, go tla dula go se na badudi go ya go ile. Nna, Modimo, motse wa Babilone ke tla o fediša ka mokgwa wo nkilego ka fediša Sodoma le Gomora le metse ya kgauswi le yona, e lego gore go ka se sa tsoga go phetše motho moo. Go ka se sa tsoga go dutše motho. Ke realo, nna, Morena. “Tšhaba se se tšwago ka leboa se etla; morafe wo maatla kua kgolekgole le magoši a mantši ba itokišetša ntwa. Ba itlhamile ka mesebe le marumo; ke ba sehlogo, ga ba na lešoko. Ba kwagala bjalo ka lewatle le le bopago ge ba nametše dipere tša bona. Ba itokišeditše go lwa le lena, Bababilonia. Kgoši ya Babilonia e kwele taba tšeo, gomme e rephile matsogo, e aparetšwe ke tlalelo, e šokwa wa mosadi ge a belega. “Nna, Morena, ke tla ragoga bjalo ka tau ye e tšwago ka sethokgweng sa Jordane e hlasela dihuswane mafulong a kgauswi le moela, ka lelekiša Bababilonia nageng ya bona. Ke mo moetapele yo ke mo kgethago a tlago buša setšhaba. Ke mang yo a swanago le nna? Ke mang yo a ka ntshekišago? Ke moetapele mang yo a ka lwago le nna? Ka gona, theeletšang maano ao ke a logetšego motse wa Babilone, le se ke ikemišeditšego go se dira naga ya Bababilonia: Le bana ba bona ba tla gogoišwa, gomme setšhaba sohle se tla tšhoga. Mohla Babilonia e thopša go tla kwagala modumo wa rekemiša lefase, gomme mokgoši o tla kwewa ke ditšhaba.” Morena o re: “Ke tla tsošetša naga ya Babilonia le badudi ba Lebe-Kamai ledimo le lešoro. Ke tla roma bafeferi Babilonia ba yo e fefera. Mohla tšatši leo la masetlapelo le fihla ba tla e hlasela ba etšwa ka mathoko ohle, ba e tlogela e le fela. Le se ke la fa boramesebe ba gona sebaka sa go thuntšha ka mesebe goba go apara tša ntwa. Masogana a gona le se ke la a šokela. Le fediše madira ohle! Nageng ya Babilonia go tla rapalala ba ba bolawago le ba ba gobaditšwego mekgotheng ya gona. Nna, Modimo wa bona, Morena Ramaatlaohle, ga se ka tlogela Baisraele le Bajuda, le ge bohle ba be ba na le molato pele ga ka, nna, Mokgethwa wa Israele. Tšhabang le tloge Babilonia, le phološe hlogo tša lena! Le se bolaelwe dibe tša Bababilonia. Bjale ke nako ya gore ke itefeletše, ke e otle ka mo go e swanetšego. Babilonia e be e swana le senwelo sa gauta se ke se swerego ka seatla, mme beine ya sona e taga lefase ka moka. Ditšhaba di nwele beine yeo mme tša gafa. Babilonia e lobile ka bjako, e gobetše! E lleleng! E nyakeleng dihlare tša go e alafa dintho, mohlomongwe e ka fola. Bafaladi ba ba dulago gona ba ile ba re: ‘Re lekile go alafa Babilonia, fela e be e sa alafege. A re e tlogeleng, mongwe le mongwe a ye ga gabo, gobane Modimo o otlile naga ya Babilonia kudu ka kotlo ye bohloko.’ ” Morena o re Baisraele ba re: “Morena o bontšhitše gore ga re na molato. A re yeng go botša batho kua Jerusalema tše Morena a di dirilego.” “Lootšang mesebe ya lena! E tlatšeng dikgotlopo tša lena!” Morena o hlohleleditše magoši a Media, ka gobane o ikemišeditše go fediša Babilonia. Ke ka mo a tlago lefeletša Tempele ya gagwe ka gona. “Bontšhang sefoka sa ge le hlasela merako ya Babilone. Beang baleti! Oketšang bahlapetši! Beang banna ba go lalela!” Morena o phethile tše a bego a rile o tla di dira badudi ba Babilonia. Lena baagi ba meetseng a mantši, le humilego ka matlotlo, mafelelo a lena a fihlile, le kgauswi le go bolawa. Morena Ramaatlaohle o ikanne gore o tla tliša banna ba bantši go tlo hlasela Babilone bjalo ka tšie, gomme ba tla tšhela legoa la phenyo. Morena o hlodile lefase ka maatla a gagwe, ka bohlale bja gagwe a le thekga, ka tlhaologanyo ya gagwe a phurolla magodimo. Ge a popoduma, meetse a ka godimo ga lefaufau a a bopa; o rotoša mouwane mafelong a kgolekgole a lefase. O gadimiša legadima puleng, a bulela phefo mo a e bolokago gona. Batho ge ba di bona ba tlaela ba sa di kwešiše; morulagauta yo mongwe le yo mongwe o inyatša ka medimo ya gagwe ya diswantšho, ka ge diswanšhobopša tšeo tša gagwe e le tša bofora, di sa phele. Ga di na mohola, ke diswantšhobopša tša go segiša. Mohla Morena a etla go di otla, di tla fedišwa. Morena, yena e lego kabelo ya Jakobo, ga a swane le medimo yeo ya diswantšho, gobane ke yena Mmopatšohle, gomme Baisraele ke sona setšhaba sa gagwe. Leina la gagwe ke Morena Ramaatlaohle. Morena o re: “Babilonia, ke wena thoka ya ka, o sehlabano sa ka sa ntwa. Ka wena ke pšhatlile ditšhaba, ka wena ke fedišitše mebušo, ka wena ke pšhatlile pere le monamedi, ka wena ke pšhatlile koloi ya ntwa le mootledi, ka wena ke pšhatlile monna le mosadi, ka wena ke pšhatlile mokgalabje le mošemane, ka wena ke pšhatlile lesogana le lekgarebe, ka wena ke pšhatlile modiša le mohlape, ka wena ke pšhatlile molemi le dipholo, ka wena ke pšhatlile mmuši le mmušiši.” Morena o re: “Le tla bona ke itefeletša ka Babilonia le badudi ba gona ka baka la tšohle tše mpe tše ba di dirilego Jerusalema. Babilonia, wena thaba, sepšhatlaganyafaselohle, ke lwa nago. Ke tla go swara, ka go kgokološa magageng, ka go fetoša thaba ye e swelego. Go ka se tšewe leswika la sekhutlo goba la motheo mo go wena. O tla swana le lešoka go ya go ile. Ke realo, nna, Morena. “Emišang sefoka nageng sa go hlasela! Galagatšang phalafala ditšhabeng! Beakanyetšang ditšhaba go yo lwa le Babilonia! Botšang mmušo wa Ararate le wa Mini le wa Ashkenase gore e hlasele. Tlišang dipere di etše tšie ka bontši. Beakanyetšang ditšhaba go yo lwa le Babilonia, gotee le magoši a Media, le babuši le babušiši ba gona, le dinaga tšohle tše ba di laolago. Lefase le a rekema ebile le a šikinyega, ka ge Morena a phetha leano la gagwe la go dira Babilonia lešoka, moo go sa dulego motho. Bagale ba Babilonia ba lesitše go lwa mme ba dutše ka dibong tša bona. Ba nolegile moko, mme ba hloka maatla bjalo ka basadi. Dintlo di tšhumilwe, mapheko a dikgoro tša motse a kgakgamolotšwe. Baromiwa ba rongwa ba sa tšo rongwa, le batseta ba kitima ba šalane morago, ba eya go begela kgoši ya Babilonia gore motse wa yona o šwahletšwe ka mathoko ohle, le gore manaba a thibile matšibogo a noka, a bile a tšhuma dibo, le gore bahlabani ba Babilonia ba gakanegile. Motse wa Babilone o tla katakelwa bjalo ka seboa pele go bunwa. Taba ye e tla direga kgauswinyana. “Ke realo, nna, Morena Ramaatlaohle, Modimo wa Israele.” Badudi ba Jerusalema ba re: “Nebukadnesare, kgoši ya Babilonia, o re thopile, a re kwametša. O tlogetše motse o le fela boka motho ge a kgothola tša ka sebjaneng, a o metša bjalo ka kgolomodumo. O kwameditše tša rena tše a di ratago, rena a re tshwa.” Batho ba Sione a ba re: “A dikgobadi tše Babilonia e re ntšhitšego tšona di e boele!” Batho ba Jerusalema a ba re: “A polao ya batho ba gaborena e boele badudi ba Babilonia!” Ka gona Morena a re go batho ba Jerusalema: “Ke tla le rerelela, ka le lefeletša. Ke tla pšheša noka ya Babilonia, ka gopiša methopo ya gona. Motse wa Babilone o tla fetoga mokgobo wa matoko le segola sa diphukubje. O tla fetoga setšhoša, wa gakgamatša batho; ga go motho yo a tlago dula gona. Bababilonia ba rora bjalo ka ditau, ba bopa boka ditawana. E tla re ba sa kukegile bjalo, ka ba direla monyanya, ba tagwa, ba potuma, ba robalela ruri, ba se sa tsoga. Ke realo, nna, Morena. Ke tla ba iša go bolawa, ba etša dikwanyana le dikgapa le dipudi.” Morena o re: “Joo, wa tla wa thubja motse wa Sheshake, moretwa wa lefase lohle! Ditšhaba di tšhošitšwe ke se se hlagetšego motse woo. Babilone e phuthumilwe ke lewatle, la e khupetša ka maphoto a lona a a bopago. Metse e fetogile setšhoša gomme e etša naga ya komelelo, ya leganata, moo go sa dulego gape go sa sepelego motho. Ke tla otla Bele, modimo wa Babilonia, gomme ka o hlatšiša tše o di kwameditšego. Ditšhaba di ka se sa o loba. “Morako wa Babilone o kgeregile. Lena setšhaba sa ka, tšhabang le tloge mo, le phološe hlogo tša lena pefelong ya ka ye šoro! Le se ke la nolega moko goba la boifišwa ke mabarebare ao le a kwago mo nageng. Ngwaga ka ngwaga go kwagala mabarebare a mohuta wo mongwe – mabarebare a dikgaruru mo nageng, kgoši e elwa le ye nngwe. Ka gona go tla tla nako yeo ka yona ke tlago otla medimo ya Babilonia ya diswantšho. Naga yohle e tla gobošwa, gomme badudi ba yona ka moka ba tla bolawa. Legodimo le lefase le tšohle tše di lego go ona di tla goa ka lethabo ge Babilonia e fenywa ke batho ba go tlo e fediša ba etšwa ka leboa. Ke realo, nna, Morena. Babilonia ke yona e hloletšego batho lehu lefaseng ka moka, gomme bjale Babilonia e tla fenywa ka gobane e hloletše Baisraele ba bantši lehu.” Morena o re: “Lena le phonyokgilego tšhoša, sepelang! Le se diege! Le ge le le nageng ya kgole bjalo, le nkgopole, nna, Morena, le gopole le Jerusalema.” Batho ba re: “Re na le dihlong ka gobane re rogilwe; re gobošitšwe ka ge bafaladi ba tsene ka mafelong a makgethwa a ka Tempeleng.” Morena o re: “Ka gona nna ke re go tla tla nako yeo ka yona ke tlago otla medimo ya Babilone ya diswantšho, gomme dikgobadi di tla tsetla mo gohle nageng. Le ge Babilone e ka namelela godimo leratadimeng, ya ikagela sebo se se tiilego, ke tla no roma batho gore ba yo se senya. Ke realo, nna, Morena.” Theeletšang sello kua Babilone, sello sa go llela ge naga e hlakotšwe. Morena o thuba motse wa Babilone, a homotša lešata leo le legolo. Madira a o kgeregela bjalo ka maphoto a a bopago, a hlaba mokgoši wa ntwa. A tlile go fediša Babilone; bagale ba gona ba thopilwe, mme mara a bona a robegile, gobane Morena ke Modimo wa boitefeletšo, ga a ke a palelwa ke go itefeletša. Kgoši, yo leina la gagwe e lego Morena Ramaatlaohle, o re: “Ke tla noša babuši ba motse wo bjala ba tagwa – bona banna ba bohlale le babušiši le bahlankedi le bagale. Ba tla re go robala ba se sa tsoga. Nna, Morena Ramaatlaohle, ke re: Merako ya Babilone, motsekgoparara, e tla kgerešwa, le mapheko a yona a matelele a tla tšhungwa ka mollo. Ditšhaba di katanela lefeela; maitapišo a merafe a felela mollong.” Mookamedi wa tša mošate e be e le Seraya, morwa wa Neria, setlogolo sa Magasea. E rile ka ngwaga wa bone wa ge Tsedekia e le kgoši ya Juda, Seraya a ya Babilonia le yena, gomme Jeremia a mo laeletša. A ngwala ka pukung e tee masetlapelo ohle a a bego a tlilo wela Babilonia, ke go re tšohle tše di ngwadilwego mabapi le Babilonia. Ke moka Jeremia a re go Seraya: “Ge o fihla Babilone o hlokomele gore o balele setšhaba tšohle tše di ngwadilwego mo. O rapele o re: ‘Morena, ke wena o rilego o tla fediša motse wo, gore go se sa ba le se se phelago mo, motho goba phoofolo, gomme go tla fetoga lešoka go ya go ile.’ “Seraya, ge o fetša go bala puku ye o e kgokaganye le leswika, o e fošetše ka nokeng ya Yufratese, gomme o re: ‘Ke ka mokgwa wo motse wa Babilone o tlago sobelela ka gona, mme wa se sa tšwa ka baka la masetlapelo ao o tla bego o a tlišeditšwe ke Morena.’ ” Tše di boletšwego ke Jeremia di felela mo. Tsedekia o be a na le mengwaga ye masome a mabedi a motšo o tee ge e eba kgoši ya Juda, gomme a buša a le Jerusalema mengwaga ye lesome le motšo o tee. Mmagwe e be e le Hamutale, morwedi wa Jeremia yola wa motse wa Libna. Kgoši Tsedekia o be a dira dibe pele ga Morena, go no swana le Kgoši Joyakime. Morena a galefela batho ba Jerusalema le ba Juda moo e lego gore o ile a ba raka pele ga gagwe. Tsedekia a tsogela Kgoši Nebukadnesare wa Babilonia maatla, ka gona Nebukadnesare a tla ka madira a gagwe ka moka gomme a hlasela Jerusalema ka letšatši la lesome la kgwedi ya lesome la ngwaga wa senyane wa pušo ya Tsedekia. Ba hloma mešaša ka ntle ga motse, gomme ba kgobela ntotoma ya mobu go o dikologa, mme ba o dikanetša go fihlela ka ngwaga wa lesome le motšo o tee wa pušo ya Tsedekia. Ka letšatši la senyane la kgwedi ya bone ya wona ngwaga woo, ge tlala e befile moo e lego gore go be go se na sa go ja, morako wa motse o ile wa kgerešwa. Le ge Bababilonia ba be ba dikaneditše motse, bahlabani ka moka ba ile ba tšhaba bošego. Ba tšea ka tsela ye e putlago serapa sa mošate, ba tšwa ka lesoro le le kgomaganyago maboto a mabedi a serapa seo, gomme ba tšhabela thoko ya moedi wa Jordane. Eupša madira a Bababilonia a rakediša Kgoši Tsedekia, a mo swara melaleng ya kgauswi le Jeriko, gomme bahlabani ba gagwe ka moka ba šwalalana, ba mo tlogela. Tsedekia a išwa go Kgoši Nebukadnesare yo a bego a le motseng wa Ribla, nageng ya Hamate, gomme Nebukadnesare a mo ahlola moo. A bolaya barwa ba Tsedekia fao Ribla Tsedekia a lebeletše, gomme a laela gore le bakgomana ba Juda ba bolawe. Ka morago ga moo a laela le gore Tsedekia a gonywe mahlo, a tlengwe ka diketane, mme a mo iša Babilone. A mo lahlela kgolegong, mme Tsedekia a dula fao go fihlela a ehwa. Ka letšatši la lesome la kgwedi ya bohlano ya ngwaga wa lesome le metšo ye senyane wa pušo ya Kgoši Nebukadnesare wa Babilonia, Nebusaradane, mohlankedi wa gagwe yo e bego e le molaodi wa baleti ba kgoši, a tsena Jerusalema. A tšhuma Tempele le mošate le nywako le meago ka moka ye megolo Jerusalema, gomme bahlabani ba gagwe ba kgereša morako wa motse. Ke moka Nebusaradane a thotha batho ba ba bego ba šetše motseng, a ba iša Babilonia, le banna ba go tseba mediro ba ba bego ba sa šetše, le ba ba bego ba šetše ba ineetše go Bababilonia. Eupša a šadiša badiidi ba bangwenyana nageng ya Juda gore ba šome mašemong le ka dirapeng tša merara. Bababilonia ba pšhatlaganya dikokwane tša mphiri le dikoloyana tša ka Tempeleng, gotee le legopo le legolo la mphiri, gomme ba iša mphiri wa gona ka moka Babilone. Ba thotha le dibjana tša go olelela melora, digarafo, ditimamabone, meruswi le ditlabakelo ka moka tša mphiri tše di bego di šomišwa tirelong ya Tempeleng. Ba thotha dilo ka moka tše di bego di dirilwe ka gauta le silibera: meruswana, dibjana tša magala, meruswi ya go foka madi, dibjana tša go olelela melora, dihlomamabone, dipane tša go tšhumela diorelo, le dibjana tša dihlabelo. Mphiri wa dikokwane ka dipedi le wa dikoloyana le wa legopo le legolo, le wa dipoo tšela tše lesome le metšo ye mebedi tše di bego di le thekgile, e lego dilo tše Kgoši Solomone a bego a di diretše Tempele, e be e le wo boima kudu go ka o ela. Dikokwane tšeo tše pedi di be di swana: ye nngwe le ye nngwe e le ya dimetara tše 8,3 go ya godimo le tše 5,5 bokoto. E be e le mahoa gomme bokoto bja mphiri wa tšona e le bja dimilimetara tše 75. Godimo ga kokwane ye nngwe le ye nngwe go be go na le hlogwana ya mphiri ya bogodimo bja dimetara tše 2,3, gomme e kgabišitšwe ka diswantšho tša digarenate go e dikologa. Digarenate tšeo le tšona di be di bopilwe ka mphiri. Hlogwana ye nngwe le ye nngwe e be e kgabišitšwe ka digarenate tše lekgolo, gomme tše masome a senyane le metšo ye e selelago di bonagala. Nebusaradane, molaodi wa baleti ba kgoši, a thopa Seraya, Moprista yo Mogolo, Sofonia, moprista yo a mo latelago ka maemo, le baprista ba bararo ba ba bego ba leta mejako ya Tempele. Motseng a tšea molaodi wa madira, le baeletši ba ba šupago ba kgoši bao ba bego ba sa le motseng, le mongwaledi wa molaodi yo mogolo yo a bego a hlokometše go rapa dira, le banna ba bangwe ba maemo ba masome a a selelago. Nebusaradane a ba iša go kgoši ya Babilonia yo a bego a le motseng wa Ribla, nageng ya Hamate. Moo kgoši a laela gore ba itiwe ba bolawe. Ke ka moo batho ba Juda ba thothilwego nageng ya bona ba išwa bothopša. Batho bao Nebukadnesare a ba išitšego bothopša šeba: Ka ngwaga wa bošupa wa pušo ya gagwe o ile a thopa batho ba 3 023; ka ngwaga wa lesome le metšo ye seswai a thopa ba 832 Jerusalema, gomme ka ngwaga wa masome a mabedi le metšo ye meraro a thopa ba 745 – a ba thopelwa ke Nebusaradane. Batho ka moka bao ba ilego ba thopša e bile 4 600. Ka ngwaga wo Ebile-Merodaka e bilego kgoši ya Babilonia ka wona o ile a ntšha Kgoši Joyakine wa Juda kgolegong. Seo se diregile ka letšatši la masome a mabedi le metšo ye mehlano la kgwedi ya lesome le metšo e mebedi ya ngwaga wa masome a mararo a metšo ye e šupago ka morago ga ge Joyakine a thopilwe. Ebile-Merodaka a mo swara gabotse, gomme a mmea maemong a a hlomphegago go feta a dikgoši tše dingwe tše e bego e le mathopša le yena Babilonia. A ba a mo apola diaparo tša gagwe tša kgolego gomme a ja dijo le kgoši bophelo bja gagwe ka moka. Ka mehla o be a fiwa tše di nyakegago tša letšatši ka letšatši. Joo, Jerusalema o bodutung bjo bokaakang, motse wola o kilego wa tlala batho! O swana le mohlologadi, motse wola o kilego wa hlompšha ke ditšhaba; wo e kilego ya ba mohumagadi wa dinaga, bjale o dira mediro ya kgapeletšo. O lala a lla gabohloko bošego, dithama tša gagwe di ela megokgo. O hloka mohomotši go ba ba bego ba mo rata. Bathuši ba gagwe bohle ba mo lahleditše, ba mo fetogetše manaba. Juda e tlogetšwe ke batho ka go tlaišega le ka go thopša, ya ba makgoba. Ba phela ditšhabeng tše dingwe, ga go mo ba ka agago gona. Bahlomari ba bona ka moka ba ba swere, ba ba dikanetša. Tsela tša Sione di a lla, gobane ga go yo a tšeago ka tšona go ya menyanyeng ye mekgethwa. Dikgorong tša motse ga go motho, baprista ba a tsetla; banenyana ba ba bego ba opela menyanyeng ba nyamile – motse o mathateng. Batlaiši ba wona ba o fentše, manaba a wona a iketlile. Morena o o kwešitše bohloko ka baka la dibe tša wona tše dintši; bana ba wona ba thopilwe ke manaba. Botse bja Jerusalema bo fedile. Baetapele ba wona ba bjalo ka dikgama tše di swerwego ke tlala, di lapišitšwe ke go tšhaba batsomi. Jerusalema ye bjale e tlaišegilego mme e tlogetšwego ke batho, e ikgopotša dilo tša yona tše bohlokwa tša kgale, mola batho ba yona ba wetše diatleng tša manaba, mme go se yo a ba thušago. Batlaiši ba yona ba ile ba e bogela, ba e sega ge e thubega. Jerusalema e itirile makgapha ka dibe tše di šiišago, ka moka ba ba bego ba e hlompha bjale ba a e nyatša, ka gobane ba bone gore ga e sa šireletšegile. E a bobola, e inamišitše sefahlego ka dihlong. Go se hlweke ga yona go be go le pepeneneng, fela ya se tshwenyege gore e tla feletša kae. Go wa ga yona e bile mo go tlabago gwa se be le wa go e homotša. E a lla e re: “Morena, bona mahlomola a ka, gobane manaba a ka a a ikgogomoša.” Manaba a yona a e hlakotše dilo tša yona tše bohlokwa. E a bone a tsena ka Tempeleng, moo Morena a bego a ganetša baditšhaba go kopana le setšhaba sa gagwe gona. Batho ba yona bohle ba a bobola ge ba tsoma tša go ja. Ba reka dijo ka dilo tša bona tše bohlokwa gore ba se ke ba hwa. Motse o a goa o re: “Ntebelele Morena, o bone go nyatšega ga ka.” O goelela bafeti ba tsela ka moka o re: “Ntebeleleng, kgane taba ye ga e le ame? Ga se gwa ka gwa ba le yo a kwago bohloko go etša nna, bohloko bjo Morena a ntlišeditšego bjona a galefile. “O nthometše mollo wa go tšwa godimo, mollo wa go ntšhuma ka teng. O ntheile ka molaba gomme a ntanya. A nkwiša ka sa morago, a ntlogela ke le bohlokong. “O kgomagantše dibe tša ka a di dira joko, a nthweša yona molaleng mme ka fokodišwa ke boima bja yona. Morena o nkgafetše manabeng ao ke šitilwego ke go lwa le ona. “Bagale ba ka bohle Morena o ba nyaditše, o kgobokantše manaba a ka go fediša masogana a ka. O pšhatlagantše batho ba ka bjalo ka diterebe ge di pitlwa ka maoto bopitlelong. “Ke ka baka leo mahlo a ka a edišago meokgo. Ga go yo a ka nkhomotšago, a ka mphago maatla. Batho ba ka ba gakanegile gobane manaba a mphentše. “Ke obeleditše matsogo, eupša ka hloka yo ke itshwarelelago ka yena. Morena o mpileditše manaba ka mathoko ohle; ba ntshwara boka makgapha. “Eupša Morena o lokile, gobane ke nna ke mo nyaditšego. Hle, ntheeletšeng, lena ditšhaba tšohle, bonang manyami a ka! Masogana le makgarebe a ka a thopilwe. “Ke biditše bathuši ba ka, eupša bona ba ntahla. Baprista le bagolo ba setšhaba ba feletše mekgotheng ya motse ba nyaka dijo gore ba fele ba phela. “Joo, Morena, bona ka mo ke nyamilego ka gona; ke huduegile moyeng! Pelo ya ka e rotha madi ka gore ke ile ka tsogela Morena maatla. Mekgotheng batho ba bolawa ka ditšhoša, ka magae ke leuba la bolwetši. “Manaba a ka a nkwele ge ke tsetla ke re: ‘Ga go yo a nkhomotšago.’ Ka moka ga bona ba kwele tša masetlapelo a ka, ba thabela ge o ntlišeditše ona. A letšatši lela o le beilego le tle gore ba tle ba tlaišege go swana le nna. “Ba lahle ka baka la makgopo ohle a bona. Ba otle bjalo ka ge le nna o nkotletše tša ka dibe. Ke tsetla o šoro, mme ke nyamile kudu.” Joo! Mong wa rena o pipile Sione ka leswiswi a galefile. O bataladitše motse wa bothakga wa Israele. Mohla wola a galefile o be a sa re selo ka Tempele ya gagwe. Mong wa rena o pšhatlagantše dintlo tšohle tša ditlogolo tša Jakobo a se na lešoko, a kgereša dibo tša batho ba Juda a galefile. A goboša mmušo le babuši ba gona. Mohlang wola a tuka bogale o ile a fetša Baisraele maatla; a lesa go ba šireletša ge manaba a ba hlasela, a gakalela ditlogolo tša Jakobo bjalo ka mollo wa go fiša se sengwe le se sengwe se se lego kgauswi. A nganga bora boka lenaba, a ba lebantšha, a gagara baratwa bohle ba bona. Kgalefo ya gagwe ye e tukago bjalo ka mollo a e tšhollela godimo ga Tempele ya Jerusalema. Mong wa rena o fedišitše Israele bjalo ka lenaba; o pšhatlagantše dintlo tšohle tša mošate, a tlogela dibo tša gona e le mašope. O tlišeditše batho ba Juda manyami a go se fele. O pšhatlagantše Tempele ya gagwe mo nkego ke mošašana ka serapeng, a fediša lefelo leo la go kopanela. Morena o fedišitše matšatši a menyanya le a Sabatha. Ge a galefile o nyatša kgoši le moprista. Mong wa rena o lahlile aletare ya gagwe, mme a tlogela Tempele ya gagwe ye kgethwa; a dumelela manaba go kgereša merako ya dibo tša gona. Ba hlaba mekgolokwane ka ntlong ya Morena bjalo ka tšatšing la monyanya. Morena o be a feditše le pelo go thuba morako wa Sione. O rile go o ela ka thapo a tšwela pele le go o phušola. A kgereša ntotoma le morako. Dikgoro di khupeditšwe ke thogorogo, o robile mapheko a tšona a a robaganya. Kgoši le bakgomana ba thopilwe. Melao ya Modimo ga e sa rutwa, le baprofeta ga ba sa bona dipono tša go tšwa go Morena. Bakgalabje ba Jerusalema ba dutše fase ba homotše, ba tletše marole dihlogong, ba apere tša go ilela. Dikgarebjana tša Jerusalema di inamišitše dihlogo. Mahlo a ka a hwibiditšwe ke sello; ke huduegile moyeng. Go fedišwa ga tšhaba sa gešo le go idibala ga bana le masea mekgotheng ya motse go nkgaola pelo. Ba llela bommabo ba re: “Sejonyana se kae? Senonyana se kae?” Ba idibala mekgotheng ya motse mo nkego ke dikgobadi; ba hwa bosele ba farilwe ke bommabo. Jerusalema, moratiwa, na nka go swantšha le eng? Nka go bapiša le eng? Nka go lekantšha le eng, gore ke go bee pelo, wena Sione? Masetlapelo a gago a lekana le lewatle ka bogolo. Ke mang a ka go hlatlolago go ona? Baprofeta ba gago ba go boditše dipono tša bofora le tša boradia, ga se ba go lemoša bobe bja gago, ba go phemiša go thopša. Dipono tše ba go boditšego tšona ke tša maaka le bofora. Bafeti ba tsela bohle ba letša tangwa, ba a kgotsa, ba šikinyetša Jerusalema dihlogo ba tlabegile ba re: “Afa wo ke wona motse wola ba bego ba re ke wo mobotsebotse, motse wo o bego o kgahla lefase lohle?” Manaba a gago ohle a go kwera a go ahlametše, a go kgotsa, a go lomantšhetša meno a re: “Swine! Re e fedišitše! Le ke letšatši leo re dutšego re le emetše, mme re feleditše re le bone!” Morena o dirile se a bego a ikemišeditše sona. O phethile se a rilego o tla se phetha. O go fedišitše a se na lešoko bjalo ka ge a be a beakantšhitše kgale. O go gafetše diatleng tša manaba a gago, a ba thabiša ka go fenywa ga gago. Jerusalema, morako wa gago a o llele Mong wa rena! Meokgo ya gago a e ele e etše dinoka bošego le mosegare; o se ke wa kgaotša, o se ke wa khutšiša mahlo a gago. Bošego o lale o tsoga, o llela go Morena; o tšholle tša ka pelong ya gago pele ga Mong wa rena boka meetse. Phagamišetša matsogo go yena o mo rapele gore a lote bana ba gago, bana ba ba hwago ka tlala magahlanong a mekgotha. Morena, lebelela, o di iše hlogong: Ke mang yo o kilego wa mo swara ka tsela ye? Kgane ke tshwanelo gore basadi ba je bana ba bona, masea a ba a tswetšego? Na go lebane gore baprista le baprofeta ba bolaelwe ka Tempeleng ya Mong wa rena? Ba bagolo le ba banyenyane ba rapaletše mekgotheng, masogana le makgarebe ba bolailwe ka tšhoša. O ba bolaile mohlang wola o befetšwe, wa ba ripitlela o se na lešoko. O nthapetše dira ka mathoko ohle, wa ba rapa mo nkego o ba rapela monyanyeng. Mohlang wola o befetšwe ga go yo a ilego a phonyokga goba a phela. Ba ile ba bolaya ba ke ba tswetšego, ke ba godišitšego. Modimo o nkotlile a galefile, ka gona ke nna motsebamatshwenyego. O nthaketše leswiswing, a ntshepetša tseleng ya tlhokaseetša. Ke nna fela yo a mphayago leboelela letšatši ka moka. O ntlhagaditše letlalo le nama tša mmele, a nthobaroba le marapo. O ntikaneditše ka morako wa maima le mathata. O mpeile leswiswing boka ba ba hwilego kgale. O nkageleditše ka morako gore ke se phonyokge, a ntlema ka ditlemo tše boima. Le ge ke goelela ke llela thušo, o gana go kwa thapelo ya ka. O nthibetše tsela ka dinkgokolo tša maswika, a nkgopamišetša ditsela. Boka bere ye e laletšego, boka tau ye e iphihlilego o nthakile tseleng, a nthathaganya, a ntlogela ke nnoši. O ngangile bora bja gagwe, a ntebantšha ka mesebe ya gagwe. A ntšha mesebe ka kgotlopong ya gagwe, a ntsotsometša ka yona mmeleng. Ke fetogile sesegiša sa ditšhaba tšohle; letšatši lohle ba hlwela go nkopela koša. O ntešitše tše di babago, a ba a nnoša lengana. O nkgotše meno ka lekgwara, a ba a nkgohliša fase ka sefahlego. Ke amogilwe boiketlo, le lethabo ga ke sa le tseba. Ke be ke re nka se sa phela go iša kae; go tshepha Morena go mpheletše. Go gopola matshwenyego a ka le go hloka legae ga ka go mpabela bjalo ka lengana le santlhoko. Ke dula ke nagana ka taba tše, pelo ya ka e nape e karabe bodibeng. Eupša e re ge ke elelwa taba e tee ye, ke tlelwe ke lehutšo. Leratorato la Morena ke le le sa felego, dikgaugelo tša gagwe ke tša go ya go ile. O di tsošološa mosong wo mongwe le wo mongwe, potego ya gagwe ga e kaaka. Ka pelong ke re: “Morena ke yena kabelo ya ka, ka gona ke botile yena.” Morena o babalela ba ba mmotilego, bona ba ba mo nyakago. Ke mo gobotse ge motho a letela go imollwa ke Morena a sa fele pelo. Ke mo gobotse go kgotlelela maima go tloga bjaneng. A motho a itulele a nnoši a ikhomoletše, ge eba a a rwešitšwe ke Modimo. A a patlame fase, a ikokobetše, mohlomongwe a ka thušega. A a fe mmethi wa gagwe lehlaa, a kgotlelele dikgobošo tšohle, gobane Morena ga a lahlele motho sa ruri. Le ge a hlokofatša o na le lešoko, gobane lerato la gagwe ga le kaaka. Ga a kgahlwe ke go hlokofatša goba go nyamiša batho. Go tlaiša bagolegwa bohle mo nageng, go ganela motho ditokelo tša gagwe e le go nyatša thato ya Yogodimodimo, go hlalefetša motho tshekong – na tšeo ka moka Mong wa bohle ga a di bone? Kgane o gona yo a ka ntšhago taelo, mme ya phethwa e se thato ya Mong wa bohle? A ke re ke ka taelo ya Yogodimodimo ge tše botse le tše mpe di hlaga? Bjale motho o reng a belaela ge a otlelwa dibe tša gagwe? A re lekoleng maitshwaro a rena, a re a hlahlobeng, gomme re sokologeleng go Morena. A re ipatametšeng go Modimo legodimong ka dipelo tša rena re phagamišitše matsogo, re rapeleng re re: “Re dirile dibe, re go rumotše, mme wena, Morena, wa se re swarele. “O iphuthetše ka kgalefo wa re hlomara, wa re gagara ntle le lešoko. O ikhurumeditše ka leru, gore thapelo tša rena di se go fihlele. O re dirile ditšhila le maudi ditšhabeng. “Manaba ohle a rena a re sega a re ahlametše. Re aparetšwe ke poifo le tšhio; ba a re fetša, ba a re lobiša. Mahlong a ka go ela dinoka tša meokgo ge setšhaba sa gešo se fedišwa. “Meokgo ya ka e tla ela e sa kgaotše, nka se khutše go lla, go fihlela Morena a okamela fase a le legodimong mme a di bona. Ke babelwa ke mahlo ka go llela basadi bohle ba motse wa gešo. “Manaba a nthakediša boka nonyana, etšwe ke se ne molato. Ba ntahletše ka moleteng ke phela, ba ntswalelela ka gare ka leswika. Meetse a thoma go nkhupetša hlogo, ka ba ka re bjale gona go fedile. “Ka go llela, wena Morena, ke le fasefase moleteng. Wa kwa kgopelo ya ka ge ke re: ‘Se ithibe ditsebe ge ke go kgopela thušo; ntlhatlole.’ Wena wa mpatamela ge ke go llela, wa re: ‘Se boife!’ “Wa tla wa nkemela, Mong wa ka, wa ntamolela. Morena, o bone ka mo ke fošeditšwego ka gona; ntirele ka toka. Lehloyo la manaba a ka o le bone, le tšohle tše ba ntakanego ka tšona. “O ba kwele ge ba nthoga, Morena, o kwele le tšohle tše ba ntakanego ka tšona, le ge ba hlwela go ntsheba tšatši lohle le go ntogela maanomabe. Bona, bošego le mosegare koša go opelwa nna. “Morena, ba otlele tše ba di dirilego. Ba nole moko, o ba pipe ka thogako! Ba hlomare o ba galefetše, o ba fediše lefaseng!” Jonna! Gauta ya rena e fifetše; gauta yela e bego e hlwekišitšwe e fetogile. Maswika a makgethwa a gašagane magahlanong a mekgotha. Masogana a Sione ao e bego e le a bohlokwa boka gauta ye e sego ya tswakwa, bjale a swerwe nke dipitša tša mmopi. Ešita diphukubje di nyantšha bana ba tšona, eupša tšhaba sa ka sona ke se sehlogo baneng ba sona, se etša dimpšhe šokeng. Leleme la lesea le kgomarela magalagapa ka baka la lenyora; bana ba kgopela dijwanyana, wa go ba fa tšona a hlokega. Batho ba ba bego ba eja tša matsaka bjale ba hwela mekgotheng ka tlala; bomagolakamatsaka bjale ba fatafata dithobolong ba tsoma diyamaleng. Tšhaba sa gešo se otlilwe le go feta motse wa Sodoma, wa go thubja ka bjako ntle le go išwa diatla. Bahlomphegi ba tšhaba sa gešo ba be ba hlwekile go feta leswela, ka bošweu ba feta lebese, ba phadima go feta magakabje, botse bja bona nke bja magakabje a safire. Bjale ba ntshofetše difahlego go feta mošidi, ga ba sa tsebega mekgotheng. Letlalo la bona le le omeletšego boka kota le kokoropane marapong a bona. Ba ba bolailwego ka tšhoša ba phala ba ba bolailwego ka tlala, bona ba ba hwilego bosele ba se ne tše di bunwago mašemong. Ešita le basadi, bona bommalešoko, ba be ba apea bana ba bona ka tša bona diatla, ya ba dijo tša bona mola tšhaba sa ka se fedišwa. Morena o gakaditšwe ke kgalefo ya gagwe; kgalefo ya gagwe, setukamollo, o e tšholletše godimo ga setšhaba sa gagwe. O goditše mollo kua Sione, wa e tšhuma thokgethokge. Ga go le o tee, ešita le ona magoši a lefase, goba moduditsoko lefaseng yo a bego a kgolwa gore go na le dira goba manaba a a kago šwahlela ka dikgorong tša Jerusalema. Seo se hlotšwe ke dibe tša baprofeta ba gona, le dikarogo tša baprista ba gona ba ba tšholotšego madi a bahlokamolato moo. Baprofeta bao le baprista e be e le bomatlarumamekgotheng bjalo ka difofu. Ba be ba thankgetše madi, motho a šia le go kgwatha diaparo tša bona. Ba be ba goelelwa ke batho, go thwe: “Tlogang, le tšhilafetše! Tlogang! Tlogang! Se re kgwatheng!” Ka gona, ba be ba ebela le ditšhaba go setšhaba sa go ba amogela. Morena ka sebele a ba šwalalanya; a se sa ba le taba nabo; baprista ba se hlompšhe, batšofadi ba se šetšwe. Ra letela thušo, ra ba ra lapa; thušo ga se ya ka ya tla. Toreng ya tlhapetšo ra letela tšhaba sa go se kgone go re hlakodiša. Manaba a be a re dišitše mesepelong, re bile re se sa kgona le go sepela mekgotheng. Mafelelo a rena a be a batametše, matšatši a rena a be a iketše; mafelelo a rena a be a fihlile. Barehlomari ba be ba šia ntšhu ka lebelo, ntšhu ye e theogago leratadimeng e huba. Ba re lota mohlala kua dithabeng, ba re lalela kua lešokeng. Morephediši, yena motlotšwa wa Morena, a tanywa ke difu tša bona, yena yo re bego re holofetše gore o tla re šireletša go baditšhaba. Hlalalang, le thabe, lena tšhaba sa Edomo, le lena badudi ba naga ya Utse; le lena le sa tlilo fiwa senwelo; le tla se nwa, la tagwa, la itlhobola. Wena Sione, o otlilwe ka mo go go swanelago; Morena a ka se sa go bea bothopša. Eupša wena, Edomo, Morena o tlilo go otla; o tla utolla dibe tša gago. Morena, gopola tše di re hlagetšego. Lebelela, o bone kgobogo ya rena. Naga ye o re filego yona e gafetšwe bašele; magae a rena a tšerwe ke bafaladi. Re fetogile bana ba ba hwetšwego ke tatabo, gomme bommagorena ba etša bahlologadi. Meetse ao re a nwago re a a reka, dikgong re a di lefela. Re swerwe gampe ke bahlakiši ba rena; ge re lapile ga re dumelelwe go khutša. Re ithapeletša go Egepeta le Asiria gore re hwetše tša go ja. Borakgolokhukhu ba rena ba dirile dibe mme ba ile, mme rena re ba ba otlelwago dibe tša bona. Makgoba ale ke ona a a re bušago, gomme ga re na wa go re hlakodiša go bona. Diyamaleng re di tsoma šokeng, ra ipea kotsing ya go bolawa ke bahlakodi. Re swerwe ke letadi ka baka la tlala, gomme letlalo la rena le fiša boka sebešo. Basadi ba gaborena ba katilwe mo Sione, makgarebe le ona a katwa metseng ya Juda. Baetapele ba rena ba bolailwe ka go fegwa ke manaba; batšofadi ba gaborena ga ba hlompšhe. Masogana a gaborena a gapeletšwa go šila; bašemane ba thekesedišwa ke ngata tša dikgong. Bakgalabje ga ba sa dula kgorong, le bafsa ga ba sa letša diletšo. Lethabo le re feletše; go bina ga rena go re fetogetše manyami. Re lahlegetšwe ke seriti; re ba madimabe gobane re dirile dibe! Pelo tša rena di bohloko, le mahlo a rena a fifaditšwe ke sello, ka gobane thaba ya Sione e šetše fela, gomme diphukubje di tšhakatšhaka go yona. Eupša wena, Morena, o buša go ya go ile, gomme o tla ba kgoši ka mehla yohle. O reng o re lebaletše sa ruri? O reng o re furalela galelele gakaaka? Re sokollele go wena, Morena, mme re tla sokologa. Re bušetše sekeng, ge e se ge e le gore o re lahlile lahlilahli, o re galefetše go feta tekanyo. Nna, moprista Hesekiele, morwa wa Busi, ke be ke dula le mathopša a Bajuda kgauswi le noka ya Kebara, nageng ya Babilonia. Ya re ka letšatši la bohlano la kgwedi ya bone ya ngwaga wa masome a mararo, legodimo la bulega gomme ka bona Modimo ponong. E be e le ngwaga wa bohlano wa ge Kgoši Joyakine a thopilwe. Gona moo Babilonia, kgauswi le noka ya Kebara, ka kwa Morena a bolela le nna, gomme maatla a gagwe a nkaparela. *** *** Ya re ge ke iša mahlo ka bona ledimo le etla le etšwa ka leboa. Legadima le be le thala lerung le legolo, gomme leratadima leo leru le bego le le go lona le tagile. Moo legadima le bego le benya gona ka bona se sengwenyana se nkego ke tshipi ye e phadimago. Ka gare ga ledimo leo ka bona se se swanago le diphedi tše nne tše di bopegilego bjalo ka batho, eupša se sengwe le se sengwe se be se na le difahlego tše nne le diphego tše nne. Maoto a tšona a be a otlologile, a se na makopano, gomme dingatha tša tšona di swana le tša poo, di le bjalo ka mphiri wo o phadimišitšwego. Ka ntle le difahlego tša tšona tše nne le diphego tša tšona tše nne, se sengwe le se sengwe sa tšona se be se na le diatla tše nne tša motho, seatla se sengwe le se sengwe se le ka fase ga lephego. Diphego tše pedi tša sephedi se sengwe le se sengwe di be di phurologile di kgomana le tša tše dingwe ka dintlha mo e lego gore di be di dirile dikhutlo tše nne. Ge di sepela di be di sepela mmogo ntle le go retologa. Sephedi se sengwe le se sengwe se be se na le difahlego tše nne: sa motho ka pele, sa tau ka go la go ja, sa poo ka go la nngele, le sa ntšhu morago. Diphego tše pedi tša sephedi se sengwe le se sengwe di be di phagame di kgomana le dintlha tša diphego tša diphedi tše di lego kgauswi le tšona, gomme diphego tše dingwe tše pedi di khurumeditše mebele ya diphedi tšeo. Sephedi se sengwe le se sengwe se be se lebeletše ka mahlakoreng ka mane, ka gona diphedi tšeo di kgona go ya mmogo mo di ratago ntle le go retologa. Gare ga diphedi tšeo go be go na le selo se se bego se sepelasepela se se bego se swana le magala a a tukago bjalo ka dirumola. Mollo woo o be o na le seetša se segolo mme o etšwa dikgadima. Diphedi tšeo tšona di be di eya kua le kua ka lebelo la legadima. Ge ke lebeledišiša diphedi tšeo tše nne gabotse, ka bona maotwana a mane a kgoma fase, le lengwe le le lengwe le le kgauswi le sephedi. Maotwana ao a mane a be a swana, le lengwe le le lengwe le phadima bjalo ka legakabje, le na le leotwana le lengwe le le le putlago ka bogare, gore maotwana ao a kgone go thwethwela ka mathokong a mane ntle le go retologa. Dirime tša ona e be e le tše dikgolo tša go boifiša, mme di tletše mahlo. Ge diphedi tšeo di sepela, maotwana le ona a be a sepela natšo, gomme ge di kukegela godimo, le ona a kukege natšo. Diphedi tšeo di be di eya mo di ratago gona, gomme maotwana le ona a eya mo di yago, ka gobane di be di a laola. Ka gona nako ye nngwe le ye nngwe ge di sepela goba di ema goba di kukegela godimo, maotwana le ona a be a dira bjalo. Ka godimo ga dihlogo tša diphedi tšeo go be go na le selo se nkego ke leratadima le le edišago seetša se se boifišago se se phadimago bjalo ka legakabje. Ka fase ga leratadima leo go be go eme diphedi tšeo, se sengwe le se sengwe se phurolletše diphego tše pedi go tša diphedi tše se bego se le kgauswi le sona, gomme ka tše dingwe tše pedi se ikhurumeditše mmele. Ka kwa modumo wa diphego tša tšona ge di fofa; o be o kwagala bjalo ka modumo wa meetse a mantši, o etša lentšu la Modimo Ramaatlaohle, nke ke mošito wa madiradira. Ge di sa fofe di be di iša diphego fase, eupša go no šala go kwagala modumo wo o tšwago leratadimeng ka godimo ga dihlogo tša tšona. Ka godimo ga leratadima leo go be go na le selo sa go swana le setulo sa bogoši se se dirilwego ka magakabje a botala bja legodimo, gomme godimo ga sona go dutše yo nkego ke motho. Yena o be a phadima bjalo ka mophiri wo o lego gare ga mollo. O be a phadima mo gohle bjalo ka mollo wo o tukago wa seetša se segolo. Go phadima moo go be go na le mebala ya molalatladi wo o bonalago marung ge pula e seno khula. Ke ka moo seetša se se fahlago sa letago la Morena se bego se bonala ka gona. E rile ge ke bona tšeo, ka itahlela fase ka sefahlego. Ke moka ka kwa lentšu la yo a bolelago le re: “Wena motho wa nama, emelela; ke nyaka go bolela le wena.” Ya re ge a realo ka tsenwa ke moya wa Morena mme wa nkemiša ka maoto, gomme ka kwa a iša pele a re: “Wena motho wa nama, ke go roma go setšhaba sa Israele. Ba ile ba ntsogela maatla mme le bjale ba sa ntsogela. Bona le borakgolokhukhu ba bona ba lwele le nna go fihlela le lehono. Ba ngangabetše, gomme ga ba ntlhomphe, ka gona ke go roma gore o yo ba botša tše nna, Morena, Mong wa bohle, ke ba botšago tšona. Le ge setšhaba seo sa batsošampherefere se ka go theeletša goba sa se go theeletše, se tla tseba gore moprofeta o kile a ba gona gare ga sona. “Eupša wena motho wa nama, o se ba tšhabe goba wa boifa se ba se bolelago. Ba tla ngangabala ba se go theeletše; go tla swana le ge o ka phela gare ga diphepheng. Le ge go le bjalo, o se boife setšhaba seo sa batsošampherefere goba wa tšhošwa ke tše ba di bolelago. O ba botše tše ke go botšago tšona, le ge eba ba ka go theeletša goba ba se go theeletše, ka gobane ke batsošampherefere. “Wena motho wa nama, theeletša se ke go botšago sona. O se ke wa tsoša mpherefere go etša bona. Ahlama o je se ke go neago sona.” Ge ke lebelela ka bona seatla se nkobeletša se swere lengwalo le le phuthilwego. Seatla seo sa phutholla lengwalo lela; le be le ngwadilwe ka mo le ka mo – go ngwadilwe dikopelo tša dillo le mantšu a manyami le a go golola. Morena a re: “Wena motho wa nama, eja lengwalo le o le fiwago le, gomme o yo bolela le setšhaba sa Israele.” Ke moka ka ahlama, a nteša lengwalo leo. A re: “Wena motho wa nama, eja lengwalo le ke go fago lona le, o le khore.” Ka le ja, gomme ka kwa e le le lebose bjalo ka todi ya dinose. Ke moo Morena a rilego: “Wena motho wa nama, eya setšhabeng sa Israele gomme o ba botše tše ke go botšago tšona. Ga ke go rome go setšhaba se se bolelago leleme le šele le bothata, eupša ke go roma go Baisraele. Ge nkabe ke go roma go ditšhaba tše dintši tše di bolelago maleme a šele a mathata a o sa a kwešišego, di be di tla go theeletša. Eupša setšhaba sa Israele sona se ka se rate go go theeletša, ka gobane le nna ga ba nyake go ntheeletša. Ka moka ga bona ba na le kgang mme ba a nnyatša. Fela le wena ke tla go thatafatša ka ba ka dira gore o be le kgang bjalo ka bona. Ke tla go thatafatša wa ba bjalo ka taamane, wa feta leswika ka bothata; o se ke wa boifa batsošampherefere bao goba wa ba tšhaba.” Morena a tšwela pele a re: “Wena motho wa nama, tšohle tše ke go botšago tšona o di theeletše gabotse mme o di sware ka pelo. Ke moka o ye go mathopša a geno o ba botše tše nna, Morena, Mong wa bohle, ke ba botšago tšona, le ge eba ba ka go theeletša goba ba se go theeletše.” Ya ba gona moya wa Morena o nkukago, gomme ka kwa modumo wo mogolo wa lentšu ka morago ga ka le re: “A go retwe letago la Morena legodimong!” Ka kwa le diphego tša diphedi tšela di phuphana, le lešata la maotwana ale le dirile modumo wo mogolo. Ge moya wa Morena o nkuka o ntloša moo, ke be ke kgopišegile ebile ke befetšwe. Ka gona ka fihla Tele-Abibe kgauswi le noka ya Kebara, moo mathopša a bego a phela gona, gomme ka dula fase moo gare ga bona matšatši a a šupago, ke tšhošitšwe ke tše ke di bonego le tše ke di kwelego. Ge go fetile matšatši ale a šupago, Morena a bolela le nna a re: “Wena motho wa nama, ke go dira moleti wa setšhaba sa Israele. O theeletše mantšu a ke a bolelago gomme o nkgalele Baisraele ka ona. Ge nka go begela gore ruri modiradibe o tla hwa, fela wena wa se mo kgale gore a tlogele ditsela tša gagwe tše mpe, a tle a iphološe, yena o tla hwa ka baka la bobe bja gagwe, gomme nna ke tla bona wena molato wa lehu la gagwe. Eupša ge o ile wa kgala modiradibe, gomme a se tlogele go dira dibe, yena o tla hwa ka baka la bobe bja gagwe, eupša wena o tla ba o iphološitše. “Ge moloki a ka tlogela boloki bja gagwe, a thoma go dira tše mpe, mme nna ka mo wetša kotsing, yena o tla hwa ge o ka se mo kgale. O tla hwa ka baka la dibe tša gagwe – nka se gopole go loka mola ga gagwe – gomme ke tla bona wena molato wa lehu la gagwe. Ge o ka botša moloki gore a se dire dibe gomme a go theeletša a se di dire, o tla fela a phela, gomme le wena o tla ba o iphološitše.” Maatla a Morena a nkaparela moo, mme yena a re go nna: “Ema, o ye ka moeding. Ke gona moo ke tlago bolela le wena.” Ka gona ka ema, ka ya ka moeding, moo go bego go na le letago la Morena la go swana le lela ke ilego ka le bona kua nokeng ya Kebara. Ka itahlela fase ka sefahlego, eupša moya wa Morena wa ntsena, wa nkemiša ka maoto. Morena a re go nna: “Eya gae o fihle o itswalelele ka ntlong. O tla kgokwa ka dithapo, wena motho wa nama, wa se kgone go tšwela ka ntle wa sepela bathong. Ke tla kgomaretša leleme la gago magalagapeng gore o se kgone go bolela wa kgala moloko wo, gobane ke dinganga. E tla re ge ke bolela le wena ka go kgomarolla leleme, wa ba botša se nna, Morena, Mong wa bohle, ke se bolelago. Yo a nyakago go theeletša a theeletše; yo a ganago go theeletša a gane, gobane ke wona moloko wa dinganga.” “Wena motho wa nama, tšea lekwate la go aga o le bee pele ga gago, o thale motse wa Jerusalema mo go lona. O swantšhe motse wo o dikaneditšwe, o age dithala tša go o hlola, o kgobele mokgobo wa mobu go o dikanetša, o hlome mešaša go bapela nawo, o bee dithubamerako go o dikologa. O tšee segadikelo o se hlome mokgahlo ga gago le motse, mo nkego ke morako wa tshipi, o dule o lebane le wona. Wona o dikaneditšwe, gomme ke wena o o dikaneditšego. E be sona sešupo go setšhaba sa Israele. “O nape o robale ka lehlakore la nngele, o ithweše molato wa setšhaba sa Israele. Molato woo wa bona o tla o rwala matšatši a a lekanago le a o a tšerego o robetše ka lehlakore leo. Ke beakantše gore o rwale molato wa Baisraele matšatši a makgolo a mararo le masome a senyane, ka gobane Baisraele ba ithwešitše molato mengwaga ye mekaalo. Ge o feditše matšatši ao bjale o robale ka la go ja, mme o rwale molato wa setšhaba sa Juda matšatši a masome a mane – letšatši le lengwe le le lengwe le emele ngwaga o tee wa molato wa bona. “O fele o lebeletše Jerusalema ye e dikaneditšwego. O e šupe ka monwana mme o e porofete. Ke tla go tlema gore o se kgone go fetogela ka lehlakoreng le lengwe go fihlela ge o feditše go swantšha go dikanetšwa ga motse. “Bjale o tšee mabele le garase le dinawa le dihlodi le leotša le mphogo. O di tswakanye ka sebjaneng se tee, mme o itirele senkgwa ka tšona. Ke sona sejo se o swanetšego go se ja matšatšing ao a makgolo a mararo le masome a senyane o robetše ka lehlakore la nngele. Ka letšatši o ikelele dijo tšeo, e be tša dikramo tše makgolo a mabedi le masome a mararo, mme o di je ka dinako tše o ipeetšego tšona. Le meetse a go nwa o ikelele a sego ka letšatši, mme o a nwe ka dinako tše o ipeetšego tšona. O beše senkgwa seo mollong wa dišu tša mantle a batho o bonwa ke batho, mee o se je boka motho a eja senkgwa sa garase.” Morena a re: “Ke ka mo Baisraele ba tlago ja dijo tše di tšhilafetšego ditšhabeng tše ke ba šwalalanyeditšego go tšona.” Ke mo nna ke fetotšego ka re: “Aowii, Morena, Mong wa ka! Ga se nke ka itšhilafatša. Go tloga bjaneng bja ka go fihla lehono ga se nke ka ja seruiwa se se ikhwetšego ka bosona, goba se gabutlilwego ke dibata. Ga se nke ka ja sejo se se tšhilafetšego.” Ke moka Morena a re: “Go lokile. Bakeng sa mantle a batho ke tla go dumelela dišu tša dikgomo, mme o beše senkgwa seo ka tšona.” A ba a tšwela pele a re: “Wena motho wa nama, ke tlilo bolaiša motse wa Jerusalema tlala. Batho ba gona ba tla ja pelo ba tsota ge ba ikelela dijo tše ba di jago le meetse a ba a nwago. Ba tla hlaelwa ke dijo le meetse; ba tla tsota mme ba otišwa ke go otlelwa dibe tša bona. “Wena motho wa nama, tšea tšhoša ye bogale o e šomiše bjalo ka legare, o ipoole moriri le maledu. Ke moka o ele meriri yeo ka kelo, mme o e arole diphuthana tše tharo. Sephuthana sa mathomo o se tšhume ka motseng wa Jerusalema ge manaba a tlogetše go dikanetša motse. Sa bobedi o se tšee o se kgabetlele ka tšhoša o ntše o dikologa motse. Sa boraro o se gaše phefong, gomme nna ke tla se hlomara ka tšhoša. O šadiše merišana e se mekae mme o e phuthele ka morumo wa seaparo sa gago. O nape o tšee ye mengwenyana gape, o e tšhele mollong, o e fiše. Mollo wa go tšwa merišaneng yeo o tla kekela setšhabeng sohle sa Israele.” Morena, Mong wa bohle, a re: “Šoowe motse wa Jerusalema. Ke o hlomile gare ga ditšhaba, o dikologilwe ke dinaga. Eupša Jerusalema e hlanametše melao le ditaelo tša ka, e le ye kgopo go feta ditšhaba tše dingwe, e nnyatša go feta dinaga tše di bapilego nayo. Jerusalema e lahlile ditaelo tša ka gomme ya gana go phetha melao ya ka. Bjale ge, nna, Morena, Mong wa bohle, ke re: O ntsogetše maatla, wena Jerusalema, go feta ditšhaba tše di bapilego nago. O nyaditše melao ya ka, wa se phethe ditaelo tša ka, ditlwaedi tša ditšhaba tše di bapilego le wena le tšona wa se di latele. Ke ka baka leo nna, Morena, Mong wa bohle, ke rego: Ke nna ka sebele ke lwago nago. Ke tla go otla pele ga ditšhaba. Ka baka la tšohle tše di šišimišago tše o di dirago ke tla go dira tše ke se nke ka di dira motho, ke bile nka se tsogego ke di dirile motho. Ka baka leo, batswadi mo Jerusalema ba tla ja bana ba bona, le bana ba ja batswadi ba bona. Ke tla go otla, mme mašaledi a badudi ba gago ka a šwalalanyetša mathokong ohle. “Ka baka leo nna, Morena, Mong wa bohle, ke ikana ke le Modimo yo a phelago, ke re: Ka gobane le tšhilafaditše Tempele ya ka ka medimo yohle ya diswantšho ya go šišimiša le ka tšohle tše ke di hlaswago tše le di dirilego, ke tla go kgabetlela ka ntle le lešoko, ka se go lese. Karolo ya mathomo ya dikarolo tše tharo tša batho ba gago e tla hwa ka leuba la bolwetši goba ka tlala ka motseng; karolo ya bobedi e tla bolawa ka tšhoša ka ntle ga morako wa gago; karolo ya boraro ke tla e šwalalanyetša mathokong ohle, ka ba hlomara ka tšhoša. “Ya ba gona bogale bja ka bo felago, le kgalefo ya ka ya kokobela, gomme ka wa pelo. Ge bogale bja ka bo kgaotša ke mo o tlago lemoga gore go boletše nna, Morena, ka ge ke nyaka o mpotegela. Ke tla go fetoša mašope, ka go dira sekwero sa ditšhaba tše di bapilego le wena, le sa mang le mang yo a fetago ka tsela. “Ge ke go befeletšwe, ke go galefetše mme ke go otla o šoro, ditšhaba tše di bapilego le wena di tla go kwera, tša go roga. O tla ba segakgamatši le setšhošetšo go bona. Ke tla go okeletša tlala, ka go hlokiša dijo. O tla kwa bohloko bja tlala mo nkego ke mesebe ye ke e rometšego go go fediša. Ke tla romela tlala le dibata gore di tle di go bolaele bana; o tla welwa ke leuba la bolwetši le dipolayano, ka go bolaiša le manaba. Ke realo, nna, Morena.” Morena o ntaetše a re: “Wena motho wa nama, lebelela dithabeng tša Israele o di porofete o re: Lena dithaba tša Israele, ekwang lentšu la Morena, Mong wa bohle. O re go dithaba le meboto le magaga le meedi: Ke tla romela madira gore a yo fediša dintotoma tšeo go tšona le khunamelago medimo ya diswantšho. Dialetare tša lena di tla phušolwa, le dialetare tša lena tša diorelo tša pšhatlwa. Ditopo tša batho ba gabolena ke tla di lahlela pele ga medingwana ya lena. Ke tla rapalatša ditopo tša Baisraele pele ga medingwana ya bona; ke tla gašanya marapo a badudi ba gabolena go dikologa dialetare tša lena. Gohle mo le dulago gona, lena Baisraele, metse ya lena e tla fedišwa, le dintotoma tšeo go tšona le khunamelago medimo ya diswantšho di tla phušolwa gore dialetare tša lena di kgerege, di we, le medingwana ya lena e pšhatlege, e fedišwe, le dialetare tša lena tša diorelo di pšhatlagane, gomme medimo ya lena ya diswantšho e fedišwe. Ge le bona batho ba bolawa le tla dumela gore Morena ke nna. “Fela ke tla šadiša mašaledi, ka gobane ba bangwe ba lena ba tla phonyokga tšhoša ge ke le šwalalanya le ditšhaba le dinaga. Ba ba phonyokgilego ba tla nkgopola ba le ditšhabeng tšeo ba thopetšwego go tšona, ba gopola ka mo ke ba otletšego bokgelogi bja bona le go duma go loba medingwana ga bona. Ba tla inyatša ka baka la tše mpe le tšohle tša go šišimiša tše ba di dirilego. Ba tla lemoga gore ke nna Morena, le gore ke be ke sa swaswe mola ke re ke tla ba tlišetša kotsi ye.” Morena, Mong wa bohle, a re: “Wena bethantšha diatla, o kibe fase ka leoto, o re: Jonna! Baisraele ba tlilo bolawa ka tšhoša le ka tlala le ka leuba la bolwetši ka baka la tše mpe tša go šišimiša tše ba di dirilego. Bao ba lego kgole ba tla bolawa ka leuba la bolwetši; bao ba lego kgauswi ba tla bolawa ka tšhoša; ba ba šetšego ba tla hwa ba bolawa ke tlala. Ke ka mo ke tlago itefetša go bona ka gona. Ditopo tša ba ba bolailwego di tla rapalala gare ga medingwana ya bona le go dikologa dialetare tša bona, le mebotong yohle ye e phagamego, le godimo ga dithaba tšohle, le ka fase ga mehlare yohle ye metala le meeike ya matlakala a mantši, le mafelong ohle ao ba bego ba direla medingwana ya bona dihlabelo tša monkgo wo mobose go ona. Bohle ba tla napa ba tseba gore ke nna Morena. Ee, ke tla otlolla letsogo la ka ka ba otla, ka senya le naga ya bona. Gohle mo ba dulago gona, go tloga lešokeng la ka borwa go yo fihla motseng wa Ribla, ke tla go fetoša leganata. Ke gona ba tlago tseba gore ke nna Morena.” Morena o re go nna: “Wena motho wa nama, Morena, Mong wa bohle, o re go naga ya Israele: Bofelo bo fihlile, bofelo bja naga yohle! “Israele, bofelo bja gago bo tlile. Ke tla go galefela kudu, ka go otla go ya ka maitshwaro a gago, ka ba ka go rweša molato wa tše di šišimišago tše o di dirilego. Nka se go babalele goba ka go gaugela. Ke tla go rweša molato wa maitshwaro a gago, le wa tše di šišimišago tše o di dirilego. Ke mo o tlago lemoga gore ke nna Morena.” Morena, Mong wa bohle, o re: “Dikotsi di tla go tlela ka go latelana. Bofelo bo etla. Bofelo bo etla. Bo tla bo go lebile. Šeboowe bo etla. O wetšwe ke madimabe, wena modudi wa naga ye. Nako e fihlile, letšatši le batametše la gore go se sa ba le menyanya kua dithabeng, e be fela kgakanego. “Ke kgauswi le go tšhollela kgalefo ya ka godimo ga gago, ka itefeletša ka wena. Ke tla go otla go ya ka maitshwaro a gago. Ke tla go rweša molato go tše di šišimišago tše o di dirilego. Nka se go babalele goba ka go gaugela. Ke tla go rweša molato wa maitshwaro a gago le wa tše di šišimišago tše o di dirilego. Ke mo o tlago tseba gore ke nna Morena, yena mootli.” Letšatši la tahlego šele le fihlile. Go senyegile. Boikgantšho bo iphile maatla. Ntwa e hlakile. Ga go motho le o tee yo a tlago phonyokga; ga go thoto ye e tlago šala; go ka se sa ba le megobo. Ga go se bohlokwa se se tlago šala. Nako e etla, le letšatši le kgauswi la gore moreki a se ke a thabela go reka, le morekiši a se ke a itsholela go rekiša, ka gobane kgalefo ya Morena e tla wela batho ka moka. Ga go morekiši yo a tlago phela go fihlela a bušetšwa tše a di rekišitšego, ka gobane kgalefo ya Morena e tla wela bohle. Motho, ka baka la dibe tša gagwe, a ka se phologe. Go lla phalafala gomme yo mongwe le yo mongwe o a itokiša. Eupša ga go yo a yago ntweng, ka gobane kgalefo ya Morena e tla wela batho bohle. Ka ntle ga motse batho ba bolawa ka tšhoša, ka gare ke leuba la bolwetši le tlala. Yo a lego šokeng o tla bolawa ka tšhoša, yo a lego ka motseng a hwa a bolawa ke tlala le leuba la bolwetši. Batšhabi ba tla tšhabela dithabeng go swana le maeba a moedi. Bohle ba tla letšwa ke bokgopo bja bona. Ka moka ba tla repha matsogo, ba ba ba itlhapologela ka baka la letšhogo. Ba tla apara tša go ilela, ba thothomela. Bohle ba tla goboga mme ba ipoola dihlogo. Ba tla lahlela silibera ya bona kua mekgotheng; gauta ya bona ba tla e tšholla mo nkego ke tšhila, gobane silibera ya bona goba gauta e ka se ba hlakodiše mohla Morena a ba galefetše. Ba ka se je gauta goba silibera ba ntšha tlala maleng goba ba khora. Ke gauta le silibera tše di ba dirišitšego sebe. Ba kile ba ikgantšha ka magakabje a bona a mabotse, eupša ba tla bopa ya bona medimo ya diswantšho ya go šišimiša, ya go selekiša ka ona. Morena o re: “Ke ka baka leo ke tlago dira gore ba bone nke gauta ya bona le silibera ke tšhila. Ke tla lesa batho ba šele ba ba hlakola tšona, gomme bakgopo ba lefase ba tla ba amoga tšona, ba di tšhilafatša. Ge Tempele ya ka ye ke e ratago e tšhilafatšwa mola bahlakodi ba e šwahlela mme ba e tšhilafatša, nka se di tsene. “Lokiša ditlemo, gobane naga e tletše dipolao, le motseng go tletše šiši. Ka gona ke tla tliša ditšhaba tše dišorošoro, gomme ka dira gore ba ba amoge magae. Banna ba gabolena ba maatla ke tla ba lahliša makoko, gomme ditšhaba tšeo di tla ba tšhilafaletša mafelo a makgethwa. Ge ba tlaletšwe ba tla nyaka khutšo, fela ba e hloka. Dikotsi di tla tla di šalane morago, mabarebare le ona a tla latelana. Ba tla hlodia baprofeta ba re ba nyaka dipono. Baprista ba ka se sa ba le se ba ka se rutago setšhaba, le dikeletšo tša bagolo ba setšhaba di ka se sa ba gona. Kgoši e tla ilela, bakgomana ba tla nyama, le bengnaga ba tla thothomela ka poifo. Ke tla ba otla go ya ka maitshwaro a bona, gomme ka ba ahlola ka tsela ye le bona ba bego ba ahlola ba bangwe ka yona. Ke mo ba tlago tseba gore ke nna Morena.” Ka letšatši la bohlano la kgwedi ya boselela ya ngwaga wa boselela wa ge re le mathopša, bagolo ba setšhaba sa Juda ba be ba dutše le nna ka ntlong ya ka. Gateetee ka tsenwa ke maatla a Morena, Mong wa bohle. Ge ke lebelela ka bona selo se nkego ke motho. Go tloga lethekeng go theogela fase mmele wa gagwe e be nke ke mollo, gomme go tloga lethekeng go ya godimo o be a phadima bjalo ka tshipi ye e phadimišitšwego. O ile a obeletša se nkego ke letsogo a ntshwara ka moriri. Gona moo ponong yeo moya wa Modimo wa nama wa nkukela godimodimo wa nkiša Jerusalema, lesorong la kgoro ya ka gare ya ka leboa ya Tempele, moo go bego go na le modimo wa seswantšho wo o bego o seleka Modimo. Moo ka bona letago la Modimo wa Israele, la go swana le lela ka go le bona kua moeding. Morena a re go nna: “Wena motho wa nama, iša mahlo ka thoko ya leboa.” Ka lebelela, gomme mojakong wa ka leboa wa Lesoro la Aletare ka bona modimo wa seswantšho wo o bego o seleka Modimo. Morena a re go nna: “Wena motho wa nama, na o bona tše setšhaba sa Israele se di dirago? Na o bona tše mpe tša go šišimiša tše ba di dirago mo, ba nthakela kgole le felo ga ka go gokgethwa? O sa tlilo bona tša go šišimiša le go feta tšeo.” A nkiša lesorong la kgoro. Ya re ge ke lebelela ka bona lešoba mo morakong. A re: “Wena motho wa nama, oketša lešoba leo.” Ka le oketša, mme ka bona lebati. A re go nna: “Tsena o lebelele dilo tše mpe tša go šišimiša tše ba di dirago ka moo.” Ka tsena, ka bona mo gohle mabotong go setilwe diswantšho tša digagabi, le tša diphoofolo tše dingwe tša go šišimiša, le tša medingwana ya setšhaba sa Israele. Mo pele ga diswantšho tšeo go be go eme bagolo ba masome a a šupago ba setšhaba sa Israele; Jaasania, morwa wa Shafane, e le yo mongwe wa bona. Yo mongwe le yo mongwe o be a swere sethuntšhetšo ka seatla, seo go sona go bego go etšwa muši wo mobose wa seorelo. Morena a mpotšiša a re: “Wena motho wa nama, na o bona tše bagolo ba setšhaba sa Israele ba di dirago ka sephiring, mongwe le mongwe a le ka felong go gokgethwa ga seswantšhobetlwa sa modimo wa gagwe? Ba gopola gore Morena ga a ba bone, o tlogetše naga ya bona.” Ke moka Morena a re go nna: “O sa tlilo ba bona ba dira tše di šišimišago le go feta tšeo.” Ya ba o nkiša lesorong la kgoro ya ka leboa ya Tempele ya gagwe, gomme ka bona basadi ba dutše moo ba llela modimo Tamuse. A mpotšiša a re: “Wena motho wa nama, na o a di bona? O sa tlilo bona tše di šišimišago le go feta tšeo.” Ya ba o nkiša ka kgorong ya ka gare ya Tempele ya gagwe. Mo lesorong la Felo mo Gokgethwa, mokgahlo ga mathudi le aletare, go be go na le banna ba e ka bago ba masome a mabedi le ba bahlano. Ba be ba furaletše Felo mo Gokgethwa, ba lebeletše bohlabatšatši, ba khunamela letšatši ge le hlaba. Morena a re go nna: “Wena motho wa nama, na o a di bona? Kgane batho ba Juda ga se ba kgotsofala ka go dira tše di šišimišago tše ba di dirago mo, ge ebile ba tlatša naga bokgoa bja bona, ya ba ge ba nthumola le go feta? Bonang ka mo ba ntlhapaolago ka mokgwa wo o kgopišago kudu ka gona! Le nna bjale ke tla ba gakalela ka kgalefo. Nka se ba babalele goba ka ba gaugela. Le ge ba ka ntelela bjang le bjang, nka se ba theeletše.” Ka kwa Morena a goelela a re: “Etlang mo, lena baotli ba motse. Le tle le swere dibolao tša lena.” Ka bona go etla banna ba ba selelago ba etšwa lesorong la ka godimo la ka leboa la Tempele, mongwe le mongwe a swere sebolao. Ba be ba na le monna yo mongwe yo a bego a apere diaparo tša lešela, a lekeleditše tša go ngwala lethekeng. Ba fihla ba ema kgauswi le aletare ya mphiri. Gwa rotoga letago la Modimo wa Israele le etšwa go bakerubi, mo le bego le le gona, mme la fetela mojakong wa Tempele. Morena a bitša monna yola wa go apara diaparo tša lešela, wa go lekeletša tša go ngwala lethekeng, a re: “Sepela le motse wohle wa Jerusalema, mme bohle ba ba nyamilego gape ba tshwenyegilego ka baka la tšohle tše di šišimišago tše di dirwago mo motseng, o tšame o ba swaya sefapano phatleng.” Ka kwa Morena a re go banna bale ba bangwe: “Mo lateleng ge a sepela le motse mme le gagare batho. Le se ke la babalela motho, le se gaugele motho. Le gagare bakgalabje le masogana le makgarebe le basadi le bana, eupša yo a swailwego yena le se mo dire selo. Le thome gona mo Tempeleng ya ka.” Ka gona ba thoma ka bagolo ba setšhaba ba ba bego ba eme pele ga Tempele. Morena a re go bona: “Tšhilafatšang Tempele. Tlatšang dikgoro tša yona ka ditopo. Thomang!” Ba napa ba thoma go bolaya batho mo motseng. Ge ba le gare ba gagara batho, nna ke be ke šetše ke nnoši. Ka itahlela fase ka sefahlego, ka goelela ka re: “Morena, Mong wa bohle, na e ka ba o befeletšwe Jerusalema mo e lego gore o yo bolaya yo mongwe le yo mongwe yo a šetšego mo Israele?” Yena a mphetola a re: “Molato wa batho ba Israele le ba Juda ke wo mogolo e le ruri. Naga ya bona e tletše dipolao, le motseng wa Jerusalema ga go latelwe toka. Ba re nna Morena ke furaletše naga ya bona, le gona ga ke ba bone. Eupša nna nka se ba babalele goba ka ba gaugela; ke tla ba otlela tše ba di dirilego.” Ya ba gona monna yola wa go apara diaparo tša lešela, wa go lekeletša tša go ngwala lethekeng, a boago a tlile go begela Morena a re: “Ke phethile ditaelo tša gago.” Ge ke sa lebeletše ka bona se nkego setulo sa bogoši se se dirilwego ka magakabje a botala bja legodimo se le ka godimo ga leratadima le le okametšego dihlogo tša bakerubi. Morena a re go monna yola wa go apara diaparo tša lešela: “Tsena ka mola mokgahlo ga maotwana ka fase ga bakerubi o ntšhe magala ka diatla mokgahlo ga bona. O name o a gaše godimo ga motse.” Ke ile ka mmona ge a tsena. Bakerubi bale ba be ba eme ka borwa bja Tempele ge a tsena, gomme leru la tlala kgoro ya ka gare. Letago la Morena la rotoga le etšwa go bakerubi bale la fetela mojakong wa Tempele. Leru lela la tlala Tempele, gomme kgoro ya tlala letago la Morena. Modumo wa diphego tša bakerubi bale wa kwagala le ka kgorong ya ka ntle. O be o kwagala bjalo ka lentšu la Modimo Ramaatlaohle. Ya re ge Morena a laela monna yola wa go apara diaparo tša lešela go tšea mollo mokgahlo ga maotwana le mokgahlo ga bakerubi, monna yoo a tsena mme a ema ka thoko ga leotwana le lengwe. Mokerubi o tee a obeletša seatla ka mollong a le gare ga bakerubi ba bangwe, a tšea magala a mangwenyana a a tšhela ka diatleng tša monna yola wa go apara diaparo tša lešela. Monna yoo a tšea magala ale a tloga. Ka fase ga lephego le lengwe le le lengwe la mokerubi go be go bonala selo se nkego ke seatla sa motho. Ka ba ka bona le maotwana a mane a go swana, kgauswi ga mokerubi yo mongwe le yo mongwe go na le leotwana. Maotwana ao a be a phadima bjalo ka magakabje, gomme le lengwe le le lengwe le tsenane le le lengwe ka bogare. *** Maotwana ao ge a sepela a be a kgona go thwethwela ka mathoko ka mane a sa retologe. Mo go lebilego leotwana la ka pele a mangwe a be a le latela ntle le go retologa. Mo gohle mebeleng ya bakerubi le mekokotlong le diatleng le diphegong le maotwaneng ka mane ba be ba tletše mahlo. Maotwana ao ka kwa go thwe ke “maotwanasesedi”. Mokerubi yo mongwe le yo mongwe o be a na le difahlego tše nne. Sa mathomo e be e le sa mokerubi, sa bobedi e le sa motho, sa boraro e le sa tau, gomme sa bone e le sa ntšhu. Bakerubi bao ba rotoga. E be e le tšona diphedi tšela ke bego ke ile ka di bona kua nokeng ya Kebara. Ge bakerubi ba sepela, maotwana ale a be a sepela nabo. Ge ba phurolla diphego gore ba fofe, maotwana le ona a be a kukega nabo. Ge ba ema, maotwana a be a ema, ge ba fofa, maotwana a be a kukega nabo, ka gore diphedi tšeo di be di a laola. Ke moka letago la Morena la tloga mogatong wa mojako wa Tempele la fihla la ema ka godimo ga bakerubi. Bakerubi ba phurolla diphego ba fofela godimo nna ke ba lebeletše, gomme maotwana a kukega nabo. Ba fihla ba ema lesorong la ka bohlabela la Tempele ya Morena, gomme letago la Modimo wa Israele la ba ka godimo ga bona. E be e le tšona diphedi tšela ke bego ke ile ka di bona ka fase ga Modimo wa Israele kua nokeng ya Kebara. Ka lemoga gore ke bakerubi. Mokerubi yo mongwe le yo mongwe o be a na le difahlego tše nne, le diphego tše nne, le selo se nkego ke seatla sa motho ka fase ga lephego le lengwe le le lengwe. Difahlego tša bona di be di no swana le difahlego tšela ke bego nkile ka di bona kua nokeng ya Kebara. Mokerubi yo mongwe le yo mongwe o be a sepela a eya kua a lebeletšego gona. Moya wa Morena wa nkuka wa nkiša lesorong la ka bohlabela la Tempele le le lebeletšego bohlabatšatši. Gona moo lesorong ka bona banna ba masome a mabedi le ba bahlano. Mo go bona go be go na le Jaasania, morwa wa Asure, le Pelatia, morwa wa Benaya, bona baetapele ba babedi ba setšhaba. Morena a re go nna: “Wena motho wa nama, banna ba ba lakana ka tše mpe, le gona ba fora batho mo motseng. Ba re: ‘Ga sešo ya ba nako ya go aga. Motse wo ke pitša, mme rena re nama.’ Bjale ge, wena motho wa nama, ba porofete! Ba porofete!” Ke ge ke tsenwa ke moya wa Morena, gomme Morena a ntaela gore ke botše setšhaba sa Israele ke re: “Morena o re: Ke tseba se le se bolelago le se le se naganago. Le bolaile batho ba bantši mo motseng mo e lego gore mekgotheng ke ditopo fela. “Ka gona, nna, Morena, Mong wa bohle, ke re: Motse wo ke pitša ka nnete, mme ditopo tša bao le ba rapaladitšego mo go wona ke yona nama. Ke tla le leleka mo motseng! Le tšhaba tšhoša, mme nna, Morena, Mong wa bohle, ke re ke tla le romeletša banna ba le hlasela ka ditšhoša. Ke tla le leleka mo motseng, ka le gafela diatleng tša bašele. Ke tla le otla la bolawa ka tšhoša mellwaneng ya naga ya gabolena. Ke gona le tlago tseba gore Morena ke nna. Motse wo e ka se be pitša, le lena le ka se be nama ye e lego ka pitšeng yeo. Ke tla le otla mellwaneng ya naga ya gabolena. Ke gona le tlago tseba gore ke nna Morena yo le sego la phetha melao le ditaelo tša gagwe, eupša ditlwaedi tša ditšhaba tše di bapilego le lena tšona la di latela.” Ya re ge ke sa porofeta, Pelatia, morwa wa Benaya, a hwa. Ka itahlela fase ka sefahlego, ka hlaba mokgoši ka re: “Jonna, Morena, Mong wa bohle! Na e ka ba o tlilo fediša mašaledi a Israele?” Morena a bolela le nna a re: “Wena motho wa nama, badudi ba Jerusalema ba bolela ka banabeno, le meloko yeno, le Baisraele ka moka ba re: ‘Ba tlogile ba ile kgole le Morena, gomme naga ye e filwe rena.’ “Bjale ge, botša mathopšakawena gore nna, Morena, Mong wa bohle, ke re: Ke nna ke ba rometšego kgole ditšhabeng, ka ba šwalalanya le dinaga tše dingwe. Le ge go le bjalo, ke ile ka ba bjalo ka lefelo le lekgethwa go bona dinageng tše ba ilego go tšona. “Ka gona o ba botše gore nna, Morena, Mong wa bohle, ke re: Ke tla le kgoboketša ka le ntšha ditšhabeng le dinageng tše le šwalalanyeditšwego go tšona, ka le bušetša naga ya Israele. Ge ba boa ba tla lahla medingwana le ditlwaedi tšohle tša go šišimiša mo nageng. Ke tla ba fa dipelo tše difsa le menagano ye mefsa. Ke tla ba amoga dipelo tša bona tše thata, ka ba fa dipelo tše boleta. Ke mo ba tlago phetha melao le ditaelo tša ka ka moka ka potego. E tla ba setšhaba sa ka, nna ka ba Modimo wa bona. Eupša bao ba ratago go khunamela medingwana ya bona ba phetha le ditlwaedi tša bona tša go šišimiša, ke tla ba otlela tše ba di dirilego. Ke realo, nna, Morena, Mong wa bohle.” Bakerubi bale ba thoma go fofa, gomme maotwana ale a kukega nabo. Letago la Modimo wa Israele la ba ka godimo ga bona. Letago la Morena la tlogela motse la ya thabeng ye e lego ka bohlabela bja wona. Moo ponong moya wa Modimo o ile wa nkuka wa mpušetša go mathopša kua Babilonia. Ke moka pono yeo ya timelela, gomme ka botša mathopša tšohle tše Morena a bego a mpontšhitše tšona. Morena a re go nna: “Wena motho wa nama, o agile gare ga setšhaba sa dingangele. Ba na le mahlo, fela ga ba bone selo; ba na le ditsebe, fela ga ba kwe selo, ka gobane ke dingangele. “Bjale ge, wena motho wa nama, phutha tše o di nyakago o etše lethopša, o ye bothopša e le mosegare ba go lebeletše. O tloge ga geno bjalo ka lethopša o ye felo mo gongwe ba go lebeletše. Mohlomongwe ba tla lemoga gore ke bona setšhaba sa dingangele. A e re e le mosegare ba go lebeletše o ntšhe tše o di phutheletšego go ya bothopša. E re e le mantšiboa o tšwele ka ntle ba go lebeletše, o etše bao ba yago bothopša. E re ba sa go lebeletše o phule lešoba lebotong la ntlo ya gago, o tšwe ka lona. E re ba go lebeletše o athe morwalo wa gago, mme o tšwele ntle leswiswing o ikhurumeditše mahlo gore o se bone mo o yago gona. Se o se dirago e tla be e le seka sa go lemoša setšhaba sa Israele.” Ke ile ka dira tše Morena a mpoditšego gore ke di dire. E rile e le mosegare ka ntšha morwalo wa ka wa ge ke eya bothopša. Mantšiboa ka phula lešoba lebotong ka diatla. Ka swahlane ka tšwela ka ntle, ka atha morwalo wa ka ba ntebeletše. Mosong wa le le latelago Morena a re go nna: “Wena motho wa nama, kgane setšhaba seo sa Israele sa dingangele ga se se go botšiše gore o dirang? O ba botše gore nna, Morena, Mong wa bohle, ke re: Molaetša wo ke wa go ama kgoši ye e lego kua Jerusalema le Baisraele bohle ba ba dulago gona. O ba botše gore tše o di dirilego ke sešupo sa se ba tlago se dirwa – ba tla išwa bothopša. Kgoši ye e ba bušago e tla atha morwalo wa yona leswiswing mme ya tšwa ka lešoba le ba e phuletšego lona lebotong. O tla ikhurumetša mahlo, a se bone mo a yago gona. Eupša nna ke tla mo thea ka lelokwa la ka ka mo tanya ka lona, ke moka ka mo iša motseng wa Babilone, nageng ya Babilonia, moo a tlago hwela gona a se a go bona. Bohle ba ba mo felesetšago le ba ba mo letago le madira a gagwe ka moka ke tla ba šwalalanyetša gohle lefaseng, gomme ke tla ba romela babolai gore ba ba bolaye ka tšhoša. “Ge ke ba šwalalanya le ditšhaba, ke ba phatlalatša le dinaga, ke gona ba tlago lemoga gore ke nna Morena. Ke tla dira gore tšhoša le tlala le leuba la bolwetši di phonyokgwe ke ba ba sego bakae gare ga bona, ba anegele ditšhaba tše ba ilego go tšona dilo tšohle tše di šišimišago tše ba di dirilego. Gomme le tšona di tla lemoga gore Morena ke nna.” Morena a ntaela a re: “Wena motho wa nama, o thothomele ge o eja, ge o enwa le gona o roromele ka letšhogo. O botše batho ba naga ye gore nna, Morena, Mong wa bohle, ke bolela ka badudi ba Jerusalema, nageng ya Israele, ke re ba tla thothomela ge ba eja, le ge ba enwa ba tla tšhoga, ka gobane naga ya bona e tla be e hutšwe tšohle ka baka la kgaphamadi ya batho bohle ba ba dulago moo. Metse ye bjale e dulwago e tla fedišwa, gomme naga ya fetoga lešoka; ke mo le tlago lemoga gore Morena ke nna.” Morena a re go nna: “Wena motho wa nama, ke ka baka la eng setšhaba sa Israele se touta seema se sa go re: ‘Nako e a feta, mme dipono e ba difefe’? Bjale ba botše gore nna, Morena, Mong wa bohle, ke re ke tla fediša seema seo; se ka se sa toutwa gape mo Israele. O ba botše o re: Nako e batametše ya gore pono ye nngwe le ye nngwe e tšwelele. “Setšhabeng sa Israele go ka se sa ba le dipono tša maaka, le go laola ga bofora, gobane go tla be go bolela nna, Morena, gomme se ke se bolelago se tla phethega ntle le tikatiko. Se ke tlago se bolela se tla phethega mehleng yeno ya lena, setšhaba sa dingangele. Ke realo, nna, Morena, Mong wa bohle.” Morena a re go nna: “Wena motho wa nama, setšhaba sa Israele se re: ‘Pono ye motho yo a e bonego e sa tlilo tšea nako ye telele pele e phethega; o porofeta tša nako ye e sa lego kgole.’ Ka gona o ba botše gore nna, Morena, Mong wa bohle, ke re: Ga go le se tee sa tše ke di boletšego se se sa tlilogo diega. Tše ke di bolelago di tla phethega. Ke realo, nna, Morena, Mong wa bohle.” Morena a ntaela a re: “Wena motho wa nama, kgala baprofeta ba Israele ba ba iporofetelago tša bona. E re go bona: ‘Theeletšang lentšu la Morena.’ ” Morena, Mong wa bohle, o re: “Go madimabe baprofeta ba ba ditlaela ba go iporofetela tša bona, mme ba dira tše nkego ba bona dipono. Lena setšhaba sa Israele, baprofeta ba lena ba etša diphukubje tše di tsomago dijo mašopeng. Ga se ba namela morako go thiba mo go kgeregilego; ke ka baka leo setšhaba sa Israele se ka se kgonego go šireletšwa ntweng ka Letšatši la Kahlolo la Morena. Dipono tša bona ke tša bofora, le bodupe bja bona ke maaka. Ba re ba bega molaetša wa ka, etšwe ba se ba rongwa ke nna. Le ge go le bjalo ba lebeletše gore tše ba di bolelago di tla phethega! Ke ba botšiša ke re: Kgane dipono tšeo le di bonago ga se tša bofora, le bodupe bja lena ga se maaka, ge le re ke tše di boletšwego ke nna, etšwe nna ke se ka bolela le lena?” Ka gona Morena, Mong wa bohle, o re go bona: “Ka ge dipolelo tša lena e le tša bofora, le dipono tša lena e le tša maaka, ke lwa le lena. Ke tlilo otla lena baprofeta ba le bonago dipono tša bofora le gona le radiago batho ka bodupe bja maaka. Le ka se dumelelwe go tla pitšong ya setšhaba sa ka; maina a lena a ka se ngwalwe le a badudi ba Israele; le ka se sa tsoga le boetše nageng ya Israele. Ke gona le tlago lemoga gore Morena, Mong wa bohle, ke nna. “Tšeo di tla le hlagela ka ge baprofeta ba timetša setšhaba sa ka ka go se botša gore tšohle di lokile, etšwe go se go loke selo. Go bjalo ka ge nke setšhaba sa ka se re go aga leboto baprofeta ba ba tla ba le dila ka motaga wo o kgobogago. O botše baprofeta bao gore leboto leo la bona le tlilo wa. Go tla na pula ya matlorotloro, gwa na le sefako, le ledimo la tšubutla. Leboto leo le tla kgerega, gomme a ke re batho ba tla le botšiša gore mohola wa motaga e bile eng?” Bjale Morena, Mong wa bohle, o re: “Ke tla tšubutliša ledimo ke galefile, ka neša pula ya matlorotloro le sefako ke befetšwe, gore di kgereše leboto leo. Ke tla thuba leboto leo ba le ditšego ka motaga ka le kgereša, motheo wa lona wa šala kgakala. Le tla le wela la le bolaya bohle. Ke mo le tlago lemoga gore Morena ke nna. “Ke tla itefeletša ka leboto leo le ka bao ba le ditšego ka motaga. Ya ba gona ke le botšago gore leboto lela ga le sa le gona mmogo le bale ba le ditšego, e lego baprofeta bale ba Israele ba ilego ba porofetela Jerusalema, ba bona dipono tša gore tšohle di tla e lokela, etšwe go ka se loke selo.” O realo, Morena, Mong wa bohle. Morena a re: “Bjale, wena motho wa nama, lebelela basadi ba ba iporofetelago tša bona gare ga setšhaba sa geno. Ba kgale, gomme o ba botše se Morena, Mong wa bohle, a se bolelago a re: “ ‘Le madimabe, basadi tenang, le rokelelago maseka a boloi matsogong a bohle, le ba rokelago le dikuane tša boloi go ya ka bogolo bja dihlogo tša bona, gore le ba tanye. Kgane le nyaka go tanya setšhaba sa ka mola lena le ipabalela? Le ntlhompholla pele ga setšhaba sa ka le gabile go hwetša magoswi a se makae a garase le marathana a se makae a senkgwa. Le bolaya batho ba ba sego ba swanela go bolawa, la lesa ba ba sego ba swanela go phela. Seo le se dira ka go fora setšhaba sa ka se se ratago go theeletša maaka.’ ” Morena, Mong wa bohle, o re: “Ke hloile maseka ao le tanyago batho ka ona mo nkego ke dinonyana. Ke tla a kgaola mo matsogong a lena, ka tanyolla batho bao le bego le ba tantše bjalo ka dinonyana. Ke tla phamola dikuane tšeo le di roketšego setšhaba sa ka, ka se hlakodiša go lena gore le se sa se kgona. Ke gona le tlago lemoga gore ke nna Morena. “Ka maaka a lena le fetša baloki maatla, bao nna ke sa ratego go ba nyamiša. Le kgothaleditše bakgopo go phegelela go dira tše kgopo, mme ba se sa iphološa. Bjale ge, dipono tšela tša lena tša bofora le ka se sa di bona, le go laola le ka se sa laola, ka gobane ke tla hlakodiša setšhaba sa ka go lena. Ke gona le tlago lemoga gore Morena ke nna.” Bagolo ba bangwe ba Baisraele ba ile ba tla go nna ba fihla ba dula pele ga ka. Ke moka Morena a re go nna: “Wena motho wa nama, banna bao ba ikgafetše medingwana, ba dula ba nagana ka yona, gomme e ba diriša sebe. Bjale na nka napa ka dumela go ba eletša? “Ba botše seo nna, Morena, Mong wa bohle, ke se bolelago ke re: Moisraele yo mongwe le yo mongwe yo a ikgafetšego medingwana, a dula a nagana ka yona gomme e mo diriša sebe, gomme ka morago a tle a kgopele maele go moprofeta, o tla arabja ke nna – a arabja ka karabo ye e lebanego medingwana ya gagwe ye mentši. Medingwana ya setšhaba sa Israele e dirile gore setšhaba se mphuralele, eupša ge ke ba arabile ke holofela gore ba tla boa ba mpotegela. “Bjale ge, botša setšhaba sa Israele se nna, Morena, Mong wa bohle, ke se bolelago ke re: Sokologang, le tlogele medingwana yeo ya lena, le furalele le tšohle tša go šišimiša tše le di dirago. “Ge yo mongwe wa setšhaba sa Israele goba mofaladi yo a dulago nageng ya Israele a ka ikaroganya le nna a ikgafela medingwana, a dula a nagana ka yona, ya mo diriša sebe, gomme ka morago a ya go moprofeta go kgopela maele go Morena ka yena, o tla fetolwa ke nna, Morena, ka bonna. Ke tla mo lwantšha, ka mo rutela ba bantši, ka mo phara seka. Ke tla mo kgaola setšhabeng sa ka, gore le tle le lemoge gore Morena ke nna. “Ge moprofeta yo a ka forwa mme a fetola ka mokgwa wo o fošagetšego, e tla be e le ka gobane a forilwe ke nna, Morena. Ke tla mo fediša setšhabeng sa ka sa Israele. Moprofeta mmogo le yoo a ka kgopelago maele go yena ba tla otlwa, ba otlwa ka kotlo e tee. Seo ke tla be ke se direla gore setšhaba sa Israele se se sa aroga go nna, goba sa itšhilafatša ka dibe tša sona. Ke mo bona e tlago ba setšhaba sa ka, mme nna ka ba Modimo wa bona.” O realo, Morena, Mong wa bohle. Morena a re go nna: “Wena motho wa nama, ge badudi ba naga ye ba ka mphošetša ka go se mpotegele, ke tla ba otla ka go fediša dijo tša yona, ka bolaiša badudi ba yona tlala, ka gagara batho le diphoofolo tša yona. Le ge banna bale ba bararo, Noa, Daniele le Jobo ba ka be ba dula moo, go loka ga bona go be go tla phološa bona beng fela.” O realo, Morena, Mong wa bohle. “Le ge nka romela dibata tša gerema le naga tša bolaya batho, mme naga ya fetoga lešoka gwa se be le motho yo a fetago mo go yona ka baka la tšona, gomme le ge banna bao ba bararo ba ka be ba dula moo, ke ikana ke le Morena, Mong wa bohle, Modimo yo a phelago, gore ba be ba ka se kgone le go phološa barwa le barwedi ba bona. Go be go tla iphološa fela bona beng, mme naga yona ya fetoga lešoka. “Le ge nka no tsoša ntwa nageng yeo, mme ka re badudi bohle ba naga ye ba bolawe ka tšhoša, ka gagara batho le diphoofolo tša gona, le ge banna bao ba bararo ba ka be ba dula moo, ke ikana ke le Morena, Mong wa bohle, Modimo yo a phelago, gore ba be ba ka se kgone le go phološa barwa le barwedi ba bona. Go be go tla iphološa fela bona beng. “Ge nka romela leuba la bolwetši nageng yeo, ka bolaya batho ba bantši ke galefile, ka gagara batho le diphoofolo, le ge Noa, Daniele le Jobo ba ka be ba dula moo, ke ikana ke le Morena, Mong wa bohle, Modimo yo a phelago, gore ba be ba ka se kgone le go phološa barwa le barwedi ba bona. Go loka ga bona go be go tla phološa fela bona beng.” Morena, Mong wa bohle, o re: “Le ge Jerusalema nka e romela dikotlo tša ka tše nne tše di šiišago, e lego ntwa, tlala, dibata, le leuba la bolwetši gore di gagare batho le diphoofolo, mašaledi a tla no ba gona, e lego masogana le makgarebe, ba ba tlago ntšhwa mo motseng. Ba tla tla go lena, gomme e tla re ge le bona maitshwaro le mediro ya bona, la kgothatšega mabapi le masetlapelo ohle a ke a tlišeditšego Jerusalema. Le tla kgothatšega ge le bona maitshwaro le mediro ya bona, gobane le tla be le tseba gore tše ke e dirilego tšona ke di dirile ka lebaka.” O realo, Morena, Mong wa bohle. Morena a re go nna: “Wena motho wa nama, na kota ya morara e phala ya mehlare ya sethokgwa ka eng? Ke ra lekala la morara ge le bapetšwa le la mehlare ye mengwe ya sethokgwa. Na go na le se se ka dirwago ka yona? Ešita le lona lemapolo le la lešidi la go fega dilo, na le ka dirwa? Gape sa kota ye ke go ba legong la mollo. Gomme ge e swele dintlha, le bogareng bja yona e fišitšwe, na go na le se se ka dirwago ka yona? Etse le ge e sešo ya swa ga e na mohola. Bjale ge e šetše e llwe ke mollo mme e swele, gona e ka hlwa e sa holang!” Bjale ge, Morena, Mong wa bohle, o re: “Bjalo ka ge mo gare ga mehlare ya sethokgwa morara ke o dirile gore kota ya wona e lokele fela go ba legong la mollo, badudi ba Jerusalema le bona ke tla ba dira bjalo. Ke tla ba otla. Ba phonyokgile mollo wa mathomo, eupša wa bobedi o sa tlilo ba tšhuma. Mohla ke ba otla le tla lemoga gore ke nna Morena. Ba be ba sa mpotegele, ka gona naga ya bona ke tla e fetoša lešoka.” O realo, Morena, Mong wa bohle. Morena a ntaele a re: “Wena motho wa nama, bontšha Jerusalema tše di šišimišago tše e di dirilego. Botša Jerusalema gore Morena, Mong wa bohle, o re go yona: “ ‘O tšwa lefaseng la Kanana mo o tswaletšwego gona. Tatago e be e le Moamore, mmago e le Mohete. Ge o seno belegwa ga go yo a ilego a go ripa kalana, goba a go hlapiša gore o hlweke, goba a go šidila ka letswai, goba a go phuthela ka mašela. Ga go yo a ilego a go kwela bohloko a go direla se sengwenyana sa dilo tšeo ka go go šokela. Ge o seno belegwa batswadi ba gago ba ile ba go šišingwa, ba go lahla nageng. “ ‘Ya re ge ke feta ka go bona o ragaraga ka gare ga madi a gago. O be o thankgetše madi, eupša ka se go lese o ehwa. Ka go godiša bjalo ka semela sa lešoka. Wa gola wa tielela, wa ba wa fihla lehlapong. Wa thoka matswele, wa tšwa le matsa, fela o be o ponapona. “ ‘Ya re ge ke feta gape ka bona o le yo a loketšego go nyalwa. Ka go apeša kobo ya ka ka ge o be o le fela, mme ka ikanela wena, ka itlemaganya le wena ka lenyalo, wa ba wa ka.’ ” O realo, Morena, Mong wa bohle. “Ke moka ka tšea meetse ka go hlapiša, ka go tloša madi ale. Ka go tlotša ka makhura a mohlware. Ka go apeša diaparo tša mebalabala, ka ba ka go rweša dieta tša letlalo le lebotse, le lešela le boletiana hlogong, le seaparo sa silika. Ka go hlama ka dikgabišo, ka go apeša maseka matsogong, le dipheta molaleng. Ka go rweša lengina la nko, le mangina a ditsebe, le kgare ye botse. O be o kgabile ka dikgabišo tša gauta le tša silibera, le diaparo o be o apara tša lešela le boletiana le tša silika ya mebalabala, o eja dinkgwa tša bupi bja mathume, le todi, le makhura a mohlware. Wa ba yo mobotse kudu, wa go ka ba mohumagadi. O ile wa tuma ditšhabeng tšohle ka botse bja gago bjo bo phethegilego, ka gobane ke nna yo ke bego ke go dirile gore o be yo mobotse ka mokgwa woo.” O realo, Morena, Mong wa bohle. “Eupša wena o ile wa bota botse bja gago, setumo sa gago sa go fetola sefebe, wa ikgafela go robala le mang le mang yo a fetago. Wa tšea tše dingwe diaparo tša gago tša mebalabala wa kgabiša dintotoma tšeo go tšona o khunamelago medimo ya diswantšho, wa itira sefebe moo. Wa tšea dikgabišo tša silibera le tša gauta tše ke bego ke go file tšona, wa dira medimo ya diswantšho ye metona ka tšona, mme wa feba le tšona. Wa tšea diaparo tšela tša gago tša mebalabala wa di apeša medimo yeo ya diswantšho, wa ba wa neela medimo yeo makhura a mohlware ao ke bego ke go file ona, le seorelo. Ke go file dijo – bupi bja mathume, makhura a mohlware, le todi – eupša wena wa di neela medimo yeo ya diswantšho gore e natefelwe ke monkgo wo mobose wa tšona. Go bile bjalo.” O realo, Morena, Mong wa bohle. “Wa ba wa tšea barwa le barwedi ba o bego o mpelegetše bona wa ba hlabela medimo yeo ya diswantšho gore e be dijo tša yona. Kgane bofebe e be e se bobe bjo bogolo, ge o bile o direla medimo yeo ya diswantšho sehlabelo ka bana ba ka? Ge o be o dira tšeo ka moka tša go šišimiša o itirile sefebe ga se wa ka wa gopola tša bjaneng bja gago – mola o ponapona, o ragaraga ka gare ga madi a gago.” Morena, Mong wa bohle, o re: “O yo madimabe! O yo madimabe! O dirile tše mpe tšeo ka moka mme wa tla wa ikgobelela dintotoma tša go feba le go khunamela medimo ya diswantšho mapatlelong ohle. Mathomong a tsela ye nngwe le ye nngwe o ikgobeletše dintotoma, wa goboša botse bja gago, wa fetlela mofeti yo mongwe le yo mongwe dirope, wa feba le banna ba bantši. Wa ba wa feba le Baegepeta, baagišani bale ba gago ba mapele a magolo, wa nthumola ka go atiša bofebe bja gago. “Bjale ke emišitše letsogo gore ke go otle le gore ke go fokoletše naga. Ke go gafetše diatleng tša manaba a gago, Bafilista, ba ba bego ba lešwa dihlong ke bofebe bja gago, gore ba dire se ba se ratago ka wena. “Ka ge o be o sešo wa kwelela go feba, o ile wa ipapatša go Baasiria. Wa feba nabo, eupša le bona wa se ba kwelele. Wa ba wa feba le batho ba Babilonia, naga ya bagwebi, eupša le bona ba se go kgotsofatše.” Morena, Mong wa bohle, o re: “Tšohle tše ge o be o di dira o be o di dira o tsogetšwe, o itshwere bjalo ka sefebe se se se nago dihlong. Mathomong a tsela ye nngwe le ye nngwe o be o feba, o ikgobeletše dintotoma tša go khunamela medimo ya diswantšho mapatlelong ohle. Eupša wena tefo o be o se na taba nayo, o sa etše segwebakathobalo. Mosadi wa seotswa towe! O reng o re o na le monna wa ratana le banna ba šele? Etse sa segwebakathobalo ke go fiwa dimpho, eupša wena dimpho o be o di fa dinyatsi tša gago ka moka, o di goketša gore di tle di go robale di etšwa kgole le kgauswi. Wena o segwebakathobalo sa mohuta wa sona. Ga go motho yo a go kaladitšego gore o be segwebakathobalo. Ga o lefše, ke wena o ba lefago. Owe, ga o swane le ba bangwe!” Ka gona, wena Jerusalema, sefebe towe, ekwa se Morena a se bolelago: Morena, Mong wa bohle, o re: “O ile wa ikapola diaparo wa pepentšha lepono, wa feba le dinyatsi tša gago, wa khunamela medingwana yohle ya gago ya go šišimiša, wa direla medingwana yeo dihlabelo ka bana ba gago. Ka baka leo, ke tla kgoboketša dinyatsi tšela tša gago ka moka, tšela o bego o ipshina natšo, tšela o bego o di rata, le tšela o bego o di hloile. Ke tla ba tliša go wena ba etšwa kgole le kgauswi, ke moka ka go hlobodiša diaparo gore ba go bonele. Ke tla go ahlola ka kahlolo ye e lebanego basadi ba diotswa le ba babolai, ka go otla ka lehu ke befetšwe ke bile ke hufega. Ke tla go gafela diatleng tša bona, gomme ba tla thunthunya dintotoma tšeo o febago go tšona, gape o khunamelago medimo ya diswantšho. Ba tla go tšola diaparo, ba go amoga dikgabišo tša gago, mme ba go tlogela o ponapona. “Ba tla hlohleletša lekoko gore le go otle; ba tla go bolaya ka maswika, ba ba ba go rathaganya ka ditšhoša tša bona. Ba tla tšhuma dintlo tša gago, ba go otla o bonwa ke basadi ka bontši. Ke tla go lahliša bofebe, ka go lahliša le go lefa dinyatsi tša gago. Ya ba gona kgalefo ya ka e felago, mme ka se sa tuka bogale. Nka se sa galefa goba ka hufega. O lebetše ka mo ke ilego ka go swara ka gona mola o sa le yo mofsa, gomme o nkgalefišitše ka dilo tšohle tšela o bego o di dira. Ke ka baka leo ke tlago go otlela tše o di dirilego. A ke re o okeditše ditiro tšohle tša gago tše di šišimišago ka bofebe?” O realo, Morena, Mong wa bohle. Morena o re: “Mang le mang yo a ratago dika, wena Jerusalema, o tla go hlaba ka se se rego: ‘Ngwana wa tadi o tsebja ka mereto.’ Le wena o tloga o abetše mmago yo a šišingwago monna wa gagwe le bana. O swana le banabeno ba basadi ba ba šišingwago banna le bana ba bona. Mmagolena e be e le Mohete, tatagolena e le Moamore. “Mogolwago ke Samaria ye e lego ka leboa, le metsana ya kgauswi ye e lego barwedi ba yona. Morathwago ke Sodoma ka borwa, le metsana ya kgauswi ye e lego barwedi ba yona. Ga se wa ba ekiša fela go tše ba di dirago, le mekgweng ya bona ye e šišimišago o ba ekišitše; sebakanyana o ile wa ba yo mobe le go ba feta mo go tšohle tše o bego o di dira. Ka nakonyana fela o ile wa ikhwetša o dira tše mpe go feta bona. “Nna, Morena, Mong wa bohle, ke re: Ke ikana ke le Modimo yo a phelago gore Sodoma, morathwago, le metsana ya kgauswi le yona ga se ya ka ya dira tše wena le metsana ya kgauswi le wena le di dirilego. Sebe sa ngwaneno, Sodoma, le barwedi ba gagwe e bile makoko le bojagobe le go se šetše – ba be ba sa thuše badiidi le bahloki ka selo. Ge ba ikgantšha, ba dira tše di šišimišago ke ile ka ba fediša, bjalo ka ge le wena o tseba gabotse. “Samaria ga se ya dira dibe, le ge e le seripagare sa tše di dirilwego ke wena. Wena o dirile tše dintši tša go šišimiša go feta yona. Tšohle tša go šišimiša tše di dirilwego ke wena o di dirile mo banabeno, Samaria le Sodoma, ba ilego ba bonala nke ga ba na molato. Bjale ge, inyatše ka ge o emelela banabeno. Ka ge dibe tša gago di šišimiša go feta tša bona, bona ba bonala ba lokile go phala wena. Ka gona, inyatše, o swabe, gobane o dirile nke banabeno ba lokile.” Morena o re go Jerusalema: “Ke tla atla Sodoma le metsana ya kgauswi le yona gape, le Samaria le metsana ya kgauswi le yona; le wena ke tla go atla gape, gore o inyatše gape o swabele tšohle tše o di dirilego, e be gona go homotša bana bao beno. Banabeno, Samaria le Sodoma, gotee le metsana ya kgauswi le bona, ba tla iketla gape, le wena le metsana ya kgauswi le wena le tla iketla gape. A ke re o be o phara Sodoma dika mehleng yela ya ge o ikgantšha, le ya pele ga ge tše mpe tše o bego o di dira di utollwa? Bjale o swana nayo ge – o lehlapa la Baedomo, le la Bafilista, le la baagišani ba gago ba bangwe ba ba go nyatšago. Yo a swanetšego go otlelwa bohlola le tše di šišimišago tše a di dirilego, ke wena.” O realo, Morena. Morena, Mong wa bohle, o re: “Ke tla go swara ka mo o swanelago ka gona, ka gobane o nyaditše keno yela ya gago go nna, wa tlemologanya lenyalo la ka le wena. Eupša ke tla gopola kgwerano ye ke e dirilego nago mola o sa le yo mofsa, gomme ke tla dira kgwerano le wena ya go ya go ile. Ke mo o tlago elelwa ka mo o ilego wa dira ka gona, gomme wa inyatša ge ke tšea mogolwago le morathwago ke go fa bona e eba barwedi ba gago, le ge seo e se se nna le wena re dirilego kgwerano ka sona. Ke tla tsošološa kgwerano ya ka le wena, gomme o tla tseba gore Morena ke nna. E tla re ge ke go swarela diphošo tša gago tšohle, wa gopola mme wa inyatša, wa hlokišwa molomo ge o ipona kgobogo.” O realo, Morena, Mong wa bohle. Morena a re go nna: “Wena motho wa nama, hlabela setšhaba sa Israele nyepo, o se botše ka go se swantšhetša. Ba botše gore nna, Morena, Mong wa bohle, ke re: Ntšhu ye kgolo ya maphego a magolo a matelele le mafofa a mantši a mebalabala e kile ya tla ya kotama dithabeng tša Lebanone. Ya roba kalana ya ka godimodimo ya mosedere. Ya kga letlakala la ntlheng la wona ya le iša nageng ya kgwebo, ya le bea motseng wa bagwebi. Ke moka ya tšea semelana nageng ya Israele ya se bjala tšhemong ye e nonnego. Ya se bjala bjalo ka motswapitswapi kgauswi le moela wa meetse a mantši. Semelana seo sa hloga, sa gola gabotse, ya ba morara, fela wa se golele godimo. Makala a wona a lelalela ntšhung yela, medu yona ya sobelela fase. Ya ba morara, wa hloga dikala le dikalana. “Gwa ba le ye nngwe ntšhu ye kgolo ya diphego tše dikgolo le mafofa a mantši. Bjale morara wa medišetša medu ya wona go ntšhu yela, wa lebiša le makala a wona go yona, gore e o nošetše ka meetse a go feta ao a bego a le ka serapeng seo morara o bego o metše ka go sona. Eupša morara o be o šetše o bjetšwe ka tšhemong ye e nonnego, kgauswi le moela wa meetse a mantši, gore morara o tle o hloge makala, o enywe, mme e be wo o kgahlišago. “Ka gona, nna, Morena, Mong wa bohle, ke a botšiša ke re: Afa morara wo o tla atlega? Na ntšhu ya mathomo e ka se o tumole ka medu, ya hlohlora dikenywa, matlakala ohle a a hlogago a pona? Go o tumola go ka se nyake maatla a mantši goba setšhaba. Go bjalwa gona o bjetšwe, eupša na o tla atlega? Na o ka se pone ge o bethwa ke phefo ya bohlabela? Afa o ka se ponele ka moo serapeng se o metšego ka go sona?” Morena a re go nna: “Botšiša setšhaba seo sa dingangele ge eba se tseba se seswantšho seo se se šupago. O ba botše gore kgoši ya Babilonia o ile a tla Jerusalema, a thopa kgoši le bakgomana ba yona a ba iša Babilonia. A tšea yo mongwe wa leloko la kgoši, a kwana le yena, mme a mo eniša a re a mmotegele. A tšea le bagolo ba setšhaba ba naga yeo a ba dira mathopša. Tšeo o be a di direla gore setšhaba se se sa mo nyatša sa mo tsogela maatla, le gore kwano yeo e hlompšhe. Eupša kgoši ya Juda ya mo tsogela maatla mme ya roma batseta Egepeta go yo kgopela gore ba thušwe ka dipere le madira a mantši. Na e ka ba o tla tšwelela? Na wa go dira tše bjalo a ka phonyokga? Na a ka re a tshetše kwano a se otlwe? “Nna, Morena, Mong wa bohle, ke re: Ke ikana ke le Modimo yo a phelago gore kgoši ya Juda e tla hwela Babilonia, nageng ya kgoši ye e mmeilego kgoši, yona ye a nyaditšego keno ya yona gape a tshetšego kwano ye a e dirilego le yona. Ešita le kgoši ya Egepeta ka madira a yona a maatla le bahlabani ba bantši a ka se mo thuše ntweng, ge Bababilonia ba dikanetša Jerusalema ka mokgobo wa mobu le ka dithubamaboto, gore ba tle ba bolaye batho ba bantši. O nyaditše keno ya gagwe ka go tshela kwano ye a bego a ikanetše yona. O dirile dilo tše ka moka, gomme bjale a ka napa a se otlwe?” Morena, Mong wa bohle, o re: “Ke ikana ke le Modimo yo a phelago gore ke tla mo otlela go nyatša keno ye a nkenetšego yona, le go se phethe tše a kwanego le nna ka tšona. Ke tla mo rea ka lelokwa ka mo tanya ka lona. Ke tla mo iša Babilonia ka mo otla gona, ka gobane ga se a mpotegela. Bagale ba gagwe ba tla bolawa ka tšhoša, gomme mašaledi a šwalalanyetšwa mathokong ohle. Ke mo le tlago lemoga gore go boletše nna, Morena.” Morena, Mong wa bohle, o re: “Nna ke tla kga lehlogedi dikaleng tša ka godimodimo tša mosedere wo motelele, ka roba lekalana la wona le boletiana, ka le hloma godimo ga thaba ye telele, ye e phagamego. Ke tla le hloma thabeng ye teleletelele ya Israele. Le tla hloga makala, la enywa dikenywa, ya ba mosedere wo mobotse. Dinonyana tša mehutahuta di tla phela moo mme tša dula moriting wa makala a wona. Mehlare yohle ya naga e tla tseba gore Morena ke nna. Ke rema mohlare wo motelele, wo mokopana ka o telefatša. Ke pontšha mohlare wo motala, wo o ponnego ka o hlogiša. Ke realo, nna, Morena, gomme ke tla phetha bjalo.” Morena a re go nna: “Na ke seema mang se batho ba felago ba se hlaba ba re: “ ‘Botatagobana ba lle diterebe tše bodila, meno gwa šia a bana’?” Morena, Mong wa bohle, o re: “Ke ikana ke le Modimo yo a phelago, gore le ka se sa hlaba seema se mo setšhabeng sa Israele. Bophelo bja motho yo mongwe le yo mongwe ke bja ka, bo laolwa ke nna, bja tatagongwana le bja yena ngwana. Motho wa go dira dibe ke yena a tlago hwa. “Yo a ratago go phetha thato ya ka ka mehla o sepela ka molao, mme o dira tše di lokilego. Ga a je dijo tša didimo tša dithabeng goba a khunamela medingwana ya diswantšho ya Baisraele. Ga a tšhilafatše mosadi wa monna yo mongwe ka go otswa le yena, goba a robala le mosadi yo a bonego kgwedi. Ga a gatelele motho; o bušetša moadingwa se moadingwa a bego a beeleditše ka sona; ga a utswetše batho; o fa ba ba swerwego ke tlala dijo, le gona o apeša ba ba se nego diaparo. Ga a adime motho tšhelete ka go e tswadiša. O a itshwara gore a se dire tše mpe, gomme tshekong ga a ahlole ka go kgetholla. Motho yo mobjalo o hlompha melao ya ka gomme o phetha ditaelo tša ka gabotse. O lokile gomme ruri o tla phela.” O realo, Morena, Mong wa bohle. “Eupša motho yo mobjalo a ka no ba le morwa yo e lego mohlakodi le mmolai, yo a dirago se sengwe sa dilo ka moka tšela tatagwe a sego a ka a di dira. O ja dijo tša didimo tša dithabeng, goba o tšhilafatša mosadi wa monna yo mongwe ka go otswa le yena, o gatelela badiidi le bahloki, o a hlakola goba ga a bušetše moadingwa se a mo swaretšego sona. O dira dilo tša makgapha, goba o adima batho tšhelete ka go e tswadiša. Na o tla phela? Aowaa, a ka se ke. Ge a dirile makgapha ao gona o tla hwa. E tla be e le moipolai yo a sa llelwego. “Morwa yoo le yena a ka ba le morwa yo a bonago dibe ka moka tše tatagwe a bego a di dira, fela yena a se di dire. A se je dijo tša didimo tša dithabeng goba a khunamela medingwana ya diswantšho ya Baisraele. A se tšhilafatše mosadi wa monna yo mongwe ka go otswa le yena, goba a gatelela motho, goba a se bušetše moadingwa se a mo swaretšego sona. A se hlakole batho, eupša a fa ba ba swerwego ke tlala dijo, le gona a apeša ba ba se nego diaparo. A itshwara gore a se dire tše mpe, le gona a se adime motho tšhelete ka go e tswadiša. A latela melao ya ka a ba a phetha le ditaelo tša ka. A ka se hwe ka baka la bokgopo bja tatagwe, eupša ka nnete o tla phela. Tatagwe yena o be a gatelela batho, a bile a ba hlakola, gomme a dira batho ba gabo tše mpe. Ka gona o tla hwa ka baka la tša gagwe dibe. “Eupša lena le a botšiša le re: ‘Na morwa yo o reng a sa otlwe ka baka la dibe tša tatagwe?’ Ke ka baka la gore morwa yo o be a dira tše di lokilego le tše di nkgahlago. O be a phetha melao ya ka mme a e latela; ka baka leo ruri o tla phela. Go tla hwa yo a dirago dibe. Morwa wa motho a ka se otlwe ka baka la dibe tša tatagwe, goba tatagomotho a otlwa ka baka la dibe tša morwagwe. Moloki o tla putsetšwa boloki bja gagwe, le yo kgopo o tla otlelwa bokgopo bja gagwe. “Ge yo kgopo a ka tlogela dibe tša gagwe tšohle, mme a phetha melao ya ka, ge a ka dira tše di lokilego le tše di nkgahlago, a ka se hwe; ruri, o tla phela. O tla lebalelwa dibe tša gagwe ka moka; o tla phela ka ge a dirile tše di lokilego. Nna, Morena, Mong wa bohle, ke re: Kgane le gopola gore ke kgahlwa ke lehu la yo kgopo? Aowaa, ke kgahlwa ke ge a ka tlogela ditsela tše mpe mme a phela. “Eupša ge moloki a ka tlogela go dira tše di lokilego gomme a thoma go dira tše kgopo, e lego makgapha ohle ao a dirwago ke bakgopo, na o tla fela a phela? Le gatee! Boloki bjohle bjo a bo dirilego bo ka se gopolwe. O tla hwa ka baka la go se botege ga gagwe le dibe tša gagwe. “Eupša lena le re: ‘Tše Morena a di dirago ga se tša loka.’ Ntheeletšeng, lena setšhaba sa Israele. Kgane tše ke di dirago ga se tša loka? Na tše di sego tša loka ga se tše di dirwago ke lena? Ge moloki a tlogela go dira tše di lokilego, a thoma go dira tše kgopo, mme a hwa, o hwa ka baka la tše kgopo tše a di dirilego. Ge yo kgopo a tlogela go dira dibe mme a dira tše di lokilego le tše di nkgahlago, o a iphološa. O lemoga tše a di dirago mme a tlogela go dira dibe. Ka gona ruri o tla phela, a ka se hwe. Gomme lena setšhaba sa Israele le re: ‘Tše Morena a di dirago ga se tša loka.’ Kgane le gopola gore ke nnete tše ke di dirago ga se tša loka? Na tše di sego tša loka ga se tše di dirwago ke lena? “Bjale nna, Morena, Mong wa bohle, ke tla ahlola yo mongwe le yo mongwe wa lena, setšhaba sa Israele, ka tše a di dirilego. Sokologang le tlogele dibe tšohle tše le di dirago, gore di se le iše tahlegong. Lahlang dibe tše le bego le di dira, le beng le dipelo tše difsa le menagano ye mefsa. Ke ka baka lang le nyaka go hwa, lena setšhaba sa Israele? Nna, Morena, Mong wa bohle, ke re: Ga ke kgahlwe ke ge motho a ehwa. Ka gona tlogelang dibe tša lena mme le phele.” “Hlaba mokgoši o llele babuši ba Israele o re: “Mmago e be e se ge e le tau ya tshadi ditaung! A patlama le ditau a godiša tawana tša gagwe. A lela ye nngwe ya tawana tša gagwe, ya gola ya ba tau ya lesogana, ya ithuta go tsoma, ya ba sejabatho. Ditšhaba tša kwa ka ga yona, mme tša e thea ka molete; tša e goga ka segalanko tša e iša Egepeta. Ya re ge e bona gore e paletšwe le lehutšo le fedile, ya tšea ye nngwe ya ditawana tša yona, ya e godiša ya ba tau ya lesogana. Ya re ge e godile go iphetša, ya šika le ditau tše dingwe. Le yona ya ithuta go tsoma, ya ba sejabatho. Ya hlahlamolla dibo tša bona, ya thuba metse ya bona. Ge e rora badudi bohle ba naga ba be ba swarwa ke letšhogo. Ditšhaba tša go tšwa dileteng tše di bapelanego tša bokanela go e hlasela. Ba e rea ka lelokwa la bona, ba e tanya ka moleteng. Ba e goga ka segalanko ba e tsenya ka lešakeng, ba tla ba e iša go kgoši ya Babilonia. Ba dula ba e letile, gore go rora ga yona go se sa tsoga go kwagetše dithabeng tša Israele. “Mmago o be a etša morara wo o bjetšwego kgauswi le moela ka serapeng sa merara. O be o entšwe kudu, o nabile, ka ge meetse e be e le maphaaphaa. Makala a wona a be a tiile, mme go dirwa melamo ya bogoši ka ona. Morara woo wa letla go fihla marung; o bonala ka botelele le makala a wona a mantši. Eupša mothotsoko a o tumola a galefile a o lahlela fase. Phefo ya bohlabatšatši ya o pontšha, dikenywa tša wona tša hlohlorega. Lekala la wona la go tia la omelela, la bešwa mollong. Morara woo bjale o hlabolotšwe wa bjalwa leganateng, nageng ya lesehla. Gwa tsupologa mollo kutung ya morara woo, wa tšhuma makala le dikenywa. Ga o sa ne makala a go tia, a go dira melamo ya bogoši. “Ke wona mokgoši wa sello, gomme o swanetše go hlabja ka tlhokofalo.” Ka letšatši la lesome la kgwedi ya bohlano ya ngwaga wa bošupa wa ge re le mathopša, bagolo ba bangwe ba setšhaba sa Israele ba ile ba tla ba kgopela maele go Morena, gomme ba fihla ba dula fase pele ga ka. Ke moka Morena a ntaela a re: “Wena motho wa nama, botša bagolo ba ba setšhaba gore nna, Morena, Mong wa bohle, ke re: A ke re le tlile go kgopela maele go nna? Fela nna, Morena, Mong wa bohle, ke ikana ke le Modimo yo a phelago gore nka se kgopelwe ke lena maele. “Na o itokišeditše go ba ahlola, wena motho wa nama? O itokišeditše go ba ahlola? Gona o ba gopotše tša go šišimiša tšela borakgolokhukhu ba bona ba bego ba di dira. O ba botše gore nna, Morena, Mong wa bohle, ke re: Mohla wola ke kgetha Baisraele ke ile ka ikana go ditlogolo tša Jakobo ke emišitše letsogo, ka ikutollela bona kua nageng ya Egepeta. Ka ba botša ke emišitše letsogo ka re: Ke nna Morena Modimo wa lena. Mohlang woo ke ile ka ikana go bona gore ke tla ba ntšha nageng ya Egepeta ka ba iša nageng ye ke ba nyaketšego yona, naga ya mokhora le monono, ya go di phala ka moka. Ka re go bona: Ka moka ga lena lahlang medimo yeo ya diswantšho ya go šišimiša ye le e botilego, le gona le se ke la itšhilafatša ka medingwana yeo ya Egepeta; Morena Modimo wa lena ke nna. Eupša bona ba ngangabala, ba gana go ntheeletša. Gwa se be le o tee yo a lahlago medimo ya gagwe ya go šišimiša ya diswantšho ye ba bego ba e botile, goba yo a lesago go khunamela medingwana ya Egepeta. Ke mo ke ilego ka nagana go tšhollela bogale bja ka godimo ga bona le go ba gakalela ka kgalefo ya ka gona kua Egepeta. Eupša ka se dire bjalo, ka gobane ke be ke tla ikgoboša ditšhabeng tše ba bego ba phela gare ga tšona, tšeo ke itsebagaditšego go Baisraele di mpona ka go ba ntšha nageng ya Egepeta. “Ka gona ke ile ka ba ntšha nageng ya Egepeta ka ba iša lešokeng la Sinai. Ka ba fa melao ya ka, ka ba ka ba begela ditaelo tša ka tše di phedišago yo a di phethago. Godimo ga moo ke ile ka ba fa le matšatši a Disabatha tša ka e le seka sa kgwerano ya ka le bona, gore ba tsebe ge e le nna, Morena, ke ba kgethwafatšago. Eupša le gona kua lešokeng setšhaba sa Israele se ile sa nngangabalela. Ba se phethe melao ya ka, ba gana le go phetha ditaelo tša ka tše di phedišago yo a di phethago. Ba nyatša matšatši a Disabatha tša ka. Ke mo ke ilego ka nagana go tšhollela bogale bja ka godimo ga bona, le go ba gakalela ka kgalefo ya ka kua lešokeng ka ba fediša. Eupša ka se dire bjalo, ka gobane ke be ke tla ikgoboša ditšhabeng tše di bego di mpone ge ke ntšha Baisraele Egepeta. Le ge go le bjalo, ka ikana go bona kua lešokeng gore nka se ba iše nageng yela ke ba filego yona, naga ya mokhora le monono, ya go di phala ka moka. Ke ikanne bjalo, ka gore ba be ba ganne go phetha ditaelo tša ka le melao ya ka, ba nyaditše le matšatši a Disabatha tša ka – ba kganyoga go khunamela medingwana ya bona. “Le ge go le bjalo, ka ba šokela ka se ba bolaye, ka se ba fediše kua lešokeng. Ka re go bana ba bona kua lešokeng: Le se ke la phetha melao le ditaelo tša borakgolokhukhu ba lena, goba la itšhilafatša ka medingwana ya bona. Ke nna Morena Modimo wa lena; le phethe melao ya ka le ditaelo tša ka. Le kgethwafatše matšatši a Disabatha tša ka, gore e tle e be seka sa kgwerano ya ka le lena, gore le tsebe ge nna, Morena, ke le Modimo wa lena. “Eupša moloko woo le wona o ile wa nngangabalela. Ba se phethe melao ya ka le ditaelo tša ka tše di phedišago yo a di phethago. Ba nyatša matšatši a Disabatha tša ka. Ke mo ke ilego ka nagana go tšhollela bogale bja ka godimo ga bona, le go ba gakalela ka kgalefo ya ka kua lešokeng. Eupša ka se dire bjalo, ka gobane ke be ke tla ikgoboša ditšhabeng tše di bego di mpone ge ke ntšha Baisraele nageng ya Egepeta. Godimo ga moo ka ikana go bona kua lešokeng gore ke tla ba šwalalanya le ditšhaba, ka ba phatlalatša le dinaga, ka gore ba be ba gana go phetha ditaelo tša ka, le melao ya ka, ba nyaditše le matšatši a Disabatha tša ka, mme ba kganyoga go khunamela medingwana ya borakgolokhukhu ba bona. “Ke ka baka leo ke ba filego melao ye e sego ya loka le ditaelo tše di sa ba phedišego. Ka ba lesa ba itšhilafatša ka dikabelo tša bona, ka ba ka ba lesa ba dira dihlabelo ka barwa bohle ba bona ba maitšibolo gore ke ba tšhoše. Ke mo ba tlago lemoga gore ke nna Morena. “Bjale ge, wena motho wa nama, botša setšhaba sa Israele gore nna, Morena, Mong wa bohle, ke re: Wo ke mokgwa wo mongwe wo borakgolokhukhu ba lena ba nnyefotšego ka wona ka go se botege ga bona. Ke ba išitše nageng ye ke bego ke ikanne go ba fa yona. Ya re ge ba bona meboto ye e phagamego le mehlare ya matlakala a mantši ba dira dihlabelo go yona, ba mpefediša ka dikabelo tša bona. Moo ba dira dihlabelo tša monkgo wo mobose, ba tšholla dikabelo tša bona tša dino. Nna ka ba botšiša ka re: Dintotoma tše le yago go tšona tše ke dilomang? Le lehono di sa bitšwa ‘Dintotoma’. Bjale botša setšhaba sa Israele gore nna, Morena, Mong wa bohle, ke re: Le reng le itšhilafatša ka mokgwa wo borakgolokhukhu ba lena ba bego ba itšhilafatša ka wona, le arogela medimong ya bona ya go šišimiša ya diswantšho? Ka ge le be le tliša dikabelo tša lena, le dira le dihlabelo ka bana ba lena, le itšhilafaditše ka medingwana yohle ya lena go fihlela le lehono. Bjale na nka nama ka kgopelwa ke lena maele, lena setšhaba sa Israele? Nna, Morena, Mong wa bohle, ke ikana ke le Modimo yo a phelago, gore maele nka se a kgopelwe ke lena. Le re: ‘Re nyaka go etša ditšhaba tše dingwe, ra swana le batho ba ba dulago dinageng tše dingwe ba khunamelago dikota le maswika.’ Eupša se le se naganago se ka se direge.” “Nna, Morena, Mong wa bohle, ke ikana ke le Modimo yo a phelago, gore ke tla ba kgoši ya lena ka maatla a ka a magolo le bonatla ge ke se sa le galefetše. Ka maatla a ka a magolo le bonatla ke tla le ntšha ditšhabeng ka le kgoboketša dinageng tše le šwalalanyeditšwego go tšona ke se sa le galefetše. Ke tla le tliša Lešokeng la Ditšhaba, gomme moo ka le ahlola ke lebane le lena. Ke tla le ahlola bjalo ka ge ke ile ka ahlola borakgolokhukhu ba lena lešokeng la Egepeta.” O realo, Morena, Mong wa bohle. “Ke tla le hlokomela bjalo ka modiša ge a hlokomela mohlape wa gagwe, ka dira gore le botegele kgwerano. Bao ba ganago go bušwa ke nna le ba go mphošetša ke tla ba tloša mo go lena. Ke tla ba ntšha dinageng tše ba falaletšego go tšona, fela nageng ya Israele gona ba ka se boele. Ke gona le tlago lemoga gore Morena ke nna.” Morena, Mong wa bohle, o re: “Bjale ge, lena setšhaba sa Israele, ka moka ga lena le ka no tšwela pele la khunamela medingwana ya lena! Ge le sa ntheeletše, le tla nkgopola ka morago, la se sa nnyatša ka dikabelo tša lena le medingwana ya lena. Gona kua nageng ya lena, thabeng ya ka ye kgethwa, thabeng ye e phagamego ya Israele, ke mo le tlago nkhunamela gona, lena setšhaba sohle sa Israele. Le tla be le nkgahla mme ke tla nyaka gore le ntlišetše dihlabelo le dikabelo tša lena tše dibotsebotse, gotee le dimpho tša lena tše dikgethwa. Mohla ke le ntšha ditšhabeng ke le kgoboketša dinageng tše le šwalalanyeditšwego go tšona, ke tla le amogela bjalo ka ge nke le monkgo wo mobose, ka ipontšha ke le mokgethwa gare ge lena ditšhaba di ntebeletše. Mohla ke le bušetša nageng ya Israele, nageng ye ke ikannego go e fa borakgolokhukhu ba lena, ke mo le tlago lemoga gore ke nna Morena. Moo le tla gopola maitshwaro ale a lena le ditiro tšohle tše le itšhilafaditšego ka tšona. Le tla inyatša ka baka la tšohle tše mpe tše le dirilego. Mohla ke le swara ka mo go lebanego tlhomphego ya ka, e sego maitshwaro a lena a mabe le ditiro tša lena tše kgopo, ke mo lena, setšhaba sa Israele, le tlago lemoga gore ke nna Morena.” O realo, Morena, Mong wa bohle. Morena a ntaela a re: “Wena motho wa nama, lebelela borwa, o bolele o lebeletše gona, o porofete sethokgwa sa ka borwa bja naga. O botše sethokgwa seo sa ka borwa bja naga gore se kwe se Morena a se bolelago. Morena, Mong wa bohle, o re: Bonang! Ke gotša mollo ka gare ga gago wo o tlago tšhuma sehlare se sengwe le se sengwe se se lego mo go wena, se setala le sa go oma. Ga go se se kago tima kgabo ya wona ye e laumago. O tla babola bohle go tloga ka borwa go fihla ka leboa. Bohle ba tla bona gore o goditšwe ke nna, Morena, gomme o ka se tingwe ke motho.” Eupša nna ka re: “Morena, Mong wa bohle, batho ba lla ka la gore ka mehla ke bolela ka dika.” Morena a ntaela a re: “Wena motho wa nama, kgala Jerusalema. Kgalema mafelo ao batho ba khunamelago medimo ya diswantšho go ona. O porofete naga ya Israele o e botše gore nna, Morena, ke re: Ke a go lwantšha. Ke tla khwamola tšhoša ya ka ka le gagara ka moka, baloki le bakgopo. Ke tla hlaba batho bohle ka tšhoša ya ka, go tloga ka borwa go fihla ka leboa. Bohle ba tla tseba gore nna, Morena, ke khwamotše tšhoša ya ka, le gore nka se sa e khwamela. “Wena motho wa nama, golola mo nkego o hlomoga pelo. Gotla gabohloko o le mo o tlago bonwa ke batho. Ge ba go botšiša gore na o golola ka baka la eng, o ba botše gore ke ka baka la taba tše o di kwelego. E tla re ge di hlaga, bohle ba kgaoga matswalo, ba repha matsogo, ba nolega moko, ba ba ba itlhapologela ka baka la letšhogo. Nako e tlile; e šetše e fihlile.” O realo, Morena, Mong wa bohle. Morena a ntaela a re: “Wena motho wa nama, porofeta o re Morena o re: Tšhoša! Tšhoša e looditšwe ya phadimišwa! “E looleditšwe go kgebetla batho; e phadimišeditšwe go benya boka legadima. Go ka se be le lethabo, gobane setšhaba sa ka se ntlhokomologile ge ke se kgala le ge ke se otla. Tšhoša e gare e a phadimišwa, e lokišetšwa go šomišwa. E a lootšwa ya phadimišwa, e tla fiwa mmolai ka seatleng. Lla, o golole, wena motho wa nama; tšhoša ye e lebile tšhaba sa ka le baetapele ba Israele. Ba tlilo bolawa gotee le tšhaba sa ka. Ka gona, rwalang megono! Ke leka setšhaba sa ka, gomme ge ba ka hlokomologa kotlo ya ka, dilo tše ka moka di tla ba hlagela. “Bjale, wena motho wa nama, porofeta. Bethantšha diatla gore tšhoša e hlabe leboelela. Ke tšhoša ye e bolayago, tšhoša ye e kgebetlago, ye e šiišago e etšwa ka mathoko ohle. E nola setšhaba sa ka moko, ya se thekesediša ka letšhogo. Ke tla hlasela motse wa bona ka tšhoša ye e bekenyago boka legadima, ye e looleditšwego polao. Hlabela ka go la go ja le go la nngele, wena tšhoša ye bogale, hlabela ka mathoko ohle. Le nna ke tla bethantšha diatla, mme kgalefo ya ka ya kokobela. Ke realo, nna, Morena.” Morena a ntaela a re: “Wena motho wa nama, swaya ditsela tše pedi tšeo kgoši ya Babilonia e kago tšea ka tšona, e tla be e swere tšhoša. Tsela tšeo ka dipedi di tloge nageng e tee. O bee maswao moo di aroganago gona. O beele kgoši yeo leswao tseleng e tee yeo e ka mo išago motseng wa Baamone wa Raba, o tla be a swere tšhoša; ye nngwe o e swaye gore e mo iše nageng ya Juda, motseng wa Jerusalema wo o ageleditšwego ka morako. Kgoši ya Babilonia e eme mathomong a mo ditsela tšeo di aroganago gona gore a laole. O šikinya mesebe ka kgotlopong, o kgopela maele go medimo ya gagwe ya diswantšho, o lekola sebete sa seruiwa sa sedimo. Ka seatla sa la go ja o swara mosebe wo o swailwego. Wona o mo laetša gore a yo bea dithubamerako, a laele madira go hlasela, a hlabe mokgoši wa ntwa, a bee dithubamerako masorong, a kgobele mokgobo wa mobu go dikanetša motse, a age le dithala tša go o hlola. Batho ba Jerusalema ba tla gopola gore go laola moo ke ga bofora, ka gobane ba ikanne gore ba tla botegela Babilonia. Eupša ka go hlasela Jerusalema o tla ba gopotša molato wa bona mme a ba thopa. Ka gona, nna, Morena, Mong wa bohle, ke re: Ka ge le nkgopoditše melato ya lena ka go pepentšha gore le gana go bušwa ke nna, le ka go tšweletša dibe tša lena nyanyeng ka tšohle tše le di dirago, ka ge le ikgopoditše nna ka tsela ye, le tla thopša. “Hee, wena mmuši wa Israele, moilabokgethwa, rabokgopo towe, letšatši la gago le fihlile, yona nako ya mafelelo ya go otlwa ga gago. Nna, Morena, Mong wa bohle, ke re: Rola kuane ya gago, o role le mphapahlogo! Go ka se sa ba bjalo ka pele: Banyatšegi ba tla hlompšha, bahlomphegi ba nyatšwa. Lešope! Lešope! Ee, motse wo ke tla o dira lešope. La mohuta wo ga se la ka la bonwa. Eupša mohla go etla mmuši yo o mo lebanego ke tla mo fa wona.” “Wena motho wa nama, porofeta o re Morena, Mong wa bohle, o bolela ka Baamone ba ba rogago Israele o re: “ ‘Tšhoša, tšhoša e khwamoletšwe go gagara; e looleditšwe go bolaya le go bekenya bjalo ka legadima. “ ‘Dipono tšeo le di bonago ke tša maaka, le go laola ga lena ke ga bofora. Le ba babe ebile le bakgopo. Letšatši la lena le fihlile, le yona nako ya mafelelo ya go otlwa ga lena ga mafelelo. Tšhoša e tla le kgaola melala. “ ‘Khwamela tšhoša segatleng! Ke ya go le ahlola mo le hloletšwego gona, nageng ye le tswaletšwego go yona. Ke tla tšhollela kgalefo ya ka godimo ga lena, ke tla le tšhuma ka mollo wa bogale bja ka. Le gona ke tla le gafela diatleng tša banna ba sehlogo, ditsebi tša polao. Le tla fedišwa ka mollo. Madi a lena a tla tšhollwa nageng ya gabolena, gomme le ka se sa gopolwa ke motho.’ ” O realo Morena. Morena a re go nna: “Wena motho wa nama, na o itokišeditše go ahlola motse woo wa go tlala dipolao? Gona o o gopotše tšohle tša go šišimiša tše o bego o di dira. O botše motse woo gore nna, Morena, Mong wa bohle, ke re: Jonna, motse wa go itahla ka go ipolaela batho ba wona, le ka go itšhilafatša ka go itirela medingwana! O ikobetše molato ka go bolaya batho, le gona o itšhilafaditše ka medingwana ye o itiretšego yona yeo. O iphokoleditše matšatši, o fihlile mafelelong a bophelo bja gago. Ke ka baka leo ke lesitšego ditšhaba di go kwera, le dinaga tšohle di go sega. Batho ba kgole le ba kgauswi ba tla go kodutla, wena segoboga, mmameferefere towe! Bona! Baetapele bohle ba Israele ba ba agilego mo go wena ba šomišitše maatla a bona go bolaya batho. Badudi ba gago ga ba hlomphe botatagobona le bommagobona. Ba swara bafaladi gampe, ba gatelela bahlologadi le ditšhiwana. O nyaditše mafelo ao ke khunamelwago go ona, wa nyatša le matšatši a Disabatha tša ka. Badudi ba bangwe ba gago ba seba ba bangwe gore ba bolawe; ba bangwe ba ja didimo mo go khunamelwago medimo ya diswantšho dithabeng, bangwe ba dira tša bohlola. Ba bangwe ba robala le basadi ba botatagobona; bangwe ba gapeletša basadi ba ba bonego kgwedi mme ba tšhilafetše gore ba robale nabo, mme ba itšhilafatše. Ba bangwe ba dira tša maila le basadi ba bangwekabona; bangwe ba tšhilafatša dingwetši tša bona ka ditiro tša dihlong; ba bangwe ba tšhilafatša dikgaetšedi tša bona, e lego barwedi ba botatagobona. Ba bangwe ba rekwa gore ba bolaye batho; bangwe ba adima Baisraelekabona tšhelete ka go e tswadiša, bangwe ba e tswadiša go feta tekanyo; bangwe ba hlalefetša Baisraelekabona ka go ba lefiša go feta tekanyo. Nna ba ntebetše.” O realo, Morena, Mong wa bohle. “Ke bethantšha diatla ke kgotsa poelo ye e fetago tekanyo ye o ikgobokeleditšego yona, le batho ba ba bolailwego ka gare ga gago. Na mohla ke etla go go otla o tla be o sa na le sebete, moko wona o tla be o sa na le wona? Ke realo, nna, Morena, gomme ke tla phetha. Ke tla šwalalanyetša badudi ba gago ditšhabeng, ka ba phatlalatša le dinaga, gomme ke tla go hlatswa go tšhilafala ga gago. Ke tla go nyatša pele ga ditšhaba, moipolai e le wena mong, fela o tla lemoga gore Morena ke nna.” Morena a re go nna: “Wena motho wa nama, setšhaba sa Israele ga se nkhole ka selo. Ba swana le tshipi ye e lahlilwego, e lego mphiri le thini le tshipi le morodi, dilo tše di šetšego ge go hlwekišwa silibera moubelong. Ka gona, nna, Morena, Mong wa bohle, ke re go bona: Ka ge le lena le le bjalo, le se na mohola, ke tla le kgoboketša Jerusalema. Bjalo ka ge motho a kgobela silibera le mphiri le tshipi le morodi le thini moubelong, a butšwetša mollo go di tološa, le nna ke tla le kgobela ke befetšwe ebile ke galefile, ka le tsenya ka motseng ka le tološa. Ee, ke tla le kgoboketša ka le butšwetša ka kgalefo ya ka ye e tukago mollo ka le tološa ka motseng. Le tla tološwa kua Jerusalema go swana le silibera ge e tološwa moubelong, mme ke gona le tlago lemoga gore ke nna, Morena, ke tšholotšego kgalefo ya ka godimo ga lena.” Morena a re go nna: “Wena motho wa nama, botša Jerusalema o re: O swana le naga ye e sego ya nelwa ke pula ka ge ke e galefetše. Baetapele ba Jerusalema ba swana le ditau tše di bopago di gagola diphoofolo tše di di bolailego. Ba bolaya batho, ba ba amoga thoto le dilo tše bohlokwa, gomme ka dipolao tšeo tša bona ba hlola bahlologadi ba bantši. Baprista ba gona ba tshela melao ya ka ebile ba nyatša mafelo ao ke khunamelwago go ona. Ga ba kgetholle se sekgethwa go se e sego se sekgethwa. Ga ba rute batho go kgethologanya dilo tše di hlwekilego le tše di sego tša hlweka, le gona ga ba šetše matšatši a Disabatha tša ka. Ka gona ba a nnyatša. Bagolo ba gona ba swana le diphiri tše di gagolago diphoofolo tše di di bolailego. Ba bolaya batho gore ba holege ka thoto tša bona. Baprofeta ba gona ba fihlile dibe tšeo go no swana le batho ba ba kgophago leboto ka motaga. Ba bona dipono tša maaka ba ba ba ba porofetela maaka, ba re ba bolela lentšu la Morena, Mong wa bohle, mola nna, Morena, ke se ka bolela le bona. Badudi ba naga ye ba tšeela batho dilo ka kgang ba ba hlakola. Ba gatelela bahloki le bahlaki, ba tšeela le bafaladi dilo ka kgang, ba ba hlokiša toka. Ke nyakile motho yo a ka thibago morako, yo a ka emago moo go kgerešitšwego gona a šireletša naga gore ke se e fediše, fela ka mo hloka. Ka gona ka tšhollela bogale bja ka godimo ga bona, ka ba fediša ka kgalefo ya ka ye e laumago mollo. Ke ba otletše tše ba di dirilego.” O realo, Morena, Mong wa bohle. Morena a re go nna: “Wena motho wa nama, go kile gwa ba le basadi ba babedi, e le barwedi ba mosadi o tee. Mola ba sa dula Egepeta e sa le ba bafsa ba be ba itirile difebe. Gona moo ba be ba swarwa matswele, ba phopholwa ditlhoko e sa le makgarebe. Yo mogolo o be a bitšwa Ohola, mme morathwagwe e le Oholiba. Ka ba nyala ka babedi, mme ba mpelegela barwa le barwedi. Ohola ke Samaria, Oholiba ke Jerusalema. Ohola, le ge e be e le wa ka, o ile a no fela e le sefebe, gomme a duma dinyatsi tša gagwe, e lego Baasiria, bagale ba go apara diaparo tša bohwibidu bja go retela, babušiši le balaodi, ka moka ga bona e le masogana a go bopega, a go namela dipere. Yena e be e le sefebe sa ditswatswa tša masogana a Asiria, gomme a itšhilafatša ka medingwana yohle ya mang le mang yo a bego a mo duma kudu. O ile a se lahle bofebe bjo a bo thomilego kua Egepeta, mola banna ba robala naye e sa le yo mofsa, ba mo phophola ditlhoko tša matswele e sa le lekgarebe, ba mo swara bjalo ka sefebe. Ka gona nna ka mo gafela diatleng tša dinyatsi tša gagwe tša Asiria tše a bego a di duma kudu. Bona ba mo hlobodiša, ba tšea barwa le barwedi ba gagwe, yena ba mmolaya ka tšhoša. A goboga basading ka kotlo ye a otlilwego ka yona. “Oholiba, ngwanabo, le ge a di bone, yena a bela madi le go feta, mme a feba le go fetiša mogolwagwe. Le yena a duma babušiši le balaodi ba Baasiria, bagale ba go apara diaparo tša botšhepi, ba go namela dipere, bohle e le masogana a go bopega. Nna ka mmona a tšhilafetše, ka bona ka babedi ga bona ba swana ka bobe. “Fela Oholiba yena a fetiša mogolwagwe ka bofebe. E be e re ge a bona diswantšho tša banna di setilwe lebotong, tša balaodi ba Bababilonia tše di kwadilwego ka mebala ya bohwibidu bja madi, mathekeng ba itlemile ka mapanta, dihlogong ba rwele dikuane tša botšhepi, e le diswantšho tša Bababilonia bao naga ya bona e bego e le Babilonia, *** ge a di bona fela a ba dume, a rome batseta go bona kua Babilonia. Bababilonia ba tle ba robale naye, mme ba mo tšhilafatše ka bofebe bja bona. Ge a itšhilafaditše ka bona bjalo, ba thome go mo tena. Ge a ntše a sa iphihle gore ke yena sefebe, a apolela mang le mang diaparo, o ile a ntšhišimiša bjalo ka mogolwagwe. A feteletša bofebe bja gagwe ge a ntše a gopola tša mola e sa le yo mofsa, mola e le sefebe nageng ya Epepeta. A duma go robala le dinyatsi tša gagwe tša mešuka ya go lekana le ya dipokolo, tša go kunyakunyetša bjalo ka dipere tša dipoo.” Wena Oholiba, o be o ikgopotša bofebe bjola bja gago bja mola o sa le lekgarebe, mola banna ba go swara matswele, ba go phophola ditlhoko kua Egepeta. “Ka baka leo, wena Oholiba, nna, Morena, Mong wa bohle, ke re: Ke tla hlohleletša dinyatsi tša gago tšela di go tennego, ka di tliša tša go hlasela di etšwa ka mathoko ohle. Ke tla tliša Bababilonia le Bakaldea bohle, le banna ba go tšwa Pekode le Shoa le Koa le Baasiria ka moka. Ke tla kgoboketša babušiši le balaodi bohle bale ba masogana ba go bopega, le bahlankedi le bagale, ka moka e le ba go namela dipere. Ba tla go hlasela ba etšwa leboa, ba etla le madira a mantši le dikoloi tša ntwa, le dikoloi tše dingwe. Ba tla go dikanetša ba swere dithebe le dikotse, ba rwele le dikefa tša ntwa. Ke tla go gafela diatleng tša bona gore ba go otle, gomme ba tla go ahlola ka melao ya segagabobona. Ke tla go galefela, mme ka ba lesa ba go otla ba galefile. Ba tla go ripa nko le ditsebe mme ba bolaya bana ba gago ka tšhoša. Ee, ba tla go amoga barwa le barwedi, ba ba ba go tšhumela thoto. Ba tla go apola diaparo, ba go tšeela le magakabje. Ke tla fediša bononyana le bofebe bja gago bjo bo thomilego kua Egepeta. O ka se sa bo hlolosela goba wa gopola Egepeta.” Morena, Mong wa bohle, o re: “Ke tla go gafela diatleng tša batho bao o ba hloilego gape ba go tenago. Ka ge ba go hloile, ba tla go amoga tšohle tše o di šometšego. Ba tla go tlogela o le fela, wa bonelwa lepono le o bego o gweba ka lona. Bononyana le bofebe bja gago ke bjona bjo bo go hloletšego kotlo ye. O be o le sefebe sa ditšhaba, ebile o itšhilafatša ka medingwana ya bona. O be o sepela mehlaleng ya mogolwago, ka gona ke tla go fa sona senwelo sela sa kotlo ya gagwe gore o se nwe.” Morena, Mong wa bohle, o re: “O tla nwa senwelo sa mogolwago; sona ke se segolo ebile ke sa nkotopu. Bohle ba tla go kodutla ba go kwera; senwelo seo se tletše. Se tla go taga, sa go tlišetša mahlomola, sona senwelo seo sa poifo le tshenyego, senwelo sa Samaria, mogolwago. O tla nwa wa se kgaritlela, gomme ka mangetana a sona wa ingwapa matswele, ka gobane go boletše nna, Morena, Mong wa bohle.” Bjale ge, Morena, Mong wa bohle, o re: “Ka ge o ntebetše mme o mphuraletše, o tla otlelwa bononyana le bofebe bja gago.” Morena a re go nna: “Wena motho wa nama, na o itokišeditše go ahlola Ohola le Oholiba? Gona ba gopotše tša go šišimiša tše ba bego ba di dira. Ba otswitše, ba bolaile batho mme ba kgamathela madi diatleng – ba otswitše le medingwana ya bona, ba ba ba e hlabela bana ba ba mpelegetšego bona ya ba dijo tša yona. Gomme tšeo ga se moka tše ba ntirilego tšona. Ba tšhilafaditše le felo ga ka go gokgethwa, ba ba ba nyatša matšatši a Disabatha tša ka. Ka lona tšatši le ba hlabetšego medingwana ya bona bana ba bona ba tlile felong ga ka go gokgethwa mme ba go nyatša. Ke tšona tše ba di dirilego ka ntlong ye e lego ya ka. “Ntle le tšeo, ba be ba roma batseta go yo bitša banna ba go tšwa kgole, mme banna bao ba tle. Basadi bao ba babedi ba hlape mmele, ba ithakge mahlo ka pilo, ba apare le dikgabišo. Ba dule setulong sa masethesethe, mme mo pele ga sona go bewe tafola ye e lokišeditšwego go jela, ye ba bego ba beile seorelo le makhura a mohlware godimo ga yona, dilo tše ke bego ke ba file tšona. Gwa kwagala lešata la lekoko le le iketlilego, la sehlopha sa banna ba ba tlišitšwego ba etšwa lešokeng. Ba rweša basadi bao maseka matsogong le mefapahlogo ye mebotse dihlogong. Gomme nna ka pelong ka re etse mosadi yo wa go hlagatšwa ke bootswa ba mo febiša. Ba be ba robala naye. Ba be ba robala le basadi bao ba difebe, Ohola le Oholiba, bjalo ka banna ge ba robala le sefebe. Banna ba go loka bona ba tla ba bona molato wa bootswa le wa go bolaya batho, ka gobane ke diotswa le gona ba kgamathetše madi diatleng.” Morena, Mong wa bohle, o re: “Tlišang lekoko le tle le ba tšhošetše le be le ba hlakole. Lekoko leo a le ba bolaye ka maswika, le ba gagare ka ditšhoša, le ba bolaele barwa le barwedi, le be le ba tšhumele dintlo. Ke ka mo ke tlago fediša bofebe mo nageng, e le go kgala basadi bohle gore ba se febe ba etša bona. Gomme lena basadi ba babedi le tla otlelwa bofebe bja lena, le sebe sa lena sa go khunamela medingwana ya lena. Ke mo le tlago lemoga gore ke nna Morena, Mong wa bohle.” Ya re ka letšatši la lesome la kgwedi ya lesome ya ngwaga wa senyane wa ge re le mathopša Morena a re go nna: “Wena motho wa nama, ngwala gore lehono ke letšatši la bokae kgweding, ka gobane le ke letšatši leo ka lona kgoši ya Babilonia e thomago go dikanetša Jerusalema. O botše setšhaba seo sa dingangele seswantšho, o se botše gore nna, Morena, Mong wa bohle, ke re: Bea pitša sebešong. O segelele digoba tšohle tše dibotse – tša dirope le tša matsogo – o e tlaleletše ka mašetla a mabotse. O kgabelele nama ye botsebotse ya dihuswane; o bešeletše pitša kudu ka dikgong. O apee nama, o e kgabakgabiše le mašetla.” Morena, Mong wa bohle, o re: “Wo madimabe ke motse woo wa go tlala dipolao! O swana le pitša ye e rusitšego ye e sa tlogego ruse. Ntšha nama pitšeng, segoba ka se tee ka se tee o sa di kgetholle. Go kile gwa bolawa batho moo motseng, eupša madi a se tšhollelwe fase moo a bego a ka khupetšwa ka mobu; a ile a tšhollelwa letlapeng. Ke a tšholotše moo gore a se khupetšege, gore ke tle ke a lefeletše ke galefile.” Ka gona Morena, Mong wa bohle, o re: “Motse wo madimabe ke woo wa go tlala dipolao! Le nna ke tla bešeletša mollo kudu ka dikgong. Oketša dikgong, o bešeletše mollo, o butšwiše nama pherephere, moro o be o felele, le marapo a swe. Bjale bea pitša yela ya go se be le selo magaleng, gore e fiše tšhiritšhiri mo tshipi ya yona e tlago hwibila, mme mešidi le ruse ka gare tša lorela, le ge ruse yeo e ka se tloge ka moka moo kgabong ya mollo. Wena Jerusalema, mediro ya gago ya bofebe e go tšhilafaditše. Le ge ke lekile go go hlwekiša, o no šala o sa tšhilafetše. O ka se hlweke gape go fihlela ke go gakalela ka kgalefo ya ka. Ke realo, nna, Morena. Bjale nako ya gore ke go otle e fihlile. Nka se hlokomologe dibe tša gago, goba ka go šokela, le ge e le go go gaugela. O tla ahlolwa go ya ka maitshwaro a gago le ka tše o di dirilego.” O realo, Morena, Mong wa bohle. Morena a re go nna: “Wena motho wa nama, ka bonakwana ke ya go go amoga motho yo o mo ratago kudu; fela o se ke wa mo ilela goba wa mo llela, goba wa sekiša meokgo. O fegelelwe teng; o se ilele mohu; o dule o rwele kuane le dieta. O se ipipe maledu goba wa ja nama ya mogoga.” Ke be ke tsogile ke botša batho molaetša woo. Mantšiboa a lona tšatši leo mosadi wa ka a hlokafala, gomme ka le le latelago ka dira ka moo ke bego ke laetšwe ka gona. Batho ba mpotšiša ba re: “Nke o re botše gore tše o di dirago tše rena di re ruta eng.” Ka gona ka re go bona: “Morena o boletše le nna a ntaela gore ke le botše, lena setšhaba sa Israele, gore yena Morena, Mong wa bohle, o re: ‘Ke kgauswi le go tšhilafatša felo ga ka mo gokgethwa – sona sebo se le ikgantšhago ka sona, se le ratago go se boga le go se etela. Gomme barwa le barwedi ba lena ba le ba tlogetšego morago Jerusalema ba tla bolawa ka tšhoša.’ Ke gona le tlago dira se ke se dirilego. Le ka se ipipe maledu goba la ja nama ya mogoga. Le tla dula le rwele dikuane le dieta, ebile le ka se ilele goba la lla. Le tla otišwa ke go otlelwa dibe tša lena mme la balabala le le mmogo. Ke mo nna, Hesekiele, ke tlago ba sešupo go lena; le tla dira tšohle tše ke di dirilego. Morena o re mohla tšeo di direga le tla lemoga gore ke yena Morena, Mong wa bohle.” Morena a re: “Gomme wena motho wa nama, ke yo ba amoga sebo seo sa bona se se ba kgahlago mme ba ikgantšhago ka sona, se ba ratago go se bogela le go se etela. Ke tla ba ka ba amoga le barwa le barwedi ba bona. Mohla ke dira seo mothotsoko yo a tla bego a phonyokgile o tla tla a go anegela taba tšeo. Lona tšatšing leo o tla rarologelwa ke polelo, mme wa bolela le yena. O tla bolela, wa se sa homola. Ke ka moo o tlago ba sešupo go bona, gomme ba tla lemoga gore Morena ke nna.” Morena a re go nna: “Wena motho wa nama, lebelela go Baamone o ba porofete. O ba botše gore ba theeletše tše nna, Morena, Mong wa bohle, ke di bolelago ke re: Le be le re: ‘Swine!’ mola felo ga ka mo gokgethwa go tšhilafatšwa, le mola naga ya Israele e senywa, le mola batho ba Juda ba išwa bothopša. Ka gona, ke tla le gafela dikgoro tša leganateng la ka bohlabela ba le fenya. Ba tla hloma mešaša ya bona nageng ya lena mme ba dula gona. Ba tla ja dikenywa tša lena, ba nwa le maswi a lena. Motse wa Raba ke tla o fetoša mafulo a dikamela, naga ya Amone ka e fetoša meraka ya dihuswane. Ke mo le tlago lemoga gore Morena ke nna. “Morena, Mong wa bohle, o re: Le be le phaphatha diatla, le bina le thabile, le nyatša naga ya Israele. Ka gona, ke tla le otla, ka le gafela diatleng tša ditšhaba tše dingwe, mme tšona tša le hlakola. Ke tla le fediša la se sa ba setšhaba, le naga ya lena ya se sa ba gona. Ke mo le tlago lemoga gore Morena ke nna.” Morena, Mong wa bohle, o re: “Ka ge Bamoaba ba rile batho ba Juda ba swana le ditšhaba tše dingwe ka moka, ke tla lesa metse ye e šireletšago mollwane wa Moaba e hlaselwa, ke ra le yona metse yela ye mebotsebotse ya naga yeo, e lego Bethe-Jeshimote, Baale-Meone le Kiriathaime. Ke tla gafela Bamoaba le Baamone go dikgoro tša leganateng la ka bohlabela tša ba fenya, gore Bamoaba ba se sa gopolwa ke ditšhaba. Ke tla otla Bamoaba, gomme ba tla lemoga gore Morena ke nna.” Morena, Mong wa bohle, o re: “Baedomo ba itefeleditše gasehlogo ka batho ba naga ya Juda, gomme tefeletšo yeo e obetše Baedomo molato wo mogolo. Ka gona nna, Morena, Mong wa bohle, ke re ke tla otla naga ya Edomo, ka bolaya batho ba gona le diphoofolo. Ke tla fetoša naga yeo leganata, go tloga motseng wa Temane go yo fihla go wa Dedane, gomme batho ba gona ba tla bolawa ka tšhoša. Baisraele, setšhaba sa ka, ba tla ntefeletša ka Baedomo, gomme ba dira gore Baedomo ba kwe bogale bja ka le kgalefo. Baedomo ba tla tseba gore go itefeletša ga ka go bjang.” O realo, Morena, Mong wa bohle. Morena, Mong wa bohle, o re: “Bafilista, ka ge ba hloile manaba a bona, ba itefeleditše gasehlogo ka ona, mme ba a fediša ka baka la metsoto ya bona ya kgale. Ka gona nna, Morena, Mong wa bohle, ke re ke tla otla Bafilista, ka fediša Bakreta bao. Ke tla fediša le mašaledi a bona a a agilego lebopong la lewatle. Ke tla itefeletša kudu ka bona, ka ba otla ke galefile. Ge ke itefeletša bjalo ke mo ba tlago lemoga gore ke nna Morena.” Ka letšatši la pele la kgwedi ya ngwaga wa lesome le motšo o tee wa ge re le mathopša, Morena a re go nna: “Wena motho wa nama, batho ba Tirose ba thabetše go wa ga motse wa Jerusalema ba re: ‘O swinegile! Motse wo go thwego ke Lesoro la Ditšhaba o thubilwe! Gomme rena re tla o ema legato. Ka ge bjale o fetošitšwe marope, go tla atlega rena.’ “Bjale ge, nna, Morena, Mong wa bohle, ke re: Theeletša! Ke a go lwantšha, wena Tirose. Ke tla tliša ditšhaba tše dintši tša go hlasela bjalo ka lewatle ge le hlatša maphoto a lona. Ba tla kgereša merako ya gago, ba phušola le dibo tša gago. Ke moka ke tla gogola thogorogo ya gago ka šadiša fela letlapa. Barei ba dihlapi ba tla anega malokwa a bona godimo ga lona, gona moo le metšego gona ka lewatleng, ka ge go boletše nna, Morena, Mong wa bohle. Ditšhaba di tla hlakola Tirose, gomme ka ditšhoša tša bona ba bolaya bao ba dulago metseng ya yona ya kua nagengkgolo. Ke mo badudi ba Tirose ba tlago lemoga gore Morena ke nna.” Morena, Mong wa bohle, o re: “Ke tlilo tliša kgoši ya dikgoši, Kgoši Nebukadnesare wa Babilonia, gore a hlasele Tirose. O tla tla a etšwa leboa ka madira a mantši, le dipere le dikoloi tša ntwa le banamedi ba dipere. Bao ba agilego metseng ya nagengkgolo ba tla bolawa ka tšhoša. Manaba a tla aga dithala tša go go hlola, a kgobela mokgobo wa mobu go go dikanetša, a go dikanetša a swere dikotse. Ba tla kgereša merako ya gago ka dithubamorako, ba phušola le dibo tša gago ka ditshipi. Dipere tša Kgoši Nebukadnesare e tla be e le tše dintši mo di tlago go khupetša ka marole a di a tupišago. Lešata la banamedi ba dipere, le la maotwana, le la dikoloi tša ntwa le tla šikinya merako ya gago ge Nebukadnesare a tsena ka dikgoro tša gago, bjalo ka banna ba ba tsenago motseng wo o kgerešeditšwego merako. Dipere tša gagwe di tla kiba mebileng ka ditlhako. Bahlabani ba gagwe ba tla bolaya badudi ba gago ka tšhoša. Dikokwane tša gago tše dikgolo di tla wišwa. Manaba a gago a tla go hula lehumo a go thopela le thoto ya kgwebo ya gago. Ba tla kgereša merako ya gago, ba thuba le dintlo tša gago tša mathedithedi. Ba tla lahlela maswika a gago le dikota le thogorogo ka lewatleng. Ke tla kgaotša dikoša tša gago, ka homotša le modumo wa harepa tša gago. Ke tla šadiša fela letlapa leo bareadihlapi ba tlago anega malokwa a bona go lona. Motse woo o ka se tsoge o tsošološitšwe, ka ge go boletše nna, Morena, Mong wa bohle.” Morena, Mong wa bohle, o re go Tirose: “Mohla o fenywa, batho ba ba dulago lebopong la lewatle ba tla thothomela ka letšhogo ge ba ekwa metsetlo ya ba ba gobaditšwego, ge badudi ba gago ba gagarwa. Magoši ohle a ditšhaba tše di agilego lewatleng a tla theoga ditulong tša ona tša bogoši. Ba tla apola diaparo tša bogoši le diaparo tša bona tša mebalabala, ba dula fase ba thothomela. Ba tla tšhoga mo ba tlago ba ba thothomela motšhaotšhele. Ba tla opela sefela sa go llela Tirose ba re: “O ripitlilwe bjang, wena motsesetuma, o agilwego lewatleng! O iketše. Baagi bohle ba lewatleng ba be ba go tšhaba, wena le badudi ba gago. Le be le ba tšhoša bohle ba ba agilego lewatleng. “Bjale ge, lehono o wele, dihlakahlaka di a thothomela, le badudi ba tšona ba tšhošitšwe ke pheletšo ya gago.” Morena, Mong wa bohle, o re: “Ke tla go fetoša marope, wa etša motse wo o ngadilwego. Ke tla go ribegetša ka lefula la phamphamadiba. Ke tla go theošetša kua fase gotee le bao ba theogelago bodulabahu, wa yo dula le bale ba phetšego mehleng ya kgale. Ka go dudiša lefaseng la ka tlase, mašopeng a go ya go ile, gotee le ba ba theogetšego bodulabahu. Ge go le bjalo o ka se sa dulwa ke motho wa ba lefaseng la ba ba phelago. O tla ba motse wo o tšhošago batho, ya napa ya ba bofelo bja gago. Le ge batho ba ka go nyaka, ba ka se tsoge ba go bone.” O realo, Morena, Mong wa bohle. Morena a re go nna: “Wena motho wa nama, opela sefela sa go llela Tirose, motse wo o agilwego lebopong la lewatle mme o gwebago le ditšhaba tše dintši tše di agilego mabopong a lewatle. O o botše gore Morena, Mong wa bohle, o re: “Wena Tirose, o be o ikgantšha, o re o leselawatle la botse bjo bo phethegilego. Mellwane ya gago e be e fihla kgole ka gare ga mawatle. Ba ba go agilego ba go thakgile kudu. Ba go hlomile ka dikota tša mophaene wa thaba ya Hermone, le ka pinagare ya mosedere wa Lebanone. Ka meeike ya Bashane ba go direla mahuduo. Ba go direla lebato ka mosaeprese wa Saeprose, ba le manega ka nakatlou. Seila ya gago e be e le ya lešela, lešela le boletiana la mebalabala la go tšwa Egepeta, mme e le yona boitsebišo bja gago. Tlhaka ya mathudi a gago e be e le ya lešela la mmala wa botala bja leratadima, le wa bohwibidu bja moretele la go tšwa lebopong la Elisha. Basepetšamaselawatle ba gago e be e le ba go tšwa motseng wa Sidone le wa Arbade. Bakgoni ba gago e be e le bašikalemaselawatle. Balokišamaselawatle ba gago e be e le bakgoni ba go tšwa Biblose. Bašikalemaselawatle ba go tšwa maselawatleng ohle ba be ba etla go wena go rekišetšana le wena. “Bahlabani ba go tšwa Persia le Lidia le Libia ba be ba go hlabanela, bohle e le bagale. Ba be ba fega dikotse le dikuane tša bona ka mešašeng ya gago. Ke bona banna ba ba go tlišeditšego setumo. Bahlabani ba go tšwa Arbade le Geleke e be e le bona baleti ba merako ya gago ka gohle, gomme banna ba go tšwa Gamade bona ba leta dibo tša gago. Ba be ba fega dikotse tša bona go dikologa merako ya gago. Ke bona ba go tlaleletša bothakga bja gago. “Badudi ba Tarshishe ba be ba gweba le wena ba bona lehumo la gago le lentši. Ba be ba reka phahlo ya gago ka silibera le ka tshipi le ka thini le ka morodi. Badudi ba Gerike le ba Tubale le ba Mesheke ba be ba gweba le wena; ba reka diphahlo tša gago ka makgoba le ka dibjana tša mphiri. O be o rekiša phahlo tša gago ka dipere tša go goga, le ka tša ntwa, le ka dimeila tša Bethe-Togarma. Batho ba Rodose ba be ba rekelana le wena; batho ba dinageng tša lebopo la lewatle tše dintši le bona ba be ba rekelana le wena, mme ba go lefa ka manaka a ditlou, le dikota tša mohlare wa eponi. Baedomo ba be ba rekišetšana le wena ka ge o be o na le diphahlo tše dintši. Ba be ba di lefa ka magakabje a mahwibidu, le ka mašela a bohwibidu bja moretele le a mebalabala, le a boletiana, le ka magakabje a mmala wo moso, le a bohwibidu bja mohuta wo mongwe. Batho ba Juda le ba naga ya Israele ba be ba rekišetšana le wena. Ba reka diphahlo tša gago ka mabele a go tšwa Minite, le ka leotša, le ka todi, le ka makhura a mohlware, le ka dihlare. Batho ba Damaskose ba be ba rekišetšana le wena ka ge o be o na le diphahlo tše dintši tša mehutahuta. Ba be ba di lefela ka beine ya go tšwa Helbone le ka boya bja dinku bja go tšwa Tsahare. Batho ba Dedane le ba Jabane ba be ba rekišetšana le wena. Ba reka diphahlo tša gago ka tshipi ye e tološitšwego ya go tšwa Usale, le ka dinoko. Batho ba Dedane ba be ba reka diphahlo tša gago ka mašela a go saletša. Baarabia le mantona ohle a naga ya Kedara ba be ba gweba le wena ka dikwana le dikgapa le dipudi. Babapatši ba Sheba le ba Rama ba be ba reka diphahlo tša gago ka dinoko tše dibosebose tša mehutahuta, le ka magakabje a mehutahuta, le ka gauta. Ba motse wa Harane, le wa Kane, le wa Edene, le babapatši ba Sheba, le ba motse wa Ashure le wa Kilmade – ka moka ba be ba rekelana nago. Ba be ba go rekišetša diaparo tša botšhepi, le dipurapura tša mmala wa bohwibidu bja moretele le tša mebalabala, le magogwa a mebalabala, le dithapo tše di logilwego gabotse. “Diphahlo tša gago di be di rwalwa ka maselawatle a magolo. “O be o le bjalo ka leselawatle le le tletšego diphahlo ka gare ga lewatle mme le imelwa. E be e re ge basepetšamaselawatle ba gago ba go išitše ka gare ga phamphamadiba, ledimo la bohlabela le go robaganye o le kgole le naga. Lehumo la gago, le diphahlo tša gago tšohle, le bašikalemaselawatle bohle, le balokišamaselawatle ba gago, le babapatši ba gago, le bagale ba gago, le banamedi ba gago bohle ba ile ba sobelela ka lewatleng ge leselawatle la gago le robega. Mekgoši ya bašikalemaselawatle ba ba kgangwago ke meetse ya thothomediša naga. “Basepetšamaselawatle bohle ba tlogetše maselawatle a bona, le bašikalemaselawatle bohle ba eme lebopong. Ba a gotla, ba go llela gabohloko, ba itšhela ka marole dihlogong, ba pshikologa le meloreng. Ba ipoola dihlogo ka baka la gago, mme ba apara tša go ilela. Pelo tša bona di kwa bohloko ge ba go llela ba hlomogile. Ba go opelela sefela sa mahloko ba re: ‘Ke mang wa go swana le Tirose, Tirose ye bjale e ikhomoletšego ka lewatleng? Mola diphahlo tša gago di eya mošamawatle o be o khoriša ditšhabatšhaba. Magoši a be a humišwa ka humo la gago le lentši le ka diphahlo tša gago. Bjale o robagantšwe ke lewatle; o sobeletše ka bodibeng bja lona. Diphahlo tša gago le banamedi bohle ba ba bego ba le ka leselawatleng ba sobeletše nago.’ “Bohle ba ba agilego lebopong la lewatle ba tšhošitšwe ke tše di go hlagetšego. Le magoši a bona a tšhogile, gomme mahlong a bona go bonala poifo fela. Babapatši ba go tšwa ditšhabeng ba go kgotsa ka molodi, batho ba a tšhoga ge ba go bona. Ke gona ge o ile.” Morena a re go nna: “Wena motho wa nama, botša mmuši wa Tirose gore nna, Morena, Mong wa bohle, ke re go yena: Ka boikgantšho bja gago o itshema modimo. O re o dutše setulong sa bogoši go etša modimo, o dikaneditšwe ke mawatle. Le ge o ka itshema modimo, o motho wa nama, ga o modimo. O bona nke o phala Daniele ka bohlale, le gona ga go sephiri se o ka se fihlelwago. O ikhumišitše ka bohlale bja gago le tlhaologanyo, wa ikgobelela gauta le silibera ka polokelong ya gago. Ka ge o hlalefetše kgwebo kudu o ikokeleditše lehumo, mme lona le go hloletše boikgantšho. “Bjale ge, nna, Morena, Mong wa bohle, ke re: Ka gobane o itshema modimo, ke tlilo go tlišetša batho ba šele ba go hlasela, setšhaba se sehlogo go feta tše dingwe ka moka. Ba tla go lobiša tšohle tše dibotse tše o ikhweleditšego tšona ka bohlale bja gago, ba go senyetša le bothakga bja gago. Ba tla go bolaya gasehlogo ka garegare ga lewatle, wa theogela bodulabahu. Na mohla o lebana le babolai ba gago o tla no itshema modimo? Ge o le ka diatleng tša babolai ba gago o tla no be o le motho wa nama, e sego modimo. O tla hwa bjalo ka mpša diatleng tša bašele, gobane go boletše nna, Morena, Mong wa bohle.” Morena a re go nna: “Wena motho wa nama, opela sefela sa go llela kgoši ya Tirose. O mmotše gore Morena, Mong wa bohle, o re: O kile wa ba seka sa bothakga, o le yo bohlale ebile o le yo botse kudu! O be o dula Edene, serapeng sa Modimo, o apara magakabje a mehutahuta: dirubi le ditopase le ditaamane le diberile le dikarneliene le dijaspere le disafire le diemerale le digarneta. Mangina le dikgabišo tša diaparo tša gago e be e le tša gauta. Di be di diretšwe wena ka tšatši lela o belegwa. Ke ile ka bea mokerubi yo a phuroletšego diphego moo gore a go lete. O be o dula thabeng ya ka ye kgethwa, gomme o sepela gare ga magakabje a a phadimago. Boitshwaro bja gago e bile bjo bo se nago bosodi go tloga mohla wola o belegwa go fihlela ge o thoma go dira tše kgopo. Kgwebo ya gago ye kgolo e ile ya go hlolela swele, gomme wa dira dibe. Ka gona nna ka go raka thabeng ya ka ye kgethwa, ka ge o be o le motho yo a tšhilafetšego, gomme mokerubi yo a bego a go leta a go raka magakabjeng ale a go phadima. O be o ikgogomoša ka botse bja gago, gomme setumo sa gago se go diriša tša bošilo. Ka baka leo ke go kgoromeleditše fase, ka go dira segoboga pele ga magoši a mangwe. O dirile dibe tše dintši, wa ba wa hlalefetša batho kudu mo kgwebong ya gago, mme wa tšhilafatša mafelo a gago a thapelo. Ka gona nna ka hlola mollo ka motseng wa gago, mme wona wa fiša motse lorelore. Bohle ba ba lebelelago motse woo ba bona ka mo ke o fetošitšego molora. Ditšhaba tšohle tše di ilego tša go tseba di a go kgotsa, o tšhoša batho ba ba go bonago. Ke gona ge o ile.” Morena a re go nna: “Wena motho wa nama, kgala motse wa Sidone, o o porofete. Botša batho ba gona gore nna, Morena, Mong wa bohle, ke re: Ke lwa le wena, Sidone; batho ba tla ntheta ba le ka gare ga gago. Ba tla lemoga gore ke nna Morena mola ke otla badudi ba gago, le mola ke ba bontšha gore ke nna yo mokgethwa. Ke tla go romeletša leuba la bolwetši. O tla hlaselwa ka mathoko ohle, gomme badudi ba gago ba bolawa, ka ediša madi mekgotheng ya gago. Ke gona o tlago lemoga gore Morena ke nna.” Morena o re: “Ga go le setšhaba se tee sa tše di bapetšego le Israele se se bego se e nyefola se se tla hlwago se sa e hlaba go etša meetlwa le ditshehlo; gomme ba tla lemoga gore Morena, Mong wa bohle, ke nna.” Morena, Mong wa bohle, o re: “Ke tla buša setšhaba sa Israele ditšhabeng tšela ke bego ke se šwalalanyeditše go tšona, gomme ke tla ba bontšha gore ke nna yo mokgethwa ditšhaba di ntebeletše. Ke mo ba tlago dula nageng ya bona ye ke e filego mohlanka wa ka, Jakobo. Ba tla dula gona ba bolokegile. Ba tla ikagela dintlo, ba ipšalela merara. Ke tla otla baagišani bohle ba bona bao ba bego ba ba kwera, gomme Baisraele ba tla bolokega. Ke mo ba tlago lemoga gore ke nna Morena, Modimo wa bona.” Ka letšatši la lesome le metšo ye mebedi la kgwedi ya lesome ya ngwaga wa lesome wa ge re le mathopša Morena a re go nna: “Wena motho wa nama, kgala kgoši ya Egepeta. O mo porofete, yena le naga ya Egepeta ka moka. O mmotše gore nna, Morena, Mong wa bohle, ke re: Ke lwa le wena, kgoši ya Egepeta, kwenakgolo towe, o patlamago ka nokeng ya Naele, o ipotšago o re: ‘Noka ya Naele ke ya ka, ke itlholetše yona.’ Ke tla go tsenya kgwega ka mohlagareng ka ba ka dira gore dihlapi tše di lego ka nokeng ya gago di go kgomarele legapi. Ke moka ka go goga ka go ntšha ka nokeng ya Naele o kgomaretšwe legapi ke dihlapi ka moka. Ke tla go lahlela lešokeng gotee le tšona dihlapi tšeo. O tla rapalala moo ntle wa se phuthwe wa bolokwa. Setopo sa gago ke tla se fa dibata le manong gore di se je. Ke mo badudi bohle ba Egepeta ba tlago lemoga gore Morena ke nna. “Lena Baegepeta, le be le swana le lehlotlo la lehlaka mo go setšhaba sa Israele. E be e re ge ba ithekga ka lena, le pharoge, le ba hlabe ka mahwafeng; ge ba ikokotlela ka lena, le robege mme ba thinyege mekokotlo. Bjale ge, nna, Morena, Mong wa bohle, ke re ke tla le romela manaba a le hlasela ka ditšhoša, a le gagara le diruiwa tša lena. Naga ya Egepeta e tla fetoga leganata. Ke mo le tlago lemoga gore Morena ke nna. “Ka ge o rile noka ya Naele ke ya gago, e dirilwe ke wena, ke lwa le wena, le yona Naele yeo ya gago. Egepeta yohle ke tla e fetoša leganata go tloga motseng wa Migdolo go yo fihla go wa Asoane, le go ba go yo fihla mollwaneng wa Etopia. Ga go motho goba phoofolo ye e tlago putla fao. Go tla fela mengwaga ye masome a mane go sa phele selo moo. Naga ya Egepeta ke tla e dira naga ye e ngadilwego go feta dinaga ka moka. Metse ya Egepeta e tla dula e le marope mengwaga ye masome a mane, maroperope a go feta a metse ka moka. Baegepeta ke tla ba šwalalanya le ditšhaba le dinaga.” Morena, Mong wa bohle, o re: “Ge go fetile mengwaga ye masome a mane ke tla kgoboketša Baegepeta ditšhabeng tše ke bego ke ba šwalalanyeditše go tšona. Ke tla ba buša bothopša ka ba bušetša nageng ya Patrose, ya setlogo sa bona. Moo e tla ba ba mmušo wa go nyatšega, mmušo wa go fokola go feta mebušo ka moka, gomme ba ka se sa tsoga ba bušitše ditšhaba tše dingwe. Ke tla ba nyenyefatša mo ba ka se sa kgonago go laola ditšhaba tše dingwe. Baisraele ba ka se sa tsoga ba ikantše bona. Se se tlago hlagela naga ya Egepeta se tla gopotša Baisraele sebe sa go ikanya bona. Ke mo Baisraele ba tlago lemoga gore Morena ke nna.” Ka letšatši la pele la kgwedi ya pele ya ngwaga wa masome a mabedi le metšo ye e šupago wa ge re le mathopša Morena a re go nna: “Wena motho wa nama, Nebukadnesare, kgoši ya Babilonia, o hlasetše motse wa Tirose. O rwešitše bahlabani ba gagwe merwalo ye boima ba ba ba tšwa mafatla, ba kgoboga le magetla; eupša yena kgoši le bona bahlabani ba gagwe ga se ba boelwa ke selo ka go itshwenya moo ga bona. Ka gona, nna, Morena, Mong wa bohle, ke re: Ke fa Nebukadnesare, kgoši ya Babilonia, naga ya Egepeta. O tla e hula, a e hlakola, a rwala mahumo a Egepeta ya ba tefo ya madira a gagwe. Ke mo fa naga ya Egepeta e le moputso wa modiro wa gagwe, ka gobane madira a gagwe a be a šomela nna. Ke realo, nna, Morena, Mong wa bohle. “Mohlang seo se direga ke tla maatlafatša setšhaba sa Israele, gomme ka dira gore tše ke go botšago tšona, wena Hesekiele, o ba botše tšona ka mafolofolo. Ke mo ba tlago lemoga ge nna ke le Morena.” Morena a re go nna: “Wena motho wa nama, porofeta o bege gore nna, Morena, Mong wa bohle, ke re gololang le re: “Jonna joo, tšatši le le šiišago le etla! Tšatši leo le kgauswi, tšatši la go šoma ga Morena. E tla ba tšatši la maru a maso, tšatši la tahlego ya ditšhaba. Baegepeta ba tla hlaselwa ka tšhoša; batho ba Etopia ba tla thothomela ka letšhogo, ge Baegepeta ba bolawa, ba hlakolwa le mahumo, le metse ya bona e pšhatlaganywa. “Ntweng yeo ba Etopia, le ba Lidia, le ba Libia, le ba Arabia ka moka, le ba Kube, le ba naga ye ke dirilego kgwerano le yona ba tla bolawa ka tšhoša.” Morena, Mong wa bohle, o re: “Go tloga Migdolo go fihla Asoane ba ba emago le Egepeta ba tla bolawa ka tšhoša. Madira a Egepeta a go ikgantšha a tla fedišwa. Ke realo, nna, Morena, Mong wa bohle. Naga yeo e tla ba ye e ngadilwego go feta dinaga ka moka, gomme metse ya yona e tla šala e le marope go feta metse ka moka. Mohla ke tšhuma Egepeta ka mollo gomme bašireletši ba yona ka moka ba bolawa, ke mo ba tlago lemoga gore Morena ke nna. “Ge letšatši leo le fihla mme Egepeta e fedišwa, ke tla roma batseta ka maselawatle go yo tšhoša batho ba Etopia ba sa itebetše, gomme ba tla welwa ke masetlapelo. Tšatši leo le etla!” Morena, Mong wa bohle, o re: “Ke tla swielela makoko a Egepeta ka Nebukadnesare, kgoši ya Babilonia. Yena le setšhaba sa gagwe se sehlogo go feta ditšhaba tše dingwe ke tla ba romela go ripitla naga yeo. Ba tla hlasela badudi ba Egepeta ka ditšhoša, gomme ba tlatša naga ka ditopo. Ke tla pšheša noka ya Naele gomme ka dira gore naga e bušwe ke badiratšempe. Bašele ba tla senya naga yohle. Ke realo, nna, Morena.” Morena, Mong wa bohle, o re: “Ke tla pšhatlaganya medingwana, ka tloša le medimo ya diswantšho le ya maaka Memfise. Go ka se be le yo a bušago naga ya Egepeta, gomme ke tla tšhoša badudi ba gona. Ke tla senya Egepeta ka borwa, gomme ka tšhuma motse wa Tsoane ka leboa. Ke tla otla badudi ba motse wa Tebetse. Ke tla tšholla kgalefo ya ka godimo ga Pelusiomo, e lego wona motse wa sebo se segolo sa Egepeta. Ke tla fediša makoko a motse wa Tebetse. Ke tla tšhuma Egepeta ka mollo, gomme badudi ba Pelusiomo ba tla menekana ka go kwa bohloko. Merako ya Tebetse e tla pšhatlwa, gomme motse wa kgangwa ke meetse. Masogana a motse wa Heliopolise le wa Bubastise a tla bolawa ka tšhoša, gomme batho ba bangwe ba thopša. Tagpanese mosegare go tla fifala ge ke fediša pušo ya Egepeta, ke fediša le madira a ba bego ba ikgantšha ka ona. Egepeta e tla khurumetšwa ke leru, gomme batho ba metse yohle ya gona ba tla thopša. Mohla ke otla Egepeta ka mokgwa woo ba tla lemoga gore ke nna Morena.” Ka tšatši la bošupa la kgwedi ya pele ya ngwaga wa lesome le motšo o tee wa ge re le mathopša Morena a re go nna: “Wena motho wa nama, ke robile kgoši ya Egepeta letsogo. Ga go motho yo a mmofilego lona goba a mo fapilego lona ka thapo, gore le tle le fole mme le tiele go ka swara tšhoša gape. Bjale ge, nna, Morena, Mong wa bohle, ke re: Ke lwa le kgoši ya Egepeta. Ke ya go mo roba matsogo ka mabedi – le le sa itekanetšego le le le robegilego – ka dira gore tšhoša e we seatleng sa gagwe. Baegepeta ke tla ba šwalalanya le ditšhaba, ka ba gašanya le dinaga. Ke moka ka tiiša kgoši ya Babilonia matsogo, ka mo swariša tšhoša ya ka. Kgoši ya Egepeta yona ke tla e roba matsogo, gomme e tla golola e le pele ga gagwe boka motho yo a gobaditšwego wa go hwa. Ee, ke tla tiiša matsogo a kgoši ya Babilonia, a kgoši ya Egepeta ona ka a rephiša. Batho ba tla lemoga gore Morena ke nna ge ke neela kgoši ya Babilonia tšhoša ya ka, mme yena a šupa Egepeta ka yona. Ke tla šwalalanya Baegepeta le ditšhaba, ka ba gašanya le dinaga. Ke mo ba tlago lemoga gore Morena ke nna.” Ka letšatši la pele la kgwedi ya boraro ya ngwaga wa lesome le motšo o tee wa ge re le mathopša Morena a re go nna: “Wena motho wa nama, botšiša kgoši ya Egepeta pele ga makoko a gagwe o re: Na nka go swantšha le eng ka maatla? “Ruri, o etša mosedere wa Lebanone wa makala a mabotse a moriti, mosedere wo motelele go fihla marung. O be o godišwa ke meetse, meetse a ka fase ga mobu a o telefatša, a edišetša dinoka mo o bjetšwego gona, a lebiša meela dihlareng tšohle tša naga. Ka ge o be o nošetšwa gabotse, o ile wa letla go feta mehlare yohle ya naga. Wa tšwa dithabe tše dintši le makala a matelele. Dinonyana tša mehutahuta tša agela makaleng a wona; diphoofolo tša mehutahuta tša naga tša tswalela ka fase ga wona. Batho ba tšhaba tše dikgolo tša mehutahuta ba dula moriting wa wona. Mohlare wa gona o be o le botse bjang – e le wo mogolo wa makala a go letla, gobane medu ya wona e iša fase go fihla meetseng a mantši. Moo serapeng sa Modimo go be go se mosedere wa go swana nawo. Go be go se gwa ka gwa ba le mophaene wa makala a mabjalo, le mopopolire go be go se gwa ka gwa ba le wa makala a mohuta woo. Moo serapeng sa Modimo go be go se na mohlare wo mobotse go swana nawo. Ke nna ke o dirilego wo mobotse wa makala a mantši. O be o tsebafelwa ke mehlare yohle moo Edene, serapeng sa Modimo. “Bjale ge, nna, Morena, Mong wa bohle, ke re: Ka ge mohlare woo o telefetše go fihla marung, wa ikgantšha ka botelele bja wona, ke o gafetše mmuši wa baditšhaba gore a o sware go ya ka mo go swanelago bokgopo bja wona. Nnaena ke o lahlile. Bašele ba sehlogohlogo gare ga ditšhaba ba o remile ba o tlogela. Makala a wona a wetše dithabeng le ka meeding yohle; dithabe tša wona tše di robegilego di wetše ka magageng ohle a naga. Batho ba ditšhaba tša mehutahuta ba tlogile moriting wa wona ba itshepelela. Dinonyana tša mehutahuta di kotama kutung ya wona ye e welego, le diphoofolo tša mehutahuta tša naga di gata makala a wona. Ka baka leo, ga go sa tlo ba le mohlare wo o lego kgauswi le meetse wo e tlago ba wo motelele wa ikgantšha goba wa tlomošetša dintlha tša wona marung. Ga go mohlare wo o nošetšwago gabotse wo o kago ba wo motelele ka mokgwa woo; gobane mehlare yohle e lebanwe ke go hwa bjalo ka batho ba nama, ya theogela ka mpeng ya lefase gotee le bao ba theogelago bodulabahu.” Morena, Mong wa bohle, o re: “Mohla wola mohlare woo o eya bodulabahu ke ile ka o khupetša ka meetse a a lego ka fase ga mobu e le sešupo sa gore o iletšwe. Ka thiba dinoka tša gona, ka se lese tša meetse a gona a mantši di ela. Ka ge mohlare woo o hwile ke ile ka tliša leswiswi dithabeng tša Lebanone, gomme ka pontšha mehlare ka moka ya naga. Ge ke lahlela mohlare woo bodulabahu lešata la go wa ga wona le ile la šikinya ditšhaba. Mehlare yohle ya Edene le ye mebotsebotse ye e kgahlišago ya Lebanone, yohle ye e nošetšwago gabotse ka mpeng ya lefase, e ile ya thabela go wa ga mohlare woo. Mehlare yeo e ile nawo bodulabahu, go bao ba bolailwego ka tšhoša. Baditšhaba ba ba bego ba thušana nawo ba dula moriting wa wona le bona ba ile nawo. “Mohlare woo ke kgoši ya Egepeta le makoko ohle a gagwe. Ešita le mehlare ya Edene e be e se ye metelele goba ya seemo go swana nawo. Le ge go le bjalo ke tla yo o lahlela gotee le mehlare ya Edene ka mpeng ya lefase. O tla rapalala gare ga baditšhaba mmogo le bao ba bolailwego ka tšhoša.” O realo, Morena, Mong wa bohle. Ka tšatši la pele la kgwedi ya lesome le metšo ye mebedi ya ngwaga wa lesome le metšo ye mebedi wa ge re le mathopša Morena a ntaela a re: “Wena motho wa nama, opela sefela sa go llela kgoši ya Egepeta o re: Wena tau ya ditšhaba, o hwile! O kile wa ba ntatauwane ya lewatle, o gaša meetse ka dinko ka dinokeng tša gago. O biloša meetse ka maoto, o tšhilafatša dinokana. Nna, Morena, Mong wa bohle, ke re mohla ditšhaba tše dintši di kgobokana, ke tla go kgaphetša ka lelokwa la ka, gomme ka dira gore ba gogele lelokwa leo letšibogong. Ke tla go lahlela ntle mo go omilego, ka go lahlela nageng, wa kobolwa ke manong, le dibata tšohle tša lefase tša iphepa ka setopo sa gago. Ke tla lahlela nama ya gago dithabeng, ka tlatša meedi ka marapo a gago. Ke tla nošetša naga ka madi a gago go fihlela dithabeng, ka tlatša magaga ka nama ya gago. Mohla o tima boka mollo ke tla khupetša leratadima, ka fifatša le dinaledi. Ke tla pipa letšatši ka maru, le ngwedi o ka se tage. Ke tla fifatša dietša tšohle tše di tagago tša legodimong, ka aparetša naga ya gago leswiswi. Ke realo, nna, Morena, Mong wa bohle. “Ditšhaba tše dintši di tla tshwenyega ge ke bega ditaba tša go fedišwa ga gago dinageng tše o sa di tsebego. Tše ke tlago go dira tšona di tla tlaba ditšhaba tše dintši. Ge ke bekenya tšhoša ya ka pele ga magoši a tšona, ona a tla roromela ka letšhogo ka baka la tše di go hlagetšego. Mohla o ehwa bohle ba tla dula ba thothomela ba tšhaba la bona lehu.” Morena, Mong wa bohle, o re: “Kgoši ya Babilonia e tla go hlasela ka madira. Ke tla hlasela makoko a gago ka madira a bagale a go tšwa ditšhabeng tše sehlogohlogo a ba bolaya ka tšhoša. Ba tla fediša tšohle tše naga ya Egepeta e ikgantšhago ka tšona, gomme makoko ohle a gagwe a tla bolawa. Ke tla bolaya leruo la gago ka moka kgauswi le noka ya gago ye kgolo. E ka se sa bilošwa ke motho, goba ya kgotlelwa ke seruiwa. Ke tla sekiša dinoka tša gago ka di ediša bjalo ka makhura a mohlware. Ke realo, nna, Morena, Mong wa bohle. Mohla ke fetoša naga ya Egepeta leganata ke e hlobola tšohle tše di lego mo go yona, ke bolaya bohle ba ba dulago go yona, ke mo ba tlago lemoga gore ke nna Morena. Ke sona sefela sa poloko se se tlago opelwa ke basadi ba baditšhaba. Ba tla se opelela naga ya Egepeta le makoko ohle a yona. Ke realo, nna, Morena, Mong wa bohle.” Ka letšatši la lesome le metšo ye mehlano la kgwedi ya pele ya ngwaga wa lesome le metšo ye mebedi ya ge re le mathopša Morena a ntaela a re: “Wena motho wa nama, llela makoko a Egepeta. A ba theogele lefaseng la ka tlase le ditšhaba tše dingwe tše maatla gotee le ba ba theogelago bodulabahu. “O ba botšiše o re: “Na le gopola gore le phala batho ba bangwe ka botse? Theogelang bodulabahu le lale gona le bahlokamodimo. “Batho ba Egepeta ba tla rapalatšwa le ba ba bolawago ka tšhoša. Tšhoša e khwamoletšwe go bolaya. Makoko ohle a Egepeta a a gogwe. Go tšwa bodulabahu bagale ba bagolo ba tla re go Baegepeta le ba ba thušanago nabo ntweng: ‘Bahlokamodimo bale ba go bolawa ka tšhoša ba theogetše mono, gomme šeba ba rapaletše!’ “Asiria o gona kua le setšhaba sa gagwe se sentši. O dikaneditšwe ke mabitla a sona. Ka moka ga sona se bolailwe ka tšhoša, gomme mabitla a sona a kua fase bodulabahu. Lebitla la gagwe le dikaneditšwe ke setšhaba sa gagwe se sentši. Ka moka ga sona se bolailwe ka tšhoša. Se be se boifiša ba ba sa dulago lefaseng la ba ba phelago. “Elamo o gona kua gomme makoko ohle a gagwe a dikaneditše lebitla la gagwe. Ka moka ga bona ba bolailwe ka tšhoša, gomme ba theogetše lefaseng la ka tlase e le bahlokamodimo. Ba be ba boifiša ba ba lego lefaseng la ba ba phelago. Bjale ba gobogile le bao ba theogelago bodulabahu. Elamo o aletšwe malao gare ga bao ba bolailwego, gomme o dikaneditšwe ke mabitla a makoko ohle a gagwe. Ka moka ga bona ke bahlokamodimo, gomme ba bolailwe ka tšhoša. Ba be ba boifiša ba ba sa dulago lefaseng la ba ba phelago. Bjale ba gobogile le bao ba theogelago bodulabahu, gomme ba beilwe le ba ba bolailwego. “Mesheke le Tubale ba gona kua le makoko ohle a bona ao mabitla a bona a ba dikaneditšego. Bohle ke bahlokamodimo, ba bolailwe ka tšhoša, ka ge ba be ba boifiša ba ba dulago lefaseng la ba ba phelago. Ga se ba bolokwa bjalo ka bagale bale ba go bolawa mehleng ya kgale, ba ba theogetšego bodulabahu le dibetša tša ntwa ba sametše ditšhoša tša bona mme dikotse tša bona di beilwe godimo ga ditopo tša bona, gobane ba be ba boifiša ba ba phelago. “Ke ka mo Baegepeta ba tlago bolawa le bahlokamodimo ba ba bolailwego ka tšhoša. “Edomo o gona kua le magoši a gagwe le babuši. Le ge e be e le ba maatla, ba bolokilwe le ba ba bolailwego ka tšhoša. Ba rapaletše le bahlokamodimo ba ba theogetšego bodulabahu. “Babuši bohle ba leboa ba gona kua, le Basidone bohle. E kile ya ba ba maatla, ba ba boifišago batho, eupša ba theogetše bodulabahu ka dihlong gotee le ba ba bolailwego. Ba rapaletše le ba ba bolailwego ka tšhoša e le bahlokamodimo. Ba gobogile le ba ba theogelago bodulabahu. “Ge kgoši ya Egepeta le madira ohle a gagwe ba bolawa, o tla kwešiša gore ga se makoko ohle a gagwe a nnoši a a bolailwego ka tšhoša; ka gona o tla homotšega.” O realo, Morena, Mong wa bohle. “Ke nna ke dirilego gore kgoši ya Egepeta e boifiše ba ba lego lefaseng la ba ba phelago, ka gona yena le makoko ohle a gagwe ba tla bolokwa le bahlokamodimo ba ba bolailwego ka tšhoša.” O realo, Morena, Mong wa bohle. Morena a re go nna: “Wena motho wa nama, botša batho ba setšhaba sa geno o re: Ge ke tsoša ntwa nageng efe goba efe, batho ba naga yeo ba kgetha yo mongwe wa bona ba mo dira moleti. Ge a bona manaba a etla, o letša phalafala go tsebiša batho. Ge motho a ka e kwa fela a se e šetše, gomme manaba a tla a mmolaya, gona molato ke wa gagwe. E tla be e le moipolai yo a sa llelwego, ka ge a se a šetša go tsebišwa moo. Ge a ka be a šeditše a ka be a phonyokgile. Fela ge moleti a ka bona manaba a etla eupša a se letše phalafala go tsebiša batho, mme manaba a tla a ba bolaya, batho bao ba tla be ba hwile ka baka la dibe tša bona, eupša nna ke tla bona moleti molato wa go bolawa ga bona. “Bjale wena motho wa nama, ke go dira moleti wa setšhaba sa Israele. O theeletše mantšu a ke a bolelago gomme o nkgalele Baisraele ka ona. Ge nka go begela gore ruri modiradibe o tla hwa, fela wena wa se mo kgale gore a tlogele ditsela tša gagwe tše mpe, yena o tla hwa ka baka la bobe bja gagwe, gomme nna ke tla bona wena molato wa lehu la gagwe. Eupša ge o ile wa kgala modiradibe gore a tlogele ditsela tša gagwe tše mpe, gomme a se lese go dira dibe, yena o tla hwa ka baka la dibe tša gagwe, eupša wena o tla be o iphološitše.” “Wena motho wa nama, botša Baisraele gore ba hlwa ba bolela ba re: ‘Re imelwa ke diphošo le dibe tša rena. Re a felelela. Re ka phela bjang?’ O ba botše gore ke ikana ke le Morena, Mong wa bohle, Modimo yo a phelago, gore ga ke kgahlwe ke lehu la yo kgopo. Ke kgahlwa ke ge a ka tlogela ditsela tša gagwe tše mpe mme a phela. Setšhaba sa Israele, tlogelang tše mpe tše le di dirago. Ke ka baka lang le nyaka go hwa? “Bjale, wena motho wa nama, botša Baisraele gore ge moloki a ka dira dibe, boloki bja gagwe bo ka se mo phološe. Ge yo kgopo a ka lesa go dira tše mpe, a ka se otlwe, gomme ge moloki a ka thoma go dira dibe, a ka se phele. Le ge nka holofetša moloki gore ruri o tla phela, fela yena a bota boloki bjola bja gagwe mme a thoma go dira tše kgopo, nka se gopole selo sa boloki bjola bja gagwe. O tla hwa ka baka la bokgopo bja gagwe. Ge nka botša yo kgopo gore o tla hwa, eupša a tlogela dibe tša gagwe, mme a dira tše di lokilego le tše di nkgahlago – go etša ge a ka bušetša moadingwa se a mo swaretšego sona, goba a bušetša motho se a bego a mo hlakotše sona – ge a ka lesa bokgopo mme a phetha melao ye e tlago mo phološa, ruri a ka se hwe, o tla phela. Ke tla mo lebalela dibe tša gagwe ka moka, gomme o tla phela ka gobane a dirile tše di lokilego le tše di nkgahlago. “Gomme setšhaba sa geno se re tše ke di dirago ga se tša loka! Aowaa, tše di sego tša loka ke tše di dirwago ke bona. Ge moloki a ka lesa go dira tše di lokilego, mme a thoma go dira tše kgopo, o tla hwela tšona. Ge yo kgopo a ka tlogela go dira dibe, mme a dira tše di lokilego le tše di nkgahlago, o tla be a iphološitše. Fela lena setšhaba sa Israele le re tše nna ke di dirago ga se tša loka. Ke tla ahlola yo mongwe le yo mongwe wa lena ka tše a di dirilego.” Ka letšatši la bohlano la kgwedi ya lesome ya ngwaga wa lesome le metšo ye mebedi wa ge re le bothopša, monna yo mongwe yo a bego a phonyokgile Jerusalema a tla a mpotša gore motse woo o thopilwe. Mantšiboeng a letšatši la pele ga ge monna yoo a etla, maatla a Morena a ile a nkaparela. Ge monna yoo a fihla mosong wa le le latelago, Morena a ntharolla leleme mme ka kgona go bolela gape. Morena a re go nna: “Wena motho wa nama, batho ba ba dulago maropeng a metse ya naga ya Israele ba re: ‘Abrahama o be a le tee, le ge go le bjalo a fiwa naga ka moka. Rena re ba bantši, ka gona naga ye ke ya rena.’ “O ba botše gore nna, Morena, Mong wa bohle, ke re: Le ja nama ye e sa nago le madi. Le khunamela medingwana ya diswantšho. Le bolaya batho. Bjale go tla bjang gore le gopole gore naga ye ke ya lena? Le ikantše ditšhoša tša lena. Tše le di dirago di a šišimiša. Monna yo mongwe le yo mongwe o a otswa. Go tla bjang bjale gore le gopole gore naga ye ke ya lena? “O ba botše gore nna, Morena, Mong wa bohle, ke ba botša gore ke ikana ke le Modimo yo a phelago gore batho ba ba dulago kua maropeng a metse ba tla bolawa ka tšhoša. Ba ba tšhabetšego nageng ke tla ba gafela dibata. Ba ba lego dithabeng le ka maweng ba tla hwa ka leuba. Ke tla dira gore naga ka moka e senywe e be marope, gomme maatla ao ba bego ba ikgantšha ka ona a tla ba felela. Dithaba tša Israele di tla tlogelwa, gwa se sa putla motho mo go tšona. Ge ke tlilo senya naga, ke e fetoša marope ka baka la makgapha ohle a ba a dirilego, ke gona ba tlago lemoga gore ke nna Morena.” Morena a re: “Wena motho wa nama, batho ba setšhaba sa geno ba bolela ka wena ge ba le ka thoko ga merako ya motse, goba mejakong ya dintlo tša bona ba botšana ba re: ‘A re yeng go kwa mantšu a a tšwago go Morena.’ Ke ka moo setšhaba sa ka se kgobokanago ka gona, sa dula fase pele ga gago go kwa tše o di bolelago, eupša ba se dire tše o ba botšago tšona. Ba bolela le wena gabotsana ka melomo, eupša ka dipelong tša bona ba ikemišeditše go tšwela pele le megabaru ya bona. Go bona o swana le motho yo a opelago dikoša tša lerato ka lentšu le lebotse, a letša sekgapa ka bothakga. Mantšu a gago ba a a theeletša, fela ga ba a latele. Eupša tše o di boletšego, ruri di tla phethagala, gomme ge di phethagala ba tla lemoga gore moprofeta o kile a ba gona gare ga bona.” Morena a re go nna: “Wena motho wa nama, porofeta o kgale badiša ba setšhaba sa Israele. Ba porofetele o ba botše gore nna, Morena, Mong wa bohle, ke re go bona: Le ba madimabe, lena badiša ba Israele le itišago lena beng! Ga ke re badiša ba swanetše go diša dihuswane? Le ja maswi a tšona, la apara diaparo tša go dirwa ka boya bja tšona, la ba la hlaba tše di nonnego, fela go di diša gona ga le di diše. Tše di fokolago ga se la ka la di hlokomela, goba la alafa tše di lwalago, goba la tlema dintho tša tše di gobetšego, goba la yo buša tše di šwalalanego, goba la yo nyaka tše di timetšego. Bakeng sa seo le ile la di swara ka makgwakgwa le sehlogo. Dihuswane tšeo di ile tša šwalalana ka ge di be di se na le modiša, gomme dibata tša di ja. Ka gona dihuswane tša ka tša ralala le dithaba le meboto ye megolo ka moka. Tša šwalalana le lefase lohle, gwa se be le yo a di nyakago goba a botšišago ka tšona. “Bjale lena badiša, theeletšang se nna, Morena, ke le botšago sona. Ke ikana ke le Modimo yo a phelago gore taba yeo e ka se sa direga. Dihuswane tša ka di hlasetšwe ke dibata, tša di ja ka ge di be di se ne modiša. Badiša ba ka ga se ba di hlokomela. Ba be ba itišitše bona beng, ba se ba di diša. Ka gona ntheeletšeng, lena badiša. Nna, Morena, Mong wa bohle, ke bega gore ke lenaba la lena. Ke tla nyaka dihuswane tša ka go lena mme ka se sa tsoga ke le dumeletše go ba badiša ba tšona; nka se sa dumela gore go itiše lena beng fela. Ke tla le ntšha dihuswane tša ka ganong, la se sa di ja.” “Nna, Morena, Mong wa bohle, ke re ke tla nyakišiša dihuswane tša ka ka di hlokomela, go no swana le modiša ge a hlokomela dihuswane tša gagwe tše di bego di šwalalantšwe. Ke tla di hlakodiša mafelong ohle ao di bego di šwalalanyeditšwe go ona ka letšatši lela la madimabe a magolo. Ke tla di ntšha dinageng di šele, ka di kgoboketša go tloga ditšhabeng tše dingwe, mme ka di bušetša nageng ya gabotšona. Ke tla di fudiša dithabeng le dinokaneng tša Israele le gohle mo go dulago batho. Ke tla di fudiša mafulong a mabotse dithabeng ka moka tša Israele, gomme tša robala phulong yeo ye tala. Nna ka noši ke tla ba modiša wa tšona, gomme ka di nyakela mo di ka robalago gona. Ke realo, nna, Morena, Mong wa bohle. “Ke tla nyaka tše di timetšego, ka buša tše di šwalalanego, ka tlema dintho tša tše di gobetšego, ka alafa tše di lwalago, eupša tše di nonnego le tše di nago le maatla tšona ke tla di fediša, ka gobane ke nna modiša wa toka. “Bjale ge, lena mohlape wa ka, nna, Morena, Mong wa bohle, ke le botša gore ke tla ahlola yo mongwe le yo mongwe wa lena, mme ka kgaoganya ba ba lokilego le ba babe, dinku le dipudi. Na ga le kgotsofatšwe ke mafulo a mabotse ge le gataka le bjang bjo le bo šadišitšego? Le nwa meetse a a sekilego mme la biloša a le a šadišitšego! Kgane dihuswane tša ka di swanetše go fula bjang bjo le bo gatakilego, goba go nwa meetse a le a bilošitšego? “Bjale ge, nna, Morena, Mong wa bohle, ke le botša gore ke tla le ahlola, lena dihuswane tše di nonnego, le tše di otilego ka le botša gore ba ba nago le molato ke bafe. Le kgoromeditše tša go fokola ka lehlakore le ka legetla, la di hlaba ka dinaka la di ntšhetša ntle. Eupša nna ke tla hlakodiša dihuswane tša ka mme ka se sa dumela gore di tshwenywe. Ke tla ahlola gore ba ba nago le molato ke bafe. Ke tla ba beela modiša o tee, e lego setlogolo sa Dafida, mohlanka wa ka, gomme o tla ba hlokomela. Nna, Morena, ke tla ba Modimo wa bona, gomme setlogolo seo sa Dafida ya ba mmuši wa bona. Ke realo, nna, Morena. Ke tla dira kgwerano le bona gore ba phele ka khutšo. Ke tla raka dibata tšohle nageng gore dihuswane tša ka di tle di phele di bolekegile mafulong, mme di ithobalele ka fase ga mehlare. “Ke tla di šegofatša gotee le tikologo ya thaba ya ka ye kgethwa. Ke moo ke tlago di šegofatša ka dipula tša matlorotloro ka nako ya tšona. Mehlare ya naga e tla enywa dikenywa, mašemong gwa ba le dibjalo, gomme batho ba dula ba bolokegile nageng ya bona. Mohla ke hunolla setšhaba sa ka go bagateledi ba sona mme ke se lokolla go bao ba se dirilego makgoba, ke gona se tlago lemoga gore ke nna Morena. Ditšhaba tše dingwe di ka se sa ba hula, gomme le dibata di ka se ba je. Ba tla dula ba bolokegile, ba sa tšhošwe ke motho. Ke tla dira gore naga ya bona e tsebege ka monono wa yona gore ba se sa hwa ka tlala. Ditšhaba tše dingwe di ka se sa ba nyatša. Baisraele ba tla lemoga gore nna Morena, Modimo wa bona, ke na le bona, le gore bona ke setšhaba sa ka. Ke realo, nna, Morena, Mong wa bohle. “Lena le dihuswane tša ka, le mohlape wo ke o fudišago, le setšhaba sa ka, gomme nna ke Modimo wa lena.” O realo, Morena, Mong wa bohle. Morena a ntaela a re: “Wena motho wa nama, kgala thaba ya Seire o e porofete. E botše gore nna, Morena, Mong wa bohle, ke re: “Ke lwa nago, wena thaba ya Seire! Ke tla go otla ka go fetoša leganata. Ke tla fetoša metse ya gago marope, naga ya gago ya šala e le leganata. Ke gona o tlago lemoga gore Morena ke nna. “O be o dula o le lenaba la Baisraele, mme o ba gafela go bolawa ka tšhoša ka nako ya mašula a bona, ka nako ya ge ke ba otla o šoro. Ka baka leo, nna, Morena, Mong wa bohle, ke ikana ke le Modimo yo a phelago gore ke tla go gafela lehu, ka ge le wena o bolaile batho. O na le molato wa polao, gomme le wena o tla bolawa. Wena thaba ya Seire, ke tla fetoša naga ya gago leganata, gomme ka bolaya bohle ba ba putlago go yona. Dithaba tša gona ke tla di apeša ka ditopo tša ba ba bolailwego ntweng. Batho ba tla bolawa ka tšhoša mebotong le meeding le magageng ohle. Ke tla fetoša naga ya gago leganata la go ya go ile, gomme ga go motho yo a sa tlago dula metseng ya gago. Ke mo o tlago lemoga gore Morena ke nna. “O be o re ditšhaba tšela tše pedi, Juda le Israele, gotee le dinaga tša tšona ke tša gago, le gore o tla di thopa, le ge e le tša ka. Bjale ge, nna, Morena, Mong wa bohle, ke ikana ke le Modimo yo a phelago gore ke tla itefeletša go wena ka ge o be o ba galefela, o ba tsebafela, ebile o ba hloile. Ba tla tseba gore ke go otla ka baka la se o ba dirilego sona. Ke gona o tlago lemoga gore nna, Morena, ke go kwele o bolela ka lenyatšo o re dithaba tša Israele di hlobotšwe, le gore o lebanwe ke go di thopa. Ke kwele ka mo o bego o mpolela gampe ka gona ka go ikgantšha le ka lenyatšo.” Morena, Mong wa bohle, o re: “Ke tla fetoša naga ya gago leganata, gomme lefase lohle le tla thaba. Ka ge o ile wa thabela ge naga ye ke e filego setšhaba sa Israele e fetošwa leganata, le wena ya gago ke tla e dira bjalo. Wena, thaba ya Seire le naga yohle ya gago ya Edomo, le tla fetošwa leganata. Ke mo go tlago lemogwa gore Morena ke nna.” Morena a ntaela a re: “Wena motho wa nama, porofetela dithaba tša Israele o re: Lena dithaba tša Israele, ekwang se Morena a se bolelago. Nna, Morena, Mong wa bohle, ke re: Manaba a be a bolela ka lena a re: ‘Le swinegile! Meboto yela ya kgale bjale ke ya rena!’ “Ka gona, porofeta o re Morena, Mong wa bohle, o re go dithaba tša Israele: Le apotšwe la gatakwa ka mathoko ohle la ba lefa la ditšhaba tše dingwe, batho ba le seba, ba le bolela gampe. Ka gona, lena dithaba tša Israele, ekwang se Morena, Mong wa bohle, a se bolelago. Nna, Morena, Mong wa bohle, ke re go dithaba le meboto le magaga le meedi le maganata le metse ye e fetošitšwego marope, e hutšwego mme e kwerwago ke ditšhaba tšohle tše di e potapotilego: Ke boletše ke tuka bogale, ke galefetše ditšhaba tše di le potapotilego, le setšhaba sohle sa Edomo. Ka lethabo le legolo le ka lenyatšonyatšo ba thopile naga ya ka, ba tšea mafulo a yona. “Ka baka leo, porofetela naga ya Israele; o botše dithaba le meboto le magaga le meedi se nna, Morena, Mong wa bohle, ke se bolelago ke galefile ke bile ke hufega ge ditšhaba di ba rogile. Nna, Morena, Mong wa bohle, ke ikana gore go tla rogwa tšona ditšhaba tše di le potapotilego. Fela godimo ga lena, dithaba tša Israele, dihlare di tla buša tša hloga mme tša enywetša setšhaba sa ka sa Israele dikenywa. Sona se kgauswi le go tla gae. Nna ke eme le lena; ke tla le lokela, gomme naga ya lena e tla buša ya lengwa, mme dipeu tša bjalwa moo. Ke tla atiša setšhaba sa naga ya lena. Metse e tla buša ya dulwa, le marope a tsošološwa. Ke tla ntšifatša batho le maruo. Ba tla ata, le maruo a tswala. Ke tla agiša batho nageng ya lena bjalo ka pele, gomme ke tla le atla le go feta pele. Ke mo le tlago lemoga gore ke nna Morena. Ke tla buša setšhaba sa ka sa Israele gore se tle se dule gape nageng ye ya lena. E tla ba naga ya bona, gomme e ka se sa ba hlakola bana. “Nna, Morena, Mong wa bohle, ke re: Batho ba re naga ya lena ke sejabatho, le gona e hlakola setšhaba sa gabolena bana ba sona. Eupša go tloga gonabjale e ka se sa ba sejabatho, goba ya hlakola setšhaba sa gabolena bana ba sona. Ke realo, nna, Morena, Mong wa bohle. Nka se sa dumelela ditšhaba gore di le roge; ditšhaba di ka se sa le goboša. Naga ya lena e ka se sa hlakola setšhaba sa gabolena bana ba sona. Ke realo, nna, Morena, Mong wa bohle.” Morena a re go nna: “Wena motho wa nama, mola Baisraele ba dula nageng ya bona ba ile ba e tšhilafatša ka mokgwa wo ba bego ba phela mme ba dira ka wona. Ke ile ka bona boitshwaro bja bona e le bjo bo tšhilafetšego go swana le mosadi ge a bone kgwedi. Ka tšhollela kgalefo ya ka godimo ga bona ka baka la ge ba bolaile batho mo nageng, le ka baka la medingwana ye ba bego ba tšhilafaditše naga ka yona. Ke ile ka ba lahla ka baka la mokgwa wo ba bego ba phela mme ba dira ka wona, gomme ka ba šwalalanya le ditšhaba, ba phatlalala le dinaga. Ge ba fihla ditšhabeng ba be ba goboša leina la ka le lekgethwa, ka gobane batho ba be ba re: ‘Batho ba ke setšhaba sa Morena, eupša ba ile ba tlemega go tloga nageng ya gagwe.’ Ke yona taba ye e ntshwentšego mabapi le leina la ka le lekgethwa leo setšhaba sa Israele se bego se le goboša ditšhabeng tše ba ilego go tšona. “Bjale ge, botša setšhaba sa Israele gore nna, Morena, Mong wa bohle, ke re: Se ke tlago se dira ga se ka baka la lena, Baisraele, eupša ke ka baka la leina la ka le lekgethwa leo lena le le gobošitšego ditšhabeng tše le ilego la ya go tšona. Mohla ke bontšha ditšhaba ka mo leina la ka e lego le lekgethwa ka gona, lona leina leo lena le le gobošitšego gare ga bona, ke gona ba tlago lemoga gore Morena ke nna. Ke realo, nna, Morena, Mong wa bohle. Ke tla šomiša lena go bontšha ditšhaba gore ke nna yo mokgethwa. Ke tla le tšea ditšhabeng ka le kgoboketša dinageng tšohle, ka le bušetša nageng ya lena. Ke tla le fokela ka meetse a a sekilego, ka le hlwekiša go tšhilafatšwa ke medingwana yohle ya lena, le tše dingwe ka moka tše di le tšhilafaditšego. Ke tla le fa dipelo tše mpsha le menagano ye mefsa. Ke tla le amoga dipelo tša lena tše thata ka le fa dipelo tše boleta. Ke tla le tsenya moya wa ka, mme ka dira gore le phethe melao ya ka le ditaelo tša ka ka potego. Ke mo le tlago dula nageng ye ke e filego borakgolokhukhu ba lena. Le tla ba setšhaba sa ka, mme nna ka ba Modimo wa lena. Ke tla le hlakodiša dilong tšohle tše di le tšhilafatšago. Ke tla laela mabele gore a ntšifale gore le se sa bolawa ke tlala. Ke tla atiša dikenywa tša mehlare ya lena le dipuno tša mašemo a lena gore le se sa nyatšwa ke ditšhaba ge le welwa ke tlala. Le tla gopola boitshwaro bjola bja lena bjo bobe le ditiro tšela tša lena tša go se loke, gomme le tla inyatša ka baka la tše mpe le tše di šišimišago tše le bego le di dira. Lena setšhaba sa Israele, tšeo ka moka ga ke di dire ka baka la lena. Inyatšeng, le itsholele tše le bego le di dira. Ke realo, nna, Morena, Mong wa bohle.” Morena, Mong wa bohle, o re: “Mohla ke le hlatswa dibe tšohle ke tla le dudiša metseng ya lena gape, la tsošološa marope. Bafeti bohle ba be ba bona ka mo mašemo a lena a letšego ka gona; eupša a tla buša a lengwa. Batho ba tla re naga ye e bego e letše ye bjale e swana le serapa sa Edene; le metse ya gona ye e bego e phušotšwe, e hutšwe mme e tlogetšwe e le marope, bjale e na le batho mme e ageleditšwe. Ke gona mašaledi a ditšhaba tše di le potapotilego a tlago tseba gore nna, Morena, ke tsošološa metse ye e phušotšwego, ka ba ka lema gape mašemo a a bego a letše. Nna, Morena, ke boletše bjalo, gomme ke tla phetha.” Morena, Mong wa bohle, o re: “Se sengwe se ke tlago se direla setšhaba sa Israele ge ba nkgopela sona ke gore ke ba atišetše thari, ba be bjalo ka mohlape wa dihuswane. Metse yeo bjale e lego marope e tla tlala batho go swana le mola Jerusalema e kile ya tlala dihuswane tša go dira dihlabelo menyanyeng. Ke mo ba tlago lemoga gore Morena ke nna.” Maatla a Morena a ile a nkaparela, gomme moya wa gagwe wa ntšea wa yo mpea molaleng wo o bego o tletše marapo. Morena a ntshepetša le molala, gomme ka bona go na le marapo a mantšintši, le gona a omeletše kudu. A mpotšiša a re: “Wena motho wa nama, na marapo a a ka buša a phela?” Nna ka mo fetola ka re: “Morena, Mong wa bohle, ke wena fela o tsebago!” Yena a re: “Porofetela marapo a, o a botše o re: ‘Lena marapo a a omeletšego, theeletšang mantšu a Morena.’ O a botše gore nna, Morena, Mong wa bohle, ke re go ona: Ke tla le tsenya moya ka le phediša gape, ka le kgomaretša mešifa le dinama gomme ka le apeša letlalo. Ke tla le tsenya moya ka le phediša gape. Ke mo le tlago lemoga gore ke nna Morena.” Ka gona ka porofeta ka moo ke laetšwego ka gona. Ya re ke sa bolela ka kwa lešata la mogwaša, gomme marapo a thoma go kopana. Ge ke ntše ke lebeletše ka bona marapo a eba le mešifa le dinama, a napa a apešwa ke letlalo. Eupša go be go se ne moya mebeleng yeo. Modimo a re go nna: “Wena motho wa nama, porofetela moya wa bophelo. Botša moya woo gore Morena, Mong wa bohle, o o laela gore o tle o etšwa ka mathoko ka mane mme o budulele mebele ye o e phediše gape.” Ke moka ka porofeta ka moo ke bego ke laetšwe ka gona. Moya wa tsena mebeleng yeo, ya phela gomme ya ema ka maoto. Ya ba batho ba bantši go swana le makokokoko a madira. Morena a re go nna: “Wena motho wa nama, setšhaba sa Israele ka moka se swana le marapo ao. Bona ba re re omeletše, re feletšwe ke tshepo, re fedile. Ka gona porofetela setšhaba sa Israele o se botše gore nna, Morena, Mong wa bohle, ke ya go fatolla mabitla a bona ka ba ntšha, ka ba bušetša nageng ya Israele. Mohla ke fatolla mabitla a bona mme ke ba ntšha, ba tla lemoga gore ke nna Morena. Ke tla ba tsenya moya wa ka, ka ba phediša gape, gomme ka dira gore ba dule nageng ya bona. Ke mo ba tlago lemoga gore Morena ke nna. Ke tshepišitše, gomme ke tla phetha bjalo. Ke realo, nna, Morena.” Morena a ntaela a re: “Wena motho wa nama, tšea patla mme o ngwale godimo ga yona o re: ‘Ke ya Juda le Baisraele ba ba šomišanago naye.’ E be o tšea ye nngwe patla mme o ngwala godimo ga yona o re: ‘Ke ya Josefa le Efraime le Baisraele bohle ba ba šomišanago nabo.’ O name o kgotlantšhe dipatla tšeo ka dintlha gore di bonale nke ke patla e tee. Ge batho ba go botšiša gore taba yeo e šupang, o ba botše gore nna, Morena, Mong wa bohle, ke re: Ke tlilo tšea patla ya Josefa le ya dikgoro tša Israele tše e lego tša Josefa, ye e swerwego ke Efraime, ka e kopanya le ya Juda, ka di dira patla e tee, ka e swara ka seatla. “Dipatla tšeo tše pedi o di ngwadilego o di sware ka seatla setšhaba se di bona. O nape o ba botše gore nna, Morena, Mong wa bohle, ke re ke tla tšea Baisraele ditšhabeng tše ba ilego go tšona, ka ba kgoboketša, gomme ka ba bušetša nageng ye e lego ya bona. Ke tla ba kopanya ya ba setšhaba se tee mo nageng ye dithabeng tša Israele. Ka moka ga bona ba tla bušwa ke kgoši e tee, gomme e ka se sa ba ditšhaba tše pedi goba ba tšwa mebušo ye mebedi. Ba ka se sa itšhilafatša ka medingwana ya bona ya go šišimiša, goba ka dikarogo tšohle tša bona. Ke tla ba hlakodiša boaroging bjo ba bego ba mphošetša ka bjona. Ke tla ba hlwekiša; ke mo e tlago ba setšhaba sa ka, mme nna ka ba Modimo wa bona. Kgoši ya bona e tla ba Dafida, mohlanka wa ka. Ka moka ba tla bušwa ke mmuši o tee, ba phetha melao ya ka le ditaelo tša ka ka potego. Ba tla dula nageng ye ke ilego ka e fa mohlanka wa ka, Jakobo, naga yeo borakgolokhukhu ba bona ba bego ba dula go yona. Ba tla dula moo go ya go ile le bana ba bona le ditlogolo tša bona. Mohlanka wa ka, Dafida, o tla ba buša go ya go ile. Ke tla dira kgwerano ya go ya go ile le bona ya go ba tlišetša khutšo. Ke tla ba bea moo mme ka ba atiša, ka aga Tempele ya ka nageng ya bona, moo e tlago dulela sa ruri. Ke tla dula le bona moo; ke tla ba Modimo wa bona, mme bona ya ba setšhaba sa ka. Ge ke agile Tempele ya ka moo nageng ya bona gore e dulele sa ruri, ke gona ditšhaba di tlago lemoga gore nna, Morena, ke kgethile Baisraele gore e be setšhaba sa ka.” Morena a ntaela a re: “Wena motho wa nama, kgala Gogo, mmuši yo mogolo wa setšhaba sa Mesheke le sa Tubale nageng ya Magogo. Mo porofete, gomme o mmotše gore nna, Morena, Mong wa bohle, ke re: Ke lwa le wena. Ke tla go retollela go nna, ka go tsenya dikgwega ka mehlagareng, mme ka go ntšha le madira ohle a gago. Madira a gago, gotee le dipere tša bona le banamedi ba ba itlhamilego go felela, ke mašabašaba, ba swere dikotse tše dikgolo le tše dinyenyane, ba itlhamile le ka ditšhoša. Banna ba go tšwa Persia le Etopia le Libia ba na le bona, gomme bohle ba itlhamile ka dikotse le dikefa tša ntwa. Bahlabani ka moka ba naga ya Gomere le ya Bethe-Togarma ka leboaboa ba na le wena, gotee le ba go tšwa ditšhabeng tše dingwe tše dintši. Itokiše, o be komana, madulaabapile, wena le madira a a go potapotilego, o be molaodi wa bona. Ge go fetile mengwaga ye mentši ke tla go laela gore o šwahlele naga ye nngwenyana ye e sa tšogo emiša ntwa, moo setšhaba se bušitšwego mmogo se etšwa ditšhabeng tše dintši, dithabeng tša Israele tše di ilego tša tlogelwa nako ye telele, eupša moo bjale batho ka moka ba dutšego ba bolokegile. Wena le madira a gago gotee le ditšhabatšhaba tše di nago le wena le tla hlasela bjalo ka ledimo, la aparela naga bjalo ka leru.” Se Morena, Mong wa bohle, a se botšago Gogo sese: “Mohlang woo o tla nagana go loga maanomabe. O tla ikemišetša go šwahlela naga ye e sego ya šireletšwa, moo batho ba gona ba dulago ka khutšo le polokego metseng ye e se nago merako, goba dikgoro, goba mapheko. O tla hula batho ba ba dulago metseng ye e kilego ya ba marope, mme wa ba thopela. Ba kgobokeditšwe ba ntšhwa ditšhabeng, gomme bjale ba na le maruo le dithoto, mme ba dula garegare ga lefase. Batho ba Sheba le ba Dedane le babapatši ba go tšwa Tarshishe ba tla go botšiša ba re: ‘Na o tlile go re hula? O rapile madira a gago a mantši go tlo re hlakola, go tlo re thopela silibera ya rena le gauta, le go ikgapela maruo a rena le dithoto, wa gogola dithebola tše dintši?’ ” Ka fao Morena, Mong wa bohle, a ntaela gore ke porofete ke re go Gogo: “Ge setšhaba sa ka sa Israele se dutše se bolokegile, wena o tla tloga mo o dutšego gona, leboaboa, wa eta madira a maatla pele a go tšwa ditšhabeng tše dintši, ka moka ga bona e le banamedi ba dipere. O tla hlasela setšhaba sa ka sa Israele bjalo ka leru le le aparelago naga. Matšatšing a a tlago ke tla go roma gore o yo šwahlela naga ya ka gore ke tle ke bontšhe ditšhaba gore ke nna mang, le go bontšha bokgethwa bja ka ka se ke se dirago ka wena. A ke re ke wena mehleng ye e fetilego ke bego ke bolela ka wena ka bahlanka ba ka, baprofeta ba Israele? Mehleng yeo ba porofetile mengwaga ye mentši ba re ke tla dira gore o hlasele Baisraele.” O realo, Morena, Mong wa bohle. Morena, Mong wa bohle, o re: “Mohla Gogo a šwahlela naga ya Israele ke tla tuka bogale. Ke bega ke galefile kudu gore mohlang woo go tla ba le tšhikinyego ye kgolo ya lefase mo nageng ya Israele. Dihlapi le dinonyana le diphoofolo tša naga le digagabi tšohle le batho ka moka ba lefase di tla thothomela ka letšhogo ge di mpona. Dithaba di tla phekgolwa, magaga a tla pšhatlagana, le merako yohle ya kgerega. Ke tla dira gore Gogo a hlaselwe ka ditšhoša dithabeng tša ka tšohle. Ke realo, nna, Morena, Mong wa bohle. Bahlabani ba gagwe ba tla hlabana seng ka ditšhoša tša bona. Yena ke tla mo otla ka bolwetši le ka polao. Yena le madira a gagwe le ditšhabatšhaba tše di emago naye ke tla ba nešetša pula ya mafula le sefako gotee le mollo le tshebela. Ka tsela ye ke tla bontšha ditšhaba tše dintši gore nna ke yo mogolo, ebile ke yo mokgethwa. Ke mo ba tlago lemoga gore Morena ke nna.” Morena, Mong wa bohle, a ntaela a re: “Wena motho wa nama, porofeta Gogo, o mmotše gore nna, Morena, Mong wa bohle, ke re: Ke lwa le wena, Gogo, mmuši yo mogolo wa setšhaba sa Mesheke le sa Tubale. Ke tla go retolla ka go ntšha ka leboaboa ka go iša dithabeng tša Israele. Ka nama ka go lahliša bora bjo o bo swerego ka seatla sa nngele, le mesebe ye o e swerego ka sa la go ja. Wena le madira a gago ka moka le ditšhabatšhaba tše di emego nago le tla bolawa kua dithabeng tša Israele, gomme ditopo tša lena ke tla di fa manong a mehutahuta le dibata gore di di je. Le tla bolaelwa molaleng, ka gobane go boletše nna, Morena, Mong wa bohle. Ke tla lahlela mollo nageng ya Magogo le go ba ba dutšego ba bolokegile mabopong a lewatle, gomme ba tla lemoga gore Morena ke nna. Ke tla hlokomela gore setšhaba sa ka sa Israele se tsebe leina la ka le lekgethwa, le gona nka se sa lesa leina la ka le gobošwa. Ke mo ditšhaba di tlago lemoga gore nna, Morena, ke Mokgethwa wa Israele.” Morena, Mong wa bohle, a re: “Letšatši lela ke le boletšego ruri le etla. Batho ba ba dulago metseng ya Israele ba tla tšwa ba yo topelela dibetša tše di tlogetšwego ya ba dikgong. Ba tla gotša mello ka dikotse tše dikgolo le tše dinyenyane le mara le mesebe le dithoka le marumo, gomme ba tla fetša mengwaga ye e šupago ba gotša mello ka tšona. Ba ka se sa ya kgonyeng nageng, goba ba yo rema dihlare ka dithokgweng, ka gobane ba tla be ba na le dibetša tše di tlogetšwego gore ba di beše. Ba tla hula mme ba thopela bale ba go ba hula le go ba thopela.” O realo, Morena, Mong wa bohle. Morena a re: “Mohla tše ka moka di direga, ke tla fa Gogo setsha sa poloko mo nageng ya Israele, ka Moeding wa Mosepedi, ka bohlabela bja Lewatle le le Hwilego. Sona se tla thiba tsela ya basepedi, ka gobane ke mo go tlago ba go bolokilwe Gogo le makoko ohle a gagwe, gomme moedi woo o tla bitšwa ‘Moedi wa Makoko a Gogo’. Go boloka ditopo tšeo ka moka le go hlwekiša naga ka lefsa go tla tšea setšhaba sa Israele dikgwedi tše di šupago. Batho ka moka mo nageng ba tla thuša go ba boloka, gomme mohla ke ikutolla gore ke nna Modimo yo maatla, bona ba tla retelwa ge ba bolokile batho bao. Ke realo, nna, Morena, Mong wa bohle. Ge dikgwedi tšeo tša go šupa di seno feta, go tla kgethwa banna ba go sepela le naga gore ba nyake ditopo tše di sa lego kgakala, mme ba di boloke, gore ba hlwekiše naga. Ge ba ntše ba sepela le naga, nako le nako ge ba hwetša lerapo la motho, ba tla bea leswao kgauswi le lona, gore baepamabitla ba tle ba le boloke ka Moeding wa Makoko a Gogo. Go tla ba le motse moo wo o bitšwago Makoko. Ke ka moo naga e tlago hlwekišwa ka lefsa ka gona.” Morena, Mong wa bohle, a ntaela a re: “Wena motho wa nama, bitša manong a mehutahuta le dibata ka moka o re: Kgobokanang le etšwa ka mathoko ohle le ye sehlabelong se ke le direlago sona. E tla ba monyanya wo mogolo wa sehlabelo dithabeng tša Israele, moo le kago ja nama, la nwa le madi. Le tla ja nama ya bagale, la nwa le madi a babuši ba lefase bjalo ka ge nke ke dikgapa goba dikwanyana goba dipudi goba dipoo, diruiwa tšeo ka moka ga tšona e lego tše di nontšhitšwego di etšwa Bashane. Sehlabelong seo ke le direlago sona le tla ja makhura go fihlela a le tena, la nwa le madi go fihlela le tagwa. Bojelong bja ka le tla ja la khora nama ya dipere le ya banamedi ba tšona, le ya bagale, le ya bahlabani ba mehutahuta. Ke realo, nna, Morena, Mong wa bohle.” Morena a re: “Ke tla ikutolla ditšhabeng gore ke nna Modimo yo maatla, mme tšohle ditšhaba di tla bona ka mo ke šomišago maatla a ka go di otla. Go tloga ka nako yeo setšhaba sa Israele se tla lemoga gore ke nna Morena Modimo wa sona. Le tše dingwe ditšhaba di tla tseba gore sa Israele setšhaba se ile sa išwa bothopša ka baka la dibe tša sona, ka ge se be se sa mpotegele. Ka gona ka ba furalela, ka ba gafela manabeng a bona, mme bohle ba bolawa ka tšhoša. Ke ile ka ba otla go ya ka mo ba bego ba tšhilafetše ka gona, le go ya ka dibe tša bona, ka ba furalela.” Ka gona, Morena, Mong wa bohle, o re: “Bjale ke tla buša ditlogolo tša Jakobo bothopša, ka šokela setšhaba sohle sa Israele, ka šetša gore leina la ka le lekgethwa le hlompšhe. Mohla ba dula ka polokego gape nageng ye e lego ya bona, ba se na le yo a ba tšhošetšago, ba tla lebala ka mo ba kilego ba gobošwa ka gona ka baka la ge ba be ba sa mpotegele. Ge ke seno ba buša ditšhabeng, ke ba kgobokeditše dinageng tša manaba a bona, ke tla bontšha ditšhaba tše dintši gore ke yo mokgethwa ka seo ke se dirago ka bona. Ke mo setšhaba sa ka se tlago tseba gore ke nna Morena Modimo wa bona. Seo ba tla se tseba ka gobane ke nna ke ba rometšego bothopša ditšhabeng, gomme ka morago ka ba kgoboketša ka ba bušetša nageng ya bona, ka se tlogele le o tee. Nka se sa tsoga ke ba furaletše, ka gore ke tla tšhela setšhaba sa Israele moya wa ka. Ke realo, nna, Morena, Mong wa bohle.” E be e le letšatši la lesome la kgwedi, mathomong a ngwaga wa masome a mabedi le metšo ye mehlano wa ge re le mathopša, le wa lesome le metšo ye mene ka morago ga ge Jerusalema e thopilwe. Mohlang woo ke ile ka aparelwa ke maatla a Morena, gomme yena a nkiša Jerusalema. Moo ponong Modimo a nkiša nageng ya Israele gomme a mpea godimo ga thaba ye teleletelele. Ka lehlakoreng la yona la ka borwa go be go bonala nke go agilwe motse. A nkiša gona, gomme ka bona monna yo a phadimago bjalo ka mphiri. O be a swere thapo ya lešela le lehlaka la go ela a eme lesorong. A re go nna: “Wena motho wa nama, o lebeledišiše, o theeletše gabotse, o ele tše ke go bontšhago tšona hloko, ka gobane ke sona se o se tlišeditšwego fa. O botše setšhaba sa Israele tšohle tše o di bonago.” Se ke bego ke se bona e be e le Tempele, gomme e dikaneditšwe ka morako. Lehlaka la go ela le le bego le swerwe ke monna yoo e be e le la dimetara tše tharo ka botelele, le feta lehlaka le le tlwaelegilego la go ela. A ela morako woo; wona e be e le wa dimetara tše tharo go ya godimo, le tše tharo bokoto. Ke moka a ya lesorong la ka bohlabatšatši. A namelela ka manamelo, a fihla a ela serepodi; sona e be e le sa dimetara tše tharo ka bophara. Gona moo go be go na le diphapoši tša baleti. Phapoši ye nngwe le ye nngwe e le ya dimetara tše tharo ka botelele, le tše tharo ka bophara, gomme maboto ao a di kgaotšego e be e le a bokoto bja dimetara tše pedi le seripa. Ge o tsena ka lesoro o be o feta ka tlase ga mathudi a a lebeletšego Tempeleng. Serepodi sa lona e be e le sa dimetara tše tharo ka bophara. O ile a ela le ona mathudi ao, mme ya ba dimetara tše nne ka bophara. Dikokwane tša ona e be e le tša metara o tee ka bokoto. *** Ge o tsena ka lesoro la ka bohlabatšatši o be o hwetša diphapoši tše tharo tša baleti ka mo le ka mo, tše tharo e le tša go lekana ka bogolo. Dikokwane tša mathudi ka mo le ka mo di be di lekana. Ka morago ga moo monna yoo a ela bophara bja lesoro. Lona e be e le la dimetara tše di selelago le seripa, sekgoba sa mokgahlo ga mabati ge a butšwe sona e be e le sa dimetara tše tlhano. Ka pele ga phapoši ye nngwe le ye nngwe ya baleti go be go agilwe le mmotwana wa disentimetara tše masome a mahlano go ya godimo. Botelele bja diphapoši tša gona e be e le dimetara tše tharo, bophara le bjona e le dimetara tše tharo. Ke moka a ela sekgoba sa mokgahlo ga leboto la ka morago la phapoši ye nngwe, le la ka morago la phapoši ye e lego ka kua ga mathudi, gomme ya ba dimetara tše lesome le tše pedi le seripa. A ela bophara bja mathudi, mme ya ba dimetara tše lesome. Lesoro le be le dikaneditšwe ka kgoro. Go tloga lesorong go fihla mafelelong a mathudi e be e le dimetara tše masome a mabedi le tše tlhano. Diphapoši tša baleti tše di bego di le ka gare ga mathudi gotee le dikokwane tša tšona di be di na le mafasetere a mapheko ka mathoko ohle. Mathudi le ona a be a na le mafasetere ka gare ka mathoko ohle. Mo dikokwaneng go be go tlokilwe diswantšho tša mehlare ya mepalema. Monna yoo a nkiša ka kgorong ya ka ntle. Gona go be go na le diphapoši tše masome a mararo; pele ga diphapoši go be go na le lebato le le dikologilego kgoro. Lebato le be le fihla ka mathoko a masoro, gomme bophara bja lona bo lekana le botelele bja masoro. Bophagamo bja lebato le bo be bo le ka fase ga bja kgoro ya ka gare. Ke moka a ela sekgoba sa go tloga lesorong la ka fase go fihla kgorong ya ka gare, ya ba dimetara tše masome a mahlano. Ka morago a ela botelele le bophara bja lesoro la ka leboa le le bego le tsenelela ka kgorong ya ka ntle. Diphapoši tšela tše tharo tša baleti ka mo le ka mo ga mathudi, le dikokwane tša lesoro, le mathudi a lona, di be di lekana le tšela tša lesorong la mathomo. Botelele bja lesoro leo e be e le dimetara tše masome a mabedi le tše tlhano, gomme bophara e le dimetara tše lesome le tše pedi le seripa. Mathudi le mafasetere le diswantšho tša mehlare ya mepalema di be di swana le tšela tša lesorong la ka bohlabatšatši. Moo go be go na le magato a a šupago a go namelela lesorong. Ge motho a tsena ka lesoro o be a feta ka tlase ga mathudi. Ka kgorong ya ka gare go lebana le lesoro la ka leboa go be go na le lesoro la go swana le lela la go lebana le lesoro la ka bohlabatšatši. Monna yoo a ela sekgoba se se lego mokgahlo ga masoro ao a mabedi, gomme ya ba a dimetara tše masome a mahlano. Ka morago monna yoo a nkiša ka lehlakoreng la ka borwa, gomme moo ka bona lesoro le le lebeletšego borwa. A ela dikokwane tša lona le mathudi; di be di lekana le tša masoro a mangwe. Diphapoši tša baleti le mathudi lesorong leo di be di na le mafasetere ka mathoko ohle go swana le masorong ale a mangwe. Botelele bja lesoro leo e be e le dimetara tše masome a mabedi le tše tlhano, gomme bophara e le dimetara tše lesome le tše pedi le seripa. Go be go na le magato a a šupago a go namelela go lona. Ge motho a tsena ka lesoro o be a feta ka tlase ga mathudi. Go be go tlokilwe diswantšho tša mehlare ya mepalema dikokwaneng tša mathudi, sengwe ka mo, sengwe ka mo. Kgoro ya ka gare le yona e be e na le lesoro la ka borwa. Monna yoo a ela sekgoba sa go tloga lesorong leo go fihla lesorong la ka ntle la ka borwa, gomme ya ba dimetara tše masome a mahlano. Monna yoo a ntsentšha ka kgorong ya ka gare ka lesoro la ka borwa. A ela lesoro leo, gomme la lekana le masoro ale a mangwe ka bogolo. Diphapoši tša lona tša baleti le dikokwane tša lona le mathudi di be di lekana le tšela tša masorong a mangwe ka bogolo. Diphapoši tša baleti le mathudi lesorong leo di be di na le mafasetere ka mathoko ohle. Botelele bja lona e be e le dimetara tše masome a mabedi le tše tlhano, gomme bophara e le dimetara tše lesome le tše pedi le seripa. Go be go na le mathudi ka mathoko a kgoro ya ka gare, e le a dimetara tše lesome le tše pedi le seripa ka botelele, le tše pedi le seripa ka bophara. Mathudi a lona a be a lebeletše kgorong ya ka ntle, diswantšho tša mehlare ya mepalema di tlokilwe dikokwaneng tša ona. Go be go na le magato a seswai a go namelela lesorong leo. Monna yoo a nkiša ka lehlakoreng la ka bohlabatšatši la kgoro ya ka gare, a ela lesoro, gomme la lekana le ale a mangwe ka bogolo. Diphapoši tša lona tša baleti le mathudi a lona le dikokwane di be di lekana le tšela tša masorong a mangwe ka bogolo. Go be go na le mafasetere ka mathoko ohle gotee le mathuding. Botelele bja lesoro le e be e le dimetara tše masome a mabedi le tše tlhano, gomme bophara e le dimetara tše lesome le tše pedi le seripa. Mathudi a lona a be a lebeletše kgorong ya ka ntle. Diswantšho tša mehlare ya mepalema di be di tlokilwe dikokwaneng tša ona ka mo le ka mo. Go be go na le magato a seswai a go namelela lesorong leo. Ka morago monna yoo a nkiša lesorong la ka leboa. A le ela, gomme la lekana le ale a mangwe ka bogolo. Diphapoši tša lona tša baleti le dikokwane le mathudi di be di lekana le tšela tše dingwe ka bogolo. Go be go na le mafasetere ka mathoko ohle a lona. Botelele bja lona e be e le dimetara tše masome a mabedi le tše tlhano, gomme bophara e le dimetara tše lesome le tše pedi le seripa. Mathudi a lona a be a lebeletše kgorong ya ka ntle. Diswantšho tša mehlare ya mepalema di be di le dikokwaneng tša lona ka mo le ka mo. Go be go na le magato a seswai a go namelela lesorong leo. Go be go na le phapoši ye e nago le mojako mathuding a lesoro ka mo go bego go hlatswetšwa dihlabelo tša go tšhungwa ka moka. Gona ka moo mathuding go be go na le ditafola tše pedi ka mo le ka mo tša go bolaela diphoofolo tša dihlabelo tša go tšhungwa ka moka, le tša dihlabelo tša tshwarelo ya dibe, le tša dihlabelo tša tefelo ya tšona. Ka ntle ga mathudi lesorong la ka leboa go be go na le ditafola tše nne: tše pedi ka lehlakoreng le lengwe, le tše pedi ka go le lengwe. Ditafola tšeo go tšona go bego go bolaelwa diphoofolo tša dihlabelo e be e le tše seswai: tše nne ka lehlakoreng le lengwe la lesoro, le tše nne ka go le lengwe. Go be go na le ditafola tše dingwe tše nne tša go dirwa ka leswika le le betlilwego tša dihlabelo tša go tšhungwa ka moka. Botelele bja ye nngwe le ye nngwe e be e le disentimetara tše masome a a šupago le tše tlhano; bophara le bjona e le disentimetara tše masome a a šupago le tše tlhano, mola bophagamo e le disentimetara tše masome a mahlano. Godimo ga tšona go be go bewa tše di dirišwago ge go bolawa diphoofolo tša dihlabelo tša go tšhungwa ka moka le tša dihlabelo tše dingwe. Maribana a dimilimetara tše masome a a šupago le tše tlhano ka bophara a be a dikologile dipapetla tša ditafola tšeo. Nama ya dihlabelo e be e bewa godimo ga ditafola tšeo. Ka morago o ile a nkiša ka kgorong ya ka gare. Go be go na le diphapoši tše pedi ka kgorong ya ka gare, ye nngwe e lebeletše borwa kgauswi le lesoro la ka leboa, mola ye nngwe e lebeletše leboa kgauswi le lesoro la ka borwa. Monna yoo a re go nna: “Phapoši ya go lebelela borwa ke ya baprista ba go hlankela Morena ka Tempeleng, gomme ya go lebelela leboa ke ya baprista ba go mo hlankela aletareng. Baprista ba ke ditlogolo tša Tsadoko; ke bona fela Balefi ba ba dumelelwago go ya pele ga Morena go mo hlankela.” Monna yoo a ela kgoro ya ka gare, gomme botelele ya ba dimetara tše masome a mahlano, bophara le bjona ya ba dimetara tše masome a mahlano, mathoko ohle a lekana, aletare e le ka pele ga Tempele. Ke moka a nkiša mathuding a Tempele. A ela dikokwane tša mathudi, bokoto bja tšona ya ba dimetara tše pedi le seripa ka mo le ka mo. Bophara bja lesoro e be e le dimetara tše di šupago, gomme bokoto bja dikokwane tša lona e le metara o tee le seripa ka mo le ka mo. Go be go na le magato a go namelela mathuding ao bophara bja ona e bego e le dimetara tše lesome, mme botelele e le dimetara tše di selelago. Moo lesorong go be go na le dikokwane tše pedi, ye nngwe ka mo, ye nngwe ka mo. Ka morago monna yoo a nkiša ka Tempeleng. A ela dikokwane, mme bokoto bja tšona ya ba dimetara tše tharo ka mo le ka mo. Bophara bja lesoro ya ba dimetara tše tlhano, gomme bokoto bja dikokwane tša lona ya ba dimetara tše pedi le seripa ka mo le ka mo. A ela phapoši ya gare, gomme ya ba dimetara tše masome a mabedi ka botelele, le tše lesome ka bophara. Ke moka a ya phapošing ya moseo. A ela dikokwane tša mojako, ye nngwe le ye nngwe ya ba ya metara o tee ka bokoto. Bophara bja mojako ya ba dimetara tše tharo, gomme bokoto bja dikokwane tša wona ya ba dimetara tše tharo le seripa. A ela botelele bja phapoši yeo, mme ya ba dimetara tše lesome, le bophara ya ba dimetara tše lesome. A re go nna: “Mo ke gona Felo mo Gokgethwakgethwa.” Monna yoo a ela bokoto bja leboto la Tempele, gomme ya ba dimetara tše tharo. Go bapela le leboto le, go dikologa le Tempele, go be go na le molokoloko wa diphapoši tše dinnyane tša dimetara tše pedi ka bophara. Diphapoši tšeo e be e le tša mabato a mararo a go hlatlagana, gomme lebatong le lengwe le le lengwe go na le diphapoši tše masome a mararo. Leboto la ka ntle la Tempele lebatong le lengwe le le lengwe le be le fetwa ke la ka fase ga lona ka bokoto mo e lego gore diphapoši di be di dulane godimo ka maboto. Bophara bja diphapoši bo be bo oketšega lebatong le lengwe le le lengwe ka go sesefala ga leboto ge le eya godimo. Diphapošing tša ka godimo go be go iwa ka manamelo a a tlogago lebatong la ka fase, go ya go la gare, le go la ka godimo. Ka bona Tempele e na le sethala se se e dikologilego, sona e le motheo wa diphapoši. Bogodimo bja sona bo be bo lekana le botelele bja lehlaka la go ela, e lego dimetara tše tharo. Bokoto bja leboto la ka ntle la diphapoši e be e le dimetara tše pedi le seripa. Go be go na le sekgoba mokgahlo ga diphapoši tša Tempele le diphapoši tša baprista go dikologa Tempele, mme sona e le sa dimetara tše lesome ka bophara. Diphapošing tšeo tša Tempele go be go na le mejako ye mebedi ye e bulelwago sekgobeng seo: wo mongwe o lebeletše leboa, wo mongwe o lebeletše borwa. Bophara bja sekgoba seo e be e le dimetara tše pedi le seripa go dikologa Tempele. Ka mafelelong a kgoro ya ka thoko ya bodikela bja Tempele go be go na le moago wa dimetara tše masome a mane le tše tlhano ka botelele, le tše masome a mararo le tše tlhano ka bophara; leboto la wona e be e le la dimetara tše pedi le seripa ka bokoto mo gohle. Monna yoo a ela Tempele, gomme ya ba ya dimetara tše masome a mahlano ka botelele. Gomme go tloga lehlakoreng la ka morago la Tempele go putla kgoro go yo fihla lehlakoreng la ka mafelelong la moago wa ka bodikela sebaka sa gona le sona ya ba dimetara tše masome a mahlano. Bophara bja kgoro ya ka bohlabatšatši go balwa le bokapele bja Tempele e be e le dimetara tše masome a mahlano. A ela le botelele bja moago wo o lebeletšego kgorong ya ka morago ga Tempele, gotee le mathudi a a lego ka mahlakoreng ka mabedi, le bjona ya ba dimetara tše masome a mahlano. Phapoši ya gare ga Tempele, le phapoši ya moseo, le mathudi a go tsenela ka Tempeleng, le direpodi, le mafasetere a mapheko, le mathudi a ka mathokong a mararo a a lebeletšego mojako wa Tempele di be di manegilwe ka dipapetlana tša dikota mo gohle, go tloga fase go fihla mafesetereng. Mafasetere ao a be a tswalelega. Mo gohle mabotong ka moka a phapoši ya moseo le ya gare go be go tlokilwe diswantšho tša bakerubi le tša mehlare ya mepalema ka go latelana ga tšona go fihla serepoding, mokerubi a latela mopalema, bjalo bjalo. Mokerubi yo mongwe le yo mongwe o be a na le difahlego tše pedi: *** sefahlego sa motho sa go lebelela mopalemeng ka thoko ye nngwe, le sa tau sa go lebelela mopalemeng ka thoko ye nngwe. Di be di tlokilwe bjalo mo gohle Tempeleng. Go tloga fase go fihla serepoding sa mojako wa Tempele mo lebotong go be go tlokilwe diswantšho tša bakerubi le tša mepalema. Bophara le bogodimo bja mojako wa phapoši ya gare bo be bo lekana. Pele ga mojako wa Felo mo Gokgethwakgethwa go be go na le selo se se swanago le aletare ya dikota. E be e le ya metara o tee le seripa go ya godimo, le metara o tee botelele, le metara o tee bophara. Dikota tša yona tša dikhutlo le bogato bja yona le mahlakore a yona ka moka e be e le tša dikota. Monna yoo a re go nna: “Ye ke yona tafola ye e emego pele ga Morena.” Phapoši ya gare le Felo mo Gokgethwakgethwa di be di na le mejako ya mabati a mabedi ye nngwe le ye nngwe. Mabati ao a be a bulwa ka bogare. Mo mabating a phapoši ya gare go be go tlokilwe diswantšho tša mehlare ya mepalema le bakerubi, go no swana le mabotong. Mathudi a Tempele a be a na le tlhaka ya dikota ka pele. Ka mahlakoreng a mathudi mabotong go be go na le mafasetere a mapheko, gomme gona moo mabotong go tlokilwe diswantšho tša mehlare ya mepalema ka mo le ka mo. Ke moka monna yoo a nkiša ka leboa ka kgorong ya ka ntle, a nkiša diphapošing tše di lebanego le kgoro ya Tempele, le moago wo o lego ka leboa. Moago woo e be e le wa dimetara tše masome a mahlano ka botelele, le tše masome a mabedi le tše tlhano ka bophara. Mojako wa wona o be o le ka leboa. Go lebana le lebala la dimetara tše lesome le le bego le kgomagane le kgoro ya ka gare, le go lebana le lebato la kgoro ya ka ntle go be go na le diphapoši tše di lebelelanego mabatong a mararo a a hlatlaganego. Mo pele ga diphapoši go be go na le megorogohlo ye e išago ka diphapošing tšeo, bophara bja yona e le dimetara tše tlhano, mme botelele e le dimetara tše masome a mahlano. Mejako ya yona e be e lebeletše leboa. Diphapoši tša lebatong la ka godimo di be di pitlagane go feta tša lebatong la ka fase le la gare, ka gore di be di agetšwe moragonyana. Diphapoši tša mabatong ao ka mararo di be di se na dikokwane, di sa swane le meago ya dikgoro; ke ka baka leo diphapoši tša ka godimo di bego di agetšwe moragonyana go tša ka fase ga tšona, le go tša gare. Go bapa le diphapoši ka ntle go be go na le leboto la dimetara tše masome a mahlano ka botelele le eya ka kgorong ya ka ntle. Botelele bja moago wa diphapoši tšeo di lebeletšego kgorong ya ka ntle e be e le dimetara tše masome a mabedi le tše tlhano, kganthe bja diphapoši tšeo di lebeletšego Tempeleng e be e le dimetara tše masome a mahlano. Ka bohlabela diphapoši tša ka fase di be di na le mojako wa go tsena ge motho a etšwa ka kgorong ya ka ntle. Go bapa le leboto la kgoro ya ka ntle ka lehlakoreng la lona la ka borwa go be go na le diphapoši tše di lebeletšego ka kgorong ya Tempele le go wona moago wa diphapoši. Mo pele ga diphapoši go be go na le mogorogohlo. Diphapoši tše di be di swana le tšela tša ka leboa. Di be di lekana natšo ka botelele le ka bophara, di swana natšo le ka sebopego, le mejako ya tšona e swana. Go be go na le mogorogohlo ka fase ga diphapoši tša ka lehlakoreng la ka borwa la moago. Mathomong a mogorogohlo wo wa go bapa le leboto go leba ka bohlabatšatši go be go na le mojako wo go tsenwago ka wona ka diphapošing. Monna yoo a re go nna: “Diphapoši tše di lego ka leboa le ka borwa tše di lebeletšego ka kgorong ya Tempele ke tše dikgethwa, tše baprista ba ba tsenago ka mo go lego Morena ba jelago dikabelo tše dikgethwakgethwa ka go tšona. Ka ge diphapoši tša gona e le tše dikgethwa, baprista ba tla bea dikabelo tše dikgethwakgethwa ka gare ga tšona: dikabelo tša bupi le dihlabelo tša tshwarelo ya dibe le tša dihlabelo tša tefelo ya tšona. Ge baprista ba ile ba tsena ka Felo mo Gokgethwa, ba se ke ba tšwela ka kgorong ya ka ntle ba se ba apola diaparo tše ba bego ba di apere ge ba hlankela Morena, ba di tlogele moo, gobane diaparo tšeo ke tše dikgethwa. Ba apare tša bona pele ba tšwela ka ntle mo go kgobokanego setšhaba.” Ge monna yoo a seno fetša go ela bokagare bja lebala la Tempele, o ile a nntšhetša ka ntle ka kgoro ya ka bohlabatšatši, gomme a ela setsha sa Tempele. A ela lehlakore la ka bohlabatšatši ka lehlaka la go ela, gomme lona ya ba la dimetara tše makgolo a mabedi le tše masome a mahlano. Ke moka a ela lehlakore la ka leboa, le lona ya ba la dimetara tše makgolo a mabedi le tše masome a mahlano. A ela lehlakore la ka borwa, le lona ya ba la dimetara tše makgolo a mabedi le tše masome a mahlano. A ya ka lehlakoreng la ka bodikela, a le ela, gomme le lona ya ba la dimetara tše makgolo a mabedi le tše masome a mahlano. Ya ba ge a etše mathoko ka mane a leboto la thetemotse; botelele bja lona ya ba dimetara tše makgolo a mabedi le tše masome a mahlano, bophara le bjona ya ba dimetara tše makgolo a mabedi le tše masome a mahlano. Leboto leo ya ba la go aroganya sekgoba se sekgethwa le se e sego se sekgethwa. Monna yoo a nkiša lesorong le le lebeletšego bohlabatšatši, gomme moo ka bona letago la Modimo wa Israele le etšwa bohlabatšatši. Modumo wa lentšu la gagwe wa kwagala bjalo ka wa maphoto a lewatle, gomme lefase la bonegelwa ke letago la gagwe. Pono yeo e be e swana le yela ke bego nkile ka e bona mola Modimo a etla go fediša Jerusalema, le yela ke bego nkile ka e bona kua nokeng ya Kebara. Ke moka ka itahlela fase ka sefahlego. Letago leo la Morena la tsena ka lesoro le le lebeletšego bohlabatšatši la ya ka Tempeleng. Moya wa Morena wa nkuka wa ntsentšha ka kgorong ya ka gare, moo ke ilego ka bona Tempele e tletše letago la Morena. Ya re monna yoo a sa eme ka thoko ga ka ka kwa motho a bolela le nna a le ka Tempeleng a re: “Wena motho wa nama, felo fa ke mo go lego setulo sa ka sa bogoši, le mo ke khutšišago maoto. Ke mo ke tlago dula gare ga Baisraele go ya go ile. Setšhaba sa Israele le magoši a sona ba ka se sa tsoga ba gobošitše leina la ka ka go khunamela medimo ye mengwe, goba ka go boloka dikgoši tša bona mo lefelong le. Dikgoši di phutše mojako wa mošate go bapela le wa Tempele ya ka, mo e lego gore nna le bona re arogantšwe fela ke leboto. Ba gobošitše leina la ka le lekgethwa ka tše di šišimišago tše ba di dirilego, ka gona ka ba fediša ke galefile. Bjale ba swanetše go lesa go khunamela medimo ye mengwe, gomme ba tloše ditopo tša dikgoši tša bona. Ge ba ka dira bjalo ke tla dula gare ga bona go ya go ile. “Wena motho wa nama, o hlalošetše setšhaba sa Israele ka Tempele yeo, gomme ba lebeledišiše seswantšho sa yona. O ba lemoše gore ba inyaletše makgopo a bona. Ge ba ka inyaletša tšohle tše ba di dirilego, o ba hlalošetše seswantšho sa Tempele: seemo sa yona, mejako le masoro, sebopego sa yona, peakanyo ya dilo ka moka, le melao le melawana yohle ya yona. O di ngwale ba go lebeletše, gore ba tle ba lemoge seemo sa yona mme ba phethe melao ya yona ka moka. Molao wa Tempele šo: Sekgoba sohle se se potapotilego Tempele godimo ga thaba le se tšee e le se sekgethwakgethwa.” Šedi dikelo tša aletare, tša ge go šomišwa kelo ya go swana le ye e šomišitšwego ge go elwa Tempele. Aletare e be e na le mosele wa disentimetara tše masome a mahlano go iša fase, le masome a mahlano bophara, le morumo wa disentimetara tše masome a mabedi le tše tlhano bophara. Bophagamo bja aletare ka boyona bo be bo le ka mokgwa wo: Go tloga fase moseleng go fihla serepoding sa ka fase e be e le metara o tee go ya godimo, le disentimetara tše masome a mahlano bophara. Go tloga serepoding se senyenyane go fihla go se segolo e be e le dimetara tše pedi go ya godimo, le disentimetara tše masome a mahlano bophara. Bophagamo bja karolo ya aletare yeo dihlabelo di bego di tšhumelwa go yona e be e le dimetara tše pedi, gomme go tloga karolong yeo go ya godimo go be go tlomogile manakana a mane. Karolo ye e be e lekalekana ka mathoko ohle, e le dimetara tše di selelago ka botelele, le tše di selelago ka bophara. Serepodi sa ka godimo se be se lekalekana ka mahlakoreng ohle, e le dimetara tše di šupago ka botelele, le tše di šupago ka bophara, se na le morumo wa disentimetara tše masome a mabedi le tše tlhano ka bophara. Mosela wa go dikologa aletare e be e le wa disentimetara tše masome a mahlano. Manamelo a go namelela aletareng a be a le ka lehlakoreng la ka bohlabatšatši. Monna yoo a re go nna: “Wena motho wa nama, Morena, Mong wa bohle o re: Ditaelo tša go dira dihlabelo tša go tšhungwa ka moka le tša go foka aletare ka madi ge e agilwe šedi: Baprista bale ba kgoro ya Lefi ba e lego ditlogolo tša Tsadoko ke bona fela ba ba swanetšego go tla pele ga Morena go mo hlankela. Morena, Mong wa bohle, o go laela gore o ba fe powana e be sehlabelo sa tshwarelo ya dibe. O tšee madi a mangwe a yona o tlotše manakana a aletare ka ona, le dikhutlo tša serepodi sa ka godimo ka dine, le morumo ka moka. Ka mokgwa woo o tla be o hlwekiša aletare ebile o e kgethwafatša. O tšee powana yeo ya go dira sehlabelo sa tshwarelo ya dibe o e tšhumele lefelong leo le se kgethetšwego ka ntle ga setsha sa Tempele. Ka tšatši le le latelago o tšee phooko ye e se nago bosodi o dire sehlabelo sa tshwarelo ya dibe ka yona. O boeletše o hlwekiše aletare ka wona mokgwa wola o dirilego ka madi a powana. Ge o feditše go e hlwekiša, o tšee powana le kgapa ya mohlape wa gago, bobedi e be tše di se nago bosodi, o di iše go Morena. Baprista ba di gaše ka letswai gomme ba mo tšhumele tšona e le sehlabelo sa go tšhungwa ka moka. Matšatšing a a šupago o dire sehlabelo sa tshwarelo ya dibe ka diruiwa tša mohlape wa gago, ka phooko le ka powana le ka kgapa tšatši le lengwe le le lengwe. Ka moka ga tšona e be tše di se nago bosodi. Matšatšing a a šupago baprista ba šegofatše aletare ba e hlwekiše, e be gona go e kgethwafatša. Ge matšatši ao a fetile, go tloga ka tšatši la seswai baprista ba thome go le direla dihlabelo tša go tšhungwa ka moka le dihlabelo tša kagišano aletareng. Ke mo le tlago nkgahla. O realo, Morena, Mong wa bohle.” Monna yoo a mpušetša lesorong la ka ntle la Tempele le le lebeletšego bohlabatšatši. Lesoro leo le be le tswaletšwe, gomme Morena a re go nna: “Lesoro le le dule le tswaletšwe, le se ke la bulwa. Go se be le motho yo a tsenago ka lona. Le dule le tswaletšwe, ka gobane nna, Morena Modimo wa Israele, ke tsene ka lona. Ke kgoši fela yo a dumeletšwego go yo jela dijo tše dikgethwa go lona pele ga ka. A ye gona ka tsela ya lona ya mathudi, a be a tšwe ka yona.” Monna yoo a nntšha ka lesoro la ka leboa a nkiša pele ga Tempele. Ya re ge ke lebelela, ka bona Tempele ya Morena e tletše letago la gagwe. Ka itahlela fase ka sefahlego, gomme Morena a re go nna: “Wena motho wa nama, o ele hloko tšohle tše o di bonago ka mahlo, gape o di kwago ka ditsebe mabapi le tšohle tše ke go botšago tšona ka melao le melawana ya Tempele ya ka. O šetše gabotse gore ke batho bafe ba ba dumeletšwego go tsena le go tšwa ka Tempeleng, le ba ba sego ba dumelelwa. “O botše setšhaba seo sa dingangele sa Israele gore nna, Morena, Mong wa bohle, ke re: Lena setšhaba sa Israele, tlogelang tšohle tše di šišimišago tše le di dirago! Le tšhilafaditše Tempele ya ka ka go dumelela bafaladi ba mašoboro, batho ba ba sa ntlhomphego, gore ba tsene ka Tempeleng ya ka ge le ntlišetša makhura le madi e le kabelo ya dijo. Ka gona le lahlile kgwerano ya ka ka tšohle tše di šišimišago tše le di dirilego. Ga se la phetha ditirelo tše dikgethwa ka Tempeleng ya ka, eupša le dirile gore di phethwe ke bafaladi. “Nna, Morena, Mong wa bohle, ke re: Mofaladi wa lešoboro, yo a sa ntlhomphego, a se tsene ka Tempeleng ya ka, ešita le bafaladi ba ba tswakanego le Baisraele.” “Balefi bale ba go kgeloga ba na le Baisraele ka moka ba khunamela medingwana ba tla otlelwa sebe sa bona. Ba ka no ntlhankela ka Tempeleng ka go hlokomela masoro le go dira modiro wa ka Tempeleng. Ba ka no hlaba diruiwa tšeo batho ba di tlišago gore ka tšona go dirwe dihlabelo tša go tšhungwa ka moka, le dihlabelo tše dingwe, gomme ba ba modirong wa go direla setšhaba dihlabelo. Fela ka ge ba ile ba khunamela medingwana, seo ba se direla setšhaba sa Israele, gomme ka go dira bjalo ba diriša setšhaba sebe, nna, Morena, Mong wa bohle, ke ikanne gore ke tla ba otlela sebe seo sa bona. Ba se ke ba mpatamela ba tlo ntlhankela e le baprista, goba ba batamela se sengwe sa tše dikgethwa tša ka, goba ba batamela dikabelo tše dikgethwakgethwa. Ke ka mo ba tlago goboga ka baka la tše di šišimišago tše ba ilego ba di dira. Ke ba fa mešongwana yohle ya ka Tempeleng, tšohle tše di swanetšego go dirwa go yona.” “Baprista ba Balefi ba e lego ditlogolo tša Tsadoko bona ba ile ba no fela ba botegela mediro ya ka Tempeleng ya ka mola Baisraele ba kgeloga. Ke ka baka leo bjale e lego bona bao ba swanetšego go mpatamela gore ba ntlhankele, ba nkabele makhura le madi a dihlabelo. Ke bona fela ba ba swanetšego go tsena ka Tempeleng ya ka, le go batamela tafoleng ya ka ba ntlhankela, gomme ba swara tirelo ya ka Tempeleng. Ge ba tsena ka masoro a go ya ka kgorong ya ka gare ya Tempele ba apare diaparo tša mašela. Ba se ke ba apara seaparo sa boya ge ba le modirong wa bona ka kgorong ya ka gare goba ka Tempeleng. Ba rwale dikuane tša mašela hlogong, ba apare marokgo a mašela; ba se ke ba apara selo se se kago ba ntšha sethitho. Pele ba eya ka kgorong ya ka ntle moo go lego setšhaba, ba apole diaparo tše ba bego ba di apere mola ba le modirong wa bona ka Tempeleng, gomme ba di tlogele ka phapošing tše dikgethwa. Ba apare tša bona gore ba tle ba se tšhele setšhaba madimabe a diaparo tša bona tše dikgethwa. “Baprista ba se ke ba phalola dihlogo goba ba rua setšhitšhi. Meriri ya bona e dule e fokoditšwe. Baprista ba se ke ba nwa beine pele ba tsena ka kgorong ya ka gare. Moprista a se ke a nyala mosadi yo a hladilwego; a nyale fela kgarebe ya Moisraele, goba mohlologadi wa moprista yo a hlokafetšego. “Baprista ba rute setšhaba sa ka go kgetholla se sekgethwa go se e sego se sekgethwa, le se se hlwekilego go se se sego sa hlweka. Ge batho ba sekišana kgorong baprista ba ahlole molato woo go ya ka melao ya ka. Ba phethe melao le melawana ya ka menyanyeng ya ka yohle, le Disabatha tša ka ba di kgethwafatše. “Moprista a se ke a itšhilafatša ka go kgoma setopo, ge e se ge e le sa tatagwe, goba sa mmagwe, goba sa morwediagwe, goba sa morwarragwe, goba sa kgaetšediagwe ye e sego ya nyalwa. Ge a seno hlwekišwa gape a letele matšatši a a šupago. Ka tšatši le a tsenago gape ka lona ka kgorong ya ka gare ya Tempele go dira modiro wa gagwe wa ka Tempeleng a dire sehlabelo sa tshwarelo ya dibe. Ke realo, nna, Morena, Mong wa bohle. “Baprista ba se ke ba fiwa lefa felo, gobane lefa la bona ke nna. Le se ke la ba fa thoto mo nageng ya Israele, gobane thoto ya bona ke nna. Ba phele ka dikabelo tša bupi, le dihlabelo tša tshwarelo ya dibe, le dihlabelo tša tefelo ya tšona; le tšohle tše di abetšwego nna mo nageng ya Israele e be tša bona. Dithakangwaga tšohle tše kaonekaone le dikabelo tšohle tše le ntlišetšago tšona e be tša bona. Hlama ya lena ya mathomo le e fe baprista, ke mo ke tlago atla malapa a lena. Baprista ba se ke ba ja nonyana goba phoofolo ye e ikhwetšego ka boyona, goba e bolailwego ke phoofolo ye nngwe.” “Mohla le arola naga le efa kgoro ye nngwe le ye nngwe karolo, seripa se sengwe se arolelwe Morena e le selete se sekgethwa. E be sa dikilometara tše lesome le tše pedi le seripa ka botelele, le tše lesome ka bophara. Sebaka seo ka moka e tla ba se sekgethwa. Gona mo sebakeng seo go be le setsha sa Tempele sa go lekana ka mathoko ohle a dimetara tše makgolo a mabedi le masome a mahlano ka botelele, le tše makgolo a mabedi le masome a mahlano ka bophara, gomme sona se dikologwe ke sekgoba sa dimetara tše masome a mabedi le tše tlhano ka bophara. Ka gare ga selete seo se sekgethwa le ele karolo ya dikilometara tše lesome le tše pedi le seripa ka botelele, le tše tlhano ka bophara. Ka go yona go agwe Tempele, e lego gona Felo mo Gokgethwakgethwa. Karolo ye e be yona ye kgethwa nageng, e be ya baprista ba go hlankela Morena ka Tempeleng. E be ya magae a bona, e be lefelo le lekgethwa la Tempele. “Karolo ye nngwe ya botelele bja dikilometara tše lesome le tše pedi le seripa, le bophara bja dikilometara tše tlhano e be ya Balefi bao ba dirago mediro ya ka Tempeleng. Gona moo go be le metse ye ba dulago go yona. “Kgauswi le selete seo se sekgethwa le arole seripa se sengwe sa dikilometara tše lesome le tše pedi le seripa ka botelele, le tše pedi le seripa ka bophara, e be ya motse moo mang le mang wa setšhaba sa Israele a kago dula gona.” “Kgoši le yona e arolelwe naga ye e lego ka mahlakoreng a mabedi a selete sekgethwa, le a karolo yeo go yona go tlago agwa motse. Ka bodikela e nabele bodikela; ka bohlabatšatši e nabele bohlabatšatši. Botelele bja yona bo lekane le bja karolo ye nngwe ya tše di aroletšwego dikgoro tša Israele. E tloge mollwaneng wa ka bodikela wa naga e yo fihla go wa ka bohlabatšatši. Karolo ye ya naga ya Israele e tla ba yona ya kgoši, gomme dikgoši tša ka di ka se sa gatelela setšhaba sa ka, eupša di tla tlogelela setšhaba sa Israele naga go ya ka dikgoro tša sona.” Morena, Mong wa bohle, a re: “Go lekane, lena babuši ba Israele! Tlogelang šiši le kgatelelo. Dirang tše di lokilego le tše di swanelago. Lesang go raka setšhaba sa ka nageng ya sona. Le botšwa ke nna, Morena, Mong wa bohle. “Le šomiše dikeloboima le diroto tše di nepagetšego le meruswi ye e nepagetšego. “Seroto le moruswi di lekane ka bogolo, moruswi le seroto bobedi e be tša go tsena galesome ka pitšeng ye go elwago ka yona. “Dikeloboima tša lena e be tše di latelago: digera tše masome a mabedi di lekana le šekele e tee, dišekele tše masome a a selelago di lekana le mina o tee. “Dikabelo tša lena e swanetše go ba tše: mabele e be seroto se tee go tše masome a a selelago, garase e be seroto se tee go tše masome a a selelago, makhura a mohlware e be moruswi o tee go ye lekgolo. Go tšwa mohlapeng wo mongwe le wo mongwe wa dihuswane tše makgolo a mabedi tša mafulo a Israele go neelwe sehuswane se tee. “Ka dikabelo tšeo ka moka go dirwe dikabelo tša bupi, le dihlabelo tša go tšhungwa ka moka, le dihlabelo tša kagišano, gore setšhaba se swarelwe dibe tša sona. “Batho bohle ba naga ye ba išetše kgoši ya Israele dikabelo tšeo. Yena sa gagwe e tla ba go tliša diruiwa tša go tšhungwa ka moka, le dikabelo tša bupi, le dikabelo tša dino ge setšhaba sa Israele se keteka Monyanya wa Lebalana, le Disabatha, le menyanya ye mengwe. O swanetše go ntšha dihlabelo tša tshwarelo ya dibe, le dikabelo tša bupi, le dihlabelo tša go tšhungwa ka moka, le dihlabelo tša kagišano, gore setšhaba sa Israele se swarelwe dibe tša sona.” Morena, Mong wa bohle, a re: “Ka letšatši la pele la kgwedi ya mathomo le dire sehlabelo ka poo ye e se nago bosodi, gomme le hlwekiše Tempele. Moprista a tšee madi a mangwe a sehlabelo se sa tshwarelo ya dibe, a a tlotše dikoteng tša mejako ya Tempele le dikhutlong tša serepodi sa ka godimo sa aletare ka bone ga tšona, le dikoteng tša masoro a go ya ka kgorong ya ka gare. Ka letšatši la bošupa la kgwedi le dire ka wona mokgwa woo, le direle mang le mang yo a ka nogo ba a dirile sebe a se a ikemišetša, goba a sa tsebe. Ke ka mokgwa wo le swanetšego go hlwekiša Tempele ka wona. “Ka letšatši la lesome le metšo ye mene la kgwedi ya mathomo le thome go keteka Monyanya wa Paseka. Matšatšing a a šupago go lewe senkgwa se se se nago komelo. Ka letšatši la mathomo la monyanya kgoši a dire sehlabelo sa tshwarelo ya dibe tša gagwe ka poo le tša setšhaba ka moka sa naga ye. Tšatšing le lengwe le le lengwe la matšatši ao a go šupa a monyanya a direle Morena sehlabelo sa go tšhungwa ka moka ka dipoo tše di šupago le dikgapa tše di šupago tše di se nago bosodi. A dire le sehlabelo sa tshwarelo ya dibe ka phooko tšatši le lengwe le le lengwe. Poo ye nngwe le ye nngwe le kgapa ye nngwe le ye nngwe ye a dirago sehlabelo ka yona e emelwe ke kabelo ya bupi ya seroto sa bupi, le moruswi wa makhura a mohlware. “Tšatši le lengwe le le lengwe la matšatši a a šupago a Monyanya wa Mešaša kgoši a dire ka mokgwa woo ka sehlabelo sa tshwarelo ya dibe, le ka sa go tšhungwa ka moka, a tšhume le kabelo ya bupi le ya makhura a mohlware ka mokgwa woo.” Morena, Mong wa bohle, o re: “Lesoro la kgoro ya ka gare le le lebeletšego bohlabatšatši le dule le tswaletšwe matšatšing a a selelago a go šoma, eupša ka Sabatha le ka Monyanya wa Lebalana le bulwe. Kgoši a tsene ka lesoro la mathudi a etšwa ka kgorong ya ka ntle, a yo ema go bapela le kota ya lesoro ge baprista ba le gare ba mo direla sehlabelo sa go tšhungwa ka moka le dihlabelo tša kagišano. Gona moo lesorong a khunamele Morena, a kgone a etšwa gape. Lesoro le dule le butšwe go fihlela mantšiboa. Ka letšatši la Sabatha le ka Monyanya wa Lebalana setšhaba sohle sa naga ye le sona se khunamele Morena moo pele ga lesoro. “Ka letšatši la Sabatha kgoši e tlišetše Morena dikwanyana tše di selelago le kgapa e tee tša go dira sehlabelo sa go tšhungwa ka moka, tšohle e be tše di se nago bosodi. Kgapa a e tliše le kabelo ya bupi bja seroto se tee, gomme dikwanyana a di tliše le kabelo ya bupi bja diroto tša palo ye a e ratago. Seroto se sengwe le se sengwe sa bupi a se tliše le moruswi o tee wa makhura a mohlware. Ka Monyanya wa Lebalana a tliše powana, dikwanyana tše di selelago, le kgapa, tšohle e be tše di se nago bosodi. Poo ye nngwe le ye nngwe le kgapa ye nngwe le ye nngwe ye a e tlišago a e tliše le kabelo ya seroto sa bupi, gomme kwanyana ye nngwe le ye nngwe ye a e tlišago, yona a e tliše le kabelo ya bupi bja diroto tša palo ye a e ratago. Seroto se sengwe le se sengwe sa bupi a se tliše le moruswi o tee wa makhura a mohlware. Kgoši a tloge mathuding a lesoro mme a tšwe ka yona tsela yela a tsenego ka yona. “Ge setšhaba sa naga ye se etla go khunamela Morena menyanyeng, ba ba tsenago ka lesoro la ka leboa ba tšwe ka la ka borwa ge ba feditše go mo khunamela, gomme ba ba tsenago ka lesoro la ka borwa ba tšwe ka la ka leboa. Go se be le yo a tšwago ka tsela ye a tsenego ka yona, eupša motho a tšwe ka lesoro le a lebanego nalo. Ge setšhaba se tsena, kgoši le yena a tsene; ge se etšwa, le yena a tšwe. Ka matšatši a mekete le mabakeng a menyanya kabelo ya bupi e be seroto sa bupi, mme e tlišwe le poo goba kgapa; morapedi a tliše kwanyana le kabelo ya bupi bja diroto tša palo ye a e ratago. Seroto se sengwe le se sengwe sa bupi a se tliše le moruswi o tee wa makhura a mohlware. “Ge kgoši a nyaka go tlišetša Morena sehlabelo sa boithaopo, e ka ba sa go tšhungwa ka moka goba dihlabelo tša kagišano, a bulelwe lesoro le le lebeletšego ka bohlabatšatši la go tsenela ka kgorong ya ka gare. A dire sehlabelo seo sa gagwe sa go tšhungwa ka moka le dihlabelo tša gagwe tša kagišano go no swana le ka letšatši la Sabatha, gomme lesoro le tswalelwe ge a seno tšwa gape.” “Mosong wa tšatši le lengwe le le lengwe a direle Morena sehlabelo sa go tšhungwa ka moka ka kwanyana ye e se nago bosodi ya ngwaga o tee. A tliše le kabelo ya bupi mosong wo mongwe le wo mongwe, e be bja dikilokramo tše pedi, le litara e tee ya makhura a mohlware a go duba bupi bjoo. Kabelo ye ya bupi ye e neelwago Morena ke taelo ya go ya go ile. Kwanyana yeo le bupi le makhura a mohlware di abelwe Morena mosong wo mongwe le wo mongwe go ya go ile.” Morena, Mong wa bohle, o re: “Ge kgoši e ka arolela yo mongwe wa barwa ba gagwe naga ye a e filwego e le bohwa, karolo yeo e tla be e filwe le ditlogolo tša gagwe. E tla ba bohwa bja bona. Eupša ge kgoši e ka arolela mohlanka wa yona naga, e tla ba ya mohlanka yoo go fihlela fela Ngwageng wa Poetšo, ya kgona e boela go kgoši. Ke barwa ba gagwe fela ba ba lebanwego ke karolo ye ya bohwa bja tatagobona. Kgoši e se ke ya amoga batho naga ye e lego bohwa bja bona, ya ba raka karolong ya bona ya naga. Naga ye a e fago barwa ba gagwe e le bohwa e be ke karolo ya naga ye a e aroletšwego, gore go se be le yo mongwe wa setšhaba sa ka yo a amogwago se e lego sa gagwe.” Ke moka monna yoo a ntsentšha ka kgorong ya ka gare ka mojako wo o lego ka thoko ga lesoro, a nkiša diphapošing tše dikgethwa tša baprista tše di lebeletšego leboa, a mpontšha felotsoko ka thoko ya bodikela bja diphapoši tšeo. A re: “Fa ke mo baprista ba swanetšego go apea dinama tša dihlabelo tša tshwarelo ya dibe, le tša dihlabelo tša tefelo ya tšona, le go apea dikabelo tša bupi, gore go se be le selo se sekgethwa se se ntšhetšwago ka kgorong ya ka ntle, mme setšhaba sa tšhelwa madimabe.” Ke moka a ntsentšha ka kgorong ya ka ntle, mme a ntshepetša le dikhutlo tša yona ka bone bja tšona; a mpontšha gore khutlong ye nngwe le ye nngwe go na le kgorwana ya dimetara tše masome a mabedi ka botelele, le tše lesome le tše tlhano ka bophara. Dikgorwana tše di be di lekana ka bogolo. *** Ye nngwe le ye nngwe e be e na le leboto la maswika ka gare go e dikologa, le dibešo tše di ageletšwego lebotong. Monna yoo a re go nna: “Ye ke merale yeo bahlanka ba ka Tempeleng ba swanetšego go apeela ka go yona dihlabelo tšeo setšhaba se di dirago.” Monna yoo a nkiša mojakong wa Tempele. Ka bona meetse a etšwa ka fase ga serepodi sa Tempele a elela bohlabela, thoko yeo Tempele e bego e lebeletše ka gona. A be a elela ka fase ga lehlakore la ka borwa la Tempele a tšwelela ka borwa bja aletare. Ke moka monna yoo a nntšha ka sekgobeng sa Tempele ka lesoro la ka leboa, gomme a ntikološa a nkiša lesorong le le lebeletšego bohlabela. Ka lehlakoreng la ka borwa go be go ela moelanyana wa meetse. Monna yoo a ela dimetara tše makgolo a mane le masome a a selelago go ya bohlabela ka lehlaka la gagwe, gomme a mpotša gore ke tshele moela. Meetse ao a be a nkgoma ka dikgokgoilane fela. A nama a ela dimetara tše dingwe tše makgolo a mane le masome a a selelago, a mpotša gore ke tshele, gomme meetse a nkgoma ka dikhuru. A ela gape dimetara tše dingwe tše makgolo a mane le masome a a selelago go theoga, mme ge ke tshela gape meetse a nkgoma ka letheka. A buša a ela tše dingwe tše makgolo a mane le masome a a selelago, gomme moo moela o be o iša kudu mo e lego gore ke be ke sa kgone go o tshela. O be o tshelega fela ka go thala. A re go nna: “Wena motho wa nama, na o bone taba ye gabotse?” Ke moka a mpušetša leribeng la noka yeo, gomme ge ke boela morago ka bona go na le mehlare ye mentši maribeng ka mabedi. A re go nna: “Moela wo o elela seleteng sa ka bohlabela gomme o theogela ka moeding wa Jordane, wa fetela Lewatleng le le Hwilego. Ge o tsena ka Lewatleng le le Hwilego o ntšha meetse a lewatle leo letswai. Mo gongwe le mo gongwe mo o fetago gona o tla tliša bophelo. Ka fao gohle mo o putlago gona go tla ba le diphoofolo tša mehutahuta le dihlapi tše dintši. Go tloga Engedi go yo fihla Ene-Eglaime go tla ba le bathei ba dihlapi lebopong la lewatle leo, gomme ba tla anega malokwa a bona moo gore a ome. Moo go tla ba le mehutahuta ya dihlapi go swana le ka Lewatleng la Mediteraniene. Eupša meetse a a lego ka mehlakeng le ka megobeng ya lebopong ona a ka se tšwe letswai. A tla no ba gona gore batho ba moo ba fele ba na le letswai. Mo maribeng a moela woo ka mabedi go tla mela mehlare ya mehuta yohle ya dikenywa tša go lewa. E ka se tsoge e ponne matlakala, le gona e ka se tsoge e lesitše go enywa. Kgwedi ye nngwe le ye nngwe mehlare yeo e tla ba le dikenywa tše di budulego, ka ge e nošetšwa ke moela woo o tšwago Tempeleng. Dienywa tša yona di tla lewa, mme matlakala a yona ya ba a go alafa malwetši.” Morena, Mong wa bohle, a re: “E re ke le botše ka mo mellwane ya naga ye e swanetšego go arolelwa dikgoro tše lesome le tše pedi tša Israele e swanetšego go ba ka gona, kgoro ya Josefa e fiwe dikarolo tše pedi. Ka ge ke ile ka ikana gore naga ye ke tla e fa borakgolokhukhu ba lena, e tla ba bohwa bja lena; le e arolelane ka go lekana. “Mellwane ya naga e tla ba ka mokgwa wo: Ka leboa mollwane o tla tloga Lewatleng la Mediteraniene, wa bapela le tsela ye e yago Hetelone go yo fihla sefateng sa Hamate, le go fetela Tsedade, go yo fihla Berota le Sibraime, mokgahlo ga selete sa Damaskose le sa Hamate, le go yo fihla Hatsare-Hatikone, mollwaneng wa Haurane. Ka gona mollwane o tla tloga Lewatleng la Mediteraniene, wa leba Hatsore-Enane, wa phaela selete sa Damaskose le sa Hamate ka leboa. “Ka bohlabatšatši mollwane o tla putla mokgahlo ga Haurane le Damaskose, wa bapela le noka ya Jordane, mokgahlo ga naga ya Gileade le ya Israele, wa fetela Lewatleng le le Hwilego wa ba wa yo fihla Tamare. Wo e tla ba wona mollwane wa ka bohlabatšatši. “Ka borwa mollwane o tla tloga Tamare wa ya mohlakeng wa Meriba-Kadeshe, go tloga moo wa ipata le noka go yo fihla Lewatleng la Mediteraniene. Wo e tla ba mollwane wa ka borwa. “Ka bodikela mollwane e tla ba Lewatle la Mediteraniene go yo fihla felo mo o lebanago le sefata sa Hamate. Wo e tla ba wona mollwane wa ka bodikela. “Le arolele dikgoro tša lena naga ye. Le e arolelane e le bohwa bja lena le bja bafaladi ba ba dulago le lena, bao bana ba bona ba tswaletšwego mo nageng ye. Le ba tšee e le badudi ba naga ya Israele. Ba abelwe bohwa gotee le lena ba dikgoro tša Israele. Mofaladi a abelwe bohwa kgorong yeo a dulago go yona. Ke realo, nna, Morena, Mong wa bohle.” Dikgoro di arolelwe naga ka mokgwa wo: Karolo ya kgoro ya Dane e thome mollwaneng wa ka leboa wa naga ya Israele. Mollwane wa yona o bapele le tsela ya Hetelone go yo fihla sefateng sa Hamate, wa leba Hatsare-Enane le mollwaneng wa Damaskose wa ka leboa, kgauswi le Hamate. E be mollwane wa yona go tloga ka bohlabatšatši go ya ka bodikela. Karolo ya kgoro ya Asere e beelane mollwane le ya kgoro ya Dane go tloga mollwaneng wa ka bohlabatšatši go yo fihla go wa ka bodikela. Karolo ya kgoro ya Naftali e beelane mollwane le ya kgoro ya Asere go tloga mollwaneng wa ka bohlabatšatši go yo fihla go wa ka bodikela. Karolo ya kgoro ya Manase e beelane mollwane le ya kgoro ya Naftali go tloga mollwaneng wa ka bohlabatšatši go yo fihla go wa ka bodikela. Karolo ya kgoro ya Efraime e beelane mollwane le ya kgoro ya Manase go tloga mollwaneng wa ka bohlabatšatši go yo fihla go wa ka bodikela. Karolo ya kgoro ya Rubene e beelane mollwane le ya kgoro ya Efraime go tloga mollwaneng wa ka bohlabatšatši go yo fihla go wa ka bodikela. Karolo ya kgoro ya Juda e beelane mollwane le ya kgoro ya Rubene go tloga mollwaneng wa ka bohlabatšatši go yo fihla go wa ka bodikela. Karolo ye e beelanego mollwane le ya kgoro ya Juda go tloga mollwaneng wa ka bohlabatšatši go yo fihla go wa ka bodikela e be ye e abelwago Morena. Bophara bja yona e be dikilometara tše lesome le tše pedi le seripa, gomme botelele bja yona go tloga mollwaneng wa ka bohlabatšatši go ya ka bodikela e be bja go lekana le bja dikarolo tše di filwego dikgoro. Bogareng bja karolo yeo ke mo go tlago agwa Tempele. Karolo ye le e abelago Morena e be ya botelele bja dikilometara tše lesome le tše pedi le seripa, le bophara bja dikilometara tše lesome. Baprista ba fiwe seripa gona moo karolong ye kgethwa. Ka leboa seripa se e be sa dikilometara tše lesome le tše pedi le seripa ka botelele, ka bodikela e be sa dikilometara tše tlhano ka bophara. Ka bohlabatšatši le gona e be sa dikilometara tše tlhano ka bophara, ka borwa e be sa dikilometara tše lesome le tše pedi le seripa ka botelele. Tempele ya Morena e agwe mo gare ga seripa se. Seripa se e be sa baprista, bona batlotšwa, ditlogolo tša Tsadoko, ba ba ntlhanketšego ka potego ba sa kgeloge bjalo ka Balefi ba bangwe mola Baisraele ba kgeloga. Ka gona, ba swanetše go ba le karolo ye e lebanego bona karolong ye kgethwa ya naga. Karolo ye e tla ba yona ye kgethwakgethwa ye e beelanego mollwane le ya Balefi. Go bapela le karolo ya baprista Balefi ba swanetše go ba le karolo ya dikilometara tše lesome le tše pedi le seripa ka botelele, le tše tlhano ka bophara. Ke karolo ye e phalago dikarolo tše dingwe ka moka tša naga, gomme go se ke gwa ba le seripanyana se sengwe sa yona se se rekišwago, goba se bapatšwago, goba se fiwago yo mongwe, gobane e kgethetšwe Morena. Karolo ye e šalago ya bophara bja dikilometara tše pedi le seripa, le botelele bja dikilometara tše lesome le tše pedi le seripa yona ga se ye kgethwa, ke ya motse le ya phulo. Bogareng bja yona ke mo go swanetšego go agwa motse, gomme gona e be dimetara tše dikete tše pedi le makgolo a mabedi le masome a mahlano ka lehlakoreng le lengwe le le lengwe. Go dikologa motse ka lehlakoreng le lengwe le le lengwe go be le karolo ya phulo ya bophara bja dimetara tše lekgolo le masome a mabedi le tše tlhano. Karolo ye e šetšego, ye e bapetšego le karolo ye kgethwa mme e lekanago nayo ka botelele, e tla ba ya dikilometara tše tlhano ka bohlabatšatši, le tše tlhano ka bodikela. E swanetše go ba mašemo a go bjala dibjalo tša go fepa ba ba šomago ka motseng. Bašomi ba ka motseng ba ba lemago karolong ye e swanetše go ba ba dikgoro tšohle tša Israele. Karolo ye ya go kgethelwa Morena e swanetše go ba ya dikilometara tše lesome le tše pedi le seripa ka mathoko ohle, e lego karolo ye kgethwa e kopane le ye e lego ya motse. Karolo ye e šalago ka mo le ka mo ga karolo ye kgethwa le ga karolo ya motse e be ya kgoši. E tla gagabela bohlabatšatši dikilometara tše lesome le tše pedi le seripa go yo fihla mollwaneng wa ka bohlabatšatši, le go ya bodikela dikilometara tše lesome le tše pedi le seripa go yo fihla mollwaneng wa ka bodikela. Dikarolo tše pedi tše tša go bapela le dikarolo tša setšhaba e be tša kgoši, gomme karolo ye kgethwa le Tempele di tla ba gare. Ka gona karolo ya Balefi le karolo ya motse di tla ba gare ga karolo ya kgoši. Karolo ye ya kgoši e tla ba mokgahlo ga karolo ya Juda le ya Benjamene. Dikgoro tše di šetšego di arolelwe naga ka mokgwa wo: Karolo ya kgoro ya Benjamene e tloge mollwaneng wa ka bohlabatšatši e yo fihla go wa ka bodikela. Karolo ya kgoro ya Simeone e beelane mollwane le ya kgoro ya Benjamene go tloga mollwaneng wa ka bohlabatšatši go yo fihla go wa ka bodikela. Karolo ya kgoro ya Isakara e beelane mollwane le ya kgoro ya Simeone go tloga mollwaneng wa ka bohlabatšatši go yo fihla go wa ka bodikela. Karolo ya kgoro ya Sebulone e beelane mollwane le ya kgoro ya Isakara go tloga mollwaneng wa ka bohlabatšatši go yo fihla go wa ka bodikela. Karolo ya kgoro ya Gade e beelane mollwane le ya kgoro ya Sebulone go tloga mollwaneng wa ka bohlabatšatši go yo fihla go wa ka bodikela. Ka borwa mollwane wa karolo ya kgoro ya Gade o tloge Tamare o lebe borwa, o yo fihla mohlakeng wa Meriba-Kadeshe, go tloga moo o ipate le noka go yo fihla Lewatleng la Mediteraniene. Morena, Mong wa bohle, o re: “Ke ka mo le swanetšego go arolela dikgoro tša Israele naga ka gona ya ba bohwa bja tšona.” Go tla ba le masoro a lesome le a mabedi ka motseng wa Jerusalema. Morako ka lehlakoreng le lengwe le le lengwe e tla ba wa dimetara tše dikete tše pedi le makgolo a mabedi le masome a mahlano, gomme o tla ba le masoro a mararo, maina a ona a ye ka dikgoro tša Israele. Masoro a morako wa ka leboa a theelelwe Rubene, Juda le Lefi; a morako wa ka bohlabatšatši a theelelwe Josefa, Benjamene le Dane; a morako wa ka borwa a theelelwe Simeone, Isakara le Sebulone; gomme a morako wa ka bodikela a theelelwa Gade, Asere le Naftali. *** *** *** *** Botelele bja morako ka mahlakoreng a motse ka bone ke dimetara tše dikete tše senyane. Go tloga nakong yeo leina la motse wo e tla ba “Morena o mo”. Ngwageng wa boraro wa ge Joyakime e le kgoši ya Juda, Kgoši Nebukadnesare wa Babilone o ile a tla motseng wa Jerusalema gomme a o dikanetša. Morena a gafela Kgoši Joyakime diatleng tša gagwe gotee le dibjana tše dingwe tša Tempele. Nebukadnesare a tšea mathopša a boela le ona tempeleng ya modimo wa gagwe nageng ya Babilonia. A bea dibjana tšela tempeleng ka diphapošing tša go bolokela tša tempele. Kgoši a laela Ashpenase, mohlankedi wa gagwe yo mogolo, gore a kgethe masogana lapeng la bogoši le malapeng a bakgomana mathopšeng a Baisraele. Masogana ao a be a swanetše go ba a a se nago bosodi mmeleng, a a bopegilego, a bohlale, a tsebo ye e nabilego, a hlogo tše boleta, gore a tle a lokele ka mošate. Ashpenase o be a swanetše go ba ruta go ngwala le go bolela Sebabilonia. Kgoši a laela le gore tšatši le lengwe le le lengwe ba solelwe dijo tše di swanago le tša gagwe, ba fiwe le beine ye a e fiwago. Ka morago ga mengwaga ye meraro ya go rutwa moo ba be ba swanetše go tlišwa pele ga kgoši. Mo go bao ba kgethilwego go be go na le Daniele, Hanania, Mishaele le Asaria, ka moka e le ba kgoro ya Juda. Mohlankedi yo mogolo a ba thea maina a mafsa: Daniele a re ke Belteshatsare, Hanania a re ke Shadraka, Mishaele a re ke Meshaka, mme Asaria a re ke Abednego. Daniele a ikemišetša gore a ka se itšhilafatše ka go ja dijo tše di bego di lewa ke kgoši, le go nwa beine ye a bego a e nwa; ka gona a kgopela Ashpenase gore a mo dumelele gore a se ke a itšhilafatša, gomme Modimo a dira gore Ashpenase a kwešiše sello sa Daniele. Eupša Ashpenase a re go Daniele: “Ke tšhaba mong wa ka, e lego kgoši. Ke yena a laetšego gore le je eng le nwe eng, gomme ge lena le ka bonala le sa phele gabotse bjalo ka masogana ale a mangwe, a ka no mpolaya.” Ka gona Daniele a ya go mookamedi yo Ashpenase a bego a mmeile go hlokomela yena le bagwera ba gagwe ka bararo, a re: “Nke o re leke matšatši a lesome. Dijo tša rena e be merogo le meetse fela. Ka morago o re bapetše le masogana ale a jago dijo tše di lewago ke kgoši, gomme o re dire se o bonago se re swanetše.” Mookamedi a dumelelana le bona mme a ba leka matšatši a lesome. Ya re ge matšatši ao a fetile, ba bonala ba kgahliša mme ba phedile gabotse go phala bohle bale ba bego ba eja dijo tše di bego di lewa ke kgoši. Ke moka mookamedi a tšwela pele le go ba fa merogo bakeng sa dijo tšela ba bego ba swanetše go di fiwa. Modimo a fa masogana ao a mane tsebo le kwešišo ya tša mangwalo le bohlale. Daniele yena o be a kgona le go hlatholla pono le toro efe le efe. Ya re mafelelong a mengwaga yela ye meraro ya go bewa ke kgoši Ashpenase a iša masogana ale ka moka go Nebukadnesare. Kgoši a bolela le bona, gomme Daniele, Hanania, Mishaele le Asaria ba mo kgahla go feta ba bangwe ka moka. Ka gona bona ba hlankela kgoši. Dipotšišong ka moka tše kgoši a bego a ba botšiša tšona mabapi le bohlale le tlhaologanyo, o ile a bona gore ba phala didupe le dingaka galesome mmušong wa gagwe ka moka. Daniele o ile a dula mošate go fihlela Kgoši Korese wa Persia a thopa Babilonia. Ka ngwaga wa bobedi wa ge Nebukadnesare e le kgoši, o ile a lora. Toro yeo ya mo tshwenya kudu ya ba ya mo hlokiša boroko. Ka gona a laela gore go bitšwe didupe, dingaka, boramaselamose le boradinaledi gore ba tle ba mo hlathollele toro ya gagwe. Ge ba fihla ba ema pele ga kgoši, mme yena a re go bona: “Ke lorile toro, gome e a ntshwenya. Ke nyaka go tseba tlhathollo ya yona.” Boradinaledi ba fetola kgoši ka Searamo ba re: “Nke kgoši a re phelele go ya go ile! Botša rena, bahlanka ba gago, toro ya gago, gomme re tla go hlathollela yona.” Kgoši a re go bona: “Ke feditše le pelo gore lena le mpotše toro yeo le be le ntlhathollele yona. Ge le ka se kgone gona le tla ripaganywa, mme le mengwako ya lena ya fetošwa marope. Eupša ge le ka kgona go mpotša toro yeo le tlhalošo ya yona, ke tla le putsa ka dimpho, ka le hlompha kudu. Bjale ge, mpotšeng toro yeo le tlhathollo ya yona.” Bona ba fetola kgoši gape ba re: “Ge kgoši a ka no botša rena, bahlanka ba gagwe, toro yeo, re tla e hlatholla.” Ge ba realo, kgoši a re: “Ke tsebile! Le re le leka go ikokeletša nako ka ge le bona gore ke ikemišeditše go le otla ka kotlo e tee ge le ka se mpotše toro ya ka. Le lakane gore le fele le mpotša maaka le bohwirihwiri go fihlela mabaka a ka fetoga. Mpotšeng gore ke lorile eng, ke gona ke tlago tseba gore le tlhathollo ya toro yeo le ka kgona go mpotša yona.” Boradinaledi ba mo fetola ba re: “Mong wa rena, ga go na motho mo lefaseng yo a ka botšago kgoši taba yeo. Le gona ga go kgoši, le ge e le ye kgolo goba ye maatla, ye e kilego ya nyaka taba ye bjalo go didupe le go dingaka le go boradinaledi. Se kgoši a se nyakago se bothata mo e lego gore ga go motho yo a ka se botšago kgoši, ge e se medimo, gomme yona ga e dule le batho.” Ge ba realo, kgoši a gakala, a galefa kudu gomme a laela gore dihlalefi tša Babilone tšohle di bolawe. Ka fao gwa laelwa gore ka moka ga bona ba bolawe, gotee le Daniele le bagwera ba gagwe. Daniele a ya go Arioko, molaodi wa baleti ba kgoši, yo a bego a šetše a ile go bolaya dihlalefi tšela. A bolela le yena gabotsana a iketletše yena, a mmotšiša gore ke ka baka lang kgoši a laetše gore go dirwe sehlogo se sekaaka. Ka gona Arioko a botša Daniele taba tšeo. Ke moka Daniele a ya go kgoši a mo kgopela gore a mo fe sebaka sa gore a tle a mo hlathollele toro yeo. Daniele a ya mo a dulago gona, a fihla a botša bagwera bale ba gagwe, e lego Hanania, Mishaele le Asaria, tše di hlagilego. A ba botša gore ba rapele Modimo wa legodimo gore a ba gaugele ka go ba hlathollela sephiri seo, gore ba tle ba se bolawe gotee le dihlalefi tšela tše dingwe tša Babilone. Ya re bjona bošego bjoo Daniele a utollelwa sephiri seo ponong, gomme yena a tumiša Morena a re: “A go retwe Modimo go ya go ile, gobane bohlale le maatla ke tša gagwe! Ke yena yo a fetošago mehla le mabaka; o bea magoši a ba a a theoša ditulong; o fa dihlalefi bohlale, mme ba kwešišo a ba fa tsebo. O utolla diphiri le dilo tše di ka se tsebjego, o tseba tše di lego swiswing; o phela a dikaneditšwe ke seetša. Ke a go reta, ke a go tumiša, wena Modimo wa borakgolokhukhu ba ka. O mphile bohlale le maatla; o nkutolletše se re go kgopetšego sona, wa re tsebiša taba ya kgoši.” Ka gona Daniele a ya go Arioko, yo kgoši a bego a mo laetše go bolaya dihlalefi tša Babilone. A re go yena: “O se ke wa ba bolaya. Nkiše go kgoši gomme ke tla mo hlathollela toro ya gagwe.” Ka bjako Arioko a iša Daniele go Kgoši Nebukadnesare, mme a re go yena: “Ke hweditše yo mongwe wa mathopša a Bajuda yo a ka hlathollelago kgoši toro ya gagwe.” Kgoši a re go Daniele yo a bego a bitšwa le ka la Belteshatsare: “Na o ka kgona go mpotša toro ye ke e lorilego le tlhathollo ya yona?” Daniele a mo fetola a re: “Mong wa ka, dihlalefi le dingaka le didupe le boradinaledi ba ka se kgone go botša kgoši taba yeo. Fela go na le Modimo legodimong yo a utollago diphiri. O tsebišitše wena, Kgoši Nebukadnesare, tše di tlago hlaga mabakeng a a tlago. Bjale ge, toro ya gago, e lego pono ye o e bonego mola o robetše, še: “Kgoši, ge o le malaong a gago o be o akanya tše di tlago hlaga mabakeng a a tlago, gomme Modimo, Moutolodi wa diphiri, a go tsebiša tšona. Bjale ge, nna ke utolletšwe sephiri seo, e sego ka gobane nka ba ke le yo bohlale go phala batho ka moka, eupša e le gore wena, kgoši, o tle o hlathollelwe sephiri se, mme o kwešiše tše o bego o di akanya. “Kgoši, mo ponong ya gago o ile wa bona seswantšho se segologolo sa motho se eme pele ga gago se phadima kudu, le gona se šiiša. Hlogo ya sona e be e le ya gauta ye e sego ya tswakwa, kgara ya sona le matsogo e le tša silibera; letheka la sona le dinoka e le tša mphiri; maoto e le a tshipi, gomme dinao tša sona e le tša tshipi le letsopa. E rile o sa se lebeletše, gwa kgerega leswika – le se la kgorometšwa ke motho – la kgatla maoto a tshipi le letsopa a seswantšho sela la a pšhatlaganya. Gateetee tshipi yela le letsopa le mphiri le silibera le gauta tša pšhatlagana mme tša ba bjalo ka mooko seboeng marega. Tša tšewa ke phefo, mme gwa se šale le mašaletšana. Leswika lela lona la gola ya ba thaba la tlala lefase ka moka. “Ke yona toro ye o e lorilego. Bjale a ke go hlathollele yona, kgoši. Wena kgoši, o kgoši ya dikgoši. Modimo wa legodimo o go beile mmuši, a go fa maatla le bogolo le tlhomphego. O gafetše lefase le batho ba lona, le diphoofolo tša naga, le dinonyana tša legodimo diatleng tša gago, gomme a go bea mmuši wa tšona ka moka. Hlogo yela ya gauta ke wena. Mmušo wa gago o tla latelwa ke wo mongwe wa go fetwa ke wa gago ka maatla, gomme woo wa latelwa ke wa boraro, mmušo wo o emetšwego ke mphiri, wo o tlago buša lefase lohle. Ka morago ga woo go tla latela mmušo wa bone wa go tla boka tshipi ye e kgatlago tšohle ya di pšhatlaganya. Gomme bjalo ka ge tshipi e pšhatlaganya se sengwe le se sengwe, le wona o tla pšhatlaganya mme wa šilaganya mebušo yohle ye e bilego gona pele ga wona. O ile wa bona le gore dinao le menwana e be e le tša tshipi le letsopa. Seo se ra gore e tla ba mmušo woo o aroganego. O tla ba le go tia ga tshipi, ka ge go bile le tshipi ye e hlakanego le letsopa. Menwana yeo mo gongwe e bego e le tshipi mme mo gongwe e le letsopa e šupa gore karolo ye nngwe ya mmušo e tla tia, mola ye nngwe e tla fokola. O ile wa bona le gore tshipi e hlakane le letsopa. Seo se šupa gore batho ba mmušo woo ba tla nyalelana, fela e ka se be selo se tee go no swana le ge tshipi e ka se tswakane le letsopa. Mehleng ya babuši ba mmušo woo Modimo wa legodimo o tla hloma mmušo wo o ka se tsogego o fedišitšwe. O ka se tsoge o thopilwe ke wo mongwe, eupša wona o tla pšhatla mebušo yeo ye mengwe ka moka wa e fediša, mme wona ya ba wa go ya go ile. O ile wa bona ka moo leswika le ilego la kgerega legageng le se la kgorometšwa ke motho, le ka moo le ilego la pšhatlaganya seswantšho sa tshipi le mphiri le letsopa le silibera le gauta. Modimo yo mogolo o go botša tše di tlago hlaga ka moso. Toro ye ke therešo, le tlhathollo ya yona ke nnete.” Ke moka Kgoši Nebukadnesare a itahlela fase ka sefahlego a obamela Daniele, gomme a laela gore Daniele a tšhumelwe kabelo ya bupi le ya seorelo. Kgoši a re: “Ruri, Modimo wa gago ke Modimo wa medimo, ke Morena wa magoši, ke Moutolodi wa diphiri, ka gobane wena o kgonne go utolla sephiri se.” A nama a bea Daniele maemong a godimo, a mo fa le dimpho tše dintši tše dikgolo, a mmea mmušiši wa selete sa Babilone, a ba a mo dira hlogo ya dihlalefi tšohle tša Babilone. Daniele a kgopela kgoši gore a bee Shadraka le Meshaka le Abednego balaodi ba tša selete sa Babilone, gomme kgoši a dumela; Daniele yena a dula mošate. Kgoši Nebukadnesare o kile a laela gore go bopše seswantšho sa gauta, botelele bja sona e be dimetara tše 26,7, bophara e be tše 2,8, le gore se hlongwe molaleng wa Dura, seleteng sa Babilone. Ke moka kgoši a laela gore bahlankedi ba gagwe ka moka ba kgobokane – babuši, babušiši, bathušababušiši, baeletši, boramatlotlo, baahlodi, bomaseterata, gotee le bahlankedi ba bangwe ba maemo ba dilete. Ba be ba swanetše go tla go kgakola seswantšhobopša seo Kgoši Nebukadnesare a bego a se hlomile. E rile ge bahlankedi bao ka moka ba kgobokane go tlo kgakola seswantšhobopša mme ba eme pele ga sona, segoeledi sa goelela sa re: “Lena ditšhaba le merafe le maleme ohle! Ge le ekwa diphalafala le dinaka le dikgapa le dikwadi le diharepa le dinakamorabana le diletšo tše dingwe tša mehutahuta di lla, le itahlele fase ka difahlego le khunamele seswantšhobopša se sa gauta se se hlomilwego ke Kgoši Nebukadnesare. Yo a ka se itahlelego fase ka sefahlego a se khunamela, o tla lahlelwa moubelong mo go laumago mollo.” Ka gona, e rile ge ditšhaba tšohle le merafe le ba maleme ka moka ba ekwa diletšo tšeo di lla, ba itahlela fase ka difahlego ba khunamela seswantšhobopša sa gauta se Kgoši Nebukadnesare a bego a se hlomile. Ke moo Bababilonia ba bangwe ba hweditšego lebaka la go bega Bajuda. Ba re go Kgoši Nebukadnesare: “Nke kgoši a re phelele go ya go ile! Kgoši, mong wa rena, o laetše gore ge diletšo di lla mang le mang a itahlele fase ka sefahlego a khunamele seswantšhobopša sa gauta, le gore yo a ka se dirego bjalo o swanetše go lahlelwa moubelong wo o laumago mollo. Go na le Bajuda ba bangwe ba o ba beilego balaodi ba tša selete sa Babilone, e lego Shadraka le Meshaka le Abednego, ba ba tšeišago taelo ya gago phefo. Ga ba direle modimo wa gago goba ba khunamela seswantšhobopša sela o se hlomilego.” Ge kgoši a ekwa seo a gakala, a tuka bogale, gomme a laela gore banna bao ba bararo ba tlišwe pele ga gagwe. Ge ba fihla, a re go bona: “Wena Shadraka le Meshaka le Abednego, na ke nnete gore lena le gana go direla modimo wa ka le go khunamela seswantšhobopša sa gauta se ke se hlomilego? Bjale ge, ge eba ga le gane, le re ge le ekwa diphalafala le dinaka le dikgapa le dikwadi le diharepa le dinakamorabana le diletšo tše dingwe tša mehutahuta di lla, le itahlele fase ka difahlego le khunamele seswantšhobopša se ke se dirilego. Eupša ge le ka se dire ka mokgwa woo, le tla lahlelwa ka pelapela moubelong wo o laumago mollo. Kgane le gopola gore go na le modimo yo a ka le phološago diatleng tša ka?” Shadraka le Meshaka le Abednego ba mo fetola ba re: “Mong wa rena, tabeng ye ga re nyake go iphetolela. Ge Modimo yo re mo hlankelago a kgona go re hlakodiša moubelong wa mollo wo o laumago le diatleng tša gago, kgoši, gona yena o tla re hlakodiša. Fela le ge a ka se re hlakodiše, wena kgoši, tseba gore modimo wa gago wona re ka se o direle, le seswantšhobopša sa gauta se o se hlomilego re ka se se khunamele.” Ke mo Nebukadnesare a tletšego pelo gomme a galoga sefahlego ka go galefela Shadraka le Meshaka le Abednego. Ka gona a laela gore moubelo o tukišwe gašupa go feta mehleng. A laela banna ba e lego dinatla mo bahlabaning ba gagwe gore ba tleme banna bao ba bararo mme ba ba lahlele moubelong wo o laumago mollo. Ka gona banna bao ba tlengwa ba sa apere dipurapura tša bona le marokgo le mengatse le diaparo tše dingwe, gomme ba lahlelwa moubelong wo o laumago mollo. Bjale ka gore kgoši o be a ba laile tsebegokwa gore moubelo o tukišwe kudu, kgabo ya wona e ile ya bolaya dinatla tšela di bego di lahlela banna bale moubelong. Ke moka Shadraka le Meshaka le Abednego ba wela ka gare ga moubelo wo o laumago mollo ba sa tlemilwe. Gateetee Nebukadnesare a emelela a tlabegile. A botšiša bakgomana ba gagwe a re: “Na ga ke re re lahletše banna ba bararo ka moubelong ba tlemilwe?” Bona ba mo fetola ba re: “Ee, go bjalo, kgoši.” Kgoši a re: “Eupša ke bona banna ba bane ba sepelasepela ka gare ga mollo! Ga se ba tlengwa, le gona ga o ba dire selo – gomme yola wa bone nke ke sebopiwa sa legodimong.” Ke moka Nebukadnesare a ya mojako wa moubelo woo mme a ba bitša a re: “Shadraka! Meshaka! Abednego! Lena bahlanka ba Modimo Yogodimodimo, etšwang le tle mo!” Gommme ba tšwa. Babuši, babušiši, bathušababušiši le baeletši ba kgoši ba kgobokana gomme ba bona banna bao ba bararo, mme ba lemoga gore mollo ga se wa ba dira selo. Meriri ya bona e be e se ya tlaboga, diaparo tša bona di se tša swa, le gona ba sa nkge mollo. Kgoši a re: “A go retwe Modimo wa Shadraka le Meshaka le Abednego! O romile morongwa wa gagwe a hlakodiša bahlanka ba ba gagwe ba ba mmotilego. Ba nyaditše ditaelo tša ka gomme ba gafa bophelo bja bona, ba se direle modimo o šele ba o khunamela, ge e se wa bona. “Gomme bjale ke laela gore ge motho wa setšhaba sefe goba morafe ofe goba leleme lefe a ka nyefola Modimo wa Shadraka le Meshaka le Abednego, o swanetše go ripaganywa, le ngwako wa gagwe o fetošwe lešope. Ga go na le modimo wo mongwe wo o ka phološago ka mokgwa wo.” Gomme kgoši a bea Shadraka le Meshaka le Abednego maemong a godimo go feta a pele seleteng sa Babilone. Kgoši Nebukadnesare a romela molaetša go ba ditšhaba tšohle, le ba merafe yohle, le ba maleme ohle ba ba agilego lefaseng lohle a re: “Nke le ka okeletšwa katlego! Ke thabela go le begela dimakatšo le mehlolo ye Modimo Yogodimodimo a ntiretšego yona. “Ke tše dikgolo bjang dimakatšo tša gagwe! Mehlolo ya gagwe ke ye maatla e le ruri! Bogoši bja gagwe ke bja go ya go ile, le mmušo wa gagwe ke wa go dulela ruri melokong ka moka. “Nna, Nebukadnesare, ke be ke dutše ka ga ka ke iketlile, ke atlegile ka mošate. Eupša ka re ke robetše ka lora toro ya go tšhoša, ka bona dipono tše di šiišago. Ka laela gore bahlale bohle ba Babilone ba tlišwe go nna gore ba tle ba ntlhathollele toro yeo. Gwa tla boramaselamose le bonkadingala le boradinaledi le didupe, gomme ka ba botša toro ya ka, eupša bona ba palelwa ke go ntlhathollela yona. Mafelelong gwa tsena Daniele. Yena o tsebja le ka la Belteshatsare, ka ge a theeletšwe modimo wa ka. Moya wa medimo ye mekgethwa o mo go yena, ka gona ka mmotša toro ya ka ka re: Wena Belteshatsare, mookamedi wa boramaselamose, ke a tseba gore moya wa medimo ye mekgethwa o mo go wena, le gore ga go sephiri se se go palelago. Toro ya ka še. Ntlhathollele yona. “Ke rile ke robetše ka bona pono ya sehlare se seteleletelele gare ga lefase. Se ile sa gola sa tia, sa ba sa fihla leratadimeng, sa bonwa ke mang le mang mo lefaseng. Matlakala a sona e be e le a mabotse, se entšwe e le ruri, gomme se fepa bohle. Diphoofolo tša naga di be di dula moriting wa sona, dinonyana di agela makaleng a sona, le diphedi ka moka di eja dienywa tša sona. “Moo ponong ya ka ya borokong ke ile ka bona morongwa a ntšhitše mahlo dinameng a theoga legodimong. A goeletša a re: ‘Remang sehlare seo mme le se ripe makala; se hlohloreng matlakala, le gašanye dienywa tša sona. Rakang diphoofolo moriting wa sona le dinonyana makaleng a sona. Fela kutu ya sona le medu le e tlogele mobung e kgokilwe ka tshipi le mphiri ka mabjanyeng a lešoka. “ ‘A monna yo a welwe ke phoka, a phele le diphoofolo gare ga dimela tša lešoka. Monagano wa gagwe o tla tšea mengwaga ye e šupago o fetogile wa phoofolo. Ke yona kahlolo ye e ntšhitšwego ke bale ba go ntšha mahlo dinameng, ke sephetho se se begilwego ke barongwa, gore bohle ba tsebe gore Yogodimodimo o na le maatla a go laola mebušo ya batho, le gore a ka no e fa yo a mo ratago, ešita le yo a nyatšegago kudu gare ga batho.’ “Ke yona toro ye nna, Kgoši Nebukadnesare, ke e lorilego. Bjale wena, Belteshatsare, ntlhathollele yona ka ge bahlale bohle ba mmušo wa ka ba paletšwe. Wena o ka kgona, ka gobane moya wa medimo ye mekgethwa o mo go wena.” Daniele, yo a bitšwago le ka la Belteshatsare, ge a ekwa kgoši a realo a tšhoga mo e lego gore o ile a tšea sebaka a sa kgone go bolela selo. Kgoši a re go yena: “Belteshatsare, o se tšhošwe ke toro ye le tlhathollo ya yona.” Belteshatsare a mo fetola a re: “Mong wa ka, nke nkabe toro ye e lebantše bahloi ba gago, le tlhathollo ya yona e lebantše manaba a gago! Sehlare se o se bonego se gola, se tia, sa ba sa fihla leratadimeng sa bonwa ke bohle mo lefaseng, sa matlakala a mabotse, sa go enywa kudu, sa fepa bohle, seo diphoofolo tša naga di dulago moriting wa sona, le dinonyana di agelago makaleng a sona, ke wena, kgoši. O godile wa tia, wa ba wa fihla leratadimeng, gomme maatla a gago a akaretša lefase ka moka. Wena, kgoši, o bone morongwa yo a ntšhitšego mahlo dinameng a theoga legodimong a re: ‘Remang sehlare seo le se fediše, fela le tlogele kutu ya sona le medu mobung e kgokilwe ka tshipi le mphiri ka mabjanyeng a lešoka. A monna yo a welwe ke phoka, gomme a phele le diphoofolo tša naga mengwaga ye e šupago.’ “Bjale ge, kgoši, tlhathollo ya toro yeo še, gomme ke kahlolo ye Yogodimodimo a ahlotšego wena kgoši, mong wa ka, ka yona. O tla rakwa bathong, wa yo phela le diphoofolo tša naga mengwaga ye e šupago, wa fula bjang bjalo ka kgomo, wa welwa ke phoka. O tla phela bjalo go fihlela o dumela gore mebušo yohle ya batho e laolwa ke Yogodimodimo, le gore yena o e fa yo a mo ratago. Barongwa ba laetše gore go šadišwe kutu le medu ka mobung. Seo se šupa gore o tla boela wa ba kgoši mohla o dumelago gore lefase lohle le bušwa ke Modimo wa legodimo. Ka gona, kgoši, nke o amogele keletšo ya ka. Tlogela go dira dibe, o dire tše di lokilego, o lahle tše kgopo, o thuše badiidi. Ke gona o tlago fela o atlega.” Tšeo ka moka di ile tša hlagela Kgoši Nebukadnesare. Ge go fetile dikgwedi tše lesome le tše pedi, ge a ntše a itshepelela godimo ga tlhaka ya ntlo ya mošate kua Babilone, a re: “Na ye ga se yona Babilone, motse serantlatla wo ke o agilego ka maatla a ka a magolo, ya ba motsemošate, gore ke kgantšhe letago la ka le bogoši?” Ya re a sa realo, gwa kwagala lentšu le le tšwago legodimong le re: “Wena Kgoši Nebukadnesare, theeletša se ke go botšago sona! Bjale o amogilwe bogoši. O tla rakwa bathong, wa yo phela le diphoofolo tša lešoka, gomme wa fula bjang bjalo ka kgomo mengwaga ye e šupago. O tla phela bjalo go fihlela o dumela gore mebušo ya batho e laolwa ke Yogodimodimo, le gore o e fa yo a mo ratago.” Ka yona nako yeo gwa phethagala tše di bego di boletšwe. Nebukadnesare a rakwa bathong, gomme a fula bjang bjalo ka kgomo; a welwa ke phoka, moriri wa gagwe ya ba setšhitšhi, wa lekana le mafofa a ntšhu, le dinala tša gagwe ya nke ke tša lenong. Kgoši a re: “E rile ge go fetile mengwaga ye e šupago yeo, nna, Nebukadnesare, ka lebelela godimo leratadimeng, gomme tlhaologanyo ya ka ya boela sekeng. Ka reta Yogodimodimo, ka hlompha yena Mophelelaruri, mme ka mo tumiša. “Mmušo wa gagwe ke wa go ya go ile, le bogoši bja gagwe ke bja go dulela ruri melokong ka moka. O bona badudi bohle ba lefase e se selo, o phetha thato ya gagwe ka barongwa ba legodimo le ka badudi ba lefase. Ga go yo a ka mo šitišago, goba a sola se a se dirago. “E rile ge tlhaologanyo ya ka e boetše sekeng tlhomphego ya ka ya mpoela, le bogoši, le seriti sa ka sa go buša. Mantona a ka le bakgomana ba nketela, ka bušetšwa sekeng, gomme bogolo bja ka bja feta le bja pele. Gomme bjale nna, Nebukadnesare, ke reta Kgoši ya legodimo, ke a mo godiša, ebile ke a mo tumiša, gobane tšohle tše a di dirago di lokile ebile di a swanela, gomme yena o kgona go kokobetša ba ba ikgogomošago.” Kgoši Belshatsare o kile a direla bakgomana ba gagwe ba sekete monyanya wo mogolo, gomme a nwa beine le bona. Ya re ge ba thoma go tagwa Belshatsare a laela gore go tlišwe dibjana tša gauta le tša silibera tšela Nebukadnesare, tatagwe, a kilego a di thotha ka Tempeleng kua Jerusalema. Kgoši a laela gore di tlišwe gore yena le bakgomana le basadi ba gagwe le metlabo ba tle ba nwe ka tšona. Ka gona dibjana tšeo tša gauta tša tlišwa, gomme ba nwa ka tšona ba reta medimo ya gauta le ya silibera le ya mphiri le ya tshipi le ya kota le ya leswika. Gateetee gwa tšwelela seatla, gomme sa thoma go ngwala mo lebotong le le ritetšwego la ntlo ya mošate moo go bego go lebane le mabone. Kgoši a bona seatla seo se ngwala. A galoga sefahlego ka letšhogo, a repha dinoka, le dikhuru tša gagwe tša tiana. A goelela a re go bitšwe dingaka, boradinaledi le didupe. Ge ba fihla kgoši a re go bona: “Yo a ka kgonago go bala tše di ngwadilwego mo mme a ntlhathollela tšona, o tla apešwa seaparo sa bogoši sa bohubedu bja go retela le pheta ya gauta, gomme ya ba wa boraro ka maemo mmušong wa ka.” Dihlalefi tša kgoši tša tla, eupša tša se kgone go bala tše di ngwadilwego moo goba go di hlathollela kgoši. Kgoši Belshatsare a tšhoga kudukudu, a galoga sefahlego go iša pele, gomme bakgomana bale ba gagwe ba gakanega. Mmakgoši o ile a kwa lešata la kgoši le bakgomana ba gagwe, gomme a tsena ka ntlong ya monyanya a re: “A kgoši a re phelele go ya go ile! O se ke wa tšhoga ka tsela ye wa ba wa galoga le sefahlego. Go na le monna ya mongwe mo mmušong wa gago yo a nago le moya wa medimo ye mekgethwa. Mehleng ya ge go buša tatago go ile gwa lemogwa gore monna yoo o na le tlhaologanyo, temogo le bohlale bja go etša bja medimo. Ka gona Kgoši Nebukadnesare, tatago, a mo dira hlogo ya didupe, dingaka, boradinaledi le mekome. Ke makgone yo mogologolo gomme o na le kwešišo le tlhaologanyo ya go hlatholla ditoro, go nyepolla dinyepo, le go rarolla tše di sa kwešišegego. Ka gona laela gore monna yo ba rego ke Daniele, yo tatago a mo theilego leina la Belteshatsare, a yo bitšwa gomme yena o tla go botša gore tše di ngwadilwego mo di ra eng.” Ke moka Daniele a tlišwa go kgoši, gomme kgoši a mmotšiša a re: “Na o yena Daniele, lethopša lela la Mojuda le tate, kgoši, a le tlišitšego mo le mathopša a mangwe a Bajuda? Ke kwele gore moya wa medimo ye mekgethwa o mo go wena, le gore o na le tlhaologanyo le temogo le bohlale bjo bogologolo. Dingaka, e lego tšona dihlalefi, di be di tlišitšwe mo go nna go tlo mpalela le go ntlhathollela tše di ngwadilwego mo, eupša ba paletšwe ke go di hlatholla. Ke kwele gore wena o kgona go hlatholla le go rarolla tše di sa kwešišegego. Ge o ka bala tše di ngwadilwego mo gomme wa ntlhathollela tšona, o tla apešwa seaparo sa bogoši sa bohubedu bja go retela le pheta ya gauta, gomme wa ba wa boraro ka maemo mmušong wa ka.” Daniele a mo fetola a re: “Itulele le dimpho tšeo tša gago goba o fe yo mongwe dineo tšeo. Eupša tše di ngwadilwego ke tla no go balela ka ba ka go hlathollela tšona, kgoši. “Modimo Yogodimodimo o be a file Nebukadnesare, tatago, bogoši le bogolo le seriti le borena. Modimo o be a mo file maatla mo e lego gore ditšhaba tšohle le merafe yohle le ba maleme ohle ba be ba mo tšhaba mme ba thothomela. Yo a nyakago go mmolaya o be a mmolaya; yo a nyakago gore a fele a phela, o be a phela. Ge a nyaka go hlompha motho o be a mo hlompha; ge a nyaka go kokobetša motho le gona o be a mo kokobetša. Eupša ya re ge a thoma go ikgogomoša le go ngangabala le go ikgantšha, a tlošwa setulong sa gagwe sa bogoši mme a amogwa seriti. A rakwa bathong gomme a ba bjalo ka phoofolo, a phela le dipitsi, a fula bjang bjalo ka kgomo, a thapišwa ke phoka bošego. Mafelelong a dumela gore Modimo Yogodimodimo ke yena a laolago mebušo yohle ya batho gomme o e beela babuši ba a ba ratago. “Eupša wena Belshatsare, morwagwe, ga se wa ikokobetša etšwe tšeo ka moka o di tsebile. O ikgantšheditše Morena wa legodimo, wa laela gore ba go tlišetše dibjana tšela tša ka Tempeleng ya gagwe. Wena le bakgomana le basadi ba gago le metlabo la nwa beine ka tšona gomme la reta medimo ya silibera, le ya gauta, le ya mphiri, le ya tshipi, le ya kota, le ya leswika – medimo ye e sa bonego gape e sa kwego, le gona e sa tsebego selo. Eupša Modimo yo a swerego bophelo bja gago gape a laolago tšohle tše o di dirago, ga se wa mo hlompha. Ke ka baka leo Modimo a romilego seatla sela gore se tle se ngwale tše di ngwadilwego mo. “Mo go ngwadilwe: ‘Badilwe, badilwe, boima, dikarolo.’ Tlhathollo še: badilwe ke go re Modimo o badile matšatši a mmušo wa gago gomme a o fediša; etšwe boima ke go re o etšwe boimakelong gomme wa hwetšwa o le bofefo kudu; arotšwe ke go re mmušo wa gago o arotšwe ka bogare wa fiwa Bamedia le Bapersia.” Ke moka Belshatsare a laela bahlanka ba gagwe gore ba apeše Daniele seaparo sa bogoši sa bohubedu bja go retela, le pheta ya gauta. A bega gore ke wa boraro ka maemo mmušong wa gagwe. Bjona bošego bjoo Belshatsare, kgoši ya Babilonia, a bolawa. Dariose, Momedia, o ile a tšea bogoši go Belshatsare a na le mengwaga ye masome a a selelago le metšo ye mebedi. A ikemišetša go bea babušiši ba lekgolo le masome a mabedi mmušong wa gagwe ka moka. A ba beela mantona a mararo a go ba hlokomela gore yena a se lobe. Daniele e be e le yo mongwe wa mantona ao. Yena a ipontšha gore o phala mantona ale a mangwe le babušiši, ka gobane o be a na le bokgoni bjo bogolo. Ka baka leo kgoši a gopola go mmea molaodi wa mmušo wa gagwe ka moka. Ke moka mantona ale a mangwe le babušiši ba leka go phara Daniele molato ka mo a bego a sepetša ditaba tša mmušo ka gona, eupša ba palelwa ke go hwetša le phošonyana, ka gobane Daniele o be a tshephega gomme a sa dire bošaedi goba se sengwenyana se sempe. Ke moka ba re: “Re ka se hwetše se re ka pharago Daniele molato ka sona, ge e se ka tša bodumedi bja gagwe.” Ka gona ba kgeregela go kgoši mme ba re: “Kgoši Dariose, nke o re phelele go ya go ile! Rena ka moka – mantona a mmušo, baokamedi ba dilete, babušiši, bakgomana le bomaseterata – re kwane gore kgoši a bee molao gomme e tloge e eba wa kgapeletšo. O laele gore lebakeng la matšatši a masome a mararo go se be le motho yo a kgopelago se sengwenyana go modimo ofe goba ofe, goba go motho yo mongwe, ge e se go wena, kgoši. Yo a ka tshelago molao wo a lahlelwe ka moleteng wa ditau. Kgoši a a bee molao woo, a o ngwale gore o se fetošwe, e be molao woo o ka se phumolwego wa Bamedia le Bapersia.” Ka gona Kgoši Dariose a ngwala molao woo. Ge Daniele a ekwa gore molao woo o ngwadilwe, a ya ntlong ya gagwe. Ka phapošing ya ka godimo ya ntlo yeo go be go na le mafasetere a a lebeletšego Jerusalema. Gona moo o be a fela a rapela gararo ka letšatši. Le mohlang woo a dira bjalo ka mehleng, a bula mafasetere, a khunama pele ga ona gomme a rapela Modimo, a mo tumiša. Ke moka banna bale ba kgeregela ntlong ya gagwe mme ba mo hwetša a rapela Modimo a mo kgopela kgaugelo. Ba napa ba ya go kgoši ba mo gopotša ka molao wola ba re: “Ga ke re o ngwadile molao wa go re mang le mang yo a ka kgopelago selo go modimo ofe goba ofe, goba go motho yo mongwenyana lebakeng la matšatši a masome a mararo ge e se go wena, kgoši, o tla lahlelwa ka moleteng wa ditau?” Kgoši a ba fetola a re: “Ee, ke molao wo o tiilego wo o ka se phumolwego wa Bamedia le Bapersia.” Bona ba re go yena: “Daniele, e lego yo mongwe wa mathopša ale a go tšwa Juda, ga se a ela wena kgoši le molao wa gago hloko. O rapela gararo ka letšatši.” Ge kgoši a ekwa seo a nyama kudu gomme a leka go loga maano a go phološa Daniele. A hlwa a leka letšatši la ba la sobela. Ya ba gona banna bale ba kgeregelago go kgoši gomme ba re go yena: “Kgoši, o tseba gabotse gore go ya ka molao wa Bamedia le Bapersia ga go kiletšo goba molao wo o ka rego o beilwe ke kgoši wa fetošwa.” Ka gona kgoši a laela gore Daniele a swarwe gomme a lahlelwe ka moleteng wa ditau. A re go Daniele: “Nke Modimo wa gago yo o mo hlankelago ka mehla a ka go phološa.” Molete woo wa tswalelwa ka leswika, gomme kgoši a o swaya ka palamonwana ya gagwe le ka ya bakgomana gore go se be le motho yo a ka phološago Daniele. Ke moka kgoši a gomela mošate, a lala a se a robala, a se a ja, a ba a laela gore a se lale a tlošitšwe bodutu. Ge go esa kgoši a tsoga a itlhaganela a ya moleteng. Ge a batamela a goelela a nyamile a re: “Wena Daniele, mohlanka wa Modimo yo a phelago! Na Modimo yo o mo hlankelago ka mehla o kgonne go go phološa ditaung?” Daniele a mo fetola a re: “Kgoši a re phelele go ya go ile! Modimo wa ka o romile morongwa wa gagwe go tlo swara ditau tše melomo gore di se ke tša ntira selo. Seo o se dirile ka ge a tsebile gore ga ke ne molato, le ka gobane le wena kgoši ga se ka go phošetša.” Kgoši o ile a thaba kudu gomme a laele gore Daniele a ntšhwe ka moo moleteng. Ka gona ba mo ntšha gomme ba bona gore ga se a gobala le gatee, ka ge a be a tshephile Modimo. Ke moka kgoši a laela gore banna bale ba bego ba pharile Daniele ka molato ba swarwe, gomme bona le basadi le bana ba bona ba lahlelwa ka moleteng woo wa ditau. Ya re ba sešo ba fihla fase, ditau tša be di šetše di ba kamile mme di ba robile mašapo ka moka. Ka morago Kgoši Dariose a ngwalela ditšhaba tšohle le merafe yohle le ba maleme ohle lefaseng ka moka a re: “Khutšo a e be le lena! Ke laela gore mmušong wa ka ka moka mang le mang a tšhabe Modimo wa Daniele mme a mo hlomphe, ka gobane ke yena Modimo yo a phelago, “gomme o tla ba gona go ya go ile. Mmušo wa gagwe o ka se tsoge o fedišitšwe, gomme pušo ya gagwe e ka se tsoge e fedile. O a phološa ebile o a hlakodiša; o dira dimakatšo le mehlolo legodimong le lefaseng. O phološitše Daniele gore a se bolawe ke ditau.” Daniele o ile a atlega nakong ya pušo ya Dariose le ya Korese wa Persia. Ka ngwaga wa mathomo wa ge Belshatsare e le kgoši ya Babilone, e ile ya re e le bošego ka lora, ka bona pono. Ka ngwala toro yeo, gomme se ke se bonego bošegong bjoo sese: Diphefo di be di etšwa ka mathoko ka mane mme di hudua lewatle le legolo. Gwa tšwelela dibata tše nne tša go se swane ka lewatleng. Sa mathomo se be se swana le tau, fela se na le diphego bjalo ka ntšhu. Ge ke sa se lebeletše diphego tša sona tša kgaoga. Sebata seo sa kukegela godimo gomme sa emišwa ka maoto bjalo ka motho, sa napa sa fiwa mogopolo bjalo ka motho. Sebata sa bobedi se be se swana le bere, se eme ka maoto a morago. Se be se swere dithapa tše tharo ka meno, gomme lentšu le re go sona: “Tšwela pele o je nama ka moo o ratago ka gona!” Ya re ke sa lebeletše gwa tšwelela sebata se sengwe. Sona se be se swana le nkwe, eupša se na le diphego tše nne mokokotlong tše di swanago le tša nonyana, ebile se na le dihlogo tše nne. Sa fiwa maatla a go buša. Ge ke sa lebeletše gwa tšwelela sebata sa bone. Se be se boifiša, le gona se šiiša mme se na le maatla kudu. Ka meno a sona a magolo a tshipi se be se rwaetša se se se swarago sa se metša, mme mašaledi sa a gataka ka maoto. Se be se sa swane le dibata tšela tše dingwe, sona se be se na le manaka a lesome. Ge ke lebelediša manaka ao ka bona lenaka le lenyenyane le mela gare ga ale a mangwe. La kgola manaka a mararo ale a bego a šetše a le gona. Lenaka leo le be le na le mahlo a motho le molomo wa go ikgantšha. E rile ke sa lebeletše gwa bewa ditulo tša bogoši. Mophelelasururi a dula go se sengwe sa ditulo tšeo tša bogoši. Diaparo tša gagwe e be e le tše ditšhweutšhweu, gomme moriri wa gagwe o swana le boya bja nku bjo bo hlwekilego. Setulo sa gagwe sa bogoši se lauma dikgabo mme se nameditšwe maotwaneng a a tukago mollo, gomme mollo o ela o etšwa go sona. Batho ba diketekete ba be ba mo hlankela, gomme pele ga gagwe go eme batho ba dimilione. Tsheko ya thongwa, mme dipuku tša phuthollwa. Ge ke sa lebeletše, sebata sela sa bone sa bolawa ka baka la dipolelo tša go ikgantšha tša lenakana lela, gomme sa lahlelwa dikgabong tša mollo sa fišwa. Dibata tšela tše dingwe tša amogwa maatla a go buša, eupša tša beelwa sebaka le matšatši a bophelo bja tšona. Moo ponong yeo ya bošego ke ile ka bona se nkego ke motho. O be a etla a pipeditšwe ke maru, gomme a ya go yola Mophelelasaruri a tsebišwa yena. A fiwa maatla a go buša, le tlhomphego, le bogoši gore ditšhaba tšohle le merafe yohle le ba maleme ohle ba tle ba mo hlankele. Pušo ya gagwe e tla ba ya go ya go ile, ya se fele, mme mmušo wa gagwe o ka se fedišwe. Dipono tšeo ka go di bona di ile tša ntshwenya kudu, tša ntšhoša. Ka ya go yo mongwe wa ba ba bego ba eme fao ka mo kgopela gore a ntlhathollele tšona. Ka gona a mpotša tše di di šupago. A re: “Dibata tšeo tše nne tše dikgolo ke mebušo ye mene ye e tlago hlaga lefaseng. Ge e le batho ba bakgethwa ba Modimo Yogodimodimo bona ba tla fiwa bogoši, gomme ya ba bja bona go ya go ile.” Ke ile ka nyaka go tsebišiša ka sebata sela sa bone sa go se swane le tše dingwe, sela sa go boifiša kudu sa go robaganya se se se swarago ka dinala tša sona tša mphiri, sa se rwaetša ka meno a sona a tshipi gomme mašaledi sa a gataka ka maoto. Le gona ke ile ka nyaka go tseba le ka manaka ale a lesome hlogong ya sona, le lenaka lela la go mela mme la kgola a mararo a manaka ale – lela la go ba le mahlo le molomo wa go ikgantšha. Lona le be le feta ale a mangwe. Ge ke ntše ke lebeletše, lenaka leo le ile la lwa le batho ba bakgethwa ba Modimo gomme la ba fenya. Ke moka Mophelelasururi a tla a ahlola batho ba bakgethwa ba Modimo Yogodimodimo a re ga ba na le molato. Nako ya gore batho bao ba fiwe maatla a go buša e be e fihlile. Ke ile ka hlathollelwa ka tsela ye: “Sebata sela sa bone ke mmušo wa bone wo o tlago ba lefaseng, o ka se swane le mebušo yela ye mengwe yohle. O tla gataka lefase ka moka wa le pšhatlaganya, wa le rwaetša. Manaka ao a lesome ke magoši a lesome ao a tlago buša mmušo woo. Gwa latela kgoši ye nngwe ye e sa swanego le tšela tša pele, gomme go dikgoši tšela tše lesome e tla fenya tše tharo. E tla bolela gampe ka Modimo Yogodimodimo gomme ya gatelela batho ba bakgethwa ba Modimo. E tla leka go fetola menyanya le melao ya bona ya sedumedi, gomme batho bao ba Modimo ba tla bušwa ke yona mengwaga ye meraro le seripa. Ka morago gwa tliwa tshekong ya legodimong, ba mo amoga maatla a go buša mme ba a fedišetša sa ruri. Batho ba bakgethwa ba Modimo Yogodimodimo ba tla fiwa bogoši le pušo le maatla a mebušo yohle lefaseng. Mmušo wa bona e tla ba wa go ya go ile, gomme babuši bohle lefaseng ba tla ba hlankela ba ba theeletša.” Ao ke mafelelo a taba ye. Ke ile ka tšhoga kudu ka ba ka galoga sefahlego, gomme tšohle tšeo ka se di botše motho. Ka ngwaga wa boraro wa ge Belshatsare e le kgoši, nna, Daniele, ke ile ka bona pono ya bobedi. Moo ponong yeo ka ipona ke le motseng wa Susa wo o ageleditšwego ka morako, seleteng sa Elamo. Moo ponong ka ikhwetša ke le nokeng ya Ulai. Ge ke phagamiša mahlo gona moo nokeng ka bona kgapa ya manaka a mabedi a matelele, lenaka le lengwe le feta le lengwe ka botelele, le gona le metše morago ga lela le lengwe. Ka bona kgapa yeo e ometša ka manaka a yona ka bodikela, ka leboa le ka borwa. Go be go se phoofolo ye e ka lwago nayo, goba ya hlakodišwa dinaleng tša yona. E be e dira ka mo e ratago ka gona, gomme e maatlafala e eya. Ge ke sa nagana ka seo ke se bonego, gwa tšwelela phooko ka bodikela e pharihla le lefase e sa gate fase, e na le lenaka la mantletlere phatleng. Ya leba go kgapa yela ya manaka a mabedi ke bego ke e bone e eme kgauswi le noka, ya e kgorogela ka šiši. Ka e bona e hlasela kgapa yela, ya e thula e e galefetše, ya e roba manaka ka mabedi. Kgapa yeo e be e se ne maatla a go itwela. Phooko yeo ya e wiša ya e gataka, gomme gwa se be le yo a e lamolelago. Phooko yeo e ile ya maatlafala e eya, eupša ya re ge e šetše e na le maatla a mantši, ya robega lenaka lela la mantletlere. Sebakeng sa lona gwa mela manaka a mangwe a mane a mantletlere, a lemetše dikhutlong tše nne tša lefase. Mo lenakeng le lengwe la ao a mane gwa mela lenakana le le ilego la gola kudu la lemela borwa le bohlabela le nageng ye e kgahlišago. La gola la ba la fihla madireng a legodimo, e lego dinaledi, gomme la wišetša tše dingwe fase, la di gataka. La ba la nyatša molaodi wa madira a legodimo, la thibela le dihlabelo tša tšatši le lengwe le le lengwe tše a bego a di direlwa, la hlompholla le Tempele. Lenaka leo la fenya madira. Batho ba be ba dira dibe bakeng sa go dira dihlabelo tša tšatši le lengwe le le lengwe. Lenaka leo le be le nyatša sedumedi sa mmakgonthe, gomme le atlega go tše le di dirago. Ka kwa morongwa a bolela, mme yo mongwe morongwa a botšiša mmoledi yoo a re: “Na taba tša pono ye di yo feletša kae? Go tla tšea nako ye kaakang batho ba ntše ba dira sebe se se šiišago legatong la dihlabelo tša tšatši le lengwe le le lengwe? Go tla tšea lebaka le lekaakang Tempele le madira a legodimo di gatakwa?” Morongwa yola yo mongwe a mo fetola a re: “Go tla tšea mantšiboa a dikete tše pedi le makgolo a mararo le masa a ona, ya ba gona Tempele e bušetšwago sekeng.” Nna, Daniele, ka re ke sa leka go kwešiša pono yeo ke e bonego, gateetee ka bona se nkego ke motho se eme pele ga ka. Ka kwa lentšu la yo a goelelago ka nokeng ya Ulai le re: “Gabriele, mo hlalošetše tša pono yeo.” Gabriele a tla mo ke emego gona, gomme nna ka tšhoga, ka ba ka wela fase ka rapalala. Yena a re go nna: “Wena motho wa nama, kwešiša gore pono yeo ke ya mabapi le tša bofelo bja lefase.” Ya re a sa bolela, ka idibala, ka wela fase ka sefahlego. Eupša yena a ntshwara, a nkemiša, a re: “Ke tla go botša tše di tlago direga ka moso mohla Modimo a otla batho, gobane pono yeo e amana le tša nako ye e beilwego ya tša bofelo bja lefase. “Kgapa yela o e bonego ya manaka a mabedi e šupa kgoši ya Media le ya Persia. Phooko yela e šupa kgoši ya Bagerike, gomme lenaka lela le legolo phatleng ya yona ke kgoši ya mathomo ya gona. Manaka ale a mane a go hloga ge go seno robega lenaka la mathomo a šupa mebušo ye mene ye e tlago aroga setšhabeng seo, le gona e ka se kego ya tia go swana le mmušo wa mathomo. “Ge mebušo yeo e ewa mme bokgopo bo iphile maatla, go tla ba le kgoši ye sehlogo, mokadikadi. O tla tia a eya, fela e sego ka boyena. O tla hlola tshenyo ye e šiišago, gomme a atlega go tše a di dirago. O tla fediša banna ba maatla le setšhaba se sekgethwa. Ka ge e le mogarigari, o tla atlega boradieng bja gagwe. O tla ikgantšha gomme a fetša batho ba bantši ba sa itebetše. O tla ba a tsogela le Kgoši ya dikgoši maatla, eupša o tla hwa, fela a sa bolawe ke motho. Tša pono ye ya mantšiboa le masa a o a bontšhitšwego di tla phethagala. Eupša gonabjale o se di botše motho, ka gobane ke tša mabakeng a a sa lego kgole.” Nna, Daniele, ke ile ka fokola mme ka fetša matšatši ke lwala. Ka morago ka tsoga ka boela mošomong wo kgoši a bego a mphile wona, eupša ke be ke tlabilwe ke pono yeo, ke sa kgone go e kwešiša. Dariose wa Momedia, yo e bego e le morwa wa Zerksese, o be a buša naga ya Babilonia. Ka ngwaga wa mathomo wa ge e le kgoši, nna, Daniele, ke ile ka lemoga ka Mangwalong a Makgethwa gore Jerusalema e tlilo ba marope mengwaga ye masome a a šupago, go ya ka mo Morena a bego a boditše moprofeta Jeremia ka gona. *** Ka rapela Morena ke tiišitše, ke phophotha, ke ikona dijo, ke apere tša go ilela, ke dutše meloreng. Ka rapela Morena Modimo wa ka, ka ipolela dibe ka re: “Joo, Morena, Modimo yo mogolo yo a tšhabegago! O botegetše kgwerano ya gago, gomme bao ba go ratago, ba phethago ditaelo tša gago, o ba bontšha leratorato. “Re dirile dibe, re fošitše, re dirile tše kgopo, re ganne go bušwa ke wena, ra aroga melaong le ditaelong tša gago. Ga se ra theeletša bahlanka ba gago, baprofeta, bao o ba romilego go bolela le magoši a rena, babuši ba rena, borakgolokhukhu ba rena, le setšhaba ka moka sa naga ya gaborena. Wena, Morena, o lokile, eupša rena re a inyatša, rena badudi ba Juda le ba Jerusalema le Baisraele bohle, ba kgole le ba kgauswi, le ba dinaga tšohle tše o re šwalalanyeditšego go tšona ka baka la go se go botegele ga rena. Morena, rena le magoši a rena le babuši ba rena le borakgolokhukhu ba rena re be re inyatša ka ge re be re go fošeditše. Wena, Morena Modimo wa rena, o a re gaugela, o a re lebalela, le ge re ile ra gana o re buša. Ga se ra go theeletša, Morena Modimo wa rena, mola o re botša gore re phele ka melao yela o re filego yona ka bahlanka ba gago, baprofeta. Baisraele bohle ba tshetše melao ya gago, ba go furalela, ba gana go go theeletša. Re go fošeditše, ka gona wa re gaša ka dithogako tše di ngwadilwego ka melaong ya Moshe, mohlanka wa gago, tše o ikannego go re otla ka tšona. O re dirile tše o bego o boletše gore o tla re dira tšona, wa ba wa di dira babuši ba rena ka go re tlišetša masetlapelo a magolo. Lefaseng lohle ga se wa ka wa dira tše o di dirilego motse wa Jerusalema. Masetlapelo a ka moka a re wetše go ya ka tše di ngwadilwego ka melaong ya Moshe. Eupša Morena Modimo wa rena, ga se ra go kgahla ka go furalela makgopo a rena, re tseba gore o phetha tše o di boletšego. Wena, Morena, ga se wa dikadika go re tlišetša masetlapelo, ka ge wena, Morena Modimo wa rena, o le yo a lokilego go tšohle tše o di dirago; le ge go le bjalo, rena ga se ra go theeletša. “Gomme wena, Morena Modimo wa rena, o itiretše leina ka go ntšha setšhaba sa gago Egepeta ka maatla a gago a magolo, gomme le lehono o sa tumile. Re dirile dibe, re fošitše. O Modimo yo a lokilego, gomme mabakeng a a fetilego o ile wa re hlakodiša; ka gona, hle, o se sa galefela Jerusalema, wa e befelelwa. Ke motse wa gago, ke thaba ya gago ye kgethwa. Batho ka moka ba dinaga tša kgauswi ba nyatša Jerusalema le setšhaba sa gago ka baka la dibe tša rena le makgopo a borakgolokhukhu ba rena. Bjale ge, wena Modimo wa rena, ekwa thapelo ya ka le kgopelo ya ka, nna, mohlanka wa gago. Tsošološa Tempele ya gago ye e pšhatlagantšwego, gore batho ba tsebe gore Mong wa bohle ke wena. Re hlwaele tsebe, Modimo wa ka, re theeletše; re lebelele, o bone mathata a rena, le motse wo e lego wa gago. Re go rapela ka ge o le yo lešokošoko, e sego ka gobane re dirile tše di lokilego. Re theeletše, Mong wa rena! Re swarele, Mong wa rena! Re kwe, Mong wa rena, mme o re hlakodiše! O se dikadike, gore batho ba tle ba tsebe ge o le Modimo, ka gobane motse wo ke wa gago le setšhaba se.” Ke ile ka no fela ke bolela le Modimo ke rapela, ke ipolela dibe tša ka le tša setšhaba sa gešo sa Israele, ke kgopela Morena Modimo wa ka gore a tsošološe Tempele ya gagwe ye kgethwa. Ke rile ke sa rapela, Gabriele, yo ke bego ke ile ka mmona mo ponong ya pele, a tla a itlhaganetše a fofela go nna. E be e le ka nako ya sehlabelo sa mantšiboa. A fihla a re go nna: “Daniele, ke tletše go go thuša gore o kwešiše profeto yela. Mola o thoma go rapela, Modimo o ile a go araba. O a go rata, ka fao nna ke tletše go go botša karabo ya gagwe. Bjale ge, o theeletše gabotse ge ke go hlathollela pono ya gago. “Mengwaga ye masome a a šupago e balwa gašupa ke nako ye Modimo a e beetšego go fediša bokgopo bja setšhaba sa geno, le bja badudi ba motse wa geno wo mokgethwa, le dibe tša bona, batho ba boelana le Modimo, gwa hlongwa toka ya go ya go ile, gwa phethagala pono yeo le profeto, gomme Tempele ye kgethwa ya šegofatšwa ka lefsa. Taba ye o swanetšego go e ela hloko le go e kwešiša še: Go tloga mohla go ntšhwa taelo ya go tsošološa le go aga Jerusalema ka lefsa go fihlela ge go etla mmuši yo a tloditšwego go tla feta mengwaga ye e šupago e balwa gašupa. Motse wa Jerusalema o tla agwa ka lefsa le mekgotha, wa ageletšwa ka leope, gomme wa dula mengwaga ye masome a a selelago le metšo ye mebedi a balwa gašupa, fela yeo e tla ba nako ya mathata. Mafelelong a nako yeo mmuši yo a tloditšwego yoo o tla bolawa a se na molato. Motse le Tempele di tla fedišwa ke madira a kgoši ye e tlilogo tla. Bofelo bja lefase bo tla fihla bjalo ka lefula, gwa ba le ntwa le tobo ye e laetšwego ke Modimo. Kgoši yeo e tla kwana le dihlopha tše dintši mengwaga ye e šupago, gomme ge seripa sa nako yeo se fetile, o tla fediša dihlabelo le dikabelo. Ntlhoreng ya Tempele go tla bewa Bohlola bjo bo tlontlollago Tempele, gomme bja dula moo go fihlela ge kgoši ya go hlasela naga e bolawa, bjalo ka ge Modimo a laetše.” Ka ngwaga wa boraro wa ge Korese e le kgoši ya Persia, Daniele, yo a bitšwago le ka la Belteshatsare, o ile a utollelwa molaetša. Molaetša woo e be e le wa nnete, eupša e le wo mothata kudu go o kwešiša. O ile a o hlathollelwa ponong. Mehleng yeo nna, Daniele, ke be ke feditše dibeke tše tharo ke hloname. Ke be ke feditše dibeke tše tharo ke sa je tše bose, ke itima nama, ke sa nwe beine, ke sa tlole. Ka letšatši la masome a mabedi le metšo ye mene la kgwedi ya pele ya ngwaga ke be ke eme leribeng la noka ye kgolo ya Tigrise. Ge ke phagamiša mahlo ka bona monna yo a aperego diaparo tša lešela le lepanta la gauta ye e sego ya tswakwa. Mmele wa gagwe o be o phadima bjalo ka legakabje. Sefahlego sa gagwe se etša legadima, mahlo a gagwe a tuka mollo. Matsogo le maoto a gagwe a be a phadima bjalo ka mphiri wo o phadimišitšwego, lentšu la gagwe le kwagala bjalo ka legoa la lešaba. E bile nna, Daniele, ke nnoši wa go bona pono yeo. Banna ba ba bego ba na le nna ga se ba e bona, fela ba ile ba tšhoga, ba tšhaba ba yo khuta. Nna ka šala moo ke nnoši, ke bogetše pono yeo ya go makatša. Ka felelwa ke maatla, ka galoga mmala boka mohu, ka nolega moko. Ge ke ekwa lentšu leo la gagwe ka wela fase ka sefahlego ke idibetše. Ke moka ka kwa seatla sa motho se ntshwara, se nthuša go khunama ka dikhuru, ka ikokotlela ka matsogo; ke ge ke sa thothomela. Morongwa yoo a re go nna: “Daniele, morategi wa Modimo, o theeletše gabotse se ke go botšago sona. Emelela, lehono ke romilwe go wena.” Ge a seno realo ka emelela ke sa thothomela. Ke moka a re: “Daniele, o se ke wa boifa. Modimo o kwele dithapelo tša gago go tloga tšatšing lela la mathomo o leka go kwešiša molaetša wola o ilego wa o utollelwa, mme wa ikemišetša go ikokobetša pele ga Modimo mabapi le thapelo ya gago. Morongwamohlokomedi wa mmušo wa Persia o be a emeletšane le nna matšatši a masome a mabedi le motšo o tee. Ka morago Mikaele, yo mongwe wa barongwa ba bagolo, a tla a ntamolela. Ka mo tlogela moo a elwa le magoši a Persia. Ke tletše go go tsebiša tše di tlago hlagela setšhaba sa geno ka moso, gobane pono ye e šupa tša ka moso.” Ge a realo nna ka lebelela fase ke se na molomo. Yo mongwe morongwa wa go swana le motho a nkgwatha molomo ka seatla. Nna ka re go yo a emego pele ga ka: “Mong wa ka, pono ye e nkweša bohloko, ke nolega moko. Nna, mohlanka wa gago, nka bolela bjang le wena, Mong wa ka? Ke feletšwe ke maatla, ke palelwa le ke go hema.” Mokamotho yoo a ntshwara gape, gomme ka maatlafala. A re: “Se boife, morategi wa Modimo, ewa pelo! Tia maatla, o be le sebete!” Ge a sa realo ka ikwa ke tieletše gape, gomme ka re: “Mong wa ka, hle, mpotše se o nyakago go se bolela, gobane o mmaatlafaditše.” Yena a re: “Na o a tseba gore ke ka baka la eng ke tlile go wena? Ke ka baka la go tlo go botša tše di ngwadilwego ka Pukung ya Therešo. Bjale ke swanetše go boela morago go yo lwa le morongwamohlokomedi wa Persia. Ka morago ga moo morongwamohlokomedi wa naga ya Gerike o tla tšwelela. Ga go yo a tlago nthuša ge ke elwa nabo, ge e se Mikaele, morongwamohlokomedi wa setšhaba sa geno. “Yena o thušitšwe ke nna ka sebele, ka mo tiiša ka ngwaga wa mathomo wa ge Dariose wa Momedia e le kgoši. Gomme tše ke yago go go botša tšona gonabjale ke therešo.” “Persia e sa tlilo bušwa ke dikgoši tše dingwe tše tharo, tša latelwa ke ya bone ye e humilego go feta tše dingwe. Yona e tla re ge e šetše e na le maatla ka baka la mahumo a yona ya hlohleletša magoši a mangwe go tsogela mmušo wa Bagerike maatla. “Ke gona go tla tšwelelago kgoši ye bogale. E tla buša dinaga tše dintši mme ya dira se e se ratago. Ge e šetše e le kgoši mmušo wa yona o tla arogana, wa tšwa dikarolo tše nne, go ya ka dikhutlo tše nne tša lefase. Mmušo wa yona o tla fedišwa, gwa se buše ditlogolo tša yona, gwa buša tše dingwe dikgoši, fela mmušo wa gona wa se tie go swana le mola go buša yena. “Kgoši ya Egepeta e tla tia. Fela molaodi wa gagwe yo mongwe o tla tia go mo feta, gomme a buša mmušo wo mogolo go feta wa gagwe. E tla re ge go fetile mengwaganyana kgoši ya Egepeta ya kwana le ya Siria, gomme ya mo nyadiša morwedi wa yona go tiišetša kwano yeo. Eupša kwano yeo e ka se be ya go ya kae, gomme mosadi yoo, le diphelesi tša gagwe, le ngwana wa gagwe, le monna wa gagwe ba ka se phele go ya kae, ba tla bolawa. Ya ba yo mongwe wa meloko yabo e ba kgoši. O tla hlasela madira a kgoši ya Siria, a šwahlela sebo sa bona gomme a ba fenya. O tla tšea le medimo ya bona ya diswantšhobopša le dilwana tša bona tše bohlokwa tša gauta le tša silibera a di iša Egepeta. Go tla tšea mengwaganyana a sa hlasele kgoši ya Siria. Ka morago kgoši ya Siria e tla šwahlela naga ya Egepeta, fela e tla gapeletšega go gomela morago. “Barwa ba kgoši ya Siria ba tla itokišetša ntwa, ba rapa madira a mantši. Yo mongwe wa bona o tla gogola tšohle go etša lefula, gomme a hlasela sebo sa manaba. Kgoši ya Egepeta e tla tšwa dira e galefile ya yo lwa le kgoši ya Siria ye le yona e tlago rapa madira a mantši, fela ona a tla fenywa. E tla re go fenya madira ao ya ikgantšha, ya bolaya bahlabani ba diketekete, eupša e ka se atlege go ya kae. “Kgoši ya Siria e tla boa e rapile madira a mantši go feta ao e bego e na le ona pele. Ge go fetile mengwaganyana o tla hlasela gape ka madira a mantši a a itlhamilego gabotse. Mehleng yeo batho ba bantši ba tla tsogela kgoši ya Egepeta maatla. Gomme bontwadumela ba bangwe ba go tšwa setšhabeng sa geno ba tla tsogela kgoši maatla ka baka la pono yeo, eupša ba ka se tšwelele. Ka gona kgoši ya Siria e tla kgobela mobu go dikanetša motse wo o ageleditšwego ka morako gore e o thope. Madira a Egepeta a ka se kgone go lwa nayo; ešita le bagale gare ga bona ba ka se be le maatla a go lwa nabo. Mošwahledi wa Mosiria o tla dira se a se ratago a sa thibelwe ke motho. O tla ema nageng ye e kgahlišago, gomme a e laola ka mo a ratago ka gona. “Kgoši ya Siria o tla itokišetša go tšwa dira ka madira ohle a gagwe. Fela pele ga moo o tla ikwantšha le lenaba leo la gagwe. Gomme gore a tle a wiše mmušo wa lona o tla le nyadiša morwedi wa gagwe; eupša maano a gagwe a ka se tšwelele goba a mo hola. Ka morago ga moo o tla hlasela ditšhaba tše di lego kgauswi le lewatle, gomme a fenya tše dintši tša tšona. Eupša molaolamadiratsoko o tla fediša makoko a gagwe; ruri o tla dira gore makoko a kgoši ya Siria a lahletše mong wa ona. Kgoši o tla boela dibong tša naga ya gagwe, fela o tla fenywa, ya napa ya ba bofelo bja gagwe. “Mohlatlami wa gagwe o tla roma mokgoboketši wa makgetho setšhabeng, e le gona go okeletša mmušo wa gagwe mahumo. Fela go se gwa ya kae kgoši yeo e tla bolawa ka go khukhunetšwa, e sego ntweng.” “Kgoši yeo ya Siria e tla hlatlangwa ke monna wa go nyatšega, yo a sego a lebanwa ke go ba kgoši, eupša o tla tla ka go khukhuna a tšea mmušo ka mahlajana. O tla swielela madira a a mo lwantšhago a a fediša, a bolaya le yena moetapele wa setšhaba sa kgwerano. O tla ikwantšha le ditšhaba tše dingwe, gomme o tla tia a eya, le ge balatedi ba gagwe ba se nene. O tla šwahlela selete se se humilego se sa itebetše, gomme a dira dilo tše le o tee wa borakgolokhukhu ba gagwe a se a kago a di dira. Ke moka a aroganyetša balatedi ba gagwe dithebola le dithoto. O tla loga maano a go hlasela dibo, fela go se gwa ya kae nako e tla be e mo šiile. “O tla rapa madira a mantši a sa boife selo a yo hlasela kgoši ya Egepeta, mme yona e tla itwela ka madira a mantši a maatla. Eupša e ka se tšwelele, ka gobane e tla be e lakanwe. O tla lahletšwa ke bao a ba tshephilego. Bahlabani ba bantši ba gagwe ba tla bolawa, le madira a gagwe a tla fedišwa. Ka tšatši le lengwe magoši ao a mabedi a tla ja mmogo, fela maikemišetšo a bona e tla be e le a mabe, gomme ba tla botšana maaka. Ba ka se hwetše se ba se nyakago, ka gobane nako ya sona ye e beilwego ga sešo ya fihla. Kgoši ya Siria e tla boela gae le tšohle tše e di hutšego, e ikemišeditše go fediša sedumedi sa setšhaba se se ineetšego go Modimo ka kgwerano. E tla dira se e se ratago, ya kgona e boela nageng ya yona. “Ka nako ye e beilwego e tla šwahlela Egepeta gape, eupša bjale go ka se sa ba bjalo ka mola pele, gobane Baroma ba tla tla ka maselawatle ba e lwantšha, mme e tla nolega moko. “Ke gona e tla boelago morago e galefile, gomme ya leka go fediša sedumedi sa setšhaba se se ineetšego go Modimo ka kgwerano. E tla latela keletšo ya bale ba tlogetšego sedumedi seo sa bona. Bahlabani ba yona ba bangwe ba tla hlompholla Tempele le sebo. Ba tla thibela dihlabelo tša tšatši le lengwe le le lengwe, gomme ba hloma Bohlola bjo bo tlontlollago Tempele. Ka leleme le boreledi o tla kgona go ikgweranya le bao ba furalelago kgwerano ya Modimo le setšhaba, eupša ba ba botegelago Modimo wa bona ba tla gana ba tiišitše. Baetapele ba bohlale ba setšhaba ba tla ruta ba bangwe ba bantši bohlale. Eupša sebakanyana ba bangwe ba bona ba tla bolawa ka tšhoša, goba ba bolawa ka go tšhungwa, gomme ba bangwe ba tla išwa bothopša, bangwe ba hlakolwa. E tla re ge batho ba bolawa, ba ba botegelago Modimo wa bona ba tla hwetša thušo ye e sego kaalo, gomme ba bantši ba tla ipata nabo ka bomenetša. Ba bangwe ba baetapele bao ba bohlale ba tla bolawa, eupša ka baka la yona taba ye setšhaba se tla hlatswiwa, sa hlwekišwa, sa tlošwa tšhila. Taba yeo e tla tšwela pele go fihlela bofelo bo etla, yona nako ye e beilwego ke Modimo. “Kgoši ya Siria e tla dira se e se ratago. E tla ikgantšha ya re e feta medimo ka moka, ya bolela tše di šiišago ka Modimo wa medimo. E tla atlega go fihlela ge Modimo a e otla. Modimo o tla dira se a ikemišeditšego sona. Kgoši o tla hlokomologa medimo ya borakgolokhukhu ba gagwe, le modimo wo o ratwago ke basadi. Gabotsebotse o tla hlokomologa medimo yohle, ka gobane o tla be a gopola gore yena o e feta ka moka ga yona. Bakeng sa medimo yeo o tla hlompha modimo wo o šireletšago dibo. O tla neela modimo wo o se wa kago wa khunamelwa ke borakgolokhukhu ba gagwe gauta, silibera, magakabje, le dimpho tše dingwe tše bohlokwa. O tla šireletša dibo tše di tiilego kudu ka go thušwa ke batho ba ba khunamelago modimo o šele. Bao ba rego ke yena mmuši wa bona o tla ba godiša kudu, a ba bea balaodi ba batho ba bantši, a ba arolela naga, ya ba gona go ba putsa. “Ge nako ya bofelo e fihla, kgoši ya Egepeta e tla hlasela kgoši ya Siria, eupša kgoši ya Siria e tla e kgeregela ka dikoloi tša ntwa, dipere le maselawatle a mantši. E tla šwahlela dinaga tše dintši bjalo ka lefula. E tla ba ya šwahlela le naga ye e kgahlišago gomme ya bolaya batho ba diketekete, eupša Baedomo le Bamoaba le mašaletšana a Baamone bona ba tla phonyokga. Mmušo wa gagwe o tla akaretša dinaga tše dintši, ešita le naga ya Egepeta e ka se phonyokge. O tla laola mahumo a Egepeta a gauta le a silibera, le tše dingwe tša gona tše bohlokwa. Balibia le Baetopia le bona ba tla mo loba. Ke mo a tlago tšhošwa ke mabarebare a go tšwa bohlabela le leboa, gomme a tšwa dira a gaketše, a bolaya batho ba bantši. O tla ba a hloma mešaša ya gagwe ya bogoši mokgahlo ga lewatle le thaba ye botse ye kgethwa. Eupša o tla hwa a se na mothuši.” “Mohlang woo morongwa yo mogolo, Mikaele, yo a šireletšago setšhaba sa geno, o tla tšwelela. E tla be e le nako ya masetlapelo a a se a kago a bonwa go tloga mola ditšhaba tša hlolegago. Mohla nako yeo e fihla batho ka moka ba setšhaba sa geno bao maina a bona a ngwadilwego ka pukung ya Modimo ba tla phološwa. Ba bantši bao ba šetšego ba bolokilwe ba tla tsoga: ba bangwe ba tla tsogela go phela go ya go ile, bangwe ba tsogela go phela ba lewa ke dihlong ba bile ba nyatšega go ya go ile. Baetapele bale ba bohlale ba tla taga bjalo ka leratadima. Gomme bao ba ilego ba ruta batho ba bantši go dira tše di lokilego ba tla taga bjalo ka dinaledi go ya go ile.” “Bjale ge, wena Daniele, tše ke go boditšego tšona o se di botše motho; o tswalele puku yeo gomme o e kgomaretše ka motu go fihlela nako ya bofelo. Batho ba bantši ba tla be ba gerema ba katanela go kwešiša tše di diregago.” Ke moka nna, Daniele, ka bona banna ba babedi ba eme kgauswi le noka, mongwe a le leribeng le, mongwe a le go lela. Yo mongwe wa bona a botšiša morongwa wa go apara diaparo tša lešela a eme kua godingwanyana ka nokeng, a re: “Na go tla tšea nako ye kaakang pele ga ge ditiragalo tše di makatšago tše di fela?” Morongwa yoo a emišetša matsogo leratadimeng, a ikana ka Mophelelaruri. Ka mo kwa a re: “Go tla tšea mengwaga ye meraro le seripa. Ge go hlomarwa ga setšhaba se sekgethwa go fela, dilo tše ka moka di tla be di šetše di diragetše.” Ge a realo ke ile ka mo kwa, fela ka se mo kwešiše. Ka gona ka mmotšiša ka re: “Fela mong wa ka, taba tše di yo feletša kae?” Yena a mphetola a re: “Daniele, itshepelele, ka gobane ditaba tše ke sephiri mme di swanetše go fihlwa go fihlela bofelong. Batho ba bantši ba tla hlatswiwa, ba tlošwa tšhila, ba hlwekišwa. Ba babe ba ka se kwešiše taba tše, eupša ba tla dula e le ba babe; ke fela ba bohlale ba ba tlago kwešiša. “Go tloga mohla go kgaotšwa dihlabelo tša tšatši le lengwe le le lengwe, e lego mohla go bewa Bohlola bjo bo tlontlollago Tempele godimo ga Tempele, go tla feta matšatši a sekete le makgolo a mabedi le masome a senyane. Go lehlogonolo yo a tlago kgotlelela go fihlela go feta matšatši a sekete le makgolo a mararo le masome a mararo le metšo ye mehlano. “Wena itshepelele; o tla re go ithobalela, bofelong bja lefase wa tsoga wa fiwa moputso wa gago.” Wo ke molaetša wo Morena a ilego a o fa Hosea, morwa wa Beeri, mehleng ya ge Usia, Jotamo, Ahase le Hiskia e le dikgoši tša Juda, gomme Jerobeamo, morwa wa Joase, e le kgoši ya Israele. Mohla Morena a bolela la mathomo le Baisraele ka Hosea o ile a re go yena: “Sepela o yo nyala mosadi yo e ka tlago ya ba seotswa. Bana ba gagwe le bona ba tla mo abela. Ke ka moo setšhaba sa ka se ntlogetšego ka gona mme se tlogago se sa mpotegele.” Hosea a yo nyala mosadi yo leina la gagwe e bego e le Gomere, morwedi wa Diblaime. Yena a ima, a tla a mmelegela morwa. Ke moka Morena a re go Hosea: “Mo thee leina la ‘Jesriele’, ka gobane ga ke sa le kgole le go otla kgoši ya Israele ka baka la batho bao Jehu, rakgolokhukhu wa gagwe, a ba bolailego motseng wa Jesriele. Ke tlilo fediša mmušo wa Israele. Gomme mehleng yeo ke tla dira gore madira a Israele a fenyetšwe sa ruri moeding wa Jesriele.” Gomere o ile a ima gape gomme a belega ngwana wa ngwanenyana. Morena a re go Hosea: “Mo thee leina la ‘Mosegaugelwe’, ka gobane nka se sa gaugela setšhaba sa Israele goba ka se swarela. Ge e le setšhaba sa Juda sona ke tla se gaugela. Nna, Morena Modimo wa bona, ke tla ba phološa, fela nka se ba phološe ka ntwa – ka mara le mesebe, goba ka ditšhoša, goba ka dipere goba ka banamedi ba dipere.” Ge Gomere a tshwešitše Mosegaugelwe o ile a ima gape gomme a belega morwa yo mongwe. Morena a re go Hosea: “Mo thee leina la ‘Gasesetšhabasaka’, ka gobane setšhaba sa Israele ga se sa ka, gomme le nna ga ke Modimo wa sona.” Le ge go le bjalo setšhaba sa Israele se tla swana le lešabašaba la lewatle, le ka se elwe goba la balwa. Bjale Modimo o re go bona: “Ga le setšhaba sa ka,” eupša mehleng ye e tlago ba tla bitšwa bana ba Modimo yo a phelago. Batho ba Juda le ba Israele e tla ba setšhaba se tee gape. Ba tla ikgethela moetapele o tee, ba buša ba gola mme ba atlega nageng ya bona. Ee, letšatši la Jesriele e tla ba le legolo. Ka gona lena Baisraele bitšanang “Setšhaba sa Modimo” le “Bagaugelwa”. Bana ba ka, beang mmagolena molato ka gobane ga e sa le mosadi wa ka, gomme le nna ga ke sa le monna wa gagwe. A a tlogele bofebe le bootswa bja gagwe. Ge a ka se bo tlogele ke tla mo hlobodiša a šala a le fela boka mola a belegwa. Ke tla mo dira bjalo ka leganata, ka mo swantšha le naga ye e omeletšego, gomme ka mmolaya ka lenyora. Bana ba gagwe nka se ba gaugele – ke bana ba seotswa, ka gobane mmagobona o be a otswa, motswadi wa bona o be a dira tša go leša dihlong. O be a re: “A ke ye go baratiwa ba ka ba ba mphago dijo le meetse, boya bja nku le mašela a boletiana, makhura a mohlware, le tša go nwa.” Ka baka leo ke tla mo thibela tsela ka mašaša a meetlwa, ka aga le morako gore a se kgone go tšea ka ditsela tša gagwe. O tla šala baratiwa ba gagwe morago, fela a se ba sware. O tla ba nyaka, eupša a se ba hwetše. Ke gona a tlago re: “A ke boele go monna yo e lego wa ka – mola ke phela le yena go be go le kaone go phala bjale.” O be a sa dumele gore ke nna ke mo filego mabele, beine, makhura a mohlware, ke mo neilego silibera le gauta ka bontši, mme yena a direla Baale ka tšona. Bjale ge, ge go bunwa ke tla mo amoga mabele a ke mo fago ona, ka mo amoga le beine ya ka ka nako ya yona; ke tla mo tšeela le boya bja nku le mašela a boletiana a ke mo filego ona gore a dire tša go ikapeša. Ke tla mo hlobodiša pele ga baratiwa ba gagwe, gomme ga go yo a tlago kgona go mo hlakodiša diatleng tša ka. Ke tla fediša mathabo a gagwe ka moka, menyanya ya gagwe ya ngwaga ka ngwaga, le ya Lebalana, le ya Disabatha – menyanya yohle ya gagwe ya sedumedi. Ke tla senya merara le mego ye a rilego o e filwe ke baratiwa ba gagwe e le meputso ya ge a robala le bona. Dirapa tša gagwe tša merara le tša mego ke tla di fetoša lešoka; di tla lewa ke diphoofolo tša naga. Ke tla mo otlela mehla yela ya ge a be a ntebala, a direla Baale dihlabelo, a bile a apara mangina a nko le dikgabišo tše dingwe, a latela baratiwa ba gagwe. O realo, Morena. Ka gona ke tla mo goketša ka mo iša lešokeng; moo ke tla mo rapeletša ka mmušetša go nna. Ke tla mmušetša dirapa tšela tša gagwe tša merara, gomme Moedi wa Matshwenyego ka o dira felo ga kholofelo. Moo o tla kwana le nna bjalo ka mola e sa le yo mofsa, mola a etšwa Egepeta. Mehleng yeo o tla buša a mpitša monna wa gagwe – a ka se sa mpitša Baale wa gagwe. Nka se sa tsoga ke mo dumeletše go bolela leina la Baale gape, a ka se sa mo rapela. Mehleng yeo ke tla dira kgwerano le diphoofolo tša naga le dinonyana tša legodimo le digagabi lefaseng, gore di se tshwenye setšhaba sa ka. Le gona ke tla tloša dibetša tša ntwa nageng – mara le mesebe le ditšhoša – gomme ka dira gore setšhaba sa ka se dule se bolokegile. Wena Israele, tumelelano ya rena ya lenyalo e tla ba ya go ya go ile. Ke tla go tshepegela ka go botegela; ke tla go rata ka mehla ka go gaugela. Ka ge ke le monna wa gago ke tla go botegela, gomme wena wa dumela gore ke nna Morena. Mehleng yeo ke tla kwa dithapelo tša setšhaba sa ka sa Israele. Ke tla fa magodimo pula ye a nkgopelago yona, magodimo ona a nešetša lefase pula ye le a kgopelago yona, lefase la mediša mabele le diterebe le mehlware, mme tšeo tša tlišetša Israele dijo. *** Ke tla atiša setšhaba sa ka mo nageng. Ke tla gaugela bao ba bego ba bitšwa “Basegaugelwe”, le bao ba bego ba bitšwa “Gasesetšhabasaka” ka re: “Le setšhaba sa ka,” gomme bona ba fetola ba re: “Wena o Modimo wa rena.” Morena a re go nna: “Boela o yo ratana le mosadi yo a ratanago le monna yo mongwe mme e le seotswa. O mo rate bjalo ka ge le nna ke rata Baisraele, le ge ba khunamela medimo e šele, ba bile ba rata diphaphašana tša makwapi a diterebe tše ba di neetšego medingwana.” Ka gona ka yo mo nyala ka dipapetlana tša silibera tše lesome le tše tlhano, le mekotla ye mebedi ya garase. Ka re go yena: “O ntetele nako ye telele o sa gwebe ka thobalo, o sa otswe; le nna ke tla itshwara ka mokgwa woo go wena.” Baisraele le bona ba swanetše go dula nako ye telele ba se na kgoši goba moetapele, ba sa dire sehlabelo, ba se na kokwane ya borapedi ya leswika, goba pheko, goba modingwana. Ka morago ga moo ba tla sokologa ba khunamela Morena Modimo wa bona gape, ba hlankela yo e lego setlogolo sa Dafida, kgoši ya bona. Ba tla buša ba boifa Morena, ba hwetša mahlatse a go tšwa go yena mehleng ya bofelo. Lena Baisraele, ekwang tše Morena a di bolelago, ka gobane lena badudi ba naga ye Morena o le bea molato o re: “Setšhaba ga se tshepane, ga se ratane, le gona ga se ntšee gore ke nna Modimo wa sona nageng ye. Ba hlolelana madimabe, ba bolela maaka, ba a bolaya, ba a utswa, ebile ba a otswa. Bosenyi bo a ata, ba tšholla madi ba sa fetše. Ka gona naga e welwa ke komelelo, le tšohle tše di phelago go yona di a felelela. Diphoofolo tša naga le dinonyana tša legodimo le tšona dihlapi di a hwa.” Morena o re: “A go se be le motho yo a beago setšhaba molato, goba a se kgalago – nna molato ke o bea lena baprista. Mosegare le dira dibe, gomme bošego baprofeta le bona ba mphošetša le lena. Ke yo fediša setšhaba sa Israele, mmagolena. Setšhaba sa ka se a felelela ka ge se sa ntšee gore ke Modimo wa sona. Lena baprista le ganne go ntumela, ka gona le nna ke tla le lahla la se sa ba baprista ba ka; ka ge le nyaditše thuto ya ka, le nna barwa ba lena nka se ba tšee gore ke baprista ba ka. “Ge lena baprista le ata, le atiša le dibe tša lena, ka gona tlhomphego ya lena ke tla e fetoša kgobogo. Le phela ka dihlabelo tša tshwarelo ya dibe tše setšhaba sa ka se di dirago, ka gona le nyaka gore ba tšwele pele le go dira dibe. Moprista o tla hlagelwa ke se se hlagelago setšhaba – ke tla le otla, ka itefeletša ka ge le dira tše kgopo. Le ge le lle kabelo ya lena ya dihlabelo le ka se khore. Le ge le ka rapela medimo ya tswala le ka se be le bana, ka gobane le tlogetše go ntlhompha.” “Beine ya kgale le ye mpsha e hlokiša setšhaba sa ka tlhaologanyo. Ba kgopela maele go kota, ba phekolwa ka ditaola. Tumo ya bona ya go khunamela medimo e šele e ba arošitše, gomme ka go khunamela medimo yeo ba mphuraletše, nna, Modimo wa bona. Ba dira dihlabelo godimo ga dithaba, le dikabelo ba di tšhuma mebotong ka fase ga mehlare ye metelele ya go ikala, ka gobane meriti ya yona ga se ka bose! “Ke ka baka leo barwedi ba lena ba febago, le dingwetši tša lena di otswago. Le ge go le bjalo, nka se ba otlele seo, ka gobane lena banna le šika le difebe, gomme le dira dihlabelo gotee le digwebakathobalo tša ka tempeleng. Ke ka mo setšhaba sa go hloka tlhaologanyo se wago ka gona. “Le ge lena Baisraele le sa mpotegele, nke Bajuda bona ba ka se ikobele molato woo. Le se ke la ya Gilgale goba Bethe-Abene go nkhunamela, goba la ikana gona ka leina la Morena yo a phelago. Baisraele ba ne kgang bjalo ka sethole sa kgang. Na nka ba fudiša bjalo ka dikwanyana molaleng? Baisraele ba ikamantše le medimo ya diswantšho. Ba tlogeleng ba le bjalo. Ge ba tagilwe ba ipha bofebe, ba thabela kgobogo go phala tlhomphego. Ba tla phamolwa nageng ya bona mo nkego ba tšewa ke ledimo, gomme dihlabelo tša bona di tla ba leša dihlong. “Ekwang taba še, lena baprista! E eleng hloko, lena setšhaba sa Israele! Theeletšang, lena ba lapa la mošate! Ke a le ahlola gobane le fetogile molaba kua Mitsepa. Ke lena lelokwa le le theilwego thabeng ya Taboro. Ke lena molete wa go iša wo o epilwego motseng wa Shitime, gomme ke tla le otla ka moka ga lena. Baisraele ke ba tseba gabotse – ba ka se nkhutele. Ga se ba mpotegela, gomme ba tšhilafetše.” Ditiro tša bona tše mpe di ba šitiša go boela go Modimo wa bona, gobane ba gogwa ke tumo ya go khunamela medimo e šele, gomme ga ba amogele Morena. Boikgantšho bja bona bo a ba wetša. Dibe tša bona di a ba kgopa, Bajuda le bona ba kgopša nabo. Le ge ba ka ya go nyaka Morena ba gapa dihuswane le dikgomo tša go mo direla dihlabelo, ba ka se mo hwetše ka ge a ba ngadile. Ba be ba sa mmotegele, gomme le bana ba bona ga ba mo khunamele. Ka gona, bona le mašemo a bona bjale ba tlilo fedišwa ka Monyanya wa Lebalana. Letšang phalafala kua Gibea, le lepatata kua Rama! Hlabang mokgoši kua Bethe-Abene! Eyang ntweng, lena banna ba Benjamene. Mohla Morena a le otla, lena Baisraele, naga ya lena e tla šala e le lešoka. Lena dikgoro tša Israele, ke le begela se se tlilogo hlaga. Morena o re: “Baetapele ba Juda ba šwahletše naga ya Israele. Ka gona, ke tla tšhollela kgalefo ya ka godimo ga bona ya etša lefula. Baisraele ba gateletšwe, ba tlaišega kudu ka ge ke ba otlela go phegelela go khunamela medimo ya diswantšho ga bona. Ka gona, go Baisraele nna ke bjalo ka sekaku; go Bajuda ke swana le bolwetši bja go ja motho marapo. “Ge Baisraele ba bona gore ba a lwala, le Bajuda ba bona bja bona bolwetši, Baisraele ba ile ba ya Asiria go kgopela thušo go kgošikgolo, eupša yena a palelwa ke go ba alafa, goba go ba fodiša. Nna ke tla hlasela Baisraele bjalo ka tau; ke tla tsogela Bajuda bjalo ka sebata. Ge ke ba hlwahlwaiša ga go yo a kago ba hlakodiša. “Ya ba gona ke boelago mo ke dulago gona go fihlela ge ba dumela gore ba na le molato, mme ba etla ba nnyaka. Ge ba le tlalelong ba tla phegelela go nnyaka.” Setšhaba se re: “A re sokologeleng go Morena! Ke yena a re rathagantšego, eupša o tla re kgomaganya; o re gobaditše, eupša o tla re tlema dintho. Ka morago ga sebakanyana o tla be a re bušeditše sekeng gomme ra phela re mo rapela. A re lekeng go tseba Morena. Ruri, o tla tla go rena bjalo ka masa, bjalo ka pula ya tsheola ye e thapišago lefase.” Eupša Morena o re: “Wena Israele le wena Juda, ke dire eng ka lena? Lerato la lena le timelela ka pela bjalo ka kgodi mosong, le etša phoka e sa le gosasa. Ke ka baka le ke romilego baprofeta ba ka go lena gore ba le botše gore ke tlilo le otla ka le bolaya. Kotlo ya ka e bonala bjalo ka seedi. Se ke se nyakago ke leratorato la lena, e sego dihlabelo. Ke kganyoga gore setšhaba sa ka se ntsebe go na le gore se ntirele dihlabelo tša go tšhungwa ka moka. “Eupša kua Adamo ba ile ba lahla kgwerano, ba se mpotegele. Gileade ke motse wo o tletšego badiratšempe le babolai. Baprista ba swana le lekoko la bahlakodi ba ba lalelago batho. Ešita le mo tseleng ya go ya Shekeme ba bolaya batho. Bohlola bja dihlong! Ke bone setšhaba sa Israele se dira taba ye e šiišago: se itšhilafatša ka go khunamela medimo ya diswantšho. “Le lena, Bajuda, ke le beetše nako ya go le otla.” le ge ke re ke a se alafa, go fela go utologa dibe tša bona le ditiro tše mpe tša Basamaria. Ba a hlalefetšana; ba šwahlela ka dintlong ba utswa; ba hlakola batho mebileng. Ga ba ke ba nagana gore bobe bjoo ka moka ke tla bo gopola; dibe tša bona di ba dikaneditše, gomme ke dula ke di bona.” “Kgoši ba e kgahliša ka bokgopo bja bona, bakgomana ba ba kgahliša ka maaka a bona. Ka moka ga bona ga ba mpotegele. Ba etša mollo wo o thunyago muši sebešong, le ge moapei a se sa o kgohletša, a le gare a duba bupi go fihlela bo hlakana. Ka letšatši la monyanya wa kgoši ya bona bakgomana ba tagwa ke beine, gomme kgoši le yena a thušane le bakwerani go kwera. Ba fiša tšhiritšhiri bjalo ka sebešo ge ba loga maanomabe. Bošego kgalefo ya bona e lala e thunya, gomme ge go esa e laume kgabo. “Ba bolaya babuši ba bona ba galefile; kgalefo ya bona e tuka bjalo ka mollo sebešong. Magoši ohle a bona a thenotšwe, eupša ga go le o tee wa bona yo a kilego a nkgopela thušo.” “Baisraele ba swana le senkgwa se se sego sa šatolwa. Ba itswakanya le ditšhaba tše di bapilego nabo. Ditšhaba di šele di ba fokoditše maatla, eupša bona ga ba lemoge. Go se gwa ya kae setšhaba sa bona se tla be se fedile, eupša bona ga ba tsebe. Boikgantšho bja bona bo a ba wetša. Le ge go le bjalo ga ba sokologele go nna, Morena Modimo wa bona, goba ba nkhunamela. Baisraele ba bjalo ka leeba, ke ditlaela tše di se nago tlhaologanyo; ba kgopela thušo Egepeta, ka morago ba ye Asiria. Eupša nna ke tla phurolla lelokwa la ka ka ba tanya bjalo ka dinonyana ge ba feta. Ke tla ba otlela tše mpe tše ba di dirilego. “Ba madimabe ke bona, gobane ba kgelogile. Ba tla fedišwa, ka gobane ba ntsogetše maatla. Ke be ke nyakile go ba hlakodiša, eupša bona ba mphara ka maaka. Ga ba nthapele ka dipelo tša bona ka moka; ba golola ba le malaong a bona. Ge ba kgopela mabele le beine go nna ba a iphatša. Ba ntsogela maatla. Le ge e le nna ke ba godišitšego ka ba tiiša, ba a ntakana. Ba kgelogela go medimo ya diswantšho ye e se nago mohola. Ga ba tshepagale, ba etša bora bja go se tsebalege. Ka ge bakgomana ba gabobona ba bolela ka makokwana, ba tla bolawa ka tšhoša. Ke mo ba tlago segwa ke Baegepeta.” “Letša phalafala! Manaba a phuthuma badudi ba naga ya ka bjalo ka ntšhu, gobane ba lahlile kgwerano ya ka le bona, ba tshela le melao ya ka. Baisraele ba a ntelela ba re: ‘Modimo wa rena, re dumela go wena!’ Baisraele ba ganne tše di lokilego; ka gona manaba a tla ba hlomara. “Ba ipeetše dikgoši ke se ka ba dumelela; ba ikgethela baetapele ba se ba boledišane le nna. Ba ipopetše medimo ya diswantšho ka silibera le ka gauta, ya ba gona go ipolaya ga bona. Wena Samaria, modingwana woo wa gago wa namane o a ntšhišimiša. Basamaria ke ba tukela bogale. Ba tla lesa neng go khunamela medimo ya diswantšho? Etse modingwana woo ke selo se se bopilwego ke mmopisethakga wa Moisraele, gomme e dio tloga e se modimo. Namane ya kua Samaria e tla pšhatlaganywa. Ka ge ba bjetše phefo, ba tla buna ledimo. Mabele ge a sa tswale a ka se tšwe bupi. Le ge bo ka be bo ka tšwa, bo be bo tla lewa ke bašele. Setšhaba sa Baisraele ga se sa ne maatla; ditšhaba tše dingwe di se bona e le selo se se se nago mohola. Ba ile ba ya Asiria bjalo ka pitsi ge e ikela mo e ratago. Ba lefile ditšhaba tše dingwe gore di ba šireletše. Le ge ba dirile bjalo, nna bjale ke yo ba kgoboketša ka ba otla. Kgauswinyana ba tla be ba menekana ge kgošikgolo e ba gateletše. “Baisraele ba agile dialetare tše dintši gore ba tle ba dire dihlabelo tša tshwarelo ya dibe mo go tšona, fela ke tšona dialetare tše tše di ba dirišago dibe. Ke ba ngwaletše melao ye e se nago palo, eupša bona ba re ga e ba ame. Ge ba ntirela dihlabelo, nama ya gona e lewa ke bona. Eupša nna, Morena, ga di nkgahle, gomme dibe tša bona nka se di lebale, ke tla ba otlela tšona. Ke tla ba bušetša Egepeta. “Baisraele ba rile go ntebala, nna, Mmopi wa bona, ba thoma go agela magoši a bona dintlo. Bajuda le bona ba ikagela metse ye mentši ye e ageleditšwego ka merako. Eupša metse yeo nna ke tla e tšhuma ka mollo, wa fiša le tšona dintlo tšeo tša magoši a bona.” Lena Baisraele, lesang go keteka menyanya ya lena bjalo ka baditšhaba, gobane le furaletše Modimo wa lena la se sa mmotegela. Seboeng se sengwe le se sengwe le be le itshwara bjalo ka segwebakathobalo ka ge le be le gabile go lefša. Eupša le ka se sa ba le mabele le beine, beine ye mpsha le yona le tla e hloka. Baisraele ba ka se sa dula nageng ya Morena, ba tla bušetšwa Egepeta, gomme kua Asiria ba tla tlemega go ja seila. Ba ka se kgone go tšhelela Morena dikabelo tša dino, le dihlabelo tša bona di ka se mo kgahle dinageng tšeo. Dijo tša bona di tla tšhilafatša bohle ba ba di jago, go no swana le dijo tša mogoga. Dijo tša bona di tla jelwa go dio tloša tlala, ga go se se tlago išwa ka Tempeleng ya Morena e le kabelo. Bjale ba tla dirang mohla wa monyanya wo o beetšwego go hlompha Morena? Ešita le ge ba ka se bolawe ke manaba, Baegepeta bona ba tla ba kgoboketša ba ba bolaya, gomme ba bolokwa Memfise. Dikgabišo tša bona tša silibera di tla khupetšwa ke ditshehlo, ka magaeng a bona go tla mela dihlašana tša meetlwa. Nako ya kotlo e tlile, yona nako ya tefetšo. Mohla seo se phethega, go tla tseba lena, Baisraele. Lena le re: “Moprofeta yo ke setlaela. Monna yo wa go tsenwa ke moya o a gafa.” Etse le ntlhoile ka mokgwa wo ka gobane sebe sa lena e le se segolo gakaaka. Gape nna, moprofeta, Modimo o mpeile mohlapetši wa lena, Baisraele. Eupša gohle mo ke yago gona le nthea ka sefu bjalo ka nonyana. Batho ba mphetogetše manaba gona mo nageng ya Modimo wa ka. Ke ba babe la bohloko go tšohle tše ba di dirago, go no swana le mola ba le Gibea. Modimo a ka se lebale dibe tša bona, mme o tla ba otlela tšona. Morena o re: “Mola ke hwetša Baisraele la mathomo ke ile ka swana le motho yo a hwetšago diterebe lešokeng. Mola ke thoma go bona borakgolokhukhu ba lena e be nke ke ge ke bona dithakangwaga mohlareng wa mogo. Fela ya re ge ba fihla Baale-Peore ba ineela go Baale, modimo wa go leša dihlong, mme ba šišimiša bjalo ka wona modimo woo ba bego ba o rata. Setumo sa Baisraele se tla ba tšhabela boka nonyana ge e fofa, gomme basadi ba ka se sa belega, goba ba ima, goba ba riboga. Fela le ge ba ka belega bana ba ba godiša, bana bao ke tla ba tloša tšatšing, gwa se šale le o tee. Ka lahla Baisraele – masetlapelo fela!” Go nna Baisraele ba kile ba swana le motse wa Tirose wo o agilwego lefelong le lebotse. Fela bjale ba swanetše go iša bana ba bona go babolai. Na nka go kgopela gore o ba dire eng, Morena? Basadi ba bona a e be ba go ima ba boa tseleng, e be ba matswele a go hloka mekgato. Morena o re: “Bobe bjohle bja bona bo thomile Gilgale. Ke gona kua mo ke ilego ka thoma go ba hloya. Gomme ka baka la tše mpe tše ba di dirilego, ke tla ba raka mo nageng ya ka. Nka se sa ba rata; baetapele bohle ba bona ba ntsogetše maatla. Baisraele ba wetšwe ke masetlapelo. Ba bjalo ka semelana se se hwilego medu mme se sa enywe. Le ge ba ka belega, ke tla bolaya bana bao ba bona ba ba ratago kudu.” Modimo wa ka o tla lahla Baisraele, ka ge ba sa mo theeletše. E tla ba bageremi gare ga baditšhaba. Baisraele ba kile ba swana le morara wo o entšwego kudu. Ya re ge ba atlega bjalo, ba atiša le dialetare tša medimo ya diswantšho. Ge monono wa naga o tšwelela, ba tšweletša le botse bja dikokwane tša maswika tše ba di khunamelago. Batho ba pelo tša bonokwane bjale ba tlilo otlwa. Morena o tla kgereša dialetare tša bona, le dikokwane tša bona tša maswika o tla di pšhatlaganya. Ke moka ba tla re: “Ga re na kgoši ka ge re sa tšhabe Morena. Fela kgoši yona e be e ka re direlang?” Ba ipolelela ditšiebadimo, ba ikana ka maaka, ba gwerana le ditšhaba tše dingwe. Tshekong ba sekamiša toka ya ba bjalo ka boori bolemeng. Badudi ba Samaria ba tshwenyegile ka modingwana wa bona wa namane wa kua Bethe-Abene. Bona le baprista ba ba hlankelago modingwana woo ba tla o llela, ba golola ge o humolotšwa bothakga bja wona bja gauta. Modingwana woo wona o tla thothelwa Asiria ya ba seloba go kgošikgolo. Baisraele ba tla gobošwa ba hlabišwa dihlong ka baka la mathaithai a bona. Motse wa Samaria o thubilwe. Kgoši ya gona e tla thopša ya etša phatša ya legong ye e tšewago ke noka. Dintotoma tša Abene, moo Baisraele ba dirago dibe, di tla phatlalatšwa. Godimo ga dialetare tša bona go tla mela mehlašana ya meetlwa le ditshehlo. Ya ba mo batho ba goelelago dithaba ba re: “Re weleng godimo!” Ba goelela meboto ba re: “Re pipeng!” Morena o re: “Baisraele e sa le ba ngangabalela sebeng go tloga mola ba le Gibea, mme ba no tšwela pele bjalo. Ka gona, ba tla rakelelwa ke manaba gona kua Gibea. Ke tla ba hlasela ka ba otla. Ditšhaba di tla ba thika tša ba otlela dibe tša bona tše pedi. “Baisraele ke sethole se se rutantšhitšwego, se se ratago go fola mabele. Ka gona nna ka sebele ke tla se bea joko molaleng wa sona wo mobotsana, ka se pana. Bajuda ke tla ba lemiša, ditlogolo tša Jakobo tšona ke tla di thubiša makwate. Ipšaleleng peu ya toka, ke mo le tlago buna leratorato. Ikgatheleng lehwiti, gobane ke nako ya gore le nnyake, nna, Morena, gore ke tle ke le nešetše ditšhegofatšo boka pula. Lena le bjetše bobe la buna dikenywa tša bjona. Le lle dikenywa tša maaka a lena. “Ka ge le ikantše dikoloi tša lena tša ntwa le bontši bja bagale ba gabolena, setšhabeng sa gabolena go tla kwagala mašata a ntwa, gomme dibo tšohle tša lena di tla thubja. Go tla etša mohla wola Kgoši Shalmane a thuba motse wa Bethe-Arbeele ka ntwa, gomme bommagobana le bana ba bona ba tlapiriganywa. Ke tše di tlago le hlagela, lena ba Bethele, ka baka la bobe bjoo bja lena bja go šiiša. Kgoši ya Israele e tla bolawa ntweng e sa le ka masa.” Morena o re: “Mola Israele e sa le ngwana ke be ke mo rata, gomme ka mmitša e le morwa wa ka gore a tšwe Egepeta. Eupša go mmitša ga ka ya ba nke ke go mo dira gore a mphuralelele sa ruri. Setšhaba sa ka sa direla Baale le medimo ya diswantšho dihlabelo. Gabotsebotse ke nna ke ba rutilego go sepela; ka kuka setšhaba sa ka, eupša sona sa se dumele gore se hlokometšwe ke nna. Ke ile ka ba tliša go nna ka botho le lerato, ka dira bjalo ka motho yo a kukago ngwana wa gagwe a mmea thameng; ka obama ka ba leša. “Ba ganne go boela go nna, ka gona ba swanetše go boela Egepeta, gomme naga ya bona e tla bušwa ke Asiria. Tšhoša e tla bolaya badudi ba metse ya bona, gomme manaba a robaganya maphika a dikgoro tša metse yeo. Setšhaba sa ka se tla fedišwa ka baka la tše se ikemišeditšego go di dira. Ba phegeletše go mphuralela. Ba tla lla ka baka la joko ye ba tla bego ba e rwele, eupša ga go yo a tla ba rolago yona. “Na nka go lahla bjang, wena Israele? Nka go tlogela bjang? Kgane o re nka go fediša bjalo ka mola ke fediša motse wa Adma, goba ka go dira tše ke di dirilego Tseboime? Pelo ya ka e a gana – ke go šokela kudu. Nka se go otle ke galefile. Nka se sa fediša Israele, gobane nna ke Modimo, ga ke motho. Ke nna Mokgethwa gare ga lena. Nka se tle go lena ka pefelo. “Baisraele ba tla ntatela, nna, Morena, ge ke bopa bjalo ka tau. Ge ke bopa bana bao ba ka ba tla tla ba phaphasela bjalo ka nonyana ba etšwa bodikela. Ba tla be ba etšwa Egepeta ba phaphasela, ba etšwa Asiria boka maeba. Nna ke tla ba bušetša magaeng a bona. Ke realo, nna, Morena.” “Setšhaba sa Israele se ntikaneditše ka maaka le boradia, sa Juda sona se sa ntatela, nna, Modimo, se sa mpotegetše, nna, Mokgethwa. Se sengwe le se sengwe se se hlwelwago go dirwa ke Baisraele ga se na mohola, ke sa go senya. Bonokwane le dikgaruru di ba atela di eya pele. Ba kwana le Asiria, gomme le nageng ya Egepeta ba romela makhura a mohlware.” Morena o bona batho ba Juda molato; le ditlogolo tša Jakobo o tla di otlela dibe tša tšona. O tla ba lefetša tše ba di dirilego. Jakobo o ile a leka go ema mogolwagwe legato ba sa le ka popelong ya mmagobona; le mola e le monna o ile a katana le Modimo – a lwa le morongwa gomme a mo fenya. A lla a mo kgopela kgaugelo. Le kua Bethele Modimo o ile a kopana naye, a bolela le yena. Yoo e be e le yena Morena Modimo Ramaatlaohle – Morena ke lona leina le a swanetšego go bitšwa ka lona ge a rapelwa. Bjale ge, boelang go Modimo wa lena, le dule le rata yena Morena, le dira tše di lokilego, le mo tshepile, yena Modimo wa lena. Morena o re: “Baisraele ba swana le Bakanana ka boradia; ba rata go hlalefetša batho ka dikelo tša bofora. Ba re: ‘Re na le sa rena, lehumo le re atlile. Gomme ga go motho yo a ka re bonago molato wa go ikhumiša ka bohwirihwiri.’ Eupša nna ke lego Morena Modimo wa lena go tloga mola le le Egepeta, ke tla dira gore le boele le dule ka mešašeng, go swana le ka nako yela ya Tente ya bodulo bja Morena. “Ke boletše le baprofeta, ka ba bontšha dipono tše dintši, ka ba ka botša setšhaba dipapišo ka bona. Batho ba Gileade ba dira tše kgopo, gomme ba tla bolawa. Kua Gilgale go direlwa dipoo dihlabelo; ke ka baka leo dialetare tša gona di tlago ba bjalo ka mekgobo ya maswika bolemeng.” Jakobo o ile a tšhabela nageng ya Aramo mo a ilego a dišetša monna yo mongwe dihuswane, e le go šomela go hwetša mosadi. Morena o ntšhitše Baisraele Egepeta ka moprofeta, a ba a ba hlokomela ka yena moprofeta. Baisraele ba galefišitše Morena gabohloko; o tla ba otlela go bolaya batho. Morena wa bona o tla ba otlela go mo goboša moo ga bona. Mehleng ya kgale e be e re ge ba kgoro ya Efraime ba bolela, ba dikgoro tše dingwe ba šie. Ba be ba hlompšha ke Baisraele ba bangwe. Fela ba ile ba ikobela molato ka go khunamela Baale, gomme ka baka la sebe seo ba hwa. Le gonabjale ba sa iša pele le go dira dibe ka go ipopela medimo ya diswantšho, diswantšhobopša tša silibera tše ba di bopago ka mo ba di bonago ka gona, tšohle di bopša ke bakgoni ba bona. Ke moka ba re: “E hlabeleng didimo!” Aowii, batho ba napile ba khunamela medingwana ya manamane ba e atla! Ke ka baka leo ba tlago timelela bjalo ka kgodi ya masa, bjalo ka phoka ye e timelelago ge le hlaba. Ba tla etša mooko wo o tšewago ke phefo seboeng, ba swana le muši wo o tupago ka lešoba. Morena o re: “Ke bile Morena Modimo wa lena go tloga mola le le Egepeta. Ga le na Modimo yo mongwe ntle le nna. Ntle le nna ga go Mophološi yo mongwe. Ke ile ka le hlokomela kua lešokeng, nageng yela ya go omelela. Ka le fepa la khora, mme ya re ge le sosometše la ikgogomoša, la ntebala. Ka gona ke tla le hlasela boka tau. Ke tla le lalela tseleng bjalo ka nkwe. Ke tla le tsogela go etša bere ye e hlakotšwego bana, ka le gagola. Ke tla le kgabutla ka bjako boka tau; ka le rathaganya bjalo ka sebata. “Ke tla le fediša, lena Baisraele, gomme le tla hlakodišwa ke mang? Bjale kgoši ya lena e kae e tle e le hlakodiše metseng yohle ya lena? Ba kae babuši ba lena ba le kilego la kgopela Samuele la re: ‘Re fe kgoši le baetapele!’ Ka gona ka le fa kgoši ke galefile, ka ba ka le amoga yona ke galefile. “Sebe sa Baisraele le molato wa bona ke di ngwadile, mme mangwalo a gona ke a lotile. Baisraele ba sa na le sebaka sa go phela, fela ba šilofetše mo ba sa bonego mohola wa go se šomiša – ba swana le ngwana yo a lego kgauswi le go belegwa, yo a ganago go tšwa ka popelong ya mmagwe. Na nka nama ka ba hlakodiša bodulabahu? Nka ba phološa lehung? Hee, lehu, tliša mauba a gago! Tliša lebolela la gago, wena bodulabahu! Setšhaba se nka se sa se šokela. Le ge Baisraele ba atlega bjalo ka lehlakanoka ke tla ba romela phefo ya bohlabatšatši ya go tšwa lešokeng, gomme e tla pšheša didiba tša bona le methopo. E tla ba hlakola tšohle tše bohlokwa. “Basamaria ba tla otlelwa go ntsogela maatla ga bona, nna, Modimo wa bona. Ba tla bolawa ka tšhoša; masea a bona a tla tlapiriganywa, le baimana ba gabobona ba tla fatolwa.” Lena setšhaba sa Israele, sokologelang go Morena Modimo wa lena. Bokgopo bja lena bo a le kgopa bja le wiša. Sokologelang go Morena, gomme se le mo abelago sona e be thapelo ye: “Re swarele bokgopo bjohle bja rena, o re kwe ge re go rapela, ke gona re tlago go reta. Asiria e ka se kgone go re phološa, le dipere tša ntwa di ka se re hole ka selo. Re ka se sa tsoga re boditše medimo ye re itiretšego yona ka diatla ra re ke medimo ya rena. Morena, ke wena o šokelago ba ba tlogetšwego ke ditšhaba.” Morena o re: “Ke tla bušetša setšhaba sa ka go nna, ka dira gore se se sa kgeloga. Ke tla ba rata ka pelo ya ka ka moka, gobane ga ke sa ba galefetše. Go setšhaba sa Israele ke tla ba bjalo ka phoka. Ba tla atlega boka matšoba a a thunyago; ba tla tia medu go etša mehlare ya Lebanone. Ba tla ba le bana ba bantši, gape ya ba ba babotse boka mehlware. Ba tla nkga bose go swana le mesedere ya Lebanone. Ba tla buša ba dula ba šireleditšwe ke nna, ba bjala mabele, ba atlega go swana le morara. Ba tla tuma bjalo ka beine ya Lebanone. Setšhaba sa Israele se ka se sa ba le taba le medimo ya diswantšho; ke tla kwa dithapelo tša bona gomme ka ba hlokomela; ke tla ba mothopo wa tšohle tše ba di hlokago, go swana le mesaeprese ge e le ye bohlokwa go bona.” A yo a lego bohlale a kwešiše tše di ngwadilwego mo, le yo a nago le temogo a di dumele. Ditsela tša Morena di lokile, gomme baloki ba sepela ka tšona, eupša batshelamolao bona ba kgopša go tšona ba wa. Tše Morena a di boditšego Joele, morwa wa Petuele, šedi: Theeletšang, lena bagolo ba setšhaba; hlwayang tsebe, lena badudi bohle ba naga. Na tiragalo ya mohuta wo e kile ya hlaga mehleng ya lena goba mehleng ya botatagolena? Le e anegele bana ba lena; le bona ba e anegele bana ba bona, mme bao le bona ba e anegele ba bona bana. Dimelana tša go šadišwa ke mogokong di lewa ke bojane; tša go šadišwa ke bojane di lewa ke segongwane; tša go šadišwa ke segongwane di lewa ke maphatakalala. Tsogang, le lleng, matagwa tenang! Gololang, lena bomagampelabeine, ka ge beine ye mpsha le ka se sa e latswa. Naga ya gaborena e hlasetšwe ke tšie, tšie ye maatla, ye e sa balwego, ya meno a nkego a tau, ya mehlagare o ka rego ya taugadi. E hlobotše merara ya rena, ya rothotha le mego ya rena. E e humolotše matswamati ya a lahlela fase, dikala tša šala di šweufetše. Gololang, le etše monyadiwa yo a iletšego monyadi wa gagwe. Ka ge go se sa išwa kabelo ya bupi goba ya dino ka Tempeleng, baprista, bahlanka ba Morena, ba a lla. Mašemo a hloboletše, naga e kwa bohloko ka ge e lobile mabele; diterebe di šwabile, le mehlware e ponne. Felang maatla, lena balemi; gololang, lena bahlokomedi ba merara, gobane le mabele le garase le dibjalo tše dingwe di lobile. Merara e omeletše, le mego e ponne; megarenate le mepalema le meapola le mehlare yohle ya naga e omeletše. Lethabo lela la batho le ile. Lena baprista, aparang tša go ilela, le lleng! Gololang, lena le hlankelago Morena aletareng! Etlang, le lale le apere tša go ilela, lena bahlankedi ba Modimo wa ka, gobane ga go sa na kabelo ya bupi goba ya dino ya go neelwa ka Tempeleng ya Modimo wa lena. Beang letšatši la go ikona dijo, le rapeng pitšo! Kgoboketšang bagolo ba setšhaba le badudi bohle ba naga ka Tempeleng ya Morena Modimo wa lena, le mo lleleng. Joo, letšatši la go tla ga Morena le batametše, lona letšatši le Ramaatlaohle a tlago lobiša naga ka lona! Re loba dibjalo re lebeletše. Ka Tempeleng ya Modimo wa rena ga go sa na lethabo le tlhalalo. Peu e boletše ka fase ga makwate, matlolo ga a ne selo, le dišego di hlagatšwa ke go hloka mabele. Diruiwa di bokoledišwa ke tlala le lenyora; mehlape ya dikgomo e gerema le naga ka go hloka mafulo; mehlape ya dihuswane le yona e a hlaka. Morena, ke llela wena, ka ge mafulo le dihlare lešokeng di swele mo nkego di tšhumilwe ke mollo. Le diphoofolo tša lešoka di llela wena, gobane dinokana di pšhele. Letšang phalafala Sione, hlabang mokgoši thabeng yeo ye kgethwa ya Modimo. Thothomelang, lena badudi ba naga ya Juda, gobane Letšatši la Morena le batametše. E tla ba letšatši la leswiswi le phifalo, letšatši le leso la maru. Motšhitšhi wo mogologolo wa tšie o tla bjalo ka lešaba la batho, o aparetše dithaba, o bjalo ka mahube a masa. Ye bjalo ga se ya ka ya ba gona, ebile e ka se sa tsoga e bonwe. Mo e yago gona e ja dibjalo ka moka bjalo ka mollo. Mo e fetago gona e senya tšohle boka kgabo ye e laumago. Ka pele ga yona naga e swana le serapa sa Edene, ka morago ga yona naga ke leganata, ga e ne selo. Ga go se e se šadišago. E bopegile bjalo ka pere; e na le lebelo bjalo ka dipere tša ntwa. Ge e taboga dintlhoreng tša dithaba, go kwala lešata le nkego ke la dikoloi tša ntwa, le nkego ke la mollo ge o fiša dikutwana tša mahlaka. E šalane morago bjalo ka madira a mantši ao a lego ntweng. Ge e batamela, batho ka moka ba a thothomela, mongwe le mongwe o galoga sefahlego. E hlasela bjalo ka bahlabani; e namela merako go etša madira. E sepela e lebile pele e sa phamoge, e sa kgorometšane. Le ge e wela mo e thibelwago ga e phamoge. E wela motse godimo, e tshela merako; e namela dintlo; e tsena ka mafasetere boka mahodu. Ge e batamela, lefase le a šikinyega, legodimo le a thothomela. Letšatši le ngwedi di a fifala, le dinaledi tša se sa taga. Morena o laya madira ao a gagwe a a etile pele. Ona madira ao a mo theeletšago ke a mantši, a na le maatla. Letšatši la Morena ke le legolo mme le boifiša kudu. Ke mang yo a kago le phonyokga? Morena o re: “Le gonabjale sokologelang go nna ka dipelo tša lena ka moka ka go ikona dijo le ka dillo le mahloko. Manyami a lena a a bonagale ka dipelo tša lena tše di kwelego bohloko; go ikgeilela diaparo ga go a lekana.” Sokologelang go Morena Modimo wa lena. Ke yo botho le yo lešoko; ga a fele pelo ebile o botega kudu; o fela a buša pelo ge a swanetše go le otla. Mohlomongwe a ka buša pelo gape, a le šegofatša ka dibjalo tše dintši. Ke gona le ka neelago Morena Modimo wa lena kabelo ya bupi le ya seno. Letšang phalafala thabeng ya Sione; beang letšatši la go ikona dijo, gomme le rape pitšo. Kgobokanyang setšhaba, le se hlwekišetšeng tirelo ya phuthego; le bokanyeng batšofadi, le kgoboketšeng bana le masea. Monyadi le monyadiwa a ba tšwe ka ntlong ya bona ba tle. Baprista ba ba hlankelago Morena a ba lle mokgahlo ga aletare le phapoši ya matsenong a Tempele, ba rapele ba re: “Šokela setšhaba sa gago, hle, Morena. O se ke wa lesa ditšhaba tše dingwe di re nyatša, di re kwera. Ke ka baka lang di re: ‘Na Modimo wa lena o kae?’ ” Ke moka Morena a ela naga ya gagwe hloko, a šokela setšhaba sa gagwe. A ba fetola a re: “Bjale ke tlilo le fa mabele le beine le makhura a mohlware, gomme le tla khora. Nka se sa le nyatšiša ditšhaba tše dingwe. Ke tla tloša motšhitšhi wa tšie yeo ya go tšwa leboa, gomme ye nngwe ya yona ke tla e šwalalanyetša leganateng. Ye e lego ka pele ke tla e lahlela ka Lewatleng le le Hwilego, gwa re ya ka morago ka e wetša ka Lewatleng la Mediteraniene, gwa kwagala fela monkgo wa yona ge e hwile, tšie yeo ya nkgela batho. Ke tla e fediša ka baka la tšohle tše e di dirilego. “Lena mašemo, le se boife, eupša hlabang mekgolokwane le thabele tše Morena a le diretšego tšona. Lena diphoofolo, le se boife ka gobane phulo lešokeng e ba ye tala; mehlare e entšwe, mego le merara le yona e entšwe. “Lena batho ba Sione, hlabang mekgolokwane, le thabele tše Morena Modimo wa lena a le diretšego tšona; o le file pula ye e lekanego, a le nešetša tsheola le kgogolamooko, bjalo ka mengwageng. Diboa di tlilo tlala mabele; mapitlelo a tla tšhologa beine le makhura a mohlware. Ke tla le bušetša dibjalo tšela le di lobilego mengwageng yela bojane le segongwane le manale le maphatakalala di di llego. Ke nna ke bego ke le rometše madira ao a tšie. Le tlilo ba le dijo tše dintši la khora. Le tla reta Morena Modimo wa lena yo a le diretšego dimakatšo. Setšhaba sa ka se ka se sa tsoga se llwe ke dihlong. Ke gona le tlago tseba, lena Baisraele, gore ke gare ga lena, le gore ke nna Morena Modimo wa lena, gomme ga go sa na le Modimo yo mongwe wa lena. Setšhaba sa ka se ka se ke sa tsoga se llwe ke dihlong.” “Ka morago ga tšeo ke tla tšhela batho bohle moya wa ka; barwa le barwedi ba lena ba tla botša batho lentšu la ka; batšofadi ba lena ba tla lora ditoro, masogana a lena a bona dipono. Le bahlanka ba lena ba banna le ba basadi ke tla ba tšhela moya wa ka mehleng yeo. “Ke tla dira dišupo tša letšatši leo legodimong le lefaseng; go tla tšhologa madi, gwa ba le mollo le dithololo tša meši. Letšatši le tla fifala, ngwedi wa hwibila bjalo ka madi pele go fihla letšatši leo le legolo le šiišago la Morena. Eupša yo mongwe le yo mongwe yo a kgopelago Morena thušo o tla phološwa, ka gobane Morena o rile: ‘Ba ba lego motseng wa Jerusalema, gagologolo thabeng ya Sione, ba tla phologa gotee le mašaledi a mangwe a Morena a tlago a kgetha.’ ” Morena o re: “Mehleng yeo ke tla atla batho ba Juda le ba Jerusalema gape. Ke tla kgoboketša ditšhaba tšohle Moeding wa Tsheko, moo ke tlago ba sekišetša tše ba di dirilego setšhaba sa ka. Ba šwalalanyeditše Baisraele baditšhabeng, mme naga ya ka, Israele, ba e arolelana. Ba arolelane setšhaba sa ka ka matengwa, ba ithekela digwebakathobalo ka bašemane, beine ye ba e nwago ba e reka ka banenyana. “Lena ba Tirose le lena ba Sidone, gotee le lena bohle ba dilete tša Filistia, le nnyakang? Kgane le leka go itefeletša ka se sengwe go nna? Ge eba go bjalo, tše le ntirilego tšona le nna ke tla itefeletša ka tšona go lena ka potlako. Le nkamogile silibera ya ka le gauta ya ka, la ba la thothela mahumo a ka a mantši ka ditempeleng tša gabolena. Le išitše batho ba Juda le ba Jerusalema kgole le ga gabobona la ba rekišetša Bagerike. Bjale ke ya go ba ntšha mafelong ao le ba rekišeditšego go ona. Le lena ke tla le dira tše le ba dirilego tšona. Ke tla dira gore barwa le barwedi ba lena ba rekišetšwe batho ba Juda; bona ba tla ba rekišetša Basheba, setšhaba se se dulago kgole. Ke realo, nna, Morena. “Begelang ditšhaba le re: “ ‘Itlhameleng ntwa, le rapeng bagale; rapang bahlabani bohle le tšweng dira! Kgatlang megoma le e direng ditšhoša, ditsedi le di direng marumo. Le dikoka di lebanwe ke go lwa. Itlhaganeleng le tleng, lena ditšhaba tše di bapanego, le kgobokaneng ka moeding.’ ” Morena, romela bagale ba gago lefaseng, ba ba hlasele. “Ditšhaba a di itokiše, di tle Moeding wa Tsheko. Moo ke mo ke yago go dula gona, nna, Morena, ka sekiša ditšhaba tše di bapilego le lena. Ke tše kgopokgopo; di ripeng boka mabele a budule. Etlang le di pitleng go etša diterebe ge di pitlwa ka maoto bopitlelong bjo bo falalago beine.” Mašabašaba a kgobokane ka Moeding wa Tsheko, ka gobane tšatši la go tla ga Morena le kgauswi, le tla tla gona ka moo Moeding. Letšatši le ngwedi di a fifala, le dinaledi ga di sa taga. Morena o bopa thabeng ya Sione; lentšu la gagwe le porotla Jerusalema, gwa šikinyega lefase le leratadima. Fela go setšhaba sa gagwe yena ke botšhabelo, ke sebo sa bona Baisraele. “Ke mo lena, Baisraele, le tlago tseba gore ke nna Morena Modimo wa lena. Ke dula Sione, thabeng ya ka ye kgethwa; Jerusalema e tla ba motse wo mokgethwa; bašele ba ka se sa o hlasela. “Mehleng yeo dithaba di tla khupetšwa ke merara ye e entšwego; diruiwa tša go fula mebotong di tla šiša; dinokana tšohle tša Juda di tla ela. Tempeleng ya Morena go tla runya mothopo, wa elela Moeding wa Megohlo. “Egepeta e tla fetoga leganata, Edomo e tla ba lešoka, gobane di hlasetše naga ya Juda, tša bolaya badudi ba yona ba se na molato. “Ke tla lefeletša ba ba bolailwego. Ba ba nago le molato nka se ba babalele. Eupša nageng ya Juda go tla dulelwa ruri, Jerusalema le gona go tla dulwa go ya go ile. Nna, Morena, ke tla dula thabeng ya Sione.” Puku ye ke mantšu a Amose yo e bego e kile ya ba modiša motseng wa Tekoa. Mengwageng ye mebedi ya pele ga tšhikinyego ya lefase, mola Usia e le kgoši ya Juda mme Jerobeamo, morwa wa Joase, e le kgoši ya Israele, Modimo o ile a utollela Amose taba tša puku ye mabapi le Israele. Amose o rile: “Morena o bopa a le thabeng ya Sione; o hlabošitše lentšu a le Jerusalema, ka gona mafulo a a omelela, le mehlare ya thaba ya Karmele e a pona.” Morena o re: “Batho ba motse wa Damaskose ba dirile dibe leboelela, ka baka leo ke tla ba otla. Ba be ba swere batho ba Gileade ka sehlogo se segolo, bjalo ka motho ge a fola mabele ka selei sa tshipi ka fase. Ka gona ke tla romela mollo mošate ga Kgoši Hasaele gomme wa tšhuma le dibo tša Kgoši Benhadade. Ke tla robaganya maphika a dikgoro tša Damaskose, ka fediša le badudi ba motse wa Abene le kgoši ya Bethe-Edene. Batho ba Siria ba tla išwa bothopša nageng ya Kire.” Morena o re: “Batho ba Gasa ba dirile dibe leboelela, ka baka leo ke tla ba otla. Ba išitše setšhaba ka moka bothopša, ba se rekišetša batho ba Edomo ya ba makgoba. Ka gona ke tla romela mollo merakong ya Gasa wa fiša dibo tša gona. Ke tla fediša badudi ba motse wa Ashdode le kgoši ya Ashkelone. Ke tla otla motse wa Ekrone, gomme mašaledi a Bafilista a hwa.” Morena o re: “Batho ba Tirose ba dirile dibe leboelela, ka baka leo ke tla ba otla. Ba išitše setšhaba sohle bothopša, ba se rekišetša batho ba Edomo ya ba makgoba, gomme ba se phethe kwano ye ba bego ba e dirile ya kagišano. Ka gona ke tla romela mollo merakong ya Tirose wa tšhuma dibo tša gona.” Morena o re: “Batho ba Edomo ba dirile dibe leboelela, ka baka leo ke tla ba otla. Ba be ba hlomara Baisraele, bomorwarragobona, gomme ba itlhokiša lešoko. Ba ba galefela go feta tekanyo, gomme kgalefo ya bona ya se tsoge e fedile. Ka gona ke tla romela mollo motseng wa Temane wa tšhuma dibo tša Botsra.” Morena o re: “Batho ba Amone ba dirile dibe leboelela, ka baka leo ke tla ba otla. Dintweng tša bona tša go ikokeletša naga ba ile ba ba ba phula baimana dimpa kua Gileade. Ka gona ke tla tukiša mollo ka gare ga merako ya motse wa Raba, wa fiša dibo tša gona. Ke moo go tlago hlabja mekgoši ka letšatši la ntwa, gomme ntwa ya gakala bjalo ka ledimo. Kgoši ya bona le bakgomana ba gagwe ba tla išwa bothopša.” Morena o re: “Batho ba Moaba ba dirile dibe leboelela, ka baka leo ke tla ba otla. Ba fišitše marapo a kgoši ya Edomo thokgethokge. Ka gona ke tla romela mollo nageng ya Moaba wa tšhuma dibo tša Keriote. Batho ba Moaba ba tla bolawa mašateng a ntwa le mekgošing, go letšwa le diphalafala. Ke tla bolaya mmuši wa Moaba gotee le bakgomana bohle ba naga yeo.” Morena o re: “Batho ba Juda ba dirile dibe leboelela, ka baka leo ke tla ba otla. Ba ganne go hlompha melao ya ka le go phetha ditaelo tša ka. Ba timeditšwe ke yona medingwana yela ya maaka e bego e khunamelwa ke borakgolokhukhu ba bona. Ka gona ke tla romela mollo Juda wa tšhuma dibo tša Jerusalema.” Morena o re: “Batho ba Israele ba dirile dibe leboelela, ka baka leo ke tla ba otla. Moloki yo a palelwago ke go lefa melato ya gagwe, le modiitšana yo a sa kgonego le go lefa le molato wa dieta tše a di tšerego, bona ba a ba rekiša ya ba makgoba. Ba swara bahloki gampe, le bahlaki ba ba hlokiša toka. Motho le tatagwe ba robala le modiredi o tee wa mosadi, mme ba tšhilafatša leina la ka. Batho ba robala kgauswi ga aletare ye nngwe le ye nngwe diaparong tše ba sa di tšeetšego baadingwa. Beine ye ba e lefišitšego bao ba adimilego tšhelete ba e nwela ka Tempeleng ya Modimo wa bona. “Kganthe e be e le ka baka la lena, setšhaba sa ka, ge ke fediša Baamore ba e bego e le ba botelele bja mesedere, ba kgwahlile bjalo ka meeike. Ke nna ke le ntšhitšego Egepeta, ka le sepetša lešokeng mengwaga ye masome a mane gore le tle le tšee naga ya Baamore. Ka dira barwa ba lena ba bangwe baprofeta, le masogana a lena a mangwe Banasire. Kgane ga se nnete, lena batho ba Israele? Ke realo, nna, Morena. Eupša lena la gapeletša Banasire go nwa beine, la ba la laya baprofeta gore ba se bolele molaetša wa ka. Bjale ge, ke tla le imela la thekesela bjalo ka koloyana ye e imelwago ke diako tša mabele. Ešita le wa lebelo a ka se kgone go tšhaba; senatla se ka se holwe ke maatla a sona, le mohlabani a ka se kgone go iphološa. Ramesebe a ka se swarelele; wa lebelo a ka se phonyokge, gomme le monamedi wa pere a ka se itlhakodiše. Mohlang woo le mogale wa bagale o tla lahla dibetša tša gagwe, a hlanola direthe.” O realo, Morena. Lena setšhaba sa Israele, theeletšang se Morena a se boletšego ka lena, setšhaba ka moka se a se ntšhitšego Egepeta: “Gare ga ditšhaba ka moka tša lefase ke lena fela ke le kgethilego. Ke ka baka leo ke swanetšego go le otla ka baka la makgopo ohle a lena.” Na banna ba babedi ba ka tšea leeto mmogo ba se ba kwana? Kgane tau e ka bopa ka sethokgweng e sa hlasele phoofolo? Tawana yona e ka rora ka serobeng sa yona e se ya swara selo? Na nonyana e ka tanywa ke sefu se se sego sa thewa? Na sefu sona se ka thenkgologa se se sa kgongwa ke selo? Kgane phalafala ya ntwa e ka lla motseng ya se tšhoše batho? Na motse o ka welwa ke kotsi e se ya tlišwa ke Morena? Morena, Mong wa bohle, ga a ke a dira selo a sa botše baprofeta, bahlanka ba gagwe, maikemišetšo a gagwe. Ge tau e bopa, na ke mang yo a sa boifego? Ge Morena, Mong wa bohle, a bolela, ke mang a ka se begego molaetša wa gagwe? Begelang ba ba dulago ka dintlong tše dikgolo Ashdode le Egepeta le re: “Kgobokanang dithabeng tše di dikologilego motse wa Samaria le bone kgakanego le kgatelelo ya gona.” Morena o re: “Batho ba ba kgobela ka dintlong tša bona dilo tše ba ikhweleditšego tšona ka kgang le ka kgapeletšo. Go dira tša go loka ga ba go tsebe. Ka gona manaba a tla dikanetša naga ya batho ba Samaria, a senya dibo tša bona, a hula le dintlo tšeo tša bona tše dikgolo.” Morena o re: “Bjalo ka ge modiša a hlakodiša fela marapo a mabedi a maoto goba nkgetlwana ya tsebe ya sehuswane se se llwego ke tau, ka wona mokgwa wo mobjalo go tla phologa ba se bakae gare ga badudi ba Samaria, bao gonabjale ba kwaelago didulong tša masethesethe le malaong ao a kgabišitšwego ka nakatlou.” Morena Ramaatlaohle, Mong wa bohle, o tšwela pele o re: “Bjale theeletšang gomme le botše ditlogolo tša Jakobo gore ke re: Mohla ke otla batho ba Israele ka baka la dibe tša bona, ke tla pšhatlaganya dialetare tša Bethele. Manaka a aletare ye nngwe le ye nngwe a tla kgonolwa a wela fase. Ke tla phušola dintlo tša marega le tšona tša selemo. Dintlo tše di kgabišitšwego ka nakatlou di tla thubega; go tla kgerešwa dintlo tše dintši.” Theeletšang mo, lena basadi ba Samaria, le nonnego bjalo ka dikgomo tša Bashane, lena le hlakišago bahloki, le pateletšago badiidi, le gona le rego go banna ba lena: “A bo tle re bo kakate!” Morena, Mong wa bohle, o ikanne ka ge e le yo mokgethwa a re: “Go tlilo tla nako yeo ka yona ba tlago le hlwahlwaiša ka dikgwega. Mongwe le mongwe wa lena o tla hlwahlwaišwa ka kgwega ya dihlapi. Le tla hlwahlwaišwa la ntšhetšwa ka ntle, mongwe le mongwe a ntšhwa ka lešoba la morako le a lebanego nalo, a rakelwa thabeng ya Hermone.” O realo, Morena. “Lena Baisraele, le ka no ya Bethele la dira dibe! Le ka no ikela Gilgale la dira dibe le go feta! Le ka no tsogela go iša didimo ka mehla, la iša karolo ya lesome ka letšatši le lengwe le le lengwe la boraro. Le ka no iša senkgwa ya ba kabelo ya tebogo, la ba la itheta ka dikabelo tša lena tša boithaopo; la ikgantšha ka tšona, gobane seo ke se le se ratago.” O realo, Morena, Mong wa bohle. “Ke nna ke ilego ka le bolaiša tlala metseng yohle ya lena, ka le hlokiša dijo ka malapeng a lena, fela la se sokologele go nna.” O realo, Morena. “Ka le tima le pula go sa šetše kgwedi tše tharo gore go bunwe. Ka neša pula motseng wo mongwe, wo mongwe ka o hlokiša yona. Ya na tšhemong ye nngwe, go ye nngwe ya se ne, mme dibjalo tša yona tša pona. Batho ba metse ye mmalwa ba be ba ikgoga ba eya motseng wo mongwe go nyaka meetse a go nwa, fela ba sa hwetše a a lekanego. Le ge go le bjalo la se sokologele go nna.” O realo, Morena. “Ka le otla ka phori le tlhakgama. Mogokong wa hlohlora mašemo a lena le dirapa tša lena tša merara, le mego le mehlware ya lena. Fela la no se sokologele go nna. “Ka le romela leuba la bolwetši la go swana le lela ka go le romela Egepeta. Ka bolaya masogana a lena ka tšhoša, ka ba ka le amoga dipere. Ka le nkgišetša seuta ka mešašeng ya lena. Le ge go le bjalo la no se sokologele go nna.” O realo, Morena. “Ba bangwe ba lena ka ba fediša, nna, Modimo, ka ba etša motse wa Sodoma le wa Gomora. Ba ba phologilego ba etša legong le le phamotšwego mollong. Fela la no se sokologele go nna.” O realo, Morena. “Bjale ge, Baisraele, ke tlilo le otla. Ka gona, itokišetšeng go ahlolwa ke nna, Modimo wa lena!” Yo e lego yena Mmopi wa dithaba, yena Mohlodi wa phefo, yena Moutollelabatho tša ka pelong ya gagwe, yena Mofetolamasa ya ba leswiswi, yena yo a sepelago godimo ga thaba tša lefase, leina la gagwe ke Morena Modimo Ramaatlaohle. Lena setšhaba sa Israele, theeletšang ge ke opela sefela sa go le llela ke re: Israele, kgarebe, o wele, o wele wa go se sa tsoga! O tlogetšwe nageng ya gabo, a hloka wa go mo tsoša. Morena, Mong wa bohle, o re: “Motse wa Israele wo o tšwago dira ka bahlabani ba sekete o tla šalelwa ke ba lekgolo; wo o tšwago dira ka ba lekgolo o tla šalelwa ke ba lesome.” Morena o re go setšhaba sa Israele: “Etlang go nna, mme le tla phela. Bethele le se ye go rapela, Gilgale le gona le se ye, le ge e le go fetela Beresheba, gobane batho ba Gilgale ba lebanwe ke go išwa bothopša; motse wa Bethele le wona o tlilo fedišwa.” Eyang go Morena gomme le tla phela. Ge le sa ye o tla tla bjalo ka mollo wa hlaga a swielela setšhaba sa Israele. Mollo woo o tla tšhuma Bethele, gwa se be le motho wa go o tima. Lena le pherekanyago toka, le e gatakago ka maoto, le a ikobela. Yo a hlodilego Selemela le Kgogamašego, a fetošago kgampipi ya leswiswi seetša sa mosegare, mosegare a o fetoša bošego, a hlomišago meetse a lewatle, a a neša godimo ga lefase, leina la gagwe ke Morena. O ratha dikokotlagadi, a fediša le dibo tša bona. Etse ke lena bale ba go hloya yo a le solago kgorong, ba go šišimišwa ke yo a bolelago therešo. Le hlakiša bahloki la ba hlakola mabele a bona. Ka gona, dintlo tša maswika a go betlwa tše le ikagetšego tšona le ka se di dule; le beine ya go tšwa merareng ye mebose ye le ipšaletšego yona le ka se e latswe. Gape bokebeka bja lena bjo bontši le dibe tša lena tša go šiiša ke a di tseba. Le hlakiša baloki, le amogela tsogolekobong, mme le šitiša bahloki go direlwa ka toka kgorong. Ka gona, yo bohlale ke wa go ikhomolela mo mabakeng ano a mabe! Ikemišetšeng go dira tše di lokilego, e sego tše mpe, gore le tle le phele. Ke gona Morena Modimo Ramaatlaohle a tlago ba le lena, lena le ipotšago gore o na le lena. Hloyang tše mpe, le rate tše di lokilego, gomme le šetše gore dikgorong go ahlolwe ka toka. Mohlomongwe Morena a ka šokela mašaledi a setšhaba se. Ka gona Morena Modimo Ramaatlaohle o re: “Mapatlelong ka moka a motse go tla gololwa, le mekgotheng yohle ya motse go tla kwagala ‘Jo nna joo!’ Le balemi ba tla bitšwa gore ba tle ba llele bahu, ba be le bao ba lefetšwego go tlo lla. Ka dirapeng ka moka tša merara go tla ba le dillo. Tšohle tše di tla hlaga ge ke putla gare ga lena.” Go madimabe lena le hlolosetšego Letšatši la Morena! Na letšatši leo le tla le hola ka eng? Go lena e tla ba letšatši la leswiswi, e sego la seetša. Go tla swana le motho yo e ka rego a tšhaba tau a gahlana le bere! Goba monna yo e ka rego a fihla gae, a ithekga ka seatla lebotong gomme a longwa ke noga. Ga ke re Letšatši la Morena e tla ba leswiswi, e sego seetša; le tla fifala la se tage? Morena o re: “Ke hloile menyanya ya lena ya sedumedi, mme ke a e gana, le diphuthego tša lena di a ntsheleka! Le ge le ntirela dihlabelo tša go tšhungwa ka moka, le ntlišetša le dikabelo tša bupi, ga ke di amogele; ga ke amogele le diruiwa tše le di nontšheditšego go tlo ntirela dihlabelo tša kagišano ka tšona. Homotšang dikoša tšeo tša lena tša mašata; ga ke nyake go kwa diharepa tša lena. A go upše go be le toka mme e ele bjalo ka noka, le boloki bo ele bjalo ka moela wo o sa pšhego. “Lena setšhaba sa Israele, kgane mola le le lešokeng mengwaga ye masome a mane le be le ntirela dihlabelo le dikabelo? Le be le rwala Sikute, modimo wa lena wo mogolo, le Kijune, modimo wa lena wa naledi, e lego diswantšho tše le ipopetšego tšona. Ke ka baka leo ke tlago le iša bothopša nageng ye e lego ka kua ga Damaskose.” O realo, Morena, yo leina la gagwe e lego Modimo Ramaatlaohle. Go madimabe lena le iketlilego mo Sione, le lena ba Samaria le se nago maseme, lena bagolo ba setšhaba sa Israele sa go phala tše dingwe, lena Baisraele ba tlago ba nyaka thušo go lena. Eyang motseng wa Kalene le yo bona; le fetele le motsengmogolo wa Hamate, le be le theogele le motseng wa Bafilista wa Gathe. Na metse yeo e phala mmušo wa Juda le wa Israele? Naga ya bona yona kgane e feta ya lena? Ga le dumele gore nako ya masetlapelo e kgauswi, eupša ditiro tša lena ke tšona tše di batametšago nako yeo ka yona le tlago bušwa ke batho ba sehlogo. Go madimabe lena le lalago malaong a a kgabišitšwego ka nakatlou, le patlamago magogweng a lena, le ipshinago ka nama ya nku le ya kgomo. Le rata go hlama dikoša bjalo ka Dafida, la di letša ka sekgapa. Le gampela beine ka phafana; le tlola ka ditlolo tše bohlokwa, le se na taba le ge setšhaba sa Israele se tlilo fedišwa. Ke ka baka leo e tlago ba lena ba mathomo ba go thopša, ya ba gona ge go fedišwa menyanya ya bomajaapatlame. Morena, Mong wa bohle, Modimo Ramaatlaohle, o boletše a tiišitše a re: “Ke šišimišwa ke boikgodišo bja Baisraele; ke hloile dibo tša bona. Motse wa bona le tšohle tše di lego ka go wona ke tla di gafela manaba.” Ge ka lapeng le tee go ka šala batho ba lesome, le bona ba tla hwa. Ge leloko la bobahu le le swanetšego go fiša ditopo le ka tla la di tšea ka moo ntlong, mme la botšiša yo a ka bago a sa khutile kua moseo la re: “Na go sa na le yo mongwe ka ntle le wena?” yoo a araba a re: “Aowa,” lona le swanetše go re: “Homola, ga se ra swanela go bolela ka leina la Morena!” Ge taelo e etšwa go Morena, dintlo tše dikgolo di a thubaganywa, tše dinyenyane di a pšhatlaganywa. Kgane dipere di ka kata letlapeng, goba motho a lema lewatle ka dipholo? Eupša lena le fetotše toka mpholo, boloki la bo fetola lengana. Lena le thabelago go thopa motse wa Lo-Dabare le re: “A ke re re thopile motse wa Karnaime ka a rena maatla?” Morena Modimo Ramaatlaohle o re: “Lena setšhaba sa Israele, ke tlilo romela setšhabatsoko sa le hlasela. Ba tla le hlakiša go tloga sefateng sa Hamate go yo fihla nokeng ya Araba.” Morena, Mong wa bohle, o ile a mpontšha pono. Mo ponong yeo ka bona a hlola motšitšhi wa tšie ge diruiwa tša kgoši di seno kgelwa bjang mme bjang bo thoma go hloga ka lefsa. Ya re ge tšie yeo e lle ditala ka moka nageng e di feditše ka re: “Morena, Mong wa bohle, hle, lebalela setšhaba sa gago! Na ba ka phologa bjang? Ga ba nene.” Morena a buša pelo mme a re: “Se o se bonego se ka se direge.” Morena, Mong wa bohle, a mpontšha pono ye nngwe. Mo ponong yeo ka bona a itokišetša go otla setšhaba se gagwe ka mollo. Mollo woo wa fiša lewatle le legolo le le lego ka fase ga lefase, gomme wa thoma go tšhuma le mašemo. Ke moka ka re: “Lesa, hle, Morena Modimo! Setšhaba sa gago se ka phologa bjang? Ga se nene.” Morena a buša pelo gape, gomme a re: “Seo le sona se ka se direge.” Morena a mpontšha pono ye nngwe gape. Mo go yona ka bona a eme kgauswi le leboto le le agilwego ka kelaseemo, a swere kelaseemo ka seatla. Yena a re go nna: “Amose, na o bonang?” Ka mo fetola ka re: “Ke bona kelaseemo.” Ke moka a re: “E mpontšha gore setšhaba sa ka se bjalo ka leboto le le sekamego. Nka se sa buša pelo, ke tla se otla. Dintotoma tšeo go tšona ditlogolo tša Isaka di khunamelago medimo ya diswantšho di tla phušolwa. Mafelo a makgethwa a Israele a tla fedišwa. Ke tla dira gore ba lapa la bogoši la Jerobeamo ba bolawe ka tšhoša.” Ke moka Amatsia, moprista wa Bethele, a roma motseta go Kgoši Jerobeamo wa Israele gore a fihle a mmotše a re: “Amose o hlohleletša setšhaba gore se go lakane. Dipolelo tša gagwe di tla senya setšhaba gobane o re: ‘Jerobeamo o tla hwela ntweng, gomme setšhaba sa Israele se tla tšewa nageng ya sona sa išwa bothopša.’ ” Ke moka Amatsia a re go Amose: “Wena moprofeta, tloga mo o fetele Juda o yo porofeta gona mme o lefelwe mošomo woo. Mo Bethele gona o se sa porofeta ka gobane ke felo ga kgoši ga tirelo, ke tempele ya setšhaba.” Amose a mo fetola a re: “Ga se nna moprofeta wa go porofetela tefo, ebile ga ke wa lekgotla la baprofeta. Mošomo wa ka ke go diša diruiwa le go bjala mego. Eupša Morena o ntšere diruiweng tša ka a ntaela gore ke yo porofetela setšhaba sa gagwe sa Israele. Bjale ge, theeletša se Morena a se bolelago. Wena o mpotša gore ke se ke ka porofetela Baisraele, ka kgalema ditlogolo tšeo tša Isaka. Ka gona wena Amatsia, Morena o go botša gore mosadi wa gago e tla ba segwebakathobalo motseng wo; bana ba gago le bona ba tla bolawa ntweng. Mašemo a gago a tla arolwa a fiwa ba bangwe, gomme wena mong o tla hwela nageng ya baditšhaba. Ge e le setšhaba sa Israele sona ruri se tla tšewa nageng ya sona sa išwa bothopša.” Morena, Mong wa bohle, o ile a mpontšha pono ye nngwe. Mo go yona ka bona seroto sa dikenywa tše di budulego. A mpotšiša a re: “Amose, na o bonang?” Ka mo fetola ka re: “Ke bona seroto sa dikenywa.” Ke moka Morena a re go nna: “Ke mafelelo a setšhaba sa ka sa Israele. Nka se sa buša pelo ka se se otle. Mohlang woo mošate batho ba ka se sa opela, ba tla lla. Go tla ba le ditopo tše dintši, mme tša lahlwa ka setu.” Theeletšang mo, lena le gatelelago bahloki, le tlaišago badiidi ba naga ye. Le ipotša le re: “Monyanya wa Ngwedi wa lebalana o tla feta neng gore re tle re rekiše mabele a rena? Sabatha e tla feta neng, gore re tle re a rekiše? Ke mo re tlago ela ka dikelo tše e sego tšona, ra lefiša batho go feta tekanyo, ra ba hlalefetša ka dikeloboima tše e sego tšona. Modiidi re ka mo reka ka tšhelete, le mohloki ra mo reka ka dieta, ešita le ditlhoka tša mabele ra di rekiša.” Morena, yo Baisraele ba ikgantšhago ka yena, o ikanne a re: “Nka se tsoge ke lebetše mediro ya bona ye mebe. Ga ke re ke yona ye e tlago hlola tšhišinyego ya lefase, gomme bohle ba ba dulago mo nageng ba lla? Ruri, lefase lohle le tla tekateka la kukutlologa bjalo ka Naele, la ba la kokobela bjalo ka noka yeo ya Egepeta. Mohlang woo ke tla dira gore letšatši le sobele mosegare wo mogolo, le lefase le aparelwe ke leswiswi mosegare. Ke realo, nna, Morena, Mong wa bohle. “Menyanya ya lena ke tla e fetoša mahloko, dikopelo tša lena ka di fetoša dillo. Ke tla le apariša tša go ilela, ka le boodiša dihlogo, gomme le tla swana le batswadi ba ba iletšego morwa motswalwanoši wa bona. Letšatši leo ka moka e tla ba la mahloko. “Go tla nako yeo ka yona ke tlago wiša tlala nageng. Batho ba tla swarwa ke tlala, eupša e sego ya bogobe; ba tla nyorwa, eupša ba sa nyorelwe meetse. Ba tla swarwa ke tlala le lenyora la go nyaka go kwa tše Morena a di bolelago. Ke realo, nna, Morena, Mong wa bohle. Batho ba tla ebela go tloga Lewatleng le le Hwilego go yo fihla Lewatleng la Mediteraniene, ba goloma ba tloga leboa ba ya bohlabela ba nyaka lentšu la Morena, fela ba le hloka. Mohlang woo makgarebe a mabotse le masogana ba tla akgega ka lenyora. Bao ba ikanago ka modimo wa seswantšho wa Samaria ba rego: ‘Ka modimo wa Dane wo o phelago,’ goba ‘Ka modimo wa Beresheba wo o phelago,’ ba tla wa gomme ba se sa tsoga.” Ke ile ka bona Morena a eme kgauswi ga aletare. A laela a re: “Betha dihlogwana tša dikokwane, gore le direpodi di šikinyege. Di kgonole, gore di wele batho godimo. Ba ba šetšego ke tla ba bolaya ntweng. Ga go yo a tlago tšhaba, ga go le o tee yo a tlago phonyokga. Le ge ba ka ikepela molete wa go tšhabela bodulabahu, ke tla ba ntšha. Le ge ba ka namelela legodimong, ke tla ba theoša. Le ge ba ka khuta godimo ga thaba ya Karmele, ke tla ba tsoma ka ba swara. Ge ba ka nkhutela ka fase ga lewatle, ke tla laela kgolomodumo gore e ba metše. “Ge ba ka išwa bothopša ke manaba a bona ke tla laela gore ba bolawe ka tšhoša. Ke ikemišeditše go ba dira tše mpe, e sego tše dibotse.” Morena Ramaatlaohle, Mong wa bohle, o kgwatha lefase la šikinyega, gomme bohle ba ba dulago go lona ba lla. Lefase lohle le tlala bjalo ka noka ya Naele, la ba la boela boka noka yeo ya Egepeta. Morena o aga ntlo ya gagwe legodimong, gomme leratadima la gagwe a le thekga ka lefase. O bitša meetse a lewatle, a a tšhollela godimo ga lefase. Leina la gagwe ke Morena! Morena o re: “Lena setšhaba sa Israele, ga ke bone le phala batho ba Etopia. Ke ntšhitše Bafilista Kreta le Basiria Kire go no swana le lena ge ke le ntšhitše Egepeta. Nna, Morena, Mong wa bohle, ke lebeletše ba mmušo wo wa Israele ba ba dirago dibe, gomme ke tla ba fediša lefaseng. Eupša nka se fediše ditlogolo tšohle tša Jakobo. “Ke tla laela manaba gore a hlokole setšhaba sa Israele bjalo ka mabele ka leselo. Ke tla ba hlokola gare ga ditšhaba mme le o tee wa ba ba lokilego a ka se lahlege. Badiradibe bohle setšhabeng sa ka ba ba rego: ‘Rena re ka se welwe ke kotsi, e ka se re batamele,’ ba tla bolawa ntweng.” Morena o re: “Nako e etla yeo ka yona ke tlago tsošološa mmušo wa Dafida wo o lego bjalo ka ntlo ye e welego. Ke tla thiba matlere a yona ka e tsošološa. Ke tla e aga ka lefsa ka dira gore e swane le kgale, gore setšhaba sa Israele se thope naga ye e sa šetšego ya Edomo le ya ditšhaba tšohle tše se kilego sa di buša legatong la ka.” O realo, Morena, yo a tlago phethagatša tše ka moka. Morena o re: “Matšatši a etla ao ka ona go tla bego go sa bunwa ge selemo se lemologa, le diterebe e tla ba tše dintši mo e lego gore batho ba tla be ba sa di pitla ka maoto go dira beine ge go lengwa. Matutu a diterebe a tla rotha dithabeng, a ela a etšwa mebotong yohle. Ke tla bušetša setšhaba sa ka sekeng sa sona; ba tla tsošološa metse ya bona ye e bego e le marope, mme ba dula gona; ba tla lema dirapa tša merara, ba nwa beine ya yona; ba tla lema dirokolo, ba ja tše ba di bjetšego. Setšhaba sa ka ke tla se bea nageng ye ke se filego yona, gomme se ka se sa tlošwa moo.” Ke realo, nna, Morena Modimo wa lena. Pono ya Obadia. Se ke se Morena, Mong wa bohle, a se bolelago mabapi le Edomo: Morena o romile motseta wa gagwe ditšhabeng, gomme re kwele molaetša wa gagwe o re: “Itokišeng! A re tšweleng Edomo dira!” Morena o re go Baedomo: “Ke tla le nyennyefatša gare ga ditšhaba, le tla nyatšwa kudu. Le forilwe ke boikgogomošo bja lena, lena le phelago magageng a thaba. Legae la lena le godimo ga dithaba, mme le ipotša le re: ‘Ke mang yo a ka re theošago?’ Le ge legae la lena le akaletše bjalo ka sehlaga sa ntšhu, la bonala eke le kua dinaleding, ke tla le theoša. “Ge mahodu goba bahlakodi ba etla bošego, ba tšea fela se ba se nyakago. Ge batho ba fula diterebe ba fela ba tlogela mabudutša. Eupša lena le bolailwe ka moka. Lena ditlogolo tša Esau, le hutšwe; le hlakotšwe mahumo a le a fihlilego. Bathuši bohle ba lena ba le forile; ba le raketše mollwaneng wa naga ya lena. Bale le bego le iketla nabo ba lwele le lena ba le fenya. Bale ba bego ba eja le lena ba le theile; ba a le kodutla ba re: ‘Mahlale a lle beng!’ “Mohlang ke otla Baedomo ke tla fediša banna ba bona ba bohlale le ba tlhaologanyo nageng ya Esau ya dithaba. Ke realo, nna, Morena. Bagale ba Temane ba tla nolega moko mo mang le mang nageng yeo a tlago bolawa.” “Ka ge le hlakotše bana ba bolena, ditlogolo tša Jakobo, mme la ba bolaya, le tla gobošwa go ya go ile mme la bolawa. Le be le emetše thoko mohla wola bašele ba roba masoro a bona. Le be le le ba babe le etša bašele bale ba go hula lehumo la Jerusalema, gomme ba le abelana ka matengwa. Le be le se la swanela go thabela madimabe a bana ba bolena kua Juda. Le be le se la swanela go thaba mohla wola ba fedišwa. Le be le se la swanela go ba kwera mola ba le tlalelong. Le be le se la swanela go tsena motseng wa setšhaba sa ka mola se le tlalelong. Le be le se la swanela go thabela madimabe a bona mohlang woo, le go ipha mahumo a bona. Le be le se la swanela go ema magahlanong a ditsela go bolaya ba ba tšhabago. Le be le se la swanela go gafela baphonyokgi manabeng a bona mohla wola ba le tlalelong.” “Letšatši le batametše mohla nna, Morena, ke tlago ahlola ditšhaba tšohle. Lena Baedomo, tše le di dirilego batho ba bangwe le lena le tla di dirwa. Le tla boelwa ke tše le di dirilego bangwe. Bjalo ka ge lena, setšhaba sa ka, le nwele senwelo sa kotlo thabeng ya ka ye kgethwa, ditšhaba tše dingwe tšona di tla se nwa motšhaotšhele; di tla se nwa sohle gomme tša timelela mo nkego ga se tša ka tša ba gona.” “Thaba ya Sione yona e tla ba botšhabelo bja ba bangwe; e tla ba felo mo gokgethwa. Setšhaba sa Jakobo se tla thopa bao ba se amogilego naga. “Ditlogolo tša Jakobo di tla swana le mollo, tša Josefa tša swana le kgabo, tša Esau tšona tša swana le ditlhaka. Mollo woo o tla tšhuma ditlhaka thokgethokge. Ga go setlogolo sa Esau se se tlago phologa. Ke realo, nna, Morena. “Batho ba go tšwa seleteng sa ka borwa se se omilego, ba tla thopa naga ya dithaba ya Edomo; ba go tšwa nagengtlase, ba tla thopa naga ya Bafilista. Baisraele ba tla thopa naga ya Efraime le ya Samaria. Batho ba Benjamene ba tla thopa Gileade. Mathopša a Israele a a lego Halage, a tla thopa Kanana go yo fihla Tsarepate. Mathopša a go tšwa Jerusalema ao a lego Sefarade, a tla thopa metse ya selete sa ka borwa se se omilego. Bahlakodiši ba tla rotogela thabeng ya Sione; ba tla buša naga ya dithaba ya Edomo, gomme Morena ka noši e tla ba Kgoši.” Ka letšatši le lengwe Morena o kile a bolela le Jona, morwa wa Amithai, a re: “Itokiše, o ye Ninibe, motseng wola wo mogolo, mme o kgaleme batho ba wona; ke tseba ka moo e lego ba babe ka gona.” Eupša Jona yena a itokišetša go ya Tarshishe go tšhabela Morena. A ya Jafo, moo a ilego a hwetša leselawatle leo le bego le šetše le itokišeditše go ya Tarshishe. A napa a lefela leeto mme a namela le basepediši ba leselawatle leo go leba Tarshishe, moo a bego a tla ba kgole le Morena. Eupša Morena a tsoša ledimo le maatla lewatleng. E be e le le maatla mo leselawatle le ilego la ba la nyaka go robega. Basepediši ba lona ba tšhoga mme ba goa ba nyaka thušo, yo mongwe le yo mongwe a llela go modimo wa gagwe. Ka morago ga moo ba lahlela merwalo ya leselawatle ka lewatleng gore ba pheme kotsi. Jona yena o be a theogetše ka garegare ga leselawatle a patlame fao a ile ka boroko. Molaolaleselawatle a mo hwetša fao gomme a re go yena: “O reng o robetše? Tsoga o rapele modimo wa gago gore a re thuše. Mohlomongwe a ka re kwela bohloko a re phološa.” Basepediši ba leselawatle ba botšana ba re: “A re temeng re bone gore ke mang yo a re hloletšego kotsi ye.” Ba tema gomme gwa swarwa Jona. Ka fao ba re go yena: “Bjale ge, re botše: A ke wena o re hloletšego kotsi ye? O dira eng fa? O tšwa nageng efe? O mohlobo mang?” Jona a ba fetola a re: “Ke nna Moheberu, ke khunamela Morena, Modimo wa legodimo, yo a hlodilego lefase le lewatle.” A iša pele a ba botša gore o tseleng, o tšhaba yena Morena yoo. Basepediši ba leselawatle ba tšhoga kudu mme ba re go yena: “Joo, o dirile taba ye e šiišago!” Ledimo la gakala go iša pele; ka fao basepediši ba leselawatle ba re go yena: “Re go dire eng gore re homotše ledimo le?” Jona a ba fetola a re: “Ntahleleng ka mo lewatleng, gomme ledimo le tla okobala. Ke a tseba gore phošo ke ya ka ge le wetše ledimong le lešoro le.” Le ge go le bjalo, basepediši ba leselawatle ba leka go bušetša leselawatle lebopong ka maatla a bona ka moka. Fela ledimo la gakalela pele mme ba šitwa ke go fihla fao. Ka gona ba llela go Morena ba re: “Hle, Morena, re a go rapela, o se ke wa re lesa re ehwa, ka ge re bolaya motho yo! Wena, Morena, ke wena o dirago tše ka moka; ke mediro ya gago.” Ke moka ba kuka Jona ba mo lahlela ka lewatleng, gomme ka bjako lewatle la okobala. Taba ye ya dira gore basepediši ba leselawatle ba boife Morena ka moo ba ilego ba ba ba mo direla sehlabelo, ba tshephiša le go mo direla tše dingwe. Morena a dira gore Jona a metšwe ke hlapi ye kgolo, mme a ba ka gare ga yona matšatši a mararo le mašego a ona. Ke moo Jona a rapetšego Morena Modimo wa gagwe a le ka teng ga hlapi a re: “Ge ke le tlalelong, Morena, ke go biditše, mme wa nkaraba. Ke lletše go wena ke le fasefase bodulabahu, mme wa nkwa. O be o ntahletše fasefase maleng a lewatle, mme ka dikanetšwa ke meetse, ka ribegetšwa ke maphoto a gago. Ka ba ka gopola gore ke raketšwe sa ruri pele ga sefahlego sa gago, mme nka se tsoge ke bone Tempele ya gago ye kgethwa gape. Meetse a nkhupetša a mpeta; lewatle la mpipetša, mme malele a ntata hlogo. Ke be ke theogetše fasefase medung ya dithaba, nageng yeo ke ilego ka tswalelelwa sa ruri ka gare ka mapheko. Eupša wena, Morena, Modimo wa ka, o nntšhitše moo fasefase ke sa phela. Ge ke ekwa gore moya wa ka o nyaka go tšwa nameng, ka go gopola, Morena, ka go rapela, mme wa nkwa o le ka Tempeleng ya gago ye kgethwa. Bao ba khunamelago medimo ya diswantšho ya lefeela ba tlogetše go go botegela. Eupša nna ke tla go opelela ditumišo; ke tla go direla sehlabelo, mme ka phetha seo ke go tshephišitšego sona. Tlhakodišo e tšwa go Morena.” Ya ba gona Morena a laelago hlapi yela gore e hlatše Jona lebopong, mme ya mo hlatša. Morena a bolela le Jona gape a re: “Itokiše o ye Ninibe, motseng wola wo mogolo, mme o tsebiše batho ba gona molaetša woo ke go filego wona.” Ka gona Jona a phetha taelo ya Morena a ya Ninibe, motseng wola wo mogolo, wo o bego o tšea motho matšatši a mararo go o putla. Jona a tsena motseng, mme ka morago ga ge a thethile le wona letšatši ka moka a thoma go goelela a re: “Ka morago ga matšatši a masome a mane Ninibe e tla thubja!” Batho ba Ninibe ba kgolwa molaetša wa Modimo. Ka fao ba bega gore yo mongwe le yo mongwe a ikone dijo, mme batho ka moka, banyatšegi le bahlomphegi, ba apare diaparo tša go ilela go laetša gore ba sokologile. Ge kgoši ya Ninibe e di kwa, ya emelela setulong sa yona sa bogoši, ya apola seaparo sa yona, ya apara diaparo tša go ilela, mme ya yo dula moloreng. Ya re gohle motseng wa Ninibe go begwe go thwe: “Ye ke taelo ye e tšwago go kgoši le bakgomana ba gagwe. Go se ke gwa ba le motho goba seruiwa se se jago selo – batho le dikgomo le dihuswane di se ke tša ja selo, goba tša nwa meetse. Batho bohle le diruiwa ba apare diaparo tša go ilela. Yo mongwe le yo mongwe a rapele Modimo a tiišitše mme a lese dilo tše mpe le diphošo tšeo a di dirago. Mohlomongwe Modimo a ka buša pelo a se sa re galefela mme ra se ke ra hwa.” Modimo a bona seo ba se dirilego, gore ba tlogetše tše mpe tše ba bego ba di dira. Ka fao a buša pelo a se ke a ba otla, le ge a be a itše o tla ba otla. Taba ye ya tlatša Jona pelo mme a galefa. Ka gona a rapela a re: “Ga ke re pele ga ge ke tloga nageng ya gešo se ke sona se ke ilego ka gopola gore o tlilo se dira? Ke ka baka le ka ilego ka thoma ka go leka go tšhabela Tarshishe. Ke be ke tseba gore o Modimo wa lerato le kwelobohloko, gore o na le pelo ye telele, o yo botho, le gona o dula o itokišeditše go buša pelo, mme wa se otle. Bjale ge, Morena, hle, ntese ke ikhwele. Go kaone ge ke hwile, ke sa phele.” Morena a mo fetola a re: “A o bona go lebane gore o befelwe?” Jona a tšwa motseng a dula fase ka thoko ya bohlabela, a itirela mošašana mme a dula moriting wa wona, a letetše go bona seo se tlago hlagela Ninibe. Ke moka Morena Modimo a mediša mokhure gore o direle Jona moriti a tle a tloge a iketla. Jona a thabela mokhure woo ka kudu. Fela ka mahube a letšatši le le latelago Morena a laela seboko sa fehla mokhure wola, mme wa hwa. Ya re ge letšatši le hlaba, Modimo a tsoša phefo ye e fišago ya bohlabela, mme letšatši la fiša Jona hlogo a ba a nyaka le go idibala. Ka fao a duma ge nkabe a hwile. A bolela a re: “Go kaone ge ke hwile go na le gore ke fele ke phela.” Eupša Modimo a mmotšiša a re: “A o bona go lebane gore o galefe ka baka la mokhure wo?” Jona a mo fetola a re: “Ee, ke bona e le tshwanelo gore ke galefe – ke galefe la go hwa.” Morena a re go yena: “Mokhure wo wa go gola bošego bo tee mme wa timelela bošego bjo bo latelago wena o o kwela bohloko, etšwe o se wa o šomela goba wa o mediša. A bjale na motse wo wo mogolo wa Ninibe, nka napa ka se o kwele bohloko le go feta? Etse e bile motse wo o nago le bana ba ba se nago molato ba go feta ba dikete tše lekgolo le tše masome a mabedi, le diruiwa tše ntši.” Mehleng ya Jotamo le ya Ahase le ya Hiskia, magoši a Juda, Morena o ile a botša Mika wa motse wa Moreshete tše di ngwadilwego mo mabapi le Samaria le Jerusalema. Lena ditšhaba tšohle, ekwang; theeletša, wena lefase le bohle ba ba phelago go wena! Morena, Mong wa bohle, o tla le tšwa a bolela a le ka tempeleng ya gagwe ye kgethwa legodimong. Morena o tšwa bodulong bja gagwe, mme o tla sepela godimo ga dithaba. Tšona di tla tologa ge a di gata, le melala ya pharoga. Dithaba di tla tologa bjalo ka motu mollong, tša ela metheogeng bjalo ka meetse. Tše ka moka di tla hlaga ka baka la ge setšhaba sa Israele se dirile dibe, le ka ge ditlogolo tšeo tša Jakobo di tsogetše Modimo maatla. Phošo ke ya mang ge di mo tsogetše maatla? Kgane ga se ya Samaria? Molato ke wa mang ge go khunamelwa medimo ya diswantšho mo Juda? A ga se wa Jerusalema? Ke ka baka leo Morena a rego: “Ke tla dira Samaria marope a melaleng, le mo go bjalwago merara. Maswika a motse woo ke tla a lahlela molaleng, metheo ya wona ya šala nyanyeng. Medimo ya wona ya diswantšho e tla pšhatlaganywa, dilo tšohle tše di filwego digwebakathobalo tša wona tša tempeleng di tla tšhungwa ka mollo, le medingwana yohle ya wona e tla ba thotobolo. Samaria e ikhweleditše dilo tše gore e tle e di šomišetše bofebe bjoo, gomme bjale manaba a yona a tla di thotha a yo di šomišetša bofebe bjoo mafelong a mangwe.” Ke moka Mika a re: “Ka baka la dilo tšeo ke tla lla ka golola ka sepela ke se ka apara dieta, ebile ke hlobotše. Ke tla lla bjalo ka phukubje, ka tsetsela boka mpšhe. Dintho tša Samaria di ka se fole, Juda le yona e kgauswi le go otlwa ka mokgwa woo; manaba a šetše a le masorong a Jerusalema mo go dulago setšhaba sa gešo.” Le se ke la bolela kua Gathe gore re fentšwe, le go lla le se ke la lla. Lena ba Bethe-Leafora, le pshikologe maroleng go bontšha manyami. Lena ba Shafire, fetang ka tsela le hlobotše, le lewa ke dihlong. Ba ba dulago Tsaanane ba šia go tšwa motseng. Ge le ekwa batho ba Bethe-Etsele ba lla, le tsebe gore ba ka se sa kgona go le thuša. Batho ba Marote ba tlaletšwe, ba nyaka go lamolelwa, ka gobane Morena o dikaneditše Jerusalema ka madimabe. Lena badudi ba Lakishe, panang dipere dikoloing tša ntwa, le tšhabe ka gobane le ekišitše Baisraele ge ba dira dibe, mme batho ba Jerusalema le bona ba le ekiša ba dira sebe. Lena ba Juda, laelang batho ba Moreshete-Gathe. Ba motse wa Akesibe ba ka se kgone go thuša magoši a Israele, gomme magoši ao a tla swaba. Lena badudi ba Maresha, Morena o tla le gafela diatleng tša ba ba tlago le fenya. Baetapele ba go tuma ba Israele ba tla tla moo Adulamo. Lena ba Juda, boolang dihlogo, e be sešupo sa go llela bana ba lena ba le ba ratago. Intšheng mafatla le be bjalo ka manong, ka gobane le tlilo amogwa bana ba lena ba išwa bothopša. Go madimabe ba ba lalago ba nagana tše kgopo le tše mpe malaong a bona. Ge go esa mme ba hwetša sebaka, ba dira tše mpe tše ba letšego ba di nagana. Ge ba duma mašemo a batho ba a tšea ka swele; ge ba duma dintlo tša batho ba ipha tšona. Ba tšea motho le lapa la gagwe ka kgang, motho le thoto ya gagwe ka kgapeletšo. Ka gona Morena o re: “Ke rera go le tlišetša masetlapelo, mme le ka se a phonyokge. Masetlapelo ao e tla ba a mašoro mo e lego gore le ka se sa sepela le kukile magetla. Mohla nako yeo e etla batho ba tla le kodutla ka sefela sa go le llela ba re: “ ‘Lehu re hwile la pitšana! Morena o amogile batho ba gaborena naga, a e fa bathopi ba rena.’ ” Ka gona, ge nako e fihla ya gore naga e bušetšwe go setšhaba sa Morena, ga go le o tee wa lena yo a tlago e arolelwa. Batho ba re go nna: “Se re rute. Se re rute ka dilo tše. Re ka se welwe ke kgobogo. Kgane rena re lego ditlogolo tša Jakobo re ka ba re rwele thogako? Kgane Morena o re feletše pelo? Na a ka napa a dira tšela a di rerilego? Ga ke re o bolela ka botho le ba ba dirago tše di lokilego?” Morena o fetola ka go re: “Le hlasela setšhaba sa ka bjalo ka manaba. Banna ba boa ntweng ba gopola gore gae ba lotegile, eupša lena le ba hlobola diaparo. Le raka basadi ba setšhaba sa ka ka magaeng a bona ao ba a ratago, gomme bana ba bona le ba amoga tše ke ba atlilego ka tšona. Emang le sepele, ka gobane mo ga go sa na boikhutšo. Naga ye e tlilo senyetšwa ruri, ka gobane le e tšhilafaditše. “Se setšhaba se se se nyakago ke moprofeta wa go tšama a botša batho tša maaka le tša boradia a re: ‘Le tlilo fiwa beine le dino tše bogale tša maphaaphaa.’ “Ke tla le kgoboketša, lena ditlogolo tša Jakobo, lena mašaledi a setšhaba sa Israele. Ke tla le phutha bjalo ka dinku ka lešakeng, bjalo ka mohlape mafulong. Naga ya lena e tla buša ya biloga batho.” Modimo o tla ba phulela tsela a ba ntšha bothopša. Ba tla šwahla kgoro ya motse ba tšwa. Ba tla etwa pele ke Morena, yena Kgoši ya bona. Theeletšang, lena baetapele ba ditlogolo tša Jakobo, babuši ba setšhaba sa Israele. Sa lena e swanetše go ba go ela toka hloko, eupša le hloile tše di lokilego gomme le rata tše mpe. Le bua batho ba ka, la ba kgakgamolla dinama marapong, la ba la ba ja. Le ba khwamola letlalo, la ba robaganya marapo, mme la ba segelela bjalo ka nama ge e segelelwa ka pitšeng. Go tla tla nako ye ka yona le tlago llela Morena, eupša yena a se le arabe. A ka se le theeletše ge le mo rapela, ka gobane le dirile tše mpe. Baprofeta ba fora setšhaba sa ka ka go botša bao ba ba lefago gore ba tla atlega, eupša ba tšhošetša bao ba ganago go ba lefa ka go ba botša gore ba tla welwa ke madimabe. Go baprofeta bao Morena o re: “Matšatši a lena a tla feta, la se sa theeletšwa ke motho. Ka ge le timetša setšhaba sa ka, le ka se sa bona dipono, le tla bona fela leswiswi. Go tla fifala mo e lego gore le ka se sa kgona go porofeta.” Ba ba botšago batho tša ka moso ba tla hlabja ke dihlong, ba inamiša difahlego, ba gagabiša mahlo ka gobane Modimo a sa ba arabe. Eupša nnaena Modimo o ntladitše moya wa gagwe a ba a mpha maatla, a ntira gore ke be le toka le sebete sa go botša setšhaba sa Israele dibe tša sona, le mpherefere wa ditlogolo tšeo tša Jakobo. Ntheeletšeng, lena baetapele ba ditlogolo tša Jakobo, babuši ba setšhaba sa Israele, lena le šišingwago toka, le phetholago tše di lokilego la re ke tše mpe. Le aga Jerusalema, motse wa Modimo, ka tšhelete ye le e hwetšago ka dipolao le ka go hlokiša batho toka. Babuši ba motse ba ahlola ka go amogela tsogolekobong, baprista ba rutela moputso, baprofeta ba nyaka go lefiwa pele ba bolela tše ba rego ba di boditšwe ke Modimo – mme batho bao ka moka ba re: “Ga go kotsi ye e ka re welago. Morena o na le rena.” Bjale ge, ka baka la lena, Sione e tla lengwa bjalo ka tšhemo, Jerusalema e tla fetošwa marope, gomme thaba ye Tempele e agilwego go yona ya ba sethokgwa. Nako e etla yeo ka yona thaba ye Tempele ya Morena e agilwego godimo ga yona e tla bago ye e phagamilego go feta dithaba ka moka, ya okamela meboto yohle. Ditšhaba ka moka di tla e kgeregela, gomme merafe ye mentši ya re: “A re rotogeleng thabeng ya Morena, re yeng Tempeleng ya Modimo wa Israele, o tla re ruta tše a nyakago re di dira; ra phela ka moo a nyakago ka gona, gobane Morena o ruta a le Sione, o bolela a le Jerusalema.” O tla ahlola ditšhaba tše dintši, a kgaola tshele merafeng ye maatla kgole le kgauswi. Batho ba tla rula ditšhoša ya ba megoma, gomme marumo ya ba dithipa tša go kgotha mehlare. Ditšhaba di ka se sa emišetšana marumo, di ka se sa ithuta go lwa. Batho ba tla dula meriting ya merara le ya mego ya bona, mme go ka se be le yo a ba tšhošago. Tšeo di boletšwe ke Morena Ramaatlaohle. Setšhaba se sengwe le se sengwe se ka khunamela modimo wa sona sa mo hlompha, ge e le rena re tla khunamela Morena Modimo wa rena ra ba ra mo hlompha go ya go ile. Morena o re: “Nako e etla yeo ka yona ke tlago kgoboketša setšhaba sa ka se ke ilego ka se otla ka go se iša bothopša, se se swanago le dinku tše di hlotšago tše di phatlaladitšwego ke dibata. Ba ba hlotšago ke bona ke tlago ba dira mašaledi; bale ba bego ba rakilwe ka ba dira setšhaba se maatla. Ke tla ba Kgoši ya bona thabeng ya Sione go tloga nakong yeo go iša go sa felego.” Gomme wena, Jerusalema, mo go lego thaba ya Sione, moo Modimo a dišago setšhaba sa gagwe a le gona bjalo ka modiša a nametše tora ya gagwe ya tlhapetšo, o tla buša wa ba mošate wa mmušo wo e kilego ya ba wa gago. O reng o sa ntše o kgitla sello? Kgane ga go ne kgoši mo go wena? O inyokanyokelang boka mosadi a swerwe ke lešoko? Kgane ke ka baka la ge o se ne kgoši, gomme le baeletši ba gago ba hwile? Inyokanyokeng le tsetle, lena ba Jerusalema, le etše mosadi ge a belega, gobane bjale le tla tloga mo motseng la yo dula nageng. Le tla ya Babilone, eupša gona kua Morena o tla le phološa a le hlakodiša diatleng tša manaba a lena. Ditšhaba tše dintši di kgobokanetše go tlo le hlasela. Di re: “A re tšhilafatšeng Tempele; re ka kgahlega ge re ka bona Jerusalema e thubilwe!” Eupša ditšhaba tše ga di tsebe se Morena a se gopolago. Ga di lemoge gore o di kgobokantše boka mabele ge a kgobetšwe seboeng. Morena o re: “Lena ba Jerusalema, emelelang le foleng manaba ao a lena! Ke tla le kgwahliša la etša poo ya manaka a tshipi le dingatha tša mphiri. Le tla gataka ditšhaba tše dintši, gomme mahumo ao ba ikhweleditšego ona ka šiši le tla nkabela ona, nna, Morena wa lefase ka moka.” Lena batho ba Jerusalema, rapang madira a lena! Manaba a re dikaneditše ka dintotoma tša mobu. Ba hlasela mmuši wa Israele! Morena o re: “Wena Betlelehema ya tikologong ya Efrata, le ge o le wo mongwe wa metsana ye menyenyane kudu mo Juda, go wena go tla tšwa mmuši wa Israele yo a tlago ntlhompha, yo lešika la gagwe e lego la bogologolo le mehleng ya kgale.” Ka baka leo Morena o tla gafela setšhaba sa gagwe manabeng a sona, go fihlela mosadi yo mongwenyana wa moimana a belega morwa. Ke gona mašaledi a gabomorwa yoo a a lego bothopša a tlago buša a kopana le magagaboona. Mohla a etla o tla diša setšhaba sa gagwe a na le maatla a Morena le bogoši bja Modimo wa gagwe. Setšhaba sa gagwe se tla dula se iketlile, ka gobane batho lefaseng ka moka ba tla tseba gore ke yo mogolo kudu, gomme yena o tla buša ka khutšo. Ge Baasiria ba šwahlela naga ya rena mme ba kgereša dibo tša rena, re tla roma balaodi le mantona ba ba lekanego go yo lwa le bona. Ba tla lwa le Baasiria, badudi ba naga ya Nimrode, ka ditšhoša ba ba fenya, gomme ba re hlakodiša diatleng tša Baasiria ge ba šwahlela naga ya gaborena. Ona mašaledi a ditlogolo tša Jakobo a a lego gare ga ditšhaba tše dingwe a tla swana le phoka ye e tšwago go Morena; a tla etša pula ye e nelago dibjalo. Ba tla bota Modimo, e sego motho. Ona mašaledi ao a ditlogolo tša Jakobo a a lego gare ga ditšhaba tše dingwe a tla swana le tau gare ga diphoofolo tša sethokgwa; a tla ba bjalo ka tawana gare ga mehlape ya dihuswane, yona e tšamago e di robakanya, e di rathaganya, mme gwa hlokega mohlakodiši. Baisraele ba tla fenya manaba a bona ba a fediša taa. Morena o re: “Mehleng yeo ke tla bolaya dipere tša lena, ka ba ka robaganya dikoloi tša lena tša ntwa. Ke tla fediša metse ya naga ya lena, ka ba ka kgereša dibo tšohle tša lena. Ke tla fediša boloi bja lena, le didupe le ka se sa ba natšo. Ke tla pšhatlaganya medimo ya lena ya diswantšho le dikokwane tša lena tša borapedi tša maswika; le ka se sa khunamela dilwana tše le ipopetšego tšona ka diatla. Ke tla tumola dikota tša borapedi nageng ya lena, ka ba ka fediša metse ya lena. Ke tla itefeletša ke befetšwe, ke galefetše ditšhaba tše di sego tša ntheeletša.” Theeletšang, Morena o re Baisraele ba obile molato. Morena, ema o hlagiše taba ya gago pele ga dithaba, mme meboto e kwe tše o di bolelago. Lena dithaba, lena metheo ya go ya go ile ya lefase, theeletšang taba ya Morena! Morena o na le taba ye a tšwago setšhaba sa gagwe go yona. O tlilo rweša Baisraele molato. Morena o re: “Setšhaba sa ka, na ke le dirile eng? Ke le lapišitše ka eng? Mphetoleng! Ke le ntšhitše Egepeta; ke le hlakodišitše bokgobeng; ke romile Moshe le Arone le Miriamo gore ba tle ba le ete pele. Setšhaba sa ka, gopolang se Balaka, kgoši ya Moaba, a kilego a ikemišetša go le dira sona, le ka mo Bileamo, morwa wa Beore, a ilego a mo fetola ka gona. Gopolang dilo tše di ilego tša direga mo tseleng ge le tloga mešašeng kua Megohlong le eya Gilgale; ke moo le tlago lemoga tše ke le diretšego tšona gore ke le phološe.” Na Morena, Modimo wa godimodimo, nka mo tlišetšang ge ke tlilo mo obamela? Kgane nka mo tlišetša marojana a go mo direla dihlabelo tša go tšhungwa ka moka? Na Morena a ka thabišwa ke diketekete tša dikgapa tše nka mo tlišetšago tšona, goba meelaela ya makhura a mohlware? Kgane nka mo direla sehlabelo sa tshwarelo ya dibe ka morwa wa ka wa leitšibolo, ka lefa makgopo a ka ka morwa yo ke mo tswetšego? Aowaa, Morena o boditše wena, motho, tše e lego tša go loka. Bjale ke eng se a se nyakago go wena, ge e se gore o dire tše di lokilego, o rate Modimo le batho ka mehla, le gore o phele o ikokobetša go Modimo wa gago? Go boifa Morena ke bohlale. O bitša ba motse wa Jerusalema o re: “Theeletšang, lena le kgobokanego mo motseng wo! Ka dintlong tša batho ba kgopo go na le mahumo ao ba a ikhweleditšego ona ka bohwirihwiri. Ba šomiša dikelo tša bofora, e lego selo se ke se hloilego. Na nka napa ka swarela batho ba ba šomišago dikelo le dikeloboima tša bofora? Bahumi ba gabolena ba rata boganka, le gona ka moka ga lena le bompheane ebile le baradia. Ka gona ke šetše ke thomile go le otla, gomme ke tla le bolaya ka baka la dibe tša lena. Le tla ja, fela la se khore – gabotsebotse la no swarwa ke tlala. Tše le di thopilego di ka se lotege. Se sengwe le se sengwe se le se lotilego ke tla se fediša ka ntwa. Le tla bjala mabele, eupša la se a bune. Le tla pitla dihlware ka maoto, eupša la se tlole ka makhura a tšona. Le tla hlotla beine, eupša la se e nwe. Tšeo di tla le hlagela ka ge le phethile ditaelo tša Omri, la ba la dira tše mpe tše ba ga Ahaba ba bego ba di dira. Le dirile tša maikemišetšo a bona, ka gona motse wa lena ke tla o fetoša marope, le tla kwerwa ke batho, la nyatšwa ke ditšhaba tše dingwe.” Jo nna joo! Ke swana le motho yo e rego a swerwe ke tlala a se ke a hwetša dienywa mehlareng le diterebe tša morago. Diterebe tšohle le mago a pele di futšwe. Ga go sa na le motho yo a botegelago Modimo nageng ya Israele, ga go sa ne moloki yo a šetšego setšhabeng. Bohle ba dula ba lalelane gore ba bolayane, ba theana ka melaba. Ka moka ke dithwadi tša go dira tše mpe. Bahlankedi le baahlodi ba nyaka tsogolekobong. Motho wa maemo o ba botša se a se nyakago, gomme bohle ba šarakanya toka. Yo mokaonekaone go bona o swana le ditshehlo, moloki o hlaba bjalo ka lešaša la meetlwa. Letšatši le Modimo a tlago otla setšhaba ka lona, letšatši le le boletšwego ke baprofeta, le fihlile. Setšhaba seo se kgauswi le go gakanega. O se ke wa kgolwa wa geno goba wa tshepa mogwera wa gago. O hlokomele se o se botšago le yena mosadi wa gago. Mehleng yeno barwa ba nyatša botatagobona, barwedi ba ngangiša bommagobona, le dingwetši di tsogela bommatswalagotšona maatla; manaba a motho ke ba lapa labo. Eupša nna ke tla letela Morena; ke tla fišegela go amogela Modimo, ke yena yo a tlago mphološa. Modimo wa ka o tla nkwa. Lena manaba a rena, le se thabele madimabe a rena. Re wele, fela re tla tsoga gape. Bjale re mo leswiswing, eupša Morena o tla re fa seetša. Re tla kgotlelela ge Morena a re galefetše ka gobane re dirile dibe pele ga gagwe. Eupša mafelelong o tla re emelela tshekong, gomme a šetša gore re ahlolwe ka toka. O tla re ntšhetša seetšeng; re tla mmona ge a re phološa. Seo se tla bonwa le ke manaba a rena, gomme a lewa ke dihlong – ona manaba ale a bego a re kwera a re: “O kae Morena Modimo wa lena?” Re tla a bona a fenywa, a gatakwa bjalo ka leraga mekgotheng. Lena batho ba Jerusalema, nako ya go tsošološa merako ya motse wo e etla. Mehleng yeo naga ya lena e tla oketšwa. Batho ba gabolena ba tla boela go lena ba etšwa gohle – ba etšwa Asiria ka bohlabatšatši, le Egepeta ka borwa, le seleteng sa Yufratese, le mawatleng a kgakala, le dithabeng tša kgole. Eupša lefase le tla senyega ka baka la makgopo a bao ba dutšego go lona. Hle, Morena, diša setšhaba se sa gago o se kgethilego; se diše bjalo ka modiša ge a diša mohlape wa gagwe. Le ge se phela se le tee lešokeng, naga ye e se dikaneditšego e nonne go swana le selete sa Karmele. Ba lese ba yo dula ba iketlile nageng ya Bashane le ya Gileade go swana le kgale. Re direle mehlolo, hle, Morena, o etše mehleng yela o re ntšha Egepeta. Yona e tla bonwa ke ditšhaba tše dingwe gomme tša inyatša le ge e le tše maatla. Ba tla ahlama ba tlabegile mme ba thibja ditsebe ke tše Morena a di dirago. Ba tla gagaba fase bjalo ka dinoga; ba tla tšwa dibong tša bona ba thothomela ba tšhogile. Ba tla tla go Morena Modimo wa rena ba thothomela ka letšhogo. Ke ofe Modimo wa go swana le wena Morena, yo a swarelago mašaledi a setšhaba sa gago makgopo a bona, yo a sa ba otlelego dibe tša bona? Wena ga o galefele sa ruri, eupša o thabela go re rata ka lerato le le sa fetogego. O tla buša wa re gaugela. O tla gata makgopo a rena ka maoto, wa lahlela dibe tša rena fasefase ka lewatleng! O tla bontšha setšhaba sa gago, ditlogolo tša Jakobo, gore o a se botegela, ebile o se rata ka leratorato bjalo ka ge o ile wa enela borakgolokhukhu ba rena kgalekgale. Wo ke molaetša wa Modimo mabapi le Ninibe; ke lengwalo la pono ya Nahume wa go tšwa Elkoshe. Modimo ga a kgotlelele baphegišananaye; Morena ke Molefetši, o lefetša a galefile; o itefetša ka dira tša gagwe; o swara manaba a gagwe ka pelo. Morena o diega go galefa, eupša maatla a gagwe ke a magolo, gomme ga a lese go otla wa molato. Mo go sepelago Morena go tsoga disesedi le madimo, maru ke lerole la nao tša gagwe. O kgalema lewatle a le pšheša. Dinoka di gopišwa ke yena. Mašemo a Bashane le thaba ya Karmele di a oma, gwa pona le maloba a Lebanone. Dithaba di šikinyega pele ga Morena, le meboto e a gologa. Morena a tšwelela, lefase le a thothomela, la roromela le badudi bohle ba lona. Ge a befetšwe, ke mang a ka lwago naye? Ke mang yo a ka kgotlelelago kgalefo ya gagwe ye šoro? O laumiša bogale bja gagwe boka kgabo; maswika a pšhatlagana pele ga gagwe. Morena ke yo botho; ke setšhabelo mohla wa mathata; o hlokomela ba ba tšhabelago go yena. O bolaya manaba a gagwe bjalo ka lefula le le gogolago tšohle; ba ba mo lwantšhago o a ba feleletša. Tše le lakanago Morena ka tšona o tla di phuhlamiša. Motho a ka se boeletše go phegiša Morena. Le tla tšhungwa bjalo ka meetlwa ye e kgakganego, goba hlaga! Go wena, Ninibe, go tšwile ramaanomabe yo a rerago go lwa le Morena. Morena o re go setšhaba sa gagwe: “Le ge Baasiria ba tiile kudu mme ba atile, ba tla fedišwa ba timelela. Lena, setšhaba sa ka, ke le hlokofaditše, fela nka se sa boeletša. Bjale ke yo fediša go bušwa ke Baasiria ga lena, ka kgaola ditlemo tše di le tlemilego.” Mabapi le lena, Baasiria, Morena o begile a re: “Le ka se be le ditlogolo tša go tšwetša leina la lena pele. Ke tla fediša diswantšhobetlwa le diswantšhobopša tše di lego ka tempeleng ya medimo ya lena. Ke tla le epela lebitla, gobane ga le na mohola!” Bonang, kua dithabeng go theoga motseta ka ditaba tše dibotse. O tlilo bega molaetša wa khutšo. Lena batho ba Juda, ketekang menyanya ya lena, le phethagatše dikeno tša lena. Bakgopo ba ka se sa tsoga ba šwahletše naga ya lena. Ba fedišitšwe taa! Agee, Ninibe, agee! Manaba, bomaphušola, a a go hlasela! Leta dibo tša gago. Dula o dišitše tsela! Itokišetše ntwa, o rape madira a gago kgothekgothe! (Gobane Morena o tlilo bušetša Baisraele, ditlogolo tša Jakobo, sekeng, le ge manaba a ba hutše, a remile le merara ya bona.) Bagale ba manaba ba swere dikotsekhwibidu, madira a bona a apere bohwibidu fela. Dikoloi tša bona tša ntwa di pekenya boka mollo ge ba ipeakanyetša ntwa. Banameladipere ba fela pelo ya go lwa. Dikoloi tša bona tša ntwa di swinilala le mebila, di pharihla le mapatlelo a motse. Di re baibai bjalo ka dirumola, tša re tseke boka legadima. Balaolamadira ba a bitšwa; ba tšama ba kgopša le tsela. Bahlasedi ba kgeregela morakong, ba tsema sefahlo sethubamorakong. Mesela ya ka nokeng e a bulwa; mošate ga se letšhogo, ga se letšhogo! Mohumagadi o a thopša, makgoba a gagwe a basetsana a rwele megono, a lla boka maeba. Batho ba tšhaba ba etšwa Ninibe, ba etša meetse a šwahlile mogobe! Ba a goelela ba re: “Emang! Emang!” eupša ga go ya a retologago. Bahlasedi ba re: “Thopang silibera! Thopang gauta! Motse wo o tletše matlotlo. O rwele mahumohumo.” O thubilwe, o ngadilwe, ke marope! Pelo di swerwe ka diatla; go bethantšhwa dikhuru, maatla a ile; bohle ba galogile difahlego. O kae motse wola e bego e le seroba sa ditau, e le lewa la ditawana, mo go bego go eya tau le taugadi mmogo le bana ba tšona di sa šie selo? Tau e be e selela bana ba yona nama, e bolaela taugadi diphoofolo; e be e kgophela dibolawa ka maweng, matšaba a yona a tletše nama. Morena Ramaatlaohle o re: “Ke lwa le wena. Ke tla tšhuma dikoloi tša gago tša ntwa gwa kuelela muši. Bagale ba gago ba tla bolawa ka tšhoša, gomme ke tla go amoga dithebola tše o di amogilego ditšhaba tše dingwe. Matšhošetši a batseta ba gago a ka se sa kwagala.” O yo madimabe, wena motse wa babolai, motse wa go tlala baradia, motse wa go tlala dithebola, motse wa go se kgaotše bohlakodi! Ekwa! Ke thwaa ya tshelane, tsitsiritsiri ya maotwana, kakarakakara ya dipere, kgekgehlekgehle ya dikoloi tša ntwa. Go hlasela banameladipere, ditšhoša di a pekenya, marumo ke lebaibai! Ba ba bolailwego ke mašabašaba, ke mekgobokgobo ya ditopo, ditopo tše di se nago palo, tše di kgopago batho. Owaa! Ninibe, sefebe, o otlelwa bofebe bja gagwe bjo bontši, yena mmasebotsana, mmabolotšana, mogokaditšhaba ka bofebe bja gagwe, mogokamerafe ka bolotšana bja gagwe. Morena Ramaatlaohle o re: “Ke lwa le wena! Ke tla go apola mesese ka go khurumetša sefahlego ka yona, ka go bogiša ditšhaba tša go bonela, le ba mebušo ba go hlodimela ka fase. Ke tla go nyatša, ka go tšhela ka ditšhila, ka go dira mmasebogwane. Ba ba go bonago ba tla go tšhaba. Ba tla re: ‘Owaa, Ninibe e pšhatlagane! Ke mang yo a tlago e kwela bohloko?’ Ke tla go hweletša kae mohomotši?” Kgane o phala Tebetse, motse wo o agilwego nokeng ya Naele, o dikaneditšwego ke meetse, wo sebo sa wona e lego lewatle, o šireleditšwego ke meetse, sekaleboto? Motse wo o be o tiile ka Etopia le Egepeta, gomme maatla a wona a se ne kelo; o be o thušwa le ke Baphute le Balibia. Le ge go le bjalo, badudi ba wona ba ile ba išwa bothopša. Bana ba bona ba kgabetletšwe dikhutlong tšohle tša ditsela. Bahlomphegi ba gona ba abetšwe bathopi ba bona ka matengwa, bagolo bohle ba bona ba tlengwa ka ditlemo. Le wena, Ninibe, o tla tšewa ke matladima, wa ba bjalo ka ge nke o tagilwe. Le wena o tla khuta, wa tšhabela manaba a gago. Dibo tša gago tšohle di swana le mego ye e budulego dithakangwaga, ye e rego ge e šikinywa, dikenywa tša wela ka ganong ga yo a nyakago go di ja. Bona, bahlabani ba gago nke ke basadi! Naga ya gago e hloka mošireletši manabeng a yona. Mollo o tla tšhuma mapheko a masoro a gago. Gaa meetse o itokišetše mohla o dikaneditšwe, o tiiše le dibo tša gago! Tsena ka lerageng, o dube seretse, o bope makwate. Le gona moo o tlilo tšhungwa ka mollo, goba wa bolawa ka tšhoša. O tla fedišwa, wa etša dibjalo ge di llwe ke segongwane. Ikoketše bjalo ka tšie, o intšifatše bjalo ka bojane. O okeditše babapatši ba gago ba feta dinaledi tša leratadima! Eupša bjale ba ile, ba etša tšie ye e rego go sola e fofe. Baleti ba gago ba swana le bommammati, bahlankedi ba gago ba bjalo ka tšie ye e momelago legora mohla go tonya. Eupša e re ge letšatši le hlabile e fofe, go se tsebe motho gore e ile kae. Wena kgoši ya Asiria, babušiši ba gago ba hwile, le bahlomphegi ba gago ba robaletše ruri. Setšhaba sa gago se gašagane le dithaba, se hloka wa go se kgoboketša. Dikgobadi tša gago ga di na kalafo, le dintho tša gago di ka se fole. Bohle ba ba kwago tša gago ba opa magoswi. Kgane go na le motho yo a kilego a phonyokga sehlogo sa gago se se sa kgaotšego? Molaetša wo Morena a o utolletšego moprofeta Habakuku. Morena, na ke go bitše go fihlela neng ke kgopela thušo wena o sa ntheeletše, o sa re lamolele ge re swerwe gasehlogo? O reng o mphediša le badiratšempe, o ntesa ke hlaka gakaaka? Gohle mo ke sepelago gona ke bona batho ba bolaya ba bangwe, ba bile ba gatelela ba bangwe. Go dula go tsoga dintwa le diphapano mo gohle. Molao o feletšwe ke maatla; ga go sa latelwa toka. Bakgopo ba holega ka baloki, ka gona toka e a kgopamišwa. Ke moka Morena a re go setšhaba sa gagwe: “Lebelelang ditšhaba tše dingwe, gomme le tla makatšwa ke tše le di bonago. Ke tlilo dira tše le ka se di kgolwego ge le di kwa. Ke tla hlohleletša Bababilonia, sona setšhaba sela se sehlogo, sa go kgowa, sa go phatša lefase gore se thope dinaga tše e sego tša sona. Ke se sešoro ebile se a šiiša; se a ikgogomoša mme se itirela se se se ratago. “Dipere tša sona di šia nkwe ka lebelo, di šiiša le go feta diphiri tše di tsomago ka swahlane. Banameladipere ba di kitimiša lekakarakara ba etšwa kgole, ba etša ntšhu ge e kgougela sebolawa. “Madira ohle a bona a hlasela ka maikemišetšo a go bolaya manaba a bona; batho ba tšhošwa ke go goroga ga bona; bona nke ke lešabašaba. Ba nyatša magoši, ba kwera le babuši ba bangwe; le dibo tšohle ba di hlaetša mahlo. Ba kgobela mokgobo wa mobu go dikanetša dibo tšeo mme ba di thopa. Ke moka ba foke bjalo ka phefo, mme ba tloge. Ba na le molato ka ge ba re maatla a bona ba a fiwa ke modimo wa bona.” Na ga ke re o bile gona go tloga mehleng ya bogologolo, wena Morena Modimo wa ka yo mokgethwa, Moilalehu? Morena, wena sebo sa ka, o kgethile Bababilonia wa ba tiiša gore ba re otle. Mahlo a gago a hlwekile mo o ka se lebelelego tše mpe, o tenwa ke go bona ba ba dirago tše kgopo. Bjale ba ba go se tshepagale bona o ka ba kgotlelela bjang? O ka napa wa homola ge bakgopo ba bolaya ba ba ba phalago ka go loka? O reng o sema batho dihlapi tša lewatle, goba digagabi tše di hlokago mmuši? Bababilonia ba ba tanya bohle ka dikgwega; ba ba gogola ka malokwa ba ba gogela ka ntle, gomme ba thaba. Ke ka baka leo ba direlago malokwa a bona didimo, ba a tšhumela le diorelo, ka gobane malokwa ao a ba kgontšha go phela mononong le go ja tša matsaka. Na e ka ba ba tla no dula ba bolaya batho ka ditšhoša tša bona, ba fediša ditšhabatšhaba ntle le lešoko? Ke tla namela sethalana sa ka, ka ema godimo ga tora ya tlhapetšo, ka letela go kwa se Morena a tlago mpotša sona, le phetolo ya gagwe mabapi le sello sa ka. Morena a mphetola a re: “Ditaba tše ke go utollelago tšona o di tloke matlapaneng, gore di balege gabonolo. O di tloke ka gobane nako ya tšona ya gore di phethagale e sa tla. Fela nako yeo e tla tla ka pela, le tše ke go utollelago tšona di tla phethagala. Le ge di ka tšea nako, o di letele; go phethagala gona di tla phethagala go se go ye kae. Molaetša wa gona šo: ‘Yo kgopo a ka se phologe; yo a lokafaditšwego ke Modimo ka tumelo ya gagwe yena o tla phela.’ ” Ruri, lehumo le a fora. Motho wa go ikgogomoša ga a phele nako ye telele. O na le megabaru bjalo ka bodulabahu; go swana le lehu ga a khore. Ke ka baka leo a thopelago ditšhaba. Bohle ba tla mo kodutla, ba mo opela koša ba re: “Owaa, moiphatšabangwe towe, ga wa le bona! O yo feletša kae le go ikhumiša ka tše o di amogilego ba ba llego molato go wena?” Ruri, o tla re o sa itebetše, gwa tšwelela ba wena o llego molato go bona, gwa tsoga ba go tlo go tšhoša, mme ba go thopela. Ka ge o hlakotše ditšhaba tše dintši, mašaledi ohle a tšona a tla go hula, ya ba ge o lefa polao yela ya gago le boganka bja gago bathong ba lefase metseng ya bona. O yo madimabe, moamogabangwe ka šiši towe, wa humiša lapa la gago, wa ikagela ntlo ya malekeleke gore o tle o se šwahlelwe! O ikgobošeditše lapa ka maanomabe a gago; ka go fediša ditšhaba tše dintši ka madira a gago o ipolaile. Le maswika a merako a a go tšwa, le tšona dikota tša mahlomo di touta seo. Owe, wena o bušago motse ka bosenyi le polao! Na ga se Morena Ramaatlaohle yo a dirilego gore maitapišo a ditšhaba a felele mollong, le gore merafe e itapišetše lefeela? Bjalo ka ge lewatle le na le meetse a mantši, batho ba lefase le bona ba tla ba le tsebo ye ntši ya bogolo bja Morena. O ikobetše, wena o nošago ditšhaba tše di agelanego le wena senwelo se se tletšego kgalefo ya gago sa ba sa ba taga gore o ba bonele. Le wena o tla apešwa kgobogo, e sego seriti; le wena enwa senwelo se se tletšego kgalefo ya gago gore o tle o bonelwe. Morena o tla go noša senwelo sa kotlo se a se swerego ka seatla sa la go ja, gomme seriti sela sa gago se tla fetoga kgobogo. O remile dithokgwa tša Lebanone, gomme bjale go tlilo rengwa wena. O bolaile diphoofolo tša gona, gomme diphoofolo di tlilo go tšhoša wa lefišetšwa go bolaya batho, le boganka bjo o bego o bo dira go badudi ba lefase le metse ya lona. Modimo wa seswantšho wo o betlilwego ke motho o thušang, goba seswantšhobopša se batho ba iphorago ka sona? Go thušang ge mmopi a bota sebopša sa gagwe, modingwana wo o sa kgonego le go bolela? O lahlegile, wena o rego go kota: “Tsoga!” goba go leswika le le sa phelego: “Emelela!” Kgane modimo wa seswantšho o ka ruta motho selo? Le ge o manegilwe ka gauta le ka silibera, go phela gona ga o phele. Morena yena o ka Tempeleng ya gagwe ye kgethwa; batho bohle ba lefase a ba iphuthe ge ba le pele ga gagwe. Thapelo ya moprofeta Habakuku ye e swanetšego go opelwa bjalo ka kopelo ya manyami še: Morena, ke kwele ka ditiro tša gago, gomme ka boifa kudu. Boeletša ka pela ditiro tšela tše dikgolo o hlwago o di dira. Hle, le ge o befetšwe o re gaugele. Modimo o tla a etšwa Edomo, yena Mokgethwa a etšwa le thabeng ya Parane. Sela Letago la gagwe le apešitše magodimo, le lefase le tletše ditumišo tša gagwe. O dikaneditšwe ke seetša se nkego sa mosegare; seatleng sa gagwe go benya seedi, moo maatla a gagwe a iphihlilego gona. O etwa ke leuba pele, a šalwa ke lehu morago. A ema, lefase la šikinyega, a gerula, ditšhaba tša thothomela; dithaba tša neng le neng tša thubagana, meboto ya go sa felego ya kodumela, meboto ye a bego a sepela go yona kgalekgale. Ke bone mešaša ya Kushane e wetšwe ke bošula, Bamidiane le bona ba thothomela. Na o be o befeletšwe dinoka, Morena? A ke lewatle le le bego le go galefišitše, ge e bile o etla ka dipere le dikoloi tša ntwa tše o fenyago ka tšona? O be o swere bora ka seatla, wa laela mesebe gore e dire eng, wa tiišetša taelo yeo ka keno. Sela O pharotše lefase, dinoka tša ela. Dithaba di go bone tša thothomela, pula ye kgolo ya na, lewatle la bopa, mme maphoto a lona a kuboga. Ge mesebe ya gago e phadima e feta ka lebelo, le lerumo la gago le le pekenyago le re baibai, letšatši le ngwedi di ile tša ema phoo. O be o gwataka o putla lefase o tuka bogale, o fola ditšhaba o galefile. O ile wa yo phološa setšhaba sa gago, wa yo hlakodiša kgoši, motlotšwa wa gago. O pšhatlagantše moetapele wa bakgopo, wa amoga bakgopo bao dilo tšohle. Sela O phuleleditše molaolamadira ka mesebe ya gagwe ge madira ao a etla boka ledimo go re phatlalatša. A thabile go swana le bagatelelabadiidi sephiring. Lewatle o be o le gata ka pere tša gago, gomme meetsemantši a ntšha maphilo. Ge ke ekwa tšohle tše ke longwa ke mala; melomo ya ka e tetema ka letšhogo. Ke thenega ditho, ka bethanya le dikhuru. Le ge go le bjalo ke tla ikhomolela ka letela mohla Modimo a tlago tlišetša ba go re hlasela bošula. Le ge mego e ka se khukhuše, le merara ya se enywe, le ge puno ya mehlware e ka pala, le mašemo a se be le dijo, le ge mašaka a ka felelwa ke dihuswane, le meraka ya dikgomo ya se be le selo, nna ke tla no thaba ka thakgala, gobane Morena Modimo ke Mophološi wa ka. Morena, Mong wa bohle, o mpha maatla. O ntshepetša gabotse bophelong, ka swana le kgama dithabeng, a ba a ntshepediša ke bolokegile le mebotong. Go moopediši. Go opelwe go letšwa diletšo tša mašika. Mehleng ya ge Josia, morwa wa Amone, e le kgoši ya Juda, Morena o ile a botša Sofonia tše di ngwadilwego mo. Sofonia e be e le morwa wa Kushe, Kushe morwa wa Gedalia, Gedalia morwa wa Amaria, Amaria morwa wa Hiskia. Morena a re: “Ke tlilo fediša tšohle tše di lego lefaseng. Ke tlilo fediša batho, diphoofolo, dinonyana le dihlapi. Ke tla phuhlamiša bakgopo. Ke tla fediša batho lefaseng. Ke realo, nna, Morena. “Ke tla otla batho ba Juda le badudi bohle ba Jerusalema. Bohle ba ba khunamelago Baale ke tla ba fediša felo fa, gomme ga go yo a tlago gopola baprista ba ba mo hlankelago. Bao ba khunamelago letšatši goba ngwedi goba dinaledi godimo ga ditlhaka tša dintlo ke tla ba bolaya. Ke tla bolaya le bao ba rego ba nkhunamela mme ba ikana ka nna, ba ba ba ikana le ka Milkomo. Ke tla bolaya ba ba kgelogago ba sa tlego go nna, le ba ba sa nkgopelego maele.” Letšatši la go tla ga Morena le kgauswi, ka gona le iphuthe mo pele ga gagwe. Morena o itokišetša go hlaba setšhaba sa gagwe bjalo ka diphoofolo tša sehlabelo. Morena o re: “Mohlang woo wa go hlaba ke tla otla baetapele, le barwa ba kgoši, le bohle ba ba latelago ditlwaedi di šele. Ke tla otla bohle ba ba tshelago serepodi sa tempele ya modimo wa bao ba o khunamelago, le ba ba tlatšago tempele ya medimo ya bona ka dithoto tše ba ikhweleditšego tšona ka boganka le ka bomenemene.” Morena o re: “Mohlang woo batho ba tla hlaba mokgoši ba le Lesorong la Dihlapi. Ba tla golola ba le karolong ya motse ye e bitšwago Motsemofsa, mme kua mebotong go tla kwagala lešata le legolo. Gololang, lena badudi ba karolo ya motse ye e bitšwago Legolo, ka gobane babapatši bohle ba tla be ba hwile, bohle ba ba elago tšhelete ba tla be ba bolailwe. “Mehleng yeo ke tla putuka Jerusalema ka lebone. Ke tla otla bao ba letšago molodi wa nko, ba ipotago ba re: ‘Morena a ka se re dire selo, e ka ba se sebotse goba se sebe.’ Ba tla hulwa mahumo a bona, ba thubelwa le dintlo. Dintlo tše ba di agago ba ka se di dule, le beine ya merara ye ba e bjalago ba ka se e nwe.” Letšatši le legolo la Morena le kgauswi, le kgauswi kudu, le gona le tla ka go phakiša! Sello sa tšatši leo la Morena e tla ba se bohloko, le bagale ba tla golola. E tla ba letšatši la kgalefo, letšatši la mahloko le mahlomola, letšatši la tobo le tahlego, letšatši la leswiswi la kgampipi, letšatši la maru le monyama, letšatši la mollo wa phalafala, le mekgoši ya madira a a hlaselago metse ye e ageleditšwego ka merako le dibo tše di phagamego. Morena o re: “Ke tla tlaletša batho mo ba tlago ba ba sepela ba phophola bjalo ka difofu, ka gobane ba mphošeditše. Madi a bona a tlilo tšhollwa fase, le mateng a bona a kgotholwa mo nkego ke boloko.” Mohlang woo wa kgalefo ya Morena silibera ya bona le gauta di ka se ba thuše. Lefase ka moka le tla tšhungwa ka mollo wa kgalefo ya gagwe. Yena o tla bolaya badudi bohle ba lefase gasehlogo. Hee, lena setšhaba sa go hloka dihlong, gopodišišang tše le di dirago pele ga ge Modimo a le dira se a ikemišeditšego sona, pele Letšatši la Kahlolo le fihla mme lena le tšhungwa ke kgalefo ya Modimo go swana le mooko ge o fišwa ke mollo, pele letšatši la pefelo ya gagwe le le fihlela. Nyakišišang thato ya Morena, lena baikokobetši bohle ba mo nageng ba le phethago ditaelo tša gagwe. Dirang tše di lokilego gomme le ikokobetše pele ga Morena. Mohlomongwe le ka phephišwa kotlo ka letšatši la kgalefo ya gagwe. Motseng wa Gasa go tla tšhabja, Ashkelone e tla ba marope, batho ba Ashdode ba tla rakwa mosegare wo monana, le motse wa Ekrone o tla thubja. Le hwile, lena Bafilista le dulago lebopong la lewatle. Morena o šetše a le ahlotše, lena badudi ba Kanana, naga ya Bafilista. O tla le feleletša, gwa se šale le o tee wa lena. Naga ya lena ye e bapilego le lewatle e tla fetoga meraka ya badiša le mašaka a dihuswane. E tla ba ya mašaledi a batho ba Juda. Ba tla fudiša mehlape ya bona gona moo, gomme ba robala ka dintlong tša Ashkelone. Morena Modimo wa bona o tla ba hlokomela, a ba atla gape. Morena Ramaatlaohle o re: “Ke kwele batho ba Moaba le ba Amone ba rumola setšhaba sa ka ba se roga, ba bile ba ikgantšha ba re ba tla thopa naga ya sona. Ke ikana ke le Modimo yo a phelago wa Israele gore Bamoaba le Baamone ba tla fedišwa bjalo ka badudi ba Sodoma le ba Gomora. Dinaga tša bona e tla ba felo ga ditshehlo le meepo ya letswai le leganata go ya go ile. Mašaledi a setšhaba sa ka a tla ba hula, a ba amoga naga.” Ke ka mo batho ba Moaba le ba Amone ba tlago otlelwa boikgantšho bja bona ka gona. Ba tla otlwa ka ge ba rogile setšhaba sa Morena Ramaatlaohle, ba bile ba itheta ba re ba tla se fenya. Go bona Morena o tla šiiša. O tla fediša medingwana yohle ya lefase, ya ba gona ditšhaba tšohle tša mabopong a lewatle di mo khunamelago, bangwe le bangwe nageng ya bona. Le lena Baetopia, Morena o tla le bolaya ka tšhoša. O tla otla naga ya Asiria ka leboa a e fediša. Motse wa Ninibe o tla o fetoša marope le lesehla, lehlokameetse. Ke mo go tlago robala mehlape ya diruiwa le diphoofolo tša mehutahuta. Maribiši a tla robala dikokwaneng tša wona, a lla mafasetereng; magokobu a tla re gwaa, gwaa, direpoding. Dikota tša mesedere tša meago ya wona di tla be di hlomotšwe. Ke tšona tše di tlago hlagela motse woo badudi ba wona ba dulago ba iketlile le gona ba bolokegile. Batho ba gona ba bona nke motse wa bona o feta metse yohle ya lefase. E tlilo ba lefelo le le ngadilwego, letšaba la diphoofolo tša lešoka. Bafeti bohle ba tsela ba tla o kgotsa ka molodi, ba šikinya dihlogo. Jonna, Jerusalema, motse wa manganga, wa go tšhilafatšwa ke dibe tša badudi ba wona, motse wo o hlakišago baagi ba wona! Ga o theeletše Morena, ebile ga o dumele ge a o kgala. Ga o bote Morena, le gona ga o khunamele yena Modimo wa wona. Baetapele ba wona ba bjalo ka ditau tše di bopago; baahlodi ba wona nke ke diphiri tše di tsomago ka swahlane, tše di sa šadišetšego la gosasa nthathana. Baprofeta ba gona ga ba na boikarabelo ebile ga ba tshephagale; baprista ba gona ba tšhilafatša tše dikgethwa, le gona ba hlatholla melao ya Modimo gore e lokele bona. Le ge go le bjalo, Morena o sa le ka mo motseng, mme ke moloki, ga a dire tša go se loke. Mosong wo mongwe le wo mongwe o šetša gore badudi ba motse ba direlwe ka toka. Le ge go le bjalo, badiratšempe ba gona ga ba na dihlong ka tše ba di dirago. Morena o re: “Ditšhaba tše dingwe ke di fedišitše, dibo tša bona ya ba marope. Mebila ya bona e wetše kgwahlana; ga go sa sepela motho go yona. Metse ya bona e phušotšwe, ga go sa dula motho, ga go sa na moagi moo. Ke be ke gopola gore ke mo badudi ba Jerusalema ba tlago mpoifa mme ba dumela go kgalwa ke nna, le gore ba ka se tsoge ba lebetše dikotlo tšohle tše ke ba otlilego ka tšona. Eupša ya ba gona ba fišegelago go dira tše mpe.” Morena o re: “Bjale ge, le ntetele go fihlela mohla ke tlelago go sekiša ditšhaba. Ke feditše le pelo gore ke tla kgoboketša ditšhaba, ka phutha le batho ba mebušo, gore ke tle ke tšhollele kgalefo ya ka godimo ga bona. Lefase ka moka le tla tšhungwa ke kgalefo ya ka ye e laumago bjalo ka mollo. “Ke mohla ke tlago hlwekiša dipolelo tša ditšhaba gore bohle ba rapele nna, Morena, ba ntlhankele mmogo. Banthapedi, e lego setšhaba sa ka se se šwalalanego, ba tla ntlišetša dikabelo ba etšwa ka kua ga dinoka tša Etopia. Mehleng yeo, lena badudi ba Jerusalema, le ka se sa lewa ke dihlong tša ge le ile la ntsogela maatla. Bao ba ipshinago ka boikgantšho bja bona ke tla ba tloša motseng wa lena, gomme le ka se sa ba le makoko thabeng ya ka ye kgethwa, gobane motseng wa lena ke tla šadiša baikokobetši le babotlana ba ba tlago tšhabela go nna. Mašaledi a Israele a ka se dire tše kgopo, a ka se bolele maaka, ebile a ka se fore motho. A tla atlega, a bolokega, a se tšhošwe ke motho.” Hlabang mekgolokwane le opele le thabile, lena setšhaba sa Israele! Thakgalang le thabe ka dipelo tša lena tšohle, lena ba Jerusalema. Morena o feditše go le otla; o tlošitše manaba ohle a lena. Morena, Kgoši ya Israele, o na le lena, le se sa boifa selo. Nako e etla yeo ka yona Jerusalema e tlago botšwa gore: “O se boife, wena motse wa Sione! O se rephiše matsogo! Morena Modimo wa gago o na le wena, yena mohlabani yo a go phološago. O tla go thabela kudu a wišwa pelo ke go go rata ga gagwe. O tla go hlabela mekgolokwane go swana le batho ge ba duduetša monyanyeng.” Morena o re: “Ke tla tloša masetlapelo mo go lena gore le se sa goboga. Tsebang gore mehleng yeo bagateledi ba lena ke tla ba otla. Ke tla hlakodiša bohle ba ba golofetšego, le ba ba thopilwego ka ba bušetša gae; bagobogi bao ka ba fetoša bahlomphegi, mme lefase lohle la ba reta. Mehleng yeo ke tla le bušetša gae ge ke seno le kgoboketša. Ke tla le tumiša ditšhabeng tšohle lefaseng, batho ka moka ba le reta ge ke le bušetša sekeng sa lena.” O realo, Morena. Ngwageng wa bobedi wa ge Dariose e le kgoši, ka letšatši la pele la kgwedi ya boselela, Morena o ile a romela molaetša wo o latelago ka moprofeta Hagai go mmušiši wa Juda, Serubabele, morwa wa Sealtiele, le go Moprista yo Mogolo, Joshua, morwa wa Jotsadaka. Morena Ramaatlaohle o re: “Setšhaba se se re nako ya go tsošološa Tempele ya Morena ga sešo ya fihla.” Ke mo Morena a botšišitšego setšhaba ka moprofeta Hagai a re: “Le reng le dula ka dintlong tše dibotse mola ntlo ya ka yona e sa le marope?” Morena Ramaatlaohle o re: “Nagantšhišang tše di le hlagelago: Le bjetše kudu, fela la buna gosenene; le a ja, fela ga le khore; le a nwa, fela ga le kgolwe; le a apara, fela ga le ruthele; mošomi o gola mogolo wo o sa lekanego go mo phediša. Nagantšhišang tše di le hlagelago. Ke realo, nna, Morena Ramaatlaohle.” Morena Ramaatlaohle o rile go Hagai: “Bjale ge, rotogelang dithabeng le yo rema dikota le tle le tsošološe Tempele; ke gona ke tlago kgahlega gomme ka direlwa ka moo ke nyakago ka gona. “Le be le holofetše gore le tla bolaya mabele, eupša šefa ga a nene. E rile ge le a goroša nna ka a budula. Etse ke be ke direlang? Ke be ke dirišwa ke gore Tempele ya ka e sa le marope, mola mongwe le mongwe wa lena a mpshafatša ntlo ya gagwe. Lebaka ke lona leo ge legodimo le sa neše pula, le lefase le gana ka dibjalo. Ke tlišitše komelelo nageng – dithabeng le mašemong le dirapeng tša merara le tša mehlware le dimeleng tšohle tša mobung, bathong le diphoofolong, le go se sengwe le se sengwe se le se bjalago.” Ke moka Serubabele, morwa wa Sealtiele, le Moprista yo Mogolo, Joshua, morwa wa Jotsadaka, le mašaledi ohle a setšhaba ba phetha tše Morena Modimo wa bona a bego a ba laetše tšona, ba theeletša moprofeta Hagai, motseta wa Morena. Ke mo Hagai, motseta wa Morena, a boditšego setšhaba molaetša wa Morena, a re Morena o re: “Ke na le lena.” Morena a tutuetša mmušiši wa Juda, Serubabele, morwa wa Sealtiele, le Moprista yo Mogolo, Joshua, morwa wa Jotsadaka, le mašaledi ohle a setšhaba gore ba šome Tempeleng. Ba tla, ba thoma go šoma Tempeleng ya Morena Ramaatlaohle, Modimo wa bona, ka letšatši la masome a mabedi a metšo ye mene la kgwedi ya boselela ya ngwaga wa bobedi wa ge Dariose e le kgoši. Ka letšatši la masome a mabedi le motšo o tee la kgwedi ya bošupa ya wona ngwaga woo, Morena a buša a bolela ka moprofeta Hagai. A mo laela a re: “Botšiša mmušiši wa Juda, Serubabele, morwa wa Sealtiele, le Moprista yo Mogolo, Joshua, morwa wa Jotsadaka, le mašaledi a setšhaba o re: Ke mang mo gare ga lena yo a ilego a bona ka mo Tempele e bego e le botse ka gona? Gonabjale le e bona e le bjang? Ga ke re le e bona e se selo? Morena o re: Tia maatla, wena Serubabele; le wena Moprista yo Mogolo, Joshua, morwa wa Jotsadaka, tia maatla; le lena setšhaba ka moka sa naga ye, tiang maatla le šome, gobane nna, Morena Ramaatlaohle, ke na le lena. Mola le etšwa Egepeta ke ile ka le tshepiša gore ke tla ba le lena. Ke sa ntše ke na le lena, ka gona le se ke la boifa selo. “Nna, Morena Ramaatlaohle, ke re: Kgauswanyana ke tla reketliša legodimo le lefase, lewatle le naga. Ke tla tsoša meferefere ditšhabeng tšohle, gomme mahumo a tšona a tla tlišwa mo, ka thakga Tempele ka ona. Ke realo, nna, Morena Ramaatlaohle. Silibera ke ya ka, gauta le yona ke ya ka. Ke realo, nna, Morena Ramaatlaohle. Tempele ye mpsha e tlilo phala yela ye tala ka botse, gomme ke tla tliša khutšo ka go yona.” O realo, Morena Ramaatlaohle. Ka letšatši la masome a mabedi le metšo ye mene la kgwedi ya senyane ya ngwaga wa bobedi wa ge Dariose e le kgoši, Morena Ramaatlaohle a bolela gape ka moprofeta Hagai. A re: “Botšiša baprista gore molao o reng mabapi le taba ye: Ge motho a ka phuthela nama ye kgethwa morumong wa kobo ya gagwe, gomme ka morumo woo a kgoma senkgwa, goba dijo tše di apeilwego, goba beine, goba makhura a mohlware, goba sejo se sengwenyana, na sejo seo e ba se sekgethwa?” Baprista ba mo fetola ba re: “Aowa.” Ke moka Hagai a ba botšiša a re: “Na ge motho yo a tšhilafaditšwego ke go kgoma setopo a ka kgoma se sengwe sa dijo tšeo le sona se tla tšhilafala?” Baprista ba mo fetola ba re: “Se tla tšhilafala.” Ke moka Hagai a re: “Morena o re go bjalo le go batho ba setšhaba se le go tšohle tše ba di šomago ka diatla; ka gona tše ba di tlišago aletareng di tšhilafetše.” Ge setšhaba se seno thoma go tsošološa Tempele Morena a re: “Bjale ge, lebeledišišang tše di le hlagetšego pele le thoma go tsošološa Tempele go fihlela lehono. Motho o be a re ge a eya mokgobong wa mabele a gopole gore o tla tšwa ka mekotla ye masome a mabedi, eupša a tšwe fela ka ye lesome. A ye bopitlelong bja diterebe go yo ga dikgapa tše masome a mahlano tša beine, a hwetše fela tše masome a mabedi. Ke be ke le romela phefo ya naka le phori le sefako gore di senye sengwe le sengwe se le se bjetšego, eupša gwa se be le yo a sokologelago go nna. Go tloga lehono le, letšatši la masome a mabedi a metšo ye mene la kgwedi ya senyane, leo motheo wa Tempele o phethilwego ka lona, le lebeledišišeng tšeo di tlago hlaga. Le ge go se na le mabele ka dišegong, le merara le mego le megarenate le mehlware e se sa enywa, go tloga lehono ke tla le šegofatša la buna.” Ka lona tšatši leo la masome a mabedi a metšo ye mene la kgwedi yeo, Morena a bolela le Hagai la bobedi, a mmotša gore a re go Serubabele, mmušiši wa Juda: “Nna, Morena, ke kgauswi le go reketliša legodimo le lefase, ka menola mebušo ya ditšhaba ka e fetša maatla. Ke tla phethola dikoloi tša ntwa le basepetši ba tšona; dipere di tla hwa, le banamedi ba tšona ba bolayana. Mohlang woo ke tla go tšea, wena mohlanka wa ka, Serubabele, morwa wa Sealtiele, ka dira gore o buše ka maatla a ka, gobane ke kgethile wena.” O realo, Morena Ramaatlaohle. Ka kgwedi ya seswai ya ngwaga wa bobedi wa ge Dariose e le kgoši, Morena o ile a fa moprofeta Sakaria molaetša. Sakaria e be e le morwa wa Berekia, Berekia e le morwa wa Ido. Morena Ramaatlaohle a laela Sakaria gore a botše setšhaba a re: “Nna, Morena, ke ile ka galefela borakgolokhukhu ba lena, eupša bjale ke le botša ke re: Boelang go nna, gomme le nna ke tla boela go lena. Le se ke la swana le borakgolokhukhu ba lena bao baprofeta ba mehleng ya kgale ba bego ba ba begela molaetša wa go re nna, Morena Ramaatlaohle, ke re ba tlogele mekgwa le ditiro tša bona tše mpe. Eupša ba ile ba se ke ba ntheeletša, goba ba phetha tše ke ba laelago tšona. Bjale ba kae bona borakgolokhukhu bao ba lena? Baprofeta bao bona ba sa phela? Ke be ke laela bahlanka ba ka, baprofeta, go begela borakgolokhukhu ba lena melao le ditaelo tša ka, eupša bona ba di tšeiša phefo gomme ba otlwa. Ka morago ba itshola, gomme ba dumela gore ba otlilwe ke nna, Morena Ramaatlaohle, go ya ka mekgwa le ditiro tša bona, bjalo ka ge ke be ke rerile.” Ka letšatši la masome a mabedi le metšo ye mene la kgwedi ya lesome le motšo o tee, kgwedi ya Shebate, ka ngwaga wa bobedi wa ge Dariose e le kgoši, Morena a bolela le moprofeta Sakaria ponong. Sakaria e be e le morwa wa Berekia, Berekia e le morwa wa Ido. Sakaria o laodišitše tša pono yeo ya gagwe a re: E rile e le bošego ka bona monna yo mongwe a nametše pere ye khunou, a le gare ga mehlakola ka legageng. Ka morago ga gagwe go be go na le dipere tše dingwe – tše dikhunou, tše ditsothwa, le tše ditšhweu. Ka botšiša morongwa yo a bego a bolela le nna ka re: “Mong wa ka, na dipere tše di šupa eng?” Yena a mphetola a re: “Ke tla go bontšha se di se šupago.” Ke ge monna yola a bego a le gare ga mehlakola a re: “Di romilwe ke Morena gore di yo lekola lefase.” Tša begela morongwa wa Morena yo a bego a eme gare ga mehlakola tša re: “Re lekotše lefase, gomme ra hwetša lohle le letše le iketlile.” Ke moka morongwa yoo a re: “Aowii, Morena Ramaatlaohle, e šetše e le mengwaga ye masome a a šupago o galefetše motse wa Jerusalema le metse ya naga ya Juda. O tla feletša kae le go se ba gaugele?” Morena a fetola morongwa yoo a bego a bolela le nna, a bolela le yena ka mantšu a botho le a go mmea pelo, gomme morongwa yoo a mpotša gore ke bege gore Morena Ramaatlaohle o re: “Ke tshwenyegile kudu ka Jerusalema le thaba ya Sione. Ge e le ditšhaba tše di dutšego ka boiketlo tšona ke di galefetše e le ruri, ka gobane mola ke be ke befeletše setšhaba sa ka gosenene, bona ba ile ba se okeletša matshwenyego. Ke ka baka leo nna, Morena, ke rego ke boetše mo motseng wa Jerusalema go o šokela. Tempele ya ka e tla agwa ka bofsa, motse le wona wa tsošološwa. Ke realo, nna, Morena Ramaatlaohle.” Morongwa yoo a mpotša le gore ke bege ke re: “Morena Ramaatlaohle o re metse ya gagwe e tla buša ya atlega kudu, le gona o tla buša a homotša badudi ba motse wa Jerusalema, gomme a o dira bodulo bja gagwe gape.” Mo ponong ye nngwe ke ile ka bontšhwa manaka a mane. Ka botšiša morongwa yoo a bego a bolela le nna ka re: “Manaka a a šupa eng?” Yena a mphetola a re: “A emela maatla a mebušo ya lefase ye e šwalalantšego batho ba Juda le ba Israele le ba Jerusalema.” Ke moka Morena a mpontšha barulatshipi ba bane. Ka mmotšiša ka re: “Banna ba ba tlilo dirang?” Yena a mphetola a re: “Mebušo yela ke yona ye e šwalalantšego batho ba Juda ya ba kokobetša. Banna ba ba tletše go e tšhoša le go fenya ditšhaba tše di šwalalantšego batho ba Juda ka sehlogo se sekaaka.” Mo ponong ye nngwe ka bontšhwa monnatsoko a swere thapo ya go ela. Ka mmotšiša ka re: “O ya kae?” Yena a mphetola a re: “Ke yo ela motse wa Jerusalema gore ke bone bophara le botelele bja wona.” Ke moka ka bona morongwa yola a bego a bolela le nna a batamela, gomme a gahlanetšwa ke yo mongwe morongwa. Yola a bego a bolela le nna a re go yoo: “Kitima o yo botša lesogana lela le swerego thapo ya go ela o re Jerusalema e tlilo ba motse wa go se ageletšwe ka morako, ka baka la bontši bja batho ba gona le diruiwa. Morena a re yena mong e tla ba morako wa mollo go dikologa motse, le gona o tla dula go wona ka letago la gagwe.” Morena o re go setšhaba sa gagwe: “Ke le šwalalanyeditše mathokong ohle. Hee! Hee! Tšhabang nageng ya ka leboa! Hee, lena le phelago bothopša Babilonia, tšhabelang Jerusalema! Nna, Morena Ramaatlaohle, ke re wena Sakaria ke go romile ditšhabeng tše di le hutšego, lena setšhaba sa ka, gore o ba botša o re: ‘Yo a ba kgomago o tla be a kgoma selo sa ka se bohlokwa.’ Ba tsebe gore ke tla lwa le bona, gomme ba tla hlakolwa ke ba e kilego ya ba makgoba a bona.” Ke mo le tlago tseba gore ke romilwe ke Morena Ramaatlaohle. Morena o re: “Opelang ka lethabo, lena batho ba Jerusalema! Ke tlilo dula le lena.” Mehleng yeo ditšhaba tše dintši di tla tla go Morena gomme ya ba setšhaba sa gagwe. Yena o tla dula le lena. Ke mo le tlago tseba gore yena Ramaatlaohle o nthomile go lena. Batho ba Juda ba tla boela ya ba ba Morena mo nageng ye kgethwa, gomme Jerusalema e tla boela ya ba bodulo bja gagwe. Iphutheng bohle ge le le pele ga Morena, gobane yena o tšwa bodulong bja gagwe bjo bokgethwa. Mo ponong Morena a mpontšha Joshua, Moprista yo Mogolo, a eme pele ga morongwa wa Morena. Ka letsogong la go ja la Joshua go be go eme Sathane a letetše go phara moprista yoo ka molato. Morongwa yoo wa Morena a re go Sathane: “A Morena a go kgale, wena Sathane, a Morena yo a ikgethetšego Jerusalema a go kgale! Monna yo o swana le serumola se se ubutšwego mollong.” Joshua o be a eme moo, a apere diaparo tša ditšhila. Morongwa yoo a re go badiredi ba gagwe: “Apolang monna yo diaparo tše tša ditšhila.” Ke moka a re go Joshua: “Ke phumotše molato wa gago gomme ke tla go apeša diaparo tše boleta.” Ke moka ka re badiredi bao ba apeše Joshua seala sa boprista se se hlwekilego. Ba dira bjalo, mme ba mo apeša le diaparo tšela tše boleta morongwa yoo wa Morena a eme moo. Ke moka morongwa a botša Joshua a tiišitše a re: “Morena Ramaatlaohle o rile: ‘Ge o ka phela ka mo ke nyakago ka gona wa dira le mediro ye ke go filego yona, gona o tla no fela o le molebeledi wa Tempele ya ka le dikgoro tša yona, gomme ke tla kwa dithapelo tša gago, go swana le ge ke ekwa tša barongwa ba ba lego pele ga ka. Bjale ge, theeletša, wena Joshua, Moprista yo Mogolo, le lena bapristakayena, lena le lego sešupo sa bokamoso bjo bobotse, theeletšang: Ke tlilo tliša mohlanka wa ka yo a bitšwago Lehlogedi. Ke beile leswika la mahlakore a a šupago pele ga Joshua. Ke tla le tloka mantšu, gomme ka phumola molato wa naga ye ka letšatši le tee. Mohla tšatši leo le fihla, batho ba tla laletša baagišani ba bona gore ba tle ba thabe le bona ka khutšo le polokego, ba dutše ka dirapeng tša bona tša merara le ka fase ga mego ya bona.’ ” Morongwa yola a bego a bolela le nna a tla gape, a ntsoša bjalo ka motho ge a tsošwa borokong. A mpotšiša a re: “O bonang?” Ka mo fetola ka re: “Ke bona sehlomamabone sa gauta. Godimo ga sona go na le sebjana sa makhura a mohlware. Sehlomamabone seo se na le mabone a a šupago, lengwe le lengwe le na le lešobana la thapo. Go na le mehlare ye mebedi ya mehlware ka thoko ga sehlomamabone, wo mongwe ka mo, wo mongwe ka mo.” Ke moka ka botšiša morongwa yola ka re: “Na dilo tše di šupang, mong wa ka?” Yena a mphetola a re: “O ra gore ga o tsebe gore dilo tše di šupang?” Ka mo fetola ka re: “Aowa, mong wa ka, ga ke tsebe.” Morongwa yola a ntaela gore ke botše Serubabele gore Morena o re: “O tla atlega, fela e sego ka maatla a gago goba a madira a gago, eupša ka go tutuetšwa ke moya wa ka. Wena thabakgolo, o selo mang go Serubabele? O tla fetoga molala ge a go batamela. Serubabele, wena o tla tsošološa Tempele, gomme ya re ge o bea leswika la mafelelo, batho ba goa ba re: ‘Ga se ka botse! Ke le lebotse bjang!’ ” Morena a mpotša gape a re: “Tempele ye e theilwe ke Serubabele, gomme e tla ba ya phethwa ke yena. Mohla seo se direga ke gona setšhaba sa ka se tlago tseba gore ke nna ke go romilego go sona. Ba se nyamišwe ke ge go se ne tema ye e bonalago. Ba tla thaba ge ba bona Serubabele a tšwela pele le go aga Tempele.” Mo ponong ye nngwe ka bontšhwa lengwalo le tšewa ke phefo lefaufaung. Morongwa a mpotšiša a re: “O bonang?” Nna ka mo fetola ka re: “Ke bona lengwalo le tšewa ke phefo lefaufaung; ke la dimetara tše lesome ka botelele, le tše tlhano ka bophara.” Ke moka a re go nna: “Mo go lona go ngwadilwe thogako ye e tlago wela naga ka moka. Ka thoko ye nngwe ya lengwalo go ngwadilwe gore mahodu ohle a tla ntšhwa mo nageng; ka thoko ye nngwe go ngwadilwe gore bohle ba ba ikanago ka maaka le bona ba tla tlošwa. Morena Ramaatlaohle o re o tla romela thogako ye gomme ya tsena ka lapeng la lehodu le lengwe le le lengwe, le ka go la yo a ikanago ka maaka ka leina la gagwe. E tla lala ka dintlong tša bona, ya hlahlamolla marulelo a tšona, ya kgereša le maboto.” Morongwa yola a bego a bolela le nna a mpatamela a re: “Bona selo sela se etla!” Ka mmotšiša ka re: “Ke eng?” Yena a mphetola a re: “Ke seroto, gomme se swantšha molato wa batho bohle mo nageng.” Sekhurumelo sa morodi sa seroto seo sa khuromologa. Ka moo serotong go be go dutše mosadi. Morongwa a re: “Mosadi yo o swantšha bokgopo.” Ke moka a mo kgoromeletša ka serotong, gomme a khurumela seroto ka sekhurumelo sela sa morodi. Ge ke lebelela ka bona basadi ba babedi ba fofa ba ntebantšhitše ba na le diphego tše di phurolotšwego moyeng tše di swanago le tša tlhame. Ba kuka seroto sela ba fofa le sona. Ka botšiša morongwa yola wa go bolela le nna ka re: “Ba se iša kae?” Yena a mphetola a re: “Ba se iša Babilonia, mo ba tlago se agela tempele. Ge e fedile seroto seo se tla bewa bodulong bja sona ka gare ga yona.” Mo ponong ye nngwe ka bontšhwa dikoloi tše nne tša ntwa di etla di etšwa mokgahlo ga dithaba tše pedi tša mphiri. Koloi ya mathomo e be e gogwa ke dipere tše dikhunou, ya bobedi e gogwa ke tše dintsho, ya boraro e gogwa ke tše ditšhweu, gomme ya bone e gogwa ke tše diphaswa. Ke mo ke botšišitšego morongwa yo a bego a bolela le nna ka re: “Mong wa ka, na dikoloi tše di šupang?” Yena a mphetola a re: “Tšeo ke diphefo tše nne tša legodimo di a tloga ge di seno rongwa ke Morena wa lefase lohle.” Koloi ye e gogwago ke dipere tše dintsho e ya nageng ya ka leboa, ya dipere tše ditšhweu e ya nageng ya ka bodikela, gomme ya tše diphaswa e ya nageng ya ka borwa. Ge dipere tše diphaswa di etšwa di be di fela pelo ya go yo lekola lefase. Morena a re go tšona: “Eyang go lekola lefase!” Gomme tša ya. Ke moka a nkgoelela a re: “Dipere tšela tša go ya nageng ya ka leboa di okobaditše kgalefo ya ka.” Morena a ntaetša a re: “Amogela dimpho tše di ntšhitšwego ke mathopša a a boilego Babilonia, e lego boHeldai le Tobia le Jedaya. Tšatšing le o di amogetšego ka lona o ye ga Josia, morwa wa Sofonia. O dire mphapahlogo ka silibera le gauta ye ba e neetšego, gomme o o rweše Moprista yo Mogolo, Joshua, morwa wa Jotsadaka. O mmotše gore Morena Ramaatlaohle o re: ‘Go na le monna yo a bitšwago Lehlogedi; o tla hloga mo a lego gona, gomme a tsošološa Tempele ya Morena. Ke yena yo a tlago e aga, a buša setšhaba sa gagwe, gomme a hlomphiwa ka mo go lebanego kgoši. O tla thušwa ke moprista, gomme bobedi ba tla šomišana ka kwano.’ Mphapahlogo woo e tla ba segopotšo ka Tempeleng ya Morena sa go hlompha boHeldai, Tobia, Jedaya le Josia. Batho ba kgole ba tla tlo thuša go tsošološa Tempele ya Morena.” Ke mo le tlago tseba gore Morena Ramaatlaohle o nthomile go lena. Tšeo di tla phethega ge le ka hlompha Morena Modimo wa lena ka botlalo. Ka ngwaga wa bone wa ge Dariose e le kgoši, ka letšatši la bone la kgwedi ya senyane, kgwedi ya Kislebe, Morena a bolela le Sakaria. Batho ba Bethele ba be ba romile Saretsere le Regeme-Meleke le banna ba gabobona Tempeleng ya Morena Ramaatlaohle go yo kgopela tšhegofatšo ya Morena, le go yo botšiša baprista le baprofeta ba re: “Na re no tšwela pele le go ilela le go ikona dijo ka kgwedi ya bohlano go etša mengwageng ye mentši ye e fetilego?” Ke mo Morena a ntaetšego gore ke botšiše batho bohle ba naga ye le baprista ke re: “Kgane mola le ikona dijo ebile le ilela ka kgwedi ya bohlano le ya bošupa mengwageng ye masome a a šupago le be le direla nna? Le mola le eja, le enwa, na e be e se go itšela le go inwela?” Tšeo ke tšona tše Morena a bego a di bolela ka baprofeta bale ba pele mola Jerusalema le metseng ye e bapilego nayo go sa na le badudi ba bantši, go dutšwe ka boiketlo, le mola seleteng sa ka borwa se se omilego le nagengtlase go sa dula batho. Morena a re go Sakaria: “Nna, Morena Ramaatlaohle, ke laile setšhaba sa ka ka re: Le hlokomele gore go dirwe toka, le gona le swarane ka botho le ka lešoko. Le se ke la gatelela bahlologadi le ditšhiwana le bafaladi le bahloki. Le gona le se ke la logelana maanomabe. “Eupša setšhaba sa ka se ngangabetše sa gana go ntheeletša. Ba ithibile ditsebe gore ba se nkwe. Ba ithatafaditše le dipelo tša ba bjalo ka leswika. Ka ge ba be ba gana go phetha melao le ditaelo tše ke bego ke ba romela tšona ka Moya wa ka di išwa ke baprofeta bale ba pele, ke ile ka ba galefela. Ka ge ba be ba sa ntheeletše ge ke be ke ba bitša, le nna ke be ke sa ba theeletše ge ba be ba nthapela. Ke realo, nna, Morena Ramaatlaohle. Ke ile ka ba hlothola bjalo ka ledimo, ka ba šwalalanyetša ditšhabeng tšohle tše ba bego ba sa di tsebe. Ya ba ge naga ye e šala e se na badudi le ba go e sepela, mme naga yela ye botse ya fetoga lešoka.” Morena Ramaatlaohle a re go Sakaria: “Ke tshwenyegile kudu ka motse wa Jerusalema, mo ke bilego ke galefetše manaba a bona. Ke realo, nna, Morena Ramaatlaohle. Ke tla boela thabeng ya Sione, ka dula motseng wa Jerusalema. Wona o tla bitšwa motse wo o botegago, gomme thaba ya Morena Ramaatlaohle e tla bitšwa thaba ye kgethwa. Bakgalabje le bakgekolo ba lehlotlo ba tla buša ba itulela mapatlelong a Jerusalema. Ke realo, nna, Morena Ramaatlaohle. Mapatlelo a motse le ona a tla tlala bašemane le banenyana ba ba ralokago. “Le ge mašaledi a setšhaba se bjale a bona nke tše dibjalo di ka se kgonege, na le nna nka bona di sa kgonege? Go botšiša nna, Morena Ramaatlaohle. Nna, Morena Ramaatlaohle, ke re ke tla hlakodiša setšhaba sa ka dinageng tša ka bohlabatšatši le tša ka bodikelatšatši, gomme ka se buša sa tlo dula Jerusalema. E tla ba setšhaba sa ka, gomme nna ka ba Modimo wa sona, ka se buša ka potego le ka toka. “Nna, Morena Ramaatlaohle, ke re: Tiang maatla, lena bjale le kwago taba ye ka baprofeta ba ba bego ba le gona mola go thewa motheo wa go tsošološa Tempele, e lego ntlo ya ka, nna, Morena Ramaatlaohle. Pele ga moo go be go se na yo a nago le tšhelete ya go thwala motho, goba go lefela seruiwa sa go dirišwa. Batho ba be ba sa dire mešomo ya bona ka polokego ka baka la manaba a bona, gobane ke be ke lwiša motho le moagelani wa gagwe. Eupša go tloga bjale mašaledi a setšhaba se nka se sa a swara bjalo ka pele. Ke realo, nna, Morena Ramaatlaohle. Ba tla bjala dipeu tša bona ba iketlile. Merara ya bona e tla enywa, mobu o tla ntšha dibjalo, le legodimo le tla wiša phoka. Tše ka moka ke tla di fa mašaledi a setšhaba se. Lena batho ba Juda le lena ba Israele, pele le be le le sešupo sa thogako go baditšhaba, eupša ke tla le phološa, mme la ba sešupo sa tšhegofatšo. Ka gona, betang dipelo le se boife.” Morena Ramaatlaohle o re: “Ka ge borakgolokhukhu ba lena ba ile ba nkgalefiša, ke ile ka ikemišetša go le hlokofatša, gomme ka se buše pelo. Fela bjale ke hlaname, mme ke ikemišeditše go atla batho ba Jerusalema le ba Juda. Ka gona le se boife. Tše le swanetšego go di dira ke go botšana nnete, le ahlole ka toka le ka therešo ka dikgorong tša tsheko, gore go be le khutšo. Le se ke la rerelana tše mpe. Le se ikane ka bohlatse bja maaka, gobane tša mohuta woo ke tše ke di hloilego. Ke realo, nna, Morena.” Morena Ramaatlaohle a re go nna: “Nna, Morena Ramaatlaohle, ke re go ikona dijo ka kgwedi ya bone, ya bohlano, ya bošupa, le ya lesome go tla fetoga mabaka a lethabo le tlhalalo, go tla fetoga menyanya bathong ba Juda. Ka gona, le rate nnete le khutšo.” Morena Ramaatlaohle o re: “Ka moso Jerusalema go tlilo tla batho ba go tšwa metseng ye mentši. Ba motse wo mongwe ba tla ya go ba wo mongwe ba re: ‘A re yeng re yo khunamela Morena Ramaatlaohle, re mo rapeleng gore a re šegofatše!’ Ditšhaba tše dintši le merafe ye maatla ba tla tla Jerusalema go khunamela Morena Ramaatlaohle, le go mo rapela gore a ba šegofatše. Mehleng yeo banna ba lesome ba maleme a a fapanego le ditšhaba tše di fapanego ba tla swara monna wa Mojuda ka morumo wa seaparo sa gagwe ba re: ‘E re re sepeleng le lena, ka gobane re kwele gore Modimo o na le lena.’ Ke realo, nna, Morena Ramaatlaohle.” Morena o begile molaetša wa gore o tla otla naga ya Hadrake le motse wa Damaskose. Ga se dikgoro tša Israele fela tše e lego tša Morena, eupša le wona motsemošate wa Siria ke wa gagwe. Motse wa Hamate, wo o beelanego mellwane le wa Hadrake, le wona ke wa gagwe, le motse wa Tirose le wa Sidone, gotee le boramahlale ba metse yeo. Motse wa Tirose o ikagetše sebo wa ba wa kgobela silibera ye ntšintši, le mekgobokgobo ya gauta. Eupša Morena o tla amoga motse woo tšohle tše o nago le tšona. O tla lahlela mahumo a wona ka lewatleng, gomme motse wona a o fiša thokgethokge. Ba motse wa Ashkelone ge ba bona tšeo ba tla tšhoga. Ba motse wa Gasa ge ba di bona le bona ba tla thothomela ka letšhogo. Ba Ekrone ge ba di bona le bona ba tla nolega moko. Kgoši ya motse wa Gasa e tla bolawa; Ashkelone e tla šala e se na badudi. Kua Ashdode go tla dula mahlakanasela. Morena o re: “Ke tla fediša boikgogomošo bja Bafilista. Ke tla ba lahliša go ja nama ye e sa nago le madi, le dijo tše dingwe tše di iletšwago. Mašaledi a bona e tla ba a ka, nna, Modimo wa bona, ba etša ba kgorwana ya kgoro ya Juda. Le ba Ekrone e tla ba ba setšhaba sa ka, ba etša Bajebuse. Ke tla leta naga ya ka, gomme ka iletša madira go putla mo go yona. Setšhaba sa ka se ka se sa šwahlelwa ke bagateledi, gobane bjale ke bone ka mo ba tlaišitšwego ka gona.” Thabang gagolo, lena ba Sione! Hlabang mekgolokwane, lena ba Jerusalema! Bonang kgoši ya lena e tla go lena! O tla ka megobo le mekgolokwane, fela ke moikokobetši, monamelapokolo; o nametše pokolwana, namane ya pokolo. Morena o re: “Ke tla amoga Israele dikoloi tša ntwa, le Jerusalema ka e amoga dipere tša ntwa; mara a ntwa le mesebe di tla robaganywa. Kgoši ya lena e tla begela ditšhaba khutšo; e tla buša go tloga lewatleng go ya lewatleng, go tloga Yufratese go ya mafelelong a lefase.” “Ka baka la kgwerano ye ke e dirilego le lena ka madi a dihlabelo, ke tla lokolla bagolegwa ba gabolena, ka ba ntšha ka moleteng, mohlokameetse, e lego bothopša. Boelang sebong sa lena, lena bagolegwa le nago le kholofelo. Bjale ke le begela gore ke tla le bušetša gabedi tše le di lobilego. Bajuda ke tla ba dira bora, Baisraele ka ba dira mesebe. Ke tla hlohleletša banna ba gago, wena Jerusalema, gore ba lwe le Bagerike; ke tla ba dira tšhoša ya mohlabani.” Morena o tla bonala ka godimo ga setšhaba sa gagwe; o tla thuntšha mesebe ya gagwe bjalo ka legadima. Morena, Mong wa bohle, o tla letša phalafala; o tla sepela ka madimo a go tšwa borwa. Morena Ramaatlaohle o tla šireletša setšhaba sa gagwe, gomme se tla fediša manaba a sona, sa gataka maswikana a diragamabje tša ona. Ba tla hlaba mašata boka banna ba ba tagilwego, gomme ba tšholla madi a manaba a bona; ona a tla ela bjalo ka madi a sehlabelo, a tšhelwago dikhutlong tša aletare ka sebjana. Mohlang woo Morena Modimo o tla hlakodiša setšhaba sa gagwe bjalo ka modiša ge a hlakodiša mohlape. Bona ba tla kgabiša naga ya gagwe go swana le magakabje a mphapahlogo. Naga e tla ba ye botse ya kgahliša e le ruri! Masogana a tla atlwa ke go fepša ka mabele, le makgarebe a atlwa ke go nwa beine ye mpsha. Kgopelang Morena pula selemo. Morena ke Mohlomišamaru a pula, o nešetša batho medupi, a fa bohle dibjalo tša mašemong. Diswantšhobopša di bolela ditšiebadimo, didupe di bona dipono tša maaka; di anega ditoro tša maaka, khomotšo ya tšona ke lefeela. Ke ka baka leo batho ba timelago boka dinku, ba bago matshwenyegong ka go hloka moetapele. Morena o re: “Ke galefetše bašele ba go buša setšhaba sa ka, gomme ke tla ba otla, gobane nna, Morena Ramaatlaohle, ke hlokometše mohlape wa ka, e lego batho ba Juda. Ke tla ba dira dipere tša ka tša ntwa tša lebelo. Go bona go tla tšwa baetapele ba bantši, ba go tia bjalo ka maswika a motheo, le dikokotela tša tente, le mara a ntwa le mesebe. Batho ba Juda ba tla fenya, ba etša bagale ba ba gatakelago manaba a bona marageng a mebileng. Ba tla lwa ka ge Morena a na le bona, gomme ba fenya banameladipere ba manaba. “Ke tla tiiša batho ba Juda; ke tla hlakodiša ditlogolo tša Josefa. Ke tla ba šokela mme ka ba bušetša nageng ya gabobona. E tla ba mo nkego ga se nke ka ba lahla, gobane ke nna Morena Modimo wa bona, mme ke tla kwa dithapelo tša bona. Batho ba Israele ba tla ba bjalo ka bagale; ba tla hlalala mo nkego ba nwele beine. Bana ba bona ge ba di bona ba tla thaba, ba hlaba mekgolokwane, ba thakgatšwa ke tše Morena a di dirilego. “Ke tla bitša setšhaba sa ka ka molodi ka se kgoboketša, ka gobane ke ba hlakodišitše, gomme ba tla ata bjalo ka kgale. Le ge ke ba šwalalantše le ditšhaba, ba tla nkgopola ba le dinageng tša kgole. Bona le bana ba bona ba tla phologa, gomme ba boela nageng ya gabobona. Ke tla ba tloša nageng ya Egepeta le go ya Asiria, ka ba bušetša nageng ya gabobona. Ke tla ba dudiša seleteng sa Gileade le go sa Lebanone, ba ba ba dula ka go pitlagana. Ba tla tshela lewatle la matshwenyego, mme nna ka okobatša maphoto a lona. Madiba ohle a noka ya Naele a tla pšha. Ke tla kokobetša Baasiria bao ba go ikgogomoša, le mmušo wa Egepeta o tla wa. Ke tla tiiša setšhaba sa ka, gomme se tla phela se ntlhompha.” O realo, Morena. Bula difero tša gago, wena Lebanone, gore mollo o tshume mesedere ya gago! Kgitlang sello, lena mephaene, gobane mesedere e wele, merematsaka yela e fedišitšwe! Gololang, lena meeike ya Bashane, gobane sethokgwa sa mašohlošohlo se remilwe! Ekwang sello sa babuši; bogoši bjola bja bona bo fedile! Ekwang tau di a bopa; gape sekgwa sa noka ya Jordane se fedišitšwe! Morena Modimo wa ka o rile go nna: “Eba modiša wa dinku tše di yago go hlabja. Bareki ba tšona ba di bolaya ba sa ipone molato. Ba rekiša nama ya tšona gomme ba re: ‘A go retwe Morena! Re humile!’ Ba ba di dišago le bona ga ba di šokele.” Morena a re: “Nka se sa šokela badudi ba naga ye. Ke tla gafela bohle diatleng tša bangwekabona le go tša magoši a bona. Magoši ao a tla lobiša naga, gomme nna ka se e hlakodiše diatleng tša bona.” Nna ke be ke dišetša bareki bao ba dinku tša go yo hlabja. Ke ile ka tšea mapara a mabedi: lengwe ka le bitša “Pelonolo”, lengwe ka re ke “Kopano”. Ka nama ka diša dinku tšeo. Ka kgwedi e tee ka tloša badiša ba bararo dinkung. Ka thoma go felela dinku pelo, mme le tšona tša se sa nnyaka. Ke mo ke rilego go tšona: “Nka se sa ba modiša wa lena. Tše di hwago a di hwe. Tše di bolawago a di bolawe. Tše di šetšego a di jane botala.” Ke moka ka tšea lepara lela la ka ke le reilego leina la “Pelonolo” ka le roba, ya ba go fediša kgwerano yela Morena a bego a e dirile le ditšhaba tšohle. Ya ba gona go fedišwa ga kgwerano mohlang woo. Bareki bale ba dinku ba be ba ntebeletše, gomme ba tseba gore se ke se dirago ke se ke se boditšwego ke Morena. Nna ka re go bona: “Ge le rata mpheng tefo ya ka; eupša ge le sa rate le lese.” Ke moka ba mpha dipapetlana tše masome a mararo tša silibera e le tefo ya ka. Morena a re go nna: “Di tšhele ka polokelong ya Tempele.” Ka gona ka tšea dipapetlana tšeo tša silibera, tše ba bego ba gopola gore ke theko ye kgolo ye e ntekanego, ka di tšhela ka polokelong ya Tempele. Ka morago ka roba lepara la ka la bobedi, lela ke bego ke le bitša “Kopano”, gomme ya ba go fediša tswalano ya Bajuda le Baisraele. Ke mo Morena a rilego go nna: “Boelela o tšee lepara la modiša, fela bjale e be la modiša yo a se nago mohola. Ke bea modiša mo nageng ye yo a ka se šetšego dinku tše di fokolago, a ka se nyakego tše di timetšego, a ka se alafego tše di gobetšego, goba a fudiša tše di phelago gabotse. Sa gagwe e tla ba go dio ja nama ya tše di nonnego le go kokona dingathana tša tšona. Lefeelana leo la modiša la go tlogela mohlape ga la le bona! Nke a ka hlabja letsogo, a tsotsometšwa le leihlo la la go ja ka tšhoša! A a golofale letsogo, a foufale le leihlo la la go ja!” Molaetša wa Baisraele wa go tšwa go Morena, yena yo a adilego leratadima, a theilego lefase, a hlodilego moya mothong, o re: “Tsebang gore ke kgauswi le go dira motse wa Jerusalema senwelo sa bjala; ditšhaba tšohle tše di bapilego le wona di tla bo nwa tša thekesela. Ge Jerusalema e dikanetšwa, metse yohle ya Juda le yona e tla dikanetšwa. Eupša ge nako yeo e fihla ke tla dira gore Jerusalema e be bjalo ka leswika le boima; setšhaba se se le kukago se tla gobala kudu. Ditšhaba tšohle tša lefase di tla e thika. Mehleng yeo ke tla gakantšha dipere tšohle tša bona, le banamedi ba tšona ka ba hlakantšha dihlogo. Ke tla hlokomela batho ba Juda, eupša dipere tšohle tša baditšhaba tšona ke tla di foufatša. Ke realo, nna, Morena. Ke mo ba dikgorwana tša Juda ba tlago bolela ka dipelong ba re: ‘Badudi ba Jerusalema ba tiišwa ke Morena Ramaatlaohle, Modimo wa bona.’ “Mehleng yeo ke tla dira gore dikgorwana tša Juda di swane le mollo ka lengetaneng ka gare ga dikgong, goba serumola se se tukago gare ga dingata tša mabele – ba tla tšhuma ditšhaba tšohle tše di bapilego le bona. Batho ba Jerusalema bona ba tla itulela ba bolokegile moo motseng. “Nna, Morena, ke tla thoma ka go hlakodiša malapa a Juda, gore setumo sa ditlogolo tša Dafida le sa badudi ba Jerusalema se se ke sa feta sa batho ba bangwe ba Juda. Mehleng yeo ke tla šireletša ba ba dulago Jerusalema, gomme le ba ba fokolago kudu ba tla tia go swana le Dafida. Ditlogolo tša Dafida di tla ba eta pele bjalo ka morongwa wa Morena, bjalo ka Modimo ka sebele. Mehleng yeo ke tla fediša setšhaba se sengwe le se sengwe se se hlaselago Jerusalema. “Ditlogolo tša Dafida le badudi ba Jerusalema ke tla ba tšhela moya wa kgaugelo le wa thapelo. E tla re ge ba lebelela yo ba mo hlabilego ba mmolaya, ba mo llela bjalo ka yo a llelago motswalwanoši wa gagwe, ba mo llela gabohloko bjalo ka yo a llelago morwa wa leitšibolo. Mehleng yeo sello sa mo Jerusalema e tla ba se segolo go swana le sa Hadade-Rimone, molaleng wa Megido. Lapa le lengwe le le lengwe mo nageng le tla lla le le tee: gwa lla malapa a ditlogolo tša Dafida, a ditlogolo tša Nathane, a ditlogolo tša Lefi, a ditlogolo tša Shimi, le a mangwe ka moka. Lapa le lengwe le le lengwe le tla lla le ikeme, banna ba lapa le lengwe le le lengwe ba tla lla ba le gotee, basadi le bona ba lla ba le gotee. “Mehleng yeo go tla thibologa sediba sa go hlatswa ditlogolo tša Dafida le batho ba Jerusalema dibe le makgopo a bona. Mehleng yeo ke tla fediša go khunamelwa ga medimo ya diswantšho mo nageng, gomme e ka se sa gopolwa ke motho. Ke realo, nna, Morena Ramaatlaohle. Mang le mang yo a rego ke moprofeta ke tla mo tloša mo nageng, ka tloša le tumo ya batho ya go dira tše mpe. Ge motho a ka no fela a phegeletše go porofeta, tatagwe le mmagwe ba tla mmotša gore o swanetše go bolawa, ka ge a re o bolela lentšu la Morena, etšwe se a se bolelago e le maaka. Ge a ka porofeta, tatagwe le mmagwe ba tla mo hlaba ba mmolaya. Mehleng yeo go ka se be le moprofeta yo a ikgantšhago ka dipono tša gagwe, goba a aparago seaparo sa boya sa moprofeta e le gore a radie batho. A ka upša a re: ‘Ga se nna moprofeta, ke nna molemi. Bophelong bja ka ka moka ke bile molemi.’ Gomme ge motho a ka mmotšiša a re: ‘Mabadi ao a lego kgareng ya gago ke a eng?’ yena o tla fetola ka go re: ‘Ke ile ka gobatšwa ka ga bagwera ba ka.’ ” Morena Ramaatlaohle o re: “Wena tšhoša, tsoga o hlasele modiša wa ka yo a dišago le nna! Mmolaye, dinku di šwalalane. Nna ke tla otla dikwanyana tša ka, gomme nageng ka moka mo go lego dikarolo tše tharo tša dinku go tla hwa karolo tše pedi, gwa šala e tee. Yeo ya go šala ke tla e hlwekiša bjalo ka silibera ge e hlwekišwa ka mollo; ke tla e hlahloba bjalo ka gauta ge e hlahlobja. Ke mo ba tlago nthapela, gomme nna ka ba kwa. Ke tla re ke bona setšhaba sa ka, gomme bona ba tla re ke nna Modimo wa bona.” Letšatši la go tla ga Morena le kgauswi. Ke mohla dithebola tša go tšwa go wena, Jerusalema, di tlago kgobja pele ga gago. Morena o tla phutha ditšhaba tšohle gore di tle di lwe le Jerusalema. Motse wo o tla thopša, dintlo tša hulwa, le basadi ba katwa. Seripa sa badudi ba wona se tla išwa bothopša, eupša ba ba šetšego ba ka se tlošwe motseng. Ka morago Morena o tla tšwa dira a yo lwa le ditšhaba tšeo, bjalo ka ge a be a elwa le manaba a gagwe kgale. Mohlang woo o tla ema godimo ga Thaba ya Mehlware ka bohlabela bja Jerusalema. Ke mo Thaba ya Mehlware e tlago pharoga ka bogare go tloga ka bohlabela go ya ka bodikela, ya ba moedi wo mogologolo. Seripa se sengwe sa thaba se tla šuthela leboa, mola se sengwe sa šuthela borwa. Le tla tšhaba ka moedi woo wa thaba ya Morena wo o tlago ba o fihla Atsele. Le tla tšhaba bjalo ka borakgolokhukhu ba lena mola lefase le šikinyega, mehleng yela Usia e le kgoši ya Juda. Ya ba gona Morena Modimo wa ka a tlago, a tla le barongwa bohle. Mohlang woo go ka se be le seedi, go tla ba le botšididi le šobane fela. E tla ba letšatši la go se swane le a mangwe. Go ka se be le nako ya mosegare le nako ya bošego, eupša ge go etla bošego go tla ba le seedi. Gore na seo se tla direga neng go tseba Morena fela. Mehleng yeo meetse a mokgako a tla ela a etšwa Jerusalema, a mangwe a elela Lewatleng le le Hwilego ka bohlabela, a mangwe a elela Lewatleng la Mediteraniene ka bodikela. A tla ela ngwaga ka moka, selemo le marega. Ka nako yeo Morena e tla be e le yena kgoši ya lefase ka moka; ke nako ye e tla bego e le yena Morena a le noši, gomme bohle ba tla mo tseba ka leina le tee. Selete sohle, go tloga Geba go yo fihla Rimone ka borwa bja Jerusalema, se tla lekanetšwa. Motse wa Jerusalema o tla dula o phagame mo o agilwego gona; o tla be o thoma lesorong la Benjamene o fihla mola go bego go na le lesoro pele, Lesoro la Sekhutlo, wa tloga Toreng ya Hananele wa yo fihla bopitlelong bja diterebe bja mošate. Batho ba tla itulela moo Jerusalema ba iketlile, motse wa bona wa se sa ba kotsing ya go fedišwa. Morena o tla otla ditšhaba tše di lwago le Jerusalema ka leuba le: Ba tla bola dinama ba sa phela; mahlo a bona a tla bolela ka dinkgotlotswaneng tša ona, le maleme a bona a bolela ka maganong a bona. Mehleng yeo Morena o tla ba ferekanya mo ba tlago ba ba swarana ka diatla. Banna ba Juda ba tla lwa Jerusalema. Ba tla hula ditšhaba tšohle tše di bapilego nabo mahumo a tšona – gauta, silibera le diaparo ka bontši. Bolwetši bja go swana le bjoo bo tla tsena le dipere, dimeila, dikamela le dipokolo, a ke re diruiwa ka moka tše di lego ka mešašeng ya manaba. Mašaledi ohle a ditšhaba tše di hlasetšego Jerusalema a tla ya gona ngwaga wo mongwe le wo mongwe go yo khunamela Kgoši, Morena Ramaatlaohle, le go keteka Monyanya wa Mešaša. Ge setšhaba se sengwe se ka se ye go khunamela yena Kgoši, Morena Ramaatlaohle, se ka se nelwe ke pula nageng ya sona. Ge setšhaba sa Egepeta se ka se ye go keteka Monyanya wa Mešaša, gona se tla otlwa ka leuba leo ka lona Morena a tlago otla ditšhaba tše di sa yego go keteka. Yeo ke yona kotlo ye Baegepeta le ditšhaba tšohle tše di sa yego go keteka Monyanya wa Mešaša di tlago otlwa ka yona. Mehleng yeo le ditšhitswana tše di kwetenyago tša dipere di tla tlokwa mantšu a: “Di abetšwe Morena”. Le dipitša tša go apea tša ka Tempeleng e tla ba tše dikgethwa go no swana le meruswi yela ya pele ga aletare. Dipitša tšohle tša go apea tša Jerusalema le tša Juda e tla ba tše dikgethwa tša Morena Ramaatlaohle. Bohle ba ba tlago go dira dihlabelo ba tla apea nama ya dihlabelo ka tšona. Mehleng yeo go ka se sa ba le mmapatši ka Tempeleng ya Morena Ramaatlaohle. Morena o ile a botša Malakia gore a botše setšhaba sa Israele molaetša. Morena o re: “Ke le ratile ka mehla. “Eupša lena le re: ‘O bontšhitše bjang gore o a re rata?’ “Nna, Morena, ke a le botšiša ke re: Ga ke re Esau e be e le ngwanaboJakobo? Eupša nna ke ile ka rata Jakobo, Esau yena ka mo hloya. Naga ya gagwe ya dithaba ka e fetola leganata, ka e gafela diphukubje. “Ge Baedomo ba ka re: ‘Le ge metse ya rena e thubilwe, re tla e aga ka bofsa,’ gona nna, Morena Ramaatlaohle, ke tla re: A ba e age ka bofsa ge, ke tla e thuba gape. Batho ba tla bitša naga ya bona ‘Naga ye kgopo’, bona ba bitšwa ‘Setšhaba sa go galefelwa ke Morena go ya go ile’. “Le tla iponela tšeo ka a lena mahlo, gomme la re: ‘Morena ke yo maatla le ka ntle ga mellwane ya Israele!’ ” Morena Ramaatlaohle o re go baprista: “Morwa o hlompha tatagwe, le mohlanka o hlompha mong wa gagwe. Nna ke Tatagolena – bjale, le reng le sa ntlhomphe? Ke nna Mong wa lena – go tla bjang le sa mpoife? Le a nnyatša, eupša le a mpotšiša le re: ‘Re go nyaditše bjang?’ Le nnyaditše ka go nneela dijo tša ditšhila aletareng ya ka. Le a mpotšiša le re: ‘Re go kgopišitše bjang?’ Le nkgopišitše ka ge le re aletare ya ka e a nyatšega. Kgane ge le ntirela sehlabelo ka seruiwa se se foufetšego, goba se golofetšego, goba se lwalago, ga se phošo? Nke le leke le neele mmušiši seruiwa se sebjalo! Kgane le ka mo kgahla goba la amogelega go yena?” Go botšiša Morena Ramaatlaohle. Bjale ge, lena baprista, rapelang Modimo gore a re gaugele. Ge le dira dilo tša mohuta woo, na le ka amogelega go yena? Go botšiša Morena Ramaatlaohle. Morena Ramaatlaohle o re: “Nke nkabe mo gare ga lena go na le yo a tswalelago mabati a Tempele, gore le se kgone go gotša mello ye e se nago mohola aletareng ya ka! Gape ga le nkgahle; nka se amogele dikabelo tše le ntlišetšago tšona. Go tloga bohlabatšatši go iša bodikelatšatši ditšhaba di a ntheta. Mo gohle ba ntšhumela diorelo, ba ntirela le dihlabelo tše di hlwekilego, ka ge ba ntheta. Fela lena le a nnyatša ge le re aletare ya ka e tšhilafetše, le dijo tše le nneelago tšona godimo ga yona di a nyatšega. Etse le re: ‘Dilo tše di re lapišitše bjang!’ gomme ge le nkgopola le a šinyalala. Ke realo, nna, Morena Ramaatlaohle. Ge e le dihlabelo tšona le ntirela tšona ka diruiwa tše le di tšeetšego batho, goba tše di golofetšego, goba tše di lwalago. Kgane le bona nke nka amogela dihlabelo tšeo tša lena? Go botšiša nna, Morena. A go rogakwe moradia yo a ntirelago sehlabelo ka seruiwa se se nago le bosodi, etšwe mo mohlapeng wa gagwe go na le seruiwa se setona se se se nago bosodi se a ntshephišitšego sona! Gobane ke nna Kgoši ye kgolo, ke boifša ke ditšhaba. “Bjale, lena baprista, ke a le laya ke re: Ge le sa ntheeletše, le sa ikemišetše go ntlhompha, gona ke tla le tlišetša madimabe. Ke realo, nna, Morena Ramaatlaohle. Ditšhegofatšo tše ke le filego tšona le tšona ke tla di fetoša madimabe. Gabotsebotse ke šetše ke di fetošitše madimabe, ka gobane ga se la ikemišetša go ntlhompha. Ke tla le hlokiša ditlogolo, ka le phetša difahlego ka mošwang wa diruiwa tše le dirago dihlabelo tša menyanya ka tšona, gomme le tla lahlwa le wona. Ke gona le tlago tseba gore taelo ye le e filwe ke nna, gore kgwerano ya ka le baprista, ditlogolo tša Lefi, e se lahlwe. “Ka kgweranong ya ka ke ba tshephišitše bophelo le boiketlo, gomme ke tšona dilo tše ke ba filego tšona, gore ba tle ba ntlhomphe. Ba be ba ntlhompha, ba bile ba mpoifa. Ba be ba ruta batho tše di lokilego, e sego tše di fošagetšego. Ba be ba phela le nna ka khutšo; ba be ba ntlhankela ka dipelo tša bona ka moka, le gona ba thuša batho ba bantši go tlogela tše mpe. Go ruta batho gore ba ntsebe gabotse ke modiro wa moprista. Batho ba swanetše go ya go yena ge ba nyaka go tseba se e lego thato ya ka, ka gobane ke yena motseta wa ka, nna, Morena Ramaatlaohle. “Eupša bjale, lena baprista, le tlogetše tsela ya nnete. Tše le di rutago batho di kgelošitše ba bantši tša ba diriša diphošo. Le lahlile kgwerano yela ke e dirilego le Lefi. Ke realo, nna, Morena Ramaatlaohle. Ka gona, le nna ke tla dira gore setšhaba ka moka se le nyatše, se le kokobetše, ka gobane ga le phethe thato ya ka, gomme ge le ruta batho ga le ba sware go swana.” Kgane Tatagorena ka moka ga se o tee? Na ga se ra bopša ke Modimo o tee? Bjale re reng re lahletšana le gona re nyatša kgwerano ye Modimo a e dirilego le borakgolokhukhu? Batho ba Juda ba lahlile kgwerano ya Modimo le bona, ba dira bohlola Jerusalema le nageng ka moka ya Israele. Ba tšhilafaditše Tempele ye Morena a e ratago. Banna ba nyetše basadi ba ba khunamelago medimo e šele. Monna yo a dirago taba tša mohuta wo a Morena a tloše ditlogolo tša gagwe ka moka setšhabeng sa Israele, le ge a ka neela Morena Ramaatlaohle dikabelo. Taba ye nngwe ye le e dirago še: Le thapiša aletare ya Morena ka meokgo, le lla le golola ka ge yena a se sa na taba le dibego tša lena, goba a di amogela. Le botšiša gore Morena o reng a se sa di amogela. Ke ka baka la ge a tseba gore le be le sa botegele basadi ba le ba nyetšego le sa le masogana, etšwe e be e le balekani ba lena ba e tlilego ya ba basadi ba lena, mola le ba holofetša gore le tla ba botegela. Kgane Modimo ga se a le kopanya la ba nama e tee le moya o tee? Se o be a se direlang? E be e le gore le be le bana ba e lego setšhaba sa Modimo. Ka gona, le hlokomeleng gore go se be le o tee mo gare ga lena yo a sa botegelego mosadi wa gagwe yo a mo nyetšego e sa le lesogana, gobane Morena Modimo wa Israele o re: “Tlhalo ke e hloile. Ke hloile yo a dirago mosadi wa gagwe sehlogo se sebjalo. Le hlokomeleng gore le botegele basadi ba lena.” Le lapišitše Morena ka dipolelo tša lena. Fela le a botšiša le re: “Re mo lapišitše ka eng?” Le mo lapišitše ka go re: “Morena o bona badiradibe bohle e le ba ba lokilego; le gona o a ba rata,” goba ka go botšiša la re: “O kae Modimo yo go thwego o ahlola ka toka?” Morena Ramaatlaohle o fetola ka go re: “Ke roma motseta wa ka gore a yo mphulela tsela. Ke gona Morena yo le mo nyakago a tlago tla Tempeleng ya gagwe ka tšhoganetšo. Motseta yo le dumago go mmona o tla tla a bega kgwerano ya ka.” Eupša ke mang yo a tlago kgotlelela mohla a etla? Ke mang yo a tlago phologa ge a tšwelela? Gobane o tla etša mollo wo o tološago tshipi, a ba bjalo ka sesepe se se tlošago tšhila. O tla tla go ahlola bjalo ka motho yo a tološago silibera a e hlwekiša. Bjalo ka ge morulatshipi a hlwekiša silibera le gauta ka go di tološa, motseta wa Morena le yena o tla hlwekiša baprista, ditlogolo tša Lefi, gore ba tle ba tlišetše Morena dikabelo ka moya wo mobotse. Ke moo dihlabelo le dikabelo tše batho ba Juda le ba Jerusalema ba di tlišetšago Morena di tlago mo kgahla bjalo ka pele, mengwageng ya bogologolo. Morena Ramaatlaohle o re: “Ke tla tla go lena go le ahlola, gomme ntle le go dikadika ka bona batho ba molato: boramaselamose, le diotswa, le dihlatse tša maaka, le ba ba hlalefetšago bašomedi ba bona meputsong ya bona, le ba ba radiago bahlologadi le ditšhuana, le ba ba hlokomologago bašele – bohle ba ba sa mpoifego.” “Ke nna Morena, ga se ka le fetogela. Ka gona lena, ditlogolo tša Jakobo, ga se la hwa. Lena le tlogetše melao ya ka ga le e phethe, le etša borakgolokhukhu ba lena. Sokologelang go nna, gomme le nna ke tla boela go lena. Eupša le a mpotšiša le re: ‘Re sokologele go wena bjang?’ Kgane motho a ka radia nna, Modimo? Aowaa, eupša lena le a nthadia. Le a botšiša le re: ‘Re go radia bjang?’ Le a nthadia tabeng ya dikarolo tša lesome. Ka moka ga lena le rogakilwe ka gobane setšhaba ka moka se a nthadia. Tlišang dikarolo tša lena tša lesome polokelong Tempeleng di se tša fokotšwa, gore go tle go be le dijo tše dintši mo ntlong ya ka. Ntekeng gomme le tla bona ke tla bula mašoba a legodimo ka le tšhollela dilo tše dibotse ka bontši. Ke tla le thibelela tšie gore e se le senyetše dibjalo, gomme le merara ya lena e ka se hloke dienywa. Ke mo ditšhaba tšohle di tlago re le ba mahlatse, ka gobane naga ya lena e tla be e le bodulo bjo bobotse.” Morena o re: “Le boletše ka nna le nnyatša. Bjale le a mpotšiša le re: ‘Na re boletše eng ka wena?’ Le rile: ‘Ga go thuše selo go hlankela Modimo. Go thušang go dira tše a re laelago tšona, goba go itsholela tše re di dirilego ka go apara diaparo tša go ilela pele ga Morena Ramaatlaohle? Rena re bona ba ba ikgogomošago nke ke bona ba mahlatse. Bakgopo sa bona ga se fela go atlega, eupša ba leka le Modimo, fela ba se hlagelwe ke selo.’ ” Ke moka ba ba boifago Morena bona ba a boledišana, gomme yena a theeletša a kwa tše ba di bolelago. Gwa ngwalwa ka pukung mo pele ga gagwe maina a bao ba bego ba mmoifa gape ba mo hlompha. Morena Ramaatlaohle o re: “E tla ba setšhaba sa ka. Ka tšatši leo ke tlago tla ka lona e tla ba ba ka. Ke tla ba gaugela bjalo ka tatagongwana ge a gaugela morwa wa gagwe yo a mo hlankelago. Setšhaba sa ka se tla buša sa bona gore tše di hlagelago baloki le tše di hlagelago bakgopo, tše di hlagelago ba ba ntlhankelago le tše di hlagelago ba ba sa ntlhankelago di fapana bjang.” Morena Ramaatlaohle o re: “Letšatši le etla leo ka lona baikgogomoši le bakgopo bohle ba tlago swa bjalo ka dikutwana tša mahlaka ge di lahletšwe ka moubelong. Mohlang woo ba tla swa lorelore, gwa se šale selo. Eupša ge e le lena ba le mpoifago ke tla tla go le phološa bjalo ka letšatši ge le hlaba, ka le fodiša bjalo ka mahlasedi a lona. Le tla lokologa la kganakgana bjalo ka manamane a a buletšwego. Ka tšatši leo ke tlago tla ka lona, le tla gatakela bakgopo bjalo ka motho ge a gata lerole. “Gopolang melao ya Moshe, mohlanka wa ka, le tše ke ilego ka mo fa tšona thabeng ya Sinai gore setšhaba sa Israele ka moka se tle se di phethe. “Eupša pele ga ge letšatši leo la ka le legolo le le šiišago le etla, ke tla le romela moprofeta Eliya. O tla retollela dipelo tša botatagobana go bana ba bona, le tša bana go botatabo, gore ke se tlo tla ka senyaka naga ya lena.” Ba lešika la boJesu Kriste, setlogolo sa Dafida, yo e bego e le setlogolo sa Abrahama, ba latelana ka mokgwa wo: Abrahama e bile tatagoIsaka, Isaka a tswala Jakobo, Jakobo a tswala Juda le banababo, Juda le Tamare ba tswala Peretse le Serage, Peretse a tswala Hetserone, Hetserone a tswala Ramo, Ramo a tswala Aminadaba, Aminadaba a tswala Nagshone, Nagshone a tswala Salmone, Salmone le Rahaba ba tswala Boase, Boase le Rute ba tswala Obede, Obede a tswala Isai, Isai a tswala Kgoši Dafida. Dafida le yo e bego e kile ya ba mosadi wa Uria ba tswala Solomone. Solomone a tswala Rehabeamo, Rehabeamo a tswala Abia, Abia a tswala Asafo, Asafo a tswala Joshafate, Joshafate a tswala Joramo, Joramo a tswala Usia, Usia a tswala Jotamo, Jotamo a tswala Ahase, Ahase a tswala Hiskia, Hiskia a tswala Manase, Manase a tswala Amone, Amone a tswala Josia, Josia a tswala Joyakine le banababo. Ka morago ga moo batho ba Juda ba thopelwa Babilone. Morago ga ge batho ba thopetšwe Babilone, Joyakine a tswala Sealtiele, Sealtiele a tswala Serubabele, Serubabele a tswala Abihude, Abihude a tswala Eliakime, Eliakime a tswala Asore, Asore a tswala Tsadoko, Tsadoko a tswala Agime, Agime a tswala Eliude, Eliude a tswala Eleasara, Eleasara a tswala Mathane, Mathane a tswala Jakobo, Jakobo a tswala Josefa, monna wa Maria, mmagoJesu yo a bitšwago le ka la Kriste. Ka gona, go tloga ka Abrahama go fihlela ka Dafida go bile le meloko ye lesome le metšo ye mene; go tloga ka Dafida go fihlela lebakeng la go thopelwa Babilone go bile le ye lesome le metšo ye mene, le go tloga nakong yeo go fihlela matswalong a Jesu Kriste go bile le ye lesome le metšo ye mene. Tša matswalo a Jesu Kriste di bile ka tsela ye: Maria, mmagwe, o be a beeleditšwe ke Josefa; eupša ya re pele ba nyalana, Maria a lemoga gore o imišitšwe ke maatla a Moya wo Mokgethwa. Josefa e be e le monna wa go phetha melao ya Moshe, eupša o ile a se ke a rata go goboša Maria phatlalatša; ka gona a ikemišetša go mo tlogela ka go ngwega. Ge a sa gopodišiša taba yeo, morongwa wa Morena a tšwelela go yena torong, a re go yena: “Josefa, setlogolo sa Dafida, o se ke wa boifa go nyala Maria, gobane o imišitšwe ke maatla a Moya wo Mokgethwa. O tla belega morwa, gomme o mo ree leina la Jesu, ka gobane o tla phološa setšhaba sa gabo dibeng tša sona.” Tšeo ka moka di ile tša direga gore go tle go phethege sela se boletšwego ke Morena ka moprofeta mola a re: “Kgarebe e tla ima, ya belega morwa yo a tlago bitšwa Imanuele.” Ke go re “Modimo o na le rena”. Ka gona, ge Josefa a tsoga, a yo nyala Maria, bjalo ka ge morongwa wa Morena a be a mo laetše. Eupša a se ke a robala naye a ba a belega morwa yoo wa gagwe. Gomme Josefa a mo rea leina la Jesu. E rile ge Jesu a tswetšwe motseng wa Betlelehema, nageng ya Judea, mehleng ya Kgoši Heroda, boradinaledi ba bangwe ba tla Jerusalema ba etšwa bohlabela, ba fihla ba botšiša ba re: “E kae kgoši ya Bajuda ye e sa tšogo tswalwa? Re bone naledi ya gagwe e rotoga ka bohlabela, gomme re tlile go mo khunamela.” Ge Kgoši Heroda a ekwa taba yeo, a ferekana gotee le batho ka moka ba motse wa Jerusalema. A kgobokanya baprista ba bagolo ka moka le boramangwalo, gomme a ba botšiša a re: “Mesia o tla belegwa kae?” Bona ba mo fetola ba re: “O tla belegwa motseng wa Betlelehema, nageng ya Judea, ka gobane moprofeta o ngwadile a re: “ ‘Wena Betlelehema wa naga ya Juda, ruri o yo mongwe wa metse ye bohlokwa ya Juda; gobane go wena go tla tšwa moetapele yo a tlago diša setšhaba sa ka sa Israele.’ ” Ka gona Heroda a biletša boradinaledi bale sephiring, a ba botšiša nako ya nnete yeo naledi e bonagetšego ka yona. Ka morago a ba roma Betlelehema a ba laela a re: “Sepelang le yo nyakišiša moo ngwana yoo a lego gona, gomme ge le mo hweditše le tle le ntsebiše gore le nna ke yo mo khunamela.” Ge ba seno kwa tša kgoši ba tloga, gomme ba bona naledi yela ba e bonego ka bohlabela. Ba rile ge ba e bona ba thaba kudukudu. Ya ba eta pele ya ba ya yo ema ka godimo ga moo ngwana a bego a le gona. *** Ba tsena ka ngwakong, gomme ge ba bona ngwana le Maria, mmagwe, ba wa ka matolo ba mo khunamela. Ba phutholla mekotlana ya bona ba mo ntšhetša dimpho tše: gauta le seorelo le mira. Ka morago ba boela nageng ya gabobona ka tsela ye nngwe, ka ge Modimo a be a ba boditše torong gore ba se ke ba boela go Heroda. Ge ba tlogile, morongwa wa Morena a tšwelela go Josefa torong, a re: “Tsoga, o tšee ngwana le mmagwe o tšhabele Egepeta, o dule gona go fihlela ke go botša gore o tloge, ka gobane Heroda o tlilo nyaka ngwana yo gore a mmolaye.” Josefa a tsoga, a tšea ngwana le mmagwe, a tloga e le bošego a leba Egepeta; a dula gona go fihlela Heroda a ehwa, gore go tle go phethege se se boletšwego ke Morena ka moprofeta mola a re: “Ke biditše morwa wa ka Egepeta.” Ge Heroda a seno lemoga gore boradinaledi bale ba mo forile, a tuka bogale. A laela gore bašemanyana ka moka ba Betlelehema le tikologong ya gona ba mengwaga ye mebedi goba ka fase ga fao ba bolawe, a lekanya ka nako yela a bego a botšišitše boradinaledi gore naledi e bonagetše neng. Gwa napa gwa phethega se se boletšwego ke moprofeta Jeremia mola a re: “Kua Rama go kwagala mebokolelo le go golola le sello sa masetlapelo. Ragele o llela bana ba gagwe; o gana go homotšwa, ka gobane ga ba sa le gona.” Ya re ge Heroda a hwile, morongwa wa Morena a tšwelela go Josefa torong kua Egepeta, a re: “Tsoga, o tšee ngwana le mmagwe, o boele nageng ya Israele, ka gobane bale ba bego ba nyaka go bolaya ngwana ba hwile.” Josefa a tsoga, a tšea ngwana le mmagwe, a boela nageng ya Israele. Eupša ge a ekwa gore Argelaose o buša naga ya Judea legatong la Heroda, tatagwe, a boifa go ya gona. Ge a seno laelwa ke Modimo ka toro, a ya nageng ya Galilea, gomme a aga motseng wo o bitšwago Nasaretha. Gwa napa gwa phethega se se boletšwego ke baprofeta mola ba re: “O tla bitšwa Monasaretha.” Mehleng yeo Johanese Mokolobetši o ile a yo ruta lešokeng la Judea a re: “Sokologang, gobane mmušo wa Modimo o batametše!” Ke yena yo moprofeta Jesaya a boletšego ka yena a re: “Segoeledi lešokeng se re: ‘Phulelang Morena tsela; mo otlolleleng mebila!’ ” Johanese yo o be a apara seaparo sa boya bja kamela; a itlema letheka ka lepanta la mokgopha, gomme dijo tša gagwe e le ditšie le todi ya dinose. Batho ba be ba etla go yena ba etšwa Jerusalema, le seleteng ka moka sa Judea, le nageng yohle ya kgauswi le noka ya Jordane. Ba be ba ipolela dibe mme yena a ba kolobetša ka nokeng ya Jordane. Ge a bona Bafarisei le Basadusei ba bantši ba etla go yena gore ba kolobetšwe, a re go bona: “Dinoga tenang, ke mang yo a le boditšego a re le ka phepha kotlo ye Modimo a lego kgauswi le go otla bakgopo ka yona? Go kaone le dire tše di tlago laetša gore le sokologile. Le se ke la gopola gore le tla phepha kotlo ka ge Abrahama e le rakgolokhukhu wa lena. Gobane ke le botša gore Modimo a ka fetoša maswika a ditlogolo tša Abrahama! Selepe se šetše se loketše go rema mehlare medung; mohlare wo mongwe le wo mongwe wo o sa enywego dienywa tše dibotse o tla rengwa wa lahlelwa mollong. Nna ke le kolobetša ka meetse ka ge le sokologile, eupša yo a tlago ntlhatlama o tla le kolobetša ka Moya wo Mokgethwa le ka mollo. O mpheta ka maatla, gomme ga se ka swanela le go mo swarela dieta. O swere leselo ka seatla, gomme o tla fefera mabele gabotse. O tla a tšhela ka letlolong, mooko wona a o tšhuma ka mollo wo o sa timego.” Mehleng yeo Jesu a ya go Johanese nokeng ya Jordane a etšwa Galilea gore a kolobetšwe ke yena. Eupša yena a gana a re: “Ke nna ke swanetšego go kolobetšwa ke wena, bjale o reng o etla go nna?” Jesu a mo fetola a re: “Ga bjale a go no ba ka mokgwa wo, gobane ke tshwanelo gore re phethe thato ya Modimo.” Ka gona Johanese a dumela go mo kolobetša. Jesu ge a seno kolobetšwa, a tšwa ka meetseng. Legodimo la mmulegela, gomme a bona Moya wa Modimo o le ka sebopego sa leeba o theoga o dula godimo ga gagwe. Gwa napa gwa kwagala lentšu le etšwa legodimong le re: “Yo ke yena Morwa wa ka yo ke mo ratago; o nkgahla kudu.” Ka morago ga moo Jesu a išwa ke Moya lešokeng gore a yo lekwa ke Diabolose. Ge a feditše matšatši a masome a mane le mašego a ona a sa je selo, a swarwa ke tlala. Moleki yoo a tla go yena a re: “Ge o le Morwa wa Modimo, laela maswika a gore a fetoge bogobe.” Jesu a mo fetola a re: “Mangwalo a Makgethwa a re: ‘Motho ga a phele ka bogobe fela, eupša o phela le ka se sengwe le se sengwe se Modimo a se bolelago.’ ” Ke moka Diabolose a mo iša Motseng wo Mokgethwa, a fihla a mo nametša ntlhohlong ya Tempele, gomme a re go yena: “Ge o le Morwa wa Modimo, ikušetše fase, gobane Mangwalo a Makgethwa a re: “ ‘Modimo o tla laela barongwa ba gagwe gore ba go kuke, gore o se thetšwe ke maswika.’ ” Jesu a mo fetola a re: “Le gona Mangwalo a Makgethwa a re: ‘O se ke wa leka Morena Modimo wa gago.’ ” Diabolose a tšea Jesu gape a mo iša thabeng ye teleletelele, a mo laetša dinaga ka moka tša lefase le mahumo a tšona a re: “Tše ka moka ke tla go fa tšona ge o ka wa ka matolo wa nkhunamela.” Jesu a mo fetola a re: “Sathane, ntlogele, gobane Mangwalo a Makgethwa a re: ‘O khunamele Morena Modimo wa gago, o direle yena a nnoši!’ ” Ke moo Diabolose a mo tlogetšego, gomme barongwa ba tla ba hlankela Jesu. Ge Jesu a ekwa gore Johanese o išitšwe kgolegong, a ya Galilea. A se ke a boela Nasaretha, eupša a yo dula Kapernaume, e lego motse wa kgauswi le letsha la Galilea, nageng ya Sebulone le ya Naftali, gore go phethege se se boletšwego ke moprofeta Jesaya mola a re: “Wena naga ya Sebulone, le wena naga ya Naftali, le lego tseleng ya go ya lewatleng, mošola wa noka ya Jordane, wena Galilea, naga ya baditšhaba – setšhaba se se dutšego swiswing se bone seetša se segolo; ba ba dutšego nageng ye e okametšwego ke lehu ba hlabetšwe ke seetša.” Go tloga ka nako yeo Jesu a thoma go ruta batho a re: “Sokologang, ka gobane mmušo wa Modimo o batametše!” Ya re ge Jesu a sepela lebopong la letsha la Galilea, a bona banna ba babedi, barwa ba motho, bao e bego e le barei ba dihlapi. Bona e be e le Simone, yo a bego a bitšwa Petrose, le Andrease, ngwanabo. Ba be ba rea dihlapi ka letsheng ka malokwa. Jesu a re go bona: “Ntateleng, gomme ke tla le dira barei ba batho.” Ba akgofa ba tlogela malokwa a bona, ba mo latela. Ge a tloga moo a bona ba bangwe ba babedi le bona e le barwa ba motho. Bona e be e le Jakobose le Johanese, barwa ba Sebediose. Ba be ba le ka leselawatleng le Sebediose, tatagobona, ba lokiša malokwa a bona. Jesu a ba bitša. Le bona ba akgofa ba tlogela leselawatle le tatagobona, ba mo latela. Jesu a sepela le naga ya Galilea ka moka, a ruta ka disinagogeng, a bega Taba ye Botse ya mmušo wa Modimo, a fodiša batho malwetši le mafokodi a bona. Taba ya gagwe ya kwagala nageng ya Siria ka moka, gomme batho ba mo tlišetša ba ba babjago ba swerwe ke malwetši a mehutahuta le dihlabi, le ba ba tsenwego ke bademone, le ba malwetši a go wa, le ba go repha ditho, gomme Jesu a ba fodiša ka moka. A latelwa ke mašaba a mantši a go tšwa Galilea, le Metseng ye Lesome, le Jerusalema, le Judea, le nageng ya ka mošola wa noka ya Jordane. E rile ge Jesu a bona mašaba, a rotogela thabeng, a dula fase. Barutiwa ba gagwe ba tla go yena, gomme a thoma go ba ruta, bona le mašaba, a re: “Ba lehlogonolo ke bao ba botilego Modimo, gobane mmušo wa Modimo ke wa bobona. Ba lehlogonolo ke bao ba llago, gobane Modimo o tla ba homotša. Ba lehlogonolo ke ba boleta, gobane sa bona e tla ba lefase le lefsa. Ba lehlogonolo ke ba ba fišegelago gore lefaseng go dirwe tše di nyakwago ke Modimo, gobane ba tla kgotsofatšwa. Ba lehlogonolo ke bao ba gaugelago, gobane le bona Modimo o tla ba gaugela. Ba lehlogonolo ke ba dipelo tše di hlwekilego, gobane ba tla bona Modimo. Ba lehlogonolo ke badirakhutšo, gobane ba tla bitšwa bana ba Modimo. Ba lehlogonolo ke ba ba hlomarwago ka ge ba dira tše di nyakwago ke Modimo, gobane mmušo wa Modimo ke wa bobona. “Ba lehlogonolo ke lena ge le rogwa, le hlomarwa, le pharwa ka bobe bja mehutahuta ka baka la ka. Thabang le hlalale, ka gore moputso wa lena ke wo mogolo legodimong. Etse le baprofeta ba ba bilego gona pele ga lena ba be ba hlomarwa ka yona tsela yeo.” “Lena le letswai la lefase. Eupša ge letswai le ka tapa, le tla tswailošwa ka eng? Ga le sa na le mohola; sa lona ke go lahlelwa ntle, batho ba le gata ka maoto. “Lena le seetša sa lefase. Motse wo o agilwego thabeng o ka se fihlege. Le gona motho ga a re go gotetša lebone a le ribega ka seroto, eupša o le hloma sehlomong sa lona, la bonegela bohle ka ngwakong. Le sa lena seetša a se bonegele batho ka tsela yeo, gore ba tle ba bone mediro ya lena ye mebotse, gomme ba tumiše Tatagolena wa legodimong.” “Le se ke la gopola gore ke tlile go fediša melao ya Moshe le dithuto tša baprofeta. Ga se ka tla go di fediša, eupša ke tlile go dira gore tlhathollo ya tšona ya nnete e kwešišege. Ruri, ke le botša gore ge legodimo le lefase di sa le gona, ga go tlhakanyana goba seripana sa tlhaka ya molao wo mongwenyana wa Moshe ye e tlago phumolwa. Melao yohle e swanetše go hwetša tlhathollo ya yona ya nnete. Ka gona, yo a ka fedišago molawana wo monnyane gare ga melao ye gomme a botša ba bangwe gore e fedišitšwe, o tla bonwa e le yo monnyane mmušong wa Modimo. Eupša yo a e phethago gomme a botša ba bangwe gore le bona ba e phethe, o tla bonwa e le yo mogolo mmušong wa Modimo. Ka gona, ke le botša gore ge le sa phale boramangwalo kudu le Bafarisei ka go dira tše di nyakwago ke Modimo, le ka se tsene mmušong wa gagwe.” “Le kwele gore kgale batho ba ile ba botšwa gore ba se ke ba bolaya motho; yo a ka bolayago motho o swanetše go išwa tshekong. Ge e le nna ke le botša gore mang le mang yo a ka befelelwago ngwanabo, o swanetše go išwa tshekong; yo a ka rego ‘selokewena’ go ngwanabo, o swanetše go išwa Kgorongkgolo ya setšhaba; le yo a ka rego ‘setlaela tena’ go ngwanabo, o lebanwe ke go ya mollong wa hele. Ka gona, ge o ka re o iša mpho go Modimo aletareng, wa elelwa o le moo gore ngwaneno o ngongorega ka wena, o tlogele mpho ya gago moo pele ga aletare, o yo boelana le ngwaneno pele, o kgone o iša mpho ya gago. “O boelane le mosekišananago ka pela le sa le tseleng ya go ya tshekong, gore a se yo go gafela go moahlodi, moahlodi a go gafela go maphodisa, mme wa lahlelwa kgolegong. Ruri, ke go botša gore o ka se tšwe gona o sešo wa lefa tšheletenyana ya mafelelo ya kotlo ya gago.” “Le kwele gore go thwe: ‘O se ke wa otswa.’ Ge e le nna ke le botša gore mang le mang yo a lebelelago mosadi ka go mo duma, o šetše a otswitše le yena ka pelong. Ka gona, ge leihlo la gago la la go ja le go diriša dibe, le gonye o le lahle. Go kaone gore o lobe setho se tee, go na le gore mmele wa gago ka moka o lahlelwe heleng. Ge seatla sa gago sa la go ja se go diriša dibe, se ripe o se lahle. Go kaone gore o lobe setho se tee, go na le gore mmele wa gago ka moka o lahlelwe heleng.” “Go boletšwe le go re: ‘Yo a hlalago mosadi wa gagwe a mo fe lengwalo la tlhalo.’ Ge e le nna ke le botša gore ge monna a ka hlala mosadi wa gagwe e se ka baka la bootswa, o mo dira gore a otswe ka go nyalwa gape; le yena monna yoo a mo nyalago o a otswa.” “Le gona le kwele gore kgale batho ba ile ba botšwa gore ba se ke ba tshela dikeno tša bona, le gona ba phethe tše ba di enetšego Morena. Ge e le nna ke le botša gore le go ena le se ke la ena, le ge e le ka legodimo, ka gobane ke setulo sa bogoši sa Modimo; goba ka lefase, ka gobane ke bogato bja gagwe; goba ka Jerusalema, ka gobane ke motse wa Kgoši ye kgolo. Motho a se ke a ena le ka hlogo ya gagwe, ka ge a ka se kgone go fetoša le ntsana ya moriri wa gagwe ya ba ye tšhweu goba ye ntsho. Sa lena e be ‘ee’ ge eba le dumela, goba ‘aowa’ ge eba le gana; se se oketšwago se tšwa go Yomobe.” “Le kwele gore go thwe: ‘Leihlo le lefša ka leihlo, leino ka leino.’ Ge e le nna ke le botša gore le se ke la itefeletša go batho ba ba le fošeditšego. Ge motho a ka go itia thama ya la go ja ka seatla, o mo retollele le ye nngwe. Le ge motho a ka ikemišetša go yo go bega kgorong gore a go tšeele seaparo sa ka gare, o mo lese a tšee le sona seaparo sa ka ntle. Le ge motho a ka go gapeletša gore o sepele le yena kilometara e tee, o sepele naye kilometara tše pedi. Ge motho a ka go kgopela selo, o mo fe sona; yo a nyakago o mo adima selo, o mo adime sona.” “Le kwele gore go thwe: ‘O rate ngwaneno, lenaba la gago lona o le hloye.’ Ge e le nna ke le botša gore le rate manaba a lena, le rapelele bao ba le hlomerego, gore le tle le be bana ba Tatagolena wa legodimong, yo a hlabišetšago baloki le bakgopo letšatši go swana, le pula a e nešetšago ba ba dirago tše di lokilego le ba ba dirago tše mpe. Na Modimo a ka le putsetša go rata fela bao ba le ratago? Ga ke re seo ke se se dirwago le ke balekgetho? Gomme ge le botšišana maphelo le ba gabolena fela, le phala ba bangwe ka eng? Ga ke re seo ke se se dirwago le ke baditšhaba? Ebang baloki ba ba feletšego, bjalo ka ge Tatagolena wa legodimong e le moloki yo a feletšego.” “Le hlokomele gore mediro ya lena ya borapedi le se e dire pepeneneng gore batho ba bone tše le di dirago; ge le ka dira bjalo le ka se hwetše moputso go Tatagolena wa legodimong. “Ka gona, ge o efa mohloki selo, o se ke wa dira gore o bonwe ke batho, wa etša baikaketši ka disinagogeng le mo mekgotheng, gore ba retwe ke batho. Ruri, ke le botša gore ke gona ge ba hweditše moputso wa bona ka botlalo. Wena ge o thuša mohloki, seo e be khupamarama. Ke mo seo o se dirilego se ka se tsebjego ke motho. Gomme Tatago, yo a bonago tše di dirwago ka sephiring, o tla go putsa.” “Ge le rapela, le se ke la etša baikaketši. Bona ba rata go rapela ba eme ka disinagogeng le magahlanong a ditsela, gore ba bonwe ke batho. Ruri, ke le botša gore ke gona ge ba hweditše moputso wa bona ka botlalo. Wena ge o rapela, o tsene ka phapošing ya gago, o tswalele lemati, o rapele Tatago yo a sa bonwego. Gomme Tatago, yo a bonago tše di dirwago ka sephiring, o tla go putsa. “Ge le rapela le se ke la touta go swana le baditšhaba, gobane bona ba gopola gore ba tla kwewa ka ge dithapelo tša bona e le tše telele. Le se ke la etša bona, gobane Tatagolena o tseba tše le di hlokago le pele le mo kgopela tšona. Ka gona, ge le rapela le re: “ ‘Tatewešo wa magodimong, leina la gago a le kgethwe; mmušo wa gago a o tle; thato ya gago a e dirwe mo lefaseng bjalo ka ge e dirwa legodimong. O re fe lehono bogobe bja rena bja ka mehla. O re lebalele melato ya rena bjalo ka ge le rena re lebalela ba ba nago le melato go rena. O se re iše molekong, o upše o re phološe bobeng.’ “Ge le lebalela ba bangwe diphošo tše ba le šitelago ka tšona, Tatagolena wa legodimong le yena o tla le lebalela tša lena. Eupša ge le sa lebalele ba bangwe diphošo tša bona, gona le Tatagolena a ka se le lebalele tša lena.” “Ge le ikona dijo le se ke la itira tše nkego le nyamile la etša baikaketši. Bona ba šošobanya difahlego gore ba bonwe ke batho gore ba ikona dijo. Ruri, ke le botša gore ke gona ge ba hweditše moputso wa bona ka botlalo. Wena ge o ikona dijo, o hlape mahlo, o tlole moriri, gore batho ba se ke ba lemoga gore o ikona dijo – go tsebe fela Tatago yo a sa bonwego. Gomme Tatago, yo a bonago tše di dirwago ka sephiring, o tla go putsa.” “Le se ke la ipolokela mahumo mo lefaseng mo go nago le ditšhwele le diji, le mo go thubago mahodu a utswa. Lena le ipolokele mahumo legodimong mo tšhwele le diji di sa kgonego go senya, mo go sa thubego mahodu a utswa. Gobane mo go lego lehumo la motho ke mo go bago pelo ya gagwe.” “Mahlo ke lebone la motho. Ge mahlo a motho a lokile motho o ba seetšeng; eupša ge mahlo a gagwe a se a loka, o ba leswiswing. Bjale ge seetša se se lego mothong e le leswiswi, o tla ba leswiswing le legologolo!” “Ga go motho yo a ka hlankelago marena a mabedi; o tla hloya yo mongwe, a rata yo mongwe; a botegela yo mongwe, a nyatša yo mongwe. Le ka se kgone go hlankela Modimo le mahumo ka nako e tee. “Ke ka baka leo ke le botšago gore le se ke la balabala mabapi le dijo le dino le diaparo tše le di hlokago bophelong. Ga ke re bophelo bo bohlokwa go phala dijo? Mmele le wona ga ke re o bohlokwa go phala diaparo? Lebelelang dinonyana tše di fofago moyeng. Ga di bjale peu, ga di bune mabele tša a tšhela ka matlolong; le ge go le bjalo Tatagolena wa legodimong o a di otla. Na lena ga le ba bohlokwa kudu go feta dinonyana? Kgane ke mang mo go lena yo a ka ikokeletšago bophelo gannyane ka go bo balabalela? “Gomme diaparo tšona le balabalelang ka tšona? Lebelelang ka mo matšoba a naga a melago ka gona: ga a šome, ga a ithokele diaparo. Eupša ke le botša gore le Kgoši Solomone, le ge a be a humile le dinala, o be a sa tšhephe bjalo ka le lengwe la ona. Bjale ge ešita le bjang bja naga, bjo bo bago gona lehono, ka moswane bo tsoge bo lahletšwe sebešong, Modimo a bo apeša ka mokgwa wo, na lena a ka nama a se le apeše le go feta, lena ba tumelo ye nnyane? “Ka gona le se ke la balabala la re: ‘Na re tla ja eng, re tla nwa eng, re tla aparang?’ Tšeo ka moka ke tše baditšhaba ba dulago ba balabala ka tšona. Tatagolena wa legodimong o a tseba gore tšohle tšeo le phela ka tšona. Lena sa pele le šomele mmušo wa Modimo le tše Modimo a nyakago gore le di phethe, gomme tše dingwe tšeo ka moka o tla le okeletša ka tšona. Ka gona le se ke la tshwenyega ka tša ka moswane, ka gobane la ka moswane le na le a lona mathata. Letšatši le lengwe le le lengwe le na le mathata a a le lekanego.” “Le se ke la bona ba bangwe diphošo, gore le lena Modimo a se tlo le bona diphošo, ka gobane ka moo le bonago ba bangwe diphošo ke ka moo le lena Modimo a tlago le bona diphošo, le melao yeo le e šomišago go ba bangwe le go lena Modimo o tla e šomiša. O reng o bona phatšana ye e fahlilego ngwaneno, eupša o sa bone kota ye e fahlilego wena? Na o ka botša ngwaneno wa re: ‘A ke go fahlolle phatšana ye e go fahlilego,’ mola wena o fahlilwe ke kota? Moikaketši tena! Pele iphahlolle kota ye e go fahlilego, ke mo o tlago bona gabotse, wa kgona o fahlolla ngwaneno phatšana ye e mo fahlilego. “Se sekgethwa le se ke la se fa dimpša – di ka retologela go lena tša le hlasela. Magakabje a lena le se a lahlele pele ga dikolobe – di ka a gata ka ditlhako.” “Kgopelang, gomme le tla fiwa; nyakang, gomme le tla hwetša; kokotang, gomme le tla bulelwa. Gobane mang le mang yo a kgopelago o a fiwa, yo a nyakago o a hwetša, le yo a kokotago o tla bulelwa. Ke mang mo go lena yo a ka fago morwagwe leswika ge a mo kgopela bogobe? Goba a mo fa noga ge a mo kgopela hlapi? Ge ešita le lena le lego ba babe le tseba go fa bana ba lena tše botse, na Tatagolena wa legodimong yena a ka napa a se le phale ka go fa bao ba mo kgopelago dilo tše dibotse? “Tšohle tše le ratago gore batho ba le direle tšona, le lena le ba direle tšona. Se se akaretša melao ya Moshe le dithuto tša baprofeta.” “Le tsene ka kgoro ye e pitlaganego, ka gobane kgoro ye e išago tahlegong e ahlame, le tsela ye e yago go yona ke ye kgolo, gomme ba ba sepelago ka yona ke ba bantši. Eupša kgoro ye e išago bophelong yona e pitlagane, le tsela ya yona ke ye tshese, gomme ba ba e hwetšago ga ba nene.” “Le itoteng go baprofeta ba maaka, ba ba tlago go lena ka boleta bjalo ka dinku, mola ka therešo e le diphiri tše bogale. Le tla ba tseba ka ditiro tša bona. Motho ga a fule diterebe mohlareng wa meetlwa, goba mago monganeng. Mohlare wo mobotse o enywa dienywa tše dibotse; wo e sego wo mobotse o enywa dienywa tše e sego tše dibotse. Mohlare wo mobotse o ka se enywe dienywa tše e sego tše dibotse, le wo o sego wo mobotse o ka se enywe dienywa tše dibotse. Gomme mohlare wo mongwe le wo mongwe wo o sa enywego dienywa tše dibotse o a rengwa, wa lahlelwa mollong. Le baprofeta ba maaka le tla ba tseba ka ditiro tša bona.” “Ga se mang le mang yo a mpitšago a re ‘Morena, Morena,’ yo a tlago tsena legodimong, eupša go tla tsena fela bao ba phethago thato ya Tate wa legodimong. Mohla wa Letšatši la Kahlolo ba bantši ba tla re go nna: ‘Morena, Morena, kgane ga se ra botša batho melaetša ya Modimo ka maatla a gago, ra leleka bademone ka go bolela leina la gago, ra dira le mehlolo ye mentši?’ Ke mo ke tlago ba fetola ka re: ‘Ga se ka ka ka le tseba. Tlogang go nna, lena ba go tshela melao ya Modimo!’ “Ka gona, mang le mang yo a kwago mantšu a a ka gomme a phetha tše ke di bolelago, o swana le monna yo bohlale yo a agilego ngwako wa gagwe leswikeng. Gwa na pula ye kgolo, dinoka tša falala, le phefo ya tšutla ngwako woo kudu. Eupša wa se ke wa wa, ka gobane o agilwe leswikeng. “Eupša yo a kwago mantšu a a ka gomme a se phethe tše ke di bolelago, o swana le monna wa setlatla yo a agilego ngwako wa gagwe lešabašabeng. Gwa na pula ye kgolo, dinoka tša falala, le phefo ya tšutla ngwako woo kudu, gomme wa wa, wa pšhatlagana.” Ge Jesu a fetša go bolela mantšu ao, lešaba la makatšwa ke ka moo a bego a ruta batho ka gona, ka gobane o be a sa ba rute go swana le boramangwalo; o be a ba ruta e le yo a nago le maatla a go dira bjalo. Ge Jesu a theoga thabeng, lešaba le legolo le ile la mo latela. Gwa nama gwa tla monna yo mongwe go yena a swerwe ke bolwetši bja letlalo bja go mo tšhilafatša, a khunama pele ga gagwe a re: “Morena, etse ge o rata o ka mphodiša ka hlweka!” Jesu a otlolla letsogo a mo kgwatha a re: “Ke a rata; hlweka!” Gateetee monna yola a fola. Ke moka Jesu a re go yena: “O se ke wa botša motho, eupša o ye go moprista a go bone, gomme o dire sehlabelo se se laetšwego ke Moshe, e be bohlatse go batho bja gore o hlwekile.” Ge Jesu a tsena motseng wa Kapernaume, a gahlanetšwa ke molaodi wa bahlabani ba lekgolo gomme yena a mo kgopela gore a mo thuše a re: “Morena, mohlanka wa ka o a babja, o robetše kua gae; o rephile ditho, le gona o lwala kudu.” Jesu a re: “Ke tla ya ka mo fodiša.” Molaodi a mo fetola a re: “Morena, ga se ka swanela gore o tsene ka lapeng la ka. Eno bolela lentšu le tee, gomme mohlanka wa ka o tla fola. Le nna ke le motho yo a bušwago, ke na le bahlabani ba ke ba bušago. Ge ke re go mohlabani: ‘Eya kua!’ o a ya; ge ke re go yo mongwe: ‘Etla mo!’ o a tla, le ge ke re go yo mongwe mohlanka wa ka: ‘Dira se!’ o a se dira.” Ge Jesu a ekwa mantšu ao a kgotsa, gomme a botša batho ba ba bego ba mo latela a re: “Ruri, ke a le botša, ga se ka ka ka hwetša motho yo a nago le tumelo ye kaaka mo go Baisraele. Ke le botša gore ba bantši ba tla tšwa bohlabela le bodikela, ba tla ba ja le Abrahama le Isaka le Jakobo legodimong. Eupša bao ba bego ba loketše go tsena legodimong ba tla ntšhetšwa ka ntle leswiswing le legolo, moo ba tlago lla ba lomanya meno.” Ka morago Jesu a re go molaodi yola: “Boela gae; se o se dumetšego se tla direga.” Gomme mohlanka wa molaodi yola a fola ka yona nako yeo. Jesu a ya lapeng la Petrose, gomme a hwetša mmatswale wa Petrose a robetše a swerwe ke letadi. Jesu a mo kgwatha letsogo, mme a fola letadi, a tsoga, a fa Jesu dijo. Ge leswiswi le swara, gwa tlišwa batho ba bantši go yena ba ba tsenwego ke bademone. Jesu a leleka meoya yeo ka go bolela lentšu fela, a fodiša le bohle ba ba babjago, gore go phethege se se boletšwego ke moprofeta Jesaya mola a re: “Yena o tšere malwetši a rena, a ithweša le mefokolo ya rena.” Ge Jesu a bona lešaba le mmokanetše, a laela barutiwa ba gagwe gore ba tshelele ka mošola wa letsha. Ramangwalo yo mongwe a tla go yena a re: “Moruti, nna ke tla go latela gohle mo o yago gona.” Jesu a re go yena: “Diphukubje di na le ditšaba, le dinonyana di na le dihlaga; Morwamotho yena ga a na mo a fihlago hlogo gona.” Yo mongwe yo le yena e bego e le morutiwa wa gagwe a re: “Morena, ntumelele ke yo boloka tate pele.” Jesu a mo fetola a re: “Ntatele, o lese bahu ba boloke bahu ba bobona.” Jesu a tsena ka leselawatleng gomme barutiwa ba gagwe ba mo latela. Ka bjako gwa tsoga ledimo le legolo letsheng, gomme leselawatle la khupetšwa ke maphoto. Jesu yena o be a robetše. Barutiwa ba ya go yena, ba mo tsoša ba re: “Morena, re phološe, re a hwa!” Jesu a ba botšiša a re: “Le reng le tšhogile, lena ba tumelo ye nnyane?” Ke moka a tsoga, a kgalema phefo le maphoto, gwa napa gwa homola, gwa re tuu. Batho ba kgotsa ba re: “Ke motho mang yo ge phefo le maphoto di mo theeletša?” Ge Jesu a fihla nageng ya Gadara ka mošola wa letsha, banna ba babedi ba ba bego ba etšwa mabitleng ba gahlana le yena. Ba be ba tsenwe ke bademone, gomme ba le kotsi mo go bego go se motho yo a bego a ka beta pelo a feta ka tsela yeo. Gateetee ba goa ba re: “O na le taba mang le rena, wena Morwa wa Modimo? A o tlilo re tlaiša pele ga nako?” Mola kgojana go be go na le mohlape wo mogolo wa dikolobe o fula. Bademone bao ba kgopela Jesu ba re: “Ge eba o tlilo re leleka bathong ba, gona re romele mohlapeng wola wa dikolobe.” Jesu a ba fetola a re: “Sepelang!” Ka gona bademone bao ba tloga ba yo tsena dikolobe tšela. Mohlape woo ka moka wa thetheoga leribeng le legolo, wa wela ka letsheng, wa betwa ke meetse. Banna ba ba bego ba dišitše dikolobe tšela ba tšhaba, ba tsena motseng, ba botša batho taba tšeo ka moka le se se hlagetšego banna bale ba bademone. Ka gona batho bohle ba tšwa motseng go yo bona Jesu, gomme ge ba mo hweditše ba mo kgopela gore a tloge nageng ya bona. Jesu a tsena ka leselawatleng, a tshela letsha, a gomela motseng wa gabo. Ke moka batho ba bangwe ba tliša monna yo a rephilego ditho go yena, a robetše legogweng. Ge Jesu a bona ka moo ba dumelago go yena ka gona, a re go morephaditho: “Beta pelo, ngwanaka! O lebaletšwe dibe tša gago.” Ke ge boramangwalo ba bangwe ba botšana ba re: “Motho yo o nyefola Modimo!” Jesu a lemoga se ba se gopolago, mme a re: “Le reng le gopola dilo tše mpe ka dipelong tša lena? Se bonolo ke eng, go re: ‘O lebaletšwe dibe,’ goba go re: ‘Emelela o sepele’? Bjale ge, ke tla le laetša gore Morwamotho o na le maatla lefaseng a go lebalela batho dibe.” Ke ge a re go monna yoo wa go repha ditho: “Emelela, o tšee legogwa la gago, o ikele gae!” Monna yola a emelela, a ya gae. Ge lešaba le bona seo, la boifa gomme la tumiša Modimo ka ge a file batho maatla a makaaka. Ge Jesu a tloga fao a bona monna yo mongwe yo leina la gagwe e bego e le Mateu a dutše ngwakong wa lekgetho. A re go yena: “Ntatele!” Mateu a emelela a mo latela. Ya re ge Jesu a le dijong ka ngwakong wa Mateu, balekgetho ba bantši le badiradibekabona ba tla ba ja le yena le barutiwa ba gagwe. Bafarisei ge ba bona seo ba botšiša barutiwa ba Jesu ba re: “Moruti wa lena o reng a eja le balekgetho le badiradibekabona?” Jesu a ba kwa, gomme a ba fetola a re: “Ngaka ga e nyakwe ke batho ba ba iketlilego, e nyakwa ke ba ba babjago. Sepelang le yo botšiša gore na Mangwalo a Makgethwa a ra go reng a a rego: ‘Se ke se nyakago ke ge le ka ba le lešoko go na le gore le ntirele dihlabelo.’ Ga se ka tlela go bitša ba ba phethago thato ya Modimo, ke tletše go bitša badiradibe.” Barutiwa ba Johanese Mokolobetši ba tla go Jesu, ba mmotšiša ba re: “Ke ka baka lang rena le Bafarisei re ikona dijo gantši, barutiwa ba gago bona le gatee ba sa ikone?” Jesu a ba fetola a re: “Kgane baeng ba ba tlilego monyanyeng ba ka hlonama monyadi a sa na le bona? Eupša nako e tla tla yeo ka yona monyadi a tlago tlošwa go bona, ya ba gona ba ikonago dijo. “Ga go motho yo a pharago segaswa se sefsa seaparong se setala, ka gobane se ka šošobana sa oketša lešoba lela mola seaparong. Le gona ga go motho yo a tšhelago beine ye e sa tšogo hlotlwa ka makukeng a kgale, ka gobane makuka ao a ka palega, beine ya tšhologa, le ona makuka a loba. Beine ye e sa tšogo hlotlwa e tšhelwa ka makukeng a mafsa, gomme yona le makuka bobedi tša lotega.” Ya re ge Jesu a sa bolela, mookamedi yo mongwe wa sinagoge a tla go yena, a khunama pele ga gagwe a re: “Morwedi wa ka o sa tšo hlokafala, eupša etla o mmee diatla, gomme o tla buša a phela.” Jesu a emelela a mo latela, le barutiwa ba gagwe ba ya le yena. Gwa tla mosadi yo mongwe yo a bego a feditše mengwaga ye lesome le metšo ye mebedi a bolawa ke bolwetši bja ngope, gomme a kgwatha morumo wa seaparo sa gagwe. O be a rile ka pelong: “Ge nka no kgwatha seaparo sa gagwe, ke tla fola.” Jesu a retologa, a mmona a re: “Beta pelo, morwedi wa ka! Tumelo ya gago e go fodišitše.” Ka yona nako yeo mosadi yoo a fola. Jesu ge a tsena ka ngwakong wa mookamedi yola, a bona baletši ba dinaka le lešaba le le tladitšego lešata la sello, a re: “Etšwang! Ngwanenyana yo ga se a hwa – o ithobaletše.” Gomme bona ba mo sega. Ge lešaba le seno ntšhetšwa ntle, Jesu a tsena ka phapošing ya ngwanenyana yola, a mo swara ka letsogo, mme ngwanenyana a emelela. Taba tšeo tša phatlalala seleteng seo ka moka. Ge Jesu a tloga fao a latelwa ke banna ba babedi ba difofu. Ba be ba goa ba re: “Re šokele, Morwa wa Dafida!” Ge Jesu a tsene ka ngwakong, banna bale ba difofu ba tla go yena, gomme yena a ba botšiša a re: “Na le dumela gore nka le fodiša?” Bona ba mo fetola ba re: “Ee, Morena!” Ke moo Jesu a ba kgwathilego mahlo a re: “A go direge ka mo le dumelago ka gona!” Gomme ba buduloga mahlo. Jesu a ba botša tsebegokwa a re: “Le se ke la botša motho taba ye!” Eupša bona ge ba tloga moo ba phatlalatša taba yeo ya gagwe seleteng seo ka moka. Ge ba tloga, batho ba bangwe ba mo tlišetša monna wa semumu yo a tsenwego ke modemone. Ya re ge modemone yoo a seno lelekwa, monna yola a thoma go bolela, gomme lešaba la kgotsa la re: “Taba ya mohuta wo ga se ya ka ya direga mo Israele!” Eupša Bafarisei bona ba re: “Maatla a go leleka bademone o a fiwa ke kgoši ya bona.” Jesu a šika le metse le metsana ka moka, a ruta batho ka disinagogeng, a bega Taba ye Botse ya mmušo wa Modimo, a fodiša batho malwetši le mafokodi a bona. Ya re ge a bona lešaba, a le šokela ka gobane le be le tshwenyegile le se na mothuši, le le bjalo ka dinku tše di hlokago modiša. Ka gona a re go barutiwa ba gagwe: “Puno ke ye ntši, eupša babuni ga ba nene. Rapelang Morena, yo e lego yena mong wa puno, gore a romele babuni tšhemong ya gagwe.” Jesu a bitša barutiwa ba gagwe ba lesome le metšo ye mebedi, a ba fa maatla a go leleka meoya ye mebe le a go fodiša batho malwetši le mafokodi a bona. Maina a baapostola bao ba lesome le metšo ye mebedi šea: Wa mathomo e bile Simone, yo a bego a bitšwa Petrose, le Andrease, ngwanabo; Jakobose le Johanese, ngwanabo, barwa ba Sebediose; Filipi le Bartolomeose, Thomase le Mateu, molekgetho; Jakobose, morwa wa Alfeose, le Thadeose; Simone, Mollelatokologo, le Judase Iskariote, wa go eka Jesu. Banna bao ba lesome le metšo ye mebedi ba ile ba rongwa ke Jesu, a ba laela a re: “Le se ke la ya nageng ye e lego ya baditšhaba, goba motseng wo mongwe wa Basamaria. Le upše le ye go dinku tše di timetšego, e lego setšhaba sa Israele. Eyang le goeletše le re: ‘Mmušo wa Modimo o batametše!’ Le fodiše balwetši, le tsoše bahu, le fodiše le ba ba swerwego ke malwetši a letlalo a a ba tšhilafatšago gore ba hlweke, le be le lelekeng le bademone. Le filwe fela, le lena le feng fela. Le se ke la tloga le tšhelete ka merabeng ya lena – e ka ba ya gauta, goba ya silibera, goba ya mphiri. Le gona le se ke la tšea mokotla wa leeto, goba seaparo sa bobedi, goba dieta, goba lepara, gobane mošomi o lebanwe ke go fiwa dijo. “Ge le tsena motseng goba motsaneng le botšiše gore na le ka dula ka ga mang. Le dule gona go fihlela ge le tloga motseng woo. Ge le tsena ka lapeng le lengwe le dumediše. Ge ba lapa leo ba ka le dumela, madume a lena a tla ba tšwela mohola; ge ba ka se le dumele, gona madume a lena a ka se ba hole ka selo. Ge motho a ka se le amogele goba a se le theeletše, le tšweng ka lapeng la gagwe goba motseng wa gabo le hlohlora marole maotong a lena. Ruri, ke le botša gore ka Letšatši la Kahlolo Modimo o tla otla batho ba motse woo gagolo go feta ba Sodoma le ba Gomora!” “Bonang, ke le roma bjalo ka dinku ge di romelwa diphiring. Ka gona le ntšhe mahlo dinameng bjalo ka dinoga, le be le ile bomenetša bjalo ka maeba. Le itote, ka gobane go tla ba le batho ba ba tlago le gafela dikgorong tša tsheko, ba le otla ka tshelane ka disinagogeng. Le tla išwa pele ga babuši le dikgoši ka baka la ka, ya ba ge le hweditše sebaka sa go begela bona le baditšhaba Taba ye Botse ya mmušo wa Modimo. Ge ba le iša dikgorong tša tsheko, le se ke la tshwenyega gore le yo bolelang, le gore le yo bolela bjang; ge nako yeo e fihla, le tla fiwa se le swanetšego go se bolela. Gobane tše le tlago di bolela e tla be e se tša lena – di tla be di bolelwa ke Moya wa Tatagolena ka lena. “Motho o tla gafa ngwanabo gore a bolawe, le tatagongwana o tla gafa ngwana wa gagwe; bana ba tla hlanamela batswadi ba bona, ba ba bolaiša. Le tla hloiwa ke batho ka moka ka baka la ka. Eupša yo a ka kgotlelelago go iša pheletšong o tla phološwa. Ge ba le hlomara motseng wo mongwe, le tšhabeleng go wo mongwe. Ruri, ke le botša gore Morwamotho o tla tla le sešo la fetša go bega molaetša wa mmušo wa Modimo metseng ka moka ya Israele. “Morutiwa ga a fete morutiši wa gagwe, le lekgoba ga le fete mong wa lona. Ka gona, morutiwa a se balaele ge a hlagelwa ke tše di hlagetšego morutiši wa gagwe, le lekgoba le se belaele ge le hlagelwa ke tše di hlagetšego mong wa lona. Ge mong wa lapa a bitšwa Beeltsebulo, na ba lapa la gagwe bona ba ka se ba ree maina a mabe le go feta?” “Ka gona, le se ke la boifa motho, gobane ga go se se bipilwego se se ka se kego sa bipollwa, le sephiri se se ka se kego sa tsebja ga se gona. Se ke le botšago sona sephiring lena le se bolele phatlalatša; se le se sebelwago ka ditsebeng lena le se goelele godimo ga dintlo. Le se ke la boifa bao ba bolayago mmele, eupša ba sa kgone go bolaya moya; le upše le boife Modimo yo a kgonago go fediša mmele le moya heleng. Ga ke re diphorogohlo tše pedi di rekwa ka sente? Le ge go le bjalo le e tee ya tšona e ka se wele fase Tatagolena a sa tsebe. Le lena meriri yohle ya lena e badilwe. Ka gona, le se ke la boifa – lena le ba bohlokwa go feta diphorogohlo tše dintši.” “Mang le mang yo a ipegago phatlalatša gore ke wa ka, le nna ke tla mmegela Tate wa legodimong gore ke wa ka. Eupša yo a ntatolago phatlalatša, le nna ke tla mo latola go Tate wa legodimong.” “Le se ke la gopola gore ke tlišitše boiketlo lefaseng. Ga se ka tliša boiketlo, eupša ke tlišitše phapano. Ke tlile go lweša morwa le tatagwe, morwedi le mmagwe, ngwetši le mmatswalagwe – ba gabomotho e tla ba bona manaba a gagwe. “Yo a ratago tatagwe goba mmagwe go feta nna, ga a lokela go ba wa ka, le yo a ratago morwagwe goba morwediagwe go feta nna, ga a lokela go ba wa ka. Yo a sego a ikemišetša go tlaišwa bjalo ka nna mme a ntatela, ga se a ntokela. Yo a ipabalelago o tla lahlega, eupša yo a itatolago ka baka la ka o tla phelela sa ruri.” “Yo a le amogelago o amogela nna; le yo a amogelago nna o amogela yo a nthomilego. Yo a amogelago motseta wa Modimo ka gobane e le motseta wa Modimo o tla fiwa moputso wa motseta yoo. Le yo a amogelago moloki ka gobane e le moloki o tla fiwa moputso wa moloki. Yo a fago yo mongwe wa ba bannyane mo go balatedi ba ba ka sego sa meetse a go tonya ka gobane e le molatedi wa ka, ruri, ke le botša gore a ka se tingwe moputso.” Ge Jesu a fetša go laya barutiwa ba gagwe ba lesome le metšo ye mebedi, a tloga fao gomme a yo ruta batho, a bega molaetša wa gagwe metseng ye mengwe ya selete seo. Ge Johanese Mokolobetši ka kgolegong a ekwa ka tše Kriste a di dirago, a roma barutiwa ba bangwe ba gagwe go yena. Bona ge ba fihla go yena ba mmotšiša ba re: “Na ke wena yo go letetšwego gore o tla tla, goba re letele yo mongwe?” Jesu a ba fetola a re: “Eyang le botše Johanese tše le di kwago le tše le di bonago: difofu bjale di a bona, digole di a sepela, ba ba swerwego ke malwetši a letlalo a go ba tšhilafatša ba a fodišwa ba hlweka, ditholo di a kwa, bahu ba a tsošwa, le badiidi ba begelwa Taba ye Botse ya mmušo wa Modimo. Go lehlogonolo bao ba sa mpelaelego!” Ge barutiwa ba Johanese ba tloga, Jesu a botšiša lešaba mabapi le Johanese a re: “Mola le etšwa motseng le eya lešokeng, le be le yo bonang? Kgane le be le yo bona lehlaka le le tšokotšwago ke phefo? Ke re le be le tšwetše go yo bonang? Afa le be le sa ye go bona monna yo a aparago diaparo tša masethesethe? Gape ba ba aparago diaparo tša masethesethe ba dula ka dintlong tša magoši. Ke re le be le tšwetše go yo bonang? Afa le be le se la yo bona moprofeta? Ruri, ke le botša gore le bone wa go feta le moprofeta. Gobane Johanese ke yena yo Mangwalo a Makgethwa a mmolelago a re: ‘Ke roma motseta wa ka a go eta pele a go kgorela tsela.’ Ruri, ke le botša gore ga se gwa ka gwa tswalwa motho wa go feta Johanese Mokolobetši. Eupša yo e lego yo monnyane mmušong wa Modimo o a mo feta. Go tloga mehleng ya Johanese go fihlela gonabjale mmušo wa Modimo o hlaselwa kudu, gomme barukhuhli ba leka go o thopa. Go fihlela ka nako ya Johanese baprofeta ka moka le melao ya Moshe ba be ba bolela ka mmušo wo; gomme ge eba le nyaka go dumela se ba bego ba se bolela, molaetša wa bona ke wa go re: Johanese ke yena Eliya yo a bego a tlilo tla. Yo a nago le tsebe a a kwe! “Batho ba mehleng yeno nka ba swantšha le eng? Ba swana le bana ba ba dutšego mapatlelong a motse ba goelelana ba re: ‘Re le leleditše dinaka, la se bine! Ra le retela sereto sa mahloko, fela la se lle!’ Johanese o be a ikona dijo a bile a sa nwe beine, eupša batho ba re: ‘O na le modemone!’ Gwa tla Morwamotho a eja, a bile a enwa, gomme ba re: ‘Bonang motho wa sejagobe, wa go nwa kudu, mogwera wa balekgetho le badiradibekabona!’ Bohlale bja Modimo bjona bo hlatselwa ke tše a di dirilego.” Jesu a thoma go kgala badudi ba metse yeo a dirilego mehlolo ye mentši go yona, ka ge ba ile ba se sokologe dibeng tša bona, a re: “Go madimabe lena badudi ba Gorasine! Go madimabe lena badudi ba Betsaida! Ge nkabe mehlolo ye e dirilwego go lena e dirilwe Tirose le Sidone, batho ba gona nkabe e le kgale ba apere diaparo tša mogohla, ba itšhetše ka melora go laetša gore ba sokologile! Fela ke le botša gore ka Letšatši la Kahlolo Modimo o tla le otla gagolo go feta batho ba Tirose le ba Sidone. Ge e le lena badudi ba Kapernaume, kgane le gopola gore le tla rotošetšwa legodimong? Gape sa lena ke go theošetšwa fasefase bodulabahu. Ge nkabe mehlolo ye e dirilwego go lena e dirilwe Sodoma, motse woo o ka be o sa le gona le lehono! Fela ke le botša gore ka Letšatši la Kahlolo Modimo o tla le otla gagolo go feta batho ba Sodoma.” Ka nako yeo Jesu a re: “Tate, wena Morena wa legodimo le lefase, ke a go reta ka ge o bontšhitše ba go hlalefetšega gabonolo tše o di utetšego ba bohlale le ba go rutega. Ee, Tate, ke ka mo o nyakilego gore go be ka gona. “Dilo ka moka ke di filwe ke Tate. Ga go yo a tsebago Morwa ge e se Tate; le yo a tsebago Tate ntle le Morwa ga a gona, ge e se yoo Morwa a ratago go mo utollela yena. “Etlang go nna bohle ba le lapilego gape le imelwago, gomme ke tla le khutšiša. Phelang ka dithuto tša ka, gomme le ithuteng ka nna, ka gobane ke yo botho, ke wa pelo ya boikokobetšo, gomme ke tla le khutšiša. Gobane go phetha tše ke le rutago tšona ga go bothata, le mediro ye ke le fago yona go bonolo go e dira.” Ka morago ga fao ka letšatši la Sabatha Jesu a putla ka mašemong a korong. Barutiwa ba gagwe ba be ba swerwe ke tlala, ka gona ba tšama ba ekga diako ba di ja. Ge Bafarisei ba bona seo, ba re go Jesu: “Bona, barutiwa ba gago ba dira se se sego sa dumelelwa ka letšatši la Sabatha!” Jesu a ba fetola a re: “Na ga se la bala se Dafida a kilego a se dira mohla wola yena le banna ba gagwe ba swerwe ke tlala? O ile a tsena ka ngwakong wa Modimo, mme yena le banna ba gagwe ba ja dinkgwa tše di bego di abetšwe Modimo, se yena le banna ba gagwe ba bego ba se ba dumelelwa go se ja; e le fela baprista ba ba dumeletšwego. Kgane ga se la bala mo melaong ya Moshe gore ka letšatši la Sabatha baprista ba tshela molao wa Sabatha ka Tempeleng, eupša ba se be le molato? Ke le botša gore mo go na le sa go feta Tempele. Ge le ka be le lemoga gore Mangwalo a Makgethwa a ra go reng ge a re: ‘Se ke se nyakago ke ge le ka ba le lešoko go na le gore le ntirele dihlabelo,’ ba ba se nago molato le ka be le sa ba tšwe; gobane Morwamotho o na le tokelo ya go laetša ge eba melao ya Sabatha e swanetše go phethwa.” Ge Jesu a tloga fao o ile a ya sinagogeng moo a ilego a hwetša monna wa go repha letsogo. Batho ba be ba nyaka go phara Jesu ka molato, ka gona ba mmotšiša ba re: “Na go fodiša motho ka letšatši la Sabatha go dumeletšwe?” Jesu a ba fetola a re: “Ke mang mo go lena yo e ka rego a na le nku e tee ya re go wela ka moleteng ka letšatši la Sabatha a se e ntšhe? Ga ke re motho yena o phala nku kudu? Ka gona, go thuša motho ka letšatši la Sabatha go dumeletšwe.” Ke moka a re go monna yola wa go repha letsogo: “Otlolla letsogo la gago.” Monna yola a le otlolla, gomme la fola la swana le lela le lengwe. Bafarisei ba tšwa ka sinagogeng ba lakana go bolaya Jesu. Ge Jesu a seno tseba gore ba mo lakane a tloga fao, gomme a latelwa ke batho ba bantši. A fodiša bohle ba ba babjago, gomme a ba laya gore ba se ke ba botša batho ka ga yena, gore go tle go phethege se se boletšwego ke moprofeta Jesaya mola a re: “Bonang mohlanka wa ka yo ke mo kgethilego, moratiwa wa ka yo a nkgahlago. Ke tla mo fa moya wa ka, a begela ditšhaba se nna, Morena, ke se nyakago. A ka se tšee kgang le batho, goba a hlaba lešata, goba a goeletša mekgotheng. Lehlaka le le thinyegilego a ka se le robele ruri, le lebone le le kunyelelago a ka se le timele ruri. O tla phegelela go begela ditšhaba molaetša wa gagwe, go fihlela batho bohle ba phetha thato ya Modimo, gomme ditšhaba tšohle di tla mo holofela.” Ke moka ba tliša go Jesu monna wa sefofu wa semumu ka ge a be a na le modemone. Jesu a mo fodiša, gomme yena a kgona go bolela le go bona. Lešaba ka moka la re: “Afa yo ga se yena Morwa wa Dafida?” Ge Bafarisei ba ekwa batho ba realo ba re: “O fiwa ke Beeltsebulo, kgoši ya bademone, maatla a go leleka bademone bao.” Jesu, ka go tseba se ba se gopolago, a re go bona: “Mmušo wo mongwe le wo mongwe wo o ikarolago dihlopha tše di lwago seng sa tšona, o tla wa. Le motse wo mongwe le wo mongwe goba lapa le lengwe le le lengwe leo batho ba lona ba ikarolago dihlopha tše di lwago seng sa tšona, le tla thubega. Ka gona, ge meoya ye mebe mmušong wa Sathane e ka ikarola dihlopha tše di lwantšhanago, seo se tla laetša gore Sathane o ikarogantše dihlopha. Gomme mmušo wa gagwe o ka se we bjang? Ge eba nna ke leleka bademone ka maatla a ke a fiwago ke Beeltsebulo, balatedi ba lena bona ba ba leleka ka a mang maatla? Ka ge ba ba leleka ka maatla a Modimo, gona ba laetša gore le mphara ka maaka. Ka ge nna ke leleka bademone ka maatla a ke a fiwago ke Moya wa Modimo, se se laetša gore Modimo o šetše a thomile go hloma mmušo wa gagwe go lena. “Kgane go na le motho yo a ka tsenago ka ngwakong wa monna wa senatla a tšea thoto ya gagwe a se a mo tlema pele, ya ba gona a hulago ngwako woo? “Yo a sa emego le nna o lwa le nna, yo a sa tlišego batho go nna o a ba phatlalatša. Ka gona ke le botša gore motho a ka lebalelwa sebe sefe le sefe goba nyefolo ye nngwe le ye nngwe; eupša yo a nyefolago Moya wo Mokgethwa, yena a ka se lebalelwe. Yo a bolelago Morwamotho gampe a ka lebalelwa, eupša yo a bolelago Moya wo Mokgethwa gampe yena a ka se lebalelwe – mehleng yeno goba mehleng ya bophelo bjo bo sa felego.” “Dienywa tše dibotse di kgewa mohlareng wo mobotse; tše e sego tše dibotse di kgewa mohlareng wo o sego wo mobotse. Mohlare o tsebja ka dienywa tše o di enywago. Dinoga tenang, le ka bolela bjang dilo tše dibotse mola le le ba babe? Ga ke re se motho a se bolelago ke se se tšwago ka pelong ya gagwe? Motho wa go loka o nagana tše di lokilego ka pelong ya gagwe, ka gona o bolela tše di lokilego. Yo mobe yena o nagana tše mpe, ka fao o bolela tše mpe. “Ke le botša gore ka Letšatši la Kahlolo motho o tla sekišetšwa tšohle tša bošaedi tše a ilego a di bolela. Motho o tla lokafatšwa goba a tšwiwa ka tše a di boletšego.” Ke moka boramangwalo le Bafarisei ba bangwe ba re: “Moruti, re nyaka go bona o dira mohlolo.” Jesu a ba fetola a re: “Ke moloko wo mobe wa bakgelogi wo o nyakago mohlolo, fela o ka se bontšhwe mohlolo wo mongwe ge e se wola wa moprofeta Jona. Bjalo ka ge Jona a ile a fetša matšatši a mararo le mašego a ona ka mpeng ya hlapi ye kgolo, le Morwamotho o tlilo fetša matšatši a mararo le mašego a ona ka maleng a lefase. Ka Letšatši la Kahlolo batho ba Ninibe ba tla tsoga bahung gotee le batho ba mehleng yeno mme ba ba tšwa, ka gobane bona ba ile ba sokologa dibeng tša bona ge Jona a ba lemoša gore Modimo o tlilo ba fediša; gomme mo go na le sa go feta Jona. Ka Letšatši la Kahlolo Kgošigadi ya Borwa o tla tsoga bahung gotee le batho ba mehleng yeno mme a ba tšwa, ka gobane o ile a tla a etšwa kgolekgole go tlo kwa tša bohlale bja Kgoši Solomone; gomme tsebang – mo go na le bja go feta bja Solomone. “Ge moya wo mobe o tšwile mo mothong, o ralala le mafelo a a se nago meetse, o nyaka mo o ka khutšago gona. Ge o sa go hwetše, o re: ‘Ke tla boela kua ngwakong wo ke tšwago go ona.’ Ge o fihla o hwetše ngwako wola o se na modudi, o fietšwe, mme tšohle di beakantšwe gabotse. Ke moka o ye o boe le meoya ye mengwe ye mebe ye e šupago ye e o fetago ka bobe, gomme e tle e dule ka moo. Seemo sa mafelelo sa motho yoo e be se sebe go feta sela sa pele. Se ke sona se se tlago hlagela moloko wo wo mobe.” Ya re Jesu a sa bolela le batho, gwa fihla mmagwe le banababo. Ba ema ka ntle, ba nyaka go bolela le yena. Motho yo mongwe a re go yena: “Mmago le banabeno šebale ba eme ka ntle, ba nyaka go bolela le wena.” Jesu a mo fetola a re: “Mma ke mang? Banabešo bona ke bomang?” Ke moka a šupa barutiwa ba gagwe a re: “Mma šo, le banabešo šeba! Yo mongwe le yo mongwe yo a phethago thato ya Tate wa legodimong ke morwarre goba kgaitšedi goba mma.” Ka lona tšatši leo Jesu a tloga gae a ya lebopong la letsha, a fihla a dula fase. A kgobokanelwa ke lešaba le lentši, a ba a tsena ka leselawatleng a dula gona, mola lešaba lona le eme lebopong. A ba botša ditaba tše dintši ka diswantšho a re: “Monna yo mongwe o kile a tšwa a yo bjala peu. Ge a dutše a e gaša, ye nngwe ya wela tseleng, gommme dinonyana tša tla tša e ja. Ye nngwe ya wela lekgwareng moo go bego go se na mobu wo montši. Ya mela ka pela ka gobane mobu o be o sa iše fase. Eupša ge letšatši le hlabile, la tšhuma dimelana tšela gomme tša pona, ka ge medu ya tšona e se ya tsenelela fase. Ye nngwe ya wela mehlašaneng ya meetlwa, mme mehlašana ya gola ya kgama dimelana tšela. Ye nngwe yona ya wela mobung wo mobotse, gomme mabele a gona a tswala; a mangwe a tšwa dithoro tše lekgolo, a mangwe a tšwa tše masome a a selelago, mme a mangwe a tšwa tše masome a mararo.” Jesu a fetša ka go re: “Yo a nago le tsebe a a kwe!” Barutiwa ba Jesu ba tla go yena, ba mmotšisa ba re: “O reng o bolela le batho ka diswantšho?” Jesu a ba fetola a re: “Lena le utolletšwe diphiri tša mmušo wa Modimo, fela bona ga se ba di utollelwa. Gape yo a nago le sa gagwe o tla okeletšwa, gore a be le tše dintši le go feta; eupša yo a se nago le sa gagwe yena o tla amogwa le bonnyane bjo a nago le bjona. Lebaka la gore ke bolele le bona ka diswantšho ke go re ba a lebelela, fela ba se ke ba bona selo; ba a theetša, fela ba se ke ba ekwa goba ba kwešiša selo. Ka gona, mo go bona go phethega se se porofetilwego ke Jesaya mola a re: “ ‘Go kwa le tla kwa, eupša le ka se kwešiše selo; le go lebelela le tla lebelela, eupša le ka se bone selo, ka gobane setšhaba se se thatafetše; ba ithibile ditsebe, ba pontše mahlo, gore ba se ke ba bona ka mahlo, ba kwa ka ditsebe, goba ba kwešiša ka megopolo mme ba sokologa, ka ba fodiša.’ “Ge e le lena le ba mahlatse, ka gore a lena mahlo a a bona, le ditsebe tša lena di a kwa. Ruri, ke le botša gore baprofeta ba bantši le baloki ba bantši ba be ba duma go bona tše le di bonago, eupša ba sa di bone. Ba be ba rata go kwa tše le di kwago, eupša ba sa di kwe.” “Ekwang se seswantšho sa mobjadi se se šupago. Bohle ba ba kwago molaetša wa mmušo wa Modimo eupša ba sa kwešiše, ba bjalo ka peu yela ya go wela tseleng. Yomobe a tla mme a ba amoga se se bjetšwego ka dipelong tša bona. Peu yela ya go wela lekgwareng e šupa bao e rego ge ba ekwa molaetša woo ba akgofe ba o amogele ka lethabo. Eupša ga o dule sebaka ka dipelong tša bona, gomme ba dumela lebakanyana fela. Ge ba tlaišwa goba ba hlomarwa ka baka la wona, ba o lahla ka pela. Peu yela ya go wela mehlašaneng ya meetlwa e šupa bao e rego ge ba ekwa molaetša woo, go balabala ka tša bophelo le go goketšwa ke mahumo di tsene di khupetše molaetša woo, mme o se ba tšwele mohola. Peu ye e bjetšwego mobung wo mobotse yona e šupa bao ba rego go kwa molaetša woo ba o kwešiša; ba atlega bjalo ka mabele ao a bago le dithoro tše lekgolo; a mangwe tše masome a a selelago, a mangwe tše masome a mararo.” Jesu a ba botša seswantšho se sengwe a re: “Mmušo wa Modimo o ka swantšhwa ka monna yo a gašitšego peu ye botse ka tšhemong ya gagwe. Ya re mola batho ba robetše, lenaba la gagwe la tla la gaša peu ya mphoka mabeleng, la sepela. Ge mabele e le lekgaba mme a thoma go tswala, mphoka le wona wa ipontšha gore ke mphoka. Bahlanka ba mong wa tšhemo ba tla ba mmotšiša ba re: ‘Morena, na ga ke re o bjetše peu ye botse ka tšhemong ya gago? Bjale mphoka wo o tšwa kae?’ Yena a ba fetola a re: ‘Woo ke modiro wa lenaba.’ Bona ba mmotšiša ba re: ‘A o nyaka gore re yo o tumola?’ A ba fetola a re: ‘Aowa. Le ka re ge le tumola mphoka la tumola le mabele. Lesang mabele le mphoka di gole mmogo go fihlela ge go bunwa. Ke moo ke tlago botša babuni gore ba tumule mphoka pele, ba o tleme dingata, ba o tšhume. Mabele ona ba a kgobele, ba a tšhele ka letlolong la ka.’ ” Jesu a ba botša seswantšho se sengwe a re: “Mmušo wa Modimo o ka swantšhwa le thorwana ya lehloko ye motho a e tšeago a e bjala ka tšhemong ya gagwe. Etse yona e fetwa ke dipeu ka moka, eupša ge e medile e a gola ya feta dimela ka moka. E ba mohlare wo dinonyana di agago dihlaga tša tšona makaleng a wona.” Jesu a ba botša seswantšho se sengwe gape a re: “Mmušo wa Modimo o ka swantšhwa ka komelo ye mosadi a e tšeago a e tswakanya le bupi bjo bo tletšego seroto go fihlela hlama yohle e omelega.” Ditaba tše ka moka Jesu o be a di botša mašaba ka diswantšho; o be a sa bolele le bona selo ge e se ka diswantšho, gore go phethege se se boletšwego ke moprofeta mola a re: “Ke tla bolela le bona ka diswantšho; ke tla ba botša tše di sa kago tša tsebja go tloga mathomong a lefase.” Ge Jesu a seno botša batho gore ba ye magae, le yena a ya gae. Barutiwa ba gagwe ba tla go yena ba re: “Re hlalošetše seswantšho sela sa mphoka ka tšhemong.” Jesu a ba hlalošetša sona a re: “Mobjadi wa peu ye botse ke Morwamotho; tšhemo ke lefase, peu ye botse ke batho ba mmušo wa Modimo, mphoka ke batho ba Yomobe, mme lenaba le le gašitšego mphoka ke Diabolose. Puno ke bofelo bja lefase, gomme babuni ke barongwa. Bjalo ka ge mphoka o kgobokanywa mme wa tšhungwa ka mollo, le bofelong bja lefase go tla ba ka tsela yeo. Morwamotho o tla roma barongwa ba gagwe mmušong wa gagwe gore ba yo kgobokanya bohle bao ba dirišago batho dibe, le bohle bao ba dirago tše kgopo, ba ba lahlele moubelong wo o laumago mollo, moo ba tlago lla ba lomanya meno. Baloki bona ba tla taga bjalo ka letšatši mmušong wa Tatagobona. Yo a nago le tsebe a a kwe!” “Mmušo wa Modimo o ka swantšhwa ka lehumo le le utilwego ka tšhemong, le e rego ge motho a le hweditše a le uta gape, mme ka go le thabela a rekiša tšohle tše a nago le tšona, gomme a reka tšhemo yeo. “Le gona mmušo wa Modimo o ka swantšhwa ka mmapatši yo a nyakago magakabje a bohlokwa, gomme ge a hwetša le bohlokwahlokwa, a tloga a yo rekiša tšohle tše a nago le tšona, gomme a le reka.” “Le gona mmušo wa Modimo o ka swantšhwa ka lelokwa le le lahlelwago ka lewatleng, la tanya dihlapi tša mehutahuta. Ge le tletše, barei ba le gogela lebopong, ba dula fase ba lokela tše di loketšego go jewa ka dibjaneng tša bona, mme tše di sego tša lokela go jewa ba di lahla. Mafelelong a lefase go tla ba ka mokgwa wo: Barongwa ba tla yo kgetholla batho ba babe go ba ba lokilego, gomme ba ba lahlela moubelong wo o laumago mollo, moo ba tlago lla ba lomanya meno.” Jesu a ba botšiša a re: “Na tšohle tšeo le a di kwešiša?” Ba mo fetola ba re: “Ee.” Yena a re go bona: “Gona ke go re ramangwalo yo mongwe le yo mongwe yo e lego morutiwa mmušong wa Modimo o swana le mong wa ngwako yo a tšeago phahla ye tala le ye mpsha ka phapošing ya gagwe ya go bolokela.” Ge Jesu a fetša go bolela ka diswantšho tšeo, a tloga fao, a boela motseng wa gabo. A ruta batho ka sinagogeng, gomme ba ba mo kwago ba makala. Ba botšišana ba re: “Bohlale bjo bokaaka le maatla a go dira mehlolo o di tšere kae? Na kgane ga se yena morwa wa mmetli? Mmagwe yena ga se Maria? A banababo ga se Jakobose le Josefa le Simone le Judase? Ga ke re dikgaetšedi tša gagwe ka moka di dula le rena? Bjale tše ka moka o tšo di tšea kae?” Gomme ba mo gana. Jesu a re go bona: “Moprofeta o hlomphiwa gohle ge e se motseng wa gabo le lapeng labo.” Ka ge ba be ba sa dumele go yena, o ile a se ke a dira mehlolo ye mentši fao. Ka nako yeo Kgoši Heroda a kwa ka ga Jesu. A botša bahlankedi ba gagwe a re: “Ruri, yo ke Johanese Mokolobetši, o tsogile bahung. Ke ka baka leo a nago le maatla a go dira mehlolo.” Gape Heroda o be a ile a laela gore Johanese a swarwe, a tlengwe, a lahlelwe kgolegong. Taba yeo o be a e dirile ka baka la Herodiase, mosadi wa Filipi, morwarragwe, ka ge Johanese a be a mo kgadile a re: “Ga se tshwanelo gore o tšee Herodiase!” Le ge Heroda a be a rata go bolaya Johanese o be a boifa Bajuda, ka ge ba be ba re ke moprofeta. Fela mohla go binwa monyanya wa matswalo a Heroda, morwedi wa Herodiase a bina pele ga baeng. A kgahla Heroda moo Heroda a ilego a mo enela gore o tla mo fa se a ka mo kgopelago sona. Ngwanenyana, ka ge a be a hlohleleditšwe ke mmagwe, a re: “Ntlišetše hlogo ya Johanese Mokolobetši ka sebjana gonabjale.” Kgoši a nyama, eupša ka baka la ge a be a enne pele ga baeng, a laela gore go phethwe ka moo ngwanenyana a kgopelago ka gona. Ka fao a roma motho a yo kgaola Johanese hlogo ka kgolegong. Hlogo yeo ya gagwe ya tlišwa go ngwanenyana ka sebjana. Yena a e tšea a e iša go mmagwe. Barutiwa ba Johanese ba tla ba tšea setopo sa gagwe, ba yo se boloka; ke moka ba tloga ba yo botša Jesu se se diregilego. Ge Jesu a ekwa tše di hlagetšego Johanese, a tloga fao ka leselawatle a nnoši a ikela felo mo gongwenyana mo go se nago batho. Batho ba kwa gore o ile kae, mme ba tloga metseng ya bona ba mo latela ba sepela ka maoto. Jesu ge a etšwa ka leselawatleng a bona lešaba le legolo, a le šokela, gomme a fodiša balwetši ba bona. Mantšiboeng ao barutiwa ba gagwe ba tla go yena ba re: “Felo mo go kgole le metse, le gona nako e šetše e ile. Botša batho gore ba ye metseng ba ithekele dijo.” Jesu a ba fetola a re: “Ga ba swanela go tloga. Lena ba feng tša go ja.” Bona ba mo fetola ba re: “Rena mo re swere fela dinkgwa tše tlhano le dihlapi tše pedi.” Jesu a re: “Di tlišeng mo.” A laela batho gore ba dule fase bjanyeng; ke moka a tšea dinkgwa tšela tše tlhano le dihlapi tšela tše pedi, a lebelela legodimong, a reta Modimo, a mo leboga. A ngwathaganya dinkgwa tšela, a di neela barutiwa ba gagwe, gomme barutiwa ba di fa batho. Bohle ba ja ba khora. Ba kgoboketša marathana a a šetšego, mme a tlala diroto tše lesome le metšo ye mebedi. Ba ba llego e be e ka ba banna ba dikete tše tlhano, go sa balwe basadi le bana. E sa le semeetseng Jesu a laela barutiwa ba gagwe gore ba namele leselawatle, ba mo ete pele ba tshelele ka mošola wa letsha, mola yena a sa botša batho gore ba boele magae. Ge a seno ba phatlalatša, a namela thaba a nnoši gore a yo rapela. Ya ba ya ba mantšiboa a le moo a nnoši; gomme ka nako yeo leselawatle le be le šetše le le garegare ka letsheng, le akgaakgwa ke maphoto ka gobane ba be ba lebane le phefo ye e tšubutlago. Ya re letšatši le sešo la hlaba Jesu a tla go barutiwa ba gagwe a sepela godimo ga meetse a letsha. Ge ba mmona a sepela godimo ga meetse ba tšhoga kudu ba re: “Ke seriti!” Gomme ba hlaba mokgoši. Jesu a akgofa a bolela le bona a re: “Betang dipelo! Ke nna – le se ke la boifa!” Petrose a re: “Morena, ge eba ke wena, ntaele gore ke tle go wena ke sepela godimo ga meetse.” Jesu a mo fetola a re: “Tlaa!” Ka gona Petrose a tšwa ka leselawatleng a sepela godimo ga meetse a lebile Jesu. Eupša ya re ge a bona gore phefo e tšubutla kudu, a boifa, gomme a thoma go sobela ka meetseng. A goa a re: “Morena, mphološe!” Gateetee Jesu a obeletša letsogo, a mo swara, a re go yena: “Wena wa tumelo ye nnyane, o reng o belaela?” Ya re ge ba tsene ka leselawatleng phefo ya homola. Ke moka barutiwa bale ba ka leselawatleng ba khunamela Jesu ba re: “Ruri, ke wena Morwa wa Modimo!” Ba tshela letsha ba fihla Genesarete moo batho ba gona ba ilego ba lemoga gore ke Jesu. Ka gona ba roma batseta tikologong ka moka ya moo go yo botša batho gore ba tliše balwetši go Jesu. Ba mo kgopela gore balwetši ba upše ba no kgwatha morumo wa seaparo sa gagwe, gomme bohle ba ba o kgwathago ba fola. Bafarisei ba bangwe le boramangwalo ba tla go Jesu ba etšwa Jerusalema, gomme ba mmotšiša ba re: “Barutiwa ba gago ba reng ba tshela ditlwaedi tša borakgolokhukhu ba rena? Gobane ge ba eja ga ba hlape diatla.” Jesu a ba fetola a re: “Lena le reng le tshela taelo ya Modimo le gabile tša lena ditlwaedi? Gobane Modimo o itše: ‘Hlompha tatago le mmago’; a buša a re: ‘Yo a ka rogago tatagwe le mmagwe a bolawe thoo’. Eupša lena le botša batho gore ge motho a ka re go tatagwe goba mmagwe: ‘Se nka bego ke go thuša ka sona ke se abela Modimo,’ le gatee ga a sa tlemegile go thuša tatagwe ka selo seo. Ka tsela yeo le nyatša molao wa Modimo, le gabile tša lena ditlwaedi. Baikaketši tenang, Jesaya o porofetile gabotse ka lena mola a re: “ ‘Setšhaba se se ntheta ka molomo, eupša dipelo tša bona di kgole le nna. Go nthapela ga bona ga go ba hole ka selo, ka gobane ba ruta batho melawana ye e beilwego ke bona mo nkego ke melao ye e beilwego ke nna.’ ” Jesu a bitša lešaba a re go lona: “Ekwang le kwešišeng! Tše di tšhilafatšago motho ga se tše a di jago ka molomo, eupša ke tše a di bolelago ka wona.” Ke ge barutiwa ba gagwe ba etla go yena ba re: “Afa o a tseba gore tše o di boletšego di hlabile Bafarisei?” Jesu a ba fetola a re: “Semela sefe le sefe se se sego sa bjalwa ke Tate wa legodimong se tla tumulwa. Ba leseng. Ke dihlahladifofu tše di foufetšego, gomme ge sefofu se hlahla se sengwe, bobedi bja bona ba tla wela ka moleteng.” Petrose a re go yena: “Re hlalošetše taba ye o e bolelago ye.” Jesu a re go bona: “Na le lena le swana le bona ka go hloka kwešišo? Kgane ga le lemoge gore se sengwe le se sengwe se se tsenago ka molomong wa motho se fetela ka mpeng gomme sa yo tšwa e le mantle? Eupša dilo tše di tšwago ka molomong wa motho tšona ke tše di tšwago ka pelong ya gagwe, gomme tšeo ke tšona tše di tšhilafatšago motho. Gobane ka pelong ya motho ke mo go tšwago megopolo ye mebe, e lego dipolao, bohlotlolo, bootswa, bohodu, bohlatse bja maaka, le lesebo. Tšeo ke tšona dilo tša go tšhilafatša motho. Eupša go ja o se wa hlapa diatla ga go tšhilafatše motho.” Jesu a tloga fao a ya tikologong ya motse wa Tirose le wa Sidone. Mosadi yo mongwe wa Mokanana yo a bego a dula seleteng seo a tla go yena, a goa a re: “Ntšhokele, Morena, Morwa wa Dafida! Morwedi wa ka o tsenwe ke modemone gomme o mo tshwenya kudu.” Eupša Jesu a se mo fetole. Barutiwa ba gagwe ba tla go yena, ba mo kgopela ba re: “Mmotše a sepele, ka gobane šo o goa a re šetše morago.” Jesu a fetola a re: “Ke romilwe fela go ba setšhaba sa Israele ba ba lego bjalo ka dinku tše di timetšego.” Mosadi yola ge a ekwa mantšu ao a tla a itahlela maotong a Jesu a re: “Morena, nthuše hle!” Jesu a mo fetola a re: “Ga se gwa loka go tšea dijo tša bana wa di lahlela dimpša.” Mosadi a mo fetola a re: “Gona go bjalo, Morena. Fela le tšona dimpša di ja marathana ao a wago tafoleng ya beng ba tšona.” Ya ba Jesu o a mo fetola o re: “Mmagobatho, tumelo ya gago ke ye kgolo! A go direge ka mo o kgopelago ka gona.” Gomme ka yona nako yeo morwedi wa gagwe a fola. Jesu a tloga fao a tla lebopong la letsha la Galilea. A namela thaba a dula fase. Mašaba a mantši a tla go yena ba tliša digole, difofu, dihlotša, dimumu le balwetši ba bangwe ba bantši ba ba bea pele ga Jesu, gomme yena a ba fodiša. Batho ba makala ge ba bona dimumu di bolela, dihlotša di sepela gabotse, digole di fodišitšwe, le difofu di bona, gomme ba reta Modimo wa Israele. Jesu a bitša barutiwa ba gagwe, gomme ge ba fihla go yena a re go bona: “Batho ba ba ntlhomola pelo ka gobane e šetše e le matšatši a mararo ba na le nna, gomme ga ba sa na le se ba ka se jago. Nka se re ba sepele ba swerwe ke tlala, ka gobane ba ka tla ba lapa tseleng.” Barutiwa ba gagwe ba mmotšiša ba re: “Mo lešokeng le re ka hwetša kae dinkgwa tša go khoriša lešaba le lekaaka?” Jesu a ba botšiša a re: “Na le na le dinkgwa tše kae?” Bona ba mo fetola ba re: “Re na le dinkgwa tše di šupago le dihlatswana di se kae.” Ke mo Jesu a laetšego lešaba gore le dule fase. Ke moka a tšea dinkgwa tšela di šupago le dihlapi tšela, a leboga Modimo, a di ngwathaganya, a di fa barutiwa; bona ba di fa batho bale. Bohle ba ja ba khora. Barutiwa ba kgoboketša marathana a a šetšego, mme a tlala diroto tše di šupago. Ba ba llego e be e le ba dikete tše nne, go sa balwe basadi le bana. Ke moka Jesu a botša batho gore ba boele magae; yena a namela leselawatle a ya nageng ya Magadane. Bafarisei ba bangwe le Basadusei ba kile ba tla go Jesu gore ba mo leke, mme ba mo kgopela gore a ba bontšhe mohlolo go laetša gore o romilwe ke Modimo. Eupša Jesu a ba fetola a re: “Mantšiboa le re: ‘Ka moswane le tla hlaba gabotse, ka gobane leratadima le hwibitše.’ Gomme ge go esa le re: ‘Lehono go tla na pula ya ledimo, ka gobane leratadima le hwibitše ebile le na le maru.’ Le kgona go tseba seemo sa moso ka go lebelela leratadima, fela ga le kgone go kwešiša gore ditiragalo tša mehla yeno di šupa eng. Ke moloko wo mobe wa bakgelogi wo o nyakago mohlolo, eupša o ka se bontšhwe mohlolo wo mongwe ge e se mohlolo wa moprofeta Jona.” Ke moka a ba tlogela a sepela. Ge barutiwa ba tshelela ka mošola wa letsha ba ile ba lebala go tšea mphago wa dinkgwa. Jesu a re go bona: “Le itoteng, le tšhabe komelo ya Bafarisei le ya Basadusei.” Ba thoma go boledišana ba re: “O bolela ka tsela ye ka gobane ga se ra tla le dinkgwa.” Jesu a tseba se ba se bolelago, ka gona a ba botšiša a re: “Ke ka baka lang le boledišana ka go hloka dinkgwa, lena ba tumelo ye nnyane? Na ga sešo la kwešiša? Kgane ga le sa gopola mola ke ngwathaganya dinkgwa tše tlhano ke di fa banna ba dikete tše tlhano? Le ile la tlatša diroto tše kae ka marathana a go šala? Ka dinkgwa tše di šupago tšela ke ilego ka di fa banna ba dikete tše nne gona le gopolang? Le ile la tlatša diroto tše kae ka marathana a go šala? Bjale le reng le sa kwešiše gore ke be ke sa bolele ka dinkgwa? Le tšhabe komelo ya Bafarisei le ya Basadusei!” Ke moka barutiwa ba lemoga gore o be a sa ba botše gore ba tšhabe komelo ya dinkgwa, eupša o be a era gore ba itlhokomele dithutong tša Bafarisei le tša Basadusei. E rile ge Jesu a fihla tikologong ya motse wa Kesarea-Filipi a botšiša barutiwa ba gagwe a re: “Na batho ba re Morwamotho ke mang?” Bona ba mo fetola ba re: “Ba bangwe ba re ke wena Johanese Mokolobetši, bangwe ba re o Eliya, mola bangwe ba re o Jeremia goba yo mongwe wa baprofeta.” Jesu a ba botšiša a re: “Lena le re ke nna mang?” Gwa fetola Simone Petrose a re: “Ke wena Mesia, Morwa wa Modimo yo a phelago.” Jesu a re go yena: “O lehlogonolo, wena Simone, morwa wa Johanese, ka gobane se ga se wa se utollelwa ke motho, eupša o se utolletšwe ke Tate wa legodimong. Etse ke wena Petrose. Bjale godimo ga lona leswika le ke tla aga kereke ya ka, gomme le ona maatla a lehu a ka se e fenye. Ke tla go fa dikgonyo tša legodimo; se o se iletšago lefaseng, le legodimong se tla iletšwa; le se o se dumelelago lefaseng, le legodimong se tla dumelelwa.” Ke moka Jesu a laya barutiwa ba gagwe gore ba se ke ba botša motho gore ke yena Mesia. Go tloga ka nako yeo Jesu a thoma go botša barutiwa ba gagwe phatlalatša gore o swanetše go ya Jerusalema, a yo tlaišwa kudu ke bagolo ba setšhaba, le baprista ba bagolo, le boramangwalo, a be a bolawe, eupša ka letšatši la boraro a tsošwe ke Modimo bahung. Petrose a mmiletša thoko gomme a mo kgala a re: “Modimo a go lote, Morena! Taba yeo e se ke ya go hlagela.” Jesu a fularela Petrose a re: “Sathane, tloga ka morago ga ka! O a nkgopiša, ka gobane ga o nagane tša Modimo, o nagana tša batho.” Ke moka Jesu a re go barutiwa ba gagwe: “Ge motho a nyaka go ba molatedi wa ka, a ikone, a ikemišetše go tlaišwa bjalo ka nna, gomme a ntatele. Gobane yo a ipabalelago o tla lahlega, eupša yo a itatolago ka baka la ka o tla phelela sa ruri. Etse motho go tla mo holang go rua lefase lohle, eupša a loba sebaka sa go hwetša bophelo bjo bo sa felego? Goba ke eng se motho a ka rekago bophelo bjo bo sa felego ka sona? Gobane Morwamotho o tlilo tla ka letago la Tatagwe le barongwa ba gagwe, a putsa yo mongwe le yo mongwe go ya ka mediro ya gagwe. Ruri, ke a le botša, go na le ba bangwe mo ba ba ka se kego ba hwa ba sešo ba bona Morwamotho a etla e le Kgoši.” Ka morago ga matšatši a a selelago Jesu a tloga le Petrose le Jakobose le Johanese, ngwanabo, a ba iša thabeng ye telele, mme fao ba ba noši. A fetoga sebopego pele ga bona: sefahlego sa gagwe sa taga bjalo ka letšatši, le diaparo tša gagwe tša šweufala tša re twaa! Ke moka ba bona Moshe le Eliya ba bolela le Jesu. Ya ba Petrose o re go Jesu: “Morena, ke mo gobotse bjang ge re le mo! Ge o nyaka, nka aga mešaša ye meraro fa – wo mongwe ya ba wa gago, wo mongwe ya ba wa Moshe, mme wo mongwe ya ba wa Eliya.” Ya re a sa bolela, leru le le tagago la ba pipetša, mme lentšu la kwagala le etšwa lerung leo la re: “Yo ke yena Morwa wa ka yo ke mo ratago, o nkgahla kudu; le mo theeletšeng!” Ge barutiwa bale ba ekwa lentšu leo ba tšhoga kudu mo ba ilego ba ba ba itahlela fase ka difahlego. Jesu a tla go bona, a ba kgwatha a re: “Tsogang, le se ke la boifa!” Ge ba lebelela ba se bone motho, ge e se Jesu fela. Ya re ge ba theoga moo thabeng Jesu a ba laya a re: “Le se ke la botša motho ka pono ye le e bonego, go fihlela Morwamotho a tsošwa bahung.” Ke moo barutiwa bale ba botšišitšego Jesu ba re: “Na ke ka baka lang boramangwalo ba re pele go swanetše go tla Eliya?” Jesu a ba fetola a re: “Ee, Eliya o tla tla mme a bušetša dilo sekeng sa tšona. Eupša nna ke le botša gore Eliya o be a tlile, fela batho ba se ke ba mo tseba, eupša ba mo swara ka moo ba ratago ka gona. Morwamotho le yena ba tla mo tlaiša ka yona tsela yeo.” Ke mo barutiwa ba lemogilego gore o ra Johanese Mokolobetši. Ge ba seno boela lešabeng, monna yo mongwe a tla go Jesu, a khunama pele ga gagwe a re: “Morena, hle, šokela morwa wa ka! O swerwe ke bolwetši bja go wa, mme bo mo tsogela kudu mo e lego gore gantši o wela mollong goba ka meetseng. Ke ile ka mo iša go barutiwa ba gago, eupša ba palelwa ke go mo fodiša.” Jesu a mo fetola a re: “Aowii, lena moloko wa go hloka tumelo, wo mokgopo! Ke se le felele pelo go fihlela neng? Ke le kgotlele go iša kae? Tlišang mošemane yoo mo.” Jesu a kgalema modemone yoo, wa tšwa mošemaneng, mme mošemane a fola ka yona nako yeo. Ke moka barutiwa ba tla go Jesu ba nnoši, ba mmotšiša ba re: “Ke ka baka lang rena re šitilwe ke go leleka modemone yola?” Jesu a ba fetola a re: “Ke ka gobane le hlaela tumelo. Ruri, ke le botša gore ge le ka be le na le tumelo ye e lekanago le thorwana ya mphogo, le be le ka botša thaba ye la re: ‘Tloga mo o ye mola!’ gomme ya ya. Le be le ka se šitwe ke selo.” *** Ge barutiwa ba le mmogo nageng ya Galilea, Jesu a re go bona: “Morwamotho o kgauswi le go gafelwa diatleng tša batho bao ba tlago mmolaya; eupša ka letšatši la boraro o tla tsošwa bahung.” Barutiwa ba nyama kudu. Ge Jesu le barutiwa ba gagwe ba fihla Kapernaume, batšhediši ba motšhelo wa Tempele ba tla go Petrose ba mmotšiša ba re: “Afa moruti wa lena o tšhela motšhelo wa Tempele?” Petrose a ba fetola a re: “Ee, o a o tšhela.” Ge a tsena ka ngwakong, Jesu a bolela pele Petrose a ka bolela a re: “Simone, na taba ye wena o e bona bjang? Na magoši a lefase a tšhediša bafe metšhelo le makgetho – badudi ba naga, goba bafaladi?” Petrose a mo fetola a re: “A tšhediša bafaladi.” Jesu a re go yena: “Gona seo se šupa gore badudi ba naga ga ba swanela go tšhela motšhelo. Fela ga re nyake go kgopiša batho ba. Ka gona eya letsheng o fihle o lahlele kgwega ka go lona. Hlapi ya mathomo ye o tlago e tanya o e ntšhe o e ahlamiše, gomme ka molomong wa yona o tla hwetša papetlana ya tšhelete ye e lekanego motšhelo wa ka le wa gago wa Tempele. O tšee tšhelete yeo o ba fe yona.” Ka moragonyana barutiwa ba tla go Jesu, ba mmotšiša ba re: “Na yo mogolo mmušong wa Modimo ke ofe?” Ke mo Jesu a biditšego ngwana, a mo emiša gare ga bona a re: “Ruri, ke a le botša, ge le sa fetoge la ba bjalo ka bana, le ka se tsoge le tsene mmušong wa Modimo. Yo mogolo mmušong wa Modimo ke yo a ikokobetšago a ba bjalo ka ngwana yo. Gomme yo a amogelago ngwana wa go etša yo ka ge e le se ke le laetšego sona, o amogela nna.” “Ge motho a ka kgeloša yo mongwe wa ba bannyane ba ba dumelago go nna ba, go ka ba kaone ge a ka tlemelelwa lwala molaleng mme a lahlelwa ka bodibeng bja lewatle. Joo nna, lefase le rwele dilo tše di kgelošago batho! Dilo tša mohuta wo go ba gona di tla no ba gona, fela go madimabe yo di tlago ka yena! “Ge letsogo goba leoto la gago le go diriša dibe, le ripe o le lahle. Go kaone go ya legodimong o se ne letsogo goba leoto, go na le gore o be le matsogo goba maoto ka mabedi, eupša o lahlelwe ka mollong wo o sa timego. Le leihlo la gago ge le go diriša dibe, o le gonye o le lahle. Go kaone gore o ye legodimong o le moihlwe, go na le gore o be le mahlo ka mabedi, fela o tle o lahlelwe ka mollong wa hele.” “Le hlokomele gore le se nyatše yo mongwe wa ba bannyane ba. Ke a le botša, barongwa ba bona legodimong ba dula ba na le Tate wa legodimong ka nako tšohle. *** “Lena le reng? Ge motho a ka re a na le dinku tše lekgolo, ye nngwe ya tšona ya timela, ga ke re o tlogela tšela tše masome a senyane a metšo ye senyane dithabeng, mme a yo nyaka yela e timetšego? Ruri, ke a le botša, ge a e bone o e thabela go feta tšela tše masome a senyane a metšo ye senyane di sa kago tša timela. Ka wona mokgwa woo Tatagolena wa legodimong ga a nyake gore le o tee wa ba bannyane ba a timele.” “Ge ngwaneno a go phošeditše, o ye go yena mme o mo kgale le le babedi fela. Ge a ka go theeletša, o tla be o mmušitše. Fela ge a ka se go theeletše, o ye go yena o na le motho o tee goba ba babedi, gore, bjalo ka ge Mangwalo a Makgethwa a bolela, ‘se a latofatšwago ka sona se hlatselwe ke batho ba babedi goba ba bararo.’ Eupša ge a ka se ba theeletše, gona o botše phuthego. Ge a ka se theeletše le yona phuthego, o mo seme moditšhaba goba molekgetho.” “Ruri, ke a le botša ke re: Se le se iletšago lefaseng, le legodimong se tla iletšwa; le se le se dumelelago lefaseng, le legodimong se tla dumelelwa. “Le gona ke a le botša ke re: Ge ba babedi ba lena mo lefaseng ba ka kwana ka se ba se kgopelago, Tate wa legodimong o tla ba fa sona. Gobane moo ba babedi goba ba bararo ba kopanego gona go nthapela, le nna ke tla ba le bona.” Ke mo Petrose a tlilego go Jesu, a mmotšiša a re: “Morena, na ge ngwanešo a ka no fela a mphošetša, ke mo lebalele gakae? Ke mo lebalele gašupa?” Jesu a mo fetola a re: “Nna ga ke re gašupa, eupša ke re ga masome a a šupago a balwa gašupa. Go hlaloša taba ye nka re mmušo wa Modimo o ka swantšhwa ka kgoši ye nngwe ye e kilego ya rata go nyakišiša ditšhelete tše bahlanka ba gagwe ba bego ba di adimile go yena. Ya re a sa tšo thoma go nyakišiša, gwa tlišwa yo mongwe wa bona yo a bego a na le molato wa diketekete tša diranta go yena. Ka ge a be a se ne tšhelete ya go lefa molato woo, kgoši a laela gore a rekišwe gotee le mosadi wa gagwe le bana le tšohle tše a bego a na le tšona, gore go tle go lefše molato woo. Mohlanka yoo a itahlela fase ka matolo pele ga kgoši, a lotšha, a phophota a re: ‘Hle, se mphelele pelo, ke tla go lefa molato woo ka moka!’ Kgoši a mo gaugela mme a mo lebalela molato wola, a mo lesa a sepela. “Ya re ge mohlanka yoo a etšwa, a gahlana le mohlankakayena yo a bego a adimile diranta di se kae go yena. A mo swara, a mo kgama ka megolo a re: ‘Ntefe molato wola o o tšerego go nna!’ Mohlanka yola a itahlela fase pele ga gagwe, a mo phophotha a re: ‘Hle, se mphelele pelo, ke tla go lefa!’ Eupša yena a gana, mme a laela gore a tswalelelwe ka kgolegong go fihlela a lefa molato woo. Ge bahlankakayena ba bona tše di diregilego ba nyama kudu, gomme ba ya go kgoši, ba mmotša ditaba tšeo ka moka. Kgoši a bitša mohlanka yola, a re go yena: ‘Mohlanka yo mobe towe! Ke go phumoletše molato wola wa gago ka moka ka ge o be o nthapela! Na e be e se tshwanelo gore le wena o gaugele mohlankakawena bjalo ka ge le nna ke go gaugetše?’ Kgoši a befelwa kudu, gomme a laela gore mohlanka yoo a hlokofatšwe go fihlela a lefa molato wa gagwe ka moka. “Le Tate wa legodimong o tla le swara ka yona tsela yeo, ge motho a sa lebalele ngwanabo ka pelo ya gagwe ka moka.” E rile ge Jesu a feditše go bolela ditaba tšeo, a tloga Galilea a ya nageng ya Judea ka mošola wa noka ya Jordane. Batho ba bantši ba mo latela, gomme a fodiša ba ba babjago mo go bona. Bafarisei ba bangwe ba tla go yena ba mo leka ba re: “Na monna o dumeletšwe go hlala mosadi wa gagwe ka baka la tabana ye nngwe le ye nngwe?” Jesu a ba fetola a re: “Na ga se la bala gore mathomong Mmopi ‘o bopile batho e le monna le mosadi,’ bjalo ka ge Mangwalo a Makgethwa a bolela? Gomme a re: ‘Ke ka baka leo monna a tlago tlogela tatagwe le mmagwe, a kopana le mosadi wa gagwe, mme bobedi bja bona ya ba mmele o tee.’ Ka gona ga e sa le ba babedi, eupša ke mmele o tee. Ka baka leo, se se kopantšwego ke Modimo, motho a se ke a se aroganya.” Bafarisei ba mmotšiša ba re: “Bjale ke ka baka lang Moshe a ile a bea molao wa gore monna a fe mosadi wa gagwe lengwalo la tlhalo, gomme a mo hlale?” Jesu a ba fetola a re: “Moshe o le dumeletše go hlala basadi ba lena ka baka la bothata bja dipelo tša lena; eupša mathomong go be go se bjalo. Bjale ke le botša gore monna yo a ka hlalago mosadi wa gagwe, e se ka baka la bootswa, mme a nyala mosadi yo mongwe, o a otswa.” Barutiwa ba gagwe ba re go yena: “Ge eba tša lenyalo la monna le mosadi di bjalo, gona go kaone gore motho a se ke a nyala.” Jesu a ba fetola a re: “Taba ye ga e kgonwe ke mang le mang, eupša e kgonwa ke bao Modimo a ba kgontšhitšego yona. Go na le batho ba ba ka se kgonego go nyala ka gobane ba lomilwe ke mmutla; ba bangwe ba ka se kgone go nyala ka gobane ba amogilwe ke batho bonna, mme ba bangwe ba ikiletša go nyala ka baka la mmušo wa Modimo. Yo a ka kgonago taba ye a a e dire.” Batho ba bangwe ba tliša bana go Jesu gore a ba bee diatla a ba rapelele, eupša barutiwa ba gagwe ba kgalema batho bao. Jesu a re: “Lesang bana bao ba tle go nna, le se ke la ba thibela, gobane mmušo wa Modimo ke wa ba babjalo.” A ba bea diatla, ke moka a tloga fao. Monna yo mongwe a tla go Jesu, a mmotšiša a re: “Moruti, ke eng sa go loka se nka se dirago gore ke tle ke be le bophelo bjo bo sa felego?” Jesu a mo fetola a re: “O reng o mpotšiša ka sa go loka? Wa go loka ke o tee fela. Ge o nyaka go tlo ba le bophelo bjo bo sa felego, o phethe melao ya Modimo.” Monna yoo a mmotšiša a re: “Melao ya gona ke efe?” Jesu a mo fetola a re: “O se ke wa bolaya; o se ke wa otswa; o se ke wa utswa; o se ke wa bolela bohlatse bja maaka; o hlomphe tatago le mmago; o rate ngwaneno bjalo ka ge o ithata.” Lesogana lela la mo fetola la re: “Melao yeo ka moka ke e phethile. Bjale ke eng se go sa nyakegago gore ke se dire?” Jesu a re go yena: “Ge o nyaka go ba moloki yo a feletšego, sepela o yo rekiša tšohle tše o nago le tšona. O tšee tšhelete ya gona o e fe badiidi, mme o tla ba le lehumo legodimong. Ke moka o tle o ntatele.” Ge lesogana le ekwa phetolo yeo, la tloga le nyamile, ka gobane le be le humile kudu. Ke mo Jesu a itšego go barutiwa ba gagwe: “Ruri, ke le botša gore mohumi o tla tsena legodimong ka bothata. Ke a boeletša ke re: Go bonolo gore kamela e tsene ka lešobana la nalete, go na le gore mohumi a tsene legodimong.” Ge barutiwa ba gagwe ba ekwa a realo ba tlabega kudu. Ba mmotšiša ba re: “Ge go le bjalo gona ke mang yo a ka phologago?” Jesu a ba lebelela, a ba fetola a re: “Mo go batho taba ye ga e kgonege, eupša go Modimo tšohle di a kgonega.” Ke moo Petrose a rilego: “Bona, rena re tlogetše tšohle tše e lego tša rena ra go latela. Bjale re tla boelwa ke eng?” Jesu a re go bona: “Ruri, ke le botša gore mohla lefase le mpshafatšwago, ge Morwamotho a dutše setulong sa bogoši sa letago la gagwe, lena balatedi ba ka ba lesome le metšo ye mebedi le tla dula ditulong tša bogoši, la buša ba dikgoro tše lesome le metšo ye mebedi tša Israele. Le gona mang le mang yo a tlogetšego lapa la gagwe, goba bomorwarragwe, goba dikgaetšedi tša gagwe, goba tatagwe, goba mmagwe, goba bana ba gagwe, goba mašemo a gagwe ka baka la ka, o tla fiwa tše di fetago tšeo kgolekgole, gomme o tla ba le bophelo bjo bo sa felego. Eupša ba bantši bao bjale e lego ba maemo e tla ba ba ba se nago maemo, mme ba bantši bao bjale e sego ba maemo e tla ba ba maemo.” “Mmušo wa Modimo o ka swantšhwa ka mongserapa yo a kilego a tloga e sa le ka meso go yo thwala banna ba go tlo šoma ka serapeng sa gagwe sa merara. Ya re ge a seno kwana le bašomi ka tefo ya mehleng, e lego papetlana ya silibera ka letšatši, a ba romela go yo šoma ka serapeng sa gagwe sa merara. A tloga gape ka nako ya senyane mosong, a ya lepatlelong la motse, gomme a bona banna ba bangwe ba eme fao ba sa dire selo. A re go bona: ‘Le lena sepelang le yo šoma ka serapeng sa ka; ke tla le lefa ka mo go lebanego.’ Gomme ba ya. A tloga gape ka nako ya lesome le metšo ye mebedi le ka nako ya boraro mathapama a dira ka wona mokgwa woo. Ge a boelela ka nako ye e ka bago ya bohlano mathapama a hwetša banna ba bangwe ba eme. A ba botšiša a re: ‘Le reng le hlwele letšatši ka moka le eme fa le sa dire selo?’ Bona ba mo fetola ba re: ‘Ke ka gobane ga se ra thwalwa ke motho.’ Yena a re go bona: ‘Le lena sepelang le yo šoma ka serapeng sa ka sa merara.’ “Ka phirimane mongserapa a laela molebeledi wa bašomedi ba gagwe a re: ‘Bitša bašomedi ba ka o ba fe meputso ya bona. O thome ka bale ba go thwalwa morago, o feleletše ka bale ba go thwalwa pele.’ Bale ba go thwalwa ka nako ya bohlano mathapama mongwe le mongwe wa bona a lefša papetlana ya silibera. Ge go etla bale ba go thwalwa pele ba gopola gore ba tlilo putswa go feta fao; eupša le bona mongwe le mongwe a fiwa papetlana ya silibera. Ge ba e tšea ba e galala go mothwadi wa bona ba re: ‘Banna ba ba go thwalwa morago ba šomile iri e tee fela, mola rena re šomile letšatši ka moka re tšhungwa ke phišo ya lona; eupša o ba lefile go lekana le rena!’ “Mongserapa a fetola yo mongwe wa bona a re: ‘Mogwera, ga ke go hlalefetše. Ga ke re o kwane le nna ka papetlana e tee ya silibera? Tšea tšhelete ya gago o sepele. Gape yo wa go thwalwa morago ke rata go mo lefa go lekana le wena. Kgane ga gwa ntshwanela go dira se ke se ratago ka se e lego sa ka, goba o ntomolela mahlo ka gobane ke lokile?’ ” Jesu a feleletša ka go re: “Seo se šupa gore ba mafelelo e tla ba ba mathomo, gomme ba mathomo ya ba ba mafelelo.” Ge ba le leetong la go ya Jerusalema, Jesu a biletša barutiwa ba gagwe ba lesome le metšo ye mebedi ka thoko, gomme a bolela le bona ba ntše ba swere tsela a re: “Theeletšang, re rotogela Jerusalema moo Morwamotho a tlago gafelwa go baprista ba bagolo le boramangwalo, mme bona ba mo ahlolela lehu. Ba tla mo gafela go baditšhaba ba ba tlago mo kwera, ba mo otla ka tshelane, ba mmapola sefapanong; eupša ka letšatši la boraro Modimo o tla mo tsoša bahung.” Ya ba mosadi wa Sebediose o batamela Jesu a na le barwa ba gagwe, a khunama pele ga gagwe a na le se a nyakago go mo kgopela sona. Jesu a mmotšiša a re: “O nyakang?” Yena a mo fetola a re: “Nke o nkholofetše gore barwa ba ba ka ba babedi ba tla dula kgauswi le wena mohla o le Kgoši, mongwe ka letsogong la go ja, mongwe ka go la nngele.” Jesu a botša barwa bao a re: “Ga le tsebe se le se kgopelago. Kgane le ka kgona go meletša ditlaišo tša go swana le tše ke yogo tlaišwa ka tšona kgauswinyana?” Ba mo fetola ba re: “Ee, re ka kgona.” Jesu a re go bona: “Go tlaišwa bjalo ka nna gona le tla tlaišwa, eupša ge e le go dula ka letsogong la ka la go ja le ka go la nngele ga se taba ye e laolwago ke nna; go lebane bao ba go lokišeditšwego ke Tate.” Ge barutiwa ba bangwe ba lesome ba ekwa taba yeo ba befelelwa banna bao ba babedi. Ka gona Jesu a ba bitša ka moka, a re go bona: “Le a tseba gore babuši ba ditšhaba tša lefase ba a di gatelela, baetapele ba tšona sa bona ke go di buša ka sehlogo. Lena go lena go se ke gwa ba bjalo. Yo a nyakago go ba yo mogolo mo go lena e swanetše go ba mohlanka wa lena, le yo a nyakago go ba mohlomphegi mo go lena e swanetše go ba lekgoba la lena – go swana le Morwamotho yo a sego a tlela go hlankelwa, eupša a tletšego go hlankela batho le go ikgafela go bolawa, gore e be seloba sa ba bantši.” Ge Jesu le barutiwa ba gagwe ba tloga Jeriko lešaba le legolo le ile la mo latela. Banna ba babedi ba difofu ba ba bego ba dutše ka thoko ga tsela ba kwa gore Jesu o a feta. Ka gona ba goa ba re: “Morena, Morwa wa Dafida, re šokele!” Lešaba la ba kgalema la ba botša gore ba homole. Eupša ba goa le go feta pele ba re: “Morena, Morwa wa Dafida, re šokele!” Jesu a ema, a ba bitša. A ba botšiša a re: “Le nyaka gore ke le direle eng?” Bona ba re: “Morena, re kgopela gore o re foufolle!” Jesu a ba kwela bohloko, a ba kgwatha mahlo; ba napa ba boela ba bona, gomme ba mo latela. E rile ge Jesu le barutiwa ba gagwe ba batamela Jerusalema, ba fihlile Betfage, Thabeng ya Mehlware, Jesu a roma barutiwa ba gagwe ba babedi, a ba laela a re: “Eyang motseng wola le lebanego le wona, gomme ge le fihla le tla hwetša pokolo e tlemilwe e na le pokolwana ya yona. Le e tlemolle, le di tliše go nna. Ge motho a ka le botšiša, le mmotše le re: ‘Morena o a di nyaka,’ gomme o tla napa a le neela tšona.” Seo se diregile gore go phethege se se boletšwego ke moprofeta mola a re: “Botšang motse wa Sione le re: “ ‘Bona kgoši ya gago e tla go wena! Ke moikokobetši, monamelapokolo; o nametše pokolwana, namane ya pokolo.’ ” Ka gona barutiwa bale ba ya, ba dira se Jesu a ba boditšego sona. Ba tliša pokolo yela le pokolwana ya yona; ba bea diaparo tša bona godimo ga tšona, mme Jesu a namela. Batho ba bantšintši ba ala diaparo tša bona mo tseleng, mola ba bangwe ba rema makala a mehlare ba a ala tseleng. Lešaba le le bego le etile Jesu pele le le le bego le mo šetše morago la goa la re: “A go tumišwe Morwa wa Dafida! A go retwe yo a tlago a romilwe ke Morena! A go retwe Yogodimodimo magodimong!” Ge Jesu a tsena Jerusalema motse ka moka wa biloga. Batho ba botšišana ba re: “Ke mang yola?” Lešaba la ba fetola la re: “Ke moprofeta Jesu wa Nasaretha kua Galilea.” Jesu a ya Tempeleng mme a raka bohle ba ba rekago le ba ba rekišago ka moo. A menola ditafola tša ba ba rekanyago ditšhelete, le ditulo tša ba ba rekišago maeba, mme a re go bona: “Mangwalo a Makgethwa a re: ‘Ngwako wa ka o tla bitšwa ngwako wa thapelo.’ Eupša lena le o dira legolo la bahlakodi!” Difofu le digole tša tla go yena ka moo Tempeleng, gomme yena a ba fodiša. Baprista ba bagolo le boramangwalo ba befelwa ge ba bona dilo tše di makatšago tše a bego a di dira, le bana ba goa ka Tempeleng ba re: “A go tumišwe Morwa wa Dafida!” Ka gona ba botšiša Jesu ba re: “Na o kwa gore ba reng?” Yena a ba fetola a re: “Ee, ke a ba kwa. Kgane ga se la ka la bala mo Mangwalo a Makgethwa a rego: ‘O ithetišitše bana le masea’?” A ba tlogela a tšwa motseng a ya Bethania, a lala gona. Ge Jesu a boela motseng mosong wa le le latelago, a kwa a swerwe ke tlala. A bona mogo ka thoko ga tsela gomme a ya go wona, eupša a hwetša o se na selo ntle le matlakala. Ka gona a re go wona: “O ka se sa tsoga o entšwe dienywa!” Gateetee mohlare wola wa omelela. Ge barutiwa ba gagwe ba di bona ba tlabega ba re: “Go tlile bjang gore mogo wo o omelele ka pela ka tsela ye?” Jesu a ba fetola a re: “Ruri, ke le botša gore ge le dumela ka dipelo tša lena ka moka, le tla kgona go dira se ke se dirilego mogo wo. E sego sona fela, eupša le go botša thaba ye la re: ‘Tloga fa o yo itahlela ka lewatleng,’ gomme go tla ba bjalo. Ge le dumela le tla fiwa se sengwe le se sengwe se le se kgopelago ka thapelo.” Jesu a boela Tempeleng. Ya re ge a ruta batho, baprista ba bagolo le bagolo ba setšhaba ba tla go yena ba mmotšiša ba re: “O romilwe ke mang go dira dilo tše? Gona ke mang yo a go boditšego gore o di dire?” Jesu a ba fetola a re: “Le nna ke tla le botšiša taba e tee, gomme ge le ka mphetola ke tla le botša gore ke romilwe ke mang go dira dilo tše. Johanese o be a laetšwe ke mang go kolobetša – ke Modimo goba ke batho?” Ba sebelana ba re: “Ge re ka re: ‘O be a laetšwe ke Modimo,’ o tla re botšiša a re: ‘Bjale ke ka baka lang le se la mo dumela?’ Ge re ka re: ‘O be a laetšwe ke batho,’ gona batho ba tla re tšwa ka gobane ka moka ga bona ba tšea Johanese gore e be e le moprofeta.” Ka gona ba fetola Jesu ba re: “Ga re tsebe.” Gomme yena a re go bona: “Gona le nna nka se le botše gore ke romilwe ke mang go dira dilo tše.” “Bjale le reng ka taba ye? Go kile gwa ba le monna yo mongwe yo a bego a na le barwa ba babedi. A ya go yo mogolo a re: ‘Ngwanaka, sepela o yo šoma ka serapeng sa ka sa merara lehono.’ Morwagwe a mo fetola a re: ‘Ga ke nyake,’ eupša ka morago a itshola, a ya. Ke moka tatagwe a ya go morwagwe yo monnyane, le yena a mmotša sela a se boditšego yo mogolo. Yena a re: ‘Go lokile, tate,’ eupša a se ke a ya. Ke mang go ba babedi bao yo a dirilego se tatagwe a bego a mo kgopetše sona?” Ba mo fetola ba re: “Ke yo mogolo.” Ka gona Jesu a re go bona: “Ruri, ke le botša gore balekgetho le digwebakathobalo ba tla le tsenela pele legodimong, ka gobane Johanese Mokolobetši o tlile go lena a le laetša tsela ya nnete, fela lena la se mo dumele, a dumelwa ke balekgetho le digwebakathobalo. Le ka morago mola le di bone la se ke la itshola la mo dumela.” Jesu a re go bona: “Ekwang se sengwe seswantšho: Go kile gwa ba le monglapa yo mongwe yo a bego a bjetše merara. A e ageletša ka legora, a epa molete moo wa go pitlela diterebe ka maoto, a aga le tora ya tlhapetšo, a hirišetša balemi merara, ke moka a tšea leeto. Ge nako ya go fula diterebe e fihla, a roma bahlanka ba gagwe go balemi bale gore ba yo mo tšeela diterebe tše e swanetšego go ba tša gagwe. Eupša balemi ba swara bahlanka bale ba gagwe, ba itia yo mongwe, ba bolaya yo mongwe, gomme yo mongwe ba mo keketa ka maswika. A buša a roma bahlanka ba bangwe ba go feta bale ba go rongwa pele, gomme le bona ba ba dira tšona tšela ba di dirilego ba pele. Mafelelong a roma morwa wa gagwe a re: ‘Morwa wa ka yena ba tla mo hlompha.’ Eupša balemi bale ge ba bona morwa wa gagwe ba lakana ba re: ‘Mojalefa šo. Etlang re mmolayeng gore re tle re tšee lefa la gagwe!’ Ke moka ba mo swara, ba mo kgoromeletša ka ntle ga serapa, ba mmolaya. “Bjale mohla mong wa serapa a etla, balemi bao o tla ba dirang?” Bona ba mo fetola ba re: “Banna bao ba babe o tla ba bolaya gasehlogo, gomme serapa seo sa merara a se hirišetša ba bangwe bao ka nako ya puno ba tlago mo fa diterebe tše e swanetšego go ba tša gagwe.” Jesu a ba botšiša a re: “Na ga se la ka la bala ka Mangwalong a Makgethwa mo go thwego: “ ‘Leswika le baagi ba le nyaditšego e bile lona la sekhutlo. Se ke se se dirilwego ke Morena, se a re tlaba ge re se bona’? “Ka gona ke le botša gore le tla amogwa mmušo wa Modimo, wa fiwa setšhaba se se tlago enywa dienywa ka tshwanelo. “Yo a ka welago leswika leo godimo o tla pšhatlagana; le yo leswika leo le ka mo welago godimo le tla mo šila.” Ge baprista ba bagolo le Bafarisei ba ekwa diswantšho tša Jesu, ba lemoga gore o ra bona. Ka gona ba rata go mo swara, eupša ba boifa lešaba leo le bego le tšea gore Jesu ke moprofeta. Jesu a buša a ruta batho ka diswantšho a re: “Mmušo wa Modimo o ka swantšhwa ka kgoši ye nngwe ye e kilego ya direla morwa wa yona monyanya wa lenyalo. A roma bahlanka ba gagwe gore ba yo bitša balaletšwa gore ba tle monyanyeng woo, eupša bona ba gana go tla. Ka gona a roma bahlanka ba bangwe a ba laela gore ba yo botša balaletšwa ba re: ‘Monyanya wa ka o lokišitšwe; dipholo tša ka le diruiwa tše di nontšhitšwego di hlabilwe, gomme dilo tšohle di lokišitšwe. Etlang monyanyeng!’ Eupša balaletšwa ba se ke ba mo šetša, ba ikela medirong ya bona: yo mongwe a ikela tšhemong ya gagwe, yo mongwe a ikela kgwebong ya gagwe, mola ba bangwe ba swara bahlanka bale ba ba tlaiša, ba ba bolaya. Kgoši a befelwa, a roma bahlabani ba gagwe go yo bolaya babolai bao le go yo tšhuma motse wa bona. Ke moka a re go bahlanka ba gagwe: ‘Monyanya wona o lokišitšwe, eupša balaletšwa ba be ba se ba o swanela. Bjale eyang ditseleng tše dikgolo tša motse le bitše batho bohle ba le ka ba hwetšago.’ Ka gona bahlanka ba ya ditseleng ba kgobokanya bohle bao ba ba hwetšago fao, ba go loka le ba go se loke, gomme ntlo ya monyanya ya tlala batho. “Ge kgoši a tsena go tlo bona baeng bao ba gagwe, a hwetša go na le motho yo mongwe yo a sego a apara diaparo tša lenyalo. A mmotšiša a re: ‘Mogweraka, o tsene bjang ka mo o se wa apara bjalo ka motho ge a eya monyanyeng?’ Eupša motho yoo a no homola. Ke mo kgoši a laetšego bahlanka ba gagwe a re: ‘Mo tlemeng maoto le matsogo le mo lahleleng ka kua ntlentle leswiswing. Moo o tla lla a lomanya meno.’ ” Jesu a feleletša ka go re: “Ba ba laleditšwego ke ba bantši, eupša ba ba kgethilwego ga ba nene.” Ke moka Bafarisei ba yo lakana go rea Jesu ka potšišo. Ba roma barutiwa ba bangwe ba bona go yena ba na le batho ba bangwe ba ba emago le ba ga Heroda, ba fihla ba re: “Moruti, re a tseba gore o motho wa therešo mabapi le tšeo Modimo a nyakago gore motho a di dire, o se na taba le gore batho ba gopolang, ka gobane ga o lebelele maemo a motho. Bjale re botše gore wena taba ye o e bona bjang. Na ke tshwanelo gore re ntšhetše Kesare metšhelo, goba ga se tshwanelo?” Fela Jesu o be a lemogile bokgopo bja bona, ka gona a re go bona: “Baikaketši tenang! Le ntheelang? Mpontšheng tšhelete ya motšhelo!” Ba mo tlišetša yona, gomme yena a ba botšiša a re: “Seswantšho se ke sa mang le leina le?” Ba mo fetola ba re: “Ke tša Kesare.” Ke moka Jesu a re go bona: “Gona ntšhetšang Kesare tše e lego tša Kesare, le Modimo le mo ntšhetše tše e lego tša Modimo.” Ge ba ekwa a realo ba tlabega, gomme ba se sa mo tshwenya, ba sepela. Ka lona letšatši leo Basadusei ba bangwe ba tla go Jesu. Gape ke bona ba ba rego bahu ba ka se tsoge. Ba re go yena: “Moruti, Moshe o itše ge monna a ka hwa a se na bana, morathoagwe a tsenele mosadi wa mohu a tsošetše mogolwagwe lapa. Bjale mo go rena go be go na le barwa ba motho ba ba šupago. Wa mathomo a nyala, eupša a hwa a se na bana; ka gona mohlologadi wa gagwe a šala a tsenelwa ke morathoagwe. Le go wa bobedi gwa ba bjalo, le go wa boraro, go fihlela le go wa bošupa. Mafelelong mosadi yola le yena a hwa. Bjale mohla bahu ba tsoga mosadi yoo e tla ba wa ofe, ka ge ka moka ga bona ba be ba mo tsenetše?” Jesu a ba fetola a re: “Le a phoša! Ke ka baka la gore le sa tsebe Mangwalo a Makgethwa le maatla a Modimo. Gobane mohla bahu ba tsoga ba ka se nyale, ba ka se nyalwe – ba tla swana le barongwa ba legodimong. Bjale mabapi le go tsoga ga bahu, na ga se la ka la bala se Modimo a le boditšego sona? Gape o itše: ‘Ke nna Modimo wa Abrahama, Modimo wa Isaka, le Modimo wa Jakobo.’ Ke Modimo wa ba ba phelago, e sego wa ba ba hwilego.” Ge lešaba le ekwa a realo la kgotsa thuto yeo ya gagwe. Ge Bafarisei ba ekwa gore Jesu o ile a thiba Basadusei melomo, ba kgobokana, gomme yo mongwe wa bona yo e bego e le ramangwalo a leka go mo rea ka go mmotšiša a re: “Moruti, molao wo mogologolo melaong ya Moshe ke ofe?” Jesu a mo fetola a re: “Ke wa go re: ‘O rate Morena Modimo wa gago ka pelo ya gago ka moka, le ka moya wa gago ka moka, le ka tlhaologanyo ya gago ka moka.’ Woo ke wona molao wo mogologolo wo bohlokwahlokwa. Wa bobedi wo o lekanago le wona o re: ‘O rate bangwekawena bjalo ka ge o ithata.’ Melao ka moka ya Moshe le dithuto tša baprofeta di akaretšwa ke melao yeo ye mebedi.” Ge Bafarisei ba sa kgobokane, Jesu a ba botšiša a re: “Na le reng ka Mesia? Ke setlogolo sa mang?” Bona ba mo fetola ba re: “Ke setlogolo sa Dafida.” Jesu a ba botšiša a re: “Bjale ke ka baka lang Moya wa Modimo o ile wa tutuetša Dafida gore a mmitše ‘Morena’? Gobane Dafida o rile: “ ‘Morena o rile go Morena wa ka: Dula ka mo letsogong la ka la go ja ke be ke tle ke go fenyetše manaba a gago.’ “Bjale ge Dafida a bitša Mesia ‘Morena’, Mesia e ka ba setlogolo sa gagwe bjang?” Gwa se be le yo a kgonago go mo fetola, gomme go tloga ka lona tšatši leo gwa se be le yo a bago le sebete sa go mmotšiša selo. Jesu a botša lešaba le barutiwa ba gagwe a re: “Tokelo ya go hlatholla melao ya Moshe e filwe boramangwalo le Bafarisei. Ka gona le phethe tšohle tše ba le botšago tšona, le di latele, fela le se ke la dira tše ba di dirago, ka gobane ga ba dire go ya ka mo ba rutago batho ka gona. Ba beela batho melao ye methata ba ba botša gore ba e phethe, etšwe bona ba sa rate go dira selo go ba fefolela yona. Tšohle tše ba di dirago ba di direla gore ba bonwe ke batho. Mapantana ao a ngwadilwego ditemana tša Mangwalo a Makgethwa ba a aparago diphatleng le matsogong, ba a dira a diphaphathi, le mašaphu a diaparo tša bona ba a dira a matelele. Menyanyeng le ka disinagogeng ba rata madulo a ka pele. Motho wa bona o rata go dumedišwa ka tlhompho mapatlelong a motse le go bitšwa ‘Moruti’. Lena le se ke la bitšwa ka la ‘Moruti’, ka gobane ka moka ga lena le bana ba motho, gomme Moruti wa lena ke o tee. Le gona le se ke la bitša motho mo lefaseng la re ‘Tate’, ka gobane Tatagolena ke o tee, o legodimong. Le gona motho wa lena a se ke a bitšwa ‘Moetapele’, ka gobane moetapele wa lena ke o tee, e lego Mesia. Yo mogolo mo go lena e be mohlanka wa lena. Yo a ikgodišago o tla kokobetšwa, mme yo a ikokobetšago o tla godišwa.” “Le ba madimabe, lena boramangwalo le lena Bafarisei, baikaketši tenang, gobane legodimo le le tswalela batho ka ntle, mola le lena le sa tsene, ebile le sa dumelele bao ba nyakago go tsena. *** “Le ba madimabe, lena boramangwalo le lena Bafarisei, baikaketši tenang, gobane le tshela mawatle la putla dinaganaga gore le yo sokolla motho o tee, gomme ge le mo sokolotše le mo dire gore e be yo a swanelago hele go le feta gabedi. “Le ba madimabe, lena le nyakago go hlahla batho etšwe le foufetše, gobane le re: ‘Ge motho a ka ena ka Tempele ga go tshwenye, eupša ge a ka ena ka gauta ye e lego ka Tempeleng, gona o itlemile.’ Ditlaela tše di foufetšego tenang, se bohlokwa ke eng? A ke gauta goba ke Tempele ye gauta ye e bago ye kgethwa ka yona? Le gona le re: ‘Ge motho a ka ena ka aletare ga go tshwenye; eupša ge a ka ena ka sehlabelo se se lego moo aletareng, gona o itlemile.’ Difofu tenang, se bohlokwa ke eng? Ke sehlabelo, goba ke aletare yeo sehlabelo e bago se sekgethwa ka yona? Ka gona, ge motho a ka ena ka aletare, o ena ka yona le ka tšohle tše di lego godimo ga yona; le ge a ka ena ka Tempele, o ena ka yona le ka Modimo, e lego yena a dulago ka go yona; gomme ge motho a ka ena ka legodimo, o ena ka setulo sa bogoši sa Modimo le ka yoo a dutšego go sona. “Le ba madimabe, lena boramangwalo le lena Bafarisei, baikaketši tenang, gobane le abela Modimo karolo ya lesome ya dikhonofolo le ya leotša le ya mphogo, eupša le hlokomologa tše bohlokwa tše melao e di rutago, e lego toka le lešoko le botshephegi. Tše ke tšona tše le swanetšego go di phetha le sa hlokomologe tše dingwe tšeo. Lena le nyakago go hlahla batho etšwe le foufetše, le hlokometše kudu go phetha melao ye e amanago le ditaba tše di sego bohlokwa, bjalo ka go ntšha selabe ka senong, eupša melao ye bohlokwahlokwa ya Modimo le a e tshela. “Le ba madimabe, lena boramangwalo le lena Bafarisei, baikaketši tenang, gobane le hlatswa senwelo sa lena le mogopo ka ntle, mola dijo le dino tše di lego ka gare e le tše le di hweditšego ka šiši le ka megabaru. Mofarisei wa sefofu tena! Hlatswa senwelo ka gare pele, gomme le ka ntle se tla hlatswega. “Le ba madimabe, lena boramangwalo le lena Bafarisei, baikaketši tenang, gobane le swana le mabitla ao a tloditšwego ka motaga, ao ka ntle a bonalago e le a mabotse, mola ka gare a tletše mašapo a bahu le go bola. Le lena le bjalo: le bonala le le ba ba lokilego, mola ka dipelong tša lena le tletše boikaketši le bokgopo.” “Le ba madimabe, lena boramangwalo le lena Bafarisei, baikaketši tenang, gobane le beela mabitla ao baprofeta ba bolokilwego ka go ona maswika, la kgabiša le digopotšo tša bao ba ilego ba phela ka go loka; gomme le re ge le ka be le phetše mehleng ya borakgolokhukhu ba lena, le ka be le se la dira tše ba di dirilego, la bolaya baprofeta. Ka gona lena beng le ipega gore le ditlogolo tša bao ba bolailego baprofeta. Bjale ge, tšwelang pele le phethe se se thomilwego ke borakgolokhukhu ba lena! Lena dinoga, mafotwana a dinoga tenang! Le tla phologa bjang go ahlolelwa heleng? Ke ka baka leo ke le botšago gore ke tlilo le romela baprofeta le borabohlale le baruti. Ba bangwe ba bona le tla ba bolaya, bangwe la ba bapola sefapanong, bangwe la ba otla ka tshelane ka disinagogeng, la ba lelekiša le metse. Ya ba gona ge le ithweša molato wa go bolaya bohle ba ba lokilego, go tloga ka moloki, Abele, go fihla ka Sakaria, morwa wa Berekia, yo le mmolaetšego gare ga Tempele le aletare. Ruri, ke le botša gore batho ba mehleng yeno ba tla otlelwa dipolao tšeo ka moka.” “Joo, Jerusalema, joo, Jerusalema, wena o bolayago baprofeta gape o keketago ka maswika bao Modimo a ba romilego go wena, ke gakae ke ratile go phutha badudi ba gago bjalo ka kgogo ge e phutha matswiana a yona ka diphego tša yona, eupša o gana? Ka gona Modimo o tla ngala Tempele ya gago ya šala e le lešope. Ke le botša gore go tloga bjale le ka se sa mpona go fihlela ge le re: ‘A go retwe yo a tlago a romilwe ke Morena!’ ” Ge Jesu a tloga Tempeleng barutiwa ba gagwe ba ile ba tla go yena go mo šupetša meago ya Tempele. Jesu a re go bona: “Ga ke re meago ye ka moka le a e bona? Ruri, ke le botša gore ga go leswika le le tlago šala le hlatlagane le le lengwe mme la se kgerešwe.” E rile ge Jesu a dutše Thabeng ya Mehlware, barutiwa ba gagwe ba tla ba mmotšiša thopeng ba re: “Re botše gore dilo tšeo ka moka di tla direga neng, le gore re tla bona ka eng ge o boa, le gore ke mafelelo a lefase.” Jesu a ba fetola a re: “Le itlhokomele gore le se forwe ke motho. Batho ba bantši ba tla tla ba re ba bolelela nna, motho a re: ‘Ke nnaena Mesia.’ Gomme ba tla fora ba bantši. Le tla kwa mekgoši ya ntwa le dipego tša ntwa; eupša le se ke la tshwenyega, gobane tšeo di swanetše go no hlaga, fela e tla be e sešo ya ba mafelelo. Ditšhaba di tla hlaselana, le mebušo e tla tsogelana maatla, le ditlala le go šikinyega ga lefase kua le kua di tla ba gona. Dilo tšeo ka moka di tla ba bjalo ka mathomo a lešoko la pelego. “Ya ba gona ba le gafelago bao ba tlago le otla ba le bolaya. Le tla hloiwa ke ditšhaba ka moka ka baka la ge le dumela go nna. Mehleng yeo ba bantši ba tla kgeloga; ba tla ekana ba hloyana. Go tla tšwelela baprofeta ba bantši ba maaka gomme ba fora batho ba bantši. Ka baka la go ata ga bokgopo lerato la ba bantši le tla fokotšega. Eupša yo a ka kgotlelelago go iša mafelelong o tla phologa. Gomme Taba ye Botse ye ya mmušo wa Modimo e tla begwa lefaseng ka moka gore ditšhaba ka moka di e kwe; e be gona go tlago mafelelo a lefase.” “Le tla bona ‘Bohlola bjo bo tlontlollago Tempele’, bjo bo boletšwego ke moprofeta Daniele, bo eme ka felong mo go kgethwa.” (A mmadi a kwešiše gore bohlola bjoo ke eng.) “Ke moka bao ba tla bego ba le nageng ya Judea ba tšhabele dithabeng. Yo a tlago be a le godimo ga ngwako wa gagwe a se ke a fologela ka ngwakong go yo tšea se e lego sa gagwe. Yo a tlago be a le mašemong a se ke a boela go yo tšea seaparo sa gagwe gae. Ba madimabe mehleng yeo ke bao e tla bego e le baimana le batswetši. Le rapeleng Modimo gore go tšhaba moo ga lena go se ke gwa ba marega goba ka letšatši la Sabatha. Gobane masetlapelo a mehla yeo e tla ba a a šiišago ao a se a kago a bonwa go tloga mola lefase la bago gona go fihlela gonabjale, gape a ka se sa tsogago a bile gona. Eupša Modimo o šetše a ikemišeditše go fokotša matšatši a masetlapelo ao; ge a ka be a ka se a fokotše, go ka be go ka se phologe motho. Modimo o tla a fokotša ka baka la bao a ba kgethilego. “Mehleng yeo ge motho a ka re go lena: ‘Bonang, Mesia šo!’ goba a re: ‘Bonang, šole!’ le se ke la mo kgolwa. BoMesia ba maaka le baprofeta ba maaka ba tla tšwelela; ba tla dira matete a magolo le dimakatšo gore, ge go kgonega, ba fore le batho bao Modimo a ba kgethilego. Le tsebe gore ke le boditše pele di direga. “Ka gona ge batho ba ka le botša ba re: ‘Mesia o kua lešokeng!’ le se ke la ya gona; le ge ba ka re: ‘Bonang, o iphihlile ka phapošing!’ le se ke la ba kgolwa. Gobane Morwamotho o tla tla bjalo ka legadima le le pekenyago le etšwa ka bohlabela le eya ka bodikela. “Gape mo go lego setoto go kgobokana manong.” “Masetlapelo a mehleng yeo a tla re a sa tšo feta, letšatši la fifala, ngwedi wa se sa taga, dinaledi tša arošwa tseleng ya tšona mme tša wela fase di etšwa godimo. Go tla bonagala se sengwenyana legodimong sa go šupa gore Morwamotho o etla, gomme ditšhaba tšohle tša lefase di tla lla ge di mmona a etla ka maru a legodimo, a na le maatla a magolo le letago le legolo. Phalafala ye kgolo e tla letšwa, gomme Morwamotho o tla roma barongwa ba gagwe ka mathokong ka mane a lefase go yo kgobokanya ba a ba kgethilego, ba tlišwa ba etšwa gohle lefaseng.” “Swantšhang ka mogo: Ge makala a wona a eba a boleta, a hloga matlakala, le tseba gore selemo se kgauswi. Le lena ge le bona tšeo ka moka di direga, le tsebe gore nako ya go tla ga Morwamotho e batametše, e kgauswikgauswi. Ruri, ke le botša gore dilo tše ka moka di tla hlaga batho ba ba phelago gonabjale ba sešo ba hwa ka moka. Legodimo le lefase di tla fela, eupša tše ke di boletšego tšona e tla no fela e le nnete.” “Ge e le letšatši le nako ya gona ga go yo a di tsebago – le barongwa ba legodimong le yena Morwa ga ba di tsebe, di tsebja ke Tatagwe fela. Go tla ga Morwamotho go tla swana le se se ilego sa hlaga mehleng ya Noa. Mehleng ya pele ga meetsefula batho ba be ba eja, ba enwa, ba nyala goba ba nyalwa, gwa ba gwa fihla letšatši lela Noa a tla tsena ka leselawatleng; le ge go le bjalo ba be ba sa lemoge gore go diregang, go fihlela meetsefula a etla a ba tšea ka moka. Le mohla Morwamotho a etla go tla ba bjalo. Mehleng yeo banneng ba babedi ba ba tlago be ba šoma tšhemong, go tla tšewa yo mongwe, gwa šadišwa yo mongwe. Basading ba babedi ba ba tla bego ba šila lwaleng, go tla tšewa yo mongwe, gwa šadišwa yo mongwe. “Ka gona le dule le itokišitše, ka gobane ga le tsebe letšatši le Morena wa lena a tlago tla ka lona. Ge mongmotse a ka be a tsebile gore lehodu le tla tla neng, ruri, a ka be a se a robala a lesa lehodu le thuba ngwako wa gagwe. Ka gona le lena le dule le itokišitše, ka gobane Morwamotho o tla tla ka nako ye le sa gopolego gore a ka tla ka yona.” “Bjale mohlanka wa go botega yo bohlale ke ofe? Ke yo mong wa gagwe a mmeilego mohlokomedi wa bahlanka ba gagwe gore a ba fe dijo ka nako ya go ja. Go lehlogonolo mohlanka yoo mong wa gagwe a tlago mo hwetša a dira bjalo ge a boa. Ruri, ke le botša gore mong wa gagwe o tla mmea mohlokomedi wa tšohle tše a nago le tšona. Eupša mohlanka ge e le yo mobe, ka pelong o tla re: ‘Mong wa ka o diegile go boa,’ gomme a thoma go itia bahlankakayena le go ja le go nwa le matagwa. Ke moka mong wa mohlanka yoo a boa ka letšatši le mohlanka a sa mo naganego ka lona le ka nako ye a sa e tsebego. Mong wa gagwe o tla mo kgaola ditho, a ba a mo dira se se dirwago baikaketši. O tla lla a lomanya meno.” “Mehleng yeo mmušo wa Modimo o tla swantšhwa ka dikgarebe tše lesome tše di kilego tša tšea mabone a tšona, tša yo gahlanetša monyadi. Tše tlhano tša tšona e be e le ditlaela, tše tlhano e le tše bohlale. Tša ditlaela tša tšea mabone a tšona, eupša tša se ke tša duta makhura, mola tšela tše bohlale tšona di tšea mabone di duta le makhura ka dibjana. Monyadi a diega, ka gona dikgarebe tšela tša potuma, tša robala. “Bošegogare gwa kwala mokgoši motho a re: ‘Monyadi šoowe! Etšwang le mo gahlanetše!’ Dikgarebe tšela tše lesome tša tsoga, tša lokiša mabone a tšona. Tšela tša ditlaela tša re go tše bohlale: ‘Nke le re topeletše makhura ka gobane mabone a rena a a tima.’ Tšela tše bohlale tša ba fetola tša re: ‘Aowa, ga re na makhura a a ka lekanego rena le lena. Go kaone ge le ka yo ithekela go barekiši.’ Ya re ba sa ile go reka, monyadi a šala a fihla. Bale ba bahlano ba ba bego ba itokišitše ba tsena le yena ka monyanyeng, gomme lemati la tswalelwa. “Ka morago gwa fihla bale ba bangwe ba re: ‘Morena, morena, re bulele!’ Monyadi yena a ba araba ka go re: ‘Aowa, ga ke le tsebe.’ ” Gomme Jesu a feleletša ka go re: “Ka gona le dule le itokišitše, ka gobane ga le tsebe letšatši le nako ya go tla ga Morwamotho.” “Mehleng yeo mmušo wa Modimo o tla swantšhwa ka monna yo a bego a nyaka go tšea leeto. A bitša bahlanka ba gagwe gomme a ba bea bahlokomedi ba thoto ya gagwe. Mongwe a mo fa dipapetlana tše tlhano tša gauta, mongwe a mo fa tše pedi, mongwe a mo fa e tee. A fa yo mongwe le yo mongwe wa bona ka moo yena a mo tsebago a kgona ka gona. Ke moka a tšea leeto. Mohlanka yola wa go fiwa dipapetlana tše tlhano a tloga le semeetseng a yo gweba ka tšhelete yeo, gomme ya mo tswalela dipapetlana tše dingwe tše tlhano. Le yola wa go neelwa dipapetlana tše pedi a tswalelwa tše dingwe tše pedi. Yola wa go neelwa papetlana e tee yena a yo epa molete, a fihla tšhelete yela ya mong wa gagwe. “Ge go fetile nako ye telele mong wa bahlanka bale a boa gomme a ba botšiša gore ba dirileng ka tšhelete yela ya gagwe. Mohlanka yola a bego a neetšwe dipapetlana tše tlhano tša gauta a batamela a mo neela tšela tše dingwe tše tlhano, a re: ‘Morena, o be o nneetše dipapetlana tše tlhano; bjale bona, tše dingwe tše tlhano tše ke di tswadišitšego tšona šedi.’ Mong wa gagwe a re: ‘O dirile gabotse, mohlanka yo a lokilego yo a botegago! O ile wa hlokomela tše dinnyane ka potego. Ka gona ke tla go bea mohlokomedi wa tše dintši. Tsena ka gae o tle o ipshine le nna!’ “Ke moka gwa batamela mohlanka yola wa go neelwa dipapetlana tše pedi tša gauta, mme a re: ‘Morena, o be o nneetše dipapetlana tše pedi; bjale bona, tše dingwe tše pedi tše ke di tswadišitšego tšona šedi.’ Mong wa gagwe a re: ‘O dirile gabotse, mohlanka yo a lokilego yo a botegago! O ile wa hlokomela tše dinnyane ka potego, ka gona ke tla go bea mohlokomedi wa tše dintši. Tsena ka gae o tle o ipshine le nna!’ “Ka morago gwa batamela mohlanka yola a bego a neetšwe papetlana e tee ya gauta, mme a re: ‘Ke tsebile gore o motho wa serumolani, o buna mo o sego wa bjala gona, o kgobela mabele a o sego wa ka wa a gaša. Ka ge ke be ke boifa, ke ile ka tloga ka yo epela tšhelete ya gago. Bjale še yona.’ “Mong wa gagwe a re: ‘Mohlanka yo mobe wa sebodu towe! Kganthe o tsebile gore ke buna mo ke sego ka bjala gona, ke kgobela mabele a ke sego ka ka ka a gaša? Gona nkabe o ile wa iša tšhelete ya ka polokelong, gomme ge ke boa nkabe ke hweditše tšhelete ya ka le tswala ya yona. Bjale ge, mo amogeng papetlana yeo le e fe yola a nago le dipapetlana tše lesome. Gobane mang le mang yo a nago le sa gagwe o tla okeletšwa, gomme a ba le tše dintši le go feta; eupša yo a se nago sa gagwe le bonnyane bjo a nago le bjona o tla bo amogwa. Lefeelana le la mohlanka lona le lahleleng ka kua ntlentle leswiswing, moo a tlago lla a lomanya meno.’ “Mohla Morwamotho a etla e le Kgoši a na le barongwa ka moka, o tla dula setulong sa gagwe sa bogoši, gomme ditšhaba ka moka di tla kgoboketšwa pele ga gagwe. Yena o tla ba kgethologanya bjalo ka modiši ge a kgethologanya dinku le dipudi. Dinku o tla di bea ka letsogong la go ja, dipudi tšona a di bea ka go la nngele. Ke moka o tla re go batho ba ba lego ka letsogong la go ja: ‘Etlang, lena le šegofaditšwego ke Tate! Etlang ke le iše legodimong le le le lokišeditšwego go tloga mola lefase le hlolwa. Gobane ke ile ka re ke swerwe ke tlala, la mpha dijo; ka re ke nyorilwe, la mpha sa go nwa; ka re ke le mošele, la nkamogela ka malapeng a lena; ka re ke hloka diaparo, la mpha tšona; ka re ke babja, la tla la mpona; ke le kgolegong, la nketela.’ “Baloki ba tla mmotšiša ba re: ‘Morena, ke neng mo re ilego ra go bona o swerwe ke tlala mme ra go fa dijo, goba o nyorilwe, ra go fa sa go nwa? Ke neng mo re ilego ra go bona o le mošele, gomme ra go amogela ka malapeng a rena, goba o hloka diaparo, ra go fa tšona? Ke neng mo re ilego ra go bona o babja goba o le kgolegong, mme ra go etela?’ Kgoši o tla ba fetola a re: ‘Ruri, ke le botša gore ge le be le direla yo mongwe wa banabešo ba ba nyatšegago ba, le be le direla nna!’ “Ka morago o tla re go bao ba lego ka letsogong la gagwe la nngele: ‘Tlogang mo go nna, barogakwa tenang, le ye mollong wo o sa timego wo o goleditšwego Diabolose le barongwa ba gagwe! Gobane ke ile ka re ke swerwe ke tlala, la se mphe dijo; ke nyorilwe, la se mphe sa go nwa; ka re ke le mošele, la se nkamogele ka malapeng a lena; ka re ke hloka diaparo, la se mphe tšona; ka re ke babja, ke le kgolegong, la se nketele.’ “Bona ba tla mo fetola ba re: ‘Morena, ke neng mo re ilego ra go bona o swerwe ke tlala, goba o nyorilwe, goba o le mošele, goba o hloka diaparo, goba o babja, goba o le kgolegong, gomme ra se go thuše?’ Yena o tla ba fetola a re: ‘Ruri, ke le botša gore ge le be le sa direle yo mongwe wa banyatšegi ba, ke gona ge le be le sa direle nna.’ Gomme bona ba tla ya go otlwa ka go sa felego, baloki bona ba tla ya go phelela sa ruri.” E rile ge Jesu a feditše go anega ditaba tšeo ka moka a re go barutiwa ba gagwe: “Le a tseba gore ka morago ga matšatši a mabedi e tla ba Monyanya wa Paseka, gomme Morwamotho o tla gafelwa batho go bapolwa sefapanong.” Ke moka baprista ba bagolo le bagolo ba setšhaba ba kopana mošate ga Khayafase, Moprista yo Mogologolo, gomme ba lakana go swara Jesu ka bohwirihwiri gore ba tle ba mmolaye. Ba re: “E se be ka nako ya monyanya, gore setšhaba se se ke sa tsoša mpherefere.” Jesu o be a le motseng wa Bethania, ka ga Simone, monna yo a bego a kile a swarwa ke bolwetši bja letlalo bja go mo tšhilafatša. Ya re Jesu a sa ja, mosadi yo mongwe a tla go yena a swere sedibelo sa leswika le le bitšwago alapastere se swere senkgabose sa theko ye kgolo, gomme a se tšhela Jesu hlogong. Barutiwa ge ba mmona a dira bjalo ba selekega ba re: “Senkgabose se se senyetšwang? Se ka be se rekilwe ka tšhelete ye ntši gomme yona ya fiwa badiidi!” Jesu, ka go tseba se ba se bolelago, a re go bona: “Le tshwenyetšang mosadi yo? Gape o nthakgile. Gobane badiidi le na le bona ka mehla, eupša nna le ka se be le nna ka mehla. Ka go tšhela senkgabose se mmeleng wa ka o ntokišeditše go bolokwa. Ruri, ke le botša gore gohle lefaseng mo Ebangedi ye e tlago begwa gona, go tla bolelwa le se mosadi yo a se dirilego, e le gore a fele a gopolwa.” Ke moka yo mongwe wa barutiwa ba Jesu ba lesome le metšo ye mebedi, yo leina la gagwe e bego e le Judase Iskariote, a ya go baprista ba bagolo, a ba botšiša a re: “Le tla mphang ge nka le gafela Jesu?” Bona ba mo fa dipapetlana tše masome a mararo tša silibera. Go tloga yona nakong yeo Judase a thoma go nyaka nako ye e lebanego ya go gafela Jesu diatleng tša bona. Ka letšatši la pele la Monyanya wa Dinkgwa tše di se nago komelo, barutiwa ba Jesu ba tla go yena ba mmotšiša ba re: “O nyaka gore re yo go lokišetša dijo tša Paseka kae?” Jesu a ba fetola a re: “Eyang go monna yo mongwe kua motseng, gomme le fihle le mmotše le re: ‘Moruti o re: Nako ya ka e batametše. Nna le barutiwa ba ka re tlilo ja Paseka ka ga gago.’ ” Barutiwa bale ba dira ka mo Jesu a ba laetšego ka gona, ba lokiša dijo tša Paseka. Ya re mantšiboa Jesu le barutiwa ba gagwe ba lesome le metšo ye mebedi ba dula fase gore ba je. Ge ba eja, Jesu a re: “Ruri, ke le botša gore yo mongwe wa lena o tla nkeka.” Barutiwa ba gagwe ba nyama kudu, gomme ba mmotšiša ka o tee ka o tee ba re: “Kgane o ra nna, Morena?” Jesu a ba fetola a re: “Yo a šebago le nna ka thiswaneng ke yena a tlago nkeka. Morwamotho go tloga gona o tla tloga, ka ge Mangwalo a Makgethwa a realo, eupša go madimabe yo a ekago Morwamotho! Go ka be go bile kaone ge motho yoo a ka be a se a tswalwa!” Judase, yena yo a bego a tlilo mo eka, a re: “Kgane o ra nna, Moruti?” Jesu a mo fetola a re: “Go bjalo.” Ya re ge ba eja, Jesu a tšea senkgwa, a tumiša Modimo, a mo leboga, a se ngwathaganya, a se fa barutiwa ba gagwe a re: “Tšeang le jeng, se ke mmele wa ka.” A tšea le senwelo, a leboga Modimo, a ba neela sona a re: “Se nweng ka moka ga lena; se ke madi a ka ao a tiišetšago kgwerano ya Modimo, ao a tšhollelwago ba bantši gore ba lebalelwe dibe. Ke a le botša, nka se sa nwa beine ye go fihlela mohla ke enwa ye mpsha le lena legodimong.” Ge ba seno opela sefela sa tumišo, ba tšwa ba ya Thabeng ya Mehlware. Ya ba Jesu o re go bona: “Ka moka ga lena bošegong bjo le tla ntšhabela, ka gobane Mangwalo a Makgethwa a re: ‘Ke tla bolaya modiši, gomme dinku tša gagwe tša šwalalana.’ Eupša e tla re ge ke tsogile bahung, ka le tlogela pele go ya Galilea.” Petrose a mo fetola a re: “Le ge bohle ba ka go tlogela, nna nka se tsoge ke go tlogetše!” Jesu a re go yena: “Ruri, ke go botša gore gona bošegong bjo, pele mokoko o lla, o tla be o ntatotše gararo.” Petrose a mo fetola a re: “Nna nka se tsoge ke go latotše, le ge eba e ka ba gore ke hwe le wena!” Le barutiwa ba bangwe ka moka ba realo. Ka morago Jesu a ya le barutiwa ba gagwe lefelong le lengwe le le bitšwago Getsemane, gomme a re go bona: “Dulang mo ge ke sa ya go rapela mola.” A tloga le Petrose le barwa ba Sebediose ka babedi. A thoma go nyama le go tlalelwa, gomme a re go bona: “Ke nyamile la go hwa. Dulang mo le letele le nna.” Ke moka a ya pejana, a itahlela fase ka sefahlego, a rapela a re: “Tate, ge go kgonega, senwelo se sa tlaišego a se mphete ka thoko. Fela go se phethege ya ka thato, go upše go phethege ya gago.” A boela go barutiwa bale ba gagwe ba bararo, gomme a ba hwetša ba robetše. A re go Petrose: “Na le paletšwe ke go itiša le nna lebakanyana fela? Letelang le rapele, gore le se lekwe. Ge e le maikemišetšo ona le nawo, fela le a palelwa.” A ya go rapela la bobedi a re: “Tate, ge go sa kgonege gore senwelo se sa tlaišego se mphete ka thoko ke sa se nwe, a go phethege thato ya gago.” Ge a boela go barutiwa ba gagwe a ba hwetša ba robetše gape, ka gobane ba be ba potuma kudu. A ba tlogela gape a yo rapela la boraro, a boeletša ona mantšu ale. A gomela go barutiwa bale ba gagwe mme a re go bona: “Na le sa robetše, le a khutša? Nako e fihlile ya gore Morwamotho a gafelwe diatleng tša badiradibe. Emang, re sepeleng! Bonang, monna yo a nkekago o šetše a batametše.” E rile ge Jesu a sa bolela gwa fihla Judase, e lego yo mongwe wa barutiwa ba gagwe ba lesome le metšo ye mebedi. O be a na le lekoko le legolo le le itlhamilego ka ditšhoša le melamo, le romilwe ke baprista ba bagolo le bagolo ba setšhaba. Moeki o be a lakane le lekoko leo a re: “Monna yo ke tlago mo atla, ke yena. Le mo swareng!” Judase a ya go Jesu ntle le go dikadika, a mo lotšha a re: “Thobela, Moruti!” Gomme a mo atla. Jesu a mo araba a re: “Mogwera, dira se o se tletšego mo!” Ke moo lekoko le batametšego Jesu la mo swara la mo tiiša. Yo mongwe wa bao ba bego ba na le Jesu a hwanyolla tšhoša ya gagwe, a rema mohlanka wa Moprista yo Mogologolo a mo kgaola tsebe. Jesu a re go yena: “Bušetša tšhoša ya gago madulong a yona. Bohle ba ba lwago ka tšhoša ba tla bolawa ka tšhoša. Kgane o gopola gore ga ke kgone go kgopela Tate, mme yena a akgofa a nthomela dihlopha tše di fetago tše lesome le tše pedi tša madira a barongwa? Fela ge nka dira bjalo, Mangwalo a Makgethwa a a rego se ke se se swanetšego go direga, a ka phethega bjang?” Ya ba yona nako yeo Jesu a botšišago lekoko leo a re: “Le reng le tlile ka ditšhoša le melamo go ntshwara mo nkego ke nna mohlakodi? Tšatši le lengwe le le lengwe ke be ke dula le batho ke ba ruta ka Tempeleng, gomme le sa ntshware. Fela tšohle tše di diregile gore go phethege tše di ngwadilwego ke baprofeta ka Mangwalong a Makgethwa.” Ke moka barutiwa ba gagwe bohle ba mo tlogela ba tšhaba. Bale ba go swara Jesu ba mo iša ga Khayafase, Moprista yo Mogologolo, moo go bego go kgobokane boramangwalo le bagolo ba setšhaba. Petrose a ba latela a le kgojana, go ba go yo fihla ka lapeng ga Moprista yo Mogologolo. A tsena ka lapeng gomme a dula fase le baleti gore a bone gore go tla feletša kae ka Jesu. Baprista ba bagolo le Kgorokgolo ka moka ba leka go phara Jesu ka bohlatse bja maaka gore ba tle ba mmolaye, eupša ba bo hloka, le ge go be go etla dihlatse tše dintši tša maaka. Mafelelong gwa tla dihlatse tše pedi tša re: “Monna yo o rile a ka kgereša Tempele ya Modimo mme a e aga gape ka matšatši a mararo.” Moprista yo Mogologolo a emelela a re go Jesu: “Na ga o iphetolele? O reng ka se ba go beago molato ka sona?” Eupša Jesu a no ikhomolela. Moprista yo Mogologolo a mmotšiša gape a re: “Ke go eniša ka Modimo yo a phelago gore o re botše ge eba o Mesia, Morwa wa Modimo.” Jesu a mo fetola a re: “O a bolela. Eupša ke le botša gore go tloga bjale le tla bona Morwamotho a dutše ka letsogong la go ja la Ramaatlaohle a etla ka maru!” Ke moo Moprista yo Mogologolo a gagotšego diaparo tša gagwe a re: “O nyefotše Modimo! Dihlatse re sa di iša kae? Le ikwetše ka bolena ge a nyefola Modimo! Bjale le reng ka yena?” Ba fetola ba re: “O swanetšwe ke lehu!” Ke moka ba mo tshwela ka mare sefahlegong, ba mo itia ka matswele, ba bangwe ba mo faphola ka dintahle, ba re: “Mesia, ka ge o le moprofeta, re botše gore o itiilwe ke mang!” Petrose o be a dutše ka lapeng. Modiredi yo mongwe wa mosetsana a tla go yena a re: “Le wena o be o na le Jesu wa Galilea.” Eupša Petrose a latola batho bohle ba mo kwa a re: “Se o se bolelago nna ga ke se tsebe!” Ya re ge a eya seferong sa lapa, yo mongwe modiredi wa mosetsana a mmona gomme a botša ba ba bego ba le moo a re: “Monna yo le yena o be a na le Jesu wa Nasaretha.” Gapegape Petrose a latola a ena a re: “Nna monna yola ga ke mo tsebe!” Ka morago ga nakonyana banna ba ba bego ba le moo ba tla go Petrose ba re: “Ruri, le wena o yo mongwe wa bona, gobane le polelo ya gago e a go lahla!” Ke moka Petrose a thoma go rogana le go ikana a re: “Monna yola ga ke mo tsebe!” Mokoko wa napa wa lla. Ya ba Petrose o elelwa sela Jesu a mmoditšego sona mola a re: “Pele ga ge mokoko o lla, o tla be o ntatotše gararo.” A napa a tšwela ka ntle a lla gabohloko. Ya re ge go esa baprista ba bagolo ka moka le bagolo ba setšhaba ba lakana Jesu gore ba mmolaye. Ba mo tlema ka diketane, ba tloga naye, ba yo mo gafela Mmušiši Pilato. Judase yola wa go mo eka, ge a ekwa gore Jesu o ahloletšwe lehu, a itshola mme a bušetša dipapetlana tšela tše masome a mararo tša silibera go baprista ba bagolo le bagolo ba setšhaba a re: “Ke dirile sebe ka go eka motho yo a se nago molato gore a bolawe.” Bona ba mo fetola ka go re: “Yeo ga se taba ya rena – ke dibonwakewena!” Judase a lahlela dipapetlana tšela ka Tempeleng, mme a tloga a yo ikgama. Baprista ba bagolo ba topa dipapetlana tšeo ba re: “Ye ke tšhelete ye e rekilego lehu la motho, gomme ga se ra dumelelwa go e tšhela ka polokelong ya Tempele.” Ge ba seno rerišana ka yona ba reka tšhemo ya mmopi wa dipitša, ya ba serapa sa go bolokela bašele. Ke ka baka leo setsha seo le lehono se sa bitšwago “Tšhemo ya Madi”. Ya ba ge go phethega sela sa go bolelwa ke moprofeta Jeremia mola a re: “Ba tšere dipapetlana tše masome a mararo tša silibera, tšhelete ye Baisraele ba bego ba kwane go mo reka ka yona, ba reka tšhemo ya mmopi wa dipitša ka yona, ka moo Morena a bego a ntaetše.” Jesu a ema pele ga mmušiši, gomme yena a mmotšiša a re: “Na ke wena kgoši ya Bajuda?” Jesu a mo fetola a re: “O a bolela.” Eupša a se ke a fetola selo go tše baprista ba bagolo le bagolo ba setšhaba ba mo pharago ka tšona. Pilato a ba a re go yena: “Na ga o kwe tše ba go pharago ka tšona?” Eupša Jesu a se ke a fetola selo, mo mmušiši a ilego a ba a makala kudu. Ka Monyanya wa Paseka mmušiši o be a tlwaetše go lokolla mogolegwa yo lešaba le kganyogago gore le lokollelwe yena. Ka nako yeo go be go na le mogolegwa yo mongwe wa go tsebega ka bosenyi yo leina la gagwe e bego e le Jesu Barabase. Bjale ge lešaba le kgobokane, Pilato a le botšiša a re: “A le nyaka gore ke le lokollele ofe: Jesu Barabase, goba Jesu yo a bitšwago Kriste?” Gape o be a realo ka gobane a tseba gore ba gafetše Jesu go yena ka baka la mona. Ya re ge Pilato a dutše sedulong sa kahlolo, mosadi wa gagwe a mo romela molaetša wo o rego: “O se ke wa ba wa tsena taba ya monna yoo wa go se be le molato, gobane ke letše ke lorile toro ye e šiišago ka yena.” Baprista ba bagolo le bagolo ba setšhaba ba hlohleletša lešaba gore le kgopele Pilato gore a ba lokollele Barabase mme a bolaye Jesu. Pilato a botšiša lešaba a re: “Ke ofe mo go ba babedi ba yo le nyakago gore ke le lokollele yena?” Bona ba mo fetola ba re: “Barabase!” Pilato a ba botšiša a re: “Bjale ke direng ka Jesu yo a bitšwago Kriste?” Ka moka ga bona ba re: “A a bapolwe sefapanong!” Pilato a ba botšiša a re: “Etse ke molato ofe wo a obilego?” Bona ba goa le go feta ba re: “A a bapolwe sefapanong!” Ge Pilato a bona gore ga go thuše selo le gore go ka no tsoga mpherefere, a tšea meetse, a hlapa diatla lešaba le mmona, gomme a re: “Nna ga ke na molato lehung la monna yo. Ke dibonwakelena!” Lešaba ka moka la fetola la re: “Lehu la monna yo e tla ba dibonwakerena le bana ba rena!” Ke moo Pilato a ba lokolletšego Barabase; gomme ge Jesu a seno itiwa ka tshelane ka taelo ya gagwe, a mo gafela go bapolwa sefapanong. Bahlabani ba Pilato ba iša Jesu ka ntlong ya mmušiši gomme sekgao ka moka sa bahlabani sa mmokanela. Ba mo apola diaparo tša gagwe, ba mo apeša seaparo se sehubedu. Ba loga kgare ya meetlwa, ba mo rweša yona, mme ba mo swariša lepara ka letsogo la go ja. Ke moka ba khunama pele ga gagwe, ba mo gegea ba re: “Re a lotšha, kgoši ya Bajuda!” Ba mo tshwela ka mare, ba tšea lepara lela ba mo itia hlogo ka lona. Ba re go mo gegea ba mo apola seaparo sela, ba mo apeša diaparo tša gagwe. Ke moka ba mo iša go bapolwa sefapanong. Ya re ge ba etšwa ba gahlana le monna yo mongwe wa Sirene yo leina la gagwe e bego e le Simone, ba mo gapeletša go rwalela Jesu sefapano. Ba fihla felo mo gongwe mo go bitšwago Golgotha, e lego go re “Felo ga Legata”. Fao ba neela Jesu beine ye e hlakantšwego le selo sa go galaka; eupša ya re ge a e kwele, a gana go e nwa. Ge ba seno mmapola sefapanong ba abelana diaparo tša gagwe ka go tema. Ke moka ba dula fao ba mo leta. Ka godimo ga hlogo ya gagwe gwa ngwalwa molato wo a pharilwego ka wona wa go re: “Yo ke Jesu, Kgoši ya Bajuda.” Bahlakodi ba babedi ba bapolwa le yena, yo mongwe a le ka letsogong la gagwe la go ja, mola yo mongwe a le ka go la nngele. Batho ba ba bego ba feta ka tsela ba be ba šišinya dihlogo, ba nyefola Jesu ba re: “Owaa, wena wa go kgereša Tempele mme wa e tsoša ka matšatši a mararo! Itlhakodiše ge eba o Morwa wa Modimo! Theoga moo sefapanong!” Baprista ba bagolo le boramangwalo le bagolo ba setšhaba le bona ba mo kwera bjalo ba re: “O phološitše ba bangwe, fela yena ga a kgone go iphološa! Ga ke re ke yena kgoši ya Israele? A a theoge mo sefapanong gonabjale, gomme re tla dumela go yena! O be a botile Modimo, bjale a a mo phološe, ge eba o a mo rata. Gobane o be a re ke yena Morwa wa Modimo!” Le bona bahlakodi bale ba go bapolwa le yena ba mo roga bjalo. Go tloga ka nako ya lesome le metšo ye mebedi mosegare go fihlela ka nako ya boraro mathapama, naga ka moka ya aparelwa ke leswiswi. Ya re ka nako ye e ka bago ya boraro mathapama, Jesu a goelela kudu a re: “Eli, Eli, lama sabagtani?” Ke go re: “Modimo wa ka, Modimo wa ka, o ntlogeletšeng?” Ba bangwe ba ba bego ba eme fao ba mo kwa, gomme ba re: “O bitša Eliya!” Yo mongwe wa bona a kitima a yo tšea motšitla, a o ina ka beineng ye bodila, a o hlomela patlaneng, a o bea molomong wa gagwe. Bale ba bangwe ba re: “Lesa, re bone ge eba Eliya o tla tla a mo hlakodiša!” Jesu a buša a goelela kudu, ya ba o a ikhwela. Ke moka seširo sa ka Tempeleng sa gagoga ka bogare, go tloga godimo go fihla fase. Lefase la šikinyega, maswika a pharoga, mabitla a bulega, gomme badumedi ba bantši bao ba bego ba ithobaletše ba tsoga. Ba tšwa mabitleng, gomme ya re ge Jesu a tsogile bahung, ba ya Motseng wo Mokgethwa, ba bonwa ke batho ba bantši. Molaodi wa bahlabani gotee le bahlabani bale ba go leta Jesu, ge ba bona lefase le šikinyega le tše dingwe tše di diregilego, ba tšhoga kudu ba re: “Ka nnete motho yo e be e le Morwa wa Modimo!” Go be go na le basadi ba bantši moo, ba lebeletše ba le kgojana, e le ba ba bego ba latela Jesu mme ba mo hlokomela go tloga mola a etšwa Galilea. Mo go bona go be go na le Maria Magadalena le Maria, mmagoJakobose le Josefa, le mosadi wa Sebediose. E rile mantšiboa gwa tla monna yo mongwe wa mohumi wa go tšwa Arimathea. Leina la gagwe e be e le Josefa, le yena e le morutiwa wa Jesu. A ya go Pilato, a fihla a mo kgopela setopo sa Jesu. Pilato a laela gore a se fiwe. Ka gona Josefa a se tšea, a se phuthela ka lešela le le hlwekilego, a se bea ka lebitleng la gagwe, le a bego a sa tšo le gwaya leswikeng. Ke moka a kgokološetša leswika le legolo mojako wa lebitla mme a sepela. Maria Magadalena le Maria yola yo mongwe ba be ba dutše moo ba lebane le lebitla. Ka letšatši le le latelago, e lego la Sabatha, baprista ba bagolo le Bafarisei ba kopana ga Pilato, ba re go yena: “Morena, re sa gopola gore sehwirihwiri sela mola se sa phela se kile sa re: ‘Ke tla tsoga bahung ka letšatši la boraro.’ Ka gona, laela gore lebitla la gagwe le letwe go fihlela ka letšatši la boraro, gore barutiwa ba gagwe ba tle ba se ke ba mo utswa, mme ba botša batho gore o tsogile bahung. Bohwirihwiri bjoo bo ka feta le bjola bja pele.” Pilato a ba fetola a re: “Tšeang baleti le yo leta lebitla ka tlhokomelo.” Ke moka ba ya lebitleng, ba fihla ba kiba leswika lela sekibo sa mmušiši, gomme ba tlogela baleti moo. E rile ge Sabatha e seno feta, mosong wa letšatši la Sontaga, Maria Magadalena le Maria yola yo mongwe ba ya go hlola lebitla. Gateetee lefase la šikinyega ka maatla; morongwa wa Morena a theoga legodimong, a tla a pshikološa leswika lela a le tloša, a dula godimo ga lona. O be a bonala a le bjalo ka legadima, le diaparo tša gagwe di re twaa bjalo ka lehlwa. Ka baka la go tšhošwa ke morongwa yoo baleti bale ba thothomela, ba feleletša ba le bjalo ka ge nke ba hwile. Morongwa a re go basadi bale: “Le se ke la boifa; ke a tseba gore le nyaka Jesu yo a bego a bapotšwe sefapanong. Ga a gona mo, o tsogile bahung bjalo ka ge a ile a bolela. Etlang le bone mo a bego a robaditšwe gona. Napang le itlhaganele, le yo tsebiša barutiwa ba gagwe le re: ‘O tsogile bahung, gomme bjale o le thaka pele go ya Galilea; ke moo le tlago mmona gona.’ Ke wona molaetša wo ke le tlišeditšego wona.” Ke moka ba tloga moo lebitleng ba itlhaganetše ba tšhogile, fela ba thabile kudu, gomme ba kitimela go yo begela barutiwa ba gagwe. Gateetee Jesu a gahlana le bona a re: “Dumelang!” Bona ba mmatamela, ba mo swara maoto, ba mo khunamela. Yena a re go bona: “Se boifeng! Sepelang le yo botša banabešo gore ba ye Galilea, moo ba tlago mpona gona.” E rile ge basadi bale ba sepela, bahlabani ba bangwe bao ba bego ba letile lebitla ba ya motseng, ba fihla ba botša baprista ba bagolo tšohle tše di diregilego. Baprista ba bagolo ba kopana le bagolo ba setšhaba mme ba lakana gore ba fe bahlabani bale tšhelete ye ntši, gomme ba re: “Le bolele gore barutiwa ba gagwe ba tlile bošego ba mo utswa lena le sa ile ka boroko. Ge mmušiši a ka kwa taba ye, rena re tla mmea pelwanatšhwaana ra ba ra šetša gore le lena le se tsene bothateng.” Baleti bao ba ile ba tšea tšhelete yeo mme ba dira ka mo ba boditšwego ka gona, gomme le lehono pego yeo e sa le ka moo e ilego ya phatlalatšwa ka gona Bajudeng. Barutiwa bale ba lesome le o tee ba ya Galilea, thabeng yela Jesu a bego a ba laetše gore ba ye go yona. Ge ba mmona, ba mo khunamela, le ge ba bangwe ba bona ba be ba belaela. Jesu a ba batamela, a re go bona: “Ke filwe maatla ohle legodimong le lefaseng. Ka gona eyang go ba ditšhaba tšohle, le ba dire barutiwa ba ka: le ba kolobetše ka leina la Tate, le la Morwa, le la Moya wo Mokgethwa, le ba rute go phetha tšohle tše ke le laetšego tšona. Tsebang gore ke tla ba le lena ka mehla go fihla mohla lefase le fela.” Taba ye Botse ya Jesu Kriste, Morwa wa Modimo, e thoma ka mokgwa wo: Ka pukung ya moprofeta Jesaya go ngwadilwe go re: “Ke roma motseta wa ka a yo go kgorela tsela pele o etla. Segoeledi lešokeng se re: ‘Lokišetšang Morena tsela; mo otlolleleng mebila!’ ” Ka gona Johanese Mokolobetši a ya lešokeng a botša batho gore ba sokologe dibeng tša bona, ba kolobetšwe, gomme Modimo o tla ba lebalela tšona. Batho ka moka ba naga ya Judea le ba motse wa Jerusalema ba ya go Johanese. Ba ipolela dibe tša bona mme yena a ba kolobetša ka nokeng ya Jordane. Johanese yo o be a apara seaparo sa boya bja kamela, a ipofa letheka ka lerala la mokgopha, gomme a eja ditšie le todi ya dinose. A begela batho a re: “Yo a tlago ntlhatlama o mpheta ka maatla. Ga se ka swanela le go inama ka mmofolla marala a dieta. Nna ke le kolobeditše ka meetse, eupša yena o tla le kolobetša ka Moya wo Mokgethwa.” Ka tšona nako tšeo Jesu a tla a etšwa Nasaretha, nageng ya Galilea, gomme a kolobetšwa ke Johanese ka nokeng ya Jordane. Ge Jesu a seno tšwa ka meetseng, a bona leratadima le gagoga gomme Moya wa Modimo o theogela godimo ga gagwe o le bjalo ka leeba. Gwa kwagala lentšu le etšwa legodimong le re: “O Morwa wa ka yo ke mo ratago, yo a nkgahlago kudu.” Ke moka Moya wa akgofa wa iša Jesu lešokeng, moo a ilego a dula matšatši a masome a mane a lekwa ke Sathane, a dutše le diphoofolo, barongwa bona ba mo hlankela. Ge Johanese a seno lahlelwa ka kgolegong, Jesu a ya Galilea gomme a begela batho Taba ye Botse ya Modimo. A re: “Nako e fihlile, le mmušo wa Modimo o batametše. Sokologang dibeng tša lena, le dumele Taba ye Botse!” Ya re ge Jesu a sepela lebopong la letsha la Galilea, a bona barei ba dihlapi ba babedi, Simone le Andrease, ngwanabo, ba rea dihlapi ka malokwa ka letsheng. Jesu a re go bona: “Ntateleng, gomme ke tla le dira barei ba batho.” Ba akgofa ba tlogela malokwa a bona, ba mo latela. A fetela pejana gomme a bona barwa ba Sebediose, e lego Jakobose le Johanese, ngwanabo. Ba be ba lokiša malokwa a bona ba le ka leselawatleng. Ge Jesu a ba bona, a ba bitša; ba tlogela tatagobona Sebediose le bathwalwa ka leselawatleng, gomme ba latela Jesu. Jesu le barutiwa ba gagwe ba fihla motseng wa Kapernaume, gomme ka letšatši la Sabatha Jesu a tsena ka sinagogeng, a thoma go ruta batho. Batho ba makatšwa ke mokgwa wo a rutago ka wona, gobane o be a sa rute bjalo ka boramangwalo, eupša a ruta e le yo a sa ipelaelego. Ka yona nako yeo ke ge go goeletša monna yo mongwe ka sinagogeng yo a bego a tsenwe ke moya wo mobe, a re: “O nyakang mo go rena, wena Jesu wa Nasaretha? A o tlile go re fediša? Nna ke a go tseba – o Mokgethwa wa Modimo!” Jesu a laela moya woo wo mobe a re: “Homola, o tšwe go motho yo!” Moya wo mobe woo wa mo akga, wa goeletša kudu, mme wa tšwa go yena. Batho ka moka ba tlabega mo ba ilego ba botšišana ba re: “Ke dilo mang tše? Gape ye ke thuto ye mpsha, ya maatla a magolo. Le meoya ye mebe o a e laola, gomme e a mo kwa.” Setumo sa Jesu sa akgofa sa phatlalala gohle le naga ya Galilea. Ge Jesu le barutiwa ba gagwe ba tloga ka sinagogeng, ba ile ba ya ga gaboSimone le Andrease ba na le Jakobose le Johanese. Mmatswale wa Simone o be a robetše a swerwe ke letadi; Jesu a botšwa ka ga yena. A ya go yena, a mo tsoša a mo swere ka seatla. Molwetši a fola letadi, gomme a ba apeela. Ge letšatši le diketše, swahlane e šetše e swere, ba tliša go yena bohle ba ba babjago le ba ba tsenwego ke bademone. Batho ka moka ba motse ba tla ba bokana pele ga ngwako. A fodiša ba bantši ba malwetši a mehutahuta, a leleka le bademone ba bantši. A se ke a ba dumelela go bolela selo ka yena, gobane ba be ba tseba gore ke yena mang. Ka letšatši le le latelago a tsoga e sa le bošego. A tloga a ya felo mo go se nago motho, a fihla a rapela. Simone le bao a bego a na le bona ba tšwa ba ya go mo nyaka. Ge ba mo hweditše ba mmotša ba re: “Batho bohle ba a go nyaka.” Jesu a ba fetola a re: “A re yeng mo gongwe metsaneng ye e lego fa kgauswi, gore le gona ke yo ruta batho, gobane ke sona se ke se tletšego.” Gomme a tšama a ruta batho ka disinagogeng tša Galilea yohle, a leleka le bona bademone mo bathong. Monna yo mongwe yo a bego a swerwe ke bolwetši bja letlalo bja go mo tšhilafatša a tla go Jesu, a khunama pele ga gagwe a re: “Morena, etse ge o rata o ka mphodiša ka hlweka!” Jesu a mo šokela, a otlolla letsogo a mo kgwatha a re: “Ke a rata; hlweka!” A sa tšo realo ke ge monna yola a fodile, a le gabotse. Jesu a mo fa tsela le semeetseng ge a seno mo laya tsebegokwa ka go re: “Bona, o se ke wa botša motho ka taba ye, eupša eya go moprista a go bone, gomme o dire sehlabelo se se laetšwego ke Moshe, gore e be bohlatse go batho bja gore o hlwekile.” Eupša monna yola ge a tloga a tšama a gaša taba yeo mo gohle. A e phatlalatša mo Jesu a bego a bile a palelwa le ke go tsena metseng a bonwa, a dula ntle mašokeng, gomme batho ba etla go yena ba etšwa thoko tšohle. Ge go fetile matšatši a se makae Jesu a boela motseng wa Kapernaume, gomme gwa tsebega gore o mo gae. Batho ba kgobokana ka bontši mo go ilego gwa hlokega sebaka, le gona pele ga mojako. Jesu a ba begela molaetša wa Modimo. Gwa fihla banna ba bane ba rwadišane motho wa go repha ditho, ba mo tliša go Jesu. E rile ge ba šitwa ke go batamela Jesu ka baka la bontši bja batho, ba phula lešoba tlhakeng go lebana le mo Jesu a bego a le gona. Ge ba seno phula lešoba ba fološetša leako leo morephaditho a bego a robaditšwe go lona ka lona. Ge Jesu a bona ka moo ba dumelago go yena ka gona, a botša morephaditho a re: “Ngwanaka, o lebaletšwe dibe tša gago.” Boramangwalo ba bangwe ba ba bego ba dutše moo ba re ka dipelong tša bona: “Motho yo o reng a realo? O nyefola Modimo. Ke mang yo a ka lebalelago batho dibe ntle le Modimo?” Jesu a lemoga ka pela se ba se naganago, ka gona a re go bona: “Le reng le nagana ka mokgwa wo? Se bonolo ke sefe, go re go morephaditho: ‘O lebaletšwe dibe tša gago,’ goba go re: ‘Emelela o rwale leako la gago o sepele’? Bjale ge, ke nyaka go le bontšha gore Morwamotho o na le maatla a go lebalela batho dibe mo lefaseng.” Ka gona a re go morephaditho: “Ke re go wena: Emelela, o rwale leako la gago o ye gae.” Yena a emelela, a napa a rwala leako la gagwe, a tšwa a sepela bohle ba mo lebeletše. Ka moka ba makala, gomme ba tumiša Modimo ba re: “Tša mohuta wo ga se ra ka ra di bona!” Jesu a buša a boela kua letsheng la Galilea; lešaba le legolo la tla go yena, mme a ba ruta. Ka morago ge a feta a bona Lefi, morwa wa Alfeose, a dutše ngwakong wa lekgetho. A re go yena: “Ntatele!” Lefi a emelela a mo latela. Ya re ge Jesu a le dijong ka ngwakong wa Lefi, balekgetho ba bantši le badiradibe ba bangwe ba tla ba ja le yena gotee le barutiwa ba gagwe, ka ge ba be ba dula ba mo šala morago ka bontši. Ge boramangwalo ba bangwe ba e bego e le Bafarisei ba bona Jesu a eja le badiradibe le balekgetho, ba botšiša barutiwa ba gagwe ba re: “O reng a eja le batho ba mohuta wo?” Jesu a ba kwa gomme a ba fetola a re: “Ngaka ga e nyakwe ke ba ba phedilego gabotse, e nyakwa ke ba ba babjago. Ga se ka tlela go botša baloki gore ba sokologe, ke tletše go botša badiradibe.” Barutiwa ba Johanese Mokolobetši le ba Bafarisei ba kile ba re ba ikona dijo gwa tla batho ba bangwe go Jesu, ba mmotšiša ba re: “Barutiwa ba Johanese le ba Bafarisei ba reng ba ikona dijo, mola barutiwa ba gago bona ba sa ikone?” Jesu a ba fetola a re: “Kgane bagwera ba monyadi ba ka ikona dijo monyadi a sa na le bona? Ge monyadi a sa na le bona ba ka se ikone. Fela nako e tla tla yeo ka yona monyadi a tlago tlošwa go bona; ya ba gona ba ikonago. “Ga go motho yo a pharago segaswa se sefsa seaparong sa kgale, ka gobane se ka gagola seaparo sa kgale sa godiša lešoba. Le gona ga go motho yo a tšhelago beine ye e sa tšogo hlotlwa ka makukeng a kgale, ka gobane e ka a paleša, mme gwa loba beine le ona makuka. Beine ye e sa tšogo hlotlwa e tšhelwa ka makukeng a mafsa.” E kile ya re ge Jesu a putla ka mašemong a korong ka letšatši la Sabatha, barutiwa ba gagwe ba tšama ba ekga diako. Bafarisei ba botšiša Jesu ba re: “Barutiwa ba gago ba reng ba dira se se sego sa dumelelwa ka letšatši la Sabatha?” Jesu a ba fetola a re: “Na ga se la ka la bala se Dafida a kilego a se dira mola a hloka sa go ja, mola yena le banna ba ba bego ba na le yena ba swerwe ke tlala – ka mo a ilego a tsena ka ngwakong wa Modimo mehleng ya ge Abiatare e le Moprista yo Mogologolo, mme a ja dinkgwa tše di bego di abetšwe Modimo, tše go bego go se motho yo a dumeletšwego go di ja ge e se moprista, a di ngwathelana le bao ba bego ba na le yena?” Jesu a fetša ka go re: “Letšatši la Sabatha le diretšwe motho, ga se motho yo a diretšwego letšatši la Sabatha. Ge go le bjalo, Morwamotho o na le tokelo ya go laetša ge eba melao ya Sabatha e swanetše go latelwa.” Jesu a buša a tsena ka sinagogeng, ka moo go bego go na le monna wa go repha letsogo. Go be go na le batho ba ba bego ba beile Jesu leihlo gore ba bone ge a ka mo fodiša ka letšatši la Sabatha, gore ba tle ba mmee molato. Jesu a re go monna yoo wa go repha letsogo: “Etla o eme mono pele.” A botšiša batho a re: “Etse ke eng se motho a dumeletšwego go se dira ka letšatši la Sabatha, ke se sebotse goba ke se sebe, ke go phološa motho goba ke go mmolaya?” Eupša bona ba homola. Jesu a ba gadima a befetšwe, a bile a nyamišitšwe ke go ba le melala ye methata ga bona. A botša monna yola a re: “Otlolla letsogo la gago!” A le otlolla, gomme la fola. Bafarisei ba napa ba tšwa ka sinagogeng, ba lakana le ba sehlopha sa Heroda gore ba tle ba bolaye Jesu. Jesu a tloga le barutiwa ba gagwe a ya letsheng la Galilea, mme batho ba bantši ba mo latela ba etšwa Galilea le Judea le Jerusalema, le seleteng sa Idumea, le ka mošola wa noka ya Jordane, le tikologong ya motse wa Tirose le wa Sidone, ka gobane ba be ba kwele tše a di dirago. Lešaba la batho e be e le le legolo moo Jesu a ilego a ba a laela barutiwa ba gagwe gore ba dule ba mo lokišeditše leselawatle gore lešaba leo le se ke la mo pitlaganya. Ka ge a be a fodiša batho ba bantši, bohle ba ba bego ba babja ba ile ba mmokanela gore ba mo kgwathe. Le batho ba ba tsenwego ke meoya ye mebe ge ba mmona ba be ba itahlela fase pele ga gagwe, ba goa ba re: “Ke wena Morwa wa Modimo!” Jesu a ba kgala kudu gore ba se mo tsebagatše. Jesu a rotogela thabeng, a bitša ba a ikgethetšego bona, mme ba tla go yena. A bea ba lesome le metšo ye mebedi baapostola gore ba be le yena, le gore a tle a ba rome go yo bega Taba ye Botse ya Modimo, le gore ba be le maatla a go leleka bademone. Ba lesome le metšo ye mebedi ba a ba beilego baapostola šeba: Simone yo a reilwego la Petrose, le Jakobose, morwa wa Sebediose, le Johanese, ngwanabo, bao Jesu a ba reilego leina la Boanergese, ke go re “Boramodumo”, le Andrease, le Filipi, le Bartolomeose, le Mateu, le Thomase, le Jakobose, morwa wa Alfeose, le Thadeose, le Simone, Mollelatokologo, le Judase Iskariote, yola wa go mo eka. Jesu a boela gae, mme lešaba le legolo la tla la kgobokana gape mo yena le barutiwa ba gagwe ba ilego ba ba ba se hwetše nako ya go ja. Ba gabo ge ba ekwa tšeo, ba tšwa go yo mo swara, gobane batho ba be ba re o hlakane hlogo. Boramangwalo ba bangwe ba go tšwa Jerusalema ba re: “O na le Beeltsebulo!” Ba re: “O leleka bademone ka yena mmuši yoo wa bona!” Jesu a ba bitša, a bolela le bona ka diswantšho a re: “Na kgane Sathane a ka kgona go leleka Sathane? Mmušo ge o ka ikarola dihlopha tše di lwago seng sa tšona, o ka se kgone go tia. Le lapa ge le ka ikarola diripa tše di lwago, le ka se kgone go tia. Le yena Sathane ge a ka itsogela maatla a ikarola dihlopha, a ka se kgone go tia, e tla napa ya ba bofelo bja gagwe. “Ga go motho yo a ka kgonago go tsena ka ngwakong wa monna wa senatla a thopa thoto ya gagwe a se a mo tlema pele, a kgona a mo thopela. “Ruri, ke le botša gore batho ba tla lebalelwa dibe tša bona ka moka le tšohle tše ba ka nyefolago Modimo ka tšona. Eupša yo a ka nyefolago Moya wo Mokgethwa a ka se tsoge a lebaletšwe, o tla be a obile molato wo o sa felego.” Jesu a realo ka ge batho ba be ba re o na le moya wo mobe. MmagoJesu le banababo ba fihla. Ba ema ka ntle, mme ba roma motho go yo ba biletša yena. O be a dikaneditšwe ke lešaba, gomme lona la re go yena: “Mmago le bomorwarrago ba ka kua ntle, ba a go nyaka.” Jesu a ba fetola a re: “Mma le bomorwarre ke bomang?” Bao ba bego ba mo dikaneditše a ba gadima, a re go bona: “Mma le bomorwarre šeba, gobane yo a dirago thato ya Modimo ke yena morwarre, ke yena kgaetšedi ya ka, ke yena mma.” Jesu a thoma go ruta batho gape a le lebopong la letsha la Galilea. A kgobokanelwa ke lešaba le legolo kudu mo a ilego a ba a namela leselawatle, a dula ka go lona le le ka letsheng, lešaba lona le eme lebopong. A ba ruta ditaba tše dintši ka diswantšho a re go bona: “Theeletšang! Monna yo mongwe o kile a tšwa a yo bjala peu. Ya re ge a dutše a e gaša, ye nngwe ya wela tseleng, gomme dinonyana tša tla tša e ja. Ye nngwe ya wela lekgwareng mo go bego go se na mobu wo montši. Ya mela ka pela ka gobane mobu o be o sa iše fase. Ge letšatši le hlabile la tšhuma dimelana tšela, gomme tša pona ka ge medu ya tšona e se ya tsenelela fase. Ye nngwe ya wela mehlašaneng ya meetlwa, gomme ge mehlašana e gola ya kgama dimelana tšela, mme tša se enywe. Ye nngwe yona ya wela mobung wo mobotse gomme ya mela ya gola, mabele a gona a tswala: a mangwe a tšwa dithoro tše masome a mararo, a mangwe tše masome a a selelago, a mangwe tše lekgolo.” Jesu a fetša ka go re: “Yo a nago le tsebe a a kwe!” Ya re ge ba le noši, ba bangwe ba ba bego ba mo latela gotee le barutiwa ba gagwe ba lesome le metšo ye mebedi ba mo kgopela gore a ba hlalošetše diswantšho tšela a ba boditšego tšona. Jesu a ba fetola a re: “Lena le utolletšwe sephiri sa mmušo wa Modimo, eupša ba bangwe ba rutwa dilo tšohle tša wona ka diswantšho, gore “ ‘go lebelela ba lebelele, fela ba se bone, go kwa ba kwe, fela ba se kwešiše selo, gore ba tle ba se sokologe, mme ba lebalelwa dibe tša bona.’ ” Jesu a re go bona: “Ge le sa kwešiše seswantšho se, tše dingwe ka moka tšona le tla di kwešiša bjang? Mobjadi o gaša lentšu la Modimo. Ba bangwe ba bjalo ka peu ya go wela tseleng; ba re go kwa molaetša wo o bjetšwego ka dipelong tša bona, Sathane a nape a ba amoge wona. Ba bangwe ba bjalo ka peu ya go wela lekgwareng. Ke bao e rego ge ba kwele molaetša wo ba akgofe ba o amogele ka lethabo. Eupša wa se dule sebaka ka dipelong tša bona; e be ba lebakanyana fela. Fela ge go tsoga ditlaišo goba go hlomarwa ka baka la molaetša wo, ba akgofe ba kgeloge. Ba bangwe ba bjalo ka peu yela ya go wela mehlašaneng ya meetlwa. Ke ba ba rego go kwa molaetša wo, go balabala ka tša bophelo le go goketšwa ke mahumo le dikganyogo tša dilo tše dingwe di tsene di khupetše molaetša wo mme o se ba tšwele mohola. Ba bangwe bona ba bjalo ka peu ye e wetšego mobung wo mobotse. Bona ke ba ba rego go kwa molaetša wo ba o amogele, mme ba atlege bjalo ka dimelana tša peu tše di tšwago dienywa: tše dingwe di tšwe tše masome a mararo, tše dingwe tše masome a a selelago, tše dingwe tše lekgolo.” Jesu a re go bona: “Kgane lebone le re go thumašwa le khurumelwe ka seroto goba le bewe ka fase ga malao, ga ke re le bewa sehlomong sa lona? Ga go na sephiri se se ka se kego sa tsebja, le gona ga go na selo se se utilwego se se ka se kego sa utollwa. Yo a nago le tsebe ya go kwa, a a kwe!” A tšwela pele a re: “Le ele hloko se le se kwago. Mokgwa wo le swarago ba bangwe ka wona, le lena le tla swarwa ka wona – ebile lena le tla okeletšwa. Yo a nago le sa gagwe o tla okeletšwa, mme yo a se nago le sa gagwe, le se a rego ke naso o tla se amogwa.” Jesu a tšwela pele a re: “Mmušo wa Modimo o ka swantšhwa ka motho yo a gašago peu ka tšhemong ya gagwe. Bošego le mosegare, ge a robetše goba a phafogile, peu yona e a mela ya ba ya gola yena a sa tsebe gore bjang. Gobane mobu o mediša peu ka bowona; go thoma lekgaba, ya ba seako, mme seako sa tlala mabele. Ge mabele a budule a ripša ka sekela ge go fihlile lebaka la puno.” Jesu a re: “Na mmušo wa Modimo re ka o swantšha ka eng? Re ka o bapiša le eng? O bjalo ka thorwana ya peu ya lehloko, yona e fetwago ke dipeu ka moka, mme ya bjalwa mobung. Ge e seno mela, e a gola mme ya feta dimela ka moka, ya ba le makala a matelele ao dinonyana di kgonago go agela dihlaga tša tšona go ona.” Jesu a ba begela molaetša wa Modimo ka diswantšho tše dintši tše dibjalo, go ya ka mo ba bego ba kgona go kwešiša ka gona. O be a sa ke a bolela le bona ka ntle ga go ba swantšhetša, eupša ge a be a na le barutiwa ba gagwe fela, o be a ba hlalošetša tšona ka moka. Mantšiboa a letšatši leo Jesu a re go barutiwa ba gagwe: “A re seleleng ka mošola.” Ba laelana le lešaba, ba tloga le Jesu ka leselawatle le a bego a le nametše, maselawatle a mangwe a mo felegetša. Gateetee gwa tsoga ledimo le legolo mo maphoto a lewatle a ilego a ba a šwahlela ka leselawatleng, leselawatle la ba la nyaka go tlala meetse. Yena o be a le kua morago ka leselawatleng a ithobaletše, a sametše mosamelo. Ba mo tsoša, ba re go yena: “Moruti! Na kgane ga o na taba le rena ge re ehwa?” Jesu a emelela, a kgalema ledimo, mme a re go letsha: “Homola, o re tuu!” Ledimo la napa la homola, gwa re tuu! Jesu a botšiša barutiwa ba gagwe a re: “Le reng le tšhogile ka tsela ye? Le reng le hloka tumelo?” Ba be ba tšhogile kudu, gomme ba botšišana ba re: “Etse ke motho mang yo wa go theeletšwa le ke ledimo le maphoto a letsha?” Jesu le barutiwa ba gagwe ba fihla ka mošola wa letsha la Galilea, nageng ya Bagerasa. Ge Jesu a seno tšwa ka leselawatleng, a gahlana le monna yo mongwe yo a nago le moya wo mobe a etšwa mabitleng, moo a bego a dula gona. O be a se sa kgona go tlengwa ke motho ešita le ka diketane. Ke gantši mo a ilego a tlengwa maoto le diatla ka diketane, eupša nako le nako a kgaola diketane tšeo tša diatla le tša maoto, mme go se motho yo a mo kgonago. Bošego le mosegare o be a dula a le mabitleng le dithabeng, a goa a bile a ikgobatša ka maswika. E rile ge a bona Jesu a sa le kgojana, a mo kitimela, a fihla a mo khunamela, a goeletša kudu a re: “Na o nyakang mo go nna, wena Jesu, Morwa wa Modimo Yogodimodimo? Ka Modimo ke a go rapela, o se ke wa ntlhokofatša.” O ile a realo ka baka la ge Jesu a be a rile: “Etšwa go motho yo, wena moya wo mobe!” Jesu a mmotšiša a re: “Ke wena mang?” Yena a mo fetola a re: “Ke nna ‘Lekoko’, ka gobane re ba bantši!” Gomme a rapela Jesu gagolo gore a se ke a raka meoya yeo ye mebe nageng yeo. Mola kgauswinyana go be go na le mohlape wo mogolo wa dikolobe o fula motheogeng wa thaba. Meoya yeo ye mebe ya kgopela Jesu ya re: “Re dumelele go ya mola dikolobeng tšela gore re di tsene.” Jesu a e dumelela, gomme ya tšwa go monna yola ya yo tsena dikolobe tšela. Gomme mohlape ka moka wa dikolobe tše e ka bago tše dikete tše pedi wa thetheoga motheogeng wa wela ka letsheng wa betwa. Badiši ba tšona ba tšhaba ba yo tsebiša batho ba ba lego motseng le ba ba lego mašemong. Batho ba ya go bona se se diregilego. Ge ba fihla go Jesu ba bona motho yola a bego a tsenwe ke bademone. O be a dutše, a apere, le tlhaologanyo ya gagwe e boetše sekeng, mme ba boifa. Ba ba di bonego ba yo anegela ba bangwe se se hlagetšego monna yola wa bademone, le se se hlagetšego dikolobe. Ba kgopela Jesu gore a tšwe ka nageng ya bona. E rile ge Jesu a tsena ka leselawatleng, monna yola a bego a tsenwe ke bademone a mo kgopela gore a sepele le yena. Jesu a se ke a mo dumelela, fela a mo laela a re: “Boela gae go ba geno, o ba botše tše dikgolo tše Morena a go diretšego tšona tše, le ka mo a go šoketšego ka gona.” Monna yola a napa a tloga a ya seleteng sa Metse ye Lesome, a thoma go bega tše Jesu a mo diretšego tšona, gomme batho ka moka ba tlabega. E rile ge Jesu a seletše gape ka mošola wa letsha ka leselawatle, lešaba le legolo la mo kgobokanela a le lebopong la letsha. Gwa tla le mookamedi yo mongwe wa sinagoge yo leina la gagwe e bego e le Jairose. Yena ge a bona Jesu, a itahlela fase maotong a gagwe, a mo kgopela a hlokofetše a re: “Morwedi wa ka o a hwa; nke o tle o mmee diatla gore a fole mme a phele!” Jesu a ya naye, lešaba le legolo le mo latela ebile le mo pitlaganya. Gona moo go be go na le mosadi yo mongwe yo a bego a feditše mengwaga ye lesome le metšo ye mebedi a bolawa ke bolwetši bja ngope. O be a ile a tlaišwa kudu ke dikalafo tša dingaka tše dintši. A loba tšohle tše a bego a na le tšona, eupša bolwetši bja fela bo gola. O be a šetše a kwele ka ga Jesu, mme a tla ka morago ga gagwe gare ga lešaba, a kgwatha seaparo sa gagwe, a rile ka pelong: “Ge nka kgwatha le ge e le diaparo tša gagwe, ke tla fola.” Gateetee a fola ngope yela gomme a ikwa mo mmeleng gore o fodile. Jesu a kwa le semeetseng gore mo go yena go tšwile maatla, gomme a retologa a le gare ga lešaba, a botšiša a re: “Ke mang yo a kgwathilego diaparo tša ka?” Barutiwa ba gagwe ba mo fetola ba re: “O ka re o bona ka moo lešaba le go pitlaganyago ka gona wa be o sa botšiša o re ke mang yo a nkgwathilego?” Jesu a ba gadima go bona yo a mo kgwathilego. Mosadi yola, ka ge a be a tseba se se diregilego mo go yena, a tla a thothomela a tšhogile, a itahlela fase pele ga gagwe, a mmotša tšohle ka bolwetši bja gagwe le ka mo a fodilego ka gona. Jesu a re go yena: “Morwedi wa ka, tumelo ya gago e go fodišitše; sepela gabotse mme e be gona ge o fodile.” Ya re Jesu a sa bolela, gwa fihla baromiwa ba go tšwa ga Jairose, ba re go yena: “Morwedi wa gago ga a sa phela, bjale Moruti o sa mo tshwenyetšang?” Jesu a hlokomologa se ba se bolelago, gomme a re go Jairose: “Se tšhoge, sa gago a e be go dumela.” Gomme a se dumelele motho go ya le yena, ge e se Petrose le Jakobose le Johanese, ngwanaboJakobose. Ba fihla ga Jairose mo Jesu a ilego a bona batho ba gakanegile, ba lla ba golola gagolo. Gomme a tsena, a re go bona: “Le reng le gakenegile le lla? Ngwana yo ga se a hwa, o ithobaletše.” Bona ba mo sega. Yena a ba ntšhetša ntle bohle. A bitša tatagongwana le mmagwe le barutiwa bale ba gagwe ba bararo, mme a tsena ka mo ngwana a letšego ka gona. A mo swara ka seatla, a re go yena: “Talita kum!” Ke go re: “Mosetsana, ke re go wena, tsoga!” Ka bjako mosetsana yola a tsoga, a sepelasepela. O be a na le mengwaga ye lesome le metšo ye mebedi. Batho ba tlabega kudu. Gomme Jesu a ba laya tsebegokwa gore ba se di botše motho, a laela le gore mosetsana yoo a fiwe dijo. Jesu a tloga moo a ya motseng wa gabo, mme barutiwa ba gagwe ba mo latela. Ka letšatši la Sabatha a thoma go ruta ka sinagogeng, gomme batho ba bantši ba ba mo kwago ba tlabega, ba botšišana ba re: “Ditaba tše o di tšere kae? Ke bohlale mang bjo a bo filwego bjo? Mehlolo yona o e kgona bjang? Kgane ga se mmetli yola e lego morwa wa Maria, ngwanaboJakobose le Josese le Judase le Simone? Ga ke re le dikgaetšedi tša gagwe di dula le rena?” Gomme a ba kgopiša. Yena a re go bona: “Moprofeta o hlompšha gohle, ge e se ga gabo le melokong ya gabo le lapeng labo.” O ile a se kgone go dira mehlolo felo fao, ge e se go fodiša balwetši ba se ba kae ka go ba bea diatla. A tlabja ke go se dumele ga bona. Jesu a šika le metse ya tikologo ya Nasaretha a tšama a ruta batho. A bitša barutiwa ba gagwe ba lesome le metšo ye mebedi, a ba roma ka babedi ka babedi, mme a ba fa maatla a go leleka meoya ye mebe bathong. A ba laela a re ba se ke ba tloga le selo, ge e se lehlotlo; a re ba se ke ba tšea mefago, goba mokotla wa mokgopedi, goba tšhelete ka dikhwama tša bona. A re ba rwale dieta, eupša seaparo sa bobedi ba se ke ba se tšea. A ba laya a re: “Ge le fihla motseng wo mongwe mme la amogelwa ka lapeng le lengwe, le dule go lona go fihlela ge le tloga motseng woo. Ge le ka re le fihla felo batho ba gona ba se le amogele goba ba se le theeletše, le tloge moo le hlohlora marole dinaong tša lena, e be go ba lemoša gore ba tla otlwa ke Modimo.” Ba ile ba tloga ba tšama ba begela batho gore ba sokologe. Ba leleka bademone ba bantši bathong, ba tlotša balwetši ba bantši ka makhura a mohlware, ba ba fodiša. Kgoši Heroda a kwa ka ga Jesu, ka gobane mo gohle batho ba be ba bolela ka yena. Ba bangwe ba be ba re: “Ke Johanese Mokolobetši o tsogile bahung, ke ka baka leo a nago le maatla a go dira mehlolo.” Ba bangwe ba re: “Ke Eliya.” Ba bangwe ba re: “Ke moprofeta go etša baprofeta bale ba kgale.” Heroda ge a di kwa a re: “Ke Johanese Mokolobetši yola ke mo kgaotšego hlogo, o tsogile bahung.” Gape yo ke Heroda yola wa go laela gore Johanese a swarwe. Ba ile ba mo tlema mme ba mo iša kgolegong ka ge Heroda a be a tšere Herodiase, mosadi wa Filipi, ngwanabo. Johanese Mokolobetši o ile a sola Heroda a re: “Ga se wa dumelelwa go tšea mosadi wa ngwaneno.” Herodiase o be a swere Johanese ka pelo a bile a rata go mmolaya, eupša a palelwa, ka gobane Heroda o be a boifa Johanese ka ge a be a lemogile gore ke monna wa go loka yo mokgethwa, ka gona a mo šireletša. O be a rata go fela a mo theeletša, le ge ka mehla a be a kgopišwa ke dipolelo tša gagwe. Ka tšatši le lengwe Herodiase a hwetša sebaka. E be e le ka tšatši la matswalo a Kgoši Heroda, mme yena a diretše bahlankedi ba bagolo ba mmušo, le balaodi ba madira, le bagolo ba naga ya Galilea monyanya. Gwa tsena morwedi wa Herodiase, mme a bina, a kgahla Heroda le baeng ba gagwe. Ka gona kgoši a re go yena: “Nkgopele se o se ratago, ke tla go fa sona.” A mo enela leboelela a re: “Se o ka nkgopelago sona ke tla go fa, le ge e ka ba go go arolela naga ya ka ka bogare.” Ka gona mosetsana a tšwa a yo botšiša mmagwe a re: “Ke kgopele eng?” Mmagwe a re: “Hlogo ya Johanese Mokolobetši.” Mosetsana a kitima a boela go kgoši, a fihla a mo kgopela a re: “Ke rata gore o mphe hlogo ya Johanese Mokolobetši ka sebjana gonabjale!” Kgoši a nyama kudu, eupša ka baka la ge a be a enne pele ga baeng, a se rate go gana. A napa a roma moleti wa gagwe yo mongwe a mo laela gore a yo tšea hlogo ya Johanese. Moleti yola a yo kgaola Johanese hlogo ka kgolegong. A e tliša ka sebjana a e fa mosetsana, mme mosetsana a e fa mmagwe. E rile ge barutiwa ba Johanese ba di kwa, ba tla ba rwala setopo sa gagwe, ba yo se boloka ka lebitleng. Baapostola ba boela go Jesu, ba mo anegela tšohle tše ba di dirilego le tše ba di rutilego batho. Ka ge batho ka bontši ba be ba etla go yena ba bangwe ba tloga, yena le barutiwa ba gagwe ba ile ba hloka le nako ya go ja. Ka gona a re go bona: “A re yeng mo gongwe mo re ka bago noši, gore le kgone go khutša gannyane.” Ke moka ba tloga ka leselawatle, ba ya felo mo gongwe mo go se nago motho. Fela batho ba ba bona ge ba tloga, le gona ba bantši ba tseba gore ba ya kae; ka gona ba tloga metseng ka moka ba sepela ka go itlhaganela, mme ba fihla lefelong leo pele ga ge Jesu le barutiwa ba gagwe ba fihla. Jesu ge a etšwa ka leselawatleng a bona lešaba leo le legolo, mme a le šokela gobane le be le le bjalo ka dinku tše di se nago modiša; mme a thoma go ba begela ditaba tše dintši tša mmušo wa Modimo. E rile ge letšatši le šetše le thapame, barutiwa ba gagwe ba tla go yena ba re: “Letšatši le šetše le thapame, le gona felo fa ke lešokeng. Botša batho ba gore ba ye metsaneng le metseng ya kgauswi go ithekela tša go ja.” Jesu a ba fetola a re: “Lena ba feng tša go ja.” Bona ba mmotšiša ba re: “A o ra gore re ye re reke dinkgwa tša dipapetlana tše makgolo a mabedi tša silibera gore re tle re ba fe ba je?” Jesu a ba botšiša a re: “Le na le dinkgwa tše kae? Sepelang le yo lebelela gore le na le tše kae.” Ge ba seno lebelela, ba tla go yena ba re: “Dinkgwa ke tše tlhano, dihlapi ke tše pedi.” Jesu a laela barutiwa ba gagwe gore ba dudiše batho ka moka ka dihlopha bjanyeng bjo botala. Batho ba dula fase ka dihlopha tša ba lekgolo le tša ba masome a mahlano. Jesu a tšea dinkgwa tšela tše tlhano le dihlapi tšela tše pedi, a lebelela legodimong, a tumiša Modimo, a mo leboga. A ngwathaganya dinkgwa tšela, a di nea barutiwa ba gagwe gore ba di abele batho. Dihlapi tšela tše pedi le tšona a di arolela bohle. Ka moka ba ja ba khora. Barutiwa ba topa marathana a dinkgwa tšela le a dihlapi tšela; gwa tlala diroto tše lesome le metšo ye mebedi. Banna ba ba ilego ba ja e be e le ba dikete tše tlhano. Jesu a kgareetša barutiwa ba gagwe gore ba tsene ka leselawatleng ba mo ete pele, ba ye motseng wa Betsaida, ka mošola wa letsha, ge yena a sa botša lešaba gore le boele magae. E rile ge a seno laelana le bona a rotogela thabeng go yo rapela. Mantšiboa ke ge leselawatle le šetše le le gare ga letsha, mme yena a le lebopong a nnoši. A bona barutiwa ba gagwe ba le mathateng a go sepediša leselawatle, gobane ba be ba sepela ba lebane le phefo. Ge go esa a tla go bona a sepela godimo ga meetse. O be a nyaka go ba feta, eupša bona ba mmona a sepela godimo ga meetse, gomme ba nagana gore ke seriti, ba hlaba mokgoši. Bohle ba tšhoga kudu ge ba mmona. Yena, ntle le go senya sebaka, a re go bona: “Betang dipelo, ke nna! Se boifeng!” A tsena ka leselawatleng go bona, mme phefo ya napa ya homola. Barutiwa ba gagwe ba tlabega kudukudu, ka ge ba be ba se ba kwešiša gabotse mohlolo wola wa go khoriša banna ba dikete tše tlhano; ba be ba sa kwešiše. E rile ge ba tshelela ka mošola wa letsha ya ba ba fihla nageng ya Genesarete, moo ba ilego ba bofa leselawatle la bona lebopong. Ge ba etšwa ka leselawatleng batho ba mo tseba ka pela. Ba itlhaganela ba ya mo gohle nageng yeo, ba thoma go rwala balwetši ba robetše magogweng a bona, ba ba iša mo ba kwago gore o gona. Mo gohle mo a tsenago gona, metsaneng le metseng le merakeng, batho ba be ba bea balwetši mapatlelong a motse mme ba mo rapela gore a ba dumelele go kgwatha le ge e ka ba morumo wa kobo ya gagwe; gomme bohle ba ba o kgwathilego ba be ba fola. Bafarisei ba bangwe gammogo le boramangwalo ba ba bego ba etšwa Jerusalema ba tla ba bokanela Jesu. Ba bona barutiwa ba gagwe ba bangwe ba eja dijo ka diatla tše di sego tša hlweka, ke gore tše di sego tša hlapiwa ka mokgwa wa setlwaedi sa Bajuda. Gape Bafarisei le Bajuda ka moka ga ba je ba se ba hlapa diatla ka mo go laetšwego, e le gona go latela thuto ya borakgolokhukhu ba bona; le ge ba boa lepatlelong la motse ga ba ke ba eja ba se ba hlapa. Ba phetha le ditlwaedi tše dingwe tše dintši tše ba di hweditšego go borakgolokhukhu ba bona, bjalo ka tša go hlatswa dinwelo, le dipitša, le dibjana tša mphiri, le ditulo. Bafarisei le boramangwalo ba mmotšiša ba re: “Barutiwa ba gago ba reng ba sa phethe setlwaedi sa borakgolokhukhu ba rena, ba eja ka diatla tše di sego tša hlweka?” Jesu a ba fetola a re: “Jo, kganthe Jesaya o porofetile gabotse ka lena, baikaketši tenang, mola a ngwala a re: “ ‘Setšhaba se se ntheta ka molomo, mola dipelo tša bona di le kgole le nna. Go nthapela ga bona ga go ba hole ka selo, ka gobane ba ruta batho melawana ye e beilwego ke bona mo nkego ke melao ye e beilwego ke nna.’ “Le tlogela molao wa Modimo, le phetha melao ya borakgolokhukhu ba lena.” Jesu a tšwela pele a re: “Le kgonetše mathaithai a go phaela molao wa Modimo thoko, le gabile go phetha ditlwaedi tša borakgolokhukhu ba lena. Gobane Moshe o rile: ‘Hlompha tatago le mmago’; a buša a re: ‘Yo a ka rogago tatagwe goba mmagwe a bolawe thoo.’ Eupša lena le re: ‘Motho o dumeletšwe go botša tatagwe goba mmagwe a re: “Se sengwe le se sengwe se ke bego ke swanetše go go hola ka sona ke Korbane” ’ (ke go re se abetšwe Modimo). Ka go realo le mo dumeletše gore a se sa thuša tatagwe goba mmagwe ka selo. Gomme ka go latela ditlwaedi tša lena le nyatša molao wa Modimo. Le dira le tše dingwe tše dintši tše dibjalo.” Ka morago Jesu a bitša lešaba gape, a re go lona: “Ka moka ga lena ekwang le kwešišeng! Se se ka tšhilafatšago motho ga se se se tsenago ka go yena se etšwa ka ntle, eupša ke se se yago ka ntle se etšwa ka go yena.” *** E rile ge a seno tloga lešabeng a ile gae, barutiwa ba gagwe ba mo kgopela gore a ba hlalošetše sela a bego a se bolela. Yena a ba fetola a re: “Kganthe le lena le swana le bona ka go se kwešiše? A ga le lemoge gore ga go se se tsenago ka mothong se etšwa ka ntle se ka mo tšhilafatšago? Ka gobane ga se tsene ka pelong ya gagwe, eupša se tsena ka mpeng, mme se tle se tšwe e le mantle.” A era gore dijo tšohle di loketše go lewa. A tšwela pele a re: “Tše di tšwago ka go motho ke tšona tše di mo tšhilafatšago. Gobane ka gare, ka pelong ya motho, ke mo go tšwago dikgopolo tše mpe, e lego tša bohlola, le tša bohodu, le tša polao, le tša bohlotlolo, le tša megabaru, le tša ditiro tše dingwe tše mpe le bomenetša, le ditumo tše mpe basading, le lehufa, le lesebo, le boikgogomošo, le bošilo. Tše mpe tše ka moka di tšwa ka pelong ya motho mme tša mo tšhilafatša.” Jesu a tloga moo a ya tikologong ya motse wa Tirose. A fihla a tsena ka lapeng le lengwe mme a se rate gore batho ba tsebe gore o moo, eupša a šitwa go ikuta. Mosadi yo mongwe yo morwetšana wa gagwe a bego a tsenwe ke moya wo mobe a kwa ka ga Jesu, mme a akgofa a tla a itahlela fase maotong a gagwe. E be e le moditšhaba, a belegetšwe seleteng sa Fenikia, nageng ya Siria. A kgopela Jesu gore a leleke modemone morweding wa gagwe. Jesu a mo fetola a re: “A go je bana pele, gobane ga se gwa loka go tšea dijo tša bana wa di lahlela dimpša.” Mosadi yoo a mo fetola a re: “Gona go bjalo, Morena. Fela le tšona dimpša di ja marathana a dijo tšeo tša bana.” Jesu a mo fetola a re: “Ka ge o nkarabile gabotse, ipoelele gae, gobane modemone o šetše a tšwile morweding wa gago.” A boela gae, a hwetša morwedi wa gagwe a robetše malaong, modemone a šetše a mo tlogetše. Ke moka Jesu a tloga tikologong ya Tirose, a feta ka motseng wa Sidone, a ya letsheng la Galilea, a putla naga ya Metse ye Lesome. Ba tliša setholo sa go koakoa go yena, mme ba mo rapela gore a mmee diatla. Jesu a mo tloša gare ga batho, a ya naye ka thoko, a mo tsenya menwana ka ditsebeng, a tshwela mare menwaneng mme a mo kgwatha leleme. A lebelela legodimong, a ehuga, a re go yena: “Efatha,” ke go re: “Thibologa!” Ka bjako a thibologa ditsebe, a rarologa le leleme, mme a kgona go bolela gabotse. Jesu a ba laela a re ba se ke ba botša motho; fela go ba iletša ga gagwe ya ba gona go ba gakatša gore ba phatlalatše taba yeo. Ba ba e kwago ba kgotsa kudu ba re: “Mmalo, tšohle tše a di dirago ga se ka go loka: o kgontšha le ditholo go kwa, le dimumu go bolela!” Mehleng ya ge Jesu a le seleteng sela sa Metse ye Lesome lešaba le lengwe le legolo le ile la tla la kgobokana. Ge ba se na se ba ka se jago, Jesu a bitša barutiwa ba gagwe a re go bona: “Lešaba le ke le kwela bohloko, gobane e šetše e le matšatši a mararo ba na le nna, mme bjale ga ba sa na dijo. Ge nka ba gomišetša magaeng a bona ba swerwe ke tlala ba tla šarelwa tseleng, gobane ba bangwe ba bona ba tšwa kgole.” Barutiwa ba gagwe ba mo fetola ba re: “Dijo tša go khoriša lešaba le motho a ka di hwetša kae mo lešokeng?” Jesu a ba botšiša a re: “Le na le dinkgwa tše kae?” Bona ba re: “Ke tše di šupago.” A laela lešaba gore le dule fase; a tšea dinkgwa tšela tše di šupago, a leboga Modimo, a di ngwathaganya, a di fa barutiwa ba gagwe gore ba di abele batho, mme ba di aba. Ba be ba bile ba na le dihlatswana di se kae. Ge a seno di šegofatša, a laela barutiwa ba gagwe gore le tšona ba di abe. Batho ba ja ba khora; barutiwa ba topa marathana a a šetšego, mme a tlala diroto tše di šupago. Batho ba ba llego e be e ka ba ba dikete tše nne. Ya ba gona Jesu a ba gomišetšago magaeng a bona. Yena a akgofa a tsena ka leselawatleng le barutiwa ba gagwe, a ya nageng ya Dalmanuta. Bafarisei ba bangwe ba tla ba phegišana le yena ba mo leka; ba re a ba bontšhe mohlolo wa go laetša gore ka nnete o romilwe ke Modimo. Jesu a ehuga a re: “Moloko wo o nyakelang mohlolo? Ruri, ke le botša gore o ka se bontšhwe mohlolo.” A ba tlogela, a boela ka leselawatleng, a selela ka mošola wa letsha. Barutiwa ba be ba lebetše go tšea mphago wo o lekanego wa dinkgwa ge ba tloga, mme ba swere senkgwa se tee fela ka leselawatleng. Jesu a ba laya a re: “Le itote, le hlokomele komelo ya Bafarisei le ya Heroda.” Ba thoma go botšana ba re: “Etse o realo ka gobane re se na dinkgwa.” Jesu, ka go tseba se ba se bolelago, a ba botšiša a re: “Le reng le bolela ka go se be le dinkgwa ga lena? Na ga sešo la kwešiša goba la hlaologanya? Kgane le mašilo? A ga le bone le ge le na le mahlo bjale? A ga le kwe le ge le na le ditsebe? Kgane ga le sa gopola tša mohla wola ke ngwathaganyetša ba dikete tše tlhano dinkgwa tše tlhano? Le ile la tlatša diroto tše kae ka marathana a go šala?” Ba mo fetola ba re: “Tše lesome le metšo ye mebedi.” “Mohla wola ke ngwathaganyetša ba dikete tše nne dinkgwa tše di šupago, gona le ile la tlatša diroto tše kae ka marathana a go šala?” Ba mo fetola ba re: “Tše di šupago.” A ba botšiša a re: “Bjale le reng le sa kwešiše?” Ba re go fihla Betsaida batho ba bangwe ba tliša monna wa sefofu go yena, ba mo kgopela gore a mo kgwathe. Jesu a mo swara ka seatla, a mo ntšhetša ka ntle ga motse, a mo tshwela ka mare ka mahlong, a mmea diatla, a mmotšiša a re: “A o a bona?” Monna yola a lebelela a re: “Ee, ke bona batho nke ke dihlare di sepela.” Jesu a buša a mmea diatla, fela bjale ya ba mo mahlong, gomme sefofu ge se lebeledišiša, sa bona se foletše ruri se bona gabotse. Jesu a re a boele gae, a mo laya a re: “O se ke wa boela motseng.” Jesu a tloga le barutiwa ba gagwe, ba ya metsaneng ya kgauswi le Kesarea-Filipi. Mo tseleng a ba botšiša a re: “Na batho ba re ke nna mang?” Ba mo fetola ba re: “Ba bangwe ba re o Johanese Mokolobetši, bangwe ba re o Eliya, mola bangwe ba re o yo mongwe wa baprofeta.” A ba botšiša a re: “Lena le re ke nna mang?” Gwa fetola Petrose a re: “Ke wena Mesia!” Jesu a ba laya a re: “Le se ke la botša motho ka nna.” Jesu a thoma go hlalošetša barutiwa ba gagwe gore Morwamotho o swanetše go tlaišwa kudu le go lahlwa ke bagolo ba setšhaba, le baprista ba bagolo, le boramangwalo, le go bolawa, eupša ka tšatši la boraro a tsoga bahung. Taba ye ge a e bolela o be a sa potapote. Gomme Petrose a mmiletša thoko, a mo kgala. Jesu a retologa, a lebelela barutiwa ba gagwe, a kgalema Petrose a re: “Tloga ka morago ga ka, Sathane, ka gobane ga o nagane tša Modimo, o nagana tša batho!” Ke moka Jesu a bitša lešaba le barutiwa ba gagwe a re go bona: “Ge motho a rata go ba molatedi wa ka, a ikone, a ikemišetše go tlaišwa bjalo ka nna, mme a ntatele. Gobane yo a ipabalelago o tla lahlega, eupša yo a itatolago ka baka la ka le ka baka la Taba ye Botse ya mmušo wa Modimo, o tla phelela sa ruri. Etse motho go tla mo holang go rua lefase lohle, eupša a loba sebaka sa go hwetša bophelo bjo bo sa felego? Goba ke eng se motho a ka rekago bophelo bjo bo sa felego ka sona? Ge motho a se na sebete sa go bolela gore ke morutiwa wa ka, goba a sa begele moloko wo mobe wo wa go se botegele Modimo tše ke di rutago batho, gona Morwamotho le yena a ka se be le sebete sa go bolela gore motho yoo ke morutiwa wa gagwe, mohla a etla ka letago la Tatagwe le barongwa ba bakgethwa.” Jesu a tšwela pele a re: “Ruri, ke le botša gore go na le ba bangwe mo ba ba ka se kego ba hwa ba sešo ba bona Modimo a etla ka letago.” Ka morago ga matšatši a a selelago Jesu a tloga le Petrose le Jakobose le Johanese, a ba iša thabeng ye telele, mme fao ba ba noši; a fetoga sebopego pele ga bona. Diaparo tša gagwe tša taga bošweu bja go re pšoo! Tša re twaa ka mo go bego go se mohlatswi yo a ka di šweufatšago ka gona mo lefaseng. Barutiwa bao ba bararo ba bona Eliya le Moshe ba bolela le Jesu. Petrose a re go Jesu: “Moruti, ke mo gobotse bjang ge re le fa! A re hlomeng mešaša ye meraro, wo mongwe e be wa gago, mongwe e be wa Moshe, mongwe e be wa Eliya.” Gape o be a sa tsebe se a se bolelago, ka ge ba be ba tšhogile kudu. Gwa tla leru la ba pipetša, mme gwa kwagala lentšu le etšwa lerung leo le re: “Yo ke yena Morwa wa ka yo ke mo ratago; le mo theeletšeng!” Ba lealea eupša ba se bone motho, ba bona fela Jesu a šetše le bona. Ge ba theoga thabeng Jesu a ba laya a re ba se ke ba botša motho tše ba di bonego, go fihlela ge Morwamotho a tsogile bahung. Taelo ye ba ile ba e phetha, eupša ba fela ba botšišana ba re: “Go ‘tsoga bahung’ mo ke go reng?” Ba botšiša Jesu ba re: “Ke ka baka lang boramangwalo ba re pele go swanetše go tla Eliya?” Yena a ba fetola a re: “Ke nnete, pele go tla tla Eliya gore a bušetše dilo sekeng sa tšona. Eupša ke ka baka lang Mangwalo a Makgethwa ona a re Morwamotho o tla tlaišwa kudu a ba a lahlwa? Fela ke le botša gore Eliya yena o šetše a ile a tla, gomme ba dira ka yena se ba se ratago, bjalo ka ge Mangwalo a Makgethwa a bolela ka yena.” Ge ba fihla go barutiwa ba bangwe, ba bona lešaba le legolo le ba dikaneditše, le boramangwalo ba phegišana le bona. Ge lešaba leo le bona Jesu a fihla le sa nagane, la tlabega, mme ba mo kitimela ba yo mo dumediša. Jesu a botšiša barutiwa ba gagwe a re: “Le phegišana le bona ka eng?” A fetolwa ke monna yo mongwe yo a bego a le gare ga lešaba a re: “Moruti, ke tlišitše morwa wa ka go wena, gobane o tsenwe ke moya wo mobe mme o mo dirile semumu. Mo o mo swarago gona o a mo utlautla, wa mo akga, wa mo dira gore a tsikitlanye meno, a be a omelele. Ke ile ka kgopela barutiwa ba gago gore ba o ntšhe, fela ba palelwa.” Jesu a mo fetola a re: “Aowii, lena moloko wa go hloka tumelo! Ke se le felele pelo go fihlela neng? Ke le kgotlelele go iša kae? Mo tlišeng mo go nna.” Ba mo tliša go Jesu. Ge moya wola wo mobe o bona Jesu, wa akgofa wa akga mošemane, mme a wela fase a pshikologa, a etšwa mapshilo ka molomo. Jesu a botšiša tatagwe a re: “E šetše e le lebaka le lekaakang a le ka mokgwa wo?” Tatagwe a re: “Ke go tloga bobjaneng bja gagwe. Ke gantši moya wo mobe o mo lahlela ka mollong le ka meetseng, o nyaka go mmolaya. Ge o kgona, re šokele, o re thuše!” Jesu a mo fetola a re: “O re ‘ge o kgona’? Gape tšohle di a kgonega go yo a nago le tumelo.” Ka pelapela tatagongwana a goeletša a re: “Tumelo yona ke nayo, eupša ga ya lekana. Nthuše, o nkokeletše yona.” Jesu ge a bona lešaba le mo phalalela, a kgalema moya wola wo mobe a re: “Wena moya wa semumu wa setholo, ke go laela gore o tšwe go ngwana yo mme o se sa mo tsena!” Moya wa goa, wa akgaakga ngwana kudu, wa napa wa tšwa, mme yena a ba bjalo ka ge nke o hwile, mo ba bantši ba ilego ba ba ba re ga a sa phela. Jesu a mo swara ka seatla a mo emiša, mme a ema. E rile ge Jesu a tsene ka ngwakong, barutiwa ba gagwe ba mmotšiša ka sephiring ba re: “Ke ka baka lang rena re paletšwe ke go leleka moya wola?” Jesu a ba fetola a re: “Moya wa mohuta wo o ka se lelekwe ka selo, ge e se ka thapelo.” Ge Jesu le barutiwa ba gagwe ba tloga moo ba ile ba ralala le Galilea. O be a sa rate gore go tsebe motho mo a lego gona, ka gobane o be a sa botša barutiwa ba gagwe a re: “Morwamotho o tla gafelwa diatleng tša batho, mme ba tla mmolaya. Eupša ka letšatši la boraro o tla tsoga bahung.” Ba ile ba se kwešiše taba ye, fela ba šia go mmotšiša. Ba fihla motseng wa Kapernaume, mme ya re ge Jesu a le ka gae a ba botšiša a re: “Le be le phegišana ka eng mo tseleng?” Ba homola, ka gobane mo tseleng ba be ba tšere kgang ya go re yo mogolo ke ofe. Jesu a dula fase, a bitša barutiwa ba gagwe ba lesome le metšo ye mebedi, mme a re go bona: “Yo a ratago go ba yo mogolo, a itire yo monyenyane go bohle mme e be mohlanka wa bohle.” A tšea ngwana, a mmea gare ga bona, a mo gokara, a re go bona: “Yo a amogelago ngwana wa go etša yo ka ge e le se ke le laetšego sona, o amogela nna. Le yo a amogelago nna, ga a amogele nna fela, eupša o amogela le yo a nthomilego.” Johanese a re go Jesu: “Moruti, re bone motho yo mongwe a leleka bademone ka go bolela leina la gago, mme ra mo iletša, ka ge e se wa rena.” Jesu a re: “Le se ke la mo iletša, gobane ga go motho yo a ka rego go dira mohlolo ka go bolela leina la ka a kgona go nkgoboša. Gobane yo a sa lwego le rena o ema le rena. Yo a ka le fago sego sa meetse ka ge le le ba ka, ruri, ke le botša gore le gatee a ka se hlokišwe moputso.” “Ge motho a ka kgeloša yo mongwe wa ba bannyane ba, go ka ba kaone ge a ka tlemelelwa lwala molaleng, mme a lahlelwa ka lewatleng. Ge letsogo la gago le go diriša dibe o le ripe. Go kaone go tlo ya legodimong o se ne letsogo, go na le gore o be le matsogo ka mabedi, eupša o ye heleng, mollong wo o sa timego. *** Le leoto la gago ge le go diriša dibe o le ripe. Go kaone go tlo ya legodimong o se ne leoto, go na le gore o be le maoto ka mabedi, fela o tle o lahlelwe ka heleng. *** Le leihlo la gago ge le go diriša dibe o le gonye. Go kaone gore o tle o ye legodimong o le moihlwe, go na le gore o be le mahlo ka mabedi, fela o tle o lahlelwe ka heleng, moo ‘diboko tše di ba jago di sa hwego, le mollo wo o ba tšhumago o sa timego.’ “Bohle ba tla hlwekišwa ka mollo wa matshwenyego mo lefaseng. “Letswai ke selo se se lokilego, fela ge le ka tapa, le ka le tswailoša bjang? “Le lena ebang ba ba lokilego bjalo ka letswai, mme le phedišane ka khutšo.” Jesu a tloga moo a ya nageng ya Judea, a selela ka mošola wa noka ya Jordane. Mašaba a buša a mmokanela, gomme yena a ba ruta ka mo a bego a tlwaetše ka gona. Bafarisei ba bangwe ba tla go yena ba mo leka ba re: “Na monna o dumeletšwe go hlala mosadi wa gagwe?” Jesu a ba fetola ka potšišo a re: “Moshe o le laetšeng?” Bona ba mo fetola ka go re: “Moshe o dumeletše monna gore a ngwale lengwalo la tlhalo, a nape a hlale mosadi wa gagwe.” Jesu a re go bona: “Moshe o le ngwaletše taelo yeo ka baka la go ba le melala ye mathata ga lena. Fela mathomong, mola Modimo a hlola dilo, Mangwalo a Makgethwa a re: ‘O bopile batho e le monna le mosadi. Ke ka baka leo monna a tlago tlogela tatagwe le mmagwe, a kopana le mosadi wa gagwe, mme bobedi bja bona ya ba mmele o tee.’ Ka gona ga e sa le ba babedi, eupša ke mmele o tee. Ka baka leo, ba ba kopantšwego ke Modimo ba se ke ba aroganywa ke motho.” Ge ba boetše ka ngwakong, barutiwa ba gagwe ba mmotšiša taba ye. Jesu a re go bona: “Monna yo a hlalago mosadi wa gagwe mme a tšea yo mongwe, o phošetša mosadi wa pele ka go otswa. Le mosadi yo a hlalago monna wa gagwe mme a tšewa ke yo mongwe, o a otswa.” Batho ba bangwe ba tliša bana go Jesu gore a ba bee diatla, eupša barutiwa ba gagwe ba kgalema batho bao. Jesu ge a di bona a befelwa, a re go barutiwa ba gagwe: “Lesang bana bao ba tle go nna, le se ke la ba thibela, gobane mmušo wa Modimo ke wa ba babjalo. Ruri, ke le botša gore yo a sa dumelego go bušwa ke Modimo, a sa etšego ngwana, a ka se tsoge a tsene legodimong.” Ke moka a ba gokara, a ba bea diatla, a ba šegofatša. Jesu ge a etšwa ka gae a wela tsela gape, monna yo mongwe a mo kitimela, a khunama pele ga gagwe, a mmotšiša a re: “Moruti wa go loka, ke direng gore ke tle ke be le bophelo bjo bo sa felego?” Jesu a mo fetola a re: “O reng o mpitša wa go loka? Ga go yo a lokilego ge e se Modimo fela. Melao o a e tseba, e re: ‘O se ke wa bolaya; o se ke wa otswa; o se ke wa utswa; o se ke wa bolela bohlatse bja maaka; o se ke wa hlalefetša; o hlomphe tatago le mmago.’ ” Yena a mo fetola a re: “Moruti, melao yeo ka moka e sa le ke e phetha go tloga bjaneng bja ka.” Jesu a mo tseparela ka mahlo a go bontšha lerato, a re go yena: “O sa hlaelelwa ke se sengwe. Sepela o yo rekiša tšohle tše o nago le tšona, o tšee tšhelete ya gona o e fe badiidi, mme o tla ba le lehumo legodimong. Ka morago ga moo o tle o ntatele.” Ge monna yoo a ekwa phetolo yeo a nyama, mme a tloga a hlokofetše, gobane o be a humile kudu. Jesu a gaša barutiwa ba gagwe mahlo, a re go bona: “Go bothata bjang gore mohumi a tsene legodimong!” Ge a realo barutiwa ba gagwe ba tlabega, fela Jesu a tšwela pele a re: “Bana ba ka, ga se ka bothata go tsena legodimong! Ebile go bonolo gore kamela e tsene ka lešobana la nalete, go na le gore mohumi a tsene legodimong.” Barutiwa ba gagwe ba tlabega kudu, ba botšišana ba re: “Ge go le bjalo, ke mang yo a ka phologago?” Jesu a ba lebelela, a ba fetola a re: “Batho taba ye ga ba e kgone, eupša e sego Modimo, gobane yena o kgona tšohle.” Petrose a tla ka tša gagwe a re: “Bona, rena re tlogetše tšohle tše e lego tša rena ra go latela.” Jesu a mo fetola a re: “Ruri, ke le botša gore mang le mang yo a tlogetšego legae, goba bomorwarragwe, goba dikgaitšedi tša gagwe, goba tatagwe, goba mmagwe, goba bana ba gagwe, goba mašemo a gagwe ka baka la ka le ka baka la Taba ye Botse ya mmušo wa Modimo, o tla boelwa kudu mehleng yeno. O tla fiwa magae le bomorwarragwe le dikgaitšedi le bommagwe le bana le mašemo ka bontši le go feta, gammogo le matshwenyego, gomme mo mehleng ye e tlago o tla ba le bophelo bjo bo sa felego. Eupša ba bantši bao bjale e lego ba maemo e tla ba ba ba se nago maemo, mme ba bantši bao bjale e sego ba maemo ya ba ba maemo.” Jesu le barutiwa ba gagwe ba be ba le tseleng ba rotogela Jerusalema, Jesu a ba etile pele. Barutiwa ba gagwe ba be ba tlabegile, le batho ba ba bego ba mo latela ba be ba boifa. Jesu a buša a biletša barutiwa ba gagwe ba lesome le metšo ye mebedi ka thoko, mme a ba botša tše di yago go mo hlagela. A re: “Theeletšang mo: Re rotogela Jerusalema, moo Morwamotho a yago go gafelwa go baprista ba bagolo le boramangwalo, bona ba mo ahlolela lehu mme ba mo gafela go baditšhaba. Ba tla mo kwera, ba mo tshwela ka mare, ba mo otla ka tshelane, ba mmolaya; eupša ka letšatši la boraro o tla tsoga bahung.” Ke ge Jakobose le Johanese, barwa ba Sebediose, ba batamela Jesu ba re go yena: “Moruti, re be re rata ge o ka re direla se re nyakago go go kgopela sona.” Jesu a ba botšiša a re: “Le rata ge nka le direlang?” Bona ba mo fetola ba re: “Re kgopela gore mohla o buša o le Kgoši o re dumelele go dula le wena – mongwe ka letsogong la gago la go ja, mongwe ka go la nngele.” Jesu a ba fetola a re: “Ga le tsebe se le se kgopelago. Kgane le ka kgona go meletša ditlaišo tša go swana le tše ke yogo tlaišwa ka tšona kgauswinyana, le go bolawa ka tsela ye ke swanetšego go bolawa ka yona?” Bona ba mo fetola ba re: “Ee, re ka kgona.” Jesu a re go bona: “Go tlaišwa bjalo ka nna gona le tla tlaišwa, le go bolawa bjalo ka nna le tla bolawa. Eupša ge e le go dula ka letsogong la ka la go ja le ka go la nngele ga se taba ye e laolwago ke nna, go lebane bao ba go lokišeditšwego.” Ge barutiwa ba bangwe ba lesome ba ekwa taba yeo, ba befelelwa Jakobose le Johanese. Ke mo Jesu a ba biditšego ka moka, a re go bona: “Le a tseba gore bao go thwego ke babuši ba ditšhaba tša lefase ba a di gatelela; baetapele ba tšona sa bona ke go di buša ka sehlogo. Lena go lena go se ke gwa ba bjalo. Yo a nyakago go ba yo mogolo mo go lena e swanetše go ba mohlanka wa lena. Yo a nyakago go ba mohlomphegi mo go lena e swanetše go ba lekgoba la bohle. Gobane le Morwamotho ga se a tlela go hlankelwa, eupša o tletše go hlankela batho le go ikgafela go bolawa, gore e be seloba sa ba bantši.” Ba fihla motseng wa Jeriko, mme ya re ge Jesu a etšwa motseng woo a na le barutiwa ba gagwe le lešaba le legolo, mokgopedi yo mongwe wa sefofu yo a bitšwago Bartimeose, morwa wa Timeose, a be a dutše ka thoko ga tsela. Ge a ekwa gore ke Jesu wa Nasaretha, a goeletša a re: “Jesu, Morwa wa Dafida, ntšhokele!” Ba bantši ba mo kgalema, ba re a homole; fela ya ba gona a goeletšago le go feta a re: “Morwa wa Dafida, ntšhokele!” Jesu a ema, a re ba mmitše. Ba mmitša, ba re go yena: “Tia maatla, emelela, o a go bitša.” A lahla seaparo sa gagwe, a nanoga, a tla go Jesu. Jesu a mmotšiša a re: “O rata gore ke go direle eng?” Monna yoo wa sefofu a mo fetola a re: “Moruti, ke nyaka gore ke boele ke bone.” Jesu a re go yena: “Sepela, tumelo ya gago e go fodišitše.” A boela a bona le semeetseng, gomme a latela Jesu. Ge ba batamela Jerusalema, ba etla Betfage le Bethania, Thabeng ya Mehlware, Jesu a roma barutiwa ba gagwe ba babedi, a ba laela a re: “Eyang motseng wola le lebanego le wona, gomme ge le fihla le tla hwetša pokolwana ye e kgokilwego, ye e sego ya ka ya namelwa ke motho. Le e kgokolle, le e tliše mo. Ge motho a ka le botšiša gore le e kgokollelang, le mmotše le re: ‘Morena o a e nyaka, o tla e buša ka pela.’ ” Ba ya, ba fihla ba hwetša pokolwana e kgokilwe mojako wa ngwako go lebana le mokgotha. Ge ba sa e kgokolla, ba bangwe ba ba bego ba eme moo ba ba botšiša ba re: “Le reng le kgokolla pokolwana ye?” Bona ba ba fetola ka mokgwa wola Jesu a ba laetšego, gomme batho bao ba ba lesa. Ba iša pokolwana yela go Jesu, ba bea diaparo tša bona godimo ga yona, mme Jesu a e namela. Batho ba bantši ba ala diaparo tša bona mo tseleng, mola ba bangwe ba rema makala a dihlare ka mašemong, ba a ala tseleng. Batho ba ba bego ba etile Jesu pele le ba ba bego ba mo šetše morago ba goa ba re: “A go tumišwe Modimo! A go retwe yo a tlago a romilwe ke Morena! Modimo a šegofatše mmušo wo o tlago hlongwa wa Dafida, rakgolokhukhu wa rena! A go retwe Yogodimodimo magodimong!” Jesu a tsena Jerusalema, a ya ka Tempeleng, a fihla a bogela tšohle moo, gomme ka ge e be e šetše e le mathapama, a tšwa a ya Bethania a na le barutiwa ba gagwe ba lesome le metšo ye mebedi. Ka letšatši le le latelago ge ba boa Bethania a kwa a swerwe ke tlala. A bona sehlare sa mogo bokgojana se na le matlakala; a ya go sona a holofetše gore o tla hwetša selo. Ge a fihla go sona a se hwetše selo ge e se matlakala fela, gobane e be e se lebaka la mago. A re go sona: “Go se sa tsoga go bile le motho yo a jago seenywa sa gago le ka mohla wo mongwe!” Barutiwa ba gagwe ba mo kwa ge a realo. Ba fihla Jerusalema. Ge Jesu a fihla Tempeleng, a raka ba ba rekago le ba ba rekišago Tempeleng. A menola ditafola tša ba ba rekanyago ditšhelete, le ditulo tša ba ba rekišago maeba. A se dumelele motho go putla kgoro ya Tempele a rwele morwalo. A ba lemoša a re: “Ga ke re Mangwalo a Makgethwa a re: ‘Ngwako wa ka o tla bitšwa ngwako wa ditšhaba ka moka wa thapelo,’ eupša lena le o dirile legolo la bahlakodi!” Ge baprista ba bagolo le boramangwalo ba ekwa a realo, ba rera go loga maano a go mmolaya, ka gobane ba be ba mmoifa, ka ge lešaba ka moka le be le kgotsa thuto ya gagwe. Mathapama Jesu le barutiwa ba gagwe ba tloga motseng. Mosong wa letšatši le le latelago, ge ba feta ka tsela, ba bona mogo wola o omeletše go tloga ka medu. Petrose a elelwa, mme a re go Jesu: “Moruti, bona mogo wola o o rogakilego, o omeletše.” Jesu a ba fetola a re: “Dumelang go Modimo. Ruri, ke le botša gore yo a ka botšago thaba ye a re: ‘Tloga mo o yo itahlela ka lewatleng’ a sa belaele ka pelong ya gagwe, eupša a dumela gore tše a di bolelago di tla direga, di tla mo diregela. Ka baka leo ke le botša gore tšohle tše le kago di kgopela ka thapelo, le dumele gore ruri le tla di fiwa, gomme le tla di fiwa. Ge le ema le rapela, le lebalele ba le ba tsotago, gore le lena Tatagolena wa legodimong a le lebalele dibe tša lena.” *** Ba buša ba tla Jerusalema. Ya re ge Jesu a sa sepelasepela ka Tempeleng, baprista ba bagolo, le boramangwalo, le bagolo ba setšhaba ba tla go yena, ba mmotšiša ba re: “O romilwe ke mang go dira dilo tše? Gona ke mang yo a go boditšego gore o di dire?” Jesu a ba fetola a re: “Le nna ke tla le botšiša taba e tee, gomme ge le ka mphetola, ke tla le botša gore ke romilwe ke mang go dira dilo tše. Johanese o be a laetšwe ke mang go kolobetša – ke Modimo goba ke batho? Mphetoleng!” Ba sebelana ba re: “Ge re ka re: ‘O be a laetšwe ke Modimo,’ o tla re: ‘Bjale ke ka baka lang le se la mo dumela?’ Gomme ge re ka re: ‘O be a laetšwe ke batho ...’ ” (Gape ba be ba boifa batho, ka ge bohle ba be ba dumela gore Johanese e be e le moprofeta.) Ka gona ba fetola Jesu ba re: “Ga re tsebe.” Gomme yena a re go bona: “Gona le nna nka se le botše gore ke romilwe ke mang go dira dilo tše.” Jesu a ba anegela ka go swantšha a re: “Go be go na le monna yo mongwe yo a bego a bjetše merara. A e ageletša ka legora, a epa molete moo wa go pitla diterebe ka maoto, a aga le tora ya tlhapetšo, a hirišetša balemi merara, ke moka a tšea leeto. Ge nako ya go fula diterebe e fihla, a roma mohlanka go balemi bale gore a yo mo tšeela diterebe tše e swanetšego go ba tša gagwe. Bona ba mo swara, ba mo itia, mme ba mo gomiša a se na selo. Mong wa serapa a buša a roma mohlanka yo mongwe go balemi bale; yena ba mo itia hlogo ba ba ba mo roga. Mong wa serapa a buša a roma mohlanka yo mongwe, mme yena ba mmolaya. Le ba bangwe ba bantši ba ile ba ba dira ka wona mokgwa woo wa go ba itia goba go ba bolaya. O tee yo a bego a sa šetše gore a ka rongwa, ke morwagwe, yo a bego a mo rata. Ka gona ya ba yena wa mafelelo yo a mo romago go balemi a re: ‘Morwa wa ka yena ba tla mo hlompha.’ Eupša balemi bale ba lakana ba re: ‘Mojalefa šo; etlang re mmolayeng, gomme lefa la gagwe e tla ba la rena!’ Ba mo swara, ba mmolaya, mme ba mo kgoromeletša ka ntle ga serapa sa merara. “Na mong wa serapa seo o tla dirang? Ga ke re o tla tla a bolaya balemi bao, mme serapa seo a se hirišetša ba bangwe? Kgane ga se la ka la bala ka Mangwalong a Makgethwa mo go thwego: “ ‘Leswika le baagi ba le nyaditšego e bile lona la sekhutlo. Se ke se se dirilwego ke Morena, se a re tlaba ge re se bona’?” Baetapele ba setšhaba ba rata go swara Jesu, ka ge ba be ba lemogile gore o ra bona ka seswantšho seo, fela ba be ba boifa lešaba. Ka gona ba mo lesa, mme ba tloga. Ba roma Bafarisei ba bangwe le Baheroda ba bangwe go yena gore ba yo mo rea ka potšišo. Ba fihla ba re go yena: “Moruti, re a tseba gore o motho wa go rereša, ga o na taba le gore batho ba gopolang, ka gobane ga o lebelele maemo a motho, eupša o rata therešo mabapi le tšeo Modimo a nyakago gore motho a di dire. Na go lebane ge re ntšhetša Kesare metšhelo, goba ga se gwa lebana? Re ntšhe metšhelo goba re se ke ra e ntšha?” Jesu a lemoga gore ba a ikgakantšha, gomme a ba botšiša a re: “Le ntheelang? Ntlišetšeng papetlana ya tšhelete gore ke e bone.” Ba mo tlišetša yona, mme a ba botšiša a re: “Seswantšho se ke sa mang le leina le?” Ba mo fetola ba re: “Ke tša Kesare.” Jesu a re go bona: “Gona ntšhetšang Kesare tše e lego tša Kesare, le Modimo le mo ntšhetše tše e lego tša Modimo.” Gomme ba tlabega. Basadusei ba bangwe ba tla go Jesu. Gape ke bona bale ba go se dumele gore bahu ba tla tsoga, gomme ba re go yena: “Moruti, Moshe o re ngwaletše molao wo o rego: ‘Ge monna a ka hwa a se na ngwana a tlogela mosadi, morathoagwe a tsenele mosadi yoo wa mohu, a tsošetše mogolwagwe lapa.’ Go kile gwa ba le barwa ba motho ba ba šupago. Wa mathomo a tšea mosadi, eupša a hwa a se na bana. Wa bobedi a tsenela mosadi yoo wa mohu, eupša le yena a hwa a se na bana. Gwa ba bjalo le go wa boraro. Ka bošupa ga bona ba mo tsenela, eupša bohle ba hwa ba se na bana. Mafelelong mosadi yola le yena a hwa. Bjale mohla bahu ba tsoga, ka lona letšatši la tsogo ya bahu, mosadi yoo e tla ba wa ofe, ka ge ka bošupa ba be ba mo tsenetše?” Jesu a ba fetola a re: “Le a phoša! Ke ka baka la gore le sa tsebe Mangwalo a Makgethwa le maatla a Modimo. Gobane mohla bahu ba tsoga ba ka se nyale, ba ka se nyalwe – ba tla swana le barongwa ba legodimong. Gomme mabapi le go tsoga ga bahu, na ga se la ka la bala pukung ya Moshe mabapi le mošwana wola wa go tuka mollo, ka mo Modimo a boditšego Moshe a re: ‘Ke nna Modimo wa Abrahama, Modimo wa Isaka, Modimo wa Jakobo’? Ke Modimo wa ba ba phelago, e sego wa ba ba hwilego. Ruri, le phamogile kudu!” Yo mongwe wa boramangwalo yo a bego a theeleditše kgang yeo a bile a kwele ka mo Jesu a kgonnego go fetola Basadusei ka gona, a batamela, a botšiša Jesu a re: “Molao wo mogologolo gare ga melao yohle ya Moshe ke ofe?” Jesu a mo fetola a re: “Molao wo mogologolo gare ga melao yohle ya Moshe šo: ‘Theeletšang, lena setšhaba sa Israele! Morena Modimo wa rena ke yena Morena a nnoši. O rate Morena Modimo wa gago ka pelo ya gago ka moka, le ka moya wa gago ka moka, le ka tlhaologanyo ya gago ka moka, le ka maatla a gago ka moka.’ Wa bobedi wo o lekanago le wona o re: ‘O rate bangwekawena bjalo ka ge o ithata.’ Ga go na molao wo mongwe wo o fetago yeo.” Ramangwalo yola a re go Jesu: “O boletše gabotse, Moruti! O rerešitše ge o re Morena ke yena Modimo a nnoši, ga go na yo mongwe ka ntle le yena. Gomme go mo rata ka pelo ka moka, le ka tlhaologanyo ka moka, le ka maatla ka moka, le go rata bangwekawena bjalo ka ge o ithata go phala go direla Modimo dihlabelo tša go tšhungwa ka moka le dihlabelo tše dingwe.” Ge Jesu a bona gore o fetotše ka bohlale, a re go yena: “Ga o kgole le mmušo wa Modimo.” Gwa se sa ba le yo mongwe yo a betago pelo a mmotšiša ditaba tše dingwe. Ya re ge Jesu a dutše a ruta batho ka Tempeleng, a ba botšiša a re: “Go tla bjang gore boramangwalo ba re Mesia ke setlogolo sa Dafida? Gobane Dafida ka boyena o boletše a tutuetšwa ke Moya wo Mokgethwa a re: “ ‘Morena o rile go Morena wa ka: Dula ka mo letsogong la ka la go ja ke be ke tle ke go fenyetše manaba a gago.’ “Bjale ge Dafida a bitša Mesia ‘Morena’, Mesia e ka ba setlogolo sa gagwe bjang?” Batho ba bantši ba rata go mo kwa. Ge a ba ruta a re: “Le hlokomeleng boramangwalo ba ba ratago go hlwa ba sepela ba apere diaparo tše ditelele, le go dumedišwa ka tlhompho mapatlelong a motse, le go rata madulo a ka pele ka disinagogeng le menyanyeng. Ba tšeela bahlologadi dintlo tša bona, mme ba ikaketše ka go rapela dithapelo tše ditelele. Ba ikobela molato le go feta.” Ya re ge Jesu a dutše a lebane le polokelo ya Tempele, a bona ka mo lešaba le lokelago ditšhelete tša bona ka polokelong. Bahumi ba bantši ba be ba tšhela tšhelete ye ntši. Gwa tla mohlologadi yo mongwe wa modiitšana; yena a lokela dipapetlana tše pedi tša mphiri tša theko ye nyenyane kudu. Jesu a bitša barutiwa ba gagwe a re go bona: “Ruri, ke le botša gore mohlologadi yo wa modiitšana o tšhetše tšhelete ye ntši go feta bohle ba ba tšhetšego ka mo polokelong. Gobane ba bangwe ka moka ba tsopotše fela mahumong a bona, eupša mosadi yo wa modiidi yena o tšhetše tšohle tše a bego a na le tšona, tšohle tše a bego a tla phela ka tšona.” E rile ge Jesu a tloga Tempeleng, yo mongwe wa barutiwa ba gagwe a re go yena: “Moruti, nke o bone gore maswika a a botse bjang le meago ye!” Jesu a mo fetola a re: “Ga ke re meago ye megolo ye o a e bona? Ga go leswika le le tlago šala le hlatlagane le le lengwe mme la se kgerešwe.” Ya re ge a dutše Thabeng ya Mehlware a lebane le Tempele, Petrose le Jakobose le Johanese le Andrease ba tla ba mmotšiša thopeng ba re: “Re botše gore dilo tšeo di tla direga neng, le gore re tla bona ka eng gore nako ya gore tše ka moka di phethege e fihlile.” Jesu a ba fetola a re: “Le hlokomele gore le se forwe ke motho. Gobane ba bantši ba tla tla ba re ba bolelela nna, motho a re: ‘Ke nna Mesia!’ gomme ba fora ba bantši. Ge le ekwa mekgoši ya ntwa le dipego tša ntwa le se ke la tshwenyega, gobane tšeo di swanetše go no hlaga, eupša e tla be e sešo ya ba mafelelo. Ditšhaba di tla hlaselana, le mebušo e tla tsogelana maatla, le go šikinyega ga lefase kua le kua go tla ba gona, le ditlala. Ditlaišo tšeo e tla be e sa le dinyane, dikgolo di sa le morago. “Ge e le lena, le itote, gobane ba tla le iša dikgorong tša tsheko; le tla itiwa le ka disinagogeng. Ka ge le le barutiwa ba ka le tla sekišwa ke babuši le magoši, ya ba gona ge le hweditše sebaka sa go ba begela gore le dumela go nna. Taba ye Botse ye e swanetše go begelwa ditšhaba ka moka pele mafelelo a fihla. Mohla le swarwa le eya go sekišwa, le se ke la tshwenyega la re re yo bolelang. Ge nako yeo e fihla, le bolele seo le tla bego le se botšwa yona nakong yeo; gobane go tla be go sa bolele lena, go tla be go bolela Moya wo Mokgethwa. Motho o tla swariša ngwanabo a mmolaiša, le tatagongwana o tla dira ngwana wa gagwe bjalo. Bana ba tla hlanamela batswadi ba bona, ba ba bolaiša. Batho ka moka ba tla le hloya ka baka la ka, eupša yo a ka kgotlelelago go fihla mafelelong o tla phologa. “Le tla bona ‘Bohlola bjo bo tlontlollago Tempele’ bo eme felo mo bo sego bja swanela.” (Mmadi a a kwešiše gore bohlola bjoo ke eng.) “Ke moka bao ba tlago be ba le nageng ya Judea ba tšhabele dithabeng. Yo a tlago be a le godimo ga ngwako, a se ke a ititela ka go fologela ka ngwakong go yo tšea selo. Yo a tlago be a le mašemong a se ke a boela go yo tšea seaparo sa gagwe gae. Ba madimabe mehleng yeo ke bao e tlago be e le baimana le batswetši. Le rapele Modimo gore go tšhaba moo ga lena go se ke gwa ba marega. Gobane masetlapelo a matšatši ao e tla ba a a šiišago ao a se a kago a bonwa go tloga mola Modimo a hlolago lefase go fihlela gonabjale, gape a ka se tsogego a bile gona. Eupša Modimo o šetše a ikemišeditše go fokotša matšatši ao; ge a ka be a ka se a fokotše, go ka be go ka se phologe motho. Eupša ka baka la ba a ba kgethilego o ikemišeditše go a fokotša. “Mehleng yeo ge motho a ka re go lena: ‘Bonang Mesia šo!’ goba a re: ‘Bonang, šole!’ le se ke la mo kgolwa. BoMesia ba maaka le baprofeta ba maaka ba tla tšwelela; ba tla dira matete le dimakatšo gore, ge go kgonega, ba fore le batho bao Modimo a ba kgethilego. Gomme lena le itote; le tsebe gore ke le boditše tšohle pele di direga. “Mehleng ya ge masetlapelo ao a fetile, letšatši le tla fifala, ngwedi wa se sa taga, dinaledi tše dingwe tša wela fase di etšwa godimo, dingwe tša arošwa tseleng ya tšona. Ya ba gona batho ba tlago bona Morwamotho a etla ka maru, a na le maatla a magolo le letago le legolo. O tla roma barongwa ba gagwe ka mathokong ka mane a lefase go yo kgobokanya ba a ba kgethilego, ba tlišwa ba etšwa gohle lefaseng.” “Swantšhang ka mogo: Ge makala a wona a eba a boleta, a hloga matlakala, le tseba gore selemo se kgauswi. Le lena ge le bona tšeo di direga, le tsebe gore nako ya go tla ga Morwamotho e batametše, e kgauswikgauswi. Ruri, ke le botša gore dilo tše ka moka di tla hlaga batho ba ba phelago gonabjale ba sešo ba hwa ka moka. Legodimo le lefase di tla fela, eupša tše ke di boletšego tšona e tla no fela e le nnete. “Ge e le letšatši leo le nako ya gona ga go yo a di tsebago – le barongwa ba legodimong le yena Morwa ga ba di tsebe, di tsebja ke Tatagwe fela. Dulang le phafogile, le tsarogile phoka, gobane ga le tsebe gore nako ya gona ke efe. Gape go tla ba bjalo ka motho yo e rego ge a eta, a tlogele legae la gagwe le hlokometšwe ke bahlanka ba gagwe, mme a file yo mongwe le yo mongwe modiro wa gagwe, a bile a laetše moletakgoro gore a lete. Ka gona, dulang le letile, ka ge le sa tsebe gore monglapa o tla boa neng – e ka ba mantšiboa, goba bošegogare, goba ka masa, goba ge letšatši le hlaba. Ge a ka boa ka tšhoganetše, a se ke a le hwetša le robetše. Se ke le botšago sona ke se ke se botšago bohle ke re: Dulang le phafogile.” Go be go šetše matšatši a mabedi pele ga Monyanya wa Paseka le wa Dinkgwa tše di se nago komelo. Baprista ba bagolo le boramangwalo ba be ba lakane go swara Jesu ka bohwirihwiri, gore ba tle ba mmolaye. Ba re: “E se be ka nako ya monyanya, gore setšhaba se se ke sa tsoša mpherefere.” Jesu o be a le motseng wa Bethania, ka ga Simone, monna yo a bego a kile a swarwa ke bolwetši bja letlalo bja go mo tšhilafatša. Ya re Jesu a sa ja, mosadi yo mongwe a tla a swere sedibelo sa leswika le le bitšwago alapastere se tletše senkgabose se se sego sa tswakwa sa theko ye kgolo sa narete, a fihla a thuba sedibelo sela, mme a tšhela Jesu ka senkgabose seo hlogong. Ba bangwe ba ba bego ba le moo ba selekega, ba botšišana ba re: “O senyetšang senkgabose se? Etse se ka be se rekišitšwe dipapetlana tša silibera tša go feta tše makgolo a mararo, gomme tšhelete yeo ya fiwa badiidi!” Ya ba ba mo sola kudu. Jesu a re: “Mo leseng, le mo tshwenyetšang? Gape o ntiretše se sebotse. Gobane badiidi le na le bona ka mehla, gomme le ka ba thuša nako ye nngwe le ye nngwe ge le rata; eupša nna le ka se be le nna ka mehla. Yena o dirile se a bego a se kgona; o tšhetše mmele wa ka ka senkgabose go o lokišetša poloko le ge nako e sešo ya fihla. Ruri, ke le botša gore gohle lefaseng mo Ebangedi ye e tlago begwa gona, go tla bolelwa le se mosadi yo a se dirilego, e le gore a fele a gopolwa.” Yo mongwe wa barutiwa ba Jesu ba lesome le metšo ye mebedi, yo leina la gagwe e bego e le Judase Iskariote, a ya go baprista ba bagolo gore a ba gafele yena. Bona ge ba di kwa, ba thaba, mme ba mo holofetša tšhelete. Ke moka Judase a thoma go nyaka nako ye e lebanego ya go gafela Jesu diatleng tša bona. Ka letšatši la pele la Monyanya wa Dinkgwa tše di se nago komelo, e lego letšatši leo ka lona go bego go hlabja dikwana tša Paseka, barutiwa ba gagwe ba mmotšiša ba re: “O nyaka gore re yo go lokišetša dijo tša Paseka kae?” Ke moka Jesu a roma barutiwa ba gagwe ba babedi, a re go bona: “Eyang motseng, mme le tla gahlanetšwa ke monna yo mongwe a rwele moeta wa meetse. Le mo latele go fihla mo a tsenago gona, gomme le botše monglapa leo le re: ‘Moruti o rile re tle re botšiše gore na phapoši yeo yena le barutiwa ba gagwe ba ka jelago Paseka ka go yona e kae.’ O tla le laetša phapoši ye kgolo ya ka godimo, ye e lokišeditšwego go jela. Le re lokišetšeng ka go yona.” Barutiwa bale ba tloga ba ya motseng, ba fihla ba hwetša go le bjalo ka ge Jesu a be a ba boditše, mme ba lokišetša Paseka. E rile ge e le mantšiboa Jesu a tla le barutiwa ba gagwe ba lesome le metšo ye mebedi. Ya re ge ba dutše tafoleng ba eja, Jesu a re go bona: “Ruri, ke le botša gore yo mongwe wa lena yo a jago le nna o tlilo nkeka.” Barutiwa ba gagwe ba nyama mme ba mmotšiša ka o tee ka o tee ba re: “Kgane o ra nna?” Jesu a ba fetola a re: “Ke yo mongwe wa lena ba lesome le metšo ye mebedi, yo a šebago le nna ka thiswaneng. Morwamotho go tloga gona o tla tloga, ka ge Mangwalo a Makgethwa a realo; eupša go madimabe yo a ekago Morwamotho! Go ka be go bile kaone ge motho yoo a ka be a se a ka a tswalwa!” Ya re ge ba eja, Jesu a tšea senkgwa, a tumiša Modimo, a mo leboga, a se ngwathaganya, a se fa barutiwa ba gagwe a re: “Tšeang le jeng, se ke mmele wa ka.” A tšea le senwelo, a leboga Modimo, a ba neela sona, mme ba se nwa bohle ka go šielana. Yena a re: “Se ke madi a ka ao a tiišetšago kgwerano ya Modimo, ao a tšhollelwago ba bantši. Ruri, ke le botša gore nka se sa nwa beine go fihlela mohla ke enwa ye mpsha legodimong.” Ge ba seno opela sefela sa tumišo, ba tšwa ba ya Thabeng ya Mehlware. Jesu a re go bona: “Ka moka ga lena bošegong bjo le tla ntšhabela, ka gobane Mangwalo a Makgethwa a re: ‘Ke tla bolaya modiša, gomme dinku tša gagwe tša šwalalana.’ Eupša e tla re ge ke tsogile bahung, ka le tlogela pele go ya Galilea.” Petrose a re go yena: “Le ge bohle ba ka go tlogela, nna nka se go tlogele.” Jesu a re go yena: “Ruri, ke go botša gore lehono, gona bošegong bjo, e tla re mokoko o sešo wa lla la bobedi, wa be o ntatotše gararo.” Petrose a boeletša a tiišitše le go feta a re: “Nna nka se tsoge ke go latotše, le ge eba e ka ba gore ke hwe le wena!” Le barutiwa ba bangwe ka moka ba realo. Ka morago Jesu a ya le barutiwa ba gagwe lefelong le lengwe le le bitšwago Getsemane, gomme a re go bona: “Dulang mo, ke sa ya go rapela.” A tloga le Petrose le Jakobose le Johanese, mme a thoma go gakanega le go tlalelwa, gomme a re go bona: “Ke nyamile la go hwa. Dulang mo le letele.” Ke moka a ya pejana, a itahlela fase, a rapela gore, ge go kgonega, a hlakodišwe nakong yeo ya go tlalelwa. A rapela a re: “Tate, Tate, wena ga o palelwe ke selo. Hle, tloša senwelo se sa tlaišego mo go nna; fela go se phethege ya ka thato, go upše go phethege ya gago.” Ge a boa a hwetša barutiwa bale ba gagwe ba bararo ba robetše. A re go Petrose: “Simone, na o robetše? O šitilwe ke go itiša le nna lebakanyana fela? Letelang le rapele, gore le se lekwe. Ge e le maikemišetšo ona le nawo, fela le a palelwa.” A boelela a yo rapela, a boeletša ona mantšu ale. Ge a boela go barutiwa ba gagwe, a ba hwetša ba ile ka boroko gape, ka gobane ba be ba potuma kudu, ebile ba sa tsebe se ba ka mmotšago sona. Ge a boa la boraro, a re go bona: “Na le sa robetše, le a khutša? Ga go sa kgonega, nako e fihlile. Bonang, Morwamotho o gafelwa diatleng tša badiradibe. Emang, re sepeleng! Bonang, monna yo a nkekago o šetše a batametše!” Jesu a re a sa bolela, Judase, e lego yo mongwe wa barutiwa ba gagwe, a fihla a na le lekoko le legolo le le itlhamilego ka ditšhoša le melamo, le romilwe ke baprista ba bagolo, le boramangwalo, le bagolo ba setšhaba. Moeki o be a lakane le lekoko leo, a ba boditše a re: “Monna yo ke tlago mo atla, ke yena, le mo sware, le tloge naye le mo dišitše.” Judase ge a fihla a ya go Jesu, mme a re go yena: “Thobela, Moruti!” Gomme a mo atla. Ke moka ba swara Jesu ba mo tiiša. Yo mongwe wa bao ba bego ba eme moo a khwamola tšhoša ya gagwe, a rema mohlanka wa Moprista yo Mogologolo ka yona, a mo kgaola tsebe. Jesu a re go bona: “Le reng le tlile ka ditšhoša le melamo go ntshwara mo nkego ke nna mohlakodi? Tšatši le lengwe le le lengwe ke be ke eba le lena ka Tempeleng ke ruta batho, gomme le sa ntshware. Eupša tše di direga gore go phethege Mangwalo a Makgethwa.” Ke moka barutiwa ba gagwe bohle ba mo tlogela, ba tšhaba. Lesogana le lengwe la mo latela le se la apara selo mmeleng, ge e se lešela. Ya re ge ba re ba a mo swara, a tšhaba a hlobotše, a tlogela lešela lela. Jesu a išwa go Moprista yo Mogologolo, moo go bego go kgobokane baprista ba bagolo ka moka, le bagolo ba setšhaba ka moka, le boramangwalo ka moka. Petrose a ba latela a le kgojana, a ba a yo tsena ka lapeng ga Moprista yo Mogologolo, gomme a fihla a dula fase le baleti a ikomoša mollong. Baprista ba bagolo le Kgorokgolo ka moka ba nyaka bohlatse bjo ba ka pharago Jesu ka bjona gore ba tle ba mmolaye, eupša ba bo hloka. Dihlatse tše dintši di be di mo phara ka maaka, fela bohlatse bja bona bo sa kwane. Ba bangwe ba ema ba mo phara ba re: “Rena re mo kwele a re: ‘Ke tla kgereša Tempele ye ya go agwa ke batho, ka aga ye nngwe ka matšatši a mararo ye e sego ya agwa ke batho.’ ” Fela le bona bao bohlatse bja bona bo be bo sa kwane. Moprista yo Mogologolo a emelela a ya ka pele ga bona ka moka, a botšiša Jesu a re: “Na ga o iphetolele? O reng ka se ba go beago molato ka sona?” Eupša Jesu a no ikhomolela, a se fetole selo. Moprista yo Mogologolo a mmotšiša gape a re: “Na ke wena Mesia, Morwa wa Modimo Motumišwa?” Jesu a mo fetola a re: “Ee, ke nnaena. Gomme ka moka le tla bona Morwamotho a dutše ka letsogong la go ja la Ramaatlaohle a etla ka maru.” Ke moo Moprista yo Mogologolo a gagotšego diaparo tša gagwe a re: “Dihlatse re sa di iša kae? Le ikwetše ka bolena ge a nyefola Modimo. Bjale le reng ka yena?” Bohle ba mo tšwa ba re: “O lebanwe ke lehu!” Ba bangwe ba mo tshwela ka mare, ba mo khupetša sefahlego, ba mo itia ka matswele, ba re go yena: “Ka ge o le moprofeta re botše gore o itiilwe ke mang!” Le baleti ba mo faphola ka dintahle. E rile ge Petrose a sa dutše ka kua fase ka lapeng gwa tla modiredi yo mongwe wa mosetsana wa Moprista yo Mogologolo. Ge a bona Petrose a ikomoša, a mo tomolela mahlo a re: “Le wena o be o na le Jesu wa Nasaretha.” Fela Petrose a latola a re: “Tše o di bolelago nna ga ke di tsebe ebile ga ke di kwešiše.” A napa a ya seferong sa lapa. Ya ba mokoko o a lla. Modiredi yola ge a bona Petrose moo, a boeletša a botša ba ba emego fao a re: “Yo ke yo mongwe wa bona.” Fela Petrose a latola gape. Ka moragonyana ga fao ba ba emego naye ba buša ba re go yena: “Ka kgonthe o yo mongwe wa bona, gobane le wena o Mogalilea.” Ke moka Petrose a thoma go rogana le go ikana a re: “Monna yoo le bolelago ka yena ga ke mo tsebe!” Ka yona nako yeo mokoko wa lla la bobedi, gomme Petrose a elelwa sela Jesu a ilego a mmotša sona a re: “Pele mokoko o lla la bobedi o tla be o ntatotše gararo.” A napa a thoma go lla. E rile ge go esa baprista ba bagolo, le bagolo ba setšhaba, le boramangwalo ba lakana ka pelapela e le Kgorokgolo ka moka. Ba bofa Jesu ka diketane, ba tloga naye ga Moprista yo Mogologolo ba yo mo gafela Pilato. Pilato a mmotšiša a re: “Na ke wena kgoši ya Bajuda?” Jesu a mo fetola a re: “O a bolela.” Baprista ba bagolo ba mmega ka dilo tše dintši. Ka gona Pilato a buša a mmotšiša a re: “Na ga o iphetolele? Ekwa gore ba go bega ka dilo tše dintši bjang!” Eupša a se sa fetola selo, mo Pilato a ilego a ba a makala. Ka Monyanya wa Paseka Pilato o be a tlwaetše go lokolla mogolegwa yo lešaba le mo kgopelago. Pakeng yeo go be go na le monna yo mongwe yo leina la gagwe e bego e le Barabase, yo a bego a golegilwe gotee le ba ba bego ba ile ba tsoša mpherefere, mme ba bolaya motho gona moo mpherefereng. E rile ge lešaba le kgobokane mme le kgopela Pilato gore a ba direle se a bego a tlwaetše go ba direla sona ka Monyanya wa Paseka, yena a ba botšiša a re: “Etse le nyaka gore ke le lokollele kgoši ya Bajuda?” Gape o be a tseba gore baprista ba bagolo ba gafetše Jesu go yena ka baka la mona. Baprista ba bagolo ba hlohleletša lešaba gore le kgopele Pilato gore a ba lokollele Barabase. Pilato a ba botšiša gape a re: “Bjale le nyaka gore ke direng ka yo le rego ke kgoši ya Bajuda?” Ba goa ba re: “Mmapole sefapanong!” Pilato a ba botšiša a re: “Etse o sentšeng?” Bona ba goa le go feta ba re: “Mmapole sefapanong!” Pilato, ka go rata go kgahliša lešaba, a ba lokollela Barabase, gomme ge Jesu a seno itiwa ka tshelane ka taelo ya gagwe, a mo gafela go bapolwa sefapanong. Bahlabani ba iša Jesu ka lapeng la mošate gomme ba kgoboketša sekgao ka moka sa bahlabani. Ba mo apeša seaparo sa bohubedu bja moretele, ba loga kgare ya meetlwa, ba mo rweša yona. Ba mo dumediša ba re: “Re a lotšha, kgoši ya Bajuda!” Ba mo itia hlogo ka lepara, ba mo tshwela ka mare, ba khunama ba mo lotšha. Ba re go mo kwera, ba mo apola seaparo sela sa bohubedu bja moretele, ba mo apeša diaparo tša gagwe. Ke moka ba mo iša go bapolwa sefapanong. Bahlabani ba gapeletša monna yo mongwe yo a bego a iphetela a etšwa mašemong a eya motseng go rwalela Jesu sefapano. Leina la gagwe e be e le Simone, wa motse wa Sirene, tatagoAleksandere le Rufose. Ba iša Jesu felo mo gongwe mo go bitšwago Golgotha, ke go re “Felo ga Legata”. Moo ba mo neela beine ye e hlakantšwego le mira gore a e nwe, fela yena a e gana. Ge ba seno mmapola sefapanong ba abelana diaparo tša gagwe ka go tema, go bona se yo mongwe le yo mongwe a lebanwego ke go se tšea. E be e le nako ya senyane mosong ge ba mmapola. Ka godimo ga hlogo ya gagwe gwa ngwalwa pego ya molato wa gagwe ye e rego: “Kgoši ya Bajuda.” Ba bapola le bahlakodi ba babedi gotee le yena, yo mongwe a ba ka letsogong la gagwe la go ja, yo mongwe ka go la nngele. *** Batho ba ba bego ba feta ka tsela ba be ba šikinya dihlogo, ba nyefola Jesu ba re: “Owaa, wena wa go kgereša Tempele mme wa e tsoša ka matšatši a mararo! Itlhakodiše o theoge moo sefapanong!” Baprista ba bagolo le boramangwalo le bona ba mo kwera bjalo, ba botšana ba re: “O phološitše ba bangwe, fela yena ga a kgone go iphološa! Mesia, kgoši ya Israele, a a theoge mo sefapanong gonabjale, gore re bone mme re dumele!” Bale ba go bapolwa le yena le bona ba mo roga. Ka nako ya mosegare wo mogolo naga ka moka ya aparelwa ke leswiswi go fihlela ka nako ya boraro mathapama. Ya re ka nako ya boraro mathapama Jesu a goelela kudu a re: “Eloi, Eloi, lama sabagtani?” Ke go re: “Modimo wa ka, Modimo wa ka, o ntlogeletšeng?” Ba bangwe ba ba bego ba eme moo ba mo kwa ba re: “Theeletšang, o bitša Eliya!” Yo mongwe wa bona a kitima a yo ina motšitla ka beineng ye bodila, a o hlomela patlaneng, a o bea molomong wa gagwe a re: “Lesang, re bone ge eba Eliya o tla tla a mo fegolla mo sefapanong!” Jesu a goelela kudu, ya ba o a ikhwela. Ke moka seširo sa ka Tempeleng sa gagoga ka bogare go tloga godimo go fihla fase. Ge molaodi wa bahlabani ba lekgolo yo a bego a eme pele ga Jesu a mmona a ehwa ka mokgwa woo, a kgotsa a re: “Jo, ka nnete motho yo e be e le Morwa wa Modimo!” Le basadi ba bangwe ba be ba le gona moo ba lebeletše ba le kgojana. Gare ga bona go be go na le Maria Magadalena le Maria, mmagoJakobose yo monnyane le Josese, le Salome. Ke bale ba bego ba latela Jesu mme ba mo hlokomela mola a le Galilea. Ba bangwe ba bantši basadi ba ba bego ba tlile le yena Jerusalema le bona ba be ba le gona. E rile ge e šetše e le mantšiboa gwa tla monna yo mongwe wa go tšwa Arimathea, leina la gagwe e le Josefa. E be e le molekgotla yo a tsebegago, yo le yena a bego a letetše go hlongwa ga mmušo wa Modimo. E be e le letšatši le le tlago pele ga Sabatha, leo ka lona go bego go lokišetšwa yona Sabatha. Ka gona Josefa a beta pelo a ya go Pilato mme a kgopela setopo sa Jesu. *** Pilato a makala ge a ekwa gore Jesu o šetše a hwile. A bitša molaodi wa bahlabani ba lekgolo, a mmotšiša ge eba e šetše e le lebaka Jesu a hwile. Ya re ge Pilato a seno kwa se se bolelwago ke molaodi, a fa Josefa setopo sa Jesu. Josefa a ya go reka lešela, a tla a fegolla setopo sa Jesu, a se phuthela ka lešela leo, mme a se bea ka lebitleng le le bego le gwailwe leswikeng. Ke moka a kgokološetša leswika mojako wa lebitla. Maria Magadalena le Maria, mmagoJosese, ba be ba lebeletše mme ba bona mo Jesu a bolokwago gona. Ya re ge letšatši la Sabatha le fetile, Maria Magadalena le Maria, mmagoJakobose, le Salome ba reka ditlolo gore ba ye ba tlotše setopo sa Jesu. Mosong wa Sontaga, ge letšatši le hlaba, ba ya lebitleng. Ba tšama ba botšišana ba re: “Ke mang yo a tlago re kgokološetša leswika a le tloša mojako wa lebitla?” Gape e be e le leswika le legolo kudu. Gomme ya re ge ba lebelela ba bona leswika lela le kgokološitšwe. Ge ba tsena ka lebitleng ba bona lesogana le lengwe le dutše ka letsogong la go ja, le apere seaparo se setelele se sešweu, mme ba tšhoga. Lesogana leo la re go bona: “Le se ke la tšhoga. Etse le nyaka Jesu wa Nasaretha yo a bego a bapotšwe sefapanong. Ga a gona mo, o tsogile bahung. Bonang felo mo ba bego ba mmeile gona. Bjale ge, eyang le botše barutiwa ba gagwe gotee le Petrose le re: ‘O le thaka pele go ya Galilea; le tla mmona gona kua bjalo ka ge a le boditše.’ ” Ba napa ba tšwa ka lebitleng ba tšhaba, gobane ba be ba tšhogile ebile ba thothomela kudu; fela ba se botše motho selo, gobane ba be ba boifa. [ Ya re ge Jesu a tsogile bahung mosong wa Sontaga, la mathomo a itšweletša go Maria Magadalena, yola Jesu a bego a kile a leleka bademone ba ba šupago go yena. Yena Maria a ya a tsebiša bale ba bego ba šika le Jesu. Ba be ba nyamile ba lla. Gomme ge ba ekwa gore o a phela, le gore yena Maria o mmone, ba se dumele. Ka morago ga tšeo Jesu a itšweletša go balatedi ba gagwe ba babedi ka sebopego se sengwe. Bona ba be ba eya mašemong. Ba napa ba gomela morago go yo tsebiša barutiwa ba gagwe, fela le bona ba se ke ba dumela. Mafelelong a itšweletša go barutiwa ba gagwe ba lesome le motšo o tee ba sa le dijong. A ba kgalela go se dumele ga bona le bonganga bja bona, gobane ga se ba dumela bale ba mmonego ge a seno tsoga bahung. A re go bona: “Sepelang le lefase ka moka, le begele batho bohle Ebangedi. Yo a dumelago mme a kolobetšwa o tla phologa; eupša yo a sa dumelego o tla lahlwa. Ba ba dumelago ba tla fiwa maatla a go dira mehlolo ye: Ba tla leleka bademone ka go bolela leina la ka; ba tla bolela ka maleme a šele. Ge ba ka swara dinoga goba ba nwa mpholo, di ka se ba dire selo; ba tla bea balwetši diatla, gomme ba fola.” Ka morago ga ge Morena Jesu a feditše go bolela le bona, a rotošetšwa ke Modimo legodimong, a yo dula ka letsogong la go ja la Modimo. Barutiwa ba gagwe bona ba ya go kwatša Ebangedi gohle, gomme Morena a ba thuša, a bontšha ka mehlolo ye ba bego ba e dira gore thuto ya bona ke ya nnete.] [Ba ya go bale ba bego ba na le Petrose, mme ba ba anegela ka boripana tšohle tše ba bego ba laetšwe gore ba di dire. Ka morago ga moo Jesu ka boyena a phatlalatša molaetša wo mokgethwa wo o ka se tsogego o paletšwe, wa go bega phologo ya go ya go ile, ka balatedi ba gagwe go tloga bohlabela go ya bodikela. Amene.] Theofilose yo a hlomphegago, batho ba bantši ba lekile go ngwala taodišo ya ditaba tše di diregilego mo go rena. Ba ngwadile tše re di boditšwego ke ba ba di bonego ka mahlo go tloga mathomong a tšona. Ke bona babegi ba Taba ye Botse ya Modimo. Le nna ge ke seno nyakišiša ditaba tše ka moka gabotse go tloga mathomong a tšona, ke bone go lebane gore ke go ngwalele tšona ka lenaneo le lebotse, gore o tle o tsebe gore tše o di rutilwego ke nnete. Mehleng ya ge Heroda e le kgoši ya naga ya Judea, go be go na le moprista yo mongwe yo leina la gagwe e bego e le Sakaria, e le wa kgoro ya boprista ya Abia. Mosadi wa gagwe e be e le Elisabetha, le yena e le wa leloko la boprista. Bobedi bja bona ba be ba phela ka mokgwa wa go kgahla Modimo, ba phetha melao le ditaelo tšohle tša Morena gabotse. Ba be ba se na bana ka ge Elisabetha e be e le moopa, le gona ka babedi ba be ba šetše ba tšofetše kudu. Ka tšatši le lengwe Sakaria o be a dira modiro wa gagwe wa boprista ka Tempeleng, ka ge e be e le mayo a kgoro ya gabo. Go ya ka setlwaedi sa baprista, o be a kgethilwe ka matengwa go yo thuntšha seorelo aletareng. Ka gona a ya ka Tempeleng ya Morena, mola lešaba ka moka la batho le eme ka ntle le rapela ka nako ya ge go thuntšhwa seorelo. Morongwa wa Morena a iponagatša go yena a eme ka letsogong la go ja la aletare ya seorelo. Ya re ge Sakaria a mmona a tšhoga, a boifa. Morongwa a re go yena: “Se boife, Sakaria, gobane Modimo o kwele thapelo ya gago. Mosadi wa gago, Elisabetha, o tla go belegela morwa, mme o mo thee leina la Johanese. Go tswalwa ga gagwe go tla go thabiša wa hlalala, gwa thabiša le ba bantši, gobane e tla ba yo mogolo pele ga Morena. A ka se tsoge a nwele beine le seno se bogale. O tla tlala Moya wo Mokgethwa go thoma ge a belegwa, gomme a sokollela Baisraele ba bantši go Morena Modimo wa bona. O tla eta Morena pele a sa boife, a le bogale bjalo ka moprofeta Eliya. O tla boelanya bana le botatagobana; ba ba sa theeletšego o tla ba bušetša tseleng ye e lokilego, gore a lokišetše Morena setšhaba sa gagwe.” Sakaria a re go morongwa: “Ke tla tseba bjang ge o bolela nnete? Gape ke mokgalabje, mosadi wa ka le yena o tšofetše.” Morongwa a mo fetola a re: “Ke nna Gabriele yo a dulago a emetše go hlankela Modimo. Ke romilwe go tlo bolela le wena, go go begela ditaba tše dibotse tše. Fela ka ge o se wa dumela se ke go botšago sona, sona se se tlago phethega ka nako ya sona, o tla ba semumu, wa se kgone go bolela, gwa ba gwa fihla letšatši le seo ke go boditšego sona se tlago phethega.” Ge e le lešaba lona le be le letetše Sakaria, mme le makaditšwe ke gore na o diegišitšwe ke eng ka Tempeleng. Ge a etšwa o be a sa kgone go bolela, gomme bona ba lemoga gore o bone pono ka Tempeleng. Ka ge a be a mumufetše o ile a bolela le bona ka diatla. Ge nako ya gagwe ya go dira modiro wa gagwe ka Tempeleng e fetile, a boela gae. Ka morago ga lebakanyana Elisabetha, mosadi wa gagwe, a ima, mme a dula ka gae dikgwedi tše tlhano, a re: “Se ke se ke se diretšwego ke Morena. Bjale ke gona a nkgopotšego, a mphumola go goboga bathong.” Ka kgwedi ya boselela ya ge Elisabetha e le moimana, Modimo a roma morongwa Gabriele motseng wo mongwe wa Galilea wo o bego o bitšwa Nasaretha, go kgarebe ye nngwe ye e bego e beeleditšwe ke monna yo mongwe wa moloko wa Dafida, yo leina la gagwe e bego e le Josefa. Leina la kgarebe yeo e be e le Maria. Morongwa a ya go yena, a fihla a mo dumediša a re: “Dumela, wena mokgahlago Modimo! Morena o na le wena!” Maria a tlabega kudu ge morongwa a realo, gomme a ipotšiša gore na tumedišo yeo e ka ba e ra go reng. Morongwa a re go yena: “Se tšhoge, Maria, gobane o kgahlile Modimo. O tla ima, wa tla wa belega morwa yo o swanetšego go mo rea leina la Jesu. Yena e tla ba yo mogolo, o tla bitšwa Morwa wa Yogodimodimo. Morena Modimo o tla mmea kgoši ya Baisraele bjalo ka Dafida, rakgolokhukhu wa gagwe. O tla buša ditlogolo tša Jakobo go ya go ile, gomme bogoši bja gagwe bo ka se fele.” Maria a botšiša morongwa a re: “Go ka kgonega bjang ke se ka ka ka robala le monna?” Morongwa a mo fetola a re: “Moya wo Mokgethwa o tla theogela go wena, gomme maatla a Yogodimodimo a tla go aparela. Ke ka baka leo yo o tlago mmelega a tlago bitšwa yo mokgethwa, a bitšwa Morwa wa Modimo. Le Elisabetha, moloko weno, o imile morwa botšofading bja gagwe, gomme yena a tsebjago e le moopa o šetše a na le kgwedi tše di selelago e le moimana. Gobane ga go se se ka palelago Modimo.” Maria a re: “Ke nna mohlanka wa Morena; tše o di boletšego a di ntiregele.” Ke moka morongwa a mo tlogela. Yona nakong yeo Maria a re go itokiša a itlhaganela a ya motseng wo mongwe nageng ya dithaba ya Judea. A fihla a tsena ka ga Sakaria, a dumediša Elisabetha. Ya re ge Elisabetha a ekwa Maria a mo dumediša, ngwana yo a mo imilego a itšhikinya. Elisabetha a tlala Moya wo Mokgethwa. A goeletša a re: “O šegofaditšwe go feta basadi ka moka, le ngwana yo o tlago mmelega o šegofaditšwe. Go tla bjang gore mmagoMorena wa ka a nketele? Gobane ke rile ge ke ekwa o ntumediša, ngwana yo ke mo imilego yo a itšhikinya ka lethabo. Go lehlogonolo wena o dumetšego gore tše Morena a go boditšego tšona di tla phethega.” Maria a re: “Pelong ya ka ke reta Morena; moyeng wa ka ke hlalalela Modimo, Mophološi wa ka, gobane o ntšheditše, nna, mohlanka wa gagwe yo ke nyatšegago. Go tloga bjale batho bohle ba tla re ke nna yo lehlogonolo, ka ge Ramaatla a ntiretše tše kgolo, mme leina la gagwe e le le lekgethwa. O gaugela ba ba mmoifago go tloga molokong wo mongwe go ya go wo mongwe. O dirile tše maatla ka letsogo la gagwe, a ba a šwalalanya baikgogomoši ba ba ipotago. O wišitše babuši ditulong tša bona, a godiša ba ba nyatšegago. Ba ba swerwego ke tlala o ba khorišitše ka dijo tše dibotse, mme bahumi a ba gomiša ba le fela. O babaletše bahlanka ba gagwe, Baisraele, a tla a ba šokela, ka gona o ba thušitše. Ke sona se a se tshepišitšego borakgolokhukhu ba rena, Abrahama le ditlogolo tša gagwe, gore yeo ke tshepišo ya go ya go ile.” Maria a dula moo ga Elisabetha dikgwedi tše e ka bago tše tharo, a kgona a boela gae. Lebaka la Elisabetha la go belega la fihla, mme yena a belega ngwana wa mošemane. Baagišani le meloko yabo ge ba ekwa gore Morena o mo gaugetše kudu o mo file ngwana, ba thaba le yena. Ka letšatši la seswai la ge ngwana a tswetšwe ba tla go mmolotša; ba be ba nyaka go mo rea leina la Sakaria, tatagwe. Eupša mmagwe a gana a re: “Aowa! Leina la gagwe e swanetše go ba Johanese.” Bona ba re go yena: “Ga ke re mo melokong ya geno ga go na motho yo a nago le leina leo?” Ba bolela le Sakaria ka diatla ba mmotšiša gore na leina la ngwana e swanetše go ba lefe. Yena a kgopela gore ba mo tlišetše letlapa, mme a ngwala mo godimo ga lona a re: “Leina la gagwe ke Johanese.” Ba tlabega ka moka. Ka yona nako yeo Sakaria a rarologa leleme a kgona go bolela gape, a reta Modimo. Baagišani ba gagwe bohle ba welwa ke poifo; nageng ka moka ya dithaba ya Judea gwa bolelwa ditaba tše ka moka. Bohle ba ba di kwago ba di nagana, ba ipotšiša ba re: “Na ngwana yo e tla ba eng?” Gobane go be go bonagala gabotse gore o thekgilwe ke maatla a Modimo. Sakaria, tatagoJohanese, a tlala Moya wo Mokgethwa, mme a porofeta a re: “A go retwe Morena Modimo wa Israele, gobane o tlilo phološa setšhaba sa gagwe a se lokolla. O re file Mophološi yo maatla, setlogolo sa Dafida, mohlanka wa gagwe. O re tshepišitše go tloga kgale ka baprofeta ba gagwe ba bakgethwa gore o tla re phološa manabeng a rena, le diatleng tša bohle ba ba re hloilego. A re o tla gaugela borakgolokhukhu ba rena, a gopola kgwerano yela ya gagwe ye kgethwa. “O enetše rakgolokhukhu wa rena, Abrahama, gore o tla re hlakodiša manabeng a rena, a re kgontšha go mo hlankela re sa boife, *** re mo kgothaletše, re mo hlompha bophelong bjohle bja rena. “Wena, ngwanaka, o tla bitšwa moprofeta wa Yogodimodimo. O tla sepela pele ga Morena go mo lokišetša tsela, go begela setšhaba sa gagwe gore se tla phološwa ka go swarelwa dibe. Modimo wa rena o na le lešoko le kgaugelo. O tla re romela Mophološi yo a tlago re bonegela bjalo ka letšatši le le hlabago la bonega le le godimo. O tla bonegela ba ba dutšego leswiswing le moriting wa lehu, rena a re iša tseleng ye e lebilego boiketlong.” Ngwana yoo o ile a gola, a fela a tia le tlhaologanyong, a dula lešokeng gwa ba gwa fihla letšatši le a ilego a iponatša phatlalatša go setšhaba sa Israele. Mehleng yeo Kesare Agostose a laela gore batho ka moka ba mmušo wa Roma ba balwe. Ge batho ba balwa lekga le la mathomo, mmušiši wa Siria e be e le Kwiriniose. Batho ka moka ba ile ba ya go ingwadiša, mongwe le mongwe a ya motseng wa gabo. Josefa le yena a tloga motseng wa Nasaretha kua Galilea a ya Betlelehema, mo go tswaletšwego Kgoši Dafida, seleteng sa Judea. Josefa o ile gona ka ge e be e le wa leloko la Dafida. A ya a ingwadiša le Maria yo a bego a mmeeleditše, yo e bego e le moimana. Ya re ge ba le moo Betlelehema nako ya gore Maria a belege ya fihla. A belega morwa wa leitšibolo, a mo phuthela ka mašela, gomme a mo robatša ka legopong, ka gobane go be go se na sekgoba ka ntlong ya baeti. Gona seleteng seo go be go na le badiši ba ba bego ba letše merakeng ba letile mehlape ya bona ya dinku. Morongwa wa Morena a iponagatša go bona, gomme letago la Morena la taga go ba dikologa. Ba tšhoga kudu, eupša morongwa yoo a re go bona: “Le se ke la tšhoga! Ke tlile go le botša taba ye botse ye e tlago thabiša setšhaba ka moka kudu. Lehono kua motseng wa Dafida le tswaletšwe Mophološi yo e lego Kriste Morena. Gomme se le tlago mmona ka sona sese: Le tla hwetša lesea le phuthetšwe ka mašela le letše ka legopong.” Ya re a sa tšo realo gwa tšwelela lešaba le legolo la madira a barongwa ba legodimo le ema le yena le tumiša Modimo le re: “A go tumišwe Modimo legodimong la godimodimo, gomme khutšo a e be le ba ba mo kgahlago lefaseng!” E rile ge barongwa bao ba tloga ba boela legodimong, badiši bale ba šala ba botšana ba re: “A re yeng Betlelehema re yo bona taba ye e diregilego ye Morena a re boditšego yona.” Ba napa ba itlhaganela ba ya, ba hwetša Maria le Josefa le lona lesea le robetše ka legopong. Ya re ge ba mmone ba yo anega tše morongwa a ba boditšego tšona mabapi le ngwana yoo. Bohle ba ba di kwago ba tlabja ke tše ba di botšwago ke badiši. Maria yena ditaba tše ka moka a di lota ka pelong mme a di nagantšhiša. Badiši bale ba boela morago ba reta Modimo ba bile ba mo tumiša ka baka la tšohle tše ba bego ba di kwele ba bile ba di bone. Gape go be go le ka wona mokgwa wola morongwa a bego a ba boditše. E rile ge go fetile matšatši a seswai, mola e le nako ya gore ngwana a bolotšwe, a thewa leina la Jesu, lona leina lela a bego a ile a le thewa ke morongwa a sešo a ingwa ke mmagwe. Ge nako ya go hlwekišwa ga bona go ya ka molao wa Moshe e fetile, batswadi ba ngwana ba mo iša Jerusalema go yo mo neela Morena. Gape go ngwadilwe ka molaong wa Morena gwa thwe: “Leitšibolo le lengwe le le lengwe le letona le neelwe Morena.” Ba ile ba yo dira le sehlabelo ka mekuru ye mebedi goba maeba a mabedi, go ya ka moo go laetšwego ka molaong wa Morena. Yona mehleng yeo moo Jerusalema go be go na le monna yo mongwe ba re ke Simeone. E be e le monna wa go loka, wa morapedi, mme a letetše go phološwa ga Baisraele. Moya wo Mokgethwa o be o na le yena, ebile o mo utolletše gore a ka se hwe a se a bona Mesia yo a tshepišitšwego ke Morena. Simeone yo a išwa ke Moya Tempeleng. Ya re ge batswadi ba ngwana Jesu ba mo tliša gona Tempeleng go mo phethela se se nyakwago ke molao, Simeone a mo kuka ka matsogo, a reta Modimo a re: “Bjale gona, Morena, o ka no ntesa, nna, mohlanka wa gago, ka itshepelela ke wele pelo, bjalo ka ge o boletše. Gobane yo a tlago phološa setšhaba sa gago ke iponetše yena ka mahlo. Ke yo o mo tlišitšego go bonwa ke ditšhaba tšohle: E le seetša sa go utollela ditšhaba nnete ya gago, sa go tlišetša Baisraele, setšhaba sa gago, tlhomphego.” Tatagwe le mmagwe ba tlabja ke tše Simeone a di bolelago ka yena. Simeone a ba šegofatša, gomme a re go Maria, mmagongwana: “Tseba gore ngwana yo o beetšwe go fedišwa ga ba bantši le go phološwa ga ba bantši mo go Baisraele. E tla ba yena sešupo sa go tšwa go Modimo se se tlago ganetšwa ke batho ba bantši, ya ba gona go utologa ga dikgopolo tša bona. Ge e le wena, mahloko a tla go hlaba pelo bjalo ka tšhoša.” Gona moo go be go na le moprofeta wa mohlologadi, e le mokgekolokgekolo. Leina la gagwe e be e le Anna, morwedi wa Fanuele, wa kgoro ya Asere. O be a rile go nyalwa e sa le kgarebe, a dula le monna wa gagwe mengwaga ye e šupago. Bjale o be a na le mengwaga ye masome a seswai le metšo ye mene. O be a sa tloge Tempeleng, bošego le mosegare a khunamela Modimo, a ikona dijo, a rapela. Ka yona nako yeo le yena a fihla a reta Modimo, gomme bohle ba ba bego ba letetše gore Modimo a lokolle Jerusalema a bolela le bona ka ngwana yoo. E rile ge Maria le Josefa ba phethile tšohle go ya ka molao wa Morena, ba boela Galilea, motseng wa gabobona wa Nasaretha. Ngwana yena a gola mme a tia; o be a kwešiša gabotse se se nyakwago ke Modimo, a bile a šegofaditšwe ke yena. Ngwaga wo mongwe le wo mongwe batswadi ba Jesu ba be ba eya Jerusalema Monyanyeng wa Paseka. Ge Jesu a na le mengwaga ye lesome le ye mebedi, ba ya monyanyeng bjalo ka mengwageng. Ya re ge monyanya o fetile ba boela gae, eupša mošemane Jesu a šala Jerusalema. Batswadi ba gagwe ba be ba sa tsebe. Ba be ba gopola gore o mo sehlopheng sa gabobona, ka gona ba hlwa ba sepela leeto la letšatši, ya ba gona ba thomago go mo nyaka melokong le bagwereng ba bona. Ba se mo hwetše; ka gona ba gomela Jerusalema ba mo nyaka. E rile ka letšatši la boraro ba mo hwetša Tempeleng, a dutše le dirutegi tša Bajuda, a di theeleditše a bile a di botšiša dipotšišo. Bohle ba ba mo kwago ba be ba tlabilwe ke kwešišo ya gagwe le diphetolo. Batswadi ba gagwe ge ba mmona ba makala, gomme mmagwe a mmotšiša a re: “Ngwanaka, o re diretšeng ka mokgwa wo? Gape nna le tatago re be re go nyaka re tshwenyegile.” Yena a mo fetola a re: “Le be le nnyakelang? Kgane le be le sa tsebe gore ke swanetše go ba mo ntlong ya Tate?” Fela bona ba se kwešiše phetolo yeo ya gagwe. Ke moka a gomela le bona Nasaretha, a dula a ba theeletša. Mmagwe yena ditaba tše ka moka a di lota ka pelong. Jesu a gola, a hlalefa le go feta, a kgahla Modimo le batho. Ka ngwaga wa lesome le metšo ye mehlano wa ge Tiberiose e le Kesare, Pontiose Pilato e le mmušiši wa Judea, Heroda e le mmuši wa Galilea, Filipi, ngwanabo, e le mmuši wa selete sa Iturea le sa Tragonitise, Lisaniase e le mmuši wa Abilene, gomme Hanase le Khayafase e le Baprista ba Bagologolo, Modimo a laela Johanese, morwa wa Sakaria, a le lešokeng gore a yo begela batho molaetša wa gagwe. Ka gona a sepela le selete sohle go bapa le noka ya Jordane, a botša batho gore ba sokologe dibeng tša bona mme ba kolobetšwe, gomme Modimo o tla ba swarela tšona. Gwa phethega se se ngwadilwego ka pukung ya Jesaya ge a re: “Segoeledi lešokeng se re: ‘Lokišetšang Morena tsela; mo otlolleleng mebila. Meedi yohle a e tšheletšwe, dithaba tšohle le meboto yohle di lekanetšwe. Ditsela tša manyokenyoke di otlollwe, le mebila ya dikotikoti e lekanetšwe. Ke mo batho bohle ba tlago bona ka mo Modimo a tlago ba phološa ka gona.’ ” Mašaba a batho a be a etla go Johanese gore a ba kolobetše. Yena a re go bona: “Dinoga tenang, ke mang yo a le boditšego gore le ka phepha kotlo ye Modimo a lego kgauswi le go otla bakgopo ka yona? Go kaone le dire tše di tlago bontšha gore le sokologile. Le se ke la forana la re le ka phepha kotlo ka baka la ge Abrahama e le rakgolokhukhu wa lena. Gobane ke le botša gore Modimo a ka fetoša maswika a gore e be ditlogolo tša Abrahama! Selepe se šetše se loketše go rema dihlare medung; sehlare se sengwe le se sengwe se se sa enywego dikenywa tše dibotse se tla rengwa sa lahlelwa mollong.” Batho ba mmotšiša ba re: “Bjale re direng?” Yena a ba fetola a re: “Yo a nago le diaparo tše pedi, se sengwe a se fe yo a se nago le sona; yo a nago le dijo le yena a ngwathele yo a di hlokago.” Balekgetho ba bangwe ba tla go kolobetšwa, gomme ba mmotšiša ba re: “Moruti, rena re direng?” Yena a ba fetola a re: “Le se ke la ntšhiša batho go feta ka mo le laetšwego ka gona.” Bahlabani ba bangwe le bona ba mmotšiša ba re: “Rena ge, re direng?” Yena a ba fetola a re: “Le se ke la tšeela motho tšhelete ka kgang goba ka go mo tšhošetša la re le tla mo phara ka maaka. Le kgotsofale ka se le lefšago ka sona.” Batho ba ile ba thoma go beega dipelo, mme bohle ba nagana gore mohlomong Johanese yo ke yena Mesia. Ka gona Johanese a ba botša bohle a re: “Nna ke le kolobetša ka meetse, eupša go tla yo mongwe yo a mphetago ka maatla, yo ke sego ka swanela le go mmofolla marala a dieta. Yena o tla le kolobetša ka Moya wo Mokgethwa le ka mollo. O swere leselo ka seatla, gomme o tla fefera mabele gabotse. O tla a tšhela ka letlolong la gagwe, mooko wona a o tšhuma ka mollo wo o sa timego.” Johanese o be a begela batho Taba ye Botse ya Modimo a bile a ba kgothatša le ka mekgwa ye mentši. O kile a kgala Heroda, mmuši, ka ge a be a tšere Herodiase, mosadi wa ngwanabo, a bile a dirile le tše dingwe tše mpe tše dintši. Heroda a senya le go feta ka go lahlela Johanese ka kgolegong. Mohla batho ka moka ba ba bego ba le moo ba kolobetšwa, Jesu le yena o ile a kolobetšwa. Ya re a sa rapela, legodimo la bulega, gomme Moya wo Mokgethwa wa theogela godimo ga gagwe o le ka sebopego sa leeba. Gwa kwagala lentšu le etšwa legodimong le re: “O Morwa wa ka yo ke mo ratago. O nkgahla kudu!” Jesu ge a thoma modiro wa gagwe o be a na le mengwaga ye e ka bago ye masome a mararo. Batho ba be ba re ke morwa wa Josefa, Josefa morwa wa Eli, Eli morwa wa Matate, Matate morwa wa Lefi, Lefi morwa wa Melgi, Melgi morwa wa Janai, Janai morwa wa Josefa, Josefa morwa wa Matatiase, Matatiase morwa wa Amose, Amose morwa wa Nahume, Nahume morwa wa Hesli, Hesli morwa wa Nagai, Nagai morwa wa Mahate, Mahate morwa wa Matatiase, Matatiase morwa wa Shimi, Shimi morwa wa Josege, Josege morwa wa Joda, Joda morwa wa Johanane, Johanane morwa wa Resa, Resa morwa wa Serubabele, Serubabele morwa wa Sealtiele, Sealtiele morwa wa Neri, Neri morwa wa Melgi, Melgi morwa wa Adi, Adi morwa wa Kosamo, Kosamo morwa wa Elmadamo, Elmadamo morwa wa Ere, Ere morwa wa Joshua, Joshua morwa wa Eliesere, Eliesere morwa wa Jorime, Jorime morwa wa Matate, Matate morwa wa Lefi, Lefi morwa wa Simeone, Simeone morwa wa Juda, Juda morwa wa Josefa, Josefa morwa wa Jonamo, Jonamo morwa wa Eliakime, Eliakime morwa wa Melea, Melea morwa wa Mena, Mena morwa wa Matata, Matata morwa wa Nathane, Nathane morwa wa Dafida, Dafida morwa wa Isai, Isai morwa wa Obede, Obede morwa wa Boase, Boase morwa wa Salmone, Salmone morwa wa Nagshone, Nagshone morwa wa Aminadaba, Aminadaba morwa wa Admine, Admine morwa wa Arni, Arni morwa wa Hetserone, Hetserone morwa wa Peretse, Peretse morwa wa Juda, Juda morwa wa Jakobo, Jakobo morwa wa Isaka, Isaka morwa wa Abrahama, Abrahama morwa wa Terage, Terage morwa wa Nahoro, Nahoro morwa wa Seruge, Seruge morwa wa Regu, Regu morwa wa Pelege, Pelege morwa wa Ebere, Ebere morwa wa Shelage, Shelage morwa wa Kenane, Kenane morwa wa Arpakshade, Arpakshade morwa wa Seme, Seme morwa wa Noa, Noa morwa wa Lamege, Lamege morwa wa Metushelage, Metushelage morwa wa Enoko, Enoko morwa wa Jerede, Jerede morwa wa Mahalalele, Mahalalele morwa wa Kenane, Kenane morwa wa Enose, Enose morwa wa Sete, Sete morwa wa Adamo, Adamo morwa wa Modimo. Jesu a tloga nokeng ya Jordane a tletše Moya wo Mokgethwa gomme a išwa ke wona lešokeng, moo a fihlilego a lekwa ke Diabolose matšatši a masome a mane. Nakong yeo ka moka o be a sa je selo, ka gona ya re ge e feta ya ba o swerwe ke tlala. Diabolose a re go yena: “Ge o le Morwa wa Modimo, laela leswika le gore le fetoge bogobe.” Jesu a mo fetola a re: “Mangwalo a Makgethwa a re motho ga a phele ka bogobe fela.” Ke moka Diabolose a mo iša thabeng, gomme ka go gadima fela a mmontšha dinaga ka moka tša lefase, a re go yena: “Mahumo a dinaga tše ka moka le maatla a go laola ke tla go fa ona, ka gobane a filwe nna, gomme nka no a fa yo ke ratago go mo fa ona. Bjale ge, ge o ka nkhunamela, dilo tše ka moka ga tšona e tla ba tša gago.” Jesu a mo fetola a re: “Mangwalo a Makgethwa a re o khunamele Morena Modimo wa gago, o direle yena a nnoši.” Diabolose a mo iša Jerusalema, a fihla a mo nametša ntlhohlong ya Tempele, a re go yena: “Ge o le Morwa wa Modimo ikwišetše fase o le fa, gobane Mangwalo a Makgethwa a re: ‘Modimo o tla laela barongwa ba gagwe gore ba go hlokomele.’ A ba a re: ‘Ba tla go kuka gore o se thetšwe ke maswika.’ ” Jesu a mo fetola a re: “Mangwalo a Makgethwa a re: ‘O se ke wa leka Morena Modimo wa gago.’ ” Ge Diabolose a seno leka Jesu ka tšeo ka moka, a mo tlogela lebakanyana. Go tloga moo Jesu a boela Galilea a na le maatla a Moya wo Mokgethwa. Setumo sa gagwe sa phatlalala le selete seo ka moka. A ruta ka disinagogeng gomme a retwa ke bohle. Jesu a boela Nasaretha moo a bego a goletše gona, gomme ka letšatši la Sabatha a ya sinagogeng bjalo ka ge a be a tlwaetše. A ema gore a bale Mangwalo a Makgethwa. A newa puku ya moprofeta Jesaya. A e phutholla ka mo go ngwadilwego go re: “Moya wa Morena o mo go nna; ke ka baka leo a mpeilego gore ke yo begela badiidi Taba ye Botse ya Modimo. O nthomile go begela dibofša gore di tla bofollwa, le difofu gore di tla kgontšhwa go bona, le go lokolla ba ba gateletšwego, le go bega gore nako ya gore Morena a lokolle setšhaba sa gagwe e fihlile.” Ke moka Jesu ge a seno phutha puku yeo, a e bušetša go mohlanka mme a dula fase. Batho ka moka ka sinagogeng ba mo tomolela mahlo. Ge a thoma go ba hlalošetša temana yeo a re: “Lehono temana ye ya Mangwalo a Makgethwa ye le sa tšogo e kwa e phethagetše.” A ba kgahla ka moka mme ba kgotsa ka mo a kgonago polelo ka gona. Ba re: “Na ga ke re ke yena morwa wa Josefa?” Yena a re go bona: “Ke a tseba gore le tla ntlhaba ka seema se se rego ‘Moreku, ithekole.’ Le tla mpotša le gore le mono motseng wa gešo ke dire tše le kwelego go thwe ke di dirile kua Kapernaume.” A ba a re: “Ruri, ke le botša gore moprofeta ga a ke a thabelwa motseng wa gabo. “Ke le botša nnete ge ke re mehleng yela ya Eliya go be go na le bahlologadi ba bantši mo gare ga Baisraele, mola pula e tšere mengwaga ye meraro le seripa e sa ne, mme go wele tlala ye kgolo nageng ka moka. Fela Eliya a se ke a rongwa le go o tee wa bona, ge e se go mohlologadi yo a bego a dula Tsarepate kua seleteng sa Sidone. Le mehleng ya moprofeta Elisha go be go na le batho ba bantši ba ba bego ba bolawa ke bolwetši bja letlalo bja go ba tšhilafatša mo go Baisraele, fela ga go le o tee wa bona yo a kilego a fodišwa, ka ntle le Naamane yola wa Mosiria.” Ge batho ba ba lego ka sinagogeng ba ekwa a realo, ba galefa. Ba emelela, ba mo ntšhetša ka ntle ga motse, ba mo iša legageng la thaba yeo motse wa bona o bego o agilwe godimo ga yona, e le gore ba tle ba mo kgoromeletše fase, eupša yena a ba ngaya a itlogela. Ke moka Jesu a ya Kapernaume, motse wo o lego Galilea, a fihla a ruta batho ka matšatši a Sabatha. Bohle ba be ba makatšwa ke mokgwa wo a bego a ruta ka wona, gobane o be a bolela e le yo a nago le maatla a go ba ruta. Ka moo sinagogeng go be go na le motho yo a tsenwego ke modemone, e lego moya wo mobe. A goeletša kudu a re: “Ao! O nyakang mo go rena, wena Jesu wa Nasaretha? A o tlile go re fediša? Nna ke a go tseba – o Mokgethwa wa Modimo!” Jesu a laela modemone yoo a re: “Homola, o tšwe go motho yo!” Modemone wa lahlela motho yola fase gare ga bona, wa napa wa tšwa go yena o se wa mo dira selo. Batho ka moka ba tlabega mme ba botšišana ba re: “Ke maatla mang a a lego polelong ya motho yo? Gape o laela meoya ye mebe ka maatla le ka šiši gore e tšwe, gomme e tšwe!” Setumo sa gagwe se ile sa phatlalala gohle seleteng seo. Jesu a tloga moo sinagogeng a ya ga Simone. Mmatswale wa Simone o be a lwala kudu a bolawa ke letadi, gomme Jesu a kgopelwa gore a mo thuše. A ema ka dihlogong tša malao a gagwe, gomme a laela letadi gore le mo tlogele. Letadi la mo tlogela ka bjako, gomme a tsoga, a ba fa dijo. Ge letšatši le dikela bohle ba ba nago le balwetši ba mehutahuta ba ba tliša go Jesu; yena a bea yo mongwe le yo mongwe wa bona diatla, a ba fodiša. Le bademone ba tšwa go batho ba bantši ba goeletša ba re: “Wena o Morwa wa Modimo!” Jesu a ba kgalema a ba ganetša go bolela, ka gore ba be ba tseba gore ke yena Mesia. Ge go esa Jesu a tloga motseng a ya felo mo go se nago motho. Batho ba thoma go mo nyaka, gomme ya re ge ba mo hweditše ba leka go mo thibela gore a se tloge. Eupša a re go bona: “Le metse ye mengwe ke swanetše go e ruta Taba ye Botse ya mmušo wa Modimo, ka gobane ke sona se Modimo a nthomilego gore ke se dire.” A tšwela pele le go ruta batho ka disinagogeng tša naga ka moka ya Bajuda. Ka tšatši le lengwe e rile ge Jesu a eme lebopong la letsha la Genesarete, lešaba la mo pitlaganya, le rata go kwa lentšu la Modimo. A bona maselawatle a mabedi a eme lebopong; barei ba dihlapi ba be ba a tlogetše moo ba hlatswa malokwa a bona. Jesu a tsena ka go le lengwe la ona, e le la Simone, gomme a mo kgopela gore a le šuthišetše lebopong go se nene. A dula ka gare ga lona a ruta lešaba leo. Ge a feditše go ba ruta, a re go Simone: “Šuthišetša leselawatle le garenyana kua go išago gomme le theošetše malokwa a lena le sware dihlapi.” Simone a mo fetola a re: “Mong wa ka, re letše re katana bošego ka moka, fela ra se sware selo. Eupša ge o realo, ke tla no theošetša malokwa.” Ba ile ba a theošetša gomme ba swara dihlapi tše dintšintši, malokwa a ba a nyaka go gagoga. Ba kgwathetša bagwera ba bona ba ka leselawatleng lela le lengwe gore ba tle ba ba thuše. Ba tla ba tlatša maselawatle ale ka mabedi a ba a nyaka go sobela. Ge Simone Petrose a bona se se diregilego a itahlela fase pele ga Jesu, a re: “Morena, tloga mo go nna, ka gobane ke nna monna wa modiradibe!” Gape yena le bohle ba ba bego ba na le yena ba be ba tlabilwe ke bontši bja dihlapi tše ba bego ba di swere. Le bagwera ba Simone, e lego Jakobose le Johanese, barwa ba Sebediose, ba be ba tlabegile. Jesu a re go Simone: “O se tšhoge, go tloga bjale o tla ba morei wa batho.” Ba bušetša maselawatle ale lebopong, ba tlogela tšohle, ba latela Jesu. Ka tšatši le lengwe Jesu o be a le motseng wo mongwe moo go bego go na le monna yo a bolawago ke bolwetši bja letlalo bja go mo tšhilafatša. Ya re ge a bona Jesu, a itahlela fase ka sefahlego, a mo kgopela a re: “Morena, etse ge o rata o ka mphodiša ka hlweka.” Jesu a otlolla letsogo a mo kgwatha a re: “Ke a rata; hlweka!” Gateetee a fola. Jesu a mo laya a re: “O se ke wa botša motho, eupša eya go moprista a go bone, gomme o dire sehlabelo ka mo go laetšego Moshe, gore e be bohlatse go batho ka moka bja gore o hlwekile.” Setumo sa Jesu sa phatlalala le go feta, gomme mašabašaba a batho a tla a mmokanela go mo kwa, yena a fodiša ba ba lwalago gare ga bona. O be a tlwaetše go ngwegela mašokeng, a ye go rapela. Ka tšatši le lengwe Jesu o be a ruta batho. Bafarisei ba bangwe le boramangwalo ba ba bego ba etšwa metseng ka moka ya Galilea le Judea ešita le kua Jerusalema le bona ba be ba dutše fase moo. Maatla a Morena a be a le mo go Jesu gore a fodiše balwetši. Gwa tla banna ba bangwe ba kukile monna wa go repha ditho ka leako, ba leka go mo tsenya ka ntlong gore ba mmee pele ga Jesu. Fela ka baka la bontši bja batho ba palelwa ke go mo tsenya. Ka gona ba namela tlhakeng, ba phula lešoba gona, gomme ba mo theošetša ka gare ka leako, a ba mo pele ga Jesu gare ga batho ba ba bego ba le ka moo. Jesu ge a bona ka mo ba nago le tumelo ka gona, a re go monna yoo: “Motho wa batho, o swaretšwe dibe tša gago.” Boramangwalo le Bafarisei ba botšišana ba re: “Motho yo o itira mang ge a nyefola Modimo ka mokgwa wo? Ke mang yo a ka swarelago batho dibe ntle le Modimo?” Jesu, ge a lemoga tše ba di naganago, a re go bona: “Le reng le nagana ka mokgwa wo? Se bonolo ke sefe, go re: ‘O swaretšwe dibe tša gago,’ goba go re: ‘Emelela, o sepele’? Bjale ge, ke nyaka go le bontšha gore Morwamotho o na le maatla a go swarela batho dibe mo lefaseng.” Ya ba o re go morephaditho: “Ke a go botša ke re: Emelela, o rwale leako la gago, o ikele gae!” Monna yoo a emelela ka ntle le go dikadika bohle ba mmona, a tšea leako le a bego a robetše go lona, a ya gae a reta Modimo. Bohle ba tlabega, ba reta Modimo ba tšhogile e le ruri ba re: “Jo, tše re di bonego lehono di a tlaba!” Ka morago Jesu ge a tloga moo a bona molekgetho yo leina la gagwe e bego e le Lefi a dutše ngwakong wa lekgetho. A re go yena: “Ntatele!” Lefi a emelela, a tlogela tšohle, a mo latela. Ka morago a direla Jesu monyanya wo mogolo ka ga gagwe, gomme gare ga bao ba bego ba tlile dijong go be go na le balekgetho ba bantši le batho ba bangwe. Bafarisei le boramangwalo ba bangwe bao le bona e bego e le Bafarisei ba ngongoregela barutiwa ba Jesu ba re: “Le reng le eja le balekgetho le bile le enwa le bona le badiradibe ba bangwe?” Jesu a ba fetola a re: “Ngaka ga e nyakwe ke batho ba ba iketlilego, e nyakwa ke ba ba lwalago. Nna ga se ka tlela go botša baloki gore ba sokologe, ke tletše go botša badiradibe.” Batho ba bangwe ba kile ba re go Jesu: “Barutiwa ba Johanese Mokolobetši ba ikona dijo gantši ba rapela, barutiwa ba Bafarisei le bona ba dira bjalo, eupša ba gago bona ba a ja, ba a nwa.” Jesu a ba fetola a re: “Kgane baeng ba ba tlilego monyanyeng wa lenyalo le ka kgona go ba gapeletša go ikona dijo monyadi a sa na le bona? Fela nako e tla tla yeo ka yona monyadi a tlago tlošwa go bona, ya ba gona ba ikonago.” Jesu a ba botša le ka seswantšho a re: “Ga go motho yo a segago segaswa seaparong se sefsa go se phara go sa kgale. Ge a ka dira bjalo o tla be a kgeitše seaparo seo se sefsa, gomme segaswa seo sa go tšwa seaparong se sefsa se ka rona sa kgale. Le gona ga go motho yo a tšhelago beine ye e sa tšogo hlotlwa ka makukeng a kgale, ka gobane e ka a paleša, beine ya tšhologa, le ona makuka a loba. Beine ye e sa tšogo hlotlwa yona e tšhelwa ka makukeng a mafsa. Le gona ga go motho yo a nyakago beine ye e sa tšogo hlotlwa a šetše a nwele ye e hlotlilwego kgale. O re: ‘Ye e hlotlilwego kgale e phala ye e sa tšogo hlotlwa.’ ” Ka tšatši le lengwe la Sabatha Jesu o be a putla ka mašemong a korong. Barutiwa ba gagwe ba tšama ba ekga diako ba di fogohlela ka diatleng, ba eja dithoro. Bafarisei ba bangwe ba ba botšiša ba re: “Le reng le dira se se sego sa dumelelwa ka letšatši la Sabatha?” Jesu a ba fetola a re: “Na ga se la bala se Dafida a kilego a se dira mohla wola yena le banna ba ba bego ba na le yena ba swerwe ke tlala – ka mo a ilego a tsena ka ngwakong wa Modimo, a tšea dinkgwa tše di bego di abetšwe Modimo, a di ja, a di ngwathela le bao ba bego ba na le yena? Etse bona ba be ba se ba dumelelwa go di ja; go be go dumeletšwe baprista fela.” A fetša ka go re: “Morwamotho o na le tokelo ya go laetša ge eba melao ya Sabatha e swanetše go phethwa.” Ka le lengwe letšatši la Sabatha Jesu a tsena ka sinagogeng a ruta batho. Go be go na le monna wa go repha letsogo la go ja. Boramangwalo le Bafarisei ba be ba beile Jesu leihlo gore ba bone ge a ka mo fodiša ka letšatši la Sabatha, gore ba tle ba mmee molato. Fela Jesu o be a tseba tše di lego ka dipelong tša bona, gomme a re go morephaletsogo: “Etla o eme mono pele.” Monna yoo a emelela a ya go ema ka pele. Ke moka Jesu a re go bona: “Ke a le botšiša ke re ke eng se se dumeletšwego ka tšatši la Sabatha, ke se sebotse goba ke se sebe, ke go phološa motho goba ke go mmolaya?” A ba gadima bohle, a napa a re go morephaletsogo: “Otlolla letsogo la gago!” A le otlolla, gomme la fola, la swana le lela le lengwe. Bona ba galefa mme ba rerišana ka se ba ka se dirago Jesu. Matšatšing ona ao Jesu a rotogela thabeng go yo rapela. A lala a rapela Modimo moo bošego ka moka. Ge go esa a bitša barutiwa ba gagwe ba tla go yena, gomme a kgetha ba lesome le ba babedi mo go bona a ba bitša baapostola. Ke Simone, yo a mo theilego Petrose, le Andrease, ngwanabo, le Jakobose le Johanese, le Filipi le Bartolomeose, le Mateu le Thomase, le Jakobose, morwa wa Alfeose, le Simone, yo a bego a bitšwa Mollelatokologo, le Judase, morwa wa Jakobose, le Judase Iskariote, yo a ilego a tla a mo eka. Ge Jesu a seno theoga thabeng le baapostola ba gagwe, o ile a ema mo e lego lebala a na le barutiwa ba gagwe ba bantši. Lešaba le lentši la batho ba go tšwa gohle nageng ya Judea le Jerusalema le seleteng sa lebopong la lewatle, mo go lego Tirose le Sidone, la tla go yena. Ba be ba tlile go mo kwa le go fodišwa malwetši a bona. Bao ba bego ba tshwenywa ke meoya ye mebe le bona ba ile ba fodišwa. Batho ka moka ba be ba leka go mo kgwatha, ka gobane go yena go be go etšwa maatla mme a ba fodiša bohle. Jesu a lebelela barutiwa ba gagwe a re: “Ba lehlogonolo ke lena le diilago, gobane mmušo wa Modimo ke wa lena. Ba lehlogonolo ke lena ba bjale le swerwego ke tlala, gobane le tla khorišwa. Ba lehlogonolo ke lena ba bjale le llago, gobane le tla sega. “Ba lehlogonolo ke lena ge le hloilwe ke batho, ba le tšwa, ba le roga, ba le šišingwa, e le ka baka la Morwamotho. Ge tšeo di le hlagela, le bine le thabile, ka gobane moputso wa lena ke wo mogolo legodimong. Gape borakgolokhukhu ba bona le bona ba be ba dira baprofeta tšona tšeo ba le dirago tšona. “Fela ba madimabe ke lena bahumi, gobane bja lena boiketlo le šetše le bo hweditše. Ba madimabe ke lena bao bjale le khorago, gobane le tla bolawa ke tlala. Ba madimabe ke lena bao bjale le segago, gobane le tla lla la golola. “Ba madimabe ke lena ge le retwa ke bohle, gobane seo ke sona se borakgolokhukhu ba bona ba bego ba se dira baprofeta ba maaka.” “Lena ba le nkwago, ke a le botša ke re: Le rate manaba a lena, ba ba le hloilego le ba direle tše di lokilego, ba ba le rogago le ba šegofatše, gomme ba ba le swerego gampe le ba rapelele. Ge motho a ka go betha thama, o mo retollele le ye nngwe. Ge motho a ka go amoga seaparo sa ka ntle, o mo lese a tšee le sa ka gare. Ge motho a ka go kgopela selo, o mo fe sona, le ge motho a ka tšea selo sa gago, o se ke wa re a se buše. Le direle batho tše le lena le ratago gore ba le direle tšona. “Ge le rata fela ba ba le ratago, le tla be le sa tlilo putsetšwang? Gape seo ke se se dirwago le ke badiradibe. Le ge le hola fela ba ba le holago, le tla be le sa tlilo putsetšwang? Etse seo ke se se dirwago le ke badiradibe. Le ge le adima bao le holofelago gore ba tla buša, le tla be le sa tlilo putsetšwang? Ga ke re le badiradibe ba a adimana, ba tle ba buše sa go lekana le se ba se adimilego? Sa lena a e be go rata manaba a lena le go ba hola, le go adima batho le sa lebelele go bušetšwa. Ke mo Modimo a tlago le putsa kudu, le gona la ba bana ba Modimo yoo Yogodimodimo. Gobane bahlokatebogo le bakgopo le bona o ba loketše. Le gaugele bjalo ka ge Tatagolena le yena a gaugela.” “Le se ke la bona ba bangwe diphošo, gomme le lena Modimo a ka se tlo le bona diphošo; le se ke la tšwa motho, gomme le lena Modimo a ka se tlo le tšwa; le swarele ba ba le fošeditšego, gomme Modimo o tla le swarela. Le fe ba bangwe, gomme Modimo le yena o tla le fa. Le tla fiwa ka kelo ya mmapaale ye e katetšwego ya ba ya ntšhwa mohlopha. Gape kelo ye le elelago ba bangwe ka yona, ke yona ye Modimo a tlago le elela ka yona.” Jesu a ba botša le ka seswantšho a re: “Kgane sefofu se ka hlahla se sengwe? Ga ke re bobedi bja bona ba tla wela ka leopeng? Morutiwa ga a fete morutiši wa gagwe; morutiwa yo mongwe le yo mongwe ge a feditše dithuto tša gagwe o lekana le morutiši wa gagwe. “O reng o bona phatšana ye e fahlilego ngwaneno, etšwe o sa bone kota ye e fahlilego wena? Na o ka botša ngwaneno wa re: ‘Ngwanešo, a ke go fahlolle phatšana yeo e go fahlilego,’ mola wena kota ye e go fahlilego le go e bona o sa e bone? Moikaketši tena! Pele iphahlolle kota yeo e go fahlilego, ke mo o tlago bona gabotse, wa kgona o fahlolla ngwaneno phatšana ye e mo fahlilego.” “Mohlare wo mobotse ga o enywe dikenywa tše e sego tše dibotse, le wo e sego wo mobotse ga o enywe dikenywa tše dibotse. Mohlare wo mongwe le wo mongwe o tsebja ka dikenywa tša wona. Motho ga a fule mago mehlareng ya meetlwa, le diterebe ga a di fule monganeng. Motho wa go loka o nagana tše di lokilego ka pelong ya gagwe, ka gona o bolela tše di lokilego; yo mobe le yena o nagana tše mpe, ka fao o bolela tše mpe. Ga ke re se motho a se bolelago ke se se tšwago ka pelong ya gagwe?” “Le mpiletšang ‘Morena, Morena,’ le sa dire tše ke le botšago tšona? Yo a tlago go nna a kwa tše ke di bolelago mme a di phetha, ke tla le botša gore o swana le mang. O swana le monna yo e rilego ge a aga ntlo ya gagwe a epa go iša fase, a aga motheo godimo ga letlapa. Ya re ge lefula le etla mme moela o tšhologela godimo ga yona, meetse a se ke a e šikinya, ka gobane e agilwe gabotse. Eupša yo a kwago tše ke di bolelago gomme a se di phethe, yena o swana le monna yo a agilego ntlo ya gagwe mabung a se a e agela motheo; ya re ge moela o tšhologela godimo ga yona, ya wa le semeetseng – gomme go pšhatlagana ga yona ya ba mo go šiišago.” Ge Jesu a feditše go botša batho ditaba tšeo ka moka, a ya motseng wa Kapernaume. Molaolalekgolo yo mongwe moo o be a na le mohlanka yo a bego a mo hola. Mohlanka yo o be a lwala a bile a le makgatheng. Ge molaolalekgolo yoo a ekwa ka ga Jesu, a roma bagolo ba Bajuda go yo mo kgopela gore a tle a fodiše mohlanka wa gagwe. Ge ba fihla go Jesu ba mo kgopela ba phegeletše ba re: “Go lebane gore o mo thuše, gobane o rata setšhaba sa gaborena, ebile ke yena a re agetšego sinagoge.” Ka gona Jesu a ya le bona. Ya re a sa le kgojana le lapa la gona, molaolalekgolo yola a roma bagwera ba gagwe gore ba yo botša Jesu ba re: “Morena, o se itapiše ka go tlo fihla mo. Ga se ka swanela gore o tsene ka lapeng la ka; ke ka baka leo le go tla go wena ka bonna ke bonego go se gwa ntshwanela. Eno bolela lentšu le tee, gomme mohlanka wa ka o tla fola. Gobane le nna, ke le motho yo a bušwago, ke na le bahlabani ba ke ba bušago. Ge ke re go mohlabani: ‘Eya,’ o a ya; ge ke re go yo mongwe: ‘Etla,’ o a tla; ge ke re go mohlanka wa ka: ‘Dira se,’ o a se dira.” Ge Jesu a ekwa a realo, a mo kgotsa; a retologa a botša lešaba le le bego le mo latela a re: “Ke a le botša, ga se ka ka ka hwetša motho yo a nago le tumelo ye kaaka mo go Baisraele.” Ge baromiwa bale ba boela go molaodi yola ba hwetša mohlanka wa gagwe a fodile. Ka moragonyana Jesu a ya motseng wo ba rego ke Naine a na le barutiwa ba gagwe le lešaba le lentši. Ge a batamela kgorong ya motse a bona go etšwa batho ba rwele mohu go yo mmoloka. Mohu yoo e be e le yena morwa motswalwanoši wa mmagwe, yo e bego e le mohlologadi, gomme lešaba le lentši la batho le be le na le yena. Ge Morena a mmona a mo kwela bohloko, a re go yena: “O se ke wa lla.” Ke moka a batamela, a kgwatha leako la mohu, gomme barwadi ba lona ba ema. Jesu a re: “Lesogana, ke a go botša ke re: Tsoga!” Mohu a tsoga mme a thoma go bolela. Jesu a mo iša go mmagwe. Bohle ba boifa mme ba tumiša Modimo ba re: “Re tlišeditšwe moprofeta yo mogolo!” Ba bangwe ba re: “Modimo o tlile go phološa setšhaba sa gagwe!” Taba ye ya Jesu ya phatlalala le naga yohle ya Bajuda le mathoko a yona. E rile ge barutiwa ba Johanese Mokolobetši ba mmotša ditaba tše ka moka, a bitša ba babedi ba bona, a ba roma go Morena gore ba yo mmotšiša ba re: “Na ke wena yo go lebeletšwego gore o tla tla, goba re letele yo mongwe?” Ge ba fihla go Jesu ba re: “Johanese Mokolobetši o re romile gore re tle re go botšiše ge eba ke wena yo go lebeletšwego gore o tla tla, goba re letele yo mongwe.” Yona nakong yeo Jesu o be a fodiša batho ba bantši malwetši le mafokodi a bona, a ntšha le meoya ye mebe, a fodiša le ba bantši ba ba foufetšego. A araba baromiwa ba Johanese ka go re: “Eyang le botše Johanese tše le di bonago le tše le di kwago: difofu bjale di a bona, digole di a sepela, ba ba swerwego ke malwetši a letlalo a go ba tšhilafatša ba a fodišwa, ditholo di a kwa, bahu ba a tsošwa, le badiidi ba begelwa Taba ye Botse ya mmušo wa Modimo. Go lehlogonolo yo a sa kgopišegego ka nna!” Ge baromiwa ba Johanese ba seno tloga, Jesu a šala a botšiša lešaba mabapi le Johanese a re: “Mola le etšwa motseng le eya lešokeng le be le yo bonang? Kgane le be le yo bona lehlaka le le tšokotšwago ke phefo? Ke re le be le tšwetše go yo bonang? Afa le be le sa re le tla bona monna yo a aparago diaparo tše dibotse? Etse ba ba aparago diaparo tša botšhephi ba bile ba ipshina ka mahumo ba dula ka dintlong tša mošate. Ke re le be le tšwetše go yo bonang? Afa le be le se la yo bona moprofeta? Ruri, ke le botša gore le bone wa go feta le moprofeta. Gobane Johanese ke yena yo Mangwalo a Makgethwa a mmolelago a re: ‘Ke tla roma motseta wa ka a go eta pele a go kgorela tsela.’ Ke le botša gore ga se gwa ka gwa tswalwa motho wa go feta Johanese. Eupša yo e lego yo monnyane mmušong wa Modimo o a mo feta.” Batho ka moka gotee le balekgetho ge ba seno kwa Johanese, ba phetha tše di nyakwago ke Modimo, ba ba ba mo kgopela gore a ba kolobetše. Bafarisei le boramangwalo bona ka go gana go kolobetšwa ke yena, ba ganne go dira se Modimo a bego a re ba se dire. Jesu a tšwela pele a re: “Na batho ba mehleng yeno nka ba swantšha le eng? Ba etšang? Ba swana le bana ba ba dutšego lepatlelong la motse, ba goelelana ba re: ‘Re le leleditše dinaka, la se bine! Ra le retela sereto sa mahloko, la se lle!’ Johanese Mokolobetši o be a ikona dijo a bile a sa nwe beine, eupša la re: ‘O na le modemone.’ Gwa tla Morwamotho a eja, a bile a enwa, gomme la re: ‘Bonang motho wa sejagobe, wa go nwa kudu, mogwera wa balekgetho le badiradibekabona!’ Bohlale bja Modimo bjona bo hlatselwa ke bana ba bjona.” Mofarisei yo mongwe o kile a laletša Jesu gore a tle a je le yena. Ka fao Jesu a ya ga Mofarisei yoo, a fihla a dula le yena dijong. Gona moo motseng woo go be go na le mosadi yo mongwe wa modiradibe. O ile a kwa gore Jesu o ka lapeng la Mofarisei yoo o a ja. A napa a tla le sedibelo sa leswika le le bitšwago alapastere, se swere senkgabose, a ema ka morago ga Jesu, kgauswi le maoto a gagwe, a lla, mme a kolobiša Jesu maoto ka meokgo. A mo phumola ka moriri, a mo atla maoto, a napa a mo tšhela ona ka senkgabose sela. Ge Mofarisei yola a di bona, a re ka pelong: “Etse monna yo ge e ka be e le moprofeta, a ka be a tseba gore mosadi yo a mo kgomago yo ke mang, le gore ke motho wa mohuta mang, a ka be a tseba gore ke modiradibe.” Jesu a re go yena: “Simone, ke na le taba ye ke nyakago go go botša yona.” Simone a re: “Go lokile, Moruti, mpotše.” Jesu a re: “Go be go na le banna ba babedi ba ba bego ba adimilwe tšhelete ke moadimiši. Yo mongwe o be a adimilwe dipapetlana tše makgolo a mahlano tša silibera, mongwe a adimilwe tše masome a mahlano. Ya re ge ba palelwa ke go buša tšhelete ye ba e adimilwego, a ba phumolela molato wa bona ka babedi. Bjale ge, ke ofe mo go bona yo a ilego a mo leboga le go feta?” Simone a mo fetola a re: “Ke bona gore ke yo a phumoletšwego molato wo mogolo go feta yola yo mongwe.” Jesu a re: “O nepile.” Ke moka a retologela go mosadi yola, a re go Simone: “Mosadi yo o a mmona? Ke tlile ka mo go gago, wa se mphe meetse a go hlapa maoto, eupša yena o nthapišitše maoto ka meokgo ya gagwe, a mphumola ona ka moriri. Wena ga se wa nkganela ka go nkatla, eupša yena e sa le a tsena ka mo ga se a lesa go nkatla maoto. Ga se wa ntlotša hlogo ka makhura a mohlware, eupša yena o ntšhetše ka senkgabose maotong. Bjale ge, a ke go botše: Yena o bontšhitše gore o na le lerato le legolo ka gobane o swaretšwe dibe tša gagwe tše e bego e le tše dintši. Yo a swaretšwego sebe se senyenyane fela, le lerato la gagwe ke le lenyenyane.” Ya ba o botša mosadi yola a re: “O swaretšwe dibe tša gago.” Ba ba bego ba eja le yena ba botšišana ba re: “Ke mang yena yo a bilego a swarela batho dibe?” Jesu yena a re go mosadi yola: “Tumelo ya gago e go phološitše; sepela gabotse.” Go tloga moo Jesu a sepela le metse le metsana a begela batho Taba ye Botse ya mmušo wa Modimo a bile a ba ruta yona, a na le barutiwa bale ba gagwe ba lesome le metšo ye mebedi. Basadi ba bangwe ba a bego a ba ntšhitše meoya ye mebe a bile a ba fodišitše malwetši le bona ba be ba na le yena. Bona e be e le Maria, yo a bego a tsebja ka la Magadalena, yola wa go ka a ntšhwa bademone ba ba šupago, le Johana, yola monna wa gagwe e bego e le Gusa, mohlankedi wa Heroda, le Susana, le ba bangwe basadi ba bantši ba ba bego ba thuša Jesu le barutiwa ba gagwe ka tše ba bego ba na le tšona. Batho ba ile ba fela ba etla go Jesu ba etšwa metseng ye e fapanego; ya re ge ba kgobokane e le lešaba le legolo, a ba botša seswantšho a re: “Monna yo mongwe o kile a tšwa a yo bjala peu. Ge a dutše a e gaša, ye nngwe ya wela tseleng, gomme ya gatwa, le dinonyana tša e ja. Ye nngwe ya wela lekgwareng, gomme ge e seno mela, dimelana tšeo tša pona, ka ge mobu woo o be o se na monola. Ye nngwe ya wela ka mehlašaneng ya meetlwa, gomme mehlašana yeo ya gola le dimelana tšela, ya di pipetša. Ye nngwe yona ya wela mobung wo mobotse; mabele a gona a gola a tswala. Lebele le lengwe le le lengwe la tšwa dithoro tše lekgolo.” Jesu a goeletša a re: “Yo a nago le tsebe a a kwe!” Barutiwa ba Jesu ba mmotšiša gore na seswantšho se se šupang, gomme a ba fetola a re: “Lena le utolletšwe diphiri tša mmušo wa Modimo, fela ba bangwe ba di kwa ka diswantšho gore ba lebelele, eupša ba se ke ba bona selo; ba kwe, eupša ba se ke ba kwešiša selo.” “Seswantšho sa mobjadi se hlalošwa ka mokgwa wo: Peu ke lentšu la Modimo. Peu ya go wela tseleng e šupa bao ba rego go kwa lentšu la Modimo, Sathane a tle a tloše molaetša wo ka dipelong tša bona gore ba se ke ba dumela, ba phološwa. Peu ya go wela lekgwareng e šupa bao ba rego go kwa molaetša ba o amogela ka thabo. Eupša wa se dule sebaka ka dipelong tša bona; ba dumela lebakanyana fela, gomme ya re ge ba lekwa, ba kgeloga. Peu ya go wela mehlašaneng ya meetlwa e šupa bao ba rego go kwa molaetša wa Modimo, go balabala le mahumo le maipshino a bophelo tša ba šitiša go bontšha tumelo ya bona ka mediro. Peu ya go wela mobung o mobotse e šupa bao e rego ge ba ekwa molaetša wa Modimo, ba ikemišetša go o phetha, mme ba o phetha, ba bontšha tumelo ya bona ka go kgotlelela melekong.” “Ga go motho yo a rego go thumaša lebone a le khurumela ka seroto, goba a le bea ka fase ga malao. O le hloma sehlomong sa lona gore ba ba tsenago ba bonegelwe. “Ga go sephiri se se ka se kego sa tsebja, le gona ga go selo se se utilwego se se ka se kego sa utollwa sa tsebja. “Ka gona le hlokomele gore na le kwa lentšu la Modimo bjang; gobane yo a nago le sa gagwe o tla okeletšwa, mme yo a se nago le sa gagwe, le se a gopolago gore ke sa gagwe o tla se amogwa.” MmagoJesu le bana ba boJesu ba kile ba re ba tlile go yena, ba palelwa ke go mmatamela ka baka la lešaba. Motho yo mongwe a re go yena: “Mmago le banabeno šebale ka kua ntle ba a go nyaka.” Jesu a botša lešaba a re: “Mma le banabešo ke ba ba rego go kwa tše Modimo a di laelago ba di phetha.” Ka tšatši le lengwe Jesu a namela leselawatle le barutiwa ba gagwe, a re go bona: “A re seleleng ka mošola wa letsha.” Ba napa ba tloga. Ge ba le gare ba sesa ka leselawatle, Jesu a swarwa ke boroko. Gateetee gwa tsoga ledimo ka letsheng, leselawatle leo la thoma go tlala meetse, mme ba ba kotsing. Barutiwa ba Jesu ba ya go yena, ba mo tsoša ba re: “Mong wa rena, Mong wa rena! Re a hwa!” Jesu a tsoga, a kgalema ledimo le maphoto a re di homole; gwa homola gwa re tuu. Ke moka a re go barutiwa bale ba gagwe: “Le reng le hloka tumelo?” Bona ba be ba tšhogile, ba tlabegile, gomme ba botšišana ba re: “Etse motho yo wa go laela le diphefo le maphoto, mme tša mo theeletša, ke mang?” Jesu le barutiwa ba gagwe ba selela ka seleteng sa Bagerasa ka mošola wa letsha la Galilea ka leselawatle. Ya re ge Jesu a fologa a gahlanetšwa ke monna yo mongwe yo a tsenwego ke bademone a etšwa motseng. E be e šetše e le go tloga kgale a sepela a itlhobotše, a sa dule ka gae, a dula mabitleng. A re go bona Jesu a hlaba mokgoši, a itahlela fase pele ga gagwe, a goeletša a re: “Na o nyakang mo go nna, wena Jesu, Morwa wa Modimo Yogodimodimo? Hle, o se ke wa nkotla!” Ge a realo e be e le ka gobane Jesu o be a laetše moya wo mobe a re o tšwe mo go yena. E be e šetše e bile gantši o mo utlautla, gomme le ge a be a kgokwa maoto le matsogo ka diketane bjalo ka sebofša, o be a di kgaola mme a išwe ke modemone yoo lešokeng. Jesu a mmotšiša a re: “Ke wena mang?” Yena a mo fetola a re: “Ke nna ‘Lekoko’,” gobane o be a tsenwe ke bademone ba bantši. Bademone bao ba kgopela Jesu gore a se ke a ba rakela ka moleteng wa go iša fasefase. Mola kgauswinyana go be go na le mohlape wo mogolo wa dikolobe o fula motheogeng wa thaba. Bademone ba kgopela Jesu gore a ba dumelele go tsena dikolobe tšeo, gomme a ba dumelela. Ba tšwa go monna yoo ba yo tsena dikolobe tšela. Mohlape ka moka wa thetheoga motheogeng wa wela ka letsheng, wa betwa. Badiša ba tšona ge ba bona tše di diregilego ba tšhaba ba yo tsebiša batho ba ba lego motseng le ba ba lego mašemong. Batho ba ya go bona se se diregilego. Ge ba fihla go Jesu ba bona monna yola bademone ba bego ba lelekilwe go yena a dutše pele ga Jesu, a apere, le tlhaologanyo ya gagwe e boetše sekeng, gomme ba šia. Ba ba di bonego ba anegela batho ka moo monna yola wa bademone a fodišitšwego ka gona. Ke moka batho ba selete seo sa Bagerasa ba kgopela Jesu gore a tšwe ka nageng ya bona, gobane ba be ba boifa kudu. Ka gona Jesu a namela leselawatle a tloga. Monna yola bademone ba bego ba lelekilwe go yena a mo kgopela gore a sepele le yena. Eupša Jesu a mo gomiša a re: “Boela gae o fihle o anege tše dikgolo tše Modimo a go diretšego tšona.” A fihla a sepela le motse, a tšama a bega tše Jesu a mo diretšego tšona. E rile ge Jesu a boela ka mošola wa letsha, a gahlanetšwa ke lešaba la batho, ka gobane ba be ba ntše ba mo letetše. Gwa tla le monna yo mongwe yo leina la gagwe e bego e le Jairose. Yena e be e le mookamedi wa sinagoge ya moo. A itahlela fase pele ga Jesu, a mo kgopela gore a ye ga gagwe, ka gobane morwedi wa gagwe yo e bego e le motswalwanoši wa mengwaga ye lesome le ye mebedi o be a le makgatheng. Ya re ge Jesu a eya naye, a tšama a pitlaganywa ke lešaba. Mo go bona go be go na le mosadi yo mongwe yo a bego a feditše mengwaga ye lesome le ye mebedi a bolawa ke bolwetši bja ngope. O be a lobile tšohle ka go ikalafiša dingakeng, eupša bohle ba be ba paletšwe. A tla ka morago ga Jesu gare ga lešaba, a kgwatha morumo wa seaparo sa gagwe, gomme gateetee a fola bolwetši bjola bja go tšwa madi. Jesu a botšiša a re: “Ke mang yo a nkgwathilego?” Bohle ba itatola, gomme Petrose a re: “Mong wa ka, ga ke re batho ba ikgohla ka wena ebile ba a go pitlaganya?” Jesu a re: “O gona yo a nkgwathilego, gobane ke kwele go etšwa maatla mo go nna.” Mosadi yola ge a bona gore o lemogilwe, a tla a thothomela, a itahlela fase pele ga Jesu. A mmotša a kwewa ke bohle gore ke ka baka la eng a mo kgwathile, le ka mo a fodilego ka gona le semeetseng. Jesu a re go yena: “Morwedi wa ka, tumelo ya gago e go fodišitše. Sepela gabotse.” Ya re a sa bolela, gwa fihla moromiwa wa go tšwa ga Jairose, a re go Jairose: “Morwedi wa gago ga a sa phela, o se sa tshwenya Moruti.” Jesu a kwa se ba se bolelago, gomme a re go Jairose: “Se tšhoge, sa gago a e be go dumela, gomme ngwana o tla tsoga.” Ge a fihla ga Jairose, a se dumelele motho yo mongwe go tsena naye, ge e se Petrose le Johanese le Jakobose le tatagongwana le mmagongwana. Ka moka ba be ba lla ba iletše ngwana. Jesu a re: “Le se ke la lla; ngwana yo ga se a hwa, o ithobaletše.” Bona ba mo sega, ka gobane ba be ba tseba gore ngwana o hwile. Jesu a mo swara ka seatla, a mmitša a re: “Ngwanaka, tsoga!” Moya wa gagwe wa boa, gomme a tsoga ka bjako. Jesu a laela gore a fiwe tša go ja. Batswadi ba ngwana ba tlabega, gomme Jesu a ba laya gore ba se ke ba di botša motho. Jesu a bitša barutiwa ba gagwe ba lesome le ba babedi, a ba fa maatla a go leleka bademone bathong, le go ba fodiša malwetši. Ke moka a ba roma go yo bega molaetša mabapi le mmušo wa Modimo le go fodiša balwetši, a re go bona: “Ge le tloga le se ke la tšea selo, e ka ba lehlotlo, goba mokotlana wa mokgopedi, goba dijo, goba tšhelete, le ge e le seaparo sa bobedi. Ge le fihla motseng wo mongwe mme la amogelwa ka lapeng le lengwe, le dule go lona go fihlela le tloga motseng woo. Ge le ka re le fihla felo batho ba gona ba se le amogele, le tloge moo le hlohlora marole dinaong tša lena, e be go ba lemoša gore ba tla otlwa ke Modimo.” Ba ile ba tloga ba sepela le metse ka moka, ba begela batho Taba ye Botse ya mmušo wa Modimo, ba bile ba fodiša balwetši mo gohle. Ge Heroda, mmuši wa Galilea, a ekwa tšeo ka moka tše di bego di direga, a gakanega kudu, gobane batho ba bangwe ba be ba re go tsogile Johanese Mokolobetši bahung. Ba bangwe ba be ba re ke Eliya o boile, mola ba bangwe ba re go tsogile yo mongwe wa baprofeta bale ba kgale. Heroda yena a re: “Johanese ke mo kgaotše hlogo, bjale yo yena ke mang yo ke kwago ditaba tše tša gagwe?” Gomme a fela a leka go bona Jesu. Baapostola ba boela go Jesu, ba mo anegela tšohle tše ba di dirilego. A tloga le bona fela, ba ya motseng wo o bitšwago Betsaida. Ge batho ba ekwa gore o fao ba mo latela. Yena a ba gahlanetša, a ba botša tša mmušo wa Modimo, a fodiša ba ba tletšego go fodišwa. Ya re ge e šetše e le mathapama, barutiwa bale ba gagwe ba lesome le ba babedi ba tla go yena ba re: “Botša batho ba ba sepele, gore ba yo inyakela dijo le marobalo mo metseng le metsaneng ya kgauswi, gobane mo ke lešokeng.” Jesu a ba fetola a re: “Lena ba feng tša go ja.” Bona ba re: “Ga re na selo, ge e se dinkgwa tše tlhano le dihlapi tše pedi. Kgane o ra gore re ye go rekela lešaba le lekaaka dijo?” Gape banna ba ba bego ba le moo e be e ka ba ba dikete tše tlhano. Jesu a botša barutiwa ba gagwe a re: “Ba dudišeng ka dihlopha tša ba e ka bago ba masome a mahlano.” Ge ba seno ba dudiša bjalo, Jesu a tšea dinkgwa tšela tše tlhano le dihlapi tšela tše pedi, a lebelela legodimong, a di šegofatša, a di ngwathaganya, a di neela barutiwa ba gagwe gore ba di abele batho. Bohle ba ja ba khora. Barutiwa ba Jesu ba kgoboketša mašaledi, a tlala diroto tše lesome le tše pedi. Ka tšatši le lengwe e rile ge Jesu a ile go rapela a nnoši, barutiwa ba gagwe ba tla go yena. A ba botšiša a re: “Na batho ba re ke nna mang?” Ba mo fetola ba re: “Ba bangwe ba re ke wena Johanese Mokolobetši, ba bangwe ba re o Eliya, mola bangwe ba re yo mongwe wa baprofeta bale ba kgale o tsogile bahung.” Yena a ba botšiša a re: “Lena le re ke nna mang?” Gwa fetola Petrose a re: “Ke wena Mesia wa Modimo.” Jesu a ba laya tsebegokwa gore seo ba se ke ba se botša motho. A ba a ba botša a re: “Morwamotho o swanetše go tlaišwa kudu le go lahlwa ke bagolo ba setšhaba, le baprista ba bagolo, le boramangwalo. O tla bolawa, eupša ka letšatši la boraro a tsoga bahung.” A botša bohle a re: “Ge motho a nyaka go ba molatedi wa ka, a ikone, a ikemišetše go tlo tlaišwa bjalo ka nna, mme a ntatele. Gobane yo a ipabalelago o tla lahlega; eupša yo a itatolago ka baka la ka o tla phelela sa ruri. Etse motho go tla mo holang go rua lefase lohle, ge yena mong a lahlega goba a otlwa go ya go ile? Ge motho a se na sebete sa go bolela gore ke yena morutiwa wa ka, goba a se bege tše ke di rutago batho, gona Morwamotho le yena a ka se be le sebete sa go bolela gore motho yoo ke morutiwa wa gagwe, mohla a etla ka letago la gagwe le la Tatagwe le la barongwa ba bakgethwa. Ruri, ke le botša gore go na le ba bangwe mo, ba ba ka se kego ba hwa ba se ba bona Modimo a buša.” Ge go fetile matšatši a seswai go ba Jesu a bolela ditaba tše, a tloga le Petrose le Johanese le Jakobose, a rotogela thabeng go yo rapela. Ya re ge a rapela sefahlego sa gagwe sa fetoga, le diaparo tša gagwe tša taga bošweu bja go re pšoo! Gateetee ba bona banna ba babedi ba bolela le yena. E be e le Moshe le Eliya, ba be ba tšweletše ka letago mme ba bolela le Jesu ka mokgwa wo a bego a swanetše go hwa ka wona Jerusalema. Petrose le ba ba bego ba na le yena ke ge ba ile ka boroko, eupša ba re go phaphama ba bona Jesu a taga, ba bona le banna bao ba babedi ba bego ba eme le yena. Ge banna bao ba tloga, Petrose a re go yena: “Mong wa ka, ke mo gobotse bjang ge re le fa! A re hlomeng mešaša ye meraro, wo mongwe e be wa gago, mongwe e be wa Moshe, mongwe e be wa Eliya.” Gape o be a sa tsebe se a se bolelago. Ya re a sa bolela gwa tšwelela leru la ba pipetša, gomme ba boifa. Gwa kwagala lentšu le etšwa lerung leo le re: “Yo ke yena Morwa wa ka yo ke mo ratago; le mo theeletše!” Ge lentšu leo le homola ba bona go šetše Jesu fela. Barutiwa bao ba Jesu ditaba tše ba di homolela; tše ba di bonego mohlang woo ba se di botše motho. Ka tšatši le le latelago ge Jesu le barutiwa bale ba gagwe ba bararo ba theoga thabeng, a gahlanetšwa ke lešaba le legolo. Monna yo mongwe a goeletša a le gare ga lešaba a re: “Moruti, ke a go rapela, nke o šetše ngwanaka, gobane ke yena morwa wa ka a nnoši! Moya wo mobe o fela o mo utlautla, a goeletše, a akgege, a ntšhe maphilo ka molomo; o dula o mo kweša bohloko, gomme o mo tlogela ka sewelo. Ke ile ka kgopela barutiwa ba gago gore ba o leleke, eupša ba palelwa.” Jesu a mo fetola a re: “Aowii, lena moloko wa go hloka tumelo, wo mokgopo! Ke dule le lena go fihlela neng ke le kgotleletše?” Ke moka a re go monna yola: “Tliša morwago yoo mo.” Ya re ge mošemane yoo a etla, modemone yola wa mo utlautla a ba a akgega. Jesu a kgalema moya wo mobe woo a fodiša mošemane, a mmušetša go tatagwe. Batho ka moka ba kgotsa maatla a Modimo. E rile ge batho ba sa kgotsa tšohle tše Jesu a bego a di dira, yena a re go barutiwa ba gagwe: “Se ke tlilogo le botša sona le se ke la se lebala: Morwamotho o tlilo gafelwa diatleng tša batho.” Fela barutiwa ba gagwe ba se kwešiše se a se bolelago. Se be se ba utagetše ba sa se kwešiše, eupša ba šia go mmotšiša taba yeo. Barutiwa ba Jesu ba kile ba tšea kgang ka go re yo mogolo gare ga bona ke mang. Jesu a lemoga se ba se naganago, gomme a tšea ngwana a mo emiša ka thoko ga gagwe, gomme a re go bona: “Mang le mang yo a amogelago ngwana wa go etša yo ka ge e le se ke le laetšego sona, o amogela nna, le yo a amogelago nna o amogela le yo a nthomilego. Gobane yo e lego yo monyenyane go lena ka moka ke yena yo mogolo.” Johanese a re go Jesu: “Mong wa ka, re bone motho yo mongwe a leleka bademone ka go bolela leina la gago, mme ra mo iletša, ka ge e se wa rena.” Jesu a re go yena le barutiwa bale ba bangwe: “Le se ke la mo iletša, ka gobane mang le mang yo a sa lwego le lena o ema le lena.” E rile ge nako ya gore Jesu a rotogele legodimong e batametše, a ikemišetša go ya Jerusalema gomme a wela tsela a ya gona. A roma batseta ba mo eta pele, ba fihla ba tsena motseng wo mongwe ka nageng ya Samaria go mo kgopelela marobalo gona. Eupša batho ba gona ba se ke ba mo amogela, ka ge ba be ba bona gore o fetela Jerusalema. Ge barutiwa ba gagwe, Jakobose le Johanese, ba di bona, ba re: “Morena, na ga o rate ge re ka ba biletša mollo wa go tšwa legodimong gore o ba fediše?” Jesu a retologa a ba kgala. Ke moka yena le barutiwa ba gagwe ba fetela go wo mongwe motse. Ge ba ntše ba sepela, monna yo mongwe a re go Jesu: “Nna ke tla go latela gohle mo o yago gona.” Jesu a re go yena: “Diphukubje di na le ditšaba, le dinonyana di na le dihlaga; Morwamotho yena ga a na mo a fihlago hlogo gona.” A napa a re go monna yo mongwe: “Ntatele.” Eupša yena a mo araba ka go re: “Morena, ntumelele ke yo boloka tate pele.” Jesu ge a mo fetola a re: “Lesa bahu ba boloke bahu ba bobona. Wena eya o bege molaetša mabapi le mmušo wa Modimo.” Yo mongwe monna a re: “Nna ke tla go latela, Morena, fela ntumelele gore ke yo laela bešo pele.” Jesu a re go yena: “Yo a lebelelago morago a swere mogoma a lema, ga se a swanela mmušo wa Modimo.” Ka morago ga moo Morena a kgetha ba bangwe banna ba masome a a šupago le ba babedi, a ba roma ka babedi ka babedi, ba mo eta pele ba ya metseng le metsaneng yohle ye a bego a ikemišeditše go e etela. A re go bona: “Puno ga e kaaka, fela babuni ga ba nene. Rapelang Rapuno gore a rome babuni ba ye go buna. Sepelang! Ke le roma bjalo ka dikwanyana diphiring. Le se ke la tloga le sekhwama, goba mokotlana wa mokgopedi, goba dieta; le se ke la senya sebaka ka go dumediša motho mo tseleng. Ge le tsena ka lapeng la motho, sa mathomo le dumediše le re: ‘Ka lapeng le a go be le khutšo!’ Ge go na le moratakhutšo ka lapeng leo, o tla ba le khutšo; ge a se gona, madume a lena a khutšo a tla boela go lena. Le dule gona ka moo lapeng leo, le eja le bile le enwa se ba le fago sona, ka gobane mošomi mogolo wa gagwe o mo lebane. Le se ke la tobatoba le malapa. Ge le ka re le tsena motseng la amogelwa, le je se ba le fago sona, le fodiše balwetši ba gona mme le botše batho ba moo le re: ‘Nako ya gore Modimo a le buše e batametše.’ Fela ge le ka re le tsena motseng batho ba gona ba se le amogele, le tšwele ka ntle mekgotheng le re: ‘Le marole a motse wa gabolena a a re kgomaretšego maoto re a thinthela go lena. Fela le tsebe gore nako ya gore Modimo a le buše e batametše.’ Ke le botša gore ka Letšatši la Kahlolo Modimo o tla otla batho ba motse woo gagolo go feta ba Sodoma.” “Go madimabe lena badudi ba Gorasine! Go madimabe le lena badudi ba Betsaida! Ge nkabe mehlolo ye e dirilwego mo go lena e dirilwe Tirose le Sidone, batho ba gona nkabe e le kgale ba dutše fase ba apere diaparo tša go ilela, ba itšhetše ka melora go bontšha gore ba sokologile! Mohla Modimo a ahlola batho o tla le otla gagolo go feta batho ba Tirose le ba Sidone. Ge e le lena badudi ba Kapernaume, kgane le gopola gore le tla rotošetšwa legodimong? Gape sa lena e dio ba go theošetšwa fasefase bodulabahu.” A botša barutiwa ba gagwe a re: “Yo a theeletšago lena o theeletša nna; yo a ganago lena o gana nna; le yo a ganago nna o gana yo a nthomilego.” Banna bale ba masome a a šupago le ba babedi ba ile ba boa ba thabile kudu. Ba re: “Morena, le bademone ba be ba re theeletša ge re ba laya ka go bolela leina la gago!” Jesu a re: “Ke bone Sathane a ewa leratadimeng bjalo ka legadima le ratha. Theeletšang! Ke le fa maatla a gore le gate dinoga le diphepheng, le a gore le fenyetše Sathane sa ruri; gomme ga go se se tla tsogago se le dirile selo. Fela gagolo le se ke la kgahlwa ke ge meoya ye mebe e le theeletša, le upše le kgahlwe ke ge maina a lena a ngwadilwe legodimong.” Yona nakong yeo Jesu a thabišwa ke Moya wo Mokgethwa, gomme a re: “Tate, wena Morena wa legodimo le lefase, ke a go reta ka ge o bontšhitše ba ba hlalefetšegago gabonolo boka bana tše o di utetšego ba bohlale le ba go rutega. Ee, Tate, ke ka mo o nyakilego gore go be ka gona. “Dilo ka moka ke di filwe ke Tate. Ga go yo a tsebago gore Morwa ke mang, ge e se Tate; le yo a tsebago gore Tate ke mang ga a gona, ge e se Morwa le yo Morwa a ratago go mo utollela yena.” A retologela go barutiwa ba gagwe a ba boletša thoko a re: “Go lehlogonolo lena le bonago tše. Ke le botša gore baprofeta ba bantši le dikgoši ba be ba duma go bona tše lena le di bonago, eupša ba se di bone, le go kwa tše le di kwago, eupša ba se di kwe.” Ramangwalo yo mongwe a ema, a leka go thea Jesu, a mmotšiša a re: “Moruti, na ge ke nyaka go ba le bophelo bjo bo sa felego ke dire eng?” Jesu a mmotšiša a re: “Etse Mangwalo a Makgethwa a reng? Wena o a kwešiša bjang?” Yena a fetola ka go re: “ ‘O rate Morena Modimo wa gago ka pelo ya gago ka moka, le ka moya wa gago ka moka, le ka maatla a gago ka moka, le ka tlhaologanyo ya gago ka moka,’ le ‘bangwekawena o ba rate bjalo ka ge o ithata.’ ” Jesu a mo fetola a re: “O fetotše gabotse; dira bjalo, gomme o tla phela.” Yena, ka go rata go ikemelela, a botšiša Jesu a re: “Mongwekanna etse ke mang?” Jesu a mo fetola a re: “Motho yo mongwe o kile a re a etšwa Jerusalema a eya Jeriko a kopana le bahlakodi; ba mo hlobodiša, ba mo keketa, ba sepela, ba mo tlogela a le makgatheng. Moprista yo mongwe a tšhoga a tšere ka tsela yeo. Ya re ge a mmona, a iphetela ka thoko. Molefi yo mongwe le yena a tšwelela; ge a fihla felo fao, a re go mmona, a iphetela ka thoko. Mosamaria yo mongwe, yo le yena a bego a tšea ka tsela yeo, a mo wela. Yena ge a mmona a mo hlomogela pelo. A mmatamela, a mo tšhatšha dintho ka makhura a mohlware le beine, a mmofa tšona. Ke moka a mo nametša pokolo ya gagwe, a mo iša ntlong ya baeti, a fihla a mo oka gona. Ka le le latelago a ntšha dipapetlana tše pedi tša silibera, a di fa mong wa ntlo ya baeti. A re go yena: ‘O mo oke, gomme ge ke boa ke tla go bušetša tše o mo lefetšego tšona ntle le tšeo.’ “Bjale wena ge o bona, ke ofe mo go ba bararo bao yo a diretšego motho yola wa go keketwa ke bahlakodi se motho a swanetšego go se direla mongwekayena?” Ramangwalo yola a mo fetola a re: “Ke yola wa go mo hlomogela pelo.” Jesu a re: “Agaa, le wena sepela o yo dira bjalo.” Jesu a re go tloga le barutiwa ba gagwe a yo fihla motsaneng wo mongwe moo mosadi yo mongwe yo a bitšwago Marta a ilego a mo amogela ka ga gagwe. O be a na le ngwanabo yo leina la gagwe e bego e le Maria. Yena yo o ile a tla a dula fase pele ga Jesu, a theeletša tše Jesu a mo rutago tšona. Marta yena o be a patlwa ke mošomo wa go apea. A ba a tla go Jesu a re: “Morena, na kgane ga o na taba le ge yo ngwanešo a ntlogetše ke šoma e le noši? Gape mmotše a tle a nthuše!” Morena a mo fetola a re: “Marta, Marta! Etse o balabala o tshwenyegile ka tše dintši, kganthe se se nyakegago ke se setee. Maria o ikgethetše se sekaone, gomme a ka se se amogwe.” Jesu o be a le felwanatsoko a rapela, gomme a re go fetša, yo mongwe wa barutiwa ba gagwe a re go yena: “Morena, nke o re rute go rapela, go swana le Johanese ge a rutile ba gagwe barutiwa.” Jesu a re: “Ge le rapela le re: “ ‘Tatewešo, leina la gago a le kgethwe; mmušo wa gago a o tle. Tšatši le lengwe le le lengwe o re fe bogobe bjo re bo hlokago. O re lebalele dibe tša rena, ka gore le rena re lebalela ba ba re fošetšago. O se re iše melekong.’ ” A re go bona: “Ge o ka ya ka ga mogwerago gare ga bošego wa fihla wa re: ‘Mogwera, nke o nthuše ka molatšana. Ke tletšwe ke mogwera wa ka ebile o a feta, gomme ga ke na le ka sejonyana sa go mo fa,’ na mogwerago a ka nama a araba a le ka ngwakong a re: ‘O se ke wa ntshwenya; ke šetše ke tswaletše, gomme nna le bana ba ka re robetše; nka se tsoge ka go fa’ – a ka realo? Nna ke le botša gore le ge a be a ka se tsogele go go fa ka ge o le mogweragwe, go tsoga gona o tla tsoga a go fa se o se nyakago, e le ka baka la ge o mo phegeletše. “Ka gona ke re go lena: Kgopelang, le tla fiwa; nyakang, le tla hwetša; kokotang, le tla bulelwa. Gobane mang le mang yo a kgopelago o a fiwa, yo a nyakago o a hwetša, le yo a kokotago o a bulelwa. Tatagobana ke ofe mo go lena yo e ka rego ge morwagwe a mo kgopela hlapi a mo fa noga? Goba ya re ge a mo kgopela lee a mo fa phepheng? Ge ešita lena le lego ba babe le tseba go fa bana ba lena tše dibotse, Tatagolena wa legodimong yena a ka nama a se le phale ka go fa bao ba mo kgopelago Moya wo Mokgethwa?” Jesu o kile a leleka modemone mothong wa semumu, gomme wa re go tšwa, semumu sela sa bolela. Batho ba tlabega, gomme ba bangwe ba bona ba re: “O leleka bademone ka maatla a Beeltsebulo, yena mmuši wa bona!” Ba bangwe ba mo leka ba re a ba direle mohlolo go bontšha gore ka nnete o romilwe ke Modimo. Fela Jesu, ka go tseba se ba se gopolago, a re go bona: “Mmušo wo mongwe le wo mongwe wo o ikarolago dihlopha tše di lwago seng sa tšona o tla wa. Le lapa leo batho ba lona ba ikarolago dihlopha tše di lwago seng sa tšona le tla thubega. Sathane le yena ge a ka ikarola dihlopha, mmušo wa gagwe o ka se we bjang? Etse le re nna ke leleka bademone ka maatla a Beeltsebulo. Ge eba go bjalo, balatedi ba lena bona ba ba leleka ka a mang maatla? Ka ge ba ba leleka ka maatla a Modimo, gona ba laetša gore le mphara ka maaka. Ka ge nna ke leleka bademone ka maatla a Modimo, se se laetša gore Modimo o šetše a thomile go hloma mmušo wa gagwe mo go lena. “Ge monna wa senatla yo a itlhamilego ka dibetša a letile motse wa gagwe, thoto ya gagwe e lotegile. Fela ge a ka hlaselwa ke senatla sa go mo feta mme sa mo fenya, se tla mo thopela dibetša tšeo a bego a di botile, gomme sa abaganya dithebola tša gagwe. “Yo a sa emego le nna o lwa le nna; yo a sa tlišego batho go nna o a ba phatlalatša.” “Ge moya wo mobe o tšwele mo mothong, o ralala le mafelo a a se nago meetse, o nyaka mo o ka khutšago gona. Ge o sa go hwetše, o re: ‘Ke tla boela ngwakong wa ka.’ Ge o fihla o hwetše ngwako wola o fietšwe mme tšohle di beakantšwe gabotse. Ke moka o ye go tšea meoya ye mengwe ye e šupago, ye mebe go o feta, gomme e tle e dule ka moo. Seemo sa mafelelo sa motho yoo e be se sebe le go feta sela sa pele.” E rile ge Jesu a sa bolela bjalo, mosadi yo mongwe a goeletša a le ka gare ga lešaba a re go yena: “Go lehlogonolo mosadi yo a go belegego a ba a go nyantšha!” Jesu a mo fetola ka go re: “Ee, fela gagolo go lehlogonolo bao ba kwago molaetša wa Modimo, ba o phetha!” E rile ge batho ba ntše ba mmokanela, yena a ba botša a re: “Batho ba mehleng yeno ga se ka ge e le ba babe. Ba nyaka go bontšhwa mohlolo wa go tšwa go Modimo, fela wo mongwe mohlolo ba ka se o bontšhwe, ge e se wola wa moprofeta Jona. Bjalo ka ge moprofeta Jona e ile ya ba sešupo go batho ba Ninibe, Morwamotho le yena e tla ba sešupo go batho ba mehleng yeno. Ka Letšatši la Kahlolo Kgošigadi ya Borwa o tla tsoga bahung gotee le batho ba mehleng yeno mme a ba tšwa, gobane yena o ile a tla a etšwa kgolekgole go tlo kwa tša bohlale bja Kgoši Solomone; gomme tsebang – mo go na le bja go feta bja Solomone! Ka Letšatši la Kahlolo batho ba Ninibe ba tla tsoga bahung gotee le batho ba mehleng yeno mme ba ba tšwa, ka gobane bona ba rile go kwa molaetša wa Jona ba sokologa dibeng tša bona; gomme tsebang – mo go na le wa go feta Jona!” “Motho ga a re go thumaša lebone a le fihla goba a le khurumela ka seroto. O le hloma sehlomong sa lona gore ba ba tsenago ba bonegelwe. Mahlo ke lebone la motho. Ge mahlo a motho a lokile, motho o ba seetšeng; eupša ge mahlo a gagwe a se a loka, o ba leswiswing. Ka gona, hlokomela gore seetša se se lego mo go wena e se be leswiswi. Ge mmele wohle wa gago o le seetšeng o se na karolo ye e lego leswiswing, o bonegelwa gohle go swana le ge o bonegelwa ke lebone ka seetša sa lona.” Ge Jesu a fetša go bolela, Mofarisei yo mongwe a mo mema gore a yo ja naye ka ga gagwe. Jesu a fihla a tsena, a dula bojelong. Mofarisei yola a makatšwa ke ge a bona Jesu a se a hlapa diatla pele a eja. Morena a re go yena: “Etse lena Bafarisei le hlatswa senwelo le mogopo ka ntle, mola ka dipelong tša lena le tletše šiši le bokgopo. Ditlaela tenang, na kgane yo a bopilego bokantle ga se yena a bopilego le bokagare? Ka gona, efang bahloki tša ka dinwelong le tša ka megopong ya lena, ke mo tšohle tše le nago le tšona e tlago ba tše di hlwekilego. “Ba madimabe ke lena Bafarisei, gobane le abela Modimo karolo ya lesome ya dikhonofolo le dipherefere le dinoko tše dingwe, etšwe toka le lerato la Modimo tšona le di hlokomologa. Tše ke tšona tše le swanetšego go di phetha, le sa hlokomologe tše dingwe tšeo. “Ba madimabe ke lena Bafarisei, le ratago madulo a ka pele ka disinagogeng, le go dumedišwa ka tlhompho kua mapatlelong a motse. Le ba madimabe, gobane le swana le mabitla ao a khupeditšwego, ao batho ba a gatago ba sa tsebe.” Ke moo yo mongwe wa boramangwalo a mo fetotšego a re: “Moruti, gape ge o realo, le rena o a re roga!” Jesu a mo fetola a re: “Le lena, boramangwalo, le ba madimabe, gobane le rweša batho merwalo ye boima, mola lena le go e kgwatha ka monwana le sa e kgwathe. Le ba madimabe, gobane le beela mabitla a baprofeta maswika a segopotšo – bona baprofeta bale borakgolokhukhu ba lena ba ba bolailego. Ka tsela ye le bontšha gore le kwana le tše borakgolokhukhu ba lena ba bego ba di dira – bona ba be ba bolaya baprofeta, gomme lena le beela mabitla a bona maswika a segopotšo. Ke ka baka leo yo a bitšwago Bohlale bja Modimo a rilego: ‘Ke tla ba romela baprofeta le baapostola bao bangwe ba bona ba tlago bolawa, mola bangwe ba hlomarwa.’ Ka gona, batho ba mehleng ye ba tla bonwa molato wa go bolaya baprofeta bohle ba ba bolailwego go tloga mola lefase la hlolwago, go tloga ka polao ya Abele go fihla go ya Sakaria yo a ilego a bolawa gare ga aletare le Tempele. Ruri, ke le botša gore batho ba mehleng yeno ba tla bonwa molato wa go bolaya batho bao ka moka. “Ba madimabe ke lena boramangwalo, gobane le tšere sekgonyo sa ntlo ya tsebo; lena beng ga le nyake go tsena ka gare, gomme le bao ba nyakago go tsena le a ba thibela.” Ge Jesu a tloga moo ga Mofarisei, o be a šetše a thomile go tena boramangwalo le Bafarisei kudu le go botšišwa ke bona ditaba tše dintši, e le go mo thea ka diphošo tše a ka tšhogago a di boletše. E rile ge batho ba bantšintši ba bothegile ebile ba gatana godimo, Jesu a botša barutiwa ba gagwe pele a re: “Le hlokomele komelo ya Bafarisei, ke ra boikaketši bja bona. Ga go se se bipilwego se se ka se kego sa bipollwa, le sephiri se se ka se kego sa tsebja ga se gona. Ka gona, se le se boletšego sephiring se tla kwagala phatlalatša; le se le se sebetšego motho ka phapošing se tla goeletšwa godimo ga dintlo.” “Bagwera ba ka, ke le botša gore le se ke la boifa bao ba rego go bolaya mmele, gwa se be le se sengwe se ba se kgonago. A ke le botše gore le boife mang: le boife Modimo yo a rego go bolaya motho a ba a ba le maatla a go mo lahlela heleng. Agaa, ke yena yo ke rego le mmoife! “Ga ke re diphorogohlo tše tlhano di rekwa ka disente tše pedi? Fela ga go le e tee ya tšona ye e lebalwago ke Modimo. Ešita le meriri yohle ya lena e badilwe. Ka gona le se ke la boifa; lena le ba bohlokwa go feta diphorogohlo tše dintši.” “Ke le botša gore mang le mang yo a ipegago phatlalatša gore ke wa ka, le nna, Morwamotho, ke tla begela barongwa ba Modimo gore ke wa ka. Eupša yo a ntatolago phatlalatša, le nna, Morwamotho, ke tla mo latola go barongwa ba Modimo. “Mang le mang yo a bolelago Morwamotho gampe a ka lebalelwa; eupša yo a nyefolago Moya wo Mokgethwa yena a ka se lebalelwe. “Ge ba le iša ka disinagogeng goba go babuši goba balaodi go sekišwa, le se ke la tshwenyega gore le tla iphetolela bjang goba le tla bolelang. Gobane tše le swanetšego go di bolela le tla di rutwa ke Moya wo Mokgethwa ka yona nako yeo.” Monna yo mongwe mo lešabeng leo a re go yena: “Moruti, nke o botše yo morwarre gore a abelane le nna lefa la rena.” Jesu a mo fetola a re: “Warra, etse ke mang yo a mpeilego moahlodi wa go le abaganyetša lefa la lena?” Ya ba o laya batho bao ka moka o re: “Le hlokomele, le itote gore le se goketšwe ke megabaru ya mehutahuta; gobane bophelo bja nnete bja motho ga bo laolwe ke thoto ye a nago le yona, le ge a humile bjang goba bjang.” Ya ba o ba botša seswantšho o re: “Monna yo mongwe wa mohumi o kile a dika a bolaile mabele ka mašemong a gagwe. A bolela ka pelong a re: ‘Ke direng, ka ge ke se na bobeo bja go lekana mabele a ka?’ A phetha ka go re: ‘Se ke tlago se dira sese: Ke tla kgereša matlolo a ka, ka aga a magolo a go bolokela mabele a ka ka moka le tše dingwe tše ke nago le tšona. Ka napa ka re ka pelong: Ekwa nna! Tše ke nago le tšona ke tše dintši tše di kgobokeleditšwego mengwagangwaga. Bjale ge, a ke iketle, ke je, ke nwe, ke ipshine!’ Eupša Modimo a re go yena: ‘Setlaela towe, bjona bošegong bjo o tlile go hwa, gomme tše o di bolokilego tše e tla ba tša mang?’ ” Jesu a fetša ka go re: “Agaa, seo ke se se hlagelago bao ba ikgobelelago mahumo, eupša go tša Modimo ba se na selo.” Ya ba Jesu o re go barutiwa ba gagwe: “Ke ka baka leo ke le botšago gore le se ke la balabala ka dijo le diaparo tše le di hlokago bophelong. Bophelo bo bohlokwa go phala dijo, mmele le wona o bohlokwa go phala diaparo. Lebelelang magokobu: ga a bjale, ga a bune, ga a na difala goba matlolo, le ge go le bjalo Modimo o a a otla. Bjale ga ke re lena le bohlokwa kudu go feta dinonyana? Kgane ke mang mo go lena yo a ka ikokeletšago bophelo ka go bo balabalela? Bjale ge tše dinyenyane ka mokgwa wo di le palela, tše dingwe tšona le tshwenyegelang ka tšona? Lebelelang ka mo matšoba a naga a melago ka gona: ga a šome, ga a ithokele diaparo. Eupša ke le botša gore le Kgoši Solomone, le ge a be a humile le dinala, o be a sa tšhephe bjalo ka le lengwe la ona. Bjale ge ešita le bjang bja naga, bjo bo bago gona lehono, ka moswane bo tsoge bo lahletšwe sebešong, Modimo a bo apeša ka mokgwa wo, na lena a ka nama a se le apeše le go feta, lena ba tumelo ye nnyane? “Ka gona le se ke la tshwenyega, la dula le balabala go re le tla ja eng, la nwa eng. Tšeo ke tše baditšhaba ka moka ba lefase le ba dulago ba balabala ka tšona. Tate wa lena o a tseba gore le phela ka tšona. Lena le šomele mmušo wa Modimo, gomme tše dingwe tšeo Modimo o tla le okeletša ka tšona.” “Le se ke la boifa, lena mohlapenyana wa ka, gobane Tate wa lena o thabela go tlo buša le lena mmušong wa gagwe. Le rekiše tše le nago le tšona, gomme tšhelete ya gona le e fe bahloki. Lena dikhwama le ipeele tše di sa felego tšhelete, e lego lehumo le le sa fokotšegego legodimong, le le sa batamelwego ke lehodu, le le sa lewego ke ditšhwele. Gobane mo go lego lehumo la motho ke mo go bago pelo ya gagwe.” “Dulang le itokišitše, le mabone a lena a tuka, le etše bahlanka ba ba letetšego mong wa bona gore a boe monyanyeng wa lenyalo. E re ge a fihla a kokota, ba akgofe ba mmulele mojako. Go lehlogonolo bahlanka bao mong wa bona a rego ge a boa a ba hwetša ba phafogile. Ruri, ke a le botša, o tla itokiša, a ba dudiša fase, a ba thota ka dijo. Ba tla ba lehlogonolo, ge a ka re a etla le ge e le bošegogare goba ka masa a ba hwetša ba phafogile. Ruri, ke a le botša, ge monglapa a ka be a ka tseba gore lehodu le tla tla neng, o be a ka se dumelele lapa la gagwe le šwahlelwa. Le lena le dule le itokišitše, ka gobane Morwamotho o tla tla ka nako ye le sa mo naganego ka yona.” Petrose a mmotšiša a re: “Morena, na e ka ba o botša rena fela ka seswantšho se, goba o botša batho ka moka?” Morena a mo fetola a re: “Bjale mohlanka yo a tshepegago, yo bohlale, ke mang? Gape ke yo mong wa gagwe a tlago mmea mohlokomedi wa bahlanka ba gagwe, a ba fa tša bona dijo ka nako ya gona. Go lehlogonolo mohlanka yo mong wa gagwe a tlago mo hwetša a dira bjalo ge a boa. Ruri, ke le botša gore mong wa gagwe o tla mmea mohlokomedi wa tšohle tše a nago le tšona. Fela ge mohlanka yoo a ka re ka pelong: ‘Mong wa ka o diegile go boa,’ gomme a thoma go betha bahlankakayena ba banna le ba basadi, le go dulela go ja le go nwa le go tagwa, mong wa gagwe a ka boa ka tšatši le lengwe le a sa mo naganego, le ka nako ye a sa e tsebego. O tla mo kgaola ditho a ba a mo dira se se dirwago ba ba sa botegelego mong wa bona. “Mohlanka yo a rego a tseba thato ya mong wa gagwe a se itokišetše go e phetha, o tla otlwa gabohloko. Eupša yo e rego a sa tsebe thato ya mong wa gagwe a dira tše di swanelago kotlo, o tla otlwa gannyane. Gape yo mongwe le yo mongwe yo a filwego tše dintši, go yena go tla nyakwa tše dintši; le yo a filwego go hlokomela tše dintšintši, go yena go tla nyakwa tše dintšintši.” “Ke tletše go tšhuma lefase ka mollo, gomme nke nkabe mollo wo o šetše o tuka! Fela ke sa lebanwe ke go tlaišwa kudu, gomme ke tla no dula ke tshwenyegile ka wona mokgwa wo go fihlela matshwenyego a a feta. Na kgane le re ke tlišitše boiketlo lefaseng? Ga go bjalo; nka re ke tlišitše phapano. Go tloga bjale ba e lego ba bahlano ka lapeng ba tla dula ba elwa. Ba bararo ba tla dula ba elwa le ba babedi, ba babedi ba elwa le ba bararo. Tatagomotho o tla dula a elwa le morwagwe, le morwa wa motho a dula a elwa le tatagwe; mmagomotho o tla dula a elwa le morwediagwe, le morwedi wa motho a dula a elwa le mmagwe; mmatswale wa motho o tla dula a elwa le ngwetši ya gagwe, le ngwetši a dula a elwa le mmatswalagwe.” Jesu a tšwela pele a botša lešaba leo a re: “Ge le bona leru le rotoga ka bodikela le akgofa go re pula e tla na, gomme e ne. Le ge le ekwa phefo ya ka borwa e foka, le re go tla fiša, gomme go fiše. Baikaketši tenang! Le kgonetše go tseba seemo sa boso ka go lebelela lefase le leratadima; bjale le reng le sa kgone go tseba gore mehla yeno e šupang?” “Le reng le sa ikgethele ka bolena se se lokilego? Ge motho a ka re o go iša kgorong ya tseko, o leke go boelana naye le sa le tseleng. Ge o ka se dire bjalo o tla go iša go moahlodi ka kgang, moahlodi a go gafela maphodisa, maphodisa a go lahlela ka kgolegong. Ke go botša gore o ka se tšwe gona o sešo wa lefa tšheletenyana ya mafelelo ya kotlo ya gago.” Ka tšona nako tšeo gwa tla batho ba bangwe ba botša Jesu tša Bagalilea bale Pilato a bego a ba bolaile ba direla Modimo dihlabelo. Jesu a ba fetola a re: “Ka ge Bagalilea bao ba bolailwe ka tsela ye, na kgane le gopola gore bona e be e le badiradibe ba bagolo go feta Bagalilea bohle? Le gatee! Gomme nna ke le botša gore ge le sa sokologe le tla bolawa go etša bona. Bale ba lesome le metšo ye seswai ba go welwa ke tora ya Siloamo ya ba bolaya, bona kgane le re e be e le badiradibe ba bagolo go feta batho ka moka ba ba agilego Jerusalema? Le gatee! Gomme nna ke le botša gore ge le sa sokologe le tla bolawa bjalo ka bona.” Jesu a ba botša seswantšho a re: “Go be go na le monna yo mongwe yo a bego a na le mogo ka serapeng sa gagwe sa merara. A re ge a re ke yo fula mago go wona a hwetša a se gona. Ke moka a re go molemi wa serokolo: ‘Bona, bjale ke mengwaga ye meraro ke etla mo ke nyaka mago mo mogong wo, fela ke a hloka. O reme. O hlagaletšang mobu?’ Molemi a mo fetola a re: ‘Morena, o lese lenyaga fela. Ke tla o hlagolela ka ba ka o tšhelela mmutedi. Gomme ge ngwaga wo o tlago o ka enywa, go tla loka; ge o ka pala, ke gona o ka o remago.’ ” Ka tšatši le lengwe la Sabatha Jesu o be a ruta batho ka sinagogeng. Gona moo go be go na le mosadi yo a tsenwego ke moya wo mobe, mme o mo lwaditše mengwaga ye lesome le metšo ye seswai. O be a kokoropane, a sa kgone go hlophologa le go se nene. Jesu ge a mmona a mmitša a re a tle go yena. Ge a fihla a re go yena: “Mmagobatho, o imolotšwe bolwetšing bja gago!” A mmea diatla, mosadi yoo a nama a hlophologa le semeetseng, gomme a reta Modimo. Mookamedi wa sinagoge yeo a galefa ka gobane Jesu a fodišitše motho ka tšatši la Sabatha, gomme a botša batho bao a re: “Matšatši a go šoma a a selela. Etlang ka ona matšatši ao go fodišwa, e sego ka Sabatha.” Morena a mo fetola a re: “Baikaketši tenang, na kgane ka tšatši la Sabatha motho mang le mang wa lena ga a ke a bofolla kgomo goba pokolo ya gagwe ka lešakeng a yo e noša? Bjale le ra gore mosadi yo e lego setlogolo sa Abrahama yo, yo a feditšego mengwaga ye lesome le ye seswai a bofilwe ke Sathane, yena a se ke a bofollwa ditlemong tša gagwe ka tšatši la Sabatha?” Ge a realo, bale ba bego ba mo ganetša ba inyatša, mola lešaba ka moka lona le thabela dilo tše di makatšago tše a di dirago. Jesu a ba botšiša a re: “Na mmušo wa Modimo o ka swantšhwa ka eng? Nka o bapiša le eng? O bjalo ka thorwana ya peu ya mohloko ye motho a e tšeago a e bjala ka serokolong sa gagwe, ya mela ya ba sehlare seo dinonyana di agelago dihlaga makaleng a sona.” Jesu a ba botšiša gape a re: “Mmušo wa Modimo nka o swantšha le eng? O ka swantšhwa ka komelo ye mosadi a e tšeago a e tswakanya le bupi bja dikelo tše tharo go fihlela motswako wohle o omelega.” Jesu a theta le metse le metsana a ntše a ruta batho, a lebile Jerusalema. Motho yo mongwe a mmotšiša a re: “Morena, na kgane ba ba tlago phološwa ke ba mmalwa fela?” Jesu a re go bona ka moka: “Le leke ka maatla go tsena ka mojako wo o pitlaganego, gobane ke a le botša, ke ba bantši ba ba tlago leka go tsena, eupša ba tla palelwa. Nako e etla mo monglapa a tlago tsoga a tswalela lebati. La re le eme ka ntle le kokota mojako le re Morena a le bulele, yena a le araba a re: ‘Nna ga ke le tsebe.’ Ke mo le tlago mo fetola la re: ‘Re be re eja re bile re enwa le wena; le gona o be o ruta mekgotheng ya motse wa gaborena.’ Yena o tla boeletša a re: ‘Ke re ga ke le tsebe. Ntlogeleng, lena bakgopo bohle!’ Ya ba le lla le lomanya meno ge le bona Abrahama le Isaka le Jakobo le baprofeta ka moka legodimong, mola lena le ntšhetšwa ka ntle. Batho ba tla tla monyanyeng legodimong ba etšwa bohlabela le bodikela le leboa le borwa, ke go re mo gohle lefaseng. Ke mo bao bjale e sego ba maemo e tlago ba ba maemo, mme bao bjale e lego ba maemo e tlago ba ba ba se nago maemo.” Ka yona nako yeo Bafarisei ba bangwe ba tla go Jesu ba fihla ba mo sebotša ba re: “Tloga mo o tšhabe, ka gobane Heroda o nyaka go go bolaya.” Jesu a ba fetola ka go re: “Sepelang le yo botša mokadikadi yola le re: ‘Tseba gore ke leleka bademone ebile ke fodiša batho lehono le gosasa, gomme go hlwa gosasa ke tla be ke feleletša mošomo wo wa ka.’ Fela lehono le gosasa le go hlwa gosasa ke swanetše go ba ke sepela, ka gobane ke taba ye e sa gopolwego gore moprofeta a ka bolaelwa mo gongwe ntle le Jerusalema. “Joo, Jerusalema, joo, Jerusalema, wena o bolayago baprofeta gape o keketago ka maswika bao Modimo a ba romilego go wena! Ke gakae ke ratile go phutha badudi ba gago bjalo ka kgogo ge e phutha matswiana a yona ka diphego tša yona, eupša o gana? Ka gona Modimo o tla ngala Tempele ya gago ya šala e le lešope. Ke go botša gore o ka se sa mpona, go fihlela go etla nako yeo ka yona o tlago re: ‘A go retwe yo a tlago a romilwe ke Morena!’ ” Ka tšatši le lengwe la Sabatha Jesu a ya go ja ka ga yo mongwe wa bagolo ba Bafarisei. Batho ba be ba tloga ba mmeile leihlo. A bona a lebane le monna yo mongwe wa go ruruga maoto le matsogo. A botšiša boramangwalo le Bafarisei a re: “Na go fodiša motho ka tšatši la Sabatha go dumeletšwe?” Bona ba homola. Ke ge Jesu a tšea molwetši yola a mo fodiša, mme a mo lesa a itshepelela. Ke moka a re go bona: “Ke mang mo go lena yo e ka rego morwagwe a wetše ka sedibeng goba go wetše kgomo ya gagwe, a se e ntšhe le semeetseng le ge e le ka lona tšatši la Sabatha?” Bona ba se kgone go mo fetola mo tabeng yeo. Jesu ge a bona balaletšwa ba bangwe ba ipea madulong a ka pele a ba botša ka go swantšha a re: “Ge motho a go laleditše monyanyeng wa lenyalo, o se ke wa fihla wa ipea madulong a bohlomphegi, ka gore e ka no ba e le gore go laleditšwe le yo mongwe yo a hlomphegago kudu go feta wena, gomme yo a le laleditšego ka babedi a tla a re go wena: ‘Šutelela yo.’ Gomme ya ba gona o yago go dula madulong a ka moragorago ka dihlong. Wena ge o laleditšwe o fihle o ipee madulong a ka moragorago, gore ge molaletši wa gago a etla a re go wena: ‘Mogwera, fetela kua madulong a makaone!’ Gomme o tla godišwa ke ba ba laleditšwego le wena. Gobane mang le mang yo a ikgodišago o tla kokobetšwa, gwa re yo a ikokobetšago a godišwa.” A botša le yola molaletši wa gagwe a re: “Ge o laletša batho go tlo ja le wena dijo tša mosegare le ge e le tša mantšiboa, o se ke wa laletša ba e lego bagwera ba gago, goba banabeno, goba meloko yeno, goba baagišani ba gago ba bahumi, gobane le bona ba ka tla ba go laletša, gomme ya ba ge o boelwa ke tše o kilego wa ba direla tšona. Wena ge o dira monyanya, o laletše badiidi le dihlotša le digole le difofu, gomme o tla ba le mahlogonolo, gobane bao ga ba na se ba ka go bušetšago ka sona. O tla bušetšwa ke Modimo mohla a tsoša baloki bahung.” Yo mongwe wa balaletšwa ba ba bego ba le dijong, ge a ekwa Jesu a realo, a re go yena: “Go lehlogonolo bao ba tlago tla dijong mmušong wa Modimo!” Jesu a re go yena: “Motho yo mongwe o kile a dira monyanya wo mogolo, mme a laletša batho ba bantši. Ge nako ya go keteka e fihla a roma mohlanka wa gagwe gore a yo botša balaletšwa a re: ‘Etlang, tšohle di lokišitšwe!’ Eupša bona ka moka ba itatola ka o tee ka o tee. Wa mathomo a re go mohlanka yoo: ‘Ke rekile tšhemo, gomme ke swanetše go yo e bona. Hle, o mpolelele gore ke swaregile.’ Yo mongwe a re: ‘Ke rekile dipholo tše lesome, gomme ke a ya go bona ge eba di tla goga gabotse. Hle, o mpolelele gore nka se kgone go tla.’ Yo mongwe a re: ‘Ke sa tšo nyala mosadi, gomme ke sona se se ntšhitišago go tla.’ “Mohlanka yola a boela morago a yo di botša mong wa gagwe. Yena a galefa, a botša mohlanka yoo a re: ‘Itlhaganele o ye mekgotheng le mekgothaneng ya motse, o boe le badiidi le dihlotša le digole le difofu.’ Ka morago mohlanka yoo a boa, a re: ‘Ke phethile se o rilego ke se dire, morena, fela go sa na le madulo.’ Monglapa a re go yena: ‘Eya ditseleng le mebileng o yo gapeletša batho go tlo tsena, gore ntlo ya ka e tle e tlale. Gomme ke le botša gore le o tee wa banna ba ba bego ba laleditšwe a ka se latswe dijo tša ka.’ ” Ya re ge batho ba bantšintši ba ntše ba sepela le yena, a retologa, a re go bona: “Yo a tlago go nna a sa nthate go feta ka mo a ratago tatagwe, le mmagwe, le mosadiagwe, le bana ba gagwe, le bomorwarragwe, le dikgaetšedi tša gagwe, ešita le yena mong, a ka se kgone go ba morutiwa wa ka. Yo a sego a ikemisetša go tlaišwa bjalo ka nna mme a ntatela, a ka se kgone go ba morutiwa wa ka. “Ga ke re ge o nyaka go aga tora o thoma ka go dula fase wa akanya tshenyegelo ya gona, gore o bone ge eba o na le tšhelete ye e lekanego go phetha modiro woo? Gape ge o ka se dire bjalo, o tla re o beile motheo wa tla palelwa ke go phetha tora yeo, gomme wa kwerwa ke bohle ba ba di bonago. Ba re: ‘Moisa yo o kgonne go thoma go aga, fela go phetha go mo paletše.’ “Kgoši yona ke efe ye e ka rego e eya go lwa le ye nngwe ya se dule fase ya lebeledišiša ge eba e tla kgona ka bahlabani ba dikete tše lesome go lwa le yo a tšwilego ka bahlabani ba dikete tše masome a mabedi? Ge a bona gore a ka se kgone, o tla roma batseta ba yo loba yola a sa le kgole.” Jesu a fetša ka go re: “Ka wona mokgwa woo, yo a sa tlogelego tšohle tše a nago le tšona a ka se kgone go ba morutiwa wa ka.” “Letswai ke selo se sebotse, fela ge le ka tapa, le ka hlwa le sa tswailošwa ka eng? Ga le sa hola mobu ka selo ešita le wona mmutedi; sa lona ke go dio tšhollwa. Yo a nago le tsebe a a kwe!” Balekgetho le badiradibe ka moka ba be ba hlwa ba etla go Jesu gore ba mo kwe. Gomme Bafarisei le boramangwalo ba tsoša tshele ba re: “Moisa yo o amogela badiradibe, ebile o ja nabo!” Ke moka Jesu a ba swantšhetša ka go re: “Ga ke re ge o ka re o na le dinku tše lekgolo, wa timelelwa ke e tee ya tšona, o tlogela tšela tše masome a senyane a metšo ye senyane madišong, wa yo nyaka yela e timetšego go fihlela o e hwetša? Etse ge o e hweditše o e atha magetleng o thabile. Ge o fihla gae o bitša bagwera ba gago le baagišani wa re: ‘Thabang le nna, ka gobane ke bone nku ya ka ye e bego e timetše!’ Ke a le botša, ka wona mokgwa wo mobjalo kua legodimong modiradibe o tee yo a sokologago dibeng tša gagwe o tla thabelwa go feta batho ba masome a senyane le metšo ye senyane ba go loka ba ba sa hlokego go sokologa.” “Ga ke re ge mosadi a ka re a na le dipapetlana tše lesome tša silibera, a timelelwa ke e tee ya tšona, o thumaša lebone a fiela ntlo ya gagwe, a e nyakišiša go fihlela a e bona? Gomme ge a e bone, o bitša bagwera ba gagwe le baagišani a re: ‘Thabang le nna, ka gobane ke bone papetlana ya ka ye e bego e timetše!’ Ka wona mokgwa wo mobjalo ke le botša gore kua legodimong barongwa ba Modimo ba thabela modiradibe o tee yo a sokologago.” Jesu a tšwela pele a re: “Go kile gwa ba le motho yo mongwe a na le barwa ba babedi. Yo monyenyane a re go yena: ‘Tate, mphe kabelo ye e ntebanego ya lefa la gago.’ Ke moka monna yola a abaganyetša barwa ba gagwe ka babedi lefa. Ge go fetile matšatši a se makae morwagwe yo monyenyane a rekiša kabelo yohle ya gagwe, gomme a tloga. A ya nageng ya kgole moo a fihlilego a senya tšhelete ya gagwe ka bohlaswa, a e fetša taa. Ke ge naga yeo e welwa ke tlala ye kgolo, mme a thoma go hloka. A ba a yo šomela yo mongwe wa badudi ba naga yeo, gomme yena a mo roma go yo diša dikolobe tša gagwe kua merakeng. A duma go intšha tlala ka matlakala a photla a a lewago ke dikolobe, fela le ona gwa se be le yo a mo fago ona. Mafelelong a rarologelwa mme a re: ‘Etse bathwalwa ba tate ke ba bantši, fela tša go ja di a ba patla, mme nna šemo, ke hwa ka tlala. Ke tla tloga ka ya go tate ka fihla ka re go yena: Tate, ke fošeditše Modimo le wena. Ga ke sa swanelwa ke go bitšwa morwago; hle, ntshware bjalo ka yo mongwe wa bathwalwa ba gago.’ Ke moka a tloga a boela go tatagwe. “O rile a sa le kgole tatagwe a mmona; a mo hlomogela pelo, a mo kitimela, a mo gokarela, a mo atla. Morwagwe a re go yena: ‘Tate, ke fošeditše Modimo le wena. Ga ke sa swanelwa ke go bitšwa morwago.’ Tatagwe a bitša bahlanka ba gagwe a re: ‘Itlhaganeleng, le tliše kobo ye botsebotse le mo apeše. Le mo apeše le palamonwana le dieta. Le nape le yo tšea namane ye e nonnego le e hlabe, gomme re ketekeng! Gobane yo morwa wa ka o be a hwile, eupša bjale šo o a phela; o be a timetše, eupša šo o hweditšwe.’ Ke moka ba thoma go keteka. “Morwagwe yo mogolo o be a sa ile mašemong. E rile ge a boa a le kgauswi le ka gae, a kwa go opelwa, go binwa. Ke ge a bitša yo mongwe wa bahlanka a mmotšiša a re: ‘Go diregang?’ Mohlanka yoo a mo fetola a re: ‘Gape morathoago o boile, gomme tatago o hlabile namane yela ya go nona ka ge a mmone a sa phela gabotse.’ “Morwa yo mogolo a befelwa kudu mo a ilego a ba a gana le go tsena ka gae. Tatagwe a ba a tšwa a yo mo rapela gore a tsene. Yena a re go tatagwe: ‘Bona, nna ke go šometše mengwagangwaga bjalo ka lekgoba; ga se ka ka ka nyatša taelo ya gago; fela ga se wa ka wa mpha le ge e le putšane gore ke ithabiše le bagwera ba ka. Eupša bjale ge yo morwago a etla a meditše lefa lela la gago le digwebakathobalo, o mo hlabela namane ye e nonnego.’ Tatagwe a mo fetola a re: ‘Ngwanaka, wena o na le nna ka mehla, gomme sengwe le sengwe se ke nago le sona ke sa gago. Go lebane ge re keteka, ka gobane yo ngwaneno o be a hwile, gomme bjale o a phela; o be a timetše, gomme bjalo o hweditšwe.’ ” Jesu a ba a botša barutiwa ba gagwe taba ye nngwe a re: “Go kile gwa ba le monna yo mongwe wa mohumi a na le molaodi wa thoto ya gagwe. Molaodi yoo a tla a pharwa ka taba ya go re o senya thoto ya mong wa gagwe. Ka gona mohumi yoo a mmitša a mmotšiša a re: ‘Ke dilo mang tše ke di kwago di bolelwa ka wena? Nke o ntaodišetše tša bolaodi bja gago, ka gobane ga o sa tlo ba molaodi wa thoto ya ka.’ Molaodi yoo a re ka pelong: ‘Bjale ge mong wa ka a nthakile modirong ke tla dirang? Etse go lema go a mpalela, go kgopela le gona go nteša dihlong. Bjale gona ke gopotše se ke tlago se dira, gore ge ke seno senyegelwa ke modiro, go be le batho ba ba tlago nkamogela ka malapeng a bona.’ “A bitša ba ba nago le molato go mong wa gagwe, ba tla ka o tee ka o tee. A botšiša wa mathomo a re: ‘Molato wo o o tšerego go mong wa ka ke bokae?’ Yena a mo fetola a re: ‘Ke metšega ye lekgolo ya makhura a mohlware.’ Molaodi a re: ‘Tšea lengwalo la gago la molato, o dule fase o phakiše o ngwale masome a mahlano.’ Ke moka a botšiša yo mongwe a re: ‘Wena o tšere bokae?’ Yena a mo fetola a re: ‘Ke mekotla ye lekgolo ya korong.’ Molaodi a re: ‘Tšea lengwalo la gago la molato o ngwale masome a seswai.’ “Mong wa molaodi yoo wa senokwane a mo reta ka baka la bonokwane bjo bja gagwe. Gape batho ba lefase le ka bonokwane bjo ba diranago ka bjona seng sa bona, ba feta batho ba seetša.” Jesu a iša pele a re: “Le nna ke le botša ke re: Itireleng bagwera ka mahumo a lefase le lebe le, gore mola mahumo a se sa le hola ka selo, ba tle ba le amogele legaeng le le sa felego. Yo a botegago go tše dinyenyane, le go tše dikgolo o tla botega; yo a sa botegego go tše dinyenyane, le go tše dikgolo a ka se botege. Ge le sa botege mahumong a lefaseng, mahumong a mmannete gona ke mang yo a ka le botago? Ge le sa botege go se e lego sa yo mongwe, ke mang yo a ka le fago selo gore e be sa lena? “Ga go mohlanka yo a ka hlankelago marena a mabedi; o tla hloya yo mongwe a rata yo mongwe; a botegela yo mongwe a nyatša yo mongwe. Le ka se hlankele Modimo le mahumo ka nako e tee.” Bafarisei ge ba ekwa ditaba tšeo ka moka ba mo kodutla ka gobane tšhelete yona ba be ba e rata. Jesu a re go bona: “Etse ke lena bale le dirago gore batho ba bone nke le lokile, etšwe yo a tsebago se le lego sona e le Modimo. Gobane tše batho ba bonago e le tše bohlokwa, Modimo yena o bona di šišimiša. “Melao ya Moshe le mangwalo a baprofeta di feleletše ka Johanese Mokolobetši. Go tloga moo go begwa Taba ye Botse ya mmušo wa Modimo, gomme mang le mang o leka ka maatla go tsena ka mmušong wo. Fela go timelela ga legodimo le lefase go boleta go feta go hlahlamoga ga tabanyana ye nyenyane mo melaong ya Moshe. “Motho yo a ka hlalago mosadi wa gagwe a nyala yo mongwe, o a otswa, le yena monna yo a ka nyalago mosadi yo a hladilwego, o a otswa.” “Go kile gwa ba le monna yo mongwe wa mohumi a apara diaparo tše dibotse, le gona a dula a ipshina ka tša matsaka. Lesorong la gagwe go be go hlwa go tlišwa monna yo mongwe wa modiidi wa go tlala dišo, yo leina la gagwe e bego e le Lasarose. Yena o be a duma go iphepa ka marathana a a wago tafoleng ya mohumi yoo. Dimpša le tšona di be di fela di etla di mo latswa dišo. “Monna yola wa modiidi a ikhwela, gomme barongwa ba mo kuka ba yo mmea madulong a a hlomphegago kgauswi le Abrahama legodimong. Mohumi yola le yena a tla a hwa, a bolokwa. Ya re ge a le kua bodulabahu a ekwa bohloko bjo bogolo, a lelala gomme a bona Abrahama a le kgole, a dutše le Lasarose. Ke moka a goeletša a re: ‘Tate Abrahama, nke o ntšhokele, hle! Roma Lasarose a ine ntlha ya monwana ka meetseng, a tle a ntimole mo lelemeng, gobane ke kwa bohloko e le ruri ka mo mollong wo!’ “Abrahama a mo fetola a re: ‘Ngwanaka, gopola gore mola o sa phela lefaseng o be o atlegile, kganthe Lasarose yena o be a tlaišegile. Bjale yena mo o iketlile, wena o kwa bohloko. Le gona go na le legaga le legolo mo mokgahlo wa rena le lena, gomme ba ba lego ka mono ge ba rata go tshelela ka moo ga ba kgone, le bona ba ba lego ka moo go lena ga ba kgone go tshelela ka mono go rena.’ Mohumi yola a re: ‘Gona tate, ke a go rapela, mo rome a ye kua ga gešo, gobane moo go na le banabešo ba bahlano. A yo ba sebotša gore bona ba se tlo tla felo mono ga masetlapelo.’ “Abrahama a re: ‘Ba na le Moshe le baprofeta. A ba theeletše bona.’ Mohumi yola a re: ‘Aowii, tate Abrahama! Ge ba ka tlelwa ke yo mongwe wa ba ba hwilego ba ka sokologa.’ Abrahama yena a re: ‘Ge ba sa theeletše Moshe le baprofeta, le ge yo mongwe wa ba ba hwilego a ka tsoga ba ka se kgolwe.’ ” Jesu a re go barutiwa ba gagwe: “Dilo tše di dirišago batho dibe tšona di swanetše go no ba gona, fela go madimabe yo di tlago ka yena. Go ka ba kaone ge a ka kgokelelwa lwala molaleng a lahlelwa ka lewatleng, go na le gore a kgeloše yo mongwe wa ba banyenyane ba. Ka gona le itlhokomele go tše le di dirago. “Ge ngwaneno a dira phošo o mo kgale; ge a ka itshola, o mo swarele. Ge a ka go fošetša gašupa ka tšatši le tee, mme nako le nako a tla go wena a re: ‘Ntshwarele,’ o mo swarele.” Baapostola ba re go Morena: “Re okeletše tumelo.” Yena a ba fetola a re: “Ge le ka be le na le tumelo ye nyenyane ya go lekana le thorwana ya mphogo, le be le ka botša sehlare se la re: ‘Tomoga, o yo ipšala ka kua lewatleng!’ Gomme se be se tla phetha taelo yeo.” “Na kgane ge o na le mohlanka yo a go lemelago goba a go dišetšago, e ka re e le gona a boago mašemong wa mo kgareeletša go ja? Ga ke re o re go yena: ‘Nkapeele tša go lalela, o ntsholele ke je, ke nwe, o kgone o eja, o enwa’? Kgane mohlanka o tle a retelwe go phetha taelo ya mong wa gagwe? Agaa, le lena ge le phethile tšohle tše le bego le laetšwe go di dira, le swanetše le re: ‘Aowii, rena ga re bahlanka ba selo; sa rena e bile go dio phetha modiro wo o bego o re lebane.’ ” Jesu ge a eya Jerusalema, o ile a šika le mollwane wa Samaria le Galilea. Ya re ge a tsena motsaneng wo mongwe, a gahlana le banna ba lesome ba ba bolawago ke bolwetši bja letlalo bja go ba tšhilafatša. Ba emela kgojana, ba mo goelela ba re: “Jesu, Mong wa rena, hle, nke o re šokele!” Jesu ge a ba bona a re go bona: “Eyang go baprista ba le bone.” Ba rile ba sa ya ba ipona ba fodile ba hlwekile. Yo mongwe wa bona ge a ipona a fodile, a boa a goeletša a tumiša Modimo. A itahlela fase ka sefahlego pele ga Jesu, a mo leboga. Yena e be e le Mosamaria. Jesu a re: “Ga ke re go fodišitšwe banna ba lesome, bjale bale ba bangwe ba senyane ba kae? Go reng go boile fela yo e sego Moisraele yo go tlo leboga Modimo?” Ke moka a re go monna yoo: “Emelela o sepele; tumelo ya gago e go fodišitše.” E rile ge Bafarisei ba bangwe ba botšiša Jesu gore na mmušo wa Modimo o tlilo hlongwa neng, yena a ba fetola ka go re: “Mmušo wa Modimo ga o hlongwe ka mokgwa wo o bonagalago. Ga go yo a tlago re: ‘Bonang, šo!’ goba a re: ‘Šolee!’ gobane mmušo wa Modimo o ka mo gare ga lena.” A botša burutiwa ba gagwe a re: “Go tla tla nako ye le tlago duma go bona le lengwe la matšatši a Morwamotho, eupša le ka se le bone. Ba bangwe ba tla le botša ba re: ‘Bonang, šo!’ goba ba re: ‘Šolee!’ Le se ke la ya goba la ba šala morago. Ge nako ya gore Morwamotho a tle e fihla, o tla tla bjalo ka legadima ge le gadima go putla leratadima, le le bonega ka gohle. Fela pele ga ge a etla o swanetše go tlaišwa kudu le go tšwiwa ke batho ba mehleng yeno. Pele ga ge Morwamotho a etla go tla no ba go swana le nakong yela ya Noa. Etse batho ba be ba eja, ba enwa, ba nyala goba ba nyalwa, gwa ba gwa fihla letšatši le Noa a tsenego ka lona ka leselawatleng, gomme meetsefula a tla a gogola batho ka moka. Gapegape go tla no ba bjalo ka nakong yela ya Lota. Batho ka moka ba be ba dulela go ja, le go nwa, le go reka, le go rekiša, le go bjala, le go aga. E rile tšatši le Lota a tšwilego motseng wa Sodoma ka lona, gwa tšhologa mollo le tshebela di etšwa legodimong, tša ba swielela taa. Le mohla Morwamotho a tšwelela go tla ba bjalo. “Mohlang woo yo a tlago be a le godimo ga ntlo ya gagwe, a se ke a fologela ka ntlong go yo tšea thoto ya gagwe; le yo a tlago be a le mašemong a se hlwe a sa boela gae. Gopolang se se ilego sa hlagela mosadi wa Lota! Yo a ipabalelago o tla lahlega, eupša yo a itatolago o tla phelela sa ruri. Ke le botša gore bošegong bjoo batho ba babedi ba tla re ba robetše malaong a tee, gwa tšewa yo mongwe, gwa šadišwa yo mongwe. Basadi ba babedi ba tla re ba šila mmogo, gwa tšewa yo mongwe, gwa šadišwa yo mongwe.” *** Barutiwa ba gagwe ba mmotšiša ba re: “Tšeo di tla direga kae, Morena?” Yena a ba fetola a re: “Manong a kgobokana mo go lego setoto.” Jesu a botša barutiwa ba gagwe seswantšho, a ba ruta gore motho o swanetše go dula a rapela le gona a sa fele pelo, a re: “Motseng wo mongwe go kile gwa ba le moahlodi wa go se hlomphe Modimo, le gona wa go nyatša batho. Gona motseng woo go be go dula mohlologadi yo mongwe yo a bego a fela a etla go yena a re: ‘Hle, nke o ntamolele go motho yola a mpharago molato!’ Moahlodi yoo o ile a dika a gana go mo theeletša, fela ka morago a ithetolla a re: ‘Le ge Modimo ke sa mo hlomphe le batho ke ba nyatša, mohlologadi yo ke tla no mo lamolela, ka gobane šo o a nngamola. Etse ge ke sa mo lamolele o tla no boaboa mo a ba a tla a ntena.’ ” Morena a iša pele a re: “Ekwang se moahlodi yoo wa go hloka toka a se boletšego. Na bjale Modimo yena a ka napa a se lamolele bao a ba kgethilego, ba ba mo llelago bošego le mosegare? A ka napa a diega go ba thuša? Ke le botša gore o tla ba lamolela ka pela. Fela Morwamotho mohla a etla afa le re o tla hwetša go sa na le ba ba nago le tumelo mo lefaseng?” Ba ba ipotšago gore ba lokile mme ba nyatša ba bangwe Jesu a ba botša ka go swantšha a re: “Batho ba babedi ba kile ba ya Tempeleng go rapela. Yo mongwe e be e le Mofarisei, mongwe e le molekgetho. “Mofarisei yoo a fihla a emelela a rapela ka pelong a re: ‘Ke a go leboga, Modimo, ge ke sa swane le batho ba bangwe ba bahlalefetši, ba baradia, ba diotswa; ebile ga ke swane le molekgetho yo. Nna ke itima dijo gabedi ka beke, le gona ke ntšha karolo ya lesome go tšohle tše ke bago le tšona.’ “Ge e le molekgetho yola yena a ema kgole, a šia le go lebelela legodimong, a ikgonara a re: ‘Hle, Modimo, nkgaugele, nna, modiradibe!’ Ke a le botša, yena o boetše gae a boelane le Modimo, e sego Mofarisei yola. Gobane mang le mang yo a ikgodišago o tla kokobetšwa, gwa re yo a ikokobetšago a godišwa.” Batho ba bangwe ba tliša bana go Jesu gore a ba bee diatla. Barutiwa ba gagwe ge ba di bona ba kgalema batho bao, fela Jesu a bitša bana bao, gomme go barutiwa ba gagwe a re: “Lesang bana bao ba tle go nna, le se ke la ba thibela, gobane mmušo wa Modimo ke wa ba babjalo. Ruri, ke le botša gore yo a sa dumelego go bušwa ke Modimo, a sa etšego ngwana, a ka se tsoge a tsene legodimong.” Monna yo mongwe wa maemo a tla a botšiša Jesu a re: “Moruti wa go loka, ke direng gore ke tle ke be le bophelo bjo bo sa felego?” Jesu a mo fetola a re: “O reng o mpitša wa go loka? Ga go yo a lokilego ge e se Modimo fela. Melao o a e tseba, e re: ‘O se ke wa otswa; o se ke wa bolaya; o se ke wa utswa; o se ke wa bolela bohlatse bja maaka; o hlomphe tatago le mmago.’ ” Yena a re: “Melao yeo ka moka e sa le ke e phetha go tloga bjaneng bja ka.” Jesu ge a ekwa a realo a re go yena: “O sa hlaelelwa ke se sengwe. Eyo rekiša tšohle tše o nago le tšona, o tšee tšhelete ya gona o e abele badiidi, gomme o tla ba le lehumo legodimong. Ka morago ga moo o tle o ntatele.” Ge monna yoo a ekwa Jesu a realo, a nyama kudu, ka gobane o be a humile e le ruri. Jesu ge a mmona a nyamile bjalo a re: “Go bothata bjang gore mohumi a tsene legodimong! Ebile go bonolo gore kamela e tsene ka lešobana la nalete, go na le gore mohumi a tsene legodimong.” Ba ba mo kwelego ge a realo ba re: “Ge go le bjalo, ke mang yo a ka phologago?” Jesu a ba fetola a re: “Tše di palelago batho Modimo yena ga di mo palele.” Ke moka Petrose a re: “Bona, rena re tlogetše tšohle tše e lego tša rena ra go latela.” Jesu a re go bona: “Ruri, ke le botša gore mang le mang yo a tlogetšego legae, goba mosadi, goba banababo, goba batswadi, goba bana ka baka la mmušo wa Modimo, o tla boelwa kudu mehleng yeno, gomme mehleng ye e tlago o tla ba le bophelo bjo bo sa felego.” Jesu a biletša barutiwa ba gagwe ba lesome le ba babedi thoko, a re go bona: “Theeletšang mo, re rotogela Jerusalema, mo go yogo phethega tšohle tše di ngwadilwego ke baprofeta mabapi le Morwamotho. O tla gafelwa baditšhaba; bona ba mo kwera, ba mo tlaiša, ba mo tshwela ka mare. Ba tla mo otla ka tshelane, ba mmolaya, eupša ka letšatši la boraro a tsoga bahung.” Fela barutiwa ba Jesu ba ile ba se kwešiše selo; polelo ya gagwe ya ba širela, gomme ba se tsebe gore o ra go reng. E rile ge Jesu a batamela motse wa Jeriko, gwa ba go na le monna yo mongwe wa sefofu a dutše ka thoko ga tsela a kgopela. Ge a ekwa lešaba la batho le feta, a botšiša a re: “Go diregang?” Ba mmotša ba re: “Ke Jesu wa Nasaretha o a feta.” Ke moka a goelela a re: “Jesu, Morwa wa Dafida, nke o ntšhokele!” Batho ba ba etilego pele ba mo kgalema ba re a homole. Eupša yena a goelela le go feta a re: “Morwa wa Dafida, nke o ntšhokele!” Jesu a ema, a re sefofu seo se tlišwe go yena. Ge se batametše, a se botšiša a re: “O rata gore ke go direle eng?” Sona sa mo fetola sa re: “Morena, ke nyaka gore ke boele ke bone.” Jesu a re go sona: “Gona bona! Tumelo ya gago e go fodišitše.” A boela a bona le semeetseng, gomme a latela Jesu a reta Modimo. Lešaba ge le di bona la tumiša Modimo. Jesu a re go fihla motseng wa Jeriko a o putla ka bogare. Gona moo go be go na le molekgetho yo mogolo wa mohumi ba re ke Sakiose. Yena o be a nyaka go bona gore na Jesu ke ofe, eupša ka ge e be e le kgopana, o be a širwa ke lešaba la batho. Ka gona a kitimela kua pele, a fihla a namela mohlare wa mogo gore a bone Jesu, gobane Jesu o be a ilo feta moo. Ge Jesu a fihla moo, ge a lelala a mmona gomme a re go yena: “Sakiose, fologa ka pela, gobane lehono ke swanetše go yo hlwa ka ga gago.” Sakiose a itlhaganela, a fologa gomme a mo iša ga gagwe a thabile. Bohle ba ba di bonago ba ngongorega ba re: “Šolee, o etetše ga monna wa modiradibe!” Sakiose a emelela a re go Morena: “Morena, bona! Thoto ya ka ke e arolela bahloki ka bogare, gomme ge eba nkile ka tšeela motho selo ka šiši, ke tla mo lefa gane se ke se tšerego.” Jesu a re go yena: “Lehono lapa le le phološitšwe ke Modimo, gobane monna yo le yena ke setlogolo sa Abrahama. Gape Morwamotho o tletše go nyaka le go phološa ba ba timetšego.” E rile ge batho ba sa theeleditše tše Jesu a di bolelago, yena a iša pele a ba botša seswantšho se sengwe. Ke ge a šetše a le kgauswi le Jerusalema, gomme ba gopola gore mmušo wa Modimo o kgauswikgauswi le go hlongwa. Ka gona a ba swantšhetša a re: “Mokgomana yo mongwe o kile a ya nageng ya kgole gore a yo bewa kgoši, a kgone a boela gae. A bitša ba lesome ba bahlanka ba gagwe, a fa yo mongwe le yo mongwe papetlana ya gauta, a ba laya a re: ‘Le gwebe ka tšhelete ye go fihlela ke boa.’ Fela batho ba naga ya gabo ba be ba mo hloile; ka gona, ge a seno tloga ba roma batseta gore ba yo botša kgošikgolo ba re: ‘Ga re nyake go bušwa ke motho yoo.’ “Le ge go le bjalo monna yola a boa a beilwe kgoši. A laela gore bahlanka bale a ba filego tšhelete ba bitšwe, ba mmotše gore ba dirile bokae ka yona. Wa mathomo a tla a re: ‘Morena, papetlana yela ya gauta o mphilego yona ke e tswadišitše tše lesome.’ Yena a re: ‘O dirile gabotse, mohlanka yo a lokilego! Ka ge o ile wa botega selong se senyenyane kudu, ke tla go bea mmuši wa metse ye lesome.’ Gwa tla wa bobedi a re: ‘Morena, papetlana yela ya gago ya gauta ke e tswadišitše tše tlhano.’ Yena a re: ‘Le wena ke tla go bea mmuši wa metse ye mehlano.’ “Gwa tla yo mongwe a re: ‘Morena, papetlana yela ya gago še; ke be ke e phuthetše ka lešela ke e bolokile. Ke be ke go boifa ka ge o le motho yo bogale; o tšea se e sego sa gago, le gona o buna mo o sego wa bjala gona.’ Kgoši a re: ‘Mohlanka yo mobe towe! Ke tla go ahlola ka tše o di boletšego ka wa gago molomo. O ntseba ke le motho yo bogale, ke tšea se e sego sa ka, ke bile ke buna mo ke sego ka bjala gona. Bjale o reng o se wa bea tšhelete yeo ya ka ka polokelong? Ke mo nka bego ke rile ge ke boa ka e hwetša e tswetše.’ “A napa a re go ba ba emego moo: ‘Mo tšeeleng papetlana yeo ya gauta le e fe yola wa go ba le tše lesome.’ Bona ba re: ‘Ga ke re o šetše a na le tše lesome, morena?’ Yena a ba fetola a re: ‘Gape ke le botša gore mang le mang yo a nago le sa gagwe o tla okeletšwa; eupša yo a se nago le sa gagwe, le bonyenyane bjo a nago le bjona o tla bo amogwa. Ge e le manaba ale a ka, bale ba bego ba sa nyake gore ke be kgoši ya bona, ba tlišeng mo le ba bolaye mo pele ga ka!’ ” Jesu ge a fetša go ba swantšhetša bjalo, a ba etelela pele a ya Jerusalema. E rile ge a batamela Betfage le Bethania mo Thabeng ya Mehlware, a roma barutiwa ba gagwe ba babedi, a ba laela a re: “Eyang motseng wola le lebanego le wona, gomme ge le fihla le tla hwetša pokolwana ye e kgokilwego, ye e sego ya ka ya namelwa ke motho. Le e kgokolle, le e tliše mo. Ge motho a ka le botšiša gore le e kgokollelang, le mmotše le re: ‘Morena o a e nyaka.’ ” Ba ile ba ya, ba fihla ba hwetša go le ka wona mokgwa wola Jesu a bego a ba boditše. Ya re ge ba sa e kgokolla, beng ba yona ba ba botšiša ba re: “Le reng le kgokolla pokolwana ye?” Bona ba ba fetola ba re: “Morena o a e nyaka.” Ba e iša go Jesu, ba bea diaparo tša bona godimo ga yona, mme ba mo nametša yona. Ge a sepela ka yona bjalo batho ba tšama ba ala diaparo tša bona mo tseleng. Ge ba batamela Jerusalema, ba etla motheogeng wa Thaba ya Mehlware, lešaba ka moka la barutiwa ba gagwe la thoma go tumiša Modimo le hlaboša mantšu le thabile ka baka la mehlolo ka moka ye ba e bonego. Ba re: “A go retwe kgoši ye e tlago e romilwe ke Morena! Legodimong go be le khutšo; Modimo a tumišwe legodimong la godimodimo!” Bafarisei ba bangwe moo lešabeng ba botša Jesu ba re: “Moruti, kgalema barutiwa ba gago gore ba homole!” Jesu a ba fetola a re: “Ke le botša gore ge ba ka homola, go tla goelela maswika.” E rile ge a batamela motse mme a o bona, a o llela a re: “Joo! Nke nkabe lehono o ka lemoga tše di nyakegago gore o tle o iketle! Fela šemo ga o di bone. Nako e etla ye ka yona manaba a gago a tlago go dikanetša ka ntotoma ya mobu, a go rakelela, a go pitlaganya ka mathoko ohle. Ba tla go fediša taa, wena le badudi ba gago; ba ka se tlogele leswika le sa hlatlagane le le lengwe, ka ge o se wa lemoga nako ye Modimo a bego a tletše go go phološa ka yona.” Jesu a ya Tempeleng a fihla a raka bagwebi, a re go bona: “Mangwalo a Makgethwa a re: ‘Ngwako wa ka e tla ba ngwako wa thapelo.’ Eupša lena le o dira legolo la bahlakodi!” Tšatši le lengwe le le lengwe Jesu o be a ruta Tempeleng. Baprista ba bagolo le boramangwalo le baetapele ba setšhaba ba be ba rera go mmolaya, eupša ba sa tsebe gore ba ka mmolaya bjang, ka gobane batho ka moka ba be ba mo hlwaela tsebe, ba fišegela go mo kwa. Ka letšatši le lengwe ge Jesu a le Tempeleng a ruta batho a bile a ba begela Taba ye Botse, baprista ba bagolo le boramangwalo le bagolo ba setšhaba ba tla go yena, ba mmotšiša ba re: “Nke o re botše mo: O romilwe ke mang go dira dilo tše? Gona ke mang yo a go boditšego gore o di dire?” Jesu ge a ba fetola a re: “Le nna ke tla le botšiša taba e tee, še: Johanese o be a laetšwe ke mang go kolobetša – ke Modimo goba ke batho?” Ba rerišana ba re: “Etse ge re ka re: ‘O be a laetšwe ke Modimo,’ o tla re: ‘Bjale le be le reng le sa mo dumele?’ Gomme ge re ka re: ‘O be a laetšwe ke batho,’ setšhaba ka moka se tla re bolaya ka maswika, gobane ba kgolwa gore Johanese e be e le moprofeta.” Ka gona ba fetola Jesu ba re ga ba tsebe gore o be a laetšwe ke mang. Gomme yena a re go bona: “Gona le nna nka se le botše gore ke romilwe ke mang go dira dilo tše.” Jesu a anegela batho seswantšho, a re: “Go be go na le monna yo mongwe yo a bego a bjetše merara, a e hirišetša balemi, ke moka a tloga gae nako ye telele. Ge nako ya go fula diterebe e fihla, a roma mohlanka go balemi bale gore a yo mo tšeela diterebe tše e swanetšego go ba tša gagwe. Bona ba mmetha, ba mo gomiša a se na selo. Mongserapa a buša a roma mohlanka yo mongwe; le yena ba mmetha, ba mo roga, ba mo gomiša a se na selo. A buša a roma wa boraro; le yena ba mo gobatša, ba mo kgoromeletša ka ntle. Ke mo mongserapa a ipotšišitšego a re: ‘Bjale ke direng? Ke tla roma morwa wa ka yo ke mo ratago; mohlomong yena ba tla mo hlompha.’ Eupša balemi bale ge ba bona morwagwe ba lakana ba re: ‘Mojalefa šo. Etlang re mmolayeng gore lefa la gagwe e tle e be la rena!’ Ke moka ba mo kgoromeletša ka ntle ga serapa, ba mmolaya. “Na mongserapa balemi bao o tla ba dirang? Ga ke re o tla tla a ba bolaya, gomme serapa seo a se hirišetša ba bangwe?” Ge ba ekwa a realo ba re: “A go se ke gwa ba bjalo!” Jesu a ba lebelela, a ba botšiša a re: “Bjale Mangwalo a Makgethwa a ra go reng ge a re: “ ‘Leswika le baagi ba le nyaditšego e bile lona la sekhutlo’? “Yo a ka welago leswika leo godimo o tla pšhatlagana; le yo leswika leo le ka mo welago godimo le tla mo šila.” Boramangwalo le baprista ba bagolo ba be ba nyaka go swara Jesu le semeetseng, ka gobane ba be ba lemogile gore ka seswantšho seo o ra bona. Fela ba be ba boifa setšhaba. Ka gona ba dula ba mmeile leihlo, ba mmeela balaledi ba go ikgakantšha ba go itira tše nkego ba gabile go phetha melao ya Moshe, gore ba mo tanye ka diphošo tše a ka tšhogago a di boletše, ba tle ba kgone go mo gafela mmušiši wa Moroma. Bona bao ba tla go Jesu ba re: “Moruti, re a tseba gore tše o di bolelago le tše o di rutago batho ke tšona, le gore ga o kgetholle batho, eupša o rata therešo mabapi le tšeo Modimo a nyakago gore motho a di dire. Na go lebane ge re ntšhetša Kesare metšhelo, goba ga se gwa lebana?” Jesu a lemoga boradia bja bona, gomme a re go bona: “Mpontšheng papetlana ya tšhelete. Seswantšho se ke sa mang le leina le?” Ba mo fetola ba re: “Ke tša Kesare.” Ke ge a re go bona: “Gona ntšhetšang Kesare tše e lego tša Kesare, le Modimo le mo ntšhetše tše e lego tša Modimo.” Ba palelwa ke go mo tanya ka selo moo pele ga batho, gomme ba homola ba tlabilwe ke phetolo ya gagwe. Basadusei ba bangwe ba tla go Jesu. Gape ke bona bale ba rego bahu ba ka se tsoge. Ba re go yena: “Moruti, Moshe o re ngwaletše molao wo o rego: ‘Ge monna a ka hwa a se na bana a tlogela mosadi, morathwagwe a tsenele mosadi yoo wa mohu, a tsošetše mogolwagwe lapa.’ Go kile gwa ba le barwa ba motho ba ba šupago. Wa mathomo a tšea mosadi, eupša a hwa a se na bana. Wa bobedi a tsenela mosadi yoo wa mohu, le yena a hwa a se na bana. Le wa boraro a mo tsenela. Ka bošupa ga bona ba mo tsenela, eupša bohle ba hwa ba se na bana. Mafelelong mosadi yola le yena a hwa. Bjale mohla bahu ba tsoga, mosadi yoo e tla ba wa ofe, ka ge ka bošupa ba be ba mo tsenetše?” Jesu a ba fetola ka go re: “Batho ba mehleng yeno ba a nyala, ba a nyalwa, eupša ba ba loketšego go tsoga bahung ba phela mehleng ye e tlago ba ka se nyale, ba ka se nyalwe. Ba ka se sa hwa, ka gobane ba tla be ba swana le barongwa. Ke bana ba Modimo, ka gobane ba tsogile bahung. Le Moshe o šupa taba ye ya go re bahu ba tla tsoga mo temaneng yela ya go bolela ka mošwana wola wa go tuka mollo, ge a era Morena a re ke Modimo wa Abrahama, Modimo wa Isaka, Modimo wa Jakobo. Ke Modimo wa ba ba phelago, e sego wa ba ba hwilego, gobane yena o bona bohle e le ba ba phelago.” Ke mo ba bangwe boramangwalo ba rilego: “O fetotše gabotse, Moruti!” Ba nama ba se sa ba le sebete sa go mmotšiša selo. Jesu a ba botšiša a re: “Go tla bjang gore ba re Mesia ke setlogolo sa Dafida? Gobane Dafida ka boyena ka pukung ya Dipesalome o re: “ ‘Morena o rile go Morena wa ka: Dula ka mo letsogong la ka la go ja, ke be ke tle ke go fenyetše manaba a gago.’ “Bjale ge Dafida a bitša Mesia ‘Morena’, Mesia e ka ba setlogolo sa gagwe bjang?” E rile ge batho ka moka ba ntše ba mo theeleditše, a botša barutiwa ba gagwe a re: “Le hlokomeleng boramangwalo ba ba ratago go hlwa ba sepela ba apere diaparo tše ditelele, le go dumedišwa ka tlhompho mapatlelong a motse, le go rata madulo a ka pele ka disinagogeng le menyanyeng. Ba tšeela bahlologadi dintlo tša bona, mme ba ikaketše ka go rapela dithapelo tše ditelele. Ba ikobela molato le go feta.” Jesu ge a lebelediša, a bona bahumi ba lokela ditšhelete tša bona ka polokelong ya Tempele; a bona le mohlologadi yo mongwe wa modiitšana a lokela dipapetlana tše pedi tše dinyenyane tša mphiri. A re: “Ruri, ke le botša gore mohlologadi yo wa modiitšana o tšhetše tšhelete ye ntši go feta bohle. Gobane ba bangwe ka moka ba tsopotše fela mahumong a bona ba lokela ka polokelong ya Tempele; eupša mosadi yo wa modiidi yena, o tšhetše tšohle tše a bego a tla phela ka tšona.” Ba bangwe ba barutiwa ba Jesu ba rile ba sa bolela ka Tempele gore e thakgilwe bjang ka maswika a mabotse le dikgabišo tšeo di neelwago Modimo, Jesu a re: “Tšohle tše le di bonago tše – nako e etla mohlang go ka se sa šalago leswika le le sa hlatlaganego le le lengwe la se kgerešwe.” Bona ba mmotšiša ba re: “Moruti, dilo tše di tla direga neng? Gomme re tla bona ka eng gore di tlilo direga?” Jesu a ba fetola a re: “Le hlokomele gore le se forwe ke motho, gobane batho ba bantši ba tla tla ba re ba bolelela nna, motho a re: ‘Ke nna Mesia!’ mongwe a re: ‘Nako e fihlile!’ Le se ke la ba šala morago. Le se tšhošwe ke ge le ekwa go bolelwa ka dintwa le meferefere; gobane pelepele go swanetše go hlaga tšona, fela e tla be e se go re mafelelo a batametše.” A iša pele a re: “Ditšhaba di tla hlaselana, le mebušo e tla tsogelana maatla. Go tla ba le ditšhikinyego tše dikgolo tša lefase, le ditlala, le mauba kua le kua, le dimaka tše di šiišago, le dipšhešamare tše dikgolo leratadimeng. Fela pele ga ge tšohle tšeo di hlaga, lena le tla hlomarwa la swarwa; le tla gafelwa baetapele ba disinagoge, la ba la išwa kgolegong. Le tla gafelwa le magoši le babušiši e le ka baka la ka. Ya ba gona ge le hweditše sebaka sa go ba begela gore le dumela go nna. Le fetše le pelo gore le ka se lakalele gore na le tla iphetolela bjang, ka gobane ke nna ke tlago le kgontšha go bolela ka bohlale mo manaba ohle a lena a ka se kgonego go le phala ka dipolelo le go le phegiša. Le tla ekwa le ke batswadi ba lena, le bana ba bolena, le meloko ya bolena, le bagwera ba lena, gomme ba bangwe ba lena ba tla bolawa. Le tla hloiwa ke batho ka moka ka baka la ka. Eupša bohle le tla bolokega, ešita le meriri yohle ya lena. Le kgotlelele, gomme le tla phelela ruri.” “Mohla le bona motse wa Jerusalema o dikanetšwa ke madira, le nape le tsebe gore o kgauswi le go pšhatlwa. Ke moka bao ba tlago be ba le nageng ya Judea ba tšhabele dithabeng; bao ba tlago be ba le motseng ba tloge, gomme bao ba tlago be ba le nageng ba se ke ba ya motseng. Gobane matšatši ao e tla be e le a Modimo a go otla, gore go phethege tšohle tše di bolelwago ke Mangwalo a Makgethwa. Ba madimabe mehleng yeo ke bao e tlago be e le baimana le batswetši, gobane naga ye e tla welwa ke masetlapelo a a šiišago, gomme Modimo o tla otla setšhaba se. Ba bangwe ba tla bolawa ka tšhoša, bangwe ba thopelwa ditšhabeng di šele, gomme motse wa Jerusalema o tla gatakelwa ke baditšhaba go fihlela pušo ya bona e fela.” “Go tla ba le dimaka letšatšing le ngweding le dinaleding. Lefaseng gona ditšhaba di tla tlalelwa tša tšhošwa ke modumo wa lewatle le maphoto a lona. Batho ba tla idibatšwa ke go boifa ba lakaleletše tše di tlago hlaga lefaseng, gobane dinaledi tše di lego kua leratadimeng di tla arošwa tseleng ya tšona. Ya ba gona batho ba bonago Morwamotho a etla ka leru a na le maatla a magolo le letago le legolo. Ge dilo tše di thoma go hlaga, le emelele le inamologe, gobane le tla be le le kgauswi le go phološwa.” Jesu a ba anegela seswantšho a re: “Bonang mogo le dihlare tše dingwe ka moka. Ge le bona di hloga, le a tseba le lena gore selemo se šetše se le kgauswi. Le dilo tšeo ge le bona di direga, le tsebe gore mmušo wa Modimo o kgauswi. “Ruri, ke le botša gore tšohle di tla hlaga batho ba ba phelago gonabjale ba sešo ba hwa ka moka. Legodimo le lefase di tla fela, eupša tše ke di boletšego tšona e tla no fela e le nnete.” “Le itlhokomele! Le se lakwe ke menyakalalo le botagwa le ge e le go balabala ka tša bophelo, gore le se tlo welwa ke Letšatši la Kahlolo, go etša sefu. La khukhunetša bohle ba ba phelago lefaseng ka moka. Dulang le phakgame le rapela ka mehla gore le tle le kgone go kgotlelela mathata ka moka a a tlago hlaga, le go ema pele ga Morwamotho gore a le sekiše.” Jesu o be a hlwa a ruta Tempeleng mosegare, gomme bošego a tšwe motseng a ye go lala Thabeng ya Mehlware. Mosong batho ka moka ba be ba tsogela Tempeleng go yo mo kwa. Monyanya wa Dinkgwa tše di se nago komelo, wo ba rego ke Paseka, o be o šetše o batametše. Baprista ba bagolo le boramangwalo ba be ba nyaka ka mo ba ka bolayago Jesu ka gona, ka gobane ba be ba tšhaba setšhaba. Ke moka Sathane a tsena Judase yo ba rego ke Iskariote, yo e bego e le yo mongwe wa barutiwa bale ba lesome le ba babedi. Yena a tloga a ya go baprista ba bagolo le go mantona a baleti ba Tempele, a fihla a lakana nabo ka mo a ka ba gafelago Jesu ka gona. Bona ba thaba, gomme ba kwana naye gore ba tla mo lefa ka tšhelete. Judase a dumela, gomme a thoma go nyaka nako ye e lebanego ya go ba gafela yena batho ba sa tsebe. Letšatši la fihla la Monyanya wa Dinkgwa tše di se nago komelo ge dikwanyana tša Paseka di swanetše go hlabja. Jesu a roma Petrose le Johanese a re: “Sepelang le yo re lokišetša dijo tša Paseka.” Bona ba mmotšiša ba re: “O nyaka gore re yo go lokišetša tšona kae?” A ba fetola a re: “E tla re ge le tsena motseng la gahlanetšwa ke monna yo mongwe a rwele motšega wa meetse. Le mo latele le tsene ka lapeng le a tsenago ka go lona, gomme le botše monglapa leo le re: ‘Moruti o rile re tle re botšiše gore na phapoši yeo yena le barutiwa ba gagwe ba ka jelago Paseka ka go yona e kae.’ O tla le bontšha phapoši ye kgolo ya ka godimo, ye e lokišeditšwego go jela. Le lokiše dijo tša Paseka ka go yona.” Barutiwa bale ba tloga, ba fihla ba hwetša go le bjalo ka ge Jesu a be a ba boditše, gomme ba lokiša dijo tšeo tša Paseka. Ge nako e fihla, Jesu a dula dijong le baapostola ba gagwe. A re go bona: “Ke dumile kudu go ja Paseka ye le lena pele ke hlokofatšwa. Gobane ke le botša gore nka se sa e ja go fihlela e phethagatšwa mmušong wa Modimo.” Ya ba o tšea senwelo, o leboga Modimo o re: “Tšeang senwelo se le se nweng ka go šielana. Ke le botša gore nka se sa nwa beine go fihlela mohla mmušo wa Modimo o hlongwa.” A tšea senkgwa, a leboga Modimo, a se ngwathaganya, a ba neela sona a re: “Se ke mmele wa ka wo o gafiwago ka baka la lena. Le dire bjalo gore e be gona go nkgopola.” Ka wona mokgwa woo a ba neela le senwelo ge ba seno lalela a re: “Senwelo se ke kgwerano ye mpsha ya Modimo ye e tiišitšwego ka madi a ka ao a tšhollelwago lena.” “Fela tsebang, yo a nkekago o na le nna gona mo tafoleng. Morwamotho go tloga gona o tla tloga, bjalo ka ge Modimo a beakantše, eupša yo madimabe ke motho yo a tlago mo eka!” Ba nama ba thoma go botšišana seng gore na e ka ba ke mang mo go bona yo a tlilogo dira taba ye. Gwa tsoga kgang mo go barutiwa ba Jesu ya gore na ke ofe mo go bona yo a swanetšwego ke bogolo. Jesu a re go bona: “Magoši a baditšhaba a gatelela ditšhaba tša ona, le babuši ba tšona go thwe ke ‘Bomothušabatho’. Fela go lena go se ke gwa ba bjalo; go upše go re yo mogolo mo go lena e be yena yo monyenyane, le moetapele a be bjalo ka mohlanka wa lena. Kgane yo mogolo ke ofe? Ke yo a dutšego dijong goba ke yo a mo hlankelago? Ga ke re ke yo a dutšego dijong? Eupša nna mo go lena ke etša yo e lego mohlanka. “Lena le bile le nna ka mehla melekong ya ka, ka gona, bjalo ka ge Tate a mpeile mmuši, le nna ke tla le bea babuši. Le tla ja, la nwa le nna mmušong wa ka, la dula ditulong tša bogoši la buša dikgoro tša Israele tše lesome le metšo ye mebedi.” Morena a re go Simone: “Simone, Simone! Tseba gore Sathane o inyaketše go le leka a le fefera bjalo ka mabele; gomme Modimo a mo dumelela. Eupša wena ke go rapeletše gore o se felelwe ke tumelo, gomme ge o šetše o boetše o mpotegela, o thuše badumedikawena go tielela tumelong.” Petrose a mo fetola a re: “Morena, nnaena ke ikemišeditše le go ya le wena kgolegong, ešita le gona go hwa le wena!” Jesu a re go yena: “Petrose, ke a go botša, gona bošegong bjo mokoko o tla re o sešo wa lla, wa be o ntatotše gararo.” A ba botšiša a re: “Na nako yela ke le romile le se na sekhwama, le se na mokotla wa mokgopedi, le se na dieta, le kile la hloka selo?” Ba mo fetola ba re: “Aowa, le gatee.” Yena a re: “Fela bjale yo a nago le sekhwama a se tšee, le yo a nago le mokotla wa mokgopedi a o tšee; yo a se nago tšhoša a rekiše kobo ya gagwe a e reke. Gobane ke le botša gore Mangwalo a Makgethwa a a mpolelago a re: ‘O badilwe le dikebeka,’ a swanetše go phethega, gobane tše di ngwadilwego ka nna di a phethega.” Bona ba re: “Tše pedi ditšhoša šedi, Morena!” Yena a ba fetola a re: “Taba ye e tlogeleng.” Jesu a tloga motseng, a ya Thabeng ya Mehlware bjalo ka mehleng; barutiwa ba gagwe ba mo latela. Ge a fihla fao a re go bona: “Rapelang gore le se lekwe.” Ke ge a fetela pejana mo go fihlago leswika ge le fošwa ke motho, a fihla a khunama, a rapela a re: “Tate, ge o rata, tloša senwelo se sa tlaišego mo go nna; fela go se phethege ya ka thato, go upše go phethege ya gago.” Morongwa wa go tšwa legodimong a itšweletša go yena, a mo tiiša. Jesu a tiiša go rapela a tlaletšwe a etšwa kudumela ye nkego ke madi a rotha. Ge a emelela moo thapelong ya gagwe, a boela go barutiwa bale ba gagwe gomme a ba hwetša ba robetše, ba lapišitšwe ke manyami. A re go bona: “Ao! Le robetše? Tsogang le rapele, gore le se lekwe.” E rile ge Jesu a sa bolela gwa fihla lekoko le etilwe pele ke Judase, e lego yo mongwe wa barutiwa bale ba lesome le ba babedi. A ya go Jesu gore a mo atle. Jesu a mmotšiša a re: “Judase, na o ka napa wa eka Morwamotho ka go mo atla?” Bao ba bego ba na le Jesu ge ba bona se se tlago direga, ba mmotšiša ba re: “Morena, re ba hlasele ka ditšhoša?” Ke ge yo mongwe wa bona a rema mohlanka wa Moprista yo Mogologolo a mo kgaola tsebe ya la go ja. Jesu a re: “Lesang! Le se sa boeletša!” A napa a kgwatha tsebe ya mohlanka yoo, a mo fodiša. A re go baprista ba bagolo le mantona a baleti ba Tempele le bagolo ba setšhaba ba ba bego ba tletše go mo swara: “Le reng le tlile ka ditšhoša le dithoka mo nkego ke nna mohlakodi? Ke be ke ehlwa le lena Tempeleng tšatši le lengwe le le lengwe, le sa ntshware. Eupša bjale ye ke yona nako ya lena, nako ye e laolwago ke Sathane, molaodi wa mmušo wa leswiswi.” Ba re go swara Jesu ba tloga naye, ba mo iša ga Moprista yo Mogologolo; Petrose le yena a ba latela a le kgojana. Go be go goditšwe mollo mo gare ga lapa, gomme a ya a dula le ba ba bego ba oretše mollo woo. Ngwanenyana yo mongwe a mmona a dutše moo mollong, a mo lebelela ka mahlong a re: “Monna yo le yena o be a na le Jesu!” Petrose a latola a re: “Kgarebe, nna le go mo tseba ga ke mo tsebe!” Ka moragonyana monna yo mongwe le yena a mmona a re: “Etse le wena o yo mongwe wa bona!” Petrose a mo fetola a re: “Monna, ga go bjalo!” Gwa feta nako ye e ka bago iri e tee gomme yo mongwe monna a bolela a tiišitše a re: “Ka nnete, monna yo le yena o be a na le Jesu! Ebile ke Mogalilea!” Petrose a mo fetola a re: “Monna, se o se bolelago nna ga ke se tsebe!” A sa realo, gateetee ke ge mokoko o lla. Morena a retologa, a hlaba Petrose ka leihlo ya ba gona Petrose a elelwago se Morena a mmoditšego sona mola a re: “Gona bošegong bjo, pele mokoko o lla, o tla be o ntatotše gararo.” Ke ge a tšwela ka ntle a lla gabohloko. Banna ba ba bego ba letile Jesu ba be ba mo kwera ba bile ba mmetha. Ba mo khupetša mahlo, ba mmotšiša ba re: “Ka ge o moprofeta, re botše gore o bethilwe ke mang!” Ba mo nyefola le ka tše dingwe tše dintši. Ge go esa, bagolo ba setšhaba le baprista ba bagolo le boramangwalo ba kgobokana mme ba tliša Jesu kgorong ya bona. Ba re: “Ge eba ke wena Mesia, re botše.” Yena a ba fetola a re: “Le ge nka le botša le ka se nkgolwe, le ge nka le botšiša taba le ka se mphetole. Fela go thoma gonabjale Morwamotho o tla dula ka letsogong la go ja la maatla a Modimo.” Ka moka ga bona ba napa ba mmotšiša ba re: “Kgane ke wena Morwa wa Modimo?” Yena a ba fetola ka go re: “Le a bolela.” Bona ba re: “Dihlatse re sa di iša kae? Rena beng re a ikwela ge a bolela ka wa gagwe molomo!” Kgoro yela ka moka ya emelela ya iša Jesu go Pilato, ba fihla ba mmega ba re: “Motho yo re mo hweditše a timetša setšhaba sa gaborena, a re ba se ke ba ntšhetša Kesare metšhelo, a bile a re ke yena Mesia, ke yena kgoši.” Pilato a mmotšiša a re: “Kgane ke wena kgoši ya Bajuda?” Jesu a mo fetola ka go re: “O a bolela.” Pilato a botša baprista ba bagolo le lešaba la batho a re: “Nna motho yo ga ke mmone molato.” Ya ba gona ba phegelelago le go feta ba re: “O ferekanya setšhaba nageng yohle ya Bajuda. O thomile kua Galilea gomme bjale o tlile mo.” Pilato ge a ekwa ba bolela ka Galilea, a ba botšiša gore na kgane ke Mogalilea. Ge a ekwa gore ke wa selete se se bušwago ke Heroda, a mo romela go Heroda yo le yena mehleng yeo a bego a le Jerusalema. Heroda ge a bona Jesu a thaba kudu, ka gobane o be a šetše a kwele ka ga yena gomme e le kgale a nyaka go mmona. O be a holofetše gore o tla bona Jesu a dira mohlolo. A mmotšiša ditaba tše dintši, fela Jesu a se fetole selo. Baprista ba bagolo le boramangwalo ba ema ba mmega ba gaketše. Heroda le bahlabani ba gagwe ba mo gegea ba mo kwera. Ba mo apeša kobo ya mabaibai, ba mmušetša go Pilato. Go tloga ka lona tšatši leo Heroda le Pilato ya ba bagwera, etšwe pele ga moo ba be ba sa kwane. Pilato a kgoboketša baprista ba bagolo le a mangwe maloko a Kgorokgolo ya Bajuda le lona lešaba, a re go bona: “Le tlišitše motho yo mo go nna la re o timetša setšhaba. Ke mo sekišitše mo pele ga lena, gomme le e tee ya tše le mmegago ka tšona ka se e hwetše. Heroda le yena ga se a mmona molato, ka gore o mmušeditše mo go rena. Ruri, ga go se motho yo a se dirilego se se mo dirago gore a lebanwe ke go bolawa. Ka gona ke tla laela gore a re go bethwa ka tshelane a lokollwe.” *** Lekoko lela la goa mmogo la re: “Mmolaye! O re lokollele Barabase!” Gape Barabase yo o be a lahletšwe kgolegong ka ge a be a badilwe le bahlolampherefere motseng wa Jerusalema, e le mpherefere woo go wona go bego go bolailwe motho. Pilato, ka ge a be a nyaka go lokolla Jesu, a hlaboša lentšu a ba kgopela gape. Eupša bona ba fela ba goeletša ba re: “Mmapole sefapanong! Mmapole sefapanong!” A ba botšiša la boraro a re: “E le gore o sentšeng? Gape nna ga se ka hwetša a dirile se go lebanego gore a ka se bolaelwa. Ka gona ke tla laela gore a re go bethwa ka tshelane a lokollwe.” Bona ba fela ba goeletša ba re a bapolwe sefapanong ba ba ba tšwelela. Pilato a ahlola Jesu ka mo ba kgopelago ka gona. A lokolla motho yo ba mo nyakago, yena yola a bego a lahletšwe kgolegong ka baka la mpherefere le polao, gomme a ba gafela Jesu gore ba dire ka yena se ba se nyakago. Ya re ge ba tloga le Jesu, ba swara monna yo mongwe wa Sirene yo leina la gagwe e bego e le Simone, a etšwa mašemong a eya motseng. Ba mo athiša sefapano sa Jesu, ba re a mo šale morago. Jesu a ya a latetšwe ke lešaba le lentši la batho, leo gare ga lona go bego go na le basadi ba ba bego ba ithwele megono ba mo llela. A retologela go bona, a re go bona: “Lena basadi ba Jerusalema, se lleleng nna; iteleleng, le llele le bana ba lena! Gobane matšatši a etla ao ka ona batho ba tlago re: ‘Ba mahlatse ke basadi ba baopa, le ba ba sego ba ka ba belega, goba ba nyantšha!’ Ke mohla batho ba tlago botša dithaba ba re: ‘Re weleng godimo!’ ba botša meboto ba re: ‘Re khupetšeng!’ Gobane ge legong la moketla ba le dira tše, le le omilego lona ba tla le dirang?” Le ba bangwe banna ba babedi ba dikebeka ba gapša gore ba yo bolawa le Jesu. Ge go fihlwa felo mo go bitšwago “Legateng”, ba bapola Jesu sefapanong. Ba bapola le dikebeka tšela tše pedi, se sengwe sa ba ka letsogong la go ja, se sengwe ka go la nngele. Jesu a re: “Tate, ba lebalele, gobane ga ba tsebe se ba se dirago!” Ba abelana diaparo tša gagwe ka go tema. Batho ba be ba eme moo ba lebeletše ge maloko a Kgorokgolo ya Bajuda le ona a mo kodutla a re: “O hlakodišitše ba bangwe; a a itlhakodiše ge, ge eba ke Mesia yo Modimo a mo kgethilego!” Bahlabani le bona ba mo kwera ba mmatamela, ba mo fa beine ye bodila, ba re: “Ge o le kgoši ya Bajuda, itlhakodiše!” Ka godimo ga hlogo ya gagwe go be go ngwadilwe go re: “Yo ke Kgoši ya Bajuda.” Yo mongwe wa dikebeka tšela di bego di bapotšwe moo a mo nyefola a re: “Ge o le Mesia, itlhakodiše, le rena o re hlakodiše!” Yola yo mongwe a mo kgala a re: “Kganthe ga o tšhabe Modimo, le ge o otlwa bjalo ka yena? Rena go re lebane, ka gobane re otlelwa se se swanelago tše re di dirilego, eupša yo yena ga go phošo ye a e dirilego.” Ke moka a re go Jesu: “Morena, o nkgopole mohla o thoma go buša.” Jesu a mo fetola a re: “Ruri, ke go botša gore lehono o tla ba le nna paradeising.” E rile ka nako ya mosegare wo mogolo letšatši la fifala, naga ka moka ya aparelwa ke leswiswi go fihla ka nako ya boraro mathapama. Seširo sa ka Tempeleng sa gagoga ka bogare. *** Jesu a goelela kudu a re: “Tate, ke gafela moya wa ka diatleng tša gago!” A re go realo a ikhwela. Molaodi wa bahlabani ba lekgolo ge a bona tše di diregilego a re: “Ka nnete motho yo e be e le moloki!” Go realo ya ba gore o tumiša Modimo. Batho ka moka ba ba bego ba kgobokane moo go tlo bogela, ba rile go di bona ba boela magae ba hlomogile pelo. Bohle ba ba bego ba tsebana le Jesu, gotee le basadi bale ba go tla le yena ge a etšwa Galilea, ba be ba eme kgojana ba lebeletše. Go be go na le monna yo mongwe yo leina la gagwe e bego e le Josefa wa go tšwa Arimathea, e lego motse wo mongwe wa Bajuda. Yena e be e le monna wa go loka, wa morapedi, yo a bego a letetše go bona mmušo wa Modimo o hlongwa. Le ge e be e le wa Kgorokgolo ya Bajuda, o be a se a kwana le bona morerong woo wa bona le go tšeo ba bego ba di dirile. *** O ile a ya go Pilato, a fihla a mo kgopela setopo sa Jesu. A se fološa, a se phuthela ka lešela, a se bea ka lebitleng le le bego le gwailwe leswikeng, lebitla leo ka go lona go bego go se gwa ka gwa bolokwa motho. E be e le Labohlano, gomme Sabatha e šetše e le kgauswi. Basadi bale ba go tla le Jesu ge a etšwa Galilea ba ile ba latela Josefa, gomme ba bona lebitla la gona, le ka mo setopo sa Jesu se beilwego ka go lona ka gona. Ke moka ba boela gae ba yo lokiša dinoko le dinkgabose tša go tlotša setopo. Ka tšatši la Sabatha ba se šome, e le gona go phetha molao wa Moshe. E rile ka masa a letšatši la Sontaga basadi bale ba ya lebitleng ba swere dinoko tše ba bego ba di lokišitše. Ba hwetša leswika la go tswalela lebitla le kgokološitšwe le tlošitšwe lebitleng, ka gona ba tsena, fela ba se hwetše setopo sela sa Morena Jesu. Ba re ba sa tlabegile, gateetee ba bona banna ba babedi ba eme kgauswi le bona ba apere diaparo tša mabaibai. Ba rile ba sa tšhogile mme ba inametše fase ka difahlego, banna bao ba re go bona: “Yo a phelago le reng le mo nyaka go ba ba hwilego? Mo ga a gona, o tsogile bahung. Gopolang tšela a le boditšego tšona mola a sa le Galilea a re: ‘Morwamotho o swanetše go gafelwa diatleng tša batho ba badiradibe, a bapolwe sefapanong, gomme ge go fetile matšatši a mararo a tsoge bahung.’ ” Ke mo ba eletšwego tše Jesu a ilego a di bolela. Ba tloga moo lebitleng, ba yo botša barutiwa ba Jesu ba lesome le o tee le balatedi ba bangwe bohle ditaba tšeo ka moka. Basadi bao e be e le Maria Magadalena, le Johana, le Maria, mmagoJakobose, le ba bangwe basadi ba ba bego ba na le bona. Ke bona ba go botša baapostola ditaba tšeo. Eupša baapostola ba gopola gore basadi bao ba bolela ditšiebadimo, gomme ba se ba kgolwe. Petrose a nanoga a kitimela lebitleng; a fihla a okamela, a se bone selo ge e se mašela ale. Ke moka a boela gae a tlabilwe ke se se diregilego. Ka lona tšatši leo balatedi ba Jesu ba babedi ba be ba le leetong la go ya Emause, motse wo o lego dikilometara tše e ka bago tše lesome le metšo ye mebedi go tloga Jerusalema, gomme ba boledišana ka tšohle tše di diregilego. Ge ba ntše ba bolela ba anegelana bjalo, yena Jesu ka nama a ba batamela, a sepela le bona. Ba se mo tsebe ka gobane ba be ba širegile. A ba botšiša a re: “Ke ditaba mang tše le tšamago le boledišana ka tšona tše?” Ba ema, ba bonala ba nyamile. Gwa fetola yo mongwe wa bona yo ba rego ke Kleopase a re: “Afa ga se wena mofaladi wa Jerusalema o nnoši yo a sa tsebego tše di diregilego kua ona matšatšing a?” Jesu a ba botšiša a re: “Dife?” Bona ba re: “Tša Jesu wa Nasaretha. Yena e be e le moprofeta yo Modimo le setšhaba ka moka ba bego ba mmona e le yo maatla go tše a di bolelago le tše a di dirago. Baprista ba bagolo le a mangwe maloko a Kgorokgolo ya rena ba ile ba mo gafela go ahlolelwa lehu, ba ba ba dira gore a bapolwe sefapanong. Rena re be re holofetše gore ke yena a tlago phološa setšhaba sa Israele. Lehono e bile ke tšatši la boraro ditaba tše di diregile. Fela re tlabilwe kudu ke basadi ba bangwe ba gaborena; ba tsogile ba ile lebitleng e sa le ka meso, gomme ba hwetša setopo sela sa gagwe se se gona. Ba boa ba re botša gore barongwa ba iponagaditše go bona ba ba botša gore o a phela. Ba bangwe ba rena ba ile ba ya lebitleng, gomme ba hwetša go le ka mo basadi bale ba boletšego ka gona, fela yena ba se mmone.” Ke mo Jesu a rilego go bona: “Aowii, lena! Ga se ka ge le hloka kelelo! Le diega bjang go dumela tšohle tše di boletšwego ke baprofeta! Na kgane e be e se tshwanelo gore Mesia a tlaišwe ka dilo tše, a kgone a yo ba letagong la gagwe legodimong?” A ba hlalošetša tše di boletšwego ka Mangwalong ohle a Makgethwa mabapi le yena go thoma dipukung tša Moshe le tša baprofeta ka moka. Ya re ge ba batamela motsana wo ba bego ba eya go wona, Jesu a dira tše nkego o fetela pele; eupša bona ba mo tutuetša ba re: “Lala le rena; tšatši le šetše le diketše, leswiswi le lona le šetše le swara.” Ka gona a tsena le bona gore a dule nabo. Ya re ge a le dijong le bona, a tšea senkgwa, a tumiša Modimo, a mo leboga, a se ngwathaganya, a ba fa sona. Ke mo ba bulegilego mahlo, ba napa ba mo tseba, eupša yena a timelela ba mo lebeletše. Ba šala ba botšišana ba re: “Afa ga se sona se se dirilego gore re ikwe re kukega mola a bolela le rena kua tseleng a re phuthollela Mangwalo a Makgethwa?” Ba emelela le semeetseng ba boela Jerusalema, ba hwetša barutiwa bale ba Jesu ba lesome le o tee ba kgobokane le balatedi ba gagwe ba bangwe ba re: “Ka nnete Morena o tsogile bahung, o bonwe ke Simone!” Ke moka bale ba babedi ba ba anegela tše di ba hlagetšego mo tseleng, le ka mo ba tsebilego Morena ge a ngwathaganya senkgwa. Bale ba babedi ba rile ba sa ba anegela, Jesu a be a eme gare ga bona, a ba dumediša a re: “Khutšo a e be le lena!” Bona ba tšhoga kudu ba boifa, ba gopola gore ba bona seriti. Fela yena a ba botšiša a re: “Le reng le tšhogile le bile le belaela? Bonang diatla tša ka le maoto – ke nna ka sebele. Mphopholeng, le tla iponela ka bolena, gobane seriti ga se na nama le marapo bjalo ka nna ge le mpona.” Ge a realo a ba bontšha diatla tša gagwe le maoto. Ba be ba thabile ba bile ba maketše mo ba ilego ba no se mo dumele; ka gona a ba botšiša a re: “Na ga le na sa go ja mo?” Ke ge ba mo fa seripana sa hlapi ye e apeilwego, gomme a se tšea a se ja ba mmona. Ke moka a re go bona: “Tše ke ilego ka le botša tšona mola ke sa na le lena šedi; tšohle tše di ngwadilwego ka melaong ya Moshe le ka dipukung tša baprofeta le ka dipesalomeng mabapi le nna di swanetše go phethega.” Ya ba gona a ba sedimošago ditlhaologanyo gore ba kwešiše Mangwalo a Makgethwa, gomme a re go bona: “Go ngwadilwe gwa thwe: Mesia o swanetše go hlokofatšwa le go bolawa, gomme ka morago ga matšatši a mararo a tsoge bahung; gwa ba gwa thwe ka taelo ya gagwe ditšhaba tšohle, go thoma Jerusalema, di swanetše go begelwa tshokologo le tshwarelo ya dibe. Lena le dihlatse tša ditaba tše ka moka. Gomme nna ka noši ke tla le romela se le se holofeditšwego ke Tate. Fela le letele gona mo motseng go fihlela le hlangwa ka maatla a go tšwa legodimong.” A ba ntšhetša ka ntle ga motse ba ya Bethania, moo a fihlilego a emiša diatla a ba šegofatša. Ya re a ntše a ba šegofatša bjalo, a tloga mo go bona a rotošetšwa legodimong. Bona ba mo khunamela, ya ba ba boela Jerusalema ba thabile e le ruri, gomme ba dula ba le Tempeleng ba tumiša Modimo. Pele ga ge lefase le hlolwa, Lentšu o be a ntše a le gona, a le go Modimo, ebile ka boyena e le Modimo. E sa le a eba go Modimo go tloga le go tloga. Tšohle di hlodilwe ka yena, gomme go tše di hlodilwego ga go le se tee se se sego sa hlolwa ka yena. Dihlolwa tšohle di hweditše bophelo ka yena, bophelo bjo e bilego seetša sa batho. Seetša seo se bonega leswiswing, gomme leswiswi ga se la kgona go se fenya. Modimo o kile a roma monna yo mongwe yo leina la gagwe e bego e le Johanese. O be a tlile go begela batho seetša, gore bohle ba kwe se a se begago gomme ba se dumele. Yena ka boyena e be e se seetša; se a bego a se tletše e be e le go bega seetša. Seetšaetša sa go bonegela batho bohle se be se etla lefaseng. Lentšu o be a le lefaseng, gomme le ge Modimo a hlodile lefase ka yena, batho ba lona ga se ba mo amogela. O be a tlile ga gabo, fela ba gabo ba se mo amogele. Eupša ba ba ilego ba mo amogela mme ba dumela go yena, bona a ba fa tokelo ya go ba bana ba Modimo. Ya ba bana ba Modimo, e sego ka go tswalwa bjalo ka bana ba bangwe, e sego ka go tswalwa ka tumo ya nama, goba ka thato ya monna, eupša ka go tswalwa ke Modimo ka boyena. Yena Lentšu e bile motho, a dula le rena e le yo botho kudu go rena, a re utollela ka botlalo se Modimo a lego sona. Ra bogela letago la gagwe, letago le a le filwego ke Tatagwe, e le yena Morwa a nnoši wa Tatagwe. Johanese o be a bolela ka yena mola a goeletša a re: “Ke be ke era yena yo ge ke be ke re: ‘Yo a ntlhatlamago o mpheta ka maemo, ka gobane o be a le gona pele nna ke tswalwa.’ ” Ka ge a re loketše kudu, o re šegofaditše bohle, a re šegofatša leboelela. Melao Modimo o re file yona ka Moshe, gomme ka Jesu Kriste a re utollela ka mo e lego yo botho go rena ka gona, a ba a re utollela se a lego sona. Ga go motho yo a kilego a bona Modimo. Batho ba mo tseba ka go mo utollelwa ke Morwagwe, Motswalwanoši, yo ka boyena e lego Modimo, yo a lego kgauswi le Tatagwe. Mola baetapele ba Bajuda Jerusalema ba romile baprista le Balefi go Johanese gore ba ye go mmotšiša gore ke yena mang, yena o ile a ipega, a se gane go ba fetola, a bolela phaa a sa iphihle a re: “Ga se nna Mesia.” Ba mmotšiša ba re: “Bjale o mang? Kgane ke wena Eliya?” Yena a re: “Aowa, ga ke yena.” Ba re: “Kgane e ka ba o yena Moprofeta?” A ba fetola a re: “Aowa.” Ba napa ba re: “Gona re botše gore o mang, gore re yo botša ba ba re romilego. O reng ge o ipega?” Johanese a ba fetola ka go tsopola se se boletšwego ke moprofeta Jesaya a re: “ ‘Ke nna segoeledi lešokeng se se rego: Otlollelang Morena tsela!’ ” Baromiwa bao ba bego ba romilwe ke Bafarisei ba botšiša Johanese ba re: “Bjale ge eba ga o Mesia, ga o Eliya, ebile ga o yena Moprofeta, o reng o kolobetša?” Johanese a ba fetola ka go re: “Nna ke kolobetša ka meetse, fela mo gare ga lena go na le yo le sa mo tsebego. Ke yena yo a ntlhatlamago, eupša nna le go mmofolla marala a dieta ga se gwa ntshwanela.” Ditaba tšeo ka moka di diregile Bethania ka mošola wa noka ya Jordane, moo Johanese a bego a kolobetša gona. Ka tšatši le le latelago Johanese a bona Jesu a etla go yena. A re: “Bonang Kwanyana ya Modimo ye e tlošago dibe tša lefase! Ke yena yo ke bego ke bolela ka yena mola ke re: ‘Monna yo a ntlhatlamago o mpheta ka maemo, ka gobane o be a le gona pele nna ke tswalwa.’ Le nna ke be ke sa tsebe gore ke ofe, etšwe ke tšwetše ke kolobetša ka meetse gore a tle a utollelwe setšhaba sa Israele.” Johanese o hlatsetše ka go re: “Ke bone Moya o theoga legodimong nke ke leeba, wa fihla wa dula godimo ga gagwe. Nna ke be ke sa tsebe gore ke yena, fela Modimo yo a nthomilego go yo kolobetša ka meetse o be a rile go nna: ‘Yo o bonago Moya o theogela go yena o dula godimo ga gagwe, ke yena yo a kolobetšago ka Moya wo Mokgethwa.’ Bjale ke bone, gomme ke hlatsela gore ke yena Morwa wa Modimo.” Ka tšatši le le latelago Johanese o be a le moo gape a na le ba babedi ba barutiwa ba gagwe. Ya re ge a bona Jesu a feta, a re: “Bonang Kwanyana ya Modimo!” Barutiwa bao ba babedi ba mo kwa ge a realo, gomme ba latela Jesu. Jesu a retologa, a ba bona ba mo latela, a ba botšiša a re: “Etse le nyakang?” Bona ba re: “Rabi,” (ke go re “Moruti”), “na o dula kae?” A ba fetola a re: “A re yeng le yo bona.” E be e šetše e le iri ya bone mathapama. Ke moka ba ya le yena ba yo bona mo a dulago gona, ba hlwa le yena tšatši leo. Yo mongwe wa bao ba babedi ba go re go kwa Johanese a bolela ba latela Jesu e be e le Andrease, ngwanaboSimone Petrose. Yena a raka a yo nyaka Simone, mogolwagwe, gomme ge a mo hweditše, a re: “Re hweditše Mesia!” (Ke go re “Kriste”.) A nama a iša Simone go Jesu. Jesu ge a mmona a re: “Etse ke wena Simone, morwa wa Johanese, fela o tla bitšwa Kefase.” (Ke go re “Petrose”.) Ka tšatši le le latelago Jesu ge a re o ya Galilea a hwetša Filipi, gomme a re go yena: “Ntatele!” Yo Filipi ga gabo e be e le Betsaida, motse wa gaboAndrease le Petrose. O rile go hwetša Nathaniele, a re go yena: “Re hweditše yola Moshe a ngwadilego ka yena ka pukung ya melao, le baprofeta ba ngwadilego ka yena; ke Jesu wa Nasaretha, morwa wa Josefa.” Nathaniele a mmotšiša a re: “Na go na le se sebotse se se ka tšwago Nasaretha?” Filipi a mo fetola a re: “A re ye o yo bona.” Ge Jesu a bona Nathaniele a etla go yena, a bolela ka yena a re: “Šo Moisraele wa mmakgonthe yo a se nago bomenetša.” Nathaniele a mmotšiša a re: “O ntsebela kae?” Jesu a mo fetola a re: “Ke go bone o le mola moriting wa mogo, pele ga ge Filipi a go bitša.” Nathaniele a mo fetola a re: “Moruti, o Morwa wa Modimo! Ke wena Kgoši ya Israele!” Jesu a re: “Na o dumela ka ge ke go boditše gore ke go bone o sa le mola moriting wa mogo? O sa tlilo bona tše di fetago tšeo.” A tšwela pele a re: “Ruri, ruri, ke le botša gore le tla bona legodimo le bulegile gomme barongwa ba Modimo ba namelela ba bile ba theogela go Morwamotho.” Ge go seno feta matšatši a mabedi gwa ba le monyanya wa lenyalo motseng wa Kana, nageng ya Galilea. MmagoJesu le yena o be a le gona. Jesu le barutiwa ba gagwe le bona ba be ba laleditšwe moo monyanyeng. Ya re ge beine e hlaetše, mmagoJesu a re go yena: “Ga ba sa na beine.” Jesu a mo fetola ka go re: “Mma, etse tša ka o di tsena bjang? Gape nna nako ya ka ga sešo ya fihla.” MmagoJesu a botša bahlanka a re: “Le dire tšohle tše a le botšago tšona.” Ka lapeng leo go be go beilwe dipitša tše di selelago tša maswika, ye nngwe le ye nngwe e tlatšwa ke metšega ye mebedi go iša go ye meraro. Go ya ka setlwaedi sa Bajuda meetse a gona a be a šomišetšwa go itlhwekiša. Jesu a botša bahlanka a re: “Tlatšang dipitša tšeo meetse.” Ba di tlatša pshi. A nama a re go bona: “Bjale egang le išetše moswaramarapo.” Ba mo išetša. Ya re ge a ekwa meetse ao a fetogilego beine ye a sa tsebego gore e tšwa kae, go tseba bahlanka bale ba go ga meetse, a bitša monyadi a re go yena: “Batho ka moka ba thoma ka go ntšha beine ye bose; ge batho ba nwele go kgolwa, ba kgone ba ntšha ye e sego bose kudu. Fela wena ke gona o ntšhitšego ye bose gonabjale!” Mohlolo wo wa mathomo Jesu o o dirile motseng wa Kana, nageng ya Galilea, a bontšha batho bogolo bja gagwe, mme barutiwa ba gagwe ba dumela go yena. Ka morago ga moo Jesu le mmagwe le banababo le barutiwa ba gagwe ba ya Kapernaume, ba fihla ba dula gona matšatšinyana. Monyanya wa Bajuda wa Paseka o be o šetše o le kgauswi, ka gona Jesu a ya Jerusalema. Kua Tempeleng a fihla a hwetša babapatši ba dikgomo le ba dinku le ba maeba, a hwetša go dutše le ba go rekanya ditšhelete. A loga tshelane ka dithapo, a ba raka Tempeleng ka moka ga bona, le dinku le dikgomo, a gašanya ditšhelete tša barekanyi ba ditšhelete, a ba a menola ditafola tša bona, gomme a laela babapatši bale ba maeba a re: “Ntšhang dilo tšeo ka mo! Le se sa dira ntlo ya Tate bobapaletšo!” Barutiwa ba gagwe ba napa ba elelwa gore go ngwadilwe ka Mangwalong a Makgethwa gwa thwe: “Modimo, ke jewa ke go fišegela ntlo ya gago.” Bajuda ba mmotšiša ba re: “O ka re bontšha ka mohlolo mang gore tše o di dirago tše di go lebane?” Jesu a ba fetola ka go re: “Kgerešang Tempele ye, gomme ka matšatši a mararo ke tla e tsoša.” Bona ba mmotšiša ba re: “Tempele ye go tšerego mengwaga ye masome a mane le metšo ye e selelago go e aga, wena o ka nama wa e tsoša ka matšatši a mararo?” Jesu ge a re Tempele o be a era mmele wa gagwe. E rile ge a šetše a tsogile bahung barutiwa ba gagwe ba elelwa gore taba ye o be a kile a e bolela, gomme ba dumela Mangwalo a Makgethwa le se Jesu a ilego a se bolela. Mola Jesu a le Jerusalema ka nako ya Monyanya wa Paseka, batho ba bantši ba ile ba dumela go yena ge ba bone mehlolo ye a e dirago. Eupša yena a se ikanye bona ka gobane o be a ba tseba bohle, gomme go sa nyakege gore a botšwe ke motho tša yo mongwe, ka ge a be a itsebela ka boyena tša ka pelong ya motho. Go be go na le leloko le lengwe la Kgorokgolo ya Bajuda yo leina la gagwe e bego e le Nikodemose, e le yo mongwe wa Bafarisei. O kile a ya go Jesu e le bošego, a fihla a re go yena: “Moruti, re a tseba gore o moruti yo a tšwago go Modimo, gobane ga go motho yo a ka kgonago go dira mehlolo ye o e dirago ye, ge Modimo a se na le yena.” Jesu a mo fetola ka go re: “Ruri, ruri, ke go botša gore ge motho a sa tswalwe gape, e ka se be wa mmušo wa Modimo.” Nikodemose a mmotšiša a re: “Motho a ka tswalwa gape bjang e šetše e le mokgalabje? Kgane a ka boela ka popelong ya mmagwe, a tswalwa?” Jesu a mo fetola a re: “Ruri, ruri, ke go botša gore ge motho a sa tswalwe ka meetse le ka Moya e ka se be wa mmušo wa Modimo. Gape nameng motho o tswalwa ke batswadi ba nama, mola moyeng a tswalwa ke yena Moya. O se makale ge ke go botša gore le swanetše go tswalwa gape. Moya o fokela mo o ratago gona; wa kwa modumo wa wona, fela wa se tsebe mo o tšwago goba mo o yago gona. Go bjalo ge le go bohle ba ba tswetšwego ke Moya.” Nikodemose a mmotšiša a re: “Go ka kgonega bjang?” Jesu a mo fetola a re: “Mmalo! Wa re o le moruti yo mokaaka wa Israele wa nama wa se tsebe? Ruri, ruri, ke go botša gore rena re le botša se re se tsebago, ebile re hlatsela se re se bonego, fela ga le amogele bohlatse bja rena. Ge le sa nkgolwe mola ke le botša tša mo lefaseng, ge ke le botša tša legodimong gona le tla nkgolwa bjang? Gape ebile ga go yo a kilego a rotogela legodimong, ge e se yena Morwamotho yo a theogilego gona. “Bjalo ka ge Moshe a kile a fega noga ya mphiri koteng kua lešokeng, Morwamotho le yena o swanetše go fegwa bjalo, gore mang le mang yo a dumelago go yena a tle a be le bophelo bjo bo sa felego. “Gobane Modimo o ratile lefase kudu mo a ilego a ba a le fa Morwa wa gagwe a le noši, gore mang le mang yo a dumelago go yena a se lahlege, eupša a be le bophelo bjo bo sa felego. Gape Modimo ga se a roma Morwagwe lefaseng gore a tle a le ahlole, o mo romile gore a tle a le phološe. “Yo a dumelago go Morwa wa Modimo a ka se ahlolwe, eupša yo a sa dumelego, yena o šetše a ahlotšwe, ka ge a sa dumele go Morwa a le noši wa Modimo. Kahlolo ya Modimo e tla ka mokgwa wo: Seetša se tlile lefaseng, fela batho ba ratile leswiswi go feta sona seetša, ka ge mediro ya bona e le ye mebe. Gape motho yo a dirago tše mpe o hloile seetša gomme ga a tle go sona, ka ge a sa nyake gore mediro ya gagwe e bonwe. Yo a dirago tša nnete yena o tla seetšeng gore mediro ya gagwe e bonwe e le ye e dirilwego ka go theeletša Modimo.” Ka morago ga moo Jesu le barutiwa ba gagwe ba ya nageng ya Judea, moo a ilego a fihla a dula nabo lebakanyana a kolobetša. Johanese le yena ke ge a kolobetša motseng wa Enone, kgauswi le Salime, ka ge felo moo go be go na le meetse a mantši. Batho ba be ba eya go yena gomme a ba kolobetša. Ke pele ga ge a išwa kgolegong. Barutiwa ba gagwe ba phegišana le Mojuda yo mongwe mabapi le taba ya go itlhwekiša. Ka gona ba ya go Johanese, ba fihla ba re: “Moruti, monna yola a bego a na le wena ka mošola wa Jordane, yola o bego o bolela ka yena, le yena o a kolobetša gomme batho ka moka ba ya go yena!” Johanese a ba fetola a re: “Gape ga go se motho a ka se dirago a se a laelwa ke Modimo. Lena beng le ka ntlhatsela gore ke be ke bolela ke re: ‘Nna ga ke Mesia, ke dio ba ke romilwe go mo kgorela tsela.’ Mong wa monyadiwa ke monyadi. Phelesi yena sa gagwe ke go ema a theeleditše ge monyadi a etla, gomme ge a ekwa lentšu la gagwe o thaba kudu. Ke ka mo le nna lethabo la ka bjale le phethagetšego ka gona. Gape yena setumo sa gagwe se swanetše gore se gole, sa ka se fokotšege.” Motšwagodimo ke wa maemo a go feta a bohle. Motšwalefaseng ke wa lefase gomme o bolela tša lefaseng, kganthe motšwalegodimong yena ke wa maemo a go feta a bohle. O hlatsela tše a di bonego le tše a di kwelego, eupša bohlatse bja gagwe ga bo amogelwe ke motho. Fela yo a amogelago bohlatse bja gagwe o tiiša gore Modimo ke yo a rerešago. Yo a romilwego ke Modimo o bolela mantšu a Modimo, ka gobane Modimo o mo fa Moya wa gagwe ka botlalo. TatagoMorwa o rata Morwagwe gomme o gafetše tšohle diatleng tša gagwe. Yo a dumelago go Morwagwe o na le bophelo bjo bo sa felego; yo a hlomphollago Morwagwe yena a ka se be le bophelo, eupša o tla otlwa ke Modimo go ya go ile. Bafarisei ba ile ba kwa gore Jesu o fetiša Johanese ka barutiwa le ka go ba kolobetša, etšwe nnete e le gore yena Jesu go kolobetša ga a kolobetše, go kolobetša barutiwa ba gagwe. Ka fao, ge Jesu a ekwa taba yeo, a tloga moo nageng ya Judea a boela Galilea. O be a swanetše go putla nageng ya Samaria. Moo nageng ya Samaria a fihla motseng wo mongwe wo ba rego ke Sigare, wo o lego kgauswi le tšhemo ye Jakobo a bego a e file Josefa, morwagwe. Gona moo go be go na le sediba sa Jakobo. Jesu a re go kwa a lapišitšwe ke leeto a itulela fase moo sedibeng. E be e ka ba nako ya mosegare wo mogolo. Gwa tla mosadi yo mongwe wa Mosamaria go ga meetse, gomme Jesu a mo kgopela a re: “Nke o nkgele ke nwe.” Ke ge barutiwa ba gagwe ba sa ile motseng go reka dijo. Mosadi yoo a mo fetola a re: “O ka re o le Mojuda, nna ke le mosadi wa Mosamaria, wa nkgopela meetse a go nwa?” Gape Bajuda ga ba sepelelane le Basamaria. Jesu a mo fetola a re: “Ge o ka be o tseba mpho ye Modimo a e fago batho, le gore yo a go kgopelago meetse yo ke mang, ke wena o ka bego o kgopela yena mme a go fa meetse a a phedišago.” Mosadi yoo a re: “Morena, etse le sego sa go ga ga o naso, sediba le sona se a iša, bjale meetse ao a go phediša o ka a hwetša kae? Kgane o feta Jakobo, rakgolokhukhu wa rena, yo a re filego sediba se, le yena a nwa go sona le bana ba gagwe le diruiwa tša gagwe?” Jesu a mo fetola ka go re: “Mang le mang yo a nwago meetse a o nyorwa gape, fela yo a nwago meetse a nna ke mo fago ona a ka se tsoge a nyorilwe gape. Meetse a ke tlago mo fa ona e tla ba mothopo mo go yena wa go seloga meetse a go mo fa bophelo bjo bo sa felego.” Mosadi yoo a re: “Morena, nke o mphe meetse a gona gore ke se sa nyorwa ka swanela go tla mo go ga meetse.” Jesu a re go yena: “Sepela o yo bitša monna wa gago, le tle mo.” Yena a re: “Ga ke na monna.” Jesu a re: “O a rereša ge o re ga o na monna, gobane banna ba o bilego le bona ke ba bahlano, gomme yo o dulago naye gonabjale yena ga se monna wa gago. Moo gona o mpoditše nnete.” Mosadi yoo a mo fetola a re: “Morena, ke a bona gore o moprofeta. Borakgolokhukhu ba rena ba be ba rapela Modimo mo thabeng ye, eupša lena le re felo mo go swanetšego go rapelwa gona ke Jerusalema.” Jesu a re go yena: “Mmagobatho, nkgolwe ge ke re nako e etla yeo ka yona le ka se sa rapelago Tate mo thabeng ye goba Jerusalema. Gape lena le rapela yo le sa mo tsebego, mola rena re rapela yo re mo tsebago, gobane Mophološi o tla tla ka Bajuda. Fela nako e etla, ebile e šetše e fihlile, yeo ka yona Moya wa Modimo o kgontšhago barapedi ba mmannete go rapela Tate ka mo go mo lebanego, gobane Tate o nyaka gore ba ba mo rapelago ba mo rapele bjalo. Gape Modimo ke Moya, gomme ba ba mo rapelago ba swanetše go mo rapela ka maatla a Moya le ka mo go mo lebanego.” Mosadi yoo a re go yena: “Ke a tseba gore Mesia, yo a bitšwago Kriste, o etla. Yena o tla re go tla, a re botša tšohle.” Jesu a mo fetola a re: “Ke nnaena yo a bolelago le wena yo.” Ka yona nako yeo ke ge go fihla barutiwa ba gagwe, gomme ba tlabega ge ba mo hwetša a bolela le mosadi. Fela gwa se be le yo a botšišago mosadi yoo a re: “O nyakang?” goba yo a botšišago Jesu a re: “O reng o bolela le yena?” Mosadi yola a tlogela motšega wa gagwe moo, a boela motseng, a fihla a botša batho ba gona a re: “A re yeng le yo bona motho yo a mpoditšego tšohle tše ke ilego ka di dira. Afa ga se yena Mesia?” Ke moka ba tšwa motseng ba ya go Jesu. Ge mosadi yola a sa ile barutiwa ba ile ba šala ba phegeletše Jesu ba re: “Moruti, eja!” Yena a ba fetola ka go re: “Ke na le tša go ja tše lena le sa di tsebego.” Barutiwa ba gagwe ba botšišana ba re: “Kgane go bile le yo a ilego a mo tlišetša dijo?” Jesu a re go bona: “Nna dijo tša ka ke go phetha thato ya yo a nthomilego, le go feleletša modiro wo a rilego ke o dire. Ga ke re polelo e re: ‘Kgwedi go šetše tše nne, ya ba go a bunwa’? Fela nna ke re go lena: Ntšhang mahlo dinameng, le lebelele mašemo: a šetše a re sehlee, a loketše go bunwa! Mmuni o šetše a fiwa moputso wa gagwe, a kgobela puno, e lego batho ba ba tlago ba le bophelo bjo bo sa felego. Ka gona yo a bjalago le yo a bunago ba tla thakgala mmogo. Go na le polelo ye e rego: ‘Go bjala yo, gwa buna yola.’ Nna ke le romile go yo buna se le se la kago la itapiša ka sona, go itapišitše ba bangwe, gomme lena la holega ka mošomo wa bona. Ya ba gona go bonagalago gore polelo yeo e a rereša.” *** Basamaria ba bantši ba motse woo ba ile ba dumela go Jesu ka ge mosadi yola a be a ba boditše a re: “O mpoditše tšohle tše ke ilego ka di dira.” Ke ka baka leo Basamaria ba rilego go fihla go yena ba mo phegelela gore a dule le bona, gomme a dula moo matšatši a mabedi. Ba bantši le go feta ba dumela ka go kwa tše a di bolelago, gomme ba re go mosadi yola: “Bjale ga re sa dumela ka baka la tše di boletšwego ke wena, eupša ke ka baka la ge rena beng re mo kwele, gomme re lemogile gore ka nnete ke yena Mophološi wa lefase.” Ge go seno feta matšatši ao a mabedi, Jesu a tloga a ya Galilea. Gape yena mong o be a kile a bolela a re: “Moprofeta ga a ke a hlomphiwa ga gabo.” Ge a fihla Galilea batho ba gona bona ba ile ba mo kganela, ka gobane ba be ba bone tšohle tše a di dirilego Monyanyeng wa Paseka kua Jerusalema, ka ge le bona ba be ba ile. A buša a ya Kana gona Galilea mola a bego a ile a fetoša meetse beine. Motseng wa Kapernaume go be go na le mohlankedi yo mongwe wa mmušo yo a bego a lwalelwa ke morwa. Yena o rile go kwa gore Jesu o tlile moo Galilea a etšwa Judea, a ya go yena a mo kgopela gore a ye Kapernaume go mo fodišetša morwa yo a bego a le makgatheng. Jesu a mo fetola a re: “Etse ge le sa bone matete le mehlolo ga le ke le dumela.” Mohlankedi yoo a mo fetola a re: “Morena, hle, a re ye ngwanaka a sešo a hlokafala.” Jesu a re go yena: “Sepela, morwago o tla phela!” Monna yoo a kgolwa se a se botšwago ke Jesu, gomme a sepela. A re a sa ya gae a gahlanetšwa ke bahlanka ba gagwe, ba mmotša ba re: “Morwago o phetše!” A ba botšiša gore o thomile neng go ba kaone, gomme bona ba re: “O thomile go se sa fiša maabane ka nako ya pele mosegare.” Tatagongwana a lemoga gore ke yona nako yela Jesu a rilego go yena: “Morwago o tla phela.” Ka gona yena le bohle ba lapa la gagwe ba dumela. Mohlolo wo ke wa bobedi wo Jesu a ilego a o dira ge a seno boela Galilea a etšwa Judea. Ka morago ga moo Jesu a ya Jerusalema, monyanyeng wo mongwe wa Bajuda. Moo Jerusalema go na le bodiba kgauswi le kgoro ye ba rego ke Lesoro la Dinku, bodiba bja gona ka Seheberu ba re ke Bethesda, gomme go dikologa bodiba bjo go na le mathudi a mahlano. Gona moo go be go robatšwa balwetši ba bantši – difofu le digole le barephaditho. *** Go be go na le monna yo mongwe gona moo yo a bego a feditše mengwaga ye masome a mararo le metšo ye seswai a lwala. Jesu a re go mmona a robetše moo a tseba gore o lwetše nako ye telele, ka gona a mmotšiša a re: “Na o nyaka go fola?” Molwetši yoo a mo fetola a re: “Morena, ga ke na motho yo a ka ntsentšhago ka bodibeng ge meetse a bilogile. Ge ke sa re ke yo tsena, mongwe o nthaka pele.” Jesu a re go yena: “Emelela, o tšee legogwa la gago o sepele.” Monna yoo a nama a fola, a tšea legogwa la gagwe a sepela. Tšatši la gona e be e le Sabatha, ka gona baetapele ba Bajuda ba botša monna yoo wa go fodišwa ba re: “Lehono ke Sabatha, gomme ga o dumelelwe go rwala legogwa.” Yena a re: “Monna yo a mphodišitšego ke yena a mpoditšego gore ke tšee legogwa le la ka ke sepele.” Bona ba mmotšiša ba re: “Ke mang yena monna yoo wa go go botša gore o tšee legogwa la gago o sepele?” Fela monna yoo wa go fodišwa o be a sa tsebe gore yo a mo fodišitšego ke mang, ka ge Jesu a be a ngwegetše lešaba le le bego le le moo. Ka morago ga lebakanyana Jesu a tla a mo hwetša Tempeleng, gomme a re go yena: “Ga ke re šemo o fodile; o se sa dira dibe, ka gore o ka tla wa welwa ke madimabe a go feta ale.” Ke moka monna yoo a tloga a yo botša baetapele bale ba Bajuda gore motho yo a mo fodišitšego ke Jesu. Bona ba napa ba thoma go hlomara Jesu, ka ge a fodišitše motho ka tšatši la Sabatha. Jesu a re go bona: “Tate o dula a šoma, gomme le nna ke a šoma.” Ge a realo baetapele ba Bajuda ba mo falela le go feta ba nyaka go mmolaya, ba re o rile go tshela molao wa Sabatha a ba a bolela gore Modimo ke Tatagwe, gomme ka go realo ya ba ge a itekanya le Modimo. Jesu ge a ba fetola a re: “Ruri, ruri, ke le botša gore Morwa wa Modimo a ka se kgone go dira selo ka boyena; o dira fela se a bonago Tate a se dira. Tše Tate a di dirago ke tše le nna, Morwagwe, ke di dirago. Gobane Tate o rata nna, Morwagwe, gomme o mpontšha tšohle tše a di dirago. Ebile o sa tlilo mpontšha tše dikgolo le go feta, gomme le tla tlabega. Bjalo ka ge Tate a tsoša bahu a ba phediša, le nna, Morwagwe, ke phediša bao ke ratago go ba phediša. Le gona Tate ga a ahlole motho. Maatla ka moka a go ahlola o a file nna, Morwagwe, gore bohle ba ntlhomphe, nna, Morwagwe, ka mokgwa wo ba hlomphago Tate ka wona. Yo a sa hlomphego nna, Morwa wa Modimo, ga a hlomphe Tate yo a nthomilego. “Ruri, ruri, ke le botša gore yo a theeletšago tše ke di bolelago mme a dumela go yo a nthomilego, o šetše a na le bophelo bjo bo sa felego. A ka se tšwewe, ka gore o šetše a tlogetše tsela ya go ya lehung, o swere ya go ya bophelong bjo bo sa felego. Ruri, ruri, ke le botša gore nako e etla, ebile nka re e tlile, ya gore bahu ba kwe lentšu la Morwa wa Modimo, gomme ba ba le theeletšago ba tla phela. Bjalo ka ge Tate a na le maatla a go phediša, ka wona mokgwa wo mobjalo o file le Morwagwe ona maatla a go phediša. O mo file le a go ahlola, ka ge e le yena Morwamotho. Le se makale ge ke realo; nako e etla ya gore bahu ka moka ba kwe lentšu la gagwe gomme ba tšwe ka mabitleng a bona: bao ba bego ba dira tše di lokilego ba tsogele go phelela sa ruri, gomme bao ba bego ba dira tše kgopo ba tsogele go lahlwa.” “Ka bonna ga go se ke kgonago go se dira. Ke ahlola fela ka mo ke botšwago ke Modimo, ka gona ke ahlola ka toka, ka gobane ga ke gabe go dira se se ratwago ke nna, ke gaba go dira se se ratwago ke yo a nthomilego. “Ge nkabe e le nna fela yo ke itlhatselago, bohlatse bja ka bo ka be bo sa amogelege. Eupša go na le yo mongwe yo a ntlhatselago, gomme ke a tseba gore bohlatse bjo a bo bolelago ka nna ke bja nnete. Ke Johanese yo le kilego la roma batseta ba lena go yena, gomme yena a hlatsela therešo. Ga se gore ke ikanya motho gore a ntlhatsele; ke dio boledišwa ke ge ke nyaka gore le phološwe. Johanese e be e le lebone le le tukago le bonega, gomme lena la kgahlwa kudu ke seetša sa gagwe sebakanyana. Eupša nna bohlatse bjo ke nago le bjona bo feta bjola bja Johanese, gobane mediro ye ke lego gare ke e dira, ye ke laetšwego ke Tate gore ke e phethe, e a ntlhatsela, gomme e tiišetša gore ke romilwe ke Tate. Tate yo a nthomilego le yena o a ntlhatsela. Lentšu la gagwe ga se la ka la le kwa, le yena ka sebele ga se la ka la mmona, le tše a di bolelago ga le di sware ka dipelo gobane ga le dumele yo a mo romilego. Le badišiša Mangwalo a Makgethwa ka gobane le holofela gore mo go ona le tla hwetša bophelo bjo bo sa felego, gomme ona Mangwalo a a Makgethwa ke ona a ntlhatselago. Le ge go le bjalo ga le nyake go tla go nna gore le be le bophelo bjo bo sa felego. “Ga se gore ke nyaka go tumišwa ke batho. Gape ke a tseba gore le batho ba mohuta mang, ebile ke a tseba gore Modimo yena ga le mo rate. Nna ke tlile ke romilwe ke Tate, fela ga le nkamogele; eupša mohla go ka tlago yo a itlelago, yena le tla mo amogela. Le rata go tumišwa ke batho, ga le gabe go tumišwa ke yo e lego Modimo a nnoši; bjale nna le ka ntumela bjang? Fela le se ke la gopola gore ke nna ke tlago le bega go Tate. Moshe, yo le mmotilego, ke yena a tlago le bega. Gape ge le ka be le dumela Moshe, le nna le ka be le ntumela, gobane o ngwadile ka nna. Fela ka ge tše a di ngwadilego le sa di dumele, tše di bolelwago ke nna tšona le ka di dumela bjang?” Ka morago ga moo Jesu a tshelela ka mošola wa letsha la Galilea, le ba bangwe ba rego ke la Tiberiase. A latelwa ke lešaba le lentši la batho, ka gore ba be ba mmone a dira mehlolo ya go fodiša balwetši. Jesu a namela thaba, a fihla a dula gona le barutiwa ba gagwe. Ke ge monyanya wa Bajuda wa Paseka o šetše o le kgauswi. Jesu ge a gadima ka gohle a bona gore lešaba le le tlago go yena ke le lentši, gomme a botšiša Filipi a re: “Dinkgwa tša go khoriša batho ba re tla di reka kae?” Ge a realo o be a dio mo leka, gobane yena o be a šetše a tseba se a tlago se dira. Filipi ge a mo fetola a re: “Dinkgwa tša dipapetlana tša silibera tše makgolo a mabedi di ka se ba lekane le ge e le gore yo mongwe le yo mongwe a ka dio fiwa nthathana.” Yo mongwe wa barutiwa ba gagwe, e lego Andrease, ngwanaboSimone Petrose, a re: “Go na le mošemane yo mongwe mo yo a nago le dinkgwa tše tlhano tša garase le dihlapi tše pedi. Fela tšeo di ka holang ge batho ba le kaaka?” Jesu a re: “Dudišang batho fase.” Felo moo go be go na le bjang bjo bontši. Ka gona batho ba dula fase. Banna ba ba bego ba le moo e be e ka ba ba dikete tše tlhano. Jesu a tšea dinkgwa tšeo, a leboga Modimo, a laela gore di abelwe ba ba dutšego moo. Le dihlapi a ba abela tšona ka mokgwa woo, gomme batho ba ja ka mo ba nyakago ka gona. Ya re ge ba khoše a laela barutiwa ba gagwe a re: “Kgoboketšang marathana a a šetšego, gore go se lahlege selo.” Ba a kgoboketša, gomme ba tlatša diroto tše lesome le metšo ye mebedi ka marathana ao a dinkgwa tšela tša garase, a go šadišwa ke ba ba llego. Batho ge ba bona mohlolo woo wa go dirwa ke Jesu ba re: “Ka nnete yo ke yena Moprofeta yo go boletšwego gore o tla tla lefaseng!” Jesu ge a bona gore ba tla tla ba mo goga gore ba yo mmea kgoši, a ba ngwegela, a namelela godingwana thabeng a nnoši. Mantšiboa barutiwa ba Jesu ba theogela letsheng, ba fihla ba namela leselawatle, ba boela ka mošola wa letsha, ba leba Kapernaume. Leswiswi la ba la swara Jesu a sešo a tla go bona. Phefo ye kgolo le yona ke ge e foka e tšubotla lewatle. E rile ge ba sepetše ka leselawatle sekgala se e ka bago dikilometara tše tlhano go iša go tše di selelago, ba bona Jesu a sepela godimo ga meetse, a batamela leselawatle leo la bona, gomme ba tšhoga. Jesu a re go bona: “Le se ke la tšhoga – ke nna!” Ba be ba rata go mo nametša leselawatle, gomme ka bjako ke ge leselawatle leo le fihlile lebopong felo mo ba bego ba eya gona. Ka tšatši le le latelago lešaba le le bego le šetše ka mošono wa letsha, la lemoga gore ga se gwa ka gwa ba le leselawatle le lengwe moo ntle le lela barutiwa ba Jesu ba le nametšego, gomme ba be ba tseba gore Jesu yena ga se a namela nabo, bona ba tlogile ba nnoši. Go ile gwa tla maselawatle a mangwe a go tšwa motseng wa Tiberiase, kgauswi le felo mola lešaba le bego le khorišitšwe dinkgwa gona ge Morena a seno leboga Modimo. Lešaba ge le lemoga gore Jesu ga a gona, le bona barutiwa ba gagwe ga ba gona, la namela maselawatle ao la ya Kapernaume le mo nyaka. Batho ba rile go hwetša Jesu ka mošola wa letsha, ba mmotšiša ba re: “Moruti, na mo o tlile neng?” Jesu a ba fetola ka go re: “Ruri, ruri, ke le botša gore ga le nnyake ka gobane le bone mehlolo, eupša le nnyaka ka gobane le ile la ja dinkgwa la khora. Le se ke la gaba dijo tše di felago, le upše le gabe tša go fa motho bophelo bjo ba sa felego. Gape ke tšona tše Morwamotho a tlago le fa tšona, ka gobane Modimo Tate o bontšhitše gore o a mo kgahla.” Ke mo ba mmotšišitšego ba re: “Re direng ge re rata go phetha tše Modimo a di nyakago?” Jesu a ba fetola ka go re: “Se Modimo a nyakago gore le se dire ke gore le dumele go nna yo a nthomilego.” Bona ba re: “O tla dira mohlolo mang wo e tlago re ge re o bone ra go dumela? Ke eng se o tlago se dira? Etse borakgolokhukhu ba rena bona ba be ba eja manna kua lešokeng, bjalo ka ge Mangwalo a Makgethwa a bolela a re: ‘O ba file senkgwa se se tšwago legodimong gore ba je.’ ” Jesu a re go bona: “Ruri, ruri, ke le botša gore ga se Moshe yo a le filego senkgwa se se tšwago legodimong; senkgwa sa mmannete se se tšwago legodimong le se fiwa ke Tate. Gobane senkgwa se le se fiwago ke Modimo ke yena Motheogalegodimong, yo a fago batho ba lefase bophelo bjo bo sa felego.” Bona ba mo kgopela ba re: “Morena, re fe senkgwa seo ka mehla.” Jesu a re: “Ke nna senkgwa seo sa go fa motho bophelo bjo bo sa felego. Yo a tlago go nna a ka se tsoge a swerwe ke tlala; yo a dumelago go nna a ka se tsoge a nyorilwe. Fela ke le boditše ka re le ge le mpone ga le ntumele. Mang le mang yo Tate a mphago yena o tla go nna, gomme yo a tlago go nna, nna nka se mo rake, ka gobane ga se ka theoga kua legodimong go tlo phetha thato ya ka, ke tletše go phetha ya yo a nthomilego. Gomme thato ya yo a nthomilego ke gore ke se lahle le o tee wa bao a mphilego bona, bohle ke ba tsoše bahung ka tšatši la mafelelo. Se Tate a se nyakago ke gore mang le mang yo a bonago Morwagwe mme a dumela go yena, a be le bophelo bjo bo sa felego, gomme nna ke tla mo tsoša ka tšatši la mafelelo.” Bajuda ba ngongorega ka yena, ka ge a rile: “Ke nna senkgwa se se theogilego legodimong.” Ba nama ba re: “Na ga se yena Jesu, morwa wa Josefa, yo re tsebago tatagwe le mmagwe? Bjale o ra go reng ge a re o theogile legodimong?” Jesu a re: “Tlogelang go dulela go ngongorega. Gape ga go motho yo a ka tlago go nna a sa gogwe ke Tate yo a nthomilego, gomme ke nna ke tlago mo tsoša bahung ka tšatši la mafelelo. Yo mongwe wa baprofeta o ngwadile go re: ‘Bohle ba tla be ba rutilwe ke Modimo.’ Ka gona, mang le mang yo a kwago Tate mme a ithuta go yena, o tla go nna. Go realo ga se go re go na le yo a kilego a bona Tate; nna ke tšwago go Modimo, ke nna fela yo ke bonego Tate. Ruri, ruri, ke le botša gore yo a dumelago o šetše a na le bophelo bjo bo sa felego. Ke nna senkgwa sa go fa motho bophelo bjo bo sa felego. Borakgolokhukhu ba lena ba be ba eja manna kua lešokeng, le ge go le bjalo ba ile ba hwa. Senkgwa se se theogilego legodimong gore ge motho a se ja a se sa hwa sese: Ke nna sona senkgwa seo sa go phediša, se se theogilego legodimong. Ge motho a eja senkgwa se o tla phela go ya go ile. Senkgwa se ke tlago mo fa sona ke nama ya ka ye ke e fago batho ba lefase, gore ba phelele sa ruri.” Ge a realo Bajuda ba galefa gomme ba thoma go ngangišana ba re: “Na motho yo a ka napa a re fa nama ya gagwe ra e ja?” Jesu a re go bona: “Ruri, ruri, ke le botša gore ge le sa je nama ya ka, nna Morwamotho, la nwa le madi a ka, gona le ka se phelele sa ruri. Yo a jago nama ya ka le gona a nwago madi a ka, yena o šetše a na le bophelo bjo bo sa felego, gomme ka tšatši la mafelelo ke tla mo tsoša bahung. Gape nna nama ya ka ke sejo sa mmannete, le madi a ka ke seno sa mmannete. Yo a jago nama ya ka, a nwago le madi a ka, o dula ka go nna, le nna ke dula ka go yena. Yo a ntšago o tla phedišwa ke nna, bjalo ka ge le nna ke phedišwa ke Tate, Mophedi yo a nthomilego. Ke nna sona senkgwa se se theogilego legodimong. Ga se swane le sela borakgolokhukhu ba lena ba bego ba re le ge ba se ja ba no hwa. Yo a jago senkgwa se yena o tla phelela sa ruri.” Ditaba tše Jesu o di boletše mola a ruta batho ka sinagogeng kua Kapernaume. Barutiwa ba bantši ba gagwe ge ba ekwa a realo ba re: “Owe! Taba ye a e bolelago ye ke ye thata! Ke mang yo a ka e theeletšago?” Jesu a tseba ka boyena gore taba ye e a ba ngongoregiša, gomme a ba botšiša a re: “Na taba ye ke e boletšego ye e a le kgopiša? Ge le ka bona Morwamotho a rotogela kua a bego a le gona pele, gona le tla reng? Gape Moya wa Modimo ke wona wo o phedišago; motho yena ga a kgone. Mantšu a ke le boditšego ona a a tšwa go yena Moya, gomme a a phediša. Eupša ba bangwe ba lena ga ba dumele.” Gape go tloga mathomong Jesu o be a tseba gore ba ba sa tlego go dumela ke bomang, le gore yo a tlago mo eka yena ke mang. A iša pele a re: “Ke ka baka leo ke le boditšego gore ga go yo a ka kgonago go tla go nna a sa kgontšhwe ke Tate.” Ka baka la polelo yeo ya gagwe barutiwa ba gagwe ba bantši ba ile ba napa ba boa ka sa morago, ba se sa sepela naye. Ke ge a botšiša barutiwa bale ba gagwe ba lesome le ba babedi a re: “Kgane le lena le nyaka go tloga?” Gwa fetola Simone Petrose a re: “Ra tloga ra ya go mang, Morena? Gape wena o bolela tša go fa motho bophelo bjo bo sa felego. Gomme rena re tloga re dumela ebile re tšea gore ke wena Mokgethwa wa Modimo.” Jesu a fetola a re: “Ga ke re ke le kgethile le le ba lesome le ba babedi? Fela yo mongwe wa lena ke diabolose!” Etse o be a era Judase, morwa wa Simone Iskariote, gobane ke yena yo a bego a tlilo mo eka, le ge e be e le yo mongwe wa ba lesome le ba babedi. Ka morago ga moo Jesu a fela a šika le naga ya Galilea; o be a sa rate go sepela le naga ya Judea, ka gobane baetapele ba Bajuda ba moo ba be ba nyaka go mmolaya. Ke ge go batametše monyanya wa Bajuda wo ba rego ke wa Mešaša; ka gona bana ba boJesu ba re go yena: “Tloga mo o ye Judea, gore barutiwa ba gago ba ba lego kua le bona ba tle ba bone tše o di dirago. Gobane ge motho a nyaka go tsebega ga a fihle tše a di dirago. Le wena ka gore šemo o dira dilo tše, dira gore bohle mo lefaseng ba go tsebe.” Gape le bona banababo ba be ba sa dumele go yena. Jesu a re go bona: “Mo go nna ga sešo ya ba nako. Gape lena nako ye nngwe le ye nngwe e le loketše. Batho ba mono lefaseng ba ka se le hloye, fela nna ba ntlhoile, ka gobane ke hlwa ke ba botša gore mediro ya bona ke ye mebe. Lena eyang monyanyeng. Nna ga ke ye, ka gobane go nna ga sešo ya ba nako.” A re go realo a šala Galilea. E rile ge banababo ba seno ya monyanyeng, le yena a šala a eya, e sego ka go bonwa pepeneneng, eupša ka go iphihla. Kua monyanyeng baetapele ba Bajuda ba be ba mo nyaka, ba botšiša ba re: “O kae yena?” Go dumaduma ka yena go be go napile go atile mo lešabeng. Ba bangwe ba re: “O lokile,” mola bangwe ba re: “Aowa, o timetša batho.” Fela gwa se be le yo a mmolelago phatlalatša, ka gobane ba be ba tšhaba baetapele ba Bajuda. E rile mola monyanya o šetše o le gare, Jesu a ya Tempeleng mme a thoma go ruta batho. Baetapele ba Bajuda ba tlabega ba re: “Na motho yo tsebo ye kaaka o e tšere kae etšwe a se a rutega?” Jesu a ba fetola ka go re: “Tše ke di rutago batho ga se tša ka, ke tša go tšwa go yo a nthomilego. Ge motho a rata go phetha tše di nyakwago ke Modimo, o tla lemoga ge eba tše ke di rutago batho ke tša go tšwa go Modimo, goba ke ipolelela tša ka. Motho yo a ipolelelago tša gagwe o rata gore go tumišwe yena. Yo a ratago gore go tumišwe yo a mo romilego ke yena wa go rereša, gomme yena ga a na bomenetša. Ga ke re Moshe o le file melao ya gagwe? Eupša ga go le o tee wa lena yo a e phethago. Le reng le nyaka go mpolaya?” Lešaba la mo fetola la re: “O tsenwe ke modemone, wena! Ke mang yo a nyakago go go bolaya?” Jesu a ba fetola a re: “Ke dirile taba e tee fela, gomme ka moka la kgopišega. Moshe o le laetše gore le bolotše barwa ba lena, mokagona yeo e se taelo ya Moshe, e le ya borakgolokhukhu ba lena, gomme le bolotša motho le ka tšatši la Sabatha. Bjale ge go bolotšwa le ka tšatši la Sabatha gore taelo yeo ya Moshe yona e se tshelwe, nna le reng le nkgalefela ge ke fodišitše motho mmele ka moka ka tšatši la Sabatha? Le se ke la ahlola ka tebelelo ya mahlo; ahlolang ka toka.” Ba bangwe ba Jerusalema ba re: “Na motho yo ga se yena yo ba nyakago go mmolaya? Gape šo o bolela phatlalatša, gomme ga ba mo dire selo! Kgane e ka be e le gore baetapele ba kgolwa ge e le yena Mesia? Fela yo re a tseba gore o tšwa kae. Kganthe Mesia yena mohla a etla ga go yo a tlago tseba mo a tšwago gona.” Jesu ge a le gare a ruta batho Tempeleng, a bolelela godimo a re: “Go ntseba le a ntseba, le mo ke tšwago gona le a go tseba. Fela ga se ka itliša, ke romilwe ke yo a tshepegago, gomme yena ga le mo tsebe. Nna ke a mo tseba, ka gobane ke tšwa go yena ebile ke romilwe ke yena.” Ba bangwe ge ba mo kwa ba nama ba nyaka go mo swara, eupša gwa se be le yo a mo kgomago, ka gobane e be e sešo ya ba nako ya gore a swarwe. Fela ba bantši mo lešabeng ba be ba dumela go yena ba re: “Na Mesia mohla a etla o tla dira mehlolo ye mentši go feta ye e dirilwego ke yo?” Bafarisei ba kwa lešaba le dumaduma ka Jesu, ka fao bona gotee le baprista ba bagolo ba roma bahlanka ba bona gore ba yo mo swara. Jesu a re: “Ke sa tlilo ba le lena sebakanyana, ka kgona ke boela go yo a nthomilego. Le tla nnyaka, fela la se nkhwetše, ka gobane mo ke tlago be ke le gona lena le ka se kgone go fihla.” Baetapele ba Bajuda ba botšišana ba re: “Motho yo o ya kae mo rena re ka se kego ra mo hwetša? Kgane o tla ya kua go ba ba falaletšego Bagerikeng a yo ruta Bagerike? O ra go reng ge a re re tla mo nyaka ra se mo hwetše, ka gobane mo a tlago ba a le gona rena re ka se kgone go fihla?” Ka tšatši la mafelelo la monyanya, e lego lona le legologolo, Jesu a ema a bolelela godimo a re: “Ge motho a nyorilwe a tle go nna a nwe! Mabapi le yo a dumelago go nna Mangwalo a Makgethwa a re: ‘Go yena go tla tšwa meela ya meetse a a phedišago.’ ” Gape ge a realo o be a era Moya wo Mokgethwa wo bao ba dumelago go yena ba bego ba tlilo o amogela. Ka nako yeo ke ge bao ba dumelago go yena ba sešo ba fiwa Moya wo Mokgethwa, ka ge Jesu a be a sešo a tsoga bahung le go rotogela legodimong. Ba bangwe mo lešabeng ge ba ekwa tše a di bolelago ba re: “Ruri, motho yo ke yena Moprofeta.” Ba bangwe ba re: “Ke yena Mesia.” Bangwe ba re: “Na Mesia a ka napa a tšwa Galilea? Ga ke re Mangwalo a Makgethwa a re Mesia o tla tšwa lelokong la Dafida, o tla tswalwa Betlelehema, motseng wo Dafida a bego a dula go wona?” Ya nama ya ba gore lešaba ga le molomo o tee ka Jesu. Ba bangwe ba nyaka go mo swara, fela gwa se be le yo a mo kgomago. Bahlanka bale ba bego ba ile go swara Jesu ge ba boa baprista ba bagolo le Bafarisei ba ba botšiša ba re: “Le reng le se la tla naye?” Batho bao ba ba fetola ba re: “Jo, motho wa go bolela ka mokgwa wola ga se a ka a ba gona!” Bafarisei ba ba botšiša ba re: “Na le lena o le forile? Goba kgane go na le yo mongwenyana wa baetapele goba wa Bafarisei yo a dumetšego go yena? Ga a gona, ge e se mogofe wo wa dihlobogwa wa go se tsebe melao ya Moshe!” Yo mongwe wa Bafarisei ba ba bego ba le moo e be e le Nikodemose yola a bego a kile a ya go Jesu. Yena a re go bangwekayena: “Go ya ka molao wa rena ga se ra swanela go bona motho molato a sešo a sekišwa, go sešo gwa tsebja se a se dirilego.” Ba mo fetola ba re: “Kgane le wena o tšwa Galilea? Nke o badišiše Mangwalo a Makgethwa gomme o tla lemoga gore Galilea ga go moprofeta yo a kago tšwa gona.” [ Ke moka bohle ba ya magae, eupša Jesu yena a ya Thabeng ya Mehlware. Ya re mosong wa le le latelago a ya Tempeleng gape. Batho bohle ba mo kgobokanela, gomme yena a dula fase a ba ruta. Boramangwalo le Bafarisei ba tliša mosadi yo mongwe go yena yo a bego a swerwe a otswa, gomme ba mo emiša pele ga batho. Ba re go Jesu: “Moruti, mosadi yo o swerwe a le gare a otswa. Mo molaong Moshe o re laetše gore basadi ba mohuta wo ba bolawe ka maswika. Bjale wena o reng?” Ge ba realo ba be ba mo leka gore ba be le se ba kago mo phara molato ka sona. Fela yena a inama, a ngwala fase ka monwana. Ge ba ntše ba phegeletše go mmotšiša, a inamologa, a re go bona: “Yo a se nago sebe mo go lena a e be yena a thomago go mo foša ka leswika.” A boela a inama a ngwala fase. Ge ba ekwa a realo ba tloga ka o tee ka o tee, gwa tloga ba bagolo pele. Ba tlogela Jesu le mosadi yola a sa eme moo. Jesu a inamologa, a botšiša mosadi yola a re: “Mmagorena, ba kae bona? Na ga go yo a go tšwilego?” Mosadi yola a re: “Ga a gona, Morena.” Jesu a re: “Gona le nna ga ke go tšwe. Sepela, fela o se sa dira sebe.”] Jesu a buša a botša Bafarisei a re: “Ke nna seetša sa ba ba lego lefaseng. Yo a ntatelago a ka se phele leswiswing, o tla ba le seetša se se phedišago.” Bafarisei ba re go yena: “Wena o a itlhatsela, ka gona bohlatse bja gago ga bo amogelege.” Jesu a ba fetola a re: “Le ge ke itlhatsela, se ke se bolelago ke nnete ka gore mo ke tšwago le mo ke yago gona ke a go tseba. Lena ga le tsebe mo ke tšwago le mo ke yago gona. Le ahlola ka tebelelo ya mahlo; nna ga ke ahlole motho. Fela le ge nkabe ke ahlola, kahlolo ya ka e ka be e le ya nnete, ka gobane ga ke tee, ke na le Tate yo a nthomilego. Ga ke re mo molaong wa lena go ngwadilwe gore bohlatse bja batho ba babedi ke bja nnete? Bjale nna šemo ke a itlhatsela, gomme ke hlatselwa le ke Tate yo a nthomilego.” Ke mo ba mmotšišitšego ba re: “Tatago o kae?” Jesu ge a ba fetola a re: “Ga le ntsebe, le Tate ga le mo tsebe. Ge le ka be le ntseba, le ka be le tseba le Tate.” Ditaba tšeo Jesu o di boletše ge a ruta batho Tempeleng, ka phapošing yeo go yona go bego go beilwe mapokisi a dikabelo. Gomme gwa se be le yo a mo swarago, ka gobane e be e sešo ya ba nako ya gagwe. Jesu a ba botša gape a re: “Ke a sepela, gomme le tla šala le nnyaka, eupša le tla hwela dibeng tša lena. Mo ke yago gona lena le ka se kgone go fihla.” Bajuda ba re: “Kgane o ya go ipolaya, ge a re mo a yago gona rena re ka se kgone go fihla?” Jesu a re: “Gape lena le ba mono fase, kganthe nna ke wa kua godimo. Lena le ba lefase le, fela nna ga ke wa lona. Ke ka baka leo ke le botšago gore le tla hwela dibeng tša lena. Gomme dibeng tša lena gona le tla hwela, ge le sa dumele gore ke ‘KE NNA’.” Bona ba mmotšiša ba re: “Etse o mang?” Jesu a ba fetola a re: “Go thušang go bolela le lena? Ke na le tše dintši tše nka le bolelago ka tšona le tše nka le tšwago ka tšona. Fela yo a nthomilego ke yo a rerešago, gomme nna tše ke di botšago lena ba mono lefaseng ke fela tše ke di boditšwego ke yena.” Bona ba be ba sa lemoge gore o bolela ka Tatagwe. Ka gona a re go bona: “Go ba le nkadietša, nna Morwamotho, le tla tseba gore ke ‘KE NNA’; ke gona le tlago lemoga gore ga go se ke se dirago ka bonna, ke bolela fela se ke se laetšwego ke Tate. Gomme yena yo a nthomilego o na le nna; ga a ntlogele ke nnoši, ka gobane ke phela ke dira se se mo kgahlago.” Ge a bolela ditaba tše ba bantši ba ile ba dumela go yena. Jesu a botša Bajuda ba ba dumelago go yena a re: “Ge le phetha tše ke le rutago tšona, gona le barutiwa ba ka ka nnete; le tla tseba nnete, gomme nnete ke yona e tlago le lokolla.” Bona ba mo fetola ka go re: “Rena re ditlogolo tša Abrahama, ebile ga se ra ka ra ba makgoba a motho. O ra go reng ge o re re tla lokollwa?” Jesu a ba fetola ka go re: “Ruri, ruri, ke le botša gore mang le mang yo a dirago dibe ke lekgoba la sebe. Gomme lekgoba ga se la ka lapeng leo le dulago ka go lona; wa ka lapeng leo ke morwa wa ka moo. Ge le ka lokollwa ke Morwa wa Modimo, gona le tla lokologa ka nnete. Ke a tseba gore le ditlogolo tša Abrahama. Fela le nyaka go mpolaya, ka gobane le gana go amogela tše ke le rutago tšona. Nna ke le botša tše ke di bonego go Tate, kganthe lena le dira tše le di laetšwego ke tatagolena.” Ba mo fetola ba re: “Gape rena tatagorena ke Abrahama.” Jesu a re: “Ge Abrahama e ka be e le tatagolena ka nnete, le ka be le dira tše a bego a di dira. Ge bjale le nyaka go mpolaya, nna ke le botšago nnete ye ke e kwelego go Modimo, le dira se Abrahama a bego a ka se se dire. Le dira tša yena tatagolena.” Bona ba mo fetola ka go re: “Gape rena ga se ra tswalwa ka bootswa – tatagorena ke o tee fela, e lego Modimo.” Jesu a re: “Ge Modimo e ka be e le yena Tatagolena, le ka be le nthata, ka gobane ke tšwa go Modimo, gomme ke mono. Ga se ka itlela, ke romilwe ke yena. Ke ka baka lang le sa kwešiše molaetša wa ka? Etse ke ka gobane le gana go theeletša tše ke di bolelago. Gape ke lena bana ba yola tatagolena, Diabolose, gomme sa lena ke go dira tše di kganyogwago ke yena yoo tatagolena. E sa le e eba mmolai go tloga mohlamonene, ebile ga se a ka a emela nnete, ka gobane yena nnete yona ga a nayo. Ge a bolela maaka, o bolela se se mo lebanego, ka gobane ka boyena ke mpheane, ke ramaaka. Gomme nna ge le sa ntumele bjale, ke ka gobane ke bolela nnete. Ke mang mo go lena yo a ka mponago molato wa sebe? Bjale ge e le gore ke bolela nnete, le reng le sa ntumele? Gape yo e lego wa Modimo o theeletša mantšu a Modimo. Fela lena, ka ge le se ba Modimo, ga le theeletše.” Bajuda ba re go Jesu: “Ga ke re re rerešitše ge re re o Mosamaria, le gona o tsenwe ke modemone?” Jesu a ba fetola a re: “Nna ga se ka tsenwa ke modemone. Taba ke gore ke hlompha Tate, eupša lena le a ntlhompholla. Nna ga ke inyakele tlhompho, go na le yo a nnyakelago yona, gomme ke yena Moahlodi. Ruri, ruri, ke le botša gore yo a phethago tše ke di rutago batho a ka se hwe le gatee.” Bona ba re go yena: “Bjale gona re na le nnete ya gore o tsenwe ke modemone. Abrahama o hwile, le baprofeta ba hwile, fela wena o re yo a phethago tše o di rutago batho a ka se hwe le gatee. O ra gore wena o feta tatagorena Abrahama yo a hwilego? Baprofeta le bona ba hwile. Wena o itira mang?” Jesu a ba fetola a re: “Ge nkabe ke ikgodiša, bogolo bja ka e ka be e se bja selo. Yo a nkgodišago ke Tate – yena le rego ke Modimo wa lena. Le ge le sa mo tsebe, nna ke a mo tseba. Ge nka re ga ke mo tsebe, ke tla be ke le mpheane bjalo ka lena. Nna ke a mo tseba, gomme ke phetha taelo ya gagwe. Abrahama, tatagolena, o ile a thabela go tlo bona nako ya go tla ga ka; a e bona, gomme a thakgala.” Ya ba ba re go yena: “O ka re le masome a mahlano a mengwaga o se nao, wa re o bone Abrahama?” Jesu a ba fetola a re: “Ruri, ruri, ke le botša gore pele Abrahama a tswalwa nna ke be ke ntše ke le gona.” Ba nama ba topa maswika gore ba mmolaye ka ona, fela yena a ba khutela, a tloga Tempeleng. Jesu ge a ntše a sepela, a bona motho yo a tswetšwego a foufetše. Barutiwa ba gagwe ba mmotšiša ba re: “Moruti, motho yo ge a tla tswalwa e le sefofu, ke ka baka la sebe sa mang – ke ka baka la sa gagwe, goba sa batswadi ba gagwe?” Jesu a ba fetola a re: “Ga se ka baka la sebe sa gagwe goba sa batswadi ba gagwe, eupša e le gore ka yena ditiro tša Modimo di tle di bonagatšwe. Gape ge e sa le mosegare re swanetše go dira mediro ya yo a nthomilego. Bošego bo etla bjo go bjona motho a ka se kgonego go šoma. Ge ke sa le mo lefaseng, ke nna seetša sa ba ba lego lefaseng.” A re go realo, a tshwela mare fase a duba seretse ka ona, gomme a tlotša sefofu seo mahlo a re: “Sepela o yo hlapa ka bodibeng bja Siloamo.” Seo ke go re “Moromiwa”. Ke moka motho yola a ya, a fihla a hlapa, a boa a bona. Ke ge baagišani ba gagwe le ba ba mmonego mola e sa le mokgopedi ba botšiša ba re: “Na motho yo ga se yola a bego a hlwa a dutše a kgopela?” Ba bangwe ba re: “Ke yena!” Bangwe ba re: “Ga se yena, o dio swana naye!” Yena mong a re: “Ke nna!” Ba mmotšiša ba re: “Go tlile bjang gore bjale o kgone go bona?” A ba botša a re: “Monna yola ba rego ke Jesu o dubile seretse, a ntlotša mahlo, a mpotša gore ke yo hlapa ka bodibeng bja Siloamo. Ka ya, ka re go hlapa ka napa ka bona.” Ba mmotšiša ba re: “O kae yena?” Yena a re: “Ga ke tsebe.” Ke moka ba tšea monna yoo wa go foufollwa ba mo iša go Bafarisei. Tšatši leo Jesu a dubilego seretse ka lona a foufolla sefofu e be e le la Sabatha. Bafarisei le bona ba botšiša monna yoo ka mo a foufolotšwego ka gona. Yena a ba botša a re: “O ntloditše seretse mo mahlong, ka yo hlapa, gomme bjale ke a bona.” Ba bangwe Bafarisei ba re: “Motho yoo ga a tšwe go Modimo, ka gobane ga a hlomphe letšatši la Sabatha.” Bangwe ba re: “Motho yo e lego modiradibe a ka kgona bjang go dira mehlolo ya mohuta wo?” Gwa tsoga phapano mo go bona. Bafarisei ba botšiša sefofu sela gape ba re: “Bjale wena o reng ka yena, ka ge a go foufolotše?” Yena a re: “Ke moprofeta.” Baetapele ba Bajuda bona ba be ba sa kgolwe gore pele e be e le sefofu mme bjale o foufologile, ba ba ba bitša batswadi ba gagwe, ba ba botšiša ba re: “Na motho yo ke morwa wa lena yo le rego o tswetšwe e le sefofu? Go tlile bjang gore bjale a bone?” Batswadi ba gagwe ba fetola ba re: “Gore ke morwa wa rena, le gore o tswetšwe e le sefofu, re a tseba. Se re sa se tsebego ke gore na go tlile bjang gore a bone, le gore na go foufollwa gona o foufolotšwe ke mang. Botšišang yena mong; o godile, o tla ipolelela.” Batswadi ba gagwe ge ba bolela ka mokgwa woo e be e le ka baka la go tšhaba baetapele ba Bajuda, gobane baetapele bao ba be ba kwane gore yo a ka rego o dumela gore Jesu ke yena Mesia o swanetše go rakwa sinagogeng. Ke ka baka leo batswadi ba lesogana le ba rilego: “Botšišang yena mong, o godile!” Ba mmitša la bobedi ba re go yena: “Godiša Modimo o bolele nnete. Rena re tseba ge motho yola a go foufolotšego e le modiradibe.” Yena a ba fetola a re: “Ge e le modiradibe nnaena ga ke tsebe; se ke se tsebago ke gore ke be ke le sefofu, gomme bjale ke a bona.” Ba mmotšiša gape ba re: “O go dirileng? O go foufolotše bjang?” A ba fetola a re: “Ga ke re ke sa tšo le botša gomme la se ntheeletše? Le reng le nyaka go botšwa gape? Kgane le lena le nyaka go ba barutiwa ba gagwe?” Bona ba mo fotlela ba re: “Morutiwa wa gagwe ke wena! Rena re barutiwa ba Moshe. Re tseba ge Modimo a boletše le Moshe. Ge e le moisana yo yena, le mo a tšwago gona ga re go tsebe.” Monna yoo a ba fetola a re: “Gomme go a makatša ge le sa tsebe mo a tšwago gona etšwe a mphoufolotše. Etse re a tseba gore badiradibe Modimo ga a ba theeletše, o theeletša ba ba mo mmoifago, ba ba phethago thato ya gagwe. E sa le go tloga le go tloga ga se gwa ka gwa kwagala gore motho yo a tswetšwego e le sefofu o foufolotšwe. Ge motho yola e ka be e se wa go tšwa go Modimo a ka be a sa kgone selo.” Ba mo fetola ba re: “Mmalo! Wa re o tswetšwe o le modiradibe wa mafelelo wa re o ka re ruta?” Gomme ba mo raka sinagogeng. Jesu a kwa gore ba mo rakile. A re go mo hwetša a mmotšiša a re: “Na o dumela go Morwamotho?” Motho yoo a re: “Mpotše gore ke ofe, Morena, gore ke tle ke dumele go yena.” Jesu a re go yena: “O šetše o mmone, ebile ke yena yo a bolelago le wena gonabjale.” Motho yoo a re: “Ke a dumela, Morena!” Gomme a khunama pele ga Jesu a mo lotšha. Jesu a re: “Gape se ke se tletšego mo lefaseng ke go dira gore batho ba kgone go ikgethela mabapi le nna. Ke mo ba ba foufetšego ba tlago bona, gwa re ba ba bonago ba foufala.” Ba bangwe ba Bafarisei ba ba bego ba na le yena ba mo kwa ge a realo, gomme ba mmotšiša ba re: “Kgane o ra gore le rena re foufetše?” Jesu a ba fetola ka go re: “Ge le ka be le foufetše, le ka be le se na molato; eupša ka ge le re le a bona, molato le tla no šima le na le wona.” Jesu a re: “Ruri, ruri, ke le botša gore yo a sa tsenego ka lešakeng la dinku ka lesoro, a namela ka go šele, ke lehodu ebile ke mohlakodi. Yo a tsenago ka lesoro yena ke modiša wa dinku. Moletalesoro o a mmulela; dinku di kwa lentšu la gagwe ge a bitša tše e lego tša gagwe ka maina, a di ntšha. O re go di ntšha ka moka a di ete pele, gomme tšona di mo šale morago, ka gobane di tseba lentšu la gagwe. Yo di sa mo tsebego yena di ka se tsoge di mo latetše, di tla mo tšhaba, ka gobane ga di tsebe lentšu la gagwe.” Jesu ge a ba botša seswantšho seo ba ile ba se kwešiše gore o ra go reng. A iša pele a re go bona: “Ruri, ruri, ke le botša gore ke nna lesoro la lešaka la dinku. Bohle ba ba tlilego pele ga ka ke mahodu le bahlakodi, fela dinku ga se tša ba theeletša. Lesoro ke nna. Yo a tsenago ka nna o tla phološwa; o tla fela a tsena a etšwa a hwetša dijo tše di khorišago. Lehodu lona le tlela go utswa le go bolaya le go lobiša. Nna ke tletše gore dinku tša ka di phele – di phele bophelo bjo bo feletšego. “Ke nna modiša wa go loka. Gomme modiša wa go loka o ikgafela go hwela dinku tša gagwe. Mothwalwa yena, yo e sego modiša ebile e se mong wa dinku, o re go bona phiri e etla a tlogele dinku, a tšhabe, gomme phiri e di sware e di phatlalatše. Mothwalwa o a tšhaba ka gobane e le mothwalwa, a se na taba le dinku. Nna ke modiša wa go loka. Ke tseba dinku tša ka le tšona di a ntseba, bjalo ka ge Tate a ntseba le nna ke a mo tseba; gomme ke ikgafela go hwela dinku tša ka. Ke sa na le tše dingwe dinku tše e sego tša lešaka le. Le tšona ke swanetše gore ke di tliše; di tla kwa lentšu la ka, gomme go tla ba mohlape o tee le modiša o tee. “Gape se Tate a nthatelago sona ke ge ke ikgafela go bolawa, e le gore ke tle ke boele ke phele. Ga go yo a kago nkamoga bophelo ke sa rate; ke nna mong ke ikgafelago go bolawa. Ke na le maatla a go ikgafela go bolawa le a go itsoša bahung. Ke sona se Tate a ntaetšego.” Bajuda ba buša ba ngangišana ka seo a se bolelago. Ba bantši ba re: “O tsenwe ke modemone! O a gafa! Le reng le mo theeletša?” Fela ba bangwe ba re: “Motho yo a tsenwego ke modemone a ka se bolele ka mokgwa wo! Na modemone a ka kgona go foufolla difofu?” E be e le marega, gomme go ketekwa Monyanya wa go šegofatša Tempele motseng wa Jerusalema. Jesu a re a sepelasepela Tempeleng mo mathuding ale a go bitšwa mathudi a Solomone, a bokanelwa ke Bajuda, ba mmotšiša ba re: “Na o tla re swariša kota go fihla neng, wena? Ge eba ke wena Mesia, re botše phatlalatša.” Jesu a ba fetola a re: “Ke šetše ke le boditše, fela ga le nkgolwe. Tše ke di dirago ke laetšwe ke Tate di a mpolelela; lena ge le sa nkgolwe bjale, ke ka gobane le se dinku tša ka. Ba e lego dinku tša ka ba theeletša se ke se bolelago; le gona nna ke a ba tseba, gomme bona ba a ntatela. Ke ba fa bophelo bjo bo sa felego, gomme ba ka se tsoge ba lahlegile. Ga go yo a tlago nkubula bona. Bao Tate a mphilego bona ke ba bohlokwa go feta bohle, gomme a ka se ba ubulwe ke motho. Nna le Tate re selo se tee.” Moo Bajuda ba topa maswika gape ba re ba mmolaya ka ona. Jesu a re go bona: “Ke le bontšhitše mediro ye mentši ye mebotse ye ke e dirilego ke laetšwe ke Tate. Etse ke ofe wo le nyakago go mpolaela wona ka maswika?” Bona ba mo fetola ba re: “Ga re nyake go go bolaela modiro wo mobotse wo o o dirilego, re nyaka go go bolaela ge o nyefola Modimo, o re o le motho wa nama, wa itira Modimo.” Jesu a ba fetola a re: “Ga ke re go ngwadilwe ka melaong ya lena gore Modimo o rile: ‘Ke lena medimo’? Bjale ge ešita bao Modimo a ba begetšego molaetša wa gagwe a re ke medimo, gomme Mangwalo a Makgethwa a ka se fetošwe, nna yo ke kgethilwego ke Tate mme a nthometšego lefaseng, le ka nama la re ke nyefola Modimo, ge ke re ke nna Morwa wa Modimo? Ge eba ke sa dire mediro ye ke e laetšwego ke Tate, gona le se ke la ntumela; eupša ge eba ke e dira, le ge nna le sa ntumele, upšang le dumele yona mediro, gore le tle le lemoge mme le tsebe gore Tate o mo go nna, le nna ke mo go yena.” Ba buša ba leka go mo swara, eupša a ba tšwa ka diatleng. A boela ka mošola wa noka ya Jordane, moo Johanese a bego a be a kolobetša gona, gomme a dula fao. Batho ba bantši ba tla go yena ba re: “Johanese o be a sa dire mehlolo, fela tšohle tše a di boletšego ka motho yo ke nnete.” Gomme ba bantši moo ba dumela go yena. Go be go na le monna yo mongwe a lwala ba re ke Lasarose, a dula Bethania, motsaneng wa gaboMaria le Marta, ngwanabo. Maria yo ke yola wa go ka a tlotša Morena ka senkgabose, a mo phumola maoto ka moriri. Ke yena yo kgaetšedi ya gagwe, Lasarose, a bego a lwala. Bona ba roma motho go Jesu ba re a fihle a mmotše a re: “Morena, yola o mo ratago o a lwala.” Jesu ge a ekwa a re: “Lehu e ka se be pheletšo ya bolwetši bjoo, e tla ba gore go tumišwe Modimo, le gore ka bjona Morwa wa Modimo a retwe.” Gape Jesu o be a rata Marta le ngwanabo le Lasarose. Fela o rile go kwa ka bolwetši bja Lasarose, a no fetša matšatši a mabedi moo a bego a le gona, ya ba gona a botšago barutiwa ba gagwe a re: “A re boeleng Judea.” Barutiwa ba gagwe ba re go yena: “Moruti, e ka re malobanyana mo Bajuda ba be ba nyaka go go bolaya ka maswika, wa be o sa re o boela kua?” Jesu a re: “Na ga ke re diiri tša letšatši ke tše lesome le tše pedi? Ge motho a sepela mosegare ga a kgopše, ka gobane o bonegelwa ke seetša sa lefase le. Eupša ge a sepela bošego o a kgopša, ka gobane a se na seetša se se mmonegelago.” Ya re go ba a realo a re: “Lasarose, mogwerarena, o robetše, gomme ke ya go mo tsoša.” Barutiwa ba gagwe ba mo fetola ba re: “Morena, ge a robetše o tla no tsoga.” Jesu o be a era gore Lasarose o hlokafetše, gomme bona ba gopola gore o ra gore o robetše boroko. Ka gona a ba botša phaa a re: “Lasarose o hlokafetše, fela se se nthabišago ka baka la lena ke ge ke be ke se na le yena, gore le tle le dumele. Bjale ge, a re yeng go yena.” Thomase yo a bitšwago Lefahla a re go barutiwakayena: “Le rena a re yeng gore re yo hwa naye!” Jesu ge a fihla Bethania a kwa gore e šetše e le matšatši a mane Lasarose a bolokilwe. Bethania e be e le kgauswi le Jerusalema, dikilometara tše e nyakilego go ba tše tharo, gomme Bajuda ba bantši ba be ba tlile ga gaboMarta le Maria go ba emela ka lehu la kgaetšedi ya bona. Marta ge a ekwa gore Jesu o etla, a ya go mo gahlanetša, Maria yena a šala a dutše ka gae. Marta a fihla a re go Jesu: “Morena, etse ge o ka be o be o le gona, kgaetšedi ya ka a ka be a se a hwa. Fela le gonabjale ke a tseba gore se o ka se kgopelago go Modimo, Modimo o tla go fa sona.” Jesu a re go yena: “Kgaetšedi ya gago o tla tsoga bahung.” Marta a mo fetola a re: “Ke a tseba gore o tla tsoga bahung ka tšatši la mafelelo, mola batho ka moka ba tsoga.” Jesu a re: “Ke nna Mophedišabahu le Mobaphedišetšasaruri. Yo a dumelago go nna o tla phela le ge a ka hwa; le yo a phelago a dumela go nna a ka se tsoge a hwetše sa ruri. Na taba ye o a e dumela?” Marta a re: “Ee, Morena, nna ke a dumela gore ke wena Mesia, Morwa wa Modimo, yo go boletšwego gore o tla tla lefaseng.” Marta ge a seno realo, a yo bitša Maria, ngwanabo, ka sehebehebe a re: “Moruti o tlile, o a go bitša.” Maria ge a ekwa a realo, a nanoga a ya go Jesu. Jesu ke ge a sešo a tsena motseng, a sa le mola Marta a mo gahlaneditšego gona. Bajuda ba ba bego ba na le Maria ka ntlong go tlo mo emela, ba rile go bona a re feu a tšwela ka ntle, ba mo šala morago ba gopola gore o yo llela lebitleng. Ge a fihla mo Jesu a lego gona, a re go mmona a itahlela fase maotong a gagwe, a re: “Morena, etse ge o ka be o be o le gona, kgaetšedi ya ka a ka be a se a hwa.” Jesu ge a bona a lla, ebile go lla le Bajuda ba ba mo feleseditšego, a huduega moyeng a hlomogile pelo, a ba botšiša a re: “Le mmolokile kae?” Bona ba re: “Morena, a re ye o yo bona.” Jesu a rothiša meokgo. Ya ba Bajuda ba re: “Bonang gore o be a mo rata bjang!” Ba bangwe ba bona ba botšišana ba re: “Motho yo ge a kgonne go foufolla sefofu sela, go thibela lehu la yo gona go be go ka nama gwa mo palela?” Jesu a re go huduega moyeng gape, a ya lebitleng. Lebitla la gona e be e le lewa le le tswaletšwego ka leswika. A fihla a re: “Tlošang leswika leo.” Marta, yena kgaetšedi ya mohu, a re: “Morena, o šetše a nkga, ka gore e šetše e le matšatši a mane a bolokilwe.” Jesu a re go yena: “Na ga ke re ke go boditše gore ge o dumela o tla bona letago la Modimo?” Ke ge ba tloša leswika lela. Jesu a lelala a re: “Tate, ke a go leboga, ka ge o nkwele. Ke a tseba gore o ntheeletša ka mehla. Ge ke realo ke no direla gore batho ba ba ntikaneditšego ba ba dumele gore ke wena o nthomilego.” A re go realo a goelela a re: “Lasarose, etšwa!” Ke ge yo a bego a hwile a etšwa a tatilwe maoto le matsogo ka mašela, a tatilwe le sefahlego ka lešela. Jesu a re: “Mo tatolleng le mo lese a sepele.” Bajuda ba bantši ba ba bego ba tlile go emela Maria ba rile go bona tše Jesu a di dirago, ba dumela go yena. Eupša ba bangwe bona ba ya go Bafarisei, ba fihla ba ba botša tše Jesu a di dirilego. Baprista ba bagolo le Bafarisei bao ba napa ba rapa pitšo ya Kgorokgolo ya Bajuda, ba botšiša ba re: “Na go ka dirwang? Gape motho yo o dira mehlolo ye mentši. Ge re ka mo lesa a no tšwela pele ka mokgwa wo, bohle ba tla dumela go yena, gomme Baroma ba tla ba re kgerešetša Tempele, ba fediša le setšhaba sa gaborena!” Yo mongwe wa bona, e lego Khayafase, yo e bego e le yena Moprista yo Mogologolo ka ngwaga woo, a re: “Lena ga le tsebe selo! Na kgane ga le bone go le kaone gore motho o tee a hwele setšhaba, go na le gore go fedišwe setšhaba ka moka?” Etse ge a realo o be a sa ipolediše. Ka ge e be e le yena Moprista yo Mogologolo ngwageng woo, o be a porofeta gore Jesu o tlilo hwela setšhaba sa Bajuda, le gona e sego sona fela, eupša le go kgoboketša batho ba Modimo ba ba phatlaletšego a ba dira batee. Go tloga ka lona tšatši leo baetapele ba Bajuda ba lakana gore ba ya go bolaya Jesu. Ka gona Jesu a se sa sepela pepeneneng le Bajuda, a tloga a ya felo mo gongwe kgauswi le lešoka, motseng wo ba rego ke Efraime, a dula gona le barutiwa ba gagwe. Ke ge go batametše monyanya wa Bajuda wo ba rego ke Paseka. Batho ba go tšwa dinagamagaeng ba be ba eya Jerusalema ka bontši gore ba yo itlhwekiša monyanya o sešo wa fihla. Ba be ba nyaka Jesu, gomme ge ba ntše ba eme Tempeleng, ba fela ba botšišana ba re: “Lena le bona bjang? Afa le re o tla tla monyanyeng?” Baprista ba bagolo le Bafarisei ba be ba laetše gore ge motho a ka tseba mo Jesu a lego gona a bolele, gore ba tle ba ye go mo swara. E rile ge go šetše matšatši a a selelago gore Monyanya wa Paseka o fihle, Jesu a ya Bethania, motsaneng wa gaboLasarose yola Jesu a bego a mo tsošitše bahung. Gona moo ba mo apeela dijo, gomme Marta a solela baeng. Lasarose e be e le yo mongwe wa bao ba bego ba dutše le Jesu dijong. Ke ge Maria a ntšha sedibelo sa senkgabose se se sego sa tswakwa sa theko ye kgolo sa narete, a tšhela Jesu maoto ka sona, a mo phumola ka moriri. Ntlo yohle ya tlala monkgo wa senkgabose seo. Yo mongwe wa barutiwa ba Jesu yo ba rego ke Judase Iskariote, yena yola a bego a eya go mo eka, a re: “Ke eng senkgabose se se sa ka sa rekišwa dipapetlana tše makgolo a mararo tša silibera, gomme tšhelete ya gona ya fiwa badiidi?” Etse ge a realo e be e se gore badiidi o na le taba nabo, e be e le ka baka la ge e le lehodu. Sekhwama sa tšhelete se be se swarwa ke yena, gomme a fela a iša seatla ka go sona. Jesu a re: “Mo tlogele! Senkgabose se e be e le sa go tlo ntlotša mohla ke bolokwa. Gobane badiidi le na le bona ka mehla; nnaena le ka se be le nna ka mehla.” Bajuda ba bantši ba ile ba kwa gore Jesu o Bethania, gomme ba ya gona, e sego ka baka la Jesu fela, eupša le gore ba bone Lasarose yo Jesu a bego a mo tsošitše bahung. Ka gona baprista ba bagolo ba lakana gore ba tle ba bolaye le Lasarose, ka gobane Bajuda ba bantši ba be ba šetše ba ba tlogela, ba dumela go Jesu. Ka tšatši le le latelago lešaba le lentši le le bego le tlile Monyanyeng wa Paseka la kwa gore Jesu o tla mono Jerusalema. Ke moka ba rema makala a mepalema ba ya go mo gahlanetša, ba phepela ba re: “A go tumišwe Modimo! A go retwe yo a tlago a romilwe ke Morena! A go retwe yena Kgoši ya Israele!” Jesu a re go bona pokolwana a e namela, bjalo ka ge go ngwadilwe ka Mangwalong a Makgethwa gwa thwe: “Se boife, wena motse wa Sione! Bona kgoši ya gago, e tla e nametše pokolwana!” Ka nako yeo barutiwa ba gagwe taba tše ba be ba sa di kwešiše; fela e rile ge a seno tsoga bahung a rotogetše legodimong, ya ba gona ba elelwago gore se batho ba mo diretšego sona ke se se ngwadilwego ka Mangwalong a Makgethwa. Batho bale ba bego ba na le Jesu ge a goelela Lasarose ka lebitleng a mo tsoša a hwile ba be ba ile ba bega taba ye. Ke ka baka leo lešaba le mo gahlaneditšego, e le ge le kwele gore o dirile mohlolo woo. Ke moka Bafarisei ba botšana ba re: “Gape le ka se mo kgone. Bonang, batho ka moka ba mo šetše morago!” Mo go ba ba bego ba tlile Jerusalema go khunamela Modimo ka nako ya monyanya go be go na le Bagerike ba bangwenyana. Bona bao ba ya go Filipi wa go dula Betsaida kua Galilea, ba mo kgopela ba re: “Morena, re nyaka go bona Jesu.” Filipi a ya go botša Andrease, gomme Andrease le Filipi ba ya go botša Jesu. Ke ge Jesu a ba fetola a re: “Bjale nako ya gore letago la Morwamotho le bonagale e fihlile. Ruri, ruri, ke le botša gore ge thoro ya lebele e ka se re go lahlelwa ka mobung ya hwa, e tla no šima e le tee. Fela ge e ka hwa e tla tšwa dithoro tše dintši. Yo a ithatago go feta ka mo a ratago nna, o tla lahlega; eupša yo a sa ithatego mo lefaseng go feta ka mo a ratago nna, yena o tla ba le bophelo bjo bo sa felego. Yo a ratago go ntlhankela, a ntatele, gomme ka ge e le mohlanka wa ka, mo ke lego gona le yena o tla ba gona. Ge motho a ntlhankela Tate o tla mo godiša.” “Bjale ke ikwa ke huduegile moyeng; fela ke ge nka reng? Kgane nka re: ‘Tate, mphološe mo nakong ye’? Fela a ke se realo, ka gobane ke sona se ke se tletšego – go hlokofatšwa ka yona nako ye. Tate, bonagatša letago la gago!” Gwa nama gwa kwagala lentšu le etšwa legodimong le re: “Ke le bonagaditše, ebile ke sa tlilo le bonagatša.” Lešaba la batho ba ba bego ba eme moo ge le ekwa lentšu leo la re: “E a duma!” Ba bangwe ba re: “Ke morongwa o bolela le yena!” Jesu a re go bona: “Ga se ka baka la ka ge lentšu le le kwagala, ke ka baka la lena. Bjale ke nako ya go ahlolwa ga batho ba lefase; bjale mmuši wa lefase le o tlilo rakwa. Ge ke phagamišwa mo lefaseng, ke tla gogela batho bohle go nna.” Ge a realo o be a šupa lehu le a yago go le hwa. Lešaba la mo fetola la re: “Rena mo melaong ya Moshe re kwa gore Mesia o tla phela go ya go ile. Bjale wena o reng o re Morwamotho o swanetše go phagamišwa? Kgane Morwamotho yo ke mang?” Jesu a ba fetola ka go re: “Le sa tlilo ba le seetša sebakanyana. Ka gona, phelang go sona se sa le mo go lena, gore le se tlo welwa ke leswiswi, gobane mophatšaleswiswi ga a tsebe mo a yago gona. Ka fao, dumelang go Mohlolaseetša a sa le mo go lena, gore le be batho ba ba phelago seetšeng.” Jesu ge a seno realo a tloga a yo iphihlela bona. Le ge a be a dirile mehlolo ye mekaaka ba mo lebeletše, ba ile ba no se dumele go yena; e le gore go phethege tše di boletšwego ke moprofeta Jesaya mola a re: “Morena, ke mang yo a dumetšego tše re mmoditšego tšona? Ke mang yo o mo utolletšego maatla a gago?” Ke ka baka leo ba paletšwego ke go dumela, gobane Jesaya o boletše le go re: “Modimo o ba foufaditše, a ba a ba thatafatša, gore ka mahlo ba se bone, le ka megopolo ba se kwešiše ba sokologa, gomme a ba fodiša.” Jesaya ge a realo e be e le ka ge a bona letago la Jesu mme a bolela ka yena. Le ge go le bjalo, batho ba bantši, ešita le mo go baetapele ba Bajuda, ba be ba dumela go Jesu, fela ka baka la Bafarisei ba be ba sa ipege, gore ba se rakwe ka sinagogeng. Ba be ba kganyoga go kgahla batho go feta go kgahla Modimo. Jesu a bolelela godimo a re: “Yo a dumelago go nna ga se gore o dumela go nna, o dumela go yo a nthomilego. Yo a bonago nna o bona yo a nthomilego. Ke tlile mo lefaseng ke le seetša, gore mang le mang yo a dumelago go nna a se ke a dula leswiswing. Ge motho a ka re a kwele tše ke di boletšego a se di phethe, nna nka se mo tšwe, gobane ga se ka tlela go tšwa batho ba lefase, ke tletše go ba phološa. Yo a nkganago, a ganago le tše ke di bolelago, o šetše a na le se se tlago mo tšwa: tše ke di boletšego ke tšona tše di tlago mo tšwa ka tšatši la mafelelo. Gobane ga se ka bolela tše ke ithometšego tšona, eupša ke boletše tše ke di laetšwego ke Tate yo a nthomilego. Gomme ke a tseba gore tše a di laetšego di fa motho bophelo bjo bo sa felego. Ka gona tše ke di bolelago ke tše ke di laetšwego ke Tate.” Pele ga ge Monyanya wa Paseka o lewa ke ge Jesu a šetše a tseba gore nako ya gore a tloge mo lefaseng a ye go Tatagwe e fihlile. Ka mehla o be a be a rata ba gagwe ba mo lefaseng, gomme o ile a fela a ba rata go fihlela mafelelong. Ge ba le dijong tša go lalela ke ge Sathane a šetše a thetsitše Judase, morwa wa Simone Iskariote, gore a eke Jesu. Jesu yena o be a tseba gore Tatagwe o gafetše dilo ka moka diatleng tša gagwe; o be a tseba le gore o tšwa go Modimo gomme bjale o boela go yena. A emelela ba le dijong, a apola seaparo sa gagwe, a tšea lešela a ipofa letheka ka lona. A tšhela meetse ka lešapelong, a thoma go hlapiša barutiwa ba gagwe maoto, a a phumola ka lešela lela a ipofilego letheka ka lona. Ge a fihla go Simone Petrose, Simone Petrose a mmotšiša a re: “Morena, na nna nka nama ka hlapišwa ke wena maoto?” Jesu a mo fetola a re: “Gonabjale se ke dirago ga o se kwešiše, o tla se lemoga ka morago.” Petrose a re: “Nna o ka se tsoge o ntlhapišitše maoto le ka mohla!” Jesu a mo fetola a re: “Ge ke sa go hlapiše maoto, o ka se sa ba morutiwa wa ka.” Simone Petrose a mo fetola a re: “Morena, gona se ntlhapiše maoto fela; ntlhapiše le diatla le hlogo!” Jesu a re: “Yo a hlapilego mmele o hlwekile hlwekihlweki, gomme ga go nyakege gore a hlape gape a sa tšo hlapa, ge e se maoto. Lena le hlwekile, fela e sego ka moka.” Ge a realo e be e le ge a tseba gore ke mang yo a tlilogo mo eka. Ke ka baka leo a rilego: “Ga se la hlweka ka moka.” Ge a seno ba hlapiša maoto, a buša a apara seaparo sela sa gagwe, a boela madulong a gagwe dijong, gomme a ba botšiša a re: “Na se ke sa tšogo le dira sona le a se kwešiša? Etse le mpitša Moruti le Morena. Gomme ge le realo le a rereša, ka gobane ke nnaena. Bjale ge nna ke lego Morena le Moruti wa lena ke le hlapišitše maoto, le lena go a swanela gore le hlapišane maoto. Gape ke napile ke le bontšhitše tsela gore le lena le tle le dire se ke le dirilego sona. Ruri, ruri, ke le botša gore ga go mohlanka yo a fetago mong wa gagwe, le moromiwa ga a gona yo a fetago moromi wa gagwe. Bjale ka gore šemo taba tše le a di tseba, ge le ka di phetha le tla be le le ba lehlogonolo. “Ga ke re lena ka moka; gape ba ke ba kgethilego ke a ba tseba. Fela Mangwalo a Makgethwa a a rego: ‘Yo a jago le nna dijo o ntlhanametše,’ a swanetše go phethega. Taba ye ke le botša yona gonabjale e sešo ya direga, gore mohla e direga le dumele gore ke ‘KE NNA’. Ruri, ruri, ke le botša gore yo a amogelago yo ke mo romilego, le nna o a nkamogela; le yo a amogelago nna, o amogela le yo a nthomilego.” Jesu ge a seno realo a ikwa a huduegile moyeng, gomme a bolela phaa a re: “Ruri, ruri, ke le botša gore yo mongwe mo go lena o tlilo nkeka.” Barutiwa ba gagwe ba lebelelana, ba tlabilwe ke gore na o ra mang. Yo mongwe wa bona, yo Jesu a bego a mo rata kudu, o be a dutše kgauswi le yena. Simone Petrose a mo kgwatša, a re a botšiše Jesu gore na o ra mang. Morutiwa yoo ke ge a sekamela go Jesu, a mmotšiša a re: “E ka ba ke mang, Morena?” Jesu a mo fetola a re: “Ke yo ke tla rego go hlosa ka nthathana ya senkgwa ka mo nea.” Ka gona a tšea nthathana ya senkgwa, a hlosa morong ka yona, a e nea Judase, morwa wa Simone Iskariote. Judase ge a seno tšea nthathana yeo, Sathane ke ge a mo tsena. Jesu a re go yena: “Se o se dirago itlhaganele o se dire!” Ga go le o tee wa bao ba bego ba le moo dijong yo a ilego a kwešiša gore Jesu o mmoletšang bjalo. Ka ge Judase e be e le yena a ba swarelago tšhelete, barutiwa ba bangwe ba Jesu ba ile ba hloma nke Jesu o mmoditše gore a ye go reka tše ba tlago di nyaka monyanyeng, goba a fe bahloki se sengwenyana. Judase o rile go tšea nthathana yeo ya senkgwa a tšwela ka ntle. E be e le bošego. Ge Judase a seno tšwa, Jesu a re: “Bjale ke gona batho ba tlilogo utollelwa letago la Morwamotho; ba tlilo utollelwa le letago la Modimo ka yena Morwamotho. Gomme ge letago la Modimo le utollwa ka yena, gona Modimo o tla utollela batho letago la yena Morwamotho ka yena mong, a ba utollela lona gonabjale. Bana ba ka, nka se sa ba le lena go iša kae. Le tla nnyaka, gomme gonabjale ke le botša se ke se boditšego baetapele ba Bajuda ka re: ‘Mo ke yago gona lena le ka se kgone go fihla.’ Ke le fa molao wo mofsa, wa gore le ratane. Bjalo ka ge ke le ratile, le lena le rataneng. Ge le ratana ke mo batho ba tlago tseba gore le barutiwa ba ka.” Simone Petrose a mmotšiša a re: “Morena, o ya kae?” Jesu a mo fetola a re: “Ga bjale mo ke yago gona o ka se ntatele, o tla ntatela ka moso.” Petrose a mmotšiša a re: “Morena, gonabjale ke tla be ke šitišwa ke eng go go latela? Nna ke ikemišeditše le go go hwela.” Jesu a re: “O ra gore ka nnete o ikemišeditše go nkhwela? Ruri, ruri, ke go botša gore pele ga ge mokoko o lla o tla be o ntatotše gararo.” “Le se ferekane; le dumele go Modimo, le nna le dumele go nna. Ka ntlong ya Tate go na le madulo a mantši; ge go ka be go se bjalo, na nkabe ke le botša gore ke ya go le lokišetša madulo? Ge ke ile go le lokišetša madulo, ke tla boa ka tla ka le tšea gore le lena le yo ba mo ke lego gona. Tsela ya go ya mo ke yago gona le a e tseba.” Thomase a re go yena: “Morena, re ka re re sa tsebe mo o yago, tsela ya go ya gona yona ra e tseba?” Jesu a mo fetola a re: “Tsela ya gona le therešo le bophelo ke nna. Ga go yo a yago go Tate ge e se ka nna. Ge eba nna le a ntseba le Tate le tla mo tseba, gomme go thoma gonabjale le a mo tseba ebile le mmone.” Filipi a re go yena: “Morena, re bontšhe Tatago, ke mo re tlago wa pelo.” Jesu a mo fetola a re: “Filipi, nka re ke dutše le lena nako ye kaaka wa se ntsebe? Gape yo a bonego nna o bone Tate. Bjale wena o reng o re ke le bontšhe Tate? Kgane ga o dumele gore nna ke mo go Tate, le Tate o mo go nna? Tše ke le botšago tšona tše ga se tša ka, ke tša go dirwa ke Tate yo a dulago a le mo go nna. Ntumeleng ge ke re ke mo go Tate, le Tate o mo go nna. Ge le sa dumele ka baka la tše ke di bolelago, le upše le dumele ka baka la tše ke di dirago. Ruri, ruri, ke le botša gore yo a dumelago go nna o tla kgona go dira dimakatšo go swana le tše di dirwago ke nna, a dira le tša go feta tšona, ka gobane ke ya go Tate. Gomme se le kago nkgopela sona le le ba ka, ke tla se dira, gore batho ba bone letago la Tate ka nna, Morwagwe. Ge le nkgopela selo ka ge le le ba ka, ke tla se phetha.” “Ge le nthata, le tla phetha melao ya ka. Ke tla kgopela Tate a le fa Mothuši yo mongwe wa go tlo dulela le lena sa ruri. Ke yena Moya wa go utolla therešo, wo batho ba lefase ba sa kgonego go o amogela, ka ge ba sa o bone ebile ba sa o tsebe. Lena le a o tseba ka gobane o dula le lena, ebile o tla no ba mo go lena. “Nka se le tlogele le le ditšhiwana, ke sa tlilo boela mo go lena. Go šetše lebakanyana, ya ba batho ba lefase ga ba sa mpona, fela lena le tla mpona; gomme ka ge ke phela, le lena le tla phelela sa ruri. Mohlang woo ke gona le tlago tseba gore nna ke mo go Tate le gore le lena le mo go nna, bjalo ka ge le nna ke le mo go lena. “Yo a amogelago melao ya ka mme a e phetha, ke yena yo a nthatago. Gomme yo a nthatago ke yena yo a tlago ratwa ke Tate. Le nna ke tla mo rata, ka ikutollela yena.” Judase – e sego Judase Iskariote – a mmotšiša a re: “Morena, o tla be o reng o ikutollela rena, o sa ikutollele batho ba lefase?” Jesu a mo fetola a re: “Yo a nthatago o phetha tše ke di bolelago. Tate o tla mo rata, gomme re tla tla go yena ra dula mmogo le yena. Yo a sa nthatego yena ga a phethe tše ke di bolelago. Gape mantšu a le kwago ke a bolela a ga se a ka, ke a Tate yo a nthomilego. “Taba tše ke le botša tšona ke sa na le lena. Mothuši, e lego wona Moya wo Mokgethwa, wo Tate a tlago o roma a kgopetšwe ke nna, o tla le ruta dilo ka moka, a le gakolla tšohle tše ke le rutilego tšona. “Ke le tlogelela khutšo; ke khutšo ya ka ye ke le fago yona. Ga ke le tlogelele yona bjalo ka batho ba lefase. Le se ke la ferekana, le se ke la boifa. Le nkwele ge ke le botša ke re: ‘Ke a sepela, eupša ke tla boela mo go lena.’ Ge le ka be le nthata le ka be le thabela ge ke eya go Tate, ka gobane yena o a mpheta. Ke le botša ditaba tše di sešo tša hlaga, gore mohla di hlaga le dumele. Nka se sa bolela le lena go iša kae, ka gobane mmuši wa lefase le o etla, fela nna ga a ntaole. Eupša batho ba lefase le ba swanetše ba tsebe gore ke rata Tate. Ke ka baka leo ke dirago tšohle ka mo a ntaetšego ka gona. “Emelelang, re tlogeng mo.” “Ke nna morara wa mmakgonthe, gomme Tate ke molemi. Lekala le lengwe le le lengwe le le lego mo go nna le sa enywe o a le rema, le lengwe le le lengwe le le enywago o a le kgotha, gore le hlweke le tle le enywe le go feta. Lena le šetše le hlwekišitšwe ka tše ke le rutilego tšona. Dulang le le ba tee le nna, gomme le nna ke tla dula ke le o tee le lena. Lekala ga le kgone go enywa ka bolona, le kgona fela ge le kopane le morara. Ka wona mokgwa woo le lena le ka se kgone go enywa dikenywa ge le sa dule le le ba tee le nna. “Morara ke nna, makala ke lena. Yo a dulago e le o tee le nna, le nna ke le o tee le yena, o enywa dikenywa tše dintši, gobane ka ntle le nna le ka se kgone selo. Yo a sa dulego e le o tee le nna o a lahlwa a omelela go etša lekala ge le lahlilwe la omelela; gomme makala a a omeletšego a a topša a lahlelwa mollong, a swa. Ge le dula le le ba tee le nna gomme le theeletša tše ke le boditšego tšona, le ka kgopela se le se nyakago, mme le tla se fiwa. Se se tumišago Tate ke ge le enywa dikenywa tše dintši ebile le le barutiwa ba ka.” “Ke le rata bjalo ka ge Tate a nthata. Dulang le le ba tee le nna gore ke dule ke le rata. Ge le phetha melao ya ka ke tla dula ke le rata, go swana le nna ge ke phethile melao ya Tate, gomme a dula a nthata. “Ditaba tše ke le boditše tšona gore le be le lethabo le ke nago le lona, le gona lethabo la lena e be le le feletšego. Molao wa ka ke wa gore le rataneng bjalo ka ge le nna ke le rata. Lerato la go feta la ge motho a ka hwela bagwera ba gagwe ga le gona. Gomme lena le bagwera ba ka ge le dira tše ke le laelago tšona. Ga ke sa le bitša bahlanka, ka gobane mohlanka ga a tsebe se mong wa gagwe a se dirago. Lena ke le bitša bagwera ka gobane ke le begetše tšohle tše ke di boditšwego ke Tate. Ga se lena le nkgethilego, ke nna ke kgethilego lena ka le dira gore le enywe dikenywa tša go swarelela, gore se le kago se kgopela Tate ka ge le le ba ka, a le fe sona. Bjale ge, se ke le laelago sona ke gore le rataneng.” “Ge batho ba lefase ba le hloya, tsebang gore pele ba be ba hloile nna. Ge le ka be le le ba lefase, batho ba lefase ba ka be ba le rata, ba le tšea le le ba gabobona. Eupša ba le hloile ka ge ke le kgetholotše go bona gomme le se sa le ba gabobona. Gopolang sela ke le boditšego sona ka re mohlanka ga a fete mong wa gagwe. Ge nna ba be ntlhomere, le lena ba tlilo le hlomara. Ge ba be ba phetha tše ke bego ke ba botša tšona, tše ba di botšwago ke lena le tšona ba tla di phetha. Tšohle tše ba ntirilego tšona le lena ba tla le dira tšona ka ge le le ba ka, gobane yo a nthomilego yena ga ba mo tsebe. Ge nkabe ke se tle ka bolela le bona, ba ka be ba se na molato; eupša bjale ga ba na se ba ka itatolago sebe ka sona. Yo a ntlhoilego, o hloile Tate. Ge nkabe ke se ka ka ka dira mediro mo gare ga bona ye e sego ya ka ya dirwa ke motho, ba ka be ba se na molato; eupša le ge ba di bone bjale, ba ntlhoile, le Tate ba mo hloile. Fela go be go swanetše go ba bjalo, gore go phethege se se ngwadilwego ka melaong ya bona mo go thwego: ‘Ba ntlhoetše lefeela.’ “Ke tla re ke le go Tate ka le romela Mothuši, wona Moya wa go utolla therešo, wona wa go tšwa go Tate, gomme ge o fihla o tla ntlhatsela. Le lena le tla ntlhatsela, ka gobane le bile le nna go tloga mathomong. “Ke le boditše ditaba tše gore le se tlo kgeloga. Le tlilo rakwa disinagogeng. Go tla ba gwa tla nako ya gore ge motho a le bolaya a hlome nke ke gona ge a direla Modimo. Ba tla le hloriša ka mokgwa woo ka ge ba sa tsebe nna goba Tate. Ke le boditše ditaba tšeo gore ge nako ya tšona e fihla, le elelwe gore ke ile ka le botša. “Ga se ka le botša ditaba tše mathomong, ka gobane ke be ke sa na le lena. Eupša bjale ke ya go yo a nthomilego, fela ga go le o tee mo go lena yo a mpotšišago gore na ke ya kae. Gomme bjale ka gore ke le boditše, le nyamile kudu. Ke le botša nnete ge ke re: Go tloga ga ka go a le hola, ka gobane ge nka se tloge Mothuši a ka se tle go lena. Fela ge nka sepela, ke tla mo roma a tla go lena. Gomme ge a tlile o tla kgodiša batho ba lefase gore tše ba di naganago mabapi le sebe, le mabapi le toka, le mabapi le kahlolo ga se tšona. Ga se tšona mabapi le sebe, ka gobane ga ba dumele go nna; ga se tšona mabapi le toka, ka gobane ke ya go Tate, gomme le ka se sa mpona; ga se tšona mabapi le kahlolo, ka gobane mmuši wa lefase le o šetše a ahlotšwe. “Ke sa na le taba tše dintši tše nka le botšago tšona, fela gonabjale le ka se di kgone. E tla re ge go tlile wona Moya wa go utolla therešo, wa le tsebiša therešo ka moka. Gape o tla be o sa ipolelele, o tla be o bolela tše o di kwago; o le begela le tše di sa tlilogo hlaga. O tla nkgodiša, ka gobane tše o tlago be o le botša tšona e tla be e le tše di tšwago go nna. Tšohle tše Tate a nago le tšona ke tša ka; ke ka baka leo ke rego tše Moya o tlago le botša tšona e tla be e le tše di tšwago go nna.” “Ka morago ga lebakanyana le ka se sa mpona, ya re ka morago ga lebakanyana la buša la mpona.” Ba bangwe ba barutiwa ba gagwe ba botšišana ba re: “O ra go reng ge a re ka morago ga lebakanyana re ka se sa mmona, ya re ka morago ga lebakanyana ra buša ra mmona, le ge a re ke ka gobane a eya go Tatagwe? O ra eng ge a re ‘lebakanyana’? Rena ga re tsebe gore o bolela ka eng.” Jesu a lemoga gore ba nyaka go mmotšiša, ka gona a re go bona: “Na le botšišana taba ye ke le boditšego yona ka re ka morago ga lebakanyana le ka se sa mpona, ya re ka morago ga lebakanyana la buša la mpona? Ruri, ruri, ke le botša gore le tla lla la golola, eupša batho ba lefase bona ba tla thaba; le tla nyama, fela manyami a lena a tla fetoga lethabo. Mosadi ge a belega o kwa bohloko, ka ge nako ya gagwe e fihlile; fela e re ge a seno belega a lebale bohloko bjola, ka baka la go thabela motho yo a tlilego lefaseng. Le lena gonabjale le nyamile, eupša ke tla le bona gape gomme le tla thaba; lethabo leo la lena le ka se le amogwe ke motho. “Mohlang woo le ka se mpotšiše selo. Ruri, ruri, ke le botša gore se le kago se kgopela Tate ka ge le le ba ka o tla le fa sona. Go fihlela bjale ga se la ka la kgopela selo le le ba ka. Kgopelang, gomme le tla fiwa, gore lethabo la lena e be le le feletšego.” “Ditaba tše ke le boditše tšona ka go swantšha. Nako e etla ye ka yona nka se sa le botšago ka go swantšha, ke tlago bolela le lena phaa ka Tate. Mohlang woo le tla kgopela Tate ka ge le le ba ka; ke ka baka leo ke sa rego nna ke tla le kgopelela go yena, gobane yena ka noši o a le rata. O le rata ka gobane le lena le nthata, le gona le dumela gore ke tšwa go yena. Ke tšwa go Tate ka tla lefaseng, gomme bjale ke tlogela lefase ke ya go Tate.” Ke mo barutiwa ba gagwe ba rilego go yena: “Bjale gona o bolela phaa, e sego ka go swantšha. Bjale re a tseba gore o motsebi wa tšohle; ga go nyakege gore o hlwe o botšišwabotšišwa. Ke sona se se dirago gore re dumele gore o tšwa o le go Modimo.” Jesu a ba fetola a re: “Eya, bjale le a dumela? Nako e etla, ebile e šetše e fihlile, mo bohle le tlilogo gašaganywa, mongwe le mongwe a ya ga gabo, la ntlogela ke le noši. Fela ga se gore ke noši, ka gobane Tate o na le nna. Ditaba tše ke le boditše tšona gore le beege dipelo ka ge le le ba tee le nna. Mo lefaseng le tla hlorišwa, fela le bete dipelo; nna lefase ke le paletše!” Jesu ge a seno realo, a lebelela legodimong a re: “Tate, bjale ke nako. Utollela batho letago la ka, nna Morwago, gore le nna ke tle ke ba utollele la gago, gobane o mphile maatla a go buša batho bohle, gore bohle ba o mphilego bona ke tle ke ba fe bophelo bjo bo sa felego. Etse bophelo bjo bo sa felego bjo ke go tseba wena, Modimo o nnoši wa mmakgonthe, le go tseba Jesu Kriste, yo o mo romilego. Ke utolletše ba lefaseng letago la gago ka go phetha modiro wo o bego o ntaetše gore ke o phethe. Tate, bjale a e be wena o utollelago batho la ka letago o le gona moo o lego gona, lona letago lela ke bego ke na le lona le wena mola lefase le sešo la hlolwa. “Ke go tsebagaditše go ba o mphilego bona o ba kgetholotše go ba lefase. E be e le ba gago, wa mpha bona. Ba phethile tše o bego o ba laetše tšona, gomme bjale ba a tseba gore tšohle tše o mphilego tšona ka nnete ke tša go tšwa go wena. Ke ba boditše tše o rilego ke ba botše tšona, gomme ba dumela; ba a tseba gore ka nnete ke tšwa go wena, ebile ba a dumela gore ke wena o nthomilego. “Ke rapelela bona; ga ke rapelele ba lefase, ke rapelela ba o mphilego bona ba, ka gobane bona ke ba gago. Etse bohle ba e lego ba ka ke ba gago, le wena bohle ba e lego ba gago ke ba ka, gomme ke tumišwa ka bona. Nna bjale ke tla go wena; kgauswinyana ke tla be ke se sa le mo lefaseng, fela bona ba sa le mo lefaseng. Tate yo mokgethwa, o ba lote ka maatla a gago, maatla a o mphilego ona, gore ba fele ba le selo se tee boka rena. Mola ke sa na le bona ke be ke ba lotile ka maatla a gago, maatla a o mphilego ona. Ke be ke ba šireleditše, gomme gwa se lahlege le o tee mo go bona, ge e se yo morwatahlego, gore go phethege Mangwalo a Makgethwa. Bjale ke tla go wena, gomme ditaba tše ke di bolela ke sa le mo lefaseng, gore ba tle ba thabe thabang go etša nna. Ke ba boditše tše o rilego ke ba botše tšona, gomme ba hloiwa ke batho ba lefase ka ge bona e se ba lefase, ba etša nna ge ke se wa lefase. Ga se gore ke kgopela gore o ba tloše mo lefaseng; se ke se kgopelago ke gore o ba phemele go Yomobe. Bjalo ka ge nna ke se wa lefase, le bona ga se ba lefase. Ikgethwafaletše bona ka mantšu a gago, ona e lego a therešo; gape tše di bolelwago ke wena ke yona therešo. Ke ba roma lefaseng boka wena mola o nthoma lefaseng. Ka baka la bona ke ineela wena, gore le bona ba tle ba ineele wena ka botlalo. “Ga ke rapelele bona fela, ke rapelela le ba ba tlago dumela go nna ka baka la tše ba tlago mpolela ka tšona, gore bohle e be selo se tee. Nke ba be mo go rena, Tate, bjalo ka ge wena o le mo go nna, le nna ke le mo go wena, gore batho ba lefase ba tle ba dumele gore ke wena o nthomilego. Ke ba file letago lela o mphilego lona, gore ba tle ba be selo se tee go etša rena ge re le selo se tee: nna ke le mo go bona, mme wena o le mo go nna, gore ba be selo se tee ka botlalo, batho ba lefase ba tle ba tsebe ge ke romilwe ke wena, le gore ba o ba rata bjalo ka ge o rata nna. “Tate, o mphile bona, gomme ke nyaka gore mo ke lego gona le bona ba be gona, ba bone letago la ka le o mphilego lona, gobane o nthatile lefase le sešo la hlolwa. Tate yo a lokilego, batho ba lefase ga ba go tsebe, fela nna ke a go tseba, gomme le ba ba a tseba gore ke wena o nthomilego. Ke ba tsebišitše wena, ebile ke tla no fela ke ba tsebiša wena, gore lerato le o nthatago ka lona le bona le ba fihlele, le nna ke be selo se tee le bona.” Jesu o rile go fetša go rapela, yena le barutiwa ba gagwe ba tloga ba tshela moedi wa Kidrone. Gona moo go be go na le serapa, gomme Jesu le barutiwa ba gagwe ba tsena ka go sona. Judase yola wa go mo eka le yena felo fao o be a go tseba, ka gobane Jesu o be a hlwa a kopanela gona le barutiwa ba gagwe. Judase a ya gona le sehlopha sa madira a Baroma le baleti ba bangwe ba Tempele ba ba romilwego ke baprista ba bagolo le Bafarisei. Ba be ba swere mabone le dirumola le marumo. Jesu, ka ge a be a tseba tšohle tše di bego di tlilo mo hlagela, a ba batamela a re: “Le nyaka mang?” Ba mo fetola ba re: “Jesu wa Nasaretha.” Yena a re: “Ke nna!” Judase wa go tlo mo eka o be a na le bona. E rile ge Jesu a re: “Ke nna!” ba katakata ba wela fase. Jesu a ba botšiša gape a re: “Ke re na le nyaka mang?” Bona ba re: “Jesu wa Nasaretha.” Jesu a re: “Ke le boditše gore ke nna. Ge eba le nyaka nna, lesang ba ba itshepelele.” E be e le gore go phethege se a se boletšego mola a re: “Go ba o mphilego bona ga se ka lahlegelwa le ke o tee.” Simone Petrose, yena a bego a swere tšhoša, a e khwamola, a rema mohlanka wa Moprista yo Mogologolo a mo ripa tsebe ya la go ja. Leina la mohlanka yoo e be e le Malgose. Jesu a re go Petrose: “Bušetša tšhoša ya gago ka segatleng sa yona! Kgane o re senwelo sa tlaišego se Tate a mphilego sona ke se ke ka se nwa?” Ke ge sehlopha sela sa madira a Baroma, le molaodi wa bona, le baleti ba Tempele ba ba bego ba romilwe ke Bajuda ba swara Jesu, ba mmofa. Ba thoma ka go mo iša go Hanase, ratswale wa Khayafase, Moprista yo Mogologolo ngwageng woo. Khayafase yo ke yena yola wa go ka a eletša baetapele ba Bajuda a re: “Go kaone gore motho o tee e be yena a hwelago setšhaba.” Simone Petrose le morutiwa yo mongwe ba be ba šetše Jesu morago. Morutiwa yoo yena o be a tsebja ke Moprista yo Mogologolo, ka gona a tsena le Jesu ka lapeng la Moprista yoo yo Mogologolo, Petrose yena a ema ka ntle seferong. Morutiwa yoo yo mongwe a tšwela ka ntle, a fihla a bolela le ngwanenyana yo a bego a letile sefero, gomme a tsentšha Petrose ka gae. Ngwanenyana yola wa go leta sefero a re go Petrose: “Afa le wena ga o yo mongwe wa barutiwa ba monna yola?” Petrose a mo fetola a re: “Aowa, ga ke yena.” Ka ge go be go tonya, bahlanka le baleti ba ba bego ba le moo ba be ba goditše mollo, ba eme ba o oretše. Petrose a ya go ema le bona, a ikomoša. Moprista yo Mogologolo a sekiša Jesu mabapi le barutiwa ba gagwe le tše a di rutago batho. Jesu ge a mo fetola a re: “Ke be ke hlwa ke bolela le batho phatlalatša; ka mehla ke be ke ba ruta ka disinagogeng le Tempeleng, moo go phuthegelago Bajuda ka moka. Go be go se na se ke se bolelago sephiring. Bjale o reng o ntshekiša? Sekiša bao ba bego ba ekwa tše ke ba botšago tšona; ke bona ba ba tsebago tše ke bego ke di bolela.” Ge a realo, yo mongwe wa baleti ba ba bego ba eme moo a mo phasola sefahlego a re: “O reng o fetola Moprista yo Mogologolo ka mokgwa wo?” Jesu a mo fetola a re: “Ge eba ke boletše gampe, bolela bobe bja ka. Fela ge eba ke boletše gabotse, o ntšhapelang?” Ke ge Hanase a mo romela go Khayafase, Moprista yo Mogologolo, a sa kgokilwe. Petrose o be a sa eme gona moo a ikomoša. Ba ba lego moo mollong ba mmotšiša ba re: “Afa le wena ga o yo mongwe wa barutiwa ba gagwe?” Yena a latola a re: “Aowa, ga ke yena.” Mohlanka yo mongwe wa Moprista yo Mogologolo, wa gaboyola wa go ripša tsebe ke Petrose, a re: “Na ga se ka go bona o na le yena ka kua serapeng?” Petrose a latola gape – gateetee mokoko wa lla. E rile ge go esa ba tloša Jesu ga Khayafase ba mo iša go mmušiši. Fela ba se ke ba tsena, ka ge ba be ba sa nyake go itšhilafatša, gore ba tle ba kgone go ja Paseka. Ka gona Pilato a tšwela ka ntle go bona, a ba botšiša a re: “Ke molato mang wo le begago motho yo gore o o dirile?” Ge ba mo fetola ba re: “Ge e ka be e se mosenyi re ka be re se ra go gafela yena.” Pilato a re go bona: “Gona mo tšeeng lena beng le mo sekiše go ya ka molao wa lena.” Ba mo fetola ba re: “Gape rena ga se ra dumelelwa go bolaya motho.” E be e le gore go phethege se Jesu a bego a kile a se bolela mola a šupa lehu le a bego a tlilo le hwa. Pilato a boela ka gae, a fihla a bitša Jesu, a mmotšiša a re: “Na ke wena kgoši ya Bajuda?” Jesu a mo fetola ka go re: “A taba ye o mpotšišago yona ye o a ithomela, goba ke ye batho ba mpolelago go wena ka yona?” Pilato a re: “Na kgane ke nna Mojuda? Gape ke setšhaba sa geno le baprista ba bagolo ba ba go gafetšego nna. O dirileng?” Jesu a re: “Mmušo wa ka ga se wa lefase le; gape ge nkabe mmušo wa ka e le wa lefase le, ba ke ba bušago ba ka be ba ntwela gore ke se ke ka gafelwa Bajuda. Bjale mmušo wa ka ga se wa lefase le.” Pilato a mmotšiša a re: “E le gore go ba kgoši gona o kgoši?” Jesu a mo fetola ka go re: “O a bolela. “Se ke se tswaletšwego mme ke se tletšego mo lefaseng ke gore ke tle ke hlatsele therešo. Mang le mang yo e lego wa therešo o a ntheeletša.” Ke ge Pilato a re: “Therešo ke selo mang?” Pilato ge a seno realo a tšwela ka ntle gape go Bajuda, a fihla a re go bona: “Nna ga ke mmone molato. Fela e šetše e le setlwaedi mo go lena gore ka Monyanya wa Paseka ke le lokollele mogolegwa. Bjale na ga le nyake gore ke le lokollele yo kgoši ya Bajuda?” Ba goeletša ba re: “E se be yo! A e be Barabase!” Yo Barabase e be e le mohlakodi. Ke moka Pilato a tšea Jesu mme a laela gore a otlwe ka tshelane. Bahlabani ba loga kgare ya meetlwa, ba mo rweša yona hlogong; ba mo apeša kobo ya bohwibidu bja moretele, ba boaboa go yena ba re: “Thobela, kgoši ya Bajuda!” Ba fela ba mo phasola sefahlego. Pilato a tšwela ka ntle gape, a fihla a re go batho: “Bonang mo: Ke tla laela gore a ntšhetšwe mo ntle go lena gore le tsebe gore nna ga go molato wo ke mmonago wona.” Ke ge Jesu a tšwela ka ntle a rwešitšwe kgare yela ya meetlwa, a bile a apešitšwe kobo yela ya bohwibidu bja moretele. Pilato a re go bona: “Ke yoo moisa yola!” Baprista ba bagolo le baleti ba Tempele ge ba mmona ba goa ba re: “Mmapole sefapanong! Mmapole sefapanong!” Pilato a re: “Lena beng mo tšeeng le mmapole. Nnaena ga ke mmone molato.” Bajuda ba mo fetola ba re: “Re na le molao wo go ya ka wona a lebanwego ke lehu, ka gobane o itirile Morwa wa Modimo.” Pilato ge a ekwa ba realo a šia le go feta. A boela ka gae, a fihla a botšiša Jesu a re: “O tšwa kae, monna?” Fela Jesu a se mo fetole. Pilato a re: “O reng o nkhomolela? Kgane ga o tsebe gore ke na le maatla a go go lokolla le a go go bapola sefapanong?” Jesu a mo fetola a re: “O ka be o se na maatla a go ntira selo ge o ka be o se wa a fiwa ke Modimo. Ke ka baka leo motho yo a nkgafetšego wena a nago le sebe se se fetago sa gago.” Ge Pilato a ekwa a realo, a rata go mo lokolla. Fela Bajuda ba goa ba re: “Ge o ka mo lokolla, gona o tla be o se mogwera wa Kesare, gobane mang le mang yo a itirago kgoši o lwa le Kesare!” Pilato a re go kwa ba realo a iša Jesu ka ntle, a fihla a dula setulong sa kahlolo felo mo ba rego ke “Lebato la Maswika”, ka Seheberu ba rego ke “Gabatha”. E be e ka ba nako ya mosegare wo mogolo ka tšatši la go hlatlama la Paseka. Pilato a hlohla Bajuda a re: “Šeowe ge, kgoši ya lena!” Bona ba goa ba re: “Mmolaye! Mmolaye! Mmapole sefapanong!” Pilato a ba botšiša a re: “Eya, nka napa ka bapola kgoši ya lena?” Baprista ba bagolo ba mo fetola ba re: “Rena ga re na kgoši ka ntle le Kesare!” Ke ge Pilato a ba gafela Jesu gore a bapolwe sefapanong. Ba tšea Jesu ba tloga naye. Yena a sepela a athile sefapano sa gagwe; ba fihla felwana mo gongwe mo go bitšwago “Felo ga Legata”. Ka Seheberu go bitšwa “Golgotha”. Gona moo ba mmapola sefapanong; a bapolwa le banna ba bangwe ba babedi, mongwe ka mo, mongwe ka mo, Jesu a ba gare. Pilato a ngwala tsebišo, a laela gore e bewe godimo ga sefapano. Yona e be e re: “Jesu wa Nasaretha, Kgoši ya Bajuda.” Ya balwa ke batho ba bantši ka ge felo fao Jesu a bego a bapotšwe gona e be e se kgole le motse. Tsebišo yeo e be e ngwadilwe ka Seheberu le ka Selatine le ka Segerike. Baprista ba bagolo ba botša Pilato ba re: “O se ke wa ngwala go re ‘Kgoši ya Bajuda’; o ka upše o re: ‘Moisa yo o rile: Ke nna Kgoši ya Bajuda’.” Pilato a ba fetola ka go re: “Se ke se ngwadilego ke se ngwadile.” Bahlabani ba rile go fetša go bapola Jesu sefapanong ba tšea diaparo tša gagwe ba di aroganya diripa tše nne, mongwe le mongwe a tšea seaparo se tee. Ba tšea le seaparo sa gagwe sa ka gare, se se bego se se na moroko, se logilwe go tloga godimo go fihla fase e le selo se tee. Bahlabani ba botšana ba re: “A re se se gagoleng. A re se direleng matengwa, re boneng gore e tla ba sa mang.” Seo se be se direga gore go phethege Mangwalo a Makgethwa mo a rego: “Ba abelane diaparo tša ka, kobo ya ka yona ba e direla matengwa.” Gomme seo ke sona se se dirilwego ke bahlabani. Kgauswi le sefapano sa Jesu go be go eme mmagwe, le mmaneagwe, le Maria, mosadi wa Klopase, le Maria Magadalena. Jesu ge a bona mmagwe le morutiwa yola a bego a mo rata kudu a eme le yena, a re go mmagwe: “Mma, morwago šoowe.” Ke moka a re go morutiwa yoo: “Mmago šoowe.” Go tloga mohlang woo morutiwa yoo a tšea Maria a mo iša ga gagwe. Jesu ka ge a be a tseba gore bjale tšohle di phethegile, le ka ge a be a nyaka go phethagatša tše di ngwadilwego ka Mangwalong a Makgethwa, a re: “Ke nyorilwe.” Gona moo go be go beilwe sebjana se se tletšego beine ye bodila. Ba ina sepontšhe ka beineng yeo, ba se hlomela lehlakeng la hisopo, ba se iša molomong wa gagwe. Jesu ge a seno mona beine yeo sepontšheng a re: “Go phethegile!” Ya ba o inamiša hlogo, o a hwa. Ka ge e be e le letšatši la go itokišetša Sabatha, Bajuda ba kgopela Pilato gore banna bale ba go bapolwa ba robje maoto, le gore ditopo tša bona di fološwe, di se hlwe moo difapanong ka tšatši la Sabatha, ka ge letšatši la Sabatha yeo e be e le le legolo. Ka gona bahlabani ba ya ba roba monna wa mathomo maoto, ba roba le wa bobedi wa go bapolwa le Jesu. E rile ge ba fihla go Jesu, ba hwetša a šetše a hwile, ka gona ba se mo robe maoto. Yo mongwe wa bahlabani a mo hlaba lehlakore ka lerumo, gomme gateetee gwa tšwa madi le meetse. Mmoni wa tiragalo ye o a e hlatsela, gore le lena le tle le dumele. Bohlatse bja gagwe ke bja nnete, ebile o a tseba gore o bolela nnete. Taba yeo e diregile gore go phethege Mangwalo a Makgethwa a a rego: “Ga go lerapo la gagwe le le tlago robja.” Mo gongwe Mangwalo a Makgethwa a re: “Ba tla lebelela yo ba mo hlabilego.” Ka morago Josefa wa go tšwa motseng wa Arimathea a ya go kgopela Pilato gore a mo dumelele go tšea setopo sa Jesu. Yo Josefa e be e le molatedi wa Jesu, fela a iphihlile ka gobane o be a boifa baetapele ba Bajuda. Pilato a mo dumelela, ka gona Josefa a ya a fihla a se fegolla. Gwa ya le Nikodemose yola a bego a kile a etela Jesu bošego. Yena a ya le setlolo sa go nkga bose sa boima bjo e ka bago dikilokramo tše masome a mararo le metšo ye mebedi sa motswako wa mira le meetse a sekgopha. Ba fihla ba tšea setopo sa Jesu ba se tlotša ka setlolo seo, ba se phuthela ka mašela, go ya ka mokgwa wa Sejuda wa go phutha mohu. Felo mo Jesu a bapoletšwego gona go be go na le serapa. Ka mo serapeng seo go be go na le lebitla le lefsa, leo ka go lona go bego go se gwa ka gwa bolokwa motho. Ke gona ka mo ba ilego ba boloka Jesu, ka ge e be e le letšatši la Bajuda la go lokišetša Sabatha, le gona lebitla leo le le kgauswi. E rile maseng a Sontaga, Maria Magadalena a tsogela lebitleng e sa le ka mahwibi a banna, gomme a fihla a bona leswika le tlošitšwe mojako. A tloga a kitima a yo botša Simone Petrose le morutiwa yola yo mongwe yo Jesu a bego a mo rata kudu, a fihla a re go bona: “Ba ntšhitše setopo sela sa Morena ka lebitleng, gomme ga re tsebe mo ba se beilego gona!” Ke mo Petrose le morutiwa yola yo mongwe ba tlogilego ba ya lebitleng. Ba be ba kitima mmogo, fela morutiwa yola yo mongwe a šia Petrose a mo fihlela pele lebitleng. A inama, a bona mašela ale a bego a phuthetše setopo a le ka moo, fela a se ke a tsena ka gare. Simone Petrose o be a mo šetše morago, gomme yena a fihla a tsena ka lebitleng. A bona mašela ale ka moo, le lela le bego le tatile setopo hlogo. Lona le be le se na ale a mangwe; le be le phuthilwe le nnoši. Morutiwa yola yo mongwe wa go fihla pele lebitleng le yena a tsena, a bona, a dumela. Gape ba be ba sešo ba kwešiša Mangwalo a Makgethwa ge a re o swanetše go tsoga bahung. Ke moka barutiwa bale ba boela gae. Maria o be a eme ka ntle ga lebitla a lla. Ya re a sa lla bjalo a inama a hlodimela ka lebitleng, gomme a bona barongwa ba babedi ba go apara diaparo tše ditšhweu ba dutše mola go bego go beilwe setopo sa Jesu, yo mongwe a le ka dihlogong, yo mongwe a le ka maotong. Ba mmotšiša ba re: “Mosadi, o llelang?” Yena a re: “Ba tšere setopo sa Morena wa ka, gomme ga ke tsebe mo ba se beilego gona.” Ge a seno realo a retologa, gomme a bona Jesu a eme moo, fela a se tsebe gore ke yena. Jesu a mmotšiša a re: “Mosadi, o reng o lla? O nyaka mang?” Maria, ka go gopola gore yoo ke moletaserapa, a re go yena: “Morena, ge eba ke wena o tšerego mohu, mpotše mo o mmeilego gona, gomme ke tla mo lata.” Jesu a mmitša a re: “Maria!” Yena a retologela go yena, a re ka Seheberu: “Rabuni!” (Ke go re “Moruti”.) Jesu a re go yena: “O se ke wa ntshwara, ka gobane ga sešo ka rotogela go Tate. Wena eya go banabešo o yo ba botša gore ke rotogela go yo e lego Tate le Tatagobona, go yo e lego Modimo wa ka le Modimo wa bona.” Ke ge Maria a eya a fihla a botša barutiwa gore o bone Morena, gomme a ba anegela tše Morena a mmoditšego tšona. Mantšiboeng a sona Sontaga seo barutiwa ba be ba kopane, ba itswaleletše ka ntlong ka baka la go boifa baetapele ba Bajuda. Jesu a tla a ema mo gare ga bona, a ba dumediša a re: “Khutšo a e be le lena!” Ge a seno realo a ba bontšha diatla tša gagwe le lehlakore. Bona ba thaba kudu ge ba bona Morena. Jesu a boeletša a re: “Khutšo a e be le lena! Bjalo ka ge Tate a nthomile, le nna ke a le roma.” Ya ba o a ba budulela o re: “Amogelang Moya wo Mokgethwa. Ge le swaretše batho dibe ba swaretšwe; ge le ganne go ba swarela ga se ba swarelwa.” Thomase, yo mongwe wa barutiwa bale ba lesome le ba babedi, yo a bitšwago Lefahla, o be a se gona ge Jesu a itšweletša go bona. Ka gona barutiwa bale ba bangwe ba mmotša ba re: “Re bone Morena!” Yena a re go bona: “Nna ge ke se ka bona dintho tša dibapola diatleng tša gagwe, ka kgoma dintho tšela ka monwana, ka phophola le lehlakore la gagwe ka seatla, nka se tsoge ke dumetše.” Ka Sontaga se se latelago barutiwa ba be ba le ka ntlong gape, gomme Thomase a na le bona. Mabati a be a tswaletšwe, fela Jesu a tla a ema mo gare ga bona, a ba dumediša a re: “Khutšo a e be le lena!” Ke moka a re go Thomase: “Mphophole ka monwana mo, o lebelele le diatla tša ka, o otlolle letsogo o mphophole mo lehlakoreng, gomme o lese go belaela, o dumele.” Thomase ge a mo fetola a re: “Morena wa ka le Modimo wa ka!” Jesu a re: “Na bjale o a dumela ka ge o mpone? Go lehlogonolo ba ba dumelago ba se ba mpona.” Jesu o ile a dira mehlolo ye mengwe ye mentši a na le barutiwa ba gagwe, fela yona ga se ya ngwalwa ka pukung ye. Ye e ngwaletšwe gore le dumele gore Jesu ke yena Mesia, Morwa wa Modimo, le gore ka go dumela le tle le be le bophelo bjo bo sa felego ka yena. Ka morago ga moo Jesu a itšweletša gape go barutiwa ba gagwe kua letsheng la Tiberiase. A itšweletša ka mokgwa wo: Simone Petrose le Thomase, yo a bego a bitšwa Lefahla, le Nathaniele wa go tšwa Kana kua Galilea, le barwa ba Sebediose, le barutiwa ba bangwe ba babedi ba Jesu ba be ba le mmogo. Simone Petrose a re go bale ba bangwe: “Nna ke sa yo thea dihlapi.” Bona ba re: “Le rena re ya le wena.” Ba nama ba tloga ba namela leselawatle, fela bošego bjoo ka moka ba se sware selo. E rile ge go šetše go sele Jesu a ema lebopong, eupša barutiwa ba gagwe ba sa tsebe gore ke yena. Ke moka a ba botšiša a re: “Banna, afa le tantše sa go šeba?” Bona ba mo fetola ba re: “Aowa, ga se ra tanya.” Jesu a re go bona: “Lahlelang lelokwa la lena ka lehlakoreng la go ja la leselawatle, gomme le tla tanya.” Ke moka ba lahlela lelokwa, gomme ba šitwa le ke go le gogela ka leselawatleng ka baka la bontši bja dihlapi. Morutiwa yola Jesu a bego a mo rata kudu a re go Petrose: “A! Ke Morena!” Petrose ge a ekwa gore ke Morena, a itata ka kobo, ka gore o be a e apotše, a itahlela ka meetseng. Barutiwa bale ba bangwe ba tla ka leselawatle, ba ntše ba goga lelokwa lela la dihlapi. Ba be ba se kgole le lebopo, ba ka ba dimetara tše lekgolo. E rile ge ba fologela lebopong, ba bona mollo woo go wona go bego go bešitšwe hlapi, ba bona le senkgwa. Ke ge Jesu a re go bona: “Tlišang dihlapi tše dingwenyana tše le sa tšogo di tanya.” Simone Petrose a namela leselawatle, a gogela lelokwa lebopong le tletše dihlapi tše dikgolo, e le tše lekgolo le masome a mahlano le tše tharo, gomme le ge e le tše dintši bjalo, lelokwa la se gagoge. Jesu a re go bona: “Etlang le jeng!” Gwa se be le o tee mo go bona wa go beta pelo a mmotšiša a re: “Ke wena mang?” gobane ba be ba tseba gore ke Morena. Ke moka Jesu a batamela, a tšea senkgwa sela a ba fa sona; a ba fa le hlapi yela. Ke ge bjale e šetše e le la boraro Jesu a itšweletša go barutiwa ba gagwe ka morago ga ge a tsogile bahung. Ge ba feditše go ja, Jesu a re go Simone Petrose: “Simone, morwa wa Johanese, na o nthata go feta ba?” Yena a mo fetola a re: “Ee, Morena, o a tseba gore ke a go rata.” Jesu a re go yena: “Fudiša dikwanyana tša ka.” A mmotšiša la bobedi a re: “Simone, morwa wa Johanese, na o a nthata?” Yena a mo fetola a re: “Ee, Morena, o a tseba gore ke a go rata.” Jesu a re go yena: “Diša dinku tša ka.” A mmotšiša la boraro a re: “Simone, morwa wa Johanese, na o a nthata?” Petrose a nyama ge Jesu a mmotšiša la boraro a re: “Na o a nthata?” Ka gona a mo fetola a re: “Ke wena o tsebago tšohle; o a tseba gore ke a go rata.” Jesu a re go yena: “Fudiša dinku tša ka. Ruri, ruri, ke go botša gore mola o sa le yo mofsa o be o ipofa letheka ka bowena, o ye mo o ratago gona; eupša ge o tšofetše o tla otlolla matsogo wa bofša ke yo mongwe a go iša mo o sa ratego go ya gona.” Etse ge a realo o be a mo swantšhetša lehu le yena Petrose a tlago le hwa a tumiša Modimo. Ke moka Jesu a re go yena: “Ntatele!” Petrose ge a retologa a bona morutiwa yola wa go ratwa ke Jesu kudu a ba šetše morago, yena yola wa go ka a sekamela go Jesu a mmotšiša ba le dijong a re: “Morena, ke mang yo a tlago go eka?” E rile ge Petrose a mmona, a botšiša Jesu a re: “Morena, yo yena o reng ka yena?” Jesu a mo fetola a re: “Na ge eba ke nyaka gore a phele go fihlela ke boa, o tshwenywa ke eng? Wena ntatele!” Mo go balatedi ba Jesu gwa napa gwa tuma gore morutiwa yoo a ka se hwe, mokagona Jesu yena a se a re morutiwa yoo a ka se hwe, a dio re: “Ge eba ke nyaka gore a phele go fihlela ke boa, wena o tshwenywa ke eng?” Ke yena a hlatselago taba tše, le gona ke yena a di ngwadilego, gomme rena re a tseba gore bohlatse bja gagwe ke bja nnete. Go sa na le dilo tše dingwe tše dintši tše Jesu a di dirilego. Ge di ka be di ngwadilwe ka moka ga tšona, ga ke kgolwe gore lefase ka bolona le be le ka kgona go phutha dipuku tše di ka bego di ngwadilwe. Theofilose wa ka. Ka pukung yela ka go go ngwalela yona pele ke ngwadile tšohle tše Jesu a di dirilego, le tše a di rutilego batho go tloga mola a thoma modiro wa gagwe, go ba go fihla mohla a rotošetšwa legodimong. Pele a rotošwa, o ile a laya baapostola ba gagwe ka Moya wo Mokgethwa, bale a bego a ba kgethile. Ke bona ba e rilego mo matšatšing a masome a mane ka morago ga go hlokofatšwa ga gagwe a itšweletša go bona gantši ka mo go sa belaetšego gore o tsogile. Ba mmona, gomme a bolela le bona ka tša mmušo wa Modimo. Ya re ge ba le mmogo, a ba laya a re: “Le se ke la tloga Jerusalema, le letele se Tate a le holofeditšego sona, sona sela ke le boditšego sona. Johanese o be a kolobetša ka meetse, eupša lena le tla kolobetšwa ka Moya wo Mokgethwa ka morago ga matšatši a se makae.” E rile ge baapostola ba kopane ba mmotšiša ba re: “Morena, na setšhaba sa Israele o tlilo se tsošetša mmušo gona mo nakong tše?” Jesu a ba fetola ka go re: “Ga se taba ya lena go tseba dinako le mabaka ao Tate a a beilego ka maatla a gagwe yena mong. Lena le tla maatlafatšwa ge Moya wo Mokgethwa o theogela go lena, la ba dihlatse tša ka Jerusalema le nageng yohle ya Judea le ya Samaria, le go fihla magomong a lefase.” Ge a seno realo, a rotošetšwa legodimong ba mo lebeletše, gomme a širetšwa ke leru, ba se sa mmona. Ba rile ba sa tsepeletše leratadimeng ge a ntše a sobelela bjalo, gateetee banna ba babedi ba ba aperego bošweu ba ema le bona ba re: “Lena banna ba Galilea, le emetšeng mo le lebeletše leratadimeng? Yena Jesu yo a tlošitšwego mo go lena a rotošetšwa legodimong, o tla boa ka wona mokgwa wo le mmonego a eya legodimong ka wona.” Ke ge baapostola ba tloga thabeng ye e bitšwago ya Mehlware, kgauswi le motse wa Jerusalema, monabjana wo e ka bago kilometara e tee go tloga gona, ba boela gona motseng. Ba re go tsena motseng ba namelela ka phapošing ya ka godimo ye ba bego ba dula ka go yona. Bona e be e le Petrose le Johanese, le Jakobose le Andrease, le Filipi le Thomase, le Bartolomeose le Mateu, le Jakobose, morwa wa Alfeose, le Simone, Mollelatokologo, le Judase, morwa wa Jakobose. Ba be ba kgothalela go rapela e le ba pelo e tee, ba na le basadi ba bangwe gotee le Maria, mmagoJesu, le banababo. Ka tšatši le lengwe ge badumedi ba e ka bago ba lekgolo le ba masome a mabedi ba kgobokane, Petrose a ema a bolela a re: “Bagešo, go be go swanetše gore Mangwalo a Makgethwa a phethege, ao Moya wo Mokgethwa o a boletšego ka Dafida a era Judase, yo e bilego mohlahli wa bale ba go swara Jesu. E be e le mongwekarena, a kgethetšwe go šoma le rena. “Yo Judase, ka tšhelete ye a bego a e hweditše ka modiro wola wa gagwe wo mobe, o rekile serapa se a wetšego ka hlogo ka go sona, a palega ka bogare, gomme mala a gagwe ohle a kgothoga. Taba ye ya tsebja motseng wohle wa Jerusalema, gomme ke ka baka leo serapa seo ka polelo ya gona ba rego ke Hakeldamage, ke go re ‘Serapa sa madi’. “Gobane ka pukung ya Dipesalome go ngwadilwe go re: “ ‘Ntlo ya gagwe a e ngalwe, a go se dule motho ka go yona.’ “Go ngwadilwe le go re: “ ‘Modiro wa gagwe a o tšewe ke yo mongwe.’ “Ka gona, yo mongwe o swanetše gore e be hlatse le rena ya gore Morena Jesu o tsogile bahung. E swanetše go ba yo mongwe wa ba ba bego ba sepela le rena nakong ka moka ya ge Morena Jesu a be a šika le rena, go tloga ka nako yela Johanese a mo kolobetša, go fihlela mohla wola a tlošwa go rena a rotošetšwa legodimong.” *** Ka gona ba ntšha ba babedi, e lego Josefa yo a bitšwago Barsabase, le lengwe ke Justose, le Mathiase. Ke moka ba rapela ba re: “Morena, wena o tsebago dipelo tša bohle, re bontšhe yo o mo kgethilego mo go ba babedi ba, gore a dire modiro wa boapostola wo Judase a o tlogetšego ge a eya felo mo go mo lebanego.” Ba ba diriša matengwa ao a ilego a ntšha Mathiase, gomme yena a nama a balwa le baapostola bale ba lesome le o tee. Ge letšatši la Pentekoste le fihla, bohle ba be ba kgobokane felo gotee. Gateetee ba kwa modumo o etšwa kua leratadimeng nke ke wa ledimo le le tšubutlago, wa tlala ntlo yohle yeo ba bego ba dutše ka go yona. Ba bona go hlahlamologa dilwana tše nkego ke dikgabo tša mollo di kotama godimo ga yo mongwe le yo mongwe wa bona. Ke moka ba tlala Moya wo Mokgethwa, ba thoma go bolela ka maleme a šele, go ya ka mo Moya o ba kgontšhago go bolela ka mafolofolo ka gona. Gona moo motseng wa Jerusalema go be go na le Bajuda, banna ba borapedi ba ba agilego ditšhabeng tšohle tše di lego lefaseng. E rile ge modumo woo o kwagala, batho ba bantši ba kgobokana. Ba tlabega ba gakanegile, ka gobane mongwe le mongwe o be a ba kwa ba bolela ka polelo ya gabo. Ge ba tlabegile ba maketše bjalo, ba botšišana ba re: “Na ga ke re batho ba ba bolelago ba ka moka ke Bagalilea? Bjale go tla bjang ge rena ka moka re ekwa ba bolela ka mebolelo ya gaborena? Etse mo go rena go na le Baparetia le Bamedia le Baelamo; go na le ba go dula Mesopotamia le Judea le Kapadokia; go na le badudi ba naga ya Pontose le ya Asia, le ya Frigia le ya Pamfilia, le ya Egepeta le dileteng tša Libia, kgauswi le Sirene. Ba bangwe ba tšwa Roma, ba bangwe ba bona ke Bajuda, ba bangwe ke baditšhaba ba ba sokologetšego tumelong ya Sejuda; ba bangwe ke Bakreta, bangwe ke Baarabia – fela re kwa ba bolela ka mebolelo ya gaborena dimakatšo tše Modimo a di dirilego.” Ba ile ba fela ba tlabegile ba gakanegile, ba botšišana ba re: “Taba ye e iša kae?” Fela ba bangwe ba ba kwera ba re: “Ke ditagwa batho ba!” Petrose a ema a na le baapostola ba bangwe ba lesome le o tee, a hlaboša lentšu a botša lešaba le le bego le le fao a re: “Lena Bajuda le lena bohle le dulago mo Jerusalema, ntheeletšeng ke le botše tše di diregilego: Batho ba ga se ba tagwa, bjalo ka ge lena le nagana, gobane e sa le iri ya senyane mosong. Gabotse tše ke ditaba tše di boletšwego ke moprofeta Joele mola a re: ‘Modimo o re: Tše ke tlago di dira ka matšatši a mafelelo šedi: “ ‘Ke tla tšhela batho bohle Moya wa ka, barwa le barwedi ba lena ba tla botša batho lentšu la ka; masogana a lena a tla bona dipono, batšofadi ba lena ba tla lora ditoro. Le badiredi ba ka ba banna le ba basadi ke tla ba tšhela Moya wa ka mehleng yeo, gomme ba tla bega molaetša wa ka. Ke tla dira mehlolo godimo leratadimeng le dimaka fase lefaseng. Go tla tšhologa madi, gwa ba le mollo le dihlahlamuši. Letšatši le tla fifala, le ngwedi wa re hwibii boka madi, pele go etla Letšatši le legolo le le makatšago la Morena. Ya ba gona go phološwago mang le mang yo a kgopelago Morena thušo.’ “Lena Baisraele, ekwang taba še: Jesu wa Nasaretha ke monna yo Modimo a mo hlatsetšego mo go lena ka ditiro tše maatla le ka dimaka le ka mehlolo ye a e dirilego ka yena mo go lena, ye lena beng le e tsebago. Ke yena yo le mo gafetšwego, go ya ka mo Modimo a beakantšego ka gona le ka mo a tsebilego ka gona pele, la ba la dira gore baditšhaba ba mmapole sefapanong ba mmolaye. Eupša Modimo o mo tsošitše bahung, ge a seno mo tlemolla mahlokong a lehu, gobane go be go sa kgonege gore lehu le mo tlemele ruri. Gape Dafida o boletše ka yena a re: “ ‘Ke be ke bona Morena a le pele ga ka ka mehla; o kgauswi le nna, gomme nka se thedimoge. Ke ka baka leo ke thabilego, mme ke bolelago ke nyakaletše e le ruri. Le ge ke le mothwana wa nama bjale, ke dula ke wele pelo ke holofetše, gobane o ka se ntlogele ke eya bodulabahu; o ka se ntese ke eya boyabahu, nna, mohlanka wa gago yo ke botegago. O ntšhupeditše tsela tše di išago bophelong, gomme ge o na le nna ke tla iketlela sa ruri.’ “Bagešo, anke ke bolele le lena ke sa boife selo ka Dafida, rakgolokhukhu wa rena. Yena o rile go hwa a bolokwa, gomme le lehono lebitla la gagwe le sa le gona mo go rena. E be e le moprofeta, gomme a tseba gore Modimo o mo enetše gore yo mongwe wa ditlogolo tša gagwe e tlilo ba kgoši go no swana le yena. Dafida o di bone di sa tla, gomme o be a bolela ka go tsoga ga yena Kriste mola a re: “ ‘A ka se tlogelwe a le bodulabahu, setopo sa gagwe se ka se bole.’ “Yena Jesu yo Modimo o mo tsošitše bahung, gomme rena ka moka re dihlatse tša taba ye. O rotošeditšwe madulong a bogoši, kgauswi le Modimo, Tatagwe, yo a mo amogedišitšego Moya wo Mokgethwa, bjalo ka ge a be a mo holofeditše. Se bjale le se bonago gape le se kwago ke wona Moya wo Mokgethwa wo a re tšhetšego wona. Gobane ga se Dafida yo a ilego a rotogela legodimong; se a se boletšego o rile: “ ‘Morena o rile go Morena wa ka: Dula ka mo letsogong la ka la go ja, ke be ke tle ke go fenyetše manaba a gago.’ “Ka gona, setšhaba sa Israele ka moka se swanetše se tsebe e le ruri gore yena Jesu yo le mmapotšego sefapanong yo, ke yena yo Modimo a mmeilego Morena, a mo dirilego Kriste.” Ge ba ekwa tšeo, tša ba hlaba, gomme ba re go Petrose le baapostola bale ba bangwe: “Bagešo, re direng?” Petrose a ba fetola a re: “Sokologang mme ka moka le kolobetšwe le be ba Jesu Kriste, gore le swarelwe dibe tša lena; gomme le tla amegedišwa mpho ya Modimo, e lego Moya wo Mokgethwa. Gobane Modimo o holofeditše lena le bana ba lena le bohle ba ba lego kgole – bohle bao Morena Modimo wa rena a ba bitšago.” Petrose a ba kgothatša kudu a tiišitše a re: “Itoteng, le tšwe bathong ba bakgopo ba!” Ba bantši ba ile ba kgolwa molaetša woo wa gagwe, gomme ba kolobetšwa; mohlang woo badumedi ba oketšwa ka batho ba e ka bago ba dikete tše tharo. Bona bao ba be ba dula e le ba ba rutwago ke baapostola, ba ba ikwago e le selo se tee, ba ba ngwathišanago bogobe, le ba ba rapelago. Mehlolo ye mentši le dimaka di be di dirwa ke baapostola, gomme bohle ba tletše poifo. Badumedi bohle ba be ba dula e le ba ba ikwago e le selo se tee, gomme tšohle tše ba nago le tšona ba di hlakanela. Ba be ba fela ba rekiša maruo le dithoto tša bona, gomme tšhelete ya gona ba e abelane, go ya ka mo motho a hlokago ka gona. Tšatši le lengwe le le lengwe ba be ba kopanela Tempeleng e le seboka, ba ngwathišana bogobe ka magaeng a bona ka go šielana, ba eja ba thabile, ba ikokobetša, ba tumiša Modimo, ba kgahla batho ka moka. Letšatši ka letšatši Morena a oketša phuthego ka bao ba phološwago. Ka tšatši le lengwe Petrose le Johanese ba kile ba ya Tempeleng ka iri ya boraro mathapama, nako ya thapelo. Mo lesorong la Tempele le le bego le bitšwa Lesoro le Lebotse go be go na le monna yo a tswetšwego e le segole. Tšatši le lengwe le le lengwe o be a rwalwa a išwa moo gore a yo kgopela tšhelete go batho ba ba tsenago ka kgorong ya Tempele. O rile go bona Petrose le Johanese ba re ba a tsena, a ba kgopela mphonyana. Bona ba mo hlaba ka mahlo, gomme Petrose a re go yena: “Re lebelele!” Monna yoo a ba lebelela, a holofetše gore ba tla mo fa se sengwenyana. Fela Petrose a re go yena: “Tšhelete yona ga ke nayo, eupša se ke nago le sona ke go fa sona: Ka maatla a Jesu Kriste wa Nasaretha, ema o sepele!” Ya ba o mo swara ka seatla sa la go ja o a mo emiša. Gatee monna yoo a tielela maoto le dikgokgoilane; a nanoga a ema, a thoma go sepelasepela, a tsena ka kgorong ya Tempele le bona, a sepela a phepela, a reta Modimo. Batho ka moka ba mmona a sepela a reta Modimo bjalo, gomme ge ba lemoga gore ke mokgopedi yola a bego a hlwa a dutše Lesorong le Lebotse, ba kgotsa kudu ba tlabilwe ke tšeo di mo hlagetšego. Ka ge monna yoo a napile a kgomarela Petrose le Johanese mo mathuding ao batho ba a bitšago mathudi a Solomone, batho ka moka ba ile ba ba kitimela ba tlabegile. Petrose ge a di bona a re go bona: “Lena Baisraele, le reng le tlabja ke taba ye? Gona le reng le lebeletše rena, mo nkego ke rena re kgontšhitšego motho yo ka maatla a rena goba ka borapedi bja rena gore a sepele? Modimo wa Abrahama le Isaka le Jakobo, Modimo wa borakgolokhukhu ba rena, o tumišitše Jesu, mohlanka wa gagwe, yena yo lena le mo gafetšego babuši ba Bajuda, la mo lahla mo pele ga Pilato, ešita le mola Pilato a ikemišeditše go mo lokolla. E be e le mokgethwa, e le moloki, fela lena la mo lahla, la kgopela gore le lokollelwe mmolai. Le bolaile yena Moišabophelong, fela Modimo a mo tsoša bahung – gomme rena re dihlatse tša taba ye. Ke ka maatla a gagwe ge segole se le se bonago se gape le se tsebago se tieletše; ke ka tumelo go yena. Bjalo ka ge le lena ka moka le iponela, ke ka tumelo go Jesu ge motho yo o fodišeditšwe sa ruri. “Bjale ge, banabešo, ke a tseba gore se le se dirilego le se dirišitšwe ke go se tsebe, le swana le baetapele ba lena. Modimo o boletše kgale ka baprofeta bohle gore Kriste wa gagwe o tla hlokofatšwa, gomme taba ye o e phethagaditše ka wona mokgwa wo. Ka gona, itsholeng le sokologe gore le phumolwe dibe tša lena, gore Morena a le lapološe, a le romele Jesu, yena Kriste yo a šetšego a mo kgethetše lena. O swanetše go ba a dutše kua legodimong go fihlela ge dilo tšohle di tlilo bušetšwa sekeng sa tšona, bjalo ka ge Modimo a begile ka baprofeta ba gagwe ba bakgethwa ba ba phetšego kgalekgale. Gobane Moshe o rile: ‘Morena Modimo wa lena o tla le romela moprofeta wa go swana le nna a etšwa setšhabeng sa gabolena. Le phethe tšohle tše a le laelago tšona. Yo a sa theeletšego moprofeta yoo a kgaolwe setšhabeng.’ Le baprofeta ka moka ba ba bego ba bega molaetša wa Modimo, go thoma ka Samuele le ba ba bego ba mo hlatlama, le bona ba bega tše di dutšego di hlaga mo matšatšing a. Dilo tše baprofeta ba boletšego ka tšona ke tša lena, gomme le na le setseka mo kgweranong ye Modimo a e dirilego le borakgolokhukhu ba lena mola a re go Abrahama: ‘Ditšhaba tšohle tša lefase di tla šegofatšwa ka ditlogolo tša gago.’ Bjale ge, Modimo o romile mohlanka wa gagwe lefaseng, pele a mo roma go lena, gore a tle a le šegofatše ka go sokolla yo mongwe le yo mongwe wa lena makgopong a gagwe.” E rile ge Petrose le Johanese ba sa bolela le batho, gwa fihla baprista ba bangwe le letona la baleti ba Tempele ba na le Basadusei ba bangwe. Ba selekwa ke ge baapostola bao ba botša batho gore Jesu o tsogile bahung, e lego taba ye e šupago gore bahu ba tla tsoga. Ka gona ba ba swara, ba ba iša kgolegong, ba ba latša gona, ka ge e be e šetše e le mathapama. Fela ba bantši ba ba bego ba kwele molaetša wa bona ba ile ba dumela; gomme bjale palo ya ba ba dumelago e be e šetše e ka ba dikete tše tlhano. Ka le le latelago bagolo ba Bajuda le bakgomana le boramangwalo ba kgobokana Jerusalema. Ba rerišana le Hanase, Moprista yo Mogologolo, le Khayafase le Johanese le Aleksandere le bohle ba gaboMoprista yo Mogologolo. Ba emiša baapostola bao mo pele ga bona, ba ba botšiša ba re: “Se le se dirile ka maatla a mang, gona le se kgontšhitšwe ke mang?” Petrose a ba fetola a tletše Moya wo Mokgethwa a re: “Lena bagolo ba setšhaba le lena bakgomana, lehono le re sekišetša modiro wo mobotse wo re o diretšego motho wa segole, le re o fodišitšwe bjang. Bjale ge, lena ka moka le setšhaba sohle sa Israele, tsebang gore motho yo o eme mo pele ga lena a fodišitšwe ka maatla a Jesu Kriste wa Nasaretha, yola lena le mmapotšego sefapanong mme Modimo a mo tsoša bahung. Ke yena “ ‘leswika leo lena baagi le le nyaditšego le e bilego lona la sekhutlo.’ “Ke yena fela yo a kgonago go phološa; lefaseng lohle ga go yo mongwe yo rena batho re mo filwego mme re kago phološwa ke yena.” Ba Kgorokgolo ya Bajuda ba ile ba tlabega ge ba bona Petrose le Johanese ba bolela ka go se boife, mola bona ba kwele gore banna bao ga se ba go rutega, ga se ba maemo. Le gona ba be ba lemoga gore banna bao ke ba bangwe ba bale ba bego ba šika le Jesu. Fela ka ge ba be ba bona monna yola wa go fodišwa a eme nabo, ba ile ba hloka se ba ka kgonago go se ganetša. Ka gona ba ba laela gore ba tšwe ka Kgorongkgolo, mme bona ba šala ba botšišana ba re: “Na banna ba re ka ba dirang? Batho ka moka mo Jerusalema ba tseba gabotse gore mohlolo wo mogolo wo o dirilwe ke bona, gomme re ka se ganetše. Fela gore taba ye e se phatlalale mo setšhabeng, a re ba tšhošetšeng, re re ba se sa botša motho ka Jesu.” Ke ge ba ba bitša, ba ba laya gore le ka mohla o tee ba se bolele goba ba ruta tša Jesu. Eupša Petrose le Johanese ba ba fetola ka go re: “Ikahloleleng, lena beng, gore go Modimo se se lokilego ke go theeletša lena goba yena na. Ge e le rena re ka se lese go bolela tše rena beng re di bonego le gona re di kwelego.” Ba rile go ba tšhošetša le go feta, ba ba lesa ba sepela. Gape ba be ba bona gore go ba otla ba ka se kgone, ka ge batho ka moka ba be ba reta Modimo ka baka la taba tše di diregilego. Monna yo mohlolo woo o bego o dirilwe go yena o be a na le mengwaga ye e fetago ye masome a mane. Petrose le Johanese ba rile go lokollwa moo ba boela go badumedi ba bangwe, ba ba anegela tše baprista ba bagolo le bagolo ba setšhaba ba di boletšego. Bona ba rile go di kwa ba rapela Modimo mmogo ba re: “Morena, wena Mohlodi wa leratadima le lefase le lewatle le tšohle tše di lego mo go ona, o boletše ka Moya wo Mokgethwa ka molomo wa rakgolokhukhu wa rena, Dafida, mohlanka wa gago, wa re: ‘Baditšhaba ba reng ba gaketše, merafe e rerelang tša lefeela? Magoši a lefase a tsogela Morena le yena Motlotšwa wa gagwe maatla, babuši ba a ba lakana.’ “Gape ka kgonthe Heroda le Pontiose Pilato le baditšhaba le setšhaba sa Israele ba ile ba kopana gona motseng, ba lakana Jesu, mohlanka wa gago yo mokgethwa yo o mo dirilego Motlotšwa. Ba kopana go tlo dira tšohle tše o bego o šetše o itherile go di dira ka bowena ka maatla a gago le ka peakanyo ya gago. Bjale, Morena, šetša ditšhošetšo tša bona, gomme o re kgontšhe, rena bahlanka ba gago, go bega molaetša wa gago ka go se boife. Otlolla letsogo la gago o fodiše batho, gomme mehlolo le dika di dirwe ge go bitšwa leina la Jesu, mohlanka wa gago yo mokgethwa.” Ya re ge ba fetša go rapela, lefelo leo ba bego ba kgobokane mo go lona la šikinyega. Bohle ba tlala Moya wo Mokgethwa, gomme ba thoma go bega molaetša wa Modimo ka go se boife. Badumedi bjale e be e šetše e le ba bantši, mme e le ba pelo e tee le moya o tee. Go be go se yo a rego tše a nago le tšona ke tša gagwe a nnoši, eupša tšohle e be e le tša bona ka moka. Baapostola bona ba be ba hlatsela ka mafolofolo a magolo gore Morena Jesu o tsogile bahung, gomme bohle Modimo o ba atlile kudu. Mo go bona go be go se mohloki. Bao ba bego ba na le mašemo goba dintlo ba be ba di rekiša, ba tliše tšhelete ya gona, ba e neele baapostola; gomme yona e abelwe bohle go ya ka mo motho a hlokago ka gona. Ke ka mo Josefa, Molefi yo ka matswalo e bego e le wa Saeprose, yo baapostola ba bego ba mmitša ka la Barnabase, ke go re “Mokgothatši”, le yena a ilego a rekiša tšhemo ya gagwe, a tliša tšhelete ya gona, a e neela baapostola. Monna yo mongwe yo ba rego ke Ananiase le mosadi wa gagwe, Safira, le bona ba rekiša tšhemo ya bona. Ananiase a ipeela tšhelete ye nngwe ye e lefetšwego tšhemo yeo, mosadi le yena a tseba, gomme ye nngwe a e neela baapostola. Petrose a mmotšiša a re: “Ananiase, o reng o dumeletše Sathane a laola pelo ya gago a go dira gore o botše Moya wo Mokgethwa maaka, o ipeele tšhelete ye nngwe ye e lefetšwego tšhemo ya gago? Tšhemo yela ge e sešo ya rekišwa e be e le ya gago. Ešita le ge e seno rekišwa tšhelete ya gona o ka be o dirile se o se ratago ka yona. Bjale o naganetšeng taba ya mohuta wo? Maaka ga se wa a botša batho, o a boditše Modimo!” Ananiase o rile go kwa mantšu ao a wela fase a hwa. Bohle ba ba kwago taba ye ba tšhoga kudu. Masogana a tla, a mo phutha, a mo ntšhetša ntle, a yo mmoloka. Ge go fetile diiri tše e ka bago tše tharo gwa tsena mosadi wa gagwe a sa tsebe se se diregilego. Petrose a mmotšiša a re: “Nke o mpotše mo: Na tšhemo ya lena le e rekišitše bokaa?” Yena a mo fetola a re: “Ee, ke bokaalo.” Ke ge Petrose a re go yena: “Le reng le lakane go leka Moya wa Morena? Tseba ge gore bao ba sa tšogo boloka monna wa gago ba mo mojako, gomme le wena ba tlilo go rwala!” Gateetee Safira ke ge a wela mo pele ga Petrose a ehwa. Masogana ale ge a tsena a mmona a hwile, gomme a mo rwala a yo mmoloka kgauswi le monna wa gagwe. Phuthego le bohle ba ba kwelego taba ye ba tšhoga kudu. Modimo o be a dira mehlolo ye mentši le dika tše dintši mo bathong ka baapostola. Badumedi bohle ba be ba kopanela mathuding a Solomone. Go be go se motho yo a ka rego e se modumedi a beta pelo a ikopanya le bona, le ge mokagona batho ba be ba ba hlompha kudu. Ba ile ba fela ba oketšwa ke batho ka bontši – banna le basadi ba ba bego ba eba badumedi ba Morena. Ka baka la mehlolo ye baapostola ba bego ba e dira, balwetši ba be ba išwa ditseleng ba robatšwe malaong le magogweng, gore e re ge Petrose a feta, ba bangwe ba bona ba upše ba kgongwe ke moriti wa gagwe. Le batho ba ba tšwago metseng ya ka mathoko a Jerusalema ka bontši ba tliša ba ba lwalago le ba ba tlaišwago ke meoya ye mebe, gomme bohle ba fodišwa. Moprista yo Mogologolo gotee le bathekgi ba gagwe, ba mokgatlo wa Basadusei, ba tsebafela baapostola e le ruri; ka gona ba ikemišetša go ba hlokofatša. Ba ba swara ba ba iša kgolegong yeo go yona go išwago bagolegwa ka moka. Fela ya re bošego morongwa wa Morena a tla a bula mejako ya kgolego, a ntšha baapostola, a re go bona: “Sepelang Tempeleng le fihle le botše setšhaba ditaba tšohle tša bophelo bjo bofsa bjo.” Baapostola ba kwa taelo yeo, gomme ge go esa ba ya Tempeleng ba fihla ba ruta batho. Moprista yo Mogologolo le bathekgi ba gagwe ba rile go fihla ba rapa pitšo ya Kgorokgolo, e lego ya bagolo ka moka ba Baisraele; ba roma bahlanka go yo lata baapostola kgolegong. Fela bahlanka bao ge ba fihla kgolegong ba se hwetše baapostola, gomme ba gomela Kgorongkgolo ba fihla ba bega ba re: “Re hweditše kgolego e tswaletšwe kgwehle, baleti ba yona bona ba eme mejako; ya re ge re bula ra hwetša go se motho ka gare.” Baprista ba bagolo le letona la baleti ba Tempele ge ba ekwa taba ye ba tlabega, ba maketše gore na ekaba baapostola ba hlagetšwe ke eng. Ke ge go fihla monna yo mongwe, a re go bona: “Theeletšang! Banna bale le ba išitšego kgolegong šebale kua Tempeleng ba ruta batho!” Letona la baleti ba Tempele la ya le bahlanka ba lona go lata baapostola, fela e sego ka go ba gapeletša, ka gobane ba be ba šia gore setšhaba se ka ba bolaya ka maswika. Ba ba tliša ba ba emiša mo pele ga Kgorokgolo, gomme Moprista yo Mogologolo a ba botšiša a re: “Na ga ke re re le laile tsebegokwa gore le se sa ruta batho tše di bego di rutwa ke monna yo? Eupša ke gona le tladitše motse wa Jerusalema ka thuto ya lena, gomme le nyaka go re rweša molato wa polao ya monna yo!” Petrose le baapostola bale ba bangwe ba ba fetola ba re: “Re swanetše go theeletša Modimo go feta ge re theeletša batho. Modimo wa borakgolokhukhu ba rena o tsošitše Jesu yola le mmolailego ka go mo kokotela sefapanong. Modimo o mo phagamišitše a mmea madulong a bogoši kgauswi le yena ya ba Moetapele le Mophološi, gore Baisraele ba sokologe gomme ba swarelwe dibe ka yena. Mo tabeng tše re dihlatse, rena le Moya wo Mokgethwa wo Modimo a o filego ba ba mo hlomphago.” E rile ge ba Kgorokgolo ba ekwa baapostola ba realo, ba galefa mo ba ilego ba rata ge ba ka bolawa. Eupša yo mongwe wa bona, Mofarisei yo ba rego ke Gamaliele, yo e bego e le ramangwalo wa go hlompšha ke setšhaba ka moka, a ema moo Kgorongkgolo a re baapostola ba ntšhetšwe ka ntle lebakanyana. Ke moka a botša Kgorokgolo a re: “Baisraele, le hlokomele se le nyakago go se dira batho ba. Ga se kgale kudu go ile gwa tšwelela Theudase, a itira motho yo maatla, gomme a latelwa ke batho ba e ka bago ba makgolo a mane. Fela o rile go bolawa balatedi bale ba gagwe ka moka ba gašagana, gomme mokgatlo wa gagwe wa hwa. Ka morago ga moo gwa tšwelela Judase wa Mogalilea ka nako yela go balwa batho; a hlohleletša batho ba bantši ba mo latela, fela le yena a re go bolawa balatedi ba gagwe ba gašagana. Bjale nna ke re le bona ba ba leseng ba sepele, le se ba dire selo. Ge eba tše ba di rerilego le tše ba di dirilego tše ke tša batho, di tla hwelela moyeng. Fela ge eba ke tše di tšwago go Modimo gona le ka se kgone go ba thibela. Ge le ka leka, e tla be e le ge le elwa le Modimo.” Ba Kgorokgolo ba mo dumela. Ke ge ba bitša baapostola, ba laela gore ba otlwe ka tshelane, ba ba ba ba laya gore ba se sa ruta batho tše di bego di rutwa ke Jesu; ke moka ba ba lesa ba tloga. Bapostola bona ge ba tloga moo Kgorongkgolo ba be ba thabile ka gobane Modimo o be a bone go ba loketše gore ba gobošwe ka baka la Jesu. Gomme ka mehla ba hlwela go ruta batho Tempeleng le ka malapeng, ba bega Taba ye Botse ya go re Jesu ke yena Mesia. Mabakeng ao, ge badumedi ba ntše ba ata, gwa tsoga dingongorego mo go Bajuda ba ba bolelago Segerike, ba lla ka Bajuda ba ba bolelago Seheberu. Sello sa bona e be e le gore bahlologadi ba gabobona ga ba šetšwe ge go abiwa dimpho ka mehla. Ke ge baapostola bale ba lesome le ba babedi ba kgoboketša badumedi ka moka ba re: “Ga se tshwanelo gore rena re hlokomologe go bega lentšu la Modimo, re abele batho dimpho. Ka gona, banabešo, kgethang banna ba ba šupago mo go lena ba go tuma ba ba nago le Moya wo Mokgethwa le bohlale, ba re kago ba fa modiro wo. Ke mo rena beng re tlago ikgafela go rapela le go bega molaetša wa Modimo.” Taba ye e ile ya kgahla badumedi ka moka, gomme ba kgetha Stefane, monna wa tumelo ye kgolo yo a tletšego Moya wo Mokgethwa, le Filipi le Progorose le Nikanoro le Timone le Parmenase, le Nikolase wa go tšwa Antiokia, yo a bego a sokologetše tumelong ya Sejuda. Ba ba tliša go baapostola, gomme ba ba rapelela ba ba bea diatla. Gomme lentšu la Modimo la fela le phatlalala, palo ya badumedi Jerusalema ya fela e gola kudu, baprista le bona ba dumela go Jesu Kriste ka bontši. Stefane, monna yo a bego a šegofaditšwe kudu ke Modimo mme a tletše maatla, o be a dira dimakatšo tše dikgolo le mehlolo ye megolo mo bathong. Fela o be a lwantšhwa ke banna ba bangwe ba sehlopha se go thwego ke sa sinagoge ya Balokollwa, e le Bajuda ba go tšwa Sirene le Aleksandria. Bona bao gotee le Bajuda ba bangwe ba go tšwa seleteng sa Tsilitsia le sa Asia ba tla ba ngangišana le Stefane. Fela ba palelwa ke go mo phala ka dipolelo ka baka la bohlale bjo a bego a bo filwe ke Moya wo Mokgethwa. Ka gona ba hlohleletša banna ba bangwe gore ba re: “Rena re mo kwele ge a bolela ditaba tša go goboša Moshe le Modimo.” Ka go realo ya ba ge ba hlohleleditše setšhaba le bagolo ba sona le boramangwalo. Ba mo wela godimo, ba mo swara, ba mo iša Kgorongkgolo. Ke moka ba tliša dihlatse tša maaka tša re: “Motho yo ka mehla o bolela gampe ka Tempele ye ye kgethwa le melao ya Moshe. Gape re mo kwele ge a re Jesu wa Nasaretha o tla kgereša Tempele, a fetoša le ditlwaedi tše re di filwego ke Moshe.” Bohle ba ba bego ba le moo Kgorongkgolo ba rile ba sa mo tomoletše mahlo bjalo ba bona sefahlego sa gagwe se swana le sa morongwa. Moprista yo Mogologolo a botšiša Stefane a re: “Na go bjalo?” Stefane ge a fetola a re: “Bagešo, le lena botate, ntheeletšeng! Pele ga ge rakgolokhukhu wa rena, Abrahama, a hudugela Harane, Modimo wa letago o ile a iponagatša go yena kua Mesopotamia, a re go yena: ‘Tlogela naga ya geno le meloko yeno o ye nageng ye ke tlago go bontšha yona.’ Ke ge Abrahama a tloga nageng ya Bakaldea a eya go dula Harane. Ge tatagwe a seno hwa Modimo o ile a mo hudušetša mo nageng ye bjale lena le dulago go yona. A se mo arolele le seripanyana sa yona, le ge e ka ba kgato. A mo holofetša gore o tla mo fa yona ya ba ya gagwe le ditlogolo tša gagwe. Ke ge Abrahama a sešo a ba le bana. Se Modimo a mmoditšego sona sese: ‘Ditlogolo tša gago e tla ba bafaladi nageng e šele moo ba tlago ba makgoba ba hlakišwa mengwaga ye makgolo a mane. Eupša setšhaba seo se tlago ba dira makgoba a sona ke tla se otla.’ A ba a re: ‘Ka morago ba tla tšwa nageng yeo, ba tla ba nkhunamela felo mo.’ Ya ba Modimo o dira kgwerano le Abrahama, a ba a e tiišetša ka lebollo. Ka gona Abrahama a re go tswala Isaka a mmolotša ka letšatši la seswai go ba a tswalwa. Isaka a tla a bolotša Jakobo; Jakobo le yena a tla a bolotša barwa ba gagwe, bona bale ba lesome le ba babedi ba ba tlilego ba ba borakgolokhukhu ba setšhaba sa gaborena. “Borakgolokhukhu bao ba ile ba hufegela Josefa, gomme ba mo rekiša a yo ba lekgoba Egepeta, fela Modimo a ba le yena. A mo hlakodiša mathateng a gagwe ka moka. A mo fa bohlale mo a ilego a kgahla Farao, kgoši ya Egepeta, a ba a mmea mmušiši wa gagwe nageng le ka mošate. Nageng ya Egepeta le ya Kanana gwa wa tlala ya go hlola tlalelo ye kgolo. Borakgolokhukhu ba rena ba hloka tša go ja, gomme Jakobo a re go kwa gore kua Egepeta go na le mabele, a roma borakgolokhukhu ba rena, ba ya gona la mathomo. E rile mohla ba eya la bobedi, Josefa a itsebiša banababo, gomme ya ba gona kgoši ya Egepeta a tsebago ba lapa la gaboJosefa. Josefa a roma ba go yo tšea Jakobo, tatagwe, le ba lapa labo ka moka ba e bego e ka ba ba masome a a šupago le ba bahlano gore ba tle Egepeta. Ke moka Jakobo a hudugela Egepeta mo yena le barwa ba gagwe, borakgolokhukhu ba rena, ba hwetšego gona. Ditopo tša bona tša bušetšwa Shekeme moo di fihlilego tša bolokwa ka lebitleng le Abrahama a bego a le rekile ka tšhelete go barwa ba Hamore gona Shekeme. “Ge nako e batamela ya gore Modimo a phethe se a se enetšego Abrahama, ke ge palo ya setšhaba sa gaborena Egepeta e oketšegile kudu. Mafelelong kua Egepeta gwa buša kgoši ye e bego e sa tsebe Josefa. Yona e ile ya radia setšhaba sa gaborena, ya se tlaiša, ya se gapeletša go lahla masea a bona gore a hwe. Ke gona mo nakong ye mo Moshe a ilego a tswalwa, e le ngwana yo mobotse kudu. A fepša ka gabo dikgwedi tše tharo, gomme ya re ge a ntšhitšwe ka gae, a thwalwa ke morwedi wa kgoši yo a ilego a mo godiša bjalo ka morwagwe. Moshe a rutwa mahlale ohle a Baegepeta gomme ya ba senatla dipolelong le medirong ya gagwe. “E rile ge a na le mengwaga ye masome a mane, a gopola go yo bona ka mo Baisraele ba gabo ba swerwego ka gona. A bona yo mongwe wa bona a tlaišwa ke Moegepeta, gomme a ya go mo lamolela, a mo lefeletša ka go bolaya Moegepeta yoo. Gape o be a nagana gore setšhaba sa gabo se tla kwešiša gore Modimo o tlilo se phološa ka yena, fela bona ba se kwešiše. Ka le le latelago a hwetša Baisraele ba babedi ba elwa, gomme a leka go ba lamola a re: ‘Banna, le reng la re le le batho ba tee la lwa seng sa lena?’ Yola a rumotšego mongwekayena a kgorometša Moshe, a mmotšiša a re: ‘Ke mang yo a go beilego molaodi le moahlodi wa rena? Kgane le nna o nyaka go mpolaya bjalo ka ge o bolaile Moegepeta maabane?’ Moshe a re go kwa a realo, a tšhaba a falalela nageng ya Midiane moo a fihlilego a tswala barwa ba babedi. “Ge go fetile mengwaga ye masome a mane, morongwa wa Morena a itšweletša go yena lešokeng kgauswi le thaba ya Sinai a le ka kgabong ya mollo wo o laumago ka sehlašaneng sa meetlwa. Moshe a tlabja ke se a se bonago. Ge a batamela gore a bone gabotse, a kwa lentšu la Morena le re: ‘Ke nna Modimo wa borakgolokhukhu ba gago, Modimo wa Abrahama le Isaka le Jakobo.’ Moshe a thothomela, a šia le go lebelela. Morena a re go yena: ‘Rola dieta tša gago, gobane felo mo o emago gona ke mo gokgethwa. Ruri, ke bone gabotse ka mo setšhaba sa ka se tlaišwago ka gona kua Egepeta. Ke kwele go tsetla ga bona, gomme ke theogetše go tlo ba lamolela. Bjale ge, etla ke go rome Egepeta.’ “Gape yo Moshe ke yola setšhaba sa Israele se mo gannego sa re: ‘Ke mang yo a go beilego molaodi le moahlodi wa rena?’ Ke yena yo Modimo a mo romilego go yo ba mmuši wa setšhaba le molokolli wa sona a thušwa ke morongwa yola wa go itšweletša go yena ka sehlašaneng seo sa meetlwa. A ntšha setšhaba Egepeta, a dira dimakatšo le mehlolo gona Egepeta le Lewatlengkhubedu le kua lešokeng mengwaga ye masome a mane. Yo Moshe ke yena yola a ilego a botša setšhaba sa Israele a re: ‘Modimo o tla le romela moprofeta wa go swana le nna a etšwa setšhabeng sa gabolena.’ Moshe ke yena yola a bego a na le setšhaba sa Israele ge se kgobokane lešokeng; o be a na le borakgolokhukhu ba rena le morongwa yola a ilego a bolela le yena thabeng ya Sinai, gomme a amogela molaetša wa bophelo go tlo re fa wona. “Eupša borakgolokhukhu ba rena ba gana go mo theeletša; ba mo tshwa ba duma ge ba ka be ba ka boela Egepeta. Ba re go Arone: ‘Re direle medimo ya go re eta pele, ka gobane ga re tsebe gore yola Moshe wa go re ntšha Egepeta o hlagetšwe ke eng.’ Ke mo ba dirilego modingwana wa powana, ba o tlišetša dihlabelo, ba ketekela se ba se bopilego ka diatla tša bona. Ke ge Modimo a ba furalela, a ba gafela go khunamela dinaledi tša leratadima, bjalo ka ge go ngwadilwe ka pukung ya baprofeta gwa thwe: “ ‘Lena setšhaba sa Israele, na dihlabelo tšela le bego le di dira mengwaga ye masome a mane kua lešokeng le be le di direla nna? Etse le be le rwala mokutwana wa modingwana Mologo, le naledi ya modingwana wa lena, Romfa. Gape tšeo ke tšona diswantšho tše le bego le itirela tšona gore le di khunamele. Ke ka baka leo ke tlago le romela bothopša ka kua pele ga Babilone.’ “Borakgolokhukhu ba rena bona ba be ba šika le Tente ya bodulo bja Morena kua lešokeng. E be e dirilwe ka mo Modimo a bego a laetše Moshe, go ya ka mohlala wa yona wo a bego a o bone o thadilwe. E rile ka morago borakgolokhukhu ba rena ba ba bego ba amogetše Tente ye go botatagobona ba sepela le yona mola ba etla le Joshua go thopa naga ye ditšhabeng tšela Modimo a ilego a di raka ge bona ba batamela. Tente e ile ya dula mo go bona go fihlela mehleng ya Dafida. Yena o be a kgahla Modimo, gomme o ile a mo kgopela gore a mo dumelele go agela Modimo ntlo ya go tlo šomišwa ke ditlogolo tša Jakobo. Fela ntlo yeo ya Modimo e tlile ya agwa ke Solomone. “Fela Modimo Yogodimodimo ga a dule ka dintlong tše di agilwego ke batho, bjalo ka ge moprofeta a bolela a re: “ ‘Legodimo ke setulo sa ka sa bogoši, lefase lona ke bogato bja ka. Ke ntlo mang ye le kago nkagela yona? Ke ngwako mang wo le kago nkagela wona ka dula ka go wona? Kgane tšohle tše ga se tša dirwa ke nna?’ “Lena dinganga, ga le na tumelo ka dipelong tša lena, le ditsebe di thibane! Ka mehla le ganetša Moya wo Mokgethwa, le etša borakgolokhukhu ba lena. Kgane ke ofe moprofeta yo borakgolokhukhu ba lena ba sego ba ka ba mo hlomara? Etse ba bolaile bao kgale ba bego ba bega go tla ga Moloki. Gomme bjale lena le mo ekile la ba la mmolaya. Etse ke lena ba le filwego melao ya Modimo wo o tlišitšwego ke barongwa, fela la se o phethe.” Ge ba Kgorokgolo ba ekwa Stefane a realo, ba betwa ke dipelo, ba lomanya meno ba mo galefetše. Stefane yena a lelalela legodimong a tletše Moya wo Mokgethwa, a bona letago la Modimo, a bona le Jesu a eme madulong a bogoši kgauswi le Modimo. A re: “Bonang! Ke bona legodimong le bulegile gomme Morwamotho a eme madulong a bogoši kgauswi le Modimo!” Ke ge ba Kgorokgolo ba goa ba ithiba ditsebe ka diatla. Ke moka ba mo phuthuma, ba mo kgoromeletša ka ntle ga motse, ba mmolaya ka maswika. Dihlatse tšela tša bea diaparo tša tšona go lesogana le ba rego ke Saulo. Ba mo keketa ka maswika, yena a fela a goelela Morena a re: “Morena Jesu, amogela moya wa ka!” A khunama a goelela kudu a re: “Morena, o se ke wa ba balela sebe se!” A re go realo a ikhwela. Ge e le Saulo yena o be a kwana le bokebeka bjo bja polao ya Stefane. Lona tšatšing leo badumedi ba Jerusalema ba thoma go tlaišwa kudu. Badumedi ka moka ntle le baapostola ba phatlalala le selete sa Judea le sa Samaria. Banna ba bangwe ba barapedi ba boloka Stefane, ba mo llela kudu. Saulo yena a leka go fediša kereke, a tsena ntlwana ka ntlwana, a goga banna le basadi a ba lahlela ka kgolegong. Badumedi bale ba go phatlalatšwa ba ya gohle ba tšama ba bega molaetša wa Modimo. Filipi a ya mošate wa naga ya Samaria a fihla a begela batho ba gona tša Kriste. Mašaba a batho a mo theeletša ge ba ekwa tše a di bolelago, ba bona le mehlolo ye a e dirago. Meoya ye mebe e be e etšwa bathong ba bantši ka go goelela, le barephaditho ba bantši le digole tše dintši ba be ba fodišwa. Ka gona gwa thakgalwa kudu motseng woo. Gona motseng woo go go be go na le monna yo mongwe yo ba bego ba re ke Simone, yo e bego e šetše e le lebakanyana a tlaba batho ba Samaria ka maleatlana a gagwe, mme a itirile motho yo mogolo, a theeletšwa ke batho ka moka, ba bagolo le ba bannyane. Ba re: “Ke yena yo e lego maatla a Modimo a go thwego ke ‘Magolo’.” Ba be ba mo hlwaela tsebe ka ge e be e šetše e le kgale a ba tlaba ka maleatlana a gagwe. Fela e rile ge ba seno kgolwa Filipi ge a ba begela Taba ye Botse ya mmušo wa Modimo le wa Jesu Kriste, ba kolobetšwa, e le banna le basadi. Yo Simone le yena o ile a dumela, gomme a re go kolobetšwa a hlwa le Filipi, a tlabega kudu ge a bona mehlolo le dimakatšo tše dikgolo tše di dirwago. Jerusalema baapostola ba kwa gore Basamaria ba amogetše lentšu la Modimo, ka gona ba roma Petrose le Johanese go bona. Ba fihla ba ba rapelela gore ba amogele Moya wo Mokgethwa, gobane o be o sešo wa theogela go bona, ba be ba kolobeditšwe go ba ba Morena Jesu ya ba moka. Baapostola bao ba ba bea diatla, gomme bona ba amogela Moya wo Mokgethwa. Simone ge a bona gore badumedi ba filwe Moya wo Mokgethwa ka go bewa diatla ke baapostola, a leka go ba reka ka tšhelete a re: “Le nna mpheng maatla ao gore yo ke mmeago diatla a amogele Moya wo Mokgethwa.” Petrose a mo fetola a re: “Nke o ka hwa mmogo le tšhelete yeo ya gago, ka ge o nagane gore o ka reka mpho ya Modimo ka tšhelete! Le gatee o ka se šome le rena mo modirong wa rena, ka gobane Modimo o a bona gore o na le pelo ye mpe. Ka gona, sokologa bobeng bjoo bja gago, o rapele Modimo gore a go swarele ge o nagane taba ya mohuta wo. Gobane ke a bona gore o tletše lehufa, gomme sebe sa gago se go fetošitše mogolegwa wa sona.” Simone a re: “Nthapeleleng go Morena gore ke se ke ka hlagelwa ke se sengwe sa tše le di boletšego tše.” Baapostola ba rile go fetša go hlatsela le go bega molaetša wa Morena ba gomela Jerusalema, ba tšama ba bega ditaba tše dibotse tšeo metseng ye mentši ya Samaria. Morongwa wa Morena a re go Filipi: “Ema o ye ka thoko ya borwa tseleng ye e tšwago Jerusalema e leba Gasa.” Tsela ye ga e sa sepelwa kudu. Filipi a ema a tloga. Mo tseleng a hwetša moamogwabonna yo mongwe wa Moetopia, mohlankedi yo mogolo wa go hlokomela mahumo a kandase, kgošigadi ya Etopia. Yena o be a etšwa Jerusalema go rapela, gomme a boela gae ka koloi, a tšama a bala puku ya moprofeta Jesaya. Moya wo Mokgethwa wa re go Filipi: “Batamela koloi yela o e tle phaphi.” Filipi a phakiša a ya go yona, gomme a kwa monna yoo a bala ka pukung ya moprofeta Jesaya. A mmotšiša a re: “Na seo o se balago o a se kwešiša?” Mohlankedi yoo a mo fetola a re: “Nka se kwešiša bjang ke se na wa go ntlhalošetša?” A kgopela Filipi gore a namele a dule le yena ka koloing. Temana ye a bego a e bala ka Mangwalong a Makgethwa še: “A etša nku ye e išwago tlhabong, a ikhomolela bjalo ka kwanyana ye e kotwago, a se bolele selo. A kokobetšwa a se a sekišwa. Ga go yo a tlago bolela ka ditlogolo tša gagwe, gobane bophelo bja gagwe lefaseng bo a kgaotšwa.” Mohlankedi yoo a botšiša Filipi a re: “Nke o mpotše gore moprofeta ge a realo o ra mang. O ra yena mong goba o ra yo mongwe?” Ke ge Filipi a thoma go mo hlalošetša; go tloga ka yona temana ye a mo anegela Taba ye Botse ya Jesu Kriste. Ge ba ntše ba swere tsela bjalo ba fihla mo go nago le meetse, gomme mohlankedi yoo a re: “Meetse šea. Bjale ke sa šitišwa ke eng go kolobetšwa?” *** A laela gore koloi e emišwe, ba theogela ka meetseng ka babedi, Filipi le mohlankedi yoo, gomme Filipi a mo kolobetša. Ge ba etšwa ka moo meetseng, Moya wo Mokgethwa wa široša Filipi. Mohlankedi yola a se sa mmona, fela a tšwela pele ka leeto la gagwe a thabile. Filipi o ile a ikhwetša a le kua Ashdode; a sepela le metse yohle, a eta a bega Taba ye Botse ya Jesu, a ba a yo fihla Kesarea. Saulo yena ke ge a sa galefile a tšhošetša badumedi ba Morena ka polao. A ya go Moprista yo Mogologolo a mo kgopela mangwalo a go itsebiša disinagogeng tša motse wa Damaskose, gore ge a ka hwetša ba bangwe ba balatedi ba Jesu, banna goba basadi, a ba sware a ba tliše Jerusalema. O rile ge a le leetong la go ya gona Damaskose, a šetše a batametše motse woo, seetša se se tšwago legodimong sa mo gadimela ka mathoko ohle. A wela fase, a kwa lentšu le re: “Saulo, Saulo, o ntlhomaretšeng?” A botšiša a re: “Ke wena mang, Morena?” Lentšu leo la re: “Ke nna Jesu yo o mo hlomerego. Bjale ge, emelela o ye ka mola motseng moo o tlago botšwa se o swanetšego go se dira.” Banna ba ba bego ba sepela le yena ba be ba eme ba rile tuu. Gobane lentšu lona ba be ba le kwa, fela ba sa bone motho. Saulo a emelela, a re o a lebaleba, fela o be a sa bone. Ka gona ba mo hlahla ka seatla ba mo iša ka Damaskose. A fetša matšatši a mararo a sa bone, a sa je a bile a sa nwe selo. Moo Damaskose go be go na le modumedi yo mongwe yo leina la gagwe e bego e le Ananiase. Yena o ile a bona pono, Morena a re go yena: “Ananiase!” Yena a araba a re: “Morena!” Morena a re go yena: “Ema, o ye tseleng ye ba rego ke Tselathwii, gomme ge o fihla ga Judase o nyake monna yo mongwe wa go tšwa Tarsose yo ba rego ke Saulo. Yena o a rapela, gomme mo ponong o bone monna yo mongwe yo ba rego ke Ananiase a tsena a mmea diatla gore a boele a bone.” Ananiase a mo fetola a re: “Morena, ke kwele ka batho ba bantši tša monna yoo, le ka mo a tlaišitšego badumedi ba gago gampe ka gona kua Jerusalema. Gomme bjale o tlile mo a filwe ke baprista ba bagolo maatla a go swara bohle ba ba go khunamelago.” Morena a re go yena: “Eya go yena, ka gobane ke mo kgethile gore e be mohlanka wa ka, a ntsebagatše go baditšhaba, le go magoši, le go Baisraele. Gomme nna mong ke tla mmontšha tšohle tše a swanetšego go tlaišwa ka tšona ka baka la ka.” Ananiase a ya, a fihla a tsena ka lapeng leo Saulo a bego a le ka go lona, a mmea diatla a re: “Saulo, ngwanešo, Morena – yena Jesu yo a itšweleditšego go wena tseleng ge o etla mono – o nthomile gore wena o boele o bone, le gore o tlatšwe Moya wo Mokgethwa.” Ya re a sa realo, dilo tše nkego dikgapetla tša kgomarologa mahlong a Saulo, gomme a boela a bona. A emelela a kolobetšwa, a re go ja a ikwa a tieletše. Saulo a fetša matšatši a se makae moo Damaskose le badumedi ba gona. A thoma le gona moo semeetseng go bega ka disinagogeng gore Jesu ke Morwa wa Modimo. Bohle ba ba mo kwago ba botšišana ba tlabegile ba re: “Na ga se yena yola wa go bolaya ba ba khunamelago mongleina le kua Jerusalema? Ga ke re le bjale mono o tletše gona go ba swara a ba iša go baprista ba bagolo?” Dithero tša Saulo e ile ya fela e eba tše maatla mme di tlaba Bajuda ba Damaskose ka go ba bontšha gore Jesu ke Mesia. Ge go šetše go fetile lebakanyana, Bajuda ba lakana go mmolaya, eupša a sebelwa maano a bona. Gape ba be ba dula ba dišitše masoro a motse bošego le mosegare gore ba tle ba mmolaye. Ya re bošegong bjo bongwe balatedi ba gagwe ba mo ntšha ka lešoba morakong wa motse ba mo theošetša fase ka sešego. Saulo o ile a ya Jerusalema a fihla a leka go itswalanya le balatedi ba Jesu, fela ka moka ba be ba mmoifa ba sa kgolwe gore le yena e ka ba molatedi wa Jesu. A ba a thušwa ke Barnabase yo a ilego a mo iša go baapostola mme a ba laodišetša ka mo Saulo a bonego Morena tseleng, le gore Morena o boletše le yena. Barnabase a ba botša le ka mo Saulo a bego a ruta batho ka leina la Jesu ka mafolofolo kua motseng wa Damaskose. Saulo a dula le bona a thetha le motse wa Jerusalema, a ruta ka leina la Morena ka mafolofolo. Le gona o be a dula a boledišana a bile a phegišana le Bajuda ba go bolela Segerike, eupša bona ba leka go mmolaya. Badumedi ba rile go lemoga taba ye ba iša Saulo Kesarea ba ba ba mo fetišetša Tarsose. Ke ka mo kereke nageng yohle ya Judea le Galilea le Samaria e ilego ya ikhutša. Ya tia ya hlompha Morena, gomme ya gola e thušwa ke Moya wo Mokgethwa. Petrose ge a fela a etela gohle, o kile a fihla go badumedi ba ba agilego motseng wa Lida. Moo a hwetša monna yo mongwe yo ba rego ke Enease yo a bego a rephile ditho mme a feditše mengwaga ye seswai a sa tsoge. A re go yena: “Enease, Jesu Kriste o a go fodiša. Tsoga, o ikalolele malao.” Enease a akgofa a tsoga. Bohle ba ba agilego moo Lida le Sharone ba re go mmona ba sokologela go Morena. Kua motseng wa Jope go be go na le modumedi yo mongwe wa mosadi ba re ke Thabitha, ka Segerike ke Dorkase, ke go re “tshephe”. Yena o be a dula a dira tše dibotse, le gona a thuša bahloki. Lebakeng leo a hlabega, a ba a hlokafala. Ba re go hlapiša setopo sa gagwe ba se bea ka phapošing ye nngwe ya ka godimo. Jope e be e se kgole le Lida, gomme ya re ge badumedi ba Jope ba ekwa gore Petrose o Lida, ba roma banna ba babedi go yena go mo kgopela ba re: “Nke o kgaoletše o tle mono go rena.” Ka gona Petrose a ema a tloga nabo. Ge a fihla ba mo iša ka phapošing yela ya ka godimo mo a fihlilego a kgobokanelwa ke bahlologadi bohle ba eme ba lla, ba mmontšha diaparo tša ka gare le tša ka ntle tše Thabitha a di rokilego ge a sa phela. Petrose a re go ba ntšhetša ntle ka moka a khunama a rapela; ke moka a retologela go setopo, a re go sona: “Thabitha, tsoga!” Thabitha a ponyologa, a re go bona Petrose a tsoga, a dula. Petrose a mo swara ka seatla a mo emiša. A bitša badumedi bale gotee le bahlologadi bale, a ba neela yena a phedile. Taba ye ya kwala motseng ka moka wa Jope, gomme batho ba bantši ba dumela go Morena. Petrose a tšea lebaka moo Jope ka ga monna yo mongwe wa go šoga matlalo yo ba rego ke Simone. Kua motseng wa Kesarea go be go na le monna yo mongwe yo ba bego ba re ke Korneliose. E be e le ralekgolo wa sehlopha sa bahlabani se se bego se bitšwa sehlopha sa Italia. Yena le ba lapa la gagwe e be e le barapedi mme ba khunamela Modimo. O be a katana kudu le go thuša bahloki ba Bajuda, le gona a dula a rapela Modimo. E rile ka tšatši le lengwe, ka nako ya boraro mathapama, a ba le pono yeo go yona a ilego a bona morongwa wa Modimo gabotse a etla go yena a re: “Korneliose!” Yena a mo hlaba ka mahlo a tšhogile a re: “Ke eng, morena?” Morongwa yoo a mo fetola a re: “Modimo o šeditše dithapelo tša gago le dimpho tše o di filego bahloki, gomme o go kwele. Bjale ge, roma batho Jope gore ba ye ba bitše monna yo mongwe yo ba rego ke Simone, le lengwe ba re ke Petrose. Yena o etetše ka ga mošogamatlalo yo mongwe yo le yena ba rego ke Simone, yo a agilego go bapela le lewatle.” Morongwa yoo a re go tloga, Korneliose a bitša ba babedi ba badiredi ba lapa la gagwe le mohlabani yo mongwe, monna wa morapedi, yo e bego e le yo mongwe wa ba ba šikago le yena. A re go ba laodišetša tšohle tše di diregilego, a ba roma Jope. Ka le le latelago, ge banna bao ba swere tsela ba šetše ba batametše Jope, Petrose a namelela tlhakeng ya ntlo go yo rapela, e le ka nako ya mosegare wo mogolo. A kwa a swerwe ke tlala a duma sa go ja. Ya re ge ba sa apeile, a tsenwa ke moya a bona pono. A bona legodimo le bulegile gomme selo se nkego ke lešela le legolo se etšwa gona se theošetšwa fase ka dikhutlo tša sona tše nne. Mo go sona go be go na le mehutahuta ya diphoofolo tša maoto a mane le ya digagabi le ya dinonyana. Gwa kwagala lentšu le mmotša le re: “Petrose, tsoga o hlabe, o je!” Petrose a re: “Le gatee, Morena! Ga se nke ka ja seila goba selo se se tšhilafetšego.” Lentšu leo la bolela gape, e le la bobedi, la re go yena: “Se Modimo a rego ga se seila wena o se ke wa re ke seila.” Taba ye e boeleditšwe gararo, ya ba gona selo seo se bušetšwago legodimong. Petrose o rile a sa tlabilwe ke gore na pono yeo e šupang, ya ba banna bale ba go rongwa ke Korneliose ba šetše ba eme lesorong, ba kwele gore ka ga Simone ke kae. Ba goelela ba botšiša ge ka moo go se na moeng yo ba rego ke Simone, le lengwe ba rego ke Petrose. Petrose yena o be a sa gopodišiša ka pono yeo, ge Moya wo Mokgethwa o mmotša o re: “Theeletša! Go tlile banna ba bararo ba a go nyaka. Bjale ge, ema o theoge o sepele nabo, o se ke wa ba le maseme, gobane ke nna ke ba romilego.” Petrose a theogela go banna bao, a re go bona: “Ke nna yo le mo nyakago. Ke efe taba ye le tlilego ka yona?” Bona ba mo fetola ba re: “Re romilwe ke Korneliose, molaodi wa bahlabani, monna wa go loka, wa go khunamela Modimo, wa go tuma setšhabeng sa Bajuda ka moka. O laetšwe ke morongwa yo mokgethwa wa Modimo gore a go bitše o tle ga gagwe, a tle a kwe ditaba go wena.” Petrose a ba iša ka gae, a ba fa marobalo. Ka le le latelago a ema a sepela le bona; le badumedi ba bangwe ba motse wa Jope ba ya le yena. Ka tšatši le le latelago ba fihla Kesarea, ba hwetša Korneliose a ba letetše, a na le meloko le bagwera ba gagwe ba bagolo ba a bego a ba laleditše. E rile ge Petrose a fihla, Korneliose a mo gahlanetša, a itahlela fase maotong a gagwe, a mo lotšha. Fela Petrose a mo emiša a re: “Emelela, le nna ke motho wa nama.” Petrose ge a tsena ka ntlong o be a bolela le Korneliose. A hwetša go kgobokane batho ba bantši. A re go bona: “Lena le a tseba gore Mojuda ga se a dumelelwa go ikopanya le moditšhaba le ge e le go mo etela. Fela nna Modimo o ntaeditše gore ke se ke ka re motho ofe goba ofe ke seila goba o tšhilafetše. Ke ka baka leo e rilego ge ke bitšwa ka tla, ka se gane. Bjale ke botšiša gore na le mpileditšeng.” Korneliose a mo fetola a re: “Gohlwamaloba, ka tšona nako tše tša boiri ya boraro mathapama ke rile ke rapela ka mo ntlong ya ka, gateetee ka bona monna wa diaparo tše ditšhweu tša mabaibai e eme pele ga ka, a mpitša a re: ‘Korneliose, Modimo o kwele thapelo ya gago, o šeditše le dimpho tše o di filego bahloki. Roma batho Jope ba yo bitša monna yo ba rego ke Simone, le lengwe ba rego ke Petrose. Yena o etetše ka ga mošogamatlalo yo mongwe yo ba rego ke Simone, yo a agilego go bapela le lewatle.’ Ke ka moo ke romilego batho le semeetseng gore ba go late, gomme o dirile gabotse ge o tlile. Bjale re mo pele ga Modimo gore re kwe tše Morena a go laetšego tšona.” Petrose ge a thoma go bolela a re: “Ruri, bjale ke a bona gore Modimo ga a kgetholle motho. O kgahlwa ke yo a mmoifago mme a dirago tše di lokilego, a sa šetše gore ke wa setšhaba sefe. Molaetša wo a o rometšego Baisraele le a o tseba, wa ge ba begelwa Taba ye Botse ya go boelanywa le yena ka Jesu Kriste, yena Morena wa bohle. Le tseba taba yela e ilego ya hlaga nageng yohle ya Bajuda, ya go thoma Galilea ge Johanese a seno bega molaetša wa gagwe wa kolobetšo. *** Ke yona taba ya Jesu wa Nasaretha, ya ge Modimo a mo tloditše a mo fa Moya wo Mokgethwa le maatla. Yena o sepetše gohle a dira tše dibotse, a fodiša bohle ba ba gateletšwego ke Diabolose, gobane Modimo o be a na le yena. Rena re dihlatse tša tšohle tše a di dirilego nageng ya Bajuda le Jerusalema. Ka morago ba ile ba mmolaya ka go mo kokotela sefapanong. Fela Modimo a mo tsoša bahung ka letšatši la boraro, a ba a dira gore a itšweletše, e sego go setšhaba ka moka, eupša go dihlatse tše Modimo a bego a šetše a di kgethile, e lego rena re ilego ra ja, ra ba ra nwa le yena ge a seno tsoga bahung. Gomme o re laetše gore re begele setšhaba Ebangedi, re be re hlatsele gore ke yena yo Modimo a mmeilego Moahlodi wa ba ba phelago le ba ba hwilego. Ke yena yo baprofeta bohle ba bolelago ka yena, ba re mang le mang yo a dumelago go yena o tla swarelwa dibe tša gagwe ka tše Jesu a di dirilego.” Ya re Petrose a sa bolela, Moya wo Mokgethwa wa theogela go bohle ba ba bego ba theeleditše molaetša woo. Badumedi bale ba Bajuda ba go tla le Petrose ge a etšwa Jope ba tlabega ge le baditšhaba ba filwe mpho ye e lego wona Moya wo Mokgethwa. Gobane ba be ba ba kwa ba bolela mantšu a a sa kwešišwego ba tumiša Modimo. Petrose a bolela a re: “Batho ba ba amogetše Moya wo Mokgethwa bjalo ka rena. Bjale ke mang yo a ka ba thibelago go kolobetšwa ka meetse?” Ke moka a laela gore ba kolobetšwe e be ba Jesu Kriste. Batho bao ba mo kgopela gore a dule le bona matšatšinyana. Baapostola le badumedi ba naga ya Judea ba ile ba kwa gore baditšhaba le bona ba amogetše lentšu la Modimo. Ya re ge Petrose a ile Jerusalema, babotalebollo ba mo sola ba re: “Etse o be o etetše batho ba go se bolle, wa ba wa ja le bona!” Ke mo Petrose a ba laodišeditšego ditaba tšohle ka mo di hlagilego ka gona go tloga mathomong a tšona a re: “Ke rile ke rapela kua motseng wa Jope ka tsenwa ke moya ka bona pono. Ka bona selo se nkego ke lešela le legolo se etšwa legodimong se theošwa ka dikhutlo tša sona tše nne, sa ba sa fihla mo go nna. Ge ke se lebelediša ka gare ka bona diphoofolo tša maoto a mane, tša gae le tša nageng, le digagabi le dinonyana. Ke moka ka kwa lentšu le mpotša le re: ‘Petrose, tsoga o hlabe, o je!’ Fela nna ka re: ‘Le gatee, Morena! Ga se ka ka ka iša seila goba selo se se tšhilafetšego ganong.’ Lentšu leo la mpotša la bobedi le etšwa legodimong la re: ‘Se Modimo a rego ga se seila wena o se ke wa re ke seila.’ Taba ye e boeleditšwe gararo, ya ba gona dilo tšeo ka moka di bušetšwago legodimong. Ka yona nako yeo ke ge go fihla banna ba bararo ntlong yeo ke bego ke dula go yona ba romilwe go nna ba etšwa Kesarea. Moya wo Mokgethwa wa mpotša gore ke sepele nabo ke se na maseme. Badumedi bao ba go selela ba go tšwa Jope le bona ba ile ba ya le nna, gomme ra fihla ra tsena ka ga Korneliose. Yena a re laodišetša ka mo a bonego morongwa a eme ka ntlong ya gagwe, a re go yena: ‘Roma batho Jope ba yo bitša monna yo mongwe yo ba rego ke Simone, le lengwe ba rego ke Petrose. Yena o tla go botša mantšu ao wena le bohle ba lapa la gago le tlago phološwa ka ona.’ E rile ge ke thoma go bolela, Moya wo Mokgethwa wa theogela go bona go no swana le mola o theogela go rena mathomong. Ka napa ka gopola sela Morena a bego a se boletše a re: ‘Johanese o be a kolobetša ka meetse, fela lena le tla kolobetšwa ka Moya wo Mokgethwa.’ Modimo o file baditšhaba mpho yela a e filego rena mola re dumela go Morena Jesu Kriste; bjale nna ke nna mang nkago thibela Modimo?” Ge ba ekwa a realo, ba lesa go mo sola, ba reta Modimo ba re: “Gona le baditšhaba Modimo o ba file sebaka sa gore ba sokologe mme ba phele!” Badumedi ba bangwe ba ba bego ba šwalalantšwe ke go hlomarwa mola ga go tla ka morago ga go bolawa ga Stefane, ba be ba sepetše le naga ba ba ba fihla Fenikia le Saeprose le Antiokia, ba begela fela Bajuda molaetša wa Modimo, e sego ba bangwe. Eupša ba bangwe ba bona, ba go tšwa Saeprose le Sirene, bona ba ya Antiokia, ba fihla ba bolela le baditšhaba, ba ba begela Taba ye Botse ya Morena Jesu. Morena a ba thuša, gomme batho ba bantši ba dumela ba sokologela go Morena. Taba ya bona ya ba ya fihla le phuthegong ya Jerusalema. Ke moka ba roma Barnabase Antiokia. Ge a fihla gona a bona tše Modimo a di dirilego ka botho bja gagwe, a thaba, gomme a ba kgothatša bohle gore ba botegele Morena ka pelo tša bona ka moka, gobane yo Barnabase e be e le moloki yo a tletšego Moya wo Mokgethwa le tumelo, gomme batho ba bantši ba dumela ba sokologela go Morena. Barnabase a ya Tarsose go nyaka Saulo. A re go mo hwetša a mo tliša Antiokia, gomme ka babedi ga bona ba fetša ngwaga ka moka ba šoma mmogo phuthegong ya gona, ba ruta batho ba bantši. Ke gona moo Antiokia mo badumedi ba thomilego go bitšwa Bakriste. Lebakeng leo ke ge moo Antiokia go fihla baprofeta ba bangwe ba go tšwa Jerusalema. Yo mongwe wa bona, yo ba rego ke Agabose, a ema a porofeta ka maatla a Moya wo Mokgethwa gore go tlilo wa tlala ye kgolo lefaseng ka moka. Ke yona yela ya go wa mehleng ya Kesare Klaudiose. Badumedi ba kwana gore mongwe le mongwe wa bona a romele mpho ye a kago e kgona go thuša badumedikayena ba ba dulago Judea. Ba dira bjalo, ba romela tšhelete ka Barnabase le Saulo go bagolo ba phuthego. Ka tšona nako tšeo Kgoši Heroda a thoma go hlomara ba bangwe ba phuthego. A bolaya Jakobose, morwarragoJohanese, ka tšhoša. Ge a bona gore seo se kgahlile Bajuda, a boeletša a swara le Petrose. E be e le ka nako ya Monyanya wa Dinkgwa tše di se nago komelo. A re go mo swara a mo iša kgolegong, a mo gafela dihlopha tše nne tša bahlabani, ba bane ba bane, gore ba mo lete. O be a gopotše go mo sekiša phatlalatša ge go fetile Monyanya wa Paseka. Ka gona Petrose a bewa ka kgolegong; phuthego yona ya fela e mo rapelela e kgothetše. Bošego bjo Heroda a bego a tlilo tsoga a tliša Petrose tshekong, Petrose o be a robetše mokgahlo ga bahlabani ba babedi, a kgokilwe ka diketane tše pedi, gomme le kua lesorong la kgolego a beetšwe baleti. Gateetee ke ge go bonala morongwa wa Morena a eme moo, gomme ka moo phapošing go taga seetša. Morongwa yoo a šikinya Petrose lehlakoreng, a mo tsoša a re: “Nanoga!” Diketane tšela tša bofologa diatleng tša Petrose tša wela fase. Ke moka morongwa yoo a re: “Ipofe letheka, o rwale le dieta.” Petrose a dira bjalo. Morongwa a re: “Apara kobo, o ntšhale morago.” Petrose a tšwa ka kgolegong a mo šetše morago, fela a sa tsebe ge tše di dirwago ke morongwa di direga ka mmakgonthe. Yena o be a nagana gore o bona pono. Ba feta baleti ba mathomo, le ba bobedi, ba feleletša ka go fihla lesorong la tshipi le le išago motseng; lona la ipula, gomme ba tšwa, ba sepela ka tsela. Gateetee morongwa yola a timelela Petrose. Ke mo Petrose a lemogilego tše di diregilego, gomme a re: “Bjale ke gona ke tsebago gore ruri Morena o romile morongwa wa gagwe go tlo ntlhakodiša diatleng tša Heroda le go tše setšhaba sa Bajuda se bego se ikemišeditše go ntira tšona.” Ge a seno kwešiša taba ye a ya ga Maria, mmagoJohanese yo leina la gagwe le lengwe ba bego ba re ke Markose. Ke mo go bego go kgobokane batho ba bantši ba rapela. A kokota lesorong, gomme gwa tla lekgoba la ngwanenyana yo leina la gagwe ba rego ke Rode. Yena a re go tseba lentšu la Petrose a thaba mo a ilego a ba a goma a se a bula, a yo ba tsebiša gore Petrose o eme ka kua lesorong. Bona ba re: “O a gafa, wena!” Eupša yena a tiiša gore ke nnete. Gomme bona ba re: “Gona ke morongwa wa gagwe!” Petrose yena ke ge a le gare a kokota. Ba ba ba bula, gomme ge ba mmona ba kgotsa. A ba laetša ka seatla gore ba homole, ba re tuu, gomme a ba laodišetša ka mo Morena a mo ntšhitšego ka kgolegong ka gona. A re: “Le tsebiše Jakobose le badumedi ba bangwe.” Ke moka a tloga a ya felwanatsoko. Ge go esa, ya ba kgakanego fela mo go bahlabani, ba botšišana ba re: “Go diregileng ka Petrose?” Heroda a laela gore a nyakwe, fela ba se mmone. Ka gona baleti ba sekišwa; Heroda a laela gore ba bolawe. Ka morago ga moo Heroda a tloga Judea a yo dula lebakanyana kua Kesarea. Heroda o be a galefetše batho ba Tirose le ba Sidone kudu. Bona ba nama ba roma baemedi go yena. Ge ba seno itswalanya le Blastose, mokgomana wa mošate, ba ya go Heroda, ba fihla ba mo kgopela kagišano ka ge naga ya bona e be e phela ka tše di lengwago nageng ya kgoši. Ya re ka tšatši le le beilwego Heroda a apara tša bogoši, a dula setulong sa gagwe sa bogoši, a bolela le bona. Lešaba la goa la re: “Yo a bolelago yo ga se motho, ke modimo!” Gateetee morongwa wa Morena a otla Heroda, ka ge a be a dirile gore batho ba tumiše yena bakeng sa go tumiša Modimo. A longwa ke dinogana ka maleng a ba a hwa. Lentšu la Modimo lona la fela le phatlalala le keka. BoBarnabase le Saulo ba rile go phetha se ba bego ba se rometšwe Jerusalema, ba boa, ba tla le Johanese yola wa go tsebja le ka la Markose. Phuthegong ya Antiokia go be go na le baprofeta le baruti ba bangwenyana, e lego boBarnabase, le Simeone wa go bitšwa Ramoso, le Lutsiose wa go tšwa Sirene, le Manaene yola wa go gola gotee le Mmušiši Heroda, le Saulo. E rile ge ba ntše ba rapela ba itima dijo, Moya wo Mokgethwa wa re go bona: “Mpeeleng Barnabase le Saulo thoko, ba ye modirong wo ke ba bileditšego wona.” Ba itima dijo ba rapela le go iša pele, ba ba bea diatla, ba laelana le bona. Bona, ka ge ba be ba romilwe ke Moya wo Mokgethwa, ba ile ba theogela Seleutsia, go tloga gona ba ya sehlakahlakeng sa Saeprose ka leselawatle. Ge ba fihla motseng wa Salamise ba begela batho molaetša wa Modimo ka disinagogeng tša Bajuda, ba na le Johanese, mothuši wa bona. Ba phatša sehlakahlaka sohle go yo fihla Pafose, moo ba hweditšego Mojuda yo mongwe wa maselamose, moprofeta wa maaka, yo ba rego ke Barjesu. Yena e be e le mohlankedi wa Mmušiši Sergiose Paulose, monna wa bohlale, kua mošate. Mmušiši a bitša Barnabase le Paulose gore a tle a kwe molaetša wa Modimo. Fela ramaselamose yoo leina la gagwe la Segerike ba bego ba re ke Elimase, a ba ganetša a leka go thibela mmušiši gore a se dumele. Ke mo Saulo, yo a bego a tsebja le ka la Paulose, a tomoletšego ramaselamose yoo mahlo a tletše Moya wo Mokgethwa a re: “Hee, wena wa ga Diabolose! Hee, wena ramathaithai, mokadikadi wa morara towe! Wena lenaba la tšohle tše di lokilego! O reng o sa lese go šitiša Modimo go phetha thato ya gagwe? Tseba ge, Morena o a go otla, gomme o tla foufala sebaka wa se bone letšatši.” Gateetee Elimase a welwa ke kgodi mahlong ya mo re pii, gomme a sepela a tlaruma, a nyaka yo a kago mo hlahla ka seatla. Mmušiši ge a bona se se diregilego a dumela; gobane o be a tlabilwe ke tše a di rutilwego mabapi le Morena. Paulose le ba ba bego ba sepela le yena ba tloga Pafose ka leselawatle ba ya Perge, motseng wo o lego Pamfilia. Gona moo Johanese a kgaogana nabo a boela Jerusalema. Go tloga Perge ba fetela Antiokia ya Pisidia, gomme ka tšatši la Sabatha ba ya sinagogeng ba fihla ba dula. Ge go seno balwa melao ya Moshe le mangwalo a baprofeta, bahlankedi ba sinagoge ba roma motho go bona a fihla a re: “Banna ba gešo, ge le na le tše le nyakago go kgothatša batho ka tšona, le bolele.” Ke ge Paulose a emelela, a emiša seatla go ba homotša a re: “Lena Baisraele le lena ba bangwe ba go khunamela Modimo, ntheeletšeng! Modimo wa setšhaba se sa Baisraele o kgethile borakgolokhukhu ba rena a ba dira setšhaba se segolo mehleng ya mola ba falaletše Egepeta. A ba ntšha gona ka maatla a gagwe a magolo, a tšea mengwaga ye e ka bago ye masome a mane a ba kgotleletše kua lešokeng. A fediša ditšhaba tše di šupago nageng ya Kanana, gomme a fa Baisraele naga ya tšona. Tšeo ka moka di diregile nakong ye e ka bago mengwaga ye makgolo a mane le masome a mahlano. “Ka morago ga moo a ba fa baahlodi go fihlela nakong ya moprofeta Samuele. Ya re ge ba kgopela go ba le kgoši, Modimo a ba fa Saulo, morwa wa Kishe, wa kgoro ya Benjamene, gomme yena ya ba kgoši ya bona mengwaga ye masome a mane. A re go mo tloša a bea Dafida kgoši ya bona, gomme ge a mmolela a re: ‘Ke bone gore Dafida, morwa wa Isai, ke yena monna yo a nkgahlago, monna yo a tlago phetha tšohle tše ke nyakago gore a di phethe.’ Ke yena yo molokong wa gagwe Modimo a phethilego se a bego a rile o tla se phetha, a dira Jesu Mophološi wa šetšhaba sa Baisraele. Pele ga ge Jesu a thoma modiro wa gagwe, Johanese o ile a begela batho bohle ba Israele gore ba sokologe dibeng tša bona ba kolobetšwe. Johanese ge a feleletša modiro wa gagwe o ile a re: ‘Na le gopola gore ke nna mang? Ga se nna yo le mo letetšego. Fela theeletšang mo: Yena o tla tla ka morago ga ka, gomme go mo hunolla dieta nna le go ntshwanela ga go ntshwanele.’ “Banna ba gešo, lena ditlogolo tša Abrahama, le lena ba bangwe ba go khunamela Modimo le lego mo: Molaetša wo wa phološo o rometšwe rena. Gobane batho ba ba dulago Jerusalema le baetapele ba bona ba be ba sa tsebe ge Jesu e le yena Mophološi, le gona ba be ba sa kwešiše mantšu a baprofeta a a balwago tšatši le lengwe le le lengwe la Sabatha. Bona ba phethagatša mantšu a baprofeta ka go mo ahlolela lehu. Ešita le mola ba sa hwetše lebaka la go mo ahlolela lehu, ba ile ba kgopela Pilato gore a bolawe. Ba rile go phetha tšohle tše di ngwadilwego ka Mangwalong a Makgethwa ka yena, ba mo fegolla sefapanong, ba mmoloka ka lebitleng. Eupša Modimo a tla a mo tsoša bahung, gomme a bonwa matšatši a mantši ke bale ba bego ba sepela naye ge ba etšwa Galilea ba eya Jerusalema. Bjale ke bona ba e lego dihlatse tša gagwe setšhabeng sa Israele. Gomme bjale rena re le begela Taba ye Botse, e lego gore se Modimo a ilego a se holofetša borakgolokhukhu ba rena bjale o se diretše ditlogolo tša bona ka go tsoša Jesu bahung, bjale ka ge go ngwadilwe ka Pesalomeng ya bobedi gwa thwe: “ ‘O Morwa wa ka, lehono ke go tswetše.’ *** “Mabapi le go mo tsoša bahung gore a se ke a bola, Modimo o rile: “ ‘Ke tla le fa ditšhegofatšo tše dikgethwa tše di tshepagalago tše ke di holofeditšego Dafida.’ “Ke ka baka leo a boletšego le ka temaneng ye nngwe a re: “ ‘O ka se lese mohlanka wa gago yo a botegago a eya boyabahu.’ “Ge e le Dafida yena mehleng ya gagwe o rile go phetha thato ya Modimo a ithobalela, a bolokwa le borakgolokhukhu ba gagwe, mme setopo sa gagwe sa bola. Kganthe yo Modimo a mo tsošitšego bahung yena ga se a bola. Bjale ge, tsebang, lena banna ba gešo, gore ke ka Jesu mo le begelwago molaetša wa tshwarelo ya dibe, le gore mang le mang yo a dumelago o lokollwa dibeng tšohle tše melao ya Moshe o bego o šitwa ke go le lokolla go tšona. *** Ka gona, le hlokomele gore tše di boletšwego ke baprofeta di se le hlagele, mola ba re: “ ‘Lebelelang, lena bakweri! Tlabegang, le hwe. Gobane se ke se dirago mehleng yeno ya lena ke taba ye le ka se kego la e kgolwa ge le e botšwa!’ ” E rile ge Paulose le Barnabase ba etšwa ka sinagogeng, batho ba ba kgopela gore ka Sabatha se se latelago ba boe ba tle ba ba botše ditaba tšeo ka botlalo. Phuthego e rile go phatlalala Bajuda ba bantši le batho ba bangwe ba bantši ba ba bego ba sokologetše tumelong ya Sejuda ba latela Paulose le Barnabase. Bona ba bolela le bona, ba ba kgothatša gore ba phele ba botile go loka ga Modimo. Ka Sabatha se se latelago batho ba ba bego ba kgobokanetše go tlo kwa lentšu la Modimo e be e nyakile go ba motse ka moka. Bajuda ge ba bona lešaba leo ba tsebafa; ba phegiša Paulose go tše a di bolelago ba ba ba mo roga. Fela Paulose le Barnabase bona ba bolela ba sa šie ba re: “E be e le tshwanelo gore lentšu la Modimo le begelwe lena pele. Fela ka gore le a le gana mme ga le bone le swanelwa ke bophelo bjo bo sa felego, re ya go baditšhaba. Gobane Morena o re laile a re: “ ‘Ke go dirile seetša sa ditšhaba, gore bohle ba lefaseng ba phološwe ka wena.’ ” Baditšhaba ba rile go di kwa ba thaba ba reta molaetša wa Morena; gomme ba ba kgethetšwego bophelo bjo bo sa felego ba dumela. Lentšu la Morena la phatlalala seleteng seo ka moka. Fela Bajuda ba hlohleletša bommamaemo ba motse woo ba barapedi le boramaemo ba gona. Bona ba thoma go hlomara Paulose le Barnabase ba ba raka seleteng sa gabobona. Baapostola bao ba hlohlora marole dinaong tša bona ba fetela Ikoniomo. Badumedi ba Antiokia ba tlala lethabo le Moya wo Mokgethwa. Paulose le Barnabase ge ba le Ikoniomo ba ile ba ya sinagogeng ya Bajuda go etša mola ba le Antiokia, gomme ba bolela ka mo Bajuda ba bantši le baditšhaba ba bantši ba ilego ba dumela. Bajuda ba ba ilego ba se dumele bona ba ile ba hlohleletša baditšhaba ba ba fapantšha le badumedi. Baapostola ba ile ba dula moo lebaka le letelele, ba bolela ka sebete ka Morena yo a ilego a hlatsela gore molaetša wa bona mabapi le kgaugelo ya gagwe ke nnete ka go ba kgontšha go dira mehlolo le dimakatšo. Badudi ba motse woo ba ile ba tšwa dihlopha: ba bangwe ba ema le Bajuda, ba bangwe ba ema le baapostola. Ke moka baditšhaba ba bangwe le Bajuda gotee le baetapele ba bona ba ikemišetša go swara baapostola gampe le go ba bolaya ka maswika. Baapostola ba rile go di kwa ba tšhabela Likaonia motseng wa Listra le go wa Derbe le tikologong ya gona. Le gona moo ba fihla ba bega Ebangedi. Motseng wa Listra go be go na le monna yo mongwe yo a bego a bolawa ke maoto, a tswetšwe a golofetše, mme a sa kgone go sepela. Yena o be a theeleditše Paulose ge a bolela. Paulose ge a mo hlaba ka mahlo, a bona gore o na le tumelo ya gore a ka fodišwa. A mo goelela a re: “Emelela ka maoto o hlophologe!” Monna yoo a nanoga mme a thoma go sepelasepela. Lešaba ge le bona se se dirilwego ke Paulose, la goelela ka polelo ya Selikaonia la re: “Medimo e iphetotše batho mme e theogetše go rena!” Ba thea Barnabase ba re ke Zeose, Paulose yena ba re ke Hermese, ka ge e be e le yena mmoledi yo mogolo wa ditaba. Moprista wa modingwana yo go thwego ke Zeose yo a bego a agetšwe tempele pele ga motse a tliša dipoo le dikgare tša matšoba kgorong, gobane yena le lešaba leo ba be ba nyaka go direla baapostola bao didimo. Baapostola, Barnabase le Paulose, ba rile go kwa taba yeo ba gagola diaparo tša bona, ba kitimela ka gare ga lešaba leo, ba goelela ba re: “Banna, le dirang? Gape le rena re batho ba nama bjalo ka lena! Re le begela Taba ye Botse ye e rego le tlogele dilo tše tša lefeela le boele go Modimo yo a phelago yo a hlodilego legodimo le lefase le lewatle le tšohle tše di lego go tšona. Kgale Modimo o be a lesa ditšhaba tšohle di itirela se di se ratago le ge a be a sa lese go itlhatsela se yena a lego sona ka go dira tše dibotse: o le nešetša pula ya go tšwa legodimong, a le fa le dibjalo ka dihla tša gona; o le fa dijo ka bontši, dipelo tša lena a di tlatša lethabo.” Baapostola le ge ba be ba realo ba nyakile ba paletšwe ke go thibela lešaba leo go ba direla didimo. Gwa tla Bajuda ba bangwe ba go tšwa Antiokia le Ikoniomo; bona ba fenya lešaba ka dipolelo, ba keketa Paulose ka maswika, ba mo gogela ka ntle ga motse ba re o hwile. Fela e rile ge badumedi ba mmokanetše a tsoga a boela motseng. Ka le le latelago yena le Barnabase ba ya Derbe. Paulose le Barnabase ba rile go bega Taba ye Botse kua Derbe ba sokolla batho ba bantši gore e be barutiwa. Ke moka ba gomela Listra le Ikoniomo ba ba ba fetela le Antiokia. Ba tiiša badumedi ba ba kgothatša gore ba kgotlelele tumelong. Ba ba ruta ba re: “Go tsena legodimong re swanetše go feta mathateng a mantši.” Mo phuthegong ye nngwe le ye nngwe ba ba beela bagolo, ba ba gafela go Morena ka dithapelo le ka go itima dijo, gobane bagolo bao ba be ba šetše ba dumela go yena. Ba rile go phatša naga ya Pisidia ba fihla Pamfilia. Motseng wa Perge ba fihlile ba bega molaetša wa Modimo, ba kgona ba fetela Athalia, gomme ba tloga moo ba boela Antiokia ka leselawatle, mola ba ilego ba gafelwa Morena gore e be yo botho go bona ka baka la modiro wo bjale ba bego ba o phethile. Ba rile go fihla Antiokia ba kgoboketša phuthego ba e anegela tšohle tše Modimo a di dirilego le bona, le ka mo a filego baditšhaba sebaka sa gore ba dumele. Ba dula le badumedi moo nako ye telele. Banna ba bangwe ba go tšwa Judea ba ile ba tla, ba botša badumedi ba re: “Ge le sa bolle go ya ka mokgwa wa Moshe, le ka se phološwe.” Paulose le Barnabase ba fapana le bona kudu mo tabeng ye; ka gona gwa kwanwa gore Paulose le Barnabase le ba bangwenyana moo Antiokia ba ye Jerusalema go boledišana le baapostola le bagolo ba phuthego ka taba ye. Phuthego ya ba ntšha ka difata. Ba phatša naga ya Fenikia le ya Samaria, ba tšama ba bega tša tshokologo ya baditšhaba, gomme taba yeo ya thabiša badumedi bohle kudu. Ge ba fihla Jerusalema ba amogelwa ke phuthego le baapostola le bagolo ba phuthego. Ba ba laodišetša tšohle tše Modimo a di dirilego ka bona. Fela badumedi ba bangwe ba e bego e le ba lekgotla la Bafarisei ba ema ba re: “Badumedi ba go sokologa seditšhabeng ba swanetše go bolotšwa le go laelwa gore ba latele melao ya Moshe.” Baapostola le bagolo ba phuthego ba kopana gore ba rerišane taba ye. Ge ba seno phegišana nako ye telele, Petrose a ema a re: “Banna ba gešo, le a tseba gore e šetše e le kgale Modimo a nkgethile mo go lena gore ke begele baditšhaba Taba ye Botse gore ba e kwe mme ba dumele. Gomme Modimo, yena Motsebadipelo, o bontšhitše gore o amogela baditšhaba ka go ba fa Moya wo Mokgethwa go no swana le ge a o file rena. Ga se a ka a bontšha kgethollo mo go rena le go bona; o ba hlwekišitše dipelo ka ge ba dumetše. Bjale lena le reng le nyaka go leka Modimo ka go rweša badumedi morwalo wo o paletšego borakgolokhukhu ba rena le rena? Gape re dumela gore re phološwa ka kgaugelo ya Morena Jesu, go no swana le bona.” Kopanong yeo go be go rile kgwathaa, ba theeleditše ge Barnabase le Paulose ba anega mehlolo yohle le dika tšohle tše Modimo a bego a di dirile ka bona mo go baditšhaba. E rile ge ba fetša go bolela, Jakobose a re: “Banna ba gešo, ntheeletšeng! Simone o sa tšo re laodišetša ka mo Modimo a thomilego go bontšha go šetša baditšhaba ga gagwe ka go ikgethela mo go bona ba ba tlilogo ba setšhaba sa gagwe. Baprofeta ba kwana le taba ye, go etša Mangwalo a Makgethwa ge a re: “ ‘Ka morago ke tla boa ka bušetša mmušo wo o wilego wa Dafida sekeng. Ke tla tsošološa marope a wona, ka o tsoša gape, gore batho ba bangwe ka moka le baditšhaba bohle ba ke ba biditšego ya ba ba ka ba tle go Morena go mo khunamela. O realo Morena yo a phethago tšeo a di boletšego, yo a di tsebagaditšego go tloga kgale.’ “Nna ke bona gore re se ke ra tlaletša baditšhaba ba ba sokologelago go Modimo. A re upšeng re ba ngwalele lengwalo re ba botšeng gore ba ile dinama tša didimo, tšona di tšhilafetšego, ba ile le go nyalana ga lešika, le nama ya phoofolo ye e kgamilwego, le bobete. Gobane tše Moshe a di boletšego di begilwe metseng yohle go tloga kgale, le melao ya gagwe e balwa ka disinagogeng tšatši le lengwe le le lengwe la Sabatha.” Baapostola le bagolo ba phuthego le phuthego ka moka ba kwana gore go kgethwe banna ba bangwe mo go bona ba rongwe le Paulose le Barnabase Antiokia. Ba ntšha banna ba maemo mo phuthegong, e lego Judase, yo a tsebjago le ka la Barsabase, le Silase, gomme ba ba roma gore ba iše lengwalo le le rego: “Rena baapostola gotee le bagolo ba phuthego re lego bana ba bolena, re a le dumediša, lena bana ba borena ba go tšwa boditšhabeng, ba ba dulago Antiokia le Siria le Tsilitsia. Re kwele gore ba bangwe ba go tšwa mo go rena ba tlile ba le ferehla maikutlo ba le ferekanya ka tše ba di boletšego. Fela ba be ba se ba rongwa ke rena. Ka gona, re ile ra kwana gore re ntšhe banna ba bangwe re ba rome go lena. Bona ba tla tla ba na le Barnabase le Paulose, bagwera ba rena ba bagolo, ba ba ilego ba itsenya kotsing ya go bolawa, ka baka la Morena wa rena, Jesu Kriste. Bjale re roma Judase le Silase go lena, bona ba tlago le laodišetša ka molomo tšona ditaba tše re di ngwalago tše. Rena le Moya wo Mokgethwa re kwane gore re se le imetše morwalo wo mongwe, ntle le melao ye bohlokwa ye e rego: Le se ke la ja didimo, goba bobete, goba nama ya phoofolo ye e kgamilwego; le gona le ile go nyalana ga lešika. Le tla be le dira gabotse ge le ka se dire dilo tše. Le dumele kudu.” Baromiwa ba rile go laela ba tloga ba ya Antiokia, moo ba fihlilego ba kgoboketša badumedi ba gona ka moka, ba ba fa lengwalo lela. Badumedi ba re go le bala ba thabela go kwa mantšu a kgothatšo ya lona. Judase le Silase, bona e bego e le baprofeta, ba bolela le bona lebaka le letelele, ba ba kgothatša, ba ba tiiša. Ba tšea lebaka ba dutše le bona, badumedi ba kgona ba laelana le bona ka khutšo ba boela go ba ba ba romilego. *** Paulose le Barnabase ba tšea lebaka ba le Antiokia, ba begela batho lentšu la Morena, ba ba ruta lona ba na le ba bangwe ba bantši. Ka morago Paulose a bolela le Barnabase a re: “A re boelele re yo bona bana ba borena metseng ka moka ye re ilego ra yo kwatša lentšu la Morena go yona, re yo bona gore na ba swere bjang.” Barnabase o be a rata ge ba tloga le Johanese yola wa go tsebja le ka la Markose. Paulose yena a bona go se gwa lebana gore ba tloge le motho yo a ilego a ba lahletša kua Pamfilia, a se dule le bona go fihlela mafelelong a modiro wa bona. Gwa tsoga kgang ye kgolo mo go bona, ba ba ba arogana. Barnabase a sepela le Markose ba ya Saeprose ka leselawatle, mola Paulose yena a ikgethela Silase, mme phuthego ya ba gafela Morena gore e be yo botho go bona. Paulose a putla Siria le Tsilitsia, a tiiša diphuthego. Paulose a fetela Derbe le Listra, mo go bego go dula modumedi yo mongwe yo ba rego ke Timotheose. Mmagwe, yo le yena e bego e le modumedi, e be e le Mojuda, tatagwe yena e le Mogerike. Badumedi ba Listra le ba Ikoniomo ba be ba bolela gabotse ka Timotheose. Paulose o be a nyaka go tloga le Timotheose, ka gona a mmolotša. Seo a se dira ka baka la Bajuda bao ba bego ba dula mafelong ao, ka ge bohle ba be ba tseba gore tatagoTimotheose ke Mogerike. Ge ba thetha le metse ba be ba efa badumedi melao ye e beilwego ke baapostola le bagolo ba phuthego kua Jerusalema, gomme ba ba laya gore ba e phethe. Ka mokgwa woo diphuthego tša fela di tia tumelong di bile di oketšega ka mehla. Ba ile ba putla naga ya Frigia le ya Galatia ka gobane Moya wo Mokgethwa o be o se wa ba dumelela go bega lentšu la Modimo nageng ya Asia. Ge ba fihla mollwaneng wa Misia ba leka go selela ka nageng ya Bithinia, fela Moya wa Jesu wa se ba dumelele. Ka gona ba putla Misia ba fetela Troase. Bošegong bjoo Paulose a lala a bone pono. A bona monna wa go tšwa Matsedonia a eme a mo rapela a re: “Selela ka mono Matsedonia o re thuše!” Paulose o rile go bona pono yeo ra itokišetša go ya Matsedonia, ka gobane re be re kgolwa gore re bitšwa ke Modimo gore re yo begela batho ba gona Taba ye Botse ya gagwe. Re tlogile Troase ka leselawatle ra ya Samotrake, gomme ka le le latelago ra ya Neapolise. Go tloga moo ra fetela Filipi, e lego wona motse wa selete sa mathomo sa Matsedonia; ebile ke koloni ya Baroma. Ra tšea matšatši re le moo. Ka tšatši la Sabatha ra tšwa motseng ra ya nokeng moo re bego re gopola gore ke felo mo Bajuda ba tlwaetšego go rapela gona. Ra dula fase ra bolela le basadi ba ba bego ba kgobokane moo. Yo mongwe wa ba ba bego ba re theeleditše e be e le Lidia, e le mmapatši wa lešela la bohwibidu bja moretele, wa go tšwa Tiatira. Yena o be a khunamela Modimo, gomme Morena a mo fa gore a ele tše Paulose a di bolelago hloko. Ge yena le ba lapa la gagwe ba seno kolobetšwa, o ile a re mema a re: “Ge eba le mpona ke le modumedi wa Morena, a re yeng le yo dula ka ga ka.” A phegelela go re mema. Ka tšatši le lengwe ge re eya felong ga thapelo ra gahlana le ngwanenyana yo mongwe wa lekgoba yo a bego a tsenwe ke moya wa bodupe. O be a tlišetša beng ba gagwe tšhelete ye ntši ka bodupe. A fela a šetše Paulose le rena morago, a goelela a re: “Banna ba ke bahlanka ba Modimo Yogodimodimo! Ba le begela ka mo le kago phološwa ka gona!” O ile a fela a dira bjalo matšatši a mantši, Paulose a ba a tenega mo a ilego a retologa a re go moya woo: “Ke go laela ka maatla a Jesu Kriste gore o tšwe mo go yena!” Moya woo wa tšwa go yena le semeetseng. Beng ba gagwe ge ba bona gore ba lobile mokgwa woo wa go ikgobokeletša tšhelete, ba swara Paulose le Silase ba ba gogela go baetapele ba motse kua kgorong. Ba ba iša go mantona a Baroma ba re: “Banna ba ke Bajuda, gomme ba hlola mmudubudu mo motseng wa gaborena. Ba ruta batho mekgwa ye rena, re le Baroma, re ka se kego ra e amogela goba ra phela ka yona.” Batho ba motse le bona ba ba tsogela maatla. Mantona a laela gore ba kgeilelwe diaparo, ba be ba bethwe ka thupa. Ba re go ba betha gasehlogo ba ba lahlela kgolegong, gomme ba laela rakgolego gore a ba diše gabotse. Yena o rile go laiwa bjalo, a ba lahlela ka phapošing ya ka garegare, a ba pataganya maoto ka dikota. E rile mo gare ga bošego Paulose le Silase ba rapela ba opelela Modimo difela, gomme bagolegwa ba bangwe ba be ba theeleditše. Gatee gwa ba le tšhikinyego ye kgolo ya lefase ya go šikinya le metheo ya kgolego. Mejako yohle ya bulega le semeetseng; ditlemo tša bohle ba ba tlemilwego tša tlemologa. Rakgolego a phafoga, gomme ge a bona mejako ya kgolego e bulegile a gopola gore bagolegwa ba tšhabile. Ka gona a gwanyolla tšhoša ya gagwe a re o a ipolaya. Fela Paulose a mo goelela a re: “O se ke wa ikgobatša! Ka moka ga rena re sa le gona!” Rakgolego a re go tlišwe lebone; a tla a itlhaganetše, a itahlela pele ga Paulose le Silase a thothomela. A ba ntšhetša ka ntle, a ba botšiša a re: “Barena, na nka dirang gore ke phološwe?” Bona ba mo fetola ka go re: “Dumela go Morena Jesu, gomme o tla phološwa – wena le ba lapa la gago.” Ke ge ba mmegela lentšu la Morena, yena le bohle ba ba bego ba le ka lapeng la gagwe. Ka yona nako yeo ya bošego a ba tšea a yo a ba hlapiša dintho; gomme yena le bohle ba lapa la gagwe ba kolobetšwa le semeetseng. Ke mo a ba išitšego ka ntlong ya gagwe, a fihla a ba fa tša go ja. Yena le ba lapa la gagwe ba be ba thabile kudu ka gobane bjale ba be ba dumetše go Modimo. Ge go sele mantona a Baroma a roma maphodisa a re: “Lokolla banna bao.” Ke ge rakgolego a tsebiša Paulose a re: “Mantona a rometše molaetša wa gore le lokollwe. Ka gona etšwang le itshepelele gabotse.” Paulose a fetola maphodisa ao a re: “Ba re bethile pepeneneng re se ra sekišwa, mokagona ebile re le ba go bušwa Roma. Morago ga moo ba re lahlela ka kgolegong. Gomme bjale ba nyaka go re ntšha ka sephiring. O gane! A go tle bona beng ba re ntšhe.” Maphodisa ao a ya go begela mantona taba ye; gomme bona ge ba ekwa gore Paulose le Silase ke badudi ba go bušwa Roma, ba tšhoga. Ba ya ba kgopela tshwarelo go bona; ba ba ntšha ka kgolegong mme ba ba kgopela gore ba tloge moo motseng. Paulose le Silase ge ba tloga moo kgolegong ba ya ga Lidia. Ba hwetša badumedikabona; ba ba kgothatša ya ba ba a tloga. Paulose le Silase ba phatša Amfipolise le Apolonia ba fetela Thesalonika moo go bego go na le sinagoge ya Bajuda. Go ya ka setlwaedi sa gagwe Paulose a ya sinagogeng. Ya re mo Disabatheng tše tharo tša go latelana a tšea kgang le bona, a boledišana nabo ka tša Mangwalo a Makgethwa, a bile a ba hlalošetša ditemana tša ona, a ba bontšha ka tšona gore Mesia o be a swanetše go tlaišwa le go tsoga bahung. A re: “Yena Jesu yo ke le begelago yena yo ke yena Mesia.” Ba bangwe ba bona ba ile ba kgolwa mme ba sepela le Paulose le Silase, le sehlopha se segolo sa Bagerike ba e bego e le barapedi ba Modimo, le basadi ba bantši ba maemo. Fela Bajuda ba ba tsebafela gomme ba rapa difelele tša metlapa ba kgoboketša lekoko. Ba tsoša mmudubudu motseng, ba hlasela lapa la monna yo ba rego ke Jasone, ba nyaka Paulose le Silase gore ba ba ntšhetše ntle bathong. E rile ge ba sa ba hwetše, ba gogela Jasone le badumedi ba bangwe go baetapele ba motse, ba goelela ba re: “Batho ba ba go tsoša mpherefere lefaseng lohle bjale ba tlile mono, gomme Jasone o ba beile ka ga gagwe. Ka moka ga bona ba tshela melao ya Kesare, ba re kgoši ke yo mongwe, leina la gagwe ke Jesu.” Go realo ya ba ge ba ferekantše lešaba le baetapele ba motse. Baetapele bao ba rile go phethiša Jasone le ba ba bangwe tše di nyakegago gore ba lokollwe, ba ba lesa ba sepela. Ge leswiswi le seno swara badumedi ba romela Paulose le Silase Berea. Bona ge ba fihla ba ya sinagogeng ya Bajuda. Batho ba gona ba be ba phala ba Thesalonika ka go amogela tše di begwago ke Paulose. Ba be ba theeletša molaetša wa Modimo ka ditsebe tše pedi, gomme ka mehla ba be ba ithuta Mangwalo a Makgethwa go bona ge eba tše di bolelwago ke Paulose ke tšona. Ba bantši ba bona ba ile ba dumela; le basadi ba bantši ba maemo ba Bagerike le banna ba bantši ba Bagerike le bona ba ile ba dumela. Fela e rile ge Bajuda ba Thesalonika ba ekwa gore Paulose o bega molaetša wa Modimo le kua Berea, ba tla gona ba fihla ba ferehla batho ba ba ferekanya. Badumedi ba akgofa ba tloša Paulose ba mo iša lebopong la lewatle, fela Silase le Timotheose ba šala Berea. Banna ba ba bego ba felesetša Paulose ba ile ba mo fihliša Athene, ya ba gona ba boelago Berea, Paulose a ba laetše gore Silase le Timotheose ba mo latele ka pelapela. E rile ge Paulose a sa letetše Silase le Timotheose kua Athene, a ferekana kudu ge a bona motse o tletše medingwana. Ka gona a tšea kgang le Bajuda ka sinagogeng le batho ba e lego bakhunamedi ba Modimo. Le kua lepatlelong la motse ka mehla a tšea kgang le ba a kopanago le bona. Le dihlalefi tše dingwe tša Baepikure le tša Bastoike di be di tšea kgang le yena. Ba bangwe ba botšiša ba re: “Etse mmalabadi yo o leka go re botšang?” Ba bangwe ba fetola ba re: “O ka re o bolela ka medimo e šele.” Ba be ba realo ka gobane Paulose o be a bega tša Jesu le tsogo ya bahu. Ba tšea Paulose ba mo iša kgorong ya motse, e lego Areopagose, ba re: “Re nyaka go tseba gore na thuto ye mpsha ye o bolelago ka yona ye ke thutomang. Tše dingwe ditaba tše o di bolelago ke tše difsa ka ditsebeng tša rena, gomme re nyaka go tseba gore na di iša kae.” Gape badudi bohle ba Athene le bafaladi ba gona ba be ba hlwa ba duletše go anega le go kwa tše difsa. Paulose a ema kgorong a re: “Lena banna ba Athene, ke a bona gore dilong tšohle ke lena barapedi ba mmakgonthe. Gobane ge ke ntše ke sepelasepela ke lebeletše mafelo a le khunamelago medimo ya lena go ona, ke bone le aletare ye nngwe ye e ngwadilwego go re: ‘Go modimo yo a sa tsebjego.’ Bjale ge, se le se khunamelago etšwe le sa se tsebe ke sona se bjale nna ke le begelago sona. Modimo yo a hlodilego lefase le tšohle tše di lego mo go lona, yo e lego yena Morena wa legodimo le lefase, ga a dule ka ditempeleng tše di agilwego ke batho. Le gona ga a nyake selo se batho ba kago mo fa sona ka go mo direla, ka ge e le yena ka noši yo a phedišago bohle le gona a fago bohle tšohle. O hlodile ditšhaba tšohle ka motho o tee, gore di phele gohle lefaseng. Ke yena a di beetšego dinako le mafelo ao di tlago dula go ona. Seo o be a se direla gore ba mo nyake, mohlomongwe ba mo hwetše ge ba mo phophola. Gape ga a kgole le yo mongwe le yo mongwe wa rena; gobane mo go yena re a phela, re a ithokgonya, ebile re gona. Go bjalo ka ge direti tše dingwe tša gabolena di boletše tša re: ‘Le rena re bana ba gagwe.’ Ka ge re le bana ba Modimo, re se ke ra gopola gore yena a ka swana le seswantšho sa gauta goba sa silibera goba sa leswika se se betlilwego ka bothakga le bokgoni bja motho. Modimo o ile a hlokomologa mehla yela go yona batho ba bego ba sa mo tsebe, eupša bjale o ba laela bohle mo gohle gore ba sokologe. Gobane o beile letšatši la ge a tlilo ahlola batho ba lefase ka toka ka monna yo a mo kgethilego. O tiišeditše taba ye ka go tsoša monna yoo bahung.” E rile ge ba ekwa Paulose a bolela ka tša go tsošwa bahung, ba bangwe ba bona ba mo gegea, fela ba bangwe ba re: “Re nyaka gore o tle o re botše gape ka taba ye.” Ke moka Paulose a tloga moo go bona. Banna ba bangwe ba thoma go sepela naye mme ya ba badumedi; yo mongwe wa bona e be e le Dionisiose, wa lekgotla la motse, le mosadi yo mongwe yo ba rego ke Damarise, le ba bangwe. Ka morago ga moo Paulose a tloga Athene a ya Korinte. Moo a kopana le Mojuda yo mongwe yo ba rego ke Akhwila, yo a tswaletšwego Pontose. Yena o be a sa tšo tla a etšwa Italia gotee le Prisila, mosadi wa gagwe, gobane Kesare Klaudiose o be a laetše gore Bajuda ka moka ba tloge Roma. Paulose a ya go ba bona, a dula le bona, a šoma le bona ka ge a be a phela ka go dira ditente bjalo ka bona. Ka Disabatha o be a tšea kgang le batho ka sinagogeng, a leka go kgodiša Bajuda le Bagerike. Ge Silase le Timotheose ba fihla ba etšwa Matsedonia, Paulose a ikgafela go begela Bajuda molaetša wa Modimo, a ba hlatselela gore Jesu ke Mesia. E rile ge ba mo ganetša ebile ba mo roga, a hlohlora marole diaparong tša gagwe, a re go bona: “Ge le timetše, molato ke wa lena, nnaena ke hlapile diatla! Go tloga bjale ke napile ke ya go baditšhaba.” Ke moka a tloga a ya ka ga monna yo ba rego ke Titose Justose, yo e bego e le mokhunamedi wa Modimo. Lapa la gagwe le be le kgauswi le sinagoge. Krispose, yo e bego e le mookamedi wa sinagoge, o be a dumetše go Morena, yena le bohle ba lapa la gagwe. Le batho ba bangwe ba bantši kua Korinte ba rile go kwa molaetša wa Modimo ba dumela, gomme ba kolobetšwa. E rile bošegong bjo bongwe Morena a botša Paulose ka pono a re: “O se ke wa šia, o fele o bolela, o se ke wa homola, gobane ke na le wena. Ga go yo a tlago go dira selo, gobane ba bantši mo motseng wo ke ba ka.” Paulose a dula moo ngwaga le dikgwedi tše di selelago, a ruta batho lentšu la Modimo. E rile ge Galio e le mmušiši wa Agaya, Bajuda ba kgobokana, ba swara Paulose ba mo iša kgorong. Ba re: “Monna yo o hlohleletša batho go khunamela Modimo ka mokgwa wo o ganwago ke molao.” Paulose o rile a sa re o a bolela, Galio a botša Bajuda a re: “Ge taba ye e ka be e le ya bokebeka goba bosenyi bjo bogolo, lena Bajuda, nkabe ke tlemegile go le theeletša ke sa le felele pelo. Eupša ka ge e le kgang ya mantšu le maina le molao wa lena, ke taba ye lena beng le swanetšego go iponela yona. Nna ga ke nyake go ba moahlodi wa taba tša mohuta wo.” Ke moka a ba raka kgorong. Bona ka moka ba swara Sostenese, mookamedi wa sinagoge, ba mmetha gona moo kgorong. Fela Galio yena a se re selo mo tabeng yeo. Paulose a tšea lebakanyana a na le badumedi Korinte, a kgona a laelana nabo mme a eya Siria ka leselawatle, a na le Prisila le Akhwila. Pele ga ge a tloga Kenegrea, o ile a boolwa hlogo ka baka la ge a be a ikanne. Ba rile go fihla Efeso a tlogela Prisila le Akhwila. A ya ka sinagogeng a fihla a tšea kgang le Bajuda. Batho ba mo kgopela gore a dule nabo sebakanyana, fela yena a se dumele. Gomme ge a sepela a ba botša a re: “Ge eba e le thato ya Modimo, ke tla boa ka tla mo go lena.” Ke moka a tloga Efeso ka leselawatle. E rile ge a fihla Kesarea a rotogela Jerusalema a yo dumediša phuthego, ya ba o fetela Antiokia. A re go fetša labaka gona, a feta a phatša naga ya Galatia le ya Frigia a tiiša badumedi bohle. Kua Efeso go kile gwa tla Mojuda yo mongwe yo ba rego ke Apolose, yo a bego a tswaletšwe Aleksandria. Yena e be e le seboledi se segolo, a tseba Mangwalo a Makgethwa gabotse. O be a rutilwe thuto ya Morena, gomme a begela batho a bile a ba ruta ka go nepa ditaba tša Jesu ka mafolofolo. Ge e le kolobetšo o be a tseba fela ya Johanese. A thoma go bolela a sa boife ka sinagogeng. Prisila le Akhwila ba rile go mo kwa ba ya le yena ga gabobona, ba mo hlalošetša gabotse thuto ya Modimo. E rile ge a nyaka go ya Agaya badumedi ba Efeso ba mo thuša ka go ngwalela badumedi ba gona gore ba mo amogele. Ge a fihla gona a thuša kudu bao e bego e le badumedi ka kgaugelo ya Modimo. Gobane ge Bajuda ba tšea kgang le yena phatlalatša o be a ba phala ka dipolelo tša gagwe tše maatla, a bontšha ka Mangwalo a Makgethwa gore Jesu ke yena Mesia. Mola Apolose a le Korinte, Paulose o ile a phatša dilete tša ka gare ga naga, a ba a yo fihla motseng wa Efeso. Moo a fihla a hwetša badumedi ba bangwe, gomme a ba botšiša a re: “Na mola le eba badumedi le ile la amogela Moya wo Mokgethwa?” Bona ba mo fetola ba re: “Aowa, le go kwa gore go na le Moya wo Mokgethwa ga se ra ka ra kwa.” Paulose a ba botšiša a re: “Bjale le kolobeditšwe ka kolobetšo efe?” Bona ba mo fetola ka go re: “Ka kolobetšo ya Johanese.” Paulose a re: “Kolobetšo ya Johanese e be e le ya bao ba sokologago dibeng tša bona; yena o be a fela a botša Baisraele gore ba dumele go yo a tlilego go mo hlatlama, a era Jesu.” Batho bao ge ba ekwa a realo, ba kolobetšwa ya ba balatedi ba Morena Jesu. Paulose a ba bea diatla, gomme Moya wo Mokgethwa wa theogela godimo ga bona; ba bolela mantšu a a sa kwešišwego ba bile ba bega molaetša wa Modimo. Ka moka ga bona e be e ka ba banna ba lesome le ba babedi. Paulose a fela a eya ka sinagogeng ya Bajuda, gomme a tšea dikgwedi tše tharo a bolela ka go se boife le batho, a tšea kgang le bona mme a leka go ba kgodiša tša mmušo wa Modimo. Eupša ba bangwe ba bona e be e le dinganga ba sa rate go dumela, ba bolela thuto ya Morena gampe mo phuthegong. Ka gona Paulose a ba tlogela, a tloga le badumedi, gomme ka mehla a fela a boledišana le batho ka ntlong ya borutelo ya Tiranose. Gwa dirwa bjalo mengwaga ye mebedi, mo bohle ba ba dulago nageng ya Asia, Bajuda le baditšhaba, ba ilego ba kwa lentšu la Morena. Modimo o be a dira mehlolo ye megolo ka Paulose. Batho ba bile ba tšea le mašelana a go phumola dikudumela, le dithetho tša go šoma, ba re go mo kgoma ka tšona ba di bea balwetši, mme bona ba fola malwetši a bona, le meoya ye mebe e ba tlogela. Bajuda ba bangwe ba go šika le naga ba raka meoya ye mebe le bona ba leka go bolela leina la Morena Jesu ge ba raka meoya ye mebe. Ba e botša ba re: “Re le laela ka Jesu yo a begwago ke Paulose gore le tšwe mo mothong yo.” Ba ba bego ba dira bjalo e be e le barwa ba ba šupago ba moprista yo mogolo wa Mojuda yo ba rego ke Skefa. Moya woo wo mobe wa re go bona: “Ge e le Jesu ke a mo tseba, Paulose le yena ke wa ka. Bjale lena – ke lena bomang?” Monna yoo wa moya wo mobe a ba hlasela, a ba keketa, a ba fenya ka moka, ba ba ba tšwa ba tšhaba ka lapeng la gagwe ba kgeigetšwe ba bile ba gobetše. Taba ye ya kwagala go Bajuda le go baditšhaba bohle ba ba agilego Efeso. Bohle ba welwa ke poifo, gomme Jesu a tuma kudu. Badumedi ba bantši ba tla ba ipobola phatlalatša gore kgale ba be ba dira tša boloi. Ba bantši ba ba bego ba kile ba dira tša boloi ba kgoboketša dipuku tša bona ba di fiša pepeneneng. Ge ba bala theko ya tšona ba hwetša e le ya dipapetlana tše dikete tše masome a mahlano tša silibera. Ka maatla a Morena molaetša wa Modimo wa fela o phatlalala o bile o tia ka tsela yeo. E rile ge taba tše di seno hlaga Paulose a ikemišetša go phatša naga ya Matsedonia le ya Agaya le go fetela Jerusalema. A re: “Ge ke seno boa kua ke swanetše go etela le Roma.” A roma ba babedi ba bathuši ba gagwe, Timotheose le Erastose, Matsedonia ge yena a sa šala lebaka kua Asia. E bile tšona nako tše ge motseng wa Efeso go tsoga mmudubudu wo mogolo mabapi le thuto ya Morena. Mathulatshipi yo mongwe yo ba rego ke Demetriose o be a bopa diswantšhobopša tša tempele ya modimo wo motshadi Artemise ka silibera, gomme a tlišetša bomathulatshipi ba gagwe poelo ye ntši. A ba rapa gotee le bohle ba ba dirago mediro ye e amanago le yeo ya bona, a re go bona: “Banna, le a tseba gore re humišwa ke modiro wo. Bjale le a iponela ebile le a ikwela tše di dirwago ke mothaka yo, Paulose. O re medimo ya go dirwa ke batho ga se medimo, gomme o kgodišitšwe batho ba bantši a ba aroša, e sego mo Efeso fela, eupša e nyakile go ba le nageng yohle ya Asia. Gomme ga se modiro wo wa rena fela wo o kago goboga, eupša le yona tempele ya modimo wo motshadi wo mogolo, Artemise, e ka bonwa e se selo, mme setumo sa yena modimo woo wo motshadi wo o khunamelwago ke bohle nageng ya Asia le lefaseng ka moka, se tla fela.” Ge lešaba le mo kwa a realo, la galefa, la goa la re: “Ke yo mogolo, Artemise wa Efeso!” Mmudubudu woo wa phatlalala le motse wohle. Lešaba la phuthuma Gayose le Aristargose ba Matsedonia ba ba bego ba felesetša Paulose, la itlhaganela go ya kgorong la ba kgareetša. Paulose o be a rata go yo bolela le lešaba leo, fela badumedi ba se mo dumelele. Le ba bangwe baetapele ba naga ya Asia ba e bego e le bagwera ba gagwe ba roma batho go mo kgopela gore a se ye kgorong. Kgabagareng yeo go be go šetše go tsoga tlhatlhariane: bangwe ba bolela se, bangwe ba bolela sela, gape bontši bja bona bo be bo sa tsebe gore ba kgobokanetšeng. Bajuda ba bangwe moo lešabeng ba bulela Aleksandere tsela. Ba bangwe batho ba mmotša gore a reng. Ke moka Aleksandere a emiša seatla go homotša batho gore a hlaloše se e lego taba. Fela e rile ge ba lemoga gore ke Mojuda, ba goa mmogo diiri tše e ka bago tše pedi ba re: “Ke yo mogolo Artemise wa Efeso!” Mafelelong lešaba leo la homotšwa ke mongwaledi wa motse a re: “Lena Baefeso, ke mang motho yo a sa tsebego gore motse wa Efeso ke modiša wa tempele ya Artemise yo mogolo le wa leswika lela la go wa legodimong? Ga go yo a ka latolago taba ye. Ka gona le swanetše le itshware, le se dire selo ka lephakuphaku. Le tlišitše banna ba mo le ge ba se ba hlakola tempele goba ba nyefola modimogadi wa rena. Ge Demetriose le bašomikayena ba na le taba le yo mongwe, dikgoro tša tsheko di gona, le baahlodi, a ba tle kgorong! Fela ge eba go sa na le se sengwe se le se nyakago, se tla rerwa pitšong ye e rapilwego go ya ka molao. Ka baka la se se diregilego lehono, re ka bonwa molato wa go hlola mpherefere. Gape ga go lebaka le le kwagalago le re ka ikarabelago ka lona, ge go ka thwe re hlotše mmudubudu.” A re go realo a phatlalatša pitšo. Tlhahlariane yela e rile go homola Paulose a rapa badumedi a ba kgothatša ya ba o a ba laela. Ke moka a tloga a ya Matsedonia. A phatša dilete tša gona a tšama a kgothatša batho ka tše a di bolelago, a ba a fihla nageng ya Bagerike; a dula gona dikgwedi tše tharo. E rile ge a re o ya Siria ka leselawatle a lemošwa gore Bajuda ba mo lakane, gomme a bona a loketšwe ke go boa ka tsela ya Matsedonia. Ba go mo felesetša e be e le Sopatere wa Berea, morwa wa Pirose, le Aristargose le Sekundose ba Thesalonika, le Gayose wa Derbe, le Timotheose, le Tigikose le Trofimose ba naga ya Asia. Ba re thaka pele ba fihla ba re letela Troase. Rena ra tloga Filipi ka leselawatle ka morago ga Monyanya wa Dinkgwa tše di se nago komelo, ya re ge go fetile matšatši a mahlano ra ba hwetša Troase gomme ra dula gona matšatši a a šupago. E rile bošegong bja Mokibelo ge re phuthegetše go ngwathišana bogobe, Paulose a bolela le phuthego a gopotše go tsoga a sepela; a dika a bolela, ya ba ya ba bošegogare. Go be go thumašitšwe mabone a mantši ka phapošing ya ka godimo ka mo re bego re phuthegetše ka gona. Lesogana le lengwe le leina la lona ba rego ke Yutigose le be le dutše lefasetereng, gomme ya re ge Paulose a ntše a bolela, yena a potuma, a ba a re uwee ka boroko, a fegologa moo lebatong la boraro a wela fase, gomme ge ba mo kuka ke ge a hwile. Paulose a theogela fase a fihla a itahlela mo godimo ga gagwe, a mo gokarela. A re: “Le se ferekane, o sa phela!” Ke moka a boela lebatong la ka godimo, a fihla a ngwatha bogobe, a ja. A dika a bolela le bona nako ye telele, gwa ba gwa sa, a kgona a sepela. Lesogana lela ba ya le lona gae le phedile mme ba homotšegile kudu. Rena re ile ra sepela pele ka leselawatle ra ya Asose, moo re bego re yo feta re tšea Paulose. O be a re laetše gore re dire bjalo, ka ge a be a ratile go šala a eya gona ka maoto. E rile ge a gahlana le rena Asose ra mo nametša leselawatle ra ya Mitilene. Ra tloga gona ka leselawatle ra fihla go lebana le Giose ka le le latelago. Gosasa ga gona ra tsoga re fihla Samose, gomme ka le le latelago ra fihla Miletose. Paulose o be a gopotše go tla motse wa Efeso ka ntle, gore a se ditelege kwa nageng ya Asia. O be a ilthaganeletše gore ge go kgonega a be a fihlile Jerusalema ka letšatši la Pentekoste. Paulose ge a le Miletose a roma batho Efeso go yo bitša bagolo ba phuthego. Ge ba fihla a re go bona: “Tša bophelo bja ka nakong yohle ya ge ke be ke na le lena go tloga tšatšing la mathomo la go fihla ga ka mo nageng ya Asia le a di tseba. Le tseba ka mo ke bego ke direla Morena ka boikokobetšo bjohle le meokgo ye mentši mathateng a a nkwetšego ge ke be ke lakanwe ke Bajuda. Le a tseba gore ga se ka ka ka le fihlela selo se se kago le hola mola ke le begela molaetša wa Modimo ke bile ke le ruta phatlalatša le ka malapeng a lena. Ke be ke fela ke kgala Bajuda le baditšhaba gore ba sokologele go Modimo mme ba dumele go Morena wa rena Jesu. Gomme bjale ke ya Jerusalema ke gapeletšwa ke Moya wo Mokgethwa, ke sa tsebe se se tlago ntlhagela gona. Se ke se tsebago ke gore motseng wo mongwe le wo mongwe Moya wo Mokgethwa o ntemošitše gore ke letetšwe ke kgolego le mathata. Fela nna bophelo bja ka ga ke bo seme selo; se ke se nyakago ke go feleletša se ke romilwego go se dira, le go phetha modiro wo ke o filwego ke Morena Jesu, e lego go bega Taba ye Botse ya kgaugelo ya Modimo. “Gomme bjale ke a tseba gore lena ka moka ke bego ke sepela mo gare ga lena ke le begela tša mmušo wa Modimo, le ka se sa mpona. Ka gona, lehono ke le botša ke tiišitše ke re: Ge motho wa lena a ka timela, molato e ka se be wa ka. Gobane ga se ka le tima selo sa thato ya Modimo. Ka gona, le itote, le lote le mohlape ka moka wo le o neilwego ke Moya wo Mokgethwa gore le o diše. Le be badiša ba phuthego ya Modimo, ye a e ikhweleditšego yona ka lehu la Morwagwe. Ke a tseba gore ge ke seno sepela, le tla tlelwa ke diphiri tše bogale tše di ka se kego tša babalela mohlape. Nako e etla mohlang le mo gare ga lena go tlago tsupologa boramaaka ba go aroša badumedi gore ba ba latele. Ka gona, le itote, gomme le gopole gore ke tšere mengwaga ye meraro ke le ruta bohle ke sa khutše, bošego le mosegare ke fela ke lla. “Gomme bjale ke le bea go Modimo le kgaugelo ya gagwe ye e kgonago go le aga le go le fa bohwa bjo Modimo a di beetšego bohle ba a ba kgethilego. Ga se ka ka ka duma silibera ya motho goba gauta goba seaparo. Lena beng le a tseba gore tše nna le bangwekanna re bego re phela ka tšona ke di šometše ka diatla tše tša ka. Dilong tšohle ke le bontšhitše gore bafokodi re swanetše go ba thuša ka go šoma gaboima ka yona tsela ye, re ntše re gopola mantšu ale a go bolelwa ke Morena Jesu ka boyena a re: ‘Lehlogonolo la mofi le feta la mofiwa.’ ” Paulose ge a feditše go bolela, a khunama le bona ka moka, a rapela. Bohle ba lla, ba mo gokarela ba mo atla ba mo laela. Gagolo ba be ba nyamišitšwe ke ge a rile ba ka se sa mmona. Ke moka ba mo felesetša leselawatleng. Ge re seno laelana nabo ra tloga ka leselawatle ra leba Kose thwii, ra ba ra yo fihla. Ka le le latelago ra fihla Rodose, gomme go tloga moo ra fetela Patara. Ra fihla ra hwetša leselawatle le le yago Fenikia, ra re go le namela, ra tloga. Ge re fihla mo re bonago sehlakahlaka sa Saeprose, ra se pota ka letsogong la manngele go leba Siria, ra fihla motseng wa Tirose moo leselawatle le bego le iša diphahla. Ra fihla ra hwetša badumedi moo gomme ra dula nabo matšatši a a šupago. Bona ba botša Paulose ba tutuetšwa ke Moya wo Mokgethwa ba re a se ke a fetela Jerusalema. Ge re seno fetša matšatši ao le bona ra tloga ra wela tsela. Ba re felesetša ka moka ga bona, le ka basadi le bana, ba re fihliša ka ntle ga motse. Ge re le lešing la lewatle ra khunama ka dikhuru ra rapela. Ke moka ra laelana, rena ra namela leselawatle mola bona ba boela gae. Go tloga Tirose ra tšwela pele ka leeto ra goroga Petolemaise. Ra fihla ra dumediša badumedi mme ra hlwa nabo tšatši le tee. Ka le le latelago ra fetela Kesarea. Gona ra fihla ra dula ka ga moebangedi Filipi yo e bego e le yo mongwe wa bathuši bale ba go šupa. O be a na le barwedi ba bane ba ba sego ba nyalwa bao ba bego ba na le mpho ya go bega molaetša wa Modimo. E rile ge e šetše e le matšatši re le moo gwa fihla moprofeta yo ba rego ke Agabose wa go tšwa Judea. A tla go rena, a tšea lepanta la Paulose, a ipofa maoto le matsogo ka lona a re: “Moya wo Mokgethwa o re: ‘Mong wa lepanta le Bajuda ba ya go mmofa ka mokgwa wo kua Jerusalema, ba mo gafela baditšhaba.’ ” Ge re ekwa a realo, rena le badumedi ba moo ra rapela Paulose gore a se ye Jerusalema. Yena a re fetola ka go re: “Le reng le lla le nyaka go ntlhanamiša? Gape nna ke itokišeditše e sego fela go bofša, eupša le go bolaelwa Morena Jesu kua Jerusalema.” Ge a re palela bjalo, ra ineela ra re: “A go phethwe thato ya Morena.” Ge go fetile matšatši ao, ra itokiša ra ya Jerusalema. Badumedi ba bangwe ba go tšwa Kesarea le bona ba ya le rena, ba re iša go Monasone wa go tšwa Saeprose yo e bego e le modumedi wa kgale, yo re bego re yo dula ka ga gagwe. Ge re fihla Jerusalema badumedi ba re amogela ka lethabo. Ka le le latelago Paulose a ya le rena go bona Jakobose; le bagolo ba phuthego ka moka ba be ba le gona. Paulose a re go ba dumediša a ba anegela ka botlalo tšohle tše Modimo a di dirilego ka yena go baditšhaba. Ge ba seno di kwa, bohle ba reta Modimo. Ke moka ba re go Paulose: “Ngwanešo, le wena o a iponela ka bowena gore ke dikete tše kaakang tša Bajuda ba ba dumetšego, le gore bohle ba botegela molao wa Moshe bjang. Ba boditšwe gore wena o ruta Bajuda bohle ba ba falaletšego baditšhabeng gore ba kgeloge molaong wa Moshe; o re ba se ke ba bolotša bana ba bona, le gona ba se ke ba latela ditlwaedi tša Sejuda. Bjale go ka dirwang? Gobane go tla kwala gore o tlile fa. Dira se re go botšago sona. Go na le banna ba bane mo ba ba ikannego. Sepela nabo le yo phetha tirelo ya boitlhwekišo, gomme o ba lefele tšhelete ya tlhwekišo gore ba kgone go ipoolwa dihlogo. Ke mo bohle ba tlago tseba gore go tše ba di boditšwego ka wena ga go therešo, gomme o phela ka molao wa Moshe. Ge e le baditšhaba ba ba sokologilego bona re ba ngwaletše lengwalo ra ba botša gore re kwane gore ba ile dinama tša didimo, le bobete, le dinama tša diphoofolo tše di kgamilwego, le go nyalana ga lešika.” Ka le le latelago Paulose a tloga le banna bao a yo phetha le bona tirelo ya boitlhwekišo. Ke moka a ya ka Tempeleng a bega gore nako ya gagwe ya matšatši a boitlhwekišo e tla fela neng, ge yo mongwe le yo mongwe wa bona a tlilo direlwa sehlabelo. E rile ge matšatši ao a go šupa a šetše a eya mafelelong, Bajuda ba bangwe ba go tšwa nageng ya Asia ba bona Paulose ka Tempeleng. Ba hlohleletša lešaba ka moka, ba mo swara. Ba goa ba re: “Lena banna ba Israele, thušang! Monna yo ke yena yo a rutago batho ka moka mo gohle a ba fapantšha le setšhaba le melao ya Moshe le Tempele ye. Ebile bjale o tlišitše baditšhaba ka mo Tempeleng, gomme o tšhetše lefelo le lekgethwa le setšhila!” Ba realo ka ge ba mmone motseng a na le Trofimose wa Efeso, gomme ba hloma nke o tsene le yena ka Tempeleng. Gwa tsoga mmudubudu motseng ka moka, setšhaba sa bokana ka lephakuphaku; ba swara Paulose, ba mo goga ba mo ntšha ka Tempeleng, gomme mejako ya tswalelwa ka pela. E rile ba sa re ba a mmolaya, rasekete wa bahlabani a hlabelwa mokgoši wa gore motseng wohle wa Jerusalema go tsogile kgaruru. A akgofa a tloga le bahlabani le boralekgolo ba bangwenyana ba bahlabani ba hlaganela kua lešabeng. Ge ba mmona a na le bahlabani ba lesa go keketa Paulose. Yena a ya go Paulose, a mo swara, a laela gore a kgokwe ka diketane tše pedi. Ke moka a botšiša gore motho yoo ke mang, le gore o dirileng. Ba bangwe moo lešabeng ba goa tša bona, bangwe ba goa tše dingwe – ya ba tlhatlhariane fela ya go šitiša rasekete go kwa se e lego taba; ka gona a laela gore Paulose a išwe sebong. Ge ba fihla manamelong bahlabani ba mo kuka gore ba mo phephiše bogale bja lešaba. Bohle ba be ba ba šetše morago ba goa ba re: “Mmolayeng!” E rile ge bahlabani ba re ba mo iša ka sebong, a re go rasekete: “Na nka se bolele le wena?” Yena a mmotšiša a re: “Kganthe o tseba Segerike? Gona ga se wena Moegepeta yola wa go tsoša mmudubudu malobanyana mo, a ya lešokeng le batšhošetši ba dikete tše nne, kgane o yena?” Paulose a mo fetola a re: “Nna ke Mojuda wa motse wa Tarsose kua Tsilitsia; ke modudi wa motse wo o tsebegago. Ke a go kgopela, hle, ntumelele go bolela le lešaba le.” Rasekete a mo dumelela, gomme Paulose a ema manamelong, a homotša lešaba ka seatla. Ge ba rile tuu, a bolela le bona ka Seheberu a re: “Bagešo le lena botate, ntheeletšeng ge ke iphetolela mo go lena!” Ge ba ekwa a bolela nabo ka Seheberu, ba nama ba homolela ruri, gomme yena a tšwela pele a re: “Ke nna Mojuda. Ke tswaletšwe motseng wa Tarsose kua Tsilitsia, fela ka godišetšwa mo motseng wo ke le morutiwa wa Gamaliele. Ke rutilwe ka šedi ye kgolo go phetha melao ya borakgolokhukhu ba rena, gomme ka ba mogale wa Modimo go etša lena bohle lehono. Ka hlomara ba go sepela ka tsela ya Bokriste gore ba be ba hwe. Ka swara banna le basadi ka ba lahlela kgolegong. Ba ba kago ntlhatsela gore ke bolela nnete ke Moprista yo Mogologolo le Kgorokgolo yohle. Ke bona ba bego ba mpha mangwalo a a ngwaletšwego Bajudakarena kua Damaskose, gomme ka ya gona gore le ba ba lego kua ke ba sware ke ba bušetše mo Jerusalema gore ba tle ba otlwe.” “Ka re ke ntše ke sepela ke batametše motse wa Damaskose ka nako tša mosegare wo mogolo, seetša se segolo se se tšwago legodimong sa nkgadimela ka mathoko ohle. Ka wela fase, ka kwa lentšu le re: ‘Saulo, Saulo, o ntlhomaretšeng?’ Nna ka botšiša ka re: ‘Ke wena mang, Morena?’ Yena a re: ‘Ke nna Jesu wa Nasaretha yo o mo hlomerego.’ Ba ba bego ba sepela le nna ba bona seetša, fela ba se kwe lentšu la yo a bolelago le nna. Ka botšiša ka re: ‘Ke direng, Morena?’ Morena a re go nna: ‘Emelela o ye ka mola motseng wa Damaskose moo o tlago botšwa tšohle tše Modimo a go beetšego tšona gore o di dire.’ Ke be ke foufaditšwe ke go phadima ga seetša seo, ka gona ba ba sepelago le nna ba ntlhahla ka letsogo ba nkiša Damaskose. “Monna yo mongwe yo ba rego ke Ananiase, morapedi wa go phetha melao ya Moshe le gona wa go hlompšha ke Bajuda bohle ba ba agilego moo, a tla go nna moo motseng, a ema kgauswi ga ka a re: ‘Saulo, ngwanešo, foufologa!’ Ka foufologa le semeetseng mme ka mmona. A re: ‘Modimo wa borakgolokhukhu ba rena o šetše a go kgethile gore o tsebe thato ya gagwe, o bone Moloki, o mo kwe ge a bolela ka wa gagwe molomo. O tla ba hlatse ya gagwe, wa botša bohle tše o di bonego gape o di kwelego. Gomme bjale o sa diegelang? Ema o kolobetšwe gomme o hlatswiwe dibe tša gago o mo rapele.’ “E rile ge ke boetše mono Jerusalema ke rapela ka Tempeleng, ka tsenwa ke moya, ka bona pono. Ka bona Morena, mme a re go nna: ‘Itlhaganele o tloge mo Jerusalema ka pela, ka gobane batho ba mo ba ka se amogele bohlatse bjo o mpolelago ka bjona.’ Nna ka mo fetola ka re: ‘Morena, bona beng ba a tseba gore ke be ke eya ka disinagogeng ke swara ba ba dumelago go wena ke bile ke ba betha. Le mohla wola go bolawa hlatse ya gago, Stefane, le nna ke be ke le gona ke thabetše polao ya gagwe, ke letile diaparo tša babolai ba gagwe.’ Morena a re: ‘Sepela, gobane ke nyaka go go roma kgole baditšhabeng.’ ” Lešaba le mo theeleditše go fihlela ge a bolela mantšu ao, ya ba ba goa ba re: “Wa mohuta wo a a tlošwe lefaseng! Ga se a swanela go phela!” Ba tsoša tlhatlhariane, ba foša diaparo godimo, ba thuntšhetša le marole godimo. Rasekete a laela gore Paulose a tsentšhwe ka sebong, a otlwe ka tshelane, a bolele gore Bajuda ba reng ba mo hlabela lešata le lekaaka. E rile ge ba mmapotše gore a otlwe, yena a botšiša ralekgolo yo a bego a eme moo a re: “Kgane le dumeletšwe go otla Moroma, le go sekišwa a se a ka a sekišwa!” Ralekgolo yoo a re go kwa Paulose a realo a ya go rasekete, a mmotšiša a re: “Na o nyaka go dirang, wena? Gape motho yo ke Moroma!” Ke ge rasekete a eya go Paulose, a mmotšiša a re: “Nke o mpotše: Na o Moroma?” Paulose a re: “Ee”. Rasekete a re: “Nna Boroma bjo ke itheketše bjona ka tšhelete ye ntši.” Paulose yena a re: “Gomme nna ke bješo ka tswalo.” Ke mo bao ba bego ba tlilo mo sekišiša ba namilego ba hunyela, gomme le rasekete yola a tšhoga ge a lemoga gore Paulose ke Moroma mme yena o mo kgokile ka diketane. Rasekete o be a nyaka go tseba gabotse se Paulose a latofatšwago ke Bajuda ka sona; ka gona, ka le le latelago a laela gore Paulose a kgokollwe diketane, le gore baprista ba bagolo le Kgorokgolo yohle ba tle pitšong. Ke moka a tšea Paulose a mo emiša pele ga bona. Paulose a tseparela Kgorokgolo ka mahlo a re: “Bagešo, go fihla le lehono le le gatee ga ke itshetshengwe mabapi le ka mo ke phetšego ka gona pele ga Modimo.” Moprista yo Mogologolo, Ananiase, a laela bao ba bego ba eme kgauswi le Paulose gore ba mmethe molomo. Paulose a re go yena: “Modimo o tla betha wena, leboto le le takilwego towe! O duletše go nkahlola ka melao ya Moshe, etšwe o laela gore ke bethwe o tshela molao.” Bale ba go ema kgauswi le Paulose ba re: “Mmalo, o reng o roga Moprista yo Mogologolo wa Modimo?” Paulose a ba fetola a re: “Bagešo, nna ke be ke sa tsebe ge e le Moprista yo Mogologolo, gobane Mangwalo a Makgethwa a re: ‘O se ke wa omanya mmuši wa setšhaba sa geno.’ ” Ka ge Paulose a be a tseba gore ba bangwe ba bona moo ke Basadusei, ba bangwe ke Bafarisei, a goelela moo Kgorongkgolo a re: “Bagešo, nna ke Mofarisei, Mofarisei wa Bafarisei. Ke sekišwa ka ge ke holofela gore bahu ba tla tsoga!” Ge a realo gwa tsoga kgang ya Bafarisei le Basadusei, gomme kgoro ya tšwa dikgao. Gape Basadusei ba re bahu ga ba tsoge, le gona ga go na barongwa, le meoya ga e gona, kganthe Bafarisei bona ba di dumela ka ditharo. Gwa tsoga tlhatlhariane, gomme boramangwalo ba bangwe ba e bego e le ba lekgotla la Bafarisei ba ema ba gatelela ba re: “Rena monna yo ga re bone a na le phošo. Mohlomongwe moya goba morongwa yo mongwenyana o boletše naye.” Kgang yeo e ile ya gakala mo rasekete a ilego a ba a tšhoga gore Paulose o tla rathagantšhwa. Ka gona a laela bahlabani gore ba ye ba mo tloše kgorong ba mmušetše ka sebong. Bošegong bjoo Morena a ema kgauswi le Paulose a re: “O bete pelo, Paulose, gobane bjalo ka ge o ntlhatsetše mo Jerusalema, le kua Roma o swanetše go ntlhatsela.” Ge go esa Bajuda ba bangwe ba lakana. Ba ikana gore ba ka se je goba ba nwa selo pele ba bolaya Paulose. Ba ba lakanego bjalo e be e le ba ba fetago ba masome a mane. Ke moka ba ya go baprista ba bagolo le bagolo ba setšhaba, ba fihla ba re: “Re ipofile ka go ikana re tiišitše ra re re ka se je goba ra nwa selo pele re bolaya Paulose. Bjale ge, lena le ba Kgorokgolo kgopelang rasekete wa bahlabani gore a tliše Paulose mono go lena mo nkego le nyaka go botšiša taba ya gagwe ka tlhokomelo ye kgolo. Gomme rena re šetše re itokišeditše go mmolaya le go fihla mo go lena a sešo a fihla.” Motlogolo wa Paulose a kwa talelo ye, ka gona a ya sebong a tsebiša Paulose. Ke mo Paulose a biditšego yo mongwe wa boralekgolo, a re go yena: “Iša lesogana le go rasekete, le na le taba ye le nyakago go mo sebela yona.” Ralekgolo yoo a tloga naye a mo iša go rasekete a re: “Mogolegwa Paulose o mpiditše a nkgopela gore ke tliše lesogana le go wena, ka ge le na le taba ye le nyakago go go botša yona.” Rasekete a mo swara ka seatla, a mo iša ka thoko, a mmotšiša a re: “Ke eng se o nyakago go ntshebela sona?” Lesogana la re: “Bajuda ba lakane go go kgopela gore gosasa o tliše Paulose Kgorongkgolo, mo nkego ba nyaka go botšišiša taba ya gagwe ka tlhokomelo ye kgolo. Fela o se ke wa ba theeletša, ka gobane banna ba bona ba ba fetago ba masome a mane ba tla be ba mo laletše. Bona ba ikanne gore ba ka se je goba ba nwa selo pele ba mmolaya. Ba šetše ba ikotišitše, ba emetše fela tumelelo ya gago.” Rasekete a re: “O se botše motho gore o ntshebetše taba ye.” Ke moka a lesa lesogana leo la tloga. Rasekete a bitša boralekgolo ba babedi a re: “Lokišang bahlabani ba makgolo a mabedi ba go ya Kesarea, gotee le boradipere ba masome a a šupago le boramarumo ba makgolo a mabedi, gomme ba loke ka iri ya senyane mantšiboa. Paulose le yena le mo lokišetše dipeleša, gore ba kgone go mo iša go Mmušiši Felikise a bolokegile.” Ke mo rasekete a ngwadilego lengwalo la mohuta wo: “Nna, Klaudiose Lisiase, ke re madume go wena, mohlomphegi Mmušiši Felikise. Bajuda ba be ba swere monna yoo ba re ba a mmolaya. Ge ke seno kwa gore ke motho wa go bušwa Roma, ka ya le bahlabani ka mo hlakodiša. Ka ge ke be ke rata go kwa molato wo ba mmegago ka wona, ka mo iša Kgorongkgolo ya bona. Ka lemoga gore ga go molato wo a o obilego wo o dirago gore a swanele go bolawa goba go golegwa. Se ba mmegago ka sona e be e le dikgang mabapi le molao wa bona. E rile ge ke seno lemošwa gore o lakanwe, ka akgofa ka mo romela go wena. Balatofatši ba gagwe ke ba boditše gore tše ba mo latofatšago ka tšona ba tle ba di bolele mo pele ga gago.” Bahlabani ba ile ba phetha ka mo ba laetšwego ka gona. Ba tšea Paulose ba lala ba mo iša Antipatrise bošego. Ka le le latelago bahlabani ba maoto ba boela sebong ba lesa boradipere ba tšwela pele naye ka leeto. Bona ge ba fihla Kesarea, ba fa mmušiši lengwalo lela, ba mo gafela le Paulose. Mmušiši a re go bala lengwalo leo a botšiša Paulose gore o tšwa seleteng sefe. E rile ge a ekwa gore o tšwa Tsilitsia, a re go yena: “Ke tla go kwa ge balatofatši ba gago ba fihlile.” Ke moka a laela gore Paulose a letwe ka sebong sa Kgoši Heroda. Ge go fetile matšatši a mahlano Moprista yo Mogologolo, Ananiase, a ya Kesarea a na le bagolo ba bangwenyana ba setšhaba le mmoleledi yo ba rego ke Tertulose. Ba tla go Mmušiši Felikise, ba bega Paulose. Ke ge Paulose a bitšwa. Tertulose a thoma go mo latofatša a re: “Mohlomphegi, re bile le boiketlo nako ye telele ge re bušwa ke wena, le setšhaba sa gaborena se holega ka ditlhabollo tše o di tlišago ka go bonela pele ga gago. Taba ye re e thabela ka mehla le mo gohle, gomme re go leboga e le ruri. *** Ke be ke sa rate go go ditela kudu, fela ke dio kgopela gore o re theeletše ka botho ge re go nyetlela taba ya rena. Monna yo re hweditše gore ke kgwara, ke mphapantšhi wa Bajuda lefaseng ka moka, ke ketapele ya bakgelogi ba go thwego ke Manasaretha. Le gona o lekile go tšhela Tempele setšhila gomme ra mo swara. Ge o ka mmotšiša, o tla ikwela ka bowena tšohle tše re mo latofatšago ka tšona.” *** Bajuda ba napa ba mo tlatša, ba re taba tšeo di bjalo. Mmušiši a kgwathetša Paulose gore a bolele, gomme Paulose a re: “Ka ge ke tseba gore e šetše e le mengwaga ye mentši o le moahlodi wa setšhaba se, ke iphetolela ke phuthologile. Bjalo ka ge o ka kgonthiša ka bowena, go tloga mola ka yago Jerusalema go rapela go fihlela gonabjale, ga se matšatši a a fetago a lesome le a mabedi. Ga se ba ka ba nkhwetša ke phegišana le motho ka Tempeleng, goba ke ferekanya batho ka disinagogeng goba mo gongwe motseng. Ebile le bohlatse bja ditaba tše ba ntatofatšago ka tšona ga ba nabjo. Se ke sa se ganetšego mo pele ga gago ke gore ke rapela Modimo wa borakgolokhukhu ka go phela ka thuto ye bona ba rego ke ya bakgelogi, ke ntše ke dumela le tšohle tše di ngwadilwego ka melaong ya Moshe le ka dipukung tša baprofeta. Ke holofela bjalo ka bona gore Modimo o tla tsoša batho bohle bahung, ba go loka le ba go se loke. Ke ka baka leo ka mehla ke itekago gore ke se itshetshengwe mo pele ga Modimo le pele ga batho. “Ka morago ga ge ke tlogile Jerusalema mengwaga ye mentši, ke ile ka boela gona go išetša ba setšhaba sa gešo dimpho tše di fiwago bahloki, le go yo dira dihlabelo. Ke tšona tše ba nkhweditšego ke di dira ka Tempeleng ka morago ga ge ke phethile tirelo ya boitlhwekišo. Ke be ke se na lešaba, mokurukuru le wona o be o se gona. Fela Bajuda ba bangwe ba go tšwa nageng ya Asia ba be ba le gona. Ke bona ba bego ba swanetše go ba mo pele ga gago ba ntatofatša, ge eba ba na le se ba ka ntatofatšago ka sona. Ka ge ba se gona, bona ba ba lego mo a ba bolele molato wo ba mponego wona mola ke eme Kgorongkgolo ya bona, ntle le taba e tee ye ke ilego ka e bolela ka re: ‘Etse lehono le ntshekiša ka baka la ge ke dumela gore bahu ba tla tsoga.’ ” Felikise, yo a bego a tseba tša thuto ya Bokriste gabotse, a bušetša molato morago a re: “E tla re ge Lisiase, rasekete wa bahlabani, a tlile ka kgaola taba ya lena.” A laela ralekgolo gore a lete Paulose, fela a se ke a mo kgoka, le gona a dumelela bagwera ba gagwe gore ba mo tlišetše tše a di hlokago. Ge go fetile matšatši a mmalwa Felikise a tla le mosadi wa gagwe, Drusila, yo e bego e le Mojuda. A re Paulose a tlišwe, gomme a mo theeletša ge a bolela ka tša tumelo go Kriste Jesu. Fela e rile ge Paulose a ntše a bolela mabapi le go phetha tše Modimo a di nyakago, le tša boitshwaro, le tša kahlolo ye e tlilogo ba gona, Felikise a tšhoga kudu mme a re: “Bjale o ka no sepela, ke tla tla ke go bitša gape ge ke hweditše sebaka.” Gape o be a holofetše gore Paulose o tla mo fa tsogolekobong; ke ka baka leo a bego a fela a mmitša a bolela le yena. Ge go fetile mengwaga ye mebedi Porkiose Festose a hlatlama Felikise. Felikise, ka ge a be a rata go ithatiša Bajuda, a tlogela Paulose ka kgolegong. Festose o rile go fihla seleteng seo sa mmušo wa gagwe, a dula Kesarea matšatši a mararo, a kgona a eya Jerusalema. Baprista ba bagolo le baetapele ba Bajuda ba tla ba latofatša Paulose mo go yena. Ba rapela Festose ba re a ba šetše a ba tlišetše Paulose Jerusalema; gape ba be ba lakana go mo lalela mo tseleng. Festose a ba fetola ka go re: “Paulose o ka kgolegong Kesarea, gomme le nna ke tla tloga ke boela gona.” A ba a re: “Baetapele ba lena a ba ye le nna ba fihle ba mo latofatše ge eba o na le molato.” Festose a tšea matšatši a mangwe a e ka bago a seswai go iša go a lesome, a kgona a boela Kesarea. Ka le le latelago a dula setulong sa kahlolo, a laela gore Paulose a tlišwe. Paulose o rile go tlišwa Bajuda ba go tšwa Jerusalema ba mmokanela, ba mo latofatša ka tše dintši tše dikgolo tše ba bego ba šitwa ke go tšweletša bohlatse bja tšona. Paulose a iphetolela ka go re: “Ga se ka fošetša molao wa Bajuda goba Tempele goba Kesare.” Fela Festose, ka ge a be a rata go ithatiša Bajuda, a botšiša Paulose a re: “Na o ka dumela go ya Jerusalema gore ke yo go sekiša gona ka taba tše?” Paulose a re: “Mo ke eme kgorong ya Kesare ya kahlolo mo ke swanetšego go sekišwa gona. Bajuda ga se ka ba fošetša ka selo, bjalo ka ge le wena o tseba gabotse. Ge nkabe ke na le molato mme ke dirile se se dirago gore ke swanele go bolawa, ke be nka se gane go bolawa. Fela ge eba tše ba ntatofatšago ka tšona ga se therešo, ga go yo a kago nkgafela bona. Ke nyaka go sekišwa ke Kesare.” Ke moka Festose a re go boledišana le baeletši ba gagwe a re: “O nyakile go sekišwa ke Kesare, gomme o tla ya gona go Kesare.” Ka morago ga matšatšinyana Kgoši Agripa le Bernise ba tla Kesarea go dumediša Festose. Ge ba seno fetša matšatši moo, Festose a anegela kgoši taba ya Paulose a re: “Go na le monna yo mongwe mo yo Felikise a mo tlogetšego e le mogolegwa. Mola ke le Jerusalema baprista ba bagolo ba Bajuda le bagolo ba setšhaba ba ile ba mo latofatša gomme ba nkgopela gore ke mmone molato. Fela nna ka ba botša gore ga se mokgwa wa Baroma go ahlolela motho lehu a se a ka a fiwa sebaka sa go iphetolela pele ga ba ba mo latofatšago. Ge ba fihla mo ka se diege, ka dula setulong sa kahlolo ka le le latelago ka laela gore monna yoo a tlišwe. Balatofatši ba gagwe ba ema, fela ba se ntšhe taba le e tee ye mpe ya tše nna ke bego ke gopotše gore ba tla di bolela. Se ba se bolelago ya dio ba kgang ya bona le yena ka tša tumelo ya bona, le ka monna yo mongwe yo a hwilego yo ba rego ke Jesu, yo Paulose yena a rego o a phela. Nna, ka ge ditaba tše di be di ntladitše dimpa, ka botšišiša Paulose ge eba a ka dumela go ya Jerusalema go sekišwa gona mabapi le ditatofatšo tšeo. Eupša Paulose a nyaka go sekišwa ke Kesare. A kganyoga go bewa ka kgolegong ge a sa letetše tsheko. Ka gona nna ka laela gore a dule a letilwe go fihlela ge a tlilo išwa go Kesare.” Agripa a re go Festose: “Ke nyaka go ikwela monna yoo ka bonna.” Festose a re: “O tla mo kwa gosasa.” Ka le le latelago Agripa le Bernise ba tla ka mokgabo le botšhepi bja bogoši, ba tsena ka ntlong ya lekgotla ba na le bagolo ba madira le baetapele ba motse. Festose a laela gore Paulose a tlišwe, mme a tlišwa. Festose a re: “Kgoši Agripa le lena ka moka le nago le rena mo: Monna yo le mmonago yo ke yena yo Bajuda ka moka ba llago ka yena mo go nna kua Jerusalema le gona mo, ba goa ba re ga a sa swanela go phela. Eupša nna ga se ka hwetša a dirile selo se se dirago gore a swanele go bolawa. Gomme ka ge le yena mong a nyakile go sekišwa ke Kesare, ke phethile ka go re ke tla mo romela gona. Fela ga ke na taba ye e lego yonayona ye nkago e ngwalela morena ka yena. Ka gona ke mo tlišitše mo go lena, gagolo go wena, Kgoši Agripa, gore ge go seno nyakišišwa, ke be le se nkago se ngwala. Gobane nna ke bona e se tshwanelo go romela mogolegwa felo ke sa bontšhe molato wa gagwe gabotse.” Agripa a re go Paulose: “O dumeletšwe go ipolelela.” Paulose a bontšha ka seatla gore o nyaka go bolela, mme a iphetolela ka go re: “Kgosi Agripa, ke bona ke na le mahlatse ge lehono ke tlilo iphetolela mo pele ga gago ditabeng tšohle tše Bajuda ba ntatofatšago ka tšona, gagolo ka ge mekgwa ya Bajuda le dikgang tša bona wena o di tseba gabotse. Ka gona ke kgopela gore o ntheeletše o sa mphelele pelo. “Tša bophelo bja ka go tloga bjaneng ka mo ke phetšego ka gona go tloga mathomong mo setšhabeng sa gešo le kua Jerusalema Bajuda ka moka ba a di tseba. Ke bona ba ntsebago go tloga mathomong, gomme ge ba rata ba ka hlatsela gore go tloga le go tloga ke be ke ntše ke phela ke le wa lekgotla la Bafarisei, e lego lona le le nago le melao ye methata kudu go feta ohle mo sedumeding sa gaborena. Gomme bjale ke emišitšwe mo ka baka la ge ke holofela gore Modimo o tla phetha se a se tshepišitšego borakgolokhukhu ba rena, sona se dikgoro tše lesome le tše pedi tša gaborena di holofetšego go se amogela ge di ntše di khunamela Modimo bošego le mosegare. Ke ka baka la yona kholofelo ye, mong wa ka, ge ke latofatšwa ke Bajuda. Lena Bajuda, le reng le bona e le taba ye e sa kgodišego gore Modimo o tsoša bahu? “Ge e le nna ke be ke bona ke swanetše go lwantšha taba ya Jesu wa Nasaretha ka mo nka kgonago ka gona. Ke sona se ke bego ke se dira kua Jerusalema. Ke be ke filwe maatla ke baprista ba bagolo go tswalelela badumedi ba bantši ba Modimo ka kgolegong; le mola ba ahlolelwa lehu le nna ke be ke ba tšwa. E bile makgathe a mantši ke laela gore ba otlwe ka disinagogeng, e le go ba gapeletša gore ba kgeloge. Ke be ke ba galefela ke bile ke ba hlomara le metseng e šele.” “Ke sona se ke bego ke se etše Damaskose ke filwe ke baprista ba bagolo maatla le ditaelo. Ya re ge ke le tseleng mosegare wo mogolo, mong wa ka, ka bona seetša se se tagago go feta letšatši se etšwa legodimong sa re gadimela ka mathoko ohle, nna le banna ba ba bego ba sepela le nna. Ka moka ra wela fase, gomme nna ka kwa lentšu le mpotšiša ka Seheberu le re: ‘Saulo, Saulo! O ntlhomaretšeng? Gape go nkgwabela ga gago ke go ikgobatša.’ Nna ka botšiša ka re: ‘Ke wena mang, Morena?’ Gomme Morena a mphetola a re: ‘Ke nna Jesu yo o mo hlomerego. Fela emelela. Ke itšweleditše mo go wena gore ke go bee mohlanka wa ka le hlatse ya ditaba tša ka tše o di bonego le ya tše ke sa tlilogo go bontšha tšona. Ke tla go hlakodiša go setšhaba sa geno le go baditšhaba ba ke go romago go bona. O swanetše go ba foufolla, gore ba tšwe leswiswing ba ye seetšeng, ba tšwe maatleng a Sathane ba ye go Modimo, gore ka go dumela go nna ba swarelwe dibe tša bona, gomme ba fiwe bohwa bja ba ba kgethilwego ke Modimo.’ ” “Ka gona, Kgoši Agripa, nna ga se ka nyatša pono ya se ke se bonego se etšwa legodimong. Ke thomile ka go begela ba Damaskose le ba Jerusalema, ka kgona ke begela bohle ba Judea le baditšhaba gore ba itsholele dibe tša bona, ba sokologele go Modimo mme ba dire tše di bontšhago boitsholo. Ke yona taba ye e dirilego gore Bajuda ba ntshware mola ke le ka Tempeleng, ba leke go mpolaya. Fela ke ka baka la ge ke thušitšwe ke Modimo go fihlela le lehono le ge ke eme mo ke hlatselela ba bagolo le bathofela, ke bolela fela tše baprofeta le Moshe ba rilego di tla direga, e lego gore Kriste o tla tlaišwa, a tla a ba wa mathomo wa go tsoga bahung, a begela Bajuda le baditšhaba seetša sa phologo.” E rile ge Paulose a iphetolela ka mokgwa woo, Festose a mo kgadimola, a re: “O a gafa, Paulose! O gafišwa ke go rutega kudu mo ga gago!” Paulose a mo fetola a re: “Ga ke gafe, mohlomphegi Festose. Tše ke di bolelago ke nnete mme di a kwala. Gape kgoši ditaba tše o a di tseba, gomme ke bolela ka tšona go yena ke sa šie, gobane ga ke dumele gore go na le ye e mo širetšego, ka ge di se tša direga mo di sa bonwego. Kgoši Agripa, na baprofeta o a ba dumela? Fela ke a tseba gore o a ba dumela.” Agripa a re go Paulose: “Etse o hloma nke o ka ntira Mokriste ka nakonyana.” Paulose a mo fetola a re: “Ana ke ka nakonyana ana ke ka nako, nna se ke se rapelago ke gore e se be wena fela wa go ba se ke lego sona ntle le diketane tše, eupša e be le bohle ba ba ntheeleditšego lehono.” Ke moka kgoši le mmušiši le Bernise le ba bangwe ka moka ba emelela, ba re go tšwa ba botšana seng ba re: “Gape motho yo ga go se a se dirilego se se dirago gore a lebanwe ke go bolawa goba go golegwa.” Agripa a re go Festose: “Motho yo a ka be a lokolotšwe ge a ka be a se a nyaka go sekišwa ke Kesare.” Ge go šetše go kwanwe gore re išwe Italia ka leselawatle, ba gafela Paulose le bagolegwa ba bangwe go Juliose, yo e bego e le ralekgolo wa sekgao sa madira sa kgošikgolo. Ra namela leselawatle la go tšwa Adramitiomo le eya maemakepeng a naga ya Asia, gomme ra tloga. Aristargose wa go tšwa Matsedonia motseng wa Thesalonika o be a na le rena. Ka tšatši le le latelago ra fihla Sidone. Juliose o be a swere Paulose gabotse, gomme a mo dumelela go yo bona bagwera ba gagwe, le go fiwa tše a di hlokago. Go tloga moo ra šika le sehlakahlaka sa Saeprose ka thoko ye go sa fokelego phefo ka ge re be re lebane le yona. Ra re go tshela lewatle kwa Tsilitsia le Pamfilia ra yo fihla Mira kwa Lisia. Gona motseng woo ralekgolo a hwetša leselawatle le le tšwago Aleksandria le eya Italia, gomme a re nametša lona. Ra sepela ka go nanya matšatši a mantši, ra ba ra fihla go lebana le motse wa Kenidose ka bothata. Ka ge phefo e be e sa re dumelele go fetela pele, ra tla sehlakahlaka sa Kreta ka thoko ye go sa fokelego phefo, ra lebana le Salmone. Ra ipata le lebopo re sepela ka bothata, ra ba ra fihla felo mo ba rego ke Maemakepe a Mabotse, kgauswi le motse wa Lasea. Ra tšea nako ye telele moo gomme go tšwela pele ka leeto leo la lewatle gwa ba gwa šiiša, ka ge Letšatši la go itima Dijo e be e le šetše le fetile. Ke mo Paulose a ba eleditšego a re: “Banna, ke a bona gore go tloga fa leeto la rena e tla ba la kotsi; e sego fela ya go loba kudu diphahla le leselawatle, eupša le bona batho.” Fela ralekgolo o be a kgolwa se se bolelwago ke molaolaleselawatle le mongleselawatle, e sego se se bolelwago ke Paulose. Ka ge boemakepe bjoo e be e se bjo bo loketšego go dulwa marega, bontši bja bona bja kwana le gore ba tloge, mme ge go kgonega ba leke go yo fihla Fenikise gore ba dike ba le moo marega. Fenikise ke boemakepe bja sehlakahlaka sa Kreta bjo bo lebeletšego borwabodikela le leboabodikela. E rile ge phefo ya borwa e thoma go foka bosele, ba gopola gore ba tla kgona go phetha se ba ikemišeditšego sona; ka gona ba tloga ba ipata le sehlakahlaka sa Kreta. Ya re go se gwa ya kae gwa tsoga ledimo le ba rego ke “Letsotabohlabela” la tšubotla le etšwa sehlakahlakeng. La fefeutla leselawatle, ra ba ra palelwa ke go le lebanya le lona, gomme ra ineela ra le lesa le laolwa ke ledimo. Ra re go fetela ka borwa bja sehlakahlaka sa Kauda ra hwetša boširelo. Gona moo ra swara bothata pele re ka kgona go bofa leselawatlana. Ba le gogela ka leselawatleng mme ba kgoka leselawatle ka fase ka dithapo, ba le tsirimetša. Ka go šia gore re ka no fefeutlelwa ke ledimo dithotobolong tša mohlaba lebopong la Libia, ba phutha diseila tša leselawatle gomme ba dio kgorometšwa ke ledimo. Ka ge re letše re fefeutlwa ke ledimo bjalo, ka le le latelago ba tsoga ba fokotša morwalo ka go o lahlela ka lewatleng; ka la go latela leo ba lahlela ka diatla ditlabakelo tša go sepetša leselawatle lewatleng. Ra tšea matšatši a mantši re sa bone letšatši goba dinaledi, ledimo lona le le gare le gaketše, ra ba ra itlhoboga. Ya re ge go fetile nako ye telele go sa lewe, Paulose a ema mo gare ga bona a re: “Banna, ge le ka be le ile la ntheeletša la se tloge kua Kreta, re ka be re se ra senyegelwa goba ra loba ka mokgwa wo. Fela bjale ke a le kgopela, ke re tiang maatla. Ga go le o tee wa rena yo a tlago hwa, ke leselawatle fela le re tlago le loba. Gobane bošego ke letše ke tletšwe ke morongwa wa Modimo, yena Modimo yo ke lego wa gagwe, yo ke mo rapelago, mme a re go nna: ‘Paulose, o se ke wa boifa. O swanetše go yo ema pele ga Kesare. Gomme Modimo ka botho bja gagwe mo go wena o tla phološa bohle ba ba sepelago le wena ka leselawatle le.’ Ka gona, banna, tiang maatla. Gape nna ke tshepile Modimo gore go tla ba bjalo ka ge ke boditšwe. Fela re tla fefeutlelwa sehlakahlakeng se sengwenyana.” E rile bošegong bja lesome le metšo ye mene re ntše re fefeutlwa ke ledimo ka Lewatleng la Adria nakong ye e ka bago bošegogare, basepetšaleselawatle ba bona nke re batametše naga. Ka gona ba ela go iša ga bodiba gomme ba hwetša e le dimetara tše masome a mane. Ge re fihla pejana, ba ela gape gomme ba hwetša e le dimetara tše masome a mararo. Ka ge ba be ba boifa gore leselawatle le le ka no gohlomela ka gare ga maswika, ba le emiša ka go theoša dikgwega tša lona tše nne tša ka morago, mme ba dula ba fela pelo ya gore bo sa neng. Basepetšaleselawatle ba leka go tšhaba; ba theošetša leselawatlana ka meetseng ba itira tše nkego ba yo theoša dikgwega tša ka pele ga leselawatle. Paulose a botša ralekgolo le bahlabani a re: “Ge basepetšaleselawatle bao ba sa dule ka mo leselawatleng le ka se phologe.” Ka gona bahlabani ba ripa dithapo tša leselawatlana, ba le lesa la tšewa ke meetse. E rile ge go esa Paulose a kgothaletša bohle gore ba je a re go bona: “Lehono e šetše e le letšatši la lesome le metšo ye mene le ehlwa ka tlala le lakaletše – le sa je selo. Hle, ke a le kgothatša, ejang gore le phologe. Ga go le o tee wa lena yo a tlago loba ešita le ntshana ya moriri.” Ge a seno realo, a tšea senkgwa, a leboga Modimo a lebeletšwe ke bohle, a se ngwathaganya, a thoma go ja. Bohle ba tia maatla gomme le bona ba ja. Ka moka ga rena ka moo leselawatleng re be re le batho ba makgolo a mabedi le masome a a šupago le ba ba selelago. Ge ba lle ba khoše, ba imolla leselawatle ka go tšhollela mabele a bona ka lewatleng. Ge go sele ba se tsebe gore naga yela ba lebanego nayo yela ke efe, fela sekhutlo sa lewatle se se nago le leši sona ba se bona, gomme ba ipotša gore ke mo ba tlago iša leselawatle gona, ge ba ka kgona. Ba ripa dikgwega tša leselawatle dithapo, gomme ba di lesa tša sobelela ka lewatleng, ba bofolla le dithapo tše di swerego dilaodi. Ba phurolla seila ya ka pele gore leselawatle le kgoromeletšwe pele ke phefo mme ra leba lešing. Eupša leselawatle la thula ntotoma ya lešabašaba la itsemelela. La tanywa ka hlogo mme la palelwa ke go šutha, marago a lona ona a phatlologanywa ke maatla a maphoto. Bahlabani ba lakana go bolaya bagolegwa ka moka, gore ba se kgone go rutha ba tšhaba. Fela ralekgolo, ka ge a be a rata go hlakodiša Paulose, a ba ganetša. A laela gore ba ba kgonago go rutha ba itahlele pele ka meetseng, ba ruthele lešing; ba bangwe ba latele ba itshwareletše ka dikota le ka dilo tše dingwe tše di robegilego leselawatleng. Ke ka mo bohle ba ilego ba phologa, ra fihla lešing. Ge re seno phologela kua lebopong, ra kwa gore sehlakahlaka seo ba re ke Maltha. Batho ba gona ba re swara gabotse kudu. Ka ge pula e be e ena le gona go tonya, ba re goletša mollo bohle re amogetšwe. Paulose ge a topeletše ngatana ya mathokgwa a re ke bešetša mollo, gwa tšwa noga e ekwa phišo ya mo loma seatla ya mo momela. Batho ba gona ge ba e bona e lekeletše seatleng sa Paulose ba botšana ba re: “Ruri, motho yo ke mmolai. Fela le ge lewatleng a phologile, medimo yona e ka se mo lese a phela.” Eupša Paulose a hlohlorela noga yeo mollong a se a gobala le ganyenyane. Bona ba be ba lebeletše gore o tla ruruga goba a akgofa a wela fase a hwa. Eupša e rile ge e eba nako ye telele ba lebeletše mme ba sa bone se sebe se mo hlagela, ba hlanama ba re: “Ke modimo!” Kgauswi le felo fao go be go na le mašemo a mookamedi wa sehlakahlaka seo yo leina la gagwe e bego e le Publiose. Yena a re amogela ka ga gagwe gomme a re thota matšatši a mararo re le baeng ba gagwe. Tatagwe o be a le diphateng a swerwe ke letadi le tengkhwibidu. Paulose a ya ka phapošing ya gagwe, a fihla a mo rapelela, a mmea diatla, a mo fodiša. O rile go mo fodiša bjalo, balwetši bohle ba sehlakahlaka seo ba tla, gomme Paulose a ba fodiša. Ba re hlompha ka mekgwa ye mentši, gomme le mohla re tlogago ba re fa tše re tlago di nyaka leetong la rena. Ge go seno feta dikgwedi tše tharo, ra tloga ka leselawatle la go tšwa Aleksandria le ba rego ke “Medimomafahla” le le bego le dikile marega moo sehlakahlakeng. Ra re go fihla motseng wa Sirakuse ra dula gona matšatši a mararo. Go tloga moo ra tšwela pele le leeto mme ra fihla motseng wa Regiomo. Ka le le latelago gwa tsoga phefo ya borwa, gomme ka morago ga matšatši a mabedi ra fihla motseng wa Puteoli. Moo ra hwetša go na le badumedi, gomme ba re kgopela gore re dule nabo matšatši a a šupago, ya ba gona re yago Roma. Badumedi ba kua Roma ba rile go kwa ka rena, ba tla ba re gahlanetša re sa le motseng wa Lebala la Apiose, bangwe ba tla ba re gahlanetša motseng wa Ntlotharo ya Baeti. Paulose ge a ba bona a leboga Modimo, a tia maatla. Ge re seno fihla Roma Paulose o ile a dumelelwa go dula a nnoši a letilwe ke mohlabani. Ka morago ga matšatši a mararo Paulose a rapa pitšo ya baetapele ba Bajuda ba felo fao. Ya re ge ba kgobokane a re go bona: “Banna ba gešo, le ge ke se ka dira selo se se senyeditšego setšhaba sa gaborena goba mekgwa ya borakgolokhukhu ba rena, ke golegilwe ke le kua Jerusalema gomme ka gafelwa Baroma. Bona ge ba seno ntshekiša, ba rata go ntokolla, ka ge ba be ba sa hwetše se se dirago gore ke swanelwe ke go bolawa. E rile ge Bajuda ba gana gore ke lokollwe, ka gapeletšega gore ke re ke nyaka go sekišwa ke Kesare, e se gore ke re ke na le taba ye ke nyakago go latofatša setšhaba sa gešo ka yona. Taba ke yona yeo ye ke kgopetšego go bonana le lena le go bolela le lena ka yona. Gabotse ge ke kgokilwe ka diketane bjalo, ke ka baka la yena yo Baisraele ba mo holofetšego.” Bona ba re go yena: “Ga se ra ka ra amogela mangwalo a go tšwa Judea a go re botša tša gago; le gona ga se gwa ka gwa tla motho wa ba gaborena a etšwe kua wa go re botša taba ka wena goba se sebe ka wena. Fela re be re ka nyaka go kwa gore na wena o gopolang, gobane ge e le mokgatlo wo wa gago wa bakgelogi, wona re tseba ge batho mo gohle ba o bolela gampe.” Ba mmeela letšatši, gomme mohlang woo batho ba bantši ba tla mo a bego a dula gona. Yena a ba hlalošetša molaetša wa gagwe mabapi le mmušo wa Modimo, a leka go ba kgodiša ditabeng tša Jesu ka go ba gopotša ka melao ya Moshe le mangwalo a baprofeta. Ba bangwe ba bona ba dumela tše a di bolelago, fela ba bangwe ba se dumele. Gomme ba phatlalala ba sa dumelelane, e le ge Paulose a ba boditše a re: “Kganthe Moya wo Mokgetwa o boditše borakgolokhukhu ba lena gabotse ka moprofeta Jesaya mola a re: “ ‘Sepela o botše setšhaba se o re: Go kwa le tla kwa, eupša le ka se kwešiše selo; le go lebelela le tla lebelela, eupša le ka se bone selo, ka gobane setšhaba se se thatafetše, ba ithibile ditsebe, ba pontše mahlo, gore ba se ke ba bona ka mahlo, ba kwa ka ditsebe, goba ba kwešiša ka megopolo mme ba sokologa, ka ba fodiša.’ ” Paulose a feleletša ka go re: “Bjale ge, tsebang gore molaetša wa Modimo wa phološo o rometšwe baditšhaba. Bona ba tla o theeletša.” *** Paulose a fetša mengwaga ye mebedi ya go tlala a dula ka ntlong ye a e adimilego, moo a bego a amogela bohle ba ba tlago go yena. A ba begela tša mmušo wa Modimo, a ba ruta tša Morena Jesu Kriste, a bolela ka go se boife a sa iletšwe. Lengwalo le le tšwago go nna, Paulose, mohlanka wa Jesu Kriste, yo ke bileditšwego go ba moapostola, ke kgethetšwego go bega Taba ye Botse ya Modimo. Taba ye Botse yeo ke ye setšhaba sa Israele se e holofeditšwego ke yena Modimo ka baprofeta ba gagwe e sešo ya hlaga, go ya ka mo go ngwadilwego ka gona ka Mangwalong a Makgethwa. Ke ya mabapi le Morwa wa gagwe, yo ka tlhago ya gagwe ya bomotho a tswetšwego e le wa leloko la Dafida; ge e le ka tlhago ya gagwe ya bomodimo o bontšhitšwe ka maatla a magolo gore ke Morwa wa Modimo ka go tsošwa bahung, yena Jesu Kriste, Morena wa rena. Ka yena Modimo o mpontšhitše go ntokela ga gagwe, a ntira moapostola, gore batho ba ditšhaba tšohle ba tle ba dumele go Modimo ka nna mme ba mo theeletše, e be gona go tumiša Jesu. Seo se ama le lena le lego fao Roma, bao Modimo a le bileditšego go ba ba Jesu Kriste. Go lena bohle ba motse wa Roma, ba le ratwago ke Modimo mme a le bileditšego go ba ba gagwe, ke re: Nke Modimo, Tatagorena, le Morena Jesu Kriste ba le gaugele, ba le fe khutšo. Ke thoma ka go le lebogela bohle go Modimo wa ka ka Jesu Kriste, gobane tumelo ya lena e kwagala gohle lefaseng. Modimo yo ke mo direlago ka pelo ya ka yohle ka go bega Taba ye Botse ya Morwa wa gagwe, ke hlatse ya ka gore ge ke rapela ke dula ke le gopotše. Nako le nako ge ke rapela ke kgopela Modimo gore ge e le thato ya gagwe a dire gore ke be ke kgone go tlo le etela. Gobane ke le hlolosetše kudu, gore ke tle ke le fe mpho ye nngwenyana ya moya ya go le tiiša. Ke ra gore nna le lena re tle re maatlafatšane – nna ke maatlafatšwe ke tumelo ya lena, le lena le maatlafatšwe ke ya ka. Ke nyaka ge le tseba, banabešo, gore e šetše e le gantši ke re ke tla le etela, fela nako le nako go be le se sengwenyana sa go ntšhitiša. Gape le moo go lena ke nyaka go ba le basokologi, bjalo ka ge ke na le bona ditšhabeng tše dingwe. Gobane ke tlemegile go begela ba ba hlabologilego le ba ba sego ba hlabologa Taba ye Botse; ba ba rutegilego le ba ba sa tsebego selo. Ke ka baka leo ke fišegelago go tlo begela le lena le dulago Roma Taba ye Botse. Ga ke na dihlong ka Ebangedi; ke maatla a Modimo a go phološa bohle ba ba dumelago, ba mathomo ke Bajuda, gwa latela ba e sego Bajuda. Gobane Ebangedi e utolla toka ya Modimo ka mo a lokafatšago batho ka gona: ke ka tumelo fela. Bjalo ka ge go ngwadilwe ka Mangwalong a Makgethwa: “Yo a lokafaditšwego ke Modimo ka tumelo o tla phela.” Kgalefo ya Modimo e bonala e etšwa legodimong e lebile bobe bjohle le bokgopo ka moka bja batho bao mekgwa ya bona ye mebe e šitišago therešo go tsebja. Modimo o ba otla ka gobane tše di kgonago go tsebja mabapi le yena, mo go bona di pepeneneng, gobane Modimo ka boyena o ba utolletše tšona. Go tloga mola Modimo a hlolago lefase, tše di sa bonwego tša gagwe, e lego maatla a gagwe a a sa felego le bomodimo bja gagwe, di bonagala gabotse; di bonagala dilong tše a di dirilego. Ka gona batho bao ga ba na tše ba ka mo latolago ka tšona. Gobane ba tseba Modimo, eupša ga ba mo hlomphe ka mo go mo lebanego, le gona ga ba mo leboge. Menagano ya bona e fetogile lefeela, gomme ka ge ba šilofetše, ga ba kwešiše selo. Ba re ba hlalefile, etšwe e le ditlaela; bakeng sa go khunamela Modimo yo a sa hwego, ba khunamela diswantšhobopša tša batho ba nama le tša dinonyana le tša diphoofolo le tša digagabi. Ka gona Modimo o ba gafetše dikganyogong tša bona tša go šišimiša, gomme ba dirana dilo tša go leša dihlong ka mebele ya bona. Ba fetola nnete ya Modimo maaka; ba khunamela sebopiwa ba se hlankela, bakeng sa go khunamela le go hlankela yena Mmopi yo a swanetšego go tumišwa go ya go ile! Amene. Ke ka baka leo Modimo a ba gafetšego ditumong tša go leša dihlong. Gobane le basadi ba gona ba fetotše mokgwa wa tlhago wa thobalo, mme ba a robalana. Ka wona mokgwa woo banna ba gona le bona ba tlogetše mokgwa wa tlhago wa go robala le basadi, ba duma go robalana. Ba dira taba ya go leša dihlong ya gore monna a robale monna, gomme ba ikobela kotlo ye e lebanego bokgopo bjoo bja bona. Ka ge ba sa nyake go tseba Modimo, yena o dirile gore ba dule ba nagana tše mpe, gomme bjale ba dira tše ba sego ba swanela go di dira. Ba tletše bobe bja mehuta yohle, bokgopo, bojato le bonokwane; ba tletše tseba, polao, bonganga, boradia le bomenetša; ba na le lesebo, gomme ba senya ba bangwe maina; ba hloile Modimo, ba na le mereba, ba a ikgogomoša ebile ba a ikgantšha; ba dula ba nagana mathaithai; ga ba theeletše batswadi ba bona; ke mašilo; ba tšeiša dikeno tša bona phefo; ga ba ne lerato le lešoko. Le ge ba tseba gore molao wa Modimo o re badiri ba tše bjalo ba lebanwe ke lehu, bona ba tšwela pele e sego fela le go di dira, eupša le go thabela bao ba di dirago. Bjale ge, wena motho, o lego semangmang, mosolabangwe, o ka se re ga o na molato, gobane ge o solela bangwe tše ba di dirago etšwe le wena o di dira, o a ikahlola. Re a tseba gore Modimo ge a ahlola badiri ba tše bjalo go lebane. Eupša wena motho, o dirago tšona tšeo o di solago go ba bangwe, na o gopola gore o tla phonyokga kahlolo ya Modimo? Na ga se gore o nyatša Modimo ka ge a lokile kudu, a sa go felele pelo, a le pelotelele? Ga ke re o a tseba gore Modimo, ka botho bja gagwe, o rata go go hlahla gore o sokologe? Eupša wena o ne kgang ebile o gana go itshola, ka gona o ikobela kotlo ye kgolo ya Letšatši la Kahlolo, mohla Modimo a tlilo utolla kahlolo ya gagwe mme a ahlola ka toka. Gobane Modimo o tlilo nea mongwe le mongwe se se lebanego mediro ya gagwe: bao ba kgotleletšego go dira tše di lokilego, ba nyakago gore Modimo a ba tumiše, a ba rete, le gona a dire gore ba se ke ba hwa, bona o tla ba phediša go ya go ile. Bao e lego dijato le gona ba ganago se e lego nnete, ba kwanago le bokgopo; bao bona Modimo o tla ba galefela, o tla ba tukela bogale. Mang le mang yo a dirago tše dimpe o tla welwa ke tlaišego le tlalelo, pele tša wela Mojuda, gwa latela yo e sego Mojuda. Fela mang le mang yo a dirago tše di lokilego, pele Mojuda, gwa latela yo e sego Mojuda, Modimo o tla mo tumiša, a mo reta, a dira gore a be le khutšo, gobane Modimo ga a bebe batho. Ba ba dirilego sebe ba sa tsebe melao ya Moshe, ba tla lahlega ba sa ahlolwe ka melao yeo. Ba ba dirilego sebe ba tseba melao ya Moshe, ba tla ahlolwa ka melao yeo. Gape batho ga ba lokafatšwe ke Modimo ka go kwa melao ya Moshe, eupša ba lokafatšwa ka go phetha melao yeo. Baditšhaba ga ba ne melao ya Moshe, eupša ge ba dira se se laelwago ke melao yeo ka go itsebela sona ka bobona, gona bona beng ke molao ka bobona, le ge melao ya Moshe mo go bona e se gona. Maitshwaro a bona a bontšha gore se melao yeo e se laelago se ngwadilwe ka dipelong tša bona. Ebile matswalo a bona a bontšha gore seo ke nnete, ka ge ditlhaologanyo tša bona ka nako ye nngwe di ba tšwa, ka nako ye nngwe di ema le bona. Bjale ge, go ya ka Taba ye Botse ye ke e begago ye, dilo tše di tla bonagala ka Letšatši la Kahlolo, mohla Modimo a tlago ahlola batho ka Jesu Kriste go ya ka dikhupamarama tša bona. Bjale wena? Etse o re ke wena Mojuda; o ikanya melao ya Moshe ebile o ikgantšha ka Modimo; o tseba se Modimo a nyakago o se dira, o ithutile melao ya Moshe go kgetha se se lokilego; o itirile mohlahli wa difofu le seetša sa ba ba lego leswiswing; o re ke wena moeletši wa ditlaela le morutiši wa ba ba sa tsebego selo, ka ge o nagana gore melao ya Moshe e go ruta tšohle mabapi le tsebo le therešo. Ka ge o le morutabangwe, o reng, wena mong, o sa ithute? O reng o laya batho gore ba se ke ba utswa, etšwe wena mong o utswa? O reng o iletša bangwe go otswa, mola wena o otswa? O šišingwelang medimo ya diswantšho, eupša o thopa tša ka ditempeleng tša medimo yeo? Wena o kgantšhago melao ya Modimo, o reng o hlompholla Modimo ka go tshela melao yeo? Gobane Mangwalo a Makgethwa a re: “Baditšhaba ba nyefola Modimo ka baka la lena Bajuda.” Go bolla ga lena go tla le hola ge le phetha melao ya Moshe, fela ge le sa e phethe, go bolla ga lena go no swana le go se bolle. Ka gona, ge lešoboro la moditšhaba le ka phetha tšohle tše di laelwago ke melao ya Moshe, go Modimo le swana le yo a bolotšego. Ka baka leo, baditšhaba, le ge e le mašoboro eupša ba phetha melao ya Moshe, ba tla ahlola lena le e tshelago etšwe le na le yona e ngwadilwe ebile le bolotše. Gape ga se gore Mojudajuda ke yo a bolotšego, le gona ga se gore lebollobollo ke leswao leo le bonalago mmeleng. Aowa, Mojudajuda ke yo e lego Mojuda ka pelong, le lebollobollo ke le e lego la pelo, gomme ke modiro wa Moya wa Modimo, e sego wa melao ya Moshe ye e ngwadilwego. Motho yo mobjalo o retwa ke Modimo, e sego batho. Ge go le bjalo, ke eng se Bajuda ba phalago baditšhaba ka sona? Mohola wa lebollo wona ke eng? Ke wo mogolo ka mekgwa ye mentši. Mokgwa wa mathomo ke wa ge Modimo a dirile Bajuda baboloki ba molaetša wa gagwe. Bjale, ge eba ba bangwe ba bona ba ile ba lesa go botega, na go se botege moo ga bona go ra gore Modimo le yena o ile a lesa go botega? Le gatee! Go pepeneneng gore wa go rereša ke Modimo, le ge batho bohle e le ba maaka. Gobane Mangwalo a Makgethwa a re: “Ruri, ge o ipobola o ka se bonwe molato; mme ge o sekišwa o tla tšwa pele.” Bjale ge go se loke ga rena go bonagatša go loka ga Modimo, gona re tla reng? Na re ka re Modimo ga se a loka ge a re otla? Seo ke se motho wa nama a ka se botšišago. Le gatee! Ge Modimo a ka be a se a loka, na o be a tla ahlola lefase bjang? Bjale ge eba go bolela maaka ga ka go tumiša Modimo ka go tšweletša nnete ya gagwe gabotse, ke sa ahlolelwang gore ke modiradibe? Ge go le bjalo, ke reng ke sa re: “A re direng tše mpe gore go tle go tšwelele tše di lokilego”? Gape batho ba bangwe ba nkgobošitše ka go mphara ka go re ke realo. Ba tla otlwa, bjalo ka ge go ba swanetše. Bjale ge, na rena Bajuda re phala baditšhaba? Le gatee! Gobane ke šetše ke boletše gore Bajuda le baditšhaba ba bušwa ke sebe bohle, bjalo ka ge Mangwalo a Makgethwa a re: “Ga go motho yo a lokilego, le o tee; ga go yo a kwešišago, ga go yo a nyakago go tseba thato ya Modimo. Bohle ba tšwile tseleng, ka moka ba dira tše mpe; ga go modiratoka, le o tee. Dipolelo tša bona di a bolaya; ba na le maleme a boreledi; ka ganong ga bona go tšwa bohloko bja mokopa. Ba khupile mahlapa le bohloko ka melomo. Ba ka pela go bolayeng; mo ba sepelago gona ke bosenyi le mahlomola. Tša go phedišana le ba bangwe ka boiketlo ga ba di šetše. Modimo le yena ga ba mmoife.” Bjale re a tseba gore tšohle tše melao ya Moshe o di bolelago di botšwa ba ba bušwago ke yona melao yeo, gore go se be le yo a bago le lebaka la go ikemelela, le gore batho bohle lefaseng ba tle ba lebanwe ke go ahlolwa ke Modimo. Gobane ga go motho yo a lokafatšwago ka go phetha melao ya Moshe; se melao yeo e se dirago ke go lemoša motho gore o dirile sebe. Gomme bjale tsela ya Modimo ya go lokafatša batho e utolotšwe. Ga e sepelelane le molao, le ge e hlatsetšwe ke melao ya Moshe le baprofeta. Modimo o lokafatša batho ka tumelo ya bona go Jesu Kriste. Seo Modimo o se direla bohle ba ba dumelago go Kriste, ka gobane ga go kgethollo. Bohle ba dirile dibe gomme ba hloka letago la Modimo. Eupša Modimo, ka kgaugelo ya gagwe ye e sego ya swanela batho, o ba lokafatša ka Kriste Jesu yo a ba lokollago. Modimo o ba neetše yena, gore ka go bolawa ga gagwe e tle e be mmoelanyi wa batho le Modimo ka go dumela ga bona go Kriste. Seo Modimo o be a se direla go bontšha go loka ga gagwe. Mehleng ya kgale o be a le pelotelele mme a hlokomologile dibe tša batho; eupša mehleng yeno o a ba kgala, gore a bontšhe go loka ga gagwe. Ke wona mokgwa wo ka wona Modimo a bontšhago go loka ga gagwe, mme a lokafatšago yo a dumelago go Jesu. *** Bjale, ke eng se re ka ikgantšhago ka sona? Ga se gona! Lebaka ke eng? Kgane lebaka ke gore re phetha melao ya Moshe? Aowaa, lebaka ke gore re a dumela. Ga ke na le ka pelaelo gore motho o lokafatšwa ka tumelo, e sego ke go phetha tše di laelwago ke melao ya Moshe. Kgane Modimo ke Modimo wa Bajuda fela? Na baditšhaba bona ga se Modimo wa bona? Ee, le bona ke wa bona. Modimo ke o tee, gomme o tla lokafatša Bajuda ka tumelo ya bona; baditšhaba le bona o tla ba lokafatša ka ya bona tumelo. Na e ka ba seo ke go re melao ya Moshe re e fediša ka yona tumelo? Aowaa, le gatee! Ebile ke gona ge re e tiiša. Ge go le bjalo, re tla re Abrahama, rakgolokhukhu wa setšhaba sa gaborena, o holegile ka eng? Ge a ka be a lokafaditšwe ka tše a di dirilego, a ka be a na le se a ka ikgantšhago ka sona, fela pele ga Modimo ga a na le sona. Gomme Mangwalo a Makgethwa a reng? A re: “Abrahama a dumela go Modimo, gomme ka baka la tumelo ya gagwe Modimo a mmona e le moloki.” Mogolo wa mošomi ga o tšewe e le mpho ye mošomi a e fiwago, eupša ke se se mo swanetšego. Kganthe wa go ikanya go phetha melao ya Moshe, wa go dumela go Modimo yo a lokafatšago mohlokatumelo, yena ke tumelo ya gagwe ye Modimo a e lebelelago gore a mo lokafatše ka yona. Dafida le yena o be a era seo ge a be a bolela ka lehlogonolo la motho yo Modimo a mmonago a lokafatše, a sa lebelele gore na o phetha melao ya Moshe goba ga a e phethe, mola a re: “Go lehlogonolo bao ba swaretšwego melato ya bona, bao ba lebaletšwego dibe tša bona. Go lehlogonolo motho yo Morena a sa mmalelego dibe tša gagwe.” Kgane lehlogonolo leo ke la bao ba bolotšego fela, goba bao ba sego ba bolla le bona ke la bona? Gape re sa ya le mola Mangwalo a Makgethwa a rego: “Abrahama, ka baka la tumelo ya gagwe, Modimo o mmone e le moloki.” Taba ye e diregile neng? Na ke ge a šetše a bolotše goba a sešo a bolla? Ga se ge a šetše a bolotše, ke ge a sešo a bolla. Gomme lebollo la gagwe ya ba sešupo sa go hlatsela gore Modimo o mmone e le moloki pele ga ge a bolla. Ka gona Abrahama ke tatago bohle ba ba dumelago go Modimo le ge ba se ba bolla, mme yena o ba tšea gore ke baloki. Ebile ke tatago bao ba bolotšego, bao ba go re ba bolotše ba ba ba phela le bophelo bja tumelo go swana le bjo bo phetšwego ke tatagorena Abrahama mola a sešo a bolla. Mola Modimo a holofetša Abrahama le ditlogolo tša gagwe gore Abrahama e tla ba mojalefa wa lefase, e be e se ka baka la ge Abrahama a phetha melao ya Moshe, eupša e be e le ka baka la ge a dumetše, ka gona Modimo o mmone e le moloki. Gobane ge e le go re bajalefa ke bao ba phethago melao ya Moshe, gona tumelo ya motho ga se selo, le kholofetšo ya Modimo ga e ne mohola. Gobane melao ya Moshe e tliša kgalefo ya Modimo; eupša mo go se nago molao, go tshela molao ga go be gona. Ka gona, Abrahama Modimo o mo holofeditše seo ka ge a be a dumetše go yena, gore kholofetšo yeo e tle e be bonnete bja gore ke mpho ya ditlogolo ka moka tša Abrahama – e sego fela bao ba phethago melao ya Moshe, eupša le bao ba dumelago bjalo ka Abrahama. Gobane Abrahama ke tatagorena ka moka, bjalo ka ge Mangwalo a Makgethwa a re: “Ke go dirile tatagoditšhaba tše dintši.” Ka gona, go ya ka Modimo yo Abrahama a dumetšego go yena, yena Modimo yo a tsošago bahu, yo a laelago tše di sego gona tša ba gona, kholofetšo ye e lebane. Abrahama o dumetše a holofetše, le ge lebaka la go holofela le be le se gona, ka gona a ba “tatagoditšhaba tše dintši”, go ya ka mo a bego a holofeditšwe ka gona, moo Mangwalo a Makgethwa a rego: “Ditlogolo tša gago di tla ata bjalo.” Ka nako yeo o be a šetše a na le mengwaga ye e batamelago lekgolo, gomme le ge a be a tseba a se sa kgona go tswala bana, le Sara a sa belege, o ile a se ke a fokola tumelong. Tumelo ya gagwe ya se mo tšhabele, mme le yena a se belaele se Modimo a mo holofeditšego sona; a upša a tielela tumelong, a tumiša Modimo, a tloga a kgolwa gore Modimo a ka kgona go dira seo a mo holofeditšego sona. Ke ka baka leo Abrahama “a bonwego ke Modimo e le moloki.” Mantšu ao a go re “o bonwe e le moloki” ga se a ngwalelwa yena fela. A ngwaletšwe le rena re tlago bonwa re le baloki, rena re dumelago go yo a tsošitšego Jesu, Morena wa rena, bahung. Yena o ile a gafelwa lehung ka baka la dibe tša rena, gomme a tsošwa bahung gore re tle re lokafatšwe. Ka ge bjale re lokafaditšwe ka tumelo, re boelantšwe le Modimo ke Jesu Kriste, Morena wa rena. Ke yena a re filego mahlogonolo a Modimo ka tumelo ya rena ao bjale re phelago ka ona. Ke ka baka leo re ikgantšhago ka letago la gagwe le re le holofetšego. E sego fao fela; re ikgantšha le ka mathata a rena, ka ge re tseba gore mathata a tliša kgotlelelo, kgotlelelo e dira gore re kgahle Modimo, gomme go kgahla Modimo go re tlišetša kholofelo. Kholofelo yeo ga e re swabiše, gobane lerato la Modimo le tšhetšwe ka dipelong tša rena ke Moya wo Mokgethwa wo re o filwego. Gobane Kriste o re hwetše ka nako ye e swanelago, mola re sa kgone go iphološa, a hwela bohle. Gape go hwela moloki ke taba ye e nyakago e sa direge; kganthe yo botho yena mohlomong motho a ka beta pelo a mo hwela. Modimo yena o re bontšhitše lerato le a re ratago ka lona, e lego la mola Kriste a re hwela re sa le badiradibe. Ka ge bjale re lokafaditšwe ka lehu la Kriste, re tloga re sa belaele gore re tla hlakodišwa kgalefong ya Modimo ka yena Kriste. Ge mola re le manaba a Modimo re boelantšwe le yena ka lehu la Morwagwe, ge bjale re šetše re boelantšwe le yena, re tloga re sa belaele gore o tla re phološa ka gobane a phela. Gomme ga se moo fela; re bile re thabela tše Modimo a di dirilego ka Jesu Kriste, Morena wa rena, yo bjale a re boelantšego le yena Modimo. Bjalo ka ge sebe se tlile lefaseng ka motho o tee, mme lehu la tla ka sona sebe, lehu le napile le aparetše batho bohle, ka ge bohle ba dirile dibe. Pele ga ge melao ya Moshe e etla sebe se be se šetše se le gona lefaseng, eupša ge go se na molao motho ga a balelwe dibe tša gagwe. Le ge go le bjalo, batho bohle ba ba phetšego go tloga mehleng ya Adamo go fihla mehleng ya Moshe ba ile ba lebanwa ke go hwa, ešita le bao ba bego ba se ba ka ba dira sebe sa go swana le sa Adamo mola a tshela taelo ya Modimo. Gape Adamo e be e le seswantšho sa yo a bego a tlilo tla. Eupša mpho ya Modimo e ka se swane le sebe sa Adamo. Ka baka la sebe sa motho o tee yola go hwile batho ba bantši. Eupša kgaugelo ya Modimo ke ye kgolo le go feta, kganthe le yona mpho ya gagwe ye a e filego batho ba bantši ka kgaugelo ya motho o tee yoo, Jesu Kriste, ke ye kgolo kudu le go feta. Le gona mpho ya Modimo le sebe sa motho o tee yola ga di swane. Gobane motho o tee yola o rile go dira sebe Modimo a mmona molato, gomme go bonwa molato moo ga gagwe gwa obela le batho bohle go bonwa molato. Eupša e rile ge sebe se dirwa ke batho ba bantši Modimo a ba gaugela ka mo go sa ba swanelego, a bega gore ga ba na molato. Ka baka la sebe sa motho o tee yola batho ba ile ba lebanwa ke go hwa. Se se phethilwego ke motho o tee yo, Jesu Kriste, sona ke se segolo kudu go feta se se sentšwego ke motho o tee yola. Ke go re ba ba gaugelwago kudu ke Modimo, ba ba fiwago ke yena mpho ya go lokafatšwa, ba tla tia moyeng ka yena Jesu Kriste. Ka baka leo, bjalo ka ge bosenyi bja motho o tee yola bo dirile gore batho bohle ba bewe molato, ka mokgwa wo mobjalo tiro ya go lokafatša ya motho o tee yo le yona e lokafaditše batho bohle, mme ya dira gore ba phelele sa ruri. Bjalo ka ge ba bantši e ile ya ba badiradibe ka baka la go se kwe ga motho o tee yola, ka mokgwa wo mobjalo ba bantši ba tla lokafatšwa ka baka la go hwa ga motho o tee yo. Molao o tlile ka morago gore o atiše diphošo, eupša mo go atilego sebe, kgaugelo ya Modimo yona e atile kudu le go feta, gore bjalo ka ge sebe se ile sa dira gore batho ba lebanwe ke go hwa, bjale kgaugelo ya Modimo e dire gore batho ba lebanwe ke go lokafatšwa, ba tle ba phelele sa ruri ka Jesu Kriste, Morena wa rena. Bjale ke ge re ka reng? Na re ka dio dula re phela sebeng gore kgaugelo ya Modimo e tle e ate? Le gatee! Na bjale ge re se sa phelela sebe re ka no dula re le mo go sona? Kgane ga le tsebe gore bjalo ka ge kolobetšo ya rena e re dirile ba tee le Kriste, ebile e re dirile ba tee le lona lehu la gagwe? Mola re kolobetšwa e bile setšha re ehwa mme re bolokwa le yena, gore bjalo ka ge a ile a tsošwa bahung ka maatla a a makatšago a Tatagwe, le rena re tle re phele bophelo bjo bofsa. Gobane ka ge re bile ba tee le yena ka go hwa lehu la go swana le la gagwe, re tla ba ba tee le yena le ka go tsoga tsogo ya go swana le ya gagwe. Gape re a tseba gore bomotho bjola bja rena bja kgale bo bapotšwe le Kriste sefapanong sa gagwe, gore tlhago ya rena ya go dira sebe e fedišwe, gore re se sa laolwa ke sebe. Gobane motho ge a hwile ga a sa laolwa ke sebe. Ge eba re hwile le Kriste, re dumela gore le go phela re tla phela naye. Gobane re a tseba gore Kriste o tsošitšwe bahung gomme a ka se sa hwa – lehu ga le sa mo laola. Go hwa o hwile gatee ya ba moka mola a hwela dibe, gomme bjale o a phela, o phelela Modimo. Ka yona tsela yeo le lena, mabapi le sebe le itsheme ba ba hwilego, eupša ba ba phelelago Modimo ka Kriste Jesu. Le se sa lakwa ke sebe, lena ba mebele ye e bolago, mo le ka laolwago ke ditumo tša yona. Le gona le se ke la gafela ditho tša lena sebe, ya ba tša go dira bokgopo. Le upše le ikgafele Modimo le le ba le tsošitšwego bahung la phela, gomme ditho tša lena le di gafele go dira boloki. Le se ke la laolwa ke sebe; gobane ga le bušwe ke molao, eupša le bušwa ke kgaugelo ya Modimo. Bjale? Na re swanetše go dira dibe ka ge re sa bušwe ke molao, eupša re re re bušwa ke kgaugelo ya Modimo? Le gatee! Kgane ga le tsebe gore ge le ineela go direla motho le go mo theeletša, le ba bahlanka ba gagwe – e ka ba go ba bahlanka ba sebe, gona go išago lehung, goba go ba bahlanka ba go kwa Modimo, gona go išago go lokeng? Fela a re lebogeng Modimo, ge lena le bego le le bahlanka ba sebe bjale le latela ka dipelo tša lena ka moka thuto ye le e rutilwego. Le lokolotšwe sebeng la ba bahlanka ba boloki. Ke bolela ka mokgwa wo o tlwaelegilego ka baka la go hlaelela ga kwešišo ya lena, ke re: Bjalo ka ge pele le be le ineetše la ba bahlanka ba bootswa le ba bokgopo mme la phela bjalo, ka tsela yeo bjale ineeleng le be bahlanka ba boloki mme le phele bophelo bjo bokgethwa. Mola le sa le bahlanka ba sebe le be le sa bone le tlemegile go dira tše di nyakwago ke Modimo. Go le thušitšeng go dira dilo tšeo bjale di le lešago dihlong? Etse pheletšo ya tšona ke lehu. Gomme ge bjale le lokolotšwe sebeng, le le bahlanka ba Modimo le boelwa ke bophelo bjo bokgethwa, gomme pheletšo ya gona ke go phelela sa ruri. Gobane moputso wa sebe ke lehu, eupša mpho ya kgaugelo ya Modimo yona ke go phelela sa ruri ka Kriste Jesu, Morena wa rena. Banabešo, ke botšiša lena le tsebago molao, ke re na ga le tsebe gore molao o buša motho fela ge a sa phela? Mohlala šo: Mosadi yo a nyetšwego o tlemagantšwe le monna wa gagwe ke molao ge monna wa gagwe a sa phela; eupša ge monna a ka hwa mosadi o tlemologa molaong wo o mo tlemagantšego le yena. Ka gona, ge a ka ipha monna yo mongwe monna wa gagwe a sa phela, o tla bitšwa seotswa; eupša ge monna wa gagwe a hwile, gona o tlemologa molaong woo, gomme ge a ka nyalwa ke monna yo mongwe ga a otswe. Le go lena, banabešo, go bjalo. Ge go iwa ka melao ya Moshe, le lena ke setšha le hwile, ka gobane le ditho tša mmele wa Kriste; gomme bjale le ba yo a tsošitšwego bahung gore re tle re enywe dienywa tše di kgahlago Modimo. Gobane mola re sa laolwa ke ditumo tša nama, go duma sebe mo go lego mo go rena go be go hlohleletšwa ke melao ya Moshe, gomme go re iša lehung. Eupša bjale re tlemolotšwe melaong ya Moshe, ka gobane ka thokong ya melao ye e bego e re tlemile yeo re hwile. Ga re sa hlankela Modimo ka mokgwa wola wa kgale wo re bego re o laetšwe ke melao ye e ngwadilwego, eupša re mo hlankela ka mokgwa wo mofsa wo re o laelwago ke Moya. Bjale re ka reng? Na re ka re melao ya Moshe ka boyona ke sebe? Le gatee! Fela nna sebe nkabe ke sa se tsebe, ge e ka be e se ka baka la yona melao yeo. Ge molao wa Moshe o ka be o sa re: “O se ke wa duma sa motho,” nkabe ke sa tsebe gore tumo ke eng. Eupša ka molao woo sebe se kgonne go hlohleletša ditumo tše di fapafapanego mo go nna. Ge molao o se gona, sebe se hwile. Nna nkile ka phela go se na molao; eupša ya re ge molao o etla, sebe sa tsoga, gomme nna ka hwa. Ya ba gore molao wo o beetšwego go mphediša, o a mpolaya. Sebe sa ntsena ka molao wo, sa nthadia, sa mpolaya ka wona. Bjale ge, melao ya Moshe ka boyona ke ye mekgethwa, le ditaelo tša yona ke tše kgethwa, di lokile, di botse. Na e ka ba seo se ra gore nna ke bolailwe ke se sebotse? Le gatee! Ke bolailwe ke sebe; ka go šomiša selo se sebotse sebe se mpolaile gore bobe bja sona bo tle bo utologe. Ka baka leo, ka yona melao ye sebe se bontšhwa e le se sebe le go feta. Melao ya Moshe re tseba ge e le ya moya, fela nna ke motho wa nama, ke rekišitšwe ka ba lekgoba la sebe. Se ke se dirago ga ke se tsebe, gobane ga ke dire se ke se ratago, eupša ke dira se ke se hloilego. Ka ge se ke se dirago e le se ke sa se ratego, seo se šupa gore ke dumela gore melao ya Moshe e lokile. Ka gona ga se nna ke dirago se, eupša ke sebe se se dulago mo go nna. Gobane ke a tseba gore mo go nna ga go dule se se lokilego – ke ra nameng ya ka. Ka gore le ge ke nyaka go dira tše di lokilego, ga ke kgone. Ga ke dire tše di lokilego tše ke nyakago go di dira, eupša tše dimpe tše ke sa nyakego go di dira, ke a di dira. Gomme ge ke dira tše ke sa di nyakego ga e sa le nna ke di dirago, eupša ke sebe se se agilego mo go nna. Ke mo ke lemogago gore se se diregago mo go nna ke go re ge ke nyaka go dira se se lokilego, e ba fela se sebe se ke se kgonago. Nnaena ka pelong ya ka ke thabela melao ya Modimo. Eupša mo nameng ya ka ke hwetša molao o šele wo o lwantšhago molao wa pelo ya ka. O ntira sebofša sa molao wa sebe wo o šomago mo nameng ya ka. Joo, nna motho wa madimabe! Ke tla hlakodišwa ke mang nameng ye ya go nkiša lehung? Modimo ke yena a ntlhakodišago, gomme ke mo leboga ka Jesu Kriste, Morena wa rena! Bjale ge, taba ya ka e ka mokgwa wo: melao ya Modimo ke e phetha ka pelo fela, eupša ka nama ya ka gona ke phetha molao wa sebe. Ge go le bjalo, bao ba phelago ba le ba tee le Kriste Jesu ba ka se lahlwe. Gobane molao wa Moya, Moya wo o re dirago gore re phele re le ba tee le Kriste Jesu, o ntokolotše molaong wa sebe le lehu. Gobane se se bego se palela melao ya Moshe ka baka la ge e fokodišwa ke tlhago ya motho, Modimo yena o se kgonne. O ahloletše sebe se se lego tlhagong ya motho go lahlwa ka go roma Morwagwe lefaseng a na le tlhago ya go swana le ya motho ye e sekametšego sebeng, gore a fediše sona sebe. Seo Modimo o se diretše gore rena re phelago go ya ka Moya, e sego go ya ka nama, re tle re phethe tše melao e di nyakago. Gobane bao ba phelago go ya ka nama, ba lakwa ke tša nama. Bao ba phelago go ya ka Moya, ba lakwa ke Moya. Gape go lakwa ke tša nama go iša motho lehung, kganthe go lakwa ke Moya gona go iša motho bophelong le boiketlong. Ka gona, ge motho a lakwa ke tša nama e ba lenaba la Modimo, ka gobane ga a phethe melao ya Modimo, ebile a ka se kgone go e phetha. Bao ba phethago tša nama ba ka se kgone go kgahla Modimo. Eupša lena ga le phele go ya ka tša nama, le phela go ya ka mo le lakwago ke Moya, ge eba Moya wa Modimo o dula ka gare ga lena. Motho yo a se nago Moya wa Kriste ga se wa Kriste. Eupša ge Kriste a le ka gare ga lena, le ge mmele wona o tla hwa ka baka la sebe, Moya wona o a le phediša, ka ge le lokafaditšwe ke Modimo. Gomme ge Moya wa Modimo yo a tsošitšego Jesu bahung o phela ka gare ga lena, gona Modimo yo a tsošitšego Kriste bahung, le mebele ya lena ye e hwago o tla e phediša ka Moya wa gagwe wo o phelago ka gare ga lena. Ka gona, banabešo, re na le se se re tlemago, fela ga se go phela ka mo re lakwago ke tša nama. Gobane ge le phela ka go lakwa ke tša nama, le tla hwa; eupša ge le thušwa ke Moya go lahla mediro ya lena ye mebe, gona le tla phela. Bao ba hlahlwago ke Moya wa Modimo ke bona bana ba gagwe. Gape Moya wo Modimo a le filego wona ga o le dire makgoba ebile ga o le dire gore le boife bjalo ka pele; eupša o le dira bana ba Modimo, o le dira gore le bitše Modimo le re: “Aba! Tate!” Moya wa Modimo o ikopanya le meoya ya rena mme ya hlatsela gore re bana ba Modimo. Gomme bjale ge re le bana ba gagwe, gona re bajalefa, bajalefa ba Modimo, ba go ja lefa le Kriste, gobane ka ge re tla be re hlokofaditšwe bjalo ka yena, le letago re tla le fiwa bjalo ka yena. Nna ke bona gore tše re tlaišwago ka tšona mehleng yeno di ka se bapetšwe le letago le Modimo a tlago re utollela lona. Tlholo ka moka e fišegela go tlo utollelwa ba e lego bana ba Modimo. Gobane Modimo o beakantše gore tlholo yohle e se be ye e dulelago sa ruri. Ga se tlholo ye e ratilego gore go be bjalo, eupša ke Modimo yo a beakantšego ka mokgwa woo. Fela yena o e holofeditše gore tšatši le lengwe e tla lokollwa dinaleng tša lehu, ya abelwa tokologo ya letago la bana ba Modimo. Etse re a tseba gore le gonabjale tlholo ka moka e sa tsetla go etša mosadi ge a swerwe ke lešoko la pelego. Eupša ga se yona fela e tsetlago; le rena beng re lego dithakangwaga tša Moya re llela teng, re ntše re letetše Modimo gore a tle a re dire bana ba gagwe, a re lokolle. Gobane re phološitšwe ka ge re be re holofetše; fela ge se re bego re se holofetše re se bona, ga e sa le kholofelo, gobane ga go motho yo a ka holofelago se a se bonago. Eupša ka ge se re se holofelago e le se re sa se bonego re se letela re sa fele pelo. Godimo ga moo re thušwa le ke Moya, ka ge re fokola gakaaka. Gape rena ga re tsebe gore ge re rapela re kgopele eng, le gona bjang, eupša Moya ke wona o re bolelelago le Modimo ka mefegelo ye e sa laodišegego. Gomme Modimo yo a lekolago dipelo tša batho o tseba se Moya o se nyakago; gobane Moya o kgopelela badumedi tše Modimo a di nyakago. Gape re tseba ge go ba ba ratago Modimo dilo ka moka di šomela go ba hola, bona bao a ba biditšego go ya ka mo a bego a ikemišeditše ka gona. Etse bao a ilego a ba kgetha o ile a ba rerela gore ba tle ba swane le Morwagwe, gore yo Morwagwe a tle a be le banababo ba bantši, mme yena e be mogolo wa bona. Bao Modimo a ba reretšego go swana le Morwagwe, o ba biditše; bao a ba biditšego o ba lokafaditše, gomme bao a ba lokafaditšego o ba dirile gore ba be le letago. Ge ditaba di le ka mokgwa wo na re ka reng? Kgane ge Modimo a na le rena ke mang yo a ka emeletšanago le rena? Modimo ga se a babalela Morwagwe, eupša o ile a re gafela yena go re phološa bohle. Bjale a ka napa a se re fe tše dingwe tšohle? Na bao ba kgethilwego ke Modimo, o gona yo a ka ba beago molato? Etse Modimo yena ga a ba bone molato! Bjale ke mang yo a ka ba bonago molato? Gape Kriste Jesu o hwile a ba a tsošwa, a yo dula madulong a bogoši kgauswi le Modimo, gomme o re rapelela go yena. Bjale ke mang yo a ka kgonago go re aroganya le Kriste yo a re ratago yo? Kgane tlalelo e ka kgona, goba mathata, goba tlaišo, goba tlala, goba mohlako, goba kotsi, goba lehu? Ga ke re go ngwadilwe ka Mangwalong a Makgethwa gwa thwe: “Ka baka la gago re dula re lebane le lehu; re swarwa bjalo ka dinku tše di yago go hlabja.” Aowa, dilong tšeo ka moka re šetše re fentše ka botlalo ka yo a re ratilego. Gobane ke tseba ntle le pelaelo gore ga go se se kago re aroganya le Modimo yo a re ratago: ga se lehu goba bophelo, ga se barongwa goba magoši a semoya goba balaodi ba semoya, goba dilo tša gonabjale goba tša ka moso, ga se sa kua godimo sebakabakeng, goba sa kua fase bodulabahu – gare ga tšohle tše di hlodilwego ga go se se kago re aroganya le Modimo yo a re ratago ka Kriste Jesu, Morena wa rena. Ka ge ke le wa Kriste ke bolela nnete, e sego maaka. Le letswalo la ka le le laolwago ke Moya wo Mokgethwa le ntlhatsela gore ga ke bolele maaka ge ke re ke kwa bohloko bjo bogolo le manyami a a sa felego ka pelong ya ka ka baka la batho ba gešo, bona e lego setšhaba sa gešo. Ka baka la bona ke re nke nkabe nna mong Modimo a ntswintše motswiri ke arogane le Kriste. Gape bona ke Baisraele; o ba dirile bana ba gagwe mme a ba utollela letago la gagwe; a dira dikgwerano le bona, a ba fa melao ka Moshe; ke ba ba mo khunamelago ka tshwanelo, ba ba filwego ke yena dikholofetšo; ke bona ditlogolo tša borakgolokhukhu ba Baheberu, bao setšhabeng sa bona go tswetšwego Kriste. Modimo, Mmušatšohle, a a retwe go ya go ile! Amene. Fela ga se go re ke re kholofetšo ya Modimo e wetše fase; gobane ga se bohle ba lešika la Israele ba e lego Baisraele ka tumelo. Le gona ga se ba lešika ka moka la Abrahama ba e lego ditlogolo tša gagwe. Modimo o rile go Abrahama: “Ke ka Isaka mo o tlago ba le ditlogolo.” Taba ye e ra gore ga se bana ka moka ba go tswalwa ke Abrahama bao e lego bana ba Modimo; ke fela bao Abrahama a ba tswetšego ka kholofetšo ya Modimo ba go thwego ke bona ditlogolo tša mmannete tša Modimo. Gobane kholofetšo ya Modimo e rile: “Išago ka tšona nako tše ke tla boa mme Sara o tla be a belege morwa.” Gomme fao ga se moka. Barwa ba Rebeka le bona ba be ba tswetšwe ke monna o tee, e lego Isaka, rakgolokhukhu wa rena. Pele ga ge ba tswalwa, pele ba dira se sebotse goba se sebe, Modimo o ile a botša Rebeka a re: “Mogolo o tla hlankela moratho.” Le Mangwalo a Makgethwa a re: “Ke ratile Jakobo, ka hloya Esau.” Morero wo wa Modimo o ya le go ikgethela ga gagwe. Ga o laolwe ke se motho a se dirago, o laolwa ke yena Modimo yo a bitšago motho. *** *** Na bjale re tla reng? Kgane re tla re Modimo ga se a loka? Le gatee! Gobane o boditše Moshe a re: “Ke tla gaugela yo ke ratago go mo gaugela; ke tla šokela yo ke ratago go mo šokela.” Ka gona, dilo ga di ye ka thato goba tumo ya motho, eupša di ya ka kgaugelo ya Modimo. Gobane Mangwalo a Makgethwa a botša kgoši ya Egepeta a re: “Ke go beile kgoši ka baka la yona taba ye, gore ka wena ke bontšhe maatla a ka, gomme ke phatlalatše setumo sa ka lefaseng ka moka.” Ge go le bjalo gona, Modimo o gaugela yo a ratago go mo gaugela, ebile o ngangabatša yo a ratago go mo ngangabatša. Ge go le bjalo gona, motho a ka no mpotšiša a re: “Bjale Modimo o reng a bona motho molato, etšwe go se yo a ka lwantšhago thato ya gagwe?” Aowi! Ke wena mang, motho ke wena, o ka solago Modimo! Kgane sebjana se ka botšiša mmopi wa sona sa re o be o reng o mpopa ka mokgwa wo? Kgane mmopi ga a na tokelo ya go bopa dibjana tše pedi ka letsopa le tee, se sengwe ya ba sa matšatši a magolo, sengwe ya ba sa mehleng? Agaa, le tše di dirilwego ke Modimo di bjalo. O ratile go bontšha kgalefo ya gagwe le go tsebatša maatla a gagwe. Eupša bale a bego a ba galefetše, bale ba bego ba lebanwe ke go fedišwa, ga se a ka a ba felela pelo. Le gona o be a nyaka go utolla letago la gagwe le legolo, le a ilego a le tšholla godimo ga rena ba a bego a tlilo re gaugela, rena balokišetšwaletago ba gagwe. Gobane re batho ba a ba biditšego, e sego fela gare ga Bajuda, eupša le gare ga baditšhaba. Ke tšona tše a di bolelago ka pukung ya Hosea ge a re: “Setšhaba se e sego sa ka ke tla se bitša ‘Setšhaba sa ka’. Morafe wo ke bego ke sa o rate ke tla o bitša ‘Moratiwa wa ka’. “Gomme moo ba bego ba boditšwe go re “ ‘Ga le setšhaba sa ka’, ke gona mo ba tlago bitšwa ‘bana ba Modimo yo a phelago’.” Jesaya le yena o goelela a era Baisraele ge a re: “Le ge setšhaba sa Israele se lekana le lešabašaba la lewatle ka bontši, go tla phologa fela ba se bakae; gobane Morena o tlilo ahlola batho bohle ba lefase a sa dikadike.” Go tla ba bjalo ka ge Jesaya a kile a bolela a re: “Ge Modimo Ramaatlaohle a ka be a se a re šadišetša ditlogolo, re ka be re bile bjalo ka Sodoma, re ka be re editše Gomora.” Bjale re ka phetha ka go reng? Re ka phetha ka go re baditšhaba ba ba bego ba sa itshwenye ka go nyaka go lokafatšwa ke Modimo, ba be ba lokafatšwa ka tumelo, kganthe Baisraele ba ba bego ba nyaka molao wa go ba lokafatša, ba o hlokile. Ba o hlokile ka baka lang? Ke ka baka la ge ba be ba sa ikanye tumelo, eupša ba ikanya mediro ya bona. Ka gona ba kgopša ke leswika la sekgopi le le bolelwago ke Mangwalo a Makgethwa ge a re: “Bonang, ke bea leswika la sekgopi Sione, letlapa le le tlago ba thetša. Fela yo a dumelago go lona a ka se swabe.” Banabešo, nna ke duma ka pelo ya ka ka moka, ebile ke kgopelela setšhaba sa gešo go Modimo gore ba phološwe. Gobane nna ke hlatse ya gore ba fišegela Modimo, fela phišegelo ya bona ke ya motho yo a hlokago kwešišo. Ga se ba ka ba tseba tsela yeo Modimo a lokafatšago batho ka yona, eupša ba lekile go itshepelela ka ya bona tsela; ka gona ba se ipee tseleng ya Modimo ya go lokafatša batho. Gape Kriste o fedišitše melao ya Moshe, gomme bohle ba ba dumelago go yena ba a lokafatšwa. Moshe ge a ngwala mabapi le go lokafatšwa ka go phetha melao yela Modimo a mo filego yona, o re: “Yo a phethago ditaelo tša melao ya Modimo o tla phela.” Se Mangwalo a Makgethwa a se bolelago mabapi le go lokafatšwa ka tumelo sona se re: “O se ke wa ipotšiša wa re: Ke mang yo a tlago rotogela legodimong?” Seo se ra go re a yo theoša Kriste. “Le gona o se ke wa re: Ke mang yo a tlago theogela bodulabahu?” Seo se ra go re a yo rotoša Kriste bahung. Se Mangwalo a Makgethwa a se bolelago se re: “Molaetša wa Modimo o kgauswi le wena, o mo molomong wa gago le ka pelong ya gago.” Ke wona molaetša wa tumelo wo re o begago. Ge o bega gore Jesu ke Morena mme o dumela gore Modimo o mo tsošitše bahung, o tla phološwa. Gobane motho o lokafatšwa ka go dumela, mola ka go bega tumelo yeo a phološwa. Mangwalo a Makgethwa a re: “Yo a dumelago go yena a ka se swabe.” Seo se ra gore ga go kgethollwe Mojuda goba moditšhaba, gobane Morena wa bohle ke o tee mme ba ba mo rapelago o ba atla kudu; bjalo ka ge Mangwalo a Makgethwa a bolela a re: “Mang le mang yo a kgopelago Morena thušo o tla phološwa.” Eupša ba ka mo kgopela thušo bjang ba se ba dumela go yena? Gomme ba ka dumela go yena bjang ba se ba kwa molaetša wa gagwe? Molaetša wa gagwe wona ba ka o kwa bjang ba sa o begelwe? Gomme molaetša o ka begwa bjang go se gwa rongwa batseta? Bjalo ka ge Mangwalo a Makgethwa a bolela a re: “Go botse bjang go bona batseta ba etla, ba re tlela le taba ye botse!” Fela ga se batho bohle ba ba amogetšego Taba ye Botse yeo. Jesaya le yena o rile: “Morena, ke mang yo a dumetšego molaetša wa rena?” Etse tumelo e tšwa go kweng, mme molaetša o tla ka go begwa ga Kriste. Bjale nna ke a botšiša ke re: Na Baisraele ga se ba kwa molaetša woo? Ruri, go o kwa gona ba o kwele, gobane le Mangwalo a Makgethwa a re: “Mokgoši wa bona o phatlaletše lefaseng lohle, molaetša wa bona o fihlile magomong a lefase.” Ke botšiša gape ke re: Ga ke re setšhaba sa Israele se o kwešišitše? Etse Moshe ka noši e bile yena wa mathomo wa go fetola legatong la Modimo a re: “Ke tla le hufegiša batho ba e sego setšhaba; ke tla le galefiša ka morafe wa mašilo.” Jesaya yena a ba a ba le sebete, a bolela se a se laetšwego ke Modimo a re: “Ke hweditšwe ke bao ba bego ba sa nnyake, ka iponagatša go bao ba bego ba sa mpotšiše.” Mabapi le Baisraele Modimo o re: “Ke hlwele ke phurolotše matsogo go amogela morafe wa lenyatšo le manganga.” Bjale ke botšiša ke re: Na ke go re Modimo o lahlile setšhaba sa gagwe? Le gatee! Gape le nna ke Moisraele wa lešika la Abrahama, wa kgoro ya Benjamene. Modimo ga se a lahla setšhaba sa gagwe se a se kgethilego kgale. Na ga le tsebe gore Mangwalo a Makgethwa a reng ka temaneng yela Eliya a begago Baisraele go Modimo? A re: “Morena, ba bolaile baprofeta ba gago, ba kgereša le dialetare tša gago; ke nna fela ke šetšego, gomme le nna ba nyaka go mpolaya.” Modimo yena o ile a mo fetola bjang? O mo fetotše ka go re: “Ke itšhadišeditše banna ba dikete tše di šupago ba ba se ba kago ba khunamela Baale.” Le mehleng yeno go sa le bjalo. Go na le mašaledi ao Modimo a a kgethilego ka ge yena a na le kgaugelo. Gape Modimo o kgetha batho go ya ka kgaugelo ya gagwe, e sego ka tše batho ba di dirago. Ge a ka be a kgetha go ya ka mediro ya batho, gona kgaugelo ya gagwe e ka be e se ya nnete. Bjale go ka thweng? Baisraele ga se ba hwetša se ba bego ba se nyaka. Se hweditšwe fela ke bao ba kgethilwego ke Modimo; ba bangwe bona a ba thatafatša gore ba se mo kwe. Ya ba go phethega ga tše di bolelwago ke Mangwalo a Makgethwa ge a re: “Modimo o dirile gore ba palelwe ke go nagana; go fihlela bjale o sa ba timile go kwešiša le go hlaologanya.” Dafida le yena o re: “A ba beelwe melaba mme ba tanywe menyanyeng ya bona; a ba we ba otlwe! A ba foufale, ba tle ba se ke ba bona; a ba kokoropantšhwe mekokotlo ke matshwenyego a bona.” Bjale ke re: Na ke go re go kgopša ga Bajuda go ba wišeditše gore ba lahlegele sa ruri? Le gatee! Ka ge ba dirile sebe phologo e tletše baditšhaba gore Bajuda ba tle ba be le lehufa. Go dira sebe ga Bajuda go hotše ditšhaba tša lefase kudu, gomme go gana Modimo ga bona go hotše baditšhaba. Bjale ge, ge Bajuda ka moka ba ka be ba ka amogela Modimo, ditšhaba tšohle di ka be di ka holega le go feta. Bjale ke botša lena baditšhaba ke re: Ge ke sa ntše ke le moapostola wa baditšhaba ke tla no fela ke itheta ka modiro wa ka. Mohlomongwe nka hufegiša morafe wa gešo, gomme ka go dira bjalo ka phološa ba bangwe ba bona. Gobane mola Modimo a ba lahla o boelantše merafe ye mengwe ya lefase le yena. Bjale mohla a ba amogela gape a gona go tla ba bjang? E tla ba mo nkego bahu ba tsošwa mabitleng. Gape ge lekako la mathomo le abetšwe Modimo, gona mogopo wohle ke wa gagwe; ge medu ya mohlare e abetšwe Modimo, le makala a wona a abetšwe yena. Makala a mangwe a mohlware wa gae a kgaotšwe, gwa hlomesetšwa lekala la mohlware wa naga. Le wena o bjalo ka lekala leo la mohlware wa naga, gomme o holega ka mohlodi wa mohlware wa gae, wona o tsenago mohlwareng ka medu. Ka gona, o se ikgantšhetše bao ba bego ba kgaotšwe boka makala; gobane le ge o ka re o a ikgantšha, o no tseba gore ga se wena o rwelego medu, medu ke yona e rwelego wena. Mohlomongwe o ka re: “Makala a kgaoletšwe gore go tle go hlomesetšwe nna.” Moo ke nnete. A kgaotšwe ka baka la go se dumele, kganthe wena o šadišitšwe ka baka la tumelo. Fela o se ikgogomoše ka seo; sa gago a e be go boifa, gobane ge Modimo a se a ka a hlekesetša bao e lego makala a mohlware, le wena a ka se go hlekesetše. Ke mo re bonago botho le bogale bja Modimo. O bogale go bao ba kgelogilego, kganthe go wena o botho, ge eba o phela ka mo go swanelago botho bja gagwe. Ge o sa phele bjalo, gona le wena o tla rengwa. Bona ge ba se sa gana go dumela, le bona ba tla hlomesetšwa, gobane Modimo o na le maatla a go ba bušetša madulong. Wena o bjalo ka lekala le le remilwego mohlwareng wa naga mme la hlomesetšwa go wa gae wo ka tlhago e sego wa gabolona. Bajuda ba swana le mohlware woo wa gae; gomme go tla ba bonolo kudu go Modimo go hlomesetša makala a a kgaotšwego go mmagoona. Banabešo, go na le sephiri se sengwe se ke nyakago gore le se tsebe, gore le se ikgopole le le ba bohlale. Sona sese: Bohlogothata bja Baisraele ga se bja dulela ruri, eupša bo tla ba kgomarela go fihlela palo ye e feletšego ya baditšhaba e sokologela go Modimo. Ka mokgwa wo Baisraele bohle ba tla phološwa, bjalo ka ge Mangwalo a Makgethwa a bolela a re: “Mophološi o tla tla a etšwa Sione, a tloša bokgopo bjohle ditlogolong tša Jakobo. Ke yona kgwerano ye ke tlago e dira le bona, ge ke tlilo tloša dibe tša bona.” Ge go iwa ka Ebangedi bona ke manaba a Modimo, mme seo sa hola lena baditšhaba. Fela ge go iwa ka go kgethwa gona ke ba a ba ratago, ka baka la borakgolokhukhu ba bona. Gobane Modimo ga a hlaname mo go kgetheng le go šegofatšeng ga gagwe. Ge e le lena, kgale le be le sa theeletše Modimo; eupša bjale le gaugetšwe ka baka la ge bona ba sa theeletše. Ka mokgwa woo, ka ge go gaugetšwe lena, bjale ga ba theeletše, gore bjale le bona ba tle ba gaugelwe. Gobane Modimo o dirile gore batho bohle ba se theeletše, gore a tle a ba gaugele bohle. Na a kaakang mahumo a Modimo! Bohlale le tsebo ya gagwe di tebile bjang! Dikahlolo tša gagwe di kwešišwa ke mang? Ditsela tša gagwe ga di na mohlathi. Gobane le Mangwalo a Makgethwa a re: “Ke mang yo a tsebago tše Morena a di gopolago? Moeletši wa gagwe yena ke mang? Ke mang yo a kilego a mo direla selo, gore bjale a lebanwe ke go bušetšwa?” Gobane dilo tšohle di tšwa go yena, tšohle di ba gona ka yena, tšohle di a mo tumiša. A go tumišwe Modimo go ya go ile! Amene. Bjale ge, banabešo, ka ge Modimo a re gaugetše gakaaka, ke a le kgopela ke re: Ineeleng go yena le be sehlabelo se se phelago, se sekgethwa se se mo kgahlago. Ke wona mokgwa wa nnete wo le swanetšego go mo khunamela ka wona. Le se swantšhe mekgwa ya lena le ya batho ba mo lefaseng, le upše le dumelele Modimo gore a le fetoše ka go le mpshafatša dikgopolong. Ke mo le tlago tseba se e lego thato ya gagwe se se lokilego, se se mo kgahlago, se se feletšego. Gomme ge ke bona mpho ye Modimo a mphilego yona ka kgaugelo ya gagwe, ke botša yo mongwe le yo mongwe wa lena gore a se ikgopole go feta tekanyo, eupša a ikgopole ka mo go mo swanetšego, a ipone go ya ka tumelo ye a e filwego ke Modimo. Gobane re swana le mmele wo o nago le ditho tše dintši, mme ditho tšeo, di sa dire modiro o tee tšohle. Ka wona mokgwa woo, le rena le ge re le ba bantši, re mmele o tee ka Kriste, gomme mongwe le mongwe ke setho sa mongwekayena. Re na le dimpho tše di fapafapanego tše Modimo a re babaletšego ka tšona go ya ka kgaugelo ya gagwe. Ge motho a filwe mpho ya go bega molaetša wa Modimo, a o bege go ya ka tumelo ye a nago le yona; ge e le bodiredi, a direle ba bangwe; ge e le go ruta, a rute; ge e le go kgothatša, a kgothatše; yo a abelago ba bangwe, a ba abele ka pelo ye tšhweu; yo a etago ba bangwe pele, a ba ete ka mafolofolo; yo a kwelago ba bangwe bohloko, a ba kwele a thabile. Le se be le lerato la bofora. Le hloye bobe le itshwarelele ka boloki. Le rataneng kudu ka mo go lebanego badumedi, mme le fišegele go hlomphana. Le se itšimeletše go bontšha mafolofolo. Le be le matšato. Le direle Morena. Le thakgatšwe ke kholofelo ye le nago le yona; ge le na le matshwenyego le se a felele pelo; le dule le rapela. Tše le nago le tšona le di abelane le badumedi ba ba di hlokago; le thakgalele go amogela baeti. Ba ba le hlomarago le ba šegofatše; ee, le ba šegofatše, le se ba roge. Le thabe le ba ba thabilego, le lle le ba ba llago. Le phedišane ka kwano. Le se llele bogolo, le upše le gwerane le babotlana. Le se ipone le le bahlalefi. Le se itefeletše go bao ba le dirago bobe. Le leke go dira tše batho bohle ba bonago e le tše di lokilego. Le dire ka mo le ka kgonago ka gona go phedišana le batho ka moka. Barategi, le se ke la itefeletša, le upše le lefeletšwe ke Modimo a galefile, gobane Mangwalo a Makgethwa a re: “Ke nna ke lefeletšago; ke nna ke tlago bušetša. O realo, Morena”. Go ya ka Mangwalo a Makgethwa: “Wena, ge lenaba la gago le swerwe ke tlala, o le fe dijo; ge le kgalegile, o le noše. Ka mokgwa woo o tla be o le leša dihlong e le ruri.” O se ke wa fenywa ke bobe, o fenye bobe ka go loka. Motho mang le mang a se gane go bušwa ke ba ba filwego maatla a go buša, ka gobane ga go mmušo wo o sa tšwego go Modimo; mebušo ye e lego gona e hlomilwe ke Modimo. Ka gona, yo a lwago le mmušo o lwa le se se laetšwego ke Modimo; gomme yo a lwago le sona o ikobela kotlo. Gobane go bao ba dirago tša go loka babuši ga ba boifiše, ba boifiša go bao ba dirago tše dimpe. Kgane wena ga o nyake go phela o sa boife babuši? Gona o dire tše di lokilego, gomme bona ba tla go reta, gobane ke bona bahlanka ba Modimo ba ba šomelago go go hola. Eupša ge o dira tše dimpe, gona o ba boife, gobane maatla a bona a go otla ga se a lefeela. Ke bona bahlanka ba Modimo, ke balefeletši ba Modimo ba go otla bakgopo. Ke ka baka leo le swanetšego go theeletša ba ba bušago, e sego fela ka gobane le tšhaba kotlo ya Modimo, eupša e be le ka baka la letswalo. Ke ka baka leo le tšhelago le metšhelo, gobane babuši ge ba dira mediro ya bona ba šomela Modimo. Ka gona le ntšhetše bohle tše di ba lebanego: yo a lebanwego ke seloba le mo lobe; yo a lebanwego ke sebego le mmegele; yo a lebanwego ke tlhompho le mo hlomphe; yo a lebanwego ke kgodišo le mo godiše. Le se ke la kolota motho selo ge e se go ratana naye. Gobane yo a ratago ba bangwe ke yena yo a phethago melao ya Moshe. Gape melao ye e rego: “O se ke wa otswa, o se ke wa bolaya, o se ke wa utswa, o se ke wa duma tša ba bangwe” le wo mongwe molao wo o ka bago gona, yohle e akaretšwa ka wo o rego: “O rate bangwekawena bjalo ka ge o ithata.” Moratamongwekayena ga a mo senyetše. Bjale ge, go rata ke go phetha melao yohle ya Moshe. Le dire ka mokgwa woo ka ge le tseba gore ke nako – nako ya go tsoga borokong e šetše e fihlile. Gobane nako ya gore re phološwe bjale e kgauswi go feta mola re sa tšo dumela. Bjale go swana le ge bošego bo esa, letšatši le le kgauswi le go hlaba. Ka gona, a re tlogeleng mediro ya leswiswi, re itlhameng ka dibetša tša go lwa seetšeng. A re itshwareng gabotse bjalo ka batho ba ba phelago seetšeng sa mosegare, e sego ka bohlola le botagwa, e sego ka bofebe le tša go leša dihlong, e sego ka diphapano le mahufa. Le upše le phele bjalo ka balatedi ba Morena Jesu Kriste, mme le lese go beakanyetša dilo pele ka mokgwa wa go kgotsofatša ditumo tša lena tša nama. Yo a tekatekago tumelong le mo amogele le sa ngangišane naye ka tše a di dumelago. Tumelo ya yo mongwe e re a ka ja sejo se sengwe le se sengwe, mola ya yo a tekatekago e re a je merogo fela. Yo a jago se sengwe le se sengwe a se ke a nyatša yo a sa se jego; le yo a jago merogo fela a se ke a bona yo a jago se sengwe le se sengwe phošo; gobane Modimo o mo amogetše. Bjale wena o mang ge o bona mohlanka wa yo mongwe phošo? Etse yo a tsebago go kgona le go palelwa ga mohlanka ke mong wa gagwe. Gomme o tla kgona ka gobane Morena a na le maatla a go mo kgontšha. Yo mongwe o bona letšatši le lengwe e le le legolo go feta a mangwe, mola yo mongwe a bona matšatši ka moka a lekana. Mongwe le mongwe a a phethe se a se dumelago. Yo a hlomphago letšatši le lengwenyana, o le hlomphela Morena; yo a jago se sengwe le se sengwe o se jela go hlompha Morena, ka gobane o leboga Modimo ka baka la dijo tšeo. Yo a ganago go ja dijo tše dingwenyana le yena o ganela go hlompha Morena, gomme o leboga Modimo. Gobane mo go rena ga go yo a iphelelago, le yo a ikhwelago ga a gona. Ge re phela, re phelela Morena, le ge re ehwa, re hwela Morena. Ka gona, ge re phela goba re ehwa, re ba Morena. Gobane Kriste o rile go hwa a ba a tsoga gore a tle a be Morena wa ba ba phelago le ba ba hwilego. Bjale ge, wena o jago merogo fela, o reng o bona ngwaneno phošo? Le wena o jago sengwe le sengwe, o reng o nyatša ngwaneno? Gape ka moka ga rena re tlilo ema pele ga Modimo gore a re ahlole. Gobane Mangwalo a Makgethwa a re: “Ke ikana ke le Modimo yo a phelago gore mongwe le mongwe o tla nkhunamela, mang le mang o tla dumela gore ke nna Modimo.” Ka gona mongwe le mongwe wa rena o tla itlhaloša go Modimo ka tše a dirilego. Ge go le bjalo, a re leseng go bonana diphošo. Go ka ba kaone ge motho a ka ikemišetša go se kgopiše ngwanabo le ge e le go mo diriša sebe. Ka ge ke le molatedi wa Morena Jesu, ke a tseba ebile ke a kgolwa gore ga go selo se ka bosona se tšhilafetšego, fela ge motho a kgolwa gore selo se tšhilafetše, ka nnete go yena e ba se se tšhilafetšego. Ge eba ka go ja sejo se sengwenyana o kgopiša ngwaneno, gona ga o sa hlahlwa ke lerato. O se ke wa timetša motho yo a hwetšwego ke Kriste ka se o se jago. Le se ke la dira gore se sebotse se le nago le sona se goboge. Gobane mmušo wa Modimo ga se go ja le go nwa, eupša ke boloki le khutšo le lethabo – dilo tšeo di tlišwago ke Moya wo Mokgethwa. Yo a hlankelago Kriste ka mokgwa wo, o kgahla Modimo gomme o hlompšha ke batho. Ka gona, a re phegeleleng go dira tše di hlohleletšago khutšo, gomme re tiišaneng. Se Modimo a se dirilego o se ke wa se senya ka baka la dijo. Ga go na sejo se se sa lewego; fela ke phošo go ja sejo se se ka dirišago yo mongwe sebe. Ke mo gobotse go se je nama, go se nwe beine, le go se dire se se ka wetšago ngwaneno sebeng. Mabapi le taba ye, se o se dumelago se ama wena le Modimo. Go lehlogonolo yo a rego go dira selo se a bonago se lokile a se itshole. Ge motho a ka re a eja sejo se sengwenyana a kwa a na le pelo tše pedi, ge a se ja Modimo o a mo tšwa, ka ge a eja a sa hlahlwe ke tumelo ya gagwe. Gomme sengwe le sengwe se motho a se dirago a sa hlahlwe ke tumelo, ke sebe. Rena ba tumelo ye e tiilego re swanetše go rwadiša ba tumelo ye e fokolago mathata a bona mo go tša tumelo. Re se ikgahliše. Motho a kgahliše modumedikayena ka go mo direla tše di mo holago, a mo age mo go tša tumelo. Gobane Kriste le yena o be a sa ikgahliše; eupša go bile bjalo ka ge Mangwalo a Makgethwa a bolela a re: “Ke wetšwe ke mahlapa a bao ba go rogago.” Tšohle tše di ngwadilwego ka Mangwalong a Makgethwa mehleng ya kgale di ngwaletšwe go re ruta, gore re tle re be le kholofelo ka go se fele pelo le go tiišwa ke tše di ngwadilwego. A Modimo yo a re kgontšhago go se fele pelo, gape a re tiišago a dire gore le phedišane ka kwano go ya ka moo go kgahlago Kriste Jesu, gore le tle le tumiše Modimo, TatagoMorena wa rena, Jesu Kriste, mmogo ka molomo o tee. Ka gona, le amogelaneng bjalo ka ge Kriste le yena a le amogetše, mme e be gona go tumiša Modimo. Gomme ke le botša gore Kriste o be a tletše go hlankela Bajuda ka go phetha tše Modimo a di holofeditšego borakgolokhukhu ba rena, go bontšha gore yena Modimo o a botega, le go dira gore baditšhaba ba tle ba tumiše Modimo ka ge a na le kgaugelo, bjalo ka ge Mangwalo a Makgethwa a re: “Ka baka leo ke tla go tumiša baditšhabeng, ke tla go opelela ditheto.” Mo gongwe go thwe: “Lena baditšhaba, thabang le setšhaba sa Modimo!” Gwa buša gwa thwe: “Retang Morena, lena baditšhaba bohle; mo reteng, lena merafe ka moka!” Jesaya le yena o re: “Go tla tšwelela mongwe wa ditlogolokhukhu tša Isai, a tla a buša baditšhaba, mme bona ba tla mmota.” Anke Modimo yo a le fago kholofelo a dire gore ka ge le mo dumetše, le be le lethabo le khutšo ka botlalo, gore kholofelo ya lena e fele e oketšwa ke Moya wo Mokgethwa ka maatla a wona. Banabešo, nnaena ke tloga ke dumela gore le na le botho e le ruri, le gore le tseba ka botlalo se motho a swanetšego go se dira, ebile le kgona le go eletšana. Fela mo lengwalong le ke tloga ke betile pelo ka ngwala ditaba tše dingwenyana tše ke le gopotšago tšona. Ke bile le sebete ka ge Modimo a bile yo botho go nna, ka go ntira mohlanka wa Kriste Jesu wa go begela baditšhaba Taba ye Botse ya Modimo. Ge ke dira bjalo ke dira modiro wa boprista, gore baditšhaba e tle e be sehlabelo se se kgahlago Modimo, se a se abetšwego ke Moya wo Mokgethwa. Ke ka baka leo ke nago le lebaka la go ikgantšha ge ke šomela Modimo, ke le wa Kriste Jesu. Nka se bete pelo ka bolela tše dingwe ntle le tše Kriste a di dirilego ka nna go ruta baditšhaba go theeletša Modimo. Seo o se dirile ka dipolelo le ka mediro, ka maatla a mehlolo le a dimakatšo, le ka maatla a Moya wa Modimo. Ke ka baka leo ke gašitšego Taba ye Botse ye ya Kriste ka botlalo gohle mo ke fetilego gona, go tloga Jerusalema go yo fihla Ilirikomo. Se ke bego ke se fišegela ke go gaša Taba ye Botse ye moo batho ba bego ba sešo ba kwa ka Kriste, gore e se tlo ba nke ke aga motheong wa yo mongwe. A go be bjalo ke ge Mangwalo a Makgethwa a bolela a re: “Bao ba sešogo ba botšwa ka yena ba tla bona, le bao ba sešogo ba kwa ka yena ba tla kwešiša.” Ke yona taba ye e mpaledišitšego gantši go le etela. Fela bjale ga go sa na modiro wo nka o dirago mo dinageng tše, le gona e šetše e le mengwaga ye mentšinyana ke duma go tlo feta moo go lena ge ke eya Spania. Ke mo ke holofelago gore ke tla feta ke le bona la mphelesetša gona ka morago ga ge ke ile ka iketla le lena sebakanyana. Gonabjale ke sa ya Jerusalema go yo thuša badumedi ba gona. Gobane diphuthego tša Matsedonia le tša Agaya di kgahlilwe ke go kgobokeletša bahloki gare ga badumedi ba Jerusalema dimpho. Seo ke se ba ithaopilego go se dira; fela gabotsebotse ba tlemegile go ba thuša, gobane ka ge Bajuda ba abelane le baditšhaba tša moya, baditšhaba le bona ba lebanwe ke go thuša Bajuda ka tša nama. E tla re ge ke phethile mošomo wo ke bile ke ba file tšhelete ka moka ye ba e kgobokeleditšwego, ka tšea leeto la go ya Spania mme ka feta ke le bona. Ke a tseba gore mohla ke etla go lena ke tla le kgopelela tšhegofatšo ye e feletšego ya Kriste go Modimo. Bjale ge, banabešo, ke le kgothatša ka Morena wa rena Jesu Kriste le ka lerato le Moya o re fago lona, gore le nthapediše Modimo ka phišego. Le nthapelele gore ke se wele diatleng tša bahlokatumelo ba naga ya Judea, le gore tše ke thušago badumedi ba Jerusalema ka tšona di ba kgahle. Ke mo ke tlago tla go lena ke thabile, ge Modimo a rata, ka lapološwa ke go ba le lena. Modimo yo a re fago khutšo a be le lena. Amene. Ke le tsebiša gore modumedikarena wa mosadi, Foibe, yo e lego modiredi phuthegong ya Kenegerea, ke motho yo a lokilego. Le mo amogele e le wa Morena, ka mo badumedi ba swanetšego go dira ka gona, gomme le mo thuše ka mo go nyakegago; gobane le yena o thušitše ba bantši, ešita le nna o nthušitše. Le dumediše Prisila le Akhwila, bona ba šomilego le nna mola re le modirong wa Kriste Jesu; ke bona bale ba go ka ba ipea kotsing ya lehu gore ba mphološe. Ga se nna fela ke ba lebogago, eupša ba lebogwa le ke diphuthego ka moka tše di tšwago baditšhabeng. Le phuthego ye e kopanelago ka lapeng la bona e dumele. Le dumediše Epaenetose, mogwera wa ka yo ke mo ratago kudu, yo e bilego yena motho wa mathomo nageng ya Asia wa go dumela go Kriste. Le ntumedišetše Maria, yo a le šometšego kudu. Le dumediše le Andronikose le Juniase, banna ba gešo, ba ba kilego ba ba kgolegong le nna, ba ba tsebjago kudu ke baapostola, le gona ba bile Bakriste pele ga ka. Le dumediše Ampliatose, mogwera wa ka yo ke mo ratago kudu, yo e lego modumedi wa Morena bjalo ka nna. Le dumediše le Urbanose, yo a šomilego le rena ge re le modirong wa Kriste, le Stagise, mogwera wa ka yo ke mo ratago kudu. Apelese a dumele, yena monna yo go botegela Kriste ga gagwe go šetšego go bonagetše. Le ba ga Aristobulose ba dumele. Madume go mogagešo, Herodione, le go ba ga Narkisose, ba e lego ba Morena. Le ntumedišetše boTrefina le Trefosa, bona ba itapišetšago Morena; le dumediše le Persise, mogweraka yo ke mo ratago kudu, mosadi yo a šometšego Morena e le ruri. Le dumediše Rufose, mošomedi wa senatla wa Morena, le mmagwe, yo le nna a bego a ntshwere bjalo ka morwagwe. Le lotšhe Asinkritose le Flegone le Hermese le Patrobase le Hermase le bana ba borena ba bangwe ka moka ba ba nago le bona. Le ntumedišetše Filologose le Julia le Nereose le kgaitšedi ya gagwe, le Olimpase le badumedi ka moka ba ba nago le bona. Le dumedišane ka go atlana, gona go bontšhago go ratana ga badumedi. Diphuthego tšohle tša Kriste di a le dumediša. Banabešo, ke le laya ke tiišitše gore le itote go bao ba aroganyago batho le gona ba ba kgelošago thutong ye le ithutilego yona. Le se ke la kopana nabo, gobane ba babjalo ga ba hlankele Kriste, Morena wa rena, eupša ba laolwa ke bojato. Ka maleme a bona a boreledi le dipolelo tša bona tša go goketša ba fora ba ba sa ba gopolelego maaka. Batho ka moka ba kwele ka mo le botegetšego Ebangedi ka gona; ke sona se ke le thabeletšego sona. Ke nyaka ge le ka hlalefela tše di lokilego, tše dimpe tšona la se tsebe selo ka tšona. Gomme Modimo, yena Moretlišetšakhutšo, o kgauswi le go gataka Sathane. Morena wa rena, Jesu Kriste, a le gaugele. Timotheose, mošomikanna, le magagešo, Lusiose, le Jasone le Sosipatere ba a le dumediša. Nna, Tersiose, mongwadi wa lengwalo le, ke le dumediša ke le modumedikalena. Gayose, yo ke lego moeng wa gagwe, yo phuthego e kopanelago ka ga gagwe, o a le tamiša. Erastose, ramatlotlo wa motse, le ngwanaborena, Kwartose, ba re le dumele. *** A re tumišeng Modimo yo a kgonago go le tiiša tumelong ya lena, go ya ka Taba ye Botse ye ke e begago mabapi le Jesu Kriste, le go ya ka kutollo ya sephiri se e sa lego se utwa go tloga le go tloga. Fela bjale sephiri seo se utolotšwe ka mangwalo a baprofeta; gomme ka taelo ya Modimo wa go sa felego se begetšwe ditšhaba tšohle, gore di dumele go Modimo di mo theeletše. A Modimo, yena Rabohlale a nnoši, a tumišwe go ya go ile ka Jesu Kriste. Amene. Nna, Paulose, yo Modimo ka go rata ga gagwe a nkgethilego ka ba moapostola wa Kriste Jesu, le Sostenese, ngwanaborena, re dumediša phuthego ya Modimo ye e lego motseng wa Korinte, ya ba e lego ba gagwe ka go ba ba tee le Kriste Jesu, ba ba bileditšego go ba bakgethwa ba Modimo, gotee le bohle ba ba khunamelago Morena wa rena, Jesu Kriste, gohle, yo e lego yena Morena wa bona le rena, re re: Nke Modimo, Tatagorena, le Morena Jesu Kriste ba le gaugele, ba le fe khutšo. Ka mehla ke le lebogela go Modimo ka baka la tše dibotse tše a le filego tšona ka Kriste Jesu. Le humišitšwe ka yena dilong ka moka, e lego tša go tseba molaetša wa Jesu Kriste gabotse le go o bega ka botlalo. Molaetša woo le tloga le o dumetše mo e lego gore ge le sa letetše go utollwa ga Morena wa rena, Jesu Kriste, ga go mpho le e tee ye le e hlokago. Ke yena a tlago le tiiša tumelong go fihlela mafelelong, gore mohla yena Morena wa rena, Jesu Kriste, a boa e be ga le na bosodi. Modimo o a tshepega, yena yo a le bileditšego go ba ba tee le Morwagwe, Jesu Kriste, Morena wa rena. Banabešo, ke le rapela ka Morena wa rena, Jesu Kriste, gore ka moka ga lena le kwaneng, gore le se tšwe dihlophana. Le be ba pelo e tee le monagano o tee le maikemišetšo a tee. Gobane, banabešo, ke kwele ka ba ga Kleo gore le na le diphapano. Ke ra tša ge motho wa lena a re nna ke wa Paulose, yo mongwe a re nna ke wa Apolose; mongwe a re nna ke latela Kefase, mongwe a re nna ke latela Kriste. Na Kriste o ntšhitšwe dikgawanakgawana? Kgane ke Paulose yo a le bapoletšwego sefapanong? Goba le kolobeditšwe gore le be ba Paulose? Nna ke leboga Modimo ge ke se ka ka ka kolobetša motho mo go lena, ge e se Krispose le Gayose. Ka gona ga go na yo a ka rego o kolobeditšwe gore e be wa ka. Ee, bjale ke a gopola, ke kolobeditše le Stefanase le ba lapa la gagwe; ga ke gopole ke kolobeditše yo mongwe. Kriste ga se a nthoma gore ke yo kolobetša. O nthomile gore ke yo bega Taba ye Botse ya Modimo, e sego ka polelo ya batho ba bohlale. Ge nkabe nka dira bjalo, lehu la Kriste sefapanong e be e tla ba lefeela. Gobane ba ba tšeago ka tsela ye e išago tahlegong ba bona molaetša wa lehu la Kriste sefapanong e le bošilo; kganthe rena re phološwago re bona e le maatla a Modimo. Gobane Mangwalo a Makgethwa a re: “Ke tla fediša bohlale bja dihlalefi; ke tla timeletša tsebo ya dirutegi.” Ge go le bjalo gona, sehlalefi le serutegi le sekgwari sa polelo sa mehleng yeno ba thušang? Ga ke re Modimo o bontšhitše gore bohlale bja batho ba lefase ke bošilo? Gobane Modimo, ka bohlale bja gagwe, o dirile gore batho ba lefase ba se kgone go mo tseba ka bja bona bohlale. O ratile gore a phološe bao ba dumelago ka molaetša wo re o gašago wo go thwego ke bošilo. Bajuda ba nyaka mehlolo, kganthe Bagerike bona ba tsoma bohlale. Ge e le rena re bega taba ya Jesu yo a ilego a bapolwa sefapanong, e lego wona molaetša wo o ganwago ke Bajuda, mola bao e sego Bajuda bona ba re ke bošilo; kganthe go bao Modimo a ba biditšego, ba Bajuda le ba e sego Bajuda, molaetša wo ke Kriste yo e lego maatla a Modimo le bohlale bja gagwe. Gobane se se bonalago nke ke bošilo bja Modimo ke se bohlale go phala bohlale bja batho; le se se bonalago nke ke bofokodi bja Modimo se tiile go phala go tia ga batho. Banabešo, nke le naganeng ka se le bego le le sona mola Modimo a le bitša. Ge go iwa ka tebelelo ya batho, ga se ba bakae mo gare ga lena ba e bego e le dihlalefi, goba ba na le maatla, goba e le ba madi a bogoši setšhabeng. Modimo o kgethile bao go thwego ke mašilo gore a leše dihlalefi dihlong, a kgetha bao go thwego ke bafokodi gore a leše ba maatla dihlong. O kgethile babotlana le banyatšegi le ba go thwego ga se selo gore a fediše ba go thwego ke ba mohola. Ka gona, ga go yo a ka ikgantšhago pele ga Modimo. Gomme ke yena Modimo yo a le dirilego ba tee le Kriste Jesu, le gona o mo dirile bohlale bja rena. Ka yena re a lokafatšwa; re ba setšhaba se se kgethilwego ke Modimo gomme ra lokollwa sebeng. Ke ka baka leo Mangwalo a Makgethwa a rego: “Yo a ikgantšhago a ikgantšhe ka tše di dirilwego ke Morena.” Banabešo, mola ke le etetše go tlo tsebagatša leano la Modimo le le bego le sešo la tsebja, ga se ka ipontšha ke le seboledi goba sehlalefi. Ke ile ka fetša le pelo gore ge ke na le lena ke tla bolela fela ka tša Jesu Kriste, gagolo tša ge e bile mmapolwa sefapanong. Ka gona, mola ke tlile moo go lena ke be ke fokola ke bile ke thothomela ka letšhogo, gomme le thuto ya ka le molaetša ke be ke sa le botše tšona ka bothakga bja seboledi le bohlale bja batho, eupša ke be ke le botša tšona ka bohlatse bjo bo bontšhago maatla a Moya wa Modimo. Ka gona, tumelo yeo ya lena ga se ya go ikanya bohlale bja batho, eupša ke ya go bota maatla a Modimo. Bohlale bjona ke a bo bega, ke bo begela ba ba kwešišago tša moya. Fela ga se bohlale bja batho ba mehleng yeno goba bja babuši ba lona – babuši ba ba lobago maatla a bona a go buša. Bohlale bjo ke bo bolelago ke bohlale bja Modimo bjo bo sa tsebjego, bjo bo fihletšwego batho, eupša bjo a bego a re lotetše bjona le pele ga ge a hlola lefase, gore re tle re be le yena letagong. Ga go mmuši wa mehleng yeno yo a tsebilego bohlale bjo. Ge ba ka be ba bo tsebile, ba ka be ba ile ba se bapole Morena wa letago sefapanong. Eupša go bjalo ka ge Mangwalo a Makgethwa a bolela a re: “Tše motho a sego a di bona goba a di kwa goba a gopola gore di ka kgonega, ke tšona tše Modimo a di lokišeditšego ba ba mo ratago.” Eupša rena Modimo o re utolletše tšona ka Moya wa gagwe, gobane wona Moya o fetleka tšohle, ešita le yona merero ye e sa tsebjego ya Modimo. Gobane ke mang yo a tsebago tša motho, ge e se yena mong? Ka mokgwa wo mobjalo, tša Modimo le tšona ga go motho yo a di tsebago, ge e se wona Moya wa Modimo. Rena ga se ra fiwa moya wa go buša batho ba lefase; re filwe Moya wa go tšwa go Modimo gore re tle re tsebe tše re di filwego ke Modimo ka kgaugelo ya gagwe. Gomme tšona re di bolela e sego ka polelo ye e rutwago ka bohlale bja batho, eupša ka polelo ye e rutwago ke Moya, re hlalošetša bao ba laolwago ke Moya wa Modimo ditaba tša moya. Yo a sa laolwego ke Moya wa Modimo ga a amogele tša Moya. Go yena ke bošilo, gomme ga a kgone go di kwešiša, ka gobane di lebelelwa fela ka leihlo la Moya. Eupša yo a laolwago ke Moya wa Modimo o kwešiša tšohle, etšwe yena a sa kwešišwe ke motho. Gape le Mangwalo o Makgethwa a re: “Kgane ke mang yo a tsebago tše Morena a di naganago mo a ka kgonago go mo eletša?” Eupša rena re nagana bjalo ka Kriste. Ge e le nna, banabešo, ke be ke sa kgone go bolela le lena wa go bolela le batho ba ba laolwago ke Moya wa Modimo; ke be ke bolela le lena wa go bolela le batho ba nama, wa go bolela le lena mo nkego le bana mo go tša tumelo ya Sekriste. Ke be ke le fepa ka lebese, e sego ka dijo tše di tiilego, ka gobane le be le sešo la di lokela. Ešita le gonabjale ga sešo la di lokela, gobane le sa phela bjalo ka batho ba nama. Ge le tsebafelana ebile le fapana, na ga se gona go bontšha gore le sa le batho ba nama, ba ba phelago ka mokgwa wa ba lefase? Ge yo mongwe a re: “Nna ke wa Paulose,” mongwe a re: “Nna ke wa Apolose,” na ga se gona ge le le batho ba nama? Etse Apolose yo ke mang? Paulose yena? Ke bahlanka ba Modimo ba le dumetšego ka bona, go ya ka mo Morena a filego yo mongwe le yo mongwe wa bona ka gona. Nna ke bjetše peu, Apolose a e nošetša; eupša wa go e mediša e bile Modimo. Ka gona, wa go e bjala le wa go e nošetša ga ba balwe, go balwa Modimo, ka gobane ke yena a e medišago. Yo a bjalago le yo a nošetšago ba a swana; mongwe le mongwe o tla putsetšwa ke Modimo mošomo wo a dirilego. Gobane rena re badirišani mošomong wa Modimo, gomme lena le tšhemo ya Modimo, ebile ke lena moago wa Modimo. Go ya ka mpho ye Modimo a mphilego yona ka kgaugelo ya gagwe ke dirile bjalo ka moagi wa bokgoni ka bea motheo, gomme yo mongwe o aga godimo ga wona. Fela mongwe le mongwe a hlokomele ka mo a agago ka gona, gobane ga go yo a ka beago motheo wo mongwe ka ntle le wo o beilwego wo, e lego yena Jesu Kriste. Ba bangwe ba ka aga motheong wo ka gauta goba ka silibera goba ka magakabje; ba bangwe ba ka aga ka dikota goba ka mabjang goba ka mahlaka. Modiro wa yo mongwe le yo mongwe o tla bonagala mohla Letšatši la Kriste le o utolla. Gobane ka Letšatši leo mollo o tla utolla modiro wa motho yo mongwe le yo mongwe; mollo o tla lekola mediro ya batho wa bontšha boyona bja yona. Ge se se agilwego motheong wo se ka palela mollo, moagi wa sona o tla fiwa moputso. Eupša ge se ka swa, gona moagi wa sona o tla loba, eupša yena mong o tla phologa, fela go phologa ga gagwe gwa ba bjalo ka ge nke o hlakodišitšwe a eswa. Kgane ga le tsebe gore ke lena tempele ya Modimo, le gore Moya wa Modimo o dula ka go lena? Gape motho ge a senya tempele ya Modimo, le yena Modimo o tla mo senya. Gobane tempele ya Modimo ke ye kgethwa, gomme lena ke lena tempele yeo. Motho a se ke a iphora. Ge mo gare ga lena go na le yo a itsebago e le sehlalefi go ya ka tša lefase, a a itire lešilo, gore e tle e be sehlalefi sa mmannete. Gobane se batho ba lefase ba bonago e le sa bohlale, Modimo yena o bona e le sa bošilo. A ke re le Mangwalo a Makgethwa a re: “Modimo o tanya bahlale ka mahlajana a bona”? Gape a re: “Morena o tseba ge megopolo ya bahlale e le lefeela.” Ka gona, go se be le yo a kgantšhago mediro ya batho, gobane dilo tšohle ke tša lena, le ge e ka ba Paulose goba Apolose goba Kefase goba lefase, goba bophelo goba lehu, goba tša gonabjale goba tša ka moso – tšeo ka moka ke tša lena, gomme lena le ba Kriste, mola Kriste e le wa Modimo. Motho a a re bone re le bahlanka ba Kriste, ba ba beilwego balebeledi ba diphihlo tša Modimo. Se segolo se se nyakegago go balebeledi ba ke gore motho a tshepege. Ge e le nna, go ahlolwa ke lena goba ke kgoro ye nngwe, ga se taba ye e ntshwenyago; ga ke re le nna mong ga ke ikahlole? Ga ke bone phošo ye nka bago ke e dirile, fela ka go realo ga se gore ke re ke lokile. Yo a nkahlolago ke Morena. Ka gona, le se ke la ahlola motho pele ga ge nako ya gona e fihla, pele Morena a etla, yena a tlago utolla tše di utilwego ka leswiswing, tše di lego ka dipelong tša batho a di tšweletša nyanyeng. Ya ba gona motho mang le mang a retwago ke Modimo ka mo go mo lebanego. Banabešo, ditaba tše ke di swantšhitše ka nna le Apolose go hola lena, gore le ithute ka rena se se šupšago ke polelo ye e rego: “Go se ke gwa fetišwa se se ngwadilwego ka Mangwalong a Makgethwa.” Motho wa lena a se ke a ikgantšha ka yo mongwe, a nyatša yo mongwe. Kgane ke mang yo a rilego o phala ba bangwe? Ke eng se o nago le sona se o sego wa se fiwa ke Modimo? Bjale ge o se filwe o reng o ikgantšha, mo nkego ga se wa se fiwa? Ga ke re tšohle tše le di nyakago le šetše le na le tšona? Gape le šetše le humile. Dikgoši ke lena, e sego rena! Nke nkabe ka nnete le le dikgoši, gore le rena re tle re be dikgoši le lena! Gobane ke bona nke rena baapostola Modimo o re beile ba moragorago, mo nkego re batho ba ba ahloletšwego lehu, re bogwa ke barongwa le batho ka moka ba lefase. Rena re mašilo ka baka la Kriste, kganthe lena le ba bohlale ka go ba ba tee le Kriste! Rena re a fokola, mola lena le tiile! Lena le a hlompšha, mola rena re nyatšwa! Le gonabjale re sa bolawa ke tlala le lenyora; re hlagaletšwe; re a bethwa; re ebela le naga; re itapiša ka go šoma ka diatla. Ge batho ba re senya maina, re a ba šegofatša; ge ba re hlomara, re a kgotlelela; ge ba re roga, re a ithapeletša. Re bjalo ka thogorogo ya lefase; go fihlela le gonabjale re etša ditlakala tša lefase. Ditaba tše ga ke le ngwalele tšona go le hlabiša dihlong, eupša ke le ngwalela tšona go le ruta bjalo ka bana ba ka ba ke ba ratago. Gobane le ge le ka ba le baruti ba diketekete mo bophelong bja lena bja Sekriste, ga le na le botatagolena ba bantši. Gobane bophelong bja lena bja Sekriste tatagolena ke nna, ka ge ke le begetše Taba ye Botse. Ka gona, ke le kgopela gore le nkekiše. Ke ka baka leo ke le rometšego Timotheose, yo go tša Bokriste e lego morwa wa ka yo ke mo ratago, gape yo a botegago. Yena o tla le gopotša tša maitshwaro a ka ka ge ke le wa Kriste Jesu, ao ke a rutago diphuthego tšohle mo gohle. Ba bangwe ba lena ba a ikgantšha mo nkego nka se sa tlo le etela. Fela ge Morena a ratile, kgauswinyana ke tla be ke le etela, gomme ke tla nyakišiša ka bonna se bona ba kgonago go se dira, e sego fela go se bolela. Gobane motho ge a bušwa ke Modimo o bonagala ka tše a di dirago, e sego ka tše a di bolelago. Na lena le kganyogang? Le kganyoga gore ke tle go lena ka thupa, goba ke tle ka moya wa lerato le wa boleta? Go kwagala gore moo go lena bohlola bo a šiiša, bohlola bjo le go baditšhaba bo sego gona, bja ge motho a robala le mosadi wa tatagwe. Lena le ikgantšha ka taba ye, kganthe e be e swanetše go le nyamiša. Motho yo a dirago taba ye bjalo a rakwe phuthegong. Nnaena le ge ka setopo ke le kgole le lena, ka pelo gona ke na le lena, gomme motho yo a dirago taba ya mohuta woo ke šetše ke mo ahlotše ka maatla a ke a filwego ke Morena wa rena, Jesu Kriste, go no swana le ge nkabe ke le moo. Ge le kopane mmogo le nna ka pelo ke kopane le lena, le maatla a Morena wa rena, Jesu, a le mo go rena, *** motho yoo a gafelwe Sathane gore mmele wa gagwe o fedišwe, gore moya wa gagwe o tle o phološwe ka Letšatši la Morena. Go ikgantšha ga lena ga go botse. Kgane ga le tsebe gore komelo ye nyenyane e bediša hlama yohle? Lahlang hlama ya kgale, e lego sebe, gore le tle le be ba ba hlwekilego. Ke mo le tlago ba bjalo ka hlama ye mpsha ye e se nago komelo, ye le bjale le lego yona. Gobane Kriste, Kwanyana ya rena ya Paseka, o hlabilwe. Ka gona, a re bineng Monyanya wa rena wa Paseka e sego ka go ja senkgwa se se nago le komelo ya kgale ya sebe le bokgopo, eupša ka go ja senkgwa se se hlokago komelo, e lego nnete le therešo. Ka lengwalo le nkilego ka le ngwalela lona ke ile ka le botša gore le se ke la ikopanya le difebe. Ga se gore ke be ke era baditšhaba ba difebe, goba ba megabaru, goba ba bahlakodi, goba ba go khunamela medingwana. Ge nkabe ke be ke era bona, nkabe e le setšha ke be ke re le tloge mo lefaseng. Se ke bego ke se bolela ke gore le se ke la ikopanya le motho yo a ipitšago modumedi, etšwe e le sefebe goba sejato goba sekhunamelamedingwana goba mpheane goba setagwa goba mohlakodi. Wa mohuta woo yena le go ja naye le se ke la ja naye. Bao e sego badumedi bona ke tla be ke ba ahlolelang? Gape yo a tlago ba ahlola ke Modimo. Ga ke re badumedi ba phuthego ya lena bona go lebane gore le ba ahlole? Gape Mangwalo a Makgethwa a re: “Tlošang yo mobe mo go lena.” Ge yo mongwe wa lena a fapane le modumedikayena, o reng a yo ahlolwa ke baahlodi ba baditšhaba, a sa ahlolwe ke badumedikayena? Kgane ga le tsebe gore badumedi ke bona ba tlago ahlola lefase? Gomme ge eba le tlilo ahlola lefase, melatwana ye menyenyane yona e ka napa ya le palela? Kgane ga le tsebe gore le barongwa ba tlilo ahlolwa ke rena? Ge e le go ahlola tša lefase gona, ga re sa go bolela. Na ruri le ka nama la re ge go hlagile taba tša mohuta wo la yo lamolwa ke batho ba ba nyatšwago ke phuthego? Ruri ga le na dihlong! Le ra gore moo gare ga lena go hlokega le o tee yo bohlale yo a kago le lamola ge modumedi a fapane le mongwekayena? Bjale modumedi o reng a iša mongwekayena tshekong mme ba ahlolwa ke baditšhaba? Gabotsebotse go išana tshekong moo ga lena go bontšha gore le a palelwa. Le reng le sa upše la dumela go fošetšwa? Le reng le sa upše la dumela go hlakolwa? Bjale šemoo ge, ke lena le fošago gape le hlakolago, gomme seo le se dira badumedikalena. Na ga le tsebe gore yo mobe a ka se ye legodimong? Le se ke la iphora; difebe le bakhunamelamedingwana le diotswa le banna ba go robala bannakabona le mahodu le dijato le ditagwa le bafeane le bahlakodi ba ka se ye legodimong. Etse ba bangwe ba lena ba be ba le bjalo. Eupša le hlwekišitšwe, le kgethwafaditšwe, le lokafaditšwe ka Morena Jesu Kriste le ke Moya wa Modimo wa rena. Go thwe: “Ke dumeletšwe tšohle.” Go bjalo; fela ga se gore tšohle di na le mohola. Le ge ke dumeletšwe tšohle, nka se dumele go laolwa ke se sengwe sa tšona. Gape go thwe: “Dijo ke tša mpa, mpa le yona ke ya dijo.” Gona go bjalo; fela Modimo o tlilo fediša dijo le mpa bobedi. Mmele ga se wa bofebe, ke wa go hlankela Morena; gomme mmele o laolwa ke yena Morena. Modimo o tsošitše Morena bahung, gomme le rena o tla re tsoša ka maatla a gagwe. Kgane ga le tsebe gore mebele ya lena ke ditho tša Kriste? Na bjale nka dira ditho tša Kriste ditho tša segwebakathobalo? Le go leka! Afa le a tseba gore motho yo a kgomanago le segwebakathobalo e ba mmele o tee le sona? Gape Mangwalo a Makgethwa a re: “Monna le mosadi ka babedi e tla ba mmele o tee.” Eupša yo a ikopanyago le Morena e ba o tee le yena ka moya. Tšhabang bofebe. Tše dingwe dibe ka moka tše motho a di dirago ga di amane le mmele wa gagwe, eupša yo a febago yena o senyetša mmele wa gagwe. Kgane ga le tsebe ge mebele ya lena e le tempele ya Moya wo Mokgethwa wo o phelago mo go lena, wo le o filwego ke Modimo? Gape ga le sa le ba lena beng, Modimo o le rekile, gomme bjale le ba gagwe. Ka gona mebele ya lena le e šomišetše go tumiša Modimo. Bjale mabapi le taba tšela le nngwaletšego tšona ke re: Monna o dira gabotse ge a sa nyale. Eupša ka ge bofebe bo iphile maatla ka mokgwa wo, monna yo mongwe le yo mongwe a a be le mosadi yo e lego wa gagwe, le mosadi yo mongwe le yo mongwe a be le monna yo e lego wa gagwe. Monna a fe mosadi wa gagwe ditshwanelo tša go sepetša madi a mmele, le mosadi a fe monna wa gagwe ditshwanelo tša go sepetša madi a mmele. Mosadi ga a laole mmele wa gagwe, o laolwa ke monna; le monna ga a laole mmele wa gagwe, o laolwa ke mosadi. Le se ke la timana thobalo, ka ntle le ge le kwane ga sebakanyana gore le iphe nako ya go rapela, eupša ka morago le boelane, gore Sathane a se tlo le diriša sebe ka ge le sa kgone go itshwara. Ge ke realo ga ke le beele molao, ke dio le eletša. Gabotse ke duma ge bohle le ka be le etša nna; fela yo mongwe le yo mongwe o na le mpho ye a e filwego ke Modimo ka kgaugelo ya gagwe – mongwe o na le ye, mongwe o na le yela. Ge e le bao ba sego ba nyala le bahlologadi, go bona ke re go ka ba kaone ge ba ka dula ba se ba nyala ba etša nna. Eupša ge ba sa kgone go itshwara, a ba nyale; gobane go kaone go nyala go na le go fišwa ke tumo. Ge e le ba ba nyetšego bona ke ba swaretše molao wa go tšwa go Morena, e sego go nna: Mosadi a se ke a hlala monna wa gagwe; eupša ge a ka hlala, a dule a se a nyalwa, goba a boelane le monna wa gagwe; le monna a se ke a hlala mosadi wa gagwe. Ba bangwe ba botšwa ke nna, e sego Morena, ke re: Ge monna wa modumedi a nyetše mosadi yo e sego modumedi mme mosadi yoo a dumela go no dula naye, monna yoo a se ke a mo hlala. Le mosadi ge a nyetšwe ke monna yo e sego modumedi mme monna yoo a dumela go no dula naye, mosadi yoo a se ke a mo hlala. Gobane monna yo e sego modumedi o kgethwafatšwa ke go nyala mosadi yoo wa gagwe wa modumedi; le mosadi yo e sego modumedi o kgethwafatšwa ke go nyalwa ke monna yoo wa gagwe wa modumedi. Gape ge go ka be go se bjalo bana ba bona ba ka be ba swana le bana ba baditšhaba; eupša bjale ba kgethwafetše. Fela ge yo e sego modumedi a nyaka go hlala, a a hlale. Ge go bile bjalo, monna goba mosadi wa modumedi ga a sa tlemilwe ke lenyalo leo. Modimo o le biditše gore le phele le sa lwe. Wena mosadi wa modumedi, o tseba bjang gore o ka phološa monna wa gago? Le wena monna wa modumedi, o tseba bjang gore o ka phološa mosadi wa gago? Motho o swanetše go phela bophelo bjo a bo abetšwego ke Morena, a dule a le seo a bego a le sona mola Modimo a mmitša. Ke sona se ke se rutago diphuthego ka moka. Ge motho a biditšwe ke Modimo a bolotše, a se ke a leka go fihla leswao la lebollo. Ge a biditšwe e le lešoboro, a se ke a nyaka go bolla. Gobane go bolla le go se bolle ga se selo; tabakgolo ke go phetha melao ya Modimo. Motho a a dule a le maemong ao a bego a le mo go ona mola a bitšwa ke Modimo. Ge o biditšwe o le lekgoba, o se tshwenyege; eupša ge o ka kgona go lokologa bokgobeng, o se ganelele. Gobane lekgoba le le biditšwego ke Morena, ke molokologi wa Morena; le molokologi yo a biditšwego ke Morena, ke lekgoba la Kriste. Modimo o le rekile, gomme bjale le ba gagwe, ka gona le se ke la ba makgoba a batho. Banabešo, yo mongwe le yo mongwe a a dule a direla Modimo maemong ao a bego a le mo go ona mola Modimo a mmitša. Bjale, mabapi le taba ye ya ba ba sego ba nyala, ga ke na molao wa go tšwa go Morena, ke dio le eletša ka ge ka kgaugelo ya Morena ke le motho yo a tshepegago. Ge ke lemoga mathata a mehleng yeno ke bona go le kaone gore motho a itulele seemong se a lego mo go sona. Ge o na le mosadi, o se leke go mo hlala; ge o se naye, o se nyake go nyala. Fela le ge o ka nyala ga se gore o tla be o dira sebe; le mosadi yo a se nago monna, ge a ka nyalwa o tla be a sa dire sebe. E no ba gore ke rata go le phephiša mathata a le tlago ba le ona ge le nyetše. Se ke le botšago sona, banabešo, ke gore ga re sa na nako ye ntši, gomme go tloga bjale ba ba nago le basadi ba itshware bjalo ka ge nke ga ba nabo; ba ba llago ba be bjalo ka ge nke ga ba lle; ba ba thabilego ba itshware bjalo ka ge nke ga se ba thaba; ba ba rekilego selo ba be bjalo ka ge nke ga ba na le sona; ge le šoma ka dilo tša lefase le bonale le se ba di le swareletšego. Gobane lefase le, ka mo le bonalago ka gona, le a fela. Ke rata ge le sa dule le balabala. Monna yo a sego a nyala o kgothalela tša Morena, ka mo a ka mo kgahlago ka gona. Yo a nyetšego yena o kgothalela tša lefase, ka mo a ka kgahlago mosadi wa gagwe ka gona, gomme o pelopedi. Mosadi yo a sego a nyalwa le kgarebe ba kgothalela tša Morena, gore ba tle ba kgethwafale mmeleng le moyeng. Yo a nyetšwego yena o kgothalela tša lefase, ka mo a ka kgahlago monna wa gagwe. Ke realo e le ge ke rata go le hola, e sego go le beela mellwane. Ke rata ge le phela ka mo go lebanego, le ikgafela go hlankela Morena ka dipelo tša lena ka moka. Ge motho a bona gore ga a dire gabotse ge a lesa morwedi wa gagwe a fetwa ke lebaka la bokgarebe a se a nyalwa, a a phethe thato ya gagwe. Ga a dire sebe ge a mo nyadiša. Eupša ge motho a feditše le pelo ka boyena a se na se se mo gapeletšago go se nyadiše morwedi wa gagwe, a kgona go itshwara mme a ikemišeditše go se mo nyadiše, o tla be a dira gabotse go se mo nyadiše. Ka gona, yo a nyadišago lekgarebe la gagwe o dira gabotse, fela yo a sa le nyadišego o sa mo phala. Mosadi yo a nyetšwego o tlemagane le monna wa gagwe ge monna yoo a sa phela, eupša ge a ka hwa, gona mosadi o lokologile go ka nyalwa ke monna yo mongwe yo a mo ratago, segolo e be modumedi. Eupša ge a ka itulela a le bjalo, a ka iketla le go feta. Ke ka mo nna ke bonago ka gona, gomme ke a kgolwa le nna ke na le Moya wa Modimo. Bjale ke tla tabeng tšela le nngwaletšego tšona mabapi le nama ya sedimo. Re a tseba gore bohle re na le tsebo ya taba ye, fela tsebonyana ya mohuta woo e fa motho makoko, kganthe lerato lona le a mo aga. Ge motho a gopola gore o tseba selo, nnete ke gore ga a se tsebe ka mo go mo swanetšego. Eupša ge motho a rata Modimo o tsebja ke yena. Ka fao mabapi le go ja nama ya sedimo ke re: Re a tseba gore mo gohle lefaseng modimo wa seswantšho ga se selo; re tseba le ge go se na Modimo wo mongwe ntle le yena Modimo fela. Le ge eba go na le dilo tše di bitšwago “medimo”, e ka ba legodimong goba lefaseng, bjalo ka ge ka nnete “medimo” ya mohuta woo e le ye mentši le “barena” ba gona ba se kaaka, rena Modimo wa rena ke o tee, yena Tate, Mohlodi wa dilo ka moka, yo re mo phelelago; le Morena ke o tee, yena Jesu Kriste, yo Modimo a hlodilego tšohle ka yena, yo re phelago ka yena. Fela ga se mang le mang yo a tsebago taba ye. Ba bangwe, ka ge ba tlwaetše medimo ya diswantšho, le gonabjale ba sa bona dinama tšeo e le sedimo; tumelo ya bona ga sešo ya tia gabotse, gomme ge ba eja nama ya sedimo ba bona nke ba itšhilafatša moyeng. Fela go Modimo ga re batametšwe ke dijo, gobane ge re sa je ga re lobe selo, le ge re eja ga re holege ka selo. Le ge go le bjalo, le hlokomele gore bolokologi bja lena bja go ja nama ya sedimo bo se wetše sebeng bao ba fokolago tumelong. Gobane ge yo a fokolago tumelong a ka bona wena o nago le tsebo ya taba ye o eja ka tempeleng ya modimo wa seswantšho, na a ka se hlohleletšwe ke seo go ja nama ya sedimo? Ka gona, modumedi yoo wa go fokola tumelong, yo Kriste a mo hwetšego, o tla lahlega ka baka la tsebo yeo ya gago. Ka tsela yeo, ka go fošetša modumedikawena le go fokotša tumelo ya gagwe ye e sešogo ya tia gabotse, o tla be o fošetša Kriste. Ka gona, ge eba ka se ke se jago ke diriša modumedikanna sebe, gona nka se sa tsoga ke jele nama, gore ke se ke ka diriša modumedikanna sebe. Kgane nna ga ke molokologi? Kgane ga ke moapostola? Kgane ga se ka bona Jesu, Morena wa rena? Ga ke re lena le badumedi ka baka la modiro wa ka wo ke o diretšego Morena? Le ge ba bangwe ba sa ntsheme moapostola, lena le ntshema yena. Ka ge le phela le le ba tee le Morena, lena ka bolena le dihlatse tša gore ke nna moapostola. Ge batho ba ntshekiša ke fetola ka go re: Na ga ke na tokelo ya go ja le go nwa? Kgane ga ke na tokelo ya go šika le mosadi wa modumedi e le mogatšaka, ka etša baapostola ba bangwe le bana ba boMorena le Petrose? Na ke nna le Barnabase fela ba re swanetšego go šomela tša go re phediša? Na mohlabani ke ofe yo a itefelago tše a phelago ka tšona ntweng? Ke mang yo a rego go bjala merara a se tle a ja diterebe tša yona? Modiša yena ke ofe yo a sa jego maswi a mohlape wo a o dišago? Ge ke realo ga se gore ke bolela fela tše di tsebjago ke mang le mang, gobane le molao wa Moshe o realo. Ka molaong woo go ngwadilwe go re: “Ge o fola mabele ka pholo o se e bofe molomo.” Etse dipholo Modimo o iša kae ka tšona? Ga ke re gabotse ge a realo o ra rena? Gape taba ye e ngwaletšwe rena. Sa molemi ke go lema a holofetše puno, le mmuni sa gagwe ke go buna a gabile go ja mabele a gagwe. Etse go le begela Ebangedi ga rena e bile go bjala peu ya tša go le phediša moyeng. Na e ka ba phošo bjang ge bjale re buna mo go lena tša go re phediša? Ge eba ba bangwe ba loketšwe ke go holega mo go lena, gona rena re loketšwe le go ba feta. Fela ga se ra ka ra dira go ya ka mo re loketšwego ka gona. Re ile ra no kgotlelela tšohle, gore Taba ye Botse ya Kriste re se e šitiše ka mokgwa ofe le ofe. Ga ke re le a tseba gore ba ba šomago ka Tempeleng ba ja tša ka Tempeleng, le ba ba dirago dihlabelo aletareng ba abelwa tšona tša aletareng? Agaa, babegi ba Ebangedi le bona Morena o laetše gore ba phele ka yona Ebangedi. Nnaena le e tee ya ditokelo tšeo ga se ka ka ka ikhola ka yona; le gona ga se gore ditaba tše ke di ngwalela gore go tle go holege nna ka ditokelo tšeo. Ebile go ka ba kaone gore ke hwe! Le go itheta ga ka nka se go amogwe ke motho! Go bega Ebangedi ga ka ga se taba ye nka ithetago ka yona, ka gobane ke tlemegile go e bega. Gomme nka ba yo madimabe kudu ge nka se e bege. Ge nkabe ke dira mošomo wo ka go rata ga ka gona nkabe ke nyaka moputso; eupša ke o dira ke tlemegile, ka gobane ke o filwe ke Modimo. Bjale moputso wa ka ke eng? Moputso wa ka ke gona go bega Taba ye Botse ye ntle le tefo, ntle le go nyaka go ikhola ka mošomo wo wa ka wa go e bega. Le ge ke le molokologi, ke se lekgoba la motho, ke itirile lekgoba la bohle, gore ke tle ke sokollele ba bantši go Kriste. Ge ke na le Bajuda ke phela bjalo ka Mojuda, gore ke ba sokolle; gomme le ge nna ke sa bušwe ke melao ya Moshe, ge ke le gare ga bao ba bušwago ke yona, ke phela bjalo ka ge nke ke bušwa ke yona, gore ke tle ke ba sokolle. Ka yona tsela yeo, ge ke na le bao ba sa bušwego ke melao ya Moshe, ke phela bjalo ka yo a sa bušwego ke melao yeo, gore ke tle ke sokolle bao ba sa bušwego ke yona. Ka go realo ga se gore ga ke phethe melao ya Modimo; gabotsebotse ke bušwa ke molao wa Kriste. Ge ke na le bafokodi tumelong, le nna ke itira mofokodi, gore ke ba sokolle. Ke dira gore batho bohle ba mpone ke swana le bona, e le ge ke gabile gore ka mo go kgonegago go be le ba ke ba phološago. Tše ka moka ke di dira ka baka la Ebangedi, gore le nna ke tle ke be yo mongwe yo a kgathilego tema mo mošomong wo. Ga ke re le a tseba gore ba ba šianago mokatong ba kitima ka moka, eupša sefoka se tšewe ke o tee? Le lena bophelong bja lena bja sedumedi katanang le etše mokati yo a gakalago, gomme le tla thopa sefoka. Mang le mang yo a itlwaetšago go šiana o itima tše dintši, a gabile go tlo thopa sefoka se se senyegago; kganthe rena re itima tše dintši re gabile go tlo thopa sefoka se se sa senyegego. Ka baka leo, nna ga ke kitime wa go tlaruma; ga ke lwe wa go kgeila phefo ka matswele. Ke laola mmele wa ka ka o tlwaetša, gore ke se re ke rutile ba bangwe bophelo bja sedumedi, nna mong ka tla ka hwetšwa ke ronwa ke bophelo bjoo. Banabešo, le se ke la lebala gore borakgolokhukhu bohle ba rena ba ile ba šireletšwa ke leru, bohle ba ile ba tshela lewatle ba bolokegile. Bohle ba ile ba kolobetšwa ka lerung le ka lewatleng gore e be balatedi ba Moshe. Bohle ba ile ba ja sejo se tee sa semoya, ba nwa le seno se tee sa semoya. Ba ile ba nwa seno sa go tšwa leswikeng la semoya le le bego le sepela nabo, gomme leswika leo e be e le Kriste. Le ge go le bjalo, bontši bja bona bo ile bja se kgahle Modimo, gomme ba hwa ba gašagana lešokeng. Tšeo ka moka di diregile go re laya gore re se dume dilo tše mpe go etša bona. Le gona le se ke la khunamela medingwana boka ba bangwe ba bona, bjalo ka ge Mangwalo a Makgethwa a re: “Setšhaba sa dulela go ja le go nwa, sa feleletša ka go bina tša go se tsebalege.” Rena re se ke ra feba, ra etša ba bangwe ba bona ba ba ilego ba feba, gomme ka tšatši le tee gwa bolawa ba dikete tše masome a mabedi le tše tharo. Re se ke ra leka Kriste, ra etša ba bangwe ba bona ba ba ilego ba mo leka, gomme ba bolawa ke dinoga. Le se ke la ngongorega, la etša ba bangwe ba bona ba ba ilego ba ngongorega, gomme ba bolawa ke Morongwammolai. Tšeo ka moka di ile tša ba hlagela e le go laya ba bangwe, gomme tša ngwalelwa go re lemoša, rena re phelago nakong ya kgauswi le bofelo bja lefase. Ka gona, yo a ikwago a sa tekateke tumelong, a itote gore a se we. Ga se la ka la tlelwa ke moleko wo o palelago batho. Modimo o a botega, gomme a ka se le lese le lekwa ka tše di kago le palela. Ge le wetšwe ke moleko, yena o tla le fa maatla a go o kgotlelela, ya ba gona go le kgontšha go o fenya. Bjale ge, banabešo, le tlogele go khunamela medingwana. Ke bolela le lena ke le tšea le le batho ba ba kwešišago; lebeledišišang se ke se bolelago. Kgane senwelo se re se nwago Selalelong sa Morena, se re tumišago Modimo gape re mo lebogago ka baka la sona, ge re se nwa na ga se gona ge re eba ba tee ka madi a Kriste? Le sona senkgwa se re se ngwathago, na ge re se ja ga se gona ge re eba ba tee ka mmele wa Kriste? Ka ge senkgwa e le se setee, rena ka moka, le ge re le ba bantši, re mmele o tee, ka gobane ka moka re abelana sona senkgwa se tee se. Bonang setšhaba sa Israele: Ga ke re ge ba eja dihlabelo e ba ba tee le Modimo yo a direlwago aletareng? Na e ka ba ge ke realo ke ra gore modingwana goba dihlabelo tše di direlwago wona di na le mohola? Le gatee! Se ke se bolelago ke go re dihlabelo tše baditšhaba ba di dirago, ba di direla bademone, e sego Modimo. Gomme ga ke nyake gore le gwerane le bademone. Le ka se nwe senwelo sa Morena la ba la nwa le sa bademone; le ka se je tša tafola ya Morena la ba la ja le tša bademone. Na e ka ba re nyaka go rumola Modimo? Kgane re mo feta ka maatla? Yo mongwe motho a ka re: “Ke dumeletšwe tšohle.” Go bjalo; fela ga se gore tšohle di na le mohola. A ka re: “Ke dumeletšwe tšohle.” Ke nnete, eupša ga se gore tšohle di tiišetša motho tumelo. Gape motho ga se a swanela go nyaka tša go ikhola, eupša o swanetše go nyaka tša go hola ba bangwe. Tšohle tše di rekišwago borekišetšong bja nama le ka no di ja le sa botšiše mo di tšwago gona, gore le se kokonelwe. Gobane Mangwalo a Makgethwa a re: “Lefase ke la Morena, le tšohle tše di lego mo go lona.” Ge motho wa go se dumele a le memile mme le rata go ya, le je tšohle tše a le fago tšona, le sa botšiše mo di tšwago gona, gore le se kokonelwe. Fela ge motho a ka le botša a re: “Nama ye ke ya sedimo,” gona le se ke la e ja, le e lese ka baka la yoo wa go le botša le ka baka la go hlompha letswalo, ke ra la gagwe, e sego la gago. Yo mongwe a ka botšiša a re: “Na nka napa ka šitišwa ke letswalo la motho yo mongwe go dira se ke se ratago? Ge ke leboga Modimo ka baka la dijo tše a mphago tšona ke tla be ke rogelwang mabapi le tše ke di lebogago?” Ka gona, ge le eja goba le enwa goba le dira se sengwe, tšohle le di direle go tumiša Modimo. Le se ke la kgopiša Bajuda goba bao e sego Bajuda goba phuthego ya Modimo. Le etše nna: nna ke leka go kgahla batho ka moka mo go tšohle tše ke di dirago, ke sa gabe go ikhola, eupša ke gaba go hola batho bohle, gore ba phologe. Ka gona le nkekiše, bjalo ka ge le nna ke ekiša Kriste. Ke a le reta ka gobane ka mehla le a nkgopola ebile le phetha tše ke le rutilego tšona. Fela ke nyaka ge le tseba gore Kriste ke hlogo ya monna, monna ke hlogo ya mosadi wa gagwe, gomme Modimo ke hlogo ya Kriste. Ka gona, monna yo a rapelago goba a begago molaetša wa Modimo a apere selo hlogong, o goboša hlogo ya gagwe, e lego Kriste. Le mosadi yo a rapelago goba a begago molaetša wa Modimo a se a apara selo hlogong, o goboša hlogo ya gagwe, e lego monna wa gagwe; o swana le mosadi yo a bootšwego hlogo. Mosadi ge a sa apare selo hlogong, a a kotwe le moriri, ge. Gomme ka ge go kotwa goba go boolwa hlogo e le taba ya dihlong mo mosading, a a apare selo hlogong. Monna yena ga se a swanela go apara selo hlogong, ka gobane ke yena seswantšho sa Modimo le sa letago la gagwe. Ge e le mosadi yena ke letago la monna, gobane monna ga a tšwe mosading, eupša ke mosadi yo a tšwago monneng. Le gona monna ga se a bopelwa mosadi, ke mosadi yo a bopetšwego monna. Ka gona, ka baka la barongwa, mosadi hlogong o swanetše go bea sešupo sa go bušwa ke monna wa gagwe. Mo bophelong bja rena bja sedumedi mosadi o ithekga ka monna, le monna o ithekga ka mosadi. Gobane bjalo ka ge mosadi a etšwa monneng, monna le yena o tswalwa ke mosadi, gomme tšohle di hlolwa ke Modimo. Lena beng le ka no bona ge eba go lebane gore mosadi a rapele Modimo phuthegong a se a apara selo hlogong. Ga ke re ke taba ye e tsebjago ke batho ka moka gore moriri wo motelele mo monneng o a mo goboša, mola mo mosading moriri wo motelele o mo thakga. Mosadi o filwe moriri wo motelele woo gore e be seaparo. Fela ge motho a ka rata go nganga mo tabeng ye, se nkago mmotša sona ke go re rena goba diphuthego tša Modimo ga re na setlwaedi se sengwe ka ntle le se. Mo tabeng ye ke yago go le botša yona gonabjale ga ke le rete, gobane ge le kopana le etla go rapela, go kopana ga lena go tliša bošaedi go feta bothakga. Sa mathomo, ke kwele gore ge le kopana le le phuthego le ikarola dihlophana tša go se kwane, gomme ke dumela gore taba yeo e ka no ba e le therešo. Ga ke na pelaelo gore moo go lena go swanetše go na le dihlophana, gore ba ba botegago tumelong mo go lena ba tle ba bonagale. Ge le kopana se le se jago ga e sa ba Selalelo sa Morena. Gobane ge le eja, mongwe le mongwe o ja tša gagwe, e be gore bangwe ba bolaišwa tlala, mola bangwe bona ba tagwa. Na ga le na magae moo le kago jela gona la ba la nwela gona? Na le nyatša phuthego ya Modimo la goboša le bahloki? Ke reng go lena? Kgane ke le rete? Aowaa, moo gona nka se le rete! Gobane se Morena a ntaetšego sona, le nna ke se laetše lena, e lego gore Morena Jesu, bošegong bjo a ekilwego ka bjona, o ile a tšea senkgwa, a leboga Modimo, a se ngwathaganya a re: “Se ke mmele wa ka wo o neelwago ka baka la lena. Le dire se e le go nkgopola.” Ka yona tsela yeo ge go seno lewa, a tšea le senwelo a re: “Senwelo se ke kgwerano ye mpsha ye e tiišeditšwego ka madi a ka. Ka mehla ge le se nwa le se nwele go nkgopola.” Seo se ra gore ka mehla ge le eja senkgwa se le enwa le senwelo se le tla be le bega lehu la Morena go fihlela a etla. Ka fao, ge motho a ka ja senkgwa se goba a nwa senwelo sa Morena ka mokgwa wo o sego wa swanela, o tla be a oba molato go mmele wa Morena le go madi a gagwe. Ka gona, motho a itekole pele, a kgone a eja senkgwa seo a enwa le senwelo seo. Gobane ge a ka ja a ba a nwa a sa ele mmele wa Morena hloko, o tla be a itšela a bile a inwela go ahlolwa. Ke ka baka leo moo go lena go nago le ba bantši ba ba fokolago le ba ba lwalago, ba ba hlokafetšego le bona e lego ba bantši. Ge re ka be re thoma ka go itekola, Modimo o be a ka se re tšwe. Fela Morena o a re ahlola, a re otla gore re se tlo tšwiwa gotee le ba ba sa dumelego ba lefase. Ka gona, banabešo, ge le kopana go tlo ja Selalelo sa Morena, le letelaneng. Gomme ge motho a swerwe ke tlala, a je gae pele, gore e se tlo re ge le kopane la ahlolwa. Ge e le tšela tše dingwe ditaba, ke tla di beakanya mohla ke etla. Banabešo, ke rata ge le tseba gabotse mabapi le dimpho tša semoya tše le nngwaletšego mabapi le tšona. Le a tseba gore mola le sa le baditšhaba, le be le arošwa ka mekgwa ye mentši go khunamela medingwana ya go se bolele. Bjale ke nyaka gore le tsebe gore ga go motho yo e ka rego a bušwa ke Moya wa Modimo a re: “Jesu a a rogakwe!” Le gona ga go motho yo a ka rego: “Jesu ke Morena,” ge e se ge a bušwa ke Moya wo Mokgethwa. Dimpho tša semoya ke tša mehuta, eupša ke tša Moya o tee. Le mekgwa ya go direla batho ke ya mehuta, eupša Morena ke o tee yo a laelago badumedi go direla batho. Le mediro ke ya mehuta, eupša Modimo yo a kgontšhago modumedi yo mongwe le yo mongwe go dira mediro ya gagwe ke o tee. Tše di dirwago ke Moya ka modumedi yo mongwe le yo mongwe ke tša go hola bohle. Yo mongwe o fiwa ke Moya go bolela ka bohlale, mola mongwe a fiwa ke wona Moya woo polelo ya tsebo. Yo mongwe o fiwa ke Moya woo tumelo, mola mongwe, ka kgaugelo ya Modimo, a fiwa ke wona dimpho tša go fodiša. Yo mongwe o fiwa ke Moya maatla a go dira mehlolo, mongwe a fiwa maatla a go bega molaetša wa Modimo, mola mongwe a fiwa maatla a go lemoga gore motho o hlohleletšwa ke moya ofe. Yo mongwe o fiwa bokgoni bja go bolela ka mantšu a go se kwešišwe, mongwe a fiwa bokgoni bja go a hlatholla. Tšeo ka moka di dirwa ke wona Moya o tee woo; o abela yo mongwe le yo mongwe mpho ka mo o ratago. Kriste o bjalo ka mmele o tee wo o nago le ditho tše dintši; le ge mmele o na le ditho tše dintši, ditho tšeo di bopa mmele o tee. Le rena ka moka re bjalo; le ge re le Bajuda, goba bao e sego Bajuda, goba makgoba, goba balokologi, re kolobeditšwe ka wona Moya o tee woo ra ba mmele o tee, bohle ra fiwa Moya o tee woo wa dula ka dipelong tša rena. Gobane mmele ka bowona ga se setho se tee, ke ditho tše dintši. Ge leoto le ka re: “Ka ge ke se letsogo, ga ke wa mmele,” ga se go re ka nnete e tla be e se setho sa mmele. Tsebe le yona ge e ka re: “Ka ge ke se leihlo, ga ke wa mmele,” ga se go re ka nnete e tla be e se setho sa mmele. Ge mmele wohle e ka be e le leihlo, go kwa o be o tla go tšea kae? Le ge mmele ka moka e ka be e le tsebe, go dupa o be o tla go tšea kae? Bjale ge, Modimo o beile setho se sengwe le se sengwe mmeleng ka mo a ratilego ka gona. Ge ditho tšohle e ka be e le setho se tee, na mmele o ka be o le gona? Bjale ditho ke tše dintši, fela mmele ke o tee. Ka gona, leihlo le ka se re go letsogo: “Ga ke bote wena!” Le hlogo e ka se re go maoto: “Ga ke bote lena!” Gabotsebotse, ditho tša mmele tše di bonalago nke di fokola go feta tše dingwe, le tšona mmele o di botile; le tšeo re naganago gore ga di na mohola wo mogolo le tšona re di šetša kudu; le tše di sa išwego mahlo le tšona re lebanwe ke go di apeša gabotsebotse, kganthe tše di išwago mahlo tšona ga re itshwenye ka go di kgabiša. Modimo o beakantše mmele bjalo, gore setho se se lebanwego ke tlhompho ye kgolo se hlomphiwe kudu. Ka gona, ga se go re ditho tša mmele di a lwa, eupša di babalelana ka go kwana. Ge setho se sengwe sa mmele se ekwa bohloko, tše dingwe ka moka le tšona di a bo kwa; ge se sengwe se retwa, tše dingwe ka moka le tšona di thaba le sona. Lena le mmele wa Kriste, gomme mongwe le mongwe wa lena ke setho sa wona. Ba bangwe mo kerekeng Modimo o ba file mediro: ba mathomo ke baapostola, ba bobedi ke baprofeta, ba boraro ya ba baruti; gwa latela ba go dira mehlolo, bona ba latelwa ke bao Modimo a ba filego mpho ya go fodiša le ba ba kgonago go thuša ba bangwe mo phuthegong, le ba ba hlahlago ba bangwe, le ba ba bolelago ka mantšu a a sa kwešišwego. Ga se gore bohle ke baapostola, goba baprofeta, goba baruti. Ga se gore ka moka ba dira mehlolo, goba ba na le mpho ya go fodiša malwetši, goba ba kgona go bolela ka mantšu a go se kwešišwe, goba go a hlatholla. Ka gona, le kgothalele gagolo dimpho tše di phalago tše dingwe. Gomme bjale ke le bontšha tsela ye e di phalago ka moka. Le ge nka kgona go bolela mantšu ohle a go se kwešišwe a batho le a barongwa, ge ke se na lerato, ke no swana le tshipi ye e kwetenyago goba moropa wo o tidimetšago. Le ge nka ba le mpho ya go kgona go bega molaetša wa Modimo, le ge nka tseba diphiri ka moka le dilo ka moka, le ge nka ba le tumelo yohle ye e nyakegago go šutiša dithaba, ge ke se na lerato, gona ga ke selo. Le ge nka fa bahloki tšohle tše ke nago le tšona, le ge nka ikgafela go fišwa, ge ke se na lerato, gona ga go nkhole selo. Wa lerato ga a felele motho pelo, ebile ke yo botho; ga a na mona, ga a ikgantšhe, ebile ga a na makoko. Wa lerato ga a dire dihlabišadihlong, ga a nyake go ikhola; ga a selekege fela; ga a sware yo kgopo ka pelo. Ga a thabele bobe, o thabela toka. O kgotlelela tšohle, o dumela tšohle, o holofela tšohle, o pelotelele go tšohle. Lerato ga le fele, kganthe mpho ya go kgona go bega molaetša wa Modimo yona e tla fela, le ya go kgona go bolela ka mantšu a a sa kwešišwego e tla fela, tsebo le yona e tla fela. Gobane tsebo ye re nago le yona e a hlaelelwa, mokgwa wo re begago molaetša wa Modimo ka wona le wona o a hlaelelwa. Eupša mohla go etla seemo sa tše di feletšego, tše di hlaelelwago di tla timelela. Mola ke sa le ngwana, ke be ke bolela bjalo ka ngwana, ke gopola bjalo ka ngwana, ke nagana bjalo ka ngwana; bjale ka gore ke monna, tša bobjana ke di tlogetše. Gonabjale tše re di bonago di etša seswantšho se se ifetšego ka seiponeng; ka nako yeo re tla bona tšohle re lebane le tšona. Gonabjale tše ke di tsebago ke seripanyana fela, ka nako yeo ke tla tseba tšohle ka botlalo bjalo ka ge le nna Modimo a ntseba ka botlalo. Bjale ge, tše di dulago di le gona ke tumelo le kholofelo le lerato, tše tharo tše; gomme sa go di feta ka moka ke lerato. Se le swanetšego go se bea pele ke lerato, le dimpho tša Moya le di fišegele, gagolo mpho ya go bega molaetša wa Modimo. Gobane yo a bolelago ka mantšu a a sa kwešišwego ga a bolele le batho, o bolela le Modimo, ka gobane ga a kwešišwe ke motho. Ka maatla a Moya wa Modimo o bolela tše di sa kwešišwego. Eupša yo a begago molaetša wa Modimo o bolela le batho ka tša go ba hola moyeng, le tša go ba kgothatša, le tša go ba homotša. Yo a bolelago ka mantšu a a sa kwešišwego go ikhola yena mong fela, kganthe yo a begago molaetša wa Modimo yena o hola phuthego yohle. Ke duma ge bohle le ka be le ka bolela ka mantšu a a sa kwešišwego; eupša gagolo ke duma ge le ka be le na le mpho ya go bega molaetša wa Modimo. Gobane motho yo a begago molaetša wa Modimo o na le mohola go fetiša yo a bolelago ka mantšu a a sa kwešišwego, ge e se ge a ka hlatholla se a se bolelago, gore phuthego e holege. Ka gona, banabešo, ge nka tla go lena ke bolela ka mantšu a a sa kwešišwego, ke tla le holang, ntle le ge e le gore ke le botša taba ye ke e utolletšwego ya Modimo, goba ye le sa e tsebego, goba molaetša wa Modimo, goba ke le ruta se sengwenyana? Ge ešita le diletšo tše di sa phelego – e ka ba naka goba harepa – ge di sa letšwe gabotse, motho a ka lemoga bjang koša ye e letšwago? Le phalafala ge e sa lle go kwalagala, ke mang yo a ka itokišetšago ntwa? Le go lena go bjalo. Ge tše le di bolelago ka mantšu a a sa kwešišwego di sa kwešišege, le ka kwešišwa ke mang? Gape tše le di bolelago di tla tšewa ke phefo. Mo lefaseng go na le maleme a mehutahuta, fela ga go le le sa kwešišwego. Eupša ge ke sa kwešiše leleme le le bolelwago, ke tla ba o šele go mmoledi wa lona, le yena a ba o šele go nna. Le go lena go bjalo. Ka ge le fišegela go ba le dimpho tša Moya, le leke gore le atelwe ke tše di holago phuthego. Yo a bolelago ka mantšu a a sa kwešišwego a rapele gore a fiwe mpho ya go kgona go hlatholla se a se bolelago. Gobane ge ke rapela ka mantšu a a sa kwešišwego, go rapela moya wa ka fela, tlhaologanyo yona ga e dire selo. Bjale ke swanetše ke direng? Ke swanetše ke rapele ka moya, ke be ke rapele le ka tlhaologanyo; ke swanetše ke opele ka moya, ke be ke opele le ka tlhaologanyo. Go sego bjalo, ge o ka leboga Modimo ka moya fela, mothofela yo a lego moo thapelong a ka araba bjang thapelo ya gago ya tebogo a re “Amene”, ge a sa kwešiše se o se bolelago? Le ge eba thapelo ya gago ke ye botse, yo mongwe yena ga e mo hole. Nna ke leboga Modimo ge ke le fetiša bohle ka go bolela ka mantšu a a sa kwešišwego. Eupša ge ke le phuthegong ke bona go le kaone gore ke bolele mantšu a mahlano a a kwešišwago, gore ke rute ba bangwe se sengwenyana, go na le gore ke bolele ka mantšu a diketekete a a sa kwešišwego. Banabešo, le se ke la nagana bjalo ka bana; le be bana ka thokong ya bobe, eupša monaganong le be batho ba bagolo. Ka melaong ya Moshe go ngwadilwe gwa thwe: “Ke tla bolela le setšhaba se ka batho ba go bolela maleme a šele le ka melomo ya bašele, le ge go le bjalo ba ka se ntheeletše,” o realo, Morena. Ka gona, go bolela ka mantšu a a sa kwešišwego ke sešupo go bao ba sa dumelego, e sego go bao ba dumelago, kganthe go bega molaetša wa Modimo gona ke sešupo go bao ba dumelago, e sego go bao ba se dumelego. Bjale, ge e ka re ge phuthego yohle e kgobokane mme bohle ba bolela ka mantšu a a sa kwešišwego, gwa tsena bathofela goba batho ba ba sa dumelego, na ba ka se re le a gafa? Eupša ge e ka re mola bohle ba bega molaetša wa Modimo gwa tsena yo a sa dumelego goba mothofela, o tla kokonelwa ke tšohle tše di bolelwago; o tla ahlolwa ke bohle ba a ba kwago. Diphiri tša pelo ya gagwe di tla utologa; o tla itahlela fase ka sefahlego, a khunamela Modimo a bega a re: “Ruri, Modimo o mo go lena!” Bjale go ka thweng, banabešo? Ge le kopane le le phuthego, yo mongwe o na le sefela, mongwe o na le se a ka se rutago ba bangwe, mongwe o na le se a se utolletšwego ke Modimo, mongwe o na le molaetša wo a ka o botšago ba bangwe ka mantšu a a sa kwešišwego, mongwe gape o kgona go hlatholla seo se bolelwago; tšohle e be tša go hola phuthego. Ge go na le ba go bolela ka mantšu a a sa kwešišwego, a e be ba babedi goba ba bararo, e sego go feta fao, le gona ba šielane, gomme go be le wa go hlatholla tše di bolelwago. Eupša ge go se na wa go hlatholla, gona yo a bego a rata go bolela ka mantšu a a sa kwešišwego mo phuthegong a homole, a bolele ge a le noši le Modimo gae. Go ba ba begago molaetša wa Modimo go bolele ba babedi goba ba bararo, ba bangwe e be ba go sekaseka tše di bolelwago. Ge yo mongwe wa ba ba dutšego phuthegong a ka utollelwa se sengwe ke Modimo, yo a bolelago a nape a homole. Bohle le ka no bega molaetša wa Modimo ka go šielana, gore bohle ba ithute se sengwenyana, ba kgothatšege. Babegi ba molaetša wa Modimo ba kgona go itshwara, ba homola, gobane Modimo ga se Modimo wa tlhakatlhakano, ke Modimo wa molao. Bjalo ka ge e le setlwaedi diphuthegong tšohle tša badumedi, ge le kopane le tlilo rapela, basadi ba homole. Ga ba dumelelwe go bolela; ba swanetše go bušwa, ba phethe molao wa Moshe. Ge ba na le taba ye ba nyakago go e tseba, ba botšiše banna ba bona gae. Ke taba ya dihlong ge mosadi a bolela phuthegong. Kgane lentšu la Modimo le thomile moo go lena, goba le tletše lena fela? Ge motho a ka ikwa a na le mpho ya go bega molaetša wa Modimo goba mpho ye nngwenyana ya Moya, a tsebe gore tše ke le ngwalelago tšona di laetšwe ke Morena. Ge a ka se be le taba natšo, Modimo le yena a ka se be le taba naye. Ka gona, banabešo, le fišegele go bega molaetša wa Modimo, gomme le ba ba bolelago ka mantšu a a sa kwešišwego le se ke la ba thibela. Fela tšohle di dirwe ka maleba le ka molao. Banabešo, ke nyaka go le gopotša Taba yela ye Botse ke le begetšego yona la e amogela la ithekga ka yona. Ke yona ye le phološwago ka yona, ge le itshwareletše ka yona e le molaetša wo ke le begetšego wona. Ge le sa itshwarelele ka yona, gona le tla be le dumeletše lefeela. Taba ye bohlokwahlokwa ye ke le boditšego yona, ye le nna ke e boditšwego, ke go re: Kriste o hwile ka baka la dibe tša rena, go ya ka Mangwalo a Makgethwa; le go re o ile a bolokwa, gomme ka morago ga matšatši a mararo a tsoga bahung, go ya ka Mangwalo a Makgethwa; le go re o ile a itšweletša go Kefase, a tla a itšweletša go baapostola ka moka ba lesome le metšo ye mebedi. A tla a itšweletša go balatedi ba gagwe ba go feta ba makgolo a mahlano ka nako e tee, bao bontši bja bona bo sa phelago, le ge ba bangwe ba ithobaletše. A tla a itšweletša go Jakobose, mme ka morago a itšweletša go baapostola ka moka. Mafelelong a tla a itšweletša le go nna, le ge ke swana le motho yo a tswetšwego ka nako ye e sego yona. Gobane nna ke fetwa ke baapostola ka moka ka maemo, ebile ga ke swanelwe le ke go bitšwa moapostola, ka gobane ke be ke hlomere kereke ya Modimo. Eupša ka kgaugelo ya Modimo ke bile se ke lego sona, gomme kgaugelo ye e ntšwetše mohola. Ke šomile go ba feta ka moka, le ge etšwe go be go sa šome nna ka bonna, eupša e le kgaugelo ya Modimo e šoma ka nna. Bjale ge, le ge eba e be e le nna goba bona, woo ke molaetša woo re o begago, gomme ke wo lena le o dumelago. Ka ge molaetša wo re o begago e le wa go re Kriste o tsošitšwe bahung, go tla bjang ge bangwe ba lena ba re bahu ba ka se tsošwe? Ge eba bahu ba ka se tsošwe, gona ke go re Kriste ga se a ka a tsošwa; gomme ge eba Kriste ga se a ka a tsošwa, gona molaetša wo re o begago ke lefeela, le se le se dumelago ke lefeela. Gona ke go re le rena re be re bolela maaka ka Modimo mola re re o tsošitše Kriste bahung. Gobane ge eba bahu ba ka se tsošwe, gona le Kriste Modimo ga se a ka a mo tsoša. Gape ge eba bahu ba ka se tsošwe, ke gore le Kriste ga se a ka a tsošwa. Gomme ge eba Kriste ga se a ka a tsošwa, tumelo ya lena e ka se le hole ka selo, le dibe tša lena ga se tša swarelwa. Le gona ke go re bao ba ithobaletšego ba dumela go Kriste ba timetše. Ge eba go holofela go Kriste ga rena go re hola fela bophelong bjo, gona re ba ba lebanwego ke go kwelwa bohloko go feta bohle lefaseng. Eupša nnete ke go re Kriste o tsošitšwe bahung, a etša thakangwaga ya ba ba ithobaletšego. Gobane bjalo ka ge lehu le tlile ka motho, le tsogo ya ba ba hwilego e tla ka motho. Bjalo ka ge batho ka moka ba ehwa ba tswalane le Adamo, le go tsoga bahung ba tla tsoga ba tswalane le Kriste. Fela yo mongwe le yo mongwe o na le nako ya gagwe ya go tsoga: wa mathomo e bile Kriste; gomme e tla re ge a etla, gwa tsoga bao e lego ba gagwe. Gwa kgona go etla mafelelo a lefase, ge Kriste a tla be a tlilo fediša balaodi ba semoya le magoši a semoya le maatla a semoya ka moka, a neela Modimo, Tatagwe, mmušo. Gobane Kriste o swanetše go buša, go fihlela Modimo a dira gore manaba ohle a Kriste a bušwe ke yena Kriste. Lenaba la mafelelo le le tlago fenywa ke lehu. Gobane Mangwalo a Makgethwa a re: “Modimo o dirile gore tšohle a di gate ka dinao.” Fela ge go thwe “tšohle” go bonala gabotse gore ga go balwe le yena Modimo, yo a dirilego gore Kriste a gate tšohle ka dinao. Eupša mohla tšohle di laolwa ke Kriste, ke mo yena Morwa a tlago ikgafela go laolwa ke Modimo yo a mmeilego Molaodi wa tšohle; gomme yena Modimo o tla laola tšohle ka botlalo. Bjale le reng ka bao ba kolobeletšwago ba ba hwilego? Seo ba se direlang? Ge eba ka nnete bahu ba ka se tsoge, batho bao ba reng ba kolobeletšwa bahu? Le rena re reng re dula re ipeile kotsing? Banabešo, nna ke dula ke lebane le lehu ka mehla! Ge ke realo ke boledišwa ke go kgantšha lena ka bophelo bjo bo ntirilego o tee le Kriste Jesu, Morena wa rena. Ge eba kua Efeso ke be ke elwa mo nkego ke lwa le dibata, ke tutuetšwa fela ke maikutlo a botho, go nthušitšeng? Ge eba bahu ba ka se tsoge, gona a re yeng le polelo ye e rego: “A re jeng, re nweng, gobane gosasa re tla tsoga re hwile!” Le se ke la forwa. Go thwe: “Go gwerana le ba babe go senya mekgwa ye mebotse.” Phafogang, le tlogele dibe. Ke le botša ke le hlabiša dihlong gore ba bangwe moo go lena ga ba tsebe Modimo. Yo mongwe motho a ka no botšiša a re: “Bahu ba tla tsoga bjang? Gona ba tla tsoga ka mmele wa mohuta mang?” Yeo ke potšišo ya botlaela. Seo o se bjalago se ka se mele sa phela se sa ka sa hwa pele. Le gona se o se bjalago ke thorwana fela – e ka ba ya lebele goba ya peu ye nngwenyana; ga se semela ka bosona se se tlilogo gola. Ke Modimo yo a fago thorwana sebopego se a se ratago. O fa peu ye nngwe le ye nngwe sebopego sa yona. Le nama ya diphedi ga e swane: batho ba na le ya bona, le diphoofolo di na le ya tšona, le dinonyana di na le ya tšona, le dihlapi di na le ya tšona. Le legodimong go na le dilo tša gona, le lefaseng go na le tša gona. Go taga ga dilo tša legodimong ga go swane le ga tša lefaseng. Go taga ga letšatši ke gošele, le ga ngwedi ke gošele, le ga dinaledi ke gošele, mola le tšona dinaledi di phalana ka go taga. Le bona bahu mohla ba tsoga ba tla ba bjalo. Mmele o bolokwa e le wo o bolago, eupša o tla tsoga bahung e le wo o sa bolego. O bolokwa o nyatšega, eupša o tla tsošwa bahung o thakgafetše. O bolokwa o fokola, eupša o tla tsoga o tiile. O bolokwa e le wa nama, eupša o tla tsoga e le wa semoya. Bjalo ka ge go na le mmele wa nama, wa semoya le wona o swanetše go ba o le gona. Le Mangwalo a Makgethwa a re: “Motho wa mathomo, e lego Adamo, e bile sebopiwa se se phelago”; le Adamo wa mafelelo e bile Moya wo o phedišago. Pele ga ge go etla mmele wa semoya, go tla wa nama, gwa kgona go etla wa semoya. Motho wa mathomo o tšwa mobung, ke wa lefase; motho wa bobedi yena o tšwa legodimong. Ba e lego ba lefase ba swana le yola wa go tšwa mobung; ba e lego ba legodimong ba swana le yola wa go tšwa legodimong. Bjalo ka ge re apere seswantšho sa yola wa go tšwa mobung, le seswantšho sa yola wa go tšwa legodimong re tla se apara. Banabešo, ge ke realo ke ra gore motho wa nama a ka se be le bophelo bjo bo sa felego; se se bolago se ka se fetoge se se sa bolego. Ekwang sephiri sese: Re ka se hwe ka moka, eupša ge phala e lla la mafelelo, ka moka re tla fetoga gateetee, ka go ponya ga leihlo. Gobane ge phala e lla, bahu ba tla tsošwa, ba se sa hwa gape, gomme rena re tla fetošwa. *** Se se bolago se tla fetošwa se se sa bolego; se se hwago se tla fetošwa se se sa hwego. Mohla se se bolago se fetošwa se se sa bolego, le se se hwago se fetošwa se se sa hwego, ke mo go tlago phethega Mangwalo a Makgethwa a a rego: “Lehu le fedišitšwe, le fenyeditšwe sa ruri!” “Wena Lehu, o fentšwe! Wena Lehu, o ka se sa bolaya!” Gape lehu le bolaya ka sebe, mme sebe se hwetša maatla melaong ya Moshe. Fela a re lebogeng Modimo yo a re fago go fenya ka Morena wa rena, Jesu Kriste. Ka gona, banabešo ba ke le ratago, tiang tumelong le se tekateke. Le tiišeng go direla Morena ka mehla, ka ge le tseba gore go itapišetša Morena ga lena ga se ga lefeela. Bjale ke tla tabeng ya dimpho tše di ntšhetšwago badumedi ba ba lego Jerusalema. Le lena le dire ka mo ke laetšego diphuthego tša Galatia. Ka letšatši la Sontaga mongwe le mongwe a beele tšhelete ye nngwenyana thoko go ya ka poelo ya gagwe, gomme a e kokotletše, gore mohla ke etla e se be gona go ntšhwago ditšhelete. Ge ke tlile, banna ba le ba kgethilego ke tla ba roma ka mangwalo gore ba iše dimpho tša lena Jerusalema. Ge e le gore go a swanela gore le nna ke ye, gona ke tla ya le bona. Ke tla tla go lena ka tsela ya Matsedonia, ka gobane ke ikemišeditše go yo feta gona. Mohlomongwe moo go lena nka dula sebakanyana, mohlomongwe ka ba ka fetša marega moo, ya ba gona le tlago mphelesetša mo ke tlago ba ke nyaka go ya gona. Gobane ga ke rate go le bona fela ke feta; ke holofela gore ge Morena a dumela ke tla ba le lena lebaka le leteletšana. Motseng wa Efeso ke tla dula go fihlela letšatši la Pentekoste. Gobane ke mo ke bilego le sebaka se sebotse sa go bega molaetša wa Modimo wo o kago sokolla batho ba bantši, le ge ba ba nkganetšago le bona e le ba bantši. Ge Timotheose a ka tla moo go lena, le mo sware gabotse, ka gobane ke modiredi wa Morena bjalo ka nna. Go se be le yo a mo nyatšago, gomme le mo felesetše a sepele a iketlile, a be a boele mono go nna, gobane nna le badumedikanna re mo letetše. Ge e le ngwanaborena, Apolose, yena ke gantši ke mo tutuetša gore a le etele a na le bana ba borena ba bangwe, fela le gatee o be a sa rate go tla gonabjale. Eupša mohla a hwetšago sebaka o tla tla. Phafogang, le tieng tumelong, le beng le sebete, le tiiše maatla. Tšohle tše le di dirago le di dire ka lerato. Tša Stefanase le ba lapa la gagwe le a di tseba; gape ke bona Bakriste ba go sokologa pele mo nageng ya Agaya, gomme ba ikgafetše go direla badumedikabona. Ke le kgopela e le ruri, banabešo, gore le dumele go laolwa ke ba babjalo le bohle ba ba itapišago mme ba šomago le bona. Ke thabetše ge Stefanase le Fortunatose le Agaikose ba tlile, ka gobane ba le eme legato, lena le sego gona, ka ge ke be ke le hlolosetše gomme ba ile ba nkhomotša bjalo ka ge le lena ba ile ba le homotša. Batho ba babjalo ba swanetše go elwa hloko. Diphuthego tša naga ya Asia di re le dumele. Akhwila le Prisila le phuthego ye e tsenelago ka lapeng la bona, bona e lego badumedikalena, ba re le dumele kudu. Badumedi ka moka ba ba lego mo ba re le dumele. Le dumedišaneng ka go atlana, gona go bontšhago go ratana ga badumedi. Le nna ke ngwala ka seatla sa ka ke re: Paulose o a le dumediša. Ge go na le yo a sa ratego Morena, a a rogakwe! Morena, etla! Morena Jesu a le gaugele. Lerato la ka le be le lena bohle ka Kriste Jesu. Nna, Paulose, yo ka thato ya Modimo ke lego moapostola wa Kriste Jesu, le Timotheose, ngwanaborena, re dumediša phuthego ya Modimo ye e lego motseng wa Korinte, le badumedi bohle nageng yohle ya Agaya, re re: Nke Modimo, Tatagorena, le Morena Jesu Kriste ba le gaugele, ba le fe khutšo. A go retwe Modimo, Tatago Morena wa rena, Jesu Kriste, yena Ralešoko, Modimo, Mokgothatši wa ka mehla. O re kgothatša mathateng ohle a rena, gore ka kgothatšo ya gagwe le rena re tle re kgone go kgothatša ba bangwe ge ba le mathateng a mehutahuta. Bjalo ka ge le rena re tlaišwa kudu go etša Kriste ge a ile a tlaišwa, Modimo le yena o re kgothatša kudu ka yena Kriste. Ge re hlokofatšwa, ke gore lena le kgothatšege, le phološwe; ge re kgothatšwa, ke gore le lena le kgothatšege, le fiwe maatla a gore le kgone go meletša ka kgotlelelo mahloko ao le rena re a meletšago. Ke ka baka leo go le tshepa ga rena go sa tekatekego; re tseba gore ge le hlokofatšwa bjalo ka rena, le go kgothatšega le kgothatšega bjalo ka rena. Banabešo, ke nyaka go le lemoša mathata a re bilego le ona nageng ya Asia. A be a re imela kudu mo re ilego ra ba ra itlhoboga gore ga re sa tlo phela. Re be re ikwa nke re šetše re ahloletšwe lehu. Fela e be e le gore re se ke ra itshepa, re tshepe Modimo, yena a tsošago bahu. Ke yena yo a re phološitšego dikotsing tše dibjalo tša lehu, ebile o sa tlilo no re phološa. Ke yena yo re holofetšego gore o tla re phološa gape, ka ge le lena le re thuša ka go re rapelela. Ke gona dithapelo tše tša batho ba bantši ba ba re rapelelago di tlago kwewa ke Modimo, a re šegofatša, mme ba bantši ba re lebogela go yena. Rena se re ikgantšhago ka sona ke gore dipelo tša rena di re hlatsela gore boitshwaro bja rena mo lefaseng, gagolo ge re be re le moo go lena, e bile bja go laolwa ke botshepegi le pelo ye e se nago bomenetša ye re e filwego ke Modimo; e bile bja go laolwa ke kgaugelo ya Modimo, e sego bohlale bja batho. Re le ngwalela fela tše le kago kgona go di bala la di kwešiša. Gomme le ge gonabjale le re kwešiša ka boripana, ke holofela gore ka moso le tla re kwešiša ka botlalo. Ke mo ka Letšatši la Morena wa rena, Jesu, le tlago ikgantšha ka rena, bjalo ka ge le rena re tla be re ikgantšha ka lena. *** Ka kholofelo ye bjalo ke be ke gopotše go tla go lena pele, gore le be le mahlatse gabedi. Gobane ke be ke gopotše gore ke fete go lena ge ke eya Matsedonia, le ge ke boa ke fete ke le bona, gomme le nthuše ka tše ke tlago di nyaka ge ke eya nageng ya Judea. Kgane ge ke be ke gopotše ka mokgwa woo ke be ke bonala ke swaswa? Na e ka ba ge ke gopola taba ke e gopodišwa ke marato, gore mo go nna “Ee, ee” e swane le “Aowa, aowa”? Ka Modimo yo a botegago, se ke le boditšego sona ga se “Ee” ye e swanago le “Aowa”. Gobane Morwa wa Modimo, Jesu Kriste, yo le mmegetšwego ke nna le Silase le Timotheose, ga se wa “Ee” ye e swanago le “Aowa”. Yena ke “Ee” ya Modimo; gobane ka yena Modimo o re “Ee” go dikholofetšo tšohle tša gagwe. Ke ka baka leo le “Amene” ya rena e bolelwago ka yena, gore go retwe Modimo. Yo a tiišago botee bja rena le lena go Kriste ke Modimo; ke yena Modimo yo a re kgethilego gore re mo direle; ke yena a re swailego, a tsenya Moya wo Mokgethwa ka dipelong tša rena ya ba tiišetšo ya gore re tla hwetša tše a re beetšego tšona. Nna ke bitša Modimo gore e be hlatse ya ka, yena a tsebago pelo ya ka, gore lebaka la gore ke se tle moo Korinte e be e le gore ke se le lakaletše. Ga re leke go le laolela tše le swanetšego go di dumela, gobane tumelong gona le tiile. Se re se dirago ke go thušana le lena go le okeletša boiketlo. Ka gona, ke feditše le pelo gore nka se sa tla go lena ka taba tša go le nyamiša. Gobane ge nka nyamiša lena, ke tla hlwa ke sa thabišwa ke bomang, ntle le lena ke tla bego ke le nyamišitše? Ke ka baka le ke ilego ka le ngwalela lengwalo lela – ke be ke sa nyake gore e re ge ke etla go lena ke tle ke nyamišwe ke bao ba swanetšego go nthabiša. Gape nna ke dumela gore ge ke thabile, le lena ka moka le a thaba. Ke le ngwaletše ke tshwenyegile kudu, ke hlokofetše kudu, ke bile ke ediša meokgo; ge ke le ngwalela ke be ke se ka ikemišetša go le kweša bohloko, eupša ke be ke nyaka go le lemoša ka moo ke le ratago ka gona. Ge motho a dirile se se nyamišago ga se a nyamiša nna, ke ra ge ke sa nyake go hlwa ke dikadika, o nyamišitše lena ka moka. Go lekane ge a kgadilwe ke ba bantši ba lena ka mokgwa woo. Bjale upšang le mo swarele, le mo kgothatše gore a se nyame mo a kago ba a fenyetšwa saruri ke manyami. Ka gona ke a le rapela, le mmontšhe gore le mo rata e le ruri. Mola ke le ngwalela lengwalo ke be ke dio nyaka go bona ge eba le a mpotegela, le ge eba le phetha tšohle tše ke le laelago tšona. Ge le swarela motho phošo ya gagwe, le nna ke a mo swarela. Gobane ge ke swarela motho – ge eba tshwarelo e nyakega – ke mo swarela go ya ka thato ya Kriste, e le ka baka la lena, gore Sathane a se ikhole ka rena, gobane maanomabe a gagwe re a a tseba. Ge ke fihla Troase go bega Taba ye Botse ya Kriste, ke hweditše Morena a nkgoretše ditsela. Fela ka se we pelo ge ke sa hwetše Titose, ngwanaborena. Ka gona ka laela batho ba moo mme ka fetela Matsedonia. Fela a re lebogeng Modimo! Gobane ka mehla Modimo o re dira ba tee le Kriste yo a fentšego. Ka rena Modimo o dira gore go tsebja ga gagwe mo gohle go phatlalale bjalo ka monko. Gape rena re etša seorelo se se nkgago bose se se tšhumelwago Modimo ke Kriste, se se phatlalalelago go bao ba phologago le bao ba lahlegago. Go bao ba lahlegago se bjalo ka lefetla le le bolayago, kganthe go bao ba phologago ke monko wo o phedišago. Bjale ke mang yo a ka kgonago taba tša mohuta wo? Rena ga re etše ba bantši ba ba gwebago ka molaetša wa Modimo; eupša ka ge re romilwe ke Modimo re bolela re se na bomenetša mo pele ga gagwe, re le bahlanka ba Kriste. Na ge re realo ke gore re sa thomile go itlhatsela? Kgane le rena go nyakega gore, bjalo ka batho ba bangwe, re be le lengwalo la bohlatse la go tla go lena goba la go tšwa go lena? Gape lengwalo la rena ke lena ka noši, gomme le ngwadilwe dipelong tša rena gore le tsebje mme le balwe ke bohle. Go pepeneneng gore ke lena lengwalo le le ngwadilwego ke Kriste ka boyena mme a le romela ka rena. Ga se la ngwalwa ka enke, le ngwadilwe ka Moya wa Modimo yo a phelago; ga se la ngwalwa matlapeng, le ngwadilwe dipelong tša batho. Re realo ka gobane re tshepile Modimo ka Kriste. Ga se gore rena ka borena re ka kgona go ikgopelela selo mo nkego se tšwa go rena. Gobane go kgona ga rena go tšwa go Modimo; ke yena a re kgontšhitšego go ba badiredi ba kgwerano ye mpsha ye e sego ya molao wo o ngwadilwego, eupša e lego ya semoya. Gape molao wo o ngwadilwego o a bolaya, kganthe Moya wo Mokgethwa wona o a phediša. Melao e be e tlokilwe ka ditlhaka matlapeng, gomme mohla e begwa letago la Modimo le ile la bonagala, Baisraele ba ba ba šitwa ke go tsepelela Moshe sefahlegong ka baka la go taga ga sefahlego sa gagwe, etšwe go taga moo e be e le mo go felago. Bjale ge melao ya Moshe ye e tlišago lehu e tlile ka letago le legolo, na modiro wa Moya wo Mokgethwa wona o ka napa wa se be le letago la go feta leo? Ge modiro wo o išago tahlegong o be o taga ka tsela ye, na modiro wo o lokafatšago wona o ka napa wa se tage le go feta? Letago lela la pele ga se selo ge le bapetšwa le la gonabjale. Gobane ge sa go fela se ile sa taga, na sa go se fele sona se ka napa sa se tage le go feta? Ka ge re na le kholofelo ye, re bolela ka sebete. Rena ga re etše Moshe yo a ilego a ikhurumetša sefahlego ka seširo gore Baisraele ba se ke ba bona letago leo ge le fifala mme le timelela. Ba be ba sa kgone go kwešiša; gomme le lehono megopolo ya bona e sa apešwa ke seširo seo ge ba bala dipuku tša kgwerano ye tala. Seširo seo se apolwa fela ke Kriste. Le lehono ge ba bala melao ya Moshe, seširo seo se ba apeša megopolo. Fela mabapi le Moshe Mangwalo a Makgethwa a re: “Nako le nako ge a retologela go Morena seširo seo se a apoga.” Bjale, mo temaneng ye “Morena” ke Moya; gomme mo go lego Moya wa Morena go na le tokologo. Ka gona, rena ka moka re bonagatša letago la Morena bjalo ka seipone re se ra ikhurumetša difahlego; gomme re a fetošwa ra swana naye le go feta pele ka letago. Seo se dirwa ke Morena, yo e lego yena Moya. Modimo o re babaletše a re fa modiro wo, ka gona ga re nyame. Mediro ya sephiring ya dihlong re e phayela thoko; ga re dire tša bofora goba ra phereketša lentšu la Modimo. Re tšweletša nnete pepeneneng re lebeletšwe ke Modimo, ra itlhatsela go mang le mang. Ge eba Taba ye Botse ye re e begago e sa širegile, e širegetše fela bao ba timelago. Ke ba ba sa dumelego, bao modimo wa lefase le o ba šitišago go kwešiša. O ba šitiša go bona seetša se se ba bonegelago sa go tšwa go Taba ye Botse ya letago la Kriste, yo e lego yena seswantšho sa Modimo. Gobane ga re ipege rena beng; re bega Jesu Kriste gore ke yena Morena, le gore rena re bahlanka ba lena ka baka la Jesu. Gape Modimo yo a rilego: “Seetša a se bonege mo leswiswing!” ke yena Modimo yo a bonegetšego dipelo tša rena, gore a re tsebiše letago la Modimo le le tagago sefahlegong sa Kriste. Eupša rena re swerego lehumo le re swana le dibjana tša letsopa, e le gona gore go bonagale gore maatla a magolo a go feta ohle ke a Modimo, ga se a rena. Re tlaišwa ka mekgwa yohle, fela ga re palelwe; re mo kgakanegong, fela ga re itlhoboge; re a hlomarwa, fela Modimo ga a re tlogele; re digelwa fase, fela ga re feleletšwe. Ka mehla re dula re le kotsing ya go bolawa ra etša Jesu, fela re sa phela, go laetša gore Jesu o a phela. Gomme rena re phelago re dula re le kotsing ya lehu ka baka la Jesu, eupša re sa phela, go laetša gore Jesu o a phela. Seo se ra gore lehu ka go rena le a katana, mola ka go lena go katana bophelo. Mangwalo a Makgethwa a re: “Ke dumetše, ka gona ke boletše.” Gomme le rena re ya ka wona moya woo wa go dumela, re a dumela, ka gona re a bolela. Re a tseba gore Modimo yo a tsošitšego Morena Jesu bahung, le rena o tla re tsoša bjalo ka ge a tsošitše Jesu, a re iša le lena mo yena a lego gona. Tšohle tše di dirwa ka baka la lena; gomme ge Modimo a dutše a gaugela batho ka bontši, bona ba tla mo leboga ba mo tumiša. Ke ka baka la tšona taba tše ge re sa lape. Le ge mebele ya rena e hlagala, re tielela pelong letšatši ka letšatši. Gomme ditlaišego tše dinyenyane tša lebakanyana tše re di kwago tše, di tla re tlišetša letago la go ya go ile, le le fetago dilo tšohle. Gobane re lebeletše tše di sa bonwego, e sego tše di bonwago. Gape tše di bonwago ke tša lebakanyana fela, kganthe tše di sa bonwego tšona ke tša go ya go ile. Gobane re a tseba gore ge mošašana wo re dulago ka go wona mo lefaseng o hlahlamolwa, Modimo o re fa moago wa go dula kua legodimong, legae la go ya go ile le le sego la agwa ka diatla. Ke ka lona baka leo re tsetlago, re dumago kudu go apešwa mmele wa rena wa letago wo o tšwago legodimong, gore re se tlo hwetšwa re hlobotše, re hwetšwe re apere. Ge re sa dula ka mošašaneng wo wa lefaseng, re tsetla re ekwa re gateletšwe; e se gore re nyaka go apolwa mmele wo wa lefaseng, eupša e le gore re nyaka go apešwa wa legodimong, gore go hwa ga rena go tle go metšwe ke go phelela sa ruri. Yo a re lokišeditšego go fetoga mo ke Modimo, a re fa Moya wa gagwe wo Mokgethwa e le tiišetšo ya gore taba yeo e tla phethega. Ka gona re dula re tiile maatla, re tseba gore ge ga gaborena e sa le mo mmeleng wa rena re tla no dula re le kgole le Morena. Gape re phela re dumela go Morena, e sego re mmona. Re dula re tiile maatla, gomme re duma kudu ge nkabe re ka huduga mo mmeleng ra yo dula le Morena. Eupša re duma kudu ge nkabe re ka mo kgahla gohle mo re lego gona, e ka ba ge re sa dula mo lefaseng, goba re ile legodimong. Gobane bohle re tla swanela go yo tšwelela pele ga Kriste gore a re ahlole, gore mongwe le mongwe a fiwe se se mo swanelago go ya ka tše a di dirilego ge a sa phela mo lefaseng, e ka ba tše dibotse goba tše dimpe. Ka ge re lemoga gore go boifa Modimo ke eng, re leka go kgodiša batho gore re a rereša. Yo a re tsebago ka botlalo ke Modimo, gomme le lena ke holofela gore le ntseba gabotsebotse. Ga se gore re leka gape go ithetiša lena; se re lekago go se dira ke go le hlalošetša tše re di dirago gore le tle le ikgantšhe ka rena, le kgone go fetola ba ba kgantšhago tše di bonwago ka mahlo, e sego tše di lego ka pelong ya motho. Gomme ge eba mola re tsenwe ke Moya re be bonala re gafa, re be re gafela Modimo. Ge re tšea gabotse, go holega lena. Re laolwa ke lerato la Kriste ka ge re lemogile gore motho o tee o hwetše batho ka moka, gomme seo se ra gore batho ka moka ba hwile naye. O hwetše batho bohle, gore bao ba sa phelago ba se sa iphelela, ba upše ba phelele yena yo a rilego go ba hwela a ba a tsoga bahung ka baka la bona. Ka gona bjale ga re sa gopolela motho go ya ka mo batho ba mo gopolelago ka gona. Le yena Kriste ge eba re be re mo gopolela bjalo, bjale ga re sa mo gopolela ka mokgwa woo. Ka baka leo, ge motho e le wa Kriste e ba sebopiwa se sefsa; tša kgale di fetile, go tlile tše difsa. Tšeo ka moka di dirwa ke Modimo, yo a re boelantšego le yena ka Jesu Kriste, le rena a re fa modiro wa go boelanya ba bangwe le yena. Molaetša wa rena ke wa gore Modimo o boelanya batho ba lefase le yena ka Kriste. Ga a ba balele dibe tša bona, le gona o re laetše go botša batho ka mo a ba boelanyago le yena ka gona. Bjale ge, ke rena baemedi ba Kriste, gomme re bolela mo nkego ke Modimo yo a kgopelago ka rena. Re kgopela legatong la Kriste re re: Ipoelanyeng le Modimo! Kriste o be a se na sebe, eupša Modimo a mo rweša dibe tša rena, gore re tle re lokafatšwe ke yena ka go dirwa ba tee le Kriste. Ka ge re le ba go dirišana le Modimo re a le kgopela gore le se be ba le amogeletšego kgaugelo ya gagwe lefeela. Gobane yena Modimo o re: “Ke go kwele ka nako ya gona, ke go thušitše ka letšatši la go go phološa.” Bonang mo: Ye ke yona nako ya gona, le ke lona letšatši la phološo. Ga re šitiše motho ka selo, ka gobane re nyaka gore bodiredi bja rena bo hloke bosodi. Mo go tšohle tše re di dirago re ipontšha re le bahlanka ba Modimo ka go kgotlelela kudu matshwenyego, le mehlako, le mahlomola, le go bethwa, le go golegwa, le go hlaselwa meferefereng, le go šomišwa kudu, le go hlobaela, le tlala. Re ipontšha re le bahlanka ba Modimo ka go ila bobe, le ka tsebo, le ka bopelotelele, le ka botho, le ka maatla a Moya wo Mokgethwa, le ka lerato la nnete, le ka molaetša wa therešo, le ka maatla a Modimo. Toka ke sona sehlabani sa rena sa go hlasela le sa go itšhireletša. Re a hlompšha ebile re a hlomphollwa; re a rogwa ebile re a retwa; re tšewa gore re a fora etšwe re rereša; re bjalo ka ba ba sa tsebjego, le ge re tsebja ke bohle; re etša ba ba hwilego etšwe re a phela. Re bjalo ka ba ba otlwago mme re sa bolawe; re swana le ba ba nyamišwago, etšwe re dula re thabile; re swana le badiidi, etšwe re humiša ba bantši; e ka re ga re na selo, etšwe re na le dilo ka moka. Lena Bakorinte, re boletše le lena re ahlame; re le utolletše tšohle tša ka pelong. Ga se rena re le tswaleletšego dipelo tša rena, eupša ke lena le re tswaleletšego tša lena dipelo. Ke bolela le lena mo nkego le bana ba ka; re direleng se re le diretšego sona: re utolleleng tša ka dipelong tša lena! Le se ke la gogišana le bahlokatumelo, gobane toka e ka sepedišana bjang le go se loke? Kgane seetša le leswiswi tšona di ka dudišana? Gomme Kriste yena a ka kwana bjang le Beliale? Modumedi yena a ka kwana ka eng le mohlokatumelo? Tempele ya Modimo e ka kwana bjang le medingwana ya baditšhaba? Gape rena ke rena tempele ya Modimo, bjalo ka ge Modimo ka boyena a boletše a re: “Ke tla aga gare ga bona, ka ba le bona; ke tla ba Modimo wa bona, gomme bona e tla ba setšhaba sa ka.” Ke ka fao Morena a rego: “Tlogang mo go bona le ikaroganyeng nabo. Se se tšhilafetšego le se se kgome, ke mo ke tlago le amogela. Ke tla ba Tatagolena, gomme lena la ba barwa le barwedi ba ka. O realo, Morena Ramaatlaohle.” Barategi, tšeo di holofeditšwe rena. Ka gona, a re itlhwekišeng go tšohle tše di re tšhilafatšago mmeleng le moyeng, gomme re kataneleng go ba ba bakgethwakgethwa ba go boifa Modimo. Re bontšheng gore le a re rata. Ga se ra fošetša motho, ga se ra kgopiša motho, ebile ga se ra hlalefetša motho. Ga se gore ge ke realo ke bea motho molato, gobane, bjalo ka ge ke šetše ke boletše, re le rata mo e lego gore rena le lena re ka se aroganywe ke selo, ešita lehu goba se sengwenyana sa gonabjale. Ke bolela le lena ke sa šie le gatee; ke tloga ke ikgantšha ka lena! Matshwenyegong a rena ohle ke tia maatla ke thabile kudu. Le ge re seno fihla Matsedonia ga se ra ka ra ehuga. Re be re dula re dikaneditšwe ke matshwenyego le diphapano le go boifa. Eupša Modimo yo a tiišago ba ba nolegilego moko a re tiiša ka go tla ga Titose. E sego ka go tla ga gagwe fela, eupša le ka mo le ilego la mo tiiša ka gona. A re anegela ka mo le ntlholosetšego ka gona, le ka mo le swabišitšwego ke se se diregilego, le ka mo le fišegelago go nthekga ka gona. Ke ka baka leo bjale ke thabilego ka mokgwa wo. Gobane le ge ke ile ka le nyamiša ka lengwalo lela ka go le ngwalela lona, ga ke itshole. Go le nyamiša gona ke a bona gore ke ile ka le nyamiša, le ge e bile ga lebakanyana fela, gomme le ge nkabe ke ile ka itshola bjale ga ke sa itshola, ke thabile, ke sa thabele ge ke ile ka le nyamiša, eupša ke thabela ge manyami a lena a le sokolotše. Le be le nyamile ka mo go nyakago Modimo, ka gona go le nyamiša ga rena ga se gwa senya selo. Gape go nyama ka mo go nyakago Modimo go tliša tshokologo ye e išago motho phologong – gomme ke manyami a a sa sodišego. Ge e le manyami a lefase ona a iša motho lehung. Bonang gore go nyama ga lena ka mo go nyakago Modimo go le diretšeng: go le dirile gore le nagantšhiše taba ye ka hloko; go feta moo go le fišegedišitše go bontšha go hloka molato ga lena, le go selekega ga lena, le go boifa ga lena, le phišego ya lena, le borapedi bja lena, le maikemišetšo a lena a go kgala phošo. Le bontšhitše gore ga le na molato mo tabeng ye. Bjale ge, le ge ke ile ka le ngwalela lengwalo lela, e be e se ka baka la yo a fošitšego goba yo a fošeditšwego. Ke be ke le ngwalela lona go le bontšha mo pele ga Modimo ka mo le re ratago gagolo ka gona. Ke sona se se ilego sa nkgothatša. Ya se be fela go kgothatšega; go kgothatšega mo ga ka gwa oketšwa ke go kgahlwa ke lethabo la Titose la mola lena ka moka le mo kgothatša. Gape nkile ka mo kgantšhetša lena, gomme ga se la ntshwabiša. Re dula re le botša therešo, gomme tše ke di kgantšheditšego Titose di bonagetše gore ke therešo. Gomme ge a gopola ka mo bohle le bego le ikemišeditše go phetha ditaelo tša gagwe, le ka mo le bego le mo amogela ka poifo le tšhabo ka gona, go le rata ga gagwe go tia go eya pele. Bjale ke thaba kudu ka gore nka no ikanya lena dilong ka moka. Banabešo, re le tsebiša tša kgaugelo ya Modimo ye a e bontšhitšego diphuthego tša Matsedonia. Le ge ba lekilwe gabohloko ka matshwenyego, lethabo la bona e bile le legolo mo e lego gore le ge ba diila ka mokgwa wo e bile bomafakudu. Ke tloga ke rereša ge ke re ba ntšhitše ka mo ba kgonago ka gona, ebile nka no re le go feta ka mo ba kgonago ka gona, e le ka boithaopo. Ba re kgopetše kudu ba re rapela gore re ba dumelele go tsenya seatla modirong wa go thuša badumedi ba Judea ka dimpho. Ba dira go feta ka mo rena re bego re gopotše gore ba tla dira. Ba ikgafela Morena pele, ba kgona ba ikgafela rena, go ya ka thato ya Modimo. Ra ba ra kgothatša Titose gore a feleletše modiro woo wa lerato mo go lena, bjalo ka ge o be o thomilwe ke yena. A e re bjalo ka ge le le dithwadi mo go tšohle tumelong, le polelong, le tsebong, le mafolofolong a a se nago kelo, le go le rateng ga rena, le modirong woo wa lerato, le gona le be dithwadi. Ge ke realo ga se gore ke le beela molao. Ka go le botša mafolofolo a ba bangwe ke dio leka go lekola gore na la lena lerato ke la nnete. Kgaugelo ya Morena wa rena Jesu Kriste le a e tseba; gobane le ge a be a humile, o ile a itiitša ka baka la lena, gore le humišwe ka bodiidi bja gagwe. Mo tabeng ye ke a le eletša mme le tla holega. Ngwagola e bile lena ba mathomo e sego fela ba go fa, eupša le ba go rata go fa. Bjale feleletšang se le se thomilego. Fišegelang go se phetha, go etša ge le ile la fišegela go se thoma, gomme le se dire ka tše bjale le nago le tšona. Gobane ge motho a ikemišeditše go fa, Modimo o thabela se a kgonago go se ntšha, e sego se a sa se kgonego. Ge ke realo ga se gore ke leka go hlatlola ba bangwe gore go imetšwe lena. Se ke lekago go se dira ke gore go lekanwe, gore ka ge bjale lena le humile, le thuše ba ba hlokago, e tla e re mola go hloka lena bona ba humile ba le thuša. Ka tsela yeo le tla be le direlwa go swana. *** Le Mangwalo a Makgethwa a re: “Yo a topilego kudu ga se a fetiša tekanyo, mme yo a topilego gosenene ga se a hlaetša.” A re lebogeng Modimo ge a file Titose mafolofolo a go swana le a rena gore a le thuše. Gobane ga se a thabela fela kgopelo ya ka; mafolofolo a go thuša le ona o be a na le a mantši mo a bilego a ithaopile a etla go lena. Re mo romile le ngwanaborena yo a hlompšhago diphuthegong ka moka ka baka la mošomo wa gagwe wa go bega Ebangedi. Ntle le moo o kgethilwe ke diphuthego gore a sepele le rena ge re dira modiro wo wa lerato wo re o direlago go tumiša Morena, le go bontšha gore re nyaka go thuša. Re hlokomela gore re se solwe mabapi le dimpho tše dintši tše. Maikemišetšo a rena ke go dira se se lokilego, e sego fela pele ga Morena, eupša le pele ga batho. Re romile ngwanaborena yo mongwe le bona. Yena re mo lekile ka mekgwa ye mentši, gomme re bone gore ka mehla o na le mafolofolo a go thuša. Gomme ka ge bjale a le tshepile gakaaka, o na le mafolofolo le go feta. Ge e le Titose yena ke modirišani wa ka, gomme o šoma le nna go le hola; ge e le bana ba borena bao ba bangwe ba ba sepelago le yena ke baemedi ba diphuthego bao Kriste a tumišwago ka bona. Le ba bontšhe lerato, gore diphuthego tšohle di le tsebe gomme di bone gore ge re di kgantšhetša lena ga se ka phošo. Ge e le mabapi le go thuša badumedi ba ba lego Judea, ga se taba ye nka hlwago ke le ngwalela yona. Ke tloga ke tseba gore le ikemišeditše go thuša, ebile ke šetše ke le kgantšhitše go ba Matsedonia ka re: “Badumedi ba Agaya e sa le ba itokišetša ngwagola go thuša.” Mafolofolo a lena a tutueditše ba bantši. Banabešo bao ke ba rometše gore go le kgantšha ga rena mabapi le taba ye e se be ga lefeela, eupša e be gore le itokišeditše go thuša, bjalo ka ge ke boletše. Fela ge batho ba Matsedonia ba ka tla le nna gomme ba hwetša gore ga se la itokiša, nka lewa ke dihlong – ge e le lena gona ga ke sa bolela – ka ge ke be ke holofetše gore le tla be le itokišitše. Ke ka baka leo ke bonego go swanetše ge ke kgothatša banabešo bao gore ba nthake pele ba tle go lena go tlo kgoboketša e sa le nako dimpho tšela le holofeditšego go di ntšha. Ke mo e tlago re ge ke etla ka hwetša di lokišitšwe, e le dimpho tše di ntšhitšwego ka go rata, e sego ka go gapeletšwa. Le gopole gore mabjalagosenene o buna gosenene; mabjalakudu le yena o buna kudu. Mongwe le mongwe a ntšhe ka mo a ikemišeditšego ka gona, e se be ka pelaelo goba ka kgapeletšo, gobane Modimo o rata moneathabile. Ebile Modimo o kgona go le fa dilo ka moka ka bontši, gore ka mehla le dule le na le tšohle tše le di nyakago le tlalelwa ke tša go le kgontšha go dira mediro ya go loka. Le Mangwalo a Makgethwa a a bolela a re: “Ke mafakudu wa bahloki; go loka ga gagwe ke ga neng le neng.” Gomme Modimo yo a fago batho peu ya go bjala le bogobe bja go ja, le lena o tla le fa peu ye le e hlokago, a e mediša, gomme ka tsela yeo a dira gore go se timane ga lena go le hweletše puno ye ntši. O tla le humiša ka mekgwa yohle gore le kgone go fa kudu mabakeng ka moka, gore batho ba leboge Modimo ka baka la dimpho tša lena tše ba di hwetšago mo go rena. Gape modiro wo le o dirago wo wa go thuša ba bangwe ga se fela wa go fa badumedi tše ba di hlokago, eupša ke wa go dira le gore batho ba bantši ba leboge Modimo kudu. Ge batho bao ba bona bohlatse bja ge le efa bangwe dimpho, ba tla tumiša Modimo ka baka la ge le theeletša Ebangedi ya Kriste ye le e hlatselago, le bopelokgolo bja lena ge le abelana nabo le batho bohle. Ka gona, ba tla le rapelela ka lerato le legolo ge ba bona Modimo a le loketše ka kgaugelo ye e se nago tekanyo. A re lebogeng Modimo ka baka la mpho ye ya gagwe ye e šitago tlhalošo! Nna Paulose ka nama, yo go thwego ke kwana ge ke le gare ga lena, eupša ke tau ge ke le kgole le lena, ke le kgopela ka boleta le botho bja Kriste. Ke a le rapela, mohla ke etla go lena le se nkgapeletše gore ke be tau go lena, gobane ke bona gore tau yona nka no ba yona go bao ba rego re hlohleletšwa ke tša nama. Gape le ge re phela mo lefaseng, ga se gore ge re elwa re hlohleletšwa ke tša lefase. Dihlabani tše re lwago ka tšona ga se tša lefaseng, ke tša Modimo tše maatla, tše re di filwego go pšhatlaganya dibo ka tšona. Re fenya ba ditshele ka dipolelo, le ba go ikgantšha ba go gana molaetša wa Modimo. Re leka go dira gore batho ba nagane tše di kgahlago Kriste. Ge le šetše le bontšhitše go theeletša Kriste ka mokgwa wo o phethegilego, rena re tla be re itokišeditše go otla mang le mang yo a sa theeletšego. Taba di a ipola! Ge motho a ipotša gore ke wa Kriste, a inagane gabedi, a tsebe gore le rena re ba Kriste bjalo ka yena. Gobane le ge eba ke kgantšha maatla go feta tekanyo ao Morena a mphilego ona, maatla a go le aga, e sego go le phuma, ga go nteše dihlong. Fela ga ke nyake go bonala nke ke a le tshošetša ka mangwalo a ka. Go thwe: “Mangwalo a Paulose a bogale ebile a a hlaba, fela ge a le mo ka nama o boleta le tše a di bolelago di a nyatšega.” Motho wa go realo o swanetše a kwešiše gore tše re di ngwalago ka mangwalong re le kgole ga di fapane le tše re tlago di dira ge re le moo go lena. Rena ga re na sebete sa go ipala goba go ipapetša le ba ba iponago e le ba bagolo. Bona ke ditlaela, ka gobane ba itekanya ka tekanyo ye ba ipeelago yona, le gona ba ipapetša le bona ka bobona. Ge e le rena, re ka se ithete go feta tekanyo, go itheta ga rena go tla ya le mellwane ye Modimo a re beetšego yona, gomme yona e akaretša le modiro wa rena moo go lena. Ka gona ga se ra tshela mollwane ka go tla go lena. Gabotse e bile rena ba mathomo ba go tla go lena ka Ebangedi ya Kriste. Ka fao ga re ithete ka modiro wo o dirilwego ke ba bangwe, modiro wo o dirilwego ka ntle ga mellwane ye re e beetšwego. Re holofela gore tumelo ya lena e tla gola, mme le maemo a rena moo go lena a phala ale a pele, re ntše re sa tshele mellwane ye re e beetšwego. Ra kgona re yo bega Ebangedi dinageng tše di lego ka ntle go tša lena, gomme ra se kgantšhe tše di šetšego di dirilwe ke ba bangwe mafelong a mangwe. Gape Mangwalo a Makgethwa a a bolela a re: “Yo a ikgantšhago a ikgantšhe ka tše di dirilwego ke Morena.” Gobane yo a swanetšego go amogelwa ga se yo a ithetago, eupša ke yo a retwago ke Morena. Nke nkabe le nkgotlelela, le ge ke bontšha botlaejana. Hle, nkgotleleleng! Ke le fišegela bjalo ka Modimo; ke le swantšha le kgarebe ye e se nago bosodi, ye ke e beeleleditšego monna o tee, yena Kriste ka sebele. Se ke se šiago ke gore le ka senywa megopolo la ba la se sa botegela Kriste gabotse, la etša Efa mola a tla forwa ke noga ka mahlajana a yona. Gobane ge motho yo mongwe a etla a le ruta tša Jesu tše di fapanago le tše le di rutilwego ke rena le mo kgotlelela gabotse. Le amogela moya go yena wo le sa kago la o amogela go rena. Le gona le amogela Ebangedi ye a e begago ye e fapanago le ye le e amogetšego go rena. Gape nna ga ke bone ke phalwa ke baapostola bao ba go ba bommakaipea. Le ge polelo ke sa e kgone, tsebo yona ga ke e hloke; taba ye re le lemošitše yona nakong yohle le ka mekgwa yohle. Ga se nke ka le lefiša selo mola ke le begela Taba ye Botse ya Modimo; ke ile ka ikokobetša gore go godišwe lena. Kgane ke be ke foša? Mola ke le šomela bjalo ke be ke lefša ke diphuthego tše dingwe. Ke setšha ke be ke di hlakola. Mola ke dula le lena ke hloka, le gona ga se nke ka imetša motho, gobane tšohle tše ke bego ke di hloka ke ile ka di fiwa ke badumedikanna ba go tšwa Matsedonia. Ke mo ke ilego ka ithiba, mme ke tla no fela ke ithiba gore ke se le imetše ka selo. Ke ikana ka therešo ya Kriste ye e lego mo go nna gore mo gohle dinageng tša Agaya ga go yo a kago nthibela ge ke kgantšha taba tše. Ka baka lang? Kgane ke ka baka la gore ga ke le rate? Modimo yena o a tseba gore ke a le rata. Se ke se dirago bjale ke tla no fela ke se dira, gore ba ba nyakago lebaka la go kgantšha le go bolela gore ba dira tša go swana le tše di dirwago ke nna ba le hloke. Gobane batho bao ke baapostola ba maaka, ke badiri ba boradia ba ba itirago tše nkego ke baapostola ba Kriste. Fela ga go makatše, gobane Sathane ka boyena o tle a itire tše nkego ke morongwa wa seetša. Ka gona, ga se semaka ge bahlanka ba gagwe ba itira tše nkego ke bahlanka ba toka. Mafelelong ba tla dirwa se se swanelago mediro ya bona. Ke a boeletša ke re: Go se be le yo a mponago botlaela. Fela le ge e le gore le mpona bjalo, le upše le amogele botlaela bja ka, gore le nna ke ithete gosenene. Tše ke di bolelago tše ga se tše ke di laetšwego ke Morena. Tabeng ye ya go itheta ke bolela tša botlaela. Eupša ka ge ba bantši ba itheta ka tša nama, le nna ke nyaka go itheta bjalo. Gobane lena ba bohlale, le kgotlelela ditlaela gabotse. Etse le kgotlelela yo a le dirago bahlanka, goba yo a le hlalefetšago, goba yo a le radiago, goba yo a le nyatšago, goba yo a le fapholago sefahlegong. Ke bolela ka dihlong ge ke re dilo tšeo re be re se na sebete sa go di dira. Fela ge eba go na le yo a kago beta pelo a itheta – ke bolela tša botlaela – gona le nna ke tla beta pelo ka itheta. Ge ba re re Baheberu, le nna ke re ke Moheberu. Ge ba re re Baisraele, le nna ke realo. Ge ba re re ditlogolo tša Abrahama, le nna ke re ke sona. Ge ba re re bahlanka ba Kriste – ke bolela tša bogafi – nka re ke a ba phala. Ke ba phadile ka go šoma gaboima, ka go ya kgolegong gantši, ka go otlwa ka tshelane kudu, ka go ba kotsing ya lehu gantši. Ke gahlano ke otlwa ke Bajuda kotlo ye e tlwaelegilego ya dithupa tša masome a mararo le tše senyane, ke gararo ke bethwa ka patla, ke gatee ke bethwa ka maswika, ke gararo ke robegelwa ke leselawatle, gomme nkile ka fetša bošego le mosegare ka garegare ga lewatle. Mo maetong a ka a mantši ke bile kotsing ya dikgogola, kotsing ya bahlakodi, kotsing ya setšhaba sa gešo, kotsing ya baditšhaba, kotsing ka metseng, kotsing lešokeng, kotsing lewatleng, le kotsing badumeding ba maaka. Ke itapišitše ka go šoma kudu, ke gantši ke lala ke sa robale, ke ehlwa ka tlala le lenyora; ke gantši ke hloka dijo; ke be ke bolawa ke phefo, ke hlaelelwa ka diaparo. Ntle le tše dingwe tše ke sa di balego, ka mehla ke imelwa ke go balabala ka diphuthego ka moka. Ge yo mongwe a fokola, le nna ke fokola naye; ge yo mongwe a dirišwa sebe, le nna ke a galefa. Ge eba go itheta go swanetše, nna ke tla itheta ka tše di bontšhago bofokodi bja ka. Modimo, yena Tatago Morena Jesu Kriste, yo a tumišwago go ya go ile, o a tseba gore ga ke bolele maaka. Mola ke le Damaskose, mmušiši wa Kgoši Aretase o ile a ntalela ka baleti lesorong la motse gore ba ntshware. Eupša ka mo tšwa ka diatleng ka go theošwa ka šešegwana lešobaneng la morako. Go itheta go ntshwanetše, le ge go sa nkhole selo. Gomme bjale ke nyaka go bolela ka dipono le ditshenolo tše di tšwago go Morena. Go na le monnatsoko yo ke mo tsebago wa Mokriste, yo mengwaga ye lesome le ye mene ye e fetilego a kilego a phamolelwa legodimong la boraro. Ga ke tsebe ge eba seo se diregile ka nnete goba e be e dio ba pono, go tseba Modimo. Ke re nna ke tseba ge monna yo a ile a phamolelwa Paradeising – se ke sa se tsebego ke ge eba seo se diregile ka nnete goba e be e dio ba pono, go tseba Modimo – gomme a fihla a kwa ditaba tše motho a sa kgonego go di bolela, le gona a sa dumelelwego go di bolela. *** Tša monna yo ke tšona tše ke nyakago go di kgantšha, ga ke nyake go kgantšha tša ka, ge e se ona mafokodi a ka. Le ge nkabe nka nyaka go kgantšha, e be e ka se be botlaela, ka gobane ke be ke tla be ke bolela nnete. Fela ke a itshwara, gore go se be le yo a ntšeelago godimo go feta tše a di bonago ke di dira, goba a di kwago ke di bolela. Fela gore ke tle ke se ikgogomoše ka tše di makatšago kudu tše ke ilego ka di utollelwa, ke ile ka kgontlhetšwa phatša nameng, phatša ye e bego e itirile moromiwa wa Sathane wa go ntlaiša gore ke fele ke ikokobetša. Ka rapela Morena gararo ke mo kgopela gore a ntlhomole phatša yeo. Yena a mphetola ka go re: “Kgaugelo ya ka e go lekane, gobane maatla a ka a tiile kudu mo go ba ba fokolago.” Ka gona ke kgahlwa kudu ke go itheta ka mafokodi a ka, gore maatla a Kriste a tle a dule mo go nna. Ke ka baka leo ke kgotsofatšwago ke go rwala mafokodi le mahlapa le mathata le dihlomaro le ditlaišego ka baka la Kriste. Gobane ge ke fokola ke mo ke nago le maatla. Ke fetogile setlaela ka go itheta ke gapeletšwa ke lena. Gape ke lena le bego le swanetše go ntlhatsela. Gobane le ge ke se selo, ga go se se ntlhaelelago sa baapostola bao ba go ba bommakaipea. Dišupo tša gore ke moapostola, e lego mehlolo le dimaka le ditiro tše maatla, ke di dirile moo go lena ka bopelotelele. Ke eng se se diretšwego diphuthego tše dingwe mme lena la se hlaetšwa, ge e se gore lena ga se ka le kgopela go nthuša ka tšhelete ka le imetša? Le ntshwarele tšhitelo yeo, ge! Bjale ke lekga la boraro ke itokišetša go tla moo go lena. Nka se le tshwenye ka selo ge ke etla, gobane se ke se nyakago ke lena, e sego tšhelete ya lena. Gape ga se bana ba ba swanetšego go nyakela batswadi tše ba di hlokago. Eupša ke batswadi ba ba swanetšego go nyakela bana ba bona. Nna nka thabela go ntšha tšohle tše ke nago le tšona le go intšha go ipheleletša, nnamong, gore ke le hole. Na ge ke le rata gakaaka, lena le ka nama la nthata mohlaetšana? Le ge go ka ba bjalo, motho yo mongwe yena a ka no re ke be ke le radia, ke le thea ka maaka. Kgane ke ile ka le hlalefetša ka yo mongwe wa ba ke ilego ka ba roma go lena? Ke ile ka rapeletša Titose gore a tle, ka mo roma le modumedi yo mongwe. Na Titose o le hlalefeditše? Kgane nna le yena re be re se na maikemišetšo a tee goba re sa gate ka mošito o tee? Mohlomongwe lena le hloma nke nako ye ka moka re leka go ikemelela mo go lena. Aowa, re bolela mo pele ga Modimo re le Bakriste. Gomme lena, barategi, tšohle tše re di dirago re di direla go le aga mo go tša tumelo. Ke dio šia gore mohla ke etla moo ke tla le hwetša le se ka mo ke ratago le eba ka gona, le lena la nkhwetša ke se ka mo le ratago ke eba ka gona. Ke šia gore ke tla hwetša diphapano, le mona, le dikgalefo, le mahufa, le ditshenyamaina, le lesebo, le boikgogomošo, le mpherefere. Ke šia gore mohla ke etla go lena gape Modimo wa ka o tla nkokobetša mo pele ga lena, gomme ke tla nyamišwa ke ba bantši ba ba kilego ba dira dibe, fela ba se itsholele bootswa le bokgeke le bofebe bjo ba bo dirilego. Bjale e tlilo ba la boraro ke le etela. Mangwalo a Makgethwa a re: “Go latofatšwa ga motho go tiišetšwa ka bohlatse bja batho ba babedi le ge e le ba bararo.” Ke ile ka lemoša bao pele ba bego ba dira dibe mmogo le ba bangwe ka moka, gomme le gonabjale ke ba lemoša ke se na le bona, go no swana le mola ke ba lemoša ke na le bona mola ke ba etetše la bobedi, ke re ge ke etla gape ga go yo a tlago phonyokga kotlo. Seo e tla be e le bohlatse bjo le bo nyakago bja gore Kriste o bolela ka nna. Gape yena ge a šoma gare ga lena ga se mofokodi, eupša ke yo maatla. Gobane le ge a bolailwe sefapanong e le mofokodi, ke ka maatla a Modimo ge bjale a phela. Gomme le rena re fokola re le batee le yena, fela ge re le kgala re tla be re na le yena ka maatla a Modimo. Itekoleng, le itebeledišiše, le bone ge eba le phela ka tumelo ya lena. Na ga le tsebe gore Kriste o phela ka dipelong tša lena? Ge eba ga le tsebe gona le paletšwe. Ke tshepa gore le tla lemoga gore rena ga re ba go palelwa. Re rapela Modimo gore le se dire se sempe, e sego gore rena re bonale re nepile, eupša gore lena le dire tše di lokilego, le ge rena re bonala re palelwa. Gobane therešo re ka se kgone go lwa le yona, se re kago se kgona ke go e lwela. Rena re thabela ge go fokola rena mme lena le tiile. Ke ka baka leo re rapelago gore le be ba ba feletšego. Ka gona ke le ngwalela lengwalo le ke le kgole le lena. Ke direla gore ge ke fihla moo ke se ke ka swanela go ba le sekgapho le lena ge ke šomiša maatla ao ke a neilwego ke Morena – ona maatla a go le aga, e sego a go le kgereša. Banabešo, ke fetša ka go re le dumele. Le be baloki ka botlalo, le eletšege, le phele ka go kwana, le se ke la dula le fapana, gomme Modimo wa lerato le khutšo o tla ba le lena. Le dumedišaneng ka go atlana, gona go bontšhago go ratana ga badumedi. Badumedi bohle ba a le dumediša. Kgaugelo ya Morena Jesu Kriste, le lerato la Modimo, le kopano le Moya wo Mokgethwa di be le lena ka moka. Nna, Paulose, moapostola yo ke sego ka bewa ke motho wa nama, le gona go sego motho yo a kilego a rongwa go tlo mpea, eupša ke beilwego ke Jesu Kriste le Modimo, Tatagwe, yo a mo tsošitšego bahung, nna le badumedi bohle ba ba nago le nna mo, re dumediša diphuthego tša Galatia re re: Nke Modimo, Tatagorena, le Morena Jesu Kriste ba le gaugele, ba le fe khutšo. Kriste o ikgafile ka baka la dibe tša rena, gore a tle a re lokolle mehleng yeno ye mebe, a phethe thato ya Modimo, Tatagorena. A go tumišwe Modimo go ya go ile! Amene. Ke a kgotsa ge le phakišetša go furalela yo a le biditšego ka kgaugelo ya Kriste, mme le amogela Ebangedi e šele. Gabotse Ebangedi e šele ga e gona, e no ba gore go na le batho ba ba le ferekanyago ba leka go fetola Ebangedi ya Kriste. Fela ge motho a ka le begela Ebangedi ye e fapanago le ye re le begetšego yona, le ge e ka ba rena, le ge e ka ba morongwa wa go tšwa legodimong, a rogakwe! Bjalo ka ge re kile ra le botša, le gonabjale ke sa boeletša ke re: Ge motho a ka le begela Ebangedi ye e fapanago le ye le e amogetšego, a rogakwe! Na ge ke realo ke kwagala nke ke gabile go ithatiša batho goba Modimo? Kgane nke ke rata go kgahla batho? Ge nkabe ke sa le wa go kgahla batho, nkabe ke se mohlanka wa Kriste. Banabešo, ke a le botša Ebangedi ye ke le begelago yona ye ga e tšwe bathong. Ga se ka e fiwa ke motho, ga se ka e rutwa, ke e utolletšwe ke Jesu Kriste. Le šetše le kwele tša mola ke sa kgothaletše tumelo ya Sejuda, ka mo ke bego ke hlomara phuthego ya Modimo gampe ke leka go e fediša. Mabapi le go phetha tša tumelo ya Sejuda ke be ke phala Bajuda ba bantši ba dithaka tša ka, ka gobane ke be ke hufegela ditlwaedi tše re di filwego ke borakgolokhukhu ba rena. Modimo yo a nkgethilego ge ke belegwa o mpiditše ka kgaugelo ya gagwe gore ke mo direle. Ya re ge a seno kgahlwa ke go nkutollela Morwagwe gore ke tle ke begele baditšhaba Taba ye Botse ya gagwe, ka se kgopele motho maele, le go ya Jerusalema go yo boledišana le bale e bilego baapostola pele ga ka ka se ye. Se ke se dirilego ke go ya Arabia ka ba ka boela Damaskose. E rile ge go fetile mengwaga ye meraro ka ya Jerusalema go tsebišiša Kefase, gomme ka dula naye beke tše pedi. Baapostola ba bangwe bona ga se ka ba bona, ntle le Jakobose, morwarragoMorena. Tše ke di ngwalago tše ke nnete, gomme Modimo o a tseba gore ga ke bolele maaka. Go tloga moo ke ile ka ya dileteng tša Siria le tša Tsilitsia. Diphuthego tša Bakriste tša Judea di be di sa ntsebe sefahlego. Ba be ba no kwa ge go thwe: “Monna yola pele a bego a re hlomara bjale ke yena a begelago batho yona tumelo yela a kilego a leka go e fediša.” Gomme ba tumiša Modimo ka baka la ka. Ka morago ga mengwaga ye lesome le ye mene ka boela Jerusalema ke na le Barnabase, ka tšea le Titose. Ka ya gona ka ge Modimo a be a nkutolletše gore ke ye. Ka fihla ka boledišana le baetapele ba nnoši ka ba hlalošetša Ebangedi ye ke e begelago baditšhaba. Ke be ke sa nyake gore modiro wa ka wa gonabjale goba wa mehleng ye e fetilego e be lefeela. Le Titose yo a bego a na le nna, le ge e le Mogerike, ga se a ka a gapeletšwa go bolla, le ge ba bangwe ba be ba nyaka gore a bolle. Bona bao ba ile ba tsena mo sehlopheng sa rena ka go khukhuna, ba itira nke ke badumedi gore e tle e be dihlodi tša go bona ge eba bolokologi bja rena ke bja go ba batee le Kriste Jesu. Ba be ba nyaka go re dira makgoba a melao ya Moshe; fela le gatee ra se dumele, ka ge re be re nyaka gore le dule le na le nnete ya Ebangedi. Fela bao ba bego ba tsebja e le baetapele – le ge seo go nna e se selo, gobane Modimo ga a ahlole motho go ya ka tebelelo ya mahlo – bona baetapele bao ba be ba kgotsofetše ka Ebangedi ye ke bego ke e ruta. Ba lemogile gore Modimo o mphile modiro wa go begela baditšhaba Ebangedi, go no swana le ge a file Petrose modiro wa go begela Bajuda Ebangedi. Gobane yena Modimo yo a filego Petrose maatla a go ba moapostola wa Bajuda, nna o mphile maatla a go ba moapostola wa baditšhaba. E rile ge ba lemoga gore modiro wo ke o filwe ke Modimo, Jakobose le Kefase le Johanese, bona ba ba bego ba bonala e le baetapele, ba fana diatla le nna le Barnabase e le sešupo sa gore re badirišani. Ra kwana gore nna le Barnabase re tla ya go baditšhaba, bona ba tla ya go Bajuda. Se ba re kgopetšego sona e bile gore re se lebale bahloki, e lego yona taba ye e bego e mpolaiša pelo. E rile ge Petrose a fihla Antiokia nna ka mo sola pepeneneng, ka gobane o be a dira phošo ye e lego molaleng. Pele ga ge go fihla balatedi ba Jakobose, Petrose o be a eja le badumedi ba go tšwa baditšhabeng. Fela e rile ge banna bao ba fihlile a hunyela a ipea lekata, ka go tšhaba Bajuda. Badumedi ba bangwe ba Bajuda le bona ba mo ekiša ba dira tša boikaketši, ešita le Barnabase a gogolwa ke boikaketši bja bona. Nna ge ke bona gore ga ba dire ka mo go lebanego go ya ka nnete ya Ebangedi, ka botša Petrose mo pele ga bona ka moka ka re: “Ge wena o lego Mojuda o sa phethe Sejuda, o phetha seditšhaba, o ka gapeletša bjang badumedi ba baditšhaba gore ba phethe Sejuda?” Rena re Bajuda ka tlhago, ga re badiradibe ba go tšwa boditšhabeng. Le ge go le bjalo, se re se tsebago ke gore motho o lokafatšwa fela ka go dumela go Jesu Kriste, e sego ka go phetha tše di laelwago ke melao ya Moshe. Le rena re dumetše go Kriste Jesu gore re tle re lokafatšwe ka tumelo ya rena go Kriste, e sego ka go phetha tše di laelwago ke melao ya Moshe. Gobane ga go motho yo a lokafatšwago ka go phetha tše di laelwago ke melao yeo. Bjale ge rena re nyakago go lokafatšwa ka go dumela go Kriste re ka hwetšwa re le badiradibe bjalo ka baditšhaba, na e ka se be gore Kriste o kgothaletša batho go dira sebe? Le gatee! Ge nka tsošološa melao ya Moshe yela ke rilego ga se yona, gona ke tla be ke bontšha gore ke a e tshela. Ge go iwa ka melao ya Moshe, nna ke hwile – ke bolailwe ke yona – e le gore ke tle ke phelele Modimo. Ke bolailwe le Kriste sefapanong, gomme ge ke phela ga e sa le nna yo a phelago, eupša ke Kriste yo a phelago mo go nna. Bophelo bjo ke bo phelago bjale ke bo phela ka go dumela go Morwa wa Modimo yo a nthatilego gomme a ikgafa ka baka la ka. Ga se gore kgaugelo ya Modimo ga se selo. Ge eba motho o lokafatšwa ka melao ya Moshe, gona ke gore Kriste o hwetše lefeela. Hee, lena Bagalatia ba ditlaela! Le loilwe ke mang, lena ba le hlalošeditšwego gabotse tša Jesu Kriste, go no swana le ge nke o bapotšwe sefapanong le mo lebeletše? Taba e tee ye ke nyakago go le botšiša yona še: Na e ka ba Moya wo Mokgethwa le o amogetše ka go phetha tše di laelwago ke melao ya Moshe, goba ka go kwa Ebangedi mme la e dumela? Na ruri le ka napa la dio tlaela ka mokgwa wo? Etse le thomile ka go hlohleletšwa ke Moya, gomme bjale le reng le nyaka go feleletša ka tša nama? Kgane tše dintši tše di le hlagetšego di le hlageletše lefeela? Ruri, ga go bjalo! Na e ka ba ge Modimo a le fa Moya wo Mokgethwa a bile a dira mehlolo mo go lena ke ka baka la ge le phetha tše di laelwago ke melao ya Moshe, goba ke ka baka la ge le ekwa Ebangedi mme le e dumela? Le go Abrahama go bile bjalo. Bjalo ka ge Mangwalo a Makgethwa a bolela, “o ile a dumela go Modimo, gomme ka baka la tumelo ya gagwe Modimo a mmona e le moloki.” Ka gona, tsebang ge, gore ba ba nago le tumelo ke bona ditlogolo tša Abrahama. Mangwalo a Makgethwa a boletše e sa le pele gore Modimo o tla lokafatša baditšhaba ka tumelo. Ke ka moo ona Mangwalo a Makgethwa a boditšego Abrahama Ebangedi e sa le pele, a re: “Ditšhaba tšohle di tla šegofatšwa ka wena.” Ka gona, ba ba dumelago ke bona ba ba šegofatšwago gotee le Abrahama yo a dumetšego. Bohle ba ba ikantšego go phetha melao ya Moshe ba phela ba rogakilwe. Gobane Mangwalo a Makgethwa a re: “Go rogakwe mang le mang yo a sa phegelelego go phetha tšohle tše di ngwadilwego ka pukung ya melao ya Moshe.” Bjale ge, go bonala gabotse gore ga go motho yo a ka lokafatšwago ke Modimo ka melao ya Moshe, gobane Mangwalo a Makgethwa a re: “Yo a lokafaditšwego ke Modimo ka tumelo o tla phela.” Melao ya Moshe ga e šome ka tumelo, gobane Mangwalo a Makgethwa a re: “Yo a phethago tše di laelwago ke melao ya Moshe o tla phela ka tšona.” Kriste o re lokolotše thogakong ya go tla le melao yeo ka go ba morogakwa yena mong bakeng sa rena; gobane Mangwalo a Makgethwa a re: “Go rogakwe mang le mang yo a fegilwego koteng.” Seo Kriste Jesu o se diretše gore tšhegofatšo ye Modimo a e filego Abrahama e tle e fiwe le baditšhaba ka yena, gore ka tumelo re tle re amogele Moya wo Mokgethwa wo re o holofeditšwego. Banabešo, ke nyaka go le swantšhetša ka se se tlwaelegilego, gore ge lengwalo la bohwa le tiišeditšwe go ka se be le yo a le hlanamišago goba a le tlaleletšago. Modimo o holofeditše Abrahama le setlogolo sa gagwe. Mangwalo a Makgethwa ga a re “le ditlogolo” mo nkego ke tše dintši, etšwe e le se setee fela, mme go thwe “le setlogolo sa gago”, e lego Kriste. Ke ra gore Modimo o dirile kgwerano le Abrahama, mme a holofetša e sa le pele gore o tla e phetha. Melao ya Moshe ye e ilego ya bewa ka morago ga mengwaga ye makgolo a mane le masome a mararo e ka se kgone go hlanamiša kgwerano yeo ya phumola kholofetšo ya Modimo. Gobane ge bohwa bo ka be bo etla ka melao ya Moshe, gona bo ka be bo sa tle ka kholofetšo. Eupša e be e le ka baka la kholofetšo ge Modimo, ka kgaugelo ya gagwe, a efa Abrahama bohwa bjoo. Bjale melao ya Moshe ke ya go dirang? Ke ya go tlaleletša kgwerano go bontšha se e lego phošo, e beetšwe go ba gona go fihlela ge go etla setlogolo sa Abrahama, yo e lego yena yo a holofeditšwego. E tlišitšwe ke barongwa ba na le mmaditsela. Eupša taba e ama motho o tee fela, mmaditsela ga a nyakege, gomme Modimo yena o tee. Kgane seo se ra gore melao ya Moshe e ganana le dikholofetšo tša Modimo? Aowa, le gatee! Gobane ge batho ba ka be ba filwe molao wa go phediša, gona ba ka be ba lokafatšwa ka go o phetha. Eupša Mangwalo a Makgethwa a re lefase lohle le golegilwe ke sebe, gore badumedi ba fiwe tše ba di holofeditšwego ka go dumela go Jesu Kriste. Mola nako ya go dumela e sešo ya tla, melao ya Moshe e be e re tswaleletše re le dibofša, gwa ba gwa tla nako ya go utollwa ga tša tumelo. Ka gona, melao yeo ya ba mohlokomedi wa rena go fihlela ge Kriste a etla, gore re tle re lokafatšwe ka tumelo. Bjale ka gore tumelo e tlile, melao yeo ga e sa le mohlokomedi wa rena. Ke ka go dumela go Kriste Jesu ge bohle le le bana ba Modimo. Le kolobeditšwe la ba ba tee le Kriste, gomme bjale le phele bjalo ka yena. Ka gona Bajuda le baditšhaba ga ba fapane, makgoba le balokologi ga ba fapane, banna le basadi ga ba fapane; bohle le selo se tee ka go ba ba tee le Kriste Jesu. Gomme ge le le ba Kriste ke gona ge le le ditlogolo tša Abrahama, gomme le tla fiwa tše Modimo a le holofeditšego tšona le le bajalefa ba gagwe. Ke ra gore mojalefa ge e sa le ngwana ga a fapane le lekgoba ka selo, etšwe e le yena mong wa tšohle. O sa laolwa ke bahlokomedi le ba go mo laolela dithoto go fihlela ge go fihla nako ye e beilwego ke tatagwe. Gomme le rena mola re sešo ra gola mo go tša moya re be re laolwa ke meoya ye e bušago lefase. Fela ya re ge go fihla nako ye e beilwego, Modimo a roma Morwagwe, wa go belegwa ke mosadi, a bušwa ke molao wa Bajuda ge a seno tswalwa, gore a tle a rekolle ba go bušwa ke wona molao woo gore re tle re dirwe bana ba Modimo. Go laetša gore ke lena bana ba Modimo, Modimo o romile Moya wa Morwagwe ka dipelong tša rena, wona wa go goelela wa re: “Aba, Tate!” Ka gona, ga o sa le lekgoba, o morwa, gomme ka ge o le morwa wa Modimo, Modimo o go dirile mojalefa wa gagwe. Kgale mola le be le sa tsebe Modimo le be le khunamela dilo tše ka botšona e sego medimo. Gomme bjale ka gore le tseba Modimo – goba, a ke re bjale ka gore Modimo o a le tseba – le reng le nyaka go boela meoyeng yela ya go fokola ya go se be le mohola ya go buša lefase? Le reng le nyaka go e khunamela gape? Go na le matšatši a le a hlomphago, le dikgwedi, le dihla tša meletlo, le mengwaga. Ke boifa gore nka no ba ke itapišeditše lefeela ka lena. Banabešo, ke a le kgopela, hle, ebang bjalo ka nna. Gape le nna ke bjalo ka lena. Ga se la mphošetša ka selo. Le tla gopola gore ke bolwetši bjo bo ilego bja mpha sebaka sa go le begela Ebangedi la mathomo. Fela le ge bolwetši bja ka e ile ya ba moleko mo go lena, moleko wa gore le nnyatše goba le ntšhišingwe, ga se la dira bjalo. Sa lena e bile go nkamogela ka mokgwa wo le bego le ka amogela morongwa wa Modimo, ka mokgwa wo le bego le ka amogela Kriste Jesu. Bjale lethabo lela la lena le feletše kae? Gape nna nka le hlatsela gore ge go be go kgonegile le ka be le ile la ikgonya mahlo la mpha ona. Kgane ke le fetogetše lenaba ge ke le botša nnete? Batho bao le ge nke ba tshwenyegile ka lena, maikemišetšo a bona ona ga se a loka. Se ba se gabilego ke go le aroganya le nna, gore le theeletše bona. Go tshwenyega ka motho go lokile ge eba maikemišetšo a lokile, gomme seo ke nnete ka mehla, e sego fela ge ke na le lena. Lena bana ba ka, ke sa buša ke le kwela bohloko bja go swana le lešoko la mosadi ge a belega, go fihlela ge le swana le Kriste. Ke duma ge nkabe ke na le lena gonabjale, gore ke bolele le lena ka boleta. Ke eme hlogo ka taba ya lena. Nke le mpotše lena le nyakago go bušwa ke molao wa Moshe: Na le a kwa gore molao wa Moshe o reng? O re Abrahama o be a na le barwa ba babedi, yo mongwe a belegwe ke mosadi wa lekgoba, yo mongwe a belegwe ke mosadi wa molokologi. Yo wa go belegwa ke mosadi wa lekgoba o be a tswetšwe ka mokgwa wo go tswalwago motho mang le mang; eupša wa go tswalwa ke mosadi wa molokologi yena o be a tswetšwe ka kholofetšo ya Modimo. Ditaba tše e dio ba seswantšho. Basadi bao ba babedi ba emetše dikgwerano tše pedi. Mosadi yo bana ba gagwe ba tswalelwago bokgobeng ke Hagare, gomme o emetše kgwerano ye e dirilwego thabeng ya Sinai. Sinai ke thaba ya kua Arabia, gomme ke seswantšho sa motse wa gonabjale wa Jerusalema wo o lego bokgobeng gotee le batho ba wona. Ge e le Jerusalema ya legodimong yona e lokologile gomme ke mmagorena. Gomme Mangwalo a Makgethwa a re: “Thaba, wena moopa, wena o sa belegego! Hlaba mokgolokwane, wena o sa tsebego lešoko la pelego! Gobane bana ba mosadi yo a hladilwego ba tla feta ba yo a dulago le monna ka bontši.” Bjale ge, lena banabešo, ke lena bana ba Modimo ka kholofetšo, bjalo ka Isaka. Ka nako yela morwa wa go tswalwa bjalo ka motho mang le mang o ile a hlakiša wa go tswalwa ka kholofetšo ya Modimo, gomme le bjale go sa le ka mokgwa woo. Fela Mangwalo a Makgethwa ona a reng? A re: “Raka mosadi wa lekgoba le ngwana wa gagwe; gobane morwa wa lekgoba a ka se je bohwa le morwa wa molokologi.” Gomme rena, banabešo, ga re bana ba mosadi wa lekgoba, re bana ba mosadi wa molokologi. Kriste o re lokolotše, gomme re lokologile ka mmannete. Ka gona emang le tiile, le se dumele go boela bokgobeng. Theeletšang! Nna, Paulose, ke le botša gore ge le ka bolla, Kriste a ka se le hole ka selo. Ke sa gatelela taba ya gore motho mang le mang yo a dumelago go bolla o tlemegile go phetha melao yohle ya Moshe. Lena ba le nyakago go lokafatšwa ka go phetha melao ya Moshe, le ikgaotše mo go Kriste. Ga le sa kgahla Modimo. Ge e le rena re holofetše gore re tla lokafatšwa ke Modimo; gomme seo ke sona se re se letetšego ka maatla a Moya wo Mokgethwa wo o šomago ka tumelo ya rena. Gobane ge re le ba tee le Kriste, go bolla goba go se bolle ga go bohlokwa; se se lego bohlokwa ke tumelo ye e iponatšago ka lerato. Etse le be le swere gabotse bjang! Bjale ke mang wa go le tlogediša nnete? O le kgonne bjang? Nnete ga se la e tlogedišwa ke Modimo yo a le bitšago. Gape go thwe: “Komelwana ye nyenyane e bediša hlama yohle.” Go phela re le ba tee le Morena ga rena go ntira gore ke holofele gore le ka se be le maikemišetšo ao a arogilego nneteng, le gore moferekanyi yoo wa lena, ana ke mang ana ke mang, o tla otlwa ke Modimo. Bjale, banabešo, ge eba nna ke sa botša batho gore go bolla go a nyakega, e reng e le gona ke sa hlomarwa? Gape ge go ka be go le bjalo, go ruta batho ga ka ka tša sefapano sa Kriste go ka be go sa kgopiše motho. Nke nkabe babolli bao ba le ferekanyago ba bile ba iphagola. Ge e le lena, banabešo, le bileditšwe tokologo. Fela le se dumelele gore tokologo ye e le diriše dibe. Sa lena a e be go direlana ka lerato. Gobane melao yohle ya Moshe e akaretšwa ka molao o tee wo o rego: “O rate bangwekawena bjalo ka ge o ithata.” Fela ge le gobatšana ebile le rathaganyana, gona le itote, ka gore le ka fetšana taa. Gomme nna ke re: Phelang ka mokgwa wo le hlahlwago ke Moya, gomme le ka se lakwe ke ditumo tša nama. Gobane tše di nyakwago ke nama ya rena di ganana le tše di nyakwago ke Moya, le tše di nyakwago ke Moya di ganana le tše di nyakwago ke nama ya rena. Dilo tše di a ganana, gomme di le šitiša go dira se le se nyakago. Ge le hlahlwa ke Moya, gona ga le bušwe ke melao ya Moshe. Tše di dirwago ka go hlohleletšwa ke nama di pepeneneng: ke bogwebakathobalano, le bootswa, le bofebe, le go khunamela medingwana, le boloi, le lehloyo, le phapano, le tseba, le kgalefo, le bojato, le tshele, le dihlophana, le mona, le botagwa, le bohlola, le tše di swanago le tšeo. Ke a le botša, bjalo ka ge ke ile ka le botša pele, ke re ba ba dirago tše dibjalo ba ka se be le bophelo bjo bo sa felego. Dikenywa tša Moya tšona ke lerato, le lethabo, le khutšo, le bopelotelele, le botho, le go loka, le potego, le boleta, le boitshwaro. Tša mohuta woo ga go molao wo o di ganago. Gomme ba e lego ba Kriste Jesu ba bolaile nama ya bona gotee le dikganyogo le ditumo tša yona. Ge eba re phedišwa ke Moya, gona le go laolwa re swanetše go laolwa ke wona. Re se ke ra ikgogomoša goba ra rumolana goba ra tsebafelana. Banabešo, ge motho a ka swarwa a dira sebe, lena le hlahlwago ke Moya le mo kgale ka moya wo boleta, gomme motho a itote, gore le yena a se lekege. Le rwadišaneng mathata a lena, gomme ka tsela yeo le tla be le phetha molao wa Kriste. Ge motho a ipona e le selo, mola e se selo, o a iphora. A mongwe le mongwe a itlhahlobe maitshwaro. Ge e le a go loka ke mo a kago ikgantšha ka tše yena mong a di dirilego, a sa di bapetše le tše di dirilwego ke yo mongwe. Gobane mongwe le mongwe o swanetše go ithwalela a gagwe mathata. Yo a rutwago tša tumelo a fele a ngwathiša moruti wa gagwe go tšohle tše dibotse tše a nago le tšona. Le se ke la iphora; Modimo ga a kodutlwe. Se motho a se bjalago ke sona se a tlago se buna. Yo a bjalago tše di kgahlago ditumo tša gagwe tša nama, se a tlago se buna ke lehu le le sa felego; yo a bjalago tše di kgahlago Moya, se a tlago se buna ke bophelo bjo bo sa felego. Re se ke ra lapa go dira tše di lokilego, gobane ge re ka se lape re tla tla re buna ka nako ya gona. Ka gona, ge re na le sebaka re direleng batho bohle tše di lokilego, gagolo bao e lego ba tumelo ya rena. Bonang gore nna ka seatla sa ka ke le ngwalela ka ditlhaka tše dikgolo bjang. Batho bao ba lekago go le gapeletša go bolla ke bona ba ba nyakago go kgantšha mebele ya bona. Seo ba dio se direla gore ba se ke ba hlomarelwa sefapano sa Kriste. Ešita le bona bao ba bollago ga se gore ba phetha melao ya Moshe; ba dio nyaka gore le re go bolla ba tle ba kgantšhe gore le obametše setlwaedi se sa go swaya mmele. Nnaena nka se ikgantšhe ka selo, ge e se ka sefapano sa Morena wa rena Jesu Kriste, gobane ka sona sefapano se ga ke sa na taba le lefase, le lona lefase ga le sa na taba le nna. Go bolla goba go se bolle ga se selo, se segolo ke go bopša lefsa. Anke bao ba phelago ba phetha molao wo ba be le khutšo ba be ba gaugelwe – bona e lego Baisraele ba Modimo. Ka moso go se sa ba le yo a ntshwenyago, ka gobane mabadi a ke nago le ona mo mmeleng wa ka ke leswao la gore ke nna wa Jesu. Banabešo, anke Morena wa rena, Jesu Kriste, a le gaugele. Amene. Nna, Paulose, yo ka thato ya Modimo ke lego moapostola wa Kriste Jesu, ke dumediša bakgethwa ba ba lego motseng wa Efeso, ba ba dumelago go Kriste Jesu, ke re: Nke Modimo, Tatagorena, le Morena Jesu Kriste ba le gaugele, ba le fe khutšo. A go retwe Modimo, Tatago Morena wa rena, Jesu Kriste! Gobane o re šegofaditše ka Kriste ka dimpho tšohle tša legodimong tša go tšwa go Moya. Le pele ga ge lefase le hlolwa, Modimo o be a šetše a re kgethile gore re be ba gagwe ka Kriste, gore re tle re be ba bakgethwa ba ba se nago molato mo pele ga gagwe, le ba ba tletšego lerato. Modimo o be a šetše a feditše le pelo gore o tla re dira barwa ba gagwe ka Jesu Kriste – seo e le go kgahlwa ga gagwe le maikemišetšo a gagwe. Ka fao, a re tumišeng Modimo ka baka la kgaugelo ya gagwe ye kgolo, ye e lego mpho ye a re filego yona ka Morwagwe yo a mo ratago. Gobane ka madi a Kriste re a lopollwa, seo se ra gore re swarelwa dibe. Modimo, ka ge a re gaugetše gakaaka, o re file bohlale bjo bontši le temogo ye ntši. O re tsebišitše maikemišetšo a gagwe a sephiri go ya ka leano la gagwe le a bego a šetše a itherile go le phethagatša ka Kriste. Lona leano le ke le Modimo a tlago le phethagatša ka nako ya gona, ke la go tlo kopanya dihlolwa tšohle tša legodimong le tša lefaseng, gomme Kriste ya ba hlogo ya tšona. Dilo ka moka Modimo o di dira ka maikemišetšo le thato ya gagwe; rena Modimo o re kgethile gore re be ba gagwe ka Kriste, bjalo ka ge a be a beakantše. Bjale ge, rena re bilego ba mathomo ba go holofela Kriste, a re tumišeng Modimo ka ge e le yo mogolo gakaaka. Ka Kriste le lena le bile ba Modimo mola le ekwa molaetša wa nnete, e lego Taba ye Botse yona e le begetšego tša phološo. Le ile la dumela go Kriste, gomme Modimo a le swaya leswao la gagwe ka go le fa Moya wo Mokgethwa wo a bego a le holofeditše wona. Moya wo ke yona peeletšo ya gore re tla fiwa tše Modimo a di holofeditšego ba e lego ba gagwe, gomme seo se re tiišetša gore Modimo o tla lokolla bao e lego ba gagwe. A re mo tumišeng ka ge e le yo mogolo gakaaka! Ka baka leo, e sa le mola ka kwago ka mo le dumetšego go Morena Jesu le ka mo le ratago badumedi bohle, ga se nke ke lese go le lebogela go Modimo ge ke le gopola ke rapela, gomme ke kgopela Modimo wa Morena wa rena, Jesu Kriste, yena Raletago, gore a le fe Moya wo Mokgethwa, yo a tlago le hlalefiša, a le utollela Modimo gore le mo tsebe. Ke rapela gore a le bonegele menagano, gore le tsebe se le bileditšwego go se holofela, le tsebe ge tše Modimo a tlago di fa badumedi e le tše di makatšago ruri, le gore maatla a gagwe mo go rena re dumelago ke a makaakang. Ona maatla a a šomago mo go rena ke ona ale a magolo a ilego a a šomiša mola a tsoša Kriste bahung a mmea madulong a bogoši kgauswi le yena kua legodimong. Ke gona mo Kriste a okametšego magoši ohle a semoya, le balaodi bohle ba semoya, le maatla ohle a semoya, le babuši bohle ba semoya; o na le maemo a a fetago a babuši bohle ba mehleng yeno le ba ye e tlago. Modimo o dirile gore tšohle di bušwe ke Kriste, a mo fa kereke gomme a ba hlogo ya tšohle. Kereke ke mmele wa Kriste yo a e tlalago, yena Motlalatšohle mo gohle. Pele le be le hwile moyeng ka baka la go tshela molao wa Modimo ga lena le ka baka la dibe tša lena. Le be le phela bjalo ka batho ba babe ba mo lefaseng; le be le theeletša molaodi wa meoya ye e bušago lefaufaung, e lego yona meoya ye bjale e hlohleletšago ba ba nyatšago Modimo go dira tše mpe. Gabotse bohle re be re swana le bona, mme re phela go ya ka ditumo tša rena tša nama, re dira se se nyakwago ke nama ya rena goba menagano ya rena. Re be re le batho ba nama mme, bjalo ka mang le mang, go se ka mo Modimo a ka se re otlelego dibe tša rena ka gona. Eupša kgaugelo ya Modimo ke ye kgolo kudu, le go re rata ga gagwe ke mo gogolo, mo e lego gore mola re sa hwile moyeng ka baka la dibe tša rena o ile a re tsoša le Kriste ra phela. Modimo o le phološitše ka kgaugelo ya gagwe. Le rena, ka ge re le ba tee le Kriste Jesu, Modimo o re tsošitše naye gore re tle re dule naye legodimong. O be a direla gore ka moso, ka lerato le a re ratago ka lona ka Kriste Jesu, a bonagatše kgaugelo ya gagwe ye e se nago kelo. Gobane ke ka kgaugelo ya Modimo mo le phološitšwego ka tumelo; ga se la iphološa. Go phološwa ga lena ke mpho ya Modimo, ga se maitekelo a lena. Ke ka baka leo go sego yo a kago itheta. Modimo o re dirile se re lego sona, gomme ka Kriste Jesu o re hlodile gore re tle re phele re dira mediro ye mebotse ye a šetšego a e lokišeditše gore re tle re e dire. Le gopole gore pele le be le le baditšhaba ka tswalo, lena bao Bajuda ba le bitšago “mašoboro” mme bona ba ipitšago “babolli” ka baka la leswao leo ba le swaiwago mebeleng ya bona. Ka nako yeo lena le be le arogane le Kriste. Le be le se ba setšhaba sa Israele. Le be le se ba dikgwerano tše Modimo a di dirilego le setšhaba sa gagwe e le tše a bego a ba holofeditše tšona pele; le be le phela mo lefaseng le se na se le se letetšego, le sa tsebe Modimo. Eupša bjale le ba tee le Kriste Jesu. Lena pele le bego le le kgole le Modimo bjale le batameditšwe ka madi a Kriste. Gobane Kriste ka boyena o re dirile gore re phedišane ka khutšo, yena yo a dirilego Bajuda le baditšhaba selo se tee. Ka lehu la gagwe sefapanong o fedišitše bonaba bjo bo bego bo itirile leboto la go ba kgaogantšha. O fedišitše melao ya Moshe le ditaelo tša yona le melawana ya yona, gore merafe ye mebedi yeo e bope setšhaba se tee se sefsa se se kopanego mo go yena, gomme ka tsela yeo a hlola khutšo. Kriste, ka lehu la gagwe sefapanong, o fedišitše bonaba bja bona; ka lona o kopantše merafe ye ka mebedi a e dira selo se tee mme a e boelanya le Modimo. Ka gona, Kriste o tlile a begela batho Taba ye Botse ya khutšo – a begela lena le bego le le kgole le Modimo, a begela le bona ba bego ba le kgauswi le yena. Ke ka Kriste mo rena, Bajuda le baditšhaba, re kgonago go tla go Tatagorena ka Moya o tee. Ge go le bjalo ge, ga le sa le bašele le bafaladi; ke lena badudi ba tee le badumedi, gomme ke lena ba lapa la Modimo. Le agilwe motheong wo o beilwego ke baapostola le baprofeta, motheo woo leswika la wona la sekhutlo e lego Kriste Jesu ka sebele. Ke yena yo a thekgilego moago wohle mme a o godišago ya ba tempele ye kgethwa ye e neetšwego Morena. Mo go yena le ageletšwe le ba bangwe la ba moago woo go ona go dulago Modimo ka Moya wa gagwe. Ke sona se se dirilego gore nna, Paulose, ke be sebofša ka baka la Kriste Jesu, e le ka baka la lena, baditšhaba. Le swanetše le kwele gore Modimo, ka kgaugelo ya gagwe, o mphile modiro wa go ba moapostola gore ke le hole. Modimo o ntsebišitše sephiri sa gagwe ka go nkutollela sona, bjalo ka ge ke sa tšo ngwala ka boripana, gomme ge eba le tla bala tše ke di ngwadilego le tla lemoga se ke se kwešišago ka sephiri se sa Kriste. Mehleng ye e fetilego batho ga se ba utollelwa sephiri se, eupša bjale Modimo o se utolletše baapostola ba gagwe ba bakgethwa le baprofeta ka Moya. Sephiri sa gona ke gore ka Ebangedi baditšhaba e tla ba bajalefa ba Modimo go no swana le Bajuda; le bona ke ditho tša mmele wa Kriste, bjalo ka Bajuda; le bona ba tla hwetša tše Modimo a di holofeditšego batho ka Kriste Jesu. Ke yona Ebangedi ye ke dirilwego mohlanka wa yona, ye Modimo a mphilego yona ka kgaugelo ya gagwe le ka maatla a gagwe a a šomago mo go nna. Nna ke fetwa le ke yo monyenyane wa badumedi; eupša Modimo o mpabaletše mo a ilego a nkgethela go yo begela baditšhaba Taba ye Botse ya mahumo a a se nago tekanyo a Kriste, le go dira gore batho bohle ba bone ka mo maikemišetšo a sephiri sa Modimo a tlilogo dirišwa ka gona. Modimo, yena Mohlodi wa tšohle, o ile a uta maikemišetšo a a gagwe mehleng yela ya kgale, gore mehleng yeno ya bjale magoši a semoya le balaodi ba semoya lefaufaung ba tsebe bohlale bja gagwe bja mehutahuta ka kereke. Seo Modimo o se dirile go ya ka mo a bego a ikemišeditše ka gona go tloga le go tloga, mme o se phethile ka Kriste Jesu, Morena wa rena. Ge re le ba Kriste re bile re dumela go yena, re ba le sebete sa go ya go Modimo re sa šie. Ka gona, ke le kgopela gore le se ke la nyamišwa ke ge ke tlaišwa ka baka la lena, seo se a le godiša. Tšeo ke tšona tše di ntirago gore ke khuname pele ga Tatagorena wa legodimong, yena yo kgoro ye nngwe le ye nngwe legodimong le lefaseng e hlolwago ke yena. Nna ke kgopela Modimo gore ka lehumo la letago la gagwe a le fe maatla ka Moya wa gagwe gore le tie ka dipelong tša lena, gomme ke rapela gore nke Kriste a ka aga ka dipelong tša lena ka tumelo ye le nago le yona go yena, le gore le dule le tieletše leratong, le le ba ba agilego godimo ga lona, gore lena le badumedi ka moka le kgone go kwešiša bophara le botelele le go phagama le go iša ga lerato la Kriste. Nke nkabe le ka tla la le lemoga – le ge mokagona lona le sa lemogege – gomme la tlala Modimo ka boyena. Yena a kgonago go dira tše di fetago kudu tše re kago di kgopela goba ra di nagana, ka maatla a gagwe a a šomago mo go rena, a a tumišwe ke ba meloko yohle ka kerekeng le go Kriste Jesu go ya go ile! Amene. Bjale ge, nna ke lego sebofša ka baka la ge ke direla Morena, ke le kgopela gore le phele ka mo go swanelago boemo bjo Modimo a le bileditšego go bjona. Ka mehla le be ba go ikokobetša, ba boleta, le ba go se fele pelo, le ntše le kgotlelelana ka lerato. Le ikokoropele go boloka botee bjo le bo fiwago ke Moya ka khutšo ye e le tlemaganyago. Ka ge bohle le na le Moya o tee wo Mokgethwa, le bopa mmele o tee seng sa lena, bjalo ka ge se ke se holofetšego e le se tee gomme e le sona se Modimo a le bileditšego go se dira. Morena ke o tee, tumelo ke e tee, le kolobetšo ke e tee. Modimo ke o tee, yena Rabohle, Kokamabohle, Modirakabohle, Modulagobohle. Mongwe le mongwe wa rena o filwe mpho ye nngwenyana go ya ka mo Kriste a re filego ka gona. Ke ka baka leo Mangwalo a Makgethwa a rego: “Mola a rotogela godimo legodimong o thopile mathopša, a fa batho dimpho.” Bjale go ra go reng ge go thwe “a rotogela godimo”? Go ra gore pele o ile a theogela fase mafelong a ka fase ga lefase. Motheogi yo ke yena a rotogetšego godimo ka godimodimo ga magodimo, gore a tlale legohle. Ke yena a filego batho dimpho: bangwe a ba dira baapostola, bangwe ya ba baprofeta, bangwe ya ba babegi ba Ebangedi, bangwe ya ba badiša le baruti, a direla gore badumedi ba itokišetše modiro wo ba swanetšego go o direla Modimo, e lego go aga mmele wa Kriste, gore bohle re be re tle re be ba tee tumelong le tsebong ya rena ya go tseba Morwa wa Modimo, re be ba ba budulego go tša tumelo bjalo ka Kriste. Ke mo re ka se sa bago bjalo ka bana, re ka se sa etšago leselawatlana la go tšokotšwa ke maphoto goba la go tšewatšewa ke phefo ye nngwe le ye nngwe ya thuto ya dihwirihwiri tše di arošago bangwe ka boradia bja tšona. Re be ba go bolela therešo ka lerato, ke mo re tlago gola go felela ra ba ba tee le Kriste yo e lego hlogo. Ke yena a kopanyago ditho tšohle tša mmele, mme mmele wohle wa swaragana ka makopano ohle a wona. Gomme ge setho se sengwe le se sengwe se dira mošomo wa sona, mmele wohle o a gola wa imaatlafatša ka lerato. Se ke se bolelago ke se gatelela legatong la Morena ke go re: Le se sa phela bjalo ka baditšhaba ba go nagana ka tše di se nago mohola, ba go se be le se ba se kwešišago. Bao ga ba na bophelo bja Modimo gobane ba dio se tsebe selo ebile ba gwaletše. Ba hwile dipelo. Ba iphile bofebe le bohlola bja mehutahuta bja go se ba tene. Eupša lena bophelo bja mohuta woo ga se selo se le ithutilego sona mabapi le Kriste. Ga ke re le kwele tša Jesu, le gona lena, balatedi ba gagwe, le rutilwe therešo ye e lego go yena? Ka gona, le se sa phela ka mokgwa wola wa lena wa pele; lahlang tlhago ya lena ya kgale ye e senywago ke ditumo tša lena tša bofora. Mokgwa wa lena wa go nagana o swanetše go mpshafatšwa, gomme le tšee tlhago ye mpsha ye e hlodilwego ka go swantšhwa le Modimo, le phele le le baloki ba nnete le bakgethwa ba nnete. Ka gona le lahle maaka. Motho a botše modumedikayena therešo, gobane bohle re ditho tša mmele o tee. Ge le ka tšhoga le galefile le se ke la lesa kgalefo ya lena e le diriša sebe, le gona letšatši le se ke la le sobelela le sa galefile. Le se ke la fa Diabolose sebaka. Yo a lemetšego go utswa a se sa utswa, a upše a kgothalele go šoma, gore a tle a hwetše tše di mo lebanego tša go iphediša, le gore a tle a be le tša go thuša bahloki. Melomong ya lena go se tšwe mahlapa; ge go nyakega gore le bolele, le bolele fela tše di lokilego le tše di holago batho, gore tše le di bolelago di hole ba ba le kwago. Le gona le se ke la rumola Moya wo Mokgethwa wa Modimo, wo ka wona le swaetšwego letšatši la go lokollwa ga lena. Le tlogeleng metsoto, le kgalefo, le swele, le mašata, le lesebo, le lehloyo ka moka. Sa lena e be go swarana ka botho le ka kwelobohloko, le swarelaneng diphošo go etša Modimo ge a le swaretše ka Kriste. Ka ge le le bana ba Modimo ba a le ratago, le mo ekiše. Le phele ka lerato, bjalo ka ge Kriste a re ratile mme a re hwetše a ba seloba le sehlabelo se se kgahlago Modimo. Ge e le bofebe le bohlola bja mehutahuta le megabaru mo go lena le go bolelwa di se ke tša bolelwa, go ya ka mo go swanelago badumedi. Le dihlabišadihlong, le dipolelo tša bošilo, le meswaso ye e sa lokago di a le rona. Sa lena a e be go leboga Modimo. Se le swanetšego go se tseba ke gore ga go sefebe goba sehlola goba wa megabaru yo a tlago tsena mmušong wa Kriste le Modimo. Gape wa megabaru ke sekhunamelamedingwana. Le se ke la forwa ke motho ka dipolelo tša lefeela; taba tše ke di bolelago tše ke tšona tše di dirago gore Modimo a otle bao ba sa mo theeletšego. Ka gona, ba babjalo lena le se ke la šomišana nabo. Pele le be le le leswiswing, eupša bjale, ka ge le le ba Morena, le mo seetšeng. Ka gona, le phele bjalo ka ba ba lego mo seetšeng, gobane seetša se diriša batho sengwe le sengwe se sebotse le se se lokilego le sa nnete. Lekang go ithuta tše di kgahlago Morena. Le se ke la kgatha tema medirong ye e se nago mohola ya ka maswiswaneng; sa lena e be go e utolla. Gape tše di dirwago ka sephiring, le go di bolela go leša dihlong, gomme tšohle ge di utologa seetšeng, ke mo di bonalago gabotse se di lego sona, gobane selo se sengwe le se sengwe se se utologago seetšeng se fetoga seetša. Ke ka baka leo sefela se rego: “Tsoga, morobadi, tsoga bahung, gomme Kriste o tla go ediša.” Ka fao, le itlhokomele gabotse ka mo le phelago ka gona. Le se phele bjalo ka mašilo, le phele bjalo ka bahlale. Le dule le direla Morena ka phišego, gobane lefase leno ke le lebe. Ka gona, le se dire tša bošilo; sa lena e be go kwešiša se e lego thato ya Morena. Le se tagwe ke bjala, ka gobane moo ke mo go tšwago bohlola; sa lena e be go tlala Moya wa Modimo. Le boledišaneng ka dipesalome le difela le dikopelo tša semoya, le opelela Morena le mo tumiša ka dipelong tša lena. Ka ge le le ba Morena wa rena, Jesu Kriste, ka mehla le leboge Modimo, Tatagorena, ka baka la tšohle. Motho a ikokobetše go mongwekayena e le ka baka la ge le hlompha Kriste. Lena basadi, le ikokobetše go banna ba lena, go etša ge le ikokobetša go Morena; gobane monna ke hlogo ya mosadi, go no swana le Kriste ge e le hlogo ya kereke; gomme yo Kriste ke Mophološi wa kereke, yona e lego mmele wa gagwe. Bjalo ka ge kereke e ikokobetša go Kriste, basadi le bona ba ikokobetše go banna ba bona go tšohle. Lena banna, le rate basadi ba lena, bjalo ka ge Kriste le yena a ratile kereke a ba a ikgafela go e hwela, e le gona go e kgethwafatša, ge a seno e hlwekiša ka go e hlatswa ka meetse, le ka molaetša wa Modimo, gore a tle a itlhomele kereke ye e thakgegilego, ye e se nago sepatso goba lešošo goba bosodi bjo bongwenyana, eupša e be ye e hlwekilego, ye e se nago bosodi. Banna ba swanetše go rata basadi ba bona bjalo, go no swana le ge ba rata mebele ya bona. Yo a ratago mosadi wa gagwe o a ithata. Etse motho wa go hloya mmele wa gagwe ga se a ka a ba gona. Se motho a se dirago ke go o fepa le go o babalela, e lego sona se Kriste a se dirago kereke ya gagwe, yona e lego mmele wa gagwe wo re lego ditho tša wona. Mangwalo a Makgethwa a re: “Ka baka leo monna o tla tlogela tatagwe le mmagwe a kopana le mosadi wa gagwe, gomme bobedi bja bona ya ba mmele o tee.” Temana ye e utolla sephiri se segolo, seo ke kwešišago gore se ra Kriste le kereke. Fela se ra le lena: Monna yo mongwe le yo mongwe o swanetše go rata mosadi wa gagwe bjalo ka ge a ithata, le mosadi o swanetše go hlompha monna wa gagwe. Lena bana, le hlomphe batswadi ba lena ka ge le le ba ba dumelago go Morena, gomme seo e le se se lokilego. “Hlompha tatago le mmago” ke molao wa mathomo wo o nago le kholofetšo ye e o tlaleletšago ka go re: “gore o tle o atlege, o phele nako ye telele mo lefaseng.” Lena botatagobana, le se galefiše bana ba lena. Sa lena e be go ba godiša ka kgalemo le thuto ya Morena. Lena makgoba, le hlomphe ka botlalo beng ba lena ba mo lefaseng, gomme seo le se dire ka botshepegi, bjalo ka ge nke le direla Kriste. Seo le se se direle gore ba le bone mme ba le rete, eupša ka dipelo tšohle tša lena le dire se se nyakwago ke Modimo, ka ge le le makgoba a Kriste. Le ba šomele ka dipelo tše ditšhweu mo nkego le šomela Morena, e sego batho. Le a tseba gore Morena o tla putsa bohle, makgoba le balokologi, ka baka la tše dibotse tše ba di dirago. Lena bengmakgoba, le sware makgoba a lena ka wona mokgwa woo, gomme le tlogele go hlwa le ba tšhošetša. Le gopole gore lena le makgoba a lena mong wa lena ke o tee wa legodimong, yo a sa kgethollego batho. A ke fetše ka go re: Ikopanyeng le Morena le itiiše le ka maatla a gagwe. Itlhameng ka dihlabani tšohle tše Morena a le fago tšona gore le kgone go iphahlela bomenemene bja Diabolose. Gobane ya rena ntwa ga se ya go lwa le batho ba nama, ke ya go lwa le meoya ye mebe ya lefaufaung, e lego magoši a semoya, le balaodi ba semoya, le babuši ba lefase le lebe le. Ka fao, itlhameng ka dihlabani tša Modimo, gore mohla go le gobe le kgone go iphahlela; e tle e re ge le lwele go fihla mafelelong a ntwa le ikhwetše le ba paletše. Ka gona, ebang komana madulaabapile, gomme nnete e be bjalo ka lepanta la go itlema letheka, toka e be bjalo ka sefahlo sa kgara, mafolofolo a lena a go bega Ebangedi ya khutšo e be dieta tša lena. Ntle le tšeo, tumelo e be thebe ya lena, gobane ka yona le tla kgona go tima mesebe ye e tukago ye Rabobe a le hlaselago ka yona. Le amogele phologo ye e lego mpho ya Modimo; e tla le šireletša boka kefa ya tshipi. Le amogele le molaetša wa Modimo wo le o fiwago ke Moya wo Mokgethwa; wona o tla ba bjalo ka tšhoša. Tšohle tše le di dire le rapela, le kgopela Modimo gore a le thuše. Le rapele ka mehla ka mo le hlahlwago ke Moya. Ka gona, le phafoge le sa lape, le dule le rapelela badumedi bohle. Le nna le nthapelele gore Modimo a mpotše se ke swanetšego go se bolela ge ke ahlama, gore ke utolle sephiri sa Ebangedi ke sa šie. Le ge gonabjale ke le sebofša, ke sa ntše ke le mmaditsela wa go bega Ebangedi ye. Le nthapeleleng gore ke bolele ka yona ke sa boife, bjalo ka ge ke swanetše. Tigikose, ngwanaborena yo re mo ratago, yo e lego mohlanka wa go botegela modiro wa Morena, o tla le anegela tšohle ka nna, gore le lena le tsebe ka mo ke phelago ka gona. Ke ka baka leo ke mo romago go lena gore a tle a le botše gore na re phela bjang, le gore a tle a le kgothatše. A Modimo, Tatagorena, le Morena Jesu Kriste ba kgontšhe badumedi go phedišana ka khutšo le go ratana le go dumela go Modimo. A Modimo a gaugele bohle ba ba ratago Morena wa rena, Jesu Kriste, ka lerato le le sa felego. Nna, Paulose, le Timotheose, makgoba a Kriste Jesu, re dumediša badumedi bohle motseng wa Filipi ba e lego ba tee le Kriste Jesu, go akaretšwa le baetapele ba phuthego le bathuši, re re: Nke Modimo, Tatagorena, le Morena Jesu Kriste ba le gaugele, ba le fe khutšo. Ke le lebogela go Modimo wa ka nako le nako ge ke le gopola; gomme ka mehla ge ke le rapelela bohle ke rapela ke thabile, ke le lebogela ka mo le nthušitšego ka gona mo modirong wa go bega Ebangedi, go tloga tšatšing lela la mathomo go fihlela gonabjale. Se ke nago le nnete ya sona ke gore Modimo yo a thomilego modiro wo mobotse wo mo go lena o tla o tšwetša pele go fihlela a o phetha ka letšatši le Kriste Jesu a tla bego a etla ka lona. Go ntshwanetše ge ke le gopola bohle ka mokgwa wo, ka gobane le ka mo pelong ya ka. Gobane le hlakanetše kgaugelo ya Modimo le nna ke le mo kgolegong, ke emela Ebangedi ke bile ke e hloma. Modimo ke hlatse ya ka gore ke le hlolosetše bohle ka lerato la Kriste Jesu. Ke rapela gore lerato la lena le gole le eya le na le tsebo le kwešišo ye e feletšego, gore le kgone go kgetha se sebotse. Ke mo le tlago ba ba ba hlwekilego ba go hloka bosodi ka letšatši le Kriste a tla bego a etla ka lona. La ba ba ba tletšego toka ye e tlago ka Jesu Kriste gore ka yona le tumiše le be le rete Modimo. Banabešo, ke rata ge le tseba gore tše di ntlhagetšego di thušitše kudu go tšweletša Ebangedi, baleti ba mošate le bohle moo ba ba ba tseba gore nna ke ka mo kgolegong ka baka la Kriste. Gomme go golegwa ga ka go dirile gore badumedi ba bantši ba tshephe Morena, ba be le sebete go feta pele go bega molaetša wa Modimo ka mafolofolo. Ba bangwe ba bega molaetša wa Kriste ka tseba le kgang, mola ba bangwe bona ba o bega ka maikemišetšo a mabotse. Bona seo ba se dirišwa ke lerato, ka ge ba tseba gore wa ka modiro ke go emela Ebangedi. Ge e le bao ba tseba le kgang bona ba bega molaetša wa Kriste ka bojato, e sego ka maikemišetšo a mabotse, e le ge ba gopola gore ba ka nkokeletša mathata ge ke le ka mo kgolegong. Fela ba tla ntirang? Segolo ke ge molaetša wa Kriste o begwa ka mekgwa yohle – ana ke ka maaka, ana ke ka therešo – seo se a nthabiša, gomme ke tla no dula ke thabile, ka gobane ke a tseba gore ka dithapelo tša lena le ka go thušwa ke Moya wa Jesu Kriste ke tla ba ka lokollwa. Se ke se dumago kudu gape ke se holofelago ke gore ke se ke ka dira selo se se kago nteša dihlong, eupša gonabjale le ka mehla ke be le mafolofolo a gore Kriste a tumišwe ka tšohle tše ke di dirago – ana ke a phela, ana ke a hwa. Gape mo go nna go phela ke go direla Kriste, go hwa ke go boelwa. Fela ge eba nka tšwela pele le go phela nka dira mošomo wo bohlokwa. Gore na nka kgetha eng, ga ke tsebe. Ke tšeatšewa ke dilo tše pedi tše. Ke duma go tloga mo lefaseng ke yo dula le Kriste. Etse seo ke sona se sekaone kudu; fela go tšwela pele le go phela ga ka mo lefaseng go tloga go nyakega ka baka la lena. Ka ge ke na le nnete ya taba ye, ke a tseba gore ke tla no dula ke phela. Ke tla dula le lena bohle gore ke le thuše go tšwela pele tumelong mme le thabe go yona, gore mohla ke na le lena gape le kgone go ikgodiša kudu ka go ba ba Kriste Jesu ka baka la se a le diretšego sona. Tabakgolo ke gore le phele go ya ka mo go nyakago Ebangedi ya Kriste, gore le ge nka kgona go tlo le bona le ge nka se kgone, ke kwe gore le eme le tiile le le ba pelo e tee, gomme le tšea kgopu le hlabanela tumelo ya Ebangedi. Le gannyane le se boife baganetši ba lena; gomme seo e tla ba sešupo sa gore ba tla lahlwa gwa phološwa lena. Sešupo se se tšwa go Modimo. Gobane lena le filwe sebaka sa go direla Kriste, e sego fela ka go dumela go yena, eupša le ka go tlaišwa ka baka la gagwe. Nna le lena re lwa ntwa e tee. Ke yona yela le bonego ke e elwa, gape ye le kwago ke sa e lwa le gonabjale. Ge eba le hweditše kgothatšo mo go Kriste goba khomotšo ye e tšwago leratong, goba le ikwa le le selo se tee le Moya wo Mokgethwa, goba le ratana le bile le kwelana bohloko, gona ke le kgopela gore le nthabiše gagolo ka go ba le menagano ya go swana, le lerato la go swana, le maikemišetšo a go swana, le pelo ya go swana. Motho a se dire selo ka bojato goba ka go nyaka boikgantšho bja lefeela, eupša ka boikokobetšo a ipone a phalwa ke ba bangwe. A se šetše fela tša go ikhola, eupša a šetše tša go hola ba bangwe. Moya wo le swanetšego go ba le wona ke wo Kriste a bego a na le wona: Yena o be a na le tlhago ya Modimo, fela a se bone go lebane gore a kgomarele go lekana ga gagwe le Modimo. A upša a ikamoga tšohle, a ipha sebopego sa lekgoba. A swana le batho, a iponagatša ka sebopego sa motho. A ikokobetša, a theeletša Modimo go iša lehung, lehung la sefapano. Ka baka leo, Modimo o mo phagamišitše kudu; a mo thea leina le le phalago ohle, gore bohle ba legodimong le ba lefaseng le ba ka fase ga lefase ba khunamele Jesu, batho bohle ba bege phatlalatša gore Jesu ke Morena, ya ba ge ba reta Modimo Tatagwe. Barategi, ka ge le be le ntheeletša ka mehla mola ke sa na le lena, gonabjale ge ke le kgole le lena, le swanetše go ntheeletša le go feta. Dulang le katanela phološo ya lena ka tlhompho le poifo, gobane go rata go phetha thato ya Modimo ga lena, le go kgona go e phetha le go dirišwa ke yena. Le dire tšohle le sa ngongorege, le se na manganga, gore le hloke bosodi mme le be ba ba hlwekilego, le be bana ba Modimo ba ba se nago molato, ba ba phelago gare ga bakgopo le baarogi, ba ba tagago mo gare ga bona bjalo ka dinaledi leratadimeng, le ba fe molaetša wa bophelo. Ge le ka dira bjalo ke tla ba le lebaka la go ikgantšha ka lena ka letšatši le Kriste a tla bego a etla ka lona, gobane go tla bontšhega gore maitekelo le maitapišo ohle a ka ga se a wela fase. Ke ra le ge nkabe nka dirwa sehlabelo ka baka la tumelo ya lena ye ka boyona e lego sehlabelo se se neelwago Modimo, ke be nka thaba ka ipshina le lena ka moka. Ka lona baka leo le lena thabang le ipshine le nna. Ge Morena Jesu a ratile ke holofela gore kgauswinyana ke tla roma Timotheose moo go lena gore le nna ke tle ke we pelo ge ke ekwa tša lena. Gape ka ntle le yena ga ke na yo mongwe yo a kago le hlokomela gabotse bjalo ka yena, yo maikutlo a gagwe a swanago le a ka. Ba bangwe batho ba inyakela tša bona, ga ba nyake tša Kriste Jesu. Ge e le yena, go botega ga gagwe le a go tseba, ka mo a šomilego le nna go bega Ebangedi ka gona bjalo ka ngwana ge a dira le tatagwe. Ke yena yo ke holofelago gore ke tla mo roma ka pelapela ge ke seno bona gore ditaba di ntshepelela bjang. Ge Morena a ratile ke tshepha gore le nna mong nka se tšee nako ke se ka tla go lena. Ke bone e le tshwanelo gore ke le romele ngwanaborena, Ephafroditose, yo e lego modirikanna le mokatanikanna, yo ebilego e le motseta wa lena wa go tlo nthuša ka tše ke di hlokago. O le hlolosetše bohle, gomme o hlobaetšwa ke ge le kwele gore o be a fokola. Ke nnete o be a lwala, a ba a ba makgatheng. Fela Modimo o mo gaugetše, e sego yena fela, eupša le nna, gore manyami a se ke a ntlela a šalane morago. Ke ka baka leo ke fišegago kudu go mo roma, gore ge le mmona gape le thabe mme nna ke se sa hlobaela. Ka fao le mo amogele ka diatla tše pedi ka ge e le modumedikalena. Ba babjalo ka yena le ba hlomphe, gobane o ile a ipea kotsing ya lehu gomme o nyakile go hwa ka baka la modiro wo a bego a o direla Kriste, e le ge a nthuša ka tše lena le bego le sa kgone go nthuša ka tšona. Bjale ge, banabešo, thabang le le ba Morena. Gape go boeletša tše ke šetšego ke le ngwaletše tšona ga go ntene, kganthe lena go a le tiiša. Le phafogele dimpša tšeo, ke ra badiratšekgopo bao, bona baripšasetho bao. Gape ba lebollo la mmannete ke rena, gobane rena re khunamela Modimo ka Moya wa gagwe, gomme re ikgantšha ka Kriste Jesu. Ga re bote tša nama. Go bota tša mohuta woo ga se gore go a mpalela. Ge eba go na le yo a gopolago gore a ka bota tša nama, nna ke a mo phala. Nna ke boloditšwe ke sa na le matšatši a seswai. Ke nna Moisraele ka matswalo, wa kgoro ya Benjamene; ke Moheberu wa Baheberu, ge go iwa ka go phetha melao ya Moshe, ke be ke le Mofarisei; ke be ke fišegela go direla Modimo mo ke bego ke bile ke hlomara kereke. Ge eba go loka ke go phetha melao ya Moshe, gona nna ke be ke sa solege. Fela tšeo ka moka tše ke bego nka re ke poelo, ka baka la Kriste ke bona e le tobo. Ga se tšeo fela; eupša le dilo ka moka ke bona e le tobo ge ke di bapetša le se se nago le mohola kudu, e lego go tseba Kriste Jesu, Morena wa ka. Ka baka la gagwe ke lobile dilo tšohle gomme ke bona tšohle e le tšhila fela, e le ge ke gabile gore Kriste e be wa ka, ke be selo se tee le yena ke se na boloki bjo e lego bja ka, bjo bo hwetšwago ka go phetha melao ya Moshe, fela ke na le boloki bjo bo hwetšwago ka go dumela go Kriste, boloki bja go tšwa go Modimo bja tla ka tumelo. Se ke se nyakago ke go tseba Kriste le go kwa maatla a tsogo ya gagwe bahung, le go ba selo se tee naye mahlokong a gagwe, ka ba wa go swana naye lehung la gagwe, ke holofetše gore le nna ke tla tsošwa bahung ka phela. Ga se gore ke re ke šetše ke atlegile goba gona go ba yo a phethegilego. Se ke se dirago ke go leka go thopa sefoka, ka gobane le nna Kriste o šetše a nthopile. Banabešo, ga se gore ke ipona nke ke šetše ke se thopile. Aowa; se ke se dirago ke gore tša ka morago ga ka ke a di lebala, ka obelela tša ka pele ga ka. Ke šianela go ba thwadi gore ke yo thopa sefoka, e lego go biletšwa ke Modimo bophelong bja legodimong ka Kriste Jesu. Rena ka moka ba re budulego go tša semoya a re naganeng ka mokgwa woo. Fela ge eba le nagana ka mokgwa wo mongwe, Modimo o tla le utollela se e lego sona. Fela se segolo a re gateleng pele ka moo re dutšego re sepela ka gona. Banabešo, nkekišeng bjalo ka badumedi ba bangwe. Le phele ka mo re le bontšhitšego go phela ka gona. Le tšee malebeši go bao ba phelago ba latela mohlala wa rena. Gobane ba bantši ba phela e le manaba a sefapano sa Kriste. Taba ye ke šetše ke ile ka le botša yona gantši, mme bjale ke boeletša ke le botša yona ke lla. Pheletšo ya bona ke tahlego, modingwana wa bona ke mpa; ba kgantšha tše di bego di swanetše go ba leša dihlong, ba nagana fela ka tša lefaseng. Ge e le rena, ga gaborena ke legodimong, gomme re letetše Mophološi wa rena, Morena Jesu Kriste, gore o tla tla a etšwa gona. O tla fetoša mebele ya rena ye e sego ya selo a e fa sebopego sa go swana le sa wa gagwe wo o tagago; ke se a tlago se dira ka maatla ao a kgonago go laola tšohle ka ona. Ka gona, banabešo ba ke le ratago gape ke le hlolosetšego, lena le nthabišago mme ke ikgantšhago ka lena, le eme le tiile le le ba Morena, lena barategi. Wena Efodia le wena Sintige, ke a le kgothatša, le kwane Moreneng. Le wena modirikanna yo a botegago, ke go kgopela gore o thuše basadi bao; ba be ba katanela go nthuša go bega Ebangedi gotee le Klemense le badirikanna ba bangwe bao maina a bona a lego ka pukung ya ba ba phelago. Thabang ka mehla le le ba Morena. Ke a boeletša, ke re thabang! Ebang ba botho go yo mongwe le yo mongwe. Morena o kgauswi le go tla. Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša. Banabešo, ke fetša ka gore le dule le nagana fela ka tšohle tše e lego tša nnete, tšohle tše di tumišegago, tšohle tše e lego tša go loka, tšohle tše di hlwekilego, tšohle tše di kgahlišago, tšohle tše di dirago gore motho a retwe – a ke re tšohle tše di dirago gore motho e be mothomotho mme a tumišwe ke batho – tšeo ke tšona tše le swanetšego go dula le di nagana. Le dire tše le ithutilego tšona go nna le tše le di amogetšego go nna, e ka ba tše le kwelego ke di bolela goba ke di dira. Gomme Modimo yo a re fago khutšo o tla ba le lena. Ka ge ke le wa Morena, ke thabile kudu ge ke lemoga gore ka morago ga nako ye telele ka mokgwa wo le sa nkgopola. E se gore ke re le kile la ntebala – se le bego le se hloka ke sebaka. Ge ke realo ga se gore ke ipega mohlako, gobane ke ithutile go kgotsofala ka se ke nago le sona. Mohlako ke a o tseba, bohumi le bjona ke a bo tseba. Ke itlwaeditše tšohle, e ka ba go khora goba go bolawa ke tlala, go tlalelwa ke dilo goba go di hloka. Tšohle ke di kgona ka maatla ao Kriste a mphago ona. Fela le dirile gabotse ge le nkimolotše mathata a ka. Gomme lena Bafilipi, le a tseba gore mola ke tloga moo Matsedonia mathomong a modiro wa ka wa go bega Ebangedi ga se gwa ka gwa ba le phuthego ye nngwe ya go nthuša ditšheleteng tša go tsena le tša go tšwa, ntle le lena. Mola ke le motseng wa Thesalonika le gona le nthometše tše ke bego ke di hloka, la ba la boeletša. Ge ke realo ga se gore ke dio nyaka go amogela dimpho; gagolo se ke se nyakago ke gore go holega ga lena go oketšege. Bjale ge, tšohle tše le nthometšego tšona ke di amogetše, gomme ebile ke hwetša di ntlaletše. Ke di tlišeditšwe ke Ephafroditose, gomme bjale ke na le tšohle tše ke bego ke di hloka. Tšona ke bona e le sehlabelo se se amogelegago go Modimo mme se mo kgahlago e le seorelo sa go nkga bose. Gomme Modimo wa ka o tla le fa tšohle tše le di hlokago, go ya ka lehumo le legolo le a nago le lona ka Kriste Jesu. A go tumišwe yena Modimo Tatagorena go ya go ile! Amene. Le dumediše badumedi bohle ba Kriste Jesu. Badumedi ba ke nago le bona mo ba re le dumele. Badumedi bohle ba a le dumediša, gagolo ba lapa la Kesare. Morena wa rena, Jesu Kriste, a le gaugele bohle. Nna, Paulose, yo ka thato ya Modimo ke lego moapostola wa Kriste Jesu, le Timotheose, ngwanaborena, re dumediša bakgethwa ba motse wa Kolose, bona e lego Bakriste ba ba botegago, re re: Nke Modimo, Tatagorena, a le gaugele, a le fe khutšo. Ka mehla ge re le rapelela, re leboga Modimo, Tatago Morena wa rena Jesu Kriste, ka ge re kwele tša tumelo ya lena go Kriste Jesu, le tša lerato la lena la ge le rata badumedi bohle. Mohla molaetša wa nnete, e lego yona Taba ye Botse ya Jesu, o le tlela la mathomo, le ile la kwa ka kholofelo ye o e tlišago. Ka gona, tumelo ya lena le lerato di ithekgile ka se le se holofetšego, se le se lotetšwego legodimong. Ebangedi e bega kgaugelo ya Modimo, gomme e phatlalala le lefase ka moka ka mokgwa wo le go lena e ilego ya phatlalala mohlamonene ge le thoma go kwa tša kgaugelo ya Modimo le bile le thoma go e tseba ka mo e lego ka gona. *** Seo le se rutilwe ke Ephafrase, mohlankakarena yo re mo ratago, yo a botegelago go direla Kriste ka baka la lena. Ke yena a re anegetšego tša lerato le le le filwego ke Moya. Ka baka leo, e sa le go tloga mola ra kwago ka lena, ga re lese go le rapelela. Re kgopela Modimo gore a le tlatše tsebo ya thato ya gagwe, ka bohlale bjohle le kwešišo yohle ye e tšwago go Moya wa gagwe. Ke mo le tlago kgona go phela ka mo Morena a nyakago ka gona, la dira fela tše di mo kgahlago. Bophelong bja lena la tšweletša tša go loka tša mehuta, la tšwela pele le go tseba Modimo. La tiišwa ka maatla ohle a go tšwa bogošing bja gagwe bja letago, gore le kgone go kgotlelela tšohle le sa fele pelo. La leboga Tatagorena ka thabo, yena a dirilego gore le lokelwe ke go hwetša kabelo ya bohwa bjo bo lego mmušong wa seetša bjo Modimo a bo beetšego badumedi. *** O re hlakodišitše maatleng a raleswiswi a re iša mmušong wa Morwamoratwe wa gagwe, yo a re lokolotšego ka go re swarela dibe. Kriste ke seswantšho sa Modimo yo a sa bonalego. Ke yena yo a fetago dihlolwa ka moka; gobane dilo tšohle legodimong le lefaseng, tše di bonalago le tše di sa bonalego, di hlodilwe ka yena, le ge e le maatla a semoya, le babuši ba semoya, le magoši a semoya, le balaodi ba semoya. Tšohle di hlodilwe ka yena ebile di hloletšwe yena. Yena o bile gona pele ga tšohle, le gona tšohle di kopane go yena. Ke yena hlogo ya mmele wa gagwe, e lego kereke; ke yena mohlomi wa yona. Ke yena wa mathomo wa go tsošwa bahung, e le gore dilong tšohle e tle e be yena wa go tšea maemo a mathomo. Gobane ke ka mo go ratilego Modimo ge Morwagwe a na le tlhago ye e feletšego ya gagwe. Gomme ka yena Modimo o ratile go boelanya tšohle tša mo lefaseng le tša kua legodimong le yena mong, a boelanya tšohle ka lehu la Morwagwe sefapanong. Le lena le kile la ba bakgelogi le manaba a Modimo ka baka la makgopo a le bego le a dira goba le a nagana. Eupša bjale Modimo o le boelantše le yena ka Morwagwe yo a ilego a phela e le motho, a tla a hwa gore le tlišwe go Modimo le le ba bakgethwa, ba ba se nago molato, ba ba se nago bosodi. Fela le swanetše go dula le tieletše tumelong le sa šikinyege kholofelong ye le bilego nayo mohla le botšwa Ebangedi. Nna, Paulose, ke mohlanka wa yona Ebangedi ye, yona ye e begelwago batho bohle lefaseng. Bjale ke thabetše ge ke hlokofatšwa ka baka la lena, gobane ka go hlokofatšwa mmeleng ke tlaleletša mo go hlaetšego mola Kriste a hlokofaletšwa kereke, yona e lego mmele wa gagwe. Nna ke dirilwe mohlanka wa kereke ke Modimo yo a mphilego wona modiro wo gore ke o direle go le hola. Ke modiro wa go bega molaetša wa gagwe ka botlalo, wona o lego sephiri se a bego a se utetše meloko ye e fetilego go tloga kgale, eupša bjale o se utolletše bakgethwa ba gagwe. Maikemišetšo a Modimo e bile go utollela bakgethwa ba gagwe sephiri se se makatšago se a bego a tlilo se utollela baditšhaba. Sephiri sa gona ke gore Kriste o ka mo gare ga lena; ka yena le holofela gore le tla hwetša kabelo letagong la Modimo. Ke yena yo re mmegago ka go eletša batho bohle re ba ruta ka bohlale bjohle gore re ba tliše go Modimo e le ba ba budulego, e le selo se tee le Kriste. Gore ke tle ke kgone seo ke ikokoropa ke katana, ke šomiša maatla a magolo ao Kriste a mphago ona, ao a šomago mo go nna. Ke rata ge le tseba ka mo le ntlhobaetšago ka gona, lena le ba Laodisea le bohle ba ba sa ntsebego. E le ge ke gabile gore le kgothatšege mme le be ba tee ka lerato, le be le tshepo ye e tletšego ye e tlišwago ke kwešišo. Ke ka mo le tlago tseba sephiri sa Modimo, e lego Kriste ka noši. Ke yena yo go yena go fihlilwego mahumo ohle a bohlale le tsebo. Ge ke realo ke direla gore le se forwe ke motho ka leleme le boreledi. Gobane le ge ka setopo ke se na le lena, ka moya gona ke na le lena, gomme ke thaba ge ke bona ditirelo tša lena di sepetšwa ka bothakga, gomme le lena le tiile mo tumelong ya lena go Kriste. Ka ge le amogetše Kriste Jesu gore e be Morena wa lena, le phele le le ba tee le yena. Le dule le tieletše go yena, lena ba ba agilego godimo ga gagwe, gomme le tie tumelong ya lena, ka mo le rutilwego ka gona. Le mo leboge kudu. Le itlhokomele gore go se be le yo a kago le lahletša ka mahlajana a gagwe le maradia a a se nago mohola a a tšwago setšong sa batho le meoyeng ye e bušago lefase, a a sa tšwego go Kriste. Gobane mo go Kriste, mo tlhagong ya gagwe ya botho, go phela bomodimo ka botlalo, gomme lena le filwe bophelo bjo bo feletšego, le le ba tee le yena. Ke yena a okametšego magoši ohle a semoya le balaodi bohle ba semoya. Le bolotše le le ba tee le Kriste, e sego lebollo le le dirwago nameng, eupša la Kriste, lona e lego go lokollwa mmeleng wo o bolago. Gobane kolobetšo ya lena e be e šupa go bolokwa ga lena le Kriste, le go tsošwa ga lena le yena ka go dumela ga lena maatleng a Modimo yo a mo tsošitšego bahung. Le be le le ba ba hwilego moyeng ka baka la dibe tša lena le ka baka la gore le be le le baditšhaba. Eupša Modimo o le phedišitše le Kriste ka go re swarela dibe tša rena ka moka; o fedišitše lengwalo la melato ya rena le le bego le laetša gore re swanetše go lefa bokae, gomme a le tloša ka go le kokotela sefapanong. Ke gona sefapanong se mo Modimo a ilego a amoga magoši a semoya le balaodi ba semoya maatla a bona a go buša; a ba dira dibogwane ka go ba gapa a ba fentše. Ka gona, le se ke la dumela go solwa ke motho mabapi le tše le di jago le tše le di nwago, goba mabapi le matšatši a menyanya goba Monyanya wa Lebalana goba Sabatha. Dilo tša mohuta wo ke diswantšho fela tša tše di sa tlilogo tla; bonnetennete bja taba ke Kriste. Le se ke la dumela go amogwa se e lego sa lena ke motho yo a kgantšhago boikokobetšo bjo e sego bjona, le go khunamela barongwa, a re o bona dipono etšwe a sa bone selo, a dio ikgogomoša ntle le lebaka ka baka la menagano ya gagwe ya botho, gomme a sa itshwarelele ka Kriste, yena e lego hlogo ya mmele. Ge mmele wohle o laolwa ke Kriste, e ba wo o fepegilego, wo o swaraganego ka makopano le mešifa, gomme o gola ka mo Modimo a nyakago ka gona. Ka ge le hwile le Kriste, gomme le lokolotšwe meoyeng ye e bušago legohle, le reng le phela bjalo ka ge nke le ba lefase le? Le reng le latela melawana ye e rego “O se sware se,” “O se je seo,” “O se kgome se”? Etse tše ka moka di ama dijo tše di felago ge di lewa. E dio ba melao le dithuto tša go bewa ke batho. Melao ya mohuta wo e bonala nke e beilwe ka bohlale, mola e dio ba borapedi bja maitirelo, le boikokobetšo bjo e sego bjona, le go itlhokofatša mmeleng, kganthe gabotse ga e na mohola mo go laoleng ga ditumo tša nama. Ka ge bjale le tsošitšwe bahung le Kriste, nyakang tša legodimong, moo Kriste a dutšego madulong a bogoši kgauswi le Modimo. Naganang tša legodimong, e sego tša mo lefaseng, gobane le hwile, gomme bophelo bja lena bo fihlilwe le Kriste go Modimo. Bophelo bja lena ke Kriste, gomme mohla a etla ka borena le lena le tla ba naye le na le letago la gagwe. Bjale ge, tlogelang ditumo tša lena tša nama bjalo ka bofebe, bootswa, ditumo tše mpe, le megabaru, yona e lego go khunamela medingwana. Tše dibjalo ke tšona tše di tlišetšago ba go se theeletše Modimo kgalefo ya gagwe. Pele le be le phela ka ditumo tše dibjalo, di le laola mo bophelong. Eupša bjale le swanetše go lahla dilo tše ka moka, e lego pefelo, kgalefo, lehloyo le lesebo. Dipolelo tša dihlong di se tšwe melomong ya lena. Le se aketšane, gobane tlhago ya lena ya kgale le e apotše gotee le ditiro tša yona, gomme la apara ye mpsha ye Modimo, Mmopi wa yona, a dulago a e mpshafatša gore e swane le yena, gore le tle le mo tsebe ka botlalo. Ge go le bjalo, ga go sa kgethologanywa Mojuda le yo e sego Mojuda, yo a bolotšego le yo a sego a bolla, ga go sa na yo a sego a hlabologa le motala, lekgoba le molokologi, yo a lego gona ke Kriste yo e lego tšohle mo go bohle. Ke lena ba ba kgethilwego ke Modimo, ba le lego ba bakgethwa ba a le ratago. Ka gona, le apare kwelobohloko le botho le boikokobetšo le boleta le bopelotelele. Le se felelaneng pelo, gomme ge le fošetšane le swarelaneng. Le swarelaneng go etša ge Morena le yena a le swaretše. Godimo ga tšeo ka moka le be le lerato, lona le le tlemaganyago ka mo go phethilego. Mererong ya lena le hlahlwe ke khutšo ye le e fiwago ke Kriste, gobane Modimo o le bileditše gona khutšong ye gore le be mmele o tee; gomme le leboge. Molaetša wa Kriste o dule ka dipelong tša lena o feletše. Le rutaneng, le eletšaneng ka bohlale bjohle. Le opeleleng Modimo dipesalome le difela le dikopelo tša semoya ka dipelo tša lena le mo leboga. Tšohle tše le di bolelago le tše le di dirago le di dire le le balatedi ba Morena Jesu le le gare le leboga Modimo, Tatagorena, ka yena. Lena basadi, ikokobetšeng go banna ba lena, gobane seo ke sona se se swanetšego badumedi ba Morena. Lena banna, ratang basadi ba lena gomme le se ba gakalele. Lena bana, le hlompheng batswadi ba lena mo go tšohle, gobane seo ke sona se se kgahlago Modimo. Lena botatagobana, le se tshwenye bana ba lena, gore ba se nolege moko. Lena makgoba, le theeletšeng beng ba lena ba mo lefaseng dilong ka moka, le sa direle gore ba le bone mme ba le rete; eupša le ba theeletše ka botshepegi ka ge le boifa Morena. Sengwe le sengwe se le se dirago le se dire ka pelo ka moka, mo nkego ga le se direle motho, le se direla Morena, le tseba gore moputso wo le tlago o fiwa ke Modimo ke wo a o beetšego ba e lego ba gagwe. Gobane gabotse Morena yo le mo hlankelago ke Kriste. Mokgopo o tla boelwa ke bokgopo bjo a bo dirilego, ka gobane Modimo o ahlola batho a sa kgetholle. Lena beng ba makgoba, le swareng makgoba a lena ka toka le ka tshwanelo, le tseba gore le lena le na le mong wa lena legodimong. Phafogelang go rapela le kgothetše le leboga Modimo. Le rena le re rapeleleng, gore Modimo a re fe sebaka se sebotse sa go bega molaetša wa gagwe mabapi le sephiri sa Kriste. Gobane ke sona se nna ke se golegetšwego. Nthapeleleng, gore ke utolle sephiri se gabotse, bjalo ka ge go ntebane. Le hlalefele go phedišana gabotse le bao e sego badumedi, gomme sebaka se sengwe le se sengwe se le se hwetšago le se šomišetše go ba bontšha gore lena le badumedi. Ka mehla tše le di bolelago e be tše di kgahlišago, tše di nago le letswai, le gona le kgone go fetola mang le mang ka mo go swanetšego. Tigikose, ngwanaborena yo re mo ratago, modiri le mohlankakarena wa go botegela modiro wa Morena, o tla le anegela tšohle ka nna. Ke ka baka leo ke mo romago go lena, gore a tle a le tsebiše ka mo bohle re phelago ka gona, mme a le thobe dipelo. O tla be a na le Onesimose, modumedikarena yo a botegago le yo re mo ratago, yo e lego mophuthego wa lena. Ba tla le anegela tšohle tše di diregago mo. Aristargose yo e lego mogolegwakanna o re le dumele, le Markose, motswala wa Barnabase, yo le šetšego le laetšwe gore ge a ka tla moo ga gabolena le mo amogele, le yena o re le dumele. Jesu, yo a tsebjago le ka la Justose, le yena o a le dumediša. Bao ke bona fela basokologi ba Bajuda ba ba thušanago le nna modirong wa go bega molaetša wa Modimo, gomme ba nthekgile e le ruri. Le dumedišwa ke Ephafrase, yo mongwe gape mophuthego wa gabolena, yo e lego mohlanka wa Kriste Jesu. O dula a le rapelela a kgothetše a kgopela Modimo gore a le tiiše tumelong le be badumedi ba ba budulego, ba ba sa tekatekego, le ba ba phethago thato ya Modimo ka botlalo. Nna ke hlatsela gore o itapiša kudu ka baka la lena le bale ba kua Laodisea le Hierapolise. Lukase, ngaka ya rena ye re e ratago, le Demase ba re le dumele. Le dumediše badumedi ba ba lego kua Laodisea, le dumediše le Nimfa mmogo le phuthego ye e tsenelago ka lapeng la gagwe. Ge le seno bala lengwalo leo, le dire gore le balwe le phuthegong ya Laodisea. Gomme le lena le bale la go tšwa Laodisea. Le botše Argipose le re: “O hlokomele gore o phethe modiro wo o o filwego ke Morena.” Ka seatla sa ka ke ngwala go re: Paulose o re le dumele. Le gopole gore ke sebofša. Modimo a le gaugele. Nna, Paulose, le Silase le Timotheose, re dumediša lena ba phuthego ya Thesalonika le lego ba Modimo, Tatagorena, le Morena Jesu Kriste, re re: Nke Modimo a le gaugele, a le fe khutšo. Ka moka ga lena re le lebogela go Modimo ka mehla re le gopola re le thapelong. Ge re le pele ga Modimo, Tatagorena, re gopola tše le di dirilego ge le dumela, ka mo lerato la lena le le dirilego gore le šome gaboima ka gona, le ka mo le phetšego le holofela go Morena wa rena, Jesu Kriste, ka gona. Banabešo ba le ratwago ke Modimo, rena re tseba ge Modimo a le kgethile gore le be ba gagwe, gobane Taba ye Botse ga se ra le tlišetša yona ka molomo fela, eupša re le tlišeditše yona le ka maatla a Moya wo Mokgethwa le ka tumelo ye e tletšego gore ke nnete. Le tseba ka mo re bego re phela ka gona go le hola mola re le moo go lena. Le ithutile go phela bjalo ka rena le bjalo ka Morena; gomme le ge le ile la tlaišwa kudu, le amogetše molaetša ka thabo ya go tšwa go Moya wo Mokgethwa. Ka gona la ba mohlala mo go badumedi bohle ba Matsedonia le ba Agaya. Go tloga moo ga gabolena molaetša wa Morena o ile wa se tume Matsedonia le Agaya fela, eupša tumelo ya lena go Modimo e kwagetše gohle, mo e lego gore taba ye ga se ye re ka hlwago re sa bolela ka yona. Bohle ba bolela ka mo le re amogetšego ka gona mola re le etetše, le ka mo le tlogetšego medingwana ya diswantšho la sokologela go Modimo, gore le tle le direle yena Modimo wa go phela wa mmakgonthe, gomme le letele Morwagwe yo a tlago tla a etšwa legodimong – yena Jesu yo a mo tsošitšego bahung, yo a tlago re hlakodiša ge Modimo a tlilo ahlola batho a ba galefetše ka baka la dibe tša bona. Lena ka noši le a tseba, banabešo, gore go le etela ga rena ga se ya ba ga lefeela. Le tseba ka mo re bego re šetše re ile ra tlaišwa ra ba ra rogwa ka gona kua Filipi pele ga ge re etla go lena moo Thesalonika. Gomme le ge batho ba bantši ba be ba re gana, Modimo wa rena o ile a re kgontšha go le botša Taba ye Botse ya go tšwa go yena re sa boife. Go le kgothatša ga rena ga se ga go tšwa boforeng, goba maikemišetšong a go se loke, goba bomenemeneng, eupša re bega molaetša wa Modimo ka mo a ratago, gobane o bone go re swanetše gore a re neele wona gore re o bege. Ga re leke go kgahla batho, re leka go kgahla Modimo yo a lekolago maikemišetšo a rena. Bjalo ka ge le tseba, ga se ra ka ra tla go lena ra le gegea goba ra bolela dipolelo tša go agela megabaru ya rena legora; Modimo ke hlatse ya rena. Le gona tša go gaba go retwa ke batho, ana ke lena, ana ke ba bangwe, ga re di šale morago, le ge, ka ge re le baapostola ba Kriste, re be re ka no le gapeletša. Fela ge re be re na le lena re be re le boleta, re le bjalo ka mosadi ge a hlokomela bana ba gagwe. Ka ge re le rata gakaaka, re be re ikemišeditše go le fa e sego Ebangedi ya Modimo fela, eupša le tšona dipelo tša rena, gobane re le rata e le ruri. Banabešo, ga ke re le a gopola ka mo re bego re katana ka gona re itapiša? Re be re šoma bošego le mosegare gore re se le tshwenye ka selo ge re le begela Taba ye Botse ya Modimo. Lena le dihlatse, le Modimo ke hlatse, gore lena, badumedi, re be re le swere ka mokgwa wo o kgahlago Modimo, wo o lokilego, wo o se nago bosodi. Le a tseba gore re be re swere yo mongwe le yo mongwe wa lena ka mokgwa wo monna a swarago bana ba gagwe. Re be re le kgothatša, re le bea pelo, re le tutuetša gore le phele bophelo bjo bo kgahlago Modimo, yo a le biletšago mmušong wa gagwe le letagong la gagwe. Le lengwe lebaka le le dirago gore re leboge Modimo re sa kgaotše ke gore e rile mola re le tlišetša molaetša wa Modimo, la re go o kwa la o amogela e le wa Modimo, e sego wa batho. Ruri o tšwa go Modimo, gomme Modimo o šoma mo gare ga lena le dumelago. Banabešo, gape tše di le hlagetšego ke tšona tše di ilego tša hlagela diphuthego tša Modimo kua Judea, tše di ilego tša hlagela batho ba gona ba e lego ba Kriste Jesu. Le tlaišitšwe ke batho ba gabolena ka mokgwa wo le bona ba tlaišitšwego ke Bajuda. Bajuda ke bona ba ba bolailego Morena Jesu le baprofeta, gomme le rena ba re hlomara. Ga ba kgahle Modimo; ba lwa le batho ka moka. Ba leka le go re ganetša ge re begela baditšhaba molaetša wa gore ba phološwe. Se ke sona sebe sa mafelelo sa dibe ka moka tše ba duletšego go di dira. Gomme bjale Modimo o feleleditše a ba ahlola a ba galefetše. Ge e le rena, banabešo, e sa le mola re kgaoganago le lena lebakanyana, re sa bonane le lena ka mahlo, re bonana ka pelo fela, re le hlolosetše kudu, gomme re lekile ka maatla go tla go le bona. Re be re ratile go tla gape go lena. Nna, Paulose, ke lekile makgathenyana, fela Sathane a re šitiša. Gobane ke mang yo a re fago lehutšo le thabo, yo a re kgontšhago go kgantšha go fenya ga rena mo pele ga Morena wa rena, Jesu Kriste, mohla a etla, ge e se lena? Ruri, ke lena setumo sa rena le thabo ya rena. Bjale e rile ge re se sa kgona go kgotlelela, ra ikgethela go šala re le noši motseng wa Athene. Ra roma ngwanaborena, Timotheose, yo a šomago mmogo le rena ge re šomela Modimo go bega Ebangedi ya Kriste, gore a tle a le tiiše, a le kgothatše go tša tumelo, gore go tle go se be le yo a ka ferehlwago ke mathata a. Lena ka bolena le a tseba gore mathata a ke se se re lebanego. Gobane e rile mola re sa na le lena ra le lemoša e sa le pele gore re tlilo ba le mathata. Gomme bjalo ka ge le tseba, seo ke sona se se diregilego. Ke ka baka leo ke ilego ka roma Timotheose. Ke be ke se sa kgona; ka gona ke be ke mo romile gore a tle a lekodišiše tša tumelo ya lena, gore e se be mohlomongwe Moleki a ka no ba a le lekile, gomme modiro wa rena wa be o fetogile lefeela. Bjale Timotheose o sa tšo boa moo go lena, gomme o re tletše le ditaba tše dibotse tša tumelo ya lena le lerato la lena. O re boditše gore ka mehla le dula le re gopola gabotse, le gore le re hlolosetše kudu bjalo ka rena ge re le hlolosetše. Ka gona, banabešo, mo matshwenyegong le mathateng a rena re wišwa pelo ke tumelo ya lena. Ka ge le tiišeditše go ba ba Morena, bjale re imologile. Na bjale Modimo wa rena re ka mo leboga bjang ka mo go swanelago ka baka la thabo ye re le thabetšego ka yona pele ga gagwe? Bošego le mosegare re rapela ka pelo ka moka gore a re dumelele go tlo le bona le go tlaleletša ka tše le sa hlaelelwago ka tšona mo tumelong ya lena. Nke Modimo, Tatagorena, ka boyena le Morena wa rena, Jesu, ba re lokišetše ditsela gore re tle re le etele. Nke Morena a ka le okeletša lerato ya ba le legologolo, gore le ratane, le be le rate le batho ka moka bjalo ka ge le rena re le rata. E tla be e le gona ge a le tiiša, gomme mohla Morena wa rena, Jesu, a etla le bakgethwa ba gagwe bohle, la ba ba ba se nago bosodi ba bakgethwa mo go Modimo, Tatagorena. Banabešo, ke fetša ka go re re le rutile ka mo le swanetšego go phela ka gona le kgahla Modimo. Ke ka mo le bego le ntše le phela ka gona. Gomme bjale re le kgopela re le tutuetša legatong la Morena Jesu gore le iteke le go feta. Gobane ditaelo tše re le filego tšona di etšwa go Morena Jesu le a di tseba. Se Modimo a se ratago ke gore le be ba bakgethwa, le ile bohlola. Yo mongwe le yo mongwe wa lena a tsebe go nyala mosadi wa gagwe ka mokgwa wo mokgethwa wo o hlomphegago, e sego go laolwa ke phišego ye mpe basading, go swana le baditšhaba ba ba sa tsebego Modimo. Mo tabeng ye go se be le yo a fošetšago modumedikayena, le ge e le go mo hlalefetša, gobane bjalo ka ge re ile ra le botša pele re tiišitše, Morena ke mootli wa bohle ba ba dirago tše dibjalo. Modimo ga se a re biletša go phela ka bohlola, o re bileditše go phela re le ba bakgethwa. Ka gona, yo a nyatšago taelo ye ga a nyatše motho, o nyatša Modimo yo a le fago Moya wa gagwe wo Mokgethwa. Ge e le mabapi le go rata modumedikawena, ga se taba ye nka hlwago ke le ngwalela yona, gobane lena ka noši le laetšwe ke Modimo gore le ratane. Gomme gabotse le phedišana le badumedikalena bohle ba Matsedonia yohle ka yona tsela yeo. Gomme, banabešo, re le tutuetša gore le iteke le go feta. Sa lena e be go rata go phela ka khutšo, go se tsenatsene tša bangwe, le go itirela ka tša lena diatla, bjalo ka ge re ile ra le laya. Ka tsela yeo le tla itlhomphiša ba e sego badumedi, le gona le ka se ikanye motho gore a le fe tše le di hlokago. Banabešo, re rata ge le tseba gabotse tša ba ba ithobaletšego, gore le tle le se ke la hlokofala, la etša ba ba se nago kholofelo. Rena, ka ge re dumela gore Jesu o ile a hwa a ba a tsoga, re dumela gore le ba ba ithobaletšego ba dumela go yena, Modimo o tla ba iša go Jesu. Se ke tlilogo le botša sona ke molaetša wa Morena: Rena ba re tlago ba re sa phela ge Morena a etla, re ka se thake pele ba ba ithobaletšego. Morena ka sebele o tla theoga legodimong ge go hlabja mokgoši le mokgolokwane wa morongwa yo mogolo, ge go letšwa phala ya Modimo. Bao ba hwilego ba dumela go Kriste ba tla tsoga pele, gwa tlo latela rena re tla bego re sa phela, ra rotošwa le bona ka maru go yo gahlanetša Morena lefaufaung. Ke ka mo re tlago dula re na le Morena. Ka fao, beanang pelo ka mantšu a. Banabešo, ge e le dinako le mabaka a go tla ga Morena, ga se taba ye nka hlwago ke le ngwalela ka yona. Gobane lena beng le tseba gabotse gore Letšatši leo la Morena le tla tla bjalo ka lehodu ge le etla bošego. Ge batho ba sa re: “Go iketlilwe, ke šebešebe,” ke mohla tahlego e tlago ba wela ka bjako go etša lešoko ge le swara moimana, gomme ga go yo a tlago phonyokga. Ge e le lena, banabešo, ga le mo leswiswing, gomme le ka se khukhunetšwe ke Letšatši leo bjalo ka lehodu. Ka moka ga lena le batho ba seetša, ba e lego ba mosegare. Ga re ba bošego goba ba leswiswi. Ka gona, a re se robaleng go etša bao ba bangwe; a re phafogeng, re ntšheng mahlo dinameng. Gobane ba ba robalago ba robala bošego, ba ba tagwago ba tagwa bošego. Eupša rena ba re lego ba mosegare a re ntšheng mahlo dinameng, re apareng tumelo le lerato, e be tšona difahlelakgara tša rena, mme kholofelo ya go phološwa e be mongatse wa rena wa tshipi. Modimo ga se a re bopela go tlo re ahlola a re galefetše, o re bopetše go tlo re phološa ka Morena wa rena, Jesu Kriste, yo a re hwetšego gore, le ge re phela le ge re hwile, re tle re phele naye. Bjale ge, dulang le kgothatšana le tiišana ka mokgwa wo le felago le dira ka wona. Re a le kgopela, banabešo, gore le hlomphe bao ba katanago gare ga lena, ba ba le etilego pele gape ba le eletšago ka tša Sekriste. Le ba hlomphe e le ruri le gona le ba rate ka baka la modiro wa bona. Le phedišane le sa kgopišane. Re a le rapela, banabešo, le kgale dibodu, le kgothatše bomahlomašia, le thuše bafokodi, le se felele motho pelo. Le bone gore go se be le yo a lefetšago bobe ka bobe, ka mehla sa lena e be go dirana botse le go dira bohle botse. Le dule le thabile; le se kgaotše go rapela; dilong ka moka sa lena e be go leboga, gobane tšeo ke tšona tše Modimo a di nyakago mo go lena ge le le ba Kriste Jesu. Le se ke la šitiša Moya wo Mokgethwa medirong ya wona, le gona le se nyatše diprofeto. Le lekole tšeo ka moka, le itshwarelele ka tše di lokilego, gomme le ile bobe bofe le bofe. Yena Modimo wa khutšo a le kgethwafatše ka botlalo mme a le lote moya, pelo le mmele ka mokgwa wo o phethegilego, a le šireletše le se be le bosodi mohla Morena wa rena, Jesu Kriste, a etla. Yo a le bitšago o a botega, ka gona o tla di kgona. Banabešo, le rena le re rapeleleng. Le dumediše badumedi bohle ka go ba atla, gona go bontšhago go ratana ga badumedi. Ke le laela ka Morena gore le balele badumedi bohle lengwalo leo. Morena wa rena, Jesu Kriste, a le gaugele. Nna, Paulose, le Silbanose le Timotheose re dumediša lena phuthego ya Bathesalonika le lego ba Modimo, Tatagorena, le Morena Jesu Kriste, re re: Nke Modimo, Tatagorena, le Morena Jesu Kriste ba le gaugele, ba le fe khutšo. Banabešo, re swanetše go leboga Modimo ka mehla ka baka la lena. Ke tshwanelo gore re dire bjalo, ka gobane tumelo ya lena šemo e tielela e eya pele, go ratana ga lena ka moka le gona go thupela go eya. Ke ka baka leo rena beng re le kgantšhago mo diphuthegong tša Modimo ka ge le dula le kgotleletše le bile le dumetše mo gare ga go hlomarwa le go tlaišwa. Tšeo ka moka di bontšha gore kahlolo ya Modimo e lokile; ka gona le tla lokela mmušo wa gagwe wo le o tlaišetšwago. Modimo o tla dira ka toka: O tla tlaiša ba ba le tlaišago, gomme a khutšiša rena le lena le tlaišwago. Seo o tla se dira mohla Morena Jesu a etla ka borena a etšwa legodimong a na le barongwa ba gagwe ba maatla, a le ka gare ga mollo wo o tukago. O tla otla ba ba ganago Modimo le ba ba sa theeletšego Taba ye Botse ya Morena wa rena, Jesu. Modimo o tla ba otla ka go ba lahlela sa ruri. Ba ka se bone Morena le maatla a gagwe a letago. Mohlang a etla bakgethwa ba gagwe ba tla mo tumiša; bohle ba ba dumelago go yena ba tla kgotsa borena bja gagwe. Le lena le tla be le le gare ga bona, gobane le dumetše molaetša wola re le boditšego wona. Ke ka baka leo re dulago re le rapelela. Re kgopela Modimo wa rena gore a le dire ba le swanelwago ke se le se bileditšwego. Nke a ka phethagatša ka maatla a gagwe tše dibotse tše le nyakago go di dira, le tše le di dirago ka ge le dumela. Ke ka mo Morena wa rena, Jesu Kriste, a tlago tumišwa ke lena, le lena la tumišwa ke yena, go ya ka kgaugelo ya Modimo wa rena le Morena Jesu Kriste. Mabapi le taba ya go boa ga Morena wa rena, Jesu Kriste, le go tlo kgoboketšwa ga rena mme ra ba mmogo le yena, ke a le kgopela, banabešo, gore le se ferekanywe gabonolo goba la tlaletšwa ke bao ba rego Letšatši la Morena le šetše le tlile. Mohlomongwe ba gopola gore re ile ra bolela bjalo re tsenwe ke moya mola re bega molaetša wa Modimo, goba re ile ra ngwala ka lengwalong. Le se forwe ke motho ka mokgwa ofe le ofe. Gobane Letšatši leo le ka se tle go sešo gwa tla bokgelogi bja mafelelo, le Rabokgopo a sešo a tšwelela, yena yo a tswaletšwego tahlego. Yena o tla lwantšha sengwe le sengwe se go thwego ke medimo goba se se khunamelwago ke batho, gomme a ipona a di feta ka moka. O tla ba a yo dula ka Tempeleng ya Modimo a ipitša Modimo. Kgane ga le sa gopola gore tše ke ile ka le botša tšona mola ke na le lena? Se se šitišago gore a senoge gonabjale le a se tseba. Rabokgopo o tla tšwelela ka nako ye e swanelago. Bokgopo bjo bo iphihlilego bo šetše bo šoma. Yo a mo šitišago go itšweletša o tla tšwela pele le go mo šitiša go fihlela a tlošwa. Ke gona Rabokgopo a tlago utollwa, fela ge Morena Jesu a etla o tla mmolaya ka moya wo o tšwago ka molomong wa gagwe, a mo fediša ka letago le a tlago ka lona. Go tla ga Rabokgopo ke modiro wa Sathane. Rabokgopo yo o tla dira mehlolo yohle ye maatla ya bofora le dimaka tšohle tše maatla tša bofora, a šomiša boradia bjo bobe bja mehuta yohle mo go ba ba lahlegago. Bona ba lahlega ka ge ba se ba amogela therešo ba e rata gore ba phološwe. Ka gona Modimo o ba romela maatla a boradia gore ba dumele tše di fošagetšego, gore bohle ba ba sa dumelego therešo eupša ba kgahlwago ke bokgopo ba bonwe molato. Ge e le rena, banabešo, re swanetše go le lebogela go Modimo ka mehla, lena le ratwago ke Morena. Gobane Modimo o le kgethile la ba ba mathomo Thesalonika ba go phološwa ka maatla a Moya wo Mokgethwa yo a le kgethwafatšago, le ka go botegela nnete ga lena. Seo ke se Modimo a le bileditšego sona ka Taba ye Botse ye re le begetšego yona, gore le tle le hwetše letago la Morena wa rena, Jesu Kriste. Ka gona, banabešo, tiišetšang, le itshwarelele ka dithuto tšela re le rutilego tšona ka molomo le ka lengwalo. A Morena wa rena, Jesu Kriste ka noši, le Modimo, Tatagorena, yo a re ratilego mme ka kgaugelo ya gagwe a dulago a re kgothatša a bile a re tiiša kholofelong, a le kgothatše a be a le tiiše go dira le go bolela tšohle tše dibotse. Banabešo, ke fetša ka go re le re rapelele, gore molaetša wa Morena o phatlalale ka lebelo mme o amogelwe ka tlhompho, go no swana le moo go lena. Le re rapelele le gore Modimo a re hlakodiše bathong ba babe le ba bakgopo, gobane ga se mang le mang yo e lego modumedi. Ge e le Morena yena ke mmotegi, gomme o tla le tiiša a le emela go Rabobe. Morena o dira gore re le bote gore le dire tše re le laelago tšona, ebile le tla no tšwela pele le go di dira. Morena a le dire gore le kwešiše lerato la Modimo le kgotlelelo ye le e fiwago ke yena Kriste. Banabešo, re le laya legatong la Morena wa rena, Jesu Kriste, gore le kgaogane le badumedi bohle ba dulago ka diatla le gona ba sa phelego ka dithuto tše re ba rutilego tšona. Lena beng le tseba ka mo le swanetšego go re ekiša ka gona. Rena re be re sa dule ka diatla mola re le moo go lena. Re be re sa phele ka mphiwafela. Sa rena e be e le go itapiša le go katana; re be re šoma bošego le mosegare gore re se tshwenye motho wa lena, e se ka gobane re se na tokelo ya go babalelwa, eupša e le ka ge re nyaka gore le tle le re ekiše. Le gona mola re le moo go lena re be re hlwa re le botša re re: “Maganagošoma le dijo a se di fiwe.” Re realo ka ge re ekwa ba re ba bangwe ba lena ke metlapa ye e sa dirego selo ge e se go tsenatsena ditaba tša ba bangwe. Ba mohuta woo re ba laya re ba kgothatša legatong la Morena Jesu Kriste gore ba se itšharakantšhetše bophelo, ba upše ba šomele tša go iphediša. Ge e le lena, banabešo, le se ke la lapa go dira tše dibotse. Ge go ka ba le yo a ganago go kwa ditaelo tše re le romelago tšona ka lengwalo le, le mmee leihlo, gomme le kgaogane naye gore a inyatše. Fela le se mo tšee gore ke lenaba, le upše le mo kgale bjalo ka ngwanabolena. Yena Morena wa khutšo a fele a le fa khutšo le ka mekgwa yohle. Morena a be le lena ka moka. Ka seatla sa ka ke ngwala gore: Paulose o re le dumele. Ke ka mokgwa wo ke swayago mangwalo a ka ohle go bontšha gore ka nnete a tšwa go nna. Morena wa rena, Jesu Kriste, a le gaugele bohle. Nna, Paulose, moapostola wa Kriste Jesu ka taelo ya Modimo, Mophološi wa rena, le ya Kriste Jesu yo re mmotilego, ke dumediša wena, Timotheose, morwa wa ka wa mmakgonthe tumelong, ke re: Nke Modimo, Tatagorena, le Kriste Jesu, Morena wa rena, ba go gaugele, ba go šokele, mme ba go fe khutšo. Bjalo ka ge ke ile ka go kgothatša mola ke fetela Matsedonia, ke sa go kgopela gore o dule moo motseng wa Efeso, o laye batho ba ba rutago dithuto tša maaka gore ba tlogele go di ruta. O ba botše gore ba tlogele dinonwane le mananeo ao a se nago pheletšo a borakgolokhukhu ba bona, a go dio hlola ditshele fela; a sa tšweletše morero wa Modimo wo o tsebjago ka tumelo. Nepo ya taelo ye ke gore le ratane ka lerato le le tšwago ka pelong ye e hlwekilego ya motho, le letswalo le le se nago boitshetshengo, le tumelo ye e se nago boikaketši. Batho ba bangwe ba phamogile tabeng tše ba phamogetše dipolelong tša bošilo. Ba nyaka go ba baruti ba melao ya Moshe, etšwe ba sa kwešiše tše ba di bolelago le tše ba tiišago gore ke nnete. Rena re a tseba gore melao ya Moshe e lokile ge motho a e šomiša ka mo go lebanego. Gape re se ke ra lebala gore molao ga o beelwe ba go loka, o beelwa disenyi le ba go itaola, o beelwa bahlokamodimo le badiradibe, o beelwa ba go se hlomphe Modimo le dilo tše dikgethwa, ba ba bolayago botatagobona le bommagobona, o beelwa babolai, o beelwa difebe, le banna ba go robala bannakabona, le bathopi, le bafeane, le ba ba hlatselago ka maaka, le ba ba dirago tše dingwe tše di fapanago le thuto ya nnete. Thuto yeo e hwetšwa ka mo Ebangeding ye ke e filwego gore ke e bege, yona Taba ye Botse ye e bolelago tša letago la Modimo wa mahlogonolo. Ke leboga Kriste Jesu, Morena wa rena, ge a mphile maatla a go dira modiro wa ka. Ke mo leboga ge a bone ke botega mme a nkgethela go mo hlankela, etšwe pele ke be ke mmolela gampe, ke mo hlomara, ke mo roga. Fela Modimo o ile a nkgaugela ka gobane ke be ke sešo ka ba modumedi, gomme ke sa tsebe se ke se dirago. Gomme Morena wa rena a nkgaugela kudu a ba a mpha le tumelo le lerato ka bontši, tšona dimpho tše e bago tša rena ge re eba ba Kriste Jesu. Ke taba ya nnete ye e swanetšego go amogelwa ka botlalo gore Kriste Jesu o tlile lefaseng go phološa badiradibe. Nna ke ba feta bohle ka bobe, fela Modimo o nkgaugetše e le gore Kriste Jesu a tle a mpontšhe go se mphelele pelo ga gagwe mo go feletšego, nna modiradibe wa go ba feta ka moka, e tle e re bohle ba ba tlago dumela go yena ba swantšhetšwe ka nna mme ba išwe bophelong bjo bo sa felego. Kgoši ya go ya go ile, yo a sa hwego gape a sa bonalego, yena Modimo a le noši, a hlompšhe a be a tumišwe go ya go ile! Amene. Taelo yeo ke go fa yona, Timotheose, ngwanaka, e le ya go ya ka mantšu a profeto ao a kilego a bolelwa mabapi le wena. Mantšu ao a go hlohleletše go lwa bjalo ka mohlabani, o lwele Ebangedi, o kgomarele tumelo ya gago le letswalo le le se nago molato. Batho ba bangwe ba be ba sa theeletše letswalo la bona, gomme tša tumelo di ba palela. Ba bangwe ba bona ke boHimeneose le Aleksandere, bao ke ba gafetšego Sathane, gore ba tlwaologe go nyefola Modimo. Go feta tšohle, ke le kgothaletša gore le kgopelele batho bohle go Modimo, le ba rapelele, le ba phophothele, le be le ba lebogele, ana ke dikgoši, ana ke batho ba maemo, gore re tle re phele re wele dipelo re iketlile, re le ba borapedi bja nnete, le maitshwaro a a swanelago. Ye ke taba ye botse gomme e kgahla Modimo, Mophološi wa rena, yo a nyakago gore batho ka moka ba phološwe mme ba tle ba tsebe nnete. Gape Modimo ke o tee, le Mmoelanyi wa batho le Modimo le yena ke o tee, yena motho, Kriste Jesu, yo a ilego a ikgafa gore e be seloba sa go lokolla batho ka moka sebeng. E bile bjona bohlatse ka nako ya gona bja gore Modimo o nyaka ge bohle ba lokollwa sebeng, gomme ke ka baka leo ke beilwego moapostola le moruti wa baditšhaba, go bega molaetša wa tumelo le nnete. Ga ke bolele maaka, ke bolela nnete. Phuthegong ye nngwe le ye nngwe ke rata ge go rapela banna ba phagamišitše matsogo a a se nago bosodi, ba sa galefe, le gona ba sa ngangišane. Basadi le bona ke rata ge ba ikgabiša ka meaparo ye e ba lebanego, le ka boitlhompho le bohlweki; e sego ka go loga meriri, goba ka dikgabišo tša gauta, goba ka diperela, goba ka diaparo tša go bitša tšhelete ye ntši, eupša ka mediro ye mebotse ye e swanelago basadi ba ba ipitšago barapedi. Mosadi a rutwe a homotše a ikokobetša ka mekgwa yohle. Ga ke mo dumelele gore a rute monna goba a mo laole. Sa gagwe ke go homola, gobane yo a hlodilwego pele ke Adamo, gwa kgona go hlolwa Efa. Le gona ga se Adamo yo a ilego a forwa, ke mosadi yo a ilego a forwa mme a tshela molao. Eupša mosadi o tla phološwa ka go tswala bana, ge a ka kgotlelela tumelong le leratong le bokgethweng ka maitshwaro a mabotse. Taba ye ke nnete, gore ge motho a duma go ba moetapelemogolo, o duma selo se sebotse. Moetapele e swanetše go ba motho wa go hloka bosodi, monna wa mosadi o tee, wa go nagana gabotse, wa maitshwaro a mabotse, wa go hlomphega, wa go amogela basepedi ka ga gagwe, wa go kgona go ruta; e se be setagwa goba seganka, e be yo boleta wa go se rumolane, wa go se rate tšhelete; e be yo a bušago lapa la gagwe gabotse, yo a laolago bana ba gagwe ka seriti. Gobane ge motho a palelwa ke lapa la gagwe, phuthego ya Modimo yona a ka e kgona bjang? E se be motho yo a sa tšogo sokologa, gore a se ikgogomoše, a tla a lahlwa go etša Diabolose. E swanetše go ba motho yo a hlompšhago le ke batho ba e sego badumedi, gore a se ke a tla a goboga mme a tanywa ke sefu sa Diabolose. Batikone le bona ba swanetše go ba le boitshwaro bjo bobotse, le gona ba tshepege; ba se ke ba nwa kudu goba ya ba dihwirihwiri tšheleteng; a ba kgomarele nnete ye e utolotšwego ya tumelo ka letswalo le le sa itshetshengwego; ba hlahlobje pele, gomme ge ba se na bosodi e be gona ba thomago go dira modiro wa botikone. Batikone ba basadi le bona e be ba maitshwaro a mabotse, ba go hloka lesebo, ba go nagana gabotse, ba go tshepagala mo go tšohle. Motikone e swanetše go ba monna wa mosadi o tee, wa go laola bana ba gagwe le lapa la gagwe gabotse. Batikone ba ba phethago modiro wa bona gabotse ba ikhweletša maemo a mabotse, gomme ba kgona go bolela ka tša tumelo ya bona go Kriste Jesu ba sa boife. Ke go ngwalela lengwalo leo ke holofetše go tla go wena kgauswinyana. Fela le ge nka diega, wena o šetše o tseba ka lengwalo le ka mo motho a swanetšego go itshwara ka gona ge a na le ba lapa la Modimo, e lego yona phuthego ya Modimo yo a phelago, ye e lego yona kokwane le motheo wa therešo. Ntle le pelaelo, phihlo ye re e utolletšwego ya tumelo ya rena ke ye kgolo: Yena o itšweleditše ka sebopego sa motho, a hlatselwa ke Moya gore tše a ipegago tšona ke therešo, gomme a bonwa ke barongwa. A begwa baditšhabeng, a dumelwa lefaseng ka moka, gomme a rotošetšwa legodimong ka letago. Moya wo Mokgethwa o bolela thwii gore mehleng ya mafelelo batho ba bangwe ba tla kgeloga; ba tla theeletša meoya ya maaka ba latela le dithuto tša bademone. Dithuto tše dibjalo di phatlalatšwa ke bafeane ba baradia ba ba hwilego matswalo mo nkego ba swailwe ka tshipi ya go fiša. Batho ba mohuta woo ba iletša batho go nyala le go ja dijo tše dingwenyana, mokagona Modimo a di diretše gore di lewe ka tebogo ke bao e lego badumedi mme ba tsebago therešo. Tšohle tše di hlodilwego ke Modimo di lokile; gomme mo go tšona ga go se se swanetšego go lahlwa, eupša tšohle di swanetše go amogelwa ka tebogo, gobane di kgethwafatšwa ka lentšu la Modimo le ka thapelo. Ge o ka laya badumedikawena bjalo o tla be o le mohlanka yo a direlago Kriste Jesu gabotse, o le yo a iphepago ka mantšu a tumelo le a thuto ye e lokilego ye o e botegetšego. O kgaogane le dinonwane tša batho ba lefase. Wena o itlwaetše bophelo bja bodumedi. Go ithobolla mmele go na le mohola mmeleng, eupša bodumedi bjona bo na le mohola dilong ka moka, ka gore bo re holofetša bophelo bja gonabjale le bja ka moso. Yeo ke nnete ye e swanetšego go amogelwa ka botlalo. Ke ka baka leo re katanago re kalokana, ka gobane re botile Modimo yo a phelago, yena e lego Mophološi wa batho bohle, gagolo bao ba dumelago. O ba laye o be o ba rute ka dilo tše. Go se be le yo a go nyatšago ka baka la ge o le yo mofsa, eupša o be mohlala go badumedi ka dipolelo tša gago, le ka boitshwaro, le ka lerato, le ka tumelo, le ka bohlweki. O ikgafele go balela phuthego Mangwalo a Makgethwa, le go ba kgothatša, le go ba ruta, go fihlela ke etla. O se hlokomologe mpho ye Modimo a go filego yona mola baprofeta ba bolela mabapi le wena, mola bagolo ba phuthego ba go bea diatla. O itlwaetše dilo tše gomme o ikgafele tšona, gore tšwelopele ya gago e bonwe ke bohle. O itote, o lote le thuto ya gago. O fele o phetha dilo tše, ka gobane ge o dira bjalo o tla be o iphološa, o phološa le ba ba go kwago. O se ke wa kgadimola mokgalabje, o upše o bolele le yena bjalo ka ge nke ke tatago. Masogana o a sware bjalo ka banabeno, bakgekolo o ba sware bjalo ka bommago, le mathari o a sware bjalo ka dikgaetšedi tša gago, ka bohlweki ka mehla. Bahlologadi ba e lego bahlologadihlologadi o ba hlokomele. Fela ge mohlologadi a na le bana goba ditlogolo, ba swanetše gore ba itlwaetše go phetha ditshwanelo tša bona tša bodumedi go ba malapa a bobona, mme ka tsela yeo ba leboge batswadi ba bona le borakgolwabona le bomakgolwabona, gobane seo ke sona se se kgahlago Modimo. Mohlologadihlologadi yo a se nago mohlokomedi o ikanya Modimo, gomme o dula a mo kgopela a mo rapela bošego le mosegare. Eupša mohlologadi yo a iphilego maithabišo o hwile a phela. O ba laye bjalo gore go se be le yo a ba bonago bosodi. Fela ge motho a sa hlokomele ba gabo, gagolo ba lapa la gagwe, o lahlile tumelo, gomme o phalwa le ke yo e sego modumedi. Lenaneong la bahlologadi go ngwalwe fela yo a sa hlaelego mengwaga ye masome a a selelago. Godimo ga moo, e be yo a ilego a nyalwa gatee, le gona a tumile ka mediro ye mebotse, ya go hlokomela bana, le go amogela baeng, le go hlapiša badumedikayena maoto, wa go thuša ba ba lego tlalelong – wa go ikgafela mediro ye mebotse ka mehla. Bahlologadi ba bafsa bona o se ke wa ba ngwala lenaneong leo la bahlologadi, ka gobane go tsogelwa ga bona go ka no ba aroša go Kriste, ba duma go nyalwa gape, ya ba ge ba ikobela molato wa go tshela dikano tšela ba ikannego ka tšona pejana. Le gona ba ka itlwaetša bobodu ka go thetha le malapa; go feta moo ba ka itlwaetša lesebo le bofeane, le go bolela tše di sego tša ba swanela. Ka gona, nna ke duma ge bahlologadi ba bafsa ba ka nyalwa gape ba ba le bana, ba hlokomela malapa a bona, gore ba tle ba se fe manaba a rena sebaka sa go re bolela gampe. Bahlologadi ba bangwe ba šetše ba kgelogile ba latela Sathane. Ge go na le Mokriste wa mosadi yo ka gabo go nago le bahlologadi, a ba hlokomele, a se ke a tshwenya phuthego ka seo, gore phuthego e hlokomele bahlologadihlologadi. Bagolo ba phuthego ba ba bušago phuthego gabotse ba lokela go lefša moputso wa bona gabedi, gagolo bao ba katanago le go begela batho Ebangedi le go ba ruta yona. Gobane Mangwalo a Makgethwa a re: “O se ke wa bofa pholo molomo ge o fola mabele ka yona.” Gapegape a re: “Mošomi mogolo wa gagwe o mo lebane.” O se ke wa theeletša yo a pharago mogolo wa phuthego molato, ge e se ge a na le dihlatse tše pedi goba tše tharo. Badiradibe o ba kgale pepeneneng, gore ba bangwe ba tle ba šie. Ke go laya Modimo le Kriste Jesu le barongwa ba bakgethwa ba na le nna, gore o phethe ditaelo tšeo ntle le go kgetholla batho, ntle le go dira dilo sepitša. O se kitimele go bea motho diatla, gore o se kgathe tema dibeng tša ba bangwe; wena o dule o hlwekile. O se sa nwa meetse fela, o upše o nwe le beinenyana ka baka la mala a gago le bokoka bja gago bjo bo felago bo go boela. Dibe tša batho ba bangwe di bonala pepeneneng, gomme di ba eta pele tša ba letela kahlolong, kganthe tša ba bangwe tšona di ba šala morago. Ka yona tsela yeo mediro ye mebotse ya ba bangwe e bonala pepeneneng, gomme le ye e sego pepeneneng ga e kgone go fihlega. Bohle ba e lego makgoba ba swanetše ba bone beng ba bona e le ba ba lebanwego ke tlhompho ye e feletšego, gore go se be le motho yo a nyefolago Modimo goba thuto ya rena. Makgoba ao beng ba ona e lego badumedi a se ke a ba nyatša, gobane ke badumedikabona. A a upše a ba šomele gabotse le go feta, ka gobane ba ba holegago ka modiro wa ona ke badumedi bao ba ratwago. O rute batho ka go realo, o ba begele ditaba tšeo. Ge eba go na le yo mongwe wa go ruta batho dišele, wa go se dumele thuto ya nnete e lego ya Morena wa rena, Jesu Kriste, le tša thuto ya bodumedi bja rena, yo mobjalo ke moikgogomoši yo a sa tsebego selo. Sa gagwe ke go tšea kgang le go ngangišana ka tlhalošo ya mantšu, gona go tswalago mahufa le ditshele le lesebo le dikgopolelo tše mpe, le kgang ya go se fele – dilo tše di tšwago bathong ba ba senyegilego menagano ba ba sa tsebego nnete. Ba hloma nke bodumedi ke mokgwa wa go ikhumiša. Bodumedi bjona bo humiša motho kudu ge eba a kgotsofala ka se a nago le sona. Gape ga se ra tla le selo mo lefaseng, gomme le go tloga re ka se kgone go tloga le selo mo go lona. Ge re na le dijo le diaparo re kgotsofale ka tšona. Ba ba nyakago go huma bona ba wela molekong, gomme ba tanywa ke ditumo tše dintši tša botlaela tša go bolaiša batho le go ba phonkgetša tahlegong le tshenyegong. Gape go rata tšhelete ke wona modu wa makgopo ka moka. Ba bangwe, ka baka la go e duma kudu, ba kgelogile tumelong mme ba itlišetša masetlapelo a mantši. Ge e le wena, motho wa Modimo, dilo tšeo o di tšhabe. O katanele go loka le borapedi le tumelo le lerato le kgotlelelo le boleta. O gakale ge o šiana mošianong wo mogolo wa tumelo, o tle o ithopele bophelo bjo bo sa felego, gobane o bileditšwe bophelong bjo mola o ipega tumelo ka sebete mo pele ga dihlatse tše dintši. Ke go laya Modimo, Mophedišatšohle, le Kriste Jesu yo a ilego a ipega tumelo ka sebete mo pele ga Pontiose Pilato ba le gona, gore o botegele go phetha ditaelo o se na bosodi, go fihlela Morena wa rena, Jesu Kriste, a tšwelela. Go tšwelela ga gagwe go tla tlišwa ka nako ya gona, gwa tlišwa ke Modimo, yena Mmušanoši yo lehlogonolo, Kgoši ya dikgoši, Morena wa marena. Ke yena fela yo a sa hwego, yo a dulago seetšeng se go sego yo a kago se batamela. Ga go yo a kilego a mmona ebile ga go yo a kago mmona. A a hlompšhe a buše go ya go ile! Amene. O laele ba ba humilego ka tša lefase le gore ba se ikgogomoše goba ba bota ona mahumo a a felago, ba upše ba bote Modimo yo a re fago tšohle ka bontši gore re ipshine ka tšona. O ba laye gore ba dire tše di lokilego, ba ikhumiše ka mediro ye mebotse, ba se timane, eupša ba ikemišetše go abelana le ba bangwe. Ka tsela yeo ba tla ipolokela lehumo le e tlago ba motheo wo o tiilego wa ka moso. Ke mo ba tlago kgona go fihlela bophelo bjo e lego bja mmakgonthe. Timotheose, o boloke tše o di neilwego. O kgaogane le dipolelo tša lefeela tša batho ba lefase le dikganetšano tše go thwego ke “Tsebo”, etšwe e se yona. Gobane ba bangwe ba ipotša gore ba na le yona, mme ba kgelogile tumelong. A Modimo a le gaugele. Nna, Paulose, yo ka thato ya Modimo ke lego moapostola wa Kriste Jesu, nna yo ke romilwego go yo bega kholofetšo ya bophelo bjo re nago le bjona ka go ba ba tee le Kriste Jesu, ke dumediša wena, Timotheose, morwa wa ka yo ke mo ratago, ke re: Nke Modimo, Tatagorena, le Kriste Jesu, Morena wa rena, ba go gaugele, ba go šokele, mme ba go fe khutšo. Ke leboga Modimo yo ke mo hlankelago bjalo ka borakgolokhukhu, ke sa itshetshengwe. Ke mo leboga ge ke go gopola ka mehla mo dithapelong tša ka bošego le mosegare. Ke gopola ge o be o lla, gomme ke duma go go bona gape, gore ke tle ke thakgale e le ruri. Ke gopola tumelo ya mmakgonthe ye o nago le yona, tumelo ya go swana le yela makgoloago, Loise, le mmago, Onika, ba bego ba na le yona. Ke tloga ke kgolwa gore le wena o na le yona. Ke ka baka leo ke go gopotšago gore o tsošološe mpho ye Modimo a go filego yona mola ke go bea diatla. Gobane moya wo Modimo a re filego wona ga o re dire gore re boife; o re tlatša maatla le lerato le boitshwaro. Se hlabje ke dihlong tša go hlatsela Morena wa rena, goba wa hlabja ke dihlong ka nna ge ke le mogolegwa ka baka la gagwe. Wena o kgathe tema mo go tlaišetšweng Taba ye Botse go ya ka maatla ao Modimo a go fago ona, yena yo a re phološitšego mme a re biditšego gore re be ba gagwe, e se ka baka la mediro ya rena, eupša e le ka baka la maikemišetšo a gagwe le kgaugelo ya gagwe. O re file kgaugelo ye ka Kriste Jesu go tloga le go tloga, eupša bjale kgaugelo ye ya gagwe re e utolletšwe ka go tla ga Mophološi wa rena, yena Kriste Jesu. Yena o fedišitše maatla a lehu, a utolla bophelo bja go ya go ile ka Ebangedi. Modimo o mpeile mmegi le moapostola le moruti wa Taba ye Botse ye, gomme ke ka baka le ke tlaišwago ka dilo tše. Eupša seo ga se nteše dihlong, ka gobane yo ke mmotilego ke a mo tseba, gomme ga ke na pelaelo ya gore o na le maatla a go lota tše a mphilego tšona go fihla ka Letšatši la Morena. O itshwarelele ka thuto ya nnete ye ke go lailego ka yona, e be tsela ye o e latelago, gomme o dule o le tumelong le leratong le re nago le lona re le ba Kriste Jesu. Tše dibotse tše o di filwego o di lote ka maatla a Moya wo Mokgethwa wo o phelago ka go rena. O a tseba gore batho ka moka seleteng sa Asia ba ntlhanametše; mo go bona ke boFigelose le Hermogenese. Nke Morena a ka gaugela ba lapa la Onesiforose, gobane o nkgothaditše makgathe a mantši. Go golegwa ga ka ga se gwa ka gwa mo leša dihlong, eupša o rile go fihla Roma a nnyaka a kgothetše a ba a nkhwetša. Nke Morena a ka mo gaugela ka Tšatši leo la Morena. Gomme dilo tše dintši tše a ntiretšego tšona kwa Efeso wena o di tseba gabotse. Bjale wena, ngwanaka, o tiišwe ke kgaugelo ya Modimo ye e bago ya rena ge re le ba Kriste Jesu. Tšela o kwelego ke go botša tšona pele ga dihlatse tše dintši o di botše batho ba ba tshepegago, ba ba tlago kgona go di ruta ba bangwe. O kgotlelele le nna ditlaišo, o be mohlabani yo a botegago wa Kriste Jesu. Gape mohlabani o leka go kgahla molaodi wa gagwe gomme ga a itsenye ditabeng tša bophelo bjo e sego bja bohlabani. Le mophadišani a ka se thope sefoka a sa latele melao ya go phadišana. Mabutšwapele a lebane molemi wa sekalokani. Nagana ka tše ke di bolelago tše, gobane Morena o tla go kgontšha go di kwešiša. Gopola Jesu Kriste, Motsošwabahung, setlogolo sa Dafida; ke yona Taba ye Botse ye ke e begago. Ka ge ke bega yona Taba ye Botse ye, ke a hlokofatšwa ke be ke kgokwe ka diketane bjalo ka sesenyi. Eupša lentšu la Modimo lona ga se la kgokwa; ke ka baka leo ke meletšago tšohle ka baka la bao Modimo a ba kgethilego, gore le bona ba tle ba hwetše phologo ka Kriste Jesu le letago le le sa felego. Taba ye ke nnete gore: “Ge eba re hwile le yena, le go phela re tla phela le yena. Ge re ka no kgotlelela, le go buša re tla buša naye. Ge re mo latola, le yena o tla re latola. Ge re sa botege, yena o tla no dula a botega, ka gobane a ka se kgone go itira o šele.” Badumedi o fele o ba gopotša taba tše, o ba laya tsebegokwa mo pele ga Modimo gore ba se tšee kgang goba ba ngangišana ka tlhalošo ya mantšu, e lego taba tše di se nago mohola, ge e se go lahla ba ba di theeletšago. O ikokoropele go kgahla Modimo, go ba modiri yo a sa lewego ke dihlong ka mošomo wa gagwe, le yo a rutago molaetša wa nnete ya Modimo ka tshwanelo. O kgaogane le dipolelo tša lefeela tša batho ba lefase. Ba ba kgahlwago ke dipolelo tša mohuta woo, ba tla ikgaogantšha le Modimo ba ntše ba eya pele. Dipolelo tša mohuta woo di swana le bolwetši bja sesepedi bjo bo kitimago le mmele. Ba bangwe ba dipolelo tša mohuta woo ke boHimeneose le Filetose. Ba phamogile tseleng ya nnete mme ba ferekanya tumelo ya badumedi ba bangwe ka go bolela gore re šetše re tsogile bahung. Fela motheo wo o beilwego ke Modimo o ka se šikinyege, gomme mo godimo ga wona go ngwadilwe mantšu a go re: “Morena o tseba ba e lego ba gagwe,” le a go re: “Bohle ba ba ipitšago ba Morena a ba tlogele bokgopo.” Ka ntlong ya mohumi dibjana ga se tša gauta le tša silibera fela, eupša le tša kota le tša letsopa di gona; dingwe ke tša go šomišwa ka matšatši a magolo, dingwe ke tša mehleng. Ge motho a ka kgaogana le dipolelo tša lefeela tše di se nago borapedi, e tla be e le wa go šomišwa ka matšatši a magolo; o tla be a ikgafile mme e le wa mohola go mong wa gagwe, a ikemišeditše go dirišwa medirong yohle ye mebotse. O tšhabe ditumo tša bosogana, mme o katanele toka le tumelo le lerato le phedišano gotee le ba ba rapelago Morena ka dipelo tše di hlwekilego. O kgaogane le dikgang tša bošilo le tša botlaela; o a tseba gore di hlola diphapano. Mohlanka wa Morena diphapano di a mo rona. Se se mo swanelago ke go lokela batho ka moka, go ba moruti wa go kgona go ruta, wa go kgotlelela ge a dirwa bošula, wa boleta ge a kgala ba ba mo ganetšago. Mohlomongwe Modimo a ka ba fa sebaka sa go itshola le go tseba nnete. Ke mo ba kago inagana ba phonyokga sefu sa Diabolose yo a bego a ba swere a ba dirile gore ba phethe thato ya gagwe. Tseba gore mehleng ya mafelelo go tla ba le mabaka a mathata. Batho e tla ba dijato, le barati ba tšhelete, le baikgantšhi, le baiponi; e tla ba banyefodi, le banyatšabatswadi; e tla ba bahlokatebogo, le ba go se hlomphe Modimo; e tla ba ba go hloka lerato, le ba go gana poelano, le ba lesebo, le ba go hloka maitshwaro; e tla ba diganka, le bahloyatoka, le mahlabapshio, le bahlokašedi, le baikgogomoši; e tla ba ba go rata boithabišo bakeng sa go rata Modimo; ba tla bonala nke ke badumedi, etšwe maatla a bodumedi ba a gana. Ba babjalo o ba katologe. Ba bangwe ba bona ba khukhunela ka dintlong tša batho, ba foraforetša basatšana ba ba tšeetšegago, ba ba lewago ke letswalo ka baka la dibe tša bona gape ba hlohleletšwago ke ditumo tša mehutahuta, ba ba ratago go dula ba rutwa, fela ba ka se kgone go tseba therešo. Bjalo ka ge Janese le Jambrese ba ile ba ganetša Moshe, le bona batho ba ba ganetša therešo – ke bona ba menagano ye e sa šomego gabotse, ba go palelwa mo go tša tumelo. Fela ba ka se tšwelele go ya kae, ka gobane bošilo bja bona bo tla tšwelela pepeneneng bjalo ka bja bale ba babedi. Fela wena o botegetše thuto ya ka, wa ba le maitshwaro a go swana le a ka, le maikemišetšo, le tumelo, wa etša nna ka go se fele pelo, le ka lerato, le ka kgotlelelo, le ka go hlomarwa, le ka go tlaišwa mola ke tlaišwa kua Antiokia le Ikoniomo le Listra. Ditlhomaro tše ke ilego ka di kgotlelela di a šiiša. Fela Morena a ntlhakodiša go tšona ka moka. Bohle ba ba ratago go phela bophelo bja borapedi e le ba tee le Kriste Jesu ba tla hlomarwa. Ge e le bakgopo le baradia, bobe bja bona bo tla keka bo eya pele, gomme bona beng ba tla tšwela pele le go radia le go radiwa. Ge e le wena, o kgomarele tše o di rutilwego, gape o di dumelago o holofetše. O tseba ba ba go rutilego tšona. O se lebale gore Mangwalo a Makgethwa o a tsebile go tloga bjaneng bja gago; ke ona a a kgonago go go fa bohlale bjo bo išago phologong ka go dumela go Kriste Jesu. Mangwalo a Makgethwa ka moka a ngwadilwe ka go huetšwa ke Modimo, gomme a hola go ruta therešo, go kgala ba ba fošago, go sokolla batho, le go laya batho gore ba phele ka tshwanelo, gore motho yo a ineetšego Modimo e be yo a kgonago gape a loketšego go dira mediro yohle ye mebotse. Ke go laya Modimo le Kriste Jesu yo a tlago ahlola ba ba phelago le ba ba hwilego e le dihlatse tša ka. Ke go laya le ka gobane yena o tlilo buša e le Kgoši, ke re o begele batho molaetša wa Modimo, o phegelele go ba begela wona, e ka ba ka nako ya gona, le ge e se nako ya gona, o ba kgale, o ba sole, o ba kgopele, o ntše o ba ruta o sa ba felele pelo. Nako e tla tla ya gore batho ba se rate go theeletša thuto ya nnete, eupša ba tla latela ditumo tša bona, gomme ba tla goketša baruti ba bantši ba go ba botša tše bona beng ditsebe tša bona di hlohlonelago go di kwa. Ba tla ithiba ditsebe gore ba se kwe nnete, ba di hlwaela dinonwane. Ge e le wena, o itshware mabakeng ka moka; o meletše ditlaišo, o dire modiro wa mmegi wa Taba ye Botse, gomme modiro woo wa gago o o phethe. Ge e le nna, ke šetše ke dirwa sehlabelo; e fihlile nako ya gore ke hwe. Ke šiane mošianong wo mogolo wa tumelo, ke kgathile tema ke e weditše, le tumelo ke sa e swere. Gomme bjale se se ntetetšego ke sefoka se se fiwago ba ba phetšego bophelo bjo bo lokilego; ke letetšwe ke sefoka se ke tlago se fiwa ke Morena ka Letšatši leo a tlago tla ka lona, yena Moahlodi wa toka – sa se fiwe nna fela, eupša sa fiwa le bao ba letetšego go iponagatša ga gagwe ka lerato. O leke go tla mono go nna kgauswinyana. Demase o ntahlile ka baka la go rata tša lefase le, gomme o iketše Thesalonika. Kresense o ile Galatia, Titose yena o ile Dalmatia. Ke Lukase fela yo a šetšego le nna. O nyake Markose o tle le yena ka gobane o tla nthuša kudu mo modirong. Tigikose yena ke mo romile Efeso. Ge o etla o ntlele le kobo ya ka ye ke e tlogetšego Troase ka ga Karpose; le dipuku o ntlele natšo, gagolo tša matlalo. Aleksandere wa mathulatshipi o ntirile gampe kudu. Fela Morena o tla mo putsa ka mo go swanetšego mediro ya gagwe. Le wena o itotele yena, gobane tše re di rutago batho o be a di gana tha. Mohla wola ke iphetolela la mathomo ga go yo a ilego a ema le nna; bohle ba ile ba nngaloga. A Modimo a se ba bone molato. Fela Morena o ile a ba le nna, a mmaatlafatša gomme ka kgona go bega molaetša ka botlalo gore baditšhaba ka moka ba o kwe; gomme ka hlakodišwa dinaleng tša lehu. Morena o sa tlilo no ntlhakodiša bobeng bjohle, a nkiša mmušong wa gagwe wa legodimong ke bolokegile. A a tumišwe go ya go ile! Amene. O dumediše Prisila le Akhwila le ba ga Onesiforose. Erastose o šetše Korinte, Trofimose yena ke mo tlogetše Miletose, ka ge a be a lwala. O leke go tla mono marega a sešo a tsene. Yubulose le Pudense le Linose le Klaudia le badumedikarena ka moka ba re o dumele. Morena a be le wena. A Modimo a le gaugele. Nna, Paulose, ke mohlanka wa Modimo le moapostola wa Jesu Kriste. Ke romilwe gore bao Modimo a ba kgethilego ke ba sokollele tumelong, le gore ba tsebe nnete gabotse ye e rutwago ke sedumedi sa gaborena, sona se ithekgilego ka go holofela bophelo bjo bo sa felego. Modimo yo a sa bolelego maaka o re holofeditše bjona go tloga le go tloga, gomme ka nako ya gona a bo utolla ka molaetša wa gagwe. Wona wa fiwa nna, gomme nna ka o bega ke laetšwe ke Modimo, Mophološi wa rena. Go wena, Titose, morwa wa ka wa mmakgonthe tumelong ye e lego ya rena ka moka, ke re: Nke Modimo, Tatagorena, le Kriste Jesu, Mophološi wa rena, ba go gaugele, ba go fe khutšo. Ke go tlogetše Kreta gore o beakanye dilo tše di bego di sa nyaka go dirwa, le gore o bee bagolo ba phuthego motseng wo mongwe le wo mongwe, go ya ka ditaelo tše ke go filego tšona tša go re: Mogolo wa phuthego a se be le bosodi; e be monna wa mosadi o tee, wa bana ba e lego badumedi, e sego ba ba gobogilego ka bophaga le lenyatšo batswading. Gobane moetapele yoo wa kereke, ka ge e le mohlokomedi wa phuthego ya Modimo, o swanetše go hloka bosodi; e se be moiponi, goba sefelapelwana, goba setagwa, goba serumolani, goba sehwirihwiri tšheleteng. A e be motho wa go amogela basepedi ka ga gagwe, le morati wa tše di lokilego. E be wa go nagana gabotse, wa go loka, yo mokgethwa, wa go itshwara ka tlhaologanyo. A itshwarelele ka molaetša wo wa go tshepega wa go dumelelana le thuto ya nnete. Ke mo a ka kgonago go kgothatša batho ka thuto ya nnete le go bontšha baganetši phošo ya bona. Gobane go na le ba bantši, gagolo ba go tšwa tumelong ya Sejuda, ba e lego bomaganagobušwa, bommalelengwana le bafori. Bona bao ba swanetše go thibja melomo, ka gobane ba pšhatla malapa ka go ruta batho tše e sego tšona, e le ge ba gabile go ikgobokeletša tšhelete ka bohwirihwiri. Mokreta yo mongwe, yo e bego e le moprofeta wa gabobona, yo a ilego a re: “Bakreta e sa le ba tloga e le bafeane, e le diphoofolo, e le dijagobe tša dibodu,” o be a rereša. Ka baka leo, o ba kgale e le ruri, gore ba be le tumelo ya nnete, gomme ba se sa šetša dinonwane tša Sejuda le melao ya batho ba ba lahlilego therešo. Go bao ba hlwekilego tšohle di hlwekile, eupša go bao ba tšhilafetšego gape ba sa dumelego ga go se se hlwekilego, gobane menagano ya bona le matswalo a bona di tšhilafetše. Ba ipotša gore ba tseba Modimo, eupša mediro ya bona e a ba ganetša. Ba hloilwe, ga ba kwe, gomme ga go modiro wo mobotse wo ba loketšego go o dira. Wena o rute tše di dumelelanago le thuto ya nnete. Bakgalabje o ba laye gore ba nagane gabotse, e be ba ba hlomphegago, ba go itshwara ka tlhaologanyo; ba be le tumelo ya nnete le lerato la nnete le kgotlelelo ya nnete. Le bakgekolo o ba laye gore ba itshware ka mo go swanetšego bakgethwa. Ba se ke ba ba le lesebo, goba ba laolwa ke bjala. E be ba go ruta tše di lokilego, gore ba kgothaletše mathari go rata banna ba bona le bana ba bona, le gore ba itshware ka tlhaologanyo le bohlweki, le gore e be ba ba hlokomelago malapa a bona, ba ba ikokobetšago go banna ba bona, gore go se be le motho yo a gobošago molaetša wa Modimo. Le masogana o a kgothatše bjalo, gore ba be le maitshwaro a mabotse. Mo go tšohle wena mong o be mohlala wo mobotse. O phegele go ruta batho therešo ka tlhompho. Thuto ya gago e be ya nnete, e be ye e se nago bosodi, gore ba ba sa emego nago ba lewe ke dihlong ge ba hloka bobe bjo ba kago re phara bjona. Makgoba a ikokobetše go beng ba ona le go ba kgahliša dilong ka moka. Ba se ke ba ba ngangiša. Ba se ke ba ba utswetša. Ba upše ba ipontšhe gore dilong tšohle ba a tshepega, gore mo go tšohle ba dire gore thuto ya Modimo, Mophološi wa rena, e kgahliše. Gobane Modimo o utolotše kgaugelo ya gagwe ye e kgontšhago batho ka moka go phološwa. Ke yona ye e re rutago gore re tlogele go phela bophelo bjo bo hlokomologago Modimo, le go laolwa ke ditumo tša lefaseng, gomme mehleng yeno re phele re itshwere ka tlhaologanyo, re le ba ba lokilego, ba borapedi, re ntše re letetše se re se holofelago sa go re thabiša, mohla letago la Modimo wa rena yo mogolo, yena Mophološi wa rena, Jesu Kriste, le tšwelela. Yena o ikgafetše rena gore a re hlakodiše bokgopong bjohle le gore a re dire setšhaba se se hlwekilego, se e lego sa gagwe a le noši, se se fišegelago go dira mediro ye mebotse. O bege o realo, o ntše o kgothatša batho o bile o ba kgalema ka maatla ohle a o a filwego. Go se be le yo a go nyatšago. O gopotše badumedi gore ba ikokobetše go balaodi le babuši, ba ba theeletše, ba ikemišetše go dira tše dibotse ka mehla, ba se senye motho leina, ba se rumolane, e be ba botho, mme ka mehla ba bonale e le ba boleta go bohle. Gobane le rena re kile ra ba mašilo, ra ba le lenyatšo, ra aroga, ra laolwa ke ditumo le mathabo a mehutahuta. Re be re phela bokgopong le lehufeng; re be re hloilwe, le rena re hloyane. Eupša e rile ge botho bja Modimo, Mophološi wa rena, le go rata batho ga gagwe di bonala, a re hlakodiša. E be e se ka baka la mediro ye e lokilego ye re e dirilego, eupša e be e le ka baka la kgaugelo ya gagwe ge a re hlakodiša. O re hlakodišitše ka go hlatswiwa ga rena ra tswalwa lefsa, ra ba ra fiwa bophelo bjo bofsa ka Moya wo Mokgethwa. Modimo o re tšhetše Moya wa gagwe ka bontši ka Jesu Kriste, Mophološi wa rena, gore ka kgaugelo ya gagwe re tle re lokafatšwe gomme re rue bophelo bjo bo sa felego bjo re bo holofetšego. Moo ke nnete. Ke rata gore taba tše o di bolele o tiišitše, gore ba ba dumelago go Modimo ba kgothalele go dira mediro ye mebotse ye e loketšego gape e holago mang le mang. O kgaogane le dikgang tša botlaela, le mananeo a borakgolokhukhu, le diphapano, le dintwa mabapi le melao ya Moshe. Tšohle tšeo ga di na mohola, ke tša lefeela. Moaroganyi o mo kgale gatee goba gabedi, e be o mo tlogela ka seripa. O a tseba gore motho yo mobjalo o arogile, gomme ka sebe seo sa gagwe o a itahla. Ge ke romile Artemase goba Tigikose go wena, o itlhaganele o tle go nna kua Nikopolise, ka gobane ke ikemišeditše go yo jela marega gona. O leke ka mo o ka kgonago ka gona go thuša Tsenase, ramangwalo, le Apolose go tšea leeto la bona, gomme o bone gore ba na le tšohle tše ba tlago di nyaka. Batho ba gaborena ba swanetše go itlwaetša go dira mediro ye mebotse, gore ba tle ba kgone go thuša ka tše di tlogago di nyakega; ba se ke ba phela bophelo bjo bo se nago mohola. Ka moka ba ba nago le nna mo ba a go dumediša. O dumediše badumedikarena ba ba re ratago. A Modimo a le gaugele bohle. Nna, Paulose, mogolegwa ka baka la Kriste Jesu, le ngwanaborena, Timotheose, re a le dumediša, wena Filemone, mogwera wa rena le modirikarena, le wena Apefia, modumedikarena wa mosadi, le wena Argipose, mokatanikarena, le phuthego ye e tsenelago ka ga gago, re re: Nke Modimo, Tatagorena, le Morena Jesu Kriste ba le gaugele, ba le fe khutšo. Ka mehla ge ke go gopola ke rapela ke leboga Modimo, ka gobane ke fela ke ekwa ka mo o ratago badumedi bohle le ka mo o dumetšego go Morena Jesu ka gona. Nna ke rapela gore botee bja rena le wena bja ge re le badumedi nke bo ka tšweletša kwešišo ya tše dibotse tše re nago le tšona ka baka la Kriste. Gobane, ngwanešo, lerato la gago le tloga le nthabišitše le bile le mpeile pelo. O kgothaditše badumedi. Ka fao, ka ge Kriste a mphile maatla, ke be nka no se šie go go laya gore o dire se se swanetšego. Eupša ka ge ke go rata, ke ikgethela go go kgopela fela. Ke a go kgopela, le ge ke le Paulose, motseta wa Kriste Jesu, yo gonabjale ke bilego ke le sebofša ka baka la gagwe. Go wena ke kgopelela Onesimose, morwa wa ka ka tša tumelo, yo ke mo sokolotšego ke le ka kgolegong. Pele o be a sa go hole ka selo, fela bjale o re hola kudu, nna le wena. Ke mmušetša go wena, yena yo ke mo ratago ka pelo ya ka ka moka. Ke be ke dumile ge a ka be a ka dula le nna a nthuša legatong la gago ge ke sa le ka mo kgolegong ka baka la Ebangedi. Fela ga se ka rata go dira selo ke se ka dumelelwa ke wena. Ga ke rate go go gapeletša gore o dumelele Onesimose go nthuša; ke rata ge o mo dumelela ka go lokologa. Yo Onesimose ge a kgaogane le wena sebakanyana, mohlomongwe e be e le gore a tle a boele ruri go wena, e se sa le lekgoba, e le wa go phala lekgoba, e le ngwaneno yo o mo ratago. Nna ke mo rata kudu, fela wena o tla mo rata le go feta, ka bokgoba bja gagwe le ka Bokriste bja gagwe. Bjale ge eba o mpona ke le modirišananago, mo amogele go no swana le ge o be o tla amogela nna. Ge eba a go fošeditše goba a jele molato go wena, lefiša nna. Ke ngwala ka seatla sa ka mo ke re: Nna ke tla go bušetša. Ke be ke sa nyake go go gopotša gore wena ka noši o a nkolota, ka gobane o se o lego sona ka nna. Ka gona, hle, ngwanešo, ka ge o le ngwanešo ka Morena, nke o ntšwele mohola, o nthabiše, ka ge o le Mokristekanna. Ke go ngwalela ke holofetše gore o tla dira ka mo ke go kgopelago ka gona; gabotsebotse ke a tseba gore o tla dira le go feta ka mo ke go kgopelago. Le gona o ntokišetše phapoši, ka ge ke holofela gore Modimo o tla le phethela ka mo le kgopelago ka gona, a mpušetša go lena. Ephafrase yo e lego sebofšakanna ka baka la Kriste Jesu o re o dumele; le badirišanikanna, Markose le Aristargose le Demase le Lukase, le bona ba a go dumediša. A Morena wa rena, Jesu Kriste, a le gaugele. Mehleng ya kgale Modimo o boletše le borakgololokhukhu ba rena gantši le ka mekgwa ye mentši ka baprofeta, ya re mehleng yeno ya mafelelo re phelago go yona a tla a bolela le rena ka Morwagwe. Ke yena yo a hlodilego legohle ka yena, yo a mmeilego mojalefa wa tšohle. Go yena go bonala letago la Modimo, ke yena seswantšho sa nnete sa sebele sa Modimo, gomme o lota tšohle ka lentšu la gagwe le maatla. Ge a phethile modiro wa go hlatswa batho dibe, o ile a yo dula legodimong madulong a bogoši kgauswi le Modimo Kgoši. Morwa wa Modimo o godišitšwe go feta barongwa, go swana le lona leina le a le filwego ge le feta a bona. Etse Modimo ga se a ka a botša yo mongwe wa barongwa a re: “O Morwa wa ka, lehono ke go tswetše.” Le bona barongwa Modimo ga se a ka a bolela ka yo mongwe wa bona a re: “Ke tla ba Tatagwe, gomme yena e tla ba Morwa wa ka.” Mohla a tliša Motswalwanoši wa gagwe lefaseng o tla boeletša a re: “Barongwa bohle ba Modimo ba mo khunamele.” Ge e le mabapi le barongwa Modimo o rile: “Modimo o dira barongwa ba gagwe diphefo; bahlanka ba gagwe o ba dira dikgabo tša mollo.” Fela mabapi le Morwagwe o rile: “Modimo, bogoši bja gago ke bja go ya go ile; o buša setšhaba sa gago ka toka. O be o rata toka, o hloile bobe. Ke ka baka leo Modimo, yena Modimo wa gago, a tloditšego wena, e sego bagwera ba gago, a go bea kgoši ka lethabo le legolo.” A ba a re: “Wena, Morena, mathomong o hlodile lefase, wa bopa magodimo ka diatla tša gago. Dilo tšeo di tla timelela, fela wena o tla šala; tšohle di tla hlagala bjalo ka seaparo. O tla di phutha bjalo ka kobo, gomme di tla šatoga bjalo ka seaparo. Eupša wena ga o fetoge, le bophelo bja gago ga bo fele.” Modimo ga se a ka a botša yo mongwe wa barongwa a re: “Dula mo letsogong la ka la go ja ke be ke tle ke go fenyetše manaba a gago.” Na barongwa ka moka ga se meoya ye e hlankelago Modimo, mme yena a e romago go yo thuša ba ba tlago phološwa? Ka gona go nyakega gore tše re di kwelego re di hlokomele le go feta, re se kgeloge. Gobane melao ya Moshe yela barongwa ba e filego borakgolokhukhu ba rena e be e le ya go ba tlema, gomme yo a bego a sa e latele goba a sa e phethe, o be a otlwa ka mo go mo swanelago. Bjale re ka phonyokga bjang ge re sa hlokomele phološo ye kaaka? Morena ka boyena ke yena wa mathomo wa go bega taba ye, gomme ba ba mo kwelego ba tiišitše gore ke nnete. Le Modimo o ba hlatsetše ka go dira mehlolo le dimakatšo tša mehutahuta le ka go abela batho dimpho tša Moya wo Mokgethwa ka mo a ratago ka gona. Ga se barongwa bao Modimo a ba beilego babuši ba lefase le lefsa la ka moso le re bolelago ka lona. Mothotsoko o boletše felwanatsoko ka Mangwalong a Makgethwa a re: “Motho ke eng, ge o bile o mo gopola, motho wa nama, ge o bile o mo šetša? O mo hlaeditše ga lebakanyana a se swane le barongwa; o mo godišitše ka letago le tlhompho, wa mo dira molaodi wa tšohle.” Go thwe Modimo o dirile motho molaodi wa tšohle; ke go re wa selo se sengwe le se sengwe. Fela ga re bone motho a šetše a laola dilo tšohle. Eupša yo re mmonago a hlaeditšwe ga lebakanyana a se be morongwa ke Jesu, e le gore a tle a hwele bohle ka kgaugelo ya Modimo. Bjale re mmona a kgabišitšwe ka letago le tlhompho ka baka la lehu le a le hwilego. Dilo ka moka di phelela Modimo yo e lego yena Mohlodi wa tšohle. Gomme go be go lebane gore Modimo a kgontšhe Jesu ka go hlokofatšwa ga gagwe gore a phološe batho, gore ba bantši ba tle ba be letagong le yena e le bana ba Modimo. Gobane Jesu ke Mophološi wa bona. Yo a kgethetšego Modimo batho mmogo le bona batho bao a ba kgethilego Tatagobona ke o tee. Ke ka baka leo Jesu a sa lewego ke dihlong ge a ba bitša banababo. O re go Modimo: “Ke tla botša banabešo bowena bja gago; ke tla go reta ke na le phuthego.” Gapegape o re: “Ke tla tshepha Modimo.” A ba a re: “Ke nna yo le bana bao Modimo a mphilego bona.” Ka ge bana ba e le batho ba nama, Jesu le yena e bile motho wa nama bjalo ka bona, gore ka lehu la gagwe a tle a fenye molaolalehu, e lego Sathane, gomme ka go dira bjalo a phološa ba e bilego makgoba bophelong bjohle bja bona, ka baka la ge ba boifa lehu. Gobane go pepeneneng gore ba a ba thušago ga se barongwa. O thuša ditlogolo tša Abrahama. Ka gona go be go lebane gore a swane le banababo ka tšohle, gore e tle e be Moprista wa bona yo Mogolo wa kgaugelo le yo a botegelago go hlankela Modimo, gore a tle a boelanye batho le Modimo ka baka la dibe tša bona. Gomme bjale a ka thuša ba ba lekwago, ka ge le yena a ile a lekwa ka go hlokofatšwa. Badumedikanna ba bakgethwa ba le biditšwego ke Modimo gotee le nna, gopolang ka Jesu, Moapostola le Moprista yo Mogolo wa tumelo ye re ipegago yona. O ile a botegela Modimo yo a bego a mo kgethile, boka Moshe ge a ile a botegela modiro wa gagwe ka lapeng la Modimo. Mohlodi wa lapa o hlompšha go feta lona lapa. Ka yona tsela yeo Jesu le yena o lebanwe ke tlhompho ye kgolo go feta Moshe. Lapa le lengwe le le lengwe le na le mohlodi wa lona, gomme Modimo ke yena Mohlodi wa dilo tšohle. Moshe o be a botega e le mohlanka wa lapa la Modimo, gomme modiro wa gagwe e le go porofeta tše di bego di tlilo bolelwa ke Modimo ka moso. Kriste yena o botegetše Modimo e le Morwa wa go buša lapa la gagwe. Rena, ge eba re na le sebete ebile re holofela re tiišitše, gona re ba lapa la gagwe. Ka gona, bjalo ka ge Moya wo Mokgethwa a bolela: “Lehono ge le ekwa lentšu la Modimo le se ke la ngangabala bjalo ka borakgolokhukhu ba lena mola ba gwabela Modimo, bjalo ka mohla wola ba mo leka lešokeng. Fao ke mo ba kilego ba ntlhohla dipolelo ba nteka, le ge ba be ba bone tše ke ba diretšego tšona mengwageng ye masome a mane. Ke ka baka le ke ilego ka galefela morafe woo ka re: ‘Ka mehla ga ba mpotegele. Ba gana go phetha ditaelo tša ka.’ Ka gona ka ikana ke galefile ka re: ‘Ba ka se tsoge ba tsene nageng ye ke bego ke ile go ba khutšiša go yona.’ ” Badumedikanna, le hlokomeleng gore mo go lena go se be le wa pelo ye mpe ya go gana go dumela, mo a kago ba a furalela Modimo yo a phelago. Sa lena e be go kgothatšana tšatši le lengwe le le lengwe ge le ekwa lentšu leo la go re “Lehono”, gore go se be le yo a hlalefetšwago ke sebe a ngangabala. Gobane re fetogile ba ba nago le kabelo le Kriste go tša gagwe ge fela re ka tiišetša go yo fihla mafelelong kholofelong ye re bilego le yona mathomong. Ke ka baka leo Mangwalo a Makgethwa a rego: “Lehono ge le ekwa lentšu la Modimo le se ke la ngangabala bjalo ka borakgolokhukhu ba lena mola ba gwabela Modimo.” Etse ke bafe ba ba rilego go kwa Modimo a bolela ba mo gwabela? Ga ke re ke bohle bale ba go hudušwa ke Moshe Egepeta? Modimo yena o ile a galefela bafe mengwaga ye masome a mane? Ga ke re ke ba ba bego ba dirile dibe, bao ditopo tša bona di ilego tša rapalatšwa lešokeng? Ke bafe bao Modimo a bego a ikana go bona, a re ba ka se tsene nageng ye a bego a tla ba khutšiša go yona? Ga ke re ke bona bale ba go se mo theeletše? Ka gona, re a bona gore ba ile ba palelwa ke go tsena ka baka la go se dumele ga bona. Ka ge kholofetšo yela ya Modimo ya go re re tla tsena makhutšong e sa le gona, a re hlokomeleng gore go se be le o tee wa lena wa go palelwa ke go tsena makhutšong ao. Re begetšwe Taba ye Botse ya Modimo go no swana le bona. Fela bona ba rile go kwa molaetša woo wa Modimo wa se ba hole ka selo, ka gobane e rile ge ba o kwa ba se o amogele ka tumelo. Rena re dumelago re tsena makhutšong ao Modimo a boletšego ka ona a re: “Ke ikanne ke galefile ka re: ‘Ba ka se tsoge ba tsene nageng ye ke bego ke ile go ba khutšiša go yona!’ ” A realo etšwe modiro wa gagwe a be a šetše a o phethile go tloga tlholegong ya lefase. Gobane mogongwenyana Mangwalo a Makgethwa a bolela mabapi le letšatši la bošupa a re: “Ka letšatši la bošupa Modimo a khutša a feditše go dira mediro ka moka ya gagwe.” Yona taba ye e sa bolelwa le ka temaneng ye re šetšego re e ngwadile mo go thwego: “Ba ka se tsoge ba tsene nageng ye ke bego ke ile go ba khutšiša go yona.” Go na le ba bangwe ba ba tlago tsena makhutšong ao. Bale ba go botšwa Taba ye Botse pele ga se ba tsena, ka gobane ba be ba sa theeletše Modimo. Ka baka leo Modimo o bea letšatši le lengwe le a rego ke “Lehono”. Ge go fetile nako ye telele a tla a bolela ka lona ka Dafida ka temaneng ye re šetšego re e ngwadile a re: “Lehono ge le ekwa lentšu la Modimo le se ke la ngangabala.” Ge Joshua a ka be a be a ile a iša setšhaba makhutšong, ka morago Modimo a ka be a se a bolela ka letšatši le lengwe. Ge go le bjalo, setšhaba sa Modimo se sa na le letšatši la go khutša, go no swana le Modimo mola a khutša ka letšatši la bošupa. Gobane yo a tsenego makhutšong ao Modimo a re holofeditšego ona, o khutša a phethile modiro wa gagwe go etša Modimo mola a khutša a phethile wa gagwe modiro. Ka gona, a re ikokoropeleng go tsena makhutšong ao, gore go se be le yo mongwe yo a palelwago go etša bona ka ge ba be ba sa theeletše Modimo. Lentšu la Modimo le a phela, le mafolofolo ebile le bogale go feta tšhoša ya magale a mabedi. Le sega go hlaphola la ba la kgaoganya pelo le moya, la kgaoganya le malokologo le moko. Le fetleka dikakanyo le menagano ya ka pelong. Ga go sebopiwa se se širegelago Modimo; tšohle di a mo utologela tša ba pepeneneng. Ke yena yo re swanetšego go ikarabela go yena. A re kgomareleng tumelo ye re e amogetšego, gobane re na le Moprista yo Mogolo, yena Jesu, Morwa wa Modimo, yo a ilego gonagona kua go lego Modimo. Moprista wa rena yo Mogolo ga se wa go se re kwele bohloko mafokoding a rena. Ke yo a ilego a lekwa ka tšohle bjalo ka rena, eupša yena a se dire sebe. Ka gona a re batameleng Modimo ka sebete setulong sa gagwe sa bogoši moo a gaugelago batho, gore a re šokele, a re gaugele, a re thuše ge re nyaka thušo. Moprista yo mongwe le yo mongwe yo Mogolo o kgethwa bathong a bewa go hlankela Modimo bakeng sa bona ka go mo neela dikabelo le dihlabelo tša dibe. Ka ge le yena mong a fokola, o kgona go se be le sekgapho go bao ba dirago sebe ba sa tsebe. Le gona ka gore yena mong o a fokola, o swanetše go dira dihlabelo e sego fela ka baka la dibe tša batho, eupša le ka baka la tša gagwe. Motho ga a iphe bohlomphegi bjoo bja go ba Moprista yo Mogolo. Ke fela ge a biditšwe ke Modimo mo a bewago Moprista yo Mogolo bjalo ka Arone. Le yena Kriste ga se a ipha bohlomphegi bja go ba Moprista yo Mogolo, eupša o bo filwe ke Modimo mola a re go yena: “O Morwa wa ka, lehono ke go tswetše.” Le felo mo gongwe a re: “O tla ba moprista go ya go ile, wa boprista bja go swana le bja Melkitsedeke.” Jesu ge a sa phela mo lefaseng o kile a rapela Modimo yo a bego a ka mo phološa lehung, a mo kgopela ka sello se segolo le meokgo. Ka ge a be a na le tlhompho, Modimo o ile a mo kwa. Le ge e be e le yena Morwa wa Modimo, go tlaišwa ga gagwe go ile gwa mo dira gore a rate go phetha thato ya Modimo le go feta. Ya re ge a phethagaditšwe ka ditlaišego, a ba yena wa go phološetša sa ruri bao ba mo theeletšago, gomme Modimo a mmega gore ke Moprista yo Mogolo wa boprista bja go swana le bja Melkitsedeke. Ke tše dintši tše re kago di bolela ka taba ye, fela ke mo gothata go le hlalošetša tšona, ka ge le diega go kwešiša. Le be le swanetše go ba le šetše le le baruti, eupša le sa nyaka motho wa go le ruta dithuto tša mathomo tša molaetša wa Modimo. Bakeng sa go ja dijo tše di tiilego le sa swanetšwe ke lebese. Mang le mang yo a fepšago ka lebese e sa le lesea, ga sešo a kgona go kgethologanya se se lokilego le se se sego sa loka. Dijo tše di tiilego ke tša batho ba bagolo, ba ba šetšego ba ithutile ka go itlwaetša go kgethologanya botse le bobe. A re tlogeleng thuto ye go thongwago ka yona ge go rutwa molaetša wa Kriste, re feteleng pele go rutwa tša Sekriste ka botlalo. A re se boeletšeng tša mathomong, mola re furalela mediro ye e se nago mohola re dumela go Modimo; tša mola re rutwa mabapi le dikolobetšo le go bea batho diatla, le tša tsogo ya ba ba hwilego, le tša kahlolo ya go ya go ile. A re gateleng pele, gomme seo ke se re tlago se dira ge eba e le thato ya Modimo. Gobane ge motho a kile a bonegelwa ke seetša sa Modimo, a kwa bose bja mpho ya legodimong, a fiwa Moya wo Mokgethwa bjalo ka ba bangwe, ge a kile a lemoga gore lentšu la Modimo le lokile, a ba a kwa maatla a mehla ye e tlago, mme le ge go le bjalo a no kgeloga, ga go kgonege gore a boele a itshole, gobane yena mong o ipolaya ka go bapola Morwa wa Modimo gape sefapanong, a mo goboša. Modimo o šegofatša mobu wo o nwago meetse a pula ye e atišago go o nela, wo o medišetšago bao ba o lemago dibjalo tše di ba holago. Fela ge o ka mediša meetlwa le ditshehlo, o ka se hole ka selo; o šetše o le kgauswi le go rogakwa ke Modimo, gomme o tla fetša ka go tšhungwa. Fela ge ke realo, baratiwa, ke tloga ke tseba gore le šegofaditšwe ka tše kaone tše di le išago phologong. Modimo ga a kgetholle motho. A ka se lebale mediro ya lena le go mo rata ga lena ge le be le thuša badumedikalena mme le bjale le sa ba thuša. Se re se dumago kudu ke gore mongwe le mongwe wa lena a bontšhe mafolofolo a mabjalo go fihlela mafelelong, gore tše le di holofelago di tle di phethagale. Ga re rate ge le lapa, re rata ge le eba bjalo ka ba ba dumelago go Modimo mme ba kgotlelela, ka go dira bjalo ba hwetša tše Modimo a di holofeditšego badumedi. Modimo mola a holofetša Abrahama o ikanne gore o tla phetha se a mo holofeditšego sona. Ka ge go se yo mongwe yo a mo fetago, o ile a ikana ka yena mong a re: “Ke ikana gore ke tla go šegofatša kudu ka go fa ditlogolo tše dintši.” Abrahama a se fele pelo, ka gona Modimo a mo fa tše a mo holofeditšego tšona. Gape ge motho a ikana o ikana ka yo a mo fetago, gomme kano yeo e fediše kgang yohle, e nape e be gona go tiiša taba. Bao Modimo a bego a tlilo ba fa se a ba holofeditšego sona o ratile go ba hlalošetša gabotse gore a ka se tsoge a hlaname; taba yeo a e tiiša ka go ikana. Ka gona, tšeo ke taba tše pedi tše di ka se hlanamišwego, tšeo go tšona Modimo a ka se bolelego maaka. Gomme rena re tšhabetšego go yena re kgothatšega kudu go itshwarelela ka se re se holofelago. Kholofelo ye ke bjona boithekgo bjo bo tiilego bja maphelo a rena, mme e putla seširo ya tsenelela ka Felo mo Gokgethwakgethwa. Ke mo Jesu a re etilego pele a yo tsena gona gore a re hole, yena yo e lego Moprista yo Mogolo go ya go ile wa boprista bja go swana le bja Melkitsedeke. Melkitsedeke yo e be e le kgoši ya Saleme, ebile e le moprista wa Modimo Yogodimodimo. E kile ya re ge Abrahama a boa ntweng yeo go yona a bego a fentše dikgoši, Melkitsedeke a mo gahlanetša, a mo šegofatša, gomme Abrahama a mo loba ka karolo ya lesome ya tšohle tše a bego a di thopile. Taba ya mathomo ye re ka e bolelago, Melkitsedeke ke go re “Kgoši ya Toka”, e be ebile e le kgoši ya Saleme, ke go re “Kgoši ya Khutšo”. Ga go tsebje tatagwe le mmagwe goba borakgolokhukhu ba gagwe; matswalo a gagwe le lehu la gagwe le tšona ga di tsebje, eupša ke moprista wa go ya go ile, bjalo ka Morwa wa Modimo. Bjale ge, bonang gore e be e le yo mogolo bjang mo Abrahama, rakgolokhukhu wa rena a ilego a mo loba ka karolo ya lesome ya tše a bego a di thopilwe ntweng. Le ditlogolo tša Lefi tšeo e lego baprista di laelwa ke molao wa Moshe go ntšhiša setšhaba sa Israele, e lego batho ba gabobona, karolo ya lesome, etšwe batho bao ba gabobona le bona e le ditlogolo tša Abrahama. Melkitsedeke, le ge e be e se setlogolo sa Lefi, o ntšhišitše Abrahama karolo ya lesome mme a mo šegofatša, yena yo a bego a filwe dikholofetšo tša Modimo. Etse go pepeneng gore mošegofatši o feta mošegofatšwa. Ge e le baprista ba ba amogelago karolo ya lesome ke batho ba ba hwago, kganthe mabapi le Melkitsedeke karolo ya lesome e amogelwa ke yo Mangwalo a Makgethwa a rego ke yo a sa hwego. Le gona re ka no re mola Abrahama a ntšha karolo ya lesome, Lefi, yo ditlogolo tša gagwe di amogelago karolo ya lesome, le yena ke setšha a ntšhitše. Gobane ke setšha a be a be a le gona ka madi a rakgolokhukhu wa gagwe, Abrahama, yola wa go gahlanetšwa ke Melkitsedeke. Setšhaba sa Israele ge se fiwa melao ya Moshe e be e le go ya ka melao ya boprista bja Balefi. Gomme ge eba motho o be a kgona go se be le bosodi go ya ka boprista bja Balefi, na go ka be go ile gwa nyakega gore go tle moprista wa mohuta wo mongwe, wa go bewa bjalo ka Melkitsedeke, e sego Arone? Gobane ge boprista bo fetolwa, le molao o swanetše go fetolwa. Morena wa rena, yena yo go bolelwago ka yena mo tabeng tše, e be e le wa kgoro e šele, gomme ga go yo mongwe wa kgoro ya gabo yo a kilego a dira dihlabelo aletareng. Go tsebega gabotse gore yena e be e le wa kgoro ya Juda, gomme Moshe ga se a ka a bolela ka kgoro ye ge a be a bolela ka baprista. Taba ye re bego re bolela ka yona ye bjale e bonala gabotse, gagolo ge re elelwa gore go tlile moprista yo mongwe, yena e le wa boprista bja go swana le bja Melkitsedeke. Ga se a bewa moprista ka go tswalelwa bopristeng, eupša o beilwe ka maatla a bophelo bja gagwe bjo bo sa felego. Gobane Mangwalo a Makgethwa a re: “O tla ba moprista wa go ya go ile wa boprista bja go swana le bja Melkitsedeke.” Ka gona, molao wola wa kgale o phumotšwe, ka gobane o be o fokola mme o se na mohola. Molao wola wa Moshe o be o sa kgone go lokafatša selo. Eupša bjale re filwe se sekaone se re se holofelago sa go re batametša go Modimo. Jesu o beilwe moprista ka keno ya Modimo. Balefi bona ba be ba bewa baprista ka ntle le keno ye. Eupša Jesu yena o beilwe moprista ka keno mola Modimo a mmotša a re: “Morena o ikanne gomme a ka se hlaname; o rile: ‘O moprista go ya go ile.’ ” Seo ke sona se se dirago gore Jesu a tiišetše gore go tla phethagala kgwerano ye kaone. Ntle le moo, baprista bale ba Balefi e bile ba bantši ka ge ba be ba ehwa, gomme ba sa kgone go tšwela pele le modiro wa bona. Ge e le Jesu, boprista bja gagwe ga bo fetele go yo mongwe, ka gobane yena o phelela sa ruri. Ke ka baka leo bao ba tlago go Modimo ka yena a kgonago go ba phološetša sa ruri, gobane o phela go ya go ile, gore a ba rapelele go Modimo. Moprista yo Mogolo yo a ka re kgonago ke yo e lego yo mokgethwa, yo a se nago sebe goba bosodi, yo a arogantšwego le badiradibe, gape a rotošeditšwego ka godimodimo ga leratadima. Ga se a swanela, bjalo ka Baprista bale ba bangwe ba bagolo, gore ka mehla a dire dihlabelo tša go tloša dibe tša gagwe, a be a dire le tša go tloša dibe tša setšhaba. O dirile sehlabelo se tee gatee a se direla sa ruri mola yena mong a itira sehlabelo. Molao wa Mošhe o bea batho Baprista ba Bagolo, etšwe ba na le mafokodi; eupša ka morago ga ge molao o šetše o beilwe, Modimo o dirile Morwagwe yo a lokafaleditšwego sa ruri Moprista yo Mogolo ka keno. Tabataba mo go tše re di bolelago ke ya gore re na le Moprista yo Mogolo yo mobjalo, yo a dutšego madulong a bogoši kgauswi le setulo sa Modimo Kgoši legodimong. Ke yena modiredi wa ka Felo mo Gokgethwa ka tenteng ya mmakgonthe ye e hlomilwego ke Modimo, e sego batho. Moprista yo mongwe le yo mongwe yo Mogolo o beelwa go neela dimpho le dihlabelo; le wa rena Moprista yo Mogolo o swanetše go ba le se a se neelago. Ge a ka be a le mo lefaseng, e ka be e ka se be moprista, ka ge go na le baprista ba go neela dimpho tše di laelwago ke molao wa Bajuda. Modiro wa baprista wo ba o dirago ke seswantšho fela le moriti wa tša kua legodimong. Ke ka baka leo Moshe, mola a šetše a nyaka go hloma Tente, Modimo a ilego a mo laya a re: “O hlokomele gore o dira tšohle go ya ka leano le ke go laeditšego lona kua thabeng.” Bjalo ka ge boprista bja Jesu bo tloga bo feta bja bale, le kgwerano ye a lego Mmoelanyi wa batho le Modimo ka yona, ye e holofetšago tše dikaone, ke ye e fetago yela. Ge kgwerano yela ya mathomo e ka be e be e se na bosodi, go ka be go se gwa nyakega ya bobedi. Gape Modimo o kgalema setšhaba sa gagwe ge a re: “Nako e etla yeo ka yona ke tlago dira kgwerano ye mpsha le setšhaba sa Israele le sa Juda,” o realo, Morena. “Yona e ka se swane le yela ke ilego ka e dira le borakgolokhukhu ba bona mohla wola ke ba swere ka seatla ke ba ntšha nageng ya Egepeta. Ba ile ba se botegele kgwerano ye ke bego ke e dirile le bona, gomme nna ka se ba šetše. Bjale kgwerano ye ke tlago e dira le setšhaba sa Israele matšatšing a a tlago še, o realo, Morena: Ke tla tsentšha melao ya ka ka matswalong a bona, ka e ngwala ka dipelong tša bona. Ke tla ba Modimo wa bona, gomme bona e tla ba setšhaba sa ka. Motho a ka se sa swanela go ruta mogagabo goba morwarragwe a re: ‘Tseba Morena,’ gobane bohle ba tla be ba ntseba, banyatšegi le bahlomphegi. Ke tla ba swarela makgopo a bona, dibe tša bona ka se sa di gopola.” Modimo ge a bolela ka kgwerano ye mpsha o ra gore yela ya mathomo ke ya kgale; gomme se e bago sa kgale mme se tšofala, se ba kgauswi le go timelela. Kgwerano yela ya mathomo e be e na le melao ya yona ya go khunamela Modimo, le lefelo la go mo khunamela mo lefaseng. Go be go hlomilwe tente ya ka ntle, ye e bego e bitšwa Felo mo Gokgethwa. Ka gare ga yona go be go beilwe sehlomamabone le tafola ye go yona go bego go bewa dinkgwa tše dikgethwa. Ka morago ga seširo sa bobedi go be go na le tente ye e bitšwago Felo mo Gokgethwakgethwa. Ka gare ga yona go be go beilwe aletare ya gauta ya go tšhumela seorelo, le Polokelo ya Kgwerano ye e ritetšwego ka gauta mo gohle, ka moo go bego go beilwe sebjana sa gauta se se swerego manna, le patla ya Arone yela e bego e kile ya hloga matlakala, le matlapa ale a go ngwalwa Melao ye Lesome. Ka godimo ga Polokelo go be go na le bakerubi ba letago la Modimo ba phurolotše diphego tša bona lefelong leo go lona go bego go swarelwa dibe. Fela tšeo ga se tše bjale re ka di bolelago ka botlalo. Ke ka mo dilo tšeo di bego di beakantšwe ka gona. Baprista ba be ba fela ba tsena ka tenteng ya ka ntle ba dira mediro ya bona, eupša ka tenteng ya ka gare go be go tsena fela Moprista yo Mogolo, le gona gatee ka ngwaga. A tsena a swere madi ao a bego a a neela go Modimo ka baka la yena mong, le ka baka la dibe tše setšhaba se di dirilego se sa lemoge. Moya wo Mokgethwa o re bontšha ka dilo tše gore tsela ya go tsena ka Felo mo Gokgethwakgethwa e be e sešo ya bulwa nakong yela ya ge tente ya ka ntle e sa hlomilwe. Tše ke seswantšho se se šupago tša mehla ya bjale. Go ra gore dikabelo le dihlabelo tše di neelwago Modimo di ka se kgone go hlwekiša pelo ya morapedi, ka ge di amana fela le dijo le dino le ditirelo tše di fapafapanego tša go hlwekiša. Tšeo ka moka ke melawana ya go hlwekiša ye e ilego ya šoma go fihlela ge go etla nako ya gore dilo di mpshafatšwe. Bjale Kriste o tlile e le Moprista yo Mogolo wa tše dibotse tše di šetšego di tlile. Tente ye a hlankelago ka go yona e feta yela ya pele ka bogolo le ka bophethegi; ga se ya go agwa ke batho, ke gore ga se ya lefase le. Kriste o tsene ka Felo mo Gokgethwakgethwa gatee a tsenela sa ruri, a se a swara madi a diphooko le a manamane; se a tsenego le sona ke madi a gagwe yena mong, a hweletša batho phologo ya go ya go ile. Bjale ge ešita le madi a diphooko le a dipoo le molora wa lethole, e lego dilo tše di fokelwago ba ba tšhilafetšego, ge di ba kgethwafatša di bile di ba hlwekiša go tšhilafala, madi a Kriste ona a ka nama a se hlatswe le go feta dipelo tša rena ditiro tše di bolayago gore re tle re khunamele Modimo yo a phelago? Ka Moya wa go ya go ile Kriste o ikgafile ya ba sehlabelo se se se nago bosodi sa go neelwa Modimo. Ke ka baka leo Kriste e lego Mmoelanyi wa batho le Modimo ka kgwerano ye mpsha, gore bao ba biditšwego ke Modimo ba fiwe bohwa bja go ya go ile bjo ba bo holofeditšwego. Taba ye e kgonega ka ge go bile le lehu le le lokollago batho dibeng tše ba di dirilego mola kgwerano yela ya mathomo e sa le gona. Mabapi le lengwalo la go aba lefa go nyakega bohlatse bja gore mongwadi wa lona o hlokafetše, gobane lengwalo le lebjalo ga le na mohola ge mongwadi wa lona a sa phela, le thoma go šoma ge a seno hlokafala. Ke ka baka leo le kgwerano yela ya mathomo e theilwego ka go šomiša madi. Gobane Moshe o rile go begela setšhaba se le ka moka ditaelo tšohle tša melao, a tšea madi a manamane le a diphooko a a hlakantšha le meetse, a foka puku ya melao le setšhaba sohle ka ona, a šomiša lehlakana la hisopo le boya bjo bohwibidu. A re: “Se ke madi a a tiišetšago kgwerano ye Modimo a laetšego gore le e botegele.” Ka wona mokgwa woo Moshe a foka le Tente ya bodulo bja Morena le ditlabakelo tšohle tše di šomišwago tirelong. Go ya ka molao wa Moshe, tše di hlwekišwago ka madi nka no re e nyakile go ba dilo tšohle, gomme ke fela ka go tšholla madi mo batho ba swarelwago dibe. Dilo tšeo tša go swantšha tša legodimong di be di hlwekiša ka yona tsela yeo. Kganthe tša legodimong tšona di lebanwe ke go hlwekišwa ka dihlabelo tše di phalago tšeo. Gobane Kriste ga se a tsena ka Felo mo Gokgethwa ga go agwa ke batho, gona e lego seswantšho sa Felo mo Gokgethwa ga mmakgonthe. Yena o tsene ka legodimong gore bjale a iponagatše pele ga Modimo gore re tle re holege, e se gore a itire sehlabelo gantši, bjalo ka Moprista yo Mogolo ge a tsena ka Felo mo Gokhethwakhethwa ngwaga ka ngwaga a swere madi a e sego a gagwe, gobane moo o be a tla swanela go hlokofatšwa gantši go tloga tlholegong ya lefase. Eupša o iponagaditše gatee mehleng ye ya mafelelo, gore a tloše dibe ka go itira sehlabelo. Ka ge batho ba abetšwe go hwa gatee mme ka morago ga moo ba ahlolwe, Kriste le yena o dirilwe sehlabelo gatee go tloša dibe tša batho ba bantši. O tla iponagatša gape, fela bjale e se sa le go tlo tloša dibe, eupša e le go tlo hlakodiša bao ba mo letetšego ka phišego. Melao ya Moshe e re akanyetša tše dibotse tše di tlilogo tla; yona e dio ba moriti wa tšona. Ngwaga ka ngwaga go dirwa dihlabelo di tee leboelela, eupša melao yeo ga e kgone go dira selo gore ka dihlabelo tše bao ba tlago go Modimo e be ba ba phethegilego. Ge barapedi ba Modimo ba ka be ba hlatswegile dibe ka nnete, ba ka be ba se sa lewa ke letswalo, le dihlabelo di be di tla kgaotšwa. Eupša se se lego gona ke gore dihlabelo di gopotša batho dibe tša bona ngwaga ka ngwaga. Gobane madi a dipoo le a diphooko a ka se kgone go tloša dibe. Ka gona Kriste mola a etla lefaseng o rile go Modimo: “Etse dihlabelo le dikabelo tša bupi ga se wa di nyaka, se o mpeetšego sona ke mmele. Dihlabelo tša go tšhungwa ka moka le tša go tloša dibe ga se tša go kgahla. Ke ge nna ke re: ‘Šemo ke tlile, Modimo, go tlo pheta thato ya gago, bjalo ka ge go ngwadilwe ka nna ka pukung.’ ” O thomile ka go re: “Dihlabelo le dikabelo tša bupi le dihlabelo tša go tšhungwa ka moka le tša go tloša dibe ga o di nyake ebile ga di go kgahle.” A realo etšwe e le tšona tše di dirwago go ya ka melao ya Moshe. Ya ba o re: “Šemo ke tlile, Modimo, go tlo phetha thato ya gago.” Ka gona Modimo o fediša dihlabelo tšela tša pele, tša tšewa ke sehlabelo sa Kriste legato. Ka ge Kriste a phethile thato ya Modimo, rena ka moka re kgethwafaditšwe ka sehlabelo se yena a se dirilego ka mmele wa gagwe gatee a se direla sa ruri. Letšatši ka letšatši moprista yo mongwe le yo mongwe o dira modiro wa gagwe wa boprista, gomme o dira dihlabelo di tee leboelela; eupša dihlabelo tše ga di kgone go tloša dibe. Ge e le Kriste yena o dirile sehlabelo se tee sa dibe, ya ba sebego se se tlošetšago dibe sa ruri, ke moka a yo dula letsogong la go ja la Modimo. Ke gona mo bjale a letetšego gore Modimo a be a mo fenyetše manaba a gagwe. Ka gona, ka go itira sehlabelo gatee fela, bao ba lokafaditšwego o ba kgethwafaleditše sa ruri. Le Moya wo Mokgethwa o a re hlatselela, gobane pelepele o re: “Kgwerano ye ke tlago e dira le bona matšatšing a a tlago še, o realo, Morena: Ke tla tsentšha melao ya ka ka dipelong tša bona, ka e ngwala ka matswalong a bona.” Gapegape o re: “Nka se sa gopola dibe tša bona le ditiro tša bona tše mpe.” Gomme ge ba di swaretšwe, sehlabelo sa go tloša dibe ga se sa nyakega. Bjale ge, banabešo, re na le maswanedi a go tsena ka Felo mo Gokgethwa ka baka la ge Jesu a re hwetše. O re phuletše tsela ye mpsha, tsela ye e phelago, ye e phuleletšago seširo, e lego mmele wa gagwe. Re na le Moprista yo Mogolo yo a hlokometšego Felo mo Gokgethwa kua legodimong. Ka gona, a re batameleng go Modimo ka botshepegi le tumelo ya nnete, re se na boitshetshengo, re le mo nkego re hlapile ka meetse a a sekilego. A re kgomareleng kholofelo ye re nago le yona, ka gobane Modimo yo a re holofeditšego o a botega. A re hlokomelaneng, re kgothaletšaneng go ratana le go direlana mediro ye mebotse. Re se lese go fela re eya dithapelong tša phuthego, ra etša ba ba itlwaeditšego go se ye. A re upše re kgothaletšaneng go fela re eya gona le go feta, ka ge le lena le iponela gore Letšatši la Kahlolo le a batamela. Ga go sa na sehlabelo se se tlago tloša dibe, ge eba re tla no tšwela pele le go dira dibe ka boomo etšwe re šetše re tsebišitšwe therešo. Se se re šaletšego ke go letela re boifa kahlolo le mollo wo bogale wo o tlago bolaya ba ba lwago le Modimo. Ge motho a tshetše molao wa Moshe o be a bolawa ntle le lešoko ge go na le dihlatse tše pedi goba tše tharo. Bjale motho yo a nyaditšego Morwa wa Modimo, yo a hlompholotšego madi a kgwerano ya Modimo ao a mo kgethwafaditšego, yo a rogilego Moya wa kgaugelo, na le bona gore yena a ka napa a se lebanwe ke kotlo ya go feta yela? Gape re a tseba gore ke mang yo a rilego: “Ke nna ke lefeletšago; ke nna ke tlago bušetša,” gapegape a rilego: “Morena o tla sekiša setšhaba sa gagwe.” Go wela diatleng tša Modimo yo a phelago go a šiiša! Gopolang matšatši ale a ge le sa tšo bonegelwa ke seetša sa Modimo, mola le tlaišwa gabohloko, fela le kgotlelela. Ka nako tše dingwe le be le rogwa mahlapa le bile le tlaišwa pepeneneng; ka nako tše dingwe le be le itswalanya le ba ba swerwego ka mokgwa woo. Dibofša le be le di kwela bohloko, gomme ge le amogwa dithoto tša lena, le dumela ntle le go ngongorega, le tseba gore le beetšwe tše kaone tše di tlago dulela sa ruri. Ka fao, le se felelwe ke tshepho, ka gobane yona e na le moputso wo mogolo. Le se fele pelo ge le nyaka go phetha thato ya Modimo le go hwetša tše a le holofeditšego tšona. Gape le Mangwalo a Makgethwa a re: “Kgauswinyana yo a tlago tla o tla tla, a ka se diege. Moloki wa ka o tla phela ka ge a dumela, eupša ge a ka kgeloga a ka se nkgahle.” Rena ga re ba go gomela morago ra yo lahlegela sa ruri. Re na le tumelo ye e tlago re phološa. Tumelo ke bonnete bja tše re holofelago gore di tla hlaga, ke go kgolwa tše re sa di bonego. Gobane ke ka tumelo mo batho ba kgale ba bego ba kgahla Modimo. Ke ka yona tumelo ge re kwešiša gore lefase le hlodilwe ke Modimo ka lentšu la gagwe, le gore tše di bonwago di tšweleditšwe ka tše di sa bonwego. Ke tumelo ye e dirišitšego Abele sehlabelo sa go phala sa Kaine. Ka tumelo ya gagwe o ile a kgahla Modimo, Modimo a bontšha gore ke moloki ka go amogela dihlabelo tša gagwe. Abele, le ge a hwile, o sa bolela ka yona tumelo yeo ya gagwe. Enoko, ka ge a be a na le tumelo, o ile a rotošetšwa go Modimo a se a hwa. Go ile gwa se be le yo a mo hwetšago, ka gobane Modimo o be a mo tšere. Mangwalo a Makgethwa a re le pele a tšewa o be a kgahlile Modimo. Gape ge motho a se na tumelo a ka se kgahle Modimo, gobane yo a tlago go Modimo o swanetše go ba le tumelo ya go re Modimo o gona, le go re o putsa ba ba mo nyakago. Ke ka tumelo mo Noa a ilego a phetha taelo ya Modimo ka boikokobetšo ge Modimo a mo sebotša mabapi le dilo tše a bego a sešo a di bona. A aga leselawatle la go phološa ba lapa la gagwe. Ka tumelo yeo ya gagwe lefase le ile la tšwiwa, eupša Noa yena a kgahla Modimo ka baka la ge a dumela go yena. Ke tumelo ye e dirilego gore Abrahama a se gane mola Modimo a mo laya gore a ye nageng ye a bego a mo tshephišitše yona. A tloga nageng ya gabo a sa tsebe mo a yago gona. Ke tumelo ye e dirilego gore a phele e le mofaladi nageng ye Modimo a bego a mo tshephišitše yona. A dula ka mešašeng bjalo ka Isaka le Jakobo, bao le bona Modimo a ilego a ba holofetša se a bego a se holofeditše Abrahama. Gobane Abrahama o be a hlolosetše motse wa metheo ya sekgonkgothela, motse wo o akantšwego ke Modimo wa ba wa agwa ke yena. Ke tumelo ye e ilego ya kgontšha Abrahama go tswala ngwana, le ge a be a šetše a tšofetše mme le yena Sara e le moopa, ka gobane o be a dumela gore Modimo o tla phetha se a mo holofeditšego sona. Le ge Abrahama e be e le setšha a hwile, go monna o tee yoo go tšwile ditlogolo tše dintšintši bjalo ka dinaledi tša leratadima, bjalo ka dithorwana tše di sa balwego tša lešabašaba lebopong la lewatle. Batho bao ka moka ba hwile ba na le tumelo, ba sešo ba amogela tše Modimo a bego a ba holofeditše tšona, eupša ba di bonetše bokgole mme ba di thabela, ba ipega gore ke bona bašele le bafaladi mo lefaseng. Ba ba bolelago bjalo ba bontšha gabotse gore ba nyaka ya gabobona naga. Ge ba ka be ba be ba gopola naga ye ba bego ba tlogile go yona, ba ka be ba bile le sebaka sa go boela go yona. Kganthe se ba bego ba se hlolosetše ke naga ya gabobona ye kaone, e lego ya legodimong. Ka gona Modimo ga a lewe ke dihlong go bitšwa Modimo wa bona, gobane o ba agetše motse. Se se nyakilego go diriša Abrahama sehlabelo ka Isaka, morwagwe, mola Modimo a mo leka, ke yona tumelo. Abrahama yo a bego a holofeditšwe ke Modimo mola a re: “Ke ka Isaka mo o tlago ba le ditlogolo tše ke go holofeditšego tšona,” o ile a ikemišetša go dira sehlabelo ka yena motswalwanoši yoo wa gagwe. *** Abrahama ka pelong o ile a re: “Gape Modimo a ka kgona go tsoša motho bahung” – ebile re ka re ke setšha Abrahama a tsošeditšwe Isaka bahung. Ke tumelo ye e ilego ya dira gore Isaka a šegofatše Jakobo le Esau gore tša ka moso di tle di ba sepelele gabotse. Ke tumelo ye e ilego ya dira gore Jakobo a šegofatše barwa ba Josefa ka babedi mola a felela. A rapela Modimo a ithekgile ka lehlotlo la gagwe. Ke tumelo ye e ilego ya dira gore Josefa, mola a ehwa, a bolele ka go huduga ga Baisraele Egepeta, a laela le gore go dirwe eng ka setopo sa gagwe. Ke tumelo ye e ilego ya dira gore batswadi ba Moshe ba mo khutiše dikgwedi tše tharo ge a seno tswalwa. Ba be ba bona gore ke yo mobotse, ba sa boife taelo ya kgoši. Ke tumelo ye e ilego ya dira gore Moshe ge a godile a gane go bitšwa morwa wa morwedi wa kgoši. O ile a ikgethela go tlaišwa le setšhaba sa Modimo go na le gore a ipshine ga lebakanyana ka sebe. A bona go tlaišetšwa Mesia go phala mahumo ohle a Egepeta kudu, ka ge a be a lebeletše moputso wa ka moso. Ke tumelo ye e ilego ya dira gore Moshe a tloge Egepeta a sa boife bogale bja kgoši. A falela go phetha taelo ya Modimo mo nkego o bona Modimo yo a sa bonagalego. Ke tumelo ye e ilego ya mo dira gore a hlome Paseka mme a laela gore madi a šašetšwe mabating, gore Morongwammolai a se tlo bolaya bašemane ba maitšibolo ba Baisraele. Ke tumelo ye e ilego ya kgontšha Baisraele go tshela Lewatlekhubedu mo nkego ba tshela mo go omilego; Baegepeta bona ge ba leka go tshela ba betwa ke meetse. Ke tumelo ye e ilego ya dira gore merako ya Jeriko e kgerege ge Baisraele ba seno e dikologa matšatši a a šupago. Ke tumelo ye e ilego ya dira gore Rahaba, mosadi yola wa segwebakathobalo, a se bolawe le batho bale ba go se theeletše Modimo, gobane o ile a amogela dihlodi tša Baisraele ka ga gagwe. Go hlwa go iša pele ka tše dingwe go thušang? Gape ge nka re ke le botša ka tša Gideone, Barake, Simsone, Jefta, Dafida, Samuele, le baprofeta, nako e ka ba ya mphelela. Ka baka la tumelo ya bona ba be ba elwa le magoši ba a fenya. Ba be ba dira tše di lokilego, gomme Modimo a ba putsa ka mo a holofeditšego ka gona. Ba tlema ditau melomo, ba tima mello ye e gaketšego, ba phonyokga go bolawa ka tšhoša. Ba be ba fokola, fela ba tia maatla; e be e le bagale ntweng gomme ba fenya madira a bašele. Basadi, ka baka la tumelo ya bona, ba be ba tsošetšwa batho ba bobona ba ba hwilego. Ba bangwe ba bolawa ka sehlogo, ba gana go lokollwa, e le gore ba tle ba tsošetšwe go phela bophelo bjo bokaone. Ba bangwe ba be ba tlaišwa ka go kwerwa le go bethwa ka dikgati, mola ba bangwe ba kgokwa ba išwa kgolegong. Ba bolawa ka maswika, ba ripša ka bogare, ba bolawa ka tšhoša. Ba sepela ba apere mekgopha ya dinku le ya dipudi – ba diila, ba tlaišwa mme ba swarwa gampe. Lefase le be le se la ba swanela. Ba be ba ebela le mašoka le dithaba, ba phela ka maweng le ka meleteng. Bona bao ka moka le ge ba be ba kgahla Modimo ka tumelo ya bona, tše Modimo a bego a ba holofeditše tšona ga se ba di hwetša, ka gobane yena o be a ikemišeditše go re direla se sekaone. Se a bego a ikemišeditše sona ke gore ba be se yena a nyakago gore ba be sona, ba na le rena. Ge e le rena, re na le lešaba le legolo la dihlatse tša tumelo le le re dikaneditšego. Ka gona, a re roleng tšohle tše di re imelago, le sebe, e lego selo se se re tanyago gabonolo, gore re tle re kgone go kgotlelela go kata mokato wo re swanetšego go o kata wo. A re duleng re lebeletše Jesu, yo tumelo ya rena go Modimo e re tlelago ka yena, yo a bilego a tiišetša tumelo yeo. Sefapano ga se sa ka sa mo palediša go phetha maikemišetšo a gagwe. Ebile, ka baka la lethabo le a bego a le lebeletše, o ile a se lewe ke dihlong tša go hwela sefapanong, gomme bjale o dutše madulong a bogoši kgauswi le Modimo Kgoši. Le fele le mo gopola, yena yo a ilego a kgotlelela mola a lwantšhwa ke badiradibe, gore le se felelwe ke tshepho goba la nolega moko. Gobane ge le katana le sebe ga se la ka la katana wa go ba kotsing ya go bolawa. Le lebetše širešire mantšu ale a Modimo a go le kgothatša bjalo ka bana ba gagwe a go re: “Ngwanaka, o ele Modimo hloko ge a go kgala, le gona o se nolege moko ge a go sola. Gobane Modimo o kgala yo a mo ratago, ebile o otla yo mongwe le yo mongwe yo a rego ke morwa wa gagwe.” Tše le hlokofatšwago ka tšona le di kgotlelele e le tša go le kgala; ditlhokofatšo tša lena di bontšha gore Modimo o le bona le le barwa ba gagwe. Kgane o gona ngwana yo a sa kego a kgalwa ke tatagwe? Ge eba ga le kgalwe bjalo ka bana ka moka, gona ga le bana ba gagwe tiitii, le bana ba serethe. Ge botatagorena ba mo lefaseng ba re kgala mme re ba hlompha, Tate, Mothopo wa bophelo ka moka, yena re ka nama ra se mo hlomphe le go feta mme ra phela? Botatagorena ba mo lefaseng ba ile ba re kgala sebakanyana go ya ka mo ba bego ba bona go lebane, eupša Modimo yena o re kgala gore re holege, gore re hwetše kabelo mo bokgethweng bja gagwe. Ka mehla ge motho a kgalwa go bonala nke ga a kwe bose, o kwa bohloko nakwana yeo. Fela e re ge a šetše a rutilwe ka go kgalwa moo, a phele ka go iketla e le moloki. Bjale ge, tiišang matsogo a lena a a rephilego le dikhuru tše di rekeselago. Le fele le swere tsela ya nnete, gore yo a fokolago tumelong a se wele ruri, a upše a tielele. Le phegeleleng go phedišana le bohle ka khutšo, le lekeng le go phela bophelo bjo bokgethwa, ka gobane ga go yo a tlago bona Morena a sa phele ka mokgwa woo. Le hlokomele gore go se be le yo a lobago kgaugelo ya Modimo, yo e bago semela sa borokgohlwele se se rego go mela sa tliša mathata, mme sa tšhilafatša ba bantši ka mpholo wa sona. Go se be le yo a febago goba yo a gokwago ke tša lefase, go etša Esau yo a ilego a reka sa go ja ka ditokelo tša gagwe tša ge e le mošemane wa leitšibolo. Gobane le a tseba gore ka morago, mola a nyaka tšhegofatšo ye e mo lebanego, o ile a ganwa, ka ge a be a ka se kgone go dirolla se a bego a se dirile, le ge a lekile ka meokgo. Lena ga se la tla thabeng ya Sinai ye e tukago mollo wa nnete, ya leswiswi le manyami le ledimo; moo go kwagalago mollo wa phala le lentšu la yo a bolelago. Ba ba le kwago ba ile ba kgopela gore le se sa bolela le bona, gobane ba be ba sa kgone go kgotlelela taelo ye e rego: “Ešita le phoofolo ge e ka gata thaba ye e bolawe ka maswika.” Tše ba di bonego di be di šiiša mo Moshe a ilego a ba a re: “Ke thothomela ka letšhogo!” Lena le tlile thabeng ya Sinai le motseng wa Modimo yo a phelago, e lego motseng wa Jerusalema ya legodimong, motseng wo o nago le diketekete tša barongwa. Le tlile kopanong ya lethabo ya bašemane ba maitšibolo ba Modimo, bao maina a bona a ngwadilwego legodimong. Le tlile go Modimo yo e lego yena Moahlodi wa batho ka moka, le tlile le go meoya ya batho ba ba lokilego ba ba se nago bosodi. Le tlile go Jesu yo e lego Mmoelanyi wa batho le Modimo ka kgwerano ye mpsha, le tlile le mading a go foka, a a bolelago tše kaone go feta ale a Abele. Ka fao, le hlokomele mme le se gane go mo kwa ge a bolela. Ba ba gannego go mo kwa ge a ba fa molaetša mola a le lefaseng ga se ba phonyokga. Bjale rena re ka phonyokga bjang ge re lahla yo a bolelago a le legodimong? Mehleng yeo lentšu la gagwe le ile la šikinya lefase, eupša bjale o re holofeditše a re: “Ke sa tlilo šikinya lefase la mafelelo, e sego lona fela, eupša le legodimo.” Mantšu a a go re “la mafelelo” a šupa gore dilo tše di bopilwego, tše di kago šikinywa, di tla šuthišwa, gore go šale tše di ka se šikinywego. Ka gona, re lebogeng ka ge re fiwa mmušo wo o ka se šikinywego, gomme re khunameleng Modimo ka mokgwa wo a kago kgahlega, ka tlhompho le poifo, gobane ruri Modimo wa rena ke mollo wo o fišago lorelore. Dulang le ratana ka mo Bakriste ba swanetšego go ratana ka gona. Le hlokomele go amogela baeng, le etše ba bangwe ba ba kilego ba amogela barongwa ba sa tsebe. Le gopole ba ba lego kgolegong bjalo ka ge nke le golegilwe le bona. Le gopole ba ba tlaišwago, mme le dire tše nkego le lena le tlaišwa nabo. Bohle le hlomphe lenyalo, gomme motho a se ke a otswa, gobane Modimo o tla otla digwebakathobalo le diotswa. Le se ke la ba le marato tšheleteng, le gona le kgotsofale ka se le nago le sona. Gape Modimo o rile: “Nka se tsoge ke le tlogetše, ebile nka se tsoge ke le lahlile.” Ka gona, a re boleleng re holofetše re re: “Morena ke mothuši wa ka, nka se boife selo; motho wa nama yena a ka ntirang?” Gopolang baetapele bale ba lena ba pele, bale ba bego ba le botša molaetša wa Modimo. Gopolang ka mo ba ilego ba phela ka gona go fihlela ba ehwa, gomme le be le tumelo ya go swana le ya bona. Jesu Kriste o a swana maabane le lehono le go ya go ile. Le se ke la kgelošwa ke dithutwanathutwana di šele. Ke mo gobotse go maatlafatšwa moyeng ka kgaugelo ya Modimo, e sego ka melawana ya dijo, yona e sa holego ka selo bao ba e phethago. Re na le aletare yeo baprista ba ba direlago ka Tempeleng ba se nago tokelo ya go ja sehlabelo se se dirwago mo go yona. Moprista yo Mogolo o tliša madi a diphoofolo ka Tempeleng gore setšhaba se swarelwe dibe; ge e le ditoto tša diphoofolo tšeo tšona di tšhungwa ka ntle ga mešaša. Ke ka baka leo Jesu le yena a bolailwego ka ntle ga motse, gore a tle a hlatswe setšhaba dibe ka madi a gagwe. Ka gona, a re yeng go yena ka kua ntle ga mešaša, re mo rwadiše go gobošwa ga gagwe. Gobane mo lefaseng ga re na motse wo o duletšego ruri; wo re o letetšego o se tla. Ka ge Jesu a re hwetše, bjale a re duleng re tumiša Modimo, e be sona sehlabelo sa rena sa go dirwa ka melomo ye e begago gore Jesu ke Morena. Le se ke la lebala go dira tše di lokilego le go ngwathelana le ba bangwe tše le nago le tšona, ka gobane ke tšona dihlabelo tša lena tše di kgahlago Modimo. Le theeletše baetapele ba lena, le ikokobetše go bona, gobane ke bona ba ba le hlokometšego, ka ge e le bona ba swanetšego go tlo ikarabela go tše ba le diretšego tšona. Ge le dira bjalo, ba tla dira modiro wa bona ba thabile, ba sa ngongorege, gobane ge ba ngongorega, seo se ka se le hole ka selo. Le re rapelele. Re tloga re sa itshetshengwe, ka ge ka mehla re rata go dira tše di lokilego. Ke le kgopela ke tiišitše ke re le rapeleng gore Modimo a mpušetše moo go lena kgauswinyana. Modimo o tsošitše Morena wa rena, Jesu, bahung, yena e lego Modiša yo Mogolo wa dinku, ka madi a gagwe ao kgwerano ya go ya go ile e tiišitšwego ka ona. Modimo wa khutšo a le fe tšohle tše dibotse tše le di nyakago, gore le tle le phethe thato ya gagwe; nke a re dire se se mo kgahlago ka Jesu Kriste. A Kriste a tumišwe go ya go ile! Amene. *** Banabešo, ke le kgopela gore molaetša wo wa go le kgothatša le o amogele, gobane lengwalo le ke le ngwaletšego lona le ga se gore ke le letelele. Tsebang gore ngwanaborena, Timotheose, o lokolotšwe kgolegong. Ge a ka tla ka pela ke tla tla naye ge ke etla go le bona. Le dumediše baetapele ba lena ka moka le badumedi bohle. Bana ba borena ba go tšwa Italia ba a le dumediša. Nke Modimo a le gaugele ka moka ga lena. Nna, Jakobose, mohlanka wa Modimo le wa Morena Jesu Kriste, ke a le dumediša, lena ba dikgoro tše lesome le tše pedi le phatlaletšego le lefase. Banabešo, le itsheme ba lehlogonolo kudu ge le tlelwa ke meleko ya mehutahuta, gobane le a tseba gore go lekwa tumelo ga lena go le tlišetša kgotlelelo. Tšwelang pele le kgotlelele, ke mo le tlago ba ba ba feletšego, ba ba se nago bosodi le ba ba sa hlokego selo. Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale. Fela ge le kgopela le be le tumelo, e sego pelaelo, ka gobane yo a belaelago o swana le lephoto la lewatle le le akgaakgwago gape le tšokotšwago ke phefo. Motho yo mobjalo, wa pelo tše pedi, wa go hloka mahlakantšho go tšohle tše a di dirago, a se ke a gopola gore Morena a ka mo fa selo. *** Mokriste wa mmotlana a thabe ge Modimo a mo godiša. Mokriste wa mohumi le yena a thabe ge Modimo a mo kokobetša, gobane bahumi ba tla timelela bjalo ka matšoba a naga ge a hlohlorega. Letšatši ge le seno hlaba mme le thoma go fiša, le pontšha dimela. Matšoba a tšona a a hlohlorega mme botse bja ona bja loba. Ka wona mokgwa woo le bahumi ba tla hlohlorega mahumo a bona ba le gare ba šoma tša bona. Wa lehlogonolo ke yo a kgonago go kgotlelela ge a lekwa, gobane ge a ile a fenya meleko yeo o tla putswa ka bophelo bjo Modimo a bo holofeditšego bao ba mo ratago. Motho ge a tlelwa ke meleko a se ke a re: “Ke lekwa ke Modimo.” Gobane Modimo a ka se lekwe ke bobe, le yena mong ga a leke motho. Motho yo mongwe le yo mongwe o a lekwa ge a goketšwa mme a gogwa ke tumo ya gagwe ye mpe. Tumo yeo ya gagwe e nape e duše mme e tswale sebe, gomme sebe ge se seno gola go iphetša se tswale lehu. Le se ke la forwa, banabešo ba ba rategago. Mpho ye nngwe le ye nngwe ye botse le neo ye nngwe le ye nngwe ya mmakgonthe di tšwa legodimong go Radietša yo a sa fetogego, yo seetša sa gagwe se sa fokotšegego. Ka go rata ga gagwe o re hlodile ka lentšu la therešo, gore e be nke re dithakangwaga tša dihlolwa tša gagwe tšohle. Banabešo ba ba rategago, taba ye le swanetšego go e tseba ke gore motho a hlaganele go kwa, eupša a diege go bolela, a diege le go galefa. Kgalefo ya motho ga e mo diriše tše Modimo a di ratago. Ka gona, le lahle bohlola bjohle le mašaledi ohle a bobe. Le amogeleng ka boikokobetšo molaetša wo Modimo a o gašitšego ka go lena, wo o kgonago go le phološa. Le se iphore ka go theeletša fela Ebangedi, eupša le dire ka mo e laelago ka gona. Yo e lego motheeletši fela wa Ebangedi a sa dire ka mo e laelago ka gona, o swana le motho yo a rego go ipona sefahlego ka seiponeng, a itebelele gabotse, mme ge a tloga a be a šetše a lebetše gore ke yena yo mobjang. Fela yo a lebeledišišago molao wo o sa hlaelelwego, wo o lokollago batho, yo a dulago a o ela hloko mme e se fela motheeletši wa Ebangedi wa go e lebala, eupša a dira ka mo e laelago ka gona, o tla šegofatšwa ke Modimo go tše a di dirago. Ge motho a re ke yena morapedi eupša a sa itshware gabotse lelemeng la gagwe, gona o a iphora, bodumedi bja gagwe ga bo thuše selo. Bodumedi bjo Modimo Tate a bonago bo hlwekile mme e le bja nnete šebo: ke go hlokomela ditšhiwana le bahlologadi matshwenyegong a bona, le go itota gore motho a se tšhilafatšwe ke tša lefase. Banabešo, ka ge le le badumedi ba Morena wa rena, Jesu Kriste, Morena wa letago, le se ke la kgetholla batho. Ge mo phuthegong ya lena go ka tsena monna wa go apara palamonwana ya gauta le diaparo tša mabaibai, gwa tsena le yo mongwe wa modiidi wa go apara diaparo tša ditšhila, mme ya re ge le bona yoo wa go tšhepa la re go yena: “Dula mo setulong se sebotse se,” gomme go yola wa modiidi la re: “Wena ema mola, goba o dule mo fase maotong a ka,” na e tla be e se gore le a kgethollana, le ahlola ka mokgwa wo mobe? Banabešo ba ba rategago, theeletšang: Na ga ke re Modimo o kgethile badiitšana ba lefase gore ba humišwe ka tša tumelo, e be bajalefa mmušong wo a o holofeditšego bao ba mo ratago? Fela lena le nyatša modiitšana. Kgane ga se bahumi ba ba le gatelelago, ba ba le gogelago ditshekong? Ga ke re ke bona ba ba nyefolago leina leo la go hlomphega leo ka lona Modimo a le dirilego ba gagwe? Le tla be le dira se se lokilego ge le ka phetha molao wa Modimo Kgoši, wo o ngwadilwego ka Mangwalong a Makgethwa wa go re: “O rate bangwekawena bjalo ka ge o ithata.” Eupša ge le kgetholla batho le dira sebe, le molao wa Moshe o a le tšwa gore le batshedi ba wona. Ge motho a ka re a phela ka go phetha Melao ye Lesome, a tshela wo mongwe wa yona, go no swana le ge a e tshetše ka moka. Gobane yo a rilego: “O se ke wa otswa,” ke yena yo a rilego: “O se ke wa bolaya.” Le ge o sa otswe, fela o bolaya, o tshela melao ya Moshe. Dipolelo le ditiro tša lena e be tša batho ba ba tlago ahlolwa ka molao wo o re lokollago. Gobane Modimo a ka se be le kgaugelo ge a ahlola yo a sego a ka a ba le kgaugelo; eupša yo a bilego le kgaugelo ga a tšhabe kahlolo ya Modimo. Banabešo, go thušang ge motho a re o na le tumelo eupša a sa bontšhe seo ka mediro? Na tumelo ya gagwe e ka mo phološa? Ge modumedikawena wa monna goba wa mosadi a hloka diaparo goba dijo, go thušang gore o re go yena: “Sepela gabotse! O ruthele, o be o je o khore,” etšwe o sa mo fe tše a di hlokago? Agaa, tumelo le yona e ka mokgwa woo – ge e se na mediro ke setšha e hwile. Eupša yo mongwe motho a ka no re: “Wena o na le tumelo, nna ke na le mediro.” Gomme yoo ke tla mo fetola ka go re: “Mpontšhe gore motho a ka ba le tumelo bjang a se na mediro, mme nna ka mediro ya ka ke tla go bontšha tumelo ya ka.” A ke re o dumela gore Modimo ke o tee fela? Agaa, seo ke se bademone le bona ba se dumelago, mme ba a thothomela. Setlaela towe, na o nyaka go bontšhwa gore tumelo ye e se nago mediro ga e na mohola? Kgane Abrahama, rakgolokhukhu wa rena, ga se a lokafatšwa ka mediro mola a neela Isaka, morwagwe, mo aletareng? Ke mo go bonagalago gore medirong ya gagwe go be go šoma tumelo, mme mediro ya gagwe e dira gore tumelo ya gagwe e be ye e feletšego. Gwa nama gwa phethagala Mangwalo a Makgethwa mo a rego: “Abrahama a dumela go Modimo, gomme ka baka la tumelo ya gagwe Modimo a mmona e le moloki.” Ke ka baka leo Abrahama a ilego a bitšwa mogwera wa Modimo. Bjale a ke re le a bona gore motho o lokafatšwa ka mediro ya gagwe, e sego fela ka tumelo? Le go Rahaba, mosadi yola wa segwebakathobalo, go bile bjalo. Ga ke re o ile a lokafatšwa ka mediro ya gagwe ka go amogela dihlodi tšela tša Baisraele ka ga gagwe, a ba a ba ngwegiša ka tsela ye nngwe? Ka gona, bjalo ka ge mmele o hwile ge o se na moya, le tumelo ge e se na mediro e hwile. Banabešo, le se ke la ba baruti ka bontši, ka ge le tseba gore rena baruti re tla sekišwa gasehlogo go feta ba bangwe. Bohle re atiša go dira diphošo. Ge eba go na le yo a sa kego a foša ge a bolela, gona yoo ke moloki ka botlalo yo a kgonago go itshwara le dithong ka moka. Pere ge re e tsenya mogala ka molomong gore re tle re e laole, re direla gore re e sepetše ka mo re ratago ka gona. Le ka no bona le ka leselawatle: le ge e le le legolo ka mokgwa wo mme le kgorometšwa ke diphefo tše maatla, le laolwa ka lephegwana le lenyenyane, le išwe mo go ratago mootledi wa lona. Leleme le lona le bjalo. Ke sethonyana se senyenyane, fela le ikgantšha ka dilo tše dikgolo. Bonang ka mo tlhase ya mollo e kgonago go tšhuma sethokgwa se segolo ka gona! Gomme leleme le swana le mollo. Ke legohle la bokgopo le le dutšego mo mmeleng wa rena mme le phatlalatša bobe mothong ka moka. Le tšhuma bophelo bja rena ka mollo wa hele. Motho o kgona go tlwaetša dibopiwa ka moka, ebile nka no re o di tlwaeditše – diphoofolo tša naga, le dinonyana, le digagabi, le diphedi tša ka lewatleng. Ge e le leleme lona ga go motho yo a kgonago go le tlwaetša. Ke lešaedi le le padilego, le tletše mpholo wa go bolaya. Ka lona re reta Morena e lego yena Tatagorena, ebile ka lona re roga bangwekarena ba ba bopilwego go swantšhwa ka Modimo. Molomong o tee go tšwa direto, go be go tšwe maroga. Banabešo, ga se tshwanelo gore go be bjalo. Kgane sediba se ka tšwa meetse a mabose le a a babago mothopong o tee? Banabešo, na mogo o ka enywa dihlware goba morara wa enywa mago? Le sediba sa meetse a letswai se ka se tšwe meetse a mabose. Na yo bohlale wa tlhaologanyo mo gare ga lena o gona? A a ipontšhe ka boitshwaro bjo bobotse le ka mediro ye a e dirago ka boleta le bohlale. Eupša ge eba ka dipelong tša lena le hlohlonwa ke mona ebile le dijato, gona le se ke la ikgantšha la re le ba bohlale, ka gobane le tla be le sa bolele therešo. Bohlale bja mohuta woo ga bo tšwe go Modimo; ke bja lefase, ke bja nama, ebile ke bja Sathane. Moo go nago le mona le bojato ke moo go nago le meferefere le bobe bja mehutahuta. Ge e le bohlale bjo bo tšwago go Modimo, sa pele bo hlwekile, sa bobedi bo nyaka khutšo, bo lokile, le gona ga bo na manganga; bo tletše lešoko le mediro ye mebotse; ga bo ne tshele le boikaketši. Badirakhutšo, ka go leka go boelanya batho, ba dira se se nyakwago ke Modimo. Dintwa le diphapano mo go lena di hlolwa ke eng? Na ga di hlolwe ke ditumo tše di dulago di elwa ka dipelong tša lena? Le duma dilo, fela ga le di hwetše, gomme le ikemišetše go bolaya; le duma dilo, eupša ga le kgone go di hwetša, ka gona le a fapana la lwa. Ga le hwetše se le se nyakago, ka gobane ga le se kgopele go Modimo. Ge le kgopela selo ga le se fiwe, ka gobane ga le kgopele gabotse; le kgopela go kgotsofatša ditumo tša lena. Bakgelogi tenang! Kgane ga le tsebe gore go rata tša lefase ke go itira lenaba la Modimo? Gape yo a nyakago go rata tša lefase o itira lenaba la Modimo. Kgane le gopola gore Mangwalo a Makgethwa ga a rereše ge a re: “Modimo o rata moya wo a re tsentšego wona kudukudu”? Eupša kgaugelo ya gagwe go rena e feta lerato leo. Bjalo ka ge Mangwalo a Makgethwa a bolela: “Modimo o gana baikgogomoši, eupša baikokobetši bona o ba direla tše dibotse.” Bjale ge, ikokobetšeng go Modimo. Elwang le Diabolose, gomme yena o tla le tšhaba. Batamelang Modimo, gomme le yena o tla le batamela. Hee, lena badiradibe, lesang go dira dibe! Itlhwekišeng dipelo, mapelopedi tenang! Hlomogang dipelo le hloname le lle; lesego la lena a le fetoge sello, lethabo le fetoge manyami. Ikokobetšeng go Morena, gomme yena o tla le godiša. Banabešo, le se ke la bolelana gampe. Yo a bolelago modumedikayena gampe goba a mo solago o bolela molao wa Moshe gampe ebile o a o sola. Gomme ge o o sola gona ga o sa o phetha, o mosodi wa wona. Etse mmei wa molao le mosodi wa batho ke o tee; ke yena yo a kgonago go phološa le go senya. Bjale wena o mang, o ka solago mongwekawena? Theeletšang mo, lena le rego: “Lehono goba gosasa re tla ya motseng wa boketekete mo re tlago dika re le gona ngwaga ka moka re gweba re bolaya tšhelete.” Etse tša la gosasa le bophelo bja lona ga le di tsebe. Le dio swana le kgodi ye e pipago lebakanyana, ka morago e apoge. Ebile le ka upše le re: “Ge Morena a ratile re tla tsoga re dira se goba sela.” Eupša lena le ikgantšha ka matepe; kgantšho yohle ya mohuta woo ke ye mpe. Bjale ge, motho ge a tseba se se lokilego se a kago se dira eupša a se se dire, o dira sebe. Theeletšang mo, lena bahumi: Llang le golole ka baka la mahlomola ao a tlilogo le wela. Mahumo a lena a bodile, diaparo tša lena di llwe ke tšhwele. Gauta ya lena le silibera di llwe ke makgalwa, gomme makgalwa ao a tšona e tla ba bohlatse bja go le tšwa, a tla le ja dinama bjalo ka mollo. Le kgobetše mahumo mehleng yeno ya bofelo. Le gana go lefa badiredi ba ba le bunelago mašemo. Ekwang ge ba lla, gomme dillo tša bona di fihlile tsebeng tša Morena Ramaatlaohle. Bophelo bja lena mo lefaseng e bile bja mabose le maipshino fela. Le inontšheditše letšatši leo ka lona le tlago hlabja bjalo ka pudi. Le tšwile ba ba se nago molato la ba bolaya, bona ba sa itwele. Ka gona, banabešo, le se fele pelo Morena a be a tle. Bonang ka mo molemi a sa felego pelo ka gona ge a letetše gore tšhemo ya gagwe e ntšhe dibjalo tše a di nyakago. O letela pula tša lehlabula le tša selemo a sa fele pelo. Le lena le se fele pelo. Le tie maatla gobane Letšatši la go tla ga Morena le kgauswi. Banabešo, le se ke la tsotana, gore Modimo a se tlo le sekiša. Gape Moahlodi o kgauswi le go tla. Banabešo, baprofeta ba ba bego ba romilwe ke Modimo go tlo bega molaetša wa gagwe a e be mohlala wo le o latelago wa go kgotlelela le go se fele pelo ga lena. Rena re bona ba ba ilego ba kgotlelela e le ba lehlogonolo. Tša kgotlelelo ya Jobo le di kwele, gomme le tseba le ka mo Morena a ilego a mo hlakodiša melekong ya gagwe ka gona. Gobane Morena o tletše kgaugelo le kwelobohloko. Go feta tšeo ka moka, banabešo, le se ke la ikana, le ge e ka ba ka legodimo, goba ka lefase, goba ka se sengwe. Sa lena e be “ee”, ge eba le dumela, goba “aowa”, ge eba le gana, gomme ke mo le ka se kego la sekišwa ke Modimo. Ge yo mongwe wa lena a le mathateng, a rapele. Ge a thabile, a opele ditumišo. Ge yo mongwe wa lena a lwala, a bitše bagolo ba phuthego ba tle ba mo rapelele, ba mo tlotše ka makhura a mohlware, ka ge ba laetšwe ke Morena. Thapelo yeo ya go rapelwa ka tumelo e tla fodiša molwetši; Morena o tla mo tsoša bolwetšing, gomme ge a dirile dibe o tla mo swarela tšona. Ka gona, le ipolele dibe seng sa lena gomme le rapelelaneng, gore le tle le fodišwe. Thapelo ya moloki e na le maatla a magolo. Eliya e be e le motho wa nama bjalo ka rena. O kile a rapela a kgothetše gore pula e se ne, gomme ka nnete pula ya se ne nageng mengwaga ye meraro le seripa. A boelela a rapela, gomme leratadima la tšholla pula, lefase la mediša dibjalo tša lona. Banabešo, ge yo mongwe wa lena a ka timelelwa ke tsela ya therešo, gomme yo mongwe a mmušetša go yona, le tsebe gore yo a sokollago modiradibe tseleng ya gagwe ye e mo timeditšego, o phološa modiradibe yoo lehung, gomme o dira gore a swarelwe dibe tše dintši. Nna, Petrose, moapostola wa Jesu Kriste, ke ngwalela lena ba le kgethilwego ke Modimo, le phelago bjalo ka bašele ba ba gašaganego le selete sa Pontose, le sa Galatia, le sa Kapadokia, le sa Asia, le sa Bithinia. Le kgethilwe go ya ka mo Modimo Tate a beakantšego ka gona, gomme Moya wa gagwe wa le dira ba bakgethwa gore le tle le hlomphe Jesu Kriste gomme le fokwe ka madi a gagwe. Nke le okeletšwe kgaugelo le khutšo. *** A go tumišwe Modimo, Tatago Morena wa rena, Jesu Kriste! Ka baka la lešoko la gagwe le legolo o re tswetše ka bofsa ka go tsoša Jesu Kriste bahung. Se se re dira gore re dule re letetše bohwa bjo le lena Modimo a le beetšego bjona legodimong. Ke bjo bo sa bolego, bjo bo se nago bosodi, le gona bo sa hwelelego. Ke bja lena bao ka maatla a Modimo le lotwago ka tumelo, gore le tle le fihlele phološo ye e tlilogo utollwa mafelelong a nako. Thabelang seo, le ge e le gore gabjale le tlemegile go nyama ka baka la meleko ya mehutahuta ye e le tlelago. Meleko yeo e le tlela gore Modimo a bone ge eba tumelo ya lena ke ya nnete. Ešita le gauta, yona e kgonago go senyega, e lekwa ka mollo; bjale ge, le tumelo ya lena, yona e lego bohlokwa kudu go feta gauta, e swanetše go lekwa. Ge e le ya nnete le tla retwa, la tumišwa, la ba la hlompšha mohla Jesu Kriste a etla. Gape le a mo rata, le ge le se la ka la mmona, ebile le dumela go yena, le ge bjale le sa mmone. Ka gona le thaba ka lethabo le legologolo leo motho a sa kgonego go le hlaloša, ge le fihlela nepo ya tumelo ya lena, e lego go phološwa ga lena. Phološo yeo baprofeta ba e nyakile kudu ba e latiša, ba porofeta mabapi le ka mo Modimo e bego e tlilo ba wa kgaugelo go lena. Ba lekile go nyakišiša tša nako ya gona le gore e tla tla bjang. Ke yona nako ye Moya wa Kriste ka go bona o bego o e šupa ge o porofeta tša mahloko ao Kriste a bego a tlilo a kwešwa, le tša letago le le bego le tlilo latela. Modimo o utolletše baprofeta bao gore modiro wa bona e be e se go ikhola, e be e le go hola lena, mola ba bolela ka ditaba tše bjale le di kwelego ka ba go le begela Taba ye Botse ka maatla a Moya wo Mokgethwa, yo a bego a romilwe a etšwa legodimong. Tše ke tšona ditaba tše le barongwa ba dumago go di tseba. Ka gona, phafogang le be le boitshwaro, le dule le letetše ka mafolofolo mpho ya phološo ye le tlago e fiwa mohla Jesu Kriste a etla. Ka ge le le ba ba theeletšago, le se dumele go lakwa ke ditumo tšela tša lena tša mola le sešo la tseba selo ka Modimo. Sa lena a e be go ba bakgethwa go tšohle tše le di dirago, bjalo ka ge Modimo yo a le biditšego le yena e le yo mokgethwa. Gape Mangwalo a Makgethwa a re: “Ebang ba bakgethwa, gobane nna ke yo mokgethwa.” Etse ge le rapela Modimo, yena yo a ahlolago batho ka go se kgetholle, a yago ka tše motho a di dirilego, le re Tatagorena. Ka gona, phelang ka go mmoifa nakong yohle ya ge le le bafaladi mo lefaseng. Gobane le a tseba gore le rekolotšwe bjang boitshwarong bjola bja lena bja go se be le mohola bjo le bo tšerego go borakgolokhukhu ba lena. Ga se la rekollwa ka se se felago, go etša silibera goba gauta, eupša le rekolotšwe ka madi a bohlokwa a Kriste, yo a etšago kwana ye e se nago bosodi goba lebadi. Ke yena yo a kgethilwego ke Modimo pele lefase le hlolwa, gomme a tla a le phološa mehleng yeno ya mafelelo. Ke ka yena mo le dumelago go Modimo yo a mo tsošitšego bahung a mo godiša; gomme bjale tumelo ya lena le kholofelo ya lena di tsepeletše go Modimo. Bjale ka gobane le itlhwekišitše ka go latela therešo gore le rate badumedikalena ka lerato la mmakgonthe, le rataneng e le ruri ka dipelo tša lena ka moka. Gobane le tswetšwe ka bofsa ke lentšu le le phelago la go ya go ile la Modimo la ba bana ba motswadi yo a sa hwego, e sego yo a hwago. Gobane Mangwalo a Makgethwa a re: “Batho ka moka ba swana le bjang, letago lohle la bona eka matšoba a naga. Bjang bo a omelela, le matšoba a a hlohlorega, eupša lentšu la Morena le duletše ruri.” Lentšu le ke yona Taba ye Botse ye le e begetšwego. Bjale ge, tlogelang bobe bjohle le maaka ohle le boikaketši bjohle le mona wohle le lesebo lohle. Le etše masea a a sa tšogo belegwa, le nyorelwe maswi a semoya a a sego a talošwa, gore ge le a nwa le gole mme le phološwe. Gobane le itemogetše gore Morena ke yo botho. Etlang go Morena, yena leswika le le phelago le le nyaditšwego ke batho, eupša la kgethwa ke Modimo a re ke le bohlokwa. Dumelang go agiwa bjalo ka maswika a a phelago, le be tempele ya semoya, le be baprista ba bakgethwa, ba go dira dihlabelo tša semoya tše Jesu Kriste a dirago gore di amogelwe ke Modimo. Gobane Mangwalo a Makgethwa a re: “Ke kgethile leswika le bohlokwa le ke le beago e le la sekhutlo mo Sione, gomme yo a dumelago go lona a ka se swabe.” Go lena le dumelago, leswika le ke le bohlokwa, eupša go bao ba sa dumelego, ke “leswika le baagi ba le nyaditšego le e bilego lona la sekhutlo.” Mo gongwe Mangwalo a Makgethwa a re: “Le ke lona leswika la go ba kgopa, ke lona letlapa la go ba thetša.” Ba kgopilwe ka ge ba sa dumele lentšu. Seo ke se se ba lebanego. Ke lena setšhaba se se kgethilwego ke Modimo, ke lena baprista ba Kgoši, setšhaba se sekgethwa, setšhaba se Modimo a ikgethetšego sona go bega ditiro tše maatla tša yena Modimo yo a le biditšego leswiswing a le tliša seetšeng sa gagwe se se tlabago. Pele le be le se setšhaba sa Modimo, eupša bjale le sona; pele Modimo o be a sa le šokelwe, eupša bjale o le šoketšwe. Barategi, ke le kgopela le le bafeti le bafaladi mo lefaseng ke re: Le se ke la ipha ditumo tša nama tše di dulago di elwa le moya. Maitshwaro a lena ge le na le baditšhaba e be a mabotse, gore le ge ba le bolela gampe ba re le disenyi, ba bone tše dibotse tše le di dirago mme ba rete Modimo ka Letšatši la gagwe la go tla. Ka baka la Morena le ikokobetše go batho ka moka ba ba le bušago, le ge e le kgošikgolo, yo e lego yena mmušabohle, le ge e le babušiši ba ba beilwego ke yena gore ba otle basenyi, ba rete ba ba dirago tše dibotse. Gobane se Modimo a se nyakago ke gore ka go dira tše dibotse le fediše dipolelo tša batho ba mašilo ba ba sa tsebego selo ka ditaba tša Sekriste. Le phele le lokologile, fela bolokologi bja lena le se bo diriše go bipa bobe, eupša le phele bjalo ka makgoba a Modimo. Le hlomphe batho bohle, le rate badumedikalena, le tšhabe Modimo, le hlomphe kgošikgolo. Lena makgoba, le dumele go bušwa ke beng ba lena gomme le ba hlomphe ka mo go lebanego, e sego fela ba go loka le ba boleta, eupša le bona bao ba lego sekgapho. Ke fela ka thušo ya Modimo mo motho a kgonago go kgotlelela bohloko bjo a tlaišwago ka bjona, a se na molato, e le ka gobane a rata go botegela Modimo. Kgane ge le kgotlelela go otlelwa bosenyi bja lena le a holega? Eupša ge le kgotlelela bohloko bjo le bo kwešwago le ge le dirile tše di lokilego, ke go re le ba lehlogonolo pele ga Modimo. Ke sona se Modimo a le bileditšego sona, gobane le Kriste o hlokofaditšwe ka baka la lena, a le tlogelela mohlala gore le o latele. “Ga se a ka a dira sebe goba a bolela maaka.” Mola a rogwa ga se a ka a ithogela; mola a hlokofatšwa ga se a ka a tšhošetša motho, eupša o ile a di gafela go Modimo, Moahlodi wa go loka. Kriste o ithwešitše dibe tša rena, a fegwa le tšona sefapanong gore re tle re tlogele sebe gomme re phelele go phetha thato ya Modimo. Le lena le fodišitšwe ka dintho tša gagwe. Le be le le bjalo ka dinku tše di timetšego, eupša bjale le boetše go Modiša le Mohlokomedi wa lena. Le lena, basadi, le ikokobetše go banna ba lena, gore ge go na le ba ba sa dumelego lentšu la Modimo ba tle ba sokollwe ke maitshwaro a lena ntle le polelo, ge ba tla be ba bona mesepelo ya lena ye e hlwekilego, le ka mo le ba hlomphago ka gona. Botšhepi bja lena a e se be bja ka ntle, bjalo ka go loga meriri le go tšhepa ka dikgabišo tša gauta le diaparo tša mabaibai. Bja lena botšhepi a e be bja ka pelong, botšhepi bjo bo sa senyegego bja moya wo boleta wo o thotšego, e lego wona wo Modimo a bonago e le wo bohlokwa. Woo ke wona mokgwa wo basadi bale ba kgale ba ba bego ba ineela go Modimo mme ba mmotile ba bego ba ikgabiša ka wona ka go ikokobetša go banna ba bona, go etša Sara ge a be a hlompha Abrahama, a mmitša mong wa gagwe. Gomme bjale lena le barwedi ba gagwe, ge eba le dira tše di lokilego, le sa boife se banna ba lena ba kago le dira sona. Le lena, banna, le phedišane le basadi ba lena ka kwešišo ya gore mosadi ke sebjana se se swanetšego go hlekesetšwa. Ka gona, le ba sware ka tlhompho, ka gore le bona ba tlilo fiwa mpho ya bophelo gotee le lena. Seo le se direle gore dithapelo tša lena di se tlo paledišwa ke selo. A ke fetše ka go re bohle le be ba pelo e tee, le kwelane bohloko, le rate badumedikalena, le be ba boleta le boikokobetšo. Le se lefetše bobe ka bobe, goba lehlapa ka lehlapa; lena sa lena e be go šegofatša, ka ge go šegofatšwa e le se Modimo a le bileditšego sona. Gobane le Mangwalo a Makgethwa a re: “Yo a ratago go ipshina ka bophelo le go bona matšatši a lethabo, a tlogele go bolela tše mpe le go thoma maaka. A furalele tše mpe a dire tše di lokilego; a ikokoropele go hlohleletša khutšo. Gobane Morena o bea baloki leihlo gomme o theeletša thapelo tša bona, eupša badiratšempe bona o a ba lwantšha.” Ke mang yo a kago le dira gampe ge eba le na le mafolofolo a go dira tše di lokilego? Fela le ge eba le ka hlokofaletšwa go dira tše di lokilego, le ba lehlogonolo. Le se boife motho, le gona le se tšhošetšwe. Fela Kriste yena le mo hlomphe ka dipelo tša lena ka ge e le Morena. Le dule le itokišeditše go iphetolela go yo a le hlohlago ka tša kholofelo ye le nago le yona, eupša seo le se dire ka boleta le tlhompho. Le gona le se lewe ke letswalo, gore bao ba le bolelago gampe ka maitshwaro a lena a mabotse a Bokriste, ba inyatše ka tše ba le gobošago ka tšona. Gobane go kaone ge le hlokofaletšwa go dira tše di lokilego, ge eba seo e le thato ya Modimo, go na le gore le hlokofaletšwe go dira tše mpe. Gobane Kriste o hlokofaditšwe gatee a hlokofaletšwa sa ruri ka baka la dibe, e le moloki wa go hlokofaletšwa bakgopo, gore a le iše go Modimo. O bolailwe e le motho, fela a tsošwa e le mophedi wa semoya, gomme ge a phela bophelo bjoo bja gagwe bja semoya a ya a begela meoya ye e golegilwego Taba ye Botse. Yona meoya yeo ke ya bale ba go se theeletše Modimo mehleng yela ya ge a be a ba letetše a sa ba felele pelo, nakong yela Noa a aga leselawatle la gagwe. Malotwana ale a go tsena ka leselawatleng, e lego batho ba seswai, ba ile ba hlakodišwa meetseng, ona e bego e le sešupo sa kolobetšo ye bjale e le phološago. Kolobetšo ga se go hlatswa tšhila ya mmele, eupša ke go kgopela Modimo gore a le fe letswalo le le lokilego. E le phološa ka tsogo ya Jesu Kriste bahung, yena a rotogetšego legodimong moo a dutšego madulong a bogoši kgauswi le Modimo, yoo a mmeilego mmuši wa barongwa le balaodi ba semoya le maatla a semoya. Ka ge Kriste a hlokofaditšwe mmeleng, le lena le itiišeng ka kgopolo ya go swana le ya Kriste, ya go re: Yo a hlokofatšwago mmeleng ga a sa laolwa ke sebe. Ka gona, matšatši a a sa mo šaletšego mo lefaseng a se sa a phela ka go laolwa ke ditumo tša batho, eupša a a phele ka go laolwa ke thato ya Modimo. Gobane bophelo bja lena bja pele le bo phetše go lekane, ge le be le dira tše di ratwago ke baditšhaba le laolwa ke bofebe, le ditumo tše mpe, le botagwa, le bohlola, le go ithabiša ka dino, le go khunamela medingwana, e lego taba ye e ganegago. Bjale baditšhaba ba a tlabega ge le se sa phonkgela nabo bohloleng bjoo bja bona, gomme ba a le nyefola. Eupša ba tla swanela go ikarabela go Modimo yo a šetšego a itokišeditše go ahlola ba ba phelago le ba ba hwilego. Ke ka baka leo le ba ba hwilego ba ilego ba yo begelwa Taba ye Botse ya Modimo, bona bale bophelong bja bona bja nama ba bego ba šetše ba sekišitšwe bjalo ka mang le mang; ba ile ba e begelwa gore bophelong bja bona bja semoya ba tle ba phele bjalo ka Modimo. Mafelelo a dilo ka moka a kgauswi. Ka gona le se tšeatšeege, le dule le phafogile, gore le kgone go rapela. Go feta tšohle, le rataneng ka lerato le borutho, gobane lerato le bipa dibe tše dintši. Le amogelaneng ka magaeng a lena le sa ngongorege. Modimo o le file dimpho tše di fapanago, gomme mongwe le mongwe wa lena e swanetše go ba mohlokomedi wa mmakgonthe wa mpho ye a e filwego, mme a e šomišetše go hola bohle. Yo a filwego mpho ya go bolela, a bolele dithuto tša Modimo; yo a filwego mpho ya go direla badumedikayena, a ba direle ka maatla ao a a filwego ke Modimo, gore dilong ka moka Modimo a tumišwe ka Jesu Kriste, yo letago le maatla e lego tša gagwe go ya go ile. Amene. Barategi, le se ke la makatšwa ke moleko wo bohloko woo le hlokofatšwago ka wona boka ge le hlagetšwe ke se le sego la se tlwaela. Le ka upše le thabele ge le hlokofatšwa le Kriste, gore le tle le hlabe mekgolokwane mohla letago la gagwe le utollwa. Le ba lehlogonolo ge le rogwa ka baka la ge le le balatedi ba Kriste; seo se šupa gore Moya wa letago, e lego wona Moya wa Modimo, o dutše mo go lena. Ge eba yo mongwe wa lena a ka hlokofatšwa, a e se be ka gobane e le mmolai goba lehodu goba sekebeka goba mpheane. Fela ge a ka hlokofatšwa ka gobane e le Mokriste, a se ke a lewa ke dihlong, eupša a tumiše Modimo ka gobane a bitšwa ka leina leo. Lebaka la gore kahlolo e thome le fihlile, gomme ba go ahlolwa pele e tla ba rena setšhaba sa Modimo. Bjale ge eba kahlolo ye e tlilo thoma ka rena, e yo feleletša bjang ka bao ba sa kgolwego Taba ye Botse ye ya go tšwa go Modimo? Gobane le Mangwalo a Makgethwa a re: “Ge ešita le moloki a phologa ka bothata, mokgopo le modiradibe bona ba tla ikela kae?” Ka gona, ba ba hlokofatšwago ka gobane e le thato ya Modimo, a ba ikgafele ka mediro ya bona ye mebotse go Mohlodi wa bona yo a botegago. Nna mong ke lego mogolo wa phuthego ke kgothatša bagolo ba phuthego moo go lena. Nna ke hlatse ya go hlokofatšwa ga Kriste, gomme ke tla hwetša kabelo letagong le le tlago utollwa. Ke le kgothatša gore le be badiša ba mohlape wo Modimo a le gafetšego wona, mme le o hlokomele ka boithaopo, go ya ka mo go nyakago Modimo, e sego ka go gapeletšwa. Le dire modiro wa lena, le sa o direle tefo, eupša le o dira ka boithaopo. Ba ba gafetšwego diatleng tša lena le se ba buše bjalo ka ge nke le dikgoši tša bona, eupša le be mohlala wo mobotse go bona e lego mohlape. Gomme mohla Modiša yo Mogolo a tšwelela, le tla fiwa kgare ya letago le le sa fifalego. Le lena bafsa, le ikokobetše go bagolo; gomme bohle le apare boikokobetšo, gore le direlaneng; gobane Mangwalo a Makgethwa a re: “Modimo o gana baikgogomoši, eupša baikokobetši ba a mo kgahla.” Ka gona le ikokobetše go Modimo yo maatla, gore a tle a le phagamiše ka nako ye e lebanego. Mathata a lena ohle le a lahlele go yena, gobane o a le šetša. Le phafoge, le ntšhe mahlo dinameng, gobane Sathane, lenaba la lena, o phaphaila bjalo ka tau ye e bopago, o nyaka yo a ka mo rwaetšago. Elwang le yena le tiile tumelong, le tseba gore ke ka mo le bana ba bolena lefaseng ka moka le bona ba tlaišwago ka gona. Fela e tla re ge le tlaišitšwe lebakanyana, Modimo yo ka mehla a lokilego, yo a le bileditšego go ba letagong la gagwe la go ya go ile la ba ba tee le Kriste, yena ka noši a le dira ba ba feletšego, a le tiiša tumelong, a le kgwahliša, a dira gore le se tekateke. Maatla a e be a gagwe go ya go ile. Amene. Ke le ngwalela lengwalo le la seripana ke thušwa ke Silase, yo ke mmonago e le ngwanešo yo a botegago wa Mokriste. Ke ngwalela go le kgothatša le go le holofetša gore go tšohle tše di le hlagelago le gopole gore ruri Modimo ke wa kgaugelo go lena. Itshwareleleng ka kgaugelo ye ya gagwe. Phuthego ya Babilone ya ba ba kgethilwego bjalo ka lena e a le dumediša; le Markose, morwa wa ka, o re le dumele. Le dumedišane ka go atlana ka lerato la Sekriste. Nke Modimo a fe lena bohle le lego ba Kriste khutšo. Nna, Simone Petrose, mohlanka le moapostola wa Jesu Kriste, ke dumediša bao, ka go loka ga Modimo wa rena, yena Mophološi Jesu Kriste, ba filwego tumelo ye bohlokwa bjalo ka ya rena, ke re: Nke le okeletšwe kgaugelo le khutšo ka go tseba Modimo le Jesu, Morena wa rena. Maatla a gagwe a bomodimo a re file tšohle tše re di hlokago gore re phele, le gore re mo direle ka go tseba yo a re biditšego ka go re bontšha letago la gagwe le boloki. Ke ka tšona dilo tše ge a re file dilo tše bohlokwa le gona tše dikgolo kudu tše a re holofeditšego tšona, gore ka tšona le kgone go phonyokga bokgopo bjo ditumo tše mpe di bo tlišitšego lefaseng, mme le tle le hwetše kabelo ya se Modimo a lego sona. Ka baka la yona taba ye le ikokoropele go oketša tumelo ya lena ka boloki; boloki le bo oketše ka tsebo; tsebo le e oketše ka boitshwaro; boitshwaro le bo oketše ka kgotlelelo; kgotlelelo le e oketše ka borapedi; borapedi le bo oketše ka go ratana ga badumedi; go ratana ga badumedi le go oketše ka leratorato. Ge le na le tšeo ebile le na le tšona ka bontši, di tla le fa mafolofolo a go tseba Morena wa rena, Jesu Kriste, le go le kgontšha go phela go ya ka tsebo yeo. Eupša yo a se nago le tšona o swana le motho wa go se bone gabotse, wa go bonela kgauswi. Modumedi yo mobjalo o lebetše gore Modimo o mo hlwekišitše dibe tšela tša gagwe tša pele. Ka gona, banabešo, le itiišeng go dira gore go bitšwa le go kgethwa ke Modimo ga lena go thupele. Ge le ka dira bjalo, le ka se tsoge le kgelogile. Ka mokgwa woo le tla bulelwa tsela ya go tsena mmušong wa go ya go ile wa Morena le Mophološi wa rena, Jesu Kriste. Ka fao, ka mehla ke tla fela ke le gopotša ditaba tše le ge le šetše le di tseba le bile le tiišeditšwe nneteng yeo le nago le yona. Ke bona go lebane gore ge ke sa phela ke fele ke le gopotša ditaba tše. Gape ke a tseba gore kgauswinyana ke tla be ke ikhwetše, bjalo ka ge Morena wa rena, Jesu Kriste, a ntemošitše. Ka gona, ke tla ikokoropela gore ge ke šetše ke itshepeletše, le šale le na le sa go le gopotša ditaba tše ka mehla. Rena mola re le anegela tša maatla a Morena wa rena, Jesu Kriste, le tša go tla ga gagwe, re be re sa le theele dinonwane tša mahlajana a batho. Re be re le anegela tša borena bja gagwe bjo re bo bonego ka mahlo a rena. O ile a hlompšha a ba a tumišwa ke Modimo Tate mola lentšu la go tšwa letagong le legologolo le bolela le yena le re: “Yo ke yena Morwa wa ka yo ke mo ratago; o nkgahla kudu.” Rena ka borena lentšu le re le kwele le bolela le etšwa legodimong mola re na le yena thabeng ye kgethwa. Ka gona, molaetša wa baprofeta wo re nago le wona o tshepagala kudu. Le ka dira gabotse ge le ka o ela hloko, gobane o swana le lebone le le bonegago felo ga leswiswi go fihlela go esa, mme naledi ya Mphatlalatšane e le bonegela menagano. Tabakgolo le tsebe gore ga go motho yo a kago hlatholla ka boyena profeto ya ka Mangwalong a Makgethwa. Gobane ga go motho yo a kilego a porofeta ka go ithatela ga gagwe, eupša batho ba be ba bega molaetša wa Modimo ka go hlohleletšwa ke Moya wo Mokgethwa. Le setšhabeng sa Israele go bile le baprofeta ba maaka, mme ka wona mokgwa woo le mo go lena go tla ba le baruti ba maaka. Ba tla tla le dithuto tše e sego tšona tše di išago tahlegong, ba ba ba latola Mong wa bona yo a ba rekolotšego, gomme ka go dira bjalo ba ikobela lehu la tšhoganetšo. Ba bantši ba tla ya le ditiro tša bona tša bohlola, gomme ka baka la bona Tsela ya therešo e tla nyefolwa. Ka baka la megabaru ya bona ba tla le fora gore ba ikhole ka go le botša ditaba tša maaka. E šetše e le kgale Modimo a itokišetša go ba otla, mme o mo tseleng ya go tlo ba fediša. Barongwa bale ba go ka ba dira dibe o ile a se ba šokele, eupša o ile a ba lahlela ka heleng moo ba kgokilwego ka diketane ka meleteng ya leswiswi, ba beetšwe Letšatši la Kahlolo. Le lefase lela la kgale Modimo o ile a se le šokele, eupša lefase leo la bahlokamodimo o ile a le khupetša ka meetsefula; a phološa fela Noa, yo a bego a ruta batho go phela ka mokgwa wa go loka, a phološa le ba bangwe ba ba šupago. Le motse wa Sodoma le wa Gomora o ile a e lahla, a e fediša ka go e fiša lorelore, a bontšha se se tlago hlagela bahlokamodimo. A hlakodiša monna wa moloki, Lota, yo a bego a tshwentšwe ke bohlola bja batho bao ba go se phethe molao. Monna yoo wa moloki yo a bego a agile le bona, ka mehla o be a tsota ge a bona a bile a ekwa ditiro tša bona tše kgopo. Morena o kgona go hlakodiša batho ba barapedi melekong ya bona, bakgopo o ba bolokela Letšatši la Kahlolo go tlo ba otla, gagolo ba ba latelago ditumo tša bona tše mpe tša ditšhila, le ba ba nyatšago pušo ya Modimo. Bona baruti bao ba na le kgang le makoko, ga ba šie le go nyefola dihlolwabarongwa tša letago, etšwe dihlolwabarongwa tšona, le ge di feta baruti bao ba maaka ka go tia le ka maatla, di sa ba bee molato ka go ba nyefola mo pele ga Morena. Fela baruti ba ba swana le diphoofolo tše di sa kgonego go nagana, tše di yago ka tlhago ya tšona, diphoofolo tša naga tše di tswaletšwego go thewa le go bolawa. Ba nyefola se ba sa se kwešišego. Ba tla fedišwa bjalo ka diphoofolo tša naga, gomme moputso wa bona e tla ba mahloko, ka baka la ge le bona ba hlotše mahloko. Mo go bona boipshino ke go hlwela botagwa letšatši ka moka. Ke bomahlabišadihlong ba ba le gobošago ka go ja le lena ba ntše ba phonkgela mojong. Ka mehla ba tsoma mosadi yo ba ka robalago le yena; ba dula ba faletše go dira sebe. Ba goketša ba ba fokolago tumelong, mola bona beng ba hlalefetše megabaru. Ke ba ba rogakilwego ke Modimo. Ba phamogile tseleng ya go loka mme ba timetše; ba tšere ka tsela yela e ilego ya tšewa ke Bileamo, morwa wa Bosoro, yola a bego a rata tšhelete ye a bego a e hwetša ka go dira tše kgopo, gomme a kgalelwa bokgopo bja gagwe – pokolo ya gagwe, selo se se sa kgonego go bolela, ya bolela ka lentšu la motho gomme ya thibela bošilo bja moprofeta yoo. Batho bao ba swana le didiba tše di pšhelego, ba bjalo ka maru a kgodi a a tšewago ke ledimo. Modimo o ba beetše madulo leswiswing le leso. Dipolelo tša bona ke tša boikgogomošo le botlaela, gomme ba ba sa tšogo phonyokga ka go ikgaoganya le balahlegi, ba ba thea ka ditumo tša bona tše mpe tša nama. Ba ba holofetša tokologo etšwe bona beng e le makgoba a mekgwa ye mebe – gobane motho e ba lekgoba la sengwe le sengwe se se mo fentšego. Ge motho a ile a phonyokga motšhilafatšo wa bobe bja lefase ka go tseba Morena le Mophološi wa rena, Jesu Kriste, gomme ka morago motšhilafatšo woo wa boela wa mo kgakga, seemo sa gagwe sa mafelelo e ba se sebe go feta sela a bilego go sona pele. Go ka be go bile kaone go yena ge a ka be a se a ka a tseba tsela ya boloki, go na le gore a re go e tseba a tle a furalele molao wo mokgethwa wo a o filwego. Tše di mo hlagetšego di bontšha gore polelo ye e a rereša ye e rego: “Mpša e boela mahlatšeng a yona,” le ye e rego: “Kolobe e re go hlapa ya boelela go pshikologa ka lerageng.” Barategi, lengwalo le ke le ngwalelago lona bjale ke la bobedi. Ka mangwalo a mabedi a ke lekile go tsoša menagano ye e hlwekilego ka go lena ka go le gopotša ditaba tše. Le gopole mantšu ao a kilego a bolelwa ke baprofeta ba bakgethwa kgale, le taelo ya Morena le Mophološi ye le e filwego ke baapostola ba gabolena. Sa mathomo, le tsebe gore mehleng ya mafelelo go tla tšwelela bakodutli bao maitshwaro a bona a laolwago ke ditumo tša bona, ba le botšiša ba re: “Kholofetšo ya gore Kriste o tla boa e feletše kae? Etse badumedi bale ba mathomo ba hwile, eupša tšohle di sa no swana le mola lefase le hlolwa!” Batho bao ba itebatša taba e tee ya gore kgale Modimo o ile a ntšha taelo, gomme legodimo le lefase tša hlolega. Lefase le hlolegile meetseng le hlolwa ka meetse, gomme ke ka meetse, meetse ale a morwalela, mo lefase la nako yela le ilego la fedišwa. Legodimo la mehleng yeno le lefase la gona le tšona di lotolwa ka yona taelo yela ya Modimo, gore di tle di fedišwe ka mollo. Di beetšwe mohla bahlokamodimo ba tlago sekišwa ba fedišwa. Barategi, taba e tee ye le sego la swanela go e lebala ke gore go Morena letšatši le tee le swana le mengwaga ye sekete, le mengwaga ye sekete e swana le letšatši le tee. Morena ga a diege go phetha tše a di tshepišitšego batho, bjalo ka ge ba bangwe ba gopola. Sa gagwe ke go se le felele pelo, ka ge a sa nyake gore go lahlege motho, eupša a nyaka gore bohle ba itsholele dibe tša bona. Letšatši la Morena le tla tla bjalo ka lehodu. Mohlang woo magodimo a tla nyamelela ka lešata le legolo; dilo ka moka tše di lego kua leratadimeng di tla fedišwa ka go fišwa; lefase gotee le tšohle tše di lego go lona di tla timelela. Ka ge tšohle tše di tlilo fedišwa ka tsela ye, lena le swanetše go ba ba babjang? Le swanetše go ba ba bakgethwa ba ba ineetšego go Modimo, le le gare le letetše Letšatši la Modimo, mme le le akgofiša – lona Letšatši le ka lona magodimo a tlago swa a fedišwa, gomme dilo tše di lego kua leratadimeng tša tološwa ke phišo. Ge e le rena re letetše se Modimo a re hlofeditšego sona: e lego magodimo a mafsa le lefase le lefsa, moo go tlago aga toka. Ka gona, barategi, ge le sa letetše dilo tšeo, le ikokoropele go ba ba ba se nago sepatso goba bosodi mo go Modimo le ithakgaletše le yena. Le tšee go se fele pelo ga Morena e le sebaka sa go phološwa ga lena, go swana le Paulose, ngwanaborena, yo re mo ratago, ge a ile a le ngwalela mangwalo, a šomiša bohlale bjo a bo filwego ke Modimo. Ke tšona tše a di bolelago ka mangwalo ka moka ao a a ngwadilego mabapi le taba ye. Ka mangwalong a gagwe go na le taba tše thata tšeo ba ba sego ba rutega le ba ba fokolago tumelong ba menolago tlhalošo ya tšona, go etša ge ba menola le tše dingwe ditemana tša Mangwalo a Makgethwa. Ke ka moo bona beng ba itahlago ka gona. Le a tseba, lena barategi, gore batho ba bangwe ba menola tlhalošo ya ditemana tša Mangwalo a Makgethwa. Le itlhokomele, gore le se tlo timetšwa ke batho ba ba sa phethego molao, gomme la ba ba pelopedi tumelong ya lena. Sa lena a e fele e eba go maatlafatšwa ke dimpho tša Morena le Mophološi wa rena, Jesu Kriste, le go mo tseba bokaone. Yena a a tumišwe bjale le ka mehla! Amene. Re le ngwalela mabapi le yo a bilego gona go tloga mathomong. Re mo kwele ra ba ra mmona ka a rena mahlo; re mmogetše ra ba ra mo kgwatha ka diatla, yena Lentšu yo e lego Bophelo. E rile ge re bontšhwa yo Bophelo ra mmona; ka gona re le begela yena, re le tsebiša yena Bophelo bjo bo sa felego, yo a bilego le Tate mme ra mmontšhwa. Se re se bonego gape re se kwelego, le lena re le begela sona gore le tle le be ba tee le rena. Le rena re ba tee le Tate le Jesu Kriste, Morwagwe. Re le ngwalela ditaba tšeo gore lethabo la rena e tle e be le le feletšego. Molaetša wo re o boditšwego ke yena Morwagwe mme re le begelago wona šo: Modimo ke seetša, gomme mo go yena ga go na leswiswi le gatee. Bjale ge re re re ba tee le yena etšwe re dutše leswiswing, re a aketša, ga re phethe thato ya Modimo. Eupša ge re phela seetšeng bjalo ka yena ge a le seetšeng, gona re ba tee seng sa rena, gomme madi a Jesu, Morwagwe, a re hlatswa dibe tšohle. Ge re re ga re na sebe, re a iphora, re hloka nnete ka dipelong tša rena. Eupša ge re ipolela dibe tša rena, ka ge Modimo a phetha tše a re holofetšago tšona mme a dira tše di lokilego, o re swarela tšona, a re hlatswa bokgopo bjohle. Ge re re ga se ra dira sebe, re ra gore Modimo o na le maaka, le gore tše a re boditšego tšona ga se tša re tsena ka dipelong. Bana ba ka, ke le ngwalela ditaba tše gore le se dire dibe; eupša ge motho a ka tšhoga a dirile sebe, re na le Mmoleledi wa go re bolelela go Tatagorena, e lego yena Jesu Kriste, Moloki. Ke yena seloba sa dibe tša rena, e sego tša rena fela, eupša le tša batho ka moka. Gomme se re nago le nnete ya sona gore re tseba Modimo, ke ge re phetha ditaelo tša gagwe. Yo a rego: “Ke a mo tseba,” etšwe a sa phethe ditaelo tša gagwe, o na le maaka, o hloka nnete ka pelong ya gagwe. Eupša yo a theeletšago molaetša wa gagwe, ke yena yo go rata Modimo ga gagwe e lego mo go feletšego. Se re nago le nnete ya sona gore re phela re le ba tee le Modimo ke gore yo a rego o dula e le o tee le Modimo, a phele ka mokgwa wo Jesu Kriste a bego a phela ka wona. Barategi, molao wo ke le ngwalelago wona wo ga se wo mofsa; ke molao wa kgale, wo le bilego le wona go tloga mathomong. Molao woo wa kgale ke molaetša wo le šetšego le o kwele. Fela ke le ngwalela wona e le wo mofsa, ka gobane nnete ya wona e bonagala go Kriste le go lena. Gobane leswiswi le a feta, gomme seetša sa mmakgonthe se šetše se taga. Yo a rego o mo seetšeng etšwe a hloile ngwanabo, o sa le leswiswing le gonabjale. Yo a ratago ngwanabo ke yena yo a phelago seetšeng, ka gona go yena ga go na se se kago mo diriša sebe. Eupša yo a hloilego ngwanabo o mo leswiswing; o sepela go lona gomme ga a tsebe mo a yago gona, ka ge leswiswi le mo foufaditše. Lena, bana ba ka, ke le ngwalela ka gobane le swaretšwe dibe tša lena ka baka la Kriste. Lena, botatagobana, ke le ngwalela ka gobane le tseba yo a bilego gona go tloga mathomong. Lena, bafsa, ke le ngwalela ka gobane le fentše Rabokgopo. Lena, bana, ke le ngwaletše ka gobane le tseba Tatagorena. Lena, botatagobana, ke le ngwaletše ka gobane le tseba yo a bilego gona go tloga mathomong. Lena, bafsa, ke le ngwaletše ka gobane le tiile, le theeletša lentšu la Modimo, le gona le fentše Rabokgopo. Le se ke la rata lefase goba dilo tša lona. Ge motho a rata lefase ga a rate Tatagorena. Tšohle tše e lego tša lefase – tše nama e di dumago, le tše mpe tše mahlo a di dumago, le thoto ye motho a ikgantšhago ka yona – tšohle tšeo ga se tše di tšwago go Tatagorena, ke tše di tšwago go lefase. Lefase le tša lona tše di dungwago ke batho di a feta, eupša yo a phethago thato ya Modimo yena o phelela ruri. Bana ba ka, ke nako ya bofelo. Bjalo ka ge le kwele gore molwalekriste o etla, gonabjale go tsogile balwalekriste ba bantši, gomme ke sona se re bonago ka sona gore ke nako ya bofelo. Ke batho ba ba tšwilego mo go rena; fela gabotse e be e se ba rena, gobane ge e ka be e be e le ba rena ba ka be ba sa dutše ba na le rena. Fela ba intšhitše, gore go tle go bonale gore bohle ga se ba rena. Eupša lena le na le Moya wo le o tšhetšwego ke Mokgethwa, gomme bohle le batsebi. Ka gona, ga se ka le ngwalela ka gobane le sa tsebe therešo; ke le ngwaletše ka ge le e tseba. Le tseba le gore ga go maaka ao a kago tšwa therešong. Bjale ke mang yo a nago le maaka? Ke yo a rego Jesu ga se yena Mesia. Yo mobjalo ke yena molwalekriste, o gana Tatagorena le Morwagwe. Gobane yo a ganago Morwa wa Modimo, o gana le Tatagorena; yo a dumelago Morwa wa Modimo, o dumela le Tatagorena. Ka gona, molaetša wo le o kwelego go tloga mathomong le o boloke. Ge le ka o boloka, gona le tla dula le le ba tee le Morwa wa Modimo le Tatagwe. Gomme se Kriste ka boyena a re holofeditšego sona sese: ke bophelo bjo bo sa felego. Ge ke le ngwalela ditaba tše ke ka baka la bao ba lekago go le timetša. Fela lena Kriste o le tšhetše Moya wo o tlago dula ka dipelong tša lena; ka gona ga go sa nyakega gore le rutwe ke motho selo. Gobane Moya woo wa gagwe o le ruta tšohle, gomme tše o le rutago tšona ke therešo, ga se maaka. Le dule le le ba tee le Kriste go ya ka mo le rutilwego ke Moya. Bjale ge, bana ba ka, dulang le le ba tee le Kriste, gore ge a etla re tie maatla, re se tlo lewa ke dihlong pele ga gagwe ka Letšatši le a tlago tla ka lona. Le a tseba gore Kriste ke moloki; ka gona, le tsebe gore mang le mang yo a dirago tše di lokilego ke ngwana wa Modimo. Bonang gore ke lerato le lekaakang le Modimo Tate a re ratilego ka lona mo re bilego re bitšwa bana ba gagwe, gomme ka kgonthe re bona. Ke ka baka leo lefase le sa re tsebego, gobane ga se la ka la tseba Modimo. Barategi, bjale re bana ba Modimo, eupša se re sa tlago go ba sona ga sešo ra se tseba. Se re se tsebago ke gore mohla Kriste a tšwelela re tla swana le yena Modimo, ka ge re tla be re mmona ka mo a lego ka gona. Mang le mang yo a mo holofelago ka mokgwa wo o dula a itlhwekišitše, bjalo ka ge Kriste le yena a hlwekile. Mang le mang yo a phelago a dira sebe o tshela molao, ka gobane sebe ke go tshela molao. Le a tseba gore Kriste o be a tletše go tloša dibe, gomme yena mong ga a na sebe. Ka gona, mang le mang yo a dulago e le o tee le Kriste ga a phele dibeng; fela yo a phelago dibeng go ra gore ga se a ka a mmona, le go mo tseba ga se a ka a mo tseba. Bana ba ka, le se timetšwe ke motho. Yo a dirago tše di lokilego ke moloki, go no swana le Kriste ge e le moloki. Yo a phelago dibeng ke wa Diabolose, ka gobane Diabolose e sa le a tloga a dira dibe go tloga mathomong a lefase. Se Morwa wa Modimo a bego a se tletše ke go fediša tše di bego di dirilwe ke Diabolose. Mang le mang yo e lego ngwana wa Modimo ga a phele a dira sebe, gobane o na le bophelo bja Modimo; le gona, ka ge e le ngwana wa Modimo, a ka se kgone go phela a dira sebe. Se bana ba Modimo le bana ba Diabolose ba bonalago ka sona sese: motho yo a sa dirego tše di lokilego goba a sa ratego mongwekayena, ga se ngwana wa Modimo. Molaetša wo le o boditšwego go tloga mathomong ke wa go re re rataneng. Re se ke ra ba bjalo ka Kaine; yena e be e le wa Rabobe gomme a bolaya ngwanabo. Kaine o be a mmolaelang? O mmolaile ka ge ya gagwe mediro e be e le ye mebe, mola ya ngwanabo e le ye e lokilego. Bjale ge, banabešo, le se makale ge batho ba lefase ba le hloile. Rena re a tseba gore re tšwile lehung ra tsena bophelong, ka gobane re rata bana ba borena. Yo a sa ratego ngwanabo o sa le diatleng tša lehu. Yo a hloilego ngwanabo ke mmolai, gomme le a tseba gore mmolai ga a na bophelo bjo bo sa felego. Se re tsebago lerato e le sona ke ge Kriste a gafile bophelo bja gagwe ka baka la rena. Ka gona, le rena re swanetše go gafa bja rena bophelo ka baka la bana ba borena. Ge mohumi a ka re a bona ngwanabo a hloka a se mo šetše, na a ka re o rata Modimo? Bana ba ka, lerato la rena a e se be la molomo, a e be la mmannete, le le ipontšhago ka mediro. Ka gona, ke ka lona lerato mo re kago tseba gore re ba therešo; ke ka lona mo re kago tia maatla mo pele ga Modimo, re sa ye le gore na letswalo la rena le a re ja goba ga le re je, gobane Modimo o feta letswalo la rena, le gona o tseba dilo tšohle. Barategi, ge re sa lewe ke letswalo, re tia maatla mo pele ga Modimo. Se re kago se kgopela o tla re fa sona, ka ge re phetha ditaelo tša gagwe re bile re dira tše di mo kgahlago. Taelo ya gagwe ke gore re dumele go Jesu Kriste, Morwagwe, le gona re rataneng go ya ka mo Kriste a re laetšego ka gona. Yo a phethago ditaelo tša gagwe o dula e le o tee le Modimo, le Modimo o dula e le o tee le yena. Gomme ka Moya wo Modimo a re filego wona, re tseba ge Modimo a dula e le o tee le rena. Barategi, le se ke la dumela mang le mang yo a rego o tsenwe ke Moya; le hlahlobe gore na moya woo ke wa Modimo. Gobane lefase le le tletše baprofeta ba maaka. Moya wa Modimo le tla o tseba ka se: mang le mang yo a hlatselago gore Jesu Kriste o tlile e le motho, o tsenwe ke Moya wa Modimo. Eupša mang le mang yo a ganetšago taba ye mabapi le Jesu, ga se a tsenwa ke Moya wa Modimo. Moya wo o mo tsenego o tšwa go molwalekriste yo le kwelego gore o etla, gomme le bjale o šetše a le mo lefaseng. Fela lena, bana ba ka, ke lena ba Modimo, gomme baprofeta bao ba maaka le ba fentše, gobane yo a le tsenego o feta yo a tsenego ba lefase. Baprofeta bao ba maaka ke ba lefase; ka baka leo ba bolela tša lefase, gomme ba lefase ba a ba theeletša. Fela rena re ba Modimo. Yo a tsebago Modimo o a re theeletša; yo e sego wa Modimo ga a re theeletše. Ke sona se re bonago ka sona ka mo Moya wa therešo le moya wa maaka e fapanago ka gona. Barategi, a re rataneng, gobane lerato le tšwa go Modimo. Yo a nago le lerato ke ngwana wa Modimo gomme o tseba Modimo. Yo a se nago le lerato ga a tsebe Modimo, gobane Modimo ke lerato. Gomme Modimo o re bontšhitše gore o a re rata ka go roma Morwa a le noši wa gagwe mo lefaseng, gore re tle re phele ka yena. Se e lego lerato sese: ga se gore ke rena re ratilego Modimo, eupša ke gore ke yena a re ratilego gomme a roma Morwagwe lefaseng gore e tle e be seloba sa dibe tša rena. Barategi, ge Modimo a re ratile ka mokgwa wo, gona le rena re swanetše go ratana. Ga go motho yo a kilego a bona Modimo, eupša ge re ratana ke gore Modimo o dula e le o tee le rena, gomme go re rata ga gagwe e be mo go feletšego. Se re tsebago ka sona gore re dula re le ba tee le Modimo, le gore le yena o dula e le o tee le rena, ke ge a re file Moya wa gagwe. Le gona re iponetše gore Tatagorena o romile Morwagwe gore e tle e be Mophološi wa lefase, gomme taba ye re e begela ba bangwe. Motho yo a begago gore Jesu ke Morwa wa Modimo o dula e le o tee le yena, le yena o dula e le o tee le Modimo. Le rena beng lerato le Modimo a re ratago ka lona re a le tseba ebile re a le dumela. Modimo ke lerato, gomme yo a phelago ka lerato o dula e le o tee le Modimo, le Modimo o dula e le o tee le yena. Go re rata ga gagwe e ba mo go feletšego, gore ka Letšatši la Kahlolo re tle re se boife selo, ka gobane bophelo bja rena mo lefaseng le bo swana le bja Kriste. Lerato ga le na poifo; lerato le le feletšego le raka poifo. Ka gona, yo a boifago ga a na lerato le le feletšego, ka gore o tseba ge a tlilo otlwa. Re rata Modimo ka gobane ke yena a re ratilego pele. Ge motho a ka re o rata Modimo etšwe a hloile ngwanabo, o bolela maaka, gobane a ka se re a sa rate ngwanabo yo a mmonago, a kgona go rata Modimo yo a sa mmonego. Molao wo Kriste a re filego wona šo: Yo a ratago Modimo a rate le ngwanabo. Mang le mang yo a dumelago gore Jesu ke yena Mesia ke ngwana wa Modimo; le yo a ratago TatagoJesu o rata le bana ba Modimo. Se re tsebago gore re rata bana ba Modimo ka sona ke ge re rata yena Modimo re bile re phetha ditaelo tša gagwe. Gobane go rata Modimo ke go phetha ditaelo tša gagwe, gomme ditaelo tša gagwe ga di boima, gobane ngwana yo mongwe le yo mongwe wa Modimo o fenya lefase. Gomme se re fenyago lefase ka sona ke tumelo ya rena. Ke mang yo a fenyago lefase? Ke fela yo a dumelago gore Jesu ke Morwa wa Modimo. Jesu Kriste ke yena wa go tla ka meetse le ka madi, e sego ka meetse fela, eupša ka meetse le ka madi. Moya ka boyena o hlatsela taba ye, ka ge yena Moya e le therešo. Dihlatse ke tše tharo: ke Moya, le meetse, le madi; gomme ka ditharo ga tšona di hlatsela go swana. Etse bohlatse bja batho re a bo dumela, gomme bohlatse bja Modimo bjona bo tiile le go feta, ka ge e le bja Modimo, gomme yena Modimo o fa bohlatse bjo ka Morwagwe. Yo a dumelago go Morwa wa Modimo o na le bohlatse bjo ka pelong ya gagwe; eupša yo a sa dumelego Modimo o ra gore Modimo o na le maaka, ka ge a sa dumele tše Modimo a di hlatsetšego mabapi le Morwagwe. Bohlatse bja gona šebo: Modimo o re file bophelo bjo bo sa felego, gomme bophelo bjo re bo hwetša ka Morwagwe. Yo a nago le Morwa wa Modimo o na le bophelo bjo; yo a se nago le yena ga a na le bjona. Lena le dumelago go Morwa wa Modimo ke le ngwaletše ditaba tše gore le tsebe gore le na le bophelo bjo bo sa felego. Re ka ya go Modimo re sa šie, ka ge re tseba gore ge re mo kgopela go ya ka thato ya gagwe o a re kwa. Ka ge re tseba gore ka mehla ge re mo kgopela selo o a re kwa, re tseba gore se re mo kgopelago sona o a re fa. Ge motho a ka bona modumedikayena a dira sebe se se sa išego lehung, a mo rapelele, gomme Modimo o tla mo phediša. Ke bolela ka ba go dira dibe tše di sa išego lehung. Gobane go na le sebe se se išago lehung, gomme modumedi yo a dirago se sebjalo ga se yo ke rego a rapelelwe. Tšohle tša go se loke ke dibe, fela ga se dibe tšohle tše di išago lehung. Re a tseba gore ga go ngwana wa Modimo yo a ka nogo tšwela pele le go dira dibe, gobane Morwa wa Modimo o a mo lota, gomme Rabobe a ka se mo dire selo. Re tseba gore ke rena ba Modimo, le gore bohle ba ba sa theeletšego Modimo ba laolwa ke Rabobe. Re a tseba gore Morwa wa Modimo o tlile mme o re file tlhaologanyo, gomme bjale re tseba Modimo wa nnete. Re phela re le ba tee le Modimo wa nnete – re le ba tee le Morwagwe, Jesu Kriste. Ke yena Modimo wa nnete, ke yena bophelo bjo bo sa felego. Ka gona, bana ba ka, le se ke la ikopanya le medimo ya maaka. Nna, mogolo, ke ngwalela wena, mohumagadi yo a kgethilwego ke Modimo, wena le bana ba gago ba ke le ratago ruri. Gomme ga se nna fela ke le ratago, eupša le bohle ba ba tsebago nnete ya Modimo ba a le rata, gobane nnete e dula mo go rena mme e tla dulela sa ruri. Modimo le Jesu Kriste, Morwa wa Tate, ba tla re gaugela, ba re lokela, ba re fa khutšo, rena re phelago ka nnete le ka go ratana. Ke ile ka thaba bjang ge mo baneng ba gago ke hwetša go na le ba ba phelago ka therešo, ka mo re lailwego ke Tatagorena. Gomme ke a kgopela, wena mohumagadi, ke re: A re rataneng. Wo ga se molao wo mofsa wo ke go ngwalelago wona, ke molao wo re bilego le wona go tloga mathomong. Lerato le ke la gore re phele ka go phetha ditaelo tša Modimo. Gomme taelo e sa le yona yela le e kwelego go tloga mathomong, e lego ya gore le phele ka go ratana. Baradia ba bantši ba phaletše le lefase, bona ba ba sa dumelego gore Jesu Kriste o tlile e le motho. Motho wa mohuta woo ke yena moradia ebile ke yena molwalekriste. Ka gona, le itlhokomele, gore le se lobe se re se šometšego, gore le tle le fiwe moputso wa lena ka botlalo. Mang le mang yo a oketšago ka tša gagwe, a sa kgomarele thuto ya Kriste, ga a na Modimo; eupša yo a kgomarelago thuto ye o na le Tatagorena le Morwagwe. Ka fao, yo a kago tla go lena a sa tliše thuto ye, le se mo amogele ka magaeng a lena; le go mo dumediša le se mo dumediše. Gobane yo a kago mo dumediša o ikopanya naye medirong ya gagwe ye mebe. Ke sa na le ditaba tše dintši tše nka le ngwalelago tšona, eupša ga ke rate go le botša tšona ka lengwalo; ke holofela gore ke tla le etela, ka tla ka le botša tšona ka molomo, gore lethabo la rena e tle e be le le tletšego. Bana ba kgaitšedi ya gago yo a kgethilwego ke Modimo ba re o dumele. Nna, mogolo, ke ngwalela wena, morategi Gayose, ke go ratago ka mmannete. Morategi, nke tšohle di ka go lokela le gona wa phela gabotse, bjalo ka ge ke tseba gore go iketla gona o sa iketlile. Ke ile ka thaba bjang ge ba bangwe badumedikarena ba fihla ba mpotša ka mo o botegetšego nnete ka gona, gobane nnete yona o phela ka yona. Ga go se se nkgahlago go phala ge ke ekwa gore bana ba ka ba phela ka nnete. Morategi, o botegile mo go tšohle tše o di direlago badumedikawena, ešita le ba e lego bašele. Ba hlatsetše lerato la gago mo phuthegong ya mono. O tla be o dirile gabotse ge o ka ba thuša ka mo go kgahlago Modimo leetong la bona. Gobane ba swere leeto le la bona la go hlankela Kriste ba sa tšee selo go baditšhaba. Rena re swanetše go thuša batho ba babjalo, gore e be gona go kgatha tema ga rena ge re phatlalatša therešo. Ke ngwaletše phuthego lengwalo la seripana mabapi le Diotrefese yoo wa go rata boetapele, fela yena o di tšeiša phefo. Ka baka leo, ge nka tla ke tla botša phuthego tše a di dirago: o re bolela gampe, o a re phara. Gomme ge tšeo di sa mo kgotsofatše, o gana le go amogela badumedikarena, mme le bao ba nyakago go ba amogela yena o a ba thibela, a be a ba rake phuthegong. Morategi, wena o se ke wa ekiša bakgopo, o ekiše baloki. Gape yo a dirago tša go loka ke wa Modimo; yo a dirago tše mpe ga se a ka a bona Modimo. Ge e le Demetriose yena, bohle ba a mo reta, le boitshwaro bja gagwe bja Sekriste bo bontšha gore go retwa go a mo swanela. Le rena re a hlatsela, gomme le wena o a tseba gore se re se bolelago ke therešo. Ke be ke sa na le ditaba tše dintši tše ke bego nka go ngwalela tšona, eupša ga ke rate go go botša tšona ka lengwalo. Ke holofela gore ke tla tla ke go bona kgauswinyana, gomme ke tla go botša tšona ka molomo. Khutšo ya Modimo e be le wena. Bagwera ba gago ba re o dumele. O dumediše bagwera ba rena ka o tee ka o tee. Nna, Judase, ke lego mohlanka wa Jesu Kriste, gape ke lego ngwanaboJakobose, ke dumediša lena le biditšwego ke Modimo, lena le phelago le ratwa ke Modimo, Tatagorena, le gona le šireleditšwe ke Jesu Kriste, ke re: Nke le okeletšwe lešoko le khutšo le lerato. Barategi, le ge ke be ke duma kudu go le ngwalela mabapi le phološo ye re e hlakanetšego le lena ye, ke bone e le tshwanelo gore ke le ngwalele go le kgothatša gore le hlabanele tumelo ye e filwego bakgethwa gatee ba e felwa sa ruri. Gobane go na le banyatšamodimo ba bangwe ba ba khukhunetšego ka gare ga lena, ba ba phereketšago kgaugelo ya Modimo, gore ba tle ba ikemelele bohloleng bja bona, bona ba ba ganago Jesu Kriste, yo e lego yena fela Mong le Morena wa rena. Bona, kotlo ye ke yago go e hlaloša e sa le ba e beelwa go tloga kgale. Gomme le ge tšohle tše le di tseba, ke rata go le gopotša gore Morena o kile a re go hlakodiša setšhaba sa Israele Egepeta, ka morago a bolaya ba ba sa dumelego, le go le gopotša gore barongwa bale ba go se tiišetše maemong a bona a bolaodi, ba go tlogela madulo a bona, Modimo o ile a ba kgoka ka diketane, ba dula ba kgokilwe go ya go ile leswiswing, moo a ba beetšego Letšatšilegolo lela ka lona ba tlilogo ahlolelwa go lahlwa. Gopolang motse wa Sodoma le wa Gomora le metse ye e bego e bapile le yona, yeo badudi ba yona ba bego ba itshwere sa barongwa bale mme ba ineetše bofebe le bohlola. Ba otlwa ka kotlo ya mollo wo o sa timego, ya ba sešupo sa go bonwa ke batho. Le bona banyatšamodimo bao ba ba le ditoro tše di dirago gore ba itšhilafatše mebele; ba nyatša bogoši bja Modimo ba bile ba nyefola dihlolwabarongwa tša letago. Etse le Mikaele, morongwamogolo, taba ya mohuta woo ga se a ka a e dira. Mola a fapane le Diabolose ge ba be ba baka setopo sa Moshe, ga se a ka a ba le sebete sa go mo ahlola ka go mo hlapaola. O dio re: “A Morena a go otle!” Eupša batho bao bona ba nyefola sengwe le sengwe se ba sa se tsebego, gomme le sengwe le sengwe se ba se tsebago ka tlhago, bjalo ka diphoofolo tše di sa kgonego go nagana, ba ipolaiša sona. Go madimabe bona, gobane ba tšere ka tsela yela ya Kaine. Ba itahlile ka bofora bja Bileamo, e le ge ba gabile tšhelete. Ba gwaba bjalo ka Korage mme ba fedišwa bjalo ka yena. Ke bona bomahlabišadihlong mengwathišanong ya lena ka go ja ba phaka ge ba eja le lena, ba gopotše fela tša bona dimpa. Ke bona maru a e sego a pula a a tšewago ke phefo. Ke mehlare ye e sa enywego, ešita le ka nako ya lehlabula, mehlare ye e tumotšwego mme e hwetšego ruri. Ba bjalo ka maphoto a lewatle a a bilogago, ba tlokoma ditiro tša dihlong boka maphoto ge a tlokoma lepshilo. Ba bjalo ka dinaledi tše di phaphailago, mme Modimo o ba beetše madulo leswiswing le leso moo ba tlago dula go ya go ile. Ke bona bale ba ilego ba porofetwa ke Enoko, monna yola wa moloko wa boselela wa Adamo, a re: “Tsebang, Morena o tla le barongwa ba gagwe ba bakgethwa ba diketekete go sekiša bohle le go ba otla ka baka la ditiro tše di se nago borapedi tše ba di dirilego, le dipolelo tše mpe tše badiradibe ba ba se nago borapedi ba mmoletšego ka tšona.” Batho ba ke bangongoregi ba go galala se sengwe le se sengwe, ba go laolwa ke ditumo tša bona, ba go bolela ka go ikgantšha le go gegea batho gore ba hwetše se ba se nyakago. Baratiwa, le gopole tšela le di porofetetšwego ke baapostola ba Morena wa rena, Jesu Kriste. Ba le boditše ba re: “Ge matšatši a mafelelo a fihla go tla tšwelela batho ba le kwera, batho ba ba itakelwago ke ditumo tša bona tše mpe.” Bao ke bona ba ba hlolago dikarogano, ke ba go laolwa ke ditumo tša bona tša nama, ba ba se nago Moya wa Modimo. Ge e le lena, baratiwa, le dule le ikaga godimo ga tumelo ya lena ye kgethwakgethwa. Le dule le rapela ka maatla a Moya wo Mokgethwa, le dule le le leratong la Modimo, le ntše le letetše Morena wa rena, Jesu Kriste, gore ka ge a na le lešoko, a tle a le fe bophelo bjo bo sa felego. Bao ba dikadikago le ba thuše. Go na le ba bangwe ba le swanetšego go ba phološa bjalo ka ge nke le ba ubula mollong; ba bangwe ke ba le swanetšego go ba gaugela le ba boifa, eupša diaparo tša bona tše di tšhilafaditšwego ke ditiro tša bona tša nama tšona le di šišingwe. Modimo yo a kgonago go le hlokomela gore le se kgopše le go le tliša pele ga gagwe le se ne bosodi mme le thabile kudu – yena Modimo a le noši, Mophološi wa rena, sa gagwe e be letago le bogoši le maatla le pušo, go tloga mehleng ya kgale le gonabjale le go ya go ile, ka Jesu Kriste, Morena wa rena. Amene. Puku ye ke kutollo ye Modimo a e utolotšego Jesu Kriste, go bontšha bahlanka ba gagwe tše di tlago hlaga kgauswinyana. Jesu a di begela Johanese, mohlanka wa gagwe, ka morongwa wa gagwe yo a ilego a mo roma. Johanese yo ke hlatse ya tše di boletšwego ke Modimo mme tša tiišetšwa ke Jesu Kriste. O begile tšohle tše a di bonego. Go lehlogonolo yo a balelago phuthego ditaba tše di porofetilwego mo, go lehlogonolo le ba ba kwago tše di ngwadilwego mme ba di phetha, gobane nako ya gore di tle di phethege e kgauswi. Nna, Johanese, ke ngwalela diphuthego tše di šupago tša selete sa Asia ke re: Modimo yo a lego gona, yo a bilego gona, gape a sa tlilogo tla, le meoya ye e šupago yeo e lego pele ga setulo sa gagwe sa bogoši, le Jesu Kriste, hlatse ye e botegago, yena Motsošwabahung wa mathomo, Mmuši wa magoši a lefase, ba le gaugele, ba le fe khutšo. Jesu o a re rata, gomme ka madi a gagwe o re lokolotše dibeng tša rena, *** a re dira bakgomana ba Modimo, le baprista ba go hlankela yena Modimo, Tatagwe. A Jesu Kriste a tumišwe, maatla e be a gagwe go ya go ile. Amene. Bonang, o tla ka maru! Bohle ba tla mmona, gotee le bona bale ba go mo hlaba ka lerumo. Batho bohle ba lefase ba tla mo llela. Ee, go tla ba bjalo. Morena Modimo yo a lego gona, yo a bego a le gona, gape yo a sa tlilogo tla, yena Ramaatlaohle, o re: “Ke nna Alfa le Omega.” Nna, Johanese, ngwanabolena, molatedikalena wa Jesu, ke na le lena matshwenyegong le mmušong le kgotlelelong. Ke ile ka ikhwetša ke le sehlakahlakeng sa Patmose, ka ge ke be ke ile ka bega lentšu la Modimo le therešo ye Jesu a e utolotšego. Ya re ka Letšatši la Morena ka tsenwa ke Moya, gomme ka kwa lentšu le legolo le nkego ke mollo wa phala ka morago ga ka le re: “Tše o di bonago di ngwale ka pukung, gomme o romele puku yeo diphuthegong tše di lego metseng ye e šupago ye: Efeso, Smirna, Pergamone, Tiatira, Sardese, Filadelfia le Laodisea.” Ke ile ka retologa gore ke bone yo a bolelago le nna, gomme ka bona dihlomamabone tše di šupago tša gauta. Gare ga tšona go be go na le selo se se swanago le motho. Se be se apere purapura ya go fihla dinaong, se ipofile ka lepanta la gauta kgareng. Moriri wa sona e le wo mošweu bjalo ka wulu ye tšhweu le bjalo ka leswela, le mahlo a sona a le bjalo ka kgabo ya mollo. Maoto a sona a be a phadima bjalo ka mphiri wo o phadimišitšwego moubelong, gomme lentšu la gagwe lona nke ke modumo wa meetse a mantši. Se be se swere dinaledi tše di šupago ka seatla sa la go ja, gomme molomong wa sona go etšwa tšhoša ya magale a mabedi. Sefahlego sa sona se be se taga bjalo ka letšatši ge le taga kudu. E rile ge ke se bona ka wela fase pele ga sona ka ba bjalo ka motho yo a hwilego. Sona sa mpea seatla sa sona sa la go ja sa re go nna: “O se tšhoge. Ke nna Mathomo le Mafelelo a dilo ka moka. Ke nnaena wa go phela. Ke be ke hwile, fela bjale ke phelela sa ruri. Ke laola bahu le bodulabahu. Bjale ge, ngwala tše o di bonago, tše di diregago gonabjale le tše di tlago direga ka morago. Se ke sona sephiri sa dinaledi tše di šupago tše o di bonago ka seatleng sa ka sa go ja, le sa dihlomamabone tše di šupago tše tša gauta: dinaledi tše di šupago tše ke barongwa ba Modimo ba diphuthego tše di šupago, gomme dihlomamabone tše di šupago tše ke diphuthego tše di šupago tšeo.” “Ngwalela morongwa wa Modimo wa phuthego ya Efeso o re: “Yo a swerego dinaledi tše di šupago ka seatla sa la go ja, yo a sepelago gare ga dihlomamabone tše di šupago tša gauta o re: Tše le di dirago ke a di tseba; ke tseba le maitapišo a lena, le kgotlelelo ya lena, le go tenwa ke bokgopo ga lena, le gore bao ba ipitšago barutiwa etšwe e se bona le ba lekotše mme la lemoga gore ke bafeane. Le na le kgotlelelo, le tlaišitšwe ka baka la ka, gomme ga se la lapa. Eupša se ke le solelago sona ke ge le se sa nthata bjalo ka pele. Gopolang gore le be le nthata bjang. Sokologang, gomme le dire tše le bego le di dira pele. Ge le sa sokologe, ke tla tla go lena ka tšea sehlomamabone sa lena madulong a sona. Fela se se ka le holago ke gore le hloile tše di dirwago ke Banikolaite, bjalo ka ge le nna ke di hloile. “Yo a nago le tsebe a a kwe se Moya o se botšago diphuthego. “Yo a ka fenyago ke tla mo fa dikenywa tša sehlare sa bophelo se se lego ka Paradeising ya Modimo, a ja.” “Ngwalela morongwa wa Modimo wa phuthego ya Smirna o re: “Yo e lego Mathomo le Mafelelo a dilo ka moka, yo a ilego a hwa mme a phela gape, o re: Ke tseba mathata a lena le bodiidi bja lena, fela nnete ke gore le bahumi. Ke tseba dikgobošo tše bao ba ipitšago Bajuda etšwe e se bona ba le pharago ka tšona; gape bona ke ba phuthego ya Sathane. Le se ke la boifa tše le tlilogo hlokofatšwa ka tšona. Theeletšang! Sathane o tlilo lahlela ba bangwe ba lena kgolegong gore Modimo a le leke, gomme matshwenyego a lena a tla tšea matšatši a lesome. Le mpotegele, le ge e le gore seo se ka le iša lehung, gomme ke tla le putsa ka bophelo bjo bo sa felego. “Yo a nago le tsebe a a kwe se Moya o se botšago diphuthego. “Yo a ka fenyago, lehu la bobedi le ka se mo dire selo le gatee.” “Ngwalela morongwa wa Modimo wa phuthego ya Pergamone o re: “Yo a swerego tšhoša ya magale a mabedi o re: Mo le dulago gona ke a go tseba, ke mo go lego setulo sa bogoši sa Sathane. Le mpotegetše, ga se la lahla tumelo ya lena, ešita le nakong yela Antipase yola wa go bega molaetša wa ka ka potego a bolailwe moo ga gabolena mo go dulago Sathane. Fela go na le dilwana di se kae tše ke le solelago tšona: Moo go lena go na le ba ba sa kgomaretšego thuto ya Bileamo yola wa go hlohleletša Balaka go diriša setšhaba sa Israele dibe ka go ba leša didimo le go ba febiša. Ka wona mokgwa wo mobjalo, moo go lena go na le ba ba latelago dithuto tša Banikolaite. Bjale ge, sokologang! Ge le sa sokologe ke tla tla go lena ka pejana ka lwa le batho bao ka tšhoša ye e tšwago ka molomong wa ka. “Yo a nago le tsebe a a kwe se Moya o se botšago diphuthego. “Yo a ka fenyago ke tla mo fa manna a a fihlilwego. Ke tla mo fa le leswikana le lešweu leo go lona go ngwadilwego leina le lefsa le le sa tsebjego ke motho ntle le yena yoo a le fiwago.” “Ngawalela morongwa wa Modimo wa phuthego ya Tiatira o re: “Morwa wa Modimo yoo mahlo a gagwe a lego bjalo ka kgabo ya mollo, maoto a gagwe a phadimago baibai, o re: Tše le di dirago ke a di tseba. Ke tseba le lerato la lena, le tumelo ya lena, le go direla ba bangwe ga lena, le go kgotlelela ga lena. Ke tseba gore tše le di dirago bjale di feta tše le bego le di dira pele. Fela se ke le solelago sona ke gore le dumelela mosadi yola ba rego ke Isebele, a ipitšago moprofeta, go ruta le go fora bahlanka ba ka gore ba febe, le gore ba je didimo. Ke mo file nako gore a sokologe, eupša ga a nyake go sokologa bofebeng bja gagwe. Ka gona ke tla mo otla ka go mo dira molwetši wa kobo, le bao ba bego ba otswa naye ke tla ba hlokofatša kudu, ge ba sa sokologe bokgopong bjo ba bo dirago le yena. Le gona ke tla bolaya balatedi ba gagwe ka bolwetši bja leuba. Ke mo diphuthego ka moka di tlago tseba gore ke nna ke tsebago tša ka pelong ya motho gabotse. Yo mongwe le yo mongwe wa lena ke tla mo otla go ya ka tše a di dirilego. “Eupša lena ba bangwe ba Tiatira ga se la latela thuto yeo; ga se la ithuta tšeo go thwego ke ‘diphiri tše dikgolo tša Sathane’. Ke le tsebiša gore nka se le rweše morwalo wo mongwe. Fela le sware seo le nago le sona le se tiiše go fihlela ke etla. Yo a ka fenyago a ba a phetha tše ke di nyakago go fihlela mafelelong a lefase, “ke tla mo fa maatla a go buša ditšhaba. O tla di buša ka lepara la tshipi, a ba a di pšhatlaganya bjalo ka pitša. “Ke ona maatla a ke a filwego ke Tate. Ke tla ba ka mo fa le naledi ya Mphatlalatšane. “Yo a nago le tsebe a a kwe se Moya o se botšago diphuthego.” “Ngwalela morongwa wa Modimo wa phuthego ya Sardese o re: “Yo a nago le meoya ye e šupago ya Modimo le dinaledi tše di šupago o re: Tše le di dirago ke a di tseba; ke a tseba gore batho ba re le a phela, etšwe le hwile. Ka gona, itsošeng, le tsošološe dimpho tša Sekriste pele di hwela ruri. Gobane ke lemogile gore tše le di dirago ga sešo ya ba tše di lokilego go felela mahlong a Modimo wa ka. Ka gona, gopolang ka mo le ilego la theeletša Taba ye Botse ya Modimo ka mafolofolo mola le e kwa, gomme le e boloke, le sokologe. Ge le sa itsoše ke tla le wela godimo bjalo ka lehodu le sa itebetše, ebile le ka se tsebe nako ye ke tlago go le wela godimo ka yona. Eupša go na le ba mmalwa moo ga gabolena, Sardese, ba ba sego ba tšhilafatša diaparo tša bona. Bona ba tla sepela le nna ba apere diaparo tše ditšhweu, ka ge go ba swanetše. Yo a ka fenyago le yena o tla apešwa diaparo tše ditšhweu, gomme nka se phumole leina la gagwe pukung ya ba ba phelago. Ke tla begela Tate le barongwa ba gagwe gore yoo ke wa ka. “Yo a nago le tsebe a a kwe se Moya o se botšago diphuthego.” “Ngwalela morongwa wa Modimo wa phuthego ya Filadelfia o re: “Yo e lego yo mokgethwa le wa go botega, yo a swerego sekgonyo se e bego e le sa Dafida, yo e rego ge a bula mojako gwa se be le yo a ka kgonago go o tswalela, ge a o tswalela gwa se be le yo a ka kgonago go o bula, “o re: Tše le di dirago ke a di tseba. Ke le buletše mojako wo o lego mo pele ga lena, gomme ga go motho yo a kago o tswalela. Ke a tseba gore ga le na maatla a mantši, eupša le latetše thuto ya ka, la mpotegela. Bjale theeletšang! Ge e le bao ba phuthego ya Sathane bona, bafeane bao ba go ipitša Bajuda etšwe e se bona, ke tla ba dira gore ba tle ba le khunamele, ba tsebe gore ke a le rata. Ka ge le phethile taelo ya ka ya gore le kgotlelele, le nna ke tla le lotola nakong ya moleko wo o tlilogo tla lefaseng ka moka go leka batho. Ke kgauswi le go tla. Le sware seo le nago le sona le se tiiše, gore le se tlo amogwa ke motho sefoka sa lena. Yo a fentšego ke tla mo dira kokwane ka tempeleng ya Modimo wa ka, gomme a ka se tsoge a tlogile gona. Ke tla mo ngwala leina la Modimo wa ka le la motse wa Modimo wa ka, Jerusalema ye mpsha, ye e tlago theoga e etšwa legodimong go Modimo wa ka. Le gona ke tla mo ngwala leina la ka le lefsa. “Yo a nago le tsebe a a kwe se Moya o se botšago diphuthego.” “Ngwalela morongwa wa Modimo wa phuthego ya Laodisea o re: “Yo e lego Amene, yena hlatse ye e botegago ka nnete, yo tšohle tše di hlodilwego ke Modimo di tšwago go yena, o re: Tše le di dirago ke a di tseba; ke a tseba gore ga le tonye ebile ga le fiše. Nke nkabe le tonya goba le fiša. Eupša ka ge le le boruthonyana fela – le sa fiše ebile le sa tonye – ke tla le tshwa ka molomong wa ka. Etse le re: ‘Re humile mme re atlegile; ga re hloke selo.’ Fela ga le tsebe gore le a hloiša, le hlomola pelo, le a diila, le foufetše, le itlhobotše. Ka gona, ke le eletša gore le reke gauta ye e sego ya tswakwa go nna, gore le tle le hume. Le reke le diaparo tše ditšhweu gore le tle le apare le ikhupetše lepono. Le reke le sehlare sa go tlotša mahlo gore le tle le kgone go bona. Gape nna ba ke ba ratago ke a ba kgala, ka ba otla. Ka gona, di išeng hlogong le sokologe. Theeletšang! Ke ema mojako ka kokota; ge motho a ka re ge a ekwa lentšu la ka a mpulela mojako, ke tla tsena mme ra ja mmogo. Yo a ka fenyago ke tla mo dudiša le nna setulong sa ka sa bogoši, go swana le nna ge ke fentše mme bjale ke dutše le Tate setulong sa gagwe sa bogoši. “Yo a nago le tsebe a a kwe se Moya o se botšago diphuthego.” Ka morago ka tlelwa gape ke pono mme ka bona mojako wo o bulegilego legodimong. Gomme gwa kwagala lentšu le nkego ke mollo wa phala, lela le bego le boletše le nna pele, la re: “Nyogela mono, mme ke tla go bontšha tše di swanetšego go hlaga ka moso.” Gateetee ka tsenwa ke Moya. Ka bona setulo sa bogoši se na le yo a se dutšego legodimong. O be a bonala a phadima botala le bohwibidu bja mebala ya magakabje, gomme setulo seo se be se dikologilwe ke molalatladi wa mmala wa botala bja legakabje. Se be se dikaneditšwe ke ditulo tše dingwe tša bogoši tše masome a mabedi a metšo ye mene, gomme godimo ga tšona go dutše bagolo ba masome a mabedi a metšo ye mene ba apere diaparo tše ditšhweu, mme dihlogong ba rwele mefapahlogo ya gauta. Moo setulong sa bogoši go be go etšwa magadima le mekidimetšo le dituduma. Mo pele ga sona go be go tuka mabone a a šupago, e lego meoya ye e šupago ya Modimo. Pele ga sona gape go be go na le selo sa go swana le lewatle le nkego ke galase, sa go bonatša bjalo ka legakadima. Ka mathoko a setulo seo sa bogoši go be go na le diphedi tše nne tše di tletšego mahlo ka pele le ka morago. Sa mathomo se be se swana le tau, sa bobedi se swana le poo, sa boraro se na le sefahlego sa go swana le sa motho, gomme sa bone se swana le ntšhu ye e fofago. Sengwe le sengwe sa diphedi tšeo tše nne se be se na le diphego tše di selelago, gomme tšona di tletše mahlo ka ntle le ka gare. Bošego le mosegare di be di duletše go opela di re: “Yo mokgethwa, yo mokgethwa, yo mokgethwa ke Morena Modimo Ramaatlaohle yo a bego a le gona, yo a lego gona, gape a sa tlilogo tla.” Di opela dikoša tša go tumiša le go hlompha le go leboga, di opelela yo a dutšego setulong sa bogoši, yo a phelago go ya go ile. Ge di opela, bagolo bale ba masome a mabedi a metšo ye mene ba itahlela fase pele ga yo a dutšego setulong sa bogoši, ba mo khunamela, yena a phelago go ya go ile. Ba bea mefapahlogo yela ya bona pele ga setulo sa bogoši ba re: “Morena le Modimo wa rena, o swanelwa ke letago le tlhompho le maatla, gobane ke wena o hlodilego tšohle, mme ke ka thato ya gago ge di le gona, di hlodilwe.” Ka bona puku ka seatleng sa go ja sa yo a dutšego setulong sa bogoši. Yona e be e ngwadilwe ka mo le ka mo, gomme e tswaletšwe ya kgomaretšwa ka dikgomaretši tše di šupago. Ka bona morongwa wa senatla a goelela a botšiša a re: “Ke mang yo a lokelago go kgomarolla dikgomaretši tša puku le go e bula?” Eupša gwa hlokega motho legodimong le lefaseng le ka fase ga lefase yo a lokelago go e bula le go e bala. Nna ka lla gabohloko ge go se yo a lokelago go e bula le go e bala. Fela yo mongwe wa bagolo bale a re go nna: “O se ke wa lla. Bona, Tau ya go tšwa kgorong ya Juda, e lego setlogolokhukhu sa Dafida, o fentše manaba a gagwe, gomme ke yena a kgonago go kgomarolla dikgomaretši tše di šupago tšeo le go bula puku.” Mo gare ga bagolo bale le setulo sa bogoši se se bego se dikaneditšwe ke diphedi tšela tše nne, ka bona go eme Kwana ye nkego e bolailwe, e na le manaka a a šupago le mahlo a a šupago ao e lego meoya ye e šupago ya Modimo ye e bego e romilwe lefaseng ka moka. Kwana yela ya tla ya tšea puku yela ka seatleng sa go ja sa yo a dutšego setulong sa bogoši. Ge e e tšea bjalo, diphedi tšela tše nne le bagolo bale ba masome a mabedi le ba bane ba itahlela fase mo pele ga Kwana, ba e lotšha, mongwe le mongwe a swere harepa, ba swere le dibjana tša gauta tše di tletšego seorelo; ke tšona dithapelo tša badumedi. Ba be ba opela sefela se sefsa ba re: “O lokela go tšea puku yeo le go e kgomarolla dikgomaretši. Gobane o ile wa bolawa, gomme ka madi a gago wa rekollela Modimo batho ba go tšwa dikgorong tšohle, le malemeng ohle, le ditšhabeng tšohle, le merafeng yohle; wa ba dira mmušo wa baprista ba go hlankela Modimo wa rena, gomme ba tla buša lefaseng.” Ge ke ntše ke lebeletše, ka kwa mantšu a barongwa ba diketekete tša go se balege. Ba be ba eme ba dikaneditše setulo sa bogoši le diphedi tšela tše nne le bagolo bale, ba goelela ba re: “Kwana ye e bego e bolailwe e lokela go fiwa maatla le lehumo le bohlale le bonatla le tlhompho le letago le tumišo!” Ka kwa le dihlolwa tšohle tša legodimong le tša lefaseng le tša ka fase ga lefase le tša ka lewatleng – a ke re diphedi ka moka tše di lego mo gohle – ka di kwa di goelela di re: “Go yo a dutšego setulong sa bogoši le go Kwana go išwe theto le tlhompho le tumišo le maatla go ya go ile!” Diphedi tšela tše nne tša fetola tša re: “Amene!” Bagolo bale bona ba itahlela fase ba khunamela Modimo le Kwana. Ka bona Kwana yela e kgomarolla sekgomaretši sa mathomo sa tšela tša go šupa, gomme ka kwa se sengwe sa diphedi tšela tše nne se goelela ka lentšu le legolo le nkego ke tladi e ratha se re: “Etla!” Ge ke lebelela, ka bona go tšwelela pere ye tšhweu. Monamedi wa yona o be a swere bora mme a fiwa mphapahlogo. A tšwa e le mofenyi yo a yago go fenya gape. Ge Kwana yela e kgomarolla sekgomaretši sa bobedi, ka kwa sephedi sa bobedi se re: “Etla!” Gwa tšwelela pere ye nngwe, yona e le ye khunong. Monamedi wa yona a fiwa maatla gore a amoge lefase khutšo, gore batho ba bolayane. Yena a fiwa tšhoša ye kgolo. Ge Kwana yela e kgomarolla sekgomaretši sa boraro, ka kwa sephedi sa boraro se re: “Etla!” Ge ke lebelela ka bona go tšwelela pere ye ntsho. Monamedi wa yona o be a swere keloboima ka seatla. Ka kwa se nkego ke lentšu le le tšwago mokgahlong ga diphedi tšeo tše nne le re: “Serotwana se tee sa mabele se rekwa ka papetlana ya silibera. Tše tharo tša garase le tšona di rekwa ka papetlana ya silibera. Mehlware le merara yona o se e senye.” Ge Kwana yela e kgomarolla sekgomaretši sa bone, ka kwa sephedi sa bone se re: “Etla!” Ge ke lebelela ka bona go tšwelela pere ye tshehla. Leina la monamedi wa yona e be e le Lehu, a šetšwe morago ke Bodulabahu. Bona ba fiwa maatla a go bolaya karolo ya bone ya lefase ka ntwa le ka tlala le ka bolwetši bja leuba le ka dibata. Ge Kwana yela e kgomarolla sekgomaretši sa bohlano, ka bona meoya ka fase ga aletare, meoya ya ba ba ilego ba bolaelwa lentšu la Modimo le go botegela bohlatse bjoo bja bona. Ba goelela ba re: “Mong wa rena yo mokgethwa wa go botega, na go sa šetše nako ye kaakang pele o ahlola batho ba lefase, wa lefeletša lehu la rena?” Mongwe le mongwe wa bona a fiwa seaparo se sešweu, gomme ba botšwa gore ba thekge ditho sebakanyana, go fihlela palo e felela ya bahlankakabona le badumedikabona ba ba tlago bolawa bjalo ka bona. Ka bona Kwana yela e kgomarolla sekgomaretši sa boselela. Lefase la šikinyega ka maatla, letšatši la ntshofala bjalo ka lešela la mogohla, le ngwedi wa hwibila bjalo ka madi. Dinaledi tša wela fase bjalo ka mago a go se butšwe ge a hlohlorwa ke ledimo. Leratadima la timelela bjalo ka lengwalo ge le phuthwa, le dithaba le dihlakahlaka tšohle tša šuthišwa madulong a tšona. Dikgoši tša lefase, le bakgomana, le balaodi ba bahlabani, le bahumi, le ba maemo, le ba bangwe batho ka moka, e ka ba makgoba goba balokologi, ba iphihla ka maweng le ka magageng. Ba botša dithaba le matlapa ba re: “Re weleng godimo le re tšhabiše mahlo a yo a dutšego setulong sa bogoši le kotlo ya Kwana. Letšatši lela la go šiiša la kotlo ye ba tlilogo re otla ka yona le fihlile, gomme ke mang yo kago e kgotlelela?” Ka morago ga moo ka bona barongwa ba bane ba eme dikhutlong tše nne tša lefase, ba swere diphefo tše nne tša lona gore go se be le phefo ye e fokago lefaseng goba lewatleng goba sehlareng. Ka bona morongwa yo mongwe a rotoga a etšwa bohlabatšatši, a swere seswai sa Modimo yo a phelago. A goelela barongwa bale ba bane ba ba bego ba filwe maatla a go senya lefase le lewatle a re: “Le se senye lefase goba lewatle goba dihlare; a re thomeng ka go swaya bahlanka ba Modimo wa rena diphatleng.” Ka kwa gore palo ya bao ba swailwego ke ba dikete tše lekgolo le tše masome a mane le tše nne. E be e le ba dikgoro ka moka tša setšhaba sa Israele. Ba kgoro ya Juda gwa swaiwa ba dikete tše lesome le tše pedi, ba kgoro ya Rubene gwa swaiwa ba dikete tše lesome le tše pedi; ba kgoro ya Gade gwa swaiwa ba dikete tše lesome le tše pedi; ba kgoro ya Asere gwa swaiwa ba dikete tše lesome le tše pedi; ba kgoro ya Naftali gwa swaiwa ba dikete tše lesome le tše pedi; ba kgoro ya Manase gwa swaiwa ba dikete tše lesome le tše pedi; ba kgoro ya Simeone gwa swaiwa ba dikete tše lesome le tše pedi; ba kgoro ya Lefi gwa swaiwa ba dikete tše lesome le tše pedi; ba kgoro ya Isakara gwa swaiwa ba dikete tše lesome le tše pedi; ba kgoro ya Sebulone gwa swaiwa ba dikete tše lesome le tše pedi; ba kgoro ya Josefa gwa swaiwa ba dikete tše lesome le tše pedi; ba kgoro ya Benjamene gwa swaiwa ba dikete tše lesome le tše pedi. Ka morago ga moo ka bona lešaba le legolo le go bego go se motho yo a ka kgonago go le bala. E be e le ba merafe yohle, le dikgoro tšohle, le ditšhaba tšohle, le maleme ohle ba eme pele ga setulo sa bogoši le pele ga Kwana, ba apere dipurapura tše ditšhweu, ba swere makala a mepalema ka diatla. Ba goelela ba re: “Phološo e tšwa go Modimo wa rena yo a dutšego setulong sa bogoši, e tšwa le go Kwana!” Barongwa ka moka ba be ba eme ba dikaneditše setulo sa bogoši, le bagolo bale, le diphedi tšela tše nne. Ke moka ba itahlela fase ka difahlego mo pele ga setulo sa bogoši ba khunamela Modimo ba re: “Amene! Tumišo le letago le bohlale le tebogo le tlhompho le maatla le bonatla e be tša Modimo wa rena go ya go ile! Amene!” Yo mongwe wa bagolo bale a mpotšiša a re: “Na ke bomang ba ba go apara dipurapura tše ditšhweu, gona ba tšwa kae?” Ka mo fetola ka re: “Nnaena ga ke tsebe, morena, go tseba wena.” Yena a mphetola a re: “Ke ba ba tšwago ditlaišegong tše di šiišago. Ba hlatswitše dipurapura tša bona ba di šweufatša ka madi a Kwana. “Ke ka baka leo ba emago mo pele ga setulo sa bogoši sa Modimo ba mo hlankela ka tempeleng ya gagwe bošego le mosegare. Yena yo a dutšego setulong sa bogoši o tla ba šireletša. Ba ka se sa tsoga ba swerwe ke tlala goba lenyora; ba ka se sa tšhungwa ke letšatši goba phišo ye nngwenyana, ka gobane Kwana ye e dutšego gare ga setulo sa bogoši e tla ba yona modiša wa bona, gomme e tla ba iša methopong ya meetse a bophelo, gomme Modimo o tla ba phumola meokgo yohle mahlong.” E rile ge Kwana e kgomarolla sekgomaretši sa bošupa gwa homola gwa re tuu legodimong nako ye e ka bago seripa sa iri. Ke moka ka bona barongwa ba ba šupago ba eme pele ga Modimo go mo hlankela, ba fiwa diphala tše di šupago. Morongwa yo mongwe a tla a ema kgauswi ga aletare a swere setšhumeladiorelo sa gauta. A fiwa diorelo tše dintši gore a di neele gotee le dithapelo tša badumedi bohle godimo ga aletare ya gauta ye e lego pele ga setulo sa bogoši. Muši wa diorelo tšeo di bego di tšhungwa ke morongwa yola wa rotogela go Modimo gotee le dithapelo tša badumedi. Ke moka morongwa yoo a tšea setšhumeladiorelo sela, a se tlatša mollo wo o tšwago aletareng, a o kgotholela fase. Gwa kwagala mekidimetšo le dituduma, magadima a bonala, le lefase la šikinyega. Barongwa bale ba go šupa ba go swara diphala tše di šupago ba itokišetša go di letša. Morongwa wa pele a letša ya gagwe, gomme gwa na sefako le mollo di tswakane le madi tša tloromišwa lefaseng. Gwa swa karolo ya boraro ya lefase, le karolo ya boraro ya dihlare, le bjang ka moka bjo botala. Morongwa wa bobedi a letša ya gagwe, gomme selo se nkego ke thaba ye kgolo ye e tukago mollo sa lahlelwa ka lewatleng. Karolo ya boraro ya lewatle ya fetoga madi; karolo ya boraro ya diphedi tšohle tša ka lewatleng ya hwa, le karolo ya boraro ya maselawatle ya fedišwa. Morongwa wa boraro a letša ya gagwe, gomme gwa wa naledi ye kgolo go tšwa leratadimeng e tuka bjalo ka serumola, ya wela karolo ya boraro ya dinoka, ya wela le didiba tša meetse. Leina la naledi yeo ke “Lengana”. Karolo ya boraro ya meetse ya galaka, gomme batho ba bantši ba ba nwelego meetse ao a go galaka ba hwa. Morongwa wa bone a letša ya gagwe, gomme karolo ya boraro ya letšatši le ya ngwedi le ya dinaledi ya rathwa mme ya fifala. Gwa fifala nako ye e ka bago karolo ya boraro mosegare, le karolo ya boraro bošego. E rile ke sa lebeletše, ka kwa ntšhu ye e fofago kua godimo sebakabakeng e goelela e re: “Joo! joo! Badulalefaseng ga ba le bona, ge barongwa bale ba bangwe ba bararo ba tlilo letša tša bona diphala!” Morongwa wa bohlano a letša ya gagwe. Ka bona naledi ya sebakabakeng e wetše fase, gomme ya fiwa sekgonyo sa molete wo o išago fasefase. Ya khurumola molete woo, gomme go wona gwa kuelela muši wo nkego wa mokubego wo mogolo, mme letšatši le leratadima tša thibja ke mokuelelo woo wa go tšwa moleteng. Gwa tšwa tšie moo mokuelelong mme ya wa nageng, ya fiwa maatla a go swana le a phepheng. Ya laelwa gore e se senye bjang goba mehlare goba dimela tše dingwe, e upše e lome fela batho ba ba se nago leswao la Modimo mo diphatleng tša bona. Ya laelwa gore e se ba bolaye, fela e ba hlokofatše dikgwedi tše tlhano. Bohloko bja yona bo swana le bja phepheng ge e lomile motho. Dikgweding tšeo tše tlhano batho ba tla inyakela lehu, fela ba ka se le hwetše; ba tla duma go hwa, fela lehu le tla ba tšhaba. Tšie yeo e be nke ke dipere tše di hlametšwego ntwa. Hlogong ya yona e be e rwele se nkego mphapahlogo wa gauta, le sefahlego sa yona se be se swana le sa motho. E be e na le moriri wa go swana le leetse la basadi, gomme meno a yona nke ke a tau. E be e na le dilo tše nkego ke difahlelakgara tša tshipi, le lešata la maphego a yona e be nke ke la dikoloi tše dintši tše di gogwago ke dipere tše di kitimelago ntweng. E be e na le mosela wa lebolela bjalo ka wa phepheng, gomme maatla a yona a go hlokofatša batho dikgwedi tšeo tše tlhano a be a le mo moseleng wa yona. E be e na le kgoši ya go e buša, e lego morongwa wa molete, yo leina la gagwe ka Seheberu ba rego ke Abadone, gomme ka Segerike ba rego ke Apolione, ke go re “Mofediši”. Masetlapelo a mathomo a fetile; go sa tlilo tla a mangwe a mabedi. Morongwa wa boselela a letša ya gagwe phala. Ka kwa lentšu le etšwa dikhutlong tše nne tša aletare ya gauta ye e lego mo pele ga Modimo. La botša morongwa wa boselela yo a swerego phala la re: “Kgokolla barongwa bale ba bane ba ba kgokilwego ka kua nokeng ye kgolo ya Yufratese!” Barongwa bao ba bane ba ile ba kgokollwa. Gape ba be ba šetše ba lokišeditšwe yona nako ye, le lona letšatši le, le yona kgwedi ye, le wona ngwaga wo, gore ba bolaye karolo ya boraro ya batho. Ke ile ka kwa ge go bolelwa palo ya bahlabani ba dipere; bona e be e le ba dimilione tše makgolo a mabedi. Moo ponong ya ka ke bone dipere le banamedi ba tšona di le ka mokgwa wo: banamedi ba be ba apere difahlelakgara tša bohwibidu bja mollo, tša botala bja leratadima, tša modipa wa tshebela. Dihlogo tša tšona di be di swana le tša ditau, gomme di ntšha mollo le muši le tshebela ka melomo. Karolo ya boraro ya batho e ile ya bolawa ka dikotlo tše tharo tše tša go ntšhwa ke dipere ka melomo: mollo le muši le tshebela. Gobane maatla a pere tšeo a be a le ka melomong ya tšona le meseleng ya tšona. Mesela ya tšona e swana le dinoga, e na le dihlogo gomme di gobatša batho ka yona. Batho ba go šala, bao ba ilego ba se bolawe ka dikotlo tše, ba ile ba se lahle medingwana ye ba itiretšego yona. Ba se lese go khunamela bademone, goba medingwana ya gauta le ya silibera le ya mphiri le ya maswika le ya kota, e lego dilo tše di sa kgonego go bona le go kwa le go sepela; le gona ba se tlogele dipolao le boloi le bohlola le bohodu bja bona. Ka morago ka bona yo mongwe morongwa wa senatla a theoga legodimong a apere leru, a na le molalatladi hlogong; sefahlego sa gagwe nke ke letšatši, mme maoto ona nke dikokwane tša mollo. Ka seatleng o be a swere lengwalwana le le phutholotšwego. O be a gatile lewatle ka leoto la go ja, ka la mmangele a gatile lefase, gomme a goelela ka lentšu le legolo le nkego ke la tau e rora. Ge a goelela bjalo, dituduma tše di šupago tša mo araba ka go kidimetša. E rile ge dituduma tšeo di seno bolela, ka re ke sa re ke ngwala tše di bolelwago, ka kwa lentšu le etšwa legodimong le re: “Tše di boletšwego ke dituduma tše di šupago tšeo e be sephiri, o se di ngwale!” Morongwa yola ka go mmona a gatile lewatle le lefase a emišetša seatla sa gagwe sa la go ja legodimong, a ikana ka yena Mophelelasaruri yo a hlodilego legodimo le lefase le lewatle le tšohle tše di lego mo go tšona, a re: “Tiego ga e sa tlo ba gona! Se se tlago ba gona ke gore mohla morongwa wa bošupa a letša phala Modimo o tla phethagatša sephiri sa gagwe, bjalo ka ge a begetše bahlanka ba gagwe, baprofeta.” Lentšu lela ka go le kwa le etšwa legodimong la bolela le nna gape la re: “Eya o tšee lengwalwana lela la go bulwa le lego ka seatleng sa morongwa yola a gatilego lewatle le lefase.” Ka ya go morongwa yoo ka re a mphe lengwalwana leo. Yena a re go nna: “Le tšee o le je; le tla ba bose bjalo ka todi ka ganong, fela ka mpeng le tla galaka.” Ka tšea lengwalwana leo ka seatleng sa gagwe ka le ja, gomme la ba bose bjalo ka todi ka ganong. Fela ka re go le metša la ntomiša mala. Ke ge ke botšwa gwa thwe: “Eya o boeletše o porofete ka ga ditšhaba le merafe le maleme le dikgoši.” Ke moka ka fiwa patla ye nkego ke thupa ya go ela, gomme gwa thwe: “Etla o ele tempele ya Modimo le aletare, o be o bale le bao ba mo khunamelago ka tempeleng. Fela lapa la ka ntle o le lese, o se ke wa le ela, ka gobane le neetšwe baditšhaba bao ba tlago gatakela motse wo mokgethwa dikgwedi tše masome a mane le tše pedi. Ke tla laela dihlatse tša ka tše pedi tša go apara diaparo tša mogohla go porofeta matšatšing ao a sekete le makgolo a mabedi le masome a a selelago.” Dihlatse tšeo tše pedi ke mehlware yela ye mebedi le dihlomamabone tšela tše pedi tše di emego mo pele ga Morena wa lefase. Ge motho a leka go di hlokofatša, go tšwa mollo ka melomong ya tšona o tšhume lenaba leo la tšona. Ge motho a ka re o di kweša bohloko, o swanetše go bolawa ka wona mokgwa woo. Ba na le maatla a go thiba magodimo gore nakong ya ge ba porofeta go se ne pula. Le maatla a go fetola meetse madi ba na le ona. Le a go otla lefase ka go rata ka kotlo efe le efe ba na le ona. E tla re ge ba fetša go hlatsela, gwa tšwa sebata ka moleteng woo wa go iša fasefase mme sa lwa nabo. Se tla ba fenya sa ba bolaya, gomme ditopo tša bona di tla rapalala mokgotheng wa motse wo mogolo moo go bapotšwego Morena wa bona, motse woo ka go swantšha ba rego ke Sodoma goba Egepeta. Ditopo tša bona di tla hlalelwa ke ba ditšhaba tšohle, le ba dikgoro tšohle, le ba maleme ohle, le ba merafe yohle matšatši a mararo le seripa, gomme ba se di dumelele gore di bolokwe. Badudi ba lefase ba tla thabela lehu la baprofeta bao ba babedi, ka ge ba tlaišitše batho gabohloko. Ba tla hlalala ba romelana dimpho. Fela e rile ge go fetile matšatši ao a mararo le seripa moya wo o phedišago wa go tšwa go Modimo wa tsena ka ditopong tša baprofeta bao. Ba emelela, gomme bao ba ba bonago ba tšhoga kudu. Ke mo baprofeta bao ba kwelego lentšu le goelela le etšwa legodimong le re go bona: “Rotogelang mono!” Ba rotogela legodimong ka leru, manaba a bona a ba lebeletše. Ka yona nako yeo lefase la šikinyega kudu; karolo ya lesome ya motse ya pšhatlagana, gomme gwa hwa batho ba dikete tše di šupago. Ba ba šetšego ba tšhoga kudu ba tumiša Modimo wa legodimong. Bjale ke gona ke go fetile masetlapelo a bobedi; kgauswinyana go tla tla masetlapelo a boraro. Morongwa wa bošupa a letša phala ya gagwe, gomme legodimong gwa kwagala mantšu a a goelelago a re: “Bjale maatla a go buša lefase ke a Morena wa rena le Mesia wa gagwe, gomme o tla buša go ya go ile!” Bagolo bale ba masome a mabedi le metšo ye mene ba ba dutšego ditulong tša bona tša bogoši pele ga Modimo ba napa ba itahlela fase ka difahlego ba khunamela Modimo ba re: “Wena, Morena Modimo Ramaatlaohle, o lego gona gape o bilego gona, re go leboga ge bjale o šomiša maatla a gago a magolo o buša! Baditšhaba ba ile ba galefa, gomme le wena wa galefa. Bjale go tlile nako ya gore bahu ba ahlolwe, nako ya go putsa bahlanka ba gago, baprofeta, le badumedi le ba ba go boifago, ba bagolo le ba banyenyane. E fihlile nako ya go fediša ba ba fedišago lefase.” Ke moka tempele ya Modimo legodimong ya bulwa, gomme Polokelo ya gagwe ya Kgwerano legodimong ya bonagala. Gwa bonwa le magadima, gwa kwagala mekidimetšo le dituduma, lefase la šikinyega, le sefako se sentši sa na. Gwa bonala semaka se segolo leratadimeng: mosadi a apere letšatši, a beile maoto godimo ga ngwedi, a rwele mphapahlogo wa dinaledi tše lesome le metšo ye mebedi hlogong. E be e le moimana, a llišwa ke bohloko bja lešoko la pelego. Gwa bonala se sengwe semaka leratadimeng. Gwa tšwelela mmamogašwa wo mohwibiduhwibidu wa dihlogo tše di šupago le dinaka tše lesome, o rwele mphapahlogo hlogong ye nngwe le ye nngwe. Wa gogola karolo ya boraro ya dinaledi tša leratadima ka mosela, wa di lahlela fase lefaseng. Wa tla wa ema pele ga mosadi yola a bego a belega, gore o tle o kwametše ngwana wa gagwe ge a seno belegwa. Ke moka mosadi yoo a belega morwa yo a bego a kgethetšwe go tlo buša ditšhaba tšohle ka lepara la tshipi. Eupša ngwana a ubulwa a išwa go Modimo yo a dutšego setulong sa gagwe sa bogoši. Mosadi yola a tšhabela lešokeng, lefelong leo Modimo a bego a mo lokišeditše lona, moo a bego a tlilo hlokomelwa matšatši a sekete le makgolo a mabedi le masome a a selelago. Ka morago gwa tsoga ntwa legodimong. Mikaele le barongwa ba gagwe ba lwa le mmamogašwa wola, mme wona le barongwa ba wona ba itwela. Mmamogašwa wa fenywa, gomme wona le barongwa ba wona ba se sa dumelelwa go dula legodimong. Mmamogašwa woo, yona noga yela ya kgale e bitšwago Diabolose goba Sathane yo a foraforeditšego lefase lohle, o ile wa rakwa. Wa lahlelwa lefaseng gotee le barongwa ba wona. Ke moka ka kwa lentšu le goelela legodimong le re: “Bjale Modimo o phološa badumedi ba gagwe, o bontšha maatla a gagwe le bogoši bja gagwe, gomme le Mesia wa gagwe o bontšha maatla a gagwe, gobane yo a bego a bea bana ba borena molato pele ga Modimo wa rena bošego le mosegare o rakilwe legodimong. Bana ba borena ba mo fentše ka lehu la Kwana, le ka go hlatsela yena. Le gona ba be ba sa tšhabe go hwela tumelo ya bona. Ka gona thabang, lena magodimo le lena bohle le dulago go ona! Eupša lena lefase le lewatle, le ba madimabe! Gobane Diabolose o theogetše go lena a tuka bogale, ka ge a tseba gore nako ye e mo šaletšego ga e nene.” E rile ge mmamogašwa o bona gore o lahletšwe lefaseng, wa lelekiša mosadi yola wa go belega ngwana wa mošemane. Mosadi yoo a fiwa maphego a mabedi a ntšhu ye kgolo gore a fofe a tšhabele bodulong bja gagwe lešokeng, moo a tlago hlokomelwa mengwaga ye meraro le seripa, gore a se hlaselwe ke mmamogašwa. Mmamogašwa woo wa hlatšetša meetse ka morago ga mosadi yoo mme a ela bjalo ka noka gore a mo tšee. Fela lefase la thuša mosadi yoo; la ahlama la metša meetse ale a go hlatšwa ke mmamogašwa. Mmamogašwa wa galefela mosadi yoo, wa ba wa tloga wa yo lwa le ditlogolo tša gagwe tše dingwe, e lego bohle ba ba phethago melao ya Modimo gape ba botegelago go hlatsela Jesu. Ya ba mmamogašwa woo o ema lebopong la lewatle. Ka bona sebata sa manaka a lesome le dihlogo tše di šupago se etšwa ka lewatleng. Mo lenakeng le lengwe le le lengwe se be se na le mphapahlago, gomme hlogong ye nngwe le ye nngwe se na le leina la Modimo, e le gona go mo nyefola. Se be se swana le lepogo, marofa a sona nke ke a bere, molomo wona o swana le wa tau. Mmamogašwa wa abela sebata seo maatla a wona a bogoši le pušo ya wona ye kgolo. Sebata seo se be se bonala nke se gobaditšwe wa go hwa mo hlogong ye nngwe ya sona, eupša ntho ya gona e be e fodile. Batho bohle mo lefaseng ba be ba tlabilwe ke sebata se mme ba se šetše morago. Ba be ba khunamela mmamogašwa woo ka ge o be o abetše sebata seo maatla. Sebata seo le sona ba se khunamela ba re: “Ke mang yo a swanago le sebata se? Yo a kago lwa naso yena ke mang?” Sebata seo se ile sa dumelelwa go bolela ka matepe le bonyefodi, sa dumelelwa le go buša dikgwedi tše masome a mane le tše pedi. Sa thoma go nyefola Modimo le leina la gagwe le bodulo bja gagwe, le ba ba dulago legodimong. Sa ba sa dumelelwa go lwa le badumedi le go ba fenya, sa fiwa maatla a go buša dikgoro tšohle, le ditšhaba tšohle, le maleme ohle, le merafe yohle. Bohle ba ba phelago mo lefaseng ba tla se khunamela, ge e se bao maina a bona a ngwadilwego pele lefase le hlolwa ka pukung ya ba ba phelago ya Kwana yela ya go ka ya bolawa. Yo a nago le tsebe a a theeletše. Yo a lebanwego ke go thopša o tla thopša; yo a lebanwego ke tšhoša, o tla bolawa ka yona. Tše ke ditaba tše di nyakago gore badumedi ba be le kgotlelelo le tumelo. Ka bona se sengwe sebata se rotoga se etšwa lefaseng, se na le manaka a mabedi a go swana le a kgapana, gomme se bolela bjalo ka mmamogašwa. Sa šomiša maatla ohle a sebata sela sa pele ka taelo ya sona. Sa gapeletša batho ba lefase le tšohle tše di lego lefaseng go khunamela sebata sela sa mathomo sa go ba le ntho ye e fodilego. Sebata se sa bobedi se be se dira mehlolo ye megolo; sa theoša mollo wa go tšwa legodimong, sa o neša lefaseng batho ba lebeletše. Sa hlalefetša badudi ba lefaseng ka mehlolo ye se bego se dumeletšwe go e dira ka taelo ya sebata sela sa mathomo. Sa ba botša gore ba bope seswantšho sa sebata sela sa go gobatšwa ka tšhoša fela sa no phela. Sa dumelelwa go phediša seswantšho seo sa go bopša sa sebata sela sa mathomo, mme seswantšho seo sa kgona go bolela le go bolaya ba ba ganago go se khunamela. Sa gapeletša batho ka moka, ba bagolo le ba banyane, bahumi le badiidi, balokologi le makgoba, gore ba swaiwe ka seatleng sa go ja goba phatleng, le gore go se be le yo a kago reka goba a rekiša selo a se a swaiwa leina goba nomoro ye e emetšego leina la sona. Gore o tle o kwešiše taba ye go nyakega bohlale. Yo a hlalefilego a ka kgona go hlatholla nomoro ya sebata seo, gobane nomoro e emela leina la motho. Nomoro ya sona ke makgolo a a selelago le masome a a selelago le metšo ye e selelago. Ge ke lebelela ka bona Kwana e eme godimo ga thaba ya Sione. E be e na le batho ba dikete tše lekgolo le tše masome a mane le tše nne ba ba ngwadilwego leina la yona le la Tatago yona diphatleng tša bona. Ka kwa modumo o etšwa legodimong o swana le wa meetse a mantši, o etša wa tladi. O kwagala nke ke sefela se se letšwago ke baletši ka dikgapa. Batho bao ba be ba opela sefela se sefsa pele ga setulo sa bogoši, le pele ga diphedi tšela tše nne, le pele ga bagolo bale ba masome a mabedi le ba bane. Sefela seo se be se kgonwa fela ke bona bao ba dikete tše lekgolo le tše masome a mane le tše nne ba ba bego ba rekolotšwe gare ga batho ba lefase. Ke ba ba se ba kago ba itšhilafatša ka go robala le basadi; ba hlwekile. Ba latela Kwana gohle mo e yago gona. Ba rekolotšwe gare ga batho ba lefase, gomme ya ba bona ba mathomo ba go neelwa Modimo le Kwana. Ga se ba ka ba bolela maaka; ga ba na bosodi. Ka bona morongwa yo mongwe a fofa kua godimo moyeng, a ilo phatlalatša Taba ye Botse go badudi ba lefase: go merafe yohle, le dikgoro tšohle, le maleme ohle, le ditšhaba tšohle. A goelela a re: “Boifang Modimo le mo reteng! Gobane nako ya gore a ahlole batho e fihlile. Mo khunameleng, yena yo a hlodilego legodimo le lefase le lewatle le methopo ya meetse!” Morongwa wa bobedi a latela yola wa pele a re: “Owaa, o wele! O wele motsesaratlatla wa Babilone! Etse o be o tšhilafatša ditšhaba tšohle ka mediro ya wona ya bohlola. E be nke ke beine ye bogale ye o di nwešago yona.” Morongwa wa boraro a latela bale ba babedi ba pele, a goelela a re: “Yo a khunamelago sebata se le seswantšhobopša sa sona a ba a swaiwa phatleng goba seatleng o tla nwa beine ye e sego ya talošwa ye e lego kotlo ya Modimo, ye a e tšhetšego ka senwelong se e lego kgalefo ya gagwe. O tla hlokofatšwa ka mollo le tshebela pele ga barongwa ba bakgethwa le yona Kwana. Muši wa mollo wo ba hlokofatšwago ka wona o tla kuelela go ya go ile. Bao ba khunamelago sebata seo le seswantšhobopša sa sona, bao ba swailwego leina la sona, ga ba ehuge bošego goba mosegare.” Seo se ra gore badumedi, bona ba ba phethago melao ya Modimo mme ba botegelago Jesu, ba swanetše go ba le kgotlelelo. Ke ge ke ekwa lentšu le etšwa legodimong le re: “Ngwala o re: Ba lehlogonolo ke bao go tloga bjale ba tlago hwa e le ba Morena!” Moya wa fetola wa re: “Ee. Ba tla ikhutša mekatano ya bona, gobane tše ba di dirilego di sepela nabo.” Ge ke lebelela ka bona leru le lešweu leo godimo ga lona go bego go dutše selo se nkego ke motho a rwele mphapahlogo wa gauta, a swere sekele ye bogale ka seatla. Ke moka gwa tšwa morongwa yo mongwe ka tempeleng a goelela yola a dutšego lerung a re: “Tšea sekele ya gago o bune, gobane nako ya go buna e fihlile; bjale mabele lefaseng a budule.” Ke ge yola wa go dula godimo ga leru a tšea sekele ya gagwe, a buna mabele a lefase. Ka bona yo mongwe morongwa a etšwa ka tempeleng ya legodimong, le yena a swere sekele ye bogale. Yo mongwe morongwa a tšwa aletareng, yena e le yo a hlokometšego mollo. A goelela morongwa yola wa go swara sekele ye bogale a re: “Tšea sekele ya gago ye bogale o kgothe dintšhuhla tša diterebe tša lefaseng, gobane di budule!” Morongwa yola a tšea sekele ya gagwe, a kgotha diterebe tša lefaseng, a di lahlela ka bopitlelong bja diterebe bja kgalefo ye kgolo ya Modimo. Diterebe tšela tša pitlwa ka maoto ka bopitlelong bja diterebe ka ntle ga motse, gomme ka moo bopitlelong gwa tšwa madi, a ela monabo wo e ka bago dikilometara tše makgolo a mararo le metara o tee le seripa go iša fase. Ka buša ka bona semaka se sengwe leratadimeng, se segolo sa go tlaba. E be e le barongwa ba ba šupago ba swere dikotlo tše di šupago, e lego tšona tša mafelelo, ka gobane ke tšona mafelelo a bogale bja Modimo. Ka ba ka bona selo se se swanago le lewatle le nkego ke galase, le le hlakahlakanego le mollo. Ka bona le bale ba bego ba ile ba fenya sebata sela le seswantšhobopša sa sona le yola leina la gagwe le emetšwego ke nomoro. Bona ba be ba eme kgauswi le lewatle leo la go swana le galase ba swere dikgapa tše ba bego ba di filwe ke Modimo, ba opela kopelo ya Moshe, mohlanka wa Modimo, le ya Kwana ba re: “Morena Modimo Ramaatlaohle, mediro ya gago ke ye megolo, ebile e a makatša! Wena Kgoši ya ditšhaba, tsela tša gago di lokile ebile di a tshepega. Ke mang yo a ka se go tšhabego goba a se go rete, Morena? Ke wena fela o lego yo mokgethwa. Ditšhaba tšohle di tla tla tša go khunamela, gobane di tla be di bona ge o dira tšohle ka toka.” Ka morago ga moo ka bona tempele legodimong e bulegile e na le Tente ya Kgwerano ka gare. Ka moo tempeleng gwa tšwa barongwa ba ba šupago ba swere dikotlo tše di šupago, ba apere diaparo tše di hlwekilego tša mabaibai, ba ipofile dikgara ka mapanta a gauta. Se sengwe sa diphedi tšela tše nne sa fa barongwa bale ba šupago meruswana ye e šupago ya gauta e tletše bogale bja Modimo yo a phelago go ya go ile. Tempele ya tlala muši wa go tšwa letagong la Modimo le maatleng a gagwe, gomme gwa se be le yo a kgonago go tsena ka tempeleng go ba go fihlela dikotlo tšela tša go tlišwa ke barongwa bale ba go šupa di fela. Ka kwa lentšu le goelela le etšwa ka tempeleng le botša barongwa bale ba go šupa le re: “Sepelang le yo tšholla meruswana yeo ya go šupa ya kgalefo ya Modimo lefaseng!” Morongwa wa mathomo a ya a tšholla moruswana wa gagwe lefaseng. Bao ba bego ba swailwe leswao la sebata sela, bona bao ba bego ba khunamela seswantšhobopša sa sona, ba tšwa dišo tša go šiiša tše bohloko. Morongwa wa bobedi a tšholla moruswana wa gagwe godimo ga lewatle. Meetse a gona a ba bjalo ka madi a motho yo a hwilego, gomme sephedi se sengwe le se sengwe ka moo lewatleng sa hwa. Morongwa wa boraro a tšholla moruswana wa gagwe godimo ga dinoka le methopo ya meetse, gomme tša fetoga madi. Ka kwa morongwa yo a hlokometšego meetse a re: “O yo mokgethwa, wena o lego gona, gape o bilego gona. O lokile ka gobane o ahlotše bjalo. Ba bolaile badumedi le baprofeta, gomme o ba nošitše madi. Ke se se ba lebanego.” Ke moka ka kwa lentšu le etšwa aletareng le re: “Morena Modimo Ramaatlaohle, dikahlolo tša gago ke tša nnete ebile di lokile.” Morongwa wa bone a tšholla moruswana wa gagwe godimo ga letšatši, gomme lona la dumelelwa go tšhuma batho ka mollo wa lona. Ba tšhungwa ke phišo ye kgolo ya lona, gomme ba nyefola Modimo yo a laolago dikotlo tše. Fela ba se sokologe gore ba rete Modimo. Morongwa wa bohlano a tšholla moruswana wa gagwe godimo ga setulo sa bogoši sa sebata sela. Mmušo wa sona wa welwa ke leswiswi, batho ba itoma maleme ka baka la bohloko bjo ba bo kwago, ba ba ba nyefola Modimo wa legodimong ba mo solela bohloko bjoo bja bona le dišo. Fela bona ba se itsholele ditiro tša bona. Morongwa wa boselela a tšholla moruswana wa gagwe godimo ga noka ye kgolo ya Yufratese. Noka yeo ya pšha, mme ya ba ge dikgoši tša go tšwa bohlabela di namile di bulegetšwe ke tsela. Ke ge ke bona meoya ye mebe ye meraro ya go swana le digwagwa. E be e etšwa ka molomong wa mmamogašwa, le ka go wa sebata sela, le ka go wa moprofeta wa maaka. Ke yona meoya ya bademone ye e dirago mehlolo, ye e yago go dikgoši tšohle tša lefase, e di rape go ya ntweng ka Letšatšilegolo la Modimo Ramaatlaohle. “Tsebang, ke tla bjalo ka lehodu. Go lehlogonolo yo a dulago a phafogile, a apere diaparo tša gagwe gore a se tlo sepela a le fela mme a bonelwa ke batho.” Meoya yela ya kgoboketša dikgoši tšela felo mo ka Seheberu go bitšwago Harmagedone. Morongwa wa bošupa a tšholla wa gagwe moruswana lefaufaung. Gwa kwagala lentšu le legolo le etšwa setulong sa bogoši ka tempeleng le re: “Go phethegile!” Gwa ba le magadima le mekidimetšo le dituduma, le tšhikinyego ye e šiišago ya lefase. E sa le go tloga mola batho ba phelago mo lefaseng ga se gwa ka gwa ba le tšhikinyego ye kaaka ya lefase. Motsemogolo wa kgaoga wa tšwa dikarolo tše tharo, metse ya ditšhaba yona ya pšhatlagana. Modimo a gopola Babilone, motsemogolo, gomme a o noša senwelo sa gagwe seo se swerego beine ye e lego kgalefo ya gagwe. Dihlakahlaka tšohle tša timelela, dithaba ka moka tša lewa ke bjelele. Sefako se sekoto sa go imela dikilokramo tše masome a mahlano ka se tee sa rothotha batho se ewa godimo, mme bona ba nyefola Modimo ka baka la kotlo yeo ya sefako, gobane e be e le ya masetlapelo. Yo mongwe wa barongwa bale ba go šupa ba go swara meruswana ye e šupago a tla go nna, a fihla a re: “Etla ke go bontšhe gore segwebakathobalo se segolo se se dutšego kgauswi le meetse a mantši se tlilo otlwa bjang. Magoši a lefase a be a dira tša bohlola le yena, le badudi ba lefase ba be ba tagwa ke beine ya bohlola bja gagwe.” Ka re ke sa tsenwe ke Moya morongwa yoo a nkuka a nkiša lešokeng. Fao ka bona mosadi a nametše sebata se sekhunong se se ngwadilwego maina a Modimo mo gohle e le gona go mo nyefola. Sebata seo se be se na le dihlogo tše di šupago le manaka a lesome. Mosadi wa gona o be a apere diaparo tša bohwibidu bja moretele le tša bohwibidu bja go topela, a kgabile ka dikgabišo tša gauta le magakabje le diperela. Ka seatleng o be a swere senwelo sa gauta se se tletšego tša go šišimiša le ditšhila tša bohlola bja gagwe. Mo phatleng o be a ngwadilwe leina le le sa hlalošegego. Leina leo ke “Babilone, motsemogolo, mmagodigwebakathobalo le bohlola bja lefase.” Ka bona mosadi yoo a tagilwe ke madi a badumedi le a bao ba bolaetšwego go dumela go Jesu. Ge ke mmona ka tlabega kudu. Morongwa a mpotšiša a re: “O tlabilwe ke eng? Ke tla go hlalošetša se mosadi yo le sebata se a se nametšego sa dihlogo tše di šupago le manaka a lesome se se šupago. Sebata seo o se bonego se kile sa ba gona, fela bjale ga se sa le gona; eupša se tlilo tšwa ka moleteng woo wa go iša fasefase sa ya go fedišwa. Badudi ba lefase bao maina a bona a se a kago a ngwalwa ka pukung ya ba ba phelago go tloga mola lefase la hlolwago, ba tla tlabega ge ba bona sebata se. Se kile sa ba gona, fela bjale ga se sa le gona, eupša se sa tlilo tšwelela gape. “Taba ye e nyaka dikgopolo tše bohlale. Dihlogo tšeo tša go šupa ke dithaba tše di šupago tše mosadi yoo a dulago godimo ga tšona. Ebile ke magoši a a šupago, ao, a mahlano a ona a šetšego a wele. O tee o sa buša, gomme yo mongwe ga sešo a tla. Mohla a etla o tla buša sebakanyana fela. Sebata se se kilego sa ba gona, seo bjale se se sa lego gona, ke kgoši ya seswai ye e balwago le tše dingwe tše di šupago, gomme e ya go fedišwa. “Manaka ale a lesome o a bonego a emetše dikgoši tše lesome tše di sešogo tša thoma go buša, eupša di tlago fiwa maatla a go buša le sebata seo nako ya iri e tee fela. Dikgoši tše tše lesome di na le maikemišetšo a go swana, gomme di fa sebata se maatla a tšona a go buša. Di tla lwa le Kwana, fela Kwana e tla di fenya le balatedi ba ba biditšwego ba ba kgethilwego gape ba ba botegago, ka gobane ke yona Morena wa marena, le Kgoši ya dikgoši.” Morongwa yoo o ile a ba a re go nna: “Meetse ale o a bonego, ale segwebakathobalo se bego se dutše kgauswi le ona, ke ditšhaba, le makoko a batho, le merafe le maleme. Manaka ale a lesome o a bonego gotee le sebata di tla hloya segwebakathobalo; di tla mo amoga tšohle tše a nago le tšona tša mo tlogela a hlobotše; di tla mo ja dinama tša mo fediša ka mollo. Tšeo di tla di dira ka ge Modimo a di dirile gore di ikemišetše go phetha thato ya gagwe. Ka gona di tla kwana go fa sebata seo maatla a tšona a bogoši go fihlela tše di boletšwego ke Modimo di phethagala. “Mosadi yoo o mmonego o emetše motsemogolo wo o bušago magoši a lefase.” Ka morago ga moo ka bona morongwa yo mongwe a theoga legodimong. O be a na le maatla a magolo, gomme letago la gagwe le bonega lefaseng ka moka. A goelela kudu a re: “Ahaaowaa, e wele! Babilone, motsemogolo wola, o wele! Bjale go yona go na le bodulo bja bademone le meoya ye mebe ya mehutahuta; le dinonyana tša mehutahuta, le diphoofolo tša mehutahuta tša go ilwa le go ganetšwa di phela gona. Gobane mediro ya Babilone ya bohlola e sentše ditšhaba tšohle tša lefase. E be e swana le beine ye bogale ye e bego e di noša yona. Magoši a lefase a be a dira bohlola le yona, le borakgwebo ba lefase ba be ba ikhumiša ka dithoto tša yona tše di se nago kelo.” Ka kwa lentšu le lengwe la go tšwa legodimong le re: “Etšwang mo Babilone, setšhaba sa ka, gore le se hlakanele nayo dibe tša yona, gore le se tlo otlwa ka kotlo tša yona. Gobane dibe tša yona di kgophetšwe go fihla legodimong, gomme Modimo o gopola makgopo a yona. Le e dire se e se dirilego ba bangwe, mme mediro ya yona e lefetšwe gabedi; senwelo se bogale se e bego e ba tlaletša sona lena le e tlaletše sona gabedi. Le e tlišetše mahloko le mahlomola a go lekana le boikgodišo le matsaka a yona. Gobane ga e lese go ipotša ya re: ‘Ke se dutše sa bogoši, ke kgošigadi, ga ke mohlologadi, mme mahlomola nka se tsoge ke a kwele.’ Ka baka leo e tla otlwa ka tšatši le tee ka lehu le mahlomola le tlala. E tla ba ya tšhungwa ka mollo, gobane Morena Modimo yo a e otlago ke yo maatla.” Dikgoši tša lefase tše di bego di dira nayo bohlola le bofebe di tla e llela di golola ge di bona mokuelelo wa muši wa go tšwa mollong wo o e tšhumago. Di tla emela kgole ka ge di boifa go otlwa le yona, gomme di tla re: “Joo, masetlapelo, Babilone, motsemogolo wola wa go tia, joo! O otlilwe ka irinyana e tee.” Babapatši ba lefase le bona ba o llela ba golola, ka gobane ga go sa na motho yo a ba rekelago; dithoto tša bona ga di sa rekwa, e lego gauta le silibera le magakabje le diperela; le mašela a masethesethe, le a bohwibidu bja moretele, le a silika, le a bohwibidu bja go topela; le dikota tše bohlokwa tša mehutahuta, le dilwana tša mehutahuta tša go dirwa ka nakatlou, le tša kota ya theko ye kgolo, le tša mphiri, le tša tshipi, le tša mmabola; le sinamone, le dinoko, le diorelo, le mira, le ditlolo, le beine, le makhura a mohlware, le bupi bja mathume, le mabele, le dikgomo, le dinku, le dipere, le dikoloi, le makgoba, ešita le batho. Babapatši bao ba re go wona: “Tše dibotse tše o bego o di duma di ile, le mahumo le matsaka ohle a gago a go tšhabetše, gomme o ka se sa tsoga o a hweditše.” Babapatši ba dilo tšeo ba go ikhumiša ka go bapatša motseng woo ba tla emela kgole ka ge ba boifa go otlwa le wona. Ba tla lla ba golola ba re: “Joo, masetlapelo, motsemogolo wola, joo! Etse o be o apara mašela a masethesethe, le a bohwibidu bja moretele, le a bohwibidu bja go topela, o bile o ikgabiša ka tša gauta, le magakabje, le diperela, eupša lehumo lela le legolo le fedišitšwe ka iri e tee fela.” Balaolamaselawatle le banamedi bohle le basepetšamaselawatle le bohle ba ba iphedišago ka go šoma ka lewatleng ba emela kgole, ba goelela ge ba bona mokuelelo wa muši wo o tšwago mollong wo o tšhumago motse woo ba re: “Ke ofe motse wo o kilego wa swana le motsemogolo wo?” Ba itšhela ka marole dihlogong, ba lla ba golola ba re: “Joo, masetlapelo! Motsemogolo wola boramaselawatle ka moka ba bego ba ikhumiša go wona, joo! Šo, o fedišitšwe ka iri e tee fela.” Wena legodimo, thabela go fedišwa moo ga wona. Thabang, lena badumedi, le lena baapostola, le lena baprofeta, gobane Modimo o le ahloletše motse woo! Morongwa yo mongwe wa senatla a kuka leswika la go lekana le lwala le legolo, a le lahlela ka lewatle a re: “Agaa, ke ka mo motsemogolo wa Babilone o tlago thubakanywa ka gona, ya ba gona ge o ile. Gomme mo go wena go ka se sa tsoga go kwagetše koša ya baletšadiharepa, le ya baopedi, le ya baletšadinaka, le ya baletšadiphala; mo go wena go ka se sa tsoga go hweditšwe makgone wa modiro ofe goba ofe, le mošito wa tšhilo o ka se sa tsoga o kwagetše mo go wena; le seetša sa lebone se ka se sa tsoga se bonegile mo go wena; le mantšu a monyadi le monyadiwa a ka se sa tsoga a kwagetše; gobane babapatši ba gago e be e le ba maatla go feta bohle lefaseng; wena o be o radia ditšhaba tšohle ka boloi bja gago.” Motseng wo go hweditšwe madi a baprofeta, le a badumedi, le a bohle bao ba bolailwego lefaseng. Ka morago ga moo ka kwa lentšu le nkego ke legoa la lešaba le legolo la batho legodimong le re: “Haleluya! Phološo le letago le maatla ke tša Modimo wa rena! Kahlolo tša gagwe ke tše di lebanego ebile di a swanela! O otlile segwebakathobalo sela se bego se senya lefase ka bohlola bja sona. Modimo o se otlile ka gobane se bolaile bahlanka ba gagwe.” Ba goeletša gape ba re: “Haleluya! Muši wa mollo wo o tšhumago motse woo o tupa go ya go ile!” Bagolo bale ba masome a mabedi le metšo ye mene le dibopiwa tšela tše nne ba itahlela fase ba khunamela Modimo yo a bego a dutše setulong sa bogoši. Ba re: “Amene! Haleluya!” Gwa kwagala lentšu le etšwa setulong sa bogoši le re: “Retang Modimo wa rena, lena bahlanka bohle ba gagwe, le lena batho ka moka le mmoifago, ba bagolo le ba banyenyane!” Ka napa ka kwa lentšu le nkego ke legoa la lešaba le legolo la batho, le le swanago le lešata la meetse a mantši, le le etšago medumo ya tladi le re: “Retang Morena, gobane Morena Modimo wa rena, Ramaatlaohle, ke Kgoši! A re thabeng re hlalaleng! A re mo tumišeng! Gobane nako ya lenyalo la Kwana e fihlile, gomme monyadiwa wa gagwe o itokišeditše lona. O filwe diaparo tše di hlwekilego, tša mabaibai, tša lešela le boletiana, gore a di apare.” Lešela leo ke mediro ye e lokilego ya badumedi. Ke moka morongwa yoo a re go nna: “Ngwala o re: Go lehlogonolo ba ba laleditšwego monyanyeng wa lenyalo la Kwana.” A ba a re: “Ao ke mantšu a Modimo, mme ke nnete.” Nna ka itahlela fase maotong a gagwe ke re ke a mo khunamela, fela yena a re go nna: “Aowaa, o se leke! Gape le nna ke mohlanka bjalo ka wena le banabeno ba ba botegelago go hlatsela Jesu. Yo o swanetšego go mo khunamela ke Modimo.” Molaetša wa Jesu ke wona wo o tutuetšago baprofeta. Ka bona legodimo le bulegile mme go bonala pere ye tšhweu. Monamedi wa yona ke Mmotegi ebile ke Morereši; o ahlola ka toka, le dintwa o di lwa ka yona. Mahlo a gagwe a be a lauma bjalo ka kgabo ya mollo, gomme a rwele mefapahlogo ye mentši hlogong. O be a na le leina le le ngwadilwego mo go yena, eupša go se yo a le tsebago ge e se yena mong. Seaparo se a bego a se apere se be se innwe mading. O bitšwa “Lentšu la Modimo”. O be a latelwa ke madira a legodimong, gomme ona a nametše dipere tše ditšhweu, a apere diaparo tše ditšhweu tša lešela le boletiana tše di hlwekilego. Ka molomong wa gagwe go be go etšwa tšhoša ye bogale yeo ka yona a tlago fenya ditšhaba. O tla ba buša ka lepara la tshipi, a ba a pitla beine ka maoto ka bopitlelong bja kgalefo ye e šiišago ya Modimo Ramaatlaohle. Mo seaparong sa gagwe le seropeng go be go ngwadilwe leina la go re: “Kgoši ya magoši le Morena wa marena”. Ke moka ka bona morongwa yo mongwe a eme godimo ga letšatši. A goelela dinonyana tšohle tše di fofago lefaufaung a re: “Etlang le kgobokanele monyanya wo mogolo wa Modimo, le je dinama tša magoši le tša balaodi ba madira le tša bahlabani, dinama tša dipere le tša banamedi ba tšona, dinama tša batho ka moka – makgoba le balokologi, ba bagolo le ba banyenyane!” Ka napa ka bona sebata sela le magoši a lefase le madira a bona a kgobokanetše go tlo lwa le yola wa go namela pere le madira a gagwe. Sebata seo sa swarwa gotee le moprofeta yola wa maaka wa go dira mehlolo ka taelo ya sona. E bile ka wona mohlolo woo ge a fora bale ba go ba le leswao la sebata sela le bale ba go khunamela seswantšhobopša sa sona. Sebata seo le moprofeta yola wa maaka di ile tša lahlelwa ka bodibeng bja mollo wo o tukago tshebela di sa phela. Madira a tšona a ile a bolawa ka tšhoša ye e tšwago ka molomong wa monamedi yola wa pere; manong ohle a khora nama ya bona. Ka morago ka bona morongwa yo mongwe a theoga legodimong, a swere sekgonyo sa molete wa go iša fasefase le ketane ye kgolo ka seatla. A swara mmamogašwa, noga yela ya kgale ya go bitšwa Diabolose goba Sathane, gomme a e kgoka mengwaga ye sekete. A e lahlela ka moleteng woo, a e kgonyeletša ka gona, a ba a bitiela mojako wa molete woo gore e se sa fora ditšhaba, go be go tle go fete mengwaga ye sekete. Ge mengwaga yeo e fetile e swanetše go kgokollwa sebakanyana. Ka bona ditulo tša kahlolo di dutšwe ke ba ba filwego maatla a boahlodi. Ka bona le meoya ya bao ba kgaotšwego dihlogo ka baka la ge ba be ba bega bohlatse bja Jesu le lentšu la Modimo. Ba be ba sa khunamele sebata sela le seswantšhobopša sa sona, le gona ba se ba ka ba swaiwa leswao la sebata seo diphatleng tša bona le diatleng. Bona bao ba tsoga bahung mme ba buša le Kriste mengwaga ye sekete. Bahu ba bangwe bona ba ile ba se tsoge, gwa ba gwa feta mengwaga yeo ye sekete. Ye ke yona tsogo ya mathomo ya bahu. Ba lehlogonolo le ba bakgethwa ke ba ba tsošitšwego le bao ba mathomo. Lehu la bobedi ga le ba laole; bona e tla ba baprista ba Modimo le Kriste, gomme ba tla buša naye mengwaga ye sekete. Ge mengwaga yeo ye sekete e fetile, Sathane o tla kgokollwa kgolegong ya gagwe, a tšwela ntle go yo fora ditšhaba tše di lego lefaseng ka moka tše di bitšwago Gogo le Magogo. O tla di kgoboketša a di iša ntweng, ya ba tše dintši bjalo ka dithorwana tša lešabašaba lebopong la lewatle. Di ile tša rotoga tša tla lefaseng, gomme tša dikanetša mešaša ya badumedi le motse wola Modimo a o ratago. Eupša go ile gwa theoga mollo legodimong wa di fediša. Ke moka Diabolose yola wa go ba fora a lahlelwa ka bodibeng bjola bja mollo le tshebela, moo go bego go šetše go lahletšwe sebata sela le moprofeta yola wa maaka; gomme ba tla hlokofatšwa bošego le mosegare go ya go ile. Ka morago ga moo ke ile ka bona setulo se segolo se sešweu sa bogoši le yo a dutšego go sona. Lefase le legodimo tša mo tšhaba gomme tša se sa bonwa. Ka ba ka bona le bahu ba eme pele ga setulo seo sa bogoši, ba bagolo le ba banyenyane. Dipuku tša phuthollwa, gwa phuthollwa le ye nngwe e lego puku ya ba ba phelago. Bahu ba ile ba ahlolwa go ya ka tše ba bego ba di dirile, tše di ngwadilwego ka dipukung tšeo. Ke moka lewatle la hlatša ba ba hwetšego ka go lona. Lehu le bodulabahu le tšona tša hlatša bahu ba tšona. Gomme bohle ba sekišwa go ya ka mediro ya bona. Lehu le bodulabahu tša napa tša lahlelwa ka bodibeng bja mollo. Bodiba bjoo bja mollo ke lehu la bobedi. Yo leina la gagwe le bego le se la ngwalwa ka pukung ya ba ba phelago o ile a lahlelwa ka bodibeng bjoo bja mollo. Ka bona legodimo le lefsa le lefase le lefsa. Legodimo lela la pele le lefase la pele di be di tlogile, le lewatle le timeletše. Ka bona motse wo mokgethwa, Jerusalema ye mpsha, o theoga legodimong go Modimo, o kgabišitšwe bjalo ka monyadiwa yo a tšhepetšego monyadi wa gagwe. Ka kwa lentšu le goelela kudu le etšwa setulong sa bogoši le re: “Bjale Modimo o dula le batho. O tla phela le bona, bona ya ba ditšhaba tša gagwe. Yena mong o tla ba le bona, ya ba Modimo wa bona. O tla ba phumola meokgo yohle. Go ka se sa ba le lehu goba manyami goba dillo goba bohloko. Dilo tšela tša kgale di fetile.” Yo a dutšego setulong sa bogoši a re: “Bona, dilo tšohle ke di dira tše mpsha!” A ba a re go nna: “Ditaba tše di ngwale, ka gobane ke tša nnete ebile di a tshepega.” A ba a re: “Go phethegile! Ke nna Alfa le Omega, Mathomo le Bofelo. Yo a nyorilwego ke tla mo noša mothopong wa meetse a bophelo a sa a lefele. Tšeo ka moka ke tla di fa yo a ka fenyago, ka ba Modimo wa gagwe, yena a ba morwa wa ka. Eupša mafšega le bakgelogi le dihlola le babolai le difebe le boramaselamose le bakhunamelamedingwana le bafeane ka moka – gabobona ke ka bodibeng bja mollo wo o tukago tshebela, ke lona lehu la bobedi.” Yo mongwe wa barongwa bale ba šupago ba ba bego ba swere meruswana ye e šupago ye e swerego dikotlo tše di šupago a tla go nna a re: “Etla ke go bontšhe monyadiwa, mosadi wa Kwana.” Ka tsenwa ke Moya, gomme morongwa yola a nkukela ntlhoreng ya thaba ye e phagamego kudu. A mpontšha Jerusalema, motse wo mokgethwa, o theoga legodimong go Modimo o phadima letago la Modimo. O be o phadima bjalo ka magakabje a bohlokwahlokwa, o etša jaspere, o bonatša go swana le legakadima. O be o ageleditšwe ka morako wa go phagama kudu, wo o nago le difero tše lesome le tše pedi: tše tharo ka bohlabela, tše tharo ka leboa, tše tharo ka borwa, tše tharo ka bodikela. Sefero se sengwe le se sengwe se be se letilwe ke morongwa, gomme mo seferong se sengwe le se sengwe go ngwadilwe leina la ye nngwe ya dikgoro tše lesome le tše pedi tša Israele. *** Morako wa motse o be o agilwe godimo ga maswika a lesome le a mabedi a motheo, ao godimo ga ona go bego go ngwadilwe maina a baapostola ba lesome le ba babedi ba Kwana. Morongwa yoo wa go bolela le nna o be a swere thupakelo ya gauta ya go ela motse le difero tša wona le morako wa wona. Motse woo o be o na le dikhutlo tše nne; botelele bja wona bo lekana le bophara. Morongwa a o ela ka thupakelo ya gagwe, a hwetša o na le botelele bja dikilometara tše dikete tše pedi le makgolo a mane, bjo bo lekanago le bophara le bogodimo. A ela le morako wa motse, mme wona wa hwetšwa o na le dimetara tše masome a a selelago le metšo ye e šupago go ya godimo go ya ka kelo ye e tsebjago ye a bego a ela ka yona. Morako wa gona o be o agilwe ka magakabje a mebalabala, gomme motse ka bowona o agilwe ka gauta ye e sego ya tswakwa, e le ye e bonatšago bjalo ka galase. Maswika a motheo wa morako wa motse a be a kgabišitšwe ka magakabje a mehutahuta. Leswika la mathomo la motheo le be le kgabišitšwe ka legakabje la go ya bohwibidung, la bobedi e le le botala bja leratadima, la boraro e le le lenala, la bone e le la botala bja morogo, la bohlano e le la mebalabala, la boselela e le le lehwibidu, la bošupa e le le modipa, la seswai e le la go ya botalawatleng, la senyane e le le modipa, la lesome e le le letalabosehla, la lesome le motšo o tee e le la botala bja leratadima, la lesome le metšo ye mebedi e le la bohwibidu bja go retela. Difero tšeo tše lesome le tše pedi e be e le tša diperela tše lesome le tše pedi, gomme sefero se sengwe le se sengwe se dirilwe ka perela e tee. Mebila ya motse e be e le ya lebato la gauta ye e sego ya tswakwa ye e bonatšago bjalo ka galase. Ke ile ka se ke ka bona tempele moo motseng, ka ge tempele ya wona e le Morena Modimo Ramaatlaohle le Kwana. Motse woo ga o nyake go bonegelwa ke letšatši goba ngwedi, ka gobane o bonegelwa ke letago la Modimo, gomme Kwana ke lona lebone la wona. Batho ba ditšhaba tša lefase ba tla phela seetšeng sa wona, le magoši a lefase a tla tliša mahumo a ona go wona. Difero tša motse wo di tla dula di butšwe nako ka moka, ka gobane moo go ka se be le bošego. Mahumo a ditšhaba le dithoto tša bona tše bohlokwa di tla tlišwa motseng. Eupša se se sego sa hlweka se ka se tsene motseng, ešita le yena motho wa sehlola le wa go dira tša bofora. Go tla tsena fela bao ba tla bego ba tlilo phelela sa ruri, bao maina a bona a ngwadilwego ka pukung ya Kwana. Morongwa yoo o ile a mpontšha le noka ye e elago meetse a bophelo a go bonatša bjalo ka legakadima, e ela e etšwa setulong sa bogoši sa Modimo le Kwana. Mokgahlong ga mmila wo mogolo wa motse le noka yeo go na le sehlare sa bophelo se se enywago ga lesome le metšo ye mebedi ka ngwaga, ke go re gatee ka kgwedi. Matlakala a sona ke a go fodiša ditšhaba. Moo motseng go ka se hwetšwe selo se se rogilwego. Setulo sa bogoši sa Modimo le Kwana se tla ba moo motseng, gomme bahlanka ba gagwe ba tla mo khunamela. Ba tla bona sefahlego sa gagwe, gomme leina la gagwe le tla ngwalwa mo diphatleng tša bona. Go ka se sa ba le bošego, ba ka se sa nyaka mabone goba seetša sa letšatši, ka gobane ba tla be ba bonegelwa ke Modimo, gomme ba tla buša go ya go ile. Ke moka morongwa yoo a re go nna: “Mantšu ao ke a nnete ebile a a tshepega. Morena Modimo yo a fago baprofeta ba gagwe Moya wa gagwe o romile morongwa wa gagwe go tlo bontšha bahlanka ba gagwe tše di swanetšego go hlaga kgauswinyana.” Jesu a re: “Theeletša! Ke kgauswi le go tla! Go lehlogonolo yo a phethago ditaba tša go porofeta tša puku ye!” Yo a kwelego dilo tše ka moka gape a di bonego ke nna Johanese. Ya re ge ke di kwele ebile ke di bone, ka itahlela fase pele ga morongwa yola a mpontšhitšego tšona, ke re ke a mo khunamela. Eupša yena a re go nna: “O se leke! Gape le nna ke mohlanka bjalo ka wena le banabeno, baprofeta, le ba ba phethago tše di ngwadilwego ka pukung ye. Yo o swanetšego go mo khunamela ke Modimo.” A iša pele a re: “Mantšu a profeto a a lego ka pukung ye o se a dire sephiri, ka gobane nako ya gore taba tše di tle di phethege e kgauswi. Yo a dirago tše mpe a a tšwele pele le go di dira; yo e lego wa ditšhila a a no phela a le bjalo; yo a lokilego a a tšwele pele le go loka ga gagwe, le yo e lego yo mokgethwa a a no phela a le bjalo.” Jesu o re: “Theeletša, ke kgauswi le go tla! Ke tla le meputso ya ka gore ke tle ke fe yo mongwe le yo mongwe go ya ka mediro ya gagwe. Ke nna Alfa le Omega, Wa pele le Wa mafelelo, Mathomo le Bofelo.” Go lehlogonolo ba ba hlatswago diaparo tša bona mme ba lokelwa ke go ja dikenywa tša sehlare sa bophelo le go tsena motseng ka difero. Eupša ka ntle ga motse go na le dihlola le boramaselamose le difebe le babolai le bakhunamelamedingwana le ba ba ratago tša bofora gape ba di dirago. “Nna, Jesu, ke romile morongwa wa ka gore a tle a le begele ditaba tše le le diphuthegong. Ke nna Setlogolokhukhu sa Dafida; ke nna Mphatlalatšane, naledi ye e tagago ya masa.” Moya le monyadiwa ba re: “Etla!” Mokwi wa ditaba tše le yena a a re: “Etla!” Yo a nyorilwego a a tle. Yo a nyakago meetse a bophelo a a a hwetše a sa a lefele. Nna, Johanese, ke lemoša bohle ba ba kwago ditaba tša go porofeta tša puku ye ke re: Ge motho a ka di oketša, Modimo o tla mo okeletša dikotlo tše di ngwadilwego ka mo pukung ye. Ge motho a ka tloša se sengwe mo mantšung a puku ye ya profeto, Modimo o tla mo amoga tokelo ya gagwe ya go ja dikenywa tša sehlare sa bophelo le ya go dula motseng wo mokgethwa ye go ngwadilwego ka yona ka mo pukung ye. Yo a hlatselago ditaba tše ka moka o re: “Ee, ke kgauswi le go tla!” Amene! Etla, Morena Jesu! Morena Jesu a gaugele bohle.