Kitabo cha kibyalilwe cha ngʼwa Yesu Kristo, ngʼwana wa ngʼwa Daudi, ngʼwana wa ngʼwa Abrahamu. Abrahamu akamyala Isaaka; Isaaka umyala Yakobo; Yakobo umyala Yuda na bana ba ngʼwawe; Yuda umyala Faresi na Zara muli Tamaru; Faresi umyala Esromu; Esromu umyala Aramu; Aramu umyala Aminadabu; Aminadabu umyala Naasoni; Naasoni umyala Salmoni. Salmoni umyala Boazi muli Rahabu; Boazi umyala Obedi muli Ruth; Obedi umyala Yese; Yese umyala Ntemi Daudi. Ntemi Daudi umyala Solomoni muli uyo walali nke wa Uria; Solomoni umyala Rehoboamu; Rehoboamu umyala Abia; Abia umyala Asa; Asa umyala Yehoshafati; Yehoshafati umyala Yoramu; Yoramu umyala Uzia; Uzia umyala Yothamu; Yothamu umyala Ahazi; Ahazi umyala Hezekia; Hezekia umyala Manase; Manase umyala Amoni; Amoni umyala Yosia; Yosia umyala Yekonia na bana ba ngʼwawe mu shiku ja kusamiwa kuja Babuloni. Na hanuma ya kusamiwa kuja Babuloni, Yekonia umyala Shealtieli; Shealtieli umyala Zerubabeli; Zerubabeli umyala Abihudi; Abihudi umyala Eliakimu; Eliakimu umyala Azori; Azori umyala Sadoka; Sadoka umyala Ahimu; Ahimu umyala Eliuda; Eliuda umyala Eleazari; Eleazari umyala Mathani; Mathani umyala Yakobo; Yakobo umyala Yusufu u ngoshi wa ngʼwa Mariamu, muli nkima uyu akabyalwa Yesu, Uyo akitanagwa Kristo. Giki i shibyalilwe shose kufuma kuli Abrahamu kushisha kuli Daudi, shibyalilwe ikumi na shine; na kufuma kuli Daudi kushisha kusamiwa kuja Babuloni, shibyalilwe ikumi na shine; na kufuma kusamiwa kuja Babuloni kushisha kuli Kristo, shibyalilwe ikumi na shine. Kubyalwa kwa ngʼwa Yesu Kristo kwali kuli giki, iki nina Mariamu wali walunjiwa na Yusufu, aho bali batali kusanja, ubonwa ali nda ya Moyo Ngʼwela. Yusufu ngoshi wakwe iki ubiza ntungilija, na walatatogilwe kungola, widedekanya kuneka mu kwigeniha. Aho wali widedekanya mihayo iyi, lolaga, malaika wa Seba akangʼwilongela mu kiloti, ungʼwila giki, Yusufu ngʼwana wa ngʼwa Daudi, utizogoha kuntwala nke wako Mariamu: iki icho chatungwa mu nda yakwe cha ngʼwa Moyo chene chela. Nanghwe alamyala ngʼwana ngosha, nangho ulangʼwilika lina lyakwe YESU: iki Wei alabapija banhu bakwe kufuma mu shibi shabo. Iyo yose yali yitwa, gushikilijiwe uyo gwaahayiwa na Seba muli nghangi, giki, Lolaga, munhya ngʼwibembu alabucha nda, nanghwe alamyala ngʼwana ngosha, na balangʼwilika lina lyakwe Emanuel; mhayo uyu, kushomelejiwa kwaho kuli giki, Mulungu ali hamo na biswe. Yusufu aho wali umisha mu tulo, akita gitumo malaika wa Seba wanagilile, na untwala nke wakwe; Na walatamanile wei kushisha umyala ngʼwana wakwe wa kwandia ngosha; na akangʼwilika lina lyakwe YESU. Aho Yesu wali wabyalwa mu Bethlehemu ya Buyudaya, mu shiku ja Ntemi Herode, lolaga, balalanghanu ba kiya bushika Yerusalemi, Bubyuhaya giki, Ali hali, Uyo waabyalwa Ntemi wa Bayudaya? Iki bukabona sonda yakwe mu kiya, na twiza-ga kunamya. Aho Ntemi Herode wigwa mihayo iyi wiganilija, na Yerusalemi yose hamo nanghwe. Na alio wababilinga bagabiji batale bose, na bandiki ba banhu, ubabugilija giki, Angu, Kristo akubyalilwa hali? Nabo bungʼwila giki, Mu Bethlehemu ya Buyudaya; iki yaandikwa muli nghangi giki, Na bebe, Bethlehemu, si ya Yuda, uti ndo yaya mu basugi ba Yuda, iki kufuma muli bebe alilonga nsugi Uyo alabadima banhu bane Israeli. Huna lulu Herode aho wabitanile balalanghanu mu kwigeniha, ubabugilija no i likanza lya chilongele cha sonda. Na aho ubatuma Bethlehemu, ubawila giki, Jagi mukagisilije gete gete mihayo ya ngʼwana; aho mulamonaga munenhele mihayo, nane naje nakanamye. Aho bali bungʼwigwa ntemi, huna buja; na lolaga, sonda iyo bali bibona mu kiya yubatongela, kushisha yushika ho yimila higulya ya ipande uko walali ngʼwana. Aho bibona sonda, buyega na kuyega kutale kutinda. Nabo aho bingila mu numba, bumona ngʼwana hamo na nina Mariamu; na bugwa ha si, bunamya ngʼwana, nabo aho butaligula sabo jabo bungʼwinha sha kwinha, zahabu, na bubani, na ngazu. Na aho bali buhugulwa na Mulungu mu kiloti giki, batizushoka kuli Herode, bubuka buja ku si yabo mu nzila yingi. Aho bali bumala kubuka kuja, lolaga, malaika wa Seba ungʼwilongela Yusufu mu kiloti, uhaya giki, Bukaga, untwale ngʼwana hamo na nina, pelelaga Misri, ukikale ko kushisha nalakuwila: iki Herode alihaya kunkoba ngʼwana amulage. Aho umisha, untwala ngʼwana hamo na nina bujiku, ubuka kuja Misri: Na wikala ko kushisha kucha kwa ngʼwa Herode: gushikilijiwe uyo gwaahayiwa na Seba muli nghangi, giki, Nakangʼwitana Ngʼwana wane kufuma mu Misri. Ntemi Herode utubulaga twana Huna Herode aho wali ubona giki, udalahwa na balalanghanu, upelana no, utuma, utubulaga twana tuyanda tose utwali tuli Bethlehemu, na mu mimbi jayo jose, utwali twamala miaka ibili na kuleba ho, gitumo ikanza ilo wali wababugilija no a balalanghanu. Hunaho gwali gushikilijiwa uyo gwaahayiwa na nghangi Yeremia, giki, Ilaka likigwiwa mu Rama, kulila nghungu na shisoji, na kuganghila kutale, Raheli alibalilila bana bakwe, na ulemelwa kulungujiwa, iki bali nduhu. Herode aho wali umala kucha, lolaga, malaika wa Seba ungʼwilongela Yusufu mu kiloti uko Misri, uhaya giki, Bukaga, untwale ngʼwana na nina, uje mu si ya Israeli; iki bachile abaakobaga bupanga wa ngʼwana. Ubuka, untwala ngʼwana na nina, na wingila mu si ya Israeli. Aliyo aho wigwa giki, Arkelao watemile mu Buyudaya ha isumbi lya ngʼwa ise Herode, ogoha kuja ho; uhugulwa na Mulungu mu kiloti, unyamuka uja ku mapande ga Galilaya: Aho ushika ko, wikala mu nzengo gukitanagwa Nazareti: gushikilijiwe uyo gwaahayiwa mu bahangi, giki, Alitanwa muna Nazareti. Mu shiku ijo Yohana Matija wali wiza, ubyulomela mu bu ya Buyudaya, uhaya giki, Oyagi, iki butemi wa ngʼwigulu wegelaga, Iki uyu ngʼwene uyo waahayiwa na nghangi Isaya giki, Ilaka lya ngʼwenuyo akuhamukaga mu bu, Bejabejagi ipalapala lya Seba, gololagi nzila jakwe. Uyo Yohana walali na shizwalo shakwe sha boya wa ngamila, na shipi gwa nkoba mu nkimbili gwakwe; na shiliwa shakwe shali shubiza njige na buki wa ngʼwikungu. Hunaho ba Yerusalemi na ba Buyudaya bose, na ba si jose ijihelile na Yordani, bufuma buja kuli wei, Nabo bubatijiwa nanghwe mu mongo gwa Yordani, bubyutambula shibi shabo. Aliyo aho ubabona bingi ba mu Bafarisayo na ba mu Basadukayo biza ku kubatija kwakwe, ubawila giki, Bingʼwe bubyile wa shipili, nani wali umukangucha kubupela bupelanu ubuhaya kwiza? Kulwa iyo itagi matwajo agigelelilwe na koya: Hangi mutiziganika mu mioyo yingʼwe kuhaya giki, Tuli na nkulugenji wiswe, Abrahamu; iki namuwila giki, Mulungu wadula kunjukija Abrahamu bana kufuma mu mawe aya. Na haha mbasa yatuulagwa ha nji gwa miti: kulwa iyi buli nti gose ugututwajaga matwajo ga wiza gukengʼenhwa, guponyiwa mu moto. Nene hene namubatija mu minzi kushika mu koya, aliyo Uyo izile hanuma yane, anikilile nene nguzu, na nene natigelile kumukija shilatu shakwe: Ngʼwenuyo alamubatija muli Moyo Ngʼwela na moto: Ihehelo lyakwe lili mu nkono gwakwe, nanghwe akweja gete gete lubuga lwakwe, ngano jakwe alajibika mu kikolo chakwe; aliyo mela alagatwima na moto ugutujima. Hunaho Yesu wali ufuma Galilaya ushika Yordani kuli Yohana abatijiwe nanghwe. Aliyo Yohana ubyunemeja, uhaya giki, Nene shinigelile kubatijiwa na Bebe, hangi Bebe wiza kuli nene? Aliyo Yesu unshokeja ungʼwila giki, Zunyaga iyi haha; iki giko shitwigelile kushikilija butungilija bose. Huna lulu unzunilija. Na Yesu, aho umala kubatijiwa, haho na haho usabuka mu minzi: na lolaga, igulu lyukunduka kuli Wei na umona Moyo Ngʼwela wa Mulungu akwikaga giti nghuulu, na wiziila hali Wei; Na lolaga, ilaka lyufuma ngʼwigulu lyuhaya giki, Uyu Ngʼwene Ngʼwana wane ntogwa, muli Wei nayejiwa no. Hunaho Yesu wali ulinhyiwa na Moyo Ngʼwela kushika mu bu agengʼwe na muji. Na aho umala kudila nzala shiku makumi ane limi na bujiku, hanuma utuba. Na aho ngemi akangʼwegela, ungʼwila giki, Ulu Bebe uli Ngʼwana wa Mulungu, gawilage mawe aya gabize migati. Aliyo Wei ushosha uhaya giki, Gwaandikwa giki, Munhu atubiza mpanga kulwa ngati gwike, aliyo kulwa buli mhayo gose ugufuma mu nomo gwa Mulungu. Hunaho muji untwala ku linzengo lyela, na ungʼwigasha ha kikungu cha hekalu, Ungʼwila giki, Ulu Bebe uli Ngʼwana wa Mulungu, wiponye hasilili, iki gwaandikwa giki, Akukulagilila bamalaika bakwe; na mu makono gabo bakukubucha, uleke kwipama lupambala lwako ku iwe. Yesu ungʼwila giki, Gwaandikwa hangi giki, Utalizungema Seba Mulungu wako. Hangi muji untwala ku lugulu lulihu no, na ungʼolekeja mabutemi gose ga si, na ikujo lyago; Na ungʼwila giki, Ishi shose nakukwinha Bebe, ulu ugwa kunilamya. Hunaho Yesu ungʼwila giki, Ingaga ho, Shetani; iki gwaandikwa giki, Ulanamyage Seba Mulungu wako, Ngʼwenuyo wike ulantumamilage. Hunaho u muji uneka, na lolaga, bamalaika biza na bungʼwinhilija. Aho Yesu wali wigwa giki, Yohana wamala kutungwa mu jela, ubuka lulu kuja Galilaya; Na aho winga Nazareti, wiza wikala mo mu Kapernaumu, iyili ku nyanza, mu mimbi ja Zabuloni, na Nafthalimu: Gushikilijiwe uyo gwaahayiwa muli nghangi Isaya, giki, Si ya Zabuloni, na si ya Nafthalimu, nzila ya ku nyanza, ku nkilo gwa Yordani, Galilaya ya bana mahanga, Banhu abigashije mu giiti babonaga isana itale, nabo abigashije mu si na mu nengeji gwa kucha, isana lyabakilaga. Kufuma ngʼwikanza ilo Yesu wandia kulomela na kuhaya giki. Oyagi, iki butemi wa ngʼwigulu wegelaga. Aho Yesu wali ushiminza ku mbalama ya nyanza ya Galilaya, ubabona babili, munhu na ngʼwana wa ngʼwawe, Simoni akitanagwa Petro, na Andrea ngʼwana wa ngʼwawe, bakuponyaga ntego mu nyanza; iki bali bategi. Na ubawila giki. Nzugwi munilondele, na Nene nakungʼwita mubize bategi ba banhu. Buleka mitego yabo haho na haho, bunondela. Na aho uja ku butongi, ubabona bangi babili, munhu na ngʼwana wa ngʼwawe, Yakobo ngʼwana wa ngʼwa Zebedayo, na Yohana ngʼwana wa ngʼwawe, bali mu lyato hamo na sabo Zebedayo, bakulungaga mitego yabo, na ubitana. Buleka lyato na sabo haho na haho, bunondela. Na Yesu wali uja hose hose mu si ya Galilaya, ubyulanga mu mabilingilo gabo, ubyulomela evangeli ya butemi, ubyupija bulwile bose na bugokolo bose mu banhu. Na lukumo lwakwe lukumuka mu si yose ya Suria; na bungʼwenhela a basatu bose, abadimilwe na bulwile bungi na bungi na kuluhiwa, nabo abali na masamva, na ba lusalo, na balema; nanghwe ubapija. Na mabita matale gunondela agali gufuma Galilaya, na Dekapoli, na Yerusalemi na Buyudaya, na ku nkilo gwa Yordani. Aho ubona mabita, ulinha mu lugulu: na aho wigashije ha si, bahemba bakwe bungʼwegela; Aho wasamya nomo gwakwe ubalanga, uhaya giki, Bali ba lubango a bahabi ba mu moyo: iki butemi wa ngʼwigulu wene wabo. Bali ba lubango abali na bupina: iki benabo balalungujiwa. Bali ba lubango a bafula: iki benabo batingila si. Bali ba lubango abakutubaga na kukolwa nota kukumbula butungilija: iki benabo baligutiwa. Bali ba lubango abakuchilaga kigongo: iki benabo balachilwa kigongo. Bali ba lubango a bela mu ngholo: iki benabo balamona Mulungu. Bali ba lubango a babeja ba mhola: iki aho balitanwa bana ba Mulungu. Bali ba lubango abaluhiwagwa kulwa nguno ya butungilija: iki butemi wa ngʼwigulu wene wabo. Muli ba lubango bingʼwe aho banhu balamusukilija, na kumuluhya, na kumuhaya mihayo yose ya bubi mu bulomolomo, kulwa nguno yane. Yegagi, sangabalagi no: iki mhela yingʼwe ili nhale no ngʼwigulu; iki giko bali bubaluhyaluhya bahangi abali batonga, aho bingʼwe mutali. Bingʼwe muli munu gwa si: aliyo ulu munu gwasukaga, gulanoniwe na ki? Gutigelile hangi ku nimo gose aliyo kuponyiwa hanze na kupandagilwa na banhu. Bingʼwe muli isana lya ba mu si. Nzengo ugwazengwa ha lugulu gutudula kushikijiwa. Nulu batubacha tala, na kuyituula igubanikigije na ikililijo, aliyo kuyituula ha ikindikilo lya tala; na yubakila bose abali mu numba. Giko isana lyingʼwe lyakage ku butongi wa banhu; babone Shitwa shingʼwe sha wiza, bankuje Singʼwe ali ngʼwigulu. Mutiziganika giki, Nene nali niza kwinja ho shilagilo nulu bahangi; Nene natizile kwinja ho, aliyo kushikilija. Iki nghana namuwila giki, Kushisha igulu na si shilabita, nulu nuguta imo, nulu kadone kamo katalinga ku shilagilo, kushisha yose ilabiza ho. Kulwa iyo munhu ose uyo akwinja kilagilo kimo cha ishi shido, na kubalanga banhu giko, alitanwa ndo kutinda mu butemi wa ngʼwigulu; aliyo munhu ose uyo akushita na kushilanga, ngʼwenuyo alitanwa ntale mu butemi wa ngʼwigulu. Iki namuwila giki, Butungilija wingʼwe, ulu butukila butungilija wa bandiki na Bafarisayo, mutalingila na hado mu butemi wa ngʼwigulu. Ngʼwigwaga gwali guhayiwa ku bakulugenji giki, Utalizubulaga: na munhu ose uyo ubulaga aligelelwa nsango. Aliyo Nene namuwila giki, Munhu ose uyo wandakila nduguye na nguno yaya, aligelelwa nsango: na munhu ose uyo ungʼwila nduguye giki, Raka, aligelelwa ngʼwibanza itale: na munhu ose uyo uhaya giki, Mbuuli bebe, aligelelwa Gehena ya moto. Kulwa iyo ulu ufunya cha kwinha chako ku ngʼwalilo, na uko wizukwa giki, nduguyo ali na mhayo na bebe, Lekaga uko cha kwinha chako ku butongi wa ngʼwalilo, jaga, wisangije na nduguyo tame, hunaho wize, ufunye cha kwinha chako. Wisangije wangu na muji wako aho utali nanghwe mu nzila; muji atizukwinha ko kuli nekanya wa nsango, na nekanya wa nsango atizukwinha ko kuli nshilikale, nangho uponyiwe mu jela. Nghana nakuwila giki, Utalafuma mo, kushisha ukukula senti ya kumalija. Ngʼwigwaga gwali guhayiwa ku bakulugenji giki, Utizushihya: Aliyo Nene namuwila giki, Munhu ose uyo wankamilija nkima kungʼwikumva, wamala kushihya nanghwe mu ngholo yakwe. Ulu liso lyako lya bulyo lyukwipamya, ulikobole mo, na uliponye kule na bebe: iki ili hambuhambu kuli bebe, ibudika limo lya mabudika gako likenaguke, kutinda mili gwako gose kuponyiwa mu Gehena. Na ulu nkono gwako gwa bulyo gukwipamya, ugubute, na uguponye kule na bebe: iki ili hambuhambu kuli bebe ibudika limo lya mabudika gako likenaguke, kutinda mili gwako gose kuponyiwa mu Gehena. Hangi gwali guhayiwa giki, Munhu ose uyo akulekana na nke wakwe, angʼwinhe cheti ya kulekanila; Aliyo Nene namuwila giki, Munhu ose uyo ulekana na nke wakwe, ulu iti kulwa nguno ya bujingi, wangʼwitaga nkima kubiza nshihiwa; na munhu ose uyo untola ngʼwenuyo walekagwa washihaja. Hangi ngʼwigwaga gwali guhayiwa ku bakulugenji giki, Utizilahila ya bumama, aliyo unshikiligijage Seba shilahilo shako; Aliyo Nene namuwila giki, Mutizulahila na hado yaya; nulu igulu, iki lyene isumbi lya Mulungu; Nulu si, iki yene ipandilo lya mhambala jakwe; nulu Yerusalemi, iki lyene linzengo lya Ntemi ntale. Nulu utizilahila ntwe gwako, iki utudula kugalucha luywili lumo lubize lwape nulu lwapi. Aliyo kilungalungile chingʼwe kibize, Ee, ee; Yaya, yaya: iki yose iyukila iyi yafuma kuli uyo mi. Ishigelile ku banishi Ngʼwigwaga gwali guhayiwa giki, Liso kulwa liso, na lino kulwa lino: Aliyo Nene namuwila giki, Mutizilwisha na uyo wa bubi; aliyo munhu ose uyo akukupala lupi ha itama lya bulyo, ungalukije na lingi. Na uyo atogilwe kukubula kukutagija nghanjo yako, unekele na nguto gwako. Na munhu ose uyo akukuhadikija kuja mailo imo, jaga nanghwe ibili. Uyo ukulomba ngʼwinhage; na uyo atogilwe kulya shiili kuli bebe, utizungʼwinhila ngongo. Ngʼwigwaga gwali guhayiwa giki, Ulantogagwe nzenganwa ngʼwiyo, na kunkolwa ngʼwanishi wako: Aliyo Nene namuwila giki, Batogagwi banishi bingʼwe, basungulilagi lubango abamuzuma, bitilagi chiza abamukolwa, balombelagi abalingʼwikomya na abamuluhyaluhya; Giko mubize bana ba Singʼwe ali ngʼwigulu: iki Wei akubabakijaga limi lyakwe ba bubi na ba wiza, na akutumaga mbula ku batungilija na abati batungilija. Iki ulu ngʼubatogwa abo abamutogwa bingʼwe, muli na mhela ki? Angu, bahoja nabo batitaga giko? Na ulu ngʼubagisha badugu bingʼwe bike, mukwitaga ki ya kubakila bangi? Angu, bahoja nabo batitaga giko? Kulwa iyo bizagi bashikanu, gitumo Singʼwe ali ngʼwigulu ah nshikanu. Ilanghanagi mutizita sha kufunya shingʼwe sha ku bahabi mu butongi wa banhu, mubonwe nabo: iki ulu ngʼwita giko, muti na mhela kuli Singʼwe ali ngʼwigulu. Kulwa iyo aho ukwitaga sha kufunya shako sha ku bahabi, utizufula mhembe ku butongi wako gitumo bakwitaga bibeleja mu mabilingilo na mu mapalapala, bakujiwe na banhu. Nghana namuwila giki, Bamala kwanukula mhela yabo. Aliyo bebe aho ukwitaga sha kufunya shako sha ku bahabi, utizugumanya nkono gwako gwa lumoso isho nkono gwako gwa bulyo gukwitaga: Sha kufunya shako sha ku bahabi shibize mu kwigeniha: na So akubonaga mu kwigeniha, alakufunija hape. Na aho ulomba, utizubiza giti bibeleja: iki batogilwe kulomba bimilile mu mabilingilo na ha maka ga mapalapala, bilonge hape mu banhu. Nghana namuwila giki, Bamala kwanukula mhela yabo. Aliyo bebe aho ulomba, ingilaga ku mbele, na aho umala kulugala lwigi, unombe So ali mu kwigeniha, na So akubonaga mu kwigeniha alakufunija hape. Aliyo aho ngʼulomba mutizushokelashokela mihayo ya dalali gitumo bana mahanga bakwitaga: iki biganika giki, bakwigwiwa kulwa kulungalunga kwabo kwingi. Kulwa iyo mutizubiza giti boi: iki Singʼwe amanile isho ngʼwagayiwa aho mutali kunomba. Kulwa iyo lombagi bingʼwe giki: Siswe, uli ngʼwigulu, lina lyako likujiwe; Butemi wako wize; iyo utogilwe yitwe, mu si giti ngʼwigulu. Twinhage lelo migati yiswe ya kutwigela. Utulekeje bugasa wiswe, gitumo na biswe tukubalekejaga abali na bugasa ku biswe. Utizututwala mu kugengʼwa, aliyo utupije muli uyo mi: iki butemi wene wako, na budula, na ikujo, kushisha welelo na welelo. Amina. Iki ulu ngʼubalekeja banhu busobya wabo, Singʼwe ali ngʼwigulu nanghwe alamulekeja bingʼwe. Aliyo ulu mutubalekeja banhu busobya wabo, na Singʼwe nanghwe atumulekeja busobya wingʼwe. Hangi aho ngʼudila nzala, mutizubiza na bushu wa bupina giti bibeleja: iki bubihya bushu wabo bilonge mu banhu giki, balidila nzala. Nghana namuwila giki, Bamala kwanukula mhela yabo. Aliyo bebe, aho udila nzala, gubilage maguta ntwe gwako na ogage ku bushu; Utizilonga ku banhu giki, ukudilaga nzala, aliyo kuli So ali mu kwigeniha; na So akubonaga mu kwigeniha alakufunija hape. Mutizibikila sabo mu si, umo balabapu na bukelebu shikukenagulaga, na umo bibi bakusimbaga na kwiba: Aliyo ngʼwibikilage sabo ngʼwigulu, umo balabapu na bukelebu butakenagulaga, na umo bibi batasimbaga nulu kwiba: Iki sabo jako uko jili, ngholo yako nayo ilabiza kwene. Tala ya mili yene liso: kulwa iyi liso lyako ulu lisonga wima, mili gwako gose gulabizaaka isana. Aliyo liso lyako ulu lili lya bubi, mili gwako gose gukubiza giiti. Kulwa iyi ulu isana ilili mo muli bebe lili giiti, giiti iki kili kinahe! Ati ho munhu uyo wadula kubatumamila baseba babili: iki nulu akunkolwa umo, na kuntogwa ungi; nulu akudimana na umo, na kundalaha ungi. Mutudula kuntumamila Mulungu na mamona. Kulwa nguno iyo namuwila giki, Mutizikoyela bupanga wingʼwe giki, mukulya ki, nulu giki, mukungʼwa ki; nulu mutizugukoyela mili gwingʼwe giki, mukuzwala ki. Angu, bupanga butakilile shiliwa, na mili gutakilile shizwalo? Lolagi noni ja hape, jitabibaga, nulu jitagesaga, nulu jitabilingaga mu mabikilo; aliyo Singʼwe ali ngʼwigulu akujilishaga. Angu, bingʼwe muti ba mpango no kutinda joi? Nani mu bingʼwe mu kwikoyela wadula kongeja ku bulihu wakwe nkono gumo? Na kulwa nguno ki mukwikoyelaga ya shizwalo? Ngʼwidedekanyage mabonji ga ngʼwitogolo gitumo gakakulaga; gatatumamaga, nulu gatalukaga. Aliyo namuwila giki, Solomoni ngʼwikujo lyakwe lyose walatuzwalichiwa giti limo lyago. Aliyo ulu Mulungu ugazwalicha giko maswa ga kwitogolo agali ho lelo, na ntondo guponyiwa mu liko, angu, atungʼwitila kutinda no bingʼwe ba kuzunya kudo? Kulwa iyo mutizikoyela kuhaya giki, Tukulya ki? nulu, Tukungʼwa ki? nulu, Tukuzwalichiwa ki? Iki ishi shose bana mahanga bakashikobaga; iki Singʼwe ali ngʼwigulu amanile giki, shingʼwigelelilwe ishi shose. Aliyo kobagi tame butemi wa Mulungu na butungilija wakwe; na ishi shose mulongegejiwa. Kulwa iyo mutizikoyela sha ntondo; iki lushiku lwa ntondo lukwikoyela mihayo yalo. Iki buli lushiku bigelelilwe na bubi walo. Mutizulekanya, mutizulekanyiwa ningʼwe. Iki na kulekanya uko mukulekanyaga bingʼwe ningʼwe mukulekanyiwa chene: na ngelekelo iyo mukugelekelaga nayo, ningʼwe mukugelekelwa chene. Kulwa nguno ki ulikalola kapalala akali mu liso lya nduguyo, aliyo utiganikaga ngamba uguli mo mu liso lyako bebe? Nulu ukungʼwila kinahe nduguyo giki, Leka nakwingije kapalala akali mu liso lyako, aliyo Iola, ngamba guli mo mu liso lyako bebe? Ngʼwibeleja bebe, injaga tame ngamba uguli mo mu liso lyako, hunaho ukubona chiza kwinja kapalala akali mo mu liso lya nduguyo. Mutizujinha mva icho kili chela, nulu mutizuponya lulu jingʼwe ku butongi wa ngurube, jitizujipandagila hasilili ya magulu gajo, na jitizumugalukila kumutema. Lombagi, na mukwinhiwa: kobagi, na mukubona: komagulagi, na mukwigulilwa. Iki buli munhu uyo ulomba, wanukula; na uyo ukoba, ubona; na uyo ukomagula, akwigulilwa. Nulu munhu nani mu bingʼwe, ulu ngʼwana wakwe unomba ngati, akungʼwinha iwe? Nulu unomba ndilo, akungʼwinha nzoka? Ulu bingʼwe aba muli ba bubi, mumanile kubinha bana bingʼwe shinhu sha wiza, angu, Singʼwe ali ngʼwigulu atutinda no kubinha shinhu sha wiza abunomba? Kulwa iyo, iyo yose mutogilwe banhu bangʼwitile bingʼwe, mubitile nabo giko; iki hu gwene shilagilo na bahangi. Bitilagi mu mita mpine, iki mita guli ngali na ipalapala lya kuja mu kuyagala lyene igali, nabo ababitila mo bene bingi. Iki mita guli mpine, na ipalapala lya kuja mu bupanga lyene ipine, nabo abalibona bene bagehu. Ilanghanagi ku bahangi bamama, abiza ku bingʼwe mu shizwalo sha ngholo, aliyo mugati bali mhuge nghali. Aliyo mukubamanija ku matwajo gabo. Angu, banhu bakayobaga mizabibu ku mihwa, nulu matwajo ga ntini ku mababanzazu? Giko buli nti gwa wiza gukatwajaga matwajo ga wiza; aliyo buli nti gwa bubi gukatwajaga matwajo ga bubi. Nti gwa wiza gutudula kutwaja matwajo ga bubi, nulu nti gwa bubi gutudula kutwaja matwajo ga wiza. Buli nti ugututwajaga matwajo ga wiza gukengʼenhwa, na guponyiwa mu moto. Kulwa iyo mukubamanija ku matwajo gabo. Iti uyo ose akuniwilaga giki, Seba, Seba, alingila mu butemi wa ngʼwigulu; aliyo uyo akwitaga iyo atogilwe Baba ali ngʼwigulu. Bingi balaniwila mu lushiku ulo giki, Seba, Seba, angu, twali tutuhangila mu lina lyako, na kupeja masamva mu lina lyako, na mu lina lyako, angu, twali tutita Shitwa shingi sha kukumya? Hunaho nalabawila hape giki, Natali kumumana na kamo: ingagi ho hali Nene, bingʼwe abo mukwitaga ya bugomi. Kulwa iyo uyo ose akwigwaga mihayo yane iyi, na kwiyita, nakungʼwikolanija na munhu wa masala, uyo akazenga numba yakwe ha itale; Na mbula yutula, na mihumo yusela, na miyaga yuhemba, nasho shuyitula numba yeniyo; nayo itagwile: iki yaazengwa ha itale. Na uyo ose akwigwaga mihayo yane iyi, na kwiyita yaya, akwikolanijiwa na munhu mbuuli, uyo akazenga numba yakwe ha maseni: Na mbula yutula, na mihumo yusela, na miyaga yuhemba, nasho shuyitula numba yeniyo; nayo yugwa: na kugwa kwayo kwali kutale no. Na yubiza aho Yesu akamala mihayo iyi, mabita ga banhu gudedebala kulwa kulanga kwakwe: Iki wali ubalanga kina munhu ali na budula, iti kina bandiki yaya. Aho wali wika kufuma mu lugulu, mabita matale gunondela. Hunaho akiza wa mbiji, unamya, uhaya giki, Seba, ulu utogilwe, wadula kuneja. Na Yesu utama nkono gwakwe, unkuumya, uhaya giki, Natogwa, elaga; na mbiji jakwe jali jejiwa haho na haho. Na Yesu ungʼwila giki, Ilanghanage, utizungʼwila munhu ose; aliyo jaga, ukiyoleche kuli ngabiji, ufunye kufunya uko Musa wali ulagila, ibize bukaniji kubo. Aho Yesu wali wingila mu Kapernaumu, ntale wa bashilikale igana ungʼwegela, ungʼwikumbilija, Uhaya giki, Seba, nyanda wane alalile mu numba, alemahalile uluhiwa no. Yesu ungʼwila giki, Nene nakwiza kumpija. U ntale wa bashilikale igana ushosha, uhaya giki, Seba, nene natigelile Bebe wingile hasilili ya kano yane; aliyo hayaga mhayo gwike, na nyanda wane akupijiwa. Iki na nene ndi munhu wa mu busugi, ndi na bashilikale nabasugile: na nene nungʼwila uyu giki, Jaga, nanghwe uja; na ungi giki, Nzugu, nanghwe wiza; na nsese wane giki, Itaga iyi, nanghwe wiyita. Aho Yesu wigwa iyo, ukumya, na ubawila abo bakunondelaga, Nghana namuwila giki, natali kubona kuzunya kutale giti uku nulu mu Israeli yaya. Namuwila giki, Bingi baliza kufuma kiya na ngʼweli, baligasha hamo na Abrahamu, na Isaaka, na Yakobo, mu butemi wa ngʼwigulu. Aliyo bana ba butemi balaponyiwa mu giiti cha hanze: uko kulabiza kulila shisoji na kushelanya mino. Na Yesu ungʼwila ntale wa bashilikale giki, Jaga lulu, gitumo wazunyaga ibize kuli bebe. Na nyanda upijiwa ngʼwikanza lyenilo duhu. Aho Yesu wali wingila mu numba ya ngʼwa Petro, umona ninabuko alalile asatile nswiza. Na unkinda nkono gwakwe, na nswiza gungʼwinga; nanghwe ubuka, ubatumamila. Aho yubiza mhindi, bungʼwenhela bingi abali na masamva: nanghwe uyipeja mioyo iyo na kuhaya duhu, na ubapija bose abasatile. Gushikilijiwe uyo gwaahayiwa muli nghangi Isaya, giki, Wei ngʼwenekele wali utwala mabugokolo giswe na ubucha mabulwile giswe. Aho Yesu wali ubona mabita matale gampindije, ulagila kuja ku nkilo. Na ngʼwandiki umo ungʼwegela, ungʼwila giki, Nangi, nakukulondela Bebe hose hose uko uje. Na Yesu ungʼwila giki, Nyamhawa jili na miobo, na noni ja hape jili na machanzo; aliyo Ngʼwana wa munhu ati na ha kulaja ntwe gwakwe. Umo ungi wa bahemba bakwe ungʼwila giki, Seba, unizunilije naje tame nakanjike baba. Aliyo Yesu ungʼwila giki, Nilondelage, balekage bafu babajike bafu babo. Aho Yesu wingila mu lyato, bahemba bakwe bunondela. Kuhayumanila nyaga ntale gubuka mu nyanza, nose lyato lyukundikijiwa na mahuli; aliyo Wei walalalile tulo. Na bahemba bakwe bungʼwegela, bumisha, buhaya giki, Seba, tupijage; twayagala. Nanghwe ubawila giki, Ngʼogohaga nguno ki, a bingʼwe ba kuzunya kudo? Huna ubuka, uyihama miyaga na nyanza; na bubiza ho bulendu butale. Banhu bukumya, buhaya giki, Munhu uyu ni munhu ki, miyaga na nyanza nasho shungʼwigwa? Aho wali ushika ku nkilo ku si ya Bagadara, bumanhya nanghwe banhu babili abali na masamva, bafumile mu mashigila, bakali kutinda; kushisha nose, munhu walatudula kubitila mu nzila yeniyo nulu umo yaya. Nabo buhamuka, buhaya giki, Bebe Yesu, Ngʼwana wa Mulungu, tuli na mihayo ki biswe na Bebe? Wizaga aha kutuluhya aho ngelo itinashika? Kule nabo lyali ho idale lya ngurube ningi jikudimaga. Masamva gungʼwikumbilija, guhaya giki, Ulu ulitupeja, utuzunilije kwingila mo ngʼwidale lya ngurube. Nanghwe ugawila giki, Jagi. Aho gubinga, gingila ngʼwidale lya ngurube: haho na haho idale lyose lya ngurube lyupela na nguzu, lyuholomoka ha ngegu shimu mu nyanza, lyucha mu minzi. Badimi bupela buja mu nzengo, busombola yose, na iyo yali yitwa ku benabo abali na masamva. Hunaho nzengo gose gubuka kunsumbila Yesu; na aho bumona, bungʼwikumbilija inge mu mimbi jabo. Hunaho akingila mu lyato, ukila ku nkilo, na ushika ku nzengo gwakwe. Huna bungʼwenhela nemehazu, alalile ha bulili; Yesu aho ubona kuzunya kwabo, ungʼwila nemehazu giki, Ngʼwana wane, timbaja ngholo; shibi shako shalekejiwa. Huna bamo ba bandiki bubyuhaya mu mioyo yabo giki, Munhu uyu akundukagulaga Mulungu. Na Yesu umana maganiko gabo, uhaya giki, Nguno ki ngʼwiganika sha bubi mu ngholo jingʼwe? Changu kili he, kuhaya giki, Shibi shako shalekejiwa, nulu kuhaya giki, Bukaga, ushiminze? Aliyo mumane giki, Ngʼwana wa munhu ali na budula mu si kulekeja shibi, (hunaho ungʼwila nemehazu giki), Bukaga, ubuche bulili wako, uje kaya. Nanghwe ubuka, uja kaya. Aliyo aho mabita gali gubona iyi, gukumya, na gunkuja Mulungu, Uyo wali wabinha banhu budula giti ubu. Na aho Yesu ali mu nzila alinga ko, umona munhu igashije ngʼwitobelo, lina lyakwe Matayo, ungʼwila giki, Nilondelage. Nanghwe ubuka, unondela. Na yubiza giki, aho wali igashije akulyaga mu numba, batobisha bingi na ba shibi biza bigasha hamo na Yesu na bahemba bakwe. Aho Bafarisayo bubona iyi, bubawila bahemba bakwe giki, Nguno ki nangi wingʼwe akulyaga hamo na batobisha na ba shibi? Aliyo aho Yesu wigwa iyi, ubawila giki, A bapanga bati na nguno ya kunkoba naguji, aliyo abasatile. Aliyo jagi, ngʼwilange makulu ga mhayo uyu, Nayejiwa na kuchila kigongo, kitambo yaya; iki natizile kubitana batungilija, aliyo ba shibi bashike mu koya. Hunaho bahemba ba ngʼwa Yohana Matija biza kuli Wei, buhaya giki, Nguno ki biswe na Bafarisayo tukadilaga nzala nghangala ningi, aliyo bahemba bako batadilaga nzala? Na Yesu ubawila giki, Biye ba ntoji badula kinahe kupinihala aho ntoji atalali hamo nabo? Aliyo shiku jiliza, aho ntoji alamala kwinjiwa mu bo, hunaho lulu baladila nzala. Ati ho munhu uyo usumila kidaso kipya ha ngʼwenda nkulukulu, iki icho chasumilwa ho chutandula ngʼwenda na butanduke waho bongeja. Hangi banhu batatuulaga minzi ga mizabibu mapya mu mhinda nghulukulu; ulu bita giko mhinda jutanduka, na minzi ga mizabibu gidika, na mhinda jikukenaguka; aliyo bakutuulaga minzi ga mizabibu mapya mu mhinda mhya, hunaho bubili washo shikala shipanga. Aho walatali ubawila mihayo iyi, wiza nsugi umo, unamya, uhaya giki, Ngʼwana wane ngʼwaniki ali hihi kucha; aliyo nzugu ukantuulile nkono gwako, nanghwe akubiza mpanga. Na Yesu ubuka unondela hamo na bahemba bakwe. Hunaho nkima uwalasatile ngeji gwa mininga miaka ikumi na ibili, wiza hanuma yakwe, na ubukuumya bukunilo wa ngʼwenda gwakwe; Iki akahaya mu moyo gwakwe giki, Ulu nugukuumya ngʼwenda gwakwe duhu, nakupila. Aliyo Yesu ugaluka, umona, ungʼwila giki, Ngʼwana wane, timbaja ngholo; kuzunya kwako kwakupijaga. Na nkima upijiwa kufuma ikanza ilo. Na aho Yesu wingila mu numba ya nsugi, na ubabona bafuji ba mbilolo, na ibita lyuyoga, Ubawila giki, Ingagi ho: iki ngʼwaniki atachile, aliyo ashutulile duhu. Nabo bunsekela no. Aliyo aho banhu bali bufunyiwa hanze, Wei wingila, undima nkono gwakwe; na ngʼwaniki ubuka. Na lukumo lwa mhayo uyu lukumuka mu si iyo yose. Na aho Yesu ali mu nzila alinga ko, baboku babili bunondela, bubyuhamuka, buhaya giki, Bebe ngʼwana wa ngʼwa Daudi, utuchile kigongo. Aho ushika mu numba, a baboku bungʼwegela: na Yesu ubawila giki, Angu, ngʼwazunya giki, Nene nadula kwita mhayo uyu? Nabo bungʼwila giki, Ali chene, Seba. Hunaho ukinda ku miso gabo, uhaya giki, Gitumo kuzunya kwingʼwe kuli, ibize chene ku bingʼwe. Huna miso gabo gufumbuka. Na Yesu ubakomeleja na nguzu, uhaya giki, Ilanghanagi, atizumana munhu nulu umo. Aliyo boi aho binga, bunkumucha mu si iyo yose. Aho benabo bakwingaga, bungʼwenhela munhu kimumu ali na isamva. Na aho lyupejiwa isamva, u kimumu ulungalunga; na mabita gukumya, guhaya giki, Itinilonga giki na kamo mu Israeli. Aliyo Bafarisayo buhaya giki, Akupejaga masamva mu budula wa ntale wa masamva. Na Yesu wali wipindila mu mizengo yose na magunguli, ubyulanga mu mabilingilo gabo, na ubyulomela evangeli ya butemi na ubyupija bulwile bose na bugokolo bose. Aho ugabona mabita, ubasatwa, iki bali banogoleku na kusalanghana giti ngholo ijiti na ndimi. Hunaho ubawila bahemba bakwe giki, A magesa gene mingi, aliyo batumami bagehu. Kulwa iyi ngʼwikumbilijagi Seba wa magesa abatume batumami mu magesa gakwe. Na aho wali ubitana bahemba bakwe ikumi na babili, ubinha budula ku mioyo ya busoso kuyipeja, na kupija bulwile bose na bugokolo bose. Mina ga batungʼwa ikumi na babili gene aya: wa kwandia Simoni uyo akitanagwa Petro, na Andrea ngʼwana wa ngʼwawe; Yakobo ngʼwana wa ngʼwa Zebedayo, na Yohana ngʼwana wa ngʼwawe; Filipo na Bartolomayo; Tomaso na Matayo u ntobisha; Yakobo ngʼwana wa ngʼwa Alfayo, na Lebayo uyo akitanagwa Thadayo; Simoni muna Kanani, na Yuda Iskariota uyo wali ungʼwinha ko. Aba ikumi na babili Yesu wali ubatuma, ubakomeleja uhaya giki, Mutizuja mu nzila ja bana mahanga, hangi mutizingila mu nzengo gose gwa Basamaria; Aliyo jagi ku ngholo ijijimilile ja mu numba ya Israeli. Aho mujile, lomelagi, hayagi giki, Butemi wa ngʼwigulu wegelaga. Bapijagi balwile, bejagi ba mbiji, bajuchagi bafu, gapejagi masamva: ngʼwanukulaga sha dalali, na bingʼwe inhagi sha dalali. Mutizubucha zahabu, nulu feza, nulu senti mu mishipi yingʼwe; Nulu mhinda ya mu lugendo, nulu nghanjo ibili, nulu shilatu, nulu nanga: iki ntumami igelile kwinhiwa shiliwa shakwe. Buli nzengo gose na igunguli lyose umo ngʼwingila mo, gisilijagi ni nani ali mo uyo igelile kungʼwegeleja: na ikalagi ko kushisha mulinge. Aho ngʼwingila mu numba, muyigishe. Na ulu numba igelelilwe, mhola yingʼwe ibize ku numba iyo; aliyo ulu bigelelilwe, mhola yingʼwe ishoke ku bingʼwe. Na uyo ose atungʼwegeleja bingʼwe nulu kwigwa mihayo yingʼwe, aho ngʼwinga mo mu numba yeniyo nulu mu nzengo gwenuyo gunghumulagi lububu lwa ku mhambala jingʼwe. Nghana namuwila giki, Ku si ya Sodoma na Gomora ilabiza hambuhambu mu lushiku lwa nsango kutinda ku nzengo gwenuyo. Lolagi, Nene namutuma giti ngholo hagati ya mhuge; kulwa iyi mubize na masala giti nzoka, hangi mubize muti na buhwiganu giti nghuulu. Aliyo ilanghanagi ku banhu, iki bakungʼwinha ko bingʼwe ku mabanza, na mu mabilingilo gabo bakumutula; Ningʼwe mukutwalwa mu miso ga banangwa na batemi kulwa nguno yane, ibize bukaniji kubo na ku bana mahanga. Aliyo aho bakungʼwinha ko, mutizikoyela giki, mukuhaya ki, nulu mukuhaya kinahe; iki ngʼwikanza ilo mukwinhiwa i ya kuhaya. Iki iti bingʼwe aba mukulungalunga, aliyo Moyo wa ngʼwa Singʼwe Uyo akulungalungaga mu bingʼwe. Ngʼwana wa ngʼwabo akungʼwinha ko ngʼwana wa ngʼwabo kucha; na ise ngʼwana wakwe; na bana bakububukila babyaji babo, na bakubabulaja. Na bingʼwe mukubiza bakumukolwa banhu bose kulwa nguno ya lina lyane; aliyo uyo akwiyumilija kushisha ku mhelo, alapijiwa. Aliyo aho bakumunyajanyaja mu nzengo gumo, pelelagi ku gungi, iki namuwila nghana giki, Mutalakwilikanya mizengo ya Israeli kushisha Ngʼwana wa munhu aho aliza. Nghemba atunkila nangi wakwe, nulu nsese atunkila ise bugonzo. Nghemba igelelilwe kubiza giti nangi wakwe na nsese giti ise bugonzo. Ulu bunghaya namugi giki, Beelzebuli, angu, iti kutinda no abo ba kaya yakwe? Kulwa iyo mutizubogoha iki guti ho mhayo gukundikigije uyo gutalakundulwa, nulu uyo gubisile ugutalamanika. Iyo namuwila mu giiti, ihayagi hape; na iyo mukwigwaga mu kutu, ilomelagi higulya ya numba. Mutizubogoha abubulaga mili aliyo batudula kubulaga bupanga; aliyo ngʼogohagi Uyo wadula kuyagaja mili na bupanga mu Gehena. Angu, nzwi ibili jitajinjiwagwa na senti imo? Aliyo nulu imo yajo itugwa ha si ulu Singʼwe atamanile: Aliyo nulu nzwili ja mitwe yingʼwe jibalilwe jose. Kulwa iyo mutizogoha; bingʼwe mujikilile no nzwi ningi. Uyo ose wanizunya na unitambula ku butongi wa banhu, na Nene nalantambula ku butongi wa ngʼwa Baba ali ngʼwigulu. Aliyo uyo ose akunilema ku butongi wa banhu, na Nene nalanema ku butongi wa ngʼwa Baba ali ngʼwigulu. Mutiziganika giki, Nali niza kutuula ho mhola mu si; natizile kutuula ho mhola aliyo lilushu. Iki nali niza kunekanya munhu na ise, na ngʼwana na nina, na ngʼwinga na ninabuko; Na banishi ba munhu balabiza a ba mu numba yakwe. Uyo antogilwe ise nulu nina kutinda Nene, atanigelelilwe; na uyo antogilwe ngʼwana ngosha nulu ngʼwana nkima kutinda Nene atanigelelilwe. Na uyo atusola nsalaba gwakwe na kunilondela, atanigelelilwe. Uyo ububona bupanga wakwe ngʼwene alabuyagaja; na uyo ubuyagaja bupanga wakwe kulwa nguno yane, alabubona. Uyo ungʼwegeleja bingʼwe, ngʼwene wanegeleja Nene, na uyo unegeleja Nene, ngʼwene wangʼwegeleja Uyo waanituma. Uyo ungʼwegeleja nghangi mu lina lya nghangi, ngʼwene alanukula mhela ya nghangi; na uyo ungʼwegeleja munhu ntungilija mu lina lya ntungilija, ngʼwene alanukula mhela ya ntungilija. Na uyo ose akungʼwisha umo wa banigini aba kikombe cha minzi manyilizu gwike mu lina lya nghemba, namuwila nghana giki, atalagayiwa mhela yakwe na hado yaya. Na ikabiza giki, aho Yesu wali umala kubalagila bahemba bakwe ikumi na babili, winga ko uja kulanga na kulomela mu mizengo yabo. Yohana aho wali wigwa mu numba ya batungwa shitile sha ngʼwa Kristo, ubatuma bahemba bakwe babili. Bungʼwila giki, U Bebe uli Ngʼwenuyo wahayiwa akwiza, himba tunindile ungi? Yesu ushosha ubawila giki, Jagi, mukansombolele Yohana iyo ngʼwigwaga na iyo ngʼwibonaga: Giki, baboku balinhwa kubona, na bachigiji balishiminza, ba mbiji balejiwa, bachibi ba matu baligwa, bafu balijuchiwa, na bahabi balilomelwa evangeli. Ali wa lubango uyo atalipama muli Nene. Benabo aho bakujaga, Yesu wandia kunghaya Yohana ku mabita giki, Ngʼwali ngʼuja mu bu kulola ki? Idete lyunegenyiwa na nyaga? Aliyo ngʼwali ngʼuja kubona ki? Munhu agalililwe na shizwalo shifuku? Ambu, abazwalile shizwalo shifuku bali mu numba ja batemi. Aliyo ngʼwali ngʼuja kubona ki? Ngʼwali ngʼuja kumona nghangi? Ali chene, namuwila giki, ankilile nghangi niyo no. Hu na ngʼwene uyo yaandikwa ya kunghaya giki, Lolagi, nantuma ntungʼwa wane ku butongi wako, uyo alalibejabeja ipalapala lyako ku butongi wako. Nghana namuwila giki, Mu benabo abakabyalagwa na bakima atilongaga ntale kutinda Yohana Matija: aliyo nahene, u ndo mu butemi wa ngʼwigulu ankilile wei butale. Kufuma mu shiku ja Yohana Matija kushisha haha, butemi wa ngʼwigulu wingilwa na nguzu, nabo abita nguzu bubudima. Iki bahangi bose na shilagilo bubyulanga kushisha kuli Yohana. Na ulu bingʼwe mutogilwe kwanukula mhayo uyu, u Yohana hu na ngʼwene Eliya uyo wali uhaya kwiza. Uyo ali na matu ga kwigwa, leka igwe. I kibyalilwe iki nakubikolanija na ki? Chikolile na banigini abigashije mu nghungʼwano, bubitana bichabo. Buhaya giki, Twamufulila mbilolo na bingʼwe kubina yaya; twamulilila nghungu na bingʼwe kupinihala yaya. Iki Yohana akiza atulyaga nulu atungʼwaga, na bahaya giki, Ali na isamva. Ngʼwana wa munhu akiza akulyaga na akungʼwaga, na bahaya giki, Lolaga, munhu ngʼwaka na ngʼwi wa minzi ga mizabibu, na nsumba ngʼwichabo wa batobisha na ba shibi! Na masala gatungiligijiwa na bana bago. Hunaho akandia kuyiduka mizengo umo shali Shitwa shitile shakwe sha budula shingi, iki yali itoya. Ulasangwa, bebe Korazini! Wasangwa, bebe Bethsaida! Iki ulu shitile sha budula isho shali Shitwa mu bingʼwe ni shali Shitwa mu Turo na Sidoni, ni bali boya kale mu magunila na mabu. Aliyo namuwila giki, Ku Turo na Sidoni ilabiza hambuhambu mu lushiku lwa nsango, kutinda ku bingʼwe. Na bebe, Kapernaumu, uyo waagunguhiwa kushisha ngʼwigulu, uladohelejiwa kushisha kulimu: iki shitile sha budula isho shali Shitwa muli bebe ulu ni shali Shitwa mu Sodoma, ni yali yushinga ho kushisha lelo. Aliyo namuwila giki, Ku si ya Sodoma ilabiza hambuhambu mu lushiku lwa nsango, kutinda kuli bebe. Ngʼwikanza lyenilo Yesu ushosha, uhaya giki, Nakulumba Bebe, Baba, Seba wa igulu na si, iki ukababisila mihayo iyi a balalanghanu na ba masala na uyikundula ku banigini: Ali chene, Baba, iki giko yali yukutoga, mu miso gako. Yose niinhiwa na Baba; na ati ho uyo amanile Ngʼwana ulu ati Baba; hangi ati ho uyo amanile Baba ulu ati Ngʼwana, na uyo ose Ngʼwana atogilwe kunkundulila. Kitanilwe ka ku bufula Nzugwi kuli Nene, bingʼwe bose abakoyile na babunilwe miligo, na Nene nakungʼwifuja. Ngʼwituulile ikondejo lyane ngʼwilangage kuli Nene; iki Nene ndi mfula na ngʼwidohya mu ngholo; ningʼwe mukubona kwifula mu ngholo jingʼwe. Iki ikondejo lyane lyene inogu, na nigo gwane mbupu. Ngʼwikanza lyenilo Yesu wali ubita mu migunda ya ngano ha Sabato; na bahemba bakwe butuba, bandia kuhulula mangala, na bulya. Aliyo Bafarisayo aho bubona iyi, bungʼwila giki, Ambu, bahemba bako bakwitaga icho cha ngilo kwita ha Sabato. Aliyo Wei ubawila giki, Mutasomaga iyo akita Daudi aho wali utuba, wei na benabo abali hamo nanghwe; Gitumo wali wingila mu numba ya Mulungu na ulya migati iyufunyiwa kuli Mulungu, iyo yali ili ya ngilo kuli wei na ku abo abali hamo nanghwe kwilya, ulu iti bagabiji bike? Nulu mutasomaga mu shilagilo giki, ha Sabato bagabiji mu hekalu bakakenagulaga Sabato, na bati na kilingo? Aliyo namuwila giki, Aha ali ho ntale kutinda hekalu. Aliyo ulu ni ngʼwali mumanile makulu ga mhayo uyu giki, Nene nayejiwa na kuchila kigongo, kitambo yaya, ni ngʼwali mutabalekanije nsango abati na kilingo. Iki Ngʼwana wa munhu ali Seba nu ku Sabato. Aho winga uko wingila ngʼwibilingilo lyabo. Na lolaga, walali mo munhu ali na nkono gumile. Na bumuja buhaya giki, Angu, cha ngilo kupija ha Sabato? babonele ho mhayo gwa kumula. Ubawila giki, Angu, munhu nani mu bingʼwe uyo ali na ngholo imo, ulu yugwa ngʼwichongo ha Sabato atuyidima kuyinja mo? Angu, munhu ati wa mpango kutinda ngholo? Kulwa iyi iti cha ngilo kwita cha wiza ha Sabato. Hunaho ungʼwila munhu ngʼwenuyo giki, Tamaga nkono gwako. Na ugutama; nago gubiza mpanga giti u gungi. Aliyo Bafarisayo bufuma na bulomana gitumo bakunyagaja. Aliyo Yesu iki umana mhayo uyu winga ko uja: na mabita matale gunondela; nanghwe ubapija bose, Na ubakomeleja batizunkumucha; Gushikilijiwe uyo gwaahayiwa na nghangi Isaya, uhaya giki. Lolagi ntumami wane, uyo naansola; ntogwa wane, muli Wei bupanga wane wayejiwagwa; nakuntuulila Moyo Ngʼwela wane, nanghwe alabasoinbolela bana mahanga butungilija. Atalahalalila, nulu kuhamuka; nulu munhu ataligwa ilaka lyakwe mu mapalapala. Idete lilabukile atalalibinza, lutambi ulukuzukaga lyochi atalalujimya, kushisha alakutuma kulekanya nsango kushike mu bupyeni. Na bana mahanga balahsagililwa lina lyakwe. Hunaho akenhwa kuli Wei munhu ali na isamva ali moku hangi kimumu, nanghwe umpija, kushisha nose uyo walali moku na kimumu ulungalunga na ubona. Na mabita gose gudedebala, guhaya giki, Angu, Uyu ati ngʼwana wa ngʼwa Daudi? Aliyo aho Bafarisayo bigwa iyi, buhaya giki, Ambu, Ngʼwenuyu atupejaga masamva ulu iti mu budula wa Beelzebuli u ntale wa masamva. Na Yesu iki umana maganiko gabo, ubawila giki. Buli butemi uwilekanya wenekele wiyita dalali; na buli nzengo nulu numba iyilekanya yenekele italimila. Na ulu Shetani akumpejaga Shetani, wilekanya ngʼwenekele, butemi wakwe bulimila kinahe lulu? Na Nene ulu nakupejaga masamva mu budula wa Beelzebuli, bana bingʼwe bakugapejaga mu budula wa ngʼwa nani? kulwa iyo boi bakubiza balekanya bingʼwe. Aliyo Nene ulu nakupejaga masamva mu budula wa Moyo wa Mulungu, huna lulu butemi wa Mulungu wangʼwiziilaga bingʼwe. Nulu munhu wadula kinahe kwingila mu numba ya munhu wa nguzu, na kusonza shikolo shakwe, ulu atandije kuntunga munhu ngʼwenuyo wa nguzu? hunaho akusonza numba yakwe. Uyo ati ku lwande lwane ali ngʼwanishi wane; na uyo atukumingaga hamo na Nene, usalanghanya. Kulwa iyo namuwila giki, Banhu balalekejiwa kibi chose na buduki bose, aliyo kunduka Moyo Ngʼwela kuti na kulekejiwa. Na uyo ose unghaya kibi Ngʼwana wa munhu, alalekejiwa; aliyo uyo ose unghaya kibi Moyo Ngʼwela, atalalekejiwa, nulu ngʼwikanza ili, nulu mu ilo lyahaya kwiza. Nulu bejagi nti gubize gwa wiza, na matwajo gago ga wiza; nulu bejagi nti gubize gwa bubi, na matwajo gago ga bubi; iki buli nti gumanika ku matwajo gago. Bingʼwe, kibyalilwe cha shipili, ngʼwadula kinahe kuhaya mihayo ya wiza, aho muli ba bubi? Iki mu iyo yokala mu ngholo, nomo gukwilungalungaga. Munhu wa wiza akufunyaga sha wiza kufuma mu bubiki wa wiza wa mu ngholo; na munhu wa bubi akufunyaga sha bubi kufuma mu bubiki wa bubi. Aliyo Nene namuwila giki, Mu lushiku lwa kulekanya nsango banhu balagufunya buli mhayo gwa dalali uyo bali bulungalunga. Iki kufuma mu mihayo yako ulabiza ntungiligijiwa, na kufuma mu mihayo yako ulalekanyiwa nsango. Hunaho bandiki na Bafarisayo bamo bushosha buhaya giki, Nangi, tutogilwe kubona kimanikijo kuli Bebe. Aliyo ushosha ubawila giki, Kibyalilwe cha bubi na cha bushihya kilikoba kimanikijo, aliyo kitinhiwa kimanikijo ulu iti kimanikijo cha Nghangi Yona. Iki gitumo Yona wali ubiza ho malimi adatu na bujiku budatu mu nda ya ndilo nhale, giko na Ngʼwana wa munhu alabiza malimi adatu na bujiku budatu mugati ya si. Banhu ba Nineve balimila ha lushiku lwa kulekanya nsango hamo na kibyalilwe iki, na balachenheleja kubona nsango; iki bali boya kulwa kulomela kwa ngʼwa Yona, na lolaga, ntale wa kutinda Yona ali ho aha. Ntemi nkima wa dakama alimila ha lushiku lwa kulekanya nsango hamo na kibyalilwe iki, alachenheleja kubona nsango; iki akiza kufuma ku mhelo ja si igwe masala ga ngʼwa Solomoni; na lolaga, ntale wa kunkila Solomoni ali ho aha. Moyo nsoso aho gungʼwinga munhu, gubita mu mapande agati na minzi, gukobakoba ha kwifulila, gutubona. Hunaho guhaya giki, nakushoka mu numba yane iyo nali ninga mo; na aho gushika ko, guyisanga ili dalali, ipyagulile na igalilile. Hunaho guja gwenha mioyo yingi mpungati ya bubi kutinda goi, nayo yingila na yikala mo; nghalilo ya munhu ngʼwenuyo yubiza ya bubi kutinda u wandijo. Ilabiza chene na ku kibyalilwe iki cha bubi. Aho walatali ulungalunga na mabita, lolaga, nina na bana ba ngʼwawe bimila hanze, bukoba kulungalunga nanghwe. Munhu umo ungʼwila giki, Lolaga, noko na bana ba ngʼwingʼwe balimila hanze, balikoba kulungalunga na Bebe. Aliyo Wei unshokeja ngʼwenuyo wali wangʼwila, uhaya giki, Mayu ngʼwene nani? Na bana ba ngʼwiswe bene banani? Nanghwe utama nkono gwakwe ku bahemba bakwe, uhaya giki, Lolaga, Mayu na bana ba ngʼwiswe! Iki uyo ose akwitaga iyo atogilwe Baba ali ngʼwigulu, hu na ngʼwene ngʼwana wa ngʼwiswe, na ilumbu lyane, na mayu. Lwise lwene wali winga mu numba, wigasha ha lwande lwa ku nyanza. Na mabita matale gungʼwibilingila, kushisha nose wingila mu lyato na wigasha mo; na ibita lyose lyimila ha ngʼwalo. Hunaho ulungalunga nabo mihayo mingi mu shigemenghejo, uhaya giki, Lolagi, mibi akafuma uja kubiba mbiyu; Aho ubiba, mbiyu jimo jugwa ha nzila, huna jiza noni, jujilya; Jingi jugwa ha ipande lya mawe, aho yali iti ho si ningi; na juzwa wangu iki si yali itajile no. Aliyo aho limi lyaka, jochiwa; na iki jali jiti na miji junyala. Jingi jugwa mu mihwa; na mihwa gukula, gujishita; Aliyo jingi jugwa ha si ya wiza, na juhola mbeke, jingi igana, jingi makumi atandatu, na jingi makumi adatu. Uyo all na matu ga kwigwa, leka igwe. Na bahemba begela, bungʼwila giki. Ni buli ukulungalungaga mu shigemenghejo? Nanghwe ushosha ubawila giki, Iki bingʼwe ngʼwinhiwagwa kumana ya kwigeniha ya butemi wa ngʼwigulu, aliyo benabo batinhilwe. Iki uyo ose ali na kinhu, ngʼwenuyo akwinhwa, nanghwe akukwija; aliyo uyo ose ati na kinhu, akwingijiwa na isho ali nasho. Kulwa iyo naalungalungaga nabo mu shigemenghejo giki, aho bulola batulolaga, na aho bigwa, batigwaga, nulu kwitegeleja yaya. Na buhangi wa ngʼwa Isaya washikilijiwa mu bo; ubo bukuhayaga giki, Kwigwa mukwigwa, aliyo kwitegeleja yaya; na kulola mukulola, aliyo kubona yaya. Iki ngholo ya banhu aba yagunaga, na matu gabo gadidohelwa kwigwa, na miso gabo bagalilimaja; giki, batizubona na miso gabo, nulu kwigwa na matu gabo, nulu kwitegeleja na ngholo yabo, nulu kugaluka, na Nene nabapije. Aliyo gali na lubango miso gingʼwe, iki gakulolaga; na matu gingʼwe, iki gakwigwaga. Iki nghana namuwila giki, Bahangi bingi na batungilija bingi bali bukumbula kubona iyi mukuyilolaga, aliyo bali batuyibona; na kwigwa iyi mukuyigwaga, aliyo bali batuyigwa. Kulwa iyo igwagi kigemenghejo cha mibi. Aho munhu ose wigwa mhayo gwa butemi na atugwitegeleja, huna wiza u mi na ugupula mhayo ugwali gubiwa mu ngholo yakwe. Uyu ali ngʼwenuyo uwali ubiwa ha nzila. Aliyo uyo wali ubiwa ha ipande lya mawe, uyu ali ngʼwenuyo akwigwaga mhayo, ugwanukula wangu na kuyega; Nanghwe ati na nji mugati yakwe, aliyo ushinga kakanza; hunaho aho makoye gilonga na kunyajanyajiwa kulwa mhayo haho na haho wipama. Uyo wali ubiwa mu mihwa, uyu ali ngʼwenuyo akwigwaga mhayo, na mayanga ga si, na bulembalembi wa sabo, shugushita u mhayo, nago gututwaja matwajo. Uyo wali ubiwa ha si ya wiza, uyu ali ngʼwenuyo akwigwaga mhayo ugwitegeleja; uyo nghana akutwajaga matwajo, umo igana, na ungi makumi atandatu, na ungi makumi adatu. Ubatuulila kigemenghejo kingi, uhaya giki, Butemi wa ngʼwigulu wikolile na munhu uwali ubiba mbiyu ja wiza mu ngunda gwakwe; Aliyo aho banhu bali bushutula, wiza u ngʼwanishi wakwe; na ubiba pungu ja ngano mu ngano, na uja. Aliyo aho juzwa na jutulika, hunaho lulu jilonga na pungu ja ngano. Hunaho basese ba namugi uyo, aho biza kuli wei, bungʼwila giki, Seba, angu, walutabibile mbiyu ja wiza mu ngunda gwako? guli na pungu ja ngano jafumile hali lulu? Nanghwe ubawila giki, Ngʼwanishi witile iyi. Na basese bungʼwila giki, Utogilwe tuje tukajidubulile mo? Aliyo uhaya giki, Yaya, iki hamo aho mulijidubulila mo i pungu ja ngano, mukujidubulanigija ni ngano hamo najo. Jilekagi jose jikule bubili wajo kushisha ku magesa; na mu shiku ja magesa nalabawila bagesi giki, Jidubulagi mo tame i pungu ja ngano, mujitunge maganda maganda, jipemve; aliyo ngano mujikuminge ngʼwibikilo lyane. Ubatuulila kigemenghejo kingi, uhaya giki, Butemi wa ngʼwigulu wikolile na kabeke ka karadali, ako munhu ukasola na ubiba mu ngunda gwakwe: Ako hene kali kado kutinda mbiyu jose; aliyo aho kukula, kukila makubi gose butale, nako kubiza nti, na noni ja hape jiza, jubyulala mu matambi gago. Ubawila kigemenghejo kingi, Butemi wa ngʼwigulu wikolile na kibimbya, icho nkima ukisola, na ukibisa mu ngelekelo idatu ja busu, kushisha bose bubimbiwa. Mihayo iyi yose Yesu wali ubawila ba mabita mu shigemenghejo, na ulu iti mu kigemenghejo walatubawila mhayo gose; Gushikilijiwe mhayo ugwali guhayiwa na nghangi giki, Nakwasamya nomo gwane mu shigemenghejo, nakuhaya mihayo iyibisile kufuma kubumva kwa si. Hunaho Yesu wilaga na mabita, wingila mu numba; na bahemba bakwe biza kuli Wei, buhaya giki, Utufubolele kigemenghejo cha pungu ja ngano ja mu ngunda. Nanghwe ushosha ubawila giki, Uyo akubibaga mbiyu ja wiza Ngʼwene Ngʼwana wa munhu; Ngunda gwene si; mbiyu ja wiza, a bene bana ba butemi; aliyo pungu ja ngano, a bene bana ba ngʼwenuyo mi; Ngʼwanishi uwali ujibiba ngʼwene Shetani; magesa gene nghalikijo ya ikanza ili: na bagesi bene bamalaika. Gitumo pungu ja ngano judubulilwa na jupemva moto ilabiza giko ku nghalikijo ya ikanza ili. Ngʼwana wa munhu alabatuma bamalaika bakwe, nabo baladubulila mo mu butemi wakwe sha kwipamya shose, na abo bakwitaga bugomi. Nabo balabaponya ngʼwichongo lya moto: kwenuko kulabiza ho kulila nghungu na kushelanya mino. Hunaho batungilija balaka giti limi mu butemi wa ngʼwa sabo. Uyo ali na matu ga kwigwa, leka igwe. Kigemenghejo cha busabi bubisile mu ngunda Hangi butemi wa ngʼwigulu wikolile na busabi ububisile mu ngunda; ubo munhu aho ubukunga ububisa; na kulwa kubuyegela, uja ujinja shose isho ali nasho, na ugula ngunda gwenuyo. Hangi butemi wa ngʼwigulu wikolile na munhu nkwabi, uyo akukobaga lulu ja wiza; Uyo aho wikunga lulu imo ya mpango ngʼwingi, uja, ujinja shose isho ali nasho, na wigula. Hangi butemi wa ngʼwigulu wikolile na igokolo ilyali lyuponyiwa mu nyanza, nalyo lyukuminga ja mbika jose; Ilo aho lyokala, bulidutila ha ngʼwalo, na bigasha bujikuminga i ja wiza mu shiseme; aliyo i ja bubi bujiponya. Ilabiza giko ku nghalikijo ya ikanza ili; bamalaika baliza, nabo balabakomanya a ba bubi kufuma mu batungilija, Na balabaponya ngʼwichongo lya moto: kwenuko kulabiza ho kulila nghungu na kushelanya mino. Yesu ubawila giki, Ngʼwitegelejaga mihayo iyi yose? Nabo bungʼwila giki, Ali chene, Seba. Huna ubawila giki, Kulwa iyo buli ngʼwandiki uyo wahembekwa mu butemi wa ngʼwigulu, wikolile munhu namugi, uyo akufunyaga ngʼwibikilo lyakwe shinhu shipya na sha kale. Na yubiza aho Yesu akamala shigemenghejo ishi, huna winga ko. Na aho ushika ku si ya ngʼwabo, akabalanga ngʼwibilingilo lyabo, kushisha nose buzunzumala na buhaya giki, Munhu uyu wafunije hali masala aya na Shitwa ishi sha budula? Ngʼwenuyu, angu, ati ngʼwana wa mpunzi? Na nina ati uyo akitanagwa Mariamu? na bana ba ngʼwawe, Yakobo, na Yusufu, na Simoni, na Yuda? Na balumbuye, angu, bati ho bose kunu ku biswe? munhu uyu wafunije hali lulu iyi yose? Nabo bipama muli Wei. Aliyo Yesu ubawila giki, Nghangi atugayiwa ikujo, ulu iti mu si ya ngʼwabo, na mu numba yakwe. Na kwenuko walatita ko shitile shingi sha budula, kuhva butuzunya wabo. Ngʼwikanza ilo Herode u nsugi wali wigwa lukumo lwa ngʼwa Yesu, Na ubawila batumami bakwe giki, Uyu hu ngʼwene Yohana Matija; wajukile mu bafu; na kulwa iyi shitile ishi sha budula shikwitaga muli Wei. Iki Herode wali wandima Yohana, untunga, na untuula mu jela, kulwa nguno ya Herodia nke wa ngʼwana wa ngʼwawe, Filipo. Iki Yohana akangʼwila giki, Ilemegije bebe kubiza nanghwe. Aho walatogilwe kumulaga ubogoha banhu, iki buzunya giki, ngʼwene nghangi. Aliyo aho bulwizukwa lushiku lutale lwa kubyalwa kwa ngʼwa Herode, ngʼwana ngʼwaniki wa ngʼwa Herodia ubina hagati yabo, unyeja Herode. Huna ungʼwisagija na kilahilo giki, akunsamba kinhu chose alakilombe. Nanghwe iki uhanwa na nina, uhaya giki, Nisambage henaha ngʼwilangahe u ntwe gwa ngʼwa Yohana Matija. Na ntemi upinihala; aliyo kulwa shilahilo shakwe, na kulwa benabo abali bigashije ku shiliwa hamo nanghwe, ulagila inhiwe. Utuma umuta Yohana ntwe mu jela. Na ntwe gwakwe gwenhwa ngʼwilangahe, na bungʼwinha ngʼwaniki, nanghwe untwalila nina. Huna bahemba bakwe biza, bugubucha mimba, buguguma; na buja bukansombolela Yesu. Aho Yesu wali wigwa iyo, winga kwenuko, uja mu lyato, wisunda heke kwipande iliti na banhu. Aho mabita gali gigwa iyo, gufuma mu mizengo gunkubija mu nzila ya magulu. Aho Yesu winga, ubona ibita itale, ubasatwa, na ubapija balwile babo. Aho yali ili mhindi bahemba bakwe biza kuli Wei buhaya giki, Ipande ili liti na banhu, na haha ikanza lyabitaga; galagage mabita, baje mu mizengo, bakigulile benekele shiliwa. Aliyo Yesu ubawila giki, Bati na mhayo gwa kuja; binhagi bingʼwe sha kulya. Nabo bungʼwila giki, Aha tuti na kinhu numho migati itano na ndilo ibili. Nanghwe uhaya giki, Shenhagi hali Nene aha. Na ugalagila mabita kwigasha ha maswa; na wanukula migati itano na ndilo ibili, ulangamila miso kwigulu, usungulila lubango, ushimeganya ubinha bahemba, na bahemba bubinha banhu. Na bose bulya, biguta; na bukuminga masajiwa agali gusaga, masonzo ikumi na abili agokala. Nabo abali bulya bali bagosha hamo shiku shitano kuleka bakima na bana. Haho na haho Yesu ubahadikija bahemba bakwe kwingila mu lyato, batonge ku nkilo, kushisha Wei alamale kwilaga na mabita. Na aho wamala kwilaga na mabita, ulinha mu lugulu wiyene kulomba, na aho yali ili mhindi walali ko wiyene. Aliyo lyato lyali lili ha bujiba wa nyanza, lyubuchabuchiwa na mahuli, iki nyaga gwali gubafumila ku butongi. Mu bulindi wa kane wa bujiku, Yesu uja kubo, akushiminzaga higulya ya nyanza. Na aho bahemba bumona alishiminza higulya ya nyanza, biganilija, buhaya giki, Lili linghangi; nabo buhamuka kulwa boba. Haho na haho Yesu ulungalunga nabo, uhaya giki, Timbyagi ngholo; ambu, ndi Nene; mutogohage. Petro unshokeja, uhaya giki, Seba, ulu uli Bebe, uniwile nize kuli Bebe higulya ya minzi. Nanghwe ungʼwila giki, Nzugu. Na aho Petro winga mu lyato, ushiminza higulya ya minzi, kuja kuli Yesu. Aliyo aho ubona nyaga, ogoha; na aho wandia kutubila, uhamuka, uhaya giki, Seba, nipijage. Haho na haho Yesu utama nkono gwakwe, undima, ungʼwila giki, Bebe wa kuzunya kudo, watawatawa nguno ki? Na aho bumala kwingila mu lyato, nyaga gulembela. Nabo abali mu lyato bungʼwegela, bunamya, buhaya giki, Nghana uli Ngʼwana wa Mulungu. Na aho bali bukila, bushika ku si ya Genesareti. Na banhu ba ipande ilo aho bumana Wei, butuma nghulu mu si iyo yose ibimbikanilwe, nabo bungʼwenhela bose abalwile; Nabo bungʼwikumbilija abazunilije bankuumye nulu kwikigijo lya kizwalo chakwe; nabo bose abunkuumya ko bupijiwa. Hunaho bandiki na Bafarisayo abali bufuma Yerusalemi, biza kuli Yesu, buhaya giki, Bahemba bako bakukilanyaga kilangile cha banamhala ni buli? iki batukalabaga makono gabo aho buhaya kulya shiliwa. Nanghwe ushosha, ubawila giki, Ni nguno ki na bingʼwe mukukilanyaga kilagilo cha Mulungu kulwa kilangile chingʼwe? Iki Mulungu akalagila, uhaya giki, Nkujage so na noko; na, Uyo unduka ise nulu nina abulagwe. Aliyo bingʼwe mukuhayaga giki, Uyo ose alangʼwila ise nulu nina giki, Icho chose shinigelile nene kungʼwinha bingʼwe, chene cha kwinha, nanghwe atunkujaga ise nulu nina. Bingʼwe ngʼwabulaga shilagilo sha Mulungu kulwa kilangile chingʼwe. Bingʼwe bibeleja, Isaya akatungilija kumuhanga bingʼwe, uhaya giki, Banhu aba bakunegelaga na nomo gwabo, na bakunikujaga na milomo yabo; aliyo ngholo yabo ili kule na Nene. Aliyo bakunilamyaga dalali, bakulangaga shilangile ishili migilo ya banhu duhu. Huna ulitana ibita kwiza kuli Wei, ubawila giki, Nigwagi, ngʼwitegeleje: Iti icho chingila mu nomo chungʼwitila munhu mako, aliyo icho chufuma mu nomo hwi chene chungʼwitila mako. Hunaho bahemba bakwe bungʼwegela bungʼwila giki, Umanile Bafarisayo bali bakolwa aho bigwa mhayo uyu? Aliyo ushosha, uhaya giki, Buli kihamva icho Baba ali ngʼwigulu atakihambile kiladubulwa. Balekagi; bali batongeji baboku ba baboku, na moku ulu untongela moku ngʼwiye bose bubili wabo bakugwila mo ngʼwichongo. Na Petro ushosha, ungʼwila giki, Utolekeje kigemenghejo iki. Na Yesu uhaya giki, Na bingʼwe mutali abati na kwitegeleja? Mutiganikaga giki, chose ichingila mu nomo chubita mu nda, huna chuponyiwa ngʼwipingilo? Aliyo isho shufuma mu nomo shikufumaga mu ngholo, shene shungʼwitila munhu mako. Iki mu ngholo shikufumaga mo maganiko ga bubi, bubulagi, bushihya, bujingi, wibi, bukaniji wa bumama, buduki. Shenishi shene shikungʼwitilaga munhu mako; aliyo kulya na makono gatakalabile kutungʼwitilaga munhu mako. Na Yesu winga ko, uja ku mapande ga Turo na Sidoni; Hunaho nkima, muna Kanani, afumile mu mimbi ijo, unghamukila, uhaya giki, Nichilage kigongo, Seba, Ngʼwana Daudi, ngʼwana wane uluhiwa no na isamva. Aliyo Wei walatunshokeja mhayo. Na bahemba bakwe bungʼwegela, bungʼwikumbilija, buhaya giki, Ngʼwilage aje, alituyombagilila. Aliyo Wei ushosha uhaya giki, Natatumilwe ulu iti ku ngholo ijajimila ja numba ya Israeli. Aliyo nkima wiza unamya, ungʼwila giki, Seba, nigunanhilage. Nanghwe ushosha uhaya giki, Iti chiza kusola shiliwa sha bana na kushiponya ku tubunda twa mva. Aliyo nkima uhaya giki, Ali chene, Seba: aliyo tubunda twa mva tukulyaga malagalikwa agakugwaga kufuma ha meza ya basugi bato. Hunaho Yesu ushosha, uhaya giki, Bebe Mayu, kuzunya kwako kutale, ibize kuli bebe gitumo utogilwe. Ngʼwana wakwe upila kufuma ikanza lyenilo. Na Yesu winga ko ushika hihi na nyanza ya Galilaya; na ulinha mu lugulu, na wigasha ho. Na mabita mingi gungʼwegela, bali nabo bachigiji, na baboku, na ba kimumu, na balema, na bangi bingi, bubatuula ku magulu ga ngʼwa Yesu; nanghwe ubapija. Kushisha nose banhu bukumya aho bubona ba kimumu balilungalunga, na balema bubiza bapanga, na bachigiji balishiminza, na baboku balibona; nabo bunkumilija Mulungu wa Israeli. Hunaho Yesu ubitana bahemba bakwe, uhaya giki, Nabasatwa a ba ibita, iki bashingile shiku idatu hamo na Nene bati nacho cha kulya: Nene natatogilwe kubalaga baje nzala, batizunogoleka mu nzila. Na bahemba bakwe bungʼwila giki, Tulafunye hali migati mingi giko kunu ngʼwipande iliti na banhu kushisha kubigutya ibita itale giti ili? Na Yesu ubawila giki, Muli na migati yinga? Buhaya, Mpungati na tudilo tugehu. Huna ubalagila banhu kwigasha ha si; Na wanukula migati mpungati na ndilo, ulumba, umeganya, ubinha bahemba bakwe, na bahemba bubinha banhu. Na bose bulya, biguta: na bukuminga masajiwa makililijo mpungati agokala. Abo abali bulya bali bagosha shiku shine, kuleka bakima na bana. Huna ubalaga banhu, wingila mu lyato, ushika ku mapande ga Magdala. Na aho Bafarisayo na Basadukayo bungʼwegela bungema, bumuja abolekeje kimanikijo kufuma ngʼwigulu. Aliyo Wei ushosha ubawila giki, Aho ili mhindi, mukuhayaga giki, Ikubiza ngʼwanga; iki igulu lili lyaza. Ulu dilu, Lelo mbula, iki igulu lili lyaza, lyatungaga di. Bingʼwe bibeleja, mumanile kupima suso ya ngʼwigulu, aliyo shimanikijo sha makanza aya mutushidula. Kibyalilwe cha bubi na cha bushihya kikukobaga kimanikijo; aliyo kitalinhwa kimanikijo ulu iti kimanikijo cha Nghangi Yona. Na ubaleka, uja. Na aho bahemba bakwe bali bushika ku nkilo bali biba kutwala migati. Hunaho Yesu ubawila giki, Ikalagi miso, ngʼwilanghanage ku kibimbya cha Bafarisayo na Basadukayo. Nabo bibugilija boi bike buhaya giki, Iki tutenhile migati. Yesu umana mhayo uyu, uhaya giki, Bingʼwe ba kuzunya kudo, ni buli ngʼwibugilija bingʼwe bike giki, Iki mutenhile migati? Mutali kwiganika nulu kwizukwa i migati itano ya benabo shiku shitano, na masonzo ganga ngʼwali ngʼukuminga? Nulu migati mpungati ya benabo shiku shine, na makililijo ganga ngʼwali ngʼukuminga? Ni buli mutiganikaga giki, yali iti ya migati namuwila kwilanghana ku kibimbya cha Bafarisayo na Basadukayo? Huna lulu bitegeleja giki, walatubawila kwilanghana ku kibimbya cha migati, aliyo ku kilangile cha Bafarisayo na Basadukayo. Aho Yesu ushika mu mapande ga Kaisaria Filipo, ubabuja bahemba bakwe uhaya giki, Banhu bakunihayaga Nene, Ngʼwana wa munhu, ndi nani? Buhaya giki, Bamo bakuhayaga giki, Yohana Matija; bangi giki, Eliya; aliyo bangi giki, Yeremia, nulu umo wa bahangi. Ubawila giki, Aliyo bingʼwe, mukunihayaga ndi nani? Simoni Petro ushosha, uhaya giki, Bebe uli Kristo, Ngʼwana wa Mulungu mpanga. Yesu ushosha, ungʼwila giki, Uli wa lubango bebe, Simoni ngʼwana Yona; iki mili na mininga shitakukundulilile mhayo uyu, aliyo Baba ali ngʼwigulu. Na Nene nakuwila giki, Bebe uli Petro, na ha itale ili nalayizenga Eklezia yane, na milyango ya kulimu italayitinda nguzu. Na Nene nakukwinha mfungulo ja butemi wa ngʼwigulu; na icho chose ulakitunga ha si kilatungwa ngʼwigulu; na icho chose ulakitungula ha si, kilatungulwa ngʼwigulu. Hunaho ubahana bahemba bakwe giki, batizungʼwila munhu nulu umo giki, u Wei Ngʼwene Yesu u Kristo. Kufuma ikanza ilo Yesu wandia kubolekeja bahemba bakwe giki, shingʼwigelile Wei kuja Yerusalemi, na kuluhaluhiwa mihayo mingi na banamhala na bagabiji batale na bandiki, na kubulagwa, na ku lushiku lwa kadatu kujuchiwa. Huna Petro umpunja ha mhelo, wandia kunemeja, uhaya giki, Ii yaya, Seba, mhayo uyu gutalabiza kuli Bebe. Aliyo Wei ugaluka, ungʼwila Petro giki, Jaga kunuma yane, Shetani; bebe uli ishiki lya kwigumha kuli Nene: iki utiganikaga i ya Mulungu, aliyo ya banhu. Hunaho Yesu ubawila bahemba bakwe giki, Munhu ose ulu atogilwe kunilondela, ilemeje ngʼwenekele, abuche nsalaba gwakwe, anilondele. Iki uyo ose atogilwe kupija bupanga wakwe, ngʼwene alabuyagaja; na uyo ose alabuyagaja bupanga wakwe kulwa nguno yane, ngʼwene alabubona. Iki ikumelela ki munhu ulu upandika si yose na ujimija bupanga wakwe? Nulu munhu alafunya ki kukomola bupanga wakwe? Iki Ngʼwana wa munhu aliza ngʼwikujo lya ngʼwa Ise hamo na bamalaika bakwe; hunaho alangʼwinha buli munhu kulenganila na shitile shakwe. Nghana namuwila giki, Bali ho bamo abimilile aha, batalaloja kucha na hado, kushisha aho balamala kumona Ngʼwana wa munhu izile mu butemi wakwe. Na hanuma ya shiku itandatu Yesu untwala Petro, na Yakobo, na Yohana ngʼwana wa ngʼwawe ubalinhya heke boi bike mu lugulu lulihu, Nanghwe uhinduka mu miso gabo; na bushu wali waka giti limi, shizwalo shakwe shubiza shape giti isana. Kuhayumanila, Musa na Eliya bubilongela balilungalunga nanghwe. Petro ushosha ungʼwila giki, Seba, ya wiza biswe kubiza ho aha; ulu utogilwe tuzenge aha maduku adatu; limo lyako, na limo ya ngʼwa Musa, na limo lya ngʼwa Eliya. Aho walatali ulungalunga, kuhayumanila, ilunde lya isana lyubakundikija: na ilaka lyufuma ngʼwilunde, lyuhaya giki, Uyu Ngʼwana wane ntogwa, muli Wei nayejiwa no, ngʼwigwagi Wei. Na aho bahemba bigwa iyi, bugwa bachimigije, na bogoha niyo no. Na Yesu ubegela ubakuumya, uhaya giki, Bukagi, mutogohage. Aho bulangamila miso, bali batumona munhu aliyo Yesu wike. Aho bakwikaga mu lugulu Yesu ubahana, uhaya giki, Mutizungʼwila munhu nulu umo kolechiwa uku, kushisha Ngʼwana wa munhu aho alamalaga kujuka mu bafu. Na bahemba bakwe bumuja, buhaya giki, Ni buli bandiki bakuhayaga gild, Shingʼwigelile Eliya kwiza tame? Yesu ushosha, uhaya giki, Eliya hene izile tame kudoganya yose. Aliyo namuwila giki, Eliya wamalaga kwiza, nabo bali batumana wei, aliyo bali bungʼwitila gitumo bali batogelilwe. Giko na Ngʼwana wa munhu alaluhaluhiwa nabo. Hunaho bahemba bitegeleja giki, walubawilaga ya ngʼwa Yohana Matija. Na aho bali bushika kwibita, munhu umo ungʼwegela, untugija mazwi, uhaya giki, Seba, unchile kigongo ngʼwana wane, iki asatile lusalo, na uluhaluhiwa no; iki nghangala ningi akugwaga mu moto, na nghangala ningi mu minzi. Na nene nali nungʼwenha ku bahemba bako, nabo buduma kumpija. Aliyo Yesu ushosha, uhaya giki, Bingʼwe kibyalilwe ikituzunyaga na chigomagomile, nakwikala na bingʼwe kushisha nanali? hangi nakwiyumilija na bingʼwe kushisha nanali? ngʼwenhagi aha hali Nene. Na Yesu ulilemeja isamva, nalyo lyungʼwinga: na nyanda upijiwa kufuma ikanza ilo. Hunaho bahemba bungʼwegela Yesu ha mhujo, buhaya giki, Ni buli biswe twali tutudula kulipeja? Yesu ubawila giki, Kulwa butuzunya wingʼwe. Iki nghana namuwila giki, Ulu muli na kuzunya giti kabeke ka karadali, mukuluwila lugulu ulu, Ingaga ho uje uko, nalo lukwinga; nulu gutalabiza ho mhayo ugutudulika ku bingʼwe. Aliyo mbika iyi itingaga ulu iti kulwa kulomba na kudila nzala. Aho bali bikala mu Galilaya, Yesu ubawila giki, Ngʼwana wa munhu alihaya kwinhiwa ko mu makono ga banhu; Nabo bakumulaga, na lushiku lwa kadatu akujuchiwa. Nabo bupinihala no. Aho bali bushika Kapernaumu, abanukuji ba nusu shekel! bungʼwegela Petro, buhaya giki, Nangi wingʼwe, angu, atafunyaga nusu shekeli? Uhaya giki, Yaya, akafunyaga. Na aho wingila mu numba, Yesu untanga kumuja uhaya giki, Wiganika kinahe, Simoni? Batemi ba si bakanukulaga kodi nulu buhoja ku banani? Ku bana babo nulu ku babisa? Petro ungʼwila giki, Ku babisa. Yesu ungʼwila giki, Nahene ulu chene, bana bali bana ba si. Aliyo tutizubipamya, jaga ku nyanza ukaponye iloho, na ndilo ya kwandia kwibuka udime, na aho wasamya nomo gwayo ukubona shekeli; utwale yeniyo, ukabinhe kulwane na kulwako. Ngʼwikanza lyenilo bahemba bungʼwegela Yesu, buhaya giki, Nani nghana ali ntale mu butemi wa ngʼwigulu? Na Yesu ungʼwitana ngʼwana nigini, untuula hagati yabo, Uhaya giki, Nghana namuwila giki, Ulu mutugaluka kubiza giti bana banigini, mutalingila na hado mu butemi wa ngʼwigulu. Kulwa iyo uyo ose widohya ngʼwenekele giti ngʼwana nigini uyu, ngʼwenuyo ali ntale mu butemi wa ngʼwigulu. Na uyo ose ungʼwanukula ngʼwana nigini giti uyu mu lina lyane, ngʼwene wananukula Nene. Aliyo uyo ose ungʼwipamya umo wa bado aba abanizunya Nene, ili hambuhambu kuli wei, ulu utungwa iwe itale lya kushela mu nhingo yakwe, na kulibijiwa mu bujiba wa nyanza. Ikusangwa si kulwa sha kwipamya, iki sha kwipamya shitukija kwiza; aliyo akusangwa munhu uyo uchenha cha kwipamya; Nkono gwako nulu kugulu gwako ulu gukwipamya, gubute ho, uguponye kule na bebe; ili ya wiza kuli bebe kwingila mu bupanga uli nema nulu nchigiji, kutinda kwikala uli na makono abili nulu magulu abili na kuponyiwa mu moto gwa welelo na welelo. Na liso lyako ulu lyukwipamya, ulikobole mo, uliponye kule na bebe; ili ya wiza kuli bebe kwingila mu bupanga uli na liso limo duhu kutinda kwikala uli na miso abili na kuponyiwa mu Gehena ya moto. Ilanghanagi mutizundalaha umo wa bado aba; iki namuwila giki, ngʼwigulu bamalaika babo bakulolaga gwa bushu wa ngʼwa Baba ali ngʼwigulu. Iki Ngʼwana wa munhu wizile kupija ichajimila. Ngʼwiganika kinahe? Ulu munhu ali na ngholo igana, na imo yajo yujimila, angu, atujileka ijo makumi kenda na kenda mu ngulu, uja uyikobakoba iyo yajimilaga? Na ulu uyibona, nghana namuwila giki, akuyiyegelaga yeniyo kutinda ijo makumi kenda na kenda ijitajimilile. Giko Singʼwe ali ngʼwigulu atatogilwe umo wa bado aba kuyagala. Nduguyo ulu ukwitila kibi, jaga untambulile kibi chakwe bebe nanghwe bingʼwe babili; ulu wei akukwigwa wabonaga nduguyo. Aliyo ulu atukwigwa, twalaga umo nulu babili bangi hamo na bebe, ibize giki, mu nomo gwa bakaniji babili nulu badatu mhayo gose gudime. Ulu ulema kubigwa abo, iwilage kanisa; aliyo ulu ulema kuyigwa kanisa, leke abize kuli bebe giti misa nulu ntobisha. Nghana namuwila giki, iyo yose mulatunga ha si ilabiza yatungagwa ngʼwigulu, na iyo yose mulatungula ha si, ilabiza yatungulagwa ngʼwigulu. Hangi namuwila giki, Ulu babili mu bingʼwe busangila ha si mu mhayo gose uyo bakugulomba, bakwitilwa na Baba ali ngʼwigulu. Iki aho bali babili nulu badatu bibilingile mu lina lyane, nu Nene ndi ho hagati yabo. Kigemenghejo cha nsese uyo walatunekeja ngʼwiye Hunaho Petro ungʼwegela, uhaya giki, Seba, ndugu wane alabyunisobya nghangala jinga, na nene nabyunekeja? himba kushisha nghangala mpungati? Yesu ungʼwila giki, Natukuwilaga kushisha nghangala mpungati, aliyo kushisha makumi mpungati nghangala mpungati. Kulwa iyo butemi wa ngʼwigulu wikolanijiwa na ntemi nebe, uyo walatogilwe kubala na basese bakwe sabo jakwe. Aho wandia kubala, wenhwa umo kuli wei, uyo walali na bugasa wa talanta 10,000. Aliyo iki wali ugayiwa cha kufunya, ise bugonzo ulagila ajinjiwe, uwe, na nke wakwe, na bana, na shose isho wali nasho, alipe bugasa. Kulwa iyo nsese ugwa, unamya, uhaya giki, Baba bugonzo, iyumilijage na nene, nane nakukulipila shose. Hunaho ise bugonzo wa nsese ngʼwenuyo unsatwa, untaligulila na unekeja bugasa. Aliyo nsese ngʼwenuyo aho winga ho, umona umo wa basese biye, uyo wali na bugasa kuli wei wa shilingi igana: na undima, uniga mu mamilo, uhaya giki, Nilipilage bugasa wane. Kulwa iyo nsese ngʼwiye ugwa ku magulu gakwe ungʼwikumbilija, uhaya giki, Iyumilijage na nene, nane nakukulipila shose. Nanghwe walatatogilwe, aliyo uja umponya mu jela kushisha aho amale kulipa bugasa wenubo. Aho basese biye bubona iyo yitagwa, bupinihala no, buja bunsombolela sabo bugonzo yose iyo yitagwa. Hunaho ise bugonzo ungʼwitana ungʼwila giki, Bebe, nsese nulu, nene nakakulekeja bebe bugasa wenubo bose, iki wali unikumbilija; Angu, shali shikwigelile nu bebe kunchila kigongo nsese ngʼwiyo, gitumo nene nakakuchila kigongo bebe? Na ise bugonzo upelana, ungʼwinha ho ku baluhya kushisha amale kulipa bugasa wenubo bose. Giko nu Baba ali ngʼwigulu alangʼwitila bingʼwe, ulu mutilekejaga mu ngholo jingʼwe buli munhu na nduguye busobya wakwe. Na yubiza aho Yesu akamala mihayo iyi, winga Galilaya, ushika mu mapande ga Buyudaya ku nkilo gwa Yordani. Na mabita mingi gunondela, nanghwe ubapija ko. Na Bafarisayo bungʼwegela, bungema, bungʼwila giki, Angu, ilagilile munhu kumpeja nke wakwe kulwa nguno yose? Aliyo Wei ushosha, uhaya giki, Mutasomaga giki, Uyo wali ubabumba kufuma kwandia ubabumba munhu ngosha na munhu nkima; Na uhaya giki, Kulwa mhayo uyu munhu akuneka ise na nina, akudimana na nke wakwe; na bubili wabo bakubiza mili gumo? Giko batubiza babili hangi, aliyo mili gumo. Kulwa iyo, isho Mulungu waashidimanya hamo, munhu atizushilekanya. Bungʼwila giki, Ni buli Musa akalagila kungʼwinha cheti ya kulekana, na kumpeja? Ubawila giki, Kulwa buganghanazu wa ngholo jingʼwe wali umuzunilija kubapeja bake bingʼwe; aliyo kufuma kwandia yali iti giko. Nene namuwila giki, Uyo ose akumpeja nke wakwe, ulu iti kulwa bujingi, na untola ungi, washihaja; na uyo untola uyo waapejiwa washihaja. Bahemba bakwe bungʼwila giki, Ulu ili giko u mhayo gwa ngosha na nke wakwe, itubelaga kutola. Aliyo Wei ubawila giki, Iti banhu bose badula kugwanukula mhayo uyu, numho abo abinhiwa; Iki bali ho basololwa ababyalwa bali chene kufuma mu nda ja baninabo, hangi bali ho basololwa abaasololwa na banhu, hangi bali ho basololwa abiisoloia benekele kulwa nguno ya butemi wa ngʼwigulu. Uyo wadula kugwanukula, agwanukule. Hunaho wenhelwa bana banigini, abatuulile ho makono gakwe, na kulomba; aliyo bahemba bubalemeja. Aliyo Yesu uhaya giki, Bazunilijagi bana banigini, mutizubalemeja kwiza kuli Nene; iki abali giti aba, butemi wa ngʼwigulu wene wabo. Na ubatuulila makono gakwe, huna winga ho. Hunaho umo ungʼwegela, ungʼwila giki, Nangi wa wiza, nite mhayo ki gwa wiza, nabone bupanga butushila? Aliyo Wei ungʼwila giki, Wanitana wa wiza ni buli? Ati ho wa wiza ulu ati umo, Ngʼwene Mulungu: aliyo ulu utogilwe kwingila mu bupanga, dimaga shilagilo. Ungʼwila giki. Shilagilo ki? Yesu uhaya giki, Utalizubulaga; Utalizushihya; Utaliziba; Utalizukanila ya bumama; Ubakujage so na noko; na, Ulantogagwe nzenganwa ngʼwiyo gitumo witogilwe ngʼwenekele. Nsumba ungʼwila giki, Iyi yose nakayidimaga kufumila mu buyanda wane; natali nalebile mhayo ki? Yesu ungʼwila giki, Ulu utogilwe kubiza nshikanu, jaga ukajinje isho shose uli nasho; ukabinhe bahabi; nangho ulabiza na wibikija u ngʼwigulu; huna wize, unilondele. Aliyo aho nsumba wigwa mhayo gwenuyo, uja akupinihalaga iki walali na sabo ningi. Hunaho Yesu ubawila bahemba bakwe giki, Nghana namuwila giki, Kilambu munhu nsabi kwingila mu butemi wa ngʼwigulu. Hangi namuwila giki, Ili changu ngamila kushepa mu kapundu ka lushinge, kutinda nsabi kwingila mu butemi wa Mulungu. Aho bahemba bakwe bigwa iyi buzunzumala no, buhaya giki, Nani lulu wadula kupijiwa? Yesu ubalola, ubawila giki, Ku banhu mhayo uyu gutudulika; aliyo kuli Mulungu mihayo yose yadulika. Hunaho Petro ushosha ungʼwila giki, Biswe tukaleka shose, na twakulondela; ali lulu tulabona ki? Yesu ubawila giki, Nghana namuwila giki, Mu kubyalwa kupya, aho Ngʼwana wa munhu atigasha ha isumbi lya butemi lya ikujo lyakwe, na bingʼwe mukanilondelaga muligasha ha masumbi ikumi na abili ga butemi, mulabasuga, kulekanya ngʼanda ikumi na ibili ja Israeli. Na buli munhu uyo waajileka numba, nulu bana ba ngʼwawe, nulu balumbuye, nulu ise, nulu nina, nulu nke, nulu bana, nulu migunda, kulwa nguno ya lina lyane, alanukula nghangala igana, na hangi alawingila bupanga butushila. Aliyo bingi a ba kwandia balabiza ba kunuma, na a ba kunuma balabiza ba kwandia. Iki butemi wa ngʼwigulu wikolile na namugi uyo wali wipuna dilu kulagana na batumami ba kutumama mu ngunda gwa mizabibu. Aho umala kulagana na batumami ku shilingi imo limi ji, ubatuma mu ngunda gwakwe gwa mizabibu. Na uja hangi mu saa ya kadatu, ubabona bangi bimilile mu nghungʼwano badukile. Nabo ubawila giki, Jagi ningʼwe mu ngunda gwa mizabibu, na iyo itungiligije nakungʼwinha. Nabo buja. Uja hangi mu saa ya katandatu na mu saa ya kenda, wita giko. Mu saa ya ikumi na imo uja ubasanga bangi bimilile ho badukile; na ubawila giki, Nguno ki ngʼwimilaga aha limi ji mudukile? Bungʼwila giki, Iki ati ho munhu walaganaga na biswe. Ubawila giki, Jagi ningʼwe mu ngunda gwa mizabibu, na iyo itungiligije mukwanukula. Aho yali mhindi, seba wa ngunda gwa mizabibu ungʼwila nalanghani wakwe giki, Bitanage a batumami, ubapele mhela jabo, ubandie a ba kumalija kushisha ku a ba kwandia. Aho biza abo ba saa ya ikumi na imo banukula buli munhu shilingi imo. Aho biza a ba kwandia biganika bakwanukula kutinda, nabo banukula buli munhu shilingi imo. Aho bumala kujanukula, bundugumila u namugi, Buhaya giki, Abo ba kumalija batumamaga saa imo gwike, nangho wabalenganijaga na biswe, abo twiyumilijaga mu makoye na busebu wa limi ji. Aliyo wei ushosha, ungʼwila umo wabo giki, Ngʼwichane, natukwitilaga kibi; angu, utalaganile na nene ku shilingi imo? Twalaga yeniyo yako, jaga. Aliyo natogilwe kungʼwinha ngʼwenuyu wa kumalija giti kuli bebe. Angu, itigelile nene kwita ku shane gitumo natogilwe? nulu liso lyako lili lya bubi iki nene ndi wa wiza? Giko ba kumalija balabiza ba kwandia, na ba kwandia balabiza ba kumalija; iki abitanwa bene bingi, aliyo abakongʼwa bene bagehu. Na aho Yesu wali ulinha kuja Yerusalemi ubapunja bahemba ikumi na babili ha mhujo mu nzila, ubawila giki, Lolagi, tulilinha kuja Yerusalemi; na Ngʼwana wa munhu akwinhiwa ko ku bagabiji batale na ku bandiki; nabo bakunekanya nsango gwa kumulaga, Na bakungʼwinha ko ku bana mahanga bansekele, na kuntula na mikoba, na kunkoma; na ku lushiku lwa kadatu akujuka. Hunaho ninabo wa bana ba ngʼwa Zebedayo ungʼwegela hamo na bana bakwe, na unamya, unomba mhayo. Nanghwe ungʼwila giki, Utogilwe ki? Wei ungʼwila giiti, Hayaga bana bane aba babili bazunilijiwe kwigasha, umo ku nkono gwako gwa bulyo, na umo ku nkono gwako gwa lumoso mu butemi wako. Aliyo Yesu ushosha, uhaya giki, Bingʼwe mutamanile iyo mulilomba. Ngʼwadula kungʼwa ku kikombe icho nahaya kungʼwa Nene; hangi kubatijiwa na kubatijiwa uko naabatijiwa nako Nene? Bungʼwila giki, Twadula. Nanghwe ubawila giki, Hene mulangʼwa ku kikombe chane, na mulabatijiwa na kubatijiwa uko naabatijiwa nako Nene; aliyo kwigasha ku nkono gwane gwa bulyo na gwa lumoso, iti mu budula wane kubinha, aliyo kwene kwabo abubegejiwa na Baba. Na abo ikumi aho bigwa mhayo uyu, bubapelanilwa benabo babili munhu na ngʼwana wa ngʼwawe. Aliyo Yesu aho ubitana, ubawila giki, Bingʼwe mumanile giki, basugi ba mahanga bakusugaga na nguzu, na batale babo bakubatumamyaga na budula. Aliyo mu bingʼwe itizubiza giko; aliyo uyo ose atogilwe kubiza ntale mu bingʼwe, leke abize ngʼwinhilija wingʼwe. Na uyo ose atogilwe kubiza wa kwandia mu bingʼwe, leke abize nsese wingʼwe; Gitumo Ngʼwana wa munhu walatizile kwinhilijiwa, aliyo kwinhilija, na kufunya bupanga wakwe bubize kikomolelo cha kubakomola bingi. Na aho bali bufuma mu Yeriko ibita itale lyunondela. Na baboku babili abigashije ha mhelo ya ipalapala, aho bigwa giki, Yesu alibita, buhamuka, buhaya giki, Seba, ngʼwana wa ngʼwa Daudi, utuchile kigongo. Ibita lyubalemeja bafulike. Aliyo boi bongeja kuhamuka, buhaya giki, Seba, Ngʼwana wa ngʼwa Daudi, utuchile kigongo. Na Yesu wimila ubitana, na uhaya giki, Mutogilwe nangʼwitile ki? Nabo bungʼwila giki, Seba, tutogilwe miso giswe gafumbulwe. Yesu ubasatwa, ubakuumya ku miso gabo. Haho na haho miso gabo ginhiwa kubona, nabo bunondela. Aho bali begela Yerusalemi na bushika Bethfage haho na lugulu lwa Mizeituni, hunaho Yesu ubatuma bahemba babili, Ubawila giki, Jagi mu nzengo uguli ku butongi wingʼwe, haho na haho mukubona nzobe ikungile, na ngʼwana wayo hamo nayo. Ikungulilagi, mujenhe kuli Nene. Na munhu ose ulu alamuwile mhayo, hayagi giki, Seba ali na nimo najo, haho na haho akujituma. Iyo yose yali yitwa gushikilijiwe uyo gwaahayiwa muli nghangi, uhaya giki, Ngʼwilagi ngʼwaniki wa Sayuni giki, Lolaga, Ntemi wako izile kuli bebe, ali nyehu adamhilile nzobe, na kayobe, ngʼwana wa nzobe. Bahemba buja, bita gitumo Yesu ubalagila, Benha nzobe na ngʼwana wayo; butuula mienda yabo higulya yajo; nabo bungʼwigasha higulya yayo. Banhu bingi ba ngʼwibita bamba mienda yabo ngʼwipalapala, na bangi bubyubuta matambi ku miti na bubyugamba ngʼwipalapala. Mabita agali gutongela, na ayo gali gulondela gubyuhamuka, guhaya giki, Utupije haha, Ngʼwana wa ngʼwa Daudi; ali wa lubango Uyo wiza mu lina lya Seba; utupije, Bebe, uli higulya no. Na aho wingila mu Yerusalemi, ikulu lyose lyuzunzumala, lyuhaya giki, Nani Ngʼwenuyu? Mabita guhaya giki, Uyu Ngʼwene Yesu, u nghangi wa mu Nazareti ya Galilaya. Na Yesu wingila mu hekalu ya Mulungu, na ubapeja bose abakujinjaga na kugula mu hekalu, ujisalikula meza ja bakabanya ba feza na masumbi ga abakujinjaga nghuulu, Ubawila giki, gwaandikwa giki, Numba yane ilitanwa numba ya kulomba; aliyo bingʼwe ngʼwayigaluchaga yabiza ipilinga lya basambo. Na baboku na balema bungʼwegela mu hekalu, nanghwe ubapija. Aliyo bagabiji batale na bandiki aho bubona mihayo ya kukumya iyo wali wita, na bana balihamuka mu hekalu, balihaya giki, Utupije haha, Ngʼwana wa ngʼwa Daudi, bupelana no, Nabo bungʼwila giki, Uligwa aba umo balihayila? Aliyo Yesu ubawila giki, Ali chene; angu, mutali kusoma giki, Kufuma mu milomo ya banigini na belele washikanyaga kulumba? Nanghwe ubaleka, ufuma mu nzengo, uja Bethania, ukalala ko. Dilu aho wali ushoka ku nzengo utuba. Na aho ugubona nti ntini ha nzila, ushika ho walatusanga mo kinhu, ulu iti madutu gwike; uguwila giki, Kufuma lelo gatalizilonga matwajo muli bebe welelo bose. Na nti ntini guma kamo na kamo. Na aho bahemba bubona iyo, bukumya, buhaya giki, Ni buli nti ntini guma kamo na kamo? Yesu ushosha ubawila giki, Nghana namuwila giki, Ulu muli na kuzunya, na kutawatawa yaya, mutalita gwike gitumo gwitilwa nti ntini, aliyo nulu mukuluwila lugulu ulu giki, Dubukaga, ukaponyiwe mu nyanza ikubiza chene. Na mihayo yose iyo mukwilombela mu kulomba, muzunije, mukwiyanukula. Na aho wali wingila mu hekalu, bagabiji batale na banamhala ba banhu bungʼwegela aho akulangaga, buhaya giki, Mu budula ki ukwitaga iyi? Hangi nani waakwinha budula ubu? Yesu ushosha ubawila giki, Na Nene nakumubuja mhayo gumo, ulu ngʼuniwila mhayo uyu, na Nene nakumuwila mu budula ki nakwitaga iyi. Angu, u kubatija kwa ngʼwa Yohana, kwali kufumila hali? Ngʼwigulu, nulu mu banhu? Nabo bitambuja boi benekele, buhaya giki, Ulu tuhaye giki, Kwafumila ngʼwigulu, nanghwe akutuwila giki, Ni nguno ki lulu ngʼwali mutanzunije wei? Aliyo ulu tuhaye giki, Kwafumila mu banhu; twalyogoha ibita; iki bose banzunije giki, Yohana walali nghangi. Nabo bunshokeja Yesu, buhaya giki, Tutamanile. Nanghwe ubawila giki, Nulu Nene natumuwila mu budula ki nakwitaga iyi. Aliyo ngʼwiganika kinahe? Munhu nebe walali na bitunja babili, nanghwe ungʼwegela wa kwandia, uhaya giki, Ngʼwana wane, jaga ukatumame lelo mu ngunda gwane gwa mizabibu. Nanghwe ushosha uhaya giki, Natatogilwe. Aliyo hanuma oya, na uja. Na ungʼwegela u wa kabili, uhaya giko. Nanghwe ushosha uhaya giki, Naja, Seba: na kuja yaya. U mu benabo babili nani akita iyo ise walatogilwe? Bungʼwila giki, U wa kwandia. Yesu ubawila giki, Nghana namuwila giki, Batobisha na bimilizu bamutanga kwingila mu butemi wa Mulungu. Iki Yohana akiza ku bingʼwe mu nzila ya butungilija, na bingʼwe ngʼwali mutunzunya; aliyo batobisha na bimilizu bali bunzunya; aliyo bingʼwe nulu ngʼwali ngʼubona iyo, ngʼwali mutoya hanuma, giki, munzunye. Degelekagi kigemenghejo kingi: walali ho namugi nebe, uyo akahamba ngunda gwa mizabibu; ugugitila lugutu, usimba mo ikamilo lya mizabibu, uzenga mo numba ngunguhu, ulagana, ugutuula ko ku balimi, uja ku si yingi. Aho ikanza lya matwajo lyegela, ubatuma basese bakwe ku balimi kwanukula ngabo gwa matwajo gakwe. Na balimi aho bubadima basese bakwe, umo buntula, ungi bumulaga, ungi bumponda mawe. Ubatuma hangi basese bangi bingi kutinda a ba kwandia, na bene bubitila giko. Ya kumalija ubatumila ngʼwana wakwe, uhaya giki, Bakungʼwinha ishima ngʼwana wane. Aliyo balimi aho bumona ngʼwana, biwila benekele na benekele giki. Uyu ngʼwene ngʼwingiji, nzugwi, tumulage, tubutwale wingiji wakwe. Na aho bundima, bumponya hanze ya ngunda gwa mizabibu, bumulaga. Ali lulu, ngʼwenekele ngunda gwa mizabibu, aho aliza alabitila ki balimi benabo? Bungʼwila giki, Alabayagaja kibi bahunga benabo, na ngunda gwa mizabibu alalagana kugutuula ku balimi bangi, abalamfunija matwajo mu makanza gago. Yesu ubawila giki, Mutali kusoma mu shandikwa giki, Iwe ilo bali bulilema a bazengi, lyene lyabizaga iwe itale lya ha lungʼongo; kwita uku kwene kwa Seba, nako kwene kwa kukumya mu miso giswe? Kulwa iyi namuwila giki, Butemi wa Mulungu bulinjiwa ku bingʼwe, na bulinhiwa ku ihanga ililatwaja matwajo ga butemi. Na uyo ugwa ku iwe ili alabinzaguka; aliyo uyo ose lilangwila lilantobagula. Na bagabiji batale na Bafarisayo aho bigwa shigemenghejo shakwe bumana giki, alibahaya boi. Aliyo aho bukoba kundima bogoha mabita, iki banzunije ali nghangi. Na Yesu ushosha ulungalunga hangi nabo mu shigemenghejo, uhaya giki, Butemi wa ngʼwigulu wikolanijiwa na ntemi nebe, uyo wali umegeja ngʼwana wakwe bukombe; Na ubatuma basese bakwe kubitana abali bitanwa ku bukombe: na bali batatogilwe kwiza. Ubatuma hangi basese bangi, uhaya giki, Bawilagi abali bitanwa giki, Lolagi, nalongije shiliwa shaue, ngʼombe jane na shitugo shinonu shubulagwa, na shinhu shose shilongije; nzugwi ku bukombe. Aliyo boi iki bali batukalalwa buja, umo ku ngunda gwakwe, ungi ku bukwabi wakwe. Abo busaga ho bubadima basese bakwe, bubitila kibi, na bubabulaga. Ntemi aho wigwa iyi, upelana; na ugatuma mabita gakwe ga bashilikale, ubayagaja babulagi benabo na ugutwima nzengo gwabo. Hunaho ubawila basese bakwe giki, Bukombe bulongije, aliyo benabo abali bitanwa batigelile. Kulwa iyi jagi ku maka ga mapalapala, mubitane ku bukombe. Na basese benabo bufuma buja ku mapalapala bubabilinga bose bali bubabona, ba bubi na ba wiza, na bukombe bokala bageni, Aliyo aho ntemi wingila kubalola bageni, ubona mo munhu atazwalile kizwalo cha bukombe; Nanghwe ungʼwila giki, Ngʼwichane, wingilaga umu kinahe uti na kizwalo cha bukombe? Nanghwe uhumula du. Hunaho ntemi ubawila binhilija giki, Ntungagi makono na magulu, ngʼwinjagi mo, mumponye mu giiti cha hanze: kwenuko kulabiza kulila shisoji na kushelanya mino. Iki abitanwa bene bingi, aliyo abasolwa bene bagehu. Hunaho Bafarisayo buja bulomana bantege kinahe mu kalungalungile, Na bubatuma kuli Wei bahemba babo hamo na Baherode, buhaya giki, Nangi, tumanile Bebe uli munhu wa nghana, hangi ukulangaga nzila ya Mulungu mu nghana, na utunkalalwa munhu ose, iki utulolaga bushu wa banhu. Kulwa iyo tuwilage, ukwiganikaga kinahe? Angu, ilagilile kumfunija Kaisari kodi, himba yaya? Aliyo Yesu iki umana buhunga wabo uhaya giki, Nguno ki mulinigema, bingʼwe bibeleja? Nolekejagi feza ya kodi. Bung wenhela shilingi. Nanghwe ubawila giki, Chikolile iki na chandikile iki cha ngʼwa nani? Bungʼwila giki, Cha ngʼwa Kaisari. Hunaho ubawila giki, Funyagi kuli Kaisari i sha ngʼwa Kaisari, na kuli Mulungu i sha Mulungu. Aho bigwa iyi, bukumya; buneka, buja. Lwise lwene Basadukayo, abakahayaga giki, nduhu kujuka, bungʼwegela, bumuja, Buhaya giki, Nangi, Musa akahaya giki, Ulu munhu ucha, ati na bana, ngʼwana wa ngʼwawe angʼwingile nke wakwe, amyalile ngʼwana wa ngʼwawe bubyile. Bali bubiza ho ku biswe bagosha mpungati ba myaji umo; u ntangi utola, ucha, na ati na bubyile, unekela nzunaye nke wakwe; Na wa kabili nanghwe chene, na wa kadatu kushisha bose mpungati. Hanuma ya bose nkima nanghwe ucha. Ali lulu, mu bujuko alabiza nke wa ngʼwa nani mu benabo mpungati? iki bose bali buntola. Yesu ushosha ubawila giki, Ng wahuba, iki mutashimanile shandikwa, nulu budula wa Mulungu. Iki mu bujuko batutola, nulu batutolwa, aliyo bali giti bamalaika ba Mulungu ngʼwigulu. Aliyo mu mhayo gwa kujuka kwa bafu, angu, mutasomile iyo yaahayiwa ku bingʼwe na Mulungu, uhaya giki. Nene ndi Mulungu wa ngʼwa Abrahamu, na Mulungu wa ngʼwa Isaaka, na Mulungu wa ngʼwa Yakobo? Mulungu ati Mulungu wa bafu, aliyo wa bapanga. Na aho mabita gali gigwa iyi, gubyukumya kulwa kilangile chakwe. Aliyo Bafarisayo aho bali bigwa giki, akabakamaja Basadukayo, huna bibilingila hamo. Na umo wabo, mani wa shilagilo, umuja kungema, uhaya giki, Nangi, i kilagilo kitale mu shilagilo ni kili? Yesu ungʼwila giki, Ulantogagwe Seba Mulungu wako na ngholo yako yose, na bupanga wako bose, na maganiko gako gose. Iki chene kilagilo cha kwandia na kitale. Cha kabili ichikolile nacho, kili iki, Ulantogagwe nzenganwa ngʼwiyo gitumo witogilwe ngʼwenekele. Mu shilagilo ishi shibili shilagilo shose na mihayo ya bahangi shumichiwa. Aho Bafarisayo bali bibilingile hamo, Yesu ubabuja, Uhaya giki, U Kristo mukungʼwiganikaga kinahe? Ali ngʼwana wa ngʼwa nani? Bungʼwila giki, Wa ng wa Daudi. Ubawila giki, Ni buli lulu Daudi, muli Moyo, ungʼwitana giki, Seba? Uhaya giki, Seba akangʼwila Seba wane giki, Igashaga ku nkono gwane gwa bulyo, kushisha nalabatuula banishi bako kubiza ha kupanda bupandijo wako. Ali lulu ulu Daudi ungʼwitana Seba, ali ngʼwana wakwe kinahe? Na walati ho munhu uyo wadula kunshokeja mhayo, nulu walatugema munhu kumuja mhayo gose kufuma lushiku ulo hangi. Hunaho Yesu ulungalunga na mabita na bahemba bakwe, Uhaya giki, Bandiki na Bafarisayo bigashije ha isumbi lya ngʼwa Musa. Kulwa iyo, mihayo yose bakumuwilaga kuyidima, yeniyo muyidime na ngʼwiyite: aliyo mutizita giti shitile shabo umo shili; iki kuhaya bakuhayaga, aliyo kwita batitaga. Iki bakulungaga miligo midito na kilambu kubuchiwa, buyiseseja ha mabega ga banhu, aliyo boi benekele batatogilwe kuyichegenya na lwala lwabo. Aliyo shitile shabo shose bakwitaga kubonwa na banhu; hangi bakukujaga fulakteria jabo, na bakugalihyaga matalajo ga shizwalo shabo. Hangi bashitogilwe shigasho sha ku butongi aho bakulyaga shitolyo; na ku masumbi ga ku butongi mu mabilingilo, Na kugishiwa mu nghungʼwano, na kwitanwa na banhu, Rabbi, Rabbi. Aliyo bingʼwe mutizitanwa Rabbi, iki nagiji wingʼwe ali umo, Ngʼwene Kristo, na bingʼwe bose muli ba ludugu lumo. Hangi mutizungʼwitana munhu nulu umo mu si, giki, singʼwe; iki Singʼwe ali umo. Uyo ali ngʼwigulu. Nulu mutizitanwa balagiji, iki nagiji wingʼwe ali umo, Ngʼwene Kristo. Aliyo uyo ali ntale mu bingʼwe akubiza ngʼwinhilija wingʼwe. Na uyo ose akwikuja ngʼwenekele akudohelejiwa, na uyo ose akwidoheleja ngʼwenekele akukujiwa. Aliyo ngʼwasangwa bingʼwe bandiki na Bafarisayo, bibeleja! Iki mukubalugalilaga banhu butemi wa ngʼwigulu: iki bingʼwe benekele mutingilaga, nabo abahaya kwingila mutubazunilijaga kwingila. Ngʼwasangwa bingʼwe bandiki na Bafarisayo, bibeleja! Iki mukulyaga kaya ja bachilwa, mukulombaga kulomba kulihu kwa kukundikija wibeleja; kulwa iyo mulanukula nsango ntale kutinda. Ngʼwasangwa bingʼwe bandiki na Bafarisayo, bibeleja! Iki mukapindilagapindilaga mu nyanza na ku si numu kunghembeka munhu; na aho ubiza nghemba, ngʼwangʼwita ngʼwana wa Gehena nghangala ibili kutinda bingʼwe benekele umo muli. Ngʼwasangwa bingʼwe batongeji baboku, abo mukuhayaga giki, Uyo ose wiyilahilila hekalu, guti mhayo; aliyo uyo ose wiyilahilila zahabu ya mu hekalu, ngʼwene witungile. Bingʼwe bachiluchilu na baboku; iki iyikilile butale ni ki, zahabu nulu hekalu iyo ikwiyejaga zahabu? Hangi giki, Uyo ose ugwilahilila ng walilo, guti mhayo; aliyo uyo ose ukwilahilila kufunya ukuli ha ngʼwalilo, ngʼwene witungaga. Bingʼwe bachiluchilu na baboku: iki iyikilile butale ni ki, u kufunya, nulu ngʼwalilo uyo gukukwejaga kufunya? Kulwa iyo, uyo ugwilahilila ngʼwalilo, ngʼwene ugwilahilila goi, na shose ishili ho kigulya yago. Na uyo wiyilahilila hekalu, ngʼwene wiyilahilila yoi, na Uyo akwikalaga mo. Na uyo ulilahilila igulu, ngʼwene ulilahilila isumbi lya butemi lya Mulungu, na Uyo wigashije ho. Ngʼwasangwa bingʼwe bandiki na Bafarisayo, bibeleja! Iki mukufunyaga imo ya ngʼwikumi ya nana, na bizari, na kumini, aliyo ngʼwalekaga mihayo mitale ya shilagilo, yene kulekanya mu wima, na kuchila kigongo na kuzunya; yeniyi shali shingʼwigelile kwiyita, na yeniyo yingi kuyileka biya. Bingʼwe batongeji baboku, abo mukuswizaga kabufune, na kuyimila ngamila. Ngʼwasangwa bingʼwe bandiki na Bafarisayo, bibeleja! Iki mukojaga kunze ya kikombe na sahani, aliyo mugati shokalile na bunyecha na bulaku. Bebe Mfarisayo moku, andaja tame koja mugati ya kikombe na sahani, hunaho kunze yasho ibize nela. Ngʼwasangwa bingʼwe bandiki na Bafarisayo, bibeleja! Iki ngʼwikolile na mashigila agabilile ndoba, ayo hene kunze gigengeleka gagalilile, aliyo mugati gokalile na maguha ga bafu na busoso bose. Giko na bingʼwe kunze ngʼwigengeleka ku banhu muli batungilija, aliyo mugati ngʼokalile na wibeleja na bugomi. Ngʼwasangwa bingʼwe bandiki na Bafarisayo, bibeleja! Iki mukuzengaga mashigila ga bahangi na mukugalilaga mashigo ga batungilija, Mukuhayaga giki, Ulu ni twali tuli ho mu shiku ja bakulugenji, ni twali tutisangigije nabo mu mininga ga bahangi. Nose ngʼwikanilija benekele giki, muli bana babo abali bubabulaga bahangi. Okajagi ningʼwe ngelekelo ya bakulugenji bingʼwe. Bingʼwe nzoka, bana ba kipili, mulagupela kinahe u nsango gwa Gehena? Kulwa nguno iyi, lolagi, namutumila bahangi, na ba masala, na bandiki: bamo babo mulababulaga na kubakoma: na bamo babo mulabatula mu mabilingilo gingʼwe, na mulabakubilija kufuma mu nzengo na ku nzengo. Kushisha nose galangʼwiziila mininga gose matungilija agali gusejiwa ha si, kufuma ku mininga ga ngʼwa Abeli ntungilija kushisha ku mininga ga ngʼwa Zakaria ngʼwana wa ngʼwa Barakia, uyo ngʼwali ngʼumulaga hagati ya hekalu na ngʼwalilo. Nghana namuwila giki, Mihayo iyi yose ilachiziila kibyalilwe iki. Bebe Yerusalemi, Yerusalemi, uyo ukababulagaga bahangi, na ukabapondaga mawe abo abakatumagwa kuli bebe! Himba nghangala jinga nali natogilwe kubilinga bana bako, giti ngoko ikukumingaga tuzwiyo twayo mu manana gayo, aliyo bingʼwe ngʼwali mutatogilwe. Lolagi, numba yingʼwe ngʼwalekelwa nsaka. Iki namuwila giki, Kufuma haha mutalanibona kushisha mulahaya giki, Ali wa lubango Uyo izile mu lina lya Seba. Na Yesu ufuma uyileka hekalu, akushiminzaga; huna bahemba bakwe bungʼwegela kungʼolekeja manumba ga hekalu. Aliyo Yesu ubawila giki, Angu, mulilola ishi shose? Nghana namuwila giki, Litalalekwa ho iwe higulya ya iwe liye, ilo litalakandulwa. Aho wali wigashije ha lugulu lwa Mizeituni, bahemba bakwe bungʼwegela mu kwigeniha, buhaya giki, Tuwilage, mihayo iyi ilabiza ho nanali? Hangi kimanikijo cha kwiza kwako na cha nghalilo ya ikanza ili, kilabiza ki? Na Yesu ushosha ubawila giki, Ilanghanagi, munhu ose atizumulembalemba. Iki bingi baliza mu lina lyane, balabyuhaya giki, Nene ndi Kristo; nabo balalembalemba bingi. Mulabizigwa bulugu na nghumo ja mabulugu; ilanghanagi, mutizufungʼwa ngholo; iki mihayo iyi yose shigelile kubiza ho, aliyo mhelo itali. Iki ihanga lilubukila ihanga liye, na butemi bulubukila butemi wiye; na galabiza mayala, na mahuya, na manyahinga, mu mapande gangi na gangi. Aliyo iyo yose yene wandijo wa kulungʼwa busungu. Hunaho balangʼwinha ko kuluhiwa, na balamubulaga; na mahanga gose galamukolwa kulwa nguno ya lina lyane. Hunaho bingi balipama, baliyinha ko benekele na benekele, na kwikolwa. Na bahangi bamama bingi balabuka, balabalembalemba bingi. Na kulwa bugomi bulabiza wingi, butogwa wa bingi bulapola. Aliyo uyo wiyumilija kushisha ku mhelo, ngʼwene alapijiwa. Na evangeli iyi ya butemi ilalomelwa mu si jose, ibize bukaniji ku mahanga gose; hunaho lulu mhelo iliza. Aliyo aho mulabona i cha malofu cha bukenaguku, ichali chuhayiwa na nghangi Danieli, chimilile ngʼwipande lyela (uyo akusomaga itegeleje), Hunaho abo bali mu Buyudaya babungilage ku ngulu; Uyo ali higulya ya numba atizika kusola mo kinhu chose mu numba yakwe; Na uyo ali mu ngunda atizushoka kusola shizwalo shakwe. Aliyo balasangwa abali nda na abakonhyaga mu shiku ijo. Aliyo lombagi u kubunga kwingʼwe kutizubiza mu shiku ja mbeho nulu ha Sabato: Iki hunaho kulabiza ho kuluhyaluhiwa kutale, gitumo kutinabiza ho kufuma kwandia kwa si kushisha haha, nulu kutalabiza ho hangi. Na ulu shiku jenijo ni jitagehiwe, ni atapilile munhu nulu umo; aliyo kulwa nguno ya basolwa shiku jenijo jilagehiwa. Hunaho ulu munhu alamuwila giki, Lolaga, Kristo ali aha; nulu giki, Ali uko; mutizuzunya: Iki galabuka Makristo mamama na bahangi bamama, nabo balita shimanikijo shitale na sha kukumya, kushisha nose kubalembalemba nulu basolwa, ulu yudulika. Lolagi, natonjaga kumuwila iyi. Kulwa iyo, ulu balamuwila giki, Ali mu bu, mutizuja ko: nulu giki, Ali mugati mu numba; mutizuzunya, Iki gitumo lulabi lukufumaga kiya, na lukulabyaga kushisha ngʼweli; nu kwiza kwa Ngʼwana wa munhu nako kulabiza chene. Iki aho hose mimba guli, kwenuko mbeshi jilikumingila ko. Haho na haho hanuma ya kuluhyaluhya kwa shiku jenijo limi lililabula, na ngʼweji gutalafunya kwela kwago; na sonda jilagwa kufuma ngʼwigulu; na mabudula ga ngʼwigulu galanegenyiwa: Hunaho lulu kililonga kimanikijo cha Ngʼwana wa munhu ngʼwigulu; hunaho ngʼanda jose ja mu si jilalila nghungu, najo jilamona Ngʼwana wa munhu izile ha malunde ga ngʼwigulu na budula na magaka matale. Nanghwe alabatuma bamalaika bakwe na ilaka itale lya ipembe, nabo balababilinga basolwa bakwe kufuma mu miyaga ine, kufuma ku mhelo imo ya igulu kushisha ku mhelo yingi. Ilangagi lulu kigemenghejo cha nti ntini; aho itambi lyago lyubiza idoto, nago gufuluma madutu, mumanile ngʼwaka guli hihi; Giko na bingʼwe, aho mulabona iyo yose, managi giki, ali hihi, ku nzwigi. Nghana namuwila giki, Kibyalilwe iki kitalabita kushisha iyi yose ilabiza ho. Igulu na si shilabita, aliyo mihayo yane italabita. Aliyo mhayo gwa lushiku lwenulo, na ikanza ilo ati ho uyo amanile, nulu bamalaika ba ngʼwigulu, aliyo Baba wike. Gitumo yali yubiza mu shiku ja ngʼwa Nuhu, nu kwiza kwa Ngʼwana wa munhu nako kulabiza chene. Iki gitumo bali bali mu shiku ijo aho ihuma lyali litali kubiza ho, baalyaga, na baangʼwaga, na baatolaga na baatolagwa, kushisha lushiku ulo Nuhu aho wingila mu ngalaba, Nabo bali batumana kushisha ihuma lyiza, na lyubatwala bose; nu kwiza kwa Ngʼwana wa munhu nako kulabiza chene. Hunaho balabiza babili mu ngunda, umo alatwalwa, na ungi alalekwa; Bakima babili balabiza busha, umo alatwalwa, na ungi alalekwa. Kulwa iyo, ikalagi miso: iki mutamanile ngʼwikanza ki Seba wingʼwe alizila mo. Aliyo managi giki, ulu namugi ni walamanile mu bulindi ki ngʼwibi akwizila mo, ni wali wikala miso, ni walatuzunya numba yakwe kuchibulwa. Kulwa iyo, ningʼwe bizagi mumalilile; iki ngʼwikanza ilo mutiganikilaga Ngʼwana wa munhu aliza. Nsese ngʼwishigwa na wa masala ali nani, uyo ise bugonzo wali untuula kubiza nindi wa kaya yakwe, kubabanzila shiliwa shabo ngʼwikanza lyasho? Ali wa lubango nsese ngʼwenuyo ise bugonzo alansanga akwitaga giko aho aliza. Nghana namuwila giki, Alantuula higulya ya shikolo shakwe shose. Aliyo nsese ngʼwenuyo wa bubi ulu uhaya mu ngholo yakwe giki, Baba bugonzo wadilaga kwiza; Na wandia kubatula basese biye, na kulya na kungʼwa hamo na bakolwa: Ise bugonzo wa nsese ngʼwenuyo aliza mu lushiku ulo atiganikaga, na ngʼwikanza ilo atalimanile. Nanghwe alamuta hagati, alantuulila ngabo gwakwe hamo na bibeleja; uko kulabiza ho kulila shisoji na kushelanya mino. Hunaho butemi wa ngʼwigulu bulikolanijiwa na banhya bibembu ikumi, abo bali bubucha tala jabo, buja kungʼwima nzila ntoji. A batano bali balalanghanu na batano bali bachiluchilu. Abali bachiluchilu bali bubucha tala jabo, aliyo bali batubucha maguta; Aliyo a balalanghanu bali bubucha maguta mu saji jabo kihamo na tala jabo. Aho ntoji wali udila, bose bubyutindila na bushutula. Bujiku hagati kubiza kuhamukila giki, Lolagi, ntoji aliza, bukagi mukangʼwime nzila. Hunaho banhya bibembu benabo bose bubuka, budoganya tala jabo. Bachiluchilu bubawila a balalanghanu giki, Twinhagi u mu maguta gingʼwe, iki tala jiswe jililimalima. Aliyo balalanghanu bushosha, buhaya giki, I yaya, hamo gatutwigela biswe na bingʼwe: hambuhambu muje ku benabo abakajinjaga, na mukigulile benekele. Aho bajile kugula, ntoji wiza; nabo abali bamalilile bingila hamo nanghwe ku bukombe; na lwigi lulugalwa ho. Hanuma biza na banhya bibembu benabo a bangi, buhaya giki, Seba, Seba, utulugulile. Aliyo wei ushosha, uhaya giki, Nghana namuwila giki, natamumanile bingʼwe. Kulwa iyo, ikalagi miso, iki mutamanile lushiku nulu ikanza Ngʼwana wa munhu aho aliza. Iki ili giti munhu uyo uhaya kuja ku si yingi, ubitana basese bakwe, ubatuulila shinhu shakwe. Umo ungʼwinha talanta itano; ungi ibili, na ungi imo; buli munhu gitumo budula wakwe umo buli; haho na haho ubuka uja lugendo. Hunaho lulu uyo wali wanukula talanta itano uja ujitumamila, ujibyalanija ho talanta itano jingi. Giko hangi na uyo wali wanukula ibili, nanghwe ujibyalanija ibili jingi. Aliyo uyo wali wanukula imo, uja usimba ha si, uyibisa feza ya ngʼwa ise bugonzo. Hanuma ya ikanza itale sabo bugonzo wa basese benabo wiza, ubala nabo. Na uyo wali wanukula talanta itano aho wegela wenha talanta itano jingi, uhaya giki, Baba bugonzo, bebe ukanituulila ho talanta itano: lolaga, najibyalanijaga ho talanta itano jingi. Ise bugonzo ungʼwila giki, Wabeja, nsese wa wiza na ngʼwishigwa; bebe wali ngʼwishigwa mu shigehu, nakukutuma ho ubize nsugi ku shingi; ingilaga mu buyegi wa ngʼwa so bugonzo. Na uyo wali wanukula talanta ibili nanghwe wegela, uhaya giki, Baba bugonzo, bebe ukanituulila ho talanta ibili: lolaga, najibyalanijaga ho talanta ibili jingi. Ise bugonzo ungʼwila giki, Wabeja, nsese wa wiza na ngʼwishigwa: bebe wali ngʼwishigwa mu shigehu, nakukutuma ho ubize nsugi ku shingi: ingilaga mu buyegi wa ngʼwa so bugonzo. Na uyo wali wanukula talanta imo nanghwe wegela, uhaya giki, Baba bugonzo, nakumanile bebe, uli munhu nambu, ukagesaga uko utabibile, ukakumingaga uko utasalanghanije. Nane nali nogoha, nuja, nukabisa talanta yako ha si: lolaga, uli na yako, yiyi. Aliyo ise bugonzo ushosha ungʼwila giki, Bebe nsese nghunga na ngʼolo, ambu wali umana giki, nakagesaga uko natabibile, nakakumingaga uko natasalanghanije; Giko yali ikwigelile bebe kutuula feza yane ku batundanya ba feza: huna nene aho niza, ni nali nanukula yane na solobo hoi. Ali lulu, ngʼwingijagi i talanta, mungʼwinhe ngʼwenuyo ali najo talanta ikumi. Iki uyo ose ali nasho alinhiwa, nanghwe alabiza na shingi; aliyo uyo ati nasho, alingijiwa na isho ali nasho. Na nsese uyo adukile, mponyagi mu giiti cha hanze: uko kulabiza ho kulila shisoji, na kushelanya mino. Aliyo aho Ngʼwana wa munhu aliza mu magaka gakwe, na bamalaika bela bose hamo nanghwe hunaho aligasha ha isumbi lya butemi lya magaka gakwe: Na mahanga gose galabilingilwa ku butongi wakwe, nanghwe alabakomanya, giti ndimi akukomanyaga ngholo na mbuli. I ngholo alajituula ku nkono gwakwe gwa bulyo, aliyo mbuli ku nkono gwa lumoso. Hunaho Ntemi alabawila benabo abali ku nkono gwakwe gwa bulyo giki, Nzugwi bingʼwe abasungulilwa lubango na Baba, ingilagi mu butemi ngʼwaabegejiwa kufuma kubumva kwa si: Iki nali nutuba, ningʼwe ngʼuninha shiliwa; nali nukolwa nota, ningʼwe ngʼuninha kungʼwa; nali ndi ngeni, ningʼwe ngʼunegeleja. Nali ndi duuhu, na ngʼunizwalicha; nali ndi nwile, ningʼwe ngʼwiza kunilola; nali nubiza mu jela, ningʼwe ngʼwiza kuli Nene. Hunaho batungilija balanshokeja, balahaya giki, Seba, twali tukubona utubile, huna tukwinha shiliwa nanali? nulu uli na nota, huna tukwinha kungʼwa? Twali tukubona uli ngeni, huna tukwegeleja nanali? nulu uli duuhu, huna tukuzwalicha? Twali tukubona uli nwile, nulu mu jela, huna twiza kuli bebe nanali? Na Ntemi alashosha, alabawila giki, Nghana namuwila giki, Gitumo ngʼwali ngʼungʼwitila umo wa badugu aba bane bado, ngʼwali ngʼunitila Nene. Hunaho alabawila na benabo abali ku nkono gwa lumoso giki, Ingagi hali Nene, bingʼwe abazumilwe, jagi mu moto ugutushila, uyo waabegejiwa Shetani na bamalaika bakwe. Iki nali nutuba, ningʼwe ngʼwali mutuninha shiliwa; nali nukolwa nota, ningʼwe ngʼwali mutuninha kungʼwa; Nali ndi ngeni, ningʼwe ngʼwali mutunegeleja; nali ndi duuhu, ningʼwe ngʼwali mutunizwalicha; nali nubiza nwile, na mu jela, ningʼwe ngʼwali mutiza kunilola. Hunaho benabo balanshokeja, balahaya giki, Seba, twali tukubona nanali, utubile, nulu uh na nota, nulu uli ngeni, nulu uli duuhu, nulu uli nwile, nulu uli mu jela, na kukwinhilija yaya? Hunaho alabashokeja, alahaya giki, Nghana namuwila giki, Gitumo ngʼwali mutangʼwitilile umo wa aba bado, nahene ngʼwali mutanitilile Nene. Na aba balaja mu kuluhaluhiwa kutushila; aliyo batungilija mu bupanga butushila. Na yubiza aho Yesu akamala mihayo iyi yose, ubawila bahemba bakwe giki, Bingʼwe mumanile giki, hanuma ya shiku ibili ikubiza ho Pasaka, na Ngʼwana wa munhu akwinhiwa ko kukongʼwa. Hunaho bagabiji batale, na bandiki, na banamhala ba banhu bibilingila mu kibuga cha ngabiji ntale uyo akitanagwa Kayafa. Nabo bulomana giki, bandime Yesu na masalasala, bamulage. Aliyo buhaya giki, Ha lushiku lwa Pasaka yaya, butizubuka buyombo mu banhu. Yesu aho walali mu Bethania mu numba ya ngʼwa Simoni wa mbiji, Nkima ungʼwegela ali na chupa yabejiwa ya alabastro ya maguta ga ngazu ga mpango ngʼwingi, ugasamija ha ntwe gwakwe, aho wali wigashije ku shiliwa. Aliyo aho bahemba bakwe bubona iyi bukolwa, buhaya giki, Bujimiji ubu ni wa ki? Iki maguta aya ni gali gudula kujinjiwa na mpango ntale, na kwinhiwa bahabi. Aliyo Yesu iki umana iyi, ubawila giki, Mulinkoyakoyela nkima nguno ki? iki wei wanitilaga chitwa cha wiza. Iki bahabi muli nabo shiku jose; aliyo Nene mutubiza na Nene shiku jose. Iki mu kunitila maguta aya ha mili gwane, wita giko kulwa nguno ya kugungʼwa kwane. Nghana namuwila giki, Hose hose uko evangeli iyi ilalomelwa mu si jose, icho witaga nkima uyu, nacho kilahayiwa cha kungʼwizukwa wei. Hunaho umo wa benabo ikumi na babili, uyo witanwa Yuda Iskariota, uja ku bagabiji batale. Ubawila giki, Ngʼwazunya kuninha ki, huna nangʼwinhe ko ku bingʼwe? Nabo bungelekela mabudika ga feza makumi adatu. Na kufuma ikanza lyenilo ukoba ngʼwanya gwa kungʼwinha ko. Ha lushiku lwa kwandia lwa migati iyiti na kibimbya, bahemba bungʼwegela Yesu, bungʼwila giki, Utogilwe tukakulongeje hali ha kulila Pasaka? Nanghwe uhaya giki, Jagi mu nzengo kuli munhu nebe, mukangʼwile giki, Nangi wahaya giki, Ikanza lyane lili hihi; nakwita Pasaka ku ngʼwako hamo na bahemba bane. Na bahemba bita gitumo wali ubalagila; nabo buyilonja Pasaka. Aho yubiza mhindi, wali igashije ku shiliwa hamo na benabo ikumi na babili; Na aho bakulyaga uhaya giki, Nghana namuwila giki, Umo wa mu bingʼwe akuninha ko. Nabo bupinihala no, na bandia umo umo kungʼwila giki, Seba, himba nene? Nanghwe ushosha uhaya giki, Uyo wakoja na nkono hamo na Nene mu lubiga, huna ngʼwene akuninha ko. Hene Ngʼwana wa munhu ajile gitumo yaandikwa ya kuli Wei, aliyo wasangwa munhu uyo Ngʼwana wa munhu winhiwa ko nanghwe. Ni yali chiza kuli wei ulu munhu ngʼwenuyo ni walatabyalilwe. Hunaho Yuda uwali uhaya kungʼwinha ko, ushosha uhaya giki, Himba nene, Rabbi? Nanghwe ungʼwila giki, Ali chene, wahayaga. Aho bakulyaga Yesu usola ngati, na aho wamala kugusungulila lubango, ugumeganya na ubinha bahemba, uhaya giki, Anukulagi, lyagi, uyu gwene mili gwane. Na usola kikombe, na aho wamala kulumba, ubinha, uhaya giki, Ngʼwelagi mo bose; Iki aya gali mininga gane a ga ilagano ipya, agasejiwa kulwa bingi, ga kukuula shibi. Aliyo namuwila giki, Natalangʼwa hangi ku matwajo aya ga nzabibu kushisha ku lushiku ulo aho nalangʼwa mapya hamo ningʼwe mu butemi wa ngʼwa Baba. Aho bali bumala kwimba, bufuma buja ku lugulu lwa Mizeituni. Hunaho Yesu ubawila giki, Bingʼwe bose mukwipama kulwa nguno yane bujiku ubu: iki gwaandikwa giki, Nalantula ndimi, na ngholo ja ngʼwidale jilasalanghanyiwa. Aliyo hanuma ya kujuka kwane, nakutonga kuja Galilaya. Petro ushosha, ungʼwila giki, Nulu bose bakwipama kulwa Bebe, aliyo nene natalipama yaya. Yesu ungʼwila giki, Nghana nakuwila giki, Mu bujiku ubu aho nghungulume itinahila, ukunilema nghangala idatu. Petro ungʼwila giki, Nene nulu shinigelile kucha hamo na Bebe, nahene, kulema natukulema. Na bahemba bose buhaya giko. Hunaho Yesu uja hamo nabo kwipande ilitanwa Gethsemane, ubawila bahemba bakwe giki, Igashagi aha, kushisha naje ko, nakalombe. Na untwala Petro na bana babili ba ngʼwa Zebedayo hamo nanghwe, wandia kupinihala na kudidohelwa no. Hunaho ubawila giki. Bupanga wane bupinihalile hihi kucha, ikalagi aha, ngʼwikale miso hamo na Nene. Nanghwe usegenela hado, ugwa ha si matuja nzwi, ulomba, uhaya giki, Baba, ulu yudulika, kikombe iki kinibitile ho, aliyo iti iyo natogilwe Nene, aliyo gitumo utogilwe Bebe. Na wiza ku bahemba, ubasanga bashutulile, na ungʼwila Petro giki, Kinahe, ngʼwalemelwa kwikala miso hamo na Nene nulu saa imo? Ikalagi miso na lombagi, mutizingila mu kugengʼwa; moyo hene gukalalilwe, aliyo mili gwene nogoleku. Uja hangi lukangala lwa kabili, na ulomba uhaya giki, bana, ulu itudulika kikombe iki kinibitile ho numho nakingʼwe, nahene, iyo utogilwe yitwe. Na wiza ubasanga bashutulile hangi, iki miso gabo gali gudidoha. Na ubaleka, uja hangi, ulomba lukangala lwa kadatu, uhaya mihayo yeniyo duhu. Hunaho wiza ku bahemba bakwe na ubawila giki, Shutulagi lulu, ngʼwifule; lolagi, ikanza lyegelaga, na Ngʼwana wa munhu winhiwa ko mu makono ga bali na shibi: Bukagi, tuje; lolagi uyo alininha ko wegelaga. Na aho walatali ulungalunga, lolaga, Yuda, umo wa ikumi na babili, wiza na ibita itale hamo nanghwe, bali na malushu na milanga, bafumilile ku bagabiji batale na banamhala ba banhu. Uyo alingʼwinha ko wali wabinha kimanikijo, uhaya giki, Uyo nalambipe huna Ngʼwene, ndimagi. Haho na haho ungʼwegela Yesu, uhaya giki, Mhola, Rabbi: huna umbipa no. Aliyo Yesu ungʼwila giki, Ngʼwichane, wizilaga ki? Hunaho bungʼwegela, bunghaja na makono, bundima. Na umo wabo abali bali hamo na Yesu, utwala nkono usopola lilushu lyakwe, untema nsese wa ngabiji ntale, umuta kutu. Hunaho Yesu ungʼwila giki, Shoshaga lilushu lyako mu kilalo chalyo: iki bose abadima lilushu balakenaguka na lilushu. Himba bebe uliganika giki, Natudula hahiyi kunomba Baba nanghwe akunenhela bamalaika kutinda lejioni ikumi na ibili? Ulu chene, i shandikwa shilashikilijiwa kinahe giki, yose igelile kubiza giko? Ngʼwikanza lyenilo Yesu ugawila mabita, Ngʼwizaga na malushu na milanga kunitwala giti ndi nsambo? Nali nigasha shiku na shiku mu hekalu naalangaga, ningʼwe ngʼwali mutunidima. Aliyo iyi yose yabizaga ho, shandikwa sha bahangi shishikilijiwe. Hunaho bahemba bose bunekanija, bupela. Aliyo abo abali bundima Yesu, buntwala kuli Kayafa, ngabiji ntale, uko bandiki na banamhala bali bibilingila ko. Petro unondela kakule ho kushisha ku kibuga cha ngabiji ntale, huna wingila mo, wigasha na banikulu, abone umo ilashilile. Aliyo bagabiji batale na banamhala na ba ngʼwibanza bose bunkobela Yesu bukaniji wa bumama, bamulage; Na bali batubona; nulu bali begela bakaniji ba bumama bingi, nahene bali batububona. Nose hanuma bali begela babili, Buhaya giki, Uyu wali uhaya giki, Nene nadula kukandula hekalu ya Mulungu, na kuyizenga mu shiku idatu. Na ngabiji ntale aho wimila ungʼwila giki, Bebe utushoshaga mhayo? Aba balikukanila ki? Aliyo Yesu uhumula du. Na ngabiji ntale ushosha ungʼwila giki, Nakulahilija kuli Mulungu mpanga, utuwile ulu Bebe uli Kristo, Ngʼwana wa Mulungu. Yesu ungʼwila giki, Ili chene, wahayaga: hangi namuwila giki, Kufuma haha mulamona Ngʼwana wa munhu igashije ku nkono gwa bulyo gwa budula, hangi izile ha malunde ga ngʼwigulu. Hunaho ngabiji ntale utandula shizwalo shakwe, uhaya giki, Wadukaga, tuli na nimo ki hangi na bakaniji? ambu, ngʼwigwaga haha buduki wakwe. Ngʼwiganika kinahe? Nabo bashosha buhaya giki, Wei wigelelagwa kucha. Hunaho bunswila mate mu bushu na kunkunduga shingholoshi, na bangi bumpala mhi. Buhaya giki, Tumanijage, Bebe Kristo, uyo wakutula ni nani? Aliyo Petro wali wigashije hanze mu kibuga; ntumami ngʼwaniki umo ungʼwegela, uhaya giki, Bebe nangho wali hamo na Yesu muna Galilaya. Aliyo wei ulema mu miso ga bose, uhaya giki, Natayimanile iyi ulihaya. Aho winga ho uja hanze ngʼwibindo, na ngʼwaniki ungi umona, ubawila banhu abali ho giki, Nuyuyu wali hamo na Yesu muna Nazareti. Nanghwe ulema hangi, na kilahilo giki, Nene natamanile munhu Uyu. Hanuma ya kakanza kado, benabo abali bimilile ho bungʼwegela bungʼwila Petro giki, Nghana bebe uli ngʼwichabo, iki kalungalungile kako kakumanichaga. Hunaho wandia kuzuma na kulahila giki, Natamanile munhu Uyu. Haho na haho nghungulume yuhila. Na Petro wizukwa mhayo uyo Yesu wali wangʼwila giki, Nghungulume aho itali kuhila, ukunilema nghangala idatu. Na ufuma hanze, ulila shisoji. Aho wali wangaluka, bagabiji batale bose na banamhala ba banhu bulomana mihayo ya kumulaga Yesu. Na aho buntunga, buntwala, bungʼwinha ko kuli Pontio Pilato u gavana. Hunaho Yuda uyo wali ungʼwinha ko, aho ubona giki, Yesu walekanyiwa nsango, wihugula, ubashokeja bagabiji batale na banamhala a mabudika makumi adatu ga feza, Uhaya giki, Nakenagulaga iki ninhaga ko mininga mela. Aliyo boi buhaya giki, Biswe yatuja mo na ki? Ukuyibona bebe. Nanghwe ujiponeja i feza mu hekalu; ufuma, uja ukinija. Nabo a bagabiji batale bujisola! feza, buhaya giki, Kalagilile kujituula ngʼwibikilo lya manongho, iki jene mpango gwa mininga. Aho bulomana, bugula najo ilale lya mumbi, lya kujikila mo babisa. Kulwa iyi ilale lyenilo Ulitanwa ilale lya mininga kushisha lelo. Hunaho gushikilijiwa uyo gwali guhayiwa muli nghangi Yeremia, uhaya giki, Nabo bugasola mabudika ga feza makumi adatu, u mpango gwa Ngʼwenuyo bali bumpanga, Uyo bamo ba bana ba Israeli bali bumpanga. Nabo bujifunya ja kugula ilale lya mumbi, gitumo Seba akanilagila. Yesu wimila mu butongi wa gavana; na gavana umuja uhaya giki, Angu, Bebe uli ntemi wa Bayudaya? Yesu ungʼwila giki, Ili chene, wahayaga. Na aho wali ubulwa na bagabiji batale na banamhala, walatushosha mhayo. Hunaho Pilato ungʼwila giki, Angu, utigwaga mihayo iyi mingi balikukanilija? Nanghwe walatunshokeja mhayo nulu gumo; kushisha nose u gavana ukumya no. Ku Pasaka shali shimile sha gavana giki, kubataligulilila banhu ntungwa umo, uyo bantogilwe. Mu shiku jenijo bali bubiza na ntungwa nkumuku, lina lyakwe, Barabba. Aho bali bibilinga lulu, Pilato ubawila giki, Mutogilwe namutaligulilile nani? Barabba, nulu Yesu Uyo witanwa Kristo? Iki walamanile giki, bangʼwinhaga ko kulwa wilu. Aho wali igashije kwisumbi lya kulekanya, nke wakwe untumila nhungʼwa, uhaya giki, Utizubiza na mhayo na munhu Ngʼwenuyo ntungilija; iki naluhiwagwa mihayo mingi lelo yeniyi kulwa nguno yakwe mu kiloti. Aliyo bagabiji batale na banamhala bugahumbula mabita kunomba Barabba, aliyo Yesu banyagaje. Aliyo gavana ushosha ubawila giki, Mutogilwe namutaligulilile nani mu benaba babili? Nabo buhaya giki, Barabba! Pilato ubawila giki, Aliyo lulu, nalangʼwitile ki Yesu Uyo witanwa Kristo? Bose bungʼwila giki, Ni akomagwe. U gavana uhaya giki, Kulwa ki? witaga bubi ki? Aliyo boi bongeja kuhamuka, buhaya giki, Ni akomagwe. Pilato aho ubona giki, guti ho mhayo gwa kubelela aliyo buyombo buhaya kubuka, usola minzi, ukalaba makono gakwe mu miso ga ibita, uhaya giki, Nene nati na njigu ku mininga ga ntungilija Uyu; mukuyibona bingʼwe. Na banhu bose bushosha buhaya giki, Mininga gakwe gabize ku biswe na ku bana biswe. Huna lulu ubataligulilila Barabba; aliyo aho wamala kuntula Yesu na mikoba, ungʼwinha ko akongʼwe. Hunaho bashilikale ba gavana buntwala Yesu mu Praitorio, na bungʼwibilingila ibita lyose lya bashilikale. Nabo bunzula shizwalo, bunzwika joho yaza, Na aho buluka ngikili ya kitemi ya mihwa, buyituula ku ntwe gwakwe, na idete mu nkono gwakwe gwa bulyo; butuja mazwi ku butongi wakwe, bungimba kichilu, buhaya giki, Lama, Ntemi wa Bayudaya! Na bunswila mate, bulidima i lidete na buntula ku ntwe. Na aho bumala kungimba kichilu, bunzula joho, na bunzwika shizwalo shakwe, buntwala ko kunkoma. Aho balifuma bumanhya na munhu, muna Kurene, lina lyakwe Simoni; ngʼwenuyo bunghadika anseselele nsalaba gwakwe. Aho bushika kwipande ilitanwa Golgota, kushomelejiwa kwaho kuli giki, ipande lya lupanga, Bungʼwinha cha kungʼwa siki isangije ndulu; na aho wali uloja walatuzunya kungʼwa. Aho bumala kunkoma bugabanha shizwalo shakwe na kwesa, gushikilijiwe ugwali guhayiwa muli nghangi giki, Bashigabanha shizwalo shane, na joho yane bakayikoma na kwesa. Huna bigasha ho, bunanghana. Na butuula higulya ya ha ntwe gwakwe kubulwa kwakwe ukwali kwandikwa giki, UYU NGʼWENE YESU, NTEMI WA BAYUDAYA. Hunaho basambo babili bukongʼwa hamo nanghwe, umo ku nkono gwa bulyo, na umo ku nkono gwa lumoso. Nabo abubita ho bundukagula, bushingisha mitwe yabo. Buhaya giki, Bebe wa kukandula hekalu, na kuyizenga mu shiku idatu, ipijage ngʼwenekele. Ulu Bebe uli Ngʼwana wa Mulungu, ikaga ku nsalaba. Giko hangi na bagabiji batale na bandiki na banamhala bungimba kichilu, buhaya giki, Walubapijaga bangi, atudula kwipija ngʼwenekele. Ulu Wei ali ntemi wa Israeli, ni ikage lulu ku nsalaba, na biswe tukunzunya. Ansanije Mulungu; leke ampije lulu, ulu antogilwe; iki wali uhaya giki, Nene ndi Ngʼwana wa Mulungu. Basambo abali bukongʼwa hamo nanghwe nabo bumbyeda chene. Kufuma saa itandatu kushisha saa kenda chali chubiza ho giiti mu si yose. Giti saa kenda Yesu uhamuka na ilaka itale, uhaya giki, Eli, Eli, lama sabakthani? kushomelejiwa kwaho kuli giki, Mulungu wane, Mulungu wane, wanilekanija nguno ki? Bamo ba mu benabo abimilile ho, aho bigwa iyi, buhaya giki, Uyu alingʼwitana Eliya. Haho na baho ngʼwichabo upela, usola ibupya, ulilobya na siki, ulituula ku idete, ungʼwinha angʼwe. Aliyo banhu buhaya giki, Leka, tulole ulu Eliya akwiza kumpija. Aliyo Yesu aho uhamuka hangi na ilaka itale, winha ko moyo gwakwe. Kuhayumanila, iselema lya mu hekalu lyutanduka hagati kufuma higulya kushisha ha si; na si yuzuguma; na matale gutanduka; Na mashigila giguka; na mibimba mingi ya bela abali bashutula yujuchiwa; Na bufuma mu mashigila hanuma ya kujuka kwakwe, bingila mu linzengo lyela, na biyeleka ku bingi. Ntale wa bashilikale igana na biye hamo nanghwe balinanghana Yesu, aho bubona nyahinga na mihayo iyali yitwa, bogoha no, buhaya giki, Nghana Uyo wali Ngʼwana wa Mulungu. Bali bubiza ho bakima bingi bakulolelaga ka kule ho, abo abali bunondela Yesu kufuma Galilaya, bubyungʼwinhilija. Mu benabo bali ho Mariamu Magdalene, na Mariamu nina wa Yakobo na Yose, na nina wa bana ba ngʼwa Zebedayo. Aho yubiza mhindi, wiza munhu nsabi wa Arimathaya, lina lyakwe Yusufu, uyo nanghwe wali nghemba wa ngʼwa Yesu; Ngʼwenuyo uja kuli Pilato, ugulomba mimba gwa ngʼwa Yesu. Hunaho Pilato ulagila giki, inhiwe u mimba. Na Yusufu ugutwala mimba, ugulingila mu ngʼwenda gwa kitani gwape. Ugutuula mu nze yakwe mhya iyo wali wayipunza mu kiganga; na ulipilingitya iwe itale ha nyango gwa nze, na uja. Walali ho Mariamu Magdalene, na Mariamu u ungi, bigashije balolelile ku kigila. Ku ntondo, ha lushiku ululondelile kalongeje, bagabiji batale na Bafarisayo bibilingila kuli Pilato. Buhaya giki, Seba, twizukagwa giki, Nembi Ngʼwenuyo aho walatali mpanga akahaya giki, Hanuma ya shiku idatu nalajuka. Kulwa iyo, lagilaga kigila kilindwe chiza kushisha ha lushiku lwa kadatu, bahemba bakwe batiziza bujiku kungʼwiba, na kubawila banhu giki, Wajukaga mu bafu, huna bulembi wa hanuma bukubiza wa bubi kutinda wa kwandia. Pilato ubawila giki, Ngʼwinhiwa balindi, jagi, mukakilinde chiza gitumo mumanile. Nabo buja bukakilinda chiza i kigila, bulituulila ho iwe ilo kimanikijo, butuula ho na balindi. Aho Sabato yali yushila, aho wandia kwela ha lwa kwandia lwa mfungo, Mariamu Magdalene na Mariamu u ungi bali biza kulola kigila. Na lolaga, yali yabizaga ho nyahinga nhale, iki malaika wa Seba wali wika kufuma ngʼwigulu, wegela, ulipilingitya iwe kulyinja ha nyango, na uligashija. Suso yakwe yali ili giti lulabi, na shizwalo shakwe shali shili shape giti theluji. Kulwa kungʼogoha, balindi buzuguma, bubiza giti bachile. Malaika ushosha, ubawila bakima giki, Bingʼwe mutogohage, iki namanile giki, mulinkoba Yesu Uyo wali wakomilwe. Ati ho aha; iki wajukaga gitumo wali wahaya. Nzugwi, mulole ipande aho Seba walalalile ho. Na jagi wangu, mukabawile bahemba bakwe giki, Wajukaga mu bafu; na lolagi, alitonga kuja Galilaya kwenuko mukumona, yene namuwilaga. Nabo binga wangu mu kigila na kogoha na buyegi butale, bupela kubawila bahemba bakwe. Aho balija kubawila bahemba bakwe, kuhayumanila, Yesu umanhya nabo, uhaya giki, Mhola bingʼwe! Nabo aho bungʼwegela bundima ku magulu, na bunamya. Hunaho Yesu ubawila giki, Mutogohage; jagi, mukabawile badugu bane baje Galilaya, kwenuko bakunibona. Aho balija, lolaga, bamo ba balindi bingila mu linzengo, bubawila bagabiji batale mihayo iyo yali yabizaga ho. Na aho bibilinga hamo na banamhala, na bumala kulomana mihayo, bubinha bashilikale feza ningi, Buhaya giki, A bingʼwe hayagi giki, Bahemba bakwe bali bizaga bujiku, bungʼwiba aho biswe tulalile. Na mhayo gwenuyu ulu guligwiwe na gavana, biswe tukunkongakonga, tukungʼwingija makoye. Nabo aho banukula feza, bita gitumo buhanangilwa. Na mhayo uyu gukukumukaga mu Bayudaya kushisha lelo. Hunaho a bahemba ikumi na umo buja Galilaya ku lugulu ulo Yesu wali wabalagila. Na aho bumona, bunamya: aliyo bamo butawatawa. Na Yesu ubegela, ulungalunga nabo, uhaya giki, Ninhagwa budula bose ngʼwigulu na mu si. Kulwa iyo, jagi mukabahembeke ba mahanga gose, mukubyubabatija mu lina lya ngʼwa Baba na Ngʼwana na Moyo Ngʼwela: Mukubyubalanga kwidima yose iyo namulagilaga bingʼwe, na lolagi, Nene ndi hamo na bingʼwe shiku jose kushisha ku nghalilo ya ikanza ili. Amina. Kwandia kwa evangeli ya ngʼwa Yesu Kristo, Ngʼwana wa Mulungu. Gitumo yaandikwa mu kitabo cha nghangi Isaya giki, Lolaga, Nene nantuma ntungʼwa wane ku butongi wa bushu wako, uyo alabeja ipalapala lyako ku butongi wako. Ilaka lya uyo akuhamukaga mu bu, Bejabejagi ipalapala lya Seba, gololagi nzila yakwe. Yohana akiza ubyubatija mu bu, na ubyulomela kubatija kwa koya kwa kushika mu kulekejiwa kwa shibi. Na ba chalo chose cha Buyudaya, na ba Yerusalemi bufuma buja kuli wei bubatijiwa nanghwe mu mongo gwa Yordani, bubyutambula shibi shabo. Wei Yohana walazwalile boya wa ngamila, na shipi gwa ndili mu nkimbili gwakwe, waalyaga njige na buki wa mu bu. Nanghwe ulomela, uhaya giki, Izile hanuma yane Uyo anikilile nene nguzu; Ngʼwenuyo nene natigelelilwe kwinama kutaligula nkoba gwa shilatu shakwe. Nene hene namubatija mu minzi, aliyo Ngʼwenuyo alamubatija na Moyo Ngʼwela. Ikabiza mu shiku jenijo Yesu wali utuma Nazareti ya Galilaya, ubatijiwa na Yohana mu Yordani. Halio na haho ulinha kwinga mu minzi, ubona igulu lyukunduka, na Moyo giti nghuulu akwikaga kuli Wei; Na ilaka lyufuma ngʼwigulu, Bebe uli Ngʼwana wane ntogwa, muli Bebe nayejiwa no. Haho na haho Moyo untwalanija mu bu. Ubiza mo mu bu shiku makumi ane akugemagwa na Shetani; ubiza hamo na mashinwele; na bamalaika bubyungʼwinhilija. Hanuma ya kutungwa kwa ngʼwa Yohana, Yesu akiza Galilaya, ubyulomela evangeli ya butemi wa Mulungu. Uhaya giki, Ikanza lyashikilijiwagwa, na butemi wa Mulungu wegelaga; oyagi, muyizunye evangeli. Aho wali ushiminza ku mbalama ya nyanza ya Galilaya, ubabona Simoni, na Andrea ngʼwana wa ngʼwabo, bakuponyaga ntego mu nyanza; iki bali bategi. Na Yesu ubawila giki, Nzugwi munilondele, na Nene nakungʼwita mubize bategi ba banhu. Haho na haho buleka mitego yabo, bunondela. Na aho uja ku butongi hado, ubabona Yakobo ngʼwana wa ngʼwa Zebedayo, na Yohana ngʼwana wa ngʼwabo, na benabo bali bali mu lyato bakulungaga mitego yabo. Haho na haho ubitana; nabo buneka sabo Zebedayo mu lyato hamo na bitumamija ba mhela, bunondela. Na bushika mo mu Kapernaumu; haho na haho ha lushiku lwa Sabato aho wingila ngʼwibilingilo, ubalanga. Nabo budedebala kulwa kalangile kakwe, iki ubyubalanga giti ngʼwenekele budula, iti giti bandiki. Na walali mo ngʼwibilingilo lyabo munhu ali na moyo nsoso, nanghwe uhamuka, Uhaya giki, Tuli na ki, biswe na Bebe, Yesu wa Nazareti? wizaga kutuyagaja? Nakumanile Bebe, Uyo uli Ngʼwela wa Mulungu. Na Yesu unghama, uhaya giki, Humulaga, ungʼwinge ho. Na moyo nsoso gumfilinghanya, guhamuka na ilaka itale, gungʼwinga. Bukumya bose, kushisha bibugilija benekele na benekele, buhaya giki, Ni ki iyi? Kulanga uku kupya kuli kinahe? iki akulagilaga na budula i mioyo misoso, nayo yungʼwigwa! Lukumo lwakwe lukumuka haho na haho mu si jose ja Galilaya jibimbikanilwe ho. Haho na haho aho hali bufuma ngʼwibilingilo, hamo na Yakobo na Yohana, bingila mu numba ya ngʼwa Simoni na Andrea. Ninabuko wa ngʼwa Simoni walalalile, asatile nswiza; haho na haho bungʼwila gitumo ali. Nanghwe ungʼwegela, undima nkono, umucha; haho na haho nswiza gunekela, nanghwe ubinhilija. Aho yubiza mhindi, aho limi lyali lyugwa, bungʼwenhela bose abalwalile, na abo abali bali na masamva. Ba nzengo bose bibilingila ha nyango. Nanghwe ubapija bingi abali basatile na bulwile bungi na bungi, hangi ugapeja masamva mingi, atugazunilija masamva kulungalunga, iki gali gumana Wei. Na mu makingo aho yali itali bujiku, ubuka, utuma, uja kwipande iliti na banhu, na ulomba uko. Na Simoni na abo abali bali nanghwe bunondela. Aho bumona, bungʼwila giki, Banhu bose balikukoba. Nanghwe ubawila giki, Tujagi ku mizengo iyili hihi, nakalomele nu kwene; iki kulwa nguno iyi nizaga. Nanghwe ubyulomela mu mabilingilo gabo mu si yose ya Galilaya, na ugapeja masamva. Na wa mbiji wiza kuli Wei, ungʼwikumbilija, untugija mazwi, ungʼwila giki, Ulu utogilwe, wadula kuneja. Yesu unsatwa, utama nkono gwakwe, unkuumya; na ungʼwila giki, Natogilwe, elaga. Na aho uhaya, haho na haho mbiji jungʼwinga ngʼwenuyo, nanghwe wejiwa. Na unghugula gete, halio na haho unaga, Ungʼwila giki, Wilanghane, utizungʼwila munhu ose mhayo; aliyo jaga, ukiyoleche kuli ngabiji, ufunye shinhu sha kwejiwa kwako gitumo Musa wali ulagila; ibize bukaniji ku bo. Aliyo wei aho wali ufuma, wandia kulomela no, na kukumucha mhayo uyo kushisha nose Yesu walatudula kwingila mu nzengo hape hangi; aliyo wali wikala kwipande iliti na banhu; nabo biza kuli Wei kufuma hose hose. Hanuma ya shiku ndo wali wingila mo hangi mu Kapernaumu, yigwiwa giki, ali mu numba. Haho na haho bingi bibilingila hamo, kushisha nose ngʼwanya gugaya nulu ha nyango: nanghwe ubalungalungila mhayo. Nabo biza kuli Wei, bungʼwenha munhu alemahalile, abuchiwe na banhu bane. Aho bali bulemelwa kungʼwegela kulwa ibita, bigula higulya ya numba umo ali; aho bumala kupigula, bicha bulili ubo abulalilile u nema. Aho Yesu ubona kuzunya kwabo ungʼwila nema giki, Ngʼwana wane, shibi shako shalekejiwa. Aliyo bali bali ho bamo ba bandiki bigashije ho, na bubyidedekanya mu ngholo jabo giki, Munhu Uyu alilungalunga giko nguno ki? Akudukaga. Nani wadula kulekeja shibi ulu ati umo wike, Ngʼwene Mulungu? Haho na haho Yesu umana mu moyo gwakwe giki, bidedekanya giko mu ngholo jabo, ubawila giki, Mulidedekanya iyo mu ngholo jingʼwe nguno ki? Changu kili he, kungʼwila u nema giki, Shibi shako shalekejiwa; nulu kuhaya giki, Bukaga, ubuche bulili wako, ushiminze? Aliyo mumane giki, Ngʼwana wa munhu ali na budula mu si kulekeja shibi, (ungʼwila nema giki,) Nakuwila giki, Bukaga, ubuche bulili wako, uje ku kaya yako. Nanghwe ubuka haho na haho, ubucha bulili, winga mu miso gabo bose; nose bukumya bose, bunkuja Mulungu, buhaya giki, Tutinabona giko na kamo. Utuma hangi, uja mu mbalama ya nyanza, na ibita lyose lyiza kuli Wei, ubalanga. Aho ubyubita, umona Levi ngʼwana wa ngʼwa Alfayo, igashije ngʼwitobelo, ungʼwila giki, Nilondelage. Nanghwe ubuka, unondela. Na yubiza giki, aho wali wigashije akulyaga mu numba ya ngʼwenuyo, batobisha bingi na ba shibi bigasha hamo na Yesu na bahemba bakwe; iki bali bali bingi, nabo bunondela. Bandiki na Bafarisayo aho bumona akulyaga hamo na batobisha na ba shibi, bubawila bahemba bakwe giki, Akulyaga na kungʼwa hamo na batobisha na ba shibi nguno ki? Yesu aho wigwa iyi, ubawila giki, A bapanga bati na nimo na naguji, aliyo abasatile; natizile kubitana batungilija, aliyo ba shibi bashike mu koya. Na bahemba ba ngʼwa Yohana na ba Bafarisayo bali bubyudila nzala; huna biza bungʼwila giki, Ni buli bahemba ba ngʼwa Yohana na bahemba ba Bafarisayo bakudilaga nzala, aliyo bahemba bako batadilaga nzala? Yesu ubawila giki, Biye ba ntoji badula kinahe kudila nzala aho ntoji atali ali hamo nabo? aho batali bali hamo na ntoji, batudula kudila nzala. Aliyo shiku jiliza, aho ntoji alamala kwinjiwa mu bo, hunaho lulu baladila nzala mu shiku ijo. Ati ho munhu uyo usumila kidaso cha ngʼwenda mpya ku kizwalo kikulukulu: ulu wita giko, icho chasumilwa kipya chutandula icho kikulukulu, na butanduke waho bongeja. Hangi ati ho munhu uyo utuula minzi ga mizabibu mapya mu mhinda nghulukulu: ulu wita giko, minzi ga mizabibu mapya gakutumula mhinda, na minzi ga mizabibu gidika, na mhinda najo jukenaguka; aliyo shigelile kutuula minzi ga mizabibu mapya mu mhinda mhya. Yubiza giki, wali ubita mu migunda ya ngano ha Sabato; na bahemba bakwe bandia kuja, bubyuhulula mangala. Bafarisayo bungʼwila giki, Lolaga, bakwitaga icho cha ngilo ha Sabato nguno ki? Nanghwe ubawila giki, Mutasomaga na kamo iyo akita Daudi aho wali ugayiwa na utuba, wei, na benabo abali bali hamo nanghwe? Gitumo wali wingila mu numba ya Mulungu mu shiku ja ngʼwa Abiathar ngabiji ntale, na ulya migati iyufunyiwa kuli Mulungu, iyo ya ngilo kwilya ulu iti bagabiji bike, na ubinha na benabo abali bali hamo nanghwe? Ubawila giki, Sabato yaabejiwa kulwa munhu, iti munhu kulwa Sabato. Giko Ngʼwana wa munhu ali Seba nu ku Sabato. Huna wingila hangi ngʼwibilingilo; na walali mo munhu ali na nkono gumile. Nabo bunola ulu alampije ha Sabato, babonele ho mhayo gwa kumula. Nanghwe ungʼwila munhu ali na nkono gumile giki, Imilaga hagati. Na ubawila giki, Igelile kwita ya wiza ha Sabato, nulu kwita ya bubi? kupija munhu nulu kubulaga? Aliyo boi buhumula. Nanghwe ubilalangija na bupelanu, apinihalile kulwa buganghanazu wa ngholo jabo, huna ungʼwila munhu uyo giki, Tamaga nkono gwako. Ugutama, na nkono gwakwe gubiza mpanga giti u gungi. Aho Bafarisayo bufuma, haho na haho bulomana na Baherode gitumo bakunyagaja. Aliyo Yesu winga ko uja hamo na bahemba bakwe ku nyanza, na buhi butale bunondela kufuma mu Galilaya, na mu Buyudaya, Na mu Yerusalemi, na mu Idumaya, na kufuma ku nkilo gwa Yordani, na kufuma mapande ga Turo na Sidoni, buhi butale; aho bali bigwa mihayo mitale iyo akwitaga, biza kuli Wei. Ubawila bahemba bakwe giki, lyato linindile kulwa nguno ya ibita, litizunshiteleja. Iki wali ubapija bingi; kushisha nose abo abali bali na mabulwile bungʼwibupa, bukoba kunkuumya. Na mioyo misoso aho yumona, yugwila ku butongi wakwe, yuhamuka, yuhaya giki, Bebe uli Ngʼwana wa Mulungu. Nanghwe uyilemeja no no no, itizungʼwelecha hape. Hunaho ulinha mu lugulu, ubitana kuli Wei abo walabatogilwe Ngʼwenekele, nabo biza kuli Wei. Ubatuula ho ikumi na babili kubiza hamo nanghwe, hangi giki, abatume kulomela. Na hangi babize na budula wa kupija bulwile bose, na kupeja masamva. Na ungʼwilika Simoni lina giki, Petro; Na Yakobo ngʼwana wa ngʼwa Zebedayo, na Yohana ngʼwana wa ngʼwawe wa Yakobo, nabo ubilika mina giki, Boanerge, makulu gaho giki, bana ba kuluma kwa mbula; Na Andrea, na Filipo, na Bartolomayo, na Matayo, na Tomaso, na Yakobo ngʼwana wa ngʼwa Alfayo, na Thadayo, na Simoni muna Kanani, Na Yuda Iskariota uyo wali ungʼwinha ko. Huna bali bingila mu numba: Na ibita libilinga hangi kushisha nose bali batudula nulu kulya migati. Na aho bakwe bigwa iyo, bufuma bandime; iki buhaya giki, Masala gakwe gangaya. Na bandiki abali butulumenha kufuma Yerusalemi buhaya giki, Ali na Beelzebuli; na hangi giki, Akupejaga masamva mu budula wa ntale wa masamva. Nanghwe ubitana kuli Wei, ubawila mu shigemenghejo giki, Shetani wadula kinahe kumpeja Shetani? Kangi butemi ulu wilekanya wenekele na wenekele, butemi wenubu butudula kwimila. Na numba ulu yilekanya yenekele na yenekele, numba yeniyo itudula kwimila. Na Shetani ulu wiyubukila ngʼwenekele na kwilekanya ngʼwenekele, atudula kwimila, aliyo ali na nghalilo. Ati ho munhu uyo wadula kwingila mu numba ya munhu wa nguzu, na kusonza shikolo shakwe, ulu atandije tame kuntunga uyo wa nguzu, hunaho akusonza numba yakwe. Nghana namuwila giki, Banhu balalekejiwa shibi shose na buduki bose ubo bakudukagulaga: Aliyo uyo ose akundukagulaga Moyo Ngʼwela atubona kulekejiwa welelo bose, aliyo wigelelilwe nsango gwa welelo na welelo: Iki bali buhaya giki, Ali na moyo gwa busoso. Hunaho biza nina na bana ba ngʼwawe; bimila hanze, butuma kuli Wei wa kungʼwitana. Na ibita lyali ligashije limpindije, nabo bungʼwila giki, Lolaga, u noko na bana ba ngʼwingʼwe bali hanze, balikukoba. Nanghwe ubashokeja, uhaya giki, Mayu ni nani nulu bana ba ngʼwiswe ni banani? Nanghwe ubilalangija abigashije bampindije, uhaya giki, Lolagi, Mayu na bana ba ngʼwiswe. Iki munhu ose uyo akwita iyo Mulungu atogilwe, ngʼwenuyo ali ngʼwana wa ngʼwiswe, na ilumbu lyane, na mayu. Nanghwe wali wandia hangi kulanga ku mbalama ya nyanza. Ibita itale no bibilingila kuli Wei kushisha nose wingila mu lyato, ukigasha mu nyanza; na ibita lyose lyali lili ha si numu hihi na nyanza. Nanghwe ubalanga mihayo mingi mu shigemenghejo, ubawila mu kulanga kwakwe giki, Degelekagi: Lolagi, mibi wali uja kubiba; Yubiza giki, aho ubiba, mbiyu jingi jugwa ha nzila, huna noni jiza jujilya. Na jingi jugwa ha ipande lya mawe, aho gali gati ho masalu mingi; na juzwa wangu, iki masalu gatajile ha si no; Aliyo aho limi lyaka, jochiwa; na kulwa jali jiti na miji, junyala. Na jingi jugwa mu mihwa, na mihwa gukula, gujishita, jukija kuhola. Na jingi jugwa ha masalu ga wiza, na juhola bana, juzwa, jukula, juponeka, makumi adatu, jingi makumi atandatu, na jingi igana. Huna ubawila giki, Uyo ali na matu ga kwigwa, leka igwe. Aho wali ubiza wiyene, abo bunondela hamo na benabo ikumi na babili bumuja makulu ga kigemenghejo iki. Nanghwe ubawila giki, Bingʼwe ngʼwinhagwa kukumana kwigeniha kwa butemi wa Mulungu: aliyo ku abo abali hanze, mihayo yose yitilwa mu shigemenghejo, Giki, Kulola balole, aliyo kubona yaya; na kwigwa bigwe, aliyo kwitegeleja yaya; batizugaluka, na kulekejiwa shibi shabo. Ubawila giki, Mutitegeleja kigemenghejo iki? ali mukushimana kinahe shigemenghejo shose? U mibi akubibaga mhayo. Aba bali abo ha nzila, uko mhayo gubiwa, huna lulu aho bigwa, haho na haho Shetani wiza, ugutaja mhayo ugwabibilwe mu ngholo jabo. Na giko aba bali abo babiwa ha ipande lya mawe; abo, aho bigwa mhayo bugwanukula haho na haho na kuyega; Nabo bati na nji mugati yabo, aliyo bushinga kakanza, kushisha aho makoye gilonga na kunyajanyajiwa kulwa mhayo, haho na haho bipama. Na aba bali abo ababiwa mu mihwa, bene abo abigwa mhayo, Na mayanga ga ikanza ili, na bulembalembi wa sabo, na kwikumva kwa mihayo yingi aho shingila, shugushita mhayo, nago gututwaja matwajo. Na aba bali abo babiwa ha masalu ga wiza; bene abo abigwa mhayo, na bugwanukula, huna butwaja matwajo, umo makumi adatu, umo makumi atandatu, na umo igana. Na ubawila giki, Angu, tala yenhwa ya kutuulwa igubanikigije na ikililijo, nulu ngʼwizungu lya bulili? angu iti giki, ituulwe ha ikindikilo lya tala? Iki guti ho mhayo ugubisile, uyo gutaligengeleka; nulu guti ho mhayo ugwitwa mu kwigeniha, aliyo uyo gulilonga hape. Munhu ose uyo ali na matu ga kwigwa, leka igwe. Ubawila giki, Ngʼwilanghanage iyo mukwigwaga; ngelekelo iyo mukugelekelaga, hwi yene mukugelekelwa, na bingʼwe aba mukwigwaga, mulongejiwa. Iki uyo ali na kinhu, akwinhiwa: na uyo ati na kinhu, akutagijiwa icho ali nacho. Na uhaya giki, Butemi wa Mulungu buli giki, bubangile munhu uyo ubiba mbiyu ha si, Ushutula, ubuka, bujiku na limi, na mbiyu juzwa, jukula, nanghwe atitegelejaga kakulile kajo umo kali. Iki si ikuzwishaga matwajo yenekele, kwandia madutu, hanuma lyangala, hanuma mbeke ijikulumile mu lyangala. Aliyo aho matwajo gupya, haho na haho ulutuula ho lushu, iki igesa lyashikaga. Na uhaya giki, Butemi wa Mulungu tuwikolanije na ki? nulu tubugemengheje na kigemenghejo kili kinahe? Bubangile kabeke ka karadali, ako, aho kabiwa ha si, nulu kali kado kutinda mbeke jose ja mu si, Nahene aho kubiwa, kukula kubiza katale kutinda makubi gose, nako kala matambi matale; kushisha nose noni ja hape judula kwikala mu mbeho yako. Na ubalungalungila mhayo mu shigemenghejo shingi giti shenishi, gitumo bali budula kwigwa; Aliyo walatulungalunga nabo ulu iti mu kigemenghejo na aho bali bali biyene, ubafubolela bahemba bakwe mihayo yose. Na lwise lwene aho yali yubiza mhindi, ubawila giki, Tukilagi ku nkilo. Huna bulilaga ibita, buntwala hamo nabo mu lyato gitumo walali. Na mato gangi gali gali ho hamo nanghwe. Na nyaga ntale gwilonga, na mahuli gulitula lyato kushisha lyuhaya kokala. Aliyo Wei Ngʼwenekele walali mu bugobelo, ashutulile ha nsago: nabo bumisha, bungʼwila giki, Nangi, utatukalalilwe ulu tujimila? Aho umishiwa, uguhama nyaga, uyiwila nyanza giki, Humulaga, ulende. Huna nyaga goya, bubiza ho bulendu butale. Ubawila giki, Ngʼogohaga giko kinahe? Muti na kuzunya ni buli? Nabo bogoha no, biwila boi bike giki, Ni nani uyu? iki nyaga na nyanza nasho shungʼwigwa. Nabo bushika ku nkilo gwa nyanza, ku si ya Bagadara. Aho wali utuma mu lyato, haho na haho munhu umanhya nanghwe, uyo walali na moyo nsoso, afumile mu mashigila, Uyo wikalo wakwe wali buli mu mashigila; nulu walati ho munhu uyo wali udula kuntunga, nulu na minyololo yaya. Iki nghangala ningi waatungagwa na nhendele, na minyololo, na minyololo yaatinagwa nanghwe, na nhendele jubinzagulwa, nulu walati ho munhu wa nguzu kunyehya. Na gwa gwa gwa, bujiku na limi, ubyuhamuka mu mashigila na mu ngulu, wichembagula na mawe. Aho umona Yesu kakule, umpelela, unamya, Uhamuka na ilaka itale, uhaya giki, Tuli na mhayo ki, nene na Bebe, Yesu, Ngʼwana wa Mulungu ali higulya no? Nakwilahilila kuli Mulungu utizuniluhya. Iki walungʼwilaga giki, Ingaga kuli munhu uyu, bebe moyo nsoso. Umuja giki, Lina lyako uli nani? Nanghwe ushosha, ungʼwila giki, Lina lyane, ndi Lejioni: iki tuli bingi. Nanghwe ungʼwikumbilija no, atizugapeja hanze ya si yeniyo. Na lyali lili ho mu nghilimva na ngulu, idale itale lya ngurube likudimaga. Na masamva gose gungʼwikumbilija, guhaya giki, Tutumagi mu ngurube, tukingile mujo. Na Yesu ugazunilija haho na haho. Na mioyo misoso yufuma mo, yukingila mu ngurube: idale lyupela na nguzu, lyuholomokela ha ngegu mu nyanza; jali jili giti shiku shibili; jungʼwa nhuli, jucha mu nyanza. Abo abali bujidima ngurube bupela, bubyigwilija mhayo mu nzengo na mu chalo. Nabo bufuma, bakalole mhayo ki uyo gwali gwitwa. Nabo biza kuli Yesu, bumona uyo walali na masamva igashije, azwalile, wabizaga na masala hangi, uyo walali na lejioni; nabo bogoha. Na benabo abali bubona, bubasombolela gitumo yali yitwa kuli uyo walali na masamva, na mihayo ya ku ngurube. Nabo bandia kungʼwikumbilija kwinga mu mimbi jabo. Aho Wei akwingilaga mu lyato, uyo walali na masamva ungʼwikumbilija giki, abize hamo nanghwe. Yesu walatunzunilija, aliyo ungʼwila giki, Jaga ku kaya yako na ku ba ha ngʼwako ukabigwilije mihayo mitale iyo Seba wakwitilaga, na kukuchila kigongo. Nanghwe uja, wandia kulomela mu Dekapoli mihayo mitale iyo Yesu ungʼwitila; na banhu bose bukumya. Aho Yesu wali ushokanya kukila hangi mu lyato, ibita itale lyungʼwibilingila: nanghwe walali haho na nyanza. Hunaho umo wa basugi ba ibilingilo wiza, lina lyakwe Yairo; nanghwe aho umona, ugwa ku magulu gakwe, Ungʼwikumbilija no, uhaya giki, Ngʼwana wane ngʼwaniki alenda kucha: nakwikumbilija, nzugu, ukantuulile makono gako, apile, nanghwe akubiza mpanga. Uja hamo nanghwe; ibita itale lyunondela, bunshiteleja. Na nkima umo uwalasatile ngeji gwa mininga miaka ikumi na ibili, Hangi wali ukoyiwa mihayo mingi na bafumu bingi, na wali umala shikolo shose ali nasho, nulu walatugunanwa, aliyo busatu bongeja, Aho wali wigwa mihayo ya kuli Yesu, wiza ngʼwibita hanuma yakwe, na ukuumya ha kizwalo chakwe. Iki wali uhaya giki, Ulu nushikuumya shizwalo shakwe gwike, nakupila. Haho na haho luzwilo lwa mininga gakwe lukama, umana mu mili gwakwe giki, wapilaga bulwile wenubo. Haho na haho aho Yesu wimana Ngʼwenekele giki, budula wangʼwingaga, ugaluka ngʼwibita, uhaya giki, Nani wanikuumyaga ku shizwalo shane? Bahemba bakwe bungʼwila giki, Ambu, ulibona ibita lilikushiteleja, na Bebe ulihaya giki, Nani wanikuumyaga? Nanghwe wilalangija kumona uyo witaga mhayo uyu. Aliyo nkima ogoha na kudetema, umana iyo witilagwa, wiza na ugwa mu butongi wakwe, untambulila yose ya nghana. Nanghwe ungʼwila giki, Ngʼwana wane, kuzunya kwako kwakupijaga, jaga mu mhola, wikale mpanga, wapilaga bulwile wako. Aho walatali ulungalunga, biza bamo kufuma kuli nsugi wa ibilingilo, buhaya giki, Ngʼwana wako wachaga: ulinojanoja Nangi hangi ni buli? Aliyo Yesu aho wali wigwa mhayo uyu gwahayiwa, ungʼwila nsugi wa ibilingilo giki, Utizogoha, zunyaga duhu. Atunzunilija munhu nulu umo kuja hamo nanghwe, ulu ati Petro, na Yakobo, na Yohana, ngʼwana wa ngʼwawe wa Yakobo. Ushika ku numba ya nsugi wa ibilingilo, ubona mayoge, na kulila na kulila nghungu nhale. Na aho wali umala kwingila, ubawila giki, Muliyoga na kulila nguno ki? Ngʼwaniki atachile, aliyo ashutulile. Nabo bunsekela no. Aliyo Wei, aho wali umala kubafunya bose, untwala ise wa ngʼwaniki na nina, na benabo abali hamo nanghwe, wingila umo ngʼwaniki ali. Na udima nkono gwa ngʼwaniki, ungʼwila giki, Talitha, kumi: mihayo iyi kushomelejiwa kwaho kuli giki, Ngʼwaniki, nakuwila giki, Bukaga. Haho na haho ngʼwaniki ubuka, ushiminza, iki walali wa miaka ikumi na ibili. Nabo bukumya na kukumya kutale. Ubalagila no munhu ose atizumana mhayo uyu: na ubawila inhiwe shiliwa. Na wali winga ko, ushika mu si ya ngʼwabo; na bahemba bakwe bunondela. Aho Sabato yushika, wandia kulanga ngʼwibilingilo; na bingi aho bundegeleka, bukumya, buhaya giki, Munhu Uyu wafunije hali mihayo iyi? na masala ki aya winhiwa, iki na shitile sha budula ishi shikwitagwa na makono gakwe? Angu, Uyu ati mpunzi, ngʼwana wa ngʼwa Mariamu, na ngʼwana wa ngʼwabo wa Yakobo, na Yose, na Yuda, na Simoni? na balumbuye, angu, bati kunu ku biswe? nabo bipama muli Wei. Aliyo Yesu ubawila giki, Nghangi atugayiwa ikujo, ulu iti mu si ya ngʼwabo, na mu ludugu lwakwe, na mu kaya yakwe. Na kwenuko walatudula kwita chitile cha budula nulu kimo yaya, ulu iti kubatuulila balwile bagehu makono gakwe, na kubapija. Nanghwe ukumya kulwa butuzunya wabo. Upindilapindila mu mizengo, ubyubalanga. Na wali ubitana kuli Wei benabo ikumi na babili, wandia kubatuma babili babili, ubinha budula higulya ya mioyo misoso; Ubalagila batizutwala kinhu cha lugendo, ulu guti nanga gwike; nulu mhinda, nulu shiliwa, nulu senti mu nkoba yaya; Aliyo bazwalile shilatu; na Mutizuzwala nghanjo ibili. Ubawila giki, Hose hose uko ngʼwingila mo mu numba, ikalagi mo kushisha ngʼwinga ko. Na banhu bose abatungʼwegeleja nulu kungʼwigwa bingʼwe, aho ngʼwinga ko, komagulagi lububu ululi hasilili ya mhambala jingʼwe, ibize bukaniji kubo. Nghana namuwila giki, Ku ba Sodoma na ba Gomora ilabiza hambuhambu mu lushiku lwa nsango kutinda nzengo gwenuyo. Nabo bubuka buja, bubyulomela giki, banhu boye. Bugapeja masamva mingi, bubabila maguta ga zeituni balwile bingi na bubapija. Na Ntemi Herode wali wigwa iyo; iki lina lyakwe lyali lyukumuka: nanghwe uhaya giki, Yohana Matija wajukaga mu bafu, na kulwa iyi shitile sha budula shikwitaga muli wei. Bangi buhaya giki, Ali Eliya, na bangi giki, Ali nghangi, nulu giti umo wa bahangi. Aliyo Herode, aho wigwa iyi, uhaya giki, Uyu ngʼwene Yohana, uyo nali numuta ntwe; wajukaga mu bafu. Iki Herode ngʼwenekele wali wafuma kundima Yohana, umfunga mu jela, kulwa nguno ya Herodia, nke wa ngʼwana wa ngʼwawe, Filipo: iki untola. Iki Yohana akangʼwila Herode giki, Ilemegije bebe kubiza na nke wa ngʼwana wa ngʼwingʼwe. Aliyo Herodia untungila nhungi, walatogilwe kumulaga, aliyo walatudula: Iki Herode wali ungʼogoha Yohana, walamanile giki, ali ntungilija na ngʼwela; na uninda chiza; na aho undegeleka, wali wita mihayo mingi; ubyundegeleka na kuyega. Na aho lushiku lwitonga lwa wiza, aho Herode, ha lushiku lwa kubyalwa kwakwe, ubazugila sha buhondo a banangʼoma, na batale ba bulugu, na banangwa ba Galilaya; Aho ngʼwana wa ngʼwenuyo Herodia akingila, ubina, unyeja Herode na benabo abigashije ku shiliwa hamo nanghwe; huna ntemi ungʼwila ngʼwaniki, Nilombage chose chose icho utogilwe, na nene nakukusamba. Nanghwe ungʼwilahilila, uhaya giki, Chose chose icho ulanilombe nakukusamba, nulu kushisha imo ya ngʼwibili ya butemi wane. Ufuma ungʼwila nina giki, Nalombe ki? Uhaya giki, Ntwe gwa ngʼwa Yohana Matija. Haho na haho wingila wangu kuli ntemi, unomba, uhaya giki, Natogilwe unisambe hahiyi mu lulangahe u ntwe gwa ngʼwa Yohana Matija. Na ntemi upinihala no; aliyo kulwa shilahilo shakwe, na kulwa benabo abigashije ku shiliwa hamo nanghwe, walatatogilwe kunemeja. Haho na haho ntemi untuma munikulu umo, ulagila kwenhwa ntwe gwakwe; Nanghwe uja umuta ntwe mu jela, wenha ntwe gwakwe mu lulangahe, ungʼwinha ngʼwaniki, na ngʼwaniki ungʼwinha nina. Bahemba bakwe aho bigwa iyi, biza, bugutwala mimba gwakwe, na bugulaja mu kigila cha mawe. Na batungʼwa bibilingila hali Yesu; bungʼwila yose iyo bali bita na iyo butonga. Nanghwe ubawila giki, Nzugwi bingʼwe, ngʼwisunde kwipande iliti na banhu, ngʼwifule hado. Iki bali bubiza bingi abakwizaga na bakujaga kushisha boi bali batubiza na ngʼwanya nulu gwa kulya. Nabo buja mu lyato bisunda heke kwipande iliti na banhu. Na banhu bubabona bajile, bingi bumana Wei, bupelela uko kihamo mu nzila ya magulu kufuma mu mizengo yose, bubatangila, bungʼwibilingila. Aho Yesu winga mu lyato, ulibona ibita itale, ubasatwa, iki bali bali giti ngholo ijiti na ndimi; wandia kubalanga mihayo mingi. Hunaho yubiza mhindi, bahemba bakwe bungʼwegela, buhaya giki, Ipande ili liti na banhu, na haha ili mhindi; Balagage, baje mu magunguli na mizengo ibimbikanilwe kunu, bakigulile migati, iki bati nasho sha kulya. Aliyo ushosha, ubawila giki, Binhagi bingʼwe sha kulya. Nabo bungʼwila giki, Himba tuje, tukagule migati ya shilingi magana abili, tubinhe balye? Aliyo ubawila giki, Muli nayo migati yinga? Jagi makalole. Aho bumana, buhaya giki, Itano, na ndilo ibili. Ubalagila babigashe bose magele magele ha maswa managana. Bigasha bihelile, igana-igana, na makumi atano-tano. Nanghwe wanukula migati iyo itano na ndilo ijo ibili, ulangamila miso kwigulu, ushisungulila lubango, umeganya migati, ubinha bahemba, bayitenge ku butongi wabo; na ndilo ibili ubagabulila bose. Bulya bose, biguta. Bukuminga masajiwa masonzo ikumi na abili agokala, na ga ndilo. Na benabo abali bulya migati iyo bali bali bagosha giti 5,000. Haho na haho ubahadikija bahemba bakwe kwingila mu lyato, batonge ku nkilo kushika Bethsaida, kushisha Wei alamale kwilaga na ibita. Aho wamala kwilaga nabo, uja mu lugulu kulomba. Aho yali ili mhindi, lyato lyali lili mu bujiba wa nyanza, nanghwe walali wiyene ku si. Ubabona balikoyakoya kufuga, iki nyaga gwali gubafumila ku butongi; mu bulindi wa kane wa bujiku, uja kubo, akushiminzaga higulya ya nyanza; wali wenda kubabitila. Aliyo aho bumona akushiminzaga higulya ya nyanza, biganika giki, lili linghangi, nabo buhamuka, Iki bose bakamona na biganilija. Haho na haho ulungalunga nabo, ubawila giki, Timbyagi ngholo, ambu, ndi Nene, mutogohage. Huna wingila mu lyato umo bali bali, na nyaga gulembela; budedebala niyo kutinda na bukumya; Iki bali batidedekanya ya migati, aliyo ngholo jabo jali juganghanajiwa. Aho bali bukila, bushika ku si ya Genesareti, bukola ha ngʼwalo. Aho binga mu lyato, haho na haho bumana, Bupela butangʼanhya si yose yeniyo ibimbikanilwe, bandia kubabukija balwile ha bulili, bubyuja uko bakungʼwigwaga giki, ali ho. Na hose hose uko ubyingila mu magunguli, nulu mu mizengo, nulu mu chalo, bubyubalaja abasatile mu nghungʼwano, bungʼwikumbilija abazunilije bakuumye nulu kwikigijo lya kizwalo chakwe; nabo bose abali bunkuumya ko bupijiwa. Hunaho bungʼwibilingila Bafarisayo na bamo ba bandiki, abali bufuma Yerusalemi; Aho bubabona bamo ba bahemba bakwe bakulyaga shiliwa na makono agali gali na mako, chene giki, agatakalabilwe, bubadonhokela. Iki Bafarisayo na Bayudaya bose, ulu batukalabaga gete makono gabo, batulya, iki budima kilangile cha banamhala babo: Hangi aho bufuma ku nghungʼwano, ulu batoga batulya; na ili ho mihayo mingi yingi iyo banukula kuyidima, giki, koja shikombe, na nungu, na sufuria, na meza. Hunaho Bafarisayo na bandiki bumuja giki, Nguno ki bahemba bako batulondelaga kilangile cha banamhala, aliyo bakulyaga shiliwa na makono agatakalabilwe? Ushosha ubawila giki, Isaya wali umuhanga gete gete a bingʼwe bibeleja, gitumo yaandikwa giki, Banhu aba bakunikujaga na milomo yabo, aliyo ngholo jabo jili kule na Nene. Aliyo bakunilamyaga dalali, bakulangaga shilangile ishili migilo ya banhu. Iki ngʼwaleka kilagilo cha Mulungu, ngʼwadima kilangile cha banhu, giki, koja nungu na shikombe, na mihayo mingi yingi giti iyi mukuyitaga. Ubawila giki, Mukulemaga chiza i kilagilo cha Mulungu, mudime kilangile chingʼwe. Iki Musa wali uhaya giki, Bakujage so na noko; na uyo unduka ise nulu nina, abulagwe. Aliyo bingʼwe ngʼwahaya giki, Ulu munhu ungʼwila ise nulu nina giki, Icho shinigelile nene kungʼwinha bingʼwe chene Korban, makulu gaho giki, cha kwinha kuli Mulungu: Mutunzunilija hangi kungunana mhayo ise nulu nina; Ngʼwabulagaga mhayo gwa Mulungu na kilangile chingʼwe icho mukulangaga: na mihayo mingi giti iyi mukuyitaga. Huna ulitana ibita lyose kwiza kuli Wei, ubawila giki, Nigwagi Nene bose, ngʼwitegeleje; Kiti ho kinhu hanze ya munhu, ulu chungʼwingila, icho chadula kungʼwitila mako; aliyo shinhu isho shikufumaga muli munhu, shene shungʼwitila mako munhu. Ulu munhu ose ali na matu ga kwigwa, leka igwe. Aho wingila mu numba ulileka ibita, bahemba bakwe bumuja makulu ga kigemenghejo iki. Nanghwe ubawila giki, Chene na bingʼwe muti na kwitegeleja? Mutiganikaga giki, chose ikili hanze ulu chingila muli munhu kitudula kungʼwitila mako; Iki kitingilaga mu ngholo yakwe, aliyo mu nda yakwe, huna chubita, chuja ngʼwipingilo, shikwelaga shiliwa shose. Uhaya giki, Icho kikufumaga muli munhu, chenicho kikungʼwitilaga mako. Iki kufuma mugati, mu ngholo ja banhu, shikufumaga mo maganiko ga bubi, bushihya, bujingi, bubulagi, Wibi, kwikumva, buhunga, bulembalembi, wimilizu, bupunya miso, buduki, budoshi, buchiluchilu; Shenishi shose sha bubi shikufumaga mugati, shikungʼwitilaga munhu mako. Huna ubuka, wali winga ko, uja ku si ibimbikanilwe na Turo na Sidoni. Aho wingila mu numba walatatogilwe munhu ose kumana mhayo uyu; aliyo walatudula kwikala ibisile. Iki nkima umo uyo walali na ngʼwana wakwe ngʼwaniki, uwalali na moyo nsoso, aho wigwa mihayo ya kuli Wei, wiza, ugwa ku magulu gakwe. Nkima uyo walali Ngiriki wa ihanga lya Surofenisa; nanghwe unomba apeje isamva muli ngʼwana wakwe. Aliyo Yesu ungʼwila giki, Leka bana bigute tame; iki iti chiza kutwala shiliwa sha bana, na kushiponeja ku mva. Aliyo ushosha, ungʼwila giki, Ali chene, Seba; aliyo nahene tubunda twa mva ngʼwizungu lya meza tukulyaga malagalikwa ga bana. Ungʼwila giki, Kulwa kihayile iki, jaga lulu; isamva lyingaga muli ngʼwana wako. Aho ushoka ku numba yakwe, unsanga isamva lyamala kwinga, na ngʼwana wakwe alajiwe ha bulili. Aho winga mu si ibimbikanilwe na Turo na Sidoni, ubitila hagati ya si ibimbikanilwe na Dekapoli, ushika hangi ku nyanza ya Galilaya. Nabo bungʼwenhela nchibi wa matu uyo atalungalungaga chiza, bungʼwikumbilija antuulile ho nkono gwakwe. Nanghwe ungʼwisundya ha mhelo kwinga ngʼwibita, utuula nzwala jakwe mu matu gakwe, uswa mate, unkuumya ku lulimi lwakwe, Ulangamila miso kwigulu, uganghila, ungʼwila giki, Effatha, makulu gaho giki, Igukaga. Matu gakwe giguka haho na haho, na kata ka lulimi lwakwe kutaliguka, nanghwe ulungalunga chiza. Ubalemeja batizungʼwila munhu; aliyo nulu wali ongeja kubalemeja, boi bongeja kutinda no kukumucha mhayo uyu. Nabo bukumya na kukumya kutale kutinda, buhaya giki, Witaga mihayo yose chiza: a bachibi ba matu akubigulaga; na ba kimumu akubalunjalunjaga. Mu shiku jenijo aho ibita lyubiza itale no, nabo bali bati nacho cha kulya, Yesu ubitana bahemba bakwe, ubawila giki, Nabasatwa a ba ibita, iki bashingile shiku idatu hamo na Nene bati nacho cha kulya. Ulu nubalaga kushoka ku kaya jabo bali nzala, bakunogoleka mu nzila; iki bamo biza kufuma kule. Bahemba bakwe bunshokeja giki, Munhu wadula kufunya hali ya kubigutya banhu aba na migati kunu ngʼwipande iliti na banhu? Nanghwe ubabuja giki, Muli na migati yinga? Buhaya giki, Mpungati. Ubawila banhu bigashe ha si: aho wamala kwanukula migati mpungati na kulumba, uyimeganya, ubinha bahemba bakwe kubatengela; nabo buyitengela mu butongi wa ibita. Hangi bali bali na tudilo tugehu; aho kusungulila lubango, ubawila kubatengela banhu na twenutu. Nabo bulya, biguta, bukuminga masajiwa makililijo mpungati. Nabo abali bulya bali bali hamo 4,000; huna ubalaga, buja. Haho na haho wingila mu lyato hamo na bahemba bakwe, ushika mu mapande ga Dalmanutha. Huna Bafarisayo biza, bandia kumugilija, bukoba kuli Wei kimanikijo kufuma ngʼwigulu, bungema. Nanghwe uganghila mu moyo gwakwe, uhaya giki, Kibyalilwe iki kikukobaga kimanikijo nguno ki? nghana namuwila giki, Kibyalilwe iki kitalinhwa kimanikijo. Ubaleka, wingila mu lyato hangi, na uja ku nkilo. Na bali biba kutwala migati, hangi bali bati nayo mu lyato, ulu guti ngati gumo gwike. Ubakomeleja, uhaya giki, Ikalagi miso, ngʼwilanghanage ku kibimbya cha Bafarisayo na kibimbya cha Herode. Bibugilija boi bike, buhaya giki, Ambu, iki tuti na migati. Iki Yesu umana mhayo uyu ubawila giki, Mulibugilija ni buli giki, Iki muti na migati? Mutali kwiganika nulu kwitegeleja kushisha haha? Mutali na ngholo jingʼwe nganghanazu? Muli na miso, mutubonaga? muli na matu, mutigwaga? nulu mutizukagwa? Aho nali nubameganhija migati itano a ba 5,000, ngʼwali ngʼukuminga masonzo ganga agokalile na masajiwa? Bungʼwila giki, Ikumi na abili. Aho nali nubameganhija migati mpungati a ba 4,000, ngʼwali ngʼukuminga makililijo ganga agokalile na masajiwa? Bungʼwila giki, Mpungati. Ubawila giki, Mutitegeleja ni buli? Hunaho ushika Bethsaida; nabo bungʼwenhela munhu moku, bungʼwikumbilija ankuumye ho. Nanghwe undima moku ha nkono, untwala hanze ya nzengo; aho wamala kunswila mate ku miso, na kuntuulila makono, umuja ulu wabona kinhu. Nanghwe aho ubucha miso, uhaya giki, Nababona banhu, bali giti manti, balishiminza. Hunaho untuulila makono hangi ku miso, ungʼwila kubucha miso; nanghwe upijiwa miso, ubona bose chiza. Nanghwe unaga aje ku ngʼwakwe, ungʼwila giki, Utizingila mu nzengo, nulu kungʼwila munhu ose mu nzengo. Hunaho Yesu ufuma hamo na bahemba bakwe, buja ku mizengo ya Kaisaria ya Filipo: na mu nzila ubabuja bahemba bakwe, ubawila giki, Banhu bakunihayaga Nene ndi nani? Bunshokeja giki, Yohana Matija; na bangi giki, Eliya; aliyo bangi giki, Umo wa bahangi. Nanghwe ubabuja giki, Aliyo bingʼwe mukunihayaga ndi nani? Petro ushosha, ungʼwila giki, Bebe uli Kristo. Ubalemeja, batizungʼwila munhu ose mhayo uyo. Hunaho wandia kubalanga giki, Ngʼwana wa munhu shingʼwigelile Wei kuluhaluhiwa na mihayo mingi, na kulengʼwa na banamhala, na bagabiji batale na bandiki, na kubulagwa, na kujuka hanuma ya shiku idatu. Nanghwe ulungalunga mhayo uyu hape, na Petro umpunja ha mhelo, wandia kunemeja. Aliyo Wei ugaluka, ubalola bahemba bakwe, unemeja Petro, uhaya giki, Jaga kunuma yane, Shetani; iki bebe utiganikaga i ya Mulungu, aliyo ya banhu. Hunaho ubitana ibita kihamo na bahemba bakwe bize kuli Wei, ubawila giki, Uyo ose atogilwe kunilondela, ilemeje ngʼwenekele, abuche nsalaba gwakwe, anilondele. Iki uyo ose atogilwe kupija bupanga wakwe, ngʼwene alabuyagaja; na uyo ose alabuyagaja bupanga wakwe kulwa nguno yane na kulwa nguno ya evangeli, ngʼwene alabupija. Iki ikumelela ki munhu ulu upandika si yose na ujimija bupanga wakwe? Nulu munhu alafunya ki kukomola bupanga wakwe? Iki uyo ose ucha minala kulwa nguno yane, na kulwa nguno ya mihayo yane, mu kibyalilwe iki cha bushihya na cha bubi, ngʼwenuyo Ngʼwana wa munhu nanghwe alacha minala kulwa nguno yakwe, aho aliza ngʼwikujo lya ngʼwa Ise hamo na bamalaika bela. Nanghwe ubawila giki, Nghana namuwila giki, Bali ho bamo abimilile aha, abatalaloja kucha na hado, kushisha aho balamala kubona butemi wa Mulungu wizaga na budula. Hanuma ya shiku itandatu Yesu untwala Petro, na Yakobo, na Yohana, ubalinhya heke boi bike mu lugulu lulihu; nanghwe uhinduka mu miso gabo. Na shizwalo shakwe shulabangila, shubiza shape no kutinda, giti snow; gitumo ati ho ngalili mu si uyo wadula kusheja giko. Hunaho Eliya na Musa bubilongela balilungalunga na Yesu, Na Petro ushosha ungʼwila Yesu giki, Rabbi, ya wiza biswe kubiza ho aha; tuzenge maduku adatu; limo lyako, na limo lya ngʼwa Musa, na limo lya ngʼwa Eliya. Iki walatamanile mhayo gwa kuhaya, iki bali bogoha no. Lyubiza ho ilunde lyubakundikija; ilaka lyufuma ngʼwilunde, lyuhaya giki, Uyu Ngʼwana wane ntogwa, ngʼwigwagi Wei. Kuhayumanila, aho bilalangija, batumona munhu hangi, aliyo Yesu wike hamo nabo. Aho bakwikaga mu lugulu, ubahana batizunsombolela munhu ose isho bali babona, kushisha Ngwana wa munhu aho alamalaga kujuka mu bafu. Nabo bulinda mhayo uyu mubo bike, bibuja benekele na benekele, kujuka mu bafu kuli kinahe? Bumuja, buhaya gild, Ni buli bandiki bakuhayaga giki, Shingʼwigelile Eliya kwiza tame? Nanghwe ushosha, ubawila giki, Eliya hene izile tame, kudoganya yose; na hangi ubawila gitumo yaandikwa ya Ngʼwana wa munhu giki, akuluhiwa na mihayo mingi na kudalahwa. Aliyo namuwila giki, Eliya wamalaga kwiza, nabo bali bungʼwitila gitumo bali batogilwe, gitumo waandikililwa. Na aho ushika ku bahemba bakwe ubona ibita itale libapindije, na bandiki bakwibugilijaga nabo. Haho na haho banhu bose aho bumona, budedebala no, bupela kuli Wei, bungisha. Nanghwe ubabuja giki, Mulibugilija nabo mhayo ki? Na umo wa ngʼwibita ushosha, uhaya giki, Nangi, nakwenhelaga ngʼwana wane, ali na moyo gwa kimumu. Na hose hose uko gundima, guntalicha; nanghwe ufuluta ifulo, ushelanya mino, unogoleka; na nene nubawila bahemba bako bagupeje; nabo bugayiwa nguzu. Nanghwe unshokeja uhaya giki, Bingʼwe kibyalilwe ikituzunyaga, nakwikala na bingʼwe kushisha nanali? na hangi nakwiyumilija na bingʼwe kushisha nanali? ngʼwenhagi hali Nene. Nabo bungʼwenha kuli Wei: aho umona, haho na haho moyo gumfilinghanya, nanghwe ugwa ha si, ugalagala, ufuluta ifulo. Umuja ise giki, Mhayo uyu gwandimile kufuma ikanza ki? Ungʼwila giki, Kufuma bunigini. Na nghangala ningi gukangwishaga mu moto na mu minzi, gunyagaje; aliyo ulu Bebe wadula kwita mhayo gose, utusatwe, utugunane. Aliyo Yesu ungʼwila giki, Ulu wadula kuzunya, yose yadulika kuli uyo alizunya. Haho na haho ise wa ngʼwana ulila na ilaka, na shisoji, uhaya giki, Nazunya, Seba; unigune mu butuzunya wane. Yesu aho ubona banhu bakupelaga bisumbila, ugulemeja moyo nsoso, uguwila giki, Bebe, moyo gwa kimumu na nchibi gwa matu, nakulagila ungʼwinge ho, utalizunshokela hangi. Aho guhamuka, na gumfilinghanya no gungʼwinga; na ngʼwana ubiza giti achile, kushisha nose bingi buhaya giki, Wachaga. Aliyo Yesu undima ha nkono na umucha, nanghwe ubuka. Aho wali wingila mu numba, bahemba bakwe bumuja mu kwigeniha giki, Ni buli a biswe twali tutudula kugupeja? Nanghwe ubawila giki, Mbika iyi itudula kwinga kulwa mhayo gose ulu iti kulwa kulomba na kudila nzala. Nabo binga ko, bubita mu Galilaya; nanghwe walatatogilwe munhu ose kumana mhayo uyu. Iki ubyubalanga bahemba bakwe, ubawila giki, Ngʼwana wa munhu winhiwa ko mu makono ga banhu, nabo bakumulaga; na aho akumala kubulagwa, hanuma ya shiku idatu akujuka. Aliyo boi bali batitegeleja mhayo uyu, na bogoha kumuja. Nanghwe ushika Kapernaumu; na aho ubiza mu numba ubabuja giki, Ngʼwali ngʼwihalalija mhayo ki mu nzila? Aliyo bufulika du; iki mu nzila bali bihalalija benekele na benekele giki, U ntale ni nani? Nanghwe wigasha, ubitana ikumi na babili, ubawila giki, Munhu ose uyo atogilwe kubiza wa kwandia, alabiza wa kunuma ya bose, na ngʼwinhilija wa bose. Huna undima ngʼwana nigini, untuula hagati yabo; na aho unela mu makono gakwe, ubawila giki, Uyo ose ungʼwanukula umo wa bana banigini giti uyu mu lina lyane, wananukula Nene, na uyo ose wananukula Nene, atunanukula Nene, aliyo ungʼwanukula Uyo waanituma. Yohana ushosha, ungʼwila giki, Nangi, tukamona munhu alipeja masamva mu lina lyako, nanghwe atulondelaga; na biswe tunemeja, iki atulondelaga. Aliyo Yesu uhaya giki, Mutanemejage; iki ati ho munhu uyo akwita chitile cha budula mu lina lyane uwadula kunihaya kibi wangu wangu. Iki uyo ati ngʼwanishi wiswe, ngʼwenuyo ali ku lwande lwiswe. Iki munhu ose uyo akungʼwinha mungʼwe kikombe cha minzi mu lina lyane, iki muli ba ngʼwa Kristo, nghana namuwila giki, uyo atalagayiwa mhela yakwe. Na uyo ose ungʼwipamya umo wa bado aba abanizunya Nene, ngʼwenuyo ili hambuhambu kuli wei ulu utungwa iwe itale lya kushela mu nhingo yakwe, na kuponyiwa mu nyanza. Na nkono gwako ulu gukwipamya gubute ho; ili hambuhambu kuli bebe kwingila mu bupanga uli nema wa nkono, kutinda kwikala uli na makono abili, na kuja mu Gehena, u mu moto ugutajimaga: Uko igino lyabo litucha na moto gutujima: Na kugulu gwako ulu gukwipamya gubute ho; ili ya wiza kuli bebe kwingila mu bupanga, uli nema wa kugulu, kutinda kwikala uli na magulu abili, na kuponyiwa mu Gehena, u mu moto ugutajimaga: Uko igino lyabo litucha na moto gutujima. Na liso lyako ulu lyukwipamya ulikobole; ili ya wiza kuli bebe kwingila mu butemi wa Mulungu uli na liso limo duhu, kutinda kwikala uli na miso abili na kuponyiwa mu Gehena ya moto; Uko igino lyabo litucha na moto gutujima. Iki buli munhu alanoniwa na moto, na buli kitambo kilanoniwa na munu. Munu guli gwa wiza, aliyo ulu munu gusuka mukugunonya na ki? Bizagi na munu mugati yingʼwe ngʼwikale mu mhola benekele na benekele. Nanghwe winga uko, ushika mu mimbi ja Buyudaya ku nkilo gwa Yordani, na banhu bingi bali bungʼwibilingila hangi; na gitumo wita na kale, ubalanga hangi. Na Bafarisayo biza kuli Wei, bumuja giki, Angu, shilagilo shunzunilija munhu kumpeja nke wakwe? Buhaya giko kungema. Nanghwe ushosha, ubawila giki, Musa waamulagila kinahe? Buhaya giki, Musa wali uzunilija kwandika nyaluba ya kulekana, na kumpeja. Yesu ushosha, ubawila giki, Kulwa buganghanazu wa ngholo jingʼwe waangʼwandikila kilagilo cheniki. Aliyo kufuma kwandia kwa kusengʼwa kwa si Mulungu akababumba munhu ngosha na munhu nkima. Kulwa mhayo uyu munhu akuneka ise na nina, akudimana na nke wakwe; Na bubili wabo bakubiza mili gumo; giko bati babili hangi, aliyo mili gumo. Kulwa iyo isho Mulungu waashidimanya hamo, munhu atizushilekanya. Na mu numba bahemba bakwe bumuja hangi mhayo uyu. Nanghwe ubawila giki, Munhu ose uyo umpeja nke wakwe, na untola ungi, washihaja kuli nke wakwe. Nu nkima, ulu ulekana na ngoshi wakwe, utolwa na ungi, waashihiwa. Hunaho bali benha bana banigini kuli Wei, abadime ho; na bahemba bakwe bubalemeja abali bubenha. Aliyo aho Yesu ubona iyi, ukolwa, ubawila giki, Bazunilijagi bana banigini kwiza kuli Nene; mutizubalemeja, iki abali giti aba, butemi wa Mulungu wene wabo. Nghana, namuwila giki, munhu ose uyo atuwanukula butemi wa Mulungu giti ngʼwana nigini atalingila mo na hado. Ubalela mu makono gakwe, ubatuulila makono, ubasungulila lubango. Aho wali winga udima nzila, munhu umo umpelela, untugija nzwi, umuja giki, Nangi wa wiza, nite ki ningile mu bupanga butushila? Aliyo Yesu ungʼwila giki, Wanitana wa wiza ni buli? Ati ho wa wiza, ulu ati umo, Ngʼwene Mulungu. Shilagilo, ambu, ushimanile: Utalizubulaga, Utalizushihya, Utaliziba, Utalizukanila ya bumama, Utalizunyekeja, Ubakujage so na noko. Nanghwe ushosha, ungʼwila giki, Nangi, iyi yose nakayidimaga kufumila mu buyanda wane. Yesu unola, untogwa, ungʼwila giki, Ulebile mu mhayo gumo; jaga ukajinje shose isho uli nasho, ukabinhe bahabi, nangho ulabiza na wibikija ngʼwigulu; huna wize, unilondele, ubukije nsalaba gwako. Aliyo wei ugwa lolo kuhva mhayo uyo, uja wapinihalaga iki walali na sabo ningi. Na Yesu wilalangija, ubawila bahemba bakwe giki, Ili kilambu shido abali na sabo kwingila mu butemi wa Mulungu! Bahemba bukumya kulwa mihayo yakwe. Aliyo Yesu ushosha hangi ubawila giki, Bana bane, ili kilambu shido abajisanije sabo kwingila mu butemi wa Mulungu! Ili changu ngamila kushepa mu kapundu ka lushinge, kutinda nsabi kwingila mu butemi wa Mulungu. Aliyo boi buzunzumala no, bilunjalunja boi bike giki, Nani lulu wadula kupijiwa? Yesu ubakamilija, uhaya giki, Ku banhu itudulika, aliyo kuli Mulungu iti giko; iki kuli Mulungu mihayo yose yadulika. Hunaho Petro wandia kungʼwila giki, Lolaga, biswe tukaleka shose na twakulondela. Yesu ushosha uhaya giki, Nghana, namuwila giki, Ati ho munhu uyo akaleka numba, nulu bana ba ngʼwawe, nulu balumbuye, nulu ise, nulu nina, nulu nke, nulu bana, nulu migunda, kulwa nguno yane, na kulwa nguno ya evangeli, Uyo akukija kwinhiwa haha ngʼwikanza ili nghangala igana ha ngʼwanya gwa shenisho: numba, na bana ba ngʼwawe, na balumbuye, na banina, na bana, na migunda, kihamo na kunyajanyajiwa; na ngʼwikanza ililiza bupanga butushila. Aliyo bingi a ba kwandia balabiza ba kunuma, na a ba kunuma balabiza ba kwandia. Nabo bali bali mu nzila bakulinhaga kuja Yerusalemi, na Yesu utongela ku butongi wabo; nabo bukumya, bunondela bogohile. Nanghwe ubatwala hangi ikumi na babili, wandia kubawila iyahaya kungwila. Uhaya giki, Lolagi, tulilinha kuja Yerusalemi; na Ngʼwana wa munhu akwinhiwa ko ku bagabiji batale na ku bandiki; nabo bakunekanya nsango gwa kumulaga, bakungʼwinha ko ku bana mahanga, Nabo bakungʼwigimbija, na kuntula na mikoba; na kunswila mate, na kumulaga; na hanuma ya shiku idatu akujuka. Hunaho Yakobo na Yohana, bana ba ngʼwa Zebedayo, bungʼwegela, bungʼwila giki, Nangi, tutogilwe utwitile yose iyo tulakulombe. Nanghwe ubawila giki, Mutogilwe nangʼwitile ki? Bungʼwila giki, Utuzunilije kwigasha umo ku nkono gwako gwa bulyo, na ungi ku nkono gwa lumoso, ngʼwikujo lyako. Aliyo Yesu ubawila giki, Bingʼwe mutamanile iyo mulilomba. Angu, ngʼwadula kukingʼwa kikombe icho nangʼwa mo Nene, na kubatijiwa na kubatijiwa uko naabatijiwa Nene? Nabo bungʼwila giki, Twadula. Aliyo Yesu ubawila giki, Hene kikombe icho nangʼwa Nene mulangʼwa na bingʼwe; na kubatijiwa uko naabatijiwa Nene mulabatijiwa nako; Aliyo u kwigasha ku nkono gwane gwa bulyo, na gwa lumoso, iti mu budula wane kubinha; aliyo kwene kwabo abubegejiwa. Na abo ikumi aho bigwa mhayo uyu, bandia kubapelanilwa Yakobo na Yohana. Aliyo Yesu aho ubitana, ubawila giki, Bingʼwe mumanile giki, abo babalwa bigelelilwe butale wa ku mahanga, bene bakusugaga na nguzu; na batale ba benabo bakubatumamyaga na budula. Aliyo mu bingʼwe itizubiza giko; aliyo munhu ose uyo atogilwe kubiza ntale mu bingʼwe, ngʼwene alabiza ngʼwinhilija wa bose: Na munhu ose uyo atogilwe kubiza wa kwandia mu bingʼwe, akubiza nsese wa bose. Iki nu Ngʼwana wa munhu walatizile kwinhilijiwa, aliyo kwinhilija, na kufunya bupanga wakwe bubize kikomolelo cha kubakomola bingi. Na bushika Yeriko; na aho akwingaga mu Yeriko kihamo na bahemba bakwe na ibita itale, u moku Bartimayo, ngʼwana wa Timayo, wali wigashije ha mhelo ya nzila, akwilombelejaga. Aho ungʼwigwa giki, Ngʼwene Yesu wa Nazareti, wandia kuhamuka na kuhaya giki, Yesu, Ngʼwana wa ngʼwa Daudi, unichile kigongo. Na bingi bunemeja afulike; aliyo wei ongeja no no no kuhamuka giki, Ngʼwana wa ngʼwa Daudi, unichile kigongo. Na Yesu wimila, ulagila itanwe. Nabo bungʼwitana u moku, bungʼwila giki, Timbyaga ngholo; bukaga, alikwitana. Nanghwe uponya kizwalo chakwe cha kwigumha, ubuka, wiza kuli Yesu. Na Yesu unshokeja, uhaya giki, Utogilwe nakwitile ki? Moku ungʼwila giki, Rabboni, natogilwe nabizubona. Yesu ungʼwila giki, Jaga; kuzunya kwako kwakupijaga. Haho na haho ubona, na unondela Yesu mu nzila. Aho bali begela Yerusalemi na bushika Bethfage na Bethania haho na lugulu lwa Mizeituni, ubatuma bahemba bakwe babili, Ubawila giki, Jagi mu nzengo uguli ku butongi wingʼwe; aho mulingila mugo haho na haho mukubona ngʼwana wa nzobe akungilwe, atinadamhilwa na munhu; munkungulile, mungʼwenhe. Munhu ose ulu alahaye ku bingʼwe giki, Mulita giko ni buli? hayagi giki, Seba ali na nimo nanghwe; haho na haho akuntuma kunu. Buja, bukansanga ngʼwana wa nzobe akungilwe hanze ha nyango, ha nzila maka, bunkungulila. Na bamo babo abimilile ho bubawila giki, Mulita giko ni buli, kunkungulila ngʼwana wa nzobe? Bubawila gitumo Yesu wali wabalagila: nabo bubazunilija lulu. Huna benha ngʼwana wa nzobe kuli Yesu, buponeja ho mienda yabo ha ngʼwana wa nzobe; nanghwe udamhila ho. Bingi bamba mienda yabo ngʼwipalapala, bangi bubyubuta matambi ku miti, na bubyubamba ngʼwipalapala. Na abatongelile na a ba kunuma bubyuhamuka, buhaya giki, Utupije haha, ali wa lubango Uyo wiza mu lina lya Seba: Buli wa lubango, u butemi wa nkulugenji wiswe Daudi, ubo buliza mu lina lya Seba. Utupije haha, Bebe uli higulya no. Hunaho Yesu wingila Yerusalemi na mu hekalu; na aho wamala kulola shinhu shose, iki yali ili mhindi, ufuma, uja Bethania kihamo nabo ikumi na babili. Na ku ntondo lulu aho bali binga Bethania, Wei utuba. Na aho ubona nti ntini kakule uguli na madutu, uja ho, ulu hamo akubona matwajo hago; aho ushika ko, walatusanga mo kinhu ulu iti madutu gwike, iki shiku ja kutwagija ntini jali jitali. Yesu ushosha uguwila giki, Kufuma lelo munhu atalizulya matwajo kuli bebe welelo na welelo. Bahemba bakwe nabo bigwa. Huna bushika Yerusalemi, na Yesu aho wingila mu hekalu wandia kubapeja abakujinjaga na kugula mu hekalu, ujisalikula meza ja a bakabanya ba feza, na masumbi ga abakujinjaga nghuulu; Walatunzunilija munhu kubitya kiseme chose mu hekalu. Ulanga, ubawila giki, Angu, gutandikile giki, Numba yane ilitanwa numba ya kulomba ya mahanga gose? aliyo bingʼwe ngʼwayigaluchaga yabiza ipilinga lya basambo. Na bandiki na bagabiji batale aho bigwa mhayo uyu, bukoba gitumbo akunyagaja, iki bungʼogoha, iki banhu bose bukukumya kulanga kwakwe. Aho yali ili mhindi ufuma mo mu nzengo. Na dilu aho bubita bubona nti ntini gumaga kufumila ngʼwitina. Na Petro wizukwa, ungʼwila giki, Rabbi, lolaga, nti ntini uyo uguzuma gumaga. Yesu ushosha, ubawila giki, Bizagi na kuzunya kwa Mulungu. Nghana namuwila giki, Munhu ose uyo alaluwila lugulu ulu giki, Dubukaga, ukaponyiwe mu nyanza; na atutawatawa mu ngholo yakwe, aliyo uzunya giki, iyo uhaya ikubizaga ho, ikubiza kuli wei yose iyo uhaya. Kulwa iyi namuwila giki, Yose iyo mukwilombela aho ngʼulomba, zunyagi giki, ngʼwayanukula, nayo ilabiza yingʼwe. Hangi aho ngʼwimila kulomba, mulekejage ulu muli na mhayo na munhu, Singʼwe ali ngʼwigulu nanghwe amulekeje busobya wingʼwe. Aliyo ulu mutulekeja, nu Singʼwe ali ngʼwigulu nanghwe atumulekeja busobya wingʼwe. Nabo bushika ko hangi Yerusalemi, na aho alishiminza mu hekalu, bagabiji batale na bandiki na banamhala biza kuli Wei, Bungʼwila giki, Mu budula ki ukwitaga iyi, hangi nani akakwinha budula ubu, uyite iyi? Aliyo Yesu ushosha ubawila giki, Na Nene nakumubuja mhayo gumo, ningʼwe munishokeje; na Nene nakumuwila mu budula ki nakwitaga yeniyi. Angu, u kubatija kwa ngʼwa Yohana kwali kufumila ngʼwigulu nulu ku banhu? Nishokejagi. Bitambuja boi benekele, buhaya giki, Ulu tuhaye giki, Kwafumila ngʼwigulu, nanghwe akuhaya giki, Ni nguno ki ngʼwali mutanzunije wei? Aliyo ulu tuhaye giki, Kwafumila mu banhu, bubogoha banhu, iki bose bali bazunije Yohana walali nghangi gete. Nabo bunshokeja Yesu buhaya giki, Tutamanile. Yesu ushosha, uhaya giki, Nulu Nene natumuwila mu budula ki nakwitaga iyi. Hunaho wandia kulungalunga nabo mu shigemenghejo. Munhu umo akahamba ngunda gwa mizabibu, ugugitila igobe, usimba mo ikamilo lya mizabibu, uzenga mo numba ngunguhu, ugutuula ho ku balimi, uja ku si yingi. Aho ikanza lyali lyushika untuma nsese ku balimi giki, anukule ku balimi ngabo gwa matwajo ga mu ngunda. Aliyo boi bundima buntulagula, na bumpeja buyiki. Ubatumila hangi nsese ungi, uyo ngʼwene bumponda mawe, bumela luguma, bumpeja bangʼwitilile ya soni. Untuma hangi ungi; uyo ngʼwene bumulaga; ubatuma na bangi bingi, bamo bubatulagula, na bangi bubabulaga. Aliyo walatali na umo, ngʼwene ngʼwana wakwe ntogwa, nu ngʼwenuyo lulu untuma kubo wa kumalija, uhaya giki, Bakungʼwinha ishima ngʼwana wane. Aliyo balimi benabo biwila benekele na benekele giki, Uyu ngʼwene ngʼwingiji, nzugwi, tumulage, na wingiji bukubiza wiswe. Huna bundima lulu, bumulaga, bumponeja hanze ya ngunda. Ngʼwenekele ngunda gwa mizabibu akwita ki lulu? Aliza kubayagaja a balimi benabo, na ngunda gwa mizabibu akugutuula ho ku bangi. Nulu mutali kusoma chandikwa iki; Iwe ilo bali bulilema a bazengi, lyene lyabizaga iwe itale lya ha lungʼongo; Kwita uku kwene kwa Seba, nako kwene kwa kukumya mu miso giswe? Nabo bukoba kundima, bulyogoha ibita; iki bali bumana giki, wabatuulilaga boi kigemenghejo iki; nabo buneka, buja. Huna bubatuma bamo ba Bafarisayo na Baherode kuli Wei, bantege mu kalungalungile. Nabo aho biza bungʼwila giki, Nangi, tumanile Bebe uli munhu wa nghana, utunkalalwa munhu ose, iki utulolaga bushu wa banhu, aliyo ukulangaga nzila ya Mulungu mu nghana; angu, ilagilile kumfunija Kaisari kodi, himba yaya? Tufunye, himba tuleke kufunya? Aliyo Wei, iki umana wibeleja wabo, ubawila giki, Mulinigema nguno ki? nenhelagi shilingi, nayilole. Nabo buyenha. Nanghwe ubawila giki, Cha ngʼwa nani i chikolile iki na chandikile iki? Nabo bungʼwila giki, Cha ngʼwa Kaisari. Na Yesu ushosha, ubawila giki, Funyagi kuli Kaisari i sha ngʼwa Kaisari, na kuli Mulungu i sha Mulungu. Nabo bunkumya no. Huna Basadukayo, abakahayaga giki, Nduhu kujuka, biza kuli Wei, bumuja buhaya giki, Nangi, Musa waatwandikila giki, Ngʼwana wa ngʼwabo wa munhu ulu ucha, uneka nke, aliyo atalekile ngʼwana; ngʼwana wa ngʼwabo angʼwingile nke wakwe, amyalile ngʼwana wa ngʼwabo bubyile. Ali lulu, bali bubiza ho bagosha mpungati ba myaji umo; u ntangi untola nkima, ucha atalekile bubyile; U wa kabili nanghwe untola, nu ngʼwene ucha atalekile bubyile; nu wa kadatu nanghwe chene. Buntola bose mpungati batalekile bubyile; na hanuma ya bose nkima nanghwe ucha. U mu bujuko lulu, aho balajuka, alabiza nke wa ngʼwa nani mubo? iki bose mpungati bali buntola. Na Yesu ushosha ubawila giki, Angu, mutuhubaga kulwa nguno iyi giki, mutamanile i Shandikwa nulu budula wa Mulungu? Iki aho bajuka mu bafu, batutola nulu batutolwa, aliyo bali giti bamalaika abali ngʼwigulu. Aliyo mhayo gwa ku bafu giki, bakujuka; angu, mutasomile mu kitabo cha Musa mihayo ya ha kasaka, gitumo Mulungu akalungalunga nanghwe, uhaya giki, Nene ndi Mulungu wa ngʼwa Abrahamu, na Mulungu wa ngʼwa Isaaka, na Mulungu wa ngʼwa Yakobo? Wei ati Mulungu wa bafu, aliyo wa bapanga; kulwa iyi bingʼwe ngʼwahuba no. Na umo wa bandiki wegela aho wigwa kwibugilija kwabo, umana wabashokeja chiza, huna umuja giki, Mu shilagilo shose i cha kwandia ni kili? Yesu unshokeja giki, Mu shilagilo shose i cha kwandia kili iki, Igwaga Israeli, Seba Mulungu wiswe Ngʼwene Seba umo; Na ulantogagwe Seba Mulungu wako na ngholo yako yose, na bupanga wako bose, na maganiko gako gose, na nguzu jako jose. Iki chene kilagilo cha kwandia. Na cha kabili ichikolile nacho, kili iki, Ulantogagwe nzenganwa ngʼwiyo gitumo witogilwe ngʼwenekele. Kiti ho kilagilo kingi ikikilile ishi butale. Na ngʼwandiki ungʼwila giki, Ali chene, Nangi, wahayaga ya nghana giki, Mulungu ali umo; na, ati ho ungi aliyo Wei wike; Na kuntogwa na ngholo yose, na kwitegeleja kose, na bupanga bose, na nguzu jose, na, kuntogwa nzenganwa ngʼwiyo gitumo witogwa ngʼwenekele, gwenuyu gukilile no kufunya kwa kupemva kugima na shitambo. Na Yesu, aho ubona washoshaga kisala, ungʼwila giki, Bebe uti kule na butemi wa Mulungu. Hanuma ya iyi walati ho munhu uyo ugima kumuja mhayo hangi. Hunaho Yesu aho wali ulanga mu hekalu, ushosha, uhaya giki, Bandiki bakunghayaga Kristo ali ngʼwana wa ngʼwa Daudi ni buli? Iki Daudi ngʼwenekele akahaya mu budula wa Moyo Ngʼwela giki, Seba akangʼwila Seba wane giki, Igashaga ku nkono gwane gwa bulyo, kushisha nalabatuula banishi bako kubiza ipandilo lya magulu gako. Iki Daudi ngʼwenekele unghaya giki, Seba, ali ngʼwana wakwe kinahe lulu? Na i libita itale lyundegeleka na buyegi. Na mu kulanga kwakwe ubawila giki, Ilanghanagi ku bandiki, abatogilwe kuyela bazwalile shizwalo shilihu, na kugishiwa mu nghungʼwano, Na kwigasha mu masumbi ga ku butongi ngʼwibilingilo, na mu shigasho sha ikujo aho bakulyaga shitolyo; Abakulyaga kaya ja bachilwa, bulomba kulomba kulihu kwa kukundikija wibeleja; benabo balabona nsango ntale kutinda. Na Yesu wigasha alolelile ibikilo lya manongho, na ubona gitumo banhu bakutuulaga feza ngʼwibikilo; na bingi abali basabi butuula mo ningi. Na nkima nchilwa nghabi wiza utuula mo tusenti tubili, Ubitana bahemba bakwe, ubawila giki, Nghana namuwila giki, Nchilwa ngʼwenuyu nghabi watuulaga mo ningi kutinda bose abatuulaga mo ngʼwibikilo; Iki benaba bose batuulaga mo kufuma mu bukwija wabo; aliyo wei mu bukunese wakwe watuulaga mo shose isho wali nasho, shene bupanga wakwe bose. Aho akwingaga mu hekalu umo wa bahemba bakwe ungʼwila giki, Nangi, lolaga mawe aya! na manumba aya! Yesu ushosha ungʼwila giki, Wabona bebe manumba aya matale? Litalalekwa ho iwe higulya ya iwe liye, ilo litalakandulwa. Aho wali wigashije ha lugulu lwa Mizeituni alolelile hekalu, Petro na Yakobo na Yohana na Andrea bumuja ha mhujo giki, Tuwilage, mihayo iyi ilabiza ho nanali? na kimanikijo kilabiza ki aho yeniyi yose ilahaya kushikilijiwa? Yesu ushosha na wandia kubawila giki, Ilanghanagi munhu ose atizumulembalemba. Iki bingi baliza mu lina lyane, balabyuhaya, Nene ndi ngʼwene; na balabalembalemba bingi. Aliyo aho muligwa bulugu na nghulu ja bulugu, mutizufungʼwa ngholo; iki yeniyi italakija kubiza ho, aliyo mhelo itali. Iki ihanga lilubukila ihanga liye, na butemi bulubukila butemi wiye; jilabiza ho nyahinga mapande gangi na gangi; na jilabiza ho nzala na makoye; mihayo iyi yene wandijo wa kulungʼwa busungu. Aliyo ilanghanagi benekele; iki balamutuula ho ku mabanza na mu mabilingilo, mulatulagulwa; mulimilijiwa mu butongi wa batale na batemi kulwa nguno yane, mihayo iyi ibize bukaniji kubo. Na evangeli shigelile ilomelwe tame mu mahanga gose. Aliyo aho balamutwala kumutuula ho ngʼwibanza, mutizandia kwiganilija iyo mulahaya, nulu mutizidedekanya; aliyo mhayo uyo mulinhiwa ngʼwikanza ilo u gwene mulahaya; iki muti bingʼwe abahaya, aliyo Moyo Ngʼwela: Hunaho ngʼwana wa ngʼwabo alantuula ho ngʼwana wa ngʼwabo kucha; na ise alantuula ho ngʼwana wakwe kucha; na bana balabubukila babyaji, balababulaga. Na banhu bose balamukolwa kulwa nguno ya lina lyane; aliyo uyo wiyumilija kushisha ku mhelo, ngʼwene alapijiwa. Aliyo aho mulabona i cha malofu cha bukenaguku ichaahayiwa na nghangi Danieli chimilile uko itigelile, (uyo akusomaga itegeleje) hunaho abo hali mu Buyudaya babungilage ku ngulu; Uyo ali higulya ya numba atizika kwingila mu numba, nulu kwingila kusola kinhu chose mu numba yakwe; Na uyo ali mu ngunda atizushishokela shikolo shakwe kusola kizwalo chakwe. Aliyo balasangwa abali nda na abakonhyaga mu shiku ijo! Aliyo lombagi u kubunga kwingʼwe kutizubiza mu shiku ja mbeho. Iki mu shiku ijo kulabiza ho kuluhaluhiwa, gitumo kutinabiza ho kufuma kwandia kwa kusengʼwa uko Mulungu akasema, kushisha haha, nulu kutalabiza ho hangi. Na ulu Seba ni atajigehije shiku ijo, ni atapilile munhu nulu umo; aliyo kulwa nguno ya basolwa abo wali ubasola, wajigehije shiku jenijo. Hunaho ulu munhu alamuwila giki, Lolaga Kristo ali aha; nulu giki, Ali uko; mutizuzunya. Iki galabuka Makristo mamama na bahangi bamama, nabo balita shimanikijo na sha kukumya, kushisha nose balabalembalemba nulu basolwa, ulu yudulika. Aliyo bingʼwe ilanghanagi: lolagi, natonjaga kumuwila mihayo yose. Aliyo mu shiku jenijo, hanuma ya kuluhyaluhya kwenuko, limi lililabula, na ngʼweji gutalafunya kwela kwago, Na sonda ja ngʼwigulu jilabyugwa, na mabudula ga ngʼwigulu galanegenyiwa. Hunaho lulu balamona Ngʼwana wa munhu izile mu malunde na budula butale na magaka; Hunaho lulu alabatuula bamalaika bakwe, alababilinga basolwa bakwe kufuma ku miyaga ine, kufuma ku mhelo ya si kushisha ku mhelo ya igulu. Ilangagi lulu kigemenghejo cha nti ntini, aho itambi lyago lyubiza idoto, nago gufuluma madutu; mumanile ngʼwaka guli hihi: Giko na bingʼwe aho mulabona iyi yose yilonga, managi giki, ali hihi, ku nzwigi, Nghana namuwila giki, Kibyalilwe iki kitalabita kushisha iyi yose ilabiza ho. Igulu na si shilabita aliyo mihayo yane italabita. Aliyo mhayo gwa lushiku lwenulo, na ikanza ilo, ati ho uyo amanile, nulu bamalaika ba ngʼwigulu, nulu Ngʼwana, ulu ati Baba wike. Ilanghanagi, ikalagi miso, na kulomba, iki mutamanile ikanza aho Ulabiza ho. Ili giti munhu ubuka lugendo kuja ku si yingi, uleka kaya yakwe, ubinha basese bakwe budula wa bulindi, ku buli munhu nimo gwakwe, na unagila nindi wa nyango kwikala miso. Kulwa iyo ngʼwikale miso; iki mutamanile namugi aho aliza, hamo mhindi, hamo bujiku hagati, hamo mu ngoko jikuhilaga, hamo dilu; Atiziza kamo na kamo na kungʼwisanganija mutalile. Iyo namuwila bingʼwe, nabawila bose, Ikalagi miso. Hanuma ya shiku ibili yubiza ho Pasaka, na shiku ja migati iyiti na kibimbya; na bagabiji batale na bandiki bukoba nzila ya kundima mu masalasala, bamulage. Aliyo bali buhaya giki, Ha lushiku lwa Pasaka yaya, butizubiza ho buyombo mu banhu. Na aho walali mu Bethania mu numba ya ngʼwa Simoni wa mbiji, aho igashije ku shiliwa, nkima wiza, ali na chupa yabejiwa ya alabastro ya maguta ga ngazu mela ga mpango ngʼwingi, ugasamija ha ntwe gwakwe. Aliyo bali bubiza ho bamo bukolwa mu mioyo yabo, buhaya giki, Kujimija uku kwa maguta ga ngazu kwabiza ho ni buli? Iki maguta aya ni gali gudula kujinjiwa shilingi magana adatu na kutinda ho; na kwinhiwa bahabi. Nabo bundugumila. Aliyo Yesu uhaya giki, Nekagi; mulinkoyakoyela nguno ki? Wei wanitilaga chitwa cha wiza. Iki bahabi muli nabo shiku jose, na buli ikanza lyose ulu mutogilwe ngʼwadula kubitila ya wiza; aliyo Nene mutubiza na Nene shiku jose. Wei witaga gitumo adulile; watongaga kugubila mili gwane kulwa kugungʼwa kwane. Nghana namuwila giki, Hose hose uko evangeli iyi ilalomelwa ku si jose, icho witaga nkima uyu nacho kilahayiwa cha kungʼwizukwa wei. Hunaho Yuda Iskariota, umo wa benabo ikumi na babili, uja ku bagabiji batale angʼwinhe ko kubo. Nabo aho bigwa, buyega, bungʼwisagija kungʼwinha feza. Nanghwe lulu ukoba ngʼwanya gitumo angʼwinhe ko kubo. Na ha lushiku lwa kwandia lwa migati iyiti na kibimbya, aho buyitambila Pasaka, bahemba bakwe buhaya giki, Utogilwe tuje hali tukakulongeje ha kulila Pasaka? Nanghwe utuma babili ba mu bahemba bakwe, ubawila giki, Jagi mu nzengo, akumanhya na bingʼwe ngosha uyo abukije luno lwa minzi, munondele; Na ngʼwenumo alingile, mungʼwile namugi giki, Nangi wahaya giki, Kili hali chumba cha ngeni umo nakulila mo Pasaka kihamo na bahemba bane? Nanghwe akungʼolekeja chumba kitale cha mu gorofa chabejabejiwa kimalilile, ngʼwenumo mukatulongeje. Na bahemba bakwe buja lulu, bingila mu nzengo, busanga gitumo wabawilila, nabo bulonja Pasaka. Aho yubiza mhindi wiza nabo ikumi na babili. Aho bigashije bakulyaga, Yesu uhaya giki, Nghana namuwila giki, Umo wa mu bingʼwe, uyo alilya hamo na Nene akuninha ko. Nabo bandia kupinihala na kuhaya kuli Wei umo umo giki, Himba nene? Na ungi giki, Himba nene? Nanghwe ushosha ubawila giki, Umo wa mu bingʼwe ikumi na babili, uyo alikoja na Nene mu lubiga, huna ngʼwene. Hene Ngʼwana wa munhu ajile gitumo yaandikwa ya kuli Wei; aliyo wasangwa munhu uyo Ngʼwana wa munhu winhiwa ko nanghwe; ni yali chiza kuli wei, ulu munhu ngʼwenuyo ni walatabyalilwe. Aho bakulyaga Yesu usola ngati, na aho wamala kugusungulila lubango ugumeganya na ubinha, uhaya giki, Anukulagi, lyagi; uyu gwene mili gwane. Na usola kikombe, na aho wamala kulumba, ubinha, nabo bungʼwela mo bose. Ubawila giki, Aya gali mininga gane a ga ilagano ipya agasejiwa kulwa bingi. Nghana namuwila giki, Natalangʼwa hangi ku matwajo ga nzabibu kushisha ku lushiku ulo aho nalangʼwa mapya mu butemi wa Mulungu. Aho bali bumala kwimba, bufuma buja ku lugulu lwa Mizeituni. Huna Yesu ubawila giki, Mukwipama bose kulwa nguno yane bujiku ubu, iki gwaandikwa giki, Nalantula ndimi, na ngholo jilasalanghanyiwa. Aliyo hanuma ya kujuka kwane, nakutonga kuja Galilaya. Aliyo Petro ungʼwila giki, Nulu bose bakwipama, aliyo nene yaya. Yesu ungʼwila giki, Nghana nakuwila giki, Lelo mu bujiku ubu, aho nghungulume itinahila nghangala ibili, ukunilema nghangala idatu. Aliyo wei wigambila kuhaya giki, Nene nulu shinigelile kucha hamo na Bebe, nahene kulema natukulema. Nabo bose buhaya giko. Nabo bushika kwipande ilitanwa Gethsemane, ubawila bahemba bakwe giki, Igashagi henaha, kushisha Nene nalombe. Untwala Petro na Yakobo na Yohana hamo nanghwe; wandia kudedebala na kudidohelwa no. Ubawila giki, Bupanga wane bupinihalile hihi kucha, ikalagi aha, ngʼwikale miso. Nanghwe usegenela hado, ugwa ha si, ulomba ulu yudulika ikanza ili limitile ho. Uhaya giki, Abba Baba, yose yadulika kuli Bebe, uningije kikombe iki; aliyo iti iyo natogilwe Nene, aliyo iyo utogilwe Bebe. Ushoka lulu, ubasanga bashutulile, ungʼwila Petro giki, Simoni, ushutulile? walemelwa kwikala miso nulu saa imo? Ikalagi miso na kulomba, mutizingila mu kugengʼwa; moyo hene gukalalilwe, aliyo mili gwene nogoleku. Uja ko hangi, ulomba, uhaya mihayo yeniyo duhu. Aho ushoka hangi, ubasanga bashutulile hangi, iki miso gabo gali gudidoha; nabo bali batumana mhayo gwa kunshokeja. Wiza na lukangala lwa kadatu, ubawila giki, Shutulagi lulu, ngʼwifule. Yigelaga; ikanza lyashikaga, Ngʼwana wa munhu winhiwa ko mu makono ga hali na shibi. Bukagi tuje; lolagi, uyo alininha ko wegelaga. Aho walatali ulungalunga, haho na haho Yuda, umo wa ikumi na babili, wegela na ibita itale hamo nanghwe, bali na malushu na milanga, bafumilile ku bagabiji batale na bandiki na banamhala. Uyo alingʼwinha ko wali wabinha kimanikijo, uhaya giki, Uyo nalambipe huna Ngʼwene, ndimagi, muntwale muninde gete. Nanghwe aho ushika, haho na haho uja hali Wei, uhaya giki, Rabbi, Rabbi; huna umbipa no. Nabo bunghaja na makono gabo, bundima. Aliyo umo wa benabo abimilile ho usopola lilushu, untema nsese wa ngabiji ntale, umuta kutu. Yesu ushosha ubawila giki, Ngʼwizaga na malushu na milanga kunidima giti ndi nsambo? Shiku jose nali ndi hamo na bingʼwe mu hekalu naalangaga, ningʼwe ngʼwali mutunidima: aliyo iyi yitwa Shandikwa shishikilijiwe. Hunaho bunekanya, bupela bose. Na nsumba umo unondela wali wigumilile ngʼwenda gwa kitani ku mili; ngʼwenuyu basumba bundima; Aliyo wei ubalekela ngʼwenda gwa kitani, ubapela ali duuhu. Nabo buntwala Yesu kuli ngabiji ntale; bungʼwibilingila bagabiji batale bose na banamhala na bandiki. Na Petro unondela kakule ho kushisha mu kibuga cha ngabiji ntale; nanghwe wali wigashije hamo na banikulu, ubyota moto. Bagabiji batale na ba ngʼwibanza bose bunkomela Yesu bukaniji wa kumulagila; aliyo bali batubona. Iki bingi bali bunkanila ya bumama, aliyo bukaniji wabo wali butulenganila. Na bangi bimila ho bunkanila ya bumama, buhaya giki, Biswe twali tungʼwigwa Uyu akuhayaga giki, Nene nakuyikandula hekalu iyi iyali yubejiwa na makono, na mu shiku idatu nakuyizenga yingi kubejiwa na makono. Nulu mu yeniyi bukaniji wabo wali butulenganila. Na ngabiji ntale wimila hagati umuja Yesu, uhaya giki, Bebe utushoshaga mhayo? Aba balikukanila ki? Aliyo Wei uhumula du, atushoshaga mhayo. Ngabiji ntale umuja hangi, uhaya giki, Angu, Bebe uli Kristo, Ngʼwana wa Ngʼwenuyo ngʼwenekele lubango? Yesu uhaya giki, Nene ndi Ngʼwene; na bingʼwe mulamona Ngʼwana wa munhu igashije ku nkono gwa bulyo gwa budula, hangi izile hamo na malunde ga ngʼwigulu. Hunaho ngabiji ntale utandula shizwalo shakwe, uhaya giki, Tuli na nimo ki hangi na bakaniji? Ambu ngʼwigwaga buduki wakwe: Ngʼwabona kinahe? Nabo bose bunekanya giki, Wei wigelelagwa kucha. Hunaho bamo bandia kunswila mate, na kunkumbanija ku bushu, na kunkunduga shingholoshi, na kungʼwila giki, Manijaga; na banikulu bumpala mhi. Na Petro aho walali mu kibuga hasilili, wiza umo wa mu batumami baniki ba ngabiji ntale; Aho umona Petro akotaga moto, unkalalila, uhaya giki, Bebe nangho wali hamo na Yesu, muna Nazareti. Aliyo wei ulema, uhaya giki, Natamanile nulu natitegeleja iyi ulihaya. Huna lulu winga ko uja hanze ngʼwibindo; na nghungulume yuhila. Na ngʼwaniki ngʼwenuyu umona hangi, wandia kubawila abimilile ho giki, Uyu ngʼwichabo. Aliyo wei ulema hangi. Hanuma ya kakanza hangi abimilile bungʼwila Petro giki, Nghana bebe uli ngʼwichabo; iki uli muna Galilaya, hangi kalungalungile kako kalenganilile na ka Kigalilaya. Aliyo wei wandia kuzuma na kulahila giki, Natamanile munhu uyo mulinghaya. Haho na haho nghungulume yuhila lukangala lwa kabili. Na Petro wizukwa mhayo uyo Yesu wali wangʼwila giki, Nghungulume aho itali kuhila nghangala ibili, ukunilema nghangala idatu. Na aho wiganika mhayo uyu, ulila shisoji. Na dilu bagabiji batale bulomana haho na haho na banamhala na bandiki na ba ibanza bose, buntunga Yesu, buntwala, bungʼwinha ko kuli Pilato. Na Pilato umuja giki, Angu, Bebe uli ntemi wa Bayudaya? Nanghwe ushosha ungʼwila giki, Ili chene, wahayaga. Na bagabiji batale bunsayila mihayo mingi. Aliyo Pilato umuja hangi, uhaya giki, Angu, utushoshaga mhayo? Lolaga mihayo iyi mingi balikukanilija. Aliyo Yesu walatanshokegije mhayo hangi; kushisha nose Pilato ukumya. Ku Pasaka shali shimile shakwe kubataligulilila ntungwa umo, uyo balanombe. Walali ho umo uwitanwa Barabba, walatungilwe hamo na biye abali bita bugomi, abo mu bugomi wabo bali bubulaga. Hunaho ibita lyuyombagila, bandia kunomba ite gitumo akabitilaga na kale. Aliyo Pilato ubashokeja uhaya giki, Mutogilwe namulekelele ntemi wa Bayudaya? Iki walamanile giki, bagabiji batale bali bangʼwinha ko kulwa wilu. Aliyo bagabiji batale bulihuhuta ibita giki, hambuhambu abalekelele Barabba. Pilato ushosha hangi, ubawila giki, Ali, mutogilwe nangʼwitile kinahe Uyo mulinghaya Ntemi wa Bayudaya? Buhamuka hangi giki, Nkomage. Pilato ubawila giki, Kulwa ki? witaga bubi ki? Aliyo boi bongeja kuhamuka higulya kutinda giki, Nkomage. Hunaho Pilato, iki ukoba nzila ya kuliyeja ibita, ubataligulilila Barabba, aliyo aho wamala kuntula na mikoba, ungʼwinha ko Yesu akongʼwe. Hunaho lulu bashilikale buntwala mu kibuga ichitanwa Praitorio; na bulitana ibita lyose lya bashilikale. Bunzwika joho yaza, bunzwika ngikili ya kitemi ya mihwa iyo bali buluka; Bandia kungisha giki, Lama, Ntemi wa Bayudaya! Buntula ku ntwe na idete, bunswila mate, butuja mazwi, bunamya. Aho bumala kungimba kichilu bunzula joho yaza, bunzwika shizwalo shakwe, bumfunya hanze bakankome. Na munhu umo Simoni, muna Kurene, ise wa Aleksandero na Rufu, walabitile afumilile ku magunguli, ngʼwenuyo bunghadika anseselele nsalaba gwakwe. Na bungʼwenha kwipande lya Golgota, kushomelejiwa kwaho kuli giki, Ipande lya lupanga. Bungʼwinha cha kungʼwa minzi ga mizabibu agasangije ngazu; aliyo Wei walatuganukula. Aho bumala kunkoma bugabanha shizwalo shakwe, bushesa, buli munhu gitumo alashikome. Yali yubiza saa ya kadatu aho bali bunkoma. Na chandikile cha kubulwa kwakwe chali chandikwa higulya giki, NTEMI WA BAYUDAYA. Na basambo babili bubakoma hamo nanghwe, umo ku nkono gwa bulyo, na umo ku nkono gwa lumoso. Hunaho lulu Shandikwa shali shushikilijiwa ishuhaya giki, Wali ubalilwa hamo na bagomi. Na abo abubita bundukagula, bushingisha mitwe yabo, buhaya giki, Ahaa! Bebe wa kukandula hekalu, na kuyizenga mu shiku idatu; Ipijage ngʼwenekele, wike ku nsalaba. Giko hangi na bagabiji batale bungilolagi, mba kichilu hamo na bandiki, biwila benekele na benekele giki, Walubapijaga bangi, atudula kwipija ngʼwenekele. Kristo, Ntemi wa ba Israeli, ni ikage lulu ku nsalaba, tuhone, huna tuzunye. Na benabo abali bukongʼwa hamo nanghwe nabo bumbyeda. Aho yali yushika saa itandatu chubiza ho giiti mu si jose kushisha saa kenda. Na ha saa kenda Yesu uhamuka na ilaka itale, uhaya giki, Eloi, Eloi, lama sabakthani? kushomelejiwa kwaho kuli giki, Mulungu wane, Mulungu wane, wanilekanija nguno ki? Na bamo ba mu benabo abimilile ho, aho bigwa iyi, buhaya giki, Lola, alingʼwitana Eliya! Hunaho ngʼwichabo upela ulilobya ibupya na siki, ulituula ku idete, ungʼwinha angʼwe, uhaya giki, Leke tulole ulu Eliya akwiza kungʼwicha. Aliyo Yesu aho uhamuka na ilaka itale, winha ko moyo gwakwe. Na iselema lya mu hekalu lyutanduka hagati kufuma higulya kushisha ha si. Ntale wa bashilikale igana, uyo wali wimila ho anolelile, aho ubona gitumo wali uhamuka, na ugufunya ko moyo gwakwe, uhaya giki, Nghana munhu Uyu wali Ngʼwana wa Mulungu. Bali bubiza ho na bakima bakulolelaga ka kule ho; mu benabo bali bali ho Mariamu Magdalene, na Mariamu nina wa Yakobo u ndo na Yose, na Salome. Abo, aho walali mu Galilaya, bubyunondela na kungʼwinhilija; na bakima bangi bingi abali bulinha kwiza Yerusalemi hamo nanghwe. Na aho yubiza mhindi, iki lwali luli lushiku lwa kulonjalonja, lwene ulutongije Sabato, Wiza Yusufu wa Arimathaya, namhala wa ibanza, nkumuku, uyo nanghwe wali ulindila butemi wa Mulungu, wingila kuli Pilato na bugimu, ugulomba mimba gwa ngʼwa Yesu. Pilato ukumya, ulu wamalaga kucha; ungʼwitana ntale wa bashilikale igana, umuja ulu wamalaga kucha ikanza itale. Na aho umanikijiwa na ntale wa bashilikale igana, huna ungʼwinha mimba u Yusufu. Nanghwe ugula ngʼwenda gwa kitani, unsungula, uningha mu ngʼwenda gwa kitani, unaja mu nze iyali yupunzwa mu kiganga; na ulipilingitija iwe ha nyango gwa nze. Mariamu Magdalene na Mariamu, nina wa ngʼwa Yose, bubona umo wali utuulwa. Aho Sabato yali yubita, Mariamu Magdalene na Mariamu, nina wa Yakobo, na Salome bugula shinhu sha ngʼwaso, baje bakamile. Na dilu no ha lushiku lwa kwandia mu mfungo bushika ku kigila, aho limi lyufuma. Na bilunjalunja benekele na benekele giki, Nani akutupilingitija iwe kulyinja ha nyango gwa kigila? Na aho bubucha miso bubona iwe lyapilingitiwagwa kufuma ha kigila; iki lyali lili itale no. Na aho bingila mu kigila bumona nsumba igashije ha ipande lya bulyo, azwalile kizwalo kilihu chape; nabo budedebala no. Aliyo wei ubawila giki, Mutadedebalage; mulinkoba Yesu muna Nazareti Uyo wali wakomilwe; wajukaga; ati ho aha; lolagi ipande uko bali bunaja. Aliyo jagi, mukabawile bahemba bakwe nu Petro giki, alitonga kuja Galilaya; kwenuko mukumona, gitumo wali umuwilila. Nabo bufuma wangu bupela kwinga ku kigila; iki kudetema na kudedebala shali shubadima; nulu batangʼwilile munhu mhayo, iki bali bogoha. Lulu aho Yesu wali ujuka dilu no ha lushiku lwa kwandia mu mfungo ungʼwilongela tame Mariamu Magdalene umo akagapeja masamva mpungati. Ngʼwenuyu uja akabawila abo biikalaga nanghwe, ubasanga bapinihalile na bakulilaga. Nabo aho bigwa giki, ali mpanga, hangi giki, wibonaga nanghwe, bali batuzunya. Hanuma ya mihayo iyi aho babili ba mu bo balishiminza bajile mu magunguli, ubilongela, ali mu suso yingi. Na benabo aho buja bukabawila bichabo, na bene bali batubazunilija. Hanuma hangi ubilongela abo ikumi na umo aho bigashije ku shiliwa; ubaganikila kulwa butuzunya wabo, na bulambu wa ngholo jabo, iki bali batabazuniligije abo abali bamona wajukile. Hunaho ubawila giki, Jagi mu si jose, mukalomele evangeli ku buli kisengʼwa chose. Uyo uzunya na ubatijiwa alapijiwa; aliyo uyo atuzunya alalekanyiwa nsango. Shimanikijo ishi shikubyuja hamo nabo abazunya; balagapeja masamva mu lina lyane; balalungalunga na ndimi mhya; Baladima nzoka; na ulu balangʼwa kinhu chose cha kubulaga, kitalabasatya; balabatuulila ho makono balwile, nabo balapila. Hunaho lulu Seba aho wamala kulungalunga nabo, wanukulwa ngʼwigulu, wigasha ku nkono gwa bulyo gwa Mulungu. Nabo buja bulomela hose hose; Seba utumama hamo nabo, ugudimya mhayo na shimanikijo isho shali shuja hamo nago. Amina. Iki bingi batuulile ho makono gabo kutunga mu kwihela kasombolele ka mihayo iyo yazunyiwa gete mu biswe, Gitumo benabo abali bali baboni na bitumamija ba mhayo uyu kufuma kwandia, bututuulila ho mihayo iyi, Nu nene nubona ili ya wiza kukwandikila mu kwihela bebe, Theofilo wa wiza, iki nene nayikomela mihayo iyi yose wima kufuma kwandia; Umane nghana ya mihayo iyo waalangwa. Buhangi wa kubyalwa kwa ngʼwa Yohana Matija Mu shiku ja ngʼwa Herode, ntemi wa Buyudaya, walali ho ngabiji lina lyakwe Zakaria, wa ngʼwigele lya Abiya: na nke walali wa bana ba ngʼwa Aroni, lina lyakwe Elizabeti. Nabo bubili wabo bali bali batungilija mu miso ga Mulungu, bubyushiminza mu shilagilo shose na mu shitile sha Seba, bali bati na kilingo. Nabo bali bati na ngʼwana, iki Elizabeti walali ngumba, nabo bubili wabo bali bakulile mu bulamu wabo. Yubiza giki, aho akwitaga nimo gwakwe gwa bugabiji mu butongi wa Mulungu, mu kwihela kwa igele lyakwe, Gitumo chimile cha nimo gwa bugabiji, mbale yungwila ya kwingila mu hekalu ya Seba, na kuzukija ngazu. Na ibita lyose lya banhu lyali lyulomba hanze ngʼwikanza lya kuzukija ngazu. Ungʼwilongela malaika wa Seba imilile ha ipande lya bulyo lya ngʼwalilo gwa kuzukigija ngazu. Na Zakaria aho umona ukoyakoyiwa, na boba butale bungwila. Aliyo malaika ungʼwila giki, Utizogoha Zakaria; iki kulomba kwako kwigwiwagwa; na nke wako Elizabeti alakubyalila ngʼwana ngosha, na ulangʼwilika lina lyakwe Yohana. Nangho ulabiza na kuyega na busangabazu, na bingi balayegela kubyalwa kwakwe. Iki wei alabiza ntale mu butongi wa Seba; nanghwe atalangʼwa minzi ga mizabibu nulu kikoji, na alizula na Moyo Ngʼwela kufumila mu nda ya ngʼwa nina. Na bingi ba bana ba Israeli alabagalucha kuli Seba Mulungu wabo. Nanghwe alatonga ku butongi wakwe mu moyo na budula wa ngʼwa Eliya, kujigalucha ngholo ja basabo ku bana babo; na bakitigwa ku masala ga batungilija, na kunongeja Seba banhu abamalilile. Na Zakaria ungʼwila malaika giki, Nakumana kinahe mhayo uyu? iki nene ndi namhala, na nke wane wagiguluhile. Na malaika unshokeja ungʼwila giki, Nene ndi Gabrieli, uyo nakwimilaga mu butongi wa Mulungu; nane natumagwa kulungalunga na bebe, na kukumanikija mihayo iyi ya wiza. Na lolaga, ukubiza kimumu na utudula kulungalunga kushisha lushiku ulo mihayo iyi ilabiza ho, iki utazunije mihayo yane, iyilashikilijiwa ngʼwikanza lyayo. Na banhu hali bunindila Zakaria, bukukumya kudila kwakwe mu hekalu. Aho utuma walatudula kulungalunga nabo; bitegeleja giki, wabonaga kolechiwa mu hekalu; nanghwe ubyubagemelela na makono, na wikala kimumu. Na yubiza, aho shiku ja butumami wakwe jali jushila, uja ku kaya yakwe. Hanuma ya shiku ijo nke wakwe Elizabeti utunga nda: wibisa mieji itano, uhaya giki, Giko Seba wanitilaga nene mu shiku ijo wanilolela kuningija kudalahwa kwane mu banhu. Buhangi wa kubyalwa kwa ngʼwa Yesu Kristo Mu ngʼweji gwa katandatu malaika Gabrieli utungʼwa na Mulungu ku nzengo gwa mu Galilaya, lina lyago Nazareti, Kuli munhya ngʼwibembu walalunjiwe na ngosha lina lyakwe Yusufu, wa numba ya ngʼwa Daudi; na lina lya munhya ngʼwibembu lyene Mariamu. Na malaika wiza kuli wei, uhaya giki, Mhola, bebe uwinhiwagwa kigongo, Seba ali hamo na bebe. Aho umona, ukoyakoyiwa no na mhayo gwakwe, widedekanya kugishiwa kwenuku kuli kinahe? Na malaika ungʼwila giki, Utizogoha Mariamu, iki wabonaga kigongo kuli Mulungu. Na lolaga, ukutunga nda, ulamyala ngʼwana ngosha, ulangʼwilika lina lyakwe Yesu. Wei alabiza ntale, alitanwa Ngʼwana wa Ngʼwenuyo ah higulya no; na Seba Mulungu alangʼwinha isumbi lya butemi lya nkulugenji wakwe Daudi; Nanghwe alayisuga numba ya ngʼwa Yakobo welelo na welelo; hangi butemi wakwe butalafunda. Mariamu ungʼwila malaika giki, Mhayo uyu gukubiza kinahe, iki natamanile ngosha? Na malaika ushosha ungʼwila giki, Moyo Ngʼwela akukwiziila, na budula wa Ngʼwenuyo ali higulya no bukukufwikija giti nengeji; kulwa iyo kinhu chela icho kilabyalwa na bebe kilitanwa Ngʼwana wa Mulungu. Na lolaga, Elizabeti nduguyo nanghwe waatunga nda ya ngʼwana ngosha mu bugikulu wakwe, na uyu gwene ngʼweji gwa katandatu gwa ngʼwenuyo wiitanagwa ngumba; Iki kuli Mulungu guti ho mhayo ugutudulika. Mariamu uhaya giki, Lolaga, ndi nsese nkima wa Seba; ibize kuli nene gitumo mhayo gwako. Huna lulu malaika winga hali wei. Mu shiku jenijo Mariamu wihuta kuja ku si ya magulya, ku nzengo gwa Yuda. Na wingila mu kaya ya ngʼwa Zakaria, ungisha Elizabeti. Na yubiza aho Elizabeti wigwa kugisha kwa ngʼwa Mariamu, ngʼwana mu nda yakwe ubina, na Elizabeti wizula na Moyo Ngʼwela; Uhamuka na ilaka itale, uhaya giki, Bebe mu bakima uli ngʼwinhiwa wa lubango, na itwajo lya mu nda yako lyinhiwa lubango. Na mhayo uyo gwanizila kinahe, nina wa Seba wane wizaga kuli nene? Iki lolaga, ilaka lya kugisha kw ako aho lyushika mu matu gane, ngʼwana wa mu nda yane ubina kulwa buyegi. Ali wa lubango uwazunije, iki mihayo iyo uwilwa na Seba ilashikilijiwa. Na Mariamu uhaya giki, Bupanga wane bulingunguhya Seba, Na moyo gwane gwanyegelaga Mulungu Mpija wane. Iki wabulolelaga buhabihabi wa nsese wakwe nkima; iki nghana, kufuma lelo ba shibyalilwe shose balabyunihaya ngʼwinhiwa wa lubango. Iki Ngʼwenekele budula wanitilile mihayo mitale; na lina lyakwe Uli lyela; Na kuchila kigongo kwakwe kuli ku shibyalilwe na shibyalilwe sha benabo abangʼogoha. Witile nguzu na nkono gwakwe, waababalasanya badoshi mu kwiganika kwa ngholo jabo. Waabagwisha batale mu masumbi gabo ga butemi, na waabagunguhya a bahabihabi. Waabigutya bayala na sha wiza, na basabi wabapeja buyiki. Waangunija ntumami wakwe Israeli, wizukilwe kuchila kigongo kwakwe. Gitumo wali ubalungalungila bakulugenji biswe, Abrahamu na bubyile wakwe, kushisha welelo bose. Mariamu ushinga hamo nanghwe giti mieji idatu, huna ushoka ku kaya yakwe. Ikanza lya kubyala lya ngʼwa Elizabeti aho lyushikila, umyala ngʼwana ngosha. Na bazenganwa biye na baduguye aho bigwa giki, Seba wangʼongegije kigongo chakwe, buyegela hamo nanghwe. Na yubiza ha lushiku lwa kanane biza kunsala ngʼwana; buhaya kungʼwilika lina lya ngʼwa ise Zakaria. Na nina ushosha uhaya giki, Yaya; aliyo akwilikwa Yohana. Nabo bungʼwila giki, Ati ho wa ludugu lwako uyo ali na lina lyenili. Bungemelela ise na makono giki, atogilwe kungʼwilika lina ki. Nanghwe ulomba lubawa lwa kwandikila ho, wandika giki, Lina lyakwe lyene Yohana. Nabo bukumya bose. Haho na haho nomo gwakwe gwiguka, na lulimi lwakwe nalo, nanghwe ulungalunga, unkumilija Mulungu. Na boba bubadima bose abazengile hihi nabo; na mihayo iyi yose yukumuka mu si yose ya magulya ya Buyudaya. Na bose abali biyigwa buyibika mu ngholo jabo, buhaya giki, Ngʼwana uyu, himba alabiza kinahe? Iki nkono gwa Seba gwali guli hamo nanghwe. Na ise Zakaria wizula na Moyo Ngʼwela, uhanga uhaya giki, Akumilijiwe Seba Mulungu wa Israeli, iki wabagenihaga banhu bakwe, na kubakomola. Hangi watubukigije ipembe lya bupiji mu numba ya ntumami wakwe Daudi. Gitumo waalungalungaga mu milomo ya bahangi bakwe bela kufuma kwandia, giki, Tupijiwe kufuma mu banishi biswe, na mu makono gabo bose abatukolwa; Kubitila kigongo a bakulugenji biswe, na kwizukwa ilagane lyakwe lyela. Kilahilo chenicho wali unahilila nkulugenji wiswe Abrahamu, Kutuzunilija giki, Biswe tuntumamile tuti na boba aba twapilile mu makono ga banishi biswe, Mu wela na mu butungilija ku butongi wakwe shiku jose ja bupanga wiswe. Na bebe, ngʼwana, ulitanwa nghangi wa Ngʼwenuyo ali higulya no; iki ulatonga ku butongi wa Seba kunongeja nzila jakwe; Kubamanikija banhu bakwe bupiji mu kulekejiwa kwa shibi shabo, Kulwa wisatwi wa Mulungu wiswe mubo busana wa kufuma higulya watugenihaga biswe, Kubakila abigashije mu giiti na mu nengeji gwa lufu; na kutongela mhambala jiswe mu nzila ya mhola. Nanghwe ngʼwana ukula, uguzuhiwa mu moyo; wikala mu bu kushisha lushiku lwa kolechiwa kwakwe ku ba Israeli. Ikabiza mu shiku jenijo, kilagilo chali chufuma kuli Kaisari Augusto giki, ba si jose bandikwe mina gabo. U kwandikwa uku kwali kuli kwa kwandia aho Kurenio walali gavana wa Suria. Banhu bose buja kwandikwa, buli munhu ku nzengo gwakwe. Yusufu nanghwe winga Galilaya kufuma mu nzengo gwa Nazareti, ulinha uja Buyudaya, ku nzengo gwa ngʼwa Daudi, ugwitanwa Bethlehemu, iki walali wa numba na luganda ya ngʼwa Daudi; Akandikwe hamo na Mariamu nke wakwe, uyo walanungije, nanghwe walali nda nhale. Ikabiza aho bali batali bali ko, shiku jakwe ja kubyala jushikila, Nanghwe umyala ngʼwana wakwe ngosha tangi, uningha mu ngʼwenda gwa chelele, na unaja ngʼwituli, iki hali hati ho hanhu ha kubigelwa mu numba ya bageni. Bamalaika na badimi Bali bubiza ho badimi mu si yeniyo, bakwikalaga mu matogolo, bakulilanghanaga idale lyabo mu bujiku. Huna malaika wa Seba wimila uko bali, na ikujo lya Seba lyubakila libatinganilile, na bogoha na kogoha kutale. Na malaika ubawila giki, Mutizogoha, iki nangʼwenhela nghulu ja wiza ja buyegi butale, ijikubiza ku banhu bose; Iki lelo, mu nzengo gwa ngʼwa Daudi, ngʼwabyaiilagwa Mpija, ngʼwene Kristo Seba. Na kimanikijo ku bingʼwe kikubiza giki, mukumona ngʼwana ngʼwelele alingililwe mu ngʼwenda gwa chelele, alalile ngʼwituli. Kuhayumanila bubiza ho hamo na malaika ngʼwenuyo bingi ba ibita lya ngʼwigulu, balinkumilija Mulungu, buhaya giki, Ikujo libize kuli Mulungu higulya no, na mhola ibize mu si mu banhu abanyeja. Na yubiza aho bamalaika bakwinhaga kubo bajile ngʼwigulu, badimi biwila giki, Tuje Bethlehemu, tukabone mhayo uyu ugwitagwa, uyo Seba watumanikijaga. Nabo bihuta buja bukabasanga Mariamu na Yusufu, na ngʼwana ngʼwelele alalile ngʼwituli. Aho bumona, bugukumucha mhayo uyo bali buwilwa gwa ngʼwana ngʼwenuyu. Na bose abali bigwa bukumya iyo buwilwa na badimi. Aliyo Mariamu wibika mihayo iyi yose, uyidedekanya mu ngholo yakwe. Huna badimi bushoka, balinkuja na kunumba Mulungu, kulwa mihayo yose iyo bigwaga na bibonaga, gitumo bali bawililwa. Aho shiku inane jali jushikila ja kunsala ngʼwana, bungʼwilika lina lyakwe Yesu, ilo wali wilikwa na malaika aho walatali kutungilwa nda. Aho shiku ja kwejiwa kwabo jali jushikila, gitumo shilagilo sha ngʼwa Musa umo shili, bungʼwenha Yerusalemi kungʼwinha kuli Seba, Gitumo yaandikwa mu shilagilo sha Seba giki, Buli ngʼwana ngosha uyo wahangula nda ya ngʼwa nina alitanwa ngʼwela kuli Seba; Na bafunye kitambo gitumo yuhayiwa mu shilagilo sha Seba giki, nghuulu ibili nulu tukune tubili twa mhunda. Na mu Yerusalemi walali mo munhu, lina lyakwe Simeoni, munhu ngʼwenuyu walali ntungilija na wa logohano, hangi akukulindilaga kulungujiwa kwa Israeli, na Moyo Ngʼwela ubiza hali wei. Nanghwe wali umanikijiwa na Moyo Ngʼwela giki, atalabona kucha kushisha amone Kristo wa Seba tame. Wali wingila mu hekalu, atongelilwe na Moyo; na babyaji aho bali bungʼwenha mo u ngʼwana Yesu, bangʼwitile gitumo shimile sha shilagilo umo shili, Ngʼwenuyo unela mu makono gakwe, na unumba Mulungu, uhaya giki, Seba, haha lulu wanizunilija nsese wako ninge mu mhola, gitumo Bebe waahaya; Iki miso gane gabonaga bupiji wako, Ubo wabulongije mu miso ga banhu bose; I lisana lya kubakundulila bana mahanga, na ikujo lya banhu bako Israeli. Na Yusufu na nina buyikumya mihayo iyuhayiwa ya kuli Wei. Na Simeoni ubasungulila lubango, ungʼwila nina Mariamu giki, Ngʼwenuyu watuulwa ho bagwe na bimile bingi mu Israeli, hangi kubiza kimanikijo ikilahalalijiwa. Na bebe nangho, lilushu likupulunghanya bupanga wako; giki, maganiko ga ngholo ningi gakundulwe. Walali ho Anna, nghangi nkima, ngʼwana wa ngʼwa Fanueli, wa luganda lwa ngʼwa Asheri, uyo wagiguluhile no, wali wikala na ngoshi miaka mpungati kufuma bunhya wakwe. Na walali nchilwa hamo miaka makumi anane na ine, ngʼwenuyu walatingaga mu hekalu, aliyo utumamila mu kudila nzala na kulomba bujiku na limi. Nanghwe wiza mu kakanza kenako, unumba Seba, unghaya ku bose abakulindilaga kukomolwa mu Yerusalemi. Aho bumala mihayo yose gitumo shilagilo sha Seba umo shili, bushoka Galilaya, ku nzengo gwabo Nazareti. Ngʼwana ukula, uguzuhiwa mu moyo, izulile na masala, na kigongo cha Mulungu chubiza hali Wei. Nyanda Yesu hagati ya balangi Na babyaji bakwe baajaga buli ngʼwaka Yerusalemi ku kilile cha Pasaka. Aho ushisha miaka ikumi na ibili, bulinha kuja Yerusalemi gitumo chimile cha kilile umo kili. Na aho bujikalicha i shiku, aho balishoka, ngʼwana ngʼwenuyo Yesu wikendeleja mu Yerusalemi, na Yusufu na nina batayimanile. Aliyo iki bubamhija giki, ali ngʼwibita, buja lugendo lwa lushiku lumo, bunkobakoba mu badugu babo na bimane babo. Aho bungayiwa, bushokanya Yerusalemi, bakunkobaga. Na yubiza hanuma ya shiku idatu bumpandikila mu hekalu, igashije hagati ya balangi, ubadegeleka na kubabuja. Bose abungʼwigwa budedebala kulwa kwitegeleja kwakwe na mashosho gakwe. Nabo aho bumona buzunzumala; na nina ungʼwila giki, Ngʼwana wane, watwitilaga biswe giko ni buli? lolaga, so na nene twalukukobaga na isungu. Nanghwe ubawila giki, Ngʼwalunikobaga ni buli? ngʼwali mutamanile giki, shinigelile kubiza mu mihayo ya ngʼwa Baba? Nabo bali batitegeleja mhayo uyo wali ubawila. Nanghwe wika hamo nabo, ushika Nazareti, ubalyehela; na nina wibika mihayo iyi yose mu ngholo yakwe. Na Yesu ongeja mu masala na kukula, na mu kuganja kuli Mulungu na banhu. Mu ngʼwaka gwa ikumi na itano gwa busugi wa ngʼwa Kaisari Tiberio, Pontio Pilato walali gavana wa Buyudaya, na Herode walali ntemi wa Galilaya, na Filipo, ngʼwana wa ngʼwawe, walali ntemi wa It urea na si ya Trakoniti, na Lusania walali ntemi wa Abilene. Mu shiku ja bugabiji butale wa ngʼwa Anna na Kayafa, mhayo gwa Mulungu gwiza kuli Yohana, ngʼwana wa Zakaria, mu bu. Nanghwe ushika mu si iyo yose ibimbikanilwe na Yordani, ubyulomela kubatija kwa koya kwa kushika mu kulekejiwa kwa shibi. Gitumo gwaandikwa mu kitabo cha mihayo ya nghangi Isaya, uhaya giki, Ilaka lya ngʼwenuyo akuhamukaga mu bu giki, Bejabejagi ipalapala lya Seba, gololagi nzila jakwe. Buli itubilo lilokajiwa, na buli lugulu na itumbi shilalenganijiwa, ahigomagomile halagololwa, na nzila ja magagala jilasheshiwa. Na ba mibili bose balabona bupiji wa Mulungu. Huna lulu ubyugawila mabita agali giza kubatijiwa nanghwe giki, Bingʼwe bubyile wa shipili, nani wali umuhugula kubupela bupelanu ubuhaya kwiza? Kulwa iyi itagi matwajo agigelelilwe na koya; nulu mutizandia kuhaya mu mioyo yingʼwe giki, Tuli na nkulugenji wiswe, Abrahamu; iki namuwila giki, Mulungu wadula mu mawe aya kunjukija Abrahamu bana. Na haha mbasa yatuulagwa ha nji gwa miti: kulwa iyi buli nti gose ugututwajaga matwajo ga wiza gukengʼenhwa, guponyiwa mu moto. Na mabita gumuja, guhaya giki, Twite kinahe lulu? Ushosha ubawila giki, Uyo ali na nghanjo ibili, angabe imo uyo ati nayo; na uyo ali na shiliwa, nanghwe ite chene. Batobisha nabo biza kubatijiwa, bungʼwila giki, Nangi, a biswe twite kinahe? Ubawila giki, Mutatobishage kukilanya isho ngʼwalagililwe. Bashilikale nabo bumuja, buhaya giki, Na biswe twite kinahe? Ubawila giki, Mutizungʼwibonela munhu ose nulu kumula ya bulomolomo, hangi bizagi ngʼwafujiwa na mhela yingʼwe. Hunaho banhu bubyuhanahana, bungʼwidedekanya Yohana mu ngholo jabo giki, Ulu ngʼwenuyo ngʼwene Kristo, himba yaya; Yohana ushosha ubawila bose giki, Nene hene ndimubatija na minzi; aliyo izile Uyo anikilile nguzu, Ngʼwenuyo natigelelilwe nulu kuntaligulila mikoba ya shilatu shakwe; Ngʼwenuyo akumubatija na Moyo Ngʼwela na moto; Uyo ihehelo lyakwe lili mu nkono gwakwe, akulweja gete lubuga lwakwe, ngano alajibika mu kikolo chakwe; aliyo mela alagatwima na moto ugutujima. Ubalomela banhu evangeli mu buganikiji wingi bungi na bungi. Aliyo ntemi Herode aho wali uhugulwa nanghwe kulwa nguno ya ngʼwa Herodia u nke wa ngʼwa Filipo ngʼwana wa ngʼwawe, na kulwa mihayo ya bubi yose iyo Herode wali wita, Ongeja ku iyo na mhayo uyu, umfunga Yohana mu jela. Yubiza aho banhu bose bali bubatijiwa, na Yesu aho ubatijiwa na ulomba, igulu lyukunduka, Na Moyo Ngʼwela ungʼwikila mu chikolile cha mili giti nghuulu, na ilaka lyufuma ngʼwigulu lyuhaya giki, Bebe uh Ngʼwana wane ntogwa; muli Bebe nayejiwa gete. Na Yesu Ngʼwenekele aho wandia kulanga walali wa miaka giti makumi adatu, uhanahanwa giki, ali ngʼwana wa ngʼwa Yusufu, u wa ngʼwa Eli, U wa ngʼwa Mathati, u wa ngʼwa Levi, u wa ngʼwa Melki, u wa ngʼwa Yanna, u wa ngʼwa Yusufu, U wa ngʼwa Matathia, u wa ngʼwa Amosi, u wa ngʼwa Nahumu, u wa ngʼwa Esli, u wa ngʼwa Nagai. U wa ngʼwa Maathi, u wa ngʼwa Matathia, u wa ngʼwa Semei, u wa ngʼwa Yusufu, u wa ngʼwa Yuda. U wa ngʼwa Yoana, u wa ngʼwa Resa, u wa ngʼwa Zorobabeli, u wa ngʼwa Salathieli, u wa ngʼwa Neri. U wa ngʼwa Melki, u wa ngʼwa Adi, u wa ngʼwa Kosamu, u wa ngʼwa Elmadamu, u wa ngʼwa Eri, U wa ngʼwa Yoshua, u wa ngʼwa Eliezeri, u wa ngʼwa Yorimu, u wa ngʼwa Mathati, u wa ngʼwa Levi, U wa ngʼwa Simeoni, u wa ngʼwa Yuda, u wa ngʼwa Yusufu, u wa ngʼwa Yonamu, u wa ngʼwa Eliakimu. U wa ngʼwa Melea, u wa ngʼwa Maina, u wa ngʼwa Matatha, u wa ngʼwa Nathani, u wa ngʼwa Daudi, U wa ngʼwa Yesai, u wa ngʼwa Obedi, u wa ngʼwa Boazi, u wa ngʼwa Salmoni, u wa ngʼwa Naasoni, U wa ngʼwa Aminadabu, u wa ngʼwa Aramu, u wa ngʼwa Esromu, u wa ngʼwa Faresi, u wa ngʼwa Yuda, U wa ngʼwa Yakobo, u wa ngʼwa Isaaka, u wa ngʼwa Abrahamu, u wa ngʼwa Tera, u wa ngʼwa Nahori, U wa ngʼwa Saruhu, u wa ngʼwa Ragau, u wa ngʼwa Faleki, u wa ngʼwa Eberi, u wa ngʼwa Saia, U wa ngʼwa Kainani, u wa ngʼwa Arifaksadi, u wa ngʼwa Shemu, u wa ngʼwa Nuhu, u wa ngʼwa Lameki, U wa ngʼwa Mathusala, u wa ngʼwa Enoka, u wa ngʼwa Yaredi, u wa ngʼwa Maleleeli, u wa ngʼwa Kainani, U wa ngʼwa Enosi, u wa ngʼwa Sethi, u wa ngʼwa Adamu, u wa ngʼwa Mulungu. Yesu izulile na Moyo Ngʼwela, ushoka kufuma ku Yordani, utwalwa na Moyo Ngʼwela kuja mu bu, Wikala ko shiku makumi ane, ubyugengʼwa na muji; na mu shiku jenijo walatalyaga kinhu; aho jukalika hanuma utuba. Muji ungʼwila giki, Ulu Bebe uli Ngʼwana wa Mulungu, liwilage iwe ili libize ngati. Na Yesu unshokeja uhaya giki, Gwaandikwa giki, Munhu atubiza mpanga kulwa ngati gwike, aliyo kulwa buli mhayo gose gwa Mulungu. Huna muji uninhya mo mu lugulu lulihu, ungʼolekeja mabutemi gose ga si, mu dakika imo. Muji ungʼwila giki, Nakukwinha Bebe butale ubu bose na ikujo lyabo, iki ninhiwa nene, na kuli uyo ose natogilwe nangʼwinha. Kulwa iyo, ulu Bebe ukunilamya mu butongi wane, shenishi shose shikubiza shako. Na Yesu ushosha ungʼwila giki, Shokaga kunuma yane, Shetani; iki gwaandikwa giki, Ulanamyage Seba Mulungu wako, Ngʼwenuyo wike ulantumamilage. Huna untwala Yerusalemi, ungʼwigasha ha kikungu cha hekalu, ungʼwila giki, Ulu Bebe uli Ngʼwana wa Mulungu, wiponye hasilili kufuma kunu, Iki gwaandikwa giki, Akukulagilila bamalaika bakwe bakulinde; Na hangi giki, Bakukubucha mu makono gabo, uleke kwipama lupambala lwako ku iwe. Yesu ushosha ungʼwila giki, Yaahayiwa giki, Utalizungema Seba Mulungu wako. Aho muji umala buli kugema kose, uja uneka kakanza. Hunaho Yesu ushoka Galilaya mu nguzu ja Moyo Ngʼwela, na lukumo lwakwe lusanja si jose jibimbikanwile. Nanghwe ulanga mu mabilingilo gabo, ukujiwa na banhu bose. Uja Nazareti uko wali ukujiwa; na ha lushiku lwa Sabato wingila ngʼwibilingilo gitumo chimile chakwe chali kili, na wimila kusoma. Winhilijiwa kitabo cha nghangi Isaya, aho ukundula kitabo, upandika ipande uko yaandikwa giki, Moyo wa Seba ali kuli Nene, iki wanitilile maguta kubalomela bahabi evangeli, unituma kubapija a bagwa ngholo, kubalomela kulekelwa a badingʼwa, na ku baboku kufumbulwa kwa miso, na ku bachubulwa kutungulwa, Kulomela ngʼwaka gwa Seba ugwazunilijiwa. Aho ukipaliga kitabo, ukishosha kuli nindi, na wigasha: na miso ga banhu bose abali ngʼwibilingilo gunkalalila Wei. Nanghwe waandia kubawila giki, Lelo shandikwa ishi shashikilijiwa mu matu gingʼwe. Na bose bunkanila, buyikumya mihayo ya kigongo iyo yufuma mu nomo gwakwe, buhaya giki, Ngʼwenuyu, angu, ati ngʼwana wa ngʼwa Yusufu? Nanghwe ubawila giki, Mukuniwila nghana lusumo ulu giki, Mfumu wilagule ngʼwenekele; yose iyo twali twigwa yitwa Kapernaumu, itaga nu kunu mu si ya ngʼwingʼwe. Ubawila giki, Nghana namuwila giki, Nduhu nghangi wa kuzunilijiwa mu si ya ngʼwawe. Aliyo nghana namuwila giki, Bachilwa bingi bali bubiza ho mu Israeli mu shiku ja Eliya, aho igulu lyali lyalugalwa miaka idatu na mieji itandatu, aho nzala nhale yali yiza mu si yose. Aliyo Eliya walatutungʼwa nulu kuli umo wabo, numho kuli nkima nchilwa wa Sarepta, mu si ya Sidoni, Hangi bali bali ho ba mbiji bingi mu Israeli mu shiku ja nghangi Elisha, aliyo wala te ji wa nulu umo numho Naamani muna Suria. Na bose abali bali ngʼwibilingilo bokala na bupelanu, aho bigwa mihayo iyi. Bubuka bumfunya hanze ya nzengo, buntwala ku nenekejo ya lugulu ulo nzengo gwabo gwaanzengelwa ho, bakangholomokeje ha si; Aliyo Wei ubita hagati yabo, uja. Na utulumenha ushika Kapernaumu, gwene nzengo gwa mu Galilaya, ubyubalanga ha Sabato. Nabo budedebala kulwa kalangile kakwe, iki mhayo gwakwe gubiza na budula. Na ngʼwibilingilo walali mo munhu ali na moyo gwa isamva isoso, uhamuka na ilaka itale, Uhaya giki, Yee! Tuli na ki, biswe na Bebe, Yesu wa Nazareti? Wizaga kutuyagaja? Nakumanile Bebe, Uyo uli Ngʼwela wa Mulungu. Na Yesu unghama, uhaya giki, Humulaga, ungʼwinge ho. Huna isamva lyuntalicha hagati, lyungʼwinga, litangulagije. Na kukumya kubadima bose, bilunjalunja, buhaya giki, Mhayo ki gwenuyu, iki akulagilaga mioyo misoso mu budula na nguzu, nayo ikwingaga. Na nghulu jakwe jukumuka mu buli ipande lya si jibimbikanilwe ho. Nanghwe utuma ngʼwibilingilo, wingila mu numba ya ngʼwa Simoni. Ninabuko wa Simoni wali waluhiwa nswiza ntale, nabo bumuja kulwakwe. Nanghwe wimila hihi nanghwe, uguhama u nswiza, nago gungʼwinga; ubuka haho na haho, ubatumamila. Aho limi lyali lyugwa, bose abali bali na basatu ba bulwile bungi na bungi bubenha kuli Wei, nanghwe utuula makono gakwe higulya ya buli munhu wa mubo, ubapija. Masamva ginga ho mu bingi, gakuhamukaga, guhaya giki, Bebe uli Kristo Ngʼwana wa Mulungu. Nanghwe ugahama, walatugazunilija kulungalunga, iki gamanile giki, Uyu ngʼwene Kristo. Aho wangaluka, winga uja kwipande iliti na banhu, na banhu bunkobakoba, biza kuli Wei, bugema kunkendeleja atizinga kubo. Aliyo ubawila giki, Shinigelile nalomele evangeli ya butemi wa Mulungu na ku mizengo yingi, iki natumagwa kulwa nguno iyi. Na ubyulomela mu mabilingilo ga mu Galilaya. Yubiza aho banhu bunshiteleja kwigwa mhayo gwa Mulungu, Wei wali wimila haho na nyanza ya Genesareti, Ubona mato abili gali ha ngʼwalo gwa nyanza, aliyo bategi bali bingile mo bakojaga mitego yabo. Wingila mu lyato limo, i lya ngʼwa Simoni, umuja alyegeleje hado kwinga ha ngʼwalo; nanghwe wigasha ubalanga banhu ali mu lyato. Aho umala kulungalunga ungʼwila Simoni giki, Egelejage ko ku bujiba, muponye mitego yingʼwe mutege. Simoni ushosha ungʼwila giki, Seba twakoyaga bujiku pe, tutabulagile kinhu: aliyo nahene kulwa kuhaya kwako nakuguponya ntego. Aho bita giko, bugwasha ibipi itale lya ndilo, na ntego gwandia kutinika. Na bubashinyela bichabo a ba mu lyato lingi, bize kubagunanha. Nabo biza bokaja mato gose abili, nose gandia kutubila. Aho Simoni Petro ubona mhayo uyu, ugwa ku mazwi ga ngʼwa Yesu, uhaya giki, Ingaga hali nene, Seba, iki nene ndi munhu wa shibi. Iki kukumya kutale kwandima, na bose abali bali nanghwe, kulwa wingi wa ndilo ijo bagwashaga. Giko Yakobo na Yohana, bana ba ngʼwa Zebedayo, abali bali na busangi na Simoni, bubiza chene. Na Yesu ungʼwila Simoni giki, Utizogoha, kufuma lelo ulabyugwasha banhu. Nabo aho bukoja mato gabo ha ngʼwalo, buleka shose bunondela. Na yubiza aho walali mo mu nzengo nebe, lolaga, ngosha okalile mbiji, aho umona Yesu ugwa achimigije ha si, ungʼwikumbilija uhaya giki, Seba, ulu utogilwe wadula kuneja. Nanghwe utama nkono gwakwe, unkuumya, uhaya giki, Natogwa; elaga. Haho na haho mbiji jungʼwinga. Na unagila atizungʼwila munhu ose; aliyo, Jaga, ukiyoleche kuli ngabiji, ufunye shinhu sha kwejiwa kwako, gitumo Musa ulagila, ibize bukaniji Aliyo lukumo lwakwe lwiyongeja kukumuka; na mabita matale gubyiza kundegeleka, na kupijiwa bulwile wabo. Aliyo Wei wisunda ngʼwipande iliti na banhu, ubyulomba. Na yubiza ha lushiku lulebe aho alilanga, Bafarisayo na balangi ba shilagilo bali bigashije haho, abali bafumilile mu buli igunguli lya mu Galilaya, na Buyudaya, na kufuma Yerusalemi: na budula wa Seba wali buli ho kubapija. Na lolaga, biza bagosha bamukije munhu ha bulili alemahalile, nabo bukoba ha kungʼwingigija na kuntuula ku butongi wakwe. Aho batabonile ha kungʼwingigija kulwa ibita, bulinha kwigulya ha numba, bumitija mu madafali ga higulya, bungʼwicha hagati hamo na kabulili kakwe ku butongi wa ngʼwa Yesu. Aho ubona kuzunya kwabo, ungʼwila giki, Ee, munhu, shibi shako shalekejiwa. Huna bandiki na Bafarisayo bandia kwidedekanya, buhaya giki, Ni nani Uyu alihaya buduki kuli Mulungu? Nani wadula kulekeja shibi ulu ati Mulungu wike? Aliyo Yesu umana kwidedekanya kwabo, ushosha ubawila giki, Mulidedekanya mu ngholo jingʼwe ni buli? Changu kili he, kuhaya giki, Shibi shako shalekejiwa, nulu kuhaya giki, Bukaga, ushiminze? Aliyo ngʼwitegeleje giki, Ngʼwana wa munhu ali na budula mu si kulekeja shibi,—ungʼwila nema,—Nakuwila bebe giki, Bukaga, ubuche kabulili kako, uje ku kaya yako. Haho na haho wimila ku butongi wabo, ukabucha ako walalalilile, uja kaya, alinkuja Mulungu. Na busangabazu bubadima bose, bunkuja Mulungu; bokala na boba, buhaya giki, Lelo twabonaga shamahano buli. Hanuma ya iyi utuma uja, umona ntobisha, lina lyakwe Levi, igashije ngʼwitobelo, ungʼwila giki, Nilondelage. Nanghwe uleka shose, ubuka, unondela. Na Levi umegeja buhondo butale mu kaya yakwe: na bali bubiza ho batobisha bingi, na banhu bangi hoi abali bigashije hamo nabo ku shiliwa. Huna bandiki babo na Bafarisayo bubadugumila bahemba bakwe buhaya giki, Ni buli mukulyaga na kungʼwa hamo na batobisha na ba shibi? Yesu ushosha ubawila giki, A bapanga bati na nguno ya kunkoba naguji, aliyo abalwalile. Nene natizile kwitana batungilija, aliyo ba shibi bashike mu koya. Aliyo bungʼwila giki, Ni buli bahemba ba ngʼwa Yohana bakadilaga nzala nghangala ningi na kulomba, na bahemba ba Bafarisayo nabo giko; aliyo bahemba bako bakulyaga na bungʼwa? Ubawila giki, Ngʼwadula kubadija nzala biye ba ntoji, aho ntoji atali ali hamo nabo? Aliyo shiku jiliza aho ntoji alamala kwinjiwa mubo, hunaho lulu baladila nzala mu shiku jenijo. Ubalungalungila mu kigemenghejo. Ati ho munhu uyo usumila kidaso cha kizwalo kipya ha kizwalo kikulukulu; ulu wita giko, ukitandula i kipya, na hangi kidaso ichufuma ha kipya kwigwindanya na kikulukulu. Hangi ati ho munhu uyo utuula minzi ga mizabibu mapya mu mhinda nghulukulu; ulu wita giko, minzi ga mizabibu mapya gakutumula mhinda, nago gakwidika, na mhinda jikukenaguka. Aliyo minzi ga mizabibu mapya shigelile kutuulwa mu mhinda mhya, huna lulu bubili washo shikala shipanga. Hangi ati ho munhu aho wangʼwaga minzi ga mizabibu ga kale atogilwe mapya; iki uhaya giki, A ga kale gali ga wiza kutinda. Yubiza ha Sabato ndebe, wali ubita mu migunda ya ngano; na bahemba bakwe bubyuhulula mangala, bulya, bubyugayuga mu makono. Aliyo bamo ba Bafarisayo bubawila giki, Ni buli mukwitaga icho cha ngilo kwita ha Sabato? Na Yesu ushosha ubawila giki, Mutasomaga iyo akita Daudi, aho wali utuba, wei na benabo abali hamo nanghwe? Gitumo akingila mu numba ya Mulungu, winja migati iyufunyiwa kuli Mulungu, uyilya, ubinha na benabo abali bali hamo nanghwe, iyo ili ya ngilo kwilya ulu iti bagabiji bike? Ubawila giki, Ngʼwana wa munhu ali Seba nu ku Sabato. Yubiza ha Sabato yingi, wingila ngʼwibilingilo na ulanga; na walali mo munhu, nkono gwakwe gwa bulyo gwali gumile. Bandiki na Bafarisayo bundegeleka, ulu alampije ha Sabato, babonele ho mhayo gwa kumula. Aliyo Wei witegeleja kwidedekanya kwabo, na ungʼwila munhu uyo ali na nkono gumile giki, Bukaga wimile hagati: nanghwe ubuka wimila. Hunaho Yesu ubawila giki, Nakumubuja bingʼwe mhayo; Angu, igelile kwita ya wiza ha Sabato, nulu kwita ya bubi, kubupija bupanga, nulu kubuyagaja? Ubilalangija bose, ungʼwila munhu ngʼwenuyo giki, Tamaga nkono gwako. Nanghwe wita chene, na nkono gwakwe gubiza mpanga giti u gungi. Aliyo boi bokala na busayi, bulomana umo balangʼwitile Yesu. Ikabiza mushiku ijo, ubuka uja mu lugulu kulomba, ukeyula bujiku pe akulombaga kuli Mulungu. Aho yubiza limi ubitana bahemba bakwe; ukoma mubo ikumi na babili, abo ubitana hangi giki, batungʼwa. Simoni, uyo ungʼwilika Petro, na Andrea ngʼwana wa ngʼwawe; Yakobo na Yohana, Filipo na Bartolomayo, Matayo na Tomaso, Yakobo ngʼwana wa ngʼwa Alfayo, na Simoni uwitanwa Zelote, Yuda u wa ngʼwa Yakobo, na Yuda Iskariota uyo wali ungʼwinha ko. Utulumenha hamo nabo, wimila ha itogolo, hamo na ibita lya bahemba bakwe, na buhi wa banhu abufumila Buyudaya yose na Yerusalemi, na ku ipande lya ku nyanza lya Turo na Sidoni, biza kundegeleka na kupijiwa bulwile wabo. Na bose abali bukoyakoyiwa na mioyo misoso, nabo bupijiwa. Na ibita lyose lyukoba kunkuumya, iki budula wali bungʼwinga, bubapija bose. Na ubucha miso gakwe ku bahemba bakwe, uhaya giki, Muli ba lubango a bingʼwe bahabi, iki butemi wa Mulungu wene wingʼwe. Muli ba lubango a bingʼwe mukutubaga haha, iki muligutiwa. Muli ba lubango bingʼwe mukulilaga haha, iki mulaseka. Muli ba lubango aho banhu balamukolwa, na aho balamusolanya, na kumusukilija na kuponya lina lyingʼwe giti lya bubi, kulwa nguno ya Ngʼwana wa munhu: Yegagi mu lushiku lwenulo, na mutambile kulwa buyegi, iki lolagi, kusamva kwingʼwe kwingi ngʼwigulu, iki bakulugenji babo bali bubitila bahangi giti iyo. Ngʼwasangwa bingʼwe basabi, iki ngʼwanukulaga kulungujiwa kwingʼwe. Ngʼwasangwa bingʼwe ngʼwafulaga, iki mulatuba. Ngʼwasangwa bingʼwe mukusekaga haha, iki mulapinihala na kulila shisoji. Ngʼwasangwa bingʼwe aho banhu bose balamuhaya chiza, iki bakulugenji babo bali bubitila bahangi bamama giti iyo. Aliyo Nene namuwila bingʼwe abakwigwaga giki, Mubatogagwe banishi bingʼwe, bitilagi chiza abamukohva. Mubasungulilage lubango abumuzuma, mubalombelage abumuluhyaluhya. Uyo ukupala ha itama limo, ungalukije na i lingi; na uyo ukutaja nguto gwako, i nghanjo nayo utizunemeja. Uyo ose ukulomba, ngʼwinhage; na uyo ukutagija ishili shako utizushilomba hangi. Na iyo yose mutogilwe banhu bangʼwitile bingʼwe, mubitile na boi giko. Na ulu ngʼubatogwa abo abamutogwa bingʼwe, muli na kulumva ki? iki nulu ba shibi nabo bubatogwa abo abubatogwa boi. Na ulu ngʼubitila chiza abo abungʼwitila chiza bingʼwe, muli na kulumva ki? iki nulu ba shibi nabo bakwitaga giko. Na ulu ngʼubalisha shiili abo ngʼwisagilagwa bakumugotolela hangi, muli na kulumva ki? iki nulu ba shibi nabo bakubalishaga shiili a ba shibi giki, bagotolelwe ishilenganilile. Aliyo mubatogwe banishi bingʼwe, itagi ya wiza, na lishagi shiili mutizisagilwa kugotolelwa hangi; na mhela yingʼwe ilabiza ningi, na bingʼwe mulabiza bana ba Ngʼwenuyo ali higulya no, iki Wei ah wa wiza ku abo bati na kulumba na ku ba bubi. Kulwa iyo bizagi na kisa, gitumo Singʼwe nanghwe ali na kisa. Hangi mutalekanyage, ningʼwe mutalalekanyiwa; nulu mutalekanyage nsango, ningʼwe mutalalekanyiwa nsango; lekejagi, ningʼwe mulalekejiwa. Inhagi, ningʼwe mulinhiwa, ngelekelo ya wiza, itindagilile, yashingishwa, ya masesa, yene balangʼwinha bingʼwe mu mifuko yingʼwe: iki na ngelekelo yeniyo mukugelekelaga nayo, ningʼwe mukugelekelelwa. Ubawila kigemenghejo giki, Angu, moku wadula kuntongela moku ngʼwiye? Batugwila bose babili ngʼwichongo? Nghemba atankilile nangi wakwe; aliyo uyo ose ashikanile alabiza giti nangi wakwe. Ni nguno ki ulilola kapalala akali mu liso lya nduguyo, aliyo utiganikaga ngamba uguli mo mu liso lyako bebe? Nulu wadula kinahe kungʼwila nduguyo giki, Ndugu wane, leka nakwingije kapalala akali mu liso lyako, aliyo utubonaga ngamba uguli mu liso lyako bebe? Ngʼwibeleja bebe, injaga tange ngamba uguli mo mu liso lyako, hunaho ukubona chiza kwinja kapalala akali mo mu liso lya nduguyo. Iki guti ho nti gwa wiza ugukutwajaga matwajo ga bubi; nulu guti ho nti gwa bubi ugukutwajaga matwajo ga wiza. Iki buli nti gumanika mu matwajo gago, iki banhu batayobaga matwajo ga ntini ku mihwa, nulu batayobaga mizabibu ku masanzu. Munhu wa wiza akufunyaga ya wiza kufuma mu bubiki wa wiza wa mu ngholo yakwe, na munhu wa bubi akufunyaga ya bubi kufuma mu bubiki wa bubi wa mu ngholo yakwe, iki mu iyo yokala mu ngholo, nomo gukwilungalungaga. Ni buli mukunitanaga Seba, Seba, na mutitaga iyo nakumuwilaga? Uyo ose uwiza kuli Nene na kwiyigwa mihayo yane, na kwiyita, nakungʼolekeja uyo wiyikolile nanghwe: Ngʼwenuyu wiyikolile na munhu uyo alizenga numba, usimba, ushimya, utuula musingi ha itale; aliyo ihuma aho lyiza, nduluma yuyipama numba yeniyo, na itudula kuyinegenya, iki izengelile ha itale. Aliyo uyo wigwa na kwiyita yaya, wiyikolile na munhu uyo wali uzenga numba ha si, atatuulile musingi; na nduluma yuyipama, nayo yugwa haho na haho, na kugwa kwayo kwali kutale. Aho umala mihayo yose yakwe mu matu ga banhu, wingila mu Kapernaumu. Nsese wa ntale wa bashilikale igana walasatile, uhaya kucha; ngʼwenuyo ntale antogilwe no. Nanghwe aho wigwa nghulu ja ngʼwa Yesu, utuma banamhala ba Bayudaya kuli Wei, bakangʼwikumbilije ize kumpija nsese wakwe. Nabo aho bushika kuli Yesu, bundayila wangu, buhaya giki, Ngʼwenuyo igelelilwe Bebe ungʼwitile mhayo uyu; Iki antogilwe ihanga lyiswe, nanghwe akatuzengela ibilingilo. Huna Yesu uja hamo nabo. Aliyo aho ubiza ati kule na numba, ntale wa bashilikale igana ubatuma basumba biye kuli Wei, kungʼwila giki, Seba, utizinoja, iki nene natigelaga U Bebe wingile hasilili ya kano yane: Kulwa iyi nene nali natibala nigelelilwe kwiza kuli Bebe; aliyo kuhaya hayaga gwike, na nsese wane akupijiwa. Iki nu nene ndi munhu atuulilwe mu busugi, ndi na bashilikale nabasugile, nane nungʼwila umo, Jaga, nanghwe uja; na kuli ungi giki, Nzugu, nanghwe wiza; na kuli nsese wane, Itaga iyi, nanghwe wita. Yesu aho wigwa iyi, unkumya; uligalukila ibita ilyali lyunondela uhaya, Namuwila giki, natali kubona kuzunya kutale giti uku nulu mu Israeli yaya. Na benabo abali butungʼwa aho bushoka ku kaya, busanga nsese uwali usata wapilaga. Yubiza ku ntondo, uja ku nzengo ugwitanwa Nain, na bahemba bakwe buja hamo nanghwe na ibita itale. Aho wegela ha mita gwa nzengo, lolaga mfu alifunyiwa hanze, walali ngʼwana ngosha, nina umyala umo wike, nu wei walali nchilwa, na banhu bingi ba nzengo uyo bali bali hamo nanghwe. Aho Seba umona unsatwa, ungʼwila giki, Utalilage. Huna wegela, ukuumya ku ibukijo lya mimba, na benabo abalibukije bimila. Nanghwe uhaya giki, Nsumba, ndikuwila, Bukaga. U mfu ubuka, wigasha na wandia kulungalunga; na ungʼwinha nina. Boba bubadima bose, na bunkuja Mulungu, buhaya giki, Nghangi ntale wabuka mu biswe; na giki, Mulungu wizaga kubalola banhu bakwe. Na nghulu jakwe ja mhayo uyu jukumuka mu Buyudaya yose, na si jose ijibimbikanilwe ho. Na bahemba ba ngʼwa Yohana bunsombolela mihayo iyi yose. Yohana aho ubitana babili ba mu bahemba bakwe, ubatuma kuli Yesu, uhaya giki, U Bebe uli Ngʼwenuyo wahayiwa kwiza, himba tunindile ungi? Bagosha abo aho bushika kuli Wei, buhaya giki, Yohana Matija wantumaga kuli Bebe, uhaya giki, U Bebe uli Ngʼwenuyo wahayiwa kwiza, himba tunindile ungi? Ngʼwikanza lyenilo ubapija banhu bingi mu busatu wabo na bulwile wabo na mioyo mibi, na baboku bingi ubinha kubona. Hunaho Yesu ushosha ubawila giki, Jagi, mukansombolele Yohana iyo ngʼwibonaga na iyo ngʼwigwaga; giki, baboku binhiwa kubona, bachigiji balishiminza, ba mbiji balejiwa, bachibi ba matu baligwa, bafu balijuchiwa, na bahabi balilomelwa evangeli; Na ali wa lubango uyo atalipama muli Nene. Batungʼwa ba ngʼwa Yohana aho bamala kwinga, wandia kunghaya Yohana ku mabita giki, Ngʼwali ngʼuja mu bu kulola ki? Idete lyunegenyiwa na nyaga? Aliyo ngʼwali ngʼuja mu bu kubona ki? Munhu agalililwe na shizwalo shifuku? Ambu, abakuzwalaga shizwalo sha ikujo na bikala mu bunyemezu bali mo mu numba ja kitemi. Aliyo ngʼwali ngʼuja ko kubona ki? Nghangi? Namuwila giki, Hene, na uyo atikilile no nghangi. Hu na ngʼwene uyo yaandikwa ya kunghaya giki, Lolagi, nantuma ntungʼwa wane ku butongi wako, uyo alalibejabeja ipalapala lyako ku butongi wako. Iki namuwila giki, Mu benabo abakabyalagwa na bakima, ati ho nghangi ntale wa kutinda Yohana Matija; aliyo u ndo mu butemi wa Mulungu ankilile wei butale. Na banhu bose na batobisha abo bigwa iyi, bunghaya Mulungu ntungilija, iki bali babatijiwa na kubatija kwa ngʼwa Yohana. Aliyo Bafarisayo na balangi ba shilagilo bali buhangija iyo Mulungu wali ubasolela, iki bah batubatijiwa nanghwe. Aliyo Seba uhaya giki, Banhu ba kibyalilwe iki nakubikolanija na ki? Hangi bikolile na ki? Bikolile na banigini abigashije mu nghungʼwano, biyitana benekele na benekele, buhaya giki, Twamufulila mhembe na bingʼwe kubina yaya, twamulilila nghungu na bingʼwe kulila yaya. Iki Yohana Matija wizile atulyaga migati nulu atungʼwaga minzi ga mizabibu, na bingʼwe ngʼwahaya giki, Ali na isamva. Ngʼwana wa munhu wizile akulyaga, na akungʼwaga, na bingʼwe ngʼwahaya giki, Lolaga, naku uyu na ngʼwi wa minzi ga mizabibu, nsumba ngʼwichabo wa batobisha na ba shibi! Na masala gatungiligijiwa na bana bago bose. Umo wa Bafarisayo wali ungʼwitana alye shiliwa hamo nanghwe; nanghwe aho wingila mu numba ya Mfarisayo wigasha kulya shiliwa. Na lolaga, nkima wa mu nzengo, uyo ali wa shibi, aho umana giki, igashije kulya shiliwa mu numba ya Mfarisayo ngʼwenuyo, wenha chupa iyabejiwa ya alabastro ya maguta ga ngazu, Wimila kunuma ku mhambala jakwe, akulilaga; wandia kudotya mhambala jakwe na shisoji, ujipyagula na nzwili ja ntwe gwakwe, ujibipa no mhambala jakwe, na kujibila na maguta genayo. Aliyo Mfarisayo uyo wali ungʼwitana aho ubona iyi, uhaya mu moyo gwakwe giki, Munhu uyu ulu ni ali nghangi, ni wamanicha nkima uyu wankuumya ni nani, hangi umo ah; iki ali wa shibi. Na Yesu ushosha ungʼwila giki, Simoni, ndi na mhayo gwa kukuwila. Nanghwe ungʼwila giki, angi, hayaga. Munhu umo nisha wa shiili walali na ba shiili babili; umo walali na bugasa wa shilingi magana atano, na ungi makumi atano. Aliyo iki bali bati nasho sha kulipa, ubalekeja bubili wabo. Hayaga lulu; nani mu bo akuntogwa kutinda? Simoni ushosha, uhaya giki, Niganika ngʼwenuyo akanekeja shingi. Nanghwe ungʼwila giki, Watungilijaga. Huna ungalukila nkima, ungʼwila Simoni giki, Ulimona nkima uyu? Nene ningila mu numba yako, bebe utaninhile minzi ga koja mhambala jane; aliyo uyu wadotya mhambala jane na shisoji, na ujipyagula na nzwili ja ntwe gwakwe. Bebe utanibipile; aliyo uyu kufuma aho ningila atakigije kubipa no mhambala jane. Utanisamigije maguta ku ntwe gwane; aliyo uyu wanisamija mhambala jane na ngazu. Kulwa iyo, nakuwila giki, Walekejiwagwa shibi shakwe shili shingi; iki ah na butogwa wingi; aliyo uyo walekejiwa mido ngʼwenuyo ali na butogwa budo. Ungʼwila nkima giki, Walekejiwagwa shibi shako. Hunaho abigashije hamo nanghwe kulya shiliwa bandia kuhaya mu mioyo yabo giki, Ni nani Uyu akulekejaga na shibi? Aliyo kuli nkima uhaya giki, Kuzunya kwako kwakupijaga; jaga mu mhola. Na yubiza hanuma ya iyo, ubyuja mu mizengo mitale na mido, akulomelaga na akukumuchaga evangeli ya butemi wa Mulungu; na abo ikumi na babili bali bali hamo nanghwe. Hangi bakima bamo abali bapijiwa mu mioyo ya bubi na mu mabulwile, bene Mariamu akitanagwa Magdalene, uyo gungʼwinga masamva mpungati; Na Yoana u nke wa Chuza, miki wa shikolo sha ngʼwa Herode; na Susana, na bangi bingi abo bubyungʼwinhilija shikolo shabo. Aho ibita itale libilinga, na banhu kufuma mu buli nzengo biza kuli Wei, ulungalunga mu kigemenghejo giki, Mibi akafuma uja kubiba mbiyu jakwe; na aho ubiba, jimo jugwa ha nzila, jupandagilwa, na noni ja hape jujilya. Na jingi jugwa ha itale, najo juzwa, junyala, iki jugayiwa budoto. Na jingi jugwa mu mihwa, na mihwa guzwa hamo najo, gujishita. Na jingi jugwa ha si ya wiza, najo juzwa, juhola mbeke igana igana. Aho uhaya mihayo iyi uhamuka giki, Uyo ali na matu ga kwigwa, leka igwe. Bahemba bakwe bumuja, buhaya giki, Kigemenghejo iki himba kili kinahe? Uhaya giki, Bingʼwe ngʼwinhiwagwa kukumana kwigeniha kwa butemi wa Mulungu; aliyo ku bangi mu shigemenghejo; giki, aho bulola, batizulola, na aho bigwa, batizitegeleja. Kigemenghejo iki kili giki, I mbiyu jene mhayo gwa Mulungu. Aba ha nzila bali abo bakwigwaga mhayo, hunaho Shetani wiza, na winja mhayo mu ngholo jabo, batizuzunya na kupijiwa. Aba ha itale, ha bene aho bigwa, banukula mhayo na buyegi; na benabo bati na nji, buzunya kakanza, na ngʼwikanza lya kugengʼwa bugwa. Najo ijali jugwa mu mihwa, bali abo abigwa, na mu kijile chabo bushitwa na mayanga na sabo na kiyegele cha bupanga ubu, batutwaja matwajo mashikanu. Aliyo ijo ha si ya wiza, bali abo abigwa mhayo mu ngholo niza na nhungilija, bugudima; na butwaja matwajo mu kwiyumilija. Ati ho munhu, aho ubacha tala, uyikundikija na kiseme, nulu kuyituula ngʼwizungu lya bulili; aliyo uyituula ha ikindikilo lya tala, bose abingila babone isana. Iki guti ho mhayo gubisile ugutaligengeleka; nulu kuduhu ya mbisila italamanika na kwigengeleka hape. Ilanghanagi lulu gitumo mukwigwaga; iki uyo ose ali na kinhu, ngʼwene akwinhiwa; na uyo ose ati na kinhu, ngʼwene akwingijiwa na iyo yiganikiwa giti ali nayo. Hunaho nina na bana ba ngʼwawe biza kuli Wei, buduma kushika kuli Wei, kulwa ibita. Wenhelwa mhayo giki, Noko na bana ba ngʼwingʼwe bimilile hanze, batogilwe kwibona na Bebe. Nanghwe ushosha ubawila giki, Mayu na bana ba ngʼwiswe bali abo bakwigwaga mhayo gwa Mulungu, na kugwita. Na lushiku lumo yubiza giki, wingila mu lyato na bahemba bakwe, ubawila giki, Tukile ku nkilo gwa nyanza; bulinhya itanga buja. Aho balija utindwa tulo ushutula; na nyaga ntale gwika ku nyanza, na lyato lyali lyuhaya kokala, nabo bubiza mu kwihiga. Bungʼwegela, na bumisha, buhaya giki, Seba, Seba, twacha. Nanghwe umisha, uguhama nyaga na kulibanguka kwa minzi; na bubiza ho bulembezu. Nanghwe ubawila giki, Kuzunya kwingʼwe kuli hali? Nabo bogoha bukumya, biwila benekele na benekele giki, Ni nani Uyu, iki ulagila na miyaga na minzi, nasho shungʼwigwa? Nabo buja bukola ku si ya Bagadara, iyilolile na Galilaya. Aho ufuma mu lyato upanda ha si, umanhya nanghwe ngosha umo afumile mu nzengo, uyo walali na masamva kufuma kale, atazwalile kizwalo nulu atikalaga mu numba, aliyo mu mashigila. Aho umona Yesu, uhamuka, ugwa ku butongi wakwe, uhaya na ilaka itale giki, Tuli na mhayo ki, nene na Bebe, Yesu, Ngʼwana wa Mulungu ali higulya no? Nakwikumbilija, utizuniluhya. Iki wali walagila moyo nsoso kungʼwinga munhu ngʼwenuyu; iki nghangala ningi gubyundima; nose nanghwe utungwa, alindilwe na minyololo na mapingu, nanghwe ujitina nhendele, utwalanijiwa na isamva mu bu. Yesu umuja, uhaya giki, Lina lyako uli nani? Uhaya giki, Ndi Legioni, iki masamva mingi gali gangʼwingila. Nago gungʼwikumbilija atizugalagila kuja ngʼwichongo iliti na ngelelo. Hunaho lyali lili ho idale lya ngurube ningi jikudimaga mu lugulu; nago gungʼwikumbilija agazunilije kwingila mu jenijo. Nanghwe ugazunilija. Gungʼwinga munhu uyo, gingila mu ngurube, nalyo idale lyupela na nguzu lyuholomokela ha ngegu shimu mu nyanza, lyungʼwa nhuli, lyucha. Aho badimi bubona iyo yali yitwa bupela, buja busombola mhayo uyu mu nzengo na mu chalo. Banhu bufuma buja kubona iyo yali yitwa, na bushika kuli Yesu, bunsanga munhu ngʼwenuyo masamva gangʼwingaga, igashije ku mhambala ja ngʼwa Yesu, azwalile shizwalo, na ali na masala; nabo bogoha. Benabo abali bubona mhayo uyu, bubawila gitumo akapijiwa uyo walali na masamva. Na banhu bose ba si ya Bagadara iyihelile ho bungʼwikumbilija inge mubo, iki bali budingʼwa na boba butale. Nanghwe wingila mu lyato, ushoka. Aliyo ngosha uyo masamva gangʼwingaga ungʼwikumbilija abize nanghwe, aliyo Yesu unaga, uhaya giki, Shokaga ku kaya yako, ukasombole mihayo mitale iyo Mulungu wakwitilaga bebe. Nanghwe uja ulomela mu nzengo gose mihayo mitale umo yali ili iyo Yesu waangʼwitila. Ikabiza aho Yesu ushoka, ibita lyungʼwegeleja, iki bose bubyunindila. Hunaho wiza ngosha lina lyakwe Yairo, ngʼwene walali ntale wa ibilingilo; ugwa ku mhambala ja ngʼwa Yesu ungʼwikumbilija ize mu numba yakwe; Iki walali na ngʼwana ngʼwaniki uwabyalwa umo wike, wa miaka giti ikumi na ibili, nanghwe alenda kucha. Aho ubyuja mabita gunshiteleja. Na nkima uwalasatile ngeji gwa mininga miaka ikumi na ibili, uyo wali umala sabo jakwe jose ku balaguji, uduma kupijiwa na munhu ose, Wiza hanuma yakwe, ubukuumya bukunilo wa kizwalo chakwe; na ngeji gwa mininga gakwe gukama haho na haho. Na Yesu uhaya giki, Nani uyo wanikuumya? Aho bulema bose, Petro na abo abali bali hamo nanghwe buhaya giki, Seba, mabita galikushiteleja na kukukandikija, na Bebe wahaya giki, Nani uyo wanikuumya? Aliyo Yesu uhaya giki, Munhu wanikuumya, iki namanile budula waningaga. Nkima ngʼwenuyo aho ubona atibisa, wiza alidetema, ugwa ku butongi wakwe, unsombolela mu miso ga banhu bose kulwa nguno ki wankuumya, na gitumo wapijiwa haho na haho. Nanghwe ungʼwila giki, Ngʼwana wane, timbaja ngholo, kuzunya kwako kwakupijaga, jaga mu mhola. Aho walatali ulungalunga, wiza munhu kufuma ha ngʼwa ntale wa ibilingilo, ungʼwila giki, Ngʼwana wako wachaga, utizunoja Nangi. Aliyo aho Yesu wigwa iyi, unshokeja, uhaya giki, Utizogoha; zunyaga gwike, nanghwe alapijiwa. Aho Yesu wingila mu numba atuzunilija munhu kwingila mo, ulu iti Petro na Yakobo na Yohana, na ise wa ngʼwaniki nu nina. Bose bulila shisoji na kumiila nghungu. Aliyo Wei uhaya giki, Mutalilage, atachile aliyo alishutula duhu. Nabo bunsekela no, iki bamanile giki, wachaga. Nanghwe aho wabafunya bose, udima nkono gwakwe, uhamuka, uhaya giki, Bebe ngʼwaniki, bukaga. Na moyo gwakwe gushoka, nanghwe ubuka haho na haho. Nanghwe ulagila inhiwe sha kulya. Na babyaji bakwe budedebala no; nanghwe ubalagila batizungʼwila munhu ose iyo yitagwa. Akabitana bahemba bakwe ikumi na babili, ubinha nguzu na budula higulya ya masamva gose, na kupija bulwile. Ubatuma kulomela butemi wa Mulungu, na kubapija abasatile. Ubawila giki, Mutizubucha kinhu cha mu lugendo, nulu milanga, nulu mhinda, nulu ngati, nulu feza, nulu munhu ose atizubiza na nghanjo ibili. Na numba yose iyo ngʼwingila mo, ikalagi mo, nu kwene fumagi mo. Na bose abatungʼwegeleja, aho ngʼwinga mu nzengo gwenuyo, gunghumulagi nu lububu lwa ku mhambala jingʼwe, ibize bukaniji wa kubakanilija. Nabo binga bubyubita mu mizengo, bakulomelaga evangeli na bubyupija banhu hose hose. Herode u nsugi wali wigwa iyo yose yali yitwa nanghwe, nanghwe wiganilija, iki yali yuhayiwa na bamo giki, Yohana wajukile mu bafu, Bangi giki, Eliya wilongile; bangi giki, Umo wa bahangi ba kale wajukile. Na Herode uhaya giki, Yohana nene nakamuta ntwe; aliyo ni nani Uyu nakungʼwigwaga mihayo iyi? Nanghwe ukoba kumona. Na batungʼwa aho bushoka, bunsombolela mihayo yose iyo bali bita. Nanghwe ubatwala, uja hamo nabo, bisunda heke kwipande iliti na banhu lya nzengo ugwitanwa Bethsaida. Aliyo mabita aho gumana iyi, gunondela; nanghwe ubegeleja, ulungalunga nabo ya butemi wa Mulungu, na ubapija abo bali bali na nguno ya kupijiwa. Aho limi lyali lyuheha, ikumi na babili bungʼwegela, bungʼwila giki, Lilagage ibita, baje mu mizengo na mu magunguli gabimbikanilwe ho, babone nghambi na sha kulya; iki aha tuli ngʼwipande iliti na banhu. Aliyo ubawila giki, Binhagi bingʼwe sha kulya. Aliyo buhaya giki, Biswe tuti na ya kukila migati itano na ndilo ibili, numho tuje, tukabagulile shiliwa banhu aba bose. Iki bali bali bagosha giti 5,000. Aliyo ubawila bahemba bakwe giki, Mubigashe magele, makumi atanotano. Nabo bita giko, bubigasha bose. Aho wanukula migati iyo itano na ndilo ijo ibili, ulangamila miso kwigulu, ushisungulila lubango, ushimeganya, ubinha bahemba babatengele ba ibita. Nabo bulya na biguta bose; huna bukuminga masajiwa agali gusaga, masonzo ikumi na abili. Ikabiza aho alilomba Wei wike, bahemba bakwe bali bali hamo nanghwe, na ubabuja, uhaya giki, Banhu bakunihayaga Nene ndi nani? Bushosha buhaya giki, Yohana Matija; bangi giki, Eliya; na bangi giki, Umo wa bahangi ba kale wajukile. Ubawila giki, Aliyo bingʼwe mukunihayaga ndi nani? Petro ushosha, uhaya giki, Bebe uli Kristo wa Mulungu. Ubalemeja na ubalagila batizungʼwila munhu ose mhayo gwenuyu; Uhaya giki, Ngʼwana wa munhu shingʼwigelile Wei kuluhaluhiwa na mihayo mingi, na kulengʼwa na banamhala na bagabiji batale na bandiki, na kubulagwa, na ku lushiku lwa kadatu kujuchiwa. Ubawila bose giki, Munhu ose ulu atogilwe kunilondela, ilemeje ngʼwenekele, abuche nsalaba gwakwe buli lushiku, anilondele. Iki uyo ose atogilwe kupija bupanga wakwe, alabuyagaja, na uyo ose alabuyagaja bupanga wakwe kulwa nguno yane, ngʼwene alabupija. Iki ikumelela ki munhu ulu upandika si yose, aliyo wiyagaja ngʼwenekele nulu kwijimija ngʼwenekele? Iki uyo ose ucha minala kulwa nguno yane na kulwa nguno ya mihayo yane, ngʼwenuyo Ngʼwana wa munhu nanghwe alacha minala kulwa nguno yakwe, aho aliza ngʼwikujo lyakwe, na lya ngʼwa Ise, na lya bamalaika bela. Aliyo namuwila nghana giki, Bali ho bamo abimilile aha abatalaloja kucha na hado, kushisha aho balamala kubona butemi wa Mulungu. Ikabiza hanuma ya mihayo iyi giti shiku inane, untwala Petro na Yohana na Yakobo ulinha mu lugulu kulomba. Ikabiza aho ulomba, ihanga lya bushu wakwe lyugaluka, na shizwalo shakwe shubiza shape na shilabangizu. Kuhayumanila, bagosha babili bulungalunga nanghwe, a bene Musa na Eliya. Abilonga ngʼwikujo bulungalunga mhayo gwa kucha kwakwe, uko uhaya kushikilija mu Yerusalemi. Aliyo Petro na abo abali bali hamo nanghwe butindwa tulo; aho bumala kumisha, bubona ikujo lyakwe, na bagosha benabo babili abimilile hamo nanghwe. Ikabiza aho benabo bulekana nanghwe, Petro ungʼwila Yesu giki, Seba, ya wiza biswe kubiza ho aha; tuzenge maduku adatu; limo lyako, na limo lya ngʼwa Musa, na limo lya ngʼwa Eliya; walatamanile iyo wahaya. Aho walatali uhaya mihayo iyi, lyubiza ho ilunde, lyubakundikija; nabo bogoha aho bingila ngʼwilunde. Na ilaka lyufuma ngʼwilunde, lyuhaya giki, Uyu Ngʼwana wane ntogwa, ngʼwigwagi Wei. Aho ilaka lyubiza ho Yesu ubonwa ali wiyene. Nabo bikala sele, batangʼwilile munhu ose mu shiku ijo mhayo nulu gumo gwa iyo bali buyibona. Ikabiza ku ntondo, aho bali bika mu lugulu, ibita itale lyunsungʼwanha. Na lolaga, ngosha umo ngʼwibita ubucha ilaka, uhaya giki, Nangi, nakwikumbilija unole ngʼwana wane, iki ali ngʼwana wane wabyalwa umo wike. Na lolaga, moyo gukundimaga, kuhayumanila uhamuka, nago gumfilinghanya na kufuluta ifulo, gungʼwinga na bugaganu, gungulaja. Nane nali nubikumbilija bahemba bako bagupeje, nabo buduma. Yesu ushosha uhaya giki, Bingʼwe kibyalilwe ikituzunyaga na chigomagomile, nakwikala na bingʼwe kushisha nanali, na kwiyumilija na bingʼwe? Ngʼwenhage aha ngʼwana wako. Aho atali wiza i lisamva lyuntalicha, na lyumfilinghanya. Aliyo Yesu ugulemeja moyo nsoso, na umpija nyanda, na unshosha hangi kuli ise. Bose budedebala kulwa magaka ga Mulungu. Aliyo bose aho bali batali bukumya kulwa yose iyo Yesu witaga, ubawila bahemba bakwe giki, Ibikagi mihayo iyi mu matu gingʼwe, iki Ngʼwana wa munhu uhaya kwinhiwa ko mu makono ga banhu. Aliyo batagumanile mhayo uyu, hangi gwibisile kubo, batizugwitegeleja; nabo bogoha kumuja makulu ga mhayo gwenuyo. Bubukabuka wibugilija mubo giki, Ntale mubo himba ni nani? Aho Yesu ubona wibugilija wa ngholo jabo, undima ngʼwana nigini, ungʼwimilija hihi nanghwe, Ubawila giki, Uyo ose ungʼwanukula nigini uyu mu lina lyane, wananukula Nene; na uyo ose unanukula Nene wangʼwanukula Uyo waanituma Nene. Iki uyo ali ndo mu bingʼwe bose, u ngʼwene alabiza ntale. Yohana ushosha uhaya giki, Seba, tukamona munhu alipeja masamva mu lina lyako, na biswe tukanemeja, iki atudimanaga na biswe. Na Yesu ungʼwila giki, Mutanemejage, iki uyo ati ngʼwanishi wiswe, ali ku lwande lwiswe. Ikabiza shiku ja kwanukulwa kwakwe ngʼwigulu aho jegela, ubuloleja na nguzu bushu wakwe kuja Yerusalemi. Nanghwe utuma batungʼwa ku butongi wakwe; nabo aho buja, bingila mu nzengo gwa Basamaria, banongeje nghambi. Nabo bali batungʼwanukula, kulwa bushu wakwe wali bulolelile kuja Yerusalemi. Bahemba bakwe Yakobo na Yohana aho bubona mhayo uyu, buhaya giki, Seba, utogilwe tulagile moto gugwe kufuma ngʼwigulu, kubamala benabo, gitumo Eliya akita? Aliyo Wei ugaluka, ubalemeja, uhaya giki, Bingʼwe mutamanile muli ba moyo ki. Iki Ngʼwana wa munhu atizile kubuyagaja bupanga wa banhu, aliyo kupija. Huna buja ku nzengo gungi. Ikabiza aho bajile mu nzila, munhu umo ungʼwila giki, Seba, nakukulondela hose hose uko ulaja. Na Yesu ungʼwila giki, Nyamhawa jili na miobo, na noni ja hape jili na machanzo, aliyo Ngʼwana wa munhu ati na ha kulaja ntwe gwakwe. Ungʼwila ungi giki, Nilondelage. Aliyo wei uhaya giki, Seba, unizunilije naje tame nakanjike baba. Aliyo Yesu ungʼwila giki, Balekage bafu babajike bafu babo; aliyo bebe, jaga ukakumuche butemi wa Mulungu. Ungi hangi uhaya giki, Seba, nakukulondela; aliyo unizunilije naje tame kubalaga ba ha kaya. Aliyo Yesu ungʼwila giki, Ati ho munhu igelelilwe butemi wa Mulungu uyo wadimaga igembe lya kulima na ngʼombe, hanuma ulola ya kunuma. Hanuma ya mihayo iyi, Seba wali ubatuula ho hangi makumi mpungati, ubatuma babili babili, batonge ku butongi wakwe, ku buli nzengo na buli ipande uko uhaya kuja Ngʼwenekele. Ubawila giki, Magesa gene mingi aliyo bagesi bene bagehu: kulwa iyo ngʼwikumbilijagi Seba wa magesa abatume batumami mu magesa gakwe. Jagi lulu: lolagi, namutuma giti bana ba ngholo hagati ya mhuge. Mutizubucha kabogoshi, nulu mhinda, nulu shilatu, hangi mutizungisha munhu ose mu nzila. Numba yose iyo ngʼwingila mo, hayagi tame giki, Mhola ibize mu numba iyi: Na ulu ali mo ngʼwana wa mhola, mhola yingʼwe ikwikala kuli wei; aliyo ulu iti chene, mhola yingʼwe ikushoka ku bingʼwe hangi. Ikalagi mu kaya yeniyo, mulyage na mungʼwage isho bakungʼwinha; iki ntumami igelelilwe mhela yakwe. Mu-tizusamasama kuja numba yingi na yingi. Na nzengo gose uyo ngʼwingila mo, nabo bungʼwanukula, lyagi isho shutengelwa mu butongi wingʼwe. Bapijagi balwile abali mo, bawilagi giki, Butemi wa Mulungu wangʼwegelaga bingʼwe. Aliyo nzengo gose uyo ngʼwingila mo, nabo batungʼwanukula, jagi mu mapalapala gago, muhaye giki, Nu lububu lwa nzengo gwingʼwe ulwatudamilaga, twamugunghumulila bingʼwe, aliyo nahene managi mhayo uyu giki, butemi wa Mulungu wangʼwegelaga. Namuwila giki, Ilabiza hambuhambu ku Sodoma kwiyumilija mu lushiku lwenulo kutinda ku nzengo gwenuyo. Ulasangwa bebe Korazini! Ulasangwa bebe Bethsaida! iki shitile sha budula isho shali Shitwa mu bingʼwe ulu ni shali Shitwa mu Turo na Sidoni, ni bali boya kale, bigashije mu mabu, bazwalile magunila. Aliyo ilabiza hambuhambu ku Turo na Sidoni kwiyumilija mu kulekanyiwa nsango kutinda ku bingʼwe. Na bebe, Kapernaumu, uwagunguhiwa kushisha ngʼwigulu, uladohelejiwa kushisha kulimu. Uyo ungʼwigwa bingʼwe, ngʼwene unigwa Nene; na uyo umulema bingʼwe, ngʼwene unilema Nene; na uyo unilema Nene, ngʼwene unema Uyo waanituma. Na benabo makumi mpungati bushoka na buyegi, buhaya giki, Seba, na masamva gali hasilili ya budula wiswe mu lina lyako. Nanghwe ubawila giki. Nakamona Shetani aligwa kufuma ngʼwigulu giti lulabi. Lolagi, nangʼwinha bingʼwe budula wa kupanda nzoka na nghomi, hangi wa higulya ya nguzu jose ja ngʼwanishi, hangi kiti ho kinhu kilangʼwita kibi. Aliyo nahene mutizuyegela mhayo uyu giki, mioyo ili hasilili ya budula wingʼwe; aliyo yegagi iki mina gingʼwe gaandikwa ngʼwigulu. Ngʼwikanza lyenilo Yesu uyega no muli Moyo, uhaya giki, Nakulumba, Bebe, Baba, Seba was igulu na si, iki uka-babisila mihayo iyi a balalanghanu na ba masala, na uyikundula ku banigini: ah chene, Baba, iki giko yali yukutoga. Ubagalukila bahemba bakwe, uhaya giki, Yose ninhiwagwa na Baba; na ati ho uyo amanile Ngʼwana aliyo Baba wike: hangi ati ho uyo amanile Baba aliyo Ngʼwana wike, na uyo ose Ngʼwana atogilwe kunkundula. Na ubagalukila bahemba bakwe, ubawila mu kwigeniha giki, Gali ga lubango miso agakubonaga iyo mukubonaga. Iki namuwila giki, Bahangi bingi na batemi bali batogilwe kuyibona iyo mukubonaga bingʼwe, aliyo bali batuyibona; na kuyigwa iyo mukwigwaga bingʼwe aliyo bali batuyigwa. Na nangi umo wa shilagilo akimila, ungema, uhaya giki, Nangi, nite ki ningile mu bupanga butushila? Ungʼwila giki, Yaandikwa kinahe mu shilagilo? wasoma kinahe? Ushosha uhaya giki, Ulantogagwe Seba Mulungu wako na ngholo yako yose, hangi na bupanga wako bose, hangi na nguzu jako jose, hangi na maganiko gako gose: na kuntogwa nzenganwa ngʼwiyo gitumo witogelilwe ngʼwenekele. Nanghwe ungʼwila giki, Watungilijaga; itaga giko, nangho ulabiza na bupanga. Aliyo iki wei walatogilwe kwiyinha butungilija, ungʼwila Yesu giki, Na nzenganwa ngʼwichane ni nani? Yesu ushosha uhaya giki, Munhu umo akafuma Yerusalemi utulumenha kuja Yeriko, wifumbukijiwa na basambo, bunzuja shizwalo shakwe, bungulaja, buja, buneka ali mandetendete. Kwita giki, ngabiji umo utulumenha mu nzila yeniyo, aho umona, ubitila ku mhelo. Nawi nanghwe giko, uyo walali ngʼwipande lyenilo, aho ushika, umona, ubitila ku mhelo. Aliyo muna Samaria umo mu lugendo ushika aho ali; aho umona, unsatwa; Na ungʼwegela, untunga malonda gakwe, ungʼwitila maguta na minzi ga mizabibu, undamija ha nzobe yakwe, ungʼwenha ku numba ya bageni, unabila. Ku ntondo aho ubuka kuja, usola shilingi ibili, ungʼwinha ngʼwenekele numba ya bageni, ungʼwila giki, Nabilage uyu, na icho chose ukufunya cha kukilanya, nene ngʼwenekele nakukukuulila aho nakushoka. Wabona kinahe lulu, mu benabo badatu nani walali nzenganwa ngʼwiye wa ngʼwenuyo uwali wifumbukijiwa na basambo? Uhaya giki, Uyo akanchila kigongo. Na Yesu ungʼwila giki, Jaga, nangho wite chene. Ikabiza aho bajile, wingila mu nzengo gumo; na nkima umo lina lyakwe Martha ungʼwanukula mu numba yakwe. Nanghwe walali na ngʼwana wa ngʼwawe, lina lyakwe Mariamu, uyo wali igashije ku mhambala ja ngʼwa Yesu, udegeleka mhayo gwakwe. Aliyo Martha wali wita iyanga kulwa kwinhilija kwingi; uja kuli Wei, uhaya giki, Seba, utukalalagwa iki ngʼwana wa ngʼwiswe wanilekanijaga kwinhilija niyene? Ngʼwilage lulu, anigunane. Aliyo Yesu ushosha ungʼwila giki, Martha, Martha, bebe wikoyakoya na winojanoja na mihayo mingi. Aliyo mhayo gumo gwike gugongilwe kwitwa; na Mariamu wakomaga ngabo gwa wiza, uyo atalagwingijiwa. Ikabiza aho ulomba ngʼwipande limo, aho oya, umo wa bahemba bakwe ungʼwila giki, Seba, tulangage biswe kulomba, gitumo Yohana nanghwe wali ubalanga bahemba bakwe. Ubawila giki, Aho ngʼulomba hayagi giki, Siswe uli ngʼwigulu, lina lyako likujiwe; butemi wako wize, iyo utogilwe yitwe, mu si giti ngʼwigulu. Twinhage buli lushiku migati yiswe ya kutwigela. Utulekeje shibi shiswe; iki na biswe tukunekejaga buli munhu ose uyo ali na bugasa ku biswe: utizututwala mu kugengʼwa; aliyo utupije muli uyo mi. Ubawila giki, Nani mu bingʼwe uyo ali na nwani ngʼwiye, ulu uja kuli wei bujiku hagati, na ungʼwila giki, Nwani ngʼwichane, nigobishage migati idatu, Iki nwani ngʼwichane ngʼwanigenihaga afumile mu lugendo, nane nati na kinhu cha kuntengela. Na uyo ali mu numba ushosha uhaya giki, Utizunikoyakoya; haha luwigi lulugalile, na bana bane balalaga hamo na nene ha bulili, natudula kubuka kukwinha. Namuwila giki, Nulu atubuka kungʼwinha kulwa ali nwani ngʼwiye, aliyo kulwa kugumiila kwakwe akubuka na kungʼwinha yose iyo wayigongela. Na Nene namuwila giki, Lombagi na mukwinhiwa; kobagi na mukubona; komagulagi na mukwigulilwa. Iki buli munhu uyo ulomba, wanukula; na uyo ukoba, ubona; na uyo ukomagula, akwigulilwa. Nani mu bingʼwe uyo ali ise, ulu ngʼwana wakwe unomba ngati, akungʼwinha iwe? Nulu unomba ndilo, ha lwande lwa ndilo akungʼwinha nzoka? Nulu unomba igi, akungʼwinha nghomi. Nahene ulu bingʼwe aba muli ba bubi, mumanile kubinha bana bingʼwe shinhu sha wiza, angu, Singʼwe ali ngʼwigulu atutinda no kubinha Moyo Ngʼwela a benabo abunomba. Na wali ulipeja isamva, nalyo lyali lili lya kimumu. Ikabiza giki, aho isamva lyinga, uyo walali kimumu ulungalunga, na mabita gukumya. Aliyo bamo buhaya giki, Akupelaga masamva mu budula wa Beelzebuli, ntale wa masamva. Bangi bungema, bukoba kimanikijo cha kufuma ngʼwigulu. Aliyo iki umana maganiko gabo, ubawila giki, Buli butemi uwilekanya wenekele, wiyita dalali; numba iyilekanya yenekele, yugwa. Ulu Shetani nanghwe wilekanya ngʼwenekele, butemi wakwe bukwimila kinahe? Iki bingʼwe mulihaya giki, Nene nakupejaga masamva mu budula wa Beelzebuli. Aliyo Nene ulu nakugapejaga masamva mu budula wa Beelzebuli, bana bingʼwe bakugapejaga mu budula wa ngʼwa nani? Kulwa iyo, boi bakubiza balekanya bingʼwe. Aliyo Nene ulu nakugapejaga masamva na lwala lwa Mulungu, huna lulu butemi wa Mulungu wangʼwiziila bingʼwe. Aho munhu wa nguzu itungile shilanga akulindilaga kaya yakwe, shikolo shakwe shili mhola: Aliyo wa nguzu kutinda aho ungʼubukila na umpyena, untagija shilanga shakwe shose isho walashisanije, ugabanya shasonzwa shakwe. Uyo ati ku lwande lwane ali ngʼwanishi wane: na uyo atukumingaga hamo na Nene usalanghanya. Moyo nsoso aho gungʼwinga munhu, gubita mu mapande agati na minzi gukobakoba ha kwifulila; aho gutubona, guhaya giki, Nakushoka mu numba yane iyo nali ninga mo. Aho gushika ko, guyisanga ipyagulile na imalilile. Hunaho guja gwenha mioyo yingi mpungati ya bubi kutinda goi, nayo yingila na yikala mo; nghalilo ya munhu ngʼwenuyo yubiza ya bubi kutinda u wandijo. Ikabiza aho ulungalunga mihayo iyi, nkima umo ngʼwibita, uhayila higulya ungʼwila giki, Ili ya lubango nda iyo yali yukubucha, na mbele ijo wali ongha. Aliyo Wei uhaya giki, Aliyo kutinda, bali ba lubango abakwigwaga mhayo gwa Mulungu na bugudima. Aho mabita gali gibilinga gishita di, akandia kuhaya giki, Kibyalilwe iki kili cha bubi; kikukobaga kimanikijo, aliyo kitinhiwa kimanikijo ulu iti kimanikijo chene nghangi Yona. Iki giti Yona wali ubiza kimanikijo ku bana Nineve, Ngʼwana wa munhu nanghwe alabiza chene ku kibyalilwe iki. Ntemi nkima wa dakama alimila mu kulekanyiwa nsango hamo na banhu ba kibyalilwe iki, alabenheleja kubona nsango; iki akiza kufuma ku mhelo ja si kwigwa masala ga ngʼwa Solomoni; na lolaga, ntale wa kunkila Solomoni ali ho aha. Banhu ba Nineve balimila mu kulekanyiwa nsango hamo na kibyalilwe iki, na balachenheleja kubona nsango; iki bali boya kuhva kulomela kwa ngʼwa Yona, na lolaga, ntale wa kunkila Yona ali ho aha. Ati ho munhu aho ubacha tala, uyituula ngʼwipande lya kwigeniha, nulu kuyigubanikija na ikililijo, aliyo uyituula ha ikindikilo lya tala, abingila mo babone isana. Tala ya mili yene liso: aliyo aho liso lyako Usonga wima, mili gwako gose gukubizaaka isana; aliyo ulu liso lyako lili lya bubi, mili gwako gose gukubiza giiti. Kulwa iyi ilanghanage i lisana ilili mo muli bebe Utizubiza giiti. Aliyo ulu mili gwako gose gukubizaaka isana, nago guti na lwande ululi na giiti, gose gukubizaaka isana, gitumo tala ikukumulikilaga na isana lyayo. Aho walatali ulungalunga Mfarisayo umo ungʼwitana kulya ikule nanghwe; nanghwe wingila wigasha ku shiliwa. Aliyo Mfarisayo aho ubona iyo, ukumya iki atakalabile aho atali kulya. Aliyo Seba ungʼwila giki, Giisi, bingʼwe Bafarisayo mukojaga kunze ya kikombe na sahani, aliyo mugati yingʼwe ngʼokalile bunyecha na buhunga. Bingʼwe babuuli; Uyo akabeja kunze, angu, walatabegije nu mugati? Aliyo funyagi sha kwinha shingʼwe sha mu isho sha mugati, na lolagi, shose shikubiza shela ku bingʼwe. Aliyo ngʼwasangwa, bingʼwe Bafarisayo, iki mukufunyaga imo ya ngʼwikumi ya nana na mchicha na buli ikubi, aliyo kulekanya mu wima na butogwa wa Mulungu mukushihungaga; yeniyi shali shingʼwigelile kuyita, na yeniyo yingi kuyileka yaya. Ngʼwasangwa bingʼwe Bafarisayo, iki mutogilwe masumbi ga ku butongi mu mabilingilo, na kugishiwa mu nghungʼwano. Ngʼwasangwa bingʼwe, bandiki na Bafarisayo, bibeleja, iki ngʼwikolile na mashigila agatabonagwa, na banhu abakushiminzilaga higulya yago batagitegelegije. Umo wa balangi ba shilagilo ushosha, ungʼwila giki, Nangi, mu kuhaya giko, ngʼwatudalaha na biswe. Aliyo Wei uhaya giki, Ngʼwasangwa na bingʼwe, balangi ba shilagilo, iki mukubasesejaga banhu miligo iyili kilambu kubuchiwa, na bingʼwe benekele mutuyichegenya na lwala lumo lwingʼwe. Ngʼwasangwa bingʼwe, iki mukuzengaga mashigo ga bahangi, aliyo bakulugenji bingʼwe bubabulaga. Giko mukushikanilaga na kushizunilija shitile sha bakulugenji bingʼwe; iki boi bali bubabulaga nghana, na bingʼwe mukuzengaga mashigo gabo. Kulwa iyo, masala ga Mulungu nago gakahaya giki, Nalabatumila bahangi na batungʼwa, na balababulaga bamo babo na kubapeja. Gakowe kuholwa ku kibyalilwe iki mininga ga bahangi bose agali gusejiwa kufuma kubumva kwa si; Kufuma ku mininga ga ngʼwa Abeli kushisha ku mininga ga ngʼwa Zakaria uyo akabulagwa hagati ya ngʼwalilo na hekalu. Ngʼwasangwa bingʼwe, balangi ba shilagilo, iki ngʼwalwingije lufungulo lwa bumani, bingʼwe benekele mutingilile, na abali buhaya kwingila ngʼwabajigije. Aho walatali ulungalunga nabo mihayo iyi, bandiki na Bafarisayo bandia kungʼwikobya na nguzu, na kunyombyanyombya mihayo mingi; Buntega malege, bukoba kudima mhayo ugulafume mu nomo gwakwe, bamule. Ngʼwikanza lyenilo aho banhu shiku na shiku bibilingila hamo, kushisha bipandagila, Wei wandia kubawila bahemba bakwe kwandia giki, Ilanghanagi ku kibimbya cha Bafarisayo, i chene wibeleja. Iki guti ho mhayo ugukundikigije, ugutalakundulwa, nulu uyo gubisile ugutalamanika. Kulwa iyo, yose iyo ngʼwahaya mu giiti, iligwiwa ngʼwisana; na iyo ngʼwalungalunga mu kutu ku mbele ya numba, ilalomelwa higulya ha numba. Nene namuwila bingʼwe banwani bane giki, Mitizubogoha abubulaga mili, na hanuma yaho gubagaya gwa kwita kutinda ho. Aliyo nakungʼolekeja uyo mulangʼogohage: Ngʼogohagi Uyo, aho wamala kubulaga, ali na budula kuponya mu Gehena: ali chene, namuwila giki, Ngʼogohagi Ngʼwenuyo. Angu, nzwi itano jitajinjiwagwa na senti ibili? aliyo nulu imo yajo itibilagwa mu miso ga Mulungu. Aliyo nulu nzwili ja mitwe yingʼwe najo jibalilwe jose. Kulwa iyo, mutizogoha: bingʼwe mujikilile no nzwi ningi? Nene namuwila giki, Uyo ose wanizunya na kunitambula ku butongi wa banhu, ngʼwenuyo Ngʼwana wa munhu nanghwe alantambula ku butongi wa bamalaika ba Mulungu; Aliyo uyo ose wanilema ku butongi wa banhu, ngʼwenuyo alalengʼwa ku butongi wa bamalaika ba Mulungu; Na uyo ose unghaya kibi Ngʼwana wa munhu, alalekejiwa; aliyo uyo unduka Moyo Ngʼwela, ngʼwenuyo atalalekejiwa. Aliyo aho balamutwala mu mabilingilo na ku butongi wa basugi na ba budula, mutizikoyakoya umo mulilwililila, nulu iyo mulahaya; Iki Moyo Ngʼwela alamulanga ngʼwikanza lyenilo iyo yingʼwigelile kuhaya. Umo wa ngʼwibita akangʼwila giki, Nangi, ngʼwilage ngʼwana wa ngʼwiswe kugabanha wingiji na nene. Aliyo Wei ungʼwila giki, Munhu bebe, nani wanituula ho kubiza nekanya nulu nyanguji ku bingʼwe? Nanghwe ubawila giki, Ilanghanagi, ngʼwilinde ku kwikumva; iki bupanga wa munhu buti mo mu wingi wa shikolo isho ali nasho. Ubawila kigemenghejo, uhaya giki, Ngunda gwa munhu nsabi umo guponeka wingi. Widedekanya mu moyo gwakwe, uhaya giki, Nite kinahe, iki nati na ha kubikila matwajo? Uhaya giki, Nakwita giki, nakusambula mabikilo gane, nakuzenga gangi matale kutinda, na umo nakubika magesa gane na sha wiza shane. Huna lulu nakubuwila bupanga wane giki, Bupanga wane, bebe uli na sha wiza shingi shabikagwa sha miaka mingi, ifulage, lyaga, ngʼwaga, uyege. Aliyo Mulungu ungʼwila giki, Mbuuli bebe, bujiku ubu bupanga wako bakubulomba hali bebe; na isho washilongije shikubiza sha ngʼwa nani? Giko na ngʼwenuyo akwibikilaga sabo, aliyo ati nsabi kuli Mulungu. Ubawila bahemba bakwe giki, Kulwa nguno iyi, namuwila giki, Mutizikoyela bupanga wingʼwe giki, Mukulya ki; nulu mibili yingʼwe giki, Mukuzwala ki. Ambu, bupanga bukilile shiliwa, nago mili gukilile shizwalo. Iganikagi ku makungulu giki, gatabibaga mbiyu, nulu gatagesaga, nago gati na ifuma nulu ibikilo, na Mulungu ugalisha. Na bingʼwe mujikilile noni himba nghangala jinga? Nani mu bingʼwe mu kwikoyela wadula kongeja nkono gumo ku bulihu wakwe? Kulwa iyo, ulu mutuguduja nulu mhayo ndo, mukwikoyelaga iyo yingi ni buli? Iganikagi ku mabonji gitumo gakakulaga; gatatumamaga, nulu gatalukaga; aliyo namuwila giki, Solomoni ngʼwikujo lyakwe lyose walatuzwalichiwa giti limo lyago. Aliyo ulu Mulungu ugazwalicha giko maswa ga kwitogolo agali ho lelo, na ntondo guponyiwa mu liko, angu, atungʼwitila kutinda no, bingʼwe ba kuzunya kudo? Na bingʼwe mutizukoba icho mukulya nulu icho mukungʼwa, nulu mutizubuchabuchiwa. Iki bana mahanga ba si bakakobaga ishi shose; aliyo Singʼwe amanile giki, Shingʼwigelelilwe ishi shose. Aliyo hambuhambu kobagi butemi wa Mulungu, na ishi shose mulongegejiwa. Mutizogoha, bingʼwe idale ido, iki Singʼwe wayega kungʼwinha bingʼwe butemi. Jinjagi isho muli nasho, mufunye sha kwinha; ibegejagi tubogoshi tutukuluhala, busabi ubutalashila ngʼwigulu, uko ngʼwibi ategela, nulu mbalabapu jitukenagula. Iki busabi wingʼwe uko buli, ngholo yingʼwe nayo ikubiza ho. Ikalagi ngʼwitungile mikimbili yingʼwe, na tala jingʼwe jibakile: Na bingʼwe mubize giti banhu bakunindilaga Seba wabo, aho alashoka kufuma bukombe, ibize aho wiza na kukomagula, banugulile haho na haho. Bali ba lubango basese abo, Seba wabo alabasanga bali miso aho aliza. Nghana namuwila giki, Alitunga ngʼwenekele, na kubigasha ku shiliwa, nanghwe alabegela kubinhilija. Na ulu wiza mu bulindi wa kabili, nulu wiza mu bulindi wa kadatu, na ubasanga chene, bali ba lubango basese benabo. Aliyo managi mhayo uyu, ulu namugi ni walamanile ngʼwikanza ki ngʼwibi akwizila mo, ni wali wikala miso, ni walatuleka numba yakwe kudululwa. Kulwa iyo ningʼwe bizagi mumalilile; iki ngʼwikanza ilo mutiganikilaga Ngʼwana wa munhu aliza. Petro ungʼwila giki, Seba, ulilungalunga kigemenghejo iki ku biswe, nulu ku bose? Seba uhaya giki, Miki ngʼwishigwa na wa masala ali nani lulu, uyo seba wakwe alantuula ho kubiza nindi wa kaya yakwe, kubinha ngelo gwa shiliwa ngʼwikanza lyasho? Ali wa lubango nsese ngʼwenuyo, seba wakwe aho aliza alansanga akwitaga giko. Nghana namuwila giki, Alantuula higulya ya shikolo shakwe shose. Aliyo nsese ngʼwenuyo ulu uhaya mu ngholo yakwe giki, Seba wane wapilaga kwiza, na wandia kubatula basese, bagosha na basese bakima, na kulya na kungʼwa na kukolwa shikoji. Seba wa nsese ngʼwenuyo aliza mu lushiku ulo atiganikaga, na mu saa iyo atamanile, nanghwe alantandula hagati, alantuulila ngabo gwakwe hamo na batuzunya. Nsese ngʼwenuyo walamanile iyo seba wakwe atogilwe, na walatamalilile ngʼwenekele, nulu kwita gitumo iyo atogilwe, ngʼwene alatulwa mingi. Aliyo uyo walatamanile, na wita iyo igelelilwe milanga, ngʼwene alatulwa migehu. Uyo ose winhiwa shingi, alakowa shingi; na uyo bali bamikila shingi, ngʼwenuyo balanomba shingi kutinda. Nakiza kuponya moto mu si, na ulu haha gwabakaga natogilwe ki? Aliyo ndi na kubatijiwa nabatijiwe nako, na Nene napimiila kinahe kushisha kulashikilijiwa. Ngʼwiganika giki, Nali niza kwinha mhola mu si? Namuwila giki, Yaya; aliyo kulekana. Iki kufuma haha bakubiza ho batano mu kaya imo, balekanile, badatu babahangija babili, babili babahangija badatu. Bakulekana ise kunghangija ngʼwana wakwe; na ngʼwana kunghangija ise; nina kunghangija ngʼwana wakwe ngʼwaniki; na ngʼwana ngʼwaniki kunghangija nina; nina buko kunghangija ngʼwinga wakwe, na ngʼwinga kunghangija nina buko. Ugawila na mabita giki, Aho ngʼwabona ilunde lililinha ku ngʼweli, haho na haho ngʼwahaya giki, Mbula iliza; na yubiza chene. Na aho nyaga gwa dakama guhemba, ngʼwahaya giki, Bukubiza ho busebu no; na yubiza chene. Bingʼwe bibeleja, mumanile kupima chikolile cha si na igulu; aliyo mutupimaga ikanza ili ni buli? Nulu mu mioyo yingʼwe benekele mutalekanyaga iyo ya butungilija ni buli? Iki aho ujile na ngʼwanishi wako kuli nsugi, komelaga kutungulwa nanghwe aho mutali muli mu nzila; atizukuduta ku butongi wa nekanya, nanghwe nekanya ukwinha ko kuli nshilikale, na nshilikale ukutunga mu jela. Nakuwila giki, Utalinga mo na hado kushisha ulamala kufunya nulu senti ya kumalija. Ngʼwikanza lyenilo bali bali ho bamo bunsombolela ya bana Galilaya, abo Pilato akagasangilija mininga gabo na shitambo shabo. Na Yesu ushosha uhaya giki, Ngʼwiganika giki, Bana Galilaya benabo bali bubiza ba shibi kutinda bana Galilaya bangi bose, iki bali bunyajiwa giko? Namuwila, Iti giko yaya; aliyo ulu mutoya, bingʼwe bose mulayagala giko. Nulu benabo ikumi na banane numba ndihu ya Siloamu ikabagwila, yubabulaga, ngʼwiganika benabo bali bigelelwa nsango kutinda banhu bose bazengile Yerusalemi? Namuwila, Iti giko yaya; aliyo ulu mutoya, bingʼwe bose mulayagala giko. Uhaya kigemenghejo iki giki, Munhu umo walali na nti ntini guhambilwe mu ngunda gwakwe gwa mizabibu, aka ja kukoba mo matwajo, na walatugabona. Ungʼwila nindi wa mizabibu, Lolaga, haha yashika miaka idatu nakwizaga kukoba matwajo ku nti ntini uyu, natabonaga yaya: gubutage, gukukenagulaga na si ni buli? Aliyo ushosha ungʼwila giki, Seba, gulekage na ngʼwakono, kushisha nagulimile ho na kugutuulila mbolela. Nago ulu gut waja matwajo, nahene; aliyo ulu gututwaja, hanuma ulagubuta. Akabyulanga mu limo lya mabilingilo ha Sabato. Na lolaga, walali ho nkima ali na moyo gwa bugokolo miaka ikumi na inane, agunghumile, atudula kugololoka gete. Aho Yesu umona, ungʼwitana, ungʼwila giki, Mayu bebe, watungulagwa bugokolo wako. Untuulila ho makono, haho na haho ugololoka na unkuja Mulungu. Aliyo ntale wa ibilingilo ushosha, adakile iki Yesu wampijaga ha Sabato, ulungalunga na ibita giki, Jili ho shiku itandatu, mujo banhu bigelile kutumama milimo, izilagi lulu mu jenijo kupijiwa, aliyo ha Sabato yaya. Aliyo Seba unshokeja, uhaya giki, Bebe ngʼwibeleja, angu, buli munhu mu bingʼwe atakungulaga ngʼombe yakwe nulu nzobe mu numba yaho ha Sabato, na uyitwala kuyingʼwisha? Aliyo ngʼwenuyu iki ali nshike wa ngʼwa Abrahamu, uyo Shetani waantunga haha miaka ikumi na inane, angu, atigelelilwe kutungulwa mu butungwa ubu ha lushiku lwa Sabato? Aho waluhayaga mihayo iyi, bose abilwisha nanghwe bugoka; na ibita lyose lyuyegela mihayo yose ya ikujo iyo akuyitaga. Huna uhaya giki, Butemi wa Mulungu wikolile na ki? hangi nawikolanije na ki? Wikolile na kabeke ka karadali, ako munhu ukasola, ukaponya mu ngunda gwakwe, nako kuzwa, kubiza nti ntale, na noni ja hape jubyulala mu matambi gago. Uhaya hangi giki, Butemi wa Mulungu nawikolanije na ki? Wikolile na kibimbya, icho nkima ukisola, ukibisa mu ngelekelo idatu ja busu, kushisha bose bubimbiwa. Na wali upindilapindila akulangaga mu mizengo mitale na mido, ajile Yerusalemi. Munhu umo ungʼwila giki, Seba, abapijiwa, himba, bagehu? Aliyo ubawila giki, Igaganijagi na nguzu kwingila mu mita mpine; iki namuwila giki, Banhu bingi balakoba kwingila, aliyo bataladula. Kufuma aho namugi alamala kubuka, na kulugala luwigi, na bingʼwe ngʼwandia kwimila hanze na kukomagula ku luwigi, ngʼuhaya giki, Seba, Seba, twigulilage; nanghwe ushosha, umuwila giki, Natamumanile uko ngʼwafuma: Hunaho mulandia kuhaya giki, Twaalyaga na kungʼwa ku butongi wako, na waalangaga mu mapalapala giswe. Nanghwe alahaya giki, Namuwila giki, Natamumanile uko ngʼwafuma; ingagi hali Nene, bingʼwe bose biiti ba buti butungilija. Hunaho kulabiza ho kulila shisoji na kushelanya mino, aho mulababona Abrahamu, na Isaaka, na Yakobo, na bahangi bose mu butemi wa Mulungu, aliyo bingʼwe ngʼwaponyiwagwa hanze. Nabo baliza kufuma kiya, na ngʼweli, na ibano, na dakama, baligasha mu butemi wa Mulungu. Na lolaga, bali ho ba kunuma balabiza ba kwandia, hangi bali ho ba kwandia balabiza ba kunuma. Lwise lwene Bafarisayo bamo bungʼwegela, bungʼwila gild, Ingaga kunu uje kungi, iki Herode atogilwe kukubulaga. Nanghwe ubawila giki, Jagi mukangʼwile nyamhawa ngʼwenuyo giki, Lolaga, nakupejaga masamva hangi nakukalichaga kupija lelo na ntondo, na ha lushiku lwa kadatu nakushikanyiwa. Aliyo shinigelile kushiminza lelo na ntondo na ntondo bungi; iki itudulika nghangi kubulagilwa hanze ya Yerusalemi. Bebe Yerusalemi, Yerusalemi, ukababulagaga bahangi, na ukabapondaga mawe abo batungʼwa kuli bebe; himba nghangala jinga nali natogilwe kubilinga bana bako giti ngoko ikukumingaga tuzwiyo twayo mu manana gayo, aliyo bingʼwe ngʼwali mutatogilwe. Lolagi, numba yingʼwe ngʼwalekelwa nsaka; namuwila nghana giki, Mutalanibona kushisha ikanza ilo aho mulahaya giki, Ali wa lubango uyo izile mu lina lya Seba. Ikabiza aho wali wingila mu numba ya ntale umo wa Bafarisayo ha Sabato kulya shiliwa, buntega malege. Na lolaga, walali ho munhu umo ku butongi wakwe asatile safula ya kududuma. Na Yesu ushosha ubawila balangi ba shilagilo na Bafarisayo, uhaya giki, Angu, ilagilile kupija ha Sabato? Aliyo boi bufulika du. Huna undima, umpija, unaga. Na ushosha, ubawila giki, Nani mu bingʼwe ali na nzobe nulu ngʼombe, igwilile mu lwinzi, atuyinja haho na haho ha lushiku lwa Sabato? Nabo buduma kunshokeja mihayo iyi. Aho ubona gitumo abali bulalikwa bitangija masumbi ga butale, ulungalunga nabo kigemenghejo, ubawila giki, Aho ulalikwa na munhu ku bukombe, utizigasha kwisumbi lya butale, itizubiza hamo ali ho uyo wa ikujo kutinda bebe walalikwa nanghwe. Na uyo wamulalika bebe na wei, wiza kuli bebe, ukuwila giki, Ungʼwingile uyu; hunaho wandia kusola isumbi lya ku nghalikijo, wagokaga. Aliyo aho ulalikwa, jaga ukigashe kwisumbi lya ku nghalikijo, ibize giki, aho wiza uyo wakulalika, akuwile giki, Nwani wane, egelaga kunu higulya; hunaho ukubiza na ikujo mu miso ga bose abigashije nangho ku shiliwa. Iki buli munhu ose uwikumilija ngʼwenekele aladohelejiwa; na uyo widoheleja ngʼwenekele akukumilijiwa. Hangi ungʼwila uyo uwanalika giki, Aho ubeja shiliwa sha kwikula nulu sha kulagila, utizubitana banwani biyo, nulu bana ba ngʼwingʼwe, nulu baduguyo nulu bazenganwa biyo basabi, giki, batizukulalika bebe hangi, na kukukuulila. Aliyo aho ubeja sha buhondo, ubalalike bakunese, na balema, na bachigiji, na baboku; Na bebe ukubiza na lubango; iki boi bati nasho sha kukukuulila, iki ulakuulilwa mu bujuko wa batungilija. Umo wa benabo bali bigashije hamo nanghwe ku shiliwa, aho wigwa iyo, ungʼwila giki, Ali wa lubango uyo alalya shiliwa mu butemi wa Mulungu. Wei ungʼwila giki, Munhu umo akabeja sha kulagila sha buhondo na ubalalika bingi. Untuma nsese wakwe ngʼwikanza lya kulagila kubawila abali bulalikwa giki, Nzugwi, iki shose shilongije. Nabo bose bandia na moyo gumo kwiyandayanda, balekelwe. Wa kwandia ungʼwila giki, Nagulaga ilale, nane shinigelile kuja kulilola; nakwikumbilija nilekage. Na ungi uhaya giki, Nene nagulaga nziku ikumi ja kutumama, nane naja kujigema; nakwikumbilija nilekage. Nu ungi uhaya giki, Nene nantolaga nkima, kulwa mhayo uyu natudula kwiza. Aho nsese ngʼwenuyo ushoka, unsombolela seba wakwe mihayo iyi. Hunaho namugi usaya, ungʼwila nsese wakwe giki, Jaga wangu mu mapalapala, na mayila ga nzengo, ubenhe kunu bakunese, na balema, na bachigiji, na baboku. Huna nsese uhaya giki, Seba, yitagwa gitumo walagila, na hatali ho ngʼwanya. Seba ungʼwila nsese giki, Jaga ku nzila nyawagendwa na ku mapanda ubahadike kwingila, numba yane yizule. Iki namuwila giki, Bagosha benabo abali bulalikwa batalaloja sha buhondo shane, nulu umo yaya. Hunaho mabita matale gubyuja hamo nanghwe; ugaluka, ubawila banhu giki, Munhu ulu wiza kuli Nene, na atunkolwa ise, na nina, na nke, na bana, na bana ba ngʼwawe, bagosha na bakima, hangi nu bupanga wakwe ngʼwenekele, atudula kubiza nghemba wane; Hangi uyo ose atubuchaga nsalaba gwakwe, na kunilondela, atudula kubiza nghemba wane. Iki nani mu bingʼwe ulu atogilwe kuzenga numba ndihu, atigasha tame kubala mpango gwayo, ulu ah nasho sha kuyimala? Himba ulu wamala kuzenga musingi na uduma kuyimala, bose abuyibona bandia kumbyeda, Buhaya giki, Munhu uyo akandia kuzenga, uduma kuyimala. Nulu ntemi nani ulu ajile kulwisha bulugu na ntemi ungi, atigasha tame kulomana mihayo, ulu wadula na bashilikale 10,000 kumanhya na uyo izile kwilwisha nanghwe na bashilikale 20,000? Aliyo ulu itudulika, aho atalali kule no, utuma banamhala, ubuja nzila ya mhola. Giko lulu, munhu ose mu bingʼwe uyo atilecha ngʼwenekele shose isho ali nasho, atudula kubiza nghemba wane. Munu gwene gwa wiza, aliyo ulu munu gusuka gukunoniwa na ki? Gutubela kutuulwa nulu mu si nulu mu mbolela; buguponya hanze. Uyo ali na matu ga kwigwa, leka igwe. Hunaho batobisha bose, na ba shibi bubyungʼwegela kundegeleka; Bafarisayo na bandiki buduguma buhaya giki, Ngʼwenuyu akubegelejaga ba shibi, hangi akulyaga nabo. Ubawila kigemenghejo iki, uhaya giki, Munhu nani mu bingʼwe uyo ali na ngholo igana, ulu ujimija imo, atujileka ijo makumi kenda na kenda mu bu, uyikubija iyijimilile, kushisha ayibone? Nanghwe aho uyibona, wibucha ha mabega gakwe, akuyegaga. Aho ushika kaya, ubitana banwani biye na bazenganwa biye, ubawila giki, Yegagi hamo na nene iki nibonaga ngholo yane iyali yajimilile. Namuwila giki, Kulabiza kuyega ngʼwigulu giko kulwa munhu wa shibi umo uyo oya, kutinda kulwa batungilija makumi kenda na kenda bati na nguno ya koya. Nulu nkima nani uyo ali na shilingi ikumi, ulu ujimija shilingi imo, atubacha tala, upyagula numba, ukobakoba chiza kushisha ayibone? Aho wibonaga ubitana bashike biye na bazenganwa biye, ubawila giki, Yegagi hamo na nene, iki nibonaga shilingi iyali yajimilile. Namuwila giki, Kuli ho kuyega giko mu miso ga bamalaika ba Mulungu kulwa munhu wa shibi umo uyo oya. Uhaya giki, Munhu umo walali na bitunja babili; U ndo ungʼwila ise giki, Baba, ninhage ngabo gwa sabo ugunigwila. Nanghwe ubagabanhya sha bupanga wakwe. Hanuma ya shiku ngehu, uyo ngʼwana ndo ushibilinga shose, ubuka uja ku si ya kule; kwenuko ushiponanja buyaga sabo jakwe, wikala ngʼwimilizu. Aho ujimala jose, nzala nhale yilonga ku si yeniyo, nanghwe wandia kugayiwa. Uja wisugija hali nzengi umo wa si yeniyo; nanghwe untuma mu migunda yakwe kujidima ngurube. Nanghwe wikumbulilwa kwigutya nda yakwe na mula ayo jubyulya ngurube; walati ho munhu wa kungʼwinha. Nanghwe aho ubyiganika uhaya giki, Batumami ba mhela bali bingi kinahe ba ngʼwa baba abiguta shiliwa na kusaja, na nene nacha kunu na nzala! Nakubuka, nakuja kuli baba, nakungʼwila giki, Baba, nakenagulile ngʼwigulu, na mu miso gako; Natigelelilwe hangi kwitanwa ngʼwana wako; unite nibize giti umo wa batumami bako ba mhela. Huna ubuka uja kuli ise. Aliyo aho walatali kule, ise umona, unsatwa, umpelela gilibanda, unkumbata mu nhingo, umbipa no. U ngʼwana ungʼwila giki, Baba, nakenagulile ngʼwigulu na mu miso gako; natigelelilwe hangi kwitanwa ngʼwana wako. Aliyo ise ubawila basese bakwe giki, Enhagi wangu kizwalo ikili cha wiza kutinda, munzwike; muntuulile na sili ku lwala lwakwe, na shilatu ku mhambala jakwe; Yenhagi na mbuka nonu ngʼwibulage, tulye, tuyege; Iki ngʼwana wane uyu walachile, ali mpanga hangi; wali wajimila, nanghwe wilongaga. Nabo bandia kuyega. Aliyo ngʼwana wakwe u ntale walali mu ngunda; aho akwizaga utumbya ha kaya, wigwa kwimba na kubina mbina. Ungʼwitana umo wa batumami umuja, Ni kinahe giki? Ungʼwila giki, Nzunayo wizaga; na so wamulagilaga mbuka nonu, iki wangʼwanukula hangi ali mhola na mpanga. Aliyo wei upelana atatogilwe kwingila. Kulwa iyo ise ufuma, ungʼwikumbilija. Aliyo wei ushosha ungʼwila ise giki, Lolaga, miaka iyi mingi nakukutumamilaga giti nsese, nulu natakilanije na kamo kilagilo chako; na bebe utali na kamo kuninha nulu kabuli yaya, nayegele na banwani bane; Aliyo aho wiza ngʼwana wako uyu, uwaalyaga sha bupanga wako na bimilizu, wamulagilaga mbuka nonu. Ungʼwila giki, Ngʼwana wane, bebe shiku jose uli hamo na nene, na shose shane shili shako. Shitwigelile kusangabala na kuyega, iki nzunayo uyo walachile, ali mpanga hangi; wali wajimila, nanghwe walongaga. Hangi ubawila bahemba bakwe giki, Walali ho munhu nsabi ubiza na mikijiwa uyo akabulwa giki, akuponanjaga shikolo shakwe. Nanghwe ungʼwitana ungʼwila giki, Ni mhayo ki uyo nigwaga kuli bebe? balaga bubiki wako; iki utudula kwikala uli mikijiwa wane hangi. Mikijiwa wilunjalunja mu moyo gwakwe giki, Nite kinahe? iki seba wane waningijaga bubiki wane. Kulima natudula; kwilombeleja, nachile minala. Namanile iyo nalite, ibize aho nupejiwa mu bubiki, babizunegeleja mu kaya jabo. Ubitana bose abali na bugasa kuli seba wakwe umo umo, ungʼwila wa kwandia giki, Uli na bugasa ki kuli seba wane? Uhaya giki, Ngelekelo igana ja maguta ga nzeituni. Ungʼwila giki, Anukulaga cheti yako, wigashe wangu, andikaga makumi atano. Huna lulu ungʼwila ungi giki, Nangho uli na bugasa ki? Uhaya giki, Ngelekelo igana ja ngano. Ungʼwila giki, Anukulaga cheti yako, andikaga makumi anane. Na seba unkumilija mikijiwa nyecha iki wali wita kisala: iki bana ba ikanza lyenili bali ba masalasala mu kibyalilwe chabo kutinda bana ba isana. Na Nene namuwila giki, Nwanagi bunwani na sabo iyiti ya butungilija, ibize aho ilagaya ho, bangʼwegeleje mu wikalo wa welelo. Uyo ali ngʼwishigwa mu kinhu kido, nu mu kitale ali ngʼwishigwa; na uyo ali nyecha mu kinhu kido, nu mu kitale ali nyecha. Kulwa iyo, ulu ngʼwali muti bishigwa mu sabo iyiti ya butungilija, nani akumusanya na busabi wa nghana? Hangi ulu ngʼwali muti bishigwa mu i sha bangi, nani akungʼwinha ishili shingʼwe? Ati ho ntumami uwadula kubatumamila baseba babili; iki nulu akunkolwa umo, na kuntogwa ungi; nulu akudimana na umo, na kundalaha ungi. Mutudula kuntumamila Mulungu na sabo. Bafarisayo abali bikumva ba feza nabo bigwa iyo yose, bunugulanugula. Nanghwe ubawila giki, Bingʼwe muli abo mukwitungiligijaga benekele mu miso ga banhu; aliyo Mulungu amanile ngholo jingʼwe; iki iyikumiligije mu banhu yene ya malofu mu miso ga Mulungu. Shilagilo na bahangi shali shili ho kushisha kuli Yohana; kufuma henaho evangeli ya butemi wa Mulungu ikulomelagwa, na buli munhu aliwingila na kwigaganija. Aliyo ili changu igulu na si kubita ho kutinda kadone kamo ka shilagilo kugwa. Buli munhu ose uwampeja nke wakwe, untola ungi, washihaja; nanghwe uwantola uyo waapejiwa na ngoshi wakwe, washihaja. Walali ho munhu nsabi, uwaazwalaga ngʼwenda gwaza na kitani, wikala uyega mu bunyemezu buli lushiku. Hangi walali ho kunese umo lina lyakwe Lazaro, ubyuponyiwa ha mita gwakwe, okalile malonda. Wikumbulilwa kwigutiwa na malagalikwa agugwa kufuma ha meza ya nsabi; kushisha na mva jiza julamba malonda gakwe. Yubiza giki, kunese uyo ucha, ubuchiwa na bamalaika kushisha mu kikuba cha ngʼwa Abrahamu. Nsabi nanghwe ucha, ujikwa. Mu kulimu ulangamila miso gakwe, aliluhaluhiwa; umona Abrahamu kule, na Lazaro ali mu kikuba chakwe. Ngʼwenuyo uhamuka uhaya giki, Baba Abrahamu, nichilage kigongo, untume Lazaro akinde ku mhelo ya lwala lwakwe mu minzi, alupoje lulimi lwane; iki nasatiwa mu moto uyu. Abrahamu uhaya giki, Ngʼwana bebe, izukagwa, bebe wali wanukula sha wiza shako mu bulamu wako, na Lazaro giko sha bubi; aliyo haha wei alilungujiwa, nangho ulisatiwa. Hangi kutinda iyi yose hagati ya biswe na bingʼwe lili ho lishimayenze itale lyadimiwa ho, giki, abatogilwe kubita kufuma kunu kuja ku bingʼwe, batudula, nulu batudula kufuma uko kubita kwiza ku biswe. Uhaya giki, Nahene Baba, nakwikumbilija untume ku numba ya ngʼwa baba; Iki ndi na bana ba ngʼwiswe bagosha batano, giki, abakanile no batiziza nabo ngʼwipande ili lya kuluhiwa. Abrahamu ungʼwila giki, Bali na Musa na bahangi, leka bigwe benabo. Uhaya giki, Yaya, Baba Abrahamu, aliyo umo wa bafu, ulu uja kubo, bakoya. Ungʼwila giki, Ulu batungʼwigwa Musa na bahangi, nulu umo wa mu bafu ulu ujuka, nahene batalazunya. Akabawila bahemba bakwe giki, Sha kwipamya shitukija kwiza; aliyo alasangwa uyo shikwizaga kulwakwe. Ili hambuhambu kuli wei ulu utungwa iwe lya kushela mu nhingo yakwe, na kuponyiwa mu nyanza, kutinda kungʼwipamya umo wa bado aba. Ilanghanagi benekele; nduguyo ulu ukwitila kibi, unganikilage; ulu oya, unekeje. Ulu ukwitila kibi nghangala mpungati lushiku lumo, na nghangala mpungati ukushokela uhaya giki, Noyaga; nekejage. Na batungʼwa bungʼwila Seba giki, Utukwigije kuzunya. Seba uhaya giki, Ulu ni muli nako kuzunya giti kabeke ka karadali, ni ngʼwaguwila nkuyu uyu giki, Dubukaga ukahamve mu nyanza; nago ni gwangʼwigwa. Lusumo lwa ntumami na milimo yakwe Aliyo nani mu bingʼwe, uyo ali na nsese akulimaga nulu akudimaga mitugo, aho wiza kufuma mu ngunda, akungʼwila giki, Nzugu wangu, wigashe ulye; Aliyo angu, atungʼwila giki, Nilongejage shiliwa nalye, hangi witunge uninhilijage kushisha namala kulya na kungʼwa u nene; hanuma ukulya na kungʼwa nangho? Angu, akunumba nsese uyo iki witaga iyo ulagilwa? Giko na bingʼwe, aho mulamalaga kwita yose iyo ngʼwalagilwa, hayagi giki, Biswe tuli basese abatenhaga solobo; twitaga iyo itwigelelilwe kwita. Na yubiza aho ali mu nzila ajile Yerusalemi, ubita hagati ya Samaria na Galilaya. Aho alingila mu nzengo gumo, bumanhya nanghwe bagosha ikumi bali bali ba mbiji, bimilile kule; Bubucha malaka gabo buhaya giki, Yesu, Seba, tuchilage kigongo. Aho ubabona, ubawila giki, Jagi mukioleche ku bagabiji. Na yubiza aho bakujaga, bejiwa. Umo wabo, aho ubona giki, wapijiwa, ushokanya, akunkujaga Mulungu na ilaka itale, Na ugwa ushisha bushu hasi ku mhambala jakwe, akunumbaga: nanghwe walali muna Samaria. Yesu ushosha uhaya giki, Batejiwe bose ikumi? Aliyo abo kenda bali hali? Batilongaga ba kushoka kunkuja Mulungu ulu iti uyu wa ihanga lingi? Ungʼwila giki, Bukaga, uje, kuzunya kwako kwakupijaga. Aho ubugilijiwa na Bafarisayo giki, Butemi wa Mulungu buliza nanali? ubashokeja uhaya giki, Butemi wa Mulungu butizaga na kulolelwa; Nulu batalahaya giki, Lolaga, buli kunu! nulu, buli uko! iki managi, butemi wa Mulungu buli mugati yingʼwe. Ubawila bahemba giki, Shiku jiliza aho mulakumbula kubona lumo lwajo lwa shiku ja Ngʼwana wa munhu, aliyo mutalalubona. Na balamuwila giki, Lolaga, uko! nulu, Lolaga, kunu! mutizuja ho, nulu mutizubalondela; Iki gitumo lulabi lukulabyaga kufuma kwipande limo hasilili ya igulu, lungʼweka kushisha ipande lingi hasilili ya igulu, nu Ngʼwana wa munhu alabiza giko mu lushiku lwakwe. Aliyo tame shingʼwigelile kunyajanyajiwa mihayo mingi na kulengʼwa na kibyalilwe iki. Hangi gitumo yali yubiza mu shiku ja ngʼwa Nuhu, ilabiza giko mu shiku ja Ngʼwana wa munhu. Baalyaga, baangʼwaga, baatolaga, baatolagwa, kushisha lwise lwene aho Nuhu akingila mu ngalaba, na ihuma likiza lyubayagaja bose. Giko hangi gitumo yali yubiza mu shiku ja ngʼwa Lutu; baalyaga, baangʼwaga, baagulaga, baajinjaga, baalimaga, baazengaga; Aliyo lwise lwene aho Lutu akinga mu Sodoma, moto na bugota wa shibiliti shutula kufuma ngʼwigulu, shubayagaja bose. Ilabiza chene lwise lwene aho Ngʼwana wa munhu alakundulwa. Mu lushiku lwenulo uyo alabiza ali higulya ha numba na shikolo shakwe shili mo mu numba, atizika kushinja mo; na uyo ali mu ngunda nanghwe chene, atizushokela sha numa. Izukagwi nke wa ngʼwa Lutu. Uyo ose atogilwe kubupija bupanga wakwe, ngʼwene alabuyagaja; aliyo uyo ose ubuyagaja, alabupija. Namuwila giki, Mu bujiku wenubo, banhu babili balabiza balalile bulili bumo; umo alatwalwa, ungi alalekwa. Bakima babili balabiza bushela hamo; umo alatwalwa, ungi alalekwa. Babili balabiza mu ngunda; umo alatwalwa, ungi alalekwa. Bunshokeja bungʼwila giki, Ni hali, Seba? Ubawila giki, Uko mimba guli, kwenuko mbeshi jilikumingila ko. Akabawila kigemenghejo giki, shibigelile kulomba gwa, koloha yaya. Uhaya giki, Walali ho nekanya mu nzengo nebe, atangʼogohaga Mulungu, nulu kundilila munhu yaya. Mu nzengo gwenuyo walali mo na nchilwa, nanghwe ubiziza kuli wei, uhaya giki, Unitile butungilija kuli ngʼwikobeja wane. Nanghwe walatatogilwe i kwandia; aliyo hanuma uhaya mu moyo gwakwe giki, Nulu natangʼogohile Mulungu nulu kundilila munhu yaya; Nahene kulwa nchilwa uyo unikoyakoyela, nakungʼwitila butungilija, akije kuninoja kulwa kwiza kwakwe gwa gwa gwa. Seba uhaya giki, Igwagi umo wahayila nekanya ngʼwenuyo ati ntungilija. Mulungu, angu, atalabitila butungilija bakongʼwa bakwe abanilila limi na bujiku, nanghwe akwiyumilijaga kubo? Namuwila giki, Akubitila butungilija wangu. Nahene, Ngʼwana wa munhu aho aliza, angu, alakusanga kuzunya kuli ho mu si? Bamo abali bisanya benekele giki, bali batungilija, na bubadalaha bangi bose, ubawila kigemenghejo iki, giki, Banhu babili bakalinha kuja mu hekalu kulomba; umo Mfarisayo, ungi ntobisha. U Mfarisayo wimila wilomba wei ngʼwenekele giki, E, Mulungu, nakulumba, iki nene nati giti banhu bangi bose, bataja, bahunga, bashihani, nulu giti ntobisha uyu. Nene nakudilaga nzala nghangala ibili buli mfungo; nakufunyaga imo ya ngʼwikumi ya shose isho nabona. Na ntobisha wimila kule walatatogilwe nulu kubucha miso kwigulu, aliyo witulagula kikuba chakwe, uhaya giki, E, Mulungu, unichile kigongo nene wa shibi. Namuwila giki, Uyo wika, kuja ku kaya yakwe ntungiligijiwa kutinda ngʼwenuyo; iki buli munhu uwikumilija ngʼwenekele, aladohelejiwa; nanghwe uwidoheleja ngʼwenekele, alakumilijiwa. Bakangʼwenhela na bana banigini abadime ho; aliyo bahemba bakwe aho bubona iyi, bubalemeja. Aliyo Yesu ubitana bize kuli Wei, uhaya giki, Bazunilijagi bana banigini bize kuli Nene, mutabalemejage, iki abali giti aba, butemi wa Mulungu wene wabo. Nghana namuwila giki, Uyo ose akwanukula butemi wa Mulungu giti ngʼwana nigini, atalawingila mo na hado. Nsugi umo umuja uhaya giki, Nangi wa wiza, nite ki nawingile bupanga butushila? Yesu ungʼwila giki, Wanitana wa wiza ni buli? Ati ho wa wiza, ulu ati umo, Ngʼwene Mulungu. Ambu ushimanile shilagilo, Utalizushihya, Utalizubulaga, Utaliziba, Utalizukanila ya bulomolomo, Bakujage so na noko. Nanghwe uhaya giki, Ishi shose nakashidimaga kufumila mu buyanda wane. Yesu aho wigwa mihayo iyi, ungʼwila giki, Gutali gusagile ho mhayo gumo; jinjaga shose isho uli nasho, ubagabile bahabi, nangho ulabiza na wibikija ngʼwigulu: huna lulu wize unilondele. Aliyo aho wigwa mihayo iyi, upinihala no; iki walali na sabo ningi no. Aho Yesu umona apinihalile no, uhaya giki, Kilambu kinahe abali na sabo kwingila mu butemi wa Mulungu! Ili changu ngamila kushepa mu kapundu ka lushinge, kutinda nsabi kwingila mu butemi wa Mulungu. Abo abigwa iyi buhaya giki, Ni nani lulu wadula kupijiwa? Uhaya giki, Iyi itudulika ku banhu, kuli Mulungu yadulika. Huna Petro uhaya giki, Lolaga, biswe twaashileka shose kukulondela. Nanghwe ubawila, Nghana namuwila giki, Ati ho munhu uwaaleka numba, nulu babyaji, nulu bana ba ngʼwabo, nulu nke, nulu bana, kulwa nguno ya butemi wa Mulungu, Uyo akukija kwanukula nghangala ningi kutinda ngʼwikanza lya haha, na ngʼwikanza liliza bupanga butushila. Huna ubatwala abo ikumi na babili, ubawila giki, Lolagi, tulilinha kuja Yerusalemi, huna ikushikilijiwa yose yaangʼwandikilwa Ngʼwana wa munhu mu bahangi; Iki akwinhiwa ko ku bana mahanga, akwigimbijiwa, akudalahwa; akuswilwa mate. Aho bakumala kuntula mikoba, bakumulaga; na ku lushiku lwa kadatu akujuka. Nabo bali batitegeleja mihayo yeniyi nulu na hado: na mhayo uyu gwali gubisile kubo, nulu bali batimana iyali yuhayiwa. Ikabiza aho wegela Yeriko, moku umo wali wigashije ha nzila wilombeleja; Aho wigwa ibita likubitaga, ubuja mhayo uyu guli kinahe? Bunsombolela giki, Yesu wa Nazareti alibita. Nanghwe uhamuka, uhaya giki, Yesu, Ngʼwana wa ngʼwa Daudi, unichile kigongo. Nabo abatongelile bunemeja giki, afulike, aliyo wei ongeja no kuhamuka giki, Bebe, Ngʼwana wa ngʼwa Daudi, unichile kigongo. Yesu wimila, ulagila bangʼwenhe kuli Wei; aho ungʼwegela umuja, Uhaya giki, Utogilwe nakwitile ki? Nanghwe uhaya giki, Seba, ninhiwe kubona. Na Yesu ungʼwila giki, Winhiwa kubona; kuzunya kwako kwakupijaga. Haho na haho winhiwa kubona, unondela, akunkujaga Mulungu. Na banhu bose aho bubona mhayo uyu, bunkumilija Mulungu. Aho wingila Yeriko, akubitaga mo. Na lolaga, walali ho munhu akitanagwa lina lyakwe Zakayo, ngʼwene ntale wa batobisha, hangi ubiza nsabi. Nanghwe ukoba kumona Yesu umo ali; aliyo atudula kulwa ibita; iki ubiza nguhi. Upela ku butongi, ulinha mu nkuyu giki, Amone; iki wali uhaya kubitila nzila yeniyo. Aho Yesu ushika henaho, ulangamila, umona, ungʼwila giki, Zakayo, ikaga wangu; iki lelo shinigelile kwikala mu kaya yako. Nanghwe wiyanguhilija kwika, ungʼwegeleja na kuyega. Aho bubona, bose buduguma, buhaya giki, Waja kugeniha hali munhu wa shibi. Zakayo wimila, ungʼwila Seba giki, Lolaga Seba, nusu ya shikolo shane nabinha bahabi; hangi ulu nanyekejaga munhu ose kinhu nulu kimo, nalinshokeja nghangala ine. Yesu ungʼwila giki, Lelo iyi bupiji wizaga ha kaya iyi, iki uyu nanghwe ali ngʼwana wa ngʼwa Abrahamu. Iki Ngʼwana wa munhu wizile bukobakoba na kupija icho chaajimila. Aho batali budegeleka mihayo iyi, Wei ongeja kubawila kigemenghejo, iki walali hihi na Yerusalemi, na hangi iki benabo biganika giki, butemi wa Mulungu buhaya kwilonga haho na haho. Kulwa mhayo uyu uhaya giki, Munhu umo wa nyatemi akaja lugendo ku si ya kule akipandikile butemi, na kushoka. Ubitana banhu ikumi ba mu basese bakwe, ubinha ratili ikumi ja feza, ubawila giki, Kwabagi kushisha naliza. Aliyo bazengi bakwe bunkolwa, butuma nhungʼwa ba kunkubija, buhaya giki, Tutantogilwe ngʼwenuyo kutusuga. Ikabiza aho ushoka hanuma ya kupandika butemi ubo, ulagila bitanwe kuli wei basese benabo wali ubinha feza, amane buli munhu umo wabyalanigije mu bukwabi wakwe. Huna wegela wa kwandia, uhaya giki, Seba, ratili yako yiyongejaga ho ratili jingi ikumi. Nanghwe ungʼwila giki, Wabegije, bebe nsese wa wiza; iki wali ngʼwishigwa mu kado, bizaga na busugi wa mizengo ikumi. Huna wiza wa kabili, uhaya giki, Seba, ratili yako yabyagije ho ratili itano. Nu ngʼwene ungʼwila giki, Sugaga nangho mizengo itano. Na ungi wiza, uhaya giki, Seba, iyi ratili yako, iyi nalulindaga ibikilwe mu kitambala cha luyilo. Iki nukogoha, iki bebe uli munhu nambu; ukasolaga isho utashituulile ho, ukagesaga isho utabibile. Nanghwe ungʼwila giki, Kufuma mu nomo gwako nakukulekanya nsango, bebe nsese nghunga. Walumanile giki, nene ndi munhu nambu, nakasolaga isho natatuulile ho, nakugesaga isho natabibile; Ni buli lulu, walutinhile feza yane ku bakabanya ba feza, na nene aho niza ni nayipandika yane hamo na kwiyongeja kwaho. Ubawila abo bimilile ho giiti, Ntajagi ratili iyo, mungʼwinhe uyo ali na ratili ikumi. Nabo bungʼwila giki, Seba, ali najo ratili ikumi. Hwi chene ndimu wila giki, Buli munhu ali nasho, alinhiwa; aliyo uyo ati nasho, alatagijiwa na isho ali nasho. Aliyo benabo banishi bane, abali batatogilwe nene kubasuga, benhagi kunu, mubabulagile mu miso gane. Aho wamala kuhaya mihayo iyo, uja ku butongi ulinha kuja Yerusalemi. Ikabiza aho wegela Bethfage na Bethania hihi na lugulu lukitanagwa lwa Mizeituni, utuma babili ba mu bahemba bakwe, Uhaya giki, Jagi mukingile mu nzengo uguli ku butongi, aho mulingila mugo mukubona kana ka nzobe kakungilwe, ako katinadamhilwa na munhu: kakungulilagi, mukenhe. Na ulu munhu ose alamubuje giki, Mulikakungulila ni buli? hayagi giki, Seba ali na nimo nako. Nabo abali batungʼwa buja, busanga gitumo walubawilaga. Aho balikakungulila kana ka nzobe, beneko bubawila giki, Mulikungulila kana ka nzobe ni buli? Buhaya giki, Seba ali na nimo nako. Bukenlia kuli Yesu; buponeja ho mienda yabo ha kana ka nzobe, bundamhija ho Yesu. Aho akujaga bamba mienda yabo ngʼwipalapala. Aho wali utumbya lulu ku ntulumenho gwa lugulu lwa Mizeituni, ibita lyose lya bahemba bandia kuyega na kunkumilija Mulungu na ilaka itale kulwa shitile shose sha budula isho bali bubona; Buhaya giki, Ali na lubango Ntemi uwiza mu lina lya Seba; mhola ngʼwigulu, na ikujo higulya no. Bamo ba Bafarisayo abali bali ngʼwibita bungʼwila giki, Nangi, bahamage bahemba bako. Nanghwe ushosha, ubawila, Namuwila giki, Benaba ulu bufulika, mawe gakuhamuka. Nanghwe aho wegela, ugubona nzengo, ugulilila, Uhaya giki, Ninga ulu ni wali umanile, nu bebe, mu lushiku ulu lwako, iyo yigelelilwe mhola yako: aliyo haha yibisile ku miso gako. Iki shiku jilakwiziila, aho banishi bako balakupindiligija ndugu, balakupindya, balakuchibila mhande jose. Balakugwisha ha si, na bana bako abali mugati yako; batalaleka muli bebe iwe higulya ya iwe liye, iki wali utamanile ikanza lya kugenihilwa kwako. Huna wingila mu hekalu, wandia kubapeja abakujinjaga na kugula mo; Ubawila giki, Gwaandikwa giki, Numba yane ilabiza numba ya kulomba; aliyo bingʼwe ngʼwayigalucha yabiza ipilinga lya basambo. Akabiza ubyulanga buli lushiku mu hekalu; aliyo bagabiji batale, na bandiki na batale ba banhu, bukoba kunyagaji. Na batubona icho bangʼwitile; iki banhu bose buhandikila kuli Wei kundegeleka. Ikabiza ho lushiku lumo, aho alibalanga banhu mu hekalu, na kulomela evangeli, bagabiji batale na bandiki hamo na banamhala bunungubalila, Bulungalunga nanghwe, buhaya giki, Tuwilage mu budula ki ukwitaga iyi; nulu nani waakwinha budula ubu? Ushosha ubawila giki, Na Nene nakumubuja mhayo gumo, niwilagi, Angu, u kubatija kwa ngʼwa Yohana kwali kufumila ngʼwigulu, nulu ku banhu? Bitambuja boi bike, buhaya giki, Ulu tuhaye, Kwafumila ngʼwigulu; akuhaya giki, Ngʼwali mutanzunije ni buli lulu? Aliyo ulu tuhaye giki, Kwafumila mu banhu: banhu bose bakutuponda mawe: iki bazunije nghana giki, Yohana walali nghangi. Nabo bushosha, angu, batamanile uko kwafumila. Huna Yesu ubawila giki, Nu Nene natumuwila bingʼwe mu budula ki nakuyitaga iyi. Wandia kubawila banhu kigemenghejo iki; Munhu umo akahamba ngunda gwa mizabibu, ugutuula ho ku balimi, uja ku si yingi ushinga ko ikanza itale. Mu shiku ja matwajo untuma nsese ku balimi benabo, giki, bangʼwenhe matwajo gamo ga mu ngunda; aliyo balimi buntula, bumpeja buyiki. Ongeja kuntuma nsese ungi; buntula nu ngʼwene, bundimya minala, bumpeja buyiki. Ongeja kuntuma wa kadatu: nu ngʼwene bungulaja, bumponya hanze. Huna seba wa ngunda gwa mizabibu uhaya giki, Nite kinahe? Nakuntuma ngʼwana wane uyo nantogilwe; hamo ngʼwene aho bakumona, bakungʼwinha ishima. Aliyo balimi benabo aho bamona, bitambuja boi bike, buhaya giki, Uyu ngʼwene ngʼwingiji: nzugwi tumulage, wingiji bubize wiswe. Bumponya hanze ya ngunda gwa mizabibu, bumulaga. Ali lulu, seba wa ngunda gwa mizabibu alabitila ki? Aliza kubayagaja balimi benabo, na ngunda gwa mizabibu alabinha bangi. Aho bigwa iyi, buhaya giki, Itizubiza giko. Ubakanilija, uhaya giki, Ili kinahe lulu, uyo gwaandikwa giki, Iwe ilo bali bulilema a bazengi lyene lyabizaga iwe itale lya ha lungʼongo. Uyo ose alaligwila iwe lyenilo, alabinzaguka; aliyo uyo ose lilangwila, lilanshiginuja gete. Ngʼwikanza lyenilo bagabiji batale na bandiki bukoba kundima; na bubogoha banhu; iki bumana giki, Kigemenghejo iki wabahayila boi. Bunkungakungila, bubatuma basasilija, abibeleja benekele kubiza batungilija, bantege mu mihayo yakwe, hunaho babone ya kungʼwinha ko mu busugi na mu budula wa gavana. Bakamuja buhaya giki, Nangi, tumanile giki, Bebe ukuhayaga na ukulangaga ya nghana, nulu utudilila butale wa munhu; aliyo ukulangaga nzila ya Mulungu mu nghana: Angu, ilagilile biswe kumfunija Kaisari kodi, himba yaya? Aliyo Wei wali witegeleja masalasala gabo, ubawila giki, Nolekejagi shilingi. Chikolile iki, na chandikile iki sha ngʼwa nani? Nabo buhaya giki, Sha ngʼwa Kaisari. Ubawila giki, Nahene lulu, sha ngʼwa Kaisari, mfunijagi Kaisari, na sha Mulungu, mfunijagi Mulungu. Nabo bali batudula kuyigwasha mihayo yakwe mu miso ga banhu; bukumya kulwa mashosho gakwe, bufulika du. Hunaho bamo ba Basadukayo bungʼwegela, abakulemaga giki, Kuduhu kujuka; bumuja, Buhaya giki, Nangi, Musa waatwandikila giki, Munhu ulu uchilwa ngʼwana wa ngʼwabo uyo walali na nke, na ngʼwenuyo ucha walati na ngʼwana, ngʼwana wa ngʼwawe angʼwingile nke uyo, amyalile ngʼwana wa ngʼwawe bana. Ali lulu, bali bubiza ho bagosha mpungati ba myaji umo, u ntangi untola nkima, ucha, atabyalile; Nu wa kabili ungʼwingila nke ngʼwenuyo, nu ngʼwene ucha, atabyalile; Nu wa kadatu ungʼwingila; giko hangi benabo mpungati bucha, batalekile bana. Hanuma ya bose nkima nanghwe ucha. Mu bujuko lulu alabiza nkima wa ngʼwa nani mu benabo? iki bose mpungati bali buntola. Yesu ushosha ubawila giki, Bana ba ikanza ili bakatolaga na kutolwa; Aliyo abo ababalwa bigelelilwe kuyibona ikanza lyenilo, na kujuka kwenuko kwa mu bafu, bene batutola nulu batutolwa; Iki batudula kucha hangi; iki balenganilile na bamalaika: hangi bali bana ba Mulungu, iki bali bana ba kujuka. Aliyo mhayo gwa kujuchiwa kwa bafu, nulu Musa wali olecha ha kasaka, aho akanghaya Seba giki, Ali Mulungu wa ngʼwa Abrahamu, na Mulungu wa ngʼwa Isaaka, na Mulungu wa ngʼwa Yakobo. Aliyo Wei ati Mulungu wa bafu, aliyo wa bapanga; iki bose bali bapanga kuli Wei. Hunaho bandiki bamo bunshokeja, buhaya giki, Nangi, wahayaga chiza. Hanuma yaho bali batugima kumuja mhayo gose hangi. Ubawila giki, Banhu bakuhayaga kinahe giki, Kristo ali ngʼwana wa ngʼwa Daudi? Iki Daudi ngʼwenekele waahaya mu kitabo cha Zaburi giki, Seba akangʼwila Seba wane giki, Igashaga ku nkono gwane gwa bulyo, Kushisha nalabatuula banishi bako kubiza ipandilo lya magulu gako. Iki Daudi ungʼwitana giki, Seba, hangi ali ngʼwana wakwe kinahe? Hunaho banhu bose aho balidegeleka, ubawila bahemba bakwe giki, Ilanghanagi ku bandiki, abatogilwe kuyelayela mu shizwalo shilihu, batogilwe kugishiwa mu nghungʼwano, na masumbi ga ku butongi mu mabilingilo, na shigasho sha ikujo aho bakulyaga shitolyo: Bakalyaga kaya ja bachilwa, na kulwa wibeleja bakulombaga kulomba kulihu. Benaba balalekanyiwa nsango ntale kutinda. Huna ubucha miso, ubabona basabi balituula sha kwinha shabo ngʼwibikilo. Umona nu nchilwa umo nghabi utuula mo tusenti tubili. Uhaya giki, Nghana namuwila giki, Nchilwa ngʼwenuyu nghabi, watuulaga mo ningi kutinda bose; Iki benaba bose kufuma mu bukwija wabo batulilaga mo mu sha kwinha kuli Mulungu; aliyo wei mu bukunese wakwe watuulaga mo shose sha bupanga isho walali nasho. Aho bamo bali bilunjalunja ya hekalu umo yaagalili lwa na mawe ga wiza, na shikolo shaafunyiwa, uhaya giki, Ishi mulishilola, shiku jiliza, aho litalalekwa ho iwe limo higulya ya iwe liye, ilo litalakandulwa. Bumuja buhaya giki, Nangi, mihayo iyi ilabiza nanali lulu? Na kimanikijo kilabiza ki aho yeniyi ikuhaya kubiza ho? Uhaya giki, Ilanghanagi mutizulembalemva; iki bingi baliza mu lina lyane, balabyuhaya giki, Nene ndi ngʼwene; hangi giki, Ikanza lyegelaga. Mutizubalondela. Aliyo aho muligwa nghulu ja bulugu, na mawiyubukiji, mutizuhaha; iki iyi shigelile kubiza ho tame; aliyo nghalilo itiza haho na haho. Hunaho ubyubawila giki, Ihanga lilubukila ihanga liye, na butemi bulubukila butemi wiye; Galabiza ho manyahinga matale na mayala na mahuya mu mapande gangi na gangi; mahahya na shimanikijo shitale kufuma ngʼwigulu shilabiza ho. Aliyo isho shose aho shitiniza, balamudima na kumuluhyaluhya; balangʼwinha ko bingʼwe ku mabilingilo na mu jela, na kumutwala mu butongi wa batemi na bagavana kulwa nguno ya lina lyane. Aliyo yeniyo ilagaluka kubiza bukaniji wingʼwe. Kulwa iyi, ngʼwidimye mu ngholo jingʼwe giki, mutizidedekanya tame i ya kushosha; Iki Nene nakungʼwinha nomo na masala, ayo banishi bingʼwe bose bataladula kugahalalija nulu kugahangija. Aliyo mulinhiwa ko nulu na babyaji bingʼwe, na bana ba ngʼwingʼwe, na badugu bingʼwe, na banwani bichingʼwe, na bamo ku bingʼwe balamubulaja. Na banhu bose balamukolwa kulwa nguno ya lina lyane. Aliyo nulu luywili lwa mitwe yingʼwe lutalajimila na hado. Mu kwiyumilija kwingʼwe mulabupija bupanga wingʼwe. Aliyo aho mulabona Yerusalemi yupindiwa na mabita ga bashilikale, hunaho managi giki, Kukenagulwa kwayo kuli hihi. Hunaho abali mu Buyudaya bapelele ku ngulu; nabo abali mugati yayo bafume moi; nabo abali mu magunguli, batizingila mo. Iki jenijo jene shiku ja kuhwima njigu, mihayo yose yaandikwa ishikilijiwe. Balasangwa abali nda na bakonhyaga mu shiku jenijo! iki bulabiza buzwangani butale ku si, na bupelanu ku banhu aba. Balagwishiwa na bugi wa lilushu, baladingʼwa busese kutwalwa kushisha ku mahanga gose; nayo Yerusalemi ilapandagilwa na bana mahanga, kushisha ikanza lya bana mahanga aho lilashikilijiwa. Hangi shilabiza ho shimanikijo mu limi na ngʼweji na sonda; na ha si mahanga galatawatawa hamo na kwiganilija kulwa kulunduma kwa nyanza na mahuli; Banhu balagwa ngholo budedebala kulwa boba na kulwa kulolela iyo ikwizaga mu si; iki mabudula ga ngʼwigulu galanegenyiwa. Hunaho balamona Ngʼwana wa munhu akwizaga ngʼwilunde na budula na ikujo itale. Aliyo mihayo yeniyi aho ilandia kubiza ho langamilagi, mubuche mitwe yingʼwe: iki kukomolwa kwingʼwe kuli hihi. Akabawila kigemenghejo giki, Gulolagi nti ntini na miti yose; Aho ngʼwibona yafuluma mumanile benekele giki, Ikanza lya magesa lili hihi. Na bingʼwe giko, aho mulibona mihayo iyi ikwitaga, managi giki, butemi wa Mulungu buli hihi. Nghana namuwila giki, Kibyalilwe iki kitalabita kushisha iyi yose ilabiza ho. Igulu na si shilabita, aliyo mihayo yane italabita. Ali lulu, ilanghanagi ngholo jingʼwe jitizudidohiwa na bulaku na kukolwa walwa, na kukoyakoyela bupanga ubu, lushiku lwenulo lutizumufumbukija: Iki giti ilunda, lulabiziila bose abali higulya ha si yose. Kulwa iyo, ikalagi miso mu buli ikanza, mulilomba, mubize ababalwa ngʼwigelelilwe kupila mu iyi yose ilihaya kubiza ho, na hangi kwimila mu butongi wa Ngʼwana wa munhu. Buli lushiku limi ubyulanga mu hekalu; na bujiku waafumaga uja ukalala mu lugulu lukitanagwa lwa Mizeituni. Na banhu bose biipunaga dilu makingo kuja kuli Wei mu hekalu kundegeleka. Hunaho kilile cha migati iti na kibimbya, icho kikitanagwa Pasaka, chegela. Na bagabiji batale na bandiki bubyukoba nzila ya kumulaga; iki bali bubogoha banhu. Shetani akingila muli Yuda uyo akitanagwa Iskariota, ngʼwene umo wa benabo ikumi na babili. U wei ufuma, uja, ulomana na bagabiji batale, na batale ba bashilikale nzila umo akungʼwinhila ko kubo. Nabo buyega, bulagana kungʼwinha feza. Nanghwe ulagana, ukoba ngʼwanya gwa kungʼwinhila ko kubo aho ibita liti ho. Huna lukashika lushiku lwa migati iyiti na kibimbya, aho yali yigelile kutambila Pasaka. Ubatuma Petro na Yohana, uhaya giki, Jagi, mukatulongeje Pasaka, twilye. Nabo bungʼwila giki, Utogilwe tukalongeje hali? Nanghwe ubawila giki, Lolagi, aho ngʼwingila mu nzengo, akumanhya na bingʼwe ngosha uyo abukije luno lwa minzi; munondele mu numba iyo alingile mo; Ningʼwe mukungʼwila namugi giki, Nangi wakuwila giki, Chumba cha ngeni kili hali, umo nalile Pasaka hamo na bahemba bane? Ngʼwenuyo akungʼolekeja chumba kitale cha mu gorofa chabejabejiwa; ngʼwenumo mulonje. Buja, bubona gitumo wali wabawilila: nabo buyilonja Pasaka. Aho ikanza lyushika, Wei wigasha ku shiliwa, na batungʼwa hamo nanghwe. Na ubawila giki, Kukukumbula, nakubabulaga no kulya Pasaka iyi hamo na bingʼwe, aho natali kunyajanyajiwa; Iki namuwila giki, Natalayilya na hado hangi, kushisha aho ilashikilijiwa mu butemi wa Mulungu. Akachanukula kikombe, aho ulumba, uhaya giki, Dimagi iki, ngʼwelagi mo bose: Iki namuwila giki, Natalangʼwa na hado hangi ku matwajo ga mizabibu kushisha butemi wa Mulungu aho wizile. Udima ngati, aho ulumba, ugumeganya, ubinha, uhaya giki, Uyu gwene mili gwane, ugwinhagwa ko kulwa nguno yingʼwe; mulitage giko mu kunizukwa Nene; Na kikombe nacho giko hanuma ya kulagila, uhaya giki, Kikombe iki chene ilagano ipya mu mininga gane, agitwa kulwa nguno yingʼwe. Aliyo, lolagi, nkono gwa ngʼwenuyo alininha ko guli hamo na Nene ha meza; Iki Ngʼwana wa munhu ajile gitumo yaalagilwa; aliyo alasangwa ngʼwenuyo alininha ko. Nabo bandia kwibugilija benekele na benekele giki, ni nani mubo uyo alite mhayo uyu. Ikabiza ho na halali mubo giki, ni nani mubo uyo wiganikwa kubiza ntale. Ubawila giki, Batemi ba bana mahanga bubasuga; nabo abali na budula kubo, bitanwa batungilija. Aliyo ku bingʼwe iti giko; aliyo uyo ntale mu bingʼwe abize giti liu ndo, na uyo ntongeji abize giti uyo akwinhilijaga. Iki ntale ni nani, uyo wigasha ku shiliwa, nulu uyo akwinhilijaga? Angu, ati uyo wigasha ku shiliwa? aliyo Nene ndi hagati yingʼwe giti uyo akwinhilijaga. Aliyo bingʼwe muli abo mukashingaga hamo na Nene mu makugengʼwa gane. Na Nene namubikila butemi, gitumo Baba waanibikila Nene; Mulye na kungʼwa ku meza yane mu butemi wane; na kwigasha ha masumbi ga butemi, mulabyulekanya misango ngʼanda ikumi na ibili ja Israeli. Seba uhaya giki, Simoni, Simoni, lolaga, Shetani amutogilwe bingʼwe kumusungula giti ngano; Aliyo Nene nakulombelaga bebe, kuzunya kwako kutizuleba; nangho aho ukumala kugaluka, ubalambye baduguyo. Nanghwe ungʼwila giki, Seba, namalilile kuja hamo na Bebe nulu mu jela nulu mu kucha. Uhaya giki, Nakuwila bebe, Petro, nghungulume aho itali kuhila lelo iyi, ukunilema nghangala idatu giki, utanimanile. Wali ubawila giki, Aho nali numutuma muti na kabogoshi ka feza, nulu mhinda, nulu shilatu, angu, mukagayiwa kinhu? Buhaya giki, Yaya. Ubawila giki, Aliyo hambunyu uyo ali na kabogoshi ka feza akatwale, na mhinda nayo chene; nuyuyo ati nalyo lilushu ajinje kizwalo chakwe aligule. Iki namuwila giki, Uyu gwaandikwa shigelile kushikilijiwa muli Nene giki, Wali ubalwa hamo na bagomi: iki iyo bigelelilwe Nene ili na ngelelo. Buhaya giki, Seba, lolaga, malushu gaya abili. Ubawila giki, Gigelaga. Utuma uja ku lugulu lwa Mizeituni gitumo chimile chakwe umo chali kili, na bahemba bakwe nabo bunondela. Aho ushika kwipande ilo ubawila giki, Lombagi mutizingila mu kugengʼwa. Nanghwe ubisunda kakule ho giti ka kuponya iwe; utuja mazwi ulomba, Uhaya giki, Baba, ulu utogilwe, uningije ho kikombe iki; nahene iti iyo natogilwe Nene, aliyo yako Bebe yitwe. Malaika ungʼwilongela kufumila ngʼwigulu, unguzuhya. Nanghwe iki ubiza mu buganghizu, ongeja no kulomba; ngʼuyilo gwakwe gubiza giti magili ga mininga, gakugwaga hasi. Aho ubuka mu kulomba, wiza ku bahemba bakwe, ubasanga bashutulile kulwa bupina. Ubawila giki, Mulishutula ni buli? bukagi, mulombe, mutizingila mu kugengʼwa. Aho walatali ulungalunga, lolaga, ibita na uyo akitanagwa Yuda, umo wabo ikumi na babili, abatongelile; ungʼwegela Yesu ambipe. Aliyo Yesu ungʼwila giki, Yuda, ulingʼwinha ko Ngʼwana wa munhu mu kumbipa? Benabo abali bali hamo nanghwe, aho bubona iyuhaya kubiza ho, buhaya giki, Seba, tubateme na malushu? Umo wabo untema nsese wa ngabiji ntale, umuta kutu gwa bulyo. Yesu ushosha uhaya giki, Lekagi giko. Unkinda ha kutu gwakwe, umpija. Yesu ubawila bagabiji batale, na batale ba hekalu, na banamhala abali bungʼwizila giki, Ngʼwizaga giti kuli nsambo, na malushu na milanga? Aho nalubizaga hamo na bingʼwe buli lushiku mu hekalu, mutanigololelaga makono kunidima; ali gisi, ili lyene ikanza lyingʼwe, na budula wa giiti. Bunghaja, buntwala, bungʼwingija mu numba ya ngabiji ntale. Aliyo Petro unondela kakule ho. Aho bali bupemba moto hagati ya kibuga, bigasha kihamo, Petro wigasha mugati yabo. Hunaho ntumami nkima umo, aho umona igashije ha bulengela wa moto, unkalalila, uhaya giki, Ambu, ngʼwenuyu wali hamo nanghwe. Aliyo unema Wei, uhaya giki, Nkima bebe, natamanile Ngʼwenuyo. Hanuma ya kakanza kado, ungi umona, uhaya giki, Nu bebe uli ngʼwichabo. Aliyo Petro uhaya giki, Munhu bebe, nati nene. Hanuma ya ikanza giti lya saa imo, ungi ugagana, uhaya giki, Nghana ngʼwenuyu wali hamo nanghwe; iki nu wei ali muna Galilaya. Aliyo Petro uhaya giki, Munhu bebe, natamanile iyi ulihaya. Kuhayumanila aho atali ulungalunga, nghungulume yuhila. Hunaho Seba ugaluka, unola Petro; na Petro ugwizukwa mhayo gwa Seba uyo wali wangʼwila giki, Lelo aho nghungulume itinahila, ukunilema nghangala idatu. Ufuma hanze ulila no shisoji. Na bagosha bundima Yesu, bungimba kichilu, buntulagula. Aho bunkundikija miso, bubyumpala ha bushu, bumuja buhaya giki, Mani jaga; nani uyo wakutula? Na yingi mingi bungʼwila mu budukaguji. Aho wela, banamhala ba banhu bikuminga hamo na bagabiji batale na bandiki; buntwala ngʼwibanza lyabo, buhaya giki, Ulu Bebe uli Kristo, tuwilage? Ubawila giki, Nulu namuwile mutuguzunya na hado; Hangi nulu nakumubuja, mutunishokeja na hado nulu kunilekela. Aliyo kufuma haha Ngʼwana wa munhu akubikala igashije ku nkono gwa bulyo gwa budula wa Mulungu. Bose buhaya giki, U Bebe bu uli Ngʼwana wa Mulungu lulu? Ubawila giki, Gitumo mulihayila ndi Ngʼwene. Nabo buhaya giki, Tuli na nimo ki hangi na bukaniji? iki biswe benekele twigwaga kufuma mu nomo gwakwe. Huna bubuka bose ba ibanza lyabo, buntwala kuli Pilato. Bandia kumula, buhaya giki, Ngʼwenuyu twamona akugomyaga ihanga lyiswe, na kubalemeja banhu kuntobela Kaisari kodi, akwihayaga ngʼwenekele giki, ali Kristo, ntemi. Pilato umuja, uhaya giki, U Bebe hu uli ntemi wa Bayudaya? Unshokeja uhaya giki, Ili chene, wahayaga. Pilato ubawila bagabiji batale na mabita giki, Natubona bubihya bose muli munhu uyu. Aliyo bugagana buhaya giki, Akubahumbulaga banhu, akalangaga mu Buyudaya yose, kufuma Galilaya kushisha nu kunu. Aho Pilato wigwa ya Galilaya, ubuja ulu munhu Uyu ali muna Galilaya. Aho umana giki, ali wa busugi wa ngʼwa Herode, untuma kuli Herode, iki ngʼwenuyo nanghwe walali mu Yerusalemi mu shiku jenijo. Aho Herode umona Yesu, uyega no; iki kufuma kale walatogilwe kumona, iki waangʼwigwaga nghulu jakwe, hangi wisagilwa kubona kimanikijo chitwe nanghwe. Umuja mihayo mingi, aliyo Wei atanshokegije mhayo. Bagabiji batale na bandiki bali bimila, bugagana niyo no kumula. Aho Herode na bashilikale bakwe bumbyeda na kungimba kichilu, bunzwika kizwalo cha kungʼwekangʼweka, huna unshosha kuli Pilato. Lwise lwene Herode na Pilato bunonya bunwani; iki i kwandia bali bali na wanishi benekele na benekele. Aho Pilato wali ubitana hamo a bagabiji batale na basugi na banhu, Ubawila giki, Ngʼwangʼwenhaga munhu uyu kuli nene, giti umo akubagomyaga banhu; nane lolagi, namugilija mu miso gingʼwe, natabonile bubihya muli munhu uyu mu yose iyo mulimula; Nulu Herode yaya, iki namutuma kuli wei: hangi Iola, atitile mhayo gwa kungʼwigelelwa kucha: Kulwa iyo, nantule, huna nakuntaligulila. Iki uhadikijiwa na chimile kubataligulilila ntungwa umo a ha Pasaka. Buhoyokela bose hamo, buhaya giki, Ngʼwinjage uyu, ututaligulilile Barabba; Ngʼwenuyo munhu uwaatungwa mu jela kulwa bugomi uwilwa mu nzengo, na kulwa bubulagi. Kulwa iyo Pilato ulungalunga nabo hangi, iki walatogilwe kuntaligulila Yesu. Aliyo buyoga buhaya giki, Ni akomagwe, ni akomagwe. Ubawila lukangala lwa kadatu giki, Ni nguno ki? Ngʼwenuyu witaga bubi ki? Natabonile kubihya muli wei kwa kumulaga; kulwa iyo nakuntula, huna nakuntaligulila. Aliyo boi bugagana na malaka matale, bungʼwikumbilija giki, Wei akongʼwe. Na malaka gabo na ga bagabiji batale gutinda. Pilato utina lubanza yitwe gitumo bunomba. Ubataligulilila uyo waatungwa mu jela kulwa bugomi na bubulagi, ngʼwenuyo balunombaga; aliyo u Yesu ungʼwinha ko bangʼwitile gitumo batogelilwe. Aho balintwala bundima Simoni muna Kurene afumile mu ngunda, bunseseja nsalaba, agubuche hanuma ya ngʼwa Yesu. Ibita itale lya banhu, na lya bakima abali bitula kikuba, na kunila nghungu, lyunondela. Aliyo Yesu ubagalukila, uhaya giki, Bingʼwe bashike ba Yerusalemi, mutanililage Nene, aliyo ngʼwilile benekele na bana bingʼwe. Iki lolagi, shiku jiliza, aho balahaya giki, Bali na lubango bagumba, na nda jitinabyala, na mbele jitinonhya. Hunaho balandia kujiwila ngulu giki, Mutugwile ho; na kugawila matumbi giki, Mutukundikijage. Iki ulu bita mihayo iyi mu linti ibisi, mu lyumu ikubiza kinahe? Butwalwa na bangi babili bakenaguji, kubulagwa hamo nanghwe. Aho bushika kwipande ilikitanagwa lupanga, bunkomela kwene, na bakenaguji abo, umo ku nkono gwa bulyo nu ungi ku nkono gwa lumoso. Yesu uhaya giki, Baba, ubalekeje; iki batamanile iyo bakwitaga. Nabo bugabanha shizwalo shakwe bushesa. Banhu bimila bakulolaga. Na basugi hamo nabo, bunugulanugula, buhaya gild, Walubapijaga bangi: ni ipijage ngʼwenekele, ulu Wei ali Kristo wa Mulungu u nsolwa wakwe. A bashilikale nabo bungimba kichilu, bungʼwegela, bungʼwinhilija bugota bululu, Buhaya giki, Ulu Bebe uli ntemi wa Bayudaya, wipije Bebe ngʼwenekele. Hangi chandikile chali kili ho higulya yakwe, ichandikwa mu nuguta ja Kigriki, na Kirumi na Kihebrania giki, UYU NGʼWENE NTEMI WA BAYUDAYA. Umo wabo a bakenaguji abusungwa unduka, uhaya giki, Ambu, Bebe uli Kristo? Wipije Bebe ngʼwenekele na biswe. U ungi ushosha, unemeja, uhaya giki, Bebe, utungʼogohaga nulu Mulungu, bebe uli mu nsango gumo nanghwe? Hangi biswe twagunyiwagwa nghana; iki biswe tuliyanukula mhela iyigelelilwe iyo tukitaga; aliyo Ngʼwenuyu walatitaga mhayo gutigelile. Huna ungʼwila Yesu giki, Seba, nizukagwe aho uliza mu butemi wako. Yesu ungʼwila giki, Nghana nakuwila giki, Lelo ukubiza hamo na Nene mu ngunda gwa Mulungu. Hunaho yushika giti saa itandatu, yubiza giiti ku si yose kushisha saa kenda. Limi lyali lilabula; na iselema lya mu hekalu ly utanduka hagati. Huna Yesu ulila na ilaka itale, uhaya giki, Baba, nagutuula moyo gwane mu makono gako. Aho umala kuhaya yeniyi, wiyinha ko bupanga. Aho ntale wa bashilikale igana ubona iyo yali yubiza ho, unkuja Mulungu, uhaya giki, Nghana munhu Ngʼwenuyo walali ntungilija. Na mabita gose agibilingila kuyilola mihayo iyi, aho bubona iyo yali yubiza ho, bushoka balitulagula shikuba shabo. Nabo bose abali bimane bakwe, na bakima abali budimana nanghwe kufuma Galilaya, bimila kule bilolela yeniyi. Na lolaga, ngosha umo lina lyakwe Yusufu, namhala wa ibanza, munhu wa wiza, hangi ntungilija; (Ngʼwenuyo walatazunije longʼwe yabo nulu kitile kabo), azengile Arimathaya, nzengo gwa Bayudaya, walalindilile butemi wa Mulungu; U ngʼwene uja kuli Pilato, ugulomba mimba gwa ngʼwa Yesu. Ugusungula, ugulingila mu ngʼwenda gwa kitani, ugulaja mu nze iyali yupunzwa mu kiganga, umo mimba gutinalajiwa na kamo. Lwise lwene lwali luli lushiku lwa kulonjalonja, na Sabato yali yuhaya kugegeleja. Bakima abali biza hamo nanghwe kufuma Galilaya, bunondela, bukibona kigila, na mimba gwakwe umo gwali gulajiwa mo. Bushoka, bushilonja ndago na maguta ga ngazu, na ha Sabato bifula giti kilagilo umo kili. Ha lushiku lwa kwandia mu mfungo dilu mu makingo, biza ku kigila, babukije ndago ijo bali balongije. Busanga iwe lyapilingitiwagwa kwinga ha kigila. Aho bingila mo bali batugusanga mimba gwa Seba Yesu. Na yubiza aho budedebala kulwa iyo, kuhayumanila bagosha babili bimila nabo, bazwalile mienda ya kungʼwekangʼweka. Aho bakima bali budingʼwa na boba, na binamya bushu wabo ha si, benabo bubawila giki, Ni buli mulinkobakoba mpanga mu bafu? Ati ho aha, aliyo wajukaga: izukagwi gitumo waalungalungaga na bingʼwe aho walatali mu Galilaya, Uhaya giki, Shingʼwigelelilwe Ngʼwana wa munhu kwinhiwa ko mu makono ga banhu ba shibi, na kukongʼwa, na ku lushiku lwa kadatu kujuka. Hunaho bizukwa mihayo yakwe. Bushoka kufuma ku kigila, bubasombolela abo ikumi na umo na bangi bose mihayo iyi yose. Bali bali Mariamu Magdalene, na Yoana, na Mariamu nina wa Yakobo, na bakima bangi hamo nabo, ha bene bubasombolela batungʼwa mihayo iyi. Na mihayo yabo yali ikolile ya buchiluchilu kubo, nabo batabazuniligije. Aliyo Petro ubuka, upela kushika ku kigila; winama, ukengela, ubona shitambala sha kitani shili shiyene, ushoka ku ngʼwakwe, ukumya iyo yali yubiza ho. Lwise lwene bichabo babili balija ku zengo, lina lyago Emau, gwali kakule na Yersusalemi, giti lugendo lwa saa ibili. Nabo bitambuhla boi bike iyo yose yali yilonga, Na yubiza aho batali bitambulila na kwigisilija, Yesu Ngʼwenekele wegela, udimana uja hamo nabo. Aliyo miso gabo gali gahumile batizumana. Ubawila giki, Mihayo ki yeniyo mulishokelela aho mulishiminza? Nabo bimila bachomelile; Umo wabo lina lyakwe Kleopa, ushosha ungʼwila giki, U Bebe ukalalaga wiyene mu Yerusalemi, utamanile iyo yubiza ho mu shiku iji? Ubawila giki, Mihayo ki? Nabo bungʼwila giki, Ya ngʼwa Yesu muna Nazareti, Uyo walali nghangi wa nguzu mu kitile na mu mihayo, mu miso ga Mulungu na ga banhu bose; Hangi gitumo bagabiji batale na basugi biswe bali bungʼwinha ko kulekanyiwa nsango gwa kumulaga, na bunkoma ha nsalaba. Aliyo biswe twalisagilagwa giki, Hu na Ngʼwenuyo alahaya kukomola Israeli. Chene na kutinda iyo yose, lelo lwene lushiku lwa kadatu kufuma aho mihayo iyi yah yubiza ho. Hangi bakima bamo ba mu biswe butudedebaja, abali bipunaga kuja ku kigila; Bah batasangile mimba gwakwe, biza, buhaya, angu, bah babona kolechiwa kwa bamalaika abuhaya giki, Ah mpanga. Hangi bichiswe bamo bah bajaga ku kigila, busanga gitumo bakima bah bahaya, aliyo Wei batamonile. Nanghwe ubawila giki, Bingʼwe bachiluchilu na babomhubomhu mu ngholo kuzunya yose iyo bahangi baahaya: Angu, yali itangʼwigelelilwe Kristo kuluhiwa mihayo iyi, na kwingila ngʼwikujo lyakwe? Wandia kuli Musa na ku bahangi bose, ubasombolela mu Shandikwa shose, isho shah shunghaya Wei. Begela hihi ku nzengo uyo bah bajile mo; Wei ubiza giti akubitilaga kuja ku butongi. Bungʼwilamilija, buhaya giki, Ikalaga na biswe; iki haha yabi mhindi na limi lyagwaga. Wingila kwikala nabo. Na yubiza, aho wigasha hamo nabo ku shiliwa, udima ngati, ugusungulila lubango, na ugumeganya, ubinha. Hunaho miso gabo gufumbuka, bumana, nanghwe ujimilila mu miso gabo. Nabo biwila giki, Yee! ngholo jiswe jitubakaga mugati yiswe aho waalungalungaga na biswe mu nzila, na kutufumbulila Shandikwa? Bubuka buja ikanza lyenilo, bushoka Yerusalemi, bubasanga benabo ikumi na umo bibilingaga hamo na benabo abali bikala nabo, Buhaya giki, Nghana Seba wajukaga, hangi wangʼwilongelaga Simoni. Na benabo bubasombolela iyo yilongaga mu nzila, na hangi gitumo umanwa nabo aho umeganya ngati. Aho bah batali bulungalunga mihayo iyi, Wei Ngʼwenekele wimila hagati yabo, ubawila giki, Mhola ibize ku bingʼwe. Bisambukila, bokala na boba, biganika balibona linghangi. Nanghwe ubawila giki, Muliganilija ni buli? Hangi nguno ki kutawatawa kuhbuka mu ngholo jingʼwe? Lolagi shiganza shane na mhambala jane, ambu, Ndi Nene; munidime ho mubone; iki moyo guti na nofu na maguha gitumo mukunibonaga Nene ndi nasho. Aho umala kuhaya iyo, ubolekeja shiganza shakwe na mhambala jakwe. Aliyo nulu bah batali kuzunya kulwa kuyega, na kukumya, ubawila giki, Muli nasho sha kulya aha? Bungʼwinha ipande lya ndilo lyokije, na buki budo. Nanghwe wanukula, ulya mu miso gabo. Ubawila giki, Iyi hi yene mihayo yane, iyo naamuwilaga aho nah natali hamo ningʼwe, giki, igelile yose kushikilijiwa, iyo naandikilwa Nene mu shilagilo sha ngʼwa Musa, na mu bahangi, na mu Zaburi. Hunaho ubafumbula masala gabo bitegeleje Shandikwa; Ubawila giki, Hu na yene yaandikwa giko, Hangi shingʼwigelelilwe Kristo kuluhiwa giko na kujuka mu bafu ha lushiku lwa kadatu; Hangi ba mahanga gose balomelwe koya, na kulekejiwa kwa shibi, mu lina lyakwe, yandije mu Yerusalemi. Bingʼwe muli bakaniji ba mihayo iyi. Na Nene, lola, nakumutumila kwisagija kwa ngʼwa Baba; aliyo ngʼwikale mu nzengo gwa Yerusalemi, kushisha mukuzwalichiwa na nguzu ijufuma ngʼwigulu. Wali ubafunya hanze, ubashisha Bethania: ubucha makono, ubasungulila lubango. Na yubiza aho walatali ubasungulila lubango, ulekana nabo, ubuchiwa higulya ngʼwigulu. Nabo bunamya, huna bushoka Yerusalemi na kuyega kutale no. Bikala mu hekalu gwa gwa gwa, bunkumilija Mulungu. Amina. Kwandia na kwandia walali ho Mhayo, na Mhayo walali ho hamo na Mulungu, nanghwe Mhayo walali Mulungu. Ngʼwene Uyo kwandia na kwandia walali ho hamo na Mulungu. Shinhu shose shali shubejiwa nanghwe; na ulu Wei ni walatukibeja, ni kiti ho kinhu chaabejiwa, mu isho shaabejiwa. Bupanga bukabizaga muli Wei, na bupanga wenubu bubiza isana lya banhu. Nalyo isana likubakaga mu giiti, na giiti chali kitulitegeleja. Walali ho munhu wali utungʼwa na Mulungu, lina lyakwe Yohana. Ngʼwenuyo wali wiza kulwa bukaniji, alikanile isana, bose bazunye kulwakwe. Ngʼwenuyo walati isana ilo, aliyo wali wiza kulikanila isana. Ilo lyene isana lya nghana, ilyungʼwakila buli munhu ose uwiza mu si. Walali mu si, na si yaabejiwa nanghwe, nayo si yali itumana Wei. Akiza ku shakwe, nabo a bakwe bali batungʼwanukula. Aliyo bose abungʼwanukula, ubinha budula wa kubiza bana ba Mulungu, ku abo abulizunya lina lyakwe; Abubyalwa, iti mu mininga, nulu iti mu kutogwa kwa mili, nulu iti mu kutogwa kwa munhu, aliyo kwa Mulungu. Na Mhayo ugaluka kubiza mili, wali upanga ku biswe, twali tubona ikujo lyakwe, ikujo giti lya Ngʼwana waabyalwa umo wike na Ise, izulile na kigongo na nghana. Yohana wali unkanila, uhamuka, uhaya giki, Uyu hu na Ngʼwene nakanghaya giki, Uyo izile hanuma yane, wabizaga ku butongi wane, iki Wei waanitanga. Na kufuma mu kokala kwakwe biswe bose twaanukula, na kigongo higulya ya kigongo. Iki shilagilo shiinhiwa muli Musa, kigongo na nghana shizile muli Yesu Kristo. Ati ho munhu uwamona Mulungu kufuma kale; Ngʼwana waabyalwa umo wike, Uyo ali mu kikuba cha ngʼwa Siswe, u Ngʼwene waangʼwelecha. Ubu u wene bukaniji wa ngʼwa Yohana, aho Bayudaya bali bubatuma bagabiji na ba Lawi kufuma Yerusalemi bamuje giki, Bebe uli nani? Nanghwe wali utambula, atalemile; utambula giki, Nene nati Kristo. Nabo bumuja giki, Kinahe lulu? Bebe uli Eliya? Nanghwe uhaya giki, Yaya, nati ngʼwene. Bebe uli nghangi Uyo? Ushosha giki, Yaya. Huna lulu bungʼwila giki, Uli nani lulu, tukabashokeje ishosho abatutumaga. Ukwihayaga kinahe? Uhaya giki, Nene ndi ilaka lya munhu akuhamukaga mu bu giki, Gololagi nzila ya Seba, gitumo wali uhayila u nghangi Isaya. Nabo abali butungʼwa bali bali ba mu Bafarisayo. Bumuja, buhaya giki, Bebe lulu ukubatijaga ni buli, ulu uti Kristo, nulu Eliya, nulu nghangi Uyo? Yohana ubashokeja, uhaya giki, Nene nakubatijaga na minzi; aliyo imilile mu bingʼwe, Uyo bingʼwe mutamanile. U ngʼwene Uyo izile hanuma yane, uwabizaga ku butongi wane, nulu nene natigelelilwe kutaligula nkoba gwa kilatu chakwe. Yeniyi yali yubiza Bethania, ku nkilo gwa Yordani, uko ubyubatigija Yohana. Ku ntondo Yohana umona Yesu izile kuli wei, uhaya giki, Lolagi Ngʼwana wa ngholo wa Mulungu, Uyo akushibuchaga shibi sha ba mu si! Uyo hu Ngʼwene nakanghaya giki, Hanuma yane izile ngosha, Uyo wabizaga ku butongi wane, iki Wei waanitanga. Nane nali natamanile Wei: aliyo olechiwe hape ku ba Israeli, kulwa nguno iyi hu yene nizile nene nubyubatija na minzi. Yohana ukanila, uhaya giki, Namala kumona Moyo Ngʼwela akwikaga giti nghuulu kufuma ngʼwigulu, nanghwe wikala higulya hali Wei. Nane nali natamanile Wei; aliyo Uyo waanituma kubatija na minzi, u Ngʼwene waaniwila giki, Uyo ulamona Moyo kungʼwikiila na kwikala higulya hali Wei, hu Ngʼwene wa kubyubatija na Moyo Ngʼwela. Nane namala kubona, hangi nakanilaga giki, Uyu hu Ngʼwene Ngʼwana wa Mulungu. Ku ntondo hangi Yohana wali wimilile hamo na bahemba bakwe babili. Aho unola Yesu alishiminza, uhaya giki, Lolagi Ngʼwana wa ngholo wa Mulungu! Bahemba babili benabo bungʼwigwa uhaya giko, bunondela Yesu. Yesu ugaluka, ubabona balinondela, ubawila giki, Ngʼwakoba ki? Bungʼwila giki, Rabbi (kushomelejiwa kwago giki, Nangi) ukikalaga hali? Ubawila giki, Nzugwi mubone. Buja lulu, bukabona aho wiikalaga; nabo bikala hamo nanghwe lushiku lwenulo: yali ili giti saa ikumi. Andrea, ngʼwana wa ngʼwawe wa Simoni Petro, walali umo wa benabo babili abali bungʼwigwa Yohana, huna bunondela. Uyo umona ngʼwana wa ngʼwawe Simoni kwandia, ungʼwila giki, Twamonaga Masiya, (kushomelejiwa kwago giki, Kristo). Untongela kuli Yesu. Yesu unola, uhaya giki, Bebe uli Simoni, ngʼwana wa ngʼwa Yona; ulitanwa Kefa, (kushomelejiwa kwago giki, Petro). Ku ntondo Yesu walatogilwe kwinga kuja Galilaya, umona Filipo, ungʼwila giki, Nilondelage. Aliyo Filipo walali wa Bethsaida, wa nzengo gwa ba Andrea na Petro. Filipo umona Nathanaeli, ungʼwila giki, Twamonaga Uyo waandikwa na Musa mu shilagilo, na bahangi, Yesu ngʼwana wa ngʼwa Yusufu, wa Nazareti. Nathanaeli ungʼwila giki, Mu Nazareti chadula kufuma mo kinhu cha wiza? Filipo ungʼwila giki, Nzugu ubone. Yesu aho umona Nathanaeli izile kuli Wei, unghaya giki, Nolagi uyu muna Israeli gete gete, muli wei bulembalembi buti mo. Nathanaeli ungʼwila giki, Wanimana kinahe? Yesu ushosha ungʼwila giki, Aho Filipo walatali kukwitana, aho waluli mu mbeho ya nti ntini, nakakubona. Nathanaeli ushosha ungʼwila giki, Rabbi, Bebe uli Ngʼwana wa Mulungu, huna Bebe uli ntemi wa Israeli. Yesu ushosha ungʼwila giki, Iki nakuwila giki, Nakakubona mu mbeho ya ntini, wazunya? ulabona mihayo mitale ya kukila iyi. Ungʼwila giki, Nghana, nghana, namuwila giki, Kufuma haha mukubona igulu lyiguka, na bamalaika ba Mulungu bakulinhaga na bakwikaga hali Ngʼwana wa munhu. Ha lushiku lwa kadatu wali bubiza ho bukombe wa butoji mu Kana, ya Galilaya; na nina wa ngʼwa Yesu walali ko; Yesu nanghwe wali witanwa hamo na bahemba bakwe ku bukombe. Minzi ga mizabibu iki guleba ho, nina wa ngʼwa Yesu ungʼwila giki, Bati na minzi ga mizabibu. Yesu ungʼwila giki, Nkima, tuli na ki, Nene na bebe? ikanza lyane litinashika. Nina ubawila binhilija giki, Iyo yose alamuwile iyitagi. Jali jili ho nno ja mawe itandatu jikindikile ho gitumo shimile shabo shili sha koga a Bayudaya, buli luno lwali luli lwa shisabo shibili nulu shidatu. Yesu ubawila giki, Jokajagi minzi nno jeniji. Nabo bujokaja pa. Ubawila giki, Dahagi lulu, muntwalile u ntale wa bukombe. Buntwalila. Ntale wa bukombe, aho uloja minzi genayo gabizaga minzi ga mizabibu, nanghwe walatamanile uko gafumaga, (aliyo binhilija abali bugadaha minzi, bene bamanile), ntale wa bukombe ungʼwitana u ntoji, Ungʼwila giki, Buli munhu ose kwandia akatengaga minzi ga mizabibu a ga wiza, kushisha banhu aho bamala kungʼwa no, huna lulu wenha agati ga wiza; aliyo bebe wagabikaga minzi ga mizabibu a ga wiza kushisha haha. Yesu wali wita wandijo ubu wa shimanikijo mu Kana ya Galilaya, na olecha hape ikujo lyakwe; na bahemba bakwe nabo bunzunya. Hanuma ya iyo, wali utulumenha kuja Kapernaumu, Wei, na nina, na bana ba ngʼwawe, na bahemba bakwe: bikala ko shiku ngehu. Na Pasaka ya Bayudaya yali ili hihi kushika: Yesu ulinha kuja Yerusalemi. Ubabona mu hekalu banhu abali bujinja ngʼombe na ngholo na nghuulu, na bakabanya ba feza bigashije; Aho ubeja fimbo ya ngoye, ubapeja bose mu hekalu, na ngholo na ngʼombe; ujitagula feza ja bakabanya ba feza, ujisalikula meza jabo; Ubawila bajinja ba nghuulu giki, Funyagi shinhu ishi; mutabejage numba ya ngʼwa Baba kubiza numba ya buguji. Bahemba bakwe bizukwa iyo yaandikwa giki, Wilu wa numba yako wanilya. Kulwa iyi Bayudaya bushosha bungʼwila giki, Kimanikijo ki ulitolekeja, iki ukwitaga yeniyi? Yesu ushosha ubawila giki, Isambulagi hekalu iyi, na Nene nakuyimilija mu shiku idatu. Kulwa iyi Bayudaya buhaya giki, Hekalu iyi yaazengagwa miaka makumi ane na itandatu, nangho ukuyimilija mu shiku idatu? Aliyo Wei wali uyihaya hekalu ya mili gwakwe. Aho wali umala kujuchiwa mu bafu, bahemba bakwe bali bizukwa giki, wali waguhaya mhayo uyu; nabo bushizunya Shandikwa, na mhayo uyo akaguhaya Yesu. Aliyo aho walali mu Yerusalemi ku Pasaka mu lushiku lutale, banhu bingi bali bulizunya lina lyakwe aho bubona shimanikijo shakwe isho akwitaga. Aliyo Yesu walatisanije ngʼwenekele kubo, iki Wei walabamanile bose. Hangi iki walati na nguno munhu ose ankanile ya banhu; iki Wei ngʼwenekele walamanile iyo ili muli munhu. Walali ho munhu umo wa mu Bafarisayo, lina lyakwe Nikodemo, nsugi wa Bayudaya; Ngʼwenuyo wali wiza kuli Yesu bujiku, ungʼwila giki, Rabbi, tumanile giki, Bebe uli nangi wafumila kuli Mulungu; iki ati ho munhu uwadula kwita shimanikijo ishi ukushitaga Bebe, numho Mulungu ali hamo nanghwe. Yesu ushosha ungʼwila giki, Nghana, nghana, nakuwila giki, Munhu ulu atubyalwa lukangala lwa kabili, atudula kububona butemi wa Mulungu. Nikodemo ungʼwila giki, Munhu wadula kinahe kubyalwa ulu anamhalile? wadula kwingila mu nda ya ngʼwa nina lukangala lwa kabili na kubyalwa? Yesu ushosha giki, Nghana, nghana, nakuwila giki, Munhu ulu atubyalwa na minzi na Moyo Ngʼwela, atudula kwingila mu butemi wa Mulungu. Icho chabyalilwe na mili chene mili; na icho chabyalilwe na Moyo Ngʼwela chene moyo. Utakumyage iki nakuwilaga giki, Shingʼwigelile kubyalwa lukangala lwa kabili. Nyaga guhemba kuja uko gutogilwe, wigwa ilaka lyago, aliyo utamanile uko gulifuma, nulu uko gujile: giko na buli munhu ose uyo wabyalilwe na Moyo Ngʼwela. Nikodemo ushosha ungʼwila giki, Yeniyi yadulika kinahe kubiza ho? Yesu ushosha ungʼwila giki, Angu bebe uli nangi wa ba Israeli, na utamanile yeniyi? Nghana, nghana, nakuwila giki, Iyo twimanile yene tukulungalungaga, na iyo twaayibona yene tukukanilaga; na bukaniji wiswe mutuwanukulaga. Ulu namuwilaga mihayo ya mu si, na bingʼwe mutuzunyaga, mukuzunya kinahe ulu namuwila ya ngʼwigulu? Ati ho munhu uwali walinha ngʼwigulu ulu ati Uyo wali wika kufuma ngʼwigulu, Ngʼwene Ngʼwana wa munhu Uyo ali ngʼwigulu. Gitumo Musa wali usunga nzoka mu bu, giko hangi na Ngʼwana wa munhu shingʼwigelelilwe kusungwa, Munhu ose uwanzunya aleke kuyagala, aliyo abize na bupanga butushila. Iki Mulungu ubatogwa ba mu si giki, na kwinha ungʼwinha ko Ngʼwana wakwe uwaabyalwa umo wike, munhu ose uwanzunya aleke kuyagala, aliyo abize na bupanga butushila. Iki Mulungu walatantumile Ngʼwana wakwe mu si kubalekanya nsango ba mu si, aliyo ba mu si bapijiwe muli Wei. Uwanzunya atulekanyiwa nsango, uyo atunzunya wamala kulekanyiwa nsango, iki atalizunije lina lya Ngʼwana waabyalwa umo wike wa Mulungu. Uyu gwene nsango giki, isana lyizile mu si, na banhu butogwa giiti kutinda isana; iki Shitwa shabo shali sha bubi. Iki uyo ose akitaga ya bubi akulikolagwa isana, nulu atiza kwisana, Shitwa shakwe shileke kuhangʼwa. Aliyo uyo akitaga ya nghana akizaga kwisana, Shitwa shakwe shigengeleke giki, Shitwa muli Mulungu. Hanuma ya yeniyi Yesu uja na bahemba bakwe ku si ya Bayudaya; na kwenuko udila hamo nabo akubatijaga. Yohana nanghwe ubyubatija mu Ainon hihi na Salim, iki gali gali ko minzi mingi; banhu bubyuja bubatijiwa. Iki Yohana walatali kutungwa mu jela. Huna lulu kwali kubuka kwibugilija kwa bahemba ba ngʼwa Yohana na Bayudaya mu mihayo ya kwejiwa. Bali biza kuli Yohana, bungʼwila giki, Rabbi, Uyo walali nangho ku nkilo gwa Yordani Uyo bebe wali unkanila, lolaga, Ngʼwenuyo akubatijaga, na banhu hose bakujaga kuli Wei. Yohana ushosha uhaya giki, Munhu atudula kwanukula mhayo gose, ulu atinhiwa kufuma ngʼwigulu. Bingʼwe benekele mulinikanila gitumo namala kuhaya giki, Nene nati Kristo, aliyo giki, nali ntungʼwa ku butongi wakwe. Uyo ali na ntolwa, u ngʼwene ntoji; aliyo nsumba ngʼwiye wa ntoji, uwimilile na kungʼwigwa, aliyegela no ilaka lya ntoji: ubu buyegi wane washikilaga lulu. Wei shingʼwigelile kukula, aliyo nene kudoha. Uyo izile kufuma higulya, ali higulya ya yose: uyo ali wa mu si, ngʼwene wa mu si, nanghwe akulungalungaga ya mu si: Uyo izile kufuma ngʼwigulu ali higulya ya yose. Iyo wamala kubona na kwigwa, i yene akukanilaga; na ati ho uyo akuzunyaga bukaniji wakwe. Uyo wazunyaga bukaniji wakwe watuulaga ho lumengho lwakwe giki, Mulungu ali wa nghana; Iki Uyo Mulungu waantuma akulungalungaga mihayo ya Mulungu; iki Mulungu atungʼwinhaga Moyo Ngʼwela mu bugeleki. Siswe antogilwe Ngʼwana, hangi wamala kungʼwinha yose mu nkono gwakwe. Uwanzunya Ngʼwana ali na bupanga butushila; na uyo atunzunya Ngʼwana, atalamona bupanga, aliyo bupelanu wa Mulungu bukikalaga kuli wei. Huna lulu Seba iki wali umana giki, Bafarisayo bigwile giki, Akwitaga hangi akubatijaga bahemba bingi kutinda Yohana, (Nahene Yesu ngʼwenekele atubatijaga, aliyo bahemba bakwe), Winga mu Buyudaya, uja Galilaya hangi. Shingʼwigelelilwe Wei kubita mugati ya Samaria. Ushika nose ku nzengo gwa Samaria, gukitanagwa Sukari, hihi na ngunda uyo Yakobo akangʼwinha ngʼwana wakwe Yusufu. Kwenuko lwali luli ho lwinzi lwa ngʼwa Yakobo. Yesu iki unoga kushiminza, wigasha giko ha lwinzi lwenulo. Limi lyali lili giti saa ya katandatu. Hunaho nkima wa Samaria wiza kudaha minzi. Yesu ungʼwila giki, Ninhage cha kungʼwa. Iki bahemba bakwe bali bajaga mu nzengo kugula shiliwa. Nkima uyo, Nsamaria, ungʼwila giki, Ili kinahe, Bebe, uli Nyudaya, ulinilomba cha kungʼwa, na nene ndi nkima Nsamaria? iki Bayudaya batisangijaga na Basamaria. Yesu ushosha ungʼwila giki, Ninga ulu ni walumanile cha kwinha cha Mulungu, na Uyo alikuwila giki, Ninhage cha kungʼwa, bebe ni wanomba, nanghwe ni wakwinha minzi mapanga. Nkima ungʼwila giki, Seba, uti nacho cha kudahila, na lwinzi lwenulu luli lushimu no; wagafunije hali lulu minzi genaya a mapanga? Angu, Bebe uli ntale kutinda nkulugenji wiswe Yakobo, uyo wali utwinha lwinzi ulu, nanghwe ngʼwenekele waangʼwaga mo, na bana bakwe, na mitugo jakwe? Yesu ushosha ungʼwila giki, Buli munhu ose akungʼwaga minzi aya akukolwa nota hangi; Aliyo uyo ose ungʼwa minzi ayo nakungʼwinha Nene, atalakolwa nota hangi welelo bose; aliyo minzi ayo nakungʼwinha, gakubiza muli wei luzwilo lwa minzi lukuzwila kushika ku bupanga butushila. Nkima ungʼwila giki, Seba, ninhage minzi genayo, natizukolwa nota hangi, nulu kwiza kunu kudaha. Yesu ungʼwila giki, Jaga ukangʼwitane u ngoshi wako, na ushokanye kunu. Nkima ushosha uhaya giki, Nati na ngoshi. Yesu ungʼwila giki, Wahayaga ya nghana giki, Nati na ngoshi: Iki wamala kubiza na bagoshi batano, na uyo uli nanghwe i haha ati ngoshi wako: gwenuyu waguhayaga gwa nghana. Nkima ungʼwila giki, Seba, nabona giki, Uli nghangi. Bakulugenji biswe baalamijaga mu lugulu ulu; na bingʼwe mukuhayaga giki, Mu Yerusalemi lili ho ipande umo shigelile kulamija mo. Yesu ungʼwila giki, Bebe nkima, nizunyage, ikanza likwizaga, aho mutalanamija Baba mu lugulu ulu, nulu mu Yerusalemi. Bingʼwe mukalamyaga icho mutakimanile: biswe tukalamyaga icho tutamanile; iki bupiji wafuma mu Bayudaya. Aliyo ikanza likwizaga, hangi haha yeniyi lili ho, aho a balamya ba nghana bakubyunamya Baba mu moyo na mu nghana; iki Baba akakobaga hanhu abali giko kubiza balamya bakwe. Mulungu Ngʼwene Moyo; nabo abakunamyaga shibigelile kulamya mu moyo na mu nghana. Nkima ungʼwila giki, Namanile giki, Masiya aliza (Uyo akitanagwa Kristo); Ngʼwenuyo aho aliza alatuwila yose. Yesu ungʼwila giki, Nene Uyo nalilungalunga na bebe, huna Nene ndi Ngʼwene. Hunaho bahemba bakwe bashika, nabo bukumya iki akulungalungaga na nkima; nahene walati ho wa kuhaya giki, Ulikoba ki? nulu giki, Nguno ki ulilungalunga nanghwe? Hunaho nkima ululeka luno lwakwe, uja mu nzengo, ubawila banhu giki, Nzugwi, munole munhu Uyo waniwilaga iyo nakitaga yose: angu, Ngʼwenuyu akukija kubiza Kristo? Bufuma mu nzengo lulu, buja kuli Wei. Ngʼwikanza lyenili bahemba bakwe bungʼwikumbilija, bungʼwila giki, Rabbi, lyaga shiliwa. Nanghwe ubawila giki, Nene ndi na shiliwa isho mutashimanile. Bahemba bakwe bilunjalunja boi bike giki, Ali ho munhu wangʼwenhelaga shiliwa? Yesu ubawila giki, Shiliwa shane shene giki, kwita iyo atogilwe Uyo waanituma, na kushikilija nimo gwakwe. Bingʼwe mutahayaga giki, Yasaga mieji ine, huna lulu magesa gushika? Lolagi, namuwila giki, Buchagi miso gingʼwe mulole migunda, iki yelaga pe kugeswa. Uwagesa wanukula mhela, hangi akubilingaga matwajo ku bupanga butushila; u mibi na ngesi bayegele hamo. Iki mu iyi lusumo ulu luli lwa nghana giki, Mibi ungi na ngesi ungi. Nene nali numutuma kugesa isho mutashikoyakoyelile; bangi bamala kukoyakoya, na bingʼwe ngʼwingilile mu kukoyakoya kwabo. Basamaria bingi ba mu nzengo gwenuyo bali bunzunya Wei kulwa mhayo gwa nkima ngʼwenuyo, aho ukanila giki, Waniwilaga iyo nakitaga yose. Huna lulu Basamaria aho bushika kuli Wei, bungʼwikumbilija kwikala hamo nabo; nanghwe wikala ko shiku ibili. Banhu bingi no kutinda bali bunzunya kulwa mhayo gwakwe, Bungʼwila u nkima giki, Haha twazunya, iti kulwa mhayo gwako gwike, iki twigwaga biswe benekele, hangi twamana giki, Nghana Uyu hu Ngʼwene Kristo, Mpija wa ba mu si. Hanuma ya shiku ijo ibili, winga ko, uja Galilaya. Iki Yesu ngʼwenekele wali ukanila giki, Nghangi ati na ikujo mu si ya ngʼwabo. Huna lulu aho wali ushika Galilaya, a Bagalilaya bungʼwegeleja, iki bali bubona iyo yose akita mu Yerusalemi ku lushiku lutale, iki na benabo bali buja ku lushiku lutale. Huna lulu ushika hangi mu Kana, nzengo gwa Galilaya; umo akagalukija minzi kubiza minzi ga mizabibu. Walali ho munikulu umo ngʼwana wakwe nyanda walasatile kwenuko Kapernaumu. Ngʼwenuyo aho wali wigwa giki, Yesu wamala kwiza kufuma mu Buyudaya washikaga Galilaya, uja kuli Wei, ungʼwikumbilija giki, atulumenhe akampije ngʼwana wakwe; iki walenda kucha. Huna lulu Yesu ungʼwila giki, Ulu mutubona shimanikijo na shamahano, mutalazunya na hado. Munikulu ungʼwila giki, Seba, tulumenhaga, kana kane kuko katali kucha. Yesu ungʼwila giki, Jaga, ngʼwana wako ali mpanga. Munhu ngʼwenuyo uguzunya mhayo uyo Yesu akangʼwila, uja lulu. Aho alitulumenha, basese bakwe bali bumanhya nanghwe, bunsombolela, buhaya giki, Ngʼwana wako ali mpanga. Huna lulu ubabugilija saa jinga aho wali wandia kupila. Nabo bungʼwila giki, Igolo saa mpungati nswiza gwali gunekela. Huna lulu ise umana giki, hu yene saa yeniyo aho Yesu wali ungʼwila giki, Ngʼwana wako ali mpanga. Uzunya u wei ngʼwenekele na kaya yakwe yose. Iki chene kimanikijo cha kabili icho Yesu wali wita aho wali winga Buyudaya kuja Galilaya. Hanuma ya mihayo iyi lwali lubiza ho lushiku lutale lwa Bayudaya; na Yesu ulinha kuja Yerusalemi. Mu Yerusalemi hihi na mita gwa ngholo, lili ho ilambo likitanagwa mu Kihebrania giki, Bethesda, nalyo lili na mabindo atano. Mu mabindo genaya bubyulala mo banhu bingi abasatile, baboku, balema, na buma buhama, bakulindilaga kusibuka kwa minzi. Iki nghangala ningi malaika wiikaga ngʼwilambo, ugasagaja a minzi. Huna lulu uyo wingila kwandia hanuma ya kusagajiwa kwa minzi, ngʼwene upila u busatu wakwe bose ubo walasatile. Kwenuko walali ho munhu waasataga miaka makumi adatu na inane. Aho Yesu wali umona ngʼwenuyo alalile, hangi umana giki, wabile giko miaka mingi, ungʼwila giki, Utogilwe kubiza mpanga? Nsatu unshokeja giki, Seba, nati na munhu wa kunituula ngʼwilambo aho minzi gasagajiwa; aliyo nene aho natali niza, ungi unishigila kwika mo. Yesu ungʼwila giki, Bukaga bubuchage bulili wako, ushiminze. Haho na haho munhu ngʼwenuyo ubiza mpanga, ububucha bulili wakwe, ushiminza; aliyo lushiku lwenulo lwali luli Sabato. Kulwa iyo Bayudaya bungʼwila uyo wamala kupijiwa giki, Lelo ili Sabato, chene cha ngilo bebe kubucha bulili wako. Nanghwe ubashokeja giki, Uyo wanipijaga, Ngʼwene wali waniwila giki, Buchaga bulili wako, ushiminze. Huna lulu bumuja giki, Munhu Uyo wali wakuwila giki, Buchaga bulili wako, ushiminze, ali nani? Aliyo uyo upijiwa walatamanile ni nani; iki Yesu wali ubihunga, iki ngʼwipande ilo bali bali ho banhu bingi. Hanuma ya mihayo iyi Yesu unsanga mu hekalu, ungʼwila giki, Lolaga, haha wabizaga mpanga, utalizita shibi hangi, mhayo gwa bubi kutinda gutizukupandika. Munhu uyu uja, ubawila Bayudaya giki, Yesu u Ngʼwene waanipija. Kulwa nguno iyi Bayudaya bubyunyajanyaja Yesu, bukoba kumulaga, iki wali wita mihayo iyi ha Sabato. Aliyo Yesu ubashokeja giki, Baba wane akwitaga milimo kushisha haha, na Nene nakwitaga milimo. Kulwa nguno yeniyi Bayudaya bongeja kukoba kumulaga, iki walatakenagulile Sabato gwike, aliyo hangi giki, wali wangʼwitana Mulungu giki, Ise gete, wilenganija ngʼwenekele na Mulungu. Huna lulu Yesu ushosha ubawila giki, Nghana, nghana, namuwila giki, Ngʼwana wiyene atudula kwita mhayo, ulu iti iyo alimona Ise akwitaga; iki iyo yose akitaga Wei, yeniyo nu Ngʼwana nanghwe akwitaga chene. Iki Baba antogilwe Ngʼwana, hangi akungʼolekejaga yose iyo akwitaga Wei ngʼwenekele; hangi akungʼolekeja milimo mitale ya kutinda iyi, bingʼwe mukumye. Iki gitumo Baba akabajuchaga bafu, ubinha bupanga, giko hangi nu Ngʼwana akubinhaga bupanga abo atogilwe. Iki Baba atunekanya munhu nulu umo nsango, aliyo waangʼwinha Ngʼwana kulekanya misango yose; Bose bankuje Ngʼwana, gitumo bakankugijaga Baba. Uyo atunkujaga Ngʼwana, atunkujaga Ise Uyo waantuma. Nghana, nghana, namuwila giki, Uyo wagwigwa mhayo gwane, na unzunya Uyo waanituma, ali na bupanga butushila, nulu atalingila mu kulekanyiwa nsango, aliyo wabitaga kwinga mu kucha kushika mu bupanga. Nghana, nghana, namuwila giki, Ikanza likwizaga, hangi haha yeniyi lili ho, aho bafu bakwigwa mo ilaka lya Ngʼwana wa Mulungu, nabo abalamala kwigwa bakubiza bapanga. Iki gitumo Baba ali na bupanga muli Wei ngʼwenekele, giko hangi waangʼwinha nu Ngʼwana kubiza na bupanga muli Wei ngʼwenekele; Waangʼwinha na budula wa kulekanya nsango, iki ali Ngʼwana wa munhu. Mutizukumya mhayo uyu; ikanza likwizaga aho bose abali mu mashigila bakwigwa ilaka lyakwe, Nabo bakufuma moi, abo biitaga ya wiza bakujukila mu bupanga; na benabo biitaga ya bubi, bakujukila mu nsango. Nene niyene natudula kwita mhayo: gitumo nakwigwilaga, giko nalekanya nsango; na kulekanya kwane kwene kwa butungilija: iki natakobaga iyo natogilwe Nene, aliyo iyo atogilwe Baba uwaanituma. Nene ulu nikanila ngʼwenekele, bukaniji wane buti wa nghana. Ali ho ungi uyo akunikanilaga; na Nene namanile giki, bukaniji ubo akunikanilaga Nene buli wa nghana. Bingʼwe ngʼwamala kutuma banhu kuli Yohana, nanghwe wamala kukanila iyo ill ya nghana. Aliyo Nene natanukulaga bukaniji kufuma ku banhu; aliyo nuhaya mihayo iyi giki, bingʼwe mupijiwe. Ngʼwenuyo walali tala iyubaka na yaka, na bingʼwe ngʼwali ngʼwatogwa kuyegela ngʼwisana lyakwe kakanza kado. Aliyo Nene ndi nabo bukaniji butale kutinda wa ngʼwa Yohana: iki milimo iyo Baba waaninha giki, nayimalije, milimo iyo nakwitaga Nene, yeniyo yenekele yunikanila giki, Baba waanituma. Nu Baba Uyo waanituma, Wei ngʼwenekele wamala kunikanila. Bingʼwe mutinigwa ilaka lyakwe nulu kamo yaya, nulu mutinibona suso yakwe. Na bingʼwe muti nago mhayo gwakwe gukwikalaga mu bingʼwe: iki mutunzunyaga Ngʼwenuyo Wei waantuma. Mukakobaga mu Shandikwa, iki mukiganikaga giki, muli na bupanga butushila musho, na shenisho i shene shunikanila Nene; Nulu mutatogilwe kwiza kuli Nene, mubize na bupanga. Natanukulaga ikujo kufuma ku banhu. Aliyo namumanile giki, muti na butogwa wa Mulungu mu bingʼwe. Nene nizile mu lina lya ngʼwa Baba, na bingʼwe mutunanukula; ungi ulu wiza mu lina lyakwe ngʼwenekele, ngʼwenuyo mulangʼwanukula. Ngʼwadula kinahe kuzunya bingʼwe, abo mukwiyanukulaga ikujo benekele na benekele, na ikujo ilyufuma kuli Mulungu ali umo wike, lyene mutukobaga. Mutiziganika giki, Nene nakumubula kuli Baba: ali ho uyo akumubulaga, ngʼwene Musa, muli ngʼwenuyo mukwisagilagwa. Iki ulu ni ngʼwali ngʼwanzunya Musa, na Nene ni ngʼwali ngʼwanizunya; iki wei waandika ya kuli Nene. Aliyo ulu mutuzunya Shandikwa shakwe, mukuzunya kinahe mihayo yane? Hanuma ya mihayo iyi Yesu wali uja ku nkilo gwa nyanza ya Galilaya, yene nyanza ya Tiberia. Ibita itale lyunondela iki bushibona shimanikijo shakwe isho wali ubitila basatu. Yesu ulinha mu lugulu, wigasha ngʼwenumo hamo na bahemba bakwe. Pasaka, lushiku lutale lwa Bayudaya, lwali luli hihi kushika. Hunaho Yesu ubucha miso gakwe, ubona ibita itale liliza kuli Wei; ungʼwila Filipo giki, Tukagule hali migati, balye benaba? Akahaya giko ya kungema, iki walamanile Wei ngʼwenekele iyo uhaya kwita. Filipo unshokeja giki, Migati ya shilingi magana abili kubigela, buli umo wabo anukule kadoo gwike. Umo wa bahemba bakwe, ngʼwene Andrea, ngʼwana wa ngʼwawe wa Simoni Petro, ungʼwila giki, Ali ho nyanda kunu, ali na migati itano ya shayiri, na tudilo tubili; aliyo ishi shili ki ku banhu bingi giko? Yesu uhaya giki, Bigashagi a banhu. Gali gali ho maswa mingi ngʼwipande ilo. Huna lulu bigasha bagosha bali hali giti 5,000. Yesu wanukula migati, aho wamala kulumba, ubagabulila bahemba, na bahemba ku abo bigashije; na tudilo nato chene, gitumo bali batogilwe. Aho biguta, ubawila bahemba bakwe giki, Bilingagi masajiwa agasaga ho, kitizujimila kinhu. Huna lulu bubilinga masajiwa, bokaja masonzo ikumi na abili ga masajiwa ga migati yeniyo itano ya shayiri, ayo gali gusaga ku benabo abali bulya. Huna lulu banhu benabo aho bubona kimanikijo icho wali wita Yesu, buhaya giki, Nghana Uyu ali nghangi Uyo izile mu si. Huna lulu Yesu, iki umana giki, bali buhaya kwiza kundima bantuule ho kubiza ntemi, ubiyalila uja hangi mu lugulu wiyene. Aho yubiza mhindi, bahemba bakwe butulumenha ku nyanza. Aho bingila mu lyato bandia kukila nyanza kuja Kapernaumu. Yubiza giiti lulu, na Yesu walatali kwiza kubo. Hangi nyanza yulibanguka kulwa nyaga ngʼwingi guhemba. Aho bumala kubuga katanalo ka stadio makumi abili na itano, hamo makumi adatu, bumona Yesu akushiminzaga ha nyanza, wegela ku lyato; nabo bogoha. Nanghwe ubawila giki, Ndi Nene, mutogohage. Buzunya lulu kungʼwegeleja mu lyato; haho na baho lyato lyukola ku si iyo bali bajile ko. Ku ntondo ibita lya banhu ilyali lyimilile ku nkilo gwa nyanza, aho bubona liti ho lyato lingi ulu liti limo, lyene ilo bali bingila bahemba bakwe, na Yesu walatingilile mu lyato hamo na bahemba bakwe, aliyo bahemba bakwe hali buja biyene; (Aliyo mato gangi gab giza kufuma Tiberia, hihi na ipande ilo uko bali bulila migati, aho Seba akamala kulumba;) Ibita lya banhu aho bubona giki, Yesu ati ho, nulu bahemba bakwe, boi benekele bali bingila mu mato genayo, biza Kapernaumu, bunkobakoba Yesu. Aho bunsanga ku nkilo gwa nyanza, bungʼwila giki, Rabbi, wizile aba nanali? Yesu ubashokeja ubawila giki, Nghana, nghana, namuwila giki, Mulinikoba, iti iki mukashibona shimanikijo, aliyo iki mukalya migati na ngʼwiguta. Mutashitilage milimo shiliwa i sha kushila ho, aliyo mushitilage milimo shiliwa isho shikushingaga ho kushisha ku bupanga butushila, isho Ngʼwana wa munhu akungʼwinha bingʼwe; iki Siswe, Ngʼwene Mulungu, waantuulila Ngʼwenuyo lumengho. Huna lulu bungʼwila giki, Twite kinahe lulu, tubizutumama milimo ya Mulungu? Yesu ushosha ubawila giki, Gwenuyu gwene nimo gwa Mulungu, munzunye Uyo waatungʼwa nanghwe. Hunaho bungʼwila giki, Ukwitaga kimanikijo ki lulu, tuhone tukuzunye? Ulita nimo ki? Bakulugenji biswe bali bulya emanu mu bu; gitumo gwaandikwa giki, Wali ubinha kulya ngati ugwafuma ngʼwigulu. Hunaho Yesu ubawila giki, Nghana, nghana, namuwila giki, Ati Musa uwali ungʼwinha bingʼwe ngati uyu gwafuma ngʼwigulu; aliyo Baba akungʼwinhaga ngati gwa nghana gwa kufuma ngʼwigulu. Iki ngati gwa Mulungu guli uyo gwika kufuma ngʼwigulu, hangi gukwinhaga ba mu si bupanga. Hunaho bungʼwila giki, Seba, twinhage shiku jose ngati gwenuyo. Yesu ubawila giki, Nene ndi ngati gwa bupanga: uyo wiza kuli Nene atalatuba na hado, nanghwe uwanizunya atalakolwa nota hangi nulu na hado. Aliyo nali numuwila giki, Ngʼwanibonaga aliyo mutuzunyaga. Uyo ose Baba waninha aliza kuli Nene; nanghwe uyo wiza kuli Nene, natalamponya hanze na hado. Iki natikile kufuma ngʼwigulu, kwita iyo natogilwe Nene, aliyo kwita iyo atogilwe Uyo waanituma. Iyo atogilwe Baba uwaanituma yene giki, mu shose isho wamala kuninha, natizujimija kinhu nulu kimo, aliyo giki, nakijuche ku lushiku lwa ku bukalikijo. Iki iyo atogilwe Uyo waanituma yene giki, uyo ose unola Ngʼwana na unzunya, abize na bupanga butushila: na Nene nalanjucha ku lushiku lwa ku bukalikijo. Kulwa iyo Bayudaya bundugumila iki akahaya giki, Nene ndi ngati uyo gwikile kufuma ngʼwigulu. Nabo buhaya giki, U Ngʼwenuyu ati Yesu, ngʼwana wa ngʼwa Yusufu, Uyo ise na nina tubamanile? akuhayaga kinahe lulu giki, Nikile kufuma ngʼwigulu? Yesu ushosha ubawila giki, Mutadugumage bingʼwe benekele na benekele. Ati ho munhu wadula kwiza kuli Nene, ulu Baba uwaanituma atunduta; na Nene nalanjucha ku lushiku lwa bukalikijo. Gwaandikwa mu bahangi giki, Nabo bose balabyulangwa na Mulungu. Buli munhu uyo wagwaga kuli Baba na walangwa, ngʼwene wiza kuli Nene. Iti giki, ali ho uyo waamona Baba, ulu ati Uyo waatuma kuli Mulungu, U Ngʼwene waamona Baba. Nghana, nghana, namuwila giki, Uyo wanizunya Nene ali na bupanga butushila. Nene ndi ngati gwa bupanga. Bakulugenji bingʼwe bali bulya emanu mu bu, nabo bucha. Gwenuyu guli ngati uyo gwikile kufuma ngʼwigulu giki, uyo ose ugulya, kucha yaya. Nene ndi ngati mpanga uyo gwika kufuma ngʼwigulu; uyo ose ulu ulya ku ngati gwenuyu, alikala mpanga welelo na welelo; na ngati uyo nakugwinha ko gwene mili gwane, uyo nakugwinha ko kulwa nguno ya bupanga wa ba mu si. Kulwa iyo Bayudaya bihalalija boi bike, buhaya giki, Ngʼwenuyu wadula kinahe kutwinha mili gwakwe kugulya? Kulwa iyo Yesu ubawila giki, Nghana, nghana, namuwila giki, Ulu mutulya mili gwa Ngʼwana wa munhu, na kungʼwa mininga gakwe, muti na bupanga mu bingʼwe benekele. Uyo ulya mili gwane na ungʼwa mininga gane, ali na bupanga butushila; na Nene nalanjucha ku lushiku lwa ku bukalikijo. Iki mili gwane guli shiliwa nghana, na mininga gane gali cha kungʼwa nghana. Uyo ulya mili gwane, na ungʼwa mininga gane, akwikalaga muli Nene, na Nene muli wei. Gitumo Baba mpanga waanituma Nene, na Nene ndi mpanga kulwa ngʼwa Baba; giko hangi na ngʼwenuyo unilya, alabiza mpanga kulwa nguno yane. Gwenuyu guli ngati ugwikile kufuma ngʼwigulu; iti gitumo bakulugenji bingʼwe baalyaga emanu na bucha; uyo ulya ngati uyu alikala mpanga welelo na welelo. Mihayo iyi akayihaya ngʼwibilingilo aho ulanga mu Kapernaumu. Huna lulu bingi ba bahemba bakwe aho bigwa yeniyi, buhaya giki, Mhayo gwenuyu guli nambu; nani wadula kugwigwa? Yesu iki umana mu moyo gwakwe giki, bahemba bakwe baligudugumila mhayo uyu, ubawila giki, Mhayo uyu gulingʼwipamya? Ikubiza kinahe lulu ulu mulamona Ngʼwana wa munhu akulinhaga uko walali kwandia? Moyo u gwene gukwinhaga bupanga; mili gutitundujaga na hado: mihayo iyo nalumuwilaga ili moyo, hangi ili bupanga. Aliyo hali ho bamo mu bingʼwe abatuzunyaga. Iki Yesu walamanile kufuma kwandia abo abatuzunya umo hali, nuyuyo wa kungʼwinha ko umo ali. Na uhaya giki, Kulwa nguno iyi namuwilaga giki, Ati ho munhu wadula kwiza kuli Nene numho wiinhwa na Baba. Huna lulu, kulwa mihayo iyi, bingi ba bahemba bakwe bushoka ku ya kunuma, hali batusliiminza hamo nanghwe hangi. Hunaho Yesu ubawila abo ikumi na babili giki, Na bingʼwe hangi, mutogilwe kuja kungi? Simoni Petro unshokeja giki, Seba, tuje kuli nani lulu? Bebe uli nayo mihayo ya bupanga butushila. Na biswe twaazunya, hangi tumanile giki, Bebe uli Kristo, Ngʼwana wa Mulungu mpanga. Yesu ubashokeja giki, Angu, Nene nali natamukomile bingʼwe ikumi na babili, na umo wa mu bingʼwe ngʼwene Shetani? Akanghaya Yuda, ngʼwana wa ngʼwa Simoni Iskariota, iki ngʼwenuyo wali uhaya kungʼwinha ko, hu ngʼwene umo wa benabo ikumi na babili. Hanuma ya mihayo iyi Yesu ubyushiminza mu Galilaya; iki walatatogilwe kushiminza mu Buyudaya, iki Bayudaya bubyunkoba kumulaga. Lushiku lutale lwa Bayudaya u lwa maduku lwali luli hihi kushika. Huna lulu bana ba ngʼwawe bungʼwila giki, Ingaga henaha, uje mu Buyudaya, bahemba bako nabo babone shitile shako isho ukwitaga. Iki ati ho munhu uyo akitaga mihayo mu mbisila, nanghwe ngʼwenekele ukoba kumanika hape. Bebe, ulu ukwitaga mihayo iyi, wiyoleche ngʼwenekele hape ku ba mu si. Iki nulu bana ba ngʼwawe bali batanzunije. Hunaho Yesu ubawila giki, Ikanza lyane litali kushika; aliyo ikanza lyingʼwe limalilile gwa. Ba mu si batudula kumukolwa bingʼwe, aliyo Nene banikolwa, iki Nene nakubakanilijaga giki, Shitwa shabo shene sha bubi. Linhagi bingʼwe kuja ku lushiku lutale. Nene natali kumalila kulinha kuja ku lushiku lutale ulu, iki ikanza lyane litali kushikilijiwa. Aho wamala kubawila mihayo iyi, wikala mu Galilaya. Aliyo bana ba ngʼwawe aho bumala kulinha kuja ku lushiku lutale, nanghwe ulinha lulu, iti hape yaya, aliyo giti mu mbisila. Hunaho Bayudaya bubyunkobakoba mu lushiku lutale, buhaya giki, Ngʼwenuyo ali hali? Kwali hubiza ho kuduguma kwingi mu mabita kulwa nguno yakwe, bangi buhaya giki, Ali wa wiza; bangi buhaya giki, Yaya, aliyo akulilembalembaga ibita. Aliyo walati ho munhu uwali unghaya hape, ku nguno ya kubogoha Bayudaya. Aho yushika hagati ya lushiku lutale, Yesu ulinha, wingila mu hekalu, ubyulanga. Bayudaya bukumya, buhaya giki, Ngʼwenuyu amanile kinahe Shandikwa; iki atalangilwe? Yesu ubashokeja uhaya giki, Kulanga kwane kuti kwane, aliyo kwa Ngʼwenuyo uwaanituma. Munhu ose ulu utogwa kwita iyo atogilwe Ngʼwenuyo, akukumana kulanga kwenuku, ulu kuli kwa Mulungu, nulu ulu Nene Bakulungalungaga i yane ngʼwenekele. Uyo akulungalungaga yakwe ya ngʼwenekele, akukobaga ikujo lyakwe lya ngʼwenekele; aliyo Uyo akukobaga ikujo lya Ngʼwenuyo uwaantuma, Ngʼwene ali wa nghana, na butibutungilija buti mo muli Wei. Angu, Musa walatangʼwinhile bingʼwe shilagilo? aliyo ati ho umo wa mu bingʼwe akwitaga shilagilo. Mukutobaga kunibulaga ni buli? Banhu bushosha buhaya giki, Bebe uli nalyo isamva; nani akukobaga kukubulaga? Yesu ushosha ubawila giki, Nali nita nimo gumo, ningʼwe bose mulikumya. Kulwa nguno iyi Musa wali ungʼwinha kusalwa; (kuti kwa ngʼwa Musa nghana, aliyo kwa bakulugenji); na ha Sabato mukunsalaga munhu. Munhu ulu usalwa ha Sabato, shilagilo sha ngʼwa Musa shitizukilanyiwa; ni buli mulinipelanilwa iki nampijaga munhu kubiza mpanga nghana ha Sabato? Mutalekanyage nsango gitumo mukubonaga na miso, aliyo mulekanye nsango gwa butungilija. Hunaho bamo ba mu Yerusalemi buhaya giki, Uyo bakunkobaga kumulaga, angu, ati Ngʼwenuyu? Lola, akulungalungaga hape, na batungʼwilaga mhayo. Hamo a batale bamanaga nghana giki, Ngʼwenuyu ali Kristo? Aliyo Ngʼwenuyu tumanile mfumo yakwe; aliyo Kristo ulu aliza, ati ho munhu amanile mfumo yakwe. Kulwa iyo Yesu uhamuka mu hekalu, ubyulanga na uhaya giki, Nene munimanile, hangi mfumo yane mumanile; hangi Nene natizile kulwane ngʼwenekele, aliyo Uyo waanituma ali wa nghana, Ngʼwenuyo bingʼwe mutamanile. Aliyo Nene namanile Wei iki nantuma kuli Wei, nanghwe waanituma. Kulwa iyo bukoba kundima, aliyo walatilonga ho wa kutama nkono gwakwe kundima, iki ikanza lyakwe lyali litali kwiza. Aliyo banhu bingi ba ngʼwibita bunzunya, buhaya giki, U Kristo, aho alizaga, angu, alita shimanikijo shingi sha kutinda ishi Ngʼwenuyu walushitaga? Bafarisayo bali bigwa banhu ba ngʼwibita bubyuduguma mihayo iyi kulwakwe; hunaho Bafarisayo na Bagabiji batale bubatuma bashilikale kundima. Hunaho Yesu uhaya giki, Kasaga ho kakanza kado ndi hamo ningʼwe, huna lulu nakuja kuli Uyo waanituma. Mulanikoba, aliyo mutalanibona; hangi aho ndi Nene bingʼwe mutudula kwiza ko. Hunaho Bayudaya bilunjalunja benekele na benekele giki, Ngʼwenuyu alihaya kuja hali, uko biswe tutalamona? Alihaya kuja ku abo babalasanile mu Bagriki, abalange Bagriki? Mhayo gwenuyo waluguhayaga guli kinahe giki, Mulanikoba, aliyo mutalanibona; hangi giki, Aho ndi Nene bingʼwe mutudula kwiza ko? Aliyo ku lushiku lwa kumalija, u lutale lwa kwibilinga, Yesu wimila, uhamuka higulya, uhaya giki, Munhu ose ulu ukolwa nota, ize kuli Nene angʼwe. Uyo wanizunya Nene, gitumo Shandikwa shuhaya giki, Miongo ya minzi mapanga ikusela kufuma mu nda yakwe. (Mhayo uyu wali uguhaya gwa Moyo Ngʼwela Uyo bali buhaya kwanukula abanzunya Wei; iki Moyo Ngʼwela walatali kubiza ho; iki Yesu walatali kukujiwa.) Bamo ba ngʼwibita aho bali bigwa mihayo iyi, buhaya giki, Ngʼwenuyu, nghana, ali nghangi uyo. Bangi buhaya giki, Ngʼwenuyu ali Kristo. Aliyo bamo buhaya giki, Angu, Kristo akufuma mu Galilaya? Angu, Shandikwa shitahayile giki, Kristo alafuma mu bubyile wa ngʼwa Daudi, hangi mu Bethlehemu, igunguli ilo umo walali Daudi? Giko hubiza ho kulekana ngʼwibita kulwa nguno yakwe. Bamo mubo bali batogilwe kundima, aliyo walatilonga ho wa kutama makono gakwe kundima. Huna lulu bashilikale bushoka ku bagabiji batale na Bafarisayo; nabo bubawila giki, Mutangʼwenhile ni buli? Bashilikale bushosha giki, Munhu atali kulungalunga na kamo gitumo munhu Ngʼwenuyu akulungalungaga. Hunaho Bafarisayo bubashokeja giki, Na bingʼwe hangi ngʼwalembalembagwa? Ali ho ntale nani uyo wanzunije, nulu wa mu Bafarisayo? Aliyo ibita lyenili, banhu abatamanile shilagilo, bene bazungʼwa. Nikodemo, (uyo wali wiza kuli Wei bujiku, ngʼwene umo wabo,) ubawila giki, Angu, shilagilo shiswe shikunekanyaga nsango munhu, aho atali kwigwiwa mihayo yakwe tame, nulu itali kumanwa iyo akwitaga? Bushosha bungʼwila giki, U bebe nangho wafuma Galilaya? Kobaga ubone giki, Munhu nghangi atubuka mu Galilaya. Nabo bali buja buli munhu ku kaya yakwe. Aliyo Yesu uja mu lugulu lwa Mizeituni. Dilu aho wangaluka, wingila hangi mu hekalu, na banhu bose biza kuli Wei; nanghwe wigasha, ubyubalanga. Bandiki na Bafarisayo bungʼwenhela nkima uwadimilwe mu bushihya, nabo buntuula hagati, Bungʼwila giki. Nangi, nkima ngʼwenuyu wadimilwe aho walushihyaga. Ambu, mu shilagilo Musa waatulagila kubaponda mawe bose abita giko; U Bebe ukuhayaga kinahe lulu? Bali buhaya giko kungema, babize na mhayo gwa kumula. Aliyo Yesu winama, ubyandika ha si na lwala lwakwe. Aliyo iki bongeja kumuja, ungungumuka, uhaya giki, Uyo ati na shibi mu bingʼwe, andie tame kuniponda iwe. Winama hangi ubyandika ha si. Nabo aho bigwa, buchingʼwa na wiyanguji wabo, bubyufuma hanze umoumo, banamhala bandia, kushisha ku ba kumalija: na Yesu ulekwa wiyene, na nkima imilile hagati. Aho Yesu ugungumuka, atamonile munhu aliyo nkima ngʼwenuyo wike, ungʼwila giki, Bebe nkima, bali hali a babuji bako? ati ho wa kukulekanya? Uhaya giki, Nduhu, Seba. Yesu ungʼwila giki, Nulu Nene natukulekanya; jaga, aliyo utalizita shibi hangi. Hunaho Yesu ulungalunga nabo hangi, uhaya giki, Nene ndi isana lya ba mu si; uyo wanilondela atushiminzila mu giiti, aliyo akubiza na isana lya bupanga. Hunaho Bafarisayo bungʼwila giki, Bebe ukwikanilaga ngʼwenekele; bukaniji wako buti wa nghana. Yesu ushosha ubawila giki, Nulu nakwikanilaga ngʼwenekele, bukaniji wane buli wa nghana; iki namanile uko nafumile, hangi uko najile; aliyo bingʼwe mutamanile uko nafuma, nulu uko najile. Bingʼwe mukulekanyaga kimilimili; Nene natunekanyaga munhu ose. Nahene nulu Nene nulekanya, kulekanya kwane kuli kwa nghana; iki Nene nati niyene, aliyo Nene ndi hamo na Baba Uyo waanituma. Hangi na mu shilagilo shingʼwe gwaandikwa giki, Bukaniji wa banhu babili wene wa nghana. Nene ndi uyo nakwikanilaga ngʼwenekele, hangi Baba uwaanituma, akunikanilaga Nene. Hunaho bungʼwila giki, U So ali hali? Yesu ushosha giki, Mutanimanile Nene, nulu Baba mutamanile; ulu ni ngʼwali ngʼwanimana Nene, nu Baba ni ngʼwaamana. Yesu ulungalunga mihayo yeniyi ngʼwibikilo lya sabo, aho ulanga mu hekalu; nulu walatilonga munhu wa kundima, iki ikanza lyakwe lyali litali kwiza. Kulwa iyo Yesu ubawila hangi giki, Nene najile kungi, ningʼwe mulanikoba, mulachila mu shibi shingʼwe; uko najile bingʼwe mutudula kwiza ko. Hunaho Bayudaya buhaya giki, Alihaya kwibulaga ngʼwenekele, iki wahaya giki, Uko najile bingʼwe mutudula kwiza ko? Nanghwe ubawila giki, Bingʼwe muli ba kusilili, Nene ndi wa higulya; bingʼwe muli ba si iyi, Nene nati wa si iyi. Mhayo uyu nalumuwilaga giki, Mulachila mu shibi shingʼwe; iki ulu mutuzunya giki, Nene ndi Ngʼwene, mulachila mu shibi shingʼwe. Kulwa iyo bungʼwila giki, Bebe uli nani lulu? Yesu ubawila giki, Mhayo gwenuyo duhu nakamuwilaga kufuma kwandia. Ndi na mihayo mingi ya kulungalunga na ya kulekanya ya ku bingʼwe; aliyo Ngʼwenuyo uwaanituma ah wa nghana; hangi mihayo iyo nali nigwa kuli Wei, i yene nakubawilaga ba mu si. Bali batumana giki, alibawila ya kuli Siswe. Kulwa iyo Yesu ubawila giki, Aho mulamalaga kunsunga Ngʼwana wa munhu, hunaho mulamana giki, Nene ndi Ngʼwene, hangi giki, Natitaga mhayo Nene ngʼwenekele wike, aliyo gitumo Baba waanilanga, giko nakayilungalungaga. Nanghwe uwaanituma ali hamo na Nene; Baba atanilekaga niyene; iki nakitaga shiku jose i ya kunyeja. Aho ulungalunga mihayo iyi banhu bingi bunzunya. Hunaho Yesu ubawila Bayudaya benabo abunzunya giki, Ulu ngʼwikala mu mhayo gwane, muli bahemba bane ba nghana; Hangi mukumana ya nghana, na nghana ikumutungula mu busese. Bunshokeja giki, Biswe tuli bubyile wa ngʼwa Abrahamu, nulu tutali kubiza basese ba munhu ose nulu kamo; ulihaya kinahe Bebe giki, Mukutungulwa mu busese? Yesu ubashokeja giki, Nghana, nghana, namuwila giki, Buli uyo ose akwitaga shibi ngʼwene nsese wa shibi. Na nsese atikalaga mu kaya welelo na welelo; aliyo Ngʼwana akwikalaga mo welelo na welelo. Kulwa iyo, ulu Ngʼwana akumutungula mu busese, mukubiza muli bana ba banhu nghana. Namanile giki, Muli bubyile wa ngʼwa Abrahamu; aliyo mulikoba kunibulaga, iki mhayo gwane guti na kwigalihija mu bingʼwe. Nene naalungalungaga iyo namala kubona kuli Baba; na bingʼwe mukitaga iyo ngʼwamala kubona kuli singʼwe. Bushosha bungʼwila giki, Abrahamu ngʼwene Siswe. Yesu ubawila giiti, Ulu ni ngʼwabiza bana ba ngʼwa Abrahamu ni ngʼwita shitile sha ngʼwa Abrahamu; Aliyo hambunyu mulikoba kunibulaga, ndi munhu Uyo namuwilaga ya nghana, iyo nigwile kuli Mulungu; Abrahamu walatitile giko, yaya. Bingʼwe mukitaga shitile sha ngʼwa singʼwe. Bungʼwila giki, Biswe tutabyalilwe mu bujingi, tuli na Siswe umo, ngʼwene Mulungu. Yesu ubawila giki, Mulungu ulu ni ali Singʼwe, ni ngʼwanitogwa Nene; iki nizile nafumile kuli Mulungu; iki natizile mu butogwa wane ngʼwenekele gwike, aliyo Ngʼwenuyo waanituma. Ni nguno ki mutumanaga kulungalunga kwane? Iki mutudula kwigwa mhayo gwane. Bingʼwe muli ba ngʼwa singʼwe Shetani, hangi kwikumva kwa ngʼwa singʼwe mutogilwe kukwita. Ngʼwenuyo walali mulagi kufuma kwandia, hangi atimilaga mu ya nghana, iki ya nghana iti mo muli wei. Aho akulungalungaga bulomolomo, akulungalungaga i ya ngʼwenekele, iki ali nomolomo, na ise wa bulomolomo. Aliyo iki Nene nahaya ya nghana, bingʼwe mutunizunyaga. Nani mu bingʼwe wadula kunikanilija ndi na shibi? Ulu nahaya ya nghana, bingʼwe mutunizunyaga ni buli? Uyo ali wa Mulungu, ngʼwene akwigwaga mihayo ya Mulungu; kulwa mhayo uyu mutigwaga bingʼwe, iki muti ba Mulungu. Bayudaya bushosha bungʼwila giki, Tutuhayaga ya nghana biswe giki, Bebe uli muna Samaria, hangi uli nalyo isamva? Yesu ushosha giki, Nene nati nalyo isamva; aliyo nakunkujaga Baba, na bingʼwe mukunidalahaga. Aliyo Nene natakobaga ikujo lyane; aliyo ali ho umo akukobaga, hangi akulekanyaga. Nghana, nghana, namuwila giki, Munhu ose ulu ugudima mhayo gwane atalabona kucha welelo na welelo. Bayudaya bungʼwila giki, Hambunyu tumanile nghana giki, uli nalyo isamva. Abrahamu akacha, na bahangi; na Bebe ulihaya giki, Munhu ose ulu ugudima mhayo gwane, atalaloja kucha welelo na welelo. Angu, Bebe uli ntale wa kutinda nkulugengi wiswe Abrahamu, uyo akacha? na bahangi abakacha! wiyita ngʼwenekele kubiza nani? Yesu ushosha giki, Ulu nikuja ngʼwenekele, ikujo lyane liti kinhu; Uyo alinikuja Ngʼwene Baba; Ngʼwenuyo bingʼwe mukunghayaga giki, Ali Mulungu wingʼwe; Nahene bingʼwe mutamanile, aliyo Nene namanile; hangi ulu ni nuhaya giki, Natamanile, nakubiza nomolomo giti bingʼwe; aliyo Nene namanile Wei, hangi nakugudimaga mhayo gwakwe. Abrahamu nkulugenji wingʼwe wali uyega kulubona lushiku lwane; ulubona uyega. Hunaho Bayudaya bungʼwila giki, Utali kushisha miaka makumi atano, na Bebe waamona Abrahamu? Yesu ubawila giki, Nghana, nghana, namuwila giki, Aho Abrahamu walatali kubiza ho, Nene ndi ho. Hunaho busola mawe bamponde; aliyo Yesu wibisa, na utuma mu hekalu, ubita hagati yabo, uja giko. Aho ubyubita umona munhu moku kufuma kubyalwa kwakwe. Bahemba bakwe bumuja buhaya giki, Rabbi, nani wali wita shibi, ngʼwenuyu, nulu babyaji bakwe, nose ubyalwa moku? Yesu ushosha giki, Nulu ngʼwenuyu walatitile shibi, nulu babyaji bakwe; aliyo shitile sha Mulungu sholechiwe muli wei. Shinigelile Nene kwita milimo ya Ngʼwenuyu uwaanituma, aho litali limi, bujiku buliza, hunaho ati ho munhu wadula kwita milimo. Aho natali ndi mu si, Nene ndi isana lya ba mu si. Aho umala kuhaya giko, uswila mate ha si, wita malongo na mate genayo, umila moku ku miso na malongo, Ungʼwila giki, Jaga, ukoge ngʼwilambo lya Siloamu (kushomelejiwa kwaho giki, watungʼwa). Uja lulu, oga, ushoka akubonaga. Hunaho bazenganwa biye nabo abubyumona na kale giki, walali moku, buhaya giki, Angu, uyu ati ngʼwenuyo uwali wigashije, wilombeleja? Bangi buhaya giki, Huna ngʼwene; bangi giki, wiyikolile nanghwe, Nose wei ngʼwenekele uhaya giki, Nene ndi ngʼwene. Kulwa iyo bungʼwila giki, Miso gako gafumbulagwa kinahe? Ushosha uhaya giki, Munhu uyo akitanagwa Yesu wali wita malongo, unibila miso gane, uniwila giki, Jaga kwilambo lya Siloamu, ukoge; nuja, noga, ninhiwa kubona. Hunaho bungʼwila giki, Ali hali Ngʼwenuyo? Uhaya giki, Natamanile. Bali buntwala ku Bafarisayo uyo walali moku kale. Lwali luli Sabato aho Yesu wali wita malongo, na umfumbula miso gakwe. Kulwa iyo Bafarisayo bumuja hangi umo wali winhiwa kubona. Nanghwe ubawila giki, Wali watuula malongo ku miso gane, nukoga, nane nakubonaga. Kulwa iyo bamo ba mu Bafarisayo buhaya giki, Munhu Ngʼwenuyu atafumile kuli Mulungu, iki atudimaga Sabato. Bangi buhaya giki, Munhu ali na shibi wadula kwita shimanikijo giti shenishi? Hunaho kubiza ho kulekana mubo. Bungʼwila moku hangi giki, Bebe ukunghayaga kinahe, iki wakufumbulaga miso gako? Nanghwe uhaya giki, Ali nghangi. Bayudaya bali batunzuya mihayo yakwe giki, walali moku kale na winhiwa kubona hangi, kushisha aho bali bubitana babyaji ba ngʼwenuyo winhiwagwa kubona. Bubabuja buhaya giki, Angu, uyu ali ngʼwana wingʼwe, uyo bingʼwe mukanghayaga giki, wali ubyalwa moku? Akubonaga kinahe lulu? Babyaji bakwe bubashokeja buhaya giki, Tumanile giki, ngʼwenuyu ali ngʼwana wiswe, hangi giki, wali ubyalwa moku; Aliyo umo akubonaga hambunyu, tutumanaga yaya; nulu munhu uyo wamfumbulaga miso gakwe tutamanile; mujagi wei, ngʼwene akulile; ahaye ngʼwenekele mihayo yakwe. Babyaji bakwe buhaya mihayo iyi iki bubogoha Bayudaya; iki Bayudaya bali bumala kulonja mihayo giki, Munhu ose ulu utambula giki, Ali Kristo, apejiwe ngʼwibilingilo. Kulwa mhayo uyo babyaji bakwe buhaya giki, Ngʼwene akulile, mujagi ngʼwenekele. Hunaho bungʼwitana lukangala lwa kabili munhu uyo walali moku, bungʼwila giki, Ngʼwinhage ikujo Mulungu; tumanile giki, Munhu Ngʼwenuyo ali wa shibi. Ngʼwenuyo ushosha uhaya giki, Ulu Uyo ali wa shibi natamanile nene; mhayo gumo nagumanile giki, Nali nali moku, hambunyu nakubonaga. Bungʼwila hangi giki, Wali wakwitila ki? hangi giki, Wakufumbulaga miso gako kinahe? Ubashokeja giki, Namala kumuwila haha, ningʼwe mutigwile: Mutogilwe kwigwa hangi ni buli? Bingʼwe hangi mutogilwe kubiza bahemba bakwe? Bungʼolomya lulu, buhaya giki, Bebe uli nghemba wa Ngʼwenuyo; biswe tuli bahemba ba ngʼwa Musa. Biswe tumanile giki, Mulungu waalungalungaga na Musa; aliyo Ngʼwenuyu, tutamanile uko afumile. Munhu ngʼwenuyo ushosha ubawila giki, Niyo, mhayo gwenuyu guli gwa kukumya, iki bingʼwe mutamanile uko afumile, nahene, wafumbulaga miso gane. Tumanile giki, Mulungu atabigwaga a ba shibi; aliyo munhu ose ulu ubiza angʼogohile Mulungu, hangi akitaga iyo Mulungu atogilwe, u ngʼwene akungʼwigwaga. Kufuma kwandia kwa si itali kwigwiwa giki, Munhu nulu umo wafumbulaga miso ga munhu uwabyalwa moku. Munhu Ngʼwenuyu ulu ni atafumile kuli Mulungu, ni atudula kwita mhayo. Bushosha bungʼwila giki, Bebe wali ubyalwa mu shibi duhu, nangho wabyutulanga biswe? Bumfunya hanze lulu. Yesu wali wigwa giki, Bumfunya hanze; nanghwe aho umona, ungʼwila giki, Bebe ukunzunyaga Ngʼwana wa Mulungu? Nanghwe ushosha uhaya giki, Ali Nani, Seba nanzunye? Yesu ungʼwila giki, Uyo wamonaga, hangi Uyu akulungalungaga nangho, hu na Ngʼwene. Uhaya giki, Seba, nazunya. Unamya lulu. Nanghwe Yesu uhaya giki, Kulwa kulekanya nizile mu si iyi, abatabonaga babone; nabo abakabonaga bagaluke kubiza baboku. Bafarisayo bamo abali bali hamo nanghwe bali bigwa mihayo iyi, huna bungʼwila giki, Angu, na biswe tuli baboku? Yesu ubawila giki, Ulu ni muli baboku, ni muti na shibi, aliyo hambunyu mulihaya giki, Tukubonaga, kulwa iyo shibi shingʼwe shikwikalaga ho. Nghana, nghana, namuwila giki, Uyo atingilila mu nyango kwingila mu lubigili lwa ngholo, aliyo ulinhila kungi, ngʼwenuyo ali ngʼwibi na nsambo. Aliyo uyo wingilila mu nyango ngʼwene ndimi wa ngholo. Ngʼwenuyo nugaji ungʼwigulila; na ngholo najo jigwa ilaka lyakwe; ujitana ngholo jakwe na mina gajo, ujitwala hanze. Aho wamala kujichilula ngholo jakwe, unitongela, na ngholo jakwe junondela, iki jimanile ilaka lyakwe. Ngeni jitunondela yaya, aliyo jikumpela, iki jitamanile ilaka lya bageni. Lusumo ulu Yesu ubawila, aliyo benabo bali batumana mihayo umo ili iyo ulungalunga nabo. Kulwa iyo Yesu ubawila hangi giki, Nghana, nghana, namuwila giki, Nene ndi nyango gwa ngholo. Abo bose abali biza aho natali Nene bene bibi na basambo; aliyo ngholo jali jitubigwa. Nene ndi nyango; munhu ose ulu wingilila mo muli Nene, akupijiwa, akwingila, hangi abufuma, hangi akubona idimilo. Ngʼwibi atiza ulu iti kulwa kwiba na kubulaga na kukenagula: Nene nizile babize na bupanga, hangi babize nabo wa buyaga. Nene ndi ndimi wa wiza; ndimi wa wiza akuwinhaga ko bupanga wakwe kulwa ngholo jakwe. Aliyo ngʼwitumamija wa mhela, uyo ati ndimi, uyo ngholo jiti jakwe, aho ubona mhuge iliza, ujileka ngholo, upela; na mhuge yujipula ngholo, yujibalasanya. Ngʼwitumamija wa mhela upela iki ali ngʼwitumamija wa mhela, nanghwe atajikalalilwe ngholo. Nene ndi ndimi wa wiza; najimanile ijili jane, najo jane jinimanile Nene. Gitumo Baba animanile, na Nene namanile Baba; hangi nawinha ko bupanga wane kulwa ngholo. Hangi ndi najo ngholo jingi, ijiti ja lubigili lwenulu; jenijo najo shinigelile kujenha, najo jiligwa ilaka lyane; na Ulabiza idale limo, na ndimi umo. Kulwa nguno iyi Baba antogilwe, iki nawinha ko bupanga wane, huna nabubuche hangi. Ati ho munhu wa kunitagija bupanga wane, aliyo nawinha ko Nene ngʼwenekele. Ndi nabo budula wa kuwinha ko, hangi ndi nabo budula wa kububucha hangi. Kilagilo cheniki naanukula kuli Baba. Kwali kubiza ho kulekana hangi mu Bayudaya kulwa mihayo iyi. Bingi mu bo buhaya giki, Ali nalyo isamva, hangi ali nsaji; mukungʼwigwaga ni buli? Bangi buhaya giki, Mihayo iyi, iti ya ngʼwa uyo ali nalyo isamva. Angu, isamva lyadula kufumbula miso ga baboku? Jali jubiza ho shiku nhale ja kegeje mu Yerusalemi; mu shiku ja mbeho. Na Yesu ubyushiminza mu hekalu ngʼwibindo lya ngʼwa Solomoni. Hunaho Bayudaya bali bumpindya, bungʼwila giki, Ukututabyatabya kushisha nanali? Ulu Bebe uli Kristo, tuwilage hape. Yesu ubashokeja giki, Nakamuwila, ningʼwe mutuzunyaga: shitile isho nakwitaga mu lina lya ngʼwa Baba, i shene shunikanila. Aliyo bingʼwe mutuzunyaga, iki muti ba ngholo jane, gitumo naali namuwila. Ngholo jane jikwigwaga ilaka lyane, na Nene najimanile, najo junilondela; Hangi najinha bupanga butushila; najo jitalayagala welelo na welelo, hangi ati ho uyo wadula kujipula mu nkono gwane. Baba uwaaninha, ali ntale kutinda bose; hangi ati ho nulu umo uyo wadula kujipula mu nkono gwa ngʼwa Baba. Nene na Baba tuli umo. Hunaho Bayudaya bugasola mawe hangi, giki, Bamponde. Yesu ubashokeja giki, Shitile shingi sha wiza nakangʼolekejaga bingʼwe sha kufuma kuli Baba; kulwa chitile ki musho mulihaya kuniponda mawe? Bayudaya bunshokeja buhaya giki, Kulwa chitile cha wiza tutukuponda mawe; aliyo kulwa kunduka Mulungu; hangi iki Bebe, uli munhu wike, wiyita ngʼwenekele Mulungu. Yesu ubashokeja giki, Angu, gutandikile mu shilagilo shingʼwe giki, Nene nali nuhaya giki, Bingʼwe muli bamulungu? Ulu wali ubitana benabo bamulungu, abo mhayo gwa Mulungu gwali gwiza kubo (na Shandikwa shitudula kutungulwa); Ngʼwenuyo Baba waangʼweja, hangi waantuma mu si, mulingʼwila giki, Bebe ukundukaga Mulungu; iki nuhaya giki, Ndi Ngʼwana wa Mulungu? Ulu natitaga shitile sha ngʼwa Baba, mutizunizunya; Aliyo Nene ulu nakushitaga, nulu ulu mutunizunya Nene, mushizunyage shitile isho; mumane hangi muzunye giki, Baba ali muli Nene, na Nene muli Baba. Bukoba hangi kundima; nanghwe ufuma mu nkono gwabo. Wali winga ho uja hangi ku nkilo gwa Yordani kwipande uko Yohana wali wandia kubatija; wikala kwenuko. Na bingi bali biza kuli Wei; nabo buhaya giki, Yohana walatitile kimanikijo nulu kimo; aliyo mihayo yose iyo Yohana wali unghaya Ngʼwenuyu yubiza ya nghana. Na banhu bingi bali bunzunya kwenuko. Walali ho munhu umo asatile, Lazaro wa Bethania, wa nzengo umo bazengile mo Mariamu na Martha, ngʼwana wa ngʼwawe. Ngʼwene Mariamu uyo akamila Seba maguta ga ngazu, upyagula magulu gakwe na nzwili jakwe, ngʼwenuyo sizaye Lazaro walasatile. Hunaho balumbuye butuma nhungʼwa kuli Wei, buhaya giki, Seba, Iola, uyo Bebe untogilwe asatile. Yesu aho wigwa iyi, uhaya giki, Busatu ubu buti wa kumulaga, aliyo kulwa ikujo lya Mulungu, Ngʼwana wa Mulungu akujiwe kulwa busatu wenubu. Yesu wabatogwa Martha, na ngʼwana wa ngʼwawe, na Lazaro. Aho wigwa giki, asatile, wikala ho henaho aho walali shiku ibili hangi. Hanuma lulu ubawila bahemba bakwe giki, Tujagi hangi mu Buyudaya. Bahemba bakwe bungʼwila giki, Rabbi, Bayudaya balukukobaga haha kukuponda mawe; na Bebe ulihaya kushoka ko hangi? Yesu ushosha giki, Angu, saa ja limi jiti ikumi na ibili? Munhu ulu ushiminza limi atipama yaya, iki akubonaga isana lya si iyi. Aliyo munhu ulu ushiminza bujiku, wipama, iki isana liti mo muli wei. Wali uhaya yeniyi; hanuma lulu ubawila giki, Nwani wiswe Lazaro alalile; aliyo Nene najile ko nakamishe. Bahemba bungʼwila giki, Seba, ulu alalile, akupila. Aliyo Yesu akahaya ya kucha kwakwe; aliyo benabo bali biganika giki, alilungalunga ya kwifula mu tulo. Hunaho Yesu ubawila hape giki, Lazaro wachile. Hangi nayega kulwingʼwe giki, nali nati ko, bingʼwe muzunye; ali lulu tujagi kuli wei. Kulwa iyo Tomaso, uyo akitanagwa Didumo, ubawila bahemba biye giki, Tujagi na biswe, tukache hamo nanghwe. Huna lulu Yesu, aho wiza, unsanga wagumilwe jabitile shiku ine mu kigila. Bethania ili hihi na Yerusalemi, giti lugendo lwa stadio ikumi na itano. Na bingi ba Bayudaya bali biza ku ba Martha na Mariamu kubalunguja kulwa kucha kwa siza wabo. Hunaho Martha aho wigwa giki, Yesu izile, uja kungʼwima nzila; aliyo Mariamu wali igashije mu numba. Hunaho Martha ungʼwula Yesu giki, Seba, ulu Bebe ni wali wabizile ho aha, siza wane ni walatachile. Aliyo namanile nulu haha giki, yose iyo utogilwe kunomba Mulungu, Mulungu akukwinha. Yesu ungʼwila giki, Sizayo akujuka hangi. Martha ungʼwila giki, Namanile alajuka hangi mu bujuko mu lushiku lwa ku bukalikijo. Yesu ungʼwila giki, Nene ndi bujuko na bupanga; uyo wanizunya Nene, nulu ucha, alabiza mpanga; Nanghwe ose ali mpanga, hangi unizunya Nene, atalacha na hado welelo na welelo. Angu, wazunya yeniyi? Martha ungʼwila giki, Ali chene, Seba; nazunije giki, Bebe uli Kristo, Ngʼwana wa Mulungu, Ngʼwenuyo wizile mu si. Aho wamala kuhaya mihayo iyi, uja, ungʼwitana Mariamu ngʼwana wa ngʼwawe mu kwigeniha, uhaya giki, U Nangi wizaga, alikwitana. Nanghwe, aho wigwa, ubuka wangu, uja kuli Wei. Yesu walatali kwingila mu nzengo, aliyo walatali ngʼwipande uko Martha ukamanya nanghwe; Hunaho Bayudaya abo bali bali hamo nanghwe mu numba, balinunguja, aho bumona Mariamu ubuka wangu, na ufuma, bunondela, buhaya giki, Ajile ku kigila kulila ko. Mariamu aho ushika uko ali Yesu, na umona, ugwa ku magulu gakwe, ungʼwila giki, Seba, ulu Bebe ni wali wabizile ho aha, siza wane ni walatachile. Hunaho Yesu aho umona akulilaga, na Bayudaya abali biza hamo nanghwe nabo bakulilaga, uganghila mu moyo, wiganilija, Uhaya giki, Ngʼwantuulila hali? Bungʼwila giki, Seba, nzugu ulole. Yesu ulila shisoji. Kulwa iyo Bayudaya buhaya giki, Lolagi gitumo walatogilwe. Bamo buhaya giki, Ngʼwenuyu uwali ufumbula miso ga moku, angu, walatudula kunemeja uyu atizucha? Hunaho Yesu uganghila hangi mu moyo ushika ku kigila. Nacho chali ipilinga, na iwe lyulajiwa ho. Yesu uhaya giki, Lyinjagi ho i liwe. Martha, ilumbuye lya ngʼwenuyo mfu, uhaya giki, Seba, hambunyu akununghaga: iki wachile shiku ine. Yesu ungʼwila giki, Natakuwilile giki, Bebe ulu uzunya ukubona ikujo lya Mulungu? Huna lulu bulyinja ho i liwe umo mfu ala jiwe. Yesu ulangamila miso gakwe higulya, uhaya giki, Baba, nakulumba iki wanigwaga. Na Nene naamana giki, ukanigwaga ka ka ka; aliyo nuhaya giko kulwa ibita lya benaba abapindyaga aha, bazunye giki, Bebe waanituma. Aho wamala kuhaya mihayo iyi, uhamuka na ilaka itale giki, Lazaro, fumaga wize. Nanghwe uwali achile ufuma, atungile magulu na makono mu mienda ya kugumila; na bushu wakwe butungile kitambala. Yesu ubawila giki, Ntaligulilagi, muneke aje kaya. Huna lulu bingi ba Bayudaya abali biza kuli Mariamu na bubona iyo Yesu witaga, bunzunya. Aliyo bamo bangi bali buja ku Bafarisayo, nabo bubawila iyo Yesu witile. Huna lulu bagabiji batale na Bafarisayo bubilinga ibanza, buhaya giki, Tukwitaga ki? iki munhu Ngʼwenuyu akwitaga shimanikijo shingi. Ulu tuneka giko, banhu bose bakunzunya; na Barumi baliza, balatutaja ipande lyiswe na ihanga lyiswe. Aliyo munhu umo wabo, Kayafa, ngʼwene ngabiji ntale ngʼwaka gwenuyo, ubawila giki, Bingʼwe mutamanile mhayo na hado, Nulu mutidedekanyaga giki, Yatubelela munhu umo abachilile banhu, ihanga igima litizuyagala. Mhayo uyu walatahayile gwa ngʼwenekele yaya; aliyo iki walali ngabiji ntale ngʼwaka gwenuyo, akahanga giki, Yesu alihaya kulichilila ihanga ilo; Hangi iti kulichilila ihanga lyenilo lyike, aliyo ababilinge babize bumo bana ba Mulungu abasalanghanile hose. Kulwa iyo kufuma lushiku ulo bubyulomana mihayo giki, bamulage. Kulwa mhayo uyu Yesu walatushiminza hape hangi mu Bayudaya, aliyo wali winga kwenuko uja mu chalo hihi na bu, mu nzengo gukitanagwa Efraimu: wikala ko na bahemba bakwe. Na Pasaka ya Bayudaya yali ili hihi kushika; na bingi bufuma mu shalo, bulinha kuja Yerusalemi aho Pasaka yali itali kushika, biyeje benekele. Huna lulu bunkobakoba Yesu, bilunjalunja benekele na benekele, aho bimilile mu hekalu, giki, Ngʼwiganika kinahe? Atiza ku lushiku lutale lwenulu yaya, angu? Bagabiji batale na Bafarisayo balagilile kilagilo giki, Munhu ose ulu umana uko ali, ize abule, bakandime. Huna lulu aho Pasaka itali kushika, jasaga ho shiku itandatu, Yesu wali wiza Bethania, uko walali Lazaro, uyo wali ucha, ngʼwenuyo Yesu akanjucha mu bafu. Hunaho bunzugila sha kulagila; Martha ubinhilija shiliwa; Lazaro walali hamo nabo abali bigasha nanghwe kulya. Hunaho Mariamu wali wenha latili imo ya maguta ga ngazu mela, ga mpango ngʼwingi, ubila magulu ga ngʼwa Yesu, upyagula magulu gakwe na nzwili jakwe; na numba yizula ngʼwaso gwa maguta. Aliyo Yuda Iskariota, ngʼwana wa Simoni, umo wa bahemba bakwe, ngʼwenuyo wahaya kungʼwinha ko, uhaya giki, Ni buli maguta genaya gakija kujinjiwʼa shilingi magana adatu na kwinhiwa bahabi? Akahaya giko, iti giki, ubakalalwa bahabi yaya; aliyo iki walali ngʼwibi, hangi walali ndimiji wa mfuko, ubyutwala isho shutuulwa mo. Kulwa iyo Yesu uhaya giki, Nekagi: wagabikaga ku lushiku lwa kugungʼwa kwane. Iki a bahabi muli nabo hamo ningʼwe shiku jose; aliyo Nene, mutubiza na Nene shiku jose. Hunaho ibita itale lya Bayudaya lyumana giki, ali ho henaho; nabo biza lulu, iti kulwa nguno ya ngʼwa Yesu wike, aliyo bamone Lazaro nanghwe hangi, ngʼwenuyo Wei akanjucha mu bafu. Aliyo bagabiji batale bali bulomana mihayo bamulage nu Lazaro hangi; Iki kulwa nguno ya ngʼwenuyo bingi ba Bayudaya bali busama, bubyunzunya Yesu. Ku ntondo ibita itale lya benabo abali bizile ku lushiku lutale, aho bigwa giki, Yesu izile Yerusalemi, Bubucha matambi ga matende, bufuma buja kunsumbila, buhamuka buhaya giki, Utupije haha; ali wa lubango Uyo wiza mu lina lya Seba, Ntemi wa Israeli. Aho Yesu ubona ngʼwana wa nzobe, udamhila ho; gitumo gwaandikwa giki, Utogohage, ngʼwana ngʼwaniki wa Sayuni; lolaga, Ntemi wako wiza adamhilile ngʼwana wa nzobe. Mihayo iyi bahemba bakwe bali batitegeleja kwandia; aliyo aho Yesu wamala kukujiwa, hunaho bizukwa giki, mihayo iyi yaandikwa ya kuli Wei, hangi giki, bali bungʼwitila yeniyi. Hunaho ibita lya banhu abali bali ho hamo nanghwe aho akangʼwitana Lazaro kufuma mu kigila, na unjucha mu bafu, bubyukanila. Kulwa nguno iyi hangi ibita lyuja kunsumbila, iki bali bigwa giki, witile kimanikijo iki. Hunaho Bafarisayo biwila boi bike giki, Ngʼwabonaga giki, mutudula kwita mhayo yaya? lolagi, ba mu si bose bakunondelaga. Bali bali ho Bagriki bamo mu benabo abakulinhaga balamye mu lushiku lutale; Benabo bungʼwegela Filipo, uyo wa Bethsaida ya Galilaya, bumuja, buhaya giki, Seba, tutogilwe kumona Yesu. Filipo uja ungʼwila Andrea; huna lulu Andrea na Filipo bungʼwila Yesu. Yesu ubashokeja, uhaya giki, Ikanza lyashikaga, Ngʼwana wa munhu akujiwe. Nghana, nghana, namuwila giki, Ulu kabeke ka ngano katucha aho kugwa mu masalu, kakikalaga ho kiyene kike; aliyo ulu kucha, kakatwajaga matwajo mingi. Uyo wabutogwa bupanga wakwe, alabuyagaja; nanghwe uyo wabukolwa bupanga wakwe mu si iyi, alabulinda kushisha ku bupanga butushila. Munhu ose ulu unitumamila, unilondele: hangi aho ndi Nene, henaho ntumami wane nanghwe alabiza ho, munhu ose ulu unitumamila, ngʼwenuyo Baba alankumilija. Hambunyu bupanga wane bukwiganilijaga; nahaye ki lulu? Baba, nipijage kuninja ngʼwikanza ili. Aliyo kulwa nguno iyi nashikaga kwikanza ili. Baba, likujage lina lyako. Hunaho ilaka lyiza kufuma ngʼwigulu giki, Nene nakalikuja, na Nene nakulikuja hangi. Huna lulu ibita lya banhu abali bimila ho, bigwa ilaka, buhaya giki, Yalumaga mbula; bangi buhaya giki, Malaika walungalungaga nanghwe. Yesu ushosha uhaya giki, Ilaka lyenili litizile kulwa Nene, aliyo kulwingʼwe. Hambunyu kuli ho kulekanyiwa nsango kwa si yeniyi; hambunyu ntale wa si yeniyi akuponyiwa hanze. Na Nene, ulu nabuchiwe kufuma ha si, nakubadutila kuli Nene banhu bose. Mhayo uyu wali uhaya ya kumanicha kachile kakwe umo alihaya kucha. Hunaho ibita lyunshokeja giki, Biswe tukigwaga mu shilagilo giki, Kristo alikala ho welelo na welelo; na Bebe ulihaya kinahe giki, Ngʼwana wa munhu shingʼwigelelilwe kubuchiwa? Ngʼwana wa munhu Ngʼwenuyo ali nani? Kulwa iyo Yesu ubawila giki, Kakanza kado isana litali hamo ningʼwe. Shiminzagi aho mutali muli nalyo isana, giiti kitizumupandika. Uyo akushiminzilaga mu giiti atamanile uko ajile. Aho mutali muli nalyo isana, mulizunye isana, bingʼwe mugaluke kubiza bana ba isana. Yesu aho wamala kulungalunga mihayo iyi, uja kungi, wibisa mu miso gabo. Aliyo nulu wiitaga shimanikijo shingi giko mu miso gabo, nahene, bali batunzunya; Mhayo gwa nghangi Isaya gushi-kilijiwe, uyo waahaya giki, Seba, nani wazunije mihayo yiswe? Nulu nkono gwa Seba gwakundulilwe kuli nani? Kulwa mhayo uyu bali batudula kuzunya, iki Isaya uhaya hangi giki, Wababokugije miso gabo, na ngholo jabo wajilambije; batizubona na miso gabo, nulu kwitegeleja na ngholo jabo, bagaluke, na Nene nabapije. Mihayo iyo akahaya Isaya aho akabona ikujo lyakwe, hangi wali unghaya Wei. Aliyo nahene, nulu mu batale bingi banzunije, aliyo kulwa nguno ya Bafarisayo batatambulile, batizupejiwa ngʼwibilingilo. Iki bali batogilwe ikujo lya banhu, kutinda ikujo lya Mulungu. Yesu uhamuka uhaya giki, Uyo wanizunya Nene, atunizunya Nene wike, aliyo wanzunya Ngʼwenuyo waanituma. Nanghwe uyo wanilola Nene, akunolaga Ngʼwenuyo waanituma. Nene nizile ndi isana mu si, munhu ose uwanizunya atizikala mu giiti. Na munhu ose ulu wigwa mihayo yane, na buyidima yaya, Nene natunekanya nsango; iki natizile kubalekanya nsango ba mu si, aliyo kubapija ba mu si. Uyo unilema Nene, hangi atanukulaga mihayo yane, ali nanghwe uyo wa kunekanya nsango; mhayo uyu nagulungalungile, gwenuyo gulanekanya nsango ha lushiku lwa ku bukalikijo. Iki nali natalungalungile yane ya ngʼwenekele; aliyo Baba uwaanituma, Ngʼwenuyo waaninha kilagilo, iyo nahaye, hangi iyo nalungalunge. Hangi namanile giki, kilagilo chakwe chene bupanga butushila; kulwa iyo, mihayo iyi naalungalungaga, naalungalungaga gitumo na Baba waaniwila. Aho lushiku lutale lwa Pasaka lutali kushika, Yesu, iki umana giki, ikanza lyakwe lyashikile afume mo mu si kuja kuli Ise; iki waabatogwa bakwe abali mo mu si, ubatogwa kushisha ku bukalikijo. Aho bulya sha kulagila, Shetani wali wamalaga kwingi ja mo mu ngholo ya ngʼwa Yuda Iskariota ngʼwana wa Simoni giki, angʼwinhe ko, Yesu, iki umana giki, Ise wangʼwinhile shose mu makono gakwe; hangi giki, Wei walafumile kuli Mulungu, hangi ajile kuli Mulungu, Ubuka ha sha kulagila, ukungula shizwalo shakwe, udima kitambala, witunga ngʼwenekele. Huna lulu usamija minzi ngʼwibakuli, wandia koja magula ga bahemba, ugapyagula na kitambala icho witungigije nacho. Huna lulu wiza kuli Simoni Petro, ngʼwenuyo ungʼwila giki, Seba, wahaya kuno ja magulu gane? Yesu ushosha ungʼwila giki, Iyo Nene nakwitaga, bebe utitegelejaga hambunyu; aliyo ulamana hanuma. Petro ungʼwila giki, Utalanoja magulu gane welelo bose. Yesu unshokeja giki, Ulu natukoja bebe, uti na ngabo hamo na Nene. Simoni Petro ungʼwila giki, Seba, iti magulu gane gike, aliyo na makono gane na ntwe gwane. Yesu ungʼwila giki, Uyo wamalaga koga ati na nguno ya koga hangi numho magulu gakwe gike, iki ali ngʼwela nghana; na bingʼwe muli bela, aliyo iti bose. Iki Wei walamanile uyo wahaya kungʼwinha ko; kulwa mhayo uyu akahaya giki, Muti bela bose yaya. Huna lulu, aho wali umala kuboja magulu gabo, na kuzwala shizwalo shakwe, na kwigasha hangi, ubawila giki, Himba, mumanile iyo nangʼwitilaga bingʼwe? Bingʼwe mukunitanaga giki, Nangi, na Seba; hene mukuhayaga ya wiza; iki ndi chene. Ulu Nene, ndi Seba na Nangi, ulu nojaga magulu gingʼwe, bingʼwe hangi shingʼwigelile kwiyoja magulu benekele na benekele. Iki nangʼwinhaga bingʼwe kigemelo, ngʼwite gitumo Nene nangʼwitilaga bingʼwe. Nghana, nghana, namuwila giki, Nsese ati ntale kutinda seba wakwe; nulu ntungʼwa ati ntale kutinda ngʼwenuyo uwantuma. Ulu ngʼwitegeleja yeniyi, muli ba lubango ulu ngʼwiyita. Natuhayaga ya bingʼwe bose; nitegeleja benabo naabakoma; aliyo Shandikwa shishikilijiwe, giki, Ngʼwenuyo akulyaga ngati hamo na Nene, ngʼwene wanibukija ishigina lyakwe. Kufuma haha namuwila kuko itali kubiza ho, huna lulu aho ikubiza ho, muzunye giki, Nene ndi Ngʼwene. Nghana, nghana, namuwila giki, Uyo ungʼwanukula uyo ose nalantuma, ngʼwene wananukula Nene; nanghwe uwananukula Nene, wangʼwanukula Uyo waanituma. Yesu aho wamala kuhaya yeniyi, wiganiiija mu moyo, ukanila, uhaya giki, Nghana, nghana, namuwila giki, Umo wa mu bingʼwe akuninha ko. Bahemba bali bilolalola benekele na benekele, butawatawa himba wanghaya nani? Walali ho ku meza umo wa bahemba bakwe asendamilile ha kikuba cha ngʼwa Yesu, uyo Yesu antogilwe. Simoni Petro unshinyela ngʼwenuyo, amuje giki, Ni nani uyo ulinghaya? Ngʼwenuyo usendamila ku kikuba cha ngʼwa Yesu, ungʼwila giki, Seba, ali nani? Yesu ushosha giki, Ali ngʼwenuyo nakunkogeja nilonge, na kungʼwinha. Aho uko ja nhonge ungʼwinha Yuda ngʼwana wa ngʼwa Simoni Iskariota. Hunaho, hanuma ya nhonge yeniyo, Shetani ungʼwingila ngʼwenuyo. Kulwa iyo Yesu ungʼwila giki, Iyo ukwitaga, itaga wangu. Walati ho nulu umo mu benabo abigashije ku meza wali witegeleja kulwa nguno ki Yesu wali ungʼwila giko. Iki bamo biganika giki, Iki Yuda walali dago mfuko, Yesu ungʼwila giki, Gulaga shinhu ishitwigelelilwre kulwa lushiku lutale, nulu hamo giki, abinhe bahabi shikolo. Huna lulu aho wei wamala kwanukula nhonge, utuma haho na haho, bubiza bujiku lulu. Kuna lulu, aho wamala kufuma, Yesu uhaya giki, Hambunyu Ngʼwana wa munhu wakujiwagwa, na Mulungu wakujiwagwa muli Wei. Ulu Mulungu wakujiwagwa muli Wei, Mulungu nanghwe alankuja muli Wei ngʼwenekele, hangi akunkuja haho na haho. Bana bado, kakanza kado natali ndi hamo na bingʼwe. Mulanikoba; na gitumo nali nubawila Bayudaya giki, Uko najile, bingʼwe mutudula kwiza ko; giko namuwila na bingʼwe haha. Kilagilo kipya nangʼwinha bingʼwe giki, Ngʼwitogwe benekele na benekele; gitumo na Nene naamutogwa bingʼwe, giko hangi na bingʼwe ngʼwitogwe benekele na benekele. Mu mhayo uyu bose bakumana giki, bingʼwe muli bahemba bane, ulu muli na kwitogwa benekele na benekele. Simoni Petro ungʼwila giki, Seba, ujile hali? Yesu unshokeja giki, Uko najile bebe utudula kunilondela ko haha; nahene ulanilondela hanuma. Petro ungʼwila giki, Seba, nene natudula kukulondela haha ni buli? Nakuwega ho bupanga wane kulwa nguno yako. Yesu unshokeja giki, Ukuwega ho bupanga wako kulwa nguno yane? Nghana, nghana, nakuwila giki, Nghungulume italahila kushisha ukunilema nghangala idatu. Ngholo yingʼwe itiziganilija: ngʼwanzunya Mulungu, munizunye na Nene. Mu kaya ya ngʼwa Baba buli ho wikalo wingi; ulu ni iti giko ni nali namuwila; iki naja kumubegabegeja ipande. Nahene ulu naja kumubegabegeja ipande, naliza hangi, kumutwala bingʼwe ku ngʼwane, giko aho ndi Nene, na bingʼwe mubize ho. Na Nene uko najile mumanile ko, na nzila mumanile. Tomaso ungʼwila giki, Seba, tutamanile uko ujile; na nzila tukwimana kinahe? Yesu ungʼwila giki, Nene ndi nzila, na nghana, na bupanga; munhu ose atiza kuli Baba, ulu iti muli Nene. Ulu ni ngʼwali ngʼwanimana Nene, ni ngʼwali ngʼwamana Baba hangi: kufuma haha mukumanaga, hangi ngʼwamonaga. Filipo ungʼwila giki, Seba, utolekeje Siswe, gwenuyo gukutwigela. Yesu ungʼwila giki, Nene ndi ho hamo ningʼwe shiku ningi giko, nangho utanimanile, Filipo? uyo wanibonaga Nene, wamonaga Baba; bebe wahaya kinahe giki, Utolekeje Siswe? Bebe utuzunyaga giki, Nene ndi muli Baba na Baba ali muli Nene? mihayo iyo nakumuwilaga natuhayaga yane ya ngʼwenekele; aliyo Baba akwikalaga muli Nene, Ngʼwenuyo akwitaga shitile shakwe. Nizunyagi giki, Nene ndi muli Baba, na Baba ali mo muli Nene; ulu natuzunya giko, nizunyagi kulwa nguno ya shitile shenekele. Nghana, nghana, namuwila giki, Uyo wanizunya Nene, shitile isho nakitaga Nene, nanghwe hangi alashita, chene na shitile shitale sha kutinda ishi alashita, iki Nene najile kuli Baba. Na mhayo gose ngʼugulomba mu lina lyane, nakugwita, Baba akujiwe muli Ngʼwana. Ulu ngʼugulomba mhayo gose mu lina lyane, Nene nakugwita. Ulu ngʼunitogwa, mukushidima shilagilo shane. Na Nene nakunomba Baba, nanghwe akungʼwinha bingʼwe Ngunani ungi, ikale hamo ningʼwe welelo bose. Ngʼwene Moyo Ngʼwela wa nghana; Ngʼwenuyo ba mu si batudula kungʼwanukula, iki batumonaga, nulu batumanaga; bingʼwe mumanile Ngʼwenuyo; iki akwikalaga hamo ningʼwe, hangi akubiza mo mu bingʼwe. Natumuleka bapina; nakwiza ku bingʼwe. Kasaga kakanza kado ba mu si batunibona hangi; aliyo bingʼwe mulinibona; hangi iki Nene ndi mpanga, na bingʼwe mukubiza bapanga. Mu lushiku lwenulo mulamana giki, Nene ndi muli Baba, na bingʼwe muli muli Nene, na Nene ndi mo mu bingʼwe. Uyo ali na shilagilo shane, hangi ushidima, uyo hu ngʼwene akunitogagwa; hangi uyo akunitogagwa, Baba akuntogwa, na Nene nakuntogwa, hangi nakwiyolecha Nene ngʼwenekele kuli wei. Yuda (ati Iskariota) ungʼwila giki, Seba, yabiza ho kinahe, Bebe wahaya kwiyolecha ngʼwenekele ku biswe, na ku ba mu si yaya? Yesu ushosha ungʼwila giki, Munhu ose ulu unitogwa, akugudima mhayo gwane, na Baba akuntogwa, na biswe tukwiza kuli wei, tukubeja wikalo hamo nanghwe. Uyo atanitogagwa, atadimaga mihayo yane; hangi na mhayo gwenuyu bingʼwe mukugwigwaga, guti gwane gwa ngʼwenekele; aliyo gwa ngʼwa Baba uwaanituma. Mihayo iyi nalungalungaga na bingʼwe, aho natali ndi hamo ningʼwe. Aliyo U Ngunani, Ngʼwene Moyo Ngʼwela, Uyo Baba akuntuma mu lina lyane, Ngʼwenuyo akumulanga mihayo yose, hangi akungʼwizukija bingʼwe yose iyo nakamuwilaga. Mhola namulekela; mhola yane nangʼwinha bingʼwe; iti gitumo ba mu si bakwinhaga umo nangʼwinha Nene. Ngholo yingʼwe itiziganilija, nulu itizogoha. Ngʼwigwaga iyo namuwila giki, Najile kungi, hangi nakwiza ku bingʼwe. Ulu ni ngʼwanitogwa, ni ngʼwayegaga, iki nahaya giki, Naja kuli Baba; iki Baba anikilile Nene butale. Na haha namuwilaga, kuko itali kubiza ho giki, aho ilabizaga ho, bingʼwe muzunye. Kufuma haha natulungalunga mingi hamo ningʼwe hangi, iki ntale wa mu si iyi izile; nanghwe ati na mhayo muli Nene; Aliyo ba mu si bamane giki, Nene nantogilwe Baba, hangi gitumo Baba waatulagila, giko nakwitaga. Bukagi, twinge kunu. Nene ndi nzabibu gwa nghana, na Baba Ngʼwene nimi. Buli itambi lyose muli Nene ilo litatwajaga matwajo, akulyinjaga ho; hangi buli itambi lyose ilo likatwajaga matwajo akulyejaga, lyongeje kutwaja matwajo. Bingʼwe hambunyu ngʼwamalaga kwela kulwa mhayo gwenuyo namalaga kumuwila. Ikalagi muli Nene, na Nene mu bingʼwe. Gitumo itambi Utudula kutwaja matwajo lyenekele, ulu litikalaga mu nzabibu, giko hangi na bingʼwe mutudula, ulu mutikalaga muli Nene. Nene ndi nzabibu, bingʼwe muli matambi. Uyo akwikalaga muli Nene, na Nene muli wei, ngʼwenuyo akatwajaga matwajo mingi; iki ulu iti hamo na Nene mutudula kwita mhayo nulu gumo. Munhu ose ulu atikalaga muli Nene, uponyiwa hanze giti itambi, uma lulu; na banhu bugabilinga, bugaponya mu moto, gupemva. Bingʼwe ulu ngʼwikala muli Nene, na mihayo yane yikala mu bingʼwe, mukulomba iyo mutogilwe, nayo ikwitwa kulwingʼwe. Mu mhayo uyu Baba akukujiwagwa giki, mutwaje matwajo mingi; na bingʼwe mukubiza bahemba bane. Gitumo Baba waatutogwa, giko hangi na Nene naamutogwa bingʼwe; ikalagi mu butogwa wane. Ulu ngʼushidima shilagilo shane, mukwikala mu butogwa wane; gitumo Nene nakashidimaga shilagilo sha ngʼwa Baba, nakwikalaga mu butogwa wakwe. Mihayo iyi namuwilaga, kuyega kwane kwikale mo mu bingʼwe, hangi kuyega kwingʼwe kukwile. Kilagilo chane kili iki, giki, Ngʼwitogwe benekele na benekele, gitumo Nene naamutogwa bingʼwe. Nduhu munhu ali na butogwa butale kutinda ubu giki, munhu kuwega ho bupanga wakwe kulwa banwani bakwe. Bingʼwe muli banwani bane ulu ngʼwita yose iyo namulagila. Kufuma haha natungʼwitana bingʼwe basese hangi; iki nsese atamanile iyo seba wakwe akwitaga; aliyo nangʼwitanaga bingʼwe banwani bane, iki yose iyo nali nigwa kuli Baba, namumanikijaga bingʼwe. Bingʼwe ngʼwali mutanikomile Nene, aliyo Nene naamukoma bingʼwe, hangi naamutuula ho bingʼwe muje, mukatwaje matwajo, na matwajo gingʼwe gikale ho; yose iyo munombe Baba mu lina lyane, angʼwinhe bingʼwe. Mihayo iyi namulagila giki, Ngʼwitogwe benekele na benekele. Ba mu si ulu bamukolwa bingʼwe, mumanile giki, bali bandia kunikolwa Nene aho batali kumukolwa bingʼwe. Bingʼwe ulu ni muli ba mu si, ba mu si ni babatogwa banhu babo; aliyo iki bingʼwe muti ba mu si, aliyo Nene naamukoma kufuma mu ba mu si, kulwa mhayo uyu ba mu si bamukolilwe. Ngʼwizukwe mhayo uyo nali namuwilila giki, Nsese atankilile seba wakwe butale. Ulu bali buniluhyaluhya Nene, nahene bakumuluhyaluhya bingʼwe hangi; ulu bugudima mhayo gwane, balagudima mhayo gwingʼwe hangi. Aliyo iyi yose balangʼwitila bingʼwe kulwa nguno ya lina lyane, iki batamanile Ngʼwenuyo waanituma. Ulu ni natizile kulungalunga nabo, ni bali batubiza na shibi; aliyo haha bati na kwiyanda kulwa shibi shabo. Uyo wanikolwa Nene wankolwa Baba hangi. Nene ulu ni natitile hagati mubo shitile isho walatitile nulu umo ungi, ni bali batubiza na shibi; aliyo haha babonaga na batukolagwa Nene na Baba. Aliyo mhayo gushikilijiwe ugwaandikwa mo mu shilagilo shabo giki, Baanikolwa na nguno yaya. Aliyo Ngunani aho aliza, Uyo nakuntuma ku bingʼwe kufuma kuli Baba, Ngʼwene Moyo Ngʼwela wa nghana, Uyo ufuma kuli Baba, Ngʼwenuyo akunikanila Nene; Na bingʼwe hangi mukunikanilaga, iki mukabizaga hamo na Nene kufuma kwandia. Mihayo yeniyi namuwilaga bingʼwe mutalizipamiwa. Balamupeja mu mabilingilo; chene ikanza likwizaga aho uyo ose umubulaga bingʼwe akwiganika giki, akuntumamilaga Mulungu. Bakungʼwitila yeniyi iki batamanile Baba nulu Nene. Aliyo namuwilaga yeniyi giki, aho ikanza lyenilo lilashikaga, ngʼwizukwe giki, Naali naamuwila mihayo yeniyi. Nali natamuwilile yeniyi kufuma kwandia, iki nali ho hamo ningʼwe. Aliyo haha naja kuli Uyo waantuma; hangi ati ho umo wa mu bingʼwe uyo wanibuja giki, Ujile hali? Aliyo iki namuwilaga yeniyi, bupina bokajaga ngholo yingʼwe. Aliyo namuwila ya nghana giki, Ikumubelela bingʼwe Nene ninge ho; iki ulu natinga ho Nene, Ngunani ataliza ku bingʼwe; aliyo ulu nuja Nene, nakuntuma ku bingʼwe. Nanghwe aho alizaga akubakanilija ba mu si ya shibi, na ya butungilija, na ya kulekanya nsango. Ya shibi, iki batunizunyaga Nene; Ya butungilija, iki naja kuli Baba, na bingʼwe mutunibona hangi; Ya kulekanya nsango, iki ntale wa si iyi nanghwe walekanyiwagwa nsango. Natali ndi na mihayo mingi ya kumuwila, aliyo bingʼwe mutudula kuyiyumilija haha. Aliyo Ngʼwenuyo, Moyo Ngʼwela wa nghana aho wiza, akumutongela mu yose ya nghana; iki atalalungalunga yakwe ngʼwenekele; aliyo yose iyo akwigwa, i yene akulungalunga; hangi akumusombolela iyahaya kwiza. Ngʼwenuyo akunikuja Nene; iki akuyinja ho ku yane, hangi akumusombolela bingʼwe. Yose iyo Baba ali nayo, yene yane; kulwa mhayo uyo namuwila giki, akuyinja ho ku yane, hangi akumusombolela bingʼwe. Kakanza kado ningʼwe mutunibona; na hangi kakanza kado ningʼwe mukunibona hangi; iki naja kuli Baba. Kulwa iyo bamo ba mu bahemba bakwe bilunjalunja giki, Mhayo uyu alituwila guli kinahe, giki, Kakanza kado ningʼwe mutunibona; na hangi kakanza kado ningʼwe mukunibona hangi? na giki, Iki naja kuli Baba? Kulwa mhayo uyu buhaya giki, Mhayo guli kinahe uyu alihaya giki, Kakanza kado? Tutamanile iyo ulungalunga. Yesu wali umana giki, batogilwe kumuja, nanghwe ubawila giki, Angu, bingʼwe ngʼwibugilija benekele na benekele ya mhayo uyu naguhayaga giki, Kakanza kado ningʼwe mutunibona; na hangi kakanza kado ningʼwe mukunibona hangi? Nghana, nghana, namuwila giki, Bingʼwe mukulila hangi mukulila nghungu; aliyo ba mu si bakuyega, bingʼwe mukupinihala, aliyo bupina wingʼwe bulagaluka kubiza buyegi. Nkima ulu alituula, ali na bupina, iki ikanza lyakwe lyashikaga; aliyo aho wamala kumyala ngʼwana, atizukwa hangi u buluhi, kulwa kuyegela giki, munhu wabyalagwa mu si. Na bingʼwe hambunyu muli nabo bupina nghana; aliyo nakumubona hangi, na ngholo yingʼwe ikuyega, hangi ati ho nulu umo wa kumutaja buyegi wingʼwe. Hangi mu lushiku lwenulo mutalanibuja mhayo gose. Nghana, nghana, namuwila giki, Yose iyo munombe Baba mu lina lyane, akungʼwinha bingʼwe. Kushisha lelo mutali kulomba mhayo nulu gumo mu lina lyane; lombagi ningʼwe mukwinhiwa, buyegi wingʼwe bubize bushikanu. Mihayo yeniyi nalungalungaga mu sumo; ikanza lukwizaga aho lyulungalunga hamo ningʼwe hangi mu sumo, aliyo nakumusombolela hape i ya ngʼwa Baba. Mu lushiku lwenulo mukulomba mu lina lyane, na Nene natumuwilaga giki, Nakumuja Baba kulwa nguno yingʼwe; Iki Baba ngʼwenekele amutogilwe, iki bingʼwe ngʼwaanitogwa, hangi ngʼwaazunya giki, Nene nafumile kuli Baba. Nene nafumile kuli Baba, hangi nizile mu si; hangi nabaleka ba mu si, naja kuli Baba. Bahemba bakwe bungʼwila giki, Lolaga, hambunyu ukulungalungaga hape, na utuhayaga lusumo nulu lumo. Hambunyu tulitegeleja giki, Bebe witegeleja mihayo yose, hangi uti na nguno munhu ose akubuje; kulwa mhayo uyo twazunya giki, Bebe ufumile kuli Mulungu. Yesu ubashokeja giki, Ngʼwazunya nghana hambunyu? Lolagi, ikanza likwizaga, chene na hambunyu lyashikaga, bingʼwe bose mukubalasanyiwa, buli munhu ose ku yakwe, na Nene mukunileka niyene; nahene nati niyene, iki Baba ali hamo na Nene. Mihayo yeniyi namu wilaga giki, muli Nene mubize na mhola. Mu si mukubiza na kuluhaluhiwa; aliyo timbyagi ngholo, Nene napyenaga si. Yesu wali ulungalunga yeniyi, ulangamila miso gakwe ngʼwigulu, na uhaya giki, Baba, ikanza lyashikaga; nkujage Ngʼwana wako; Ngʼwana wako nanghwe akukuje Bebe: Gitumo Bebe waangʼwinha budula wa kusuga ba mibili bose, giki, abinhe bupanga butushila abo bose Bebe waangʼwinha. Na bupanga butushila wene ubu giki, bakumane Bebe, Mulungu wa nghana umo wike, na Yesu Kristo, Uyo waantuma. Nene nakukugije Bebe mu si; nagushikilijaga nimo gwenuyo Bebe waaninha kugwita. Na hambunyu, Baba, nikujage na Bebe ngʼwenekele, na ikujo ilo nali nabiza nalyo hamo na Bebe, aho si iti-nabiza ho. Namalaga kubamanikija lina lyako banhu abo waaninha kufuma mu ba mu si; bali bali bako, na Nene waaninha boi; na mhayo gwako baagudima. Hambunyu bamanile giki, yose iyo waaninha Nene, ifumile kuli Bebe: Iki mihayo iyo waaninha Nene i yene namalaga kubinha benabo, nabo buyanukula, hangi bumana nghana giki, Nene nafumile kuli Bebe, hangi buzunya giki, Bebe waanituma. Nene nabalombela benabo; natubalombelaga ba mu si, aliyo nabalombela benabo waaninha Nene, iki bali bako. Na shane shose shene shako, na shako shene shane; na Nene nakujiwa mu bo. Na Nene nati mo mu si hangi, aliyo benaba bali mo mu si, na Nene niza kuli Bebe. Baba Ngʼwela, ubalinde mu lina lyako benabo waaninha, babize bumo, giti Biswe. Aho nali natali hamo nabo, nubyubalinda mu lina lyako; abo waaninha, nubalalanghana, hangi atayagalile nulu umo, ulu ati uyo ngʼwana wa kuyagala, mhayo gwaandikwa gushikilijiwe. Hambunyu niza kuli Bebe; na mihayo yeniyi nayilungalunga mu si, babize na buyegi wane bushikilijiwe mubo. Nene namalaga kubinha mhayo gwako; hangi ba mu si bubakolwa, iki bati ba mu si, gitumo Nene nati wa mu si. Natulombaga giki, ubinje mu si, aliyo giki, ubalinde muli ngʼwenuyo mi. Boi bati ba mu si, gitumo Nene nati wa mu si. Bejage benabo mu nghana yako; mhayo gwako u gwene nghana. Gitumo Bebe waanituma Nene mu si, giko Nene naabatuma benabo mu si. Na kulwa nguno yabo niyeja ngʼwenekele, benabo nabo bejiwe mu nghana. Nulu natubalombelaga benaba bike, aliyo nabalombela hangi benabo bakubyunizunya kulwa mhayo gwabo; Bose babize bumo; gitumo na Bebe, Baba, uli muli Nene, na Nene muli Bebe, benabo nabo babize bumo mu Biswe; ba mu si bazunye giki, Bebe waanituma. Na Nene, ikujo ilo waaninha Nene, naabinha boi; babize bumo, gitumo Biswe tuli bumo. Nene mubo, na Bebe muli Nene, bashikanyiwe babize bumo; ba mu si bamane giki, Bebe waanituma Nene, hangi waabatogwa boi, gitumo waanitogwa Nene. Baba, natogilwe giki, abo Bebe waaninha, babize hamo na Nene, aho ndi; balilolele ikujo lyane, ilo waaninha; iki Bebe waanitogwa aho si yali itali kusengʼwa. Baba ntungilija, ba mu si batakumanaga, aliyo Nene nakumanile, na benaba bamanile giki, Bebe waanituma Nene. Hangi naabamanikija lina lyako, nakulimanicha hangi; butogwa ubo Bebe waanitogwa nabo, bubize mubo, na Nene nabize mo mubo. Yesu aho umala kuhaya yeniyi, winga hamo na bahemba bakwe, uja ku nkilo gwa mongo Kedroni, aho ngunda guli, wali wingila mo mugo, Wei na bahemba bakwe. Yuda, uwahaya kungʼwinha ko, nanghwe walamanile ipande lyenilo, iki Yesu wibilinga ho hamo na bahemba bakwe nghangala ningi. Huna lulu Yuda, aho wamala kwinhiwa ibita lya bashilikale, na batale ba kufuma ku bagabiji batale na Bafarisayo, wiza henaho na mashenge na matala na shilanga. Yesu iki witegeleja yose iyuhaya kungʼwiziila, ubatumila, ubawila giki, Mulinkoba nani? Bunshokeja giki, Yesu wa Nazareti. Yesu ubawila giki, Nene ndi Ngʼwene. Yuda uyo alingʼwinha ko, wali wimilile hamo nabo. Huna lulu aho ubawila giki, Nene ndi Ngʼwene, bushoka kigongwanuma, bugwa ha si. Kulwa iyo ubabuja hangi giki, Mulinkoba nani? Buhaya giki, Yesu wa Nazareti. Yesu ushosha giki, Ambu, namuwilaga giki, Nene ndi Ngʼwene; ulu mulinikoba Nene, balekagi benaba baje. Gushikilijiwe mhayo uyo akaguhaya giki, Mu benabo Bebe waaninha atayagalile nulu umo. Simoni Petro iki walali na lilushu, ulisopola, untema nsese wa ngabiji ntale, umuta kutu gwakwe gwa bulyo. Lina lya nsese ngʼwenuyo akitanagwa Malko. Kulwa iyo Yesu ungʼwila Petro giki, Shoshaga lilushu lyako mu kilalo chalyo; kikombe icho Baba waaninha, nakije kukingʼwa? Hunaho ibita lyenilo na ntale walyo, na batale ba Bayudaya bali bundima Yesu, buntunga; Buntwala kwandia kuli Ana; iki wei walali ise buko wa Kayafa, uyo walali ngabiji ntale ngʼwaka gwenuyo. Kayafa walali ngʼwenuyo uwali ubinha Bayudaya masala giki, ibelile munhu umo abachilile banhu. Simoni Petro wali unondela Yesu, na nghemba ungi. Nghemba ngʼwenuyo walamanilwe na ngabiji ntale, nanghwe wingila hamo na Yesu mu kibuga cha ngabiji ntale: Aliyo Petro wimila hanze ha nyango. Huna lulu nghemba ungi uyo walamanilwe na ngabiji ntale, ufuma hanze ulungalunga na ngʼwaniki uyo ulinda nyango, ungʼwenha Petro mugati. Huna lulu ngʼwaniki uyo ulinda nyango, ungʼwila Petro giki, Angu, bebe uti umo wa bahemba ba munhu Ngʼwenuyu? Nanghwe uhaya giki, Nene nati ngʼwene. Basese na batale bali bimilile ho, bagudaga moto gwa makala; iki yali ili ho mbeho, nabo bakotaga moto; Petro nanghwe wimila hamo nabo, akotaga moto. Huna lulu ngabiji ntale wali umuja Yesu mihayo ya bahemba bakwe, na ya kulanga kwakwe. Yesu unshokeja giki, Nene nalulungalungaga hape ku ba mu si, nubyulanga shiku jose ngʼwibilingilo, na mu hekalu, uko Bayudaya bose bakibilingilaga ho; hangi mu mbisila natalungalungaga mhayo nulu gumo. Ulinibuja Nene ni buli? babujage benabo abigwile iyo nubyulungalunga nabo; lolaga, boi bamanile iyo Nene nuhaya. Aho wahaya yeniyi, umo wa batale uwimilile ho umpala Yesu na lupi, uhaya giki, Bebe wanshokeja ngabiji ntale giko? Yesu unshokeja giki, Ulu nalungalungaga ya bubi, kanilaga bubi wenubo; aliyo ulu nahaya ya wiza, wanitula ni buli? Huna lulu Ana untuma atungilwe kuli Kayafa ngabiji ntale. Simoni Petro wali wimilile ho akotaga moto. Huna lulu bungʼwila giki, Angu, bebe uti umo wa bahemba bakwe? Wei ulema uhaya giki, Nene nati ngʼwene. Umo wa basese ba ngabiji ntale, nduguye wa ngʼwenuyo uwabutwa kutu na Petro, uhaya giki, Angu, natakubonile bebe hamo nanghwe mu ngunda? Huna lulu Petro ulema hangi; halio na haho nghungulume yuhila. Buntwala Yesu lulu kufuma kuli Kayafa kuja ngʼwilekanijo; yubiza dilu no; na benabo benekele bali batingila ino ngʼwilekanijo batiziyitila buka, aliyo balye Pasaka. Kulwa iyo Pilato wali ufuma hanze kubo, na uhaya giki, Muli na mihayo ki kumula munhu uyu? Nabo bushosha bungʼwila giki, Ngʼwenuyu ulu ni ati nkenaguji, biswe ni tutungʼwinhaga ko kuli bebe. Pilato ubawila giki, Ntwalagi bingʼwe benekele, munekanye nsango gitumo shilagilo shingʼwe umo shili. Bayudaya bungʼwila giki, Itazuniligije ku biswe kumulaga munhu. Mhayo gwa ngʼwa Yesu gusliikilijiwe, uyo akaguhaya gwa kolecha kucha umo kuli uko wahaya kucha. Kulwa iyo Pilato wingila hangi ngʼwilekanijo, ungʼwitana Yesu, ungʼwila giki, Angu, Bebe uli Ntemi wa Bayudaya? Yesu unshokeja giki, Bebe ulihaya giko ya ngʼwenekele, nulu bangi bakuwilaga iyo ya kuli Nene? Pilato ushosha giki, Nene ndi Nyudaya? Ihanga lyako na bagabiji batale bakwinhaga ko kuli nene; witaga ki Bebe? Yesu ushosha giki, Butemi wane buti wa mu si iyi; butemi wane ulu ni wabiza wa mu si iyi, nahene, batumami bane ni bakulwaga, natizinhiwa ko mu makono ga Bayudaya, aliyo hambunyu butemi wane buti wa kunu. Kulwa iyo Pilato ungʼwila giki, Bebe uli ntemi lulu? Yesu ushosha giki, Bebe watungilija giki, Nene ndi ntemi. Kulwa nguno iyi Nene naabyalwa, na kulwa nguno iyi niiza mu si, giki, nikanile ya nghana. Buli munhu ose uyo ali wa nghana, akigwaga ilaka lyane. Pilato ungʼwila giki, Nghana ni ili kinahe? Aho wamala kuhaya giko, ufuma hanze hangi ku Bayudaya, ubawila giki, Natubonaga buka muli Wei. Aliyo bingʼwe muli na chimile giki, Nene namutaligulilile ntungwa umo ha Pasaka; mutogilwe ki lulu, angu, namutaligulilile Ntemi wa Bayudaya? Kulwa iyo bose buhamuka hangi, buhaya giki, Ngʼwenuyu yaya, aliyo Barabba. Barabba walali nsambo. Hunaho lulu Pilato untwala Yesu, untula mikoba. Bashilikale nabo buluka ngikili ya mihwa, bunzwika ku ntwe, hangi bunzwika na kizwalo chaza; bubyungʼwegela, Buhaya giki, Lama, Ntemi wa Bayudaya! bubyumpala mapi. Pilato ufuma hanze hangi, ubawila giki, Lolagi, Ngʼwenuyo nangʼwenhaga hanze ku bingʼwe, mumane giki, nene natubonaga buka muli Wei. Hunaho lulu Yesu ufuma hanze azwalile ngikili ya mihwa na kizwalo chaza. Pilato ubawila giki, Nolagi Munhu Uyu! Huna lulu bagabiji batale na batale aho bumona, buhamuka buhaya giki, Nkomage, nkomage! Pilato ubawila giki, Ntwalagi bingʼwe benekele, mukankome; iki nene natubonaga buka muli Wei. Bayudaya bunshokeja giki, Biswe tuli na kilagilo, na kulwa kilagilo iki shingʼwigelelilwe kucha, iki wiyita ngʼwenekele Ngʼwana wa Mulungu. Kulwa iyo aho Pilato wigwa mhayo gwenuyu ongeja kogoha no; Wingila mo hangi ngʼwilekanijo, ungʼwila Yesu giki, Bebe walumile hali? Aliyo Yesu walatunshokeja mhayo. Kulwa iyo Pilato ungʼwila giki, Bebe utulungalungaga na nene? Utamanile giki, Nene ndi nabo budula wa kukukoma, hangi ndi nabo budula wa kukutaligulila? Yesu ushosha giki, Bebe ni utabizile na budula kuli Nene, na hado yaya, ulu ni utinhilwe kufuma higulya. Kulwa mhayo uyu ngʼwenuyo waninha ko kuli bebe ali na kibi ikikilile butale. Kufumila henaho Pilato ukoba kuntaligulila; aliyo Bayudaya buhamuka, buhuya giki, Bebe ulu ulantaligulile munhu uyu, uti nwani wa ngʼwa Kaisari; uyo ose wiyita ngʼwenekele ntemi, ngʼwene wangemela Kaisari. Pilato aho wigwa mhayo uyu, umfunya Yesu hanze, wigasha ha ilekanijo, kwipande ilo likitanagwa giki, Kibuga cha Mawe, aliyo mu Kihebrania giki, Gabbatha. Kwali kulonjalonja kwa Pasaka, yubiza giti saa ya katandatu; nanghwe ubawila Bayudaya giki, Lolagi Ntemi wingʼwe! Nabo buhamuka giki, Ngʼwinjage ho, ngʼwinjage ho, nkomage. Pilato ubawila giki, Angu, nankome Ntemi wingʼwe? Bagabiji batale bushosha giki, Biswe tuti na ntemi ulu iti Kaisari. Hunaho lulu ungʼwinha ko mu makono gabo akongʼwe. Nabo bundima Yesu, buntwala. Nanghwe wibukija nsalaba gwakwe, utuma uja kwipande likitanagwa giki, Ha lupanga, ilikitanagwa mu Kihebrania giki, Golgotha; Kwenuko bali bunkoma, na babili bangi hamo nanghwe, umo kwipande na ungi kwipande, na Yesu hagati. Pilato nanghwe wali wandika kimanikijo, ukituula ho ku nsalaba. Na iyo yandikile yali ili giki, YESU WA NAZARETI, NTEMI WA BAYUDAYA. Kulwa iyo banhu bingi ba Bayudaya bukisoma kimanikijo icho; iki ipande ilo aho Yesu ukomelwa lyali lili hiha na nzengo; hangi iyo yandikile yali ili mu Kihebrania, na mu Kirumi, na mu Kigriki. Huna lulu bagabiji batale ba Bayudaya bungʼwila Pilato giki, Utandikage giki, Ntemi wa Bayudaya; aliyo Ngʼwenuyo wihaya ngʼwenekele giki, Nene ndi Ntemi wa Bayudaya. Pilato ushosha giki, Yeniyo nandikaga yene nandikaga. Huna lulu aho bashilikale bali bunkoma Yesu, but wala shizwalo shakwe, bushigabanha migabo ine, buli nshilikale ngabo gwakwe; na nghanjo; nghanjo yeniyo yali iti na busumilo, yali ilukile kilukile kimo kufuma higulya. Kulwa mhayo uyu biwila boi bike giiti, Tutizitandula, aliyo tuyesagi, himba ikubiza ya ngʼwa nani; ugwaandikwa gushikilijiwe, uyo guhaya giki, Bushiga banha shizwalo shane boi bike, na joho yane bakayikoma na kwesa. Mihayo yeniyo lulu bashilikale bali bita. Bali bimilile ho hihi na nsalaba gwa ngʼwa Yesu nina, na ngʼwana wa ngʼwawe wa nina, Mariamu nke wa Klopa, na Mariamu Magdalene. Aho Yesu umona nina, na nghemba uyo antogilwe imilile hihi, ungʼwila nina giki, Nkima, nolage ngʼwana wako. Hunaho ungʼwila nghemba ngʼwenuyo giki, Nolage noko. Na kufuma ikanza lyenilo nghemba ngʼwenuyo untwala nkima uyo ku ngʼwakwe. Hanuma ya yeniyi, Yesu iki umana giki, yose yashikilijiwagwa, ugwaandikwa gushikilijiwe, uhaya giki, Nakolwa nota. Chali chutuulwa ho kiseme chokalile bugota bululu; nabo bokaja ibupya na bugota bululu, buntuula ha hisopo, bulibukija ku nomo gwakwe. Aho Yesu wamala kwanukula bugota bululu, uhaya giki, Gwashilaga lulu: Winamya ntwe gwakwe, winha ko moyo gwakwe. Hunaho iki lwali luli lushiku lwa kulonjalonja, mibimba itizikala ha nsalaba ha Sabato, (iki Sabato yeniyo yali ili lushiku lutale), Bayudaya bumuja Pilato giki, magulu gabo gabinzwe, nabo binjiwe ho. Huna lulu bashilikale biza, bugabinza magulu ga ngʼwenuyo wa kwandia, hangi ga ngʼwenuyo ungi ukongʼwa hamo nanghwe; Aliyo aho bushika hali Yesu, bubona giki, wamala kucha, bali batugabinza magulu gakwe; Aliyo umo wa bashilikale unchima ichimu mu mbazu, haho na baho gufuma mo mininga na minzi. Na uyo waabona, waakanila, na bukaniji wakwe buli wa nghana; nanghwe amanile giki, alihaya ya nghana, bingʼwe muzunye. Iki yeniyi yali yubiza ho ugwaandikwa gushikilijiwe giki, Iguha lyakwe litalabinzwa nulu limo yaya. Na hangi ugwaandikwa gungi uguhaya giki, Balanola Uyo bakanchima. Hanuma ya yeniyi Yusufu wa Arimathaya, ngʼwene nghemba wa ngʼwa Yesu, aliyo mu mbisila, kulwa kubogoha Bayudaya, nanghwe wali umuja Pilato giki, atwale mimba gwa ngʼwa Yesu; na Pilato unzunilija. Wali wiza lulu, ugutwala mimba gwa ngʼwa Yesu. Wali wiza hangi Nikodemo, ngʼwenuyo akiza kuli Yesu bujiku i kwandia, wei ubucha bugota busangije bunasa na ngazu bushika giti ratili igana. Huna lulu bugutwala mimba gwa ngʼwa Yesu, bugutunga mu mienda ya kitani hamo na bugota, gitumo chimile cha Bayudaya cha kuguma umo kili. Ngʼwipande ilo aho wali ukomelwa gwali guli ho ngunda; na mu ngunda gwenuyo nze mhya, munhu atali kulajiwa mo. Kwenuko lulu, iki lwali luli lushiku lwa kulonjalonja kwa Bayudaya, iki nze iyo yali ili hihi, bunguma mo Yesu. Ha lushiku lwa kwandia lwa mfungo mu makingokingo, aho chali kitali giiti, Mariamu Magdalene wali wiza ku kigila, na ulibona iwe lyinjiwagwa ho kufuma ha kigila. Upela lulu, wiza kuli Simoni Petro na kuli nghemba ungi uyo Yesu untogwa, ubawila giki, Bangʼwinjaga ho Seba mu kigila, hangi uko bantuulaga tutamanile. Petro ufuma lulu, na nghemba uyo ungi, buja ku kigila. Bupela bose hamo: na nghemba ungi upela wangu kutinda Petro, ushika kwandia ku kigila; Winama usula mo, ubona mienda ya kitani ituulilwe ho; aliyo walatingila mo. Simoni Petro ushika lulu akunondelaga, nanghwe wingila mo mu kigila; nanghwe uyilola mienda ya kitani gitumo ituulilwe. Na kitambala icho chali chubiza ku ntwe gwakwe, chali kitatuulilwe hamo na mienda ya kitani, aliyo chulingwa heke ngʼwipande lyacho. Hunaho lulu nghemba ungi nanghwe wingila mo, uyo wandia kushika ko ku kigila, nanghwe ubona, na uzunya. Iki bali batali kwitegeleja uyo gwaandikwa giki, Kujuka, shingʼwigelile kujuka hangi kufuma mu bafu. Huna lulu bahemba benabo bushokanya hangi ku kaya yabo. Aliyo Mariamu wali imilile hanze ya kigila, alilila shisoji; aho walatali ulila, winama usula mo mu kigila; Ulolela mo bamalaika babili, bazwalile shizwalo shape, bigashije ho, ungi ku ntwalili na ungi ku magulu, kwipande ilo aho mimba gwa ngʼwa Yesu gwali gwalajiwa ho. Nabo bungʼwila giki, Mayu, ulililila ki? Nanghwe ubawila giki, Iki bantwalaga Seba wane, na nene natamanile bantuulaga hali. Aho wamala kuhaya giko, ugaluka kunuma, unola Yesu imilile, aliyo walatitegeleja giki, Ngʼwene Yesu. Yesu ungʼwila giki, Mayu, ulililila ki? ulinkoba nani? Nanghwe iki wiganika giki, Uyo ngʼwene nimi wa ngunda, ungʼwila giki, Baba, ulu Bebe wamuchaga kungi, niwilage uko wantuulaga, na nene nakuntwala. Yesu ungʼwila giki, Mariamu. Ngʼwenuyo ugaluka, ungʼwila mu Kihebrania giki, Rabboni, kushomelejiwa kwaho giki, Nangi. Yesu ungʼwila giki, Utizunikuumya; iki natali kulinha kuli Baba; aliyo jaga ku badugu bane, ukabawile giki, Nene nalilinha kuli Baba, na kuli Singʼwe, hangi kuli Mulungu wane, na kuli Mulungu wingʼwe. Mariamu Magdalene wiza na ubasombolela bahemba giki, wamonaga Seba; hangi Wei wangʼwilaga yeniyi. Aho yali ili mhindi lwise lwene, u lushiku lwa kwandia lwa mfungo, hangi na nzwigi jali jilugalilwe ho uko bahemba bibilinga, kulwa kubogoha Bayudaya, huna lulu Yesu wiza, wimila hagati yabo, na ubawila giki, Mhola ku bingʼwe. Aho wamala kuhaya giko, Ubolekeja makono gakwe na mbazu jakwe. Bahemba bakwe buyega aho bumona Seba. Huna lulu Yesu ubawila hangi giki, Mhola ku bingʼwe; gitumo Baba waantuma Nene, giko hangi namutuma bingʼwe. Aho wamala kuhaya giko, ubahahila, ubawila giki, Ngʼwanukulagi Moyo Ngʼwela; Abo bose ulu ngʼubalekeja shibi shabo, shene shalekejiwa kubo; abo bose ulu ngʼushidimya, shene shadimiwa. Aliyo Tomaso, umo wa benabo ikumina babili, uyo akitanagwa Didumo, walati ho aho Yesu wali wiza. Kulwa iyo bahemba bangi bungʼwila giki, Twamonaga Seba. Aliyo ubawila giki, Nene ulu natubona mu makono gakwe nhondo ja misumali, na ulu natutuula mo lwa la lwane mu nhondo ja misumali, na ulu natingija mo nkono gwane mu mbazu jakwe, natalazunya na hado. Hanuma ya shiku inane bahemba bakwe bali bali mo mu numba hangi, Tomaso nanghwe ali hamo nabo. Yesu wiza, nzwigi jali jilugalilwe, na wimila hagati, uhaya giki, Mhola ku bingʼwe. Hunaho ungʼwila Tomaso giki, Enhaga lwala lwako kunu, ulole makono gane; enhaga na nkono gwako, ugwingije mo mu mbazu jane; utizubiza uyo atuzunya, aliyo uyo azunije. Tomaso ushosha ungʼwila giki, Seba wane na Mulungu wane. Yesu ungʼwila giki, Iki wanibonaga, wazunyaga; bali ba lubango abo abatinabona, aliyo bazunyaga. Shimanikijo shingi na sha mbika ningi Yesu waashitaga mu miso ga bahemba bakwe, isho shitandikilwe mo mu kitabo cheniki; Aliyo shenishi shandikilwe bingʼwe muzunye giki, Yesu ngʼwene Kristo, Ngʼwana wa Mulungu, na hangi kulwa kuzunya mubize na bupanga mu lina lyakwe. Hanuma ya yeniyi, Yesu wali wiyolecha ngʼwenekele hangi ku bahemba ku nyanza ya Tiberia; nanghwe wiyolecha giki, Simoni Petro, na Tomaso uyo akitanagwa Didumo, na Nathanaeli wa Kana ya Galilaya, na bana ba ngʼwa Zebedayo, na bahemba bakwe bangi babili bali bali ho bose hamo. Simoni Petro ubawila giki, Naja kutega ndilo. Bungʼwila giki, Na biswe tukuja na bebe. Bufuma lulu, bingila haho na haho mu lyato, na bujiku wenubo batabulagile kinhu. Aliyo dilu aho wangaluka, Yesu wali wimila ha ngʼwalo, aliyo bahemba bali batitegeleja giki, Ngʼwene Yesu. Huna lulu Yesu ubawila benabo giki, Bana bane, muli nasho sha kulya? Bunshokeja giki, Yaya. Nanghwe ubawila giki, Ponyagi ntego ha lwande lwa bulyo lwa lyato, ningʼwe mukupandika. Buponya lulu, nabo bali batudula kuguduta ntego hangi kulwa buhi wa ndilo. Kulwa iyo nghemba ngʼwenuyo Yesu untogwa, ungʼwila Petro giki, Uyo Ngʼwene Seba. Aho Petro wali wigwa giki, Uyo Ngʼwene Seba, witunga ngʼwenda gwakwe (iki walali duuhu), wiponeja ngʼwenekele mu nyanza. Aliyo bahemba bangi bali biza mu lyato ido, (iki bali bati kule na ngʼwalo, aliyo yali ili giti mikono magana abili,) bakudutaga ntego gwa ndilo. Hunaho lulu, aho bukola ha ngʼwalo bubona guli ho moto gwa makala, na ndilo ituulilwe higulya yago, na ngati. Yesu ubawila giki, Enhagi lulu ndilo jimo ijo ngʼwamalaga kubulaga haha. Simoni Petro ulinha mu lyato, uguduta ntego ku ngʼwalo, gokalile na ndilo nhale, igana na makumi atano na idatu; nahene nulu jali jili ningi giko ntego gwali gututanduka. Yesu ubawila giki, Nzugwi lulu, mulye. Aliyo mu bahemba benabo walatugima nulu umo kumuja giki, Bebe uli nani? iki bali bitegeleja giki, Uyu Ngʼwene Seba. Yesu wali wiza, udima ngati, ubinha benabo, na ndilo najo giko. Lwenulu lwene lukangala lwa kadatu Yesu wali olechiwa ku bahemba bakwe, hanuma ya kujuka kwake kufuma mu bafu. Aho bali bumala kulya, Yesu ungʼwila Simoni Petro giki, Simoni, ngʼwana wa ngʼwa Yohana, angu, unitogilwe Nene kutinda aba? Ungʼwila giki, Ali chene, Seba, Bebe witegelegije giki, tuli bunwani. Nanghwe ungʼwila giki, Utulishe twana twa ngholo twane. Ungʼwila hangi ku lukangala lwa kabili giki, Simoni, ngʼwana wa ngʼwa Yohana, angu, unitogilwe Nene? U-ngʼwila giki, Ali chene, Seba, Bebe witegelegije giki, tuli bunwani. Nanghwe ungʼwila giki, Dimaga ngholo jane. Ungʼwila hangi ku lukangala lwa kadatu giki, Simoni, ngʼwana wa ngʼwa Yohana, angu, tuli bunwani? Petro upinihala lulu iki ku lukangala lwa kadatu ungʼwila giki, Tuli bunwani? Na ungʼwila giki, Seba, Bebe witegelegije mihayo yose; umanile giki, tuli bunwani. Yesu ungʼwila giki, Ujilishe ngholo jane. Nghana, nghana, nakuwila giki, Aho walutali nsumba wiitungaga ngʼwenekele waashiminzaga uko walutogilwe; aliyo aho ulanamhala ulagagolola makono gako, na ungi alakutunga, alakutwala ko uko bebe utatogilwe kuja. Akahaya giko ya kolecha kucha uko alankuja Mulungu nako. Aho akamala kuhaya giko, ungʼwila giki, Nilondelage Nene. Petro wali ugaluka, umona nghemba ngʼwenuyo Yesu untogwa alilondela, hu ngʼwene uyo wali usendama ha kikuba chakwe aho bakalya shiliwa sha kulagila, nanghwe akahaya giki, Seba, uyo alikwinha ko ali nani? Petro aho umona ungʼwila giki, Seba, aliyo ngʼwenuyo kinahe? Yesu ungʼwila giki, Ulu natogilwe ngʼwenuyo ikale ho kushisha aho naliza, guli mhayo ki kuli bebe? nilondelage Nene. Huna lulu, mhayo gwenuyo gwali gukumuka mu badugu giki, nghemba ngʼwenuyo atalacha; aliyo Yesu walatangʼwilile giki, Atalacha; aliyo giki, Ulu natogilwe ngʼwenuyo ikale ho kushisha aho naliza, guli mhayo ki kuli bebe? Uyu hu ngʼwene nghemba uyo alikanila yeniyi, hangi waandika mihayo yeniyi; hangi twitegeleja giki, bukaniji wakwe buli wa nghana. Hangi ili ho mihayo mingi yingi iyo Yesu wiitaga, yeniyo ulu ni yandikwa gumo gumo, nene niganika giki, si yose ngima ni yishita shitabo isho ulu ni shandikwa. Amina. Kitabo cha kwandia naachita, E, Theofilo, cha iyo yose Yesu wali wandia kuyita na kulanga, Kushisha lushiku ulo waanukulwa ngʼwigulu, aho wali wamala kubalagila muli Moyo Ngʼwela a batungʼwa abo wali wabakoma: Hangi hanuma ya kuluhiwa kwakwe wiyolecha kubo mu shimanikijo shingi giki, ali mpanga, ubyubilongela shiku makumi ane, ulungalunga nabo mihayo ya butemi wa Mulungu: Aho wali wibilinga nabo, ubalagila batizufuma mu Yerusalemi, aliyo balindile kwisagija kwa ngʼwa Baba, uko ngʼwali ngʼwakwigwile kuli Nene. Iki Yohana wali ubatija na minzi, aliyo bingʼwe mukubatijiwa na Moyo Ngʼwela hanuma ya shiku ngehu. Kulwa iyo aho bali bibilinga, bumuja, buhaya giki, Seba, ulibashokeja ba Israeli butemi ngʼwikanza ili? Ubawila giki, Yene iti yingʼwe kumana makanza nulu kajile ka miaka, isho Baba waashituula mu budula wakwe ngʼwenekele. Aliyo mukwanukula budula, aho Moyo Ngʼwela alangʼwiziilaga, ningʼwe mukubiza bakaniji bane mu Yerusalemi, na mu Buyudaya yose, na mu Samaria, na kushisha ku mhelo ya si. Aho wamala kuhaya mihayo iyi, aho balolile, ubuchiwa kwigulya; na ilunde lyungʼwanukula kwinga mu miso gabo. Aho batali bukalalila ngʼwigulu, aho Wei akujaga, kuhayumanila bagosha babili bimila haho nabo, bazwalile shizwalo shape, Nabo buhaya giki, Bingʼwe bagosha ba Galilaya, Mukwimilaga mulilangamila ngʼwigulu ni buli? Yesu Ngʼwenuyu uwanukulwa kufuma ku bingʼwe kuja ngʼwigulu, aliza hangi giko, gitumo mulimonela ajile ngʼwigulu. Hunaho bushoka kuja Yerusalemi kwinga ku lugulu lukitanagwa Lwa Mizeituni, ululi hihi na Yerusalemi, giti lugendo lwa ha Sabato. Aho bali bingila bulinha mu chumba cha gorofa, umo biikalaga Petro, na Yohana, na Yakobo, na Andrea, Filipo na Tomaso, Bartolomayo na Matayo, Yakobo, ngʼwana wa ngʼwa Alfayo, na Simoni Zelote, na Yuda nduguye wa ngʼwa Yakobo. Benabo bose bubyukomela na moyo gumo mu kulomba, hamo na bakima na Mariamu, nina wa ngʼwa Yesu, na bana ba ngʼwawe. Na mu shiku jenijo, Petro akimila hagati ya badugu (bukumi wabo kihamo, bali giti igana na makumi abili), uhaya giki, Badugu, yigelile Shandikwa shishikilijiwe, isho Moyo Ngʼwela, mu nomo gwa ngʼwa Daudi, wali utonja kunghaya Yuda, uyo wali ubiza ntongeji wa benabo abali bundima Yesu. Iki wali wabalilwa wa mu biswe, hangi wali wanukula ngabo gwa mu butumami ubu. Ngʼwenuyo, lulu, ugula ngunda na mhela ya buhunga wakwe; nanghwe ukubunghila, utanduka, na bula wakwe bose bufuma. Gumanika hape ku bose abazengile mu Yerusalemi; kushisha nose ngunda gwenuyo gukitanwa mu lulimilwabo giki, Akeldama, makulu gaho giki, ngunda gwa mininga. Iki yaandikwa mu kitabo cha Zaburi giki, Wikalo wakwe leke bubize saka, na munhu atizuzenga mo; hangi giki, Bulindi wakwe ungi abudime. Kulwa iyo, kufuma mu bagosha abo bakadimanaga na biswe shiku jose ijo Seba Yesu wiingilaga na kufuma mu biswe, Kwandia mu kubatija kwa ngʼwa Yohana, kushisha lushiku ulo aho waanukula kwigulya kwinga mu biswe, kufuma mu benabo yigelile umo abize nkaniji hamo na biswe mu kujuka kwakwe. Huna lulu bubatuula ho babili, Yusufu, akitanagwa Barsaba, lina lyakwe lingi Yusto, na Matiya. Huna bulomba, buhaya giki, Bebe, Seba, Uyo umanile ngholo ja bose, ungʼoleche umo, uyo wankomaga, mu benaba babili, Adime ngabo mu butamami ubu na butungʼwa, ubo Yuda wali ububihya ugwa, aje ku wikalo wakwe. Huna bubatubigija mbale, na mbale yungwila Matiya; nanghwe ubalanijiwa hamo na batungʼwa ikumi na umo. Aho lushiku lwa Pentekote lwali lushika, bali bubiza bose kihamo ngʼwipande limo. Kuhayumanila chali chiza kifutumo kufuma ngʼwigulu giti kifutumo cha nyaga gwa nguzu no, guyokaja numba yose umo bali bigashije. Jubilongela ndimi jugabanika giti ndali ja moto; nalo lwigasha ha buli umo wabo. Huna bose bokajiwa na Moyo Ngʼwela, bandia kulungalunga na ndimi jingi, gitumo Moyo wali ubinha kujilungalunga. Mu Yerusalemi bali bazengile mo Bayudaya, banhu bishigwa, ba mu buli ihanga ilili hasilili ya igulu. Aho kifutumo chenicho chali chiza, banhu bingi bibilinga, buzwangana, iki buli munhu ubigwa balilungalunga mu lulimi lwakwe. Bose budedebala na bukumya, biwila boi bike giki, Angu, aba bose abalilungalunga bati Bagalilaya? Tukwigwaga kinahe lulu buli munhu mu lulimi lwiswe ulo twaabyalilwa mo? Baparthi na Bamedi na Baelamiti na bazengi ba Mesopotamia, na Buyudaya, na Kapadokia, Ponto na Asia, Frugia na Pamfulia, Misri, na mapande ga Libia hihi na Kurene, na bageni abufuma Rumi, Bayudaya na bagaluki, Bakrete na Baarabu, tukubigwaga balilungalunga mu ndimi jiswe Shitwa shitale sha Mulungu. Budedebala bose na butawatawa, biwila boi bike giki, Mihayo iyi ili kinahe? Aliyo bangi bubagimba kichilu, buhaya giki, Bakolagwa na minzi ga mizabibu mapya. Aliyo Petro, wimila hamo na benabo ikumi na umo, uhamuka higulya na ilaka lyakwe, ubahabulila giki, Bingʼwe bagosha Bayudaya, na bingʼwe bose aba muzengile Yerusalemi, managi iyi, na tegagi matu ku mihayo yane: Iki aba batakolilwe, gitumo bingʼwe muliganikila; iki ili gwike saa ya kadatu ya limi; Aliyo mhayo uyu guli uyo gwaahayiwa na nghangi Yoeli giki, Hangi ilabiza mu shiku ja ku mhelo, Mulungu uhaya, nalabasamija bamibili bose Moyo wane, na bana bingʼwe bagosha na bakima balahanga, na bana bingʼwe basumba balabona kolechiwa, na banamhala bingʼwe balalota shiloti: Chene na mu shiku jenijo nalabasamija basese bane bagosha na bakima Moyo wane, nabo balahanga; Na nene nalafunya sha kukumya higulya ngʼwigulu, na shimanikijo hasilili mu si, mininga, na moto, na kuzuka kwa lyochi; Limi bugaluchiwa hubiza giiti, na ngʼweji kubiza mininga, aho lutali kwiza lushiku lwa Seba, lwenulo lutale na lukumuku. Na ilabiza giki, uyo ose alalililila lina lya Seba, alapijiwa. Bingʼwe bagosha ba Israeli, igwagi mihayo iyi: U Yesu wa Nazareti, ngosha olechiwa ku bingʼwe na Mulungu mu Shitwa sha budula na sha kukumya na shimanikijo, isho Mulungu ubyushita muli Wei hagati ya bingʼwe, gitumo bingʼwe benekele mumanile: Ngʼwenuyo uwali winhiwa ko gitumo kasigilile na kamanile ka Mulungu kufuma kale umo kaali, bingʼwe mukandima na makono ga bagomi, mukankema ha nsalaba, ngʼumulaga. Ngʼwenuyo Mulungu unjucha, utungula busungu wa kucha: iki yali itudulika Wei umiilwe nako. Iki Daudi waanghaya mihayo yakwe giki, Nubyumona Seba mu butongi wane shiku jose, iki ali ho ku nkono gwane gwa bulyo, natizunegenyiwa. Kulwa iyo ngholo yane yuyega, na lulimi lwane lukasangabala; hangi, mili gwane nago gulikala mu kwisagilwa, Iki utubuleka bupanga wane uko kulimu, nulu utumfunya Ngʼwela wako abone kubola. Wanimanikigije nzila ja bupanga; ukunokaja na buyegi mu miso gako. Badugu bagosha, leka namuwile hape i ya ngʼwa nkulugenji ntale wiswe u Daudi giki, Wei wali ucha, ujikwa, nacho kigila chakwe kili ho ku biswe kushisha lelo iyi. Aliyo iki wei walali nghangi, nanghwe walamanile giki, Mulungu unahilila kilahilo giki, Mu bubyile wa mu nkimbili gwakwe, mu kimili alamucha Kristo kwigasha ngʼwisumbi lyakwe lya butemi; Iki wali utonja kuyibona iyi, waakuhaya kujuka kwa ngʼwa Kristo giki, Bupanga wakwe wali butulekwa kulimu, nulu mili gwakwe gwali gutubona kubola. Ngʼwenuyo Yesu, Mulungu waanjucha, na biswe bose tuli bakaniji ba mhayo uyu. Iki Wei waagunguhiwa ku nkono gwa bulyo gwa Mulungu, nanghwe wamala kwanukula kuli Ise kwisagijiwa kwa Moyo Ngʼwela, wakisamijaga iki, icho mulikibona na kuchigwa. Iki Daudi walatalinhile ngʼwigulu, aliyo wei ngʼwenekele uhaya giki, SEBA akangʼwila Seba wane giki, Igashaga ku nkono gwane gwa bulyo, Kushisha nalabatuula banishi bako babize ipandilo lya magulu gako. Kuhva iyo, numba ya ba Israeli bose bamane gete gete giki, Mulungu waangʼwita Yesu, Ngʼwenuyo bingʼwe ngʼwali ngʼunkoma ha nsalaba, abize Seba na Kristo. Aho buyigwa iyi, buchingʼwa mu ngholo, bungʼwila Petro na batungʼwa bangi giki, Badugu bagosha twite kinahe lulu? Petro ubawila giki, Oyagi, mubatijiwe buli munhu wa mu bingʼwe mu lina lya ngʼwa Yesu Kristo kulwa kulekejiwa kwa shibi shingʼwe; ningʼwe mukwanukula cha kwinhiwa cha Moyo Ngʼwela. Iki kwisagijiwa uku kuli ku bingʼwe, na ku bana bingʼwe, na ku abo bose abali kule, bose abo Seba Mulungu wiswe akubitana. Ubakanilila na mihayo yingi mingi, na ubakomeleja, uhaya giki, Ipijagi kwinga mu kibyalilwe iki ichigomagomile. Nabo abali bugwanukula mhayo gwakwe na buyegi bubatijiwa, lwise lwene bongejiwa kubo banhu giti 3,000. Shitile sha kanisa ya kwandia Nabo bubyukomela mu kilangile cha batungʼwa, na mu kusangila, na mu kumeganya ngati, na mu kulomba. Buli munhu udingʼwa na lyogohya, na sha kukumya shingi na shimanikijo shali Shitwa na batungʼwa. Bose abuzunya, bubiza kihamo, busangila mu shinhu shabo shose; Nabo bujinja sabo jabo na shikolo, bushigabanhya ku bose, gitumo kugayiwa kwa buli munhu umo kwali kuli. Bukomela buli lushiku na moyo gumo mu hekalu, na kumeganya ngati kuja buli kaya buli kaya, bubyanukula shiliwa shabo na busangabazu na ngholo ndyehu. Bubyunumba Mulungu, bubyubayeja banhu bose; Seba ongeja ku kanisa buli lushiku abo bubyupijiwa. Petro na Yohana bali bulinha kuja mu hekalu ngʼwikanza lya kulomba, saa ya kenda. Na ngosha uyo walali nema kufuma mu nda ya ngʼwa nina, akubuchiwagwa, uyo baantuulaga buli lushiku ha nyango gwa hekalu, ugukitanagwa Gwa Bulenji, giki, abalombe cha kwinhiwa abo bakwingilaga mu hekalu; Ngʼwenuyo aho ubabona Petro na Yohana balihaya kwingila mu hekalu, ubalomba inhiwe cha kwinhiwa. Petro unkalalila, hamo na Yohana, uhaya giki, Tulolage biswe. Nanghwe ubalola, wiganika akwinhiwa kinhu nabo. Aliyo Petro uhaya giki, Feza na zahabu, nati nasho; aliyo icho ndi nacho nakukwinha: Mu lina lya ngʼwa Yesu Kristo wa Nazareti, bukaga ushiminze. Huna undima nkono gwa bulyo, na ungʼwimilija: haho na haho mhambala jakwe na shingʼongwa shakwe shuguzuhiwa. Nanghwe wikindika, wimila, wandia kushiminza; wingila hamo nabo mu hekalu, alishiminza, na witambuka na kunumba Mulungu. Banhu bose bumona alishiminza na kunumba Mulungu: Bungʼwitegeleja giki, ali ngʼwenuyo wiikalaga igashije ku Nyango Gwa Bulenji gwa hekalu, wilombeleja; bokajiwa na kukumya na kudedebala, kulwa iyo yangʼwilongela. Nema uyo wapijiwagwa aho alibadima Petro na Yohana, banhu bose bubapelela ngʼwibindo likitanagwa lya ngʼwa Solomoni bukumya no. Aho Petro ubona iyo, ubashokeja banhu giki, Bingʼwe bagosha ba Israeli, mulikumya mhayo uyu ni buli? nulu mulitukalalila biswe ni buli, giti kulwa budula wiswe wa benekele, nulu kulwa wela wiswe twanshiminjaga munhu uyu? Ambu, Mulungu wa ngʼwa Abrahamu, na Isaaka, na Yakobo, Mulungu wa bakulugenji biswe, waankuja Ntumami wakwe Yesu; Uyo bingʼwe ngʼwali ngʼungʼwinha ko, na ngʼunema mu butongi wa ngʼwa Pilato, aho wei wali walekanya giki, ataligulilwe. Aliyo bingʼwe ngʼwali ngʼunema Uyo Ngʼwela na Ntungilija, na ngʼulomba ngʼwinhiwe mulagi; Ngʼumulaga Meja wa bupanga, Uyo Mulungu unjucha mu bafu; na biswe tuli bakaniji ba mhayo uyu. Na kulwa kulizunya lina lyakwe, lina lyakwe lyanguzuhyaga munhu uyu, ngʼwenuyo mulimona na kumana: chene, kuzunya ukulifumila muli Wei kwangʼwinhaga bupanga ubu bushikanu mu miso ga bingʼwe bose. Na haha, badugu, namanile giki, ngʼwita iyo kulwa butumana wingʼwe, gitumo batale bingʼwe nabo chene. Aliyo mihayo iyo Mulungu waahangaga kale mu nomo gwa bahangi bakwe bose giki, Kristo shigelile kuluhiwa, wali uyishikilija giko. Kulwa iyo, oyagi, mugaluke, shibi shingʼwe shijimiwe, makanza ga kwifujiwa gize kufuma mu butongi wa Seba; Huna antume Kristo, Uyo wali wandia kulomelwa ku bingʼwe: Uyo shigelile igulu lingʼwanukule kushisha gize makanza ga kudoganya bupya kwa shinhu shose, ayo Mulungu waahayaga mu nomo gwa bahangi bakwe bose bela, kufumila kwandia kwa si. Iki Musa akabawila bakulugenji biswe giki, Seba Mulungu wingʼwe alamubukigija nghangi wa kufuma mu badugu bingʼwe, ali giti nene; Ngʼwenuyo mulangʼwigwage mu mihayo yose iyo alamuwila. Ilabiza giki, buli munhu uyo alalemaga kungʼwigwa nghangi Ngʼwenuyo alajimijiwa kwinga mu banhu. Chene, na bahangi bose kufuma kuli Samueli, nabo abali biza hanuma yakwe, abo bose abaahayaga, bujihanga kale shiku jeniji. Bingʼwe muli bana ba bahangi, na ba bulagane, wenubo Mulungu wali ulagana na bakulugenji bingʼwe, ungʼwila Abrahamu giki, Mu bubyile wako ngʼanda jose ja si jilasungulilwa lubango. Mulungu, aho wali wamala kunjucha Ntumami wakwe Yesu, untuma ku bingʼwe tame, kumusungulila lubango mu kumugalucha buli munhu winge mu buhunga wakwe. Aho balilungalunga ku banhu, bagabiji na ntale wa hekalu na Basadukayo bubibakija. Bukolwa no iki bakubalangaga banhu, na kulomela muli Yesu kujuka kufuma mu bafu. Huna bubadima na makono, bubatuula mu jela kushisha ntondo; iki yubiza mhindi lulu. Aliyo bingi ba mu benabo abali bagwigwaga u mhayo buzunya; na bukumi wa bagosha bubiza giti 5,000. Yali yubiza ku ntondo, basugi babo na banamhala na bandiki bibilinga mu Yerusalemi; Ana u ngabiji ntale nanghwe walali ho, na Kayafa, na Yohana, na Aleksandro, na bose a ba ludugu lwa ngabiji ntale. Na aho hali bamala kubatuula hagati yabo, bubabuja giki, Bingʼwe ngʼwitile mhayo uyu mu budula ki, nulu mu lina ki? Hunaho Petro izulile na Moyo Ngʼwela, ubawila giki, Bingʼwe basugi ba banhu, na banamhala ba Israeli, Ulu biswe tulibugilijiwa lelo kulwa nimo gwa wiza uyo witililwe munhu nema ngʼwenuyu, gitumo wapigijiwa; Leka imanike ku bingʼwe bose, na ku banhu bose ba Israeli giki, mu lina lya ngʼwa Yesu Kristo wa Nazareti, Uyo bingʼwe mukankoma ha nsalaba, Uyo Mulungu waanjucha kufuma mu bafu, chene muli Wei munhu ngʼwenuyu akwimilaga ali mpanga mu butongi wingʼwe. Ngʼwenuyo ali iwe ilo lyusuchiwa na bingʼwe bazengi, ilo lyabiza itale lya ha lungʼongo. Hangi bupiji buti mo muli ungi, iki liti ho lina lingi hasilili ya igulu, ilo binhiwa mu banhu, mulyo shitwigelelilwe kupigijiwa. Aho bubona bugimu wa Petro na Yohana, na bubitegeleja giki, ball banhu abatalangilwe hangi bati a ba masala, bukumya, bubamanicha giki, baabizaga hamo na Yesu. Aliyo iki bumona munhu uyo wapijiwe imilile hamo nabo, gubagaya mhayo gwa kushosha. Huna lulu aho bumala kubalagila bafume ngʼwibanza, busigana boi bike, Buhaya giki, Tubite kinahe banhu benaba? Iki ili hape ku bose abazengile mu Yerusalemi giki, kimanikijo kitale chitilwe nabo nghana, na biswe tutudula kukilema. Aliyo nahene mhayo gwenuyu gutizongeja kukwilikana mu banhu, kukanga tubakange, batizulungalunga hangi na munhu nulu umo mu lina ili. Na aho bubitana, bubalagila batizuhaya nulu na hado yaya, nulu kulanga mu lina lya ngʼwa Yesu. Aliyo Petro na Yohana bushosha bubawila giki, Ulu ili ya butungilija mu miso ga Mulungu kungʼwigwa bingʼwe kutinda Mulungu, lekanyagi bingʼwe; Iki biswe tutudula kuleka kuhaya mihayo iyo twali twibona na twiyigwa. Aliyo aho bali bumala kubakanga hangi, bubataligulila, iki batabonile umo babaluhije, kulwa nguno ya banhu; iki banhu bose bunkuja Mulungu kulwa iyo yitilwe; Iki munhu ngʼwenuyo witililwe kimanikijo iki cha kupijiwa, walakilile miaka makumi ane ya bulamu wakwe. Aho butaligulilwa, bukashika ku bichabo, na bubasombolela yose iyo bagabiji batale na banamhala baluhayaga. Nabo aho bigwa iyo, buhamuka ilaka kuli Mulungu na moyo gumo, buhaya giki, Ee Seba, Bebe uli Mulungu, Uyo waabeja igulu na si na nyanza, na shose ishili mo: Bebe Uyo mu nomo gwa ngʼwa Daudi ntumami wako ukahaya giki, Mahanga gali gudaka ni buli, na banhu bidedekanya mihayo ya dalali? Batemi ba si bimila bihelile na basugi bibilingila hamo kungʼubukila Seba na Kristo wakwe. Iki nghana Herode na Pontio Pilato, kihamo na bana mahanga, na banhu ba Israeli bali bibilinga kungʼubukila Ntumami wako Ngʼwela, Yesu, Uyo waansamya maguta, Bite yose iyo nkono gwako na kalongeje kako shutonja kale giki, ibize ho. Na haha, Ee Seba, kulolage kukanga kwabo: na binhage basese bako bahaye mhayo gwako na bugimu bose; Giki, ugolole nkono gwako kupija; na shimanikijo na shamanaho shitwe mu lina lya Ntumami wako Ngʼwela, Yesu. Na aho bumala kulomba, ipande ilo umo bibilingila mo lyunegenyiwa, nabo bose bizula na Moyo Ngʼwela, bulungalunga mhayo gwa Mulungu na bugimu. Ibita lya benabo abazunije bali bubiza na ngholo imo na bupanga bumo; nulu walati ho munhu mubo wa kuhaya giki, Chose chose cha shikolo isho ali nasho, chene chakwe ngʼwenekele, aliyo bali bubiza na busangi mu shinhu shose. Na batungʼwa bukanila ya kujuka kwa Seba Yesu na budula wingi, na kigongo kitale chubiza kubo bose. Iki walatilonga munhu ngayiwa mubo nulu umo; iki bose abo bali bali na migunda nulu numba bushijinja, benha sabo ja shinhu ishali shujinjiwa, Na bujituula ku magulu ga batungʼwa; shugabanyiwa ku buli munhu gitumo kugayiwa kwakwe kwali kuli. Yusufu, uwilikwa na batungʼwa giki, Barnabas, (kushomelejiwa kwaho giki, Ngʼwana wa kulunguja), Nawi, kibyalilwe chakwe muna Kupro, Iki walali na ngunda, ugujinja, ujenha feza, na ujituula ku magulu ga batungʼwa. Aliyo munhu umo, lina lyakwe Anania, hamo na nke wakwe, Safira, wali ujinja ngunda, Na wibikila mu kwigeniha ibudika lya mpango gwago, nu nke wakwe walamanile, huna lulu wenha ibudika limo, ulituula ku magulu ga batungʼwa. Petro uhaya giki, Anania, ni buli Shetani okajaga ngholo yako ya kunembalemba Moyo Ngʼwela, na wibikila ibudika lya mpango gwa ngunda? Aho gwali gwikala kuli bebe, angu, gwali guti gwako ngʼwenekele? na aho gukajinjiwa, angu, gwali guti mu budula wako? Ni buli wasema mhayo uyu mu ngholo yako? Utahayile bulomolomo ku banhu, aliyo kuli Mulungu. Anania aho wigwa mihayo iyi, ugwa ha si, utina ngholo: na boba wingi bubadima bose abigwa iyo. Basumba bubuka bumpaligila mu ngʼwenda, bumucha bumfunya hanze, bunjika. Yubiza hanuma ya ikanza lya saa idatu, nke wakwe wingila, atamanile iyo yitwa. Petro unshokeja giki, Niwilage ulu ngʼwagujingije ngunda chene. Nanghwe uhaya giki, Ali chene, hu gwene. Petro ungʼwila giki, Ni buli bingʼwe ngʼwaalagana kungema Moyo wa Seba? lolaga, magulu ga benabo balunjikaga ngoshi wako gali ho ha nyango, nabo bakukubucha nangho hanze. Haho na haho ugwa ku magulu gakwe, utina ngholo: basumba bingila busanga wacha, aho bumucha bumfunya hanze bunjika haho na nghoshi. Na boba wingi bubadima kanisa yose, na banhu bose abigwa mihayo yeniyi. Shimanikijo shingi na shamahano shali Shitwa mu banhu na makono ga batungʼwa: (Nabo bose bali bubiza ngʼwibindo lya ngʼwa Solomoni bubiza na moyo gumo. Aliyo mu banhu bangi walati ho nulu umo ugima kwisangija nabo; aliyo banhu bubakumilija; A bazunya bongejiwa no kuli Seba, bagosha na bakima bingi no;) Kushisha nose bubafunya hanze balwile bubatuula mu mapalapala, balalile ha bulili na ha shilago giki, aho Petro wiza, nulu nengeji gwakwe gubashikije bamo. Banhu bingi ba mu mizengo iyipindije Yerusalemi bibilinga hamo, bubyubenha balwile, na abo bali bukoyiwa na mioyo misoso, benabo bose pye bupijiwa. Huna lulu ubuka ngabiji ntale, na bose a bubiza hamo nanghwe (a bene banhu ba kazunije ka Basadukayo), bokala na budaki. Nabo bubadima na makono a batungʼwa, bubatuula mu jela. Aliyo malaika wa Seba, akigula nzwigi ja jela bujiku, ubafunya hanze, uhaya giki, Jagi, mukimile, mulungalunge mu hekalu ku banhu, mihayo yose ya bupanga wenubu. Aho bigwa iyo, bingila mu hekalu mu makingo, bandia kulanga. Aliyo ngabiji ntale ushika, na benabo abali hamo nanghwe, ubitana abo ba ibanza, na banamhala bose ba bana ba Israeli, butuma ku jela, babajile. Aliyo aho bashilikale bushika ko batabasangile mo mu jela; bushoka, busombola, Buhaya giki, I jela hene, twayisanga ilugalile chiza no, na balindi bimilile ku nzwigi; aliyo aho twigula, tutansangile mo munhu mugati. Ngabiji ntale na ntale wa hekalu na bagabiji batale aho bigwa mihayo iyi, buzwanjiwa kulwa nguno yabo, himba gukubiza kinahe mhayo gwenuyu. Ushika umo ubasombolela, uhaya giki, Lolagi, bagosha abo ngʼwali ngʼwabatuula mu jela, bali mu hekalu, bimilaga, bakulangaga banhu. Huna lulu ntale, hamo na bashilikale, buja; bukabenha chiza, kubakalanghamya yaya; iki bubogoha banhu, batizupondwa mawe. Aho bamala kubenha, bubatuula mu butongi wa ibanza. Na ngabiji ntale ubabuja, Uhaya giki, Angu kulagila tutamulagilile bingʼwe giki, Mutizulanga mu lina ili; na lolagi, ngʼokajaga Yerusalemi na kulanga kwingʼwe, mulikoba kutwenheleja mininga ga munhu Ngʼwenuyu. Aliyo Petro na batungʼwa bushosha, buhaya giki, Shitwigelile kungʼwigwa Mulungu kutinda banhu. Mulungu wa bakulugenji biswe, waanjucha Yesu, Uyo bingʼwe ngʼwali ngʼumulaga, ngʼunsunga ha linti. Ngʼwenuyo Mulungu waangunguhya na nkono gwakwe gwa bulyo abize Ntale na Mpija, abinhe ba Israeli koya; na kulekejiwa kwa shibi. Na biswe tuli bakaniji ba mihayo iyi; kihamo na Moyo Ngʼwela, Uyo Mulungu waabinha abo abangʼwigwa. Aho bigwa iyo, buchingʼwa mu ngholo jabo, nabo bulomana kubabulaga. Aliyo umo wimila ngʼwibanza, Mfarisayo, lina lyakwe Gamalieli, nangi wa shilagilo, nkumilijiwa na banhu bose, uyo ulagila kubafunya batungʼwa hanze kakanza. Huna lulu ubawila giki, Bingʼwe bagosha ba Israeli, ilanghanagi iyo mulihaya kubitila banhu benaba. Iki kale aho jali jitali kushika shiku iji, akabuka Theuda, wihaya ngʼwenekele giki, wei ali munhu ntale; bakadimana nanghwe bagosha giti magana ane: ngʼwenuyo wali ubulagwa, na bose abali buhuhutwa nanghwe bubalasanyiwa, bubiza dalali. Hanuma ya munhu ngʼwenuyu, ubuka Yuda wa Galilaya, mu shiku ja kwandikwa kodi, wali ubahumbula banhu bingi hanuma yakwe; ngʼwenuyo nanghwe uyagala, nabo bose abali buhuhutwa nanghwe busalanghanyiwa. Na lulu namuwila giki, Mubihunge banhu aba, balekagi; iki mhayo uyu nulu nimo uyu, ulu yubiza ya banhu, ikubulagwa, Aliyo ulu yubiza ya Mulungu, mutudula kuyibulaga; mutizilonga mulilwisha na Mulungu. Buzunya yakwe: nabo aho bubitana batungʼwa, bubatula, bubalemeja batizulungalunga mu lina lya ngʼwa Yesu, huna bubataligulila. Nabo bufuma lulu mu butongi wa ibanza, bakuyegaga iki bubal wa abigelelilwe kudimiwa minala kulwa lina lyakwe. Buli lushiku mu hekalu, na mu kaya, hali hatuleka kulanga na kulomela evangeli ya ngʼwa Yesu Kristo. Mu shiku jenijo, aho bahemba biyongeja kukwila, bubiza ho budugumi giki, Bahelenisti bubadugumila Bahebrania, iki bachilwa babo bubitiilwa mu kwinhilija kwa buli lushiku. Benabo ikumi na babili aho bubitana bahemba bose, buhaya giki, Iti chiza biswe kuguleka mhayo gwa Mulungu, na kwinhilija ku meza. Kulwa iyo, badugu, solagi mu bingʼwe, bagosha mpungati bakanilwa giki, bali ba wiza, bizulile na Moyo Ngʼwela na masala, abo tubatuule ba kusuga nimo gwenuyu. Aliyo biswe tukwiyumilija gwa mu kulomba na kwinhilija kwa mhayo. Na mhayo gwenuyu gubatoga bose pye; nabo bunkoma Stefano, munhu izulile na kuzunya na Moyo Ngʼwela; na Filipo na Prokoro, na Nikanori, na Timoni, na Parmena, na Nikolao ngaluchiwa wa Antiokia; Bubatuula mu butongi wa batungʼwa; nabo aho bamala kulomba, bubatuulila makono. Na mhayo gwa Mulungu gwiyongeja; na bukumi wa bahemba bukwila no mu Yerusalemi; na bagabiji bingi bukulondela kuzunya kwenuku. Na Stefano, izulile na kuzunya na budula, ubyita sha kukumya na shimanikijo shitale mu banhu. Aliyo bamo bubuka ba benabo ba ibilingilo ilikitanagwa lya Balibertino na lya ba Kurene, na lya ba Aleksandria, na ba benabo ba Kilikia na Asia, bubyunghalalija Stefano. Nabo bali batudula kugahangija masala na Moyo Ngʼwela, umo wali uhayila. Hunaho bubahana bagosha ba kuhaya giki, Twangʼwigwile uyo akulungalungaga mihayo ya kunduka Musa na Mulungu. Bubasabula banhu, na banamhala na bandiki, bungʼwibakija, bundima, buntwala kwibanza, Bimilija bakaniji ba bulomolomo, abuhaya giki, Munhu uyu atulekaga kuhaya mihayo ya kulisondagula ipande ili lyela, na shilagilo: Iki twangʼwigwile akuhayaga giki, Ngʼwenuyo Yesu wa Nazareti alakenagula ipande ili, na kushigalucha shimile isho Musa waatwinha. Na bose abali bigashije ngʼwibanza, bunkalalila, bububona bushu wakwe, giti bushu wa malaika. Lulomelo lwa ngʼwa Stefano ngʼwibanza Huna lulu ngabiji ntale uhaya giki, Angu, mihayo yeniyi ili chene? Nanghwe uhaya giki, Badugu na bababa, degelekagi. Mulungu wa ikujo akangʼwilongela nkulugenji wiswe Abrahamu, aho walali ho mu Mesopotamia, aho walatali kuzenga Harani. Nanghwe akangʼwila giki, Fumaga mu si yako, na mu ba luganda lwako, wize ku si iyo nalakolekeja. Hunaho wali ufuma mu si ya Bakaldayo, uzenga mu Harani; na kufuma kwenuko, aho ise wali ucha, Mulungu unsamija mu si iyi, umo muzengile bingʼwe haha. Na walatungʼwinha wingiji muyo, nulu ha kupanda kugulu gwakwe; aliyo ungʼwisagija kungʼwinha si iyi kubiza busugi wakwe, na ya bubyile wakwe wa hanuma yakwe, aho walatali kubiza na ngʼwana. Mulungu ulungalunga giki, bubyile wakwe bulabiza bugeni mu si iti yabo, na boi balabita basese, na kubitila kibi, miaka magana ane. Na ihanga ilo balabiza basese balyo, nalalilekanya nsango Nene, uhaya Mulungu: na hanuma ya yeniyo, balafuma mo, na kunilamya ngʼwipande lyenili. Huna ungʼwinha bulagane wa kusala: na giko akamyala Isaaka, unsala ha lushiku lwa kanane; Isaaka nanghwe umyala Yakobo, na Yakobo ubabyala bakulugenji biswe ikumi na babili. Nabo bakulugenji biswe bali bungʼwitila Yusufu wilu, bunjinja atwalwe Misri: aliyo Mulungu wali ubiza hamo nanghwe, Wali ungʼwinja mu kuluhiwa kwakwe kose, ungʼwinha kigongo na masala mu butongi wa ngʼwa Farao, ntemi wa Misri; nanghwe wali untuula kubiza nsugi wa Misri na wa kaya yakwe yose. Ikiza nzala mu si yose ya Misri, na ya Kanani, na kuluhiwa kutale no: na bakulugenji biswe bali batubona sha kulya sha kubigela. Aliyo aho Yakobo wali wigwa giki, shiliwa shili ko Misri, ubatuma bakulugenji biswe lugendo lwa kwandia. Ku lugendo lwa kabili Yusufu wifumbula ku bana ba ngʼwabo, na luganda lwa ngʼwa Yusufu tumanika kuli Farao. Huna lulu Yusufu utuma ba kungʼwitana ise Yakobo, na bose ba kibyalilwe chakwe, banhu makumi mpungati na batano. Huna Yakobo utulumenha kuja Misri, ucha wei na bakulugenji biswe; Bubuchiwa kutwalwa Shekemu, na butuulwa mu likigila, ilo Abrahamu wali uligula na feza ku bana ba ngʼwa Emori wa uko Shekemu. Aliyo aho ikanza lya kwisagija uko Mulungu wali unahilila Abrahamu aho lyegela, banhu benabo biyongeja na kukwila no mu Misri. Kushisha ntemi ungi uyo wamtamanile Yusufu ubuka mu Misri. Ngʼwenuyo wali ubitila ya masalasala ba luganda lwiswe, ubitila ya bubi bakulugenji biswe, ulagila kubaponya bana belele babo, batizikala bapanga. Ngʼwikanza ilo wali ubyalwa Musa, nanghwe walali wa wiza no kuli Mulungu, ulelwa mieji idatu mu numba ya ngʼwa ise; Aho wali uponyiwa, ngʼwana nkima wa Farao unsola, unela abize ngʼwana wakwe ngʼwenekele. Na Musa wali ulangwa masala gose ga bana Misri; ubiza wa nguzu mu mihayo na mu Shitwa. Aho ushisha miaka makumi ane, wiganika mu ngholo yakwe kuja kubalola baduguye, bana ba Israeli, Nanghwe umona umo wabo witilwa kibi, ungunija na umalila shili uyo wali wibonelwa, umulaga u muna Misri. Wali wiganika giki, baduguye bakwitegeleja giki, mu nkono gwakwe Mulungu wabinha bupiji; aliyo boi bali batitegeleja. Ku ntondo ubilongela abo bakulwaga, ubakomeleja kwisangija, uhaya giki, Bagosha, ambu, bingʼwe muli badugu; muliyitila kibi benekele na benekele ni buli? Aliyo uyo wali ungʼwitila kibi ngʼwiye unshindika kule, uhaya giki, Ni nani wakutuulile ho kubiza ntale na nekanya wiswe? Utogilwe kunibulaga nene, gitumo ukamulaga muna Misri igolo? Huna Musa upela kulwa mhayo uyu, wikala nyageni mu si ya Midiani, uko ubyalila bana bagosha babili. Aho yushila miaka makumi ane, malaika wa Seba ungʼwilongela ngʼwipolu lya lugulu lwa Sinai mu lulali lwa moto mu kasaka. Musa aho ukubona, ukukumya kolechiwa kwenuko; aho wegela kulola, ilaka lya Seba lyungʼwiziila, Giki, Nene ndi Mulungu wa bakulugenji bako, ndi Mulungu wa ngʼwa Abrahamu, na Mulungu wa ngʼwa Isaaka, na Mulungu wa ngʼwa Yakobo, Musa udetema, atugima kulola. Seba ungʼwila giki, Kungulaga shilatu ku mhambala jako; iki ipande aho wimilile ili si nela. Kubona namala kubona kuluhiwa kwa banhu bane abali mu Misri, nigwile kuganghila kwabo, na Nene nikaga nakabinje mo; ali lulu nzugu, nakukutuma kuja Misri. Musa ngʼwenuyo hali bunema, bakahaya giki, Ni nani wakutuulile ho kubiza ntale na nekanya? Hu ngʼwene Mulungu wali untuma kubiza ntale na nkomoji, mu nkono gwa ngʼwa malaika uwali ungʼwilongela mu kasaka. Ngʼwenuyo wali ubinja mo, aho wita sha kukumya na shimanikijo mu si ya Misri, na mu Nyanza Yaza, na ngʼwipolu miaka makumi ane. Ngʼwenuyo Musa, hu ngʼwene uyo wali ubawila bana ba Israeli giki, Seba Mulungu wingʼwe alamubukija nghangi kufuma mu badugu bingʼwe, giti nene. Ngʼwenuyo hu ngʼwene uyo wali ubiza mu kanisa ngʼwipolu hamo na malaika uyo wali ulungalunga nanghwe mu lugulu lwa Sinai, hangi hamo na bakulugenji biswe: hu ngʼwene uyo wali wanukula mihayo ya bupanga ya kutwinha biswe. Ngʼwenuyo bakulugenji biswe bali batatogilwe kungʼwigwa, aliyo bunshindika kule, na mu ngholo jabo bushoka hangi mu Misri, Bungʼwila Aroni giki, Tubegejage bamulungu, ba kututongela biswe: iki ngʼwenuyo Musa uwali wa twin ja biswe mu si ya Misri, tutamanile umo wabizile. Nabo bubeja ndama mu shiku jenijo, na bukitambila kitambo chikolile chenicho, buyegela milimo ya makono gabo. Aliyo Mulungu ugaluka, ubagumanija balitumamile ibita lya ngʼwigulu; gitumo yaandikwa mu kitabo cha bahangi giki, Angu, ngʼwaanifunijaga Nene ngʼombe jibulagilwe na shitambo miaka makumi ane ngʼwipolu, bingʼwe ba numba ya Israeli? Ambu, ngʼubucha ihema lya Moloki, na sonda ya mulungu wingʼwe Refani, shikolile isho ngʼubeja kushilamva; na Nene nalamusamya muje ku nkilo gwa Babeli. Ihema lya bukaniji lyali lili hamo na bakulugenji biswe ngʼwipolu, gitumo akalagila Uyo wali ulungalunga na Musa, giki, alibeje lilenganilile na chikolile icho wali ukibona. Ilo bakulugenji biswe aho bulyanukula bali buliyingija hamo na Yoshua, aho bubudima wingiji wa bana mahanga, abo Mulungu wali ubapeja kufuma mu butongi wa bakulugenji biswe, kushisha mu shiku ja ngʼwa Daudi; Uyo wali ubona kigongo mu butongi wa Mulungu, nanghwe ulomba giki, amonele wikalo Mulungu wa ngʼwa Yakobo. Aliyo Solomon! wali unzengela numba. Aliyo Uyo ali higulya no atikalaga mu numba ijabejiwa na makono, gitumo nghangi uhaya giki, Igulu lyene isumbi lyane lya butemi, na si yene ha kupanda magulu gane; ni numba ki iyo mukunizengela? wahaya Seba: nulu ipande lili ki lya kwifulila kwane? Angu, guti nkono gwane uyo gwaashibeja ishi shose? Bingʼwe ba nhingo numaganu na mutasalilwe mu ngholo na mu matu, mukunghangijaga Moyo Ngʼwela gwa gwa gwa, gitumo bakulugenji bingʼwe bali bita, ningʼwe chene. Ni nani mu bahangi, uyo bakulugenji bingʼwe bali batunyajanyaja? nabo bali bubabulaga abo abali butonja kusombola kwiza kwa Ngʼwenuyo Ntungilija; Uyo bingʼwe i haha ngʼwabile bilimongi na babulagi bakwe; Bingʼwe abo ngʼwaanukula shilagilo, mu kalagilile ka bamalaika, aliyo mutashidimaga. Aho bigwa mihayo iyi, buchingʼwa ngholo, bungʼwilumila nghaya. Aliyo wei izulile na Moyo Ngʼwela, ukamilija ngʼwigulu, ubona ikujo lya Mulungu, na Yesu imilile ku nkono gwa bulyo gwa Mulungu, Uhaya giki, Lolagi, nabona igulu likundulile, na Ngʼwana wa munhu imilile ku nkono gwa bulyo gwa Mulungu. Aliyo buhamuka na ilaka itale no, buchibila matu gabo, bungholekela na moyo gumo; Bumponya hanze ya nzengo, bumponda mawe: nabo a bakaniji butuula shizwalo shabo ku magulu ga nsumba umo, akitanagwa Saulo. Nabo bumponda mawe Stefano, alilomba, uhaya giki, Seba Yesu, anukulaga moyo gwane. Utuja mazwi, uhamuka na ilaka itale giki, Seba, utizubabikila kibi cheniki. Aho wamala kuhaya giko, ushutula. Saulo yumelela kucha kwa ngʼwenuyo. Lwise lwene kunyajanyajiwa kutale kwali kubilongela kanisa iyali mu Yerusalemi, bubalasanyiwa bose si yose ya Buyudaya na Samaria kuleka batungʼwa. Banhu bishigwa bunjika Stefano, bungʼwitila kulila nghungu kutale. Aliyo Saulo wali ubyukenagula no kanisa, ubyingila buli numba, ubahulumula bagosha na bakima, ubaponya mu jela. Kulwa iyi, abo abali bubalasanyiwa, buja hose hose bakugulomelaga mhayo. 5 Filipo utulumenha kuja mu nzengo gwa Samaria, ubalomela ya ngʼwa Kristo. Banhu bingi bali budegeleka na moyo gumo mihayo iyo yali yuhayiwa na Filipo, aho bigwa na kubona shimanikijo isho wita. Iki mioyo misoso yali yufuma mu bingi abo bali budingʼwa nayo, yulila na ilaka itale; na bingi abalemahalile na balema bupijiwa. Bubiza ho buyegi butale mu nzengo gwenuyo. Walali ho munhu umo, lina lyakwe Simoni, uyo wali wita maleba na kale mu nzengo uyo, nanghwe ubadedebaja banhu ba ihanga lya Samaria, wihaya ali magatala. Ngʼwenuyo bose bubyundegeleka kufuma bado kushisha batale, buhaya giki, Munhu ngʼwenuyu ali budula wa Mulungu, u butale. Ngʼwenuyo bubyundegeleka, iki kufuma kale ubyubadedebaja na maleba gakwe. Aliyo aho bali bunzunya Filipo uyo ulomela nghombe ya butemi wa Mulungu na lina lya ngʼwa Yesu Kristo, bubatijiwa bagosha na bakima. Simoni nanghwe ngʼwenekele uzunya: aho ubatijiwa ushinga hamo na Filipo; udedebala, aho ushibona shimanikijo na shitile sha budula shitale isho shikwitagwa. Aho batungʼwa ba mu Yerusalemi bali bigwa giki, Samaria yanukulile mhayo gwa Mulungu, bubatumila Petro na Yohana. Benabo aho butulumenha bushika ko, bubalombela giki, banukule Moyo Ngʼwela; Iki walatali kungʼwikiila munhu nulu umo wabo, gwike bali babatijiwa mu lina lya Seba Yesu. Hunaho bubatuulila makono higulya yabo, nabo banukula Moyo Ngʼwela. Aho Simoni wali ubona giki, bakwinhiwagwa Moyo Ngʼwela kulwa kutuulilwa makono na batungʼwa, usanga wabinha feza, Uhaya giki, Ninhagi nane budula ubu, uyo ose nakuntuulila makono gane, anukule Moyo Ngʼwela. Aliyo Petro ungʼwila giki, Feza jako jiyagale hamo na bebe, iki wiganikaga giki, cha kwinhiwa cha Mulungu chu-pandikwa na feza. Bebe uti na ngabo nulu busangi mu mhayo uyu; iki ngholo yako iti wima mu butongi wa Mulungu. Kulwa iyi, oyaga bubi wako wenubu, unombe Mulungu, ulu hamo ukulekejiwa iganiko lya ngholo yako. Iki nakubona bebe uli mu ndulu ya bululu, na mu butungwa wa buti butungilija. Simoni ushosha uhaya giki, Nilombelagi bingʼwe kuli Seba, itizunisliikila mihayo iyo ngʼwahayaga. Nabo aho bali bumala bukanila na kugulomela mhayo gwa Seba, bushokanya Yerusalemi, bakulomelaga evangeli mu mizengo mingi ya bana Samaria. Malaika wa Seba akalungalunga na Filipo, uhaya giki, Bukaga uje ku lwande lwa dakama mu nzila itulumenhile kufuma Yerusalemi kushika Gaza: yene ya ngʼwipolu. Nanghwe ubuka uja; kuponya miso, umona munhu wa Etiopia, asololilwe, wa budula butale hasilili ya Kandake, ntemi nkima wa ba Etiopia, ngʼwenuyu walali miki wa sabo jakwe jose, wali wajile Yerusalemi kulamya; Na alishoka igashije ngʼwigali lyakwe, akusomaga kitabo cha nghangi Isaya. Moyo ungʼwila Filipo giki, Egelaga, ukadimane na igali lyenili. Filipo umpelela, ungʼwigwa alisoma kitabo cha nghangi Isaya, nanghwe uhaya giki, Angu, umanile iyo ulisoma? Uhaya giki, Nakudula kinahe, numho munhu unitongela? Ungʼwikumbilija Filipo alinhe igashe hamo nanghwe. Ipande lya Shandikwa ilo walusomaga lyali lyenili: Wali utwalwa giti ngholo ya kubulagwa; na giti ngʼwana wa ngholo atulilaga mu nkono gwa mutiji wa boya, giko Wei atusamyaga nomo gwakwe. Mu kwidohya kwakwe nsango gwakwe gwali gwinjiwa; ni nani uyo alabukumucha bubyile wakwe? iki u bupanga wakwe winjiwagwa mu si. Ngʼwenuyo asololilwe unshokeja Filipo, uhaya giki, Nakwikumbilija, mhayo gwenuyu nghangi alinghaya nani? ya kwihaya wei ngʼwenekele, nulu ya munhu ungi? Huna Filipo wasamya nomo gwakwe, wandija ha Shandikwa shenishi, unomela ya ngʼwa Yesu. Aho bakujaga mu nzila, bushika aho gubiza ho minzi; ngʼwenuyo asololilwe uhaya giki, Gaya minzi; ya kunilemeja kubatijiwa ni ki? Filipo uhaya giki, Ulu uzunya na ngholo yako yose, ikudulika. Ushosha uhaya giki, Nazunya giki, Yesu Kristo ali Ngʼwana wa Mulungu. Huna ulagila igali lyimilijiwe. Nabo bika bubili wabo mu minzi, Filipo na ngʼwenuyo asololilwe, nanghwe umatija. Aliyo aho busabuka mu minzi, Moyo wa Seba unghwehula Filipo, na ngʼwenuyo asololilwe walatumona hangi iki uja mu nzila yakwe, akuyegaga. Aliyo Filipo akabonwa mu Azoto: ubitila mu mizengo yose akulomelaga evangeli, kushisha ushika Kaisaria. Aliyo Saulo, walatali ubahezelela bukangi na bubulagi a bahemba ba ngʼwa Yesu, uja kuli ngabiji ntale, Ulomba nyaluba ja kuja najo Damasko, ku mabilingilo, giki, ulu ubabona banhu abali ba nzila iyi, bagosha nulu bakima, abenhe Yerusalemi batungilwe. Aho akujaga, yubiza aho wegela Damasko, kuhayumanila, isana kufuma ngʼwigulu lyungʼwakila limpindije. Nanghwe ugwa pu ha si, wigwa ilaka lilingʼwila giki, Saulo, Saulo, ukuninyajanyajaga ni buli? Uhaya giki, Uli nani, Seba? Seba uhaya giki, Nene ndi Yesu Uyo ukuninyajanyajaga: Ili kilambu kuli bebe kupanda milambi ku someke. Wei udetema na ukumya, uhaya giki, Seba, utogilwe nite ki? Seba ungʼwila giki, Bukaga, wingile mu nzengo, nangho ukuwilwa iyo ikwigelelilwe kwita. Bagosha abali bushiminza hamo nanghwe bimila du, bigwa ilaka duhu aliyo batamonile munhu. Huna Saulo ubuka ha si; aho ulolecha miso walatubona kinhu: bundima nkono, buntongela, bungʼwenha Damasko. Udila shiku idatu kubona yaya, na kulya yaya nulu kungʼwa yaya. Walali mo nghemba umo mu Damasko, lina lyakwe Anania; na Seba ungʼwila mu kolechiwa giki, Anania. Uyo uhaya giki, Nene ndi aha, Seba. Seba ungʼwila giki, Bukaga, uje ku nzila ikitanagwa Ngololoku, ukankobe mu numba ya ngʼwa Yuda munhu, lina lyakwe Saulo, wa Tarso: iki lolaga, akulombaga; Nanghwe wamonaga munhu mu kolechiwa, lina lyakwe Anania, wingila, untuulila nkono giki, abone. Anania ushosha giki, Seba, nigwile ku banhu bingi nghulu ja ngosha ngʼwenuyo, bubi wingi ubo wabitilile bela bako mu Yerusalemi: Nu kunu ali nabo budula kufuma ku bagabiji batale kubatunga bose abalililila lina lyako. Seba ungʼwila giki, Jaga duhu; iki wei ali kiseme kisolwa kuli Nene, alibuche lina lyane ku butongi wa bana mahanga, na batemi, na bana ba Israeli; Iki nakungʼolekeja mihayo mitale yinga shingʼwigelelilwe kuluhiwa kulwa lina lyane. Huna Anania ubuka uja, wingila mu numba iyo; untuulila makono, uhaya giki, Ndugu wane Saulo, Seba wanituma, Yesu, Uyo wali ukwilongela mu nzila iyo wizilile, bebe winhiwe kubona, na oka jiwe na Moyo Ngʼwela. Haho na haho gugwa kufuma mu miso gakwe giti magamba, kuhayumanila ubona, huna ubuka, ubatijiwa; Nanghwe tilya shiliwa na ubona nguzu. Huna Saulo wali ubiza hamo na bahemba ba mu Damasko shiku ndebe. Haho na haho mu mabilingilo ulomela ya ngʼwa Yesu giki, ali Ngʼwana wa Mulungu. Bose abo bali bungʼwigwa, budedebala, buhaya giki, Uyu ati ngʼwenuyo wali utunyajanyaja bose abalililila lina ili mu Yerusalemi? Nanghwe wizile kunu kulwa mhayo uyu, abatwale batungilwe ku bagabiji batale? Aliyo Saulo ongeja kwinhiwa nguzu, ubazwanganya Bayudaya abali bikala mu Damasko, ubamanikija giki, Uyu hu ngʼwene Kristo. Aho shiku ningi jali jubita, Bayudaya bulomana mhayo gwa kumulaga: Aliyo busigani wabo bumanwa na Saulo. Bungʼwitegela ha mibita limi na bujiku, bamulage. Aliyo bahemba buntwala bujiku, bukangʼwikija ngʼwitangwa ha ndugu. Aho Saulo ushika Yerusalemi, wali ugema kwisangija na bahemba; nabo bose bali bungʼogoha, bali batuzunya giki, ali nghemba. Aliyo Barnabas untwala, ungʼwenha ku batungʼwa, ubasombolela gitumo wali umona Seba mu nzila, na gitumo wali ulungalunga nanghwe, na gitumo wali ulomela na bugimu mu lina lya ngʼwa Yesu mu Damasko. Nanghwe wali ubiza hamo nabo mu Yerusalemi, akwingilaga na kufuma, Ubyulomela na bugimu mu lina lya Seba; ulungalunga na wihalalija na Bahelenisti; aliyo boi bukoba nzila ya kumulaga. Aho badugu bali bumana chene, bunshindikila Kaisaria bilaga nanghwe, buntuma aje Tarso. Huna lulu makanisa gose mu Buyudaya na Galilaya na Samaria gubiza na mhola, guzengwa, na gongeja kushiminza mu logohano kuli Seba, na mu kulungujiwa kwa Moyo Ngʼwela, giyongeja. Ikabiza aho Petro wali upindila hose hose, utulumenha kuja ku a bela abazengile mu Luda. Unsanga ko munhu umo, lina lyakwe Ainea, wali walala ha bulili miaka inane, alemahalile. Huna Petro ungʼwila giki, Ainea, Yesu Kristo wakupija; bukaga, uwambe bulili wako. Nanghwe ubuka haho na haho. Na bose abazengile mu Luda na Saroni bumona, nabo bungalukila Seba. Mu Yopa walali mo nghemba umo, lina lyakwe Tabitha, lina ili kushomelejiwa kwalyo kuli giki, Dorkas; nkima ngʼwenuyo wali izulile na shitile sha wiza, na bugabi wa shikolo, isho wita. Ikabiza mu shiku jenijo, usata, ucha; aho bali bumala kungʼoja, buntuula mu chumba cha higulya. Aliyo iki Luda ili hihi na Yopa, na bahemba bali bigwa giki, Petro ali ko, bufuma bagosha babili kuli wei bangʼwikumbilije giki, atizudila kwiza kubo. Petro ubuka kuja nabo. Aho ushika, buntwala mu chumba cha higulya; na bachilwa bose bimila hihi nanghwe balilila, kunu bungʼolekeja nghanjo na shizwalo isho Dorkas walubejaga, aho walatali hamo nabo. Petro ubafunya bose, utuja mazwi, ulomba; na ugugalukila u mimba, uhaya giki, Tabitha, bukaga. Nanghwe ulolecha miso gakwe, na aho umona Petro, ubuka wigasha. Ungʼwinha nkono, umucha; aho wamala kubitana a bela na bachilwa, untuula mu butongi wabo ali mpanga. Mhayo uyu gukumuka mu Yopa yose, na bingi bunzunya Seba. Hunaho Petro wali wikala ko shiku ningi mu Yopa ha ngʼwa munhu umo, Simoni, mpaji wa makunza. Evangeli yandia kushika ku bana mahanga Walali ho munhu mu Kaisaria, lina lyakwe Kornelio, ntale wa ibita lya bashilikale igana ilikitanagwa giki, lya Italia. Walali munhu ngʼwishigwa mu kulamya, hangi uyo angʼogohile Mulungu na ba mu kaya yakwe bose, ngabi wa shikolo shingi ku banhu, hangi ubyunomba Mulungu gwa gwa gwa. Ngʼwenuyo akamona malaika wa Mulungu mu kolechiwa hape, yali ili saa ya kenda ya limi, wingila kuliwe, na ungʼwila giki, Kornelio. Nanghwe aho unkalalila, ogoha no, uhaya giki, Ni kinahe, Seba? Nanghwe ungʼwila giki, Kulomba kwako na bugabi wa shikolo shako shalinhaga kubiza chizukijo mu butongi wa Mulungu. Na haha tumaga banhu kuja Yopa, banjile Simoni, uyo akitanagwa Petro. Ngʼwenuyo ashikilile hali umo Simoni, mpaji wa makunza, numba yakwe ili haho na nyanza, ngʼwenuyo akukuwila iyo ikwigelile bebe kwita. Aho malaika uyo ulungalunga na Kornelio winga, wei ubitana batumami bakwe ba mu kaya babili, na nshilikale ngʼwishigwa mu kulamya wa mu benabo bakuntumamilaga gwa gwa gwa; Nanghwe aho umala kubatambulila mihayo yose, ubatuma Yopa. Ku ntondo, aho balija mu lugendo, na begela hihi ku nzengo, Petro ulinha kwigulya ha numba kulomba, yali ili saa ya katandatu. Hunaho utuba no walatogilwe kulya: aliyo aho bali batali bulonja shiliwa, kuhayumanila ufelwa; Nanghwe ubona igulu likundukile, na kiseme kilika kuli wei, chali kili giti ngʼwenda ntale no, gutungilwe ku nana jago ine; gwichiwa ha si; Mugati yago jali jili mo mbika jose mu si ja shinhu sha magulu ane, ndimu, shinwele, sha kwigwesa, na noni ja hape. Huna ilaka liza kuli wei giki, Bukaga, Petro, bulagaga ulye. Aliyo Petro uhaya giki, Yaya, Seba; iki natinalya kinhu cha bubi nulu kisoso, na kamo yaya. Na ilaka liza kuli wei hangi lukangala lwa kabili, lyuhaya giki, Icho Mulungu wamala kucheja, utakihayage cha bubi. Mhayo gwenuyu gwitwa giko nghangala idatu: huna lulu kiseme chenicho chanukulwa ngʼwigulu. Aho Petro uzwangana no mu moyo gwakwe, himba kuli kinahe kolechiwa uko walukubonaga, kuhayumanila, banhu abatumilwe na Kornelio, bagisilijaga numba ya ngʼwa Simoni, bimila ha mita. Buhamuka, bakubujaga ulu Simoni, uyo akitanagwa Petro, ashikilile mo. Aho Petro walatali widedekanya ya kolechiwa, Moyo ungʼwila giki, Lolaga, bagosha badatu balikukoba. Bukaga lulu, wike, uje nabo, utiziganilija, iki Nene nabatumaga. Petro wika ku bagosha abali butungʼwa kuli wei na Kornelio, uhaya giki, Nene ndi ngʼwenuyo mulinikoba; ngʼwizaga kulwa nguno ki? Buhaya giki, Kornelio ntale wa bashilikale igana, munhu ntungilija, uyo angʼogohile Mulungu, hangi uyo akanililwe chiza na ihanga lyose lya Bayudaya, ngʼwenuyo wali ulagilwa na malaika ngʼwela kumutumila nhungʼwa, uje ku kaya yakwe, akigwe mihayo hali bebe. Huna lulu ubitana bingile na ubegeleja. Ku ntondo ubuka uja nabo, na bamo ba badugu ba mu Yopa buja nanghwe. Ku ntondo bungi bali bingila mo mu Kaisaria. Kornelio walabalindilile, wali wababilinga baduguye na bimane biye. Aho Petro uhaya kwingila, Kornelio umanya nanghwe, ungwila ku magulu, unamya. Aliyo Petro umucha, uhaya giki, Imilaga, nene nane ndi munhu duhu. Aho ulungalunga nanghwe, wingila, ubasanga bingi bibilingile. Ubawila giki, Bingʼwe mumanile giki, ili ya ngilo kuli munhu Nyudaya kwisangija na munhu wa ihanga lingi nulu kungʼwegela; aliyo Mulungu wanolekejaga giki, natizunghaya munhu ose giki, wa bubi nulu nsoso. Kulwa iyo, aho nali nizilwa, hu yene nizaga, natalemile yaya. Nabuja lulu giki, Ngʼwanitanilile ku mhayo ki? Kornelio uhaya giki, Lelo jabitaga shiku ine kufumila aho nudila nzala kushisha saa iyi; na mu saa ya kenda naalombaga mu numba yane, kuhayumanila, munhu wimilile mu butongi wane, ali na shizwalo shilabangizu, Uhaya giki, Kornelio, kulomba kwako kwigwiwagwa, na bugabi wa shikolo shako wizukagwa mu butongi wa Mulungu. Kulwa iyo, tumaga banhu kuja Yopa, ukangʼwitane Simoni, uyo akitanagwa Petro ize aha; ashikilile mu numba ya ngʼwa Simoni, mpaji wa makunza haho na nyanza; uyo aho wiza akulungalunga nangho. Haho na haho lulu, nutuma banhu kuli bebe; nangho witaga chiza iki wiza. Nahene lulu biswe bose tuli ho aha mu butongi wa Mulungu, twiyigwe yose iyo walagilwa na Mulungu. Huna Petro wasamya nomo gwakwe, uhaya giki, Nghana nitegeleja lulu, Mulungu ati nsolanya wa banhu. Aliyo mu buli ihanga lyose uyo ungʼogoha, na akwitaga ya butungilija, uzunilijiwa nanghwe. Mhayo uyo Wei waatuma ku bana ba Israeli, kubalomela evangeli ya mhola muli Yesu Kristo, (Ngʼwenuyo ali Seba wa bose): Mhayo gwenuyo na bingʼwe mumanile, uyo gwali gukumuchiwa mu Buyudaya yose, kwandija mu Galilaya, hanuma ya kubatija uko Yohana wali ukulomela; Gitumo Mulungu wali ungʼwitiila Yesu wa Nazareti Moyo Ngʼwela na budula; Uyo waapindilaga, akwitaga ya wiza na kubapija bose abali biboneelwa na Shetani; iki Mulungu ubiza hamo nanghwe. Na biswe tuli bakaniji ba mihayo yose iyo wali wiyita mu si ya Bayudaya na mu Yerusalemi; Uyo bali bumulaga, bunsunga ku linti. Ngʼwenuyo Mulungu waanjucha ku lushiku lwa kadatu, na ungʼwelekeja hape, Iti ku banhu bose, aliyo ku bakaniji abali basolwa kale na Mulungu, chene ku biswe, abo twaalyaga na tungʼwa hamo nanghwe, aho wali wamala kujuka. Nanghwe waatulagila biswe kubalomela banhu, na kukanila hape giki, Ngʼwenuyo ali Uyo waatuulwa na Mulungu abize nekanya wa bapanga na bafu. Kuli Wei bahangi bose bunkanila giki, mu lina lyakwe buli munhu uyo wanzunya akwanukula kulekejiwa kwa shibi. Aho Petro walatali ulungalunga mihayo yeniyi, Moyo Ngʼwela ubikiila bose abo baligwa mhayo gwenuyo. Nabo abasalilwe abali bazunya, budedebala, bose abo bali biza na Petro, iki cha kwinhiwa cha Moyo Ngʼwela chusamijiwa na ku bana mahanga. Iki bubigwa bakulungalungaga na ndimi jingi, na kunkumilija Mulungu. Hunaho Petro ushosha giki, Munhu ose wadula kubalemeja minzi, aba batizubatijiwa, benabo banukulaga Moyo Ngʼwela giti biswe? Huna ulagila babatijiwe mu lina lya ngʼwa Yesu Kristo. Hunaho bungʼwikumbilija ikale nabo shiku ndo. A batungʼwa na badugu abali bali mu Buyudaya bali bigwa giki, bana mahanga nabo bagwanukulile u mhayo gwa Mulungu. Aho Petro ulinha kuja Yerusalemi, abo abasalilwe buhalalila nanghwe, Buhaya giki, Bebe wali wingila ku banhu abatasalilwe, na ulya nabo. Aliyo Petro wandia kubasombolela mu kwihela, uhaya giki, Nali nali mu nzengo gwa Yopa nakulombaga, na mu kufelwa nubona kolechiwa, kiseme kilika, chali kili giti ngʼwenda ntale, gutungilwe ku nana jago ine, gwichiwa kufuma ngʼwigulu, nago gwika kuli nene: Aho nugukalalila, nidedekanya, nubona shinhu sha mu si sha magulu ane, ndimu, shinwele, sha kwigwesa, na noni ja hape. Huna nigwa ilaka likuniwilaga giki, Bukaga Petro; bulagaga, ulye. Nane nuhaya giki, Yaya, Seba; iki kinhu cha bubi nulu kisoso kitiningila mu nomo gwane. Aliyo ilaka lyunishokeja lukangala lwa kabili kufuma ngʼwigulu giki, Icho Mulungu wamala kucheja, utakihayage cha bubi. Mhayo gwenuyu gwali g witwa nghangala idatu, huna lulu shose shudutilwa hangi higulya ngʼwigulu. Kuhayumanila, banhu badatu bimila mu butongi wa numba umo nali nali, batumilwe kuli nene kufuma Kaisaria. Na Moyo uniwila kuja nabo natiziganilija. Badugu aba batandatu nabo buja hamo na nene, na twingila mu numba ya munhu ngʼwenuyo: Nanghwe utusombolela gitumo wali umona malaika mu numba yakwe, uwali wimila, ungʼwila giki, Tumaga banhu kuja Yopa, banjile Simoni, uyo akitanagwa Petro. Uyo akukuwila mihayo iyo ukupijiwa nayo, u bebe na kaya yako yose. Aho nali nandia kulungalunga, Moyo Ngʼwela ubikiila, gitumo utwikiila biswe kwandia. Nali nizukwa mhayo gwa Seba, gitumo akahaya giki, Yohana wali ubatija na minzi hene, aliyo bingʼwe mulabatijiwa na Moyo Ngʼwela. Ulu Mulungu wabinha boi cha kwinhiwa icho, gitumo utwinha biswe, abo twaanzunya Seba Yesu Kristo, nene lulu, nali nani wa budula wa kunghangija Mulungu? Aho bigwa mihayo iyi, bufulika, huna bunkumilija Mulungu, buhaya giki, Nahene Mulungu waabinha na bana mahanga koya kwa kushika mu bupanga. Benabo lulu abali basalanghanyiwa kulwa kunyajanyajiwa ukwali kubiza ho kulwa mhayo gwa ngʼwa Stefano, buja lugendo nose bushika Foiniki na Kupro na Antiokia, bali batunomela munhu ose mhayo numho ku Bayudaya bike. Aliyo bamo ba benabo bali bali banhu ba Kupro na Kurene, nabo aho bushika Antiokia bulungalunga na Bagriki, bulomela evangeli ya Seba Yesu. Na nkono gwa Seba gwali guli hamo nabo: banhu bingi buzunya, bungalukila Seba. Huna lukumo lwabo lushika mu matu ga ba kanisa ya mu Yerusalemi: nabo buntuma Barnabas aje ko Antiokia: Ngʼwenuyo aho ushika ko na ubona kigongo cha Mulungu, uyega; ubakonieleja bose giki, Badimane na Seba mu buhandikiji wa ngholo. Iki wei walali munhu wa wiza, uyo izulile na Moyo Ngʼwela na kuzunya; na banhu bingi Yiyongeja kuli Seba. Huna Barnabas winga uja Tarso kunkoba Saulo; Nanghwe aho umala kumona, ungʼwenha Antiokia. Ikabiza, bubizibilinga hamo na kanisa ngʼwaka ngima, na bubalanga banhu bingi: kwenuko Antiokia bahemba bali bandia kwitanwa giki, Bakristo. Mu shiku jenijo bahangi bali butulumenha kufuma Yerusalemi bushika Antiokia. Umo wabo, lina lyakwe Agabo, wali wimila, ubamanikija mu budula wa Moyo giki, yahaya kubiza ho nzala nhale mu si jose; iyo ikabiza ho mu shiku ja ngʼwa Klaudio Kaisari. Huna lulu bahemba bulagana kubatumila badugu abazengile mu Buyudaya sha kubagunana, buli munhu gitumo isho walali nasho. Bali bita giko, bubatumila banamhala mu makono ga Barnabas na Saulo. Ngʼwikanza lyenilo Ntemi Herode wali ubadima na makono gakwe kubitila kibi bamo ba mu kanisa. Umulaga Yakobo ngʼwana wa ngʼwawe wa Yohana na lilushu. Nanghwe aho wahona giki, yubayeja Bayudaya, ongeja kundima nu Petro. (Shiku jenijo jali jili shiku ja migati iti na kibimbya.) Aho wamala kundima, untuula mu jela, ungʼwinha ko ku bashilikale ikumi na batandatu ba ludima lwa bane bane bananghane; walatogilwe kungʼwenha ku butongi wa banhu hanuma ya Pasaka Petro ulornbelwa; upijiwa na malaika Kulwa iyo Petro wali ulindwa mu jela: aliyo ba kanisa bali bunombela kuli Mulungu na bukomezu. Aho Herode wali uhaya kumfunya, bujiku wenubu Petro walalalile hagati ya bashilikale babili, atungilwe minyololo ibili: na balindi ku butongi wa luwigi bulinda jela. Kuhayumanila malaika wa Seba wimila hihi nanghwe, na isana lyaka mu numba: aho umbada Petro mu mbazu, umisha, uhaya giki, Bukaga wangu. Na minyololo yugwa kufuma ha makono gakwe. Malaika ungʼwila giki, Zwalaga, witunge ni shilatu shako. Nanghwe wita giko. Huna ungʼwila giki, Igumilage ngʼwenda gwako, unilondele. Na utuma hanze unondela; nanghwe atitegelegije giki, iyo yitwa na malaika yene ya nghana, aliyo wiganika giki, wabonaga kolechiwa. Aho bamala kubita bulindilo wa kwandia, na wa kabili, bushika ku mita gwa chuma gwa kwingilila mu nzengo; gubigukila gwiyene; bufuma hanze, bubitila ngʼwipalapala limo; haho na haho malaika uneka. Petro aho wahayimanila, uhaya giki, Haha nitegeleja nghana giki, Seba wantumaga malaika wakwe, wanipijaga mu nkono gwa ngʼwa Herode na mu kulolela kose kwa banhu ba Bayudaya. Aho akwidedekanyaga, ushika ku numba ya ngʼwa Mariamu, nina wa Yohana, uyo akitanagwa Marko; umo bibilingila bingi bakulombaga. Aho Petro wali ukomagula ku luwigi lwa ha mita, ntumami ngʼwaniki, lina lyakwe Roda, wiza kudegeleka. Aho umana ilaka lya ngʼwa Petro, walatigula luwigi kulwa kuyega, aliyo upelela mo, ubawila giki, Petro imilile ku butongi wa mita. Bungʼwila giki, Bebe uli nsaji. Aliyo wei ugagana kuhaya giko, ili chene. Nabo buhaya giki, Ngʼwenuyu ali malaika wakwe. Aliyo Petro ukomela kukomagula: aho bumala kulugula, bumona, buzunzumala. Aliyo wei ubahungija nkono giki, bahumule, ubatambulila gitumo Seba walungʼwinjaga mu jela. Uhaya giki, Basombolelagi Yakobo na badugu, mihayo yeniyi. Nanghwe winga ho, uja ipande lingi. Aho wangaluka, bashilikale bali bali na wiyangayangiji no, iki bali batamanile umo wabizilaga u Petro. Aho Herode wamala kunkoba, ha kumona yaya, ubabugilija balindi, huna ulagila giki, babulagwe. Nanghwe utulumenha kwinga mu Buyudaya ushika Kaisaria, wikala kwenuko. Herode wali wabapelanilwa no banhu ba Turo na Sidoni; nabo buja kuli wei na moyo gumo, na aho bumala kunghuhuta Biasto, u nindi wa numba umo akalalaga ntemi, bulomba mhola, iki si yabo yulishiwa kufuma mu si ya Ntemi Herode. Huna lulu ha lushiku lusolwa, Herode uzwalila shizwalo sha kitemi, aho wigasha ha isumbi lya butemi, alibalomela ya magaka. Bamunhu buhamuka, buhaya giki, Lyenili ilaka lya mulungu, liti lya munhu yaya. Haho na haho malaika wa Seba untula, iki walatangʼwinhile Mulungu ikujo; nanghwe uliwa na magino, ucha. Aliyo mhayo gwa Mulungu gukula na gwiyongeja. Huna Barnabas na Saulo aho bumala kushikilija kwinhilija kwabo, bushoka kufuma Yerusalemi, buntwala hamo nabo Yohana, uyo akitanagwa Marko. Mu kanisa ya mu Antiokia bali bali mo bahangi na balangi, benaba, Barnabas, na Simeoni uyo akitanagwa Nigeri, na Lukio muna Kurene, na Manaeni, uyo wali ulelwa na Ntemi Herode, na Saulo. Benabo aho buntumamila Seba na budila nzala, Moyo Ngʼwela uhaya giki, Nikomanijagi Barnabas na Saulo ku nimo uyo nabitanilile. Huna lulu aho bumala kudila nzala na kulomba bubatuulila makono, bubalaga baje. Benabo iki butungʼwa na Moyo Ngʼwela, butulumenhela Selukia; kufuma kwenuko bulinhya itanga kuja Kupro. Nabo aho bushika Salamisi, bulomela mhayo gwa Mulungu mu mabilingilo ga Bayudaya; Yohana nanghwe walali hamo nabo wa kubagunana. Aho bali bumala kubita ngʼwijinga kushika Pafo, bumona munhu umo, wa mabinda, nghangi mama, Nyudaya, lina lyakwe Bariyesu; Ngʼwenuyo walali ho hamo na nsugi Sergio Paolo, munhu wa masala. Ngʼwenuyo wali ubitana Barnabas na Saulo bize ku ngʼwakwe, ukoba kwigwa mhayo gwa Mulungu. Aliyo uyo wa mabinda, Eluma (iki lina lyakwe lyushomelejiwa chene) ubahangija, ukoba kunchamya nsugi, aleke kuzunya. Aliyo Saulo (hu na ngʼwene Paulo) izulile na Moyo Ngʼwela, unkalalila, Uhaya giki, Bebe, uyo okalile na bulembalembi bose na buhunga bose, bebe ngʼwana wa Shetani, bebe ngʼwanishi wa butungilija bose, utuleka kuchamya nzila ngololoku ja Seba? Ali lulu lolaga, nkono gwa Seba guli hali bebe, nangho ukubiza moku, utulibona limi kakanza. Haho na haho shungwila wija na giiti; upindilapindila, ukoba munhu wa kundima nkono antongele. Hunaho nsugi aho ubona iyo yitagwa, uzunya, udedebala kulwa kulanga kwa Seba. Aho Paulo na biye bulinhya itanga binga Pafo, bushika Perga ya Pamfulia; aliyo Yohana ubaleka ushoka Yerusalemi. Aliyo aho bali bubita mu Perga, bushika Antiokia ya Pisidia; bingila ngʼwibilingilo ha lushiku lwa Sabato, bigasha. Hanuma ya kusongʼwa kwa shilagilo na kwa bahangi, batale ba ibilingilo bufuma munhu kubo, buhaya giki, Badugu bagosha ulu muli na mhayo gwa kubaganikila banhu, nahene hayagi. Aho Paulo ubuka, ubahungija nkono, uhaya giki, Bagosha ba Israeli, na bingʼwe abo mungʼogohile Mulungu, degelekagi. Mulungu wa banhu aba ba Israeli wali ubasola bakulugenji biswe, na ubagunguhya banhu aho bali bikala bageni mu si ya Misri, na ubinja boi mu si iyo na nkono gwa budula butale. Nanghwe wali wiyumilija nabo miaka makumi ane ngʼwipolu. Huna lulu aho wali umala kugayagaja mahanga mpungati mu si ya Kanani, ubagabila benabo si yabo, Hanuma ya yeniyo ubinha balekanya, miaka giti magana ane na makumi atano, kushisha kuli nghangi Samueli. Hunaho bulomba ntemi, na Mulungu ubinha Saulo, ngʼwana wa ngʼwa Kishi, ngosha wa luganda lwa Benjamini, ikanza lya miaka makumi ane. Aho wali ungʼwinja uyo, umucha Daudi wa kubiza ntemi wabo: unkanila, uhaya giki, Namonaga Daudi ngʼwana wa Yese, munhu uyo ngholo yane yuntogwa, uyo akwita yose iyo natogilwe. Kufuma mu bubyile wa munhu uyu gitumo kwisagija kwali, Mulungu waababukija ba Israeli Mpija u Yesu; Aho Yohana wali watonja kubalomela banhu bose ba Israeli kubatija kwa koya, aho Wei walatali kwiza. Aho Yohana ubyushikilija lugendo lwakwe, uhaya giki, Mukuniganikilaga nene, himba ndi nani? Nene nati Ngʼwene. Aliyo lolagi, Uyo izile hanuma yane, Ngʼwenuyo natigelelilwe kutaligula shilatu sha mhambala jakwe. Badugu bagosha, bana ba kibyalilwe cha ngʼwa Abrahamu, nabo mu bingʼwe mungʼogohile Mulungu; mhayo gwa bupiji wenubu gwaatungʼwa ku bingʼwe. Iki abo bazengile Yerusalemi, na batale babo, iki bali batamanile Wei, nulu na malaka ga bahangi ayo gakasomagwa buli Sabato, bali bugashikilija aho bunekanya nsango. Nabo nulu bali batubona i nguno ya kumulagila, nahene bunomba Pilato giki, abulagwe. Aho bali bumala kushikilija mihayo yose iyo yaandikwa ya kunghaya Wei, bunsungula ku linti, buntuula mu kigila. Aliyo Mulungu unjucha mu bafu; Nanghwe waabilongelaga shiku ningi benabo abali bufuma Galilaya hamo nanghwe kulinha kuja Yerusalemi, ha bene bakaniji bakwe haha ku banhu. Na biswe tukumulomelaga evangeli giki, u kwisagija uko wali ubisagija bakulugenji biswe, Mulungu waatushikiligija biswe bana babo, aho unjucha Yesu; gitumo yaandikwa mu Zaburi ya kabili giki, Bebe uli Ngʼwana wane, Nene nakubyalaga Bebe lelo iyi. Hangi giki, waanjucha mu bafu, atizushoka hangi mu kubola, gwene uguhaya giki, Nakungʼwinha bingʼwe shigongo sha ngʼwa Daudi, shela na sha nghana. Kulwa iyo uhaya ngʼwipande lingi hangi giki, Utunekanija Ngʼwela wako abone kubola. Iki u Daudi, aho wali wamala kubagunana ba kibyalilwe chakwe, gitumo Mulungu atogilwe, ushutula akatuulwa hamo na bakulugenji bakwe, nanghwe ubona kubola. Aliyo Ngʼwenuyo Mulungu waanjucha, walatabonile kubola. Kulwa iyo, imanike ku bingʼwe, badugu bagosha, giki, Muli munhu Ngʼwenuyu mukulomelagwa kulekejiwa kwa shibi; Hangi muli Ngʼwenuyu buli munhu uyo anzunije utungiligijiwa mu mihayo yose iyo ngʼwali mutudula kutungiligijiwa mu shilagilo sha ngʼwa Musa. Kulwa iyo ilanghanagi itizumushikiila iyo yaahayiwa mu bahangi giki, Lolagi, bingʼwe badalahi, kumyagi, mushile, iki Nene nakwitaga nimo mu shiku jingʼwe, nimo uyo bingʼwe mutuguzunya na hado, nulu munhu umusombolela gete. Aho Bayudaya bufuma ngʼwibilingilo, bana mahanga bubikumbilija giki, balomelwe mihayo iyi ha Sabato yingi. Aho kwibilinga kusambala, Bayudaya bingi na a bagaluki bishigwa mu kulamya bubalondela Paulo na Barnabas; benabo bubalungalungila, bubakomeleja kwiyumilija mu kigongo cha Mulungu. Ha Sabato yingi, hihi bose ba nzengo bali bibilinga hamo kudegeleka mhayo gwa Mulungu. Aho Bayudaya bugabona mabita, bokala na wilu, buyihalalija mihayo iyo ikuhayiwagwa na Paulo, buhalalila na kusondagula. Hunaho Paulo na Barnabas bulungalunga na bugimu, buhaya giki, Shali shigelile mhayo gwa Mulungu gulomelwe ku bingʼwe tame; aliyo iki ngʼwagupamila kungi, na ngʼwibala benekele mutigelelilwe bupanga butushila, lolagi, twabagalukila bana mahanga. Iki Seba waatulagila chene giki, Nakutuulaga Bebe hubiza isana lya ku bana mahanga, ubize wa bupiji kushisha ku mhelo ya si. Bana mahanga aho bigwa iyi, buyega, bugukuja mhayo gwa Seba, nabo bose baatuulwa ho ku bupanga butushila buzunya. Hu yene mhayo gwa Seba gwali gutangʼanha mu si yeniyo yose. Aliyo Bayudaya bubatwalanija bakima bishigwa mu kulamya na ba ikujo, na banhu batale ba nzengo, bububukija Paulo na Barnabas kunyajanyanja, bubapeja binge mu mimbi jabo. Nabo bubakomagulila lububu lwa ku mhambala jabo, bushika Ikonio. Aliyo bahemba bali bokala na buyegi na Moyo Ngʼwela. Ikabiza mu Ikonio giki, bali bingila bubili wabo ngʼwibilingilo lya Bayudaya, bulungalunga, nose ibita itale lya Bayudaya na Bagriki buzunya. Aliyo Bayudaya abatazunije bubayugulayugula a bana mahanga, bugabihya maganiko gabo babakolwe badugu. Ikanza itale lulu bali bikala ko bulungalunga na bugimu muli Seba, Uyo wali ugukanila mhayo gwa kigongo chakwe, ubinha shimanikijo na sha kukumya shitwe na makono gaho. Aliyo bamunhu ba mu nzengo bali bulekana, bangi bubiza ha lwande lwa Bayudaya, na bangi ha lwande lwa batungʼwa. Aliyo bana mahanga na Bayudaya hamo na batale babo aho bubatuuliila kubitila sha bubi na kubaponda mawe, Boi bitegeleja mhayo uyu, bupelela Lustra na Derbe, mizengo ya mu Lukaonia, na si ibimbikanilwe ho; Kwenuko bubyulomela evangeli. Na mu Lustra wali wigasha munhu umo, nema wa magulu, walali nsonji kufuma mu nda ya ngʼwa nina, walatinashiminza na kamo. Ngʼwenuyo ungʼwigwa Paulo aho alilungalunga, uyo aho unkalalila, umona giki, ali nako kuzunya kwa kupijiwa. Uhaya na ilaka itale giki, Bukaga, imilaga na magulu gako wima. Nanghwe ujuduka ushiminza. Aho mabita gubona iyo Paulo wita, buhamukila na ilaka lyabo mu Kilukaonia, buhaya giki, Bamulungu batwikiilaga biholile na banhu. U Barnabas bungʼwilika giki, Zeu; nu Paulo giki, Herme, iki wei walali ntale wa kulungalunga. Huna ngabiji wa Zeu uyo hekalu yakwe yali haho na nzengo, wenha nzagamba na ngikili ja mabulabo ha mibita, walatogilwe hamo na mabita kutambila kitambo. Aliyo batungʼwa, Barnabas na Paulo, aho bigwa iyi, butandula shizwalo shabo, bupela, bingila ngʼwibita, buhamuka, Buhaya giki, Bagosha, mukwitaga mihayo iyi ni buli? Ambu, na biswe tuli banhu ba nhungwa giti bingʼwe, tulimulomela evangeli giki, muyinhile ngongo mihayo yeniyi ya dalali, mungalukile Mulungu mpanga, Uyo waasema igulu, na si, na nyanza, na shose ishili mo; Uyo mu shibyalilwe ishaabita, ubaleka bana mahanga bose kushiminzila mu nzila jabo benekele. Aliyo walatuleka ngʼwenekele atikanilile, iki akitaga ya wiza, akatwinhaga mbula kufuma ngʼwigulu na makanza ga buponi, okaja ngholo jiswe na shiliwa na buyegi. Nulu buhaya giko, nahene yuba-koya kubalemeja batizubatambila kitambo. Huna lulu Bayudaya bali biza kufuma Antiokia na Ikonio; nabo bubahuhuta banhu, bumponda mawe Paulo, bungwesela hanze ya nzengo, biganika giki, wachaga. Aliyo bahemba aho bimila bampindije, ubuka wingila mu nzengo, na ku ntondo winga hamo na Barnabas kuja Derbe. Alio bali bumala kulomela evangeli mu nzengo uyo, na kwita bahemba bingi, bushokanya Lustra, na Ikonio, na Antiokia. Bubajamya bupanga wa bahemba, bubakomeleja kwiyumilija mu kuzunya, hangi gitumo shitwigelelilwe kuwingila butemi wa Mulungu mu nzila ya kuluhiwa kwingi. Aho bali bumala kubakomelela banamhala buli kanisa, na bulomba hamo na kudila nzala, bubatuula ho kuli Seba, Uyo banzunije. Nabo bubita mu Pisidia, bushika Pamfulia. Aho bumala kulomela mhayo mu Perga, butulumenhela Atalia; Kufuma uko bulinhya itanga kuja Antiokia, uko bali balombelwa kigongo cha Mulungu kulwa nimo uyo bagushikiligije. Aho bali bushika bubabilinga ba kanisa, bubasombolela mihayo yose iyo Mulungu uyitilila hamo nabo, hangi gitumo waabigulilaga bana mahanga luwigi lwa kuzunya. Bikala kwenuko shiku ningi hamo na bahemba. Huna lulu banhu bali butulumenha kufuma Buyudaya, biza bubyubalanga a badugu giki, Mutudula kupijiwa ulu mutusalwa giti chimile cha ngʼwa Musa umo kili. Paulo na Barnabas aho bali bilwisha na kwihalalija nabo na nguzu, badugu bulomana giki, Paulo na Barnabas na bichabo bangi balinhe kuja Yerusalemi ku batungʼwa na banamhala kulwa mhayo gwa halali yeniyi. Aho bushindikilwa lulu na ba kanisa, bubyubita mu Foiniki na Samaria, bubyusombola kugaluchiwa kwa bana mahanga: nabo bubayeja badugu bose no no no. Aho bali bushika Yerusalemi begelejiwa na ba kanisa na batungʼwa na banamhala, bubasombolela mihayo yose iyo Mulungu uyitilila hamo nabo. Aliyo bamo ba Kazunije ka Bafarisayo abazunije, bimila buhaya giki, Shigelile kubasala na kubalagila kudima shilagilo sha ngʼwa Musa. Huna batungʼwa na banamhala bibilinga kugulola chiza mhayo gwenuyu. Aho kubiza ho kwihalalija kwingi, Petro wimila, ubawila giki, Badugu bagosha, ambu bingʼwe mumanile gitumo Mulungu wali usola mu biswe mu shiku ja kwandia giki, bana mahanga bigwe mhayo gwa evangeli mu nomo gwane, huna bazunye. Mulungu nanghwe, Uyo ajimanile ngholo, ubakanila, iki ubinha Moyo Ngʼwela gitumo waatwinha na biswe; Nanghwe walatitile solanya hagati ya biswe na boi, ujeja ngholo jabo kulwa kuzunya. Mulingema Mulungu ni buli lulu, na kutuula ikondejo mu nhingo ja bahemba, ilo bakulugenji biswe nulu biswe twali tuduma kulibucha? Aliyo biswe twazunya giki, tukupijiwa kulwa kigongo cha ngʼwa Yesu Kristo giti na boi. Huna lulu bose ba libilinga bufulika du, bubadegeleka Barnabas na Paulo balisombola shimanikijo na sha kukumya isho Mulungu uyitilila hamo nabo mu bana mahanga. Hanuma aho benabo bufulika, Yakobo ushosha uhaya giki, Badugu bagosha, nidegelekagi. Simeoni wasombolaga gitumo Mulungu wali wandia kubalola bana mahanga, abasole banhu mubo ba ku lina lyakwe. Na mihayo ya bahangi yigwindanya chene: gitumo yaandikwa giki, Hanuma ya mihayo iyi nakushoka kuyizenga hangi i numba ya ngʼwa Daudi, iyigwile; nakuzenga hangi bukenaguku wayo, na kuyimilija; Giki, abasaga ho mu banhu bankobe Seba, na bana mahanga bose abo bitanililwe lina lyane, wahaya Seba, Uyo akitaga mihayo iyi yose. Shitile shakwe shose shumanwa na Mulungu kufuma kwandia kwa si. Kulwa iyi nene nalekanya giki, tutizubakoyakoya abo balingalukila Mulungu kufuma mu bana mahanga; Aliyo tubandikile giki, bikomanye na migilo ya kwitongeleja ku shikolile, na bujingi, na sha kunigwa, na mininga. Iki kufuma shiku ja kale mu buli nzengo Musa ali nabo abalomela mihayo yakwe, yusongʼwa buli Sabato mu mabilingilo. Hunaho batungʼwa na banamhala hamo na ba kanisa bose yubatoga kubakoma bagosha ba mubo, na kubatuula Antiokia hamo na Paulo na Barnabas; ha bene Yuda uyo akitanagwa Barsabas na Silas, bagosha batale mu badugu; Butuma mu nkono gwabo, bandika giki, Batungʼwa na banamhala na badugu ku badugu biswe ba mu bana mahanga abo muli mu Antiokia na Suria na Kilikia, twamugisha. Iki twigwaga giki, bichiswe bamo abali bufuma ku biswe baamukoyakoyaga na mihayo yabo, bumuzwanja bupanga wingʼwe; benabo tutabalagilile chene: Biswe twibilingile bose kihamo, yatutoga kubakoma bagosha mu biswe na kubatuma ku bingʼwe hamo na batogwa biswe Barnabas na Paulo, Banhu abiiyinha ko bupanga wabo kulwa lina lya Seba wiswe Yesu Kristo. Kulwa iyo twabatuma Yuda na Silas, abo benekele bakumusombolela mihayo yeniyi na milimo yabo. Iki yantoga Moyo Ngʼwela na biswe giki, tutizumutuulila nigo ntale kukila mihayo iyi iyigelile giki, Ngʼwikomanye na isho shafunyiwa mu shitambo ku shikolile, na mininga, na sha kunigwa, na bujingi; isho ulo ngʼwi komanya musho m ukwita chiza. Ngʼwikale mhola. Huna lulu aho bulagwa, bu ja Antiokia; na aho bumala kubabilinga banhu bose, bubinha i nyaluba. Aho bumala kuyisoma, buyega kuhva kulungujiwa kwenuku. Yuda na Silas nabo, iki na bene bali bahangi, bubakomeleja badugu na mihayo mingi, na kubajamya. Aho bali budila ko ikanza, bulagwa mu mhola na badugu bashoke ku benabo bali bubatuma. Aliiyo yuntoga Silas kushinga kwenuko. Paulo na Barnabas bali bikala mu Antiokia, bubyulanga na kulomela mhayo gwa Seba kihamo na bangi bingi. Hanuma ya shiku jimo Paulo akangʼwila Barnabas giki, Tushoke hangi tukabalole badugu biswe mu buli nzengo umo twali twalomela mhayo gwa Seba, tumane umo bali. Barnabas wigongeja kuntwala nabo Yohana uyo akitanagwa Marko: Aliyo Paulo wali upima iti chiza kuntwala nabo uyo akabaleka uko Pamfulia, hangi walatajile hamo nabo ku milimo. Yubiza ho kwilemelwa kutale kushisha bulekana benekele na benekele, Barnabas untwala Marko, ulinhya itanga kuja Kupro; Aliyo Paulo unsola Silas ubuka kuja aho ulombelwa kigongo cha Mulungu na badugu. Ubita mu Suria na Kilikia, ubajamya ba kanisa. Huna ushika Derbe na Lustra; henaho walali ho nghemba umo, lina lyakwe Timoteo, ngʼwana wa nkima Nyudaya nzunya: aliyo ise Ngriki. Uyo wali ukanilwa chiza na badugu ba mu Lustra na Ikonio. Ngʼwenuyo Paulo walatogilwe aje hamo nanghwe; na untwala, unsala kulwa nguno ya Bayudaya abo bali mu mapande genayo: iki bose bitegelegije giki, ise ali Ngriki. Aho bubyubita mu mizengo yeniyo, bubinha shilagilo isho shalagililwe na batungʼwa na banamhala abali mu Yerusalemi giki, bashidime. Giko lulu makanisa gali gubyujamiwa mu kuzunya, nabo biyongeja bukumi wabo buli lushiku. Aho bali bubita mu si ya Frugia na Galatia, iki bakalemejiwa na Moyo Ngʼwela kulungalunga mhayo mu Asia; Aho bali butulumenhela Musia, bugema kuja mu Bithunia; na Moyo wa Yesu walatubazunilija; Huna bubita mu Musia, butulumenhela Troa. Na kolechiwa kwali kungʼwilongela Paulo mu bujiku: Walali ho ngosha wa Makedonia wimila, alingʼwikumbilija, uhaya giki, Kilaga wingile mu Makedonia, utugunane. Aho wali wamala kubona kolechiwa uku, haho na haho tukoba kuja mu Makedonia, iki tupima nghana giki, Seba watwitanaga biswe kubalomela evangeli. Huna lulu aho tulinhya itanga kwinga Troa, tuja wima kushika Samothraki, ku ntondo tushika Neapoli. Kwinga kwenuko tushika Filipi, hu gwene nzengo ntale gwa ipande ilo lya Makedonia, boma ya Barumi: twali twikala mu nzengo gwenuyo shiku jimo. Ha lushiku lwa Sabato tufuma hanze ya mita, mu nghilimva ya mongo, iki tukiganika kwenuko lili ipande lya kulombela; aho twigasha, tulungalunga na bakima abizile kwibilinga ko. Na nkima umo, lina lyakwe Ludia, njinja wa langi nalaluku, wa nzengo gwa Thuatira, uyo walali namya wa Mulungu, utudegeleka; hu ngʼwene Seba uyigula ngholo yakwe, ayidime mihayo ilihayiwa na Paulo. Aho wamala kubatijiwa wei na ba ha kaya yakwe, utwikumbilija, uhaya giki, Ulu ngʼwanibonaga ndi ngʼwishigwa kuli Seba, ingilagi ngʼwikale mu kaya yane, nanghwe utuhimbila. Yubiza ho, aho tukujaga kwipande lya kulombela, umanhya na biswe ngʼwaniki umo uyo walali na moyo gwa kisato, uyo ubyubenhela baseba bakwe sabo ningi kulwa kuchuja. Ngʼwenuyo wali unondela Paulo na biswe, ubyuhamuka, uhaya giki, Banhu aba bali basese ba Mulungu ali higulya no, abakutulomelaga nzila ya bupiji. Wita giko shiku ningi. Aliyo Paulo, usatiwa no, ugaluka, uguwila moyo uyo giki, Nakulagilila bebe mu lina lya ngʼwa Yesu Kristo ungʼwinge. Gungʼwinga ngʼwikanza lyenilo duhu. Aho baseba bakwe bubona giki, kwisagilwa kwabo kwa kupandika sabo kwashilaga, bubadima Paulo na Silas, bubagwesanja mu nghungʼwano ku butongi wa batale; Aho bumala kubenha ku basugi, buhaya giki, Banhu aba bakukoyakoyaga no nzengo gwiswe, iki bali Bayudaya, Bakulomelaga shimile isho shili sha ngilo ku biswe kushanukula, nulu kushita, iki biswe tuli Barumi. Huna banhu bose bububukila kihamo, na basugi aho bubatandaguja na kuzuja shizwalo shabo, bulagila batulwe mhanga. Aho bumala kubatula milanga mingi, bubaponya mu jela, bunagila nindi wa jela kubalinda no; Ngʼwenuyo, iki wanukula kilagilo giko, ubaponya mu numba ya mugati, na ubatunganija magulu gaho ngʼwitungilo. Aho bujiku hagati Paulo na Silas bakulombaga na kungʼwimbila Mulungu mimbo ga bulumbi a batungwa bangi balibadegeleka. Kuhayumanila, yubiza ho nyahinga nhale kushisha nose musingi gwa jela gunegenyiwa: haho na haho nzwigi jose jiguka, na nhendele ja bose jutaliguka. Nindi wa jela aho umisha, na ubona nzwigi ja jela jigukile, usopola lilushu, wendibulaga ngʼwenekele, iki wiganika a batungwa bapelaga. Aliyo Paulo uhamuka na ilaka itale, uhaya giki, Utiziyitila ngʼwenekele kibi; iki biswe bose tuli aha. Ulomba tala jenhwe, ukolobela mugati, ugwa ha si mu butongi wa ngʼwa Paulo na Silas, alidetema. Huna ubafunya hanze, uhaya giki, Baseba, shinigelelilwe nite ki napijiwe? Nabo buhaya giki, Nzunyage Seba Yesu Kristo, nangho ukupijiwa, u bebe na ba mu kaya yako. Huna lulu bunomela mhayo gwa Seba, wei na banhu bose ba mu kaya yakwe. Nanghwe ubatwala mu saa yeniyo ya bujiku, uboja malonda gaho; ubatijiwa u wei na bose bakwe haho na haho. Ubatwala higulya mu numba yakwe, ubatengela shiliwa, uyega no hamo na ba kaya yakwe bose, iki wamala kunzunya Mulungu. Aho wali wangaluka, basugi butuma bashilikale batale, buhaya giki, Bataligulilage banhu benabo baje. Nindi wa jela unsombolela Paulo mihayo yeniyo giki, Basugi batumaga mhayo giki, Mutaligulilwe. Nahene lulu, fumagi, muje mu mhola. Aliyo Paulo ubawila giki, Batutulile milanga hape mu miso ga banhu, aho tutali kulekanyiwa nsango a biswe tuli Barumi, hangi batuponyaga mu jela; i haha hu batogilwe kutuponya hanze mu mbisila; I yaya, aliyo ni bizage benekele, batufunye hanze. Bashilikale batale bubasombolela basugi mihayo yeniyi; nabo bogoha no aho bigwa giki, bali Barumi. Nabo biza, bubikumbilija, na aho bumala kubafunya hanze bubiyandila giki, binge mu nzengo gwabo. Aho bufuma mu jela, bingila mu kaya ya ngʼwa Ludia; nabo aho bibona na badugu, bubalunguja, huna buja. Aho bali bumala kubita mu Amfipoli na Apolonia, bushika Thesalonika, umo lyali lili ibilingilo lya Bayudaya: Na Paulo gitumo chimile chakwe kili wingila mo kubo, wibugilija nabo ya mu Shandikwa Sabato idatu. Ubakundulila na ufubola giki, shingʼwigelelilwe Kristo kuluhiwa na kujuka mu bafu; hangi giki, Yesu, Uyo namulomelela, u Ngʼwene Kristo. Na bamo mubo buzunya, budimana na Paulo na Silas; na mu Bagriki a balamya ba Mulungu bingi no, na bakima batale nabo bali bati bagehu. Aliyo Bayudaya abatazunije bali budingʼwa na wilu, biyenhela bagosha bahunga bamo ba nhungwa mbi, nabo aho bulibilinga ibita bita nsambo mu nzengo; buyipindya numba ya ngʼwa Yasoni, bubakoba babafunye hanze ku banhu. Aho bali batubasanga, bungwesa Yasoni na badugu bamo ku butongi wa basugi ba nzengo, buhamuka giki, Aba bayugulile si bashikaga na kunu; U Yasoni wabegelegije, hangi boi bakwitaga wanishi ku shilagilo sha Kaisari, buhaya giki, angu, ali ho ntemi ungi, Ngʼwene Yesu. Bubakoyakoya banhu na batale ba nzengo aho bigwa mihayo yeniyi. Nabo aho bali bumala kumpya funge u Yasoni na biye, bubalekela baje. Haho na haho badugu bubatuma Paulo na Silas bujiku baje Beroya; nabo aho bushika ko bingila ngʼwibilingiio lya Bayudaya. Benabo bali bali ba wiza kutinda a ba mu Thesalonika, iki bugwanukula mhayo na kukalalwa kose, buli lushiku bakukobaga mu Shandikwa, babone ulu mihayo iyi ili giko. Kulwa iyo bingi ba benabo buzunya; hangi bakima Bagriki abakujiwa, na bagosha nabo bali bati bagehu. Aliyo aho Bayudaya ba Thesalonika bali bumana giki, mhayo gwa Mulungu gukulomelagwa na Paulo na mu Beroya, bushika nu kwene bubayombya mabita. Haho na haho badugu buntuma Paulo aje kushika ku nyanza: aliyo Silas na Timoteo bali bikala ko. Abo abali bunshindikila Paulo buntwala kushika Athene; nabo aho bumala kwanukula kilagilo cha kuli Silas na Timoteo giki, banguhe kwiza kuli wei, huna buja. Aho Paulo wali ubalindila mu Athene, usatwa no mu moyo gwakwe aho ubona nzengo gokalile na shikolile sha kulamiwa. Kulwa iyo wibugilija ngʼwibilingilo na Bayudaya na banhu bishigwa mu kulamya, na mu nghungʼwano buli lushiku nabo abibona nanghwe. Aliyo bamo ba basimbi ba masala ba mu Baepikurio, na Bastoiko, bunsanga. Bangi buhaya giki, Wanyibubu uyu atogilwe kuhaya ki? Bangi giki, Ulu wangemela, ali nsomboji wa bamulungu bageni, iki walubalomelaga mihayo ya ngʼwa Yesu na bujuko. Huna lulu bundima, bunt wala ko Areopago, buhaya giki, Angu, twadula kukamana kalangile aka kapya, ako ulikahaya bebe? Iki ukwenhaga mihayo migeni mu matu giswe; tutogilwe kumana lulu makulu ga mihayo yeniyi. (Iki bana Athene bose na bageni abazengile mo batayegelaga mihayo yingi, ulu iti kuwila nulu kwigwa mhayo mpya.) Huna lulu Paulo wimila hagati ya Areopago, uhaya giki, Bingʼwe bagosha ba Athene, nakumubonaga mu mihayo yose mulidakila kalamije. Iki aho nuyelayela, nakushilolaga i sha kalamije shingʼwe, nubona ngʼwalilo ugwandikilwe giki, KULI MULUNGU ATAMANAGWA. Ngʼwenuyo mukanamyaga mu butumana, hu Ngʼwene lulu namufubolela bingʼwe. Mulungu Uyo waashisema si na shinhu shose ishili mo, iki Wei ali Seba wa igulu na si, atikalaga mu hekalu ja kubejiwa na makono; Nulu atatumamilagwa na makono ga banhu giti ugayiwa kinhu chose chose, iki Wei ngʼwenekele akabinhaga bose bupanga, na miuyi na shinhu shose; Nanghwe waabeja buli ihanga lya banhu na mininga gamo, bikale ha si yose, ubalongeja makanza agahelilwe na kale, na mimbi ja wikalo wabo; Giki bankobe Seba, ulu hamo bambabashebabashe na kumona, aliyo nahene ati kule na buli munhu wa mu biswe: Iki muli Wei tuli bapanga, tukushiminzaga, hangi tuli ho bapanga; gitumo bamo ba batungi ba mihayo bingʼwe baahaya, Iki na biswe tuli bubyile wakwe. Iki tuli bubyile wa Mulungu lulu, shitatwigelile biswe kuwiganika bumulungu wakwe giki, wikolile na zahabu nulu feza nulu iwe, i kinhu kipunzile na bubeja na bubamhija wa munhu. A makanza genayo ga butumana Mulungu ubitiila kugalola, aliyo i haha akubalagilaga banhu bose hose hose giki, boye; Iki waatuula ho lushiku mulo alabalekanya mo ba mu si mu butungilija, muli munhu Uyo waantuula ho, nanghwe waabinha banhu bose bumani gete iki waanjucha mu bafu. Aho bigwa mihayo ya kujuka kwa bafu, bangi bubyeda; bangi buhaya giki, Tukukudegeleka bebe hangi mu mhayo uyu. Giko Paulo winga mugati yabo uja. Aliyo bagosha bamo budimana nanghwe, buzunya: mu benabo walali mo Dionusio, muna Areopago, na nkima umo lina lyakwe Damari, na bangi hamo nabo. Hanuma ya mihayo yeniyo Paulo akinga Athene ushika Korintho. Na unsanga Nyudaya umo, lina lyakwe Akula, myalwa wa Ponto, wafunyile Italia shiku jenijo, hamo na nke wakwe Priskila (iki Klaudio wali wabalagila Bayudaya bose binge Rumi:) nanghwe ushika kubo. Ali iki nimo gwabo gwali guli gumo, wikala hamo nabo, ubyutumama; iki mu nimo gwabo bali bali basumi ba maliema. Nanghwe wibugilija ngʼwibilingilo buli Sabato, ubakonieleja Bayudaya na Bagriki bazunye. Aho Silas na Timoteo biza kufuma Makedonia, Paulo wali uhadikijiwa mu moyo gwakwe, ubakanilija Bayudaya giki, Yesu Ngʼwene Kristo. Nabo aho blai buhangi ja na kudukagula, wei ugunghumula shizwalo shakwe, ubawila giki, Mininga gingʼwe gabize ha mitwe yingʼwe; nene nelaga: kufuma haha nakuja ku bana mahanga. Nanghwe winga uko, akingila mu numba ya munhu umo, lina lyakwe Yusto, namya wa Mulungu, uyo numba: yakwe yali ili haho na ibilingilo. Krispo, ntale wa ibilingilo, unzunya Seba hamo na kaya yakwe yose; na bingi ba Bakorintho aho bigwa buzunya, na bubatijiwa: Huna Seba ungʼwila Paulo mu kolechiwa bujiku giki, Utizogoha, aliyo hayaga duhu, utizufulika; Iki Nene ndi hamo na bebe, atalilonga nulu umo wa kukubukila kukwitila kibi; iki Nene ndi na banhu bingi mu nzengo uyu. Wali wikala ko ngʼwaka gumo na mieji itandatu, akulangaga mhayo gwa Mulungu mugati yabo. Aliyo aho Gallio walali nsugi wa Akaya, Bayudaya bungʼubukila Paulo na moyo gumo, bungʼwenha ku butongi wa isumbi lya kulekanija, Buhaya giki, Ngʼwenuyu akubahumbulaga banhu kunamya Mulungu iti gitumo shilagilo shili. Aho Paulo wali uhaya kwasamya nomo gwakwe, Gallio ubawila Bayudaya giki, Bingʼwe Bayudaya, ulu nghana ni guli ho mhayo gwa bukenaguji nulu gwa buhunga, ni yali ho nguno niyumilije na bingʼwe; Aliyo ulu ili kwibugilija kwa mihayo na mina na shilagilo ishili shingʼwe, yene ilolagi bingʼwe benekele; iki nene natatogilwe Itubiza nekanya wa mihayo yeniyo. Huna ubapeja binge ku butongi wa isumbi lya kulekanija. Hunaho Bagriki bose bundima Sosthene u ntale wa ibilingilo, buntulagula mu butongi wa isumbi lya kulekanija. Nanghwe Gallio na kuyikalalwa yaya mihayo yeniyi. Paulo ongeja kwikala ko shiku ningi, huna wilaga na badugu, ulinhya itanga kuja Suria; na Priskila na Akula bu ja nanghwe, aho wei wali wamala kumoga ntwe gwakwe mu Kenkrea, iki wali wilahilila. Bushika Efeso, ubaleka ko: aliyo wei ngʼwenekele aho wingila ngʼwibilingilo, wibugilija na Bayudaya. Aho bali bumuja ashinge nabo ikanza itale, walatuzunya. Aliyo wilaga nabo, uhaya giki, Lushiku lutale ululiza shinigelelilwe kuludima mu Yerusalemi, huna lulu nakushoka hangi ku bingʼwe ulu Mulungu utogwa. Ulinhya itanga winga Efeso. Aho umala kukola Kaisaria, ulinha, ubagisha ba kanisa, huna utulumenhela Antiokia. Aho wali umala kwikala ko ikanza, huna winga, ubita mu kwihela si yose ya Galatia na Frugia, ubajamya bahemba bose. Nyudaya umo, lina lyakwe Apolo, myalwa wa Aleksandria, ngosha wa bumani, wiza Efeso; walali wa nguzu no mu Shandikwa. Munhu ngʼwenuyu wali walangwa mu nzila ya Seba; nanghwe iki walali sebu mu moyo, ulungalunga na ulanga wima mihayo ya ngʼwa Yesu, walamanile kubatija kwa ngʼwa Yohana gwike: Ngʼwenuyo wandia kulungalunga na bugimu ngʼwibilingilo. Aho Akula na Priskila bungʼwigwa, buntwala ku kaya yabo, bumfubolela wima kutinda i nzila ya Mulungu. Aho walatogilwe kukila aje mu Akaya, badugu bakangʼwandikilila nyaluba, bubakomeleja bahemba bangʼwegeleje: nanghwe aho ushika, ubagunana niyo no benabo abali bazunya kulwa kigongo; Iki wali ubakamaja Bayudaya gete gete mu butongi wa banhu, ubolekeja kufuma mu Shandikwa giki, Yesu ali Kristo. Yubiza aho Apolo walali mu Korintho, Paulo aho wali wamala kubita mu shalo sha magulya, ushika Efeso, na ubasanga bahemba bamo, Ubawila giki, Ngʼwali ngʼwanukula Moyo Ngʼwela aho ngʼwaazunya? Nabo bungʼwila giki, Yaya, nulu kwigwa ulu Moyo Ngʼwela ali ho, tutali kwigwa. Ubawila giki, Ngʼwaabatijiwa bubatijo wa ki lulu? Buhaya giki, Mu bubatijo wa ngʼwa Yohana. Paulo uhaya giki, Yohana waabatijaga na bubatijo wa koya shibi, ubyubawila banhu giki, banzunye Uyo izile hanuma yakwe, Uyo Ngʼwene Kristo Yesu. Aho bigwa yeniyo, bubatijiwa mu lina lya Seba Yesu. Na Paulo aho ubatuulila makono, Moyo Ngʼwela ubiziila, nabo bulungalunga na ndimi jingi na buhanga. Nabo bose bali bali bagosha ikumi na babili. Huna wingila ngʼwibilingilo, ulungalunga na bugimu mieji idatu, wibugilija na kubakomeleja bazunye mihayo ya butemi wa Mulungu. Aliyo aho bamo bali bilambya na bulema kuzunya, bakusondagulaga Nzila yeniyi mu butongi wa libilinga, ubaleka, ubakomanya a bahemba heke, wibugilija buli lushiku ngʼwisomelo lya ngʼwa Turano. Mihayo iyi yushinga ho giko miaka ibili; kushisha nose bose abali bazengile Asia bugwigwa mhayo gwa Seba, Bayudaya na Bagriki. Mulungu wali wita shitile sha budula mu makono ga ngʼwa Paulo; Kushisha nose balwile bubyutwalilwa shitambala na shizwalo sha kufuma ha mili gwakwe, huna busatu bubinga ho na mioyo ya buhunga yufuma mubo. Aliyo bamo ba Bayudaya a bayejiyeji, bapeja ba masamva, bigimilija tulihaya lina lya ngʼwa Yesu higulya ya benabo abali bali na mioyo ya buhunga, buhaya giki, Twangʼwilahilila kuli Yesu Uyo Paulo akunghayaga. Bali bali ho bagosha mpungati bakwitaga giko, bene bana ba ngʼwa Skewa, Nyudaya, ngabiji ntale. Huna moyo gwa buhunga gushosha, guhaya giki, U Yesu, namanile, na Paulo nimanile nanghwe, aliyo bingʼwe muli banani? Na munhu ngʼwenuyo walali nago moyo gwa buhunga, ubitambukila, ubaheba ubatinda nguzu, kushisha nose bupela nhumbo kufuma mu numba yeniyo bali bali duuhu na bugulajiwa. Mhayo uyu gwali gumanika ku Bayudaya bose na Bagriki bose abali bazengile Efeso; na boba bubagwila bose, na lina lya Seba Yesu lyukumilijiwa. Bingi ba benabo abali bazunya, biza bakutambulaga na kufumbula shitile shabo. Bingi ba benabo abali bugatumamila mabinda, bubilinga shitabo shabo, bushipemba mu butongi wa banhu bose; huna bubala mpango gwasho, bugubona gushikile feza 50,000. Giko mhayo gwa Seba gwiyongeja na nguzu na gupyena. Mihayo yeniyo aho yushila, Paulo upima mu moyo gwakwe giki, aho akumala kubita mu Makedonia na Akaya aje Yerusalemi, uhaya giki, Aho namala hubiza kwenuko, shinigelile kuyibona Rumi. Ubatuma banhu babili ba benabo bakungʼwinhilijaga, baje Makedonia, bene Timoteo na Erasto, aliyo wei ngʼwenekele ushinga mu Asia ikanza. Ngʼwikanza lyenilo nzambo ntale gw ali gwilonga kulwa Nzila yeniyi. Iki munhu umo, lina lyakwe Demetrio, nsuji wa feza, uyo utubeja tuhekalu twa feza twa ngʼwa Artemi, ubyubapandikila basuji biye solobo ningi; Ubabilinga benabo kihamo na batumami a ba milimo giti yeniyo, uhaya giki, Bingʼwe bagosha, ambu mumanile giki, busabi wiswe bufumile mu milimo iyi. Hangi mukubonaga na kwigwa giki, iti mu Efeso yike, aliyo hihi mu si yose ya Asia, Paulo ngʼwenuyu waabahumbula na kubagalucha banhu bingi, akuhayaga giki, Bamulungu abubejiwa na makono angu, bati bamulungu. Iti giki, mega gwiswe gwike guli mu kwihiga kwa kudalahijiwa, aliyo hangi i hekalu ya ngʼwa Artemi, mulungu ntale nkima, nayo ilihaya kugayilijiwa iti kinhu, na magaka gakwe ga nyatemi galihaya kwinjiwa ho, ngʼwenuyo bana Asia bose na ba si yose bakanamyaga. Aho bigwa giko bokala na bupelanu, buhamuka buhaya giki, Artemi wa ba Efeso ali Ntale. Na nzengo ngima gokala wiyuguji, bupela nhambo bose na moyo gumo kuja mu ligusijo aho bumala kubadima Gaio na Aristarko, bana Makedonia biye ba ngʼwa Paulo mu lugendo. Paulo alio uhaya kwingila ku banhu, a bahemba bali batunzunilija. Batale bamo ba Asia a banwani biye, butuma nhungʼwa kuli wei, bungʼwikumbilija atizugima kwingila mugati ya ligusijo. Huna lulu bamo buhamuka kingi na bangi kingi: iki libilinga lyali lyayuguka, na bingi babo bali batamanile ya nguno ki bibilingile hamo. Bungʼwinja Aleksandro kufuma ngʼwibita, Bayudaya buntuula ho mu butongi wabo. Huna Aleksandro ubahungija nkono, walatogilwe kubasombolela banhu. Aliyo aho bumana giki, Ali Nyudaya, buhamukila bose higulya ilaka limo ikanza giti lya saa ibili giki, Artemi wa ba Efeso ali Ntale. Karani wa nzengo aho wali wabahumuja banhu, uhaya giki, Bingʼwe bagosha ba Efeso, ni munhu nani uyo atamanile giki, nzengo gwa ba Efeso gwene nindi gwa hekalu ya ngʼwa Artemi, mulungu ntale nkima, na gwa chikolile ichaagwa kufuma kuli Zeu? Iki mihayo yeniyi itudulika kuyilema, shingʼwigelile kulenda, mutitage mhayo gwa wangu wangu. Iki ngʼwabenhaga banhu aba, bati basonzi ba mahekalu nulu buduki ba mulungu wingʼwe nkima. Kulwa iyi, ulu Demetrio na basuji biye bali na mhayo na munhu, mabanza gali ho, na basugi bali ho; bibule benekele na benekele. Aliyo ulu mulikoba mhayo gose gwa mbika yingi, gukulonjiwa ngʼwibanza ililagilile. Iki biswe tuli mu kwihiga kwa kubulwa bugomi kulwa nguno ya mihayo ya lelo, iki iti ho nguno yaho nulu imo, iyo twadula kuyifunya ya mbuki ya libilinga lyenili. Aho wali umala kuhaya giko, ulilaga libilinga. Huna lulu aho buyombo bushila, Paulo ubitana bahemba na wilaga nabo, ubuka kuja Makedonia. Aho umala kubita mu mapande genayo, na kubakomeleja na mihayo mingi, ushika mu si ya Bagriki. Ushinga ho mieji idatu. Iki Bayudaya busigana kuntega aho wei wali uhaya kulinhya itanga kuja Suria, usola mhayo gwa kushokanya mu nzila ya Makedonia. Abali bu ja hamo nanghwe kushika Asia bene aba, Sopateri, muna Beroya, na Aristarko na Sekundo bana Thesalonika; na Gayo, muna Derbe, na Timoteo; na Tukiko na Trofimo, bana Asia. Benabo iki bali batonga, butulindila biswe mu Troa. A biswe tulinhya itanga kwinga Filipi hanuma ya shiku ja migati iti na kibimbya, tukashika kubo uko Troa mu shiku itano; tudila ko shiku mpungati. Ha lushiku lwa kwandia lwa mfungo, aho bahemba bibilingile hamo kumeganya migati, Paulo ubalomela, wali uhaya kwinga ko ku ntondo; ushinga mu bulomeji wakwe kushisha yubiza bujiku hagati. Jali jili ho tala ningi mu gorofa ya higulya, umo bibilingilile mo. Nsumba umo, lina lyakwe Eutuko, wali igashije ngʼwidilisha, utindwa tulo nhale; aho Paulo ulomela ikanza itale, nsumba iki uhewa tulo, ugwa kufuma ku gorofa ya kadatu ya higulya, ubuchiwa achile. Paulo wika ungwila, unkumbata, uhaya giki, Mutayogage iki bupanga wakwe butali mo muli wei. Hunaho ulinha hangi, na aho umala kumeganya migati, na kulya, na kuhoya ikanza itale kushisha dilu, giko winga ko. Bungʼwenha nsumba ali mpanga, kulungujiwa niyo no. Aliyo biswe, twali tutonga kuja ku ngalaba, tulinhya itanga kuja Asso, kwenuko twali tuhaya kungʼwanukula Paulo; iki wali walagila chene, wei ngʼwenekele uhaya kuja lwa magulu. Aho utusanga biswe mu Asso, tungʼwanukula, tuja, tushika Mitulene. Huna tulinhya itanga kwinga kwenuko, ku ntondo tushika tulilolela Kiosi; ku ntondo bungi tukola mu Samosi, twikala mu Trogulio; ku ntondo bungi iyo tushika Mileto. Iki Paulo upima gild, abitiile Efeso giki, atizudila mu Asia; iki wali wikangilija, ulu yudulika, wei abize mu Yerusalemi lushiku lwa Pentekote. Kufuma Mileto utuma nhungʼwa kuja Efeso, ubitana banamhala ba kanisa. Aho bali biza kuli wei, ubawila giki, Bingʼwe mumanile gitumo naabizaga makanza gose hamo na bingʼwe kufuma lushiku lwa kwandia aho nushika mu Asia, Nubyuntumamila Seba mu kwidokeleja kose na shisoji shingi, na kugengʼwa ukwaii kuniziila kulwa busigani wa Bayudaya; Gitumo nali natishishimulwa kumusombolela mhayo gose ugungʼwigelelilwe, na kumulanga hape mu miso ga banhu na buli kaya buli kaya, Nubyubakanila Bayudaya na Bagriki ya koya kuli Mulungu, na kuzunya kuli Seba wiswe Yesu Kristo. Na haha, lolagi, nene naja Yerusalemi natungilwe mu moyo, natamanile mihayo iyo ikunipandikila kwenuko; Ulu iti uyo Moyo Ngʼwela akutukanilaga mu buli nzengo uhaya giki, kutungwa na kuluhiwa shilinilindila. Aliyo natubala yeniyi, nulu natububala bupanga wane buli kinhu cha mpango kuli nene, nashikilije lugendo lwane na buyegi, na kwinhilija uko naanukula hali Seba Yesu, kuyikaniia evangeli ya kigongo cha Mulungu. Na haha, lolagi namanile giki, bingʼwe bose abo nubyuyelayela mu bingʼwe kumulomela butemi wa Mulungu, mutalanibona bushu wane hangi. Kulwa iyo namukanila bingʼwe lelo iyi giki, nene nelaga mu mininga ga banhu bose. Iki nali natishishimulwa kumulomela kalongeje kose ka Mulungu. Ilanghanagi bingʼwe benekele lulu, na idale lyose ilo Moyo Ngʼwela waangʼwita bingʼwe ku biza balanghani balyo, kuyilisha kanisa ya Mulungu, iyo waayigula na mininga gakwe ga ngʼwenekele. Iki nene namanile giki, hanuma ya kwinga kwane mhuge nghali jikwingila mu bingʼwe, jitalalichila kigongo i lidale; Hangi kufuma mu bingʼwe benekele balabuka banhu, balabyulungalunga mihayo igomagomile ya kubaduta bahemba hanuma yabo. Kulwa iyo ikalagi miso, ngʼwizukwe giki, miaka idatu bujiku na limi nali natalekile kunganikila buli munhu na shisoji. Na haha namutuula ho kuli Mulungu, na ku mhayo gwa kigongo chakwe, uyo gwadula kumuzenga na kungʼwinha wingiji mu benabo bose abeejiwa. Nali natikumva feza, nulu zahabu, nulu shizwalo kuli buli munhu ose. Bingʼwe benekele mumanile giki, makono genaya gaatumamaga kubona isho nugayiwa nene na benabo abali hamo na nene. Naangʼolekejaga kalolelo mu mihayo yose gitumo shingʼwigelile bingʼwe kutumama giko, kubagunana bagokolo, na kuyizukwa mihayo ya Seba Yesu, iyo uhaya Wei ngʼwenekele giki, Ili ya lubango kwinha kutinda kwanukula. Aho akamala kuhaya mihayo yeniyi utuja mazwi, ulomba hamo nabo bose. Nabo bose bulila no, bungwila Paulo mu nhingo, bumbipa no, Bupinihala no kutinda kulwa mhayo gwenuyo uguhaya giki, batalamona bushu wakwe hangi. Nabo bunshindikila kushisha ku ngalaba. Yubiza aho twali tulekana nabo na kulinhya itanga, tuja wima kushika Kosi, ku ntondo tushika Rodo, kwinga kwenuko tushika Patara. Na aho tubona ngalaba iyuhaya kukila kuja Foiniki, twingila mo, tuja. Aho tulilolela Kupro, tulipamila nkono gwa lumoso, tuja kushisha Suria, tukola Turo; iki kwenuko ngalaba yuyikija miligo yayo. Aho tubabona bahemba, twikala kwenuko shiku mpungati; benabo bungʼwila Paulo muli Moyo Ngʼwela giki, atizulinha kuja Yerusalemi. Aho tumala shiku jenijo, tubuka tuja nabo bose kihamo na bake babo na bana butushindikila kushisha hanze ya nzengo; huna tutuja mazwi ha ngʼwalo, tulomba. Aho tumala kwilaga nabo twingila mu ngalaba, aliyo benabo bushoka ku kaya jabo. Aho tumala lugendo lwiswe kufuma Turo, tushika Ptolemai; huna tubagisha badugu, twikala hamo nabo lushiku lumo. Ku ntondo biswe twali tuli hamo na Paulo tukinga, tushika Kaisaria, twingila mu numba ya ngʼwa Filipo nomeji wa evangeli ya bupiji, uyo walali umo wa benabo mpungati, twikala hamo nanghwe. Munhu ngʼwenuyo walali na bana bakwe bane, banhya bibembu, abubyuhanga. Aho tushinga kwenuko shiku ningi, nghangi umo, lina lyakwe Agabo, utulumenha kufuma Buyadaya. Aho wiza ku biswe, udima shipi gwa ngʼwa Paulo, witunga ngʼwenekele magulu na makono, uhaya giki, Moyo Ngʼwela wahaya giki, Bayudaya abali mu Yerusalemi bakuntunga ngosha u ngʼwenekele wa shipi uyu, nabo bakungʼwinha ko mu makono ga bana mahanga. Aho twigwa mihayo yeniyi, biswe na benabo ba henaho tungʼwikumbilija atizulinha kuja Yerusalemi. Hunaho Paulo ushosha giki, Mulita ki, kulila na kubinza ngholo yane? iki nene namalilile, iti kutungwa gwike, aliyo hangi nulu kucha mu Yerusalemi kulwa nguno ya lina lya Seba Yesu. Iki ulema kutwigwa, tuhumula, tuhaya giki, Iyo Seba atogilwe yitwe. Hanuma ya shiku jenijo tutunga shikolo shiswe, tulinha kuja Yerusalemi. Bahemba bamo ba Kaisaria nabo buja hamo na biswe, bungʼwenha hamo nabo munhu umo lina lyakwe Mnasoni, muna Kupro, nghemba wa kale, uyo tukikale ha ngʼwakwe. Aho tushika Yerusalemi, badugu butwegeleja na buyegi. Ku ntondo Paulo wingila hamo na biswe kuli Yakobo, na banamhala bose bali bali ho. Aho umala kubagisha, ubasombolela mihayo yose gumo gumo iyo Mulungu waluyitaga mu bana mahanga mu kwinhilija kwakwe. Aho bigwa iyo, bunkuja Mulungu; huna bungʼwila giki, Ndugu wiswe, ulibona giki, Bayudaya abazunije, ambu, bali shiku shingi, nabo bose bali bakomezu ku shilagilo. Nabo bawililwe nghulu jako giki, angu, ukabalangaga Bayudaya bose abali mu bana mahanga balekane na Musa, ulibawila giki, angu, kubasala bana babo yaya, nulu kushiminza mu shimile isho yaya. Ali gisi ili kinahe lulu? Libilinga litukija kwibilinga, iki bakwigwa giki, bebe wizaga. Kulwa iyo itaga uyo tulikuwila: tuli na bagosha bane abilahilile kilahilo. Batwalage benabo, wiyeje hamo nabo, ubakuulile boi, bamogwe mitwe yabo: huna lulu bose bakumana giki, nghulu jose ijo bawililwe ja kuli bebe, jiti ja nghana; aliyo giki, bebe ngʼwenekele ukushiminzaga wima, ukushidimaga shilagilo. Aliyo ya bana mahanga abazunije, twali twabandikila, tulekanya giki, batizudima mihayo yeniyo, aliyo bilanghane benekele ku shinhu shafunyiwa ku shikolile, na ku mininga, na ku sha kunigwa, na ku bujingi. Hunaho Paulo ubatwala bagosha benabo, ku ntondo wiyeja hamo nabo, wingila mu hekalu, olecha kashikiligije ka shiku ja kwejiwa, kushisha aho kitambo kifunyiwe kulwa buli munhu wabo. Aho shiku mpungati jali jili hihi kushila, Bayudaya abafumile Asia, aho bumona ali mu hekalu, bubayugula banhu bose, bundima na makono, Buhamuka giki, Bagosha ba Israeli, gunanagi: ngʼwenuyu ali munhu uyo akubasugaga bose hose hose kugomela ihanga lyiswe na shilagilo, na ipande lyenili, hangi kutinda iyi, wabenha Bagriki mu hekalu, walisosohajaga ipande lyenili lyela. Iki hali bamona Trofimo muna Efeso ali hamo nanghwe mu nzengo, biganika giki, Paulo akangʼwenha mu hekalu. Nzengo gose guyonzomoka, na banhu bugidinga bibilinga hamo; bundima Paulo, bungwesa bumfunya hanze ya hekalu; haho na baho nzwigi julugalwa. Aho bukoba kumulaga, mihayo yushika kuli ntale wa ibita lya bashilikale giki, Yerusalemi yose yabizaga na wiyuguji. Haho na haho ubatwala bashilikale na batale babo, ubikiila alipela. Aho bumona uyo ntale wa bashilikale na bashilikale bakwe, boya kuntula Paulo. Hunaho ntale wa bashilikale wegela, undima, ulagila atungwe na minyololo ibili: ubuja uyo ni nani, hangi witaga ki. Bamo ngʼwibita buhamuka kingi, na bangi kingi: nanghwe walatudula kumana i ya nghana kulwa buyombo, ulagila atwalwe mu numba ya bashilikale. Aho ushika ha malinhilo yubiza giki, walabuchiwe na bashilikale kulwa bukali wa ibita. Iki banhu bingi bunondela, bakuhamukaga giki, Ngʼwinjage ngʼwenuyo. Aho uhaya kwingijiwa mu numba ya bashilikale, Paulo ungʼwila ntale wa bashilikale giki, Nazunilijiwa kukuwila mhayo? Nanghwe uhaya giki, Umanile Kigriki? Angu, bebe uti uyo muna Misri, uyo mu shiku jabitile wali wita bugomi, wali ubatwala mu bu bagosha benabo shiku shine a babulagi? Aliyo Paulo uhaya giki, Nene ndi Nyudaya wa Tarso ya Kilikia, nzengi wa nzengo nkumuku, nakwikumbilija unizunilije kulungalunga ku banhu. Aho unzunilija, Paulo wimila ha malinhilo, ubahungija nkono; aho bufulika du, ulungalunga mu lulimi lwa Kihebrania, uhaya giki, Bingʼwe bagosha, badugu na bababa, munidegeleke kwitolongola kwane uku ku bingʼwe haha. Aho bigwa giki, alilungalunga nabo mu lulimi lwa Kihebrania bikala sele kutinda: nanghwe uhaya giki, Nene hene ndi Nyudaya, naabyalwa mu Tarso ya Kilikia, aliyo nali nukulila mu nzengo uyu, mu magulu ga ngʼwa Gamalieli, nulangwa mu butungilija wa shilagilo sha bakulugenji biswe, nali nah nkomezu no kuli Mulungu, gitumo bingʼwe bose muli lelo iyi: Nane nubyubanyajanyaja a ba nzila yeniyi kushisha kubabulaga, nubatunga na kubinha ko mu jela bagosha na bakima. Gitumo ngabiji ntale akunikanilaga, na banamhala ba ibanza bose pye, kufuma ku benabo nali nanukula nyaluba ja kuja ku badugu, nuja Damasko, nabenhe abali bali kwenuko kunu Yerusalemi batungilwe, bize binhiwe nsango. Yubiza aho nalija mu lugendo, negela Damasko giti limi ntwe gati, kuhayumanila, isana itale lyufuma ngʼwigulu lyunakila linipindije. Nugwa pu ha si, nigwa ilaka liliniwila giki, Saulo, Saulo, ukuninyajanyajaga ni buli? Nene nushosha giki, Bebe uli nani, Seba? Nanghwe uniwila giki, Nene ndi Yesu wa Nazareti, Uyo ukuninyajanyajaga. Nabo abali ball hamo na nene bulibona isana hene, nabo bogoha no, aliyo bali batigwile ilaka lya Ngʼwenuyo alilungalunga na nene. Nuhaya giki, Nite kinahe, Seba? Seba uniwila giki, Bukaga, uje Damasko; kwenuko ukuwilwa mihayo yose iyo ilagilile bebe kuyita. Aho nali natudula kubona kulwa ikujo lya isana lyenilo, nutongelwa na nkono na benabo abali bali hamo na nene, nushika mu Damasko. Huna lulu ngosha umo, lina lyakwe Anania, namya ngʼwishigwa mu shilagilo, uyo wali ukanilwa chiza na Bayudaya bose abali bazengile kwenuko, Wiza kuli nene, wimila hihi na nene, uniwila giki, Ndugu wane, Saulo, winhiwe kubona. Nane nunola mu kakanza kenako duhu. Nanghwe uhaya giki, Mulungu wa bakulugenji biswe waakusola bebe umane iyo atogilwe, na kumona Uyo Ntungilija, na kwigwa ilaka ilyafuma mu nomo gwakwe; Iki ukubiza nkaniji wakwe ku banhu bose, wa yose iyo wamala kwibona na kwigwa. Ali lulu, ulidila ni ya ki? bukaga, ubatijiwe, oje shibi shako, ulililile lina lya Seba. Yubiza aho nali nushokanya Yerusalemi, aho nulomba mu hekalu, nubiza mu kolechiwa, Numona Uyo aliniwila giki, Kangilijaga winge wangu mu Yerusalemi, iki batalanukula bukaniji wako wa kuli Nene. Nane nuhaya giki, Seba, benabo, ambu, bamanile giki, naabatungaga mu jela na kubatula mu buli ibilingilo abo balikuzunya; Na mininga ga ngʼwa Stefano nkaniji wako aho gali gitwa, nene nane nali nimilile halio, nukazunilija kabulagilwe kakwe, nane nakashilinda shizwalo shabo abali bumulaga. Nanghwe uniwila giki, Jaga duhu, iki Nene nakukutuma kule ku bana mahanga. Bundegeleka kushisha mhayo gwenuyu, huna bubucha ilaka lyabo, buhaya giki, Ngʼwinjage munhu ngʼwenuyo mu si; iki itigelile wei kwikala mpanga. Aho bali buhamuka na kuponanja shizwalo shabo, na busamula lububu higulya, Ntale wa bashilikale ulagila ingijiwe mu numba ya bashilikale, uhaya giki, agengʼwe mihayo yakwe na milanga, amane ni nguno ki balinyogela giko. Aho bumala kuntunga na mikoba, Paulo ungʼwila ntale wa bashilikale igana uyo imilile hihi giki, Angu, ilagilile ku bingʼwe kuntula milanga munhu muna Rumi, uyo atali kulekanyiwa? Aho ntale wa bashilikale igana wigwa iyo, uja kuli ntale wa bashilikale unsombelela giki, Ilanghanage, ulihaya kwita ki? iki munhu ngʼwenuyu ali muna Rumi. Ntale wa bashilikale ungʼwegela, ungʼwila giki, Niwilage, angu, bebe uli muna Rumi? Nanghwe uhaya giki, Ali chene. Ntale wa bashilikale ushosha giki, U nene naabugula buzengo ubu na mpango ntale. Aliyo Paulo uhaya giki, U nene naabyalwa muna Rumi. Haho na baho benabo ubuhaya kungema mihayo yakwe, buneka; na ntale wa bashilikale nanghwe ogoha iki wamana giki, ali muna Rumi, hangi waluntungaga. Ku ntondo, iki utegwa kumana i ya nghana, ni nguno ki wabulwa na Bayudaya, untaligulila, ubalagila bagabiji batale na bose ba ibanza bize, bibilinge hamo, ungʼwenha Paulo, untuula mu butongi wabo. Paulo ubakalalila a ba ibanza, uhaya giki, Badugu bagosha, nakikalaga mu butongi wa Mulungu ndi na wiyanguji bose wa wiza na kushisha lelo. Huna ngabiji ntale Anania ubalagila abo bimilile hihi nanghwe kuntula nomo gwakwe. Hunaho Paulo ungʼwila giki, Mulungu alihaya kukutula bebe ndugu iyibililwe swakala; u bebe wigashije kunilekanya gitumo shilagilo shili, nangho ulilagila natulwe, aliyo italagililwe chene. Nabo abimilile hihi buhaya giki, Aga, ulingʼolomya ngabiji ntale wa Mulungu? Paulo uhaya giki, Nali natamanile badugu bane giki, ali ngabiji ntale; iki gwaandikwa giki, Utizunghaya kibi ntale wa banhu bako. Aliyo aho Paulo umana giki, lwande lumo bali Basadukayo, na lungi bali Bafarisayo, uhamuka ngʼwibanza giki, Badugu bagosha, nene ndi Mfarisayo, ngʼwana wa Mfarisayo: kulwa nguno ya kwisagilwa kwa kujuka kwa bafu nalilekanyiwa. Aho umala kuhaya giko, kubiza ho kwilemelwa kwa Bafarisayo na Basadukayo, na kwibilinga kugabanika. Iki Basadukayo bakahayaga giki, kujuka kuli nduhu, nulu malaika, nulu moyo; aliyo Bafarisayo bakuyitambulaga bubili wayo. Yubiza ho yombo nhale; na bandiki ba lwande lwa Bafarisayo bimila, bilwisha, buhaya giki, Tutabonaga kibi chose muli munhu uyu; aliyo ulu moyo nulu malaika wali walungalunga nanghwe, tutizulwa na Mulungu. Aho kubiza ho kwilemelwa kutale, ntale wa bashilikale, iki ogoha Paulo atizutandagulwa nabo, ulagila bashilikale biike bakanghulumule mugati yabo, bangʼwenhe mu numba ya bashilikale. Bujiku wenubo Seba wimila hali wei, uhaya giki, Timbyaga ngholo Paulo: iki wanikanilaga mihayo yane mu Yerusalemi, giko shikwigelile bebe kukanila na mu Rumi. Aho yubiza dilu, Bayudaya bisigilila hamo, bitungila na kizumo, buhaya giki, Kulya yaya nulu kungʼwa yaya kushisha aho tumulaga Paulo. Benabo abali bilahila bulagane ubu bali bali banhu kutinda makumi ane. Nabo buja ku bagabiji batale na banamhala, buhaya giki, Kwizuma, twitungila na kizumo kitale giki, Tu tulo ja kinhu kushisha aho tumulaga Paulo. Kulwa iyo lulu, bingʼwe hamo na ba ibanza manikijagi ntale wa bashilikale antulumenhaje kwiza ku bingʼwe, giti mulihaya kumana chiza mihayo yakwe: na biswe twamalilaga kumulaga aho atali kwegela. Aliyo ngʼwipfa wa ngʼwa Paulo aho wigwa wibandiji wabo, wiza, wingila mu numba ya bashilikale, unsombolela Paulo mihayo yeniyo. Paulo ungʼwitana ntale umo wa bashilikale igana, uhaya giki, Ntwalage nsumba ngʼwenuyu kuli ntale wa bashilikale; iki ali na mhayo gwa kungʼwila. Huna lulu untwala, ungʼwenha kuli ntale wa bashilikale, uhaya giki, Paulo ntungwa wali wanitana, unilomba giki, Nangʼwenhe nsumba uyu kuli bebe, angu, ali na mhayo gwa kukuwila. Ntale wa bashilikale undima nkono, bisunda ha mhujo, umuja giki, Uli na mhayo ki gwa kunisombolela? Uhaya giki, Bayudaya balomanaga kukulomba, angu, untulumenhye Paulo ntondo kwibanza, giti balihaya kubuja chiza mihayo yakwe. Aliyo bebe utizubazunilija: iki bagosha babo ba kutinda makumi ane balingʼwibandila, abamala kwitungila na kizumo giki, kulya yaya nulu kungʼwa yaya kushisha aho bumulaga; na haha bamalilaga, balilindila kwisagija kwako. Huna lulu ntale wa bashilikale unekela nsumba aje, unghana giki, Utizungʼwila munhu nulu umo giki, wanimanikijaga mihayo yeniyi. Nanghwe ubitana babili ba mu batale ba bashilikale igana, uhaya giki, Balonjagi bashilikale magana abili, baje kushika Kaisaria, na bashilikale badamhiji ba falasa makumi mpungati, na ba machimu magana abili, bamalile mu saa ya kadatu ya bujiku; Hangi jenhwe nzobe jimalilile, bandamhije ho Paulo, bantwale mhola kuli Feliki u gavana. Wandika nyaluba ili giki; Klaudio Lusia kuli gavana nkumilijiwa Feliki, nakugisha. Ngosha ngʼwenuyu wali wadimilwe na Bayudaya, wali wenda kubulagwa nabo, nushika na ibita lya bashilikale, numpija, iki nitegeleja giki, ali muna Rumi. Iki nali natogilwe kumana nguno yabo ya kumulila, nuntulumenhya kwibanza lyabo; Nubona giki, alibulwa ya mabujo ga mu shilagilo shabo, aliyo nubona ati na mhayo gwa kubulwa ugwigelelilwe kucha nulu kutungwa. Aho nufubolelwa giki, Bayudaya busigana kungʼwibandila ngosha uyu, haho na haho nantuma kuli bebe, nubalagila na babuji bakwe bahaye mihayo yakwe mu butongi wako. Wikale mhola. Kulwa iyo bashilikale buntwala Paulo gitumo bali balagilwa, bungʼwenha bujiku kushisha Antipatri. Ku ntondo bubaleka abadamhiji ba falasa kuja hamo nanghwe, nabo bushokanya ku numba ya bashilikale: Benabo aho bushika Kaisaria, nabo bungʼwinha gavana i nyaluba, nu Paulo buntuula mu butongi wakwe. U gavana aho umala kwisoma nyaluba, ubuja ali wa chalo ki; na aho witegeleja giki, ali wa Kilikia, Uhaya giki, Nakukwigwa mihayo yako chiza aho babuji bako nabo bakushika; ulagila alindwe ngʼwilekanijo lya ngʼwa Herode. Hanuma ya shiku itano Anania ngabiji ntale utulumenha hamo na banamhala bamo, na nungalungi umo, Tertulo; nabo bumanikija gavana mihayo ya ngʼwa Paulo. Aho witanwa Tertulo wandia kumula, uhaya giki, Iki biswe tukubonaga mhola ningi muli bebe, na kulwa bulanghani wako mihayo ya bubi ikulonjiwagwa chiza ngʼwihanga ili, Ee, Feliki nkumilijiwa, tukwiyanukulaga yose buli ikanza na buli ipande na kulumba kose. Aliyo natizongeja kukunoja, nakwikumbilija utwigwe mihayo mido kulwa bulyehu wako. Iki tumona ngosha ngʼwenuyu ali nghala, ngʼwandija wa bugomi mu Bayudaya bose mu si jose, ntongeji ntale wa kazunije ka Banazorayo. Hangi wei wali ugema kusosohaja hekalu, huna tundima: twali tutogilwe kunekanya mu shimile sha shilagilo shiswe; Aliyo Lusia ntale wa bashilikale ushika, ungʼwinja mu makono giswe na nguzu ningi, Ubalagila babuji bakwe giki, bize kuli bebe: nangho ulu ungisilija, bebe ngʼwenekele wadula kumana mihayo yose iyo tulimulila. Bayudaya nabo bisangija kumula, buhaya mihayo iyi ili giko. Aho gavana unsonela nkono giki, ahaye, Paulo ushosha giki, Iki namanile bebe uli nekanya wa ihanga ili miaka mingi, nakwitolongola mihayo yane na buyegi kutinda. Iki wadula kumana giki, kufuma aho nali nulinha kuja Yerusalemi kulamya, jitinabita shiku kutinda ikumi na ibili; Nulu bali batanisangile nakuhalalilaga na munhu mu hekalu, nulu kwita nzambo ngʼwibita, nulu ngʼwibilingilo, nulu mu nzengo; Nulu batudula kunikanilija mihayo iyo balinibulila haha. Aliyo mhayo uyu nagutambula kuli bebe giki, mu Nzila iyo bakuyihayaga ya nyagomi, hi yene nakuntumamilaga Mulungu wa bakulugenji biswe, nayizunije yose yaandikwa mu shilagilo na mu bahangi; Ndi nako kwisagilwa kuli Mulungu uko boi benekele bakuzunije giki, Kulabiza ho kujuka kwa bafu, kwa batungilija na abati batungilija. Nane nakwimanilijaga mu mhayo uyu giki, nabize gwa na wiyanguji ubuti na kilingo mu butongi wa Mulungu na wa banhu. Haha hanuma ya miaka mingi nali niza kubenhela ba ihanga lyane bugabi na sha kufunya. Mu shenisho bamo ba Bayudaya bafumile Asia bunisanga nejiwa mu hekalu, yali iti ngʼwibita nulu na buyombo. Shibigelile benabo kubiza ho mu butongi w ako banibule, ulu ninga bali na mhayo kuli nene. Nulu benaba benekele ni bahayage ulu bali bubona buti butungilija muli nene aho nali nimila mu butongi wa ibanza, Ulu iti kulwa ilaka ili limo, ilo nuhamuka aho nimilile hagati yabo giki, Kulwa nguno ya kujuka kwa bafu nalekanyiwa mu butongi wingʼwe lelo iyi. Aliyo Feliki, iki witegeleja wima mihayo ya Nzila yeniyi, ubitujatuja, uhaya giki, Lusia, ntale wa bashilikale aho akutulumenha, nakupima mihayo yingʼwe. Unagila ntale wa bashilikale igana kuninda Paulo, anekele wiyabi, atizunemeja nulu umo wa banwani bakwe kuli tumamila nulu kwiza kuli wei. Hanuma ya shiku jimo, Feliki ushika hamo na nke wakwe, Drusilla, u ngʼwene Nyudaya, ungʼwitana Paulo, undegeleka mihayo ya kuzunya ukuli muli Kristo. Aho ungʼwigwilija mihayo ya butungilija, na ya kwilinda, na ya nsango uguhaya kwiza, Feliki udingʼwa boba, ushosha giki, Haha lulu jaga, aho nakubona ngʼwanya, nakukwitana bebe. Nahene wali wisagilwa kwinhiwa feza na Paulo giki, antungule: kulwa iyo umala kungʼwitana nghangala ningi, uhoya nanghwe. Aliyo aho yushila miaka ibili, Porkio Festo udima nimo gwa ngʼwa Feliki; na Feliki, iki walatogilwe Bayudaya bantogwe, uneka Paulo mu butungwa. Aho Festo wali wingila mu chalo, hanuma ya shiku idatu ulinha kuja Yerusalemi kufuma Kaisaria. Hunaho ngabiji ntale, na batale ba Bayudaya bumanikija mhayo gwa ngʼwa Paulo; bungʼwikumbilija, Bunomba kigongo giki, angʼwitane ize Yerusalemi; babone kungʼwibandila bamulage mu nzila. Huna lulu Festo ushosha giki, Paulo alilindwa uko Kaisaria; nanghwe ngʼwenekele wahaya kuja ko wangu. Uhaya giki, Abo bali na budula mu bingʼwe batulumenhe hamo na nene bakamule, ulu guli ho mhayo gwa bubi muli munhu uyo. Aho wali ushinga nabo kutinda shiku ikumi, utulumenhela Kaisaria; ku ntondo aho wigasha ngʼwisumbi lya kulekanija, ulagila Paulo enhwe. Aho ushika, Bayudaya abutulumenha kufuma Yerusalemi bimila bampindije, bumula Paulo mihayo mingi na milambu, iyo bali batudula kwiyolecha nghana yaho; Aho Paulo witolongola giki, Natakenagulile nulu ku shilagilo sha Bayudaya, nulu ku hekalu, nulu kuli Kaisari. Aliyo Festo, iki walatogilwe Bayudaya bantogwe, unshokeja Paulo uhaya giki, Utogilwe kulinha kuja Yerusalemi, ukalekanyiwe mihayo yeniyi kwenuko mu butongi wane? Aliyo Paulo uhaya giki, Nene nimilaga aha mu butongi wa isumbi lya kulekanija lya ngʼwa Kaisari, uko shinigelelilwe kulekanyiwa: Bayudaya natabasobije mhayo, gitumo nu bebe umanile chiza no. Iki ulu nene nasobya, nulu ulu nitile mhayo ugwigelelilwe kucha, natulema kucha; aliyo ulu guti ho mhayo gwa nghana mu yeniyo balinibulila, ati ho munhu uyo wadula kunituula mu makono gabo. Nene nalilila nakalekanyiwe na Kaisari. Huna lulu, aho Festo wali wamala kulungalunga na ba ibanza, ushosha giki, Wamala kulilila ukalekanyiwe na Kaisari! nahene ukuja kuli Kaisari. Aho shiku jimo jabita Ntemi Agripa na Bernike butulumenhela Kaisaria, kungisha Festo. Aho bushinga ko shiku ningi, Festo unsombolela ntemi mihayo ya ngʼwa Paulo, uhaya giki, Ali ho ngosha umo uyo waalekwa mu butungwa na Feliki. Aho nali nali mu Yerusalemi, bagabiji batale na banamhala ba Bayudaya bunimanikija mihayo yakwe, bulomba alekanyiwe nsango. Nane nubashokeja giki, Iti chimile cha Barumi kuntuula ho munhu ose kubulagwa, aho uyo wabulwa atali kwibona na babuji bakwe bushu ku bushu, nanghwe abize na ngʼwanya kwitolongola mu iyo wabulilwa. Kulwa iyo aho bali bibilinga aha, nali natudila, aliyo ku ntondo nali nigasha ngʼwisumbi lya kulekanija, nulagila ngosha ngʼwenuyo enhwe. Aliyo aho babuji bimila bali batamulile mhayo gwa bubi gitumo nali niganikila; Aliyo bali bali na mabujo gangi na gangi kuli wei ga dini yabo benekele, na mihayo ya munhu umo Yesu, Uyo waacha, Uyo Paulo ugagana kuhaya giki, Ali mpanga. Na nene, iki nuzwangana kagisiligije ka mihayo yeniyi, numu ja ulu atogilwe kuja Yerusalemi, akalekanyiwe kwenuko mu mihayo yeniyi. Aliyo iki Paulo ulilila alindwe, kukalekanyiwa na Augusto, nulagila giki, alindwe kushisha aho nalantuma kuli Kaisari. Huna Agripa ungʼwila Festo giki, Nu nene nane natogilwe kungʼwigwa munhu ngʼwenuyo. Nanghwe uhaya giki, Ntondo ukungʼwigwa. Ku ntondo lulu, aho Agripa wiza, hamo na Bernike, na magaka mingi, nabo bingila mu lwande lwa kwigwila mihayo, hamo na batale ba bashilikale na bagosha batale ba nzengo, huna lulu iki Festo ulagila, Paulo wenhwa. Na Festo uhaya giki, Ntemi Agripa na bagosha bose abo muli ho aha hamo na biswe, mulimona uyu, ngʼwenuyo banhu bose ba Bayudaya bunidayila uko Yerusalemi na henaha, buhamuka giki, Shi tangʼwigelile kwikala mpanga. Aliyo aho nitegeleja giki, walatitile mhayo ugwigelelilwe kucha, nanghwe ngʼwenekele ulilila akalekanyiwe na Augusto, nupima lulu kuntuma. Aliyo nati na mhayo gwa gete gete kuli wei gwa kungʼwandikila seba wane. Kulw;a iyo nangʼwenhaga mu butongi wingʼwe, na kutinda no mu butongi wako, Ee Ntemi Agripa, aho wamala kubujiwa mihayo yakwe, nabone mhayo gwa kwandika; Iki nene napima giki, ili ya buchiluchilu kuntuma ntungwa, na kumanicha yaya mihayo ya kubulwa kwakwe. Hunaho Agripa ungʼwila Paulo giki, Wazunilijiwa kuhaya mihayo yako. Huna lulu Paulo utama nkono gwakwe, witolongola giki, Nalibona ndi na lubango, Ee Ntemi Agripa, iki nahaya kwitolongola mu butongi wako lelo iyi, mu mihayo yose iyo nalibulilwa na Bayudaya: Kutinda no, iki bebe uli mani no wa shimile shose na mabujo ishili mu Bayudaya: kulwa iyo nakwikumbilija unidegeleke na kwiyumilija. Bayudaya bose bamanile kashiminzile kane kufumila mu buyanda wane, gitumo kali kali kufuma kwandia ngʼwihanga lyane mu Yerusalemi, Benabo banimanile kufuma kale, ulu batogilwe bukanila, giki, naali Mfarisayo gitumo kali kazunije ka dini yiswe akali wima kutinda. Na haha nimilaga aha nalilekanyiwa kulwa nguno ya kwisagilwa kwa kwisagija uko Mulungu wali wabinha bakulugenji biswe; U kwisagija kwenuko ngʼanda jiswe ikumi na ibili jilisagilwa kukushikila, jikutumamilaga Mulungu na bukomezu bujiku na limi. Na nene nalibulwa na Bayudaya, Ee Ntemi Agripa, kulwa kwisagilwa uku. Ni buli lulu ngʼwapima guli mhayo ugutudula kuzunyiwa, ulu Mulungu wabajucha bafu? Na nene nghana nali niganika mu moyo gwane giki, shinigelile kwita mihayo mingi ya wilemelwa na lina lya ngʼwa Yesu wa Nazareti. Hangi nali nita chene mu Yerusalemi: nali nubyubatunga a bela bingi mu jela, iki nali nanukula budula kufuma ku bagabiji batale; hangi aho bakubulagagwa, nuzunilija nane. Hangi nubinha nsango nghangala ningi mu mabilingilo gose, nubahadikija kunduka Mulungu; nubapelanilwa no giti ndi nsaji, nubanyajanyaja nulu kushisha ku mizengo ya bugeni. Mu yeniyo aho nali nuja Damasko ndi na budula na kulagilwa kufuma ku bagabiji batale, Limi ntwe-gati, Ee Ntemi, mu nzila nubona isana lyufuma ngʼwigulu, ilikilile kwaka kwa limi, lyunakila, linipindije mapande gose, u nene nabo abali bushiminza hamo na nene. Aho tugwa ha si bose, nigwa ilaka nulungalunga mu lulimi lwa Kihebrania, lyuniwila giki, Saulo, Saulo, ulininyajanyaja ni buli? Ili kilambu kuli bebe kupanda milambi ku someke. Nuhaya giki, Bebe uli nani, Seba? Seba uhaya giki, Nene ndi Yesu Uyo bebe ukuninyajanyajaga. Aliyo bukaga, na magulu gako wima, iki nakwilongelaga bebe kulwa nguno iyi giki, nakutuule ho ubize ntumami na nkaniji wa mihayo iyo wayibonaga, na wa mihayo iyo nakukwilongelela mo; Giki, nakukupija mu banhu bako, na mu bana mahanga, abo nalikutuma kubo, Ukabafumbule miso gaho, bagaluke kwinga mu giiti bingile ngʼwisana, na kwinga mu budula wa ngʼwa Shetani bashike kuli Mulungu, banukule kulekejiwa kwa shibi na wingiji mu benabo beejiwa kulwa kuzunya ukuli muli Nene. Huna yene, Ee Ntemi Agripa, nali natulema kwigwa kolechiwa kwenuko kwa ngʼwigulu; Aliyo nali nandia kubalomela abo ba mu Damasko, na mu Yerusalemi, na mu si yose ya Buyudaya, na ku bana mahanga giki, boye na kungalukila Mulungu, na kwita Shitwa ishigelelilwe koya. Kulwa nguno ya mihayo yeniyo, Bayudaya bali Chunidima nali nali mu hekalu, bugema kunibulaga. Huna lulu iki nali nupandika kugunanwa kufuma kuli Mulungu, nakimilaga na kushisha lelo iyi, nubyukanila ku bado na batale, natahayaga mhayo gungi ulu iti iyo bahangi na Musa baahayaga ilabiza ho; Giki, shigelile Kristo kuluhiwa, na kubiza wa kwandia wa kujuchiwa mu bafu, abalomele isana banhu bakwe na bana mahanga. Aho witolongola mu mihayo yeniyi, Festo uhaya na ilaka itale giki, Paulo, wasalaga; kwilanga kwako kwingi kuli-kugalucha kubiza nsaji. Paulo uhaya giki, Natasalile, Ee Festo nkumilijiwa; aliyo nakuhayaga mihayo ya nghana na ya masala mashikanu. Iki Ntemi amanile mihayo yeniyi, huna yene nalilungalunga nanghwe na bugimu; iki namanile no giki, kuduhu mhayo nulu gumo mu yeniyi ugwibisile kuli wei, iki mhayo gwenuyu gwali gutitilwe ha mhujo. Ntemi Agripa, wabazunya bahangi? Namanile giki, wabazunya. Agripa ungʼwila Paulo giki, Mu mihayo mido ulinikongakonga kunita kubiza Nkristo. Paulo uhaya giki, Nanomba Mulungu giki, nulu mu mido, nulu mu mingi, iti bebe wike aliyo na benabo bose abalinigwa lelo iyi, babize giti nene umo ndi, kuleka minyololo iyi. Aho wali wamala kuhaya yeniyi Ntemi ubuka, na gavana na Bernike, nabo abigashije hamo nabo. Bisunda ha mhujo, bilunjalunja benekele na benekele buhaya giki, Munhu ngʼwenuyu atitaga mhayo nulu gumo ugwigelelilwe kucha nulu minyololo. Agripa ungʼwila Festo giki, Munhu ngʼwenuyu ni wadula kutaligulilwa, ulu ni walatalililile akalekanyiwe na Kaisari. Aho yupingʼwa giki, shitwigelile kulinhya itanga kuja Italia, bungʼwinha ko Paulo na batungwa bamo bangi mu makono ga ntale umo wa bashilikale igana, lina lyakwe Yulio, wa ibita lya Augusto. Aho twingila mu ngalaba ya Adramutio, iyuhaya kusingija mu mapande ga ha mialo ya Asia, tulinhya itanga, Aristarko muna Makedonia wa Thesalonika walali hamo na biswe. Ku ntondo tukola Sidoni: Yulio ungʼwitila Paulo chiza, unzunilija kuja ku banwani biye, anukule kugunanwa. Kufuma kwenuko tulinhya itanga, tusingija musilili ya Kupro, iki miyaga yali yutufumila ku butongi. Aho tubita mu nyanza ya lwande lwa Kilikia na Pamfulia, tushika Mura, nzengo gwa Lukia. Kwenuko ntale wa bashilikale igana uyisanga ngalaba ya Aleksandria ijile Italia; utwingija mo biswe. Tuja hado hado shiku ningi nose, tushika Knido na makoye no, iki nyaga gwali gutushokeleja tusingija musilili ya Krete tulolelile Salmone; Twikilimbija hihi na ngʼwalo na makoye no kushisha tushika kwipande limo likitanagwa Bukolelo wa Wiza; hihi na henaho gwali nzengo gwa Lasea. Aho ikanza itale lyali lyabita, na lugendo lwa mu nyanza lubiza lwa kwihiga, iki shiku ja kudila nzala jali jabita, huna Paulo ubahugula, Ubawila giki, Bagosha, nabona giki, lugendo lwenulu lukubiza na ngulala na kujimija kwingi, kuti kwa shikolo na ngalaba gwike, aliyo kwa bupanga wiswe hangi. Aliyo ntale wa bashilikale igana ungʼwigwa ngobi na ngʼwenekele wa ngalaba kutinda mihayo iyo yali yuhayiwa na Paulo. Na iki bukolelo wali buti wa wiza wa kwikala ho mu shiku ja mbeho, bingi mubo bulomana kulinhya itanga kwinga kwenuko, ulu yudulika kushika Foiniki, na kwikala uko mu shiku ja mbeho, hu wene bukolelo wa Krete, ubulolelile ibano-ngʼweli, na dakama-ngʼweli. Aho nyaga gwa dakama guhwehweta chiza chiza, biganika giki, bupandika umo balupimaga, buzubula nanga, bikilimbija hihi na Krete. Kakanza kado nyaga gwa nguzu, ugukitanagwa Eurakulo, gufuma ko, guyitula ngalaba. Aho ngalaba yupelengechiwa, nayo yali itudula kugulola nyaga, twileka, tutwahva. Tuja musilili ya kajinga kakitanagwa Klaudo, tubiza na makoye matale kulitunga lyato; Aho bali bumala kulilinhya, butumamila bugunani, buyitunga ngalaba buyigobya ngoye musilili yayo; bogoha batizutinya mu maseni ga Surtisi, bicha itanga, butwalwa giko duhu. Aliyo iki twali tubucliabuchiwa no na nyaga ntale, ku ntondo bandia kuponya shikolo mu nyanza; Na lushiku lwa kadatu tuponya shikolo na makono giswe benekele. Aho limi nulu masonda shali shitutwakila shiku ningi, na nyaga ntale no gubyutukoya, nose kugaya kwisagilwa kose kwa kupijiwa kwiswe. Aho jubiza shiku ningi na kulya yaya, hunaho Paulo wimila hagati yabo uhaya giki, Bagosha, shali shingʼwigelile kunigwa nene, na kukija kulinhya itanga kwinga Krete; ni mutabonile ngulala iyi na kujimija uku. Nahene lulu namuganikila timbyagi ngholo; iki kutalabiza kujimija bupanga nulu bumo mu bingʼwe, aliyo kwa ngalaba gwike. Iki bujiku wenubu malaika wa Mulungu, Uyo nene ndi wakwe, hangi Uyo nakuntumamilaga, wali wimila hihi na nene, Uhaya giki, Utizogoha Paulo, shikwigelile kwimila mu butongi wa Kaisari; na lolaga, Mulungu wakwinhaga bebe bose abali hamo nangho mu lugendo. Kulwa iyi, bagosha, timbyagi ngholo: iki nanzunya Mulungu, giki, ikubiza giko gitumo nawililwe nene. Aliyo shitwigelile kuponyiwa ngʼwijinga limo. Bujiku wa ikumi na bune aho bushika, tubyutwalwa kunu na kunu mu nyanza ya Adria, bujiku hagati batwaji ba ngalaba bali biganika begela ku si numu: Bupima bushimu wa minzi, bubona buli shita makumi abili; buja hado ho bupima hangi, bubona buli shita ikumi na shitano. Iki bogoha batizupamilwa mu mapande ga shiganga, buponeja nanga ine kufuma ku bugobelo, bukumbula wagaluke. Batwaji ba ngalaba aho bali bukoba kupela kwinga mu ngalaba, nabo bicha lyato mu nyanza bugemela giti balihaya kuponya nanga ja ku lulimi, Paulo ungʼwila ntale wa bashilikale igana, na bashilikale giki, Ulu benaba batikala mu ngalaba, mutudula kupijiwa. Huna lulu bashilikale bujibuta ngoye ja lyato, bulilekela ligwe. Aho lyuhaya kubiza dilu, Paulo ubakomeleja bose balye, uhaya giki, Lelo lushiku lwa ikumi na ine mulindilile na kudila nzala, mutalile kinhu. Kulwa iyi namukomeleja mulye shiliwa: iki ili ya ku bupiji wingʼwe: iki lutalajimila luywili nulu lumo ku ntwe gwa munhu ose mu bingʼwe. Aho umala kuhaya yeniyi, usola ngati, unumba Mulungu mu butongi wa bose; ugumeganya, wandia kulya. Huna lulu bose butimbya ngholo, nabo bulya shiliwa. Bose aba twali tuli mu ngalaba, twali tuli banhu magana abili na makumi mpungati na batandatu. Aho biguta, buyibupya ngalaba, buponeja ngano mu nyanza. Aho yubiza dilu, bali batuyimana i si; aliyo bubona ikondo limo ilili na ngʼwalo gwa luseni, bulomana kuyikoja ngalaba henaho ulu yudulika; Nabo bujibuta ngoye ja nanga bujileka mu nyanza, bujiteja ngoye ja magobelo; bulinhya itanga lya ku butongi lya kudima nyaga, belema kuja ha ngʼwalo. Iki bali bushikila ha lwande aho jisangigije nyanza ibili, buyikoja ngalaba umo; na lulimi lwa ngalaba lwifufunika ho lwikala lutunegenaga, aliyo bugobelo wandia kubinzagulwa, kuhva nguzu ja mahuli. Kulomana kwa bashilikale kwali kuli giki, bababulage batungwa, atizujiha nulu umo wabo na kupela. Aliyo ntale wa bashilikale igana iki walatogilwe kumpija Paulo, ubalemeja batizita gitumo bulomana kwita; ubalagila abo abudula kujiha, batonge kwiponeja mu nyanza, bashike ku si numu; Nabo abasaga ho, bangi ha mbawa, na bangi ha shinhu shingi sha mu ngalaba; yubiza giko bose bupila bushika ku si numu. Na aho twali tumala kupila, huna lulu tumana giki, ijinga lyenilo likitanagwa Melita. Bana mahanga benabo butwitila chiza niyo no; iki aho bupemba moto, butwegeleja biswe bose, kulwa nguno ya mbula iyali yutula, na kulwa nguno ya mbeho. Aho Paulo wali umala kusomela iganda lya nghwi, na ujituula ha moto, kipili yufuma kulwa kusebelwa moto, yukonzela ha nkono gwakwe. Aho bana mahanga bulibona i lishinhu linungelile ha nkono gwakwe, biwila boi bike giki, Munhu ngʼwenuyu ali mulagi gete, uyo nulu wapilaga mu nyanza, nahene butungilija butunzunilijaga kwikala mpanga. Huna lulu wei ulisasamulila i lishinhu mu moto, atasatilwe kabi kose. Aliyo bali bulindila giki, akubimba, nulu hamo akugwa ha si haho na haho ucha; aho bulindila ikanza itale, na bubona giki, atitilwe kilingo nulu kido, bugalucha maganiko gaho, buhaya giki, wei ali mulungu. Hihi na lwande lwenulo yali ili ho migunda ya ntale wa ijinga, lina lyakwe Publio; ngʼwenuyo wali utwanukula na moyo gwa bunwani utuchumbela shiku idatu. Ikabiza aho ise wa Publio walalalile ukoyakoyiwa ns wiza na kupanza mininga; Paulo wingila kuli wei, ulomba, untuulila makono, umpija. Aho yeniyi yali yitwa, bangi abali bali na busatu ngʼwijinga lyenilo biza, nabo bupi ji wa: Nabo butukuja na ikujo itale; aho twali twinga ko, butunongha shinhu isho twali tushigayiwa. Hanuma ya mieji idatu twali tuja mu ngalaba ya Aleksandria iyali yikala ngʼwijinga shiku ja mbeho, lumengho lwayo lwene “Ba Mabasa.” Aho tukola Surakusa, twikala ko shiku idatu. Kufuma kwenuko tupinda tushika Regio; na hanuma ya lushiku lumo nyaga gwa dakama gufula, lushiku lwa kabili tushika Puteoli; Henaho tubona badugu, twikumbilijiwa kwikala nabo shiku mpungati; na giko tushika Rumi. Badugu ba kwenuko, aho bali bigwa nghulu jiswe, biza kutusungʼanha ku Apioforo, na ku Trestaberne; Paulo aho ubabona, unumba Mulungu, uzalabana. Aho twali twingila mu Rumi ntale wa bashilikale igana ubinha batungwa mu nkono gwa ntale wa balanghani, aliyo Paulo uzunilijiwa kwikala wiyene hamo na nshilikale uwali uninda. Ikabiza hanuma ya shiku idatu Paulo ubitana abo abali batale ba Bayudaya: aho bibilinga ubawila giki, Bagosha badugu, nene natitile mhayo gwa wanishi ku banhu biswe, nulu ku shimile sha bakulugenji biswe, aliyo ninhiwa ko mu makono ga Barumi natungilwe kufuma Yerusalemi; Nabo aho bumala kunigisilija bali batogilwe kunitaligulila, iki yali iti ho nguno nulu imo muli nene ya kunibulaga. Aliyo aho Bayudaya bali bulema mhayo uyo nuhadikijiwa kulilila nakalekanyiwe na Kaisari; iti giti nali nali na mhayo gwa kulibula ihanga lyane. Kulwa nguno ya mhayo uyu nangʼwitanaga bingʼwe, namubone na kulungalunga na bingʼwe, iki natungilwe na nyololo uyu, kulwa nguno ya kwisagilwa kwa Israeli. Nabo bungʼwila giki, Biswe tutanukulile nyaluba ja mihayo yako kufuma Buyudaya, hangi atashikile nulu umo wa badugu uyo watusombolela nulu kulungalunga mhayo gwa bubi kuli bebe. Aliyo tutogilwe kwigwa kuli bebe iyo ukwiganikaga, iki mihayo ya kazunije aka imanikile ku biswe giki, kakusukilijiwagwa hose hose. Aho bulagana nanghwe lushiku, bingi bali biza kuli wei mu numba umo wali wikala; nanghwe ubasombolela wima, na kukanila butemi wa Mulungu, ubakonieleja kuzunya mihayo ya ngʼwa Yesu kufuma mu shilagilo sha ngʼwa Musa na mu bahangi, kufuma dilu kushisha mhindi. Bangi buzunya mihayo iyali yuhayiwa hene, aliyo bangi bali batuzunya. Aho bali batushekana boi bike, buja, aho Paulo wali wamala kuhaya mhayo gumo giki, Moyo Ngʼwela wali ulungalunga chiza ku bakulugenji biswe muli nghangi Isaya, Uhaya giki, Jaga ku banhu aba, ukahaye giki, Kwigwa mukwigwa na mutalitegeleja nulu na hado; na kulola mukulola, na mutalabona nulu na hado: Iki ngholo ya banhu aba yagunaga, na matu gaho gadidohelwa kwigwa, na miso gabo bagalilimaja; giki, batizubona na miso gabo, na kwigwa na matu gabo, na kwitegeleja na ngholo yabo, na kugaluka hangi, na Nene nabapije. Kulwa iyo imanike ku bingʼwe giki, bupiji ubu wa Mulungu watungʼwa ku bana mahanga; benabo bakuwigwa. Aho wali umala kuhaya mihayo yeniyi, Bayudaya buja, bubiza na kwibugilija kwingi boi bike. Paulo wali wikala miaka ibili nugima mu numba yakwe, iyo wali wifunija, nanghwe ubegeleja bose abali bingila kuli wei, Ubyulomela butemi wa Mulungu, na ulanga mihayo ya Seba Yesu Kristo, na bugimu bose, walatulemejiwa na munhu. Paulo, nsese wa ngʼwa Yesu Kristo, ngʼwene ntungʼwa, wiitanwa, uwaakongʼwa kulomela Evangeli ya Mulungu, (Iyo Wei utonja kwisagija kale mu bahangi bakwe mu Shandikwa Shela.) Ya kunghaya Ngʼwana wakwe, Uyo akabyalwa mu kitungilwe cha mili mu bubyile wa ngʼwa Daudi, Uyo umanikijiwa na budula giki, ali Ngʼwana wa Mulungu gitumo guli u moyo gwa wela kulwa kujuka mu bafu; Ngʼwene Yesu Kristo, Seba wiswe; Muli Wei twaanukula kigongo na butungʼwa kushisha bakulyehele kuzunya mu mahanga gose, kulwa nguno ya lina lyakwe; Mu benabo na bingʼwe muli bitanwa ba ngʼwa Yesu Kristo; Ku bose abali mu Rumi, abo Mulungu amutogilwe, abitanwa bela: Kigongo na mhola shibize ku bingʼwe kufuma kuli Mulungu Siswe, na kufuma kuli Seba Yesu Kristo. Kwandia, nanumba Mulungu wane muli Yesu Kristo kulwa nguno ya bingʼwe bose, iki kuzunya kwingʼwe kukumukile mu si yose. Iki Mulungu Uyo nakuntumamilaga mu moyo gwane mu evangeli ya Ngʼwana wakwe, ali nkaniji wane gitumo nakumuhayaga gwa gwa gwa mu kulomba kwane. Nakulombaga giki, ulu mu nzila yose haha nose nazunilijiwe mu butogwa wa Mulungu kwiza ku bingʼwe. Iki nakumbula kumubona, nangʼwinhe bingʼwe cha kwinha cha ki-moyo, giki, mujamiwe; Yene giki, nalungujiwe hamo na bingʼwe, kulwa kuzunya kwiswe, kwingʼwe na kwane. Hangi, badugu, natatogilwe bingʼwe mukije kumana giki, nghangala ningi nali nupima kwiza ku bingʼwe, nabize na matwajo gamo na gamo mu bingʼwe, gitumo na mu bana mahanga bangi, (aliyo najijiwa kushisha haha). Nali nabo bugasa ku Bagriki na ku bana mahanga, ku ba masala na ku bachiluchilu. Giko, gitumo ndi nene, namalilile kumulomela evangeli na ku bingʼwe aba muli mu Rumi. Iki natudingʼwa minala kulwa evangeli ya ngʼwa Kristo, iki ili budula wa Mulungu kushikilija mu bupiji buli munhu uwazunya, kwandia kuli Nyudaya na hangi kuli Ngriki. Iki muyo butungilija wa Mulungu bulikundulwa kufuma mu kuzunya kushika mu kuzunya: gitumo gwaandikwa giki, Ntungilija alikala mpanga kulwa kuzunya. Bupelanu wa Mulungu ku shibi sha banhu bose Iki bupelanu wa Mulungu bulikundulwa kufuma ngʼwigulu ku bukitigwa bose, na buti butungilija wa banhu abayilemeja i nghana mu buti butungilija. Kulwa nguno iyamanika ya Mulungu ili hape kubo, iki Mulungu uyigengelecha kubo. Iki iyo yakwe itabonagwa kufuma kusengʼwa kwa si ikwitegelejiwagwa chiza, yitegelejiwa na isho shaabumva, i yene budula wakwe wa welelo na welelo na bumulungu wakwe, batizubiza na gwa kwiyandila. Iki aho bali bumana Mulungu, hali batunkuja gitumo ali Mulungu, nulu kunumba yaya; aliyo bubiza badoshi mu maganiko gabo, na ngholo yabo iyititegelejaga yitilwa giiti. Aho bihaya benekele bali ba masala, buchiluhala, Buligalucha ikujo lya Mulungu Uyo ati na kubola, mu chikolile cha suso ya munhu wa kubola, na cha noni, na shinhu sha magulu ane, na sha kwigwesa. Kulwa iyo Mulungu ubagumanija mu kwikumva kwa ngholo jabo kushika mu busoso, bakenagule ikujo lya mibili yabo benekele na benekele: Iki buyikabanya i nghana ya Mulungu na bulomolomo, bulamya na bukitumamila icho chaasengʼwa, kukila Nsemi Uyo alikumilijiwa welelo na welelo. Amina. Kulwa iyo Mulungu ubagumanija ku manamba ga minala; iki na bakima babo bukabanya katumamile ka kitungilwe na ako kati ka kitungilwe: Bagosha nabo giko, buleka katumamile ka kitungilwe cha bakima, baaka mu kwiyikumva benekele na benekele, bagosha na bagosha bita iyitigelile kwita, banukula mubo benekele mhela iyigelelilwe bubihya wabo. Na gitumo bali batuzunya kwikala na Mulungu mu bumani wabo, Mulungu ubagumanija ku maganiko agatuzunilijiwa, kwita iyitigelile; Bizulile na yose iyiti ya butungilija, bujingi, buhunga, kwikumva kwa bubi, isubi; bizulile na wilu, bubulagi, wanishi, bulembalembi, bukolo bubi; bali batulatuji; Bali basonghanya, bankolwa Mulungu, balulu, badoshi, bikumilija, basemi ba mihayo ya bubi, batabigwaga babyaji babo, Bati na kwitegeleja, babulagi ba bulagane, bati na butogwa, batuyangulagwa, bati na kigongo; Benabo, nulu bamanile kalekanije katungilija ka Mulungu, giki, abakitaga yeniyo bigelelilwe kucha, batugelelaga kuyita duhu, aliyo bizunilija nabo abakitaga yeniyo. Kulwa iyo uti nago gwa kwiyandila, bebe munhu, uyo akunekanyaga ungi, iki mu iyo wanekanya ungi wilekanya ngʼwenekele nsango; iki bebe uyo ulilekanya, nangho ukwitaga yeniyo duhu. Tumanile giki, kulekanya kwa Mulungu kuli kwa nghana ku benabo abakwitaga yeniyo. U bebe uyo ulibalekanya benabo abakwitaga yeniyo, kunu nangho ukwitaga yeniyo, angu! uliganika giki, ukupila mu nsango gwa Mulungu? Nulu hamo wabudalaha wingi wa wiza wakwe na kulindila kwakwe, na kwiyumilija kwakwe, utamanile giki, wiza wa Mulungu bulikutongela bebe ushike mu koya? Aliyo kulwa bugunu wako na ngholo iti na koya ukwibikilaga bupelanu mu lushiku lwa bupelanu na kukundulwa kwa kulekanya kwa nsango mu butungilija, u kwa Mulungu; Uyo alangʼwinha buli munhu gitumo Shitwa shakwe umo shili: Benabo abiyumilija mu kwita ya wiza, bakukobaga ikujo na kukumilijiwa na butubola, alabinha bupanga butushila: Aliyo benabo abali na wilwisha, na batuyigwaga i nghana, aliyo bakuwigwaga ubuti butungilija, balabona bukali na bupelanu, Lunyalo na busunduhazu ku buli bupanga wa munhu uyo akwitaga bubi, kwandia kuli Nyudaya na hangi kuli Ngriki, Aliyo ikujo na kukumilijiwa na mhola ku buli munhu uyo akuyitaga ya wiza, kwandia kuli Nyudaya na hangi kuli Ngriki: Iki kuli Mulungu kuti ho kusolanya mu banhu. Iki bose abita shibi abati mu shilagilo, kuyagala balayagala bati mu shilagilo: na bose abita shibi abali mu shilagilo, balalekanyiwa nsango na shilagilo; (Iki iti badegeleki ba shilagilo bali batungilija mu butongi wa Mulungu, aliyo a biiti ba shilagilo, a bene balatungiligijiwa. Iki bana mahanga abati na shilagilo aho bakwitaga mu kitungilwe iyo ya shilagilo, benabo, nulu bati na shilagilo, babiza shilagilo ku benekele; Benabo bolecha nimo gwa shilagilo gwandikiie mu ngholo jabo, wiyanguji wabo bukubakanilaga, na maganiko gabo genekele na genekele nago gubabula, nulu kubahvilila;) Mu lushiku aho Mulungu alayilekanya ya kwigeniha ya banhu, muli Yesu Kristo, gitumo evangeli yane umo ili. Aliyo bebe ulu ulitanwa Nyudaya, na ushisanije shilagilo, na wikumilija muli Mulungu, Kangi umanile iyo Wei atogilwe, na ukukomanyaga iyo iyili ya wiza, iki ulangilwe mu shilagilo; Na wisanya ngʼwenekele giki, uli ntongeji wa baboku, i lisana lya benabo abali mu giiti; Nghuguji wa bachiluchilu, nangi wa bana belele, iki uli nako kahelele ka; bumani na ka nghana mu shilagilo: Bebe uyo ukunangaga ungi, angu, utilangaga ngʼwenekele? bebe uyo ukulomelaga giki, kwiba yaya, angu, ukwibaga u bebe? Bebe uyo ukuhayaga giki, kushihya yaya, angu, ukushihaja u bebe? bebe uyo ukushikolagwa shikolile sha kulamiwa, angu, ukusonzaga hekalu u bebe? Bebe uyo ukwikumilijaga mu shilagilo, mu kusobya kwa shilagilo, angu, ukundimyaga minala Mulungu? Iki lina lya Mulungu likudukagwa mu bana mahanga kulwa nguno yingʼwe, gitumo yaandikwa. Iki kusalwa kubelelile nghana, ulu uli ngʼwiiti wa shilagilo; aliyo ulu uli nsobya wa shilagilo, kusalwa lwako kwabiza butusalwa. Kulwa iyo, ulu uyo atasalilwe ushidima shilagilile sha shilagilo, butusalwa wakwe, angu, butubalwa giki, kusalwa? Nanghwe uyo atasalilwe mu kitungilwe, ulu ushishikilija shilagilo, angu, atukulekanya bebe u nsobya wa shilagilo, uyo uli na Shandikwa na kusalwa? Iki uyo ali Nyudaya wa kunze, ngʼwene ati Nyudaya, nuiu kusalwa kwa mili kwa kunze nako kuti kusalwa; Aliyo Nyudaya wa mugati u ngʼwene Nyudaya gete; na kusalwa kwa gete kwene uko kwa ngholo, kwa ki-moyo, kuti mu shandikwa; kukumilijiwa kwakwe kuti kwa banhu, aliyo kwa Mulungu. Nyudaya abakilile bangi kinahe lulu? nulu kusalwa kubelelile ki? Kubelelile no mu mihayo yose: kwandia iki boi baabikijiwa shihayile sha Mulungu. Ni ki lulu ulu bamo bali batuzunya? u butuzunya wabo bukuwita kubiza dalali wishigwa wa Mulungu? Na hado yaya! leka Mulungu ilonge ali wa nghana, aliyo buli munhu ali nomolomo; gitumo gwaandikwa giki, Wilonge uli ntungilija mu mihayo yako, na utinde aho ulilekanyiwa. Aliyo ulu buti butungilija wiswe bubukumilija butungilija wa Mulungu, tuhaye ki? Mulungu ati ntungilija iki wenha bupelanu? (Nalihaya mu ki-munhu.) Na hado yaya! ulu ili giko, Mulungu alabalekanya ba mu si kinahe? Iki ulu i nghana ya Mulungu yiyongeja kwikujo lyakwe mu bulomolomo wane, u nene nalilekanyiwa giti ndi ngʼwiiti wa shibi ni buli? Hangi ni buli tutuhayaga (gitumo twalembekejiwa, na gitumo bamo bugagana kuhaya, angu, tukuhayaga) giki, Twite i ya bubi, i ya wiza yize? kulekanyiwa kwabo kubatungiligije. Ni ki lulu? tubakilile wiza bangi? I yaya, nulu na hado: iki twatonga kubasula Bayudaya na Bagriki bubili wabo giki, bose pye bali hasilili ya shibi: Gitumo gwaandikwa giki, Ati ho ntungilija, nulu umo yaya: Ati ho uyo akwitegelejaga; ati ho uyo akunkobaga Mulungu. Bose baaleka nzila, bakenagukile bose pye; ati ho uyo akwitaga ya wiza, ati ho nulu umo yaya; Milo gwabo guli kigila ichigukile, butumamila bulembalembi na ndimi jabo: busungu wa nzoka buli hasilili ya milomo yabo: Nomo gwabo gwizulile na kuzuma na bululu; Magulu gabo gali mangu kuseja mininga; Kukenagula na luduko shili mu nzila jabo; Na nzila ya mhola batayimanile; Kuti ho kungʼogoha Mulungu mu butongi wa miso gabo. Tumanile lulu giki, iyo yose shilagilo shuhaya, shubawila benabo abali hasilili ya shilagilo; buli nomo gose gumumiwe, na si yose ibize ilindilile kulekanyiwa nsango na Mulungu: Kulwa iyo ati ho munhu wa mili, uyo alatungiligijiwa mu butongi wakwe kulwa shitile sha shilagilo; iki bumani gete wa shibi buli mu nzila ya shilagilo. Aliyo haha butungilija wa Mulungu ubulekanile na shilagilo wiigengelechiwa, bukanilwa na shilagilo na bahangi; Wene butungilija wa Mulungu ubukupandikagwa kulwa kunzunya Yesu Kristo, ubuli ku bose, hangi buli ha bose abazunya, iki kusolanyiwa kuti ho; Iki bose biita shibi na bulileba ho i likujo lya Mulungu; Butungiligijiwa dalali na kigongo chakwe kulwa kukomolwa ukuli muli Kristo Yesu: Ngʼwenuyo Mulungu waantuula ho hape Itubiza isangigijo kulwa kuzunya mu mininga gakwe giki, oleche butungilija wakwe mu kushibita shibi ishali Shitwa kale, mu kwiyumilija kwa Mulungu; Nahaya giki, oleche butungilija wakwe ngʼwikanza ili lya haha, wei amanike giki, ali ntungilija, hangi ali ntungiligija wa ngʼwenuyo anzunije Yesu. U kwikumilija kuli hali lulu? Kwafunyiwagwa hanze. Mu nzila ya shilagilo ki? I sha Shitwa? Yaya: aliyo na shilagilo sha kuzunya. Kulwa iyo twabala giki, munhu akutungiligijiwagwa kulwa kuzunya ukulekanile na Shitwa sha shilagilo. U Mulungu ali Mulungu wa Bayudaya bike? Ati Mulungu wa bana mahanga nabo? Ali chene, na wa bana mahanga: Iki ali Mulungu umo duhu Uyo akubatungiligija a basalwa mu kuzunya, nabo abatasalilwe kulwa kuzunya. Twashigalucha shilagilo shabiza dalali lulu kulwa kuzunya? Na hado yaya! Aliyo nghana twashiyumicha i shilagilo. Tukuyihaya kinahe lulu, iyo Abrahamu nkulugenji wiswe akabona mu kimili? Iki ulu Abrahamu wali utungiligijiwa na Shitwa, ali nayo ya kwikumiligija; aliyo iti mu butongi wa Mulungu. Iki Shandikwa shuhaya kinahe? Huna Abrahamu wali unzunya Mulungu, nako kukabalwa kuli wei kubiza butungilija. Aliyo kuli uyo akutumamaga, mhela yakwe itubalagwa giki, ya kigongo, aliyo ya bugasa. Aliyo kuli uyo atutumamaga, aliyo unzunya Uyo akubatungiligijaga a bahunga, kuzunya kwakwe kwabalilwa kuli wei kubiza butungilija. Gitumo Daudi nanghwe uluhaya lubango lwa munhu uyo Mulungu umalila butungilija, iti kulwa Shitwa, Uhaya giki, Bali ba lubango abo baalekejiwa bugomi wabo, nabo shibi shabo shaakundikijiwa. Ali wa lubango munhu uyo Seba atumalila shibi. Lubango lwenulu luli ku abasalilwe bike lulu, nulu na ku abatasalilwe? iki twahaya giki, U kuzunya kwakwe kukabalilwa kuli Abrahamu kubiza butungilija. Kukabalilwa kinahe lulu? Aho walasalilwe, nulu aho walatali kusalwa? Iti aho walasalilwe yaya, aliyo aho walatali kusalwa. Nanghwe wali wanukula kimanikijo cha kusalwa, kubiza lumengho lwa butungilija wa mu kuzunya uko walali nako aho walatali kusalwa; abize sabo wa bose abazunya nulu batasalilwe, benabo nabo babalilwe butungilija; Hangi abize sabo wa kusalwa, iti wa benabo abasalilwe bike, aliyo hangi wa abakushiminzaga kulondela mu bupandijo wa kuzunya kwa nkulugenji wiswe Abrahamu, uko walali nako aho walatali kusalwa. Iki kwisagija uko wali winhiwa Abrahamu na bubyile wakwe, giki, alabiza ngʼwingiji wa si, kwali kutubiza ho mu nzila ya shilagilo, aliyo mu nzila ya butungilija wa mu kuzunya. Iki ulu a ba shilagilo bali bingiji, kuzunya kwagaluchiwa kubiza kuti kinhu, na kwisagija kwagaluchiwa kubiza dalali. Iki shilagilo shikwitaga kwenha bupelanu; aliyo uko shilagilo shiti ho, kusobya nako kuti ho. Kulwa mhayo uyo butungilija buli wa mu kuzunya, bubize wa kigongo, u kwisagija kubize kudimiwa ku bubyile bose, iti ku bubyile wa mu shilagilo gwike, aliyo hangi ku wenubo wa mu kuzunya kwa ngʼwa Abrahamu, u nkulugenji wa biswe bose. (Gitumo gwaandikwa giki, Namala kukutuula ho kubiza sabo wa mahanga mingi) mu butongi wa Ngʼwenuyo wanzunije, Ngʼwene Mulungu, Uyo akubinhaga bupanga bafu, na ushitana shinhu ishiti ho giti shili ho. Uyo, nulu ya kwisagilwa yali iti ho, nahene wali ukuzunya u kwisagilwa, giki, akubiza sabo wa mahanga mingi, gitumo yuhayilwa giki, Bubyile wako bulabiza giko. Nanghwe iki walati ngokolo mu kuzunya, walatugwiganika mili gwakwe ugwabiza guchile (iki wali washisha hihi miaka igana mu bulamu wakwe), nulu kucha kwa nda ya ngʼwa Sara, Nulu walatukwiganiligija u kwisagija kwa Mulungu mu butuzunya, aliyo uguzuhiwa mu kuzunya, ungʼwinha Mulungu ikujo, Nanghwe walamanile gete giki, iyo Mulungu wisagigije, ali na budula wa kuyita. Kulwa iyo, yubalilwa kuli wei kubiza butungilija. Yali itandikilwe kulwa nguno yakwe gwike giki, yubalilwa kuli wei. Aliyo hangi kulwa nguno yiswe, abo tulihaya kubalilwa niswe giko, biswe abo tunzunije Uyo waanjucha Yesu, Seba wiswe, mu bafu, Ngʼwenuyo wali winhiwa ko kulwa mabusobya giswe, na ujuchiwa giki, tutungiligijiwe. Kulwa iyo, iki twaatungiligijiwa kulwa kuzunya, tuli na mhola kuli Mulungu mu nzila ya Seba wiswe Yesu Kristo; Hangi muli Wei tuli nayo, mu kuzunya, nzila ya kuchingilila kigongo cheniki, icho twimilile mo; hangi tukuyegelaga mo mu kwisagilwa kwa ikujo lya Mulungu. Nulu iti giko gwike, aliyo hangi tukuyegelaga mo mu kuluhiwa; iki tumanile giki, kuluhiwa kukwitaga kwenha kwiyumilija; Na kwiyumilija kwenha wimaniki, na wimaniki wenha kwisagilwa; Na kwisagilwa kutadimyaga minala; iki butogwa wa Mulungu waasukilwa mu ngholo jiswe na Moyo Ngʼwela Uyo twiinhiwa. Iki aho twali tuti na nguzu, ngʼwikanza lishikile Kristo ubachilila bahunga. Iki ili kilambu munhu kunchilila munhu ntungilija; aliyo hamo ali ho umo wa kugima kunchilila munhu wa wiza. Aliyo Mulungu ubukumilija butogwa wakwe ngʼwenekele ku biswe giki, aho twali tutali biiti ba shibi, Kristo utuchilila. Nahene kutinda no, iki twaatungiligijiwa mu mininga gakwe, tulapijiwa nanghwe kufuma mu bupelanu wa Mulungu. Iki ulu twaasangijiwa kuli Mulungu mu nzila ya kucha kwa Ngʼwana wakwe, aho twali tuli banishi, kutinda no, iki twaasangijiwa, tulapijiwa mu bupanga wakwe; Na iti giko gwike, aliyo hangi tukuyegelaga muli Mulungu kulwa Seba wiswe Yesu Kristo, muli Wei twanukula haha u kusangijiwa. Kulwa mhayo uyo, gitumo muli munhu umo bubi wingila mo mu si, na kucha mu nzila ya bubi wenubo, giko na kucha kubatangʼanha banhu bose, iki bose bita shibi: Iki nulu aho shilagilo shali shitiniza, bubi bubiza mo mu si; aliyo bubi butabalagwa ulu shilagilo shiti ho. Aliyo kucha kwaatemaga kufuma kuli Adamu kushisha kuli Musa, nulu kubasuga na benabo abali batitile shibi ishikolile na kukilanya kwa ngʼwa Adamu, uyo all kigemelo cha Ngʼwenuyo uwali uhayiwa aliza. Aliyo i cha kwinhiwa dalali kitabiile gitumo busobya umo buli. Iki ulu mu busobya wa ngʼwenuyo umo, a bingi bucha, kutinda no kigongo cha Mulungu, na cha kwinhiwa cha mu kigongo i cha munhu umo, Yesu Kristo, chukwila kubo bingi. Hangi i cha kwinhiwa kitabiile gitumo kulwa ngʼwenuyo umo uwali wita shibi; iki nghana kulekanyiwa kuli ho kufuma muli umo kushika mu nsango, aliyo i cha kwinhiwa dalali kili ho kufuma mu mabusobya mingi kushika mu kutungiligijiwa. Iki ulu mu busobya wa umo kucha kubyutema mu nzila ya umo; kutinda no abo abanukula wingi wa kigongo na wa cha kwinhiwa cha butungilija balatema mu bupanga mu nzila ya Ngʼwenuyo umo, Ngʼwene Yesu Kristo. Huna lulu, gitumo kulwa busobya bumo nsango gubashikiila banhu bose, giko hangi kulwa chitile kimo cha butungilija kutungiligijiwa kwa bupanga kubashikiila banhu bose. Iki gitumo kulwa bukitigwa wa munhu umo, bingi biitwa kubiza a ba shibi, giko hangi kulwa chigwile cha munhu umo a bingi balitwa kubiza batungilija. I shilagilo shali shingila giki, busobya bukwile; aliyo aho bubi bukwila, kigongo chukwila kutinda no, Giki, gitumo bubi bubyutema mu kucha, giko hangi kigongo kisuge mu nzila ya butungilija kushika mu bupanga butushila kulwa Yesu Kristo Seba wiswe. Tuhaye ki lulu? Twikale mu bubi, kigongo kikwile? Na hado yaya! Biswe aba twaacha ku bubi, tukwikala bapanga mubo hangi kinahe? Nulu mutamanile giki, biswe aba twaabatijiwa kwingila muli Kristo Yesu, twaabatijiwa kwingila mu kucha kwakwe? Kulwa iyo twaajikwa hamo nanghwe mu nzila ya kubatijiwa kwingila mu kucha kwakwe, giki, gitumo Kristo waajuchiwa kufuma mu bafu mu nzila ya ikujo lya ngʼwa Ise, giko hangi biswe tushiminze mu bupya wa bupanga. Iki ulu twaasangijiwa hamo nanghwe mu chikolile cha kucha kwakwe, giko hangi tulabiza mu chikolile cha kujuka kwakwe; Tumanile mhayo uyu giki, munhu wiswe wa kale waakongʼwa hamo nanghwe, giki, mili gwa bubi ubo gugaluchiwe kubiza dalali, tutizubiza mu busese wa ku bubi hangi; Iki uyo waacha, waatungiligijiwa kwinga mu bubi. Aliyo ulu twaacha hamo na Kristo, twazunya giki, tulikala bapanga hamo nanghwe; Tumanile giki, Kristo iki waajuchiwa kufuma mu bafu, atalacha hangi; kucha kutunsugaga Wei hangi. Iki kucha kwenuko akacha, waacha ku bubi lukangala lumo; aliyo bupanga wenubo akwikalaga mo mpanga, akwikalaga mpanga kuli Mulungu. Giko hangi na bingʼwe ibalagi benekele muli abachile gete ku bubi, aliyo a bapanga kuli Mulungu muli Kristo Yesu, Seba wiswe. Kulwa iyo mutizubuzunilija bubi kutema mu mili gwingʼwe gwa kucha, kushisha mukuwigwa mu kwikumva kwabo. Nulu mutizinha ko mabudika gingʼwe ku bubi, ga kubiza shilanga sha buti butungilija; aliyo ngʼwiyinhage ko benekele kuli Mulungu, gitumo a bapanga kufuma mu bafu, na mabudika gingʼwe ga kubiza shilanga sha butungilija kuli Mulungu. Iki bubi butalamusuga bingʼwe; iki muti hasilili ya shilagilo, aliyo ya kigongo. Ni ki lulu? twite shibi, iki tuti hasilili ya shilagilo, aliyo ya kigongo? Na hado yaya! Mutamanile giki, kuli uyo ngʼwiyinha ko benekele kubiza basese ba kungʼwigwa, muli basese ba ngʼwenuyo mukungʼwigwaga; nulu ba ku bubi kushika mu kucha, nulu ba ku wigwi kushika mu butungilija? Aliyo Mulungu alumve, iki ngʼwali muli basese ba ku bubi, aliyo ngʼwaabiza ba kwigwa kufuma mu ngholo a kalangile kenako a kene ngʼwaatuulilwa ko muko. Iki ngʼwaataligulilwa lulu mu bubi, ngʼwaabiza basese ba ku butungilija. Nahaya mu chimile cha ki-munhu kulwa bugokolo wa nhungwa ya mili gwingʼwe. Iki gitumo ngʼwali ngʼwiyinha ko mabudika gingʼwe mu busese wa ku busoso, na ku bugomi kushika mu bugomi; giko haha ngʼwiyinhage ko mabudika gingʼwe mu busese wa ku butungilija kushika mu wela. Iki aho ngʼwali muli basese ba ku bubi, ngʼwali muli batungulwa ku butungilija. Ngʼwikanza ilo, lulu, ngʼwaabizaga na matwajo ki mu mihayo iyo ngʼwadingʼwa minala mo haha? iki nghalilo ya mihayo yeniyo yene kucha. Aliyo haha iki ngʼwaatungulilwa mu bubi, na ngʼwaabiza basese ba kuli Mulungu, muli nago matwajo gingʼwe kushika mu wela, na nghalilo yaho bupanga butushila. Iki mhela ya shibi yene kucha, aliyo cha kwinhiwa dalali cha Mulungu chene bupanga butushila muli Kristo Yesu, Seba wiswe. Nulu mutamanile, badugu, (iki nalungalunga ku abo bamanile shilagilo), giki, shilagilo shunsuga munhu aho atali ho mpanga? Iki nkima ntoleke alitungwa na shilagilo kuli ngoshi aho wei atali ho mpanga; aliyo ulu ngoshi ucha, wataligulilwa mu shilagilo sha ngoshi. Huna lulu, aho ngoshi atali ho mpanga, ulu ubiza na ngosha ungi, akwitanwa giki, nshihiwa; aliyo ulu ngoshi ucha, waatungulilwa mu shilagilo, wei ati nshihiwa lulu, nulu ubiza wa ngosha ungi. Giko lulu, badugu bane, na bingʼwe ngʼwaabulagwa ku shilagilo mu nzila ya mili gwa ngʼwa Kristo; mubize ba ungi, Ngʼwenuyo uwaajuchiwa mu bafu, giki, tuntwagije Mulungu matwajo. Iki aho twali tuli mu nhungwa ya ki-mili, manamba ga shibi, agali gali ho mu nzila ya shilagilo, gubyutumama mu mabudika giswe ga kutwaja matwajo kushika mu kucha. Aliyo haha twaatungulilwa mu shilagilo, iki twaacha ku iyo umo twali tutungwa; giko lulu tutumame mu nhungwa mhya ya ki-moyo, iti mu nhungwa ya kale ya chandikwa. Tuhaye ki lulu? Shilagilo shene bubi? Na hado yaya! Aliyo ni nali natumana bubi, ulu ni iti mu nzila ya shilagilo: iki ni nali natitegeleja kwikumva, ulu shilagilo ni shitahayile giki, Utalizikumva. Aliyo bubi, aho bubona ngʼwanya mu nzila ya shilagilo, bubyutumama muli nene buli kwikumva kose. Iki ulu shiti ho shilagilo bubi buchile. Na nene kale nali nali mpanga, aho nali nati na shilagilo; aliyo aho kilagilo chiza, bubi buhimbuka, na nene nucha. Na kilagilo ichali chutuulwa ho kwenha bupanga, nukibona chali kili cha kwenha kucha: Iki bubi, aho wali bubona ngʼwanya mu nzila ya kilagilo bunilembalemba, na bunibulaga mucho. Giko lulu shilagilo shili shela, na kilagilo kili chela, na kitungilija, na cha wiza. Ali lulu, iyo ili ya wiza yubiza kucha kuli nene? Na hado yaya! Aliyo bubi, wigengeleke giki, buli bubi; mu nzila ya iyo ya wiza wali wita kucha muli nene; giki, mu nzila ya kilagilo bubi bongeje kumanika giki, buli wa bubi kutinda. Iki tumanile giki, shilagilo shene sha ki-moyo; aliyo nene ndi wa nhungwa ya ki-mili, nagujiwa kusugwa na bubi. Iki iyo nakutumamaga, natamanile umo ili: iki iyo nakuyitaga, iti iyo natogilwe; aliyo iyo nayikolilwe, hu yene nakuyitaga. Aliyo ulu nakuyitaga iyo natayitogilwe, nazunya giki, shilagilo shili sha wiza. Giko lulu iti nene uyo nakuyitumamaga, aliyo bubi ubukwikalaga muli nene. Iki namanile giki, muli nene, u mu nhungwa yane ya ki-mili, gutikalaga mo mhayo gwa wiza, yaya; iki kutogwa kwita kuli muli nene hene, aliyo kuyitumama i ya wiza natubonaga. Iki i ya wiza iyo natogilwe kwita, yene natitaga; aliyo i ya bubi iyo natatogilwe kwita, hu yene nakuyitaga. Aliyo ulu nakuyitaga iyo natatogilwe, iti nene uyo nakuyitumamaga, aliyo bubi ubukwikalaga muli nene. Nabona lulu kilagilo iki giki, kuli nene uyo natogilwe kwita i ya wiza, i ya bubi buli muli nene. Iki nakushiyegelaga shilagilo sha Mulungu muli munhu wa mugati: Aliyo nabona kilagilo kingi mu mabudika gane, ikikwilwishaga bulugu na kilagilo cha kwiganika kwane, nacho chunidima ndingʼwa wa ku kilagilo cha bubi ubo, icho kili ho mu mabudika gane. U nene munhu nzonguzongu! ni nani uyo akunipija mu mili uyu gwa kucha kwenuku? Nanumba Mulungu mu nzila ya ngʼwa Yesu Kristo Seba wiswe. Huna lulu u nene ngʼwenekele nakushitumamilaga shilagilo sha Mulungu mu kwiganika kwane; aliyo mu nhungwa ya ki-mili i kilagilo cha bubi ubo. Huna lulu guti ho nsango ku benabo abali muli Kristo Yesu, abatushiminzaga mu nhungwa ya ki-mili, aliyo ya ki-Moyo. Iki kilagilo cha Moyo wa bupanga muli Kristo Yesu, chaanitungulila mu kilagilo cha bubi ubo na cha kucha. Iki iyo shilagilo shali shuduma kwita, iki shali shugayiwa nguzu mu nhungwa ya ki-mili, Mulungu, aho akantuma Ngʼwana wakwe ngʼwenekele mu chikolile cha nhungwa ya mili gwa bubi ubo, na kulwa bubi, ubulekanya nsango bubi mu nhungwa ya ki-mili: Butungilija ubo bulagilwa na shilagilo bushikilijiwe mu biswe, abo tutushiminzaga mu nhungwa ya ki-mili, aliyo mu ki-Moyo. Iki abo abali ba nhungwa ya ki-mili bakuyiganikaga i ya nhungwa ya kimili; aliyo abo abali ba ki-Moyo, i ya ki-Moyo. Iki kwiganika kwa nhungwa ya kimili kwene kucha: aliyo kwiganika kw a ki-Moyo kwene bupanga na mhola: Kulwa kwiganika kwa nhungwa ya ki-mili kwene wanishi kuli Mulungu; iki kutilyeliyaga kusugwa na shilagilo sha Mulungu, nulu kudula kutudula: Nabo abali mu nhungwa ya ki-mili batudula kunyeja Mulungu. Aliyo bingʼwe muti mu nhungwa ya ki-mili aliyo mu ki-Moyo, ulu nghana Moyo wa Mulungu akwikalaga mo mu bingʼwe. Aliyo uyo ose ati na Moyo wa ngʼwa Kristo, ngʼwenuyo ati wakwe. Na ulu Kristo ali mu bingʼwe, mili guchile kulwa bubi, aliyo moyo gwene bupanga kulwa butungilija. Aliyo ulu Moyo wa Ngʼwenuyo uwaanjucha Yesu kufuma mu bafu akwikalaga mu bingʼwe, Uyo unjucha Kristo kufuma mu bafu, akuyinha bupanga na mibili yingʼwe ya kucha kulwa Moyo wakwe Uyo akwikalaga mu bingʼwe. Huna lulu, badugu, tuli ba bugasa, iti ku nhungwa ya ki-mili, giki, kwikala mpanga mu nhungwa ya ki-mili; Iki ulu mukwikala bapanga mu nhungwa ya ki-mili, mulihaya kucha; aliyo ulu ngʼubulaga shitile sha mili kulwa Moyo Ngʼwela, mulikala bapanga. Iki bose abakutongelagwa na Moyo wa Mulungu, benabo bali bana ba Mulungu. Iki ngʼwali mutanukulile moyo gwa busese kushika mu boba hangi, aliyo ngʼwaanukula Moyo wa kwitwa kubiza bana, muli Wei twalila giki, Baba, Siswe. Moyo ngʼwenekele akukanilaga hamo na mioyo yiswe giki, tuli bana ba Mulungu; Na ulu tuli bana, nahene tuli bingiji ba Mulungu, na bingiji biye ba ngʼwa Kristo; ulu nghana tuluhiwa kihamo nanghwe, tukujiwe hangi kihamo nanghwe. Iki napima gild, makuluhiwa ga ikanza ili lya haha gatigelile kulenganijiwa na ikujo ililakundulilwa ku biswe. Iki kalolelele katale ka shisengʼwa kakulindilaga Kukundulwa kwa bana ba Mulungu. Iki i shisengʼwa shutuulwa kusugwa na dalali, iti kulwa kutogwa kwasho shenekele, aliyo kulwa Uyo waashisugija mu kwisagilwa, Giki, i shisengʼwa nasho shenekele shilatungulilwa mu busese wa bubozu, shingile mu butungulwa wa ikujo wa bana ba Mulungu. Iki tumanile giki, Shisengʼwa shose shikuganghilaga, na kulungʼwa busungu kihamo, kushisha haha. Na iti isho shike, aliyo na biswe abo tuli na matwajo ga kwandia ga Moyo, chene na biswe benekele tukuganghilaga mu mioyo yiswe, tukulindilaga kwitwa kubiza bana, u kwene kukomolwa kwa mili gwiswe. Iki twaapijiwa mu kwisagilwa; aliyo kuyisagilwa iyo ilibonwa kuti kwisagilwa yaya, iki iyo munhu uyibona, uyisagilwa hangi ni buli? Aliyo ulu tuyisagilwa iyo tutuyibonaga, huna lulu tukuyilindilaga na kwiyumilija. Giko hangi Moyo akutugunanaga mu bugokolo wiswe; iki tutamanile kulomba gitumo shitwigelile; aliyo Moyo ngʼwenekele akutulombelaga na kuganghila ukutudula kuhayiwa. Nanghwe Uyo akugisilijaga mu ngholo, amanile kwiganika kwa Moyo gitumo kuli, iki akubalombelaga a behi gitumo Mulungu atogilwe. Na biswe tumanile giki, mihayo yose jikutumamilaga hamo kwenha ya wiza ku abo abantogilwe Mulungu, chene ku benabo ablitanwa gitumo iyo Mulungu waamalila. Iki abo waabamana kufuma kale, ubatuula ho kufuma kale balenganijiwe mu chikolile cha Ngʼwana wakwe, Wei abize Ngʼwana tangi wa mu badugu bingi. Na abo ubatuula ho kufuma kale, benabo ubitana: na abo ubitana, benabo ubatungiligija: na abo ubatungiligija, benabo ubakuja. Tuhaye ki lulu ku mihayo yeniyi? Ulu Mulungu ali ku lwande lwiswe, ni nani wadula kutuhangija? Uyo walatungugila Ngʼwana wakwe gete gete, aliyo ungʼwinha ko kulwa biswe bose, angu, akukija kinahe kutwinha biswe shinhu shose dalali hamo nanghwe? Ni nani uyo akubabula a bakongʼwa ba Mulungu? Mulungu hu Ngʼwene Uyo akubatungiligijaga. Ni nani uyo wa kulekanya nsango? Kristo hu Ngʼwene Uyo waacha, ali chene, na kutinda iyi, waajuchiwa; Uyo ali ho ku nkono gwa bulyo gwa Mulungu, hangi akutulombelaga biswe. Ni nani uyo akutukomanya na butogwa wa ngʼwa Kristo? Angu! shadula ishi, kuluhiwa, nulu makoye, nulu kunyajanyajiwa, nulu nzala, nulu buzuka, nulu kwihiga, nulu lilushu? Gitumo gwaandikwa giki, Kulwa nguno yako tukubulagagwa limi ji; twabalwa kubiza giti ngholo ja kubulagilwa. Aliyo mu mihayo iyi yose tukupyenaga na kutinda ho, muli Uyo waatutogwa. Iki namanile gete gete giki, nulu kucha, nulu bupanga, nulu bamalaika, nulu mabutale, nulu shinhu ishili ho, nulu shinhu ishuhaya kwiza, Nulu i ya higulya, nulu i ya hasilili, nulu kisengʼwa kingi chose, kitudula kutukomanya na butogwa wa Mulungu, ubuli muli Kristo Yesu Seba wiswe. Nahaya nghana muli Kristo, natuhayaga bumama, wiyanguji wane bulikanila hamo na nene muli Moyo Ngʼwela, Giki, ndi nabo bupina wingi na kusatwa gwa gwa gwa mu ngholo yane. Iki nali natogilwe giki, nazungʼwe nene ngʼwenekele nakomanyiwe na Kristo kulwa nguno ya badugu bane, a ba ihanga lyane mu ki-mili; A bene ba Israeli, abo biinhiwa kitilwe hubiza bana, hangi i likujo, na malagane, na kinhilwe ka shilagilo, na kalamije ka Mulungu, na sha kwisagija; A bakulugenji na bene babo, hangi mu benabo Kristo utuma mu ki-mili, Uyo ali higulya ya shose, Mulungu nkumilijiwa welelo na welelo. Amina. Aliyo iti giki, mhayo gwa Mulungu gwabiile dalali. Iki abo bose abafuma mu Israeli, bati ba Israeli a bose: Nulu iti giki, iki hali ba bubyile wa Abrahamu huna bali bana a bose: aliyo giki, Bubyile wako bulitanwa muli Isaaka. Yene giki, abali bana ba ki-mili boi bati bana ba Mulungu; aliyo bana ba kwisagija a bene balibalwa kubiza bubyile. Iki mhayo gwa kwisagija guli uyu giki, Ngʼwikanza giti lyenili naliza, na Sara alabiza na ngʼwana. Na iti giko gwike, aliyo hangi Rebeka aho wali ubucha nda ya umo ngʼwene Isaaka, nkulugenji wiswe; (Iki aho bali batali kubyalwa bana benabo nulu bali batali kwita mhayo gwa wiza nulu gwa bubi, ibize giki, iyo Mulungu wali wamalila yikale ho gitumo kukoma kwakwe umo kuli, iti kufuma mu Shitwa, aliyo kufuma muli Uyo akitanaga;) Ngʼwenuyo Rebeka uwilwa giki, U ntale alantumamila uyo ndo. Chene gitumo gwaandikwa giki, Naantogwa Yakobo, aliyo Esau nunkolwa. Tuhaye ki lulu? Buti butungilija buli ho hali Mulungu? Na hado yaya! Iki ungʼwila Musa giki, Nakunchila kigongo uyo nakunchila kigongo, hangi nakunsatwa uyo nakunsatwa. Huna lulu iti ya ngʼwenuyo atogilwe, nulu ya uyo akupelaga, aliyo ya Mulungu Uyo akuchilaga kigongo. Iki Shandikwa shungʼwila Farao giki, Kulwa mhayo uyu nakwimiligije bebe giki, noleche budula wane muli bebe, na lina lyane likumuchiwe mu si yose. Huna lulu, akunchilaga kigongo uyo atogilwe kunchila kigongo, na uyo atogilwe kungunya, ungunya. Hamo ukuniwila giki, Atali ubuumanya ni buli lulu? Iki ni nani uyo wahangigije iyo atogilwe Wei? Iti giko yaya, aliyo munhu bebe, uli nani uyo ulinshokeja Mulungu? I kibumva kikungʼwila uyo ukibumba giki, Waanibeja giko ni buli? Nulu mumbi angu, ati na budula ku mabumba, mu mbilya imo kubeja kiseme cha ikujo, na kingi kiti cha ikujo? Ili kinahe lulu ulu Mulungu, iki utogwa kolecha bupelanu wakwe, na kubumanicha budula wakwe, ushigoyela mu kwiyumilija kwingi i shiseme sha bupelanu ishimalilile kushika mu kuyagala; Hangi amaniche busabi wa ikujo lyakwe ku shiseme sha kuchilwa kigongo, isho ushilonja kale kushika ngʼwikujo, Chene biswe, abo twiitanwa nanghwe, iti kufuma Bayudaya bike, aliyo hangi kufuma mu bana mahanga? Gitumo uhaya na muli Hosea giki, Nakubitana abo bali bati banhu bane giki, banhu bane, na ngʼwenuyo walati ntogwa giki, ntogwa. Na ilabiza giki, mu lwande ulo bali buwilwa giki, Bingʼwe muti banhu bane, henaho bulitanwa bana ba Mulungu mpanga. Na Isaya wali ubahamukila ba Israeli giki, Bukumi wa bana ba Israeli nulu bubiza giti maseni ga ku nyanza, busago wabo wike bulapijiwa: Iki Seba aligushikilija na kugubuta mhayo mu butungilija, iki akugwita mhayo gubutwa nguhi mu si. Na gitumo Isaya wali utonja kuhaya giki, Ulu Seba wa mabita ni walatatusagigije ho bubyile, ni twali tubiza giti Sodoma, hangi ni twali twikolanijiwa na Gomora. Tuhaye ki lulu? Giki, bana mahanga abatalondelaga butungilija, baapandika butungilija, u wene butungilija wa mu kuzunya: Aliyo ba Israeli, abubyulondela kilagilo cha butungilija, batashikile ku kilagilo icho cha butungilija. Ni buli? Iki bali batukikoba mu kuzunya, aliyo giti mu Shitwa sha shilagilo. Bali bipama ku iwe ilo lya kwipamya; Gitumo gwaandikwa giki, Lolaga, natuula mu Sayuni iwe lya kwipamya na kiganga cha kwigumhya; na uyo ose wanzunya Wei, ataladingʼwa minala. Badugu, nghumbu ya ngholo yane, na kulomba kuli Mulungu kulwa ba Israeli kuli giki, bapijiwe. Iki nabakanila giki, bali nabo bukomezu kuli Mulungu, aliyo iti ya mu bumani bushikanu. Iki boi, iki batabumanile butungilija wa Mulungu, na bakukobaga kumicha butungilija wabo benekele, batilyehyaga benekele ku butungilija wa Mulungu. Butungilija muli Kristo gitumo bupandikwa Iki Kristo ali nghalikijo ya shilagilo sha kushika mu butungilija kuli buli munhu uyo wazunya. Iki Musa uwandika butungilija ubufumila mu shilagilo giki. Munhu uyo akuyitaga mihayo yeniyo alikala mpanga muyo. Aliyo butungilija ubufumila mu kuzunya bukuhayaga giki, Utizuhaya mu ngholo yako giki, Nani alalinha ngʼwigulu? (makulu gaho giki, kungʼwenha Kristo ha si:) Nulu giki, Nani alika kulimu? (makulu gaho giki, kuninhya Kristo kufuma mu bafu.) Aliyo bukuhayaga kinahe? Giki, Mhayo guli hihi na bebe, mu nomo gwako, na mu ngholo yako: u gwene mhayo gwa kuzunya, uyo tukugulomelaga; Giki, ulu utambula na nomo gwako giki, Yesu ngʼwene Seba, hangi uzunya mu ngholo yako giki, Mulungu waanjucha kufuma mu bafu, ukupijiwa. Iki munhu akuzunyaga na ngholo kushika mu butungilija: na utambula na nomo kushika mu bupiji. Iki Shandikwa shuhaya giki, Uyo ose wanzunya ataladingʼwa minala. Iki kuti ho kukomanyiwa kwa Nyudaya na Ngriki; iki Uyo ali Seba wa bose ali ngʼwila ku bose abanilila. Iki uyo ose akulililila lina lya Seba akupijiwa. Ali lulu bakunilila kinahe Uyo batanzunije? hangi bakunzunya kinahe Uyo batangʼwigwile? hangi bakwigwa kinahe ulu ati ho nomeji? Hangi bakulomela kinahe, ulu batutungʼwa? gitumo gwaandikwa giki, Gabelile kinahe magulu ga benabo abalomela evangeli ya mhola, abalomela evangeli ya mihayo ya wiza! Aliyo iti giki, bose baayigwa evangeli ya bupiji. Iki Isaya uhaya giki, Seba, ni nani uyo wazunije nghombe yiswe? Giko kuzunya kukufumaga mu kwigwa, na kwigwa kukufumaga mu mhayo gwa Mulungu. Aliyo nahaya giki, Angu, bali batigwile? Aliyo nghana giki, Ilaka lyabo lyukumuka mu si yose, na mihayo yabo yushika ku mhelo ja si. Aliyo nahaya giki, Ba Israeli, angu, bali batamanile? Kwandia Musa uhaya giki, Nakumudimya wilu na benabo abati ihanga, hangi nakumupelanya na ihanga iliti na kwitegeleja. Isaya ali ngimu no, na uhaya giki, Naabonwa nabo abali batunikoba; nubiza nigengeleka hape ku benabo abali batunibugilija. Aliyo ku ba Israeli uhaya giki, Limi ji nubambila makono gane banhu ba bukitigwa na ba halali. Nahaya lulu giki, Angu, Mulungu waabaponya banhu bakwe? Na hado yaya! Iki nu nene ndi muna Israeli wa bubyile wa Abrahamu, wa luganda lwa Benyamini. Mulungu atabaponije banhu bakwe abo waabamana kufuma kale. Nulu mutamanile umo Shandikwa shunghayila Eliya? gitumo wei ungʼwikumbilija Mulungu kulwa nguno ya Israeli, uhaya giki, Seba, bubyubulaga bahangi bako, busambula mialilo yako; na nene nasaga niyene, nabo balibukoba bupanga wane. Aliyo ishosho lya Mulungu lyungʼwila kinahe? Giki, Kisagigije Nene bagosha shiku mpungati abatatujaga nzwi kuli Baali. Giko lulu na ngʼwikanza lya haha, buli ho bysago gitumo kakomele ka kigongo umo kali. Aliyo ulu ili ya kigongo, nahene iti ya Shitwa hangi, numho kigongo kitabiile kigongo hangi. Ni ki lulu? Iyo ba Israeli bakukobaga, batayipandikile; aliyo abakongʼwa buyipandika, aliyo a bangi bugunyiwa. Gitumo gwaandikwa giki, Mulungu ubinha moyo gwa tulo nhale, miso giki, batizubona, na matu giki, batizigwa, kushisha ku lushiku lwenulu. Na Daudi uhaya giki, Meza yabo leka ibize lubeto na ntego, na ishiki lya kwipamya, na mhela kubo: Miso gaho gitilwe giiti, batizubona, hangi ubagundamyage migongo yabo shiku jose. Nahaya lulu giki, Angu, hali busisibuka bagwe gete gete? Na hado yaya! aliyo kulwa busobya wabo bupiji wabashikiila bana mahanga, giki, boi badimiwe wilu. Aliyo ulu busobya wabo wene busabi wa si, na kugeha kwabo kwene busabi wa bana mahanga, angu, kokala kwabo kutalatinda no? Aliyo namuwila bingʼwe bana mahanga, gitumo nene ndi ntungʼwa wa ku bana mahanga, nakukumiiijaga kwinhilija kwane; Ulu hamo nakubadimya wilu a ba ihanga lyane lya ki-mili, hangi nabapije bamo mubo. Iki ulu kuponyiwa kwabo kwene kusangijiwa kwa si, kwegelejiwa kwabo kulabiza ki, ulu iti bupanga kufuma mu bafu? Hangi ulu matwajo ga kwandia gali mela, giko iganda lyose nalyo; na ulu itina lili lyela, matambi nago chene. Aliyo ulu gamo ga mu matambi gaabutwa, na bebe uyo wabili nzeituni gwa mu bu, waadimanyiwa mugo, na ubiza ngʼwisangija ngʼwichago ngʼwitina, na wa buginu wa nzeituni; Ulikumilija ku matambi; aliyo ulu wikumilija, iti bebe uyo ukubuchaga i litina, aliyo itina likukubuthaga bebe. Ukuhaya lulu giki, Matambi gaabinzwa, nene nadimanyiwe mo. Nahene: kulwa butuzunya wabo gubutwa, na bebe ukwimilaga kulwa kuzunya kwako. Ulikumilija, aliyo ogohaga: Iki ulu Mulungu walatugagugila matambi ga kitungilwe, nahene nulu bebe atukugugila. Bulolage lulu u wiza na bukali wa Mulungu: ku benabo bagwile, bukali; aliyo kuli bebe, wiza wa Mulungu, ulu wikala mo, mu wiza wakwe; ulu iti giko, nulu bebe ukubutwa ho. Na benabo hangi, ulu batikala mu butuzunya wabo, baladimanyiwa: iki Mulungu wadula kubadimanya hangi. Iki ulu bebe wali ubutwa ho mu nzeituni uguli gwa mu bu mu kitungilwe, huna udimanyiwa mu nzeituni gwa wiza mu nzila iyiti ya kitungilwe; a ba matambi ga kitungilwe batutinda niyo no kudimanyiwa mu nzeituni gwabo benekele? Iki, badugu, natatogilwe bingʼwe kubiza mutamanile cha kwigeniha cheniki, mutizubiza ba masala mu miso gingʼwe benekele; giki, bugunu wabashikila ngʼwibudika lya ba Israeli, kushisha kokala kwa bana mahanga bulashikila. Na giko ba Israeli bose balapijiwa; gitumo gwaandikwa giki, Nkomoji aliza kufuma mu Sayuni, Uyo alangʼwingija Yakobo buhunga wakwe: Na ubu wene bulagane wane kubo, aho nalashinjaga shibi shabo. Ha lwande lwa evangeli ya bupiji, bali banishi hene kulwa nguno yingʼwe; aliyo ha lwande lwa kukongʼwa, ball batogwa kulwa nguno ya bakulugenji. Iki sha kwinha sha Mulungu na kwitana kwakwe shiti sha kwidetiwa. Iki gitumo bingʼwe kale ngʼwali muli ba bukitigwa kuli Mulungu, aliyo haha ngʼwaachilwa kigongo kulwa bukitigwa wabo; Giko baha boi hali ba bukitigwa, kulwa kuchilwa kigongo kwingʼwe, benabo nabo bachilwe kigongo. Iki Mulungu waabatunganija bose mu bukitigwa, ibize giki, abachile kigongo a bose. Ee bushimu wa busabi wa masala na wa bumani wa Mulungu! misango yakwe ikilile kugisilijiwa, na nzila jakwe jikilile kabonelwe! Iki ni nani uyo alimanile iganiko lya Mulungu? nulu ni nani uyo wabiile nganikiji wakwe? Nulu ni nani uyo watonja kungʼwinha kinhu tame, huna akuulilwe nanghwe? Iki shinhu shose shafuma kuli Wei, hangi shili ho kulwa budula wakwe, na hangi shashikila kuli Wei: kuli Wei ikujo libize ho welelo bose. Amina. Kulwa iyo, badugu, nangʼwikumbiiija, kulwa shigongo sha Mulungu, ngʼwiyinhage ko mibili yingʼwe ibize kitambo kipanga, chela, cha kunyeja Mulungu, chene kalamije kingʼwe ka masala. Ningʼwe mutiziyita kubiza ngʼwikolile na kikalile ka si iyi; aliyo mubize abagalukile mu kwitwa kupya kwa maganiko gingʼwe, mubone kumana iyo Mulungu atogilwe, iyo ya wiza na iyo ya kunyeja, na iyishikanile. Iki, mu nzila ya kigongo icho niinhiwa, nahaya kuli buli munhu uyo ali mu bingʼwe giki, atiziyiganika kwikuja ngʼwenekele kutinda shingʼwigelelilwe kwiganika: aliyo kwiganika, iganike gitumo yabela, gitumo Mulungu angelekelile buli munhu ngelekelo ya kuzunya. Iki gitumo tuli nago mabudika mingi mu mili gumo, na mabudika gose gati na katumamile kamo duhu; Giko na biswe, tuli bingi, aliyo tuli mili gumo muli Kristo, na buli munhu ku biye, bali mabudika benekele na benekele. Hangi iki tuli na sha kwinhiwa shikilakilile, gitumo kigongo icho twiinhiwa, nulu buhangi, tuhange gitumo ili ngelekelo ya kuzunya kwiswe; Nulu kwinhilija tutumame mu kwinhilija kwiswe; nulu uyo akulangaga, atumame mu kulanga kwakwe; Nulu uyo akukomelejaga, atumame mu kukomeleja kwakwe; uyo akinhaga, inhe mu bulyehu; uyo akusugaga, asuge na bukomezu; uyo akuchilaga kigongo, achile kigongo na buyegi. Butogwa butizubiza na wibeleja. Mubukolagwe buhunga; umamilagi i ya wiza. Mu kwitogwa kwa badugu, ngʼwitogagwe na kisa benekele na benekele; mu kwikuja, buli munhu antangile kunkuja ngʼwiye; Mu bukomezu, koloha yaya, bizagi basebu mu moyo; muntumamile Seba; Yegagi mu kwisagilwa; iyumilijagi mu kuluhiwa; komelagi no mu kulomba; Bagabilagi bela isho bagayiwa; londelagi kubatindiiza bageni. Basungulilagi lubango abamunyajanyaja; sungulilagi lubango, na kuzuma yaya. Yegagi hamo nabo abakuyegaga; lilagi hamo nabo abakulilaga. Bizagi na kwigwindanya maganiko benekele na benekele. Mutiziganika ku mihayo mitaletale, aliyo ngʼwikondelage na balyehu. Mutizubiza ba masala mu miso gingʼwe benekele. Mutizunshokeja munhu nulu umo bubi kulwa bubi wakwe. Muyilonje iyibelile mu miso ga banhu bose. Ulu yudulika, ha lwande lwingʼwe, bizagi na mhola ku banhu bose. Batogwa, mutizimalila magudi, aliyo wiyalilagi bupelanu wa Mulungu iki gwaandikwa giki, Kumala magudi kwene kwane, nene nakukuula, uhaya Seba. Kulwa iyo ulu ngʼwanishi wako utuba, nishage shiliwa; ulu ukolwa nota, ngʼwinhage angʼwe: iki mu kwita giko ukusumbya makala ga moto ha ntwe gwakwe. Utizutindwa na ya bubi, aliyo uyitinde ya bubi na ya wiza. Kubalyehela batale ba si Buli munhu abalyehele batale abakusugaga: iki buti ho butale numho bufumile kuli Mulungu; na batale abali ho baatuulwa ho na Mulungu. Kulwa iyo, uyo ubugomela butale, ngʼwene akuhangijaga kilagilile cha Mulungu: nabo abakuhangijaga bakwiyenhelejaga nsango. Iki basugi bati lyogohya lya ku shitile sha wiza, aliyo ku sha bubi. Utogilwe kwikala uti na boba ku butale? itaga ya wiza, na bebe ukulumva nabo; Iki ali ntumami wa Mulungu kuli bebe kuhva nguno ya wiza. Aliyo ulu ukwitaga ya bubi, ogohaga; iki atubuchaga lilushu dalali; iki ali ntumami wa Mulungu wa kumala magudi mu bupelanu kuli uyo akwitaga ya bubi. Kulwa iyo shingʼwigelile kwilyehya, iti kulwa nguno ya bupelanu wike, aliyo hangi kulwa nguno ya wiyanguji. Kulwa mhayo uyu hangi mukutobaga kodi; iki boi bali batumami ba Mulungu, abakukomelaga kugulonja mhayo gwenuyu duhu. Bafunijagi bose ishibigeielilwe lulu: a ba kodi, bafunijagi kodi; a bahoja baholelagi; abigelelilwe kogohiwa, bogohagi; abigelelilwe ikujo, bakujagi. Mutizubiza na bugasa na buli munhu ose, ulu iti wa kwitogwa benekele na benekele: iki uyo untogwa munhu ngʼwiye washikiligije shilagilo. Iki mhayo uyu giki, Utizushihya, Utizubulaga, Utiziba, Utizukanila ya bulomolomo, Utizigonga; na ulu kili ho kilagilo kingi chose, chasangijiwa mu mhayo uyu giki, Ulantogagwe nzenganwa ngʼwiyo gitumo witogwa ngʼwenekele. Butogwa butungʼwitilaga kibi nzenganwa ngʼwiye: kulwa iyo butogwa buli bushikilija wa shilagilo. Itagi giko, iki tulimanile ikanza giki, lili ikanza lya kumisha mu tulo; iki haha bupiji wiswe buli hihi ku biswe kutinda aho twaazunya. Bujiku wegelaga kwangaluka, limi Iyahaya kufuma; kulwa iyo tushizule shitile sha giiti, tuzwale shilanga sha isana. Tushiminze chiza, gitumo kashiminzile ka mu limi umo kali: iti mu mbina na kukolwa shikoji, iti mu bujingi na wimilizu, iti mu buyombo na wilu. Aliyo nzwalagi Seba Yesu Kristo, mutiziganika ku nhungwa ya ki-mili kulwa kushikilija kwikumva kwago. Aliyo uyo ali ngokolo mu kuzunya ngʼwegelejagi, nahene iti kulwa kumpimilila maganiko gakwe. Munhu luno wazunya giki, Wadula kulya shinhu shose; aliyo ngokolo akulyaga makubi. Uyo akulyaga shose atizungayilija uyo atalyaga; nanghwe atalyaga atizunekanya nsango uyo akulyaga: iki Mulungu waangʼwegeleja. Bebe uli nani uyo ukunekanyaga nsango ntumami wa ungi? kuli seba wakwe ngʼwenekele akwimilaga nulu akugwaga. Nanghwe akwimilijiwa, iki Mulungu wadula kungʼwimilija. Munhu umo ulupima lushiku lumo giki, lukilile lungi: ungi ujipima giki, shiku jose jilenganilile. Buli munhu imanijage mu maganiko gakwe. Uyo akulwiganikaga lushiku, kwiganika kuli Seba, uyo akwiganikaga lushiku, kuli Seba akwiganikaga; nanghwe uyo akulyaga, akulyaga kuli Seba, iki alinumba Mulungu; nanghwe uyo atulyaga, kuli Seba atulyaga, nanghwe alinumba Mulungu. Iki ati ho munhu mu biswe uyo akwikalaga mpanga kulwakwe ngʼwenekele, na ati ho wa kucha kulwakwe ngʼwenekele. Iki ulu twikala bapanga, twikala bapanga kuli Seba; nulu ulu tucha, tucha kuli Seba: kulwa iyo ulu twikala bapanga, nulu tucha, nahene tuli ba Seba. Kulwa mhayo uyu Kristo wali ucha, waajuka, na ubiza mpanga hangi giki, abize Seba wa bose, a bafu na bapanga. Aliyo bebe ulinekanya nsango nduguyo ni buli? nulu hangi bebe ulingayilija nduguyo ni buli? iki biswe bose tulimila mu butongi wa isumbi lya kulekanija lya ngʼwa Kristo. Iki gwaandikwa giki, Gitumo Nene ndi mpanga, uhaya Seba, buli izwi lilanitugija Nene, na buli lulimi lulatambula kuli Mulungu. Huna lulu, buli munhu mu biswe alibula mihayo yakwe ngʼwenekele umo ali kuli Mulungu. Kulwa iyo, tutizilekanya nsango benekele na benekele hangi; aliyo hambuhambu mulekanye mhayo uyu giki, munhu atizuntuulila ho nduguye i ya kwipamya, nulu ya kwigumha. Namanile, hangi nitegelejiwa gete muli Seba Yesu giki, kiti ho kinhu cha busoso choi chenekele: numho kuli uyo ukibala kinhu chose chose giki, kili cha busoso, kuli ngʼwenuyo kili cha busoso. Iki ulu nduguyo upinihajiwa kulwa nguno ya shiliwa, bebe utushiminzaga hangi mu butogwa. Utizunyagaja na shiliwa shako ngʼwenuyo Kristo waanchilila. Nahene wiza wingʼwe butizuhayiwa bubi; Iki butemi wa Mulungu buti kulya na kungʼwa; aliyo giki, butungilija na mhola na kuyegela muli Moyo Ngʼwela. Iki uyo untumamila Kristo mu mihayo yeniyi, akunyejaga Mulungu, hangi uzunilijiwa na banhu. Huna lulu, tulondele mihayo iyikwenhaga mhola, na mihayo ya kwizenja benekele na benekele. Utizugukenagula nimo gwa Mulungu kulwa shiliwa. Nghana shinhu shose shili shela; aliyo kinhu kili cha bubi kuli munhu uyo akulyaga mu nzila ya kwipama. Cha wiza kuleka kulya nyama, nulu kungʼwa minzi ga mizabibu, nulu kwita mhayo gose uyo nduguyo wipama mo mugo, nulu wigumha mo, nulu ugogolohajiwa mo. Uli nako kuzunya, bebe? Bizaga nako muli bebe ngʼwenekele mu miso ga Mulungu. Ali wa lubango uyo atilekanyaga nsango ngʼwenekele mu iyo utuzunilija. Aliyo uyo utawatawa ulu ulya watindwa nsango, iki atulyaga kufuma mu kuzunya; na yose iyo itufumaga mu kuzunya, yene shibi. Nahene biswe aba tuli na budula shitwigelile kubucha bugokolo wa benabo abati na budula, na kwiyeja benekele yaya. Buli munhu wa mu biswe anyeje nzenganwa ngʼwiye mu iyo ya wiza kulwa kunzenja. Iki Kristo nanghwe walatiyeja ngʼwenekele; aliyo, gitumo gwaandikwa giki, kudalaha kwa benabo abubyukudalaha Bebe kw ali kunigwila Nene. Iki yose iyo yaandikwa kale, yaandikwa kulwa kutulanga biswe, giki, mu nzila ya kwiyumilija na ya mu kulungujiwa kwa Shandikwa, tubize na kwisagilwa. Mulungu wa kwiyumilija na kulunguja angʼwinhe bingʼwe kubiza na kwiganika kumo benekele na benekele gitumo Kristo Yesu umo ali; Giki, ngʼwidomanigigije mu moyo gumo na mu nomo gumo munkuje Mulungu, Ise wa Seba wiswe Yesu Kristo. Kulwa iyo ngʼwiyegelejage benekele na benekele, gitumo na Kristo waangʼwegeleja bingʼwe kwikujo lya Mulungu. Iki nahaya giki, Yesu Kristo waabiza ngʼwinhilija wa kusalwa kulwa nghana ya Mulungu, ashidimye sha kwisagija isho bakulugenji binhiwa; Na hangi bana mahanga bankuje Mulungu kulwa kigongo chakwe; gitumo gwaandikwa giki, Kulwa nguno iyo nakukukumilija Bebe mu bana mahanga, hangi kulilumba lina lyako na mimbo. Na hangi uhaya giki, Bingʼwe bana mahanga, yegagi kihamo na banhu bakwe. Na hangi giki, Numbagi Seba, bana mahanga hose; ngongolagi banhu bose. Na hangi, Isaya uhaya giki, Gulabiza ho nji gwa ngʼwa Yese, nanghwe Uyo alabuka kubasuga bana mahanga: muli Wei bana mahanga balisagilwa. Hambunyu Mulungu wa kwisagilwa angʼokaje bingʼwe na kuyega kose na mhola mu kuzunya, kushisha mukwije mu kwisagilwa, mu budula wa Moyo Ngʼwela. Hangi nu nene ngʼwenekele, badugu bane, namanile gete giki, na bingʼwe benekele ngʼokalile na wiza, iki ngʼwizulile na bumani bose, hangi ngʼwadula kwiyiganikila benekele na benekele. Nahene, badugu, nugima kutinda kungʼwandikila yimo na yimo ya kungʼwizukija, kuhva kigongo icho niinhiwa na Mulungu, Giki, nene nabize ntumami wa ngʼwa Yesu Kristo ku bana mahanga, nakuyinhilijaga giti ngabiji evangeli ya Mulungu, kufunyiwa ko kwa bana mahanga kubize kitambo chazunilijiwa, chejiwa na Moyo Ngʼwela. Kulwa iyo ndi nayo ya kwikumilija muli Kristo Yesu, mu mihayo ya kuli Mulungu. Iki natugima kuhaya mhayo gose kuleka iyo Kristo waatumama muli nene, ya kubashisha bana mahanga mu kuzunya gete, mu nzila ya kihayile na chitile, Mu budula wa shimanikijo na sha kukumya, mu budula wa Moyo Ngʼwela; kushisha nose natangʼanhije kulomela evangeli ya ngʼwa Kristo, kufuma Yerusalemi na mapande agapindije kushisha Iluriko. Giko, nukomela giki, kulomela evangeli ya bupiji, iti uko Kristo wamala kukumuchiwa, natizuzenga ho ha musingi gwa munhu ungi. Aliyo, gitumo gwaandikwa giki, Abo abatali bulomelwa mihayo yakwe, balabona: nabo abatali kwigwa, batitegeleja. Kulwa nguno iyi nubyujijiwa nghangala ningi kwiza ku bingʼwe. Aliyo haha, iki nati na hanhu hangi mu shalo shenishi, hangi iki kufuma miaka mingi ndi na nghumbu kwiza ku bingʼwe; Aho nalabuka kuja Sipania nalashika ku bingʼwe; iki nisagilwa kumubona mu lugendo lwane, nane nashindikilwe koi na bingʼwe, ulu nalafujiwagwa hado na bingʼwe tame. Aliyo haha najile Yerusalemi, kubinhilija a bela; Iki yubayeja a ba Makedonia na ba Akaya kubakumingila sha kwinha a bahabi ba mu a bela abali mu Yerusalemi. Chene yubayeja, na hangi bali ba bugasa kubo; iki ulu bana mahanga busangijiwa mu mihayo yabo ya ki-moyo, boi nabo shibigelile kubalongeja mu mihayo ya ki-mili. Aho nalashikilijaga yeniyi lulu, na kugadimya kubo nghana nghana matwajo genaya, huna nakubuka kubita ku bingʼwe kuja Sipania. Na nene namanile giki, kwiza ku bingʼwe, naliza nizulile na lubango lwa evangeli ya ngʼwa Kristo. Huna lulu nangʼwikumbilija bingʼwe, badugu bane, kulwa Seba wiswe Yesu Kristo, na kulwa butogwa wa Moyo, komelagi hamo na nene mu kunilombela kuli Mulungu; Giki, napijiwe mu benabo ba bukitigwa mu Buyudaya; hangi giki, kwinhilija kwane uko nali nako mu Yerusalemi kubize kuzunilijiwe na a bela; Nize ku bingʼwe na buyegi mu nzila ya iyo Mulungu atogilwe, nabone kwifula hamo na bingʼwe. Mulungu wa mhola abize na bingʼwe bose. Amina. Natikumilija ku bingʼwe ilumbu lyiswe Foibe, uyo ali ngʼwinhilija nkima wa kanisa iyili mu Kenkrea. Mungʼwanukule muli Seba, gitumo shibigelelilwe a bela, mungunane mu mhayo gose uyo ukoba kugunanwa mu bingʼwe; iki wei waabiza ngunani wa bingi, na wane nene. Nigisijagi Priskila na Akula batumami bichane muli Kristo Yesu, Benabo bali batuulile ho nhingo jabo kuniyagija bupanga wane: nulu iti nene wike nalibalumba, aliyo na ba makanisa gose ba bana mahanga: Hangi nigisijagi kanisa iyili mu numba yabo. Nigisijagi ntogwa wane Epaineto, uyo ali itwajo lya kwandia mu Asiya kuli Kristo. Nigisijagi Mariamu, uyo wali wikoyakoya no kulwa biswe. Nigisijagi Androniko na Yunia, a ba ludugu lwane, na batungwa bichane, abali bamaniku mu batungʼwa; hangi bali balangi bane muli Kristo. Nigisijagi Amplia ntogwa wane muli Seba. Nigisijagi Urbano, ntumami ngʼwichiswe muli Kristo, na ntogwa wane Staku. Nigisijagi Apelle uyo ali nshikanu muli Kristo. Nigisijagi a ba mu kaya ya ngʼwa Aristobulo. Nigisijagi ndugu wane Herodioni. Nigisijagi a ba mu kaya ya Narkiso, abali muli Seba. Nigisijagi Trufina, na Trufosa, abakukoyelaga muli Seba. Nigisijagi ntogwa Perisi, uyo waakoyela no muli Seba. Nigisijagi Rufusi, nkongʼwa muli Seba, na nina uyo ali mayu nu nene. Nigisijagi Asunkrito, na Flegoni, na Herme, na Patroba, na Herma, na badugu abali hamo nabo. Nigisijagi Filologo, na Yulia, na Nereu na ilumbuye, na Olumpa, na a bela bose abali hamo nabo. Ngʼwigishage benekele na benekele na kwibipa kwela. Kanisa jose ja ngʼwa Kristo jamugisha. Nangʼwikumbilija bingʼwe, badugu, bilanghanagi abo bakwitaga kwilekanya na ya kwigumhya iyiliganije na kalangile ako ngʼwaakilanga, ngʼwikomanye nabo. Iki abali giko batantumamilaga Seba wiswe Yesu Kristo, aliyo nda jabo benekele; bulembalemba ngholo ja bafula mu nzila ya mihayo mikonu, na kalungalungile ka nyalumbi. Iki kwigwa kwingʼwe kwaakumuka ku banhu bose. Kulwa iyo namuyegela bingʼwe; aliyo natogilwe mubize ba masala mu iyo ya wiza, hangi bachilu mu iyo ya bubi. Na Mulungu wa mhola alantobagula Shetani hasilili ya bupandijo wingʼwe wangu. Kigongo cha Seba wiswe Yesu Kristo kibize hamo na bingʼwe. Timoteo, ntumami ngʼwichane, alimugisha, na Lukio na Yasoni na Sosipatro, a ba ludugu lwane. Nene Tertio, uyo nandika nyaluba yeniyi, namugisha muli Seba. Gayo, ngʼwegeleja wane na wa kanisa yose ngima, alimugisha. Erasto, mikijiwa wa nzengo, alimugisha, na Kwarto, ndugu wiswe. Kigongo cha Seba wiswe Yesu Kristo kibize na bingʼwe bose. Amina. Haha kuli Uyo uwadula kumuhandikija gitumo ili evangeli yane ya bupiji, na gitumo kuli kulomela kwa ngʼwa Yesu Kristo, gitumo kuli kukundulwa kwa iyo ya kwigeniha iyali ibisile kufuma haho bufumanwa, Aliyo haha yigengelechiwa, na mu Shandikwa sha buhangi yaamanikijiwa ku bana mahanga bose, gitumo kili kilagilile cha Mulungu wa welelo, giki, bashike mu kukwigwa kuzunya: Kuli Mulungu umo wike wa masala, Ubize ikujo muli Yesu Kristo welelo na welelo. Amina. Paulo, wiitanwa ntungʼwa wa ngʼwa Yesu Kristo, kulwa kutogwa kwa Mulungu, na Sosthene ndugu wiswe, Ku Kanisa ya Mulungu iyili mu Korintho, ku aho abeejiwa muli Kristo Yesu, abitanwa bela, kihamo na bose ba mu buli ipande abakulitanaga lina lya Seba wiswe Yesu Kristo, ngʼwene Seba wabo na wiswe: Kigongo kibize ku bingʼwe na mhola kufuma kuli Mulungu Siswe na kuli Seba wiswe Yesu Kristo. Nanumba Mulungu wane ka ka ka kulwa nguno yingʼwe, kulwa kigongo cha Mulungu icho ngʼwiinhiwa muli Kristo Yesu; Iki mu buli mhayo ngʼwaasabiwa muli Wei, mu kalungalungile kose na mu bumani bose; Gitumo bukaniji wa ngʼwa Kristo waadimyiwa mu bingʼwe: Giko lulu mutalebije mu buli cha kwinhiwa chose; mukulindilaga kukundulwa kwa Seba wiswe Yesu Kristo; Uyo akumudimya kushisha ku mhelo, mubize muti na buka mu lushiku lwa Seba wiswe Yesu Kristo. Mulungu ali ngʼwishigwa, Uyo muli Wei ngʼwiitanwa kushika mu busangi wa Ngʼwana wakwe Yesu Kristo Seba wiswe. Namukomeleja bingʼwe, badugu bane, mu lina lya Seba wiswe Yesu Kristo, muhaye bose kihayile kimo, na kulekana kose kutizubiza ho mu bingʼwe; aliyo mubize ngʼwisangigije mu kwiganika kumo na mu kulomana kumo. Iki nusombolelwa nghulu jingʼwe, badugu bane, na ba mu kaya ya ngʼwa Kloe giki, buli mo wanishi mu bingʼwe. Nahaya mhayo uyu giki, buli munhu mu bingʼwe akuhayaga giki, Nene ndi wa ngʼwa Paulo; nene ndi wa ngʼwa Apolo; nene ndi wa ngʼwa Kefa; nene ndi wa ngʼwa Kristo. Angu, Kristo walekanyiwa mo? Paulo waakongʼwa kulwingʼwe? Nulu hamo ngʼwaabatijiwa mu lina lya ngʼwa Paulo? Nanumba Mulungu iki nali natamatigije nulu umo wa mu bingʼwe ulu iti Krispo na Gayo; Munhu ose atizuhaya giki, naamubatija mu lina lyane. Na hangi nubabatija ba kaya ya ngʼwa Stefano; a bangi natamanile ulu naamatija munhu ungi. Iki Kristo atanitumile kubatija, aliyo kulomela evangeli ya bupiji; iti mu masala ga kalungalungile, nsalaba gwa ngʼwa Kristo gutizitwa kubiza dalali. Iki mhayo gwa nsalaba guli gwa buchiluchilu ku abo abakuyagalaga; I aliyo ku biswe aba tukupijiwagwa guli budula wa Mulungu. Iki gwaandikwa giki, nakujimija masala gabo abali na masala, na kwitegeleja kwabo abali na kwitegeleja nakukwita kubiza dalali. Ali hali u wa masala? all hali u ngʼwandiki? ali hali u nghalali wa ikanza lyenili? Angu, Mulungu walatagitile masala ga si iyi kubiza buchiluchilu? Iki ulu mu masala ga Mulungu, si yali itamanile Mulungu mu nzila ya masala gayo, yunyeja Mulungu lulu kubapija abazunya mu nzila ya buchiluchilu wa kulomela. Iki a Bayudaya bakulombaga kimanikijo, na Bagriki bakukobaga masala; Aliyo biswe tukulomelaga mihayo ya ngʼwa Kristo uwali ukongʼwa, ku Bayudaya ali mhayo gwa kwipamya, na ku Bagriki ali buchiluchilu; Aliyo ku abo biitanwa, nulu Bayudaya nulu Bagriki, Kristo u budula wa Mulungu, na masala ga Mulungu. Iki buchiluchilu wa Mulungu buli na masala kutinda banhu; na bugokolo wa Mulungu buli na nguzu kutinda banhu. Kwikumilija kwa kimunhu kwene dalali kuli Mulungu Iki badugu bane, ngʼwabona kwitanwa kwingʼwe, giki, abitanwa a ba masala ba nhungwa ya ki-mili bati bingi, na ba budula bati bingi, na ba ikujo bati bingi; Aliyo Mulungu waashikoma i sha buchiluchilu sha si, abadimye minala a ba masala; na Mulungu waashikoma shinhu i shigokolo sha si, ashidimye minala isho shili na nguzu; Na shinhu sha si ishiti na ikujo, na shinhu shagayilijiwa Mulungu ushikoma, chene, na shinhu ishiti ho, ashite kubiza dalali shinhu ishili ho; Giki, i shose sha ki-mili shitizikumilija mu miso ga Mulungu. Aliyo kufuma muli Wei bingʼwe muli mo muli Kristo Yesu, Uyo kulwiswe wiitwa kubiza masala kufuma kuli Mulungu, chene butungilija, na wela, na kukomolwa; Gitumo gwaandikwa giki, Uyo akwikumilijaga, ikumilije muli Seba. Na nene, badugu bane, aho nali niza ku bingʼwe, nali natizile na kalungalungile ka nyagaliligalili nulu ka masala aho numulomela u bukaniji wa Mulungu. Iki nali nulekana ngholo yane giki, natizumana mhayo gose mu bingʼwe, ulu iti Yesu Kristo, na Ngʼwenuyo giiti, ukougʼwa. Hangi nali nubiza ko mu bingʼwe mu bugokolo, na mu boba, na mu kudetema kwingi. Na kalungalungile kane na kalomelele kane kali kati mu mihayo ya kuhumbula ya masala ga ki-munhu; aliyo kali kali mu kolechiwa kwa Moyo Ngʼwela na kwa budula; U kuzunya kwingʼwe kutizubiza mu masala ga banhu, aliyo mu budula wa Mulungu. Tukugalungalungaga masala, hene, mu benabo bashikanu; nahene iti masala ga ikanza ili, nulu ga batale ba ikanza ili, abalihaya kwitwa kubiza dalali. Aliyo tukugalungalungaga masala ga Mulungu ga mu kwigeniha, agabisile, ayo Mulungu waagatuula ho kale kwikujo lyiswe, aho si yali itali kubiza ho; Masala ayo basugi ba ikanza ili bali batagamanile nulu umo; iki ulu ni bali bugamana, ni bali batankomile Seba wa ikujo: Aliyo gitumo gwaandikwa giki, Mihayo iyo liso litibonaga, nulu kutu gutayigwaga, nulu itingilaga mu ngholo ya munhu, ya yeniyo yose Mulungu waababegeja abo abantogilwe. Aliyo Mulungu waayikundula ku biswe na Moyo wakwe; iki Moyo akakobaga mihayo yose, chene nulu mihayo mishimu ya Mulungu. Iki nani mu banhu ayitegelegije mihayo ya munhu, ulu iti moyo gwa munhu uguli muli wei? giko hangi mihayo ya Mulungu ati ho uyo ayitegelegije, ulu ati Moyo wa Mulungu. Na biswe tutanukulile moyo gwa si iyi, aliyo Moyo Uyo wa kufuma kuli Mulungu, tuyitegeleje iyo twiinhiwa dalali na Mulungu. Nayo yeniyo tukuyilungalungaga, iti mu mihayo iyo ikulangagwa na masala ga ki-munhu, aliyo mu mihayo iyo ikulangagwa na Moyo Ngʼwela; tukuyipimaga mihayo ya ki-moyo mu nzila ya ki-moyo. Aliyo munhu wa nhungwa ya kimunhu atuyanukulaga mihayo ya Moyo wa Mulungu; iki ili ya buchiluchilu kuli wei; nulu atudula kuyimana, iki yitegelejiwa ki-moyo. Aliyo uyo ali wa ki-moyo akwitegelejaga yose, nulu wei ngʼwenekele atitegelejiwa na munhu ungi. Iki nani uyo wali umana iganiko lya Seba, anange? Aliyo biswe tuli nalyo iganiko lya ngʼwa Kristo. Na nene, badugu, nali natudula kulungalunga ku bingʼwe gitumo ku ba ki-moyo, aliyo gitumo ku ba ki-mili; gitumo ku bana belele muli Kristo. Nali numungʼwisha mabele, nali natumulisha nyama yaya; iki ngʼwali mutali kushidula; chene nulu haha mutali kushidula; Iki mutali muli ba ki-mili: iki gitumo buli mo mu bingʼwe wilu na buyombo, na kwilekanya, angu, muti ba ki-mili, hangi mukushiminzaga gitumo kili chimile cha ki-munhu? Iki aho umo wahaya giki, Nene ndi wa ngʼwa Paulo; na ungi giki, Nene ndi wa ngʼwa Apolo; angu, muti ba ki-mili? Ali lulu, Apolo ali nani? na Paulo ali nani? Bali binhilija gwike, abo ngʼwaazunya kulwabo; na buli munhu gitumo Seba waangʼwinha. Nene nakahamba, Apolo wisila minzi; aliyo Mulungu ubyukuja. Giko lulu, uyo akuhambaga ati kinhu, nulu uyo akwisilaga minzi; aliyo Mulungu Uyo akukujaga. Uyo akuhambaga na uyo akwisilaga bali bumo: aliyo buli munhu alinhiwa mhela yakwe ngʼwenekele gitumo milimo yakwe umo yali ili. Iki biswe tuli batumami biye ba Mulungu; bingʼwe muli ngunda gwa Mulungu, muli numba ya Mulungu. Gitumo kigongo cha Mulungu icho niinhiwa, kina ntale wa bazengi wa masala, naagutuula ho musingi gwa numba; na ungi uzengela higulya yago. Aliyo buli munhu ilanghanage gitumo akuzengelaga higulya yago. Iki munhu atudula kutuula ho musingi gungi kuleka uyo gwaatuulwa ho, u gwene Yesu Kristo. Aliyo ulu munhu ose uzengela higulya ya musingi gwenuyu zahabu, nulu feza, nulu mawe ga mpango ntale, nulu miti, nulu maswa, nulu matindigisi; Nimo gwakwe gwa buli munhu guligengelechiwa hape; iki lushiku ulo lulagufumbula, iki gulakundulilwa mu moto; na moto gwenuyo gulagugema nimo gwa b uli munhu, gumanike umo guli. Nimo gwa munhu ose gwenuyo waaguzengelaga higulya yago, ulu gwikala ho, alinhiwa mhela. Nimo gwa munhu ose ulu gupemva, alagayiwa; aliyo wei ngʼwenekele alapijiwa; aliyo nahene, giti wapijiwa mu moto. Mutamanile giki, bingʼwe muli hekalu ya Mulungu, hangi giki, Moyo wa Mulungu azengile mu bingʼwe? Munhu ose ulu ukenagula hekalu ya Mulungu, ngʼwenuyo Mulungu akunkenagula; iki hekalu ya Mulungu ili nela, yene bingʼwe. Munhu atizilembalemba ngʼwenekele. Munhu ose mu bingʼwe ulu wiyiganika ngʼwenekele giki, ali wa masala ngʼwikanza ili, leka ni abizage nchiluchilu, huna abize wa masala. Iki masala ga si iyi gali buchiluchilu kuli Mulungu. Iki gwaandikwa giki, Wei akubagwashaga ba masala mu masalasala gabo ga benekele: Na hangi giki, Seba agamanile maganiko ga ba masala, giki, gali ga dalali. Huna lulu munhu atizikumilija mu banhu; iki shinhu shose shili shingʼwe; Nulu Paulo, nulu Apolo, nulu Kefa, nulu si, nulu bupanga, nulu kucha, nulu isho shili ho, nulu isho shilabiza ho; shose shili shingʼwe; Na bingʼwe muli ba ngʼwa Kristo; na Kristo ali wa Mulungu. Munhu ose atubale biswe giki, tuli batumami ba ngʼwa Kristo, na babikijiwa ba ya kwigeniha ya Mulungu. Hangi igongile mu babikijiwa giki, munhu abonwe ali ngʼwishigwa. Aliyo kuli nene guli mhayo ndo ulu nalekanyiwa na bingʼwe, nulu na kalekanije ka ki-munhu, hangi nulu natilekanyaga nene ngʼwenekele. Iki natimanaga giki, ndi na kilingo; aliyo natubiza ntungiligijiwa kulwa mhayo uyu: aliyo Uyo wa kunilekanya ngʼwene Seba. Kulwa iyo mutizulekanya mhayo gose aho ikanza lyago litali kushika, kushisha Seba aho aliza, Uyo alafumbula ngʼwisana mihayo ya giiti iyo yali ibisile, hangi alagatenda hape maganiko ga mu ngholo; huna lulu buli munhu alabona kukumilijiwa kufuma kuli Mulungu. Mihayo yeniyi, badugu, nayita hubiza kigemelo cha kuli nene na kuli Apolo kulwingʼwe; ngʼwilange mu biswe giki, mutiziganika kukilanya iyo yaandikwa; munhu ose atizudosela muli umo na kundalaha ungi. Iki ni nani uyo wakubeja wikilile na ungi? hangi uli na ki icho utanukulile? na ulu waachanukula, ulikumilija giti utachanukulile ni buli? Ngʼwamala kwiguta nose, ngʼwamala kusaba, mutemile na kutema biswe tuti ho; ni yabela ulu ni ngʼwatema gete, niswe tuteme hamo ningʼwe. Iki niganika giki, Mulungu watolekije biswe a batungʼwa kubiza ba ku bukalikijo, giti banhu abakongʼwa kubulagwa: iki twaabiza cha kwilolelwa ku si, ku bamalaika, na ku banhu. Biswe tuli bachiluchilu kulwa nguno ya ngʼwa Kristo, aliyo bingʼwe muli balalanghanu muli Kristo; biswe tuli bagokolo, aliyo bingʼwe muli ba nguzu; bingʼwe muli ba ikujo, aliyo biswe tuli badalahwa. Kushisha na kakanza kenaka tuli na butubu, na kukolwa nota, tuli bazuka, tukukundugagwa shingholoshi, na tuti na wikalo wa nghana; Hangi tukukoyaga tubyutumama na makono giswe. Ulu tolomyiwa, tukusungulilaga lubango; ulu tunyajanyajiwa, tukwiyumilijaga; Ulu tusondagulwa, tukwikumbilijaga: twabile giti mapalala ga si, kibugulu cha shinhu shose, na kushisha haha. Mihayo iyi natandikile kulwa kumudimya minala, aliyo kulwa kumuganikila gitumo bana bane batogwa. Iki nulu ngʼubiza na balangi ba kihumbi muli Kristo, nahene muti na basingʼwe bingi: iki nene naamubyala bingʼwe muli Kristo Yesu, mu nzila ya evangeli ya bupiji. Kulwa iyo, nangʼwikumbilija bingʼwe giki, bizagi balondeji bane. Kulwa mhayo uyu nantumaga Timoteo ku bingʼwe, uyo ali ngʼwana wane ntogwa, na ngʼwishigwa muli Seba, ngʼwenuyo akungʼwizukija bingʼwe shimile shane umo shili muli Kristo, gitumo nakalangaga hose hose mu buli kanisa. Aliyo bamo bakudosaga, giti natiza ku bingʼwe. Aliyo nakwiza ku bingʼwe wangu, ulu Seba utogwa; huna kumana nakumana budula wa benabo abalidosa, iti kalungalungile kabo duhu. Iki butemi wa Mulungu buti mu kalungalungile, aliyo mu budula. Mutogilwe ki? nize ku bingʼwe na nanga, nulu nize mu butogwa na moyo gwa bupolo? Nghana ikumukile giki, bujingi buli ho ku bingʼwe; na bujingi wenubu nulu kuhayiwa butahayiwagwa nulu mu bana mahanga, giki, munhu kubiza na nke wa ngʼwa ise. Na bingʼwe mulidosa, na kupinihala yaya, giki, injiwe ho mu bingʼwe ngʼwenuyo witile chitile cheniki. Iki nene nghana, nulu nati ko mu mili, nahene ndi ko hamo ningʼwe mu moyo, namalaga kunekanya nsango uyo watumamile chitile cheniki giko, giti ni ndi ko, Mu lina lya Seba wiswe Yesu Kristo, bingʼwe aho gnʼwibilinga hamo, na moyo gwane, hamo na budula wa Seba wiswe Yesu Kristo, Kungʼwinha ko munhu uyo ali giko kuli Shetani nhungwa ya mili gwakwe ikenagulwe, moyo gwakwe gupijiwe mu lushiku lwa Seba wiswe Yesu. Kwikumilija kwingʼwe kuti kwa wiza. Mutamanile giki, kakibimbya kado kakabimbaja mbiiya yose? Injagi ho kibimbya cha kale ngʼwele, mubize mbilya mhya, gitumo muti na kibimbya. Iki Pasaka yiswe yaafunyiwa kitambo kulwa biswe, i yene Kristo. Huna yene, twite lushiku lutale, iti na kibimbya cha kale, nulu na kibimbya cha isubi na buhunga, aliyo na shiliwa ishitabimbiwe, i sha wiza na nghana. Naangʼwandikila bingʼwe mu nyaluba yane giki, mutizisangija na bajingi; Natuhayaga ya bajingi ba si iyi, nulu bigongi, nulu bataja, nulu balamya ba shikolile; iki ulu ni ili giko ni shigelile kwinga mu si: Aliyo haha, nangʼwandikila bingʼwe giki, mutizisangija hamo na munhu ose uyo akitanagwa ndugu ulu ali njingi, nulu ngʼwigongi, nulu namya wa shikolile, nulu ngʼolomya, nulu nkolwa walwa, nulu ntaja; munhu ali giko, nulu kulya nanghwe yaya. Iki guli mhayo ki kuli nene kubalekanya nsango benabo ba hanze? angu, mutubalekanyaga nsango benabo ba mugati? Aliyo Mulungu akubalekanyaga nsango benabo ba hanze. Ngʼwinjagi munhu uyo nghunga mu bingʼwe. Angu, munhu wa mu bingʼwe, ulu ali na mhayo na ngʼwiye, wagima kinahe kuja kulekanyiwa mu butongi wa bati batungilija, na mu butongi wa bela yaya? Himba mutamanile giki, bela balabalekanya nsango ba mu si? na ulu ba mu si balalekanyiwa nsango na bingʼwe, angu, mutigelelilwe kulekanya nulu tumihayo tudo? Mutamanile giki, tulabalekanya nsango bamalaika? tulemelwe kinahe lulu mihayo ya bupanga ubu? Nahene, ulu muli nayo mihayo ya kulekanya ya bupanga ubu, batuulagi ho ba kuyilekanya abo abati na ikujo mu kanisa. Nahaya iyi ya kumudimya minala. Angu, ili giko mu bingʼwe nghana ati ko munhu wa masala nulu umo yaya, uyo akudula kubuta mihayo ya munhu na nduguye? Aliyo ndugu akujaga na nduguye kulekanyiwa, na yeniyi mu butongi wa bati bazunya. Nghana haha kilingo kili mo gete mu bingʼwe, iki muli nayo misango benekele na benekele. Hambuhambu muzunye kwitilwa kibi; hambuhambu muzunye kunyekejiwa. Aliyo mukwitaga ya bubi na kubanyekeja na yeniyo mukubitilaga badugu bingʼwe. Nulu mutamanile giki, abati batungilija batalingila wingiji wa butemi wa Mulungu? Mutizulembalemva; nulu bajingi, nulu balamya shikolile, nulu bashihya, nulu ba kikima, nulu bikenaguji na bagosha, Nulu bibi, nulu bigongi, nulu bakolwa walwa, nulu bolomya, nulu bataja, batalawingila butemi wa Mulungu yaya. Na bamo ba mu bingʼwe ngʼwali muli chene; aliyo ngʼoojiwa, aliyo ngʼweejiwa, aliyo ngʼwaatungiligijiwa mu lina lya Seba wiswe Yesu Kristo, na muli Moyo wa Mulungu wiswe. Shose shizuniligije kuli nene, aliyo iti giki, shose shili na bugunani; shose shizuniligije kuli nene, aliyo natuzunya kusugwa na kinhu chose chose. Shiliwa shili ho kulwa nda, na nda nayo kulwa shiliwa; aliyo Mulungu alashita kubiza dalali shose, bubili washo, iyo na isho. Aliyo mili guti kulwa bujingi, aliyo kulwa Seba, nanghwe Seba kulwa mili: Na Mulungu waanjucha Seba wiswe, hangi alatujucha na biswe mu nzila ya budula wakwe. Mutamanile giki, mibili yingʼwe ili mabudika ga ngʼwa Kristo? Ninje ho lulu mabudika ga ngʼwa Kristo, nagite kubiza mabudika ga ngʼwimilizu? Na hado yaya. Nulu mutamanile giiti, uyo wadimanyiwa na ngʼwimilizu ngʼwene ali mili gumo nanghwe? Iki Wei wahaya giki, U bubili wabo bakubiza ki-mili kimo. Aliyo uyo wadimanyiwa na Seba wiswe ngʼwene ali moyo gumo nanghwe. Bupelagi bujingi. Buli kibi chose icho munhu wita kili kunze ya mili gwakwe; aliyo uyo wita bujingi akwitaga shibi ku mili gwakwe ngʼwenekele. Nulu mutamanile giki, mili gwingʼwe guli hekalu ya Moyo Ngʼwela, Uyo ali mu bingʼwe. Uyo muli nanghwe kufuma kuli Mulungu? hangi muti ba bingʼwe benekele; Iki ngʼwaagulwa na mpango ntale; nahene nkujagi Mulungu mu mibili yingʼwe, na mu mioyo yingʼwe, i shene shakwe Mulungu. Mihayo yeniyo ngʼwanandikilile ili giki, ili ya wiza kuli ngosha nulu kunkuumya nkima yaya. Aliyo kulwa kuwihunga bujingi, buli ngosha abize na nke wakwe ngʼwenekele, na buli nkima abize na ngoshi wakwe ngʼwenekele. U ngosha angʼwinhage nke wakwe iyo ingʼwigelelilwe, giko hangi nkima nanghwe ite kuli ngoshi wakwe. Nkima ati na busugi ku mili gwakwe ngʼwenekele, aliyo ngoshi wakwe; giko hangi ngosha nanghwe ati na busugi ku mili gwakwe ngʼwenekele, aliyo nke wakwe. Mutiyimage benekele na benekele, ulu iti kulwa kulagana ikanza, mubize na ngʼwanya gwa kudila nzala na kulomba, nahene; na mushoke kubiza hamo hangi, Shetani atizumugema kulwa kulema kwilinda kwingʼwe. Aliyo mhayo uyo nahaya gwa kuzunilija, guti gwa kilagilo. Iki ni natogwa banhu bose kubiza gitumo ndi nene. Aliyo buli munhu ali na cha kwinhiwa chakwe cha ngʼwenekele kufuma kuli Mulungu, umo kingi na ungi kingi. Aliyo ku abo abatatolile na ku bachilwa, nahaya giki, Ili ya wiza kubo ulu bikala gitumo ndi nene. Aliyo ulu bati na kwilinda, bitole; iki ili hambuhambu kwitola kutinda kubaka moto. Aliyo abatoleke nabakomeleja, nulu iti nene, aliyo Seba giki, Nkima atizulekana na ngoshi wakwe. Aliyo ulu ulekana, ikale na kutolwa yaya, nulu azunye kwisangija na ngoshi wakwe; hangi ngosha atizuneka nke wakwe. Aliyo a bangi nabawila nene, iti Seba, giki, Ndugu ose ulu ali na nke ati nzunya, na nkima ngʼwenuyo uzunya kwikala hamo nanghwe, atizuneka nke. Hangi na nkima uyo ali na ngoshi ati nzunya, na ngosha ngʼwenuyo uzunya kwikala nanghwe, atizuneka ngoshi. Iki ngoshi ati nzunya wejiwa muli nke wakwe, na nke ati nzunya wejiwa muli ngoshi wakwe; ulu ni iti giko, bana bingʼwe ni bali basoso; aliyo haha bali bela. Aliyo uyo ati nzunya ulu ulekana, nahene alekane; ndugu ngosha nulu ndugu nkima ati ntungwa mu mihayo giti iyo; aliyo Mulungu waatwitanila mu mhola? Iki bebe nkima, umanile kinahe, hamo ukumpija ngoshi wako? nulu bebe ngosha, umanile kinahe, hamo ukumpija nke wako? Gwike gitumo Seba wangabilile buli munhu, chene gitumo Mulungu waangʼwitanila, ashiminzage giko. Hangi nakabalagilaga giko mu kanisa jose. Munhu ose ulu wiitanwa asalilwe, atiziyita kubiza giti atasalilwe. Munhu ose ulu wiitanwa atasalilwe, atizusalwa. Kusalwa kuti mhayo, na butusalwa buti mhayo; aliyo kushidima shilagilo sha Mulungu. Buli munhu ikalage mu kitanilwe ako wiitanilwa mo. Bebe ulu wiitanwa uli nsese, utiganiligijage mhayo uyo; aliyo na kudula ulu wadula kutungulilwa kubiza ngʼwana wa banhu, hambuhambu uyitumamile. Iki uyo wiitanwa muli Seba ali nsese, ngʼwene ali ntungulilwa wa Seba; giko hangi uyo wiitanwa ali ngʼwana wa banhu, ngʼwene ali nsese wa ngʼwa Kristo. Bingʼwe ngʼwaagulwa na mpango ntale; mutizubiza basese ba banhu. Badugu, buli munhu ikalage hamo na Mulungu mu kikalile ako wiitanilwa mo. Mihayo ya ku banhya bibembu, nati na kilagilo cha Seba; aliyo nangʼwinha kupima kwane, gitumo nene Seba wiswe akanichila kigongo nabize ngʼwishigwa. Kulwa iyo niganika giki, Ili ya wiza, kulwa nguno ya makoye agali ho agalitugwila, munhu ikale gitumo ali. Waatungwa kuli nkima? utizukoba kutungulilwa. Waatungulwa kuli nkima? utizukoba nkima. Aliyo nulu utola, nahene utitile shibi; na munhya ngʼwibembu ulu utolwa, nanghwe atitile shibi: aliyo abali giko bakubiza na kuluhaluhiwa mu ki-mili; na nene natogilwe kumugugila kigongo. Aliyo nahaya giki, badugu, lyasaga ikanza ido, kufuma haha abo bali na bakima babize giti bati nabo; Nabo abalila shisoji babize giti batulilaga; nabo abayega babize giti batuyegaga; nabo abagula shikolo, babize giti bati na kinhu; Nabo abayitumamila si yeniyi, batizuyitumamila kibi; iki mihayo ya si iyi ikubitaga. Aliyo natogilwe bingʼwe mubize muti na kwiganilija. Uyo atatolile akwikoyelaga mihayo ya Seba giki, anyeje Seba kinahe; Aliyo ngʼwenuyo ntoleke akiganilijaga mihayo ya si iyi giki, anyeje nke wakwe kinahe. Balekanile hangi shike na munhya. Uyo atatolilwe akiganilijaga mihayo ya Seba wiswe, abize ngʼwela mu mili na mu moyo; aliyo uyo atolilwe akiganilijaga mihayo ya si iyi giki, anyeje ngoshi wakwe kinahe. Nahaya iyi kulwa kumugunana; iti giki, namutege ikila yaya, aliyo kulwa iyibelile, mubizuntumamila Seba muti na mapinja. Aliyo munhu ose ulu upima giki, atungʼwitilaga chiza ngʼwana wakwe munhya ngʼwibembu, ulu wakulila bukulu, hangi ulu igelile kubiza chene, nahene, ite gitumo atogilwe, atita shibi: bitolage. Aliyo uyo uhandikila mu ngholo yakwe, na kuhadikijiwa yaya, aliyo ali na budula kusuga iyo atogilwe ngʼwenekele, na waalekana mu ngholo yakwe giki, akuninda ngʼwana wakwe munhya ngʼwibembu, nahene akubeja chiza. Huna lulu uyo ungʼwinha ko ngʼwana wakwe kutolwa, akubeja chiza; aliyo uyo atungʼwinha ko kutolwa, akubeja chiza kutinda. Nkima atungilwe mu shilagilo ikanza lyose aho ngoshi wakwe atali ho mpanga; aliyo ulu ngoshi wakwe ucha, ali ntungulilwa lulu kutolwa na munhu ose uyo antogilwe; aliyo muli Seba gwike. Aliyo gitumo napima nene, ali wa lubango kutinda ulu wikala giko; hangi napima giki, nene nane ndi nanghwe Moyo wa Mulungu. Mihayo ya ku shinhu isho shufunyiwa ku shikolile sha kulamiwa ili giki, tumanile biswe bose tuli nabo bumani: bumani bukenhaga budoshi, aliyo butogwa bukuzenjaga. Munhu ose ulu wiganika giki, amanile mhayo, atamanile mhayo nulu gumo gitumo shingʼwigelile kugumana. Aliyo munhu ose ulu untogwa Mulungu, ngʼwenuyo wamanagwa nanghwe. I mihayo ya kulya isho shufunyiwa ku shikolile sha kulamiwa, tumanile giki, chikolile cha kulamiwa kiti kinhu mu si, hangi giki, ati ho Mulungu ungi aliyo umo wike. Iki nulu bali ho abitanwa bamulungu, nulu ngʼwigulu nulu mu si, gitumo bali ho bamulungu bingi na baseba bingi; Aliyo ku biswe ali ho Mulungu umo, Ngʼwene Siswe, muli Wei shufumila shinhu shose, na biswe kuli Wei; hangi ali ho Seba umo, Ngʼwene Yesu Kristo, Uyo shinhu shose shili ho kulwa budula wakwe, na biswe kulwa budula wakwe. Aliyo bumani ubu buti mo mu banhu bose: aliyo bamo kulava kumanila chikolile cha kulamiwa kushisha haha, bakulyaga giti kili kinhu chufunyiwa ku chikolile cha kulamiwa, na wiyanguji wabo iki buli bugokolo, busosohajiwa. Aliyo shiliwa shitutubelejaga kuli Mulungu; iki nulu tulya, nahene tutongejaga kubelela, nulu ulu tutulyaga nahene tutugehejiwa kinhu. Aliyo ilanghanagi budula wingʼwe ubu butizubiza mhayo gwa kwipamya ku bagokolo. Iki ulu munhu ukubona bebe uyo uli na bumani wigashije ku shiliwa mu hekalu ya shikolile sha kulamiwa, wiyanguji wa ngʼwenuyo iki all ngokolo, angu, butuzengwa kulya isho shufunyiwa ku shikolile sha kulamiwa? Huna lulu ngokolo ngʼwenuyo akuyagala kulwa bumani wako, nanghwe ndugu uyo Kristo waanchilila. Aliyo giko, iki mukasobaja giko ku badugu, na kubusatya wiyanguji wabo ubuli bugokolo, mukusobaja kuli Kristo. Kulwa iyo ulu shiliwa shungʼwipamya ndugu wane, natalalya nyama na hado kushisha welelo na welelo, natizungʼwipamya ndugu wane. Angu, nene nati ntungʼwa? nene nati ngʼwana wa banhu? nene natamonile Yesu Kristo Seba wiswe? bingʼwe muti milimo yane muli Seba? Ulu nati ntungʼwa ku bangi, nahene ku bingʼwe ndi ntungʼwa; iki bingʼwe muli kimanikijo cha butungʼwa wane muli Seba. Kwitolongola kwane ku benabo abalinilekanya kuli giki, Angu, biswe tuti na budula kulya na kungʼwa? Angu, biswe tuti na budula kuntwala hamo niswe nke uyo ali ndugu mu kuzunya, gitumo bakwitaga a batungʼwa bangi, na bana ba ngʼwawe ba Seba, na Kefa? Nulu hamo nene wike na Barnabas tuti na budula wa kuleka kwita milimo? Nshilikale nani akujaga ku bulugu na kwilisha ngʼwenekele? Nani akulimaga ngunda gwa mizabibu, nanghwe atalyaga ku matwajo gago? Nulu nani akudimaga idale, nanghwe atangʼwaga ku mabele ga idale? Himba nalungalunga mihayo yeniyi ki-munhu duhu nulu shilagilo nasho shituhayaga chene? Iki gwaandikwa mu shilagilo sha ngʼwa Musa giki, Utalizutunga nomo gwa ngʼombe aho ikupandagilaga busiga. Himba Mulungu ajikalalilwe ngʼombe? Nulu uguhaya kulwa nguno yiswe gete? Ali chene, gwaandikwa kulwa nguno yiswe, giki, uyo akulimaga alime mu kwisagilwa, na uyo akutulaga busiga, atule mu kwisagilwa kwa kupandika ya kwisagilwa kwakwe. Ulu biswe twamubibilile sha ki-moyo, guli mhayo ntale lulu ulu tulashigesa shinhu shingʼwe sha ki-mili? Ulu bangi bali na budula ubu ku bingʼwe, angu, itigelile biswe kutinda benabo? Aliyo biswe tutabutumamilaga budula wenubu; aliyo tukiyumilijaga mu yose, tutizuhangija evangeli ya bupiji ya ngʼwa Kristo. Mutamanile giki, abo abakatumamaga mu milimo ya mu hekalu bakalyaga sha mu hekalu, na benabo abakinhilijaga ku ngʼwalilo bali na ngabo gwabo mu isho sha ha ngʼwalilo? Giko hangi na Seba waalagila giki, abo abakalomelaga evangeli ya bupiji, balishiwe mu i sha evangeli ya bupiji. Gitumo Paulo wilecha kulwa evangeli ya bupiji Aliyo nene natayitumamilaga mihayo yeniyi na hado, hangi natiyandikilile mihayo yeniyi giki, yitwe giko kuli nene: iki ili hambuhambu kuli nene kucha, kutinda munhu ose atizita kubiza dalali kwikumilija kwane. Iki nene nulu nulomela evangeli ya bupiji, nahene nati nayo ya kwikumiligija; iki ndi nghadikijiwa; nghana nalasangwa ulu natulomela evangeli ya bupiji. Iki ulu nene nita mhayo uyu kulwa butogwa wane, ndi na mhela; aliyo ulu iti kulwa butogwa wane nalekelwa kalongeje. Mhela yane ili ki lulu? Ili giki, aho nulomela evangeli ya bupiji, nayite evangeli ya bupiji ya ngʼwa Kristo dalali na mhela yaya, natizushikilija gete budula wane mu evangeli ya bupiji. Iki nene nulu natasugilwe na munhu ose, nahene niisesehaja ngʼwenekele ku bose, nabapandike bingi kutinda. Hangi ku Bayudaya nubiza giti Nyudaya, nabapandike a Bayudaya; ku abo abasugilwe na shilagilo, nubiza giti nasugilwe na shilagilo, nabapandike abasugilwe na shilagilo; Ku abo abati na shilagilo, nubiza giti nati na shilagilo, (iti giki, nati na shilagilo mu butongi wa Mulungu, aliyo ndi mo mu shilagilo sha ngʼwa Kristo,) nabapandike abati na shilagilo. Ku bagokolo nubiza giti ngokolo, nabapandike bagokolo. Nabiza wa shimile shose ku banhu bose, giki, mu nzila jose nabapije bamo. Nakwitaga yeniyi kulwa nguno ya evangeli ya bupiji, nabize na nsangiji muyo. Mutamanile giki, abakapelaga mu kwishiganilwa, kupela bakapelaga bose, aliyo uyo wa kwanukula mhela ali umo wike? Pelagi giko, ningʼwe mu-pandike. Buli munhu uyo akugagabalaga kutinda mu mawigusha akilindaga ngʼwenekele mu mihayo yose. Benabo lulu bakitaga giko, banukule ngikili ya butindi nghenaguku, aliyo biswe iyo iyiti nghenaguku. Kulwa iyo nene nakapelaga giko, iti mu kwihulahuja; nakutimbagulaga iti giti uyo akuyitimbagulaga miuyi, Aliyo nakugutulagulaga mili gwane na kugusesehaja, itizubiza aho namalaga kubalomela bangi hanuma u nene ngʼwenekele nabize nahagwe. Badugu, natatogilwe bingʼwe kwikala mutamanile iyi giki, bakulugenji biswe bose bali bali hasilili ya ilunde, na bose bali bubita mu nyanza; Na bose bali bubatijiwa kuli Musa ngʼwilunde na mu nyanza; Na bose bali bulya kiliwa icho kimo cha ki-moyo; Na bose bali bungʼwa kingʼwiwa icho kimo cha ki-moyo; iki bali bungʼwa ku kiganga cha ki-moyo icho chubyubalondela: na kiganga icho chene Kristo. Aliyo bingi babo Mulungu walatuyejiwa nabo; iki bubyumalilwa mu bu. Aliyo mihayo yeniyi yabiza mabulolelo ku biswe, giki, tutizubiza bikumva ba sha bubi, gitumo benabo bali bikumva. Nulu mutizubiza balamya ba shikolile, giti bamo mubo; gitumo gwaandikwa giki, Banhu bali bigasha kulya na kungʼwa, huna bubuka kubina mbina. Nulu tutizita bujingi, gitumo bamo mubo bali bita bujingi, nabo bugwa bucha ku lushiku lumo banhu 23,000. Nulu tutizungema Seba, gitumo bamo mubo bakangema, nabo buyagajiwa na mayoka. Nulu mutizuduguma, gitumo bamo mubo bakaduguma, nabo buyagajiwa na nyagaja. Mihayo yeniyi yali yubagwila benabo kubiza mabulolelo, nayo yaandikwa kulwa kutuhugula biswe aba twapandikwa na bukalikijo wa makanza. Huna lulu uyo akwiganikaga giki, imilile, ilanghanage atizugwa. Mutinadingʼwa na kugengʼwa ulu kuti uko bakagemagwa banhu bose; aliyo Mulungu ali ngʼwishigwa, Wei atuzunilija bingʼwe mugengʼwe na kugengʼwa kwa kumulebya budula wingʼwe; aliyo hamo na kugengʼwa akutuula ho nzila ya kupulugukiia, giko mudule kwiyumilija muko. Kulwa iyo, batogwa bane, bupelagi bulamya shikolile. Nalilungalunga giti na banhu ba masala: ipimagi iyo nahaya. Kikombe cha lubango icho tukukisungulilaga lubango, angu, kiti kusangila kwa mininga ga ngʼwa Kristo? Na ngati uyo tukumeganyaga, angu, guti kusangila kwa mili gwa ngʼwa Kristo? Iki ngati gwene gumo, biswe aba tuli bingi tuli mili gumo: iki biswe bose tukusangilaga ku ngati gwenuyo gumo. Balolagi ba Israeli ba mu mili: abo abakalyaga ku shitambo, angu, bati busangi bumo na ngʼwalilo? Iyo nahaya ili kinahe lulu? himba chikolile cha kulamiwa kili kinhu, nulu icho chufunyiwa ku chikolile cha kulamiwa kili kinhu? Yaya, aliyo nahaya giki, isho bakashifunyaga kubiza shitambo a bana mahanga, bakagafunijaga masamva, iti kuli Mulungu yaya: natatogilwe bingʼwe kubiza ba busangi bumo na masamva. Mutudula kungʼwa ku kikombe cha Seba, na ku kikombe cha masamva: mutudula kusangila ku meza ya Seba, na ku meza ya masamva. Hamo twangʼwitya Seba wilu? nulu hamo tuli na nguzu kutinda Wei? Shose shizuniligije kuli nene, aliyo iti giki, shose shili na bugunani; shose shizuniligije kuli nene, aliyo iti giki, shose shikuzenjaga. Munhu ose atizukoba kwipandikila ngʼwenekele, aliyo akobe kumpandikila ngʼwiye. Shose shikajinjiwagwa mu sokoni, shene lyagi, yaya kubugilija, kulwa nguno ya wiyanguji. Iki si yose ili ya Seba na shiyokagije shayo. Munhu ati nzunya ulu umulalika, ningʼwe ulu mutogilwe kuja ko; shose mukatengelwe lyagi, yaya kubugilija, kulwa nguno ya wiyanguji. Aliyo ulu munhu ose umuwila giki, kinhu iki chali chafunyiwa ku chikolile cha kulamiwa, mutizukilya, kulwa nguno yakwe uyo wakifubola, na kulwa nguno ya wiyanguji; iki si yose ili ya Seba; Nahaya giki, kulwa nguno ya wiyanguji, iti wako, aliyo wa ngʼwa ungi; iki butungulwa wane, bulilekanyiwa nsango na wiyanguji wa ngʼwa ungi ni buli? Iki nene ulu nusangila na kulumba, nadukwe ni buli kulwa nguno ya isho nanumba Mulungu kulwasho? Kulwa iyo nulu mukulyaga, nulu mukungʼwaga, nulu mhayo gose uyo mukwitaga, itagi yose kulwa ikujo lya Mulungu. Mutizutuula mhayo gwa kwipamya nulu ku Bayudaya, nulu ku Bagriki, nulu ku kanisa ya Mulungu. Gitumo nu nene nakubayejaga bose mu mihayo yose, natakobaga solobo yane, aliyo i ya banhu bingi giki, bapijiwe. Bizagi balondeji bane, gitumo nu nene ndi nondeji wa ngʼwa Kristo. Namukumilija, badugu, iki mukanizukagwa mu mihayo yose; hangi mukadimaga shimile gitumo naangʼwinha bingʼwe. Aliyo natogilwe ngʼwitegeleje giki, ntwe gwa buli ngosha gwene Kristo; na ntwe gwa nkima gwene ngosha: na ntwe gwa ngʼwa Kristo gwene Mulungu. Buli ngosha ulu ulomba nulu uhanga, afikigije ntwe gwakwe gukundikijiwe ko, wagudimya minala ntwe gwakwe. Aliyo buli nkima ulu ulomba, nulu uhanga, na atazwalile ku ntwe wagudimya minala ntwe gwakwe; iki gwenuyu guli mhayo gumo na kumogwa. Iki nkima ulu atafikigije ku ntwe, nahene asunzulwe: aliyo ulu ili minala kuli nkima kusunzulwa nulu kumogwa, afikilagwe ko. Iki ngosha shitangʼwigelile kuzwala ngʼwenda ku ntwe, iki wei ali wikolile na Mulungu, na ikujo lya Mulungu; aliyo nkima ali ikujo lya ngosha. Iki ngosha atafumile muli nkima; aliyo nkima afumile muli ngosha. Iki hangi ngosha walatusengʼwa kulwa nguno ya nkima; aliyo nkima kulwa nguno ya ngosha. Kulwa mhayo uyu, shingʼwigelile nkima kubiza na kalolelo ka busugwa ku ntwe gwakwe kulwa nguno ya bamalaika. Nahene muli Seba nulu nkima atubiza ho ulu ati ho ngosha, nulu ngosha atubiza ho ulu ati ho nkima. Iki gitumo nkima wali utuma muli ngosha, giko ngosha nanghwe wabiza ho iki wabyalwa na nkima; aliyo bufumanwa wa shinhu shose shaafuma kuli Mulungu. Ilekanyagi bingʼwe benekele: angu, ibelelile nkima kulomba kuli Mulungu na atafikigije ku ntwe? Kitungilwe chingʼwe chenekele kitumulangaga giki, ngosha ulu ubiza na nzwili ndipu yene minala kuli wei? Aliyo ulu nkima ali na nzwili ndipu, lyene ikujo lyakwe; iki winhiwa nzwili jakwe kubiza cha kufikija. Aliyo munhu ose ulu atogilwe kwenha kuhalalila, biswe tuti na shimile ishili giko nulu kanisa ja Mulungu. Mu bulagiji wa yeniyi natumukumilijaga iki u kwibilinga kwingʼwe kuti na cha kumubelela, aliyo cha kumubihya. Iki ya kwandia, nigwile giki, aho ngʼwibilingila mu kanisa, kulekana kuli mo mu bingʼwe; na nene naguzunyazunya hado mhayo uyu. Iki wisolanya butukija kubiza ho mu bingʼwe, hunaho abo abazunilijiwa bigengeleke ku bingʼwe. Kulwa iyo aho ngʼwibilingila hamo, itudulika kulya sha kulagila sha Seba; Iki mu kulya kwingʼwe buli munhu akwandiaga kwinja cha kulagila chakwe ngʼwenekele; na ungi atubile, na ungi akolilwe walwa. Angu, muti na numba ja kulila na ja kungʼwela? Nulu hamo ngʼwadalaha kanisa ya Mulungu, na kubadimya minala abo abati najo? Namuwile kinahe? Angu, namukumilije mu yeniyi? Natumukumilija. Iki nene naanukula kuli Seba iyo naangʼwinha bingʼwe, giki, Seba Yesu mu bujiku ubo wali winhiwa ko, udima ngati; Aho umala kulumba, ugumeganya, uhaya giki, Uyu gwene mili gwane uguli ho kulwingʼwe; itagi giko kulwa kunizukwa Nene. Giko hangi na kikombe aho bumala kulya, uhaya giki, Kikombe iki kili ilangane ipya mu mininga gane: itagi giko, buli lukangala lose mulangʼwage ko, kulwa kunizukwa Nene. Iki buli aho mukugulyaga ngati uyu, na kungʼwa ku kikombe iki, mulikukumucha kucha kwa Seba kushisha aliza. Kulwa iyo, uyo ose ulu ugulya ngati gwenuyu nulu ukingʼwela kikombe iki cha Seba, gitumo itigelile, akubiza na nsango gwa mili na mininga ga Seba. Aliyo munhu ose igisilije ngʼwenekele, huna lulu agulye ngati, angʼwe ku kikombe. Iki uyu uwalya na ungʼwa gitumo itigelile, akulyaga na akungʼwaga nsango kulwakwe ngʼwenekele, kulwa butukomanya mili gwa Seba. Kulwa nguno ya mhayo uyu hali ko bingi mu bingʼwe abali bagokolo na balwile, na bingi bashutulile. Aliyo ulu ni twilekanya chiza biswe benekele, ni tututindwa nsango. Aliyo ulu twalekanyiwa nsango, twatwenyiwa na Seba giki, tutizulekanyiwa nsango kihamo na ba mu si. Kulwa iyo, badugu bane, aho ngʼwibilinga kulya, ngʼwilindiile. Munhu ose ulu watuba alye ku kaya; mutizibilingila nsango. Na iyasaga ho ulu ndiza nakuyibeja. Na ku mihayo ya sha kwinha sha ki-moyo, badugu, natatogilwe bingʼwe ngʼwikale na kumana yaya. Mumanile giki, aho ngʼwali muli bana mahanga, ngʼwali ngʼutwalanijiwa ku shikolile sha kulamiwa ishitalungalungaga, hose hose gitumo ngʼwali mutongelwa. Kulwa iyo nangʼwitegeleja giki, ati ho munhu uyo akalungalungaga mu Moyo Ngʼwela wa Mulungu wa kuhaya giki, Yesu azumilwe; hangi ati ho munhu uwadula kuhaya giki, Yesu ali Seba, ulu iti mu Moyo Ngʼwela. Kuli ho kulekana kwa sha kwinha, aliyo Moyo ali umo duhu. Hangi kuli ho kulekana kwa kinhiligije, aliyo Seba ali umo duhu. Na hangi kuli ho kulekana kwa katumamile, aliyo Mulungu ali umo duhu Uyo akashitumamyaga shose mu bose. Aliyo buli munhu winhiwa kukundulilwa kwa Moyo, kulwa kubelela kwa bose. Iki munhu umo winhiwa na Moyo mhayo gwa masala; na ungi mhayo gwa bumani, gitumo Moyo Ngʼwenuyo atogelilwe; Na ungi kuzunya mu Moyo Ngʼwenuyo; na ungi sha kwinha sha kupija balwile mu Moyo Ngʼwenuyo umo; Na ungi kwita shamahano; na ungi buhangi; na ungi kukomanya mioyo; na ungi ndimi jingi na jingi; na ungi kushomeleja ndimi. Aliyo iyi yose akayitumamyaga Moyo Ngʼwenuyo umo duhu, ugabanya ku buli munhu heke heke, gitumo atogelilwe Wei ngʼwenekele. Iki gitumo mili guli gumo, nago guli na mabudika mingi, hangi mabudika gose ga mu mili gwenuyo nulu gali mingi, nahene gali mili gumo duhu; giko na Kristo ali chene. Iki mu Moyo umo twaabatijiwa biswe bose kwingila mu mili gumo, nulu tuli Bayudaya nulu Bagriki, nulu tuli basese nulu bana ba banhu; na biswe bose twaangʼwishiwa mu Moyo umo. Iki mili guti ibudika limo, aliyo mabudika mingi. Kugulu ulu guhaya giki, Iki nene nati nkono, nati gwa mili; angu guti gwa mili lulu? Nulu kutu ulu guhaya giki, Iki nene nati liso, nati gwa mili; angu guti gwa mili lulu? Mili gose ulu ni gubiza liso, kwigwa ni kuli hali? mili gose ulu ni gubiza kwigwa, kununghilwa ni kuli he? Aliyo Mulungu waagatuula mabudika aya mu mili, buli ibudika, gitumo walatogelilwe. Aliyo mabudika gose ulu ni gali gubiza ibudika limo, mili ni gwabiza he? Aliyo haha, mabudika gali mingi, aliyo mili gumo duhu. Na liso Utudula kuguwila nkono giki, Nene natakukalalagwa bebe; hangi nulu ntwe gutudula kugawila magulu giki, Nene natamukalalagwa bingʼwe. Iti chene, aliyo kutinda no mabudika ga mu mili ayo giganikwa gati na nguzu, gene gigongilwe kutinda: Na mabudika ga mili ayo twiganika giki, gati na ikujo, gene ayo tugakugije kutinda; na mabudika giswe ayo gati ga wiza gene gagalilwa kutinda; Iki mabudika giswe agagalililwe gati na kugayiwa: aliyo Mulungu akagudimanya mili, ibudika ilyagehehva ikujo, lyene lyinhiwa ikujo kutinda; Butizubiza wilemelwa mu mili; aliyo mabudika gose gidilile genekele na genekele. Hangi ibudika limo ulu lyusata, mabudika gose gusata hamo nalyo; nulu ibudika limo ulu lyukujiwa, mabudika gose guyegela hamo nalyo. Giko bingʼwe muli mili gwa ngʼwa Kristo, hangi muli mabudika, buli ibudika ha lwande lwalyo. Mulungu waabatuula ho bangi mu kanisa, ba kwandia batungʼwa, ba kabili bahangi, ba kadatu balangi, hanuma shamahano, hanuma sha kwinhiwa sha kupija balwile, bugunani, na busugi, na ndimi jingi na jingi. Angu bose bali batungʼwa? bose bali bahangi? bose bali balangi? bose bali biti ba shamahano? Bose bali na sha kwinhiwa sha kupija balwile? bose bakalungalungaga na ndimi? bose bakashomelejaga? Aliyo shigongelagi no sha kwinhiwa ishili sha wiza kutinda. Na hangi nangʼolekeja nzila ya wiza kutinda. Nene nulu nulungalunga na ndimi ja banhu nulu na ja bamalaika, aliyo ulu nati na butogwa, nabizaga giti kalumbete kakulilaga, nulu chuma chape ikikulilaga. Hangi nulu nabiza na cha kwinhiwa cha buhangi; nulu namanile mihayo yose ya kwigeniha, na bumani bose; hangi nulu nabiza na kuzunya kose kwa kwinja ho ngulu, aliyo ulu nati na butogwa, nahene nati kinhu. Hangi nulu nagaba shikolo shane shose kubagisha bahabi, nulu niyinha ko mili gwane gupemve moto, aliyo ulu nati na butogwa, cha kunibelela nati nacho. Butogwa bukwiyumilijaga, nabo bub na kisa; butogwa butitaga wilu; butogwa butikumilijaga, butadosaga, Butogwa butagayaga logohano, butahuhumaga, butasayaga, butatungaga nhungi; Butogwa butayegaga mu isho shiti sha butungilija, aliyo bukiiyegelaga nghana; Butogwa buchulelile mu yose, bukazunyaga yose, bukisagilagwa yose, bukiyumilijaga yose. Butogwa butalaleba ho welelo bose: aliyo nulu bubiza ho buhangi, bulagaya; nulu jabiza ho ndimi, jilafulika; nulu bubiza ho bumani, bulagaya. Iki tukwitegelejaga ibudika, hangi tukuhangaga ibudika; Aliyo iyo ishikanile aho iliza, hunaho lulu, iyi yene ya mabudika ilagaya. Aho nali natali ngʼwana nigini, naalungalungaga giti nigini, niitegelejaga giti nigini, niiganikaga giti nigini; aliyo aho nukula nushileka sha bunigini. Iki hambunyu tukabonaga giti ngʼwilole, tutabonaga chiza; aliyo mu welelo ubo bushu ku bushu: haha nitegeleja hado, aliyo mu welelo ubo nakwitegeleja gete gitumo nene namanagwa. Aliyo haha shikikalaga ho kuzunya, na kwisagilwa, na butogwa, ishi shidatu; aliyo mu shenishi butogwa butindile butale. Londelagi butogwa; hangi igongagi no sha kwinhiwa sha ki-moyo, aliyo kutinda yose mulomele. Iki uyo akulungalungaga mu lulimi atalungalungaga na banhu, aliyo na Mulungu; iki ati ho munhu uyo akwigwaga; aliyo mu moyo akulungalungaga mihayo ya kwigeniha. Aliyo uyo akulomelaga akulungalungaga na banhu mihayo ya kubazenja, na ya kubatimbya ngholo, na ya kubalunguja. Uyo akulungalungaga mu lulimi akwizenjaga ngʼwenekele; aliyo uyo akulomelaga akuyizenjaga kanisa. Nene natogilwe bingʼwe bose ulu ni ngʼwalungalunga mu ndimi, aliyo kutinda no ulu ni ngʼwalomela: iki uyo akulomelaga antindile butale uyo akulungalungaga mu ndimi, numho ashomeleje, kanisa ibone kuzenjiwa. Ali lulu, badugu bane, nene ulu niza ku bingʼwe nulungalunga mu ndimi, nakumubelela ki, ulu natumulungalungila mu nzila ya kukundulwa, nulu ya bumani, nulu ya kulomela, nulu ya kulanga? Hangi shinhu ishiti na bupanga shikalilaga, giti filimbi nulu kita, ulu shitulekanya malaka, likumanwa kinahe ilaka ki ilo lilifulwa nidu ilo lilitulwa? Iki ipembe ulu lyulila buyagabuyaga, nani akumalila ku bulugu? Giko hangi na bingʼwe, ulu mutulungalungaga na lulimi mihayo ili hape kwitegelejiwa, ikumanwa kinahe iyo ilihayiwa? iki mukulungalungilaga ku nyaga duhu. Hamo gali ho mu si malaka ga mbika ningi, na liti ho nulu limo iliti na makulu. Kulwa iyo, nene ulu natamanile makulu ga ilaka, nakubiza muna mahanga kuli uyo alilungalunga; nanghwe alilungalunga akubiza muna mahanga kuli nene. Giko hangi na bingʼwe, iki muhahalilile no sha kwinhiwa sha ki-moyo, komelagi mubize na ya kuyizenja kanisa. Kulwa iyo uyo akulungalungaga mu lulimi lungi, alombe inhiwe kulushomeleja. Iki ulu nulomba mu lulimi lungi, moyo gwane gukulombaga, aliyo kwitegeleja kwane kuti na matwajo. Kinahe lulu? nakulomba mu moyo; na hangi nakulomba na kwitegeleja kwane: nakwimba mu moyo, na hangi nakwimba na kwitegeleja kwane. Iki bebe ulu usungulila lubango mu moyo, uyo igashije kwipande lya batalangilwe aladule kinahe kuzunya Amina aho bebe walumba? iki atitegelegije iyo ukuhayaga. Iki bebe nghana walumbaga chiza, aliyo ngʼwenuyo ungi atazenjiwe. Nene nanumba Mulungu wane iki nalungalunga mu ndimi kutinda bingʼwe bose: Aliyo mu kanisa natogwa kulungalunga mihayo itano na kwitegeleja kwane, nabalange bangi, kutinda kulungalunga mihayo 10,000 mu lulimi lungi. Badugu bane, mutizubiza banigini mu kwitegeleja: aliyo bizagi banigini mu sha bubi, aliyo mu kwitegeleja bizagi banhu bakulile. Mu shilagilo yaandikwa giki, na banhu ba ndimi jingi, na milomo ya bageni nakulungalunga na banhu aba aliyo nulu ili giko batalanigwa, uhaya Seba. Kulwa iyo, ndimi jene kalolelo, iti ku bazunya, aliyo ku abatuzunya; aliyo kulomela kuti kulwa benabo abatuzunya, aliyo kulwa bazunya. Kulwa iyo, ulu kanisa yose yibilingile hamo, na bose ulu bulungalunga mu ndimi, hunaho bingila banhu abatalangilwe, nulu abati a bazunya, angu batuhaya giki, Bingʼwe ngʼwasalaga? Aliyo bose ulu bulomela, na wingila mo munhu uyo utazunije, nulu atalangilwe, ukanilijiwa na bose, ulekanyiwa na bose; Giko ya kwigeniha ya mu ngholo yakwe yifumbula; na giko akugwa achimigije akunamya Mulungu, akutambula giki, Nghana Mulungu ali hamo ningʼwe. Kinahe lulu badugu bane? aho mukwibilingaga hamo, buli munhu ali na zaburi, ali na kalangile, ali na lulimi, ali na kukundulwa, ali na kushomeleja. Mihayo yose yitwe kulwa kwizenja. Munhu ose ulu ulungalunga mu lulimi lungi, balungalunge banhu babili nulu badatu, kukila ho yaya, hangi bibalilwe; na umo ashomeleje; Aliyo nshomeleja ulu ati ho, ahumule mu kanisa; ilunjalunje ngʼwenekele, na kuli Mulungu. Hangi balomeji balungalunge babili nulu badatu, na bangi bakomanye. Aliyo ungi uwigashije haho ulu ukundulilwa mhayo u wa kwandia afulike. Iki bingʼwe bose ngʼwadula kulomela, umo umo, banhu bose bilange, na bose balungujiwe. Hangi mioyo ya balomeji ibalyehelile balomeji. Iki Mulungu ati Mulungu wa buyagabuyaga, aliyo wa mhola, gitumo ili mu makanisa gose ga bela. A bakima bahumule mu kanisa; iki batuzunilijiwa kulungalunga; aliyo babize bigwi, gitumo shilagilo shuhaya. Hangi ulu batogilwe kwilanga mhayo, bababuje bagoshi babo benekele ku kaya: iki ili ya minala nkima kulungalunga mu kanisa. Angu, mhayo gwa Mulungu gwali gufuma ku bingʼwe? nulu gwali gushika ku bingʼwe bike? Munhu ose ulu akwiganika ali nomeji, nulu munhu wa ki-moyo, ayimaniche giki, mihayo iyi nangʼwandikila, yene kilagilo cha Seba. Aliyo munhu ose ulu ali mu butumana, ikale mu butumana. Kulwa iyo, badugu, igongelagi no kulomela, hangi mutizunemeja munhu kulungalunga mu ndimi. Mihayo yose yitwe chiza, na mu kwihela. Na namumanikija bingʼwe, badugu, evangeli iyo nali namulomela, yene iyo ngʼwali ngʼwiyanukula, mu iyo ngʼwimila; Mu yeniyo ngʼwaapijiwa, ulu ngʼwiyumila mihayo iyo nali namulomela ulu iti ngʼwali ngʼuzunya dalali. Iki, nali nangʼwinha bingʼwe kwandia iyo nene nali nanukula giki, Kristo wali ucha kulwa shibi shiswe gitumo Shandikwa shuhaya; Na giki, wali ujikwa; na giki, waajuka ha lushiku lwa kadatu gitumo Shandikwa shuhaya; Na giki, wali ungʼwilongela Kefa; na hanuma ku benabo ikumi na babili: Hanuma ya yeniyo wali ubilongela banhu ba kukila magana atano kihamo, bingi babo batali ho bapanga kushisha haha, aliyo bamo bashutulile; Hanuma ungʼwilongela Yakobo; hangi ubilongela batungʼwa bose; Na wa kumalija wa bose unilongela nene, giti uyo uwabyalwa aho ikanza lyakwe lyali litali. Iki nene ndi ndo mu batungʼwa, natigelile kwitanwa ntungʼwa, iki nali nuyinyajanyaja kanisa ya Mulungu. Aliyo kulwa kigongo cha Mulungu ndi gitumo ndi: na kigongo chakwe icho nali ninhiwa chali kiti dalali; aliyo nene nubyutumama kutinda abo bose; aliyo iti nene, aliyo kigongo cha Mulungu icho chali hamo na nene. Kulwa iyo nulu nene nulu boi, giko tukulomelaga na giko ngʼwaazunya. Ali lulu, ulu Kristo waalomelwa giki, waajuka mu bafu, ni buli bamo ba mu bingʼwe bakuhayaga giki, Kuduhu kujuka kwa bafu? Aliyo kujuka kwa bafu ulu ni kuti ho, nahene Kristo nanghwe ni atajuchiwe: Na hangi ulu Kristo ni atajuchiwe numho kulomela kwiswe ni kuli dalali, na kuzunya kwingʼwe ni kuli dalali. Ali chene, na biswe twasangwa tuli bakaniji bamama ba Mulungu; iki twakanila Mulungu giki, waanjucha Kristo: Uyo atanjukije, ulu ili chene, bafu ni batujuchiwa. Iki bafu ulu ni batujuchiwa nahene Kristo nanghwe ni atajuchiwe: Na hangi ulu Kristo ni atajuchiwe, kuzunya kwingʼwe ni kuli dalali; bingʼwe mutali mu shibi shingʼwe. Numho nabo abo abashutulile muli Kristo bajimilile. Na biswe, ulu tuli na kwisagilwa muli Kristo mu bupanga ubu duhu, tuli bagayiwa kutinda banhu bose. Aliyo hambunyu Kristo waajuka mu bafu, waabiza itwajo lya kwandia lya benabo abakushutulaga. Iki kucha kwali kwenhwa na munhu, giko na kujuka kwa bafu kwenhwa na munhu. Iki gitumo muli Adamu bose bakachaga, giko hangi muli Kristo bose balahimbuchiwa kubiza bapanga. Aliyo buli munhu mu kwihela kwakwe: Kristo i litwajo lya kwandia; hanuma lulu abo abali ba ngʼwa Kristo aho aliza. Hanuma lulu nghalilo, aho alawinha ko butemi kuli Mulungu, Siswe; aho alamala kubujimija busugi bose na budula bose na nguzu jose. Iki shigelile ateme kushisha alabatuula banishi bose hasilili ya bupandijo wakwe. Ngʼwanishi wa kumalija uyo alajimijiwa ngʼwene kucha. Iki giki, waashisugija shinhu shose hasilili ya bupandijo wa magulu gakwe. Aliyo aho uhaya giki, Shinhu shose shaasugijiwa, tumanile giki, atakumbanijiwagwa Ngʼwenuyo ushisugija shinhu shose kuli Wei. Na aho shinhu shose shilasugijiwa kuli Wei, hunaho Ngʼwana nanghwe ngʼwenekele alasugijiwa kuli Ngʼwenuyo uwaashisugija shinhu shose kuli Wei giki, Mulungu abize shose mu shose. Ulu iti chene numho bakwita kinahe lulu abo abali bubatijiwa kulwa bafu, ulu bafu batujuchiwa na hado? kulwa kinahe hali bubatijiwa kulwabo? Na biswe kulwa ki tuli mu kwihiga buli ikanza lyose? Ali chene, kulwa kwikumilija kwane uko nali nako muli Kristo Yesu Seba wiswe kulwa bingʼwe, badugu bane, giki, nakuchaga buli lushiku. Nene ulu naalwaga na shinwele mu Efeso, kina shimile sha banhu, cha kunibelela ki ulu bafu batujuka? Nahene tulye na tungʼwe; iki ntondo tukucha. Mutalembagwe; Kunonia busumba na ba bubi kukabihaja shimile sha wiza. Kangukagi nghana, itagi butungilija, na mutizita shibi: iki bangi batamanile Mulungu. Nahaya iyi kulwa kumudimya minala. Aliyo hamo munhu akuhaya giki. Bafu bajuchiwa kinahe? na mu mili ki biza? Mbuuli bebe, iyo wabiba, itubiza mhanga ulu itachile: Na iyo waabiba, utagubibaga mili ugulabiza ho, aliyo mbeke gwike, hamo ya ngano, nulu hamo yingi nayo: Aliyo Mulungu akwiyinhaga mili gitumo atogelilwe Wei ngʼwenekele, na ku buli mbiyu mili gwayo. Nyama jose jiti nyama imo duhu: aliyo ili ho nyama imo ya banhu, na nyama yingi ya ndimu, na nyama yingi ya noni, na nyama yingi ya ndilo. Ili ho hangi mibili ya ngʼwigulu, na mibili ya mu si: aliyo ikujo lya mili gwa ngʼwigulu lili heke, na ikujo lya mili gwa mu si, nalyo heke. Ikujo lya limi lili heke, na ikujo lya ngʼweji lili heke, na ikujo lya sonda lili heke; iki sonda imo yalekanile na sonda yingi ngʼwikujo lyayo. Giko na bujuko wa bafu. Gubiwa mu bubozu; gujuchiwa mu butubola: Gubiwa mu kudalahwa; gujuchiwa ngʼwikujo; gubiwa mu bugokolo; gujuchiwa mu budula: Gubiwa mili gwa ki-munhu; gujuchiwa mili gwa ki-moyo. Ulu guli ho mili gwa ki-munhu, guli ho na gwa ki-moyo. Giko yaandikwa giki, Munhu wa kwandia, Adamu, ubiza ngholo mhanga; Adamu wa nghalikijo moyo gwa kwinha bupanga. Aliyo, gwali gututonga gwa ki-moyo, aliyo gwa ki-munhu; hanuma lulu gwiza gwa ki-moyo. Munhu wa kwandia ali wa mu si, wa malongo: munhu wa kabili ali wa ngʼwigulu. Gitumo u wa malongo umo ali, na benabo ba malongo bali giko: na gitumo wa ngʼwigulu umo ali, na benabo ba ngʼwigulu bali giko. Hangi gitumo twikolanijiwa na chikolile cha ngʼwenuyu wa malongo, giko hangi tulikolanijiwa na chikolile cha ngʼwenuyo wa ngʼwigulu. Nalihaya iyi giki, badugu, i nyama na mininga shitudula kuwingila butemi wa Mulungu, nulu bubozu kuwingila butubola. Kucha kulapyenwa na kujuka Lolagi, namuwila mhayo gwa kwigeniha, giki, tutalashutula bose, aliyo bose tulalujiwa, Mu kakanza kado, mu kukabya ngohe, mu kakanza ka ipembe lya kumalija: iki ipembe lilalila, na bafu balajuka mu butubola, na biswe tulalujiwa. Iki mili gwenuyu gwa bubozu gwigelile guzwale butubola; na uyu gwa kucha guzwale butucha. Kulwa iyi mili gwenuyu gwa bubozu aho gulazwala butubola, na gwenuyu gwa kucha gulazwala butucha, hunaho gulashikilijiwa mhayo uyo gwaandikwa giki, Kucha kwakwelelagwa na Kupyena. Ee Kucha, kupyena kwako kuli hali? Ee Kucha, lubola lwako luli he? Lubola lwa kucha lwene shibi; na nguzu ja shibi jene shilagilo. Aliyo Mulungu akumilijiwe uwaatwinha kupyena kulwa Seba wiswe Yesu Kristo. Kulwa iyo badugu bane batogwa, lambagi, mutizunegenyiwa, ngʼongejage no shiku jose mu milimo ya Seba, iki mumanile giki, butumami wingʼwe buti wa dalali muli Seba. Hangi, mihayo ya kasolelegeje kingʼwe kulwa bela ili giki, gitumo nali nulagila kanisa ja Galatia, itagi bingʼwe giko. Ha lushiku lwa kwandia lwa mfungo buli munhu mu bingʼwe ashisumbye ku ngʼwakwe, gitumo kwilukilwa kwakwe kuli; giko kutizubiza ho kusoleleja aho naliza. Na aho naliza abo bose mulabashima mu nyaluba jingʼwe, abo bene nalabatuma kutwala sha wila wingʼwe Yerusalemi: Na ulu inigelile nene kuja, nahene balaja hamo na nene. Ya kumalija na kubagisha Aliyo naliza ku bingʼwe, aho nalamala kubita mu Makedonia; iki nalabita mu Makedonia; Hamo nalashinga ku bingʼwe, ali chene hamo nalamala shiku ja mbeho hamo na bingʼwe, bingʼwe munigunane mu lugendo lwane, hose hose aho nalaja. Iki natatogilwe kwibona ningʼwe haha nabitile duhu; iki nisagilwa kushinga hamo ningʼwe kakanza, ulu Seba unizunilija. Aliyo nalikala mu Efeso kushisha Pentekote; Iki nalugulilagwa ho nyango ntale na ngʼwanya gwa kwitila milimo, aliyo bali ho bahangija bingi. Aliyo Timoteo ulu wiza, ilanghanagi ikale ku bingʼwe ati na boba; iki akatumamaga milimo ya Seba gitumo nakitaga nene: Kulwa iyo munhu ose atizundalaha. Aliyo munshishe mu lugendo lwakwe mu mhola, ize kuli nene; iki nalinolela hamo na badugu. Hangi mihayo ya ngʼwa Apolo ndugu wiswe, nali nungʼwikumbilija no giki, aje ku bingʼwe hamo na badugu: aliyo wei walatatogilwe kwiza haha, nahene aliza aho alabona ngʼwanya. Ikalagi miso, handikilagi mu kuzunya, bizagi bagosha, bizagi ba nguzu. Mihayo yingʼwe yose yitwe mu butogwa. Hangi nangʼwikumbilija badugu, (ngʼwimanile numba ya ngʼwa Stefano, giki, ili matwajo ga kwandia ga mu Akaya, nabo biyinha ko ku nimo gwa kubinhilija bela), Ali lulu balyehelagi abali giko, hangi na buli munhu uyo utumama hamo nabo na kukoya. Hangi nayega kulwa kwiza kwabo kwa Stefano na Fortunato na Akaiko: iki isho mukalebya kunitila boi bakanishikiligija. Iki bali bunifuja moyo gwane na mioyo yingʼwe: kulwa iyi bamanagi no abali giti abo. Ba kanisa ja Asia bamugisha. Akula na Priskila bamugisha no muli Seba, kihamo na kanisa iyili mu numba yabo. Badugu bose bamugisha. Ngʼwigisijage mu kubipa kwela. Uku kwene kugisha kwane nene Paulo na nkono gwane gwa ngʼwenekele. Munhu ose ulu atantogilwe Seba Yesu Kristo, azungʼwe. Seba izile. Kigongo cha Seba wiswe Yesu Kristo kibize hamo ningʼwe. Butogwa wane bubize hamo na bingʼwe bose muli Kristo Yesu. Amina. Paulo, ntungʼwa wa ngʼwa Kristo Yesu kulwa butogwa wa Mulungu, na Timoteo ndugu wiswe, ku kanisa ya Mulungu iyili mu Korintho, kihamo na bela bose abali mu si yose ya Akaya: Kigongo kibize ku bingʼwe na mhola, ishufuma kuli Mulungu Siswe, na kuli Seba Yesu Kristo. Kulumba kuli Mulungu kulwa kulungujiwa na kupijiwa Akumilijiwe Mulungu, Ise wa Seba wiswe Yesu Kristo, u Siswe wa kigongo, na Mulungu wa kulunguja kose; Uyo akutulungujaga mu makoye giswe gose, biswe tubaluuguje abali mu makoye gose, na kulunguja uku biswe tukulungujiwagwa nako na Mulungu. Iki gitumo makuluhiwa ga ngʼwa Kristo gakukwilaga mu biswe, giko hangi nu kulungujiwa kwiswe kukukwilaga kulwa kulungujiwa na Kristo. Aliyo nulu ulu tuluhiwa, nahene ili kulwa nguno ya kulungujiwa kwingʼwe na bupiji wingʼwe: na hangi nulu tulungujiwa, nahene ili kulwa nguno ya kulungujiwa kwingʼwe ukukutumamaga mu kwiyumilija kwa kuluhiwa uku tukuluhaluhiwagwa nako na biswe; nulu tulungujiwa, ili kulwa nguno ya kulungujiwa kwingʼwe na bupiji wingʼwe. Na kwisagilwa kwiswe ku bingʼwe kuli kudimu, iki tumanile giki, gitumo muli mu busangi wa mu kuluhiwa, giko hangi muli mu busangi wa kulungujiwa. Iki tutatogilwe bingʼwe, badugu, kwikala mutamanile mihayo ya makoye ayo gali gatugwila mu Asia, giki, twali tubunwa no, kushisha nose tugwa ngholo giki, tutikala bapanga: Ali chene, biswe benekele twali twilekanya benekele nsango gwa kucha, tutizisanya benekele, aliyo muli Mulungu Uyo akajuchaga bafu: Uyo waatupija mu kucha kutale giko, hangi akutupijaga; Uyo tunsanije alatupija nu ku butongi; Bingʼwe ningʼwe, ngʼutugunana mu kulomba kwingʼwe kulwiswe giki, bingi balumbe kulwa nguno yiswe kulwa kigabilwc icho twali twinhiwa kulwa kulombelwa na banhu bingi. Iki kwikumilija kwiswe hu kwene giki, bukaniji wa wiyanguji wiswe buli giki, i shikalile shiswe mu si iyi shali shili mu wela na mu nghana ya Mulungu, shali shiti mu masala ga ki-mili, aliyo shene mu kigongo cha Mulungu, na kutinda no ku bingʼwe. Iki tutungʼwandikila mihayo yingi ulu iti iyo ngʼwisoma na kuyitambula giki, ili ya nghana; hangi nisagilwa giki, mukuyitambula kushisha ku mhelo; Gitumo ngʼwali ngʼututambula giki, biswe tuli kwikumilija kwingʼwe gitumo na bingʼwe muli kwikumilija kwiswe mu lushiku lwa Seba Yesu. Na mu kusanya uku nali natogilwe kwiza ku bingʼwe kwandia, mubone kigabilwe cha kabili; Na kubita ku bingʼwe kuja Makedonia, na hangi kufuma Makedonia na kushoka ku bingʼwe huna munishindikile mu lugendo lwane kuja Buyudaya. Aliyo aho nali niganika giko, himba nali nubiza ndi ngalugalu? nulu hamo mihayo iyo nasola kwita, nasola kuyita ki-mili duhu, huna nabize munhu wa ee, ee, na hangi, yaya, yaya? Aliyo gitumo Mulungu ali ngʼwishigwa, mhayo gwiswe ku bingʼwe gwali guti ee na yaya. Iki Ngʼwana wa Mulungu, Yesu Kristo Uyo uwaalomelwa mu bingʼwe na biswe, nene na Silvano na Timoteo, walati ee na yaya, aliyo muli Wei ili mo ee duhu. Iki kwisagija kose kwa Mulungu kuli ee muli Wei, na hangi Amina muli Wei, Mulungu abone kukujiwa mu biswe. Aliyo uwaatulambya biswe hamo na bingʼwe muli Kristo, na kutwitiila maguta, ngʼwene Mulungu; Uyo hangi waatutuulila kimanikijo, na utwinha ngumili ya Moyo Ngʼwela mu ngholo jiswe. Aliyo nangʼwitana Mulungu abize nkaniji ku moyo gwane giki, kulwa nali natogilwe kumuchila kigongo nali natiza Korintho. Iti giki, biswe tuli basugi ba kuzunya kwingʼwe aliyo tuli bagunani ba kuyega kwingʼwe: iki mu kuzunya muhandikilile. Aliyo mu moyo gwane nali nusola mhayo uyu giki, natiza hangi ku bingʼwe nasunduhalile. Iki ulu namupinihaja, u wa kuniyeja ni nani, ulu ati uyo wapinihajiwa na nene? Na nene nali nangʼwandikila mhayo gwenuyu giki, aho naliza, naleke kubona bupina mu benabo, abo shinigelile nene kubayegela; ndi na kusanya mu bingʼwe bose giki, kuyega kwane kwene kuyega kwa bingʼwe bose. Iki nali nungʼwandikila bingʼwe kufuma mu kuluhiwa kwingi na busatu butale wa ngholo na shisoji shingi; iti giki, mupinihajiwe, aliyo mumane butogwa ubo ndi nabo ku bingʼwe wingi no kutinda. Aliyo ulu munhu ose upinihaja, atanipinihagije nene, aliyo wamupinihagije nusu nusu bingʼwe bose, natizumudidoheja kutinda. U munhu ali giko, u nsango uyo wali witilwa na bingi gwangʼwigelwa. Ili hambuhambu munkuulilwe, na kununguja munhu giti uyo, atizutubijiwa na bupina wingi kutinda. Kulwa iyo nangʼwikumbilija mudimye butogwa wingʼwe kuli wei. Iyo yene nguno nali nandika giki, nadegeleke namane ulu muli bigwi mu mihayo yose. Aliyo uyo ngʼwankuulilwa mhayo gose nu nene nane nankuulilwa: iki iyo naankuulilwa, ulu naankuulilwa mhayo gose, nahene naankuulilwa kulwa nguno yingʼwe mu butongi wa ngʼwa Kristo; Shetani atizutushitila hapine; iki biswe tutajimililwe bukungiji wakwe. Aliyo aho nali nushika Troa kulomela evangeli ya ngʼwa Kristo, na aho nali nigulilwa nyango muli Seba, Nahene nali natubona kwifula mu moyo gwane, iki nali natasangile ko Tito ndugu wane: aliyo nali nilaga nabo, huna nubuka kuja Makedonia. Aliyo Mulungu alumve Uyo akututongelaga gwa mu bupyeni muli Kristo, na kwelecha kulwiswe u ngʼwaso gwa wiza gwa kumana Wei mu buli ipande. Iki biswe tuli ngʼwaso gwa wiza gwa ngʼwa Kristo kuli Mulungu, mu abakupijiwagwa na mu abakuyagalaga: Ku bangi tuli ngʼwaso gwa kucha kwa kushika mu kucha; na ku bangi tuli ngʼwaso gwa bupanga wa kushika mu bupanga. Ni nani uyo igelelilwe ku mihayo yeniyi? Iki biswe tuti giti bingi abasulugija mhayo gwa Mulungu: aliyo tuli abo abakulungalungaga mu welwa ngholo, kina banhu abatungʼwa na Mulungu, tukuhayaga muli Kristo mu butongi wa Mulungu. Angu, twandia hangi kwikumilija benekele? nulu hamo igongile biswe tubize na nyaluba ja kutukumilija ku bingʼwe nulu ja kukumilijiwa ningʼwe, gitumo bangi? I nyaluba yiswe ili bingʼwe, yandikilwe mu ngholo jiswe, imanikile na kusongʼwa na banhu bose; Bingʼwe ngʼwaamanika giki, muli nyaluba ya ngʼwa Kristo iyatumangʼwa na biswe, itandikilwe na wino, aliyo na Moyo wa Mulungu Uyo ali mpanga; iti ha mabalala ga mawe, aliyo ha mabalala ga ngholo ja ki-mili. U kusanya kwenuko tuli nako kuli Mulungu kulwa Kristo: Iti giki, twiyigeja biswe benekele kugwiganika mhayo gose giti gwafuma mu biswe benekele; aliyo wigeja wiswe wafuma kuli Mulungu; Uyo hangi waatwigeja kubiza batumami ba ilagane ipya; iti ba nuguta, aliyo ba moyo; iki nuguta ikubulagaga, aliyo moyo gukuhimbuchaga. Aliyo ulu katumamile ka kucha akali kandikilwe na kolilwe ha mawe kali kiza ngʼwikujo, kushisha nose bana ba Israeli bali batudula kubukamilija bushu wa ngʼwa Musa kulwa nguno ya bungʼweku wa bushu wakwe; ubu wahaya kushila: A katumamile ka moyo katubiza na ikujo kutinda ilo? Iki ulu katumamile ka kulekanya nsango kali na ikujo, a katumamile ka butungilija kali na ikujo ilitindile no. Iki nulu iyo yali yakujiwa, nahene yali iti na ikujo mu mhayo uyu kuhva nguno ya ikujo ilitindile no. Iki ulu ilo ilyahaya kushila lyali na ikujo, kutinda no ilikushingaga ho lili na ikujo. Ali, iki tuli na kwisagilwa ukuli chene, tukuhayaga na bugimu no. Tuti giti Musa uwali ufikija bushu wakwe na ngʼwenda, bana ba Israeli batizukamilija nghalilo ya iyo yali yahaya kukalika: Aliyo maganiko gabo gali guganghanajiwa: iki kushisha lelo iyi, ulu busoma ilagane lya kale, ifikigijo lyenilo litali lili ho, iki batali kukundulilwa giki, muli Kristo lyinjiwa ho. Aliyo kushisha lelo iyi, buli aho Musa akusomagwa, ifikigijo lili ho ha ngholo jabo. Aliyo aho ngholo yungalukila Seba, ifikigijo ilo likwinjiwagwa ho. Iki Seba hu ngʼwene Moyo Ngʼwenuyo: na aho ali ho Moyo wa Seba, nahene kuli ho kutungulwa. Aliyo biswe bose na bushu butafikigije, tukulolaga ikujo lya Seba, giti ngʼwilole, twalujiwa mu suso yakwe umo ali, kufuma ngʼwikujo kushisha ngʼwikujo, gitumo likufumaga kuli Seba Uyo ali Moyo. Kulwa iyo, iki tuli na butumami ubu, gitumo twali tuchilwa kigongo, tutoloha; Aliyo twaayilema mihayo ya minala iyibisile, tutushiminzaga nyasalasala, nulu tutusanjaga mihayo ya Mulungu na bulembalembi; aliyo kulwa kuyolecha hape i nghana, wiyanguji wa buli munhu butukumilije mu butongi wa Mulungu. Aliyo nulu evangeli yiswe ifikigije, nahene ifikigije kubo abajimilile; Abo mulungu wa si iyi waabokuja maganiko gaho abatuzunya, litizubakila isana lya evangeli ya ikujo lya ngʼwa Kristo, Uyo ali suso ya Mulungu. Iki tutilomelaga biswe benekele, aliyo Kristo Yesu giki, ali Seba, na biswe giki, tuli batumami bingʼwe kulwa nguno ya ngʼwa Yesu. Iki Mulungu Uyo waahaya giki, Isana lyake kufuma mu giiti, huna ngʼwene Uyo waaka mu ngholo jiswe, atwinhe isana lya bumani wa ikujo lya Mulungu mu bushu wa ngʼwa Yesu Kristo. Aliyo busabi ubu wa mpango tuli nabo mu shiseme sha bulongo giki, u wingi wa nguzu kutinda bubize bufumile kuli Mulungu, iti mu biswe. Twashitelejiwa mapande gose, aliyo tutuhehenala; twazwangana, aliyo tutugwa ngholo; Twakubiwa, aliyo tutulekanijiwa; twatalichiwa, aliyo tutuyagajiwa; Tukabuchaga gwa mu mibili yiswe kabulagilwe ka ngʼwa Yesu, bupanga wa ngʼwa Yesu nabo butendwe mu mibili yiswe. Iki biswe aba tuli bapanga tukinhagwa ko gwa tuche kulwa nguno ya ngʼwa Yesu, u bupanga wa ngʼwa Yesu nabo bumanike mu mibili yiswe ya kucha. Giko lulu kucha tukwitaga mu biswe, aliyo bupanga mu bingʼwe. Aliyo iki tuli na moyo gwenuyu gwa kuzunya, gitumo yaandikwa giki, Nali nuzunya, na kulwa nguno iyo nuhaya; na biswe twaazunya, na kulwa nguno iyo twahaya; Iki tumanile giki, Uyo waanjucha Seba Yesu, alatujucha na biswe muli Yesu, na alatwimilija kihamo na bingʼwe ku butongi wakwe. Iki mihayo yose ili ho kulwa nguno yingʼwe giki, kigongo chongejiwe no kulwa kulumba kwa bingi, kulumba kukwijiwe kwikujo lya Mulungu. Kulwa iyo tutugwa ngholo; iki nulu munhu wiswe wa hanze akakenagukaga, aliyo munhu wiswe wa mugati akudoganyiwagwa bupya buli lushiku. Iki u kuluhiwa kwiswe kubupu, ukuli kwa kakanza kado duhu, kukutwitilaga ikujo lya welelo lingi no kutinda; Kunu tutushilolaga shinhu ishikabonagwa, aliyo isho ishitabonagwa: iki ishabonwa shene shengemekije duhu, aliyo ishitabonagwa shene shili sha welelo. Iki tumanile giki, i numba ya si i ya ihema lyiswe, ulu yusambulwa, tuli na nzengo gwa kufumiila kuli Mulungu, i numba ya welelo itabejiwe na makono, iyili ngʼwigulu. Iki mu iyi tukuganghilaga, tuhahalilile kuzwalichiwa na nzengo gwiswe gwa kufuma ngʼwigulu: Ulu ili chene tuzwikile, tutalilonga tuli duuhu. Iki biswe aba tuli ngʼwihema ili, tukuganghilaga tudidohelilwe; iti giki, tutogilwe kukungulwa, aliyo tutogilwe kuzwalichiwa, giki, i sha kucha shimilwe na bupanga. Aliyo Uyo wali utwita biswe kulwa nguno ya mhayo gwenuyu ngʼwene Mulungu, uwaatwinha ngumili ya Moyo Ngʼwela. Kulwa iyo tuli batimbya ngholo shiku jose, tumanile giki, aho tutali tuzengile mu mili, tuti ho hamo na Seba. (Iki tukushiminzaga kulwa kuzunya, iti kulwa kubona); Nghana tuli batimbya ngholo, tulibona ili hambuhambu kwikala tuti mo mu mili, na kubiza ho hamo na Seba. Kulwa iyo nulu tuli kunu nulu tuti ho kunu, tukuhahalilaga kunyeja Wei. Iki shitwigelile biswe bose kolechiwa ku butongi wa isumbi lya ngʼwa Kristo lya kulekanya nsango; buli munhu anukule iyo yali yitwa mu mili, gitumo iyo wali wita, nulu ya wiza, nulu ya bubi. Kulwa iyo, iki tumanile lyogohya lya Seba, twabazunisha banhu; aliyo tolechiwa kuli Mulungu; na nene ndisanya giki, tolechiwa nu mu wiyanguji wingʼwe. Tutushokelaga kwikumilija hangi ku bingʼwe, aliyo ili giki, twangʼwinha nguno ya kwikumiligija kulwiswe, mubone mhayo gwa kubashokeja abo abikumiligija mu iyo yabonwa, iti ya mu ngholo. Iki nulu twahugana, nahene ili kulwa nguno ya Mulungu: nulu tuli na masala madekanu, nahene ili kulwa nguno yingʼwe. Iki butogwa wa ngʼwa Kristo bukutuhadikijaga; iki twapima giki, ulu umo ubachilila bose, nahene bose bali bucha; Nanghwe ubachilila bose giki, abali bapanga batizikala bapanga hangi ku boi benekele, aliyo babize bapanga kuli Uyo wali ucha na ujuka kulwabo. Hu yene lulu kufuma haha tutamanile munhu ose gitumo ali mu mili: nulu twali tumanile Kristo gitumo walali mu mili, aliyo kufuma haha tutamanile Wei giko hangi. Kulwa iyo munhu ose ulu ali muli Kristo, ali kisengʼwa kipya: mihayo ya kale yaabita; lolaga yose yaabiza mipya. Aliyo mihayo yose, fumiilo yayo kuli Mulungu, Uyo waatwisangija kuli Wei ngʼwenekele muli Kristo, nanghwe utwinha kubutumamila winhilija ubu wa busangija; Wene giki, Mulungu ubiza muli Kristo, ubasangija ba mu si kuli Wei Ngʼwenekele, atubabalila bukenaguji wabo; nanghwe waatwinha biswe kugutumamila mhayo gwa busangija. Hu yene lulu, biswe tuli batumijiwa kulwa nguno ya ngʼwa Kristo, ili giti Mulungu akungʼwikumbilijaga mu milomo yiswe: twangʼwikumbilija ha ngʼwanya gwa ngʼwa Kristo giki, isangijagi na Mulungu. Iki Wei akangʼwita Uyo wamtamanile shibi kubiza shibi kulwiswe; biswe tubize butungilija wa Mulungu muli Wei. Bushikanu wa ngʼwa Paulo mu butumami wa evangeli Huna lulu biswe, aba tukutumamaga kihamo nanghwe, twangʼwikumbilija mutizanukula kigongo cha Mulungu dalali, (Iki Wei wahaya giki, Nali nukwigwa ngʼwikanza ilizuniligije, na mu lushiku lwa bupiji nali nukugunana: lolaga, haha hi lyene ikanza ilizuniligije; lolaga, haha hu lwene lushiku lwa bupiji.) Biswe tutatuulaga ho mhayo gose gwa kwipamya, u kwinhilija kwiswe kutizuhayiwa kibi; Aliyo mu mihayo yose tumanika tuti na buka aba tuli batumami ba Mulungu mu kwiyumilija kwingi, mu kuluhiwa, mu buluhi, mu bupina, Mu kutulwa, mu kutungwa kwa mu jela, mu kuubukilwa na banhu, mu milimo ya bunoge, mu kwikala miso, mu kudila nzala; Mu wibembu, mu bumani, mu kwiyumilija, mu shitile sha kigongo, mu Moyo Ngʼwela, mu butogwa ubuti na buhwahwa, Mu mhayo gwa nghana, mu nguzu ja Mulungu; kulwa shilanga sha butungilija ku nkono gwa bulyo na gwa lumoso, Kulwa kukujiwa na kudalahwa, kulwa kutulanyiwa na kukumilijiwa; giti tuli balembalembi, aliyo tuli ba nghana; Giti tutamanikile, aliyo tumanikile; giti tukuchaga, lolaga, tuli bapanga; giti tuli batulwa, na kubulagwa yaya; Giti abapinihalile, aliyo tukuyegaga gwa; giti bahabi, aliyo twabasabya bingi; giti aba tuti na kinhu, aliyo tuli nasho shose. Bingʼwe Bakorintho, milomo yiswe yasamiwa ku bingʼwe, ngholo jiswe jagalihiwa. Mutapinehile mu biswe, aliyo ngʼwapinehile mu ngholo jingʼwe benekele. Ali lulu, shokejagi gitumo ngʼwali ngʼwinhiwa (nahaya giti ku bana bane) mugalihyiwe ningʼwe. Mutizutunganigijiwa ngʼwikondejo limo kihamo na bati bazunya: iki butungilija buli na busangi ki na buti butungilija? nulu isana lili na busangi ki na giiti? Hangi kuli ho kwigwindanya ki Kristo na Beliali? nulu nzunya ali na busangi ki na uyo ati nzunya? Hangi hekalu ya Mulungu ili na ngʼwigwano ki na shikolile sha kulamiwa? iki biswe tuli hekalu ya Mulungu mpanga; gitumo Mulungu uhaya giki. Nakwikala mubo, hangi nakushiminzila mubo; Nene nakubiza Mulungu wabo, nabo bakubiza banhu bane. Kulwa iyi, fumagi mubo, ngʼwikomanye, uhaya Seba, mutizukuumya kinhu kisoso; na Nene nakungʼwegeleja, Nakubiza Singʼwe ku bingʼwe, ningʼwe mukubiza bana bane bagosha na bakima, uhaya Seba wa budula bose. Kulwa iyo, iki tuli na kwisagijiwa kwenuku, batogwa, twiyejage benekele mu mabusoso gose ga mili na ga moyo, tubyubushikanya wela tungʼogohile Mulungu. Mutugalihigije mu ngholo jingʼwe: biswe tutangʼwitilile munhu kibi, tutankenagulile munhu, tutangʼwibonelile munhu. Natuhayaga mhayo uyu kumulekanya giki, muli ba bubi: iki namala kuhaya kale giki, bingʼwe muli mu ngholo jiswe, nulu tuche hamo, nulu tubize bapanga hamo. Bugimu wa kuhaya wane buli butale ku bingʼwe, kwikumilija kwane kuli kutale kulwa nguno yingʼwe: nizulile na kulungujiwa, nasesekela na buyegi mu kuluhiwa kwiswe kose. Iki nulu aho twali tushika Makedonia nahene mibili yiswe yali iti na kwifula, aliyo twali tuluhiwa mapande gose; hanze lyali lili ho ilwa, mugati wali buli mo boba. Aliyo nahene, Mulungu Uyo akubalungujaga abadohelejiwa, wali utulunguja kulwa kwiza kwa ngʼwa Tito; Nulu iti kulwa kwiza kwakwe gwike, aliyo hangi kulwa kulunguja uko wali ulungujiwa nako mu bingʼwe, aho utusombolela nghumbu jingʼwe, na kapinihalile kingʼwe, na bujangizu wingʼwe kulwane; nose nali nuyega kutinda. Bakorintho bupinihala no kulwa shibi sha mu kanisa yabo Iki nulu nali numupinihaja na nyaluba yane, nahene natideta giki, nahuba: nulu nali nideta; iki nabona giki, nyaluba yeniyo yali yumupinihaja, aliyo nahene yali ili ikanza duhu. Ali haha nayega, iti kulwa nguno mukapinihajiwa bingʼwe, aliyo kulwa nguno iyi, ngʼwali ngʼupinihajiwa kushisha ngʼoya; iki ngʼwali ngʼupinihajiwa gitumo igelile kuli Mulungu, ngʼwali mutugehelwa mu mhayo gose kulwa nguno yiswe. Iki kupinihala ukwigelile kuli Mulungu kukwitaga koya kushisha mu bupiji, u koya kwenuku kuti na nimo kwideta: aliyo kupinihala kwa si kukwitaga kucha. Iki lolagi mhayo gwenuyu, ambu ngʼwali ngʼupinihala gitumo igelile kuli Mulungu, kupinihala kwenuko kwali kwita bukomezu kinahe mu bingʼwe, ali chene, kwali kwita kwilwilila kinahe mu bingʼwe, ali chene, na kupelana kinahe, ali chene, na kogoha kinahe, ali chene, na nghumbu kinahe, ali chene, na bujangizu kinahe, ali chene, na kuwima njigu kinahe! Mu mihayo yose ngʼwali ngʼwiyolecha muti na buka mu mhayo uyu. Kulwa iyo, nulu nali nungʼwandikila, nahene nali natandikile kulwa nguno ya ngʼwenuyo wali usobya, nulu kulwa nguno ya ngʼwenuyo wali usobiwa, aliyo giki, bukalalwa wingʼwe kulwiswe bumanike hape ku bingʼwe mu miso ga Mulungu. Kulwa iyo twaalungujiwa: na mu kulungujiwa kwiswe twaayega kutinda no kulwa buyegi wa ngʼwa Tito, iki moyo gwakwe gwali gwifujiwa na bingʼwe bose. Iki nulu nali numukumiligija kuli wei, nahene natagokile; aliyo gitumo twali tumuwilila mihayo yose mu nghana, giko nu kwikumilija kwiswe uko nali nuhaya ku butongi wa ngʼwa Tito, kwali kwa nghana. Na butogwa wakwe ku bingʼwe wabizaga wingi no kutinda, aho akwizukagwa wigwi wa bingʼwe bose, gitumo ngʼwali mungʼwegeleja na kogoha na kuzuguma. Nayega iki nadula kumusanya mu mihayo yose. Hangi twamumanikija bingʼwe, badugu, i kigongo cha Mulungu icho kanisa ja Makedonia jali jugabilwa; Gitumo mu kugengʼwa kwingi kwa kuluhiwa, u wingi wa buyegi wabo na buhabi wabo butale, wali busesekela kushika mu wingi wa wila wabo. Iki nene nalibakanila giki, gitumo budula wabo wali buli, ali chene, na kutinda budula wabo, bali bufunya batakomigilwe; Butwikumbilija na kudaya kutale kulwa cha kwinha chabo giki, bazunilijiwe kusangila mu nimo gwa kubinhilija bela: Hangi bali batita gitumo twali twisagilwa, aliyo kwandia bali biyinha ko benekele kuli Seba, na ku biswe gitumo Mulungu atogelilwe. Kushisha nose tunkomeleja Tito giki, gitumo wali wandia kwita, i chene ashikilije nu mu bingʼwe kigongo iki. Aliyo gitumo mukukwilaga mu yose, mu kuzunya, na mu kuhaya, na mu bumani, na mu bukomezu hose, na mu butogwa wingʼwe ku biswe, giko mukwilage nu mu kigongo iki. Natuhayaga giti guli mhayo gwa kilagilo yaya, aliyo kulwa bujangizu wa bangi nageme i nghana ya butogwa wingʼwe. Iki mumanile kigongo cha Seba wiswe Yesu Kristo giki, nulu walali nsabi, aliyo kulwa nguno yingʼwe ubiza nghabi giki, bingʼwe mubize basabi kulwa buhabi wakwe. Nane mu mhayo uyu nalipima giki, imubelelile bingʼwe, aba ngʼwali ngʼwandia kwita ngʼwakizo, iti kwita gwike, aliyo hangi nu kuzunya kwita. Kulwa iyo, shikilijagi nu giki, gitumo ngʼwali mumalilile kutogwa kwita, giko shikilijagi gitumo budula wingʼwe umo buli. Iki ulu kutogwa kwita kuli ho, yazunilijiwa gitumo munhu ali nasho, iti gitumo kugayiwa kwakwe umo kuli. Iki natuhayaga mhayo uyu giki, bangi babupilwe na bingʼwe mudidohelwe; Aliyo bose babize balenganilile: wingi wingʼwe bubize wa kubagunana mu kugayiwa kwabo ngʼwikanza lya haha, hunaho wingi wabo bubize wa kumugunana bingwe mu kugayiwa kwingʼwe; giko kubize ho kulenganila: Gitumo yaandikwa giki, Uyo wali ushibilinga shingi walatusaja kinhu, na uyo wali ushibilinga shido walatugehelwa. Aliyo Mulungu alumve, Uyo akatuula ho bukalalwa butale wenubu mu ngholo ya ngʼwa Tito kulwingʼwe. Iki wali uzunya kaganikile kiswe; aliyo iki walakalalilwe wei ngʼwenekele, wali wiza ku bingʼwe kulwa butogwa wakwe ngʼwenekele. Twantumaga hamo nanghwe ndugu uyo, kukumilijiwa kwakwe mu evangeli kukumukile mu kanisa jose; Nulu iti giko gwike, aliyo wali usolwa na makanisa kuja lugendo kihamo na biswe mu nimo gwa kigongo iki, icho tukwinhilijaga kwikujo lya Seba, na hangi imanike giki, tumalilile kwita; Twilanghanile mu mhayo uyu giki, munhu ose atizutuhaya kibi mu wingi ubu ubukwinhilijiwagwa na biswe: Iki tuli na iganiko giki, kwita mihayo yose wima, iti mu miso ga Mulungu gwike, aliyo hangi na mu miso ga banhu. Hangi twantumaga kuja hamo nabo ndugu wiswe, uyo twamala kumona nghangala ningi, ali nkalalwa mu mihayo mingi, aliyo haha ali na bukalalwa kutinda no, kuhva kusanya kutale uko ali nako mu bingʼwe. Ulu munhu ose ubuja mihayo ya ngʼwa Tito, wei tuli bumo nanghwe, hangi ali ntumami ngʼwichane ku bingʼwe; nulu ubuja mihayo ya badugu biswe, boi bali batungʼwa ba kanisa jose na ikujo lya ngʼwa Kristo. Kulwa iyo, mubolekejage mu butongi wa makanisa, bumaniku wa butogwa wingʼwe, na wa kukumilija kwiswe kulwa nguno yingʼwe. Aliyo mu mihayo ya kubinhilija bela, nati na nguno hangi ya kungʼwandikila: Iki namanile kumalila kwingʼwe uko nikumiligija ku ba Makedonia giki, Akaya imalilile kufuma ngʼwakizo; na bukalalwa wingʼwe waabakomeja bingi. Aliyo nabatumaga badugu, giki, kwikumiligija kwiswe mu bingʼwe kutizubiza dalali mu mhayo uyu; chene gitumo nali nuhaya, mubize mumalilile: Itizubiza giki, hamo ulu biza ba Makedonia kihamo na nene, na kumusanga mutamalilile, biswe (tutuhaya bingʼwe), tutizugoka kulwa kwisagilwa kwenuku. Huna nali nubona giki, shigelile nabakomige badugu aba, batonge kushika ku bingʼwe, na kushibilinga kuko tutali kwiza, sha kwinha isho ngʼwali ngʼwandia kwisagija, giki, shibize shimalilile, kufuma mu butogwa, iti mu buhadiki. U mhayo uyu ndihaya guli giki, Uyo ubiba mu bugugu, nu kugesa alagesa budo; na uyo ubiba mu wila, nu kugesa, alagesa mu wila. Buli munhu ite gitumo waasola kwita mu ngholo yakwe: iti mu bujimbi, nulu ya buhadiki: iki Mulungu antogilwe uwafunya na buyegi. Na Mulungu wadula kumukwigija mu buli kigongo chose giki, bingʼwe mubize na sha kwigelelwa shose shose gwa mu mihayo yose, mukwile mu buli chitile chose cha wiza: (Gitumo yaandikwa giki, wabalasanyaga hose hose, wabinhaga bahabi, butungilija wakwe bukwikalaga welelo bose. Nanghwe uyo akangʼwinhilijaga mibi mbiyu na migati ya kulya, akungʼwinhilija na kujikwija mbiyu jingʼwe ja kubiba, hangi akungʼongegeja matwajo ga butungilija wingʼwe;) Ningʼwe musabiwe mu mihayo yose kulwa nguno ya wila bose, ubu bukungʼwityaga Mulungu kulumva kulwa kwinhilija kwiswe. Iki kinhiligije ka nimo uyu, iti giki, kakugelelaga kubigeja kugayiwa kwa bela gwike, aliyo kakukwilaga mu bulumbi wingi kuli Mulungu; Iki kulwa kugengʼwa kwingʼwe mu kwinhilija uku, boi bunkumilija Mulungu kulwa wigwi wa kazunije kingʼwe ku lwande lwa evangeli ya ngʼwa Kristo, na kulwa nguno ya wila wa kafunije kingʼwe kubo, na ku banhu bose; Hangi nabo bakumulombelaga bingʼwe, bakumukumbulaga kulwa nguno ya kigongo kitale cha Mulungu ikili mu bingʼwe. Mulungu alumve kulwa nguno ya cha kwinha chakwe ikitudula kuhayiwa. Aliyo lulu, u nene Paulo nangʼwikumbilija kulwa bufula na bufuku wa ngʼwa Kristo, u nene, uyo ndi ngʼwidoheleja aho ndi hamo ningʼwe, aliyo ulu nati ko ndi ngimu ku bingʼwe; Ali chene, nangʼwikumbilija, aho ndi ho natizubiza na bugimu ubu nabusanije hubiza nabo ku bamo, abakutupimaga biswe giki, tukushiminzaga kimili. Iki nulu twashiminza mu mili, aliyo kulwa, tutalwaga ki-mili, (Iki shilanga sha bulugu wiswe shiti sha ki-mili, aliyo shili na budula kulwa Mulungu kugagwisha mamizengo ga nguzu); Tukugagwishaga maganiko, na buli kinhu cha higulya ichigunguhije kubukilila bumani wa Mulungu, na hangi kulisesehaja buli iganiko libize lili na wigwi kuli Kristo; Tumalilile kuwinha nsango bukitigwa bose, aho wigwi wingʼwe bulashikila. Angu, mukuyidililaga mihayo ya kubonwa duhu? Ulu munhu wisanya ngʼwenekele giki, wei ali wa ngʼwa Kristo, idedekanyage ngʼwenekele giki, gitumo wei ali wa ngʼwa Kristo, niswe tuli ba ngʼwa Kristo. Iki nulu nongeja kwikumilija hado kulwa budula wiswe (ubu Seba watwinha kumuzenga, iti kumugwisha), nahene nataladingʼwa minala: Natizubonwa giki, natogilwe kungʼogohya na nyaluba jane. Iki balihaya giki, Nyaluba jakwe hene jili na mihayo mitale na ja nguzu; ali u mili gwakwe, ulu ali ho, gwene ngokolo, na kahayile kakwe dalali. Munhu giti uyu ni iganikage giki, umo tuli mu mihayo ya nyaluba aho tuti ho, hu umo tuli mu kitile aho tuli ho. Iki tuti na bugimu kwibala nulu kwilenganija na bangi abakwikumiligijaga benekele: aliyo boi iki bipima boi na boi, na bilenganija boi na boi, bati na kitegelegeje. Aliyo biswe tutalikumilija kukila umo tuli, aliyo tukwikumilija kulenganila na kagelekelelwe ka Mulungu, ako akatugelekela kubiza ngele ya kushika nu ku bingʼwe. Iki tutunanamilaga benekele kukilila ngelelo yiswe himba giki, tutashikaga ku bingʼwe, iki tukashika nu ku bingʼwe na evangeli ya ngʼwa Kristo. Tutikumilija kutinda umo tugelelile, nulu mu milimo ya banhu bangi; aliyo tuli na kwisagilwa uku giki, kuzunya kwingʼwe aho kulakula, tulakumilijiwa mu bingʼwe gitumo kagelekelelwe kiswe umo kali kushika mu kukwila no, Nose tulalomela evangeli na ku mapande ga kukila ku bingʼwe, tutizikumiligija mu kagelekelelwe ka ungi mu mihayo iyamaliihva kubejiwa. Aliyo uyo akikumilijaga, ikumiligijage muli Seba. Iki uyo wazunilijiwa ati ngʼwenuyo akwikumilijaga, aliyo ngʼwenuyo Seba unkumilija. Natogilwe ulu ni ngʼwadula kwiyumilija na nene mu mihayo mido ya buchiluchilu; ali chene, iyumilijagi na nene. Iki nene ndi na wilu ku bingʼwe, u wilu wa Mulungu: iki numulungija kuli ngosha umo, nangʼwenhcle Kristo ngʼwaniki ngʼwibembu. Aliyo nogoha giki, gitumo nzoka yali yunembalemba Eva kulwa masalasala gayo, giko ningʼwe maganiko gingʼwe gatizuhuganyiwa kwinga mu bumo wa moyo na wela ubuli kuli Kristo. Iki ulu wiza uyo akulomelaga Yesu ungi, uyo tutalondelile biswe, nulu ulu ngʼwanukula moyo gungi kuleka Uyo ngʼwanukula, nulu evangeli yingi, kuleka iyo ngʼuzunya, nahene ngʼwabeja kwiyumilija nanghwe. Iki naliganika giki, a batungʼwa a batale batanilebije. Aliyo nulu nabize ndi munhu atakindikaga mu kalondelele, aliyo nahene, mu bumani nati chene; aliyo biswe twigengelechiwa gete ku bingʼwe mu mihayo yose. Hamo nali nita kibi iki nidohya ngʼwenekele, bingʼwe mugunguhiwe, iki nali numulomela evangeli ya Mulungu nati na mhela? Nali nubingija kanisa jingi sabo jabo, nanukula mhela kubo giki, nangʼwinhilije bingʼwe; Na hangi aho nali nali hamo ningʼwe na nali nugayiwa nahene nali natunubyalubya munhu ose; iki badugu aho biza kufuma Makedonia, buninha isho nali nugayiwa; na mu mihayo yose nali nilecha ngʼwenekele natizumulubyalubya, na hangi nakwilecha. Gitumo nghana ya ngʼwa Kristo ili muli nene, nduhu munhu uyo akunilemeja mu kwikumilija uku mu si ya Akaya. Kulwa ki? iki natamutogagwa? Mulungu amanile. Aliyo mhayo uyu nakwitaga hu gwene nakwita, nabachibile nzila abachola ngʼwanya gwa kwikumiligija; giki, mu mhayo gose uyo bakwikumiligijaga babize gitumo biswe tuli. Iki abali chene bali batungʼwa balomolomo, bali batumami ba nyasalasala, bihindula benekele babize bali batungʼwa ba ngʼwa Kristo. Gwene guti mhayo gwa kukumya; iki nulu Shetani ngʼwenekele akwihindulaga giki, ali malaika wa isana. Kulwa iyo guti mhayo ntale ulu batumami bakwe nabo bihindula kubiza batumami ba butungilija; abo nghalilo yabo ilabiza gitumo shitile shabo shili. Nahaya hangi, Munhu ose atizuniganikila nene ndi mbuuli; aliyo nulu muliniganikila giko, nahene munegeleje giti ndi mbuuli, nane nikumilije hoi hado. Iyo ndihaya, natuhaya giki, ili mihayo ya Seba, aliyo giti mu buchiluchilu, mu bugimu ubu wa kwikumilija. Iki bingi bikumilija ki-mili, nu nene nakwikumilija. Iki bingʼwe ngʼwayega kwiyumilija nabo a bachiluchilu, iki bingʼwe muli ba masala. Iki bingʼwe ngʼwiyumilija na munhu, ulu umutuula mu busese, ulu umulya shikolo, ulu ungʼwibonela, ulu wikuja ngʼwenekele, ulu umutula ku bushu. Ndihaya mu kwigayilija giti tuli bagokolo. Aliyo mu mhayo gose, ulu ali ho uyo ali na bugimu (ndihaya kichiluchilu), nu nene nane ndi ngimu. Bali Bahebrania? nu nene nane ndi chene. Bali ba Israeli? nu nene nane ndi chene. Bali bubyile wa ngʼwa Abrahamu? nu nene nane ndi chene. Bali binhilija ba ngʼwa Kristo? (Ndihaya kisaji) nene kutinda ho; mu milimo ya bunoge kutinda, mu jela kutinda, mu kutulwa kukila ngelelo, mu kwihiga kwa kucha nghangala ningi. Ku Bayudaya nali nutulwa nghangala itano, mikoba makumi ane kugayila ho gumo. Nghangala idatu nali nutulwa mhanga, lukangala lumo nupondwa mawe, nghangala idatu nali nukenagukilwa na jahaji, limi limo na bujiku nali nubiza mu bujiba; Mu ngʼendo nghangala ningi, mu kwihiga kwa miongo, mu kwihiga kwa basambo, mu kwihiga ku ba ihanga lyane, mu kwihiga ku bana mahanga, mu kwihiga mu nzengo, mu kwihiga kwa mu bu, mu kwihiga kwa mu nyanza, mu kwihiga kwa mu badugu bamama; Mu milimo ya bunoge na makoye, mu kwikala miso nghangala ningi, mu butubu na kukolwa nota, mu kudila nzala nghangala ningi, mu mbeho na buzuka. Na hangi kutinda mihayo yeniyi iyabonwa ili ho iyo ikunizilaga buli lushiku, hu yene kwiganilija kulwa kanisa jose. Nani ali ngokolo na nene natubiza ngokolo? nani wipamiwa, na nene natukolwa? Ulu igelile nene kudosa, nahene nakudosela mu mihayo ya bugokolo wane. Mulungu Ise wa Seba Yesu uwakumilijiwa welelo na welelo, amanile giki, natuhaya bulomolomo. Mu Damasko u gavana wa mu busugi wa ntemi Areta akalinda nzengo gwa bana Damasko giki, anidime: Na nene nali nichiwa ngʼwikililijo mu nghengeleji ya ndugu, nupuluguka mu makono gakwe. Nihadikija kwikumilija nulu itigelile; aliyo nakuhaya ya kolechiwa na ya kukundulwa kwa Seba. Namanile munhu umo muli Kristo, haha yashikaga miaka ikumi na ine, munhu ngʼwenuyo wali uhwehulwa kutwalwa ngʼwigulu lya kadatu (nulu walali mu mili natamanile; nulu walati mu mili, nahene natamanile; Mulungu amanile). Na nene namanile munhu ngʼwenuyo, (nulu walali mu mili, nulu walati mu mili, natamanile; Mulungu amanile); Giki, munhu ngʼwenuyo wali uhwehulwa kutwalwa ku ngunda gwa Mulungu, nanghwe wali wigwa mihayo iyitudula kuhayiwa, iyitigelile munhu kuyihaya. Uyo ali giko hu ngʼwene nakwikumilija muli wei, aliyo kulwane ngʼwenekele natikumilija, ulu iti mu mabugokolo gane. Iki nulu ni natogilwe kwikumilija, ni natubiza nchiluchilu, iki ni nahaya ya nghana: aliyo naleka, munhu ose atizuniganikila kutinda iyo wahona kuli nene, nulu iyo wigwa kuli nene. Na kulwa nguno iyi, natizukilanija kwikumilija kulwa wingi wa makukundulilwa, hi nguno nali ninhiwa lihwa mu mili, lyene ntungʼwa wa ngʼwa Shetani kunitula, giki, natizukilanija kwikumilija. Kulwa mhayo uyu nali nungʼwikumbilija Seba nghangala idatu, mhayo uyu guninge ho. Nanghwe uniwila giki, Kigongo chane chakwigela: iki nguzu jane jikushikanaga mu bugokolo. Kulwa iyo nayega no kwikumilija mu bugokolo wane, nguzu ja ngʼwa Kristo jikale muli nene. Kulwa iyi naliyegela mu bugokolo, mu budalahwa, mu buluhi, mu kunyajanyajiwa, mu makoye, kulwa nguno ya ngʼwa Kristo: iki ulu ndi ngokolo hu ndi wa nguzu. Nabiza nchiluchilu; bingʼwe ngʼwanihadikija; iki shali shinigelile kukumilijiwa na bingʼwe: iki a batungʼwa a batale batanilebije mu mhayo gose, nulu nabize nati kinhu. Nghana shimanikijo sha ntungʼwa shali Shitwa mu bingʼwe mu kwiyumilija kose, mu shimanikijo, mu sha kukumya, mu Shitwa sha nguzu. Iki mhayo ki uyo ngʼwali ngʼugehelwa kutinda kanisa jingi, ulu iti mu mhayo uyo giki, natamulubalubije? nikuulilagwi busobya ubu. Lolagi, ulu lwene lukangala lwa kadatu namalila kwiza ku bingʼwe; nahene natumulubyalubya: iki natukoba shinhu shingʼwe aliyo ndimukoba bingʼwe: iki itigelile bana kubabikila shikolo babyaji, aliyo babyaji bababikile shikolo bana. Na nene ndi na buyegi kufunya shikolo na kufunyiwa nene ngʼwenekele kulwa bupanga wingʼwe. Nulu nongeja kumutogwa no, huna bingʼwe ngʼwagehya kunitogwa? Aliyo nulu ibize giko, nahene nali natumulubyalubya; aliyo iki nali na masala, numugwasha na masalasala. Angu, hamo nali nungʼwibonela nabone solobo mu benabo nabatumaga ku bingʼwe? Nakanganikila Tito, hangi nuntuma ndugu ngʼwenuyo hamo nanghwe. Angu, Tito wali ungʼwingija kinhu? Angu, twali tutushiminzila mu moyo gumo? twali tutushiminzila mu kapandile kamo? Angu mulitwiganikila giki, tukungʼwiyandayandilaga? Mu butongi wa Mulungu twalungalunga muli Kristo aliyo mihayo yose, batogwa, ili kulwa kumuzenja. Iki nogoha, aho naliza, natizumusanga muti gitumo natogelilwe; na nene nane mutizunibona ndi gitumo bingʼwe mutatogelilwe; natizusanga hamo buli ho wilemelwa, na wilu, budaki, na buyombo, na busonghanya, na busigani, na budoshi, na wiyogeji; Na hangi aho ndiza Mulungu atizunidoheleja mu butongi wingʼwe, nane nabone bupina kulwa bingi abali bita shibi kale, na koya batoyile mu buhali na bujingi, na busoso isho bali bita. Ulu lwene lukangala lwa kadatu nizile ku bingʼwe. Mu kuhaya kwa bakaniji babili nulu badatu, buli mhayo guladimiwa. Nali natongaga kumuwila, gitumo aho nali nali ho lugendo lwa kabili, giko ni haha aho nati ho, natonga kuhandikila aho abali bita shibi kale, na ku bangi bose giki, ulu naliza hangi, natumulendegetela. Iki mulikoba kimanikijo cha ngʼwa Kristo, Uyo akalungalungaga muli nene; Uyo ati ngokolo ku bingʼwe, aliyo ali wa nguzu mu bingʼwe: Iki nulu wali ukongʼwa mu bugokolo, aliyo ali mpanga kulwa nguzu ja Mulungu. Iki na biswe tuli bagokolo muli Wei, aliyo tukwikala bapanga hamo nanghwe kulwa nguzu ja Mulungu ku bingʼwe. Igemagi benekele ulu muli mo mu kuzunya: igemagi bingʼwe benekele. Nulu mutamanile bingʼwe benekele giki, Yesu Kristo ali mu bingʼwe? Numho muli balengʼwa? Aliyo nisagilwa giki, mukumana giki, biswe tuti balengʼwa. Twanomba Mulungu giki, mutizita mhayo gose gwa bubi; iti giki, biswe tubonwe tuti na buka, aliyo giki, bingʼwe ngʼwite iyo igelile, nulu biswe tubize giti tuli balengʼwa. Iki tutudula kwita mhayo gwa wanishi ku nghana, aliyo ha lwande lwa nghana. Iki twayega aho biswe tuli bagokolo, na bingʼwe muli na nguzu: nu kulomba twalomba giki, mushikane. Hi nguno nangʼwandikila mihayo iyi aho nati ho, giki, ulu nalabiza ho natizubutumamila bukali, gitumo budula ubo Seba waaninha kulwa kumuzenja, nulu iti kulwa kumukambula. Ya kumalija, badugu, ikalagi mhola, mushikane; mulungujiwe; bizagi na iganiko limo, ikalagi mu mhola: na Mulungu wa butogwa na wa mhola akubiza hamo ningʼwe. Igishagi benekele na benekele na kibipile kela. Bela bose bamugisha. Kigongo cha Seba Yesu Kristo, na butogwa wa Mulungu, na kusangila kwa Moyo Ngʼwela shikale hamo ningʼwe bose. Amina. Paulo, ntungʼwa (ati ntungʼwa wa banhu, nulu atatumilwe na munhu, aliyo na Yesu Kristo, na Mulungu Siswe Uyo waanjucha mu bafu), Na badugu bose abali hamo na nene, twandika ku kanisa ja mu Galatia: Kigongo kibize ku bingʼwe na mhola ishufuma kuli Mulungu Siswe, na kuli Seba wiswe Yesu Kristo. Uyo wali wiyinha ko kulwa shibi shiswe, atukomole mu si iyi ya bubi ya haha, gitumo atogelilwe Mulungu Siswe: Ikujo libize kuli Wei welelo na welelo. Amina. Nakumya iki ngʼwaatala wangu giko kwinga kuli Uyo waangʼwitana mu kigongo cha ngʼwa Kristo ngʼuja ku evangeli yingi; Iti giki, ili ho yingi: aliyo bali ho banhu abamukoyakoya, abatogilwe kugalucha evangeli ya ngʼwa Kristo. Aliyo nulu biswe nulu malaika wa ngʼwigulu, ulu tumulomela evangeli yingi, kuleka iyo tumulomela, azungʼwe. Gitumo tuhaya kwandia, giko haha nahaya hangi, Ulu munhu ose umulomela evangeli yingi, kuleka iyo ngʼwaanukula, azungʼwe. Himba ndikoba kukumilijiwa na banhu, nulu na Mulungu? nulu hamo nakugemaga kubayeja banhu? ulu ni natali nubayeja banhu, ni natubiza nsese wa ngʼwa Kristo. Iki namumanikija bingʼwe badugu giki, evangeli iyulomelwa na nene, iti ya ki-munhu. Iki nulu kuyanukula natayanukulile kuli munhu, nulu kulangwa natayilangilwe, aliyo yiza kuli nene mu kukundulilwa na Yesu Kristo. Iki ngʼwigwa mihayo ya kashiminzile kane i kale mu dini ya Bayudaya, gitumo nali nuyinyajanyaja kanisa ya Mulungu no no no, na kuyigunzagula: Mu dini ya Bayudaya nali nubalebya bingi ba ilika lyane ba ngʼwihanga lyane, iki nali nugajangilila no no no kutinda a malange ga baguku bane. Aliyo Mulungu, Uyo wali unikoma kufuma mu nda ya ngʼwa mayu, na unitana kulwa kigongo chakwe, Aho ikantoga kunkundula Ngʼwana wakwe muli nene giki, nanghaye Wei mu kulomela kwane mu bana mahanga; haho na haho nali natulomana mihayo na munhu wa mili na mininga: Nulu nali natulinha kuja Yerusalemi ku abo abali bunitanga kubiza batungʼwa: aliyo nali nuja mu Arabu; huna nushoka hangi Damasko. Hunaho hanuma ya miaka idatu, nulinha kuja Yerusalemi kwibona na Kefa, nikala ha ngʼwakwe shiku ikumi na itano. Aliyo a batungʼwa bangi nali natibona nabo, ulu iti Yakobo ngʼwanongʼwabo wa Seba. Iyo nalingʼwandikila, lolagi, mu miso ga Mulungu natulomalomaga. Huna lulu nali nushika mu mapande ga Suria na Kilikia. Hangi nali natali kumanika bushu wane mu kanisa ja Buyudaya ijali muli Kristo: Aliyo bigwa duhu giki, Uyo wali utunyajanyaja kale, haha lulu akubulomelaga buzunya ubo wali ubukenagula kale; Nabo bunkumilija Mulungu kulwane. Butungʼwa wa ngʼwa Paulo wali buzunyiwa Yerusalemi Na hanuma ya miaka ikumi na ine nali nulinha hangi kuja Yerusalemi kihamo na Barnabas, nu Tito tuja nanghwe. Nane nakaja kulwa kolechiwa; nubasombolela evangeli iyo nakuyilomelaga mu bana mahanga, aliyo mu kwigeniha, mu butongi wa benabo abali bakumuku, natizubiza hamo nakupelaga dalali, nulu hamo namalaga kupela dalali. Aliyo nulu Tito uwalali hamo na nene, nulu ali Ngriki, nahene, walatuhadikijiwa kusalwa. Aliyo kulwa nguno ya badugu ba bumama abali buswenghwa mu kwigeniha, abali biswengha mu kwigeniha kubudata butungulwa wiswe ubo tuli nabo muli Kristo Yesu giki, batutuule mu busese: Abo twali tutubagalihija nulu saa imo kubalyehela; giki, i nghana ya evangeli ikale hamo ningʼwe. Aliyo mu benabo abukumilijiwa giki, bali batale, (umo bali nahene, iti na mihayo kuli nene, Mulungu ataganjaga munhu:) nahaya giki, benabo abukumilijiwa batanongegije mhayo: Iti giko duhu, aliyo aho bali bubona giki, u nene nasanyiwa kuyitumamila evangeli ku abo abatasalilwe, gitumo Petro nanghwe ku abo abasalilwe; (Iki Uyo wali wita muli Petro kubiza ntungʼwa wa ku basalile, hu Ngʼwene wali wita muli nene kuja ku bana mahanga): Nabo aho bali bubona kigongo icho nali ninhiwa, huna Yakobo na Kefa na Yohana, abukumilijiwa giki, bali makingi, buninha nene nu Barnabas makono ga bulyo ga busangi, giki, biswe tuje ku bana mahanga, nabo baje ku abasalile; Aliyo mhayo gumo batogilwe tubizukwe a bahabi; mhayo gwenuyu nu nene nali nakalalilwe kugwita. Aliyo aho Petro wali wiza Antiokia, nubuka kunghugula mu butongi wakwe, ki utindwa nsango. Iki aho batiniza a ba kufuma kuli Yakobo, wali ulya hamo na bana mahanga; aliyo aho biza wisunda, wikomanya nabo, iki wali ubogoha abasalile. Na Bayudaya bangi, nabo butuulilwa na wibeleja wakwe; nose nu Barnabas nanghwe uhumbulwa na wibeleja wabo. Aliyo aho nubona giki, batushiminzaga wima gitumo i nghana ya evangeli umo ili, huna nungʼwila Kefa mu miso gabo bose giki, Ulu bebe, uyo uli Nyudaya, ulu ukushilondelaga shimile sha bana mahanga, nulu shiti sha Bayudaya, ni buli ukubahadikijaga bana mahanga kushilondela shimile sha kiyudaya? Biswe aba tuli Bayudaya ba bufumanwa, nulu tuti banhu ba shibi ba bana mahanga, Aliyo iki tumanile munhu atutungiligijiwa kulwa Shitwa sha shilagilo aliyo kulwa kuzunya ukuli muli Yesu Kristo, na biswe twaanzunya Kristo Yesu, tutungiligijiwe kulwa kuzunya ukuli muli Kristo, na iti kulwa Shitwa sha shilagilo: iki kulwa Shitwa sha shilagilo ati ho munhu akutungiligijiwa. Aliyo aho tulikoba kutungiligijwa muli Kristo, ulu biswe benekele tusangwa tuli ba shibi, angu, himba Kristo wabiza ntumami wa shibi? Nulu na hado bia. Iki ulu nazenga hangi iyo nali nikambula, huna nalolecha nali nkenaguji. Iki nene kulwa shilagilo nali nucha ku shilagilo giki, nikale mpanga kuli Mulungu. Naakongʼwa hamo na Kristo, aliyo ndi mpanga; nulu nati nene hangi, aliyo Kristo ali mpanga muli nene: na bupanga ubo ndi nabo haha mu mili, wene ndi nabo kulwa kuzunya, u kuzunya ukuli kwa Ngʼwana wa Mulungu, Uyo unitogwa, na wiyinha ko ngʼwenekele kulwane. Natukisucha kigongo cha Mulungu: iki ulu butungilija bupandikwa mu shilagilo, nahene numho Kristo akacha dalali. Bingʼwe Bagalatia, aba muti na masala, nani wali umuloga muleke kuyigwa i nghana, bingʼwe aba Yesu Kristo waatendwa mu butongi wingʼwe giki, akomilwe? Natogilwe munitegeleje mhayo uyo gumo duhu giki, u Moyo ngʼwaangʼwanukula kulwa Shitwa sha shilagilo nulu kulwa kwigwa kwa kuzunya? Ni buli ngʼwabuuliha giko? Mukandia mu Moyo, haha lulu mutogilwe kushikanyiwa mu ki-mili? Himba ngʼwali ngʼuluhiwa mihayo mingi giko dalali? ulu nghana ili dalali. Ali Uyo akumugabilaga bingʼwe u Moyo, na kwita shamahano mu bingʼwe, himba akwitaga giko kulwa Shitwa sha shilagilo, nulu kulwa kigwile ka kuzunya? Gitumo Abrahamu waanzunya Mulungu, hu kwene ubalilwa butungilija. Kulwa iyo managi giki, abali ba kuzunya, ha bene bali bana ba ngʼwa Abrahamu. Na Shandikwa, iki shali shatonga kubona giki, Mulungu akubatungiligija bana mahanga kulwa kuzunya, shunomela Abrahamu evangeli kale, shuhaya giki, Muli bebe mahanga gose galasungulilwa lubango. Giko nabo abali ba kuzunya binhiwa lubango hamo na Abrahamu uwali na kuzunya. Iki abo bose abali ba Shitwa sha shilagilo basugilwe na izumo: iki yaandikwa giki, Wazumagwa buli munhu uyo atukomela mu mihayo yose iyaandikwa mu kitabo cha shilagilo, kwiyita. Ali mhayo uyu gumanikile hape giki, ati ho munhu uyo utungiligijiwa mu butongi wa Mulungu kulwa shilagilo: iki, U ntungilija alikala mpanga kulwa kuzunya; Na shilagilo shitiziilile mu kuzunya, aliyo, Uyo akashitaga akubiza mpanga musho. Kristo waatukomola ngʼwizumo lya shilagilo, iki akabiza izumo kulwiswe, iki yaandikwa giki, Wazumagwa buli munhu uwasungwa ha linti. Giki, u lubango lwa ngʼwa Abrahamu lushike ku bana mahanga muli Kristo Yesu; giki, twinhiwe kwisagija kwa Moyo kulwa kuzunya. U kwisagija kwali kutinjiwa na shilagilo Badugu, nalihaya ki-munhu, giki, nulu ilagane libize lili lya munhu duhu, aliyo ulu lyamala kudimiwa, ati ho munhu walyita hubiza dalali, nulu kulyongegeja mhayo. Kwisagija kuhayiwa kuli Abrahamu na ku bubyile wakwe. Walatuhaya giki, ku babyalwa, giti bali bingi; aliyo giti umo giki, Na kuli myalwa wako, ngʼwene Kristo. Iyo ndihaya ili giki, Ilagane ilyali lyatonga kudamiwa na Mulungu, i shilagilo ishali shiza hanuma ya miaka magana ane na makumi adatu, shitudula kulyinja ilagane, nulu kwita kwisagijiwa kubize dalali, Iki ulu wingiji bufuma mu shilagilo, butufuma hangi mu kwisagijiwa: aliyo Mulungu akangʼwinha Abrahamu u wingiji mu kwisagijiwa. Kulwa iyo, shilagilo shili ki? Shali shongegejiwa kulwa nguno ya bukenaguji, kushisha aliza u myalwa Uyo wali winhiwa kwisagijiwa, nasho shulagilwa na bamalaika mu nkono gwa nsangija. Ali u nsangija ati nsangija wa umo; aliyo Mulungu ali umo. Angu, shilagilo shili na wilwisha na kwisagija kwa Mulungu? Nulu na hado yaya: iki ulu ni shali shubiza ho shilagilo ishadula kwinha bupanga, nahene butungilija ni wali bufuma mu shilagilo. Aliyo Shandikwa shuyilugalila yose mu busugwa wa shibi, giki, a bazunya binhiwe kwisagija kulwa kuzunya kwa muli Yesu Kristo. Aliyo kuzunya aho kwali kutali kwiza, twali tulindwa na shilagilo, twali tulugalilwa kushisha kwize kuzunya u kwali kwahaya kukundulilwa hanuma. Giko shilagilo shabiza nangi wiswe kutwenha kuli Kristo, giki, twitwe kutungiligijiwa mu kuzunya. Aliyo haha iki kuzunya kwamala kwiza, tutasugilwe hangi na nangi. Iki bingʼwe bose muli bana ba Mulungu kulwa kuzunya kwa muli Kristo Yesu. Iki bingʼwe bose abo ngʼubatigijiwa muli Kristo, ngʼwanzwalile Kristo. Umo ati ho hangi Nyudaya nulu Ngriki, ati ho nsese nulu ngʼwana wa banhu, ati ho ngosha nulu nkima, iki bingʼwe bose muli umo muli Kristo Yesu. Na ulu muli ba ngʼwa Kristo, nahene muli bubyile wa Abrahamu na bingiji gitumo u kwisagija umo kuli. Aliyo ndihaya giki, u nsugi wa kaya aho atali ndo, atikilile na nsese, nulu ali ntale wa shose; Aliyo asugilwe na baleji na balabilija kushisha lwise lwenulo lwali lulagilwa na ise. Giko na biswe aho twali tutali banigini, twali tuli mu busugwa na malange ga kwandia ga mu si. Aliyo aho ikanza lyali lyungʼwa, Mulungu akantuma Ngʼwana wakwe, ubyalwa na nkima, ubyalwa mu busugwa wa shilagilo, giki, Abakomole abali busugwa na shilagilo, huna twinhiwe kwitwa kubiza bana. Na kulwa bingʼwe muli bana, Mulungu waantuma Moyo wa Ngʼwana wakwe mu ngholo jingʼwe, akulilaga giki, Abba, Siswe. Huna lulu bebe uti nsese hangi, aliyo uli ngʼwana; hangi ulu uli ngʼwana, nahene uli ngʼwingiji wa Mulungu muli Kristo. Aliyo ngʼwikanza lyenilo aho ngʼwali mutamanile Mulungu, ngʼwali ngʼubatumamila abo abati bamulungu ba bufumanwa: Aliyo haha lulu, iki ngʼwamala kumana Mulungu, na kutinda no ngʼwaamanwa na Mulungu, ni buli ngʼugashokela hangi a malange ga kwandia, agati na nguzu na ga nyahabi ayo ngʼugikumbulilwa kugatumamila hangi. Mukudimaga shiku, na mieji, na makanza, na miaka. Namuhehenalilwa, itizubiza hamo namunoganogela milimo dalali. Nangʼwikumbilija badugu, mubize gitumo nene ndi, iki nu nene nabiza gitumo bingʼwe muli: mutanitilile kibi. Ambu mumanile giki, nali namulomela evangeli lugendo lwa kwandia ndi ngokolo mu mili: Na kugengʼwa kwane kwa mu mili gwane, ngʼwali mutukudalaha nulu kukusucha: aliyo ngʼwali ngʼunegeleja giti ndi malaika wa Mulungu, ali chene, giti ndi Kristo Yesu. U kuyega kwingʼwe kuli hali? iki nene ndimukanila giki, ulu ni yali yadulika, ni ngʼwali ngʼukobola miso gingʼwe na kuninha nene. Himba nabiza ngʼwanishi wingʼwe lulu, iki namuwila ya nghana? Boi bamukalalilwe aliyo iti mu wima; aliyo batogilwe kumulugalila giki, mubalondele. Aliyo ili ya wiza kukalalwa mhayo gwa wiza makanza gose, na iti ngʼwikanza ilo duhu aho ndi ho hamo ningʼwe. Bana bane bado, abo namulumilwa busungu hangi kushisha Kristo abumve mu bingʼwe; Ni natogwa ulu ni nabiza hamo ningʼwe haha, na kugalucha ilaka lyane; iki ndingʼwiganiligija. Niwilagi, bingʼwe aba mutogilwe kusugwa na shilagilo, angu, mutigwaga shilagilo? Iki yaandikwa giki, Abrahamu walali na bana bagosha babili, umo wa muli nkima nsese, na ungi wa muli ngʼwanisale. Aliyo ngʼwana wa muli nkima nsese akabyalwa mu ki-mili, aliyo ngʼwana wa ngʼwanisale akabyalwa mu kwisagijiwa. Mihayo iyi yahayiwa mu kigemelo: iki bakima benabo bene malagane abili; limo likafuma ku lugulu lwa Sinai, likabyalaga bana ba nyasese, i lyene Hagari. U Hagari ngʼwenuyu hu ngʼwene lugulu lwa Sinai ululi mu Arabu, ululenganilile na Yerusalemi ya haha: iki yoi ili mu busese kihamo na bana bayo. Aliyo i Yerusalemi ya higulya yene ngʼwanisale, i yene niniswe. Iki yaandikwa giki, Yegaga bebe ngumba, uyo utabyalaga: hamukilaga higulya bebe, uyo utalumagwa busungu: iki bana ba uyo atatolilwe bali bingi kutinda ba uyo ali na ngosha. Ali biswe, badugu, tuli bana ba kisagigije, giti Isaaka umo walali. Aliyo gitumo mu shiku ja kale, uyo wali ubyalwa mu ki-mili unkoyakoya uyo wali ubyalwa mu ki-Moyo, giko ni haha ili chene. Aliyo Shandikwa shuhaya kinahe? giki, Mpejage nkima nsese kihamo na ngʼwana wakwe: iki ngʼwana wa nkima nsese atalingila hamo na ngʼwana wa ngʼwanisale: Hi yene badugu, biswe tuti bana ba nkima nsese, aliyo ba ngʼwanisale. Kristo akatutungula biswe, giki, tubize batungulwa: kulwa iyo handikilagi, mutizutaliginjiwa hangi na ikondejo lya busese. Degelekagi, nene Paulo namuwila giki, ulu ngʼusalwa, Kristo atumubelela na hado. Nanghugula hangi buli munhu uyo wazunya kusalwa giki, wei ali na nimo kushikilija shilagilo shose. Bingʼwe aba mutogilwe kubiza batungilija mu shilagilo, ngʼwalekanyiwa na Kristo; ngʼwagwaga ngʼwinga mu kigongo. Iki biswe tukulindilaga kwisagilwa kwa butungilija kulwa Moyo mu kuzunya. Iki muli Kristo Yesu kusalwa kuti mhayo, nulu kutusalwa; aliyo kuzunya ukukwitaga mu nzila ya butogwa. Bingʼwe ngʼwali ngʼupela chiza, nani wali umulemeja kuyigwa i nghana? Kuliwa matu uku kwali kutufuma kuli Uyo wali ungʼwitana bingʼwe. Kibimbya kido kikubimbaja mbilya yose. Nene ndi na kusanya ku bingʼwe muli Seba giki, mutalagaluka kubiza na iganiko lingi: aliyo uyo akumukoyaga alabiza na nsango gwakwe, nulu abize nani. Aliyo nene, badugu, ulu natali nulomela mhayo gwa kusalwa, ni buli natali nunyajanyajiwa? Ulu ili chene numho kwipama ku nsalaba kwinjiwagwa ho. Ni natogilwe abo abamutabatabya ulu ni bakomanyiwe. Iki bingʼwe badugu, ngʼwali ngʼwitanwa mubize batungulwa, aliyo mutizubutumamila butungulwa wingʼwe mu kwikumva kwa ki-mili, aliyo mu butogwa ngʼwitumamilage benekele na benekele. Iki shilagilo shose shashikilijiwa mu mhayo gumo, gwene giki: Ulantogagwe nzenganwa ngʼwiyo gitumo witogwa ngʼwenekele. Aliyo ulu ngʼwiluma na ngʼwilya benekele na benekele, ilanghanagi, mutizimala benekele na benekele. Aliyo ndihaya giki, Shiminzilagi mu ki-Moyo, huna mutalakushikilija kwikumva kwa ki-mili. Iki kwigongela kwa ki-mili kwene wanishi ku Moyo, na kwigongela kwa Moyo kwene wanishi ku ki-mili; iki shenishi shili na wilwisha shenekele na shenekele; nose ngʼwalemelwa kwita iyo mutogilwe. Aliyo ulu ngʼwigwa katongelele ka Moyo, mutusugwa na shilagilo. Ali i shitile sha ki-mili shimanikile, i shenishi: bujingi, busoso, wimilizu, Kwitongeleja, bulogi, wanishi, buyombo, wilu, bupelanu, bubudaniki, kwilekanya, kwisolanya, Isubi, kukolwa walwa, bulaku, na mihayo yingi iyilenganilile na yeniyi; namuhugula ku yeniyo, gitumo namala kumubugula kale giki, abakwitaga giti iyi, batalingila mu butemi wa Mulungu. Aliyo matwajo ga Moyo gene aya: kwitogwa, kuyega, mhola, kwiyumilija, wizangholo, wila, wishigwa, Bufula, kwilinda, ku yeniyo shilagilo shiti ho. Nabo abali ba ngʼwa Kristo Yesu, bakikomaga ki-mili kihamo na kwigonga na kwikumva kwabo. Ulu tuli bapanga kulwa Moyo, nahene tushiminzilage mu Moyo. Tutizubiza na kudosa kwa dalali, twiyikomya benekele na benekele na kwidimya wilu. Badugu, ulu munhu wipumukijiwa na bukenaguji bose, bingʼwe aba muli ba ki-moyo nshoshagi uyo ali giko, mu moyo gwa bufula; ilanghanage utizugengʼwa nangho. Ibukijagi miligo yingʼwe benekele na benekele, giko mukushikilija kilagilo cha ngʼwa Kristo. Iki ulu munhu wibona giki, ali kinhu aliyo ati kinhu, akwilembalembaga ngʼwenekele. Aliyo munhu ose apime nimo gwakwe ngʼwenekele umo guli, huna lulu akubiza na kwikumiligija mu yakwe ngʼwenekele, kuleka mu ya ungi. Iki buli munhu akubucha nigo gwakwe ngʼwenekele. Aliyo uyo akulangagwa mu mhayo gwa Mulungu angabile shinhu sha wiza uyo akunangaga. Mutilembalembage: Mulungu atugimva kichilu: iki iyo yose munhu wiyibiba, hi yene alayigesa. Iki uyo ubiba ku ki-mili chakwe, ya ki-mili alagesa bubozu; aliyo uyo ubiba ku Moyo, ngʼwene alagesa ku Moyo bupanga butushila. Tutizunoga kwita ya wiza; iki tulagesa aho ngelo ilashika ulu tutaloloha. Huna lulu gitumo tuli na ngʼwanya, twite shitile sha wiza ku banhu bose, aliyo kutinda ku benabo abali ba mu numba ya kuzunya. Lolagi umo nangʼwandikila bingʼwe na nuguta nhale no na nkono gwane ngʼwenekele. Abo bose abatogilwe kwiyolecha chiza mu iyo ya ki-mili, bene bamuhadikija kusalwa, giki, batizunyajanyajiwa kulwa nguno ya nsalaba gwa ngʼwa Kristo. Iki nulu benabo abasalwa boi benekele batadimaga shilagilo: aliyo batogilwe bingʼwe musalwe, giki, bikumiligije mu mibili yingʼwe. Aliyo nene natatogilwe nulu na hado kwikumiligija, ulu iti mu nsalaba gwa Seba wiswe Yesu Kristo, kulwago si yakomagwa kuli nene, na nene ku si. Iki u kusalwa kuti kinhu, nulu kutusalwa, aliyo kisengʼwa kipya gwike. Nabo bose abalashiminzila mu kalagilile aka, mhola na kuchilwa kigongo shibize kubo, na ku Israeli ya Mulungu. Kufuma haha munhu ose atizunikoyakoya; iki ndi nago malanda ga ngʼwa Yesu golilwe ha mili gwane. Kigongo cha Seba wiswe Yesu Kristo kibize hamo na mioyo yingʼwe, badugu bane. Amina. Paulo, ntungʼwa wa ngʼwa Yesu Kristo, mu iyo Mulungu atogilwe, ku bela abali ko mu Efeso, na ku bishigwa muli Kristo Yesu: Kigongo kibize ku bingʼwe na mhola kufuma kuli Mulungu Siswe, na Seba Yesu Kristo. Akumilijiwe Mulungu, Ise wa Seba wiswe Yesu Kristo, Uyo waatusungulila buli lubango lose lwa ki-moyo mu kikalile ka ngʼwigulu muli Kristo: Gitumo waatukoma muli Wei aho si itali kubumva, tubize bela, na abati na kilingo mu butongi wakwe mu butogwa; Iki waatutuula ho biswe kufuma kale twitwe kubiza bana kuli Wei mu nzila ya Yesu Kristo, gitumo kuli kuyega kwakwe kwa iyo atogilwe, Kulwa kulilumba i likujo lya kigongo chakwe, mucho waatwita bazunilijiwa muli Ntogwa: Muli Wei tuli nako kukomolwa kwiswe mu mininga gakwe, kulekejiwa kwa mabusobya giswe, gitumo busabi wa kigongo chakwe umo buli, Icho waatukwigija biswe mu masala gose na kwitegeleja kose. Iki waatumanikija cha kwigeniha cha iyo atogilwe, gitumo kuli kuyega kwakwe, uko umalila muli Wei ngʼwenekele: Giki, mu kalongeje ka bushikanu wa makanza, ashibilinge shinhu shose muli Kristo, shinhu ishili ngʼwigulu, i nasho ishili mu si; shose muli Wei; Hangi muli Wei twiinhiwa wingiji, iki twaatuulwa ho kufuma kale, gitumo kuli kumalila kwa Ngʼwenuyo, akutumamaga mihayo yose gitumo buli bupimi wa iyo atogilwe ngʼwenekele; Biswe aba twaandia kungʼwisagilwa Kristo, tubize ba kulilumba i likujo lyakwe: Muli Wei bingʼwe hangi, aho ngʼwaagwigwa mhayo gwa nghana, evangeli ya bupiji wingʼwe, muli Wei: aho ngʼwaazunya, ngʼwaatuulilwa himengho lwa Moyo Ngʼwela wa kwisagija, Ngʼwenuyo ali ngumili ya wingiji wiswe, kushisha kukomolwa kwa iyo yagulwa ya Mulungu, kulwa kulilumba i likujo lyakwe. Kulwa mhayo uyo nu nene hangi, iki nigwile nghulu ja kuzunya muli Seba Yesu, uko muli nako na butogwa ubo muli nabo ku a bela bose, Natukijaga kulumba kulwa; bingʼwe, hangi nakumuhayaga mu kulomba kwane giki, Mulungu wa Seba wiswe Yesu Kristo, Siswe wa ikujo, angʼwinhe i bingʼwe moyo gwa masala na gwa i kukundula, mu kumana Wei, Miso ga maganiko gingʼwe gitilwe isana kushisha ngʼwitegeleje giki, kwisagilwa kwa kwitana kwakwe gitumo kuli, busabi wa ikujo lya wingiji wakwe mu a bela gitumo buli, Na hangi butale no wa budula wakwe gitumo buli wa ku biswe abazunya, gitumo katumamile umo kali ka makaya ga nguzu jakwe, Ako utumamila muli Kristo, aho waanjucha kufuma mu bafu, na ungʼwigasha ku nkono gwakwe gwa bulyo mu kikalile ka ngʼwigulu. Higulya no kutinda buli butale bose, na busugi bose, na budula bose, na buseba bose, na buli lina lyose ililitanwa, iti ngʼwikanza ili duhu, aliyo hangi mu ilo lyuhaya kwiza: Na ushituula ho shinhu shose hasilili ya bupandijo wakwe, hangi ungʼwinha kubiza ntwe higulya ya shinhu shose ku kanisa, Iyili mili gwakwe, kokala kwa Ngʼwenuyo akokalaga shose mu shose. Nanghwe waamugalucha kubiza bapanga, abo ngʼwali muli bafu kulwa mabusobya gingʼwe na shibi shingʼwe, Musho ngʼwali ngʼushiminza kale gitumo ikanza umo lili lya si iyi, gitumo ali u ntale wa busugi wa mu miuyi ya higulya, ngʼwene moyo uyo akutumamaga haha mu bana ba bukitigwa: Mu benabo na biswe bose twali twikala bapanga kale mu kwikumva kwa nhungwa ya ki-mili gwiswe, twali tubyita katogelwe ka nhungwa ya kimili na maganiko, hangi twali tuli bana ba bupelanu mu kitungilwe, gitumo na bangi: Aliyo Mulungu, iki ali nsabi mu kuchila kigongo, kulwa butogwa wakwe wingi ubo waatutogwa nabo, Aho twali tuli bafu mu mabusobya giswe, waatugalucha kubiza bapanga hamo na Kristo (ngʼwaapijiwa na kigongo), Hangi utujucha hamo nanghwe Yesu, na utwigasha hamo nanghwe mu kikalile ka ngʼwigulu muli Kristo Yesu; Giki, mu makanza agahaya kwiza, Wei oleche busabi butale kutinda wa kigongo chakwe mu wiza wakwe ku biswe muli Kristo Yesu: Iki ngʼwaapijiwa na kigongo mu nzila ya kuzunya, hangi iti kufuma mu bingʼwe benekele, ili cha kwinha cha Mulungu; Iti kufuma mu Shitwa, munhu nulu umo atizikumilija. Iki tuli milimo yakwe, abo twaasengʼwa muli Kristo Yesu twite shitile sha wiza, isho Mulungu ushimalila kale, tushiminze musho. Kulwa iyo ngʼwizukwe giki, bingʼwe abo ngʼwali muli bana mahanga kale mu nhungwa ya ki-mili, abitanwa batasalilwe na abo bitanwa basalwa mu mili, kusalwa ukubejiwa na makono; Giki, ngʼwikanza lyenilo ngʼwali muti na Kristo, ngʼwali muli bashomha kwihanga lya Israeli, na bageni ku malagane ga kwisagija, ngʼwali muti na kwisagilwa, hangi ngʼwali muti na Mulungu mu si umu. Aliyo haha muli Kristo Yesu, bingʼwe abo ngʼwali muli kule na Mulungu kale, ngʼweegelejiwa mu mininga ga ngʼwa Kristo. Iki Wei ali mhola yiswe, Uyo waababeja bubili wabo kubiza bumo, hangi usambula isenge ilyali lyutukomanya. Iki mu ki-mili chakwe waabugalucha kubiza dalali wanishi, u wene kilagilo cha malagilo mu isho shilagililwe, abaseme benabo babili muli Wei ngʼwenekele kubiza munhu umo mpya, giko ubeja mhola; Nanghwe abasangije bubili wabo mu mili gumo kuli Mulungu mu nsalaba, iki waabubulaga wanishi mugo; Nanghwe wiza ubyulomela mihayo ya mhola ku bingʼwe ngʼwali muli kule, na mhola kubo abali hihi: Iki muli Wei biswe babili tuli na nzila yiswe ya kwingila kuli Siswe mu Moyo umo. Huna lulu muti bageni na bashomha haha, aliyo muli bazengi bichabo ba a bela, na muli ba mu kaya ya Mulungu, Ngʼwaazengwa ha musingi gwa batungʼwa na bahangi, Kristo Yesu ngʼwenekele ali iwe itale lya ha lungʼongo; Muli Wei numba yose ngima yudimanyiwa chiza, ikongejaga kukula kubiza hekalu nela muli Seba; Muli Wei hangi bingʼwe mulizengwa hamo, kubiza wikalo wa Mulungu mu Moyo. Kulwa mhayo uyu nene Paulo, ntungwa wa ngʼwa Kristo Yesu kulwa nguno ya bingʼwe bana mahanga, Ulu nghana ngʼwamaia kwigwa mihayo ya kalongeje ka kigongo cha Mulungu, ako niinhiwa kulwa nguno yingʼwe; Gitumo waanimanikija mu kukundula kwa cha kwigeniha iki, gitumo namala kwandika mu mihayo mido, Muyo, aho ngʼusoma, ngʼwadula kumana kwitegeleja kwane mu cha! kwigeniha cha ngʼwa Kristo; Icho chali kitumanichiwa mu shibyalilwe shingi ku bana ba banhu, gitumo chaakundulwa haha ku batungʼwa bakwe bela, na bahangi mu Moyo, Giki, bana mahanga bah bingiji bichabo, na mabudika michabo ga mili, na bisangiji bichabo mu cha kwisagija chakwe muli Kristo Yesu mu nzila ya evangeli ya bupiji; Iyo naagaluchiwa kubiza ngʼwinhilija wayo, gitumo cha kwinha umo kili cha kigongo cha Mulungu, icho niinhiwa gitumo katumamile ka budula wakwe umo kali. Kuli nene, uyo ndi ndo kutinda ndo wa mu bela bose, niinhiwa kigongo cheniki giki, nabalomele bana mahanga busabi wa ngʼwa Kristo ubukilile kubugilijiwa; Na kubamulikila banhu bose babone busangi umo buli wa cha kwigeniha, icho chali chubiswa kufuma kale muli Mulungu, Uyo waashisema shinhu shose muli Yesu Kristo, Giki, haha mu nzila ya kanisa masala ga Mulungu ga mbika ningi gamanike ku mabutale na mabusugi agali mu kikalile ka ngʼwigulu, Gitumo kumalila kwa welelo umo kuli, uko waabeja muli Kristo Yesu, Seba wiswe; Muli Wei tuli na bugimu na nzila ya kwingila mu kusanya mu nzila ya kuzunya kwakwe. Kulwa iyo nangʼwikumbilija giki, mutizugwa ngholo mu makuluniwa gane kulwa nguno yingʼwe, a gene ikujo lyingʼwe. Kulwa mhayo uyu natuja mazwi gane mu butongi wa ngʼwa Siswe, Kufuma kuli Wei buli ludugu lose lwa ngʼwigulu na lwa ha si lulitanwa lina, Giki, angʼwinhe bingʼwe gitumo busabi wa ikujo lyakwe umo buli, mu Moyo wakwe muguzuhiwe na budula muli munhu wa mugati; Kristo azenge mu ngholo jingʼwe kulwa kuzunya, bingʼwe iki muli na miji na musingi mu butogwa, Mubize ba nguzu ja kwitegeleja hamo na bela bose yeniyi giki, bugaligali na bulihu na bugunguhu na bushimu umo buli, Hangi kumana butogwa wa ngʼwa Kristo ubukilile bumani; bingʼwe ngʼokajiwe kushika mu kokala kose kwa Mulungu. Haha kuli Uyo wadula kwita no no no kutinda iyo tukulombaga nulu kwiganika, gitumo buli budula ubo ubukutumamaga mu biswe, Ikujo libize kuli Wei mu kanisa na muli Kristo Yesu kushika mu shibyalilwe sha welelo na welelo. Amina. Kulwa iyo nene ntungwa muli Seba nangʼwikumbilija bingʼwe giki, Mushiminzage gitumo ikudalaga kwitanwa uko ngʼwiitanilwa mo, Na bulyehu bose na bufula, na kwiyumilija, ngʼwikondelile benekele na benekele mu butogwa; Mukomelage kutinda bumo wa Moyo mu katutigile ka mhola. Gwene mili gumo, na Moyo umo, chene gitumo bingʼwe ngʼwiitanwa mu kwisagilwa kumo kwa kitanilwe kingʼwe; Seba umo, kuzunya kumo, kubatija kumo, Mulungu umo na Siswe wa bose, Uyo ali higulya ya bose, akwitaga mu bose, na ah mu bingʼwe bose. Aliyo buli umo wa mu biswe wiinhiwa kigongo, gitumo ili ngelekelo ya cha kwinha cha ngʼwa Kristo: Kulwa iyo wahaya giki, Aho wiinunga ngʼwigulu ubatwala badingʼwa abali budingʼwa, nanghwe ubinha banhu sha kwinha. (Aliyo mhayo uyu, wiinunga, guli kinahe, ulu guti giki, Wei wali wika tame kwingila mu mabudika ga hasilili ga mu si. Ngʼwenuyo uwali wika ali Uyo wiinunga higulya kukila igulu lyose, Wei okale mu shinhu shose.) Nanghwe ubinha bamo, batungʼwa; na bamo, bahangi; na bamo, balomeji ba evangeli ya bupiji; na bamo, badimi ba kanisa na balangi; Kulwa kubashikanya bela; kushika mu nimo gwa kwinhilija, mili gwa ngʼwa Kristo guzengwe; Kushisha biswe bose tulashikila mo mu bumo wa kuzunya, na wa bumani bushikanu wa Ngʼwana wa Mulungu, kushisha tubiza ngosha akulile gete, kushisha tushika mu ngelekelo ya butale wa kokala kwa ngʼwa Kristo: Giki, kufuma lelo tutizubiza banigini, ababuchabuchiwa na kutwalatwalwa kunu na kunu na buli nyaga gose gwa kalangile, mu masalasala ga banhu, mu butegitegi, kulwa kalondelele ka bulembalembi, Aliyo tubize tukuhayaga i ya nghana mu butogwa, tukuliile muli Wei mu mihayo yose, Uyo ngʼwene ntwe, Kristo; Kufuma muli Wei mili gose gulilunganyiwa chiza na kudimanyiwa hamo, mu nzila ya bugunani wa buli bulungilo, gitumo katumamile kali ka ngelekelo ya buli ibudika lyose, mili gukiyongejaga kukula kushika mu kwizenga gwenekele mu butogwa. Nahene nahaya mhayo uyu, hangi nakanila muli Seba giki, kufuma haha mutizushiminza gitumo bana mahanga bangi bakushiminzaga, mu budoshi wa iganiko lyabo, Biitihva giiti mu kwitegeleja kwabo, bikomanije kule na bupanga wa Mulungu, kulwa butumana ubuli mo mubo, kulwa bugunu wa ngholo jabo, Benabo iki boya kusatwa mu mioyo yabo, biyiinha ko benekele ku wimilizu, kulwa kwita kwa busoso bose mu kwikumva shikolo. Aliyo bingʼwe mutalangilwe ya ngʼwa Kristo giko; Ulu nghana ngʼwamala kwigwa na kulangwa muli Wei, gitumo nghana ili muli Yesu; Giki, mu mihayo ya chimile chingʼwe cha kale munzule munhu nkulukulu, uyo akubolaga gitumo kwikumva kwa bulembalembi umo kuli; Hangi giki, mudoganyiwe bapya mu moyo gwa iganiko lyingʼwe. Hangi munzwale munhu mpya uyo waasengʼwa mu kungʼwikola Mulungu mu butungilija na wela wa nghana. Kulwa iyo, iki ngʼwaazula bulomolomo, hayagi ya nghana buli munhu na nzenganwa ngʼwiye; iki tuli mabudika ga benekele na benekele. Pelanagi, aliyo mutizita shibi; mutizulizunilija limi kumulokela mu bupelanu wingʼwe. Nulu mutizungʼwinha Shetani ngʼwanya. Ngʼwenuyo akibaga, atiziba hangi; aliyo hambuhambu ite milimo, atumamage na makono gakwe iyo ya wiza, abize nasho sha kungʼwinha uyo ali na kugayiwa. Mhayo gose gose gwa malofu gutizufuma mu nomo gwingʼwe, aliyo uyo gwa wiza gwa kuzenga gitumo kugayiwa umo kuli, gubinhe kigongo abakwigwaga. (4) Batizumpinihaja Moyo Ngʼwela Na mutizumpinihaja Moyo Ngʼwela wa Mulungu, muli Wei ngʼwaatuulilwa lumengho kushisha lushiku lwa kukomolwa. Bululu bose, na budaki, na bupelanu, na buyombo, na buduki, shenisho shinjiwe ho mu bingʼwe, hamo na isubi lyose: Bizagi na kigongo benekele na benekele, ngholo niza, ngʼwikuulilwe benekele na benekele, gitumo Mulungu waamukuulilwa bingʼwe muli Kristo. Kulwa iyo bizagi balondeji ba Mulungu, gitumo bana batogwa; Hangi shiminzagi mu butogwa, gitumo nu Kristo nanghwe waamutogwa bingʼwe, na wiiyinha ko ngʼwenekele kulwa biswe, ubiza cha kwinha na kitambo kuli Mulungu, kulwa kubiza ngʼwaso gwa kunungha chiza. Aliyo bujingi na ya busoso yose, nulu kwikumva shikolo shenishi shitizuhayiwa mu bingʼwe, gitumo ikubelaga mu a bela; Nulu ya minala, nulu kuhoya kwa nyachiluchilu, nulu wimeji, yene itigelile; aliyo hambuhambu bulumbi. Iki mumanile mhayo uyu giki, njingi, nulu munhu nsoso, nulu ngʼwikumva wa shikolo, hu na ngʼwene namya wa shikolile, ngʼwenuyo ati na wingiji mu butemi wa ngʼwa Kristo na Mulungu. Munhu atizumulembalemba na mihayo iyili ya dalali; iki kulwa mihayo yeniyi bupelanu wa Mulungu bukubiziilaga bana ba bukitigwa. Kulwa iyo mutizubiza ba kwisangija hamo nabo; Iki kale ngʼwali muli giiti, aliyo haha muli isana muli Seba; shiminzagi gitumo muli bana ba isana. (Iki matwajo ga isana gali mu wiza bose na butungilija na nghana), Mubone kumana iyo iyili ya kunyeja Seba; Mutizita busangi na shitile sha giiti ishitatwajaga matwajo, aliyo hambuhambu shihamagi; Iki ili ya minala nulu kuyihaya mihayo ikwitagwa nabo mu kwigeniha. Aliyo mihayo yose aho yuhangʼwa, yigengelechiwa na isana: iki yose iyo ikwigengelechaga mihayo yene isana. Kulwa iyo uhaya giki, Mishaga, bebe ulishutula, na jukaga kufuma mu bafu, huna Kristo akukwakila bebe. Kulwa iyo ilanghanagi chiza umo mukushiminzilaga, iti gitumo abati na masala, aliyo gitumo abali na masala; Mubizukomola ikanza, iki shiku iji jili ja buhunga. Kulwa mhayo uyo mutizubiza bachiluchilu, aliyo abo mukwitegelejaga iyo Seba atogilwe. Hangi mutizukolwa na minzi ga mizabibu, iki mugo kili mo kikoji; aliyo ngʼwizulwe na Moyo; Ngʼwilunjalunjage benekele na benekele mu zaburi na mimbo, na kwimba kwa ki-moyo, ngʼwimbage na kugongola mu ngholo jingʼwe kuli Seba; Munumbage gwa Mulungu Ngʼwene Siswe kulwa mihayo yose, mu lina lya Seba wiswe, Yesu Kristo. Ngʼwilyehelage benekele na benekele mu lyogohya lya ngʼwa Kristo. Bakima ilyehyagi ku bagoshi bingʼwe, gitumo kuli Seba. Iki ngoshi ali ntwe gwa nkima gitumo Kristo ali ntwe gwa kanisa, Wei ngʼwenekele ali Mpija wa mili. Aliyo gitumo kanisa inyehelile Kristo, giko bakima babize ku bagoshi babo mu mihayo yose. Bagosha mubatogagwe bake bingʼwe, gitumo nu Kristo nanghwe waayitogwa kanisa, na wiiyinha ko ngʼwenekele kulwayo, Ayikomanye heke, iki waamala kuyeja na kogeje ka minzi mu mhayo, Ayenhe kuli Wei ngʼwenekele, kanisa ya ikujo, iyiti na kabado nulu wikunakuni nulu kinhu chingi giti isho; aliyo ibize nela, na buka nduhu. Giko hangi shibigelile bagosha kubatogwa bake babo giti mibili yabo benekele. Uyo untogwa nke wakwe ngʼwenekele witogwa ngʼwenekele. Iki ati ho munhu uyo ukolwa mili gwakwe ngʼwenekele; aliyo ugulisha na ugulinda gitumo Kristo akuyilindaga kanisa; Iki tuli mabudika ga mili gwakwe, ga nofu yakwe na ga maguha gakwe. Kulwa mhayo uyu munhu akubaleka ise na nina, na akudimana na nke wakwe; nabo bubili wabo bakubiza mili gumo. Cha kwigeniha iki kili kitale: aliyo nalihaya mihayo ya kuli Kristo na ya ku kanisa. Nahene buli munhu antogwe nke wakwe ngʼwenekele, gitumo witogwa ngʼwenekele; na nkima nanghwe angʼogohe ngoshi wakwe. Bana, balyehelagi babyaji bingʼwe muli Seba; iki mhayo uyo gutungiligije. Bakujage so na noko; iki chene kilagilo cha kwandia ikili nako kwisagija, Giki, ibize mhola kuli bebe, hangi ubize wa kulama shiku ningi ha si. Na bingʼwe bababa, mutizubapelanya bana bingʼwe; aliyo mubakugije mu kahugulile na kaganikilile ka Seba. Basese, balyehelagi baseba bingʼwe ba ki-mili, na boba na kudetema, mu bulyehu wa ngholo jingʼwe, gitumo kuli Kristo; Iti mu katumamile ka kubonwa na miso, gitumo bayeja ba banhu; aliyo gitumo basese ba ngʼwa Kristo, mubizita kufuma mu ngholo iyo Mulungu atogilwe; Mutumame na ngholo niza gitumo kuli Seba, iti ku banhu; Iki mumanile giki, buli mhayo gwa wiza uyo munhu waagwita, u gwene alinhiwa hangi kufuma kuli Seba, nulu ali nsese nulu ngʼwana wa banhu. Na bingʼwe baseba, bitilagi nabo giko, muleke kubakanga; iki mumanile giki, Seba wingʼwe, hangi wabo, ali ngʼwigulu, na kubasolanya banhu kuti ho muli Wei. Haha lulu, badugu bane, bizagi ba budula muli Seba, na mu makaya ga nguzu jakwe. Zwalagi shilanga shose shigima sha Mulungu, mudule kuhandikila, kugahangija masalasala ga Shetani. Iki kulwa kwiswe tutalwaga na mili na mininga, aliyo na mabutale, na mabusugi, na batemi ba giiti cha ikanza ili, na mabita ga ki-moyo ga buhunga mu kikalile ka ngʼwigulu. Kulwa iyo manulagi shilanga shose shigima sha Mulungu, mudule kuhangija mu lushiku lwa buhunga, na aho ngʼwamala kwita yose, kuhandikila. Nahene handikilagi lulu, abo ngʼwitungile mikimbili yingʼwe na nghana, na muzwalile cha mu kikuba, chene butungilija. Na ngʼwitungile magulu gingʼwe na kubejabejiwa kwa evangeli ya bupiji ya mhola: Kutinda yose manulagi lumuda lwa kuzunya, nalo muladula bujimya masonga gose ga moto ga uyo mi. Hangi anukulagi ngofila ya bupiji, na lilushu lya Moyo, lyene mhayo gwa Mulungu; Mu nzila ya kulomba kose na kwikumbilija kose, lombagi buli ikanza mu Moyo, hangi ikalagi miso mu mhayo uyu gete mu kwiyumilija kose na kwikumilija kose kulwa bela bose; Munilombelage nene giki, ninhiwe kuhaya, nasamye nomo gwane kumanicha na bugimu u kwigeniha kwa evangeli ya bupiji. Iyo kulwayo nene ndi nanghani mu nyololo; muyo nahaye na bugimu, gitumo shinigelile kulungalunga. Aliyo bingʼwe ngʼwitegeleje mihayo yane umo ili, iyo nakwitaga, Tukiko, ndugu ntogwa na ngʼwinhilija ngʼwishigwa muli Seba, alamumanikija bingʼwe mihayo yose: Uyo naantuma ku bingʼwe kulwa mhayo uyu duhu, mumane mihayo yiswe, hangi amulunguje ngholo jingʼwe. Mhola ibize ku badugu, na butogwa hamo na kuzunya, kufuma kuli Mulungu Siswe, na Seba Yesu Kristo. Kigongo kibize hamo nabo bose abantogilwe Seba wiswe Yesu Kristo mu nghana. Amina. Paulo na Timoteo, basese ba ngʼwa Yesu Kristo, ku bela bose muli Kristo Yesu abali mu Filipi kihamo na balindi na binhilija. Kigongo kibize ku bingʼwe na mhola, ishufuma kuli Mulungu Siswe, na kuli Seba wiswe Yesu Kristo. Kulumba kwa ngʼwa Paulo na kulomba kwakwe Nanumba Mulungu wane, buli aho nakungʼwizukagwa, Gwa mu buli kulomba kwane kulwingʼwe bose, nakulombaga na buyegi, Kuhva nguno ya kusangila kwingʼwe mu nimo gwa kuyitangʼanhya evangeli kufuma lushiku aho mukandia kushisha haha; Mhayo uyu nasanije giki, Wei Uyo waandia kwita nimo gwa wiza mu mioyo yingʼwe, alagumalija kushisha ku lushiku lwa ngʼwa Yesu Kristo: Gitumo igelile kuli nene nangʼwiganike bingʼwe bose chene, iki bingʼwe muli mu ngholo yane, iki mu butungwa wane na mu nimo gwa kuyilwilila evangeli na kuyidimya, bingʼwe bose ngʼwasangila na nene mu kigongo iki. Iki Mulungu ali nkaniji wane, gitumo nakumukumbulilaga bingʼwe bose mu moyo gwa ngʼwa Yesu Kristo. Uku kwene kulomba kwane giki, butogwa wingʼwe wiyongeje kukwila no mu bumani bose na mu kwitegeleja kose giki, Muyizunilije mihayo iyili ya wiza; mubize ababonwa hape bali bela, abati na kwipamya kushisha ku lushiku lwa ngʼwa Yesu Kristo; Ngʼokajiwe na matwajo ga butungilija, agabiza ho kuhva Yesu Kristo, kwikujo na kukumilijhva kwa Mulungu. Buyegi wa ngʼwa Paulo mu kuluhiwa kwakwe Aliyo badugu bane, natogilwe mumane giki, i mihayo iyali yunigwila, yabyagi ya kukwilikanya evangeli; Nose butungwa wane muli Kristo wigengelekile ngʼwikulu lya Kaisari na mu bangi bose; Na bingi ba badugu abali muli Seba butimbiwa ngholo kuhva butungwa wane, babiza na bugimu no kutinda kuhaya mhayo gwa Mulungu bati na boba. Bangi hene, bakulomelaga ya ngʼwa Kristo kuhva wilu na wilwisha; aliyo bangi kuhva butogwa gete; Bangi bakulomelaga ya ngʼwa Kristo kulwa butogwa iki bamanile giki, nene natuulwa ho kuhva kwilwilila i evangeli; Aliyo bangi bakulomelaga ya ngʼwa Kristo mu shiki, iti mu nghana, biganika kunongegeja buluhi ku butungwa wane. Mhayo guli ho? yaya, leke Kristo alomelwe mu nzila jose, nulu mu wibeleja, nulu mu nghana nahene naliyega mu yeniyi, na hangi nakuyega. Iki namanile giki, mhayo uyu gulanigalukila kubiza bupiji wane, kuhva kulomba kwingʼwe na kugabihva kwa Moyo wa ngʼwa Kristo Yesu, Gitumo kuhahalila kwane na kwisagilwa kwane giki, nataladingʼwa minala mu mhayo gose, aliyo gitumo kale, giko ni haha, Kristo akukumiligijiwa mu mili gwane na butimbu bose, nulu ibize mu nzila ya kwikala mpanga, nulu mu nzila ya kucha. Iki kuli nene u kulama kwene Kristo, na kucha kwene solobo. Aliyo ulu nakulama mu mili, hu gwene matwajo ga milimo yane; aliyo gwa kusola himba nasole ki, natamanile. Iki nashitilijiwa hagati ya mihayo iyi ibili, ndi na nghumbu kuja kubiza hamo na Kristo; iki hu gwene guli gwa wiza kutinda: Aliyo kushinga mu mili, gwene gwigongile kutinda kulwa nguno yingʼwe. Nene ndi na kwisagilwa uku, namanile giki, nakwikala na nakushinga hamo ningʼwe bose kumusegeja, muyege mu kuzunya; Gild, kwikumilija kwingʼwe muli Kristo Yesu kulwane kukwile, ulu nalize hangi ku bingʼwe. Kusangila mu kuluhiwa kulwa nguno ya evangeli Aliyo kashiminzile kingʼwe kabize gitumo kayigelelilwe evangeli ya ngʼwa Kristo giki, nulu niza kwibona ningʼwe, nulu nukija, nahene, nigwe nghulu jingʼwe giki, mukuhandikilaga mu moyo gumo, mukukulwililaga kuzunya kwa mu evangeli na ngholo imo; Hangi mutogohiwa na banishi bingʼwe mu mhayo gose; ku benabo mhayo uyu guli kimanikijo ikili hape cha kuyagala, aliyo ku bingʼwe guli kimanikijo cha bupiji ubufumile kuli Mulungu; Iki bingʼwe ngʼwinhiwa kulwa nguno ya ngʼwa Kristo, iti kuzunya gwike, aliyo hangi nu kuluhiwa kulwa nguno yakwe: Iki muli na wilwisha wenubo duhu ubo mukabubona kuli nene, na haha ngʼwigwa giki, ndi nabo. Kulwa iyo ulu kuli ho kuganikilwa kose muli Kristo, ulu kulungujiwa kose kwa butogwa, ulu kusangila kose kwa Moyo Ngʼwela, ulu kisa na wisatwi, Kokalilijagi kuyega kwane giki, mubize na ngholo imo, na butogwa wenubo duhu, ngʼwigwindanije, mubize ba moyo gumo; Mutizita mhayo gose mu halali nulu kwikumilija dalali, aliyo mu widoheleja wa ngholo, buli munhu angʼwiganike ngʼwiye ali wa wiza kutinda wei ngʼwenekele; Buli munhu mu bingʼwe atizudilila yakwe duhu, aliyo buli munhu ayidilile ni ya bangi. Bizagi na iganiko ili mu bingʼwe, ilyubiza muli Kristo Yesu: Uyo nulu walali mu suso ya Mulungu, walatidedekanya giki, a kalenganilile kakwe na Mulungu guli mhayo gwa kumiila, Aliyo akigayisha ikujo lyakwe, na uzwala suso ya kisese, na akabejiwa mu kikolele ka banhu; Na aho ubonwa ali mu suso ya banhu, akidohya ngʼwenekele na ubiza nyehu nulu kushisha mu kucha, hu kwene kucha kwa ha nsalaba. Kulwa iyo Mulungu akangunguhya no, na ungʼwinha i lina ilikilile mina gose; Giki, ku lina lya ngʼwa Yesu buliizwi lilatuja, lya shibumva ishili ngʼwigulu, nulu ishili mu si, nulu ishili hasilili ya si, Na buli lulimi lulatambula giki, Yesu Kristo ngʼwene Seba, kwikujo lya Mulungu Ise. Kulwa iyo batogwa bane, gitumo ngʼwali mulyehela na kale, iti aho nali ndi ho gwike, aliyo kutinda no i haha aho nene nhi ko, tumamagi kushikilija bupimi wingʼwe mu kogoha na kuzuguma, Iki ali Mulungu Uyo akutumamaga mu bingʼwe kulagila na kwita iyo atogilwe Wei. Itagi mihayo yose muti na kuduguma nulu halali; Mubize muti na kilingo nulu buhwiganu, mubize muli bana ba Mulungu, abati na buka hagati ya kibyalilwe ichigomagomile na kitigwa, mubo bingʼwe mukwakaga mu si giti sonda; Mukolechaga mhayo gwa bupanga giki, nabize nago gwa kwikumilija, mu lushiku lwa ngʼwa Kristo giki, natupelaga dalali nulu natutumamaga dalali. Ali chene, nulu nutambilwa ha kitambo na kwinhilija sha kuzunya kwingʼwe, nahene nuyega, hangi nayegela hamo na bingʼwe bose: Na bingʼwe hangi giko, yegagi, na muyegelage hamo na nene. Aliyo nisagilwa muli Seba Yesu kumutumila Timoteo wangu, nalungujiwe aho numana mhola yingʼwe umo muli. Iki nati na munhu ungi wa kiganikile kamo na nene, uyo wei ngʼwenekele akumudilila gete. Iki bose bakalalilwe shabo sha benekele, iti sha ngʼwa Yesu Kristo. Aliyo bingʼwe mumanile kukanilwa kwakwe giki, gitumo ngʼwana akatumamilaga ise, giko wei akutumamaga hamo na nene mu nimo gwa evangeli. Kulwa iyo nisagilwa kuntuma uyu, aho nalamanaga iyo ilanigwila; Aliyo nisagilwa muli Seba giki, natudila kwiza nene ngʼwenekele. Aliyo nali nubona inigelile kumutumila ndugu wane Epafrodito, ntumami ngʼwichane na nshilikale ngʼwichane, na ntungʼwa wingʼwe na ngʼwinhilija wa mu kugayiwa kwane. Iki wei wali umukumbula no bingʼwe bose na hangi walali na bupina, iki ngʼwali mungʼwigwa giki, asatile; Na nghana walasatile hihi kucha, aliyo Mulungu akanchila kigongo; nulu iti wei wike aliyo nu nene, natizubiza na bupina hangi na hangi. Kulwa iyo niyanguhilijaga kuntuma giki, muyege aho mukwibona nanghwe, hangi nane bupina wane bugehe. Kulwa iyo, ngʼwegelejagi muli Seba na kuyega kose, na mubinhe ishima abali chene: Iki kulwa nguno ya nimo gwa ngʼwa Kristo walali hihi kucha, walatubudilila bupanga wakwe, ashikilije iyo iyali yuleba mu kwinhilija kwingʼwe kuli nene. Huna lulu, badugu bane, yegagi muli Seba. Kungʼwandikila bingʼwe mihayo yeniyo ituninojaga, aliyo ku bingʼwe guli mhayo gwa kumuhandikija. Ilanghanagi ku mva, ilanghanagi ku biiti ba ya bubi, ilanghanagi ku bichembi: Iki tuli basalwa abakunamyaga Mulungu mu Moyo Ngʼwela, abakwikumiligijaga muli Kristo Yesu, abati na kwisagilwa mu mili: Aliyo nene nadula kuhimbila mu mili: ulu munhu ose wibona ali na nguno ya kuhimbila mu mili, nene natindile: Nakasalwa lushiku lwa kanane, ndi wa ihanga lya Israeli, wa mu luganda lwa Benyamini, ndi Nghebrania wa Bahebrania; mu mihayo ya shilagilo nali ndi Mfarisayo; Mu bukomezu nuyinyajanyaja kanisa, mu butungilija ubulagililwe mu shilagilo, nali nati na kilingo. Paulo wilecha yose kulwa nguno ya kumana Kristo Aliyo mihayo iyo iyali ili ya solobo kuli nene, i yene nuyibala ili dalali kulwa ngʼwa Kristo. Ali chene, nene nayibala yose ili dalali kulwa nguno ya bugalili wa kumana Kristo Yesu Seba wane, Uyo kuhvakwe nazunya kwilecha mihayo yose, na kuyibala ya mapalala duhu, giki, nampandike Kristo; Hangi nilonge muli Wei, nati na butungilija wane wa ngʼwenekele, ubufumile mu shilagilo, aliyo ubo ubukupandikagwa mu kuzunya ukuli muli Kristo, u butungilija ubufumile kuli Mulungu kulwa kuzunya; Namane Wei, na budula wa bujuko wakwe, na kusangila kwa mu kuluhiwa kwakwe, nikolanijiwe na kucha kwakwe; Giki, ulu yadulika nashike mu bujuko wa mu bafu. Iti giki napandikile, nulu giki, nashikanile, aliyo nakukubilijaga giki, nakayidime iyo kulwa nguno yayo nane naadingʼwa na Kristo Yesu. Badugu, natibalaga ngʼwenekele giki, namala kudima, aliyo nakwitaga mhayo gumo giki, nakwibaga mihayo ya kunuma, nakuyinanamilaga iyili ku butongi, Nakugangilaga nashikile ku ngelelo ya sha kwinhiwa sha kwitanwa kutale kwa Mulungu muli Kristo Yesu. Ali lulu, biswe abo tuli bashikanu tubize na iganiko ilili chene: na ulu mu mhayo gose muli na iganiko lingi, nahene Mulungu akumukundulila nu gwene: Aliyo, umo twagelela, tushiminzilage mu chanda chenicho duhu. Badugu, bizagi balondeji bane, balolagi abakushiminzaga giko gitumo mukutubonaga tuli kalolelo ka kashiminzile. Iki bingi bakushiminzaga, abo nakamuwilaga nghangala ningi, ni haha namuwila nu kulila shisoji giki, a bene banishi ba nsalaba gwa ngʼwa Kristo: Abo nghalilo yabo kuyagala, mulungu wabo nda jabo, ikujo lyabo lili mu minala yabo, bakuyiganikaga ya si. Iki bujigajiga wiswe buli ngʼwigulu, kufuma kwene tunindilile u Mpija Seba Yesu Kristo: Uyo alagalucha mili gwa budohelejiwa wiswe, gwikolanijiwe na mili gwakwe gwa ikujo; gitumo nguzu ijo umo jili, ijo wadula kushilyehya shinhu shose shingʼwigwe. Kulwa iyo badugu bane batogwa na bakumbulwa bane, aba muli kuyega kwane, na ngikili yane ya ikujo, handikilagi giko muli Seba, batogwa bane. Nangʼwikumbilija Euodia, hangi nangʼwikumbilija Suntoke giki, babize na iganiko limo muli Seba. Ali chene, nakwikumbilija nu bebe ntumami ngʼwichane nghana, bagunanage bakima benabo, iki bakakoyela hamo na nene mu evangeli kihamo nu Klementi na batumami bichane bangi, abo mina gabo gali mu kitabo cha bupanga. Yegagi muli Seba gwa, nahaya hangi, Yegagi. Bufula wingʼwe bamanike ku banhu bose. Seba ali hihi. Mutiziganilija mu mhayo gose; aliyo mu buli mhayo mumanyage Mulungu iyo mutogilwe mu kulomba, na kwikumilija na kulumba, Na mhola ya Mulungu iyikilile kwitegeleja kose, ikukingitila ngholo jingʼwe na maganiko gingʼwe muli Kristo Yesu. Ya kumalija, badugu, mihayo yose iyili ya nghana, mihayo yose iyili ya ishima, mihayo yose iyili ya butungilija, mihayo yose iyili miela, mihayo yose iyitogije, na mihayo yose iyili ya lukumo lwa wiza; ulu buli ho bugalili, ulu guli ho mhayo gose gwa kukumilijiwa, idedekanyagi mihayo yeniyi. Mihayo iyo ngʼwali ngʼwilanga, na kuyanukula, na kuyigwa, na kuyibona kuli nene, iyitagi yeniyo; na Mulungu wa mhola akubiza hamo ningʼwe. Aliyo nali nuyega no muli Seba iki kwiganika kwingʼwe kuli nene kwajukaga hangi, hene ngʼwali ngʼunizukwa aliyo ngʼwali muti na ngʼwanya. Iti giki, ndihaya kulwa kugayiwa: iki nimaniligije kwigelwa na isho ndi nasho. Namanile kudohelwa, namanile hangi nu kukwililwa; mu chikalile chose na mu mihayo yose naalangwa kwiguta nu kutuba, hangi kukwililwa nu kugehelwa. Nene nadula kwita yose muli Kristo Uyo akuniguzuhaja. Aliyo ngʼwali ngʼwita chiza no kusangila mu kuluhiwa kwane. Bingʼwe Bafilipi mumanile ningʼwe giki, mu kwandia kwa evangeli aho nali ninga Makedonia, yali iti ho kanisa yingi iyali yusangila na nene mu mhayo gwa kufunya na kwanukula, aliyo bingʼwe bike; Iki nu mu Thesalonika, nu kwene ngʼwali ngʼunitumila hangi na hangi kulwa kugayiwa kwane. Iti giki, ndikoba cha kwinhiwa, aliyo nakoba matwajo gongeje kubalilwa ha lwande lwingʼwe. Aliyo nene ndi nasho sha kutugela na kutinda hoi: nokaiile, naanukula kuli Epafrodito isho shali shufuma ku bingʼwe, shili ngʼwaso gwa kunungha chiza, na kitambo chazunilijiwa, cha kunyeja Mulungu. Na Mulungu wane akungʼwinha bingʼwe buli kugayiwa kwingʼwe kose gitumo busabi wakwe ngʼwikujo umo buli muli Kristo Yesu. Hambunyu kuli Mulungu Siswe libize ikujo welelo na welelo. Amina. Kigisije Nigisijagi ku buli ngʼwela muli Kristo Yesu. Badugu abali hamo na nene bamugisha. Bela bose bamugisha, aliyo kutinda no ba ngʼwikulu lya ngʼwa Kaisari. Kigongo cha Seba wiswe Yesu Kristo kibize hamo na mioyo yingʼwe. Amina. Paulo, ntungʼwa wa ngʼwa Yesu Kristo kulwa iyo Mulungu atogilwe, na Timoteo ndugu wiswe, Ku bela na badugu bishigwa muli Kristo abali mu Kolose: kigongo kibize ku bingʼwe na mhola ishufuma kuli Mulungu Siswe. Twanumba Mulungu Ise wa Seba wiswe Yesu Kristo, tukumulombelaga gwa. Iki twigwile nghulu ja kuzunya kwingʼwe muli Kristo Yesu na butogwa ubo muli nabo ku bela bose, Kulwa nguno ya kwisagilwa uko ngʼwaabikilwa ngʼwigulu, uko nghulu jako ngʼwali ngʼwandia kwigwa mu mhayo gwa nghana gwa evangeli; Iyashikile ku bingʼwe, gitumo yashikile numu si jose; ikutwajaga matwajo na kwiyongeja, gitumo ikwitaga nu mu bingʼwe kufuma lwise lwene aho ngʼuchigwa na ngʼukimana kigongo cha Mulungu mu nghana; Gitumo ngʼulangwa na Epafra u ntumami ngʼwichiswe ntogwa, uyo ali ngʼwinhilija ngʼwishigwa wa ngʼwa Kristo kulwingʼwe. Nanghwe akatusombolela butogwa wingʼwe wa mu Moyo Ngʼwela. Kulwa nguno iyo na biswe, kufuma lushiku ulo aho twali twigwa mihayo iyi, tutuleka kumulombela na kulomba kulwingʼwe giki, ngʼwizujiwe na bumani wa iyo atogilwe Wei mu masala gose ga ki-moyo na mu kwitegeleja kose. Mushiminze gitumo igelelilwe kuli Seba, munyeje mu yose, mutwaje matwajo mu buli nimo gose gwa wiza, ngʼongeje mu kumana Mulungu; Muguzuhiwe na budula bose, gitumo budula wa ikujo lyakwe umo buli giki, mubize mu kugoyela kose na kwiyumilija kose na buyegi; Munumbe Siswe Uyo waatubeja tubize abigelile kwanukula ngabo gwa wingiji wa bela ngʼwisana; Uyo waatupija twinge mu budula wa giiti, na utusamya na utwingija mu butemi wa Ngʼwana wakwe wa butogwa: Uyo muli Wei tuli na kukomolwa kwiswe, kwene kukuuliiwa kwa shibi shiswe. Uyo ngʼwene ali suso ya Mulungu Uyo atabonagwa, ali ngʼwana tangi wa shisengʼwa shose; Iki muli Wei shinhu shose shusengʼwa, ishili ngʼwigulu ni ishili mu si, shinhu ishabonwa ni ishitubonwa, nulu gali mabutemi, nulu mabusugi, nulu mabutale, nulu mabudula; shinhu shose shaasengʼwa nanghwe, na hangi kulwakwe; Nanghwe walali ho aho shinhu shose shali shiti ho, na muli Wei shinhu shose shidimanigije. Nanghwe ali ntwe gwa mili, gwene Eklezia: Uyo ali wandijo, myalwa wa kwandia wa kufuma mu bafu, giki, mu mihayo yose Wei abize ntale: Iki inyegije Ise giki, kokala kose kwikale mo muli Wei: Na muli Wei kushisangija shinhu shose shibize busangi nanghwe, iki wamala kubeja mhola kulwa mininga ga nsalaba gwakwe; muli Wei nulu shinhu ishili mu si, nulu ishili ngʼwigulu. Na bingʼwe aba mu shiku ja kale ngʼwali ngʼukomanyiwa na ngʼwali muli banishi mu kiganikile kingʼwe kuhva Shitwa shingʼwe sha bubi, Aliyo haha waamusangija mu mili gwakwe gwa kimunhu kulwa kucha, giki, angʼwenhe ko ku butongi wakwe muli bela na abati na kilingo nulu mhayo gwa kudonholwa: Ulu ngʼushinga mu kuzunya, ngʼuzengelwa ha itale na ngʼuma kulu, na mutuhumbulwa kwinga mu kwisagija kwa evangeli iyo ngʼuyigwa, iyulomelwa ku shisengʼwa shose ishili hasilili ya igulu; iyo nene Paulo nutuulwa kubiza ngʼwinhilija wayo. Uyo nene haha nakukuyegelaga kuluhiwa kwane kulwa nguno yingʼwe, nashikilije mu mili gwane iyishigilile ya kuluhiwa kwa ngʼwa Kristo kulwa nguno ya mili gwakwe, gwene Eklezia; Iyo nutuulwa kubiza ngʼwinhilija wayo gitumo kali kalongeje ka Mulungu aka ninhiwa kulwa nguno yingʼwe, kutangʼanhya mhayo gwa Mulungu, U gwene gwa kwigeniha ugwali gubiswa kufuma makanza ga kale na ga shibyalilwe: aliyo haha gwaakundulwa ku bela bakwe; Abo Mulungu yuntoga kubamanikija busabi wa ikujo lya kwigeniha uku mu bana mahanga gitumo kuli, kwene giki, Kristo mu bingʼwe, kwisagilwa kwa ikujo: Uyo tukulomelaga yakwe tunghugula buli munhu, na kunanga buli munhu mu masala gose giki, tungʼwenhe buli munhu ashikanile muli Kristo Yesu: Nakoyakoya milimo kulwa nguno yeniyi, nigwiyambija gitumo kali kitile kakwe, ako akitaga muli nene na nguzu. Iki natogilwe mumane kwigwiyambija kutale uko ndi nako kulwingʼwe na kulwabo ba mu Laodikia, na kulwabo bose abatinanibona bushu wane mu mili; Giki, ngholo jabo jilungujiwe, balunganyiwe mu butogwa, na bashike mu busabi bose wa kokala kwa kwitegeleja, bakumane gete kwigeniha kwa Mulungu, kwene Kristo; Uyo muli Wei bubiki bose wa masala na wa bumani bubisile. Nahaya giki, munhu ose atizumulembalemba na mihayo ya bukongakongi. Iki nulu nati ko mu mili, aliyo ndi hamo ningʼwe mu moyo, nakuyegaga na kububona widomanija wingʼwe, na buhandikiji wa kuzunya kwingʼwe muli Kristo. Kulwa iyo gitumo ngʼwaangʼwanukula Kristo Yesu Seba, shiminzagi giko muli Wei, Mukomile miji na ngʼwazengwa muli Wei, mujamiwe mu kuzunya, gitumo ngʼulangwa, kulumba kongeje kukwila. Ilanghanagi, munhu ose atizumugwasha na busimbi wa masala, na bulembalembi wa dalali, nulu gitumo iyalekwa hakulu umo ili, na gitumo malange ga si umo gali, aliyo iti gitumo kalangile ka ngʼwa Kristo umo kali. Iki muli Wei buzengile mo bushikanu bose wa Bumulungu mu mili. Na bingʼwe ngʼwashikanile muli Wei, Uyo ali ntwe gwa busugi bose na budula bose. Muli Wei mukasalwa na kasalilwe akatitwa na makono, kene kuguzula mili gwa shibi sha kimili mu kusatwa kwa ngʼwa Kristo; Mukajikwa hamo nanghwe mu kubatijiwa, muko ngʼwaajuchiwa hamo nanghwe kulwa kukazunya kitile ka Mulungu Uyo waanjucha mu bafu. Na bingʼwe aba ngʼwali muchile kulwa bukenaguji wingʼwe na butusalwa wa ki-mili chingʼwe, ungʼwita bingʼwe kubiza bapanga kihamo nanghwe, aho umukuulilwa bukenaguji wingʼwe; Iki wamala bujimya i chandikile ichali chandikwa kutubula, ichali kili wanishi ku biswe: i chene uchinja na ukikoma ha nsalaba; Ugatagija mabusugi na mabudula shilanga shago, ugatenda hape, ugapyena mu nzila ya nsalaba. Kulwa iyo munhu ose aleke kumulekanya mu mihayo ya sha kulya na sha kungʼwa, nulu mu mihayo ya lushiku lutale nulu ya bafumile ka ngʼweji, nulu ya lushiku lwa Sabato: Mihayo iyo yene nengeji gwa yeniyo iyali yuhayiwa giki, iliza; aliyo mili gwene gwa ngʼwa Kristo. Munhu ose atizumutagija mhela yingʼwe kulwa kidohelegeje kakwe ka ngʼwenekele, na kulamya bamalaika, na kwigungunika mu iyo atinibona, na kudosela dalali mu kigambile kakwe ka ki-mili. Atudimana na Ntwe, Uyo mugo mili gose gulishiwa na gulunganigijiwa hamo mu malungilo na matimba gago, gukula nghulile ya kufuma kuli Mulungu. Kulwa iyo ulu ngʼwamala kucha hamo na Kristo ku malange ga si, ni buli mukushilyehelaga shilagilo giti muli bazengi ba mu si giki, Mutizudima iki, nulu mutizuloja ishi, nulu mutizukuumya aya. (Shinhu isho shose shikukenaguka aho shutumamilwa) ngʼulondela shilagilo na malange ga ki-munhu? Mihayo yeniyi hene yalolwa ili ya wenge mu kalamije ako ngʼwibegeja benekele na mu widoheleja, na mu kwigumanija kwa mili; aliyo yeniyo yose ili dalali, nulu itudula kugulemeja mili. Nahene, ulu ngʼwaajuchiwa hamo na Kristo, ikobagi iyili higulya, uko Kristo igashije ku nkono gwa bulyo gwa Mulungu. Kumbulagi iyili higulya, iti ya mu si. Iki ngʼwaacha, na bupanga wingʼwe bubisilwe hamo na Kristo muli Mulungu. Kristo Uyo ali bupanga wiswe, aho alilongaga, huna lulu na bingʼwe mulilonga hamo nanghwe ngʼwikujo. Kulwa iyo, gabulagagi mabudika gingʼwe agali mu si: bujingi, busoso, kwikumva kwa minala, kwigonga kwa bubi, na kwikumva kwa shikolo, u kw ene kulamya kwa shikolile; Kulwa nguno ya yeniyi bupelanu wa Mulungu bubashikila bana ba bukitigwa: Mu yeniyo nu bingʼwe mukashiminzila mo kale, aho ngʼwali ngʼwikala mu yeniyo; Aliyo haha iponyagi iyi yose: budaki, bupelanu, kitima, buduki na widuki wa mu milomo yingʼwe: Mutiwilage bulomolomo; ikingʼwaanzula munhu wa kale kihamo na Shitwa shakwe, Ngʼwaanzwala munhu mpya uyo akudoganyiwagwa mpya kushika mu kwitegeleja mu chikolile cha Ngʼwenuyo uwaansema: Umo ati ho Ngriki nulu Nyudaya, kuti ho kusalwa nulu butusalwa, ati ho nshoma nulu Munasitiani, ati ho nsese nulu ngʼwana wa banhu, aliyo Kristo ali yose, hangi ali mu bose. Kulwa iyo iki muli bakongʼwa ba Mulungu, bela na batogwa, zwalagi ngholo ya kuchila kigongo, wizangholo, bulyehu, bufula, wiyumilija; Ngʼwichilage kigongo, ngʼwikuulilwe benekele na benekele ulu munhu ali na nhungi kuli ngʼwiye; gitumo Kristo waamukuulilwa bingʼwe, itagi ningʼwe giko: Na higulya ya yeniyi yose zwalagi butogwa, hu wene itungijo lya bushikanu. Na mhola ya Mulungu leka isuge mu ngholo jingʼwe, i yene ngʼwitanilwa mu mili gumo; hangi bizagi na kulumba. Mhayo gw a ngʼwa Kristo gwikale mu bingʼwe gukwile mu masala gose; ilangagi na iganikilagi benekele na benekele na zaburi na kwimba na mimbo ga ki-moyo, ngʼwimbilagi Seba na kigongo mu ngholo jingʼwe. Na yose yose iyo mukwitaga mu kalungalungile nulu mu kitile, itagi yose mu lina lya Seba Yesu, ngʼunumba Mulungu Siswe muli Wei. Bingʼwe bashike, balyehelagi bagoshi bingʼwe gitumo shigelile muli Seba. Bingʼwe bagosha, batogagwi bake bingʼwe, mutabadakilage. Bingʼwe bana, bigwagi babyaji bingʼwe mu mihayo yose, iki u gwene guntogije Seba. Bingʼwe basabo, mutizubikomya bana bingʼwe, batizugwa ngholo. Bingʼwe basese, bigwagi basingʼwe bugonzo ba ipande lya mili mu mihayo yose; iti kulwa kubonwa na banhu, giti bayeja ba banhu, aliyo mu wishigwa wa ngholo, mungʼogohile Mulungu: Yose iyo mukwitaga, itagi mu kutimbya kwa ngholo, iti ku banhu aliyo kuli Seba; Iki mumanile giki, kufuma kuli Seba mulinhiwa mhela ya wingiji: iki mukuntumamilaga Seba Kristo. Iki uyo akwitaga bubi, ngʼwene alashokejiwa kulwa bubi ubo witile; kuduhu sololo. Bingʼwe baseba, binhagi basese bingʼwe iyili ya butungilija na ya kulenganila; iki mumanile na bingʼwe ningʼwe muli na Seba ngʼwigulu. Komelagi mu kulomba, ngʼwikale miso mo hamo na kulumba; Tulombelagi nu biswe, Mulungu atulugulile nyango gwa kutemela mhayo, kuyihaya ya kwigeniha ya ngʼwa Kristo, iyo kulwa nguno yayo ndi mu butungwa; Niyoleche hape gitumo shinigelile kuhaya. Shiminzagi kisala mu butongi wabo abali hanze, mubizukomola makanza. Kalungalungile kingʼwe kabize ka kigongo gwa, kalunge na munu, mumane umo igelile kunshokeja buli munhu. Mihayo yane yose gitumo ili akungʼwitegeleja Tukiko u ndugu ntogwa, na ntumami ngʼwishigwa na ntumami ngʼwichane muli Seba: Uyo nantumaga ku bingʼwe kulwa nguno yeniyo duhu giki, amane mhola yingʼwe, hangi amutimbye ngholo jingʼwe; Nuntuma kihamo na Onesimo ndugu ngʼwishigwa na ntogwa, uyo ali munhu wa ku bingʼwe. Benabo bakumumanikija mihayo yose ya kunu. Aristarko, ntungwa ngʼwichane, wamugisha, na Marko, u ngʼwipfa wa ngʼwa Barnabas (uyo ngʼwamala kulagilwa ya kungʼwitila; ulu alashika ku bingʼwe, ngʼwegelejagi), Na Yesu, uyo witanwa Yusto, abali ba mu basalwa. Bene bike hali batumami bichane mu nimo gwa butemi wa Mulungu, aba banilungugije. Epafra, uyo ali munhu wa ku bingʼwe, nsese wa ngʼwa Kristo Yesu, wamugisha, akujangilaga kulwingʼwe gwa mu kulomba kwakwe giki, muhandikile, mushikane mu iyo yose Mulungu atogilwe. Iki nankanila giki, ali na bukalalwa butale kulwingʼwe, na kulwabo abali mu Laodikia, na kulwabo abali mu Hierapoli. Luka, u mfumu ntogwa, na Dema, bamugisha. Bagishagi badugu abali mu Laodikia, na Numfa, na kanisa iyili mu numba yakwe. Nyaluba iyi ulu yamala kusongʼwa ku bingʼwe, huna isongʼwe nu mu kanisa ya Laodikia; na bingʼwe isomagi nyaluba ya Laodikia. Ngʼwilagi Arkipo giki, Kulanghanage kwinhilija uko winhiwa muli Seba akushikilije. Kugisha kwane nene Paulo na nkono gwane ngʼwenekele. Wizukagwi butungwa wane. Kigongo kibize hamo na bingʼwe. Amina. Paulo, na Silvano, na Timoteo, ku kanisa ya Bathesalonika iyili muli Mulungu Siswe na Seba Yesu Kristo: kigongo kibize ku bingʼwe na mhola. Tukunumbaga Mulungu gwa kulwa bingʼwe bose, tukumuhayaga mu kulomba kwiswe; Tutukijaga kugwizukwa nimo gwingʼwe gwa kuzunya, na kutumama kwingʼwe kwa butogwa, na wiyumilija wingʼwe wa kwisagilwa muli Seba wiswe Yesu Kristo, mu miso ga Mulungu na Siswe; Iki tumanile, a badugu batogwa ba Mulungu, kusolwa kwingʼwe, Iki evangeli yiswe yali itumupandika mu kuhaya gwike, aliyo na mu budula, na mu Moyo Ngʼwela, na mu kusanya kwingi; gitumo mumanile umo twali mu bingʼwe kuhva nguno yingʼwe. Ningʼwe mukabiza balondeji biswe na ba Seba, iki ngʼwaanukula mhayo mu kuluhiwa kwingi, kihamo na buyegi wa mu Moyo Ngʼwela; Giko mukabiza chilolelo ku bazunya bose ba mu Makedonia na mu Akaya: Iki kufuma ku bingʼwe mhayo gwa Mulungu gubyukumuka, iti mu Makedonia gwike na mu Akaya, aliyo na mu buli ipande, kuzunya kwingʼwe uko muli nako kuli Mulungu kwatangʼanhile; giko tuti na nimo kuhaya mhayo hangi. Iki boi benekele bakukumuchaga nghulu jiswe, gitumo kwali kubiza kwingila kwiswe ku bingʼwe; na gitumo ngʼungalukila Mulungu, kwinga ku shikolile sha kulamiwa giki, muntumamile Mulungu mpanga na wa nghana; Na kunindila Ngʼwana wakwe kufuma ngʼwigulu, Uyo waanjucha mu bafu, ngʼwene Yesu Uyo waatupija mu bupelanu ubuliza. Iki bingʼwe benekele, badugu, mukumanile kwingila kwiswe ku bingʼwe giki, kwali kutubiza kwa dalali: Aliyo aho twali twamala kunyajanyajiwa kwandia na kwilambagulilwa mu Filipi, gitumo mumanile, nahene twali na bugimu muli Mulungu wiswe kuyihaya evangeli ya Mulungu ku bingʼwe mu kwilwilila kwingi. Iki buganikiji wiswe buti wa kijimija, nulu wa busoso, nulu wa nyasalasala: Aliyo gitumo twali tubona kuzunilijiwa na Mulungu kubiza basanyiwa kuyitumamila evangeli, i chene tukuhayaga; iti giki, tuli bayeja ba banhu aliyo ba Mulungu Uyo akujigemaga ngholo jiswe. Iki twali tutinatumamila mihayo ya kugimbilija na kamo yaya, gitumo mumanile, nulu ya ikundikijo lya kwikumva shikolo: Mulungu ali nkaniji; Nulu twali tutukoba ikujo ku banhu, nulu ku bingʼwe nulu ku bangi yaya, aho twali twabiza na budula kumuhehenaja giti batungʼwa ba ngʼwa Kristo. Aliyo twali tubiza bafula ku bingʼwe, gitumo neji akubatogagwa na akubalindaga bana bakwe: Giko hangi, iki twali twamukumbula na butogwa no, tuyejiwa no kungʼwinha, iti evangeli ya Mulungu gwike, aliyo hangi na bupanga wiswe pye, iki bingʼwe ngʼwaabiza batogwa ku biswe. Iki bingʼwe badugu, mukwizukagwa kutumama kwiswe kwa bunoge na makoye: iki twali tutumama milimo limi na bujiku, giki, tutizunubyalubya munhu ose mu bingʼwe, giko twali tumulomela evangeli ya Mulungu. Bingʼwe muli bakaniji nu Mulungu nu Ngʼwene, gitumo twali tushiminza mu bingʼwe abazunya, mu wela na mu butungilija na mu kikalile akati na kilingo; Gitumo mumanile umo tunganikila buli munhu ose ku bingʼwe gitumo sabo akuganikilaga bana bakwe, na kumutimbya ngholo, na kumukanila; Giki, mushiminze gitumo shingʼwigelelilwe kuli Mulungu, Uyo waangʼwitana kwingila mu butemi wakwe na ngʼwikujo lyakwe. Kulwa nguno iyi hangi, tukunumbaga Mulungu gwa, iki aho ngʼugwanukula mhayo gwa Mulungu uyo ngʼugwigwa ku biswe, ngʼwali mutugwanukula giti mhayo gwa banhu, aliyo gitumo nghana guli, mhayo gwa Mulungu, ugukwitaga mu bingʼwe abazunya. Iki bingʼwe badugu, ngʼwaabiza balondeji ba kanisa ja Mulungu ijili mu Buyudaya muli Kristo Yesu: iki ningʼwe ngʼwali ngʼuluhiwa na banhu ba ihanga lyingʼwe gitumo boi bali buluhiwa na Bayudaya; Abo bali bumulaga Seba Yesu, na bahangi, na butuyunjayunja biswe, batanyejaga Mulungu, hangi bati na busangi na banhu bose; Butulemeja kubatambulila bana mahanga bapijiwe; bokalilija shibi shabo gwa; aliyo nu bupelanu washikile kubo kushisha kokala pa. Aliyo biswe, badugu, aho twaalekana na bingʼwe ikanza ido mu mili, aliyo iti mu ngholo, twali tujangila na nghumbu nhale kumubona bushu wingʼwe; Kulwa iyo twali tutogilwe kwiza ku bingʼwe, u nene Paulo, iti kamo nulu kabili yaya, aliyo Shetani utuhangija. Iki kwisagilwa kwiswe, nulu buyegi, nulu ngikili ya kwikumilija kwiswe ni ki? Iti bingʼwe mu miso ga Seba wiswe Yesu aho aliza? Iki bingʼwe muli ikujo lyiswe na buyegi wiswe. Kulwa iyo aho twali tutudula kwiyumilija kutinda, tubona ili ya wiza kulekwa mu Athene twiyene; Tuntuma Timoteo ndugu wiswe na ntumami wa Mulungu mu evangeli ya ngʼwa Kristo, kumulambya na kumulunguja mu kuzunya kwingʼwe; Munhu ose atizuyanganyiwa na kuluhiwa uku; iki bingʼwe benekele mumanile giki, twitegwa yeniyi. Iki aho twali tuli ku bingʼwe, twali twandia kumuwila giki, tukubona kuluhaluhiwa gitumo nghana yali yubiza chene, ningʼwe mumanile. Kulwa iyo nene aho nali natudula kwiyumilija hangi, nutuma namane kuzunya kwingʼwe ulu hamo ngemi waamala kumugema mu mhayo gose na milimo yiswe yubiza dalali. Aliyo haha Timoteo washikile ku biswe kufuma ku bingʼwe na utwenhela nghulu ja wiza ja kuzunya kwingʼwe, na butogwa wingʼwe, na hangi giki, mukutwizukagwa gwa, mukukumbulaga kwibona na biswe, gitumo niswe tukumukumbulilaga kwibona ningʼwe; Kulwa iyo, badugu, tulungujiwa kulwingʼwe ngʼwilundu lyiswe lyose na kuluhiwa kwiswe kose kuhva kuzunya kwingʼwe; Ali haha lulu tutikala bapanga, ulu bingʼwe ngʼuhandikila muli Seba. Iki kulumba ki twadula kungʼwinha Mulungu kulwa bingʼwe, kulwa buyegi bose ubo tulibuyegela kulwa nguno yingʼwe mu butongi wa Mulungu wiswe; Tukulombaga no no no limi na bujiku, twibone bushu ku bushu, na kumushikanya mu iyo ngʼwagehelwa mu kuzunya kwingʼwe? Hambunyu Mulungu wiswe na Siswe ngʼwenekele, na Seba wiswe Yesu, atutonge nzila yiswe kushika ku bingʼwe: Na Seba angʼongeje hangi amukwigije kwitogwa benekele na benekele, na ku banhu bose, gitumo na biswe tukwitaga ku bingʼwe; Amuhandikije ngholo jingʼwe, jibize jiti na kilingo mu wela mu butongi wa Mulungu Siswe, ngʼwikanza lya kwiza kwa Seba wiswe Yesu kihamo na bela bakwe bose. Na hangi ya kumalija, badugu, twangʼwikumbilija na kumuganikila muli Seba Yesu giki, gitumo ngʼwiinhiwa na biswe umo shingʼwigelile kushiminza na kunyeja Mulungu, shiminzagi giko, mukwije no. Iki mumanile shilagilo isho twaangʼwinha muli Seba Yesu. Iki iyo Mulungu atogilwe yene iyi giki, kwejiwa kwingʼwe, muwihungage bujingi: Buli munhu mu bingʼwe amane kugulinda mili gwakwe mu wela na ngʼwikujo, Iti mu nghumbu ya kwikumva, giti bana mahanga abatamanile Mulungu; Munhu atizunghunga nduguye nulu kungʼwitila kibi mu mhayo gwenuyu: iki Seba ali nghwimi wa njigu mu mihayo yeniyi yose, gitumo hangi twali twandia kumuwila na kumubugula. Iki Mulungu atatwitanilile mu busoso aliyo ku wela. Kulwa iyo uyo akulemaga, atunemaga munhu aliyo akunemaga Mulungu, Uyo waangʼwinha bingʼwe Moyo Ngʼwela wakwe. Hangi i mihayo ya kubatogwa badugu, muti na nguno nangʼwandikile: iki bingʼwe benekele ngʼwalangwa na Mulungu kwitogwa. Iki nghana mhayo gwenuyu mukubitilaga badugu bose abali mu Makedonia yose. Aliyo twangʼwikumbilija, badugu, ngʼongeje no; Hangi komelagi no kulembela, na kwita milimo yingʼwe, na kutumama milimo na makono gingʼwe benekele, gitumo twali twamulagila; Giki, mushiminze mu butengeke mu butongi wabo abali hanze, mubize muti na kugayiwa kose. Aliyo badugu, tutatogilwe bingʼwe kwikala mutamanile mihayo ya benabo abalalaga; mutizita ilundu gitumo bali abati na kwisagilwa. Iki ulu tuzunya giki, Yesu akacha na hangi ujuka, giko hangi na benabo abalalaga muli Yesu, Mulungu alabenha hamo nanghwe. Iki twamuwila yeniyi kulwa mhayo gwa Seba giki, biswe abo tuli bapanga, abo tulasagila kushisha kwiza kwa Seba tutalabatanga abo bamala kulala. Iki Seba ngʼwenekele alika kufuma ngʼwigulu na kuhamuka kutale, na ilaka lya malaika ntale, na ipembe lya Mulungu: nabo abali bachila muli Kristo balajuka tange; Hunaho biswe aba tuli bapanga, abo twasagila, tulahwehulwa kutwalwa kihamo nabo mu malunde kulumana na Seba higulya: na giko tulabiza hamo na Seba welelo na welelo. Kulwa iyo ilungujagi benekele na benekele na mihayo iyi. Aliyo mihayo ya makanza na shiku, badugu, muti na nguno nangʼwandikile. Iki bingʼwe benekele mumanile nghana giki, lushiku lwa Seba lukwizaga giti ngʼwibi mu bujiku. Iki aho bakuhayaga giki, Mhola na kaholele, ngʼwikanza lyene buyagajiwa bukubifumbukija, giti kulungʼwa busungu kwiza kuli nkima ali nda; nabo batalapuluguka. Aliyo bingʼwe badugu, muti mu giiti, lushiku lwenulo lumufumbukije giti ngʼwibi. Iki bingʼwe bose muli bana ba isana na bana ba limi; tuti ba bujiku nulu ba giiti; Huna lulu tutizulala giti bangi, aliyo twikale miso na ba masala madekanu. Iki a balaji bakalalaga bujiku; na bakolwa walwa bakakolagwa bujiku. Aliyo biswe abo tuli ba limi, tubize ba masala madekanu, tuzwale lumuda lwa mu kikuba lwa kuzunya na butogwa; na ngofila yiswe ya chuma ibize kwisagilwa kwa bupiji. Iki Mulungu atatwitegile tushike mu bupelanu, aliyo tupandike bupiji kulwa Seba wiswe Yesu Kristo. Uyo waatuchilila biswe giki, nulu tuli miso, nulu tulalile, nahene, tubize bapanga hamo nanghwe. Kulwa iyo ikomelejagi benekele na benekele na ngʼwizenje gitumo mukwitaga. Aliyo badugu, tutogilwe mubamane abo abakukoyakoyaga kulwa nguno yingʼwe, na abakumusugaga muli Seba, na bakumuganikilaga; Mubinhe ishima no mu butogwa kulwa nguno ya milimo yabo. Ikalagi na mhola benekele na benekele. Hangi badugu, twamukomeleja baganikilagi abali buyagabuyaga, batimbyagi ngholo a bagwa ngholo, badimyagi a bagokolo, iyumilijagi na banhu bose. Ilanghanagi, munhu ose atizumalila igudi ngʼwiye; aliyo shiku jose kobagi kwiyitila benekele na benekele Shitwa sha wiza, na ku banhu bose. Yegagi gwa; Lombagi gwa gwa gwa; Mu buli mhayo lumbagi: iki hu yene Mulungu atogelilwe muli Kristo Yesu ku bingʼwe. Mutizunjimya Moyo Ngʼwela; Mutizudalaha mihayo ya buhangi; Igemagi mihayo yose; dimagi ya wiza; Ihungagi mu buli mhayo gose gwa bubi. Na Mulungu wa mhola ngʼwenekele angʼweje nghana nghana; mioyo yingʼwe na ngholo na mibili shibaladwe mu bushikanu, shiti na kilingo ngʼwikanza lya kwiza kwakwe Seba wiswe Yesu Kristo. Wei ali ngʼwishigwa Uyo waangʼwitana, nanghwe akugwita. Badugu, mutulombele. Bagishagi badugu bose na kubipa kwela. Namulahilila kuli Seba giki, nyaluba iyi isongʼwe ku badugu bose. Kigongo cha Seba wiswe Yesu Kristo kibize hamo ningʼwe. Amina. Paulo, na Silvano, na Timoteo, ku kanisa ya Bathesalonika iyili muli Mulungu Siswe na Seba Yesu Kristo; Kigongo kibize ku bingʼwe na mhola ishufuma kuli Mulungu Siswe na Seba Yesu Kristo. Tuli na nimo kunumba Mulungu gwa kulwa nguno vingʼwe, badugu, gitumo igelile, iki kuzunya kwingʼwe kukwiyongejaga no, na butogwa wa buli munhu kuli ngʼwiye wakwilile no mu bingʼwe: Kushisha biswe benekele tukwikumilijaga mu kanisa ja Mulungu, kulwa nguno ya kwiyumilija kwingʼwe na kuzunya uko muli nako mu kunyajanyajiwa kwingʼwe na kuluhaluhiwa uko muliyumilija mo; I chene kimanikijo cha giki, kulekanya kwa Mulungu kwene kwa butungilija; giki, mubalwe abawigelelilwe butemi wa Mulungu, ubo ngʼwaluhijiwa kulwabo: Iki gwene mhayo gwa butungilija kuli Mulungu kubamalila igudi abo abamuluhyaluhya bingʼwe; Na kungʼwinha bingʼwe abaluhaluhiwa kwifula hamo na biswe, mu ngelo ya kukundulwa kwakwe Seba Yesu kufuma ngʼwigulu, kihamo na bamalaika ba budula wakwe, Mu ndali ja moto, kubahwima njigu abo abatamanile Mulungu, nabo abatigwaga evangeli ya Seba wiswe Yesu Kristo: Balaluhaluhiwa nsango gwa kuyagala welelo na welelo kukomanyiwa kwinga mu miso ga Seba, na ngʼwikujo lva budula wakwe; Aho aliza kukujiwa mu bela bakwe, na kukumiligijiwa mu bazunya bose mu lushiku lwenulo (iki bukaniji wiswe ku bingʼwe waazunyiwa). Kulwa iyo tukumulombelaga gwa giki, Mulungu wiswe amubale kubiza muwigelelilwe witanwa wingʼwe, abushikilije buli wiza ubukalalilwe, na buli nimo gose gwa kuzunya na budula: Lina lya Seba wiswe Yesu likujiwe mu bingʼwe, na bingʼwe hangi muli Wei, gitumo kigongo cha Mulungu wiswe na Seba Yesu Kristo umo kili. Ali badugu, mihayo ya kwiza kwakwe Seba wiswe Yesu Kristo na kikumingile kiswe kuli Wei, twangʼwikumbilija giki, Mutizulelengetiwa wangu mukaleke kasanije kingʼwe, nulu kwibakijiwa nulu na moyo, nulu na mhayo, nulu na nyaluba giti yafumaga ku biswe ya kuhaya giki, lushiku lwa Seba lwashikaga lulu; Munhu ose atizumulembalemba nulu mu nzila yose: iki lushiku lwenulo lutiza, ulu butandije kubiza ho tame bugomi; na munhu ngʼwenuyo wa shibi atendwe ali ngʼwana wa buyagaji, Uyo uhangija na wigunguhya kushubukila shose ishikitanagwa Mulungu, nulu isho shikalamiwagwa kushisha nose wigasha mu hekalu ya Mulungu na wiyolecha ngʼwenekele giki, wei ali Mulungu. Angu mutizukagwa giki, aho nali natali hamo ningʼwe, nakamuwila mihayo yeniyi? Na haha mugumanile uyo ugukunghangijaga kushisha akundulwe mu ngelo yakwe. Iki ya kwigeniha ya bugomi ikwitaga, aliyo ali ho umo Uyo akuhangijaga i haha, kushisha aho alinjiwagwa ho. Hunaho lulu aligengeleka ngomi, uyo Seba Yesu alamulagila na miuyi ya nomo gwakwe, na kunyagaja mu kolechiwa kwa kwiza kwakwe; Uyo u ngʼwene, kwigengeleka kwakwe kutumainiwa na Shetani mu nguzu jose na mabulolelo na shamahano sha bulomolomo, Na mu kulembalemba kose kwa buti butungilija ku benabo abakuyagalaga; kulwa nguno iyi bali batuzunya kuyitogwa i nghana babone kupijiwa. Na kulwa nguno iyo, Mulungu ubatumila kahuganile ka nguzu, babuzunye bulomolomo: Giki, balekanyiwe nsango bose abanzunije i nghana, aliyo bali biyeja mu buti butungilija. Aliyo tuli na nimo kunumba Mulungu gwa kulwingʼwe, badugu batogwa ba Seba, iki Mulungu waamukoma kufuma kwandia kushika mu bupiji, mu kwejiwa kwa Moyo, na kuyizunya i nghana: U wene wangʼwitanila mu evangeli yiswe giki, mupanaike ikujo lya Seba wiswe Yesu Kristo. Kuhva iyo, badugu, handikilagi, mugadime malange ayo ngʼulangwa, nulu mu nomo nulu na nyaluba yiswe. Na Seba wiswe Yesu Kristo ngʼwenekele, na Mulungu Siswe Uyo waatutogwa na utwinha kulungujiwa ukutushila na kwisagilwa kwa wiza mu kigongo, Amulunguje ngholo jingʼwe na amuhandikije mu buli kitile kose ka wiza na mu buli mhayo. Ya kumalija, badugu, tulombelagi, mhayo gwa Seba gusambale wangu na kukujiwa gitumo gukukujiwagwa nu ku bingʼwe; Na hangi giki, tupijiwe mu banhu abali buyagabuyaga na ba bubi; iki iti bose bali na kuzunya, Aliyo Seba ali ngʼwishigwa, Uyo akumulambya na kumukingitila muli ngʼwenuyo u mi. Niswe tulinsanya Seba kulwingʼwe giki, mukwiyitaga iyo twaamulagila na hangi muliyita. Seba amutongele ngholo jingʼwe mu butogwa wa Mulungu, na mu kwiyumilija kwa ngʼwa Kristo. Aliyo twamulagila, badugu, mu lina lya Seba wiswe Yesu Kristo giki, ngʼwikomanye na buli ndugu ose uyo akushiminzaga buyagabuyaga, uyo atulondelaga kulanga uko ngʼwaanukula ku biswe; Iki bingʼwe benekele mumanile gitumo shingʼwigelile kutulondela; iki biswe twali tutikala buyagabuyaga mu bingʼwe, Nulu kulya twali tutable shiliwa sha munhu ose dalali, aliyo mu mamilimo na mu makoye limi na bujiku twali tutumama milimo, tutizunubyalubya munhu ose mu bingʼwe: Iti giki, tuti na budula, aliyo kulwa kwiyita benekele kubiza chilolelo ku bingʼwe giki, mutulondele. Iki nulu aho twali tuli ku bingʼwe tumulagila mhayo uyu giki, Ulu munhu atatogilwe kutumama milimo, nahene aleke nu kulya. Iki twigwile giki, bali ko banhu ku bingʼwe abali buyagabuyaga, batatumamaga milimo, aliyo bali bishatya. Ali lulu abali giko twabalagila na kubahugula muli Seba wiswe Yesu Kristo giki, butumame milimo yabo mu bulendu, babyulya shiliwa shabo benekele. Aliyo bingʼwe badugu, mutizunoga kwita shitile sha wiza. Na ulu munhu ali ho uyo walema kwigwa mhayo gwiswe gwa mu nyaluba iyi, kangukagi munhu ngʼwenuyo, nulu mutizisangija nanghwe, adingʼwe minala. Aliyo mutizungʼwiganika ali ngʼwanishi, aliyo nghugulagi giti ndugu. Haha lulu Seba wa mhola ngʼwenekele angʼwinhe mhola shiku jose mu mihayo yose. Seba abize hamo ningʼwe bose. Kugisha kwane nene Paulo na nkono gwane ngʼwenekele: iki chene kimanikijo cha buli nyaluba iyo nandika. Kigongo cha Seba wiswe Yesu Kristo kibize hamo na bingʼwe bose. Amina. Paulo, ntungʼwa wa ngʼwa Kristo Yesu gitumo kulagila kwa Mulungu Mpija wiswe umo kuli, na kwa Kristo Yesu ngʼwene kwisagilwa kwiswe; Kuli Timoteo, ngʼwana wane nghana mu kuzunya; kigongo, na kuchila kigongo na mhola, kufuma kuli Mulungu Siswe na kufuma kuli Kristo Yesu Seba wiswe. Gitumo nali nukukomeleja kushinga mu Efeso, aho nali nuja Makedonia, ubalemeje banhu bamo batizulanga kulanga kungi, Nulu batizudima ngano na chandikile cha shibyalilwe ishiti na kushila, ishikwenhaga mabugilijo ga halali, kutinda kuzenjiwa kwa Mulungu ukuli mu kuzunya; itaga giko. Aliyo i nguno ya kalagilile ili butogwa ubufumile mu ngholo yape, na wiyanguji wa wiza, na kuzunya ukuti na buhwiganu: Bamo bafugije mu mihayo iyi, baligilile ku kahayile ka dalali; Batogilwe kubiza balangiba shilagilo; aliyo batitegeleja iyo bakuhayaga, nulu iyo bidimya. Aliyo tumanile giki, shilagilo shene sha wiza, ulu munhu ushitumamila kishilagilo, Yamanika giki, shilagilo shitutuulwa ho kulwa munhu ntungilija, aliyo kulwa a ba kitigwa na abatulyehiwa, kulwa abati na ikujo na a ba shibi, kulwa abati bela na abatunamya Mulungu, na kulwa batulaguji ba basabo, na batulaguji ba baninabo, na kulwa babulagi ba banhu, Na kulwa bajingi na bikenaguji bagosha na bagosha, na kulwa bakwabi ba banhu, na kulwa bamama, na kulwa bitonga bumama, na ulu guli ho mhayo gose gungi uyo ugukuhangijaga kulanga kwa bupanga; Gitumo evangeli ya ikujo ya Mulungu nkumilijiwa umo ili, iyo nubikijiwa nene. Nene nanumba Kristo Yesu Seba wiswe, Uyo akaniguzuhya iki akanibala ndi ngʼwishigwa, unituula mo mu kwinhilija kwakwe; U nene uyo kwandia nali ndi ndukaguji wa Mulungu, na nyajanyaja, na nghungu: aliyo naachilwa kigongo, iki nali nita mu butumana na mu butuzunya; Na kigongo cha Seba wiswe chukwila no kihamo na kuzunya na kutogwa ukuli muli Kristo Yesu. Uyu gwene mhayo gwa wishigwa, gwigelile kwanukulwa na banhu bose giki, Kristo Yesu akiza mu si kubapija a ba shibi; mu benabo nene nali wa kwandia: Aliyo naachilwa kigongo, kulwa nguno iyi giki, muli nene u wa kwandia, Yesu Kristo oleche kwiyumilija kose, nabize kalolelo ku benabo abahaya kunzunya Wei kushika mu bupanga butushila. Na lulu kuli Ntemi wa welelo na welelo, Uyo atakenagukaga, Uyo atabonagwa, Uyo ali Mulungu umo wike, ibize ho kukumilijiwa na ikujo welelo na welelo. Amina. Kilagilile iki nakwinha bebe, ngʼwana wane Timoteo, gitumo buhangi wali butonga bukuhaya bebe, mu wenubu ulwage kulwa kwa wiza; Ukumiche kuzunya na wiyanguji wa wiza; mihayo iyi bangi bayiponije kule, butubija kuzunya kwabo: Mu benabo bene Humenayo na Aleksandro; abo nali nabinha kuli Shetani, balangwe kuleka kunduka Mulungu. Kulwa iyi nakomeleja kutinda yose giki, kwikumilija, na kulomba, na kulombela, na kulumba, shitwe kulwa banhu bose; Kulwa batemi na kulwa batale bose; twikale bapanga mu mhola na mu bulembezu mu wela bose na bubyedeku. Iki mhayo uyu gwene gwa wiza, guntogile Mulungu Mpija wiswe; Uyo atogilwe banhu bose kupijiwa na kushika mo mu kuyitegeleja i nghana. Iki Mulungu ngʼwene umo, na nsangija wa Mulungu na banhu nanghwe umo, ngʼwene munhu Kristo Yesu, Uwali wiyinha ko ngʼwenekele abize kikomolelo cha ku bose; mhayo uyu gulakanilwa mu makanza gago; Ku mhayo uyu naatuulwa ho kubiza nomeji na ntungʼwa (ndihaya nghana muli Kristo, natuhayaga bumama); nangi wa bana mahanga mu kuzunya na mu nghana. Kulwa iyi natogilwe bagosha balombe buli ipande lyose, babukije higulya makono mela, bati na bupelanu na halali. Na hangi giko bakima bigalile benekele mu shizwalo ishigelile, hamo na bukonu na wibembu; iti mu kushiba nzwili, nulu kuzwala zahabu na lulu, nulu mienda ya mpango no; Aliyo bigalile na shitile sha kigongo gitumo ibigelile bakima abihaya bangʼogohile Mulungu. Nkima ilange mu buhumuzu na bulyehu bose. Aliyo natunzunilija nkima kulanga, nulu kunsuga ngosha, aliyo ikale nghumuzu. Iki Adamu akabumva tange, hunaho Eva; Na Adamu walatulemva, aliyo nkima iki wali ulemva akingila mu busobya. Aliyo alapijiwa mu kubyala bana, ulu bushinga mu kuzunya mu butogwa na wela hamo na wibembu. Uyu gwene mhayo gwa wishigwa, Ulu munhu uhahalila ku bulanghani wa kanisa akukalalagwa nimo gwa wiza. Kulwa iyo nanghani shigelile abize munhu uyo atusuchiwa, ngoshi wa nkima umo, ngʼwilindi ngʼwenekele, wa masala madekanu, uyo akushiminzaga wima, ngʼwegeleja wa bageni, ndebeji mu kulanga; Ati nkolwa wa shikoji, ati ntuji wa banhu, ati nyecha; aliyo ali mpolo, ati nyombo, nulu ngʼwikumva wa sabo; Uyo akusugaga chiza kaya yakwe, ali na bana banyehelile mu bubyedeku bose; (Aliyo ulu munhu atamanile kusuga kaya yakwe ngʼwenekele, akwilinda kinahe i kanisa ya Mulungu?) Atizubiza mypa mu kuzunya, akije kudosa na kugwa mu nsango gwa Shetani. Hangi shingʼwigelile akanilwe ali wa wiza na abo abali hanze; atizugwa mu kudalahwa na ntego gwa ngʼwa Shetani. Na giko binhilija nabo shibigelile babize bikaji ba miso, batizubiza na mihayo ibili, batiyinhile ku shikoji, bati banyecha; Abadimile ya kwigeniha ya kuzunya mu wiyanguji wela. Na abo bagengʼwe tange; huna lulu bamanike giki, bati na kilingo, huna bagutumame nimo gwa winhilija. Giko hangi bakima nabo babize bikaji ba miso, bati basigani, bati bangʼwi ba shikoji, bali bishigwa mu mihayo yose. Binhilija ba kanisa babize buli munhu ngoshi wa nkima umo, bakusugaga chiza bana babo mu kaya jabo. Iki abo abakwinhilijaga chiza, bibegeja butale wa wiza, na bugimu butale mu kuzunya ukuli muli Kristo Yesu. Mihayo iyi nakwandikila, nisagililwe kwiza kuli bebe wangu; Aliyo ulu nudila, bebe umane gitumo ibigelile banhu kushiminza mu numba ya Mulungu, i yene kanisa ya Mulungu mpanga, hangi yene ikingi na musingi gwa ya nghana. Na mhayo uyu gwene guti gwa kuhalalikwa giki, kwigeniha kwa kungʼogoha Mulungu kwene kutale; Mulungu wali wigengelechiwa mu mili, ukanilwa ali ntungilija mu Moyo Ngʼwela, ubonwa na bamalaika, ulomelwa mu bana mahanga, uzunyiwa mu ba mu si, wanukulwa ngʼwigulu ngʼwikujo. Aliyo Moyo Ngʼwela akuhayaga hape giki, mu shiku ja ku mhelo, bamo balinga mu kuzunya, balalondela mioyo ya bulembalembi, na shilangile sha masamva; Balabyulungalunga mu bumama; wiyanguji wabo wagunyiwa giti na chuma kisebu; Balabyubalemeja banhu kutola, hangi balabyubalagila kuleka shiliwa isho Mulungu wali ushisema giki, shanukulwe na kulumba nabo abazunije na abamanile i nghana. Iki buli kinhu chose icho Mulungu akakisema chene cha wiza, kiti cha ngilo ulu chanukulwa na kulumba: Iki chejiwa na mhayo gwa Mulungu na kulomba. Ulu ubizukija badugu mihayo iyi, ulabiza ntumami wa wiza wa ngʼwa Yesu Kristo, akulile mu mihayo ya kuzunya na mu kulangwa kwa wiza, uku ukakulondelaga. Aliyo ngano ja bubi na ja bagikulu ujileme, aliyo wimanilije mu wela; Iki wimaniliji wa mili wene buli na solobo ndo gwike: aliyo wela buli na solobo mu mihayo yose, wisagijiwa bupanga wa haha hangi ubo ubuhaya kubiza ho. Uyu gwene mhayo gwa wishigwa, gwigelile kuzunyiwa na banhu bose. Kulwa nguno iyi twiyumiiija mu kutumama na mu kusondagulwa, iki twangʼwisagilwa Mulungu mpanga, Uyo ali Mpija wa banhu bose, kutinda no wa benabo abazunya. Mihayo iyi uyilagilage na uyilangage. Munhu ose atizukudalaha busumba wako, aliyo ubize kalolelo ku bazunya mu kahayile na mu kashiminzile, na mu butogwa, na mu kuzunya na mu wela. Komelaga mu nimo gwa kusoma, na kuganikila, na kulanga, kushisha naliza. Utizugumanija ngabo uguli muli bebe, uyo wiinhiwa kulwa kuhangilwa na kutuulihva makono ga banamhala. Uyikalalwe mihayo iyi, wifunye ko kuyo; kubelela kwako kumanike ku banhu bose. Wilanghanage ngʼwenekele, hangi mu iyo ukulangaga; komelaga mu mihayo yeniyi, iki ulu wita giko ukwipija ngʼwenekele na abo abakukwigwaga. Utizunghama namahala na bukali, aliyo unganikile giti so; a basumba nabo giti bana bangʼwingʼwe; A bagikulu nabo giti banoko; na a bashike giti balumbuyo, mu wela bose. Bakujage bachilwa abali bachilwa gete. Aliyo ulu nchilwa ose ali na bana nulu bizukulu, bilange tame i nhungwa ya kuzunya mu kaya jabo, na kubakuulila babyaji babo: iki gwene gwa wiza hangi guntogile Mulungu. Aliyo nchilwa gete, uwalekwa wiyene, uyo watuula ho kwisagilwa kwakwe muli Mulungu, hangi akushingaga mu kudaya na kulomba limi na bujiku. Aliyo uyo akwikalaga mu kwiyeja ngʼwenekele achile aho atali mpanga. Mihayo iyi ubalagile babize batusuchiwa. Aliyo munhu ose ulu atubalinda abo akubasugaga, na kutinda a ba mu kaya yakwe, ngʼwenuyo walemaga u buzunya, hangi ali wa bubi kutinda uyo atinazunya. Nchilwa atizandikwa mu bachilwa ulu atali kumala miaka makumi atandatu, walali like wa ngosha umo, Alikanilwa ali na shitile sha wiza, giki, wali ubalela bana, wali ubegeleja bageni, wali oja mhambala ja bela, wali ubambilija abali mu kuluhiwa, na wali ulondela buli nimo gwa wiza na bukomezu. Aliyo bachilwa abatali bashike uleme kuyandika, iki aho balalemelwa kasugile ka ngʼwa Kristo balatogwa kutolwa, Bali na nsango iki bukuponya kuzunya kwabo kwa kwandia. Na hangi bimanilija kubiza bolo, buyelayela mu manumbanumba, nulu bati bolo bike aliyo bubiza ba kasombandasi na bishatya, bulungalunga iyitindile kuhayiwa. Kulwa mhayo uyu natogihve giki, bachilwa abati bagikulu batolwe, babyale bana, basuge mihayo ya mu kaya, batizungʼwinha ngʼwanishi i nguno ya kusondagula. Iki ni haha bamo bamala kugaluka kunondela Shetani. Nzunya, ngosha nulu nkima, ulu ali na bachilwa, abagunane wei, kanisa itizudidohelwa, aliyo ibagunane bachilwa a bapina. Banamhala abakusugaga chiza babalwe bigelile kwinhiwa ikujo nghangala ibili, kutinda binhiwe benabo abakutumamaga mu mhayo na mu kulanga. Iki Shandikwa shuhaya giki, Utizutunga nomo gwa ngʼombe aho ikupandagilaga ngano ha lubuga, na hangi giki, Ntumami igelelilwe mhela yakwe. Utizuzunya kubulwa kwa namhala numho bigele bakaniji babili nulu badatu. Abo babihije ubahugule mu butongi wa bose, na bangi nabo bogohe. Nakulagila bebe mu butongi wa Mulungu na Yesu Kristo na bamalaika basolwa giki, uyite mihayo iyi uti na sololo, utizusolanhya kuntogwa umo kutinda ungi. Utizanguhilija kuntuulila munhu makono, nulu utizubiza na busangi mu shibi sha bangi; wilinde wikale ngʼwela. Kufuma haha utizungʼwa minzi gwike aliyo ungʼwe minzi ga mizabibu mado kulwa nguno ya nda yako, na kulwa busatusatu ubo uli nabo nghangala ningi. Shibi sha banhu bamo shili hape, shili shangu kulekanyiwa nsango; aliyo bangi shibi shabo shililonga hanuma. Giko hangi na shitile sha wiza sha bamo shigengeleka hape, aliyo ishili chene shitudula kubiswa. Bose abali mu butungwa wa busese babinhe basabobugonzo ikujo lyose, lina lya Mulungu litizudukwa nulu kulanga kwiswe. Nabo abali na basabo-bugonzo abazunya, batizubadalaha, iki bali badugu babo; aliyo hambuhambu babatumamile, babinhilije, iki bali bishigwa na batogwa, bisangija mu solobo ya milimo yabo. Mihayo iyi langaga na ganikilaga. Munhu ose ulu akulangaga yingi, hangi utazunije mihayo mipanga ya Seba wiswe Yesu Kristo, nulu utazunije kulanga ukulenganilile na wela: Ngʼwene ndoshi, atamanile mhayo gose, aliyo asalile, wikumva mabugilijo na halali ya mihayo, muyo shufuma wilu na halali na budukaguji na witingʼwa wa bubi, Na mahalali agatakalikaga ga banhu abakenagukile mu masala gaho, na nghana yabagaya, biganika giki, kazunije ka wela kene nzila ya kusabila mo: abali giko wikomanye nabo. Aliyo kazunije ka wela na wigelelwa kene solobo nhale: Iki twali tutenhile kinhu mu si, na giko hangi tutudula kwinga nacho; Nahene ulu tuli na shiliwa na shizwalo, shene shitwigele. Aliyo abo abatogilwe kusaba, bagwa mu kugengʼwa na mu mbeto, na mu kwikumva kungi na kungi kwa buchiluchilu na bukenaguku, ukubalibija banhu mu kukenagulwa na mu kuyagala. Iki kwikumva feza kwene itina lya bubi bose: iyo bamo buyikumva, huna bunyangʼwa mu kuzunya na bichima benekele na mabupina mingi. Aliyo bebe, munhu wa Mulungu, ipelage yeniyo; aliyo londelaga butungilija, wela, kuzunya, butogwa, kwiyumilija na bufula. Lwaga bulugu wa wiza wa kuzunya, dimaga bupanga butushila ubo witanilwa mo, hangi waakanila kuzunya kwa wiza mu miso ga bakaniji bingi. Nakulagila mu butongi wa Mulungu, Uyo akushinhaga bupanga shinhu shose, na mu butongi wa ngʼwa Yesu Kristo, Uyo wali ukanila kuzunya kwa wiza ku butongi wa Pontio Pilato, giki: Dimaga iyo waalagilwa, uti na ibado nulu kilingo kushisha kwilonga kwa Seba wiswe Yesu Kristo; Uko alolecha mu ngelo yakwe Uyo ali wa lubango na wa budula bose Wei wike, Ntemi wa batemi, na Seba wa baseba, Uyo wike ali na butucha, akwikalaga ngʼwisana ilitegelwa na munhu, Uyo atabonilwe na munhu nulu umo, hangi ati ho munhu wadula kumona; kuli Wei libize ikujo na budula welelo bose. Amina. Balagilage abali basabi mu si iyi, batizudosa nulu batizusanya busabi ubuti wa nghana, aliyo bansanye Mulungu Mpanga Uyo akutwinhaga shinhu shose mu wila tuyegele musho; Bite shitile sha wiza, babize basabi mu shitile sha wiza, na bamalilile mu wila, na bangu kugaba shikolo shabo; Bibikile wibikiji bubize musingi gwa wiza mu ngelo yahaya kwiza, babudime bupanga butushila. Bebe Timoteo, ilindage iyo wabikijiwa, iligage kalungalungile ka nyachiluchilu na ka dalali, na buhalaliji wa bumani wa si ubukuhayiwagwa mu bumama; Ubo bangi, iki babuzunije, bahubaga mu kuzunya. Kigongo kibize na bebe. Amina. Paulo, ntungʼwa wa ngʼwa Yesu Kristo, gitumo Mulungu atogilwe, gitumo kuli u kwisagija kwa bupanga ubuli muli Kristo Yesu, Kuli Timoteo, ngʼwana wane ntogwa no, Kigongo, na kuchila kigongo, na mhola, ishufuma kuli Mulungu na kuli Kristo Yesu Seba wiswe, shibize kuli bebe. Nanumba Mulungu, Uyo nakantumamilaga kufuma mu baguku bane na wiyanguji wela giki, natukijaga kukwizukwa gwa mu kulomba kwane limi na bujiku; Nakukumbulaga no kwibona nangho iki nashiganika shisoji shako, nokajiwe na buyegi; Aho nizukwa kuzunya ukuti na wibeleja ukuli muli bebe, ukwali kwabiza muli mamayo Loisi kwandia, na muli noko Eunike, na hangi namanile nghana giki, nu muli bebe kuli mo. Kulwa iyo nakwizukija giki, usosele cha kwinha cha Mulungu ikili muli bebe kulwa kutuulilwa makono gane. Iki Mulungu atatwinhile moyo gwa kogoha, aliyo gwa budula, na gwa butogwa, na gwa kulingisila. Kulwa iyi utizudingʼwa minala kulwa bukaniji wa Seba wiswe, nulu kulwa nene ntungwa wakwe; aliyo isangijage mu kululiiwa kwa mu evangeli, gitumo budula wa Mulungu umo buli; Uyo waatupija, na utwitana na kwitana kwela, iti kulwa shitile shiswe gitumo shali shili, aliyo utwitana gitumo usola Wei ngʼwenekele, na gitumo kigongo chakwe umo kili, icho waatwinha muli Kristo Yesu aho si yali itali kubiza ho, Aliyo haha yolechiwa hape kulwa kwilonga kwa Mpija wiswe Yesu Kristo, Uyo akajimija kucha, na welecha hape bupanga na butucha kulwa evangeli: Ku yeniyo nene naasolwa kubiza nomeji, na ntungʼwa, na nangi wa ku bana mahanga. Kulwa nguno iyo nakuluhaluhiwagwa mihayo iyi: aliyo natudingʼwa minala; iki namanile Uyo naanzunya, namanile nghana giki, Wei ali na budula kukilinda icho naabika kuli Wei kushisha lushiku ulo. Umicliaga kalangile ka mihayo mipanga iyo wiyigwa kufuma kuli nene, mu kuzunya na mu butogwa ubuli muli Kristo Yesu. Iyo ya wiza iyo waabikijiwa uyilinde mu Moyo Ngʼwela Uyo akwikalaga mu biswe. Mhayo uyu umanile giki, bose abali mu Asia banilekaga; mu boi bali mo Fugelo na Hermogene. Seba abachile kigongo ba mu numba ya ngʼwa Onesiforo, iki nghangala ningi waanifujaga, nulu walatudingʼwa minala kulwa nyololo gwane, Aliyo aho walali mu Rumi akanikoba na bukomezu kushisha unibona. Seba angʼwinhe kubona kuchilwa kigongo kwa Seba mu lushiku ulo; na hangi gitumo waaninhilijaga mu Efeso mu mihayo mingi, ni yene uyimanile. Kulwa iyi, bebe ngʼwana wane, bizaga na nguzu mu kigongo ikili muli Kristo Yesu. Na mihayo iyo wiyigwa kuli nene mu bakaniji bingi, yeniyo ubinhe banhu bishigwa, abadula kubalanga bangi. Iyumiilage hamo na nene mu kuluhiwa, giti nshilikale wa wiza wa ngʼwa Kristo Yesu. Ati ho nshilikale uyo akwitaga bulugu, na hangi akwiyangayangilaga ngʼwenekele mu mihayo ya bupanga ubu; anyeje uyo uwali ungʼwandika kubiza nshilikale. Na munhu ulu akukomelaga kulwa kuheba, atinhiwa ngikili ya ikujo numho akuhebelaga gitumo waalagilwa. Nimi uyo akulimaga shingʼwigelile kubiza wa kwandia kulya matwajo. Iyidedekanyage iyo nahaya; iki Seba alakwinha kwitegeleja mu mihayo yose. Ngʼwizukagwe Yesu Kristo uwaajuchiwa mu bafu, wa bubyile wa ngʼwa Daudi, gitumo evangeli yane yuhaya; Muyo niyumilija mu kuluhiwa, nose nushika mu butungwa giti ndi miliya; aliyo mhayo gwa Mulungu gutatungilwe. Kulwa iyo niyumilija mu mihayo yose kulwa basolwa, nabo babone bupiji ubuli muli Kristo Yesu hamo na ikujo litalashila. Mhayo uyu gwene gwa wishigwa giki, Ulu twaacha hamo nanghwe, nahene tulabiza bapanga hamo nanghwe: Ulu twiyumilija, nahene tulasuga hamo nanghwe: ulu tunema Wei, nanghwe akutulema biswe: Ulu tuti bishigwa, Wei akwikalaga ali ngʼwishigwa; atudula kwilema ngʼwenekele. Ubizukije yeniyi, ubaganikilage mu miso ga Seba giki, batizuhalalila mu mihayo ya dalali iyo iti na solobo, aliyo yubahwiganya abiyigwa. Komelaga kwiyolecha ngʼwenekele kubiza waazunilijiwa na Mulungu, u ntumami uyo ati na nguno ya kudingʼwa minala, uyo akutumamilaga wima mhayo gwa nghana. Aliyo ihungage mu kalungalungile ka nyachiluchilu na ka dalali; iki kakwiyongejaga kukwija mu bubi, Na mhayo gwabo gukulyaga giti ilonda, mu boi Humenayo na Fileto bali mo; Abo bahubile kwinga mu nghana, bakuhayaga giki, kujuka kwamala kubita ho; bugalucha kuzunya kwa bamo. Aliyo musingi gwa Mulungu guli ndimu, guli na kimanikijo iki giki, Seba abamanile abali bakwe: na hangi giki, Buli munhu ose uyo akulihayaga lina lya ngʼwa Kristo, ikomanye mu ya bubi. Aliyo mu numba nhale shiti mo shiseme sha zahabu na sha feza shike, aliyo hangi shili mo sha miti na sha mabumba; shingi shili na ikujo, na shingi shiti na ikujo. Kulwa iyo, munhu ulu wiyeja na ubihunga benaba, alabiza kiseme cha ikujo, chejiwa, chigelile kuli Seba, ichabejiwa kulwa nimo gose gwa wiza. Aliyo kupelage kwikumva kwa busumba, aliyo londelaga butungilija, kuzunya, butogwa, mhola, hamo nabo abakunililaga Seba mu ngholo yape. Aliyo mabugilijo ga buchiluchilu na ga butumana ihungage mugo, iki umanile giki, yombo yufuma mo. Na itangʼwigelile nsese wa Seba kubiza na yombo, aliyo abize mpolo ku banhu bose, amalilile kulanga, na ngʼwiyumilija, Mu bulyehu akubalangaga abo abihalalija nanghwe; hamo Mulungu abinhe koya babone kuyimana i nghana, Hangi babamuke, biyinje mu lubeto lwa ngʼwa Shetani, abagwashiwa nanghwe kwita iyo atogilwe wei. Hangi managa uyu giki, mu shiku ja ku mhelo, galiza makanza ga kwihiga. Iki banhu balabiza bitogilwe benekele, batogilwe sabo, bikumilija, badoshi, badalahi ba Mulungu, batubigwa babyaji babo, bati na kulumba, bati bela, Bati na kwitogwa, babulagi ba bulagane, balembekeja, bati na kwilinda, bakali, babyedi ba ba wiza, Bijomboki, balambu, bihayi, abatogilwe kwiyeja benekele kutinda kuntogwa Mulungu; Bali na shimile sha wela, aliyo balema budula wakwe: abali giko isundage mubo. Iki mu benabo bali mo abakushepaga kwingila mu manumba, na bubadima bakima bachiluchilu ababunwa na mashibi, abadutwa na kwikumva kungi na kungi, Bakwilangaga gwa, nulu kushika mu kwitegeleja kwa nghana yaya. Gitumo Yanne na Yambre bali bunghangija Musa, nabo chene balihangija i nghana; bali banhu bakenaguku mu masala gabo, batuzunilijiwa mu mihayo ya kuzunya. Aliyo batongeja no; iki buchiluchilu wabo buligengeleka ku banhu bose, gitumo wa ba kale wali buli. Aliyo bebe ukalondelaga kulanga kwane, na kashiminzile, na kasolele, na kuzunya, na bulyehu, na butogwa, na kwiyumilija, Na kunyajanyajiwa, na kuluhiwa uku kwali kunigwila Antiokia, na Ikonio, na Lustra; makoye matale ayo nali nugiyumilija: aliyo Seba akanipija mu genayo gose. Chene na bose abatogilwe kwikala bela muli Kristo Yesu balabona kunyajanyajiwa. Aliyo banhu ba bubi na balembalembi balongeja kukula mu bubi, balalembalemba, na balilemvalemva. Aliyo bebe, ikalaga mu mihayo iyo wamala kulangwa na kwitegelejiwa, iki umanile uyo ukulanga umo ali; Na hangi giki, kufuma mu buyanda wako umanile Shandikwa Shela, ishili na budula kukwinha masala kushika mu bupiji kulwa kuzunya ukuli muli Kristo Yesu. Shandikwa Shela shose shiinhwa na miuyi ya Mulungu, shigelile ku nimo gwa kulanga, na kuganikila, na kuhugula bakenaguji, na kulela mu butungilija; Munhu wa Mulungu abize nshikanu, amalililwe no ku nimo gose gwa wiza. Nakulagila mu butongi wa Mulungu, na wa ngʼwa Kristo Yesu, Uyo alabalekanya nsango a bapanga na bafu mu kwilonga kwakwe na mu butemi wakwe; Lomelaga Mhayo, komelaga ngʼwikanza iligelile na ngʼwikanza ilitigelile; hugulaga, hamaga, ganikilaga mu kwiyumilija kose na kulanga. Iki ikanza liliza aho balatema kalangile kabyedeku; aliyo gitumo kwikumva kwabo umo kuli balikwigija balangi abali na matu gababile; Nabo balagagalucha matu gabo kwinga mu nghana, na balagalukila ngano ja bulomolomo. Aliyo bebe lalanghanaga mu mihayo yose, iyumilijage mu kuluhiwa, itaga nimo gwa nomeji wa evangeli, shikilijaga kwinhilija kwako. Iki haha namalilile kufunyiwa giti kitambo, na ngelo ya kwinga kwane yegelaga. Nakalwaga kulwa kwa wiza, namallle chanda chane, nakubaladile u kuzunya: Haha lulu nabikililwe ngikili ya nyatemi ya butungilija, iyo Seba Nekanya ntungilija alaninha lushiku lwenulo; nulu iti nene gwike, aliyo benabo bose abakutogilwe kwilonga kwakwe. Komelaga no kwiza kuli nene wangu: Iki Dema akaniteka, uyitogwa si ya haha, nanghwe winga uja Thesalonika; Kreske waaja Galatia; Tito waaja Dalmatia. Luka wike ali hamo na nene. Ngʼwenhage Marko, wize hamo nanghwe; iki igelile ku butumami wane. Aliyo Tukiko nantumile Efeso. I likoti lya mbeho ilo nakalileka Troa ha ngʼwa Karpo, aho uliza ulyenhage, na shitabo, na kutinda no sha makunza ga bunuke. Aleksandro nsuji wa chuma chaza akanitila kibi no: Seba alampela gitumo shitwa shakwe umo shili: Na bebe ilanghanage kuli ngʼwenuyo; iki wali ujija na nguzu mihayo yiswe. Mu kushosha kwane kwa kwandia walati ho munhu nulu umo wa kwimila hamo na nene, aliyo bose bunilekanija: batizubalilwa kilingo kulwa mhayo uyu. Aliyo Seba akanimiila, na akaniguzuhya; bulomeji butangʼanhe kulwa nene; na bana mahanga bose biyigwe: na nene nakapijiwa mu nomo gwa shimba. Na Seba alanipija mu mhayo gose gwa bubi, hangi alanilinda kushisha mu butemi wakwe wa ngʼwigulu: kuli Wei libize ho ikujo welelo na welelo. Amina. Nigisijage kuli Priska na Akula na kaya ya Onesiforo. Erasto wikala Korintho: aliyo Trofimo nakaneka Mileto asatile. Komelaga no kwiza aho shiku ja mbeho jitali. Bakugisha Eubulu, na Pudene, na Linu na Klaudia, na badugu bose. Seba Yesu Kristo abize hamo na moyo gwako. Kigongo kibize na bingʼwe. Amina. Paulo, nsese wa Mulungu, na ntungʼwa wa ngʼwa Yesu Kristo, gitumo kuzunya kwa basolwa ba Mulungu umo kuli na kumana kwa nghana iyigwindanije na wela, Mu kwisagilwa kwa bupanga butushila, ubo Mulungu, Uyo atudula kulomaloma, wiisagija aho si yali itali kubumva; Aliyo mu makanza gakwe, akagukundula mhayo gwakwe mu nzila ya bulomeji, ubo nabikijiwa gitumo kilagilo cha Mulungu Mpija wiswe umo kili; Kuli Tito, ngʼwana wane nghana mu kuzunya uku tukusangilile: Kibize kuli bebe kigongo na kuchila kigongo na mhola ishufuma kuli Mulungu Siswe na Kristo Yesu Mpija wiswe. Nali nukuleka Krete kulwa nguno iyi giki, uyilonje mihayo iyali yasaga, utuule ho banamhala ba kanisa mu buli nzengo, gitumo nukulagila; Ulu munhu umanika ati na kilingo, ngosha wa nkima umo, ali na bana bazunya abatubulwa bali buyagabuyaga nulu bati na chigwamatu. Iki nindi shingʼwigelile abize ati na kilingo, iki ali mikijiwa wa Mulungu, ati ngʼumaganu, ati ngʼwangu kupelana, atimaniligije minzi ga mizabibu; ati ntuji, ati ngʼwigongi wa solobo ja busoso; Aliyo abize ali ngʼwegeleja, ntogwa wa ya wiza, wa masala madekanu, ntungilija, ngʼwela, ngʼwilindi ngʼwenekele; Uyo akudimaga mhayo gwa wishigwa gitumo waalangwa, adule kubaganikila na kalangile kapanga na kubakamaaja ba halali. Iki bali ho ba kitigwa bingi, na bahayi ba mihayo iti ya kapanga na balembalembi, kutinda abo abasalilwe. Abo shibigelile milomo yabo yimumiwe; abo bakuhwiganyaga makaya magima, bakulangaga iyi itigelile kulwa nguno ya solobo ja busoso. Na umo wabo, u nghangi wabo benekele, akahaya giki, Bakrete bali balomolomo gwa, bali shinwele sha bubi, balaku abatitaga nimo. Bukaniji ubu wene nghana. Kulwa mhayo uyu ubahamage na bukali, babize bapanga ba gili mu kuzunya, Baleke kwigwa ngano ja Kiyudaya na kalagilile ka banhu, abiyihunga i nghana. Ku a bela shinhu shose shili shela, aliyo ku abo abali basoso na abatuzunya, kiti ho kinhu kili chela; aliyo iganiko lyabo na wiyanguji wabo shili sha busoso. Bakatambulaga giki, bamanile Mulungu, aliyo mu Shitwa shabo bakanemaga, bali ba malofu, na ba kitigwa, na ku nimo gose gwa wiza batigelile. Aliyo bebe, hayaga mihayo iyidebelile na kalangile kapanga: Giki, a banamhala babize ba masala madekanu, binhiwa ishima, bilindi benekele, babize bali bapanga mu kuzunya, na mu butogwa, na mu kwiyumilija: A bagikulu nabo babize na kashiminzile ka wela, batizubiza balembekeja, nulu abo abakutumamilaga minzi mingi ga mizabibu, aliyo babize balangi ba iyo ya wiza. Babalange bashike kubatogwa bagoshi babo, na kubatogwa bana babo, Kubiza na masala madekanu, bela, bakomezu mu milimo ya kaya, ba wiza, balyehu ku bagoshi babo, mhayo gwa Mulungu guleke kudukwa: A basumba nabo ubakomeleje babize ba masala madekanu: Mu mihayo yose wiyoleche uli kalolelo ka kuhwawa ka Shitwa sha wiza: mu kulanga kwako wiyoleche uti na buhubi; hangi uli ngʼwinhiwa ishima, Wa mihayo mipanga iyo itudula kusukilijiwa; uyo akukuhangijaga adingʼwe minala, iki gukungaya mhayo gwa bubi gwa kutuhaya biswe. Basese babigwe basabo bugonzo babayeje mu mihayo yose; batizubiza bashosha ba mihayo, Nulu banyecha, aliyo biyoleche bali basanyiwe mu ya wiza yose; bakugaliile kulanga kwa Mulungu Mpija wiswe mu mihayo yose. Iki kigongo cha Mulungu ichabenhela banhu bose bupiji, chiilonga, Kikutulangaga kulema buti butungilija na kwikumva kwa kinasi; na hangi giki, twikale ba masala madekanu, na batungilija, na bela mu si iyi; Tukukulolelaga kwisagilwa kwa lubango, na kwilonga kwa ikujo kwa Mulungu ntale na Mpija wiswe Yesu Kristo: Uyo akiyinha ko kulwiswe, atukomole kufuma mu buhunga bose, na wiyegeje banhu bakwe ba wikomangile, abashikalalilwe Shitwa sha wiza. Hayaga mihayo iyi, na kukomeleja, na kuhugula na budula bose. Munhu ose atizukudalaha. Ubizukije bubalyehela basugi na ba budula, na kubigwa, na kubiza bamalilile ku nimo gose gwa wiza. Batizunsiga munhu kibi, batizubiza na buyombo, aliyo babize bapolo, bolekeje bufula bose ku banhu bose. Iki biswe niswe twali tuli bachilu i kale, na ba kitigwa, na balemva, twali tukutumamila kwikumva na kwiyeja kungi na kungi, twali twikala na isubi na wilu, na busayi, na twikolwa benekele na benekele. Aliyo aho wiza-ngholo wa Mulungu Mpija wiswe, na butogwa wakwe kubanhu bukilonga, Iti kulwa shitile sha butungilija isho twaashitaga, aliyo gitumo kuchila kigongo kwakwe umo kuli, waatupija mu kojiwa kwa kubyalwa kupya na kudoganya kwa Moyo Ngʼwela, Uyo waatungʼwagila wingi no muli Yesu Kristo Mpija wiswe; Giki, aho twaatungiligijiwa na kigongo chakwe, twitwe kubiza bingiji gitumo kwisagilwa kwa bupanga butushila umo kuli. Mhayo uyu gwa wishigwa, na mihayo yeniyi natogilwe uyihaye gwa na nguzu giki, benabo abanzunije Mulungu bakalalwe kukomela mu shitile sha wiza. Mihayo yeniyi ili ya wiza na ya solobo ku banhu: Aliyo a mabugilijo ga nyachiluchilu, na ga kubala shibyalilwe, na buyombo na halali ya ku shilagilo, shenishi ushihungage, iki shiti na solobo, hangi sha dalali. Munhu ngunghumi hanuma ya kunganikila lukangala lwa kwandia na lwa kabili, nemage; Iki umanile munhu ali chene waahugana, hangi akwitaga shibi, wilekanya nsango ngʼwenekele. Aho nalantuma Artema kuli bebe nulu Tukiko, komelaga kwiza kuli nene kunu Nikopoli: iki hu kwene natogilwe kwikala ko mu shiku ja mbeho. Batumage Zena mani wa shilagilo, na Apolo, mu lugendo lwabo na bukomezu, batizugayiwa kinhu chose. Na banhu biswe nabo bilange kukomela mu Shitwa sha wiza kwita iyo iyigelelilwe, batizubiza bati na matwajo. Bose abali hamo na nene bakugisha. Bagishage abatutogwa mu buzunya. Kigongo kibize hamo na bingʼwe bose. Amina. Paulo ntungwa wa ngʼwa Yesu Kristo, na Timoteo ndugu wiswe, kuli Filemoni ntogwa wiswe na ntumami ngʼwichiswe; Na kuli Appia ilumbu lyiswe, na kuli Arkipo u nshilikale ngʼwichiswe; na ku Kanisa iyili mu numba yako: Kigongo kibize ku bingʼwe, na mhola iyufuma kuli Mulungu Siswe na kuli Seba wiswe Yesu Kristo. Nanumba Mulungu wane gwa, nakukuhayaga mu kulomba kwane. Nigwile mihayo ya butogwa wako na buzunya ubo uli naho kuli Seba Yesu, na ku bela bose; U busangi wa kuzunya kwako butumame mu bumani wa buli mhayo gwa wiza uguli mo muli bebe muli Kristo Yesu. Iki tuli na buyegi wingi na kwifula kulwa nguno ya butogwa wrako, iki mioyo ya bela yifujiwagwa na bebe, ndugu wane. Ali lulu nahone, nulu ndi na bugimu muli Kristo kukulagila iyikwigelile, Aliyo kulwa nguno ya butogwa nakwikumbilija, iki ndi Paulo, u namhala, na hangi haha ndi ntungwa wa ngʼwa Yesu Kristo: Nakwikumbilija kulwa ngʼwana wane uyo naamyala mu butungwa wane, u Onesimo, Uyo i kale walati na ngofyolo kuli bebe, aliyo i haha ali na ngofyolo kuli bebe na kuli nene: Uyo nanshosha kuli bebe wei ngʼwenekele, unzunilije, uyo hu moyo gwane: Uyo nali natogihve ikale na nene, anambilije ha ngʼwanya gwako mu butungwa wa evangeli: Aliyo natatogilwe kwita mhayo bebe utazunije, giki, wizangholo wako buleke kubiza wa buhadiki, aliyo bubize wa kutogwa ngʼwenekele. Iki hamo kulwa mhayo uyo akakomanyiwa nangho kakanza, huna abize kihamo nangho shiku welelo: Kufuma haha ati giti nsese, aliyo atindile nsese, haha ali ndugu ntogwa no kuli nene, aliyo kuli bebe kutinda no, mu mili na muli Seba. Aliyo lulu, ulu unibala ndi ngʼwiyo, ngʼwegelejage giti nene. Aliyo ulu wakenagulile mhayo gose kuli bebe, nulu ulu ali na bugasa kuli bebe, nahene ububalile kuli nene; Nene Paulo nandika iyi na nkono gwane ngʼwenekele, nene nalabukuula: aliyo natukutondaga bugasa ubo uli naho kuli nene, wene bebe ngʼwenekele. Ali chene, ndugu wane, leke nabone buyegi muli bebe muli Seba: uyifuje ngholo yane muli Kristo. Nakwandikila nakusanije bulyehu wako: namanile giki, ukwita na kutinda iyo nalihaya. Na hangi, unilongeje numba ya kushikila mo: iki nalisagilwa kushoshiwa ku bingʼwe hangi kulwa kulomba kwingʼwe. Epafra, u ntungwa ngʼwichane muli Kristo Yesu, wakugisha; Na Marko na Aristarko na Dema na Luka, a batumami bichane. Kigongo cha Seba wiswe Yesu Kristo kibize hamo na moyo gwako. Amina. Mu mapande mingi na mu nzila ningi Mulungu, mu shiku ja kale, waalungalungaga ku bakulugenji mu bahangi, Uyo mu mhelo ya shiku iji waalungalunga na biswe muli Ngʼwana wakwe, Ngʼwenuyo waantuula ho kubiza ngʼwingiji wa shinhu shose, hangi muli Wei akabeja si jose; Uyo Ngʼwene kwaka kwa ikujo lyakwe, hangi ali suso ya bu-Mulungu wakwe gitumo ali, hangi akumiichaga shinhu shose kulwa mhayo gwa budula wakwe, Uyo aho wali wamala kubeja kegeje ka shibi shiswe Wei ngʼwenekele, wiigasha ku nkono gwa bulyo gwa Butale wa magaka ngʼwigulu; Waabejiwa wabakilile no bamalaika, iki wiingila mu lina lya ikujo kutinda boi. Iki Mulungu akangʼwila malaika nani nulu lukangala lumo giki, Bebe uli Ngʼwana wane, Nene nakubyalaga Bebe lelo iyi? na hangi giki, Nene nakubiza Ise kuli Wei, nanghwe akubiza Ngʼwana kuli Nene? Na hangi aho wali wenha Ngʼwana ntangi mu si, uhaya giki, Bamalaika bose ba Mulungu banamye. A bamalaika waabahaya giki, Ubabeja bamalaika bakwe kubiza mioyo, na batumami bakwe kubiza lulali lwa moto: Aliyo Ngʼwana unghaya giki, Isumbi lyako lya butemi, Ee Mulungu, lyene lya welelo na welelo: nanga gwa butungilija gwene nanga gwa butemi wako. Bebe ukabutogagwa butungilija, hangi ukabukolagwa buhunga; kulwa nguno iyi Mulungu, Mulungu wako, wakwitiilile Bebe maguta ga buyegi kutinda biyo. Hangi giki, Bebe Seba, kwandia na kwandia ukatuula ho musingi gwa si, igulu nalyo lili milimo ya makono gako. Shenisho shilashila; aliyo Bebe ukubizikala ho; nasho shose shilakuluhala giti kizwalo; Hangi ulashilinga giti ngʼwenda gwa kwigumiila, nasho shilagaluchiwa; aliyo Bebe uli gitumo uli, na miaka yako italakalika. Aliyo Wei akangʼwila malaika nani nulu lukangala lumo giki, Igashaga ku nkono gwane gwa bulyo kushisha nubatuula banishi bako kubiza ipandilo lya magulu gako? Angu, benabo bose bati mioyo ya butumami, iyatungʼwa kubinhilija benabo abahaya kubiza bingiji ba bupiji? Kulwa nguno iyi shitwigelile kuyilanghana kutinda no mihayo iyo tuyigwa, tutizuyibitiila nulu kamo. Iki ulu mhayo ugwaahayiwa na bamalika gwali ndimu, na buli busobya na buli bakitigwa wali winhiwa nsango ugwigelile, A biswe tulapila kinahe, ulu tutudilila bupiji butale giti ubu? Ubo wali wandia kuhayiwa na Seba, na waadimiwa ku biswe na benabo abigwile; Mulungu nanghwe ukanila hamo nabo mu shimanikijo na sha kukumya, na mu shitile sha budula shingi na shingi, na mu kagabanhije ka Moyo Ngʼwela, gitumo atogilwe Wei ngʼwenekele. Iki ku bamalaika atisugigije si iyahaya kwiza, iyo tukuyihayaga. Aliyo umo akakanila hape halebe, uhaya giki, Munhu ali ki, Bebe ungʼwizukwe? nulu ngʼwana wa munhu nanghwe ki, Bebe ungenihe? Bebe ukangʼwita ndo, akililwe na bamalaika ikanza ido; waanzwika ngikili ya ikujo na kukumilijiwa, waantuula ho kushisuga Shitwa sha makono gako; Waashisugija shose hasilili ya ma gula gakwe. Na kulwa nguno akashisugija shose hasilili yakwe, atashilekelaga kinhu nulu kimo ikitasugijiwe. Aliyo tutali kubona shinhu shose shisugigije hasilili yakwe. Aliyo twamona Yesu Uyo wali witwa akililwe na bamalaika ikanza ido, kulwa nguno ya kuluhaluhiwa kwa kucha, waazwalichiwa ngikili ya ikujo na kukumilijiwa; giki, kulwa kigongo cha Mulungu shingʼwigelile kuloja kucha kulwa buli munhu ose. Iki yali ingʼwigelile Wei, Uyo shinhu shose shili ho kulwakwe, hangi shinhu shose shabiza ho muli Wei, aho wenha bana bingi ngʼwikujo, kunshikanya Ntongeji ntale wa bupiji wabo mu kuluhaluhiwa. Iki Uyo akwejaga na benabo abakwejiwagwa bose bali ba muli umo: kulwa mhayo uyu Wei atudingʼwa minala kubitana baduguye, Uhaya giki, Nakukomela lina lyako ku badugu bane. Nakukwimbila mu kulumba mugati ya kwibilinga. Na hangi giki, Nakubyunsanya Wei. Na hangi giki, Lolaga, Nene ndi ho na bana abo Mulungu waaninha: Nahene iki bana busangijiwa mu mili na mininga, Wei nanghwe giko ushidima isho giki, kulwa kucha ansupye uyo walali na budula wa kucha, ngʼwene Shetani; Hangi abataligule abo bose baadimagwa mu busese kulwa kogoha kucha shiku jose ja bupanga wabo. Iki walatukisola kitungilwe cha bamalaika aliyo akasola bubyile wa ngʼwa Abrahamu. Kulwa iyo shali shingʼwigelile Wei kwikolanijiwa na baduguye mu mihayo yose, giki, abize ngabiji ntale wa kuchila kigongo na ngʼwishigwa mu mihayo ya kuli Mulungu, ite kihongelo kulwa shibi sha banhu. Iki Wei ngʼwenekele wali uluhiwa na kugengʼwa, wadula kubaguna abakugemagwa. Kulwa iyo, badugu bela, abadimanije mu kwitanwa kwa ngʼwigulu, ngʼwudedekanyagi Ntungʼwa na Ngabiji ntale wa kutambula kwiswe, ngʼwene Kristo Yesu; Uyo wali ngʼwishigwa kuli Ngʼwenuyo waantuula ho, gitumo Musa nanghwe walali ngʼwishigwa mu numba yakwe yose. Iki Wei waabalwa igelelilwe ikujo itale kutinda Musa, gitumo uyo uzenga numba ali na ikujo itale kutinda numba: Iki buli numba yaazengwra na munhu, aliyo uyo waazenga shinhu shose ngʼwene Mulungu. Na Musa nghana walali ngʼwishigwa mu numba yakwe yose giti nonja, abize bukaniji wa ku mihayo iyo iyali ya kuhayiwa hanuma; Aliyo Kristo ali ngʼwishigwa giti ngʼwana ntale wa mu numba yakwe; nayo numba yakwe ha biswe, ulu tukumiila bugimu wiswe na kukumilija kwa kwisagilwa kwiswe kushisha ku nghalilo. Kulwa iyo, gitumo Moyo Ngʼwela waahaya, giki, Lelo ulu mukwigwa ilaka lyakwe, Mutizuganghanaja ngholo jingʼwe, giti ngʼwikanza lya bulubi, gitumo mu lushiku lwa kugengʼwa mu bu: Aho bakulugenji bingʼwe baanigemaga, bunipima, nabo bubona shitile shane miaka makumi ane. Kulwa iyo nali nusatiwa na kibyalilwe chenicho, nuhaya giki, Bakahubaga gwa mu ngholo jabo, na nzila jane batajimanile; Gitumo nali nilahila mu bupelanu wane giki, batalingila mu kwifula kwane. Ilanghanagi, badugu, itizubiza muli munhu ose wa mu bingʼwe ngholo ya bubi ya butuzunya ya kutala kwinga kuli Mulungu mpanga: Aliyo ikomelejagi benekele na benekele buli lushiku, aho itali yuhayiwa giki, Lelo; atizuganghanajiwa nulu umo wa mu bingʼwe na bulembalembi wa shibi; Iki twabiza abadimanile hamo na Kristo, ulu tubumiila wandijo wa kusanya kwiswe na budimu kushisha ku nghalilo: Aho yuhayiwa giki, Lelo ulu mukwigwa ilaka lyakwe, mutizuganghanaja ngholo jingʼwe, gitumo ngʼwikanza lya bulubi. Iki banani, aho bali bigwa, bunubya? Bali bati abo bose abali bufuma Misri hamo na Musa? Na hangi ni banani aho wali usatiwa nabo miaka makumi ane? Bali bati abo abali bakenagula, abo mibimba yabo yali yugwa mu bu? Hangi banani abo wali ubalahilila giki, batalingila mu kwifula kwakwe, ulu hali bati abo abali bulema kwigwa? Na biswe twabona giki, bali batudula kwingila mo kulwa butuzunya wabo. Kulwa iyo, iki kwisagija kwa kwingila mu kwifula kwakwe kutali kuli ho, togohe atizigela umo wa mu bingʼwe uyo walebaga kwingila mu kwifula kwakwe. Iki nghana na biswe twali tulomelwa evangeli giti boi: aliyo mhayo uyo bali bigwa gwali gutubabelela, iki gwali gutusanjiwa na kuzunya mu benabo abali bugwigwa. Iki biswe aba twazunije twingila mu kwifula kwenuku; gitumo akahaya giki, Gitumo nali nilahila mu bupelanu wane giki, batalingila mu kwifula kwane; aliyo milimo yali yamalwa kufuma kubumva kwa si. Iki ngʼwipande limo akaluhaya lushiku lwa mpungati giki, Mulungu akifula lushiku lwa mpungati mu milimo yakwe yose; Na ngʼwipande ili hangi giki, Batalingila mu kwifula kwane. Kuhva iyo, gutali guli ho mhayo uyu giki, bali ho abigelile kwingila mo, na benabo abali bulomelwa evangeli kwandia bali batingila mo kuhva bukitigwa wabo. Huna utuula ho hangi lushiku lulebe, uhaya muli Daudi hanuma ya ikanza itale giki, Lelo, gitumo yali yuhayiwa kale giki, Lelo, ulu mukwigwa ilaka lyakwe, mutizuganghanaja ngholo jingʼwe. Iki ulu Yoshua ni wali ubinha kwifula, ni walatahayile lushiku lungi hangi. Kulwa iyo kwifula kutali kuli ho ku banhu ba Mulungu. Iki uyo wingila mu kwifula kwakwe, ngʼwene wamala kwifula mu milimo yakwe, gitumo Mulungu akifula mu yakwe. Kulwa iyo, tukomelage kwingila mu kwifula kwenuko, munhu ose atizugwa mu kwikola kwa bukitigwa giti ubo. Iki mhayo gwa Mulungu guli mpanga na gwa nguzu; hangi guli na buugi kutinda lilushu lya bungi bubili, gukuchimaga kushisha kukomanya bupanga na moyo, hangi bulungilo na mhongo, hangi guli ngʼwangu kugitegeleja maganiko na iyo ngholo itogilwe. Hangi kiti ho kisengʼwa ikibisile mu miso gakwe: aliyo shinhu shose shili duuhu, hangi shakundulwa mu miso ga Ngʼwenuyo, Uyo ali nonja wa mihayo yiswe. Kulwa tuli na ngabiji ntale, uyo wiingila ngʼwigulu, ngʼwene Yesu, Ngʼwana wa Mulungu, tumiilage no kutambula kwa kuzunya kwiswe. Iki tuti na ngabiji ntale Uyo atudula kutusatwa mu mabugokolo giswe: aliyo Uyo wali ugengʼwa mu mihayo yose giti biswe, aliyo walati na shibi. Kulwa iyo, twegele na bugimu kwisumbi lya kigongo, twinhiwe kuchilwa kigongo, hangi tuhone kigongo cha kutugunana ngʼwikanza lya kugayiwa. Iki buli ngabiji ntale uwasolwa kufuma mu banhu utuulwa ho kuhva banhu mu mihayo ya kuli Mulungu, afunye sha kwinha na shitambo kuhva shibi: Uwadula kubachila kigongo batumana na bahubi, iki wei ngʼwenekele apindilwe na mabugokolo; Na kulwa nguno iyo shingʼwdgelile kufunya kuhva ngʼwenekele shitambo sha shibi, gitumo ufunya kulwa banhu. Na ati ho munhu wiyinha ngʼwenekele ikujo ili, aliyo uyo uwitanwa na Mulungu, giti Aroni. Giko hangi Kristo walatikumilija ngʼwenekele kubiza ngabiji ntale, aliyo Ngʼwenuyu uwali ulungalunga nanghwe giki, Bebe uli Ngʼwana wane, lelo nakubyalaga; Gitumo uhaya hangi ngʼwipande lingi giki, Bebe uh ngabiji wa shiku jose wa mu mbika ya ngʼwa Melkizedeki. U Wei mu shiku ijo aho walali mu mili, unomba na kungʼwikumbilija hamo na kulila kwa nguzu na shisoji Uyo uwali na budula kumpija mu kucha, na wali wigwiwa kulwa kogoha kwakwe, Nulu ali Ngʼwana, nahene wali wiyiga bulyehu kulwa mihayo iyo wali uluhiwa; Nanghwe aho waamala kushikanyiwa, ubiza mfumiilo ya bupiji wa welelo ku bose abungʼwigwa, Wilikwa na Mulungu kubiza ngabiji ntale mu mbika ya ngʼwa Melkizedeki. U ngʼwenuyo tuli na mihayo mingi ya kunghaya, na milambu kufubolwa, iki muli na matu ga ndemakwigwa. Iki haha shingʼwigelile bingʼwe kubiza balangi, aliyo ibelile mukobelwe munhu kumulanga hangi wandijo wa kalangile ka mihayo ya Mulungu; ngʼwabiza abo gabigelile mabele aliyo shiliwa sha nguzu yaya. Iki munhu ose uyo akatumamilaga mabele atamanile mhayo gwa butungilija; iki ali ngʼwelele. Aliyo shiliwa sha nguzu shene sha banhu abakulile, abo masala gabo, kulwa kutumamilwa, gumanilijiwa kulekanya ya wiza na ya bubi. Kulwa iyo, tuleke kalangile ka kwandia ka ngʼwa Kristo, tuhahalile kushika ku bushikanu, tutizutuula ho hangi musingi gwa koya mu Shitwa shichile, na kuzunya kuli Mulungu, Na kulanga kwa kubatija, na kutuulihva makono, na kujuchiwa kwa bafu, na nsango gwa welelo na welelo. Na iyi tukwita, ulu Mulungu utuzunilija. Iki abo abamala kwelelwa, na kuloja cha kwinhiwa cha ngʼwigulu, na bitwa basangijiwa ba Moyo Ngʼwela, Na buloja mhayo gwa wiza gwa Mulungu na budula wa ikanza lyuhaya kwiza, Ulu butala kwinga mu yeniyo, itudulika kubadoganya bupya hangi kushika mu koya; iki bushokela kunkoma hangi Ngʼwana wa Mulungu kubo benekele, na bandimya minala hape. Iki si ikangʼwaga mbula iyi ikatulaga ho nghangala ningi, na ikazwishaga makubi agabigelile benabo abakayilimaga, ikinhagwa lubango ulufuma kuli Mulungu: Aliyo ulu yuzwisha mihwa na masaka ga bubi, yulengʼwa lulu, nayo ili hihi kuzungʼwa; ku nghalilo yaho kupemva. Aliyo nahene, batogwa, nulu twahaya giko, tungʼwiganikila bingʼwe mihayo ya wiza kutinda yeniyo, yene mihayo iyudimana na bupiji: Iki Mulungu ali ntungilija, atibaga milimo yingʼwe, na butogwa ubo ngʼwali ngʼolecha mu lina lyakwe, iki ngʼwali ngʼubinhilija a bela, ni gisi mutali mubinhilija. Na biswe tutogilwe giki, buli munhu ose mu bingʼwe oleche bukomezu wenubo mu bushikanu wa kwisagilwa kushisha ku nghalilo. Muleke koloha, aliyo mubize balondeji ba benabo abingila mu kwisagijiwa kulwa kuzunya na kwiyumilija. Bazunya bakomelejiwa na kwisagija kwa Mulungu Iki Mulungu aho akangʼwisagija Abrahamu, iki walati ho ungi ntale kutinda Wei wa kunahilila, wiilahilila Wei ngʼwenekele, Uhaya giki, Nghana kusungulila lubango, nakukusungulila lubango, na kongeja, nakukongeja bebe. Na giko, iki wali wiyumilija, winhiwa kwisagijiwa. Iki banhu bakulahililaga ku batale: na kilahilo cha kudimya mhayo chene imalilo lya halali yose mu banhu. Mu mhayo uyu Mulungu, iki walatogilwe no kubolekeja bingiji ba kwisagijiwa giki, longʼwe yakwe itagalukaga, utuula ho kilahilo kuyidimya; Giki, kulwa mihayo ibili iyitagalukaga, mu iyo Mulungu walatudula kuhaya bumama, tubize na butimbyangholo wa nguzu, biswe abamala kupelela kudima kwisagilwa ukwatuulwa ho ku butongi wiswe: Uko tuli nako giti nanga ya moyo, ya gete gete na ndimu na iyingilaga mu iyo ili mo mugati ya iselema; Umo Yesu wiingila mo kulwa biswe, u ntongi wiswe, waabiza ngabiji ntale wa welelo na welelo wa mbika ya ngʼwa Melkizedeki. Iki Melkizedeki ngʼwenuyo, ntemi wa Salemi, ngabiji wa Mulungu ali higulya no, uyo wali umanhya na Abrahamu aho walashokile kufuma mu kubulagwa kwa batemi, na unsungulila lubango, Kuli wei hangi Abrahamu ungʼwinha imo ya ngʼwikumi ya shose; (na kunshomeleja, kwandia walali Ntemi wa butungilija, na hangi walali Ntemi wa Salemi, makulu gaho giki, Ntemi wa mhola; Walati na ise nulu nina, nulu walati na luganda, walati na kwandia kwa shiku, nulu nghalikijo ya bupanga, aliyo wikolanijiwa na Ngʼwana wa Mulungu); akikalaga ngabiji welelo bose. Nahene, idedekanyagi butale wa munhu uyo gitumo walali, uyo Abrahamu u nkulugenji wiswe akangʼwinha imo ya ngʼwikumi ya sha kusonzwa. Na nghana bana ba Lawi abo abinhiwa nimo gwa bugabiji, bali na kilagilo kutwala imo ya ngʼwikumi ya banhu gitumo shilagilo shuhaya, bene bali badugu babo, nulu bali bufuma mu nkimbili gwa ngʼwa Abrahamu: Aliyo ngʼwenuyo, luganda lwakwe lutubalwa kufuma mu benabo, akanukula imo ya ngʼwikumi ya ngʼwa Abrahamu, na unsungulila lubango uyo uwalali na kwisagijiwa. Mhayo uyu guti na kuhalalilwa giki, ndo akusungulilagwa lubango na ntale. Na kunu banhu abakuchaga banukula imo ya ngʼwikumi; aliyo uko, munhu uyo wakanilwa giki, ali mpanga. Hangi nadula kuyihaya giki, Lawi nanghwe uyo waanukulaga imo ya ngʼwikumi, akafunya imo ya ngʼwikumi muli Abrahamu. Iki wei walatali mu nkimbili gwa ngʼwa gukuye aho Melkizedeki umanhya nanghwe. Nahene, ulu bushikanu ni wali bubiza ho mu bugabiji wa ki-Lawi (iki mu busugi ubu banhu bali binhiwa shilagilo), kulwa kinahe igelile ngabiji ungi kubuka hanuma, wa mbika ya ki-Melkizedeki, atabalilwe wa mu mbika ya ngʼwa Aroni? Iki bugabiji aho bugaluchiwa, shigelile shilagilo nasho shigaluchiwe. Iki Uyo wali uhayiwa mihayo iyi ali wa luganda lungi, nulu kuduhu munhu wa luganda ulo uwali winhilija ha ngʼwalilo. Iki ili hape giki, Seba wiswe akafuma mu Yuda, luganda lwenulo Musa walataluhayile mhayo gwa bugabiji. Na iyo tukuhayaga ili hape kutinda, giki, wabuka ngabiji ungi wa mbika ya ki-Melkizedeki, Uyo atatuulilwe mu bugabiji mu kalagilile ka ki-mili, aliyo mu budula wa bupanga butushila: Iki yakanilwa kuli Wei, Bebe uli ngabiji wa welelo na welelo, wa mbika ya ki-Melkizedeki. Iki kuli ho kwinjiwa kwa shilagilo ishali shutonga kulwa nguno shali shiti na nguzu nulu solobo. Iki shilagilo shali shitushikanya mhayo gose; aliyo ha lwande lwasho kwingijiwa kwisagilwa kwa wiza kutinda: mu uko twangʼwegela Mulungu. Hangi gwali gutitwa ulu iti kulwa kilahilo: Iki abo bali bitwa bagabiji bali batulahililwa; aliyo Ngʼwenuyu wiitwa na kilahilo cha Ngʼwenuyo uwali wangʼwila giki, Seba akalahila, nanghwe atugaluka, Bebe uli ngabiji wa welelo na welelo, (wa mbika ya ki-Meikizedeki.) Kulwa iyo Yesu wabizile ngʼwipiga ibili wa ilagane ilili lya wiza kutinda. Nabo bali bubiza bagabiji bingi iki kulwa kucha bali bujijiwa kushinga ho. Aliyo Wei, kulwa akwikalaga mpanga shiku jose, ali na bugabiji ubutingaga ho. Kulwa iyo Wei wadula kubapija gete abungʼwegela Mulungu muli Wei, iki akwikalaga mpanga shiku jose kubalombela. Iki itubelelile biswe kubiza na ngabiji ntale giti Wei, Uyo ali ngʼwela, ati na buhwiganu, ati na kilingo, ukomanyiwa na abali na shibi, hangi ugunguhiwa kukilila igulu; Uyo ati na nguno buli lushiku giti bagabiji benabo kufunya shitambo, kwandia kulwa shibi shakwe sha ngʼwenekele, na hanuma kulwa shibi sha banhu: iki mhayo uyu wali wita lukangala lumo aho wali wiyinha ko ngʼwenekele. Iki shilagilo shubatuula ho banhu kubiza bagabiji batale abali na bugokolo; aliyo mhayo gwa kilahilo, uyo ugwali gwiza hanuma ya shilagilo, gwantuula ho Ngʼwana, ngʼwene nshikanu wa welelo bose. Ali lulu, mu mihayo iyo tulihaya, mhayo ntale guli giki, Tuli na ngabiji ntale Uyo igashije ku nkono gwa bulyo gwa isumbi lya kitemi lya Butale wa magaka ngʼwigulu, Ntumami ngʼwipande lyela na wa ihema lya nghana, ilo Mulungu waalikoma, munhu yaya. Iki buli ngabiji ntale watuuhva ho kufunya sha kwinha na shitambo: kulwa iyo shingʼwigelile Ngʼwenuyo nanghwe abize nasho sha kufunya. Nahene, ulu ni ali mu si, ni atubiza ngabiji yaya, iki bali ho abakafunyaga shitambo gitumo shilagilo shuhaya; Abashitumamila shikolile, na nengeji gwa shinhu sha ngʼwigulu, gitumo Musa wali ulagilwa na Mulungu aho wali uhaya kubeja ihema: iki akahaya giki, Ilanghanage, ukabeje, uhwabe shinhu shose gitumo olekejiwa mu lugulu. Aliyo hambunyu Wei wiinhiwa kwinhilija kwa wiza kutinda, iki ali Nsangija wa ilagane lya wiza kutinda, ilyiimilijiwa na kwisagija kwa wiza kutinda. Iki ilagane lyenilo lya kwandia ulu ni lyali lyubiza liti na kilingo, ni gwali gutukowa ngʼwanya gwa lya kabili. Iki akabadonhola uhaya giki, Lolagi, shiku jiliza, uhaya Seba, nakubeja ilagane ipya na numba ya Israeli na numba ya Yuda; Italabiza gitumo ilagane ilo nakabeja na bakulugenji babo, lushiku lwene aho nakabadima makono kubatongela kwinga mu si ya Misri; iki bali batushinga ngʼwilagane lyane, na Nene nane nali natubadilila, wahaya Seba. Iki ili lyene ilagane ilo nakubeja na numba ya Israeli, giki, Hanuma ya shiku jenijo, wahaya Seba, nakutuula shilagilo shane mu maganiko gabo, na mu ngholo jabo nakushandika: na Nene nakubiza Mulungu kubo, nabo balabiza banhu kuli Nene: Nabo batalilanga buli munhu na nzenganwa ngʼwiye na buli munhu na nduguye, kuhaya giki, Managa Seba: iki bose balanimana, kufuma kuli ndo kushisha kuli ntale mubo. Iki nakubachila kigongo buhunga wabo, na shibi shabo natalishizukwa hangi. Kulwa wahaya giki, Ilagane ipya, waalyita i lya kwandia kubiza ikulukulu. Iki icho ichaabiza kikulukulu, chakuluhala, chene kili hihi kushila. Na nghana ilagane lya kwandia nalyo lyubiza na kitile ka kalamije, na hangi ipande lyela lyalyo mu si. Iki lyubejiwa ho ihema, i lya kwandia mulyo shikala mo tala, na meza, na migati iyufunyiwa kuli Mulungu; i lyene litanwa ipande lyela. Na ku mbele ya iselema lya kabili, ihema ilitanwa Lyela lya wela: Ilyubiza na kizukijo cha ngazu cha zahabu, na isandiko lya ilagane ilikundikigije hose hose na zahabu, mugati yalyo shikala mo nungu ya zahabu iyili na emanu, na nanga gwa ngʼwa Aroni ugwali gufuluma, na mabalala ga mawe ga ilagane. Na higulya yalyo makerubi ga ikujo nengeji gwago gulikundikija isumbi lya kuchila kigongo; mihayo yeniyi tutudula kuyihaya gumo gumo i haha. Nahene aho shinhu isho shali shumala kubejiwa, bagabiji bubingila ngʼwihema lya kwandia shiku jose kushikiligija kalamije. Aliyo ngʼwihema lya kabili akingilaga ngabiji ntale wiyene, lukangala lumo buli ngʼwaka, nanghwe walatingila ulu ati na mininga ayo ugafunya kulwakwe ngʼwenekele, na kulwa buhubi wa banhu: Moyo Ngʼwela olecha mhayo uyu giki, nzila ya kwingila ngʼwipande lyela yali itali kukundulwa, aho ihema lya kwandia lyikala litali limilile; I lyene kagemelelo ka ikanza lya haha; mulyo shikafunyiwagwa shakwinha na shitambo, ishitudula kunshikanya munhu namya, mu wiyanguji wakwe. Shenisho shili sha kimili duhu, shiliwa, na kungʼwa, na kogele kangi na kangi, ishali shulagilwa kushisha ngʼwikanza lya kudoganya mipya. Aliyo Kristo wamala kwiza ngabiji ntale wa mihayo ya wiza iyuhaya kwiza, ngʼwihema ilili itale na ishikanu kutinda, ilitabejiwe na makono, makulu gaho giki, iliti lya kisengʼwa iki, Nulu iti kulwa mininga ga mbuli na ndama, aliyo kulwa mininga gakwe ngʼwenekele akingila lukangala lumo gwike ngʼwipande lyela, iki wamala kubona bukomoji butushila. Iki ulu mininga ga mbuli na ga nzagamba, na mabu ga ndogosa, agasesebelwa ha basoso, gubeja bashike mu kwejiwa kwa mili: A mininga ga ngʼwa Kristo, Uyo kulwa Moyo wa butushila akiyinha ko ngʼwenekele ati na kilingo kuli Mulungu, gatutinda no kweja wiyanguji wingʼwe mu Shitwa shichile muntumamile Mulungu mpanga? Kulwa mhayo uyu Wei ali Nsangija wa ilagane ipya, giki, kucha aho kwamala kwigela kulwa nguno ya kukomola bukenaguji wa hasilili ya ilagane lya kwandia, abo abitanwa banukule kwisagija kwa wingiji ubutushila. Iki ilagane lya wingiji ulu lili ho, shigelile kubiza ho kucha kwa ngʼwenuyo wali ulibeja. Iki ilagane lya wingiji lili na nguzu aho kubiza ho kucha kwa munhu; iki liti na nguzu yaya aho uyo uwali ulibeja atali mpanga. Kulwa iyo, ilagane lya kwandia nalyo lyali litandiwa ulu mininga gali gati ho. Iki aho buli kilagilo chose chali chumala kuhayiwa na Musa ku banhu gitumo shilagilo umo shuhaya, udima mininga ga ndama na ga mbuli, kihamo na minzi, na boya waza wa ngholo, na husopu, ugasesebela ha kitabo chenekele na ku banhu bose, Uhaya giki, Ayo gene mininga ga ilagane ilo Mulungu wamulagila. Na hangi ihema na shiseme shose sha kwinhilija, shene ushisesebela na mininga giko. Mu shilagilo hihi shinhu shose shejiwa na mininga; na ulu mininga gatiitwa kulekejiwa kuti ho. Kulwa iyo sha kwikola sha shinhu isho ishili ngʼwigulu shali shigelile kwejiwa na shitambo shenisho; aliyo shinhu sha ngʼwigulu gete, shigelile kwejiwa na shitambo ishitindile shenishi. Iki Kristo walatingila ngʼwipande lyela ilyali lyubejiwa na makono, ilili kigemelelo cha lyenilo lya nghana; aliyo Wei wiingila ngʼwigulu gete, ilonge haha mu butongi wa Mulungu kulwa biswe. Yesu akiyinha ko ngʼwenekele kubiza kitambo kulwa shibi lukangala lumo gwike Hangi iti giki, shingʼwigelile iyinhe ko nghangala ningi, gitumo ngabiji ntale akingilaga ngʼwipande lyela buli ngʼwaka na mininga gati gakwe ngʼwenekele; Ulu ili chene, ni yali ingʼwigelile kuluhiwa nghangala ningi kufuma kubumva kwa si: aliyo haha wilongile lukangala lumo ku nghalilo ya makanza, inje shibi kulwa kwiyinha ko ngʼwenekele kubiza kitambo. Na gitumo banhu batuulilwa ho kucha lukangala lumo, na hanuma yaho, nsango; Giko Kristo nanghwe wali winhiwa ko lukangala lumo kubucha shibi sha bingi, lukangala lwa kabili alilonga ati na shibi, ku benabo abanindilila kulwa bupiji. Iki shilagilo shene nengeji gwike gwa mihayo ya wiza iyuhaya kwiza, shiti lususo lwayo nghana, kulwa iyi shitambo shenisho shitudula na hado kubashikanya benabo abakwegelaga kushitambila gwa gwa gwa buli ngʼwaka. Ulu ni ili giko, angu ni bali batoya kushifunya? Iki abalamya, aho bamala kwejiwa lukangala lumo, ni bali batudidohiwa hangi wiyanguji wabo na shibi. Aliyo mu shitambo shenisho kuli ho kwizukija kwa shibi buli ngʼwaka. Iki itudulika mininga ga nzagamba na ga mbuli kwinja shibi. Kulwa iyi aho wiza mu si uhaya giki, Shitambo na sha kufunyiwa utashitogilwe, aliyo wanibegegije mili; Kufunya kwa kupemva na kufunya kwa shibi utuyejiwagwa nasho. Hunaho Nene nali nuhaya giki, Lolaga, (mu bulingilo wa kitabo nandikililwe giki,) nizaga kwita iyo utogilwe, Mulungu. Aho wamala kuhaya iyi giki, Shitambo na kufunya na kufunya kwa kupemva na kufunya kwa shibi utushitogagwa, nulu utuyejiwagwa nasho (isho ishafunyiwagwa gitumo kalagilile ka shilagilo kali), Hunaho akahaya, Lolaga, nizaga kwita iyo utogilwe Bebe. Wali winja i cha kwandia, akidimye i cha kabili. Mu iyo atogelilwe Wei tweejiwa kulwa kufunyiwa kwa mili gwa ngʼwa Yesu Kristo lukangala lumo gwike. Hangi buli ngabiji akwimilaga buli lushiku akinhilijaga na akafunyaga shitambo shenisho duhu nghangala ningi, isho ishitudula na hado kwinja shibi. Aliyo Ngʼwenuyo, aho waamala kufunya kitambo kimo cha welelo na welelo kulwa shibi, wiigasha ku nkono gwa bulyo gwa Mulungu, Kufuma henaho akulindilaga kushisha banishi bakwe batuulwe kubiza ipandilo lya magulu gakwe. Iki kulwa kufunya kumo waabashikanya welelo bose benabo abakwejiwagwa. Na Moyo Ngʼwela nanghwe akutukanilaga; iki hanuma ya kuhaya giki, I lyene ilagane ilo nakubeja nabo hanuma ya shiku jenijo, uhaya Seba; nakushituula shilagilo shane mu ngholo jabo, na mu maganiko gabo nakushandika; Na shibi shabo na buhunga wabo natalashizukwa hangi na hado. Iki aho kuli ho kulekejiwa kwa ishi, kutalabiza ho hangi kufunya kulwa shibi. Kulwa iyi, badugu, iki tuli na bugimu wa kwingila ngʼwipande lyela kulwa mininga ga ngʼwa Yesu, Mu nzila iyo waatubegeja mhya na mhanga, iyubita ngʼwiselema i lyene mili gwakwe; Na hangi tuli na ngabiji ntale uwasuga numba ya Mulungu; Twegele na ngholo ya nghana mu bushikanu wa kuzunya, na ngholo jiswe jaasesebelwa twinge mu wiyanguji wa bubi, na mibili yiswe yojiwa na minzi mela, Tumiilage kutambula kwa kwisagilwa kwiswe kutizulelengeta; iki Wei ali ngʼwishigwa uwatwisagigije; Hangi twidedekanyagi benekele na benekele, twilishe nghali mu butogwa na mu Shitwa sha wiza; Tutizuleka kwibilinga hamo, gitumo chimile cha bangi umo kili, aliyo twikomeleje benekele na benekele; kutinda no, iki ngʼwabona lushiku lwenulo lukwegelaga. Iki ulu twita shibi na makala hanuma ya kuwanukula bumani wa nghana, kitusaga ho hangi kitambo kulwa shibi, Aliyo kulolela kwa lyogohya kwa nsango, na bukali wa moto ubulabalya banishi. Uyo wali udalaha shilagilo sha ngʼwa Musa wali ucha atuchilwa kigongo kulwa bukaniji wa bakaniji babili nulu badatu: Ngʼwiganika kinahe, gutangʼwigelile nsango ntale no kutinda, uyo waampanda Ngʼwana wa Mulungu na magulu gakwe, hangi ubala mininga ga ilagane ayo wejiwa nago giki, gati kinhu, hangi undalaha Moyo wa kigongo? Iki tumanile Wei uwaahaya giki, Kuhwima njigu kwene kwane, Nene nakukuula. Na hangi giki, Seba ala-balekanya nsango banhu bakwe. Guli mhayo gwa boba no kugwa mu makono ga Mulungu Uyo ali mpanga. Aliyo izukagwi shiku ja kwandia aho ngʼwali ngʼwandia kwelelwa, ngʼwali ngʼwiyumilija mu wilwisha butale wa kuluhiwa: Ipande limo ngʼwali ngʼwilolelwa mu kusondagulwa na kuluhiwa; na ipande lingi ngʼwali ngʼwisangija na benabo abali bitwa giko: Iki ngʼwali ngʼubasatwa benabo abali butungwa, hangi mukazunya na kuyega kusonzwa shikolo shingʼwe, iki mumanile bingʼwe benekele giki, muli na sabo ja wiza kutinda ngʼwigulu, i ja kushinga ho. Kulwa iyi mutizuponya bugimu wingʼwe, ubo ubuli na mhela ningi. Iki shingʼwigelile kubiza na kwiyumilija giki, aho ngʼwamala kwita iyo Mulungu atogilwe, mubone iyo ngʼwisagijiwa. Iki kasaga ho kakanza kado gwike, U ngʼwizi aliza, na ataladila. Nahene ntungilija alikala mpanga kulwa kuzunya: aliyo uwishishimulwa, bupanga wane buti na buyegi nanghwe. Aliyo tuti benabo abishishimulwa kushika mu kujimila, aliyo tuli benabo abali na kuzunya kushika mu bupiji wa bupanga. U kuzunya kwene kukadimyaga gete iyo tukisagilagwa, hangi kukuyitendyaga nghana iyo itabonagwa. Iki mu kuzunya a banamhala ba kale bali bukanilwa. Kulwa kuzunya twitegeleja giki, si jose jubejiwa na mhayo gwa Mulungu, hu chene ishabonwa shali shitubejiwa kufuma mu isho shilonga hape. Kulwa kuzunya Abeli akafunya kuli Mulungu kitambo cha wiza no kutinda Kaini, muko wali ukanilwa giki, ali ntungilija, Mulungu ushikanila sha kwinha shakwe: mu yeniyo, nulu wamala kucha aliyo atali uhaya. Kulwa kuzunya Enoka akasamiwa atizubona kucha, walatilongile hangi iki Mulungu waansamya: iki aho walatali kusamiwa wali ukanilwa giki, anyegije Mulungu: Aliyo kuzunya ulu kuti ho itudulika kunyeja Wei; iki uyo wiza kuli Mulungu shigelile kuzunya giki, ali ho, na hangi giki, ali ngʼwinhi wa mhela wa benabo abankoba. Kulwa kuzunya Nuhu aho akahugulwa na Mulungu mu mihayo iyi itinilonga, kulwa kungʼogoha Mulungu ubeja ngalaba ya kubapigija ba ha kaya yakwe; kulwa iyo akabalekanya nsango ba mu si, ubiza ngʼwingiji wa butungilija ubufuma mu kuzunya. Kulwa kuzunya Abrahamu, aho akitanwa kwinga kuja kwipande ilo alinhiwa kubiza wingiji wakwe, wigwa; ubuka uja atamanile uko ajile. Kulwa kuzunya ubiza ngeni mu si ya kwisagijiwa, giti mu si iti yakwe, wali wikala mu mahem a kihamo na Isaaka na Yakobo, a bingiji biye ba kwisagijiwa kwenuku. Iki ugulolela nzengo uguli na musingi, nzengi na meja wago ngʼwene Mulungu. Kulwa kuzunya Sara nanghwe akinhiwa nguzu ja kutunga nda aho walali ngikulu, iki wali umona Uyo ungʼwisagija giki, ali ngʼwishigwa. Kulwa iyo bubyalwa na munhu umo, nanghwe walali giti mfu, bingi giti sonda ja ngʼwigulu wingi wabo, na giti seni ja ha ngʼwalo ijitudula kubalwa. Abo bose buchila mu kuzunya, aho bali batali kwinhiwa sha kwisagijiwa, aliyo bali bushibona kule na bushisumbila, butambula giki, bali bali bageni na bashiminzi mu si. Iki abakuhayaga giko bolecha hape giki, bakukobaga si yabo benekele. Na nghana, ulu ni bali buyikumbula si iyo bakinga mo, ni bali bubona ngʼwanya gwa kushoka ko. Aliyo haha bikumva si iyitindile wiza, yene ya ngʼwigulu: kulwa iyo Mulungu atudingʼwa minala kwitanwa Mulungu wabo; iki waababegeja nzengo. Kulwa kuzunya Abrahamu, aho akagengʼwa, ungʼwinha ko Isaaka abize kitambo: nanghwe uyo wali wanukula kwisagijiwa, ungʼwinha ko ngʼwana wakwe uwabyalwa umo wike: Ngʼwene uyo uhayiwa giki, Muli Isaaka bubyile wako bulitanwa: Ubala giki, Mulungu wadula kunjucha nulu kufuma mu bafu; kufuma kwene ungʼwanukula hangi mu kwikola. Kulwa kuzunya Isaaka akabasungulila mbango Yakobo na Esau mu mihayo iyali yuhaya kwiza. Kulwa kuzunya Yakobo, aho uhaya kucha, unsungulila lubango buli ngʼwana wa ngʼwa Yusufu; ulamya asendamilile nanga gwakwe. Kulwa kuzunya Yusufu, aho wali wegela ku ngelo yakwe, uhaya mihayo ya kwinga kwabo bana ba Israeli, ubalagila mihayo ya maguha gakwe. Kulwa kuzunya, Musa aho akabyalwa, ubiswa mieji idatu na babyaji bakwe, iki bumona giki, ali ngʼwana wa wiza; bali batogoha kilagilo cha ntemi. Kulwa kuzunya Musa aho ukula, ulema kwitanwa ngʼwana wa ngʼwana nkima wa Farao; Usola kunyala kihamo na banhu ba Mulungu, kutinda kwiyeja mu buyegi wa shibi kakanza kado: Ubala giki, kusondagulwa kulwa ngʼwa Kristo kwene busabi butale kutinda busabi wa Misri: iki ulolela kwinhiwa mhela. Kulwa kuzunya winga Misri, walatogoha bukali wa ntemi: ukomela giti akumonaga Uyo atabonagwa. Kulwa kuzunya wita pasaka, na usesebela mininga, giki, nyagaja wa ba kwandia kubyalwa atizubakuumya boi. Kulwa kuzunya bakabita mu Nyanza Yaza giti ha si numu: ba Misri nabo bugema kwita giko bungʼwa nhuli bucha. Kulwa kuzunya ndugu ja Yeriko jikagwa aho jamalwa kwipindilwa shiku mpungati. Kulwa kuzunya Rahabu u ngʼwimilizu walatuchila hamo nabo abali batuzunya, iki wali ubegeleja badati mu mhola. Angu, nahaye ki hangi? iki ikanza litunigelaga lya kusombolela nghulu ja ngʼwa Gideoni, na Baraka, na Samsoni, na Yefta, na Daudi, na Samueli, na bahangi: Abo kulwa kuzunya bali bupyena mabutemi, bali bita butungilija, binhiwa sha kwisagija, bumumya milomo ya shimba, Bali bujimya nguzu ja moto, bupila mu buugi wa lilushu, bingi mu bugokolo buguzuhiwa, bubiza ba nguzu mu bulugu, bugapeja mabita ga bashilikale ga bageni. Bakima bali banukula bafu babo abali bujuchiwa: na bangi bali budenyiwa bulema kulekelwa, babone bujuko wa wiza kutinda; Na bangi bugengʼwa mu kwaniilwa na kutulwa, ali chene, mu butungwa na kutuulwa mu jela; Bupondwa mawe, bubutwa na ikeleso, bugengʼwa, bubulagwa na lilushu; buyelayela bazwalile makunza ga ngholo na ga mbuli; bali bagayiwa, buluhiwa, bitilwa ya bubi. Si yali itabigelile, biyungayunga mu matogolo, na mu ngulu, na mu mapilinga na mu machongo ga si. Benabo bose bali bukanilwa giki, bali ba wiza kulwa kuzunya, aliyo bali batanukula kwisagijiwa; Iki Mulungu waatubikila biswe mhayo gwa wiza kutinda, giki, boi batizushikanyiwa ulu iti hamo na biswe. Kulwa iyo na biswe, iki tupindiwa na ilunde itale giko lya bakaniji, tuzule buli kinhu ichatudidohya, na bubi ubututaligija wangu, tupele na kwiyumilija mu kwishiganilwa ukwatuulwa ho ku butongi wiswe, Tunolile Yesu u ntale na nshikilija wa kuzunya kwiswe, Uyo kulwa buyegi ubo wali butuulwa ho ku butongi wakwe, ugwiyumilija nsalaba, udalaha minala, na wiigasha ku nkono gwa bulyo gwa isumbi lya butemi i lya Mulungu. Kulwa iyo ngʼwidedekanyagi Uyo wali wiyumilija mu buhalali butale ubu wali uhalalijiwa na ba shibi, mutizudedeleha na kugwa ngholo mu mioyo yingʼwe. Mutinita bulugu wa kuhangija shibi kushisha kwiita mininga; Hangi ngʼwibile kuganikila ukukulungalungaga na bingʼwe giti na bana, giki, Ngʼwana wane, utizudalaha kutula kwa Seba, nulu utizugwa ngholo aho uhangʼwa nanghwe; Iki uyo Seba antogilwe, hu ngʼwene akuntulaga, nanghwe akuntulaga buli ngʼwana uyo anzunije. Iyumilijagi mu kutulwa; iki Mulungu akungʼwitilaga giti bana; iki ngʼwana ali he, uyo ise atantulaga? Aliyo ulu muti na kutulwa, uko bose bakusangilile, numho muli bana ba nda ya bu, muti bana ba nghana. Hangi, twali na basiswe ba mu mili abali bututula, twali tubakuja: angu, shitatwigelile kutinda kunyehela Siswe wa mioyo, na kwikala bapanga? Iki nghana benabo bali bututula shiku ndo gitumo bali bubona chiza boi benekele: aliyo Wei kulwa solobo yiswe, giki, twisangije mu wela wakwe. Hene, i haha kutulwa kose kutubalwa giki, guli mhayo gwa buyegi, aliyo gwa bupina; aliyo hanuma kutwaja gukubatwagija abo abulangwa nako matwajo ga mhola, gene butungilija. Kulwa iyo gololagi makono aganogolekile na mazwi agahamalalile; Gabegejagi magulu gingʼwe nzila ngololoku, uyo ali nema atizinga mu nzila, aliyo hambuhambu apijiwe. Kubijagi mhola na banhu bose, na wela ubo ulu munhu ati nabo atalamona Seba: Langhanagi no munhu ose atizuleba mu kigongo cha Mulungu; itina lya bululu litizufuluma kumukoyakoya, na banhu bingi basosohajiwe nalyo; Atizubiza ho njingi, nulu uyo atangʼogohaga Mulungu, giti Esau, uyo ujinja wingiji wakwe wa kwandia kubyalwa kulwa nguno ya kiliwa kimo. Iki mumanile giki, hanuma yaho, aho walatogilwe kwingila mu lubango lwenulo, ulengʼwa; iki walatubona hangi ngʼwanya gwa koya, nulu wali ulukoba no na shisoji. Iki mutashikile ku lugulu ulwadula kukuumiwa, ulubaka moto, nulu ku buupi, na giiti, na nyaga ntale no, Na kulila kwa ipembe, na ilaka lya mihayo; nose abali bigwa ilaka lyenilo bikumbilija giki, mhayo uyo gutizuhayiwa kubo hangi; Iki bali batudula kwiyumilija na mhayo uyo bulagilwa, Nulu ndimu ulu yulukuumya lugulu, yupondwa mawe nulu yuchingʼwa ichimu; Iyo yali yilonga yali ili ya lyogohya no no no, nose Musa uhaya giki, Nogoha kutinda na kuzuguma: Aliyo bingʼwe ngʼwaashika ku lugulu lwa Sayuni, na ku nzengo gwa Mulungu mpanga i Yerusalemi ya ngʼwigulu, na ku mabita agati na bubalilwe ga bamalaika, Na ku kwibilinga kutale na kanisa ya babyalwa ba kwandia bandikilwe ngʼwigulu, na kuli Mulungu Nekanya wa bose, na ku bupanga wa banhu batungilija abashikanile, Na kuli Yesu nsangija wa ilagane ipya, na ku mininga gusesebelwa agakuhayaga mihayo ya wiza kutinda ga ngʼwa Abeli. Langhanagi mutizunema Uyo akuhayaga. Iki ulu benabo bali batupila abali bunema uyo wali uhaya mu si, kutinda no tutupila biswe ulu tungʼwinhila ngongo Uyo waahaya ku biswe kufuma ngʼwigulu; Uyo ilaka lyakwe lyali lyuzugumya si lushiku lwenulo: aliyo haha wiisagija uhaya giki, Lukangala lungi hangi natalizugumya si gwike, aliyo na igulu nalyo. Mhayo uyu, Lukangala lungi hangi, gulolecha kwinjiwa kwa isho shadula kuzugumiwa, giti shinhu shali shubejiwa, hunaho shinhu isho ishituzugumiwa shikale ho. Kulwa iyi, iki twinhiwa butemi ubutudula kuzugumiwa, tubize na kigongo, tumfunije Mulungu kalamije akantogije mu bulyehu na boba. Iki Mulungu wiswe ali moto ugukubugilijaga. Kwitogwa kwa badugu kushinge ho. Mutiziba kubachumbela bageni; iki mu mhayo uyo bamo bali bubachumbela bamalaika na kumana yaya. Bizukagwi abatungilwe, giti mutungilwe hamo na benabo; nabo abitilwa ya bubi, iki ningʼwe muli mu mili. Butoji bukujiwe na banhu bose, na ndalo itizusosohajiwa: iki bajingi na bashihya Mulungu akubalekanya nsango. Mutizubiza na shikalile sha butogwa wa feza; muzunye kwigelelwa na isho muli nasho: iki Wei ngʼwenekele wahaya giki, natalakuleka welelo bose nulu kukulekanija yaya. Kulwa iyo, twagima kuhaya giki, Seba ali ngunani wane, natalogoha; munhu alanitila ki? Bizukagwi abo abali basugi bingʼwe, abumuwila mhayo gwa Mulungu; idedekanyagi kakalikile ka kashiminzile kabo, londelagi kuzunya kwabo. Yesu Kristo igolo, na lelo hu na neʼwene, na kushisha welelo na welelo. Mutizuhumbulwa na kalangile kangi na kangi na kageni; iki ili ya wiza ngholo ijamiwe na kigongo; iti kulwa shiliwa, isho abo abali bushitumamila batabonile solobo moi. Biswe tuli na ngʼwalilo, abo abakinhilijaga ihema batuzunilijiwa kulya shago. Iki mibili ya mitugo iyo, mininga gajo genhwa ngʼwipande lyela na ngabiji ntale kulwa nguno ya shibi, mibili yajo ikapembagwa hanze ya nghambi. Kulwa nguno iyo Yesu nanghwe wali uluhiwa hanze ya mita, giki, abeje banhu na mininga gakwe ga ngʼwenekele. Kulwa iyo tujagi kuli Wei hanze ya nghambi, tukubuche kusondagulwa kwakwe. Iki kunu tuti na nzengo gwa kushinga ho, aliyo twagukoba uyo uguliza. Muli Wei tufunye gwa kitambo cha kulumba kuli Mulungu, gene matwajo ga milomo iyo ikulikumilijaga lina lyakwe. Aliyo mutiziba kwita ya wiza na kugaba shikolo: iki shitambo shenisho shikunyejaga Mulungu. Bigwagi abo abamusuga, mubalyehele: iki boi bakwikalaga miso kulwa bupanga wingʼwe giti banhu abatukija kubujiwa butumami wabo, bashoshe mashosho na buyegi, iti mu bupina; iki ulu yubiza chene itumubelela. Tulombelagi: iki twazunya giki, tuli na wiyanguji wa wiza, tutogilwe kwikala na kashiminzile ka wiza mu mihayo yose. Na nene nangʼwikumbilija kutinda no kwita giko, giki, nashoshiwe wangu ku bingʼwe. Hambunyu Mulungu wa mhola Uyo waangʼwenha hangi kufuma mu bafu Seba wiswe Yesu, u ndimi ntale wa ngholo, kulwa mininga ga ilagane lya welelo na welelo, Amushikanye bingʼwe mu buli mhayo gwa wiza kwita iyo atogilwe, ite mu bingʼwe iyo ya wiza mu miso gakwe muli Yesu Kristo; ikujo libize kuli Wei welelo na welelo. Amina. Nangʼwikumbilija bingʼwe, badugu, gwiyumilijagi mhayo uyu gwa kuganikila: iki nangʼwandikila bingʼwe mihayo mido. Managi giki, ndugu wiswe Timoteo wamala kutungulilwa; ulu wiza wangu, tukwibona ningʼwe tuli nanghwe. Nigisijagi bose abamusuga, na bela bose. A ba Italia bamugisha. Kigongo kibize hamo na bingʼwe bose. Amina. Yakobo, nsese wa Mulungu na wa Seba Yesu Kristo, ku ba ngʼanda ikumi na ibili ijasalanghanile, namugisha. Badugu bane, balagi kubiza buyegi aho ngʼwilongelwa na kugengʼwa kungi na kungi, Managi giki, kugengʼwa kwa buzunya wingʼwe kukwenhaga kwiyumilija. Aliyo kwiyumilija shigelile kubize na nimo gwako gushikile, mubize abashikile na bashikanu, abatagehelilwe mhayo gose. Aliyo munhu ose mu bingʼwe ulu ugehelwa masala, anombe Mulungu, Uyo akabinhaga bose mu wila, atajahalilaga; nanghwe akwinhiwa. Aliyo alombe na kuzunya, atizubiza na kususanya; iki uyu ususanya abange na ihuli lya mu nyanza ilyutwalwa na nyaga, na kulibangulwa ipande na ipande. Ulu munhu ali giko, atiziganika giki, akwanukula mhayo gose kufuma kuli Seba. Munhu wa ngholo ibili ali na magalugalu mu nzila jakwe jose. Ndugu uyo ati na ishima ayege iki wagunguhiwa; Aliyo nsabi ngʼwene mu kudohiwa kwakwe: iki alashila giti bulabo wa maswa. Iki aho limi lyufuma na kupembeka na nguzu, lyugajija maswa; na bulabo wago buhululuka, na wiza wa wikole wago bugaya ho; giko na nsabi nanghwe alanyala mu nzila jakwe. Ali wa lubango uyo wiyumilija mu kugengʼwa; iki ulu upyena alanukula ngikili ya bupanga, iyo Seba waabisagija abantogilwe. Munhu, ulu ugengʼwa, atizuhaya giki, Nagengʼwa na Mulungu: iki Mulungu atagemagwa na bubi, giko nanghwe Ngʼwenekele atangemaga munhu ose. Aliyo buli munhu akugemagwa ulu udutwa na ulembalemva na kwikumva kwakwe ngʼwenekele. Hunaho kwikumva aho kwa mala kutunga nda, kubyala shibi, na shibi aho shukula shubyala kucha. Mutilembalembage, badugu bane batogwa. Buli cha kwinha cha wiza, na buli cha kwinhiwa ikishikile, shufuma ngʼwigulya, shiika kufuma kuli Siswe wa masana, kuli Wei gati ho magalugalu, nulu nengeji gwa kugalukagaluka. Kulwa kutogwa kwakwe waatubyala biswe na mhayo gwa nghana, tubize matwajo ga kwandia ga shisengʼwa shakwe. Ali lulu, badugu bane batogwa, buli munhu abize na shigwamatu, atizubiza ngʼwangu kuhaya, nulu ngʼwangu kupelana: Iki bupelanu wa munhu butitaga butungilija wa Mulungu. Kulwa iyo kungulagi busoso bose na wingi wa sha malofu, gwanukulagi na bulyehu mhayo ugubiwa mu bingʼwe, uguli na budula kumupija bupanga wingʼwe. Aliyo mubize biti ba mhayo, iti badegeleki gwike na kwilembalemba bingʼwe benekele. Iki buli munhu ose ulu ubiza ndegeleki wa mhayo duhu, aliyo kwita yaya, ngʼwenuyo abange giti munhu u wa kwilola bushu wakwe ngʼwilole: Aho umala kwiiola, uja, wiba suso yakwe umo ali. Aliyo uwakalalila mu kilagilo kushikanu, i cha butungulwa, na wikala mo, ati ndegeleki ngʼwibi, aliyo ali ngʼwiti wa mhayo, ngʼwenuyo alabiza wa lubango mu kwita kwakwe. Munhu ulu wiganika giki, ali na kitumamile cha nyazunya, nanghwe atululemeja lulimi lwakwe aliyo wilembalemba ngholo yakwe, munhu ngʼwenuyo kitumamile chakwe cha nyazunya chene cha dalali. Kitumamile chela cha nyazunya ikiti na kilingo mu butongi wa Mulungu na Siswe chene kili giki, Kuja kubalola bapina abati na basabo, na bakima bachilwa mu makoye gabo, na hangi kwilinda ngʼwenekele ati na mako mu si. Badugu bane, kuzunya kwa kuli Seba Yesu Kristo, u Seba wa ikujo, kutizubiza kuli na soldo mu banhu. Iki ulu wingila ngʼwibilingilo lyingʼwe munhu azwalile sili ya zahabu na shizwalo sha wiza, hanuma wingila na nghabi wa shizwalo sha bubi; Ningʼwe ngʼwangʼwinha ikujo uyo azwalile shizwalo sha wiza, na ngʼwangʼwila giki, Igashaga aha ha wiza, aliyo u nghabi ngʼwangʼwila giki, Bebe, imilaga uko, nulu igashaga ha si ku bupandijo wane, Angu, muti na kusolanya mu ngholo jingʼwe, na ngʼwabiza balekanya abo muli na maganiko ga bubi? Degelekagi badugu bane batogwa, Angu, Mulungu atabasolile abali bahabi mu si, babize basabi ba buzunya na bingiji ba butemi ubo ubisagija abatogilwe? Aliyo bingʼwe ngʼwangʼwibengelegije nghabi. Angu, a basabi batungʼwiboneelaga bingʼwe, bumuduta kumutwala ku butongi wa masumbi ga kulekanija misango? Angu, bati bene abuliduka lina lya wiza ilo ngʼwitanwa mulyo? Aliyo ulu ngʼukishikilija kilagilo cha kitemi gitumo chandikilile giki, Ulantogagwe nzenganwa ngʼwiyo gitumo witogelilwe bebe ngʼwenekele, numho ngʼwita chiza. Aliyo ulu ngʼubiza na sololo mu banhu, ngʼwita shibi, ngʼwakanilijiwa na shilagilo giki, muli bakenaguji. Iki munhu ose uyo ushidima shilagilo shose, aliyo ukenagula mu mhayo gumo, ngʼwene wabiza nkenaguji mu shose. Iki uyo waahaya giki, Utalizushihya, uhaya na giki, Utalizubulaga. Ali lulu, ulu utashihyaga, aliyo ubulaga, uli nkenaguji wa shilagilo shose. Lungalungagi giko, na itagi giti banhu abalalekanyiwa nsango mu kilagilo cha butungulwa. Iki nsango gutunchila kigongo uyo atachilaga kigongo: nako kuchila kigongo kukwikumilijaga ku nsango. Ikubelela kinahe, badugu bane, ulu munhu wihaya giki, ali na kuzunya, aliyo ati na Shitwa? Angu, buzunya ubo wadula kumpija? Ulu ndugu ngosha nulu nkima ali duuhu na ati na shiliwa, Na umo wa mu bingʼwe ubawila giki, Jagi na mhola, mulunguje, ngʼwigute; aliyo atabinhile isho bagayiwa mu mili; ikubelela kinahe? Na giko kuzunya ukuti na Shitwa kuchile mu koi kwenekele. Aliyo ulu munhu uhaya giki, Bebe uli na kuzunya, na nene ndi na Shitwa: nolekejage buzunya wako ubuti na Shitwa, na nene nakukolekeja buzunya wane kulwa Shitwa shane. U bebe wazunya giki, Mulungu ali umo wike: nahene, watungilija: na masamva nago guzunya na kuzuguma. Aliyo utogilwe kumana, bebe munhu uyo uti kinhu, giki, kuzunya ukuti na Shitwa kuli dalali? Angu, u Abrahamu nkulugenji wiswe walatutungiligijiwa kulwa Shitwa, aho wali umfunya ngʼwana wakwe Isaaka ha ngʼwalilo? Wahona lulu gitumo kuzunya kwali kwitila hamo na Shitwa shakwe, na kulwa Shitwa kuzunya kwali kushikana? Huna shushikilijiwa i Shandikwa ishihayile giki, Abrahamu unzunya Mulungu, nako kuzunya kwakwe kubalilwa kuli wei kubiza butungilija: nanghwe witanwa giki, Nwani ngʼwiye wa Mulungu. Ngʼwabona lulu giki, munhu akubalilagwa butungilija kulwa Shitwa, iti kulwa kuzunya ko kwiyene. Angu, Rahabu u ngʼwimilizu nanghwe walatutungiligijiwa kulwa Shitwa, kulwa nguno ya kubegeleja badati na kubafunija hanze baje mu nzila yingi? Iki giti mili ulu guti na moyo guchile, na kuzunya ulu kuti na Shitwa nako kuchile giko. Munhu alulinde lulimi lwakwe Mutabizage balangi bingi, badugu bane, managi giki, biswe tulinhiwa nsango ntale no kutinda. Iki mu mihayo mingi twipama biswe bose. Munhu ose uyo atipama mu kayombele, ngʼwenuyo ali munhu ashikanile, wadula kugulemeja mili gwakwe gose. Gemelagi, ambu tukatuulaga chuma mu milomo ya falasa giki, jitulyehele, twabyujinyamucha mibili yajo yose. Gemelagi hangi meli; nulu yubiza nhale kinahe na kuselemiwa na nyaga ntale no, najo jugowa na igobelo ido no hose hose uko ngobi atogilwe kutungila. Giko hangi na lulimi nalo, luli kabulungilo kado, lukwidosaga mu mihayo mitale. Gemelagi gitumo kamoto kado kakubachaga bu nhale! Na lulimi nalo luli moto hu lwene si ya buhunga mu mabulungilo giswe, lukasosohajaga mili gose, lukabachaga kitungilwe chose cha kibyalilwe, nalo lwenekele lubachiwa na moto gwa Gehena. Iki buli mbika yose ya ndimu, na ya noni, na ya sha kusholoma, na sha mu nyanza shikakondiwagwa, nasho shamala kukondiwa na banhu. Aliyo lulimi ati ho munhu uwadula kulukondya; luli bubi ubutalembelaga, lokalile na busungu wa kubulaga. Mulo twankuja Mulungu Siswe, mulo hangi twabazuma banhu abaabejiwa mu kwikola kwa Mulungu. Mu nomo gumo shufuma mo kusungulila lubango na kuzuma. Badugu bane, mihayo iyi itigelile kubiza giko. Angu, luzwilo lumo lwadula kuzwilila minzi mapolo na malulu? Angu badugu bane, ntini gwadula kutwaja mizeituni, nulu nzabibu kutwaja ntini? Giko na luzwilo lumo lutudula kuzwilila minzi masalazu na mapolo kihamo. Ni nani uyu ali na masala na kwitegeleja mu bingʼwe? Ni olechage Shitwa shakwe mu kashiminzile kakwe ka wiza mu bulyehu wa masala. Aliyo ulu ngʼubiza na bululu wa wilu na wilwisha mu ngholo yingʼwe, mutizikumilija, nulu mutizuhaya bulomolomo ku ya nghana. Masala aya gati gene agika kufuma ngʼwigulya yaya, genaya gali ga mu si, na ga kimunhu, hangi gali ga nyashetani, Iki aho buli ho wilu na buyombo, henaho ili ho ya buyaga buyaga, na buli kitile kose ka soni. Aliyo masala agafumile ngʼwigulya, a gene kwandia gali mela, hanuma ga mhola, mafula, manogu kuwilwa, gokalile kuchila kigongo na matwajo ga wiza, gati na soldo nulu wibeleja. Na itwajo lya butungilija likuhambagwa mu mhola na benabo abakwitaga mhola. Bulugu na wilwisha ubuli mu bingʼwe shufuma hali? Shitufumaga mu kwikumva kwingʼwe ukukulwaga mu mabulungilo gingʼwe? Ngʼwikumva, na mutubona kinhu; ngʼubulaga na ngʼwita wilu na mutubona kinhu. Ngʼwita bulugu ngʼwalwa, na mutubona kinhu iki mutulomba. Ngʼwalomba na kwinhiwa yaya iki ngʼwalomba kibi, iki ngʼwakoba sha kwitila kwikumva kwingʼwe. Bingʼwe bashihani, bagosha na bakima, mutamanile giki, kunonia busumba na si wene wanishi kuli Mulungu? Ali lulu, uyo atogilwe kunonia busumba na si, ngʼwene wigalucha kubiza ngʼwanishi kuli Mulungu. Himba ngʼwiganika giki, i Shandikwa shihayile dalali giki, Moyo uyo akwikalaga mu biswe ali na kwikumva kushika mu wilu? Aliyo Wei akutwinhaga kigongo chingi kutinda; iki Shandikwa shihayile giki, Mulungu akubahangijaga a badoshi; aliyo a bidoheleja akubinhaga kigongo. Kulwa iyo, nyehelagi Mulungu; nghangijagi Shetani, nanghwe akumupela. Ngʼwegelagi Mulungu, nanghwe akungʼwegela bingʼwe. Ejagi makono gingʼwe bingʼwe ba shibi, jejagi ngholo jingʼwe bingʼwe ba ngholo ibili. Ipinihajagi, mulile nghungu, mulile. Kuseka kwingʼwe kugaluke kubiza kulila nghungu, na buyegi wingʼwe bugaluke kubiza bupina. Ngʼwidohye mu butongi wa Seba, nanghwe alamugunguhya. Mutisigage benekele na benekele, badugu bane. Uyo wansiga nduguye, nulu kunekanya nduguye, ngʼwenuyo wasiga shilagilo, na ushilekanya shilagilo. Aliyo ulu bebe ushilekanya shilagilo, uti ngʼwiti wa shilagilo yaya, numho uli nekanya washo. Ngʼwinhi wa shilagilo na nekanya ali umo wike, Uyo ali na budula kupija nulu kuyagaja. Bebe uli nani ulinekanya ngʼwiyo? Ali lulu, a bingʼwe abo mukuhayaga giki, Lelo nulu ntondo tukuja ngʼwigunguli ilebe, tukulimuka ko ngʼwaka gumo, tulabyukwaba tuhone solobo; Aliyo mutamanile iyo ilabize ho ntondo. Bupanga wingʼwe buli ki? Ambu wene buli ikunguku ililonga kakanza kado, hanuma lyushila. Hambuhambu ni ngʼwahaya giki, Ulu Seba utogwa, tukwikala bapanga, tulita giki nulu giki. Ali gisi ngʼwikumilija mu budoshi wingʼwe; kwikumilija ukuli giko kuli kwa bubi. Ali lulu, uyo amanile kwita ya wiza na kwita yaya, kuli ngʼwenuyu shene shibi. Ali lulu, bingʼwe basabi, lilagi na lijagi ngʼwano kulwa luduko ulo lulangʼwiziila. Busabi wingʼwe waabola, na shizwalo shingʼwe shaaliwa na fufuji. Zahabu jingʼwe na feza jingʼwe jaakeleba; na bukelebu wajo bulabiza bukaniji ku bingʼwe, nabo bulalya mibili yingʼwe giti moto. Bingʼwe ngʼwaabika busabi wingʼwe ku shiku ja nghalilo. Lolagi, mhela ya batumami abali bugesa migunda yingʼwe, iyo ngʼwaabanyekeja, yana: na kwana kwabo abagesa kwaashika mu matu ga Seba wa mabita. Ngʼwiyegije mu si, hangi ngʼwitile iyo mutogilwe; ngʼwiilisha ngholo jingʼwe giti mu lushiku lwa kubulaga mitugo. Ngʼwaanekanya nsango na ngʼwamulagile ntungilija; nanghwe atumuhangijaga. Kulwa iyo, badugu, iyumilijagi kushisha kwiza kwa Seba. Nolagi nimi akulindilaga matwajo ga mpango ga mu si, ugagoyela kushisha gabone mbula ya kwandia na ya hanuma. Giko ningʼwe iyumilijagi; muhandikilage mu ngholo jingʼwe: iki kwiza kwa Seba kuli hihi. Badugu, mutizidugumila benekele na benekele, muleke kulekanyiwa nsango; lolagi, nekanya wa nsango imilile ha nyango. Badugu, idedekanyagi u kuluhiwa na kwiyumilija kwa bahangi abali bahaya mu lina lya Seba, mubalondele. Lolagi, twabahaya benabo abiyumilija giki, bali ba lubango: ambu ngʼwigwile mihayo ya kwiyumilija kwa ngʼwa Yobu, hangi ngʼwaabona bukalikijo wa Seba, gitumo Seba okalile na kusatwa na kuchila kigongo. Aliyo kutinda mihayo yose, badugu bane, mutizulahila, nulu kwigulu nulu ku si, nulu kilahilo kingi chose: aliyo ee yingʼwe leke ibize ee, na yaya yingʼwe leke ibize yaya; mutizugwilwa na nsango. Ali ho mu bingʼwe uwayugulwa? Alombe. Ali ho uyo ali na buyegi? Imbe mimbo ga kulumba. Ali ho mu bingʼwe uwasatile? Abitane banamhala ba kanisa; banombele, bamile na maguta mu lina lya Seba: Na kulomba kwa kuzunya kukumpija nwile, na Seba akungungumula; na ulu witile shibi, akukuulilwa. Kulwa iyo ngʼwitambulilage shibi shingʼwe benekele na benekele, hangi ngʼwilombelage, mupijiwe. Kulomba kwa munhu ntungilija kuli na budula no mu kwita kwako. Eliya walali munhu wa kitungilwe giti biswe, nanghwe ujangila kulomba mbula itizutula; na mbula yali yukija kutula ha si miaka idatu na mieji itandatu. Nanghwe ulomba hangi; na mbula yufuma ngʼwigulu, na si yutwaja matwajo gayo. Badugu bane, ulu ali ho mu bingʼwe munhu uwaahuba kwinga mu nghana, na umo ungalucha; Amane giki, uyo ungalucha nkenaguji kwinga mu buhubi wa nzila yakwe, akupija moyo kufuma mu kucha, hangi akukundikija shibi shingi. Petro, ntungʼwa wa ngʼwa Yesu Kristo, ku basolwa abusalanghanyiwa mu si iti yabo, mu Ponto, na Galatia, na Kapadokia, na Asia na Bithunia, Gitumo Mulungu Siswe waabamana kufuma kale, mu kwejiwa kwa Moyo Ngʼwela, kubashisha mu bulyehu na kusesebelwa kwa mininga ga ngʼwa Yesu Kristo; Kigongo na mhola shongejiwe ku bingʼwe. Alumve Mulungu na Ise wa Seba wiswe Yesu Kristo, Uyo kulwa wingi wa kigongo chakwe waatubyala lukangala lwa kabili giki, tushike mu kwisagilwa kupanga kulwa kujuka kwa ngʼwa Yesu Kristo kufuma mu bafu, Tuhone wingiji ubutukenagukaga, na ubuti na busoso hangi ubutunyalaga, ubu ngʼwaabikilwa ngʼwigulu, Abo ngʼwalindwa na nguzu ja Mulungu kulwa kuzunya, mushike mu bupiji uwamaliilwa kukundulwa mu shiku ja ku mhelo. Mu wenubo ngʼwabuyegela no, nulu yubiza giki, haha shiku ndo ulu igelile giko, ngʼwapinihala kulwa kugengʼwa kwingi, giki, Kugengʼwa kwa kuzunya kwingʼwe, ukuli kwa mpango ntale no kutinda zahabu iyo ikushilaga, nulu yugengʼwa na moto, kwilonge kuli na kukumilijiwa na ishima na ikujo mu kukundulwa kwa ngʼwa Yesu Kristo: Uyo ngʼwantogwa nulu mutamonile; Uyo nulu mutumonaga haha aliyo iki ngʼwanzunije, ngʼwayega no na kuyega ukutudula kuhayiwa, ukokalile na ikujo; Muyanukule nghalikijo ya kuzunya kwingʼwe, u kwene bupiji wa bupanga wingʼwe. Mu mihayo ya bupiji ubu, bahangi bali bukobakoba na bugisilija no, abo bukihanga kigongo ichuhaya kushika ku bingʼwe: Bukoba lili ikanza ki, na ikanza lili kinahe, ilo moyo gwa ngʼwa Kristo ugwali guli mubo gubamanikija, aho gwali gutonga kukukanila u kuluhaluhiwa kwa ngʼwa Kristo na ikujo ililabiza ho hanuma yaho. Boi bufumbulilwa giki, yali iti kulwabo benekele aliyo kulwiswe, bali butumama mihayo iyi, iyo haha ikutambulagwa ku bingʼwe na benabo abalilomela evangeli mu Moyo Ngʼwela uwaatungʼwa kufuma ngʼwigulu; mihayo iyo bamalaika bali na nghumbu kuyitegeleja. Kulwa iyo itungagi mikimbili ya maganiko gingʼwe; bizagi ba masala madekanu, bashikanu mu kisagililwe ka kigongo icho mulenhelwa ha kukundulwa kwa ngʼwa Yesu Kristo; Giti bana balyehu, mutiziyikolanija na kwikumva kwingʼwe kwa kwandia kwa butumana wingʼwe: Aliyo gitumo Uyo waangʼwitana ali Ngʼwela, ningʼwe giko bizagi bela mu kashiminzile kingʼwe kose: Iki yaandikwa giki, Bizagi bela; iki Nene ndi ngʼwela. Bazunya baakomolwa na mpango ntale Na ulu ngʼwangʼwitana Siswe, Uyo akunekanyaga buli munhu gitumo Shitwa shakwe shili, atasolanyaga, shiminzagi mu kogoha shiku jingʼwe ja kwikala mu si giti bageni: Mumanile giki, mutakomolilwe na shinhu shikenaguku, giti feza nulu zahabu kufuma mu kashiminzile kingʼwe ka dalali, ako ngʼwali ngʼwanukula kufuma ku bakulugenji bingʼwe; Aliyo ngʼwakomolilwe na mininga ga mpango ga ngʼwa Kristo, giti ga ngʼwana wa ngholo, Uyo ati na kilingo nulu kabado: U Wei umanwa kufuma kale aho si yali itali kusengʼwa, aliyo akafumbulwa mu shiku iji ja nghalikijo kulwingʼwe, Abo kulwakwe munzunije Mulungu Uyo waanjucha mu bafu, na ungʼwinha ikujo, giki, kuzunya kwingʼwe na kwisagilwa kwingʼwe kubize kuli Mulungu. Iki ngʼwamala kweja mioyo yingʼwe mu kuyigwa i nghana mu Moyo Ngʼwela kushika mu kutogwa kwa badugu ukuti na buhwiganu, ikomejagi kwitogwa benekele na benekele mu ngholo nela. Iki ngʼwaabyalwa hangi, iti kulwa mbiyu ya kubola, aliyo mu iyo itubola, kulwa mhayo gwa Mulungu, uguli mpanga gwa kushinga ho welelo na welelo. Iki mibili yose ili giti maswa, na ikujo lyayo lyose lili giti mabulabo ga maswa. Maswa gakuumaga, na mabulabo gago guyuguka: Aliyo mhayo gwa Seba gukushinga welelo bose. Nago gwene mhayo gwa evangeli ugwaalomelwa ku bingʼwe. Kulwa iyo sundyagi isubi lyose, na bulembalembi, na wibeleja, na wilu, na kalungalungile kose ka nyasigani. Giti bana belele ababyalwa haha, igongagi mabele ga nghana agatatulanije, mukule mu bupiji kulwago; Ulu ngʼwalogije giki, Seba ali wa kigongo: Aho ngʼuja kuli Wei giti iwe ipanga ilyali lyulengʼwa na banhu, aliyo kuli Mulungu lili isolwa na lya mpango no, Na bingʼwe ningʼwe, giti mawe mapanga, ngʼwazengwa kubiza numba ya ki-moyo, mubize bugabiji wela, mufunye shitambo sha ki-moyo ishazunilijiwa kuli Mulungu muli Yesu Kristo. Iki yaandikwa mu Shandikwa giki, Lolagi, natuula ho mu Sayuni iwe itale lya ha lungʼongo, isolwa, lya mpango no; na uyo anzunije ataladingʼwa minala. Kulwa iyo, ku bingʼwe abazunije ali wa mpango ngʼwingi: aliyo ku benabo abatuzunya ali iwe ilyali lyulengʼwa na bazengi, lyene lyaabiza iwe itale lya ha lungʼongo. Na hangi iwe lya kwipamya, na kiganga cha kwigumhya, ku benabo bakipamaga kulwa mhayo, iki bali bakitigwa; nu kutuulwa bakatuulwa ku mhayo uyu. Aliyo bingʼwe muli kibyalilwe kisolwa, bugabiji wa kitemi, ihanga lyela, banhu ba wikomangile; ngʼoleche bugalili wa Ngʼwenuyo uwaangʼwitana kwinga mu giiti, na kwingila ngʼwisana lyakwe lya kukumya: Bingʼwe abo kale ngʼwali muti banhu, aliyo haha muli banhu ba Mulungu: abo kale ngʼwali mutuchilwa kigongo, aliyo haha ngʼwamala kuchilwa kigongo. Batogwa, nangʼwikumbilija giti bageni na bashiminzi, ikomanyagi na kwikumva kwa ki-mili, ukukulwaga na bupanga. Shimile shingʼwe shibize sha wiza mu bana mahanga; giki, nulu bamusayila muli biti ba sha bubi, aliyo aho bubona shitile shingʼwe sha wiza, bankuje Mulungu mu lushiku lwa kugenihwa. Lyehelagi kalagilile kose ka banhu kulwa nguno ya Seba: nulu ntemi iki ali ntale; Nulu batwale abutungʼwa nanghwe kubahwima njigu abiti ba sha bubi, na kubakanilija abiti ba sha wiza. Iki yene iyo Mulungu atogilwe giki, kulwa Shitwa sha wiza mubukamaaje butumana wa banhu bachiluchilu; Giti batungulwa, aliyo butungulwa wingʼwe butizubiza wa kukundikija bubi, aliyo giti basese ba Mulungu. Bakujagi banhu bose. Butogagwi budugu. Ngʼogohagi Mulungu. Nkujagi ntemi. Bingʼwe batumami bigwagi baseba bingʼwe mu boba bose; iti abo abali ba wiza na bapolo duhu, aliyo na benabo abali bakali. Iki uyo gwene gwa kukumilijiwa, ulu munhu kulwa wiyanguji wa kuli Mulungu akwiyumilijaga mu bupina na kuluhaluhiwa ukuti na nguno ya nghana. Iki ikujo ki, ulu ngʼwiyumilija aho ngʼutulwa kulwa kwita shibi? Aliyo ulu ngʼukoyakoyiwa kulwa Shitwa shingʼwe sha wiza, na ulu ngʼwiyumilija, uyo gwene gwanyeja Mulungu. Iki hu gwene ngʼwiitanilwa: iki Kristo nanghwe akaluhiwa kulwingʼwe, umulekela chanda giki, mulondele bupandijo wakwe: Uyo walatita shibi, nulu bulembalembi wali butilonga mu nomo gwakwe; Uyo, aho wali udukwa, walatushosha mu buduki hangi; aho wali uluhiwa, walatubogohya; aliyo wali wituula kuli Uyo akalekanyaga mu butungilija: Wei ngʼwenekele akabucha shibi shiswe mu mili gwakwe ha linti, giki, biswe abachile ku shibi, tubize bapanga ku butungilija; kulwa kuchubulwa kwakwe ngʼwapijiwa. Iki ngʼwali ngʼujimila giti ngholo: aliyo haha ngʼwashokile kuli Ndimi na Nanghani wa mioyo yingʼwe. Giko, bingʼwe bakima balyehelagi bagoshi bingʼwe; ulu bali ho bangi abatazunije mhayo uyu, badutwe na kashiminzile ka bake babo; nulu iti na mhayo uyu, Aho bubona kashiminzile kingʼwe kela na ka logohano. Kwigalila kwabo kutizubiza kwipatila kwa hanze, kwene kushiba nzwili, na kwituulila zahabu nulu kuzwalila shizwalo; Aliyo kubize kwa munhu uwibisile mu ngholo, u kwigalila ukutakenagukaga kwene moyo mpolo na nghumuzu, uyo gwene gwa mpango no mu butongi wa Mulungu. Iki na bakima bela ba kale abali bansanije Mulungu, bali bigalila giko, bali bubalyehela bagoshi babo; Gitumo Sara akanyehela Abrahamu, waangʼwitanaga giki, seba: na bingʼwe muli bana bakwe ulu ngʼwita ya wiza, na ngʼwalema kukangwa na lyogohya lyose. Giko na bingʼwe bagosha, ikalagi na bake bingʼwe na masala, ngʼwinhagi ikujo nkima giti kiseme ikiti na nguzu, iki bali bingiji hamo ningʼwe ba kigongo cha bupanga; kulomba kwingʼwe kutizulemejiwa. Mhayo gwa kumalija guli giki, bose bizagi na iganiko limo, bichiji ba kigongo, abitogilwe giti badugu, bisatwa, bidoheleja: Mutizubashokeja kibi abangʼwitila bingʼwe kibi, nulu buduki kulwa buduki; aliyo mubize basunguliji ba lubango; iki i yene ngʼwitanilwa giki, mubize bingiji ba lubango. Iki uyo utogwa bupanga na kujibona shiku ja wiza, ngʼwene alulemeje lulimi lwakwe mu bubi, na milomo yakwe itizuhaya bulembalembi: Hangi ikomanye na bubi, ite ya wiza; akobe mhola, na ayikubije no. Iki miso ga Seba galolile batungilija: na matu gakwe gadegelekile kulomba kwabo; aliyo bushu wa Seba buli wanishi ku benabo abakwitaga shibi. Ni nani uyo akungʼwilambagulila ulu muli balondeji ba ya wiza? Aliyo ulu ngʼuluhiwa kulwa nguno ya butungilija, hu muli ba lubango: mutizogoha kulwa kuitanga kwabo, nulu mutiziganilija: Aliyo mungʼwikomye Kristo mu ngholo jingʼwe giki, ali Seba: ngʼwikale mumalilile kunshokeja buli munhu uwamubuja i nguno ya kwisagilwa ukuli mu bingʼwe, aliyo munshokeje mu bulyehu na logohano: Mubizage na wiyanguji wa wiza, abo abamusayila giki, muli bakenaguji, badingʼwe minala abakumudukaga kashiminzile kingʼwe ka wiza muli Kristo. Iki hambuhambu kuluhiwa kulwa kwita ya wiza ulu Mulungu atogilwe chene, kutinda kuluhiwa kulwa kwita ya bubi. Iki Kristo nanghwe akaluhiwa lukangala lumo kulwa shibi, u ntungilija kulwa abati batungilija, atwenhe kuli Mulungu; akabulagwa mu mili, aliyo witwa kubiza mpanga mu Moyo; Mugo wali uja uyilomela mioyo iyutungwa mu butungwa, Abo kale bulema kwigwa, aho wiyumilija wa Mulungu bulindila mu shiku ja ngʼwa Nuhu, aho ngalaba yali yubejiwa, muyo banhu bagehu, bene banane, bakapigijiwa mu minzi. Mhayo uyu gwene kigemelelo cha kubatija ukulimupija bingʼwe haha, iti kweja kwa mako ga mili, aliyo ishosho lya wiyanguji wa wiza kuli Mulungu, kulwa kujuka kwa ngʼwa Yesu Kristo; Uyo waaja ngʼwigulu, ali ku nkono gwa bulyo gwa Mulungu, bamalaika na mabudula na mabusugi shasugijiwa kuli Wei. Ali lulu, iki Kristo wali uluhiwa mu mili kulwa biswe, manulagi ningʼwe iganiko lyenilo giti shilanga; iki uyo waaluhiwa mu mili, waalekana na shibi; Atizikala mpanga hangi shiku jakwe ijasaga ho mu mili kwita kwikumva kwa banhu, aliyo kwita iyo Mulungu atogilwe. Iki shiku ja bupanga wiswe ijabitile jigegije kwita iyo bana mahanga bayitogilwe, aho twali tushiminza mu wimilizu, kwikumva, bukolwa wa minzi ga mizabibu, bulaku, mabungʼwi, na kulamya kwa chikolile cha bubi: Mu mihayo iyo boi balimukumya bingʼwe, iki mutupelaga kwisangija nabo mu buyagabuyaga ubuti na ngelelo, bakumuhayaga kibi: Abo balahaya shitile shabo kuli Ngʼwenuyo amalilile kubalekanya nsango a bapanga na bafu. Kulwa nguno iyo evangeli ikalomelwa ku benabo abachile, giki, balekanyiwe nsango giti banhu ba mu mili, aliyo bikale bapanga kuli Mulungu mu moyo. Aliyo nghalikijo ya shose yegelaga: kulwa iyo bizagi na masala madekanu, ngʼwikale miso mu kulomba: Kutinda yose, komelagi mu kwitogwa kwingi benekele na benekele; iki butogwa bukukundikijaga shibi shingi no: Ngʼwiyegelejage benekele na benekele, iti mu kwidugumya: Gitumo buli munhu waanukula cha kwinhiwa, ngʼwigolele benekele na benekele, giti babikijiwa ba wiza ba kigongo kingi na kingi cha Mulungu; Munhu ulu ulungalunga, ahaye kina shihayile sha Mulungu; munhu ulu winhilija, inhilije mu nguzu ijo winhiwa na Mulungu: giki, Mulungu akujiwe mu mihayo yose muli Yesu Kristo, ikujo na budula shene shakwe kushisha welelo na welelo. Amina. Batogwa, mutizukumya kugengʼwa ukulimugema giti moto, giti ngʼwapandikilwe na mhayo ngeni: Aliyo yegagi iki muli bisangija mu kuluhiwa kwa ngʼwa Kristo, a ha kukundulwa kwa ikujo lyakwe muyege na buyegi wingi no. Ulu ngʼwadalahwa kulwa lina lya ngʼwa Kristo, lwene lubango lwingʼwe; iki Moyo wa ikujo na wa Mulungu akwikalaga ha bingʼwe; kubo alihayiwa kibi, aliyo ku bingʼwe alikujiwa. Aliyo munhu ose mu bingʼwe atizuluhaluhiwa giti mulagi, nulu ngʼwibi, nulu ngʼwiti wa sha bubi, nulu ngʼwishatya wa mihayo ya banhu bangi: Aliyo ulu munhu uluhiwa iki ali Nkristo, atizudingʼwa minala; aliyo ankuje Mulungu mu lina ili. Iki ikanza lyashikaga kulekanyiwa nsango kwandije mu numba ya Mulungu: na ulu gwandia ku biswe, abo abatazunije evangeli ya Mulungu nghalilo yabo ilabiza kinahe? Ulu u ntungilija upilila mu kakulula, bahunga na bati batungilija balilongela hali? Kulwa iyo abaluhiwa gitumo Mulungu atogelilwe, ni bamikije bupanga wabo mu Shitwa sha wiza, giti kuli Nsemi ngʼwishigwa. A banamhala ba kanisa abali mu bingʼwe, namukomeleja, uyo ndi namhala ngʼwichingʼwe na nkaniji wa kuluhaluhiwa kwa ngʼwa Kristo, hangi na nsangijiwa ngʼwikujo ilo lilakundulilwa: Lidimagi idale lya Mulungu ilili ku bingʼwe, mulilabilage, iti kulwa kuhadikijiwa, aliyo kulwa butogwa, gitumo iyo Mulungu atogilwe; iti kulwa kwikumva kwa feza ja busoso, aliyo na moyo ugumalilile; Nulu iti giti muli baseba ba wingiji wa Mulungu, aliyo gitumo muli chanda cha idale. Na aho Ndimi ntale alilonga, mulinhiwa ngikili ya ikujo itanyalaga. Giko na bingʼwe basumba balyehelagi banamhala. Chene, bingʼwe bose zwalagi bulyehu, ngʼwiyinhilije benekele na benekele: iki Mulungu akabahangijaga badoshi aliyo balyehu akabinhaga kigongo. Kulwa iyo ngʼwidoheleje hasilili ya nkono gwa nguzu gwa Mulungu, amugunguhye ngʼwikanza lishikile. Ntuulilagi Wei kwiganilija kwingʼwe kose, iki wamukalalilwe. Bizagi ba masala madekanu, ngʼwikale miso: iki ngʼwanishi wingʼwe Shetani wayelayela giti shimba ikuzumilaga, unkoba uyo alanʼye: Uyo nghangijagi na budimu mu kuzunya, iki mumanile giki, kuluhiwa kwenuku duhu kwashikilijiwa mu badugu bingʼwe abali mu si. Aliyo Mulungu wa kigongo chose, Uyo waangʼwitana kwingila ngʼwikujo lyakwe lya welelo na welelo muli Kristo, aho ngʼumala kuluhiwa kakanza kado, Wei ngʼwenekele akumushikanya, akumudimya, akumuguzuhya. Wei, budula buli wakwe welelo na welelo. Amina. Nangʼwandikila bingʼwe iyi migehu, mu nkono gwa ngʼwa Silvano, uyo nansanije giki, ali ndugu ngʼwishigwa, namukomeleja, namukanila giki, yeniyi yene kigongo cha nghana cha Mulungu: handikilagi mo. Nkima nsolwa ngʼwichingʼwe uyo ali ko mu Babeli, wamugisha; na Marko ngʼwana wane. Ngʼwigishagi benekele na benekele na kwibipa kwa butogwa. Mhola ibize ku bingʼwe bose abali muli Kristo Yesu. Amina. Simoni Petro, nsese na ntungʼwa wa ngʼwa Yesu Kristo, ku benabo abamala kwinhiwa kuzunya kumo na biswe u kwa mpango, uku twinhiwa mu butungilija wa Mulungu wiswe na Mpija wiswe Yesu Kristo: Kigongo kibize ku bingʼwe na mhola yongejiwe mu kumana Mulungu na Yesu Seba wiswe; Gitumo budula wakwe wa ki-mulungu waatwinha shinhu shose ishili sha bupanga na wela, mu kumana Ngʼwenuyo uwaatwitana kulwa ikujo lyakwe na bugalili wakwe; Mu iyo twinhiwa kwisagija ku tale na kwa mpango no; giki, mu isho tubize bisangija ba kitungilwe cha Mulungu, iki ngʼwaapijiwa mu bubozu ubuli mu si kulwa kwikumva. Kulwa iyo, komelagi no, ngʼongegeje ku kuzunya kwingʼwe bugalili; na ku bugalili wingʼwe kumana; Na ku kumana kwingʼwe kwilinda; na ku kwilinda kwingʼwe kwiyumilija; na ku kwiyumilija kwingʼwe wela; Na ku wela wingʼwe kwitogwa na badugu; na ku kwitogwa na badugu kwingʼwe kubatogwa bose. Iki ulu mihayo iyi yikala mu bingʼwe na yukwila, yangʼwita bingʼwe kubiza muti binogolelwa, nulu abati na matwajo mu kumana Seba wiswe Yesu Kristo. Aliyo uyo ati nayo yeniyo ali moku, atudula kubona kule, hangi wibaga kwejiwa kwa shibi shakwe sha kale. Kulwa iyo, badugu, komelagi no kukudimya kwitanwa na kusolwa kwingʼwe; iki ulu ngʼwita giko mutaligumha na hado: Iki giko mukukwigijiwa kwingila mu butemi ubutushila wa Seba na Mpija wiswe Yesu Kristo. Kulwa iyo, natukija kungʼwizukija shiku jose mihayo yeniyi, nulu ngʼwimanile, na ngʼwadimiwa mu nghana iyili mu bingʼwe. Hangi niganika ili ya wiza, aho natali ndi mo ngʼwihema ili, kumukomeja na kungʼwizukija: Iki namanile giki, natudila kukungula ihema lyane, gitumo Seba wiswe Yesu Kristo wali unolekeja. Aliyo nahene, nakukomela gild, buli makanza gose hanuma ya kucha kwane mudule kuyizukwa mihayo iyi. Iki tutalondelile ngano ijali julingwa mu nyasala, aho tumumanikija budula wa Seba wiswe Yesu Kristo na kwiza kwakwe, aliyo twali tuli bambona ba magaka gakwe. Iki Wei wali winhiwa na Mulungu Ise kukumilijiwa na ikujo, aho ilaka lyali lyushika kuli Wei kufuma ngʼwikujo itale no, giki, Uyu u ngʼwene Ngʼwana wane nganja, Uyo nayejiwa nanghwe. Na ilaka lyenilo ilyali lyufuma ngʼwigulu, twali tuligwa aho twali tuli nanghwe mu lugulu lwela. Hangi tuli nago mhayo gwa buhangi ugudimije kutinda; ngʼwita chiza aho ngʼugulanghana giti tala ikwakaga ngʼwipande lya giiti, kushisha bujiku Avangaluka na sonda ya dilu yaake mu ngholo jingʼwe: Managi mhayo uyu kwandia giki, guti ho mhayo gwa buhangi mu Shandikwa ugwadula kushomelejiwa gitumo munhu atogelilwe. Iki kufuma kale buhangi wali butenhwa mu iyo munhu walatogelilwe: aliyo banhu bela ba Mulungu bali bulungalunga aho bali butwalanijiwa na Moyo Ngʼwela. Aliyo bali bubuka na bahangi ba bumama mu banhu, gitumo balabiza mo mu bingʼwe balangi ba bumama, abo abalenha mu masalasala kalangile ka mihayo ka kubahubya banhu, bunema Seba Uyo ubagula, na biyenheleja kuyagala kwa wangu wangu. Bingi balalondela Shitwa shabo sha wimilizu; hangi kulwa benabo nzila ya nghana ilahayiwa kibi. Abo kulwa kwikumva balamuhimbilija bingʼwe kubiza solobo yabo; nsango gwabo gwa kufuma kale gutudila, nulu kuyagala kwabo kututindila. Iki ulu Mulungu walatubachila kigongo bamalaika abali bukenagula, aliyo ubaponya mu kulimu, na kubatuula mu machongo ga giiti balindwe kushisha nsango guliza; Nulu hangi walatuyichila kigongo i si ya kale, aliyo akampija Nuhu nomeji wa butungilija kihamo na bangi mpungati, aho Mulungu wali wenha ihuma ku si ya bahunga; Na wali wigalucha mizengo ya Sodoma na Gomora kubiza mabu, uyilekanya nsango gwa kukenagulwa, wiyita ibize kalolelo ku banhu bahunga. Na akampija Lutu uwali upinihajiwa no kulwa kashiminzile ka busoso ka bakenaguji abo. Iki munhu ngʼwenuyo ntungilija iki walazengile mubo, mu kuhona na kwigwa ugupinihaja moyo gwakwe ntungilija shiku na shiku mu Shitwa shabo ishitalagililwe. Seba amanile kubapija mu kugengʼwa abangʼogohile, na kubalinda abati batungilija mu kuyugulwa kushisha ku lushiku lwa nsango; Aliyo kutinda, abo abakulondelaga mili mu kwikumva kwa malofu na kudalaha basugi. Bali bagimu, bumaganu, batogohaga kubasondagula batale: Aliyo bamalaika abatindile nguzu na budula, batenhaga kubula kwa bubi ku butongi wa Seba. Aliyo abo bali giti ndimu ijiti na masala mu bufumanwa wajo, ijabejiwa kudingʼwa na kubulagwa, bakusondagulaga mu mihayo iyo batimanile, balajimijiwa mu kujimila kwabo, Balabona mhela ya buti butungilija; biganika giki, bungʼwi na nyalaku mu limi wene buyegi. Bali mabado na minala, budosa mu kulembalemba kwabo aho bulya bukombe kihamo ningʼwe: Bali na miso agokalile bushihani, gati na boyele kwita shibi; bukongakonga mioyo iyiti na budimu; ba ngholo yamanilijiwa kwikumva; bana ba kizumo; Bali buleka nzila ngololoku, buhuba, bulondela nzila ya ngʼwa Balaamu, ngʼwana Bosori, uwali utogwa mhela ya buti butungilija; Aliyo wali uhangʼwa kulwa bukenaguji wakwe: nzobe iyi italunganungaga, yulungalunga na ilaka lya ki-munhu, yulemeja lusalo lwa nghangi. Benabo bali nzwinzi ijiti na minzi, na malunde agupelengeshiwa na nyaga ntale; hangi aba bupi wa giiti baabikilwa, bubalindiile. Iki aho bulungalunga mihayo mitale ya kidoshi, bubakongakonga mu kwikumva kwa mili na bujingi, benabo abali bumala kubapela abakwikalaga mu buhubi; Bakubisagijaga butungulwa, aliyo boi benekele bali basese ba bubozu; iki munhu uhewa na ungi, ali nsese wa ngʼwenuyo ungheba. Iki aho bamala kugapela malofu ga si, kulwa kumana Seba na Mpija wiswe Yesu Kristo, ulu bitaligija hangi mugo, na kupyenwa, nhungwa yabo ya nghalilo yabiza ya bubi kutinda ya kwandia. Iki yali hambuhambu, ulu ni bali batumana nzila ya butungilija, kutinda aho bamala kwimana, huna lulu kuleka kilagilo chela icho bali binhiwa. Yabizaga kubo gitumo lusumo lwa nghana umo luli, giki, Mva yashokela maluki gayo, na ngulube iyali yojiwa yushoka hangi kugalagali mu matembe. Batogwa, nyaluba iyi nangʼwandikila bingwe yene ya kabili; mu bubili wajo jose namubamucha maganiko gingʼwe ga nghana kungʼwizukija; Mubize ba kwizukwa mihayo iyali yahayiwa kale na bahangi bela, na kilagilo cha Seba na Mpija wiswe ichenhwa na biswe batungʼwa bakwe: Mumane uyu tame giki, mu shiku ja ku nghalilo badalahi baliza, balalondela kwikumva kwabo benekele. Banhu balalema mihayo ya kushoka kwa Seba Bakubyuhaya giki, Kwisagijiwa kwa kwiza kwakwe kuli hali? iki kufuma kuko bakulugenji biswe bachila, shinhu shose shikikalaga gitumo shili kufuma kwandia kwa kusengʼwa kwa si. Iki batatogilwe kumana giki, mapande ga igulu gaabiza ho kufuma kale, kulwa mhayo gwa Mulungu, na si yali yabuka mu minzi, hangi yali mu minzi, Kulwago si iyali ili ho kale yuyagala, iki yutubijiwa na minzi: Aliyo mapande ga igulu agali ho haha, na si, shaabikwa shipemve moto, shaalindwa kushisha ku lushiku lwa nsango na kuyagajiwa kwa banhu bahunga. Aliyo batogwa, mutiziba mhayo uyu giki, kuli Seba lushiku lumo lwene giti miaka 1,000, na miaka 1,000 ili giti lushiku lumo. Seba atudila kushikilija kwisagija kwakwe, gitumo bamo biganika giki, wadila; aliyo ali na kwiyumilija ku bingʼwe, iki atatogilwe munhu nulu umo buyagala, aliyo bose bashike mu koya. Aliyo lushiku lwa Seba lukwiza giti ngʼwibi bujiku, mulo mapande ga igulu galinga ho na kulunduma butale, na shibumva sha bufumanwa shilajimijiwa na moto ntale, na si na Shitwa ishili mo shilapemva. Ali lulu, iki shinhu shenishi shose shilajimijiwa giko, shingʼwigelile bingʼwe kubiza banhu ba chimile ki mu kushiminza kwela kose na wela bose, Mulolela na kukangilija kwiza kwa lushiku lwa Mulungu, mulo mapande ga igulu galajimijiwa na moto, na shinhu sha bufumanwa shilabiwa na moto ntale? Aliyo biswe, gitumo kwisagija kwakwe umo kuli, twalolela mapande ga igulu mapya na si mhya, umu butungilija bukwikalaga mo. Kulwa iyo, batogwa, iki mukulolelaga mihayo yeniyo, komelagi amusange mu mhola, aba muti na kabado nulu kilingo mu miso gakwe. Balagi giki, wiyumilija wa Seba wiswe wene bupiji; gitumo Paulo ndugu wiswe ntogwa waangʼwandikila mu masala ayo winhiwa; Gitumo mu nyaluba jakwe jose akuhayaga mihayo yeniyi; mu nyaluba jenijo ili mo mihayo milambulambu kuyitegeleja, iyo abatalangilwe na abati badimu bibichola, gitumo bakwitaga na Shandikwa shingi, muyo biyaga ja benekele. Kulwa iyo batogwa, iki ngʼwatonga kumana mihayo iyi, ilanghanagi, mutizuhumbulwa na buhubi wa bakenaguji, na kugwa kuleka budimu wingʼwe. Aliyo kulagi mu kigongo na kumana kwa Seba na Mpija wiswe Yesu Kristo. Ikujo lyene lyakwe haha na kushisha ku welelo na welelo. Amina. Iyo yali ili ho kufuma kwandia, iyo twali twayigwa, iyo twali twayibona na miso giswe, iyo twali twayilola, na makono giswe gali guyibabasha, ya Mhayo gwa bupanga: (Na bupanga ubo wiigengeleka, na biswe twaabubona, hangi tukukanilaga na kumulomela bupanga wenubu wa butushila, uwali buli hamo na Siswe huna wiigengelechiwa ku biswe:) Iyo twali twayibona na kwiyigwa tukumulomelaga bingʼwe, ningʼwe mubize na busangi na biswe; na busangi wiswe buli na Siswe, hangi na Ngʼwana wakwe Yesu Kristo. Na mihayo iyi twangʼwandikila giki, kuyega kwingʼwe kubize kushikanu. Na uyu hu gwene guli mhayo twali twagwigwa kufuma kuli Wei, hangi tumulomela bingʼwe giki, Mulungu ali isana, na giiti kiti mo muli Wei nulu na hado. Ulu tuhaya giki, Tuli na busangi nanghwe, na tushiminzila mu giiti, twahaya bulomolomo, na tutuyitaga i nghana: Aliyo ulu tushiminzila ngʼwisana, gitumo Wei ali ngʼwisana, tuli na busangi benekele na benekele, na mininga ga ngʼwa Yesu Kristo Ngʼwana wakwe gakutwejaga mu shibi shose. Ulu tuhaya giki, Tuti na shibi, twilembalemba benekele, na nghana iti mo mu biswe. Ulu tutambula shibi shiswe, Wei ali ngʼwishigwa na ntungilija kutulekeja shibi shiswe na kutweja mu shose sha buti butungilija. Ulu tuhaya giki, tutitile shibi, twangʼwita Wei kubiza nomolomo, na mhayo gwakwe guti mo mu biswe. Bana bane bado, nangʼwandikila yeniyi giki, mutizita shibi. Munhu ulu wita shibi, tuli na nombeji kuli Siswe, Ngʼwene Yesu Kristo ntungilija. Hu na Ngʼwene kihongelo cha shibi shiswe; iti kulwa shiswe gwike, aliyo hangi kulwa shibi sha ba mu si bose. Mu mhayo uyu tumanile giki, twaamana Wei, ulu tushidima shilagilo shakwe. Uyo alihaya giki, naamana Wei, aliyo atushidimaga shilagilo shakwe, ali nomolomo, nayo i nghana iti mo muli wei; Aliyo uyo ose ugudima mhayo gwakwe, muli ngʼwenuyo butogwa wa Mulungu waashikilijiwa nghana. Mu mhayo uyu tumanile giki, tuli muli Wei. Uyo alihaya giki, akwikalaga muli Wei, shingʼwigelile kushiminza gitumo Wei waashiminzaga. Badugu, natungʼwandikilaga kilagilo kipya, aliyo kilagilo cha kale, icho ngʼwali nacho kufuma kwandia: i kilagilo cha kale kili mhayo uyo ngʼwaagwigwa kufuma kwandia. Hangi nangʼwandikila kilagilo kipya, ikili mhayo gwa nghana muli Wei na mu bingʼwe, iki giiti kikubitaga, na isana i lya nghana likwakaga haha. Uyo alihaya giki, ali ngʼwisana aliyo unkolwa nduguye, atali mu giiti na kushisha haha. Uyo antogilwe nduguye, akwikalaga ngʼwisana, hangi muli wei mhayo gwa kwipama guti mo. Aliyo uyo unkolwa nduguye ali mu giiti, hangi ukushiminzilaga mu giiti, atamanile uko ajile, iki giiti chaamokuja miso gakwe. Nangʼwandikila bingʼwe bana bado, iki ngʼwaalekejiwa shibi shingʼwe kulwa nguno ya lina lyakwe. Nangʼwandikila bingʼwe bababa, iki ngʼwaamana Wei, Uyo ali ho kufuma kwandia. Nangʼwandikila bingʼwe basumba, iki ngʼwaampyena u mi. Nangʼwandikila bingʼwe bana bado, iki ngʼwaamana Siswe. Nangʼwandikila bingʼwe bababa, iki ngʼwaamana Uyo ali ho kufuma kwandia. Nangʼwandikila bingʼwe basumba, iki muli na nguzu, na mhayo gwa Mulungu gukwikalaga mu bingʼwe, hangi ngʼwaampyena u mi. Mutizutogwa si, nulu mihayo iyili mo mu si. Ulu munhu ose utogwa si, butogwa wa ngʼwa Siswe buti mo muli wei; Iki yose iyili mo mu si, kwikumva kwa mili, na kwikumva kwa miso, na budoshi wa bupanga, itafumile kuli Siswe, aliyo ili ya mu si. Na si ikubitaga hamo na kwikumva kwayo: aliyo uyo akwitaga iyo Mulungu atogilwe akwikalaga ho welelo na welelo. Bana bado, lili ikanza lya nghalilo, na gitumo ngʼwali ngʼwigwa giki, ngʼwilwisha wa ngʼwa Kristo akwiza, na haha bilwisha ba ngʼwa Kristo bingi bamala kwilonga, kulwa iyo tumanile giki, lili ikanza lya nghalilo. Bali binga mo mu biswe, iki bali bati ba mu biswe; iki ulu ni bali ba mu biswe, ni bikala hamo na biswe; aliyo bakinga ho, bigengeleke giki, bati bose ba mu biswe. Na bingʼwe muli nako kamaalilwe kufuma kuli Uyo Ngʼwela, na mumanile mihayo yose. Natangʼwandikilile bingʼwe giki, mutayimanile i nghana, aliyo giki, muyimanile, hangi giki, kuduhu bulomolomo ubufuma mu nghana. Nomolomo ali nani ulu ati uyo akulemaga mhayo uyu, Yesu ali Kristo? Ngʼwenuyo ali ngʼwilwisha wa ngʼwa Kristo uyo akunemaga Siswe na Ngʼwana. Uyo ose akunemaga Ngʼwana, nu Siswe ati nanghwe; uyo akuntambulaga Ngʼwana, nu Siswe ali nanghwe. Iyo ngʼwaayigwa kufuma kwandia yikale mu bingʼwe. Iyo ngʼwaayigwa kufuma kwandia ulu yikala mu bingʼwe, na bingʼwe mukwikala muli Ngʼwana na muli Siswe. Na uku u kwene kwisagija uko utwisagija giki, bupanga butushila. Mihayo iyi nangʼwandikila bingʼwe ya ku benabo abaligema kumulembalemba. Aliyo kamaalilwe ako ngʼwaanukula hali Wei kakwikalaga mu bingʼwe, ningʼwe muti na nguno ya munhu ose amulange; aliyo gitumo kamaalilwe kenako kakumulangaga mihayo yose, nako kali ka nghana, kati bulomolomo yaya; gitumo kaamulanga, mukwikala muli Wei. Haha lulu, bana bado, ikalagi muli Wei giki, aho aligengeleka, tubize na bugimu, tutalizudingʼwa minala mu butongi wakwe aho alilonga. Ulu mumanile giki, Wei ali ntungilija, mumanile hangi giki, uyo ose akwitaga butungilija waabyalwa nanghwe. Lolagi, butogwa ki ubo Siswe waatwinha biswe, twitanwe bana ba Mulungu; kulwa mhayo uyo si itatumanile biswe, iki yali itamanile Wei. Batogwa, haha tuli bana ba Mulungu, na itali kwigengeleka umo tulabizila; aliyo tumanile giki, aho aligengeleka, tulabiza twikolile nanghwe, iki tulamona gitumo ali. Na buli uyo akungʼwisagililagwa Wei giko, akwiyejaga ngʼwenekele gitumo Wei ali ngʼwela. Buli uyo akwitaga shibi, akwitaga bugomi hangi, iki shibi shene bugomi. Ningʼwe mumanile giki, Wei wali wigengeleka ashinje shibi shiswe; na muli Wei shibi shiti mo. Buli uyo akwikalaga muli Wei atitaga shibi; buli uyo akwitaga shibi atamonaga, nulu atamanaga Wei. Bana bado, munhu ose atizumulembalemba; uyo akwitaga butungilija ali ntungilija, gitumo na Wei ali ntungilija; Uyo akwitaga shibi ali wa ngʼwa Shetani; iki Shetani akitaga shibi kufuma kwandia. Kulwa mhayo uyu Ngʼwana wa Mulungu wali wigengeleka ayisambule milimo ya ngʼwa Shetani. Buli uyo waabyalwa na Mulungu atitaga shibi, iki lubiyu lwakwe (lwa Mulungu) ikwikalaga muli wei; nanghwe atudula kwita shibi, iki waabyalwa na Mulungu. Mu mhayo uyu bana ba Mulungu na bana ba ngʼwa Shetani bigengeleka. Buli uyo atitaga butungilija ati wa Mulungu, nulu uyo atuntogwa nduguye. Iki uyu guli mhayo uyo ngʼwaagwigwa kufuma kwandia giki, twitogagwe benekele na benekele; Iti giti Kaini uwali wa ngʼwenuyo mi, nanghwe akamulaga nzunaye; nanghwe akamulagila nguno ki? Iki Shitwa shakwe shali shili sha bubi, aliyo sha nzunaye shali shili sha butungilija. Mutizukumya, badugu bane, ulu si yamukolwa. Biswe tumanile giki, twaabita kwinga mu kucha kushika mu bupanga, iki tukubatogagwa badugu. Uyo atuntogagwa nduguye akwikalaga mu kucha. Buli uyo wankolwa nduguye ali mulagi: na mumanile giki, ati ho mulagi uyo aii na bupanga butushila bukwikalaga muli wei. Mu mhayo uyu twaabumana butogwa, iki Wei waabutuula ho bupanga wakwe kulwiswe; huna shitwigelile na biswe kubutuula ho bupanga wiswe kulwa badugu. Aliyo munhu uyo ali nasho shikolo sha si iyi, ulu umona nduguye ali na kugayiwa, ukija kungʼwitila kigongo, angu, butogwa wa Mulungu bukwikalaga muli wei kinahe? Bana bane, tutitogagwe mu mhayo, nulu mu lulimi duhu; aliyo mu Shitwa na mu nghana. Kulwa mhayo uyu tukumana giki, tuli ba nghana, hangi tulatimbya ngholo jiswe mu butongi wakwe: Iki ulu ngholo jiswe jutulekanya, Mulungu ali ntale kutinda ngholo jiswe, nanghwe amanile mihayo yose. Batogwa, ulu ngholo jiswe jitutulekanya, tuli na bugimu kuli Mulungu. Na iyo yose tunomba, twinhiwa nanghwe, iki tukudimaga shilagilo shakwe na kuyita iyo atogilwe mu miso gakwe. Iki chene kilagilo chakwe giki, tulizunye lina lya Ngʼwana wakwe Yesu Kristo, na kwitogwa benekele na benekele gitumo waatulagila. Uyo akushidimaga shilagilo shakwe akwikalaga muli Wei, nanghwe muli wei. Kulwa mhayo uyu tumanile giki, akwikalaga mu biswe, kulwa Moyo uyo waatwinha. Batogwa, mutizuzunya buli moyo gose, aliyo igemagi i mioyo ulu ifumile kuli Mulungu; iki bahangi ba bumama bingi bilongile mu si. Mu mhayo uyu mugumanile Moyo wa Mulungu: buli moyo ugulitambula giki, Yesu Kristo wiiza mu mili, gwenuyo gufumile kuli Mulungu: Na buli moyo ugututambula giki, Yesu Kristo wiiza mu mili, gwenuyo gutafumile kuli Mulungu: na uyu gwene moyo gwa ngʼwilwisha wa ngʼwa Kristo, uyo ngʼungʼwigwa giki, aliza; na haha wamalile kubiza mo mu si. Bingʼwe bana bane, muli ba Mulungu, hangi ngʼwamala kubapyena: iki Uyo ali mu bingʼwe ali ntale kutinda uyo ali mu si. Abo bali ba mu si: kulwa iyo bakuhayaga ya mu si, na si nayo yubigwa. Biswe tuli ba Mulungu: uyo amanile Mulungu akutwigwaga; uyo ati wa Mulungu atutwigwaga. Mu mhayo uyu twaagumana moyo gwa nghana na moyo gwa bujimiji. Batogwa twitogagwi: iki butogwa buli wa Mulungu; na buli uyo watogwa waabyalwa na Mulungu, hangi amanile Mulungu. Uyo atutogwa atamanile Mulungu; iki Mulungu ngʼwene butogwa. Mu mhayo uyu butogwa wa Mulungu wiigengeleka ku biswe giki, Mulungu waantuma Ngʼwana wakwe uwaabyalwa umo wike mu si, tubize bapanga muli Wei. Ubu wene butogwa, iti giki, biswe twali tuntogwa Mulungu, yaya, aliyo Wei waatutogwa biswe, na untuma Ngʼwana wakwe kubiza kihongelo cha shibi shiswe. Batogwa, ulu Mulungu waatutogwa biswe giko, shitwigelile na biswe twitogwe. Ati ho munhu uwamona Mulungu kufuma kale: ulu twitogwa, Mulungu akwikalaga mu biswe, na butogwa wakwe waashikanyiwa mu biswe: Kulwa iyi tumanile giki, tukwikalaga muli Wei, nanghwe mu biswe, iki waatusangigija na Moyo wakwe. Niswe twaabona hangi twakanila giki, Siswe waantuma Ngʼwana wakwe kubiza Mpija wa ba mu si. Uyo ose utambula giki, Yesu ali Ngʼwana wa Mulungu, Mulungu akwikalaga muli wei, nanghwe muli Mulungu. Na biswe twaabumana na twaabuzunya butogwa ubo Mulungu ali nabo ku biswe. Mulungu ngʼwene butogwa; na uyo akwikalaga mu butogwa, akwikalaga muli Mulungu, na Mulungu akwikalaga muli wei. Giko butogwa waashikanyiwa mu biswe, tubize na bugimu mu lushiku lwa kulekanyiwa nsango: iki gitumo Wei ali, na biswe tuli chene mu si umu. Boba buti mo mu butogwa: aliyo butogwa ubushikanile bukwinjaga boba, iki boba buli na nsango, na uyo ali na boba atushikanyiwa mu butogwa. Biswe twaantogwa, iki Wei wandia kututogwa biswe. Ulu munhu uhaya giki, Nantogwa Mulungu, aliyo unkolwa nduguye, ngʼwene ali mama: iki uyo atantogagwa nduguye uyo akumonaga, alantogwa kinahe Mulungu, Uyo atamonaga? Na kilagilo iki twiinhiwa nanghwe giki, uwantogwa Mulungu, antogwe nu nduguye. Buli munhu uwazunya giki, Yesu ali Kristo, waabyalwa na Mulungu: na buli munhu uwantogwa myaji, wantogwa na uyo waabyalwa nanghwe. Mu mhayo uyu tumanile giki, twaabatogwa bana ba Mulungu, ulu tuntogwa Mulungu na kudima shilagilo shakwe. Iki ubu wene butogwa wa Mulungu giki, kushidima shilagilo shakwe: na shilagilo shakwe shiti shilambu. Iki buli uyo uwaabyalwa na Mulungu, akupyenaga si: na uku kwene kupyena ukukuyipyenaga si, kwene kuzunya kwiswe. U Mpyeni wa si ni nani, ulu ati uyo uwaazunya giki, Yesu ali Ngʼwana wa Mulungu? Uyo ngʼwene uwali wiza na minzi na mininga, ngʼwene Yesu Kristo; atizile na minzi gwike, aliyo na minzi na mininga. Na Moyo ngʼwene akukanilaga, iki Moyo ali nghana. Iki bali ho bakaniji badatu ngʼwigulu, Siswe, na Mhayo, na Moyo Ngʼwela: nabo budatu wabo bali umo. Iki shili ho shidatu ishikukanilaga mu si, shene Moyo, na minzi, na mininga: nasho shidatu shisangilile mu mhayo gumo. Ulu tubuzunya bukaniji wa banhu, bukaniji wa Mulungu wene butale kutinda; iki bukaniji wa Mulungu wene ubu giki, waankanila Ngʼwana wakwe. Uwanzunya Ngʼwana wa Mulungu ali na bukaniji muli wei ngʼwenekele: uyo atunzunya Mulungu waangʼwita kubiza mama; iki atabuzunije bukaniji ubo Mulungu unkanila Ngʼwana wakwe. Na ubu wene bukaniji giki, Mulungu waatwinha bupanga butushila, na bupanga wenubu buli muli Ngʼwana wakwe. Uyo ali na Ngʼwana ali na bupanga, uyo ati na Ngʼwana wa Mulungu ati na bupanga. Mihayo iyi nangʼwandikila mumane giki, muli na bupanga butushila, bingʼwe abo mulizunije lina lya Ngʼwana wa Mulungu. Ubu wene bugimu ubo tuli nabo kuli Wei giki, yose iyo tulomba gitumo atogelilwe Wei, akutwigwaga: Ulu tumanile giki, akutwigwaga yose yose iyo tulomba, tumanile giki, tuli nayo iyo twali twanomba. Munhu ulu umona nduguye akwitaga kibi ikiti cha kucha, alombe, nanghwe Mulungu akungʼwinha bupanga kulwa abo abatitaga kibi cha kucha. Kili ho kibi cha kucha: natuhayaga giki, alombe kulwa kibi icho. Buti butungilija bose wene shibi: hangi kili ho kibi ikiti cha kucha. Tumanile giki, buli munhu uwaabyalwa na Mulungu atitaga shibi: aliyo uwaabyalwa na Mulungu akwilindaga, nanghwe u mi atunkuumya. Tumanile giki, tuli ba Mulungu, na si yose ikwikalaga muli ngʼwenuyo u mi. Tumanile giki, Nghana wa Mulungu waamala kwiza, nanghwe waatwinha kwitegeleja giki, tumane Wei Uyo ali wa nghana, na biswe tuli muli Wei Uyo ali wa nghana, Ngʼwene Ngʼwana wakwe Yesu Kristo. Uyu Ngʼwene ali Mulungu nghana na bupanga butushila. Bana bado, ngʼwilanghanage mu shikolile sha kulamyiwa. Namhala kuli nkima nsolwa na bana bakwe, abo naabatogwa mu nghana; nulu iti nene wingʼwene, aliyo na benabo bose abayimanile i nghana; Kulwa nghana iyo ikwikalaga mu biswe, hangi ilabiza hamo na biswe welelo na welelo; Kigongo, kuchila kigongo, na mhola ishufuma kuli Mulungu Siswe na kuli Seba Yesu Kristo, Ngʼwana wa Siswe, shikubiza hamo na biswe mu nghana na butogwa. Bazunya bashiminzile mu nghana Nali nuyega no iki nubabona bamo ba mu bana bako bakushiminzaga mu nghana, gitumo twaanukula kilagilo kuli Siswe. Na haha nakwikumbilija, mayu, iti giki, nakwandikila kilagilo kipya, yaya, aliyo icho tuli nacho kufuma kwandia giki, twitogwe. Na ubu wene Mitogwa giki, tushiminze gitumo shilagilo shakwe shili. Uku kwene kulagila kwakwe giki, gitumo ngʼwigwa kufuma kwandia, mushiminze muko. Iki balembalembi bingi bilongile mu si, abatutambulaga giki, Yesu Kristo wali wiza mu mili. Uyo ngʼwene nembalembi na ngʼwilwisha wa ngʼwa Kristo. Ilalanghanagi benekele mutizujimija iyo ngʼwamala kwita, aliyo ngʼwanukule cha kwinhwa ikishikanile. Uyu ose ukilanija na atikalaga mu kulanga kwa ngʼwa Kristo, ngʼwene ati na Mulungu. Uyo akwikalaga mu kulanga kwa ngʼwa Kristo, ngʼwene ali na Siswe na Ngʼwana. Munhu ulu wiza ku bingʼwe, nanghwe atenha kulanga kwenuku, mutizungʼwegeleja mu numba yingʼwe, nulu mutizungisha: Iki uyo ungisha wisangija nanghwe mu Shitwa shakwe sha bubi. Nali ndi nayo mihayo mingi ya kungʼwandikila, natatogilwe kuyandika ha lubapula na wino: aliyo nisagilwa kwiza ku bingʼwe na kulungalunga ningʼwe nomo ku nomo, buyegi wingʼwe bushikilijiwe. Bana ba ngʼwanongʼwingʼwe nkima nsolwa bakugisha. Amina. Namhala kuli ntogwa Gaio, uyo naan tog wa mu nghana. Ntogwa, nalomba giki, winhiwe lubango mu mihayo yose, na ubize na buzubuku wa gili, gitumo bupanga wako buli mu lubango. Iki nakayega no, aho bakiza badugu bukanila nghana iyili mo muli bebe, gitumo ukushiminzilaga mu nghana. Nati na buyegi bungi butale kukila ubu kwigwa giki, bana bane bakushiminzilaga mu nghana. Ntogwa, ukwitaga mu wishigwa iyo yose ukubitilaga benabo abali badugu na bageni; Nabo bakukanilaga butogwa wako ku butongi wa ba kanisa: ukwita chiza ulu ulabashindikila mu lugendo lwabo gitumo ikwigelile kwita kuli Mulungu: Iki kulwa nguno ya lina lyakwe bali bubuka lugendo, batanukulile kinhu ku bana mahanga. Kulwa iyo shitwigelile biswe kubegeleja banhu abali giko, tubize batumami bichabo mu kuyitumamila i nghana. Nali nubandikila ba kanisa: aliyo Diotrefe, uyo atogilwe kukujiwa mubo atutuzunilija biswe. Kulwa iyo, ulu naliza ko, nalizukwa Shitwa shakwe isho akwitaga, akutusondagulaga mihayo ya bubi: nulu atagelelile giko duhu, wei ngʼwenekele atubegelejaga badugu, nulu aho abatogilwe kubegeleja na bene akubalemejaga, na ubapeja mu kanisa. Ntogwa, utizulondela i ya bubi, aliyo i ya wiza. Uyo akwitaga ya wiza ali wa Mulungu: aliyo uyo akwitaga ya bubi atamonile Mulungu. Demetrio waakanilwa na hanhu bose ali wa wiza, hangi na nghana mayo yunkanila chene, ali chene, na biswe twaakanila: nangho umanile giki, bukaniji wiswe wene wa nghana. Nali ndi na mihayo mingi ya kukwandikila, aliyo natatogilwe kukwandikila na wino na kalamu ya wino: Aliyo nisagilwa kukuboha wangu, huna tulalungalunga nomo ku nomo. Mhola ibize kuli bebe. Batogwa bichiswe bakugisha. Bagishage bichiswe buli munhu na lina lyakwe. Yuda, nsese wa ngʼwa Yesu Kristo, na ngʼwana wa ngʼwabo wa Yakobo ku benabo ablitanwa, abo Mulungu Siswe waabatogwa, na abalindwa muli Yesu Kristo: Kuchila kigongo na mhola na butogwa shongejiwe ku bingʼwe. Batogwa, aho nali nukomela ngʼkwandikila mihayo ya bupiji wiswe wa bose, nuhadikijiwa kungʼwandikila kumukomeleja giki, Muhalalililage kuzunya uko binhwa bela lukangala lumo duhu. Iki bali ho banhu bamo abali bigungunika mu kwigeniha, abstuulilwa ho kale nsango uyu, banhu abatungʼogoha Mulungu, bakugaluchaga kigongo cha Mulungu kubiza wimilizu, hangi bakunemaga Seba Mulungu umo wike, Seba wiswe Yesu Kristo. Hangi natogihve kungʼwizukija bingʼwe, nulu ngʼwimanile iyi yose giki, Seba aho wamala kubapija banhu kufuma mu si ya Misri, hanuma ubayigaja abali batuzunya. Na bamalaika abali batulinda kitungilwe chabo cha kwandia, anyo buleka wikalo wa bo, abo waabalindikija ann minyololo itushila mugati ya giti, kushisha nsango gwa lushiku lwenu to lutale. Hangi gitumo Sodoma na Gomora, i na mizengo iyipindiligije ho, abo abali bulondela bujingi mu nhungwa imo giti boi, bulondela mili ngeni uguti gwa bufumanwa, batuulwa ho kubiza kalelelo, bakinhwa nsango gwa motp gutushila. Giko na benabo baloti ba malofu bagusosohaja mili, hangi bubadalaha basugi, bubaduka ba ikujo, Aliyo Mikaeli, malaika ntale aho wali wilwisha na Shetani na kwihalalija nanghwe kulwa mili gwa ngʼwa Musa, walatagimile kungʼwila nsango gwa kunduka, aliyo akahaya giki, Seba akuhame. Aliyo abo bakuyidukaga ku mihayo iyo batayimanile: aliyo mihaye iyo bimanile mu kitungilwe cha mili, giti ndimu ijiti na masala, mu yeniyo bikenagulila benekele. Basangwa benabo! iki buyidima nzila ya ngʼwa Kaini, na buhahala kutendela buhubi wa ngʼwa Balaamu kulwa mhela, na buyagala mu bugomi wa ngʼwa Kora. Banhu benaba bali shiganga shibisile mu bukombe wingʼwe wa butogwa aho bakulyaga hamo ningʼwe, abilisha benekele bati na boba; bali malunde agati na minzi agutwalanijiwa na miyaga; bali miti miyuguku iyiti na matwajo, iyacha nghangala ibili, iyadubulwa gete; Bali mahuli makali ga nyanza agalitunda ifulo, lyene minala yabo; bali masonda agayelayela, abo abibikilile giiti cha gamha kushisha welelo na welelo. Na Enoka, u wa mpungati kufuma mu kibyalilwe cha ngʼwa Adamu, nanghwe ubahanga benaba, uhaya giki, Lolagi, Seba izile na bela bakwe 10,000 na 10,000, Kubalekanya nsango bose, na kubakanilija bahunga bose kulwa Shitwa shabo isho bali bita na kungʼogoha Mulungu yaya, na kulwa mihayo milambu yose yeniyo ba shibi benabo abatangʼogohaga Mulungu banungalungila. Banhu benaba bali badugumi, bilijaliji, bakushiminzilaga mu kwikumva kwabo; na milomo yabo ikulungalungaga mihayo mitale ya kidoshi, bubabeleleka banhu ikujo kulwa nguno ya solobo. Aliyo bingʼwe batogwa, izukagwi mihayo iyaahayiwa kwandia na batungʼwa ba Seba wiswe Yesu Kristo; Iyo bumuwila giki, ku shiku ja nghalilo balabiza ho badalahi, balondeji ba kwikumva kwabo ukuti mu nzila ya Mulungu. Banhu benabo bisolanya, ba si iyi duhu, bati na Moyo Ngʼwela. Aliyo bingʼwe batogwa, izenjagi mu kuzunya kwingʼwe kwela, lombagi mu Moyo Ngʼwela, Ilindagi mu butogwa wa Mulungu, mulindilile kuchila kigongo kwa Seba wiswe Yesu Kristo kushisha ku bupanga butushila. Bangi mubachile kigongo, abo abalitawatawa; Aliyo bangi bapijagi mubapule mu moto; na bangi mubachile kigongo na kogoha, mukolwe nulu shizwalo ishasosohajiwa na mili. Haha kuli Uyo uwadula kumubalada bingʼwe mutizigumha, na kungʼwimilija muti na kilingo mu butongi wa ikujo lyakwe na buyegi butale, Kuli Mulungu umo wike wa masala, Mpija wiswe, Ubize ho ikujo, na butale, na budula, na nguzu muli Yesu Kristo Seba wiswe kufuma welelo, na haha, na kushisha welelo na welelo. Amina. Kukundula kwa ngʼwa Yesu Kristo, uko Mulungu akangʼwinha kubolekeja basese bakwe mihayo iyigelile kutoza ho wangu: akantumila nsese wakwe Yohana, malaika wakwe kumanikija mihayo yeniyo; U ngʼwene waagukanila mhayo gwa Mulungu, na bukaniji wa ngʼwa Yesu Kristo, na iyo yose wali uyibona. Ali wa lubango uyo akusomaga, nabo abakwigwaga mihayo ya buhangi ubu, na buyidima mihayo iyandikile mo; iki ikanza lili hihi. Nene Yohana ku kanisa mpungati ijili mo mu Asia: Kigongo kibize ku bingʼwe, na mhola, kufuma kuli Ngʼwenuyu ali ho, hangi walali ho, hangi alabiza ho; na hangi kufuma ku mioyo yeniyo mpungati iyili ho mu butongi wa isumbi lyakwe lya butemi; Hangi kufuma kuli Yesu Kristo, Uyo ali nkaniji ngʼwishigwa, na Ngʼwana uwabyalwa tangi kufuma mu bafu, na nsugi wa batemi ba mu si. Uyo waatutogwa, hangi ututungula mu shibi shiswe na mininga gakwe, Utugalucha kutoza batemi na bagabiji kuli Ise Mulungu; Ngʼwenuyu ikujo lili lyakwe na budula welelo na welelo. Amina. Lolagi, izile na malunde; na buli liso lyose lilamona, na benabo abaanchima; na mahanga gose ga mu si galalila shisoji kulwa nguno yakwe. Ali chene, Amina. Nene ndi Alfa na Omega, uhaya Seba Mulungu, Uyo ali ho, na walali ho, hangi alabiza ho, Uyo wa budula bose. Yesu ungʼwilongela Yohana Nene Yohana, ndugu wingʼwe, na ngʼwichingʼwe mu kunyajanyajiwa, na mu butemi, na mu kwiyumilija kwa ngʼwa Yesu Kristo; nali nubiza ho ngʼwijinga ilitanwa Patmo, kulwa nguno ya mhayo gwa Mulungu, na kulwa nguno ya bukaniji wa ngʼwa Yesu. Nali nubiza mu ki-moyo ha lushiku lwa Seba, huna nigwa kunuma yane kulunduma kwa ilaka itale, giti lya mhembe, Lyuhaya giki: Nene ndi Alfa na Omega, wa kwandia na wa nghalikijo: iyo ulibona iyandikage mu kitabo, ukitume ku kanisa mpungati ijili mu Asia: ku Efeso, na Smurna, na Pergamo, na Thuatira, na Sardi, na Filadelfia, na Laodikia. Huna lulu nikibuka nalibone i lilaka ilililungalunga na nene. Aho nikibuka nubona matala mpungati ga zahabu; Na hagati ya matala mpungati genayo numona ho munhu ikolile giti Ngʼwana wa munhu, azwalile kizwalo kushisha ku mliambala, itungigije nkoba gwa zahabu mu kikuba. U ntwe gwakwe na nzwili jakwe jali jape giti boya wape wa ngholo, giti theluji; a miso gakwe nago giti lulali lwa moto; Na magulu gakwe gabange giti chuma chape kigusile, giti kipembilwe mu luhiza, na ilaka lyakwe giti kulunduma kwa minzi mingi. Mu nkono gwakwe gwa bulyo walali na sonda mpungati: na lilushu lya bugi bubili lifumile mu nomo gwakwe: na bushu wakwe wali giti limi likwakaga mu budula walyo lyose. Aho numona, nugwa ha si ku magulu gakwe giti munhu achile. Nanghwe unituulila nkono gwakwe gwa bulyo, uhaya giki, Utizogoha; Nene ndi wa kwandia na wa nghalikijo: Hangi ndi Uyo ndi mpanga, nali nubiza nachile, na lolaga, ndi mpanga kushisha welelo na welelo, Amina: hangi ndi najo mfungulo ja kucha na ja kulimu. Iyandikage lulu mihayo iyo wali uyibona, na iyo ili ho, na iyo ilabiza ho hanuma ya yeniyo; I cha kwigeniha cha sonda mpungati ijo wali ujibona mu nkono gwane gwa bulyo, na cha kwigeniha cha tala jenijo mpungati ja zahabu. I sonda jenijo mpungati jene bamalaika ba kanisa mpungati: na tala mpungati ijo wali ujibona jene kanisa mpungati. U malaika wa kanisa ya mu Efeso, ngʼwandikilage giki, Uyo ajidimile sonda mpungati mu nkono gwakwe gwa bulyo, Uyo akushiminzaga hagati ya tala jenijo mpungati ja zahabu, wahaya giki, Nene namanile Shitwa shako, na kukoyakoya kwako, na kwiyumilija kwako; hangi giki, utudula kubagoyela banhu ba bubi, hangi ukabagema abali bihaya giki, bali batungʼwa, aliyo bati bene, hangi wali ubamana giki, bali bamama; Hangi wiyumiligije na wagoyelile no ku nguno ya lina lyane, aliyo walutanogile. Aliyo ndi nago mhayo kuli bebe, giki, waaleka butogwa wako wa kwandia. Ali lulu, izukagwa kufuma uko wagwilile, oye, ushoke ushite hangi shitile sha kwandia; aliyo ulu utita giko, nakwiza kuli bebe wangu, nakuyinja tala yako mu wikalo wayo, ulu utoya. Aliyo uli nago mhayo uyu giki, ukushikolagwa shitile sha Banikolaiti, shenisho nu Nene nashikolilwe. Uyo ali na kutu igwe mihayo iyi Moyo akujiwilaga kanisa. Uwapyena nalanzunilija kulya ko ku nti gwa bupanga uguli hagati ya ngunda gwa Mulungu. U malaika wa kanisa ya mu Smurna, ngʼwandikilage giki, Uyo ali wa kwandia na wa nghalikijo, Uyo wali ucha hangi ubiza mpanga, Ngʼwenuyo wahaya giki, Nene namanile shitile shako, na kunyajanyajiwa kwako, na buhabi wako, (aliyo uli nabo busabi); hangi namanile nu buduki wabo abihaya bali Bayudaya, aliyo bati bene, aliyo bali ibilingilo lya ngʼwa Shetani. Utizogoha kulwa kunyajanyajiwa ukuhaya kukwilongela: lolaga, muji ngʼwenuyu alihaya kubaponya bamo ba mu bingʼwe mu jela, giki, mugengʼwe; ningʼwe mulabona kunyajanyajiwa shiku ikumi. Komelaga ubize ngʼwishigwa kushisha kucha, na nene nalakwinha ngikili ya bupanga. Uyo ali na kutu igwe mihayo iyi Moyo akujiwilaga kanisa. Uwapyena atalagulajiwa na kucha kwa kabili. U malaika wa kanisa ya mu Pergamo, ngʼwandikilage giki, Uyo ali na lilushu lya bugi bubili wahaya giki, Namanile uko ukikalaga, hu kwene isumbi lya butemi lya ngʼwa Shetani lili: hangi ukumiilaga lina lyane, na utakulemile kuzunya kwane, nulu mu shiku ja ngʼwa Antipa, nkaniji wane ngʼwishigwa, uyo wali ubulagwa mu bingʼwe, uko akikalaga Shetani. Aliyo ndi nayo mihayo yimo kuli bebe, iki uli nabo uko banhu bamo abadimile kulanga kwa ngʼwa Balaamu, uyo wali unanga Balaka kutuula ho ishiki lya kwigumha mu butongi wa bana ba Israeli, giiti, bashilye shinhu ishufunyiwa shitambo ku shikolile, na kwita bujingi. Giko hangi uli nabo banhu abadimile bulangi wa Banikolaiti, ubo nabukolilwe. Oyaga; aliyo ulu utoya nakwiza kuli bebe wangu, nilwishe nabo bulugu na lilushu lya mu nomo gwane. Uyo ali na kutu igwe mihayo iyi Moyo akujiwilaga kanisa. Uwapyena nalangʼwinha kulya ku emanu iyibisile, hangi nalangʼwinha iwe lyape, na ha iwe ilo lina ipya lyandikwa ho, ilo atalimanile munhu ose ulu ati uyo winhiwa. U malaika wa kanisa ya mu Thuatira, ngʼwandikilage giki, Ngʼwana wa Mulungu, Uyo ali na miso giti lulali lwa moto, na magulu gakwe gikolile giti chuma chape kigusile, wahaya giki, Namanile shitile shako, na butogwa wako, na kuzunya kwako, na kwinhilija kwako, na kwiyumilija kwako; hangi shitile shako sha hanuma shene shingi kutinda i sha kwandia. Aliyo ndi na mhayo kuli bebe, giki, u nkima ngʼwenuyo Yezebeli, uyo wihaya giki, ali nghangi, ukunzunilijaga kubalanga na kubahubya basese bane bite bujingi, na kulya shinhu ishufunyiwa shitambo ku shikolile. Na Nene nali nungʼwinha ngʼwanya gwa koya bujingi wakwe; nanghwe atuhayaga koya. Lolaga, nakungwisha ha bulili, nabo abakushihaja nanghwe nakubagwisha mu kuluhaluhiwa kutale, ulu batoya shitile shabo. Hangi na bana bakwe nakubabulaga na lufu; hunaho kanisa jose jilamana giki, Nene ndi Ngʼwenuyo akugisilijaga mhigo na ngholo ja banhu; na Nene nalampeela buli munhu mu bingʼwe gitumo Shitwa shakwe umo shili. Ali bingʼwe abali mu Thuatira, abatadimile kulangwa uku, abo abatamanile mishimu ya ngʼwa Shetani, gitumo bakuhayilaga; namuwila bingʼwe giki, Nene natungʼwidwicha nigo gungi hangi. Aliyo iyo muli nayo iyumiilagi kushisha naliza. Uyo uwapyena na ushita Shitwa shane kushisha ku mhelo, ngʼwenuyo ndangʼwinha budula kugasuga mahanga: Nanghwe alabasuga na nanga gwa chuma, gitumo nungu ja mumbi jutobagulwa; gitumo na Nene ninhiwagwa na Baba. Na Nene ndangʼwinha sonda ya dilu. Uyo ali na kutu igwe mihayo iyi Moyo akujiwilaga kanisa. U malaika wa kanisa ya mu Sardi, ngʼwandikilage giki, Uyo ali nayo Mioyo mpungati ya Mulungu, na sonda jenijo mpungati, wahaya giki, namanile shitile shako giki, uli na lina giki, uli mpanga, aliyo uchile. Mishaga, uyilambye mihayo iyo yasaga ho, iyi ilenda kucha: iki natabonaga shitwa shako giki, shishikile mu butongi wa Mulungu wane. Ali lulu, izukagwa gitumo wali wanukula na wigwa, iyumiilage yeniyo, oye. Ali, ulu utumisha na wikala miso, nakwiza kuli bebe giti ngʼwibi, nangho utalalimana ikanza ilo ndizila kuli bebe. Aliyo uli nago mina magehu mu Sardi, abatasosohagije shizwalo shabo; nabo balashiminzila hamo na Nene bazwalile shizwalo shape, iki bene bigelelilwe. Uyo uwapyena alazwalichiwa shizwalo shape; na Nene natalalijimya lina lyakwe mu kitabo cha bupanga; aliyo nakulitambula lina lyakwe mu butongi wa ngʼwa Baba, na mu butongi wa bamalaika bakwe. Uyo ali na kutu igwe mihayo iyi Moyo akujiwilaga kanisa. U malaika wa kanisa ya mu Filadelfia, ngʼwandikilage giki, Uyo ali ngʼwela na wa nghana, Uyo ali na lufungulo lwa ngʼwa Daudi, uwalugula nulu kuduhu wa kulugala ho, uwalugala nulu kuduhu wa kulugula ho, Ngʼwenuyo wahaya giki, Namanile shitwa shako, lolaga, natuulaga nyango guli ngʼwaje mu butongi wako, nulu kuduhu wa kugulugala; iki bebe uli najo nguzu ndo, aliyo waagudima mhayo gwane, nulu wali utulilema lina lyane. Lolaga, nakwita giki, benabo abali ba ibilingilo lya ngʼwa Shetani, abihaya giki, bali Bayudaya, aliyo bati bene, aliyo balihaya bulomolomo; lolaga, ndabenha bize kulamya mu butongi wa mhambala Jako, nabo balamana giki, Nene nakutogilwe. Iki waagudima mhayo gwane gwa wiyumilija, nu Nene nane nakukubalada upile ngʼwikanza lya kugengʼwa, ilyuhaya kwiza ku si jose, kubagema abikala mu si; Nizile wangu: iyumiilage iyo uli nayo, munhu ose atizukutagija ngikili yako ya nyatemi Uyo uwapyena ndangʼwita kubiza ikingi lya mu Hekalu ya Mulungu wane, nanghwe atalinga mo hangi; na Nene ndangʼwandika lina lya Mulungu wane, na lina lya ikulu lya Mulungu wane, lyene Yerusalemi mhya, iyo iliika kufuma ngʼwigulu kuli Mulungu wane, na lina lyane ipya. Uyo ali na kutu igwe mihayo iyi Moyo akujiwilaga kanisa. U malaika wa kanisa ya mu Laodikia, ngʼwandikilage giki, U Amina, u nkaniji ngʼwishigwa na wa nghana, Uyo ali wa kwandia kwa shisengʼwa sha Mulungu, wahaya giki, Namanile shitwa shako giki, uti nyilizu nulu uti nsebu; hambuhambu ulu ni wabiza nyilizu nulu nsebu. Aliyo, iki wabiza uli nunguzu duhu, uti nyilizu nulu uti nsebu, nakukuswa mu nomo gwane. Iki ulihaya giki, Nene ndi nsabi, nikwigigije sabo ningi, natugayiwa kinhu yaya; aliyo utamanile giki, uli nsunduhazu, na mpinihalilwa, na ngayiwa, na moku, na hangi uli duuhu: Nene nakwinha masala giki, Gulaga kuli Nene zahabu iyejiwa mu moto, hunaho ubize nsabi; na shizwalo shape ushizwale, minala ya duuhu yako itizilonga; ugule na bugota wa kwibila ku miso gako, hunaho ubone. Abo bose nabatogilwe, bene nakabahugulaga na nakabatulaga: ali lulu, kalalagwa, oye. Lolaga, nimilaga ha nyango ndikomagula: munhu ose ulu wigwa ilaka lyane na wigula luwigi, nakwingila kuli wei, nakulya hamo nanghwe, nanghwe hamo na nene. Uyo uwapyena, ngʼwene ndanzunilija kwigasha kihamo na Nene hisumbi lyane lya butemi, gitumo na Nene nupyena nigasha kihamo na Baba hisumbi lyakwe lya butemi. Uyo ali na kutu igwe mihayo iyi Moyo akujiwilaga kanisa. Hanuma ya yeniyi nali nulola, lolaga, nubona luwigi ngʼwigulu lwigulile, na ilaka lya kwandia ilo nali nandia kuligwa, lili giti ilaka lya mhembe, lyulungalunga na nene, lyuhaya giki, Linnaga kunu, na Nene nakukolekeja mihayo iyahaya kubiza ho hanuma ya yeniyo. Haho na haho nali nubiza mu kimoyo: lolaga, isumbi lya butemi lyutuulwa ho ngʼwigulu, na hisumbi lyenilo igashije ho ume. Nanghwe Uyo igashije ho ulu wanola ikolile giti iwe lya Yaspi na lya Sardio: na ita-lya-bashi lilipindije isumbi lya butemi, likolile giti iwe lya Zumalidi. Hangi masumbi makumi abili na ane ga kitemi, galipindije isumbi lya butemi: ha masumbi genayo nali nubabona banamhala makumi abili na bane bigashije ho bazwalile shizwalo shape; na ngikili ja zahabu ku mitwe yabo: Na hisumbi lya butemi jufuma ho ndabi na kupalaluka na malaka. Na matala mpungati ga moto gubyubaka mu butongi wisumbi lyenilo lya butemi, ha gene Mioyo mpungati ya Mulungu. Na mu butongi wisumbi lyenilo lya butemi, yali ili ho giti nyanza ya ilole, iyikolile giti bilauri; na hagati ya isumbi lya butemi na hapindiligije shali shili ho shibumva shipanga shine shokalile miso ku butongi na kunuma. I kibumva kipanga cha kwandia chikolile giti shimba, na kibumva kipanga cha kabili chiikolile giti ndama, na kibumva kipanga cha kadatu chali na bushu giti wa munhu, na kibumva kipanga cha kane chiikolile giti mbeshi ililala. I shibumva shipanga shenisho shine, buli kimo chali na manana atandatu, hangi shokalile miso mapande gose na mugati: nasho shiti na kwifula limi na bujiku kuhaya giki: Ngʼwela, Ngʼwela, Ngʼwela, Seba Mulungu wa budula bose, Uyu uwalali ho, na Uyu ali ho, na Uyo alabiza ho. Hangi shibumva shipanga shenisho aho shungʼwinha ikujo na kunkumilija na kunumba Ngʼwenuyo wigashije ho hisumbi lya butemi, Uyo ali mpanga welelo na welelo, Hunaho lulu banamhala benabo makumi abili na bane bugwa ku butongi wa Ngʼwenuyo wigashije ho hisumbi lya butemi, bunamya Uyo akikalaga mpanga welelo na welelo, buponeja ngikili jabo ku butongi wisumbi lya butemi, buhaya giki, Ee Seba Mulungu wiswe, Bebe wigelelilwe kwinhiwa ikujo na kukumilija na budula: iki Bebe waashisema shinhu shose, nasho shubiza ho, hangi shusengʼwa kulwa butogwa wako. Hangi nali nubona mu nkono gwa bulyo gwa Ngʼwenuyo igashije hisumbi lya butemi kitabo ichandikile mapande gose mugati kunde, kitungilwe na matungijo mpungati. Huna numona malaika wa nguzu uhamuka na ilaka itale, uhaya giki, Ni nani uyo igelelilwe kukuadula kitabo iki na kutungula matungijo gacho? Aliyo walatilonga ho munhu nulu umo yaya, nulu ngʼwigulu, nulu mu si, nulu hasilili ya si; uyo wadula kukikundula kitabo chenicho, nulu kukilola. Na nene nali nulila no shisoji, aho ukija kwilonga munhu nulu umo uwigelelilwe kukikundula kitabo chenicho, nulu kukilola. Huna lulu, umo wa banamhala benabo uniwila giki, Utalilage; lolaga Shimba ya luganda lwa ngʼwa Yuda, Itina lya ngʼwa Daudi, hu Ngʼwene wapyenaga kukikundula kitabo, na kugatungula matungijo gacho mpungati. Huna hagati na hagati ya isumbi lya butemi na ya shibumva shipanga shine, na ya banamhala, numona Ngʼwana wa ngholo imilile ho, ikolile giti wali ubulagwa, ali na mapembe mpungati na miso mpungati, ha gene Minyo mpungati ya Mulungu iyatungʼwa mu si jose. Ngʼwana wa ngholo niza lulu uchanukula kitabo mu nkono bulyo gwa Ngʼwenuyo igashije hununti lya butemi. Aho uchanukula akabo i shibumva shipanga shine na hala benabo makumi abili na bane ha si mu butongi wa Ngʼwana na acholo; buli umo wabo wali na shinje ja zahabu ijokalile ngazu gwa wiza hu kwene kulomba kwa bela. Nabo bimba iyimbo ipya, buhaya giki, Bebe wigelelilwe kuchanukula kitabo, na kugatungula matungijo gacho: iki Bebe wali ubulagwa, ungulila Mulungu na mininga gaho banhu ba buli luganda na lulimi na ludugu na ihanga, Ubita kubiza batemi na bagabiji kuli Mulungu wiswe; nabo balasuga mu si. Huna nulola, nigwa ilaka lya bamalaika bingi bapindije isumbi lya butemi, na shibumva shipanga na banamhala; na wingi wabo wali kihumbi nghangala kihumbi, na shiku nghangala shiku; Nabo buhaya na ilaka itale giki, Igelelilwe Ngʼwana wa ngholo Ngʼwenuyo uwali ubulagwa kwanukula budula, na busabi, na masala, na nguzu, kukumilijiwa, na ikujo, na kugongolwa. Na buli kisengʼwa chose ikili ngʼwigulu, na mu si, na hasilili ya si na ha nyanza, na shose ishili mo, nali nushigwa shuhaya giki, Kugongolwa, na ikujo, na kukumilijiwa, na budula shingʼwigelile Uyo igashije hisumbi lya butemi, na kuli Ngʼwana wa ngholo, kushisha welelo na welelo. I shibumva shipanga shine nasho shuhaya giki, Amina. Na banamhala benabo makumi abili na bane bugwa ha si bunamya Uyo ali mpanga welelo na welelo. Na nene nubona aho Ngʼwana wa ngholo Ngʼwenuyo akatungula limo ku matungijo genayo mpungati, nigwa umo wa shibumva shipanga shine uhaya na ilaka itale kina kuluma kwa mbula, uhaya giki, Nzugu ulole. Huna nubona falasa yape, na uyo wali widamhilile ho ali na buta, hangi winhiwa ngikili ya kutemela, nanghwe uja akupyenaga, na kupyena. Aho wali utungula itungijo lya kabili, nigwa kibumva kipanga cha kabili uhaya giki, Nzugu ulole. Yufuma lulu falasa yingi yaza; na uyo wali widamhilile ho winhiwa kuyinja mhola mu si, banhu bibulage benekele na benekele; hangi wali winhiwa lilushu itale. Aho wali utungula itungijo lya kadatu, nigwa kibumva kipanga cha kadatu uhaya giki, Nzugu ulole. Nahayulola nubona falasa yapi; na uyo wali widamhilile ho wali na ipimilo mu nkono gwakwe. Huna nigwa ilaka hagati ya shibumva shipanga shine, lyuhaya giki, Igopo lya ngano shilingi imo, na magopo adatu ga shairi shilingi imo; aliyo utashikenagulage maguta na minzi ga mizabibu. Aho wali utungula itungijo lya kane, nigwa ilaka lya kibumva kipanga cha kane uhaya giki, Nzugu ulole. Nahayulola nubona falasa ya shini; na uyo wali widamhilile ho, lina lyakwe kucha, kulimu nako kunondela. Nabo binhiwa budula kwipande lya kane lya si, banhu babulagwe na lilushu, na nzala, na ihuya, na shinwele sha mu si. Aho wali utungula itungijo lya katano, nubona hasilili ya ngʼwalilo bupanga wabo abali bubulagwa kulwa mhayo gwa Mulungu, na kulwa bukaniji wabo, ubo bali bukanila: Nabo buhamuka na ilaka itale, buhaya giki, Ee! Seba Ngʼwela na wa nghana, ukwikendeleja kushisha nanali kukija kubalekanya nsango, na kugahwimila njigu mininga giswe ku benabo abali mu si? Nabo bali binhiwa buli munhu kizwalo chape; hangi buwilwa kwifula hado tame, kushisha bungʼwe bukumi wa basese bichabo na badugu babo abalabulagwa nabo giti boi. Nubona aho wali utungula itungijo lya katandatu, huna yubiza ho nyahinga nhale; limi lyali lilabula giti ngʼwenda gwa igunila lyapi, na ngʼweji gulaluka za giti mininga; Na sonda ja ngʼwigulu najo jugwa ha si, gitumo nti ntini gulagalicha maholosho gago ulu gushingishiwa na nyaga ntale. Na igulu lyali lyinjiwa ho, giti kinhu kipaligilwe; na buli lugulu na ijinga shali shinjiwa ha wikalo washo. Na batemi ba si, na batale, na batale ba mabita, na basabi, na ba budula, na buli munhu nulu nsese nulu ngʼwana wa banhu, bibisa mu mapilinga na mu mashiganga ga mu ngulu: Bujiwila ngulu na shiganga giki, Tugwilagi, mutubise mu miso ga Ngʼwenuyo igashije hisumbi lya butemi, na mu bupelanu wa Ngʼwana wa ngholo: Iki lushiku lutale lwa bupelanu wakwe lwashikaga; ni nani uyo wadula kwimila ho? Huna lulu nubabona bamalaika bane bimilile ku mhelo ine ja si, bayidimile miyaga ine ya si, nyaga gose gutizuhemba mu si, nulu mu nyanza, nulu ku nti gose. Hangi numona malaika ungi winunga kufuma kiya, ali na imenghelo lya Mulungu mpanga: ngʼwenuyo ubahamukila na ilaka itale bamalaika bane abo bali binhiwa budula kukenagula si na nyanza, Uhaya giki, Mutizukenagula si, nulu nyanza, nulu miti, kushisha aho tulamala kubamengha basese ba Mulungu ha bushu wabo. Huna nigwa bukumi wabo abali bumenghwa; bali 144,000 ba buli luganda lwa bana ba Israeli. Ba luganda lwa ngʼwa Yuda, bali bumenghwa 12,000: Ba luganda lwa ngʼwa Rubeni 12,000: Ba luganda lwa ngʼwa Gadi 12,000: Ba luganda lwa ngʼwa Asheri 12,000: Ba luganda lwa ngʼwa Naftali 12,000: Ba luganda lwa ngʼwa Manase 12,000: Ba luganda lwa ngʼwa Simeoni 12,000: Ba luganda lwa ngʼwa Lawi 12,000: Ba luganda lwa ngʼwa Isakari 12,000: Ba luganda lwa ngʼwa Zabuloni 12,000: Ba luganda lwa ngʼwa Yusufu 12,000: Ba luganda lwa ngʼwa Benyamini 12,000. Hanuma ya yeniyi nubona, lolaga, ibita itale no no no walati ho munhu uwali udula kubabala u wingi wabo, abafumile mu mahanga gose, na mu ngʼanda jose, na mu ndugu jose, na mu ndimi jose; bimiliie mu butongi wisumbi lya butemi na mu butongi wa Ngʼwana wa ngholo, bazwalile shizwalo shape, bali na mafambi ga magashushiga mu makono gabo; Buhamuka na ilaka itale, buhaya giki, Bupiji bubize kuli Mulungu wiswe Uyo igashije hisumbi lya butemi na kuli Ngʼwana wa ngholo. Na bamalaika bose bali bimiliie balipindije isumbi lya butemi na banamhala na shibumva shipanga shine; nabo bugwa bachimigije bushu wabo mu butongi wisumbi lya butemi, bunamya Mulungu, Buhaya giki, Amina: Kugongolwa, na kukumilijiwa, na masala, na kulumba, na ikujo, na budula, na nguzu, shibize kuli Mulungu wiswe kushisha welelo na welelo. Amina. Na umo wa banamhala benabo ushosha mihayo, uniwila giki, Banani benaba abazwalile shizwalo shape? hangi bafumile hali? Na nene nungʼwila giki, Seba wane, umanile bebe. Nanghwe uniwila giki, Benaba a bene bafumile mu kukoyakoyiwa kutale no, nabo bojaga shizwalo shabo, bashegije pe mu mininga ga Ngʼwana wa ngholo. Kulwa iyo bali mu butongi wisumbi lya butemi lya Mulungu; bakantumamilaga limi ha bujiku mu hekalu yakwe: na Uyo igashije hisumbi lya butemi alabafiikija na ihema lyakwe. Nabo batalatuba nzala hangi, nulu kukolwa nota hangi, nulu limi litalabocha, nulu nhungwizi yose. Iki Ngʼwana wa ngholo Uyo ali hagati ya isumbi lya butemi, alabiza ndimi wabo, nanghwe alabatongela ku nzwinzi ja minzi ga bupanga: na Mulungu alapyagula shisoji shose sha mu miso gabo. Aho akatungula itungijo lya mpungati, hubiza ho ngʼwigulu kuhumula du kakanza giti ka nusu saa. Huna nubabona bamalaika mpungati abimila mu butongi wa Mulungu; nabo binhiwa mapembe mpungati. Na malaika ungi wiza, wimila ha ngʼwalilo, ali na shinje ya zahabu; nanghwe winhiwa ngazu ngʼwingi, agutuule kihamo na kulomba kwa bela bose ha ngʼwalilo gwa zahabu uguli mu butongi wisumbi lya butemi. I lyochi lya ngazu linunga ku butongi wa Mulungu, kihamo na kulomba kwa bela kufuma mu nkono gwa malaika. Huna lulu malaika uyisola i shinje uyokala moto gwa ha ngʼwalilo, uyiponeja ku si: huna yubiza ho kuluma kwa mbula, na malaka matale, na ndabi, na nyahinga. Na bamalaika benabo mpungati abali na mapembe mpungati, bibejabeja kugafuula. Malaika wa kwandia utuula, huna yubiza ho mbula ya mawe na moto shisangiligije na mininga, nasho shuponejiwa ku si: ipande lya kadatu lya si Iyupya moto; na ibudika lya kadatu lya miti lyutwingʼwa na moto; maswa madoto gose nago gupemva. Malaika wa kabili nanghwe utuula, yubiza giti lugulu lutale lukubakaga moto lutalichiwa mu nyanza: ipande lya kadatu lya nyanza lyubiza mininga; Na ibudika lya kadatu lya shisengʼwa sha mu nyanza, ishali na bupanga, shushila kucha; na ibudika lya kadatu lya meli jose jukenagulwa. Malaika wa kadatu nanghwe utuula ipembe, na isonda itale lyugwa kufuma ngʼwigulu, lyubaka giti chenge, nalyo lyugwa ku ibudika lya kadatu lya imonga, na ku nzwilo ja minzi; Na lina lya isonda lyenilo litanwa giki, Absinto: na ibudika lya kadatu lya minzi lyubiza absinto, banhu bingi bucha kulwa minzi genayo iki gulujiwa no. Malaika wa kane nanghwe utuula ipembe, na ibudika lya kadatu lya limi lyutulwa, na ibudika lya kadatu lya ngʼweji, na ibudika lya kadatu lya sonda; huna ibudika lyasho lya kadatu lyubiza giiti, na ibudika lya kadatu lya isana lya limi lyoya kwaka, na bujiku nabo chene. Huna lulu nubona, hangi nigwa mbeshi yulala hagati ya, igulu, yuhamuka na ilaka itale, yuhaya giki, Basangwa, basangwa, basangwa, abikala ho mu si, ku nguno ya malaka agasaga ho ga mapembe ga bamalaika badatu aba-tali kufyula. Malaika wa katano nanghwe utuula, na nene nubona sonda iyali yagwa ha si kufuma ngʼwigulu: nanghwe winhiwa lufungulo lwa ichongo iliti na ngelelo. Nanghwe uligula i lichongo iliti na ngelelo; lyufuma mo lyochi, lyudundumuka giti lyochi lya ku ibibi itale; limi na hape shutuula giiti kulwa lyochi lyenilo lya ngʼwichongo. Hangi kufuma mu lyochi lyenilo jufuma mo njige jugwila ha si, najo jinhiwa budula giti wa nghomi ja mu si umo buli. Julagilwa, jitizukenagula maswa ga mu si, nulu chose chose kidoto, nulu buli nti gose; aliyo jibaluhye banhu benabo duhu abati nalo lumengho lwa Mulungu ku bushu wabo. Julagilwa jitizubabulaga, aliyo jibaluhye mieji itano: na busungu wajo bubange giti busungu wa nghomi ulu yunuma munhu. Mu shiku jenijo banhu balakoba kucha, nako kulabagaya; balikumva kucha, na kucha kulabapela. Na shikolile sha njige jenijo shubiza iti falasa ijimalilile kulwa bulugu, na u mitwe yajo jili na ngikili jibange giti zahabu, na bushu wajo wikolile giti bushu wa banhu. Najo jali na nzwili giti nzwili ja bakima, na mino gajo giti mino ga shimba. Hangi jali na muda mu kikuba giti muda ja chuma, na kulunduma kwa manana gajo kwali giti kulunduma kwa magogoteni ga falasa ningi, ulu jufutuma kuja ku bulugu. Hapgi jali na mikila na mbola giti ja nghomi; na mu mikila yajo jali na budula kubaluhya banhu mieji itano. Hangi jali na ntemi wajo ngʼwene malaika wa ichongo iliti na ngelelo; lina lyakwe mu Kihebrania lili giki, Abadoni, na mu lulimi lwa Kigriki giki, Apolyoni. Kusangwa kwa kwandia kwabitaga: lolaga, gatali gali ho makusangwa abili agaliza hanuma yaho. Malaika wa katandatu nanghwe utuula ipembe, na nene nigwa ilaka ilyufuma ku mapembe ane ga ngʼwalilo gwa zahabu uguli mu butongi wa Mulungu, Lilingʼwila malaika wa katandatu uyo ali na ipembe giki, Tungulaga bamalaika bane abatungilwe mu mongo ntale gwa Eufrati. Huna butungulwa bamalaika benabo bane abali bumalililwa ku saa yeniyo na lushiku na ngʼweji na ngʼwaka, giki, babulage ibudika lya kadatu lya banhu. U bukumi wabo wa ibita abadamhilile falasa bene 200,000,000: nigwa chene kubalwa kwabo. Mu kolechiwa kwane nujibona falasa jenijo nabo abajidamhilile ho bali giki, bazwalile muda mu kikuba jibange giti moto, na giti bupi wa igulu, na giti bugota wa kibiliti; na mitwe ya falasa jenijo yali giti mitwe ya shimba; na moto gufuma mu milomo yajo na lyochi na bugota wa kibiliti. Ibudika lya kadatu lya banhu bubulagwa na shenishi shidatu, moto, na lyochi, na bugota wa kibiliti, ishufuma mu milomo yajo. Iki budula wajo wene mu milomo yajo na mu mikila yajo; iki mikila yajo yikolile giti nzoka, hangi jali na mitwe; hu yene jikulumilaga nayo. Aliyo a banhu abusaga, abo bali batubulagwa na makoye genaya, nahene, bali hatuleka isho bali bubeja na makono gabo; nulu bali batoya kulamya masamva, na shikolile sha zahabu, na sha feza, na sha chuma chape, na sha mawe, na sha manti; isho shitudula kubona, nulu kwigwa, nulu kushiminza: Nulu bali batoya bubulagi wabo, nulu bulogi wabo, nulu bujingi wabo, nulu wibi wabo. Huna numona malaika ungi wa nguzu wika kufuma ngʼwigulu, azwalile ilunde na italyabashi ha ntwe gwakwe, bushu wakwe wali giti limi, na magulu gakwe giti nghingi ja moto; Mu nkono gwakwe walali nako kakitabo kakundulile: upanda kugulu gwakwe gwa bulyo higulya ya nyanza, na gwa lumoso ku si numu; Na uhamuka na ilaka itale giti shimba ikuzumilaga; aho uhamuka, milumi mpungati yuluma na malaka gayo. Milumi yeniyo mpungati aho yamala kuhaya, nene nitegatega kwandika: huna nigwa ilaka kufuma ngʼwigulu lyuhaya giki, Iyo yahayiwa na milumi mpungati ituulilage lumengho lwa kwibisa, utizuyandika. Na malaika uyo numona imilile higulya ya nyanza na ya si usunga nkono gwakwe gwa bulyo kwigulu, Witonga kuli Uyo ali mpanga welelo na welelo, uwasema igulu na shinhu ishili mo, na si na shinhu ishili mo, na nyanza na shinhu ishili mo, witonga giki, Hatalabiza ho kukendela hangi: Aliyo mu shiku ja ilaka lya malaika wa mpungati, aho alandia kufuula mhembe, hunaho ya kwigeniha ya Mulungu ilashikilijiwa, gitumo wali ubamanya batumami bakwe a bahangi. Na ilaka ilo nuligwa kufuma ngʼwigulu lyulungalunga na nene hangi, lyuhaya giki, Jaga ukanukule kakilabo akakundulile akali mu nkono gwa malaika uyo imilile higulya ya nyanza na ya si. Nuja lulu kuli malaika ngʼwenuyo, nungʼwila giki, Ninhage kakitabo. Nanghwe uniwila giki, Anukulaga ukalye; nako kakuluja mu nda yako, aliyo mu nomo gwako kakunonela giti buki. Nane nukanukula a kakitabo mu nkono gwa malaika ngʼwenuyo, nukalya; nako kunonela giti buki mu nomo gwane: aliyo aho namala kukalya, nda yane yulujiwa bululu. Huna lulu buniwila giki, Bebe shikwigelile kuhanga hangi mihayo ya banhu, na ya mahanga, na ya ndimi, na ya batemi. Hanuma lulu ninhiwa ibingo likelile na nanga, nuwilwa giki, Bukaga upime hekalu ya Mulungu na ngʼwalilo, na benabo abakalamijaga mo. Aliyo kibuga ikili hanze ya hekalu chene, kilekage, utizukipima; iki chene chaabalekelwa bana mahanga: na nzengo ngʼwela balagupandagila mieji makumi ane na ibili. Bakaniji babili Na Nene nakubinha budula bakaniji bane babili, nabo balabyuhanga shiku 1,260, bazwalile shizwalo sha magunila. Benabo bene miti yeniyo ibili ya mizeituni na tala ibili ijimilile mu butongi wa Mulungu wa si jose. Munhu ose ulu uhaya kubitila kibi, moto gufuma mu milomo yabo, gubabocha banishi babo: na munhu ose ulu uhaya kubitila kibi, ngʼwenuyo akubulagwa giko. Benaba bali na budula kulugala igulu, mbula ituzutula mu shiku ja buhangi wabo: hangi bali na budula ku minzi kugagalucha kubiza mininga, hangi na kutula si na mahuya gose, nghangala ningi gitumo batogelilwe. Aho balamalija bukaniji wabo, huna lulu kinwele ichufuma ngʼwichongo iliti na ngelelo kilita bulugu nabo, nacho kilabapyena na kubabulaga. Na mibimba yabo ilalambalala ngʼwipalapala lya nzengo ntale, uyo ugwitanwa mu ki-moyo Sodoma na Misri, hangi hu kwene Seba wiswe wali ukomelwa. Na banhu ba mu ndugu, na ba mu ngʼanda, na ba mu ndimi, na ba mu mahanga, nabo balayibona mibimba yabo shiku idatu na nusu; nulu batalazunilija mibimba yabo kugungʼwa mu shigila. Nabo abazengile mu si balayega kulwabo, na kusangabala no, hangi balabinongha benekele na benekele; iki bahangi benabo babili bali bubyubaluhya abazengile mu si. Hanuma ya shiku idatu na nusu moyo gwa bupanga ugufumile kuli Mulungu gubingila, nabo bimila na magulu gabo wima; na boba butale bubadima abo abubilolela. Huna lulu bigwa ilaka itale kufuma ngʼwigulu lilibawila giki, Linhagi ngʼwize kunu. Nabo bulinha lulu ngʼwigulu ngʼwilunde; na banishi babo bubilolela. Ngʼwikanza lyenilo yubiza ho nyahinga nhale, na ibudika lya ikumi lya nzengo lyugwa; na banhu 7,000 nabo bubulagwa na nyahinga yeniyo: nabo abali busaga ho budingʼwa na boba, bungʼwinha ikujo Mulungu wa ngʼwigulu. Kusangwa kwa kabili kwamala kubita: lolaga, kusangwa kwa kadatu kuliza wangu. Malaika wa mpungati utuula ipembe; huna gubiza ho malaka matale ngʼwigulu, guhaya giki, U butemi wa si wabizaga wa Seba wiswe, na wa ngʼwa Kristo wakwe: nanghwe alatema kushisha welelo na welelo. Nabo a banamhala benabo makumi abili na bane, abigashije ku butongi wa Mulungu ha masumbi gabo ga nyatemi, bugwa bachimigije bushu, bunamya Mulungu, Buhaya giki, Twakulumba, Ee Seba Mulungu wa nguzu jose, Uyu uli ho, na wali uli ho, hangi ulabiza ho; iki Bebe wadimaga budula wako butale, na watema. Huna bana mahanga bupelana, na bupelanu wako washikaga, na ngelo ya kubalekanya nsango bafu, na ngelo ya kubinha mhela basese bako a bahangi, na bela, na benabo abalyogohile lina lyako, a bado na batale; hangi na ngelo ya kubakenagula benabo abakuyikenagulaga si. Huna lulu hekalu ya Mulungu yigulwa ngʼwigulu; na isandiko lya ilagane lyakwe lyubonwa mu hekalu yakwe; huna lulu jubiza ho ndabi, na malaka, na nghuba, na nyahinga, na mbula nhale ya mawe. Na bulolelo butale wali wilonga ngʼwigulu; nkima azwalile limi, na ngʼweji hasilili ya magulu gakwe, na ku ntwe gwakwe ngikili ya sonda ikumi na ibili. Nanghwe walali nda, ulila ulungʼwa busungu wa kubyala. Bubonwa hangi bulolelo bungi ngʼwigulu, lolaga, isota lyaza itale, ilili na mitwe mpungati na mapembe ikumi, na ha mitwe yalyo ngikili mpungati. Na nkila gwalyo gudutila ibudika lya kadatu lya sonda ja ngʼwigulu, gujiponeja ha si: i lisota lyimila mu butongi wa nkima uyo wahaya kubyala giki, aho alabyale, linʼye ngʼwana wakwe. Nanghwe ubyala ngʼwana ngosha, uyo alagadima mahanga gose na nanga gwa kisinza: na ngʼwana wakwe upulwa kutwalwa kuli Mulungu na kwisumbi lyakwe lya butemi. U nkima nanghwe upelela mu bu, uko ali na lwande aho wabegahegejiwa na Mulungu, banishe kwenuko shiku 1,260. Bubiza ho lulu bulugu ngʼwigulu: Mikaeli na bamalaika bakwe bulwa na isota; isota nalyo lyulwa kihamo na bamalaika balyo; Aliyo bali batupyena; nulu wikalo wabo wali butilonga hangi ngʼwigulu. Na isota lyenilo itale lyuponyiwa, i lyene iyoka lya kale, ilitanwa giki, Muji, hangi Shetani, uyo akulembaga si yose, ngʼwene uponejiwa ku si, na bamalaika bakwe nabo buponyiwa kihamo nanghwe. Hunaho nuligwa ilaka itale ngʼwigulu, lyuhaya giki, Haha lulu washikaga bupiji, na nguzu, na butemi wa Mulungu wiswe, na budula wa ngʼwa Kristo wakwe: iki muji wa badugu biswe waponejiwagwa ha si, uyo wali ubyubabula mu butongi wa Mulungu wiswe limi na bujiku. Nabo bumpyena kulwa mininga ga Ngʼwana wa ngholo, na kulwa mhayo gwa bukaniji wabo; hangi bali batubudilila bupanga wabo kushisha kucha. Kulwa iyo, yegaga bebe igulu, na bingʼwe mukikalaga mo. Ngʼwasangwa bingʼwe si na nyanza; iki muji ngʼwenuyo wikaga ku bingʼwe, ali na bupelanu wingi no, iki amanile ikanza lyakwe ilyasaga lili ido. Isota lyenilo aho lyubona giki, lyuponejiwa ku si, lyunyajanyaja lulu nkima ngʼwenuyo wali umyala ngʼwana ngosha. Huna lulu u nkima ngʼwenuyo winhiwa manana abili ga mbeshi nhale giki, alale aje mu bu, ku lwande lwakwe, alishiwe kwenuko ikanza, na makanza na ikanza nusu, alisegenelile iyoka. Iyoka nalyo lyuswa minzi kufuma mu nomo gwalyo giti mongo kunuma ya nkima, giki, u nkima ahulumiwe na mongo. Aliyo si yungunana u nkima, si yasamya nomo gwayo, yugukwelela mongo gwenuyo uguswiwa na isota mu nomo gwalyo. Hunaho lulu isota lyundakila nkima, lyuja lulu lyububukila bulugu u bubyile wakwe uwali busaga ho, abashidimile shilagilo sha Mulungu, hangi abali nabo bukaniji wa kuli Yesu Kristo. Huna nali nimila ku maseni ga ku nyanza. Nubona kinwele kilifuma mu nyanza, kili na mapembe ikumi na mitwe mpungati, na ha mapembe gacho kili na ngikili ikumi, na ku mitwe yacho a mina ga buduki. Na kinwele icho nukibona kibangile giti subi, na magulu gacho gali giti ga nduba, na nomo gwacho giti nomo gwa shimba: na isota lyuchinha nguzu jalyo, na isumbi lyalyo lya butemi, na budula butale no. Ntwe gwacho gumo nugubona giti gugulajiwa nhondo ya kucha: aliyo nhondo yacho ya kukibulaga yupila: na si yose bakikalalilile budedebala kulwa kinwele chenicho: Nabo bulilamya i lisota, ilo lyuchinha kinwele budula, na bukilamya ni kinwele, buhaya giki, uyo abangile giti kinwele cheniki ngʼwene nani? nulu nani uyo wadula kwita bulugu nacho? Hangi chinhiwa nomo gwa kuhaya mihayo mitale, na buduki; na chinhiwa budula kwita giko mieji makumi ane na ibili. Nacho chasamya nomo gwacho kundukila Mulungu, na kulidukila lina lyakwe, na ihema lyakwe, na kubadukila benabo abikala ngʼwigulu. Hangi chinhiwa kwita bulugu na bela, na kubapyena: nacho chinhiwa budula ku ngʼanda, na ku ndimi jose, na ku mahanga gose. Nabo bose abikala mu si balakilamya, abo mina gabo gatandikilwe mu kitabo cha bupanga cha Ngʼwana wa ngholo uwali wabulagwa kufuma kubumva kwa si. Uyo ali na kutu, igwe. Uyo udima ndingʼwa, nanghwe alatwalwa ndingʼwa: uyo ulu ubulaga na lilushu, nanghwe chene alabulagwa na lilushu. Huna kwene kwiyumilija na kuzunya kwa bela. Huna nubona kinwele kingi kilifuma mu si; chali na mapembe abili giti mapembe ga ngʼwana wa ngholo, aliyo chulungalunga giti isota. Nacho chubutumamila budula bose wa kinwele cha kwandia mu butongi wacho. Chuyita si yose, nabo abikala mo, bakilamye kinwele cha kwandia, ichupila nhondo yacho ya kucha. Nacho kikwitaga mabulolelo matale, kikugwichaga moto ku si kufuma ngʼwigulu mu miso ga banhu. Kikubalembalembaga bose abikala mu si na mabulolelo genayo kili na nguzu kwita mu miso ga kinwele chenicho; chubalagila abikala mu si giki, bakibegeje chikolile cha kulamya kinwele ichali chutengʼwa nhondo na lilushu hangi chikala kipanga. Huna chinhiwa budula kukituulila chikolile cha kinwele miuyi, chikolile cha kinwele kilungalunge; hangi babulagwe bose abulema kukilamya chikolile cha kinwele. Nacho chubita banhu bose, bado na batale, na basabi na bahabi, na bana ba banhu na basese, giki, bose bamenghwe lumengho ku nkono gwabo gwa bulyo, nulu ku bushu wabo; Hangi giki, munhu ose atuzunilijiwa kugula nulu kuguja, ulu ati nalo u lumengho, lwene lina lya kinwele nulu bukumi wa lina lyacho. Henaha hagongile masala. Uyo ali na witegeleja abale bukumi wa kinwele; iki bukumi wacho wene bukumi wa kimunhu; hangi bukumi wacho wene magana atandatu na makumi atandatu na itandatu. Huna nulola, numona Ngʼwana wa ngholo imilile ku lugulu lwa Sayuni, kihamo na banhu 144,000, abali na lina lyakwe na lina lya ngʼwa Ise lyandikililwe ha bushu wabo. Nane nigwa ilaka kufuma ngʼwigulu, giti kulunduma kwa minzi mingi, na giti kulunduma kwa kuluma kutale kwa mbula: hangi ilaka ilo nigwa lyali giti kulila kwa shita ulu batuji butula shita shabo: Nabo bimba lyimbo lyubiza giti ipya mu butongi wisumbi lya butemi, na mu butongi wa shibumva shipanga shine na wa banamhala benabo; walati ho munhu uwadula kwilanga lyimbo lyenilo aliyo benabo bike 144,000, abugulwa kufuma mu si. Abo ha bene abatusosohajiwa na bakima, iki bali bibembu. Abo ha bene abunondela Ngʼwana wa ngholo hose hose uko ajile. Bene bugulwa kufuma mu banhu babize matwajo ga kwandia kuli Mulungu na kuli Ngʼwana wa ngholo. Na mu milomo yabo butilongile bulomolomo; boi bati na kilingo mu butongi wisumbi lya butemi lya Mulungu. Numona malaika ungi akulalaga hagati na hagati ya ngʼwigulu, ali na evangeli ya butushila kubalomela abikala mu si, ku buli ihanga lyose, na luganda, na lulimi, na ludugu; Nanghwe uhaya higulya na ilaka itale giki, Ngʼogohagi Mulungu, mungʼwinhe ikujo; iki ikanza lya kulekanya kwakwe kwa nsango lyashikaga: namyagi Ngʼwenuyo waashibeja igulu na si, na nyanza na nzwilo ja minzi. Malaika ungi wa kabili unondela, uhaya giki, Lyagwaga, lyagwaga i Libabeli itale ilyali lyubyugangʼwisha mahanga gose kangala ya budaki wa bujingi walyo. Malaika ungi wa kadatu ubalondela, uhaya na ilaka itale giki, Munhu ose ulu ukilamya kinwele na chikolile chacho, na uzunya kumenghwa lumengho lwacho mu bushu wakwe, nulu ha nkono gwakwe, Ngʼwenuyo alangʼwa kangala ya budaki wa Mulungu, iyo yasamijiwa, itasanjiwe na minzi mu kikombe cha bupelanu wakwe; hangi alaluhaluhiwa mu moto na bugota wa kibiliti, mu butongi wa bamalaika bela, na mu butongi wa Ngʼwana wa ngholo: Na lyochi lya kuluhaluhiwa kwabo likwinungaga kushisha welelo na welelo: nabo bati na kwifula limi na bujiku, abalamya kinwele na chikolile chacho, kihamo na benabo abazunya kumenghwa lumengho lwa lina lyacho. Henaha hagongile kwiyumilija kwa bela, abakushidimaga shilagilo sha Mulungu, na kuzunya kwa ngʼwa Yesu. Hangi nigwa ilaka lyufuma ngʼwigulu lyuhaya giki, Andikaga, Bali ba lubango a bafu abacliila muli Seba kufuma haha; Ali chene, wahaya Moyo, leke bifule mu milimo yabo ya makoye; iki shitile shabo shubalondela. Nubona, hangi lolaga, ilunde lyape; na ha ilunde lyenilo numona igashije ho umo uwikolile na Ngʼwana wa munhu, azwalile ngikili ya zahabu ku ntwe gwakwe, na mu nkono gwakwe ali na lushu lugi. Na malaika ungi ufuma mu hekalu, unilila na ilaka itale Uyo igashije ha ilunde, uhaya giki, Temaga lulu na lushu lwako, ugese: iki ikanza lya kugesela lyashikaga, iki magesa ga mu si gumile. Hunaho Uyo igashije ha ilunde uluponeja lushu lwakwe ku si, i si yugeswa lulu. Hunaho malaika ungi ufuma mu hekalu iyili ngʼwigulu, nanghwe ali na lushu lugi. Na malaika ungi ufuma mu nghalilo, ngʼwene ali na budula ku moto; nanghwe unilila na ilaka itale uyo ali na lushu lugi, uhaya giki, Temaga lulu na lushu lwako lugi, ugese mikungo ya nzabibu gwa mu si; iki mizabibu yayo yahile nghana. Huna lulu malaika uluponeja lushu lwakwe ku si, ugesa nzabibu gwa si, uguponya ngʼwikamilo itale lya bupelanu wa Mulungu. Na ikamilo lya nzabibu lyupandagilwa hanze ya linzengo, na mininga gali gufuma ngʼwikamilo, kushisha ku hatamu ja falasa, gusela gashika kule giti mailo magana abili. Nubona hangi bulolelo bungi ngʼwigulu, butale na wa kukumya, bamalaika mpungati abali na sha kuluhyaluhya mpungati sha kumalija, iki mu shenisho bupelanu wa Mulungu washikila. Nubona iyikolile giti nyanza ya ilole isanganikilile na moto: hangi nubabona benabo abupyena mu kwiheba na kinwele, na chikolile chacho, na lumengho lwacho, na bukumi wa lina lyacho, bimilile ha nyanza ya ilole baii na shita sha Mulungu. Nabo bimba lyimbo lya ngʼwa Musa ntumami wa Mulungu, na lyimbo lya Ngʼwana wa ngholo, buhaya giki, Ee, Seba Mulungu, Wa budula bose, shitile shako shene shitale na sha kukumya; nzila jako jene ja butungilija na ja nghana, Bebe Ntemi wa bela. Ni nani uyo aleme kukogoha Bebe Seba, na kwikumilija lina lyako? iki Bebe wike uli Ngʼwela; iki mahanga gose galiza kulamya mu butongi wako; iki shitile shako sha butungilija shutendwa hape. Hanuma ya yeniyi nubona, lolaga, hekalu ya ihema lya bukaniji iyili ngʼwigulu yigulile. Na bamalaika mpungati abali na sha kuluhyaluhya mpungati bufuma mu hekalu, bazwalile shizwalo shape na sha kungʼwekangʼweka sha kitani, bitungigije mikoba ya zahabu mu shikuba, Na shibumva shipanga shine, kimo chasho chubinha bamalaika benabo mpungati nzweso mpungati ja zahabu, ijizulile na bupelanu wa Mulungu, Uyo ali mpanga welelo na welelo. Hunaho hekalu yokajiwa na lyochi ilyufuma ngʼwikujo lya Mulungu na mu nguzu jakwe; walati ho munhu uwadula kwingila mu hekalu kushisha sha kuluhyaluhya mpungati sha bamalaika benabo mpungati aho shilashikilijiwa. Hangi nigwa ilaka itale kufuma inu hekalu, lyubawila bamalaika benabo mpungati giki, Jagi lulu muholele ku si nzweso mpungati ja bupelanu Mulungu. U wa kwandia uja lulu, uholela lweso lwakwe ku si; hunaho nhondo ja bubi no na ndambu kupila jubagwila banhu abali na lumengho lwa kinwele, na benabo abali bulamya chikolile chacho. Malaika wa kabili nanghwe uholela lweso lwakwe higulya ya nyanza; nayo yubiza mininga, giti mininga ga mfu; na shose shipanga ishili mu nyanza shucha. Malaika wa kadatu nanghwe uholela lweso lwakwe higulya ya miongo na ku nzwilo ja minzi; nasho shubiza mininga. Nigwa lulu malaika uyo asugile minzi, uhaya giki, Bebe uli ntungilija, Uyo uli ho, hangi Uyo waali ho, Bebe ngʼwela; iki walekanyaga nsango giko: Iki boi bali buseja mininga ga bela na ga bahangi, nangho wabinhaga mininga bangʼwe: nabo bigelelilwe chene. Nigwa hangi ilaka kufuma mungʼwalilo lyuhaya giki, Ali chene, Ee Seba Mulungu, Wa budula bose, kulekanya kwako kwene kwa butungilija na kwa nghana. Malaika wa kane nanghwe uholela lweso lwakwe higulya ya limi; nalyo lyinhiwa nguzu kubocha banhu na moto. Hunaho banhu hali bochiwa na busebu butale no: nabo buliduka lina lya Mulungu Uyo ali na budula ku sha kuluhyaluhya shenishi; aliyo bali batoya giki, bangʼwinhe ikujo. Malaika wa katano nanghwe uholela lweso lwakwe higulya ya isumbi lya butemi lya kinwele; hunaho butemi wacho butuulilwa giiti; nabo bulilumagula ndimi jabo kulwa kuluhaluhiwa, Bunduka Mulungu wa ngʼwigulu kulwa kuluhaluhiwa kwabo na kulwa nhondo jabo, aliyo bali batoya shitwa shabo. Malaika wa katandatu nanghwe uholela lweso lwakwe higulya ya mongo ntale gwa Eufrati; hunaho minzi ga mongo gukama giki, nzila ibejiwe ya batemi abalafuma ku bufumalimi. Hunaho hangi nubona mioyo idatu ya busoso yikolile madanga ilifuma mu nomo gwa isota na mu nomo gwa kinwele, na mu nomo gwa nghangi nomolomo; Iki yene mioyo ya masamva, iyita mabulolelo; nayo yubalasana kuja ku batemi ba si jose, kubabilingila ku bulugu wa lushiku lwenulo lutale lwa Mulungu Wa budula bose. Lolaga, nizile giti ngʼwibi. Ali wa lubango uyo wikala miso, na kushilinda shizwalo shakwe, aleke kushiminza duuhu, minala yakwe itizubonwa. Nanghwe ubabilingila kwipande ilitanwa mu lulimi lwa Kihebrania giki, Armagedon. Malaika wa mpungati nanghwe uholela lweso lwakwe higulya ya luyaga; ilaka itale lyufuma mu hekalu ya ngʼwigulu, kufuma kwisumbi lya butemi, lyuhaya giki, Yashila lulu. Jubiza ho malaka na kupalaluka na ndabi, na yubiza ho nyahinga nhale no, kufuma aho banhu bali bandia kubiza ho mu si, itinabiza ho nyahinga nhale na ya nguzu giti yeniyo. Na linzengo lyenilo itale lyulekana mabudika adatu, na mizengo ya mahanga yugwa: Libabeli itale lyizukilwa na Mulungu, lyinhiwe kungʼwa ku kikombe cha kangala ya bukali wa bupelanu wakwe. Na buli ijinga lyupela, na ngulu jali jitubonwa hangi. Hunaho mbula nhale ya mawe kufuma ngʼwigulu yubagwila banhu, buli iwe budito walyo wali giti talanta imo: banhu bunduka Mulungu kulwa kuluhaluhiwa kwa mawe ga mbula; iki sha kuluhyaluhya shayo shali shitale no kutinda. Hunaho wiza ume wa bamalaika benabo mpungati abali na nzweso mpungati, nanghwe ulungalunga na nene, uni wila giki, Nzugu nakolekeje kulekanyiwa kwa ngʼwetauyo ngʼwimilizu ntale uyo igashije higulya ya minzi mingi; Uyo batemi ba mu si biijingilaga nanghwe, nabo abikala mu si bukolwa na kangala ya bujingi wakwe. Nanghwe unit wala lulu, ndi mu kimoyo, mu bu: numona nkima ayidamhilile kinwele chaza ichokalile mina ga buduki, kili na mitwe mpungati na mapembe ikumi. Nkima ngʼwenuyo walazwalile shizwalo shilaluleu na shaza; hangi abelejiwe na Rahabu na tuwe twa mpango ngʼwingi na lulu; mu nkono gwakwe waladimile kikombe cha zahabu chizulile malofu na busoso wa bujingi wakwe. Na ha bushu wakwe lyandikilwe ho lina giki, KWIGENIHA, BABELI ITALE, NINA WA BIMILIZU NA WA MALOFU GA SI. Na nene numona nkima agʼwenuyo akolilwe mininga ga bela na mininga ga bakaniji ba ngʼwa Yesu. Nane aho numona, nukumya na kukumya kutale no. Malaika uni wila uhaya giki, Wakumya ni buli? Neofe nakukuwila kwigeniha kwa nkima agʼwenuyo, nu kwa kinwele ikimukije, ikili na mitwe mpungati na mapembe ikumi. I kinwele icho ukibona chali kili ho, na haha kiti ho; nacho kilihaya kulinha kufuma ngʼwichongo iliti na ngelelo, na kuja mu kuyagala. Nabo abikala mu si, abo abatandikilwe mina gaho mu kitabo cha bupanga kufuma kubumva kwa si, balakumya aho balakibona i kinwele icho chali kili ho, hangi kiti ho, na hangi kilabiza ho. Henaha gagongile masala agali na kwitegeleja. I mitwe mpungati yene malugulu mpungati, ayo agigashigije ho u nkima: Hangi gene batemi mpungati; batano bamala kugwa, umo ali ho, na ungi atali; nanghwe aho aliza, shingʼwigelile kushinga shiku ndo. Na kinwele ichali kili ho, hangi kiti ho i haha, ngʼwene wa kanane, hangi ali ngʼwichabo wa benabo mpungati; nanghwe ajile mu kuyagala. A mapembe ikumi ayo ugabona, gene batemi ikumi abatali kwinhiwa butemi; aliyo binhiwa budula giti batemi saa imo kihamo na kinwele. Benabo gwabo gumo, kungʼwinha kinwele nguzu jabo na budula wabo. Benabo balita bulugu na Ngʼwana wa ngholo, aliyo Ngʼwana wa ngholo alabapyena iki Wei ali Seba wa baseba, na Ntemi wa batemi; nabo abali hamo nanghwe, bene basolwa, bitanwa, na bishigwa. Akaniwila hangi giki, Minzi ayo ugabona, ayo ngʼwimilizu igashije ho, gene ndugu, na mabita, na mahanga, na ndimi. Mapembe ikumi ayo ugabona ha kinwele, bene balankolwa ngʼwimilizu, balangʼwita nsaka, balaneka duuhu, balanʼya mili gwakwe, balanjija nghana na moto. Iki Mulungu wabatuulila mu ngholo jabo kwita iyo atogilwe, babize na mhayo gumo kungʼwinha kinwele butemi wabo, kushisha mihayo ya Mulungu ishikilijiwe U nkima uyo umona, ngʼwene linzengo itale likubasugaga batemi ba si. Hanuma yeniyi numona malaika ungi wika kufuma ngʼwigulu, ali na budula kutale no; na si yakilwa pe kulwa ikujo lyakwe. Nanghwe uhamuka no na ilaka lya nguzu, uhaya giki, Lyagwaga, lyagwaga i Libabeli itale, lyabizaga wikalo wa masamva, na ipilinga lya buli moyo nsoso, na luzumba lwa huli noni nghaali na ya malofu. Iki mahanga gose gaangʼwaga kangala ya bupelanu wa bujingi wakwe; na batemi ba si bijingila nanghwe, na bakwabi ba si busabila kulwa wingi wa shimile shakwe sha nyadoshi. Nigwa ilaka lingi kufuma ngʼwigulu, lyuhaya giki, Ingagi kuli wei bingʼwe banhu bane, mutizisangija mu shibi shakwe, muleke kukubilwa na sha kuluhaluhiwa shakwe: Iki shibi shakwe shashikaga kushisha ngʼwigulu, na Mulungu wizukagwa buhunga wakwe. Malagi shili kuli wei gitumo wali ungʼwitila bingʼwe, ngʼwinhagi nghangala ibili kulenganila na Shitwa shakwe: mu kikombe icho waamusamigijaga mo, ningʼwe munsamigije mo nghangala ibili. Gitumo wali wikumilija, na wita ya nyadoshi, mungʼwinhe hangi giko kuluhaluhiwa na bupina: iki akuhayaga mu ngholo yakwe giki, Nene nigashije ndi ntemi nkima, nati nchilwa yaya, hangi natalabona bupina nulu na hado. Kulwa iyo shilashikila sha kuluhaluhiwa shakwe lushiku lumo duhu, kuchilwa na bupina na nzala; nanghwe alapemva na moto; iki Seba Mulungu Uyo unekanya ali wa nguzu. Na batemi ba si abali bijingila nanghwe na bikala nyadoshi hamo nanghwe, balampinihalilwa, bunila nghungu, aho balabona lyochi lya kupya kwakwe, Bimilile kule kulwa boba wa kuluhaluhiwa kwakwe, balihaya giki, Wasangwa, wasangwa, bebe linzengo itale, Babeli, linzengo itale na lya nguzu! iki nsango gwako gwashikaga mu saa imo. Bakwabi ba si nabo balalila, na kumpinihalilwa, iki kuduhu munhu wa kugula alia buguji wabo hangi: Buguji wa zahabu, na feza, na mawe ga mpango, na lulu, na bafta ya kitani, na mienda ya malaluku, na ya halili, na yaza, na miti yose ya ngazu, na shiseme shose sha mapembe ga mbuli, na shiseme shose sha manti ga mpango ngʼwingi, na sha chuma chaza, na sha kisinza, na sha iwe idimu, Na dalasini, na ngazu, na maguta ga kwibila, na bubani, na minzi ga mizabibu, na maguta, na busu wa wiza, na ngano, na ngʼombe, na ngholo, na falasa, na magali, na basese, na bupanga wa banhu. Hangi na matwajo ayo wali ugigongela mu moyo gwako nago gakwingaga; na shinhu shose shinonu na sha wiza shakwingaga, utalashibona hangi yaya. Na bakwabi ba shinhu shenishi, abali busabiwa nanghwe, balimila kule kulwa lyogohya lya kuluhaluhiwa kwakwe, kulila shisoji na kupinihala; Balihaya giki, Wasangwa, wasangwa, bebe linzengo itale, ilyali lyuzwikwa na bafta ya kitani, na mienda ya malaluku na yaza; hangi lyali lyubelejiwa na zahabu na tuwe twa mpango na lulu! Iki mu saa imo duhu busabi ubu wingi bujimiji wa pye. Na buli ngobi wa meli, na bose abakashiminzilaga mu meli, na batumami bose ba mu meli, na bose abakatumamaga mu nyanza, benabo bose bimila kule, Bulila no aho bulilolela lyochi lya kupya kwakwe, buhaya giki, Linzengo lili he ililenganilile na linzengo itale ili? Butuula lububu ha mitwe yabo, buhayila higulya, bulila shisoji na kupinihala, buhaya giki, Wasangwa, wasangwa, bebe linzengo itale, ilyali lyabasabya bose abali na mameli mu nyanza kulwa sabo jakwe ningi! iki mu saa imo lyubiza nsaka. Babeli yucha Liyegelage, bebe igulu; na bingʼwe bela, na batungʼwa, na bahangi; iki Mulungu wanekanyaga nsango gwa kulekanya kwingʼwe kuli wei. Hunaho malaika wa nguzu akabucha iwe itale giti iwe lya kushela, uliponeja mu nyanza, uhaya giki, Giko Babeli, i linzengo itale, lilagwishiwa na kugwa kutale, nulu litalilonga hangi na hado. Nulu ilaka lya batuji ba shita, nulu bimbi, nulu bafuji ba filimbi na bafuji ba mhembe, gataligwiwa hangi muli bebe nulu na hado. Nulu koli wa nimo gose atalilonga hangi muli bebe; nulu kidinhimo cha sho kitaligwiwa hangi muli bebe; Nulu isana lya tala litalaka hangi muli bebe, nulu ilaka lya ntoji na lya ntolwa litaligwiwa hangi muli bebe, iki bakwabi bako bali bali batale ba si; iki mahanga gose gali gulembalemva na bulogi wako. Na mugati yakwe gali gilonga mo mininga ga bahangi, na ga bela, na ga bose abali bubulagwa mu si. Hanuma ya yeniyi nigwa kulunduma kutale giti kwa ilaka lya ibita itale lya ngʼwigulu, lyuhaya giki, Haleluya: Bupiji, na ikujo, na budula, shili sha Mulungu wiswe: Iki misango yakwe yene ya nghana na ya butungilija; iki wanekanyaga nsango ngʼwimilizu ngʼwenuyo ntale uwali uyibihya si kulwa bujingi wakwe, nanghwe wanghwimaga njigu kulwa mininga ga basese bakwe agali gitwa na nkono gwakwe. Nabo bushokela kuhaya giki, Haleluya. Na lyochi lyakwe likwinungaga kushisha welelo na welelo. Hunaho banamhala benabo makumi abili na bane, hamo na shibumva shipanga shine, bugwa na bunamya Mulungu uwigashije kwisumbi lya butemi, buhaya giki, Amina; Haleluya. Na ilaka lyufuma kwisumbi lya butemi, lyuhaya giki, Nkumilijagi Mulungu wiswe, bingʼwe batumami bakwe bose abangʼogohile, a bado na batale. Hunaho nigwa kulunduma giti kwa ilaka lya ibita itale, nulu giti kulunduma kwa minzi mingi, hangi giti kuluma kutale kwa mbula, lyuhaya giki, Haleluya; Seba Mulungu Wa budula bose walemaga. Tuyege na kusangabala, tungʼwinhe ikujo: iki butoji wa Ngʼwana wa ngholo washikaga, na nke wakwe wamalilaga. Nanghwe winhiwa kuzwala bafta ya kitani nela na ya wiza no: iki bafta iyo ya kitani yene shitile sha butungilija sha bela. Huna uniwila giki, Andikaga, Bali ba lubango abitanagwa ku bukombe wa butoji wa Ngʼwana wa ngholo. Uniwila giki, Mihayo iyi ili mihayo ya nghana ya Mulungu. Huna nugwa ku mhambala jakwe kunamya. Nanghwe uniwila giki, Yaya, utizita giko: nene ndi nsese ngʼwiyo, na ngʼwichabo wa badugu bako abali na bukaniji wa ngʼwa Yesu: namyage Mulungu: iki bukaniji wa ngʼwa Yesu wene moyo gwa buhangi. Huna nubona igulu likundukile; nubona falasa yape, na Uyo uyidamhilile ho witanwa giki, Ngʼwishigwa, na Wanghana; nanghwe alilekanya mu butungilija na kwita bulugu. Miso gakwe gali giti ndali ja moto, na ku ntwe gwakwe jili ho ngikili ningi ja butemi; hangi ali nalyo lina lyandikilwe ho, ilo atalimanile munhu ose, numho Wei ngʼwenekele. Hangi azwalile kizwalo chudabiwa mu mininga: na lina lyakwe akitanagwa giki, Mhayo gwa Mulungu. Na mabita ga bashilikale agali ho ngʼwigulu bunondela, badamhilile ha falasa jape, bazwalile mienda ya kitani yape na nela. Na mu nomo gwakwe lyufuma mo lilushu lyugi, agatulile mahanga nalyo: nanghwe alabasuga na nanga gwa kisinza: hangi alipandagila ikamilo lya kangala ya bukali wa bupelanu wa Mulungu Wa budula bose. Ha kizwalo chakwe na ha itango lyakwe ali na lina lyandikilwe giki, NTEMI WA BATEMI, NA SEBA WA BASEBA. Hunaho lulu numona malaika umo imilile mu limi; uhamuka na ilaka itale, ujiwila noni jose ijikulalalalaga hagati ya ngʼwigulu, uhaya giki, Nzugwi ngʼwibilinge ku sha kulagila shitale sha Mulungu; Mukalye nofu ja batemi, na nofu ja bashaushi, na nofu ja ba nguzu ningi, na nofu ja falasa na ja abo abajidamhilile, na nofu ja banhu bose ja bana ba banhu nulu basese nulu bado nulu batale. Nukibona i kinwele na batemi ba si, na mabita gabo ga bashilikale bibilingaga kunwisha bulugu Uyo adamhilile ha falasa, na ibita lyakwe lya bashilikale. Huna kinwele chudingʼwa, kihamo na nghangi nomolomo, uwali wita mabulolelo mu butongi wakwe, ayo wali ugalembalembela abo abali bulwanukula lumengho lwa kinwele, na benabo abali bulamya chikolile chacho; bose bubili wabo buponyiwa bapanga mu nyanza ya moto ikabakaga na bugota wa kibiliti. Na abo busaga bubulagwa na lilushu lya Ngʼwenuyo adamhilile ha falasa, ilyufuma mu nomo gwakwe: noni jose jali jiguta na nofu jabo. Huna numona malaika alika kufuma ngʼwigulu, ali nalo lufungulo lwa ichongo iliti na ngelelo, na nyololo ntale mu nkono gwakwe. Nanghwe ulidima isota, i liyoka lya kale, lyene Muji na Shetani, untunga miaka 1,000, Umponya ngʼwichongo iliti na ngelelo, unugalila, utuula ko itungijo kwigulya, atizugalembalemba mahanga hangi, kushisha aho miaka 1,000 ilakalika: hanuma yaho shingʼwigelile kutungulwa ikanza ido. Hunaho nubona masumbi ga kitemi, na abo abigashije ho binhiwa bulekanya: nubona ngholo jabo abali bubutwa mitwe yabo kulwa bukaniji wa ngʼwa Yesu, na kulwa mhayo gwa Mulungu, nabo abali batukilamya kinwele, nulu chikolile chacho, hangi hali batulwanukula lumengho lwacho ha bushu wabo, nulu ku makono gabo; nabo bubiza bapanga, busuga kihamo na Kristo miaka 1,000. Aliyo a bafu bangi abusaga ho bali batubiza bapanga kushisha miaka 1,000 yukalika. Ubu wene bujuko wa kwandia. Ali wa lubango na ngʼwela uyo ali na kusangila mu bujuko wa kwandia; ku benabo kucha kwa kabili kuti na nguzu; aliyo boi balabiza bagabiji ba Mulungu na ba ngʼwa Kristo, nabo balatema hamo nanghwe miaka 1,000. Aho miaka 1,000 yeniyo ilakalika, Shetani alatungulilwa mu butungwa wakwe, Nanghwe alafuma kubalembalemba mahanga agali ku mhande ine ja si, Gogi na Magogi, kugabilingila ku bulugu: abo bukumi wabo wene wingi giti maseni ga ku nyanza. Nabo bulinhila ku bugaligali wa si, bugobanila nghambi ya bela na linzengo itogwa: huna moto gwika kufuma ngʼwigulu, gubabugilija. Hunaho lulu muji uyo uwali ubalembalemba uponyiwa mu nyanza ya moto na bugota wa kibiliti, umo ali kinwele na nghangi nomolomo; nabo balaluhaluhiwa limi na bujiku welelo na welelo. Hunaho nubona isumbi lyape itale lya kitemi, na Uyo igashije ho, Ngʼwene igulu na si jubupela bushu wakwe; na wikalo washo bugaya. Nubabona bafu a batale na bado, bimilile mu butongi wa Mulungu; shitabo shukundulwa: na kitabo kingi chukundulwa, chene kitabo cha bupanga: nabo bafu bulekanyiwa gitumo yali yandikilwe mu shitabo shenisho, gitumo shitile shabo umo shali shili. Nyanza nayo yubafunya bafu abaali muyo; Kucha na Kulimu nasho shubafunya bafu abaali musho: nabo bulekanyiwa buli munhu gitumo shitile shakwe umo shali shili. Hunaho Kucha na Kulimu shuponyiwa mu nyanza ya moto. Uku kwene kucha kwa kabili. Munhu ose ulu wilonga atandikilwe mu kitabo cha bupanga uponyiwa mu nyanza ya moto. Hangi nubona igulu ipya na si mhya: iki igulu lya kwandia na si ya kwandia shali shabita, nyanza nayo yali iti ko hangi. Nubona linzengo lyela, Yerusalemi mhya, lyika kufuma ngʼwigulu kuli Mulungu, lyubejabejiwa giti ntolwa wagalililwa ngoshi wakwe. Hangi nigwa ilaka itale kufuma ngʼwigulu lyuhaya giki, Lolaga, hekalu ya ihema ya Mulungu ili hagati ya banhu, nanghwe akwikala hamo nabo, nabo balabiza banhu bakwe, na Mulungu ngʼwenekele alabiza hamo nabo, Mulungu wabo; Nanghwe alashipyagula shisoji shose mu miso gabo; nulu kucha kutalabiza ho hangi; nulu bupina, nulu kulila nghungu, nulu butalabiza ho hangi busatu: iki mihayo ya kwandia yaabita. Nanghwe uwigashije ha isumbi lya butemi uhaya giki, Lolaga, nayibeja yose kubiza mipya. Hangi uhaya giki, Andikaga; iki mihayo iyi yene ya nghana na ya wishigwa. Hangi uni wila giki, yashikilijiwagwa lulu. Nene ndi Alfa na Omega, ndi wandijo na nghalikijo. Uwakolwa nota Nene nakungʼwinha kungʼwa dalali ku lwinzi lwa minzi ga bupanga. Uwapyena alingila mu wingiji wa mihayo yeniyi; na Nene nakubiza Mulungu wakwe, nanghwe akubiza ngʼwana wane. Aliyo abo abogohile, nabo abatazunije, na basoso, na babulagi, na bajingi, na balogi, na abalamya shikolile na balomolomo bose, bene balabiza na ngabo gwabo mu nyanza iyibakile moto na bugota wa kibiliti; uku kwene kucha kwa kabili. Huna akiza umo wa bamalaika benabo mpungati, abali balina nzweso jenijo mpungati ijokalile na sha kuluhyaluhya mpungati sha kumalija, ulungalunga na nene uhaya giki, Nzugu kunu nakolekeje ntolwa, u nke wa Ngʼwana wa ngholo. Huna unitwala, ndi mu ki-moyo, ku lugulu lutale na lulihu, unolekeja linzengo lyela, i Yerusalemi, lyika kufuma ngʼwigulu kuli Mulungu, Lilina ikujo lya Mulungu; kungʼwekangʼweka kwalyo kwikolile iwe lya mpango ngʼwingi no, giti iwe lya yaspi ilyungʼwekangʼweka giti bilauli: Kangi lili na ndugu nhale na ndihu; ili na mibita ikumi na ibili, na ku mibita yeniyo bamalaika ikumi na babili; mina nago gandikilwe ho, a gene mina ga ngʼanda ikumi na ibili ja bana ba Israeli; Kwipande lya kiya mibita idatu; kwipande lya ibano mibita idatu; kwipande lya dakama mibita idatu; na kwipande lya ngʼweli mibita idatu. Hangi na ndugu ya linzengo ili na misingi ikumi na ibili, hangi mu misingi yeniyo gandikilwe mo mina ikumi na abili ga batungʼwa ikumi na babili ba Ngʼwana wa ngholo. Nanghwe uwali ulungalunga na nene walali na ibingo lya zahabu alipimile i linzengo na mibita yalyo, na ndugu yalyo. I linzengo lyenilo a mapande galyo ane galenganilile, bulihu walyo na bugali walyo bulenganilile; nanghwe ulipima i linzengo na ibingo lyenilo, mailo 1,500: bulihu walyo na bugali na bugunguhu bulenganilile. Upima hangi ndugu yalyo mikono igana limo na makumi ane na ine, kapimilwe ka munhu umo kali, kene ka malaika. Na kazengele ka ndugu yeniyo kali ka mawe ga yaspi: i linzengo nalyo lili lya zahabu ya wiza, iyikolile giti bilauli nela no. I misingi ya ndugu ja linzengo igalililwe na mawe ga buli mbika ga mpango ngʼwingi. Musingi gwa kwandia guli yaspi; gwa kabili safiro; Gwa kadatu kalkedoni; gwa kane sumaradi; gwa katano sardonuksi; gwa katandatu sardio; gwa mpungati kerisoletio; gwa kanane berilo; gwa kenda topazio; gwa ikumi krisopraso; gwa ikumi na gumo gwa yakintho; gwa ikumi na ibili ametisto. I mibita ikumi na ibili ili lulu ikumi na ibili; buli mita guli gwa lulu imo; na ipalapala lya linzengo lili lya zahabu ya wiza, giti ilole lyape no. Na nene natabonile hekalu mugati yalyo: iki Seba Mulungu wa budula bose na Ngʼwana wa ngholo, bene hekalu yalyo. I linzengo lyenilo litigongaga limi, nulu ngʼweji, kulyakila; iki ikujo lya Mulungu likalyakilaga, na Ngʼwana wa ngholo ngʼwene tala yalyo. A ba mahanga abakomolilwe balashiminzila ngʼwisana lyalyo: na batemi ba si balyenhela mo ikujo lyabo. Na mibita yalyo italalugalwa limi na hado; iki bujiku buti ko kwenuko; Nabo balalyenhela mo magaka na ikujo ga mahanga: Nulu kitalingila mo na hado kinhu chose chose cha busoso, nulu uyo ose akwitaga cha malofu nulu bulomolomo: aliyo benabo bike baandikwa mina gabo mu kitabo cha bupanga cha Ngʼwana wa ngholo. Huna lulu unolekeja mongo gwa minzi ga bupanga, malabangizu giti bilauli, gufumile ngʼwisumbi lya butemi lya Mulungu na Ngʼwana wa ngholo, Hagati ya ipalapala lyalyo, na ipande na ipande lya mongo gwenuyo guli ho uti gwa bupanga, ugukatwajaga matwajo mbika ikumi na ibili, gukutwajaga matwajo gago buli ngʼweji; na madutu ga nti gwenuyo gene ga kugapija mahanga. Nulu litalabiza mo hangi izumo lyose; isumbi lya butemi lya Mulungu na lya Ngʼwana wa ngholo lilabiza mo: na batumami bakwe balantumamiia; Nabo balamona ihanga lya bushu wakwe; na lina lyakwe lilabiza ha bushu wabo. Nulu bujiku butalabiza ko hangi, nulu bataligonga tala nulu isana lya limi; iki Seba Mulungu alabamulikila isana: nabo balatema welelo na welelo. Na akaniwila giki, Mihayo yene ya wishigwa na ya nghana; Seba Mulungu wa mioyo ya bahangi wantumaga malaika wakwe kubolekeja batumami bakwe mihayo iyahaya kubiza ho wangu. Lolaga, nizile wangu. Ali wa lujango uwayidima mihayo ya buhangi wa kitabo iki. Hu na nene Yohana uyo nuyibona nigwa yeniyi yose. Aho nuyigwa na nuyibona, nugwa kunamya ku butongi wa mhambala ja malaika ngʼwenuyo uwanolekeja mihayo yeniyi. Nanghwe uniwila giki, Yaya, utizita giko: nene ndi nsese ngʼwiyo, na ngʼwichabo wa badugu bako a bahangi, na wa benabo abayidima mihayo ya kitabo iki: namyage Mulungu. Uniwila giki, Utizutuula itungijo ku mihayo ya buhangi wa kitabo iki; iki ikanza lili hihi. Uyo ati ntungilija, ikale ati ntungilija: na uyo ali nsoso, ikale ali nsoso: na uyo ali ntungilija, ikale ali ntungilija: na uyo ali ngʼwela, ikale ali ngʼwela. Lolaga, nizile wangu; hangi ndi najo mhela, kumpela buli munhu gitumo milimo yakwe umo ili. Nene ndi Alfa na Omega, wa kwandia na wa kumalija, ndi wandijo na nghalikijo. Bali ba lubango abashifulile shizwalo shabo, bazunilijiwe kushika ku nti gwa bupanga, na kwingila mu mibita ya kwingila mu linzengo. Aliyo hanze jili ho mva, na balogi, na bajingi, na babulagi, na abo abalamya shikolile, na buli munhu uyo atogilwe bulomolomo na kuwita. Nene Yesu nantumaga malaika wane kumukanila mihayo yeniyi mu kanisa. Nene ndi itina na bubyile wa ngʼwa Daudi, ndi sonda i ya nyakabusinze, iyungʼwekangʼweka mu makingo. U Moyo na Ntolwa buhaya giki, Nzugu. Nanghwe uyo akwigwaga ahaye giki, Nzugu. Nanghwe uyo ali na nota ize, na uyo ose atogilwe, atwale dalali minzi ga bupanga. Nene namanikija buli munhu ose uyo akwigwaga mihayo ya buhangi wa kitabo iki, giki, Munhu ose uyo alongejaga ko ku mihayo iyi, Mulungu nanghwe alangʼongegeja sha kuluhaluhiwa ishandikilwe mu kitabo iki; Na munhu ose uyo alinja ho ku mihayo ya mu kitabo cha buhangi wenubu, Mulungu nanghwe alangʼwingija ngabo gwakwe gwa ku nti gwa bupanga, na gwa linzengo lyela, na gwa yose iyandikilwe mu kitabo iki. Uyo ukanila mihayo iyi, wahaya giki, Ali chene nizile wangu. Amina: Ali chene, Seba Yesu, nzugu. Kigongo cha Seba wiswe Yesu Kristo kibize hamo na bingʼwe hose. Amina.