Hozrot Isa al-Mosi oila Daud nobir bongshodor, ar Daud oila Hozrot Ibrahimor bongshodor. Isa al-Mosir ḳandanor forisoy oilo, Hozrot Ibrahimor fua Hozrot Isʼhak, Isʼhakor fua Hozrot Iakub, Iakubor fua Ehuda ar tan baiain, Ehudar fuain Firuz ar Zarah, erar maʼr nam Tamar. Firuzor fua Hasir, Hasiror fua Rayam, Rayamor fua Aminadab, Aminadabor fua Nahish, Nahishor fua Selim, Selimor fua Buaz, tan maʼr nam Rahba. Buazor fua Ubayed, tan ma oila Rut. Ubayedor fua Ias, Iasor fua Bashsha Daud. Daudor fua nobi Sulaiman, en ma asla Uriar ṛaṛi bou Batseba. Sulaimanor fua Rohbiam, Rohbiamor fua Abia, Abiar fua Asa, Asar fua Zihusafoṭ, Zihusafoṭor fua Uram, Uramor fua Uzia, Uziar fua Zutom, Zutomor fua Ahaz, Ahazor fua Hizkia, Hizkiar fua Manosha, Manoshar fua Amon, Amonor fua Iushia, Iushiar fua Iakunia ar tar baiain. Israil zatire Babil desho bondi kori neoar bala erar zonom oisil. Israil zatire Babil desho bondi kori neoar bade Iakuniar fua Saltielor zonom oisil. Saltielor fua Zerbabil, Zerbabilor fua Abihud, Abihudor fua Iliakim, Iliakimor fua Azor, Azoror fua Sadik, Sadikor fua Akim, Akimor fua Elihud, Elihudor fua Ali-Azor, Ali-Azoror fua Motin, Motinor fua Iakub, Iakubor fua Iusuf, ou Iusuf oila Bibi Moriomor zamai. Bibi Moriomor feṭo Hozrot Isar zonom oisil, enre ḍaḳa oy al-Mosi. Ou laḳan Hozrot Ibrahim taki Daud nobi forzonto souddo siṛi. Daud nobi taki Babilo bondi kori neoa forzonto souddo siṛi. Babilo bondi oa taki al-Mosi forzonto souddo siṛi. Isa al-Mosir zonom oisil ou laḳan. Iusuf namor eḳ zonor loge Bibi Moriomor shadi ṭik oisil, oile tara eḳloge mila-misha ḳorar age-u Allar Pak Ruhur kudroti bole Moriomor feṭo hurutta ailo. Iusuf asla hok manush, Moriomor feṭo hurutta ase, i kobor hunia tain Moriomre manshor samne shorom dita saila na, erdae mone mone ṭik korla, lukaia i bia bangilita. Tain zebla olaḳan sinta ḳorra, ou shomoy Mabudor eḳ firistae kuabor maze tanre doroshon dia ḳoila, “O Iusuf bin Daud, tumi Moriomre shadi korte ḍoraio na. Tan feṭo ze hurutta aise, ita to Pak Ruhur kudroti bole-u oise. Tan goro eḳ fuae zonom loiba. Tumi i fuar nam rakio Isa. Ḳaron i namor mani toraneala, ein nizor ummot oḳolre guna taki toraiba.” Agor zomanar nobir mazdi Mabude zela bataisla, oḳan folibar lagi-u ita oibo. Mabude bataisla, “Huno, eḳzon abiati shoti narir feṭo hurutta aibo, tain eḳ fuar zonom diba, i fuare ḍaḳa oibo Immanuel.” I namor mani oilo, Alla amrar loge asoin. Bade gum taki uṭia Iusufe firistar hukum mafik Bibi Moriomre shadi korla. Oile ou fuar zonmor ag forzonto tain Moriomor loge kunu mila-misha ḳorla na. Shomoy moto ou fuar zonom oilo, tain ou fuar nam raḳla Isa. Raza Herudor amolo Ehudia zilar Betelham gaut Hozrot Isar zonom oisil. Zonmor bade fubor deshor ḳoyzon gonoḳ Zeruzalem ṭauno aia zikaila, “Ihudi zatir ze bashshar zonom oise, ein kuai? Amra asmanor fubedi tan zonmor tera deḳsi, dekia tanre boḳti deoat aisi.” Noya bashshar ḳota hunia Raza Herud ar Zeruzalemor bad-baki hoḳol manush kub sintat foṛigela. Erlagi Herude deshor boṛo imam ar moulana oḳolre ekḳano dola ḳori zikaila, “Afnara zanoin ni, al-Mosi kuai zonom loiba?” Era ḳoila, “Tan zonom oibo Ehudia zilar Betelham gaut. Agor zomanar eḳ nobir kitabo leḳa ase, O Ehudia zilar Betelham, Ehudiar nami-dami zagar maze tumi kunumonte-u huru nae, tumar maz taki-u to ola eḳzon bashsha foyda oiba, zein amar Israil zatire salaiba.” Teu Herude hou gonoḳ oḳolre niralae nia zikaia zanla, ṭik kun shomoy hou zonmor tera deḳa gesil. Tain ou gonoḳ oḳolre ḳoila, “Afnara Betelham zaukka, gia bala ḳori ou huruttar tallash ḳoroukka. Tan kunu ḳobor faile amare zanaiba, teu ami-o gia tanre boḳti dimu.” Razar hukum faia gonoḳ oḳol roana dila. Tara fubor asmano ze zonom tera deḳsila, ou tera tarar age age gelo. Ar ou hurutta ze zagat asla, ṭik ou zagat aia tera tami gelo. Tera tami gese dekia gonoḳ oḳlor bitre kushir ḍeu uṭlo, kushir maire tara goror bitre hamaila. Goro hamaia ou huruttare tan ma Moriomor ḳandat deḳla. Dekia tara maṭit foṛi tanre boḳti dila, ar tarar beg kulia dami dami ufohar dila. Ou ufohar oilo shuna, loban-agor ar mura-ator. Oile Allae kuabor maze tarare hushiar ḳori dila, tara zanu Raza Herudor gese ar firia na zain. Teu tara dusra fote nizor desho gelagi. Gonoḳ oḳol gia harle Allar eḳ firistae kuabor maze Iusufre doroshon dia ḳoila, “O Iusuf uṭo, fua ar tan maʼre loia Mishor desho bagia zaogi, bade ami zotodin na ḳoi, otodin hono-u roio. I fuare marilito ḳori Herude tukaibo.” Teu Iusuf uṭia ou rait-u tarare loia Mishoro roana dila, ar Raza Herud morar ag forzonto hono roila. Ita goṭisil, zate agor eḳ nobir mazdi Mabude zeta zanaisla, ota fura oy. Mabude bataisla, “Ami amar futre Mishor taki ḍakia anlam.” Gonoḳ oḳole Raza Herudre ṭogisoin ḳoria tain kub gusa ḳorla. Erlagi gonoḳ oḳlor ges taki tain ze shomoyor ḳota hunsla, ou shomoy mafik Betelham gau ar er ash-fash elaḳat dui bosor ba tar ḳom boyoshi zoto fuain asla, ita hoḳolre marilibar hukum dila. Ete nobi Iaromiar mazdi Mabude zeta zanaisla, ota foligelo. Mabude bataisla, Ramat kub ḳanda-ḳaṭir aoaz huna zar, Rahelae tair huruttaintor lagi kander, kunumonte-u shanti or na, tair huruttain shesh oigesoin. Bade Raza Herud moria harle Mabudor eḳ firista aia, Mishor desho Iusufre kuabor maze ḳoila, “O Iusuf, uṭo, ou fua ar tan maʼre loia Israil desho zaogi. Fuare zetae marilita saisla, ita to morigesoin.” Teu Iusuf uṭia fua ar fuar maʼre loia Israil deshor shimanat aila. Aia hunla, hou Herudor fua Arkilaus oḳon Ehudia zilar raza oigese. Erlagi tain hino zaite ḍoraila. Bade kuabe hukum faia Galil zilat gelagi. Galilo gia Nasarot namor ek gaut boshot ḳorla. Ita goṭilo, zate agor nobi oḳlor mazdi zeta zanail oisil, ota oḳon fura oy. Zanail oisil, “Tanre Nasaroti koia ḍaḳa oibo.” Ou shomoy Ehudia zilar morubumit aia Ehia nobie toblig korla, “Touba ḳoro, duniar maze behesti bashshai salu oite ar beshi deri nae.” Ou Ehia nobir befare-u Ishaya nobie age bataisla, Morubumir maze eḳzon manshe zure zure elan ḳorra, ‘Tumra malikor fot sohi koro, tan solar rasta oḳol shida ḳoro.’ Ehia nobie to uṭor rumor ḳafoṛ findita ar ḳomro samṛar belṭ bandita. Tain faṛia mou ar foring kaita. Tan toblig hunar lagi asta Ehudia zila, Zeruzalem ṭaun ar Zordan gangor sairobae taki bout manush tan gese aila. Aia zarzir guna shikar ḳorla, bade tain erare Zordan gango toubar gusol ḳoraila. Tain deḳla, toubar gusol ḳorar lagi bout Forishi ar Siddekia mozobor manush-o tan gese aira. Ou tain ḳoila, “O hafor baichchain, asmani gozob aior dekia zan basanir fot tumrare ḳegie batai dilo? Tumra zudi hasaror touba ḳoria taḳo, te er fol-o deḳao. Mone mone ḳoio na, tumra Ibrahimor aolad. Huno, ami koiram, Allae saile to ou fattor oḳol taki-u Ibrahimor aolad banaita farba. Gasor guṛit to kuṛal lagail-u ase. Ze gaso bala fol dore na, i gas ḳaṭia agunit falail oibo. “Touba ḳorso gotike ami tumrare fanidi gusol ḳorailam, oile amar bade aro eḳzon aira, ein ama tone-o himmot-ala, tan faor zuta boar laḳ-o ami nae. Tain aia tumrare Pak Ruhu ar aguindi gusol ḳoraiba. Tan kula to tan ato-u ase, ikan dia tain dan uaia ugaro tulba, ar susare ou agunit falaia zalaiba, ze aguin kunu shomoy nibto nae.” Ou shomoy Galil zila taki Hozrot Isa-o pak gusol ḳorar lagi, Zordan gango Ehia nobir gese aila. Oile Ehiae tanre oḳan ḳoia na ḳorla, “Afne aisoin ni amar gese, amar-u zorur asil afnar gese gia gusol ḳora!” Isae zuaf dila, “Aichcha, oḳon ola-u ouk, karon amrar usit oilo Allar morzi furon ḳora.” Ikan hunia Ehia razi oigela. Pak gusol ḳoria fani taki uṭte-u Isae deḳla, asman dui bag oigese, ar Allar ruhu faror surot doria tan ufre lamia aira. Ou shomoy asman tone gaibi aoaz oilo, “Ein-u amar ḳas mayar zon Ibnulla, en ufre ami kub kushi.” Pak gusol ḳorar bade, Allar Pak Ruhur isharae Isare morubumit neoa oilo, zate ou shomoy Iblise tane forikka ḳorar shuzug fae. Morubumir maze tain eḳlagare sallish din sallish rait ruza asla. Erbade tan kub feṭo buk laglo. Ou shomoy Iblise aia tanre ḳoilo, “Tumi zudi Ibnulla, Allar ḳas mayar zon o, te ota fattorre ḳo na ruṭi oizito.” Isae zuaf dila, “Allar kalamo leḳa ase, ḳali ruṭi kaile-u manush base na, borong Allar fortek kalame-u manush base.” Teu he Isare loia fobitro ṭaun Zeruzalemo gelo, gia Baytul-Mukaddos Kaba goror minarar ufre tane uba ḳoraia ḳoilo, “Tumi zudi Allar ḳas mayar zon o, te deki sain, on taki fal dia lamat foṛo, kitabo to leḳa ase, Allae tan firista oḳolre hukum diba; ar tara nizor atdi tumare doriliba, zate tumar fao-o kunu fattoror suṭ na lage.” Isae tare ḳoila, “Kitabo ou ḳota-o leḳa ase, Tumi tumar Mabud Allare forikka ḳorat lagio na.” Bade Iblise tanre kub usa eḳ faṛor ufre loia gelo, nia eḳ foloḳe duniar tamam mulluk ar otar hoḳol zak-zomoḳ deḳailo ar ḳoilo, “Tumi zudi amare soizda ḳorilao, te i hokkolta ami tumare dilaimu.” Isae zuaf dila, “Dur Shoytan, bag! Allar kalamo ase, tumi kali tumar Mabud Allare-u ḍoraio, ḳali tan ebadot ḳorio.” Oḳan hunia Iblis tan ges taki horia gelogi, ar Allar firista oḳol aia tan kezmot ḳorla. Bade Isae ḳobor faila, Ehia nobire aṭok koria zelo harail oise, oḳan hunia tain Galil zilat gelagi. Hono gia Nasarot gau saṛia Sobulon-Noftali elaḳar aoror faror Kofornaum ṭauno gia roila. Ita hoḳolta oilo, zate Ishaya nobir mazdi Allae zeta bataisla, ota oḳon folizae. Ishaya nobie ḳoisla, Bidormi manshor boshot ḳana Galil zilar aoror faror Sobulon-Noftali elaḳar manush, ar Zordan gangor dusra faror manshor gese Allar nur zair oibo. Zeta manush be-foti bonia andarir maze zindegi kaṭaira, tara Allar nuror moha rushoni deḳba. Ar zera goin andarir maze boshot ḳore, tarar gese-o Allar nur zair oibo. Ou shomoy taki Isae toblig korla, ḳoila, “Touba ḳoro, ḳaron duniar maze behesti bashshai salu oite ar beshi deri oito nae.” Hozrot Isa Galil aoror faredi aṭia zaira, ou shomoy deḳla, Saimon urfe Fitor ar en bai Andriase aoro zal baira, era to zalua asla. Isae erare ḳoila, “Amar loge ao, ami tumrare manush dorar zalua banaimu.” Loge loge era zal falaia Isar loge roana oigela. On tone tuṛa age gia deḳla, Iakub ar Hannan tara duio baie bafor loge nao-o boia zal zuit-zait ḳorra. Erar bafor nam Zibudia. Isae erare dekia ḍaḳ dila, ḍaḳ hunia era-o tarar bafre nao-o toia Isar loge aila. Bade Isa Galil zilar hoḳol zagat guri guri, honor nanan mosido gia nosiot ḳorla, ar behesti bashshair kush-ḳobri toblig korla. Erloge bout nomunar bemarire bala ḳorla. Asta Siria deshor maze tan ḳobor roṭi gelo. Ete nanan nomunar bemar-azar ar zala-zontronae zeta manshe ḳoshṭo faisil, zerare zin-bute dorsil, mirgi ar ordong bemari zoto manush asil, manshe otare Isar gese loia aila. Tain era hoḳolre bala ḳorla. Galil, Dikafoli, Zeruzalem, Ehudia ar Zordanor oinno far taki bout manush Isar ḳore ḳore roana oila. Bout manush aisoin dekia Isa gia eḳ faṛor ufre uṭila. Uṭia boar bade tan shagrid oḳol ḳandat aila. Shagrid oḳolre dekia tain ou talim dila, ḳoila, “Nek-kofali ou manush-u zara dil taki nizore gorib mono ḳore, behesti bashshai to tara-u faiba. Tara-u ḳofali zarar mono oḳon duk ase, tara-u to shuk faiba. Tara-u ḳofali zarar sal-cholon norom, i dunia to tarar-u oibo. Tara-u ḳofali zara dile-zane fak-forezgarir lagi ḳande, tarar ou asha fura oibo. Tara-u ḳofali zara manshore doya ḳore, tara-u to doya faiba. Tara-u ḳofali zarar dil ḳaṭi, ḳaron tara-u Allar didar faiba. Tara-u ḳofali zara manshore shantie raḳar lagi menot ḳore, Allae tarare tan afon aolad ḳoia ḍakiba. Tara-u ḳofali zara Allar hukum mafik solat gia zulum-mosibot shoijjo ḳore, behesti bashshai to tara-u faiba. “Ar tumra-u ḳofali zarare amar lagi manshe ginnae, manshe tumrare zulum ḳore ar nanan nomunar misa bodnam gae. Ila oile mono rakio, tumrar age ze nobi oḳol aisla, ita manshe ou nobir ufre-o ola zulum ḳorta. Te tumra kushi-bashi ar furti korio, ḳaron tumra-o ou nobi oḳlor laḳan behesto bout boṛo furuskar faibae. “Tumra oilae duniar nun, oile nunor gun zudi nosṭo oizae, te ar nunta ḳora zae ni? I nun to ar kunu ḳamo lage na. Manshe ita bare falai dein ar itar ufredi aṭoin. “Huno, tumra oilae duniar batti. Faṛor ufror kunu ṭaun to lukail raḳa zae na. Ar kunu manshe lem zalaia ṭukrir tole toy na, ikṭa lem-danir ufre-u toy, zate goror hoḳole for deḳoin. Ou laḳan tumrar for-o manshor samne zolouk, zate tumrar bala ḳam dekia manshe tumrar behesti baf, Alla Pakor tarif ḳoroin. “Tumra ikan mono ḳorio na, ami Tourat Kitab ar nobi oḳlor sohifa batil ḳorat aisi. Ami to ita batil ḳorat nae, borong fura ḳorat aisi. Ami hasa ḳota ḳoiram, Tourat Kitabor hoḳol ḳota zotodin na folise, oto din i kitabor eḳṭa horof ba zer-zobor-o batil oito nae. Asman-zomin koy na oa forzonto, ikan batil oito nae. Tourat Kitabor kunu huru-muru hukum-o zudi keu na mane, ba i hukum na manar lagi manshore foramish dey, te behesti bashshait tare-o hoḳol taki huru ḳoa oibo. Oile ze zone i hukum-ahkam amol ḳore ar manshore-o hikae, behesti bashshait tare bout dam deoa oibo. Ami tumrare ḳoiram, alim-ulama ar Forishi oḳlor amol taki-o, tumrar amol zudi aro bala na oy, te kunumonte-u behesti bashshait hamaitae fartae nae. “Tumra huncho, agor amolor manshor gese ḳoa oise, ‘Kun ḳorio na, zegie kun ḳorbo, he i kunor daṛo foṛbo.’ Oile ami tumrare ḳoiram, ze manshe tar bai-biradoror loge rag-gusa ḳore, he bisaror daṛo foṛbo. He zudi tar baire ḳoy, ‘Tumi to be-aḳol’ te aro boṛo bisaror daṛo foṛbo. Ar ze zone tar baire ḳoy, ‘Tumi beokuf,’ he duzoḳor aguino zolbo. “Erdae kurbani kanat gia Allar name lilla-sodga dibar shomoy zudi tumar mono oizae, tumar loge tumar kunu bair bibad ase, te tumar lilla-sodga ou zagat toia, age gia tumar bair loge miṭ-maṭ ḳoro, bade gia tumar kurbani deo. “Ḳeu tumar birudde kunu mamla ḳorle adaloto zaoar age-u tar loge zoldi miṭ-maṭ ḳorilio. Ila na ḳorle, he tumare hakimor ato dibo, hakime tumare fulishor haola ḳorba, ar fulishe tumare zelo haraiba. Heshe tar shullo-ana faona adae na ḳora forzonto, tumi kunumonte-u saṛa faitae nae. Ami tumrare asol ḳota ḳoilam. “Tumra huncho, age batail oise, ‘Zina ḳorio na.’ Oile ami tumrare ḳoiram, kunu beṭae zudi kunu beṭi manshor bae ku-nozore sae, te he ou shomoy mone mone tair loge zina ḳorlo. “Tumar ḍain souke zudi tumare gunar fote ṭane, te i souk tulia falai deo. Asta shoril loia duzoḳo zaoa taki, eḳṭa ongo binash ḳorilaoa tumar lagi bala. Tumar ḍain ate zudi tumare gunar fote ṭane, i at ḳaṭia falai deo. Asta shoril loia duzoḳo zaoa taki, eḳṭa ongo binash ḳorilaoa tumar lagi bala. “Aro ḳoa oise, ‘Ze manshe tar boure talaḳ dey, he boure talaḳ nama deuk.’ Oile ami tumrare ḳoiram, ze manshe zina saṛa oinno kunu ḳarone nizor boure talaḳ dey, he to tar boure zinakur banae. Ar talaḳ faoa beṭire zegie bia ḳore, he-o zinakur bone. “Tumra to zano, agor zomanar manshor gese batail oise, ‘Misa kunu ḳosom ḳorio na, ar zekunu ḳosom ḳorle iṭa Allar name adae ḳorio.’ Oile ami tumrare ḳoiram, kunuzat ḳosom ḳorio na. Behestor name ḳosom ḳorio na, ikan to Allar arosh. Duniar name ḳorio na, ikan to Allar ḳodom mubarok toar zaga. Zeruzalemor name-o ḳosom ḳorio na, ikan oilo mohan bashsha Allar ṭaun. Tumar nizor matar name ḳosom ḳorio na, i matar eḳsa sulre dola ba ḳala ḳorar ḳemota to tumar nai. Tumrar mator oy ḳan oy, ar na ḳan na ouk. Huno, itar bare ar zotota-u oy, ita Iblis taki oy. “Tumra to huncho, age batail oise, ze forimane ḳeti oise, ou forimane shaza dio, ‘Souḳor bodla souk ar dator bodla dat.’ Oile ami koiram, ḳeu zudi tumrar loge ḳaraf bebohar ḳore, te tumra er bodla loio na, borong kunu manshe tumar ḍain galo soṛ marle, tare bau gal-o fatia dilaio. Ḳeu zudi mamla-mokoddoma ḳoria tumar kurta nitogi sae, te tumar saddor-o dilaio. Ḳeu zudi tumare ḳoy, tar gaiṭ boia loia eḳ mail zaitae, te tumi tar loge dui mail zaiogi. Ḳeu tumar gese kunta kuzile tare dio. Ḳeu aolat saile, tare firai dio na. “Tumra zano, age to batail oisil, ‘Tumar ari-forire maya ḳorio ar dushmonre ginnaio.’ Oile ami tumrare ḳoiram, tumrar dushmonre-o maya ḳorio. Zera tumrare zulum ḳore, tarar lagi dua ḳorio. Ita dekia manshe buzba, tumra hasau tumrar behesti baf Alla Pakor mayar aolad bonigeso. Tain to bala-bura hoḳlor ufre tan shuruz uṭain, dindar ar naforman hoḳlor ufre-u meg-fani dein. Zara tumrare mohobbot ḳore, tumra zudi kali tarare-u mohobbot ḳoro, te tumra kita furuskar faibae? Gushkur toshildar oḳole-o ila ḳore na ni? Tumra zudi kali nizor baire salam deo, te oinno manush taki beshi ar kita ḳorrae? Bidormi oḳole-o ila ḳoroin na ni? Erlagi ami koiram, tumrar behesti baf Alla Pak zela ḳaṭi, tumra-o ola ḳaṭi o. “Tumra hushiar roio, manshore deḳanir lagi ebadot-bondegi korio na, ila ḳorle tumrar behesti baf Alla Pakor ges taki kunu furuskar faitae nae. “Kunu manshore dan-ḳoyrat dile bonḍo oḳlor laḳan dio na. Tara to manshor ges taki tarif faita ḳori mosido-mondiro ar fote-gaṭe, ḍul-ḍofki bazaia lilla-zoḳat dein. Ami tumrare hasau ḳoiram, tarar furuskar to tara failise. Oile tumi kunu dan-ḳoyrat dile, tumar ḍain ate bilaile bau ate zanu na zane. Oula lukaia dan ḳorio. Teu tumar behesti baf Alla, zein lukaia hoḳolta deḳoin, tain-u tumare furuskar diba. “Tumra zebla dua ḳoro, ou shomoy bonḍo oḳlor bab dorio na. Tara manshore deḳanir lagi mosido-mondiro ar fotor muko ubaia dua ḳore. Ami tumrare hasau ḳoiram, itae to tarar furuskar failise. Oile tumi dua ḳorar bala goror dorza-zanala lagaia dua ḳorio, ar tumar niraḳar baf, zenre deḳa na gele-o azir asoin, hou Allar gese saio. Tain to gufon hoḳolta deḳoin, tain-u tumare fol diba. “Tumra zebla dua ḳoro, ou shomoy duniar manshor laḳan ḳamoḳa ber-beri korio na. Tara mono ḳoroin, beshi beshi koile Allae tarar dua ḳobul ḳorba. Tumra tarar laḳan oio na, tumrar behesti baf Allar gese saoar age-u, tain zanoin tumrar kita dorḳar. Erlagi tumra olaḳan dua ḳorio, O baba, amrar behesti baf, tumar nam fak-fobitro mana ouk. Duniait tumar bashshai zoldi auk, shob tumar morzi mafik kora zauk, behesto zela oula duniait, behesto zela oula duniait. O baba, aizkur ḳani aizku deo, maf ḳoro amrar hoḳol oforad, zara amrar birudde ḳorse faf, amra to tarare dilaisi maf. Falaio na amrare forikkat, Shoytanor ḳobza taki koro ḳalas. Huno, tumra zudi aroḳzonor oforad maf ḳoro, te tumrar behesti baf Allae-o tumrar oforad maf ḳori diba. Oile tumra zudi oinnore maf na ḳoro, te tumrar behesti bafe tumrare-o maf ḳorta nae. “Tumra zebla ruza raḳo, ou shomoy bonḍo oḳlor laḳan muk kala ḳorio na. Tara ruza raḳsoin, oḳan deḳanir lagi souk-muk kala ḳori raḳoin. Ami tumrare hasau ḳoiram, itae to tarar furuskar failise. Oile tumi ruza raḳle muk-at doio, matat tel-fani dio, zela manshe buzto na fare, tumi ruza raḳso. Teu tumar niraḳar baf, zenre deḳa na gele-o azir asoin, hou Allae-u ita deḳba. Tain to gufon hoḳolta deḳoin, tain-u tumare fol diba. “I zindegit tumra nizor lagi oto don-shompod zomaio na. Duniar shompodor maze zongare dore, fuke ḳae ar hing kudia sure ney. Oile behestor maze nizor lagi samana zomao, hino zongare dore na, fuke-o ḳae na ar suri-o oy na. Mono rakio, tumar don zeno, mon-o hono roy. “Zano to, souk oilo shorilor batti. Tumar souk zudi bala oy, te tumar asta shorilo soḳsoḳa for oibo. Oile tumar souk zudi karaf oy, te asta shoril-u ḳala andair oizibo. Tumar dilor batti andair oile, i andair boṛo bezuita. “Zano ni, kunu gulame-u dui munibor kezmot ḳorto fare na, he eḳzonre ginnaibo aroḳzonre bala faibo. Arnae eḳzonor bae kial ḳorbo, aroḳzonre elami korbo. Te tumra-o Alla Pak ar don-samana, duiotar kezmot eḳloge ḳortae faro na. “Erdae ami tumrare ḳoiram, kila ḳaitam ar kila finditam, ita loia sinta ḳorio na. Ḳani taki zan boṛo, ḳafoṛ-sufoṛ taki shoril boṛo. “Asmanor ou fakintor bae sao, tara zala-o bain ḳore na, foshol-o ḳaṭe na, ugaro kunta zomae na, ḳali tumrar behesti baf Allae tarar kuraḳ dein. Te tumra kunu ita taki aro dami nae ni? Ḳo sain, tumrar maze ḳeu sinta-babna ḳoria tar hayati ekḳan gonṭa baṛaito farbo ni? “Finnor ḳafoṛor lagi sinta ḳoro ḳene? Tumra ou zongli fulor bae saia deḳo, ita ḳoto beshi shundor! Itae to nizor shundoror lagi kunta-u ḳore na, kunu rong-o silai kore na, bain-o ḳore na, emne-u oy. Te ami koiram, Bashsha Sulaiman oto zak-zomoḳor maze roile-o tan lebas to ota egu zongli fulor laḳan-o shundor asil na. Deḳrae ni, zongolor maze ou zeta shundor ful oḳon ase, ḳail oile-u manshe ita daru banaia aguindi zalaibo. Allae zudi ou zongolre ola shundor ḳori hazaisoin, te O ḳomzur imandar oḳol, tumrare-o tain shundor ḳori hazaita nae ni? Erdae kita ḳaitae ar kita finditae, ita loia sinta ḳorio na. I duniar manshe ḳali ota loia-u danda ḳore. Tumrar behesti baf Allae to zanoin-u, ita hoḳolta tumrar zorur ase. Erlagi tumra foyla-u Allar morzi zugaia solo, tan bashshair dandat ro. Teu ita hokkolta-o tumra faibae. Ḳailkur sinta ḳorio na, ḳailkur befar ḳailkur ufre saṛi deo. Dinor azab dinor lagi zotesṭo. “Tumra manshor dush tukanit roio na, teu tumrar dush-o tukail oito nae. Tumra zela manshor dush tukao, Allae-o oula tumrar dush tukaiba. Tumra zela falladi mafibae, tumrar lagi-o ola mafa oibo. “Tumar bair souḳor bitre guṛa ase ikan deḳrae, oile nizor souko gasor seli ase ikan deḳrae na ḳene? Tumar sokut seli hamaise ikan zebla deḳrae na, te tumar baire kila ḳoibae, bai, tumar sokut guṛa hamaise, ao, bar ḳoria dei? Haere bonḍo, foyla nizor souk taki seli bar ḳoro, bade tumar bair souk taki guṛa bar ḳorat lagle bala ḳori deḳtae farbae. “Huno, kuttar samne fak-fobitro kunu siz dio na. Shuoror samne moni-mukta siṭaio na. Arnae ou sizre tarar faodi uṛia, ulṭa aia tumrare-o hamla ḳorta faroin. “Ami tumrare ḳoiram, sao, tumrare deoa oibo. Tallash ḳoro, teu faibae. Duaro ṭuka deo, teu duar kula oibo. Zara sae, tara-u to fae. Ze tallash ḳore he fae. Ze duaro ṭukae, tar lagi duar kula oy. Tumrar maze ila kunu ma-baf ase ni, zar fute ruṭi saile maṭi dibo? Mas saile haf dibo? Tumra ḳaraf oia-o zudi tumrar huruttainre bala bala siz ditae zano, te zara behesti baf Alla Pakor gese saibo, tain to nisoy tarare bala bala siz dan ḳorba, ita to shababik. Huno, tumra manshor ges taki zelaḳan bebohar faitae sao, tumra-o hoḳlor loge ou laḳan bebohar ḳoro. Ota-u oilo Tourat Kitab ar nobi oḳlor sohifar mul talim. “Huno, tumra sifa duaredi hamaio, ḳaron ze fote binashor bae ṭane, i fot muṭa, fotor duar-o boṛo, bout manush ou duaredi hamain. Oile ze fote gele zindegi mile, i fotor duar sifa, fot-o huru-muru. Kub ḳom manshe-u i duaror kuz fain. “Bonḍo nobi oḳol taki hushiar roio. Tara tumrar gese meṛar surote ae, oile bitre bitre tara raikkosh bagor laḳan. Tarar zindegi dekia-u sintae farbae. Zano to, gosa-ḳaṭar maze kunu angur dore ni ba bon-jonglar maze kunu ḍumur fol dore ni? Ṭik ou laḳan, bala gase to bala fol-u dore ar mondo gase mondo fol-u dore. Bala gase to mondo fol dore na, ar mondo gase bala fol dore na. Ze gase bala fol dore na, igure ḳaṭia daru zalail oy. Ola-u bonḍo nobi oḳlor zindegir fol deḳle-u itare sinbae. “Mono rakio, amare ‘Huzur, huzur!’ ḳoile-u zen behesti bashshait hamaizibae, ikan ṭik nae. Borong ze zone amar behesti baf Alla Pakor morzi zugaia sole, ḳali he-u hamaito farbo. Hou din aile boute ḳoiba, ‘Munib, munib, amra tumar name gaibi kobor ḳoisi na ni? Tumar name zin-but saṛaisi na ni? Tumar name bout keramoti deḳaisi na ni?’ Oile ami tarare zuaf dimu, ‘Dur, Iblisor dol! Ami to tumrare sini-u na, amar ges taki bago.’ “Ze manshe amar ou talim hunia amol ḳore, he aḳoldar manshor laḳan mozbut kuṭir ufre tar gor banae. Bade meg-tufan ar zuar aia ou gorre ṭela dile-o falaito fare na, ḳaron ikan to mozbut kuṭir ufre banail oise. Oile ze amar talim hunia-o amol ḳore na, he be-aḳolor laḳan norom maṭir ufre gor banae. Bade zebla meg-tufan ar zuar aia ou gorre ṭela dey, ou shomoy ikan foṛia sefṭa oizae.” Isar ita talim hunia manush taijjub bonigela. Ḳaron tain to tarar moulana oḳlor laḳan talim na dia, ḳemotaban manshor laḳan talim dita. Hozrot Isa faṛ taki lamia aile bout manush tan ḳore ḳore aila. Ou shomoy eḳ fosa-kusṭo bemarie tan ḳandat aia faot foṛia ḳoilo, “Huzur, afnar morzi oile amare ou nafaḳ bemar taki bala ḳorta faroin.” Teu tain at baṛaia tare soia ḳoila, “Oy ami sairam, tumi fak-saf o.” Ḳoar loge loge-u tar bemar shifa oigelo. Isae tare ḳoila, “Huno, ita ḳeurore hunaio na, ḳali imam sabor gese gia deḳao. Musa nobir shoriot mafik fak-saf oar lagi zela kurbani kora zorur, ou kurbani dile-u shomaze zaniliba tumi bala oigeso.” Erbade Isa gia Kofornaum ṭauno hamaila. Hino Ruman sifair eḳ subedare tan gese aia minot-ḳajji lagaila, “Huzur, amar gulamor obosh bemar oia bisnat foṛi roise, he kub ḳoshṭo ḳorer.” Isae enre ḳoila, “Aichcha, ami zaimune, gia tare bala ḳormu.” Teu subedare ḳoila, “Huzur, afnar moto zone amar baṛit toshrif nita, ami to er laḳ nae. Afne ḳali mukkandi koile-u he bala oizibo. Afne to buzra, ami-o amar kamanḍaror hukume soli, oula amar sifai oḳol-o amar hukume soloin. Ami era eḳzonre ao ḳoile ae, zao ḳoile zae. Amar gulamre zudi koi, oḳan ḳoro, he ikan ḳore, te afne-o ola mukdi hukum dile-u he bala oizibo.” Ikan hunia Isa ekkere taijjub oigela, tan ḳore oia zoto manush aoat asil, erare ḳoila, “Ami tumrare hasau ḳoiram, i subedar to bidormi Ruman manush, oile amar Boni Israilor maze-o oto boṛo mozbut imandar ami ar deḳsi na. Huno, fub ar foismor desh taki bout zon aiba, tara Hozrot Ibrahim, Isʼhak ar Iakub nobir loge behesti bashshait ḳanit boiba. Oile behesti bashshait zara taḳar ḳota, tarare bare andair gato falai deoa oibo. Hino tara ḳanda-ḳaṭi korba ar zala-zontronae dat kiṛimiṛi kaiba.” Bade Isae ou subedarre ḳoila, “Tumi zaogi. Tumi zela ekin ḳorso, ola-u ouk.” Hasau, loge loge-u hou gulam bala oigelo. Erbade Hozrot Isa Hozrot Fitoror baṛit gela, gia deḳla, Fitoror hoṛir kub taf uṭse, tain bisnat foṛono. Tane dekia Isae tan ato soila, ar loge loge taf saṛi dilo. Beṭie uṭia Isar memandarit lagla. Ou din hainja bala manshe zinor asor-ala bout zonre Isar gese loia aila. Isae tan mukor ḳotae-u erar zin saṛaila, ar hokkol bemarire bala ḳorla. Ita goṭlo, zate Ishaya nobir mazdi bout age zeta batail oisil, ota oḳon fura oy. Hono batail oisil, Amrar hoḳol ḳomzuri tan ḳando nila, amrar bemar-azar horaila. Isar sairo galabae biṛ lagi gese dekia, tan shagrid oḳolre hukum dila aoror hofaro zaitagi. Ou shomoy eḳzon moulana aia Isare ḳoila, “Huzur, afne zeno zaiba, ami-o hono zaimu.” Isae enre ḳoila, “Hunoukka, hialor gat ase, fakir-o bada ase, oile ami bin-Adomor mata toar ṭai nai.” Aroḳzon shagride aia ḳoila, “Huzur, amare baṛit zaite deukka, ami foyla gia amar babar dafon-ḳafon ḳoria ai.” Tain ḳoila, “Mora oḳole-u tarar morare maṭi deuk, tumi amar loge solo.” Isa aoror hofaro zaita ḳori, tan shagrid oḳolre loia eḳ nao-o uṭla. Isa naor maze gumaira, ou shomoy aḳta-u aoror maze boṛo eḳ tufan ailo, tufane naoḳan buṛizibar dosha oigelo. I dosha dekia shagrid oḳole Isare hozag kori koila, “Huzur, amrare basaukka, amranu mori zairam.” Isae zuaf dila, “O ḳomzur imandar oḳol, tumra ḍorairae ḳene?” Oḳan ḳoia tain uṭia tufan ar aorre domoḳ dila, teu hokkolta tir oigelo. I keramoti dekia tara taijjub oia ḳoila, “Ein ashole ḳe? Tufan ar aore-o deki tan hukum mane!” Erbade Isa aor faṛi dia Zerasini oḳlor desho aila. Ou shomoy bute dora duizon manush ḳobrostan taki bar oia tan gese ailo. Tara ola zonun fagol asla zen, tarare ḍoraia ḳeu ou fotedi zaito farto na. Tara sillaia Isare ḳoilo, “O Allar ḳas mayar zon Ibnulla, amrar loge afnar kita dorḳar? Shomoy oar age-u afne amrare satanit aichchoin ni?” Ou shomoy tarar ges taki tuṛa duroi boṛo eḳ shuoror fale ḳaoat asla. But oḳole Isare minot ḳori koilo, “Afne amrare ḳedaite saile, ou shuoror falor maze faṭai deukka.” Isae tarare izazot dia harle tara gia ou shuoror falor maze hamaigelo. Ar shuoror fale aoror ḳaṛa soredi kub zure douṛaia gia fanir maze buṛia morla. Ita dekia shuoror raḳal oḳole douṛaia gia gaur hoḳol manshore ḳobor zanaila, erloge ou bute dora manshor ḳota-o ḳoila. I goṭona hunia gaur hoḳol manush Isar loge deḳa ḳorat aila. Tan loge deḳa ḳoria tara minot ḳori koila, “Meherbani kori amrar desh taki zaukkagi.” Bade Hozrot Isa nao-o ḳori aor faṛi dia nizor ṭauno aila. Aia harle ḳoyzon manshe eḳzon obosh bemarire folodi boia loia tan gese ailo. Tarar imanor bol dekia Isae ou bemarire ḳoila, “Mono bol raḳo re fut, tumar guna maf ḳora oise.” Ikan hunia ḳoyzon moulanae mone mone ḳoila, “I beṭae to shiriki korer.” Isae tarar dilor bab buzia ḳoila, “Afnara ḳene ila ku-sinta ḳorra? Amar lagi kunḳan ḳoa shuza, tumar guna maf ḳori dilailam, na uṭo, tumar bisna loia baṛit zaogi? Te oḳon afnara forman deḳoukka, i duniat guna mafir ḳemota ami bin-Adomor ase.” Oḳan ḳoia-u tain bemari beṭare ḳoila, “Oba uṭo, tumar ḳeta-balish loia baṛit zaogi.” Ḳoite-u hi bemari beṭa uṭia tar baṛit gelogi. Ita dekia manush taijjub oigela, Allae manshore oto ḳemota disoin ḳori tara Allar tarif ḳorla. Isae fotedi aṭia zaira, ou shomoy deḳla, Moti namor eḳzon manush ḳazna tular ofiso boiroisoin. Dekia tanre ḳoila, “Ao, amar ummot o.” Teu Moti uṭia Isar ḳore ḳore gela. Erbade Isae tan shagrid oḳolre loia Motir baṛit gia ḳaoat boila. Tan loge bout ḳazna tulra ar naforman oḳol-o ḳanit asla. Ita dekia Forishi mozobor manshe Isar shagrid oḳolre ḳoila, “Tumrar murshide gushkur ḳazna tulra ar ḳobis oḳlor loge ḳaoa-daoa ḳoroin ḳene?” Ikan hunia Isae ḳoila, “Bala manshor lagi kobiraz lage na, oile bemarir lagi to lage. Allar kalamo batail oise, ‘Ami kunu foshu kurbani nae, ḳali doya deḳtam sai.’ Te ou ayator mani kita, oḳan tallash ḳoroukka. Mono raḳba, ami kunu forezgarre daot deoat aisi na, ḳali gunagar oḳolre-u daot ditam aisi.” Erbade Ehia nobir ummot oḳole aia Isare zikaila, “Huzur, amra ar Forishi mozobor manshe hamesha ruza raki, oile afnar ummot oḳole ruza raḳoin na ḳene?” Tain zuaf dila, “Nosha loge taḳle logor boiratire kunu duk deoa zae ni? Deḳbane, ila shomoy aibo, zebla noshare tarar ges taki horail oizibo, hou shomoy tara ruza raḳba. “Ana-doa noya ḳafoṛor ṭukradi keu furan kurtat tali dey na. Ila ḳorle doia harle furan ḳafoṛ taki noya tali kus oia siṛizae, ar siṛaḳan aro boṛo oy. Furan samṛar tolit ḳeu noya anguror rosh bore na. Borle ou taza roshor fafe toli faṭia rosh ar toli duiota borbad oy. Erlagi manshe taza rosh noya tolit toin. Teu duiota base.” Hozrot Isae zebla ota befare talim dira, ou shomoy eḳ neta aia tan fao-o foṛia ḳoila, “Huzur, amar fuṛigu ou matro mara gese. Te afne aia meherbani kori taire atai dile-u fuṛigu zinda oizibo.” Teu Isae tan shagrid oḳolre loia en loge roana dila. Zaoar fote eḳ beṭie ḳoredi aia Isar saddoror kunat soilo. Baro bosor dori i beṭir beṭiara bemaror lou zaito. Beṭir ekin asil, tai zudi kali tan saddoror kunat soilito fare, te bemar bala oizibo. Isae ṭer faia ḳoredi saia ou beṭire ḳoila, “Ḍoraio na go mai, tumar imanor bole-u tumi bala oilae.” Oḳan ḳoar loge loge beṭi bala oigelo. Erbade Isa hou netar baṛit gela. Gia deḳla, asta baṛir manshe hoi-hulla ḳorra, ar tarar shomazor reoaz mafik mora baṛit bashi-bazona bazaira. Tain ḳoila, “Tumra hoḳol gor taki bare zao. Fuṛigu morse na, tai to gumar.” Ikan hunia manshe tanre loia asha-ashi lagaila. Manshore bar ḳoria harle, tain gia goror bitre hamaia fuṛir ato dorla, dorte-u tai uṭia boigelo. Ar i goṭonar ḳota ou elaḳar hoḳolbae roṭi gelo. Isa ou netar baṛi taki bidae oia harle duizon anda beṭa tan ḳore ḳore gelo. Tara zure zure ḳoilo, “O Daudor aolad, amrare rohom ḳoroukka.” Bade tain aia goro hamaile, hou duio anda-o tan gese ailo. Tain zikaila, “Tumra ekin ḳorrae ni, ami tumrare bala ḳortam farmu?” Tara ḳoilo, “Ji oy huzur, afne-u farba.” Teu tain erar souk atai dia ḳoila, “Tumra zela ekin ḳorso, ola-u ouk.” Oḳan ḳoite-u tarar souk bala oigelo. Bade Isae tarare kub doṛaia ḳoila, “Huno, ita ḳeurore hunaio na.” Oile tara bar oia gia ash-fash hoḳol zagat tan i kobor roṭai dilo. Hou duio anda zebla bala oia zairagi, ou shomoy manshe bute dora eḳ buba beṭare Isar gese loia ailo. Tain i beṭar but saṛanir bade tar zoban kuligelo, he mat-ḳota matilo. Ita dekia hoḳole taijjub oia ḳoila, “Asta Israil deshor maze ila ḳam to kunudin deḳsi na.” Oile Forishi oḳole ḳoila, “Igie to butor bashshar shaijjoe but saṛae.” Hozrot Isae gaue gaue ar ṭaune ṭaune gia tarar mosido hamaia talim dila. Tain behesti bashshair kush-ḳobri toblig korla, ar hoḳol nomunar bemarire bala ḳorla. Ou shomoy manshor biṛ dekia tan kub duk laglo, ita manush to a-raḳali meṛar laḳan befana lagi gurira. Teu Isae shagrid oḳolre ḳoila, “Zomino to foshol bout ase, oile ḳamla kub ḳom. Erlagi zominor malikor gese dua ḳoro, tan foshol tular lagi tain ḳamla faṭaiba.” Bade Isae tan barozon sahabire ḍaḳaia anla, ania zin-but saṛani, ar hoḳol zator bemarire bala ḳorar ḳemota dila. Ou barozon sahabi oila, Saimon urfe Fitor ar tan bai Andrias, Zibudiar fuain Iakub ar Hannan, Filif ar Bortolmoy, Tumas ar ḳazna tulra Moti, Alfir fua Iakub ar Toddey, muktizudda Saimon ar Ihuda Iskariat. Ou Ihudae bade beimani koria Isare dushmonor ato dorai disil. Ou barozon sahabire Isae hukum dila, ḳoila, “Tumitain tobligo zao, oile kunu bidormir gese ba Shomoria zatir kunu gaut zaio na, ḳali Boni Israilor arail meṛa oḳlor gese zao. Zaoar fote toblig kori kori zaio, ḳoio, Behesti bashshai daro aichche. Ar tumra bemari oḳolre bala ḳorio, morare zinda ḳorio, fosa-kusṭo bemarire bala ḳorio, ar zin-but saṛaio. Tumra zela bina ṭeḳae faiso, oula bina ṭeḳae-u dio. Zaoar shomoy loge ḳori ṭeḳa-foyshar toli, shuna-rufa ba eḳṭa shiki-o nio na. Tumra fotor lagi laṭi, gaiṭ-buski, zuta, ba duiṭa kurta-o loge nio na. Ze zone ḳam ḳore, he ḳaoa-finda faoar zuka. Tumra ze gaut hamaibae, ou gaur eḳzon zoiggo manshore tukaia bar ḳorio, i gau saṛia zaoar ag forzonto en baṛit-u roio. Baṛir bitre hamanir bala tarare salam dio. I baṛi zudi salam faoar zuka oy, te tumrar deoa ou shanti tara faiba, ar zuka na oile tumrar shanti tumrar gese-u firia aibo. I zagar ḳeu zudi tumrare ḳobul na ḳore, tumrar ḳota na hune, te i baṛi ba gau taki baronir bala tumrar faor duil zaṛia falaia aio. Ami tumrare hasa ḳota ḳoiram, Hashoror din ou gaur dosha taki, hou lannoti Sadum ar Amura ṭaunor dosha bout bala oibo. “Huno, raikkosh bagor samne meṛar laḳan ami tumrare faṭairam. Erlagi tumra hafor laḳan salaḳ-sotur ar faro fakir laḳan shorol o. Hushiar roio, manshe tumrare doria adaloto shomzaiba, ar tarar mosido nia tumrare singladi marba. Amar nam loar lagi tumrare raza-bashshar samne neoa oibo. Tumra erar samne ar bidormi oḳlor gese amar befare shakki dibae. Manshe zebla tumrare dorai dibo, ou shomoy kita mattae ba kita ḳoitae, ita loia kunu sinta ḳorio na. Hou shomoy tumrare ita hikai deoa oibo. Ashole tumrar mukdi zen tumra nize matbae, ikan nae, tumrar batuni bafor ze ruhu tumrar bitre ase, hou ruhe-u itar zuaf diba. “Baie baire ar bafe fuare kun ḳoranir lagi dorai dibo. Fua-fuṛie-o tarar ma-bafor bifokke gia tarare kun ḳoraibo. Amar ḳarone hoḳol manshe tumrare ginnaibo, oile hesh forzonto ze ṭikia roibo, he-u rehai faibo. Kunu gaur manshe tumrare zulum ḳorle, i gau saṛia oinno gaut zaiogi. Huno, ami hasa ḳota ḳoiram, Israil deshor hokkol ṭaun ar gaut tumrar toblig shesh oar age-u bin-Adom hirbar aiba. “Mono rakio, ustad taki shagrid boṛo nae, ar munib taki tar gulam boṛo nae. Te shagrid tar ustador shoman, ar gulam tar munibor shoman oa-u zotesṭo. Hunrae ni, goror munibre zebla butor bashsha Bel-Sobul ḳoira, te goror baki hoḳolre tara aro ḳotota ḳoiba! “Oile tumra tarare ḍoraio na, ḳaron ila gufon kunta-u nai zeta zair oito nae. Ila lukail-o kunta nai zeta ḳeu hunto nae ba zanto nae. Ami andarir maze zeta tumrare ḳoisi, tumra ita foror maze ḳoio. Zeta ḳane ḳane huncho, ita saṭor ufre gia zure zure elan ḳorio. Zara manshor ḳayare binash ḳorto fare, oile ruhre kunta ḳorto fare na, tarare ḍoraio na. Zein ḳaya ar ruhu duiotare duzoḳo zalaita faroin, ḳali tanre-u ḍoraio. Huno, duiṭa soṛa faki kali dui ṭeḳae bike na ni? Oile tumrar batuni baf Allar hukum na oile ota egu soṛa faki-o maṭit foṛe na. Zano to, tumrar matar sul gesain-o gona ase. Erdae tumra ḍoraio na. Tumrar dam to bout soṛa taki-o beshi. “Shomazor samne ze zone amare ḳobul ḳore, ami-o amar behesti baf Alla Pakor samne tare ḳobul ḳormu. Oile ze manshe shomazor samne amare oshikar ḳorbo, ami-o tare amar behesti baf Allar samne oshikar ḳormu. “Tumra mono ḳorrae ni, ami duniat shanti ditam aisi? Na, muṭe-u nae, ami to duniat eḳ motobed laganit aisi. Ami bafe-fuae, mae-fuṛie, ar hoṛie-boue bibad laganit aisi. Manshor nizor foribaror zone-u tar loge dushmoni korbo. “Ze manshe ama taki tar ma-bafre beshi maya ḳore, he amar ummot oito farto nae. Ar ze zone ama taki tar fuare ba tar fuṛire beshi maya ḳore, he-o amar ummotor zuka nae. Ze zone nizor duk-koshṭor solib boia loia amar ḳore na ae, he-o amar zuka nae. Ze zone tar nizor zan basaito sae, he tar asol zindegi kuaibo. Oile ze zone amar lagi tar zan kurbani dilae, he asol zindegi faibo. “Ze zone tumrare ḳobul ḳore, he amare-u ḳobul ḳore, ar ze amare ḳobul ḳore, he ashole hou Allare-u ḳobul ḳore, zein amare faṭaisoin. Ḳeu zudi kunu nobire nobi koia ḳobul ḳore, te ou nobie ze furuskar faiba, he-o ou furuskar faibo. Kunu Allaraia manshore ḳeu zudi Allaraia ḳoia ḳobul ḳore, te ou Allaraia manshe ze furuskar faiba, he-o ou furuskar faibo. Ar amar ummot zania ḳeu zudi tumrar mazor eḳ nogoinno zonre-o ek gelas fani kaoae, te he kunumonte-u er furuskar taki bad foṛto nae.” Hozrot Isae tan barozon sahabire ou talim dia harle, tain gaue gaue gia toblig ar talim deoar lagi roana oigela. Ehia nobie zelo taki zebla al-Mosir ḳamor ḳota hunla, ou shomoy tan ḳoyzon shagridre faṭaila ḳobor zanar lagi. Era gia Isare zikaila, “Huzure ḳoisoin, zein aibar ḳota asil, afne-u hein ni? Na amra ar ḳeuror lagi bar saitam?” Isae ḳoila, “Huno, ono aia tumrar nizor souke zeta deḳso ar huncho, ota gia Ehiare ḳo. Tanre ḳoio, anda manshe souke deḳra, lengṛae-o aṭira, fosa-kusṭo bemari bala oira, ḳalua oḳole hunra, mora manush zita oira, ar gorib oḳlor gese Allai kush-ḳobri toblig kora or. Huno, he-u nek-kofali, zar dilo amar befare kunu bada ae na.” Ehia nobir shagrid oḳol zairagi, ou shomoy Ehiar befare Isae manshore ḳoila, “Kita ba, morubumit kita deḳat geslae? Batash aile zeta nol-ḳagṛae loṛe, ota deḳat geslae ni? Na, kita deḳat geslae? Shundor ḳafoṛ finno kunu manshore ni? Ashole, zera dami dami kafoṛ findoin, tara to razbaṛit taḳoin. Te tumra kita deḳat geslae? Kunu nobire deḳat ni? Huno, ami koiram, Ehia to ḳali nobi nae, nobi taki-o boṛo. Ein to hou zon, zen befare Asmani Kitabo leḳa ase, Huno, tumar age faṭaiar ami, amar fegambor, ein gia ṭik-ṭak korba tumar solar fot. Te ami tumrare hasa ḳota ḳoiram, Ehia taki boṛo asta duniat-u kunu adom asla na. Oile behesti bashshair maze hoḳol taki huru zon-o, Ehia taki mohan. Ehia nobir amol taki oḳon forzonto behesti bashshai kub mozbut oia aguar, ar zera imane mozbut, tara dile-zane aia er bitre hamaira. Huno, Ehia nobir amol forzonto Hozrot Musar Tourat Kitab ar shob nobir sohifar maze, Allar bashshai aoar ḳota zanail oise. Oḳon zudi afnara amar mat ekin ḳoroin, te hunoukka, ze Ilias nobie hirbar aibar ḳota asil, ou Ehia-u oila hou Ilias. Zar ḳan ase, he hunouk. “I zomanar manshore ami kitar loge tulona ḳortam? Tara to omon huruttar laḳan, zetae bazaro boia eḳe-oinnore ḍakia ḳoin, ‘Hoi, amra tumrar lagi bashi bazailam, tumra to naslae na, ahazarir gan gailam, tumra to ḳanlae na.’ Ṭik olaḳan, Ehia nobie aia shomazor loge ḳaoa-daoa na ḳorae, manshe ḳoira tane bute dorse. Oile ami bin-Adom aia ḳaoa-daoa ḳorae tumra ḳoirae, ‘Deḳoukka, i beṭa to feṭua, modkur, he gushkur ḳazna tulra ar naforman oḳlor loge dusti kore.’ Te aḳol ḳaṭaia zera sole, tarar sal-cholon taki-u forman mile, aḳol-u oilo ḳaṭi-nikut siz.” Hozrot Isae zeta gauainto ar ṭauno beshir bag keramoti deḳaisla, itar manshe touba ḳorsoin na. Erlagi tain i gau ar ṭaunor ufre bezar oia ḳoila, “Haere Bayt-Soyda ar Kurasin gau, tumra to lannoti. Tumrar maze zeta kudroti ḳam deḳail oise, ita zudi Shur ar Sidon elaḳat deḳail oito, te bout age-u tara ḳator oia touba ḳorlo one. Oile ami tumrare ḳoiram, kiamotor din Shur ar Sidon elaḳar dosha taki-o, tumrar dosha bout ḳoṭin oibo. O Kofornaum ṭaun, huno, tumi bule usa oia asmano gia lagtae? Na, fartae nae! Tumare fatalo lamani oibo. Tumar maze zeta kudroti muzeza deḳail oise, ita zudi Sadum ṭauno deḳail oito, te i ṭaun oḳono ṭikia roilo one. Oile ami tumrare ḳoiram, Hashoror din Sadum ṭaunor halot-o tumrar taki bout bala oibo.” Erbade Isae ḳoila, “O amar gaibi baf Alla, tumi to asman-zominor malik. Ami tumar shukria zanairam, ḳaron tumi aḳoldar ar buddiman oḳlor gese ita zair na ḳoria, bebuz-huruttar laḳan manshor gese zair ḳorso. Baba, ashole ita hoḳolta-u tumar morzi. “Amar gaibi babae hoḳolta-u amar ato shofi disoin. Baf saṛa dusra ḳeu ou futre sine na, ar fut saṛa dusra ḳeu ou bafre sine na. Fute bafre zar gese zair ḳorar kial oy, ḳali he-u bafor forisoy fae. “Bar-buza boite boite tumra zera heran oigeso, tumra hoḳol amar gese ao, ami tumrare aram dimu. Eḳ Zummabare Hozrot Isa ḳetor ailedi aṭia zaoat asla. Tan shagrid oḳlor feṭo buk lagae, tara danor soṛa siṛi siṛi kaoat lagla. Ita dekia Forishi mozobor manshe Isare ḳoila, “Amrar shoriote ḳoy, Zummabare kunu ḳam ḳora zaiz nae, te afnar shagrid oḳole danor soṛa siṛira ḳene?” Isae zuaf dila, “Daud nobi ar tan logor manshe eḳbar feṭor buke zeta ḳorsla, ita afnara foṛsoin na ni? Tain Allar Kaba goro hamaia hou fobitro ruṭi kaisla, i ruṭi kaoa to tain ar tan logor manshor lagi nazaiz, ita ḳali imam sabor lagi zaiz asil. Ar afnara Tourat Shorifo foṛsoin na ni, Baytul-Mukaddosor imam oḳole Zummabare zummar dinor niom bangle-o tarar kunu guna oy na. Oile ami afnarare ḳoiram, Baytul-Mukaddos taki-o dami eḳ manush ono asoin. Allar kalamor ou ayator bed zudi afnara buzta, ze ayato ase, ‘Ami doya deḳtam sai, foshu-kurbani nae.’ Te afnara ni-oforadire oforadi banaila na one. Hunoukka, Zummabaror tamam eḳtiar ami bin-Adomor ato.” Bade Hozrot Isa intone gia ou Forishi oḳlor mosido hamaila. Hono ola eḳ beṭa asil, tar eḳ at bemare hukai gese. Isar kunu kut bar ḳoria tanre dushi bananir niote, ou mosidor manshe tanre zikailo, “Sab, Musar shoriot mafik Zummabare ḳeuror bemar shifa ḳora zaiz ni?” Isae zuaf dila, “Doroukka, afnara eḳzonor egu meṛa zudi Zummabare gator maze foṛizae, te ou din i meṛare gato taki tulta nae ni? Ar manshor dam to meṛa taki bout beshi. Erlagi buza zae, Zummabare-o nek kam ḳora zaiz ase.” Bade tain ou hukna at-ala beṭare ḳoila, “Tumar atḳan baṛao.” He tar at baṛaite-u hukna at oinno ator laḳan furafur bala oigelo. Bade hou Forishi oḳole bare gia foramish ḳorla, Isare kila zane mara zae. Tarar ou foramishor ḳobor Isae zanilila, erlagi tain hintone hori gela. Ou shomoy bout manush tan ḳore ḳore aila. Erar maze zoto bemari asla, tain era hoḳolre bala ḳorla. Tain erare doṛaia ḳoila, “Ḳobordar, tumra amar forisoy zair ḳorio na.” Ita oisil zate agor amolor nobi Ishayar mazdi zeta batail oisil, ota folizae. Tain ḳoisla, Huno, ami amar ou gulamre fosond ḳorsi. Ein-u amar mayar zon, tan ufre ami kub kushi. En ufre ami amar ruhu dimu, hoḳol zatir gese tain amar hok bisaror ḳota zanaiba. Tain kunu torka-torki ba silla-silli korta nae, fote-gaṭe kunu manshe tan aoaz hunto nae. Hok bisar ḳaim oar ag forzonto, tain sesa nol-ḳagṛa bangita nae, ar miṭ miṭ ḳori zolra lemor fita-o limaita nae. Duniar hoḳol zatie tan ufre-u borosha ḳorba. Bade manshe zinor asor-ala eḳ beṭare Isar gese loia ailo. I beṭa asil anda ar buba. Tain ou beṭare bala ḳorla. He bala oia mat-ḳota matilo ar souke-o deḳlo. Ita dekia hoḳol manush taijjub oia ḳoila, “Daud nobir ḳandano zein zonom oar ḳota, ein-u hein ni?” Ikan hunia Forishi oḳole ḳoila, “Igie to zinor bashsha Bel-Sobulor bole zinnat saṛae.” Tarar monor sinta buzia Isae ḳoila, “Kunu deshor bitre doladoli lagigele, i desh to binash oizae. Ou laḳan kunu foribaror maze ba kunu ṭauno zebla doladoli lagizae, ita-o ar ṭike na. Oula Shoytane zudi Shoytanre ḳedai dey, te to tar nizor maze-u doladoli lagigelo. Tar razotto ar kila ṭikbo? Ami zudi Bel-Sobulor bole zinnat saṛai, te tumrar manshe ḳar bole saṛae? Tumrar mator bisar tumrar manshe-u ḳorba. Oile ami zudi Allar ruhur bole zinnat saṛai, te to Allar bashshai tumrar daro aichche. “Kunu bolala manshor baṛit luṭ-toraz ḳorat aia, foyla bolala zonre na bandile, ḳemne luṭ-toraz ḳorbo? Oile tare bandia harle luṭ-faṭ ḳorto farbo. “Ḳeu zudi amar fokke na taḳe, he to amar bifokke. Ze zone amar loge tukae na, he to sitrae. Ami tumrare ḳoiram, manshor tamam nomunar guna ar kufurir mafi ase, oile Pak Ruhur befare kufuri korle, i kufurir kunu mafi milto nae. Ami bin-Adomor birudde ḳeu kunta matile-o he mafi faibo, oile Pak Ruhur birudde matile tar kunu mafi nai, i zindegit-o nai, aḳero-o nai. “Mono raḳba, gas bala oile tar fol-o bala oy, ar gas bura oile tar fol-o bura oy. Fol dia-u gas sina zae. O hafor baichchain, tumra nize-u to ḳaraf, te tumrar muk tone bala buli ḳemne bar oibo? Manshor dil zetadi bora, muk taki to ota-u baroy. Bala manshor dilor bitoror balai tone bala buli baroy, ar bad manshor dilor burai tone bad buli baroy. Oile ami tumrare ḳoiram, ze manshe aze-baze ber-beri kore, Hashoror moydano tar forteḳ mator hishab dite oibo. Tumar zobane-u tumare dushi banaibo, ar ou zobane-u tumare nirdushi-o banaibo.” Bade ḳoyzon moulana ar Forishie Isare ḳoila, “Huzur, amra afnar ekḳan keramoti deḳtam sai.” Isae zuaf dila, “I zomanar naforman ar beiman oḳole ḳali keramoti deḳta sain, oile Iunus nobir keramoti saṛa dusra kunu keramoti tarare deḳail oito nae. Iunus nobi zela masor feṭo tin din, tin rait asla, ami bin-Adom-o oula tin din, tin rait maṭir tole roimu. Kiamotor din hou Ninob ṭaunor murda oḳol uṭia hari, i zomanar manshor dush zair ḳorba. Ḳaron Iunus nobir toblig hunia tara touba ḳorsila. Oile oḳon to Iunus taki-o aro mohan eḳzon ino asoin, ta-o manshe touba ḳorer na. Ruz kiamotor din douknor deshor rani uṭia aia ou zomanar manshor dush zair ḳorba. Ḳaron Bashsha Sulaimanor aḳolor ḳota hunar kiale tain duniar hesh mata taki aisla. Oile oḳon to Sulaiman taki-o aro mohan eḳzon ono asoin. “Huno, kunu bute zebla manshor log saṛia zaegi, ou shomoy he arame taḳar kiale hoḳol hukna zagat asroy tukae. Oile aramor zaga na faia bade ḳoy, ‘Dur, amar agor gor-u bala, zegur ges taki aisi, ogur gese-u firia zaigi.’ Firia aia deḳe i gorḳan ḳali, saf-sofa ar hazail-faṛail. Dekia he gia tar tone aro ḳaraf shatgu but loge loia ae, aia ou goro roy. Erdae ou manshor dosha foyla taki heshe aro beshi karaf oy. Te i zomanar naforman oḳlor dosha-o olaḳan oibo.” Isae zebla manshor loge matira, ou shomoy tan ma ar baiain bare aia, tan loge deḳa ḳorar lagi bar saoat asla. Teu eḳzon manshe aia tanre ḳoilo, “Huzur, afnar ma ar baiain afnar loge matar lagi bare ubai roisoin.” Ikan hunia Isae tare ḳoila, “Amar ma ḳe, ar amar baiain-u ba ḳe?” Bade tan shagrid oḳolre deḳaia ḳoila, “Era-u amar ma ar baiain. Zara amar behesti baf Alla Pakor morzi zugaia soloin, tara-u amar ma ar bai-boin.” Hozrot Isa ou din gor taki bar oia aoror faro gia boila. Boia harle bout manush tan gese aia biṛ lagai dila, biṛ dekia tain gia eḳ nao-o uṭia boila ar hoḳol manush faro ubai roila. Ou shomoy tain kichcha hunai hunai nanan nomunar talim dila. Tain ḳoila, “Mono ḳoro, ek giroste zala bain ḳorat gelo. Gia bain ḳorar bala kisu zala ailor maze foṛlo, ar fakinte aia ita ḳaililo. Tar kisu zala hukna-shokto maṭir ufre foṛlo, i zala fuṭia ali bar oile-o tole beshi maṭi na taḳae, zoldi baṛilo. Bade shuruz uṭia harle zoir ḳaililo, ar tolor zoṛe rosh na faoae hukaia morigelo. Kisu zala bon-jonglar maze foṛlo, ar ou bon-jongla baṛia itare zatia dorlo. Oile kisu zala bala zomino foṛlo, i zalae bala dan oilo, itar kunu soṛae tish, kunu soṛae shaiṭ, kunu soṛae eḳ-sho gun beshi dan dorlo.” Ou kichcha hunanir bade Isae ḳoila, “Zar ḳan ase, he hunouk.” Bade tan shagrid oḳole ḳoila, “Afne ḳali kichcha ḳoia manshore talim dira ḳene?” Tain ḳoila, “Behesti bashshair gufon rohoisho zanar shuzug tumrare deoa oise, oile baki manshor gese ita batuni roise. Huno, zar ase, tare aro deoa oibo, tar aro baṛibo. Oile zar nai, tar zeta ase, ota-o ḳaṛia neoa oibo. Erlagi ami kichchar mazdi erare talim diram, era to dekia-o deḳe na, hunia-o hune na ar kunta buze-o na. Erar mazdia-u Ishaya nobir batail ou ayat fura oise, tain ḳoisla, Tumra ḳane hunle-o kunta buztae nae, souke deḳle-o kunta sintae nae. Ita manshor dil oshaṛ oigese, tarar ḳano tala lagigese. Tara zarzir souk muzi boiroise, zate souke na deḳe, ḳane na hune, dil dia na buze. Kizanu tara touba ḳoria amar bae firizain, ar ami tarar shifa ḳorilai. Oile nek-kofali to tumra, tumrar souke deḳe, ar ḳane hune. Ami tumrare hok kota ḳoiram, tumrar souke zeta deḳrae ar ḳane zeta hunrae, ita bout nobi ar oli-auliae deḳar asha ḳorle-o deḳar ḳofal oise na, ar hunar asha ḳorle-o hunar ḳofal oise na. “Oḳon tumrare ou girostor kichchar mani buzai diram, Huno, ailor maze foṛa zala dia olaḳan manshor befare buzail oise, ze manshe behesti bashshair ḳota hunia-o buze na, erlagi Iblise aia ou zonor dilo Allar ze kalam bain ḳora oisil, ota ḳaṛia neygi. Hukna-shokto maṭir ufre foṛa zaladi buzail oise, zera i kalam hune ar kub kushi oia ḳobul ḳore, oile tarar dilo balamonte hamae na, erlagi ita tuṛa ḳoydin roy, bade i kalamor lagi kunu zulum-mosibot aile-u tara ḳorlami zae. Bon-jonglar maze foṛa zaladi buzail oise, zera i kalam hune, oile duniabi sinta-babna ar don-samanar mayae i kalamre zatia dorilae, erdae kalame kunu fayda oy na. Ar bala zomino foṛa zaladi buzail oise, zera i kalam hune, hunia buze ar amol ḳore. Ḳeu zindegit tish gun, ḳeu shaiṭ gun, ḳeu eḳ-sho gun beshi fol dey.” Bade Isae talim dibar lagi arok kichcha hunaila. Ḳoila, “Behesti bashshai ola ek girostor laḳan, zein nizor zomino bala danor zala bain dila. Bade rait oia harle zebla hoḳol manush gumai gesoin, ou shomoy tan eḳ dushmone aia bain deoa ou zominor maze fufra gasor bisi siṭaia gelogi. Heshe danor gas zebla boṛo oia soṛa saṛlo, ou shomoy ermaze fufra gaso deḳa gelo. Ita dekia baṛir saḳor oḳole tarar munibre ḳoila, ‘Afne zomino ḳali bala dan bain disla na ni? Oḳon fufra gas oilo kuai taki?’ “Tain ḳoila, ‘Kunu dushmone i ḳam ḳorse.’ Saḳor oḳole tanre zikailo, ‘Te amra gia ou fufra gas saf ḳoriltam ni?’ Munibe ḳoila, ‘Na, na, tumra fufra gas saf ḳorat gia, danor gaso tulilibae. Erlagi dan daoar ag forzonto ita taḳouk. Bade daoar bala ami manshore ḳoimu, foyla hoḳol fufra gas tulta, ar daru zalanir lagi aṭi bandita, bade dan daia amar ugaro tulba.’ ” Hozrot Isae arok kichcha hunaila. Ḳoila, “Behesti bashshai oilo egu ḍenga bisir laḳan. Eḳzon manshe egu ḍengar bisi tar zomino bain dilo. I bisi to hoḳol zator bisi taki huru. Oile bain deoar bade i gas hokkol zator hag-torḳari taki boṛo oy, ar fakinte aia tar ḍal-falat bada banae.” Erbade arok kichchar maze ḳoila, “Behesti bashshai oilo ḳamiror laḳan. Eḳzon beṭi manshe tin bosta moydar maze tuṛa ḳamir mishailo. Ḳamiror fafe hoḳol moyda fulia uṭlo.” Hozrot Isae kichcha hunai hunai hoḳol nomunar talim dila. Kichcha saṛa tain kunu talim dila na. Ita hokkolta oilo, zate nobir mazdi zeta batail oisil, ota oḳon fura oy, Talime bora kichcha hunai hunai ami matimu, duniar foyla taki zotota batuni asil, ota oḳon kulmu. Bade Isae manshore bidae dia goro hamaila. Ou shomoy tan shagrid oḳole aia ḳoila, “Huzur, fufra gasor kichchar manikan amrare buzai deukka.” Tain ḳoila, “Bala danor zala zein bain ḳoroin, ein oilam ami bin-Adom. Zomin oilo ou zogot, ar behesti bashshair manush oila bala bis. Iblisor ḳandan oilo ou fufra gas. Ze dushmone fufra gas bain disil, he oilo Iblis. Dan daoar shomoy oilo kiamot, ar daora oḳol oila Allar firista. Fufra gas aṭi bandia zela daru zalani oy, kiamotor shomoy ṭik ola-u oibo. Bin-Adome tan firista oḳol faṭaiba. Ze manshe nize guna ḳore ar aroḳzonre gunar fote ṭane, tara hoḳolre firista oḳole bin-Adomor bashshair maz taki ekḳano dola ḳoria, duzoḳor agunit falaiba. Hino manshe ḳanda-ḳaṭi korba ar zala-zontronae dat kiṛimiṛi diba. Hi shomoy Allaraia manshe tarar behesti baf Alla Pakor bashshait nurani surote shuruzor laḳan jilmil ḳorba. Hunar lak kan zar ase, he hunouk. “Huno, behesti bashshai oilo, maṭir tole lukail kunu donor laḳan. Kunu manshe ou don tukaia failo, faia hirbar gaṛia toi dilo. I don faia kushi oia he tar hoḳol samana besia, ou zominḳan ḳorid ḳorlo. “Hirbar, behesti bashshai oilo ola eḳ shodagoror laḳan, i shodagore ḳaṭi moni-mukta tukanit asil. He eḳṭa dami muktar ḳobor faia, tar hokkolta besia ou mukta ḳorid ḳorlo. “Ba behesti bashshai ola eḳ zalor laḳan, i zaldi aoro ṭan dile er bitre hokkol zator mas hamailo. Mase zal borigele zalua oḳole ikanre ṭania faro tullo. Bade tara bala bala mas basia sangat toilo ar badguin falai dilo. Te Hashoror moydano ou halot oibo. Firista oḳole aia Allaraia manshor dol taki, naforman oḳolre algaia duzoḳor agunit falaiba. Hino tara ḳanda-ḳaṭi korba ar zala-zontronae dat kiṛimiṛi diba.” Erbade Isae tan shagrid oḳolre zikaila, “Tumra ita hoḳolta buzcho ni?” Tara ḳoila, “Ji oy, buzchi.” Teu Isae tarare ḳoila, “Ze moulana oḳole behesti bashshair talim faisoin, tara ola ek girostor laḳan, ze giroste tan shonduk taki noya ar furana mal bar ḳoroin.” Hozrot Isae kichcha ḳoia ḳoia talim dia harle intone gelagi. Gia tan nizor gaur mosido hamaia oaz-nosiot ḳorla. Tan boyan hunia manshe taijjub oia ḳoila, “I beṭae ḳemne oto ilim ar keramoti failo? E kita hou ḳaṭ mestorir fua nae ni? Tar maʼr nam Moriom nae ni? He Iakub, Iusuf, Saimon ar Ehudar bai nae ni? Tar boinain to amrar gaut-u roira? Te he ita ilim ḳoi taki failo?” Ou laḳan Isare loia manshor dilo bitishona ailo. Ou shomoy Isae tarare ḳoila, “Nizor baṛi-gor ba gau-desh saṛa ar hoḳol zagat-u nobi oḳole shomman fain.” Gaur manshor iman nai dekia, tain hikano beshi keramoti deḳaila na. Ou shomoy Galil zilar Raza Herude Isar befare hunla, hunia tan uzir-nazirre ḳoila, “Ein to toubar gusol ḳoraora Ehia. Ein mora taki zinda oia uṭae ou keramoti deḳaira.” Ou Herude tar bai Filifor bou Herudiare hanga ḳorsil. Tair mon zuganir lagi he Ehia nobire zelo bondi koria toisil, ḳaron Ehiae Herudre ḳoita, “Taire hanga ḳora to tumar ṭik oise na.” Erlagi he Ehia nobire marilito sailo, oile manshor ḍore marto farlo na, manshe zanta ein eḳzon nobi. Bade Raza Herudor zonom dinor onusṭano Herudiar fuṛie nasia razare kushi korlo. Erdae razae ḳosom ḳaia ḳoilo, “Ou fuṛie zeta saibo, ota dimu.” Fuṛie tair maʼr loge foramish ḳori ḳoilo, “Toubar gusol ḳoraora Ehiar ḳolla ḳaṭia ekḳan talo ḳori, oḳon ania amare deukka.” Ikan hunia razar mon kub bezar oigelo. Oile tar loge boa meman-musafiror samne nize ḳosom ḳorse, erlagi he ou ḳolla ḳaṭibar hukum dilo. Tar zollad faṭaia zelor bitre Ehia nobir ḳolla ḳaṭailo. Bade ou ḳolla eḳ talo ḳori ania ou fuṛire deoa oilo, fuṛie nia tair maʼr gese dilo. Erbade Ehia nobir ummot oḳole tan lash nia dafon ḳorla, ar Hozrot Isar gese gia ou ḳobor zanaila. Ehiar moutor ḳobor hunia Isae ekḳan naot uṭia nirai eḳ zagat gelagi. Tain gesoingi hunia, nanan zagar manush hukna bae aṭi aṭi tan ḳore roana oila. Tain nao tone lamar bade manshor biṛ dekia tan bitre doya hamaigelo. Erdae tarar maze zoto bemari asla, tain erare bala ḳorla. Biali bala sahabi oḳol ḳandat aia ḳoila, “Huzur, ikan to kub nirai zaga, ar beil-o zargi. Te ota manshore bidae dilaukka, era ḳanda-ḳasar gauainto gia tarar ḳani-kuraki louk.” Isae ḳoila, “Na, tara zaoar dorḳar nai, tumra-u erare ḳani deo.” Sahabi oḳole ḳoila, “Amrar gese to ḳali fasḳan ruṭi ar duiṭa biran mas saṛa ar kunta-u nai.” Tain ḳoila, “Oḳnain amar gese ano.” Bade tain manshore ḳoila, gashor ufre boizita. Tain hou fasḳan ruṭi ar duiṭa biran mas ato loila, ar asmanedi saia shukria adae ḳorla. Bade ou ruṭi ṭukraia sahabi oḳlor ato dile, era baṭia dilaila. Otadi hoḳol manshe feṭ bori kaila. Ḳaia harle baṛti zeta roilo, oḳnain dola ḳorle baro ṭukri borigelo. Onuman fas azar beṭa manshe ou ḳana ḳaila, erar loge beṭin ar huruttain-o asla. Ḳanir bade-u tan sahabi oḳolre hukum dila, tain zaibar age tara nao-o uṭia aoror hofaro zaitagi. Ḳoia tain onor manshore bidae dilaila. Era gia harle tain dua ḳorar lagi faṛor ufre uṭila. Hainja bad forzonto hono eḳla roila. Ou shomoy sahabi oḳlor nao aoror mazḳano gesegi, ar ufta batashor ḍeue nao kub ilkani dorlo. Fotabala Hozrot Isa aoror fanir ufredi aṭia sahabi oḳlor ḳandat aira. Ou shomoy sahabi oḳole tanre dekia kub ḍoraila, tara but mono ḳoria but, but ḳoia sillaia uṭla. Ou tain ḳoila, “Ḍoraio na, shaosh ḳoro, i to ami.” Teu sahabi Fitore ḳoila, “Huzur, afne-u zudi oin, te amare izazot deukka, ami-o fanir ufredi aṭia afnar gese aitam.” Isae ḳoila, “Ao.” Teu Fitor nao taki lamia fanir ufredi aṭa dorla. Oile batashor zur dekia tain ḍoraigela, ar buṛizira dekia zure zure Isare ḍaḳ dila, “Huzur, huzur, amare basaukka.” Loge loge Isae at baṛaia tanre doria ḳoila, “Ouni tumar iman? Mono shondoy anlae ḳene?” Bade Isa ar Fitor nao-o uṭte-u batash tamigelo. Teu naor hoḳole tanre soizda ḳoria ḳoila, “Huzur, ashole-u afne Alla Pakor ḳas mayar zon, Ibnulla.” Aor faṛi dia tara Gineshorot elaḳat aia nao taki lamla. Lamte-u honor manshe tanre dekia sairobae ḳobor faṭaila. Ḳobor faia manshe hoḳol zator bemarire loia tan gese ailo, tara minot ḳori koilo, ou bemari oḳole zanu tan gotror saddoror kunaḳano soita faroin. Ar zoto manshe soila, tara hokkol-u bala oigela. Zeruzalem ṭaun taki koyzon moulana ar Forishi mozobor kisu manush Isar gese aila, aia tanre zikaila, “Afnar ummot oḳole agor zomanar moulana oḳlor batail rosumot manoin na ḳene? Tara to uzu na ḳoria-u ḳani kailain.” Isae zuaf dila, “Ou moulana oḳlor rosumot manar lagi afnara ḳene Allar hukumor borkelaf ḳorra? Allae hukum disoin, ‘Ma-bafre ijjot ḳorio, ar ze manshe tar ma-bafor bodnam gae, tare nisoy marilite oibo.’ Oile afnara ḳoin, kunu manshe zudi tar ma-bafre ḳoilae, ‘Amar zeta samana dia afnaintor kezmot ḳortam asil, ita ami Allar name lilla dilaisi,’ te tar ma-bafre ar kunta ḳora lage na. Ou laḳan afnarar baf-dadar mongoṛa niom dia Allar kalam batil ḳorilisoin. O bonḍo oḳol! Hozrot Ishaya nobie tumrar befare ṭik-u ḳoisoin, Ita manshe muk dia ḳali amare ijjot ḳore, oile tarar dil ama taki bout duroi. Tara hudar ḳamoḳa amar ebadot ḳore, tarar talim oḳol to manshor banail mongoṛa rosumot.” Bade Isae manshore ḍakia ḳoila, “Amar talim ḳanain kial ḳori hunoukka. Baire taki zeta zinish manshor mukor bitre hamae, itae to tare nafaḳ banae na. Borong manshor muk taki zeta baroy, otae-u tare nafaḳ banae.” Teu tan shagrid oḳole ḳoila, “Huzur, afne buzchoin ni, Forishi oḳole mono ḳorra, ou talim dia afne tarare beijjot ḳorsoin?” Teu sahabi Fitore ḳoila, “Afne zeta bataira, ota amrare buzai deukka.” Isae ḳoila, “Tumra oḳono bebuz roiso ni? Tumra buzo na ni, baire taki zeta zinish manshor muko hamae, ita to ḳali feṭo hamae, ar feṭ taki hirbar bar oizae. Oile manshor muk taki zeta baroy, ita dilo taki ae, ar otae-u manshore nafaḳ banae. Manshor dil taki-u to hoḳol nomunar ku-sinta baroy, zemon kun, zina, suri, misa shakki, ar ingsha-ninda baroy. Otae-u manshore nafaḳ banae, oile uzu saṛa ḳani kaile ḳeu nafaḳ oy na.” Bade Hozrot Isa nizor desh saṛia Shur ar Sidon desho gelagi. Hono gia harle Kenani zatir eḳ bidormi beṭi tan gese aia zure zure ḳoilo, “O huzur, Daudor aolad, amare rohom ḳoroin. Amar fuṛigure zine dorae tai boṛo ḳoshṭo ḳorer.” Oile Isae kunta matila na. Teu tan sahabi oḳole tanre minot ḳori koila, “Huzur, ou beṭigure bidae dilaukka, tai amrar ḳore oia sillar.” Isae ḳoila, “Amare to faṭail oise, ḳali Boni Israilor arail meṛa oḳlor lagi.” Oile ou beṭi tan ḳandat aia ḳodombusi koria ḳoilo, “Huzur, amare ou asanḳan ḳoroukka.” Tain ḳoila, “Nizor huruttar rizek kuttar samne deoa ṭik nae.” Beṭie ḳoilo, “Ji oy huzur, afnar ḳota-u ṭik, oile munibor ḳani taki zeta guṛa-gaṛa galabae foṛe, ita to kukre ḳae.” Teu tain beṭire ḳoila, “Ashole go mai, tumar iman boṛo mozbut. Aichcha, tumi zela sairae, ola-u ouk.” Oḳan ḳoar loge loge-u fuṛi bala oigelo. Bade Isa hon tone Galil aoror faredi aṭia gela, gia eḳ faṛor ufre uṭia boila. Boia harle manshe lula-lengṛa, atur, anda, buba, olaḳan aro bout zator bemarire dole dole tan gese loia ailo. Ania tan faor ḳandat toilo, tain era hoḳolre bala ḳorla. Manshe zebla deḳla, lula-lengṛa bala oizira, buba oḳole matira, atur manshe aṭira, andae souke deḳra, dekia tara hoḳol taijjub oigela, ar Boni Israilor Mabud Allar shukria adae ḳorla. Erbade Isae tan sahabi oḳolre ḳandat ania ḳoila, “Ita manshor lagi amar boṛo dorod lager, aiz tin din dori tara amar ḳore ḳore gurira, oile tarar loge ḳanir kunta nai. Te ou halote erare bidae ditam sai na, arnae ita foto-u beush oiziba.” Sahabi oḳole ḳoila, “Huzur, i nirai morubumir maze oto manshore ḳaoanir lagi ruṭi amra kuai faimu?” Tain ḳoila, “Tumrar gese ḳoyḳan ase?” Era ḳoila, “Shatḳan ruṭi ar biran ḳora ḳoyṭa huru mas ase.” Teu Isae manshore maṭit boar lagi koila. Ḳoia tain ou shatoḳan ruṭi ar biran mas ato loia, Allar shukria adae ḳoria oḳnain ṭukraila, bade sahabi oḳolredi baṭaila. Hokkol manshe feṭ bori kaila. Ḳaia zeta roisil, sahabi oḳole ota dola ḳorar bade shat ṭukri borigelo. Onuman sair azar beṭa manshe ou ḳana ḳaila, erar loge beṭin ar huruttain-o asla. Bade tain erare bidae dia nao-o uṭia Mogodon elaḳat gelagi. Bade Isare forikka ḳorar lagi Forishi ar Siddekia mozobor kisu manush aila, aia asmani kunu nishana deḳta saila. Isae ḳoila, “Biali bala asmanor lal rong dekia afnara ḳoin, ḳailkur din to bala oibo. Ar biani bala asmano ḳalni dekia ḳoin, aiz meg-tufan oibo. Te asmanor halot afnara ṭik-u buzoin, oile zomanar halot afnara buzoin na. Ou zomanar beiman ar naforman oḳole ḳali keramoti deḳta sain, oile Iunus nobir nishana saṛa dusra kunu nishana tarare deḳail oito nae.” Oḳan ḳoia tain erare toia hori gela. Bade aor faṛi dia zaoar ḳalo sahabi oḳole loge ḳori ruṭi nita faurilila. Isae tarare ḳoila, “Tumra shabdan o, Forishi ar Siddekia dolor ḳamir taki hushiar roio.” Ikan hunia sahabi oḳole ḳana-ḳani kori koila, “Amra ruṭi anchi na ḳori monoloy tain oḳan ḳoira.” Isae tarar bab buzilila, buzia ḳoila, “Haere ḳomzur imandar oḳol, tumrar gese ruṭi nai, ikan ḳoirae ḳene? Tumra oḳono kunta buzo na ni, kunta mono or na ni? Ami zebla fasḳan ruṭidi fas azar manshore ḳaoaislam, ḳanir bade tumra ḳoto ṭukri guṛa-gaṛa dola ḳorslae? Ar hou ze shatḳan ruṭidi sair azar manshe ḳaisla, ḳaia harle ḳoto ṭukri dola ḳorslae? Te oḳon tumra buzo na ḳene, ami ou ruṭir befare ḳoiar na? Huno, Forishi ar Siddekia oḳlor ḳamir taki hushiar o.” Teu sahabi oḳole buzla, tain ashole ḳaibar ḳamir taki hushiaror ḳota ḳoira na, borong Forishi ar Siddekia oḳlor talim taki hushiar oite ḳoisoin. Bade tan sahabi oḳolre loia Ḳoisoria-Filifi ṭaunor ḳanda-ḳasat gela. Foto sahabi oḳolre zikaila, “Ḳo sain, manshe kita mono ḳoroin, ami bin-Adom ḳe?” Era zuaf dila, “Kunu kunu manshe ḳoin, afne Ehia nobi. Kunu zone ḳoin Ilias nobi. Ḳeu ḳeu ḳoy Iaromia nobi, ba oinno kunu nobi.” Ou tain ḳoila, “Oile tumra kita mono ḳoro, ami ḳe?” Sahabi Saimon-Fitore zuaf dila, “Afne to Allar oada ḳora hou al-Mosi Ibnulla, zinda Allar ḳas mayar zon.” Isae ḳoila, “O Saimon bin Iunus, tumi boṛo nek-kofali, ḳaron, duniar kunu manshe tumare ita zanaise na, oile amar behesti baf Allae-u zanai disoin. Te ami tumare ḳoiram, tumi to fattor, erlagi tumar nam dislam Fitor, ar ou fattoror ufre-u amar torikar tamam zomat goṛia tulmu. Duzoki kunu shoktie-u er loge farto nae. Tumar ato ami behesti bashshair sabi dimu, ou duniat tumi zetare nazaiz ḳoibae, ita Allar dorbaro nazaiz oizibo, ar tumi zetare zaiz ḳoibae, Allar dorbaro-o ita zaiz oizibo.” Bade Isae tarare doṛaia ḳoila, “Ami-u zen hou al-Mosi, ita ḳeurore hunaio na.” Ou shomoy taki Isae tan sahabi oḳolre zanani dorla, tain Zeruzalemo zaite oibo. Honor murobbi oḳole, boṛo imam oḳole ar moulana oḳole tanre bout duḳ-mosiboto falaiba. Bade tanre zane mara oibo, oile moutor tin dinor din hirbar zinda oia uṭba. Ikan hunia sahabi Fitore tanre tuṛa horaia nia ḳoila, “Huzur, oshombob, afnar ufre kunumonte-u ita oite fare na.” Isae Fitoror bae firia ḳoila, “Dur Iblis, amar ges taki bag! Tui amar fotor zoinjal. Tui Allai munshare bad dia, manshor laḳan sinta ḳorre.” Bade tain erare ḳoila, “Ḳeu zudi amar torikat aito sae, te he tar nizor kushie sola bad deuk, tar afon duk-koshṭor solib boia loia amar ḳore auk. Ze manshe tar nizor zan basaito sae, he tar asol zindegi kuaibo. Oile ze zone amar lagi tar zan kurbani dey, he asol zindegi faibo. Kunu manshe asta dunia faia-o zudi tar asol zindegi kuailae, te tar kunu fayda oilo ni? Heshe asol zindegi faoar lagi he kun don bilaibo? Ami bin-Adome zebla amar firista oḳolre loge loia amar gaibi bafor kudroti mohimae zogoto hirbar aimu, ou shomoy forteḳ manshore tar amol mafik fol dimu. Huno, ami tumrare hasa ḳota ḳoiram, ono ilaḳan ḳoyzon azir asoin, ami bin-Adom bashsha halote na aoa forzonto, kunumonte-u erar mout oito nae.” Er soydin bade Hozrot Isae ḳali Fitor, Iakub ar Iakubor bai Hannanre loia usa eḳ faṛor ufre uṭla. Uṭia harle erar souḳor samne tan nizor surot bodli gelo. Tan muk oigelo shuruzor laḳan zolmol, ar finnor lebas oilo dola soḳsoḳa. Sahabi oḳole deḳla, Hozrot Musa ar Ilias nobie aia tan loge batchit ḳorra. Ou shomoy Fitore ḳoila, “Huzur, amra to ono asi, kub bala oise. Afne saile ami tinḳan ḍera-gor banailai, ekḳan afnar, ekḳan Musa nobir ar ekḳan Ilias nobir lagi.” Tain Isar loge matira, aḳta-u dola dobdoba megor eḳ ṭukrae aia erare gurililo, ar ou ṭukra taki gaibi aoaz ailo, “Ein-u amar ḳas mayar zon Ibnulla, en ufre ami kub kushi, tumra en nosiot huno.” Ikan hunia sahabi oḳol kub ḍoraila, ḍoraia maṭit foṛigela. Ou shomoy Isa aia tarare soia ḳoila, “Uṭo, ḍoraio na.” Teu tara souk tuli saila, saia ḳali Isa saṛa ar ḳeurore ino deḳla na. Faṛ taki lamia aoar bala Isae erare hukum dila, “Aiz zeta deḳlae, ami bin-Adom mora taki zinda oia uṭar ag forzonto ita ar ḳeurore hunaio na.” Sahabi oḳole Isare zikaila, “Huzur, moulana oḳole ḳene ḳoin, al-Mosi aibar age, foyla Ilias nobir aoa zorur?” Tain ḳoila, “Ikan hasa ḳota, foyla Hozrot Iliase aia hokkolta agor haloto firaia anba. Oile ami tumrare ḳoiram, Ilias nobi ṭik-u aisla. I duniar manshe tanre na sinae, tan loge zeta monoloy ota ḳorse. Ar ami bin-Adome-o ou laḳan duḳ-mosibot fuani lagbo.” Teu sahabi oḳole buzilila, tain oḳon Ehia nobir ḳota ḳoira. Bade tara faṛ taki lamia aila. Ono manshor biṛ asil, ou biṛor maze eḳ beṭa aia Isar samne aṭu galadi boia ḳoilo, “Huzur, amar fuagure basaukka, he mirki bemare kub ḳoshṭo ḳorer. Ou bemar uṭle he hamesha agunit ar fanit foṛizae. Ami tare loia afnar sahabi oḳlor gese aislam, oile tara bala ḳorta farsoin na.” Isae ḳoila, “Haere beiman ar naformanor zat, ami ar ḳotodin tumrar loge roimu, tumrar zala ḳotodin shoijjo ḳormu? Deki, tumar fuare ono ano.” Isae fuar logor hou zinnatre damki dila, damki kaia zine fuare saṛia gelogi, loge loge he bala oigelo. Bade sahabi oḳole niralae Isare zikaila, “Huzur, amra ḳene ou zinnat saṛaitam farlam na?” Tain ḳoila, “Tumrar imanor ḳomzurir lagi-u farso na. Ami hasau ḳoiram, tumrar dilo zudi egu ḍenga bisi foriman iman taḳe, ar tumra ou faṛre ḳo, ‘On taki ḍulia hono zaogi,’ te ou faṛ-o ḍulizibo. Tumrar oshaiddo kunta-u roito nae. Huno, dua ar ruza raḳa saṛa i-zat zin saṛail zae na.” Bade Galil zilat aia Isae tan sahabi oḳolre ḳoila, “Ami bin-Adomre manshor ato dorai deoa oibo. Tara amare zane mariliba, morar tin dinor din ami hirbar zinda oia uṭmu.” Ikan hunia sahabi oḳol kub bezar oigela. Erbade Isae sahabi oḳolre loia Kofornaum ṭauno gela, ou shomoy Baytul-Mukaddosor ḳazna tulra oḳole sahabi Fitorre ḳoila, “Afnarar ustade Baytul-Mukaddos Kaba Shorifor sanda dein na ni?” Fitore zuaf dila, “Ji oy, dein to.” Oḳan ḳoia Fitor goro hamaia kunta matar age-u Isae ḳoila, “Fitor, tumi kita mono ḳoro? Duniar bashsha oḳole ḳar ges taki kazna-sanda adae ḳoroin? Nizor manshor ges taki, na bara manshor ges taki?” Fitore ḳoila, “Bara manshor ges taki.” Teu Isae ḳoila, “Te to nizor manush ita taki basi gelo, ar amra-o Allar afon manush oae Allar goror ḳazna taki basi gesi. Oile amra erare bezar ḳortam nae, erlagi tumi aoro zao, gia mas marar lagi bori falao, borit foyla ze mas lagbo, ogur mukor bitre eḳṭa rufar ṭeḳa faibae. Ou ṭeḳa nia tumar ar amar sanda dilao.” Ou shomoy sahabi oḳole Hozrot Isar ḳandat aia zikaila, “Huzur, behesti bashshair maze hokkol taki boṛo ḳe?” Teu Isae eḳ huruttare ḍakia ania tarar maze uba ḳorai koila, “Ami tumrare hasau ḳoiram, tumra zudi mon firaia ou huruttar laḳan na o, te kunumonte-u behesti bashshait hamaitae fartae nae. Ze zone nizore ou huruttar laḳan huru mono ḳore, behesti bashshait he-u hoḳol taki dami. Ar ze zone amar lagi ou huruttar laḳan kunu sabalre ḳobul ḳore, he amare-u ḳobul ḳore. “Huno, amar torikar ou huru-muru eḳzonre zegie gunar fote ṭania ney, ogur lagi aro bala oilo one, ogur golat fattor bandia doriat falai deoa. Haere dunia, gunar fote neoar lagi tumar maze ḳoto uskani ase! Uskani to aibo-u aibo. Oile lannot hou zonor ufre, zegie guna ḳoranir lagi uskani dey. Tumar at ba fao zudi tumare gunar fote ṭane, te i at-fao ḳaṭia falai deo. Duio at-fao loia duzoḳo zola taki, atur oia-o behesto zaoa tumar lagi bala. Tumar souke zudi tumare gunar fote ṭane, te i souk tulia falai deo. Duio souk loia duzoḳo zola taki, ḳana oia-o aḳer faoa tumar lagi bala. “Huno, ami koiram, tumra ou huruttar laḳan kunu sabalre-o elami korio na. Tarar firista oḳole behestor maze hor-hamesha amar behesti baf Alla Pakor muk deḳra. Zano ni, zera be-fote gesegi, erare basanir lagi-u ami bin-Adom i duniat aisi. “Mono ḳoro, kunu manshor eḳ-shogu meṛa ase, er mazor egu meṛa arai gele he baki nirannobboiṭa bondo toia, hou arail ogu tukanit zae na ni? Ami tumrare hasau ḳoiram, he zudi ikṭa tukaia fae, te ze nirannobboigu arsil na, oguin toia zegu ari gesil, ogur lagi-u he kub kushi-bashi kore. Ṭik ou laḳan, tumrar behesti baf Allae-o sain na, ou huruttaintor mazor egu hurutta-o binash ouk. “Tumar kunu baie zudi tumar gese dush ḳorilae, te he zebla niralae taḳe, ou shomoy tumi eḳla gia tare buzaio. Tumar buz zudi manilae, te ou bair loge tumar baiali basaililae. Oile he zudi tumar buz na mane, te aro dui-eḳzon mazor manush loia zaio. Gia tarar samne tare buzaio. Teu Musar shoriotor ou hukum fura oibo, ‘dui-tinzon shakkir ḳotae zekunu befar forman oy.’ Erar buz-o zudi he na mane, te tar befare zomato nalish deo. Zomator ḳota zudi manilae te bala, ar na manle tare bidormi ba gushkur toshildar mono ḳoria, tare tar fote saṛi deo. Te ami tumrare hasa ḳota ḳoiram, ou duniait tumra zetare nazaiz ḳoibae, ita Allar dorbaro nazaiz oizibo, ar tumra zetare zaiz ḳoibae, Allar dorbaro-o ita zaiz oibo. “Huno, ami tumrare aro ḳoiram, tumrar mazor duizon zudi eḳmot oia kunu befare dua ḳore, te amar behesti baf Allae ou dua ḳobul ḳorba. Amar name ze zagat dui ba tin zon zoma oy, hou zagat ami-o azir taki.” Ou shomoy Fitore aia Isare ḳoila, “Huzur, amar baie zudi amar gese bar bar dush ḳore, te ami kotobar tare maf ḳortam? Shatbar ni?” Isae ḳoila, “Ḳali shatbar nae, ami koiram, tare shottoir gun shatbar maf ḳorio. “Huno, behesti bashshai ola eḳ bashshar laḳan, zein tan uzir-naziror gese hishab-nikash saila. Bashshae hishab loat boile erar mazor ola eḳzonre tan samne ana oilo, bashshae er gese laḳ laḳ ṭeḳa faona asla. Ou faona firot dibar ḳemota er nai. Erdae bashshae hukum dila, he shudda tar bou, fua-fuṛin gulam hishabe biki kaia, hoḳol shoy-shompotti besia tan faona adae ḳorar lagi. Ou hukum hunia he bashshar faot doria ḳandia ḳoilo, ‘Huzur, amare tuṛa shuzug deukka, ami afnar hoḳol faona dilaimu.’ Ou tain doya ḳoria tare saṛi dila, ar hoḳol dena maf ḳori dilaila. “Bade he bare gia tar logor aroḳ saḳrianre failo. Ou zonor gese he eḳ-sho ṭeḳa faona asil. Faia tare golat ṭifa mari doria ḳoilo, ‘Oi, tui amar faona ṭeḳa de.’ Hou zone tar fao-o foṛi minot ḳori koilo, ‘Amare tuṛa shuzug deo, ami tumar hoḳol faona dilaimu.’ Oile he er ḳota manlo na. Tar ṭeḳa na deoa forzonto tare zelo harai toilo. “Ita dekia tar logor uzir-nazir oḳol kub bezar oila. Tara gia ita bashshare zanaila. Bashshae hou saḳrianre anaia ḳoila, ‘Haere naforman, tumi amare minot ḳorae ami tumar hoḳol dena maf ḳori dilaislam. Te ami zela tumare doya ḳorslam, tumi-o oula tumar logor saḳrianre doya ḳora usit asil na ni?’ Bade bashshae gusa ḳoria tare zelo haraila, tan faona adae oar ag forzonto zelor zollad sifaie tare ḳoṛaḳoṛi shaza dila. “Ṭik ou laḳan, tumra-o zudi tumrar baire dil taki maf ḳori na deo, te amar behesti baf Allae-o tumrare oula shaza diba.” Ou talimor bade Hozrot Isa Galil zila taki Zordan gangor hofaro Ehudia zilar fub elaḳat aila. Ou shomoy bout manush tan ḳore ḳore aila, tain era hoḳlor bemar bala ḳorla. Ar Forishi mozobor ḳoyzon manush aia Isare forikka ḳorar lagi zikaila, “Ḳoukka sain, Musa nobir shoriot mafik kunu manshe zekunu ḳarone tar boure talaḳ deoa zaiz ni?” Isae ḳoila, “Afnara Allar kalamo faisoin na ni, Allae foyla Adom ar Haoare beṭa ar beṭi banai foyda ḳorsoin, tain ḳoisoin, ‘Erlagi-u beṭainte tarar ma-bafre saṛia bour loge taḳba, tara duiozon eḳ shoril oiba.’ Erdae tara dui roita nae, ek kaya oiba. Te Allae zerare zuṛa bandia disoin, manshe itare alog na ḳorouk.” Teu Forishi oḳole tanre ḳoila, “Te Musa nobie ḳene bataisoin, talaḳ nama lekia boure talaḳ deoa zaiz?” Tain ḳoila, “Tumrar dil fashan gotike-u Musae i onumoti disoin. Oile foyla taki ila niom asil na. Ami tumrare ḳoiram, ze manshe zinar dush saṛa oinno zekunu ḳarone tar boure talaḳ dia aroḳ beṭire hanga ḳore, he nize-u zina ḳore.” Teu sahabi oḳole tanre ḳoila, “Zamai-bour maze-o zudi ola goṭona goṭe, te to bia na ḳora-u bala.” Isae tarare ḳoila, “Hoḳol manush to ila roito fare na, ḳali Allae zerare i ḳemota disoin, tara-u fare. Kunu kunu manush na-mord halote-u duniat zonom loy, erlagi tara bia ḳore na. Ar kunu kunu zonre manshe-u na-mord banailae, erdae tara-o bia ḳore na. Hirbar ḳeu ḳeu ase bia-shadi na ḳoria, ḳali behesti bashshair kezmoto zindegi kaṭanir niot ḳorilae. Te ikan zera amol ḳorto fare, tara amol ḳorouk.” Bade manshe huru huru huruttainre loia Isar gese aila, tara saila tain zanu huruttaintor matagu atai dia dua ḳoroin. Oile sahabi oḳole erare boḳa-zoḳa ḳorla. Ita dekia tain ḳoila, “Huruttainre aṭḳaio na, tarare amar gese aite deo. Allar bashshai to erar laḳan manshor lagi-u.” Huruttaintor mata ataia dua ḳoria harle, tain hin taki gelagi. Bade eḳ zuan beṭae aia tanre zikailo, “Huzur, aḳerat faoar lagi ami kun hok kam ḳortam?” Isae ḳoila, “Hok kamor befare amare ḳene zikairae? Hok to ḳali eḳzon-u asoin, tumi aḳerat faite saile, tan hoḳol hukum-ahkam amol ḳoro.” Hou zuane ḳoilo, “Huzur, kun kun hukum mantam?” Tain ḳoila, “Kun ḳorio na, zina ḳorio na, suri korio na, misa shakki dio na, ma-bafre ijjot ḳorio ar ari-forire nizor laḳan maya ḳorio.” Beṭae ḳoilo, “Sab, ita to ami emne-u amol ḳoriar, oile ar kita ḳortam ḳoukka?” Teu Isae tare ḳoila, “Tumi zudi shullo-ana ḳaṭi oitae sao, te tumar baṛit zao, gia tumar hoḳol don-samana besia gorib-dukire bilai deo. Teu tumi behesto don-samana faibae. Erbade aia amar ummot oio.” Ikan hunia beṭa bezar oia gelogi, tar to bout don-samana asil. Teu Isae tan sahabi oḳolre ḳoila, “Ami hasa ḳota ḳoiram, doni manush Allar bashshait hamani boṛo moshkil. Huno, doni manush Allar bashshait hamanir saite, suir furedi uṭ hamani aro shuza.” Ikan hunia sahabi oḳol taijjub oia ḳoila, “Te kun manush nazat hasil ḳorbo, ḳe rehai faibo?” Tain erar bae saia ḳoila, “Manshor lagi oshombob oito fare, oile Allar nozoro ita to mamuli. Tain hoḳolta-u faroin.” Ou shomoy Fitore zikaila, “Huzur, amra to hokkolta falai toia afnar ḳore aisi. Te amra kita faimu?” Isae ḳoila, “Ami tumrare hasa ḳota ḳoiram, tumra zara amar ummot oiso, ami bin-Adom zinda oia zebla Allar bashshair godit boimu, ou shomoy tumra-o amar loge oia baroṭa toḳto boibae, boia Boni Israilor baro gusṭir bisar ḳorbae. Huno, ze manshe amar lagi nizor baṛi-gor, ma-baf, bai-boin, fua-fuṛi, ar zomi-mirash falaia aise, he ou duniat itar eḳ-sho gun beshi faibo, erloge aḳer-o faibo. Oile oḳon zera agor ḳataro ase, erar bout zon ḳore foṛizibo, ar ḳoror ḳataror bout zon age aibo.” Hozrot Isae aro ḳoila, “Behesti bashshai to ola ek girostor laḳan. I giroste tan ḳetor ḳamor lagi kub biane uṭia ḳamla tukanit gela. Gia ḳamla saia tarare eḳ-sho ṭeḳa ruz fuṛaia tan angur bagano ḳamo lagaila. Kisu beil oia harle tain hirbar bar oila, bar oia deḳla aro ḳoyzon ḳamla beḳar ubai roisoin. Dekia ḳoila, ‘Tumra-o gia amar bagano ḳamo lago, ami tumrare usit ṭeḳa dimu.’ Teu tara gia ḳamo lagla. Olaḳan beil duifori bala ar zuhoror bade girost hirbar bar oia gia aro ḳamlain ania ḳamo lagaila. Heshe biali bala tain bare gia, aro ḳamlain ubai roisoin dekia ḳoila, ‘Tumra haradin dori ino ubai roiso ḳene?’ Era ḳoila, ‘Sab, amra kunu ḳam faisi na.’ Giroste ḳoila, ‘Tumra-o gia amar bagano ḳamo lago.’ “Hainja bala giroste tan nizor saḳorre ḳoila, ‘Oba, baganor ou ḳamlaintore ania, sheshor zon taki foyla zon forzonto hoḳlor ruz dilao.’ Biali bala zera ḳamo lagsil, tara eḳ-sho ḳori failo. Ita dekia foyla zara ḳamo lagsil, tara mono ḳorlo tara aro beshi ṭeḳa faibo, oile giroste era hoḳolre eḳ homan ruz dila. Erdae foyla dol ou girostor ufre bezar oia ḳoila, ‘Amra hara din dori roide zoli-fuṛi ḳam ḳoria eḳ-sho ṭeḳa failam. Oile tara heshe aia tuṛa shomoy ḳam ḳorae-o, afne tarare amrar homan ṭeḳa dila.’ “Teu giroste tarar eḳzonre ḳoila, ‘Oba, ami oinnae kunta ḳorsi ni, tumi nize-u to eḳ-sho ṭeḳae ḳam ḳorte razi oiso na ni? Oḳon tumar faona loia tumi zao. Ami amar nizor ichchae hoḳolre eḳ homan disi. Amar nizor samana, nizor ichchamoto ḳoros ḳorar odikar nai ni? Ami tarare doya ḳorae tumar sokut zoler ni?’ ” Ou kichcha hunanir bade Isae ḳoila, “Buzcho ni, zera ḳoror ḳataro ase tara age aibo, ar agor ḳataror tara ḳore zaibo.” Bade tain zebla Zeruzalem muka roana oizita, ou shomoy tan barozon sahabire alga horaia nia ḳoila, “Huno, amra oḳon Zeruzalem zairam. Hono ami bin-Adomre doria boṛo imam ar moulana oḳlor ato shofi deoa oibo. Tara bisar ḳoria amare zane marar ray diba. Amare bin-deshi oḳlor ato shomzaiba. Tara amare ṭaṭṭa-moshkora ḳoria, bezuita sabuk maria, laḳṛir solibo loṭḳaia zane mariliba. Moutor tin dinor din ami hirbar zinda oia uṭmu.” Bade Zibudiar duio fuare loia tarar maʼe Isar gese aila. Aia kunta saoar ashae tan fao-o foṛla. Isae beṭire zikaila, “Afne kita sain?” Beṭie ḳoila, “Huzur, amar egu fuare afnar razottor ḍainor godi, ar arogure baur godikano boibar shuzug diba ni?” Isae tarare zuaf dila, “Tumra to buzrae na, tumra kita sairae. Ami ze duḳ-mosibotor fialadi kaimu, ita kunu tumra ḳaitae farbae ni?” Tara ḳoila, “Ji oy, farmu.” Tain ḳoila, “Aichcha, ami ze fialadi kaimu tumra-o ou fialadi kaibae, oile amar ḍaine ba baue boanir eḳtiar to amar ato nae. Amar behesti baf Allae zarar lagi i godi ṭik korsoin, ḳali tara-u faiba.” Zibudiar duio fuar arzi hunia, baki doshozon sahabi erar ufre kub biroḳto oila. Teu Isae era hoḳolre ḳandat ania ḳoila, “Tumra to zano, bidormi zatir raza oḳol tarar prozar ufre hukum zari kore, ar tarar zomidar oḳole gulamor ufre beṭagiri kore. Oile tumrar maze to ila oa ṭik nae. Tumrar ḳeu dami bonte saile, he tumrar kezmot ḳorouk. Ar ḳeu boṛo oite saile, he hoḳlor gulami korouk. Mono rakio, ami bin-Adome-o kezmot faoat aisi na, aisi to kezmot ḳorat. Ar bout manshor zan basanir lagi, nizor zan bilai deoat aisi.” Hozrot Isae tan sahabi oḳolre loia Ziriho ṭaun taki roana oigela, ou shomoy bout manush tan ḳore ḳore gela. Zaoar shomoy fotor ḳandat dui anda beṭa boat asil. Tain ou fotedi zaira hunia tara zure zure sillaia ḳoilo, “O huzur, O Daud nobir aolad, amrare rohom ḳoroin.” Sillani hunia onor manshe tarare domoḳ dila. Oile tara aro zure zure sillaia ḳoilo, “O huzur, O Daud nobir aolad, amrare rohom ḳoroin.” Erar sillani hunia tain ubai gela, ubaia ou duio andare ḳandat anaia zikaila, “Kita ba, kita sao? Ami tumrare kita ḳortam?” Tara ḳoilo, “Huzur, amrar soukguin bala ḳori deukka.” Ikan hunia tan dorod hamaigelo. Tain tarar souk atai dila, loge loge-u tarar souk bala oigelo. Bade tara-o tan ḳore ḳore roana oilo. Hozrot Isae tan sahabi oḳolre loia Zeruzalemor ḳasat, Zoytun faṛor loge Bayt-Faijja gaut aia azila. Ono aia tan duizon sahabire ḳoila, “Tumra ou samnor gaut zao. Gaut hamaite-u deḳbae egu gada banda ase, loge tar baichcha-o banda. Oguintor golar doṛi kulia ono loia aio. Ḳeu kunta zikaile ḳoio, huzuror dorḳar ase, erdae niram. Teu he loge loge razi oizibo.” Ita oilo zate agor zomanar hou nobir mazdi zeta batail oise, ota oḳon folizae. Tain ḳoisla, “Sion-ḳoina Zeruzalemre tumra ḳoio, tumar bashsha tumar gese aira. Tain kub norom mizazi. Tain gada soṛia, gadir baichcha soṛia aira.” Teu Isae zela hikai disla, duio sahabie gia ola ḳorla. Ou gada ar tar baichcha anar bade sahabi oḳole nizor gotror saddor kulia gadar fiṭit bisai dila, teu Isa er ufre soar oila. Aro bout manshe tarar gotror saddor kulia fotor maze bisai dila, ar boute shundor shundor gasor fatain siṛia ania foto bisaila. Isar age-ḳore aro bout manush zaoat asil, era zure zure misil dila, “Bashsha Daudor aolad, marhaba! Mabudor name zein aira, tan tarif ouk. Behesto-o marhaba!” Hozrot Isa Zeruzalem aia harle asta ṭauno uloistol lagigelo. Hoḳole zikaila, “Oba, ein ḳe?” Manshe ḳoila, “Ein to hou Isa nobi, en baṛi Galilor Nasarot gaut.” Bade Zeruzalem aia tain fobitro Baytul-Mukaddoso hamaila. Hono Kaba goror shimanat zera ḳorid-bikir ḳarbari asil, itare ḳedai dila. Tain ṭeḳar baṭṭar ḳarbari oḳlor kesh bakso, ar ḍufi-faro besra oḳlor ashon ulṭaia falai dila. Tain ḳoila, “Allar kalamo batail oise, amar gor oibo ebadotor gor, oile tumra ikanre ḍaḳaitor aḍḍaḳana banailiso.” Erbade anda, lula-lengṛa manush oḳol Isar gese Baytul-Mukaddoso aila, tain era hoḳolre bala ḳorla. Hozrot Isae ze kudroti muzeza ḳam ḳorsla, boṛo imam ar moulana oḳole ita deḳla. Tara hunla, Baytul-Mukaddosor bitre huruttainte ḳoira, “Marhaba, Daudor aolad, marhaba.” Ikan hunia tara zoli-fuṛi uṭla. Tara Isare ḳoila, “Ou huruttainte kita sillaira, ita tumi hunrae na ni?” Tain ḳoila, “Oy, huniar to. Allar kalamo foṛsoin na ni, ‘Nabalik huruttaintor muk taki tumi tumar tarif adae ḳorso’?” Bade Hozrot Isa tarar ges taki gelagi, gia ṭaunor bare Bayt-Ania gaut rait roila. Bador din biane Bayt-Ania taki Zeruzalem ṭauno aoar shomoy tan feṭo buk laglo. Ou tain fotor ḳandat egu ḍumur gas dekia, ogur fol ḳaoar kiale gasor daro gela. Gia deḳla, gasor maze ḳali fata, kunu fol nai. Tain ou gasre ḳoila, “Tumar maze zanu ar kunudin fol na dore.” Oḳan ḳoar loge loge-u gasṭa hukaia morigelo. Sahabi oḳole ita dekia taijjub oia ḳoila, “Gasṭa oto zoldi hukai gelo kila?” Isae zuaf dila, “Ami tumrare hasau ḳoiram, tumra zudi dilor maze shondoy na ḳoria, furafur imane mozbut taḳo, te ami ou ḍumur gasre zeta ḳorsi, tumra-o ola farbae. Ḳali ikan nae, tumra zudi ou faṛore ḳo, ‘Uṛia gia doriat foṛo,’ te ola-u oibo. Tumra zudi kalis niote ekin ḳoria dua ḳoro, te tumra zeta saibae, ota-u faibae.” Bade Hozrot Isa hirbar Baytul-Mukaddoso aia oaz-nosiot ḳorat asla. Ou shomoy boṛo imam ar murobbi oḳol aia tanre zikaila, “Aichcha, ḳo sain, tumi kun eḳtiare ita ḳorrae? Ḳe tumare i ḳemota dise?” Isae zuaf dila, “Ami-o afnarare ekḳan soal ḳoriar, afnara er zuaf dilaile ami-o ḳoimu, kun eḳtiare ami ita ḳorram. Afnara ḳoukka sain, Hozrot Ehiae torikar gusol deoar eḳtiar ḳar ges taki faisla? Manshor ges taki, na Allar ges taki?” Ikan hunia tara ḳane ḳane matila, “Amra zudi koi, Allar ges taki, te he ḳoibo, taile tumra tan ufre iman anlae na ḳene? Ar zudi koi, manshor ges taki, te manshe amrare marba, ḳaron manshe to Ehiare nobi koia manoin.” Erlagi-u tara zuaf dila, “Amra ikan zani na.” Isae ḳoila, “Te ami-o ḳoitam nae, kun ḳemotae ami ita ḳorram.” Erbade Isae ḳoila, “Aichcha, afnara kita mono ḳoroin? Doroukka, eḳ beṭar dui fua asil. Beṭae tar boṛo fuare ḳoilo, ‘Tumi aiz anguror bagano ḳamo zao.’ Fuae foyla ḳoilo, ‘Ami fartam nae.’ Oile bade tar mon bodlaia ḳamo gelo. Bade beṭae tar huru fuar gese gelo, gia ou ḳamor ḳota ḳoilo. He zuaf dilo, ‘Aichcha ami zaimune,’ oile bade gelo na. Te ḳoukka sain, ou duio fuar maze ḳe bafor hukum manlo?” Tara ḳoila, “Boṛo fuae.” Teu Isae ḳoila, “Ami afnaintore hasa ḳota ḳoiram, gushkur toshildar ar silan beṭin afnaintor age oia Allar bashshait hamaizira. Ḳaron Ehia nobie hok fot bataia deoat aisla, ta-o afnara tan ḳotae iman anchoin na. Oile gushkur toshildar ar silan beṭinte iman anla. Ota deḳar bade-o afnara iman anchoin na, touba-o ḳorsoin na.” Bade Hozrot Isae ḳoila, “Afnara oḳon arok kichcha hunoukka. Eḳzon giroste anguror bagan ḳoria sairobae beṛa dilo. Bade sokidaror lagi usa ḳori ekḳan ṭong-gor banailo ar anguror rosh bar ḳorar lagi gat kudilo. Heshe ḳet bagi dia girost bidesh gelogi. Angur fakia harle giroste tar baṭ nibar lagi, bagidar oḳlor gese tar saḳor oḳol faṭailo. Oile bagidare girostor eḳ saḳorre doria kub mair-doir ḳorlo, dusra saḳorre fattordi maria zoḳom ḳorlo ar aroḳ saḳorre zane marililo. Bade tain aro besh ḳori eḳ dol saḳor faṭaila, oile bagidar oḳole tarar loge-o oula bebohar ḳorlo. Hesh-mesh giroste tan nizor fuare tarar gese faṭaila, mono ḳorla, tara tan fuare dam dibo. Oile bagidar oḳole fuare dekia, eḳe-oinne foramish ḳori koilo, ou fua-u to bade i shompottir malik oibo. Te ao, ogure marilai, teu amra-u itar malik bonizimu. Ḳoia-u tara fuare doria angur baganor bare nia zane marililo. Oḳon ḳoukka sain, baganor malik zebla aiba, aia ou bagidar oḳolre kita ḳorba?” Tara ḳoila, “Tain aia to ou naforman oḳolre kun ḳorba ar shomoy moto zera fosholor baṭ dibo, tarar gese ḳet bagi diba.” Hozrot Isae ḳoila, “Afnara Allar kalamo foṛsoin na ni, Raz mestoir oḳole ze fattorre beḳama ḳoia falai disil, oḳṭa dia-u goror ian kuṭi oilo. Mabude nize-u ita oaila, ita dekia to amrar taijjubi lager. Erlagi koiram, Allar bashshai afnarar ges taki kaṛia neoa oibo. Ar zerar zindegit ou bashshair fol deḳa zaibo, tarare-u ou bashshai deoa oibo. Huno, ou fattoror ufre ze zon foṛbo, he ṭukra ṭukra oizibo. Ar ou fattoro zar ufre foṛbo, he-o surmar oizibo.” Isar ou talim hunia boṛo imam ar Forishi oḳole buzilila, tain ita tarar bifokke-u ḳoira. Erdae tara Isare dorilito sailo. Oile manshore ḍoraia tanre kunta ḳorlo na. Manshe to Hozrot Isare nobi hishabe manta. Hozrot Isae hirbar tarare aro kichcha hunaila. Tain ḳoila, “Behesti bashshai ola eḳ bashshar laḳan, ze bashshae tan fuar biar ḳanir bebosta ḳorla. Ar daoti meman oḳolre anar lagi tan ḳoyzon saḳorre faṭaila, oile tara ḳeu ailo na. Bade tan aro saḳorre oḳan hikai dia faṭaila, ḳoila, ‘Tumra gia meman oḳolre ḳoio, ami amar taza bisal ar ḍeḳain zobo ḳoria ḳani zuit ḳorsi. Oḳon ḳani tiar oigese, afnara aia ḳailaukka.’ “Daoti oḳole erar ḳota-o na hunia, ḳeu tar nizor ḳamaro ar ḳeu tar dukano gelogi. Ar baki manshe ou saḳor oḳolre doria beijjot ḳoria kun ḳorillo. Bashshae ita hunia gusae aguin oigela. Tain nizor sifai dol faṭaia hou kuni oḳolre binash ḳorla, tarar asta ṭaun aguindi zalailila. Bade tan saḳor oḳolre ḳoila, ‘Ḳani to tiar oigese, oile zetare daot dislam, ita to i daotor zuka nae. Te huno, tumra oḳon rastar muṛae muṛae zao, gia zoto manshore faibae, tara hokkolre biar ashoro loia ao.’ Bashshar hukum faia tara bar oia gia bad-bala zoto zonre failo, hoḳolre anlo. Erlagi memane asta bia baṛi bori gelo. “Erbade bashshae memanor loge deḳa ḳorat aila, aia mozlisor bitre hamaia deḳoin, eḳ beṭae shadaron ḳafoṛ findia ḳanit aichche. Tain ere zikaila, ‘Oba, bia baṛir zuka ḳafoṛ na findia ino hamaile kila?’ Oile he kunu zuaf dito farlo na. Teu bashshae tan gulam oḳolre hukum dila, ‘Ogur at-fao bandia bare nia andair gato falai deo.’ Hono manshe ḳanda-ḳaṭi korba ar zala-zontronae dat kiṛimiṛi kaiba.” Kichchar bade Isae ḳoila, “Erlagi-u ami koiram, daot faisoin boute, oile fosond oisoin ḳom.” Oḳan hunia Forishi dolor manush Isar ges taki horia gelagi, gia foramish ḳorla tanre kila ḳotar fando falail zae. Teu tara nizor ḳoyzon shagrid ar Raza Herudor dolor kisu manshore Isar gese faṭaila. Otae aia ḳoila, “Huzur, amra to zani, afne eḳzon hok manush. Hok-halal fote manshore Allar rasta batai dira. Ḳe kita mono ḳore ba na ḳore, itae afnar kunta-u zae ae na, afne to muk saia kunta ḳoroin na. Te amrare batai deukka, Hozrot Musar shoriot mafik Ruman bashshare ḳazna deoa zaiz ni? Amra tanre ḳazna ditam ni, na ditam na?” Itar ku-foramish tain buzilila, buzia ḳoila, “O bonḍo oḳol, tumra ḳene amare forikka ḳorrae? Ze ṭeḳadi kazna dein, ota egu ṭeḳa amare deḳao.” Ou tara eḳṭa dinar ania Isar ato dila. Tain zikaila, “I foyshar ufre ḳar nam ar sobi?” Tara ḳoila, “Ruman bashshar.” Tain ḳoila, “Te huno, bashshar zeta ita bashshare deo, ar Allar zeta ita Allare deo.” Ikan hunia tara taijjub bonia tan ges taki gelagi. Ou din Siddekia mozobor ḳoyzon manush Isar ḳandat aila. Era ekin ḳoroin, moutor bade kunu manush ar zinda oia uṭoin na. Erdae tara Isare fando falaibar lagi zikaila, “Huzur, Hozrot Musae ḳoisoin, ḳeu zudi tar boure niaoladi halote toia mara zae, te tar baie ou ṛaṛi beṭire bia ḳoria tar bair bongsho basaite oibo. Te amrar ono eḳ foribaro shat bai asil. Boṛo zone bia ḳoria niaoladi halote mara gelo. Bade dusra baie tar ou ṛaṛi babire bia ḳori mara gelo. Ou nomunae tisra bai taki shuru ḳoria shato baie ou beṭire bia ḳorlo. Heshe ou beṭi-o mara gelo. Te ḳoukka sain, moron bade zebla tara zinda oia uṭba, ou shomoy i beṭi, era kun bair bou oibo? Tara hoḳole-u to i beṭire bia ḳorsil.” Tain zuaf dila, “Afnara to Allar kalam zanoin na, Allar kudroti befar-o buzoin na. Erdae afnara i bul ḳorra. Hunoukka, murda oḳol zebla zinda oia uṭba, ou shomoy tara bia-shadi korta nae, ḳeu tarare bia dito-o nae. Era to firistar laḳan boniziba. Murda oḳol zinda oar befare Allae kita bataisoin, ita afnara kitabo foṛsoin na ni? Kitabo leḳa ase, ‘Ami Ibrahimor Alla, Isʼhakor Alla ar Iakubor Alla.’ Oḳan taki buza zae, ou nobi oḳlor ufat oile-o era to Allar sokut oḳono zinda asoin. Alla to murda oḳlor Mabud nae, tain zinda oḳlor Mabud.” I talim hunia tara taijjub oigela. Forishi oḳole zebla hunla, Siddekia mozobor manshe Isar mator kunu zuaf dita farsoin na, teu tara hoḳol ekḳano oila. Tarar dolor eḳzon moulana aia Isare forikka ḳorar lagi zikaila, “Huzur, Musar shoriotor maze hoḳol taki boṛo hukum kunṭa?” Dusra hukum-o ou laḳan, ‘Tumrar ari-forire nizor laḳan maya ḳorio.’ Ou duio hukumor ufre asta Tourat Shorif ar Asmani Kitab oḳol nirbor ḳore.” Forishi oḳol ekḳano dola roisoin, ou shomoy Isae tarare zikaila, “Al-Mosir befare afnara kita zanoin? Tain ḳar aolad?” Tara ḳoilo, “Daud nobir aolad.” Teu Isae tarare ḳoila, “Te Pak Ruhur bole Daud nobie kila al-Mosire tan nizor munib ḳoisoin? Daude to ḳoisoin, Mabude amar munibre ḳoila, ‘Ami zoto shomoy tumar dushmon oḳolre tumar faor tolat na falai, oto shomoy tumi amar ḍainor toḳto bo.’ Daude zebla nize-u al-Mosire tan munib ḳoisoin, te al-Mosi ḳemne Daudor aolad oiba?” Tara er kunu zuaf dita farla na, ar ou din taki keu tanre kunta zikanir-o shaosh failo na. Hozrot Isae tan logor manshore ar sahabi oḳolre ḳoila, “Musa nobir shoriot talim dibar eḳtiar to moulana ar Forishi oḳlor ato. Erlagi tara zeta ḳoin, ota manio, ar zeta amol ḳorar hukum dein, ota amol ḳorio. Oile tara nize zeta ḳoroin, tumra ita ḳorio na. Ḳaron, tara muk dia zela ḳoin, ila ḳam ḳoroin na. Tara am manshor ḳando boṛo boṛo gaiṭ tulia dein, oile shaijjor lagi tara eḳṭa angul-o laṛain na. Tara ḳali manshore deḳanir lagi hoḳolta ḳoroin. Allar kalamor ayat dia boṛo boṛo tabiz bandoin ar nizor forezgari deḳanir lagi lamba lamba faugṛi bandoin. Tara ḳanir mozliso bala bala zaga tukain ar mosido hamaia samnor ḳataro boita sain. Bazar-aṭo gia salam faite kub fosond ḳoroin, ar sain manshe tarare huzur huzur ḳorouk. “Oile tumrare ḳeu huzur huzur ḳorouk, ita asha ḳorio na. Tumrar asol huzur to ḳali eḳzon-u asoin, tumra ḳali bai bai roio. I duniat ḳeurore baba ḳoia ḍakio na, ḳaron tumrar batuni baf to eḳzon-u, tain behesto asoin. Ḳeu tumrare neta ḳoia ḍaḳouk, ita asha ḳorio na. Tumrar neta to eḳzon-u, tain oila al-Mosi. “Tumrar maze zein hoḳol taki boṛo, ein tumrar kezmot ḳorouk. Ze zone nizore boṛo mono ḳore, tare huru ḳora oibo. Ar ze nizore huru mono ḳore, tare boṛo ḳora oibo. “Haere moulana ar Forishir dol, afsus tumrar lagi, tumra bonḍo! Tumra manshor samne behesti bashshair duar bond ḳori toiso. Tumra nize-o ono hamairae na, manshore-o hamaite dirae na. Haere bonḍo moulana ar Forishir dol, manshore deḳanir lagi tumra lamba lamba dua ḳoro, hirbar ṛaṛi beṭintor zaga-mirasho doḳol ḳoro. Erlagi tumrar ḳoṭin shaza oibo. Haere bonḍo moulana ar Forishir dol! Eḳzon manshore tumrar dolo nibar lagi shat shomudro tero nodi faroia tumra douṛao. Oile he tumrar dolo hamaia harle, tare tumra taki aro boṛo duzoki banao. “Haere anda fot deḳaora! Tumra nize anda oia oinnore kila fot deḳao? Tumra to ḳo, Baytul-Mukaddosor name ḳosom ḳaile kunta oy na, oile Baytul-Mukaddosor shunar name ḳosom ḳaile mante oibo. Haere anda be-aḳolor dol, kunḳan boṛo? Baytul-Mukaddos, na shuna? Baytul-Mukaddose-u to ou shunare fak-fobitro ḳore. Hirbar tumra ḳo, kurbani kanar name ḳeu ḳosom ḳorle kunta oy na, oile kurbanir sizor name ḳosom ḳorle mante oibo. O anda oḳol, kunḳan boṛo? Kurbani kana, na kurbanir siz? Ou kurbani kanae-u ou sizre fak-fobitro ḳore na ni? Erlagi ze zone kurbani kanar name ḳosom ḳore, he kurbani kana ar kurbanir siz, i duiotar name-u ḳosom ḳore. Ola-u Baytul-Mukaddosor name ze zone ḳosom ḳore, he-o Baytul-Mukaddos ar er bitre zein taḳoin, tan name-u ḳosom ḳore. Ze zone behestor name ḳosom ḳore, he Allar arosh ar arsho zein asoin, tan name-u ḳosom ḳore. “Haere bonḍo moulana ar Forishir dol! Tumra guamuri, fodina fata, ar zirar dosh baṭor eḳ baṭ Allar oaste zoḳat dirae, oile Musa nobir shoriotor hukum mafik aro zoruri befar, mani hok insaf, doya ar Allar mohobbot tumra bad dilaiso. Te foyla hukum amol ḳorar loge loge badorta-o amol ḳora zorur. Tumra nize-u anda, otoso aroḳzonre fot deḳairae. Tumra egu mosha-o sakia tulo, oile uṭre gililao. “Haere bonḍo moulana ar Forishir dol! Tumra to bashon-bortonor bargala bala ḳori saf ḳoro, oile itar bitor gala zulum ar lub-lalose bora. Haere anda Forishir dol, tumra foyla otar bitor saf ḳoro, teu bargala emne-u saf oibo. “Haere bonḍo moulana ar Forishir dol! Tumra oilae sun-ḳam ḳora ḳoyboror laḳan, er bargala soḳsoḳa oile-o bitre to ḳali mora manshor aḍḍi-guḍḍi ar ḳasrae bora. Ṭik ou laḳan, manshe mone ḳoroin tumra kub forezgar, ashole tumrar dil to bonḍami ar naformanie bora. “Haere bonḍo moulana ar Forishir dol! Tumra nobi oḳlor rouzare shundor ḳori fakka ḳoro, ar oli-auliar mazarre soḳsoḳa ḳori hazao. Ar tumra ḳo, ‘Ish, amra zudi amrar baf-dadar zomanat duniat aitam, te nobi oḳolre zane marar ḳalo baf-dadar loge gelam na one.’ Ou mate tumra forman dirae, nobi oḳolre zetae zane marsla, otar bongshodor-u tumra. Te tumrar baf-dadainte zeta shuru ḳoria gesoin, tumra otar baki gala fura ḳorrae. “O hafor baichchain, duzoḳor azab taki tumra kila bastae? Erlagi ami tumrar gese nobi-rosul, ar alim-ulama faṭaiar. Erar mazor ḳoyzonre tumra zane marilibae, ḳoyzonre duk-koshṭor solibo loṭḳaia marbae. Ar ḳoyzonre tumrar mosido haraia sabuk maria, ek gau taki arok gaut ḳedaia nibae. Erdae-u nirdushi hou Habilor kun taki shuru ḳoria Barakiar fut Zakariar kun forzonto, duniat zoto kun oise, ita hoḳol kunor dayi oibae tumra. Ou Zakariare to Baytul-Mukaddosor bitoror kurbani kana ar Herem Shorif ou dui zagar mazḳano kun ḳora oisil. Ami tumrare hasa ḳota ḳoiram, ou tamam kunor dayi oibae i zomanar manush. “Zeruzalem! Haere Zeruzalem ṭaun! Tumi nobi oḳolre zane maro, tumar gese zarare faṭail oy, tumi tarare fattor maro. Murgie zela tair baichchare ḍaḳnar tole asroy dey, ami-o oula tumar manshore asroy ditam saisi, oile tara hunla na. O Zeruzalemor bashinda oḳol, tumrar sokur samne-u tumrar boshot ḳana ḳali baṛi oibo. Ami tumrare ḳoiram, zotodin tumra ikan na ḳoibae, ‘Mubarok tain-u, Allar nam loia zein aira,’ oto din tumra ar amare deḳtae nae.” Hozrot Isa Baytul-Mukaddos taki bar oia zairagi, ou shomoy tan sahabi oḳol tan gese aila, tanre Baytul-Mukaddosor shundor shundor dolan deḳanir lagi. Tain ḳoila, “Ami tumrare hok kota ḳoiram, tumra ou zeta boṛo boṛo dolan deḳrae, itar dui iṭ ekḳano roito nae, hoḳolta maṭit mishizibo.” Bade tain zebla Zoytun faṛor ufre boat asla, ou shomoy sahabi oḳole aia tanre niralae zikaila, “Huzur, amrare ḳoiba ni, ita kun shomoy oibo? Kun alamot dekia amra buzmu, afnar aoar shomoy ar kiamotor-o shomoy aichche?” Isae ḳoila, “Dekio, ḳeu zanu tumrare na ṭoge. Bout zone amar nam doria aibo, aia ḳoibo, ami-u al-Mosi, ḳoia boutre ṭogibo. Huno, zuddor aoaz ar laṛair ḳobor tumra faibae, oile itae ḍoraio na. Ita nisoy goṭbo, goṭle-o ita to shesh nae. Eḳ zatie aroḳ zatir loge, eḳ deshe aroḳ deshor loge laṛai korbo. Bout zagat boisal ar nidan deḳa dibo. Oile ita to ḳali mosibotor shuru. “Ou shomoy aile manshe tumrare zulum ḳorar lagi dorai dibo ar kun ḳoraibo. Amar lagi hoḳol zatie tumrare ginnaibo. Teu bout zon fislizibo, eḳe-oinnore ginnaibo ar dorai dibo. Bout bonḍo nobi aia manshore ṭogiba. Naformanir foriman baṛizibo, erlagi bout manshor maya-momota ḳomizibo. Oile hesh forzonto zera ṭikia roiba, era-u rehai faiba. Hoḳol zatir gese shakki hishabe behesti bashshair kush-ḳobri toblig kora oibo, erbade-u kiamot aibo. “Hozrot Danial nobir muk taki ze bezuita noforoti zinishor ḳota zanail oise, tumra ou pak zagat i zinish deḳbae. Ze zone tilaot ḳorer, he buzouk. Ou shomoy zera Ehudia zilat taḳba, tara faṛedi gia bagouk. Hidin ḳeu zudi goror salor ufre taḳe, he tar goror mal-samana nibar lagi, lamat lamia goror bitre na hamauk. Zera bondor maze ase, tarar gotror saddor nibar lagi baṛit na auk. Ou shomoy zeta beṭintor feṭo hurutta, ar zera huruttare bukur dud ḳaoaira, tarar boṛo mosibot oibo. Tumra dua ḳoro, shitor dino ba Zummabare zanu tumrar bagia zaoa na lage. Ou shomoy oto bezuita ḳoshṭo oibo, zeta duniar foyla taki aiz forzonto kunudin oise na, ar oito-o nae. Mabude zudi i shomoyre ḳomaia na dita, te ḳeu zinda roilo na one. Oile Allae tan fosond ḳora bonda oḳlor lagi i shomoy ḳomaia diba. “Hi shomoy ḳeu zudi tumrare ḳoy, ‘Huncho ni, al-Mosi bule ono aisoin’ ba ‘Hono aisoin’ te tumra ekin ḳorio na. Ḳaron al-Mosi nam loia bout bonḍo aiba, nobi hazia-o bout bonḍo aiba. Itae bout boṛo boṛo asanok keramoti ḳam deḳaiba. Tara saiba, shuzug faile Allar fosond ḳora bondare duka dia be-fote nitagi. Dekio, ami ita hokkolta tumrare age-u zanai dilam. “Huno, ḳeu zudi tumrare ḳoy, ‘al-Mosi bule morubumit asoin,’ te tumra zaio na. Zudi koy, ‘Tain goror bitre asoin,’ te ekin ḳorio na. Megor zilkir loge fube-foisme hoḳolbae zela for oizae, ami bin-Adom aile-o ola oibo. Huno, lash zeno taḳe, hokun emne-u hono dola oy. “Ou mosibotor shomoy shesh oar bade-u, ‘shuruz andair oizibo, sande ar for dito nae. Tera oḳol asman taki foṛizibo, asmanor kunu shoktiala siz-u ṭik-ṭak roito nae.’ Ou shomoy asmanor maze ami bin-Adomor nishana deḳa zaibo. Duniar hoḳol manshe ahazari korba. Tara deḳba, Allar kudroti shokti ar nuror mohimae, ‘megor kuṭit oia bin-Adom duniat aira.’ Ou shomoy zure zure shingar aoaz oibo, er loge loge-u duniar eḳ mata taki aroḳ matat tain firista oḳolre faṭaiba, era Allar fosond ḳora bonda oḳolre sairobae tone dola ḳorba. “Ou ḍumur gasor bae saia talim lo. Gasor ḍal-fala norom oia zebla noya kuṛi baroy, ou shomoy tumra buzilao gormor din aichche. Te ou laḳan tumra zebla deḳbae ita hoḳolta goṭer, dekia buzilio, bin-Adom-o daro aichchoin. Ḳali daro nae, tain aia duaro ṭukaira. Ami tumrare hasa ḳota ḳoiram, ita na goṭa forzonto i zomanar manush fuṛaita nae. Asman-zomin hoḳolta binash oizibo, oile amar kalam hamesha zari roibo. “Hou din ar hi shomoyor befare ḳali amar gaibi baf Alla saṛa ar ḳeu zanoin na. Asmani firista ba Ibnullae-o zanoin na. Nuh nobir amolo ze halot oisil, ami bin-Adom dusrabar aoar shomoy ṭik olaḳan-u oibo. Boinna shuru oar age Nuh nobi zazo uṭar ag forzonto manshe ḳaoa-daoa ḳorse, eḳe-oinnore bia-shadi korse. Nuh nobir boinnar fanie itare bashaia neoar ag forzonto tara kunta-u ṭer faila na. Ami bin-Adom aibar shomoy-o ṭik olaḳan oibo. Ou shomoy duizon manush eḳloge bondo taḳle, eḳzonre neoa oibo ar dusra zonre bad deoa oibo. Dui beṭie eḳloge bara-banat taḳle-o, erar eḳzonre neoa oibo, aroḳzon bad foṛizibo. Erlagi koiram, tumra hushiar roio, tumrar malik kun din aiba, ita to tumra zano na. Oile ikan mono rakio, sur kun shomoy aibo, ikan zudi giroste zanto, te to he hozag roilo one ar surre goro hamaite dilo na one. Erlagi tumra-o hamesha tiar roio, ze shomoyor ḳota tumra sinta-o ḳortae nae, hou shomoy bin-Adom aiba. “Ila hok-halali ar aḳoldar saḳor ḳe ase, zar ato tar munibe dayitto dila he oḳtor ḳalo oinno saḳor oḳolre ḳani baṭia dibo. Ḳofali to hou saḳor, zare tar munibe aia hok-halal faiba. Ami tumrare hasa ḳota ḳoiram, munibe ou saḳoror ato-u tan nizor hoḳol don-samanar bar diba. Oile doro, hou saḳore mone mone ḳoilo, amar munib aite to bout deri ase, ar ou faḳe he hokkol saḳor-baḳorre mair-doir ḳorlo, ar modkuror loge ḳana-dana ḳoria mod ḳailo. Bade ze din ar ze oḳtor ḳota he sinta-u ḳorto nae, hou din ar hou oḳto tar munib aia azir oiba. Tain aia tare ḳaṭia ṭukraia bonḍo oḳlor loge mishaiba. Hino manshe ḳanda-ḳaṭi korba, ar zala-zontronae dat kiṛimiṛi diba.” Erbade Isae ḳoila, “Behesti bashshai oilo ola doshgu fuṛir laḳan, zeta fuṛinte biar damandre aguaia anar lagi lem-lemṭon loia bar oilo. Erar maze fas zon asil aḳoldar ar fas zon asil be-aḳol. Be-aḳol fuṛinte ḳali lem loia bar oilo, lemor kunu tel nilo na. Oile aḳoldar fuṛinte lemor loge fifat ḳori tel-o nilo. Daman aite deri oae tara hoḳol-u ungaite ungaite gumai gelo. “Bade ada-raitkur bala sillani huna gelo, ‘Daman aichchoin, daman aichchoin, zoldi baro.’ Sillani hunia ou fuṛin uṭia lem-lemṭon ṭik korat lagla. Hou be-aḳol fuṛinte aḳoldar fuṛinre ḳoila, ‘Amrare tuṛa tel deo na, amrar lem limizargi.’ Tara ḳoila, ‘Amrar gese zeta tel ase, ita to amrar-u lagbo. Te tumra dukan taki tel anailao.’ Ou be-aḳol fuṛin tel anat gia harle-u daman ailla. Ou shomoy aḳoldar ou fuṛin zuit asla, tara damandre loia bia baṛit hamailo. Tara hamanir bade-u duar bond ḳora oilo. Bade ou be-aḳol fuṛinte aia duar bond dekia ḳoila, ‘Hunra ni, duarḳan kuloukka.’ Damande zuaf dila, ‘Ami hasau ḳoiram, ami to tumrare sini na.’ ” Ou kichchar bade Isae ḳoila, “Erdae tumra hushiar roio, hi din ar hi shomoyor ḳota to ḳeuror zana nai.” Tain aro ḳoila, “Behesti bashshai ola eḳzon manshor laḳan, ein bidesh zaoar bala tan saḳor oḳlor ato asta shompottir bar shomzai dila. Erar zoiggota mafik tain eḳzonre fas azar ṭeḳa, dusra zonre dui azar ar aroḳzonre eḳ azar ṭeḳa dila. Fas azar ṭeḳa ze faisil, he ou ṭeḳadi karbar ḳoria aro fas azar lab ḳorlo. Dui azar ṭeḳa ze faisil, he-o aro dui azar lab ḳorlo. Oile eḳ azar ṭeḳa ze faisil, he tar malikor i ṭeḳa ḳamo na lagaia gat kudia maṭir tole toilo. “Bout din bade hou malik desho aia tarar hishab-nikash saila. Teu fas azar ṭeḳa ze faisil, he aro fas azar loia aia malikre ḳoilo, ‘Sab, afne amare fas azar ṭeḳa disla, ou ṭeḳadi ami aro fas azar lab ḳorsi.’ Ikan hunia malike ḳoila, ‘Shabbash, tumi kub hok-halali manush. Tumi huru-muru befare-u hok-halal roiso, erlagi ami tumare aro bout boṛo dayitto dimu. Ao, amar kushir bagi o.’ Bade dui azar ṭeḳa ze faisil, he aia ḳoilo, ‘Sab, afne amare dui azar ṭeḳa disla. Ami to aro dui azar lab ḳorsi.’ Teu malike ḳoila, ‘Shabbash, tumi kub hok-halali manush. Tumi tuṛa befare-u hok-halal roiso, erlagi ami tumare aro bout boṛo dayitto dimu. Ao, amar kushir bagi o.’ Oile eḳ azar ṭeḳa zare disla, he aia ḳoilo, ‘Sab, ami zani afne kub ḳoṛa manush. Afne ḳet na ḳoria-o dan ḳaṭoin ar bain na dile-o ali huroin. Erdae ami ḍoraia afnar ṭeḳa maṭir tole lukaia toislam. Ou neukka afnar ṭeḳa.’ Malike ḳoila, ‘Haere ḳobis, tuin to kuṛia. Tui zudi ikan mono ḳorle, ami ḳet na ḳorle-o dan ḳaṭi ar bain na dile-o ali huri, te amar ṭeḳa tui befarir gese dile na ḳene? Te to ami aia mul ṭeḳar loge kisu lab failam one.’ Bade tain oinno saḳor oḳolre ḳoila, ‘Tumra ogur ges taki ou ṭeḳa nia, dosh azar zar gese ase tare deo. Huno, zar ase tare aro deoa oibo, tar aro baṛibo. Oile zar nai, tar zeta ase ota-o ḳaṛia neoa oibo. Ou bojjat saḳorre nia tumra andair gato falai deo. Hou gato manshe ḳanda-ḳaṭi korbo ar zala-zontronae dat kiṛimiṛi dibo.’ “Bin-Adome zebla firista oḳolre loia nizor mohimae hirbar aiba, aia nizor bashshair godit boiba. Ou shomoy duniar tamam zatir manshore tan samne ana oibo. Raḳale zela meṛa ar sagolre alada ḳore, tain-o oula hoḳol manshore algaia dui bag korba. Tan ḍain galabae meṛa ar bau galabae sagolre raḳba. “Erbade bashshae tan ḍain galar manshore ḳoiba, ‘Tumra zara amar batuni bafor rohom faiso, tumra ao. Ar duniar foyla taki tumrar lagi ze bashshai tiar ḳori raḳa oise, ou bashshair doḳol shomzia neo. Mono ase ni, amar zebla feṭo buk lagsil, tumra amare ḳani dislae, fiasor shomoy fani dislae, ar musafir halote amare asroy dislae. Ami zebla udla aslam, tumra ḳafoṛ dislae, bemaror shomoy kezmot ḳorslae, ar zel ḳanat amare deḳat geslae.’ “Ou shomoy hou allaoala manshe ḳoiba, ‘Malik, afnar buk lagae amra kun shomoy afnare ḳaoailam? Kun shomoy afnare fani dilam? Ar kun shomoy musafir halote afnare asroy dilam, ḳali ga dekia kun shomoy ḳafoṛ dilam? Ar kun shomoy-u ba bemari haloto afnar kezmot ḳorlam, ba zel ḳanat deḳat gelam?’ Ou shomoy bashshae tarare ḳoiba, ‘Ami hok kota ḳoiram, amar ou huru-muru eḳzon manshor lagi tumra zebla ita ḳorso, er mani amare-u ḳorso.’ “Bade bashshae tan bau galar manshore ḳoiba, ‘O lannotir dol, amar samon taki bago. Iblis-Shoytan ar tar samsa zinnat oḳlor lagi duzoḳor ze aguin tiar ḳora oise, hono zao. Amar feṭo bukor ḳalo tumra amare ḳaoaiso na, fiasor shomoy fani diso na. Amar musafir haloto roibar asroy diso na, ami zebla udla aslam, ḳafoṛ diso na, bemaror shomoy saiso na, amare deḳar lagi zelḳanat-o geso na.’ “Ou shomoy tara ḳoiba, ‘Huzur, amra kun shomoy ita ḳorlam? Afnare bukashi, fiasi, musafir, udla gotor, bemari ar zel ḳanat dekia-o shaijjo ḳorlam na?’ Bashshae tarare ḳoiba, ‘Ami hok kota ḳoiram, amar ou huru-muru eḳzon manshor lagi-u tumra zebla ita ḳorso na, er mani amare-u ḳorso na.’ ” Heshe Isae ḳoila, “Ou naforman oḳole aḳerato siroḳal shaza faiba, oile allaoala manshe aḳeri zindegi faiba.” Ou boyan shesh oia harle, Isae tan sahabi oḳolre ḳoila, “Tumrar to zana ase, ar dui din bade-u Azadi Id. Idor shomoy ami bin-Adomre solibo loṭḳaia marar lagi dorai deoa oibo.” Ou shomoy boṛo imam ar murobbi oḳol aia, tarar fordan imam Kayafar baṛit dola oila. Dola oia ou foramish ḳorla, Isare kila lukaia aṭok koria zane mara zae. Oile tara ḳoila, “Idor shomoy tare dortam nae. Dorle manshe gonḍogul lagai dito fare.” Isa zebla Bayt-Ania gaur fosa-kusṭo bemari Saimonor baṛit asla, ou shomoy eḳ beṭi manush tan gese aila. Beṭie sinor eḳ boyamo ḳori kub dami kaṭi ator anchila. Isa ḳaoat boia harle beṭie hoḳol ator tan matat ḍali dila. Ita dekia sahabi oḳol biroḳto oia ḳoila, “Ou ator fuṭain ḳene borbad ḳora oilo? I fuṭin besile to bout ṭeḳa faia gorib oḳolre bilai deoa gelo one.” Ikan buzia Isae ḳoila, “Tumra i beṭigure duk dirae ḳene? Tain to amar lagi ṭik kam-u ḳorsoin. Gorib oḳol to hamesha-u tumrar loge roiba. Oile amare to hamesha faitae nae. Ein aia amar gotro ator maḳaia, dafon-ḳafonor lagi amare zuit ḳorsoin. Ami tumrare hasa ḳota ḳoiram, duniar zekunu zagat Allar kush-ḳobri toblig korar shomoy, ou besaṛire mono ḳorar lagi, tan i nek kamor ḳotaḳan-o ḳoa zaibo.” Bade tan barozon sahabir mazor eḳzon, en nam Ihuda Iskariat, ein boṛo imam oḳlor gese gia ḳoila, “Isare afnarar ato doraia dile amare kita diba?” Teu boṛo imam oḳole tare rufar tish ṭeḳa dila. Erbad taki-u Ihudae Isare doraia deoar shuzug tukanit roilo. Ḳamir Saṛa Ruṭi Kaoar Idor foyla din, sahabi oḳole aia Isare zikaila, “Huzur, amra kun zagat gia afnar lagi Azadi Idor ḳana tiar ḳortam?” Tain zuaf dila, “Tumra ṭauno zao. Gia omuk manshore ḳoio, ‘Huzure ḳoisoin, amar shomoy gonaia aichche, te ami amar sahabi oḳolre loia tumar baṛit id ḳormu.’ ” Isar hukum mafik sahabi oḳole gia Azadi Idor ḳani tiar ḳorla. Bade hainja bala Isae tan barozon sahabire loia ḳanit boila. Boia ḳoila, “Ami tumrare hasa ḳota ḳoiram, tumrar mazor eḳzone-u to amare dushmonor ato dorai dibo.” Ikan hunia tara kub bezar oigela. Erlagi tara eḳ ek kori zikaila, “Huzur, i zon kita ami ni?” Tain ḳoila, “Oḳon ze zone amar loge oia talo at harar, he-u amare doraia dibo. Ami bin-Adomor moutor befare Asmani Kitabo zela leḳa ase, amar mout to oula-u oibo. Oile afsus hou zonor lagi, zegie amare doraia dibo. Duniat tar zonom na oa-u, tar lagi bout bala asil.” Ze Ihudae Isare dorai dito sar, he tanre zikailo, “Huzur, hi zon kita ami ni?” Isae tare ḳoila, “Tumi ṭik-u ḳoirae.” Tara ḳana ḳaira, ou shomoy Isae ruṭi ato loia Allar shukria adae ḳorla. Tain ruṭi siṛia ṭukra ṭukra ḳori sahabi oḳolre dila. Dia ḳoila, “Ou neo, ḳao, mono ḳoro ita amar ḳaya.” Bade tain shorbotor fiala loia Allar shukria zanaila, ar erare dia ḳoila, “Tumra hoḳole ou fiala taki anguror shorbot ḳao. Mono ḳorio, ita amar lou. Ou lour zoriae adom zatir boutor guna mafi oibo. Allar loge manshor milonor usilla oilo ou lou. Ami hasa ḳota ḳoiar, ami amar gaibi bafor bashshait dakil oia hari, tumrare loge loia zotodin noya halote anguror shorbot na ḳaisi, oto din i shorbot ar ḳaitam nae.” Heshe tara hoḳole mili ek gozol gaia, gor taki bar oia Zoytun faṛo gelagi. Bade Isae tan sahabi oḳolre ḳoila, “Huno, aiz rait tumra hoḳole-u to amare falaia bagibae. Allar kalamo ase, ‘Ami meṛar falor raḳalre marmu, teu falor meṛain sairobae sitriziba.’ Oile amare murda taki zinda ḳorar bade, tumrar age-u ami Galil zilat zaimugi.” Teu sahabi Fitore tanre ḳoila, “Huzur, hoḳol bagi gele-o ami bagitam nae.” Isae ḳoila, “Te huno, ami tumare hasa ḳota ḳoiram, aiz fotabala murgae bang dibar age-u tumi tinbar ḳoibae, tumi amare sino na.” Oile Fitore ḳoila, “Huzur, ou kita ḳoin, afnar loge zudi amar moron-o oy, ta-o ami kunumonte-u afnare oshikar ḳortam nae.” Hoḳol sahabie ou eḳlaḳan ḳoila. Bade Hozrot Isae tan sahabi oḳolre loia Getshimani namor eḳ bagano aila. Aia erare ḳoila, “Tumra ono bo, ami hogalat gia dua ḳormu.” Oḳan ḳoia tain Fitor ar Zibudiar dui fuare tan loge nila. Aste aste tan dilor maze duk ar hae-hutash baṛilo. Tain erare ḳoila, “Baiainre, duke amar ḳoilja faṭizar. Tumra ono boiro ar amar loge hozag roio.” Oḳan ḳoia tuṛa horia gia tain maṭit soizdat foṛia ḳoila, “O amar behesti abba, amar ufre ou ze zulum-mosibot aior, dusra kunu ufae taḳle ikanta horailao. Oile ita amar ichchae nae, tumar morzi mafik-u ouk.” Soizda taki uṭia tain sahabi oḳlor gese aia deḳla, era gumai gesoin. Ou tain Fitorre hozag kori ḳoila, “Tumra ekḳan gonṭa-o hozag roitae farlae na ni? Hozag ro dua ḳorar lagi, ar dua ḳoro forikka taki basar lagi. Tumrar dilor maze nisoy kial ase, oile ḳaya to ḳomzur.” Bade tain dusrabar gia dua ḳorla, “O amar behesti abba, ou zulum-mosibot ami shoijjo na ḳorle, zudi dusra kunu fot na taḳe, taile tumar morzi mafik-u ouk.” Bade tain hirbar aia deḳla, era gumai gesoin, gume tarar souk falai der. Dekia tarare toia tain tisra bar gia eḳoi dua ḳorla. Erbade tain sahabi oḳlor gese aia ḳoila, “Tumra deki oḳono arame gumairae. Huno, shomoy aichche, ami bin-Adomre gunagar oḳlor ato shomzai deoa oibo. Uṭo, amra roana dei. Amare zegie dushmonor ato dorai dibo, he aia azigese.” Tain erar loge mato roisoin, ou shomoy Ihuda hono ailo. He asil barozon sahabir mazor eḳzon. Tar loge oia aro boute laṭi-soṭa, toluar loia ailo. Boṛo imam ar murobbi oḳole erare faṭaisoin. Tanre zegie doraia dito, ou Ihudae tar logor erare age hikaia disil, “Ami gia zar galo hunga dimu, he-u hou zon. Tumra ere aṭok korio.” Erlagi Ihudae shuza-shuzi Isar gese gia ḳoilo, “Huzur, assalamu alaikum.” Ḳoia he tanre hunga dilo. Isae tare ḳoila, “Baire, zeta ḳorat aiso, ḳorilao.” Loge loge-u tara aia Isare dorililo. Ou shomoy Isar logor eḳzone nizor toluar bar ḳoria fordan imamor gulamre sed marla, sedor loge tar ek kan ḳaṭia foṛigelo. Teu Isae enre ḳoila, “Tumar toluar bego harailao. Toluardi zara ḳelae, toluaror tole-u tarar zan zae. Tumi ikan sinta ḳoro na ni, ami amar batuni bafor dorbaro aroz ḳorle, tain ḳoyeḳ azar firista faṭaita nae ni? Oile ami ila ḳorle kitabor ḳota kila folibo? Kitabo zotota batail oise, ita to goṭbo-u.” Bade tain ota manshore ḳoila, “Kita ba, ami kunu sur-ḍaḳait ni, tumra deki laṭi-soṭa, toluar loia amare dorat aiso. Ami to forteḳ din Baytul-Mukaddoso boia talim ditam. Ou shomoy to tumra amare dorlae na. Ashole ita hokkolta goṭer, zate Asmani Kitabo nobi oḳole zela bataisoin, ota fura oy.” Ou shomoy sahabi oḳole Isare toia bagi gela. Hozrot Isare doria hari ou manshe fordan imam Kayafar gese loia gelo. Hono moulana ar murobbi oḳol ekḳano dola oila. Sahabi Fitor Isar ges tone duroi hori hori roia tan ḳore ḳore fordan imamor baṛir uṭanor ḳandat gela. Gia hesh-mesh kita oy, oḳan deḳar lagi uṭanor bitre hamaia, honor faradar oḳlor loge boila. Hozrot Isare zane marilibar lagi boṛo imam oḳole ar mozlisor hoḳol manshe Isar bifokke kunu nalish tukaila, oile faila na. Mozliso Isar bifokke boute misa shakki dile-o, tarar shakkir mil oilo na. Bade duizon manshe aia tan birudde misa shakki dia ḳoilo, “Amra hunchi, he ḳoise, Allar Kaba Shorif, mani Baytul-Mukaddosre he bangilibo, ar tin dinor bitre hirbar banaibo.” Teu fordan imam ubaia hoḳlor samne Isare zikaila, “Oba, tumi kunu mator zuaf ditae na ni? Ita manshe tumar befare kita shakki dira, hunrae ni?” Oile tain kunu zuaf na dia nirai roila. Fordan imame tanre hirbar ḳoila, “Tumi zinda Allar ḳosom ḳaia ḳo sain, tumi kita Allar oada ḳora hou al-Mosi ni, tumi-u Allar ḳas mayar zon Ibnulla ni?” Tain zuaf dila, “Afnara-u to ḳoira. Oile ami koiram, afnara deḳbane, ami bin-Adom arshe-azimo Alla Rabbul Alaminor ḍainor toḳto boat asi. Aro deḳba, ami behesti megor kuṭit oia duniat aiar.” Ikan hunia-u fordan imame nizor finnor ḳafoṛ siṛia ḳoila, “He to shiriki korlo, te ar kunu shakkir zorur ase ni? Afnara nizor ḳane-u to hunla, he shiriki korlo. Te oḳon afnara kita ray diba?” Tara ḳoila, “Ere to marilaoa dorḳar.” Ou shomoy tara tan muko sef dilo, ar tanre soṛ-taboṛ marlo. Ḳeu ḳeu gushi maria ḳoilo, “Hoi al-Mosi, gaibi ko sain, tore ḳegie marlo?” Fitor uṭano boat asla, ou shomoy eḳ bandi beṭi tan ḳandat aia ḳoilo, “Galilor ou Isar loge to afne-o asla.” Oile Fitore hoḳlor samne oshikar ḳoria ḳoila, “Na go, tumi ita kita mato? Ita kunta-u ami zani na.” Oḳan ḳoia Fitor geiṭor daro gelagi. Tanre dekia aroḳ bandi beṭie ḳoilo, “Ou beṭa-o to Nasarot gaur Isar loge asil.” Oile Fitore hirbar ḳosom ḳori koila, “Na, na, ami tare sini-u na.” Ou shomoy tan ḳandat zera uba asil, tuṛa bade tara ḳoila, “Oba, tumi-o nichchoy erar logor, tumar mat-ḳotae-u to buza zar.” Teu Fitore ḳoila, “Allar gozob foṛouk, ami kosom ḳaia ḳoiar, ami muṭe-u tare sini na.” Oḳan ḳoite-u murgae bang dilailo. Bang hunte-u Fitoror mono oigelo, Isae age ḳoisla, “Murgae bang dibar age-u tumi tinbar ḳoibae, tumi amare sino na.” Erlagi tain bare gia au au ḳori kandon dorla. Biane uṭia boṛo imam ar murobbi oḳole Hozrot Isare zane marar foramish ḳorla. Tara tanre bandia Ruman hakim Filator gese loia gela. Ze zone Hozrot Isare dushmonor ato dorai disil, hou Ihudae zebla deḳlo bisaro tanre dushi shaibosto ḳora oise, ou tar bitre kub duk hamailo. He boṛo imam ar murobbi oḳlor gese hou rufar tish ṭeḳa loia aia ḳoilo, “Ami to eḳzon ni-oforadi manshore zane marilibar lagi dorai dia guna ḳorsi.” Ikan hunia tara ḳoila, “Teu amrar kita oilo? Ita to tumar befar.” Ou shomoy Ihudae hou tish ṭeḳa Baytul-Mukaddoso iṭa mari falaia gelogi, gia nize nize-u fash lagia morigelo. Boṛo imam oḳole i ṭeḳa ato loia ḳoila, “Iguin to Baytul-Mukaddosor tohbilo raḳa ṭik nae, ḳaron ita oilo lour dam.” Bade tara foramish ḳoria ou ṭeḳadi musafir manshor ḳobrostanor lagi ek kumaror ges taki zaga loila. Erlagi ou zagare oḳono ‘lour zaga’ ḳoa oy. Ita oae, Iaromia nobir mazdi zeta batail oisil, ota foligelo. Tain ḳoisla, “Tara ze tish ṭeḳa nilo, ikṭa oilo tan dam. Boni Israile tan ou dam shaibosto ḳorsil. Allae amare zela hukum disoin, ola-u tara kumaror zaga loar lagi ṭeḳaguin dilo.” Hozrot Isare Ruman fordan hakim Filator adaloto azir ḳora oilo. Hakime tanre zikaila, “Kita ba, tumi Ihudi oḳlor bashsha ni?” Tain ḳoila, “Ji oy, afne ṭik-u ḳoira.” Boṛo imam ar murobbi oḳole tan name bout nalish dila. Oile Isae kunu zuaf dila na. Ou shomoy Filate zikaila, “Tumi kunu zuaf ditae na ni? Deḳrae ni, tara tumar birudde ḳoto nalish dira.” Oile Isae itar ekḳan-o zuaf na deoae Filat kub taijjub oigela. Deshor fordan hakimor niom asil, Azadi Idor shomoy manshor fosond mafik eḳzon azotire ḳalas dita. Ou shomoy Isa-Barabba namor eḳ namḳora azoti zelo asil. Hoḳol manush ekḳano dola oar bade hakim Filate tarare zikaila, “Tumra kita ḳo? Ami kare saṛtam, Isa-Barabbare, na hou Isare, zare al-Mosi koa oy?” Filate zanta, boṛo imam oḳole ingsha ḳoria Hozrot Isare nia tan ato disoin. Filat zebla hakimor ashono boat, ou shomoy tan bibie ḳobor faṭaia zanaila, “Ou ni-oforad manshore tumi kunta ḳorio na, tan befare ami aiz eḳṭa kuab dekia boṛo duk lagse.” Oile boṛo imam ar murobbi oḳole manshore uskaia dila, tara zanu Barabbar mukti sain ar Isare zane marilibar lagi koin. Bade fordan hakim Filate onor manshore zikaila, “Ou duio zonor maze ami kare saṛtam?” Tara ḳoila, “Barabbare.” Teu Filate tarare zikaila, “Te tumra zare al-Mosi ko, hou Isare kita ḳortam?” Tara hoḳole sillani lagailo, “Tare solibo gatia maro.” Tain ḳoila, “Ḳene, he kita dush ḳorse?” Oile manshe aro zure zure misil lagailo, “Solibo deo, solibo deo.” Filate zebla deḳla, tain kunumonte-u Isare basaita farra na, borong gonḍogul aro baṛer. Ou tain fani dia hoḳlor samne tan at doia ḳoila, “I manshor lour dayi ami nae, tumra-u er zuaf dibae.” Teu hoḳol manshe ḳoila, “Ṭik ase, amra ar amrar aolad oḳol i lour dayi oimu.” Teu Filate tarare kushi korta ḳori Barabbare ḳalas dilaila. Ar Isare besh ḳori sabuk maria, solibo deoar hukum dila. (Solib oilo laḳṛidi banail manshore loṭḳaia marar eḳ zinish.) Bade Filator sifai oḳole Isare doria tarar kempor bitre loia gelo. Hono asta sifai dol dia tanre ber ḳori raḳlo. Tara tan finnor ḳafoṛ-sufoṛ kulia, lal-baingoni rongor bashshai lebas findailo. Ar gosa-ḳaṭa dia raz-mukuṭ banaia tan matat dilo. Tan ḍain ato dilo eḳṭa raz-laṭi. Tane ijjot deḳanir ban ḳoria tan samne aṭu gaṛia boia ḳoilo, “Ihudir bashsha, marhaba.” Ou shomoy tara tan ufre sef dilo ar ou laṭi dia bare bare tan matat marlo. Ou laḳan ṭaṭṭa-moshkora ar bettomizi korar bade tan finnor baingoni lebas kulia, tan nizor ḳafoṛ findailo. Tanre solibo nia zane marilita ḳori roana dilo. Sifai dole Isare loia zaira, ou shomoy tara Kurini elaḳar Saimon namor eḳzon manshore deḳlo. Sifai oḳole zur ḳoria enedi hou solib boaia neoailo. Tara Isare loia Golgata, mani ‘Kollar Saṛ’ namor zagat gelo. Hono nia hari mura namor oshud furail anguror shorbot tan muko dilo, oile tain ita ḳaila na. Bade tara Isare nia ou solibo gatilo. Sifai oḳole tan ḳafoṛ-sufoṛ baṭia neoar lagi loṭari maria baiggo forikka ḳorlo. Ar tara ono boia tanre fara dilo. Solibo tan matar ufre oforad-namar maze leḳlo, “En nam Isa, Ihudir bashsha.” Duizon ḍaḳaitre-o tan loge loṭḳail oilo, eḳzon ḍain galat, oinnozon bau galat. Fotedi zera zaoat asil tara mata laṛaia Isare siṛaia ḳoilo, “Oi mia, tumi bule Baytul-Mukaddos Kaba gor bangia tin dinor maze hirbar banailibae! Te oḳon nizor zan basao na. Tumi bule Allar ḳas mayar zon Ibnulla, te solib taki lamia ao na.” Boṛo imam, moulana ar murobbi oḳole-o tanre siṛaia ḳoila, “He bule manshor zan basaito, oḳon to nizor zan-u basaito farer na. Hirbar Boni Israilor bashsha-o bule he! Te oḳon farle solib taki lamia auk, teu amra-o ota dekia tar ufre iman anmu. He to Allar ufre borosha ḳore. Oḳon Alla zudi tar ufre kushi taḳoin, te tare basaukka. He to dabi korto, he Ibnulla, Alla Pakor ḳas mayar zon.” Tan ḍaine-baue ze dui ḍaḳaitre solibo loṭḳail oisil, tara-o tanre ota ḳoia siṛailo. Ou din duifor taki zuhoror bad forzonto tin gonṭa asta desh andair oigelo. Ar Isae kub zure zure ḳoila, “Eloi, eloi, lama sabaktani?” Mani, “O amar Alla, amar Moula, tumi ḳene amar log saṛi dilae?” Ou shomoy tan daro zara uba asil, tara ikan hunia ḳoila, “Huno, huno, he Hozrot Iliasre ḍaḳer.” Tara eḳzone douṛaia gia ekḳan tena ania ṭenga anguror shorbotor maze bizaia, eḳ laṭir matat bandia usa ḳori tanre ḳaite dilo. Baki hoḳole ḳoilo, “Aichcha, deki na, Ilias nobi tare basanit ain ni.” Heshe Isae hirbar zure aoaz ḳoria aḳeri dom falaia inteḳal ḳorla. Loge loge Baytul-Mukaddos mani Kaba goror Herem Shorifor fordaḳan, ufre taki tol forzonto siṛia dui ṭukra oigelo. Ar boisalor loge boṛo boṛo fattor oḳol faṭigelo. Bout ḳoyboror muk kuligelo, ar Allar mayar ze bonda oḳol mara gesla, era bout zon zinda oia uṭla. Tara ḳoybor taki bar oia aila. Isa murda taki zinda oia harle, tara fobitro ṭauno gia hamaila, ar bout zonre deḳa dila. Fordan sifair loge aro zeta sifai oḳole Isare fara deoat asla, tara ou boisal ar hoḳol halot dekia kub ḍoraia ḳoila, “Nichchoy, ein-u asla Allar ḳas mayar zon, Ibnulla.” Galil zila taki zeta beṭinte Isar kezmot ḳorar lagi tan loge oia aisla, tara-o duroi ubaia ita deḳla. Erar maze asla Mogdilini Moriom, Iusi ar Iakubor ma Moriom, ar Zibudiar bou. Ou din hainja bala Arimatia gaur Iusuf namor eḳzon doni manush hono aila. Tain Isar eḳ shagrid asla. Tain hakim Filator gese aia, Hozrot Isar lash nita saila. Teu Filate tanre lash neoar izazot dila. Iusufe Isar lash solib taki lamaia ḳafon findaila. Tain faṛ ḳaṭia nizor lagi ze ḳoybor kudisla, ou ḳoyboror maze Isare dafon ḳorla. Bade boṛo eḳ fattor ṭelia ania ḳoyboror muko dia gelagi. Oile Mogdilini Moriom ar aroḳ Moriom ou ḳoyboror daro boi roila. Bador din Zummabare boṛo imam ar Forishi oḳol aia hakim Filator gese ḳoila, “Huzur, amrar mono ase, ou ṭoge zinda taḳte ḳoisil, he bule morar tin din bade hirbar zinda oia uṭbo. Erlagi afne hukum deukka, ḳoyborṭa zanu tin din forzonto ḳoṛa fara dia raḳa oy. Arnae tar ummot oḳole tar lash suri kori nia manshore ḳoito fare, tain to zinda oigesoin. Taile age zeta ḳoia duka dise, oḳon aro beshi duka dibo.” Filate ḳoila, “Tumra faradar oḳolre neo, nia zela faro, ola fara deoar bebosta ḳoro.” Ou tara gia ḳoyboror muko ze fattor asil, ou fattoror ufre sil-sappoṛ mari toila ar ḳoṛaḳoṛi fara deoar bebosta ḳorla. Zummabar shesh oia haftar foyla din fozor oḳto, Mogdilini Moriom ar oinno Moriome Hozrot Isar ḳoybor deḳat gela. Ou shomoy aḳta-u boṛo eḳ boisal oilo ar asman taki Allar eḳ firista lamia aila. Aia tain ḳoyboror mukor fattorṭa horaia, er ufre boila. Tan surot asil kub nurani ar finnor ḳafoṛ asil dola soḳsoḳa. Tanre dekia faradar oḳole ḍoraia ḳafa dorla ar tara beush oia foṛi roila. Firistae ou beṭintore ḳoila, “Ḍoraio na go. Ami zani, solibo loṭḳaia zare zane mara oise, tumra hou Isare-u tukairae. Oile tain to ino nae. Tain zela ḳoisla, ola-u zinda oia uṭi gesoin. Ao, tanre ze zagat hutaia raḳa oisil, oḳan aia deḳo. Ar tumra zoldi zao, gia tan sahabi oḳolre ḳo, tain murda taki zinda oia tarar age oia Galilo zairagi. Hono-u tan loge tarar deḳa oibo. Huno, ami age-u tumrare ikan zanai dilam.” Beṭinte zudio ḍoraisla, tebou tara kushir suṭe tan sahabi oḳolre i kobor zananir lagi douṛaia roana oila. Ou shomoy aḳta-u Hozrot Isa aia erare salam dila. Loge loge tara tan samne aia faot doria ḳodombusi korla. Isae tarare ḳoila, “Ḍoraio na go. Tumra gia amar baiainre ḳo, tara Galilo zaitagi. Hono tarar loge amar deḳa oibo.” Isar logor batchit shesh ḳoria tara zebla zairagi, ou shomoy hou faradaror ḳoyzone ṭauno gia boṛo imam oḳolre ita hokkolta zanaila. Teu boṛo imam ar murobbi oḳol ekḳano dola oia foramish ḳorla, ou faradar sifai oḳolre bout ṭeḳa dibar lagi. Tara sifai oḳolre ḳoila, “Tumra ḳoio, ‘Amra zebla gumo aslam, ou shomoy shagrid oḳole aia tan lash suri kori nisoingi.’ Ikan zudi deshor fordan hakim sabe hunilain, te amra tanre buz dimu, tan at taki tumrare basaimu.” Teu faradar oḳole ou ṭeḳa nila, ar tarare zela hikail oisil, ola ḳoila. Oḳon forzonto i misa ḳota Ihudi shomazo roṭail ase. Isae tan sahabi oḳolre Galilor ze faṛo zaoar ḳota ḳoisla, hou egaro zon sahabi ou faṛo aila. Aia Isare dekia tara soizda ḳorla, ermaze ḳoyzonor bitre shondoy asil. Ou shomoy Isa tarar ḳandat aia ḳoila, “Behest ar duniar hokkol ḳemota amare deoa oise. Erlagi tumra gia tamam zatir manshore amar ummot banao. Behesti baba Alla Pak, tan ḳas mayar zon Ibnulla, ar Pak Ruhur name manshore torikar gusol ḳorao. Ami tumrare zeta hukum disi, ota amol ḳorar lagi tarare talim deo. Mono rakio, kiamotor ag forzonto shob shomoy ami tumrar loge loge asi.” Amin. Alla Pakor ḳas mayar zon Ibnulla Hozrot Isa al-Mosir Injil, mani kush-ḳobri boyanir shuru. Bout din age, Hozrot Ishaya nobir kitabo Alla Pake bataisoin, Huno, ami tumar age amar fegamborre beziar, ein tumar fot sohi korba. Morubumir maze zure zure eḳzone elan ḳorra, tumra malikor fot sohi koro, tan solar rasta oḳol shida ḳoro. Ou ayat mafik Hozrot Ehia nobie morubumit gia toblig korta ar toubar gusol ḳoraita. Tain elan ḳorta, “Gunar mafir lagi touba ḳoro, torikabondi lo.” Teu asta Ehudia zila ar Zeruzalem ṭaunor hoḳol manush bar oia Ehiar gese aia, zarzir gunar lagi touba ḳorla, ar Ehiae tarare Zordan gangor fanit toubar gusol ḳoraita. Ehia nobie uṭor rumor ḳafoṛ findita ar ḳomro samṛar belṭ bandita. Tain faṛia mou ar foring kaita. Tain manshore ḳoita, “Amar bade aro eḳzone toshrif anra, ein ama tone-o himmot-ala. Unda oia tan faor zutar fita kular laḳ-o ami nae. Ami tumrare fanidi toubar gusol ḳorailam, oile tain tumrare Pak Ruhu dia gusol ḳoraiba.” Ou shomoy Hozrot Isa Galil zilar Nasarot gau tone Ehiar gese aia, Zordan gango torikabondi loila. Ar fanit buṛ dia uṭte-u Isae loge loge deḳla asman dui bag oigese, Allar ruhu faror surot doria tan ufre lamia aira. Ou shomoy asman tone aoaz oilo, “O fut, tumi-u amar ḳas mayar zon, tumar ufre ami kub kushi.” Erbade-u Allai Pak Ruhur tagide tanre morubumit beza oilo. Ou morubumit Shoytane sallish din dori Isare lalos deḳaia guna ḳoraito sailo. Hino zongli zanuaror loge tain roila ar Allar firista oḳole tan kezmot ḳorta. Hozrot Ehia zelḳanat bondi oar bade Isa Galil zilat aia Allar batail ou kush-ḳobri toblig korla, “Shomoy fura oigese, Allar bashshai nozdik aichche. Afnara touba ḳoroukka ar ou kush-ḳobrir ufre iman anoukka.” Bade tain Galil aoror faredi aṭia zaira, ou shomoy deḳla, Saimon ar tan bai Andriase aoro zal baira. Era to maimol asla. Isae erare ḳoila, “Amar loge ao, ami tumrare manush dorar zalua banaimu.” Loge loge era zalor log saṛia Isar loge log dorla. On tone tuṛa age gia tain deḳla, Iakub ar Hannan duio baie nao-o boia zal zuit-zait ḳorra, erar bafor nam Zibudia. Isae erare dekia-u ḍaḳ dila, ḍaḳ hunia era-o nizor baf Zibudiare ḳamlaintor loge nao-o toia Isar log dorla. Bade era hoḳole milia Kofornaum ṭauno gela, ar Ihudir Zummabare tarar mosido hamaia Isae talim dila. Hozrot Musar reoaz mafik Ihudir Zummabar oilo Shukrobar shuruz ḍuba taki Shonibaror shuruz ḍuba forzonto. I din kunuzat ḳam ḳora haram. Tan talim hunia manush taijjub bonigela, tain to tarar alim-ulamar laḳan boyan ḳorra na, tain ḳemota-ala manshor laḳan talim dira. Ou shomoy zinor asor-ala eḳ beṭa-o ou mosidor bitre asil. He sillaia ḳoilo, “O Nasarotor Isa, amrar loge afnar kunu zae-zorur ase ni? Afne kita amrare binash ḳorat aisoin ni? Ami to afnare sini, afne-u Allar hou pak zon.” Ikan hunia Isae tare damki dila, “Chup, oḳon-u ere saṛia za.” Ou hi zine beṭare murani maria zure sik dia saṛia gelogi. Ita dekia hoḳole taijjub oia eḳe-oinne ḳoilo, “Deḳrae ni! Asanok karbar! Ita kun zator noya talim? Tan ḳemota ḳaṭaia zinnatre hukum dein, ar tara-o mane.” Erdae Isar nam asta Galil zilar sairobae kub zoldi uṛi gelo. Mosid taki bar oia tain-tain Iakub ar Hannanor loge oia Saimon ar Andriasor baṛit gela. Saimonor hoṛir kub taf oisil, tain bisnat foṛono asla. Isae toshrif ante-u tanre bemarir ḳota zanail oilo. Bemar hunia tain ou beṭir ato dori tulla, ar loge loge tafe saṛi dilo, beṭi uṭia gia erar memandari korat lagla. Ou zummar din sheshe hainja bala, shuruz ḍubar bade manshe hoḳol bemarire ar zinor asor-ala manshore Isar gese loia ailo. Asta ṭaunor manush aia ou baṛir uṭano dola oigelo. Teu Isae nanan nomunar bout bemarir shifa ḳorla ar boutor log tone zinnat saṛaila. Oile zinnate tan forisoy zanai diba ḳori, tain itare kunu mat matar shuzug dila na. Bade fotabala uṭia tain nirai zagat gia dua ḳorat boila. Teu Saimon ar tan logor hoḳole Isare tallash ḳorat bar oila. Baroia tanre faia ḳoila, “Huzur, hokkol manshe afnar tallash ḳorer.” Isae ḳoila, “Ao, amra ou ḳanda-ḳasar gauainto gia toblig kori. Erlagi-u to ami aisi.” Bade tain hara Galil zilar mosidainto gia toblig korla ar zinnat saṛaila. Eḳdin eḳ fosa-kusṭo bemarie Hozrot Isar ḳandat aia tan faot foṛia minot ḳoria ḳoilo, “Huzur, afnar morzi oile amare shifa ḳoria fak-saf ḳoroukka.” Beṭar bae tan kub doya hamailo. Tain nizor at baṛaia tare soia ḳoila, “Oy ami sairam, tumi fak-saf o.” Ḳoar loge loge tar bemar bala oia he fak-saf oigelo. Isae ou shomoy-u tare bidae dila ar doṛaia ḳoila, “Huno, ita ḳobor ḳeurore hunaio na. Ḳali imam sabor gese gia deḳao ar fak-saf oar lagi Hozrot Musar kitabor hukum mafik, kurbani adae ḳoro. Teu shomaze-o zanilibo, tumi bala oigeso.” Oile he bare gia-u ita hokkol bae roṭai dilo. Erdae Isa ar kula-mela kunu gaut zaita farla na. Tain bara nirai zagat gia roa laglo, ono-o sairobae tone manush tan gese aila. Ḳoydin bade Hozrot Isa hirbar Kofornaum ṭauno firia aile manshe hunilila tain goro asoin. Teu oto manush ino zoma oila, goro to duror ḳota, goror bare-o ar zaga roilo na. Tain era hoḳlor gese Allar kalam toblig korat asla. Ou shomoy sairzon manshe eḳzon ordong bemarire boia loia Isar gese ailo, erar loge aro manush asla. Oile biṛor lagi tare Isar gese loia zaita farla na. Erdae tain ze zagat boat asla, ṭik tar ufror sal fuṛ ḳoria folo shudda ou bemarire lamat lamai dilo. Tarar imanor bol dekia tain ou ordong bemarire ḳoila, “Baba, tumar tamam guna maf ḳori dilailam.” Oile hikano ḳoyzon moulana boat asla. Tain-tain mone mone ḳoila, “I manshe ilaḳan mater ḳene? He to shiriki korer. Eḳmatro Alla saṛa ar ḳe guna maf ḳorto fare?” Tanre loia moulana oḳole ze olaḳan sinta ḳorra, Isae tan gaibi bole ikan buzilila, buzia erare ḳoila, “Afnara ḳene mone mone ila sinta ḳorra? I ordong bemarire kunḳan ḳoa amar lagi shuza, tumar guna maf ḳora oilo, na, uṭo tumar folo loia aṭia zaogi? Te oḳon afnara forman deḳoukka, i duniat guna maf ḳorar ḳemota ami bin-Adomor ase,” oḳan ḳoia-u tain bemari beṭare ḳoila, “Ami tumare ḳoiar, uṭo, tumar folo loia tumar baṛit zao.” Teu loge loge ou bemari beṭa uṭia tar folo loia hoḳlor samne-u bar oia gelo. Ikan dekia hoḳole taijjub oia ḳoila, “Subohan Alla, zindegie kunudin ilaḳan ḳam deḳsi na.” Bade Hozrot Isa hirbar bar oia Galil aoror daro gela, teu hokkol manush tan ḳandat ailo, tain tarare talim deoat lagla. Talim dia fotedi zaite zaite deḳla, Alfir fua Lebi kazna tular ofiso boi roisoin. Dekia tanre ḳoila, “Ao amar ummot o.” Teu Lebi uṭia Isar loge loge gela. Bade tain Lebir baṛit gia ḳaoat boila. Bout ḳazna tulra ar gunagar manush-o Isa ar tan ummot oḳlor loge ḳanit asla. Ou shomoy bout manush tan ḳore ḳore gurat asil. Oile tain gunagar oḳlor loge boia ḳani ḳaira dekia Forishi mozobor moulana oḳole tan ummot oḳolre ḳoila, “Ein gushkur ḳazna tulra ar ḳobis oḳlor loge ḳaoa-daoa ḳoroin ḳene?” Ikan hunia Isae ou moulana oḳolre ḳoila, “Bala manshor ḳobiraz lage na, oile bemarir to lage. Ami forezgaror gese aisi na, gunagar oḳolre-u daot ditam aisi.” Eḳbar Hozrot Ehiar ummot ar Forishi oḳol ruza asla, ita dekia kisu manshe Isar gese aia ḳoila, “Ehia nobir ummot ar Forishi oḳole ruza raḳoin, oile afnar ummot oḳole ruza raḳoin na ḳene?” Isae tarare ḳoila, “Nosha loge taḳte kita boirati oḳole ruza raḳto fare ni? Na, ḳeu ruza roy na, zotodin nosha loge taḳoin, oto din tara ruza raḳto fare na. Oile ola oḳt aibo, zebla noshare tarar ges tone horail oizibo, ou shomoy tara ruza raḳba. Furan ḳafoṛor maze ḳeu noya ḳafoṛ zuṛa dey na. Zuṛa dile ou ḳafoṛ doia harle kus oia siṛia i fuṛ aro boṛo oizae. Furan samṛar tolit ḳeu taza anguror rosh bore na. Borle ou taza roshor fafe toli faṭia rosh ar toli duiota borbad oy. Taza rosh noya tolit toite oy.” Eḳ Zummabare Hozrot Isa ḳetor ailedi aṭia zaoat asla. Aṭi aṭi tan ummot oḳole danor soṛa siṛat lagla. Ita dekia Forishi dole Isare ḳoila, “Amrar Musa nobir shoriot mafik to Zummabare kunuzat ḳam ḳora zaiz nae, te tara i danor soṛa siṛira kitar lagi?” Isae zuaf dila, “Daud nobi ar tan logor hoḳole eḳbar feṭor buke zeta ḳorsla, ita kita tumitain kunu shomoy foṛso na ni? Tain to fordan imam Abiatoror amolo Allar goro hamaia, ze fobitro ruṭi imam sab bade ar ḳeu ḳaoa zaiz nae, ou ruṭi kaisla ar tan logor manshore-o disla.” Isae tarare aro ḳoila, “Zummabaror balair lagi to manshore banail oise na, oile manshor balair lagi-u Zummabar banail oise. Huno, Zummabaror tamam eḳtiar ami bin-Adomor ato ase.” Hozrot Isa hirbar mosido gia hamaila, hono ola eḳ beṭa asil, tar eḳ at bemare hukai gese. Tain Zummabare ou beṭare bala ḳoroin ki na deḳar lagi Forishi mozobor ḳoyzon manshe tan bae kub kial raḳla, tara saila tan kunu kut bar ḳoria fando falaita. Isae ou hukna at-ala beṭare ḳoila, “Oba, hoḳlor samne aia ubao sain.” Beṭa aia harle tain hoḳol manshore zikaila, “Sab oḳol, Zummabare kita ḳora zorur, nek kam, na bod ḳam? Zanor hefazot ḳora, na zane mara?” Ikan hunia tara muk bond ḳori boiroila. Tarar monor i fashan halot dekia, Isar dilo kub duk hamailo. Tain tarar bae saia gusa ḳori hou bemari beṭare ḳoila, “Tumar atḳan baṛao.” He tar at baṛaite-u agor laḳan fura bala oigelo. Ikan dekia-u Forishi oḳol loge loge bar oigela, gia Raza Herudor manshor loge milia Isare zane marilibar foramish ḳorla. Manshor biṛ dekia tain shagrid oḳolre ḳoila, “Tumra amar lagi ekḳan nao zuit ḳoro, arnae manshe ṭela-dakka ḳaia amar ufre aia foṛiziba.” Tain bout bemarire shifa ḳorae bemari manshe tane soita ḳori ṭelia dakkaia aia tan ufre foṛizita. Ar zin-but oḳole tane deḳle-u tan samne maṭit foṛia soizda ḳoria sillaia ḳoito, “Afne-u Allar ḳas mayar zon Ibnulla.” Oile Isae tarare kub ḳoṛaḳoṛi hukum dita, “Ḳobordar! Tumra amar forisoy zair ḳorio na.” Bade Hozrot Isa faṛor ufre gelagi, gia tan fosond ḳora kisu shagridre tan ḳandat ḍaḳaia nila. Tain Saimonor noya nam raḳla Fitor. Zibudiar dui fua Iakub ar Hannan, tain erar noya nam dila Bunergosh, mani megor ḍaḳor fua. Andrias, Filif, Bortolmoy, Moti, Tumas, Alfir fua Iakub, Toddey, muktizudda Saimon, ar Ihuda Iskariat, ou Ihudae bade beimani koria Isare dushmonor ato doraia disil. Hozrot Isa eḳ baṛit gela. Ono aia-o oto beshi manshe biṛ bandila, biṛor lagi Isae ar sahabi oḳole-o ḳana ḳaita farla na. Tan bai-biradore i kobor hunia tanre on taki bar ḳori neoat aila, era ḳoila, “Tar to mata ḳaraf oigese.” Zeruzalem taki koyzon moulana aisla, tara ḳoila, “Zinor bashsha Bel-Sobule tare asor ḳorse. Ou Bel-Sobulor bole he zin-but saṛae.” Ikan hunia Isae ou moulana oḳolre daro anaia kichcha dia ḳoila, “Shoytane kila Shoytanre ḳedae? Kunu deshor bitre doladoli lagigele i desh to ar ṭike na. Oula kunu foribaror maze-o zebla doladoli lagi zae, ou foribar-o ar ṭike na. Te Shoytane-o zudi nizor maze doladoli lagai dey, he-o to ṭikto nae, binash oizibo. Asol hasa ḳota oilo, kunu ḍaḳait ḍaḳatit aia foyla ou baṛir bolala mul girostre na bandile, he luṭ-toraz ḳorto farto nae. Oile tare bandia harle luṭ-toraz ḳorto farbo. Hunoukka, ami hasa ḳota ḳoiram, manshor tamam nomunar guna ar kufurir mafi ase, oile Pak Ruhur befare kufuri korle, kunumonte-u i gunar mafi milto nae. I guna Ruz Hashor forzonto zari roibo.” Isar ufre zine asor ḳorse, moulana oḳole ou ḳota ḳoae tain tarare oula zuaf dila. Ou shomoy Hozrot Isar ma ar baiain aia bare tone tan gese ḳobor faṭaila. Oile sairo galabae manshor biṛ lagail asil, manshe tanre ḳoila, “Huzur, afnar amma ar baiain aia bare afnar tallash ḳorra.” Tain ḳoila, “Amar ma ar baiain ḳe?” Ḳoia tain sairo galar manshor bae saia ḳoila, “Huno, era-u to amar ma ar baiain. Zera Allar morzi zugaia soloin, tara-u to amar ma, ar bai-boin.” Hozrot Isa hirbar Galil aoror faro aia manshore talim dita lagla. Tan sairo galabae bout manshe biṛ bandilla, erdae tain eḳ naot uṭia boila, ar manshe faro tone tan boyan hunla. Tain kichcha hunai hunai manshore talim deoat asla, ermaze tain ḳoila, “Doroukka, ek giroste zala bain ḳorat gelo. Gia bain ḳorar shomoy kisu zala fotor ḳandat foṛlo, ar fakinte aia ita ḳaililo. Kisu zala fattorala maṭit foṛlo, itar tole beshi maṭi asil na, erdae toledi bol na ḳoria-u zoldi kori fuṭigelo. Bade shuruz uṭia harle zoir ḳaililo, ar tolor zoṛe rosh na faoae hukaia morigelo. Kisu zala zonglar maze foṛlo, teu zongla boṛo oia itare zatia dorlo, erdae kunu soṛa saṛlo na. Oile kisu zala bala zomino foṛlo, itae ali bar oia boṛo oia soṛa saṛlo, kunu soṛae tish, kunu soṛae shaiṭ, kunu soṛae eḳ-sho gun beshi dan dorlo.” Heshe Isae ḳoila, “Hunar lak kan zar ase, he hunouk.” Bade biṛ ḳomia harle tan logor manshe ar barozon sahabie tanre zikaila, “Huzur, i kichchar mul mani kita?” Isae zuaf dila, “Allar bashshair gufon rohoisho zanar shuzug tumrare deoa oise, oile baira manshor gese kichchar mazdi koa oise. Er ḳaron oilo, Allar kalamor ou ayat folite oibo, Tara saia taḳle-o kunta-u deḳto nae, hunle-o kunta buzto nae. Kizanu tara zudi Allar bae firizain, ar mafi failain.” Bade Isae tarare ḳoila, “Tumra ou kichchar maniḳan-o buzlae na ni? Te baki kichchar mani kila buzbae? Huno, giroste ze zala bain ḳorer, i zala oilogi Allar kalam. Fotor ḳandat foṛa zala dia tarar befare buzail oise, zera i kalam hune, oile loge loge Iblis aia tarar dil taki i kalamre ḳaṛia neygi. Fattoror ufre foṛa zaladi buzail oise, zera i kalam hune ar kub kushi oia loge loge ḳobul ḳorilae, oile tarar dilo balamonte hamae na ḳoria, ita ḳali tuṛa ḳoydin ḳaim roy, bade i kalamor lagi kunu zulum-mosibot azir oile tara fislai zae. Zonglar maze foṛa zalar mani oilo, zera i kalam hune, oile zogotor sinta-babna, don-samanar maya ar duniabi lalose i kalamre zatia dorilae, erdae kalame kunu amol ḳore na. Ar bala zomino foṛa zalar mani oilo, zera i kalam hune, ḳobul ḳore ar bala fol dore, ḳeu tish, ḳeu shaiṭ, ḳeu eḳ-sho gun fol dore.” Isae aro ḳoila, “Kunu manshe lem zalaia ṭukrir tole ba sokir tole toy ni? Lem zalaia gasar ufre toin na ni? Te ila lukail kunta-u nai, zeta bar oito nae. Ar ila kunu batuni befar-o nai, zeta zair oito nae. Hunar lak kan zar ase, he hunouk.” Bade tain ḳoila, “Tumra kial ḳoria huno, tumra zela mafia deo, tumrar lagi oula mafa oibo. Dorilao, tumrar lagi aro besh ḳori mafa oibo. Zar ase tare aro deoa oibo, oile zar nai, tar zeta ase eota neoa oizibo.” Tain aroḳbar ḳoila, “Huno, Allar bashshai oilo ou laḳan. Dorilao, ek giroste tar zomino zala bain ḳorlo. Bade he rait oile gumailo ar dinor bala guraguri korlo. Oile zala fuṭia ḳemne gas oilo, he to kunta zane na. Zomine nize nize-u ita folailo, foyla sera, bade soṛa ar soṛar maze fusṭo dan dorlo. Dan fakia harle he buzilae daoar shomoy oigese, teu ḳasi lagaia dae.” Hozrot Isae ḳoila, “Allar bashshaire amra kitar loge tulona ḳortam? Kitadi buzaitam? Aichcha, mone ḳoro, Allar bashshai oilo egu ḍenga bisir laḳan. I bisi bain ḳorar bala deḳa zae, hoḳol zator bisi tone iṭa huru-muru. Oile bain ḳorar bade iṭa hokkol zator hag tone-o boṛo boṛo fata ar gas oy. Ar muṭa muṭa ḍal baroy, i ḍalor sayat fakinte aia asroy loin.” Ou laḳan bout nomunar kichcha ḳoita, ar ze zela buzto fare, tar buz mafik tare Allar kalam hunaita. Kichcha saṛa tarare kunu talim dita na. Oile ḳali sahabi oḳol zebla tan loge roita, ou shomoy tain hoḳol bed bangia buzaita. Ou din hainja bala Hozrot Isae tan sahabi oḳolre ḳoila, “Ao, amra aoror hofaro zaitam.” Teu sahabi oḳole manshor ges taki bidae loia, Isa ze nao-o boat asla ou nao-o uṭia roana dilaila, erloge aro naoain-o asil. Nao soler, ou shomoy aḳta-u kub boṛo eḳ tufan ailo, tufanor dae afalor fani hamaia nao buṛizibar dosha. Isa naor ḳor galat eḳ balisho hitan dia gumo asla. Sahabi oḳole tanre hozag koria ḳoila, “Huzur, afne kial ḳorra na ni, amra to morizaiar.” Tain uṭia tufanre domoḳ dila ar aorre ḳoila, “Dom lo, tir o.” Ḳoar loge loge tufan bond oigelo, ar hokkolta tir oilo. Bade tain sahabi oḳolre ḳoila, “Tumra oto ḍoraluk kene? Tumra oḳono iman ancho na ni?” Ita dekia sahabi oḳole kub ḍoraila, ar eḳe-oinne ḳoila, “Ein ashole ḳe? Fanie ar batashe-o deki tan hukum mane.” Hozrot Isae tan sahabi oḳolre loia Galil aor faṛi dia Zerasini oḳlor desho aila. Tain nao taki lamte-u bute dora eḳ beṭa, ḳobrostan taki bar oia tan samne ailo. He ḳoyboror maze roito, kunu manshe luar zinjurdi bandia-o tare aṭḳaita farta na. Tar at-fao bout bar zinjurdi bandile-o he ita siṛia, faor beṛi-o bangilito. Tare ḳeu shamlaita farta na. He faṛor ṭillae ṭillae, ḳoybore ḳoybore hara din-rait gurto ar sillaito, fattor dia tar nizor shorilo marto. Isare he duroi taki dekia-u douṛaia aia tan faot foṛia soizda ḳorlo, ar sillaia ḳoilo, “O Isa, Allatalar ḳas mayar zon Ibnulla, afne ḳene amar gese aisoin? Ami Allar ḳosom ḳaia ḳoiar, afne amare satain na zanu.” Isae age ou butre ḳoisla, “Tui ou beṭare saṛia bar oia za,” erdae he Isare ou minoti korlo. Tain ou butre zikaila, “Tor nam kita?” He ḳoilo, “Amar nam fouz, ḳaron amra bout zon asi.” Oḳan ḳoia he Isar gese bare bare minot ḳori koilo, “Afne amrare i elaḳa taki kedain na zanu.” Ou shomoy hono faṛor galat boṛo eḳ shuoror fale ḳaoat asil. Butor fale Isare minot ḳori koilo, “Huzur, amrare ou shuoror falor maze faṭai deukka, amra gia otar bitre hamai.” Isae izazot dia harle tara gia ou shuoror falor maze hamaigelo. Teu shuoror fale faṛor ṭillar feṭedi kub zure douṛaia gia aoror maze buṛia morla. I falo onuman dui azar shuor asil. Ita dekia shuoror raḳal oḳole douṛaia gia gaut ar ḳanda-ḳasar hoḳolre ḳobor zanaila. Ḳobor hunia manshe ita deḳat aila. Tara Isar ḳandat aia deḳla, butor fouze ze beṭare dorsil, i beṭa bala oia ḳafoṛ-sufoṛ findia boiroise. Ita dekia tarar mono ḍor hamaigelo. Teu zera ou goṭona deḳsil, tara hou bute dora beṭar ḳota ar shuoror goṭona erare zanailo. Erdae manshe Hozrot Isare minot ḳori koila, “Meherbani kori amrar elaḳa taki toshrif neukkagi.” Tain zebla naot uṭizira, ou shomoy bute dora beṭa-o tan loge oia zaito ḳori minot lagailo. Oile Isae tare oḳan ḳoia bidae ḳori dila, “Tumi tumar baṛit zao, gia baṛir manshore deḳao, Mabude tumare ḳoto meherbani ar boṛo taijjubi ḳam ḳorsoin.” Tan ḳota hunia beṭa gelogi ar asta Dikafoli elaḳar manshore ḳoilo, Isae tar lagi koto boṛo ḳam ḳorsoin. Ikan hunia tara-o taijjub oigela. Hozrot Isa naot ḳoria hirbar aoror hofaro gia harle, sairobae tone manshe aia ou aoror faro-u biṛ lagai dila. Ou shomoy mosid komiṭir Zayir namor eḳ neta aia Isare dekia tan faot foṛia, kub minot ḳori koila, “Huzur, amar fuṛigu morar foti oigese. Afne toshrif ania amar fuṛigure atai dile-u tai bala oizibo.” Teu tain ou netar baṛit roana dilaila. Tan sairo galabae biṛ bandia ṭela-ṭeli koria aro bout manush tan loge oia zaira. Ou biṛor maze eḳzon beṭi manush asla, baro boros dori tan beṭiara bemaror lou zaito. Bout ḍaktor ḳobiraz deḳaia ḳoshṭo ḳori niom-ḳanun mania, hoḳol ṭeḳa-foysha kuaia-o kunu fayda oise na. Dine dine bemar aro baṛise. Isar befare hunia beṭie ou biṛor maze ṭik tan ḳoredi aia, tan finnor saddor ḳanor ek kunat soilo. Tai ekin ḳorsil zen, Isar finnor kunu ḳafoṛor maze soite farle-u bemar shifa oizibo. Hasau, Isar saddoror kunat soite-u, beṭir lou zaoa ekkere ḳomigelo. Beṭie nizor shorilor halot buzililo, bemar ḳomigese. Isae-o ṭer faila, tan shoril mubarok taki bol bar oise. Ou tain biṛor maze sairobae saia zikaila, “Amar ḳafoṛo ḳe soilo?” Tan shagrid oḳole ḳoila, “Huzur, afne to deḳra, manshe kila sairobae ṭela-ṭeli korra, te ar ḳene zikaira, ḳe afnare soilo?” Oile Isae sairobae soukdi tallashit roila, ḳe tane soilo. Teu bemar shifa oa beṭie nizor halot buzia ḍoraia ḳafi kafi tan samne aia faot foṛlo, ar hoḳolta kulia ḳoilo. Isae beṭire ḳoila, “Mai go, tumar imane tumi baslae. Oḳon shantie baṛit zao, ar i bemar taki hefazot ro.” Tain ota mato roisoin, ou shomoy mosidor hou netar baṛi taki kobria aia netare ḳoilo, “Sab, afnar fuṛi to ar nai, dunia saṛia gesoingi. Te huzurre ar toklif dibar ḳam nai.” Oile ikan hunia Isae hou netare ḳoila, “Ḍoraiba na, ḳali ekin ḳoroukka.” Ḳoia tan sahabi Fitor, Iakub, ar Iakubor bai Hannan, ḳali ou tinzon bade ar ḳeurore tan loge nila na. Erare loia tain hou netar baṛit aia deḳla, manshe ḳanda-ḳaṭi, bilaf ar mattom ḳorra. Tain bitre gia manshore ḳoila, “Tumra i kanda-ḳaṭi ar mattom ḳorrae ḳene? I fuṛi to morse na, ḳali gumaise.” Ikan hunia manshe tanre siṛaila. Teu tain murdar kuṭa taki hoḳolre bar ḳori dia, ḳali fuṛir ma-baf ar sahabi oḳolre loia kuṭat hamaila. Tain fuṛir ato doria ḳoila, “Ṭalita kum,” mani, “O fuṛi, tumare ḳoiar, uṭo.” Hasau, murda fuṛi loge loge uṭia aṭa dorlo, fuṛir boyosh asil baro bosor. Ita dekia era asanoḳ taijjub oigela. Isae erare hukum dila, ita ḳeurore hunaio na. Ar ou fuṛire oḳon ḳaibar kunta deo. Hozrot Isa hon tone nizor gau Nasaroto toshrif anla. Tan sahabi oḳol-o loge asla. Zummabare tain mosido gia talim dila. Bout manshe tan talim hunla, hunia taijjub oia ḳoila, “I beṭae ita talim kuai taki failo? He ḳemne ita ilim hasil ḳorse, ar zeta muzeza oḳol deḳar, itar bed kita? E to hou Moriomor fua ḳaṭ-mestoir nae ni? He Iakub, Iusi, Ehuda ar Saimonor bai nae ni? Tar bonin to amrar gaut-u roira.” Isar befar loia manshor dilor maze bitishona deḳa dilo. Teu Isae tarare ḳoila, “Zekunu nobi-u nizor gau, nizor desh, nizor baṛi, ḳesh-kuṭumor bairaḳano ijjot fain.” Bade tain ḳoyzon bemarire atai dia bemar shifa ḳorla. Oile hino ar kunu muzeza zair ḳorar ufae oilo na. Manshe tan ufre iman na anae tain kub taijjub oigela. Bade tain gaue gaue sairobae sofor ḳoria manshore talim dila. Isae tan barozon sahabire nizor daro ania, zin-butor ufre ḳemota dia, duizon duizon ḳori toblig kamo faṭaila. Soforor shomoy ḳali ator laṭi saṛa ar kunta-u erare loge nite dila na. Ḳani-kuraki, beg ba ḳomror tolit bandia kunu foysha-ḳoṛi nite-o na ḳorla. Tain ḳoila, “Faot zuta finditae farbae, oile finnor ek kafoṛ bade ar kunu ḳafoṛ-sufoṛ nio na.” Ar hukum dila, “Tumra gia foyla ze baṛit hamaibae, i gau saṛia zaoar ag forzonto ou baṛit-u roio. Kunu zagar manshe zudi tumrare ḳobul na ḳore, ar tumrar boyan na hune, te hon taki baronir bala tumrar faor duil zaṛia falaio, ou duil tarar naformanir shakki roibo.” Teu sahabi oḳole gia toblig korla, manshore tagid dila touba ḳorar lagi. Era bout but saṛaila, ar bout bemari manshor matat tel maḳaia bemarre shifa ḳorla. Hozrot Isar shunam sairobae roṭi zaoae Raza Herudor ḳano-o gia azilo. Kunu kunu manshe ḳoila, tain oila Ehia nobi, ein hirbar zinda oia uṭia aisoin ḳori-u ou keramoti deḳaira. Ḳeu ḳoilo, ein oila Hozrot Ilias nobi. Ar ḳeu ḳeu ḳoilo, ein furana zomanar kunu nobir laḳan noya eḳ nobi. Ita hunia Herude ḳoilo, “Ein to hou Ehia, zen ḳolla ami kaṭaislam. Tain hirbar zinda oia uṭsoin.” Erdae Ehia nobir bae Herudiar kub gusa asil. Tai enre zane marilibar niot ḳorlo, oile farlo na. Herude enre ḍoraito ar zanto, ein eḳzon fak-forezgar kamil manush, erdae hamesha enre tair at taki basaito. En nosiot hunte tar bitre doṛfoṛ ḳorle-o he ita kub fosond ḳorto. Heshe tai eḳ shuzug failo, Herudor zonom dinor onusṭano tar uzir-nazir, sifair ofisar oḳol, ar Galil zilar goinno-mainno hoḳol manshor lagi kani zuit ḳora oilo. Ou onusṭano Herudiar fuṛie aia nas deḳaia hoḳol meman ar Herudre kushi korlo. Kushi oia Herud razae fuṛire ḳoilo, “O ma, tumi amar gese kita sao? Zeta saibae, ota-u faibae.” He ḳosom ḳaia ḳoilo, “Tumi amar gese zeta saibae, ota-u dimu. Amar raijjor ordeḳ saile-o dilaimu.” Ou fuṛie tair maʼr gese gia zikailo, “Mai go, ami kita saitam?” Ma Herudiae hikai dilo, “Tumi hou Ehiar ḳolla saio.” Fuṛie zoldi kori aia razare ḳoilo, “Ami sairam, afne hou Ehiar ḳolla ḳaṭia eḳ talo ḳori amare deukka.” Ikan hunia raza kub bezar oigelo, oile onusṭanor meman oḳlor samne ḳosom ḳorae ou fuṛire na ḳorar kunu ufae asil na. Ehia nobir shagrid oḳole i kobor hunia zel tone tan lash nia dafon ḳorla. Hozrot Isar barozon sahabie toblig tone firia aia tanre zanaila, tobligo gia kita kita ḳorsoin, kilaḳan talim disoin. Ou shomoy bout manush Isar gese aoa-zaoat taḳae sahabi oḳole kunu ḳana-finar-o shuzug faila na. Erdae tain sahabi oḳolre ḳoila, “Tumra amar loge kunu nirai zagat aia tuṛa zirao.” Ḳoia naot uṭia eḳ nirai zagat roana oila. Erare zaoat dekia bout manshe sinilila, teu era fosar age-u ash-fashor gauain taki manush douṛaia gia hono fosigela. Isa nao taki lamia-u deḳla, bout manshe tan bar saira. Dekia erar bae tan boṛo dorod hamailo. Era asil a-raḳali meṛar laḳan. Ou Isae erare bout laḳan talim dila. Hainja oia harle tan sahabi oḳole ḳoila, “Huzur, ikan kub nirai zaga, ar hainja-o oigese, te ota manshore bidae dilaukka, era ḳanda-ḳasar ota gauainto gia tarar ḳani-kuraki louk.” Isae ḳoila, “Tumra-u erar ḳanir intezam ḳoro.” Sahabi oḳole zuaf dila, “Amra kita dui-sho dinaror ḳani loia ania erare ḳaoaitam ni?” Dui-sho dinar to foinchash azar ṭeḳar homan. Tain ḳoila, “Tumra saia deḳo, tumrar gese ki foriman ruṭi ase.” Tara dekia ḳoila, “Sab, fasḳan ruṭi ar duiṭa biran mas ase.” Tain sahabi oḳolre hukum dila, “Tumra ou gashor ufre lain doraia manshore boai deo.” Teu manshe eḳ-sho zon ḳori katar bandia foinchash ḳatar boila. Isae hou fasḳan ruṭi ar duiṭa biran mas ato loia Allar arshor bae saia shukria adae ḳoria, manshore baṭia dibar lagi ou ruṭi ṭukra ṭukra ḳori sahabi oḳlor ato dila. Ou laḳan mas duiṭa-o baṭia dila. Hoḳol manshe feṭ bori kaila. Ḳaia harle baṛti ruṭi ar masor ṭukrain nia baroṭa ṭukri borla. I dolor maze ḳali beṭa manush-u fas azar zone boia ḳaila. Ḳanir bade-u Hozrot Isae sahabi oḳolre tagda dila, tara naot ḳori aoror hofaro Bayt-Soyda gaut zaoar lagi, tain onor manshore-o bidae dila. Manush bidae oia harle tain dua ḳorar lagi faṛor ufre uṭila. Raitor bala sahabi oḳlor nao aoror mazḳano asil, oile Isa eḳla huknat asla. Tain deḳla, ufta batashor maze era kub ḳoshṭo ḳori daṛ baira. Fotabala Isae ou aoror fanir ufredi aṭia, sahabi oḳlor galabae tarare faroia agedi zaira. Tain aia sahabi oḳlor naot uṭte-u ufta batash dom loililo. Ita dekia era asanoḳ taijjub bonigela. Oile agor hou ruṭi-masor gaibi kanir bed era buzla na. Erar dilor duar to bond asil. Aor faṛi deoar bade era Gineshorot elaḳat aia nao biṛaila. Ṭauno ba gaut, ollie-gollie tain zeno-u toshrif nita, ono-u manshe bemari oḳolre ania bazaro dola ḳorta. Ar tanre minot-ḳajji koria ḳoita, bemari oḳole zanu tan saddoror kunaḳano soita faroin. Ar zera soita, hasau erar bemar shifa oizito. Bade Zeruzalem taki koyzon moulana ar Forishi mozobor kisu manush Hozrot Isar gese aila. Aia deḳla, Isar ḳoyzon ummote at na doia emne-u ḳanit boigesoin. Ashole agor zomanar moulana oḳlor batail rosumot mafik, hokkol Ihudi ar Forishi oḳole-o uzu na ḳoria kunu ḳani kain na. Bazar-aṭ taki kunu zinish anle fak-saf na ḳoria muko dein na, tal-bashon doia saf-sutra ḳora, ou laḳan bout riti-reoaz tara mane. Erdae ou moulana ar Forishi oḳole Isare zikaila, “Afnar ummot oḳole agor zomanar moulana oḳlor batail rosumot ḳene manoin na? Tara to nafaḳ ate ḳani kain.” Tain zuaf dila, “Afnara to bonḍo! Hozrot Ishaya nobie afnaintor befare ṭik-u ḳoisoin, Ita manshe muk dia ḳali amare ijjot ḳore, oile tarar dil ama tone bout duroi. Tara hudar ḳamoḳa amar ebadot ḳore, tarar talim oḳol to manshor banail mongoṛa shoriot. Te afnara to Allar deoa hukum-ahkam bad dia, manshor banail rosumot amol ḳorra.” Isae tarare aro ḳoila, “Allar deoa hukum bad dia, nizor mongoṛa rosumot ḳaim ḳorar danda to afnara kub bala ḳori-u zanoin. Zela Hozrot Musae ḳoisoin, ma-babare ijjot ḳorio, ze manshe afon ma-bafor bodnam gae, tare zane mara oibo. Oile afnara manshore talim dira, kunu manshe zudi tar ma-bafre ḳoilae, amar zeta samana dia afnaintor kezmot ḳortam asil, ita Allar name lilla dilaisi, te tar ma-bafor lagi ar kunta-u ḳora lage na. Ou laḳan afnarar baf-dadar mongoṛa niom dia Allar kalam batil ḳorilisoin. Ikan bade-o afnara oula aro bout ḳam ḳorra.” Bade Isae manshore tan ḳandat nia ḳoila, “Afnara hoḳole amar ḳota kial ḳori hunoukka ar buzoukka. Boyan bade tain manshor ges taki horia gia goro hamaila, teu sahabi oḳole tanre er mani zikaila. Isae ḳoila, “Tumra kita oula-u be-akkol ni? Tumra buzo na ni, bare taki zeta zinish manshor bitre hamae, itae manshore nafak korto fare na. Ita to tar dilor bitre hamae na, ḳali feṭor maze hamae, ar feṭ taki hirbar baroi zae.” Isae ou talim dia buzaila, kunuzat ḳani-u nafaḳ nae. Tain ḳoila, “Manshor bitre taki zeta baroy, otae-u manshore nafak kore. Manshor dil taki-u to hoḳol nomunar ku-sinta ae; zina, suri, kun, lub-lalos, foror ḳeti korar danda, sol-soturi, bodmaishi, bod-nozor, ingsha-ninda, boṛai-beṭagiri ar shoytani baroy. Ou tamam naformani manshor dil taki bar oia tarare nafaḳ banae.” Bade Isa ou elaḳa tone Siria deshor Shur ṭaunor ḳandat toshrif nilagi. Ono aia tain ek goror bitre lukai roila, saila manshe zanu na zanoin tain aisoin ḳori. Oile tan ḳobor roṭi gelo. Hono eḳ beṭi manshor fuṛire bute dorae, Isae toshrif anchoin hunia ou beṭie, zoldi kori aia tan faot foṛlo. I beṭir baṛi Siria deshor Foinikia elaḳat, oile matito Iunani bashae. Tai Isar gese minot-ḳajji koria ḳoilo, “Huzur, butor ḳobza taki amar fuṛigure basaukka.” Isae ḳoila, “Age nizor huruttainte feṭ bori kaukka, nizor sabalor ḳani kukror samne falani ṭik nae.” Beṭie ḳoilo, “Ji oy huzur, afnar ḳota-u ṭik, oile nizor sabalor ḳanir zeta guṛa-gaṛa galabae foṛe, ita to kukre ḳae.” Tain ḳoila, “Tumi to ḳaṭi mat-u matso. Te zao, gia deḳo, bute tumar fuṛire saṛia gesegi.” Hasau beṭie baṛit gia deḳlo, tair fuṛi bala oia bisnat hutiroise. Bade Isae Shur elaḳa tone Sidon ṭaun oia, Galil aoror hofaro Dikafoli elaḳat aila. Ono aia harle manshe ek kalua tutla beṭare tan gese ania minot lagaila, tare atai dibar lagi. Tain ere manshor biṛ tone bare nirai zagat nia, tar duio ḳano tan ator anguil haraila, tan mukor sef lagaia tar zifra atai dila. Ar ufre asmanedi saia lamba ḳori shash falaia ḳoila, “Iffata,” mani, “Kulizauk.” Loge loge-u beṭar ḳan kuligelo. Tutlami saṛi gelo, he forishkar mata dorlo. Heshe tain erare hukum dila, “Ḳobordar, tumra ita ḳeurore hunaio na.” Oile tain zoto beshi na ḳorla, tara oto besh ḳori ita roṭailo. Tara asanoḳ taijjub oia ḳoila, “Ein to hoḳol ḳam-u kub nikut ḳori koroin. Deḳrae ni, tain ḳaluare hunar shokti, ar bubare matibar takkot disoin.” Bade aroḳbar bout manush aia tan gese dola oila. Erar gese kunu ḳani-kuraki na taḳae, Isae tan sahabi oḳolre daro nia ḳoila, “Ita manshor lagi amar boṛo dorod lager, aiz tin din dori tara amar loge loge asoin, oile oḳon tarar ḳanir kunta nai. Ou halote erare bidae ḳori baṛit faṭai dile, ita foto-u beush oiziba, era ḳeu ḳeu to bout duroi taki aise.” Sahabi oḳole ḳoila, “Huzur, i nirai-morubumir maze ḳe kuai taki oto ruṭi zugaia erare ḳaoaibo?” Tain ḳoila, “Tumrar gese ruṭi koyḳan ase?” Era ḳoila, “Sab, shatḳan ase.” Tain manshore ḳoila, “Afnara ḳanir lagi maṭit boizain.” Ḳoia ruṭi shatoḳan nia Alla Pakor shukria adae ḳori oḳnain siṛila, ar sahabi oḳolre dia baṭia deoaila. Sahabi oḳlor gese huru huru ḳoyṭa biran mas-o asil, tain ou masor lagi shukria adae ḳorla, ar erare ḳoila manshore baṭia dita. Hoḳol manshe feṭ bori kaila. Ḳanir bade zeta roisil, sahabi oḳole ota dola ḳoria harle shat ṭukri borigelo. I dolor maze ḳali beṭa manush-u onuman sair azar zone ḳaila. Bade tain erare bidae dia, sahabi oḳolre loia naot ḳori Dalmanuta zilat gelagi. Ono aia harle Forishi oḳole tan loge torka-torki lagaila, ar tanre zasai korar lagi tara asmani kunu muzeza deḳta saila. Ikan hunia Isae lamba ḳori shash falaia ḳoila, “I zomanar manshe ḳali muzeza tukain ḳene? Ami hok kota ḳoiar, erare kunuzat muzeza deḳail oito nae.” Ḳoia tain erar ges taki horigela, ar naot uṭia hirbar aoror hofaro gelagi. Sahabi oḳole loge ḳori ruṭi nite faurilila. Naor maze erar loge ḳali ekḳan ruṭi asil. Ou shomoy Isae ḳoila, “Tumitain hushiar o, Raza Herud ar Forishi mozobor ḳamir taki hushiar roio.” Ikan hunia sahabi oḳole ḳana-ḳani kori koila, “Amra loge ḳori ruṭi na anae tain monoloy oḳan ḳoira.” Oile sahabi oḳole kita matira, Isae ikan buzia tain erare ḳoila, “Tumitain ḳene ḳoirae, ruṭi ancho na ḳori ami ikan ḳoisi? Tumra kita oḳono kunta zano na ni, kunta-u buzo na ni? Tumrar dil fashan oigese ni? Tumrar souk taḳte-o deḳrae na ni? Ḳan taḳte-o hunrae na ni? Tumrar mono foṛer na ni, zebla ami fas azar manshor lagi kali fasḳan ruṭi siṛislam, ou manshe ḳaia harle tumra ḳoto ṭukri guṛa-gaṛa dola ḳorslae?” Era ḳoila, “Huzur, baro ṭukri.” Tain hirbar ḳoila, “Aichcha, ami zebla sair azar manshor lagi shatḳan ruṭi siṛislam, manshe ḳaia harle tumra ḳoy ṭukri dola ḳorslae?” Era ḳoila, “Shat ṭukri.” Ou tain ḳoila, “Erbade-o tumra buzlae na ni?” Bade Isae tan sahabi oḳolre loia Bayt-Soyda gaut aila, aia harle manshe eḳ anda beṭare tan gese ania ḳoilo beṭagure atai dibar lagi. Isae ou beṭar ato dori gaur bare loia gela. Gia tan mukor sef beṭar sokut lagaia tar gotro at dia ḳoila, “Oba, tumi kunta deḳrae ni?” Beṭae souk kulia saia ḳoilo, “Ji oy huzur, ami to manush deḳram, oile itare gasor laḳan lager, era aṭa-uṭi korer.” Teu Isae aroḳbar tar sokur ufre atai dile, he bala ḳori sailo ar hokkolta forishkar deḳlo. Isae tare tar baṛit faṭai dia ḳoila, “Huno, Bayt-Soyda gaut ar zaio na.” Bade tain ar sahabi oḳol Ḳoisoria-Filifi ṭaunor ḳanda-ḳasar gauainto gela. Foto tan sahabi oḳolre zikaila, “Ḳo sain, manshe amar befare kita mono ḳoroin, ami ḳe?” Era zuaf dila, “Ḳeu ḳoy, afne Hozrot Ehia. Ḳeu ḳoy Ilias nobi. Ḳeu ḳeu ḳoin, afne oinno kunu nobi.” Ou tain ḳoila, “Oile tumra kita mono ḳoro, ami ḳe?” Sahabi Fitore zuaf dila, “Afne-u Allar oada ḳora hou al-Mosi.” Tain erare hushiar ḳori koila, “Tumra amar befare ḳeurore hunaio na.” Bade tan sahabi oḳolre ou boyan hunaila, “Ami bin-Adome bout duḳ-mosibot fuani lagbo. Murobbi oḳole, boṛo imam oḳole, ar moulana oḳole-o amare manta nae. Amare zane mara oibo, oile moutor tin din bade hirbar zinda oia uṭa lagbo.” Tain kub kula-mela ḳori ita ḳoila. Erdae Fitore tanre alga horaia nia ḳoila, “Huzur, shabdan, ila mat matoin na zanu.” Isae sahabi oḳlor bae muk firaia Fitorre damki dia ḳoila, “Dur Iblis, amar ges taki bag! Tui Allai munshare bad dia, manshor laḳan sinta ḳorre.” Bade tan sahabi ar am manshore-o tan daro nia ḳoila, “Huno, amar torikae ḳeu zindegi kaṭaite saile, he tar nizor kushie sola bad deuk. Tar afon duk-koshṭor solib boia loia amar ḳore auk. Ze zone tar nizor shadine solto sae, he tar hasaror zindegi kuailibo. Oile ze zone amar lagi ar Allar deoa kush-ḳobrir lagi tar zan bilae, he tar hasaror zindegi basaibo. Ḳeu zudi asta duniar malik bonia-o tar hasaror zindegi, mani aḳer kuailae, te tar kunu fayda oilo ni? Heshe hasaror zindegi faoar lagi he kun don bilaibo? Hunoukka, i zomanar beiman ar gunagar oḳlor maze, ḳeu zudi amar lagi ba amar talimor lagia muk lukae, te ami bin-Adom zebla fobitro firista oḳolre loge loia, amar gaibi bafor shan-tozollie zogoto hirbar aimu, ou shomoy ami-o erare deḳle muk lukaimu.” Hozrot Isae tan sahabi oḳolre ḳoila, “Ami tumrare hasau ḳoiram, ino ilaḳan ḳoyzon azir asoin, zera Allar bashshair shan-tozollire nizor souke na deḳar age mout oito nae.” Ikan ḳoar soydin bade tain ḳali Hozrot Fitor, Iakub ar Hannanre loia usa eḳ faṛor ufre uṭila. Ou tino zonor souḳor samne tan nizor surot bodli gelo. Tan finnor lebas oto beshi dola soḳsoḳa oilo zen, duniar kunu dufae-u ila soḳsoḳa ḳori doar takkot nai. Sahabi oḳole Hozrot Musa ar Ilias nobire deḳla, era aia Hozrot Isar loge batchit ḳorra. Teu Fitore ḳoila, “Huzur, amra to ono asi, kub bala oise. Amra tinḳan ḍera-gor tiar ḳorilai, ekḳan afnar lagi, ekḳan Hozrot Musa ar ekḳan Ilias nobir lagi.” Era kub beshi ḍoraigesla, erdae kita matita kunu tal faila na. Ou shomoy gaibi eḳ megor ṭukrae aia erare gurililo, ar ou ṭukra taki gaibi aoaz oilo, “Ein-u amar ḳas mayar zon, tumra en nosiot huno.” Ṭik ou shomoy tara sairobae saia ḳali Isa saṛa ar ḳeurore ino deḳla na. Bade faṛ taki lamia aibar bala Isae erare hukum dila, “Aiz zeta deḳlae, ami bin-Adom mora taki zinda oia uṭar ag forzonto ita ar ḳeurore hunaio na.” Era tan hukum manla, oile mora taki zinda oar bed kita oḳan na buzae, tara eḳe-oinne zikaila. Bade Isar gese aroz ḳorla, “Huzur, moulana oḳole ḳene ḳoin, Hozrot Ilias nobie foyla toshrif ana zorur?” Tain ḳoila, “Ikan hasa ḳota, foyla Hozrot Iliase aia hokkolta agor haloto firai anba. Oile bin-Adomor befare Allar kalamo ḳene leḳa oise, tain kub duḳ-mosibot fuani lagbo, manshe tanre ḳobul ḳorta nae? Ami tumrare ḳoiar, Ilias nobir befare Pak Kitabo zela leḳa ase, olaḳan-u tain aisla. Manshe-o tan loge zeta monoloy ota ḳorse.” Isae ou tino zonre loia faṛ tone lamia baki sahabi oḳlor gese aia deḳla, bout manush aia sairobae dola oisoin, ar ḳoyzon moulanae erar loge torka-torki korra. Isare dekia-u manush taijjub oia, douṛaia aia tanre salam ḳorla. Tain ou moulana oḳolre zikaila, “Afnara kita loia erar loge torko ḳorra?” Biṛor maz taki eḳzone ḳoilo, “Sab, amar fuagure loia afnar gese aislam, ogure buba zine asor ḳorse. Ou zine tare zebla-u dore, tare asaṛ maria maṭit falae. Tar muk taki fena baroy, dato ḳoboṭ lagia ḍaṭṭa oizae. Ami tare loia afnar sahabi oḳlor gese aislam, oile era farsoin na.” Teu Isae ḳoila, “Haere beiman oḳol! Ami ar ḳotodin tumrar loge roimu, tumrar zala ḳotodin shoijjo ḳormu? Aichcha, fuare ono ano.” Manshe fuare tan gese anla. Tane dekia-u zine tare kub zatia dorlo. Fuae maṭit foṛia mukor fena bar ḳori goṛagoṛi lagailo. Isae tar bafre zikaila, “Tar i dosha ḳotodin taki?” Beṭae ḳoilo, “Huruman taki-u. Ar i zine tare marilito ḳori bout bar tare agunit ar fanit falaise. Oḳon afne zudi faroin, te amrare doya ḳoroukka.” Isae ḳoila, “Zudi faroin, i kotar mani kita? Ze ekin ḳore tar lagi hokkolta-u oy.” Ou beṭae zure zure ḳoilo, “Huzur, ami ekin ḳorsi. Amar imanor ḳomzuri horai deukka.” Aro bout manush douṛaia tan gese aira dekia, tain zinre damki mari koila, “Oi kalua ar buba zin, ami hukum diar, er ges taki baroi za. Tare ar kunudin doris na.” Ikan hunia zine tare kub zure sik dia zata mari saṛia gelogi. Teu i fua murdar laḳan maṭit foṛi roise dekia manshe ḳoila, “E to mara gese.” Oile Isae tare ato dori tulte-u he ubai gelo. Bade tain goro hamaia harle sahabi oḳole tanre niralae zikaila, “Huzur, amra farlam na ḳene?” Tain zuaf dila, “Dua na ḳorle ar kunumonte-u i laḳan zin saṛail zae na.” Bade hoḳole mili i zaga saṛia Galil zilar mazedi roana oila. Saila, manshe zanu ita na zanoin. Ou shomoy to tan sahabi oḳolre talim deoat asla, tain ḳoila, “Ami bin-Adomre manshor ato dorai deoa oibo, zane mara oibo, ar moutor tin din bade hirbar zinda oia uṭmu.” Sahabi oḳole tan i talimor kunu bed buzla na, ar tan gese zikanir-o shaosh faila na. Bade Isae tan sahabi oḳolre loia Kofornaum ṭauno aila. Aia goro hamaia erare zikaila, “Foto tumra kita loia torko ḳorlae?” Era muk bond ḳori boiroila. Ashole foto tara torko ḳorsla, tarar maze ḳe hoḳol taki dami manush. Isa boigela, boia era barozonre tan daro nia ḳoila, “Ḳeu zudi dami manush oito sae, te he hoḳlor ḳore roite oibo. Ar hoḳlor kezmot ḳora lagbo.” Bade eḳ huruttare ania erar samne uba ḳoraila. Tare kulo loia ḳoila, “Ze zone amar lagi ou huruttar laḳan kunu sabalre ḳobul ḳore, he amare-u ḳobul ḳore. Ar amare ze ḳobul ḳore, he ḳali amare nae, amare zein bezisoin tanre-o ḳobul ḳorlo.” Tan sahabi Hannane ḳoila, “Huzur, amra eḳ beṭare deḳsi, he afnar nam loia zinnat saṛae. Dekia amra tare nished ḳorsi, he to amrar torikar manush nae.” Tain ḳoila, “Ere nished ḳorio na. Amar nam loia ḳeu keramoti deḳanir bade, he oto zoldi amar gibot gaito farto nae. Zera amrar bifokke nae, tara to amrar fokke. Huno, ami hasa ḳota ḳoiar, al-Mosir torikar manush oar ḳatire, ḳeu zudi tumrare ek gelas fani kaoae, te he er furuskar faibo-u faibo. “Ar amar torikar ou huru-muru eḳzonre zudi keu tar imanor fote bada dey, te er saite tar lagi aro bala oibo, tar golat fattor bandia doriat falai deoa. Tumar at zudi tumar rifu oizae, te at ḳaṭia falai deo. Duio at loia Zahannami oa taki, eḳ at loia Zannato zaoa tumar lagi bala. Zahannamor aguin to kunudin nibe na. Tumar fao zudi tumar rifu oizae, te fao ḳaṭia falai deo. Duio fao loia Zahannamo zola taki, lengṛa oia Zannato zaoa tumar lagi bala. I Zahannamor bichchu oḳol more na, ar hinor aguino kunudin nibe na. “Huno, forteḳ manush-u agunit nunta oibo. Nun to bala zinish, oile nune zudi tar nunta gun kuailae, te tare ar nunta banail zaibo ni? Tumra zarzir dilor maze i nun ḳaim raḳo, ar eḳe-oinne shantie boshot ḳoro.” Kofornaum taki Hozrot Isa Ehudia zilat aila, ar Zordan gangor hofaro gela. Ono aile hirbar bout manush aia tan gese dola oila. Tain-o tan reoaz mafik erare talim dila. Ou shomoy tanre forikka ḳorar niote Forishi mozobor ḳoyzone aia zikailo, “Sab, ḳoukka sain, boure talaḳ deoa zaiz ase ni?” Tain zuaf dila, “Hozrot Musae afnaintore kita bataisoin?” Tara ḳoila, “Tain ḳoisoin, talaḳ nama lekia hari bou talaḳ deoa zaiz ase.” Isae ḳoila, “Tumrar dil fashan, erlagi-u Musa nobie i musla leḳsoin. Oile eoḳan to leḳa ase, Allae foyla Adom ar Haoare mordo ar aorot banai foyda ḳorsoin. Erdae manshe-o tarar ma-bafre toia bour loge ashik oiba. Zamai ar bou ek kaya oiba. Tara dui roita nae, eḳ oiba. Te Allae zeta zuṛa lagaisoin, manshe itare alog na ḳorouk.” Bade sahabi oḳole goro hamaia, hirbar tanre ou musla zikaila. Teu Isae ḳoila, “Ze manshe tar boure talaḳ dia aroḳ beṭire nika ḳore, he to ou bour loge zina ḳore. Oula boue-o zudi nizor zamaire talaḳ dia aroḳ beṭar gese nika boy, te tai-o zina ḳore.” Bade manshe huru huru huruttaintore loia Isar gese aila tarare atai dibar lagi. Oile sahabi oḳole erare boḳa-zoḳa ḳorla. Ita dekia Isa naraz oia tarare ḳoila, “Huruttaintore amar gese aite mana ḳorio na, Allar bashshai to erar laḳan manshor lagi-u. Ami hok kota ḳoiram, huru huruttainte zela boṛor shashon manoin, Allar shashonre ou laḳan na manle, manush kunumonte-u Allar bashshait hamaito farto nae.” Bade tain tarare kulo loia tarar matat at rakia dua ḳorla. Hozrot Isa zebla bar oia roana oila, ou shomoy eḳ beṭa douṛaia aia aṭu gaṛia tan samne boia ḳoilo, “Ustad, afne to meherban. Te amare batai deukka, aḳer faoar lagi ami kita ḳortam?” Tain ḳoila, “Amare ḳene meherban ḳoirae? Eḳ Alla saṛa ar ḳeu meherban nae. Tumi to Tourat Kitabor hukum zano. Kun ḳorio na, zina ḳorio na, suri korio na, misa shakki dio na, ṭoga-ṭogi korio na, ma-bafre ijjot ḳorio.” Beṭae ḳoilo, “Sab, ami to huruman tone-u ita amol ḳoriar.” Teu Isae mayar nozore tar bae saia ḳoila, “Ḳali ekḳan zinish tumar baki roise. Tumi zao, gia tumar hoḳol don-samana besia gorib oḳolre bilai deo. Teu tumi behesto tumar samana ḳamaibae. Bade aia amar ummot oio.” Ikan hunia beṭar muk kala oigelo. Tar bout don-samana asil ḳori mono duk loia gelogi. Teu Isae sairobae saia tan sahabi oḳolre ḳoila, “Doni manush Allar bashshait hamani boṛo moshkil.” Ikan hunia era taijjub oigela. Isae hirbar ḳoila, “Baba oḳol, deḳrae ni, duniabi don-samanar ufre zera borosha ḳore, Allar bashshait hamani tarar lagi bout moshkil. Doni manush Allar bashshait hamanir saite, suir furedi uṭ hamani aro shuza.” Ikan hunia sahabi oḳol aro taijjub oia eḳe-oinne ḳoila, “Te kun manshe nazat hasil ḳorbo, ḳe rehai faibo?” Isae erar bae saia ḳoila, “Manshor lagi oshombob oito fare, oile Allar nozoro ita to mamuli. Tain hoḳolta-u faroin.” Sahabi Fitore ḳoila, “Huzur, amra to hoḳolta falai toia afnar ḳore aisi.” Tain ḳoila, “Ami tumrare hok kota ḳoiram, ze manshe amar lagi ar Allar batail kush-ḳobrir lagi nizor baṛi-gor, ma-baf, bai-boin, fua-fuṛi, zomi-mirash saṛi dise, he ou duniat itar eḳ-sho gun beshi baṛi-gor, ma-baf, bai-boin, fua-fuṛi, zomi-mirash faibo. Itar loge he zulum-toklif-o faibo. Bador zindegit he aḳer-o faibo. Oile zera foyla ḳataro asoin, erar maze bout zon ḳore foṛiziba, ar zera ḳoror ḳataro asoin, tarar bout zon foyla ḳataro aiba.” Hozrot Isae sahabi oḳolre loia Zeruzalemo zaira. Tain age oia aṭira, ar sahabi oḳol ḍorai ḍorai kore ḳore zaira. Aro zera tan ḳore oia zaira tarar zano-o ḍor asil. Isae tan barozon sahabire alga horaia nia hirbar ḳoila, tan kun dosha goṭibo. Tain ḳoila, “Huno, amra oḳon Zeruzalem zairam. Hono ami bin-Adomre doria boṛo imam ar moulana oḳlor ato shofi deoa oibo. Tara bisar ḳoria amare zane marar ray diba. Amare bidormi zatir ato shomzai diba. Ou bidormi oḳole ṭaṭṭa-moshkora ḳoria, shorilo sef siṭaia, bezuita sabuk marba, ar zane mariliba. Moutor tin din bade hirbar zinda oia uṭmu.” Bade Zibudiar dui fut Iakub ar Hannan namor duio sahabi Hozrot Isar gese aia ḳoila, “Huzur, amra ekḳan arzi loia aisi, mono ḳorram, afne amrar arzikan raḳba.” Tain ḳoila, “Ami tumrar lagi kita ḳortam, tumra kita sairae?” Era ḳoila, “Afne zebla furafur dafoṭor loge raz-godit boiba, ou shomoy amra eḳzonre afnar ḍainor godi, oinno zonre bauor godiḳan diba.” Isae ḳoila, “Tumra to buzrae na tumra kita sairae. Ami ze toklifor fialadi kaimu, ita kunu tumra ḳaitae farbae ni? Ami ze toklifor gusol ḳormu, tumra ita farbae ni?” Tara ḳoila, “Ji oy farmu.” Tain ḳoila, “Aichcha, ami ze fialadi kaimu, tumra-o ogudi kaibae. Ami ze gusol ḳormu, tumra-o oula ḳorbae. Oile amar ḍain ba bau galat boanir eḳtiar amar ato nae. I godi oḳol zerar lagi zuit ḳora oise, ḳali tara-u faiba.” Baki doshzon sahabie Iakub ar Hannanor i arzi hunia kub biroḳto oila. Teu Isae era hoḳolre ekḳano dola ḳoria ḳoila, “Tumra to zano, bidormi zatir raza oḳol tarar prozar munib oy. Tarar zomidar oḳole nizor gulamor ufre beṭagiri kore. Oile tumrar maze ila oa ṭik nae. Tumrar ḳeu dami bonte saile, he tumrar kezmot ḳorouk. Ar ḳeu boṛo oite saile, he hoḳlor gulami korouk. Mono rakio, ami bin-Adome-o kezmot faoat aisi na, aisi to kezmot ḳorat. Ar bout manshor zan basanir lagi nizor zan bilai deoat aisi.” Hozrot Isae tan sahabi oḳol loia Ziriho ṭauno aila. Bade erare ar aro bout manshore loia ṭaun taki baronir bala, Timoyor fua Bortimoy namor eḳ anda beṭae fotor daro boia bik korat asil. Ein-u Nasarot gaur Isa, ikan hunia beṭae zure sillai sillai koilo, “O Isa, Hozrot Daudor aolad, amare rohom ḳoroin.” Sillani hunia boute ḳoila, “Chup, sillais na.” Oile he aro zure sillaia ḳoilo, “Daudor aolad, amare rohom ḳoroin.” Tar sillani hunia Isae dom loia ḳoila, “Ere ono ano.” Manshe ou anda beṭare ḳoila, “Ḍoraio na, ao. Huzure tumare ḍakira.” Teu beṭae tar shorilor saddor kulia, faldi uṭia tan ḳandat gelo. Isae tare zikaila, “Tumi kita sao ba? Ami tumare kita ḳortam?” Beṭae ḳoilo, “Huzur, ami souke deḳtam sai.” Tain ḳoila, “Aichcha zao, tumar imanor bole-u tumi bala oilae.” Ḳoite-u tar deḳar shokti ailo ar Isar ḳore ḳore roana oilo. Hozrot Isae tan sahabire loia Zeruzalemor ḳasat, Zoytun faṛor loge Bayt-Ania ar Bayt-Faijja gaut aia azila. Ono aia tain duizon sahabire ḳoila, “Tumra duio zon samnor ou gaut zao. Gia gaut hamaite-u deḳbae egu gadar baichcha banda ase. Er ufre ḳeu kunudin soar oise na. Ogur golar doṛi kulia ono loia aio. Ḳeu zikaile ḳoio, huzuror dorḳar ase, erdae niram. Tain zoldi kori firot dilaiba.” Tan hukum mafik era gela. Gia deḳla, hasau fotor ḳandat eḳ baṛir uṭano gadar baichcha banda ase. Dekia era tar band kulita saila, ou shomoy hono uba ḳoyzon manshe zikaila, “Oba, tumra i baichchar doṛi kulrae ḳene?” Teu Isae zela hikai disla, era oula-u zuaf dila. Ikan hunia manshe ar kunta ḳoila na. Gadar baichcha loia Isar gese aia harle, manshe nizor gotror saddor kulia gadar fiṭit bisaila. Bade tain er ufre soṛila. Aro bout manshe tarar gotror saddor kulia fotor maze bisai dila, ar boute gasor fatain siṛia ania foto bisaila. Isar loge oia age-ḳore zera zaoat asil, era zure zure elan dila, “Marhaba! Mabudor name zein toshrif anra, tan tarif ouk. Amrar mul murobbi Daudor bashshai kaim or, Alhamdulilla! Behesto-o marhaba!” Zeruzalem aia tain fobitro Baytul-Mukaddoso hamaila ar sairobae saia hoḳolta deḳla. Bade hainja oizaoae tan barozon sahabire loia Bayt-Aniat gelagi. Bador din Bayt-Ania taki bidae oar shomoy tan feṭo buk laglo. Ou tain duroi taki fatae bora egu ḍumur gas dekia, ogur fol ḳaibar niote gasor daro gela. Ou shomoy ḍumur gaso fol dorar din nae. Tain gia deḳla, gasor maze ḳali fata, kunu fol nai. Tain ou gasre ḳoila, “Ar kunudin ḳeu zanu tumar fol na ḳae.” Tan i buli sahabi oḳole hunilila. Bade Zeruzalem aia tain fobitro Baytul-Mukaddoso hamaila. Ar Kaba goror shimanat zoto ḳorid-bikir ḳarbari asil, itare ḳedai dila. Tain ṭeḳar baṭṭar ḳarbari oḳlor kesh bakso, ar faro besra oḳlor ashon ulṭaia falai dila. Baytul-Mukaddosor uṭanedi kunuzat mal-samana loia solasol ḳorte nished dila. Tain talim dila, “Allar kalamo batail oise na ni, amar gorre duniar tamam zatir ebadot ḳana ḳoia ḍaḳa oibo? Oile tumra i gorre ḍaḳaitor aḍḍaḳana banailiso.” Ikan hunia boṛo imam ar moulana oḳole tanre zane marilibar dandat lagla. Oile tara Isare kub ḍoraita, ḳaron tan talim hunia manshor maze asanoḳ eshki foyda oisil. Hainja bala tain sahabi oḳolre loia ṭaunor bare gelagi. Biane sahabi oḳole fotedi aṭia aoar bala deḳla, ou ḍumur gas ekkere zoṛe-foṛe hukaia morigese. Dekia sahabi Fitoror mono oigelo. Ou tain ḳoila, “Huzur, afne ze gasre boddua disla, deḳoukka, igu morigese.” Tain erare ḳoila, “Allar ufre ekin raḳo. Ami tumrare hasau ḳoiram, kunu manshe tar dilor maze shondoy na ḳoria, furafur imane zudi ou faṛore ḳoy, ‘Zao, uṛia gia doriat foṛo,’ te he zela ḳoibo tar lagi ola ḳora oibo. Erdae ami tumrare ḳoiram, dua ḳorar shomoy tumra zeta mango, ekin ḳorio tumra ita failiso. Teu hasau ita faibae. Bade Hozrot Isae tan sahabi oḳolre loia hirbar Zeruzalem aila. Tain Kaba goror uṭano aṭira, ou shomoy boṛo imam oḳole, murobbi ar moulana oḳole tan daro aia zikaila, “Tumi kun eḳtiare ita ḳorrae? Ḳe tumare i ḳemota dise?” Tain ḳoila, “Ami afnarare ekḳan soal ḳormu. Afnara er zuaf dilaile, ami-o ḳoimu, ḳar eḳtiare ami ita ḳoriar. Aichcha ḳoukka sain, Hozrot Ehiae torikar gusol deoar eḳtiar ḳar ges taki faisla, Allar ges taki, na manshor ges taki?” Ikan hunia tara ḳane ḳane matila, “Amra zudi koi Allar ges taki, te tain ḳoiba, tumra tan ufre iman anlae na ḳene? Ar zudi koi manshor ges taki, te to?” Tara manshore kub ḍoraita, ḳaron hoḳol manshe-u manta, Hozrot Ehia eḳzon nobi. Erdae tara zuaf dila, “Amra ikan zani na.” Teu Isae-o ḳoila, “Te ami-o afnarare ḳoitam nae, ḳar eḳtiare ami ita ḳoriar.” Teu Hozrot Isae hou moulana oḳolre kichcha hunaia buzaila, “Eḳzon manshe angur ḳet ḳoria tar sairobae beṛa dila. Bade anguror rosh bar ḳorar lagi ek gat kudila ar sokidaror lagi usa ḳori ekḳan ṭong-gor banaila. Heshe manshor gese ḳet bagi dia malik bidesh gelagi. Angur fakia harle malike tan ek gulamre bagidaror gese faṭaila, tan baṭ anar lagi. Oile bagidar oḳole i gulamre dori mair-doir ḳori, ḳali ate bidae ḳori dilo. Teu malike tan aro ek gulamre faṭaila. Bagidar oḳole tare-o gala-gali koria maria tar mata faṭaililo. Erbade tain aro eḳzonre faṭaila. Enre tara zane marililo. Olaḳan ḳori tain aro bout zonre faṭaila. Erar mazor ḳoyzonre tara mair-doir ḳorlo, ar ḳoyzonre zane marililo. Heshe malikor ḳali eḳzon manush baki roisil, he oilo tan mayar fut. Hesh-mesh tain ou fuare-u tarar gese faṭaila, mono ḳorla, amar fuare tara ijjot dibo. Oile bagidar oḳole eḳe-oinne foramish ḳori koilo, ‘Ou fua-u to bade i shompottir malik oibo. Te ao, ere-o amra marilai, teu amra-u itar malik bonizimu.’ Ḳoia-u tara fuare doria zane maria, angur ḳetor bare nia falai dilo. “Te oḳon ḳoukka sain, ḳetor malike kita ḳorba? Tain aia to ou bagidar oḳolre mariliba ar ḳet oinno manshor gese bagi diba. Afnara Allar kalamo foṛsoin na ni, Raz mestoir oḳole ze fattorre beḳama ḳoia falai disil, oḳṭa dia-u goror ian kuṭi oilo. Mabude nize-u ita oaila, ita dekia to amrar taijjubi lager.” Ita hunia tara Isare dorilito sailo. Tara buzililo, tain i kichcha tarar bifokke-u ḳoira. Oile manshore ḍoraia tanre saṛia gelogi. Bade ou murobbi ar moulana oḳole Isare fando falanir lagi, Forishi ar Raza Herudor dolor ḳoyzon manshore tan gese faṭailo. Tara aia ḳoilo, “Huzur, amra to zani, afne eḳzon hok manush. Manshe kita mono ḳore ba na ḳore, itae afnar kunta-u zae ae na, afne to ḳeuror mukor bae saia kunta ḳoroin na. Hok-halal niome manshore Allar rasta batai dira. Te amrare batai deukka, Hozrot Musar shoriot mafik Ruman bashshare ḳazna deoa zaiz ni? Amra tanre ḳazna ditam ni, na ditam na?” Tain tarar bonḍami buzilila, buzia ḳoila, “Tumra ḳene amare forikka ḳorrae? Deki, eḳṭa dinar ania amare deḳao.” Tara dinar loia tan gese aile, tain zikaila, “I foyshar ufre ḳar nam ar sobi?” Tara ḳoila, “Ruman bashshar.” Tain ḳoila, “Te huno, bashshar zeta ita bashshare deo, ar Allar zeta ita Allare deo.” Ikan hunia tara ammok bonigela. Bade Siddekia mozobor ḳoyzon manush Isar ḳandat aila. Era ekin ḳoroin, moutor bade kunu manush ar zinda oia uṭoin na. Erdae tara Isare zikaila, “Huzur, Hozrot Musae amrar lagi ou musla lekia gesoin, kunu manshe bia ḳoria, tar boure niaoladi halote toia he zudi mara zae, te tar baie ou beṭire bia ḳoria tar bair bongsho basaite oibo. Te doroukka, eḳ foribaro shat bai asil. Boṛo zone bia ḳoria niaoladi halote mara gelo. Bade dusra baie tar ou ṛaṛi babire bia ḳorlo. Oile he-o niaoladi roia mara gelo. Bade tin nombor baie bia ḳoria he-o oula mara gelo. Ou nomunae tara shato bair ḳeuror-u hurutta oilo na. Heshe ou beṭi-o mara gelo. Te moron bade zebla manush zinda oia uṭba, ou shomoy i beṭi, era kun bair bou oibo? Tara hoḳole-u to i beṭire bia ḳorsil.” Tain zuaf dila, “Afnara to Allar kalam-o zanoin na, Allar kudroti takkot-o buzoin na. Erdae afnara i bul ḳorra. Hunoukka, murda oḳol zebla zinda oia uṭba, ou shomoy tara bia-shadi korta nae, ḳeu tarare bia dito-o nae. Era to firistar laḳan boniziba. Tourat Kitabo Tur faṛor zongla zolar boyanir maze, murda oḳol zinda oar befare kita leḳa ase, ita afnara foṛsoin na ni? Allae Musa nobire ḳoila, ‘Ami-u Ibrahim, Isʼhak ar Iakubor Alla’. Te Alla to murda oḳlor Alla nae, tain zinda oḳlor Alla. Afnara to bout boṛo bul ḳorsoin.” Ou shomoy eḳzon moulana aia erar torka-torki hunla. Ar Isae zen ṭik zuaf disoin ikan buzia ein zikaila, “Ḳoukka sain, Tourat Shorifor maze hoḳol taki boṛo hukum kunṭa?” Isae zuaf dila, “Hoḳol taki boṛo hukum oilo, O Boni Israil, amrar Mabud Alla eḳ. Tumrar asta dil, zan, mon ar hoḳol shokti dia tumrar Mabud Allare mohobbot ḳorio. Dusra hukum oilo, tumrar ari-forire nizor laḳan maya ḳorio. Ou duio hukum taki boṛo ar kunu hukum nae.” Ikan hunia hi moulanae ḳoila, “Huzur, marhaba! Afne to ṭik-u ḳoisoin, Alla eḳ, tain saṛa ar kunu Mabud nai. Ar asta dil, bibeḳ-buddi, hoḳol shokti dia tanre mohobbot ḳora, ari-forire nizor laḳan maya ḳora oilo, hoḳol nomunar foshu kurbani ar lilla-sodga taki-o zoruri.” Isae zebla deḳla, ou moulanae kub shundor ḳori zuaf disoin, ou tain ḳoila, “Allar bashshai taki afne to beshi duroi nae.” Erbade tone Isare kunu soal ḳorar shaosh ar ḳeuror oilo na. Isae Baytul-Mukaddoso talim deoar shomoy zikaila, “Moulana oḳole ḳemne ḳoin, al-Mosi oila Hozrot Daudor aolad? Daude to Pak Ruhur bole ḳoisoin, Mabude amar munibre ḳoila, Ami zoto shomoy tumar dushmon oḳolre tumar faor tolat na falai, oto shomoy tumi amar ḍainor toḳto bo. Daude zebla nize-u al-Mosire tan munib ḳoisoin, te al-Mosi ḳemne Daudor aolad oiba?” Bout manshe kushi oia Isar boyan hunat asil. Boyanor maze tain ḳoila, “Moulana oḳlor befare hushiar roio. Tara ḳali lamba lamba zubba findia bazar-aṭo gura-fira ḳoroin ar ijjot faita sain. Tarar shoḳ oilo kunu mozliso gele dami zagat boa, ḳanir shomoy samnor ḳataro boia ḳaoa. Eḳbae tara lamba lamba dua ḳoria manshor mon golain, aroḳbae ṛaṛi beṭintor zomi-mirash doḳol ḳori nein. Hashoror moydano erar hoḳol taki boṛo mosibot oibo.” Bade tain Baytul-Mukaddosor lillar ḍegor ḳandat boia deḳla, manshe aia ḳemne lilla-sodga dira. Tain deḳla, bout doni manshe besh ḳori ṭeḳa-foysha dan ḳorra. Bade ek gorib ṛaṛi beṭie aia ḳali duiṭa foysha dan ḳorlo. Dekia tan sahabi oḳolre ḳoila, “Ami tumrare hok kota ḳoiram, hoḳol manush tone ou beṭie beshi dan ḳorlo. Hoḳol manshe tarar bout don-saman taki kisu ongsho dan ḳorse, oile i beṭi obabi oile-o, beṭie nizor lagi kunta na rakia, hoḳolta-u dan ḳori dilo.” Hozrot Isa Baytul-Mukaddos taki bar oia zaoar bala tan eḳzon sahabie ḳoila, “Huzur, ou deḳoukka, ḳoto boṛo boṛo fattoror oal ar shundor shundor dolan.” Tain ḳoila, “Tumi ou zeta boṛo boṛo dolan deḳrae, itar dui fattor ekḳano lagail roito nae, hoḳolta banga oizibo.” Bade tain zebla Zoytun faṛor ufre Baytul-Mukaddos Kaba Shorif muka boat asla, ou shomoy sahabi Fitor, Iakub, Hannan ar Andriase tanre niralae zikaila, “Huzur, amrare zanaukka, ita kun shomoy oibo? Kun alamot dekia amra buzmu, ita binash oar shomoy aichche?” Tain ḳoila, “Dekio, ḳeu zanu tumrare na ṭoge. Bout zone amar nam doria aia ḳoibo, ami-u hein, ḳoia boutre ṭogibo. Oile zuddor aoaz ar laṛair ḳobor hunia tumra ḍoraio na. Ita nisoy goṭbo, goṭle-o ita to shesh nae. Eḳ zatie aroḳ zatir loge, eḳ deshe aroḳ deshor loge laṛai korbo. Bout zagat boisal ar nidan deḳa dibo. Oile ita to ḳali mosibotor shuru. “Tumra nizor befare hushiar roio. Manshe tumrare doria bisaror adaloto shomzaibo. Mosidor bitre tumrare singladi mara oibo. Amar lagi tumrare deshor raza-bashshar samne neoa oibo. Tumra erar samne amar befare shakki dibae. Foyla duniar tamam zatir gese Allar deoa kush-ḳobri toblig kora zorur. Tumrare doria zebla bisaro neoa oibo, ou shomoy kita zuaf ditae, ita loia age kunu sinta ḳorio na. Hou shomoy tumrare zeta hikaia deoa oibo, tumra ota-u ḳoio. Ashole tumra to hino mattae nae, Pak Ruhe-u matiba. Baie baire, bafe fuare zane marar lagi dorai dibo. Fua-fuṛie afon ma-bafor birudde gia, ma-bafre kun ḳoraibo. Ar amar lagi hoḳole tumrare ginnaibo, oile hesh forzonto ze ṭikia roibo, he rehai faibo. “Ze tilaot ḳorer he buzouk, bezuita mosibotor ginnar i siz ze zagat aoar ḳota nae, i sizre zebla ono deḳbae, ou shomoy zera Ehudia zilat asoin, tara bagia faṛia elaḳat zauk. Sator ufre zera roiba, tara lamat lamia kunta neoar lagi goror bitre ar na hamauk. Ḳetor maze zera roiba, tarar gotror saddor neoar lagi baṛit na auk. Ou shomoy zeta beṭintor hurutta oita, ar zera huruttare bukur dud ḳaoaira, tarar boṛo zobor mosibot oibo. Tumra dua ḳoro, ita zanu shitor dino na oy. Ou shomoy to oto bezuita ḳoshṭo oibo, zeta duniar foyla tone aiz forzonto kunudin oise na, ar kunudin oito-o nae. Mabude zudi i shomoyre ḳomaia na dita, te ḳeu zinda roilo na one. Oile Allae tan fosond ḳora bonda oḳlor lagi i shomoy ḳomai disoin. Hi shomoy ḳeu zudi tumrare ḳoy, ‘Huncho ni, al-Mosi ono aisoin,’ ba ‘Deḳo, ounu tain,’ te tumra ita ekin ḳorio na. Ḳaron bout bonḍoe aia ḳoibo, ami-u al-Mosi, ar bout bonḍo nobi-o aiba. Shombob oile tara Allar fosond ḳora bonda oḳolre-o duka dia be-fote nita ḳori bout keramoti-muzeza deḳaiba. Oile tumra hushiar roio, ami to tumrare age-u ita hal-hokikot zanai dilam. “Ou mosibotor shomoy faronir bade, Shuruz andair oizibo, sande ar for dito nae. Tera oḳol asman taki kulia foṛizibo, asmanor kunu shoktiala siz-u ṭik-ṭak roito nae. Ou shomoy manshe deḳba, bin-Adome Allar kudroti zalal ar shan-tozollie, megor ṭukrat oia duniat toshrif anra. Tain firista oḳolre duniar eḳ mata taki aroḳ matat faṭaia, Allar fosond ḳora bonda oḳolre sairobae tone dola ḳorba. “Ḍumur gasor bae saia ilim ḳamai koro. Gasor ḍal-fala norom oia zebla noya kuṛi baroy, ou shomoy tumra buzilao gormor din aichche. Te ou laḳan tumra zebla deḳbae ita hoḳolta goṭer, dekia buzilio, bin-Adom-o daro aichchoin. Ḳali daro nae, tain aia duaro ṭukaira. Ami tumrare hok kota ḳoiram, ita na goṭa forzonto i zomanar manush fuṛaita nae. Asman-zomin hoḳolta binash oizibo, oile amar kalam hamesha ḳaim roibo. “Hou din ar hi shomoyor befare ḳali amar gaibi baf bade ar ḳeu zanoin na. Asmani firista ba ḳas mayar zone-o zanoin na. Tumra hushiar o, kial ḳori solo ar dua ḳoro. Hi din kun shomoy aibo, tumra ḳeu to zano na. Ola eḳ manshor laḳan hi din aibo, zein bidesh zaoar shomoy tan gulam oḳlor ato hoḳolta shomzai dia zarzir ḳam buzai dila. Ar sokidarre ḳoila hozag roito. Tumra-o oula hozag roio. Baṛir malik kun shomoy aiba, hainja bala, maz raite, fotabala na fozore aiba, ikan to tumra ḳeu zano na. Tain aḳta aile zanu na deḳoin, tumra gumai roiso. Ami tumrare zela ḳoilam, hoḳolre-u oula ḳoiram, hozag ro.” Azadi Id ar Ḳamir Saṛa Ruṭir Idor ḳali dui din baki roise. Boṛo imam ar moulana oḳole, Hozrot Isare manshor aforḳe doria zane marilibar danda lagaila. Tara ḳoila, “Idor shomoy tare dortam nae. Dorle manshe gonḍogul lagai dito fare.” Isa ou shomoy Bayt-Ania gaur fosa-kusṭo bemari Saimonor baṛit asla. Ono boia tain ḳana ḳaira, aḳta-u eḳ beṭi manshe sinor eḳ butolo ḳori kub dami kaṭi ator loia aia, butol bangia hoḳol ator tan matat ḍali dilo. Ita dekia hino azir kunu kunu zone na-kush oia eḳe-oinne ḳoilo, “I ator fuṭain ḳene borbad ḳora oilo? I fuṭin besile to tin-sho dinar faia gorib oḳolre bilai deoa gelo one.” Otar lagi tara beṭire boḳa-zoḳa ḳorla. Oile Isae ḳoila, “Oise, tanre ar kunta ḳoio na. Tain to amar lagi kub shundor ḳam ḳorsoin. Gorib oḳol to hamesha-u tumrar loge roiba. Tumrar zebla mone sae tarare shaijjo ḳortae farbae. Oile amare to hamesha faitae nae. Besaṛie zeḳan farsoin oḳan-u ḳorsoin. Ein aia amar gotro ator ḍalia, dafon-ḳafonor lagi amare age-u zuit ḳorsoin. Ami tumrare hok kota ḳoiar, duniar zekunu zagat Allar kush-ḳobri toblig korar shomoy, ou besaṛire mono ḳorar lagi, tan i ḳamor ḳota ḳan-o ḳoa zaibo.” Bade tan barozon sahabir mazor eḳzon, en nam Ihuda Iskariat, ein Isare doraia deoar lagi boṛo imam oḳlor gese gela. Imam oḳole hunia kub kushi oia ḳoila, “Tare doraia dile tumare ṭeḳa dimu.” Teu Ihudae tanre dorai deoar shuzug tukanit roilo. Ḳamir Saṛa Ruṭir Idor foyla din, Azadi Idor lagi meṛa-baichcha zobo ḳora oito. Erdae sahabi oḳole Isare zikaila, “Huzur, amra kun zagat gia afnar lagi idor ḳana tiar ḳortam?” Ou Isae tan duizon sahabire ḳoila, “Tumra ṭauno zao. Gia deḳbae hono eḳ beṭa manshe ḳoyladi fani boria nira. Tumra tan ḳore ḳore zaio. Tain ze baṛit gia hamaiba, hou baṛir malikre tumra ḳoio, ‘Sab, murshide ḳoisoin, sahabi oḳolre loia ami zeḳano Azadi Idor ḳana ḳaitam, hou musafirḳana ḳan deḳai deukka.’ Tain tumrare ufor talat hazail-faṛail eḳ boṛo kuṭa deḳai diba. Tumra ono hoḳolta tiar ḳorio.” Teu sahabi oḳol gia ṭauno hamaila. Hamaia Isae zelaḳan ḳoisla, ṭik ou laḳan hoḳolta faila ar idor ḳana tiar ḳorla. Hainja bala Isae tan barozon sahabire loia ono aila. Aia ḳani kaoar shomoy tain ḳoila, “Ami tumrare hok kota ḳoiram, tumrar mazor eḳzone-u beimani koria amare dorai dibo, he oḳon amar loge boia ḳar.” Ikan hunia tara kub bezar oigela. Ar eḳ ek kori zikaila, “Huzur, i zon kita ami ni?” Tain ḳoila, “He ou barozonor mazor-u eḳzon. He oḳon amar loge talo at harar. Bin-Adomor moutor befare Asmani Kitabo zela leḳa ase, tan mout to oula-u oibo, oile afsus hou manshor lagi, ze tanre doraia dibo. Duniat tar zonom na oa-u, tar lagi bout bala asil.” Ḳanat roisoin, ou shomoy Isae ruṭi ato loia Allar shukria adae ḳoria, siṛia ṭukra ṭukra ḳori sahabi oḳlor ato dia ḳoila, “Ou neo, mono ḳoro ita amar shoril.” Bade tain anguror shorbotor fiala loia Allar shukria zanaia erare dila. Era hoḳole ou fiala taki shorbot ḳaila. Isae ḳoila, “Ḳao, mono ḳoro ita amar lou. Ou lour zoriae Adom zatir boutor basibar lagi noya usilla ḳaim ḳora oibo. Ami hasa ḳota ḳoiram, zei forzonto Allar bashshait dakil oia ami anguror shorbot na ḳaisi, oto din i laḳan shorbot ar ḳaitam nae.” Heshe hoḳole mili ek gozol gaia, gor taki bar oia Zoytun faṛo gelagi. Faṛo gia Isae tan sahabi oḳolre ḳoila, “Tumra hoḳole-u to amare falaia bagibae. Allar kalamo ase, ‘Ami falor raḳalre marilimu, teu falor meṛain sairobae sitriziba.’ Oile amare murda taki zinda ḳorar bade, tumrar age-u ami Galilo zaimugi.” Fitore tanre ḳoila, “Huzur, hoḳol bagi gele-o ami bagitam nae.” Isae ḳoila, “Te huno, ami tumare ḳoiram, aiz fotabala murgae duibar bang dibar age-u, tumi tinbar ḳoibae, tumi amare sino na.” Oile Fitore aro boṛo golae ḳoila, “Huzur ou kita ḳoin, afnar loge zudi amar moron-o oy, ta-o ami kunumonte-u ḳoitam nae ami afnare sini na.” Hoḳol sahabie-o ou laḳan ḳoila. Bade Hozrot Isae tan sahabi oḳolre loia Getshimani namor eḳ bagano aila. Aia tain erare ḳoila, “Ami zoto shomoy dori dua ḳormu, oto shomoy tumra ono boat roio.” Oḳan ḳoia tain Fitor, Iakub ar Hannanre tan loge raḳla, monor duk ar zalae tain boṛo toklif faila. Tain erare ḳoila, “Duke amar zan baroi zargi. Tumra hoḳol ono ro ar hozag taḳo.” Ḳoia tuṛa horia gia tain maṭit soizdat foṛia aroz ḳorla, shombob oile i mosibotor oḳtḳan horizibar lagi. Tain ḳoila, “O abba, amar oli, tumi to hoḳolta-u ḳortae faro. Tumi amar ufor taki aneoala ou mosibotḳan horailao. Oile ita amar ichchae nae, tumar morzi mafik-u ouk.” Soizda taki uṭia tain sahabi oḳlor gese aia deḳla, era gumai gesoin. Ou tain Fitorre hozag kori koila, “Saimon, tumi gumai gelae ni? Ekḳan gonṭa-o hozag roitae farlae na ni? Hozag ro, forikka taki bastae ḳori dua ḳoro. Dilor maze nisoy kial ase, oile ḳaya to ḳomzur.” Bade tain hirbar gia hou eḳoi dua ḳorla. Firia aia deḳla, era hirbar gumai gesoin, gume tarar souk falai der. Tara Isare kita zuaf dita, kunta buzla na. Tin nombor bar tain aia erare ḳoila, “Tumra deki oḳono arame gumairae. Aichcha oise, shomoy aichche to. Deḳrae ni, bin-Adomre gunagar oḳlor ato shomzai deoa or. Uṭo, amra roana dei. Amare zegie dushmonor ato dorai dibo, he aia azigese.” Tain erar loge mato roisoin, ou shomoy Ihuda hono ailo. He asil barozon sahabir mazor eḳzon. Tar loge oia aro boute laṭi-soṭa-toluar loia ailo. Boṛo imam, moulana ar murobbi oḳole erare faṭaisoin. Tanre zegie doraia dito, he tar logor erare age hikaia disil, “Ami gia zen galo hunga dimu, ein-u hou zon. Tumra enre bondi koria kub shabdane loia zaio.” Teu Ihudae shuza-shuzi Isar gese gia ḳoilo, “Huzur!” Ḳoia he tanre hunga dilo. Loge loge tara aia Isare dorililo. Tan ḳandat zera ubat asla, era eḳzone nizor toluar bar ḳoria fordan imamor gulamre sed marla, sedor loge tar ek kan ḳaṭia foṛigelo. Isae ota manshore ḳoila, “Kita ba, ami kunu sur-ḍaḳait ni, tumra deki laṭi-soṭa-toluar loia amare dorat aiso? Ami to forteḳ din Baytul-Mukaddoso gia tumrar samne-u talim ditam. Ou shomoy to tumra amare dorlae na. Nisoy Allar kalamor ayat to folite oibo.” Tanre bondi korte-u tan hoḳol sahabi tane toia bagi gela. Ḳali eḳzon zuane ekḳan longi findia tan ḳore ḳore gelo. Oile manshe zebla tare-o dorta saila, he tar longi falaia lemṭa oia douṛaia bagilo. Ou manshe Hozrot Isare doria hari fordan imamor gese loia gelo. Hono boṛo imam oḳol, murobbi ar moulana oḳol-o ekḳano dola oila. Sahabi Fitor Isar ges tone duroi hori hori roia tan ḳore ḳore gia fordan imamor baṛir uṭano gela. Gia hono faradar oḳlor loge milia aguin tabanit boila. Boṛo imam oḳole ar fotua komiṭir hoḳol manshe Isare zane marar lagi kunu nalish tukaila, oile faila na. Mozliso Isar birudde boute misa shakki dile-o, tarar shakkir mil oilo na. Teu aro ḳoyzone tan birudde ou misa shakki dilo. Tara ḳoilo, “Amra hunchi, he ḳoise, manshor ator banail Zeruzalemor ou Kaba Shorif, ami bangilimu, ar tin dinor maze kunu manshor at na lagaia ami arokkan banaimu.” Oile erar shakki-o millo na. Heshe fordan imam ubaia hoḳlor samne Isare zikaila, “Oba, tumi kunu mator zuaf ditae na ni? Ita manshe tumar befare kita shakki dira, hunrae ni?” Oile tain kunu zuaf na dia nirai roila. Fordan imame tanre hirbar zikaila, “Tumi kita Allatalar oada ḳora hou al-Mosi ni, tan ḳas mayar zon Ibnulla ni?” Tain zuaf dila, “Ji oy, ami-u hein. Afnara deḳba, ami bin-Adom arshe-azimo Alla Rabbul Alaminor ḍainor toḳto boat asi. Ar deḳba, ami behesti megor kuṭit oia duniat toshrif aniar.” Ikan hunia-u fordan imame nizor finnor ḳafoṛ siṛia ḳoila, “Ar kunu shakkir zorur ase ni? Afnara nizor ḳane-u to hunla, he shiriki korlo. Te oḳon afnara kita ray diba?” Ou tara hoḳole tane dushi shaibosto ḳoria, zane marilibar hukum dilo. Ḳeu ḳeu tan ufre sef dilo. Tan muk bandia gushi maria ḳoilo, “Hoi, tuin bule nobi, te oḳon ohi kos na.” Bade sifai oḳole-o tane nia mair-doir ḳorlo. Fitor zebla lamat uṭano asla, ou shomoy fordan imamor eḳ bandi beṭi tan ḳandat gelo. Gia tanre aguin tabanit dekia, bala ḳori tan bae saia hari koilo, “Afne-o to ou Nasarotor Isar loge asla.” Fitore oshikar ḳoria ḳoila, “Na go, tumi ou kita ḳoirae? Ami ita kunta-u zani na, buzi-o na.” Oḳan ḳoia Fitor geiṭor daro gela, ar ou shomoy murgae bang dilailo. Bandi beṭie zebla deḳlo, Fitor ono gia ubaisoin, ou tan ḳasat uba manshore gia tai koilo, “Ou beṭa-o erar logor eḳzon.” Fitore hirbar na ḳorla. Oile tan ḳandat zera uba asil, tuṛa bade tara ḳoila, “Tumi nichchoy erar logor, tumar baṛi-o to Galil zilat.” Fitore ḳoila, “Allar gozob foṛouk, ami kosom ḳaia ḳoiar, tumra ou zar ḳota ḳoirae, tare ami sini-o na.” Oḳan ḳoite-u murgae duara bang dilo. Bang hunia-u Fitoror mono oigelo, Isae ḳoisla, “Murgae duibar bang dibar age-u tumi tinbar ḳoibae, tumi amare sino na.” Oḳan mono oite-u tain au au ḳori kandon dorla. Boṛo imam oḳole sobre uṭia murobbi oḳol, moulana ar fotua komiṭir hoḳlor loge foramish ḳoria, Hozrot Isare bandia Ruman hakim Filator gese loia gela. Gia harle hakim Filate Isare zikaila, “Tumi kita Ihudi oḳlor bashsha ni?” Tain ḳoila, “Afne ṭik kota-u ḳoira.” Boṛo imam oḳole tan name bout nalish dila. Filate hirbar ḳoila, “Tumi kunta zuaf ditae na ni? Deḳrae ni, tara tumar birudde ḳoto nalish der.” Oile Isae kunu zuaf na deoae Filat taijjub oigela. Azadi Idor shomoy hakime deshor manshor fosond mafik, eḳzon azotire ḳalas dita. Ou shomoy Barabba namor eḳzon manush zelo asil. Shongramor shomoy he fouzor loge roia manush kun ḳorsil. Manshe Filator gese aia dabi zanaila, “Afne afnar nizor reoaz mafik kam ḳoroukka.” Tain zikaila, “Tumra sairae ni, ami Ihudi oḳlor bashshare saṛi ditam?” Filate zanta, boṛo imam oḳole ingsha ḳoria Isare nia tan ato disoin. Boṛo imam oḳole manshore uskaia dila, manshe Isar mukti na saia Barabbar mukti sain. Erdae Filate hirbar manshore zikaila, “Te tumra zare Ihudir bashsha ḳo, tare ami kita ḳortam?” Tara hoḳole sillani lagailo, “Tare solibo deo.” Tain ḳoila, “Ḳene, he kita dush ḳorse?” Oile manshe aro zure zure sillaia ḳoilo, “Solibo deo.” Teu Filate tarare kushi korta ḳori Barabbare ḳalas dilaila, ar Isare besh ḳori sabuk maria, solibo loṭḳaia zane marar hukum dila. (Solib oilo laḳṛidi banail manshore loṭḳaia marar eḳ zinish.) Bade sifai oḳole Isare doria fordan hakimor baṛir bitre loia gela. Hono tara aro sifai oḳol dola ḳorla. Tara Isare baingoni rongor bashshai lebas findaila, ar gosa-ḳaṭa dia mukuṭ banaia tan matat dila. Bade tara moshkora ḳori misil dilo, “Ihudir bashsha, marhaba.” Ar eḳ laṭi ania bare bare tan matat marlo, gotro sef dilo, tane ijjot deḳanir ban ḳoria tan samne aṭu gaṛia boilo. Ou laḳan ṭaṭṭa-moshkora ar bettomizi korar bade tan finnor baingoni lebas kulia, tan nizor ḳafoṛ findailo ar solibo nia zane marilito ḳori roana dilo. Tara loia zaira ou shomoy Kurini elaḳar Sikondor ar Roufor baf, Saimon namor eḳzon manush gau taki ou fotedi aṭia zaoat asla. Sifai oḳole zur ḳoria enedi hou solib boaia nila. Tara Isare Golgata, mani ‘Kollar Saṛ’ namor zagat loia gela. Hono nia tanre mura namor oshud furail anguror shorbot ḳaite dila, oile tain ita ḳaila na. Bade tara tanre solibo, mani gaso loṭḳailo. Sifai oḳole tan ḳafoṛ-sufoṛ baṭia neoar lagi loṭari maria baiggo forikka ḳorlo. Biane noyṭar shomoy tara tanre zane marar lagi solibo gatilo. Ar tan oforad-namar maze leḳlo, “Ihudir bashsha.” Tara duizon ḍaḳaitre-o tan loge solibo loṭḳailo, eḳzon ḍain galat, oinnozon bau galat. Erdae Allar kalamor ou ayat-o foligelo, “Tanre naforman oḳlor loge gona oise.” Hou fotedi zera zaoat asil tara mata laṛaia Isare siṛaia ḳoilo, “Oi mia, tumi bule Kaba gor bangia tin dinor maze hirbar banaitae farbae! Te oḳon solib taki lamia aia nizor zan basao na.” Boṛo imam ar moulana oḳole-o tanre siṛaia mata-mati korla, “He to manshor zan basaito, oḳon nizor zan basaito farer na. He bule oada ḳora hou al-Mosi, Boni Israilor bashsha! Te farle oḳon solib taki lamia auk, teu amra-o ota dekia iman anmu.” Tan ḍaine-baue zerare solibo loṭḳail oisil, tara-o tanre siṛailo. Bade beil duifor taki zuhoror bad forzonto tin gonṭa asta desh andair oigelo. Erbade-u tain kub zure zure ḳoila, “Eloi, eloi, lama sabaktani,” mani, “O amar Alla, amar Moula, tumi ḳene amar log saṛi dilae?” Ou shomoy zera tan daro uba asil, tara ikan hunia ḳoila, “Huno, huno, he Hozrot Ilias nobire ḍaḳer.” Oḳan hunia eḳzon manshe douṛaia gia ekḳan tena ania ṭenga anguror shorbotor maze bizaia, eḳ laṭir matat bandia usa ḳori tanre ḳaite dilo. He ḳoilo, “Ouk, deki na Iliase tare lamaia neoat ain ni.” Heshe Isae zure aoaz ḳoria aḳeri dom falaia inteḳal ḳorla. Loge loge Zeruzalemo Kaba goror Herem Shorifor fordaḳan, ufre taki tol forzonto siṛia dui ṭukra oigelo. Sifair ze ofisar hono fara deoat asla, ein Isar moutor i halot dekia ḳoila, “Nichchoy, ein-u asla Allar ḳas mayar zon Ibnulla.” Ḳoyzon beṭi manshe-o duroi ubaia ita deḳla, erar maze asla Mogdilini Moriom, Iusi ar huru Iakubor ma Moriom, ar Bibi Salumi. Isa zebla Galilo asla, ou shomoy ou beṭin hamesha tan loge loge roita ar tan kezmot ḳorta. Aro bout beṭi manush, zera tan loge oia Zeruzalemo aisla, tara-o ita deḳla. I din asil intezamor din, mani Ihudir Zummabaror agor din, ou din shuruz ḍubar bade tone kunuzat ḳam ḳora haram asil. Erdae ou biali bala fotua komiṭir ijjoti montri, Arimatia gaur Iusuf namor eḳzon manshe, shaosh ḳoria hakim Filator gese aia, Hozrot Isar lash nita saila. Allar bashshai kaim oar lagi ein bar saoat asla. Filate hunia kub taijjub oigela zen, Isae oto zoldi kori inteḳal formaisoin. Erdae tain sifair subedarre ania zikaila, hasau Isar ruhu baroi gese ni. Subedare zebla ḳoila, “Ji oy, tain mara gesoin”, ou Filate Isar lash Iusufor zimmae shomzai dila. Iusufe gia ḳafonor ḳafoṛ ḳorid ḳori ania, Isar lash solib taki lamaia, ḳafon findaia, fattor ḳaṭia banail ek koyboror maze tanre dafon ḳorla, i laḳan ḳoyboro maṭi deoa lage na. Erdae tara boṛo eḳ fattor goṛiaia ania ḳoyboror muko dila. Ou shomoy Mogdilini Moriom ar Iusir ma Moriome deḳla, tanre kun zagat dafon ḳorsoin. Tarar zummar din shesh oia harle Mogdilini Moriom, Iakubor ma Moriom ar Bibi Salumie, Hozrot Isar lasho maḳanir lagi kushboy-ala moshla loia anaila. Haftar foyla din biane, mani Robibare fozore shuruz uṭar loge loge-u era tan ḳoyboror ḳasat gela. Ou shomoy tara eḳe-oinne zikaila, “Ḳoyboror mukor ou fattor ḳe horaiba?” Mati mati tara saia deḳla, i fattor horail oigese. Fattorṭa asil kub boṛo. Bade tara ḳoyboro hamaia deḳla, eḳ zuan beṭae dola ḳafoṛ findia ḍain galat boi roisoin. Ene dekia tara kub taijjub oigela. Ou hein ḳoila, “Taijjub oio na go. Tumitain to Nasarot gaur Isare-u tallash ḳorrae, zenre solibo gatia zane mara oise? Tain oḳon ino nae, tanre zinda ḳora oise. Dekizao, ou zagat-u tanre dafon ḳora oisil. Te tumitain oḳon zao, gia tan sahabi oḳolre ar Fitorre-o ḳo, tain age zelaḳan ḳoisla, oula tumrar age Galilo zaira. Tumra hono gele tan doroshon faibae.” Ikan hunia beṭinte ḳoybor taki bar oia douṛaia bagila. Tara taijjub bonigela, ḍoror suṭe ḳeurore kunta ḳoila na. Haftar foyla din fozor oḳto Isa murda taki zinda oia uṭla, ar foyla-u Mogdilini Moriomre doroshon dila. Ou Moriomor log taki tain shatgu zinnat saṛaisla. Tan doroshon faia-u Moriome gia Isar logor hoḳolre ḳobor zanaila. Ou shomoy tara ḳanda-ḳaṭi ar ahazari korat asil. Oile tain zinda oisoin ar Moriomre doroshon-o disoin, ita tara ḳeu ekin ḳorla na. Bade tan duizon ummote aṭi aṭi gau baedi roana oila, ou shomoy Isae tan surot bodlaia tarare doroshon dila. Tara gia baki hoḳolre ou ḳobor zanaila. Oile tarar ḳota-o era ekin ḳorla na. Heshe Hozrot Isae tan egaro zon sahabire doroshon dila. Ou shomoy era ḳaoat asla. Murda taki zinda oar bade zera tanre deḳsil, tarar ḳota ekin na ḳorae, erar imanor ḳomzuri ar dilor na-humarir lagi tain erare domḳaila. Ar ou sahabi oḳolre ḳoila, “Tumra duniar tamam zagat zao, gia hoḳol manshor gese Allar batail kush-ḳobri toblig koro. Ze manshe iman ania toubar gusol ḳore, he-u rehai faibo. Ze manshe iman anto nae, he Allar dorbaro dushi bonia shaza faibo. Zera iman anbo, erar maze ou nishana deḳa zaibo: amar name tara zinnat saṛaibo, noya noya bashae gaibi buli matibo. Tara zati hafre ato loiba, bezuita bishakto kunta ḳaile-o tarar kunu ḳeti oito nae. Ar kunu bemarire ataia dile bemar shifa oizibo.” Sahabi oḳlor loge batchit ḳorar bade Hozrot Isare arshe-azimo tulia neoa oilo. Hono tain Alla Pakor ḍainor toḳto toshrif raḳsoin. Bade sahabi oḳole hoḳol zagat gia toblig korla. Hozrot Isae erar mazdi ḳam ḳorla, ar erare keramoti ḳamor takkot dia forman deḳaila, era zeta toblig korra, ita hasa. Amin. Erlagi oḳon ami-o adi-onto hokkolta tallash ḳoria, eḳ ek kori lekia afnare zanani kan bala mono ḳorlam. Oḳan taki afne shomzita farba, afne age zeta talim hunchoin, ita ekkebare ṭik. Raza Herude zebla Ehudia zila salaira, ou shomoy Zeruzalem ṭauno Baytul-Mukaddosor imam oḳlor mazor eḳzonor nam asil Zakaria. Tain Boni Israilor mul imam Harunor ḳandanor Abia dolor manush. Tan bibir nam Elisabet, ein-o Harunor bongshor manush. Era duiozon-u Allar nozoro kamil dindar asla. Mabudor hoḳol hukum-ahkam shullo-ana adae ḳorta. Oile era asla niaoladi, Bibi Elisabet oila aṭkura bemari. Ou halote duiozon murobbi oigesoin. Ermaze oinno dolor imamotir din shesh oia tan nizor dolor imamotir bari ailo, teu Zakaria Allar goro imamotit asla. Imamoti ḳamor niom mafik loṭari maria tane fosond ḳora oilo, zate tain Baytul-Mukaddosor fobitro Herem Shorifo hamaia agor-kushboy zalain. Tain bitre ota zalaira, ar bare bout manshe dua-durud ḳorra. Aḳta-u agor-kushboy zalanir ṭebulor ḍainedi Allar eḳzon firistae tanre doroshon dila. Firistare dekia-u tan dil ḳafigelo, zano ḍor ailo. Firistae ḳoila, “O Zakaria, ḍoraio na. Huno, Allar dorbaro tumar dua ḳobul oise. Tumar bibi Elisabetor goro eḳ fua oiba, tumi en nam rakio Ehia. Ou fute tumar zindegit bout kushi baṛaiba, tain zonom loae aro bout zon kushi oiba. Ein to Mabudor nozoro bout boṛo ijjoti oiba. Zindegie kunudin-u anguror shorab ba kunuzat nisha ḳaita nae. Tan maʼr feṭo taḳte-u Pak Ruhe kamil oiba. Ar Boni Israilor bout manshore tarar Mabud Allar bae firaia anba. Tain Ilias nobir laḳan himmot ar takkote malikor age oia aiba. Aia baf oḳlor dilre aolador bae, ar naforman oḳlor dilre forezgarir bae firaiba. Ou laḳan Mabudor lagi eḳ dol bondare tain furafur tiar ḳorba.” Ita hunia Zakariae firistare ḳoila, “Er forman kita, ami ḳemne ekin ḳortam? Ami to buṛa oigesi, amar bou-o ekkere murobbi oigesoin.” Firistae ḳoila, “Ami Zibrail, ami Allar samne azir taki. Tumar loge batchit ḳoria, ou kush-ḳobri tumare zananir lagi-u Allae amare bezisoin. Dekio, amar ḳota shomoy moto folibo. Oile amar mat ekin na ḳorae, ikan folibar ag forzonto tumi buba bonizibae, kunta mattae fartae nae.” Ibae manshe Zakariar lagi bar saira. Baytul-Mukaddosor bitoror ou pak zagat tan deri or dekia, tara hoḳol sintat foṛigela. Bade Zakaria bar oia aila, oile tain kunta-u matta farla na. Tain buba oigela ar ishara-asharae buzaila. I halot dekia manshe buzilila, pak zagar bitre tain kunu doroshon faisoin. Imamoti ḳamor bari shesh oia harle, tain nizor baṛit gelagi. Erbade tan bibi Elisabetor feṭo hurutta ailo, erdae Elisabet fas mash baṛir bare bar oila na. Tain ḳoila, “Ita to Allai lila-ḳela. Manshor gese ami ze kuṭar bagi oisi, ou kuṭar shorom horanir lagi tain amar bae kial ḳorsoin.” Firistae aia Bibi Moriomre ḳoila, “Assalamu alaikum; Alla Pake afnare rohomot ḳorsoin, tain afnar loge asoin.” Ikan hunia Moriomor mon fereshan oigelo. Tain mone mone ḳoila, i salamor mani kita? Firistae ḳoila, “O Moriom, afne ḍoraiba na, Allae afnare rohomot ḳorsoin. Hunoukka, afnar goro eḳ fua foyda oiba, afne en nam raḳba, Isa. Tain bout boṛo ijjoti oiba. Tanre ḳoa oibo Ibnulla, Allatalar ḳas mayar zon. Alla Mabude tan ḳandanor murobbi Bashsha Daudor godi tanre diba. Tain dunia aḳerato Boni Israilor ufre bashshai korba, tan bashshai kunudin-u fuṛaito nae.” Teu Bibi Moriome firistare ḳoila, “Ita kilan oibo? Amar to bia-shadi-u oise na.” Firistae ḳoila, “Pak Ruhu afnar ufre nazil oiba, ar Allar kudroti saya afnar ufre aibo. Erdae-u afnar goro ze pak aolade zonom loiba, tanre Ibnulla, mani Allar ḳas mayar zon ḳoia ḍaḳa oibo. Hunoukka, afnar kuṭum Bibi Elisabetor befare manshe ḳoita na ni, tan kunu hurutta-u oita nae? Oile oḳon to ou murobbi boyosho tan feṭo-o soy mashor fua ase. Te Allae faroin na, ila kunta-u nai.” Moriome ḳoila, “Ami to Allar bandi; afnar ḳotamoto-u hoḳolta folouk.” Bade firista tan ges taki bidae oigela. Erbade Bibi Moriom uṛa-taṛa ḳori, Ehudia zilar eḳ faṛia gaut gela. Gia hono imam Zakariar baṛit hamaia, tan bibi Elisabetre salam ḳorla. Elisabete Moriomor aoaz hunar loge loge-u, tan feṭor hurutta aḳta loṛia uṭila. Tain Pak Ruhe kamil oia, zure zure ḳoila, “Duniar tamam beṭintor maze tumi-u ḳofali, tumar feṭor sabal-o ḳofali. Amar munibor ma amar goro toshrif anchoin, amar oto boṛo ḳofal kila oilo? Ami tumar aoaz hunar loge loge-u, amar feṭor gedae-o kushie loṛia uṭisoin. Tumi to ḳofali beṭi, ḳaron Mabude tumare zeta zanaisoin, tumi dile-zane ita ekin ḳorso.” Ou Bibi Moriome ḳoila, “Amar ḳolbe tarif ḳorer amar Mabudor, behesti kushie borigese amar ontor, toraora sand aisoin, obaginir gor. Souk tulia saisoin doyal, ḳangal bandir bae, erdae-u tamam zatie shabash shabash gae, boṛo ḳofali koiba more, zug-zugantor. Shoktimane ḳorla more oto boṛo ḳam, amar lagi oisoin tain kudroti asan, tain-u to Subohan Alla, fak-fobitro tain. Zera tane tazim ḳori roin ḍoraia, rohom ḳoroin tain itare nizor zania, oarishe oarishe rohom, tain-u bilain. Tan-u kudroti ate ḳorsoin moha ḳam, monor gorimae zetae ḳore boṛai shan, itare ḳedaia dia, boitol banaisoin. Raza-bashshain hokir oila godi kuaia, hokir oḳol bashsha oila rohomot faia, usa-nisa hokir-bashsha, tain-u banaisoin. Ufashi kangalre dila bala bala ḳani, bukashir feṭo gelo dami dana-fani, doni zonre ḳali ate, ḳedaia disoin. Tain zela oada ḳorsla moy-murobbir loge, ola-u to asan ḳorsoin Boni Israilre, Boni Israil oila Allar afon gulam. Ibrahimre iad raḳsoin rohom-borkot diba, loge tan ḳandane-o ou doya faiba, siroḳalin ou oada mono rakisoin.” Bibi Moriom tan kuṭum Elisabetor gese tin mash roila, heshe tan nizor baṛit gelagi. Bade miad fura oia harle Elisabetor goro eḳ fua oila. Mabude tanre oto boṛo rohom ḳorsoin hunia, ari-fori ar ḳesh-kuṭum oḳol aia tan loge kushi-bashi korla. Ihudi oḳlor reoaz mafik zonmor aṭ dinor din, fuar mosolmani ar akika ḳoranir lagi tara hoḳol dola oila. Tara saila, bafor namor laḳan fuar nam-o ouk. Oile maʼe ikan manla na, tain ḳoila, “Na, er nam oibo Ehia.” Tara ḳoila, “Tumar ḳesh-kuṭumor maze to ila nam ḳeuror nai.” Teu tara isharae fuar bafre zikaila, tain kun nam fosond ḳoroin. Zakariae tarar ges taki kata-ḳolom nia leḳla, “Tar nam Ehia.” Ou tara hoḳol taijjub oigela. Ar loge loge-u Zakariar zoban kuligelo, tain mat-ḳota matila ar Allar shukria adae ḳorla. Ita dekia ari-fori hoḳole ḍoraigela. Ehudia zilar faṛia oncholor hoḳol manshor muke muke ou ḳobor roṭigelo. Zoto manshe i goṭona hunchil, tara hoḳole-u mone mone sinta ḳori koilo, boṛo oia harle i fua kita oibo. Ḳaron Mabudor kudroti at tan ufre asil. Bade fuar baf Zakaria, Pak Ruhe kamil oia ou gaibi kobor ḳoila, “Shukria zanai ami bondae Alla Mabudor, asan ḳorsoin tain nize afon Israilor, kial ḳori korla azad nizor gulam dol. Amrar lagi fosond ḳorla Daud ḳandanre, bol-takkoti kanḍarire anla oḳan tone, deḳailae doyal more nazat ḳorra zon. Nobi oḳole zobandi koisla bout age, tain-u ḳoaisla ita nobi oḳlor muke, takkoti kanḍari-u oiba Daud kulor bol. Dushmon oḳlor ḳobza taki tain basaila, gin-ingsha ḳorra taki oḳon fana dila, amrare basaila aia doyal Moular zon. Basaila amrare ḳali moy-murobbir ḳatire, ḳosom ḳora pak oada furanir niote, moy-murobbire zoban deoae amra basilam. Ḳosom ḳori oada ḳorsla doyal Allae, Ibrahimre zanaila tain nazator ufae, Ibrahim nobi-u oila amrar asol baf. Ore amar mayar fut Ehia babaji, tumare to ḍaḳa oibo Allatalar nobi, munibor age roia sohi korbae fot. Batai dibae tumi tan bonda oḳolre, guna mafir fot sinba tumar talime, bataia dibae baba nazat faoar fot. Amrar Allar rohom ar hou mohobbote, behesti nuror eḳ shuruz aiba ufrete, amrar ufre aia hari rakiba nozor. Mout ar andarir gato zera ḳaṭae din, nuror fot deḳba tara ḳoria ekin, amrare-o shantir fote salaiba ou zon. Ou huzur nazil oia deḳaiba kudrot, tain-u hou oada ḳora Allai rohomot.” Bade Ehia aste aste boṛo oila, loge oia tan ruhani bol-o baṛilo. Boni Israilor samne kula-mela zair oibar ag forzonto, tain morubumir maze din ḳaṭaila. Ou shomoy Ruman bashsha Agosto Ḳoisore hukum dila, tan asta bashshair hoḳol prozae zarzir nam leḳanir lagi. Siriar hakim Kuriniasor amolo, ou foyla bar manush gonar lagi nam leḳail oilo. Teu nam leḳanir lagi hoḳol manush zarzir buniadi gaut gela. Ou laḳan Iusuf-o nam leḳanir lagi Galil zilar Nasarot gau taki Bashsha Daudor gaut aila. Tain to Daudor ḳandanor manush. Gaur nam Betelham, iṭa Ehudia zilat. Bibi Moriom-o ou Iusufor loge oia nam leḳanit gela. Ou Iusufor loge-u tan shadi ṭik oisil, ar tan feṭo ou shomoy hurutta asil. Betelhamo taḳte-u Moriomor hurutta oibar bishe dorlo. Ar tan foyla fuar zonom oilo. Oile hino kunu meman ḳanat taḳar zaga millo na, erdae Moriome ou huruttare tenadi beraia gual goror ḳeror gamlat hutai toila. Ou Betelham gaur ḳandat bondor maze, meṛar raḳal oḳole raitkur bala tarar meṛa fara deoat asil. Aḳta-u Allar eḳ firista tarar samne aia doroshon dila, ar Mabudor nuror teze sairobae for oigelo. Ita dekia raḳal oḳol ḍoror suṭe bedisha bonigela. Oile firistae tarare ḳoila, “Tumra ḍoraio na. Ami tumrar lagi kub kushir ḳobor loia aisi. I kush-ḳobri duniar tamam manshor lagi. Huno, tumrar toraneala aiz Daudor gaut zonom loisoin. Tain-u al-Mosi, tain-u Malik. Tumra gia er forman deḳbae, deḳbae ek kasa huruttare tenadi beraia, gual goror ḳeror gamlat hutaia toa oise.” Ou shomoy aḳta-u hou firistar loge aro bout firistare deḳa gelo. Era Allar zikir-azkar ḳori kori koila, “Asmano Allar lila-ḳela deḳa zauk, duniar bukut tan fiara bondar shanti ouk.” Bade firista oḳol tarar ges taki asmano gia harle, raḳal oḳole eḳe-oinnore ḳoilo, “Ao, amra Betelhamo zai. Mabude amrare ze ḳobor zanaila, ota dekia ai.” Mati mati tara zoldi kori gela, gia Moriom, Iusuf ar ḳeror gamlat hutail ou huruttare faila. Faia ou huruttar befare tarare ze ḳobor zanail oisil, ita tara hoḳolre ḳoila. Tarar mat hunia hoḳole-u taijjub oigela. Oile Moriome hoḳolta dilor maze gatia raḳla, ar mone mone sintat roila. Firista oḳole raḳal oḳolre zela ḳoisla, era ita dekia hunia Allar zikir tarif ḳori kori firot gelagi. Bade zonmor aṭ dinor din akika ar mosolmani koranir bala, tan nam raḳa oilo Isa. Maʼr feṭo aibar age-u firistae ou nam toisla. Ermaze Musa nobir shoriot mafik tarar fak-saf oar shomoy oilo. Teu Isare Mabudor ato shofia dibar niote, Iusuf ar Moriome tane loia Zeruzalem ṭauno aila. Mabudor shoriotor hukum asil, forteḳ zandaror foyla fuare Allar name shofia dite oibo. Erloge, eḳ zuṛa ḍufi faki ba faror duiṭa baichcha kurbani dite oibo, shoriotor ou hukum mafik tara kurbani deoat aila. Ou shomoy Zeruzalem ṭauno Samaun namor eḳzon Allaraia buzurg asla, tain Pak Ruhe kamil. Tain mone mone bar saoat asla, Allae kun shomoy Boni Israilre shanti diba. Pak Ruhu tan loge asla, ou ruhe tanre bataisla, tan moutor age-u Allar oada ḳora al-Mosire tain deḳba. Pak Ruhur isharae Samaun ou din Baytul-Mukaddoso azir oila. Isar ma-bafe-o shoriotor hukum adae ḳorar niote, geda Isare loia ono aila. Ou kamil buzurg Samaune Isare kulo loia Allar shukria adae ḳorla. Tain ḳoila, “O malik, tumar zoban mafik tumar i gulamre oḳon shantie bidae deo. Tumar ḳas proza Boni Israilor gourob to ein-u, bad-baki tamam zatire-o fot deḳanir nur.” Samaune Isar befare ou zeta ḳoila, ita hunia Isar ma-baf taijjub oigela. Samaune tarare dua dila, tain Isar ma Moriomre ḳoila, “Huno, Alla Pakor kial oilo, ou huruttar dorun Boni Israilor bout zone nazat hasil ḳorba, ar bout zon lannoti oiba. Tain ou laḳan eḳ nishana, tan bifokke boute-u matibo. Ota taki tarar dilor hal-hokikot buza zaibo. Ar huno, toluare ḳaṭile zela oy, tumar dilo-o ola dukor sel hamaibo.” Ou shomoy Hanna namor eḳzon beṭi manush-o asla, tain Allar nobi. Tan bafor nam Fanuel, ar ḳandanor nam Ashir. Tan bout boyosh oigese, shat bosor zamair gor ḳoria hari, sourashi bosor forzonto ṛaṛi halote asla. Tain Baytul-Mukaddosor bitre ruza raḳta ar dua ḳorta. Ebadot-bondegir maze rait-din ḳaṭaita, bare bar oita na. Ṭik ou shomoy tain-o ono aia Allar shukria adae ḳorla. Ar zerar dilo ou asha asil, Alla Pake Zeruzalemre azad ḳorba, tarar loge-o tain Isar befare batchit ḳorla. Moriom ar Iusufe Mabudor shoriot mafik hoḳol ḳam shesh ḳoria harle, tarar boshot baṛi Galil zilar Nasarot gaut gelagi. Nabalik Isar boyosh baṛilo, erloge tain shorilor bol ar ilim-aḳole-o mozbut oila. Allar rohomot to tan loge asil. Ihudi oḳlor Azadi Idor shomoy aile Isar ma-baf forti bosor-u Zeruzalemo zaita. Isar boyosh zebla baro bosor, ou shomoy-o hou reoaz mafik tara Zeruzalemo aila. Id shesh oia harle tara baṛit roana dila, oile Isa ou shomoy i dolor loge na gia Zeruzalemo roigela. Tan ma-bafe ikan ṭer faila na. Isa-o dolor bitre asoin mono ḳoria tara eḳdinor fot aguai gela. Gia tarar ḳesh-kuṭum ar logor manshor gese tallash ḳoria tanre faila na. Na faia tanre tukai tukai hirbar Zeruzalemo aila. Tin din tallash ḳoria tanre Baytul-Mukaddoso faila. Tara deḳla, tain moulana oḳlor loge boia tarar boyan hunra, ar nanan musla zikaira. Ar zoto manshe tan mat hunla, tara hoḳole-u tan aḳoldari batchit hunia taijjub bonigela. Tan ma-bafe-o tanre dekia ekkere somkigela. Maʼe tanre zikaila, “Futre, tumi amrar loge ita ḳorlae ḳene? Ami ar tumar bafe ḳoto fereshan oia tumare tukairam.” Isae zuaf dila, “Tumitain ḳene amare tukairae? Zano na ni, ami to amar gaibi bafor goro-u roite oibo?” Tan ma-bafe i mator kunu bed buzla na. Bade tain bar oia ma-bafor loge oia Nasaroto gela, ar tarar ḳotamoto solla. Oile tan maʼe ita hokkolta dilo gatia raḳla. Ermaze Allar mohobbot, manshor maya, boyosh ar ilim-aḳole tain aste aste boṛo oila. Ruman bashsha Tibirio Ḳoisoror bashshair fonro bosor soler. Ou shomoy Fontio Filat asla tan odinor Ehudia zilar hakim, ar Herud asla Galil zilar raza, Herudor bai Filif asla Zituria ar Takuniti zilar raza, ar Lusanias asla Abilini zilar raza. Era hoḳol-u asla Ruman bashshar odine. Ou amolor Ihudi zatir fordan imam asla, imam Hanon ar Kayafa. Ṭik ou shomoy Zakariar fut Ehiar gese morubumi elaḳat Allae tan kalam nazil ḳorla. Teu Ehia nobie Zordan gangor ḳanda-ḳasar hoḳol ḳano gia toblig korla. Ḳoila, guna taki mafi faoar lagi touba ḳoria torikar gusol ḳora zorur. Ehia nobir befare Ishaya nobir kitabo zela leḳa asil, tain oula ḳorla. Leḳa ase, Morubumir maze eḳzone elan ḳorra, tumra malikor fot sohi koro, tan solar rasta oḳol shida ḳoro. Faṛia hokkol nisa zaga boraṭ oibo, usa-nisa ṭillain homan ḳora oibo. Teṛa-beḳa hoḳol fot shuza oibo, gat-gaṛa hoḳolta homan ḳora oibo. Ar duniar manshore toranir lagi Allae nazator ze usilla ḳorsoin tamam manshe-u ita deḳba. Ehia nobir toblig hunia toubar gusol ḳorar niote zera ailo, tain erare ḳoila, “O hafor baichchain, asmani gozob aior dekia zan basanir fot tumrare ḳegie batai dilo? Hasau zudi tumra touba ḳoria taḳo, te er fol-o deḳao. Mone mone ḳoio na, tumra Ibrahimor aolad. Huno, ami koiram, Allae saile to ou fattor oḳol taki-u Ibrahimor aolad banaita farba. Gasor guṛit to kuṛal lagail-u ase. Ze gaso bala fol dore na, i gas ḳaṭia agunit falail oibo.” Ita hunia manshe Ehiare zikaila, “Te amra kita ḳortam?” Tain ḳoila, “Ḳeuror zudi duiṭa kurta taḳe, te zar nai tare eḳṭa deuk. Zar goro dan-saul ase, he-o oula bilauk.” Ḳazna tulra ḳoyzon toshildare toubar gusol ḳorat aia zikaila, “Murshid, amra kita ḳortam?” Tain ḳoila, “Niom taki beshi ṭeḳa adae ḳorio na.” Ḳoyzon sifaie-o zikaila, “Huzur, te amra kita ḳortam?” Tain ḳoila, “Ḳeurore zur-zulum ḳoria ba fando falaia kunta adae ḳorio na. Zarzir betone kushi roio.” Manshe mone mone al-Mosir lagi bar saoat asil, Ehiare dekia tara kub asha ḳorlo, ein-u monoloy al-Mosi. Oile Ehiae tarare ḳoila, “Ami kali fanidi toubar gusol ḳoraiar, te amar bade zein toshrif anra, tain ama taki-o takkot-ala. Tan faor zutar fita gesa kular zuka-o ami nae. Tain aile Pak Ruhu ar aguin dia tumrare gusol ḳoraiba. Tan kula to tan ato-u ase, maṛa deoa dan ou kuladi uaia hari dan nia ugaro tulba, ar susare omon agunit falai zalaiba, ze aguin kunudin nibe na.” Ou laḳan aro bout nosiot ḳoria Ehiae manshor gese kush-ḳobri toblig korla. Oile Raza Herude bout nomunar ḳaraf ḳam ḳorae, ar tar bair bou Herudiare hanga ḳorae, Ehiae tare dushi shaibosto ḳorla. Erdae he tar hoḳol ku-ḳamor loge eoḳan-o baṛailo, he nobi Ehiare zelo haraililo. Ehia nobi zelo hamanir age, tan gese aia zebla bout manshe toubar gusol ḳorra, ou shomoy Isa-o ono aia tarar loge gusol ḳorla. Gusolor bade Isae zebla dua ḳorra, aḳta-u Allar arshor duar kuligelo, ar Pak Ruhu faror surot doria tan ufre nazil oila. Loge loge behesti ou aoaz-o huna gelo, “Tumi-u amar ḳas mayar zon, tumar ufre ami kub kushi.” Onuman tish bosor boyoshor ḳalo Isae toblig kam shuru ḳorla. Manshe zanta tain Iusufor fua. Iusufor moy-murobbi oila, Ali, Mattat, Lebi, Malki, Iyannai, Iusuf, Mattatia, Amuz, Naum, Isli, Naggai, Mahat, Mattatia, Shimio, Iuseḳ, Iyuda, Iuhannan, Risha, Zerbabil, Saltiel, Niri, Malki, Addi, Kasam, Ilmadam, Iyer, Iusa, Eliezer, Iurim, Mattat, Lebi, Shimion, Ehuda, Iusuf, Iunan, Iliakim, Malia, Manna, Mattata, Natan, Daud nobi, Ias, Ubayed, Buaz, Selim, Nahish, Aminadab, Admin, Arni, Hasir, Firuz, Ehuda, Iakub nobi, Isʼhak nobi, Ibrahim nobi, Tareḳ, Nahur, Saruz, Rau, Falez, Aber, Shaleḳ, Kinan, Arfaksad, Sham, Nuh nobi, Lamaḳ, Matushalaḳ, Idris nobi, Iared, Maholail, Kenan, Inush, Shish nobi, Adom, Alla Pak. Isa Pak Ruhe kamil oia, Zordan gango taki uṭia morubumit gelagi. Gia Pak Ruhur isharae eḳlaga sallish din morubumit gurila. Ar Iblis aia tanre forikka salailo. Ou sallish din eḳlagare ruza asla, kunuzat ḳana ḳaisoin na. Erbade tan feṭo buk laglo. Teu Iblise tanre ḳoilo, “Tumi zudi Ibnulla, Allar ḳas mayar zon o, te ou fattorre ḳo na ruṭi oizito.” Isae zuaf dila, “Allar kalamo batail oise, ḳali ruṭi kaile-u manush base na.” Bade Iblise tanre kub usa eḳ zagat loia gelo, nia hari eḳ foloḳe duniar tamam mulluk tanre deḳailo ar ḳoilo, “I tamam mullukor bashshai ar zak-zomoḳ ami tumare dilaimu. Ita hokkoltar malikana amare deoa oise. Ami zare kushi tare ditam fari; ḳali tumi amare soizda ḳorilao, teu i hokkolta tumar oizibo.” Isae tare ḳoila, “Allar kalamo ase, tumi kali afon Mabud Allare soizda ḳorbae, ḳali tan ebadot ḳorbae.” Teu he Isare loia Zeruzalem ṭauno gelo, gia fobitro Kaba gor Baytul-Mukaddosor minarar ufre tane uba ḳoria ḳoilo, “Tumi zudi Ibnulla, Allar ḳas mayar zon o, te deki sain, on taki fal dia lamat foṛo. Kitabo to leḳa ase, Allae tan firista oḳolre hukum diba, ar tara tumare basaiba. Tara nizor atdi tumare doriliba, zate tumar faot kunu fattoror suṭ na lage.” Isae tare ḳoila, “Kitabo leḳa ase, tumi tumar Mabud Allare forikka ḳorat lagio na.” Iblise tar hoḳol nomunar forikka shesh ḳoria, afatoto tan ges taki horia gelogi. Bade Pak Ruhur kudrote Isa Galil elaḳat gela, gia harle tan nam sairobae roṭigelo. Tain honor mosido mosido gia boyan-talim dila, teu hoḳol manshe tan tarif ḳorlo. Ar Isa hou Nasarot gaut aila, ze gaut tain huru taki boṛo oisoin. Ono aia tain nizor niom mafik Zummabare mosido gia kutba foṛat ubaila. Ishaya nobir sohifaḳan tan ato deoa oilo. Tain kitab kulia ou ayat bar ḳorla, ze ayato leḳa ase, Amar dilo Mabudor ruhu boshot ḳoroin, tain-u amare ḳelafoti dia bezisoin, gorib oḳlor gese kush-ḳobri zananir lagi. Ar bondi oḳlor gese azadir ḳota, anda oḳlor gese souke deḳar ḳota, zerar ufre zulum or tarare basanir ḳota elan ḳorar lagi bezisoin. Ar ou ḳota elan ḳorar lagi-o bezisoin, oḳon Mabudor rohomot deḳanir shomoy oigese. Kutba tilaot ḳoria harle, tain kitabḳan aṭaia mosidor motollir ato dia boila, mosidor hoḳol manshe tan bae dian dori sai roise. Tain ḳoila, “Asmani Kitabor i ayat ḳanain, aiz afnara hunar loge loge-u foligelo.” Hoḳol manshe tan tarif ḳorlo, tan muk taki oto shundor boyan hunia taijjub oigelo. Tara ḳoilo, “Ein Iusufor fua nae ni ba?” Ermaze Isae tarare ḳoila, “Afnara nisoy amare ou silleḳ hunaiba, ‘Ḍaktor sab, nizor bemar shifa ḳoro. Kofornaumo bule bout keramoti-muzeza deḳaiso, te oḳon nizor gaut-o ota deḳao na.’ Hunoukka, ami afnaintore hok kota ḳoiram, kunu nobire-u tan nizor gaur manshe manoin na. Ar ikan-o hasa ḳota, Ilias nobir zomanat eḳlaga shaṛe tin bosor kunu meg oisil na, asta desho bezuita nidan asil. Hou shomoy to Israil desho bout ṛaṛi beṭin asla, oile Ilias nobire era ḳeuror gese na bezia, ḳali Sidon deshor Sarifot gaur eḳ ṛaṛi beṭir gese beza oisil. Ar Aliasha nobir amolo Israil desho bout fosa-kusṭo bemari asla, oile era ḳeurore bala na ḳoria, ḳali Siria deshor Namanre bala ḳora oisil.” Ikan hunia-u mosidor shob manush gusae aguin oigela. Tara uṭia tanre ṭelia ḳedaia gaur bare loia gelo, gia gaur kunar ḳaṛa ṭillar ufre nia, dakkadi tole falaito sailo. Oile biṛor maz tone tain aṭia horia gelagi. Bade Isa Galil elaḳar Kofornaum ṭauno gela, gia Zummabare manshore oaz-nosiot ḳorla. Tan oaz hunia manush taijjub oigela, tain to fura himmot-ala zonor laḳan talim dita. Hou mosido zinor asor-ala eḳ beṭa asil. He zure zure sillaia ḳoilo, “O Nasarotor Isa, amrar gese ḳene aisoin? Amrare binash ḳorat aisoin ni? Ami zani afne ḳe, afne-u Allar hou fak-fobitro zon.” Isae tare damki dia ḳoila, “Chup, er bitre taki baroi za.” Zine loge loge-u tare asaṛ mari hoḳlor mazḳano falaia, kunuzat ḳeti na ḳoria saṛia gelogi. Ita dekia manush taijjub bonia mata-mati lagaila, “Ita kita deḳlam? Tain himmot ar ḳemota ḳaṭaia zin oḳolre hukum dein, tara-o deki bar oia zaegi.” Bade hinor hokkol zagat Isar keramotir ḳobor roṭigelo. Mosid taki bar oia tain Saimonor baṛit gela. Saimonor hoṛir kub beshi taf uṭsil, erdae hoḳole Isare kub minot ḳorla. Tain Saimonor hoṛir ḳandat ubaia tafre domoḳ dila. Domoḳor loge loge-u tafe saṛidilo. Beṭie uṭia tarar memandarit lagla. Hainja bala manshe bout zator bemarire loia Isar gese aila. Isae tara hoḳlor gotro atai dia bemar bala ḳorla. Zinor asor-ala-o bout bemari asla, tara-o bala oila. Zin oḳole zure zure sillaia ḳoila, “Afne-u Ibnulla, Allar ḳas mayar zon.” Oile tain itare damki dia muk bond ḳorla. Tarar to zana asil, tain-u Allar oada ḳora hou al-Mosi. Biane uṭia hari, Isa hi gau saṛia eḳ nirai zagat aila. Manshe tanre tukai tukai tan daro ailo, aia minot-ḳajji korlo zate tain tarar gese roin. Oile tain zuaf dila, “Ami aro bout zagat gia Allar bashshair kush-ḳobri toblig kora zorur, ou ḳamor lagi-u Allae amare bezisoin.” Bade tain asta Ihudi deshor mosidainto gia toblig korla. Eḳ din Isa Galil aoror faro uba asla, ou shomoy bout manush Allar kalam hunar lagi tan ḳandat aia ṭelaṭeli lagaila. Isae deḳla, aoror kinaro dukan zalua nao lagail. Nao taki lamia zalua oḳole tarar zal doira. Isa gia Saimon namor eḳ zaluar nao-o uṭia tare ḳoila, naoḳan bashaia kisu fanit nibar lagi. Ḳoia tain nao-o boia manshore oaz-nosiot ḳorat lagla. Nosiot bade tain zalua Saimonre ḳoila, “Naoḳan goin fanit neo ar zal falao.” Saimone ḳoila, “Huzur, asta rait ḳoshṭo ḳoria-o kunu mas faisi na, ta-o afnar ḳotae zal falairam.” Zal falanir bade oto beshi mas zalo hamaila, masor ṭelae zal farizibar dosha. Ou tara shaijjor lagi logor naor zaluare ḍaḳ dila. Tara aia mas doria nao borilila, zalo oto mas hamaisil zen, masor bare duio nao ḍubuḍubu oigelo. Ita dekia, Saimon-Fitore Isar fao-o foṛia ḳoila, “Huzur, ami to gunagar manush, amar ges taki toshrif ḳan neukkagi.” Ḳaron, oto mas dekia Saimon-Fitor ar tan logor hokkole taijjub bonigela. Saimonor logor zalua Zibudiar duio fua Iakub ar Hannane-o ita dekia taijjub oila. Teu Isae Saimonre ḳoila, “Ḍoraio na, oḳon taki ar mas nae, tumi Allar name manush dorbae.” Bade tara nao loia kinarat aila, ar hokkolta toia Isar loge roana oigela. Eḳbar Isa ek gaut gela. Hou gaur eḳ beṭar asta gotor zuṛi nafaḳ fosa-kusṭo bemar asil. Isare dekia-u he tan fao-o foṛia minot-ḳajji lagailo, “Huzur, afnar mone saile to amare ou nafaḳ bemar taki bala ḳorta farba.” Isae at baṛaia tare soia ḳoila, “Oy, ami-o sairam, tumi fak-saf o.” Ḳoar loge loge-u tar bemar ḳomigelo. Bala oia harle Isae tare hukum dila, “Ita ar ḳeurore hunaio na, tumi gia ḳali imam sabre deḳao. Musa nobir shoriot mafik fak-saf oar lagi zela kurbani kora zorur, ou kurbani dile-u manshe zaniliba, tumi bala oiso.” Oile Isar ḳobor sairobae roṭigelo. Erdae tan mukor buli hunar lagi ar bemari oḳol bala oar niote, bout manush tan gese aila. Oile tain kunu na kunu nirai zagat gia hamesha dua ḳorta. Eḳdin Isa talim deoat asla, ou mozliso alim oḳol ar Forishi mozobor bout mullain boat asla. Tara Zeruzalem ṭaun, Galil ar Ehudia zilar nanan gauain taki aisoin. Isar maze Mabudor kudroti bol asil, ou bole-u bemari oḳolre shifa ḳorta. Ermaze ḳoyzon manshe eḳzon obosh bemarire folodi boia loia aila. Tara saila tare nia goror bitre Isar samne toita. Oile biṛor lagi goro hamanir fot faila na. Ou tara salor ufre uṭia, salor sani kulia folo shudda bemarire Isar samne manshor mazḳano lamai dila. Tarar imanor bol dekia Isae ḳoila, “Baire, tumar guna maf ḳori dilam.” Ikan hunia alim oḳole ar Forishi dolor mullainte mone mone ḳoila, “I manushgu ḳegu, he ola shiriki korer? Ḳali Alla saṛa ar ḳeu guna maf ḳorto fare ni?” Tarar dilor sinta Isae buzilila, buzia ḳoila, “Afnara ḳene ila sinta ḳorra? Ami kunḳan ḳoa shuza, tumar guna maf ḳori dilam? Ba tumi uṭia aṭia tumar bisna loia baṛit zaogi? Kunḳan shuza? Te oḳon afnara forman deḳoukka, i duniat guna mafir ḳemota ami bin-Adomor ase.” Oḳan ḳoia-u tain bemari beṭare ḳoila, “Oba, ami tumare ḳoiram, uṭo, tumar ḳeta-balish loia baṛit zaogi.” Ḳoite-u hi bemari beṭa hoḳlor samne ubaia, tar ḳeta-balish loia Allar tarif ḳori kori nizor baṛit gelogi. Ita dekia hoḳol taijjub bonia, Allar tarif ḳori ḍorai ḍorai koila, “Aiz ita kizat keramoti ḳam deḳlam.” Bade Isa bare gela, gia toshil ofiso Lebi namor ek kazna tulrare boat deḳla. Dekia tare ḳoila, “Ao, amar ummot o.” Daot hunia-u Lebie tan hoḳolta falaia Isar loge oia roana dilaila. Bade Lebie tan nizor baṛit Isar lagi boṛo ek kaoa-daoar bebosta ḳorla. Tarar loge bout gushkur ḳazna tulra ar aro manush ḳaoat boila. Teu Forishi ar tarar dolor alim oḳole na-kush oia Isar shagrid oḳolre ḳoila, “Tumra ḳazna tulra ṭogbaz ar naforman oḳlor baṛit ḳana-fina ḳao ḳene?” Isae tarare zuaf dila, “Bala manshor lagi to ḍaktoror zorur nai, oile bemari oḳlor lagi zorur ase. Te ami-o forezgar oḳolre daot deoat aisi na, ḳali gunagar oḳolre daot deoat aisi, zate tara touba ḳoroin.” Bade hou alim ar Forishi oḳole ḳoila, “Ehiar shishio oḳole hamesha ruza raḳoin, dua ḳoroin, ar Forishir shishio oḳole-o ola ḳoroin, te afnar shishio oḳole kunu shomoy-u ḳani bad dein na ḳene?” Isae zuaf dila, “Nosha loge taḳle logor boiratire kunu ufash raḳa zae ni? Oile omon eḳ din aibo, zebla noshare tarar ges taki neoa oizibo. Hou shomoy tara ruza raḳba.” Isae tarare talim dibar lagi ou misal hunaila, ḳoila, “Noya kurtar ṭukra siṛia, ḳeu furan kurtat tali dey na. Ila ḳorle to noyaṭa-o nosṭo oibo, ar noya ḳafoṛor tali to furan ḳafoṛor loge milto-o nae. Furan samṛar tolit ḳeu taza anguror rosh bore na. Borle ou taza roshor fafe toli faṭia rosh ar toli duiota borbad oy. Taza rosh noya tolit toite oy. Ar anguror furan rosh ḳaia hari kunu manshe noya rosh ḳaito sae na. Tara ḳoin, furanta-u moza.” Eḳ Zummabare Isa gom ḳetor ailedi aṭia zaira. Ou shomoy tan shagrid oḳole gomor soṛa siṛia ato goshi goshi kaira. Ita dekia Forishi mozobor ḳoyzone ḳoila, “Musa nobir shoriot mafik to Zummabare zekunu ḳam ḳora haram, te tumra i soṛa siṛirae ḳene?” Isae zuaf dila, “Te Daud nobi ar tan logor hoḳlor zebla feṭo buk lagsil, hi shomoy tara kita ḳorsla, ita afnara foṛsoin na ni? Tain nize Allar goro hamaia fobitro ruṭi kaisla, ar tan logor oḳolre-o ḳaoaisla. Ashole ḳali imam oḳol saṛa ar ḳeu i ruṭi kaoa zaiz asil na.” Bade Isae tarare ḳoila, “Huno, ami bin-Adom-u Zummabaror malik.” Aroḳ Zummabare Isa mosido gia oaz-nosiot ḳorat asla. Hono eḳ bemari beṭa asil, tar ḍainor at bemare hukai gese. Moulana ar Forishi dolor manshe Isare fando falaita ḳori bana tukanit asla. Tara deḳta saila, zummar din tain ḳeurore bala ḳoroin ni, ḳorle tanre dushi banaita farba. Isae-o tarar dilor ku-motlob buzilila. Buzia tain hukna at-ala beṭare ḳoila, “Oba, tumi aia hoḳlor samne ubao sain.” Teu beṭa aia ubailo. Isae tarare zikaila, “Ami afnaintore ekḳan ḳota zikairam, Zummabare kun ḳam ḳora zaiz, bala ḳam na bad ḳam? Zan basani, na zanor binash ḳora?” Bade tain sairo galar hoḳlor bae saia hou beṭare ḳoila, “Tumar atḳan baṛao.” Beṭae tar at baṛailo, ar furafur bala oigelo. Ita dekia hou mulla oḳlor kub gusa uṭlo. Tara foramish salaila, Isare ḳemne tamail zae. Bade Isa dua ḳorar lagi eḳ faṛo uṭila, ar asta rait Allar gese dua ḳorla. Biani bala tan shagrid oḳolre ḍakia ḳandat anla, erar mazor baro zonre fosond ḳoria, tan ḳas sahabi banaila. Ou baro zon oila, Saimon—Isae en noya nam dila Fitor, Saimonor bai Andrias, Iakub, Hannan, Filif, Bortolmoy, Moti, Tumas, Alfir fua Iakub, muktizudda Saimon, Iakubor fua Ihuda, ar Ihuda Iskariat—ou Ihudae bade beimani korsil. Ermaze Isae tan sahabi oḳolre loia ufre taki lamia faṛor feṭo homan eḳ zagat aia ubaila. Hino tan bout ummot dola oisla, Zeruzalem ṭaun ar Ehudia zila taki, doriar faror Shur ar Sidon elaḳa taki-o dol bandi bandi manush aisla. Tara tan boyan hunar kiale ar bemar taki shifa oar niote aila. Ar zarar ufre zinor asor asil, tara-o bala oila. Hoḳol manshe-u tanre at dia soito sailo, ḳaron tan bitor taki kudroti shokti baronie, era hoḳlor bemar ḳomsil. Teu Isae afon shagrid oḳlor bae saia ḳoila, “Tumra zera gorib tumra-u ḳofali, Allar bashshai to tumrar lagi-u. Tumra zoto zonor feṭo buk ase, tumra-u ḳofali, tumra feṭ boria ḳaibae. Tumra zera ḳandirae tumra-u ḳofali, bade to ashibae. “Tumra-u ḳofali, zebla bin-Adomor dae manshe tumrare ginnae, gau taki basia ekgori kore, bodnam gae, ar tumrar nam hunle mukor tu falae. Ila ḳorle tumra kushi oio, furtie nasio, ḳaron behesto tumra bout boṛo furuskar faibae. Zano ni, ou naforman oḳlor baf-dadainte-o Allar nobi oḳlor ufre ola zulum ḳorta. “Haere doni oḳol, tumrar shuk to duniat-u ḳamailirae. Haere feṭ boria ḳaora oḳol, tumra-o buke soṭfoṭ ḳorbae. Haere hae zera oḳon ashirae, tumra ḳanda-ḳaṭi ar ahazari korbae. Haere hae, manshe zebla tumrar shunam gae, zano ni, ota manshor baf-dadainte-o agor amolor bonḍo nobi oḳlor ola shunam gaito. “Tumra zotozon amar torikae soltae sao, ami tumrare ḳoiram, tumra zarzir dushmonre-o mohobbot ḳorio. Zera tumrare ginnae, tumra tarar balai korio. Zera tumrar lagi lannot mange, tumra tarar lagi rohomot saio. Ar zera tumrar bodnam ḳore, tumra tarar lagi dua ḳorio. Ze tumar ek galo soṛ mare, tare arok gal fatia dio. Ze tumar saddor ḳaṛia nito sae, tare kurta-o kulia dio. Zara tumar gese sae, tarare dio. Ḳeu tumar kunu siz nilegi, tar gese ar firot saio na. Huno, tumra manshor ges taki zelaḳan bebohar faitae sao, tumra-o hoḳlor loge ou laḳan bebohar ḳoro. “Zara tumrare maya ḳore, tumra zudi kali tarare-u maya ḳoro, te tumra bahba faitae kila? Ila to naforman oḳole-o eḳe-oinnore maya ḳore. Ar zara tumrar balai kore, tumra zudi kali tarar balai koro, te bahba faibae kila? Naforman oḳole-o to ila ḳore. Ze manshor ges taki tumra ḳorzo faibar asha ase, tumra zudi kali tare-u ḳorzo deo, te kila bahba faibae? Naforman oḳole-o eḳe-oinnore ila ḳorzo dey, he asha ḳore bifodo foṛle he-o hon taki korzo faibo. Te ami tumrare ḳoiram, tumra zarzir dushmonre-o maya ḳorio, tarar balai korio. Bodla faoar asha na ḳoria ḳorzo dio, teu tumrar lagi boṛo boḳshish ase. Tumra Alla Pakor aolad bonbae. Tain to nimoḳ-haram ar ḳaraf manshore-o doya ḳoroin. Tumrar niraḳar baf zela doyal, tumra-o olan doyal o. “Manshor bisar ḳorio na, teu tumra-o bisaror daṛo foṛtae nae. Ḳeurore dushi shaibosto ḳorio na, teu tumra-o dushi oitae nae. Maf ḳoria dio, teu tumra-o mafi faibae. Dan-ḳoyrat deo, teu tumrare-o deoa oibo. Manshe zatai zatai boria ania tumrar gaṭit bandia diba. Tumra zela mafia dibae, tumrar lagi-o ola mafa oibo.” Bade Isae tarare ou kichcha hunaila, “Eḳ andae kunu aroḳ andare fot deḳaito fare ni? Te duiozon-u gato foṛto nae ni? Shagrid ustad taki boṛo nae, oile ze shagride furafur talim loy, he-o ustador laḳan bonizae. Tumar bair sokut guṛa hamaise oḳan-u deḳrae, oile nizor souko gasor seli ase ita deḳrae na? Tumar sokut seli hamaise ikan na saia tumar baire kila ḳoibae, ‘Baisab, tumar souko ze guṛa foṛse, ao, ogu bar ḳoria dei.’ Tumar nizor sokur seli-u to deḳrae na. O bonḍo, foyla tumar nizor souk taki seli horao, teu bair souk taki guṛa bar ḳorat lagle bala ḳori deḳtae farbae. Bala gase to mondo fol dore na, ar mondo gase bala fol dore na. Fol dekia gas sina zae. Manshe to rifuzi lot taki boroi faṛe na, ba sutra gas taki angur faṛe na. Bala manshor dilor nek banḍar taki balai baroy, ar bod manshor bod dil taki bod-u baroy. Manshor dilor banḍaro zeta zoma ase, ota taki-u to zobanor buli baroy. “Tumra ḳene amare ḳali huzur huzur ḳoirae, otoso ami zeta ḳoi, ita mano na? Amar ḳandat aia amar boyan hunia ze zone amol ḳore, he ḳar laḳan, ami tumrare ḳoiram. He ou manshor laḳan, ze gor bananir niote goin ḳori maṭi kudia mozbut ḳori goror kuṭi banailo, bade boinna ailo ar fanir fute ou gorre ṭelilo, oile ikan loṛaito farlo na, ikan to mozbut ḳori banail. Ar amar boyan hunia ze zone amol na ḳore, he ou laḳan manush, zegie gat na kudia ḳali norom maṭir ufre gor banailo, bade banor futor dakkae tar gor foṛia bangia surmar oigelo.” Isae tan boyan shesh ḳoria manshor ges taki bidae loia Kofornaum ṭauno gelagi. Hino Ruman sifair eḳ subedaror gulam bemar foṛia morar foti oigesil, subedar sabe i gulamre kub maya ḳorta. Tain Isar ḳobor hunia ḳoyzon Ihudi murobbire Isar gese faṭaila, tan gulamre bala ḳorta sufarishor lagi. Murobbi oḳol aia Isare minot-ḳajji kori koila, “Sab, ze zone amrare afnar gese faṭaisoin tan gulamor lagi minot ḳortam, ein ashole-o doya faoar laḳ. Tain bideshi oile-o amrar Ihudi zatire kub maya ḳoroin. Amrar mosid ḳan-o tain banai disoin.” Isa tarar loge oia roana dila, tain subedaror baṛir ḳandat aite-u subedare nizor dust oḳolre faṭaia zanaila, “Huzure ar ḳoshṭo ḳoroin na zanu, afnar moto zone amar baṛit toshrif anra, ami to itar laḳ nae. Afnar samne ubanir zoiggo-o ami nae, erdae ami airam na. Te afne ḳali zobandi koile-u, amar gulamor bemar shifa oizibo. Afne to buzra, ami amar kamanḍaror hukume soli, oula amar sifai oḳol-o amar hukume soloin. Ami era eḳzonre ao ḳoile ae, zao ḳoile zae, amar gulamre ou ḳam ḳoro ḳoile, he ḳore. Te afne-o ola ḳali mukdi koile-u, hokkoltae manbo.” Ikan hunia Isa ekkere taijjub bonigela, dole dole zoto manush tan ḳore oia aoat asil, erar bae firia ḳoila, “Ami tumrare ḳoiram, i subedar to bidormi Ruman manush, oile amar Boni Israilor maze-o to oto mozbut imandar ami kunuḳano deḳsi na.” Hasau subedare zarare faṭaisla, tara goro aia deḳla, hi gulamor bemar ḳomigese. Tuṛa ḳoy din bade Isae tan shagrid oḳol ar aro bout manush loia Nayin namor ek gaut aila. Tain zebla hou gaut aia hamaira, ou shomoy manshe ḳoraro ḳori eḳ moiot loia zaira. I moiot asil eḳ ṛaṛi beṭir eḳmatro fua. Gaur bout manush ou ḳoraror loge asla. Ou ṛaṛi beṭire dekia Isar dilo doya hamailo, tain ḳoila, “Ogo, ḳandio na.” Ḳoia tain ḳoraror ḳandat gia ḳoraro soila, teu moiot boia neora beṭain ubai gela. Isae ḳoila, “O beṭa, ami koiram, tumi uṭo.” Teu hi murda beṭa uṭia boigelo, boia mat-ḳota matilo. Isae tare tar maʼr ato shomzai dila. Ita dekia hoḳlor bitre ḍor hamaigelo. Tara ḳoila, “Subohan Alla, eḳzon mohan nobie amrar maze toshrif anchoin, Allae meherbani koria tan bonda oḳlor bae souk firaisoin.” Isar ou keramotir ḳota asta Ehudia zilat ar ash-fash hokkol zagat mashur oigelo. Ehia nobir shagrid oḳol gia ou hokkolta Ehiare zanaila. Ou Ehiae tan duizon shagridre Isar gese faṭaila. Tara aia Isare ḳoita, “Huzure ḳoisoin amra zania zaitam, zein toshrif anar ḳota, afne-u hein ni? Na amra ar ḳeuror lagi bar saitam?” Teu duio shagrid aia Isare ḳoila, “Ehia nobie amrare faṭaisoin, afnare zikaitam, zein toshrif anar ḳota, afne-u hein ni? Na amra ar ḳeuror lagi bar saitam?” Ṭik ou shomoy Isae bout manshore bemar-azar ar zin-butor asor taki bala ḳorla. Bout andare-o deḳar ḳemota dila. Ota ḳoria harle Ehiar duio shagridre Isae ḳoila, “Tumra zaogi, tumra ono aia nizor souke zeta deḳlae ar hunlae, ota gia Ehiare zanao. Tanre ḳoio, andae-o souke deḳra, lengṛa oḳole aṭira, fosa-kusṭo bemari bala oira, ḳaluae-o hunra, murda manush zinda oira, ar gorib oḳlor gese-o Allai kush-ḳobri toblig kora or. Ar era-u ḳofali manush, amar befare zerar dilo kunu bada na fae.” Ehiar shagrid oḳol gia harle, Ehiar befare Isae manshore ḳoila, “Tumra morubumit kita deḳat geslae? Batashe loṛe-soṛe ota ḳagṛa-bon deḳat geslae ni? Na, kita deḳat geslae? Shundor ḳafoṛ finno kunu manshore ni? Zera dami dami kafoṛ findia zak-zomok kore, ar shukirta din ḳaṭae, tara to razbaṛit taḳoin. Te tumra kita deḳat geslae? Kunu nobire deḳat geslae ni? Oy, hasau ami tumrare ḳoiram, i Ehia to ḳali nobi nae, nobi taki-o boṛo zon. Ein to hou zon, zen ḳota Asmani Kitabo leḳa ase, Huno, tumar age beziar ami amar fegambor, ein gia ṭik-ṭak korba tumar solar fot. Te ami tumrare ḳoiram, asta duniar kunu adom-u Ehia taki boṛo nae. Oile Allar bashshair hoḳol taki huru zon-o, Ehia taki mohan.” Shomazor hoḳol doronor am manshe ar gushkur ḳazna tulra oḳole-o Ehiar toblig hunla, tara toubar gusol ḳoria Alla Pakre hok-insafḳari hishabe manla. Oile Forishi dolor manshe ar moulana oḳole Ehiar gese toubar gusol na ḳoria, tarar befare Alla Pakor ze kial asil, iṭare kunu dam dilo na. Teu Isae hirbar ḳoila, “Ḳo sain, oḳon i zomanar manshore ami kitar loge tulona ḳortam? Tara ḳar laḳan? Tara to omon huruttar laḳan, zetae bazaro boia eḳe-oinnore ḍakia ḳoy, Bashi to bazailam dust tumrar lagia, tumra ḳeu nasilae na bashi hunia. Mattomor zari-gan gailam amra shobe, ḳandilae na tumra ḳeu mattomor shure. Te Ehia nobi aia hari bat-ruṭi ar anguror shorbot na ḳaoae, tumra ḳoilae tanre bute dorilise. Ar bin-Adom aia ḳana-fina ḳorra dekia tumra ḳoirae, deḳrae ni, i beṭa to feṭua ar modkur. He gushkur ḳazna tulra ar naforman manshor loge dusti kore. Ta-o aḳol ḳaṭaia zera sole, tarar sal-cholon taki-u forman mile, aḳol-u oilo ḳaṭi-nikut siz.” Forishi dolor eḳzon manshe Isare tan baṛit ḳanir daot dila, Isa ou baṛit gia ḳanit boila. Oile ou gaut ek kobis beṭi asil. Isa ono daoto aisoin hunia hou ḳobis beṭie dami eḳ fattoror boyamo ḳori ator loia ono ailo. Aia Isar fison galabae tan faor ḳandat ubaia, ḳandia souḳor fanidi tan faor fata bizaililo. Bade tair matar suldi fao fusia dilo, faor maze hunga dite dite ator maḳailo. Ita dekia Isare zein daot disla, ein mone mone ḳoila, “I beṭa kunu nobi oile to emne-u buzlo one i beṭi kegu, igu ḳoto boṛo ḳobis gunagar beṭi.” Isae tare ḳoila, “Saimon, tumar loge amar kisu ḳota ase.” Saimone ḳoila, “Ḳoukka huzur.” Isae tanre ḳoila, “Mone ḳoro, eḳ mazonor ges taki duizon manshe kisu ṭeḳa ḳoroz nisil, eḳzone fas-sho, aroḳzone foinchash dinar. Tarar ḳeuror-u takkot asil na i ṭeḳa firot deoa, teu mazone era duio zonre maf ḳori dilaila. Oḳon ḳo sain, era kun zone mazonre beshi bala faibo?” Saimone ḳoila, “Amar mone ḳoy, zar beshi ṭeḳa maf deoa oise.” Isae ḳoila, “Tumi ṭik-u ḳoiso.” Teu Isae ou beṭir bae saia ḳoila, “Saimon, ou beṭi bae kial ḳoro ar huno, ami tumar goro aia harle tumi to amare fao doar-o fani diso na, oile tair souḳor fanidi amar fao bizaia, matar suldi fusia dise. Tumi to amar loge ainja ḳori doria hunga diso na, oile deḳrae ni ami tumar baṛit hamanir bad one-u tai amar faot hunga deoat-u ase. Tumi kunuzat tazim ḳori amare aguai ancho ni? Oile tai amar faot ator ḍalia tazim ḳorse. Te ami tumare ḳoiram, tai beshi maya ḳorse ḳori buza zar, tai boṛo gunagar oile-o gunar mafi faise. Zar tuṛa guna maf ḳora oy, he tuṛa maya ḳore.” Bade Isae beṭire ḳoila, “Ogo, tumar tamam guna maf ḳora oise.” Zara Isar loge ḳanit boisla tara mone mone ḳoila, “Ein ḳe, zein guna-o maf ḳorilain?” Isae hi beṭire ḳoila, “O beṭi, tumar imanor bole-u tumi nazat failae, oḳon shanti oia baṛit zao.” Bade Isae ou barozon sahabire loia gaue gaue, ṭaune ṭaune guria Allar bashshair toblig korat roila. Tarar loge ḳoyzon beṭin-o asla. Ou beṭin zinor asor ar bout zator bemar taki bala oia tan log dorsla. Erar nam oilo: Mogdilini Moriom, en ges taki shatgu zin saṛail oisil; Raza Herudor uzir Kuzair bou Iuhanna; Susanna; ar aro bout beṭin asla. Ou beṭinte tarar nizor samana dia Isa ar tan shagrid oḳlor ḳoros-fati salaita. Bade zebla nanan zaga taki bout manush aia Isar gese dola oila, ou shomoy tain ek kichcha hunaila. Tain ḳoila, “Ek giroste danor zala bain deoat gelo. Gia bain deoar bala kisu zala ailor maze foṛigelo, manshe faodi uṛia i zala nosṭo ḳorillo, ar fakinte-o aia ḳaililo. Girostor kisu zala hukna-shokto maṭir ufre foṛlo, itae ali bar oile-o heshe rosh na faia hukaia morigelo. Kisu zala bon-jonglar maze foṛlo, i zalae ali fuṭle-o itare bon-jonglae zatia dorlo. Oile kisu zala bala zomino foṛlo, i zalae bala dan oilo, ar eḳ-sho gun beshi dan dorlo.” Ou kichcha ḳoia-u tain zure zure ḳoila, “Zar ḳan ase, he hunouk.” Shagrid oḳole aroz ḳorla, “Huzur, i kichchar mani kita?” Tain ḳoila, “Allar bashshair gufon rohoisho zanar shuzug kali tumrare deoa oise, oile baki manshor gese to ita kichchar laḳan ḳoiram, zate tara dekia-o na deḳe, hunia-o na buze. “Te i kichchar mani oilo, i danor zala oilo Allar kalam. Ailor maze foṛa zaladi buzail oise, zera Allar kalam hune, bade Iblise aia tarar dil taki ita ḳaṛia neygi. Iblise sae na manshe iman ania nazat hasil ḳorouk. Ar hukna-shokto maṭir ufre foṛa zaladi buzail oise, zara i kalam besh kushi oia hune, oile kalame tarar dilo balamonte zoṛ ḳore na. Erdae i iman tuṛa ḳoydin ṭike, kunu forikkat foṛle-u tarar iman kuailae. Bon-jonglat foṛa zaladi buzail oise, zera imanor daot hune, oile duniabi dandat foṛia don-samanar lalos, ar aram-ayeshor bae saia ita faurilae. Erdae tarar zindegit kunu bala fol dore na. Bala zomino foṛa zaladi buzail oise, zera hok ar sohi dile Allar kalam hune, hunia nizor dilo balamonte gatia raḳe, ar imane mozbut roia zindegit bala fol dore. “Kunu manshe lem zalaia hari sokir tole toy ni ba ṭukridi gurilae ni? Nisoy na, tara gasar ufre toy, zate goror bitre for deḳa zae. Te ila gaibi kunta-u nai zeta zair oito nae. Ila lukail-o kunta nai zeta ḳeu hunto nae ba zanto nae. Erdae tumra kila hunrae kial ḳorio, zar ase tare aro deoa oibo, ar zar nai, tar zeta ase bolia he mone ḳorer, ota-o neoa oizibo.” Ermaze Isar ma ar baiain tan gese aia azila, oile biṛor lagi tara ḳasat aita farla na. Teu eḳzon manshe aia Isare ḳoila, “Afnar ma ar baiain afnar loge deḳa ḳorat aia bare ubai roisoin.” Isae zuaf dila, “Amar ma-bai to era-u, zera Allar kalam hunoin ar amol ḳoroin.” Eḳdin Isa ar tan sahabi oḳol gia nao-o uṭla, uṭia tain sahabi oḳolre ḳoila, “Ao, amra aoror hofaro zai.” Teu sahabi oḳole nao bashaila. Nao soltir maze Isa gumai gela. Aḳta-u aoror maze omon tufan ailo, tufane naot fani hamaia borizar, tara deḳla boṛo mosibot aise. Sahabi oḳol Isar daro gia tane hozag koria ḳoila, “Huzur, huzur, amranu moriziram.” Isa uṭia fanir ḍeu ar batashre damki dila. Loge loge-u ḍeu ar tufan tamia hoḳolta tir oigelo. Isae tarare ḳoila, “Ou ota ni tumrar iman?” Tara ḍoraia taijjub oia eḳe-oinnore ḳoila, “Ein ashole ḳe, deḳrae ni batashe ar fanie-o tan hukum mane?” Isae tan sahabi oḳol loia Galil aor faroia Zerasini elaḳat gela. Gia hari tain nao taki lamla, ou shomoy hou gaur zinor asor-ala eḳ beṭa tan gese ailo. Zinor fale asor ḳorae he bout din dori lemṭa ar kunu baṛi-goro roito na, ḳali kobrostano roito. Isare dekia-u he sillaia uṭlo, tan samne foṛia zure zure ḳoilo, “O Allar ḳas mayar zon, afne ḳene amar ino toshrif anla? Meherbani kori amare satain na zanu.” Ikan ḳoar ḳaron oilo, Isae hi zinre hukum disla ou beṭare saṛia zaoar lagi. I zine tare bout din taki asor ḳorsil, beṭare ḍanḍa-beṛi ar shikoldi bandia raḳle-o, he ita siṛilito, hou zine tare nirai zagat nitogi. Isae tare zikaila, “Tor nam kita?” He ḳoilo, “Fouz fal” ḳaron tara bout zin eḳloge asil. Teu hi fouz fale Isare minot-ḳajji koria ḳoila, tain zanu tarare roshatole na gaṛoin. Hino faṛor ek galat boṛo eḳ shuoror fal asil. Fouz fale tanre minot ḳoria ḳoila, tarare hou shuoror bitre hamanir izazot dita. Tain izazot dila. Ou tara hi beṭare saṛia shuoror bitre gia hamailo, ete shuoror fal faṛor ḍaledi douṛia gia aoror fanit buṛia morla. Ita dekia shuoror raḳal oḳol douṛia gia ṭauno ar gaue gaue ḳobor dilo. Ḳobor faia sairobae tone manush aila, aia deḳla, ze beṭar log taki fouz fal bar oia gesoin, he furafur bala oia ḳafoṛ-sufoṛ findia Isar faor ḳandat boiroise. Dekia tara somki gela. Ar ou goṭona goṭite zera deḳsil, tara hoḳol manshore hunaila, i beṭa kila bala oise. Hunia Zerasini elaḳar hoḳol manush ḍoraigela. Ḍoror suṭe tara Isare minot-ḳajji koria ḳoila, tain tarar ges taki toshrif nitagi. Teu Isa nao-o uṭia hirbar Galilo aila. Oile ze beṭare zine dorsil, he aroz ḳorlo tan loge roibar lagi. Isae tare oḳan ḳoia baṛit faṭai dila, ḳoila, “Tumi tumar baṛit zao, ar Allae tumar lagi ze kudroti ḳam ḳorsoin, ota gia ḳo.” Teu he gelogi, gia ṭaunor hoḳol manshore zanailo, Isae tar lagi oto boṛo ḳam ḳorsoin. Isa Galilo aia harle hinor manshe kushi oia tanre ḳobul ḳorla, tara tan lagi bar saoat asil. Ou shomoy Zayir name mosid komiṭir eḳ motolli aia Isar fao-o foṛia minot lagaila, huzurre tan baṛit nibar lagi. Ḳaron tan eḳmatro fuṛi sorḳato asil, fuṛir boyosh baro bosor. Isa zebla ou baṛit zaibar lagi roana dila, manshe aia tan sairobae biṛ ḳoria ṭelaṭeli lagaila. Biṛor maze eḳ beṭi manush-o asla, ein baro bosor doria mashik bemari. Tan hoḳol don-samana ḍaktoror tole kuaia-o bala oita farsoin na. Tain Isar ḳoredi aia Isar saddoror kunat soar loge loge-u tan bemar ḳomigelo. Teu Isae zikaila, “Amare ḳe soilo?” Ḳeu shikar na ḳorae Fitor ar tan logor manshe Isare ḳoila, “Huzur, afnar sairobae ḳoto manshe ṭelaṭeli koria afnar gat lager.” Oile Isae ḳoila, “Ḳeu amare soise, ḳaron ami buzram, amar bitor taki gaibi bol bar oise.” Ou beṭie zebla deḳlo dora foṛigese, tai kafi kafi Isar samne aia tan fao-o foṛia hoḳlor samne-u ḳoilo, ḳene tai Isare soisil ar kilan loge loge-u bala oigese. Isae beṭire ḳoila, “Mai go, tumi ekin ḳorso ḳori bala oiso. Oḳon shantie baṛit zao.” Isae ota matira, omon shomoy mosidor motollir baṛi taki kobria aia tanre ḳoilo, “Sab, afnar fuṛi dunia taki gesoingi, te huzurre ar ḳoshṭo dibar ḳam nai.” Ikan hunia Isae ḳoila, “Ḍoraio na, ḳali ekin ḳoro. Deḳbaene, tai bala oizibo.” Isa hou baṛit gela, gia Fitor, Hannan, Iakub ar fuṛir ma-baf saṛa oinno ḳeurore goror bitre hamaite dila na. Hoḳole zebla fuṛir lagi kanda-ḳaṭi ar ahazari korra, ou shomoy Isae ḳoila, “Ḳandio na-re, tai to morse na, gumar.” Ikan hunia tara tanre siṛaila. Tara hoḳole-u zanto fuṛi morigese. Teu Isae fuṛir ato doria ḍaḳ dila, “Mai go, uṭo.” Loge loge-u fuṛir zan firot ailo. Tai uṭia boigelo. Isae ḳoila, fuṛire kunta ḳaibar dita. Fuṛir ma-baf ekkere taijjub bonigela. Bade Isae ḳoila, “Huno, ita ḳeurore hunaio na.” Bade Isae hou barozon sahabire ekḳano dola ḳorla, tarare hoḳol zator zin-but saṛani, bemarire bala ḳorar izazot ar ḳemota dila. Bade tain Allar bashshair toblig ar bemarintore shifa ḳorat erare faṭaila. Tain ḳoila, “Tumra fotor lagi laṭi, gaiṭ-buski, ḳani-kuraki, ṭeḳa-foysha, ba duiṭa kurta-o loge nio na. Kunu gaut gele tumra ze baṛit hamaibae, ou baṛit-u roio, ar on taki hirbar bidae oio. Manshe zudi tumrare zaga na dein, te hon taki bar oibar age tumrar faor duil fusia falaio, ou duile-u tarar bifokke shakki dibo.” Sahabi oḳol roana oia gaue gaue gia, Allar kush-ḳobri toblig ar bemarintore shifa ḳorat lagla. Raza Herude Isar ou ḳam-ḳazor ḳobor hunia kub gabṛi gela. Kunu kunu manshe tanre ḳoila, Ehia nobi hirbar zinda oia uṭi gesoin. Ar kunu kunu zone ḳoila, Ilias nobie doroshon disoin. Hirbar ḳeu ḳeu ḳoilo, furana zomanar kunu nobi zinda oia aisoin. Teu Herude ḳoila, “Ami nize-u to Ehiar mata ḳaṭaisi, te ou zeta hunram, ein ashole ḳe?” Erdae Herude Isare deḳar kial oilo. Isae ze barozon sahabire tobligo faṭaisla, tara firia aila. Aia tanre zanaila, tobligi soforo kita kita ḳorsoin, ou tain erare loia kub niribili halote Bayt-Soyda namor ek gaut gela. Oile manshe i kobor hunia dole dole Isar ḳore oia roana dilaila. Tain erare kushi mone ḳobul ḳorla. Tarar gese Allar bashshair boyani toblig korla, ar zeta bemarir bemar shifa oa zorur asil, tain erare shifa ḳorla. Hainja bala hou barozon sahabi aia Isare ḳoila, “Huzur, amra ze zagat asi, ikan kub niribili zaga. Te ota manshore bidae dilaukka, tara ḳanda-ḳasar gaut gia raitkur taḳa-ḳaoar bebosta ḳorouk.” Isae zuaf dila, “Tumra tarare ḳana ḳaoao.” Tara ḳoila, “Amrar gese to ḳali fasḳan ruṭi, duiṭa biran mas ase, ar kunta nai. Te amra bazaro gia erar lagi kana loia antam ni?” Isae ḳoila, “Erare foinchash-zon, foinchash-zon ḳori boai deo.” Ino ḳali beṭa manush-u asla fas azaror laḳan. Teu sahabi oḳole tarare boaila. Isae ou fasoḳan ruṭi ar duio mas loia asmanor bae saia Allar shukria adae ḳorla. Bade ruṭi ar mas ṭukra ṭukra ḳori bangia, sahabi oḳlor ato dia ḳoila baṭia dilaita. Ou ḳanae hoḳol manshe feṭ boria ḳaila. Ḳaia harle zeta guṛa-gaṛa roisil ota dola ḳorle baro ṭukri borigelo. Eḳdin Isa eḳ nirai zagat dua ḳorat boira, ḳali sahabi oḳol tan loge asla. Tain erare zikaila, “Ḳo sain, manshe kita mono ḳoroin, ami ḳe?” Tara zuaf dila, “Kunu kunu manshe ḳoin, afne Ehia nobi. Kunu zone ḳoin Ilias nobi, ar ḳeu ḳeu ḳoy bout agor zomanar kunu nobi hirbar zinda oia uṭisoin.” Isae erare zikaila, “Oile tumra kita mono ḳoro, ami ḳe?” Sahabi Fitore ḳoila, “Afne-u Allar oada ḳora hou al-Mosi.” Isae tarare ḳoila, “Ḳobordar! Ita ar ḳeurore hunaio na.” Bade tain ḳoila, “Ami bin-Adome bout ḳoshṭo shoijjo ḳora lagbo. Shomazor murobbi oḳole, boṛo imam, ar moulana oḳole amare ela ḳorba. Amare zane mara oibo, oile moutor tin dinor din amar hirbar zinda oia uṭa zorur.” Tain era hoḳolre ḳoila, “Amar torikae ḳeu zindegi kaṭaite saile, he tar nizor kushie sola bad deuk. Tar afon duk-koshṭor solib forteḳ din boia loia amar ḳore ḳore auk. Ze manshe nizor zan basaito sae, he tar hasaror zindegi kuaibo. Oile ze zone amar lagi nizor zan kurbani dey, he hasaror zindegi faibo. Kunu manush zudi asta duniar malik bonia-o tar hasaror zindegi mani aḳer kuailae, te tar kunu fayda oilo ni? Hunoukka, ḳeu zudi amar lagi ba amar talimor lagia muk lukae, te ami bin-Adom zebla amar nizor, ar fobitro firista oḳlor, ar gaibi bafor shan-tozollie duniat hirbar aimu, ou shomoy ami-o erare deḳle muk lukaimu. Ami tumrare hasa ḳota ḳoiram, ou mozliso oula ḳoyzon manush azir asoin, Allar bashshai na dekia erar mout oito nae.” Ou talimor eḳod hafta bade, Isa dua ḳorar lagi tan sahabi Fitor, Hannan, ar Iakubre loia eḳ ṭillar ufre uṭla. Tain dua ḳorra, omon shomoy aḳta-u tan mukor rong bodligelo, tan finnor ḳafoṛ-sufoṛ dola soḳsoḳa oigelo. Ou shomoy deḳa gelo, duizon manshe aia tan loge batchit ḳorra, erar eḳzon oila Musa nobi, dusra zon Ilias nobi. Tara Allai zalal ar shane deḳa dila. Zeruzalem soforor ḳalo Isa zen Allar morzi mafik moutor mukamuki oira, ou befare-u tara batchit ḳorla. Sahabi Fitor ar tan logor oḳol be-malum gumo asla. Aḳta-u gum bangi zaoae tara Isar zalal-shan deḳla, ar tan ḳandat uba ou duio zonre-o deḳla. Hou duiozon zebla Isar ges taki roana dilaira, ou shomoy Fitore ḳoila, “Huzur, amra-o to ono asi, kub bala oise, te ek kam ḳorilai, amra ono tinḳan ḍera-gor banailai, ekḳan afnar, ekḳan Ilias nobi, ar ekḳan Musa nobir lagi.” Fitore zen kita ḳoira, ita tain nize-u buzla na. Fitore ota matira, ou shomoy aḳta-u megor ḳalni aia tarare gurililo. Tara ḳalnir aoṛe hamanir bade sahabi oḳol ḍoraigela. Ar ḳalnir bitor taki ou aoaz ailo, “Ein-u amar ḳas mayar zon, tumra en ḳota mano.” I aoazor bade-u deḳa gelo, Isa hono eḳla ubai roisoin. Sahabi oḳol nirai oigela, tara zeta deḳsila ou shomoy ita ar ḳeurore hunaila na. Bador din Isa ar sahabi oḳol faṛor ṭilla taki lamia aile, bout manush tan loge deḳa ḳorat aia biṛ bandilla. Ou biṛor mazor eḳzone sillaia ḳoilo, “Huzur, amar fuagur bae kial ḳoroukka, ogu amar eḳmatro aolad. Tare eḳṭa zine dore, igie tare saṛto sae na, he aḳta-u sik dia uṭe ar maṭit foṛia saṭiae. Tar mukedi fena baroy, heshe tare asaṛia ad-mora ḳori falai toia zae. Ami afnar sahabi oḳlor gese minot-ḳajji korslam ogutare ḳedaibar lagi, oile tara farsoin na.” Isae ḳoila, “O beiman ar naformanor zat, ami ar ḳotodin tumrar loge roimu, tumrar satani shoijjo ḳormu? Deki sain, tumar fuare ono ano.” Beṭae fuare loia aguar, ou shomoy zinnate tare maṭit falaia zatia dorlo, he hutia saṭiani lagailo. Teu Isae zinnatre damki dila, tain ou fuare bala ḳoria tar bafor ato shomzai dila. Allar kudroti lila-ḳela dekia hoḳol manush taijjub oigela. Isar keramoti ḳam-ḳaz dekia hokkole taijjub bonia sinta ḳorra, ou shomoy tain sahabi oḳolre ḳoila, “Amar ḳota ḳanain tumra mon dia huno, ami bin-Adomre to manshor ato dorai deoa oibo.” Sahabi oḳole i mator kunu mani buzla na. Allae tarar gese ikan gaib raḳla, zate tara na buzoin. Ar ou befare Isare-o kunta zikaite tarar shaosh oilo na. Sahabi oḳlor maze ḳe hoḳol taki boṛo, ota loia tara torka-torki korra, ermaze Isae tarar dilor bab buzilila. Tain eḳ nabalik huruttare ḳandat ania ḳoila, “Ze zone amar lagi ou huruttar laḳan kunu sabalre ḳobul ḳore, he amare-u ḳobul ḳore. Ar amare ze ḳobul ḳore, he ḳali amare nae, amare zein bezisoin tanre-o ḳobul ḳorlo. Tumrar maze ze zon hoḳol taki huru, he-u hoḳol taki boṛo.” Bade sahabi Hannane ḳoila, “Huzur, amra deḳlam afnar nam loia eḳzone but saṛar. Dekia amra tare mana ḳorsi, he to amrar torikar nae.” Isae tanre ḳoila, “Ar mana ḳorio na, ze tumrar bifokke nae, he to fokke-u ase.” Isae behesto toshrif nibar din gonaia ailo, ou tain Zeruzalemo zaita ḳori niot ḳorla. Tan age oia ḳobria oḳol faṭaila. Tara age gia hoḳolta zuit-zait ḳorar kiale Shomoria zatir ek gaut gia hamaila. Oile hi gaur manshe zebla hunla, Isa Zeruzalem zaita, hunia tara tanre asroy dilo na. Erdae tan sahabi Iakub ar Hannane ḳoila, “Huzur, Ilias nobir laḳan amra-o oḳon aroz ḳortam ni, asmani aguin lamia otare binash ḳorilauk?” Isae tarar bae firia damki dia ḳoila, “Tumra zano na ni tumra kun laḳan ruhur goṛa? Amare kunu beza oise ni manshor binash ḳortam? Amare to beza oise manshor zan basaitam.” Oḳan ḳoia era arok gaut gelagi. Tara zebla fotedi zaira, ou shomoy eḳ beṭa aia Isare ḳoilo, “Sab, afne zeḳano zaiba, ami-o afnar loge hono zaimu.” Isae tare ḳoila, “Babare, hialor gat ase, fakintor bada ase, oile ami bin-Adomor mata guzar kunu ṭai nai.” Bade Isae aroḳzonre deḳla, dekia tare ḳoila, “Oba, amar loge solo.” He zuaf dilo, “Huzur, amar bafor moutor bade tanre maṭi dia harle ami aimu.” Isae tare ḳoila, “Mora oḳole tarar morare maṭi deuk, tumi aia Allar bashshair daot deo.” Aro eḳzone ḳoilo, “Huzur, ami afnar loge zaimu, te amar baṛit gia bidae loia ai.” Isae tare ḳoila, “Langolor kuṭit doria zegue ḳoredi firia sae, he Allar bashshair laḳ nae.” Bade Hozrot Isae aro shottoirzon shagridre tobligo faṭaita ḳori fosond ḳorla. Tain nize zeta ṭaun ba gauainto zaoar irada ḳorsila, hono zaibar age erare duizon duizon ḳoria faṭaila. Faṭanir bala erare ḳoila, “Huno, zomino to foshol bout ase, oile ḳamla kub ḳom. Erlagi zominor malikor gese dua ḳoro, tan foshol tular lagi tain ḳamla faṭaiba. Tumra oḳon roana oizao. Kial rakio, bagor falor maze meṛa-baichchar laḳan ami tumrare faṭailam. Tumra zaoar ḳalo ṭeḳar toli, gaiṭ-buski, faor zuta ita kunta-u loge nio na, ar fotor maze ḳeurore salam-o ḳorio na. Ze baṛit gia hamaibae, hamaia-u ḳoio, assalamu alaikum. Salam loar zuka ḳeu hino taḳle, tumrar salam tar ufre bortibo, ar ila ḳeu na taḳle, tumrar salam tumrar gese-u firot aibo. Foyla ze baṛit hamaibae, hou baṛit-u roio. I baṛi saṛia dusra baṛit zaio na. Tara zeta dein ota ḳaio, ḳaron ḳamlae tar beton faoar zoiggo. “Zebla kunu gaut zaibae, hinor manshe tumrare ḳobul ḳoria, tara zeta ḳaite dein, ota-u ḳaio. Tarar bemari oḳlor bemar bala ḳorio. Tarare ḳoio, Allar bashshai to tumrar daro aichche. Oile kunu gaut gele honor manshe zudi tumrare ḳobul na ḳoroin, te gaut aṭi aṭi oḳan ḳoio, Hoba, tumrar gaur ze duil amrar faot lagse, ita amra fusia falai diram, ou duile-u tumrar bifokke shakki dibo. Oile mono rakio, Allar bashshai kandat aichche. Ami tumrare ḳoiram, kiamotor din lannoti Sadum ṭaunor dosha taki, hi gaur dosha aro ḳoṭin oibo. “Haere Bayt-Soyda ar Kurasin gau, tumra to lannoti. Tumrar maze zeta kudroti ḳam deḳail oise, ita Shur ar Sidon elaḳat deḳail oile, tara ḳator oia touba ḳorlo one. Ashole kiamotor din Shur ar Sidon elaḳar dosha taki-o, tumrar dosha bout ḳoṭin oibo. Ar O Kofornaum ṭaun, tumi bule usa oia asmano gia lagtae? Na, fartae nae! Tumare fatalo lamail oibo. “Tumra mono rakio, zera tumrar ḳota mane, tara ashole amar ḳota-u mane. Ar zera tumrare mane na, tara amare-o mane na. Zera amare mane na, tara ashole hou Allare-o mane na, zein amare bezisoin.” Bade hi shottoirzon shagride toblig koria kub kush mizaze firot aila. Aia ḳoila, “Huzur, afnar nam hunle zin-bute-o amrar ḳota mane.” Isae tarare ḳoila, “Huno, ami deḳsi, Iblis-Shoytan megor zilkir laḳan behest taki foṛizar. Te ami tumrare haf-bichchur ufredi aṭar ḳemota disi, ar tumrar dushmon, Iblisor hoḳol shoktir ufre tumrare ḳemota disi. Kunuzat kuntae-u tumrar ḳeti korto farto nae. Ar zin-bute tumrar ḳota huner dekia kushi na oia, borong behesti katat tumrar nam leḳa oise ḳori-u kushi koro.” Ou shomoy Isa-o Pak Ruhur bole kushi oia ḳoila, “O gaibi baba, tumi-u to asman-zominor malik. Ami tumar shukria adae ḳorram, ḳaron tumi aḳoldar-buddiman oḳlor gese ita zair na ḳoria, bebuz-huruttar laḳan manshor gese zair ḳorso. Baba, ashole to ita hoḳolta-u tumar morzi. Amar gaibi babae hoḳolta-u amar ato shofi disoin. Baf saṛa dusra ḳeu zane na ou fut ḳe, ar fut saṛa dusra ḳeu zane na ou baf ḳe. Fute bafre zar gese zair ḳorar kial oy, ḳali he-u bafor forisoy fae.” Bade tain shagrid oḳlor bae firia ḳane ḳane ḳoila, “Tumra zeta zeta deḳso, ita deḳar shuzug zar oy, he-u nek-kofali. Ami tumrare ḳoiram, tumra zeta deḳrae, ita bout nobie ar raza-bashshae deḳar asha ḳorle-o, deḳar ḳofal oise na. Tumra zeta hunrae, ita tara hunte saile-o hunar ḳofal oise na.” Eḳbar eḳ alim sab Isar gese aila. Aia tanre forikka ḳorar lagi zikaila, “Huzur, kita ḳam ḳorle ami behest faimu?” Isae ḳoila, “Musa nobir kitabo kita leḳa ase? Afne kita faisoin?” Alime zuaf dila, “Leḳa ase, Tumi tumar asta dil dia, zan dia, hoḳol bol-shokti dia, tumar shullo-ana mon dia, tumar Mabud Allare mohobbot ḳorbae. Ar, Tumar ari-forire nizor laḳan maya ḳorbae.” Isae tanre ḳoila, “Afne ṭik kota ḳoisoin. Te afne-o oula ḳoroukka, teu behest faiba.” Ou alime nizor dam baṛanir lagi Isare ḳoila, “Aichcha, te amar ari-fori ḳe?” Isae ḳoila, “Hunoukka, eḳzon manush Zeruzalem taki Ziriho ṭauno zaoat asil. Foto ḍaḳaite faia tar ḳafoṛ-sufoṛ hoḳolta ḳaṛia nia, tare maria ad-mora ḳori falai toia gelogi. Bade eḳ imam sab ou fotedi zaira, tain ou beṭare dekia galabae horia gelagi. Ou laḳan Lebir ḳandanor ek kadim sab-o ou fotedi aila, tain-o ere dekia galabae gelagi. Heshe Shomoria zatir eḳ beṭa ou fotedi ailo, he bidormi zatir oile-o er halot dekia tar dilo dorod hamailo. Ou he er zoḳomor ufre tel ar anguror rosh malish ḳoria foṭṭi bandia dilo. Bade tar nizor gadar ufre tulia, eḳ musafir ḳanat nia tar zoton ḳorlo. Bador din ou Shomorio beṭae musafir ḳanar malikor ato duiṭa dinar dia ḳoilo, ou manushgur zoton ḳorba. Er beshi koros oile-o, ami aia dimu. “Te alim sab, afnar kita mono oy, ou tinzonor maze kun zon, ḍaḳaitor ato fiṭa ḳaora beṭar ari-fori?” Alime ḳoila, “Ze manshe tare dorod ḳorlo he-u to.” Teu Isae ḳoila, “Te afne-o gia oula ḳoroukka.” Bade Isa ar tan sahabi oḳol aṭi aṭi ek gaut gela. Hou gaur eḳ beṭi manshe kushi oia Isare tan baṛit nia memandari korla. Ou beṭir nam Marta. Beṭir eḳ boinor nam oilo Moriom, ein huzuror faor ḳandat boia nosiot hunra. Ar Marta gia randa-baṛa ar ḳatir-zoton ḳorat fereshanit roila. Ermaze Marta aia huzur Isare ḳoila, “Huzur, deḳra ni amar boine hokkol ḳam-ḳaz eḳla amar ufre toia ono aise? Te afne ḳoukka, amare shaijjo ḳorto.” Huzure ḳoila, “Marta, tumi bout befare sinta ḳoria fereshan oigeso. Huno, ashole eḳṭa befar-u ḳali zorur ase. Tumar boin Moriome hou zoruri befarre fosond ḳorse. Ita to tair ges taki kaṛia neoa zaito nae.” Eḳdin huzur Isae kunu eḳ zagat dua ḳorat asla. Dua shesh oia harle tan eḳ sahabie ḳoila, “Huzur, Ehia nobie to tan sahabire dua ḳora hikaita, te afne-o amrare dua ḳora hikaukka.” Isae erare ḳoila, “Dua ḳorar shomoy tumra oula ḳoio, O asmani baba, tumar nam fobitro ḳoia mana ouk, duniat tumar bashshai kaim ouk. Amrar forteḳ dinor rizek fortidin zugai dio; Baba, amrar tamam gunare maf ḳoria dilao, zela amra-o mafi dilaisi amrar oforadi oḳolre; ar forikka taki hefazot ḳoro amrare.” Bade Isae tarare ḳoila, “Dorilao, ada raitkur bala tumrar kunu dustor baṛit gia ḳoilae, dust, amare tinḳan ruṭi koroz deo. Amar eḳ bondu fotedi zaoar bala aḳta-u amar baṛit uṭsoin. Oḳon tane kita ḳaoaitam, amar goro to kunta nai. Teu duste goro tone zuaf dila, ami dorza bond ḳoria amar huruttain loia hutiroisi, amare ḳoshṭo dio na. Oḳon uṭia kunta ditam fartam nae. Oile ami koiram, ou duste uṭia bondu hishabe kunta dite na saile-o, tumi bar bar minot ḳorle he uṭbo-u. Uṭia tumi zeta sairae, ita ṭik-u dibo. “Te ami tumrare ḳoiram, tumra sao, teu deoa oibo. Tallash ḳoro, teu faibae. Duaro ṭuka deo, tumrar lagi duar kula oibo. Zara sae, tara-u to fae. Ze tallash ḳore he fae. Ze duaro ṭuka dey, tar lagi duar kula oy. Tumrar maze ila kunu baf ase ni, zar fute ruṭi saile tare maṭi dibo, mas saile haf dibo, ba enḍa saile bisa dibo? Te tumra naforman oia-o zudi tumrar huruttainre bala bala siz ditae zano, te zara behesti bafor gese saibo, tain nisoy tarare Pak Ruhu dan ḳorba-u.” Eḳdin eḳ beṭar log takia Isae eḳ buba zinnat saṛaila. Zinnate saṛar bade hi beṭar zoban kuligelo, mat-ḳota matilo. Ita dekia manush taijjub bonigela. Oile kunu kunu manshe ḳoilo, “I beṭae zinor bashsha Bel-Sobulor bole zin saṛae.” Aro ḳoyeḳ zone tanre forikka ḳorar niote, tan ator kunu keramoti deḳto sailo. Isae tarar dilor bab buzilila. Buzia ḳoila, “Kunu raijjo nize nize bag oigele, i raijjo binash oizae. Oula kunu foribaro zebla bibad lagizae, i foribar-o ar ṭike na. Te zinnat zudi tar nizor bifokke lagizae, taile tar raijjo ḳemne ṭikbo? Tumra to ḳoirae, ami Bel-Sobulor bole zinnat saṛai. Kub bala ḳota, ami zudi Bel-Sobulor bole zinnat saṛai, te tumrar manshe kitadi saṛae? Tumrar mator bisar tumrar manshe-u ḳorbo. Oile ami zudi Allai kudrote zinnat saṛai, te to Allar bashshai tumrar nozdik aichche. “Huno, kunu bolala manshe ostro-shostro loia tar baṛi fahara dile, tar samana nirafod taḳe. Oile tar taki zobordosto aroḳzon aia hamla ḳoria tare arailile, he zeta ostro-shostror boṛai korsil, i ostro-o ḳaṛia nibogi. Tar hoḳol mal-samana-o luṭia nia ḳaṭilibo. “Te ze zon amar fokke nae, he to amar bifokko. Ze amar oia ḳam na ḳore, he to amar birudde ḳam ḳore. “Kunu zine zebla eḳ bemarir log saṛia zaegi, gia boshot ḳorar lagi morubumit guraguri kore. Bade kunuḳano roibar zaga na faia mone mone ḳoy, dur! Ami zen taki aisi ono-u hirbar zaigi. Firot aia hari deḳe, hi zaga shundor ḳori hazai-faṛai toa. Ou he gia tar taki aro bod shatgu zin loge ḳori ane. Ania ono hamaia basha banae. Erdae ou bemarir dosha foyla taki heshe aro ḳaraf oy.” Isae ota boyan ḳorra, aḳta-u biṛor maz taki eḳ beṭie zure zure ḳoilo, “Huzur, ze maʼe afnare feṭo loisoin ar dud ḳaoaisoin, ein boṛo ḳofali ma.” Isae ḳoila, “Ikan hasa ḳota, oile er saite-o boṛo ḳofali tara, zara Allar kalam hune, hunia ola amol ḳore.” Bade aro bout manush Hozrot Isar gese aila. Tain erare ḳoila, “I zomanar manush to naforman. Tara ḳali keramoti tukae, oile Iunus nobir alamot saṛa dusra kunu keramoti tarare deḳail oito nae. Iunus nobi nize nize-u zela Ninob ṭaunor manshor gese eḳ alamot oisla, bin-Adom-o oula i zomanar manshor gese nize-u alamot oiba. Ruz kiamotor din douknor deshor rani uṭia ou zomanar manshor dush zair ḳorba. Ḳaron Bashsha Sulaimanor aḳolor ḳota hunar niote tain duniar hesh mata taki aisla. Oile oḳon to Sulaiman taki-o aro mohan eḳzon ono asoin. Kiamotor din Ninob ṭaunor murda oḳol uṭia i zomanar manshor dush zair ḳorba. Ḳaron Iunus nobir toblig hunia tara touba ḳorsila. Oile oḳon to Iunus taki-o aro mohan eḳzon ino asoin, ta-o manshe touba ḳorer na. “Kunu manshe to lem zalaia hari sokir tole ba ṭukrir tole toy na, borong gasar ufre-u toy, zate goror manshe for deḳe. Tumar souk-u oilo tumar ḳayar batti. Souk zudi bala oy, te tumar asta shorilo for oibo. Ar souk karaf oile, tumar shoril-o andarit roibo. Te kial rakio, tumar dilo ze nur ase, ita andair oizar ki na? Tumar asta shorilo zudi for taḳe, kunu ongo andair na taḳe, te leme zela tar nizor teze tumare for dey, oula i nure-o tumar asta shorilre for ḳorilibo.” Isae boyan ḳorra ou shomoy Forishi dolor eḳzone tanre ḳaibar daot dila. Tain gia en goror bitre ḳanit boila. Forishie deḳla, ḳaoat boibar ḳalo Isae Ihudi niom mafik at doisoin na, ou tain taijjub bonigela. Teu Isae tanre ḳoila, “Hunoukka, afnara Forishi oḳole to bashon-bortonor bair gala kub shundor ḳoroin, oile afnarar bitre to naformani ar lalose bora. O be-aḳolor dol, zein bargala banaisoin, tain-u kita bitor gala-o banaisoin na ni? Erlagi afnarar bitre zeta ase, ota age Allar oaste lilla-sodga deukka. Teu deḳbane, afnarar hoḳolta-u fak-saf oizibo. “Haere Forishi oḳol, lannot tumrare, tumra ḳali tezfata, fodina fata ar hokkol hag-torḳarir dosh baṭor eḳ baṭ Allar name zoḳat deo, oile Allar mohobbot ar hok insafor bae tumrar kunu kial-u nai. Ashole ou foylata manar loge loge badorta-o amol ḳora forz. O lannoti Forishi oḳol! Mosido hamaia samnor ḳataro boa, ar bazar-aṭo gia salam faite tumra kub fosond ḳoro. Lannot tumrar ufre, tumra oilae osina ḳoyboror laḳan. Manshe na sinia er ufredi aṭa-fira ḳore.” Ikan hunia eḳzon alime Isare ḳoila, “Huzur, oḳan ḳoia to afne amrare-o beijjot ḳorra.” Isae ḳoila, “Nisoy, afnara-o lannoti, afnara manshor ḳando bar buzai koria dein, oile tarar asanor lagi angulṭa-o laṛoin na. “Haere lannoti oḳol, tumra nobi oḳlor rouzare shundor ḳoria fakka ḳoro, oile tumrar moy-murobbie-u to erare zane marsla. Ota dekia-u buza zae, tumra tumrar moy-murobbir ḳamor shakki oirae, tumra-o ola oirae. Tara nobi oḳolre zane marsil, ar tumra hou nobir rouzare fakka ḳorrae. Erdae Alla Pake-o tan nizor morzie ḳoila, ami tarar gese amar nobi-rosul bezimu, erar ḳeurore tara zulum ḳorbo, ar ḳeurore zane marbo. Ete duniar foyla taki oḳon forzonto zoto nobire zane mara oise, era hokkolor dayi oiba ou zomanar manush. Hunoukka, ami afnaintore ḳoiram, foyla Adomor fut Habilor kun taki shuru ḳoria, nobi Zakariar kun forzonto hoḳol lour shaza ou zomanar manshor ges taki adae ḳora oibo. Nobi Zakariare to Zeruzalemor fobitro Kaba Shorifor kurbani kana ar Herem Shorifor mazḳano kun ḳora oise. Haere lannoti alim oḳol, tumra manshore-o Allar fot sinairae na, nize-o Allar bashshait hamairae na, ar zera hamaito sar, tarare-o bada dirae.” Ou shomoy azar azar manush dola oigela, tara ṭelaṭeli kori eḳe-oinnor ufre foṛla. Isae foyla tan sahabi oḳolre ḳoila, “Tumra Forishi mozobor ḳamir taki hushiar roio, ou ḳamir oilo tarar bonḍami. Ṭik ou ḳamiror laḳan, ila lukail kunta-u nai, zeta zair oito nae. Ila gufon kunta-u nai, zeta zana zaito nae. Tumra andair goro zeta matiso, manshe ita foror maze hunbo. Goror bitre ḳane ḳane zeta ḳoiso, ita salor ufre roṭail oibo. “O amar dust oḳol, ami tumrare ḳoiar, zara ḳali shorilre binash ḳora saṛa ar kunta-u ḳorto fare na, tarare ḍoraio na. Te ḳare ḍoraitae eoḳan-o ḳoiram, marar bade duzoḳo haranir ḳemota-o zan ase, ḳali tanre-u ḍoraio. Ami hirbar ḳoiram, tumra ḳali tane-u ḍoraio. Matro dui anae fasgu soṛa faki mile na ni? Allae to ou soṛar ḳota-o fauroin na. Ar kita ḳoitam, tumrar matar sulor hishab-o tan gese ase. Tumra ḍoraio na, bout soṛa faki tone-o tumrar dam tan gese beshi. “Huno, ami tumrare ḳoiram, ze manshe shomazor samne amare ḳobul ḳore, ami bin-Adome-o Allar firista oḳlor samne tare ḳobul ḳormu. Oile ze manshe shomazor samne amare oshikar ḳorbo, ami-o tare Allar firista oḳlor samne oshikar ḳormu. Ami bin-Adomor birudde ḳeu kunta matile-o mafi faibo. Oile ḳeu zudi Pak Ruhur birudde kufuri kore, te tar kunu mafi nai. “Manshe zebla tumrare mosidor fainchaito, bisari oḳlor samne, ba tanat nibo, ou shomoy kita zuaf ditae ba kita ḳoitae, ita loia kunu sinta ḳorio na. Kita matitae ita Pak Ruhe tumrare hou shomoy batai diba.” Biṛor maz taki eḳzone Isare ḳoilo, “Huzur, afne amar baire ḳoukka, amar babae zeta don-samana toia gesoin, ota baṭ-baṭura ḳoria dita.” Isae tare ḳoila, “Oba, tumrar bisar ḳortam ar don-samana baṭitam, ita eḳtiar amare ḳegue dise?” Tain manshore ḳoila, “Ḳobordar! Hokkol nomunar lub-lalos tone nizore basao. Ḳaron don-samana baia gele-o itae manshor zan basae na.” Bade Isae tarare ou kichcha hunaila, ḳoila, “Eḳ doni beṭar zomino bout dan folisil. Dan dekia he mone mone ḳoilo, oto dan oḳon kita ḳortam? Amar to toibar-u zaga nai. Te ami ek kam ḳori, amar ugar bangia boṛo ḳori koyṭa ugar banailai. Teu amar hoḳol dan ar mal-samana zaga oibo. Heshe amar zanre ḳoimu, O zan, bout bosoror mal-samana ar ḳani-kurakir lagi nisinta oigeso. Oḳon aram-ayeshe tumi kaia findia furti koro. Oile Allae tare ḳoila, ore be-aḳol, tor zan to aiz rait-u ḳoboz ḳora oibo. Te tui zeta zomaisos, ita ḳegue ḳaibo?” Heshe Isae ḳoila, “Ze manshe ḳali duniabi don-samana dola ḳore, oile aḳeror don na zomae, tar halot oula-u oy.” Bade Isae tan shagrid oḳolre ḳoila, “Erdae-u ami tumrare ḳoiram, kita ḳaia bastam, ar kita finditam, ita loia tumra sinta ḳorio na. Zan taki to ḳani boṛo nae, ar shoril taki kafoṛ boṛo nae. Ou ḳauaguintor bae kial ḳoro, tara to ḳet-o ḳore na, foshol-o ḳaṭe na. Tarar ugar-o nai, banḍar-o nai. Allae tarar rizek zugaia dein. Te tumra to ou ḳaua taki bout dami. Ḳo sain, tumrar maze ḳeu sinta-babna ḳoria tar hayati ekḳan gonṭa-o baṛaito farbo ni? Ar ou huru ḳamḳan-u zebla faro na, te ḳene baṛti sinta ḳoro? “Tumra ou zongli fulor bae sao, ita ḳoto shundor! Itae to nizor shundoror lagi kunta-u ḳore na, kunu rong silai-o ḳore na, bain-o ḳore na, emne-u oy. Te ami koiar, Bashsha Sulaiman oto zak-zomoḳor maze roile-o tan lebas to ota egu zongli fulor laḳan-o shundor asil na. Deḳrae ni, zongolor maze ou zoto shundor ful oḳon ase, ḳail oile-u manshe ita daru banaia aguindi zalaibo. Allae zudi ou zongolre ola shundor ḳori hazaisoin, te O ḳomzur imandar oḳol, tumrare-o tain shundor ḳori hazaita nae ni? Te kila ḳaitam, kila soltam, ita befare sinta ḳorio na, ba ostir oio na. I duniar manshe ḳali ota loia-u danda ḳore. Oile tumrar batuni bafe to emne-u zanoin, tumrar kita kita lagbo. Erdae-u tumra ita bad dia, ḳali Allar bashshair dandat ro, teu ita hokkolta-u tain zugaiba. “Tumra-u amar meṛar fal, tumrar dol huru-muru oile-o ḍoraio na, tumrar batuni bafor morzi oilo, tumra tan bashshair bitoro hamao. Tumrar zotota ase, hokkolta besia gorib oḳolre bilai deo, ar nizor lagi kali oula ek kuti-beg tiar ḳoro, ze kuti kunudin furan oy na. Ou behesto samana zoma ḳoro, zeḳano samana koy oy na, sure-o ney na, fuke-o ḳae na. Ḳaron tumrar don zeno roy, mon-o hono roibo. “Tumra ḳafoṛ-sufoṛ findia ar batti zalaia tiar roio. Tumra ou zat ḳamlar laḳan o, zara tarar munibor lagi bar sae, tain biar daot taki firot aia duaro ṭuka dile-u, loge loge duar kulto fare. Hou gulam oḳol-u ḳofali, zerare tarar munibe aia hozag faiba. Ami hasa ḳota ḳoiram, munibe aia hari tan nizor ḳomro gamsa bandia tarare ḳanit boaiba, ar nizor ate baṛia ḳaoaiba. Tara-u boṛo ḳofali, zerare tarar munibe ada rait ba hesh raite aia ḍaḳ dile-u hozag faiba. Mono rakio, sur kun shomoy aibo, giroste ikan zanle to he hozag roilo one, tar goro hing kaṭte dilo na one. Tumra-o ola tiar roio, ḳaron ze oḳtor ḳota tumra sinta-u ḳortae nae, hou shomoy-u bin-Adome toshrif anba.” Teu sahabi Fitore ḳoila, “Huzur, i nosiot ḳali amrar lagi, na hoḳol manshor lagi?” Huzure zuaf dila, “Aḳoldar ar hok-halali ou zon ḳe, zar ato malike tan gulam-bandire deḳa-hunar bar diba, he oḳtor ḳalo tarar ḳani baṭia dibo? Hou gulam-u ḳofali, zare tar munibe aia ou laḳan ḳam ḳorat deḳba. Ami tumrare hasa ḳota ḳoiram, hou munibe tare tan nizor hoḳol don-samana todarkir eḳtiar diba. Oile dorilao, hou gulame mone mone ḳoilo, amar munib aite to bout deri ase, ar ou faḳe he hokkol bandi-gulamre mair-doir ḳorlo, ḳaia-daia furti koria, mod ḳaia ṭal oia foṛi roilo. Bade ze din ar ze oḳtor ḳota he sinta-u ḳorto nae, hou din ar hou oḳto tar munib aia azir oiba. Tain tare eḳ sede dui ṭukra ḳoria naforman oḳlor ḳataro mishaiba. “Ar ze gulame tar munibor morzire buzia-o tiar oise na, tan hukum mafik kam ḳorse na, tare bezuita mair mara oibo. Oile na zania zudi he shaza faibar ḳam ḳorilae, te tar shaza ḳom oibo. Zare beshi deoa oise, tar ges tone beshi saoa oibo, ar zar gese beshi forimane toa oise, tar gese-u beshi dabi kora oibo. “Ami to duniat aguin laganit aisi. Oḳon zudi i aguinḳan zolizito, te boṛo bala oilo one. Ami to ek kas gusol ḳora-u lagbo. Te amar duk-koshṭor i gusol zotodin na oise, otodin amar fereshanir kunu shima nai. Tumra mono ḳorrae ni, ami duniat shanti ditam aisi? Na, muṭe-u nae, ami koiram, ami to duniat eḳ motobed laganit aisi. Oḳon taki ek goror faszon zarzir alog oizibo. Tinzon duizonor bifokke, ar duizon tinzonor bifokke lagbo. Bafe fuar bifokke ar fua bafor bifokke. Ma fuṛir bifokke ar fuṛie maʼr bifokke. Hoṛi bour bifokke ar boue hoṛir bifokke lagbo.” Bade Isae manshore ḳoila, “Tumra to foismedi kalni deḳle-u ḳo, meg aior. Ar hasau meg ae. Hirbar dokkina batash salu oile tumra ḳo, ḳora oibo, ar ola-u oy. O bonḍo oḳol! Tumra asman ar zominor surot buztae faro, te aḳeri zomanar hal-hokikot ḳene buzo na? “Kunḳan ṭik, ita tumra nize nize-u bisar ḳoro na ḳene? Kunu nalish loia hakimor samne zaibar age, bifokkor loge foto boia-u miṭ-maṭ ḳorar sesṭa ḳorio. Arnae he tumare doria hakimor samne nibo, hakime fulishor ato dibo, ar fulishe nia zelo haraibo. Heshe shesh foyshaṭa adae na ḳora forzonto, kunumonte-u zel taki saṛa faitae nae, ita ami tumrare ḳoiram.” Hozrot Isae boyan ḳorra, ou shomoy honor ḳoyzon manshe tanre ḳoila, “Huzur, Galil zilar kisu manshe Allar pak zagat gia foshu kurbani deoat asla, ou shomoy hakim Filate tarare hou pak zagat zane maria, tarar lou ar kurbanir lou eḳloge mishaisoin.” Ikan hunia Isae ḳoila, “Ou kurbani deorar mout ola oae, tumra mono ḳorrae ni, Galilor oinno manush taki era beshi gunagar asil? Ami tumrare ḳoiram, na, ila nae, oile tumra zudi guna taki touba na ḳoro, te tumra-o ola binash oibae. Huno, Zeruzalemor Siloa elaḳar hou usa minara bangae ze aṭaro zon mara gesil, tarar befare kita mono ḳoro? Zeruzalemor baki manush taki era beshi gunagar ni? Ami tumrare ḳoiram, na, ikan ṭik nae, oile tumra zudi guna taki touba na ḳoro, te tumra-o ola binash oibae.” Bade tain ou kichcha hunaila, “Ek giroste tan bagano ḍumuror eḳṭa gas lagaila. Shomoy aile ein aia gaso fol tukaila, oile kunu fol faila na. Na faia baganor malire ḳoila, huno, aiz tin bosor dori ou ḍumur gaso fol tukairam, oile kunta-u fairam na. Te tumi gasgu ḳaṭilao, igue ḳamoḳa zominor rosh ṭaner. Malie ḳoilo, Sab, i bosorḳano taḳouk. Ami ogur sairo galar maṭi kuṛia shar dimu. Samnor bosor zudi fol dorilae, te to bala, naile ḳaṭilimu.” Eḳ Zummabare Isa mosidor bitre nosiot ḳorat asla. Hono eḳ beṭi manush asil, i beṭir ufre aṭaro bosor dori atoshi-deoe asor ḳorsil. Deoe beṭire guza banailisil, beṭi shida oia ubaito farto na. Isae beṭire ḍaḳdi kandat ania ḳoila, “Mai go, tumi oḳon i bemar taki rehai faiso.” Oḳan ḳoia-u tain beṭire atai dila. Loge loge-u beṭi shida oia ubailo, ar Allar shukur-guzar ḳorlo. Oile Zummar din tain i beṭire bala ḳorae, mosidor motollie gusa ḳoria ḳoila, “Ḳam ḳorar lagi to baki soydin-u ato ase. Tumra Zummar din na aia oinno zekunu din aia bala oio.” Teu Isae hi motollire ḳoila, “O bonḍo oḳol! Zummar din afnarar goru-gadare gualar bare nia fani kabain na ni? Aiz aṭaro bosor dori Ibrahimor ou aoladre Shoytane bandia raḳsil. Oḳon Zummabare i beṭire azad ḳora zaiz oise na ni?” Ikan hunia zera tan bifokke asil tara hoḳole-u shorminda oilo. Oile baki musolli oḳole tan hoḳol keramoti dekia kushi oila. Bade Isae ḳoila, “Allar bashshaire ami kitar loge tulona ḳortam? Mono ḳoroukka, Allar bashshai oilogi egu ḍenga bisir laḳan, kunu giroste tar zomino nia ou bisi bain dilo, bade iṭa boṛo oia gas oigelo, ar fakinte aia gasor ḍalo bada banailo.” Tain hirbar ḳoila, “Allar bashshair tulona ami kitar loge ḳortam? Doroukka, Allar bashshai oilogi ḳamiror laḳan, kunu eḳ beṭie tuṛa ḳamir nia eḳ mon moydar loge makilo, ar ḳamiror fafe hoḳol moyda fulia uṭilo.” Hozrot Isae aṭi aṭi gaue gaue ar ṭaune ṭaune gia toblig koria Zeruzalemor bae aguaila. Ermaze eḳzon manshe tane zikailo, “Huzur, zera nazat faiba, era forimane kub ḳom ni?” Ou Isae manshore ḳoila, “Sifa duaredi hamanir lagi dile-zane fikir ḳoro. Huno, ami tumrare ḳoiram, bout zon ino hamaite saile-o, hamaito farto nae. Goror malike zebla duar bond ḳoriliba, tumra bare ubaia duaro ṭukaite ṭukaite ḳoibae, ‘Huzur, amrare duarḳan kulia deukka.’ Oile tain zuaf diba, ‘Tumra kuai taki aiso, ami to sini-u na.’ Teu tumra ḳoibae, ‘Amra afnar loge ḳaisi-boisi, afne to amrar foto-gaṭo aia amrare nosiot ḳorta.’ Oile tain ḳoiba, ‘Haere naforman oḳol, amar ges taki bago. Tumra kuai taki aiso, ami to sini-u na.’ “Tumra deḳbae Ibrahim, Isʼhak, Iakub ar tamam nobi oḳol Allar bashshait dakil oisoin, oile tumrare horaia falani oise. Tumrar maze ḳeu ḳanda-ḳaṭi korbae ar ḳeu dat kiṛimiṛi kaibae. Aro deḳbae, duniar sairobae taki manush aia Allar bashshait dakil oia ḳana-dana ḳaira. Te zera oḳon ḳoror ḳataro ase, tara ḳeu ḳeu age aibo, oile oḳon zera agor ḳataro ase tara ḳeu ḳeu ḳore zaibogi.” Tain ota matira, ermaze aḳta-u Forishi dolor ḳoyzon aia Isare ḳoila, “Afne in taki horia zaingi, ḳaron Raza Herude afnare marilita saira.” Isae tarare ḳoila, “Afnara gia hou hialor saore ḳoukka, aiz ar ḳail ami zinnat saṛaimu, bemari oḳlor shifa ḳormu, foru din amar ḳam shesh oibo. Te zela-u ouk, aiz, ḳail ar foru, ou tin din amar sola-u lagbo. Ami to zani-u, Zeruzalemor bare kunu nobire zane mara oy na. “Zeruzalem! Haere Zeruzalem! Tumi nobi oḳolre zane maro. Tumar gese zarare beza oise, tumi tarare fattor marso. Murgie zela tair saore ḍaḳnar tole asroy dey, ami oula tumar manshore asroy ditam saisi, oile tumi razi oilae na. Te huno, tumar baṛi kali-baṛi oibo. Ami tumrare ḳoiram, zotodin tumra na ḳoibae, Allar nam loia zein aira tain-u mubarok, otodin tumra ar amare deḳtae nae.” Hozrot Isa Forishi dolor eḳ murobbir baṛit kunu eḳ Zummabare daoto gela, gia harle tara tan bae kub bala ḳori souk raḳlo. Aḳta-u tan samne eḳ bemari beṭa ailo, tar asta shoril bemare fuligesil. Teu Isae honor alim ar Forishi oḳolre zikaila, “Musa nobir shoriot mafik Zummabare kunu manshor bemar shifa ḳora zaiz ni?” Ikan hunia tara hoḳol nirai roila, ar Isae hi bemarire shifa ḳoria bidae dilaila. Bade tarare ḳoila, “Tumrar maze ila kunu zon ase ni, zar kunu hurutta ba goru-sagol zummar din fanit foṛigele, he igure fani taki tule na?” Ikan hunia tara kunu zuaf dita farla na. Ar ze meman oḳol daoto aisoin, tara hoḳole bala bala zaga tukai boira dekia, Isae tarare ou talim dila, “Kunu manshe tumare biar daot dile, tumi mozliso hamaia dami zagat boa ṭik nae. Ḳaron malike kiban tumar taki aro ijjoti ḳeurore daot disoin. Te oile zein tumare daot disoin tain aia ḳoiba, ou siṭ taki uṭia amar dami memanre boibar dein. Teu tumi shorminda oia emne-u hoḳol taki nisa zagat gia boibae. Erdae tumi kunu daoto gele foyla nisa zagat gia boio. Teu zar baṛit daoto geso tain aia ḳoiba, baisab, ino ḳene boisoin, bala zagat toshrif anoukka. Ete aro meman oḳlor samne tumar ijjot baṛbo. Ashole ze nizore boṛo mono ḳore, tare huru ḳora oibo. Ar ze nizore huru mono ḳore, tare boṛo ḳora oibo.” Ze moulanae Hozrot Isare daot disla, Isae enre ḳoila, “Dinor ba raitkur ḳanir lagi tumi kunu onusṭan ḳorle, tumar bondu-bandob, bai-birador, ḳesh-kuṭum, ar daro ḳasor doni manshore daot dio na. Tarare ḳaoaile bade tara-o tumare ḳaoaia bodla dilaiba. Erlagi tumi kunu memandari korte saile, ḳali gorib manush, atur, anda, lula-lengṛare daot dio. Era to firia tumare ḳaoaito farto nae. Ete kiamotor din tumi forezgar oḳlor loge itar bodla faibae.” Ita hunia hou ḳanir mozlisor eḳzone ḳoila, “Mubarok hou bonda, zein Allar bashshait boia ḳana-fina ḳaiba.” Teu Isae ḳoila, “Kunu eḳzon manshe kub boṛo eḳ mezbani koria, bout manshore daot dila. Ḳaoar shomoy oile tan gulamredi koaila, ‘Afnara aioukka, ḳana tiar oigese.’ Oile hoḳol daotie eḳ eḳṭa uzor deḳailo. Foyla zone ḳoilo, ‘Ami tuṛa zomin ḳorid ḳorsi, oḳon deḳat zaitam, te hono na gele oito nae, erlagi amare maf ḳoroukka.’ Dusra zone ḳoilo, ‘Ami alor lagi fas zuṛa bisal loisi. Oḳon gia deḳtam, itae al bain ki na, amare maf ḳoroukka.’ Aroḳzone ḳoilo, ‘Ami to noya bia ḳorsi. Oḳon zaitam fartam nae.’ Hi gulame aia tar malikre hoḳolta zanailo. Ita hunia malike gusa ḳoria ḳoila, ‘Tui zoldi kori ṭaunor ollie-gollie za, gia gorib, atur, anda, lula-lengṛare angi.’ Teu he ola ḳoria hari bade aia ḳoilo, ‘Huzur, afnar hukume hoḳolta ḳora oise, oile oḳono zaga ḳali roise.’ Ou tain ḳoila, ‘Te ṭaunor bare foto-gaṭo, ar sifae-safae za, gia minot-ḳajji kori manshore an. Manush aia mozlis bori zaukka. Ar tumra kial ḳori huno, age zetare daot dislam, ita kunugie zanu amar ḳani na fain.’ ” Bade Hozrot Isar loge oia bout manush aṭat asla. Ou shomoy tain erar bae saia ḳoila, “Ḳeu zudi amar torikat aito sae, te tar nizor ma-baf, bou-baichcha, bai-birador, ar nizor zanre-o amar taki huru mone ḳorte oibo. Arnae he amar ummot oito farto nae. Ze manshe nizor duk-koshṭor solib ḳando loia amar ḳore ḳore roy na, he amar ummot oito fare na. “Tumrar ḳeu zudi usa kunu dolan banaito sae, te he foyla tar ḳorosor hishab milaia deḳe, dolanor ḳam shesh ḳorar lagi tar ṭeḳa ase ki na. Na oile, ian dia hari ḳam shesh ḳorte na farle, manshe ṭaṭṭa ḳorba, tara ḳoiba, beṭae dolan tulia oḳon shesh ḳorto farer na. “Ar zudi eḳ raza aroḳ razar bifokke zuddo ḳorat lagoin, te foyla boia foramish ḳorba, tain ḳoiba, bish azar fouz loia zera amar bifokke aira, ami dosh azar fouz loia er mukabila ḳortam farmu ni? Zudi na faroin, te hamla ḳorra raza duroi taḳte-u afushor lagi koyzon tiait faṭaiba. Ṭik oula, tumrar maze ḳeu zudi tar hokkoltar maya saṛto na fare, te he amar ummot oito farto nae. “Nun to bala zinish, oile nunor zudi shad nosṭo oizae, te ar nunta ḳora zae ni? Itadi shar-o banail zae na, zomino deoa zae na, erlagi manshe ita bare falai dein. Hunar moto ḳan zar ase, he hunouk.” Hozrot Isar boyan hunar lagi bout gushkur ḳazna tulra ar be-shorioti am manush tan gese dola oila. Ita dekia Forishi dolor manshe ar moulana oḳole ḳana-ḳani kori koila, “I manushgu ḳali naforman oḳlor loge uṭa-boa ar ḳana-fina ḳae.” Teu Isae tarare ou kichchain hunaila. Tain ḳoila, “Mono ḳoroukka, afnara kunu eḳzonor eḳ-shoṭa meṛa ase. Ermazor egu meṛa arai gele, he baki nirannobboiṭa bondo toia hou arail ogu tukanit zae na ni? Gia ogu tukaia faile, kushie iṭare ḳando ḳori ane. Bade baṛit gia bondu-bandob ar ari-forire ḳoy, ‘Ao, amar loge furti koro. Amar arail meṛagu tukaia failisi.’ Ami afnarare ḳoiram, ekkere ou laḳan-u, zara guna taki touba ḳorar zorur mono ḳore na, ila nirannobboi zon forezgar taki eḳzon gunagare mon bodlaia touba ḳorle, behesto aro beshi kushi-bashi oy. “Ba doroukka, kunu eḳ beṭir gese rufar doshṭa ṭeḳa asil. Er taki egu ṭeḳa zudi araizae, te beṭie hi ṭeḳar lagi lem zalaia huruindi huria asta gor tukae na ni? Bade tukaia failile bondu-bandob ar ari-forire ḍakia ḳoy, ‘Ao na, amar loge kushit shamil o. Amar arail ṭeḳagu tukaia failisi.’ Ami afnarare ḳoiram, ekkere ou laḳan-u, eḳzon gunagar manshe mon bodlaia touba ḳorle, Allar firista oḳole oula kushi koroin.” Bade Isae ḳoila, “Ek girostor dui fua asil. Eḳdin huru fuae tar bafre ḳoilo, baba, ami babaiti zomi-zoma ar don-samana zeta faitam, amar ou baṭḳan oḳon-u algaia dilaukka. Ou bafe tan samana duio fuar name baṭia dilaila. Er ḳoydin bade huru fuae tar hokkol samana besia bidesh gelogi. Bidesh gia bad fote solia tar ṭeḳa-foysha hokkolta kuaililo. Hoḳolta kuaia harle hou deshor hoḳol zagat kub nidan deḳa dilo erdae he kub ḳoshṭot foṛlo. He hou deshor ek girostor baṛit gia saḳri sailo. Malike tare saḳri dia shuoror fal raḳar lagi bondo faṭailo. Bondo gia shuore zeta ḳae, he-o ota ḳaia feṭor buk miṭaito sailo, oile ota-o ḳeu tare dito na. “Bade aḳta eḳdin tar hush oilo. He mone mone ḳoilo, amar babar baṛit to bout saḳor-baḳore feṭ bori bat ḳaira. Te ami ono ufashe morram ḳene? Ami gia amar babare ḳoimu, Baba, ami to Allar gese ar tumar gese-o naforman bonigesi. Tumar fua ḳoia ami ar forisoy dibar laḳ nae. Ḳali tumar saḳoror laḳan amare eḳzora asroy deo. Oḳan ḳoia he tar baṛit roana dilailo. Baṛir ḳandat aite-u tar bafe tare dekilila. Dekia tan dil goli gelo. Tain douṛia gia tare ainja ḳori doria hunga dila. Teu fuae ḳoilo, ‘Baba, ami to tumar fua ḳoia forisoy dibar laḳ roisi na. Ami Allar gese ar tumar gese-o naforman bonigesi.’ Oile bafe loge loge ḳamlaintore ḳoila, ‘Hoi, zoldi kori gor taki bala zubbaṭa ania amar fuagure findao. Tar ato angṭi ar faot zuta findai deo. Ar huno, falo taki taza ḍeḳa-basurgu ania zobo ḳoro. Ao, amra hoḳole milia kushi-bashi kori kana ḳai. Amar i fuagu to morigesil, oḳon hirbar zinda oise. Ogu nai oigesil, oḳon firot faisi.’ Teu hoḳole milia kushi-bashit lagla. “Ou shomoy beṭar boṛo fua bondo asil. He baṛir ḳandat aia nas-gan ar ḍul-ḍofkir aoaz hunia, tarar eḳ saḳorre zikailo, ‘Kitare, ita kita or?’ Saḳore ḳoilo, ‘Sab, afnar huru bai baṛit aisoin. Afnar abbae tanre sohi-salamote faia, taza ou ḍeḳa-basur zobo ḳorsoin.’ Ikan hunia boṛo fuae gusa ḳoria baṛir bitre aito sailo na. Teu tar baf bar oia aia tare minot-ḳajji korla. He tar bafre ḳoilo, ‘Deḳoukka, ami otodin doria afnar kezmot ḳorram, kunudin-u afnar hukum ulṭaisi na. Oile amar bondu-bandob loia kushi korar lagi egu bokrir baichcha-o kunudin disoin na. Ar afnar ze fuae noṭi beṭintor tole hoḳol samana kuaise, he aite-u taza ḍeḳa-basurgu ania zobo ḳorilaila!’ Bafe ḳoila, ‘Futre, tumi to hamesha-u amar loge aso. Amar zeta samana roise, ita hokkolta-u to tumar. Oḳon amra hoḳole dil saf ḳoria kushi-bashi kora zorur. Tumar i bai to mori-u gesil, oḳon hirbar zinda oise. Ogu ekkere nai oigesil, oḳon firot faisi.’ ” Bade Hozrot Isae tan shagrid oḳolre ḳoila, “Huno, kunu eḳ zomidaror eḳ menezar asil. Ou menezaror bodnam bar oilo, he bule tar munibor don-samana binash ḳorilar. Bodnam hunia munibe tare anaia ḳoila, ‘Tumar name ita kita hunram? Tumar hishab-nikash hoḳolta shomzai deo. Tumare ar saḳrit raḳtam nae.’ Ikan hunia menezare mone mone ḳoilo, ‘Oḳon ami kita ḳortam? Munibe to amare bidae dilaira. Ami to maṭi ḳam-o ḳortam fartam nae, bik korte-o shorom lage. Oḳon ḳaimu kila? Aichcha, ek kam ḳori, zate amar menezari gelegi-o manshor goro asroy fai.’ Ou he kita ḳorlo, zarar gese tar munibor faona asil, eḳ ek kori erare anailo. Anaia foyla zonre ḳoilo, ‘Tumar gese amar munibor ḳoto faona ase?’ Hein ḳoila, ‘Eḳ-sho mon tel.’ Menezare ḳoilo, ‘Zoldi kori tumar ḳata bar ḳoro, ar eḳ-shor bodla foinchash mon lekilao.’ Bade menezare dusra zonre zikailo, ‘Tumar gese ḳoto fain?’ Hein ḳoila, ‘Eḳ-sho furar gom.’ Menezare ḳoilo, ‘Tumar hishabo ashi furar lekilao.’ Ita hunia hi zomidare ou beiman menezaror tarif ḳorla. Tain ḳoila, ‘He dandabaz oile-o bout boṛo buddimanor ḳam ḳorse.’ Te kita mono ḳoro, itae buza zae na ni, Allaraia manshor aḳol taki-o, i zomanar duniabi manshor fes-faichcha beshi. Huno, ami kita ḳoiram, tumra-o naforman ou zogotor samana dia manshor loge dusti fatao, zate i samana fuṛaigele-o tumrare behestor bagano fulor mala deoa oy. “Ze manush shamainno befare hok-halal roy, he boṛo befare-o hok-halal roy. Oile ze zone shamainno befare beimani kore, he boṛo befare-o beimani kore. Te tumra zudi duniabi don-samanar befare hok na ro, taile ḳe tumrare bishash ḳoria asol don dibo? Foror samana zudi tumra ṭik-ṭak moto bebohar ḳortae na faro, te ḳe tumrar nizor samana tumrar ato dibo? Kunu gulame eḳloge dui munibor gulami korto fare na. Te oile he eḳzonre ingshaibo, aroḳzonre maya ḳorbo. Eḳzonre ijjot dibo ar aroḳzonre elami korbo. Tumra-o oula, Allatala ar don-samana duiotar gulami eḳloge ḳortae fartae nae.” Ikan hunia Forishi mozobor manshe Isare loia ḍong-tamsha lagaila, tara to ṭeḳa-foyshare kub maya ḳorta. Isae tarare ḳoila, “Tumra-u to manshor samne nizor forezgari deḳao, oile Allae tumrar dilor ḳobor zanoin. Manshor gese zeta kub dami, Allae itare ginnain. Huno, Ehia nobir shomoy forzonto Musar shoriot, ar nobi oḳlor sohifa zari asil. Oile oḳon Allar bashshair kush-ḳobri toblig kora or, ar manshe-o dile-zane ono dakil oita saira. I shoriotor eḳṭa horof batil oar saite, asman-zomin binash oaḳan bout shuza. Te huno, ze beṭae nizor boure talaḳ dia aroḳ beṭire hanga ḳore, he zinakur. Oula talaḳ faoa kunu beṭire zegie bia ḳore, he-o zinakur.” “Eḳ doni beṭa asil, he raza-bashsha oḳlor laḳan dami dami kafoṛ-sufoṛ finto, ar hamesha zak-zomok koria furti-amud ḳorto. Manshe Lasar namor eḳ hokir beṭare hamesha ou donir duaror samne boaia toita, tar asta gotro fosa-ga asil, ar fotor kuttainte aia tar ga zifradi leita. Ou donie bat ḳaia hari aḍḍi-guḍḍi guṛa-gaṛa zeta tole falaita, ota ḳaoar lagi tar kub ichcha asil. Eḳdin ou hokir beṭa morigelo, morar bade Allar firista oḳole tare Ibrahim nobir kulo nia boaila. Ermaze hou doni beṭa-o morigelo, tare dafon ḳora oilo. Bade he duzoḳor azab taki aḳta ufredi saia deḳlo, duroi behestor maze Ibrahim nobi boi roisoin, tan kulo hou Lasar. Dekia-u he sillaia ḳoilo, ‘Baba Ibrahim! Amare rohom ḳoroukka. Lasarre amar gese faṭaukka, he tar angulir agaḳan fanit buṛaia amar zifrare ṭanḍa ḳorouk. Duzoḳor i agunit amar boṛo azab or.’ Ibrahime ḳoila, ‘Babare, mono ḳoria deḳo, tumar shuk tumi duniat-u ḳamailiso, ar Lasare bout ḳoshṭo ḳorse. Oḳon ino aia he arame ase, ar tumi azabo aso. Huno, ita saṛa-o tumrar ar amrar maze oḳon bout boṛo faḳ raḳa oise. Inor ḳeu ichcha ḳorle-o tumrar gese zaito farto nae, ar tumra-o ḳeu ichcha ḳorle ino aitae fartae nae.’ Ou hi doni beṭae ḳoilo, ‘Baba, te doya ḳori Lasarre amar babar baṛikano faṭaukka. Hono amar aro fasgu bai roisoin. He gia amar baiainre hushiar ḳorouk, tara zanu i duzoḳor azab taki basoin.’ Ibrahime zuaf dila, ‘Tarar gese to Hozrot Musa ar nobi oḳlor usillae bout kitab beza oise, tara ou talim hunouk.’ Hou donie ḳoilo, ‘Na, na, baba Ibrahim! Murda taki keu zinda oia tarar gese gele-u, tara touba ḳorba.’ Ibrahime ḳoila, ‘Tara zudi Hozrot Musa ar nobi oḳlor ḳota na hune, te murda taki zinda oia gele-o tara manto nae.’ ” Hozrot Isae tan shagrid oḳolre ḳoila, “Gunar fote neoar lagi uskani aibo-u aibo. Oile lannot hou zonor ufre, zegie guna ḳorar lagi uskani dey. Ou bebuz oḳlor eḳzonre-o zegie gunar fote ṭania ney, ogur lagi aro bala oilo one, ogur golat fattor bandia doriat falai deoa. Tumra-o zarzir befare hushiar roio. Tumar kunu baie tumar gese dush ḳorle tare buzaio. He dil bodlaia maf saile tare mafi dio. He dinor maze shatbar dush ḳoria, shatbar aia tumar gese maf saile, tare maf ḳori dio.” Sahabi oḳole Hozrot Isar gese abdar ḳorla, “Huzur, amrar imani bol baṛai deukka.” Tain ḳoila, “Tumrar dilo zudi egu ḍengar bisir foriman iman taḳe, ar tumra ou heora gasre ḳo, zoṛ shudda huria gia doriat gaṛizao, te he tumrar ḳota hunbo. “Tumrar maze ila kunu girost ase ni, zar ḳamlae al baia ba goru rakia bondo taki baṛit aite-u, he tar ḳamlare ḳoy, tumi zoldi aia ḳana ḳao? Na, ḳeu ila ḳoy na. Borong oula ḳoy, oba, tui amar ḳana zuit ḳor. Ami zoto shomoy ḳana ḳai, tui ono ubaia balamonte amare batash de. Bade tui kais. Ar hou gulame tan hukum manche ḳori tain tare kunu doinnobad dein ni? Nisoy na. Ou laḳan tumra-o hoḳol hukum-ahkam adae ḳorle-o ḳoio, Malik, amra to tumar na-layek gulam. Amra zeta ḳam ḳora zorur asil, ḳali ota-u kunu roḳome adae ḳorsi.” Hozrot Isa Zeruzalem ṭauno zaoar bala Shomoria ar Galil zilar mazedi aṭia zaira. Ou shomoy ek gaut hamanir fotor muko doshzon fosa-kusṭo bemarie tanre deḳat aila. Tara duroi ubaia zure zure ḳoila, “O huzur Isa, amrare rohom ḳoroukka.” Tarare dekia tain ḳoila, “Zao, imam sab oḳolre gia tumrar halot deḳao.” Fotedi zaite zaite tara hoḳlor bemar ḳomigelo. Tarar maze eḳzone zebla deḳlo, he bala oigese, dekia-u zure zure Allar tarif ḳori kori he firia ailo. Aia Isar faot foṛia tanre shukria zanailo. He oilo Shomoria zatir manush. Teu Isae ḳoila, “Dosho zonre-u kunu bala ḳora oise na ni? Te baki noyzon kuai? Allar tarif ḳorar lagi ou bideshi beṭa saṛa ar ḳeu firia ailo na ni?” Bade Isae tare ḳoila, “Bai, tumar imanor bole-u tumi bala oiso. Oḳon sohi-salamote zao.” Forishi mozobor ḳoyzon aia Hozrot Isare zikaila, Allae kun shomoy tan bashshai salu ḳorba. Tain ḳoila, “Allar bashshai to ḳeurore zanai-hunai ae na. Ḳeu ḳoar shaiddo nai, Allar bashshai ono ba hono deḳsi. Hunoukka, Allar bashshai to oḳon-u afnarar maze salu ase.” Bade tan shagrid oḳolre ḳoila, “Omon eḳ shomoy aibo, zebla tumra ami bin-Adomor ekḳan din deḳtae saibae, oile fartae nae. Manshe tumrare ḳoiba, ono deḳo, hono deḳo. Oile tumra tarar ḳotae douṛio na, kunuḳano zaio na. Huno, megor zilkir loge asmanor eḳ mata taki aroḳ mata zebla for oy, ou shomoy to hoḳole deḳe. Te ami bin-Adom zebla aimu hou shomoy-o ola hoḳole deḳbo. Oile-o foyla i zomanar manshor ato ami bout ḳoshṭo faitam oibo, tara amare dur dur ḳorba. “Zela Nuh nobir amolo oisil, ami bin-Adomor zomanat-o ola oibo. Nuh nobi zazo uṭar ag forzonto manshe ḳana-fina, bia-shadi ar gor-shongshar ḳorta, Nuh nobir boinna aia itare nifat ḳorlo. Oula Lut nobir amolo-o manshe ḳana-fina, ḳorid-biki, ḳet-girosti ar baṛi-gor bananit besto asla. Oile Lut nobi zedin Sadum ṭaun saṛia bidae oigela, hou din-u asman taki aguin ar gondoḳor gozob lamia ita hokkolṭire nifat ḳorlo. Ṭik oula, ami bin-Adom zedin zaira oimu, houdin-o ola aḳta aibo. “Hidin ḳeu zudi goror salor ufre taḳe, te tar goror mal-samana nibar lagi, lamat lamia goror bitre na hamauk. Ou laḳan ḳeu zudi bondo taḳe, he-o ar baṛit na auk. Lut nobir bibir goṭona iad ḳoro. Mono rakio, ze zone zan basaito sae, he nizor zindegi kuaibo, oile ze zone zan shofia dey, he zindegi faibo. Hi rait eḳoi bisnat duizon hutile-o, eḳzonre neoa oibo, dusra zon bad foṛizibo. Sahabi oḳole ḳoila, “Huzur, ita kuai oibo?” Tain zuaf dila, “Mora lash zeḳano, hokun-o hono dola oy.” Munazator befare shagrid oḳol nirash na oia hamesha zate munazat ḳoroin, oḳan buzanir lagi Isae ek kichcha hunaila. Ḳoila, “Kunu eḳ ṭauno eḳzon hakim asla. Ein Allare-o ḍoraita na, kunu manshore-o toakka ḳorta na. Hou ṭauno eḳ ṛaṛi beṭi asil. Ou beṭie aia hamesha tanre ḳoito, ‘Hakim sab, amare dushmonor at taki basaukka, doya ḳori ou niajjo bisarḳan ḳoroukka.’ I hakime ḳoydin kunta ḳoila na. Bade mone mone ḳoila, ‘Ami to Allare ḍorai na, manshore-o toakka ḳori na, oile i ṛaṛie aia to hamesha satae, oḳon ogur niajjo bisarḳan ḳorilai. Naile tai aia bar bar sataibo.’ ” Bade huzure ḳoila, “Deḳlae ni, ou naforman hakime kita ḳorse? Te zera hamesha dine-raite Allar gese ḳande, Allae kita tan i mayar bonda oḳlor hok foriad hunta nae ni? Tain hunte kunu ar deri korba ni? Ami koiram, tain zoldi kori-u erar hok foriad hunba. Oile ami bin-Adom dusrabar zebla i duniat aimu, hou shomoy duniat kunu iman faimu ni?” Zeta manshe nizore kub forezgar, ar bad-baki hoḳol manshore huru mono ḳorto, Hozrot Isae tarare ou kichcha hunaila. Ḳoila, “Duizon manush dua ḳorar lagi Baytul-Mukaddoso gelo. Erar eḳzon Forishi dolor ar dusra zon gushkur ḳazna tulra. Forishi beṭae alga ubaia oula dua ḳorlo, ‘O Alla, ami tumar shukria adae ḳorram, ami to shomazor manshor laḳan naforman, zalim, ar zinakur nae, ba ou gushkur ḳazna tulrar laḳan-o nae. Ami haftat duidin ruza raki, ar amar hokkol ruzir dosh baṭor eḳ baṭ tumar name zoḳat dei.’ Oile ou ḳazna tulra beṭae duroi ubai roilo, Allar arshor bae souk tular shaosh-o tar oilo na. He bukut mari mari kandi kandi koilo, ‘O Alla, ami boṛo gunagar, amare rohom ḳoro.’ “Ami tumrare ḳoiram, ou ḳazna tulra beṭa-u forezgar bonia tar goro gelo, hi Forishi nae. Ashole ze nizore boṛo mono ḳore, tare huru ḳora oibo. Ar ze nizore huru mono ḳore, tare boṛo ḳora oibo.” Manshe tarar huru huruttainre loia Isar gese ailo, tain zanu huruttainre atai dia dua ḳoroin. Ita dekia sahabi oḳole manshor ufre biroḳto oia na ḳorla. Oile Isae huruttainre tan ḳandat nila, nia ḳoila, “Huruttainre amar ḳandat aibar deo, tarare bada dio na. Allar bashshai to ou nomunar manshor lagi-u. Ami hok kota ḳoiar, huru hurutta bonia Allar shashon na manle, kunu zon-u Allar bashshait hamaito farto nae.” Hozrot Isar gese fainchaitor eḳ murobbi aila, aia ḳoila, “O hok ustad, amare batai deukka, kita ḳorle ami aḳer faimu?” Isae ḳoila, “Amare ḳene hok koira? Ḳali eḳ Alla bade ar ḳeu hok nae. Afne to shoriotor hukum-ahkam zanoin, Zina ḳorio na. Kun ḳorio na. Suri korio na. Misa kunu shakki dio na. Tumar ma-bafre ijjot ḳorio.” Hi murobbie ḳoila, “Huzur, i hokkolta to huruman tone-u adae ḳorram.” Ikan hunia Isae ḳoila, “Oḳon ḳali ekḳan ḳam baki ase, afnar hoḳol don-samana besia gorib oḳolre lilla dilaukka. Teu afne behesto don faiba. Bade aia amar ummot oukka.” Ikan hunia hi murobbi kub bezar oigela, tain ashole bout boṛo doni asla. Tain bezar oigesoin dekia Isae ḳoila, “Doni manush Allar bashshait hamani boṛo moshkil. Doni manush Allar bashshait hamanir saite, suir naʼ baedi uṭ hamani aro shuza.” Ikan zara hunla, tara aroz ḳorla, “Te ar ḳegie rehai faibo?” Tain ḳoila, “Manshor gese zeta oshombob, Allar gese to ita shombob.” Ou shomoy Fitore ḳoila, “Huzur, amra to hoḳolta falai toia afnar ummot oisi.” Teu Isae sahabi oḳolre ḳoila, “Ami tumrare hasa ḳota ḳoiram, Allar bashshair lagi zera nizor baṛi-gor, ma-baf, bou, fua-fuṛi, bai-birador falaia aise, tara ou duniat-u er bout beshi faiba, ar bador zindegit aḳer-o faiba.” Bade Isae tan barozon sahabire daro boaila. Boaia ḳoila, “Huno, amra oḳon Zeruzalemo zairam, te ami bin-Adomor befare nobi oḳole zotota lekia gesoin, ita oḳon fura oibo. Amare bidormi zatir ato shofi deoa oibo. Manshe loia ḍong-tamsha ḳorba, beijjot ḳorba, ar tutu ḳori muko sef diba. Amare sabuk marba bade zane marba. Moutor tin dinor din ami hirbar zinda oia uṭmu.” Oile tan sahabi oḳole ou mator kunu bed buzla na. Tain kita ḳoira tara shomzita farla na, ḳaron tarar gese gufon raḳa oisil. Isa zebla Ziriho ṭaunor ḳandat aila, ou shomoy eḳ anda beṭae fotor ḳandat boia bik korat asil. Aḳta-u bout manshor faor tali hunia beṭae zikailo, “Kita ba, kita or?” Manshe ḳoila, “Nasarotor Isae ou fotedi toshrif nira.” Ou he sillaia uṭlo, “O Daudor aolad Isa, amare doya ḳoroukka.” Sillani hunia biṛor samnor ḳataror manshe tare domoḳ dila, “Chup ḳoro, nirai ro.” Oile he aro zure sillaia ḳoilo, “O Daudor aolad, amare rohom ḳoroukka.” Teu Isa ubai gela. Ubaia anda beṭare tan ḳandat anaila. Beṭa daro aia harle tain zikaila, “Kita ba, tumare kita ḳortam?” Beṭae ḳoilo, “Huzur, ami kali souke deḳtam sai.” Isae tare ḳoila, “Aichcha te deḳo. Tumar imanor bole-u tumi bala oilae.” Loge loge-u beṭar souk kuligelo, deḳar shokti failo. Beṭae Allar shukria adae ḳori kori tan ḳore oia roana dilailo. Ita dekia hoḳol manshe Allar tarif ḳorla. Hozrot Isa Ziriho ṭaunor mazedi aṭia zaira, hono Zakir namor boṛo eḳ doni manush asla. Ein oila ḳazna tulra oḳlor fordan. Isare deḳar lagi tan kub ḳaish asil, oile tain baṭṭi manush, erdae oto biṛor maze deḳar ufae oilo na. Ou douṛia agedi gela, gia Isa ze fotedi aira ou fotor ḳandar eḳ ḍumur gaso uṭla. Isa zebla hou ḍumur gasor tole aila, tain ufredi saia Zakirre ḍaḳ dila, “Zakir, zoldi lamia ao. Ami aiz tumar baṛit roite oibo.” Zakir loge loge-u lamia aila. Tain kushi oia Isare tazim ḳoria tan baṛit nila. Ita dekia hoḳole ḳana-ḳani kori koila, “Tain ḳene eḳ naforman beṭar baṛit rait ḳaṭanit gela?” Zakire hoḳlor samne ubaia ḳoila, “Huzur deḳoukka, ami oḳon-u amar don-samanar ordek goribre lilla dilairam. Ar zerar hok ṭogia anchi, tarare sair otoḳan firot dilaimu.” Teu Isae ḳoila, “Aiz taki i baṛit nazat aise. Ein-o to Ibrahimor ḳandanor eḳzon. Ou laḳan be-foti oḳolre tukaia bar ḳoria, tarare basanir lagi-u to ami bin-Adom i duniat aisi.” Hozrot Isae tarar loge ota matira, ou shomoy tain Zeruzalem taki tuṛa duroi roisoin. Tara mono ḳorla, Zeruzalem fosia-u tain Allar bashshai zair ḳoriliba. Erlagi Isae tarare ou kichcha hunaila, “Nobab foribaror eḳzon beṭa manush bout duroi eḳ desho soforo gela. Tan kial asil hono gia raza oia firot aiba. Zaibar age tan doshzon gulamre ania forteḳ zonre eḳṭa ḳori shunar mohor dia ḳoila, ‘Ami aibar ag forzonto oguindi tumra ḳay-ḳarbar ḳoro.’ “Oile tan proza oḳole tanre fosond ḳorta na. Erlagi tara tan ḳore oia guia faṭaia hou bashshare zanaila, ‘Amra sai na, ein amrar raza oukka.’ Oile-o tain raza bonia firot aila. Aia hou ze doshzon gulamre tain mohor disla, tarare anaia zikaila, ḳay-ḳarbar ḳoria tara ḳe ḳoto lab ḳorsoin. Foyla zone aia ḳoilo, ‘Huzur, afnar eḳ mohordi ami dosh mohor ruzi korsi.’ Razae tare ḳoila, ‘Bala ḳorso! Tumi to bala gulam, tumi kub shamainno befare-o hok aso. Te tumi ou dosh forgonar ufre zomidari koro.’ Dusra zone ḳoilo, ‘Huzur, afnar mohordi ami fas mohor ruzi korsi.’ Tain ḳoila, ‘Tumi-o fas forgonar ufre zomidari koro.’ Bade aroḳzone ḳoilo, ‘Huzur, ou neukka, afnar hi mohor. Ami afnare ḍoraia afnar mohor rumalo bandia toi disi. Afne to ḳoṛa mizazor manush. Zoma na ḳoria-o adae ḳoroin, ḳet na ḳoria-o foshol ḳaṭoin.’ “Teu razae ḳoila, ‘O ḳobis gulam! Tor mukor ḳotae ami tor bisar ḳormu. Tui to zanos-u ami koṛa mizazor manush, zoma na ḳoria-o adae ḳori, ḳet na ḳoria-o foshol ḳaṭi! Te amar mohor tui befarir gese toile na ḳene? Te to ami aia mul mohoror loge kisu lab-o failam one.’ Razae tan uzir-nazirre ḳoila, ‘Ogur ges taki ou mohor firot ano, ar zar dosh mohor ase tare deo.’ Teu hoḳole ḳoila, ‘Huzur, tar to emne-u dosh mohor ase.’ Razae ḳoila, ‘Ami tumrare ḳoiram, zar ase tare aro deoa oibo. Zar nai, tar zeta ase ota-o ḳaṛia neoa oibo. Ar amar zeta dushmone saisoin na ami raza oitam, otare ono doria ania amar samne marilao.’ ” Oḳan ḳoia hari Isae tarar age oia Zeruzalemor bae toshrif nila. Tain Zoytun faṛor ḳandat Bayt-Faijja ar Bayt-Ania gaur galat aia harle, tan duizon sahabire oḳan ḳoia faṭaila, “Tumra ou samnor gaut zao. Gaut hamaia-u deḳbae, egu gadar baichcha banda ase. Ogur ufre ḳeu kunudin soṛse na. Tumra ogur ban kulia ono loia aio. Ḳeu zudi zikae, ‘Igur ban kulo ḳene ba?’ te ḳoio, ‘Huzuror goroz ase.’ ” Ze sahabi oḳolre faṭaisla, tara gia tan ḳotamoto hoḳolta faila. Tara zebla gadar baichchar ban kulra, ou shomoy malike zikaila, “Oba, doṛi kulrae ḳene?” Tara ḳoila, “Huzuror goroz ase ḳori kulram.” Bade gadar baichcha loia Isar ḳandat aia, erar gotror saddordi gadar fiṭit godi banaia Isare boaila. Tain zebla gada soṛia fotedi roana dila, fotor maze manshe tarar zarzir saddor bisai dila. Isa Zeruzalemor ḳandat Zoytun faṛ tone lamar foto aia azila, ou shomoy tan ummot oḳol-o loge asla, era tan zeta keramoti ḳam deḳsila, otar lagi tara kushie zure zure sillaia Allar tarif ḳoria ḳoila, “Mubarok hou bashsha, zein Mabudor name toshrif anra. Behesto shanti, Allar arsho gourob!” Biṛor maze Forishi dolor ḳoyzone Isare ḳoila, “Huzur, afnar ummot oḳolre domoḳ deukka.” Isae ḳoila, “Ami afnarare ḳoiram, erar muk bond ḳorille-o, fattor oḳole sillaia uṭbo.” Tain zebla Zeruzalemor ḳandat aila, ou shomoy Zeruzalem ṭaun dekia ḳandi dila. Tain ḳoila, “Haere hae! Aiz zudi tumi buztae, shanti kila ḳaim oy! Oile oḳon ita tumar sokur aoṛe roise. Tumar ufre ila shomoy azir oibo, zebla dushmon oḳole deoalor sairo galabae maṭir ṭeki bandibo. Tumare berilibo, ar hokkolbae aṭok korbo. Tara tumare ar tumar feṭor aolad oḳolre maṭir loge mishaibo. Tumar eḳ fattoror ufre aroḳ fattor roito nae. Ḳaron Allae tumare basaita ḳori ze shuzug disoin, tumi i shomoy-shuzugre sinlae na.” Bade tain Baytul-Mukaddoso hamaila. Hamaia hono zetae bebsha ḳorat asla, ota hokkolṭire ḳedai dila. Tain ḳoila, “Pak kalamo leḳa ase, amar gor oibo munazator gor, oile tumra ikanre ḍaḳaitor aḍḍaḳana banailiso.” Hozrot Isa forteḳ din Baytul-Mukaddoso gia nosiot ḳorta. Ou shomoy boṛo imam, moulana ar shomazor murobbi oḳole tanre marilita saila. Oile kila tanre mara zae, er kunu fondi tara failo na. Ḳaron hoḳol manshe ashik oia dile-zane tan boyan hunta. Ou soforor ḳalo eḳdin Hozrot Isa Baytul-Mukaddosor maze, manshor gese Allai kush-ḳobri toblig korat asla. Aḳta-u boṛo imam ar alim oḳol tarar murobbi oḳolre loia aia ḳoila, “Aichcha ḳo sain, tumi kun ḳemotae ita ḳam ḳorrae, tumare itar eḳtiar ḳegie dise?” Isae zuaf dila, “Te ami-o afnaintore zikairam, ḳoukka sain, Ehia nobie toubar gusol ḳoranir ḳemota faisla, manshor ges taki na Allar ges taki?” Ou tara eḳe-oinne zukti-foramish ḳorlo, “Zudi koi Allar ges taki, te he ḳoibo, taile tan ufre iman anlae na ḳene? Ar zudi koi manshor ges taki, te manshe amrare fattordi marba. Ehiare to tara Allar nobi koia manoin.” Ou tara ḳoilo, “I ḳemota kuai taki faisla, amra zani na.” Isae tarare ḳoila, “Te ami-o ḳoitam nae, kun ḳemotae ita ḳorram.” Bade Isae manshore ou kichcha hunaila, “Ek giroste anguror bagan ḳorla, bade tan baganre ḳetal oḳlor gese bagi dia bout dinor lagi bidesh gelagi. Angur faḳar shomoy oile malike tan baṭ nibar lagi ek gulamre faṭaila. Oile ḳetal oḳole tare mair-doir ḳoria ḳali ate firai dilo. Bade tain arok gulamre faṭaila. Tara i gulamre-o mair-doir ḳori beijjot ḳoria ḳali ate firai dilo. Bade tin nombor gulamre faṭaile, tara eo gulamre maria zoḳom ḳoria bare falai dilo. Teu baganor malike ḳoila, ‘Ami kita ḳortam? Oḳon ami amar mayar futre faṭaimu, teu tara manto fare.’ Oile malikor fuare dekia ḳetal oḳole ḳoilo, ‘Ou fua-u to tar bafor hoḳoltar malik oibo. Ao, ere maria falai dei. Teu malikor hoḳolta amra failimu.’ Oḳan ḳoia hari tare baganor bare nia kun ḳorilailo. “Oḳon ḳoukka sain, baganor malike i bagidar oḳolre kita ḳorba? Tain aia tarare nifat ḳoriliba na ni? Ar tan bagan dusra manshor gese diba na ni?” Ita hunia tara ḳoila, “Nauzubilla! Allae fana deuk!” Teu Isae tarar bae saia ḳoila, “Te Allar kalamo ḳene ila leḳa ase, Raz mestoir oḳole ze fattorre beḳama ḳoia falai disil, oḳṭa dia-u goror ian kuṭi oilo. I fattoror ufre ḳeu foṛle, i zon bangia ṭukra ṭukra oizibo, ar i fattoro ḳeuror ufre foṛle, he-o zon surmar oizibo.” Oḳan hunia-u moulana ar boṛo imam oḳole Isare dorilta saila. Tara buzilila, Isae i kichcha tarar niote-u ḳoira. Oile manshore ḍoraia tara kunta ḳorla na. Erlagi tara Isare souke souke raḳla, tan ḳore ḳoyzon guia lagaila. Guia oḳole mumini besh doria solle-o, tarar niot oilo Isare ḳotar fando falaita, zate tane deshor fordan hakimor adaloto salan ḳorail zae. Ou guia oḳole Isare ḳoila, “Huzur, afne to hoḳolre homan souke deḳoin. Afne hok mat matoin, hok talim dein. Ḳeurore toakka na ḳoria, manshore Allar hok fot deḳain. Te ḳoukka sain, Ruman bashsha Ḳoisorre ḳazna deoa zaiz ni, na nazaiz?” Isae tarar ku-motlob buzilila. Buzia ḳoila, “Deki, amare eḳṭa dinar deḳao.” Dinar dekia ḳoila, “Igur ufre ḳar sobi ar nam ase?” Tara ḳoila, “Bashsha Ḳoisoror.” Isae ḳoila, “Te Ḳoisororta Ḳoisorre deo, ar Allarta Allare deo.” Tan zuaf hunia tara taijjub bonia nirai oigela. Guia oḳole manshor samne tanre ḳotar fando falaito farlo na. Bade Siddekia mozobor kisu manush Isar gese aila. Ou mozobor manshe mono ḳoroin, morar bade kunu zandar-u ar zinda oita nae. Tara Isare zikaila, “Huzur, Musa nobie amrar lagi ou niom lekia gesoin, kunu manshe tar bou toia niaoladi halote morigele, tar baie ou boure bia ḳoria mora bair oarish foyda ḳorbo. Oḳon mono ḳoroukka, ek goro shat bai asil. Foyla zone bia ḳoria niaoladi halote morigelo. Heshe ou beṭi-o morigelo. Te kiamotor din i beṭi kar bou oibo? Shato zone-u to i beṭire bia ḳorsil.” Isae ḳoila, “I duniar manshe bia-shadi koroin, ar bia-shadi dein. Oile moutor bade zinda oia zera aḳerato kamiabir laḳ oizae, tara ar bia-shadi korta nae, ba bia-shadi boita-o nae. Tarar kunu mout-o oito nae, tara firistar laḳan oiziba. Moutor bade aḳer faoae tara Alla Pakor aolad boniziba. Tur faṛor zalail zonglar boyanir maze Musa nobie buzaisoin, murda oḳol to zinda oia uṭoin, erlagi-u bout age ze nobi oḳol mara gesoin Musae Mabudre hou nobi oḳlor Alla ḳoia ḍakila. Tain Mabudre ḳoila, Ibrahimor Alla, Isʼhakor Alla ar Iakubor Alla. Te Alla to murda oḳlor Alla nae, tain zinda oḳlor Alla. Tan nozoro hokkol manush-u zinda asoin.” Teu ḳoyzon alime ḳoila, “Huzur, afne to ḳaṭi mat matsoin.” Heshe tara Isare ar kunu soal ḳorar shaosh failo na. Ermaze Isae ou alim oḳolre zikaila, “Manshe ḳene al-Mosire Daud nobir aolad ḳoin? Daude to al-Mosire tan munib ḳoia ḍakila, te al-Mosi ḳemne Daudor aolad oiba?” Manshe Isar boyan hunra, ou shomoy tain shagrid oḳolre ḳoila, “Alim oḳlor befare hushiar o. Tara lamba lamba zubba findia gurite kub bala fain. Bazar-aṭo gia salam faite fosond ḳoroin. Mosido gia samnor ḳataro boite ar mozliso gia dami zagat boite fosond ḳoroin. Tara manshore deḳanir lagi lamba lamba dua ḳoroin. Hirbar ṛaṛi beṭintor gor-baṛi doḳol ḳoroin. Kiamotor din erar boṛo ḳoṭin shaza oibo.” Hozrot Isae saia deḳla, doni oḳole Baytul-Mukaddosor lillar ḍegor maze dan-ḳoyrat dira. Ermaze deḳla, kub gorib eḳ ṛaṛi beṭie-o aia ḍegor maze duiṭa foysha dan ḳorlo. Dekia tan sahabi oḳolre ḳoila, “Ami tumrare hasa ḳota ḳoiram, ou gorib ṛaṛi beṭie hoḳol taki beshi dan ḳorse. Ḳaron baki hoḳole ḳoros ḳorar bade zeta deṛia roise, on taki tuṛa ongsho ḍegor maze dan ḳorse. Oile i beṭie nizor obab-onoṭon taḳle-o, tair ḳamail hokkolta-u dan ḳorilise.” Ḳoyzon sahabie Baytul-Mukaddos Kaba Shorifor befare matila, ḳoila, “Deḳra ni, oto shundor shundor fattordi ar dan-ḳoyratdi gorḳanre hazail oise.” Isae tarare ḳoila, “Tumra ou zotota deḳrae, ola eḳ din aibo, zebla ita eḳ fattoror ufre aroḳ fattor roito nae. Hoḳolta maṭir loge mishizibo.” Sahabi oḳole tanre zikaila, “Huzur, ita kun zomanat oibo? Kun alamot deḳle buza zaibo, hi shomoy oigese?” Tain ḳoila, “Hushiar roio, ḳeu zanu tumrare be-fote na ney. Bout zone amar nam dori aia ḳoibo, shomoy oigese, ami-u al-Mosi. Oile tumra itar ḳore zaio na. Tumra zebla zuddo ar gonḍogulor ḳobor hunbae, ḍoraio na. Ḳaron foyla ita oibo-u oibo, oile ita to shesh nae.” Bade tain ḳoila, “Zatie zatir bifokke, razae razar bifokke zuddo ḳorbo. Boṛo boṛo boisal oibo, zagae zagae nidan ar bezuita bemar-azare manush morba. Asmano-o kub ḍor-ḳofor nishana ar azob azob kudroti lila zair oibo. “Oile ita goṭar age manshe tumrare ḳedaibo, dorbo. Bisaror lagi mozlisor samne azir ḳorbo, zelo haraibo. Amar namor lagi tumrare raza-bashsha ar hakim oḳlor samne neoa oibo. Teu amar name toblig korar lagi tumra shuzug faibae. Oile tumra mono rakio, kita zuaf ditae, ita age sinta ḳorar kunu zorur nae. Ḳaron ami tumrare oula zoban ar hekmot zugaia dimu, tumrar bifokko oḳole ita firaito farto nae, er zuaf dibar-o takkot oito nae. Tumrar ma-baf, bai-birador, ḳesh-kuṭum ar dust oḳole-o tumrare doraia diba. Tara tumrar kunu kunu zonre zane marailiba. Ar amar namor lagi tumrare hokkole ginnaibo. Oile-o kunumonte-u tumrar matar eḳsa sulor-o ḳeti oito nae. Tumra imane mozbut roile, nizor hasaror zindegi hasil ḳorbae. “Tumra deḳbae, sifai oḳole aia sairobae tone Zeruzalemre gerao ḳorilira, teu buzilio, Zeruzalemor binash aichche. Hi shomoy zara Ehudia zilat taḳba, tara faṛedi gia bagouk. Zara ou Zeruzalemo taḳba, tara ṭaunor bare zauk. Zara gau-geramo taḳba, tara zanu kunumonte-u ṭauno na ain. Ḳaron i oḳt oilo Allai gozobor oḳt, Allar kalamor ayat oḳol fura oibar oḳt. Ish! I shomoy zeta beṭintor feṭo hurutta taḳba, zera huruttare bukur dud ḳaoaiba, erar bout ḳoshṭo oibo! Deshor ufre bezuita durgoti, ar Ihudi oḳlor ufre gozob nazil oibo. Toluaror tole tara zan kuaiba, bondi oia hokkol zatir maze zaiba. Ou bidormi zatir ḳemotar shomoy fura oar ag forzonto, i Zeruzalem tarar faor tole roibo. “San-shuruz ar asmanor terar maze nanan alamot deḳa zaibo. Duniar hoḳol deshor manshor ḳoshṭo oibo. Doriae utal-fatal ḳorbo. Ḍeur aoaze manush bedisha lagba. Duniat kun dosha goṭibo ota sinta ḳoria ḍoror suṭe manush beush oizibo, asmani san-shuruz, tera hokkolta aula-zaula oizibo. Ou shomoy deḳbae, ami bin-Adome Allar kudroti shokti ar nuror mohimae megor kuṭit oia duniat toshrif aniar. Ita hal-hokikot deḳle tumra mozbut oio, mata usa ḳorio, buzilio tumrar nazat daro aichche.” Isae tarare ou misal hunaila, ḳoila, “Tumra ḍumur gas ar oinno gasaintor bae deḳo, itar noya kuṛi-fata baroni deḳle-u tumra buzilao, gormor din aichche. Oula tumra zebla deḳbae, ita hal-hokikot goṭer, te buzilio Allar bashshai nozdik aichche. Ami tumrare hasau ḳoiram, ita hokkolta na goṭar age, i zomanar manush koy oita nae. Asman-zomin koy oizibo, oile amar kalam kunudin-o koy oito nae. “Tumra nize hushiar roio, zate mozar mozar ḳani, mod ḳaia ṭal oa ar ruzi-ruzgaror neshae aula-zaula na o, arnae hou din aia aḳta-u tumrare fando haraito fare. Duniar tamam manshor ufre-u hi din azir oibo. Oile tumra hamesha hozag roio, ar dua ḳorio, zate ou zeta zair oibo ota faroia hari amar samne ubanir bol fao.” Isae forteḳ din Baytul-Mukaddoso aia nosiot ḳorta. Bade rait oile tain bar oia Zoytun faṛo zaitagi. Hoḳol manshe tan boyan hunar niote bian-sobre Baytul-Mukaddoso aita. Ihudi oḳlor Ḳamir Saṛa Ruṭir Id ḳasat ailo, ou idor nam Azadi Id. Ibae moulana ar boṛo imam oḳole foramish ḳorla, Hozrot Isare am manshor ges taki lukaia kila zane marta. Tara am manshore kub ḍoraita. Ou shomoy tan barozon sahabir mazor eḳzon, en nam Ihuda Iskariat, en bitre Shoytan hamailo. Ein Isare doraia deoar lagi lukaia Baytul-Mukaddoso gela. Gia honor daroga ar boṛo imam oḳlor loge foramish ḳorla, kun nomunae Isare tarar ato dorai deoa zae. Teu imam oḳol kub kushi oia oada ḳorla, tanre doraia dile tare boḳshish diba. Ete Ihuda-o razi oia manshor aforḳe, tanre dorai deoar shuzug tukanit roilo. Bade Azadi Id ailo, ou idor din meṛa-baichcha kurbani deoa oy. Teu Isae sahabi Fitor ar Hannanre hukum dila, “Tumra gia amrar lagi idor ḳani tiar ḳoro, amra hoḳol aia eḳloge ḳaimu.” Era zikaila, “Huzur, afnar kial kita, amra kunano gia ḳana tiar ḳortam?” Tain ḳoila, “Huno, ṭauno hamaia harle tumra deḳbae, eḳ beṭae fanir ḳoyla boria loia zaira. Tumra en ḳore ḳore zaio, gia ein ze goro hamaiba, hou goror malikre ḳoio, ‘Huzure zikaisoin, tan sahabi oḳolre loia Azadi Idor ḳani ze goro ḳaita, i musafir ḳana kuai?’ He tumrare ufror talat hazail-faṛail boṛo ek kuṭa deḳaia dibo. Hono gia tumra randa-baṛa ḳorio.” Hasau tara gia tan ḳota mafik hoḳolta faila, faia Azadi Idor ḳani-o tiar ḳorla. Bade shomoy aile Isae tan barozon sahabi loia ḳanit boila. Boia ḳoila, “Amar boṛo kial asil mosibotor mukamuki oibar age, aḳeri idor ḳani kan tumrare loia ḳaitam. Ami tumrare ḳoiram, Allar bashshair asol morzi-munsha furafur hasil na oa forzonto, ami ar kunu idor ḳani kaitam nae.” Bade tain shorbotor fiala loia Allar shukria zanaia ḳoila, “Ou fuṭain tumra baṭia ḳailao. Ar huno, ami tumrare ḳoiram, Allar bashshai na aoa forzonto, ami ar anguror kunu shorbot ḳaitam nae.” Erbade ruṭi ato loia Allar shukria zanaila. Ruṭi ṭukraia sahabi oḳolre dila, ḳoila, “Mono ḳorio iṭa amar ḳaya, ou ḳaya ami tumrar lagi shofi dimu. Amare mono ḳorar lagi tumitain-o ola ḳorio.” Ḳaoar bade shorbotor fiala ato loia ḳoila, “Amar lour zoriae Allar loge manshor milonor ze noya usilla nazil or, ou fiala oilo er nishana. Amar ou lou tumrar nazator lagi dimu. Te deḳrae ni! Amare zegie doraia dibo, he oḳon amar loge ou dostarḳanat boia ḳar. Allae zela hukum ḳorsoin, ami bin-Adomor mout to ola-u oibo. Haere hae! Lannoti hou adom, zegie amare doraia dibo.” Sahabi oḳole eḳe-oinnore zikaila, “Te amrar mazor kun manshe ila ḳam ḳorbo?” Ou shomoy sahabi oḳlor maze kun zon hoḳol taki boṛo, ota loia tarar maze torka-torki lagigelo. Teu Isae tarare ḳoila, “Bidormi deshor raza oḳole tarar prozar ufre munibgiri deḳain. Tarar zomidarre ḳoa oy zongonor dust. Oile tumra ilan oio na. Tumrar maze zein hoḳol taki boṛo, ein hoḳlor huru ouk. Ar zein neta, ein ḳadimdaror laḳan ouk. Ḳo sain kun zon boṛo? Zein ḳana ḳain, na ze ḳadimdari kore? Zein ḳana ḳain ein-u nae ni? Te ami nize-u to tumrar ḳadimdari koriar. “Huno, amar hoḳol bala-mosiboto tumra amar loge loge aslae. Ar amar batuni bafe amare zela godi ar ḳemota dan ḳorsoin, ami-o oula tumrare ḳemota dan ḳorram. Ou ḳemota faia, tumra-o amar bashshait dakil oia amar loge boia ḳana-fina ḳaibae, amar loge godit boia Boni Israilor baro gusṭir bisar-adalot ḳorbae. “Saimon, Saimon, huno, dan-saul zela saindi saniain, Shoytane-o tumrare ola saniaito saise. Oile tumar lagi ami aroz ḳorsi, tumar iman zanu ḳomzur na oy. Te tumi eḳbar gelegi-o touba ḳoria zebla firot aibae, ou shomoy tumar ou baiaintor imani bol-o mozbut ḳorio.” Fitore ḳoila, “Huzur, ami to afnar loge oia zelo zaite, ba zan dite-o tiar asi.” Tain ḳoila, “Fitor, ami tumare ḳoiram, aiz fotabala murgae bang dibar age-u, tumi tin-tinbar ḳoibae, tumi amare sino na.” Bade tan sahabi oḳolre zikaila, “Ḳo sain, ami zebla tumrare ṭeḳar toli, gaiṭ-buski ita kunta na dia ḳali faoe faṭaislam, hi shomoy tumrar kuntar obab oisil ni?” Tara ḳoila, “Ji na, kunu obab oise na.” Isae ḳoila, “Te oḳon ami koi, oḳon zar ṭeḳar toli ba gaiṭ-buski ase, he ota loge raḳouk. Zar toluar nai, he tar saddor besia toluar ḳorid ḳorouk. Pak Kalamor ayato to leḳa ase, tanre naforman oḳlor ḳataro milail oibo. I ayat to amar ufor dia-u folibo. Amar befare zotota leḳa ase, ita hokkolta oḳon folizar.” Teu sahabi oḳole ḳoila, “Huzur deḳoukka, ino dukan toluar ase.” Tain ḳoila, “Ota-u to bout.” Ḳana-finar bade Isa bar oia boraborkur laḳan hou Zoytun faṛo gela, sahabi oḳol-o tan ḳore ḳore gela. Hono gia harle Isae tarare ḳoila, “Tumra dua ḳoro, zate kunu forikkat na foṛo.” Ḳoia hari sahabi oḳlor ges taki sair nol foriman duroi gia, zanu fatia dua ḳorat boila. Tain ḳoila, “Behesti baba, tumar ichcha oile mosibotor i fialaṭa amar ges tone horailao. Oile amar ichchae nae, tumar ichchae-u ouk.” Teu behest taki eḳ firista aia Isare doroshon dia tan bol baṛaila. Bade tain monor duke fereshan bonia aro ḳator oia dua ḳorla. Erlagi tan gotror gam lour fuṭar laḳan maṭit foṛto laglo. Dua shesh ḳoria sahabi oḳlor ḳandat aia deḳla, monor duke ḳator oia tara gumai gesoin. Dekia tarare ḳoila, “Gumairae ḳene? Uṭia dua ḳoro, zate forikkat na foṛo.” Isa mato roisoin, ou shomoy aḳta-u hikano bout manush aila. Erar hokkolor age asil Ihuda, he Isar barozon sahabir mazor eḳzon. Ihudae tanre hunga dibar lagi kandat ailo. Isae tare ḳoila, “Ihuda, ami bin-Adomre hunga dia dorai dirae ni?” Ou shomoy Isar ḳandat zera asla, tara buzilila kita or. Buzia ḳoila, “Huzur, otare amrar toluardi martam ni?” Ḳoia-u eḳ sahabie toluardi sed mari fordan imamor gulamor ḍainor ḳan ḳaṭilila. Oile Isae ḳoila, “Bad deo, ar mario na.” Oḳan ḳoia tain hi gulamor ḳan atai dia tare bala ḳorilla. Hozrot Isare aṭok korat zoto boṛo imam, Baytul-Mukaddosor daroga, ar murobbi oḳol aisla, Isae tarare zikaila, “Manshe sur-ḍaḳait dorte zela laṭi-sulfi loia zain, tumra amare dorat oula aiso ni? Ami to forteḳ din-u Baytul-Mukaddoso tumrar samne aslam, hi shomoy amare dorlae na ḳene? O, oḳon nisoy tumrar shomoy, andairor razotto salu oise.” Dushmonor dole Isare aṭok koria fordan imamor baṛit loia gelagi. Sahabi Fitor duroi hori hori Isar ḳore oia gela. Uṭanor maze bakka manshe aguin doraia tabanit lagla, Fitor-o ono aia shorik oila. Ou shomoy eḳ bandi beṭie agunir foror maze Fitorre dekia bala ḳori saia ḳoilo, “Ou beṭa-o hogur loge asil.” Fitore ḳoila, “Na beṭi, ami ere sini-u na.” Tuṛa bade aroḳzone Fitorre dekia ḳoilo, “Tumi-o otar logor eḳzon.” Tain ḳoila, “Na ba, ami nae.” Aro eḳod gonṭa bade aroḳzone boṛo golae ḳoilo, “Oy, oy, ogu-o er loge asil, e-o to Galilor manush.” Tain ḳoila, “Dur beṭa! Tumi ita kita mato, kunta buzi na.” Fitore ota ḳoira, ermaze aḳta-u murgae bang dilailo. Teu Isae muk firaia Fitoror bae saila. Saite-u Fitoror mono oigelogi, huzure to age-u ḳoisla, “Aiz fotabala murgae bang dibar age-u, tumi tinbar ḳoibae, tumi amare sino na.” Teu Fitor bare gia kub ḳandon ḳandila. Hozrot Isare doria ania faradar oḳole tanre ṭaṭṭa-moshkora ar mair-doir ḳorlo. Tan souk bandia ḳoilo, “Hoi, tui bule nobi, te oḳon gaibi ko sain, tore ḳegie marlo?” Oula aro boutta ḳoia tanre beijjot ḳorlo. Rait fuanir bade deshor fotua komiṭir murobbian, boṛo imam ar alim oḳol dola oila, ar Isare tarar samne anaia ḳoila, “Tumi zudi Allar oada ḳora hou al-Mosi o, te amrare ḳo.” Isae ḳoila, “Ami koile-o to tumitain ekin ḳortae nae. Kunta zikaile-o zuaf ditae nae. Oile ami bin-Adom oḳon taki-u arshe-azimo Allar ḍainor kursit boimu.” Teu hokkole zikailo, “Te tumi-u kita Allar ḳas mayar zon Ibnulla ni?” Tain ḳoila, “Oy, tumitain-u to ḳoirae, ami-u hein.” Teu tara hokkole ḳoilo, “Te ar shae-shakkidi kita ḳortae? Amra nizor ḳane-u to tar zobanbondi hunlam.” Tara hoḳole eḳloge dol bandia Isare loia Ruman hakim Filator gese gela. Gia Isar bifokke nalish dila. Tara ḳoila, “Amra deḳsi, ou beṭae amrar deshor manshore bigṛai der, he manshore nished ḳore amrar bashsha Ḳoisorre ḳazna dita na. He nize-u bule al-Mosi namor eḳ bashsha.” Filate Isare zikaila, “Tumi kita Ihudi oḳlor bashsha ni?” Tain zuaf dila, “Afne zela ḳoin, ola-u.” Teu Filate boṛo imam ar hoḳol manshore ḳoila, “Ami to i ashamir kunu dush-u fairam na.” Oile tara zid ḳoria ḳoilo, “I beṭae Galil zila taki arombo ḳoria asta Ehudia zilar manshore bigṛaia, oḳon amrar ono aia-o hokkolre bigṛailar.” Ikan hunia Filate zikaila, “He kita Galilor manush ni?” Hakime zebla hunla, Isar baṛi oilo Raza Herudor odinor Galil zilat, hunia tain Isare Herudor gese faṭai dila, ḳaron Herud-o ou shomoy Zeruzalemo asla. Isare dekia Herud kub kushi oila. Tain bout din dori Isare deḳta saira. Age tain Isar befare boutta hunchila, erlagi tan monor asha asil, Isae tanre kunu keramoti-muzeza deḳaiba. Tain Isare bout nomunar prosno ḳorla, oile Isae itar kunu zuaf dila na. Adaloto ubaia-o boṛo imam ar moulana oḳole kub gorom oia Isar bifokke nalish hunanit roila. Erloge Herude ar tan sifai oḳole-o Isare ṭaṭṭa-moshkora, beijjoti korla, hesh-mesh tanre bashshai soḳsoḳa lebas findaia hakim Filator gese firot faṭai dila. Er age Raza Herud ar hakim Filator maze dushmoni asil, oile ou din taki-u tarar maze dusti oigelo. Bade Filate boṛo imam, murobbi oḳol, ar am manshore ekḳano dola ḳoria, ḳoila, “Ou ashamire tumra doria ania amar gese nalish dilae, he hokkol manshore bigṛailar, oile ami to tumrar samne-u tare zera ḳorlam, te tumra zela nalish diso, tar maze to ila kunu dush-u failam na. Ar Raza Herude-o nisoy tar kunu dush faisoin na, erlagi-u tain tare amar gese firot faṭaisoin. Ami deḳram, moutor shazar zuka kunu dush-u he ḳorse na. Te ami tare singladi maria saṛi dimu.” Ashole hakim Filator reoaz-o asil, tain Azadi Idor oḳto eḳzon ḳoydire ḳalas dita. Oile manshe eḳloge sillaia ḳoilo, “Na, na, ogure marilao. Barabbare saṛi deo.” Ou Barabbare age zelo harail oisil, he Zeruzalem ṭauno kun ar shontrash ḳorsil. Oile Filate Isare saṛi deoar niote hirbar tarar loge batchit ḳorla. Ta-o tara eḳloge sillaia uṭlo, “Ogure solibo deo, solibo deo.” (Solib oilo laḳṛidi banail manshore loṭḳaia marar eḳ zinish.) Filate tin-tinbar tarare zikaila, “Ḳene? I ashamie kita dush ḳorse? Moutor shazar zuka tar kunu dush-u ami fairam na. Ami kali singladi maria tare saṛi dimu.” Oile tara mairmuki oia, sillaia, misil lagaila, “Ogure solibo loṭḳao, solibo loṭḳao.” Sillanir suṭe tarar dabi fura oilo. Tarar dabi mafik-u Filate ray dilaila. Tain Hozrot Isare tarar bod ḳaish mafik tarar ato saṛi dila ar hou kuni-shontrashire ḳalas dilaila. Hakimor ray faia sifai oḳole Isare zane marilita ḳori Isare loia zaira. Ou shomoy Saimon namor Kurini elaḳar eḳzon manush gau taki ṭauno aoat asil. Tara ou beṭare doria laḳṛidi banail solib tar ḳando tulia dia ḳoilo, he ogu loia Isar ḳore ḳore zaito. Isar ḳore ḳore bout manush asil, erar loge bout beṭin-o asla. Tara tan lagi bilaf ar ahazari koria bukut tabaia ḳandon lagaila. Oile Isae tarar bae saia ḳoila, “O Zeruzalemor mai oḳol, amar lagi kandio na. Tumra nizor lagi ar nizor fua-fuṛir lagi kando. Huno, omon eḳ din aibo, zebla manshe ḳoiba aṭkura beṭin-u boṛo ḳofali. Zerar kunu hurutta-u oise na, bukor dud-o kunudin ḳaoaise na, tara-u ḳofali. Hi shomoy manshe boṛo boṛo faṛre ḳoibo, tumra aia amrar ufre foṛo. Faṛor ṭilla oḳolre ḳoibo, amrare lukaia raḳo. Tumra deḳrae na ni, taza gasre-u itae ou halot ḳorra, te hukna gasor kun dosha oibo.” Hozrot Isar loge ḳori marar lagi sifai oḳole duizon dagi ashamire loia ailo. Bade Matar-Kuli namor zagat ania, tara Isare ar hou duio dagi ashamire gasor ṭukradi banail solibo loṭḳailo, eḳzonre tan ḍain galat, aroḳzonre bau galat loṭḳailo. Ou shomoy Isae ḳoila, “Baba, erare maf ḳori dilao. Tara to buzer na tara ita kita ḳorer.” Bade tara tan ḳafoṛ-sufoṛ nita ḳori loṭari maria baṭa-baṭi korla. Bout manshe ubaia ita deḳla, oile tarar murobbi oḳole Isare ṭiṭkari maria ḳoila, “He to bout manshor zan basaito, he zudi hasau Allar oada ḳora hou al-Mosi oy, te oḳon tar nizor zan-o basauk.” Ruman sifai oḳole-o tanre loia moshkari korlo, tara ṭenga anguror shorbot loia tan ḳandat gia ḳoila, “Tumi zudi Ihudi oḳlor hasaror bashsha o, te oḳon nizor zan basao na.” Tan matar ufre ekḳan sainborḍ lagail oilo, hono leḳa asil, “He Ihudir bashsha.” Ou shomoy tan loge aro ze duizon ashamire solibo loṭḳail oisil, ota eḳzone tanre ṭiṭkari maria ḳoilo, “Tumi bule hou al-Mosi? Te oḳon amrare ar tumare-o basao na.” Oḳan hunia dusra zone ere damki dia ḳoilo, “Tumi kita Allare-o ḍorao na ni? Tumi-o to ou homan shaza fairae. Ar amra to fairam amrar usit shaza, amra zelan ḳam ḳorsi oulan fairam. Oile ein to kunu dush-u ḳorsoin na.” Bade he ḳoilo, “O Isa, afne firia aia zebla nize bashshai korba, ou shomoy ḳano amare iad raḳoin zanu.” Tain ḳoila, “Ami tumare hok kota ḳoiram, tumi aiz taki-u amar loge arshe-azimo taḳbae.” Ou shomoy beil onuman duifor, erbad taki zuhoror bad forzonto tin gonṭa dori asta desh andair oigelo. Shuruzor for nibigelo. Ermaze Zeruzalemo Kaba goror fobitro Herem Shorifor fordaḳan, ufre taki tol forzonto siṛia dui ṭukra oigelo. Heshe Isae zure aoaz ḳoria ḳoila, “Baba, amar ruhu tumar ato shofia dilailam.” Oḳan ḳoia-u aḳeri dom falaia inteḳal ḳorla. Ruman sifair ze boṛo ofisar hono fara deoat asla, ein Isar moutor i halot dekia Allar tarif ḳoria ḳoila, “Nichchoy, i besaṛa ḳaṭi dindar manush asla.” Ar ita deḳar lagi zoto manush dola oisla, tara-o i halot dekia bukut mari mari ahazari koria firia gela. Isar forisito zon oḳole, ar Galil zila taki zeta beṭin tan loge oia aisla, tara hokkole duroi ubaia ita deḳla. Ou Iusuf hakim Filator gese gela, gia Isar lash nita saila. Bade Hozrot Isar lash solib taki lamaia, ḳafon findaila, ar fattor kudia banail oula ek koyboror maze dafon ḳorla, i koyboro kunudin ar ḳeurore dafon ḳora oise na. I din asil Ihudir zummar agor din, tuṛa bade-u Zummabar shuru oizibo. Ar zeta beṭin Galil taki Isar loge oia aisla, tara Iusufor ḳore ḳore gia hou ḳoybor deḳla, ar kilaḳan tan lash dafon ḳora oilo eota deḳla. Bade tara firia gia hari ator-gulaf ar sondon-molom banaila, heshe shoriotor hukum mafik zummar din ziraila. Ou beṭinte zeta ator-gulaf tiar ḳorsla, haftar foyla din kub sobre tara ota loia, Isar ḳoyboror ḳandat aila. Aia deḳla, ḳoyboror mukor fattorḳan horail oigese. Dekia tara ḳoyboror bitre hamaia deḳoin, Isar lash to ḳoyboro nai. Teu tara sintat foṛigela. Ou shomoy dola soḳsoḳa ḳafoṛ finno duizon aia tarar ḳandat ubaila. Erare dekia beṭinte ḍoraia mata nuailila. Ou duiozone tarare ḳoila, “Ogo, tumitain zindare ḳene murda oḳlor maze aia tukairae? Tain to ono nai, tain zinda oigesoin. Tain Galilo taḳte tumrar gese kita ḳoisla, mono ḳoria deḳo. Tain ḳoisla na ni, bin-Adomre naforman manshor ato dorai deoa oibo. Tanre solibo loṭḳaia zane mara oibo, oile moutor tin dinor din hirbar zinda oia uṭba?” Oḳan hunte-u Isar agor ḳota oḳol tarar mono oigelo. Tara ḳobrostan taki firia gia, hou egaro zon sahabire ar baki hoḳlor gese ḳobor zanaila. Mogdilini Moriom, Iuhanna, Iakubor ma Moriom ar tarar loge zeta beṭin asla, era hoḳole gia i ḳobor ḳoila. Oile zera ita hunla, era mono ḳorla ita nisoy baze mat, ita beṭintor mat tara ekin ḳorla na. Oile Fitor douṛaia ḳoyboror ḳandat gela. Gia unda oia deḳla, ḳali kafonḳan foṛi roise. Ita dekia tain taijjub bonia firot aila. Ou din-u duizon shagrid Zeruzalem taki shat mail duroi Imuas namor ek gaut zaoat asla. Foto tara ota befar oḳol loia-u mati mati zaira. Tara mato roisoin ou shomoy aḳta-u Isa nize tarar ḳandat aia eḳloge aṭa dorla. Oile tarar sokut saṭa lagigesil, tara Isare dekia-o sinla na. Isae tarare zikaila, “Aṭi aṭi afnara ita kitar batchit ḳorra?” Ikan hunia era muk bezar ḳori ubai gela. Ermaze Kiliofas name eḳzone Isare ḳoila, “Afne-u eḳmatro zon, zein hunchoin na i koydine Zeruzalemo kita goṭise?” Isae tarare zikaila, “Kita goṭise ba?” Tara ḳoila, “Nasarotor Isare loia zotota goṭise. Tain to Allar nobi, tan mukor zoban ar ḳame-ḳaze Allar nozoro ar hoḳol manshor sokut-o kub takkoti ar mortuba-ala nobi asla. Amrar boṛo imam ar murobbi oḳole tanre zane marar lagi Ruman oḳlor ato doraia dilaila, tara tanre nia solibor ufre zane marilise. Oile amrar asha asil, tain Boni Israilre azad ḳorba. Aiz tin din oilo i goṭona goṭise. Ar amrar logor ḳoyzon beṭi manshe aia amrare taijjub banailisoin. Tara kub sobre Isar ḳoyboro gesla, gia deḳsoin, tan lash nai. Tara firot aia ḳoila, tara firistar doroshon faisoin, ar firista oḳole tarare ḳoisoin, Isa zinda asoin. Bade amrar loge zara asla, tarar maze-o ḳeu ḳeu ḳoyboro gia deḳla, beṭintor ḳota-u hasa, Isar lash ḳoyboro nai.” Hoḳolta hunia Isae tarare ḳoila, “Afnara to kunta-u buzoin na. Afnaintor dil ola oshaṛ bonigese ni? Allar nobi oḳole zeta bataia gesoin, otare-o afnara ekin ḳorra na. Nobi oḳole ḳoisoin na ni, Allar oada ḳora al-Mosie duḳ-mosibot shoijjo ḳoria hari tan zalal ar gourob hasil ḳorba?” Bade tain Musa nobir Tourat Kitab taki shuru ḳoria, hokkol nobir kitabor maze tan befare zotota leḳa ase, ota tarare buzaila. Ar ze gaut zaita ḳori tara roana disla, hou gaur ḳandat aile Isae aro duroi zaoar bab deḳaila. Oile tara kub minot-ḳajji koria tanre ḳoila, “Oḳon to beil gesegi, hainja oizar, te raitḳan afne amrar gese roi zaukka.” Ou tain roar lagi baṛit hamaila. Bade zebla ḳanit boila, ou shomoy Isae ruṭi loia ṭukraia Allar shukria adae ḳoria tarare dila. Teu tarar souk kuligelo, tara Isare sinilila. Sinar loge loge-u tain erar ges taki auṛi dilaila. Bade tara eḳe-oinnore ḳoila, “Foto zebla tain amrar loge batchit ḳorsla, amrare Allar kalam buzaia disla, hou shomoy amrar dilor maze eḳ eshki foyda oisil na ni?” Loge loge tara duiozon bar oia Zeruzalem aila. Aia hou egaro zon sahabi ar baki hokkolre ekḳano boat faila. Tara ono boia ota matira, Hozrot Isa ashole-u zinda oigesoin, zinda oia Saimon-Fitorre deḳa disoin. Ou shomoy hou duio zone-o erare ḳoila, fotor maze tara kila Isar deḳa faila, ruṭi ṭukraibar shomoy kila tanre sinla, ita hoḳolta zanaila. Sahabi oḳole to ota loia batchit ḳorra, ou shomoy aḳta-u Isa nize ono aia tarar mazḳano ubaia ḳoila, “Assalamu alaikum.” Tane dekia tara kub ḍoraigela, mono ḳorla but aise. Isae tarare ḳoila, “Tumra oto ostir oigelae ḳene? Ḳene tumrar dilo shondoy hamailo? Amar at-fao balamonte deḳo, deḳo na, i to ami. Amare ataia deḳo, butor to amar laḳan aḍḍi-mangsho nai.” Oḳan ḳoia tain nizor at-fao tarare deḳaila. Oile tara tane dekia oto beshi kushi oila, kushir suṭe bedisha bonigela, kunta bishash ḳorta farla na. Teu Isae tarare ḳoila, “Ino ḳaibar kunta ase ni?” Tara eḳ ṭukra biran mas tanre dila. Ou mas tain hoḳlor samne ḳaila. Ḳaia erare ḳoila, “Ami zebla tumrar loge aslam, hou shomoy tumrare ḳoislam na ni, Musa nobir Tourat Shorif, nobi oḳlor sohifa, ar Zobur Shorifor maze zeta leḳa ase, ita hoḳolta nichchit folibo.” Oḳan ḳoia hari, tain sahabi oḳlor dilor duar kuli dila, zate Allar kalamor mani era buzta faroin. Tain ḳoila, “Allar kalamo leḳa ase, al-Mosie bout ḳoṭin duk-toklif faiba, moutor tin dinor din tain murda taki zinda oiziba. Zekunu manshe tan name touba ḳorle, gunar mafi magile mafi faibo, ou boyani Zeruzalem taki shuru oia asta duniar hoḳol zatir ḳano fosani lagbo. Tumra-u i hokkoltar shakki. Ar huno, amar batuni bafe zeta dan ḳorar oada ḳorsoin, ami ita tumrar gese bezimu. Oile behest taki bol-takkot na faoa forzonto, tumra ou Zeruzalemo roio.” Bade Isae sahabi oḳolre loia Bayt-Ania gaur muko gela, gia tain at tulia tarare dua dila. Ar ou duar halote-u tain tarar ges tone alog oigela, tanre behesto tulia neoa oilo. Tara hoḳole tanre soizda ḳoria, kub kushi oia Zeruzalemo firot aila. Ar Baytul-Mukaddosor maze hamesha Allar hamd-tarif ḳorat roila. Amin. Foyla-u kalam asla, kalam Allar loge asla ar ou kalam nize-u Alla asla. Hoḳol foyla ou kalam Allar loge asla. Ou kalamor mazdi hokkolta foyda ḳora oisil, zotota foyda ḳora oise, er kunuta-u tanre saṛa foyda oise na. Tan maze zindegi asil, hou zindegi-u oilo manshor nur. Ou nur andarir maze zoler, oile andaire i nurre ḳobza ḳorto farse na. Allae Ehia namor eḳzon manshore duniat faṭaila. Ou nuror befare shakki dibar lagi tanre faṭail oilo, zate tan zobanbondi hunia manshe iman ane. Tain nize hi nur asla na, oile nuror befare shakki dibar lagi duniat aisla. Asol nur oila hou zon, zein hokkol manshore nur dan ḳoroin, tain duniat toshrif anra. Ou duniat tain asla, dunia tan usillae foyda oise, ta-o duniar manshe tanre sinlo na. Tain nizor zomino aila, tan nizor manshe-u tanre ḳobul ḳorlo na. Oile zoto zone tan ufre iman ania tanre ḳobul ḳorla, era forteḳ zonre tain Allar ḳas aolad, mani mayar zon bonar eḳtiar dila. Ashole ou zon oḳlor zonom to manshor lou taki oise na, shorilor ḳaish ba manshor ichchae-o oise na, iṭa ḳali Alla taki-u oise. Ou kalam-u manush surote zonom loila ar amrar maze boshoti korla. Bafor ḳas aolad hishabe tain ze zalal ar mohima faisoin, hou zalal ar mohima amra deḳsi. Tain to hok ar rohomote shullo-ana kamil. Ehia nobie tan befare boṛo golae shakki dila, ḳoila, “Ein-u to hou zon, zen befare ami age ḳoislam, amar bade eḳzone toshrif anra, tain ama taki-o mohan, amar bout ag taki-u to tain asoin.” Tain shullo-ana kamil oae amra hoḳole rohomotor ufredi aro rohomot faisi. Musa nobir marfote Allae shoriot dan ḳorsila, oile Isa al-Mosir marfote hok ar rohomot aise. Allare to ḳeu kunudin deḳse na. Tan loge roura hou eḳmatro fut, mani tan ḳas mayar zon, zein shoyong Moula, tain-u Allare zair ḳorsoin. Ihudi neta oḳole Zeruzalem ṭaun taki zebla ḳoyzon imam ar Lebi shomazor kisu manshore Ehia nobir gese faṭaila, ou shomoy Ehiae erar gese shakki dila. Tara zebla zikaila, “Sab, afne ashole ḳe?” Ehia nobie kunta na lukaia shikar oia ḳoila, “Ami to al-Mosi nae.” Teu tara tanre zikaila, “Te afne ḳe? Afne Ilias nobi ni?” Tain ḳoila, “Na, ami Ilias nae.” Ou tara zikaila, “Te afne kita agor zomanar hou nobi ni?” Tain zuaf dila, “Ji na.” Tara hirbar tanre zikaila, “Taile afne ḳe? Amrare zera faṭaisoin, amra firia gia kita ḳoitam, afnar nizor forisoy kita?” Ehiae zuaf dila, “Ami oilam hou aoaz, zen befare Hozrot Ishaya nobie batai gesoin, Morubumir maze zure zure eḳzone elan ḳorra, tumra Malikor fot sohi koro.” Ehia nobir gese zerare faṭail oisil, era asla Forishi shomazor manush. Tara tanre zikaila, “Afne zebla al-Mosi-o nae, Ilias nobi-o nae ba agor zomanar hou nobi-o nae, te afne ḳene manshore toubar gusol dira?” Ehia nobie tarare zuaf dila, “Ami to manshore fani dia toubar gusol ḳorairam, oile afnarar maze oula eḳ buzurg zon asoin, zenre afnara sinoin na. I buzurg hou zon, zein amar bade toshrif anar ḳota asil. Tan faor zutar fitagesa kular laḳ-o ami nae.” Zordan gangor aroḳ faro Bayt-Ania gaut, Ehia nobi ze zagat toubar gusol ḳoranit asla, hou zagat ou soal-zuaf oilo. Bador din Ehia nobie deḳla Huzur Isa tan gese aira, dekia ḳoila, “Ou deḳrae ni Allai meṛa-baichcha, zen usillae hokkol manshor gunar mafi oy. Ein oila hou zon, zen befare ami age ḳoislam, amar bade eḳzone toshrif anra, ashole tain amar ag taki-u asoin, ar tain ama taki-o ijjoti zon. Age to ami tanre sintam na, oile Boni Israilor maze tain zate forisiti fain, otar lagi ami age aia manshore fanidi toubar gusol ḳorairam.” Bade Ehia nobie ou shakki dila, ḳoila, “Ami deḳlam ḳoitoror surote Pak Ruhu asman taki lamia aila, aia en ufre azila. Ami to tanre sintam na, oile toubar gusol ḳoranir lagi zein amare bezisoin, tain amare batai disoin zen, Allai Pak Ruhre zar ufre lamia aite deḳbae, ein-u hou zon, zein manshore Pak Ruhdi torikabondi diba. Te ami ita deḳlam, dekia hari shakki diram, ein-u Ibnulla, Allar ḳas mayar zon.” Bador din Ehia nobi ar tan duizon ummot hirbar hou zagat aila. Ou shomoy Hozrot Isa aṭia zaira, tanre dekia Ehiae ḳoila, “Ou deḳrae ni Allai meṛa-baichcha.” Ehia nobir ou ḳota hunia hou duiozon Isar ḳore ḳore roana oigela. Isae ḳoredi firia erare deḳla, dekia ḳoila, “Kita ba, tumra kita sao?” Tara zuaf dila, “Robbi, (mani ustad), afne kuai taḳoin?” Isae tarare ḳoila, “Ao na, aia dekia zao.” Teu tara tan loge gela, gia deḳla tain kun zagat taḳoin, ar tara-o asta din tan loge roila. Ou shomoy asoror oḳt aichche. Ehia nobir ḳota hunia ze duizon Isar ḳore ḳore gesla, erar eḳzonor nam oilo Andrias, en bair nam Saimon-Fitor. Ou Andriase foyla tan bai Saimonre tukaia bar ḳoria ḳoila, “Baisab huncho ni, amra to al-Mosire deḳsi.” Al-Mosir mani oilo Allar ḳelafoti faoa zon. Andriase Saimonre loia Isar gese aila. Isae Saimonor bae saia ḳoila, “Tumi to Saimon bin Iuhanna, oile oḳon taki tumare Koifa name ḍaḳa oibo.” Koifa mani Fitor, ba fattor. Bador din Isae niot ḳorla, Galil zilat zaitagi. Ou shomoy tain Filifre deḳla, dekia ḳoila, “O Filif ao, aia amar ummot o.” Filif asla Bayt-Soyda gaur manush. Andrias ar Fitoror baṛi-o asil ou gaut. Filife Notonelre tukaia bar ḳoria ḳoila, “Musa nobir Tourat Kitabo ar asmani nobi oḳlor sohifat zen ḳota leḳa ase, amra to tanre deḳsi. Tain to Nasarot gaur Isa, tan bafor nam Iusuf.” Ikan hunia Notonele Filifre ḳoila, “Dut! Nasarot taki bala kunta baroy ni?” Filife ḳoila, “Te aia deḳo.” Isae deḳla, Notonel tan gese aira, dekia ḳoila, “Ou deḳrae ni eḳzon ḳaṭi Boni Israili. Tar maze kunu dundur-mundur nai.” Teu Notonele Isare zikaila, “Afne amare ḳemne sinla?” Isae zuaf dila, “Huno, tumare ḍakibar age tumi zebla hou ḍumur gasor tole aslae, hou shomoy ami tumare deḳsi.” Ikan hunia Notonele Isare ḳoila, “Huzur, afne-u to Ibnulla, Allar ḳas mayar zon. Afne-u Boni Israilor bashsha.” Isae tanre ḳoila, “Tumare hou ḍumur gasor tole deḳsi oḳan ḳoae tumi iman anlae ni? Huno, er taki-o aro bout boṛo boṛo keramoti tumi deḳbaene.” Bade Isae ḳoila, “Ami tumrare hok kota ḳoiram, tumra deḳbae behest kuligese, ar Allar firista oḳol ami bin-Adomor ufre uṭa-nama ḳorra.” Er duidin bade Galil zilar Kanna gaut eḳ bia asil. Hozrot Isar ma ou biat asla. Ou biat Isa ar tan sahabi oḳole-o daot faisla. Biar onusṭano zebla anguror shorbot fuṛai gelo, ou shomoy Isar maʼe Isare ḳoila, “Erar anguror shorbot shesh oigese.” Isae tan maʼre ḳoila, “Mai go, ita to amar bishoy nae. Oḳono amar shomoy oise na.” Oile tan maʼe ḳadimdar oḳolre ḳoila, “Oba, tain zeta ḳoin, ota-u ḳoro.” Ihudir shoriot mafik uzu ḳorar lagi hino fattoror soyṭa gamla asil. Ita eḳoṭat onuman dui-tin mon fani dorto. Isae ḳadimdar oḳolre ḳoila, “Ou gamlainto fani boro.” Teu tara iguin ṭefe ṭefe bori dilo. Bade tain ḳoila, “On taki tuṛa fani nia fordan baburchire deo.” Teu tara ola-u ḳorlo. Baburchie ou fani kaia deḳla, ita to anguror shorbot. Oile i shorbot kuai taki ailo, ikan tain zanta na. Ḳali kadimdar oḳole zanto. Erlagi baburchie biar noshare ḍakia ḳoila, “Foyla hoḳole-u manshore ḳaṭi shorbot ḳaite dey. Manshe ichchamoto ḳaoar bade zebla shesh oizae, ou shomoy ze shorbot dey, ita foyla taki kisu bezal taḳe. Oile tumi kaṭi shorbot oḳono raḳso.” Hozrot Isae Galil zilar Kanna gaut nishana hishabe ou foyla keramoti deḳaia nizor mohima zair ḳorla. Ita dekia sahabi oḳole tan ufre iman anla. Erbade Isae tan ma, baiain ar sahabi oḳolre loia Kofornaum ṭauno gela, gia ḳoydin hono roila. Ihudir Azadi Id gonai gele Isa Zeruzalem ṭauno aila. Zeruzalemo aia tain deḳla, fobitro Baytul-Mukaddos Kaba goror shimanat kurbanir goru, meṛa ar faro besa-kina soler, ar ṭeḳar baṭṭar ḳarbari oḳol-o boi roisoin. Ita dekia tain doṛi dia eḳṭa sabuk banaila, ar sabuk dia hoḳol goru-meṛa ar manshore intone ḳedai dila. Ar ṭeḳar baṭṭar ḳarbari oḳlor ṭeḳa-foysha sitraia, tarar kesh bakso ulṭaia falaila. Faro besra oḳolre Isae ḳoila, “In tone hokkolta horao. Amar bafor gorre bazar banaio na.” Ou shomoy Pak Kitabor ou ḳota sahabi oḳlor mono oigelo, “Tumar goror lagi amar ze mohobbot, ou mohobbote-u amar dilor maze agunir laḳan zoler.” Isar i ḳamor lagi Ihudi neta oḳole tanre zikaila, “Ita ḳorar odikar ze tumar ase, tar forman hishabe tumi kun keramoti deḳaibae?” Tain zuaf dila, “Afnara ou Kaba gor bangilaukka, ami tin dinor bitre hirbar tulmu.” Ikan hunia tara ḳoila, “I ebadot ḳana banaite soysallish bosor lagsil, ar tumi kita tin dinor bitre banailibae ni?” Oile Isae ino Allar gor bolte nizor shorilor ḳota-u ḳoisoin. Erlagi Isa mora taki zinda oar bade sahabi oḳlor mono oisil, tain ou ḳota-u ḳoisla. Teu sahabi oḳole Pak Kitabor ḳota ar Isae zeta ḳoisla, ota ekin ḳorla. Azadi Idor shomoy Isae Zeruzalem roia zeta keramoti ḳam ḳorsila, ita dekia bout manshe tan ufre iman anlo. Oile Isae nizore tarar gese dora dila na, ḳaron tain hoḳol manshore sinta. Manshor befare tan kunu shakkir zorur asil na, tain erar dilor ḳobor zanta. Forishi oḳlor maze Nikodim name Ihudi oḳlor eḳzon neta asla. Eḳdin rait tain aia Isare ḳoila, “Huzur, amra zani, afne eḳzon ustad hishabe Allar ges taki aisoin. Afne zeta keramoti ḳam ḳorra, Alla loge na taḳle ḳeu ita ḳorto fare na.” Tain Nikodimre ḳoila, “Ami afnare hasau ḳoiram, noya ḳori zonom na loile ḳeu Allar bashshai deḳe na.” Teu Nikodime tanre ḳoila, “Manush buṛa oigele hirbar zonom loy kila? Dusrabar maʼr feṭo hamaia zonom loy ni?” Isae zuaf dila, “Ami afnare hasau ḳoiram, fani ar Pak Ruhu taki zonom na oile ḳeu Allar bashshait hamaito fare na. Roḳto-mangsho taki zetar zonom oy, ita to ḳali roḳto-mangsho. Ar Pak Ruhu taki zetar zonom, ita ruhu. Ami ze afnare ḳoilam, noya ḳori zonom loa zorur, ete taijjub oiba na. Batash tar zebae ichcha obae zae, ar afne tar aoaz hunoin, oile ḳoi taki ae ar ḳoi zae, ikan zanoin na. Te Pak Ruhu taki zerar zonom oise, tarar belae-o olaḳan oy.” Nikodime Isare zikaila, “Ikṭa kila oito fare?” Isae zuaf dila, “Afne Boni Israilor ustad oia-o ita buzoin na ni? Afnare hasau ḳoiram, amra zeta zani oḳan-u ḳoi, ar zeta deḳsi ou befare shakki dei. Oile afnara amrar shakki manoin na. Ami afnarare duniabi befare ḳoile zebla ekin ḳoroin na, te behesti befar ḳoile kila ekin ḳorba? Zein behesto taḳoin ar behest taki aisoin, hou bin-Adom saṛa ar ḳeu behesto uṭsoin na. “Morubumir maze Musa nobie zela hafre usat tulchila, ola ami bin-Adomre-o usat tula oibo. Zate ze zone amar ufre iman ane, he aḳeri zindegi hasil ḳore. Alla Pake duniar manshore oto beshi maya ḳorla, i mayar ḳatire tan ḳas mayar zonre dan ḳorla. Ze manshe ou mayar zonor ufre iman ane, he binash oy na, borong aḳeri zindegi hasil ḳore. “Allae manshore dushi forman ḳorar lagi tan mayar zonre duniat faṭaisoin na. Ou mayar zonor ḳatire manshe zate nazat fae, erlagi-u faṭaisoin. Ze zone ou mayar zonor ufre iman ane, tar kunu bisar oy na, oile ze iman ane na, tare age-u dushi shaibosto ḳora oigese. Ḳaron Allar eḳmatro mayar zon Ibnullar ufre he iman anche na. Tare dushi shaibosto ḳora oise, ḳaron duniat nur zair oise. Oile manshor bod ḳamor lagi nur taki andairre beshi bala faise. Ze manshe bod ḳam ḳore, he nurre ginnae, tar bod ḳam oḳol zair oizibo ḳori he nuror gese ae na. Oile ze zon hok-halalir fote sole, he nuror gese ae, zate tar hoḳol ḳam Allar munsha mafik oise ḳori forman oy.” Erbade Hozrot Isa ar sahabi oḳol Ehudia elaḳat aila. Hino tain sahabi oḳlor loge kisu din ḳaṭaila ar manshore toubar gusol ḳoraila. Ou shomoy Salim namor ek gaur ḳandat Oinun namor eḳ zagat Ehiae-o toubar gusol ḳoranit asla. Hou zagat bout fani taḳae dole dole manush aia toubar gusol loila. Ehia nobire ou shomoy-o zelo bondi kora oise na. Ou shomoy shoriot mafik fak-saf oar befar loia, Ehia nobir ummot oḳole Ihudir eḳ alimor loge torko lagai dila. Bade tain-tain Hozrot Ehiar gese aia ḳoila, “Huzur, zein Zordan gangor hofaro afnar loge asla, ar zar befare afne shakki disla, deḳra ni, hoḳol manush tan gese zairagi ar tain erare toubar gusol dira.” Ikan hunia Ehiae ḳoila, “Behest taki deoa na oile ḳeu kunta fae na. Tumra-u to huncho, ami koisi, ami al-Mosi nae, oile tan age amare faṭani oise. Zar gese ḳoinare bia deoa oy, ein-u nosha. Noshar duste ḳali ubaia noshar mat hunoin ar tan golar aoaz hunia kushi oin. Ou laḳan amar kushi-o aiz fura oilo. Tanre boṛo oite oibo ar ami hori zaitam oibo.” Zein ufor taki ain, ein hoḳlor ufre. Oile ze dunia taki ae, he to duniar, he duniabi mat-u mate. Zein behest taki ain, tan ashon hoḳlor ufre. Tain hono zeta deḳsoin ar hunchoin, otar shakki-u dein. Ḳeu tan shakki mane na. Oile ze zone tan shakki kobul ḳorse, he oḳan dia-u forman ḳore, Allar kalam-u hasa. Allae zenre faṭaisoin, tain Allar kalam-u batain, ḳaron Allae tanre furafur ḳoria Pak Ruhu dan ḳoroin. Bafe tan futre, mani tan ḳas mayar zonre maya ḳoroin ar tan ato-u hoḳolta disoin. Ze manshe Allar ḳas mayar zonor ufre iman anche, he aḳeri zindegi failise. Oile ze tanre mane na, he kunumonte-u aḳer faito nae borong tar ufre Allar gozob foṛbo. Forishi oḳole hunla, Hozrot Isae Ehia nobi taki beshi manshore tan ummot banaisoin, ar toubar gusol ḳoraira. Oile Isae nize toubar gusol ḳoraira na, tan ummot oḳole-u ḳoraira. Hozrot Isae i kobor faia, Ehudia zila saṛia hirbar Galil zilat zaoar lagi roana oila. Zaoar ḳalo tanre Shomoriar mazdi zaoa lagsil. Foto tain Shomoriar Shukar namor ek gaur daro aila. Hozrot Iakube tan fua Iusufre ze zomin dan ḳorsla, ou zominḳan asil hou gaur daro. I zomino Hozrot Iakubor kua asil. Isa aṭte aṭte heran oia ou kuar ḳasat ziraila. Ou shomoy onuman duifor oigese. Beṭie ḳoilo, “Ami to Shomoria zatir manush. Afne eḳzon Ihudi oia amar gese fani saira kila?” Beṭie ikan ḳoilo, ḳaron Shomoria zatir loge Ihudi manshor kunuzat mil-mish ba sola-fira asil na. Isae taire ḳoila, “Tumi zudi zantae Allar dan kita, ar ḳe tumar gese fani saira, te tumi nize-u tan gese fani sailae one, ar tain tumare zinda fani dila one.” Beṭie ḳoilo, “Sab, afnar gese to fani tular kunta nai, ar i kua-o goin. Te zinda fani kuai taki faila? Afne kunu amrar mul murobbi Iakub nobi taki boṛo ni? Tain-u amrar lagi i kua kudisla. Tain ar tan fuainte-o ou kuar fani kaita, ar tan foshur falre-o ḳaoaita.” Teu Isae ḳoila, “Ze zone i kuar fani kaibo, tar hirbar fias lagbo. Oile amar deoa fani ze ḳaibo, tar kunu shomoy-u fias lagto nae. Borong i fani tar dilor maze zornar laḳan utlia uṭbo ar aḳeri zindegi dan ḳorbo.” Teu beṭie Isare ḳoilo, “Huzur, te amare-o hou fani deukka, zate amar fias na lage, ar fanir lagi ino aoa na lage.” Isae beṭire ḳoila, “Te zao, tumar zamaire ono loia ao.” Beṭie ḳoilo, “Sab, amar to kunu zamai nai.” Isae ḳoila, “Tumi ṭik-u ḳoiso, tumar zamai nai. Ḳaron er age to tumar faszon zamai oigesoin, ar oḳon ze tumar loge ase, he tumar zamai nae. Tumi hasa ḳota-u ḳoilae.” Ikan hunia beṭie Isare ḳoilo, “Huzur, oḳon ami buzlam, afne eḳzon nobi. Amrar baf-dadainte ou faṛor ufre-u ebadot ḳorta, oile afnara ḳoin, Zeruzalemo-u manshor ebadot ḳora usit.” Isae tanre ḳoila, “Huno, amar matḳan ekin ḳoro. Dekio, oula shomoy aibo zebla tumra i faṛor ufre, ba Zeruzalemor kunuḳano, gaibi baf Allar ebadot ḳortae nae. Tumra zare sino na, tar ebadot ḳoro, oile amra zan ebadot ḳori, tanre amra sini. Zano ni, nazator fot to Ihudi oḳlor mazdi-u aise. Huno, ola shomoy aibo, borong oḳon-u aichche, zebla asol ebadotḳari oḳole hokkani ruhe gaibi baf Allar ebadot ḳorba. Gaibi bafe-o olaḳan ebadotḳarir tallash ḳoroin. Allatala oilagi ruhu, erlagi zara tan ebadot ḳorba, tara hokkani ruhe tan ebadot ḳora lagbo.” Bade ou beṭie ḳoilo, “Ami zani, al-Mosi aira. Tain aia hoḳolta amrare zanaiba.” Isae ou beṭire ḳoila, “Ami-u hein, zein oḳon tumar loge matira.” Ou shomoy sahabi oḳole aia deḳla, Isae eḳ beṭir loge matira, dekia tara taijjub oigela. Ta-o tara ḳeu zikaila na, afne kita saira ba en loge matira ḳene. Bade beṭie tair fanir ḳoyla toia gaur manshore gia ḳoilo, “Tumra aia eḳzonre deki zao. Amar zindegit zeta ḳorsi, ita hoḳolta-u tain ḳoilisoin. Te tain-u kita hou al-Mosi ni?” Ita hunia gaur manush bar oia Isar gese aoa dorla. Bade tan sahabi oḳole tanre onurud ḳori koila, “Huzur, kunta ḳaukka.” Tain ḳoila, “Amar gese ila ḳani ase, ze ḳanir befare tumra zano na.” Ikan hunia sahabi oḳole eḳe-oinne zikaila, “Te tanre ḳeu kunu ḳani ania dise na kita?” Teu Isae tarare ḳoila, “Zein amare bezisoin, tan morzi mafik tan ḳam fura ḳora-u amar ḳani. “Tumra ḳo na ni, ‘Ar sair mash bade-u foshol ḳaṭar shomoy aibo’? Oile ami tumrare ḳoiram, bala ḳori eḳbar ḳetedi saia deḳo, foshol fakia ḳaṭar zuka oigese. Foshol ḳaṭrae oḳon-u beton faira ar aḳeror lagi foshol dola ḳorra. Erlagi zein zala bain dein ar zein foshol ḳaṭoin, duiozon-u homan kushi oin. Ete ou silleḳor forman oy, ‘Eḳzone bain dein, aroḳzone ḳaṭoin.’ Ami-o tumrare ola foshol ḳaṭat faṭaisi, ze fosholor lagi tumra menot ḳorso na. Oinno manshe menot ḳorse ar tumra ou menotor foshol ḳaṭiso.” Ze beṭir zindegir hoḳolta Isae ḳoilisoin, ou beṭir shakki hunia hou gaur bout Shomoria manshe Isar ufre iman anla. Tara Isare gia minot ḳori koila, tarar oḳano roibar lagi. Erdae tain dui din hono roila. Ou shomoy tan talim hunia aro bout manshe iman anla. Ar gaur manshe ou beṭire ḳoila, “Tumar ḳotae amra iman anchi na, amra nize-u tan mat hunia buztam farsi, ein-u zogotor asol toraneala.” Shomoriat duidin roia hari Hozrot Isa nizor baṛi Galil zilat gelagi. Zudio tain age ḳoisla, kunu nobire-u nizor desho dam deoa oy na, tebou ou shomoy tara tanre ḳobul ḳorla. Ḳaron idor shomoy Isae Zeruzalemo zeta keramoti deḳaisla, Galilor manush hono taḳae tara ita deḳsla ḳori tain Galilo aile tara ḳobul ḳorla. Bade Isa hirbar Galilor Kanna gaut gela. Ono-u tain fanire anguror shorbot banaisla. Kofornaum ṭauno eḳ shorḳari ofisaror fua kub bemar asil. Hozrot Isa Ehudia taki Galil aisoin hunia, ou ofisar tan gese gia minot ḳorla, tain zanu Kofornaum gia en fuagure bala ḳoroin. Ou shomoy tan fua morar foti oigesil. Isae ou ofisarre ḳoila, “Kunu nishana ba keramoti ḳam na deḳle afnara kunumonte-u iman anta nae.” Teu ofisare ḳoila, “Huzur, doya ḳori zoldi aukka, fuagur zan taḳte aukka.” Isae tanre ḳoila, “Afne zaukkagi, afnar fua bala oigese.” Isar ḳota ekin ḳoria ein gelagi. Hasau, hou ofisar baṛit zaoar fote tan gulam oḳole aia ḳobor ḳoilo, “Sab, afnar fuar bemar ḳomigese.” Tain erare zikaila, “He kun shomoy bala oise?” Tara ḳoila, “Ḳail duifor taki tan taf saṛi dise.” Teu ofisaror mono oilo, ṭik duifori bala Isae tanre ḳoisla, “Afne zaukkagi, afnar fua bala oigese.” Erlagi ou ofisar ar tan foribaror hoḳole Isar ufre iman anla. Hozrot Isa Ehudia tone Galilo aoar bade ou dusra keramoti nishana deḳaila. Itar bade Ihudi oḳlor idor shomoy aile Isa Zeruzalemo gelagi. Zeruzalemo meṛa-dorzar ḳandat eḳṭa furki asil, ou furkit siṛi banda fasḳan gaṭ asil, faso gaṭor ufre fasḳan sauni. Ibrani bashae i furkir nam Bayt-Soda. Ou gaṭo bout zator bemari foṛi roito. Lula-lengṛa, anda, ar bemare zerar shoril ekkebare hukai gese, tara-o ono roito. Maze maze eḳzon firista aia ou furkir fani laṛaita, laṛanir bade-u foyla ze zon fanit lamto, tar zoto boṛo bemar ouk bala oizito. Erdae ou bemari oḳole fani laṛanir ashae ono foṛi roito. Erar maze ola eḳzon bemari asil, ze beṭa aṭtish bosor taki bemar. Bout din taki he ono foṛi roise hunia Isae tare zikaila, “Kita ba, tumar ichcha ni tumi bala oizitae?” Beṭae ḳoilo, “Huzur, amar to ila ḳeu nai, zein fani laṛanir loge loge-u amare furkit lamaito. Ami lamte lamte aroḳzon gia lami zae.” Isae ere ḳoila, “Te uṭo, tumar bisna loia aṭa-sola ḳoro.” Loge loge-u ou bemari bala oigelo, ar tar bisna tulia sola-fira ḳorlo. Hi din asil Zummabar, Zummabare kunuzat ḳam ḳora zaiz nae. Erdae Ihudi neta oḳole ou beṭare ḳoila, “Aiz to Zummabar, te aiz tumar bisna tulia neoa zaiz nae.” Oile he ḳoilo, “Zein amare bala ḳorsoin, tain-u amare ḳoila, uṭo, tumar bisna loia aṭa-sola ḳoro.” Teu neta oḳole beṭare zikaila, “Ou manushgu ḳegu, zegie tumare ḳoise, bisna loia sola-fira ḳortae?” Oile ou beṭae to zanto na, tain ḳe, hi zagat bout manshe biṛ ḳorilisoin dekia, Isa hin tone geslagi. Bade Isae ou beṭare Baytul-Mukaddoso faia ḳoila, “Huno, tumi to bemar taki bala oigeso. Te ar kunu guna ḳorio na, zate tumar shorbonash na oy.” Teu ou beṭae gia Ihudi neta oḳolre ḳoilo, tare zein bala ḳorsoin en nam Isa. Isae Zummabare bemarire bala ḳorae Ihudi neta oḳole tanre marilita saila. Oile Isae tarare ḳoila, “Huno, amar gaibi bafe hamesha ḳam ḳorra ar ami-o ḳorram.” Ikan hunia tara tanre zane marar lagi aro gorom oia fot tukanit roila. Tara mono ḳorsil, tain ḳali Zummabaror niom bangisoin na, tain Alla Pakre baf ḍakia shiriki-o ḳorsoin. Erlagi tain ou neta oḳolre ḳoila, “Ami nichchit hok kota ḳoiram, fute to nize nize kunta ḳorta faroin na, oile tan bafre zeta ḳam ḳorat deḳoin, tain ḳali ota-u ḳoroin, bafe zeta ḳoroin, fute-o to ota ḳoroin. Bafe tan futre maya ḳoroin ar tain nize ze ḳam ḳoroin, ita hoḳolta-u futre deḳain. Ar ita taki aro boṛo boṛo kudroti ḳam futre deḳaiba, zeta dekia afnara taijjub oiziba. Bafe zela murdare zinda ḳori tuloin, fute-o oula zerare ichcha zindegi dan ḳoroin. Bafe ḳeuror bisar-o ḳoroin na, tan hoḳol bisaror bar futor ato disoin, zate bafre zela hoḳole ijjot ḳore, oula futre-o ijjot ḳore. Futre ze ijjot ḳore na, he ashole hou bafre-o ijjot ḳore na, zein i futre bezisoin. “Ami afnarare hasa ḳota ḳoiram, ze zone amar kalam hune ar zein amare faṭaisoin tan ufre iman ane, he to aḳeri zindegi failise. Tare ar dushi shaibosto ḳora oito nae. He to mout taki zindegit faṛi dilaise. Ar ami hasau ḳoiram, ila eḳ zomana aibo, borong oḳon-u aichche, zebla murda oḳole ami Ibnullar golar aoaz hunba, ar zara hunba tara zinda oiba. Itar ḳaron oilo, baf nize zela zindegir malik, tan futre-o oula zindegir malikana disoin. Bafe futre manshor bisar ḳorar eḳtiar disoin, ḳaron ein-u to bin-Adom. Te ita hunia afnara taijjub oiba na, zanoin ni, oula shomoy aior, zebla Allar futor golar aoaz hunia murda oḳol ḳoybor taki bar oia aiba. Ar zera nek kam ḳorsoin, tara behesti zindegi faoar lagi uṭba, oile zera naformanir maze zindegi kaṭaise, tara uṭba shaza faoar lagi. “Ami to nize nize kunta ḳortam fari na, ami zela huni ola bisar ḳori. Ami hok bisar ḳori, ḳaron ami amar nizor ichchae ḳam ḳortam sai na, ḳali zein amare faṭaisoin tan morzi fura ḳortam sai. “Ami zudi nizor befare nize shakki dei, te i shakki shoṭik nae. Oile dusra zone-o amar befare shakki dira, ar ami zani, tain ze shakki dira, ita hasa. Afnara to Ehia nobir gese ḳobria faṭaia zikaisoin, tain-o hokor fokke shakki disoin. Ar ami kunu manshor shakkir ufre borosha ḳori na, oile afnara zate nazat faia zan basaita faroin, erdae ita ḳoiram. Hozrot Ehia-u asla hou zalail mushal, ze mushale for disil. Afnara-o tuṛa ḳoydin ou mushalor foror maze kushi korte razi oisla. “Oile Ehia nobir shakki tone-o aro boṛo shakki amar ase, ḳaron amar gaibi bafe ze ḳamor lagi amare faṭaisoin, ami ota-u ḳorram. Ar ou ḳamor shakkie-u buza zae, amare amar gaibi bafe bezisoin. Tain-u to hou baba, zein amare faṭaisoin, tain nize-o amar befare shakki disoin. Afnara kunu shomoy tan golar aoaz hunchoin na, ar tanre deḳsoin-o na. Esaṛa tan kalam to afnarar dilo roy na, ḳaron tain zare faṭaisoin, en ufre afnara iman anoin na. “Afnara to kub mon dia Asmani Kitab tilaot ḳoroin, mono ḳoroin ita tilaot ḳorle aḳeri zindegi faiba. Oile ou kitab to amar befare shakki dey. Erbade-o afnara zindegi faoar lagi amar gese aita sain na. “Ami to manshor ges taki tarif faoar ashae aisi na, oile ami zani, Allar bae afnarar kunu mohobbot nai, ami to afnarare sini. Ami amar gaibi bafor nam loia aisi, ta-o afnara amare ekin ḳorra na. Oile dusra ḳeu zudi tar nizor name ae, te tare afnara ekin ḳorba. Afnara eḳe-oinnor ges taki tarif faita sain, oile ze tarif Allar ges tone faoa zae, itar lagi kunu sesṭa ḳoroin na. Te afnara ḳemne ekin ḳorba? Afnara mono ḳorba na, ami amar babar gese afnaintore dushi banaimu. Oile ze Musa nobir ufre afnara borosha ḳori asoin, hou Musae-u afnaintore dushi koira. Afnara zudi Musa nobire ekin ḳorta, te amare-o ekin ḳorla one, i Musa nobie to amar befare-u leḳsoin. Oile afnara zebla tan leḳare-u ekin ḳoroin na, te amar mukor ḳotare kila ekin ḳorba?” Erbade Hozrot Isa Galil aoror hofaro gelagi, ou aoror aroḳ nam Tibiria aor. Bout manush tan ḳore oia zaoat asla, tara to deḳsila, bemari oḳlor ufre tain kila keramoti ḳam ḳorsoin. Hono gia hari tan sahabi oḳolre loia eḳ faṛor ufre boila. Ou shomoy Ihudi oḳlor Azadi Id gonai aise. Isae saia deḳla, bout manush tan gese uṭia aira, ou tan sahabi Filifre ḳoila, “Ita manshore ḳaoanir lagi amra ruṭi faimu kun zagat?” Ashole Filifre forikka ḳorar lagi tain ikan zikaila, oile kila kita ḳorba, ikan tain age-u zanta. Filife zuaf dila, “Erare tuṛa tuṛa ḳani dile-o dui-sho dinaror ruṭie kulaito nae.” Hono Andrias name Hozrot Isar eḳ sahabi asla. Tain oila Saimon-Fitoror bai. Tain Isare ḳoila, “Huzur, ono huru eḳ fuar gese fasḳan aṭar ruṭi ar duiṭa biran mas ase, oile oto manshor maze itae kita oibo?” Isae hukum dila, “Tumra ota manshore gashor ufre boai deo.” Teu tara gashor ufre boigela. Ino ḳali beṭa manush-u asla onuman fas azar zon. Bade tain ou fasḳan ruṭi ato loia Allar shukria adae ḳoria erare baṭia dila. Oula biran mas-o baṭia dila. Ze zoto sailo, he otoḳan failo. Hoḳol manshe feṭ bori kailo. Ḳaia harle Isae tan sahabi oḳolre ḳoila, “Ḳanir bade zeta roise, tumra ota ekḳano dola ḳoro, kunta falaio na.” Era ou fasḳan ruṭir baṛti ṭukrain dola ḳoria baro ṭukri borla. Hozrot Isar i keramoti dekia manshe mata-mati lagaila, “Nichchoy ein-u hou nobi, zein duniat toshrif anar ḳota.” Teu Isae buzilila, manshe zur ḳoria tanre tarar bashsha bananir lagi dorto sar. Oḳan buzia tain hirbar eḳla-u faṛor ufre gelagi. Hainja bala Isar sahabi oḳol aoror faro gela. Ar Kofornaum ṭauno zaita ḳori nao loia aor faṛi deoat lagla. I shomoy andair oigesil ar Isa-o tarar loge asla na. Aoror mazḳano zaite-u kub tufani batash ar boṛo boṛo ḍeu shuru oilo. Onuman tin-sair mail nao baia zaoar bade tara deḳla, Hozrot Isa fanir ufredi aṭia tarar gese aira. Ita dekia sahabi oḳole kub ḍoraigela. Ou shomoy Isae tarare ḳoila, “Ḍoraio na, i to ami.” Sahabi oḳole tanre nao-o tulta saila, ar tara ze zagat zaoar ḳota, loge loge nao gia hono fosi gelo. Aoror hofaro zeta manush uba asla, bador din tara buzla, agor din ino ekḳan nao saṛa dusra kunu nao asil na. Tara eoḳan-o buzla, Isa tan sahabi oḳlor loge nao-o uṭsoin na, borong tara eḳla-u aor far oisoin. Oile ze zagat Isae Allar shukria adae ḳoria hari manshore ruṭi kaoaisla, ou zagar gese Tibiria ṭaun taki koyḳan nao ailo. Manshe zebla deḳla, Isa ba tan sahabi oḳol ḳeu i zagat nai, ou tara ota naoainto uṭia Isar tallashe Kofornaum ṭauno gelagi. Hono gia tara Isare faia ḳoila, “Huzur, afne ino kun shomoy aila?” Tain zuaf dila, “Ami tumrare hasa ḳota ḳoiram, tumra amar keramoti nishanar mani buzia amare tukairae na, borong feṭ bori ruṭi kaiso ḳori-u tukairae. Oḳon huno, duniabi ze ḳani nosṭo oizae, tar ḳore guria lab kita? Ze ḳani kunudin nosṭo oy na, borong aḳeri zindegi dan ḳore, tar ḳore oia guro. I kani to ami bin-Adome tumrare dimu. Ou eḳtiar ḳali amar ase, amar gaibi baf Allae-u itar forman deḳaisoin.” Ikan hunia tara Isare zikaila, “Te Allar ḳam ḳorar lagi amra kita ḳortam?” Tain ḳoila, “Allae zare faṭaisoin, tan ufre iman ana-u oilo Allar ḳam.” Erbade tara tanre zikailo, “Te afne omon kita nishana deḳaiba, zeta dekia amra afnar ufre iman anmu? Afne kun ḳam ḳorba? Amrar baf-dadae to morubumit manna ḳaisla. Pak Kitabo leḳa ase, Allae tarare behesti kani kaoaila.” Isae zuaf dila, “Ami tumrare hok kota ḳoiram, behesti ze ruṭi tumra faislae, ita to Musa nobie disoin na, borong amar gaibi bafe-u tumrare asol behesti ruṭi dan ḳoroin. Ar Allar deoa hou ruṭi oila ou zon, zein behest taki lamia aia hara zogotre zindegi dein.” Teu tara ḳoilo, “Huzur, te ou ruṭi-u amrare hor-hamesha deukka.” Isae ḳoila, “Ami-u hou zindegi-ruṭi. Ze zon amar gese ae, tar kunu shomoy buk lage na, ar ze amar ufre iman ane, tar kunu shomoy fiase-o dore na. Ami to tumrare mukdi koisi-o, ar tumra amare dekia-o iman anlae na. Amar gaibi bafe zerare amar ato dein, tara hoḳol-u amar gese aibo. Ze zon amar gese ae, ami kunumonte-u tare bare falaitam nae. Ami kunu amar morzi mafik kam ḳorat aisi ni? Na, borong zein amare faṭaisoin, tan morzi zugaia ḳam ḳorar lagi-u ami behest taki lamia aisi. Huno, ze bafe amare faṭaisoin, tan munsha oilo, tain zerare amar ato disoin, ami zanu era eḳzonre-o na arai borong Ruz Hashoro erare zinda halote tuli. Amar bafor munsha oilo, zara tan futre dekia tan ufre iman ane, tara zanu aḳer fae. Ar ami-u tarare Ruz Hashoro zinda ḳori tulmu.” Ikan hunia Ihudi neta oḳole Isare loia ḳana-gusha lagaila. Ḳaron tain age ḳoisla, “Behest taki ze ruṭi lamia aise, ami-u hou ruṭi.” Erlagi tara nize nize ḳoila, “Ogu to Iusufor fua Isa nae ni ba? Amra to tar ma-bafore-o sini. Te he ḳemne ḳoy, he bule behest taki lamia aise?” Isae tarare ḳoila, “Tumra nizor maze ḳana-gusha ḳorio na. Amar ze gaibi bafe amare faṭaisoin, tain ashik na banaile kunu manush-u amar gese aito fare na. Ar ami-u tare Ruz Hashoro zinda halote tulmu. Zano ni, nobi oḳlor kitabo leḳa ase, ‘Tara hoḳole Allar ges taki talim loiba.’ Ar ze zone gaibi bafor ges taki talim faise, hou zon-u amar gese ae. “Ou bafre to kunu manshe deḳse na, ḳali Allar ges taki zein aisoin, tain-u i bafre deḳsoin. Ami tumrare nichchit hasa ḳota ḳoiram, ze zone amar ufre iman anche, he loge loge-u aḳer failise. Ami-u zindegi-ruṭi. Tumrar baf-dadainte to morubumit manna ḳaisla, ta-o tarar mout oise. Oile ikan oilo hou ruṭi, ze ruṭi behest taki lamia aise, zate ou ruṭi kaia manush moron taki rehai fae. Huno, ami-u oilam hou zinda ruṭi, ze ruṭi behest taki lamia aise. Ze zone i ruṭi kaibo, he siroḳalin zindegi faibo. Amar ḳaya-u oilo ou ruṭi. Manshore siroḳalin zindegi dibar niote ami amar deho-ḳaya bilai dimu.” Ikan hunia Ihudi neta oḳlor maze torka-torki lagigelo. Tara eḳe-oinne ḳoilo, “I beṭae ḳemne tar shorilor gust amrare ḳaoaibo?” Isae ḳoila, “Te huno, ami nichchit hok kota ḳoiram, tumra ami bin-Adomor lou ar gust na ḳaile to tumrar maze zindegi-u nai. Ḳeu zudi amar lou ar gust ḳae, te he aḳeri zindegi failise, ar Ruz Hashoror dino ami tare zinda ḳori tulmu. Amar gust-u oilo asol ḳani ar amar lou-u oilo asol fani. Ze zone amar lou ar gust ḳae, he amar bitre taḳe ar ami-o tar bitre taki. Zela amar gaibi zinda bafe amare faṭaisoin, erlagi-u ami-o zinda asi. Oula ze zone amare ḳae, he-o amar lagi zinda roibo. Deḳrae ni, ou ruṭi to behest taki lamia aise. Ze ruṭi kaia tumrar baf-dadain mara gesoin, i ruṭi to amar laḳan nae. Amar ou ruṭi ze zone ḳaibo, he siroḳal zinda roibo.” Hozrot Isae Kofornaum ṭaunor mosido talim deoar shomoy ita hoḳolta ḳoila. Talim hunia hari tan ummotor mazor boute ḳoila, “Ita to boṛo gorom talim. Ita ḳegie manbo?” Oile Isae tan gaibi bole buzilila, kita loia era ḳana-gusha ḳorra. Buzia erare ḳoila, “Ou talim hunia tumra gabṛi gelae ni? Te ami bin-Adom age ze zagat aslam, amare zebla hono uṭi zaoat deḳbae, ou shomoy tumra kita ḳoibae? Tumra buzrae ni, manshor shoril to beḳama, ashole ruhu oilogi zindegi. Ami tumrare ze boyani koilam, ita oilogi manshor ruhu ar zindegir befar. Oile tumrar maze ḳeu ḳeu oḳono amar ufre iman anche na.” Ḳe tan ufre iman anche na, ar ḳe tanre dushmonor ato dorai dibo, Isae foyla taki-u ita zanta. Ou tain ḳoila, “Ou ḳarone ami tumrare ḳoisi, gaibi bafe bol na dile, kunuzon-u amar gese aito fare na.” Isar ita talim hunia tan bout ummot firia gelagi, tara tan loge sola-fira bad dilaila. Erlagi Isae tan barozon sahabire zikaila, “Kita ba, tumitain-o zaitaegi ni?” Saimon-Fitore zuaf dila, “Huzur, amra ar ḳar gese zaitam? Aḳeri zindeganir talim to ḳali afnar gese-u ase. Amra to zanchi ar afnar ufre iman-o anchi, afne-u Allar oada ḳora hou fobitro zon.” Teu Isae erare ḳoila, “Ami to tumra barozonre fosond ḳorsi, oile tumrar maze-u eḳzon shoytan ase.” Ino tain Saimon Iskariator fua Ihudar befare ḳoila, ou Ihudae bade tane dorai dibo. He asil ou barozon sahabir mazor eḳzon. Erbad taki Hozrot Isa Galil zilar bitre-u sola-fira ḳorla. Ihudi neta oḳole tanre zane marilito saisil, erlagi tain ar Ehudia zilat zaita saila na. Ou shomoy Ihudi oḳlor Ḍera-goror Idor din gonai aisil. Erlagi Isar baiainte tanre ḳoila, “Tumi in tone Ehudia zilat zaogi, teu tumi zeta ḳam ḳorso, ota tumar ummot oḳole-o deḳba. Ḳeu zudi nizore manshor gese zair ḳorto sae, te he lukaia kunta ḳore na. Tumi-o zebla omon ḳam ḳorrae, te nizore manshor gese zair ḳoro.” Ashole Isar baiainte-o tan ufre iman anchoin na. Isae tarare ḳoila, “Amar shomoy oḳono oise na, oile tumrar to shomoy oshomoy kunta nai. Duniar manshe tumrare ginnaito nae, oile amare gin ḳore. Ami to tarar befare ḳoiar, tarar hoḳol ḳam-u ḳaraf. Te tumra zaogi, gia id ḳoro. Amar shomoy oḳono fura oise na, erlagi ami oḳon zaitam nae.” Oḳan ḳoia tain Galil zilat roigela. Tan baiain idor mahfilo gia harle tain-o gela, oile kula-mela na gia lukaia gela. Idor ḳalo Ihudi neta oḳole tan tallash ḳorat roila, ar ḳoila, “Hou manushṭa kuai.” Biṛor maze Isar befare manshe mata-mati korla. Ḳeu ḳeu ḳoilo, “Ein to boṛo bala manush.” Ar ḳeu ḳeu ḳoilo, “Na, na, he to manshore be-foti banailar.” Oile Ihudi neta oḳolre ḍoraia, muk kulia tan befare ḳeu kunta matilo na. Ou idor mazamazi shomoy Hozrot Isa Baytul-Mukaddos Kaba Shorifo gia talim dila. Tan talim hunia taijjub oia Ihudi neta oḳole ḳoila, “I manshe madrashat na foṛia oto ilim failo kila?” Isae zuaf dila, “Ami ze talim dei, ita amar nizor nae, zein amare bezisoin, ita to tan-u talim. Ḳeu zudi tan morzi zugaia solto sae, te he buzbo, i talim Allar ges taki aise, na amar muk taki diram. Ze zone nizor mon taki mate, he ḳali nizor tarif faito sae. Oile ze zone tar faṭaneala malikor tarif ḳorar sesṭa ḳore, he hamesha hok-halal taḳe, tar mono kunu dukabazi nai. “Tumra kunu Musa nobir shoriot faiso na ni? Oile tumra eḳzone-o to shoriotor hukum-ahkam manrae na. Te tumra ḳene amare marilitae sairae?” Teu tara ḳoila, “Tumare bute faise, tumare ḳe marto sar?” Isae tarare ḳoila, “Ami kali ekḳan ḳam ḳorlam, ar tumra taijjub oigelae. Hozrot Musae to tumrare mosolmani ḳam ḳoranir niom disla, ar Zummabare-o tumra ou ḳam ḳorao. Ashole, i niom Musa nobir ges taki aise na, borong agor moy-murobbir ges taki-u aise. Ṭik ase, Musa nobir niom salu raḳar lagi Zummabare-o zudi mosolmani ḳam ḳorail zae, te ami Zummabare eḳzon bemarire bala ḳorsi dekia amar ufre gusa ḳorrae ḳene? Hok-insaf ḳoro, ḳali bargala dekia bisar ḳorio na.” Ou shomoy Zeruzalem ṭaunor kisu manshe ḳoilo, “Neta oḳole zare marilta saira, ogu kita hou manush nae ni? Te he to deki kula-mela mater, ta-o tara deki kunta ḳoira na. Taile tara kita hasa ḳota buzilisoin ni, ou manush-u al-Mosi? Ar amra to zani, ogu kuai taki aise. Oile al-Mosi zebla aiba, ou shomoy ḳeu zanto nae, tain kuai taki aisoin.” Erbade Isae Baytul-Mukaddoso talim deoar shomoy zure zure boyan ḳorla, “Afnara amare-o sinoin, ar ami kuai taki aisi ikan-o zanoin. Hunoukka, ami niz taki aisi na, hok Alla Pake-u amare faṭaisoin. Afnara tanre sinoin na, oile ami sini. Ḳaron ami tan ges taki-u aisi ar tain-u amare faṭaisoin.” Ikan hunia manshe Isare dorilito sailo, oile tan shomoy fura oise na gotike ḳeu tan gotro at tullo na. Ar erar mazor boute tan ufre iman ania ḳoilo, “Ein to bout keramoti deḳaisoin, al-Mosi aia kunu er saite beshi keramoti deḳaiba ni?” Ita loia manshe ḳana-ḳani korra, ikan Forishi oḳole hunla. Hunia boṛo imam ar Forishi oḳole Isare dorar lagi koyzon faradar-sifai faṭaila. Isae ḳoila, “Huno, ami ar beshi din tumrar maze nae. Ami to tan gese zaimugi, zein amare faṭaisoin. Tumra amare tukaia faitae nae, ar ami ze zagat roimu, tumra ḳeu hino aitae-o fartae nae.” Hozrot Isar ita mat hunia Ihudi neta oḳole eḳe-oinne zikaila, “He kuai zaibogi, zeḳano amra tare tukaia faitam nae? He kita Iunani oḳlor desho zeta Ihudi asoin, hono roia Iunani otare-o talim dibo ni? He to ḳoilo, tumra amare tukaia faitae nae, ar ami zeḳano zaimu, tumra hino aitae fartae nae. Tar i mator mani kita?” Idor aḳeri din Hozrot Isa ubaia zure zure boyan ḳorla, “Kunu manshor fiase dorle, he amar gese aia fani kauk. Ze zone amar ufre iman ane, Pak Kitabor ayat mafik tar dil taki zinda fanir gang bar oibo.” Isar ufre iman ania zera Pak Ruhre faiba, hou Pak Ruhur befare tain ou ḳota ḳoila. Tarar gese Pak Ruhre oḳono deoa oise na, ḳaron Isae tan mohima oḳono hasil ḳorsoin na. Ita hunia kisu manshe ḳoilo, “Ashole ein-u hou oada ḳora nobi.” Ar ḳoyzone ḳoilo, “Ein-u al-Mosi.” Oile ḳeu ḳeu ḳoilo, “Al-Mosi kunu Galil zila taki aiba ni? Pak Kitabe to batae, al-Mosie zonom loiba Daud nobir bongshot, Daud nobir Betelham gaut.” Ou laḳan Isare loia manshor maze doladoli lagigelo. Ermaze ḳoyzone tanre dorilito sailo, oile ḳeu tan gotro at tullo na. Isare dorar lagi ze faradar-sifai oḳolre faṭani oisil, tara firot aile boṛo imam ar Forishi oḳole zikaila, “Tare doria anlae na ḳene?” Era ḳoila, “I manshe zela mat mate, ila mat ḳeu kunudin matise na.” Teu Forishi oḳole sifai oḳolre ḳoila, “He tumrare-o ṭogililo ni? Deḳso ni, neta ba Forishi shomazor ḳeu tar ufre iman anche ni? Ḳali ou zetae shoriotor kunta-u zanoin na, ota-u to. Itar ufre lannot ase.” Forishi oḳlor maze eḳzonor nam asil moulana Nikodim, ein age Isar gese gesla. Nikodime ḳoila, “Ḳeuror mukor ḳota na hunia ba tar oforad na zania, tare shaza deoar niom kunu amrar shorioto ase ni?” Bade hoḳol manush zarzir baṛit gelagi, ar Hozrot Isa eḳla Zoytun faṛo gia uṭla. Bador din fozor oḳto Isa hirbar Baytul-Mukaddoso gela, gia harle hoḳol manush tan gese ailo. Tain ono boia tarare talim dila. Ou shomoy moulana ar Forishi shomazor manshe eḳ zinakur beṭire loia tan gese ailo. Aia beṭire mozlisor mazḳano uba ḳoraia ḳoilo, “Huzur, ou beṭi ogu zinar ḳamo dora ḳaise. Te Tourat Shorifor maze to Musa nobie zinakur beṭintore fattor maria marilibar hukum disoin. Oḳon afne kita ḳoin?” Tara Isare forikka ḳorar niote-u ila ḳoila, zate tanre dushi bananir lagi kunu kut fain. Teu Isae-o mata nisa ḳori angul dia maṭit leḳat lagla. Oile tara zebla bar bar tanre zikaira, ou shomoy tain mata tulia ḳoila, “Afnaintor maze ze zone kunudin guna ḳorsoin na, ein foyla ou beṭire fattor maroukka.” Oḳan ḳoia tain hirbar mata nisa ḳori maṭit leḳat lagla. Ikan hunia neta oḳlor maze buṛa taki shuru ḳoria eḳe eḳe hoḳol-u gelagi. Ḳali Isa ar hou beṭi saṛa dusra ḳeu roilo na. Teu Isae mata tulia ou beṭire zikaila, “Kita go mai, ita manush kuai? Ḳeu tumare shazar zuka mono ḳorlo na ni?” Beṭie ḳoilo, “Ji na huzur, tara ḳeu to shaza disoin na.” Ou shomoy Isae ḳoila, “Te ami-o tumare kunu shaza ditam nae. Oḳon zaogi, gunar fote ar zindegi kaṭaio na.” Bade Hozrot Isae manshore ḳoila, “Ami-u duniar nur. Ze zon amar fote ae, he kunu shomoy andarit fao falaito nae, borong nuror zindegi faibo.” Ikan hunia Forishi oḳole ḳoila, “Tumar shakki loa zaito nae, tumi tumar nizor fokke shakki dirae.” Teu Isae zuaf dila, “Ami amar nizor fokke shakki dile-o amar shakki to hasa. Ḳaron ami kuai taki aisi ar kuai zairam, ita to tumra zano na, ḳali ami-u zani. Tumra to duniabi manshor laḳan bisar ḳoro, oile ami ḳeuror bisar ḳori na. Ami ḳeuror bisar ḳorle-o hok bisar ḳormu, ḳaron ami eḳla nae, amar loge amar gaibi baf-o asoin, ou bafe amare bezisoin. Tumrar shoriotor maze leḳa ase, duizone zudi eḳ homan shakki dey, te i shakki hasa. Olaḳan ami-o amar fokke shakki dei, ar ze bafe amare faṭaisoin, tain-o amar fokke shakki dein.” Forishi oḳole tanre ḳoila, “Tumar baf kuai?” Isae zuaf dila, “Tumra amare-o sino na, ar amar bafre-o sino na. Amare sinle amar bafre-o sinlae one.” Fobitro Baytul-Mukaddosor dan-baksor gese ubaia Hozrot Isae ou talim dila. Oile tan shomoy fura na oae ḳeu tanre dorlo na. Hozrot Isae Forishi oḳolre hirbar ḳoila, “Ami to zaiargi. Gia harle tumra amare tukaibae, oile ar faitae nae, ami zeno zairam, tumra hino aitae-o fartae nae, tumra nizor gunar maze-u morbae.” Ihudi neta oḳole ḳoila, “He ḳene ḳoilo, ami zeno zairam, tumra hino aitae fartae nae? He kita nize nize morizito ni?” Isae ḳoila, “Ami aisi ufre taki, ar tumra tole taki. Tumra i zogotor, oile ami to i zogotor nae. Erlagi ami koiram, tumra nizor gunar maze-u morbae. Tumra zudi ekin na ḳoro, ami-u hein, te gunagar halote-u morbae.” Ikan hunia neta oḳole tanre ḳoila, “Tumi ḳe?” Tain zuaf dila, “Foyla taki ami zela ḳoiram, ami-u hein. Tumrar befare matar ar bisar ḳorar boutta ase. Huno, zein amare faṭaisoin tan maze to misa kunta nai. Ami tan ges taki zeta huni, ota-u i duniare zanai.” Isae zen tan gaibi bafor ḳota ḳoira, tara ita buzla na. Erdae Isae ḳoila, “Tumra zebla ami bin-Adomre ufre tulbae, ou shomoy buzbae ami-u hein. Ar eoḳan buzbae, ami nize nize kunta ḳori na, amar gaibi bafe amare ze talim disoin, ou talim-u ami batai. Zein amare faṭaisoin, tain nize amar loge asoin. Tain amar log saṛsoin na, ami to hamesha ou ḳam-u ḳori, ze ḳam ḳorle tain kushi oin.” Isar i boyan hunia bout manshe tan ufre iman anla. Erar maze zeta Ihudi oḳole tan ufre iman anchila, tain erare ḳoila, “Tumra zudi amar ḳotamoto solo, te tumra amar hasaror ummot. Tumra hok sinbae ar ou hoke-u tumrare azad ḳorba.” Ikan hunia tara ḳoila, “Amra to Hozrot Ibrahimor bongshor manush, amra kunu shomoy-o ḳeuror gulam aslam na. Te tumi kila ḳoirae, amrare azad ḳora oibo?” Hozrot Isae ḳoila, “Ami tumrare hok kota ḳoiram, zera gunar maze zindegi kaṭae, tara gunar gulam. Kunu gulam siroḳal tar munibor baṛit taḳe na, oile fut to siroḳal taḳe. Erlagi fute zudi tumrare azad ḳoroin, te tumra hasaror azad oibae. Ami zani, tumra Ibrahim nobir bongshor manush, tebou amare marilitae sairae, ḳaron amar nosiot tumrar bitre hamae na. Ami amar gaibi bafor gese zeta deḳsi ota ḳoiram, ar tumra nizor bafor ges taki zeta hikso ota-u ḳorrae.” Ou shomoy tara Isare ḳoila, “Huno, Hozrot Ibrahim-u amrar baf.” Tain ḳoila, “Tumra zudi Ibrahim nobir aolad oitae, te Ibrahimor laḳan ḳam ḳorlae one. Ami Allar ges taki ze hok kalam faisi, ota-u tumrare ḳoiram. Tebou tumra amare marilitae sairae, oile Ibrahime to ila ḳorsoin na. Tumrar nizor bafe zeta ḳore, tumra-o ota ḳorrae.” Ou tara Isare ḳoila, “Amra to funga fua nae. Amrar eḳzon-u baf asoin, ein oila Alla.” Isae tarare ḳoila, “Ashole-u Alla zudi tumrar gaibi baf oita, te amar bae tumrar maya taḳlo one. Ḳaron ami Allar ges taki aisi ar oḳon tumrar maze asi. Ami nize aisi na, tain-u amare faṭaisoin. Tumra amar ḳota buzrae na, ḳaron tumra amar ḳota shoijjo ḳortae faro na. Iblis-u tumrar baf ar tumra tar aolad, erdae tumra tar ḳaish fura ḳortae sairae. Iblis to foyla taki-u kuni. He kunudin hokor maze boshot ḳorse na, ḳaron tar maze kunu hok nai. He zebla misa mate, ou shomoy he niz taki-u mate. Ḳaron he beiman, ar hoḳol beimani tar maz taki-u foyda oise. Ami hok mat matiar erlagi tumra amare ekin ḳorrae na. Tumrar maze ḳeu amare gunagar forman ḳorto farbo ni? Ami zudi hok mat mati, te amare ekin ḳorrae na ḳene? Ze manush Allar bonda, he Allar kalam hune. Tumra Allar nae gotike Allar kalam huno na.” Ou shomoy tara Isare ḳoila, “Amra to ṭik kota ḳoisi, tui Shomoria zator manush, tore bute dorse.” Tain ḳoila, “Na, amare bute dorse na. Ami amar bafre ijjot ḳori, oile tumra amare beijjot ḳorrae. Ami nize kunu ijjot faitam ḳori ḳam ḳori na. Oile eḳzon asoin zein amar ijjotor lagi ḳam ḳoroin, tain-u amar bisarok. Ami tumrare hok kota ḳoiram, ḳeu zudi amar ḳota mane, he kunu shomoy-u morto nae.” Tara tanre ḳoila, “Oḳon amra buzlam, tore ṭik-u bute dorse. Ibrahim nobi ba aro nobi oḳol to mara gesoin, ar tui koire, ḳeu zudi amar ḳota mane, he kunu shomoy-o morto nae. Tui kunu baba Ibrahim taki-o boṛo ni? Tain nize ar baki tamam nobi oḳol-u mara gesoin. Te tui nizore kita mono ḳoros?” Isae zuaf dila, “Ami zudi nizor tarif nize-u ḳori, te er kunu dam nai. Amar gaibi baf, zanre tumrar Alla ḳoia dabi koro, tain-u amare ijjot dan ḳoroin. Tumra tanre sincho na, oile ami tanre sini. Ami zudi koi ami tanre sini na, te to tumrar laḳan ami-o beiman oimu. Ami tanre sini ar tan hukum-ahkam mania soli. Tumrar baf Ibrahim nobie amar din deḳar ashae kushi korsoin. Tain ita deḳsoin ar kushi-o oisoin.” Ihudi neta oḳole tanre ḳoila, “Tumar boyosh to oḳono foinchash bosor oise na, te tumi Ibrahim nobire deḳlae kila?” Isae ḳoila, “Ami tumrare hok kota ḳoiram, Ibrahim nobir zonmor ag taki-u ami asi.” Ikan hunia neta oḳole tanre marar lagi fattor tukaia loila. Oile Hozrot Isae auṛi dia Baytul-Mukaddos taki bar oia gelagi. Hozrot Isa fotedi aṭia zaoar shomoy eḳ anda beṭare faila. He zonmo taki-u anda asil. Ere dekia tan sahabi oḳole tanre zikaila, “Huzur, ou manushgu ḳar gunae anda oia zonmise? Tar nizor gunar lagi, na tar ma-bafor?” Tain zuaf dila, “Tar nizor lagi-o nae, ar tar ma-bafor gunar lagi-o nae. Tar mazdi Allar lila-ḳela zair oar lagi-u ila oise. Huno, zein amare bezisoin, shomoy taḳte taḳte tan ḳam ḳora amrar zorur. Rait gonaia ar, hi shomoy ḳeu ḳam ḳorar ufae nai. Buzrae ni, ami zotodin duniat asi, otodin ami-u duniar nur.” Oḳan ḳoia-u tain maṭit sef falaia feḳ banaila, bade ou feḳ anda beṭar sokut lagaia ḳoila, “Zao ba, Siloar furkit gia doilao.” Siloa mani faṭani. He gia souk doilo ar bala oia ailo. Ikan dekia ari-fori ar zoto manshe tare age bik korat deḳsila era ḳoila, “Ogu kita hou beṭa nae ni, zegie ono boia bik korto?” Ḳeu ḳeu ḳoilo, “Oy, he to ou beṭa-u.” Ar ḳeu ḳeu ḳoilo, “Deḳte zudio tar laḳan, oile he nae.” Teu he nize ḳoilo, “Ji oy, ami-u hou zon.” Ou tara ere zikaila, “Ḳo sain, tumar souk bala oilo kila?” He ḳoilo, “Isa namor ou manshe feḳ banaia amar sokut lagaia ḳoila, zao ba, Siloar fukrir maze doia aogi. Ami gia doilam ar bala oigelam.” Tara ḳoila, “Ou manushgu kuai?” He ḳoilo, “Ami zani na.” Ou ze beṭa anda asil, manshe tare doria Forishi oḳlor gese loia gela. Ḳaron Isae zedin feḳ lagaia tar souk bala ḳorsla, i din asil tarar Zummabar. Erlagi Forishi oḳole hirbar tare zikaila, “Tumar souk bala oilo kila?” He ḳoilo, “Hou zone amar sokut feḳ lagaia dila, ar ami gia doia-u souke deḳlam.” Ou shomoy ḳoyzon Forishie ḳoila, “I manushgu to Allar ges taki aise na. Deḳrae ni, he Zummabar-o mane na.” Oile ḳeu ḳeu ḳoila, “Gunagar manshe ilaḳan keramoti ḳam ḳorbo kila?” Ota loia tarar maze doladoli lagigelo. Tara hirbar ou manshore zikaila, “Ṭik ase, he to tumar souk bala ḳorse, erlagi tumi tar befare kita ḳo.” He ḳoilo, “Tain eḳzon nobi.” Oile ou beṭa zen age anda asil ar oḳon souke deḳer, Ihudi neta oḳole tar ma-bafre na zikani forzonto ita ekin ḳorla na. Tara tar ma-bafre zikaila, “Deḳo sain, ogu tumrar hou anda fua ni, zegure tumra zonmor anda ḳo? Te he oḳon souke deḳer kila?” Tar ma-bafe ḳoila, “Ji oy, he amrar-u fua ar he anda oia zonmisil. Oile oḳon kila souke deḳer, ikan amra zani na. Ar ḳe tar souk bala ḳorsoin, ta-o ḳoitam fari na. He to boṛo oigese, tare-u zikaukka, tar befar he ḳouk.” Tar ma-bafe Ihudi neta oḳlor ḍore ola matila, ḳaron Ihudi neta oḳole ag taki-u ain ḳorsila, ḳeu zudi Isare al-Mosi koia ḳobul ḳore, te tare shomaz taki bar ḳori deoa oibo. Erlagi-u tar ma-bafe ḳoila, “He boṛo oigese, tare-u zikaukka.” Neta oḳole dusrabar tare ania zikaila, “Tumi Allar name hasa mat mato. Amra to zani i manushṭa gunagar.” He zuaf dilo, “Tain gunagar na kita, ikan ami zani na. Ḳali oḳan zani, ami age anda aslam, oḳon souke dekiar.” Neta oḳole ḳoila, “Ḳo sain, he tumare kita ḳorse? Tumar souk kila bala ḳorlo?” Ou beṭae zuaf dilo, “Ami to age-u ḳoilam, oile afnara hunla na. Te oḳon ḳene ar hunta saira? Afnara-o tan ummot oita saira ni?” Ikan hunia tara beṭare kub gala-gali koria ḳoila, “Hoi, tui gia ogur ummot oisot, oile amra oilam Musa nobir ummot. Amra zani, Allae nize Musa nobir loge batchit ḳorsoin, oile i beṭa kuai taki aise, ita to amra zani-u na.” Teu beṭae ḳoilo, “Ki taijjubi! Afnara zanoin na tain kuai taki aisoin, otoso tain-u amar souk bala ḳorla. Amra zani, naforman oḳlor ḳota Allae hunoin na. Oile ḳeu zudi Allar ashik bonia tan morzi zugaia sole, te Allae tar foriad hunoin. Ar aiz forzonto ila huna gese na zen, zonmo taki anda kunu manshor souk keu bala ḳorse. Tain zudi Allar ges taki na aita, te ila ḳorta farla na one.” Neta oḳole tare ḳoila, “Tor zonom oise naformanir maze, ar tui amrare talim dire ni?” Oḳan ḳoia tara tare shomaz taki ekgori korla. Isae hunla, neta oḳole ou beṭare ekgori korsoin. Tain ou beṭare tukaia bar ḳoria ḳoila, “Oba, tumi kita bin-Adomor ufre iman ancho ni?” He ḳoilo, “Huzur, tain ḳe? Amare ḳoukka, ami zate tan ufre iman antam fari.” Isae tare ḳoila, “Tumi tanre deḳso, ar tain-u tumar loge matira.” Ou beṭae ḳoilo, “Huzur, ami iman anlam.” Oḳan ḳoia-u he Hozrot Isare soizda ḳorlo. Isae ḳoila, “Huno, ami aisi i duniat bisar ḳorar lagi, zera anda asoin tara zanu bala oin, ar bala oḳol anda oin.” Ou shomoy ḳoyzon Forishi-o Isar ḳandat asla. Ikan hunia tara ḳoila, “Te afne kita ḳoita saira, amra anda ni?” Isae ḳoila, “Tumra zudi anda oitae, te tumra kunu dushi oilae na one. Oile tumra-u ḳoirae anda nae, erlagi-u tumrar maze dush ase.” Hozrot Isae aro ḳoila, “Ami tumrare nichchit hasa ḳota ḳoiram, ze manush meṛar gual-goror duaredi na hamaia, oinno fote hamae, he to sur-ḍaḳait. Oile ze zon duaredi hamae, he-u meṛar raḳal. Gual-goror sokidare raḳalre duar kulia dey. Meṛainte-o raḳalor ḍaḳ hunoin ar raḳale tarar nam dori ḍaki ḍaki bar ḳori ney. Gor taki nizor meṛaintore bar ḳoria harle, raḳal tarar age age zae, ar tar meṛain zae ḳore ḳore, ḳaron tar golar aoaz tara sine. Tara kunubala osina kunu raḳalor loge zaito nae borong tar ges taki bagibo, ḳaron osina kunu raḳalor golar aoaz tara sine na.” Isae Forishi oḳolre hikanir lagi ou udahoron dila, oile tain kita buzaira, tara shomzita farla na. Erlagi tain hirbar ḳoila, “Ami tumrare nichchit hok kota ḳoiram, meṛar falor lagi ami-u duar. Amar age raḳalor bab doria zeta aisla, iguin to sur-ḍaḳait asla, meṛainte-o tarar ḳota hunchoin na. Ami-u duar. Amar mazdi ze hamaibo, he tar zan basaibo. He bitre aoa-zaoa ḳorbo ar aṭia-soria ḳaibo. Sure to ḳali suri, kun-ḳarafi ar binash ḳorar niote-u ae. Oile ami aisi zate tara zindegi fae, ar ou zindegi furafur bug kore. “Ami-u asol raḳal. Asol raḳale tar meṛar lagi nizor zan bilai dey. Ḳali betonor lagi ze zone raḳali kore, he ḳaṭi raḳal nae ar i meṛain-o tar nizor nae. Bag aoat deḳle-u he meṛain falaia nizor zan basae. Ḳaron he ḳali betonor ashae raḳali kore, meṛaintor ḳota sinta-o ḳore na. Bage aia meṛain doria neygi, teu tara fal bangia sitri zae. Amar to aro meṛain asoin, zeta i gual-goro nai, tarare-o ami ante oibo. Tara nichchoy amar ḍaḳ hunba, teu ḳali eḳzon raḳal ar eḳṭa fal oibo. “Bafe amare maya ḳoroin, ḳaron ami amar zan bilaimu zate hirbar firot nei. Amar zan ḳeu amar ges taki kaṛia nito nae, oile ami nize-u zan bilaimu. Mono rakio, zan deoar ḳemota zela amar ase, oula firot neoar ḳemota-o ase. I dayitto ami amar gaibi bafor ges taki faisi.” Hozrot Isar ita mat-ḳota hunia Ihudi neta oḳlor maze hirbar doladoli lagigelo. Tarar mazor boute ḳoilo, “Ogure bute dorse, he fagol, tumra ogur mat hunrae ḳene?” Ar boute ḳoilo, “Bute dora manshor mat to ila nae. Bute kunu andar souk bala ḳore ni?” Bade Zeruzalem Kaba goror doḳol faoar idor shomoy aia azilo. Ou shomoy asil shitor din. Hozrot Isa Baytul-Mukaddosor Bashsha Sulaimanor barindat aṭa-uṭi korra. Ermaze Ihudi neta oḳol Isar sairobae dola oia ḳoila, “Ar ḳotodin tumi amrare loṭḳaia raḳtae? Tumi zudi hasaror al-Mosi o, te forishkar ḳori amrare ḳo.” Teu Isae zuaf dila, “Ami to ḳoilam, oile afnara ekin ḳorra na, ar amar gaibi bafor name ami ze ḳam ḳori, itae-o amar befare shakki der, ta-o afnara ekin ḳorra na, ḳaron afnara amar falor meṛa nae. Amar meṛainte amar ḍaḳ hunoin. Ami to tarare sini ar tara-o amar ḳore ḳore roin. Ami tarare aḳeri zindegi dan ḳori, tara kunu shomoy binash oita nae. Ḳeu amar ges tone tarare ḳaṛia nito nae. Amar ze gaibi bafe tarare amar ato disoin, tain hoḳol taki mohan. Tan at taki keu kunta ḳaṛia nito fare na. Ami ar baba, amra eḳ.” Teu Ihudi neta oḳole hirbar fattor loila tanre marar lagi. Isae tarare ḳoila, “Gaibi bafor hukum mafik bout bala bala ḳam ami afnaintore deḳaisi. Itar maze kun ḳamor lagi afnara amare fattor marta saira?” Tara ḳoila, “Bala kunu ḳamor lagi amra tore fattor mariar na, tui to shiriki korre, erlagi-u fattor marmu. Manush oia tui nizore Alla hishabe dabi korre.” Tain ḳoila, “Afnarar shorioto leḳa ase na ni, ‘Ami koilam, tumra-u elahi’? Te Allar kalam zerar gese nazil oisil, erare to tain nize-u Allar laḳan ḳoia ḍakisoin. Ar Pak Kitabor ḳota to bad deoa zae na. Te gaibi bafe zanre nizor lagi basia fosond ḳorla ar duniat faṭaila, ou ami zebla ḳoilam, ami Ibnulla, te afnara kila ḳoira, tui shiriki korre? Ami zudi amar gaibi bafor ḳam na ḳori, te afnara amar ufre iman anba na. Oile ami zudi amar bafor hoḳol ḳam ḳoria taki, te amar ufre iman na anle-o ita ekin ḳoroukka. Teu afnara zanba, gaibi baf amar maze-u asoin, ar ami-o tan maze asi.” Ou shomoy hirbar tara Isare dorar sesṭa ḳorla, oile tain in tone gaib oigela. Bade tain hirbar Zordan gangor hofaro gia roila. Age ou zagat Hozrot Ehiae manshore toubar gusol dita. Hono bout manush tan gese ailo ar mata-mati korlo, “Ehia nobie to kunu keramoti nishana deḳaisoin na, oile tain Hozrot Isar befare zotota ḳoisla, ita furafur hasa.” Oḳan buzia honor bout manshe Hozrot Isar ufre iman anla. Lasar name eḳzon manush bemar asla. Tan baṛi Bayt-Ania gaut, Moriom ar Marta namor tan dui boin-o ou gaut roita. Ḳoydin bade ou Moriome-u Isar fao-o kushboy-ala ator maḳaia, nizor matar suldi fao fusai diba. Ou Moriomor bai oila bemari Lasar. Erlagi tan boinainte oḳan ḳoia Hozrot Isar gese ḳobor faṭaila, “Huzur, afnar mayar manush kub bemar.” Ḳobor faia Isae ḳoila, “I bemar to tar moutor lagi oise na, borong Allar mohima zairor lagi-u oise, zate er mazdi ami Ibnullar mohima-o zair oy.” Hozrot Isae Bibi Marta, tan boin ar Lasarre kub maya ḳorta. Lasaror bemaror ḳota hunar bade-o Isa ze zagat asla, hono aro duidin roila. Bade tan sahabi oḳolre ḳoila, “Ao, amra hirbar Ehudia zilat zai.” Sahabi oḳole ḳoila, “Huzur, ou ḳoydin age honor manshe afnare fattor marta saila, oḳon afne hirbar hono zaita ni?” Tain ḳoila, “Dinor bela to baro gonṭa ase, ḳeu zudi dinor bela sola-fira ḳore, he usṭa ḳae na, ḳaron he ou duniar for deḳe. Ar ḳeu zudi raitor bela sola-fira ḳore, he usṭa ḳae, ḳaron tar maze kunu for nai.” Oḳan ḳoia hari tan sahabi oḳolre ḳoila, “Huno, amrar dust Lasar gumai gesegi, ami tare hozag korat zaiar.” Ikan hunia sahabi oḳole ḳoila, “Huzur, he zudi gumo taḳe, te to bala oizibo.” Isae Lasaror moutor ḳota ḳoisla, oile tara mono ḳorla, tain emne gumor ḳota ḳoisoin. Teu Isae forishkar ḳori koila, “Lasar mara gese. Oile ami tumrar ḳota mono ḳoria kushi oisi, ami hino aslam na, zate tumra ekin ḳortae faro. Oḳon ao, amra Lasaror gese zai.” Teu tan sahabi Tumase logor sahabi oḳolre ḳoila, “Ao na, amra-o zai, zate tan loge mortam fari.” Ou Tumasre Zomoz ḳoia ḍaḳa oy. Hono gia harle Hozrot Isae hunla, tain zaoar sair din age-u Lasarre dafon ḳora oigese. Zeruzalem ṭaun taki ou Bayt-Ania gau onuman dui mail duroi asil. Lasaror moutor bade tan boin Bibi Marta ar Moriomre buz deoar lagi Ihudi shomazor bout manush aila. Ermaze Hozrot Isae toshrif anra hunia Bibi Marta tan loge deḳa ḳorat gela, oile Moriom goro boi roila. Bibi Martae Isare ḳoila, “Huzur, afne zudi ono roita, te amar baigu morlo na one. Oile erbade-o ami zani, afne Allar gese zeta saiba, tain afnare ota diba.” Isae ḳoila, “Huno, tumar bai hirbar zinda oia uṭbo.” Teu Martae ḳoila, “Ji oy, ami zani kiamotor din zebla murda oḳol zinda oiba, ou shomoy he-o zinda oia uṭbo.” Isae Martare ḳoila, “Ami-u to kiamot ar zindegi. Ze zone amar ufre iman ane he morle-o zinda oibo. Ar ze zone asol zinda oia amar ufre iman ane, he kunudin-o morto nae. Tumi ikan ekin ḳoro ni?” Martae ḳoila, “Ji oy huzur, ami iman anchi, Allar oada ḳora ze zone duniat toshrif anar ḳota, afne-u hou al-Mosi Ibnulla, Allar ḳas mayar zon.” Oḳan ḳoia Martae gia tan boin Moriomre sufte ḍakia nia ḳoila, “Huno, huzur ono asoin, tain tumare ḍakira.” Teu Moriom zoldi kori Isar ḳandat gela. Isa ou shomoy-o gaur bitre hamaisoin na, Martae tan loge zeno deḳa ḳorsla, tain hono-u ubai roisla. Ar goror bitre zeta Ihudi oḳole Moriomre buz deoat asla, Moriome aḳta-u bare zaoat dekia tara tan ḳore ḳore gela. Tara mono ḳorlo, Moriom ḳoyboror gese ḳanda-ḳaṭi korat zaira. Isa ze zagat asla, Moriom-o hono gela ar Isare dekia tan fao-o foṛia ḳoila, “Huzur, afne zudi ono taḳta, te amar baigu morlo na one.” Moriom ar tan logor Ihudi oḳlor ḳandon-ahazari dekia Hozrot Isar dilor ruhu gorom oigelo, tain ḳator oigela. Tain erare zikaila, “Lasarre kuai dafon ḳorso?” Tara ḳoila, “Huzur aukka, deki zaukka.” Ou shomoy Isae ḳandi dila. Tan ḳandon dekia honor era ḳoila, “Deḳrae ni, tain Lasarre ḳoto maya ḳorta!” Oile kunu kunu zone ḳoila, “Zein andar souk bala ḳorsoin, tain ila kunta ḳorta farla one na ni, zate Lasargu na more?” Ita hunia Hozrot Isar dilor ruhu hirbar gorom oigelo, tain Lasaror ḳoyboror daro gela. I koybor asil guhar laḳan ek gato ar ḳoyboror muko eḳ fattor deoa asil. Tain manshore ḳoila, “Fattorṭa horao.” Lasaror boin Martae ḳoila, “Huzur, oḳon to lash fosia gondo bar oigese, tain sair din age mara gesoin.” Isae enre ḳoila, “Ami to tumare ḳoisi, tumi zudi ekin ḳoro, te Allar kudroti mohima deḳbae.” Teu manshe ḳoyboror mukor fattorṭa horaila. Isae asmanor bae saia dua ḳorla, “O gaibi baba, tumi amar ḳota huncho, erlagi ami tumar shukria adae ḳori. Ami zani, tumi hamesha amar ḳota huno. Oile amar sairobae zeta manush asoin, tara zate ekin ḳoroin, tumi amare faṭaiso, erdae-u oḳan ḳoilam.” Oḳan ḳoia tain zure ḍaḳ dia ḳoila, “Lasar, bar oia ao.” Teu murda Lasar ḳoybor taki bar oia aila. Tan at-fao ḳafondi fesail asil, ar muk asil rumal dia banda. Isae manshore ḳoila, “Tar band kulo ar tare zaite deo.” Bibi Moriomor gese zeta Ihudi manush aisla, Hozrot Isar ou keramoti ḳam dekia erar mazor boute tan ufre iman anla. Oile ḳeu ḳeu Forishi oḳlor gese gia Isar ou ḳamor ḳota zanailo. Ita hunia boṛo imam oḳole ar Forishi dolor manshe deshor fotua komiṭire loia ekḳano boila, boia ḳoila, “Amra oḳon kita ḳortam? I beṭae to bout keramoti ḳam deḳar. Amra zudi tare emne solte dei, te hoḳol manshe tar ufre iman anbo, ar ita hunia Ruman shorḳaror manshe amrar ṭikana ar amrar zatire-o binash ḳorba.” Ou mozlisor maze ou bosoror fordan imam, Kayafa namor eḳzon asla. Tain erare ḳoila, “Tumra to kunta-u zano na. Buzo na ni, asta zati binash oar saite, hoḳlor bodla eḳzonor moron aro bala.” Imam Kayafae ashole nizor mon taki ou ḳota ḳoisoin na, tain ou bosoror fordan imam oae gaibi buli tan muk taki bar oise ze, Ihudi zatire basanir lagi Isar moron oibo. Ḳali Ihudi zatir lagi nae, Allar zoto bondain sairobae sitria asoin, tarare dola ḳoria ekḳano ḳorar lagi-o tain zan bilai diba. Hou din taki tara Isare marar faetara ḳorat lagla. Erlagi Isae tarar maze kula-mela sola-fira bad dilaila, ar ou zaga saṛia morubumir ḳandat Afraim namor ek gaut gia tan sahabi oḳolre loia roila. Ou shomoy Ihudi oḳlor Azadi Id gonai aisil. Idor age nizore fak-saf ḳorar lagi bout manush gau taki Zeruzalem ṭauno gela. Hino gia tara Hozrot Isare tukaila. Tara Baytul-Mukaddoso ubaia eḳe-oinne zikaila, “Kita mono ḳoroin, tain i ido aita nae ni?” Boṛo imam ar Forishi oḳole hukum disla, ḳeu zudi Isar kuz fae, te tarare zananir lagi, zate tara Isare dorta faroin. Azadi Idor soydin age, Hozrot Isa hou Lasaror gau Bayt-Aniat aila, ze Lasarre tain mora taki zinda ḳorsla. Ino tara Hozrot Isar lagi kanir mezbani zuit ḳorla. Isar loge ḳaoat zera boisil, erar loge Lasar-o asla ar Bibi Martae ḳadimdari korla. Ou shomoy Lasaror boin Moriome ada sher kub dami kaṭi ator loia aila, aia ou ator Isar fao-o ḍalia nizor matar suldi fao fusia dila. Atoror kushboye asta gor borigelo. Ihuda Iskariat name Isar eḳ sahabi, zein tanre dushmonor ato dorai diba, ein ḳoila, “Ish, i ator fuṭin besile to tin-sho dinar faia gorib oḳolre bilai deoa gelo one.” Ashole Ihudae gorib oḳlor ḳota sinta ḳoria ikan ḳoise na. He asil sur. Ṭeḳar toli tar gese taḳto, ar zoma ṭeḳa taki he suri korto, erlagi ola ḳoise. Isae ḳoila, “Tumra i beṭigur mono duk dio na. Amar dafon-ḳafonor lagi tain i fuṭain toisla. Gorib oḳol to hamesha-u tumrar maze asoin, oile amare hamesha faitae nae.” Hozrot Isa Bayt-Aniat aisoin hunia, Ihudi zatir bout manush ono aila. Tara ḳali Isar lagi nae, hou ze Lasarre Isae mora taki zinda ḳorsla, tare-o deḳat aila. Ou shomoy boṛo imam oḳole niot ḳorla Lasarre-o marilita. Ḳaron Lasaror lagi bout Ihudi manshe neta oḳlor log saṛia, Isar ufre iman anchila. Idor niote dole dole zoto manush aisoin, tara bador din hunla, Hozrot Isae Zeruzalemo toshrif anra. Ou tara ḳezuror ḳesma ḍal loia tanre aguaia anat gela ar misil dia ḳoila, “Marhaba! Mabudor name zein toshrif anra, tan tarif ouk, tain-u Israilor bashsha!” Allar kalamor ayat mafik Hozrot Isae eḳṭa gada dekia tar ufre soar oila. Kitabo leḳa ase, “O Sion-ḳoina Zeruzalem, ḍoraio na. Saia deḳo, gadar baichcha soṛia tumar bashsha aira.” Sahabi oḳole foyla itar kunu mani buzla na. Bade Hozrot Isar kudroti mohima zair oia harle, Pak Kitabor ḳota tarar mono oilo, ou ayato tan befare-u leḳa asil, ar manshe tan lagi-u otota ḳorse. Ḳoybor taki Lasarre ḍakia zinda ḳori tular shomoy zeta manush Isar loge asla, tara-o ou befare hamesha mat-ḳota matita. Erlagi manshe tan ou keramoti ḳamor ḳobor hunia tanre aguaia anat gesla. Ita dekia Forishi oḳole eḳe-oinne ḳoilo, “Amrar to kunu lab or na. Deḳrae ni, asta dunia-u tar ḳore gesegi.” Azadi Ido zera ebadot ḳorat aisla, tarar maze ḳoyzon Iunani manush-o asla. Tara Galil zilar Bayt-Soyda gaur Filifre aia minot ḳorla, “Sab, amra huzur Isare deḳtam sai.” Filife ikan Andriasre ḳoila. Bade Andrias ar Filife gia Isare zanaila. Isae tarare ḳoila, “Ami bin-Adomor mohima zair oar shomoy aichche. Ami tumrare hasau ḳoiram, danor bis maṭit foṛia zudi na more, te eḳṭa-u taḳe, ar maṭit morle bout foshol fole. Ola ze zone nizor zanre beshi maya ḳore, he tar asol zindegi kuailae, oile ze zone i duniat nizor zanre tuchcho mono ḳore, he tar asol zindegi, mani aḳerator lagi zan basae. Ḳeu zudi amar kezmot ḳorto sae, te amar fote solouk. Teu ami zeḳano roimu amar kezmotḳari-o ono roibo. Ze zone amar kezmot ḳore, amar gaibi bafe tare ijjot diba. “Amar mon oḳon fereshan oigese. Te ami oḳan ḳoitam ni, baba, ze shomoy aia azise, ou shomoyor at taki amare basao? Oile otar lagi-u to ami ou shomoy forzonto aisi. Baba, tumi tumar mohima zair ḳoro.” Ou shomoy asman taki gaibi aoaz ailo, “Ami amar mohima zair ḳorsi ar hirbar zair ḳormu.” I aoaz hunia hino zoto manush asla, tara ḳoila, “Ita to megor ḍaḳ.” Ḳeu ḳeu ḳoilo, “Kunu firistae tan loge batchit ḳorsoin.” Ikan hunia Isae ḳoila, “I aoaz to amar lagi aise na, afnarar lagi-u aise. I zogotor manshor bisaror shomoy aichche, duniar munib Iblisor at taki oḳon ḳemota ḳaṛia neoa oibo. Amare zebla zomin taki ufre tula oibo, ou shomoy ami hoḳolre amar gese ṭania tulmu.” Tan kilaḳan mout oibo, oḳan buzanir lagi tain ita ḳoila. Ou shomoy manshe Isare ḳoila, “Amra Pak Kitab taki hunchi al-Mosi siroḳal roiba. Te afne kila ḳoira, bin-Adomre usat tula oibo? Taile i bin-Adom ḳe?” Tain zuaf dila, “Ar kisu shomoy nur afnarar loge ase, nur taḳte taḳte-u aṭa doroukka, zela andaire aia afnaintore na bere. Ze zon andair fote aṭe, he zane na he kuai zar. Nur afnarar loge taḳte taḳte-u nuror ufre iman anoukka, zate afnara-o ou nuror manush oita faroin.” Erbade Isa in tone horia gia, erar souk taki nizore lukailila. Hozrot Isae manshor samne oto beshi keramoti nishana deḳanir bade-o tara tan ufre iman anlo na. Ita hokkolta goṭisil zate agor zomanar nobi Ishayar ḳota fura oy, tain bataisla, Mabud go, amrar tobligor ufre ḳe ekin ḳorse? Tumar kudroti at ḳar gese-u ba zair oise? Erlagi-u to ita manshe iman anche na, ḳaron Ishaya nobie eoḳan ḳoisla, Allae tarar souk anda banailisoin, tarar dil fashan banailisoin, zate soukdi na deḳe ar dildi na buze. Arnae kizanu tara touba ḳorilain, Allar bae firizain, ar ami tarare shifa ḳorilai. Ishaya nobie Isar mohima deḳsla gotike, tan befare ou ḳota ḳoisla. Tebou Ihudi neta oḳlor maz taki boute tan ufre iman anla, oile Forishi oḳole tarare shomaz taki bar ḳori dilaibo, oḳan ḍoraia tara shikar ḳorla na. Tara Allar tarif taki manshor tarif faite beshi fosond ḳorta. Bade Isae zure zure ḳoila, “Ze zone amar ufre iman ane, he ḳali amar ufre nae, zein amare faṭaisoin tan ufre-o iman ane. Ze zone amare deḳe, he ashole tanre-u deḳe, zein amare faṭaisoin. Ami i duniat nur hishabe aisi, zate amar ufre ze iman ane, he ar andarit na roy. Ḳeu zudi amar ḳota hunia, ou mafik amol na ḳore, te ami nize tar bisar ḳori na, ḳaron ami manshore dushi shaibosto ḳorat aisi na, borong manshore toranit aisi. Ze zone amare mane na ar amar ḳota hune na, tar bisaror lagi to eḳzon asoin. Ami tare ze ḳota ḳoisi, ou ḳotae-u kiamotor din tare dushi shaibosto ḳorbo. Ami to nize taki kunta ḳoisi na, ḳali amar ze gaibi bafe amare bezisoin, tain nize-u hukum disoin, ami kita kita ḳoitam. Ami zani, tan hukum mana-u oilo aḳeri zindegi. Erlagi ami zeta ḳoi, ita amar gaibi bafor hukme-u ḳoi.” Azadi Idor tuṛa agor goṭona. Isae buzilila, tain i dunia saṛia tan gaibi bafor gese zaibar shomoy aichche. Duniat zera tan afon manush asla, tarare tain kub maya ḳorta ar hesh forzonto ola maya ḳoria-u gesoin. Raitkur ḳanit boibar agor ḳota, Hozrot Isare dushmonor ato dorai dibar lagi, Iblise aia Saimon Iskariator fua Ihudar mono ḳaish zagai dilo. Isae zanta, tan gaibi baf Allae tan ato hoḳolta shofi disoin, tain Allar ges taki aisoin ar tan gese-u firia zaira. Erlagi tain ḳaoa taki uṭla ar finnor fainjabi kulia ekḳan gamsa ḳomro bandila. Bade tain gamlar maze fani loia sahabi oḳlor fao doai dila, ar ḳomror gamsadi fao fusia deoat lagla. Ou laḳan tain zebla Saimon-Fitoror gese aila, Fitore ḳoila, “Huzur, ita kita ḳoroin, afne amar fao doaia dita ni?” Tain ḳoila, “Ami zeta ḳoriar, oḳon tumi itar mani buztae nae, bade buzbae.” Ou Fitore tanre ḳoila, “Ji na, afne kunumonte-u amar fao doai diba na.” Isae ḳoila, “Ami zudi tumar fao doia na dei, te tumar loge amar kunu ḳatir nai.” Teu Saimon-Fitore ḳoila, “Huzur, te ḳali fao nae, amar mata ar at-o doaia deukka”. Tain ḳoila, “Ze manshe gusol ḳorse, tar fao saṛa ar kunta doar zorur nae, tar to hoḳolta forishkar ase. Tumra-o nichchoy forishkar aso, oile hoḳol nae.” Ashole dushmonor ato ḳe tanre dorai dibo, ikan tain zanta. Erdae tain ḳoila, “Tumra hoḳol forishkar nae.” Sahabi oḳlor fao doaia harle Isae tan fainjabi findia hirbar boila ar tarare ḳoila, “Ami kita ḳorlam, tumra ita buzcho ni? Tumra amare ustad ar malik koia ḍaḳo, ikan ṭik-u, ami-u tumrar ustad ar malik. Ar ami tumrar ustad ar malik oia-o zebla tumrar fao doaia dilam, te tumra-o ola eḳe-oinnor fao doai deoa zorur. Ami ila ḳoria deḳailam, zate ami zela ḳorlam tumra-o ola ḳoro. Ami tumrare hasau ḳoiram, gulam tar munib taki boṛo nae. Ar zare faṭani oise, he tar faṭaora taki boṛo nae. Ita zania zudi amol ḳoro, te tumra doinno. “Ami tumra hoḳlor befare ḳoiram na. Ami zerare fosond ḳorsi tarare to sini. Huno, Allar kalamor ayat to folite oibo, leḳa ase, ‘Amar loge boia zegue ḳaoa-daoa ḳore, hogue amar ufre fao tulche.’ Ita goṭar age-u ami tumrare zanai dilam, teu goṭar bade tumra buzbae, ami-u hein. Ami tumrare hasau ḳoiram, ami zare faṭai, tare ze zone ḳobul ḳore, he ashole amare-u ḳobul ḳore. Ar ze zone amare ḳobul ḳore, he tanre-u ḳobul ḳore, zein amare faṭaisoin.” Oḳan ḳoia harle Hozrot Isar dil fereshan oigelo. Tain kulia ḳoila, “Ami hok kota ḳoiram, tumrar mazor eḳzone-u amare dushmonor ato dorai dibo.” Tain ḳar ḳota ḳoira, sahabi oḳole ikan na buzae eḳe-oinnor bae sai roila. Erar mazor ze sahabire Isae maya ḳorta, ein Isar kulo elain dia boat asla. Saimon-Fitore enre ishara dia ḳoila, tumi zikao, tain ḳar ḳota ḳoira. Teu ou sahabie Isar bae zukia ḳoila, “Huzur, ḳe ou zon?” Isae zuaf dila, “Ou ruṭir ṭukra boulo bizaia zare dimu, he-u ou zon.” Ar ou ruṭi tain Saimon Iskariator fua Ihudare dila. Ruṭir ṭukra loar loge loge-u Iblis Ihudar bitre hamailo. Isae tare ḳoila, “Zeta ḳortae sao, zoldi korilao.” Isar loge zara ḳaoat boisla, tara ḳeu buzla na, tain Ihudare ḳene ikan ḳoisoin. Ḳeu ḳeu mono ḳorlo, idor bazar ḳorar lagi Isae Ihudare oḳan ḳoisoin ba gorib oḳolre kunta deoar ḳota ḳoisoin, ḳaron ṭeḳar toli to Ihudar gese-u taḳto. Ruṭir ṭukra loar loge loge Ihuda bar oia gelogi. I shomoy rait asil. Ihuda bare gia harle Isae ḳoila, “Bin-Adomor mohima zair ḳorar shomoy aichche, tan mazdi Allar mohima zair oibo. Ar Allar mohima zebla tan mazdi zair oibo, ou shomoy Allae-o nizor maze bin-Adomor mohima zair ḳorba, ita tain kub zoldi-u ḳorba. O aolad oḳol, ami ar beshi din tumrar gese roitam nae. Te Ihudi neta oḳolre age zela ḳoislam, tumra amare tallash ḳorbae, oile ami zeḳano zaimu tumra hino zaitae fartae nae, oḳon ou ḳota tumrare-o ḳoiram. Ami tumrare ekḳan noya hukum diram, tumra eḳe-oinnore maya ḳorio. Ami zela tumrare maya ḳorsi, tumra-o ola eḳe-oinnore maya ḳorio. Tumra zudi eḳe-oinnore maya ḳoro, te hoḳole buzbo tumra amar ummot.” Saimon-Fitore Isare ḳoila, “Huzur, afne kuai zaira?” Tain ḳoila, “Ami zeno zairam, tumra oḳon amar loge hino aitae fartae nae, oile bade aibae.” Fitore ḳoila, “Oḳon ḳene zaitam fartam nae? Afnar lagi ami amar zan-o bilai dimu.” Ou shomoy Isae ḳoila, “Amar lagi hasau tumar zan dibae ni? Te hasa ḳota ami tumare ḳoiram, murgae bang dibar age-u, tumi tinbar ḳoibae, tumi amare sino na.” Hozrot Isae ḳoila, “Tumra ar fereshan oio na. Allar ufre to tumrar ekin ase, te amar ufre-o ekin raḳo. Amar bafor baṛit roar bout zaga ase, na taḳle ami koilam one. Ami to tumrar lagi zaga ṭik korat zairam. Zaga ṭik koria hirbar aimu, aia tumrare amar gese nimu. Teu ami zeno roimu, tumra-o hono roibae. Ar ami kuai zairam, i fot to tumrar sina ase.” Ou shomoy sahabi Tumase Isare ḳoila, “Huzur, afne kuai zaira, oḳan-u amra zani na, te fot kila sinmu?” Isae ḳoila, “Ami-u fot, ami-u hok ar ami-u zindegi. Amar usilla saṛa kunu manush-u gaibi bafor gese zaito fare na. Tumra amare sinle amar gaibi bafre-o sinlae one. Te oḳon tumra tane sincho ar deḳso-o.” Filife ḳoila, “Huzur, ou gaibi baf amrare deḳaukka, teu amra shanti oimu.” Isae ḳoila, “Filif, otodin taki ami tumrar loge loge asi, erbade-o tumi amare sinlae na ni? Ze zone amare deḳse, he amar gaibi bafre-o deḳse. Te tumi kilan ḳoilae, gaibi bafre deḳaukka? Tumi ekin ḳoro na ni, ami gaibi bafor maze asi, ar gaibi baf-o amar maze asoin? Ami tumrare zeta ḳoi, ita amar nizor mukor buli nae, ze gaibi baf amar bitre asoin, tain-u tan nizor ḳam salaira. Amar ḳota ekin ḳoro, ami amar bafor maze asi, ar tain amar maze asoin. Arnae ontoto amar ota keramoti ḳam dekia amare ekin ḳoro. “Ami tumrare hasau ḳoiram, ḳeu zudi amar ufre iman ane, te ami zeta ḳam ḳori, he-o ota ḳorbo. Ar ami amar bafor gese zaiargi kori he aro boṛo boṛo ḳam ḳorbo. Tumra amar name zeta saibae, ami ita fura ḳormu zate bafor mohima futor mazdi zair oy. Amar nam loia amar gese kunta saile, ami dimu. “Tumra zudi amare maya ḳoro, te amar hoḳol hukum-ahkam amol ḳorio. Ami gaibi bafor gese saimu, ar tain tumrar lagi aroḳ shaijjogir faṭaiba, ein siroḳal roiba. Ou shaijjogir oila hok ruhu. I duniar manshe ou hok ruhre ḳobul ḳore na, ḳaron tara ere deḳe-o na, sine-o na. Oile tumra ene sino, ein to tumrar loge loge roin ar samnedi tumrar dilor maze boshot ḳorba. “Ami tumrare etim halote falaia zaitam nae, ami hirbar tumrar gese aimu. Tuṛa bade duniar manshe amare ar deḳto nae, oile tumra deḳbae. Ami zinda asi gotike tumra-o zinda roibae. Ami zinda oia uṭia harle tumra buzbae, ami amar gaibi bafor maze asi ar tumra amar maze aso, ami tumrar maze asi. Ze zone amar hukum-ahkam sine ar amol ḳore, he-u amare maya ḳore. Ar ze zone amare maya ḳore, amar gaibi baf Allae-o tare maya ḳorba. Ami-o tare maya ḳormu, ar amar nizore tar gese zair ḳormu.” Sahabi oḳlor maze Ihuda Iskariat saṛa aroḳ sahabir nam asil Ihuda, ein ḳoila, “Huzur, duniar hoḳol manshor gese zair na ḳoria, ḳali amrar gese-u afnare ḳene zair ḳorba?” Isae zuaf dila, “Ḳeu zudi amare maya ḳore, te he amar ḳota manbo. Amar gaibi bafe tare maya ḳorba, amra tar gese aimu, aia tar loge boshot ḳormu. Oile ze zone amare maya ḳore na, he kunumonte-u amar ḳotae sole na. Ami tumrare zeta ḳoilam, ita amar mukor ḳota nae, zein amare bezisoin hou bafor ḳota. “Ami tumrar loge taḳte taḳte-u ita ḳoilam. Ou shaijjogir Pak Ruhu, zanre amar bafe amar name faṭaiba, tain-u hoḳol befare tumrare talim diba, ar ami tumrare zeta ḳoisi ota iad ḳorai diba. “Ami tumrar lagi shanti rakia zaiar, amar shanti-u ami tumrare dia zaiargi. I duniae zemne shanti dey, ami ila dei na. Tumrar dilo zanu kunu fereshani ba ḍor-ḳof na ae. Ami to age-u tumrare ḳoisi, ami zaiargi, ar hirbar tumrar gese aimu. Tumra zudi amare maya ḳortae, te ami amar bafor gese zaiar ḳori kushi oilae one, ḳaron i baf to amar taki-o mohan. Ita goṭar age-u tumrare zanai dilam, zate goṭia harle tumra ekin ḳortae faro. Ami tumrar loge ar beshi shomoy mattam nae, ḳaron duniar munib Iblis aior. Amar ufre tar kunu ḳemota nai. Oile ami amar bafor hukum mania ita hoḳolta ḳori, zate duniar manshe buzoin, ami amar bafre maya ḳori. Te ao, amra oḳon i zaga taki zaigi.” Hozrot Isae ḳoila, “Ami-u asol angur gas ar amar baba girost. Amar zeta ḍalainto fol dore na, tain itare ḳaṭia falai dein. Ar zeta ḍalainto fol dore, tain itare saṭia saf-sutra ḳori raḳoin, zate aro beshi fol dore. Te ami tumrare ze kalam talim disi, erlagi to tumra ag taki-u saṭa oia saf-sutra oiso. Tumra amar maze ro, ami-o tumrar dilo roimu. Angur gasor loge ḍal zudi lagail na taḳe, te ḍale zela nize nize fol doraito fare na, oula tumra-o amar maze na roile nize nize folala oitae faro na. Ami-u angur gas, ar tumra oilae ḍal-fala. Ze zon amar loge lagail taḳe, ami-o tar loge lagail roi, teu tar zindegit bout fol dore. Ar, amare saṛa to tumra kunta-u ḳortae faro na. “Amar loge ḳeu lagail na roile, tare ḳaṭa ḍalor laḳan falai deoa oy ar roide hukai zae. Bade hukna ḍalain tubaia aguino dein, teu ita zoli-fuṛi zae. Tumra zudi amar loge lagail taḳo ar amar kalam ḳanain tumrar dilo taḳe, te tumrar zeta ichcha ota-u saio, ita tumrare deoa oibo. Tumrar zindegit zudi bout fol dore, ar olaḳan tumra nizore amar ummot hishabe forman ḳorilao, te amar gaibi bafor tarif oibo. Bafe amare zela maya ḳorsoin, ami-o oula tumrare maya ḳorsi. Tumra amar mayar maze ro. Ami amar bafor hoḳol hukum-ahkam mania zela tan mayar maze roisi, tumra-o oula amar hukum-ahkam manle amar mayar maze roibae. “Ami tumrare ita ḳoilam, zate amar kushi tumrar dilo taḳe ar tumrar kushi fura oy. Amar hukum oilo, ami zela tumrare maya ḳorsi, tumra-o oula eḳe-oinnore maya ḳoro. Ḳeu zudi nizor dustor lagi zan bilai dey, te tar taki ar beshi maya ḳar ase? Amar deoa hukum zudi tumra amol ḳoro, te tumra amar dust. Ami tumrare ar gulam ḳoiram na, ḳaron munibe kita ḳoroin gulame to ita zane na, borong ami tumrare dust ḳoisi, ḳaron gaibi bafor ges taki ami zotota hunchi, hoḳolta-u tumrare zanaisi. “Amare to tumra fosond ḳorso na, borong ami-u tumrare fosond ḳorsi ar ḳamo lagaisi, zate tumrar zindegi folala oy ar ou fol ṭikia roy. Teu amar name gaibi bafor gese zeta saibae, tain tumrare diba. Ami tumrare ou hukum diar, tumra eḳe-oinnore maya ḳoro. “Duniar manshe tumrare ginnain, oile mono rakio, er age tara amare-u ginnaise. Tumra zudi ou duniar oitae, te tara tumrare nizor hishabe bala failo one. Tumra to i duniar nae, ami tumrare duniar maz taki fosond ḳorsi gotike tara tumrare ginnae. Amar ḳotaḳan mono rakio, gulam tar munib taki boṛo nae. Erlagi manshe zudi amare zulum ḳore, te tumrare-o ola ḳorbo. Tara amar ḳota manle tumrar ḳota-o manlo one. Amar ḳarone-u tara tumrar loge ola ḳorbo, ḳaron amare zein bezisoin, enre tara sine na. “Ami zudi na aitam ar tarar gese nosiot na ḳortam, te tara gunagar oilo na one, oile oḳon to tarar kunu ozuat nai. Ze zone amare ginnae, he amar gaibi bafre-o ginnae. Huno, zeta keramoti keu kunudin deḳaise na, ota keramoti zudi ami na deḳaitam, te tara gunagar oilo na one. Oile tara to amare ar amar gaibi bafre deḳse, dekia-o ginnaise. Ita oilo, zate tarar kitabor ou ḳota fole, kitabo ase, tara bina ḳarone amare ginnaise. “Ami amar gaibi bafor ges taki ze shaijjogir ruhre tumrar gese faṭaimu, tain aia amar befare shakki diba. Tain oila hok ruhu, tain gaibi bafor ges taki aiba. Ar tumra-o amar befare shakki dibae, tumra to foyla taki-u amar loge loge aso.” Hozrot Isae aro ḳoila, “Ami ita zanai dilam, zate tumra ḳorlami na zao. Manshe tumrare shomaz taki bar ḳori diba. Ola shomoy aibo, zara tumrare kun ḳorbo, tara mono ḳorbo ita Allar ebadot ḳorer. Tara ita ḳorbo, ḳaron tara gaibi bafre-o sinche na, amare-o sinche na. Ami ita age-u ḳoia raḳlam, zate shomoy aile mono oy, ami tumrare ota ḳoislam. Ami foyla taki ita ḳoisi na, ḳaron ami to tumrar loge loge-u aslam. “Huno, amare zein faṭaisoin, ami oḳon tan gese zaiargi, ta-o tumra ḳeu amare zikairae na, ami koi zairam. Borong ami tumrare ita ḳoisi, erlagi tumrar mono kub duk aise. Tebou ami hok kota ḳoiram, amar zaoaḳan tumrar lagi bala, ami na gele to hou shaijjogir ruhu aita nae. Ami gelegi tanre tumrar gese faṭaimu. Tain aia gunar befare, Allar morzi mafik solar befare ar Allar bisaror befare manshore hozag korba. Tain gunar befare hozag korba, ḳaron manshe amar ufre iman ane na. Allar morzi mafik solar befare hozag korba, ḳaron ami amar gaibi bafor gese zaiargi, tumra amare ar deḳtae nae. Bisaror befare hozag korba, ḳaron duniar munib Iblisor bisar oigese. “Tumrare aro boutta ḳoar ase, oile oḳon ita ḳoile shoijjo ḳortae fartae nae. Hou hok ruhu aia hari fot deḳaia tumrare furafur hokkan zanaiba. Tain to niz taki kunta ḳoita nae, ḳali zeta hunoin, ota-u ḳoiba. Ar zeta goṭbo, ota-u zanaiba. Ami zeta ḳoi, tain aia ota-u tumrar gese zair ḳorba. Olaḳan tain amar mohima zair ḳorba. Gaibi bafor zeta ase, ita hoḳolta-u amar. Erlagi ami koiram, ami zeta ḳoi, tain ota-u tumrar gese zair ḳorba.” Hozrot Isae ḳoila, “Tuṛa bade tumra ar amare deḳtae nae, hirbar tuṛa bade deḳbae.” Ikan hunia ḳoyzon sahabie mata-mati korla, “Tain ita kita matoin, ‘Tuṛa bade tumra ar amare deḳtae nae, hirbar tuṛa bade deḳbae’, tain hirbar ḳoira, ‘Ami bafor gese zairamgi.’ Te tain ze tuṛa shomoyor ḳota ḳoira, ikan kita? Tain kita matira, amra to buzram na.” Hozrot Isae buzilila, tan sahabi oḳole ou befare tanre kunta zikaita saira, buzia tain ḳoila, “Ami ze ḳoisi, ‘Tuṛa bade tumra ar amare deḳtae nae, hirbar tuṛa bade deḳbae’ ota loia tumra mata-mati korrae ni? Huno, ami tumrare hasau ḳoiram, tumra ḳandibae ar ahazari korbae, oile i duniar manshe kushi korba. Tumra oḳon duk-koshṭo ḳorbae, oile bade i duk roito nae, er bodla kushi korbae. Baichcha oar shomoy beṭintor kub ḳoshṭo oy, oile oia harle noya aolador furtie mon bori zae, hi koshṭor ḳota ar mono taḳe na. Ou laḳan tumra-o oḳon duk-koshṭo ḳorrae, oile hirbar zebla tumrar loge amar deḳa oibo, hou shomoy kushie tumrar dil borizibo, i kushi keu ḳaṛia nito farto nae. “Hi shomoy tumra amar gese kunta saitae nae. Ami tumrare hasa ḳoiram, tumra amar name amar gaibi bafor gese zeta saibae, tain tumrare diba. Oḳono to tumra amar name kunta saiso na. Sao, teu faibae, zate tumrar kushi fura oy. “Ami tumrare udahoron dia ou talim dilam. Oile olaḳan shomoy aibo, zebla ami kunu udahoron saṛa, amar gaibi bafor befare kula-mela buzaimu. Hou din-u tumra amar name saibae. Ami to ikan ḳoiram na, ami tumrar oia gaibi bafor gese minot ḳormu. Tain nize-u tumrare maya ḳoroin, ḳaron tumra amare maya ḳorso ar ekin ḳorso ze, ami Allar ges taki aisi. Ashole, ami amar gaibi baf Allar ges taki ou duniat aisi ar dunia saṛia tan gese-u zairam.” Ou shomoy sahabi oḳole tanre ḳoila, “Huzur deḳoukka, oḳon to afne kula-mela-u matira, kunu udahoron dira na. Oḳon amra buzlam, afnar ozana kunta nai, ar afnare ḳeu kunta zikanir-o nai. Gotike-u amra ekin ḳorlam, afne Allar ges taki-u aisoin.” Isae tarare ḳoila, “Oḳon ekin oise ni? Huno, ola shomoy aior, emonki aichche, zebla tumra dol saṛia amare toia zarzir zagat bagibae. Oile ami to eḳla nae, amar gaibi baf amar loge loge asoin. Ami tumrare ita ḳoilam, zate tumra amar loge mishia aso gotike mono shanti fao. I duniat tumra duḳ-mosiboto aso, ta-o monobol rakio, ami-u duniare joy ḳorsi.” Oḳan ḳoia hari Hozrot Isae asmanor bae saia dua ḳorla, “Baba, shomoy oigese. Tumi tumar futor mohima zair ḳoro, zate fute-o tumar mohima zair ḳorta faroin. Tumi tanre hoḳol manshor ufre ḳemota diso, zate tumi zerare tan ato shofiso, erare tain aḳeri zindegi dein. Eḳmatro hok Allare mani tumare ar tumi zenre faṭaiso, hou Isa al-Mosire sina-u oilo aḳeri zindegi. Tumi amare ze ḳam diso, i ḳam adae ḳoria duniat tumar mohima zair ḳorsi. Te baba, dunia foyda ḳorar age tumar dorbaro amar ze mohima asil, tumar gesor ou mohima oḳon amare hirbar deo. “I duniar mazor zerare amar ato shofiso, ami erar gese tumare zair ḳorsi. Tara to tumar-u asla, tumi-u tarare amar ato shofiso. Tara tumar hukum mania solche. Tara oḳon buzche, tumi zeta amare diso, ita to tumar ges taki-u aise. Ḳaron oilo, tumi zeta toblig korar hukum diso, ami ota zanaisi. Ar tara-o itare ḳobul ḳoria asolḳan buzilise zen, ami tumar ges taki-u aisi. Tara ekin-o ḳorse, tumi-u amare faṭaiso. Te ami to hoḳlor lagi minot ḳoriar na, ḳali tumi zarare amar ato diso, erar lagi-u minot ḳorram, tara to tumar-u. Amar zotota ase hokkolta-u tumar, ar tumar hokkolta-u amar. Erar mazdi-u amar mohima zair or. “O fobitro baba, i duniat ami ar beshi shomoy nae, oile tara i duniat asoin, ami to tumar gese airam. Tumi amare tumar ze nam diso, ou namor bole erare basao, zate amra zela eḳ, tara-o ola eḳ oita faroin. Ami zotodin tarar loge aslam, otodin tumar deoa ou namor gune tarare basaisi. Tarare fara dia raḳsi, tara ḳeu binash oise na. Ḳali zar binash oar ḳota, he-u binash oise, zate Allar kalamor ḳota fole. “Te oḳon ami tumar gese airam, duniat roite-u ita tarare zanai dilam, zate amar kushie tarar dil bori zae. Tumi amare zeta zanaiso, ami-o tarare ota zanaisi. Ami zela i duniar nae, tara-o ola i duniar nae, erlagi duniar manshe tarare ginnaise. Ami tumar gese abdar ḳorram na, tumi tarare dunia taki nitaegi, borong ou abdar ḳorram, tumi tarare Iblisor at taki hefazot ḳoro. Ami zela ou duniar nae, oula tara-o i duniar nae. Tumi tarare tumar hok dia ḳas hishabe raḳo. Tumar kalam-u oilo ou hok. Tumi zela amare duniat faṭaiso, oula ami-o tarare duniar maze faṭaisi. Ami tarar lagi nizore ḳas ḳori raḳsi, zate tarare-o hok dia ḳas hishabe raḳa oy. “Te ami kali erar lagi minot ḳoriar na, tarar lagi-o minot ḳorram, zera erar ḳota hunia amar ufre iman anbo. Ami minot ḳoriar tara hoḳol zanu eḳ oy. Baba, tumi zela amar loge aso ar ami-o zela tumar loge asi, oula tara-o zanu amrar loge milia roin. Teu duniar manshe ekin ḳorba, tumi-u amare faṭaiso. Tumi amare ze mohima dan ḳorso, ami ita tarare dan ḳorsi, zate amra zela eḳ, oula tara-o eḳ oita faroin. Tumi zela amar maze aso, ola ami-o tarar maze asi. Ou laḳan tara zanu furafur eḳ oita faroin. Teu duniar manshe buzbo, tumi-u amare faṭaiso, ar tumi amare zela maya ḳoro, oula tarare-o maya ḳoro. Baba, ami sairam, tumi zerare amar ato shofiso, ami zeḳano asi, tara-o zanu amar loge hono roin ar amar mohima deḳoin. I mohima to tumi-u amare dan ḳorso, ḳaron dunia foyda ḳorar ag taki-u tumi amare maya ḳorso. “O hok insafḳari baba, duniar manshe tumare sine na, oile ami to sini. Ar tumi-u zen amare faṭaiso, ikan era buzilise. Erar gese ami tumar nam zair ḳorsi, agedi aro ḳormu, zate tumi amare zela maya ḳoro, ola maya tarar bitre-o taḳe ar ami tarar loge mishia taki.” Ou munazator bade Hozrot Isae tan sahabi oḳolre loia Kidrun namor eḳ faṛia ḳal faroia gela. Gia tarare loia eḳ baganor bitre hamaila. Beiman Ihudae i zaga sinto, ḳaron Isae age bout bar sahabi oḳolre loia ono boisoin. Ermaze boṛo imam ar Forishi oḳole ou Ihudar loge eḳ dol sifai ar Baytul-Mukaddosor ḳoyzon fulish faṭaila. Ihudae tarare loia ono ailo, ou shomoy tarar ato lem, mushal, ar ostro-shostro asil. Isae ag taki-u hoḳolta zanta, tan ufre kita goṭbo. Erlagi tain aguaia aia tarare zikaila, “Afnara ḳare tukaira?” Tara ḳoila, “Nasarot gaur Isare.” Tain ḳoila, “Ami-u hein.” Ou shomoy beiman Ihuda-o tarar loge asil. Isae zebla ḳoila, “Ami-u hein,” ikan hunia-u tara ḳoredi gia maṭit foṛigela. Tain hirbar tarare zikaila, “Afnara ḳare saira?” Tara ḳoila, “Nasarot gaur Isare.” Tain ḳoila, “Ami to ḳoilam, ami-u hein. Afnara zudi amare-u tukanit ain, te amar logor erare saṛi deukka.” Ashole ila goṭlo, zate Isae age zeta ḳoisla ota fura oy. Tain ḳoisla, “Baba, tumi zerare amar ato shofiso, era eḳzonre-o ami kuaisi na.” Ou shomoy Saimon-Fitoror loge ekḳan toluar asil, oḳan bar ḳoria, tain fordan imamor gulamor ḍain ḳan ḳaṭilila. I gulamor nam asil Malkus. Erlagi Isae Fitorre ḳoila, “Tumar toluar ḳafo harao. Gaibi bafe amare ze mosibotor fiala disoin, ikṭar shad ami loitam na ni?” Ou shomoy sifai oḳole, fordan sifaie ar Baytul-Mukaddosor fulish oḳole Isare doria bandililo. Bandia foyla tara Hanonor gese loia gelo. I Hanon asla hou bosoror fordan imam Kayafar hour. Ou Kayafae age Ihudi neta oḳolre ḳoisla, “Asta zati binash oar saite, hoḳlor bodla eḳzonor moron aro bala.” Ou shomoy Fitor ar aroḳzon sahabi Isar ḳore ḳore gela. Ou sahabire fordan imame sinta. Ein Isar loge oia fordan imamor baṛir uṭano hamaila. Oile Fitor baire geiṭor gese ubai roila. Teu fordan imamor forisito Isar ou sahabi bare gia faradar beṭire ḳoia Fitorre bitre anaila. Ou beṭie Fitorre ḳoilo, “Tumi-o en murid ni?” Fitore ḳoila, “Na, na, ami nae.” Ou shomoy kub shit foṛsil, erdae sifai ar gulam oḳole uṭano angradi aguin doraia aguin tabanit lagla. Fitore-o tarar daro ubaia aguin tabaila. Ou shomoy fordan imame Isare tan ummot ar tan talimor befare zikaila. Isae zuaf dila, “Ami manshor samne kula-mela matisi. Ihudi oḳol zeḳano zoma oin, ota mosido ar Baytul-Mukaddoso hamesha talim disi. Ami to lukaia kunta ḳoisi na. Te amare ar ḳene zikaira? Amar talim zera hunche, tarare-u zikaukka. Ami ze talim disi, ita tarar zana ase.” Isar i zuaf hunia, ḳandat ze sifai oḳol uba asla, era eḳzone tanre soṛ maria ḳoilo, “Tui fordan imamre ola zuaf dire ni?” Tain ḳoila, “Ami zudi bad kunta ḳoia taki te ḳoukka, ar bala mat matile amare marra ḳene?” Ou shomoy Hanone banda halote Isare fordan imam Kayafar gese faṭai dila. Sahabi Saimon-Fitore zebla aguin tabaira, ou shomoy manshe tanre ḳoilo, “Tumi-o tar logor eḳzon sahabi ni?” Fitore dusrabar oshikar ḳori koila, “Na, na, ami nae.” Fitore zar ḳan ḳaṭisla, tar ek kuṭum asil fordan imamor gulam. He ḳoilo, “Ami baganor bitre ogur loge tumare-o deḳlam na ni?” Fitore hirbar oshikar ḳorla, ar loge loge-u murgae bang dilailo. Ihudi neta oḳole biane Isare Kayafar ges taki, Ruman bashshar fordan hakim Filator ṭongit loia gela. Oile tara baṛir bitre hamaila na, zate be-din hakimor baṛit hamaia nafaḳ na oin, borong fak-saf roia Azadi Idor ḳani kaita faroin. Erlagi Ruman hakim Filat bare aia zikaila, “I beṭar birudde tumrar nalish kita?” Tara ḳoila, “He oforad na ḳorle to afnar gese anlam na one.” Filate tarare ḳoila, “Tumra tare loia zaogi, gia tumrar shoriot mafik bisar ḳorilao.” Ikan hunia tara Filatre ḳoila, “Kunu manshore zane marar moto shaza deoar ḳemota amrar ato nai, ḳali Ruman oḳlor ato ase.” Nizor mout kilan oibo, Isae ikan age-u ḳoisoin. Te ita oilo, zate tan ou ḳota fole. Teu Filat hirbar ṭongir bitre hamaila ar Isare ḍaḳ dia ḳoila, “Oba, tumi kita Ihudi oḳlor bashsha ni?” Tain zuaf dila, “Afne nize ou ḳota ḳoira, na manshe amar befare afnare ḳoise?” Filate zuaf dila, “Ami kita Ihudi ni? Tumar nizor zatir manshe ar boṛo imam oḳole tumare amar ato dise. Ḳo, tumi kita ḳorso?” Isae ḳoila, “Amar bashshai i duniar nae. Amar bashshai zudi ou duniar oito, te Ihudi neta oḳlor ato ami na foṛar lagi amar manshe laṛai korlo one, oile amar bashshai to inor nae.” Ikan hunia Filate Isare zikaila, “Taile tumi kita bashsha ni?” Isae ḳoila, “Afne-u to ḳoira, ami bashsha. Hunoukka, hokor fokke shakki deoar lagi ami duniat aisi. Zara hokor loge ase, tara amar ḳota hune.” Filate tanre ḳoila, “Te hokkan kita?” Oḳan ḳoia tain hirbar bare gia Ihudi neta oḳolre ḳoila, “Ami to er kunu dush faisi na. Oile tumrar to eḳṭa reoaz ase, Azadi Idor shomoy ami eḳzon ḳoydire ḳalas dei. Te tumra sao ni, ami Ihudir ou bashshare saṛi ditam?” Ikan hunia tara sillaia ḳoilo, “Na, na, ere na, Barabbare saṛi deukka.” Ou Barabba asil eḳ ḍaḳait. Bade Ruman hakim Filate Isare sabuk marar hukum dila. Ar sifai oḳole gosa-ḳaṭa dia eḳ mukuṭ banaia tan matat dilo, ar baingoni rongor bashshai lebas findailo. Bade tara tan samne aia ḳoilo, “O Ihudir bashsha, marhaba!” Oḳan ḳoia ḳoia tara tan galo soṛailo. Teu Filat hirbar bare aia ḳoila, “Huno, ami ere tumrar gese bar ḳoria aniar, teu tumra buzbae, ami er kunu dush-u fairam na.” Hou gosa-ḳaṭar mukuṭ ar baingoni lebas finda halote Isa bar oia aila, ar Filate ḳoila, “Ou deḳo, hou manush.” Isare dekia boṛo imam ar Baytul-Mukaddosor fulish oḳole sillaia ḳoila, “Tare solibo deo, solibo deo.” Filate ḳoila, “Ami to tar kunu dush faisi na, te tumra-u tare nia solibo gatilao.” (I solib oilo laḳṛidi banail, manshore loṭḳaia marar eḳ zinish.) Ihudi neta oḳole Filatre ḳoila, “Amrar shoriot mafik tar moron oa usit, ḳaron he nizore Allar ḳas mayar zon, Ibnulla ḳoise.” Ikan hunia Filate aro beshi ḍoraigela. Tain hirbar ṭongi-goror bitre hamaia Isare zikaila, “Tumi kuai taki aiso?” Oile Isae kunu zuaf dila na. Erdae Filate Isare ḳoila, “Tumi amar mator kunu zuaf ditae na ni? Tumi zano ni, tumare ḳalas dibar ba solibor ufre loṭḳaia marar ḳemota amar ase?” Teu Isae ḳoila, “Ufre taki afnare ḳemota na deoa oile, amar ufre afnar kunu ḳemota-u taḳto na. Erlagi ze manshe amare afnar ato dorai dise, he-u boṛo gunagar.” Ikan hunia Filate Isare ḳalas dilaita saila, oile Ihudi neta oḳole sillaia ḳoila, “Afne zudi ere ḳalas dilain, te afne Ruman bashshar dust nae. Ze manshe nizore bashsha ḳoia dabi kore, he to Ruman bashshar dushmon.” Ikan hunia Filate Isare bar ḳori anla ar Fattordi-Banda namor eḳ uṭano bisaror ashono boila. Ibrani bashae i uṭanre Gabbata ḳoa oy. I din asil Azadi Idor ayozonor din. Ou shomoy beil onuman duifor oigese. Filate Ihudi neta oḳolre ḳoila, “Ou deḳo, tumrar bashsha.” Isare dekia tara sillaia ḳoilo, “Ogure horao, horao, tare solibo deo.” Filate ḳoila, “Tumrar bashshare ami solibo dilaitam ni?” Boṛo imam oḳole ḳoila, “Ḳali Ruman bashsha saṛa, amrar ar kunu bashsha nai.” Teu hakim Filate solibor ufre loṭḳaia marar lagi Isare tarar ato shomzai dila, ar sifai oḳole tanre loia gela. Bade Isae tan solib nize boia ‘Ḳollar Saṛ’ namor zagat gela. Ibrani bashae i zagar nam Golgata. Hino nia tara tanre solibo loṭḳailo. Isare mazḳano, ar tan dui galar duio solibo oinno duizonre loṭḳailo. Ar Filate ekḳan oforad-nama lekia Isar solibor ufre lagaila. Ikano leḳa asil, “Nasarot gaur Isa, Ihudir bashsha.” Ze zagat tanre solibo loṭḳail oisil, ou zaga ṭaunor ḳandat asil gotike bout Ihudie ou oforad-nama foṛlo. Ikan Ibrani, Iunani ar Ruman bashae leḳa asil. Ihudir boṛo imam oḳole hakim Filatre ḳoila, “Ihudir bashsha na lekia, afne ola leḳoukka, he ḳoito, ami Ihudir bashsha.” Filate ḳoila, “Ami zeta leḳsi, leḳsi-u.” Isare solibo loṭḳanir bade sifai oḳole tan ḳafoṛ-sufoṛ sair baṭ ḳori baṭia nila. Bade tan kurtaṭa-o nila. I asta kurtar gola taki bain ḳora, kunu silai asil na. Erlagi sifai oḳole eḳe-oinne ḳoilo, “Ikṭa na siṛia borong loṭari mari deki, ḳar baiggot foṛe.” Ita goṭsil, zate Asmani Kitabor ḳota fole, kitabo leḳa ase, Tara nizor maze amar ḳafoṛ-sufoṛ baṭa-baṭi korse, amar kurtar lagi tara loṭari marse. Ar hasau tara ola ḳorlo. Hozrot Isar solibor ḳandat tan ma, ḳala, Kulufar bou Moriom ar Mogdilini Moriom uba asla. Isae deḳla, tan ma ar mayar hou sahabi daro ubai roisoin. Dekia foyla tan maʼre ḳoila, “Mai go, ounu tumar fua.” Ar sahabire ḳoila, “Bai, ounu tumar ma.” Ou shomoy taki i sahabie Isar maʼre tan nizor goro loia gelagi. Erbade hokkolta shesh oigese zania, al-Zobur kitabor ayat zate fole, otar lagi Isae ḳoila, “Amar fiase dorse.” Ou shomoy hino eḳ zog ṭenga anguror shorbot asil. Tara ekḳan tena ania ou shorbotor maze bizaia, esub gasor ḍeṭar matat lagaia usa ḳori tan mukor gese dilo. I shorbot ḳaia harle tain ḳoila, “Shesh oigese.” Oḳan ḳoia, tain mata nuaia aḳeri dom falaila. Azadi Idor agor din Hozrot Isae inteḳal ḳorla. Bador din asil ḳas fobitro eḳ Zummabar. Erlagi Ihudi neta oḳole saila, i din zanu kunu lash solibor ufre na taḳe. Ou tara hakim Filator gese saila, zate solibo zera ase, tara zoldi morar lagi tarar fao bangia solib taki lamani oy. Teu Isar loge zerare solibo loṭḳail oisil, sifai oḳole era duiozonor fao bangi dilo. Tara Isar gese aia deḳlo, tain mara gesoin, erlagi tan fao banglo na. Oile eḳ sifaie sulfi dia tan fatti-aṛor mazedi faṛ marlo, faṛor loge lou ar fani bar oia ailo. Ze zone nizor souke i goṭona deḳsoin, tain-u shakki disoin ar tan shakki hasa. Tain zanoin, tain zeta ḳoira ita hasa, zate tumra-o ekin ḳoro. Ita oisil zate Pak Kitabor ou ḳota fura oy, kitabo ase, ‘Tan eḳṭa aḍḍi-o banga oito nae.’ Eoḳan ase, ‘Zara tanre gatise, tara tan bae sai roibo.’ Ita goṭonar bade Arimatia gaur Iusufe Isar lash nita ḳori hakim Filator onumoti saila. Iusuf asla Isar eḳzon lukail ummot, ḳaron tain Ihudi neta oḳolre ḍoraita. Filator onumoti faia tain Isar lash nila. Age raitor bala zein Isar gese aisla, hou Nikodime-o mura-ator ar oguru mishaia onuman eḳ mon kushboy moshla loia aila. Ar Isar lash nia Ihudi oḳlor niom mafik ou kushboy-ala moshla maḳaia ḳafon findaila. Isare zeḳano solibo gata oisil, hono eḳ baganor bitre faṛor guhar maze noya eḳṭa ḳoybor kudia raḳa asil. I koyboro ḳeurore dafon ḳora oise na. Ou din Ihudi oḳlor idor agor din oae ar ḳoyborṭa-o ḳandat taḳae, tara taṛa-uṛa ḳori Isare ono-u dafon ḳorla. Haftar foyla din fozor oḳto andair roite-u Mogdilini Moriom Hozrot Isar ḳoyboror ḳandat gela. Gia deḳla, ḳoyboror muk taki fattorṭa horail oigese. Dekia tain Saimon-Fitor ar ze sahabire Isae kub maya ḳorta, erar gese douṛaia gia ḳoila, “Hunchoin ni, huzuror lash manshe ḳoybor taki tulia nisoingi. Nia ḳoi raḳsoin amra zani na.” Ḳobor faia Fitor ar ou sahabi koyboror bae roana oila. Duiozone eḳloge douṛaira. Fitorre ḳore falaia hou sahabi age ḳoyboror ḳandat gela. Gia unda oia deḳla, ḳoyboror bitre ḳafon foṛi roise, oile tain ḳoyboror bitre hamaila na. Fitor-o tan ḳore ḳore aila, aia ḳoyboror bitre hamaia deḳla, ḳali kafon ḳan foṛi roise. Ze ḳafonor ṭukra dia tan mata banda oisil, ikan oinno ṭukrar loge nae, alga foṛi roise. Ze sahabi foyla ḳoyboror ḳandat gesla, bade tain-o bitre hamaila, hamaia hoḳolta dekia ekin ḳorla. Isar to murda taki zinda oa zorur, Pak Kitabor ou talimor mani age to era ḳeu buzchoin na. Erbade sahabi oḳol zarzir baṛit gelagi, oile Moriome ḳoyboror ḳandat ubaia ḳandon lagaila. Tain ḳandi kandi unda oia ḳoyboror bitredi saia deḳla, Isar lash zeno hutaia raḳa oisil, hono dola ḳafoṛ finno duizon firista boi roisoin, eḳzon hitanedi, aroḳzon fao galabae. Firista oḳole Moriomre ḳoila, “Tumi kandirae ḳene go?” Tain ḳoila, “Manshe amar malikor lash tulia nisoingi, nia ḳoi toisoin zani na.” Oḳan ḳoia tain ḳoredi saite-u deḳla, Hozrot Isa ubai roisoin. Oile tain-u ze Isa, Moriome ikan buzla na. Isae Moriomre ḳoila, “Ogo, tumi kando ḳene? Ḳare tukairae?” Isare baganor mali mono ḳoria tain ḳoila, “Deḳoukka, afne zudi tan lash nia taḳoin, te kuai nisoin, ḳoukka. Ami tan lash nimu.” Isae ḳoila, “Moriom.” Teu Moriom firia ubaia Ibrani bashae tanre ḳoila, “Rabbuni” mani ustad. Isae tanre ḳoila, “Amare doria rakio na, ami to oḳono gaibi bafor gese ufre gesi na. Tumi borong amar baiainre gia ḳo, zein amar ar tumrar gaibi baf, amar ar tumrar Alla, ami ufre tan gese-u zairam.” Teu Mogdilini Moriome sahabi oḳolre gia ḳoila, Isar loge tan deḳa oise ar Isae-u tanre ita hoḳolta ḳoisoin. Hou din, mani haftar foyla din hainja bala sahabi oḳol ekḳano dola oila. Oile Ihudi neta oḳlor ḍore goror duar-kiṛki hoḳolta bond asil. Ermaze aḳta-u Hozrot Isa aia erar mazḳano ubaia ḳoila, “Assalamu alaikum.” Oḳan ḳoia hari tain nizor duio at ar fatti-aṛor zoḳomor dag erare deḳaila. Huzurre dekia sahabi oḳol kub kushi oila. Bade Isae hirbar erare ḳoila, “Assalamu alaikum. Huno, amar gaibi bafe zela amare faṭaisoin, ami-o oula tumrare faṭairam.” Oḳan ḳoia tain sahabi oḳlor ufre fu dia ḳoila, “Allar Pak Ruhre ḳobul ḳoro. Huno, tumra zudi ḳeure maf ḳori deo, te tar guna maf ḳora oibo, ar zudi maf na ḳoro, te tar gunar mafi milto nae.” Hozrot Isa zebla sahabi oḳlor samne aila, ou shomoy barozon sahabir mazor Tumas namor eḳzon sahabi ino asla na. Ou Tumasre Zomoz ḳoia ḍaḳa oito. Erlagi baki sahabi oḳole Tumasre ḳoila, “Amra to huzurre deḳsi.” Tumase ḳoila, “Hunoukka, ami amar nizor souke zudi tan duio ator feregor dag na deki, ou zoḳomo angul na lagai, ar tan fatti-aṛor zoḳomo at na dei, te kunumonte-u ami ita ekin ḳortam nae.” Er eḳ hafta bade hirbar sahabi oḳol ou goro dola oila, erar loge Tumas-o asla. Ou shomoy goror hoḳol duar-kiṛki bond taḳle-o aḳta-u Isa aia tarar mazḳano ubaia ḳoila, “Assalamu alaikum.” Bade tain Tumasre ḳoila, “Tumar angul lagaia amar duio at deḳo, ar tumar at baṛaia amar fatti-aṛor zoḳomo harao, ekin ḳoro, shondoy ḳorio na.” Teu Tumase ḳoila, “Malik amar, Alla amar.” Isae tanre ḳoila, “Tumas, amare deḳso ḳori tumi iman anlae ni? Huno, doinno tara, zera na dekia-o amar ufre iman ane.” Hozrot Isae sahabi oḳlor samne aro bout keramoti nishana deḳaisoin, ita hoḳolta to ou kitabo leḳa oise na. Ḳali ou goṭona oḳol leḳa oise, zate ota tilaot ḳoria tumra iman ano, Hozrot Isa-u Alla Pakor oada ḳora hou al-Mosi, tain-u Ibnulla, Allar ḳas mayar zon, ar iman ania zate tan usillae tumra aḳeri zindegi hasil ḳoro. Erbade Tibiria namor aoror faro Hozrot Isae sahabi oḳolre hirbar deḳa dila. Goṭona ou laḳan oilo. Saimon-Fitor, Tumas zare Zomoz ḳoa oito, ar Galil zilar Kanna gaur Notonel, Zibudiar fuain shoho aro duizon sahabi eḳloge asla. Sahabi Saimon-Fitore logor erare ḳoila, “Ami mas marat zaiargi.” Tara ḳoila, “Amra-o tumar loge zaimu.” Teu tara nao loia mas marat bar oila, oile i rait kunu mas faila na. Fozor oḳto Isa aia aoror faro ubaila. Oile tain-u ze Isa, era ikan buzla na. Tain sahabi oḳolre ḳoila, “O beṭain, tumra kunu mas faiso na ni?” Tara ḳoila, “Ji na, faisi na.” Isae tarare ḳoila, “Te naor ḍain galabae zal falao, teu faibaene.” Tan ḳotamoto tara zal falaila ar zalo oto mas hamaila, ikan ṭania tulta farla na. Ze sahabire Isae maya ḳorta, tain Fitorre ḳoila, “Ein to malik.” I shomoy Saimon-Fitoror gotro ḳafoṛ asil na. “Ein to malik” oḳan hunia-u tain ḳafoṛ findia faldi fanit foṛla. Oile baki sahabi oḳole mase bora zalḳan ṭani ṭani nao loia faro azila. Ḳaron tara far taki beshi duroi nae, onuman dui-sho at duroi asla. Tara faro uṭia deḳla angrar aguin, ou aguinor ufre mas ar ruṭi. Isae tarare ḳoila, “Oḳon zeta mas marso, on tone ḳoyṭa ano.” Saimon-Fitore nao taki zalḳan faro ṭania tulla. Zalor bitre eḳ-sho teppannoṭa boṛo mas asil, tebou zal faṛlo na. Isae tarare ḳoila, “Ao, ḳao aia.” Oile kunu sahabie zikanir shaosh oilo na “Afne ḳe?” Ḳaron tara zanta, tain-u Malik. Bade tain aia tarare ruṭi kaite dila, oula biran mas-o dila. Murda taki zinda oar bade, ou tin nombor bar tain sahabi oḳolre deḳa dila. Tarar ḳaoa-daoar bade Isae Saimon-Fitorre zikaila, “O Saimon bin Iuhanna, era zela amare maya ḳoroin, tumi amare er taki beshi maya ḳoro ni?” Tain ḳoila, “Ji oy malik, afne to zanoin, ami afnare ḳoto maya ḳori.” Teu Isae ḳoila, “Te amar meṛa-baichchar raḳali koro.” Isae hirbar tanre zikaila, “Saimon bin Iuhanna, tumi amare maya ḳoro ni?” Fitore ḳoila, “Ji oy malik, afne to zanoin, ami afnare ḳoto maya ḳori.” Isae ḳoila, “Te amar meṛar fal deḳa-huna ḳoro.” Bade tain tisrabar zikaila, “O Saimon bin Iuhanna, hasau ami tumar mayar manush ni?” Isae tisrabar zikanie Fitor mone mone kisu dukito oia ḳoila, “Malik, afne to hoḳolta-u zanoin, afne zanoin-u afne amar kub mayar zon.” Teu Isae ḳoila, “Te amar meṛa falor raḳali koro. Ami tumare hasau ḳoiram, tumar zuankir shomoy tumi nize-u tumar ḳomor bandia zeno kushi ono zaitae. Oile buṛakir shomoy tumar at baṛai dibae, ar oinno zone tumare bandia, tumi zeno zaitae sao na, hono loia zaibo.” Allar gourob zair oar lagi Fitoror mout kilan oibo, oḳan buzanit gia Isae ou ḳota ḳoila. Bade tain Fitorre ḳoila, “Ao, amar loge taḳo.” Ou shomoy Fitore ḳoredi saia deḳla, Isar hou mayar sahabi kore ḳore aira. Ou sahabie ḳoydin age ḳanit boia Isar bae zukia ḳoisla, “Huzur, afnare dushmonor ato ze dorai dibo, he ḳe?” Fitore enre dekia Isare ḳoila, “Huzur, en kita oibo?” Isae Fitorre ḳoila, “Ami zudi sai, ami dusrabar duniat na aoa forzonto he ono rouk, te tumar kita? Tumi amar loge taḳo.” Erlagi ummot oḳlor maze ḳobor roṭi gelo, ou sahabi morta nae. Oile Isae Fitorre ikan ḳoisoin na. Borong tain ḳoisla, “Ami zudi sai, ami hirbar toshrif na ana forzonto he ono taḳouk, te tumar kita?” Ou sahabie ita hoḳol befare shakki disoin ar leḳsoin. Amra zani, tan shakki hasa. Hozrot Isae aro bout ḳam ḳorsoin. Ita zudi eḳ ek kori leḳa oito, te oto kitab oito, ita asta duniaiye dorlo na one. Mohamainno Tiofilas, Hozrot Isare behesto tulia neoar ag forzonto tain zeta talim disoin ar zeta zeta ḳorsoin i hoḳolta-u ami agor kitabo leḳsi. Ze sahabi oḳolre tain basia loisla, tanre tulia neoar age Pak Ruhu dia erar gese osiot ḳorai gesoin. Tan toklif ḳaimor bade tain zen zinda asoin iṭar bout kisimor alamot deḳaisoin. Sallish din dori tain sahabi oḳolre deḳa dia Allar bashshair bishoye batchit ḳorsoin. Isae tara hokkolor loge ekḳano shorik oia ou hukum dila, “Tumra Zeruzalem taki zaio na, amar gaibi bafor oada ḳora ze danor ḳota tumra age amar gese huncho, er lagi ono bar sao. Hozrot Ehiae to fanir maze toubar gusol ḳoraita, oile besh deri oito nae Allae tumrare Pak Ruhu dia gusol ḳoraiba.” Tara hokkol ekḳano dola oia Isare zikaila, “Huzur, i shomoy kita Boni Israil oḳlor ato raijjo firot anba ni?” Isae zuaf dila, “Ze oḳt ba zomana amar gaibi bafe tan nizor eḳtiaro raḳsoin, ita tumra zanar goroz nai. Oile Pak Ruhu tumrar ufre ḳaim oia harle tumra gaibi bol faibae, ou bole Zeruzalem, asta Ehudia ar Shomoria elaḳa, ar duniar hesh shimana forzonto amar shakki oibae.” Ou mator bade-u sahabi oḳlor souḳor samne Isare tulia neoa oilo, ar tain megor ṭukrar aoṛ oigela. Isa zebla asmano uṭira i shomoy sahabi oḳole souk na firaia asmanor bae sairoila, ou shomoy dola ḳafoṛ finda duizon beṭa manush tarar ḳandat ubaia ḳoila, “O Galilor manush oḳol, ikano ubaia asmanor bae sairiso ḳene? Zare tumrar ges taki tulia neoa oilo, ou Isare zelaḳan tumra behesto zaite deḳlae, ou laḳan tain firia-o aiba.” Ou sahabi oḳol Zoytun namor faṛo taki Zeruzalemo firia aila. I faṛ Zeruzalem ṭaun tone tuṛa duroi. Ṭauno firia tara ze goror ufror talat roita hou goro gela. Tara oila Fitor, Hannan, Iakub, Andrias, Filif, Tumas, Bortolmoy ar Moti, Alfir fua Iakub, muktizudda Saimon, ar Iakubor fua Ihuda. Goro hamaia hoḳole milia ḳas dile dua ḳorat roila, erar loge asla imandar beṭin, Isar ma Moriom ar tan baiain. Hou shomoy eḳdin Fitore onuman eḳ-sho bishzon mumin oḳlor maze ubaia ḳoila, “Bai oḳol, Isare zera dorat aisil tarare fot sinaia nisil Ihuda, tar befare bout age Daud nobir muko Pak Ruhe zeta ḳoisla, Pak Kalamor i kota fura oar dorḳar asil. He to amrar-u eḳzon asil, ar amrar loge torikar kezmotor lagi tare-o sahabi hishabe fosond ḳora oisil.” Ou nafaki ḳamor ṭeḳa dia he eḳzora zomi loisil, ar ou zomino ufoit oia foṛia tar feṭ faṭia at-boṛ bar oilo. Zeruzalemor hoḳol manshe ita hunchil, erlagi hoḳole ou zominre ḍaḳoin Akeldama ba ‘Lour Zomin’. Fitore aro ḳoila, “Ou ḳota fobitro Zobur Shorifo ase: Tar boshot ḳana ḳali rouk, hono roar ḳeu na taḳouk. Tar godi aroḳzone fauk. Teu tara ou duizonre uba ḳoraila, Iusuf Barshabba, tan aroḳ nam Iustus; ar Matias. Heshe tara duizonor name loṭari marle Matiasor nam uṭlo; teu Matias ou egarozon sahabir loge zug oila. Fonchaisha Idor din tara hoḳol eḳ zagat dola asla. Ou shomoy asman taki tufanor laḳan eḳ aoaz oilo, tara ze goro boat asla i aoaze asta gor borigelo. Tara deḳla, aguinor lukkar laḳan kitar ṭukrain aise, ar i lukkain tara hoḳlor ufre aia boilo. Teu tara hoḳole Pak Ruhe kamil oila, ar ruhur gaibi bole tara alog alog bashae matta lagla. I shomoy duniar hokkol deshor forezgar Ihudi oḳol Zeruzalemo asla. I aoazor loge loge-u tara aia biṛ ḳorilla ar be-aḳol oigela, ḳaron erare zarzir nizor bashae mat-ḳota matte deḳla. Dekia tara taijjub oia mata-mati korla, “Ou zera matra era hoḳol-u kita Galilor manush nae ni? Zudi oy te amra kila zarzir nizor bashar buli erar ges taki hunram? Amra to Partio, Madio, Ilamio, ar Meshofotamiar bashinda, Ehudia, Kappadokia, Fonto, Asiya, Forugia, Pamfulia ar Mishor deshor manshe-o; Libiar Kurini elaḳar manshe, ino gurat aisoin oula Ruman oḳole, zera Ihudi zati ba Ihudi dormor manush, ar Kritio, Arobi, amra hoḳole-u to zarzir nizor bashae Allar kudroti ḳamor ḳota erar muk taki hunram!” Ou laḳan tara taijjub ar be-aḳol bonia eḳe-oinne zikaila, “Er mani kita?” Ar baki oḳole ṭaṭṭa ḳoria ḳoilo, “Era to mod ḳaia matlami korer!” Ita hunia Fitore ou egaro zon sahabir loge ubaia zure zure tarare ḳoila, “O Ihudi oḳol ar Zeruzalemor bashinda oḳol, afnara zania raḳoukka ar mon dia amar boyan hunoukka. Afnara mono ḳorra era matal oigese, na, ashole ṭik nae, oḳon to ḳali shoḳal noyṭa bazer. Iṭa to ou goṭona zar befare nobi Zuele ḳoisla: Allae formaira, aḳeri zomanat oula goṭbo, ami amar ruhu hokkolor maze bezimu; teu tumrar fua-fuṛinte nobir laḳan batuni mat matba, tumrar zuan oḳole gaibi alamotor deḳa faiba, murobbi oḳole kuab deḳba. Ou shomoy amar bonda-bandir ufre amar ruhu bezimu, tara nobir laḳan ohi koiba. Ami ufre asmano bout keramoti deḳaimu, ar tole duniat bout nishana goṭaimu, lou, aguin ar ḳala-duma deḳaimu. Mabudor i mohan ar ḳas din aibar age, shuruz andair oizibo, sand lour laḳan oizibo. Ar oulan oibo, zekunu manshe Mabudor name ḍakile, he nazat hasil ḳorbo. O Boni Israil oḳol, hunoukka, Nasarotor Isar mazdia Allae tan kudroti ar keramoti ḳam ḳoraia, afnaintor gese forman ḳorsoin, tain-u Isare faṭaisla, ar ita to afnara-o zanoin. Alla, zein age-u zanoin ar foysala-o ḳoria raḳsoin, Isare afnaintor ato shofiba. Ar afnara be-din oḳlor atane tanre duk-koshṭor solibo dia zane marsoin. Oile Allae moutor azab taki tanre ḳalas ḳoria zinda ḳorsoin, ḳaron moutor ḳemota asil na tanre ḳobza ḳorar. Daude-o tan ḳota ḳoisoin: Ami hamesha munibre amar samne deḳtam, tain amar ḍain galat asoin, ami zanu ostir na oi. Erlagi amar dil kushi oy, amar muk taki furti baroy, amar ḳaya ou ashae zita roibo, ḳaron tumi amar zanre fatalo falaia toitae nae, tumar pak bondar shorilre fosa-gola oite ditae nae. Tumi amare zindegir fot zanaiso. Tumar didaror maze ase furafur furti. Bai oḳol, ou mohan-baf Daudor befare ami afnarare kula-kuli koiram, tain mara gesoin, tanre dafon ḳora oise, ar tan ḳoybor aiz-o oḳano ase. Tain eḳzon nobi asla ar tain zanta, Allae ḳosom ḳoria i oada ḳorsoin zen, tan-u oarishor eḳzonre tan godit boaiba. Erlagi ag tone dekia-u tain Allar oada ḳora bashsha, mani al-Mosir murda taki zinda oia uṭar befare ou ḳota ḳoisla, enre fatalo falaia toa oito nae, en ḳaya-o fosto nae. Allae ou Isare-u zinda ḳoria tulchila, amra hokkol er shakki. Allar ḍainor toḳto boibar takkot tanre-u deoa oise, gaibi bafor oada ḳora Pak Ruhu tain-u faisla, ar oḳon afnara zeta deḳra ar hunra ita tain-u ḳorsoin. Daud to nize behesto hamaisoin na, oile tain ḳoisoin: Mabude amar munibre ḳoila, tumi amar ḍain galat bo, ami tumar dushmon oḳolre tumar faor tolat falani forzonto bo. Erlagi hokkol Boni Israile ou ḳota bala ḳori zanoukka, afnara zenre solibo gatisla, Allae ou Isare-u malik ar al-Mosi duio toḳt disoin.” Ita hunia manshor dilo sel hamailo, tara Fitor ar sahabi oḳolre zikailo, “Baiainre, amra kita ḳortam?” Fitore zuaf dila, “Mon firaukka, afnara hoḳole gunar mafir lagi Isa al-Mosir name toubar gusol ḳoroukka, teu afnara dan hishabe Pak Ruhu faiba. I oada afnaintor lagi, afnaintor aolador lagi, zera duroi ase tarar lagi, zoto manshore amrar Mabud Allae tan ḳas bonda oibar lagi daot diba tara hokkolor lagi.” Aro boutta ḳoia Fitore hushiar ar minot ḳori koila, “I zomanar naforman oḳlor ges taki afnaintor zan basaukka.” Tan boyan hunia zera iman anla tara toubar gusol ḳorla, onuman tin azar manush i din ummot oḳlor loge shorik oila. Tara sahabi oḳlor talim huna, tarar loge shorik oia al-Mosir mezbani kaoa, ar dua ḳorat hamesha ḳaim roita. Teu hoḳole ḍoraito ḳaron sahabi oḳole bout keramoti ar muzeza ḳam deḳaita. Hokkol imandar oḳol ekḳano roita ar zarzir dorḳari samana on taki nita. Tarar zomi-zoma don-doulot besia zar zela dorḳar oula baṭia dita. Tara forteḳ din Baytul-Mukaddoso ekḳano milta, ar kushi oia eḳloge shorol mone goro goro gia ḳana-fina ḳorta. Tara Allar tarif ḳorat roita ar hokkol manshor mohobbotor manush oila. Zera nazat hasil ḳorta, Allae tarare-o ania dine dine erar loge shorik korta. Eḳdin asor oḳtor nomazor lagi Fitor ar Hannan Baytul-Mukaddoso zaoat asla; manshe forteḳ din eḳzon manshore boia ania Baytul-Mukaddosor ‘Shundor’ namor geiṭor gese toita, he zonmogoto lengṛa-atur asil, zera Baytul-Mukaddoso zain tarar gese bik saoar lagi tare hikano toa oito. Fitor ar Hannanre Baytul-Mukaddoso hamanit dekia he tarar gese minot-ḳajji kori bik kuzilo. Fitor ar Hannan tar bae dian dori saia ḳoila, “Amrar bae sao.” Teu he tarar ges taki kunta faoar lalose dian dori sairoilo. Fitore tare ḳoila, “Amrar gese to shuna-rufa kunta nai reba, oile zeta ase tumare dan ḳorram. Nasarotor Isa al-Mosir name aṭia zao.” Ḳoia hari tain er ḍain ato doria usa ḳorla, ar loge loge-u tar fao ar gusit bol ailo. He faldi uṭia ubailo ar aṭa shuru ḳorlo, aṭi aṭi falai falai Allar tarif ḳorte ḳorte erar loge oia Baytul-Mukaddoso hamaigelo. Hokkol manshe tare aṭat ar Allar tarif ḳorat dekia ere sinililo, igu deki ou manush, zegue Baytul-Mukaddosor Shundor namor geiṭo boia bik korto! Tar halot dekia manush asanoḳ taijjub oigelo. Oile lengṛa hokire Fitor ar Hannanor ḳore oia gurae, manshe Fitoror i ḳame taijjub oia douṛia Sulaiman namor barindat tan gese ailo. Ita dekia Fitore manshore ḳoila, “O Boni Israil oḳol, ere dekia afnara taijjub oigela ḳene? Amrar nizor firaki ba forezgarir gune tare solar shokti disi mone ḳoria, ḳene amrar bae dian dori sairoiso? Ibrahim, Isʼhak ar Iakubor Alla, amrar baf-dada oḳlor Alla, tan afon bonda Isar mohima zair ḳorsoin, zenre afnara dushmonor ato shofi disla. Ar hakim Filate zebla tanre saṛi dita ḳori niot ḳorsla, i shomoy afnara Isare duroi horai disoin. Afnara ou fak-forezgar manshore horai dia eḳzon kunire saṛanir lagi sufarish disoin. Zein zindegi dan ḳoroin tanre afnara zane marilisoin, oile Allae tanre murda taki zinda ḳorsoin, amra er shakki. Ar tan ufre iman anae, ou ze beṭare afnara sinra ar deḳra, hou Isar nam-u tare bolala ḳorse. Isar mazedi zeta iman foyda oy, ou imanor bole-u afnara hoḳlor samne tare bala ḳora oise. “O bai oḳol, ami oḳon zani afnaintor murobbi-salish oḳlor laḳan afnara-o na-buzia i ḳam ḳorilisoin. Oile Allae tan tamam nobi oḳlor mazdi al-Mosir toklifor befare age zotota zanaisoin, i hokkolta ou laḳan ḳori fura ḳorsoin. Erlagi afnara mon firaukka ar Allar muki oukka, zate afnaintor guna oḳol fusia saf ḳora oy. Te ou laḳan oḳt aibo, zebla Mabude hou Isare mani tan fosond ḳora al-Mosire bezia afnaintore tortaza ḳorba. Allae hoḳoltare agor haloto firaiba, ita bout din age-u pak nobi oḳlor zoban dia ḳoisoin. Zotodin tan i oada fura na ḳorba, otodin Isa-o behestor maze roiba. Musae to ḳoisla, ‘Mabud Allae tumrar lagi tumrar nizor manush oḳol taki amar laḳan eḳ nobi foyda ḳorba, tain tumrare zeta ḳoiba, tumra i hoḳolta-u amol ḳorio. Zegue tan ḳota hunto nae, Allae ere nizor bondar ḳata taki fusia falai diba.’ Ar [Bashsha Daudor amolor] Shamuel nobi taki shuru ḳori zoto nobi oḳole kalam bataisoin, era hoḳole-u i oḳtor ḳota ḳoisoin. Afnara to i nobi oḳlor oarish, ar hou ḳanunor-o oarish zeta Allae afnaintor baf-dada oḳlor loge ḳaim ḳorsila. Allae Hozrot Ibrahimre ḳoisla, ‘Tumar oarishor mazedi duniar hokkol zatie borkot faiba.’ Hou oarish, mani tan ḳas gulam Isare, Allae foyla-u afnaintor gese bezisoin, zate tain afnarare be-dini ḳam oḳol taki firaia hari borkot dein.” Fitor ar Hannane zebla manshore boyan ḳorra ou shomoy imam oḳol, Baytul-Mukaddosor boṛo daroga ar Siddekia mozobor manush aḳta-u tarar gese aila. Fitor ar Hannane manshore talim dira ar Isar mazdia-u murda oḳol hirbar zinda oia uṭar befare toblig korra dekia tara kub naraz oisla. Tara Fitor ar Hannanre aṭok korla ar hainja oigesil ḳori erare bador din forzonto bondi kori toila. Zera Fitoror boyan hunchila erar maze boute iman anla, teu imandar beṭaintor foriman fas azaror laḳan oilo. Bador din Ihudir neta oḳol, murobbi-salish ar moulana oḳol eḳloge Zeruzalemo dola oila. Hikano fordan imam Hanon, Kayafa, Iuhonna, Sikondor ar fordan imamor ḳesh-kuṭum oḳol-o azir asla. Tara Fitor ar Hannanre tarar mazḳano uba ḳoraia zikaila, “Tumra kun bole ar ḳar name i ḳam ḳorrae?” Teu Fitore Pak Ruhe kamil oia tarare ḳoila, “O murobbi saebain ar deshor buzurg oḳol, eḳzon lengṛa-atur manshor balai korsi kori afnara aiz amrare zera ḳorra, manushgu kila bala oilo. Te afnara hoḳole ar Boni Israil oḳole-o hunoukka, Nasarotor Isa al-Mosir name, zenre afnara solibo gatia zane marsla, zenre Allae murda taki zinda ḳorsoin, tan bole-u i manushgu afnaintor samne bala oia ubaise. Tain hou fattor, zeṭare raz mestoir oḳole, mani afnara elami kori bad dilaisla, Pak Kitabor ḳota mafik hou fattor-u aiz ian kunar hoḳol taki zoruri kuṭi oise. Toranir ḳemota ar ḳeuror gese nai, ḳaron asmanor tole ar zominor ufre oula ar kunu nam deoa oise na, zen name amra rehai faimu.” Fitor ar Hannanor shaosh dekia, era zen oshikkito shamainno manush ita zania tara taijjub oigela, ar era Isar loge asla ḳorio sinla. Ze beṭa bala oisil, he erar loge ubairoise dekia erare ar kunta ḳoar shaosh oilo na. Bade mozlis taki erare bare zaoar hukum dia tara hoḳole foramish ḳorat boia ḳoila, “I manshore loia amra kita ḳortam? Era to bout boṛo ek keramoti ḳam ḳorse ar ita to asta Zeruzalemor hoḳole zane, ar amra-o iṭare oshikar ḳortam fariar na. Oile manshor gese zanu i kota ar zana-zani na oy, erlagi erare ḍor deḳail ouk, zate i zonor name tara ar ḳeuror gese kunta na ḳoy.” Bade tara Fitor ar Hannanre hirbar anaia ou hukum dila, “Tumra Isar name ar kunudin eḳdom kichchu ḳoio na, kunuzat nosiot-o ḳorio na.” Fitor ar Hannane tarare zuaf dila, “Amra afnaintor hukum mantam, na Allar hukum mantam? Allar nozoro kunḳan ṭik, ita afnara-u bisar ḳoroukka. Amra zeta deḳsi ar hunchi, ita na ḳoia to taḳtam fari na.” Teu tara Fitor ar Hannanre aro ḍor deḳaia saṛi dila. Manshore ḍoraia tara erare kunu shaza dita farla na, ḳaron zeta goṭsil ita dekia hoḳol manshe Allar proshongsha ḳorat asil. Ze manushgu keramoti ḳamor mazdi bala oisil tar boyosh sallish bosoror beshi asil. I bisar taki tarare saṛar bade Fitor ar Hannan tarar afon manshor gese gelagi, gia boṛo imam oḳole ar murobbi-salish oḳole-o tarare zeta zeta ḳoisla, ita hokkolta zanaila. Ita hunar bade tara hoḳole eḳ dile Allar gese zure zure dua ḳorla, “O malik, tumi asman, zomin, doria ar itar maze zotota ase hokkolta foyda ḳorso. Tumi tumar gulam, amrar ḳandanor baf Daudor zobano Pak Ruhur mazdia oula ḳoiso, Hokkol zatie ḳene ostir oia sillaira? Kior lagi manshe behuda fondi korer? Zogotor bashsha oḳol bigṛi gelo, raza oḳol ekḳano dola oilo, Mabudor birudde ar tan al-Mosir birudde. Tumar fobitro gulam Isa, zenre tumi al-Mosi koria duniat faṭaiso, tan birudde Raza Herud ar Fontio Filat, ou shohoro o-Ihudi ar Boni Israilor loge ekḳano oisil. Tumar morzi ar tumar kudrote zeta goṭar lagi tumi age-u ṭik kori raḳsilae, tara outa-u goṭaise. Oḳon O malik, tara amrare kila ḍor deḳaira, tumi kial ḳoro, tumar gulam oḳolre oula takkot deo zate, furafur shaosh ḳoria tumar kalam toblig kortam fari. Bemari oḳlor shifar lagi tumar at mubarok baṛai deo, ar tumar pak gulam Isar name muzeza ar keramoti deḳanir tofik deo.” Tarar dua ḳorar bade ze zagat tara dola oisla, hi zaga ḳafia uṭlo. Ar tara hoḳole Pak Ruhe kamil oia shaosh ḳoria Allar kalam toblig korat roila. Zera al-Mosir ufre iman anchila, tarar eḳ mon ar eḳ dil asil. Tara eḳzone-o nizor don-doulotre nizor ḳoia dabi korta na, hokkolta-u hoḳlor dorḳar moto ḳoros ḳorta. Sahabi oḳole kub himmot ḳoria, Hozrot Isar murda taki zinda oia uṭar bishoye toblig korta, ar tara hokkolor ufre Allar ḳas rohomot asil. Tarar maze ḳeu obabi asla na, ḳaron zerar zomin ba baṛi asil tara ita hoḳolta besia, sahabi oḳlor gese ania dan ḳorilita, bade zar zela goroz tare oula deoa oito. Ar Iusuf name Lebir bongshor eḳzon manush asla, tan baṛi Saipras dif, sahabi oḳole tanre ḍakita Barnabas, mani utshaho zugaora, tan eḳzora zomin asil, tain-o tan zominḳan besia ṭeḳa ania sahabi oḳlor ḳodomo dan ḳorla. Ou shomoy Ononio name eḳzon manush ar tar bou Safirae tarar-o eḳzora zomin besila, besia tar bour zana monte-u zominor kisu ṭeḳa nizor lagi lukaia, baki ṭeḳa sahabi oḳlor faot dila. Teu Fitore ḳoila, “Ononio, Shoytane ḳemne tumar dilre doḳol ḳorlo, tumi Pak Ruhur gese kila misa matlae, ar zomin besar ṭeḳa kisu lukai raḳlae? Besar age zominḳan kita tumar asil na ni? Ar besar bade-o to i ṭeḳa tumar eḳtiaro asil, te ḳene tumar bitre ita hamailo? Tumi to manshor gese misa matso na, Allar gese-u misa matlae.” Ita hunar loge loge-u Ononio maṭit foṛia morigelo. Ar zera i goṭona hunlo tara hoḳole-u kub ḍoraigelo. Bade zuan oḳole aia tare ḳafon findaia bare nia maṭi dila. Onuman tin gonṭa bade tar bou-o hono ailo, oile age kita goṭse tai zanto na. Teu Fitore taire zikaila, “Amare ḳo sain, tumra i zomin oto ṭeḳae besislae ni?” Tai koilo, “Ji oy oto ṭeḳae-u.” Ou Fitore ḳoila, “Mabudor ruhre forikka ḳorar lagi tumra ḳene eḳmot oilae? Deḳo, zera tumar zamaire dafon ḳorse tara oḳon dorzar samne aior, tara tumare-o bare loia zaibo.” Loge loge-u Safira Fitoror faot foṛia morigelo, ar ou zuan oḳole goro aia taire mora dekia bare nia zamair ḳandat maṭi dila. Teu hokkol zomat, ar zoto manshe ita hunlo, hoḳole-u kub ḍorailo. Sahabi oḳlor atane manshor maze bout muzeza ar keramoti nishana zair oito, tara hoḳole eḳ dil oia Baytul-Mukaddosor Sulaimanor barindat dola oita. Zudio manshe tarare ijjot ḳorta, ta-o ar ḳeu tarar loge mishte shaosh ḳorlo na. Ar dine dine bout beṭain-beṭinte iman ania Allar dolo hamanit lagla. Ar manshe bemari oḳolre bare ania fotor ḳandae ḳandae hutaia ar bisna fatia boaia toita, zate Fitore sola-firar shomoy ontoto tan seba ḳan-o tara ḳeuror ufre foṛe. Ar Zeruzalemor ḳanda-ḳasar gauain taki manshe tarar bemari oḳolre ar zinor asor-ala manshore loia aia biṛ zomaito, tara hokkol-u bala oito. Ita dekia fordan imam ar tan logor Siddekia oḳol ingshae zoli-fuṛi uṭla, ar sahabi oḳolre doria shorḳari zelo haraila. Oile raitku Mabudor eḳzon firistae zelor duar kulia tarare bare ania ḳoila, “Tumra zao, Baytul-Mukaddoso ubaia manshor gese noya zindegir ḳota ḳo.” Ita hunia tara kub shoḳale Baytul-Mukaddoso hamaia manshore nosiot ḳorat lagla. Ibae fordan imam ar tan logor hoḳole aia deshor fotua komiṭire ar Boni Israilor murobbi oḳolre ekḳano dola ḳorla, ar sahabi oḳolre anar lagi zel ḳanat manush faṭaila. Oile tara gia erare zel ḳanat faila na. Ou tara firia aia ḳobor ḳoila, “Amra deḳsi, zelor dorza shokto ḳori lagail, ar duaro duaro faradar ubai roisoin, oile duar kulia bitre ḳeurore failam na.” Ita hunia Baytul-Mukaddosor boṛo darogae ar boṛo imam oḳole beokuf oia sintat foṛla, er fol kita oibo. Ermaze kunu eḳzone aia tarare ḳobor dilo, “Deḳoukka, afnara ze manshore zelo haraisla, tara Baytul-Mukaddoso ubaia manshore nosiot ḳorer.” Teu boṛo darogae tan sifai dolre loia hono gia sahabi oḳolre doria anla, oile zur-zobordosti korla na ḳaron tara ḍoraigela, manshe tarare fattordi marta faroin. Bade sahabi oḳolre ania tara fotua komiṭir samne uba ḳoraila, ar fordan imame erare zikaila, “Amra tumrare doṛaia hukum dislam, i name kunu nosiot na ḳorar lagi, ta-o asta Zeruzalem zuṛi tumrar talime boriliso, ar ou zonor kunor bar amrar ufre falaitae sairae.” Teu Fitor ar tan logor sahabi oḳole zuaf dila, “Manshor hukum manar saite Allar hukum mana to forz. Amrar baf-dadar Allae hou Isare murda taki zinda ḳorsoin, zenre afnara gaso loṭḳaia zane marsla, Allae tanre-u toraneala ar bashsha banaia nizor ḍain galat boibar ijjot dan ḳorsoin, zate tain Boni Israil oḳolre touba ḳorar shuzug, ar gunar mafi dita faroin. Amra i hoḳoltar shakki, ar Allae tan nizor hukum manra bonda oḳolre ze Pak Ruhu disoin, hou Pak Ruh-o er shakki.” Ita hunia tara gusae aguin oigela, ar sahabi oḳolre zane marar lagi niot ḳorla. Oile ou mozlis taki Gomoliel name Forishi mozobor eḳzon manush ubaila, tain eḳzon namḳora moulana asla, hokkole tanre ijjot ḳorto, tain sahabi oḳolre tuṛa bare neoar hukum dila. Bade tain fotua komiṭir manshore ḳoila, “O Boni Israil oḳol, i manush oḳolre tumra zeta ḳortae sairae i befare hushiar o. Huno, ou ḳoydin age Tuda name eḳzon manush aia kub boṛo-manshi deḳaisil, ar onuman sair-sho manush tar dolo hamaisil. Tare kun ḳora oilo, ar tar dolor hoḳol manush sairobae sitrigese, ḳeu dolo roise na. Bade Galilor Ehuda aia deshor manush gononar bosor, eḳdol manshore tar dolo haraia fitna ḳaṛa ḳorlo, he-o morigelo, ar tar logor hokkol-o sitrigese. Ita dekia ami tumrare ḳoiram, tumra i manush oḳolre kunta ḳorio na, tarare saṛi deo, tarar ḳam-ḳaz ar niot zudi manush taki oy, te ita emne-u binash oizibo. Ar zudi Alla taki oy, te tumra tarare tamaitae fartae nae, ki zani heshe deḳa zaibo zen, tumra-u Allar birudde jihad ḳorrae.” Gomolielor mate neta oḳol razi oila, tara sahabi oḳolre ḳasat anaia singladi marla ar ḳoila, “Tumra Isar name kunta matio na.” Heshe tarare saṛi dila. Teu sahabi oḳole, Isar namor lagi beijjoti ḳamanir zuka oisoin gotike kushi oia furti kori kori mozlis taki bar oia gela. Sahabi oḳole forteḳ din Baytul-Mukaddoso ar baṛie baṛie gia nosiot ḳorta, ar Isa-u zen al-Mosi ikan toblig kora bad dita na. Hi shomoy ummot oḳlor foriman baṛte-u asil, ar ummot oḳlor maze zeta Ihudi oḳole Iunani bashae matta, tara Ibrani bashae matra Ihudi oḳlor loge ḳaijja ḳorta lagla. Tara dush deḳaila, forteḳ din ḳani bilanir shomoy tarar ṛaṛi beṭinte kunta fain na. Teu hou barozon sahabie hoḳol ummotre eḳ zagat dola ḳoria ḳoila, “Amra Allar kalamor toblig bad dia, ḳana-finar befare besto oaḳan ṭik nae. Oile bai oḳol, tumrar maz taki oula shatzon shunam-ala manshore fosond ḳoro, zera Pak Ruhe ar hekmote fura kamiab ase, amra tarar ufre i ḳamor zimma dilaimu. Ar amra kalamor kezmot ar dua ḳorar ḳamo ḳaim roimu.” Teu hokkol manush shanti oila, tara Pak Ruhu ar imane kamil Stifanre fosond ḳorla, tan loge Filif, Foḳor, Nikanor, Timun, Farmina ar Antiokia ṭaunor noya Ihudi Nikulaere basia nila. Bade tara ou shatzonre sahabi oḳlor gese loia aile, sahabi oḳole dua ḳoria tarar ufre at raḳla. Ar Allar kalam sitria sairobae fosigelo, teu Zeruzalemo ummotor foriman kub zoldi kori baṛto laglo, Ihudi imam oḳlor maze-o bout zone al-Mosir ufre iman anla. Stifan Allar rohomot ar himmote kamil oia, manshor maze bout keramoti ar muzeza ḳam ḳorta lagla. Ihudir ze mosidre azad-oa gulam oḳlor mosid ḍaḳa oito, hou mosidor ḳoyzon manush, kunu kunu Kurini, Alekzandria, Kilikia ar Asiya deshor kisu manshe Stifanor loge ḳaijja-torko ḳorat lagla. Oile Stifane Pak Ruhur bole kub aḳoldar manshor laḳan tarar loge matae, tara tan loge matia kulaito farsil na. Teu tara ḳoyzon baze manshore gush dia oḳan hikai dilo, “Tumra ḳoio, amra hunchi ou beṭae Hozrot Musa ar Allar birudde kufuri mat mater.” Ota ḳori tara manshore, murobbi oḳolre, ar alim shomazre Stifanor birudde bigṛailo, ar tanre zobordosti kori doria deshor fotua komiṭir samne bisaro anlo. Ar misa shakki oḳole ḳoila, “Ou beṭae hamesha Musar shoriotor birudde ar ou fobitro mukamor birudde-o mate. Amra hunchi he ḳor, hou Nasarotor Isae i Baytul-Mukaddos bangilibo ar Musa nobie amrar lagi ze shoriot toia gesoin, ita bodlailibo.” I shomoy zera fotua komiṭit boat asla tara hoḳole dian dori Stifanor bae saia deḳla, tan muk firistar mukor laḳan oigese. Teu fordan imame Stifanre zikaila, “Ita kita hasau ni?” Stifane zuaf dila, “O bai oḳol, baba oḳol, hunoukka, amrar mul baf Ibrahim zebla Haran shohoro roar age Meshofotamiat asla, hou shomoy Allae tanre didar dia ḳoisla, ‘Tumi tumar desh ar ḳesh-kuṭum saṛia roana deo, ami tumare ze desh deḳaimu hou desho zao.’ Ou tain Kolodio oḳlor Babil desh taki bar oia, Haran shohoro boshot ḳorla; ar tan bafor moutor bade Allae tanre hon taki i desho anchoin, zeḳano afnara oḳon boshot ḳorra. Ta-o Allae ino Ibrahimre tan nizor bolte kunta-u dila na, fao toibar zaga ḳan-o na, oile Allae tan loge oada ḳorla, tanre ar tan oarish oḳolre ou zominor malikana diba, zudio i shomoy Ibrahimor kunu aolad oisoin na. Allae tanre ḳoila, ‘Tumar aolad oḳol bidesho musafir roiba, manshe tararedi gulami koraiba, ar sair-sho boros tarar ufre zulum solbo.’ Allae eoḳan-o ḳoila, ‘Ze zatie tararedi gulami koraiba, ami hi zatir bisar foysala ḳormu; bade tara hi desh taki bar oia aia, ou zagat amar ebadot ḳorba.’ Allae tanre mosolmani korar hukum dila; heshe Ibrahimor fua Isʼhakor zonom oilo, ar tain aṭ dinor din tar mosolmani koraila. Bade Isʼhake Iakubre, ar Iakube tan fuain baro ḳandanor barozon bafor mosolmani koraila. “Hou ḳandanor baf oḳole ingsha ḳoria Iusufre besilaile, tanre Mishor desho neoa oilo. Oile Alla Iusufor loge loge asla, tain Iusufre hoḳol toklif taki hefazot ḳorla, Mishoror bashsha Feraunor nozoro doya ar kamiabi dan ḳorla; teu Feraune tanre Mishoror hakim ar asta razbaṛir deḳa-hunar bar dila. Bade fura Mishor ar Kenan desho nidan deḳa dilo erlagi manshor kub durgoti oisil, ar amrar baf-dada oḳol-o ḳanir obabo foṛla. Oile Mishoro foshol ase hunia, Iakube amrar baf-dada oḳolre foyla bar hikano faṭaila. Bade dusrabaror bala Iusufe tan baiainre zanaila tain ḳe, ar Feraune Iusufor foribarre sin faila. Iusufe tan baba Iakub ar nizor ḳesh-kuṭum milaia hokkoltae fosottoir zonre ḳobordi anaila. Iakub Mishoro aila, heshe tain ar amrar baf-dada oḳol-o mara gela. Tarar lash Shikimo ania ḳoybor deoa oilo, i kobrostan Ibrahime Shikim shohoror Homuror ḳandanor ges taki rufar ṭeḳa dia ḳorid ḳorsla. “Ibrahimor gese Allae zeta oada ḳorsila, hi oada furon oar shomoy zebla ḳasai gelo, i shomoy Mishoro amrar manshor foriman bout oigese. Heshe Mishoro eḳ noya bashsha oila, ein Iusufor befare kunta zanta na. Hi bashshae amrar manshore ṭogaita ar amrar baf-dada oḳlor ufre kub zulum ḳorta, tan niot asil erar huruttain zonmor bade-u zate bare falai deoa oy, ar tara mori zain. Hou shomoy Hozrot Musar zonom oilo, Allar nozoro tain kub shundor asla. Tin mash forzonto tain tan ma-bafor baṛit asla. Bade tanre bare falai deoa oile, Feraunor fuṛie tanre nia nizor fua banaia falia boṛo ḳorla. Musa Mishorio ilim ar adob-ḳaislote boṛo oila, tain ḳotae ar ḳame himmoti asla. Bade Musar boyosh zebla sallish boros oilo, ou tan dilor maze nizor Boni Israili bai oḳolre deḳa-huna ḳorar kial oilo. Tain bar oia deḳla, eḳzon Mishorie eḳ Israilir ufre zulum ḳorer, tain hou Israilire shaijjo ḳorat gela, ar Mishorire zane maria er bodla loila. Musae mone ḳorsila tan zatir manshe buzba zen, Allae tanre dia-u tarare uddar ḳorba; oile tara ita buzla na. Bador din Musae duizon Israilire mair ḳorat dekia, tarare mil-mish ḳorar niote ḳoila, ‘Oi tumra to bai bai, te tumra ḳene eḳzone aroḳzonor loge mara-mari korrae?’ Oile ze manshe bad bebohar ḳorat asil, he Musare ṭela mari falaia ḳoilo, ‘Oba, tumare ḳegie amrar ufre salish ar hakim banaise? Ḳail zela hou Mishorire kun ḳorso, amare-o ola ḳortae sao ni?’ Ikan hunia-u Musae bagia Madian desho gelagi, ar hikano tan dui fuar zonom oilo. “Bade aro sallish boros guzori gele, Tur faṛor ḳandat morubumit, aguin zalail zonglar maz tone eḳ firistae Musare doroshon dila. Musae ita dekia ekkere taijjub bonigela, ar bala ḳori deḳar niote ḳandat zaira, ou shomoy Mabudor aoaz hunla, ‘Ami tumar baf-dadar Alla, Ibrahim, Isʼhak ar Iakubor Alla.’ Teu Musae ḍoraia ḳafa shuru ḳorla, ar bala ḳori deḳar shaosh faila na. Mabude tanre ḳoila, ‘Tumar faor zuta kulilao, ḳaron tumi zeno ubaiso ikan pak zaga. Huno, ami Mishor desho amar proza oḳlor toklif deḳsi, ami tarar ahazari hunchi, tarare uddar ḳorar lagi lamia aisi, oḳon ami tumare Mishor desho firot faṭaimu.’ “Ein hou Musa, zare Israili oḳole ou ḳota ḳoia firot disil, ḳe tumare salish ar hakim banaise? Tanre-u Allar ze firistae zonglar maze deḳa disla, hou firistar atane Boni Israilor salish ar toraneala banaia faṭaila. Ar ou Musae-u Mishoror Nil doria ar morubumit sallish boros bout keramoti ar muzeza ḳam ḳoria, Mishor desh taki Israili oḳolre bar ḳori ansla. “Ein hou Musa, zein Boni Israilre ḳoisla, Allae tumrar lagi tumrar nizor manush taki, amar laḳan eḳzon nobire beziba. Ou Musa-u to morubumit amrar baf-dada Boni Israilor loge asla. Ar ze firistae Tur faṛo batchit ḳorsila, ou Musar loge-u tain matisla. Ar amrare dibar lagi zinda-kalam ou Musar gese-u deoa oisil. “Oile amrar baf-dada oḳole Musar hukum manta saila na, tara Musare horai toia mone mone hirbar Mishoror bae niot ḳoria Harunre ḳoila, ‘Amrare fot sinaia loia zaoar lagi devta banai deukka. Ḳaron ze Musae Mishor desh taki amrare bar ḳori anchoin, tan dosha kita oise, amra to zani na.’ Ou shomoy tara gorur basuror laḳan eḳ murti banaila, ar ou murtir name boli dila, nizor ator banail murtire loia tara furti-amud ḳorla. Oile Allae naraz oia tarar log saṛi dila, ar tarare asmanor san-shuruz, terar pujat buṛai toila; zela nobi oḳlor kitabo leḳsoin: O Israil zati, morubumit hi sallish boros, tumra amar name kunu foshu kurbani dislae ni? Na, tumra to Mulok devtar murti, ar Rifon devtar tera banai kando loia gurso. Hou duio futul to puja ḳorar niote banaislae, erlagi ami tumrare Babil deshor hofaro bonobash dimu. Te shahadot tambur Kaba Shorif morubumit amrar baf-dadaintor gese asil. Tain Musare hukum disla, tumi zelaḳan noksha deḳlae, ou laḳan ḳori iṭa tiar ḳoro. Amrar baf-dada oḳole hi Kaba Shorif faia, tarar amir Iusar atane nizor loge ḳori amrar i desho anchila, tara zebla hi desho hamaisil i shomoy Allae tarar samon taki hinor manshore ḳedai disla. Hi tambu Hozrot Daudor amol forzonto ou desho asil. “Daude Allar rohomot hasil ḳorsila, ar Iakubor Allar name ekḳan gor banaibar arzi korsla. Oile Hozrot Sulaimane tan lagi hi gor banaisla. Ta-o Allatala to manshor ator banail goro boshot ḳoroin na; zela nobie ḳoisoin, Mabude ḳoin, Behest amar toḳt, dunia amar fao toibar zaga, tumra amar lagi kizat gor banaibae? Amar ziranir zaga kuai? I hokkolta kita amar nizor ate banaisi na ni? “O gaṛteṛar zat! Ḳan ar dilor mosolmani na ḳorail zat! Tumra hamesha Pak Ruhur duar bond ḳori to. Tumrar baf-dadain zela asla, tumra-o oula oiso. Tumrar baf-dadainte kun nobir ufre zulum ḳorsoin na? Tara to hou nobi oḳolre zane-o marse, zera age i dindar zon aibar ḳota elan ḳorsoin. Ou dindar zonre oḳon tumra-o dushmonor ato shofia zane maraiso. Firista oḳlor mazdi nazil oa shoriot tumrare deoa oisil, oile ita amol ḳorso na.” Ita hunia-u tara gusae aguin oigela, ar dat kiṛi-miṛi kora dorla. Oile Stifane Pak Ruhe kamil oia behestor bae dian dori saia Allar shan-tozolli deḳla, ar Isare Allar ḍain bazut uba deḳla. Teu tain ḳoila “Deḳoukka, ami deḳram behest kula ase, ar Isa bin-Adom Allar ḍaine ubai roisoin.” Ar tara ḳano angul dia eḳloge sillaia Stifanor ufre uṛia gia foṛla. Tanre ṭania shohoror bare nia fattor marat lagla; ar badi oḳole zarzir ḳafoṛ kulia Shoul namor eḳ zuanor faor ḳandat toila. Manshe zebla Stifanre fattor marra, ou shomoy tain dua ḳoria ḳoila, “O Malik Isa, amar ruhre ḳobul ḳoroukka.” Ḳoia-u tain aṭu gala dia zure sillaia ḳoila, “Malik, erar i gunare amolo dorio na.” Oḳan ḳoia-u tain aḳeri dom saṛi dila. Ar Shoule hono Stifanor kunor hukumor loge shae dila. Hidin taki Zeruzalemor zomator ufre kub zulum-mosibot ḳaṛa oilo, erlagi kali sahabi oḳol bade ar hoḳole-u Ehudia ar Shomoria elaḳar zagae zagae sitri gela. Ḳoyzone milia Allaraia manush Stifanre dafon ḳorla ar tan lagi bout ahazari korla. Oile Shoule zomatre binash ḳorar niote, goro goro hamaia imandar beṭain-beṭinre bondi kori ṭania sesraia zel ḳanat haranit lagla. Teu zera sairobae sitri gesil, tara hokkol zagat guri guri Injilor kush-ḳobri toblig korla. Ar Filif Shomoriar eḳ shohoro gia al-Mosir befare toblig korla. Manshe Filifor boyan hunia ar tan keramoti ḳam oḳol dekia, dian dori eḳ dile tan nosiot hunla. Ḳaron boutor ges taki but oḳol zure zure sillaia saṛia gelo, ar bout ordong bemari ar lengṛa oḳol bala oila. Ita dekia hi shohoror manush kub kushi oila. Oile hikano Saimon namor eḳzon manshe bout din dori zadu-ṭunar ḳam ḳorto, Shomoriar manshore danda lagaia he nizore eḳzon kamil pir ḳoia dabi korto. Ar huru-boṛo hoḳole tar ḳotar dam dito, manshe ḳoito, Allar ze kudrotre ḳas kudrot ḳoin, i beṭa oilo hou ḳas kudroti beṭa. Manshe-o tar ḳotamoto solto ḳaron bout din dori he tar zadu-ṭuna deḳaia tarare taijjub banaisil. Oile Filife zebla Allar bashshai ar Isa al-Mosir befare kush-ḳobri toblig korla, ar manshe tan toblige iman anla, i shomoy beṭain-beṭinte aia toubar gusol ḳorla. Hou Saimon-o iman ania toubar gusol ḳoria Filifor ḳore ḳore roila, bout keramoti ar boṛo boṛo kudroti ḳam hasil or dekia taijjub oigela. Zeruzalemor sahabi oḳole zebla hunla, Shomoriar manush oḳole Allar kalamor ufre iman anchoin, teu tara Fitor ar Hannanre erar gese faṭaila. Fitor ar Hannan aia tarar lagi dua ḳorla, zate tara Pak Ruhu fain. Ḳaron oḳono tarar ufre Pak Ruhu nazil oise na, tara ḳali Hozrot Isar name toubar gusol ḳorsoin. Fitor ar Hannane tarar ufre at raḳla, teu tara Pak Ruhu faila. Ar Saimone zebla deḳla, sahabi oḳlor at raḳar ḳarone Pak Ruhu miler, ou tain ṭeḳa ania erar gese dia ḳoila, “Amare-o ou ḳemota deukka, zate ami ḳeuror ufre at raḳle he-o ou Pak Ruhu fae.” Fitore tare ḳoila, “Tumar rufa tumar loge-u binash ouk, tumi mono ḳorso Allar dan ṭeḳadi korid ḳora zae. Amrar i ḳamo tumar kunu bag nai, ḳaron Allar nozoro tumar dil shorol nae. Erlagi i nazaiz ḳam taki tumar dil firao. Ar Allar gese minot-ḳajji koro, kiba tumar dilor i nazaiz kial tain maf ḳorilita faroin. Ami deḳram, tumar dil lifshae bora ar tumi gunar maze bondi oiroiso.” Teu Saimone ḳoila, “Afnara Allar gese amar lagi dua ḳoroukka, zate afnara zeta zeta ḳoisoin ita zanu amar ufre na ae.” Bade Fitor ar Hannane malikor kalam toblig koria Zeruzalemo firot zaoar foto, Shomoriar bout gaut kush-ḳobri toblig kori kori gela. Eḳdin Allar eḳ firistae Hozrot Filifre ḳoila, “Uṭo, douknor ze fot Zeruzalem taki Gaza ṭaunor bae gese hou fote roana deo.” I fot asil morubumit. Teu Filif uṭia hobae roana dila, zaite zaite foto Itiopia deshor Kandaki ranir eḳzon boṛo raz ḳazanchir loge tan mulaḳat oilo, hi kazanchi asla na-mord, ar ranir hokkol don-rotnor zimmadar. Allar ebadot-bondegi korar lagi ein Zeruzalemo aisla. Bade baṛit zaoar bala foto tan nizor guṛar garit boia Ishaya nobir kitab tilaot ḳorat asla. Ou shomoy Pak Ruhe Filifre ḳoila, “Ou gaṛir ḳandat zao, ar en loge log doro.” Teu Filife douṛia ou gaṛir ḳandat gia hunla, ein Ishaya nobir kitab tilaot ḳorra; Filife tanre zikaila, “Afne zeta tilaot ḳorra itar mani buzra ni?” Hein ḳoila, “Ḳeu buzaia na dile ami ḳemne buzmu?” Ou tain Filifre garit uṭia tan ḳandat boar lagi minot ḳorla. Hein kitabor ze ayat tilaot ḳorat asla, ita oilo, Zobo ḳorar lagi meṛare zela nein, marar niote tanre oula neoa oilo, ruma ḳaṭrar samne meṛa-baichcha zela nirai roy, oula tain-o zoban kulla na. Tain beijjot oila, tanre be-insaf ḳora oilo. Tan oarishor ḳota ḳegie ḳoito farbo? Tan zanre dunia taki kaṛia neoa oisil. Hou ḳazanchie Filifre ḳoila, “Ḳoukka sain, nobie ḳar befare ita ḳoisoin? Nizor befare na ar ḳeuror?” Filife zoban kulia Pak Kalamor ou ayat taki loia Isar kush-ḳobri forzonto tan gese toblig korla. Ḳoia tain guṛar gaṛi uba ḳorar hukum dila, Filif ar hou na-mord ḳazanchi duiozon fanit lamla, ar Filife tanre toubar gusol ḳoraila. Tara zebla fani taki uṭia aila, ou shomoy Mabudor ruhe aḳta-u Filifre aoṛe nilagi. Hi na-morde ar Filifre deḳla na, teu tain furti kori kori tan nizor fote gelagi. Oile Filifre Ashdud ṭauno deḳa millo; tain gaue gaue kush-ḳobri toblig kori kori heshe Ḳoisoria ṭauno gela. Foto zaite zaite zebla Damesk ṭaunor ḳandat aila, teu aḳta-u asman taki tan sairo galabae for oia somḳaia uṭlo. Ou tain maṭit foṛigela ar gaibi aoaz hunla, ḳe zanu tanre ḳor, “Shoul, Shoul, ḳene amare zulum ḳorrae?” Shoule zikaila, “Malik, afne ḳe?” Tain ḳoila, “Ami Isa, zenre tumi zulum ḳorrae. Tumi oḳon uṭia shohoro zao, tumi kita ḳortae tumare zanail oibo.” Oile zera Shoulor loge zaoat asla tara somki gela, tara i aoaz ṭik-u hunchila, oile ḳeurore deḳla na. Bade Shoul maṭi taki uṭla, ar souk melia harle kunta-u deḳla na; tan logor manshe tanre ato doria Damesko loia gela. Shoule tin din dori souke kunta-u deḳla na ar kunuzat ḳana-fina-o ḳaila na. Damesk shohoro Ononio name eḳzon mumin asla, Mabude tanre doroshon dia ḳoila, “Ononio!” Tain zuaf dila, “Malik, ounu ami.” Mabude tanre ḳoila, “Shuza namor ze shoṛok ase, tumi hou shoṛoke zao, gia honor Ehudar baṛit Tarsho shohoror Shoul namor eḳzon manshor tallash ḳoro. Hono he dua ḳorer, ar he doroshon faise, Ononio namor eḳzon manush aia tar shoril ataia dibo, teu he hirbar souke deḳbo.” Ononioe ḳoila, “Malik, ami bout manshor gese i manushgur ḳaislot hunchi, he Zeruzalemo tumar pak bonda oḳlor ufre bout zulum ḳorse. Ar ou zagat-o zoto manshe tumar fote sole, erare bandia neoar ḳemota he boṛo imam oḳlor ges taki faise.” Oile malike tanre ḳoila, “Tumi zao, ḳaron o-Ihudi oḳol, tarar raza oḳol, ar Boni Israilor gese amar nam tobligor lagi ami tare fosond ḳorsi. Ami tare deḳaimu, amar namor lagi tare ḳoto zala-zontrona shoijjo ḳora lagbo.” Teu Ononio bar oia hou baṛit gia hamaila, ar Shoulor gotro at dia ḳoila, “Bai Shoul, ono aoar foto zein tumare doroshon disoin tain Hozrot Isa, tain amare faṭaisoin, zate tumi hirbar souke deḳtae fao ar Pak Ruhe kamil o.” Ar loge loge-u tan souk taki masor-foiror laḳan kita foṛigelo, tain deḳta farla ar uṭia fanit gia toubar gusol ḳorla; ḳaoa-daoar bade shorilo hirbar bol faila. Ar tain kisudin Dameskor ummot oḳlor loge roila. Shoule ar deri korla na, tain zagae zagae mosidainto gia toblig korat lagla, Hozrot Isa-u Allar hou ḳas mayar zon, Ibnulla. Zera tan boyan hunto tara hoḳole-u taijjub oia mata-mati korto, “Ein hou manush nae ni zein Zeruzalemo Isar ummot oḳolre zulum ḳorta? Ar ono-o to otar lagi-u aisoin, zera Isar fote sole tarare bandia boṛo imam oḳlor gese loia zaita?” Oile Shoul din din aro himmot-ala oila, ar Dameskor Ihudi oḳolre la-zuaf banaita lagla, tain forman deḳaila, ou Isa-u hi al-Mosi. Er bout bade Ihudi oḳole tanre marar lagi solla-foramish ḳorla, ar Shoule i kobor faila. Tara tanre marar lagi shohoro hamani baronir hokkol duaro dine-raite sokidar boaila. Eḳdin rait ummot oḳole Shoulre eḳ ṭukrir bitre haraia, baunḍori oalor kiṛkibae far ḳori bare lamaia dila. Bade tain Zeruzalemo aia ummot oḳlor loge shorik oita saila; oile hokkole tanre ḍorailo, tain zen hasau iman anchoin tara bishash ḳorla na. Teu Barnabase tanre ato doria sahabi oḳlor gese loia gela, ar Damesk zaoar foto kila tain al-Mosir didar faila, ar kila malike tan loge batchit ḳorla, Damesko kila tain shaosh ḳori Isar name toblig korsoin hoḳolta erare zanaila. Bade Shoul Zeruzalemo erar loge loge roita, tain Zeruzalemor hoḳol zagat guria firia shaosh ḳori Isar name toblig korta. Tain Iunani bashae matra Ihudi oḳlor loge dini batchit ar torko ḳorta; Ihudi oḳole tanre zane marilta saila. Mumin oḳole i kobor hunia tanre Ḳoisoria shohoro loia gela, hon taki tanre Tarsho shohoro faṭai dila. Hi shomoy Ehudia, Galil ar Shomoria elaḳar zomat oḳol shantir maze toiar oilo, i zomat oḳol Mabudor ḍore ar Pak Ruhur isharae soli soli bout forimane baṛlo. Fitore hokkol zagat gurte gurte Ludda gaur mumin oḳlor gese aia azila. Hou gaut Oinio name eḳzon manush asil; he ordong bemare aṭ boros dori bisnat foṛono asil. Fitore tare dekia ḳoila, “Oinio, Isa al-Mosi tumare bala ḳorla, uṭo, tumar bisna tulilao.” Ar loge loge-u Oinio uṭia ubai gelo. Teu Ludda gau ar Sharun elaḳar hoḳol manshe Oinior halot dekia Allar bae firla. Jafa shohoro Ṭabita name eḳzon mumin beṭi asla, Iunani bashae Ṭabita namor orto Dorka, mani horini, tain hoḳol shomoy bala ḳam ḳorta ar goribre shaijjo ḳorta. Tain bemar foṛia mara gela, ar manshe tanre gusol deoaia ufror kuṭat nia toila. Jafa shohor Luddar ḳasat asil gotike, ummot oḳole zebla hunla, Fitor Luddat asoin, ou tara duizon manshore tan gese faṭaia minot ḳorla, “Afne zoldi kori amrar gese aukka.” Teu Fitor tarar loge roana dila, tain hono zaoar bade tara tanre ufror kuṭat loia gelo, hoḳol ṛaṛi beṭinte Fitoror sairobae ubaia ḳandon shuru ḳorla ar Dorka zita taḳte zeta ḳafoṛ-sufoṛ banaisla, ota Fitorre deḳaila. Fitore tara hokkolre kuṭa taki bar ḳori dia zanu faṛia dua ḳorla; bade mora beṭir lashor bae firia ḳoila, “Ṭabita, uṭo.” Loge loge Dorkae souk kulla, ar Fitorre dekia uṭia boila. Fitore tan ato doria uba ḳorla, bade hi ṛaṛi beṭin ar mumin oḳolre ḍakia deḳaila, Dorka zita oisoin. I kobor Jafa shohoror hoḳol zagat uṛigelo ar bout manshe al-Mosir ufre iman anla. Fitor bout din Jafa shohoro Saimon namor eḳ samaror baṛit roila. Ḳoisoria shohoro Kornilus name eḳzon manush, Itali namor sifai dolor subedar asla. Tain eḳzon forezgar manush, tan foribaror hoḳole-o Allare ḍoraita. Tain gorib oḳolre bout ṭeḳa-foysha dan-ḳoyrat ar hamesha Allar gese dua ḳorta. Eḳdin onuman tinṭar shomoy tain eḳ saf doroshon faila. Deḳla, Allar eḳ firistae tan gese aia ḍakira, “Kornilus!” Korniluse ḍoraia hi firistar bae saia ḳoila, “Malik, ḳoukka, hunram.” Firistae tanre ḳoila, “Tumar munazat ar gorib oḳolre danor ḳota behesto fosise ar Allae ita ḳobul ḳorsoin. Oḳon tumi Jafa shohoro manush faṭao, ar Saimon urfe Fitorre tallash ḳorai anao. Ein doriar faro aroḳ Saimonor baṛit taḳoin, hi Saimone samṛar ḳarbar ḳore.” Ze firistae Kornilusor loge batchit ḳorsila, tain zaoar bade Korniluse tan baṛir duizon ḳamla ar tan shaijjoḳari eḳzon forezgar sifaire ḍaḳ dila. Tain erare hoḳolta buzai dia Jafa shohoro faṭaila. Bador din zebla hou manush oḳol zaite zaite Jafa shohoror ḳasat aila, i shomoy beil onuman duifor, Fitore dua ḳorar lagi hou shomoy sato uṭsoin. Tan kub buk lagsil, teu kunta ḳaita saila ar manshe ḳani tiar ḳorra, ou shomoy gume tan ungani ailo. Ou haloto tain deḳla, asman kuligese ar kub boṛo saddoror laḳan eḳ sizor sair kunat doria duniat lamai deoa or; ar i saddoror maze duniar hokkol zator foshu, buke solra zandar ar fakin ase. Bade tain ou aoaz hunla, ḳe zanu tanre ḳor, “Fitor, uṭo, maria ḳao.” Fitore ḳoila, “Na, na, malik, kunumonte-u na, ami kunu shomoy-u nafaḳ ar haram kunta ḳai na.” Tain hirbar ou aoaz hunla, “Allae zeta halal ḳorsoin, itare tumi haram ḳoio na.” Oula tinbar oar bade hou saddorḳan asmano tulia nilagi. Fitore ze batuni doroshon deḳla, er mani kita oito fare tain dian ḳorra, ou shomoy Kornilusor faṭail hi manush oḳol Saimonor baṛi tukaia faia, baṛir duaror samne aia ubaila. Tara ḍakia zikaila, “Saimon zenre Fitor ḳoia ḍaḳoin, tain ikano asoin ni?” Fitore hou doroshonor ḳota sinta ḳorra, ou shomoy Pak Ruhe tanre ḳoila, “Deḳo, tinzon manshe tumare tukanit aisoin. Tumi lamat lamo ar tarar loge roana deo, kunu shondoy ḳorio na, tarare ami-u faṭaisi.” Teu Fitor lamia gia tarare ḳoila, “Afnara zare tukaira ami-u hein; ḳoukka sain, kitallagi aisoin?” Tara ḳoila, “Sho-sifair subedar Korniluse Allar firistar hukum faia amrare faṭaisoin, tain eḳzon forezgar manush, Allar hukum mafik soloin, Ihudi oḳole tanre kub tazim ḳoroin. Firistae tanre ḳoisoin, zate afnare tan baṛit neoaia afnar nosiot hunoin.” Ou Fitore tarare bitre ḍakia nia, tarar memandari korla. Bador din uṭia Fitor tarar loge roana dila, ar Jafa shohoror ḳoyzon imandar-o tan loge gela. Er bador din tara Ḳoisoriat fosla; ou shomoy Korniluse tan ḳesh-kuṭum ar bondu-bandob oḳolre dola ḳoria tarar bar saira. Ar Fitor gia zebla goro hamaila, i shomoy Korniluse tan ḳasat gia faot foṛia soizda ḳorla. Oile Fitore tanre tulia ḳoila, “Uṭoukka, ami nize-o to eḳzon manush.” Bade Kornilusor loge mati mati bitre hamaia Fitore deḳla, bout manush dola oiroise. Ou tain ḳoila, “Afnara to zanoin, eḳzon Ihudi manshe kunu o-Ihudir ḳasat zaoa ba mila-misha ḳora amrar shoriotor nazaiz. Oile Allae amare deḳaisoin zen, kunu manshore nafaḳ ba ofobitro ḳoa amar lagi nazaiz. Erlagi afnara zebla amare ḳobor disoin, te ami kunu omot na ḳoria-u aisi. Oḳon ami afnarare zikairam, amare kitallagi anaisoin?” Korniluse zuaf dila, “Aiz taki sair din age omon bala mani tinṭar shomoy ami amar goro dua ḳorat aslam, ou shomoy somḳail ḳafoṛ finda eḳ beṭa manush amar samne aia ubaila, tain ḳoila, ‘Kornilus, Allae tumar dua ḳobul ḳorsoin. Ar tumar dan-ḳoyrat-o ḳobul ḳorsoin. Oḳon tumi Jafa shohoro manush faṭao ar Saimon urfe Fitorre anao. Tain doriar faro Saimon namor eḳ samṛar ḳarbarir baṛit asoin.’ Erlagi ami zoldi kori afnare anat manush faṭailam. Afne toshrif anchoin dekia kub kushi oilam. Oḳon amra hoḳol Allar samne azir asi, Allae afnare zeta hukum ḳorsoin, amra hokkolta zanmu.” Teu Fitore zoban kulia ḳoila, “Ami oḳon hasaror buzlam, Allar nozoro hoḳol-u homan. Hoḳol zatir maze zera tanre ḍorae ar tan hukum mania sole, tarare tain ḳobul ḳoroin. Afnara to zanoin, tain Boni Israilor gese kushir ekḳan ḳobor zanaisoin. Hozrot Isa al-Mosi, zein hoḳlor malik, tan usillae shanti faoa zae. Manshor lagi toubar gusol ḳora zorur, Ehiae ikan toblig korar bade-u Galil taki asta Ehudia zuṛi zeta goṭsil, ita hoḳolta-u afnara hunchoin. Allae Nasarotor Isare Pak Ruhu ar kudrote kila ḳas kolifa banaisla; tain bala ḳam ḳori kori sofor ḳorta, ar zine dora bemari oḳolre bala ḳorta, Alla Pak to tan loge asla. Tain Ihudi oḳlor zomino ar Zeruzalemo zeta ḳorsila, amra ita hoḳoltar shakki; ar manshe tanre gaso loṭḳaia marlo. Allae tanre tin din bade zinda ḳori uṭaila, ar manshe-o tanre deḳla. Ta-o hokkole tane deḳar nosib oise na, ḳali Allae zerare age fosond ḳorsila, hou shakki oḳolre, mani amrare deḳaila, ar murda taki tain zinda oia uṭar bade amra tan loge ḳana-fina-o ḳaisi. Tain amrare hukum disoin, amra zanu Ihudi oḳlor gese toblig kori ar shakki dei zen, tanre-u Allae zinda ar murda oḳlor hakim banai faṭaisoin. Hoḳol nobie-o tan befare oula shakki disoin zen, zera tan ufre iman ane, tara hoḳole-u tan namor usillae gunar mafi fae.” Fitore boyan ḳorra, i shomoy zera tan boyan hunat asil, tara hoḳlor ufre Allai Pak Ruhu nazil oilo. Ar Fitoror loge oia mosolmani korail zeta imandar oḳol aisla, tara ita dekia somkia uṭla, ḳaron o-Ihudi oḳlor ufre-o Pak Ruhu borshisoin. Tara deḳla, ou o-Ihudi oḳole nanan gaibi bashae matira, ar Allar tarif ḳorra. Teu Fitore ḳoila, “Ou zeta manshe amrar laḳan Pak Ruhu hasil ḳorsoin, era fanit toubar gusol ḳorte kita ḳeu bada dito farbo ni?” Bade tain erare Isa al-Mosir name toubar gusol ḳorar hukum dila. Ar tara Fitorre minot ḳorla, tarar gese ḳoyḳan din roar lagi. Bade sahabi oḳole ar Ehudia zilar hokkol mumin baiainte hunla, o-Ihudi oḳole-o Allar kalamor ufre iman anchoin. Erlagi Fitor zebla Zeruzalemo aila, i shomoy mosolmani korail imandar oḳole tane dushi shaibosto ḳoria ḳoila, “Afne to mosolmani na ḳorail manshor goro hamaisoin, ar tarar loge ḳana-o ḳaisoin.” Teu Fitore foyla taki zeta zeta goṭsil, tarar gese eḳ ek kori buzaia ḳoila, “Ami Jafa shohoro dua ḳorat aslam, omon shomoy Pak Ruhur doroshon failam, ami deḳlam, asman taki boṛo saddoror laḳan ekḳan sizor sair kunat doria amar gese lamaia deoa or. Ami dian dori saia sintat foṛigelam, ar deḳlam, ermaze hoḳol zator foshu, faki, zongli zanuar ar buke solra zandar oḳol asoin. Bade eḳ aoaz hunlam, Fitor, uṭo, maria ḳao. Ami koilam, na, na malik, kunumonte-u na, nafaḳ ba haram kunta ami kunudin muko disi na. Bade dusrabar asman taki ou aoaz hunlam, Allae zeta halal ḳorsoin, tumi itare haram ḳoio na. Oula tinbar ḳoar bade hoḳolta asmano tuli neoa oilo. Ar er loge loge-u, ami ze baṛit aslam ou baṛit aia tinzon manush hamailo, tarare Ḳoisoria taki faṭail oisil. Teu Pak Ruhe amare ḳoila, kunu shondoy na ḳoria tarar loge oia zaoar lagi. Ar ou soyzon bai-o amar loge gesla. Bade amra ou o-Ihudir baṛit hamailam. Tain kila tan baṛit eḳzon firistar doroshon faisla ita amrare hunaila. Hou firistae to tanre ḳoisla, Saimon urfe Fitorre anar lagi Jafa shohoro manush faṭao. He tumare oula nosiot ḳorbo, zeta mania tumi ar tumar foribaror hoḳole nazat faibae. Ar ami boyan shuru ḳorar bade, Pak Ruhu foyla zela amrar ufre aisla, ekkere oula tarar ufre-o aila. Ougi al-Mosir talim amar mono oilo, tain ḳoisla, Ehiae toubar gusol ḳoraisoin fanit, ar tumrar gusol oibo Pak Ruhe. Te bai oḳol, Isa al-Mosir ufre iman anae Allae amrare zela dan disoin, hou eḳoi dan zebla tarare-o dila, te ami aroḳzon ḳe, Allare na ḳortam?” Ikan hunar bade Ehudiar imandar oḳole ar kunu afotti na ḳoria, Allar tarif ḳora dorla, tara ḳoila, “Te Allae o-Ihudi oḳolre-o guna taki mon bodlaia, zindegi faoar tofik disoin.” Stifanor moutor goṭonar bade zeta imandar oḳol zulumor lagi sitri gesla, tara Foinikia, Saipras ar Antiokia forzonto gia ḳali Ihudi oḳlor gese Allar kalam toblig korla. Oile erar maze ḳoyzon asla Saipras dif ar Kurini elaḳar manush, era Antiokiat gia Iunani oḳlor gese-o Hozrot Isar kush-ḳobri toblig korla. Ar Allae tan kudroti bole tarare shaijjo ḳorla, teu bout manush iman ania tan muki oila. I kobor Zeruzalem zomator mumin oḳlor ḳano ailo, ḳobor hunia tara Barnabasre Antiokiat faṭaila. Tain hono fosia Antiokiat Allar meherbani dekia kub kushi oila, ar manshore asha dita taḳla, zate tara dile-zane malikor name imane mozbut roin. Barnabas eḳzon hok manush, tain Pak Ruhu ar imane kamil asla. Ar bout manush malikor muki firia aisil. Bade Barnabas Shoulor tallashe Tarsho ṭauno gela, ar tanre faia Antiokiat loia aila. Barnabas ar Shoul fura eḳ boros hono zomator loge milia bout manshore talim dila. Ou Antiokiat-u al-Mosir ummot oḳolre foyla Isayi name ḍaḳa oilo. Ou shomoy ḳoyzon nobi Zeruzalem taki Antiokiat aila. Erar maze Agabus namor eḳ nobie Pak Ruhur zoriae ḳaṛa oia ḳoila, asta duniai zuṛia eḳ bezuita nidan deḳa dibo; Bashsha Keladusor razottor ḳalo ikan fura oilo. Erlagi mumin oḳole niot ḳorla, Ehudia zilar imandar oḳlor kezmotor lagi, tara zarzir ḳemota mafik shaijjo faṭaita. Ar niot mafik kam-o tara ḳorla, tara Barnabas ar Shoulor atane Ehudiar zomator murobbi oḳlor gese shaijjo faṭaila. Hi shomoy Raza Herude zomator ḳoyzon manshore dorai ania zulum ḳorla. Tain Hannanor bai Iakubre toluar dia ḳaṭilila. Erlagi Ihudi oḳol kushi oisoin dekia, tain Ḳamir Saṛa Ruṭir Idor oḳto Fitorre-o aṭok korla. Ar tanre zelo haraila, zelo-o fahara deoar lagi sairzon ḳori, sair dol sifaire hukum dila. Herudor niot asil Azadi Idor bade Fitorre manshor samne bar ḳori bisar ḳorba. Fitor zel ḳanat bondi roila, oile zomator manshe Fitoror lagi dile-zane Allar dorbaro dua ḳorat roila. Bisaror lagi zedin Fitorre bare anaita, er agor rait tain duizon sifair mazḳano duigesa cheindi banda halote gumo asla, ar bare sifai oḳole duaro fahara dira. Omon shomoy aḳta-u Mabudor eḳzon firista hono aia ubaila, ar zelor bitor for oigelo. Firistae Fitoror gotro ṭela dia tanre hozag kori koila, “Zoldi uṭo!” Teu Fitoror duio at taki chein kulia foṛigelo. Bade firistae tanre ḳoila, “Tumar ḳomro ḳafoṛ findo ar zuta faot deo.” Tain oula ḳorla. Firistae ḳoila, “Tumar saddor gotro dia amar ḳore ḳore ao.” Fitor firistar ḳore ḳore zelḳana taki baroi aila, oile firistae zeta ḳorla, ita zen hasaror-u or, ita kunta-u Fitore buzta farla na, tain mono ḳorla ita kunu doroshon deḳra. Tara foyla ar dui nombor faradaror dolre faroia zebla shohoro hamaibar luar geiṭor gese aila, geiṭ nize nize-u kuligelo. Tara bar oia ek gollir hesh galat aia azila, ar ou shomoy firista Fitoror log taki gelagi. Teu Fitoror hush oilo ar tain ḳoila, “Oḳon ami hasaror-u buzlam zen, Mabude tan firistare faṭaia, Herudor at taki ar Ihudi oḳlor bod ḳaish taki amare hefazot ḳorsoin.” Tain mone mone ita mati mati Moriomor baṛir muka gela, i Moriom oila Hannan urfe Markusor ma. Ono bout manush dola oia dua ḳorat asla. Fitore geiṭo ṭuka marar bade Ruda namor eḳ bandi beṭie geiṭ kulat ailo; ar Fitoror golar shur hunia kushie tai geiṭ na kulia douṛia gia hoḳlor gese ḳoilo, “Fitor aia bare geiṭo ubai roisoin.” Tara ita hunia hi beṭire ḳoila, “Tumar mata ḳaraf oise ni?” Beṭie tarar loge niae ḳoria ḳoilo, “Na, hasau Fitoror gola hunchi!” Teu hoḳole ḳoila, “Te ein mone oy Fitoror surote kunu firista.” Ibae Fitore geiṭo ṭukanit roila. Ou tara kulia Fitorre dekia taijjub oigela. Fitore atdi ishara dila tarare nirai oar lagi, ar zelḳana taki Mabude kila tanre bar ḳori anla, outa hoḳolta ḳoila. Bade tain ḳoila, “I koborḳan tumra Iakub ar baki baiaintore-o zanaio.” Heshe tain on taki bar oia aroḳ zagat gelagi. Rait fuanir bade Fitor kuai gela, i mat loia sifai oḳlor maze ulustul foṛigelo. Herude tanre tukaia na faoae faradar oḳolre zera ḳorla, ar tarare zane marar hukum dila, bade Herud nize-o Ehudia saṛia ḳoydinor lagi Ḳoisoriat gelagi. Hi shomoy Herude Shur ar Sidonor manshor ufre kub gusa asla. Oile Raza Herudor desh taki tarar desho ḳanir samana aito ḳori, hinor hoḳol manshe eḳloge milia Herudor gese aila, tara razar hutibar goror Belastos namor eḳ boṛo gulamre at ḳoria razar loge afush ḳorat aila. Ar Herude eḳ din ṭik koria, hidin tan raz lebas findia shinghashono boia tarar samne bashon deoat asla. Tan ḳota hunia tara sillaia ḳoila, “Ita to manshor buli nae, kunu devtar buli!” Ar loge loge Mabudor eḳ firistae tanre marla, ḳaron Herude Allar ijjot raḳla na. Teu kirmir kuraḳ bonia tan dom bar oilo. Oile Allar kalam hoḳolbae aro beshi sitrilo, ar bout manshe iman anla. Ibae Barnabas ar Shoulor toblig kam shesh oae tara Hannan urfe Markusre loge loia Zeruzalemo firot gela. Antiokia zomato ḳoyzon nobi ar ustad asla, erar nam Barnabas, Samaun urfe Ḳalabai, Kurini shohoror Lukias, Raza Herudor ḳatiror manush Monohem, ar Shoul. Era zebla ruza rakia Mabudor ebadot ḳorat asla, ou shomoy Pak Ruhe erare ḳoila, “Barnabas ar Shoulre ami ze ḳamor lagi fosond ḳorsi, ou ḳamor lagi tarare alog kori deo.” Teu era ruza rakia, hou duiozonor ufre at toia dua ḳoria bidae dila. Ou laḳan ḳori Pak Ruhe Barnabas ar Shoulre Silukiat faṭai dila, ar hikan taki zazo ḳoria tara Saipras difo gela. Ar Salamis gia harle tara Ihudi oḳlor mosidainto hamaia Allar kalam toblig korla. Tarar ḳam ḳorar lagi Hannan urfe Markus tarar loge asla. Tara asta dif guria harle Fafus ṭauno aila, ar hino Bor-Jishu namor eḳ Ihudi zadugiror loge deḳa oilo, he asil bonḍo nobi. Ar Shoul, zenre Paulus ḳoia-o ḍaḳoin, tain Pak Ruhe kamil oia Ilumar bae dian dori saia ḳoila, “O Iblisor baichcha, hoḳol mumini ḳamor dushmon, tor bitre hoḳol laḳan sol-soturi ar naformanie bora, tui Mabudor sohi fotre teṛa ḳorar fikir bad dite nae ni? Hun, Mabudor at tor birudde lagse. Tui anda oizibe, ar ḳoydin shuruz deḳte nae.” Loge loge-u kua ar andaire tare gurililo, ar he at baṛaia ḍaine-baue ḳeurore tukailo, tare ato doria neoar lagi. Ita dekia hi hakime malikor bishoye ze talim faila, ete tain taijjub oia iman anla. Bade Hozrot Paulus ar tan logor hoḳole Fafus saṛia zazo ḳori Pamfulia deshor Forga shohoro fosla. Ar Hannan urfe Markuse tarare toia Zeruzalemo firot gelagi. Bade tara Forga taki aguaia Fisidia deshor Antiokia shohoro fosla ar Zummabare Ihudir mosido hamaia boila. Musar shoriot ar nobi oḳlor kitab taki tilaot ḳora shesh oile, mozlisor neta oḳole tarare ḳoila, “O baisab oḳol, manshore nosiotor lagi kunta boyan ḳorar kial oile, ḳoroukka.” Ou Pauluse ubaia atdi ishara ḳori koila, “O Boni Israil oḳol, ar Allare ḍoraora o-Ihudi oḳol afnara hunoukka. Ou Israil zatir Allae amrar baf-dada oḳolre fosond ḳorsla, zebla tara Mishor desho musafirit asla, ou shomoy tarare mohan ḳorsila, ar tan moha kudrote tarare hikan taki bar ḳori anchila. Onuman sallish boros dori tain morubumir maze huruttar ma-bafor laḳan tarar be-adobi sobor ḳorsla. Bade tain Kenan deshor shatṭa zatire binash ḳoria, tan nizor bonda oḳolre hou deshaintor malikana dan ḳorla. Ou laḳan onuman sair-sho foinchash boros guzori gelo. Heshe Shamuel nobir amol forzonto Allae ḳoyzon amir bezisla. Oile manshe eḳzon bashsha sailo. Teu Allae sallish bosoror lagi Bin-Iamin bongshor Kishor fua Talutre bashsha banaila. Bade Allae Talutre horaia Hozrot Daudre tarar bashsha banaila. Tain Daudor befare ḳoila, ‘Ami Iasor fua Daudre faisi, he amar monor moto manush. Amar hoḳol morzi amol ḳorbo.’ Allae tan oada mafik ou manshor oarish taki eḳzon toraneala, mani Hozrot Isare Boni Israil oḳlor gese azir ḳorsila; Ou Isa aoar age hokkol Boni Israilor gese Hozrot Ehiae toblig korsila, ‘Guna taki dil firaia hari manshe toubar gusol ḳora dorḳar.’ Ar Ehiae tan toblig kamor aḳer ḳalo ḳoila, ‘Tumra kita mono ḳoro, ami ḳe? Ami to hi oada ḳora al-Mosi nae; tain amar bade toshrif anra. Tan faor zutar fita kular laḳ-o ami nae.’ “Te O baiain, Ibrahimor oarish oḳol, ar Allare ḍoraora o-Ihudi oḳol, amra hokkolor gese-u nazator i kalam nazil oise. Zeruzalemor manshe ar tarar neta oḳole Isare na sinae, ar forteḳ Zummabare nobi oḳlor ze boyan tilaot oy eota na buzae, tara Isare dushi shaibosto ḳoria hou ḳota oḳol fura ḳorla. Ar zane marar lak kunu dush na faile-o tara hakim Filator gese dabi zanaila, tanre zane marar lagi. Tan bishoye Asmani Kitab oḳol-o zeta leḳa asil, ita hoḳolta fura oar bade tara tanre gaso loṭḳail halot taki, mani solib taki lamaia dafon ḳorlo. Oile Allae tanre murda taki zinda ḳori tulla. Ar Galil taki zera tan loge Zeruzalemo aisla, tarar gese tain bout din dori deḳa dila; era-u oḳon amrar gese tan befare shakki dira. Ar amrar baf-dada oḳlor gese Allae zeta oada ḳorsila, amra afnaintor gese hou kush-ḳobri zanairam, Allae Isare murda taki zinda ḳoria tarar oarish oḳol, mani amrar gese tan oada fura ḳorsoin, ar i befare Zobur kitabor dusra rukut oula leḳa ase: Tumi amar fut, aiz taki ami oilam tumar gaibi baf. Allae zen tanre murda taki zinda ḳorsoin, ar tain zen kunudin-o koy oita nae, i befare Allae ḳoisoin: Ami Daudor gese ze pak oada oḳol ḳorsi, ita ami tumrare dan ḳormu. Tain Zobur Shorifor aroḳ ayato ḳoisoin: Tumi nizor pak bondare koy oite ditae nae. Daud to hi amolor manshor maze Allar kial-kushi fura ḳorar bade inteḳal ḳorla, ar tan moy-murobbi oḳlor gese tanre dafon ḳorar bade koy oigela, oile Allae zenre murda taki zinda ḳorsoin, ein to koy oisoin na. Erlagi amar bai oḳol, afnara-o zania raḳoukka, ou Isar mazdia-u guna taki mafi faoar ḳota afnaintor gese toblig kora or. Afnara Musar shoriotor usillae gunar shaza taki rehai faisoin na, oile zekunu zone Isar ufre iman anle, tan usillae he gunar shaza taki rehai fae. Erlagi afnara-o hushiar oukka, zate nobi oḳlor kitabo zeta boyan ḳora oise, ita zanu afnaintor ufre na goṭe: Tumra zera Allare loia ṭaṭṭa ḳoro, tumra kial ḳoro, tumra somḳaia uṭo ar binash o; ḳaron tumrar amolo-u ami oula ek kam ḳormu, ze ḳamor ḳota ḳeu tumrar gese ḳoile-o, tumra kunumonte-u bishash ḳortae nae.” Paulus ar Barnabas mosid taki zaoar bala manshe tarare minot ḳori koila, bador Zummabare-o tara i befare aro boyan ḳorar lagi. Mosid taki manush oḳol bar oia zaoar bade, bout Ihudi ar Ihudi dormo manra forezgar oḳole Paulus ar Barnabasor ḳore ḳore gela. Era Paulus ar Barnabasor loge batchit ḳorla, tara erare utshaho dila, era Allar rohomotor ufre ḳaim roita ḳori. Bador Zummabare ṭaunor manush dole dole Allar kalam hunar lagi aila. Oile oto manshor biṛ dekia Ihudi oḳole ingshae bori gela, ar Pauluse zeta boyan ḳorla tara er ninda gaia tan birudita ḳorla. Teu Paulus ar Barnabase shaosh ḳoria zuaf dila, “Allar kalam foyla afnaintor gese toblig kora dorḳar asil; oile afnara zebla ita ṭelia horai dira, ar aḳeri zindegi ḳamai kora dorḳar mono ḳorra na, te amra-o o-Ihudi oḳlor bae nozor firaillam. Ḳaron Mabude amrare oula hukum ḳorsoin, Ami tumare o-Ihudi oḳlor gese nur hishabe bezisi, zate tumi duniar hesh shimana forzonto nazator usilla o.” O-Ihudi oḳole ita hunia kushi oila ar malikor kalamor tarif ḳorla; ar zoto manshore Allae aḳeri zindegi hasilor lagi fosond ḳori raḳsila, tara iman anla. Malikor kalam hi deshor hoḳol zagat fosi gelo. Oile Ihudi oḳole tarar forezgar ḳandani beṭintore ar ṭaunor boṛo boṛo murobbi oḳolre uskaia dilo tara Paulus ar Barnabasor ufre zulum ḳoraia, tarar shimana taki kedaia bar ḳori dilo. Teu Paulus ar Barnabase hi manshor birudde tarar faor duil zaṛia falaia Ikonia ṭauno gelagi. Ar hinor ummot oḳol kushie ar Pak Ruhe furafur kamil oila. Ikonia ṭauno aia-o ou laḳan Paulus ar Barnabas Ihudir mosido gia hamaila, hamaia tara omon laḳan toblig korla, ita hunia bout Ihudi ar o-Ihudi oḳole iman anla. Oile zeta Ihudie iman anla na, tara o-Ihudi oḳolre uskai dia, mumin oḳlor bae bigṛaila. Paulus ar Barnabas hi ṭauno bout din roila, tara shaosh ḳoria malikor befare toblig korla. Ar malike-o tan rohomotor kalamor fokke Paulus ar Barnabasor mazdi, bout muzeza ar keramoti oḳol zair ḳoraila. Bade asta ṭaunor manush dui dol oigelo, eḳ dol Ihudi oḳlor fokke, aroḳ dol sahabi oḳlor fokke. Oile Ihudi ar o-Ihudi kisu manshe tarar neta oḳlor loge milia, Barnabas ar Paulusre mair-doir ar fattor marar fondi korla. Paulus ar Barnabase ita ṭer faia Luḳaenia deshor Lushra ar Dorbi shohoro, ar er ḳanda-ḳasat bagia roila; tara hono Injilor kush-ḳobri toblig korla. Lushra ṭauno eḳzon manush boat taḳto, tar faot kunu bol asil na, he maʼr feṭ taki-u lengṛa, kunudin-o aṭto farse na. He Paulusor boyan hunat asil; Pauluse tar bae dian ḳori saila, ar bala oar lagi tar iman ase buzia, tare zure ḍaḳdi koila, “Tumar faot bordi shida oia ubao!” Teu loge loge-u manushgu faldi uṭia aṭto laglo. Paulusor i keramoti dekia manshe Luḳaenia bashae sillaia ḳoilo, “Devta oḳole manshor surot doria amrar gese lamia aisoin!” Ar manshe Barnabasor nam dilo ‘Zius deb’ ar Paulus boṛo boyan ḳorra gotike, tan nam dilo ‘Harmis deb’. Shohoror baira mul geiṭor ḳandat Zius devtar mondiror babon ṭakure bisal ar mala loia ailo, ḳaron hi ṭakure ar hokkol manshe Paulus ar Barnabasor niote foshu boli dito sailo. Oile sahabi Barnabas ar Pauluse ita hunia beḳorar bonia zarzir finnor ḳafoṛ siṛia douṛia manshor gese gela, ar zure sillaia ḳoila, “O sab oḳol, afnara ḳene ita ḳorra? Amra to ḳali afnaintor laḳan-u duki-shuki manush, amra afnaintor gese ou kush-ḳobri toblig korram, zate i oshar hoḳolta bad dia zinda Allar bae firoin, zein asman-zomin, doria ar ermaze zotota ase hokkolta foyda ḳorsoin. Agor amolor hoḳol zatire tain zarzir ichchamoto fote solte disoin; ta-o tain hamesha nizore zair ḳorsoin, tain asman taki meg dia, shomoy moto foshol dan ḳoria tan meherbani deḳaisoin, afnaintor feṭ bora ḳani ar dilor aram zugaisoin.” I mat oḳol matar bade-o bout ḳoshṭo ḳoria erar foshu boli deoa bond ḳoraila. Bade Antiokia ar Ikonia taki koyzon Ihudi aia, Paulusor birudde manshore uskaia dia tanre fattor marlo, ar tain morigesoin mone ḳoria, ṭaunor bare sesraia loia gelo. Oile mumin oḳol tan sairobae eḳloge dola oar bade, tain uṭia ṭauno firia gela. Bador din tain Barnabasor loge oia Dorbi shohoro gelagi. Dorbit gia harle hono kush-ḳobri toblig koria Paulus ar Barnabase bout manshore imandar banaila, bade tara Lushra, Ikonia ar Antiokiat firot gela; hono gia tara mumin oḳlor imani bol baṛaia tarare imane mozbut roar lagi tagid dila, tara ḳoila, bout duk-toklifor fot faroia amra Allar bashshait hamani lagbo. Tara zomatre salanir lagi forteḳ zomator murobbi-komiṭi banaila. Ar ze malikor ufre tara iman anchoin, en name ruza rakia dua ḳoria ou Isar ato erare shofia dila. Bade Paulus ar Barnabase Fisidia deshor bitredi Pamfulia desho gela. Tara Forga shohoro Allar kalam toblig koria Antulia zaz gaṭo gela; Antulia taki zazo uṭia Antiokiat firot aila. Tara i soforo zeta ḳam oḳol injam ḳorsila, i ḳamor lagi tarare ou Antiokia taki-u Allar rohomotor hefazoto shofi deoa oisil. Antiokiat fosia zomator hoḳolre ekḳano dola ḳorla, ar Allae tarar i ṭauno tarar loge roia zeta zeta ḳam oḳol ḳorsoin, ar tain kila o-Ihudi oḳlor maze iman anar duar kulia disoin, i hokkolta zanaila. Heshe tara mumin oḳlor loge hikano bout din roila. Ehudia taki koyzon manush Antiokiat aila ar imandar oḳolre ou talim hikanit lagla, “Musar shoriot mafik tumrar mosolmani korail na oile, kunumonte-u guna taki nazat faitae nae.” Ita loia Hozrot Paulus ar Barnabasor loge ou manush oḳlor kub ḳota ḳaṭaḳaṭi oilo. Bade ṭik oilo, Paulus ar Barnabas Antiokiar ḳoyzon imandarre loge loia Zeruzalemo zaiba, gia tara sahabi ar zomator murobbi oḳlor loge i bishoye batchit ḳorba. Antiokiar zomate tarar zaoar bondobost ḳori dila, Foinikia ar Shomoria elaḳar bitredi zaite zaite Paulus ar Barnabase manshore zanaila o-Ihudi oḳol kila Allar bae firer, ita hunia tara kub kushi oila. Paulus ar Barnabas Zeruzalemo aia fosar bade zomator manshe, sahabi ar murobbi oḳole-o tarare mayar nozore ḳobul ḳorla. Ar tarar usillae Allae zeta ḳam ḳorsoin, ita hoḳlor gese zanaila. Ou shomoy Forishi dolor ḳoyzon imandare ubaia ḳoila, “O-Ihudi oḳlor mosolmani korani zorur, ar tara zanu Hozrot Musar shoriot-o amol ḳore, erlagi tarare hukum deoa ouk.” Teu i bishoyor foysala ḳorar lagi sahabi oḳol ar zomator murobbi oḳol eḳ zagat dola oila. Bout batchitor bade Hozrot Fitore ubaia ḳoila, “Baiain oḳol, afnara to zanoin, bout din age afnaintor maz taki-u Allae amare fosond ḳori nisoin, zate o-Ihudi oḳole-o amar muk taki kush-ḳobri hunia iman anoin. Allae to hoḳlor dilor ḳobor zanoin, te tain amrare zelaḳan Pak Ruhu dan ḳorsoin, o-Ihudi oḳolre-o oula Pak Ruhu dan ḳoria deḳaisoin, tara-o nazat hasil ḳorse. Tain amrar ar tarar maze alada kunta raḳsoin na, ḳaron tara iman anchoin ḳori, tarar dil-o saf ḳorilisoin. Te amrar baf-dada oḳole ba amra-o ze bar boitam farsi na, hi bar o-Ihudi ummot oḳlor ḳando tulia dia, ḳene afnara Alla Pakre forikka ḳorra? Amra to mono ḳori, Hozrot Isar meherbanie amra zela guna taki mafi faisi, tara-o oula mafi faisoin.” Teu hokkol nirai oigela; Paulus ar Barnabasor zoriae Allae o-Ihudir maze zeta muzeza ar keramoti ḳam oḳol ḳoraisoin, tarar muk taki ota hunla. Tarar boyan shesh oar bade Iakube ḳoila, “Baisab oḳol, hunoukka, Allae tan nizor bonda oar lagi o-Ihudi oḳol taki eḳdol manshore fosond ḳori nia deḳaisoin, o-Ihudi oḳlor bae-o tan kial ase, ar ou ḳota-u Saimon-Fitore oḳon boyan ḳorsoin. I boyanor loge nobi oḳlor kalamor-o mil ase; zela leḳa ase, Erbade ami aia Daudor foṛi zaoa gor hirbar tiar ḳormu, zeta binash oigese ita hirbar gatimu, hirbar noya ḳoria banaimu, zate baki hoḳol manshe Mabudor tallash ḳoroin, ar zoto o-Ihudir nam amar bondar ḳatat leḳa ase, tara-o tallash ḳoroin. Mabude-u ou kalam ḳoira, Ita bout din ag taki-u tan malum asil.” Iakube aro ḳoila, “Te amar foysala oilo, o-Ihudi taki zera Allar foti or, tarare amra kunu duk ditam nae. Tarar gese ḳali ou hukumḳan lekia zanai dei, tara zanu devtar namor hokkol ḳam taki, zinar ḳam taki, ar gola ṭifia mara zandaror gust ḳaoa ar lou ḳaoa taki duroi roin. I hukum oḳol tarare zananikan bala, ḳaron Musae zeta talim disoin, ita bout zomana taki forteḳ ṭauno manshe toblig korra, ar tain zeta lekia toia gesoin, ita to forteḳ Zummabare mosidainto tilaot ḳora or.” Teu sahabi oḳol, zomator murobbi oḳol, ar zomator hoḳol am manshe eḳmot oila, tarar nizor maz taki koyzonre fosond ḳoria Paulus ar Barnabasor loge Antiokiat faṭai diba. Ou tara Silas ar Ehuda urfe Barshabba namor ou dui murobbire fosond ḳorla. Tarar ato ou siṭi lekia faṭaila: “Antiokia, Siria ar Kilikiar o-Ihudi mumin baiaintor gese, sahabi oḳole, zomator murobbi oḳole, ar mumin oḳole i salam zanairam. Amra hunlam zen, amrar maz taki koyzon manush gia tarar zobandi afnarare ostir banaia fereshani korar; oile amra to tarare ila ḳamor kunu hukum disi na. Erlagi amra hoḳole eḳmot oia ḳoyzonre fosond ḳoria, amrar mayar manush Barnabas ar Paulusor loge ḳori tarare afnaintor gese faṭailam, Barnabas ar Paulus to amrar Hozrot Isa al-Mosir namor lagi morar zuka oigesla. Amra Ehuda ar Silasre-o faṭailam, tara ita muke muke-o zanaiba. Pak Ruhu ar amra milia oṭa-u bala mono ḳorlam zen, ou zoruri talim oḳol saṛa ar kunu bar afnaintor ufre na gosai. Te afnara devtar namor mana kunu ḳani, lou, ar gola ṭifia mara zandaror gust ḳaiba na, ar zinar ḳam taki duroi roiba; ita taki hefazot roile afnaintor balai oibo. Iti, assalamu alaikum.” Bade tara bidae loia Antiokiat aila, hino tara zomator manshore ekḳano dola ḳori siṭikan shomzai dila. Manshe siṭikan foṛia i shantir nosiot hunia kushi oila. Ehuda ar Silas, era duiozon nobi asla, era hinor mumin oḳolre bout laḳan oaz-nosiot ḳoria utshaho dila ar tarar imani bol mozbut ḳorla. Oile Paulus ar Barnabas Antiokiat roigela, tara hino aro boutor loge malikor kalamor talim ar kush-ḳobri toblig korat roila. Ḳoydin bade Pauluse Barnabasre ḳoila, “Amra zeta zagainto age malikor kalam toblig korslam, ao, hou zagainto hirbar gia deḳa ḳori. Dekia ai baiaintor hal-hokikot kita.” Teu Barnabasor kial oilo, Hannan urfe Markusre loge loia zaita; oile Pauluse enre loge neoa bala mono ḳorla na, ḳaron Markuse age Pamfuliat tarare falaia geslagi, tarar loge ḳam ḳora bad dilaisla. Erlagi Paulus ar Barnabasor maze motor omil oigelo erdae tara zarzir fote alog oigela. Barnabase Markusre loia zazo ḳori Saipras difo gela; ar Pauluse Silasre fosond ḳoria, Antiokiar mumin oḳlor zoriae Mabudor rohomotor ato shofa oia roana dila. Tain Siria ar Kilikiar mazedi roana ḳoria fote fote zomat oḳolre aro mozbut ḳorla. Hozrot Paulus foyla Dorbi ar bade Lushra ṭauno gia azila. Lushrat Timoti name eḳzon ummot asla, tan ma imandar, ma to Ihudi zator, oile baf Iunani zator. Lushra ar Ikonia ṭaunor hoḳol imandare Timotir bout tarif ḳorta. Pauluse Timotire loge nita ḳori kial ḳorla; tain Timotire mosolmani koraila, ḳaron hi zagaintor Ihudi oḳole zanta Timotir baf oila Iunani zator manush. Zeruzalem zomator sahabi ar murobbi oḳole zeta hukum disla, tara ṭaune ṭaune sofor ḳori kori ita mumin oḳlor ato shomzaila ar manar tagid dila. Oula zomator mumin oḳlor iman mozbut oilo, ar dine dine tarar foriman aro baṛilo. Pak Ruhe Hozrot Paulus ar tan logor hoḳolre Asiya desho kalam toblig korte mana ḳorla, teu tara Forugia ar Galatia deshor bitredi faroia gela. Gia Mushiar shimanat aia harle Bitunia desho zaita saila, oile Isar ruhe tarare hikano zaite dila na, erdae tara Mushia desh falaia Toruas ṭauno gelagi. Raitor bala Pauluse gaibi eḳ doroshon faila; tain deḳla, Makidonia deshor eḳ beṭae ubaia tanre minot ḳori koira, “Makidoniat faroia aia amrare shaijjo ḳoroukka.” Tain i alamot deḳar bade-u amra Makidoniat zaoar lagi tiar oilam, amra buzlam, Makidoniar manshor gese kush-ḳobri toblig korar lagi Allae amrare faṭaira. Ou amra Toruas saṛia zazo ḳori shuza Samtraki difo gelam, hin taki bador din Niafoli ṭauno gia azilam. Niafoli taki amra Filifi ṭauno gelam. Iṭa oilo Makidoniar hoḳol taki boṛo ṭaun, ino Ruman razar manush boshot ḳorta. Amra ḳoydin ono roilam. Eḳ Zummabare amra ṭaunor baira gangor faro gelam, mono ḳorlam, hikano Ihudi dormor dua ḳorar kunu zaga ase. Hino gia amra beṭintor eḳ dol dekia tarar loge mato boilam. Ar erar maze Tuatira ṭaunor Ludia namor o-Ihudi Allaraia eḳ beṭi manush asla, ein baingoni rongor ḳandani kafoṛor ḳarbar ḳorta. Tain amrar boyan hunat asla, ar Mabude tan dilor duar kulia dilaila, zate tain Paulusor boyan dil dia hunoin. Tain ar tan goror hoḳole toubar gusol ḳoria harle tain minot ḳori koila, “Afnara zudi amare malikor ufre imandar mono ḳoroin, te amar baṛikano aia roukka.” Ḳoia tain zure zatia amrare tan baṛit nilagi. Eḳdin amra zebla hou dua ḳorar zagat zaoat aslam, ou shomoy zinnat shadoki eḳ bandi beṭi aḳta-u amrar samne ailo. Tai baiggo gonia tair girost oḳolre bout lab ḳoraito. Tai amrar ḳore ḳore aia sillaia ḳoilo, “I manushguin uforalar shebok, era tumrare toranir fot deḳai dira.” Tai bout din dori ita ḳorsil, eḳdin Pauluse biroḳto oia tair bae muk firaia hou zinre ḳoila, “Ami Isa al-Mosir name tumare i hukum diram, tumi i beṭir ges taki bar oia zaogi!” Ar loge loge-u hi zin bar oia gelogi. Oile tair munib oḳole tarar lab fuṛaigelo dekia, Paulus ar Silasre doria ṭania shodoro loia gela. Bade hakim oḳlor gese shomzai dia ḳoila, “I manush guinte amrar ṭauno aia betaya gonḍogul baṛai dise. Era to Ihudi ar amra oilam Ruman manush. Era ou zator ḳayda-ḳanunor ḳota manshore hikaira, zeta ḳora amrar lagi be-aini.” Ar hinor aro manush eḳloge dol bandia Paulus ar Silasor birudita ḳorlo, teu hakim oḳole erar ḳafoṛ-sufoṛ kulia singladi marar hukum dila. Ar kub balaṭike singladi maria tarare zelo harai toia, zelor ofisarre hukum dila ḳoṛaḳoṛi fahara deoar lagi. Zelor ofisare i hukum faia hari tarare zelor bitoror kuṭat harai toila, ar tarar faot ḍanḍa-beṛi lagaila. Ada raitkur bala Paulus ar Silase Allar hamd-gozol gaite gaite dua ḳorat asla, zelor ḳoydi oḳole ḳan fatia tarar gozol hunla. Ou shomoy aḳta-u boṛo eḳ boisal oilo, asta zelḳanar bit ḳafia uṭlo. Zelor hoḳol duar ar ḳoydi oḳlor shikol kuligelo. Teu zelor ofisaror gum banglo ar zelor hoḳol duar kula dekia tan toluar bar ḳoria nize nize kun oizita saila, tain mono ḳorla, hoḳol ḳoydi bagia gesoingi. Ou Pauluse dekia sillaia ḳoila, “Dom lo, dom lo, nizor ḳeti korio na, amra hoḳol-u ikano roisi.” Teu ofisare eḳzonre batti anar hukum dia, tain douṛaia gia bitre hamaila, ar ḍoror suṭe ḳafi kafi Paulus ar Silasor faot foṛla; bade Paulus ar Silasre bare ania zikaila, “Sab oḳol, ami kita ḳorle zane bastam farmu?” Tara zuaf dila, “Hozrot Isar ufre iman anoukka, teu afne ar afnar baṛir hoḳol zane basba.” Paulus ar Silase zelor ofisar ar tan baṛir hoḳolre malikor kalam hunaila. Ar hou rait-u tain Paulus ar Silasre loia gia tarar shorilor ḳaṭa-sira doia dila, bade tain ar tan baṛir hoḳole loge loge toubar gusol ḳorla. Ar tarare tan nizor goro nia ḳana ḳaite dila. Baṛir hoḳole mili Allar ufre iman ania bout kushi oila. Bador din biane hakim oḳole fulish faṭaia zanaila, “I koydi oḳolre saṛi deo.” Teu zelor ofisar sabe Paulusre zanaila, “Hakim oḳole hukum disoin afnarare saṛi dibar lagi, te afnara bar oia aukka ar sohi-salamote toshrif neukka.” Pauluse tarare ḳoila, “Amra Ruman manush, amrar kunu bisar na ḳoria hoḳlor samne singladi marsoin ar zelo haraisoin. Oḳon hakim oḳole amrare lukaia saṛi dita saira? Ita oito nae, tara nize aia amrare bar ḳori neukka.” Fulishe gia hakim oḳolre ou ḳota zanaila, hakim oḳole Paulus ar Silasre Ruman manush hunia ḍoraigela. Tara Paulus ar Silasor gese aia maf saila, ar tarare bare nia ṭaun taki hori zaoar lagi minot ḳorla. Teu tara zelḳana taki bar oia aia Bibi Ludiar baṛit hamaila. Hikano mumin oḳlor loge deḳa-shakkat ḳoria tarare utshaho dila, bade hon taki roana oila. Hozrot Paulus ar Silas Amfipuli ar Apollunia ṭaunor mazedi gia Tisholonikit aila. Hino Ihudi oḳlor ekḳan mosid asil; Paulus tan niom moto-u hi mosido gela, ar laga laga tin Zummabare manshore Pak Kalam taki buzaila. Tain buzaila ar forman-o deḳaila, toklif shoijjo ḳora ar murda taki zinda oia uṭa al-Mosir lagi zorur asil. Tain ḳoila, “Ou ze Isar ḳota ami afnarare buzairam, ein-u al-Mosi.” Ita hunia erar maz taki koyzone iman ania Paulus ar Silasor loge shorik oila. Bout Allaraia Iunani beṭain ar ḳandani beṭin-o tarar loge shorik oila. Oile Ihudi oḳole ingsha ḳoria bazari gunḍain ania dol banailo ar ṭaunor maze gulmal lagai dilo. Tara Zasunor baṛit hamla ḳoria Paulus ar Silasre tukaia manshor samne anto sailo. Oile erare na faia tara Zasun ar aro ḳoyzon muminre ṭania sesraia ṭaunor shordar oḳlor gese loia gelo, ar sillai sillai koilo, “Ou beṭainte asta duniare lonḍo-bonḍo ḳoria oḳon ono-o aise. Ar ou Zasune tar nizor baṛit erare memandari korse; era hoḳole amrar bashsha Ḳoisoror hukum na mania ḳoira, tain saṛa Isa name aroḳzon bashsha asoin.” Ou laḳan mat matia tara shordar oḳolre ar am manshore-o uslaia dilo. Shordar oḳole Zasun ar tan logor hokkolor zamanot loia zamine saṛi dila. Rait oar bade mumin oḳole zoldi kori Paulus ar Silasre Biroyat faṭai dila. Hikano gia harle tara Ihudir mosido aila. Tisholonikir Ihudi oḳol taki Biroya ṭaunor Ihudi oḳol bout kula-mela asla. Tara Allar kalam hunia kub gorzi oia ḳobul ḳorla, ar Pauluse zeta talim dira ita hasa ki na deḳar lagi tara forteḳ din Asmani Kitab kulia milaita. Tarar maz taki bout Ihudie, ar Iunani taki-o bout ḳandani beṭain-beṭinte Isar ufre iman anla. Oile Tisholonikir Ihudi oḳole zebla hunlo, Pauluse Biroyat aia-o toblig korra, ou tara-o Biroyat aia hinor manshore uslaia gulmal lagailo. Ita hunia-u mumin oḳole Paulusre doriar faro faṭai dila, oile Silas ar Timoti Biroyat-u roila. Paulusre loia zera roana oisil, tara tanre loia Atiniat gela. Gia harle Pauluse tarare ḳoila, Silas ar Timotire kub zoldi kori tan gese faṭanir lagi, ḳoia tarare bidae dilaila. Atiniat aia Hozrot Pauluse zebla Silas ar Timotir lagi bar saira, ou shomoy tain deḳla hi ṭaunor maze murtie bora, dekia tan monor maze kub ḳoshṭo faila. Ou tain Ihudi mosido gia Ihudi ar Allaraia Iunani oḳolre, ar fortidin bazaro gia-o zerar loge deḳa oito, tarar loge-o Hozrot Isar befare batchit ḳorta. Teu Ifikuri ar Stuiki motobador ḳoyzon fonḍite tan loge torko lagaila, tara ḳoyzone ḳoila, “I bok-bok korrae kita hikaito sae?” Ar ḳeu ḳeu ḳoilo, “Mone ḳoy he kunu bideshi devtaintor ḳota zanaito sar.” Ḳaron Pauluse Hozrot Isa ar murda taki zinda oar kush-ḳobrir ḳota toblig korsila. Bade tara Paulusre ania Areo-fagor mozliso nia azir ḳorla, ar tanre zikaila, “Ou zeta noya shikka afne ḳoira, ita kita amrare-o hunaiba ni? Afne to kisu azgubi mat matira, te amra zantam sairam er asol maniḳan kita.” Atinia ṭaunor manshe ar hino roura musafir oḳole-o ḳali noya noya befaror mat matia ba hunia tarar din ḳaṭaita. Teu Hozrot Pauluse Areo-fagor mozlisor mazḳano ubaia ḳoila, “O Atiniar manush oḳol, ami deḳram, afnara hoḳol ḳamo-u kub devta bozoin. Ami zebla faḳanit geslam, ou shomoy afnaintor pujar hoḳolta guria deḳlam, ami deḳlam eḳ fattoror maze leḳa ase, ‘Osina devtar name.’ Te hunoukka, afnara na-sinia zen puja ḳorra, ami tan ḳota-u afnaintor gese toblig korram. Alla Pak, zein i dunia ar er mazor hoḳolta foyda ḳorsoin, tain behest ar duniar malik, tain to manshor banail kunu mondiro boshot ḳoroin na. Tan kunu obab nai gotike manshor ges taki kunuta neoar-o goroz nai, tain-u to hokkol manshor zan, dom, ar hoḳolta dan ḳoroin. Tain eḳzon manush taki hokkol zator manush foyda ḳorsoin, asta duniai zuṛi boshot ḳorar lagi. Tara kun amolo kunano boshot ḳorba iṭa-o tain foysala ḳori disoin. Allae i ḳam ḳorsoin zate manshe tanre tallash ḳoroin, ar tukai tukai tan didar fain. Otoso tain amra ḳeuror ges taki duroi nae. Afnaintor ḳoyzon ḳobie-o ḳoisoin, ‘Tan kudrote-u amrar zindegi, goti ar ṭai.’ Ar, ‘Amra-o tan oarish.’ “Ar amra zebla Allar oarish, te Allar surotre manshor kial-morzie banail shuna-rufa ba fattoror murti mono ḳora amrar lagi usit nae. Agor zomanar manshe ita zanta na gotike Allae itare ḳosur mono ḳorsoin na, oile oḳon tain hoḳol zagar hokkol manshore mon bodlaia touba ḳorar lagi hukum dira. Tain to oula eḳ dino ṭik korsoin, zedin tan fosondor hokkani manshor atane din-duniar hok bisar ḳoraiba. Iṭare ekin ḳorar lagi tain hou manshore murda taki zinda ḳoria er forman-o deḳaisoin.” Murda oḳol hirbar zinda oia uṭba ikan hunia ḳeu ḳeu asha-ashi korlo, ar ḳeu ḳeu ḳoilo, “Afnar i befarḳan amra aroḳbar hunmu.” Ou laḳan ḳori Pauluse hi mozlis taki uṭia gelagi. Oile ḳeu ḳeu tan loge eḳmot oila ar iman-o anla. Erar maze Dionusio name Areo-fagor eḳzon membar, Damaris namor eḳzon beṭi manush ar aro ḳoyzone iman anla. Bade Hozrot Paulus Atinia saṛia Korint ṭauno aila. Hino aia harle Akil namor eḳzon Ihudir loge tan deḳa oilo. En baṛi Fonto desho, Ruman bashsha Keladuse Ihudi oḳolre Rum taki hori zaoar hukum disla gotike, Akile tan bou Fiskilare loge loia tuṛa ḳoydin age Itali taki Korintot aisla. Paulus tarar ḳandat gela. Tain-o tarar laḳan tambu bananir ḳam ḳorta gotike tain tarar loge roia ou ḳamo lagla. Forteḳ Zummabare Paulus Ihudi mosido gia Isar befare batchit ḳorta, tain Iunani ar Ihudi oḳolre iman anar lagi tagid dita. Hozrot Silas ar Timoti Makidonia taki aia harle, Pauluse ḳali Allar kalamor toblig korta. Tain Ihudi oḳolre buzaita, Hozrot Isa-u oila al-Mosi mani Allar ḳas fosond ḳora zon. Oile Ihudi oḳole zebla Paulusor birudita ar bodnam gaoat lagla, i shomoy tain nizor lebasor duil zaṛia falaia ḳoila, “Afnaintor lour dae afnaintor matat-u rouk. Ami amar dayitto taki kalas failam. Oḳon taki o-Ihudi oḳlor muka fot dorlam.” Ḳoia hari hon taki Titio-Iustus namor eḳzon Allaraia manshor baṛit gela. En baṛi asil mosidor loge. Mosidor mutolli Kirispo sab ar tan baṛir hoḳole malikor ufre iman anla. Ar Paulusor boyan hunia Korintio oḳlor maze boute iman ania toubar gusol ḳorla. Raitor bala Mabude Paulusre doroshon dia ḳoila, “Ḍoraio na, toblig salaia zao, muk bond ḳorio na. Ami tumar loge loge asi, ḳeu tumare hamla ḳoria tumar ḳeti korto nae. Ḳaron i ṭauno amar bout proza asoin.” Ou Paulus deṛ boros dori hono roia manshore Allar kalam talim dila. Bade Galion zebla Gris deshor hakim asla, ou shomoy Ihudi oḳol eḳloge milia Paulusre doria bisar ḳoranir lagi raz dorbaro nia ḳoila, “Ou beṭae amrar shoriotor hukumor ulṭa talim dia ḳor, amra-o oula Allar ebadot ḳortam.” Oile Pauluse zebla zobanbondi dita saila, ou shomoy Galione Ihudi oḳolre ḳoila, “O Ihudi oḳol, iṭa zudi kunu oinnae ba dushor ḳam oito te tumrar nalish ami hunlam one. Oile iṭa zebla kunu ḳas buli ba nam ba tumrar shoriotor firka, te ita bishoy-ashoy tumra-u foysala ḳorilao, ita mator lagi ami bisar ḳortam sai na.” Ḳoia hari tain adalot taki itare bar ḳori dilaila. Teu manshe Ihudi mosidor ḳadim Susinre doria adalotor samne mair-doir ḳorla. Oile Galione imuka firia-u saila na. Paulus aro bout din Korintot roar bade, mumin oḳlor ges taki bidae loia Siria desho zaita ḳori Kinkria namor zaz gaṭo aila, Akil ar Fiskila-o tan loge aila. Paulusor eḳ mannot asil ḳori ono aia tan matar sul ḳamaia zazo uṭla. Bade Ifis ṭauno aia Pauluse hi duiozonre ono toia, tain mosido hamaia Ihudi oḳlor loge Hozrot Isar befare batchit ḳorla. Ihudi oḳole tanre ḳoydin tarar gese roar lagi minot ḳorle-o, tain razi oila na. Tain erar ges taki bidae loia ḳoila, “Inshalla, ami hirbar aimu.” Ḳoia tain Ifis taki zazo ḳori roana oigela. Ar Ḳoisoriat aia harle zaz taki lamia Zeruzalemo gela, gia zomator manshor loge mulaḳat ḳoria hon taki Antiokiat aila. Antiokiat ḳoydin ḳaṭanir bade hikan taki roana dia, Galatia ar Forugia deshor zagae zagae guria mumin oḳlor imani bol mozbut ḳorla. Er maze Apollos namor eḳzon Ihudi Ifis ṭauno aila. Tan baṛi Alekzandria ṭauno, tain shundor ḳori oaz ḳoroin, ar Asmani Kitab-o kub bala buzoin. Malikor torikar ilim-o tan asil, tain ruhe gorom oia Hozrot Isar befare sohi-shuddo oaz-nosiot ḳorta ar talim dita. Oile tain ḳali Hozrot Ehiar torikar toubar gusol saṛa ar kunu toubar gusolor ḳota zanta na. Tain kub himmot ḳoria mosido gia oaz ḳorta. Fiskila ar Akile tan oaz hunia tanre tarar baṛit daot dila, ar Allar rasta aro bala ḳori buzaia dila. Bade Apollos zebla Gris desho zaita saila, i shomoy imandar oḳole tanre utshaho dila, ar tanre ḳobul ḳorta ḳori ummot oḳlor gese siṭi-o dila. Teu tain gia Griso azir oila, ar Allar rohomote zera iman anchila tarar bout fayda oilo. Ar Hozrot Isa-u zen al-Mosi, ou ḳota to tain Pak Kitab taki forman deḳaia, manshor samne himmot ḳori Ihudi oḳolre ekkere la-zuaf banaila. Apollos zebla Korintot asla, ou shomoy Hozrot Paulus Asiya deshor mazedi Ifis ṭauno aila. Hikano ḳoyzon ummotor loge deḳa oae, tain erare zikaila, “Afnara iman anar shomoy kita Pak Ruhu hasil ḳorsla ni?” Tara zuaf dila, “Pak Ruhu aroḳta kita, ita to amra hunchi-u na.” Pauluse tarare ḳoila, “Te afnara kun torikae toubar gusol ḳorsla?” Tara ḳoila, “Ehia nobir torikae.” Ou tain ḳoila, “Guna taki mon bodlaile ze gusol ḳorail oy, oṭa-u oilo Hozrot Ehiar torikar gusol, oile Ehiae to talim disla, tan bade zein toshrif anra, mani Hozrot Isar ufre-o iman ana lagbo.” I nosiot hunar bade tara Hozrot Isar name toubar gusol ḳorla. Bade Pauluse tarar ufre at raḳle tara Pak Ruhu faila, teu era nanan gaibi bashae matila ar firaki mat mata dorla. Era hoḳole milia onuman barozon asla. Bade tain Ihudir mosido gia eḳlagare tin mash himmot ḳoria toblig korla, Allar bashshair befare zukti-torko deḳaia tarare buzaila. Erar maze ḳoyzonor dil na-humar oae tara iman anla na, tara hoḳlor gese Isar torikar gibot gaita. Teu Pauluse erar ges taki horia ummot oḳolre algaia tan loge raḳla, ar forteḳ din Turanno namor eḳ ustador ṭongit gia tarare talim dila. Oula dui bosor guzorar bade Asiya deshor Ihudi ar Iunani, hokkolor ḳano-u Mabudor kalam fosi gelo. Allae Hozrot Paulusor atane asanok keramoti ḳam zair ḳoraila. Heshe oula-o oilo zen, tan gotror ḳafoṛ ba gamsaḳan-o kunu bemari manshor ḳasat nile-u bemar bala oizito, ar zin-bute-o bemari saṛia bagita. Ermaze ḳoyzon guria faḳaia ḳaora Ihudi tabzati mullae-o Hozrot Isar nam loia zin-but saṛaito sailo, tara oula ḳoito, “Pauluse zen name toblig koroin, hou Isar duai dia, ami tumrare bar oia zaoar hukum diram.” Erar maze Skiba namor eḳzon Ihudi fordan imamor shat fuae-o oula ḳorto. Teu eḳdin bute tarare zuaf dilo, “Ami Isare-o sini, Paulusre-o sini, oile tumra ḳe?” Ḳoia-u ze beṭare bute dorsil hi beṭae tarar ufre fal dia foṛia mair-doir ḳoria tara shato zonre arailo. Maire tarar shoril siṛia-biṛia zoḳom oigelo, tara lemṭa oia i baṛi taki bagila. I kobor zebla Ifisor Ihudi ar Iunani oḳole zanla, te tara hokkole ḍoraigela, ar sairobae Hozrot Isar namor mohima zair oilo. Zera Hozrot Isar ufre iman anchil, era boute aia hari kula-mela ḳori tarar bad ḳamor ḳota shikar ar zair ḳorla. Ar zera zadu-ṭunar ḳam ḳorto, tarar maze-o boute tarar zadu-ṭunar boiain ania dola ḳori hoḳlor samne zalailila. I boiaintor dam hishab ḳoria deḳa gelo foinchash azar rufar dinar. Ou laḳan ḳori malikor kalam bout baṛilo ar manshor maze kub ḳam ḳorlo. Ita goṭar bade Pauluse mone mone niot ḳorla, tain Makidonia ar Gris oia Zeruzalemo zaitagi, tain ḳoila, “Zeruzalem zaoar bade ami Rum ṭauno-o zaoa zorur.” Bade tain Timoti ar Irastas namor tan duio ḳadimre Makidoniat faṭaia, nize aro ḳoydin Asiya desho roila. Ou shomoy Isar torikar bishoy loia bout gonḍogul laglo. Ḳaron Dimitri name eḳzon baniae Artemis debir mondiror nomunae rufadi huru huru mondir banaito, aro bout baniae-o ou ḳam ḳoria bout lab ḳorto. He ou bania oḳolre ar tarar logi oḳolre-o ekḳano dola ḳoria ḳoilo, “Bai oḳol, tumra to zanrae, i karbar taki amra bala lab fairam. Oile tumra deḳrae ar hunrae-o, Paulus namor ou beṭae ḳali amrar Ifiso-u nae, ḳoite gele asta Asiya zuṛi bout manshore ḳoise ar ekin ḳoraise, ator banail deb-debi oḳol bule kunu devta-u nae. Erlagi oḳon ḍor ḳorer, ḳali amrar ḳarbaror-u bodnam oibo ila nae, oile mohadebi Artemisor mondir-o beḳama oizibo, ar Asiya deshor hokkol manshe ar hara duniaiye milia zen puja ḳore, tain-o nizor ijjot araiba.” Ita hunia tara gusae aguin oia zure zure sillaia ḳoila, “Ifisiar Artemis debi, zindabad!” Loge loge asta ṭauno gonḍogul lagigelo; manshe Makidoniar Gous ar Aristakus namor Paulusor logor duizonre doria, eḳloge fal bandia douṛaia sṭeḍiamo loia gela. Hozrot Paulus ou biṛor samne zaita saila, oile mumin oḳole tanre aṭḳailla. Asiya deshor shorḳari ofisaror maze ḳoyzon asla Paulusor dust, era ḳobriadi tanre zanaila, tain hi biṛor samne gia nizor mosibot ḍakia anta na. Biṛor maze manshe kub silla-silli ar geinjam lagaila. Beshir bag manshe zanta-u na ino kita oise, tara eḳzone eḳlaḳan, aroḳzone aroḳ laḳan matila. Teu ḳoyzon Ihudie Sikondor namor eḳzonre samne ṭelia dilo bashon dibar lagi. Tain atdi ishara dila, zate manush nirai oia tan boktita hunoin. Oile manshe zebla buzla, ein-o Ihudi, teu tara aro zure zure onuman dui gonṭa dori sillaia ḳoila, “Ifisiar Artemis debi, zindabad!” Heshe ṭaunor searmane manshore nirai koraia ḳoila, “O Ifisia oḳol, ḳoukka sain, kun manushgue na zane zen, i Ifis ṭaun oilo mohan Artemis debir mondir ar asman taki tan zeta murti lamat foṛse er roikka ḳoroneala? Ar i hasa ḳota ḳeu zebla ḳonḍaito farto nae, te bebutar laḳan kunu ḳam na ḳoria tumra nirai o. Ou manshe to amrar mondiro suri-o ḳorse na, amrar debir kunu bodnam-o ḳorer na, ta-o tumra erare doria ancho. Te huno, Dimitri ar tar logor bania oḳlor zudi kunu nalish taḳe, te adalot to kula ase, hakim oḳol-o asoin, tara hono gia zarzir mamla-mokoddoma ḳorouk. Oile tumrar ar kunu dabi-daoa taḳle ita niom mafik mozliso boia miṭ-maṭ ḳora oibo. Ashole aizkur i geinjam laganir lagi amrar ufre-u dush foṛto fare, i gonḍogul laganir kunu ḳaron deḳaitam fartam nae.” Oḳan ḳoia tain mozlis bangi dila. Geinjam shesh oar bade Hozrot Pauluse mumin oḳolre ḳobordi anaila, tara aia harle tain tarare utshaho dia, sohi-salamote bidae loia Makidoniat zaita ḳori roana oila. Makidoniar mazedi zaite zaite mumin oḳolre bout utshaho dia, Gris desho aia azila. Ono aia tin mash roar bade zebla zazo ḳori Siria desho zaita saila, ou shomoy Ihudi oḳole tan bifokke ku-motlob ḳorer hunia, tain Makidoniar mazedi zaita ḳori niot ḳorla. Ar Biroya ṭaunor Furosor fua Sufatos, Tisholonikir Aristakus ar Sikundos, Dorbi shohoror Gous, Timoti, ar Asiya deshor Tukik ar Tofim, era hokkol Paulusor loge gela. Era age oia Toruas ṭauno gia amrar lagi bar saoat asla. Bade Ḳamir Saṛa Ruṭir Id shesh oigele amra zazo ḳori Filifi taki roana dia, fas din bade Toruas aia tarar loge millam, ono shatdin roilam. Haftar foyla din Isar mezbani kaoar lagi amra ekḳano dola oile, Paulus bador din zaitagi kori maz rait forzonto mumin oḳlor gese oaz ḳorla. Amra ufror talar ze goro boislam hikano bout batti asil. Ar Utuḳ namor eḳ zuan fua kiṛkir ufre boat asil, Pauluse bout shomoy dori oaz ḳorae he huni huni gumai gesil, aḳta-u he tin tala taki lamat foṛigelo. Teu manshe tare mora halote tulla. Paulus lamat lamia fuar ufre ḳait oia ainja ḳori doria ḳoila, “Tumra uloistol ḳorio na, tar bitre to zan ase.” Bade tain hirbar ufror talat gia mezbani kaila, ḳaia harle fozor forzonto batchit ḳoria bidae loila. Er maze ou fuare manshe zita halote baṛit nia zar for nai kushi oila. Amra age gia zazo ḳori Asus gaṭor bae roana oilam, mono ḳorlam Paulusre hon taki tulmu. Ḳaron tain kial ḳorsla aṭia hikano gia uṭta. Asus aia tain amrar loge milar bade, amra tanre zazo tulia Mitulinit ailam. Bador din amra zaz kulia hikan taki roana oia Kius difor ḳandat ailam; er bador din amra Samus difo roilam, tar bador din gia amra Milita gaṭo biṛilam. Asiya desho Pauluse deri korar kial na oae tain mone mone ṭik korsla, Ifiso na hamaia er galabae zaibagi, tain zoldi kori Zeruzalemo gia hari Fonchaisha Id hono adae ḳorta saila. Milita taki Pauluse ḳobria faṭaia Ifisor zomator murobbi oḳolre anaila. Tara aia fosar bade Pauluse ḳoila, “Afnara to zanoin, Asiya desho aia harle ami foyla din taki-u kila afnaintor loge shomoy ḳaṭaisi. Ihudi oḳlor bout zator ku-foramish taki, tarar fatail fondir maze-o ami furafur norom dile, souḳor fani falaia Mabudor gulami korsi. Afnarar fayda oibo ila kunu talim-u na lukaia furafur zanaisi, kula-mela mozliso ar goro goro gia talim dite-o na ḳorsi na. Ihudi ar Iunanir gese toblig koria buzaisi, tarar gunar mon bodlaia Allar foti oita, ar amrar malik Hozrot Isar ufre iman anta. Ar oḳon Pak Ruhur hukumbondi oia ami Zeruzalemo zairam, hikano amar kun dosha oibo, zani na. Ḳali ou ḳoborḳan zani, Pak Ruhe hokkol ṭauno amare ou ḳota zanaira, toklif ar zel ḳaṭa amar lagi bar sar. Oile-o amar nizor zanor forua ḳori na, amar zanre oto mulloban mono ḳori na. Ami irada ḳora fotor hesh ṭikana forzonto douṛaitam sairam. Allar rohomotor kush-ḳobrir toblig ar kezmotor ou ze bar Hozrot Isar ges taki faisi, er injam ditam sairam. Oḳon ami eoḳan-o zani, afnara zerar maze ami Allar bashshair ḳota toblig korram, ou afnaintor loge-o ar kunudin deḳa oito nae. Erlagi ami aiz afnaintor gese ou zobanbondi diram, hokkolor lour dae taki ami kalas. Ami Alla Pakor hoḳol laḳan morzir ḳota afnaintor gese boyan ḳorte ḳoredi gesi na. Afnara zarzir befare hushiar oukka. Pak Ruhe afnarare zerar saloḳdar banaisoin, tarar befare hushiar oukka. Allae tan nizor zonredi zerare ḳorid ḳorsoin, hi zomatre furafur deḳa-huna ḳoroukka, zela raḳale tar meṛar falor deḳa-huna ḳore, imam oia afnara-o oula ḳoroukka. Ami zani, ami zaoar bade tumrar maze fagola bagor surotor manush aia hamaiba, tara nirdoy oia falor bout ḳeti korba. Ar afnaintor nizor maz taki-o ḳeu ḳeu mumin oḳolre tar ḳore neoar lagi, hasa talimre misa ḳoia noya talim bar ḳorbo. Erlagi afnara hozag roukka, ar mono raḳba, ami tin boros doria rait-din souḳor fani falaia afnarare hushiar ḳorte dom loisi na. Oḳon Alla ar tan rohomotor kalamor zimmae ami afnarare shofilam. Allar i kalame afnarare goṛia tulbo ar tan pak bonda oḳlor lagi oada ḳora behesti monjilo fosai dibo. Ami to ḳeuror shuna-rufa ba ḳafoṛ-sufoṛor bae lalos ḳorsi na. Afnara nize-u to zanoin, amar ar amar logi oḳlor obab miṭanir lagi ami duio ate ḳam ḳorsi. Ami hoḳol laḳan ḳamor maze nomuna deḳaisi, ou laḳan ḳam ḳoria durbol oḳolre shaijjo ḳora zorur. Hozrot Isar talimre mono raḳo, tain nize bataisoin, neoar saite deoa doinno.” Oḳan ḳoia harle, Pauluse aṭu gaṛia hoḳlor loge dua ḳorla. Bade zomator hoḳole milia kub ḳandon ḳandila, ar Paulusre ainja ḳori doria hunga dila. Ḳas ḳori Paulusor ou ḳotar lagi beshi kandila, tain ḳoisla, tan muk tara ar deḳta nae. Bade tara tan loge oia gia zazo tulia dila. Ifisor zomator murobbi oḳlor ges taki bidae loia, zaz kulia hari amra shuza fote Kus namor difo ailam, bador din amra Rudos difo ailam, hon taki Fatara namor ṭauno gelam. Hono gia harle Foinikiat zaora ekḳan zaz failam, amra hou zaze roana dilam. Ar zebla Saipras dif deḳlam, ou shomoy difor ḍain galabae gia amra Siria deshor Shur ṭauno aia lamlam. Hikano zazor mal-samana lamai dilo. Honor mumin oḳolre tukaia hari amra shat din tarar gese roilam; tara Pak Ruhur marfote Paulusre minot ḳorla, tain zanu Zeruzalemo na zain. Ino ḳoydin ḳaṭanir bade amra hirbar roana oilam, teu tara hokkole bou-baichcha loia ṭaunor bare aia amrare aguai dila. Bade doriar faro amra aṭu gaṛia dua ḳorlam. Dua bade zarzir fote bidae loia amra zazo uṭlam, ar tara nizor baṛit gelagi. Shur taki roana oia amra zazor sofor shesh ḳoria Tolimayit azilam, honor mumin oḳolre bala-bura zikanir bade amra tarar loge eḳdin roilam. Bador din amra bidae loia Ḳoisoriat ailam, ar toblig kamor buzurg Filifor baṛit gelam. Ein to Zeruzalemor hou shat ḳadimdaror eḳzon. Tan sairzon abiati fuṛin asla, era nobir laḳan ohi koita. Bakka ḳoydin hono roar bade Agabus namor eḳzon nobie Ehudia taki toshrif anla. Tain aia hari Paulusor ḳomror taga kulilila, ar iṭadi nizor at-fao bandia ḳoila, “Pak Ruhe oula ḳoira, Zeruzalemor Ihudi oḳole ou ḳomror taga-alare oula banba, ar o-Ihudi oḳlor ato shofia diba.” Ita hunia hinor manshe ar amra-o Paulusre bout minot ḳorlam, tain zanu Zeruzalemo zaoa bad dilain. Pauluse ḳoila, “Tumra ita kita lagailae? Ḳandia amar mon bangi dirae ḳene? Hozrot Isar lagi ami Zeruzalemo ḳali bondi oa-u nae, morte-o tiar asi.” Tanre ḳota hunaitam na faria amra nirai oigelam, ar ḳoilam, “Mabudor morzi kaim ouk.” Bade amra mal-samana gaiṭ bandia Zeruzalemo roana dilam. Ḳoisoria ṭaunor ḳoyzon mumin-o amrar loge aila, ar Saipras difor Menason namor eḳzon furana imandaror baṛit amrare loia gela. En baṛit-u amra roar ḳota asil. Zeruzalemo aoar bade mumin oḳole kushi oia amrare ḳobul ḳorla. Bador din Pauluse amrare loia Hozrot Isar bai Iakubor loge mulaḳat ḳorla. Hikano zomator murobbi oḳol-o aila. Pauluse erare bala-bura zikaia harle, tan tobligor mazdi Allae kilan o-Ihudi oḳlor maze dini ḳam hasil ḳorsoin, ita hoḳolta eḳ ek kori tarar gese boyan ḳorla. Ita hunia murobbi oḳole Allar tarif ḳorla ar tanre ḳoila, “Bai, tumi to deḳrae, azar azar Ihudie Hozrot Isar ufre iman anchoin, ar tara hoḳole-u Hozrot Musar shoriotre amol ḳorar kial ase. Oile tara ou ḳobor-o faisoin, o-Ihudi oḳlor loge zeta Ihudi oḳol taḳoin, tarare tumi talim diso Musar shoriot bad dilaita ḳori, tara zanu huruttaintor mosolmani korani bad dilain ar Ihudi oḳlor reoaz-o na manoin. Te kita ḳora zae? Tara to nisoy hunba tumi aiso. Oḳon amra tumare zela ḳoi, tumi oula ḳorilao. Amrar maze sairzon beṭain asoin, tara ekḳan mannot ḳorsoin; tumi tarare loge loia zao, tarar loge gia tumi ar tarar fak-saf oar ḳoros ar matar sul ḳamanir foysha-o dilao. Teu hoḳole zanba, tumar name tara zeta ḳobor faisoin, ita kunta-u nae, ashole tumi nize-o Musar shoriot ar reoaz manrae. Oile zeta o-Ihudi oḳole iman anchoin, tarare amrar ou foysala lekia zanai disi, devtar name niot ḳora ḳani kaita na, lou ḳaita na ar gola ṭifia mara kunu zandaror gust ḳaita na, kunu zator zinar ḳamo zaita na.” Teu Pauluse hou manush oḳolre loge loia gia, tarar loge nizore-o fak-saf ḳorla. Bador din Baytul-Mukaddoso hamaila, ar tarar fak-saf oar lagi foshu kurbani kundin deoa oibo, eo tarik zanai dila. Fak-saf oar niomor hi shat din shesh na oite-u, Asiya deshor ḳoyzon Ihudie Paulusre Baytul-Mukaddoso dekia, manshore uskai dia tane dorla. Tara sillaia ḳoila, “O Boni Israil oḳol, aguao! Asta duniar manshor gese zegue amrar zatir, amrar shoriotor ar Baytul-Mukaddosor bifokke talim dia gure, ogu hou beṭa! He Iunani oḳolre ono haraia i pak zagaḳanre-o nafaḳ banaise.” Er age to Ifisor Tofimre Paulusor loge ṭauno sokkoro dekia tara mone mone shondoy ḳorsoin, Pauluse tanre Baytul-Mukaddoso-o haraisoin. Teu asta ṭaunor manush gorom oigela, ar eḳloge douṛia aia Paulusre doria Baytul-Mukaddos taki ṭania bare anla, ar loge loge-u er duar oḳol bond ḳorilla. Tara Paulusre marilita saila, oile ou shomoy Ruman sifai oḳlor fordanor gese ḳobor gelo, asta Zeruzalemor maze uloistol lagigese. Loge loge-u tain subedar oḳol ar sifai dol loia douṛia tarar gese aila. Manshe sifai ar sifair fordanre dekia Paulusre mair-doir ḳora bond ḳorla. Teu hi ofisare aia Paulusre aṭok koria duigesa shikoldi bandar hukum dila, bade zikaila, “I manushgu ḳe, he kita dush ḳorse?” Gonḍogulor maze sillaia ḳeu eḳlaḳan, ḳeu ḳeu aroḳ laḳan ḳoilo. Oile tain balamonte kunta shomzita na faria Paulusre nia kenṭonmenṭo haraia toar hukum dila. Paulus siṛir muko zaite-u manshor at taki basanir lagi, sifai oḳole tanre usa ḳoria boia nilagi. Manshe ḳore oia misil dita lagla, “Ogure marilao!” Sifai oḳole tanre kenṭonmenṭo harai dita saira, ou shomoy tain fordan ofisarre Iunani bashae soal ḳorla, “Ami afnar gese kunta mattam farmu ni?” Ofisare ḳoila, “Tumi kita Iunani basha zano ni? Te tumi kita hou Mishori beṭa ni, zegue ḳoydin age laṛai koria, sair azar shontrashire loge loia morubumit gesil?” Pauluse zuaf dila, “Sab, ami eḳzon Ihudi, Kilikiar Tarsho shohoror manush, ami zeta mone ḳoy ita ṭaunor manush nae. Ami afnare minot ḳorram, doya ḳori manshor gese amare matar shuzugkan deukka.” Tain shuzug deoar bade Pauluse siṛir ufre ubaia, manshore nirai oar lagi atdi ishara dila, tara nirai oia harle tain Ibrani bashae ḳoat lagla. Pauluse ḳoila, “O baba oḳol, bai oḳol, ami oḳon amar nizor zobanbondi diram, afnara hunoukka.” Tain Ibrani bashae matra dekia manush ekkere nirai oigela. Ou tain ḳoila, “Ami eḳzon Ihudi. Kilikiar Tarsho shohoro amar zonom oise; oile ou Zeruzalem ṭauno aia ami manush oisi, allama Gomolielor faor ḳandat boia ami amrar moy-murobbi oḳlor shoriot ar ḳayda-ḳanunor shullo-ana talim faisi. Ar aiz afnara zela allaoalagiri deḳaira, ami nize-o age oula allaoala aslam. Ami Isar foti oḳolre zan-foran shofia zulum ar zane martam, beṭain-beṭinre bandia nia zel ḳanat haraitam. Ita to fordan imam sab ar deshor fotua komiṭir hokkol moy-murobbi oḳole-o bala ḳori zanoin. Ami tarar ges taki siṭi loia, Damesk shohoror amrar baiainre dibar lagi roana oislam. Hono zera Isar torikat aisla, tarare bondi koria Zeruzalemo ania shaza deoar lagi hono zaoat aslam. Zaite zaite Dameskor ḳandat gia harle beil duifor oigelo, aḳta-u amar sairo galabae asmani for somḳaia uṭlo. Ami maṭit foṛigelam ar hunlam, amare ḳeu ḍakia ḳoira, ‘Shoul, Shoul, tumi amare ḳene toklif dirae?’ Ami zikailam, ‘Huzur, afne ḳe?’ Tain ḳoila, ‘Ami Nasarotor Isa, zenre tumi toklif dirae.’ Zera amar loge asil tara hoḳole-u i for oise ḳori deḳla, oile zein amar loge batchit ḳorsila, tan buli tara hunla na. Bade ami koilam, ‘Malik, te ami kita ḳortam?’ Tain ḳoila, ‘Uṭo, Damesko roana deo, tumar zeta zeta ḳorar goroz ase, ita tumare hono zanail oibo.’ Ar hi somḳanie amar souk anda oigesil gotike, amar logi oḳole amar ato doria Dameskor bae loia roana dila. “Hono Ononio namor eḳzon manush asla, tain Hozrot Musar shoriot mafik kub forezgar manush. Hikanor hoḳol Ihudir gese tain kub ijjoti zon. Tain aia amar ḳasat ubaia ḳoila, ‘Bai Shoul, tumar deḳar takkot firot auk.’ Ar loge loge-u ami tanre deḳlam. Ou tain ḳoila, ‘Amrar baf-dada oḳlor Allae tumare fosond ḳorsoin, tumi zanu tan morzi zantae faro, ar hou masum bonda Hozrot Isare-o deḳtae faro, ar tan zobanor buli-o huntae faro. Tumi tan shakki oibae, zeta zeta deḳso ar huncho ita hokkolta tamam duniare zanaibae. Oḳon ar deri korrae ḳene? Uṭo, tane ḍaḳo, ar toubar gusol ḳoria tumar hoḳol guna doia falao.’ “Bade ami Zeruzalemo firot aia harle eḳdin Baytul-Mukaddosor bitre dua ḳorat aslam, ou shomoy unganir haloto aḳta-u tan doroshon failam. Ami deḳlam, tain amare ḳoira, ‘Zoldi kori uṭo, oḳon-u Zeruzalem saṛia baro, ḳaron amar befare tumar mukor kunu shakki inor manshe hunto nae.’ Ami koilam, ‘Malik, i hoḳol manshe-u to zanoin, zera tumar ufre iman anta, erare zelo harani ar mair-doir ḳorar lagi, ami hokkol mosidainto zaitam; tumar shakki Stifanre zebla mara oisil, hi shomoy ami nize hikano ubaia shae deoat aslam, ar zera tanre marsil, ami tarar ḳafoṛ-sufoṛ fara dislam.’ Teu Malike amare ḳoila, ‘Tumi roana deo, ami duroir bin zati oḳlor gese tumare bezimu.’ ” Manshe oto shomoy dori Paulusor boyan hunat asla, bade o-Ihudir nam hunia-u tara sillaia ḳoila, “Ogure dunia taki horai deo, igu basia roar zuka nae!” Manshe zebla sillani dorla ar ḳafoṛ-sufoṛ falaia, asmano duil uṛanit lagla, ou shomoy fordan ofisare Paulusre kenṭonmenṭo loia zaoar hukum dila, ar ḳoila, “Ere sabuk maria zera ḳoro, ḳene manshe tar birudde ila silla-silli korer.” Paulusre zebla sabuk marar lagi bandila, i shomoy sho-sifair eḳ subedar hikano ubat asla, teu Pauluse tanre ḳoila, “Oḳono zare dushi shaibosto ḳora oise na, ila eḳzon Ruman manshore sabuk mara afnaintor lagi ṭik or ni?” Ikan hunia hi subedare fordan ofisarre gia ḳoila, “Sar, afne ita kita ḳorat lagsoin? I beṭa to Ruman manush.” Teu tain Paulusor daro gia zikaila, “Ḳo sain, tumi Ruman ni?” Pauluse ḳoila, “Ji oy.” Ofisare ḳoila, “Ami bout ṭeḳa-foysha ḳoros ḳoria Ruman siṭizen oar shuzug loisi.” Pauluse ḳoila, “Ami zonom shutre-u Ruman.” Ikan hunia-u ze sifaie tanre zera ḳorat zaoat asla, loge loge-u tara hon tone horia gelagi. Ar tain Ruman manush oile-o tanre bandisla ḳori fordan ofisare-o ḍoraigela. Oile bador din hirbar Paulusre zikaita saila, kitar lagi Ihudi oḳole tanre dush dira, teu fordan ofisare Paulusor band kuli dila, boṛo imam oḳol ar fotua komiṭir hoḳolre ekḳano dola oar hukum dila. Bade Paulusre lamaia tarar samne azir ḳorla. Pauluse fotua komiṭir manshor bae dian dori saia ḳoila, “O baisab oḳol, ami to oḳon forzonto amar bibeḳ forishkar rakia, Allar bonda hishabe dayitto adae ḳorram.” Ikan hunia fordan imam Ononioe, Paulusor galat zera ubat asil, tarare ḳoila, “Ogur muko soṛ maro.” Teu Pauluse tanre ḳoila, “O bonḍo, Allae tumare-o soṛ marba. Tumi shoriotor aine amar bisar ḳorat boia, shoriotor borkelaf ḳoria amare soṛ marar hukum dirae?” Zera Paulusor ḳandat ubaisil, tara tanre ḳoilo, “Tumi Allar goror fordan imam sabre beijjot ḳorrae ni?” Pauluse ḳoila, “Bai oḳol, ami to zani na ein fordan imam ḳori. Arnae ila ḳoilam na one, Allar kalamo to leḳa ase, ‘Tumar nizor zatir murobbire kunu gali dio na.’ ” Pauluse zebla buzla hi mozlisor kisu manush Siddekia mozobor ar kisu oila Forishi mozobor, ou tain mozlisor maze zure zure ḳoila, “O bai oḳol, ami eḳzon Forishi ar Forishir aolad. Murda oḳol hirbar zinda oia uṭba, ou mator lagi oḳon amar bisar ḳora or.” Tain ikan ḳoar loge loge-u Forishi ar Siddekia oḳlor maze ḳaijja lagigelo, mozlisor maze dui dol oigela. Ḳaron Siddekia oḳlor ekin oilo, murda oḳol ar zinda oita nae, firista ba ruhu ita kunuta nai. Oile Forishi oḳole ekin ḳoroin ita hoḳolta-u asoin. I gonḍogul bout boṛo oigelo, teu Forishi dolor ḳoyzon moulanae ubaia torka-torki kori koila, “Amra to i manshor kunu dush deḳram na. Kunu ruhu ba firistae to tar loge ila batchit ḳorta faroin.” Ou laḳan ḳori betaya gonḍogul laglo, erdae fordan ofisare ḍoraigela, manshe Paulusre ṭukra ṭukra ḳori siṛilaiba, ou tain sifai oḳolre hukum dila, tara lamia gia Paulusre manshor ges taki horaia nia kenṭonmenṭo haraila. Bade raitor bala Malik Isae Paulusor gese ubaia ḳoila, “Himmot ḳoro, amar name Zeruzalemo zela shakki diso, Rum ṭauno-o oula shakki dite oibo.” Bador din fozoror oḳto Ihudi oḳole eḳ dagabazi korla, tara ḳosom ḳaia ḳoila, Paulusre marar ag forzonto tara dana-fani kunta muko dita nae. Sallish zonor-o beshi manush ekḳano oia i dagabazir ḳosom ḳaila. Tara boṛo imam ar murobbi oḳlor gese gia ḳoila, “Amra ḳoṛaḳoṛi kosom ḳaisi, Paulusre na mara forzonto dana-fani kunta muko ditam nae. Oḳon afnara ar fotua komiṭir hoḳole fordan ofisaror gese ou abdar ḳoroukka zen, afnara aro balaṭike i bisaror todonto ḳorta saira, ou usillae he afnaintor gese aoar age-u, fotor maze amra tare marilimu.” Oile Paulusor bagnae tarar i dagabazir ḳobor hunia, kenṭonmenṭo gia Paulusre ita zanaila. Teu Pauluse sho-sifair eḳzon subedarre anaia ḳoila, “Ou fuagure fordan ofisar sabor gese loia zaukka, he tanre kita ḳoito aise.” Ou hi subedare tare loia fordan ofisaror gese gia ḳoila, “Bondi Pauluse amare anaia ḳoila, ou fuagure afnar gese loia aitam, he afnar gese kita ḳoito sar.” Fordan ofisare tar ato doria ek galabae loia gia ḳoila, “Tumi amare kita ḳoitae sairae?” He ḳoilo, “Ihudi oḳole niot ḳorsoin, tara afnar gese ou abdar ḳorba, Paulusor bisar aro balaṭike todonto ḳorar lagi afne zanu samnor ḳail tanre deshor fotua komiṭir samne azir ḳorain. Afne tarar ḳotae razi oin na zanu, era sallish zonor-o beshi manshe lukaia Paulusor lagi bar saira, tara ḳosom ḳaise, tanre na mara forzonto dana-fani kunta muko dito nae. Tara oḳon tiar oia foto boise, ḳali afnar razi oar bar saira.” Fordan ofisare tare ou hukum dia bidae dila, “Tumi amar gese i kobor ḳoiso ḳori ḳeurore hunaio na.” Bade tain sho-sifair duizon subedarre anaia ḳoila, “Dui-sho zon sifai, shottoir zon guṛa-ala sifai, ar dui-sho zon sulfi-ala sifai aiz rait noyṭat Ḳoisoriat zaoar lagi tiar ḳoro. Ar Paulusor lagi-o guṛar bondobost ḳoro, tare zanu nirafode deshor fordan hakim Filiksor gese fosail oy.” Ḳoia, tain ou siṭi leḳla, “Manonio fordan hakim sab, ami Keladus Lusias, afnare salam zanairam. Ihudi oḳole ou manushgure doria zane marilita saisla, ami hunlam he eḳzon Ruman manush, hunia amar sifai oḳol loia gia tare basailam. Bade ami huntam sailam manshe tar kita dush faisoin, erdae tare nia tarar mozliso azir ḳorlam. Teu ami buzlam, tarar shoriotor kunu fotuar lagi er ufre dush dira, oile zelo harani ba zane marar zuka kunu nalish faisi na. Ar ami hunlam, tar birudde dagabazi kora or, teu zoldi kori tare afnar gese faṭai dilam. Tar birudde zera nalish dise, tarare-o ḳoisi, tarar kunu nalish taḳle afnar gese gia hunaita.” Sifai oḳole fordan ofisaror hukum mafik Paulusre loia raitor bala Antifatri ṭauno gela. Bador din guṛa-ala sifai oḳlor loge Paulusre bidae dia baki sifai oḳol kenṭonmenṭo guria aila. Guṛa-ala sifai oḳole siṭi ar Paulusre loia Ḳoisoriat fosia harle deshor fordan hakimor ato shomzai dila. Tain i siṭi foṛia Paulusre zikaila, “Tumi kun deshor manush?” Paulus Kilikiar manush ikan hunia tain ḳoila, “Tumare zera dusher tara ikano aia harle, ami tumar zobanbondi hunmu.” Bade tain hukum dila, Paulusre nia Raza Herudor baṛir zelo haranir lagi. Fas din bade fordan imam Ononioe ḳoyzon Ihudi murobbi ar Tortullo namor eḳzon ukilre loia Ḳoisoriat gela, gia fordan hakimor adaloto Hozrot Paulusor birudde nalish dakil ḳorla. Paulusre ania adaloto azir ḳora oilo. Bade ukil Tortulloe ou nalish gaila, “Manonio hakim sab, afnar shashono roia amra bout din taki boṛo shantie asi. Afne afnar aḳol-hekmot dia i zatir bout balai korra. Erlagi amra hamesha hoḳol zagat afnar gunogan gai. Amra afnar mulloban shomoy nosṭo ḳortam sairam na, meherbani koria hunle, amrar nalishḳan dui-sair ḳotae ḳoilimu. Sab, amra deḳsi, ou manushgu boṛo eḳ afod oia azise. He Nasara namor eḳ bidormi dolor ustad. Hamesha ḳali hangama lagae, duniar hoḳol Ihudir maze doladoli lagani-u tar ḳam. Ar ou zeta nalish dilam, afne nize tare zera ḳorle-u ita hoḳolta bar oizibo.” Ukilor loge oia Ihudi oḳole-o ita hokkolta hasa ḳoia shae dila. Teu fordan hakim sabe Paulusre ishara dila, Pauluse ḳoila, “Sab, afne bout boros dori i Ihudi zatir bisar ḳoria aira, iṭa hunia ami kub kushi oia amar zobanbondi diram. Afne tallash ḳorle-u zaniliba, oḳono baro din oise na, ami ebadot ḳorar lagi Zeruzalemo geslam. Ou zera amar befare nalish dira, tara ḳeu amare Baytul-Mukaddoso kunu manshor loge hangama ḳorat deḳsoin na. Ṭaunor kunuḳano ba kunu mosido-o manshore uskaia deoat amare faisoin na. Oḳon tara amar zeta dush deḳaira, itar kunu forman-o tara dita farta nae. Oile ami afnar gese shikar ḳorram, era zeḳṭare bidormi dol ḳoira, hou Isa al-Mosir torikae ami amar moy-murobbi oḳlor Allar ebadot ḳori. Tourat Kitabor batail hoḳol hukum-ahkam ar tamam nobi oḳlor kitabre ami ekin ḳori. Ar era zelan ekin ḳoroin, ami-o oula Allar ufre ekin ḳori, forezgar ba gunagar hoḳolre-u morar bade hirbar zinda ḳora oibo. Erdae ami Allar gese ar manshor gese-o hamesha amar bibeḳ forishkar raḳtam sai. Bout boros bade ami Zeruzalemo geslam, kurbani ditam ar amar nizor zatir gorib oḳolre dan-ḳoyrat bilaitam ḳori. Te ami fak-saf oia zebla Baytul-Mukaddoso hamailam, ou shomoy tara amare deḳsoin. Amar gese kunu biṛ-o oise na, ba kunu gonḍogul-o oise na. Ḳali Asiya deshor ḳoyzon Ihudi hono asla. Amar ufre kunu nalish taḳle hou Ihudi oḳole afnar gese aia nalish dita asil. Arnae ono zera aisoin era-u ḳoukka, ami zebla fotua komiṭir samne ubaislam, ou shomoy tara amar kita dush faisla? Kunta-u na, ḳali ekḳan mat ami zure zure matislam zen, murda oḳol hirbar zinda oia uṭar musla loia aiz afnaintor samne amar bisar ḳora or.” Hakim Filikse Hozrot Isar torikar befare kub bala ḳori zanta, erdae tain bisar bond ḳoria ḳoila, “Sifair fordan ofisar Lusias aia harle ami tumrar bisaror foysala ḳormu.” Tain sho-sifair subedarre hukum dila, “Paulusre aṭoḳ raḳo, oile tare mayar nozore rakio, tar ḳesh-kuṭume tar kezmot ḳorat aile bada dio na.” Ḳoydin bade Filikse tan Ihudi bou Drusillare loge loia aia Paulusre ḳobordi anaila, ar Paulusor muk taki Isa al-Mosir ufre iman anar boyani hunla. Pauluse zebla hok fote sola, nizore domaia raḳa, ar Hashoror bisaror ḳota boyan ḳorla, Filikse ita hunia ḍoraigela. Ḍoraia ḳoila, “Tumi oḳon zaogi, shomoy shuzug oile ami tumare ḳobordi anaimu.” Tan mone mone asil, Pauluse tanre kisu gush diba, erlagi tain bare bare Paulusre anaia gof ḳorta. Dui boros faronir bade Forkio Fistos aia Filiksor godit boila. Filikse Ihudi oḳolre kushi korta ḳori Paulusre zelo toia gelagi. I desho aoar tin din bade Fistos Ḳoisoria taki Zeruzalemo gela. Ou shomoy boṛo imam ar Ihudi neta oḳole tan gese aia Paulusor befare nalish dila. Tara Fistosor gese kub minot-ḳajji kori koila, tain zanu meherbani kori Paulusre Zeruzalemo anain. Tarar motlob asil, Paulusre anar shomoy fotor maze lukaia roia marilita. Hakim Fistose tarare ḳoila, “Paulusre to Ḳoisoriat aṭoḳ raḳa oise, ar ami-o kub tagda ḳori hikano zairam. Te tumrar maz taki buzdar ḳoyzon amar loge aio, he kunu dush ḳorle er nalish dibae.” Fistos tarar loge aṭ-dosh din roia harle Ḳoisoriat gelagi. Gia bador din tain adaloto boia, Paulusre tan samne azir ḳorar hukum dila. Zeta Ihudi oḳol Zeruzalem taki aisla, Paulus hino azir oar bade tara tanre sairobae beria ubaia kub dusha-dushi korla, oile itar kunu forman dita farla na. Ou Pauluse nizor zobanbondi dila, “Ami to Ihudi oḳlor shoriot, Baytul-Mukaddos, ba Ruman bashsha Ḳoisoror birudde kunu dush ḳorsi na.” Oile Fistose Ihudi oḳolre kushi korar kial oae tain Paulusre zikaila, “Ou mamlar bisar ami Zeruzalemo ḳortam sairam, tumi hikano zaite razi aso ni?” Pauluse zuaf dila, “Ami to Ruman adalotor samne azir oisi, ar ou adaloto-u amar bisar oaḳan zorur. Afne nize-o bala ḳori zanoin, ami Ihudi oḳlor loge kunu oinnae ḳorsi na. Ta-o amar kunu ḳosur oile, moutor shaza faoar zuka kunu dush faile, ami morte razi asi. Oile era amar birudde zeta dush dira, ita zudi hasa na oy, te amare tarar ato saṛi deoar eḳtiar ḳeuror nai. Erdae ami bashsha Ḳoisoror gese afil ḳorram.” Ikan hunia Fistose tan uzir-naziror loge foramish ḳori koila, “Tumi zebla bashshar gese afil ḳorlae, te bashshar gese-u zaibae.” Ḳoydin bade Ihudi oḳlor raza Agrippo ar tan boin rani Bornikie, noya hakim Fistosre salam zananir lagi Ḳoisoriat aila. Tara ikano ḳoydin roiba gotike, Fistose Paulusor mamlar ḳota razare zanaila. Tain ḳoila, “Filikse eḳzon manshore zelo toia gesoin. Ami zebla Zeruzalemo geslam, ou shomoy honor boṛo imam ar Ihudi murobbi oḳole ou beṭar birudde nalish dia tar shaza saisoin. Ami tarare ḳoislam, zar birudde nalish deoa oy, ar zera i nalish dein, hi badi-bibadir mukamuki zobanbondi ar zera na oile, ashamire kunu shaza deoar eḳtiar Ruman aino nai. Teu tara hoḳol ono aia harle, ami bador din-u adaloto boia hou ashamire samne anar hukum dilam. Zera tar birudde nalish disla tarar zobanbondi hunlam, oile ami zela onuman ḳorslam, ila kunu nalish tara disoin na. Ḳali tarar nizor dormor ḳota, ar Isa namor kunu eḳzon mora manshor ḳota, Pauluse enre zinda ḳoia dabi korer, ota loia tara adaloto nalish dise. Ar ita kila tallash ḳortam, ikan malum na oae ami tare zikailam, he Zeruzalemo gia i mamlar foysala ḳorte razi ase ni. He razi na oia, afil ḳoria bashshar rayor lagi bar saoae, ami tare bashsha Ḳoisoror gese faṭanir ag forzonto aṭoḳ raḳar hukum disi.” Ou raza Agrippe Fistosre ḳoila, “Ami nize tar zobanbondi huntam sai.” Fistose zuaf dila, “Te ḳail hunbane.” Bador din raza Agrippo ar rani Borniki bout dumdam ḳori aila, tain sifair fordan ofisar oḳol, ṭaunor goinno-mainno manshore loia adaloto hamaila. Fistose hukum dia Paulusre-o ono anaila. Bade Fistose ḳoila, “Mohan raza Agrippo, ar adaloto azir goinno-mainno sab oḳol, afnara hoḳole ou besaṛare deḳra. Hoḳol Ihudie milia Zeruzalem ar Ḳoisoriat amar gese tar bisar saia misil dia ḳoisoin, tare ḳotom ḳoro. Oile ami deḳlam, moutor shaza deoar zuka kunu dush tar nai. Ta-o he nize bashshar gese afil ḳorae, ami tare tan gese faṭanir kial ḳorsi. Oile mohan bashshar gese leḳtam, ila kunu dush fairam na gotike, ami shroddeo raza Agrippo ar afnara hoḳlor samne tare azir ḳorsi. Afnara zera ḳorle leḳar zuka kunta faimu ḳori mono ḳorram. Ḳaron ami mono ḳori, kunu bondire salan deoar bala tar dush oḳol zananikan zorur.” Ikan hunia raza Agrippe Paulusre ḳoila, “Tumar zobanbondi koar lagi onumoti dilam.” Teu Pauluse at zuṛ ḳoria nizor zobanbondi koila, “Manonio raza namdar, Ihudi oḳole amar birudde zeta nalish disoin, ita befare aiz afnar gese amar zobanbondi hunanir shuzug faia, ami nizore baiggoman mono ḳorram. Ḳas ḳori, Ihudi oḳlor hoḳol laḳan sal-cholon ar tarar fitna oḳol afnar zana ase. Erdae aroz ḳorram, meherbani kori afne amar matḳanain hunba. “Huruman tone-u nizor elaḳat amar sal-cholon kila asil, bade Zeruzalemo aia kilaḳan solchi, ita to tamam Ihudi oḳole zanoin. Tara to bout din dori amare sinoin gotike, tara kial ḳorle i shakki dita farba, amrar dormor maze Forishi namor ze moulobadi dol ase, ami ou Forishi torikae zindegi kaṭaitam. Allae amrar moy-murobbi oḳlor gese zeta oada ḳorsila, hou oadae ami borosha ḳori, erlagi aiz amar bisar or. Amrar baro ḳandanor manshe rait-din dile-zane ebadoti koria, hou oadar fol deḳar ashat asoin. Raza namdar, hou ashar lagi-u Ihudi oḳole amare dushira. Allae murdare zinda ḳoria tuloin, ikan ḳene afnara bishash ḳorta faroin na? “Ami to mono ḳortam, Nasarotor Isa namor birudde, hoḳol nomunar ḳam ḳora amar lagi forz. Ar Zeruzalemo ami ola ḳorsi-o. Boṛo imam oḳlor onumoti loia Isar ummot oḳolre ami zelo haraitam. Tarare zane marar ḳalo ami tarar birudde buṭ ditam. Ami hoḳol mosidainto gia bare bare tarare shaza ditam. Isar torika taki tarare firaia, Isar name lannot dita ḳori tarar ufre zur-zulum ḳortam. Erar ufre amar oto gusa asil zen, erare zulum ḳorar lagi ami bara deshor ṭauno-o zaitam. “Oula eḳbar boṛo imam oḳlor ges taki ḳemota ar hukumzari loia ami Damesko zaoat aslam. Ar raza namdar, ou shomoy beil duifor oigese. Aḳta-u deḳlam, amar ar amar logor hoḳlor sairobae shuruz taki aro beshi forala eḳ rushoni, asman tone zoli uṭlo. Ou amra hoḳol maṭit foṛigelam ar ami hunlam, Ibrani bashae ḳeu amare ḳoira, Shoul, Shoul, tumi ḳene amar ufre zulum ḳorrae? Suḳa faizono lat maria nizor ḳeti korrae na ni? Teu ami zikailam, munib, afne ḳe? Munibe zuaf dila, ami Isa, zenre tumi zulum ḳorrae. Oḳon uṭo, faot bordi ubao. Tumi oḳon zeta deḳso ar zeta tumare deḳaimu, ita hoḳoltar shakki ar kezmotgar bananir kiale, ami nize tumare deḳa dilam. Ami tumare o-Ihudi oḳlor gese faṭaiar, tarar ar tumar nizor zatir at taki ami tumare basaimu. Tumi tarar souk kulia dibae, tara zanu andair taki nuror bae, Shoytanor doḳol taki Allar bae firia ain, amar ufre iman ania gunar mafi faia, forezgar bonda oḳlor maze tara-o dakil oin. “Manonio raza namdar, behesti i doroshonre ami falaitam farlam na. Erdae foyla Dameskor manshor gese, bade Zeruzalemo, Ehudia zilar hoḳol zagat ar o-Ihudi oḳlor gese-o toblig korlam. Tarare ḳoilam, touba ḳoria Allar bae firo, ar ou laḳan amol ḳoro, zeta dekia forman mile tumra hasaror touba ḳorso. Ou ḳarone Ihudi oḳole Baytul-Mukaddoso doria amare marilita saisoin. Oile Allar shaijjoe ami oḳon forzonto ṭikia asi, ar huru-boṛo hoḳlor samne ubaia shakki-o diram. Hozrot Musae ar tamam nobi oḳole zeta goṭibo ḳori bataia gesoin, itar bara ami kunta-u ḳoiram na. Era ḳoisoin, al-Mosie toklif shoijjo ḳorba, tain-u foyla murda taki zinda oia uṭia hari tan nizor zati, ar o-Ihudi oḳlor gese-o nuror torikar ḳota toblig korba.” Pauluse zebla ou laḳan zobanbondi dira, aḳta-u Fistose tanre zure damki mari koila, “Paulus, tumi to fagol oigeso. Tumi bout leḳa-foṛa ḳorso, ou leḳa-foṛae tumare fagol banailise.” Pauluse zuaf dila, “Ji na, hakim sab, ami fagol nae. Ami to hok ar zuktir mat matram. Raza namdare to ita hokkolta-u zanoin, ar ami himmot ḳoria tan samne kula-mela matiram. Ami furafur zani, ita hokkolta-u raza namdaror malum ase, ita to kunu andarir maze lukaia goṭse na. “Te manonio raza namdar, afne kita nobi oḳolre ekin ḳoroin ni? Ami to zani, afne-o ḳoroin.” Ou Agrippe ḳoila, “Tumi kita oto zoldi amare-o al-Mosir torikat nitaegi sairae ni?” Pauluse ḳoila, “Ami Allar gese ou dua ḳorram, zoldi ouk ba derie ouk, ḳali afne nae, zoto manshe amar aizkur i zobanbondi hunra, era hokkol-u amar laḳan bonizaukka. Ḳali ou shikol bad dia.” Teu raza, deshor fordan hakim, rani Borniki ar tarar loge adalotor hoḳol manush ubai gela. Bade tara baronir fote eḳe-oinne ḳoila, “I besaṛae to moutor shaza ba zel ḳaṭar zuka kunta-u ḳorse na.” Raza Agrippe Fistosre ḳoila, “He zudi bashshar gese afil na ḳorto, te tare oḳon ḳalas deoa gelo one.” Hakimor foysala mafik zazo ḳoria amrare Itali desho faṭanir shomoy aile, Paulus ar aro ḳoyzon ḳoydire Zulio namor eḳzon sho-sifair subedaror ato shomzai dila. Zulio asla bashsha Ḳoisoror afon sifai dolor eḳzon subedar. Bade amra Adramuttio gaṭor oula eḳ zazo oia roana dilam, zeḳan Asiya deshor bout zaz gaṭo zaoar lagi zuit ḳora oise. Ar Makidonia deshor Tisholoniki ṭaunor Aristakus amrar loge asla. Bador din amrar zaz gia Sidono biṛlo. Subedar Zulioe Paulusor loge kub bala bebohar ḳorla. Tain tan dust oḳlor gese gia, nizor zoruri goroz kulanir izazot dila. Bade hi zaga taki hirbar zaz saṛlo, ar amrar ulṭamuka batash deoae, amra Saipras difor zebae batash asil na hobaedi gelam. Gia Kilikia ar Pamfuliar samnor shagor faroia Lukia deshor Mura ṭauno aia azilam. Subedare hikano Itali desho zaora, Alekzandriar ekḳan zaz faia, hou zazo ḳori amrare loia roana dila. Amrar zazḳan kub aste aste solia bout din bade ḳoshṭo ḳori Klid ṭaunor ḳandat aia azilo, oile batashor lagi amra ar shohoze aguaitam farlam na. Teu amra ḳom batashedi Salmunar ḳandabae gia Kriti difor aoṛedi zaoat laglam. Ar doriar faror ḳandabae ḳoshṭo ḳoria zaite zaite, ‘Shundor Longorḳana’ namor eḳ huru zaz gaṭo ailam, er ḳandat asil Lasea ṭaun. Ou laḳan bout din guzori gelo, ruzar idor din shesh oia tuṛa tuṛa shit aise. I shomoy zaze sofor ḳora kub bifod. Teu Pauluse zazor manshore foramish dila. Tain ḳoila, “Sab oḳol, ami deḳram, i soforo amrar bout mosibot ar ḳeti oibo. Ita ḳali zaz ba mal-samanar nae, amrar zanor-o ḳeti oibo.” Oile subedare Paulusor ḳota na mania, zazor malik ar kefṭinor ḳota hunla. Ar i longorḳanat shitor dino roite shubida oito nae gotike, beshir bag manshe hin taki zaoar lagi foramish dila. Tara saila kunumonte Finiks gaṭo fosia shitor din ḳaṭaita. I gaṭ asil Kriti difo, er uttor-fochchim ar dokkin-fochchim dik kula asil. Bade zebla aste aste douknor batash salu oilo, ou tara mono ḳorla, tara zela asha ḳorsla ola-u oise. Erdae tara zazor longor kulia Kriti difor galabae roana dilo. Oile tuṛa bade-u hi faro taki ian-kuni namor kub bezuita eḳ tufan ailo. Amrar zaz tufanor maze foṛlo, tufanor ṭela mukabila ḳortam na faria, zazre batashor tale tale baṭiol dilam. Bade Kouda namor eḳ huru difor aoṛedi gia, zazor logor barki naoḳanre amra bout ḳoshṭo ḳori banga taki basailam. Manshe naore ṭania nia zazor ufre tulla, ar zazor toḳtainre doṛi dia doṛo ḳori bandila, zate tufane na bange. Bade Surti namor shagoror soro zaz lagizibar ḍore, fal lamaia zazre emne batash baṭiole saṛi dilam. Tufane zazre omon laḳan goṛagoṛi shuru ḳorlo, erdae tara bador din zazor mal-samana fanit falai dila. Tin dinor din tara nizor ate zazor shaz-shoronjam-o fanit falai dila. Bout din taki san-shuruz kun zinish ita na deḳae, ar tufanor zur kub beshi oae, amra zane basar asha saṛi dilam. Zazor manush bout din dori ufash roae Pauluse ubaia tarare ḳoila, “O baisab oḳol, amar ḳota hunia Kriti dif taki zazḳanre na saṛle, i mosibot ar ḳeti taki afnara basla one. Oile oḳon ami afnarare ou foramish diram, afnara monor maze bol raḳoukka, amra ḳeu zane mortam nae, ḳali zazḳan binash oizibo. Ami ze Allar ebadot-bondegi kori, hou Allar eḳ firistae goto rait amar ḳandat ubaia ḳoisoin, Paulus, ḍoraio na, bashsha Ḳoisoror samne tumar ubani lagbo. Ar i zazo ḳori zera tumar loge oia zaira, Allae tumar ḳatire meherbani koria era hokkolor zan basaisoin. Te sab oḳol, afnara monor maze bol raḳoukka. Ami ekin ḳori, Allae amare zela ḳoisoin, ola-u oibo. Oile amra kunu difor ufre gia foṛmu.” Ou laḳan ḳori amra Adria shagoror ufredi zaoat roilam, bade tufanor souddo dinor din ada raitkur bala naia oḳole andaz ḳorla, tara faror ḳandat aisoin. Tara fani mafia deḳla ḳali ashi at goin ase, tuṛa bade hirbar mafia deḳla, shaiṭ at ase. Erdae soror fattoror maze gia zaz dakka lagar ḍore, tara zazor ḳoredi sairgesa longor falaia, shuruzor for deḳar lagi dua ḳorat boila. Naia oḳole zaz taki bagia zaoar motlob ḳori, samnor goloir tuṛa age longor falanir ḳota ḳoia, zazor barki naore doriat lamaila. Teu Pauluse subedarre ar sifai oḳolre ḳoila, “Naia oḳol zaz taki bagi gele afnara hoḳol mara zaiba.” Ikan hunia sifai oḳole naor doṛi kaṭi dila, teu nao fanit bashia gelogi. Fotabala Pauluse hoḳolre minot ḳorla kunta ḳaoar lagi, tain ḳoila, “Aiz souddo din dori kita oibo na oibo ou sintae afnara kunta ḳaisoin na. Ami afnarare minot ḳorram, kunta ḳaukka. Zan basaite oile to afnara ḳaite oibo. Deḳbane, afnaintor matar eḳsa sulor-o ḳeti oito nae.” Ikan ḳoia hari Pauluse tara hoḳlor samne ruṭi ania Allar shukria zanaia, ruṭi siṛia ḳaoat lagla. Teu hoḳole monor maze bol faia ḳani kaila. I zazor maze amra hoḳole milia dui-sho siottoir zon aslam. Hoḳole feṭ boria ḳaoar bade zazor bar ḳomanir lagi hokkol gom doriat falai dila. Bian oia harle tara sinla na, i zaga ashole kun zaga. Oile oula eḳ baḳ deḳa gelo, i baḳor sor balue bora. Dekia tara foramish ḳorla, farle zazre nia hou soro tulilita. Teu tara longorain ḳaṭia doriat falai dila, ar ḳanḍarir boiṭar doṛin-o ḳaṭi dila. Bade batash baṭiole samnor fal ṭangaia hou balur soror muka gelam. Oile zaz tole lukail kuntat aṭki gelo. Ar samon gala aṭki zaoae, ḳoror goloit ḍeur baṛi lagia banga dorlo. Teu sifai oḳole foramish ḳorla bondi oḳolre marilita, arnae ḳeu ḳeu hatraia bagizito fare. Oile sho-sifair subedare Paulusre basanir kiale sifai oḳlor i foramish manla na. Tain hukum dila, zera hatar zane, tara age zaz taki falaia foṛia huknat uṭouk. Ar hatar na zanra oḳole zazor toḳta ba aro kuntat doria huknat farouk. Ou laḳan hoḳole huknat uṭia zan basaila. Amra hefazote faro uṭia harle zanlam, i difor nam oilo Malṭa. Hinor manshe amrar loge kub bala-manshi korla, meg ar shit asil ḳori tara aguin zalaia amrare ḍakia nia ḳatir-zoton ḳorla. Ermaze Pauluse eḳ aṭa hukna laḳṛi tukaia dola ḳori ania agunir maze deoar bade, agunir teze ek kalnag bar oia hari Paulusor ato ḳamoṛ mari dorlo. Ḳalnage Paulusor ato ḳamoṛdi loṭki roise dekia, hinor manshe mata-mati lagaila, “I manushgu nisoy kunu kuni, doriar at taki he basigele-o niae-devtae tare baste dila na.” Oile Pauluse at zaṛa dia ḳalnagre aguino falai dila, ar tan kunu ḳeti oilo na. Manshe mone mone bar saoat asil, Paulusor gotor fulizibo, ba tain aḳta-u maṭit foṛia moriziba. Bout shomoy bar saia harle tan kunu bifod oise na dekia, tarar mot bodlaia ḳoila, “Ein to kunu devta.” I zagar ḳandat hou difor Fublio namor ek kandani manshor zomidari asil. Tain amrare tan baṛit daot dila ar tindin dori amrare kub ḳatir-zoton ḳorla. Ou shomoy Fublior baf taf ar ḳamṛi bemare bisnat falail asla. Pauluse bitre hamaia tan ḳandat boia dua ḳorla, tan gotro atai dia bemar shifa ḳorla. Ita dekia hari hi difor zoto bemari asla, tara-o aia bala oila. Tara amrare bout laḳan ijjot ḳorla, bidae bala zaz saṛar age amrar dorḳari hoḳol siz zugaia zazo ania boria dila. Tin mash bade amra Alekzandriar eḳ zazo ḳori roana dilam. I zazḳan ou difo roia shitor din ḳaṭaisil, er samnor goloi kudia Zuṛ devtar murti lagail asil. Bade amra Surakusho aia tin din roilam. Hikan taki roana dia guri guri Italir Riziot ailam. Bador din douknor batash saṛlo, teu dusra din amra Futioli zaz gaṭo ailam. Hino ḳoyzon muminor loge mulaḳat oilo, tara minot-ḳajji korae tarar loge eḳ hafta roilam. Ota ḳori kori amra Rum ṭauno aia azilam. Rumor mumin oḳole amra aoar ḳobor hunsla, tara amrar loge mulaḳat ḳorta ḳori kunu kunu zone Appior bazar, ḳeu ḳeu Tin-Shoraiḳanar gau forzonto aguai aila. Erare dekia Pauluse Allar shukria adae ḳorla, ar dilor maze bout bol faila. Amra Rumo aoar bade Pauluse tan nizor fosond mafik roibar onumoti faila. Ḳali eḳzon sifaie tane fara dito. Tindin bade Pauluse Ihudi oḳlor boṛo boṛo murobbire dola ḳoria ekḳano ḳoraila. Tara dola oia harle tain ḳoila, “O baisab oḳol, zudio ami nizor zator ba moy-murobbir batail niom-ḳanunor ulṭa kunta-u ḳorsi na, ta-o Zeruzalem taki amare aṭok koria, Ruman oḳlor ato shomzail oise. Ruman oḳole amare zera ḳoria moutor shaza deoar zuka kunu dush na faoae, amare ḳalas dilaita saisla. Oile Ihudi oḳole bada deoae nirufae oia ami bashshar gese afil ḳorsi. Ta-o ami amar nizor zator ufre kunu laḳan dush ditam saisi na. Te sab oḳol, tamam Boni Israilor dilor maze ze asha ase, hou ashar lagi-u amare i shikol findail oise, erlagi-u ami afnaintor loge mulaḳat ar batchit ḳortam sairam.” Tara ḳoila, “Amra to afnar befare Ehudia taki kunu siṭi faisi na. Ar zeta Ihudi baiain hon taki aisoin, tara-o afnar name kunu nalish disoin na, ba bura kunta ḳoisoin-o na. Oile amra afnar muk taki motamot huntam sairam. Ḳaron amra zani, hoḳol zagar manshe-u i torikar bifokke matoin.” Paulusor loge hirbar mulaḳat ḳorar lagi eḳ tarik ṭik korla. Hou din tarar loge aro bout manush Paulusor goro aila. Pauluse fozor taki hainja forzonto haradin Allar bashshair ḳota tarar gese bangia boyan ḳorla. Hozrot Musar Tourat Kitab ar nobi oḳlor kitabor ayat deḳaia, Isar befare tarar dilo ekin zonmaita saila. Tan boyan hunia kunu kunu zone iman anla, ar kunu kunu zone ita ekin ḳorla na. Boyan hunar bade tarar maze motor omil oigelo, tara hikan taki bidae oita saila. Zaoar age Pauluse tarare ḳali ou nosiotḳan ḳorla, “Pak Ruhe Hozrot Ishaya nobir zoriae afnaintor baf-dada oḳolre ou ḳotaḳan ṭik-u ḳoisla, Ou manush oḳlor ḳasat gia ḳo, tumra ḳane hunle-o kunta buztae nae, souke deḳle-o kunta sintae nae. Ḳaron ita manshor dil oshaṛ oigese, tarar ḳano tala lagigese, tara zarzir souk muzi boiroise. Zate souke na deḳe, ḳane na hune, dil dia na buze, kizanu tara touba ḳoria, amar bae firizain, ar ami tarar shifa ḳorilai. Hozrot Paulus fura dui boros dori tan nizor baṛa ḳora bashat roila. Ar zoto manush tan gese aita tarare ḳobul ḳoria, furafur himmot ḳori Allar bashshair ḳota toblig korta. Ar Malik Isa al-Mosir befare bina badae kula-mela talim dita. Ami Paulus to Hozrot Isa al-Mosir gulam. Ruman bashshair razdani Rum ṭaunor mumin oḳlor gese ou sohifaḳan leḳram. Alla Pake amare fosond ḳoria anchoin al-Mosir sahabi oar lagi ar tan batail kush-ḳobri toblig korar lagi. Allae tan nobi oḳlor mazdi Pak Kitabor maze ou kush-ḳobrir ḳota age-u oada ḳorsoin. Tan nam uzila ḳorar lagi, tan mazdi-u amra Allar niamot ar sahabi fod faisi, zate hoḳol zatir manshe iman ania Allar baiddo oia sole. Ou manshor maze tumra-o aso. Allae to tumrare daot ḳoria anchoin, Isa al-Mosir afon zon oar lagi. Te ou Rum ṭauno Allar zoto mayar bonda oḳol asoin, Allae tan pak bonda oar lagi zerare daot ḳoria anchoin, tumra hoḳlor gese ami ou siṭikan leḳram. Amrar gaibi baf Alla Pak ar Hozrot Isa al-Mosie tumrare rohomot ar shanti dan ḳoroukka. Ami foyla-u ḳoiram, tumrar mozbut imanor ḳota asta duniair maze roṭigese ḳori, ami Isa al-Mosir name amar Allar shukria adae ḳorram. Allar ḳas mayar zon Ibnullar befare kush-ḳobri toblig koria, ami dile-zane Allar ebadot ḳorram. Eḳ Alla-u shakki asoin, ami forteḳ bar munazator shomoy tumrar ḳota iad ḳori. Ami hamesha ou ḳota magiram, otodin bade oile-o Allar morzie zekunu monte ami zanu tumrar gese aitam fari. Ami tumrar loge deḳa ḳortam sairam, zate ruhani kunu niamot dia tumrare boloban ḳortam fari. Mani, amar iman dekia tumra hoḳole ar tumrar iman dekia ami nize-o utshaho fai. O baiain huno, ami bout bar tumrar gese aitam saisi, oile bar bar bada aise. Nanan zagat gia bin zatir gese toblig koria zela fol faisi, tumrar gese-o ola fol deḳar ashae aitam sairam. Bodro Iunani zati ba obodro borbor zati, shikkito ba oshikkito, hoḳlor lagi-u to amar eḳ homan dae-bar ase. Erlagi tumra zera Rum ṭauno boshot ḳorrae, ami amar shaiddo mafik tumrar gese-o kush-ḳobri toblig korar lagi kiali. Ḳaron Hozrot Isa al-Mosir befare kush-ḳobri toblig korte ami kunu shorom mono ḳori na, ou kush-ḳobri hunia zera iman ane, tarar zan basanir lagi iṭa oilo Allai bol. Foyla Boni Israilor lagi zera eḳ Alla manoin, bade be-din bin zati oḳlor lagi. Ou kush-ḳobrir maze-u to batail oise, Allae kila manshore be-ḳosur ḳalas hishabe ḳobul ḳoroin. Ḳali imanor mazdi-u manshore aual taki aḳer forzonto be-ḳosur ḳalas ḳoia goinno ḳora oy. Zela kitabo leḳa ase, “Imanor bole-u be-ḳosur ḳalas oa zonor zan basibo.” Manshe nizor naformani dia Allai hokre lukaia raḳe. Tarar naformani ar Allar bae ḍor-ḳof na taḳae asman taki tarar ufre gozob nazil oy. Allar befare zotoḳan buzar takkot ase ita manshor gese forishkar, Allae nize-u to ita zair ḳorsoin. Tan zeta gunagun manshor a-deḳa, mani tan siroḳalin ḳemota ar Allai shobab, ita dunia foyda oar ag taki-u forishkar fuṭia uṭse. Tan foyda ḳora zinish deḳle-u manshe ita buzto fare. Erlagi-u tanre sini na ḳoia kunu manshe bana deḳanir ufae nai. Allar befare otota zanar bade-o manshe tanre Alla babia tan ebadot-bondegi ar shukur-guzari na ḳorae, tarar bisar-bibeḳ oshar oigese ar be-aḳol mon andair oigese. Zudio tara nizore aḳoldar mono ḳoroin, ashole tara be-aḳol. Tara siroḳalin zinda Allar ebadot bad dia ostayi manush, foshu-faki, ar buke solra zandaror murti banaia otar puja ḳorse, Allar faona gourob-mohima otare dise. Erlagi Alla Pake-o tarar dilor bod ḳaish mafik, tarare noforoti ḳamor ato saṛi disoin, otar dae tara eḳe-oinnor loge bodmaishi-beijjoti korer. Tara Allar hokre bad dia misare fosond ḳorse. Foyda ḳorra Allare bad dia, tan foyda ḳora zinishor puja ḳorse. Oile zuge zuge siroḳal hoḳol tarif eḳmatro foyda ḳorra Allar-u. Amin. Manshe olaḳan noforoti ḳam ḳorer dekia, Allae-o tarare ou bod ḳaishor ato shofi disoin. Otar beṭinte-o zamair loge mila-misha bad dia oinno beṭintor loge ḳobisi ḳam ḳorse. Oula beṭainte-o beṭintor loge mila-misha bad dia oinno beṭar loge mila-mishar lagi fagol oigese, beṭainte beṭaintor loge ḳobisi ḳam ḳorse. Erlagi tara forteḳor zindegit zarzir bod ḳamor shaza faira. Manshe tar dil taki Alla Pakre maner na dekia, Allae-o tarare ola bod ḳaishor ḳobisi dilor ato saṛi disoin, erlagi tara ota ḳorat roy. Tara hoḳol nomunar naformani, bod ḳam, lub-lalos, ingsha-ninda, kun-ḳarafi, mara-mari, sol-soturi ar ḳana-ḳani korar lagi ustad. Tara manshor gibot gae, ar Allare ginnae. Tara bod-mizazi, ohonkari, boṛai-beṭagiri ar noya noya naformanir dandae taḳe. Tara ma-bafor-o obaiddo. Neki-bodi buzar aḳol nai, oada ḳelafḳari, fashan, itar dilo kunu doya-maya nai. Tara to Allar i bisaror ḳota bala ḳori-u zane, zera ilaḳan ḳam ḳore, tarar shaza oibo mout. Ikan zania-o, tara ḳali nize ita ḳore na, baki zera ila ḳam ḳore, tarar fokke-o shae dey. Erlagi-u ḳoiram, O manush zati, tumi to oinno zonre dushi shaibosto ḳorrae, ita bisar tumi hiklae kila? Tumar zuaf dibar kunu fot ase ni? Ḳaron tumi nize ze oforad ḳorrae, ou eḳoi oforade tumi aroḳzonre dushi koirae. Te i dush tumar ufre-o foṛer na ni? Amra to zani, zera ilaḳan oforad ḳore, Allae hok insaf mafik tarar faona shaza diba. O manush zati, ze ḳam tumi nize-o ḳoro, ou eḳoi ḳamor lagi tumi aroḳzonre dushi shaibosto ḳoro, te ḳemne buzlae, tumi Allar shaza taki rehai failibae? Tumi to Alla Pakor oshesh meherbani, tan doirjo-shokti ar soborgarire elami korrae. Tan meherbanie tumare ḳali touba ḳorar fote ṭania ney, ikan fauriliso ni? Oile tumar fashan dil ar touba na ḳorar monobabor lagi, tumar ufre Allar gozob dola ḳori toirae, Allae zedin gozob zair ḳorba, hok bisar ḳorba, hou dinor lagi shaza dola ḳorrae. Tain forteḳ manshore zarzir ḳamor fol diba. Zera doijjo doria nek kamor mazdi Allai tarif, ijjot, ar koyhin zindegi tallash ḳore, Allae tarare-u aḳeri zindegi dan ḳorba. Oile zera nizor ḳaishor boshe sole, Allai hokor birudde roy, naformanir fokke taḳe, tarar ufre Allai duḳ-mosibot, gozob ar lannot aibo. Forteḳ naformanor ufre ita aibo, foyla Boni Israilor ufre, bade bin zatir ufre. Oile zera nek kam ḳore, tara forteḳe tarif, ijjot ar shanti faibo. Foyla Boni Israile, bade bin zatie faiba. Allar dorbaro to fokkofatir kunu ḳarbar nai, hoḳol-u homan. Shoriotor baire roia zeta manshe guna ḳorse, tara binash-o oiba shoriot saṛa, ar shoriotor bitre roia zera guna ḳore, ou shoriot mafik-u tarar bisar oibo. Zeta manshe shoriotor boyan ḳali hune, Allar nozoro to tara be-ḳosur nae, oile zera shoriot amol ḳore, tara-u ḳali be-ḳosur ḳalas ḳoia goinno oiba. Bin zati oḳole Allai kunu shoriot na faile-o, tara zebla emne-u shoriot mafik soloin, ou shomoy tarar bibeḳ-u shoriot bonizae. Ete deḳa zae, shoriot mafik zeta ḳora zorur, ita tarar dilor bibeḳor maze leḳa ase. Tarar bibeḳe tarar ḳamor shakki dey, kunu kunu shomoy tarar bibeḳe tarare dushi shaibosto ḳore, ar kunu kunu shomoy tarar fokke-o shae dey. Te Allae zedin Isa al-Mosir mazdi hoḳol manshor lukail amolor bisar ḳorba, hou din-u ita zair oibo. Ar ami oḳon ze kush-ḳobri toblig koriar, ou mafik-u bisar oibo. Tumi zebla nizor forisoy dirae Boni Israil ḳoia, tumi Hozrot Musar shoriotor ufre borosha ḳorrae ar Allar mayar bonda ḳoia boṛai deḳairae. Te Allae tumar ges taki kita asha ḳoroin, tumi kita ḳortae, ikan to tumi zano-u, shoriot taki tumi itar talim faiso. Tumi mone mone ḳoirae, ami to andare fot deḳaiar, andarit zeta asoin, itar gese ami nuror rushoni. Be-aḳolre hedayot ḳoriar, huruttainre talim diar. Tumi buzrae, shoriotor bitre hok ar aḳol-buddi ase. Ita kub bala ḳota, oile tumi zebla oinno manshore hikairae, te nize-o ita hiko na ḳene? Tumi manshore ḳoirae, suri korio na, oile tumi nize-u suri korrae na ni? Manshore ḳoirae, zina ḳorio na, oile tumi nize kunu zina ḳorrae na ni? Tumi to deb-debir murtire ginnairae, hirbar nize-u murtir mondirre luṭ-toraz ḳorrae na ni? Ze shoriot loia tumi boṛai korrae, i shoriotor ulṭa solia tumi nize-u Allare oshomman ḳorrae na ni? Allar kalamo ase, “Tumrar sal-cholon dekia bin zati oḳole Allar namre beijjot ḳorer.” Huno, tumi zudi shoriot mania solo, te mosolmani ḳam ḳoranir dam ase, ar shoriot mafik na solle, mosolmani ḳam ḳoraile-o zeta, na ḳoraile-o ota. Allar nozoro tumi mosolmani na ḳorail be-dinor laḳan. Oḳon mosolmani na ḳoraia-o zudi keu shoriot mania sole, te Allae tare mosolmani korail ḳoia shomzita nae ni? Ar mosolmani na ḳorail manshe zebla shoriot mania sole, te likito shoriot faia ar mosolmani koraia-o zudi tumi er ulṭa solo, taile hou mosolmani na ḳorail beṭae tumare dushito nae ni? Bishoyṭa buzrae ni? Ḳali name Boni Israil oile-u ḳeu asol Boni Israil nae. Shorilor ongo ḳaṭia mosolmani koraile-o to, asol mosolmani oy na. Oile mon taki zera Boni Israil, tara-u asol Boni Israil. Ita kunu likito ain-ḳanunor befar nae, dilor bitoror ruhani befar. Dilor mosolmani-u oilo asol mosolmani. Zogotor manshe erar tarif na ḳorle-o, Allae tarif ḳoroin. Te ilaḳan befar oile, Boni Israil oae baṛti kunu lab ase ni? Mosolmani ḳam ḳoranit kunu fayda ase ni? Nichchoy ase. Bout nomunar fayda ase. Foyla fayda: Alla Pake tan hokkol kalam nazil ḳorsoin Boni Israilor gese. Oboshsho tarar kunu kunu zone beimani korse, ete kita oise? Tara beimani korle-o Alla Pake kunu tarar laḳan beimani korba ni? Nauzubilla! Hoḳol manshe misa matle-o Alla to hamesha hok taḳoin. Fobitro Zobur Shorifo ase: Erbade-o forman milbo tumar zoban shoṭik, tumar fokke ray zaibo. Duniabi manshe ḳoito fare, amrar na-hok kame zebla aro forishkar buza zae Alla Pak koto hok, te amrar na-hoke tan gourob oar bade-o tain amrare shaza dile ita tan oinnae? Nauzubilla. Allae zudi hok insaf na ḳoroin, te tain kila asta zogotor bisar ḳorba? Tara ḳoin, “Amar misa mator mazdi-u buza zae, Alla Pak hok-insafḳari. Ar amar misa mate zebla Allar gourob-tarif oy, te tain amare gunagar shaibosto ḳoroin ḳene?” Ikan kub shundor zukti. Erlagi amra ḳoitam ni, “Ao, amra naformani korat roi, zate ou naformanir mazdi bala fol mile?” Kunu kunu manshe amrar bodnam gaia ḳoin, amra-o bule ola talim dei. Itae tarar faona shaza faiba. Oḳon amra kita ḳoitam? Boni Israil hishabe amrar halot kita bin zati taki bala ni? Nichchoy na. Age-u amra ḳoisi, Boni Israil ar bin zati hoḳol-u gunar gulam. Allar kalamo ase, Be-ḳosur bolte ḳeu nai, eḳzon-o nai; aḳoldar eḳzon-o nai, ḳeu Allar tallash ḳore na. Hoḳol manush be-foti oigese, hoḳol eḳloge naforman oigese, nek kam ḳore ila ḳeu nai, eḳzon-o nai. Tarar muk to fosa lashor kula ḳoyboror laḳan, tarar zibe sol-soturi mate, ar ṭuṭor tole ase, hafor bish. Tarar golar maze boddua ar titta mat-ḳotae bora, kun-ḳarafir lagi tarar fao aguail, tarar foto ḳali binash ar ahazari. Shantir fot tara sine na, tarar dil taki Allar ḍor-ḳof horigese. Amra zani, Hozrot Musar shoriot tarar lagi-u, zerar gese ou shoriot deoa oise. Zate ḳali bin zati nae, shoriot faora Boni Israil-o, mani asta zogotor ḳeu kunta matibar shuzug nai, shob-u Allar bisaror daṛo foṛe. Ḳaron shoriot amol ḳorle-u, Allae manshore be-ḳosur ḳalas ḳoia goinno ḳoriliba, ila kunta nae. Oile shoriotor mazdi-u manush gunar befare hushiar oy. Oḳon to Alla Pake fot batai disoin, shoriot saṛa-o tain kila manshore be-ḳosur ḳalas hishabe goinno ḳoroin. Age tain Tourat Shorif ar nobi oḳlor kitabo ou befare ishara disoin. Ou fot oilo, Hozrot Isa al-Mosir ufre zera iman ane, ou imanor mazdi-u Allae tarare be-ḳosur ḳoia goinno ḳoroin. I befare Boni Israil ouk ba bin zati ouk hoḳol-u eḳ homan. Ḳaron, hoḳole-u guna ḳorse, Allar shan-tozollit hamanir shamorto ḳeuror nai. Oile Isa al-Mosie manshore gunar at taki basanir bebosta ḳorsoin, tain Allar rohomotor dan hishabe manshore be-ḳosur ḳoia goinno ḳorar fot ḳorsoin. Zera tan ufre iman ane, al-Mosie tarar lagi nizor loure koforar kurbani dia Alla Pakre kushi korsoin. Ou nomunae Allae deḳaisoin, zudio tan nizor soborgarir lagi manshor furana gunar shaza dite deri korra, tebou tain hok-insafḳari. Ar oḳon tain ita deḳaisoin, zate forman oy, tain nize hok-insafḳari ar zera al-Mosir ufre iman anoin, tarare be-ḳosur ḳalas ḳoia goinno ḳoroin. Erbade-o manshe boṛai deḳanir kunta ase ni? Na, kunta-u nai. Ḳene nai? Manshe shoriot mane ḳori tar boṛai korar kunta nai ni? Na, asol ḳota oilo, imanor maze boṛai korar zaga nai. Amra zani, Allae manshore tar imanor lagi-u be-ḳosur ḳalas ḳoia goinno ḳoroin, shoriot manar lagi nae. Te Alla ḳali Boni Israilor ni, bin zatir lagi-o nae ni? Nichchoy, tain bin zatir-o Alla. Ḳaron Alla to eḳzon-u. Tain Boni Israilre zela imanor mazdi be-ḳosur ḳoia goinno ḳoroin, ola bin zati oḳolre-o ḳorba. Oḳon ḳo sain, imanor lagi amra shoriot batil ḳorram ni? Na, muṭe-u na! Borong amra shoriotre mozbut ḳoriar. Te amrar ḳandanor mul baf Hozrot Ibrahimor zindegir befare kita ḳoitam? Tain kita faila? Shoriot manar lagi-u zudi tanre be-ḳosur ḳoia gona oy, te tain nizor boṛai deḳaita faroin, oile Allar dorbaro to nae. Ḳaron Allar kalamo ase, “Ibrahime Allar ufre iman anae, Allae tanre be-ḳosur ḳalas ḳoia goinno ḳorla.” Ḳamlae ḳam ḳoria ze beton fae, ikṭa kunu dan nae, ikṭa tar faona mozuri. Oile kunu manshe zudi nizor amolor ufre borosha na ḳoria, ḳali tan ufre iman ane, zein gunagarre be-ḳosur ḳoia goinno ḳoroin, te tar imanor lagi he ḳalas fae. Ar niz amol saṛa Alla Pake zare be-ḳosur ḳoia goinno ḳorsoin, Hozrot Daude-o tare nek-kofali koisoin. Fobitro Zobur Shorifo tain ḳoira, Nek-kofali tara-u, zerar naformanire maf ḳora oise, Mabud Moulae zerar gunare ar hishabo dorta nae. Nek-kofali hou zon, zar gunare Allae tar amol-nama taki kaṭi disoin. Te nek-kofali kali tarare-u ḳoa oise ni, zerar mosolmani ḳam ḳorail oise? Mosolmani na ḳorail manshore-o ḳoa oise na ni? Oy, tarare-o nek-kofali koa oise. Ḳaron Allar kalamo faisi, Hozrot Ibrahimor imanor lagi-u, Allae tanre be-ḳosur ḳalas ḳoia goinno ḳorla. Kun shomoy ḳorla? Mosolmani koranir age, na bade? Nichchoy, mosolmani koranir age-u oisla. Mosolmani ḳam ḳoranir age-u Allae tanre imanor lagi be-ḳosur ḳoia goinno ḳorsla, ar mosolmani ḳam ḳorani asil er forman ba nishana. E taki buza zae, mosolmani na dile-o, ḳali imanor lagi zerare be-ḳosur ḳalas ḳoia dora oy, tarar mul baf oila Hozrot Ibrahim. Mosolmani koranir age Hozrot Ibrahimor iman zelaḳan asil, mosolmani koraia zoto manshe ou imane sole, tarar-o mul baf oila ou Ibrahim. Alla Pake oada ḳorsla, Hozrot Ibrahim ar tan ḳandanre i duniar doḳoldari diba. Shoriot manar lagi i oada ḳora oise na, borong Ibrahimor imanor lagi-u tanre be-ḳosur ḳalas ḳoia goinno ḳoria ou oada ḳorsla. Shoriot mania ḳeu zudi doḳoldari failae, te to iman beḳama bonizae ar Allar oadar-o kunu dam roy na. Shoriote to Allar gozob lamae. Asol ḳota oilo, zeḳano shoriot nai, ino shoriot bongor ḳota-o nai. Erlagi i oada ḳali manshor imanor mazdi fura ḳora oy, zate iṭa Allar rohomotor dan hishabe roy. Te Ibrahimor ḳandanor gese ze oada ḳora oise, ikan nichchoy fura ḳora oibo. Ḳali shoriot manra oḳlor lagi-u furon ḳora oito nae, zera Ibrahimor imanor loge shorik, tarar lagi-o i oada fura ḳora oy. Allar kalamo zela leḳa ase, “Ami tumare bout zatir mul baf banailam.” Ou hishabe Allar nozoro Ibrahim oila amra hoḳlor mul baf. Zein morare zindegi dein ar zeta oar nae, ota oaita faroin, hou Allar ufre tain iman ansla. Ou Ibrahime zebla aolad faoar kunu asha ḳorar ḳota nae, hou shomoy-o tain Allar ufre borosha ḳoria imane mozbut roisoin. Allae tanre ḳoisla, “Tumar ḳandanre ami asmanor terar laḳan behishab ḳormu.” Ar ou ḳotar ufre tain iman anla. Eḳ-sho bosor boyoshor Ibrahime zudio buzchila, hurutta zonom deoar ḳemota ar tan nai, tan bibi Saerar-o hurutta oar boyosh shesh oigese, tebou tan iman mozbut asil. Allar oadar befare tan mono kunu shondoy aise na, borong tain imane aro mozbut oia Allar tarif ḳorla. Ibrahime furafur ekin ḳorla, Allae ze oada ḳorsoin, ita fura ḳorar ḳemota-o tan ase. Ou ḳarone-u tan imanor lagi tanre be-ḳosur ḳoia goinno ḳora oisil. “Be-ḳosur ḳoia goinno ḳora oisil,” ikan ḳali Ibrahimor lagi leḳa oise na, amrar lagi-o leḳa oise. Imanor lagi-u Allae amrare be-ḳosur ḳoia goinno ḳorba, ḳaron ze Allae amrar Malik Isare murda taki zinda ḳorsla, amra tan ufre-u iman anchi. Amrar gunar kofora hishabe ou Isare moutor ato tuli deoa oisil, ar amrare be-ḳosur ḳalas ḳoia goinno ḳorar lagi tanre murda taki zinda ḳora oisil. Imanor mazdi amrare be-ḳosur ḳalas ḳoia goinno ḳora oise, gotike Malik Isa al-Mosir usillae Alla Pak ar amrar maze shu-shomporko boail oise. Ou ze rohomotor tole amra asi, al-Mosie amrare i zagat ania fosaisoin. Erlagi Allar mohima faoar ashae amrar mon oḳon nichchit kushie bori gese. Ḳali ikan nae, amra duk-koshṭor maze-o kushi-bashi korram. Ḳaron duk-koshṭoe sobor ane, sobre meoa fole, ou meoae asha-borosha ane, ar ou asha-borosha beḳama zae na. Ḳaron Allae amrare ze Pak Ruhu disoin, i Pak Ruhe amrar dilor maze Allai mohobbot zonmae. Amra to ḳomzur-lasar aslam, shoṭik shomoye amrar laḳan gunagarre basanir lagi, al-Mosie nizor zan kurbani dila. Kunu forezgar manshor lagi shadaronoto ḳeu zan dilaito sae na, ta-o kub bala zonor lagi aḳta ḳeu dile-o dilaito fare. Oile amra gunagar halote-u al-Mosie amrar lagi nizor zan kurbani disoin. Oḳan taki forman mile, Allae amrare ḳoto maya ḳoroin. Ar al-Mosir kurbanir usillae zebla be-ḳosur ḳalas ḳoia goinno oisi, te oḳon al-Mosir mazdi amra Allar shaza taki-o rehai faimu, iṭa to shullo-ana nichchit. Amra age Allar dushmon aslam, hou shomoy tan ḳas mayar zon Ibnullar moutor usillae, tan loge amrar milon oise. Te to al-Mosir zinda oia uṭar mazdi oḳon aro beshi nichchit, amra nazat faimu. Ḳali ikan nae, zar usillae ou milon oise, amrar malik ou Isa al-Mosir mazdi oḳon Allar name kushi-bashi-o ḳorram. Eḳzon manshor mazdi duniait guna aia hamaisil, ar ou gunar mazdi mout-o aisil. Bade hoḳol manshe-u guna ḳorse, erlagi hoḳlor lagi-u mout aia azise. Hozrot Musar shoriot nazilor age-o duniait guna asil. Oile shoriot asil na gotike gunare hishabo dora oito na. Ta-o Baba Adom taki Musa nobir amol forzonto zera Adomor laḳan shorashori Allar hukumre bangise na, tarar ufre-o moute beṭagiri korse. Te kunu kunu ḳarone Baba Adomor loge, bade toshrif ana ou al-Mosir-o mil asil. Oile Baba Adomor naformani ar Allar rohomotor danor maze bout tofat ase. Hou eḳzonor naformanir dae boutor lagi mout ailo ar aroḳzon, mani Isa al-Mosir meherbanir mazdi ze rohomoti dan ailo, Allar i rohomot aro bout beshi baṛi gelo. Ar eḳzon manshor gunae zela fol deḳa gelo, Allar rohomotor dan to ilaḳan nae. Ḳali eḳzon manshor gunar lagi bout manshore dushi shaibosto ḳora oise. Oile bout beshi forimane guna ḳorar bade-o Allar ou rohomote bout zonre be-ḳosur ḳalas ḳoia goinno ḳora oise. Eḳzon manshor gunar lagi zebla moute amrar ufre beṭagiri korse, te dusra aroḳzon, mani Isa al-Mosir mazdi amra zera Allar rohomote be-ḳosur ḳalas hishabe goinno oisi, amra-o ola ḳoto beshi nichchit oia Allai zindegi faia hoḳoltar ufre razotto ḳormu. Asol ḳota oilo, eḳzon manshor gunar lagi zela hoḳol manshore dushi shaibosto ḳora oise, oula eḳṭa nek kamor mazdi hoḳol manshore be-ḳosur ḳalas ḳoia goinno oar shuzug deoa oise. Ou shuzugor fol oilo aḳeri zindegi. Zemon doro, eḳzon manshor obaiddotar lagi bout manush gunagar oisoin. Oula eḳzon manshor baiddotar lagi bout manshore be-ḳosur ḳalas ḳoia goinno ḳora oise. Ermaze shoriotor hukum-ahkam-o nazil oigelo, zate i naformanir hishabor foriman aro baṛi zae. Oile naformani zeno baṛilo, ino Allar rohomot aro bout baṛigelo. I rohomot baṛilo, zate moutor mazdi age gunae zela beṭagiri korsil, oḳon be-ḳosur ḳalas oar mazdi Allar rohomote oula razotto ḳore. Ar otar fol hishabe amrar Malik Isa al-Mosir usillae aḳeri zindegi fai. Te oḳon amra ola ḳoitam ni, amrar ufre zate Allar rohomot aro baṛe, erlagi amra aro guna ḳorat roi? Nauzubilla, muṭe-u na! Gunar babote amra to morigesi, te i murda halote oḳon ar ḳemne gunar ḳamo roitam? Aichcha, amra zoto zone al-Mosir name toubar gusol ḳorsi, amra to tan moutor loge-o shorik oisi. Ou gusolor ḳalo amrare to al-Mosir loge ḳoybor deoa oise. Ar gaibi baf Allae tan moha kudrote al-Mosire zela ḳoybor taki zinda ḳori tulchoin, ṭik oula amra-o zanu noya zindegie din ḳaṭai. Ar amra zebla al-Mosir mouto shorik oisi, te tain zela murda taki zinda oia uṭsoin, ola amra-o tan zinda oar loge shorik roimu. Amra ikan zani, amrar shorilor bod ḳaishre beḳama ḳorar niote amrar furan ‘ami’re al-Mosir loge solibor ufre maria falail oise, zate amra ar gunar gulam na roi. Ḳaron zar mout oizae, he to gunar ḳobza taki kalas failise. Te al-Mosir loge zebla amrar moron oise, oḳon amrar iman oilo, tan loge zindegi-o faimu. Amra zani, al-Mosi murda taki zinda oia uṭisoin ḳori tan ar mout oito nae. Moutor kunu ḳemota tan ufre nai. Ashole tan ze mout oise, ita to gunar ḳemota binash ḳorar lagi kali eḳbar-u oise. Ar oḳon tan ze zindegi ase, iṭa to Allar mohimar lagi zinda asoin. Ṭik oula, tumra-o mono ḳorio, gunar ḳemotar befare tumrar moron oigese, oḳon ḳali Isa al-Mosir name Allar mohimar lagi zinda aso. Erlagi moutor zuka tumrar i shorilor ufre gunare kunu laḳan beṭagiri korte dio na, shorilre bod ḳaishor ato shofi dio na. Shorilor kunu ongore bod ḳamor atiar banaio na. Borong nizore murda taki zinda oa zon mono ḳoria furafuri Allar ato shofi deo, shorilor hoḳol ongore nek kamor atiar hishabe Allar name bilai deo. Tumra to gunar gulam nae, shoriotor aotae-o nae, ḳali Allar rohomotor tole aso. Te oḳon kita ḳortam? Shoriotor aota taki saṛa faia, Allar rohomotor aotae asi kori, amra ḳali guna ḳortam ni? Nauzubilla, muṭe-u na! Tumra buzo na ni, tumra zebla nizore ḳeuror ato shofi dia tar hukum mafik solo, te emne-u to tar gulam bonizao. Olaḳan tumra hoyto gunar gulam bonia morbae, arnae Allar gulam bonia nek kam ḳorbae. Alla Pakor shukur, age zudio tumra gunar gulam aslae, ta-o Isayi torikar talim faia hari, dile-zane itar ashik oiso. Gunar gulami taki saṛa faia, nek kamor gulam oiso. Baiainre, tumrar aḳolor ḳomzuri dekia ami tumrar loge manush bulie matiram, age zela tumrar shorilor ongore nafaki ar bod ḳaishor gulam banaislae, oḳono ṭik oula, fak-fobitro zindegi kaṭanir lagi, zarzir ongore nek kamor gulamit shofi deo. Tumra zebla gunar gulam aslae, i shomoy to nek kamor day-dayitto taki azad aslae. Agor bod ḳam-ḳazor ḳota mono oile oḳon tumrar shorom lage, te ḳo sain, ita ḳame tumrar kita lab oito? Itar hesh fol to moron. Oile oḳon tumra gunar gulami taki azad oia, Allar fotor gulam bonia fak-fobitro zindegi kaṭairae, er hesh fol to aḳeri zindegi. Ashole gunar mozuri oilo mout, oile Allar rohomotor dan oilogi amrar Malik Isa al-Mosir usillae aḳeri zindegi. Te O bai oḳol, Hozrot Musar shoriotor bishoy to tumrar zana-u ase. Ta-o tumra buzo na ni, shoriotor dabi-daoa manshor ufre boail taḳe, ḳali zinda taḳa forzonto. Zela, zamai zotodin zita ase, otodin tar bou tar aotae banda roy, ar zamair moutor bade tar bou i bandon taki kalas fae. Ar zamai zita taḳte bou zudi dusra beṭar gese hanga boy, taire to zinakur hishabe gona oy. Oile zamair moutor bade tai zamair bandon taki ain mafik kalas fae, erbade tai oinno zonor gese bia boile zinakur nae. Baiainre, ṭik ou laḳan-u, al-Mosir shorilor moutor mazdi shoriotor bandon taki tumrar mout oigese ḳori, oḳon tumra oinno zonor bandono zaitae faro, ar ou oinno zon oila, murda taki zinda oa hou Isa al-Mosi, zate amrar zindegit Allar name nek fotor fol dore. Age zebla amra shorilor morzie soltam, ou shomoy shoriote amrar mazor gunar bod ḳaishre kusaia hozag korto, ou ḳarone amrar shorilor ongo oḳole moutor foti gunar fol dorto. Te age amra ze shoriotor bandono aslam, ita taki amrar mout oigese, oḳon amra i shoriotor bandon taki kalas faisi. Erlagi amra ar hi likito shoriotor gulam nae, ḳali Allai Pak Ruhe noya zindegir gulami kori. Oḳon amra ola ḳoitam fari ni, shoriote-u guna ḳorae? Nauzubilla, muṭe-u na! Asol ḳota oilo, shoriot na taḳle to ami buztam farlam na one, guna ki zinish. Shoriote zudi na ḳoito, lub-lalos ḳorio na, te lalos ḳorle kita oy, ita amra buzlam na one. Ar ou hukumor shuzug buzia amar bitre guna hamaia, hoḳol nomunar lub-lalos zonom dise. Shoriot na taḳle to guna-o morar laḳan sufsaf roy. Amar zindegit shoriotre balamonte sinar age ami to zita aslam, oile ou hukum zanar loge loge-u guna hozag oilo, ar amar mout oilo. Buzrae ni, ze shoriote ami zindegi faoar ḳota, hou shoriote amar lagi moron loia ailo. Shoriotor ou hukumor shuzug faia gunae amare ṭogilo, ou hukumor bole-u gunae amar zan ḳaṛia nilo. Oile ikan to hasa, Musa nobir deoa shoriot fobitro, er hukum-ahkam-o fobitro, ita shoṭik ar bala zinish. Te ou bala zinishe-u kita amar moron anlo ni? Nauzubilla, muṭe-u nae! Borong gunae-u ita ḳorse, he bala zinish dia amare maria hari forman deḳailo, guna to guna. Ar ou hukum-ahkame-u buza zae, guna oilo mosto boṛo zogoinno. Amra to zani, shoriot oilogi ruhani zogotor, oile ami oilam roḳto-mangshor zogotor, ami shorilor morzir bandono taḳae gunar gulam oisi. Ami nize-u to buzi na, ami kita ḳam ḳori. Ashole ami zeta ḳortam sai, ita na ḳoria, zetare ginnai ota-u ḳori. Ar zeta ḳortam sai na, ola gunar ḳam zebla ḳori, te ami emne-u shikar ḳoriar, shoriot ashole-o bala zinish. Ita taki buza zae, ami nize ila ḳoriar na, oile amar maze ze gunae boshot ḳore, he-u amare dia ita ḳorae. Ar ami to buziar, amar lour maze, mani shorilor ḳaishor maze bala kunu zinish-u nai. Ami nek kam ḳorar kial taḳle-o, amar shamortoe kulae na. Ḳaron ami zeta nek kam ḳortam sai, ita ḳortam fari na, oile ze bod ḳam ḳortam sai na, ota-u ḳori. Te zeta ḳortam sai na, ota-u zebla ḳori, er mani oilo ita ami kori na, borong ze gunae amar maze boshot ḳore, he-u ita ḳorae. Oḳon amar nizor bitre-u dekiar, eḳṭa bod rifue ḳam ḳorer, ami nek kam ḳorat lagle, bod ḳam emne-u aia azi zae. Ashole amar dilor ḳaislot mafik ami Allai hukum-ahkame kushi oi. Oile amar shorilor ongor maze dusra arok kaislote ḳam ḳorer, amar dile nek kamre fosond ḳorle-o, ou bod ḳaislote amar dilor loge zuddo ḳoria, amare tar gulamit bandia raḳe. Amar boṛo bod nosib! Amar shorilor ou bod ḳaislot, zegie amare moutor fote ṭane, tar at taki ḳe amare basaibo? Allar shukur, amrar Malik Isa al-Mosie tar at taki amare basaisoin! Oḳon nichchit buza zae, dilor dik taki ami Allai shoriotor gulami kori, oile shorilor morzir dik taki ami gunar ḳaislotor gulami kori. Te ou talim taki amra buzi, Isa al-Mosir zera afon zon boni gesoin, oḳon tarare ar dushi shaibosto ḳora oito nae. Guna ar moutor at taki amare ḳalas ḳora oise, zindegi deora ruhe Isa al-Mosir usillae ḳalas ḳorsoin. Roḳto-mangshor shorilor bod ḳaishor lagi shoriote amrare basaito farse na, ar shoriote zeta ḳorto farse na, Allae to nize-u ita ḳorsoin. Tain tan nizor ḳas mayar zon Ibnullare amrar laḳan gunagar manshor surote faṭaila, gunar ḳemotare binash ḳorar lagi. Ar ou mayar zonor zan kurbanir mazdi gunar bisar ḳoria tar ḳemotare batil ḳori dila. Tain amrar fokko loia ita ḳorla, amra zera roḳto-mangshor shorilor ḳaishe na solia ruhur boshe soli, ou amrar lagi shoriotor dabi-daoa adae ḳorla. Shorilor bod ḳaishor aotae zeta manush soloin, tarar mon-o bod ḳaishor bae kiali taḳe, ar zera Pak Ruhur aotae, tarar mon to Pak Ruhur kushi mafik solte kiali roy. Shorilor bod ḳaish ze ḳamor kiali, itar fol oilo moron, oile Pak Ruhur kiale solar fol oilo zindegi ar shanti. Ze zonor mon shorilor bod ḳaishor bae kiali, i mon to Allar dushmon, he Allai shoriot mante razi nae, manto fare-o na. Erlagi-u zeta manush shorilor bod ḳaishor aotae soloin, tara Allare kushi korta faroin na. Oile tumrar dilo zebla Allar ruhu boshot ḳoroin, te tumra to shorilor bod ḳaishor aotae nae, borong Pak Ruhur aotae. Asol ḳota oilo, al-Mosir ruhu zar maze nai, he al-Mosir nae. Ar hasau zudi al-Mosi tumrar maze taḳoin, te gunar fol hishabe tumrar shoril morar foti oile-o, Pak Ruhur fol hishabe tumra to zinda. Allae to tumrare be-ḳosur ḳalas ḳoia goinno ḳorsoin. Ar hou Isare zein murda taki zinda ḳorsoin, ou Allar ruhu zebla tumrar dilo boshot ḳoroin, te tan ou ruhur bole moutor aotae taḳa tumrar shorilre-o zindegi dan ḳorba. Erlagi O bai oḳol, shorilor bod ḳaishor gese amra ar ṭeḳat nae, ou bod ḳaishor odine solar-o zorur nae. Oḳon shorilor bod ḳaishor aotae solle to tumra siroḳalor lagi morbae, oile Pak Ruhur bole shorilor hoḳol naformanire binash ḳorille siroḳal zinda roibae. Ḳaron Allar ruhur bole zera sole, tara-u Allar aolad. Tumra to gulamir ruhu faiso na, te ar ḍoraitae ḳene? Tumra ḳali hou Allar ruhu faiso, zein tumrare aolad oar eḳtiar disoin. Erlagi-u Alla Pakre amra ruhani abba, fobitro baba ḳoia ḍaki. Amrar dilor mazor Allai Pak Ruhe-o ola shakki dia ḳoira, amra Allar aolad. Amra zebla aolad, te amra mouroshi baṭ faimu. Al-Mosie Allar ges taki mouroshi baṭ faiba, ar tan loge amra-o faimu. Ḳali amra tan loge duk-koshṭo shoijjo ḳorle, tan loge gourob-mohimar-o bag faimu. Baiainre, amra bade ze mohima faimu, itar tulonae oḳonkur i duk-koshṭo kunta-u nae, ita to ami zani. Hou shomoy aile deḳa zaibo ḳe ḳe tan asol aolad, erare deḳar lagi-u Allar foyda ḳora hoḳoltae zane-forane bar saira. Ḳaron tan foyda ḳora hoḳolta-u oḳon oshar oigese. Ita kunu nize nize oshar oigese ni? Na, borong Allae-u tarare hou fote saṛi disoin. Oile erloge tain ou asha-o disoin, eḳdin ita hoḳolta binashor at taki kalas oia, Allar aolad oḳlor shadinota ar gourobor bagi oito farbo. Oḳon forzonto dekiar, hurutta foydar ḳalo maʼe zela buk faṭaia sillain, tan foyda ḳora hoḳoltae-u ola ahazari kori sillaira. Ḳali ikan nae, amra-o hou ze mohima bade faimu, er foyla kishti hishabe Allai Pak Ruhre oḳon faisi, faia baki kishtir lagi amra-o ola sillaiar. Ar hou kishti faoar dinor lagi bar saiar, ze din amrare Allar aolad hishabe zair ḳora oibo, mani ze din amrar shorilre binashor at taki kalas ḳora oibo. Amra ḳalas oar ou asha faisi, iman anar ḳalo. Te zeta zinish manshe dekilae, ita deḳar lagi he ar asha ḳore na, zeta deḳa oigese, itare deḳar asha ar ḳene ḳorto? Oile na deḳa zinishre deḳar lagi amra doijjo doria bar sai. Ita saṛa amrar ḳomzurir shomoy to Pak Ruhe amrare shaijjo ḳoroin. Dua ḳorar ḳalo amra kita saitam, ita to amra zani na. Oile mukdi zeta ḳoar shaiddo nai, dilor ḳandonor loge Pak Ruhe nize-u amrar fokko oia, itar lagi minoti koroin. Ḳaron zein manshor dilor tallash ḳoroin, tain to Pak Ruhur ḳota-o buzoin. Pak Ruhe Allar morzi mafik tan pak bonda oḳlor lagi minoti koroin. Amra zani, Allare zera mohobbot ḳoroin, mani Allae tan nizor morzi mafik zerare daot disoin, tarar balair lagi hoḳoltae eḳloge ḳam ḳorer. Allae zerare ag taki-u tan nizor lagi fosond ḳori raḳsila, tarare tan ḳas mayar zon Isar laḳan oar lagi-u fosond ḳorsila, zate ou Isa Ibnulla-u, era hoḳlor boṛo bai oin. Tain age zerare fosond ḳorsila, tarare-u daot dila. Ar zerare daot dila, tarare be-ḳosur ḳalas ḳoia goinno ḳorla, ar zerare be-ḳosur goinno ḳorla, tarare tan nizor gourob-mohima-o dan ḳorla. Oḳon ita befare amra kita ḳoitam? Shoyong Alla Pak zebla amrar fokke, te amrar bifokke ḳegu lagto? Amra hoḳolre basanir lagi, Allae zebla tan ḳas mayar zon Ibnullare bilai dite-o naraz oila na, tanre moutor ato shofi dila, te ou mayar zonor loge hoḳolta-u amrare dan ḳorta nae ni? Ar Allae tan nizor lagi zerare fosond ḳorsoin, erar birudde nalish dibar shaiddo ḳar? Allae nize-u tarare be-ḳosur ḳalas ḳoia goinno ḳorsoin. Te tarare ḳegue dushito? Zerar lagi hou Isa al-Mosir mout oise, moutor bade zinda ḳorio tula oise, tain oḳon Alla Pakor ḍain galar toḳto boia, amrar lagi minot-ḳajji korat asoin. Erlagi ila kunu zinish ase ni, zetae amrare al-Mosir mohobbot taki alog korto? Zulum-nirjaton, zala-zontrona, monor ḳoshṭo, ḳaoa-findar obab, bifod-afod ba dushmonor toluar? Fobitro Zobur Shorifo ase, Tumar namor lagi amrare hor-hamesha kun ḳora or. Manshor sokut amra oilam bolir faṭa. Na, ila kunta-u nai. Ḳaron ze Isae amrare oto mohobbot ḳorsoin, tan bole amra ita hoḳoltat-u furafur joyi oiar. Te ami ikan balamonte-u zani, zindegi ba mout, firista ba Iblisor kunu sela, oḳon ba bobishotor kunutae-u, kunu laḳan shoktie-u, asmanor ba fatalor ba foyda oa kunu zinishe-u amrare Allar mohobbot taki alog korto farto nae. Tan ou mohobbot to amrar Malik Isa al-Mosir usillae faisi. Ami al-Mosire shakki rakia, ekkere hasa ḳota ḳoiram, amar bibeḳe-o Pak Ruhur loge oia ou shakki der. Boni Israilor lagi amar boṛo afsus ar shimahin ḳoshṭo lager. Haere hae, ami lannotir ḳataro gia al-Mosir ges taki horail oia-o zudi, amar zatir baiain Boni Israilre basaitam fartam. Allae to Boni Israilre tan nizor aolador eḳtiar disoin, tan shan-tozolli deḳaisoin, tan loge milonor usilla oḳol ḳaim ḳorsoin, shoriot nazil ḳorsoin, tan ebadot-bondegir shuzug kori disoin ar bout laḳan oada-o ḳorsoin. Hozrot Ibrahim, Isʼhak ar Iakub nobi asla Boni Israilor mul murobbi. Bade Isa al-Mosi-o to roḳto-mangshor bae taki erar ḳandano-u zonom loisoin, ein hoḳoltar uforala, zuge zuge siroḳal tan tarif ouk. Amin. Huno, Allar oada oḳol oḳon zen beḳama oigese, ila kunta nae. Ḳaron Boni Israilor maze zonom oilo ḳori-u, era hoḳol to asol Boni Israil nae. Hozrot Ibrahimor ḳandan ḳori-u tara zen tan asol aolad, ila kunta nae. Borong kitabo leḳa ase, “Tumar fua Isʼhakor ḳandanre-u tumar ḳandan ḳoia gona oibo.” Mani Israil zatir maze zonom oise gotike-u mono ḳorio na, tumra Allar aolad bonigeso. Ḳali Allar oada mafik zera aolad bonche, tarare-u Ibrahimor ḳandan hishabe goinno ḳora oibo. Buzrae ni, Allae to Hozrot Ibrahimor gese ou oada ḳorsla, “Samnor bosor ou sando ami firia aimu, ou shomoy tumar bibi Saerar kulo eḳ fua taḳbo.” Ar ou fua oila, amrar furbofurush Hozrot Isʼhak. Ḳali ikan nae, ou Isʼhakor bibi Rebekar feṭor zuṛor fuain eḳoi bafor aolad oile-o, Erlagi-u Pak Kitabo leḳa ase, “Ami to Iakubre mohobbot ḳorsi, oile tar bai Ishʼre horaia raḳsi.” Te oḳon amra ḳoitam ni, Allae-o obisar ḳoroin? Nauzubilla, muṭe-u na! Allae Hozrot Musare ḳoisla, “Ami zare kushi doya ḳormu, ar zare kushi rohom ḳormu.” On taki buza zae, rohomot to ḳeuror sesṭae ba ichchae mile na, ḳali Allar meherbani taki-u mile. Asmani Kitabor ayato ase, Allae Feraunre ḳoisla, “Ami tumare bashsha banaisi, zate tumar mazdi hoḳole amar lila-ḳela dekia, hara duniait amar nam zair oy.” Te deḳa zae, Allae tan nizor kushi mafik ḳeurore doya ḳoroin, ar ḳeuror dilre fashan banain. Oḳon tumra amare zikaitae faro, “Allar morzir baira zebla ḳeu kunta ḳorto fare na, te Allae ḳene manshor dush-tiruti gonoin?” I soalor shuza zuaf oilo, Allar ufre matar tumi ḳe? Ḳeu zudi kunu zinish banae, te tar banail zinishe zikaito farbo ni, amare ḳene ila banailae? Eḳ maṭi taki kumare nanan zator zinish banaito fare na ni? Itar kunuṭa ijjoti ḳamo ar kunuṭa shadaron ḳamo lage. Ṭik olaḳan, Allae tan lannot ar kudroti ḳemota deḳaita saisla, ar zerar ufre i lannot ḍalita saisla, erar faona asil ḳali binashi gozob, ta-o tain bout boṛo sobor ḳoria tarar ita shoijjo ḳorla. Tain ita shoijjo ḳorla, ḳaron aroḳbar nizor kudroti shan-tozollir ḳota zanaita saila. Ar zerare doya ḳorsoin, erare tain age taki-u zuit ḳoria raḳsila, tan shan-tozolli deḳanir kiale. Ashole amra-u oilam hou doyar zon. Amrare tain ḳali Boni Israilor maz taki-u daot dia anchoin na, oinno zatir maz taki-o to anchoin. Hozrot Husia nobir sohifat Allae ḳoisoin, Zeta manush amar proza nae, tarare-o amar nizor proza banaimu. Ar zera amar mayar manush asil na, tarare-o mayar manush ḳoia ḍaḳmu. Ze zomino ḳoa oisil, tumra amar proza nae, hou zomino-u tarare zinda Allar aolad ḳoa oibo. Oile Boni Israilor befare Hozrot Ishaya nobie ḳoisla, Gonar bala zudio tara doriar soror balur laḳan behishab, tebou tarar mazor kub huru eḳ ongshoe ḳalas faiba. Mabud Moulae zogotor faona ze shaza zuit ḳorsoin, ou shullo-ana shaza kub zoldi-u diba. Hozrot Ishaya nobie aro bataisoin, “Alla Rabbul Alamine zudi amrar lagi kisu manshore zinda na raḳta, te amrar dosha to lannoti Sadum ar Amura ṭaunor laḳan oilo one.” Te amra ou ḳota-u ḳoimu, bin zati oḳole zudio Allar forezgar bonda oar sesṭa ḳorse na, tebou iman anar mazdi tara Allar dorbaro forezgar bonigese. Ar Boni Israile ḳali shoriot mania forezgar bonto saisil, oile shoriot manto farse na. Aichcha, tara ḳene farse na? Tara imanor ufre borosha na ḳoria, ḳali ḳam-ḳazor amolor ufre borosha ḳorse, erlagi farse na. Manshe ze fattoro usṭa ḳain, tara-o ou fattoro usṭa ḳaisoin. I befare Asmani Kitabo leḳa ase, Huno, ami Zeruzalemo ola eḳ fattor boaisi, ze fattoro manshe usṭa ḳaia foṛbo. Oile ze zone tan ufre iman anbo, he kunumonte-u shorminda oito nae. Te O bai oḳol, Boni Israilor lagi amar dilor ou foriad ase, ami Allar dorbaro dua ḳoriar, tara zanu nazat fain. Tarar befare ami oḳan-u ḳoiram, tarar monor maze Allar eshki ase, oile tara zane na, Allar dorbaro ḳemne forezgar bona zae. Allar dorbaro be-ḳosur ḳalas oar fot na zanae, tara i fotre manche-o na, tara ḳali shoriot amol ḳoria forezgar bonto sae. Ou shoriotor hoḳol dabi-daoa al-Mosie to adae ḳorilsoin, erlagi tan ufre zera iman ane, Allar dorbaro tarare be-ḳosur ḳalas ḳoia goinno ḳora oy. Shoriot amol ḳoria Allar dorbaro forezgar oar befare, Hozrot Musae Tourat Kitabo leḳsoin, “Zera shoriot manto sae, tara furafur manle basibo.” Ar imanor bole manush kila Allar dorbaro forezgar bone i befare Allar kalamo leḳa ase, “Mone mone ḳoio na, ḳe gia asmano uṭito?” Er mani oilo, hono uṭia al-Mosire lamaia anto. Ba ikan-o ḳoio na, “Ḳe gia fatalo lamto?” Er mani oilo, hono lamia al-Mosire ḳoybor taki tulia anto. Na ila kunta nae, ḳaron leḳa ase, “Ashole Allar kalam to tumar kub daro ase, ita tumar muko ar tumar dilo ase.” Ar amra zeta toblig korram, ita-u to hou kalam. Oḳon tumi zudi muke shikar ḳoro Hozrot Isa-u malik, ar dile ekin ḳoro, Allae tanre murda taki zinda ḳorsoin, te tumi aḳer faibae. Ḳaron dile iman anle Allae manshore be-ḳosur ḳalas ḳoia goinno ḳoroin, ar muke shikar ḳorle Allae nazat dan ḳoroin. Allar kalame batae, “Ze zone tan ufre iman anbo, he kunumonte-u shorminda oito nae.” Boni Israil ouk ba bin zati ouk, erar maze kunu tofat nai, ḳaron hoḳlor malik to eḳzon. Ze manshe Allar nam loy, Allae tare bout meherbani koroin. Allar kalame to ḳoy, “Zekunu manshe Mabudor name ḍakile, he nazat hasil ḳorbo.” Oile zan ufre tara iman-u anche na, tanre kila ḍakibo? Ar zan befare tara hunche-u na, tan ufre iman anbo kila? Toblig korra na taḳle, tara hunbo kila? Ar tobligo ḳeu na faṭaile, tara kila tobligo zaibo? Zela Allar kalamo batail oise, “Doinno tarar fao ḳanain, zera aṭi aṭi kush-ḳobri toblig koroin.” Oile hoḳol manshe to i kush-ḳobrire ḳano ṭai dey na. Hozrot Ishaya nobie ḳoisoin, “O Mabud, amrar toblig hunia ḳe iman anche?” Te deḳa zar, Allar kalam hunle iman ae, ou kalam oilo, al-Mosir befare toblig. Oile ami koiram, Boni Israil oḳole i kalam hunche na ni? Nichchoy hunche. Pak Kalame ḳoy, Tarar aoaz to hara duniait sitri gese, sitri gese tarar mat-ḳota, duniar eḳ mata taki aroḳ mata forzonto. Ami hirbar ḳoiram, Boni Israile hou kalam buzchoin na ni? Nichchoy buzchoin, Allae to Hozrot Musa nobir mazdi tarare ḳoisoin, Zeṭa zati nai ila zati dia ingsha ḳoraimu, ammok zati dia tarar gusa tulaimu. Bade Ishaya nobie kub shaosh ḳoria i ayato ḳoisoin, Amare zera tallash ḳorse na, tara-u amare faise. Amar gese zera kunta saise na, tarare ami didar disi. Oile Boni Israilor befare tain ḳoira, Ami at baṛaia ḍakiram, hara din dori duio ate ḍakiram, naforman ar fashan eḳ zatire ḍakiram. Erlagi ami oḳon zikairam, Allae kunu tan afon bonda Boni Israilor log saṛi disoin ni? Nichchoy na! Ḳaron ami nize-o to eḳzon Boni Israil ar Hozrot Ibrahimor bongshodor, Bin-Iamin ḳandanor manush. Allae foyla taki tan ze prozare fosond ḳoria alog korsila, tain to erar log saṛsoin na. Hozrot Ilias nobir befare Allar kalamo kita ase, ita tumra zano na ni? Tain to Boni Israilor birudde Allar dorbaro ou nalish disla, “O Mabud, itae tumar nobi oḳolre zane marilise, tumar kurbani kanain-o bangilise. Ḳali ami-u basia roisi, oḳon tara amar zanḳan-o nitagi saira.” Teu Allae tanre kita zuaf disla mono ase ni? Tain ḳoisla, “O Ilias, ami to shat azar manshore amar nizor lagi alog koria raḳsi, era to i Baal devtare fornam ḳorse na.” Ṭik olaḳan, Allae rohom ḳoria Boni Israilor eḳṭa ongshore oḳono alog kori raḳsoin. Ar Allae zebla rohom ḳoria erare alog korsoin, te iṭa kunu nek amolor fol nae. Amolor fol oile to ar rohomot ḳoa oilo na one. Te buza zae, Boni Israile shoriot amol ḳoria zeta faita saisla, ita tara faisoin na. Ḳali Allar fosond ḳora zone faisoin. Oile baki hoḳlor dil fashan bonigese. Zela Allar kalame ḳoise, Allae tarar dilre beushi gumo falaisoin, tarar souk taḳte-o deḳe na, ḳan taḳle-o hune na. Aiz forzonto ou haloto ase. Ola Hozrot Daud nobie-o ḳoira, Tarar dumdam ḳori kaoa-daoa-u shikaror zal ar fand bonizauk. Ita tarar bifodor ḳaron ouk, bod ḳamor shaza bonizauk. Tarar souk anda oizauk zate na deḳe, tumi tarar ḳomorre hamesha guza ḳori rakio. Te Boni Israil siroḳalor lagi ou bifodor fando roibo ni? Nichchoy na. Borong tarar naformanie bin zati oḳlor lagi nazator duar kuligelo. Allae saila, ita dekia tarar dilo zanu zala foyda oy, ḳaron bin zatie nazat failira. Oḳan taki buza zae, tarar naformanir lagi zogotor manshor bout fayda oise, ar tarar ḳetie zebla bin zatir lab oilo, te tara zebla Allar nazator daot ḳobul ḳorba, ou shomoy bin zati oḳole aro ḳoto beshi rohom faiba. O bin zati oḳol, ami tumrare ḳoiram, huno, tumrar gese-u amare sahabi hishabe faṭail oise ḳori, ami amar ḳamre kub dam diram. Ḳaron, ou ḳam deḳaia amar nizor zati Boni Israilor dilo kunu zala foyda ḳortam fari, ar ou zalae tarar mazor kisu manshor zan basaitam fari. Tara duroi hori zaoae zebla zogotor manshor loge Allar milon oilo, te tarare zebla hirbar ṭai diba hou shomoy kun halot oibo? Ita mora manush zita oar laḳan nae ni? Doro, Allar name bilanir ruṭir mul ḳai zudi fobitro oy, te to banail ruṭi-o fobitro. Gasor mul zoṛ fobitro oile, er ḍal-fala-o nichchoy fobitro. Ṭik ola, Boni Israilor mul baf Hozrot Ibrahim zebla fobitro, te Boni Israil-o fobitro. Ar mone ḳoro, gasor kisu ḍal-fala ḳaṭa oilo, bade ou ḳaṭa zagat tumar laḳan zongli zoytun gasor kisu ḍal ḳolom dia zuṛa deoa oilo, te tumi nichchoy mul gas taki-u rosh fairae. Oḳon tumi-o nizore hou ḳaṭia falail ḍal taki boṛo mono ḳorio na, iad rakio, tumi mul gasre ṭikai raḳso na, borong mul gase-u tumare ṭikaia raḳse. Tumi ikan ḳoitae faro, “Amare zuṛa dibar lagi-u to agor ḍal-falain ḳaṭa oisil.” Ikan ṭik ase, oile iman na anar ḳarone-u to tarare ḳaṭia falail oise, ar iman anae tumare hono lagail oise. Te tumi-o beṭagiri na deḳaia Allare ḍorao. Mono rakio, Allae zebla mul ḍal-falare-u rehai disoin na, te tumi kolomor ḍalre kunu rehai diba ni? Erlagi-u sinta ḳoria deḳo, Alla Pak koto doyal ar ḳoto fashan. Zera be-fote faṭi gesoin tarar lagi tain fashan, ar tumar bae tain doyalu, zudi tumi tan doyar maze ro, na roile tumare-o ola ḳaṭia falai diba. Ar hou Boni Israile-o zudi hirbar iman anoin, te tarare-o tain mul gasor loge zuṛa diba, Allae to ila zuṛa dita faroin. Ashole to tumi aslae zongli zoytun gasor ḍal, tumare zebla hon taki kaṭia ania malikana baganor zoytun gasor loge asanoḳ halote zuṛa lagail oise. Te sinta ḳoro, zera ou gasor asol ḍal, tarare mul gasor loge lagani koto shuza. O bai oḳol, tumra zate nize nize aḳoldar na bono, erlagi eḳṭa batuni befar ami tumrare hikai dei. Huno, bin zati oḳlor nazat faoar shongḳa fura na oa forzonto bout Boni Israilor dil fashan halote roibo. Heshe ola-u hoḳol Boni Israile nazat hasil ḳorba, zela Asmani Kitabo ase, Toranealae toshrif anba Zeruzalemor Sion faṛ taki, tain Iakub nobir ḳandan taki naformani kedai diba. Ami ola-u tarar gunare horailimu iṭa to amar deoa oada. Huno, tumrar balair lagi kush-ḳobrir befare tara to oḳon Allar dushmon, oile Allai fosondor befare baf-dadar silsilae tara oila Allar mohobbotor manush. Ḳaron Allae tan rohomotor dan-dokkina ar tan daotor ḳota kunumonte-u mot bodlain na. Zela tumra-o eḳ shomoy naforman aslae, oile oḳon Boni Israile naformani korae tumra tan meherbani faiso, ṭik ou laḳan, tumra meherbani faoae tara oḳon naformani korer, zate tara-o ola meherbani fain. Ar Allar munsha oilo, tain zate hoḳlor bae meherbani deḳaita faroin, otar lagi hoḳolre-u naformanir maze bondi korsoin. Buzrae ni, Allar banḍar ḳoto boṛo! Tan aḳol-hekmot ḳoto goin! Tan bibeḳ-bisar buzar oshaiddo, tan ḳam-ḳaz oḳol tallash ḳori buza zae na. Zela kitabo ase, Ḳaron Mabudor mon sinar shaiddo ḳar ase? Tanre foramish dibar lak ḳe ase? Ḳe age Allare kunta dilaito farse, ze ḳarone tain tar gese denadar asoin? Ashole hoḳolta-u to tan ges taki, tan mazdi-u ae, tan nizor lagi foyda ḳorsoin. Zuge zuge siroḳal tan tarif ouk. Amin. Erlagi O bai oḳol, Allae tumrare ola meherbani korae, ami tumrare ḳas minoti koriar, tumra zarzir shorilre Allar ato shofi deo, ila zinda fobitro kurbani Allar dorbaro ḳobul oy, oḳṭa-u oibo tumrar sohi-shuddo ebadot. Ar ou ḳaraf zomanar talo foṛio na, borong nizor dilor bab bodlaia noya manush o. Teu tumra Allar morzi buzbae. Tan morzi to bala ar furafur nikut, ola ḳorle tain kushi oin. Talim dibar lagi Allae amare ze ḳas niamot disoin, ou niamotor bole ami tumra forteḳ zonre ḳoiram, nizore zotoḳan boṛo mono ḳora usit, er saite beshi mono ḳorio na. Allae zare zotoḳan imani bol disoin, he zanu nizore er taki beshi kunta mono na ḳore. Kial rakio, amra hoḳlor shorilo bout ongo ase, hoḳol ongoe to eḳlaḳan ḳam ḳore na. Ṭik ou laḳan, mumin hishabe amra bout zon oile-o, al-Mosir loge shorik oia ḳali eḳ shoril oisi. Eḳoi shorilor ongo gotike amrar eḳe-oinne mil ase. Allar rohomote amra nanan zone nanan laḳan niamot faisi, ou niamot zudi gaibi ohi zananir befare oy, te amrar iman mafik oli-auliar laḳan ohi koite taki. Ḳeu zudi kezmot ḳorar niamot fae, te kezmot ḳorouk. Ar talim dibar niamot ze faise, he talim deuk. Utshaho dibar niamot ze faise, he manshore utshaho deuk. Dan ḳorar niamot ze faise, he ḳalis niote dan ḳorouk. Murobbiana ḳorar niamot ze faise, he dile-zane hoḳolta salauk. Manshore shaijjo ḳorar niamot ze faise, he kushi mone shaijjo ḳorouk. Maya-mohobbotor maze kunu ḳad mishaio na. Ḳarafire ginnao, balair ashik o. Eḳe-oinnore afon bair laḳan dile-zane maya ḳoro, niz taki oinnore beshi dam deo. Kezmot ḳamo durbol oio na, ruhre gorom raḳo, malikor gulami korat ro. Samnor furuskaror ashae hamesha kushi-bashi koro, duḳ-mosiboto sobor ḳoro, hor-hamesha munazat ḳorat ro. Allar pak bonda oḳlor obabo shaijjo ḳoro. Memandari korte kiali o. Tumrar ufre zera zulum ḳore, tarar lagi nek dua ḳorio, boddua dio na. Zera kushi-bashi korer, tarar loge kushi koro, zera ḳander tarar loge oia ḳando. Tumra eḳe-oinne bai bai oia ro. Boṛoluki bab na deḳaia, shadaron manshor loge mili-mishi solo. Nizor fonḍiti deḳaio na. Ḳarafir bodla hishabe ḳeuror ḳarafi korio na, hoḳol manshe zetare bala mono ḳoroin, tumra sinta-babna ḳoria ota-u ḳoro. Tumrar torof taki zotoḳan shombob hoḳol manshor loge shantie boshot ḳoro. O mayar bai oḳol, tumra ḳeuror bodla loio na, ita Allar ato saṛi deo, bodla deoa tan ḳam. Allar kalamo ase, “Naformanir shaza dibar eḳtiar ḳali amar-u ase, zar zela faona ami tare ola bodla dimu, ikan ami Mabude ḳoiram.” Borong kitabe ḳoy, “Tumar dushmonor feṭo buk lagle, tare ḳani deo. Fiase dorle tare fani deo. Ola ḳorle to tumi tar matar ufre zalail angrar ṭukri toilae.” Ḳarafir gese kunumonte-u ario na, borong balare dia ḳarafire arao. Forteḳ manshe deshor razare mania solouk, ḳaron Allar morzi saṛa ḳeu razotto fae na, raza oḳolre to Allae-u godit boain. Erlagi ze manshe deshor razar dushmoni kore, he ashole Allai hukumor dushmoni kore. Ila ḳam zetae ḳoroin, tara to nizor ufre gozob ḍakia anoin. Ar bala ḳam ḳorra zone to razare ḍoranir kunta nai, oile ku-ḳam ḳorra zonor lagi koṭin bifod. Te tumra kita nirboye roitae sao ni? Taile bala fote aṭo, teu razae tumrar tarif ḳorba. Razae to tumrar balair lagi-u Allar ḳadim hishabe ḳam ḳoroin. Oile tumra zera ku-ḳam ḳoro, tumrar lagi bifod ase. Tain ḳamoḳa ḳeurore maroin na, oile ku-ḳam ḳorrare Allar ḳadim hishabe ṭik-u shaza dein. Te ḳali shazar ḍore nae, borong zarzir bibeḳor bisare-o razar hukum mana zorur. Otar lagi-u to tumra ḳazna deo, ḳaron ḳazna tulia ḳoros ḳorar mazdi tara Allar kezmot ḳorra. Oḳon zar zela faona, tare ola deo. Zenre ḳazna dibar ḳota, enre ḳazna deo; zenre mashul dibar ḳota, enre mashul deo; zenre ijjot ḳorar ḳota, ene ijjot ḳoro; zenre tazim ḳorar ḳota, ene tazim ḳoro. Ḳali mayar rin saṛa dusra kunu befare ḳeuror gese rini oio na. Zano ni, ze manshe oinno zonre maya ḳore, he to shoriotor hukum-ahkam shullo-ana adae ḳorse. Zela shoriotor hukum ase, “Zina ḳorio na, kun ḳorio na, suri korio na, lub-lalos ḳorio na,” ba i laḳan aro zoto hukum ase, i hoḳol hukumre ekḳano ḳori koa oise, “Tumar ari-forire nizor laḳan maya ḳoro.” Ar maya taḳle ḳeu ari-forir ḳeti korto fare na, erlagi maya ḳorle furafur shoriot-u mana oizae. Te bai oḳol, oḳonkur zomanar halot to tumra zano-u, erlagi buzi-huni solo. Tumra gum taki hozag oar shomoy oigese, ḳaron amra ze shomoy iman anchilam, hou halot taki-o amrar nazat oḳon aro daro aichche. Rait fuaia hari bian oizar; oḳon zoldi ao, amra andarir bod ḳam saṛia nuror lebas lagai, Allai atiar findilai. Hoi-hulla ḳori mod ḳaia ṭal oa, zina-bodmaishi ba mongoṛa sola, ingsha ar ḳaijja-fosad bad dia, ao, amra dinor fore solra manshor laḳan soli. Finnor lebasor laḳan tumra Malik Isa al-Mosire furafur findilao. Shorilor bod ḳaish miṭanir sinta ekkere bad deo. Tumrar mazor ze bai imane ḳomzur, tare-o afon hishabe shomzo, tar fosond-ofosond loia torka-torki korio na. Buzrae ni, eḳzone mono ḳore, he hoḳol zator ḳani kaito farbo, oile ḳomzur imandar zone ḳali niramish ḳae. Te mas-mangsho ḳaora zone ou niramish ḳaora zonre zanu na siṛae. Ar niramish ḳaorae-o zanu mas-mangsho ḳaorare na dushe, ḳaron Allae to duiozonre-u nizor ḳoia ḳobul ḳorsoin. Ar tumare ḳegie ḳemota dilo, aroḳ beṭar gulamor bisar ḳortae? He ṭik fote ase, na bul fote ase ikan to tar munibe buzba. Ashole to he ṭik fote-u roibo, malike-u tare ṭik fote raḳta farba. Kunu kunu manshe mono ḳoroin, shadaron din taki kunu ḳas dinor fozilot beshi. Ar ḳeu ḳeu hoḳol dinre-u eḳlaḳan mono ḳore. Te i befare ḳe kita ḳorto na ḳorto, ita zanu tar dil taki furafur shae dey. Ze manshe kunu ḳas dinre mane, he to Malik Isare kushi korar niote-u ita mane. Ze zone hoḳol zator ḳani kae, he-o to malikre kushi korar niote-u ḳae, he Allar shukria adae ḳoria ḳae, ar ze zone hoḳolta ḳae na, he-o malikre kushi korar niote ḳae na, he-o Allar shukria adae ḳore. Amrar mazor kunu bonda-u nizor lagi nize zinda roy na, ar nizor lagi more-o na. Ḳaron amra zebla zinda roi, ḳali malikor lagi-u zinda roi, ar zebla moron oy, ḳali malikor lagi-u moron oy. Te amra zinda roile-o zeta, morle-o ota, amra to Malik Isar-u. Malik al-Mosi-o to mara gesla ar hirbar zinda oia uṭsoin, zate tain zinda ar murda duio dolor-u malik bonoin. Te tumi ḳene tumar bair kut tukairae? Tare ḳene siṛairae? Allar bisaror samne to amra hoḳol-u ubaimu. Zela Allar kalamo ase, Mabude ḳoira, amar namor ḳosom ḳaia ḳoiar, hoḳole-u amar samne aia soizda ḳorbo, forteḳ muke-u shikar ḳorbo, ami-u Alla. Ono deḳa zae, Allar dorbaro amra forteḳe-u zarzir ḳamor hishab dite oibo. Te ao, oḳon taki amra eḳe-oinnor kut dora bond ḳori, ar niot ḳori, ila kunu ḳam ḳortam nae, ze ḳame aroḳ bair imanor ḳeti oibo, ba tare gunar fote nibo. Malik Isar ummot oae ami balamonte-u zani ar buzi, emne to kunu zinish-u nazaiz nae, oile ḳeu zudi itare nazaiz mono ḳore, te tar lagi-u ita nazaiz. Zudi tumar kunu ḳanir lagi aroḳ baie mono duk fae, te to tumi tare mohobbot ḳorrae na. Ze baire basanir lagi al-Mosie mout ḳobul ḳorla, kunu ḳanir lagi i bair shorbonash ḳorio na. Tumi zetare fosond ḳoro, itar lagi dusra zone zanu tumare na nindae. Allar bashshai to ḳali kana-finar lagi nae, borong Allai Pak Ruhe deoa forezgari, shanti ar kushi-bashir befar. Ou nomunae zera al-Mosir kezmot ḳore, erar ufre Alla kushi taḳoin, ar manshe-o bala fain. Erlagi ao, amra ola ḳam ḳori, ze ḳame shanti kaim oy, ze ḳame eḳe-oinnore goṛia tultam fari. Ar kunu laḳan ḳanir lagi Allar ḳamre binash na ḳori, ḳanir zuka hoḳolta-u to halal. Oile tumi kunu eḳ bishesh ḳani kaoae zudi dusra manshor imano ḳoshṭo lage, te ita ḳaoa tumar lagi zaiz nae. Bishesh kunu gust ba shorab ḳaoa, ze ḳame tumar baie mono duk fae, imane bada fae, ila kunu ḳam ḳora tumar lagi ṭik nae. Tumar dilor ekinre, ḳali tumi ar tumar Allar maze raḳo. Nek-kofali to hou zon, ze zone bala mono ḳoria kunu ḳam ḳoria harle, tar mono kutkuti ae na. Oile mono kutkuti loia zudi he kunta ḳae, te to he dushi. Ḳaron he zeta ḳaise, ita tar bibeḳor ofosond, ar bibeḳor ulṭa ḳam-u oilo guna. Erlagi amra zerar iman mozbut ase, amra ḳali nizor kushir bae na saia, amrar ḳomzur motoshokki mona imandar baiainre-o zanu shoijjo ḳori. Ota baiaintore goṛia tular niote, forteḳe-u tarar balair lagi tarar monor fosondre zanu kush raki. Al-Mosie-o to tan nizore kushi korsoin na, borong Fobitro Zobur Shorifo ase, “O Mabud, tumare zera beijjot ḳorse, tarar ou hoḳol beijjoti amar ufre-u aise.” Te agor Asmani Kitabo zotota leḳa oise, ita to amrare-u talim dibar lagi leḳa oise, zate ota dekia amrar sobor ar shantona ae, ar asha-borosha fai. Oḳon sobor ar shantona deora Allae Isa al-Mosir fote solar lagi, tumra hoḳlor mon ek koroukka. Teu tumra eḳ mone ar eḳ muke, amrar Malik Isa al-Mosir gaibi baf Allar tarif ḳortae farbae. Erlagi-u O bai oḳol, al-Mosie zela tumrare afon ḳorsila, tumra-o ola eḳe-oinnore afon ḳorilao, zate Allar gourob oy. Mono rakio, Allae Boni Israilor mul murobbi oḳlor loge zoto oada ḳorsla, otar hokikoti forman ḳorar lagi al-Mosi aia Boni Israilor kezmotgar oila. Ar bin zatir gese-o aila, zate era-o Allar rohomot dekia tan tarif ḳore. I befare Zobur Shorifo age-u ḳoa oise, Erlagi-u ami bin zati oḳlor maze tumar tarif ḳormu tarar maze tumar gunogan gaimu. Ar Tourat Shorifo ḳoa oise, O duniar hoḳol zatir manush, Allar afon proza Boni Israilor loge milia, tumra-o tan tarif ḳoro. Hirbar Zobur Shorifo ḳoa oise, Hoḳol zatie Allar tarif ḳoro, desh ar gusṭie tan nam zofo. Ar Hozrot Ishaya nobie leḳsoin, Zein Bashsha Daud bin Iasor ḳandanor mul kuṭi, hoḳol zatir ufre bashshai korar lagi ein aiba, tan ufre-u taḳbo hoḳol manshor asha-borosha. Te dilor maze asha deora Allae imanor bole, tumrare hoḳol laḳan kushi-bashi ar shantir maze habu-ḍubu ḳaoaukka. Teu Allai Pak Ruhur kudrotie tumrar asha-borosha baia foṛbo. O bai oḳol, tumrar befare ami furafur buzram, tumrar dilḳan nek niote bora ar sohi-shuddo imani aḳol ase, zate eḳe-oinnore foramish ditae faro. Ta-o ḳoyeḳṭa befare ami tumrare mono ḳorai diram, Allae amare ou niamot disoin ḳori, ami shaosh ḳori tumrar gese lekiar, Isa al-Mosir ḳadim hishabe Allae amare tumrar laḳan bin zati oḳlor gese faṭaisoin. Erlagi-u tan deoa kush-ḳobri tobligor mazdi ami imamotir ḳam ḳoriar, zate ou bin zati oḳol Allar Pak Ruhe fobitro oia tan dorbaro ḳobul oar zuka kurbani oin. Alla Pakor lagi ami ze kezmot ḳoriar, ou ḳamor ḳarone Isa al-Mosir mazdi amar boṛai deḳanir eḳtiar ase. Al-Mosie amar mazdi ze ḳam hasil ḳorra, er baire kunta matibar shaosh amar nai. Tain amar mukor ḳota, amar ḳam-ḳaz, keramoti-muzeza ar Allai Pak Ruhur kudroti bole bin zati oḳolredi Allar gulami koraisoin. Erlagi-u ami al-Mosir kush-ḳobrire Zeruzalem taki Ilurika forzonto hoḳol zagar maze furafur toblig korsi. Te ze zagat kunudin al-Mosir kush-ḳobri toblig kora oise na, hou zagat toblig kora-u amar zindegir mul ḳam mono ḳori. Ami sai na aroḳzonor gaṛa kuṭir ufre bor ḳoria gor banaitam. Zela Allar kalamo ase, Tan ḳota zerar gese zanail oise na oḳon tara ita deḳba, tan befare age zera hunchoin na tara oḳon buzba. Te ou ḳarone ami bout bar tumrar gese zaoar fote bada faisi. Oinno zagat amar ḳam shesh na oae zaoa bond oigese, oile oḳon to ita zagat amar toblig kam shesh, kunu zaga-u bad roise na. Ashole bout bosor dori-u amar kial asil tumrar gese zaitam, erlagi oḳon Spen desho zaoar ḳalo ami tumrar gese zaitam sairam. Ami asha ḳorram, hono zaoar shomoy tumrar loge deḳa oibo, ar kushi-bashi koria ḳoyḳan din tumrar loge ḳaṭaimu. Bade Speno zaoar lagi tumra-u amar bebosta ḳoria dibae. Oile oḳon ami Allar pak bonda oḳlor maze rilif baṭibar lagi Zeruzalem ṭauno zairam. Hino obab-onoṭonor maze Allar ze bonda oḳol asoin, tarar gese baṭia dibar lagi Makidonia ar Gris deshor zomat oḳole kisu shaijjo tulchoin. Tara kub kushi oia ita tulchoin. Zano ni, i zomator bai-boin oḳol Zeruzalem ṭaunor Allar pak bonda oḳlor gese rini asoin. Ḳaron Allai batuni niamotor baṭ zebla Boni Israilor mazdi bin zatie faisoin, te bin zatir lagi-o zorur oilo, Boni Israilre duniabi befare shae-shaijjo ḳora. Amar ou rilif baṭat gia hari ami zebla nichchit oimu, ita furafur tarar ato fosi gese, ou shomoy ami tumrar gese aia Spen desho zaimu. Ami buziar, ami zebla tumrar gese aimu, ou shomoy al-Mosir shullo-ana rohom-niamot loia aimu. O bai oḳol, Allar Pak Ruhur mohobbote ar amrar Malik Isa al-Mosir name ami tumrare ḳas minoti koriar, amar loge oia tumra-o amar lagi Allar dorbaro dua-munazator jihad salao. Dua ḳorio, Ehudia zilat Isayi torikar birudi manshor at taki ami zanu rehai fai, ar amar ana i rilif ḳanain zanu Zeruzalem ṭauno Allar pak bonda oḳole shomzoin. Teu ami kushi mone tumrar gese zaitam farmu, tumrar loge aram-ayesh ḳormu, inshalla. Shanti deora Alla Pak tumrar loge loge roukka. Amin. Te oḳon amrar boin Foibi Bibire faṭairam, tain oila Kinkria ṭaunor Isayi zomator ḳadim, tan befare ḳoiar, Allar bonda oḳolre zela afon ḳora zorur, Malik Isar name enre-o ola afon mono ḳorio. Tain to amare ar aro bout manshore shaijjo ḳorsoin, erlagi zekunu befare shaijjo saile, tumra tanre shaijjo ḳorio. Amar loge oia al-Mosir lagi zera ḳam ḳorsoin, ou Fiskila ar Akilre amar salam zanaio. Amar zan basanir lagi, tara nizore moutor ato shofi disla. Ḳali ami nae, bin zatir mazor hoḳol zomat-u tarar gese rini. Oḳon tarar baṛir zomato aia zera shorik oin, era hoḳolre-u amar salam zanaio. Turoshkor Asiya elaḳat hoḳol foyla zein al-Mosire ḳobul ḳorsla, hou Afinitus baire salam zanaio, ein amar mayar manush. Ar hou Moriom Bibire-o salam zanaio, zein tumrar lagi bout menot ḳorsoin. Amar nizor zatir manush Andronikus ar Juniare-o salam zanaio, era to amar loge oia zel ḳaṭisoin. Al-Mosir sahabi oḳlor gese era kub ijjoti zon, era amar age iman anchoin. Amar mayar mumin bai Amfilusre salam zanaio. Amrar logor tobligkari Urban baire, ar amar mayar dust Stakisre-o salam ḳoio. Al-Mosir forikkat fash ḳora sifai Afilis baire-o salam dio. Bai Aristabulor baṛir hokkolre salam zanaio. Amar zatir bai Herudunre salam dio. Morhum Nakisusor baṛir zera Malik Isar ummot oisoin, tarare-o salam zanaio. Turfana ar Turfasa Bibire-o salam dio. Ou beṭinte Malik Isar lagi boṛo menot ḳorra. Mayar boin Farsiare-o salam ḳoio, Malikor lagi tain-o bout menot ḳorsoin. Malik Isar fosondor manush Rouf baire salam dio, tan ammare-o salam ḳoio, i beṭi to amar-o ma. Singkirat, Filigun, Harmis, Fatrub, Hermas ar tarar loge zoto imandar bonda asoin, era hoḳolre salam zanaio. Bai Filagi, Julia Bibi, Nirias ar tan boinre, ar Olimpasre salam ḳoio, Allar zoto bonda tarar loge asoin era hoḳolre salam dio. Huno, tumra eḳe-oinne fobitro golagoli korio. Al-Mosir hoḳol zomator bai-boninte tumrare salam zanaira. O bai oḳol, tumrare minot ḳori koiram, age zeta talim faiso, ou talimor ulṭa talim dia zeguinte doladoli ar bada-bignor zonom dein, otar bae nozor rakio, tumra itar ges taki horia roio. Ḳaron itae amrar malik al-Mosir gulami na ḳoria, tarar feṭor gulami kore. Miṭa miṭa mat matia ar tel malish ḳoria shorol-shuza manshore be-foti banae. Ar tumra zen Allar hukum mafik solrae, ita to hoḳole-u zane, i kobor hunia ami-o kub kushi oisi. Te ami sairam, tumra nek fote kamil o, bod fot taki basia ro. Shanti deora Allae Iblis-Shoytanre kub zoldi kori tumrar faor tole falai fishaiba. Amrar Malik Isa al-Mosir rohom-niamot tumrar ufre zari rouk. Amar loge kush-ḳobri toblig koroin ze Timoti bai, ein tumrare salam zanaira. Amar zati bai Lukias, Zasun ar Sufatose-o tumrare salam ḳoira. Hozrot Paulusor buli hunia ami Tortius mohorire leḳram, Malik Isar name ami-o tumrare salam zanairam. Alhamdulilla, ami Pauluse Isa al-Mosir befare ze kush-ḳobri toblig kori, Alla Pakor ḳemota ase ou kush-ḳobrir usillae tumrare imane tir raḳa. Mono rakio, bout zomana dori Allae tan i batuni munshar ḳota lukai raḳsila, oile oḳon ita duniar hoḳol zatir gese zair or. Siroḳalin zinda Allar hukume, agor zomanar nobi oḳole zeta lekia raḳsila, ota zair or, zate tara al-Mosir ufre iman ania Alla Pakor baiddo oin. Erlagi ou kush-ḳobri oḳon toblig kora or. Tain-u eḳmatro Alla, tain-u aḳoldar, zuge zuge siroḳal Isa al-Mosir mazdi tan tarif ouk. Amin. Ami Paulus, Alla Pakor morzie Allai daot faia Hozrot Isa al-Mosir eḳzon sahabi oisi. Ami ar amar mumin bai Susine, Korint ṭaunor Allar zomator manshor gese, mani tumrar gese leḳram. Hozrot Isa al-Mosir torika ḳobul ḳorae Allae tumrare fak-fobitro ḳorsoin ar tan afon bonda oibar lagi daot disoin. Tumrar gese ar oinnainno zagar zoto manshe amrar Hozrot Isa al-Mosire malik koia manoin, tara hoḳlor gese amra ou siṭikan leḳram. Tain tarar-o malik, amrar-o malik. Amrar gaibi baf Alla Pake ar Hozrot Isa al-Mosie tumrare rohomot ar shanti dan ḳoroukka. Ami hamesha tumrar lagi amar Allar dorbaro shukria adae ḳori, ḳaron Isa al-Mosir torika ḳobul ḳorae tumra Allar rohomotor tole aiso. Ou rohomot oilo, Hozrot Isa al-Mosir loge shorik oia tumra hoḳol nomunae mat-ḳota mata ar aḳol-ilime doni oiso. Oḳon deḳa zar, al-Mosir befare amra zeta talim dislam, ita tumrar dilo gatia raḳso. Ar Hozrot Isa al-Mosie dusrabar toshrif anar lagi tumra bar sairae, ermaze Allar deoa batuni ḳemotar zekunu niamot faite tumrar obab or na. Ami zani, amrar Hozrot Isa al-Mosie tumrare aḳer forzonto imane mozbut raḳba, zate tain aibar ag forzonto tumra furafur nikut roibae. Alla Pak to hok ar ḳaṭi, tain zela ḳoin ola oy. Tain tumrare daot disoin, tumra zanu tan ḳas mayar zon Isa Ibnullar loge ḳatir-shomporko raḳo, ein-u al-Mosi, amrar malik. Te bai oḳol, Hozrot Isa al-Mosir oia ami tumrare zuṛ ate minot ḳoriar, tumra hoḳol eḳ o. Tumrar maze kunu doladoli na rouk, eḳ mon ar eḳ mot o. Huno, Kulua Bibir baṛir manshor ges taki zanlam, tumrar maze ḳaijja-fosad soler. Ami hunlam, tumrar maze ḳeu ḳoy, “Ami Paulusor dolor,” ḳeu ḳoy, “Ami Apollosor dolor,” ḳeu ḳoy, “Ami Fitoror dolor,” ar ḳeu ḳoy, “Ami al-Mosir dolor.” Te ḳo sain, al-Mosire kita baṭa-baṭi kora oigese ni? Ami Paulusre tumrar lagi solibo loṭḳaia mara oise ni? Tumra kita amar name toubar gusol ḳorso ni? Ami Allar dorbaro shukria zanai, ḳali Kirispo ar Gous saṛa, dusra kunu manshore ami toubar gusol ḳoraisi na. Zate ḳeu ḳoito na fare, tumra amar name toubar gusol ḳorso. Astifan bair foribaror manshore-o ami toubar gusol ḳoraisi, esaṛa ar kunu manshore gusol ḳoraisi koria amar mono or na. Al-Mosie to amare toubar gusol ḳoranir lagi faṭaisoin na, ḳali kush-ḳobri tobligor lagi-u faṭaisoin. Ar ou kush-ḳobri-o kunu aḳoldari fonḍiti bab-bongie toblig korat faṭaisoin na, zate solibor ufre al-Mosir kurbani oa beḳama na bone. Zara gozobi fotedi douṛar, al-Mosir solibor ufror kurbani tarar gese to ḳali be-aḳoli mono oy, oile amra zara nazator fote douṛairam, amrar gese ita oilo Allai bol. Asmani Kitabo leḳa ase, “Ami aḳoldar oḳlor aḳolre beḳama ḳormu, ar buddiman oḳlor buddire bifol ḳormu.” Te ou aḳoldar oḳol kuai? Alim oḳol-u ba kuai? Ar ou zomanat torko ḳorar ḳemota zar ase, he oḳon kuai? Duniabi aḳol to ḳali be-aḳoli, ita Allae-u deḳaira. Allae tan nizor aḳol dia foysala ḳorsoin, zate duniae zanu tar aḳol dia tanre sinto na fare. Erlagi be-aḳolir ou kush-ḳobri tobligor mazdi Allae mumin oḳlor zan basaita saila. Ihudi oḳole ḳali keramoti ḳam deḳta sain, Iunani oḳole aḳolor tallash ḳoroin, oile amra toblig kori solibor ufre kurbani oa al-Mosir ḳota. Ita oilo Boni Israilor gese eḳṭa be-dini ḳam ar bin zati oḳole mono ḳoroin be-aḳoli ḳam. Oile Boni Israil oukka ba Iunani oukka, Allar daoti bonda oḳlor gese ou al-Mosi-u oila Allai aḳol ar Allai bol. Allai be-aḳoli manshor aḳol taki bout boṛo aḳoldar, ar Allai komzuri manshor shokti taki bout shobol. Bai oḳol, sinta ḳori deḳo, tumrare zebla daot deoa oisil, hi shomoy tumra kilaḳan aslae. Tumrar mazor bout zon-u manshor sokut aḳoldar, ḳemotaban ba nami-dami bongshor aslae na. Oile duniae zetare be-aḳoli koia mono ḳore Allae otare-u fosond ḳorsoin, zate duniar aḳoldar oḳole shorom fain. Ar duniae zetare ḳomzur mono ḳore, Allae otare fosond ḳorsoin, zate duniar boloban hoḳolta shorminda oin. Duniar manshe zetare kub tuchcho mono ḳore, duniar bukut zetar kunu dam nai, Allae otare-u fosond ḳorsoin, zate duniar sokut zeta nami-dami, ita be-dami oizae. Tain itare fosond ḳorsoin, zate duniar kunu manshe tan samne boṛai deḳanir shuzug na fain. Ar tumra zera Isa al-Mosir afon zon boncho, ita to Alla taki-u oise. Al-Mosi-u oila amrar gese Allar deoa aḳol, fak-forezgari, fobitrota ar azadir kuṭi. Erlagi Asmani Kitabo leḳa ase, “Ze manshe boṛai kore, he Mabudre loia-u boṛai korouk.” Bai oḳol, Allar deoa kush-ḳobri tumrar gese toblig korat gia ami to shundor shundor bashae matisi na, ba boṛo kunu alim-ulamar laḳan boyan ḳorsi na. Ami mone mone ṭik korslam, tumrar loge taḳar ḳalo ami kali ou Isa al-Mosir bishoye matimu, ze Isare solibor ufre loṭḳaia mara oise, ita saṛa ar kunta mattam nae. Ami zebla tumrar loge roitam, ou shomoy nizore ḳomzur mono ḳortam ar ḍoraia ḳafitam. Amar toblig ar amar boyanor maze manshor mon joy ḳorar moto kunu aḳol-hekmot ar zukti asil na, ḳali Allai Pak Ruhu ar kudroti bol deḳa gesil. Ami sailam, tumrar iman manshor aḳol-ilimor ufre borosha na ḳoria, ḳali Allai bolor ufre borosha ḳore. Ta-o zera imane kamil, tarar gese amra aḳolor mat mati. Oile ou aḳol to i zogotor nae ba zogotor neta oḳlor laḳan-o nae, tara to borbad oar foti. Ashole amra ḳali Allai aḳol-hekmotor batuni gufon befare mati. Ou batuni befar to dunia foyda ḳorar age-u Allae tan nizor morzie ṭik koria raḳsoin, zate amra tan gourobor bagi oi. Oile ou zogotor neta oḳole ita buzra na. Ita buzle tara, hou gourobor don amrar Malik Isare solibor ufre loṭḳaia marlo na one. Oile amra zani, Allar kalame ḳoy, Zara Allare mohobbot ḳoroin, tarar lagi tain zeta raḳsoin, ita ḳeu souke deḳse na, ḳane-o hunche na, dilor maze kunudin sinta-o ḳorse na. Ita oḳon tan Pak Ruhur mazdi amrar gese zair ḳorsoin. Pak Ruhur ozana kunta-u nai, tain Allar hoḳol batuni befar-o zanoin. Manshor maze ola ḳeu ase ni, zera eḳzone aroḳzonor monor ḳobor zanoin? Ḳali nizor ruhe-u tar monor ḳobor zane. Ṭik ou laḳan, Allar Pak Ruhu saṛa dusra ḳeu tan gaibi befar zane na. Ar amra to duniabi ruhu faisi na, borong Allar torof taki tan ruhu faisi, erlagi tan deoa niamot oḳol amra sini. Ar ou niamotor befare-u amra ḳoi, ita ḳoar shomoy amra manshor aḳol bebohar ḳori na, ḳali Pak Ruhur mazdi talim faia ḳoi. Ruhani hokikotre zair ḳorar lagi, amra ruhani mat mati. Ze manush ruhani monobabor nae, Allai Pak Ruhur mazdi zeta mile he itare ḳobul ḳore na, ḳaron tar gese ita beḳama. Ita befar he buze-o na, ḳaron ita ruhani zogotor befar, ḳali ruhdi zasai kora zae. Ze zonor maze Pak Ruhu ase, he hokkolta zasai koria deḳe, tare ḳeu zasai korto fare na. Zela Allar kalamo ase, Mabudor mon ḳegie buzto farse, tanre foramish dibar shaiddo ḳar? Oile al-Mosir mon amrar dilo taḳae, amra ita buzram. Bai oḳol, ruhanik zonor loge zelaḳan mata usit, ami tumrar loge ila mattam farsi na. Borong duniabi manshor loge zela mata usit, tumrar loge ola-u matisi. Tumra to Isayi torikat ekkere huruttaintor laḳan, erlagi-u oula matilam. Foyla ami tumrare shokto ḳani na dia ḳali dud ḳabaislam, hi shomoy shokto ḳani kaoar zuka aslae na, ar otodin bade-o tumra i befare hurutta roiso. Ḳaron tumra oḳono duniabi roḳto-mangshe solrae. Tumrar maze oḳono ingsha, ḳaijja-fosad lagail-u ase. Te tumra roḳto-mangshor boshe roiso na ni? Tumrar maze ḳeu zebla ḳoy, he Paulusor dolor, ḳeu ḳoy Apollosor dolor, te tumra duniabi manshor laḳan nae ni? Apollos ḳe? Ar Paulus-u ba ḳe? Amra to shamainno kezmotḳari, amrar mazdi tumra imanor fote aiso. Allae-u amrare zarzir i dayitto disoin. Ami bis lagaisi, Apollose fani disoin, ar Allae itare boṛo ḳorsoin. Erlagi zein bis lagain ar zein fani dein, era ashole kunta-u nae, oile zein itare boṛo ḳori tuloin, tain-u hokkolta. Bis lagaora ar fani deorar eḳoi uddesho. Era forteḳe zarzir menot mafik kamor fol faiba. Oile amra duio zone-u Allar ḳam ḳoriar. Tumra Allar-u ḳet, tan banail bilḍing. Allar ges taki ze ḳas rohomot ami faisi, ou rohomotor bole-u ami aḳoldar raz mestorir laḳan ian kuṭi gaṛsi. Ar ou kuṭir ufre oinno zone bilḍing banaira. Oile ḳe kila banaira, i befare tara hushiar ouk. Ze ian kuṭi age-u gaṛa oigese, Malik Isa al-Mosi-u oila hou kuṭi, ikṭa bad dia ar kunu noya kuṭi keu gaṛto farto nae. Oḳon i kuṭir ufre shuna, rufa, dami fattor, laḳṛi ar son dia ḳeu zudi gor banae, te ḳe kila banaisoin, ita bala ḳori deḳa zaibo. Ruz Hashoror din ita zair oibo, hou din ogni-forikkar mazdi ita kula-mela oibo. Zein zeta banaisoin, ita zudi ṭikia roy, te ein furuskar faiba. Oile ita zoli gele furuskar taki bad foṛbo, ta-o tar nizor zan basibo. Tare deḳle buza zaibo, he aguinor mazdi faṛi dia aise. Tumra zano na ni, tumra oilae Allar Kaba gor, tumrar maze tan Pak Ruhu boshot ḳoroin? Ḳeu zudi Allar Kaba gor binash ḳore, te Allae-o tare binash ḳorba. Ḳaron tan taḳar gor oilo fobitro, ar tumra-u oilae hou gor. Tumra ḳeu nizore faki dio na. Tumrar mazor ḳeu zudi duniar aḳol-ilime nizore aḳoldar mono ḳore, te he be-aḳol bonouk zate asol aḳoldar oito fare. Ḳaron i zogotor aḳol-buddi, Allar nozoro ḳali be-aḳoli. Asmani Kitabo ase, “Allae aḳoldar oḳolre tarar salakit doroin.” Aroḳ ayato ase, “Aḳoldar oḳlor hoḳol sinta-u beḳama, ita to Mabude zanoin.” Erlagi amar ḳota oilo, hokkolta-u to tumrar, te tumra kunu manshore loia boṛai korio na. Paulus, Apollos, Fitor, i dunia, zindegi, mout, bortoman, bobishot, hokkolta-u tumrar. Tumra oilae al-Mosir, ar al-Mosi oila Allar. Amrare dekia manshe buzouk, amra al-Mosir ḳadim, Allai batuni banḍaror ḳazanchi. Ar zerar ufre banḍaror ḳazanchir bar deoa oy, tara to forman deḳani lagbo, tara hok-halal. Te ami hok-halal ki na i bisar tumra ḳoro ba adalote-u ḳorouk, ete amar kunta zae ae na. Ami to amar nizor bisar-u ḳori na. Amar mon shada oile-o forman ḳora zar na ami nirdush. Te Malik Isae-u amar bisar ḳorba. Erlagi shoṭik shomoyor ag forzonto, mani Malik Isa hirbar na aoa forzonto tumra kunu bisar ḳorio na. Andairo zeta lukail ase, tain aia itare foro anba ar manshor dilor gufon niot oḳol zair ḳorba. Hou shomoy Allar ges taki hoḳole zarzir faona tarif faiba. Bai oḳol, tumrar balair lagi ami amar nizor ar Apollosor udahoron dia tumrare ḳoilam, zate tumra amrar ges taki ou talim neo, Asmani Kitabo zeta leḳa ase, itar bare zaoa ṭik nae. Te tumra eḳzonre toia areḳzonre loia boṛai korio na. Ḳeu zanu mono na ḳore tumi alada kunta bonigeso. Tumar nizor emon kun don ase, zeta tumi Allar ges taki lilla faiso na? Ar ita zudi lilla faia taḳo, te lilla faiso na ḳoia beṭagiri korrae ḳene? Tumrare dekia to mono or, tumra age-u hokkolta faia doni oigeso, amrare bad dia-u tumra bashsha bonigeso! Tumra hasaror bashsha oile bala-u oito, amra-o tumrar loge bashsha oitam fartam. Zuddo-bondi oḳolre marilibar niote, zuddor bijoe misilor ḳoror ḳataro zarare raḳa oy, amar mono oy Allae amrar laḳan sahabi oḳolre-o ola hoḳlor ḳore raḳsoin. Amra asta zogotor gese, hoḳol manshor gese, ar firista oḳlor gese-o tamshar nayok bonigesi. Amra to al-Mosir lagi be-aḳol oisi, ar tumra bule al-Mosir name aḳoldar bonigeso. Amra ḳomzur, tumra boloban, tumra bule ijjoti bonigeso, amrar to kunu ijjot nai. Amra oḳono feṭor buke, fanir fiase, ḳafoṛ-sufoṛor obabe ḳoshṭo ḳoriar, baṛi-gor nai kori boitolor laḳan roiar ar mair-doir ḳaiar. Hamesha nizor ate menot ḳori kaiar. Manshor gail-mondo hunia-o, tarar balai saiar, zulum-nirjaton, humki-damkire sobor ḳoriar. Bodnam-gibot shoijjo ḳori kori, norom shure tarare buzaiar. Oḳon forzonto amra asta zogotor ḳasrar laḳan, hoḳoltar gese-u zoinjal bonigesi. Huno, tumrare shorom deoar niote ita leḳram na, ḳali amar mayar aolad hishabe hushiar ḳorar lagi leḳram. Mono rakio, al-Mosir befare talim deoar lagi tumrar azar azar ustad taḳta faroin, oile tumrar baf to otozon nae. Kush-ḳobri tobligor mazdi Isayi zindegit eḳmatro ami-u oilam tumrar baf. Oḳon ami tumrare minot ḳoria ḳoiar, ami zela soli, tumra-o ola solo. Ou niote ami Timotire tumrar gese faṭailam, malikor name ein to amar mayar hok-halal fut. Malik Isa al-Mosire ami kila mania soliar, ar hoḳol zagar hoḳol zomato kila talim diar, ita tain mono ḳorai diba. Tumrar mazor ḳeu ḳeu mono ḳorer, ami ar tumrar gese aitam nae, erlagi tara boṛai-beṭagiri deḳaira. Inshalla ami kub zoldi-u aimu. Zetae boṛai-beṭagiri deḳaira, tarar mat hunat nae, ḳali tarar mul ḳemota deḳat aimu. Allar bashshai to mat-ḳotar befar nae, ita oilo kudroti ḳemotar befar. Tumrar ichcha kita? Ami tumrar gese kita loia aitam? Singla loia ni, na maya-momota ar norom mizaz? Ami hunram, tumrar maze zelaḳan zogoinno zinar ḳam soler, ila ḳam bidormi oḳole-o ḳore na. Tumrar mazor eḳzone nizor haton maʼre-o bour laḳan raḳse. Erbade-o tumra boṛai koro kila? Itar lagi tumra fana manga zorur nae ni? Ar zegie ita ḳorse, tare zomat taki bar ḳori deoa usit na ni? Ami sho-shorile tumrar maze na taḳle-o ruhe to tumrar loge asi, erlagi zegie ita ḳorse, samne taḳa bisarir laḳan ami-o age-u tar bisar ḳoria raḳsi. Amar bisar oilo, tumra Malik Isar name eḳ zagat dola o, ou shomoy ami-o ruhe tumrar loge roimu ar Malik Isar bol-shokti-o amrar loge taḳbo. Ar ou naformanor shorilre binash ḳorar lagi Shoytanor ato dilaite oibo, zate Malik Isa aibar ḳalo tar ruhe nazat fae. Baiainre, boṛai kora tumrar lagi ṭik nae. Zano na ni, moydar ḳair boṛo gamlare-o tuṛa ḳamire fulailae? Te tumrar dil taki-o hou furan ḳamiror bab falai deo, zate ḳamir saṛa moydar ḳai bono, ar ashole-u to tumra ḳamir saṛa zon. Azadi Idor kurbanir meṛa-baichchar laḳan amrar lagi al-Mosire-o kurbani deoa oise. Zano to, hou ido hoḳol laḳan ḳamir raḳa haram. Erlagi ao, amra-o hou furan ḳamir, mani ingsha ar ḳarafire bad dilai, er bodla ḳamir saṛa ruṭi, mani hok ar shada dile id adae ḳori. Ami age tumrare leḳslam, tumra naforman ḳobis oḳlor loge shong dorio na. Ami koiram na, i zogotor ḳobis manush, lubi, doḳolbaz ar deb-debir puja ḳorrar shongo ekkere saṛi ditae. Ila oile to tumra zogotor bare aro kunuḳano zaitegi oibo. Oile ami kali oḳan ḳoitam sairam, ḳeu zudi nizore mumin ḳoia dabi kore, ar he zinakur, lubi, deb-debir pujari, gibot gaora, modkur, ba sur-ḍaḳait oy, te tar shong dorio na, tar loge ḳana-fina-o ḳaio na. Tumra ḳeuror zudi kunu imandar bair bifokke nalish taḳe, te Allar pak bonda oḳlor gese na gia, he kun shaoshe baira manshor gese bisar sae? Tumra zano na ni, ou pak bonda oḳole-u asta zogotor bisar ḳorba? Ar asta zogotor bisar ḳorte farle ou mamuli befaror foysala ḳortae faro na ni? Tumra zano na ni, amra firista oḳlor-o bisar ḳormu? Te duniar befar to kunta-u nae! Tumrar zebla ou laḳan bisar-asaror zorur oy, ou shomoy zomator baira manshore ḳene bisaror salish banao? Ami to tumrare shorom deoar lagi-u leḳram, tumrar maze ila aḳoldar salish eḳzon-o nai ni, zein tumrar nizor mazor gonḍogul miṭ-maṭ ḳorta faroin? Ami deḳram, bisaror mozliso boia-o tumra baie baie ḳaijja ḳorrae. Ta-o abar o-imandaror samne! Ashole tumra baie baie ou zela bisar salish salairae, itae to tumrar nizor-u ḳeti or. Tumra ita shoijjo ḳoro na ḳene ba nize nize ṭoga ḳao na ḳene? Borong tumra nize-u to oinnae ḳorrae, manshore ṭogirae, ar ita nizor bair loge-u ḳorrae! Ashole tumra zano na ni, Allar bashshait naforman ḳobis oḳlor kunu ṭai nai. Te tumrar bul sinta dur ouk, zeta manshor shobab ḳaraf, zetae zina ḳoroin, murtifuza ḳoroin, gaṭua nasain, shomoḳami, suri, lub-lalchi, modkur, gibot gaora ar doḳolbaz, ita manshe to Allar bashshait ṭai faita nae. Tumrar mazor kunu kunu zon-o age ola aslae, oile Malik Isa al-Mosir usillae ar amrar Allar ruhe tumrare doia saf ḳorse, tumrare fobitro ḳora oise ar be-ḳosur ḳalas ḳoia goinno ḳora oise. Kunu kunu manshe ḳoin, “Amar lagi kunta-u haram nae, hokkolta-u zaiz.” Oile hokkolta zen manshor lagi ufoḳari, ila sinta ṭik nae. Amar lagi hokkolta zaiz oile-o, ami kuntar gulam oitam nae. Ḳeu ḳeu ḳoin, “Feṭor lagi kani ar ḳanir lagi feṭ deoa oise.” Kub shundor ḳota, oile Allae to i duiota-u binash ḳoriliba. Mono rakio, shoril to zina ḳorar lagi nae borong Malik Isar lagi-u, ar Malik Isa shorilor lagi. Allae tan kudroti bole Malik Isare murda taki zinda ḳorsoin, ar ou bole amrare-o zinda ḳorba. Tumra zano na ni, tumrar shoril oilo al-Mosir shorilor ongo? Te al-Mosir shorilre ami bodmaish beṭir shorilor loge milaitam ni? Nauzubilla, kunumonte-u na! Tumra buzo na ni, ze beṭae bodmaish beṭir loge mila-misha ḳore, tar shoril to ou beṭir loge ekḳano milizae. Zela Fobitro Tourat Shorifo leḳa ase, “Tara duiozon eḳ shoril oiba.” Oile ze zon Malik Isar loge milizae, he tan loge ruhe-o eḳ oizae. Baiainre, tumra hoḳol zator zina taki zan basao. Manshe bad-baki zoto guna ḳore, ita shorilor bare ḳore, oile zegie zina ḳore, he tar nizor shorilor birudde guna ḳore. Tumra buzo na ni, tumrar shoril oilo Allai Pak Ruhur Kaba gor, ou ruhre tumra Allar ges taki faiso, ein tumrar dilo boshot ḳoroin. Tumar shoril to tumar nizor shompod nae. Bout dam dia tumare ḳorid ḳora oise. Erlagi tumar shorilre Allar gourobor ḳamo lagao. Baiainre, tumra zeta fotua zanar lagi amar gese leḳso, oḳon ou befare ḳoiram. Tumrar ḳota ṭik ase, manshor lagi bala ḳam oilo bia-shadi na ḳora. Oile shomazor halot dekia ami koiram, zina taki basibar lagi forteḳ beṭaintor bou taḳle bala, ar forteḳ beṭintor-o zamai taḳle bala. Hoḳol zamaie tar bour faona hok adae ḳorouk, ar boue-o ola zamair faona adae ḳorouk. Bour shoril to tair nizor nae, tair zamair. Olaḳan zamair shoril-o tar nizor nae, tar bour. Zamai-boue eḳe-oinnore nirash ḳorio na, ḳali kas kunu dua-munazator lagi duiozone foramish ḳoria kisu shomoy alada roitae faro. Bade hirbar milizio, zate shorilor ḳaishor lagi Shoytane tumrare gunar fote ṭanar shuzug na fae. Te i befare ami tumrare kunu hukum diram na, ḳali izazot diram. Ta-o amar monor asha oilo, hoḳol manush amar laḳan abiati rouk! Oile Allar ges taki to eḳo manshe eḳo nomunar rohom-niamot faisoin. Te ṛaṛi beṭintore ar bou mora beṭaintore ami foramish diram, tara zudi amar laḳan roita faroin, te bala. Oile nizore shamlaite na farle tara bia-shadi korouk. Karon shorilor ḳaishe zolia-fuṛia mora taki bia-shadi kora-u bala. Ar zamai-boure ami ou hukum diram, boue zanu tair zamai saṛia na zae. I hukum ḳali ami diram na, shoyong malike-u dira. Ar zudi tai horia zaegi, te dusra bia na bouk, borong zamair gese firia auk. Ola kunu zamaie-o tar boure talaḳ na deuk. Oḳon zeta ḳoiram, ita to shorashori malikor hukum nae, tan fokke ami koiram, kunu mumin bair bou zudi Isayi torikar na oin ar tain zamair loge shongshar ḳorta sain, te zamaie tanre talaḳ na deuk. Ou laḳan kunu beṭi manshor zamai-o zudi Isayi torikar na oin, ar zamai tan loge roita sain, te boue i zamaire talaḳ na deuk. Ḳaron ou bour usillae Allae tair zamaire fak-fobitro ḳorsoin ar ou zamair usillae tar boure-o fak-fobitro ḳorsoin. Ila na oile tumrar huruttain to nafaḳ oilo one. Ashole to Allae oḳon tarare-o fak-fobitro mono ḳoroin. Oile Isayi torikar baira hou bou ba zamai zudi emne-u alog oizita sain, te oita farba. Ila halote hou mumin bai ba boin biar kunu bandonor maze taḳoin na. Buzrae ni, amra shantie roar lagi Allae-u amrare daot disoin. O bou oḳol, tumi kila buzlae, tumar zamair zan tumi basaitae fartae nae? O zamai oḳol, tumi-u ba kila buzlae, tumar bour zan tumi basaitae fartae nae? Zai ouk, Malik Isae zare zela raḳsoin, Allae zare zela daot disoin, he ola solouk. Hoḳol Isayi zomatre ami ou eḳoi hukum diar. Zela, mosolmani ḳam ḳorail kunu manshe Isayi torika ḳobul ḳorle he tar ou mosolmanire oshikar na ḳorouk, ar mosolmani na ḳorail kunu manshe Isayi torika ḳobul ḳorle, he mosolmani na ḳorouk. Mosolmani ḳam ḳorani ba na ḳorani iṭa kunu boṛo befar nae, Allar hukum-ahkam mana-u oilo asol ḳota. Allae zare ze halote daot disoin, he ou halote-u taḳouk. Isayi torikat aibar ḳalo tumi gulam aslae ni? Te itar lagi bezar oio na, ar shadin oite farle shadin o. Gulami kora halote Malik Isae zare daot ḳori anchoin, he to tan dorbaro shadin oigese. Ar shadin halot taki zare daot ḳori anchoin, he to al-Mosir gulam bonigese. Baiainre, tumrare bout damdi korid ḳora oise, erlagi manshor gulam bonio na. Allae zare ze halote daot disoin, Allar dorbaro he ola-u rouk. Oḳon ami abiati fuṛintor muslar befare ḳoiram. I befare malikor ges taki ami shorashori kunu hukum faisi na, oile Allar rohomote hok-halal roia ami amar motamot zanairam. Ou aḳeri zomanat zela mosibot aia azise, amar mone or tumra zein zela aso, ola-u ro. Tumar zudi bou taḳe, te taire talaḳ dio na, ar bou na taḳle bia-shadi korat-o lagio na. Oile bia ḳorle kunu guna oito nae, ar kunu abiati fuṛi bia boile tair-o guna oito nae. Ḳali zogoto tarar ḳoshṭo baṛibo, ou ḳoshṭo taki ami tumrare basaitam sairam. Bai oḳol, ami koitam sairam, Malik Isae kub zoldi toshrif anra, beshi deri nae. Erlagi oḳon taki oula mono ḳorio, zerar bou-baichcha ase, mono ḳorio bou-baichcha nai. Zera duḳ-mosiboto asoin, tara mone ḳoroukka kunu duḳ-mosibot nai, zera kushi-bashi korra, tara mone ḳoroukka kunu kushi-bashi nai, ar zara ḳorid-biki korer, tara-o mone ḳoroukka, ita malor ufre tarar kunu dabi-daoa nai. Zera zogot-shongshar loia besto, tarar bab zanu furafur shongshari na oy, ḳaron bobor bazar to shango oizar. Ami sairam, tumrare hoḳol nomunar sinta-babna taki horai raḳtam. Ḳaron abiati beṭainte sinta ḳoroin malikor befare, kila Malik Moulare kushi raḳa zae. Oile biati manshe sinta ḳoroin shongsharor befare, kila goror bou-baichchare kushi raḳa zae, erlagi tarar mon du-ṭanat foṛizae. Oula abiati beṭi ar fuṛinte sinta ḳoroin malikor befare, kila Malik Moulare kushi raḳa zae, zate tarar shoril ar mon fak-fobitro taḳe. Oile biati beṭinte sinta ḳoroin shongsharor befare, kila zamaire kushi raḳa zae. Buzrae ni, ou talim oḳol to tumrar balair lagi koiram. Ami tumrar golat kunu fash lagaitam sairam na, ḳali koitam sairam, tumra nek fote solo ar dile-zane Malik Moular ashik o. Kunu manshe zudi mono ḳore, he tar abiati fuṛir day-dayitto adae ḳorer na, fuṛir biar boyosh far oizar ḳori, he fuṛire bia deoa zorur mono ḳore, te tar kushi mafik fuṛire bia deuk. Ete kunu guna oito nae. Oile ze manshor mon tir ase, zar mono kunu oshanti nai, he tar nizor monre shamlaia ḳam ḳore, i manshe zudi mone ḳore tar fuṛir bia-shadi zorur nae, te he ṭik kam-u ḳorer. Oḳon buza zar, ze zone tar fuṛire bia-shadi dey, he nek kam ḳore ar ze zone tar fuṛire abiati halote raḳe, he aro beshi nek kam ḳore. Zamai zotodin zinda taḳoin, otodin bou zamair bandono taḳoin. Oile zamai mara gele boue ḳalas fain, ar nizor fosond mafik Isayi torikar zekunu zonor gese bia boita faroin. Ta-o ami mono ḳori, tain ṛaṛi halote roile-u aro bala. Ami buzram, ami ou hokkolta Allai ruhur bole ḳoiram. Huno, oḳon ami devtar name bilai deoa foshador muslar ḳota ḳoiram. Amra to zani, amra hoḳlor-u aḳol-buddi ase. Oile aḳole boṛai baṛe, ar mohobbote manush goṛe. Ḳeu zudi nizore shian mono ḳore, te zotoḳan shian oa zorur, otoḳan to oise na. Oile ze zone Allare mohobbot ḳore, Alla Pake to tare sinoin. Te devtar name bilai deoa foshador befare ḳoiram, amra zani, devta bolte i zogoto kunta-u nai, eḳ Alla saṛa dusra kunta-u nai. Asmano ba zomino zekunu zagat, deb-debi name zudi kunta takia taḳe, te bout devta ar bout munib asoin. Oile amrar zana mote ḳali eḳ Alla asoin, tain-u amrar gaibi baf. Tan ate hokkolta foyda oise, tan lagi-u amra basia asi. Ṭik oula amrar malik-o ḳali eḳzon, tan nam Isa al-Mosi. Tan usillae hokkolta foyda oise, amra ḳali tan lagi-u ṭikia asi. Ita buzar aḳol to hoḳol manshor nai. Kunu kunu zone age devtare bozona ḳorto, erlagi tara oḳon devtar name bilai deoa foshad ḳaile, tarar bibeḳor ḳomzurie tare ḳolonki banae. Ashole kunu nomunar ḳanir bole-u amra Allar dorbaro ḳobul oi na. Ḳani na ḳaile-o amrar imanor ḳeti oy na, ar ḳaile-o kunu lab oy na. Oile hushiar roio, tumrar ou shadinota kunumonte-u zanu ḳomzur imandaror lagi gunar ḳaron na oy. Tumar to aḳol-bibeḳ ase, oile zar bibek komzur, he zudi tumare devtar mondiro boia foshad ḳaoat deḳe, te he-o ou foshad ḳaito nae ni? Ar ou ḳomzur baire basanir lagi-u to al-Mosie zan kurbani disla, oḳon tumar ou aḳole tar imanor shorbonash or. Olaḳan tumra zebla tumrar mumin baiaintor loge gunar ḳam ḳoro, tarar ḳomzur bibeḳre duk deo, ou shomoy tumra al-Mosir birudde-u guna ḳoro. Erlagi ami koiram, ḳana-finar ḳarone zudi amar bair imanor ḳeti oy, te tare guna taki basanir lagi ami gust ḳaoao ekkere bad dilaimu. Baiainre, ami kita shadin nae ni? Ami kunu sahabi nae ni? Ami kunu amrar Malik Isare deḳsi na ni? Malikor lagi ami ze toblig kam ḳorsi, itar fol tumra nae ni? Oinno ḳeu amare sahabi koia na manle-o tumra to manbae, amar sahabi ḳamor sil-sappoṛ tumra-u, ḳaron amar mazdi tumra tan ummot oiso. Te amar sahabi fod loia zera shondoy ḳoroin, tara amar ou zuaf hunoukka. Ami ar sahabi Barnabase kita ḳana-finar beton faibar odikar nai ni? Mumin kunu boinre shadi korar odikar amrar nai ni? Oinno sahabi oḳole, Malik Isar baiainte ar sahabi Fitore zela zarzir bibire loia soforo zain, amra-o ola fari na ni? Ḳali ami ar Barnabase-u nizor ate ḳamai koria ḳaitam ni? Nizor gaṭṭir ṭeḳa bangia ḳeu sifair saḳri kore ni? Ze giroste folor bagan ḳore, he itar fol ḳae na ni? Ze raḳale foshufal raḳe, he itar dud ḳae na ni? Ami to ḳali manush aḳole matiar na, Musa nobir shoriote-o ola ḳoise. Shorioto ase, “Dan maṛa deoar shomoy gorur muko hufi lagaio na.” Te Allae ḳali gorur ḳota-u sinta ḳoroin ni? Tain ashole amrar ḳota-u ḳoisoin, ikan hasa nae ni? Nichchoy, ita amrar lagi-u leḳa oisil, ḳaron zein ḳet ḳoroin ar zein dan maṛa dein, fosholor baṭ faoar ashae-u tarar ita ḳora usit. Te amra zela tumrar maze ruhanik bisi ruisi, oula zudi tumrar ges taki duniabi kani-fani zugai, te beshi kunta niram ni? Ar ou befare zudi tumrar ufre oinno manshor dabi kaṭe, te amra aro beshi dabi kaṭaitam fari na ni? Oile amra ila dabi na ḳaṭaia shoijjo ḳoriar, zate al-Mosir befare kush-ḳobri toblig kamo amra ḳeuror fotor ḳaṭa na oi. Tumra zano na ni, fobitro Baytul-Mukaddoso zera ḳam ḳoroin, tara oḳan taki-u ḳana-fina fain, ar kurbani kanat zera ḳam ḳoroin, tara ou kurbanir mal taki baṭ fain. Ṭik olaḳan Malik Isar hukum ase, zara kush-ḳobri toblig koroin, tara zanu ou ḳamor usillae ḳaoa-finda fain. Oile ami to er kunta-u nisi na. Ar oḳon tumrare-o ita lekiar na, amar lagi otar bebosta ḳortae ḳori. Oḳon amar ou boṛaire zudi keu beḳama banailae, te amar mori zaoa-u bala. Ami ze kush-ḳobri toblig koriar, ete amar boṛai deḳanir kunta nae, ita amar lagi forz. Toblig na ḳorle amar ufre lannot foṛouk! Oile ami zudi kushi mone toblig kori, te to amar furuskar ase, ar zudi nizor kushie na-o ḳori, te malikor deoa zimmadar hishabe to ḳoriar. Oḳon amar i ḳamor furuskar kita? I furuskar oilo, kush-ḳobri toblig koria hari faona beton nei na, bina foyshae toblig kora-u amar beton. Ami zudio kunu beṭar gulam nae, tebou bout manshor zan basanir lagi nizore hoḳlor gulam banaia raḳsi. Ihudi oḳlor mon joy ḳorar lagi Ihudi shomazo ami Ihudir laḳan oisi. Ami to Musa nobir shoriotor odine nae, oile zara tan shoriot mane, tarare joy ḳorar lagi ami tarar laḳan oisi. Ar zara shoriotor baira, tarare joy ḳorar lagi ami shoriotor baira manshor laḳan oisi. Ashole ami Allar deoa shoriotor bare nae, al-Mosir shoriotor odine asi. Zera ḳomzur, tarar gese ami komzuror laḳan oisi, tarare-o joy ḳorar lagi. Befar oilo, zekunu monte kisu manshor zan basanir lagi ami hoḳol shomazor mon zugai soliar. Ḳali kush-ḳobrir lagi-u ami ita ḳoriar, zate er rohomotor bagi oi. Tumra zano na ni, douṛor ḳelat uṭia hoḳole-u douṛae, oile furuskar ḳali eḳzone-u fae. Oḳon tumra-o oula douṛao zate furuskar fao. Douṛor ḳelat douṛaia hari manshe ola eḳ mala fae, ze mala bade nosṭo oizae, ar ou mala faoar lagi era bout ḳoṭin niom-ḳanun-o mane. Oile amra to asol okkoy mala faoar lagi ita ḳorram. Erlagi uddesho saṛa ami douṛairam na. Zeta beṭainte batashor loge kilakili koroin, ami to itar laḳan nae. Borong ami nizor shorilre ḳoshṭo dia gulamor laḳan raḳsi, zate oinnor gese kush-ḳobri toblig koria hari, furuskar taki nize bad na foṛi. Bai oḳol, ami sairam, morubumir maze amrar moy-murobbi oḳlor goṭona tumrar mono rouk. Era hoḳol to gaibi megor kuṭir tole roita, hoḳole faoe aṭia Nil doria faroia gesla. Hoḳole-u hou megor kuṭi ar Nil doriar maze Hozrot Musar torikae pak gusol ḳorsla. Tara Allar deoa eḳoi laḳan gaibi kani kaisoin, eḳoi laḳan gaibi fani-o ḳaisoin, hoḳole ola ek kudroti fattor taki fani kaita, ze fattor tarar loge loge roito, ou fattor-u oila al-Mosi. Ta-o era beshir bag manshor ufre Alla Pak kushi asla na. Erlagi-u tarar lash morubumir maze foṛi roilo. Ita goṭona oilo amrar talimor lagi eḳ itihash, zate ota dekia amra hushiar oi ar tarar laḳan ku-fotor ashik na oi. Tarar maze ḳeu ḳeu zela murtifuza ḳorsil, tumra ila ḳorio na. Tourat Shorifo ase, “Hoḳol manush ḳanit boila, bade tara ḳaoa-daoa ḳoria hari, hoi-hulla ḳori nas-gan, furti-amud ḳorat lagla.” Aroḳbar tarar mazor bout zone zina ḳorae, eḳoi dine teish azar manush mara gesla. Te amra zanu olaḳan zina taki basia roi. Tarar mazor boute Malik Moulare forikka ḳorat lagia hafor ḳamoṛ ḳaia morsoin. Amra zanu tanre ila forikka na ḳori. Tarar mazor boute na-kush oia boḳa-zoḳa ḳorae, Allar gozobor firistae tarare binash ḳorsoin. Erlagi tumra ila ḳorio na. Tarar ufre ita goṭisil nishana hishabe, zate ota dekia amra hushiar oi. Amra zera ou aḳeri zomanar manush, ou leḳa foṛia amra zanu shabdane roi. Erlagi kunu manshe zudi mono ḳore, he mozbut ase, te he hushiar rouk zate tar iman na ale. Manshor zindegit zelaḳan forikka ae, otar baira noya kunu forikka to tumrar ufre or na. Alla Pak to hok-halal, tain tumrare shoijjor otirikto kunu forikkat falaita nae, borong forikka taki basibar fot-o batai diba, zate tumra ita shoijjo ḳortae faro. O mayar dust oḳol, erlagi ami tumrare ḳoiram, deb-debir puja taki zan basao. Tumrare aḳoldar zania-u ami koiram, ami zeta ḳoiram tumra ita zasai-basai koria deḳo. Al-Mosir mezbanir shomoy, shukria adae ḳoria fiala taki amra ze shorbot ḳai, itar mazdi amra al-Mosir lour loge shorik oi na ni? Ar ze ruṭi siṛia ḳai, i kanir mazdi tan shorilor loge shorik oi na ni? Amra hoḳole zebla eḳ ruṭi baṭia ḳai, te buza zae, amra bout zon oile-o amra ḳali eḳ shoril. Huno, Boni Israilor halot sinta ḳoro, tarar zeta manshe kurbanir gust ḳain, tara hou kurbani kanar hoḳol ḳamo-o shorik oizain na ni? Ar ami kunu ḳoiram ni, devtar namor foshadre hishabo dora zae, ba ou devtare hishabo dora zae? Na, muṭe-u na. Ta-o bidormi oḳole zoto nomunar boli dein, ita deo-danob, but-ferotor name-u dein, Allar name nae. Te ami sai na, ou but-ferotor loge tumrar kunu ḳatir-dusti rouk. Huno, Malik Isar mezbani ar but-ferotor mezbani, i duio ḳamo shorik oa tumrar lagi ṭik nae. Malikor fiala ar butor fiala, duiota taki eḳloge ḳaoa ṭik nae. Te amra kita ḳoriar, amra Malik Isar dilo aguin lagaitam ni? Tan loge laṛai koria zittam farmu ni? Mono or ni, ami to age ḳoisi, kunu kunu zone ḳoin, “Amar lagi kunta-u haram nae, hokkolta-u zaiz.” Oile hokkolta zen manshor lagi ufoḳari, ila sinta to ṭik nae. Zudio era ḳoin, hokkolta-u halal, oile hoḳoltae to manshor iman baṛae na. Te kunu zone-u nizor sharto loia fagol oio na, borong oinnor balai korar sesṭa ḳoro. Bazar-aṭo zekunu gust biki oile ita ḳaio, nizor bibeḳre shanti raḳar lagi kunu shondoy ḳorio na. Fobitro Zobur Shorife to ḳoy, “I zogot ar zogotor hokkolta-u Mabudor.” Erlagi amrar torikar bairor kunu manshe zudi tumrare daot dein, ar tumra zaitae sao, te bibeḳre ṭanḍa raḳar lagi kunu shondoy na ḳoria zeta samne dein ota-u ḳaio. Oile ḳeu zudi tumrare zanai dey, i kani kunu devtar namor foshad, te ze zone ikan ḳoise, tar balair lagi ar bibeḳor aramor lagi ita ḳaio na. Ami to tumrar bibeḳor ḳota ḳoiram na, hou dusra manshor bibeḳor ḳota ḳoiram. Ḳaron oinno manshor bibeḳ-bisare, amar ichcha-onichchar shadinotat ḳene nak golaito? Ami zudi Allar shukria adae ḳoria ḳana-fina ḳai, te ze ḳanir lagi shukria adae ḳorlam, ou ḳanir lagi ar bodnam oito ḳene? Erlagi tumra ḳana-fina ḳoro ba zeta-u ḳoro na ḳene, hoḳolta-u Allar gourobor niote ḳorio. Boni Israil ba bin zati, ba Allar zomator kunu manshor fotor ḳaṭa bonio na. Ami zela hoḳol nomunar manshore hoḳol befare kush raḳar sesṭa ḳori, tumra-o oula ḳorio. Ami to nizor shartor sinta ḳori na, shob manshor balair sesṭa ḳori, zate tara nazat hasil ḳoroin. Te ami zela al-Mosir laḳan soliar, tumra-o oula amar laḳan solo. O bai oḳol, tumra amar deoa talim mono rakia solrae, ar hoḳol befare-u amare iad raḳrae, erlagi ami tumrar tarif ḳoriar. Te ami sairam, tumra oḳan buzo, al-Mosi-u oila hoḳol beṭaintor mata, beṭain oila beṭintor mata, ar Alla Pak oila al-Mosir mata. Ebadot-bondegir shomoy ze beṭae mata guria dua-munazat ḳore, ba firaki mate, he to tar matare oshomman ḳore. Olaḳan ze beṭie mata na guria dua-munazat ḳore, ba firaki mate, ou beṭie-o tair matar oshomman ḳore, tai mata ḳamail beṭintor laḳan bonizae. Kunu beṭie zudi mata na gure, te tair sul ḳamailauk. Oile beṭintor sul ḳamani shoromor bishoy mono oile, tair mata guria raḳouk. Ebadot-bondegir shomoy mata guria raḳa beṭaintor lagi ṭik nae, Allae to beṭaintore tan nizor surote foyda ḳorsoin ar beṭaintor mazdi-u Allar mohima zair oy, oile beṭintor mazdi beṭaintor mohima zair oy. Foyla beṭa manush Baba Adom to beṭi taki foyda oisoin na, oile foyla beṭi manush Mai Haoa nichchoy beṭa taki-u foyda oisoin. Ar beṭintor lagi beṭain foyda oisoin na, borong beṭaintor lagi-u beṭin foyda oisoin. Ou talim mafik firista oḳlor ḳota kial rakia, tabedari manar nishana hishabe hoḳol beṭinte mata guria raḳa zorur. Ta-o Malik Isar torikar beṭi manshe goror beṭar ufre borosha ḳoroin, ar beṭae-o ola beṭir ufre borosha ḳoroin. Ḳaron, foyla beṭa Adom taki zudio foyla beṭi Mai Haoa foyda, ta-o beṭin taki-u hirbar beṭaintor zonom oy. Ashole hokkolta-u to Allar foyda. Tumra nize-u bisar ḳori deḳo, matat ḳafoṛ na dia kunu beṭie dua-munazat ḳora ṭik ni? Ar shomazor hal-sal taki-u to buza zae, beṭaintor matat lamba sul raḳa shoromor befar, oile beṭinte lamba sul raḳle tarar shunam baṛe na ni? Nizore guria raḳar lagi-u to tara i lamba sul faisoin. Te ita loia ḳeu torko-bitorko ḳorle, amar forishkar zuaf oilo, ita saṛa dusra kunu niom amrar maze nai ar Allar zomator maze-o nai. Oḳon ami ze befare foramish ditam sairam, i befare to tumra muṭe-u tarif faoar zuka nae. Tumra zomato zela shorik o, itae tumrar kunu fayda oy na, borong keti oy. Ami huniar, tumra zebla zomato shorik o, ou shomoy tumrar maze doladoli taḳe, ar ita kisu ami bishash-o ḳori. Ashole to tumrar maze motor omil taḳbo-u, zate tumrar mazor ḳaṭi nikut manshor forisoy mile. Huno, tumra zebla ekḳano milia ebadot-bondegi koro, ou shomoy to al-Mosir mezbanir niote ḳani bilani oy na. Ḳaron tumra eḳzone aroḳzonor bae kial na ḳoria-u ḳani kailao. Tumrar eḳzonor feṭo buk taḳe, ar aroḳzon ḳaia ṭal oizae. Ḳana-fina ḳaibar lagi tumrar kunu gor-baṛi nai ni? Tumra ichcha ḳoria Allar zomatre elami korrae ni? Ar zerar ḳanir kunta nai, tarare shorom dirae ni? Oḳon ami ar kita ḳoitam? Tumrar tarif ḳortam ni? Nauzubilla! Ashole ami Malik Isar ges taki ze talim faisi, ou talim-u ami tumrare disi. Malik Isare ze rait dushmonor ato dorai deoa oisil, hou rait tain ḳanir ruṭi ato loila, ar Allar shukria adae ḳorla, bade ou ruṭi ṭukraia ḳoila, “Ita to amar shoril, ou shoril tumrar lagi bilai deoa or, te amare mono raḳar lagi oula ḳorio.” Ola ḳaoar bade tain shorbotor fiala loia ḳoila, “Amar lour zoriae Allar loge milonor ze noya usilla ḳaim oibo, ou fiala oilo er nishana. Tumra ou fiala taki kaoar shomoy amare iad ḳorar lagi hamesha ola ḳorio.” Te tumra zotobar ou ruṭi kaibae ar ou fialar shorbot ḳaibae, Malik Isa hirbar na aoa forzonto otobar-u tan moutor ḳota elan ḳorrae. Erlagi ḳam-ḳeali koria ḳeu zudi i ruṭi kae ar fialar shorbot ḳae, te he Malik Isar shoril ar lour birudde guna ḳoria dushi bonizae. Ou ruṭi kaibar age ar fialar shorbot ḳaibar age, manshe nizore zasai kori deḳouk. Ḳaron ita ḳaoar shomoy he zudi Malik Isar shorilor befare na buze, te ita ḳaia he nizor ufre gozob ḍakia ane. Otar lagi-u tumrar mazor bout manush ḳomzur ar bemari asoin, emonki keu ḳeu morsoin. Amra nizor bisar nize ḳorille, malikor ator bisar taki rehai faimu. Oile malike zebla amrar bisar ḳoroin, ou shomoy tain amrare shashon ḳoroin, zate duniar hoḳlor loge aḳerator din amrare dushi shaibosto ḳora na oy. Erlagi O bai oḳol, tumra zebla mezbani kaoar lagi ekḳano dola o, ou shomoy eḳe-oinnor bae kial ḳorio. Eḳzonor zudi feṭo buk lagizae, te he baṛi taki kaia auk, zate tumra ekḳano oae kunu shaza na fao. Te ami zebla tumrar gese aimu, ou shomoy bad-baki befare nosiot ḳormu. O bai oḳol, ami sairam Allai Pak Ruhur dan-niamotor befare tumrar kunta-u ozana na rouk. Tumrar zana ase, age zebla tumra Allar ebadot ḳortae na, hou shomoy tumrare olaḳan deb-debir bae ṭania neoa oito, zetae kunta matito fare na. Oile ami tumrare zanairam, Allar ruhur bole matile kunu manshe ikan ḳoy na, “Isar ufre lannot foṛouk.” Ar Allai Pak Ruhur bol saṛa ḳeu ḳoito-o fare na, “Hozrot Isa-u malik.” Ou eḳoi Pak Ruhur nanan nomunar dan-niamot ase. Amra nanan niome eḳoi malikor kezmot ḳori. Amra forteḳ zonre nanan nomunar ḳam-ḳaz deoa oise, oile Alla Pak to eḳzon-u, tain nanan ufaye amrar maze ḳam ḳoroin. Hoḳlor faydar lagi ou Pak Ruhu eḳo zonor maze eḳo nomunae zair oin. Ou Pak Ruhur bole kunu kunu zonre gian-buddir mat mata, ar ḳeurore aḳoldari mat matar niamot deoa oy. Eḳzone ou ruhur bole gaibi borosha fain, ar ou ruhur bole dusra zone bemarire bala ḳorar ḳemota fain, ḳeu ḳeu keramoti ḳam ḳorar ḳemota, ḳeu ḳeu firaki matar ḳemota, ḳeu ḳeu bad-bala ruhu oḳol ar zin-butre sinar ḳemota, ḳeu ḳeu nanan nomunar gaibi bashae matar ḳemota ar ḳeu ḳeu itar mani buzaia dibar ḳemota fain. Ita hoḳol ḳam to ou eḳoi Pak Ruhe ḳoroin. Ou dan-niamot oḳol tan nizor kushi mafik forteḳ muminre baṭia dein. O baiain oḳol, eḳ shorilor zela bout ongo taḳe, ola bout ongo milia eḳ shoril oy, al-Mosi-o to ṭik olaḳan. Amra Boni Israil oi ba bin zati oi, azad ba gulam oi, ou eḳoi Pak Ruhe hoḳlor torikabondi oise eḳ shoril oar lagi. Hoḳole-u to ou eḳoi Pak Ruhu faisi. Kunu manshor shorilre ḳali eḳ ongo dia banail oise na, borong bout ongo zuṛa deoa oise. Oḳon faoe zudi koy, “Amar nam to at nae, te ami shorilor ongo-o nae,” erlagi fao zen shorilor ongo nae, ikan to ṭik nae. Oula ḳane zudi koy, “Amar nam to souk nae, te ami shorilor ongo-o nae,” erlagi kan zen shorilor ongo nae, ikan to ṭik nae. Manshor asta shoril-u zudi souk oizito, te hunbar ḳemota ḳoi failo one? Ar zudi shara shoril-u ḳan oizito, te geran hungibar ḳemota ḳoi roilo one? Te Allae tan nizor kial-kushi mafik shorilor nanan ongore eḳ ek kori hazaisoin. Hoḳol ongo zudi eḳlaḳan oizito, taile shorilor kun halot oilo one? Shorilo bout ongo ase, ta-o shoril to eḳṭa-u. Souke atre ḳoito fare na, “Tumare amar dorḳar nai,” ar matae duio faore ḳoito fare na, “Tumrare amar dorḳar nai.” Ashole shorilor ze ongore ḳomzur mono oy, oguin-u beshi dorḳari. Shorilor ze shoromor ongore amra huru-muru mono ḳori, iṭare amra beshi dam dei, mani ze ongore bare deḳani zae na, itare amra ijjot ḳoria guria raki. Oile ze ongore bare deḳani zae, itare guria raḳar dorḳar oy na. Ashole Allae ou huru-muru ar ḳomzur ongore beshi ijjot dia, hoḳol ongore zuṛa lagaia eḳ shoril banaisoin, zate shoril bagabagi na oy, borong eḳ ongoe aroḳ ongore nizor laḳan mono ḳore. Shorilor eḳ ongor zudi koshṭo oy, te shara shorile ḳoshṭo fae, ar eḳ onge ijjot faile, asta shorile kushi-bashi kore. Te tumra-u oilae al-Mosir shoril, tumra eḳo zon ou shorilor eḳo ongo. Zano ni, Allae to zomator bitre foyla sahabi, bade firaki mat matra, bade ustad oḳol boail ḳorsoin. Erbade boail ḳorsoin zera keramoti ḳam ḳorra, bemar bala ḳorra, shaijjo-shohayota ḳorra, Isayi zomatre salaora ar nanan gaibi bashae matra zon. Te era hoḳole-u kunu sahabi fod faisoin ni? Hoḳole-u firaki matoin ni? Hoḳol-u ustad ni? Ar hoḳole kunu keramoti ḳam ḳorar ḳemota faisoin ni? Hoḳole kunu bemar shifa ḳorta faroin ni? Hoḳole-u gaibi bashae matoin ni? Hoḳole-u itar mani buzaia dita faroin ni? Nichchoy na. Ta-o ami ḳoiram, tumra hoḳol taki dami niamot oḳol faoar lagi ashik o. Ar kial ḳoro, oḳon ami tumrare aro bala ekḳan fot deḳairam. Ami zudi zogotor manush ba asmani firistar gaibi bashae mati, ar amar bitre kunu mohobbot na taḳe, te to ami zure zure bazail fitolor gonṭi ba jonjon ḳora ḳortalor laḳan oigesi. Amar zudi firaki matibar ḳemota taḳe, hoḳol batuni befar buzi, hoḳol nomunar aḳol-buddie kamil oi, ar amar imani boldi usa faṛore-o eḳ zaga taki aroḳ zagat horailitam fari, oile amar dilo kunu mohobbot na taḳe, te Allar nozoro ami kunta-u nae. Amar hoḳol don-samana zudi gorib-dukire bilai dei, emonki amar shorilre-o zudi zalanir lagi dan ḳorilai, ar amar bitre zudi mohobbot na taḳe, te kunu fayda nai. Mohobbot hoḳol shomoy sobor ḳore, doya-maya ḳore, ingsha ḳore na, boṛai kore na, ohonkar ḳore na, bad bebohar ḳore na, nizor shartor sesṭa ḳore na, rag-gusa ḳore na, ḳeu kunu ḳeti korle mono raḳe na, naformanit kushi oy na, borong hokikotie kushi kore. Mohobbote hokkolta shoijjo ḳore, hoḳolta bishash ḳore, hoḳol befare monor maze asha zugae ar hoḳol befare sobor ḳoria doijjo dore. Huno, hoḳol firaki mat eḳdin fuṛaizibo, nanan basha-o shesh oizibo ar aḳoldaror aḳol-o fuṛaizibo, oile mohobbot kunu shomoy fuṛae na. Te oḳon amra to kunuta-u shullo-ana zani na, firaki mat-o shullo-ana ḳoitam fari na. Oile amra zani, shullo-ana oar shomoy zebla aibo, ou shomoy banga-sura hoḳolta fuṛaizibo. Ami zebla huru aslam, ou shomoy huruttar laḳan matitam, huruttar laḳan sinta-babna ḳortam, ar huruttar laḳan bisar-bibechona ḳortam. Oile oḳon to boṛo oigesi, erlagi huruttar laḳan asar-bebohar bad dilaisi. Oḳon to amra zafsa aynar maze hoḳolta forishkar deḳram na, bade hou shullo-ana oar shomoy aile amra hoḳolta samna-samni deḳmu. Oḳon ami hokkolta furafur zani na, hou shomoy aile ami hoḳolta furafur zanmu, Allae amare zela furafur sinoin, ola ami-o hoḳolta zanmu. Buzrae ni, iman, asha, ar mohobbot, ou tino don hor-hamesha roibo, itar maze mohobbot-u hoḳol taki boṛo. Erlagi O bai oḳol, tumra-o mohobbotor lagi ashik o, Pak Ruhur deoa dan-niamotor lagi kiali o, ḳas ḳori firaki matibar ḳemota faite kiali o. Ḳaron ze manshe gaibi kunu bashae mate, he ita manshor loge mater na, Allar loge-u mater. Tar mator basha kunu manshe buze na, he ḳali Pak Ruhur bole batuni buli koy. Oile zein firaki matoin, ein manshor gese-u matoin, en mate manshor zindegire goṛia tule, manshor dilo asha ar shantona zugae. Te ze zone gaibi bashae mate, he ḳali nizore goṛia tule, oile zein firaki matoin, ein to Allar zomatre goṛia tuloin. Erlagi ami sairam, tumra hoḳole-u gaibi bashae mato, oile aro beshi sairam, tumra hoḳole firaki mat mato. Mono rakio, kunu manshe zudi gaibi bashae mate, ar mator bade zomator manshore goṛia tular lagi dusra ḳeu itar mani buzaia na dey, te hou zein firaki matoin ein-u boṛo. Baiainre, ami zudi tumrar gese aia ḳali gaibi kunu bashae mati, oile er mazdi Allar batuni munshar ḳota, aḳol-hekmotor ḳota, firaki kunu mat ba kitabi nosiot na zanai, te amaredi tumrar kunu fayda oibo ni? Mone ḳoro, bashi, sharinda, ar zeta baiddo-bazonar bitre kunu zan nai, ita zudi ganor shoṭik shur-tal na mania baze, te ou baznat kita bazer, manshe ita ḳemne buzbo? Zuddot zaoar lagi fouzi shingae zudi forishkar aoaz na dey, te kunu sifai reḍi oibo ni? Olaḳan tumi zebla ozana bashae mato, te tumi kita ḳoirae, tara ḳemne buzbo? Tumar i mat ḳali batashor loge matrae ni? I duniat nanan zator buli ase, ita kunuṭa-u mani saṛa nae. Ar ami zudi ou buli na buzi, te ze zone matira, tan gese to ami bideshi manshor laḳan, ar tain-o amar gese bideshi. Ikan to tumrar belae-o ṭik. Tumra zebla Pak Ruhur deoa dan-niamotor lagi kiali oirae, te ze niamot dia zomatre goṛia tula zae, ou niamot faoar lagi-u beshi sesṭa ḳorio. Erlagi ze manshe gaibi bashae mate, he Allar gese mangouk, zate itar mani buzaia dito fare. Ami zudi gaibi bashae dua ḳori, te ashole amar ruhe dua ḳorer, amar nizor mone kunta ḳorer na. Oḳon ami kita ḳortam? Ami ruhu dia dua ḳortam, ar buddi dia-o ḳortam. Ami ruhu dia git-gozol gaimu, buddi dia-o git-gozol gaimu. Ar tumi zudi kali ruhu dia shukria adae ḳoro, te mozlisor manshe kila Amin ḳoito? Tara to buzer-u na tumi kita ḳoirae, tara to osina zonor laḳan roila. Tumi hoyto ṭik babe-u shukria adae ḳorrae, oile ou manshore to goṛia tula or na. Ami Alla Pakor shukria adae ḳori, ḳaron ami gaibi bashae tumrar saite bout beshi mati. Ta-o zomator mahfilor maze gaibi bashae azar azar ḳotar bodla, manshor talimor lagi ami aḳol ḳaṭaia ḳali fasḳan ḳota ḳoimu. Baiainre, tumrar aḳol-buddi huruttar laḳan na oia boyosko manshor laḳan ouk. Oile ingsha-nindar befare tumrar mon masum baichchar laḳan ouk. Asmani Kitabo ase, Osina bashae matra manushdi, bideshi manshor mukdi, ami ou zatir loge matimu. Ta-o amar mat tara hunto nae, ikan ami Mabude ḳoiram. Te buza zae, gaibi bashae mata imandar oḳlor lagi kunu nishana nae, borong o-imandar oḳlor lagi ita eḳṭa nishana. Ar firaki mat mata o-imandaror lagi kunu nishana nae, oile imandaror lagi to ita eḳṭa nishana. Zomator hoḳol manush eḳ zagat milar bade, hoḳole zudi eḳloge gaibi bashae mate, ar ou shomoy zomator bairor ba o-imandar kunu manush ino ae, te tara tumrare fagol ḳoiba na ni? Ar hoḳole zudi firaki matoin, omon shomoy kunu o-imandar aia ino hamae, te ou hoḳlor mator mazdi he nizor gunar halot buzilibo, ou mat hunae tar nizor bisar nize ḳorbo. Tar monor lukail bishoy kula-mela oibo, teu he soizdat foṛia Allar gourob-tarif ḳoria ḳoibo, “Afnarar maze nichchoy Alla Pak azir asoin.” Baiainre, kita oito? Tumra zebla eḳ zagat zomato dola o, ou shomoy ḳeu git-gozol gain, ḳeu nosiot ḳoroin, ḳeu batuni befare ḳoin, ḳeu gaibi bashae matoin, ar ḳeu itar mani buzaia dein. Te zein zeta-u ḳoroin na ḳene, ita zanu zomatre goṛia tular niote oy. Ḳeu zudi gaibi bashae kunta mate, te eḳozon ḳori dui-tinzone matouk ar eḳzone itar mani buzaia deuk. Mani buzai dibar ḳeu na taḳle, tara zomato sufsaf taḳouk, ḳali nize nize Allar loge matouk. Ar firaki matra oḳole ola dui-tinzone matouk ar baki hoḳole zasai-basai korouk. Oile zomato zera boat asoin, tara ḳeuror gese zudi kunu ohi ba batuni kobor nazil oy, te zein boyan ḳorra, tain nirai oizaukka. Olaḳan tumra hoḳole-u eḳ ek kori firaki matio, zate hunra oḳole talim ar utshaho fae. Firaki matrar ruhu to tarar nizor boshe taḳe, Alla Pake nichchoy gulmal fosond ḳoroin na, borong shanti fosond ḳoroin. Allar pak bonda oḳlor hoḳol zomator niom-ḳanun oilo, zomator maze beṭi manush nirai roa usit, gof-shof ḳora tarar lagi ṭik nae. Shoriotor niom mafik tara odinota manouk. Tara kunu talim zanar kiali oile baṛit gia nizor zamair ges taki zanouk. Ḳaron zomator maze beṭinte gof-shof ḳora shorom. Aichcha ḳo sain, Allar kalam kunu tumrar ges taki bar oise ni? Ḳali tumrar gese-u aise ni? Mono rakio, kunu manshe zudi nizore pir-dorbesh ba batuni ḳemota-ala mono ḳore, te he ikan buzilauk, ami tumrar gese zeta leḳlam, ita hokkolta-u Malik Isar hukum. Ar ḳeu ita na manle, tare-o mainno ḳora oito nae. Erlagi O bai oḳol, tumra firaki mat matibar lagi kiali o, ar gaibi bashae matite-o bada dio na. Ta-o zomator hoḳol ḳam-u furafur adob-ḳayda ar niom-ḳanun mania ḳora zorur. O mumin bai oḳol, ami age ze kush-ḳobri toblig korsilam, hou ḳota oḳon iad ḳorai diram. Tumra to ita ḳobul ḳorslae ar imane ṭikia-o roiso. Ami ze kalam toblig korsi, ita zudi tumra mozbut ḳori doria raḳo, te ou kush-ḳobrir mazdi nazat fairae, ar na faile tumrar iman ana-u beḳama. Ashole ami nize ze talim faisi, ou talimre kub zoruri mono ḳoria tumrare-o zanaisi. Allar kalam mafik amrar gunar mafir lagi al-Mosie nizor zan kurbani disoin. Tanre dafon ḳora oisil, ar Allar kalam mafik moutor tin dinor din tain murda taki zinda oisoin. Zinda oar bade tain foyla sahabi Fitorre, bade tan hou barozon sahabire deḳa disoin. Erbade tain eḳloge fas-shor-o beshi mumin baire deḳa disoin. Erar maze ḳeu ḳeu mara gele-o, oḳono beshir bag zinda asoin. Erbade tan bai Iakubre, bade hoḳol sahabire deḳa disoin. Ar ami to hoḳlor heshor juli-jaṛa fut, ou amare-o tain deḳa disoin. Sahabi oḳlor maze ami-u hoḳol taki nogoinno, ami to sahabi koia forisoy dibar laḳ nae, age ami Allar zomator ufre zulum ḳortam. Oile oḳon ami zela oisi, ita Allar rohomote-u oisi. Amar ufre tan i rohomot beḳama gese na, ami oinno sahabi oḳol taki beshi menot ḳorsi. I menot to ami nize nize ḳortam farsi na, borong Allar rohomote-u ita ḳoraise. Erlagi ami ba oinno kunu sahabie zein-u toblig kori na ḳene, amra ou eḳoi befare-u toblig koriar, ita hunia tumra-o iman ancho. Te al-Mosire murda taki zinda ḳora oise ḳoia zebla toblig kora oy, taile tumrar mazor ḳeu ḳeu ḳemne ḳoy, manush morigele ar zinda oita nae? Moron bade zinda oia uṭte na farle to, al-Mosi-o zinda oisoin na. Ar al-Mosi zinda oia na uṭle to amrar toblig-o beḳama ar tumrar iman anao beḳama. Emonki oḳan-o buza zar zen, Allar befare amra zeta toblig koriar ita misa, ḳaron amrar toblig oilo, Allae al-Mosire murda taki zinda ḳorsoin. Oile murda oḳolre zudi zinda ḳora na oy, te to tain al-Mosire-o zinda ḳorsoin na. Ar murda oḳol zudi zinda oia na uṭoin, te to al-Mosi-o zinda oia uṭsoin na. Al-Mosire zudi zinda ḳora na oia-u taḳe, te to tumrar iman beḳama, ar tumra oḳono gunar maze habu-ḍubu ḳairae. Taile al-Mosir torikar zerar mout oigese, tara-o to binash oigesoin. Al-Mosir ufre amrar ze asha, i asha zudi kali ou duniabi zindegir lagi oy, te to hoḳol taki amrar-u beshi bod nosib. Oile asol ḳota oilo, al-Mosire to hasau murda taki zinda ḳora oise. Tain-u foyla foshol, murda taki zoto zonre zinda ḳora oibo, erar maze tanre-u foyla zinda ḳora oise. Buzrae ni, eḳzon manshor mazdi zela mout aise, ola zinda oia uṭa-o eḳzon manshor mazdi aise. Baba Adomor aolad hishabe hoḳol manshor zela moron oy, al-Mosir ummot hishabe oula hoḳolre zinda ḳora oibo. Oile ermaze ḳota ase, Allae tan morzi mafik dafe dafe hoḳolta ḳoraiba. Ḳeto taki foyla tula fosholor laḳan foyla dafo al-Mosire zinda ḳora oise, bade tain dusrabar toshrif anar ḳalo tan ummot oḳolre-o zinda ḳora oibo. Erbade kiamotor ḳalo al-Mosie duniabi hoḳol shashon, odikar ar ḳemotare binash ḳoria gaibi baf Allar ato bashshai shomzaiba. Ḳaron, Allae zoto shomoy forzonto al-Mosir hoḳol dushmonre tan faor tolat na falain, oto shomoy forzonto tain bashshai korte oibo. Ar shesh dushmon moutre-o tain binash ḳorba. Fobitro Zobur Shorifo ase, “Tain hokkoltare-u al-Mosir faor tolat raḳsoin.” Te buza zae, hokkoltare al-Mosir odine raḳar mani oilo, Allae tan nizore bad rakia oinno hoḳoltare-u al-Mosir tole raḳsoin. Ar hokkolta tan odine aia harle, hokkoltare loia ou ḳas mayar zon Ibnulla-o Alla Pakor odin oiba. Zate zein hoḳolta tan odine raḳsila, hou Alla Pak-u hokkoltar uforala oin. Aichcha doro, murda oḳlor lagi zera toubar gusol ḳorer, murda oḳolre zudi kunudin-u zinda ḳora na oy, te erar fayda kita? Ar amra sahabi oḳol-o ḳene gonṭae gonṭae bifodor mukamuki oiar? Oy, bai oḳol, ami to forteḳ din-u moutor mukamuki oiar! Amrar Malik Isa al-Mosir name tumrare loia ze boṛai deḳai, ou boṛair lagi-u ami tumrare ita zanairam. Ifis ṭauno zongli zanuar falor loge ami ze laṛai korsi, ita zudi kali duniabi niote ḳoria taki, te amar kunu lab oise ni? Murda oḳolre zudi zinda ḳora na oy, te ao, ola ḳoi, “Ao, ḳao-dao furti koro, ḳail to nichchit moron oibo.” Baiainre, tumra bul ḳorio na, ola eḳ silleḳ ase, “Ku-shongie bala manshore-o naṭailae.” Erlagi tumra bod nisha taki hozag o, ar guna ḳorio na. Tumrar mazor ḳeu ḳeu to shoyong Allare-u sine na, ita boṛo shoromor befar. Kunu kunu manshe zikaito fare, “Murda oḳol ḳemne zinda oiba? Tarar shorilor goṭon kilaḳan oibo?” Haere be-aḳol! Tumar nizor ḳetor maze ze bisi bain ḳoro, i bisi na morle to sera uṭe na. Ar tumar bain ḳora bisi taki ze sera baroy, tumi to i sera bain ḳoro na, tumi kali bisi bain ḳoro dan ba oinno kunu fosholor, ogu moria-u sera baroy. Bade Allae tan morzi mafik itar surot-aḳar goṭon ḳoroin. Tain forteḳ bisre-u tar zat mafik serar surot-aḳar dein. Buzo na ni, hoḳol zandaror gust to eḳ shoman nae. Manshor gust eḳlaḳan, foshur eḳlaḳan, fakir eḳlaḳan ar masor aroḳ laḳan. Oula asmano-o bout nomunar shoril ase, duniat-o bout shoril ase, ta-o behesti shorilor tez eḳlaḳan, ar duniabi shorilor tez aroḳ laḳan. Shuruzor tez eḳlaḳan, sandor tez aroḳ laḳan ar terar tez dusra laḳan. Emonki eḳ tera taki aroḳ terar tez-o alada. Moron bade zinda oia uṭa-o ou laḳan. Lash maṭi dia harle fosizae, oile ou lashre zebla zinda ḳora oibo, iṭa ar fosto nae. Oshommani halote maṭi deoa oy, shommani halote tula oibo. Maṭi deoa oy durbol halote, ar tula oibo boloban halote. Maṭi deoa oy roḳto-mangshor shoril, oile tula oibo ruhanik shoril. Roḳto-mangshor shoril zebla ase, te to ruhanik shoril-o ase. Zela Baba Adomor befare Fobitro Tourat Shorifo ase, “Ou foyla Adom zinda zandar oila.” Te shesh Adom, zein al-Mosi, tain kita oila? Tain to oila zindegi deora ruhu. Oile ruhanik ze shoril, ikan to foyla oy na, foyla oy roḳto-mangshor shoril, bade oy ruhanik shoril. Zela foyla Adom maṭi taki aila, bade dusra Adom, al-Mosi aila behest taki. Zogotor manush oila ou maṭir banail manshor laḳan, ar behesti manush oila hou behesti zon al-Mosir laḳan. Te Baba Adomor laḳan amra zela maṭir ḳayar surot faisi, ṭik oula hou behesti zonor laḳan behesti surot-o faimu. Baiainre ami tumrare ḳoiram, roḳto-mangshor kunu shoril Allar bashshair odikar fae na. Zetar binash ase, ita kunumonte-u sirostayi bone na. Te ami tumrare eḳṭa batuni kota zanairam, zano ni, amra hoḳlor to mout oito nae, oile hoḳlor-u surot bodlizibo. Kiamotor ḳalo eḳ muhurtor maze, sokur foloḳe, shingat fu deoar loge loge-u amra bodlizimu. Ou shinga bazia harle, hoḳol murda ola surote zinda oiba, zeta kunudin binash oito nae, ar amra-o hou surote bodlizimu. Erlagi ze shoril binash oizae, itae ola surot faite oibo, zeta kunudin fosito nae, ar zeta morizibo, itae ola surot faite oibo, zeta kunudin morto nae. Ar ze shoril fosizae, i shorile zebla sirostayi surot faibo, ze shorilor mout oy, itae zebla siroḳalin zindegi faibo, hou shomoy Allar kalamor ou leḳa folibo, Moutor binash oia joy aise. O mout, tor joy kuai? Moutre, tor bish-dat kuai? Moutor bish-dat oilo guna, ar gunare ḳemota zugae Musa nobir shoriot. Oile Alla Pakor shukria adae ḳori, amrar Malik Isa al-Mosir usillae tain amrare joy dan ḳoroin. Te, O amar mayar baiain, tumra imane mozbut o, zate kuntae tumrare alaito na fare. Malikor kezmotor lagi nizore hor-hamesha furafur bilai deo, tumra to zano, tan lagi menot ḳorle i menot kunumonte-u beḳama zae na. O bai oḳol, Allar pak bonda oḳolre shaijjor lagi sanda tular befare ami oḳon ḳoiram. Galatia deshor Isayi zomat oḳolre ami zela hukum disi, tumra-o oula ḳoro. Tumra forteḳ zone zarzir tofik onuzayi haftar foyla din kisu ṭeḳa-foysha dola ḳoro, zate ami zebla aimu, ou shomoy kunu sanda tula na lage. Ami aia harle tumrar dola ḳora ou dan-ḳoyrat Zeruzalemo loia zaoar lagi, tumra zerare fosond ḳorbae, ami siṭi dia tarare faṭaimu. Ar tumra zudi mono ḳoro ami-o zaoa zorur, te tara amar loge oia zaiba. Amar kial oilo Makidonia oia aitam, erlagi ami Makidonia deshor bitredi tumrar gese aimu. Aia hoyto tuṛa ḳoydin tumrar gese roimu ba asta shitkal tumrar gese-u ḳaṭaimu, zate ami zeno-u zai na ḳene tumra-u amare ou soforor lagi hoḳolta zuit-zait ḳoria dibae. Fotor kuṭmor laḳan ami kali fotedi zaoar ḳalo tumrar loge deḳa ḳortam sai na, ami sairam, Allar morzi oile bakka ḳoydin tumrar loge taḳmu. Oile Fonchaisha Id forzonto ami ou Ifis ṭauno-u roimu, ḳaron amar samne oula boṛo eḳṭa shuzug ase, i shuzuge boṛo bala fol mile. Ta-o bout manshe itar birudita ḳorra. Kial rakio, Timoti bai tumrar ono aile tain zanu shantie-nirboye roita faroin. Zano to, ami zela malikor kezmot ḳoriar, tain-o ṭik oula ḳorra. Erlagi keu zanu tanre elami na ḳore. Bade tain zela amar gese aita faroin, oula shanti moto tanre aguaia dio. Ami to tan lagi bar saiar, asha ḳori baiaintor loge tain-o aiba. Ar Apollos bair befare ḳoiram, tanre bout minot ḳorslam, baiaintor loge oia oḳon tumrar gese zaita, ta-o kunumonte-u razi oila na. Te shomoy-shuzug oile bade zaibane. Baiainre, tumra hoḳol hushiar o, imane mozbut o, shaoshi bab deḳao ar boloban o. Tumra zotota-u ḳoro, mohobbotor shohit ḳorio. Ar tumrar to zana ase, asta Gris deshor maze Astifan bair foribar-u oila foyla imandar. Allar pak bonda oḳlor kezmotor lagi tara nizore shofi disoin. Erlagi minot ḳoriar, ilaḳan manshore tumra ijjotor shohit bozio, aro zoto zone ola kezmot ḳoroin, Allar name menot ḳoroin, tarare-o ola bozio. Ou Astifan bai, Fatunat bai ar Akik bai aisoin dekia ami kub kushi oisi, era aoae tumrar obab furon oise. Era amar ar tumrar dilo aram disoin. Tumra ou laḳan manshore ḳas ijjot ḳorio. Turoshkor Asiya deshor zomator manshe tumrare salam zanaira. Akil ar Fiskila, ar tarar goror zomator manshe malikor mohobbotor shohit tumrare salam zanaira. Hoḳol mumin baiainte tumrare salam zanaira. Tumra eḳe-oinne fobitro golagoli korio. Ami Pauluse nizor ate ou salamor ḳota leḳlam. Malik Isare zudi keu mohobbot na ḳore, te tar ufre lannot foṛouk. Marana ta! Mani, O amrar malik, toshrif anoukka! Malik Isar rohomot tumrar ufre zari rouk. Tumra hoḳlor lagi amar Isayi mohobbot roilo. Amin. Ami Paulus, Alla Pakor morzi mafik Hozrot Isa al-Mosir eḳzon sahabi. Korint ṭaunor Isayi zomat ar asta Gris deshor maze Allar zoto pak bonda oḳol boshot ḳoroin, erar gese ami ar amrar mumin bai Timotie ou sohifaḳan leḳram. Amrar gaibi baf Alla Pake ar Malik Isa al-Mosie afnara hoḳlor ufre rohomot ar shanti nazil ḳoroukka. Amrar Malik Isa al-Mosir gaibi baf Alla Pakor tarif ouk. Tain-u rohmanur rohim Alla, hokkolor dilor buz deora Alla. Hoḳol zat duḳ-mosibotor shomoy tain amrare buz dein, zate tan ges taki buz faia, oinnor duḳ-mosibotor shomoy amra-o tarare buz ditam fari. Al-Mosir laḳan amra zela bout duḳ-mosibot shoijjo ḳoriar, oula tan usillae bout buz-shanti-o faiar. Amra ze duḳ-mosibot shoijjo ḳori, ita to tumrar monor shantona ar nazator lagi-u ḳori. Tumrare buz deoar niote-u Allae amrare buz dein. Tumra zebla amrar laḳan duḳ-mosiboto foṛbae, ou shomoy amrar deoa buz mafik tumrar ḳoshṭore shoijjo ḳorte shaijjo ḳorbo. Tumrar ufre amrar mozbut ekin ase, tumra zela amrar duḳ-mosiboto shorik aso, oula Allar deoa buz-shantonar maze-o shorik aso. Turoshkor Asiya desho amra ze mosiboto foṛslam, ota tumrare zanaitam sai. Hino taḳte amrar ufre ze azab aisil, ou azab ola marattoḳ asil, erlagi amra zanor maya saṛi dislam. Mono ḳorslam, amra nichchit mara zaimu. Te amrar i halot oisil, zate amra nizor ufre borosha na ḳoria, ze Allae murdare zinda ḳori tuloin, ou Allar ufre borosha ḳori. Eḳ bezuita moutor at taki tain amrare basaisoin, ar oḳono basaira. Amra tan ufre borosha ḳortam fari, tain hamesha-u amrare olaḳan basaiba. Tumra-o dua-munazat ḳoria amrare shaijjo ḳorrae, erlagi bout zonor duar ḳatire amra ze rohom faisi, otar fol dekia boute Allar shukria adae ḳorba. Amra zeta loia gourob ḳoriar, amrar bibeḳe-o ola ḳoy, Allar deoa fobitro ar shorol mon loia hoḳol manshor maze zindegi kaṭaisi, ḳas ḳori tumrar maze-u ḳaṭaisi. I zindegi amra duniabi aḳol-hekmote nae, ḳali Allar rohomotor bole ḳaṭaisi. Amra to tumrar gese lukai-safai kunuta lekiar na, tumra ze leḳa foṛrae ar buzrae, ḳali ou befare-u lekiar. Ar asha ḳoriar, tumra hamesha-u ola buzat roibae. Ashole amrar befare tumra tuṛa kisu zania-u, amrare loia zela boṛai korrae, Malik Isae toshrif anar shomoy tumrare loia amra-o ola boṛai kormu. Ar ou ḳotar ufre borosha ḳoria ami kub kiali oislam, ami aoa-zaoar foto duiobar tumrar gese zaimu, gele tumra duiobar-u rohom-niamot faibae. Ami mono ḳorslam, Makidoniat zaoar fote tumrar loge deḳa ḳormu ar hon taki hirbar tumrar gese aimu, zate Ehudia zilat zaoar ḳalo tumra amare aguaia deo. Oile ami na aoae tumra mono ḳorrae ni, ami ita ḍong korslam? Zogotor manshe zela eḳbar ḳoy “Oy, oy” aroḳbar ḳoy “Na, na”, ami-o ola ni? Alla Pak to hok ar ḳaṭi, ikan zela hasa, oula eoḳan-o hasa, tumrar gese amrar zoban eḳbar “Oy” ar aroḳbar “Na” oy na. Ami, Silas, ar bai Timotie tumrar gese zar ḳota toblig korsi, hou Isa al-Mosi-u oila Allar ḳas mayar zon Ibnulla, tain eḳbar “Oy” ar eḳbar “Na” nae, tain to hoḳol shomoy-u “Oy.” Alla Pakor hoḳol oada-u to al-Mosir mazdi fura oy. Erlagi munazator shomoy Allar gourobor lagi al-Mosir namor usillae amra “Amin” mani “Oy” ḳoi. Ar al-Mosir lagi amrare ar tumrare zein mozbut ḳori ṭikai raḳsoin, tan nam Alla. Tain-u amrare ḳelafoti disoin. Tan nizor don hishabe amrare sil-sappoṛ maria raḳsoin, ar tain zeta amrare dibar oada ḳorsoin, itar foyla kishti hishabe amrar dilor maze Allai Pak Ruhu dan ḳorsoin. Ami Allare shakki rakia amar zindegir ḳosom ḳaia ḳoiram, tumrar bae doya-maya taḳae tumrare basanir kiale ami Korint ṭauno zaoa bond raḳsi. Amra nizore tumrar imanor malik mono ḳorram na, borong tumrare kushi-bashie raḳar lagi tumrar loge roia ḳam ḳorram. Ḳaron tumra imane mozbut aso. Erlagi mone mone ṭik korlam, tumrar mono duk deoar lagi ami ar tumrar gese zaitam nae. Ḳaron ami tumrare duk dile amare kushi korbo ḳe? Ar ami zarare duk dimu, ou tumra saṛa amare kushi korar ar to ḳeu nai. Amar ila leḳar ḳaron oilo, ami zebla zaimu, ou shomoy zera amare kushi korar ḳota, tarar ges taki zanu kunu duk na fai. Tumrar ufre amar i bishash ase, ami zetat kushi oimu, tumra-o itat kushi oibae. Amar mono boṛo duk loia, sokur fani falaia age tumrar gese leḳslam. Ashole ami tumrare duk deoar lagi leḳsi na, borong tumrar lagi amar ze ḳoto mohobbot, oḳan zananir lagi-u leḳsi. Amare zudi keu duk dia taḳe, te he ḳali amare nae, tuṛa oile-o tumra hoḳolre-u duk dise. Tumra beshir bag zone milia tare ze shaza diso, ota-u tar lagi zotesṭo. Oḳon tumra tare maf ḳori dilao, tare buz deo, zate beshi duke he ḳator na oy. Erlagi kas ḳori tumrare ḳoiram, tumra zen tare maya ḳoro, ita forman ḳori deḳao. Ami forikka ḳori deḳtam saislam, tumra hoḳol befare baiddo aso ki na, erlagi-u ami tumrar gese leḳsi. Tumra zudi kunu befare ḳeurore maf ḳori dilao, te ami-o tare maf ḳori dei. Ar hasau zudi ami kunta maf ḳoria taki, te al-Mosir samne tumrar lagi-u ḳoriar, zate Shoytane amrare duka dito na fare. Tar ku-motlobor ḳota to amrar ozana nae. Ami Toruas ṭauno al-Mosir befare kush-ḳobri toblig korat gia deḳlam, hono ḳam ḳorar lagi malike amare eḳṭa shuzug kori disoin. Oile amar imandar bai Titasre hono na faoae amar mono kub oshanti asil. Erlagi Toruas ṭaunor manshor ges taki bidae loia Makidoniat gelamgi. Oile amra Allar shukria zanai, tain amrare hamesha al-Mosir bijoyor moha furtir misilor loge salaira. Al-Mosire sina to ek geranor laḳan. Allae tan joy-jatrae ou geran amrar mazdi hoḳol zagat sitrai dein. Zera nazat hasil ḳorra ar zera binash oira, ou duio dolor lagi amra oilam al-Mosir ek geran, ou geranre al-Mosie Allar dorbaro kurbanir laḳan shofia dira. Zera binash oizar, tarar gese amrar geran oilo morar gondo, zar fol oilo nichchit moron. Ar zera nazat hasil ḳorra, tarar gese amra oilam zindegir geran, er fol oilo aḳerator zindegi. I oto boṛo nek kam ḳorar lak kun zon? Nizor labor lagi zela bout zone Allar kalam loia bebsha ḳore, amra to itar laḳan nae. Amra borong Allar faṭail zon hishabe shorol mone al-Mosir name Allare azir-nazir rakia toblig koriar. Tumra kita mono ḳoro, amra ita ḳoia hirbar amrar nizor shunam gaoat lagsi ni? Kunu kunu manshor zela oinnor ges taki sonod neoa lage, amra-o olaḳan tumrar gese ba tumra taki sonod faoa lagbo ni? Na, muṭe-u na. Tumrar nam to amrar dilor maze leḳa ase, tumra-u oilae amrar sonod. Ar ou sonodor ḳota to hoḳole-u zane ar hoḳole-u foṛe. Ikan to forishkar buza zae, al-Mosir leḳa sonod oilae tumra-u, tumra-u amrar menotor fol. I sonod to kunu ḳali-kolom dia leḳa oise na, ḳali Allar Pak Ruhu dia leḳa oise. Ikan to Tur faṛo faoa shoriotor laḳan kunu fattoror ufre leḳa nae, borong manshor dilor maze-u leḳa oise. Ou befare al-Mosir usillae Allar dorbaro amrar furafur nichchoyota ase, ta-o amra ze nizor gune hoḳolta ḳoriltam farmu, ila kunu ḳota nae. I kezmoti gun to ḳali Allar ges taki-u fai. Allar loge milonor noya usillar ḳota zananir lagi, tain-u amrare i kezmoti gun dan ḳorsoin. I usilla to okkore okkore shoriot manar befar nae, borong Pak Ruhur forisalonae dilor iman-akidar befar. Ḳaron okkore mout, ar ruhe zindegi. Fattoror ufre leḳa shorioti ze kezmote moron ae, ou shoriot nazilor shomoy to Allar mohima zair oisil. Ou shomoy Hozrot Musar sehara-o Allar mohimae nurani oigesil. Tan mukor nurani surot zudio aste aste ḳomi zaoa dorsil, tebou Boni Israil oḳole tan sehara bae saoar takkot oise na. Ou shoriotor kezmoti fol zudi oto mohima-ala oy, te Pak Ruhur kezmoti fol ḳoto beshi mohima-ala! Ou ze okkori shoriote manshore dushi shaibosto ḳore, tar kezmoti ḳam zudi oto mohima-ala oy, te ze kezmote be-ḳosur ḳalas ḳoia goinno ḳore, i kezmot to aro ḳoto beshi mohima-ala! Buzrae ni, age zeta mohima-ala asil, oḳon itar kunu mohima nai koile-u sole, tar tulonae oḳonkur noya kezmotor mohima bout beshi. Ze nuranir tez ḳoma dorsil, ita zebla oto mohima-ala, te zeta siroḳal roibo, ita to aro ḳoto beshi mohima-ala! Amrar mono olaḳan asha ase gotike-u amra kula-kuli mati. Amra to Hozrot Musar laḳan nae, tain forda dia tan muk guria toisla, zate tan mukor ḳomi zaoa nurani surot Boni Israile na deḳoin. Oile tarar dil fashan oigesil. Ar oḳono Tourat Shorifo leḳa, Allar loge milonor hou furana usillar ḳota tilaot ḳorle, tarar dilor maze forda taḳe. Ḳali Isa al-Mosir ufre iman anle ou forda hori zae. Ar oḳon forzonto Hozrot Musar Tourat Shorif tilaot ḳorar shomoy Boni Israil oḳlor dil forda dia gura taḳe. Tarar maze ḳeu zebla malikor ufre iman ane, ou shomoy hou forda hori zae. Ou malik oila Pak Ruhu, ar malikor ruhu zeno ase, ono-u shadinota ase. Aynar samne zela forda saṛa muk shorashori deḳa zae, oula amra hoḳol-u al-Mosir nurani mohima deki deki aro beshi mohima-ala bonia tan laḳan mohima-ala oiram. Amrar Malik Isa, mani Pak Ruhur kudroti bole-u ila or. Ou ḳarone, Allae meherbani koria ou noya kezmoti ḳamor dayitto amrar ato disoin ḳori, amra nirash oi na. Toblik kamo manshe lukaia zeta behayami koroin, ita amra muṭe-u ḳori na. Amra kunu ḳamo sol-soturi kori na, Allar kalamo bezal mishai na. Borong hok kotare kula-mela ḳoia hoḳol manshor gese ar Allar dorbaro amrare zoiggo hishabe forman ḳori. Amrar kush-ḳobri zudi lukail taḳe, te lannoti fote zera zaira, tarar gese-u lukail taḳe. Ou zogotor devta Iblise o-imandar oḳlor dilre anda banailise, zate tara kush-ḳobrir nur na deḳe. Ou kush-ḳobrir mazdi al-Mosir gourob zair oise, ar ou al-Mosi-u oila Allar obikol surot. Amra to nizor befare toblig korram na, ḳali Isa al-Mosire toblig korram, tain-u malik, tan lagi-u amra tumrar gulam bonchi. Amra ita toblig korram, ḳaron ze Allae ḳoisoin, “Andair taki for ouk,” hou Alla Pake tan nur amrar dilo zalaisoin, zate al-Mosir seharar maze Allar nuror mohima zair oy. Allai ou nuror don to maṭir bashono raḳa oise, ou bashon oilam amra-u. Maṭir bashono raḳa oise, zate manshe buzto fare ou kudroti mohashokti amrar nizor ges taki aise na, borong Allar ges taki-u aise. Hoḳolbae taki amrar ufre bout laḳan saf aile-o, amra surmar oisi na. Amra bedisha lagle-o furafur nirash oisi na. Amrar ufre zulum ḳora oile-o Allae to amrar log saṛsoin na. Maṭit falaia asaṛle-o amra binash oisi na. Hamesha Malik Isar moutor duk-koshṭor nishana amrar shorilo loia guriar, zate amrar shorilor maze tan zindegi-o deḳa zae. Ar amra zoto shomoy basia asi, Malik Isar lagi amrare to hor-hamesha-u moutor ato tuli deoa or, zate ou moutor odin shorilo tan zindegi zair oy. Ou nomunae amrar maze ḳam ḳorer moute, ar tumrar maze ḳam ḳorer zindegie. Fobitro Zobur Shorifo ase, “Ami iman anchi gotike-u ḳoilam.” Ou eḳoi imanor bagi oia amra-o ola ḳoi. Ḳaron amra zani, ze Allae Malik Isare zinda ḳorsla, hou Allae tan loge amrare-o zinda ḳorba, ar amrar loge ḳori tumrare-o tan samne azir ḳorba. Ita hoḳolta tumrar balair lagi-u oise, zate manshor ufre Allar ze rohomot nazil oise, hou rohomotor ḳatire boute aro beshi kori Allar shukria adae ḳore ar Allar gourob oy. Erlagi amra nirash oi na. Zudio amrar roḳto-mangshor shoril koy oizar, tebou amrar ruhu din din taza oia uṭer. Oḳon amra ze ḳoydinor lagi shamainno ḳoshṭo ḳoriar, i koshṭor bodla amra siroḳalor lagi ofuronto shan-mohima lab ḳormu. Soukdi zeta deḳa zae, amra to itar bae sairam na, borong zeta deḳa zae na, otar bae sairam. Souke zeta deḳa zae, ita to tuṛa ḳoydinor, oile zeta deḳa zae na, ita siroḳalor. Amra zani, amra i duniabi ze ḍera-goro boshot ḳori, mani ze ḳomzur shoril loia asi, ikan zudi binash-o oizae, tebou Allar deoa ekḳan gor amrar ase. I gor kunu manshor ator banail nae, ikan to hamesha behesto ase. Ou ḍera-goro boshot ḳora halote amra lamba ḳori dom falaiar ar dile-zane asha ḳoriar, zate behesti hou noya goror maze amrare gura oy. Ta-o ḳota oilo, ou ḍera-gor bangar bade amrare zanu lemṭa deḳa na zae. Ou ḍera-goro roia bar-buza boite boite amra ahazari koriar. Erbade-o amra roḳto-mangshor i ḍera-gor saṛtam sai na, ta-o bala goror lagi bar sairam, zate oḳonkur ou moutor odin ḍera-gor falaia, siroḳal zinda taḳar zuka gor fai. Otar lagi-u Allae amrare zuit ḳorsoin ar itar baenama hishabe amrare Pak Ruhu dan ḳorsoin. Erdae amrar shaoshor kunu ḳomti nai. Amra to buzilisi, zotodin ou roḳto-mangshor shoril loia boshot ḳormu, otodin amra malikor ges taki horail roimu. Amra to sokur deḳa kuntar boroshae soli na, ḳali imanor bole-u soli. Ashole amrar bitor bora shaosh ase, ar amra roḳto-mangshor shorilo roa taki malikor loge boshot ḳoraḳan-u bala mono ḳori. Erlagi amra shorilor maze taki ba na taki, amrar niot oilo malikre kushi kora. Ḳaron al-Mosir adaloto amra hoḳole-u ubani lagbo, zate duniabi ou shorile amra zoto nomunar bad-bala ḳam ḳorsi, ou ḳamor bodla fai. Amra to Alla Pakre ḍoraia soli, erlagi manshore buzanir sesṭa ḳorram. Amrar befar to Allar dorbaro forishkar, asha ḳori tumrar gese-o ola forishkar asi. Ikan ḳoia amra hirbar nizor tarif gairam na, borong amrare loia tumrar boṛair ḳaron zanairam. Te zeta manshe bitor na dekia, ḳali manshor bar gala loia boṛai kore, tumra tarare eḳṭa zuaf ditae faro. Amra zudi fagol oi, te Allar fagol oisi, ar zudi mata bala taḳe, te tumrar lagi-u bala ase. Al-Mosir mohobbote amrare fush manaia salae. Amra nichchit buzchi, hoḳlor torof taki eḳzonor mout oisil, erlagi hoḳlor-u mout oise. Tain hoḳlor lagi mara gesla, zate zera zinda asoin, tara zanu ar nizor lagi na basoin. Borong tarar lagi zein mara gesla ar hirbar zinda oisla, tan lagi-u tara basoin. Erlagi oḳon taki amra ar manshor bairor surot dekia bisar ḳori na. Amra to age al-Mosire olaḳan mono ḳorslam, oile oḳon ar ila ḳori na. Ḳeu zudi al-Mosir torika ḳobul ḳore, te he noya foyda oilo. Tar furan hoḳolta fusia hari ekkere noya bonigelo. Ita to Alla taki-u oy. Tain al-Mosir usillae tan loge amrar milon goṭaisoin, ar amrare ou kezmotor dayitto disoin, bad-baki hoḳol manshore tan loge milai ditam. Er mani oilo, Allae manshor gunar bae na saia, al-Mosir usillae tan loge manshor milon goṭaisoin. Ar ou milonor kush-ḳobri tobligor dayitto amrare disoin. Erlagi-u amra al-Mosir naib hishabe tan fokke matiram. Ashole Allae-u amrar mazdi manshore minoti korra. Ar al-Mosir fokke amra-o minot ḳorram, tumra Allar loge milito o. Hozrot Isa al-Mosie to kunu guna-naformani korsoin na. Oile amra hoḳlor gunar shaza Allae tan ḳando tuli dila, zate tan ufre iman anar mazdi Allai fobitrotae amra forezgar hishabe ḳobul oi. Allar ḳadim hishabe amra ou minot ḳoriar, tumra zebla Allar rohomot faiso, te ikṭare bifol oite dio na. Pak Kalamo Allae bataisoin, Ami shoṭik shomoye tumar arzi hunchi, nazat faoar din tumare shaijjo ḳorsi. Huno, oḳon-u shoṭik shomoy, oḳon-u nazat faoar din. Al-Mosir name amra ze toblig kori, ou tobligor bodnam na oar lagi amra ila kunu ḳam ḳori na, ze ḳame manshor mono bada ae. Borong hoḳol befare amra forman deḳairam, amra Allar kezmotḳari. Bout duk-koshṭo, zulum-mosibot, ar bifod-afod shoijjo ḳoria itar forman diram. Amrare bout bar mair-doir ḳora oise, bout bar zelo harani oise, bout danga-hangama amrar ufredi gese, bout menot ḳorsi, na gumaia rait ḳaṭaisi ar ufash-ḳafash roisi. Ita saṛa amrar fak-forezgar zindegi, aḳol-buddi, soborgari, doya-maya, dilor Pak Ruhu, ḳaṭi mohobbot, hok kota ḳoa ar Allar kudroti bol, duio ate forezgarir atiar bebohar ḳoriar. Manshe amrare dam deuk ba na deuk, amrar shunam gauk ba bodnam gauk, itae amrar zae ae na. Manshe ḳoira, amra bule ṭog, ashole to amra hok fote soli. Manshe ḳoin, amrare sinoin na, tebou hoḳole amrare sine. Amra morar laḳ oigele-o basia asi. Amrare mair-doir ḳora or, oile zane mara or na. Bout dukor maze-o amra hamesha kushi-bashi asi. Amra nize gorib oia-o boutre doni banaisi. Amrar to kunta-u nai, tebou hokkoltar malik. Ou laḳan amra forman ḳorsi, amra Allar kezmotḳari. O Korint zomator mumin bai oḳol, tumrar gese to kula-mela-u matisi, tumrar lagi amrar mon uzaṛ ḳori disi. Amrar dil tumrar lagi kulia raḳsi, oile tumrar dil amrar lagi bond ḳori toiso. Te amar aolad hishabe tumrare ḳoiram, amra zela tumrar lagi dil kulia raḳsi, tumra-o ola amrar lagi tumrar dilḳan kulia deo. Tumra bidormi manshor loge ḳeshi-kuṭumita ḳorio na. Forezgaror loge naformanor mil kuai? Allar nuror loge andarir kunu ḳatir ase ni? Iblisor loge al-Mosir kunu ḳatir ase ni? Muminor loge bidormi shorik oibo kila? Zano to, Pak Kalamo Allae ḳoira, Ami tarar bitre boshot ḳormu, tarar loge-u sola-fira ḳormu. Ami oimu tarar Alla, tara oiba amar proza. Te amra-u oilam zinda Allar boshot ḳana. Allar Kaba goror bitre murtir kunu zaga ase ni? Pak Kalamo aro bataisoin, Erlagi tumra bidormir ges taki horo, tarar ges taki alog ro, nafak kunu zinish soio na, teu ami tumrare ḳobul ḳormu. Ami oimu tumrar gaibi baf, tumra oibae amar aolad, ikan ami Alla Rabbul Alamine ḳoiram. O mayar bai oḳol, ou oada oḳol to amrar lagi-u ḳora oise, te ao amra shorilor ar dilor nafaki dur ḳoria nizore fak-saf ḳori, ar Allar ḍor-ḳofe furafur fak-fobitro zindegir fote soli. Bai oḳol, amra to kunu manshor loge oinnae ḳorsi na, ḳeuror ḳeti-o ḳorsi na ar ḳeurore ṭogaisi-o na. Erlagi amrare tumrar dilor maze ṭai deo. Tumrare dushibar lagi ikan ḳoiram na. Ami age-u ḳoisi, tumra to amrar zanor zan ḳoiljar ṭukra, amra morle-o eḳloge mormu, basle-o eḳloge basmu. Tumrar ufre ami kub borosha ḳori, tumrare loia boṛai kori. Erlagi oto duḳ-mosibotor maze roia-o amar zano shanti asil, amar mon kushi-bashie bora. Huno, ou Makidoniat aia-o amrar shorilo kunu shuk faisi na, hoḳolbae taki-u amra ḳoshṭo faisi, baire asil gonḍogul ar zanor bitre asil ḍor-ḳof. Oile Alla Pak, zein duki zonre buz dein, tain amrare buz dibar lagi Titas baire ono anaila. Ḳali ikan nae, Titas baie tumrar ges taki ze buz faisla, ou buze tain amrare-o buz dila. Tain tumrar monor eshki, tumrar ḳanda-ḳaṭir ḳota zanaila, amar befare tumra bule kub agrohi. Ou hoḳolta hunia ami kub kushi oisi. Baiainre, amar agor siṭir maze zudio tumrare duk dislam, tebou amar mono kunu ḳoshṭo nai. Ami zebla buzlam, ou siṭie tumrar monor maze tuṛa ḳoydin duk dise, ou shomoy ami-o kisu duk faislam, oile oḳon ami kushi. Tumrare duk deoae kushi oisi na, borong duk faia tumra touba ḳorso dekia kushi oisi. Ou duk faislae tumra Allar morzie, zate amrar dara tumrar kunu ḳeti na oy. Allar deoa monor ḳoshṭoe manshe touba ḳoroin, ar zan basain. Te ou ḳoshṭoe to duk nai. Oile duniabi monor ḳoshṭoe manshor moron ane. Tumra buzrae ni, Allar deoa monor ḳoshṭoe tumrar ḳoto balai korse, tumrare naformani taki basaise, gunar bae tumrar ginna zonmaise, mone mone ḳoto ḍor ḍoraiso, Allar bae ḳoto aguaiso, naformani ḳamor bisar ḳorso. Ou befare tumra hoḳol monte-u forman diso, tumra nikut. Ami zudio ou siṭi leḳsilam, oile ze manshe oinnae ḳorse ba zar ufre oinnae ḳora oise tar lagi nae, borong Allar dorbaro zate tumrar ou halotḳan zair oy zen, tumra hasau amrare mohobbot ḳoro, otar lagi-u leḳsi. Erlagi amra buz-o faisi. Ou buz faia ar bai Titasor kushi dekia amra aro beshi kushi oisi, ḳaron tumra hoḳlor ges taki tain kub aram faisoin. Ashole ami tumrare loia tan gese boṛai korslam, ete kunu shorminda-o oisi na. Tumrar gese amrar batail hoḳol ḳota zela hasa asil, oula tumrare loia amrar boṛai koraḳan-o tan gese hasa forman oise. Tumra hoḳole zela tan nosiot mancho, monor ḍor-ḳofe ḳafi kafi tanre ḳobul ḳorso, oḳan mono oae tumrar bae tan maya kub beshi baṛise. Ar ami-o kub kushi, tumrar ufre ami oḳon furafur borosha ḳortam fari. Bai oḳol, ami tumrare zanairam Makidonia deshor zomat oḳole Allar ges taki koto niamot faisoin. Zudio bout duḳ-mosibot dia tarare forikka ḳora oisil, tara kub gorib halote asla, tebou tarar monor maze bout furti asil, tara kula ate Allar name dan-ḳoyrat ḳorsoin. Ami tarar fokke ḳoiram, tara kushi oia nizor tofik mafik, emonki tofik taki aro beshi-o dan ḳorsoin. Ar kub kiali oia amrare minot ḳorsila, zate Allar ze bonda oḳol obabor maze asoin, erare obab taki basanir lagi tara shorik oita faroin. Amra zotoḳan asha ḳorslam, tara er saite-o beshi dan ḳorsoin. Ḳali ikan nae, tara foyla nizore Malik Isar ato shofisoin, bade Allar morzie amrar gese-o shofa oisoin. Ita dekia amra Titas baire kub minot ḳorslam, dan-ḳoyrat ḳorar ze ḳam tain tumrar maze salu ḳorsoin, ita zanu shesh-o ḳoroin. Tumra zela hoḳol befare-u aguail aso, tumrar shobol iman, ḳota-barta, aḳol-hekmot, monor eshki, ar amrar bae zela kub maya-mohobbot ase, ṭik ou laḳan dan-ḳoyrat ḳorar nek amol-o zanu tumrar maze baia foṛe. Ita lekia ami tumrare kunu hukum diram na, ḳali forikka ḳori deḳram, erlagi oinno mumin oḳlor nek kamor eshkir ḳota zanairam. Deki, tumrar mohobbot ḳotoḳan nikut. Amrar Malik Isa al-Mosir rohom-niamotor ḳota to tumra zano-u, tain to Allai done doni asla, oile tumrar lagi gorib bonla, zate tain gorib bonar ḳarone tumra doni oitae faro. Te ami tumrare foramish diram, ita manle tumrar balai oibo, tumra kub kushi oia goto bosor dan-ḳoyrat tulat lagsilae, oḳon ou ḳam shesh ḳoro. Monor ze eshki loia tumra i ḳam shuru ḳorsilae, oula eshkie zarzir tofik mafik dan-ḳoyrat dia ita shesh ḳoro. Dan-ḳoyrat dibar niot ḳorle, Allae to niot mafik kobul ḳoroin, te tofik taḳle deo, na taḳle nai. Baiainre, ami sairam na, oinno manshe aram ḳorouk ar tumra ḳoshṭo ḳoro, borong tumra hoḳlor halot eḳlaḳan ouk, oḳan-u asha ḳorram. Tumrar zeta don-doulot oḳon baṛti ase, otae tarar obab miṭauk, ar tarar zebla beshi oibo, ou shomoy tara-o tumrar obab miṭaiba. Olaḳan hoḳlor halot eḳoi laḳan ouk. Zela Tourat Shorifo ase, “Zein beshi tukaisla tan-o beshi oise na, ar zein tuṛa tukaisla tan-o ḳom oise na.” Huno, ami Allar shukria adae ḳori, amar monor maze tumrar bae zela kial ase, Allae ou eḳoi laḳan kial dan ḳorsoin bai Titasor maze-o. Tain amrar onurud mania tumrar gese zaira, ar asol ḳota oilo tain nize-u kushi oia zaira. Tan loge ḳori amra hou baire-o faṭaiar, kush-ḳobri tobligor lagi hoḳol zomate-u i bair tarif ḳoroin. Zomator manshe ḳali tan tarif ḳorse na, amrar loge oia dan-ḳoyrat loia zaibar lagi tara-u tanre fosond ḳorse. Te Malik Isar gourobor lagi, ar oinno mumin oḳolre shaijjo ḳorar lagi, amra ou dan-ḳoyrat nibar bebosta ḳorsi. Amra kub hushiar oia soliar, zate boṛo aḳaror ou rilif bilanir bade ḳeu amrar bodnam ḳorar shuzug na fae. Mono rakio, amra ḳali Malik Isar gese nae, manshor samne-o hok-halali roar sesṭa ḳoriar. Ar erar loge ḳori amra aroḳ baire faṭairam, enre amra bout bar bout laḳan forikka ḳoria deḳsi, tan kub eshki ase. Oḳon deḳram, tain tumrare kub bishash ḳoroin, erlagi tumrar bae tan eshki aro baṛise. Oḳon Titas bair befare ami koiram, ein to amar loge roin, ar tumrar lagi ḳam ḳoroin. Bad-baki hoḳol baiaintor befare ḳoiram, hoḳol zomator manshe fosond ḳoria tarare faṭaira, tarar mazdi al-Mosir gourob oy. Erlagi koiram, tumrar bitoror mohobbot, ar tumrare loia amra ze boṛai-beṭagiri deḳai, itar forman deḳaio. Teu hoḳol zomator manshe buzba, tumra ḳe. Baiainre, Allar pak bonda oḳolre shaijjor lagi dan-ḳoyrat tular ze ḳam soler, ita befare to tumrare kunta leḳar zorur nae. Ou befare tumrar monor kial to amar zana ase. Makidoniar manshor gese ami tumrar shunam gaia ḳoiram, Gris deshor manush mani tumra, goto bosor taki-u dan-ḳoyrat loia zuit aso. Tumrar i eshki dekia, Makidoniar bout manush hozag oisoin. Erlagi ami ou baiainre faṭairam, zate tumrare loia amra ze boṛai deḳai, tara gia nizor souke ita dekia forman fain. Te ami zela boṛai korsi tumra-o olaḳan zuit roio. Arnae amar loge oia Makidoniar kunu baiain gia zudi deḳoin tumra zuit nae, te tumrar ufre oto boṛo borosha ḳorae, amra shorom faimu ar tumra-o shorminda oibae. Erlagi ou mumin oḳolre onurud ḳorlam, tara zanu amar age tumrar gese zain. Rilif ḳamor lagi dan-ḳoyrat dibar ze oada ḳorsilae, tara gia oguin zuit ḳorat shaijjo ḳorba. Te tumrar ges taki zur-zobordosti koria kunta adae ḳora oito nae, ḳali monor kushie deoa dan-ḳoyrat neoa oibo. Kial rakio, ze giroste tuṛa ḳori zala bain dey, he tuṛa foshol daibo, ar ze giroste besh ḳori zala bain dey, he besh ḳori foshol daibo. Te tumra-o ola forteḳe zarzir niot mafik dan-ḳoyrat deo. Monor maze ḳoshṭo loia ba deoa lagbo ḳori dio na. Ḳaron dilor kushie dan ḳorle, Allae maya ḳoroin. Allae tumrare hoḳol laḳan rohom-borkot dita faroin. I ḳemota tan ase, zate tumrar dorḳari hoḳolta hamesha tumrar gese taḳe, ar nek kamor lagi kula ate ita bilaitae faro. Zela Fobitro Zobur Shorifo ase, He to kula ate bilai dise, gorib oḳolre dan ḳorse, tar forezgari siroḳal stayi. Mono rakio, girostor lagi zein bis zugaia dein, ar ḳaibar lagi zein dana-fani zugaia dein, tain tumrare-o bis zugai diba, itat borkot diba, tumrar nek kamor foshol bout baṛai diba. Ou laḳan tumra hoḳolmonte doni oibae, ar kula ate dan-ḳoyrat bilaibae, teu amrar mazdi Allar shukur-guzar adae oibo. Ou rilif ḳame ḳali Allar bonda oḳlor obabo shaijjo oito nae, borong bout zonor torof taki Allar shukur-guzar-o baia foṛer. Tumra al-Mosir kush-ḳobrir ufozukto ou kezmot ḳorso dekia, tara Allar shukur-guzar adae ḳorba. Tumra duio ate dan-ḳoyrat bilanie, Makidoniar manshe ar baki hoḳole-u Allar gourob ḳorba. Tumra dan-ḳoyrat deoae Allar ges taki ou ze asanoḳ niamot faiso, ota dekia tara tumrar lagi dile-zane dua ḳorba. Allar ze danor ḳota mukdi koia fuṛanir shaiddo nai, hou danor lagi tan tarif ouk. O mumin baiain, al-Mosir norom ar doyalu babor ḳota iad ḳoria, ami Pauluse tumrare minot ḳoriar, manshe ḳoin, ami zebla tumrar loge roi, ou shomoy ami bule ḍorai ḍorai taki, ar horia gia harle shaoshi oizai. Te zera mono ḳore, amra duniabi manshor laḳan zindegi kaṭaiar, tarar loge zotoḳan shaosh deḳani dorḳar, ami sairam, ami aoar bade zanu otoḳan shaosh deḳani na lage. Amra zudio roḳto-mangshor manush, oile amra ze laṛai korram, ita to kunu roḳto-mangshor laṛai nae. Duniabi sifaie zeta ostro-shostro dia laṛai koroin, amra to ita dia laṛai kori na, Allai bole amrar ostro-shostroe faṛor ufror bankar-o bangilto fare. Amrar ostrodi manshor banoaṭ zukti binash ḳori, ar Allare sinar fote zoto laḳan bada-bignoe dilre aṭḳaia raḳe, itare-o binash ḳori. Manshor monor hoḳol ku-sintare ḳedaia hari al-Mosir tole ani. Te tumra zebla shullo-ana baiddo oia tan tole aibae, hou shomoy zeta obaiddo roiba, itare shaza dibar lagi amra zuit oimu. Tumra to ḳali amrar bairor surot deḳso. Kunu manshe zudi nizore al-Mosir ummot mono ḳore, te tar sinta ḳora zorur, he zan ummot, amra-o to tan ummot. Ashole Malik Isae amrare ze odikar disoin, i befare ami kisu boṛai deḳaile-o to shorminda oitam nae. Ḳaron i odikaror uddesho oilo, tumrare goṛia tula, kunu ḳeti kora nae. Amar i leḳa foṛia mono ḳorio na, ami siṭi dia tumrare ḍor deḳairam. Kunu kunu manshe matoin, “Tan leḳa siṭinte dilo ḍekka mare, ita shoktishali siṭi, oile tain ḳandat aile deḳa zae, tain ḳomzur ar oaz-nosiot-o muṭe-u gorom nae.” Ota manshore zananir lagi koiram, amra duroi taki siṭir mazdi zeta leḳram, samne aile ṭik ola-u ḳormu. Tumrar mazor kunu kunu zone tar nizor tarif gae. Tarar loge to amrar tulona sole na, ba tarar dolor shodoishsho oite-o shaosh ḳori na. Tara to nize nize zeta bala mono ḳoroin, otar loge-u tarar tulona ḳoroin, otadi-u bisar ḳoroin, buzrae ni, ita ḳoto boṛo ammok! Huno, amrar zotoḳan boṛai kora usit, er beshi kortam nae, borong Allae amrar ḳamor ze shimana ṭik kori disoin, amra er bitre roia-u boṛai kormu, i shimanar bitre tumra-o aso. Erlagi amra zebla tumrar gese geslam, ou shomoy shimar bara to gesi na. Tumrar gese to hoḳol foyla amra-u al-Mosir kush-ḳobri toblig korat geslam. Esaṛa foror ḳam loia amra gourob ḳoriar na, ita ḳorle shimar bara oilo one. Amra asha ḳoriar, tumrar imani bol baṛar loge loge tumrar maze aro bout ḳam ḳortam farmu. Hou shomoy tumrar ges taki aro duror deshainto gia kush-ḳobri toblig kortam farmu. Teu kunu manshe ḳoito farto nae, foror ḳam loia amra boṛai koriar. Oile Allar kalamo ase, “Ze manshe boṛai kore, he Malik Moulare loia boṛai korouk.” Ḳaron nizor shunam nize gaile-u forman oy na he bala manush, borong Malik Moulae zar shunam gain, he-u bala hishabe forman oy. O mumin bai oḳol, ami sairam, amar tuṛa be-aḳoli tumra shoijjo ḳoro, ar hasau tumra amare shoijjo ḳorrae-o. Allai eshkir zalae amar dilo tumrar lagi eḳ zala foyda oise. Te ami eḳzon noshar loge tumrar biar mat-ḳota ṭik kori raḳsi, en nam al-Mosi. Ami sairam, shoti koina hishabe tumrare tan ato shomzai ditam. Oile ami ḍoraiar, hou hafe zela ku-buddi dia Bibi Haoare be-fote nisilgi, olaḳan tumrare-o al-Mosir ges taki horailito fare, he tumrar dilor ḳaṭi bab ar monor nishana alailibo. Ḳaron amra ze Isar befare toblig korsi, oinno zone zebla tanre saṛa dusra kunu Isar ḳota toblig kore, tumra ita manrae. Ar tumra ze Pak Ruhu faiso, ou Pak Ruhu saṛa dusra kunu ruhu faile, ba ze kush-ḳobri tumra manrae, i kush-ḳobri saṛa dusra kunu kush-ḳobri hunle, kub kushi oia-u manilirae. Oile ami mono ḳori na, hou nam-ḍaki sahabi dol taki ami kunumonte-u huru. Ami zudio kub miṭa miṭa shure oaz ḳortam fari na, tebou amar to aḳol-buddir ḳomti nae, ita to ami hoḳol nomunae hoḳol halote tumrare deḳaisi. Tumrar unnoti deḳanir lagi ami bina betone Allar deoa kush-ḳobri toblig koria nizore nisa ḳorsi, ita kunu faf ḳorsi ni? Tumrar kezmotor lagi ami oinno zomat oḳlor ges taki shaijjo anchi, ḳoite gele tarare luṭia anchi. Tumrar gese roar ḳalo ami zebla obabo foṛlam, hou shomoy-o ami ḳeuror buza oisi na. Ḳaron Makidonia taki zeta baiain aisla, tara amare shaijjo ḳorsoin. Te kunu halote-u ami tumrar buza oisi na, oitam-o nae. Al-Mosir ze hokikoti amar bitre ase ou hokor bole-u ami koiram, asta Gris deshor kunu zagat-u amar i beṭagiri keu bond ḳorto farto nae. Ami ila matar ḳaron kita? Ami tumrare maya ḳori na ni? Eḳ Allae-u zanoin, ami tumrare ḳoto maya ḳori. Nizor boṛai-beṭagiri deḳaia zeguin amrar homani oita sain, itae zanu i shuzug na fain, otar lagi ami zeḳan ḳorat asi, ikan ḳorat roimu-u. Ashole to ita oila bonḍo sahabi ar ṭog kamlain. Tara nizore al-Mosir sahabi deḳaito ḳori nizor surot bodlilae. Ete taijjub oar kunta nae, Iblise-o to nizore nuror firista deḳanir lagi tar surot bodlae. Erlagi zeguinte Iblisor kezmot ḳoroin, tara-o zudi nizor surot bodlaia deḳain tara nek kam ḳorra, te taijjub oar kita ase? Tarar ḳamor fol tara aḳerato faibo. Ami aroḳbar ḳoiram, amare zanu ḳeu fagol mono na ḳore. Ar zudi ila mono ḳorilao, te amare eḳ fagol hishabe-u shomzilao, zate ami-o tuṛa boṛai korar shuzug fai. Ami oḳon zeta ḳoiram, ita Malik Isar hukume ḳoiram na, ḳali nizor boṛai deḳanit gia faglami korram. Bout zone zebla duniabi bishoy loia boṛai deḳaira, te ami ḳene deḳaitam na? Tumra to beshi aḳoldar, erlagi be-aḳol oḳolre kush dile shoijjo ḳoro. Ḳali ikan nae, ḳeu zudi tumrare nizor gulam banaia raḳe, tumrare tar shikar banailae, fando falae, tumrar ufre ustadi kore ba tumrar galo soṛ mare, ta-o to tumra kushi oia shoijjo ḳorrae. Oile ami kub shorminda oia shikar ḳoriar, ita befare tumrar gese amra boṛo ḳomzur aslam, ila netagiri kortam farsi na. Oinno manshe zeta loia boṛai korar shaosh fae, amar-o shaosh ase ita befare boṛai deḳanir, ami kali faglor laḳan ita matiram. Zetae boṛai-beṭagiri deḳain, tara kita Ibrani zatir ni? Ami-o to tarar laḳan. Tara Boni Israil zatir ni? Ami-o ola. Tara Hozrot Ibrahimor aolad ni? Ami-o to. Tara al-Mosir kezmotḳari ni? Ami aro boṛo kezmotḳari. Mono rakio, ami faglor laḳan matiram. Ami al-Mosir kezmoto lagia tara taki bout beshi menot ḳorsi. Bout bar zel ḳaṭsi, bout bar mair-doir ḳaisi, ar bout bar moutor mukabila oisi. Ihudi oḳole amare fasbar durra marsoin, forteḳ bar unusallishṭa ḳori durra ḳaisi. Tinbar amare singladi mara oise. Eḳbar amare fattor mara oise. Tinbar amar zaz ḍubi gesil, ar eḳ din eḳ rait doriar fanit bashail aslam. Ami bout desh sofor ḳorsi. Ban-fanir ato, sur-ḍaḳaitor ato, nizor zatir ato ar bin zatir ato ami mosiboto foṛsi. Esaṛa ṭauno, morubumit, doriat, ar bonḍo mumin oḳlor ato-o ami mosiboto foṛsi. Ou duḳ-mosibotor maze-o zane-forane menot ḳorsi, bout rait uzagori korsi, ḳani-fanir lagi koshṭo faisi, bout ufash-ḳafash roisi, shit ar ḳafoṛ-sufoṛor obabe-o ḳoshṭo faisi. Ita saṛa-o al-Mosir zomat oḳlor lagi ami forteḳ din sinta ḳori. Ḳeu ḳomzur oile ami nize-o tar ḳomzurir bagi oi na ni? Kunu ku-shongir talo foṛia ḳeu gunar fote gelegi, ami oshanti kori na ni? Ami zudi boṛai deḳaitam sai, te ou ḳomzuri loia-u boṛai kormu. Amrar Alla Pak ar Malik Isa al-Mosir gaibi baf, zein hamesha gourob faoar laḳ, tain nize-u zanoin, ami kunta-u misa matram na. Dameskor bashsha Aritar hakim sabe amare dorar lagi Damesk ṭauno fara deoar hukum disla. Oile ṭaunor baunḍorir oalor maze ze kiṛki asil, mumin baiainte eḳ ṭukrit ḳori ou kiṛki baedi amare maṭit lamai disla, ou nomunae ami tan at taki bagisi. Te amar aro kisu boṛai kora dorḳar, i boṛaie kunu fayda nai, oile Malik Isae ze doroshon deḳaisoin ar zeta zanaisoin, ita oḳon ḳoiram. Hozrot Isar eḳzon ḳadimre ami sini, oḳon taki souddo bosor age meraz shorifor lagi tanre behesto tulia neoa oisil. Tain zannatul-ferdouso gela, i shomoy tain sho-shorile gesoin ki na zani na, ḳali Allae-u zanoin. Te enre ami sini, oile tane sho-shorile neoa oise ki na ami zani na, ḳali Alla Pake zanoin. Meraz Shorifo nia harle tan loge bout batchit ḳora oise, ita batchit manshore hunani ṭik nae. Oula manshore loia ami boṛai kormu. Amar nizore loia kunu boṛai nae, ḳali amar ḳomzurir lagi boṛai kormu. Ou boṛai deḳaite saile-o, ami kunu be-aḳoli kortam nae, ḳali hasa mat matimu. Ta-o ami boṛai deḳani bad dilailam, kizanu amar ḳam-ḳaz dekia ba amar mukor zobanbondi hunia, manshe oḳon amare zotoḳan mono ḳoroin, er saite beshi mono ḳorilain. Allae amare oto batuni befar zananie amar dilo zanu ohonkar na ae, ou niote tain amar shorilo eḳṭa rifu dila, amare ḳoshṭo dibar lagi, ou rifu oilo Iblisor sela. Malik Isar dorbaro ami tinbar aroz ḳorslam, ou rifugu amar ges taki horaia nitagi. Oile tain zuaf dila, “Amar rohomot-u tumar boutta, amar bol-shokti mile ḳali komzur halote.” Erlagi amar ḳomzurir befare ami kushi mone-u boṛai kormu, zate al-Mosir ou bol-shokti amar maze boshot ḳore. Te al-Mosir namor lagi nanan laḳan ḳomzuri, beijjoti, obab-onoṭon, zulum-mosibot, ar be-fanat foṛle-o ami kushi oi. Ḳaron ḳomzur halote-u ami boloban oi. Ami fagol oisi ṭik-u, oile tumra-u amare fagol oite baiddo ḳorso. Tumrar usit asil amar tarif ḳora. Ami zudio kub shadaron manush, tebou tumrar hou nam-ḍaki sahabi dol taki kunumonte-u huru nae. Ami nizore eḳzon hok sahabi hishabe forman ḳorsi, bout shoijjo ḳoria tumrar maze nanan nomunar keramoti ḳam, kudroti nishana ar muzeza deḳaisi. Aichcha ḳo sain, oinno zomat oḳol taki tumra kunumonte huru ni? Oy, ḳali eḳṭa befare huru aso, ita oilo, ami tumrar gese buza oisi na. I bulor lagi amare mafi deo. Huno, ami tumrar gese zaoar lagi ou tin nombor bar zuit oilam, te ami kunu buza oitam nae, tumrar gese kunu don-samana sairam na, ḳali tumrare sairam. Ma-bafor lagi don-samana zomani to aolador forz nae, borong ma-bafor usit oilo aolador lagi don zomani. Te ami kub kushi oia-u tumrar lagi amar hoḳolta ḳoros ḳormu, amar nizore-o bilai dimu. Ami zebla tumrare besh ḳori maya-mohobbot ḳoriar, te tumra ḳene amare ḳom maya ḳorrae? Zai ouk, ami tumrar ufre buza oisi na, arnae ḳeu ḳoilito fare, ami salaki koria tumrare duka disi. Ar tumrar gese ami zerare faṭaislam, eraredi tumrare ṭogaisi ni? Titas baire ami minot ḳorlam tumrar gese zaoar lagi, tan loge hou baire-o faṭailam. Te ou Titase tumrare ṭogisoin ni? Ami ar Titas, amra duiozone to eḳoi ruhe ar eḳoi niote ḳam ḳori. Aichcha, tumra mono ḳorrae ni, ou siṭi lekia amra nizor dush ḳaṭairam? Na, ikan ṭik nae, O dust oḳol, amra al-Mosir ḳadim hishabe Alla Pakre azir-nazir rakia leḳram, tumrare goṛia tular niote-u ita ḳoiram. Ashole amar kub ḍor ḳorer, ami zebla tumrar gese aimu, aia hari tumrare zela deḳtam sairam, tumra zudi ilaḳan zuit na o, ar tumra-o amar ze ruf deḳtae sao na, ami zudi hou ruf deḳani lage. Ba aia deki tumrar maze ḳaijja-fosad, ingsha-ninda, rag-gusa, doladoli, foror bodnam gaoa, gibot gaoa, boṛai-beṭagiri ar gulmal ase. Amar bitre ḍor ḳorer, ami aroḳbar zebla tumrar gese aimu, ou shomoy amar Allae ni tumrar samne amare shorminda banailain, zeta manshe guna ḳorsoin, zetae nafaki ḳam, zina, ar bodmaishi koria touba ḳorse na, otare dekia ni ami monor maze ḳoshṭo fai. Baiainre, ami ou tin nombor bar tumrar gese airam. Zano to, Allar kalamo ase, “Dui ba tin zon manshe eḳoi laḳan shakki dile ou befar hasa forman oy.” Te ami zebla dusrabar tumrar gese geslam, hou soforor age zera guna-ḳosuri korsil, ami tarare ar bad-baki hoḳolre hushiar ḳori dislam. Ar oḳon ami nize azir na oile-o tarare ola hushiar ḳori diram, ami aroḳbar aile tara ḳeu rehai faita nae. Tumra bule forman sairae, amar muk dia al-Mosie matira ni. Ashole al-Mosi to tumrar befare kunumonte-u ḳomzur nae, tan nizor bol-shokti tumrar maze azir ase. Zudio tanre ḳomzur halote solibor ufre loṭḳaia zane mara oisil, ta-o Allar kudroti bole tain oḳon zinda asoin. Ar amra-o ola tan laḳan ḳomzur asi, oile tan loge zinda roae Allai kudroti bole tumrar gese aia mukabila oimu. Tumra nizore zasai kori deḳo, al-Mosir ufre hasaror iman ase ni? Tumra buzo na ni, Isa al-Mosi tumrar dilo asoin. Kial rakio, zasai korat gia zanu tumrar maze bezal na mile. Ar ami asha ḳori tumra buzbae, amra to ḳaṭi hishabe forman oigesi. Amra Allar dorbaro munazat ḳorram, tumra hoḳol laḳan bod ḳam taki basia ro. Amra nizor forezgarir forman deḳanir lagi ikan ḳoiram na. Ar manshe amrare forezgar mono na ḳorle-o, tumra hamesha nek kam ḳorat ro. Amrar ḳemota oilo hokor fokke, na-hokor fokke amrar kunu bol nai. Te amra zebla ḳomzur ar tumra boloban, ita deḳle amra kushi. Amra dua ḳoriar, tumra touba ḳoria hari furafur ḳaṭi o. Erlagi ami tumrar ges taki duroi roia ita leḳram, zate tumrar samne aia harle Malik Isar deoa ḳemota ḳaṭaia ḳoṭu bebohar ḳora na lage. Malike amare i ḳemota disoin tumrare goṛia tular lagi, ḳeti korar lagi nae. O bai oḳol, hesh-mesh ḳoiram, tumra kushi-bashi koro, nizore kamil banao, eḳe-oinnore nosiot ḳoro, eḳoi monobabe ro, shantie boshot ḳoro. Teu shantir ar mohobbotor Alla-o tumrar loge loge roiba. Tumra eḳe-oinne fobitro golagoli korio. Allar hoḳol pak bondae tumrare salam zanaira. Malik Isa al-Mosir rohomot, Alla Pakor mohobbot, ar Pak Ruhur ḳatir-zoton tumra hoḳlor dilo rouk. Amin. Ami Paulus, Isa al-Mosir eḳzon sahabi. Ami kunu manshor hukum-foramishe ba kunu manshor usillae sahabi oisi na. Ḳali Isa al-Mosi ar amrar gaibi baf Alla, zein al-Mosire murda taki zinda ḳori tulchoin, erar ges taki-u ḳelafoti faisi. Ami ar amar logor hoḳol mumin baiainte milia, Galatia deshor Isayi zomat oḳlor gese ou sohifaḳan leḳram. Amrar gaibi baf Alla Pake ar Isa al-Mosie tumrare rohomot ar shanti dan ḳoroukka. Amrar gaibi baf Alla Pakor munshae, hou Isae amrar gunar mafir lagi nizor fobitro zan kurbani disoin, zate ou ḳaraf zomanar at taki amrare basaita faroin. Alla Pakor tarif hor-hamesha zari rouk. Amin. Ami boṛo taijjub oigesi, al-Mosir rohome zein ḍakia ania tumrare nizor bonda banaisoin, tane saṛia tumra kila oto zoldi aroḳ nomunar kush-ḳobrir bae firigelae. Ashole to iṭa kunu kush-ḳobri-u nae. Oile ḳoyzon manush ase, zetae tumrar iman loia ḳeiṛ ḳelaira, tara al-Mosir kush-ḳobrire ulṭa-falṭa ḳorilta saira. Huno, amra ze kush-ḳobri tumrar gese toblig korsi, ou kush-ḳobri saṛa dusra kunu kush-ḳobri zudi tumrar gese toblig kora oy, ita zudi amra nize-u ḳori, ba asmani kunu firistae aia ḳoroin, te ogur ufre lannot foṛouk. Ami age zemne ḳoisi, oḳon hirbar oula ḳoiram, agor ze kush-ḳobri tumra mancho, ita saṛa dusra kunu kush-ḳobri keu tumrar gese toblig korle, ogur ufre lannot foṛouk. Ita ḳoria ami kar ges taki tarif faitam saiar, kunu manshor ges taki na Allar ges taki? Ami kunu manshore kush ḳorar sesṭa ḳoriar ni? Ami zudi oḳono manshore kush ḳorar sesṭa ḳortam, te ami al-Mosir ḳadim oilam na one. O baisab oḳol, afnara zania raḳoukka, ami ze kush-ḳobri toblig korsi, ita to kunu manshor banail motobad nae. Ami ita kunu manshor ges taki faisi na, ḳeu amare ita hikaise-o na. Ḳali Isa al-Mosie nize amar gese ita zair ḳorsoin. Ami age zebla Ihudi dormo mantam, hou shomoy amar sal-cholon kila asil ita to tumra huncho. Ami Allar zomat oḳolre ḳoto beshi zulum ḳortam, ar itare binash ḳorar sesṭat aslam, eota tumra zano. Amar baf-dadar ges taki faoa shora-rosumot manat-o ami kub kiali aslam. Erdae amar boyoshi Ihudi oḳlor maze Alla-billa ḳorat ami bout aguail aslam. Oile Allae to amar maʼr feṭo taḳte-u amare fosond ḳorsoin, tain-u nizor rohomote amare daot disoin. Tan munsha asil, ami tan ḳas mayar zonor didar faia, oinnainno zatir gese kush-ḳobri toblig kori. Te ou didar faia-o ami kunu Adom zator loge foramish ḳorsi na. Ar amar agor kunu sahabir loge mulaḳat ḳorar lagi ami Zeruzalem ṭaun ḳano-o gesi na. Borong ami Arob desho geslamgi, gia guri-firi hirbar Damesk ṭauno aisi. Er tin boros bade sahabi Fitoror loge mulaḳat ḳorar niote Zeruzalem geslam, gia tan ono fonro din aslam. Ou shomoy Hozrot Isar bai sahabi Iakub saṛa, dusra kunu sahabir loge amar deḳa oise na. Eḳ Alla shakki asoin, ami ou zeta leḳlam, er eḳṭa horof-o misa nae. Mono raḳba, ou kush-ḳobri to kunu manshor ges taki faisi na, ḳali Isa al-Mosie nize amar gese zair ḳorsoin. Bade ami Siria ar Kilikia deshor bout zagat geslam. Ou shomoy Ehudia zilar Isayi zomat oḳole-o amare sinta na. Tara ḳali ou ḳobor hunchila, “Age ze beṭae amrar ufre zulum ḳorto, ar Isar namre dunia taki tuṛilito saisil, oḳon hou beṭae al-Mosir imanor kush-ḳobri toblig korer.” Ami iman ania bodli zaoae, tara Allar shukur-tarif ḳorta. Souddo boros bade Barnabasor loge oia ami hirbar Zeruzalem gelam, ou shomoy Titasre-o loge nilam. Allai hukume ami hono gelam. Gia honor baiainre ḳoilam, oinnainno zatir gese ami kun kush-ḳobri toblig kori. Oile zomator murobbi oḳolre ita niralae ḳoilam, amar sinta asil, amar oto douṛor ḳam zate beḳama na zae. Amar logor bai Titas o-Ihudi oile-o, tan mosolmani ḳam ḳoranir lagi era kunu saf dise na. Ashole imandar dolor bitre ḳoyzon munafik hamanie ola oilo. Isa al-Mosir ummot bonae amra ze shadinota faisi, otar kut dorar lagi-u era hamaisil, zate amrare Musar shoriotor gulamit raḳto fare. Oile amra eḳ foloḳor lagi-o tarar gulami manlam na, zate kush-ḳobrir hokikoti tumrar gese ḳaim roy. Ar zomator nam-ḍaki zon oḳlor loge ami matilam, era zein-u oin na ḳene, itae amar kunta-u zae ae na, Allae to muk saia mosolmani koroin na. Era to amare noya kunta disoin na, borong tara buzilila, Ihudi shomazor gese kush-ḳobri tobligo Fitorre zela dayitto deoa oisil, ou laḳan oinnainno zatir gese tobligor dayitto amare deoa oise. Tara oḳan deḳla, Ihudi oḳlor gese sahabi ḳamo Fitorre zein salaisoin, hou Allae-u oinnainno zatir maze sahabi ḳamo amare salaisoin. Oḳan dekia zomator goinno-mainno murobbi, mani Iakub, Fitor ar Hannane buzilila, Allar torof tone ami kas rohomot faisi. Teu tara-o amrar loge eḳmot asoin oḳan deḳaita ḳori, amar ar Barnabasor loge tarar at milaila. Ar ou mate razi oila, amra toblig kormu oinnainno zatir gese, oile tara toblig korba Ihudi shomazor gese. Tara ḳali ekḳan abdar ḳorla, amra zanu zomator gorib oḳlor bae kial raki. Ashole amar-o ola ḳorar kub ichcha asil. Bade Fitor Antiokia ṭauno aila. Ermaze tain eḳ boṛo oinnae ḳorae ami tan mukor samne-u afotti zanailam. Ou shomoy Ihudi taki mumin oa eḳdol manshe fotua dita, oinnainno zati taki zera Isar ummot oy, tarar mosolmani ḳam ḳorani zorur. Ou fotua dolor kisu manush sahabi Iakubor ges taki aibar age Fitore oinno zatir loge mila-misha ḳori kana-dana ḳaita. Iṭa to kub bala. Oile era aoae erar ḍore tain ou bala ḳam bond ḳorilla. Oḳṭa-u boṛo oinnae. Antiokiar aro bout Ihudi mumine-o Fitoror loge ou bonḍamit shamil oila. Hesh-mesh Barnabas-o tarar loge bul fote fao dilaila. Oile ami zebla deḳlam, kush-ḳobrir hokikotor loge tarar ḳam-ḳaz miler na, ou hoḳlor samne Fitorre ḳoilam, “Afne Ihudi oia-o zudi Ihudi niom bad dia oinno zatir laḳan soloin, te oinno zatire ḳene oḳon Ihudi niom manar tagid dira? Afne-ami duiozon-u to Ihudi, naforman o-Ihudi kulo zonmisi na. Erbade-o to amra zani, Musar shoriot amol ḳorle-o Allae manshore dindar ḳoia ḳobul ḳoroin na, ḳali Isa al-Mosir ufre iman anle-u dindar ḳoia ḳobul ḳoroin. Erdae-u amra tan ufre iman anchi, zate shoriotor amole nae, oile al-Mosir ufre iman anae amrare dindar ḳoia ḳobul ḳoroin. Ḳaron shoriot amol ḳorle-o kunu manshore dindar ḳoia gona oito nae.” Oile oḳon amra al-Mosir torikae dindar bontam sairam ḳori, Ihudi shorar niom-ḳanun bad dilaisi. Ete zudi kunu kunu zone amrare naforman ḳoin, te kita buza zae, al-Mosie kunu gunar kezmot ḳoroin ni? Nauzubilla, nisoy na. Ami nize zeta bad dilaisi, ota zudi hirbar ḳori, te to nize-u nizore dushi forman ḳoriar. Shoriotor niome shoriotor ato-u amar mout oigese, zate Allar tarifor lagi ami zinda roi. Te dorilao, amare al-Mosir loge gaso loṭḳaia zane mara oise. Ami ar zinda nae, amar ḳayar maze al-Mosi-u zinda asoin. Ou ḳayae oḳon ze zindegi kaṭairam, iṭa Allar ḳas mayar zonor ufre imanor bole ḳaṭairam. Tain amare mohobbot ḳoria, amare toranir lagi nizor zan kurbani disoin. Alla Pakor i rohomot ami bifol oite ditam nae. Shoriot amol ḳoria zudi manush dindar bonizito, te al-Mosi ḳamoḳa kurbani oila ni? O be-aḳol Galati oḳol, tumrare ḳegie zadu ḳorse? Tumrar gese to kula-mela ar saf-sofa toblig kora oise, Isa al-Mosire gaso loṭḳaia zane mara oisil. Te oḳon ami kali ou ḳotaḳan zantam sairam, tumra ze Pak Ruhu faiso, iṭa kita Musar shoriot amol ḳoria faiso ni? Na kush-ḳobri hunia iman anae faiso? Tumra kunu ola be-aḳol ni? Pak Ruhur bole noya zindegi shuru ḳoria, oḳon nizor bole kamiab oitae sairae? Te ḳamoḳa oto duk-koshṭo ḳorlae ni? Ami asha ḳori tumrar i koshṭo muṭe-u behuda gese na. Aichcha, Allae to tumrare Pak Ruhu dan ḳorsoin, ar tumrar maze bout keramoti ḳam-o ḳorsoin. Te ḳo sain, tan shoriot manae tain ita ḳorla ni? Na kush-ḳobri hunia tumra iman anae ita ḳorsoin? Ibrahim nobir befarḳan deḳo, Allar kalamo ase, “Ibrahime Allar oadae iman anae, Allae tanre dindar ḳoia ḳobul ḳorla.” Erdae tumra-o shomzilao, zera iman ane, tara-u Ibrahimor asol aolad. Asmani Kitabo age-u batail oise, Allar ufre iman anle-u to tain oinnainno zatire dindar ḳoia ḳobul ḳoroin. Ibrahimor gese ou ayator kush-ḳobri age-u zanail oisil, “Tumar usillae duniar tamam zatie borkot faiba.” Te buza zae, Allar oadae iman anae Ibrahime zela borkot faisoin, tan bade zera iman anba tara-o ola borkot faiba. Asmani Kitabe ḳoy, “Ze manshe shoriotor kitabo leḳa tamam hukum-ahkam amol na ḳore, he lannoti.” On taki buza zae, zera shoriot manar ufre borosha ḳore, tara hoḳlor ufre-u i lannot ase. Allar kalame batae, “Dindar ḳoia zare ḳobul ḳora oy, he tar imanor zoriae zindegi faibo.” Erdae buza zae, shoriotor hukum-ahkam manle-o Allae ḳeurore dindar ḳoia ḳobul ḳoroin na. Oile shoriote ḳoy, “Shoriotor hukum-ahkam mafik ze manush sole, he shoriotor mazdi-u zindegi kaṭaibo.” Te to buza zae, shoriote imanor ufre borosha ḳore na. Shoriotor borkelaf ḳorae amrar ufre ze lannot asil, ou lannot al-Mosie tan nizor ḳando nia amrare azad ḳorsoin. Allar kalamo to ase, “Gaso loṭḳaia zare zane mara oy, he lannoti.” Allae Ibrahim nobire ze borkot dan ḳorsoin, Isa al-Mosir zoriae ou borkot zate oinno zati oḳole-o fain, ar amra-o zate imanor mazdi oada ḳora hou Pak Ruhu fai, otar dae-u al-Mosie i lannot nizor ḳando nisoin. O bai oḳol, ami duniabi kotadi buzai diram. Dui fokko manshor maze zebla kunu chukti faḳa-fukto oizae, ou chukti eḳ fokkoe ar batil ḳorto fare na, ba ermaze noya kunta lagaito-o fare na. Te Ibrahim nobi ar tan aolador loge Allae ze oada ḳorsla, Allar kalamo to ḳoa oise na, “aolad oḳlor loge” mani bout aolador loge. Borong koa oise ḳali “tumar aolador loge” mani eḳ aolador loge, ar ou aolad-u oila al-Mosi. Ami koitam sairam, Allae Ibrahimor amolo oadar mazdi ze niom boail ḳorsla, er sair-sho tish boros bade shoriot deoa oisil. Ou shoriot aoae agor hou oadar niom to batil ḳorto fare na. Te to tan oada zari roilo. Ar Allar borkot faoa zudi shoriot amolor ufre nirbor ḳorto, te oadar ufre nirbor roilo na one. Oile Allae oadar mazdi-u Ibrahimre borkot dan ḳorsla. Te ḳoiba, shoriot ḳene deoa oisil? Manshe gunar ḳam na saṛae, Allar torof taki oadar loge shoriot-o shamil ḳorsla. Ar Ibrahimor ze aolador befare Allae oada ḳorsla, ou zone toshrif na ana forzonto i shoriot boail asil. Allar firistar zoriae Musa nobir gese i shoriot nazil oisil. Ou Musa-u asla Alla ar manshor maze shafayatḳari, mani mazor manush. Oile ḳali eḳfokko taḳle to mazor manshor zorur asil na; ar Alla to eḳzon-u. Tain Ibrahimor loge oadar ḳalo kunu mazor zon lagse na. Te shoriot kunu Allar oada oḳlor ulṭa ni? Nichoy na. Allae zudi ou laḳan shoriot dan ḳorta, zetae aḳeri zindegi mile, te shoriot mania-u manush Allar dorbaro ḳobul oigelone. Oile Asmani Kitabe batae, tamam manush-u gunar ḳobzae bondi, tara zanu Isa al-Mosir ufre iman ania, imanor zoriae oada ḳora hou borkot fain. Iman aoar age shoriote amrare fara disil. Iman zair na oa forzonto ou shoriote-u amrare bandia raḳsil. Erdae buza zae, al-Mosir gese fosanir age ou shoriote-u otodin amrare salaise, zate imanor zoriae amrare dindar ḳoia ḳobul ḳora oy. Oile oḳon iman ḳaim oae, amra ar saloḳdar shoriotor tolua nae. Isa al-Mosir ufre iman anae tumra hokkol oḳon Allar aolad bonigeso. Tumra zara al-Mosir torika ḳobul ḳorso, tumra to finnor noya ḳafoṛor laḳan al-Mosir bitre hamaigeso. Ihudi ar o-Ihudi, gulam ar azad, beṭin ar beṭaintor maze oḳon kunu tofat nai. Isa al-Mosir loge mishi zaoae tumra hoḳol-u to eḳ oigeso. Tumra zebla al-Mosir zon oigeso, te to Ibrahimor aolad-o oiso, ar Allae Ibrahimre zeta diba ḳori oada ḳorsla, tumra-o otar bagi bonigeso. Ashole ami buzaitam sairam, bafor hoḳol don-samanat aolador eḳtiar taḳle-o, he zotodin nabalik roy otodin aolad ar gulamor maze kunu tofat mile na. Tar bafe ze shomoyor ḳota osiot ḳori zain, otodin he tar murobbi ba zimmadaror aotae roite oy. Ou laḳan amra-o zebla nabalik aslam, hou shomoy duniar nanan sal-cholonor gulam aslam. Oile shomoy fura oia harle, Allae tan ḳas mayar zonre bezila. Tain eḳzon nek aorotor feṭo zonom loia, shoriotor hukum-ahkam mafik zindegi kaṭaila. Zate shoriotor aotae taḳa manshore azad ḳorta faroin, ar amrare-o Allar aolad bonar eḳtiar dein. Erdae tumra Allar aolad bonizaoae tumrar dilo boshot ḳorar lagi, Allae tan ḳas mayar zonor ruhre bezisoin. Tumrar dilor ou ruhe to Alla Pakre abba ḳoia ḍaḳoin. Gotike-u tumra gulam roiso na, aolad bonigeso; ar aoladre Allae zeta deoar oada ḳorsila, oḳon tumra eotar malikana-o faiso. Age tumra zebla Alla Pakre sintae na, hou shomoy tumra zetar gulami kortae, iguin to ashole kunu devta-u nae. Oile oḳon to Allare sincho; ashole Allae-u tan nizor forisoy disoin. Te tumra kila hirbar duniabi hou ḳomzur ar batil sal-cholonor bae firizirae? Aroḳbar otar gulam bontae sairae ni? Tumra hirbar omuk ar tomuk din, mash, ritu ar bosorre manrae. Erdae amar ḍor ḳorer, tumrar tole amar oto menot ni maṭi oizae. O bai oḳol, ami tumrare minot ḳoriar, ami zela tumrar laḳan oigesi, tumra-o ola amar laḳan o. Tumra to otodin amar kunu ḳeti korso na. Tumrar zana ase, amar shorilo bemar oae, ami tumrar gese foyla bar kush-ḳobri tobligor shuzug faislam. Amar bemaror dae tumrar ḳoshṭo oile-o, tumra to gin ba ela ḳoria amare falaiso na. Borong Allar kunu firista ba Isa al-Mosire zelaḳan ḳobul ḳortae, ou laḳan amare-o ḳobul ḳorso. Oile oḳon tumrar dilor hi eshki gelo kuai? Ami to tumrar befare oḳan-u ḳoitam fari, hou shomoy farle tumra nizor ḳoilja kulia amare dilailae one. Te tumrar gese hok kota matae, ami oḳon dushmon oigelam ni? Huno, ou zeguinte tumrar kuz-ḳobor loira, oguin to bod niote aira. Tara sain, tumrare amar bae tone firaia, tarar ashik banaita. Bala niote ola ḳorle fayda oilo one. Oile ami zebla tumrar samne ai, ḳali ou shomoy nae, nek niote hor-hamesha kuz-ḳobor loa bala. O amar fiara aolad oḳol, tumra zotodin al-Mosir laḳan na boncho, otodin ami hirbar tumrar lagi hurutta foydar bishor laḳan soṭfoṭ ḳorram. Amar mone sar, ou foygam leḳa bad dia oḳon-u ami nize tumrar gese aia, ṭanḍa matae batchit ḳortam. Te tumrare loia kita ḳortam kunta buzram na. Tumra zera Musar shoriotor gulami kortae sao, tumra ḳo sain, shoriote zeta ḳoy ita tumrar ḳano hamae na ni? Allar kalame batae, Ibrahim nobir dui fua asla, foyla fua bandi beṭi Hazerar torofa ar dusra fua asol shadin Bibi Saerar torofa. Bandi beṭir torofa fuar zonom oisil duniar niome, oile asol shadin bibir fuar zonom oisil Alla Pakor oadae kudroti bole. I mator mani oilo, ou dui beṭi oila duiṭa niom. Eḳ niom Tur faṛ tone aise, iṭae tar kezmot ḳorra manshore gulamir fote ṭane; ein oila bandi Hazera. Ou Hazera mani Arob deshor Tur Faṛ. Ar Hazera oila ou zogotor Zeruzalem ṭaunor eḳ nomuna, Zeruzalem ṭaune to tar fua-fuṛinre loia bandi bonche. Oile asmani ze Zeruzalem, ein to shadin; ein-u amrar ma. Asmani Kitabe ḳoy, “O niaoladi beṭi, zar kunu hurutta oise na, tumi kushir gozol gao. Hurutta foydar bishe zare dorse na, tumi gola faṭaia zure zure gozol gao. Zamair goror bour saite-o, zar ḳeu nai tair bout beshi aolad oiba.” Bai oḳol, erdae-u tumrar zonom oise Allar oadar Isʼhakor laḳan. Oile hou shomoy duniar niome zar zonom oisil, he zulum ḳorto ou zonre, zein zonom loisoin Allar Pak Ruhur bole; ar oḳono oula zulum or. Erdae deḳo, Allar kalame ḳoy, “Bandire ar tair fuare baṛi tone ḳedai deo; bandir torofa fuae kunumonte-u asol bibir fuar loge, don-samanar baṭ faito nae.” Te O bai oḳol, ou ayate buza zae, amra bandir aolad nae, amra to asol shadin bibir goror aolad. O mumin oḳol, al-Mosie amrare shadin ḳorsoin, shadin halote roar lagi. Erdae tumrar shadinotare doria raḳo, gulamir lagam ar findio na. Huno, ami Pauluse tumrare ḳoiram, tumra zudi oḳono mosolmani ḳam ḳorao, te al-Mosir kunu dam-u to tumrar gese nai. Ami hoḳlor gese hirbar oḳan ḳoiram, ze zonre mosolmani korail oy, tar ufre forz oizae shoriotor tamam hukum-ahkam mana. Tumra zara shoriot amol ḳoria dindar bontae sairae, tumra to al-Mosir ges tone alog oigeso, Allar rohomot tone horigeso. Oile amrare dindar ḳoia ḳobul ḳora oibo, imane ou nichoyota faia Pak Ruhur bole amra bar sairam. Isa al-Mosir ummot bonia harle mosolmani ḳam ḳoraile-o zeta, na ḳoraile-o ota. Borong mohobbotor mazdi ze iman zair oy, ou iman-u oilo asol. Tumra to bala fote solat aslae; te ou hok fote solte tumrare ḳegie bada dilo? Huno, tumra oḳon ze motobad manrae, ze Allae tumrare fosond ḳori anchoin, i motobad to tan batail fot nae. Zano ni, eḳ fuṭa senae eḳ balti dudre borbad ḳorilae. Te tumrar befare ami malikor dorbaro ou borosha ḳori, tumra dusra kunu motobado zaitae nae. Oile zegie tumrare satar, he ze-u oy na ḳene, tar faona shaza he faibo. O bai oḳol, ami zudi oḳono oḳan ḳoi, manshe mosolmani ḳam ḳorani zorur, te amar ufre ḳene oḳono zulum or? Te duk-koshṭor solibor ufre al-Mosir moutor ḳota hunle zetae muk lukain, tarar muk lukani to bond oigelo one. Erdae ami sairam, tumrar dilo zetae gonḍogul lagaisoin, oguinte tarar asta nofs ḳaṭia falai deuk. O bai oḳol, Allae tumrare fosond ḳoria anchoin azad oar lagi. Oile azad bonia tumrar dilor gunar ḳaish furanit lagio na, borong dilor mohobbote eḳe-oinnor kezmot ḳoro. Ḳaron asta shoriotre-u ekḳano ḳoria ḳoa oise, “Tumar ari-forire nizor laḳan maya ḳorio.” Oile tumra zudi eḳe-oinne ḳaijja-fosad ar resha-reshi koro, te hushiar oizao! Ita ḳorle to tumra eḳe-oinnore binash ḳorilibae. Huno, ami tumrare ḳoiram, Pak Ruhur bole zindegi kaṭao, teu dilor ou ḳaish miṭanir kial oito nae. Ou ḳaishe zeta ḳoy, ita to Pak Ruhur bifokke, ar Pak Ruhe zeta ḳoin ita bod ḳaishor bifokke. Bod ḳaish ar Pak Ruhu era eḳe-oinnor birudi, erdae nek kamor niot ḳoria-o tumra ita fura ḳoro na. Ar tumra zudi Pak Ruhur bole zindegi kaṭao, te tumra shoriotor gulam nae. Dilor bod ḳaishor ḳam-ḳaz to kula-mela-u sina zae, ita oilogi zina, nafaki, bodmaishi, devta puja, zadu-ṭuna, dushmoni, ḳaijja-fosad, lub-lalos, gusa, niz-motlobi, omil, doladoli, ingsha, matlami, hoi-hulla ḳori bojjati kora, ar ou nomunar aro bout ḳam. Te ami age zela hushiar ḳorslam, oḳon hirbar oula ḳoiram, dilor ou bod ḳaishor gulami zera ḳore, Allar bashshait tarar kunu ṭai nai. Oile Pak Ruhe sola zindegir fol oilo mohobbot, kushi-bashi, shanti, sobor ḳora, doyalu bab, bala-manshi kora, hok-halali roa, norom oa ar nizore shamlaia raḳa. Ou nek kamor birudi kunuzat ain nai. Ar Isa al-Mosir afon ummote to, zarzir rifure, dilor hoḳol bod ḳaish shudda Isa al-Mosir solibo ḳoybor dilaise. Oḳon amra zudi ekin ḳori Pak Ruhur zoriae noya zindegi faisi, te ao, amra Pak Ruhur zimmae zindegi kaṭai. Amra behuda boṛai-beṭagiri bad dei, eḳe-oinnore satani ar ingsha-ingshi ekkere saṛi dei. O bai oḳol, zomator ḳeu zudi aḳta kunu gunar fando foṛizae, te tumra zera Pak Ruhe zindegi kaṭairae, tumra tare tulia anio. Ar kub norom dile i ḳam ḳorio, nizor befare-o hushiar roio, zate nize-o fando na foṛo. Tumra eḳe-oinnor bar bo, teu al-Mosir niom furafur mana oibo. Kunta na bonia-o ze manshe nizor boṛai-bahaduri deḳae, he to nize-u nizore ṭogae. Te forteḳ manshe zarzir amol-ḳaislot forikka ḳorouk. Teu oinnor loge nizor tulona na ḳoria, tar nizor ḳamor lagi boṛai korto farbo. Forteḳ zone-u nizor gaiṭ nize bo. Huno, ze zonre Allar kalam hikail oy, he tar ustador balair lagi kezmot ḳorouk. Bai oḳol, tumra be-foti bonio na, Allar loge to ṭaṭṭa-moshkora sole na. Zein zela ḳet ḳorbae, ein ola foshol faibae. Dilor ou bod ḳaishre kush ḳorar lagi ket ḳorle, i ket taki gozob milbo. Oile Pak Ruhre kush raḳar lagi ket ḳorle, i Pak Ruhu taki aḳeri zindegi milbo. Nek kam ḳorat lagia amra zanu nirash na oi. Hamesha lagia roile ṭik shomoye er foshol faimu. Shuzug faile-u amra zanu hoḳol manshor, ḳas ḳori Allar foribaror manshor asan ḳori. Deḳrae ni, ḳoto muṭa muṭa horofe ami nizor ate tumrar gese leḳsi! Zeguinte tarar nizor bala-manshi zair ḳorto sae, otae tumrare mosolmani ḳam ḳoranir lagi tagid der. Al-Mosir solibor lagi zate tarar ufre kunu zulum na oy, zulum taki basar lagi tara ita ḳorer. Huno, mosolmani ḳam zetae ḳoraisoin, otae-o to shoriotor borkelaf ḳoroin. Oile erbade-o tara tumrare mosolmani koraito sae, zate tara boṛai koria ḳoito fare tumra-o tarar dolo aso. Oile ami koiram, ḳali Isa al-Mosir solib saṛa dusra kunu befare-u ami boṛai kori na. Ou solibor mazdi-u i dunia amar gese morigese, ar ami-o duniar sokut morigesi. Erdae mosolmani ḳam ḳoraile-o zeta, na ḳoraile-o ota. Al-Mosir zoriae hirbar noya foyda oa-u oilo asol befar. Ar ou imane zera zindegi kaṭae, mani kaṭi Allar bondare, tain rohom ar shanti dan ḳoroukka. Hesh-mesh ḳoiram, Hozrot Isar lagi mair ḳaia ḳoto nomunar zoḳom amar nizor shorilo loia sokkor diar. Te amare ḳeu duk dio na. Bai oḳol, amrar munib Isa al-Mosir rohomot tumrar dilo ḳaim rouk. Amin. Ami Paulus, Alla Pakor morzi mafik Hozrot Isa al-Mosir eḳzon sahabi. Ifis ṭaunor maze al-Mosir torikar pak bonda ar mumin oḳlor gese ami Pauluse ou sohifaḳan leḳram. Amrar gaibi baf Alla Pake ar Hozrot Isa al-Mosie afnara hoḳlor ufre rohomot ar shanti nazil ḳoroukka. Alla Pakor tarif ouk, tain-u Isa al-Mosir Alla ar tan gaibi baf, ar ou Hozrot Isa-u amrar malik. Alla Pake to al-Mosir usillae asmanor forteḳ nomunar ruhani rohomot amrare dan ḳorsoin. Alla Pakor dorbaro amra zate fak-fobitro ar nikut oitam fari, ou kiale tain i dunia foydar age-u, nizor maya-mohobbote al-Mosir usillae amrare fosond ḳorsoin. Allae tan nizor morzi ar nizor kushie age-u ṭik koria raḳsoin, zate Isa al-Mosir usillae amrare tan afon aolad hishabe ḳobul ḳorba. Allae ita ḳorsoin, zate tan ḳas mayar zon Isar usillae amrare zoto forimane rohomot ar mohima dan ḳorsoin, otae tan tarif oy. Al-Mosir fobitro kurbanir usillae tan lour bodla amra gunar shaza taki kalas faisi, amra ou mafi faisi, ita to Alla Pakor ḳas rohomot. Ou rohomot to Allae tan ḳas aḳol-hekmote amrar ufre ḍalia disoin. Tain age taki zelaḳan kial ḳorsla, al-Mosir mazdi zeta ḳorar niot ḳorsila, ou kial-kushir hokkol batuni befar tain amrare zanaisoin. Tain to age-u oḳan ṭik koria raḳsila, zate shomoy fura oia harle, tan afon morzi mafik asman-zominor hokkoltare ekḳano ḳoria, al-Mosir aotae anba. Allae tan nizor aḳol-insaf dia nizor morzi mafik hoḳol ḳam ḳoroin. Tan munsha mafik tain age-u zeta ṭik koria raḳsila, hou munsha mafik tain amrare-o fosond ḳorsoin al-Mosir usillae tan ḳas bonda oar lagi. Erlagi amra zera ag taki-u al-Mosir ufre borosha ḳortam, ou amrar mazdi-u zate Allar gourob-mohimar tarif oy, ou kiale-u tain amrare fosond ḳorsoin. Ar afnara-o Allar hok kalam, mani nazator kush-ḳobri faia al-Mosir ufre iman anchoin. Al-Mosir ummot oae Alla Pake tan oada ḳora Pak Ruhu dia afnaintore sil-sappoṛ marsoin. Te zeta manshore Alla Pake tan nizor shompod ḳoia ḍakisoin, erare tain eḳṭa odikar dibar oada ḳorsoin. Erlagi zotodin forzonto era furafur ḳalas na oisoin, otodin forzonto ou odikaror foyla kishti hishabe erare Pak Ruhu dan ḳorsoin. Ar ou hokkoltar mazdi Allar gourob-mohimar tarif oibo. Te Hozrot Isar ufre afnara iman anchoin ar Allar hoḳol bondare-u afnara maya-mohobbot ḳorra, ou ḳobor ami zebla hunlam, hunar bad taki-u, ami afnarar lagi Allar dorbaro shukria adae ḳora kunu shomoy-o bond ḳorsi na. Ami zebla munazat ḳori, i shomoy afnaintor ḳota fauri na. Ami Allar dorbaro aroz ḳori, amrar Malik Isa al-Mosir Allae, zalal ar shan-ala gaibi bafe afnaintore ruhani aḳol ar buzar ḳemota deukka. Teu afnara aro balamonte tanre sinba. Ami aro munazat ḳoriar, afnarar dilor souk kuli zauk, teu Allai daot faia afnarar dilor maze ze eshki foyda oise ota aro balamonte buzba. Erloge eoḳan-o buzta farba, Allar dorbaro tan pak bonda oḳol ḳoto boṛo shompotti. Ar amra zera tan ufre iman anchi, amrar dilor maze ḳoto boṛo shoktie ḳam ḳorer. I shokti oilo, tan kudrotor mohashokti. Ou shoktir bole-u tain al-Mosire mora taki zinda ḳorsoin, ar behestor arshe-azimo tan ḍainor toḳto nia boaisoin. Asmanor hokkol nomunar ḳemota, shashon, shokti, ar bahaduri zarar ato ase, era hoḳolre-u tain al-Mosir tole raḳsoin. Ar zare ze name-u ḍaḳa oy na ḳene, ita i zogotor ouk ba aḳeri zogotor ouk, hokkol namor ufre Isa al-Mosir nam. Allae hokkoltare-u al-Mosir aotae raḳsoin. Manshor mata zela tar shorilor bashsha, al-Mosire ola zomator mata, mani bashsha hishabe boail ḳorsoin. Ar i zomat oilogi al-Mosir shoril. Zein asman-zominor hokkoltare shullo-ana furafur ḳorsoin, ou al-Mosie zomatre furafur ḳoroin. Tumra to guna ar naformanir maze mora aslae. Zogotor babor maze foṛia tumra-o eḳ shomoy hou naformani ar gunar fote sola-fira ḳortae. Ze bod ruhu asmanor hoḳol taki shoktiala raza, hou bod ruhe naforman oḳlor bitre ḳam ḳore, ar tumra-o hou bod ruhur murid aslae. Amra hoḳole-u eḳ shomoy gunar shobabor gulam bonia, ota naforman manshor laḳan zindegi kaṭaitam. Ou bod shobab taki ze bod ḳaish amrar dilo aito, amra ola ḳam ḳortam. Ar ou ḳam-ḳazor lagi hota manshor laḳan amra-o Allar gozobor laḳ aslam. Oile Alla Pak to rohomotor banḍar; tain amrare kub beshi maya-mohobbot ḳoroin. Erlagi-u naformani koria amra zebla mora zindegir maze habu-ḍubu ḳaislam, hou shomoy al-Mosir loge tain amrare zinda ḳorla. Allar rohomote tumra rehai faiso. Amra al-Mosir loge asi, erlagi Allae amrare al-Mosir loge zinda ḳoria, tan loge ḳori behestor bitre boaisoin. Tain ita ḳorsoin, zate tan moha-mulloban rohomot oḳol zuge zuge siroḳal deḳaita faroin. Al-Mosir usillae tain amrare ze doya ḳorsoin, ou doyar mazdi tan i rohomotor ḳota zair oise. Allar rohomote iman anae tumra nazat faiso. Ita tumrar nizor kunu amolor fol nae, ḳali Allar deoa dan. Ita to kunu nek kamor bodla nae, zate ḳeu kunu laḳan boṛai korto na fare. Amra to Alla Pakor ator foyda. Tain al-Mosir ummot hishabe amrare hirbar noya ḳori foyda ḳorsoin, zate amra nek kam ḳori. Ou nek kam tain age taki-u ṭik koria raḳsila zate amra ola zindegi kaṭai. Zonmogoto babe tumra oilae bidormi zatir manush. Manshor at dia zarare shorilo mosolmani korail oise, era ḳoira, tumra bule mosolmani koraiso na. Te mono rakio, age to tumra al-Mosir ges taki horail aslae; tumra aslae Allar fosond ḳora Boni Israilor bairor manush. Allae Boni Israilor loge milonor zoto laḳan usillar oada ḳorsoin, itar loge tumrar to kunu shomporko asil na. Tumrar kunu asha-o asil na; tumra aslae i duniat Alla saṛa zati. Ek kotae, tumra Alla taki duroi aslae. Oile oḳon Isa al-Mosir ummot oae, tan kurbanir lour usillae tumrare Allar daro ana oise. Tain-u amrar shanti. Israil zati ar bin zati, hokkolre tain ek korsoin. I duio zatir maze dushmonir ze oal asil, i oalre tain bangia surmar ḳorsoin. Ar solibor ufre nizor ḳayare kurbani dia, tain Musa nobir shoriotor hoḳol hukum-ahkam ar ain-ḳanunor ḳemotare batil ḳorsoin. Tan ila ḳorar ḳaron oilo, tain saila, ou duiota dia tan nizor noya eḳ zati foyda ḳorta, zate ou zatir mazdi i duio dolor maze shanti oy. Ar tain saila, solibor ufre tan nizor zan kurbanir usillae, ou duio dolre tain ekḳano ḳoria Allar loge milon goṭaita. Erlagi ou duio dolor maze dushmonir ze bab asil, i dushmonire tain ekkebare miṭai disoin. Tumra eḳ shomoy Alla taki duroi aslae, ar Boni Israil oḳol ḳasat asla, oḳon tain aia ou duio dolor gese-u shantir kush-ḳobri toblig korsoin. Erfole tan usillae amra duio dol Pak Ruhur mazdi, amrar behesti baf Alla Pakor dorbaro azir oitam fari. Erlagi-u tumra oḳon bairor manush nae, bin zati-o nae. Borong Allar ḳas bonda oḳlor loge tumra-o Allar bashshai ar tan foribaror shodoishsho bonigeso. Sahabi ar nobi oḳol oila tan goror kuṭi, ar Hozrot Isa al-Mosi oila mul ian kuṭi. Ou kuṭir ufre-u tumrare goṛa oise. Al-Mosir loge zuṛa lagae, asta goror hoḳol ongsho eḳloge milia ekḳan fobitro gor tiar oise. Tumra-o aia tan loge zuṛa lagso, mani tan ummot oiso, erlagi tumrare-o eḳloge goṛia tula or, zate Pak Ruhur mazdi i goror maze Allar boshot ḳana oy. Ou ḳarone ami Pauluse Allar dorbaro dua ḳoriar. Ar tumra zara bin zati, tumrare Isa al-Mosir torikar daot deoar lagi-u ami oḳon zelo bondi oisi. Tumra nisoy huncho, Allae amare ou ḳas dayitto disoin, tan rohomotre ami tumrar ato fosai ditam. Allae tan nizor batuni munsha ohir mazdi amare zanaisoin, ar ou befarḳan ami tumrar gese shongkefe leḳlam. Ikan foṛle tumra buzbae, al-Mosir befare ou batuni bishoy buzar ḳemota amar ase. I batuni befarḳan sahabi ar nobi oḳlor gese zela Pak Ruhur mazdi oḳon zair or, agor zomanar kunu manshor gese-u ila zair oise na. Ar i batuni befar oilo, Injilor kush-ḳobrir mazdi bin zati oḳol-o Isa al-Mosir loge eḳ oia, Boni Israilor loge Allai odikaro shorik oy, hoḳol eḳ shorilor ongsho oy, eḳoi oadar duar bagi oy. Allae tan moha kudrotor bole amare rohomot dan ḳorsoin, ar zela rohomot faisi, ola kush-ḳobri tobligor dayitto adae ḳorram. Allar hokkol bondar maze ama taki huru ar ḳeu nai, ta-o al-Mosir ze donor ḳota shullo-ana buza zae na, ou mulloban donor kush-ḳobri bin zatir gese tobligor dayitto amar ufre disoin, iṭa-u Allar rohomot. Ar tan batuni munsha kila ḳamo lagail zae, ikan zair ḳorar bar-o tain amar ufre disoin. Zein asman-zomin hokkolta foyda ḳorsoin, hou Allae otodin doria ita batuni raḳsila. Tain ita batuni raḳar ḳaron oilo, asmanor hoḳol raza ar ḳemota-ala hoḳlor gese, Allar nanan nomunar aḳol-hekmot al-Mosir zomator mazdi oḳon kula-mela oy. Tan nizor siroḳalor munsha mafik ita oise, ar ou munsha-morzi amrar Malik Isa al-Mosir mazdi fura ḳorsoin. Tan loge shorik oia imanor bole, bukut shaosh rakia Allar samne amra azir oar eḳtiar faisi. Erlagi ami tumrare minot ḳoriar, ami duḳ-mosibot shoijjo ḳoriar dekia tumra nirash oio na. Ita to tumrar lagi-u shoijjo ḳoriar, erlagi gourob ḳoro. Ami dua ḳori, Allae zanu tan oshesh kudrotor bole tumrare omon bol-shokti dein, zate Pak Ruhur mazdi tumrar dil mozbut oy, ar imanor usillae al-Mosie tumrar dil furafur doḳol ḳoroin. Ami dua ḳori, tumra zanu Isa al-Mosir mohobbotor maze furafur ḍub dia tir ro. Teu hoḳol pak bonda oḳlor loge tumra-o buzbae, al-Mosir mohobbotor kunu kul-kinar nai, kunu shesh shima nai. Ou ze mohobbot furafur buzar oshaiddo, ami dua ḳoriar, i mohobbotre zanu tumra sino, sinia hari tumra-o Allai hoḳol nomunar gunagun hasil ḳoria furafur kamil o. Ashole Allar ze kudroti bole amrar dilor maze ḳam ḳore, hou bolor usillae amrar sinta-babna ba saoa-faoa taki aro bout beshi ḳam tain ḳorta faroin. Hozrot Isa al-Mosir mazdia ar zomator mazdia-o zug zug dori hor-hamesha Alla Pakor tarif ouk. Amin. Amar malik al-Mosir lagi ami zelo bondi asi. Ou bondi halote ami tumrare minot ḳoriar, ze ḳamor lagi Allae tumrare daot disoin, tumra er ufozukto oia solo. Tumrar asar-bebohar zanu furafur miṭa ar norom oy. Forteḳe sobor ḳoro ar dilo mohobbot rakia eḳe-oinnore shoijjo ḳoro. Al-Mosir ze shantie amrare ekḳano zuṛa lagaise, hou shantir bole Pak Ruhur deoa eḳota rokkar lagi dile-zane sesṭa ḳoro. Allae tumrare tan fote daot disoin ḳoria tumrar maze ḳali ekḳan asha ase, ḳali eḳ shoril ar eḳzon Pak Ruhu asoin. Ek iman, eḳ torikabondi ar eḳzon malik asoin. Hoḳlor Alla ḳali eḳzon, mani behesti baf eḳzon-u asoin. Tain-u hoḳlor ufre, hoḳlor maze, hoḳlor dilo asoin. Oile al-Mosie zela ṭik koria raḳsoin, hou mafik amra forteḳe ḳas rohomot faisi. Erlagi Zobur Shorifo leḳa ase, Tain gia zebla behesto uṭila, ou shomoy bondi oḳolre bandia ṭania nila, ar tan manshore bout dan dila. Te behesto gia uṭila, i ayat taki buza zae na ni, age tain duniar tole lamsila. Ar zein lamsila, tain hoḳolta furon ḳorar lagi, asman taki aro ufre gia uṭisoin. Tain manshore ou dan disoin, ḳoyzonre sahabi, ḳoyzonre nobi, ḳoyzonre kush-ḳobrir toblig, ḳoyzonre zomator imam ar ustad hishabe boail ḳorsoin. Tain ila ḳorar ḳaron oilo, Allar pak bonda oḳole zanu tan ebadot-bondegi korar lagi zuit oy, ar ou nomunae al-Mosir shoril, zomat hishabe goṛia uṭe. Tan kial oilo, amra hoḳole zanu Allar ḳas mayar zon, Ibnullar ufre iman ania, tanre bala ḳori sinia ekḳano oi. Ar al-Mosi zela hoḳol laḳan gune furafur bora, amra-o ola hoḳol gune furafur oia kamil oi. Teu amra ar huruttar laḳan roitam nae. Manshe shoytani aḳol ḳaṭaia be-fote nibar lagi manshore ze bul talim dey, ou bul talime zanu amrare fanir aula-zaula ḍeur laḳan du-dila na banae. Borong amrar dilor mohobbote hok mat matimu, hoḳol nomunae boṛo oia al-Mosir laḳan oimu. Tain-u to asta shorilor mata. Asta shoril omola banail oise, zate shorilor hoḳol ongo zarzir zagat roia mul ḳayar loge zuṛa lagail roy. Forteḳ ongo zebla ṭik-ṭak kam ḳore, ou shomoy asta shoril-u matar bole baṛia uṭe, ar mohobbotor mazdi nizore goṛia tule. Erlagi ami amar malikor name tumrare hushiar ḳori diar, bin dormor manshe zela baze sinta ḳoria zindegi kaṭain, tumra ar ila zindegi kaṭaio na. Tarar dil to andairor maze foṛi roise. Itar dil gumra, erlagi-u tara Allar befare kunta sine na, kunta sinto sae-o na, erlagi Allar deoa zindegi taki tara bout duroi. Tarar bibeḳ oshaṛ oigese, otar dae hor-hamesha nafaki ḳamor danda ḳore, tara nizor zindegire lagam saṛa bod ḳaishor ato saṛi dise. Oile tumra to al-Mosir befare ilaḳan talim faiso na. Tumra nichchoy tan befare huncho, hunia tan loge shorik oia, tan maze ze hok ase, ou hokor talim faiso. Tan talim oilo, finnor furan ḳafoṛ manshe zebla ekkere falai dey, ou laḳan tumrar bitoror furan ‘ami’re ekkebare falai deo, ḳaron ou ‘ami’r bod ḳaishe manshor zindegire borbad ḳorilae. Er bodla Alla Pakre shuzug deo, tain tumrar dilre noya halote goṛia tuloukka, tan deoa noya ‘ami’re noya ḳafoṛor laḳan findo. Ou noya ‘ami’re asol hok-forezgari ar fak-fobitro ḳoria Allar surote goṛa oise. Erlagi tumra misa mata bad deo, eḳe-oinne hasa mato, ḳaron amra hoḳol-u eḳe-oinne mishia asi. Rag-gusa ḳorle-o i ragor lagi guna ḳorio na, shuruz ḍubar age-u gusar ḳota faurilao, Iblis-Shoytanre kunu shuzug dio na. Sure tar suri kora bad deuk, nizor ate halal fote menot ḳoria ḳana ḳauk, zate tar ḳaoa-findar bade-o gorib-dukire dibar lagi kisu zoma roy. Tumrar mukdi zanu bad ḳota na baroy, borong aroḳzonor ufoḳari talimor lagi bala mat matio, zate ita hunia hunra zonor balai oy. Tumra Allar Pak Ruhre duk dio na, aḳeri nazator ag forzonto ou ruhu dia-u Allae tumrare sil-sappoṛ maria toisoin. Hoḳol nomunar birokti bab, mizaz deḳani, rag-gusa, sillaia ḳaijja ḳora, gala-gali, ar hoḳol nomunar ingsha-ninda tumrar ges taki horailao. Borong tumra eḳe-oinne doya ḳoro, oinnor duke duki o, al-Mosir mazdi Allae zela tumrare maf ḳorsoin, tumra-o ola eḳe-oinnore maf ḳoro. Tumra to Allar mayar aolad, te fut zela bafor laḳan oy, tumra-o ola o. Al-Mosie zela amrare mohobbot ḳorsoin, tumra-o ola maya-mohobbotor fote solo. Tain amrare basaita ḳori nizor zanre kushboydar kurbani hishabe Allar name bilai disoin. Kunu nomunar zina, nafaki ar lub-lalosor ḳota tumrar maze zanu na huna zae, ḳaron ita ḳam Allar pak bondar lagi ṭik nae. Ar behaya-beijjotir zekunu mat-ḳota, asar-bebohar ba ḳobisi ṭaṭṭa-moshkora zanu tumrar maze na oy, itae tumrare manae na. Itar bodla Allar shukur-guzar ḳoro. Tumra to zano-u, zinakur, nafaḳ ar lalchi manshe, Alla Pak ar al-Mosir bashshair maze kunu zaga faito nae. Itae to eḳlaḳan murtifuza ḳorra. Hushiar roio, misa mat matia ḳeu zanu tumrare be-fote na ney, Allar naforman bonia zera ita bod ḳam ḳore, tarar ufre Allar gozob lame. Tumra ilaḳan manshor loge mishio na, ḳaron tumra age andarir maze taḳle-o oḳon to al-Mosir ummot bonia nuror foto aiso. Erlagi Allar nure kamil zone zela zindegi kaṭani usit, tumra oula solo. Ar nure solar fol oilo, forezgari, shotota, hoḳol nomunar nek kam. Erlagi ze ḳame malik kushi oin, tumra zasai koria ou ḳam ḳoro. Andair zogotor befayda ḳamor loge kunu nomunar shomporko rakio na, borong tumra otar dush deḳai deo. Manshe lukaia zeta ḳam ḳoroin, ita befare kunta mata-o shorom. Nuror mazdi dush deḳaia dilaile ita zaira oizae, ḳaron ou nure-u hoḳolta zair ḳore. Erlagi silleḳ ase, O gumor manush, hozag o, mora taki zita o, teu al-Mosir nure, nurani koriba tumare. Tumra sinta-babna ḳori deḳo, tumrar sal-cholon kilaḳan. Be-aḳolor laḳan na solia, aḳoldaror laḳan solo. Nek kam ḳorar ze shuzug tumrar ato ase, ita shullo-ana ḳamo lagao, zano to oḳonkur zomana ḳaraf. Erlagi-u ḳoiram, tumra be-aḳol bonio na, borong malikor morzire buzo. Modor nishae ṭal oio na, itae zindegi nosṭo ḳorilae. Borong furafur Pak Ruhur boshe ro, tumra hamd, ḳaoali ar Fobitro Zobur Shorifor gozol gaia eḳe-oinne batchit ḳoro; tumrar dilor bitre malikor name gozol gao. Hamesha hoḳol befare amrar Malik Isa al-Mosir name behesti baf Allar shukria adae ḳoro. Al-Mosir ijjot ar ḍore tumra eḳe-oinnore dil taki mainno ḳoro. Tumra zera bou oiso, tumra zela Malik Isare mainno ḳoro, ou laḳan zarzir zamaire mainno ḳoro. Ḳaron al-Mosi zela zomator, mani tan shorilor mata, zamai-o ola bour mata. Ashole al-Mosi-u ou asta shorilor toraneala. Ar zomat zela al-Mosir zimmae ase, oula bou oḳol-o hoḳol befare zamair zimmae roa usit. Tumra zera zamai oiso, huno, al-Mosie zela zomatre mohobbot ḳorsoin, ṭik olaḳan tumra-o zarzir boure mohobbot ḳorio. Tain to zomator lagi tan nizor zan kurbani disoin. Tan kial oilo, tain zomatre fobitro ḳorar lagi, tan kalamor mazdi manshore torikar gusol ḳoraia, nuror mohimae nizor samne azir ḳora. Ou shomoy zomator maze kunu ḳolonkor dag, kut ba ila kunta-u roito nae, ita fak-fobitro ar nikut oibo. Erlagi zamaie tar nizor shorilre zela maya ḳore, ṭik tar boure-o oula maya ḳora forz. Nizor boure maya ḳorar mani oilo, nizor shorilre maya ḳora. Ḳeu to kunu shomoy tar nizor shorilre ginnae na, hoḳole-u zarzir shorilor boron-fushon ḳore. Ekkere ou laḳan, al-Mosie-o tan zomator boron-fushon zugain. Ḳaron amra tan shorilor ongo. Allar kalamo leḳa ase, “Erlagi-u beṭainte ma-bafre saṛia bour loge taḳba, tara duiozon eḳ shoril oiba.” Ikan oilo bout boṛo batuni befar, ashole ami to al-Mosi ar tan zomator befare ḳoiram. Zai ouk, tumra hoḳole-u zarzir boure nizor laḳan maya ḳorio, ar bou oḳole-o zarzir zamaire ijjot ḳora zorur. O aolad oḳol, malikor morzi mafik tumrar ma-bafor ḳotamoto solio, ar ola solaṭa-u to usit. Allar kalamor foyla hukum, ze hukumor loge furuskaror oada ase, iṭa oilo, “Tumar ma-bafre ijjot ḳorio. Teu tumar balai oibo, ar i duniat tumar hayati baṛibo.” Te tumra zera huruttar baf oiso, tumra-o nizor aoladre sataio na, borong malikor talim ar shrinkolar mazdi tarare manush banao. Tumra zera gulam, tumra al-Mosir zela baiddo, oula ḍor ar tazime dile-zane tumrar zogotor munib oḳlor baiddo roio. Ḳali manshore kushi korar niote munibor samne baiddo roio na, borong al-Mosir gulam hishabe dile-zane Allar morzi mafik solrae ḳoria tumrar munibor baiddo roio. Tumra ikan mono ḳorio na ze, tumra manshor kezmot ḳorrae, borong asmani malikor kezmot ḳorrae mono ḳoria, zogotor munibor kezmoto kiali o. Mono rakio, malikor ges taki forteḳ manshe zarzir nek kamor furuskar faibo, he gulam ouk ba azad ouk. Tumra zera munib, tumra-o tumrar gulam oḳlor loge oula bala bebohar ḳoro. Tarare ḍor deḳani bad deo, ḳaron tumra to zano, tara ba tumra hoḳlor-u malik eḳzon, tain behesto asoin; tan nozoro hoḳol-u shoman. Hesh-mesh ḳoiram, tumra asmani malikor loge milia roia tan kudroti bole bolala o. Zuddor lagi Allar deoa hoḳol nomunar atiar lagao, teu Iblisor hoḳol sol-soturir birudde mozbut oia ubaitae farbae. Amrar ou zuddo to kunu manshor loge nae, ita oilo andair zogotor hoḳol raza ar tar ḳemota-ala oḳlor birudde, andair zogotor shoktiala bod ruhu oḳlor birudde, ar asmanor Iblis-Shoytan dolor birudde. Te ou zuddor lagi tumra Allar deoa hoḳol nomunar atiar findilao, zate Iblise zebla hamla ḳorbo ou shomoy mozbut oia ubaitae faro, ar hesh-mesh tir roitae faro. Erlagi Allai hokikotir belṭ ḳomro bando, ar buk basanir lagi forezgarir amol dia buk guria raḳo, sifai oḳlor laḳan duio fao-o zuta lagao, zate shantir kush-ḳobri tobligor lagi zuit taḳtae faro. Ar sifai oḳole nizore basanir lagi ze ḍala bebohar ḳore, oula hoḳol shomoy tumra imanor ḍala ato lo, ou ḍala dia Iblisor hoḳol zalail tir nibaitae farbae. Matare basanir lagi Allar deoa nazat sifair kefor laḳan findilao. Ar Pak Ruhur toluar mani, Allar kalamre mozbut ḳori doro. Pak Ruhur bole dile-zane hor-hamesha munazat ḳoro. Erlagi hozag roia hoḳol pak bonda oḳlor lagi shob shomoy munazat ḳorat roio. Amar lagi-o dua ḳorio, ami kota matar bala zanu Allae amar mukor buli zugai dein, zate toblig korar shomoy ami shaosh ḳaṭaia kush-ḳobrir asol batuni bed manshore buzaitam fari. Ou kush-ḳobri tobligor lagi luar cheindi banda halote-o ami al-Mosir naib hishabe ḳam ḳorram. Te zelor maze roia zelaḳan shaosh ḳaṭaia toblig kora zorur, dua ḳorio, ami zate ola ḳortam fari. Amar hal-hokikot kilaḳan ar amar din-kal kila zar, ita amar mayar dust Tukik bair ges taki hunbae. Ein amrar malikor hok-halal kezmotḳari. Ami tanre tumrar gese faṭailam, tumra tan muk taki amrar ḳobora-ḳobor hunbae, tain gia tumrare utshaho diba. Amrar gaibi baf Alla Pake ar Hozrot Isa al-Mosie, mumin bai oḳolre shanti ar imani maya-mohobbote raḳoukka. Amrar Hozrot Isa al-Mosir lagi zarar dilo ḳaṭi mohobbot ase, era hoḳlor ufre Allar rohomot nazil ouk. Amin. Ami Paulus ar Timoti oilam Hozrot Isa al-Mosir gulam. Ou Filifi ṭauno boshot ḳorra, ze pak bonda oḳole Hozrot Isa al-Mosir ufre iman anchoin erare, erar ustad oḳolre ar ḳadimdar oḳlor gese leḳram. Amrar gaibi baf Alla Pak ar Hozrot Isa al-Mosir rohomot ar shanti tumrar ufre nazil ouk. Tumrar ḳota zotobar-u amar iad oy, otobar-u ami amar Allar shukria adae ḳori. Ami zebla tumrar lagi dua ḳori, amar mono kub kushi loia dua ḳori. Hozrot Isa al-Mosir toblig kamor lagi to tumra foyla taki oḳon forzonto amare shaijjo ḳorrae. Ami ekin ḳori, ze Allae tumrar dilor maze ou nek kam shuru ḳorsoin, al-Mosie dusrabar toshrif ana forzonto, ou Allae i ḳam fura ḳorba. Tumra to amar mayar manush, erlagi tumrar befare amar monor bab ola oa usit. Ami zelo bondi halote ba kush-ḳobrir hok kota zeno-u toblig kori na ḳene, tumra-o amar logor rohomotor bagi. Eḳ Allae zanoin, al-Mosir mohobbote ami tumrar lagi koto ashik. Ami dua ḳori, tumrar mohobbot zanu kamil bibeḳ ar aḳole din din baṛe. Zate tumra aḳol ḳaṭaia bala bala befar oḳol sinbae, ar al-Mosie dusrabar toshrif anar ag forzonto, tan bole tumra nek kam-ḳaz ḳoria ḳaṭi fote nikut oia roibae. Teu Alla Pakor gourob ar tarif zair oibo. O amar bai oḳol, ami sairam tumra-o zano, amar ufre zeta zeta goṭise, itar lagi ashole kush-ḳobri tobligor ḳam aro baṛigese. Erlagi onor razbaṛir sifai oḳole ar bad-baki manshe-o zanilisoin, ami to ḳali al-Mosir lagi-u zel ḳaṭiar. Ar ami zelo hamanie amrar bout baiainte malikor ufre aro besh ḳori borosha ḳora hiksoin, tara ḍor-boy fauria Allar kalam tobligor lagi aro shaoshi oisoin. Erar maze ḳeu ḳeu ingsha ar doladolir niote al-Mosir toblig korer, oile ḳeu ḳeu bala niote ḳorer. Erar dilor mohobbote-u al-Mosir toblig korer. Tara zanoin, kush-ḳobrir fokke matar lagi-u amare aṭok kora oise. Oile zera nizor fayda ḳamanir lagi al-Mosir toblig kore, era to bala niote ḳam ḳore na. Tara sae, ami zelo bondi roi ar amar ḳoshṭo baṛouk. Oile itae kita ae zae? Asol ḳota oilo, zemne-u oy na ḳene, al-Mosir nam to toblig or. Ita dukabazir niote ouk ba sohi niote-u ouk. Ar ota dekia-u ami kushi. Amar i kushi kunudin fuṛaito nae. Ami to zani, amar ufre zeta goṭise, itar hesh fol oilo, ami nistar faimu. Tumrar dua ar Isa al-Mosir ruhur bole ita oibo. Amar kub mozbut ekin ase, ami kunumonte-u shorom faitam nae. Ami furafur shaosh ḳoria age zela al-Mosir gourob zair ḳorsi, ami mori ba basi oḳono ola zair oibo. Ḳaron amar lagi zindegi oila al-Mosi ar moron oilo lab. Oile ami zudi basia roi, te amar zindegit kub bala ḳam ḳorar shuzug oibo. Erlagi ami buzram na, ami kun fot loitam. Duio fote-u amare ṭaner. Amar ichcha oilo, ami moria hari al-Mosir loge roitam, oḳan-u amar lagi bala. Oile tumrar lagi amar basia roaḳan aro zoruri. Ar ou monobole ami bala ḳori zani, ami basmu ar tumrar loge roimu, zate tumrar iman aro mozbut oia tumrar kushi baṛe. Ami tumrar maze hirbar aia harle, amare loia tumra Isa al-Mosir name kub kushi korbae. Asol befar oilo, tumra zarzir zindegire ou nomunae ḳaṭao, ze zindegi al-Mosir kush-ḳobrir laḳ. Teu ami nize aia deki ba duroi taki huni, ami buzmu, tumra dile-zane milia mozbut aso. Ar kush-ḳobrir mazdi ze iman foyda oy, ou imanor lagi hoḳole milia eḳ dile menot ḳorrae. Zetae tumrar birudita ḳoroin, kunu befare-u tumra itare ḍoraio na. Teu forman oizibo, tara binashor fote zairagi ar tumra rehai fairae. I rehai kali Allar ges taki-u mile. Al-Mosir ufre iman ancho iṭa zela rohomot, tan lagi zulum-mosibot shoijjo ḳorar shuzug faiso iṭa-o tumrar lagi rohomot. Tumra age amare zela ḳoshṭo ḳorat deḳso ar oḳono zeta ḳoshṭor ḳota hunrae, tumra-o to ou laḳan ḳoshṭor maze foṛigeso. Al-Mosir ufre iman anle zebla borosha mile, tan mohobbote zebla shanti mile, tumrar loge zebla Pak Ruhur bala shomporko ase, ar tumrar dilo zebla maya-momota ase, te tumra amar bitoror kushikan furailao. Tumra hoḳol eḳ mone solo, dile-zane eḳ o, ar eḳe-oinnore mohobbot ḳoro. Nizor labor asha ba beṭagiri deḳanir lagi kunta ḳorio na, borong noto oia nizor saite oinnore beshi dam deo. Ḳali nizor shartor sinta ḳorio na, foror ḳota-o sinta ḳorio. Hozrot Isa al-Mosir mon zelaḳan asil, tumrar mon-o olaḳan banailao. Tain ashole Allai surote roile-o, Allai shinghashon doria raḳar lagi lalchi asla na. Borong gulam bonia manush hishabe zonom loia nizore huru banaila. Tain manush surote roia mout forzonto, duk-koshṭor solibor ufror mout forzonto baiddo roia nizore noto ḳorla. Erlagi-u Allae tanre arshe-azimo uṭaila ar ola ijjoti eḳ nam dila, ze nam hoḳol taki shera. Zate ou namor gune asman-zomin ar fatalor tamam zandar Isar samne noto oin, ar gaibi baf Alla Pakor gourobor lagi shikar ḳoroin, Isa al-Mosi-u malik. O amar mayar bai oḳol, tumra to hamesha-u amar hukum mania airae. Te ami samne taḳle zela mano, oḳon amar aforḳe-o ola tumrar dilor ḍor-ḳofe nek amol ḳoro. Ou amolor mazdi deḳao, tumra guna taki nazat failiso. Buzrae ni, Allae tumrar dilor maze ola eḳ bab dan ḳorsoin, ita amol ḳorle tain kushi oin, ou amol ḳorar niot ar takkot-o tain tumrare disoin. Tumra kunuzat torka-torki ba ḳaijja-fosad na ḳoria hoḳol ḳam ḳoro. Huno, ze imanor kurbanir mazdi tumra Allar ebadot ḳorrae, er ufre zudi amar nizor loure kurbani hishabe ḍali deoa oy, ta-o ami kush asi, tumrare loia kushi korram. Ṭik tumra-o ola kushi o, amar loge kushi koro. Ami asha ḳori, Hozrot Isar morzi oile ami Timotire kub zoldi kori tumrar gese faṭaimu, teu tumrar halot zania ami shanti oimu. Timotir laḳan ila ar ḳeu amar gese nai, zein tumrar lagi sinta ḳoroin. Baki hoḳole-u Isa al-Mosir befare sinta na ḳoria, tara zarzir dandae asoin. Oile Timotir befar to tumra zano, fute zela nizor bafor loge ḳam ḳore, tain-o ola al-Mosir kush-ḳobri tobligor lagi amar loge menot ḳorsoin. Erlagi-u ami asha ḳoriar, amar dosha kita oibo, oḳan zanar bade-u ami tanre faṭaitam. Oile ami malikor ufre borosha ḳori koiar, ami nize-o kub zoldi kori aitam farmu. Ar ami mono ḳoriar, Usaidre tumrar gese faṭanikan kub zorur. Amar kezmot ḳorar lagi tumra tanre amar gese faṭaislae. Amra eḳloge toblig kori, Isa al-Mosir lagi jihad ḳori. Ein amar imandar bai. Tain-o tumrar loge deḳa ḳorta saira, tumra tan bemaror ḳobor hunae, tain fereshanit foṛigesoin, erlagi ami tanre faṭaiar. Ashole tain kub bemar asla, bemare tan na-basar halot oigesil. Oile Allae tanre rohom ḳorsoin. Ḳali tanre nae, tain basi zaoae Allae amare-o bout boṛo rohom ḳorsoin, zate ami ek koshṭor ufre ar kunu ḳoshṭo na fai. Erlagi ami kub kiali oia tanre faṭaiar, zate tanre faia tumra-o kushi o, ar amar monor sinta-o hori zae. Te Allar bonda hishabe furafur kushi oia tanre ḳobul ḳorio, ar erar laḳan manshore ijjot ḳorio. Al-Mosir toblig korat gia tain morar foti oigesla. Amar samne na taḳae tumra ze ḳam ḳortae farso na, ou ḳamor lagi tain nizor zan dite-o razi asla. O amar bai oḳol, hesh-mesh ḳoiram, malikor name kushi koro. Eḳ befar loia bare bare leḳte amar kunu ḳoshṭo or na, tumrare basanir lagi-u ami ita ḳorram. Huno, hou kukror fal taki, mani naforman dolor dadir musla taki hushiar roio. Itae to tarar shorilor ḳaṭa-sirar ufre-u borosha ḳore. Ashole amra-u oilam ḳaṭi mosolmani korail manush, amra to Isa al-Mosir name gourob ḳori, Allar ruhur bole tan ebadot ḳori, shorili kunu ebadotor ufre borosha ḳori na. Ashole ḳeu zudi mono ḳore, nizor shorili ebadotor ufre borosha ḳorar zukti ase, te he buzilauk, tar saite amar aro beshi zukti ase. Ami-o itar ufre borosha ḳortam farlam one. Zonmor aṭ dinor din-u amar mosolmani ḳam ḳorail oisil. Ami eḳzon ḳaṭi Ibrani, amar zonom oise to Boni Israilor Bin-Iamin gusṭit. Hozrot Musa nobir shoriotor befare ami to Forishi zomator. Shoriot manar befare kunu manshe amar kut bar ḳorto farse na. Dormor befare ami kub ḳoṛa, al-Mosir zomator ufre-o ami zulum ḳortam. Oile ou amol ḳorae amar zoto fayda oisil, oḳon al-Mosir lagi ami itare ḳeti mono ḳori. Ashole ami zar lagi i keti shikar ḳoriar, ein-u amar Malik Isa al-Mosi. Tanre zanar maze-u hoḳol taki boṛo fayda, tan tulonae bad-baki hokkoltare-u ami ḳeti mono ḳori. Ami zate al-Mosire fai, ar amare zate al-Mosir loge ekḳano milail deḳa zae, ou niote-u ami ita hokkoltare moylar laḳan horaia falaisi. Te shoriot manae ami ze forezgar bonigesi, ikan nae, al-Mosir ufre iman anae-u Allae amare forezgar hishabe ḳobul ḳorsoin. I forezgari kali Alla taki-u mile, iṭa to imanor ufre nirbor ḳore. Al-Mosir loge milar bade-u amar ou halot oise. Te ami al-Mosire sintam sai, ze kudroti bole tanre mora taki zinda ḳora oisil, ou bolre-o sintam sai. Ami tan duḳ-mosibotor bagi oitam sai, tain zela nizor zan kurbani disla, ami-o ou mouto shorik oitam sai. Ar zekunu laḳan moron taki zinda oat-o shorik roi. Te ami zeta faitam sairam, ita ze oḳon-u failisi, ba furafur kamiab oigesi ila kunta nae. Hozrot Isa al-Mosie ze niote amare bondi korsoin, ou niot fura ḳorar lagi-u ami douṛairam. Bai oḳol, ami mono ḳorram na, ami itar lagal failisi. Oile ḳoror hoḳolta falaia ami dile-zane samnedi douṛaiar. Douṛai douṛai sesṭa ḳoriar, Isa al-Mosir zoriae Alla Pakor ze behesti daot ase, furuskar hishabe ou daoto hamaitam fari. Erlagi koiram, amra zara Hozrot Isar fote bout aguai gesi, amrar niot-o olaḳan oa zorur. Ar tumrar zudi oinno kunu niot taḳe, te Allae-u fot batai dibane. Zai ouk, amra zotoḳan aguaisi, ou laḳan zindegi-o ḳaṭani usit. Bai oḳol, tumra kilan zindegi kaṭaitae, ita to ami hikaisi. Tumra amar laḳan solo, ar ou laḳan zara sole, tarare dekia hiko. Ami to bout bar tumrare ḳoisi, ar sokur fani falaia oḳono ḳoiram, ila-o bout zon ase, zera al-Mosir duk-koshṭor solibor dushmonor laḳan soler. Tarar ḳofalo ase binash. Tarar feṭ-u tarar Alla. Naformani ḳam loia tara boṛai kore, ḳali duniar dandae fagol. Oile amrar asol baṛi to behesto. Amrar toraora malik, Hozrot Isa al-Mosie hon taki toshrif anba. Amra tan lagi dile-zane bar sairam. Tain aia amrar ou ḳomzur ḳaya bodlaia, tan ḳayar laḳan ḳemota-ala nuror ḳaya diba. Ze kudroti bole tain hokkolta ḳorta faroin, hou bole-u tain ita ḳorba. O amar mayar bai oḳol, ami tumrare deḳtam sai. Tumra-u amar kushi, amar joyor mala. Amrar malikor loge tumra mozbut oia lagia ro. O amar boin Salima ar Saida, ami minot ḳori koiram, eḳ malikor kezmoto lagail aso ḳori, tumra mili-mishi eḳ mone solo. O amar logor asol shongi, ami tumare-o minot ḳorram, tumi ou beṭintore shaijjo ḳorio. Al-Mosir kush-ḳobri toblig kamo era amar loge bout ḳoshṭo ḳorsoin. Kiliman ar oinnainno baiaintor loge-o ḳoshṭo ḳorsoin. Tarar nam to Allar zindegi katat leḳa ase. Malik Isar name tumra hamesha kushi-bashi koro. Ami hirbar ḳoiram, kushi-bashi koro. Tumrar norom bebohar zanu hoḳol manshor sokut foṛe. Zano to, amrar malik kub zoldi-u aira. Kunu befare-u tumra fereshan oio na, borong munazat ḳoro. Tumrar zotota saibar ase, Allar shukria adae ḳoria tan gese sao. Teu Allar deoa ze shantir ḳota manshe sinta-o ḳorto fare na, Isa al-Mosir mazdi ou shanti aia tumrar dil ar monre roikka ḳorbo. O bai oḳol, ami hesh-mesh ḳoiram, zeta hasa, zeta ufozukto, hok, ḳaṭi, shundor, ar ijjot faoar zuka, mani zeta bala ar zetae tarif oy, ou laḳan befare tumra kiali o. Tumra amar ges taki ze talim faiso, zeta huncho, zeta deḳso, ar zeta ḳobul ḳorso ota oḳon amol ḳoro. Teu shanti deora Alla-o tumrar loge loge roiba. Malike amar kushi aro baṛai dila, bout din bade tumra amare mono ḳorrae. Amar lagi to hamesha-u tumra sinta ḳorso, oile ita deḳanir shuzug faiso na. Kunu obabo foṛia ami ikan ḳoiram na, zekunu halote-u shontusto roaḳan ami zani. Obabi ba nobabi halote, ufashi feṭe ba bora feṭe, doni ba goribir maze kila shontusto roa zae, ita talim ami faisi. Ashole zein amare bol-shokti zugaia dein, tan bole-u ami hokkolta ḳortam fari. Ta-o tumra amar ḳoshṭor loge shorik oia, kub bala ḳam ḳorso. O Filifi zomator mumin oḳol, tumra to zano, tumra foyla kush-ḳobri faoar bade ami zebla Makidonia desh taki geslamgi, ou shomoy tumra saṛa ar kunu zomate-u amar loge kunuzat len-den ḳorse na. Ami zebla Tisholoniki ṭauno aslam, ou shomoy amar obabor ḳalo tumra ḳoybar shaijjo faṭaiso. Ami tumrar ges taki kunu dan-dokkina sairam na, oile tumrar lagi ola eḳ fol asha ḳorram, zeta tumrar amol-namat zoma roibo. Amar hoḳol faona-u ami failisi. Ashole amar zotoḳan zorur, er saite-o beshi ase. Usaid bair at taki tumrar ufohar faia oḳon amar bout oise. Ou ufohar to Allai kushboy-ala, Allar dorbaro ḳobul oar zuka kurbani. Alla Pak itae kushi oin. Amar Allae tan nizor gourobor don hishabe, Hozrot Isa al-Mosir usillae tumrar hoḳol obab dur ḳorba. Zuge zuge hor-hamesha amrar gaibi baf Alla Pakor tarif zari rouk. Amin. Hozrot Isa al-Mosir torikar Allar hoḳol bondare amar salam dio. Amar logor hoḳol baiainte tumrare salam zanaira. Allar zoto pak bonda i zagat asoin, ḳas ḳori bashsha Ḳoisoror baṛir mumin oḳole salam zanaira. Hozrot Isa al-Mosir rohomot tumrar dilo taḳouk. Amin. Tumra age ze kush-ḳobri mani Allar hok kalam faiso, ou kalam hunia-u tumrar mono eḳ asha zonmise. Ou asha taki-u tumrar iman ar maya foyda oise. Ar tumra asha ḳorrae ze saman faitae, ita to behesto raḳa ase. I kush-ḳobri duniar hoḳolbae sitria bala folala oia din din baṛer. Ze din tone tumra ou kush-ḳobri ar Allar rohomotor befare furafur huncho, ou din tone-u itae tumrar bitre-o furafur ḳam ḳorer. Ou kush-ḳobrir ḳota tumra amar logor mayar bai Abu-Farasor gese huncho. Tain tumrar torof taki al-Mosir eḳzon hok kezmotḳari. Pak Ruhur bole tumrar dilor maze ze maya foyda oise, ou befare Abu-Farase amrare zanaisoin. Erlagi tumrar befare hunar bad taki-u amra hamesha tumrar lagi dua ḳori. Ruhani ilim ar buddi dia tumra zanu Allar munsha furafur buztae faro. Amra Allar dorbaro ou dua-u ḳorram, tumra zate hoḳol befare al-Mosir morzi zugaia solo ar tan ufozukto ummotor laḳan zindegi kaṭao. Hok kam ḳori kori foloban o, ar Alla Pakre aro bala ḳori sino. Allae tan moha kudroti bole hoḳol nomunar bol dia tumrare boloban ḳoroukka. Bala-mosiboto foṛle-o kushi-bashi roia sobor ḳorar tofik deukka. Ar hoḳol shomoy behesti baf Alla Pakor shukria zanao. Allar pak bonda oḳole nuror bashshait ze odikar faiba, itar bagi oar lagi to tain-u tumrare ufozukto banaisoin. Tain-u amrare andairor bashshai taki uddar ḳoria, tan ḳas mayar zonor bashshait anchoin. Ou mayar zonor ufre iman anae amra rehai faisi, mani guna taki mafi faisi. Ou mayar zon-u oila, batuni Allar zairi surot; hokkolta foyda ḳorar age tain asla, ar foyda oa hokkoltar maze tain-u fordan. Asman-zominor maze deḳa ar a-deḳa zotota ase, ita bashshai ouk ba bahaduri, shashon kiba ḳemota ouk, hokkolta-u tan ator foyda. Ita to ḳali tan lagi-u foyda ḳora oise. Hokkoltar foyla tain asla ar tan mazdia-u hoḳolta ṭikia ase. Tain-u tan shorilor mata, mani zomator mata. Tain-u hokkoltar foyla, ar tain-u foyla murda taki zinda oisoin, zate hoḳol befare tain-u fordan oita faroin. Allae saila, tan Allai gunor hokkolta zanu al-Mosir maze taḳe. Ar duniat ba behesto zeno-u oy na ḳene, ou al-Mosir mazdia zanu hokkoltar loge tan milon oy. Tain saila, solibor ufre al-Mosir kurbanir lour bodla shanti kaimor mazdi ou milon ouk. Tumra to eḳ shomoy Allar ges taki duroi aslae, ar tan befare tumrar dilo dushmoni bab asil. Ita tumrar bod ḳamor mazdi zair oise. Oile al-Mosir zan kurbanir mazdi Allae tumrare-o tan loge milon goṭaisoin, zate tumrare fak-fobitro, nikut ar ni-oforadi halote tan samne azir ḳorta faroin. Te al-Mosir befare kush-ḳobri taki ze nichchit asha tumra faiso, ḳali ou ashar ufre imane tir roio, in taki loṛio na. Tumra to zano, i kush-ḳobri hara duniat toblig kora oise, ami Paulus-o ou kush-ḳobri tobligor ḳadim oisi. Tumrar lagi ami duḳ-mosibot shoijjo ḳorae kub anondo fairam. Zano to, al-Mosir shoril mani zomator lagi tan ze duḳ-mosibot oḳono baki ase, ita oḳon amar shoril dia fura ḳoriar. Alla Pake tan fobitro kalam tumrar gese furafur toblig korar bar amare disoin, gotike-u ami zomator eḳzon kezmotḳari oisi. Allar kalamor ze batuni befar agor zomanar manshor gese zug zug dori lukail asil, ita oḳon tan pak bonda oḳlor gese zair ḳora oise. Allae saisoin, bin zati oḳlor gese-o tan batuni munshar gourob ze kita, ita zenu tan hoḳol bonda oḳole zanta faroin. Ashole al-Mosi tumrar dilo asoin, gotike tumra gourob faoar asha faiso. Ar ou al-Mosir befare amra toblig koriar, Allar deoa aḳol-hekmot dia manshore hushiar ḳoriar ar talim diar zate al-Mosir torikat furafur kamil halote tarare Allar dorbaro azir ḳortam fari. Ou niote Allar ze kudroti bol amar maze ḳam ḳorer, ou kudroti bole-u ami dile-zane menot ḳoriar. Ami tumrare zanaitam sairam, ami to tumrar lagi, Laodikea ṭaunor zomator lagi, ar zera amare deḳse na tarar lagi-o ḳoto menot ḳorram. Ami sairam, tarar dilo borosha faia mohobbote eḳ ouk. Ar furafur aḳole aḳoldar bonia nichchit ouk. Teu Allar lukail batuni bed buzbo, mani al-Mosire tara sinbo. Al-Mosir maze-u hoḳol aḳol-hekmot lukail ase. Ami ita ḳoilam, zate ḳeu banoaṭ mat-ḳota matia tumrare be-fote nito na fare. Ami sho-shorile tumrar maze na taḳle-o ruhur bole ṭik-u tumrar maze azir asi. Tumrar bala sal-cholon ar al-Mosir ufre mozbut iman dekia amar kub bala lager. Isa al-Mosire tumra malik hishabe zela ḳobul ḳorso, ou laḳan tan loge roia zindegi-o ḳaṭao. Al-Mosir maze shullo-ana ḍub dia tumrar zindegire goṛia tulo. Tumra talim faia ze iman ancho, ou imane mozbut ro ar hamesha Alla Pakor shukria adae ḳoro. Tumra hushiar roio, ḳeu zanu tumrare manshor banail mongoṛa talimdi bandia be-fote ṭania nito na fare. Al-Mosir loge i talimor kunu mil nai, ita to manshor mongoṛa rosumot ar duniabi nanan asar-beboharor ufre borosha ḳore. Allar hokkol laḳan gunagun al-Mosir ḳayar bitre ase. Erlagi al-Mosir loge shorik oia tumra-o hoḳol gune kamil oiso, tan ashon to hoḳol nomunar shashonḳari ar ḳemota-ala hokkoltar ufre. Al-Mosir ufre iman anae to tumrare mosolmani ḳam ḳorail oise. Ou mosolmani kunu manshor ate ḳorail oise na, al-Mosie nize-u ita ḳorsoin, mani dilor maze ze bod ḳaish asil, ou bod ḳaishre dil taki kaṭia falaisoin. Toubar gusolor mazdi al-Mosir loge tumrare-o maṭi deoa oisil, ar zein al-Mosire murda taki zinda ḳorsoin, hou Allar kudroti bole imanor mazdi tumrare-o al-Mosir loge zinda ḳora oise. Tumrar guna ar dilor bod ḳaish na horanie murda aslae, oile Allae tumrare al-Mosir loge zinda ḳorsoin. Tain amrar hoḳol gunar mafi disoin. Ar amrar bod amol-namar ze dolil asil, ou dolilre hoḳol zator dabi-daoa shudda fusia falaisoin. Laḳṛidi banail ze solibo Isare zane mara oise, ou solibo i dolilre fereg maria batil ḳorsoin. Al-Mosie bod shashonḳari ar ḳemota-ala hokkolor ḳemotare binash ḳorsoin. Solibo tan nizor zan kurbanir mazdi tarar ufre joyi oisoin ar hoḳlor samne tarar muk nisa ḳorsoin. Erlagi-u shinni-shoḳat, puja-foshad omaboishsha-funnima, id ba Zummabaror niom-ḳanun loia tumrare dushi korar eḳtiar ḳeuror nai. Ita to asil, bobishote zeta aibo otar eḳṭa nomuna matro, oile asolta to al-Mosir maze-u ase. Zera nizor shorilre ḳoshṭo deoa ar firista oḳlor ebadot ḳorare zoruri mono ḳore, era zanu tumrare furuskaror fot taki horaito na fare. Ou nomunar manshe zeta deḳse ḳoia ḳamoḳa boṛai-beṭagiri kore, ar ota loia boṛo boṛo gof mare, ashole erar ontor to ḳali duniabi sintae bora. Tara to matare, mani Isa al-Mosire mozbut ḳori doria raḳe na, ou matar ḳemotae asta shorilor aḍḍi-mangsho bol-shokti faia ekḳano roy, ar Allai bole baṛe. Al-Mosir loge mara gia tumra zebla duniabi hoḳol sal-cholon taki horia aiso, te hirbar ḳene duniabi manshor laḳan duniabi niom-nitir gulam oirae? Ḳemne ebadot ḳora, nizore nisa ḳora, ḳemne nizor shorilre ḳoshṭo deoa, ou niom-nitie ota hikae. I niom-niti deḳle mono oy, ita kub aḳolor ḳam, oile dilor bod ḳaishre domon ḳorar lagi itar kunu dam-u nai. Huno, tumra to al-Mosir loge mora taki zinda oiso, ar al-Mosi to behesto Allar ḍainor toḳto boat asoin, erlagi tumra-o oula behesti befar loia ashik o. Duniabi befare ashik na bonia, behesti befare ashik o. Tumra to mara geso, tumrar zindegi al-Mosir loge Allar dorbaro lukail ase. Zein tumrar zindegi, hou al-Mosi zebla hoḳlor samne zair oiba, ou shomoy tumra-o tan mohimar bagi oia tan loge zair oibae. Erlagi gunar zeta rifu oḳol tumrar zindegit ase, itare eḳdom binash ḳorilao. Ita oilo hokkol nomunar zina, nafaki, bod ḳaish, ku-sinta, ar lub-lalos, i lub-lalos oilo eḳlaḳan murtifuza. Zara Allar naformani kore, otar ḳarone-u tarar ufre Allar gozob lamia ae. Tumra-o age ou laḳan naformanir maze zindegi kaṭaitae. Oile oḳon rag-gusa, bitori dushmoni, ingsha-ninda, gala-gali ar ḳobisi mat-ḳota tumrar ges taki horailao. Eḳe-oinne misa matio na, ḳaron tumrar zindegir furan ‘ami’re tar hoḳol amol shudda furan ḳafoṛor laḳan falai diso, ar Allar deoa noya ‘ami’re noya ḳafoṛor laḳan findiso. Ou noya ‘ami’ aro noya oia tar foyda ḳorra malikor laḳan boner, zate ou foyda ḳorrare tumra furafur sino. Ou halote Ihudi kiba bin zati, mosolmani ḳam ḳorail ba na ḳorail, oshikkito borbor, nisa zati, gulam ba azad manshor maze kunu tofat nai. Ita hoḳoltar maze al-Mosi-u fordan, hoḳlor maze-u tain asoin. Te Allae zarare fosond ḳoria tan nizor lagi alog korsoin, tan hou mayar bonda hishabe tumrar dilor maya-momota, doya, norom bebohar, norom shobab ar sobor dia nizore hazao. Eḳe-oinnore shoijjo ḳoro, ḳeuror birudde tumrar kunu nalish taḳle tare maf ḳori deo. Malike zela tumrare maf ḳorsoin, tumra-o oula eḳe-oinne maf ḳora zorur. Ar ita hokkoltar loge maya-mohobbotdi nizore hazao. Mohobbote to hoḳolre furafur eḳloge bandia raḳe. Al-Mosie ze shanti dan ḳoroin, ou shanti tumrar dilo roia tumrare salauk. Eḳ shoril oia shantir maze roitae ḳori-u to tumrare daot deoa oise. Tumra shukur-guzar ḳorat ro. Al-Mosir kalamre tumrar dilor maze furafur boshot ḳorte deo. Allar deoa aḳol ḳaṭaia eḳe-oinnore talim ar foramish deo. Allar shukria adae ḳorar mazdi tan name hamd, ḳaoali ar Zobur Shorifor gozol gao. Tumra mukdi zeta mato ar shoril dia zotota ḳoro, ita Hozrot Isar name ḳoro, tan usilla loia gaibi baf Alla Pakor shukria zanao. Tumra zera bou oiso, tumra forteḳe zarzir zamair hukum mania solo, malikor bonda hishabe to ola sola zorur. Tumra zera zamai oiso, tumra-o zarzir boure mohobbot ḳorio, bour loge ḳoṭu bebohar ḳorio na. Tumra zera fua-fuṛi, tumra hoḳol befare ma-bafor baiddo roio, ila solle malik kushi oin. Ar tumra zera baf oiso, tumra nizor fua-fuṛintor monre titta ḳorio na, zate tarar mon na bange. Tumra zera gulam, tumra hoḳol befare tumrar zogotor munib oḳlor baiddo roio. Tara samne roia zebla tumrar ḳam-ḳaz deḳoin, ḳali ou shomoy tarare kushi raḳar sesṭa na ḳoria, borong malikor ḍor-ḳof bitre rakia ḳaṭi dile tarar baiddo roio. Tumra zeta-u ḳoro na ḳene, ita manshor lagi nae, borong malikre kushi korar niote dile-zane ḳorio. Mono rakio, malike tan bonda oḳlor lagi zeta raḳsoin, ita to furuskar hishabe tan ges taki-u tumra faibae. Tumra to ḳali Hozrot Isa al-Mosir kezmot ḳorrae. Ar ze zone naformani kore, he to tar ḳamor fol faibo. Mono rakio, malike ḳeuror muk saia bisar ḳoroin na. Tumra zera munib, tumrar gulam oḳlor loge niae ar hok insaf ḳorio. Mono rakio, behestor maze tumrar-o eḳzon munib asoin. Tumra mon dia shukria adae ḳoria dua ḳorat roio. Amrar lagi-o dua ḳorio, zate Allae amrare al-Mosir befare batuni hok kalam toblig korar tofik dein. Ou batuni hok kalamor lagi-u to amare bondi kora oise. Dua ḳorio, manshore zela forishkar ḳori buzani zorur, ami zanu ṭik oula buzaitam fari. Al-Mosir torikar bairor manshor loge aḳol ḳaṭaia solio, ar toblig korar hokkol shuzug kamo lagaio. Tumrar mukor zoban hamesha miṭa ar roshail ouk, zate ḳare kila zuaf ditae, ita tumra buzo. Amrar mayar bai, bishashi kadim ar malikor kezmoto amrar logor tobligkari Tukik baie, amar bistarito ḳobora-ḳobor tumrare zanaiba. Tan marfote amrar hal-hokikot zanbae, tain tumrare shaosh diba. Erlagi ami tanre tumrar gese faṭailam. Tukikor loge amrar mayar imandar bai Onisimre-o faṭailam. Ein to tumrar-u eḳzon. Tara inor hoḳol ḳobor-antor tumrare zanaiba. Amar logor bondi bai Aristakus ar Barnabasor kuṭum Markuse-o tumrare salam disoin. Ou Markusor befare tumra to ag taki-u ḳobor faiso, tain zudi tumrar gese zain, te kushi mone tanre ḳobul ḳorio. Ar Isa urfe Iustuse-o tumrare salam disoin. Allar bashshair lagi Ihudi oḳlor maze ḳali ou tin zone-u amar loge ḳam ḳoroin, tara amare bout shaosh disoin. Abu-Farase-o tumrare salam disoin, tain to tumrar afon manush ar Isa al-Mosir gulam. Ein hamesha tumrar lagi dile-zane munazat ḳorra, tumra zate kamil o, ar Allar morzi-munsha buzia mozbut oia ubao. Tan befare ami ou shakki ditam fari, tumrar lagi ar Laodikea, Hiorapoli ṭaunor manshor lagi-o Abu-Farase kub menot ḳoroin. Amrar mayar ḳobiraz Luk ar bai Dimase-o tumrare salam disoin. Laodikear imandar bai oḳolre, ar Nimufa ar tan baṛir zomator hoḳlor gese-o salam zanaio. Tumra ou siṭikan foṛia harle Laodikear zomator manshore foṛar lagi dio ar Laodikea zomatre dusra ze siṭi deoa oise, ou siṭi-o tumra foṛio. Arkipasre oḳan ḳoio, “Malikor kezmoto tumare ze ḳam deoa oise, ou ḳam shesh ḳorar niote mon dia ḳam ḳoro.” Ami Pauluse nizor ate ou salamor ḳota leḳlam. Mono rakio, ami zelo bondi asi. Allae tumra hoḳlor ufre rohomot nazil ḳoroukka. Amin. Ami Paulus, bai Silas ar Timotie Tisholoniki ṭaunor zomator gese leḳram. Tumra amrar gaibi baf Alla Pak ar Hozrot Isa al-Mosir afon zon oiso. Tumrar ufre rohomot ar shanti nazil ouk. Amra dua ḳorar bala hamesha tumrar zomator hoḳlor nam mono ḳoria Allar shukria adae ḳori. Imanor lagi tumra ze ḳam ḳorrae, mohobbotor lagi tumra ze menot ḳorrae ar Hozrot Isa al-Mosir ufre asha-borosha ḳoria tumra ze sobor ḳorrae, ita amrar gaibi baf Allar dorbaro dua ḳorar shomoy hamesha mono ḳori. O bai oḳol, Allar mayar bonda oḳol, amra zani, Allae-u tumrare fosond ḳorsoin. Amrar kush-ḳobrir toblig kam to tumrar gese ḳali mukor ḳota-u roise na, borong Allai bol, Pak Ruhu, ar nichchit boroshar ufre salu oise. Tumrar balair lagi amra zebla tumrar loge roitam, ou shomoy kilan solchi, ita to tumra zano-u. Tumra bout zulum-mosibotor maze-o Pak Ruhur deoa kushie amrar toblig kobul ḳoria, amrar ar malikor fote solrae. Oula solia tumra Makidonia ar Gris deshor mumin oḳlor gese eḳ nishana oigeso. Malikor kalam tumrar mazdi kali Makidonia ar Gris desho-u sitrise na, borong Allar ufre tumrar imanor ḳota hoḳol zagat-u sitrigese. I befare amra kunta matar zorur nae. Hoḳol manshe-u to amrare ḳoira, tumra ḳoto ador ḳoria amrare ḳobul ḳorsilae, tara eoḳan ḳoira, tumra kila deb-debintor puja bad dia Allar foti oia, zinda hok Allar ebadot ḳorat aiso. Ar murda oḳlor maz taki zenre zinda ḳori tula oise, hou Isa duniat aoar bar saitae faro. Tain oila Allar ḳas mayar zon Ibnulla, behest taki lamia aira, Allar ze gozob aia lamer, i gozob taki ou Isae amrare basaiba. Bai oḳol, tumra to nize-u zano, tumrar gese amrar zaoaḳan beḳama gese na. Tumra eoḳan-o zano, er age amra Filifi ṭauno zulum-mosiboto foṛslam ar beijjot oislam. Bade tumrar ono-o bout bada-nished ḳaṭaia amra Allai shaoshe shaoshi oia dile-zane tan kush-ḳobri kula-mela toblig korsilam. Amrar daot to kunu bul talim taki nae, kunu bod niote-o nae ba kunu ṭoga-ṭogir niote-o nae. Ḳali Allae amrare zoiggo mono ḳoria zela kush-ḳobri tobligor dayitto disoin, amra ola-u toblig korram. Kunu manshore kush ḳorar niote amra ita ḳoiram na, ḳali zein amrar dilre zasai koria deḳoin, hou Allare kush ḳorar lagi-u toblig korram. Tumra to zano, amra kunu shomoy-u ḳeuror gese tel-malish ḳoria ḳota matsi na, ar kunu lub-laloso foṛia dandabazir ḳam-o ḳorsi na, eḳ Alla-u itar shakki. Kunu manshor ges taki ijjot faite asha ḳorsi na, tumrar ges taki-o na, ba baira manshor ges taki-o na. Amra ichcha ḳorle to al-Mosir sahabi hishabe tumrar ufre dabi kaṭaitam farlam one. Oile er bodla, maʼe zela nizor huruttainre zoy-zoton ḳoroin, tumrar loge taḳar shomoy amra-o ola norom bebohar ḳorsi. Tumrar lagi kub beshi maya-mohobbot oae, ḳali Allai kush-ḳobri toblig nae, amrar nizor zan dite-o razi aslam. Zano to, tumra oilae amrar kub mayar manush. Baiainre, ashole to amrar menot ar aṭni-ḳaṭnir ḳota, nichchoy tumrar mono ase. Allai kush-ḳobri tobligor faḳe faḳe amra dine-raite ruzi-ruzgar ḳorsi, zate amrar ḳorsa-fati tumra ḳeuror lagi buza na oy. Ar tumra zera iman ancho, tumrar loge to amrar asar-bebohar asil fobitro, hok ar nikut. Tumra-u itar shakki, ar Alla Pak-o shakki asoin. Tumra to zano, bafe zela nizor forteḳ aoladre utshaho, shantona ar mozbut foramish dein, amra-o tumra hoḳolre oula foramish ditam, zate Allar bonda hishabe tumra ufozukto oia solo. Allae tumrare daot dira, tan nizor bashshai ar gourobor bagi oar lagi. Mono rakio, amra hamesha Allar shukria adae ḳorram, ḳaron amrar ges taki Allar kalam hunia tumra zebla iman anchilae, hou shomoy kunu manshor mukor ḳota nae, borong Allar kalam hishabe-u tumra ita ḳobul ḳorsilae, ar hasau ita Allar kalam. Tumra zera iman ancho, hou kalame-u tumrar dilo ḳam ḳorer. Bai oḳol, Hozrot Isar torikae solra Allar zoto zomat oḳol Ehudia zilat ase, tumrar hal-hokikot to tarar laḳan-u. Ḳaron tara zela nizor Ihudi zatir ato duḳ-mosibot faisoin, tumra-o oula nizor zatir manshor ges taki duḳ-mosibot faiso. Mono rakio, Ihudi oḳole Hozrot Isa ar nobi oḳolre zane marsil, tara amrar ufre-o zulum ḳorse. Te Alla Pak tarar ufre kushi nae, hoḳol manshor loge-o tarar dushmoni bab ase. Tara amrare nished dira, zate bin-dormi manshor gese amra Allai nazator kush-ḳobri toblig na ḳori. Ou laḳan tara zarzir gunar buza boṛo ḳorra. Erlagi tarar ufre Allar ḳaṛa gozob lamche. O bai oḳol, monor dik taki na oile-o, shorilor dik taki to amra tuṛa dinor lagi, tumrar ges taki horail asi. Erlagi amrar kub kial ase, zate tumrar mukkan hirbar deḳtam fari. Amra hoḳol-u, ḳas ḳori ami Pauluse bar bar sesṭa ḳorsi tumrar gese aitam. Oile Shoytane amrare aṭḳailise. Hasau amrar Malik Isae zebla toshrif anba, ou shomoy tan samne amrar asha, anondo ar gourobor joyor mala hishabe kita faimu? Ita to tumra-u nae ni? Ashole tumra-u amrar gourob, tumra-u amrar anondo. Bade amra zebla ar shoijjo ḳortam farlam na, ou shomoy amra niot ḳorlam, amra eḳla-u Atinia ṭauno roia, amrar bai Timotire faṭaimu, zate tain gia tumrar iman mozbut ḳoroin ar monor shaosh zugain. Tain to al-Mosir kush-ḳobrir toblig kamo Allar ḳadim, amrar logor bai, tanre faṭailam, zate ou duḳ-mosibotor maze-o tumra ḳeu ḳoredi na zao. Tumrar zana ase, duḳ-mosibot amrar ufre ṭik-u aibo, ar ita shoijjo ḳora lagbo. Ami age zebla tumrar loge aslam, hou shomoy tumrare ḳoisi, duḳ-mosibot amrar ufre aibo-u, ar ṭik-u olaḳan aise. Te ami zebla ar shoijjo ḳortam farlam na, ou shomoy tumrar imanor halot deḳar lagi Timoti baire faṭailam. Amar mono ḍor asil, kizanu Shoytane tumrare lalos deḳaise ar amrar hoḳol menot beḳama gesegi. Oile Timoti bai tumrar ges taki firia aia amrare zanaisoin, tumrar iman ar maya-mohobbotor halot bout bala. Tain ḳoisoin, tumra hamesha maya-mohobbote amrare mono ḳoro, ar amra zela tumrare deḳtam sairam, tumra-o oula amrare deḳar asha ḳorrae. O bai oḳol, erlagi-u tumrar imanor mozbutir ḳota hunia, amrar oto duḳ-mosibotor maze-o dilo shanti faisi. Tumra malikor ufre imane mozbut roile-u, amrar zindegikan doinno. Tumrare loia Allar dorbaro amra ze kushi-bashi koriar, itar lagi amra kila Allar shukria zanaitam, zanram na. Amra mon dia dine-raite hamesha dua ḳorram, zate tumrar mukkan hirbar deḳar shuzug fai, ar tumrar imanor bad-baki hoḳolta fura ḳortam fari. Te gaibi baf Allae ar Hozrot Isa al-Mosie zanu, tumrar gese zaoar lagi amrare shuzug dein. Amra zela tumrar bae maya-mohobbotor maze ḍubi gesi, ṭik oula Malik Isae tumrare-o eḳe-oinne, ar hoḳlor bae maya-mohobbote habu-ḍubu ḳaoaukka. Ou laḳan tain tumrar dil furafur mozbut ḳoroukka, zate amrar Hozrot Isae zebla tan nizor pak bonda oḳol loia toshrif anba, ou shomoy amrar gaibi baf Allar nozoro tumra fobitro ar nikut ro. O baiain huno, Allare kushi korar lagi ḳemne zindegi kaṭani lage, i talim to tumra amrar ges taki age-u faiso ar tumra ola solrae-o. Erbade-o Hozrot Isar oia tumrare minot ḳoriar ar hushiar ḳoriar, tumra zela solrae, oula aro besh ḳori solo. Hozrot Isar deoa eḳtiare amra zeta hukum disi, ita to tumrar zana ase. Ashole Allae saira, tumra zanu fak-fobitro o, mani hoḳol nomunar zina taki horia ro. I befare ḳeu zanu nizor bair loge gaddari na ḳore. Mono rakio, amra age-u tumrare ḳoisi ar hushiar-o ḳorsi, ita naformani korle Malik Isae shaza diba. Allae kunu amrare daot disoin ni naformanir fote solar lagi? Tain to amrare fak-fobitro oia solar lagi koisoin. Erlagi zegie i talim mane na, he ḳali duniar manshore mane na ikan nae, he ashole hou Allare-u maner na, zein tumrare Pak Ruhu dan ḳorsoin. Te baie baie kila maya-mohobbot taḳa zorur, i befare tumrare kunta leḳar goroz nai, ḳaron Allae tumrare hikaisoin, eḳe-oinne maya-mohobbot ḳortae. Ar hasau tumra asta Makidonia deshor bai-boinre oula maya ḳorrae. Oile amrar ḳas onurud oilo, tumrar i mohobbot zanu dine dine aro baṛe. Huno, amra age zela ḳoisi, ou ḳota mafik shantie zindegi kaṭao, foror ḳamo naḳ na golaia nize ḳam ḳoria ḳao. Teu baira manshor sokut tumrar sal-cholon bodro oibo, ar oinno zonor ruzir ufre tumrar borosha ḳora lagto nae. O bai oḳol, huno, murda oḳlor kun halot oibo, amra sairam ita tumra zano, zate moron bade kita oibo ikan na zanae zera nirash oizae, tumrar mon zanu ilaḳan na oy. Huno, amra zebla ekin ḳori, Hozrot Isar mout oisil oile tain zinda oia uṭsoin, te eoḳan-o ekin ḳori, Hozrot Isae dusrabar toshrif anle Isar ufre iman ania zerar mout oise, Allae tarare-o Isar loge milon ḳoria tan loge niba. Erlagi malikor kalam mafik tumrare ḳoiram, amra zera zinda asi ar malike toshrif anar ag forzonto zinda roimu, amra kunumonte-u hi murda oḳlor age zaitam fartam nae. Ḳaron Allai shingar aoazor loge loge, fordan firistar ḍaḳor loge, Malik Isae zure haukdi hukum diba, tain nize-u behest taki lamia aiba. Ar al-Mosir ummot bonia zerar mout oigese, tara-u foyla zinda oia uṭba. Erbade amra zera duniat zinda taḳmu, amrar malikor loge mulaḳat ḳorar lagi amrare-o megor kuṭit ḳori asmano tulia neoa oibo. Olaḳan amra siroḳal malikor loge roimu. Erlagi tumra ota zanaia eḳzone aroḳzonre utshaho deo. Baiainre, kun zomanat kun shomoy kita goṭibo, ita tumrar gese leḳar zorur nai. Tumra nize-u to bala ḳori zano, raitkur bala zela aḳta-u sur ae, Malik Isa aibar dino ṭik ola-u aibo. I zogotor manshe zebla ḳoiba, “Hoḳolta shanti oigese, kunu ḍor-boy nai,” ou shomoy, beṭintor hurutta oar bedona zela aḳta-u dore, oula ota manshor shorbonash aḳta-u oibo. Tara kunumonte-u rehai faito nae. Bai oḳol, tumra kunu andarir maze boshot ḳorrae ni zen, hou din aḳta-u suror laḳan tumrar ufre aito? Tumra hoḳol-u to Allar nuror ar dinor foror manush. Amra to andarir ba raitor balar manush nae. Erlagi ao, oinno manshor laḳan amra na gumaia borong hozag roi ar nizore shamlaia raki. Zano to, zera gumae, tara raitor balae-u gumae ar zera modkur, rait oile tara mod ḳaia ṭal oy. Oile amra to dinor foror manush, erlagi nizore shamlaia raki. Amrar buk basanir lagi iman ar mohobbot dia buk guri, ar matare basanir lagi Allai nazator ashare sifair kefor laḳan matat lagai. Mono rakio, Allae amrare shaza dibar lagi ḍakia anchoin na, borong amrar Malik Isa al-Mosir usillae nazat faoar lagi-u ḍakisoin. Ar al-Mosir mout oise to amrar lagi-u, zate amra basi ba mori, tan loge-u hamesha zinda roi. Erlagi-u tumra oḳon zela ḳorrae, hamesha ola eḳe-oinnore shaosh deo ar goṛia tulo. Te baiain, amra minot ḳoria ḳoiar, tumrar lagi zera aṭni-ḳaṭni kaṭoin, malikor oia tumrare salain ar nosiot ḳoroin, tumra erare ijjot ḳorio. Tara zela kezmot ḳorra, otar bae saia dilor mohobbote tarare ḳas ijjot dio. Ar tumra eḳe-oinne mili-mishi roio. O bai oḳol, tumrare ou nosiotḳan ḳoriar, zeta manush kuṛia, tumra itare hushiar ḳori deo, ḍoraluk zonre shaosh deo, ḳomzur oḳolre shaijjo ḳoro, ar doijjo doria hokkolre shoijjo ḳoro. Kial rakio, oinnayor bodla ḳeu zanu oinnae na ḳore. Tumra hamesha eḳe-oinnor, ar hoḳlor-u balai korar sesṭa ḳorio. Hoḳol shomoy kushi-bashi korat roio, hamesha dua-munazat ḳorio Ar hoḳol haloto Allar shukria adae ḳorio. Ḳaron Alla Pakor kial oilo, Hozrot Isa al-Mosir loge imane tumra olaḳan solo. Pak Ruhre dilor bitor taki nibaio na. Ar zera Allar oli hishabe batuni koin, tarar ḳotare elami korio na, borong hoḳolta zasai kori dekia, balaḳan bitre haraio. Ar hoḳol nomunar naformani taki horia roio. Shanti deora Allae nize tumrare furafur fak-fobitro ḳoroukka, amrar Malik Isa al-Mosie toshrif anar ḳalo tumrar asta shoril, ruhu ar dilre furafur nikut raḳoukka. Ar tain nichchit ola-u ḳorba. Zano to, zein tumrare daot ḳori anchoin, tan ufre furafur borosha ḳora zae. O baiain, amrar lagi dua ḳorio. Tumra eḳe-oinne fobitro golagoli korio. Amrar malikor name ami tumrare ou hukum diar, ou siṭikan foṛia zanu hoḳol baiaintore hunail oy. Amrar Malik Isa al-Mosir rohomot tumrar loge rouk. Amin. Amrar gaibi baf Alla Pak ar Hozrot Isa al-Mosir loge shorik, Tisholoniki ṭaunor zomator gese ami Paulus, bai Silas ar Timotie ou sohifaḳan leḳram. Gaibi baf Allae ar Hozrot Isa al-Mosie tumrare rohomot ar shanti dan ḳoroukka. Bai oḳol, amra hamesha tumrar lagi Allar shukria adae ḳora zorur. Tumrar imani bol bout baṛer ar eḳe-oinne maya-mohobbot-o baia foṛer, erlagi amra shukria adae ḳora dorḳar. Amra to Allar zomat oḳlor samne tumrare loia boṛai koriar, ḳaron oto zulum-mosibot ar duk-koshṭo faia-o tumra sobor ḳorso ar imane ṭikia roiso. Tumrare zate Allar bashshair zoiggo ḳoia gona oy, otar lagi-u tumra oto duḳ-mosibot shoijjo ḳorrae, ita oilo Allar hok-insafor forman, tan hok-insaf oilo, zetae tumrare ḳoshṭo dein, tain itare ḳoshṭo diba. Malik Isae zebla toshrif anba, ou shomoy tarare omon shaza deoa oibo, zate tara tan didaror ar moha kudrotir bare foṛia hor-hamesha lannoti shaza faibo. Hou din tan nizor pak bonda oḳol, zera tan ufre iman anche tarar mazdi, tan gourob-mohima zair oibo. Erar maze tumra-o aso, ḳaron amrar toblig hunia tumra iman ancho. Erlagi amra hamesha tumrar lagi dua ḳori, amrar Allae zanu tumrare tan daotor zuka mono ḳoroin, tan ḳemotar bole tumrar hoḳol nek kamor asha furon ḳoroin, ar iman ania hari tumra zeta ḳam ḳorrae, i ḳam-o zanu tain fura ḳoroin. Teu amrar Alla ar Hozrot Isa al-Mosir rohomotor lagi, tumrar mazdi amrar Malik Isar gourob zair oibo, ar tan mazdi tumra-o gourobor bagi oibae. O bai oḳol huno, amrar Malik Isa al-Mosi to hirbar aiba, aia amra hoḳolre ekḳano dola ḳoria tan gese niba. Te ou befare tumrare minot ḳori koiram, ḳeu zudi aia ḳoy Malik Isar din aia harse, he kunu gaibi doroshon deḳse, ba ohi nazil oise, ba amrar leḳa siṭi mono ḳoria-o tumra ḍoraia ostir oio na. Ḳeu zanu kunumonte-u tumrare ṭogia iman luṭito na fare. Ḳaron hou din aoar age beshir bag manush Alla Pakor birudde zaibo, tara Allar ges taki duroi horizibo, ar duzoki zon, hou naforman Kane-Dorjal bar oibo. Baroia “Allar name” zotota ase, ita hokkoltar bifokke ar ebadoti korar zuka hokkoltar bifokke gia, he nizore boṛo mono ḳorbo. He ola-o ḳorbo, Allar ebadot ḳanat boia nizore Alla ḳoia dabi korbo. Te ami zebla tumrar gese roitam, hou shomoy ami i befare mattam, ita tumrar mono or na ni? Hou naforman zate shomoy fura oar age bar oito na fare, erlagi kitae tare aṭḳaia raḳse, ikan to tumra zano-u. Tumra eoḳan-o zano, hou naformanor lukail ḳam-ḳaz oḳono soler. Oile zein tare aṭḳaia raḳra, tain horia zaoar ag forzonto tare aṭḳanit roiba. Tain hori gele hou naforman Kane-Dorjal bar oibo. Hozrot Isae mukdi fu dia tare binash ḳorba, ar tan kudroti mohimae azir oia tar bol-shoktire ḳotom ḳorba. Hi Kane-Dorjal zebla aibo, tar loge roibo shoytani ḳemota. Ou shoytani ḳemotae he hoḳol misa keramoti ar muzeza ḳam deḳaibo. Tar hoḳol nomunar beimani kaṭaia beiman manshore ṭogibo. Ita manush binash oiziba, ḳaron zan basanir lagi tara Allai hokre fosond ḳorse na, ar ḳobul-o ḳorse na. Erlagi Allae tarare shoktishali ek ku-dandat falaiba, zate tara misa befarre ekin ḳore. Ete Allai hokor ufre iman na ania zetae naformanire fosond ḳorsoin, tarare kiamotor din dushi shaibosto ḳora oibo. O bai oḳol, O Malik Isar mayar zon oḳol, tumrar lagi amra hamesha Allar dorbaro shukria adae ḳora dorḳar, Allae to tumrare foyla taki-u basia alog korsoin nazat faoar lagi. Pak Ruhu dia tumrare fobitro ḳorar mazdi, ar Allai kush-ḳobrir hokor ufre iman ania tumra nazat faiso. Amra ze kush-ḳobri toblig korsi, er usillae nazat faoar lagi Allae tumrare fosond ḳorsoin, zate tumra amrar Malik Isa al-Mosir mohimat shorik o. Te O bai oḳol, tumra imane tir ro ar muke muke ba siṭir marfote amra ze talim disi, ita balamonte mono rakio. O bai oḳol, hesh-mesh ḳoiram, amrar lagi dua ḳorio, Hozrot Isar kush-ḳobri tumrar maze zela zoldi zoldi sitrisil, oula zanu din din sitrat roy ar gourob faoat roy. Ar ou duaḳan-o ḳorio, amra zanu bibeḳ saṛa naforman oḳlor at taki rehai fai. Shob manush to ar imandar nae. Oile Malik Isa to hok ar ḳaṭi, tain-u tumrare imane tir raḳba ar Shoytanor at taki hamesha hefazot ḳorba. Malikor ufre iman ancho ḳori tumrar ufre amrar i ekin ase, amra zela hukum disi, tumra ṭik ou laḳan ḳam ḳorrae ar ḳorat roibae-o. Malik Isae zanu tumrar dilre Allar mohobbotor fote ar al-Mosir soboror fote salu raḳoin. Bai oḳol, amrar Hozrot Isa al-Mosir name ou hukum diram, tumrar zomator kunu imandar baie zudi kuṛiami kore ar amra zeta talim disi, ita na mane, te tar loge sola-fira bad dilao. Huno, amrar laḳan ḳemne soltae, ita to tumra zano-u. Amra zebla tumrar loge roitam, ou shomoy to kunuzat kuṛiami korsi na, magna kunu ḳani kaisi na. Amra dine-raite menot ḳoria ruzi-ruzgar ḳorsi, zate tumra ḳeuror buza na oi. Oile amra zen tumrar ges taki shaijjo nibar odikar nai, ila to nae, ta-o amra ola ḳoria deḳaisi, zate tumra-o amrar laḳan solo. Tumrar gese taḳar ḳalo talim dislam, kunu zone zudi ḳam ḳorto na sae, te he ḳani-o bad dilauk. Amra oḳono hunram, tumrar maze ḳeu ḳeu kuṛiami korer ar kunuzat ḳam-ḳaz ḳorer na, borong hamesha foror kichcha gaia din ḳaṭae. Te amrar Malik Isa al-Mosir oia ita manshore nosiot ar hukum diar, tara zanu shanti oia ruzi-ruzgar ḳoria ḳae, ar nizor ḳani nize zugae. Baiainre, nek kamo heran oio na. Ou siṭir bashae leḳa amrar foramish zudi keu na mane, te tare sinia raḳo, tar loge sola-fira bad dilao, teu he shorminda oibo. Oile kial rakio, tare dushmon mono ḳorio na, borong bai hishabe hushiar ḳoro. Shanti deora malike tumrare hamesha hoḳol nomunar shanti dan ḳoroukka. Malik Isa tumra hoḳlor loge loge roukka. Huno, i salamor ḳota ami Pauluse nizor ate leḳsi. Oḳṭa-u amar forteḳ siṭir alamot, ami ou nomunae siṭi leki. Tumra hoḳlor ufre amrar Malik Isa al-Mosir rohomot zari rouk. Amin. Ami Paulus to amrar toraneala Alla Pak ar amrar asha-borosha Hozrot Isa al-Mosir hukume tan sahabi oisi. Mumin hishabe amar ḳas aolad, Timotir gese leḳram. Gaibi baf Alla Pake ar amrar Malik Isa al-Mosie tumare rohomot, meherbani ar shanti dan ḳoroukka. O Timoti, ami Makidonia desho zaoar bala tumare ḳoislam, oḳon hirbar minoti kori koiram, huno, tumi Ifis ṭauno-u ro, roia onor ola kisu mullaintore hukum deo, tara zanu manshore ar bul talim na dey. Tarare ḳoio, tara zate banoaṭ kichcha ar lamba lamba ḳandanor lisṭor bae kiali na oin. Itae to nanan nomunar doladolir zonom dey, Allar ḳamor kunu fayda oy na, Allai fayda mile ḳali imanor mazdi. Borong shoṭik talimor fol oilo, maya-mohobbot, ita to ḳaṭi dil, forishkar bibeḳ ar hasaror iman taki foyda oy. Oile kisu manshe ita bad dia banoaṭ mat-ḳotar bae mon dilaise. Tara zudio nize-u nizor mator mani buze na, ar ze befar loia boṛo golae mater, i befare-o balamonte zane na, tebou tara Musa nobir batail shoriotor ustad oito sae. Amra zani, shoriot bala zinish, ḳeu zudi ṭik moto ita ḳamo lagae. Amra to zani, i shoriot kunu forezgar manshor lagi deoa oise na. Ikan deoa oise, zetae Allar ain manoin na, Allare ḍorain na, naformani koroin, gunagar, kuni, nafaḳ ar be-din, ma-bafor kuni, Hozrot Isa al-Mosi, zein amrar malik, tain amare bol zugaisoin, amare hok-halal mono ḳoria tan ḳamo boail ḳorsoin, erlagi ami tan dorbaro shukria zanairam. Zudio ami age al-Mosir bodnam gaitam, tan manshor ufre zulum ḳortam, bod-mizaz deḳaitam. Ta-o tain amare rohomot dan ḳorsoin, ḳaron hou shomoy ami iman anchilam na. Amrar munibe amare ḳoto boṛo meherbani korsoin, Isa al-Mosir torika ḳobul ḳorle ze iman ar mohobbot foyda oy, ita to amare furafur dan ḳorsoin. Ashole i kota to hok-kaṭi ar shullo-ana manar laḳ, gunagar oḳlor zan basanir lagi-u Isa al-Mosie i duniat toshrif anchila. Ou gunagaror maze ami-u fordan. Otar lagi-u Allae amare doya ḳorsoin, zate amar moto fordan gunagaror mazdi Isa al-Mosie tan shima saṛa soborgari deḳaita faroin, ar tan ufre iman anae zera aḳeri zindegi faiba, tara zanu amare dekia Allai fot buzoin. Zein siroḳalin bashsha, zein niraḳar, eḳmatro Alla, zan kunu koy nai, tan ijjot ar gourob hor-hamesha zari rouk. Amin. O mayar fut Timoti, tumar befare age zeta batuni mat mata oisil, ou mafik ami tumare minot ḳori koiram, tumi ita mono rakia al-Mosir lagi dile-zane laṛai korat ro. Erloge nizor iman ar forishkar bibeḳre basaio. Kunu kunu manshe bibeḳor buli na mania, nizor imanre nosṭo ḳorilise. I dolo asoin, Huminas ar Sikondor. Erlagi ami itare Iblisor ato shofi disi, zate tara buzta faroin, kufuri mat mata ṭik nae. Ami foyla-u zanairam, forteḳ manshor lagi tumra Allar dorbaro kakuti-minoti, dua-munazat, foriad zanao ar shukria adae ḳoro. Olaḳan raza-bashsha oḳol ar usa fodor hoḳol ofisaror lagi munazat ḳora zorur, zate amra Allar ḍor-ḳof mono rakia, hok-halal fote roia, nirafode shantie zindegi kaṭaitam fari. Ita to amrar toraneala Allar nozoro nek kam, itae tain kushi oin. Alla Pakor kial oilo, zate hoḳol manshe nazat fain, ar al-Mosir torikar hokkolta shullo-ana buzoin. I hokikoti oilo, Alla ḳali eḳzon, Alla ar manshor maze shafayatḳari mazor manush-o ḳali eḳzon-u asoin, en nam Isa al-Mosi, ein-o manush. Duniar hoḳol manshor zanor bodla hishabe, tain nizor zan kurbani disoin. Ou befare to Allar ṭik kora shomoye shakki deoa oise. Ar ou shakki dibar lagi Allae amare toblig kamo, sahabi fodo boail ḳorsoin, tain amare dayitto disoin, bin zatir gese iman ar Allai hokor ustad hishabe. Ami ita hok mat matiar, misa kunta nae. Ami sairam, hoḳol zagar beṭainte ḳalis niote duio at tulia munazat ḳorouk. Tarar monor maze kunuzat rag-gusa ba ḳaijja-fosador bab na rouk. Ami eoḳan-o sairam, beṭinte tarar haya-shorom rakia shomazor ufozukto beshe bodro ḳafoṛ-sufoṛ findouk. Tara zanu nanan nomunae sulor beni bolia, shuna-rufa ar moni-muktar goyna lagaia ar dami dami kafoṛ findia nizore na hazain. Borong Allar forezgar bandie zela nek kamor maze zindegi kaṭani usit, tara-o ola oin. Ḳortar furafur baiddo roia, ar nirai-zirai roia ilim ḳamai koroukka. Ustadi kora ar beṭaintor ufre musoddori korar odikar ami kunu beṭire dei na. Tara nirai-zirai roa zorur. Zano to, hoḳol foyla Adomre ar bade Bibi Haoare foyda ḳora oisil. Adom to Iblis-Shoytanor dukat foṛsoin na, oile Haoa Iblisor dukat foṛia Allar hukumor borkelaf ḳorsoin. Oḳon zudi beṭinte tarar haya-shorom rakia iman, mohobbot ar fak-fobitro oia soloin, te hurutta zonom deoar mazdi tara rehai faiba. Huno, asol hok kota oilo, ḳeu zudi zomator saloḳdar oita sain, te tain to nek kam ḳorar kiali oisoin. Zomator saloḳdar manshor sokut nikut oite oibo. Tan ḳali eḳ bou oibo. Tain nizore shamlaia raḳba, tan bala aḳol-buddi roibo, shobab oibo bodro, ar memandari korte bala faiba. Manshore talim deoar ḳemota taḳte oibo. Tain zanu modkur ar bod-mizazi na oin, borong tan shobab oibo norom, tain zanu mair-danga ḳorra ba ṭeḳa-foyshar lalchi na oin. Tain zanu shoṭik babe tan nizor foribaror hokkolta salain, tan huruttain oiba baiddo ar adob-ḳayda manra. Ze manshe tar nizor gor shamlaito fare na, he Allar zomatre kila deḳa-huna ḳorbo? Kunu noya imandar bai zomator saloḳdar oa ṭik nae, ila oile tain hoyto boṛai-beṭagirie bahaduri korba, ar Iblisor lagi ṭik kora shazar bagi oiba. Zomator bairor manshor gese tan shunam taḳa dorḳar, zate aḳta kunu bodnamor bagi na oin ar Iblisor fando na foṛoin. Oula zomator ḳadim oḳol-o ijjoti ar ek kotar manush oa zoruri. Era zate modkur ar haram lub-lalchi na oin. Tara zanu hok bibeḳe Isayi imanor batuni befarre mozbut ḳori dilo raḳoin. Erlagi foyla tarare zasai kori deḳa zorur, zasait zudi tara nikut oin, te zomator ḳadim oita farba. Ṭik olaḳan beṭi manush-o zanu ijjoti oin. Era manshor bodnam na gain, nizore shamlaia raḳoin, ar hoḳol befare bishashi oin. Ḳadim sab ḳali eḳ bou-ala manush oiba. Tain zanu balamonte tan bou fua-fuṛin ar shongsharor deḳa-huna ḳoroin. Ze ḳadime balamonte kezmot ḳoroin, ein shunam fain, ar Hozrot Isa al-Mosir ufre iman taḳae tan dil shaoshe bora roy. O Timoti, ami asha ḳorram kub zoldi-u tumar gese aitam. Oḳan mono ḳoria tumare ita leḳram. Zudi kunu ḳarone amar aite deri oizae, te i leḳa foṛle tumi buzbae, Allar foribaror manshor sal-cholon kila oito. I foribar to zinda Allar zomat, Allai hokikotor bit ar ian kuṭi. Isayi imanor marifoti koto mohan, ita to oshikar ḳora zae na. Ou marifoti oula zair oilo, Tain manush surote zair oila, Pak Ruhe forman oila be-ḳosur, firista oḳole tan doroshon faila. Tan befare hokkol zatir gese toblig kora oilo, asta duniar manshe tan ufre iman anla, gourob-mohimae tanre ufre tuli neoa oilo. O Timoti, Allai Pak Ruhe forishkar ḳori koira, aḳeri zomanat kisu manush Isayi iman taki horizibo, tara na-hok ruhu ar zin-butor talimor ashik oibo. Zeta beiman oḳlor bibeḳ-buddi oshaṛ oigese, otar bonḍamir dae ola oibo. Itae manshore ḳoṛaḳoṛi hukum dein bia-shadi na ḳorar lagi, ar kunu kunu ḳani kaite-o nished ḳoroin. Oile Allae to i kani foyda-u ḳorsoin, zera iman anche, zera Allar hokre zanilise, tara zate Allar shukria adae ḳoria ita ḳain. Allar foyda ḳora hoḳol zinish-u bala. Haram mono ḳoria kunuta bad deoa ṭik nae, borong Allar shukria adae ḳoria ḳaoa zae. Ḳaron Allar kalam ar i munazator mazdi ita fak-fobitro oizae. O Timoti, tumi zudi ou talim oḳol mumin baiainre buzaia deo, te Isayi imanor ze hok ar nirbul talim mania solrae, i befare tumi faḳa-fukto oia al-Mosir eḳzon ufozukto ḳadim oibae. Tumi aze-baze kichcha-ḳahini taki horia roio, ita to dadi-nanir ḳoa banail kichchar laḳan. Erlagi ita bad dia dilor imani beyam ḳorat ro. Shorilor beyam ḳorle kisu fayda oy, oile dilor imani beyame hokkol bae taki fayda oy. Ermaze to ḳali i dunia nae, aḳerator asha-o ase. Ita to furafur hok ar ḳaṭi, shullo-ana ḳobul ḳorar laḳ. Erlagi-u amra zane-forane imanor menot ḳoriar ar kiali oia ḳam ḳoriar. Ḳaron amra to zinda Allar ufre borosha ḳori. Tain-u hoḳol manshor toraneala, ḳas ḳori zera tan ufre iman ane. Te tumi-o ou befare hukum ar talim deo. Tumi zuan beṭa mono ḳoria ḳeu zanu tumare ela na ḳore, erlagi mat-ḳotae, sal-cholone, mohobbote, imane ar fak-fobitrotae tumi mumin oḳlor gese eḳṭa nishana bonizao. Ar ami aibar ag forzonto tumi mumin oḳolre Pak Kalam tilaot ḳora, shu-foramish deoa, ar talim deoat lagail roio. Mono rakio, zomator murobbi oḳole tumar ufre at rakia, nobir laḳan gaibi buli matia tumare ḳelafoti disoin, te tumi i niamotre elami korio na. Ita befare kiali o, nizore otar maze furafur ḍubaia raḳo, teu hoḳlor sokut foṛbo tumi agedi aguairae. Tumar nizor befare ar tumar talimor befare hushiar roio. Teu tumi nizore basaibae, ar zera tumar boyan hunbo, tarare-o basaitae farbae. O Timoti, huno, kunu murobbi manshor dush deḳanit gia ḳoṛa bashae matio na. Tarar loge nizor bafor laḳan bebohar ḳorio. Ar zuan oḳolre nizor bai mono ḳoria hedayot ḳorio. Murobbi beṭinre nizor ma ar fuṛintore boin mono ḳoria, monor bab fak-fobitro rakia tarare hedayot ḳorio. Zeta ṛaṛi beṭintor ḳeu nai, tarare kub zoton ḳori deḳa-huna ḳorio. Oile kunu ṛaṛi beṭintor zudi fua-fuṛin ba nati-natni taḳoin, te Allar ḍore era-u zanu foyla zarzir foribaror deḳa-huna ḳore. Ou nomunae tarar moy-murobbir maya-momotar rin shud ḳorta farba, ar ita ḳame to Alla kushi oin. Ze ṛaṛi beṭintor ḳeu nai, tara ḳali Allar ufre borosha rakia, dine-raite tan dorbaro munazat ar ḳanda-ḳaṭi korat roin. Oile zeta ṛaṛi beṭinte zemne mone sae emne soloin, ita to zinda halote-u mora. Ou befare hukum deo, zate ḳeu tarare dushi koar shuzug na fae. Ze zone afon zonre, ḳas ḳori nizor foribaror manshor deḳa-huna ḳore na, he ashole Isayi imanre-u oshikar ḳorlo. Igu to bidormi taki-o bad. Erlagi ṛaṛi beṭintor namor lisṭ ḳorar bala age deḳte oibo, i beṭir boyosh shaiṭ bosor oise ni, ar zamair bae tain furafur hok-halali asla ni. Esaṛa nek kamor lagi tan shunam taḳte oibo, ou nek kam oilo, fua-fuṛin manush banani, memandari kora, Allar bonda oḳlor fao doani, duk-mosiboti manshore shaijjo ḳora, ar hoḳol nomunar nek kamo shorik oa. Kunu zuan ṛaṛi beṭir nam i lisṭo tulio na. Ḳaron tarar zoubonor lagi shorilor gorome zebla utal-fatal ḳoroin, ou shomoy al-Mosir bae tarar ḍor-boy ḳomi zae, teu tara hirbar bia boita sain. Erlagi tara Allar logor agor oada bongo ḳoroin, nizor ufre gozob ḍakia anoin. Ar tara baṛie baṛie aḍḍa maria kuṛia bonizain. Ḳali kuṛia nae, zeta mat-ḳota tarar lagi zaiz nae, ota baze mat-ḳota-o matoin ar foror gibot gaoat roin. Erlagi ami ou nosiot ḳoriar, zuan ṛaṛi beṭinte bia-shadi kora-u bala, tara huruttar ma ouk, nizor shongsharor deḳa-huna ḳorouk, ar dushmonre kunu laḳan bodnam gaoar shuzug na deuk. Ḳoyzon ṛaṛi beṭin er maze-u to be-foti bonia Shoytanor fote sola-fira ḳorra. Kunu Isayi imandar beṭi manshor goro zudi ṛaṛi beṭin taḳoin, te ou beṭie zanu erar deḳa-huna ḳoroin. Erare deḳa-hunar bar zomator ufre na deoa bala. Teu zeta ṛaṛi beṭin eḳdom lasar, zomate tarar deḳa-huna ḳorte shubida oibo. Zomator ze fordan murobbi oḳole zomatre balamonte salain, ḳas ḳori zera Allar kalam toblig ar talim deoar lagi menot ḳoroin, tara ḍabul ijjot faoa zorur. Allar kalamo to ase, “Dan maṛa deoar shomoy gorur muko hufi lagaio na.” Aroḳ ayato ase, “Ḳamlae tar beton faoar zoiggo.” Mono rakio, dui ba tin zon shakkir ḳota saṛa, zomator murobbir birudde kunu nalish shomzio na. Oile ze murobbi oḳole guna ḳorat-u taḳoin, zomator manshor gese tarar dush zair ḳorio, zate oinno hoḳole ḍorain. Huno, Alla Pak, Malik Isa al-Mosi, ar Allar mayar firista oḳolre shakki rakia tumare ou hukum diram, tumi nirofokko roia ita ḳam ḳorio, ḳeurore for ba afon mono ḳorio na. Soṭ ḳori ḳeurore ḳelafoti dia, kunu fodo boail ḳorio na. Oinno manshe zebla gunar ḳam ḳore, tumi tarar loge shorik oio na, nizore nikut rakio. Ar ḳoydin bade bade-u tumar bemar oy, erlagi tumi kali fani kaio na, tuṛa tuṛa anguror shorbot-o ḳaio, teu ozom oibo. Kial rakio, kunu kunu manshor guna ola forishkar deḳa zae, erlagi tar bisar age-u oizae. Ar kunu kunu manshor guna bade dora foṛe. Olaḳan nek kam forishkar deḳa zae, ar kunu nek kam forishkar deḳa na gele-o, ita lukail roy na. Huno, ze gulam-bandie munibor gulami koroin, tara hoḳole-u zarzir munibre ijjoti zon mono ḳorouk, zate ḳeu Allar namre ba amrar talimre ḳaraf ḳoar shuzug na fae. Ze zone Isayi imandar kunu munibor gulami koroin, ein zanu imandar bai hishabe tan munibre elami na ḳoroin borong aro bala ḳori tan kezmot ḳoroin. Ḳaron gulamor kezmote ze munibe ufoḳar faira, tain to mayar imandar bai. Te ota befare tumi talim ar hukum deo. Ḳeu zudi ita bad dia dusra kunu talim dey, ar amrar Malik Isa al-Mosir ḳaṭi talim ar Allar ḍor-ḳofor talimre na mane, he to misa ohonkari, he kunta-u buze na, motobed ḳora, behuda uftami kora tar eḳṭa bemar. Otar ḳarone ingsha-ninda, ḳaijja-fosad, ku-shondoy foyda oy. Ar oshaṛ bibeḳ-ala manshor maze hamesha gulmal lagail-u taḳe. Ita manshor maze Allai hok nai. Tara Isayi imanre duniabi labor ufae mono ḳore. Ashole monor tusṭie Isayi iman mafik zindegi kaṭaile kub beshi lab oy. Amra duniat aibar ḳalo to kunta-u loge loia aisi na, ar zaoar ḳalo-o kunta nitam fartam nae. Erlagi kali kani-ḳafoṛ faile-u amra kushi roimu. Oile duniat zera doni oito sae, tara nanan nomunar forikkat ar fando foṛe, tarar mono kub bod ḳaish foyda oy, zetae tarar zindegire shorbonashor gato falae. Ḳaron hoḳol nomunar bod ḳamor zonom oilo ṭeḳa-foyshar maya. Kunu kunu zon ṭeḳa-foyshar lalose Isayi iman taki horia gia, nizor ufre boṛo duḳ-mosibot ḍakia anche. Oile tumi to Allar bonda, tumi ita bod ḳam taki horia ro. Tumi fak-forezgar zindegi, Allar ḍor-ḳof, iman, mohobbot, sobor, ar norom shobabor bae kiali o. Imani laṛai korat ro. Aḳerator ze zindegir lagi Alla Pake tumare daot disoin, hou zindegire tumi mozbut ḳori doro. Tumi to imani shakki dislae bout manshor samne. Oḳon Alla Pakor name, zein hokkoltar zan dein, ar zein hakim Fontio Filator samne nizor befare hok shakki disla, hou Isa al-Mosir name-o tumare ou minoti korram, amrar Malik Isa al-Mosi zair oar ag forzonto tumi furafur nikut ar bodnam saṛa roia hukum adae ḳoro. Ar gunogane doni hou Alla, zein eḳmatro shomraṭ, bashsha oḳlor bashsha ar malik oḳlor malik, tain-u tan ufozukto shomoye al-Mosire zair ḳorba. Ḳali Alla Pakre-u moute ḳobza ḳorto fare na. Tain ola eḳ nuror foro boshot ḳoroin, hino kunu adom zat zaito fare na. Kunu Adome kunudin tanre deḳse-o na, deḳar takkot-o nai. Ijjot ar ḳemota siroḳal ḳali tan-u. Amin. Huno, ou duniar doni oḳolre hukum deo, tara zanu boṛai na ḳoroin, ar duniabi ostayi donor ufre borosha na ḳoria, Allar ufre borosha ḳoroin. Amrar balair lagi tain-u hoḳolta kula ate dan ḳoroin. Ar tarare ḳo, tara zanu oinnor balai kore, nek kam ḳorat roy, mon kulia dan-ḳoyrat ḳore, ar tarar don-doulotor baṭ oinno manshore dey. Teu tara nizor lagi emon don zoma ḳorbo, zeta bobishote tarar lagi ekḳan mozbut bitor laḳan oibo. Ete hasaror zindegire tara shokto ḳori doria raḳto farbo. O Timoti, tumar zimmae ze shompod deoa oise, i shompod tumi balamonte hefazot ḳoro. Aze-baze aḳolor beḳama biddar bulir du-nosla talim taki horia ro. Kunu kunu zon ota beḳama aḳol deḳanit gia, asol iman taki be-fote gesegi. Alla Pake tumrare rohomot dan ḳoroukka. Amin. Ami Paulus to Alla Pakor morzie Hozrot Isa al-Mosir sahabi. Al-Mosir usillae Allar oada ḳora aḳeri zindegir ḳota tobligor lagi sahabi fod faisi. Ami amar mayar aolad Timotir gese leḳram. Gaibi baf Allae ar amrar Malik Isa al-Mosie tumare rohomot, meherbani ar shanti dan ḳoroukka. O Timoti, huno, amar moy-murobbie zela eḳ Allar ebadot ḳorta, ami-o oula forishkar bibeḳe Allar ebadot ḳori. Ami dua ḳorar bala dine-raite hamesha tumar lagi Allar shukria adae ḳori. Tumar hou ḳandonor ḳota mono ḳoria tumare deḳar lagi mone kub ṭaner, tumare deḳle amar bitor kushie borizibo. Amar mono ase, tumar dilḳan hok imane bora, tumar nani Lois ar tumar amma Unikir bitre-o ola hok iman asil. Ami nichchit zani, tumar bitre-o ola iman ase. Erlagi oḳon tumare mono ḳorai diram, ami tumar shorilo at rakia ḳelafoti deoae, Allae tumare ze ḳas niamot dan ḳorsoin, i aguin zalaia tulo. Allae to amrare bitu-ḍoralukor monobab disoin na. Borong bol-shokti, maya-mohobbot ar nizore shamlanir ḳemota dan ḳorsoin. Erlagi amrar Malik Isar befare shakki dite shormaio na, ar tan namor lagi ami zen zelo bondi asi, amare loia-o shormaio na. Borong Allar deoa bole kush-ḳobri tobligor ḳamo amar loge roia duk-koshṭo shoijjo ḳoro. Allae amrar zan basaisoin, ar fak-fobitro oia zindegi kaṭanir lagi daot disoin. Ita to amrar kunu nek kamor gune nae, borong tan morzi ar rohomotor gune-u ḳorsoin. Amrare i rohomot dan ḳorsoin to, dunia foyda ḳorar age Hozrot Isa al-Mosir usillae. Ar Allae oḳon ou rohomot zair ḳorsoin, amrar toraneala Isa al-Mosie duniat toshrif anar mazdi. Al-Mosie to moutor ḳemotare surmar ḳorsoin, tan kush-ḳobrir mazdi siroḳalin nurani zindegir fot kula-mela ḳorsoin. Ou kush-ḳobri tobligor lagi-u to amare tobligkari, sahabi ar ustad hishabe boail ḳora oise. Erlagi-u ami ola duk-koshṭo faiar, ta-o ami shorminda nae. Ḳaron ami zani, ami kar ufre borosha ḳorsi. Amar furafur ekin ase, ami tan dorbaro zeta zoma ḳorsi, itare hefazote raḳar ḳemota tan ase, al-Mosie dusrabar toshrif anar din forzonto ita roibo. Te tumi amar muk taki zoto talim huncho, ou hok talimre zanor ḳoboz mono ḳoria, al-Mosir ufror iman ar mohobbote doria raḳo. Allae ze samana hefazote raḳar lagi tumar zimmae disoin, amrar dilor mazor Allai Pak Ruhur bole tumi itar hefazot ḳoro. Tumi to zano, Turoshkor Asiya elaḳar hoḳol manush amar ges taki algi gesoin, Fugilas ar Hamaginas-o tarar loge gesoingi. Bai Anisor foribaror ufre Malik Isae rohom-borkot deukka. Ein bout bar amar zano aram disoin, ami zelo hamaile-o tain kunu shorom mono ḳorsoin na. Tain ou Rum ṭauno aia bout tallash ḳori amare bar ḳorsoin. Ami Ifis ṭauno taḳte tain kila amar kezmot ḳorsla, ita to tumi balamonte-u zano. Malik Isae ola ḳoroukka, zate tan toshrif anar din ein meherbani fain. O amar aolad Timoti, Isa al-Mosir usillae faoa rohomote tumi boloban o. Ar bout shakkir samne amar mukor zeta talim huncho, ou talimre olaḳan hok-halal manshor ato deo, zera oinno manshore-o talim deoar ufozukto. Tumi Isa al-Mosir ḳaṭi sifai oia duk-koshṭot shorik o. Kamanḍarre kushi raḳar lagi zuddor ḳalo kunu sifai shongsharor maya-zalo hamae na. Ou laḳan ḳelat lagia ḳeu zudi niom moto na ḳelae, te joyor mala he fae na. Ar ze giroste menot ḳore, fosholor foyla baṭ to he-u fae, iṭa-u niom. Te ami zeta buzaitam sairam, ita sinta ḳori deḳo, Malik Isae tumare ita hoḳolta buzar aḳol diba. Isa al-Mosir befare tumi oḳan mono rakio, tanre murda taki zinda ḳora oisil, tain oila Bashsha Daud nobir bongshodor, amar ḳoa kush-ḳobrir maze-o ikan ase. Ar ou kush-ḳobri toblig korae-u ami duk-koshṭo faiar. Dagi ashamir laḳan amare bondi raḳa oise, oile Allar kalam to bondi oise na. Allae zerare fosond ḳoria alog korsoin, tarar lagi ami hokkolta shoijjo ḳoriar, zate al-Mosir usillae tara nazat fain, loge siroḳalin gourob-mohima-o fain. Ou ḳota to ekin ḳorar zoiggo, Al-Mosir loge zebla amrar moron oise, te amra zinda-o oimu tan loge. Amra sobor ḳoria shoijjo ḳorle, tan loge bashshai kormu. Ar tanre oshikar ḳorle to, tain-o amrare oshikar ḳorba. Amra beiman oigele-o, tain hamesha hok-halali roin. Tain kunumonte-u nizore oshikar ḳorta faroin na. O Timoti, tumi mumin oḳolre amar ou talimḳan mono ḳorai deo. Allar samne tarare hushiar ḳoro, zate aze-baze mat loia torka-torki na ḳoroin, ita mator to kunu dam nai, ita zera hune, tarar shorbonash oy. Tumi Allar kushi mafik nizore forezgar halote tan samne azir ḳoro, ou laḳan ḳamla bono, ze ḳamlae Allar dorbaro shorom faoar kunu ḳaron nai. Ze ḳamlae shoṭik babe hok kalam talim dein, ou laḳan o. Allar birudi aze-baze mat taki duroi ro. Ila mate Allar bae manshor ḍor-ḳof ḳoma dorbo. Ila aze-baze talim to fosa-gar laḳan sairobae sitre. I dolo ase, Huminas ar Filitas. Iguin to Allai hok taki ku-fote gesoingi. Itae ḳoin, mumin oḳol bule murda taki zinda oia harsoin. Ola aze-baze matia tara kunu kunu zonor iman nosṭo ḳorilise. Tebou Allar banail mozbut bit uba roise, er ufre sil-sappoṛor laḳan ou ḳota leḳa ase, “Malike zanoin, ḳe ḳe tan,” ar “Ze zone al-Mosire malik koia shikar ḳore, he hoḳol zator guna taki horail rouk.” O Timoti, zomidar baṛit to ḳali shuna-rufar zinish taḳe na, laḳṛir zinish ar maṭir tal-bashon-o taḳe. Ermaze kunuṭa shommani ḳamo ar kunuṭa nisa ḳamo bebohar oy. Te zeta manush ou nisa ḳamor ashbabor laḳan, itar ges taki horia aia ḳeu zudi nizore fak-saf ḳorilae, te he shommani zinish bonizae. Tare fobitro hishabe alada ḳori raḳa oibo. He tar malikor ḳamo lagbo ar hoḳol nomunar nek kamor lagi zuit oibo. Timoti hushiar o, zoubonor bod ḳaish taki tumar zan basao, ar zera ḳas dile malikor nam loy, tarar loge shorik oia forezgari, iman, mohobbot ar shantir lagi kiali o. Aze-baze be-aḳoli torka-torkit shamil oio na, tumar zana ase, itae ḳali kaijja-fosad baṛae. Malik Isar gulame ḳaijja-fosad ḳora ṭik nae, ein borong hoḳlor bae doyal oite oibo, ein manshore talim deoar ḳemota ar sobor-shokti taḳte oibo. Tain nizor birudi manshore-o norom mone buz diba. Ou ashae talim diba, hoytoba Allae tarare touba ḳorar shuzug diba, zate tara Allai hokre balamonte sinoin. Teu tara seton faia Iblisor fando taki zan basaiba, ou Iblise tar gulam bananir lagi erare dorsil. O Timoti, ou hushiari kanain mono rakio, aḳeri zomanat kub mosibotor din aibo. Manush shartofor oizibo, ṭeḳa-foyshar lalchi, boṛai-beṭagiri deḳani, manshore elami kora, durnam gaoa, ma-bafor obaiddo, nimoḳ-harami korbo ar Allar naformani korbo. Maya-momota ḳomizibo, ḳaijja-fosad ḳorle afush ḳorto nae. Foror bodnam gaibo, nizore shamlaito farto nae, manush omanush oizibo ar hoḳol nomunar nek kamor dushmoni korbo. Manshe beimani, fuṭani ar beforua bab deḳaibo, Allar ashik na oia duniabi aram-ayeshor ashik oibo. Bairor bab-surote buza zaibo kub allaoala pak-musolli, oile muloto lebasdari bonḍo. Te tumi itar ges taki horia roio. Otar mazor ḳeu ḳeu duka dia manshor goro hamaia ḳom imani beṭintore ku-fote ṭane. Ita beṭintor mogoz oilo gunar banḍar. Tara nanan nomunar furti-amudor boshe sole. Tara hamesha Allai fotor talim hune, oile kunudin-o Allai hokikot tarar bitre hamae na. Mishoror Feraunor zadugir-gunin Zanni ar Zamborie zela Musa nobir birudita ḳorsila, ṭik ou laḳan oguinte-o Allai hokor birudita ḳore. Itar bibeḳ fosi gese, tarar bitre imanor balai nai. Oile tara ar aguaito farto nae, hou zadugir Zanni ar Zamborir be-aḳoli zela hoḳlor gese dora foṛsil, itar be-aḳoli-o ola dora foṛbo. O Timoti, tumi amar talim, amar sal-cholon, amar uddesho, iman, soborgari, mohobbot, ar amar doijjor ḳota furafur kial ḳorso. Antiokia, Ikonia ar Lushra ṭauno ami koto zulum-mosibot shoijjo ḳorsi, ita to tumi zano. Oile malike amare rokka ḳorsoin. Ashole Allar ḍor-ḳof bitre rakia, Isayi imandar bonia zera zindegi kaṭaito sae, tara to zulum-mosiboto foṛbo-u. Oile bonḍo ar ḳobis oḳol din din aro ḳaraf oibo. Tara nize-o be-fote solbo, ar aroḳzonre-o be-foti banaibo. Te tumi zeta talim faiso, faia dile-zane ekin ḳorso, er ufre tir taḳo, ḳaron tumi nize zano, i talim ḳar ges taki faiso. Tumi to huruman tone-u Allar kalamor talim faiso, ar ou kalame-u tumare Isa al-Mosir ufre iman anar usillae, nazat hasilor fot batai dibo. Huno, Allar kalamor forteḳṭa horof Allar ges taki-u aise. Ita to talim, hushiari, hedayot, ar hok zindegi goṛibar kuraḳ, zate Allar bonda oḳol ufozukto bonia hoḳol nek kamor lagi zuit oin. Ami Alla Pakre shakki rakia, ar zein tamam zinda-murdar bisar ḳorba, hou Isa al-Mosire shakki rakia, duniat tan dusrabaror toshrif ana ar tan bashshair duai dia tumare ou ḳoṛa hukum diar. Tumi Allar kalam toblig koro, shomoy-oshomoy kunta nai, hamesha toblig koro, kub beshi doijjo doria talim deo ar manshor oforad deḳai deo, tarare hushiar ḳoro ar buzao. Agedi ola shomoy aibo, zebla hasa talim manshor shoijjo oito nae, borong nizor monor ḳaish furaita ḳori tara olaḳan ustad dorba, zetae tarar mon zugaia mongoṛa talim diba. Tara hok talim taki muk firaia, mongoṛa kichcha-ḳahinir ḳore douṛaiba. Oile tumi hoḳol befare nizore shamlaia raḳo, duk-koshṭo shoijjo ḳoro, al-Mosir befare kush-ḳobri toblig korat ro, Allar deoa dayitto adae ḳoro. Amar moutor din aia azigese, amar nizor loure kurbani hishabe ḍali deoa or. Ami to al-Mosir lagi zane-forane laṛai korsi, amare batai deoa fotor hesh mata forzonto douṛaisi, amar iman ṭikaia raḳsi. Te amar forezgarir furuskar to zoma ase, hou hok-insafḳari malike Ruz Hashoror din amare joyor mala furuskar diba. Ita ḳali amare nae, zoto manush ashik oia tan lagi bar saira, tara hoḳolre-u diba. O Timoti, tumi sesṭa salaia zoto zoldi faro amar gese ao. Ḳaron Kirisken bai Galatia desho, Titas bai Dalmatia desho gesoin. Ar Dimas bai duniabi mayar dandat foṛia, amare saṛia Tisholoniki ṭauno gesoingi. Ḳali Luk bai amar gese asoin. Erlagi Markus baire loia tumi zoldi ao, amar ḳam-ḳazo tain bout shaijjo ḳoroin. Tukik baire ami Ifiso faṭaisi. Ami aibar shomoy Toruas ṭaunor Karfus bair gese, amar ekḳan saddor toia aisi, tumi aibar fote oḳanta anio, ar amar kitab ḳanain, ḳas ḳori samṛar ufre leḳa kitab ḳanain-o anio. Huno, tama-fitolor ḳam ḳore ze Sikondor, ogie amar bout ḳeti korse, oile Malik Isae tare ufozukto bodla diba. Te tar befare tumi hushiar roio, he ḳomor bandia amrar toblig kamor birudita ḳorsil. Zano ni, amare foyla bar zebla adaloto neoa oilo, ou shomoy ḳeu amare shaijjo ḳorse na, hoḳole-u amare saṛia bagise. Ta-o Allae zanu tarar i bishoyḳan hishabo na doroin. Ḳali Malik Isa amar fokke ubaila, tain amare bol zugaila. Erlagi ami bin zatir samne shullo-ana kush-ḳobri toblig korar shuzug faisi, tara hoḳole ita hunche. Ou bisaro tarar shinghor mukor kuraḳ oa taki Allae amare basaisoin. Ou Malik Isae hoḳol nomunar bod ḳam taki-o amare hefazote raḳba ar sohi-salamote behesti bashshait far ḳorba. Zuge zuge siroḳal tan tarif ouk. Amin. Amrar mumin bai Akilre, tan bibi Fiskila ar Anis bair foribarre amar salam zanaio. Irastas bai Korint ṭauno roisoin, ar Tofimre bemar halote ami Milita bondoro toia aisi. Te tumi kub sesṭa salao, shitor age aibar lagi. Bai Abul, Bodis, Olinis, boin Kuludia shoho aro hoḳol bai-boine tumare salam disoin. Malik Isa tumar loge loge roukka. Allar rohomot tumrar loge taḳouk. Amin. Ami Paulus to Alla Pakor gulam ar Hozrot Isa al-Mosir eḳzon sahabi. Amar dayitto oilo, Allar fosond ḳora bonda oḳolre imanor fote ana, ar Allare mania solar maze ze hokikot ase, ou hokikotre sinai deoa. Ami al-Mosir kezmot ḳoriar, aḳeri zindegi faoar ashae. Ze Allae kunu misa matoin na, hou Allae i zindegi deoar oada ḳorsoin, dunia foyda oar age-u. Tain tan kalam shoṭik shomoye zair ḳorsoin, ar amrar toraneala Allar hukum mafik ita toblig korar bar amar ato deoa oise. Amar hou ḳas aolad Titasor gese leḳram, amra duiozon-u eḳoi imane al-Mosir ummot oisi. Amrar gaibi baf Allae ar toraneala Isa al-Mosie rohomot ar shanti dan ḳoroukka. Titas huno, ami tumare ou Kriti difo toia aisi, zate zeta ḳam oḳono baki roise, tumi ota furafur adae ḳoro. Ar ami zela hukum dislam, ṭik oula tumi forteḳ ṭaunor zomator murobbi oḳolre ḳamo boail ḳoro. Mono rakio, ze murobbi oḳol bodnam saṛa nikut, zerar ḳali eḳzon bou asoin, zerar fua-fuṛin Isayi imandar, zera beforua babe zindegi kaṭae na, borong ma-bafor baiddo ase, ou murobbire tumi boail ḳoro. Allai ḳamor zimmadari faoae zekunu saloḳdar zanu bodnam saṛa nikut oin. Tain zanu shoirasar, bodragi, nishakur, mara-mari korra ba haram ruzi-ruzgaror lalchi na oin. Er bodla tain zanu memandari korra, nek babor ashik, hok-halali, ar Allar baiddo zon oin. Tan bala bisar-buddi taḳe, ar nizore furafur shamlaia raḳta faroin. Alla Pakor ze hok kalam talim faisoin, tain itare mozbut ḳori doria raḳoin, ar ṭik ou laḳan ḳaṭi talim toblig korta faroin. Erloge zera tan bifokke ase, tarar bul-beaḳoli-o dorai dein. Ḳaron bout beshamal manush asoin, zetae ḳeurore manoin na, beḳama mat matoin, sol-soturi koroin. Zetae mosolmani ḳam ḳoranir lagi zura-zuri koroin, ami kas ḳori otar ḳota-u ḳoiram. Itar muk bond ḳora zorur. Itae ku-fote ṭeḳa ḳamanir ashae ola talim dein, ze talim deoa tarar lagi ṭik nae. I talim dia kunu kunu foribarre bigṛailira. Erlagi tarar nizor deshor eḳzon fonḍite ḳoisoin, “Kriti difor manshe hamesha misa matoin, iguin to zongli zanuaror laḳan, kuṛia ar feṭua.” Ita to eḳdom hasa, erlagi tumi kub gorom oia tarar aib deḳaia deo, zate tarar Isayi iman shullo-ana nikut oy. Ihudi oḳlor banail kichcha-ḳahini, ar zeta manush Allai hokikot taki be-fote gesegi, tara zanu itar hukum-ufodesh ḳano na loin. Zerar dil fak-fobitro, tarar gese hoḳolta-u fobitro. Oile zerar dil nafakie bora, ar zeta beiman, itar gese kunta-u fobitro nae. Itar mon ar bibeḳ hoḳolta-u borbad. Tara mukdi dabi koroin Allare manoin, oile tarar ḳamor mazdi tanre oshikar ḳoroin. Iguin to noforoti ar obaiddo. Itare kunu bala ḳamo lagail zae na. Titas huno, tumi manshore olaḳan talim deo, zate tumar mator maze nikut hok talim taḳe. Zomator murobbi beṭainre ḳo, tara zanu hamesha nizore shamlaia raḳoin, ijjoti bonoin, bala bisar-bibek kaṭain. Tarar zanu ḳaṭi iman, maya-mohobbot ar sobor taḳe. Olaḳan murobbi beṭintore-o ḳo, tara zanu forezgarir adob-ḳayda mania soloin ar nekir bab hikain. Oinnor bodnam gaoa, ba nishakur bona tarar lagi ṭik nae. Teu tara zuan fuṛintore hikaita farba, zate tarar zamai ar fua-fuṛinre mohobbot ḳoroin, nizore shamlaia raḳoin, shoti roin, bala shongshari oin, doyalu oin, ar zamair baiddo taḳoin. Teu Allar kalamor bodnam ḳorar shuzug keu faito nae. Olaḳan zuan fuaintore-o ufodesh deo, zate tara nizore shamlaia raḳoin. Tumi tarar gese hoḳol nomunar nek kamor nishana o. Hok niote ar day-dayitto loia talim deo. Ḳeu zanu tumar zobanor kunu dush na fae. Tumar oula sal-cholon dekia dushmon oḳol shorminda oiba ar amrar bodnam ḳorar kunu kut faita nae. Tumi saḳor oḳolre ḳo, tara zanu hokkol befare munibor baiddo roin, munibor mon zugaia soloin, tarar mukor ufre be-adobi mat na matoin. Munibor mal-samana suri na ḳoroin, borong nizor hok-halalir forman deḳaia hari, amrar toraneala Allar befare ze talim ase, ou talimre hokkol nomunae shundor ḳori hazain. Zano to, Allar ze rohomotor usillae hoḳlor nazat mile, ita oḳon duniat zair oigese. Ou rohomote-u amrare talim dira, zate amra be-dini ḳam-ḳaz taki ar duniar hoḳol bod ḳaish taki duroi roia, i zogoto nizore shamlaia raki, ar nek fote roia forezgar zindegi kaṭai. Erloge amrar dilor forom asha furonor lagi bar sai, Allatala ar toraneala Isa al-Mosir shan-mohima zair oar kushi-bashi furonor lagi bar sai. Isa al-Mosie to amrare basanir lagi tan nizor zan kurbani dilaisoin, zate hoḳol guna taki amrare ḳalas ḳori anta faroin, ar ou laḳan eḳdol manshore fak-fobitro ḳoroin, zera ḳali tan nizor oiba, zera nek kamor ashik oiba. Tumi furafur bol ḳaṭaia ota befare talim deo, manshore nosiot ḳoro ar tarar dush-ḳosuri deḳaia deo. Tumare hey ḳorar shuzug keurore dio na. Allar bonda oḳolre mono ḳorai deo, tara zanu deshor raza ar shorḳari niomor odine roin, tara obaiddo na oin, manshor hoḳol nomunar ufoḳar ḳorar lagi zuit taḳoin. Tara zanu ḳeuror bodnam na gain, ḳaijja-fosad na ḳoroin, borong shanto-shisṭo roia hoḳlor loge norom bebohar ḳoroin. Amra-o age be-aḳol ar naforman aslam, be-fote soltam, duniabi aram-ayesh ar nanan nomunar bod ḳaishor gulam aslam. Oinno manshore ingsha ḳortam, tarar ḳeti korar dandae din ḳaṭaitam. Ar nize ginnar zoiggo oile-o eḳe-oinnore ginnaitam. Oile amrar toraneala Allar rohomot ar mohobbot zebla zair oilo, ou shomoy tain amrare rehai dila. Amrar nizor kunu nek kamor lagi rehai disoin na, ḳali tan doya-mayae disoin. Pak Ruhe noya zonom dia, noya babe foyda ḳoria amrar dilre forishkar ḳorsoin. Ar olaḳan-u tain amrare rehai disoin. Amrar toraneala Isa al-Mosir mazdi tain kula ate amrar maze ou Pak Ruhu ḍalia disoin. Zate aḳeri zindegir asha-borosha faia, Allai hokkoltar odikari oi. Allar rohomote amrare be-ḳosur ḳalas hishabe ḳobul ḳorae-u to amra ita faisi. Ikan to furafur hasa. Ami saiar, tumi ou befare furafur zur deo, zate Allar ufre zera iman anche, tara nek kam ḳorar kiali oy. Ila nek kam ḳora to hoḳlor lagi bala ar ufoḳari. Ta-o beokufor laḳan torka-torki, zat-bongsho loia mata, ḳaijja-fosad, ar shoriot loia ḳota ḳaṭa-ḳaṭi korio na. Itae to kunu fayda oy na, ita ekkere beḳama. Ze manshe doladoli lagae, tare foyla eḳbar, bade dusrabaro hushiar ḳorio, itae zudi he na bodle, te tar loge sola-fira ekkere bad dilaio. Tumi to zano-u, ita manshor dilor sinta kub ḳaraf, he gunagar. He emne-u nizor naformanir forman dey. Titas huno, ami Artimas ba Tukik baire tumar gese faṭaimu, era ḳeu gele tumi kas ḳori sesṭa ḳorio Nikafoli ṭauno aia amar loge deḳa ḳorar lagi. Ami niot ḳorsi, shitor ḳoymash ou Nikafolit roimu. Ukil Zoin sab ar Apollos bair soforor lagi zotoḳan faro shaijjo ḳorio, zate tarar kunu obab na oy. Amrar manshore to hikani zorur, shomazor balair lagi kila nizore ḳaṭail zae. Teu tara manshor zoruri obab miṭaito farbo, ola tarar nizor zindegi-o folala oibo. Amar logor hoḳole tumare salam zanaira. Al-Mosir ufre iman anae zera amrare maya ḳoroin, tarare amar salam dio. Allar rohomot tumra hoḳlor ufre ḳaim rouk. Amin. Ami Paulus, Isa al-Mosir lagi bondi asi. Ami ar amrar bai Timotie, amrar logor toblig korra mayar dust Filimonor gese leḳram. Boin Afia, amrar loge imanor zudda Arkipas ar tumar baṛir zomator hoḳolre salam zanairam. Amrar gaibi baf Alla Pake ar Hozrot Isa al-Mosie tumrar ufre rohomot ar shanti nazil ḳoroukka. Ami hamesha munazator shomoy tumar ḳota iad ḳoria Allar shukria adae ḳori. Ḳaron Hozrot Isa al-Mosir ufre tumar iman ar pak bonda oḳlor bae tumar mohobbotor ḳota ami hunchi. Ami dua ḳori, mumin oḳlor loge tumar ḳatir-shomporko aro baṛouk. Tumi to zano, al-Mosir ḳatire Allae amrare ḳoto bala bala niamot bilai disoin. Bai, tumar mohobbot dekia ami kub kushi oisi ar utshaho faisi, tumi to Allar pak bonda oḳlor dilo aram diso. Tumar i bab dekia ami tumare ekḳan ḳota ḳoitam sairam. Ami to al-Mosir name tumare hukum ditam farlam one, tumar ḳam fura ḳorar lagi. Oile mohobbotor ḳatire hukum na dia tumare minot ḳoriar. Ami Paulus ou murobbi boyosho al-Mosir lagi bondi halote tumar gese i minoti korram. Amar aolad Onisimor lagi arzi zanairam, ami zelo bondi taḳa halote he iman ania amar aolad bonigese. Eḳ shomoy tumar gese he beḳama asil, oile oḳon amar ar tumar gese he bout ḳamaora bonigese. Zai ouk, amar zanor taki beshi mayar ou manshore ami tumar gese firot faṭairam. Ami tare amar gese raḳtam saislam, zate kush-ḳobrir dae bondi halote tumar oia he amar kezmot ḳorto fare. Oile tumar izazot saṛa ami kunta ḳorlam na, zate zur ḳoria tumar bala ḳam adae ḳora na lage. Ami sairam, tumi niz taki-u ou ḳam ḳoro. Tumi zate siroḳalor lagi tare firia fao, oito fare ou ḳarone-u he tumar ges taki tuṛa dinor lagi horia asil. Oile tumi oḳon tare ar gulam hishabe faitae nae borong gulam taki boṛo, mani mayar bai hishabe faibae. Ḳas ḳori he amar kub mayar manush, oḳon tumar gese-o he aro mayar, ḳali roḳto-mangshe nae, imandar bai hishabe mayar. Erdae tumi zudi amare eḳoi imanor bagi zano, te amare zela ḳobul ḳorar ḳota, tare-o ola ḳobul ḳorio. He zudi tumar kunu ḳeti koria taḳe ar tar gese tumar kunu faona taḳe, te mono ḳorio, i faona tumi amar gese fao. Ami Pauluse nizor ate lekia zanairam, tumar faona ami dilaimu. Ashole ami koitam sairam na ze, tumar nizor zanor lagi-u tumi amar gese rini aso. Bai Filimon, Allar oaste ekḳan ḳam ḳoro, eḳzon imandar bai hishabe amar zano aram deo. Tumi amar ḳota raḳbae zania-u, tumar gese ou siṭikan leḳlam. Ami mono ḳori, ami zeta ḳorar lagi koiram, er taki beshi tumi korbae. Huno, aro ekḳan ḳota ḳoiram, tumi amar lagi memanor kuṭa ṭik koria rakio. Ḳaron ami asha ḳorram, tumrar duar usillae amare tumrar gese firot deoa oibo. Abu-Farase tumare salam disoin, tain Isa al-Mosir lagi amar loge oia bondi asoin. Ar amar logor tobligkari Markus, Aristakus, Dimas ar Luke-o tumare salam zanaira. Amrar Hozrot Isa al-Mosir rohomot tumrar dilo ḳaim rouk. Amin. Alla Pake agor zomanat nanan nomunae nobi oḳlor mazdia amrar moy-murobbi oḳlor gese ṭukra ṭukra ḳori ohi bezisoin, oile oḳon aḳeri zomanat aia tain ohire manush surote shorashori bezisoin. Ou manush oila Allar ḳas mayar futor laḳan, en nam-u Kolimatulla, mani Allar ohi. Ou mayar fut Kolimatullar ato-u tain hokkoltar malikana dilaisoin, en usillae asman-zomin ar hokkolta foyda oise. Ein-u oila Allar shan-tozollir nur, tan mazdia-u Alla Pake nizore zair ḳorsoin. Ou mayar fut Kolimatullar hukumor bole, tamam zogotor hokkolta sole. Tain duniar manshor gunare doia saf ḳoria, arshe-azimo Allar ḍainor toḳto toshrif raḳsoin. Ita dekia amra buzi, Allae tanre firista oḳol taki aro beshi mortuba-ala nam disoin, ar zela nam oula ijjot-o dan ḳorsoin. Allae kunudin kunu firistare ila ḳota ḳoisoin na, Tumi to amar fut, aiz-u ami tumar bafor laḳan oilam. Ba, Ami-u tar bafor laḳan oimu ar he oibo amar fut. Tain zebla tan ḳas fordan futre duniat bezila, ou shomoy firista oḳolre hukum dila, O firista oḳol, tumra enre soizda ḳoro. Allae firista oḳlor befare ḳoira, Firista oḳolre tain haoar nomunae foyda ḳorsoin, nizor ḳadim oḳolre agunir fulkir laḳan banaisoin. Oile ou futor befare tain ḳoira, Ia Elahi, tumar toḳt hor-hamesha boail roibo, tumar insaf-u oilo hok insaf, tumi naformanire ginnao ar dindarire bala fao, erlagi Allae-o, tumar Allae tumare ḳelafoti disoin, tumare ijjoti godi dan ḳorsoin, tumar bai-birador taki-o tumare bout beshi kushi disoin. Allae aro ḳoira, O malik, tumi-u foyla duniar ian kuṭi gaṛiso, asman oḳol-o tumar ate foyda ḳorse. Ita hokkolta binash oizibo, oile tumi to hamesha boail roibae. Ita ḳafoṛor laḳan furan oizibo, tumi itare saddoror laḳan bainj ḳoria toibae, findibar ḳafoṛor laḳan ita hokkolta bodlaibae. Oile tumi zela aso, oula-u roibae, tumar hayati kunudin-u fuṛaito nae. Ar Allae kunudin kunu firistare ila ḳota ḳoisoin na, Tumar dushmon oḳolre zotodin tumar faor tolat na falai, otodin tumi amar nizor toḳtor ḍain galat bo. Firista oḳol to ḳali kezmot ḳorra ruhu nae ni? Zera nazat hasil ḳorba, tarar ufoḳar ḳorar lagi-u erare beza oise. Te ou futor befare amra zotota hunchi, ita kub kial ḳoria shomza dorḳar, arnae aste aste i talim taki be-fote zaitamgi fari. Firistar marfote batail kalam zebla ḳaim roise, ar zera i kalamor ulṭa solchil, era-o tarar faona shaza faise, taile Allae tan ḳas meherbanie amrar lagi oḳon ze nazator fot tiar ḳorsoin, i fotor ulṭa solle amra kunu basmu ni? Ou nazator ḳota to hokkol foyla Malik Isae nize-u ḳoisoin, ar zera ita hunchil tara-o furafur saf ḳoria amrare ḳoisoin, ita ekkebare hasa. Erar loge Allae nize-o nanan kisimor kudroti alamot, keramotir bol-takkotdi ou nazator fokke shakki disoin. Ar nizor morzie Pak Ruhur deoa nanan niamot bilai dia-o shakki disoin. Te amra ze batuni bashshair ḳota ḳoiar, i bashshai to Allae kunu firistar zimmae raḳsoin na. Borong Allar kalamor maze eḳzone bataisoin, Manush aroḳta kita zen tumi tarare iad ḳoro? Manshor aolad-u ba kita zen tarare deḳa-huna ḳoro? Tumi to manshore firista taki kali tuṛa lamat lamaiso, gourob ar ijjotor mala to manshore-u dan ḳorso. Tumar foyda hokkoltar ufre erare ijjot diso, hokkolta-u erar faor tolat, erar aotae raḳso. Te Allae hokkoltare erar aotae anae, erar ḳemotar bare ar kunta-u roise na. Oile oḳono to hokkoltare amrar nizor aotae deḳram na. Ḳali hou Isare deḳram, tanre firista oḳol taki tuṛa lamat lamail oisil, zate Allar rohomote duniar tamam manshor zan basanir lagi, tan nizor zan bilai dein. Hasau tain kub ḳoshṭo faia nizor zan bilai dia mara gesoin, erlagi-u deḳram, Allae tanre ou ijjot ar gourobor mala findaisoin. Ashole hokkolta-u to Allar lagi, tain-u hokkolta foyda ḳorsoin, ar tan kial oilo tan bout aolad-o tan shan-mohimar bagi oin. Erlagi-u tarar nazator ḳanḍari ou Isare duk-koshṭo dia kamil banaisoin, zate en log doria era tan gese ain. Te ze Isae manshore fak-saf ḳoroin ar zera fak-saf bonoin, era hokkol-u to eḳ Allar foribaror. Otar dae Isae erare bai koia ḍaḳte kunu shorom fain na. Tain ḳoisoin, Ami amar baiaintor gese tumar nam toblig kormu, shomazor maze tumar tarif-gozol gaimu. Tain hirbar ḳoisoin, Ami Allar ufre borosha ḳormu. Ar aroḳbar ḳoisoin, Deḳoukka, ami-o asi ar hou aolad oḳol-o ono asoin, zerare Allae amar ato shofia disoin. Aichcha, te i aolad oḳol to roḳto-mangshor manush, gotike Isa nize-o oula roḳto-mangshor ḳayae zonom loila. Ḳali ou ḳayar moutor usillae, moutor ḳemotar malik hou Iblisre gayel ḳorta faroin, ar moronor ḍore zera hara zindegi moutor gulamor laḳan ḳaṭaira, tarare-o azad ḳorta faroin. Tain to firista oḳolre shaijjo ḳoroin na, ḳali Ibrahimor aolad oḳolre-u shaijjo ḳorra. I hokkolta furafur adae ḳorar lagi Isar-o zorur asil, tain nize-o ou baiaintor loge hoḳol befare homani oa. Homani oia Allar dorbaro nirbor ḳorar zuka, dil-dorodi fordan imam oita faroin. Imam bonia manshor gunar koforar lagi nizor zan kurbani dein. Tain nize forikkat foṛia duk-koshṭo shoijjo ḳorsoin, erlagi-u zera forikkat foṛoin tarare-o tain shaijjo ḳorta faroin. Erlagi O amar fak-forezgar bai oḳol, tumra zera behesti daoto shorik oiso, tumra forteḳe-u Isar bae souk raḳo. Alla Pake tan i ḳas kolifare bezisoin, tain-u to hou fordan imam, ikan amra manchi. Hozrot Musa zela Allar gor-shongsharo nirbor ḳorar zuka asla, ou laḳan Isare-o zein bezisoin, ou Allar dorbaro tain asla nirbor ḳorar zuka. Te gor banaora malike zela gor taki-o beshi ijjot fain, ou laḳan Allar gor-shongsharo Hozrot Isae-o Musa nobi taki beshi ijjot hasil ḳorsoin. Hokkol gorain-u to kunu na kunu manshe banaisoin, oile zein hokkolta banaisoin tain-u Alla. Ashole samnor zomanar lagi zeta batail oibo, ota befar zananir lagi, Musa asla Allar gor-shongsharor ḳam-ḳazo nirbor ḳorar zuka ḳamlar laḳan. Oile al-Mosi to Allar gor-shongsharor zimmadar hishabe nirbor ḳorar zuka futor laḳan asla. Oḳon amra-o zudi zarzir dilor asha ar himmot rakia mout forzonto ḳaim roi, te deḳa zaibo zen, amra-o Allar gor-shongsharor bagi oisi. Erlagi-u Allar Pak Ruhe bataisoin, Aiz zudi tumra tan aoaz huno, te tumrar moy-murobbir laḳan, tumrar nizor dilre fashan banaio na. Allae ḳoira, tara zela morubumir maze, amar birudde gia amare forikka ḳorsla, tumra ila ḳorio na. Tumrar baf-dadainte sallish bosor dori amar kudroti ḳam deḳar bade-o, hono amare forikka ḳorsoin. Erlagi ami tarar ufre kub bezar oia ḳoilam, erar dil to hamesha be-fote sokkor der, tara to amar fot sinlo na. Teu ami gusa ḳoria ḳosom ḳaia ḳoislam, amar deoa hou aramor zagat, era hamaito farto nae. Baiain oḳol, hushiar o! Tumrar dilor maze zanu naformani ar beimani na hamae, ita hamai gele zinda Allar ges taki nizore duroi horailae. Itar bodla zotodinre aiz ḳoia ḍaḳa oy, otodin tumra eḳe-oinnore shaosh deo, zate ḳeu gunar fando foṛia nizor dilre fashan na banae. Ḳaron amra zudi foylakur laḳan hesh forzonto imane mozbut roia soli, te buza zaibo amra al-Mosir loge shorik oisi. Tuṛa age batail oise, Aiz zudi tumra tan aoaz huno, te tumrar moy-murobbir laḳan, tumrar nizor dilre fashan banaio na. Aichcha ḳo sain, Allar nizor zobanor buli hunar bade-o ḳegie tan birudita ḳorsil? Era-u nae ni, zerare Musa nobie Mishor taki bar ḳori anchila? Ḳo sain, Allae sallish bosor dori kar ufre bezar asla? Erar ufre-u nae ni, zera guna ḳorsla ar morubumir maze lash oia foṛsla? Allae ḳar ufre bezar oia ḳosom ḳaia ḳoisla, ‘Amar deoa hou aramor zagat era hamaito farto nae’? Ou erar ufre-u nae ni, zera tan zobanor buli hunia-o naformani korsil? Ota taki-u to amra buzram, iman na anae tara Allar deoa hou aramor zagat hamaito farse na. Allar deoa aramor zagat hamanir oada oḳono amrar lagi salu ase. Erlagi ao, amra aro hushiar oia soli, naile deḳa zaibo heshe tumra ḳeu aramor zaga taki bad foṛigeso. Amrar gese zela kush-ḳobri toblig kora oise, Boni Israilor gese-o oula toblig kora oisil, i kush-ḳobri hunia tarar kunu fayda oise na, ḳaron tara ita hunle-o iman anche na. Oile amra to iman anchi ar Allar oada ḳora hou aramor zagat hamaitam fariar. Ou aramor befare Allae ḳoisoin, Teu ami gusa ḳoria ḳosom ḳaia ḳoislam, amar deoa hou aramor zagat, era hamaito farto nae. Zudio dunia foyda ḳorar bad taki-u, Allar i aram tiar ḳora oise, ta-o tain ola ḳoisoin. Ou aramor befare aroḳ ayato leḳa ase, “Allae i hoḳol ḳam shesh ḳoria shat nombor din aram ḳorla, tain idin ar kunta foyda ḳorla na.” Oile tain-u hirbar ḳoisoin, Amar deoa hou aramor zagat, era hamaito farto nae. Erlagi ou ḳota-u foysala oilo zen, kisu manush Allar hi aramor maze hamaita farba, oile foyla zerar gese kush-ḳobri toblig kora oisil, tarar naformanir ḳarone-u tara Allar hi aramor maze hamaito farse na. Allae bout din age ita Boni Israilor gese bataisla, bade tan aramor maze hamanir lagi hirbar noya din ṭik koria ou dinor nam dila, aiz. Hirbar bout din bade tain Daud nobir gese ḳoisoin, zela ufre leḳa ase, Aiz zudi tumra tan aoaz huno, te tumrar nizor dilre fashan banaio na. Oḳan ḳoar mani oilo, Hozrot Musar moutor bade Iusa nobie zudi tarare hi aramo harailita farta, te Allae bade aroḳ dinor ḳota ḳoila na one. Te buza zae, aramo hamanir fot Allar bonda oḳlor lagi oḳono kula ase. Mul ḳota oilo, Allae zela tan hokkol ḳam shesh ḳoria bade aram ḳorsla, ou laḳan kunu bonda-o tan aramor maze hamaia harle, he-o tar ḳam taki aram fae. Te ao, amra-o hi aramor maze hamanir lagi kas dile aguai, zate hou naforman Boni Israilor laḳan Allar hukumor birudde gia, i aram taki bad na foṛi. Allar kalam to zinda ar bolala ḳamla, duio gala darail toluaror saite-o beshi darala. I kalame fuṛ ḳoria manshor bitre hamaia dil-ruh, aḍḍi-gustre algae, ar dilor bitoror niot-sinta hokkoltare forikka ḳoria deḳe. Allar foyda ḳora kunu moḳluḳat-u tan gese lukail nae. Tan souḳor samne hokkolta-u kula-mela zair ase, tan gese-u amrar hishab dite oibo. Amra to ola eḳ fordan imam faisi, zein tamam asman far oia hari Allar arsho toshrif nisoin, tain-u Allar ḳas mayar zon, Isa Ibnulla. Te aukka, amra tan kolimare mozbut ḳori mani. Ḳaron amrar fordan imam i laḳan nae zen, amrar kunu ḳomzurir duke tain duki oita nae, tain-o amrar laḳan hokkol zator gunar forikkat foṛsoin, oile kunuzat guna ḳorsoin na. Erlagi aukka, amra himmot ḳoria Allar rohomotor toḳtor kinaro zai, zate meherbani hasil ḳortam fari, ar zelaḳan rohomotor goroz ase, ou laḳan rohomot-o fai. Manshor fokke roia Allar ebadotir lagi manshor maz tone-u forteḳ fordan imamre fosond ḳori neoa oy. Tan ḳam oilo manshor guna mafir lagi foshu kurbani deoa ar hoḳol zator lilla-sodga boḳshia deoa. Zera na buzia guna ḳore ar be-foti oy erar loge tain norom bebohar ḳorta faroin, ḳaron tan maze-o ḳomzuri ase. Tain zela oinno manshor gunar lagia kurbani dein, oula tan nizor ḳomzuri ar gunar lagi-o kurbani kora forz. Fordan imam oar ijjot ḳeu nize nize ḳamaito fare na, ḳali Allae zenre fosond ḳoroin tain-u i ijjot hasil ḳoroin, zela Allae Harun nobire i ijjot disla. Isae-o oula fordan imam oar lagi nize nizore boṛo banaila na, borong Allae-u tanre ou gourob dan ḳorsoin, Allae bataisoin, Tumi to amar fut, aiz-u ami tumar bafor laḳan oilam. Tain oula aroḳ ayato ḳoisoin, Bashsha Malki-Siddikor silsilae tumi-u hor-hameshakur imam. Allae to Isare moutor at taki basaita farla one, Isa duniat taḳar shomoy tan gese ahazari kori kandia dua-minoti kori bik magisoin, tan maze Allar ḍor-ḳof ar baiddota taḳae itar zuaf-o faisoin. Tain fut oile-o ḳoshṭo shoijjo ḳoria, Allar baiddo oia roa hikisoin, Malki-Siddikor befare amrar aro bout boyan ase, oile tumrar ḳano tala lagai diso ḳori tumrare ita buzani kub ḳoshṭo. Otodinor maze tumra-o ustad oizitae asil, oile oḳono deḳa zar tumrare Allar kalamor foyla soboḳ hikani lagbo. Tumrare oḳono huruttar laḳan dud ḳaoani lager, shokto ḳana hozom ḳortae farrae na. Ar zera dud ḳae tara to geda hurutta, shoriotor hukum-ahkamor befare tara kunta-u buze na. Shokto ḳana tarar lagi-u zerar boyosh oise, tara bala-burar tofat buzia aḳol ḳaṭaia sole. Isar befare amra foyla zeta talim faisi, aukka itare faroia amra aro agedi aguaia kamil oi. Hou foylakur talim hirbar hikar ar goroz nai, zemon naformani ḳam taki dilre bodlani, Allar ufre iman ana, nanan nomunar gusol, dua nibar shomoy atai deoa, moutor bade zinda oia uṭa, ar aḳerator bisar. Inshalla, amra ola-u ḳormu. Oile zera eḳbar Allar fot dekilaise, behesti danor moza faise, Pak Ruhe shorik oise, Allar rohomotor kalamor moza buzche, ar samnor zomanar nanan kudroti ḳam deḳse, deḳar bade-o kafiri ḳam ḳorse, erar dilre ar bodlail zaito nae, ḳaron tara nize Allar ḳas mayar zon Ibnullare hirbar duk-koshṭor solibo zane marer, ar hoḳlor samne kula-mela tan gibot gar. Ze maṭie bare bare megor fani ozom ḳoria girost oḳolre hag-torḳari zugaia dey, i maṭit Allar rohomot nazil oy. Oile ze maṭit ḳali bon-zongol ar ḳaṭa-gosa fole, ita beḳama maṭi, i maṭit lannot foṛe. Manshe itare aguindi zalain. O mayar dust oḳol, zudio amra ilaḳan ḳoiram, oile ashole amra ḳas dile mono ḳori, tumrar halot e taki bout bala ase, ar tumrar zindegit nazator fol-o deḳa zar. Alla to hok-insafḳari, tumra tan lagi ze mohobbot deḳairae, tan lagi zeta ḳam-ḳaz ḳorrae, tan pak bonda oḳlor kezmot ḳoria airae, ita to tain faurita nae. Amrar kub ichcha oilo, tumra forteḳ zone-u hesh forzonto eḳoi laḳan ḳam ḳorat aguai aibae, zate tumrar asha fura oy. Ou laḳan ḳamo aguaite tumrar alshi na ae; borong imane ar sobre zera Allar oada ḳora borkot hasil ḳorsoin, tumra-o tarar laḳan oizao. Hozrot Ibrahimor loge Allae zebla oada ḳorsla, i shomoy dusra kuntar name tain ḳosom ḳaisoin na, ḳaron tan taki boṛo dusra kunta-u nai, erlagi tain nizor name ḳosom ḳoria ḳoisla, Ami nisoy tumare borkot nazil ḳormu, tumar aolad bout forimane baṛai dimu. Ibrahime oula bout lamba shomoy sobor ḳoria Allar oadar fol faila. Manshe zebla kunu ḳosom ḳae, he tar saite dami ḳeuror name ḳosom ḳae, teu buza zae tar ḳosom hasa, ar ou ḳosmor lagi hoḳolta miṭ-maṭ oizae. Oula Allae-o zerar loge oada ḳorsoin, tan oadar nichchoyotar lagia tain-o ḳosom ḳaisoin, zate tan oada rod-bodol oar shondoy na taḳe. Ar Allae kunu misa mata to bout duror ḳota. Te tain zebla oadar loge ḳosom-o ḳorsoin, oḳon amra aro ḳoto beshi borosha raḳtam fari. Erlagi ao, amra zera tan dorbaro gia asroy faisi, faia ze asha foyda ase, amrar samnor hou ashare mozbut ḳori doria roi. Ou asha amrar zanor longoror laḳan, ḳaim ar mozbut. Iṭae Allar behesti ebadot ḳanar forda faroia Herem Shorifor bitre amrare nia fosae. Ar amrar fokko oia Isa gia amrar age hi zagat fosi gesoin. Tain to Malki-Siddikor silsilar reoaz mafik hor-hameshakur lagi fordan imam oisoin, te ou befare oḳon ḳoiram. I Malki-Siddik oila Allatalar imam, Shalemor bashsha. Ibrahime bashsha oḳolre zuddot araia hari firia aoar bala ou Malki-Siddikor loge tan mulaḳat oile, Malki-Siddike Ibrahimre dua ḳorsla. Ibrahime tan hokkoltar dosh baṭor eḳ baṭ enre dilaila. Malki-Siddik namor mani oilo, forezgaror bashsha. Tain Shalem ṭaunor-o bashsha, mani shantir bashsha. Malki-Siddikor ma nai, baf-o nai, tan kunu ḳandan-nama-o nai, tan hayatir shuru ba shesh nai. Te buza zae, tain Allar ḳas mayar futor laḳan, hor-hameshakur imam. Te sinta ḳori deḳoukka, ein ḳoto mohan, zenre amrar ḳandanor mul baba Ibrahime-o tan gonimotor malor dosh baṭor eḳ baṭ dan ḳori disoin. Ar Lebi gusṭir maze zera imamoti ḳam ḳoroin, tara shoriotor hukum mafik tarar baiain, mani Boni Israilor ges taki dosh baṭor eḳ baṭ adae ḳorar eḳtiar faisoin. Ou Boni Israil-o to Ibrahimor ḳandanor maze zonmisoin. Oile hou ze Malki-Siddik Ibrahimor ḳandanor na oile-o, Ibrahimor ges taki dosh baṭor eḳ baṭ nisla, ar Ibrahimre dua-o disla, zen loge Allae nize oada ḳorsoin. Huru oḳole boṛo oḳlor ges taki dua faia taḳoin, ermaze to shondoy nai. Eḳbaedi ze imamor mout oy, ou Lebi gusṭir imam oḳole dosh baṭor eḳ baṭ adae ḳoroin, ar aroḳbae Malki-Siddik, kitabe ḳoy tain hor-hamesha zinda asoin, tain-o dosh baṭor eḳ baṭ adae ḳorsoin. Hirbar ikan-o ḳoa zae, Lebi gusṭir ze imame dosh baṭor eḳ baṭ adae ḳorsoin, tain-o Ibrahimor mazdi Malki-Siddikre dosh baṭor eḳ baṭ disoin, ḳaron Malki-Siddike zebla Ibrahimor loge mulaḳat ḳorla, Lebi to ou shomoy Ibrahimor naṛor bitre asla. Lebi gusṭir imam sab oḳlor ḳam-ḳazor ufre nirbor ḳoria Allae Boni Israilre shoriot disla, i imamor mazdi zudi ḳamil oa zaito, te Lebi gusṭir foyla imam Harunor bodla Malki-Siddikor nomunar aroḳ imam aoar kunu goroz asil ni? Imamor silsila bodlail oile to shoriotre-o bodlani lage. I hoḳol boyan zan niote ḳorram, ein to Lebi gusṭir nae, arok gusṭir, hi gusṭir ḳeu kurbani kanar ḳadim asla na. Amrar munib to Ehuda gusṭir maze foyda oisoin, i gusṭir ḳeu imam oiba ḳoria Musae kunta ḳoisoin na. Malki-Siddikor nomunae zebla aroḳzon imame toshrif anoin, i shomoy to amrar boyan aro saf oigese. Isa to roḳto-mangshor kunu niome imam oisoin na, ḳali tan hor-hameshakur kudroti zindegir bole-u oisoin. Tan befare Pak Kalame ḳoy, Malki-Siddikor silsilae, tumi-u hor-hameshakur imam. Te deḳoukka, eḳbae agor imamotir hukum-ahkam oḳol ḳomzur ar beḳama oizaoae itare horai deoa oise, Musar shoriote to kuntare-u kamil banaito farse na. Ar aroḳbae oula eḳ mohan noya oada zari kora oise, i oadar zoriae amra Allar aro ḳasat aitam farmu. Ar agor imam oḳlor befare to kunu ḳosom ḳora oise na, oile Isar imamotir befare Allae ḳosom ḳorsoin. Tain ḳosom ḳoria enre boail ḳorsoin, ar ḳoisoin, Mabude ḳosom ḳaia ḳoira, tumi-u hor-hameshakur imam, tumar befare tan munsha bodlaita nae. Te amra buzram zen, Isa Allar loge manshor milonor aro mohan eḳ usillar zamindar oisoin. Ar Lebir gusṭi taki bout manshe imamoti korsoin, mout oizae ḳori era kunu zon-u hamesha imamoti korta farsoin na. Oile Isa to hor-hamesha zinda asoin, erlagi tan imamoti kunudin-o fuṛaito nae. Erlagi-u zera tan usilla loia Allar ḳasat ae, Allae tarare furafur nazat dan ḳoroin, ḳaron tarar fokke sufarish ḳorar lagi tain hamesha zinda asoin. Ashole amrar lagi oula eḳzon fordan imamor zorur-o asil, zein fak-forezgar, be-guna, gunagar oḳol tone alog, ar Allae zenre asman oḳlor ufre tulchoin. Baki hokkol fordan imame foyla tan nizor lagi, bade tan ḳoumor gunar lagi forteḳ din kurbani adae ḳora lagto. Oile ou imamor lagi itar zorur asil na, ḳaron tain tan nizore kurbani dia eḳoi bare i ḳam adae ḳorilisoin. Shoriote zoto fordan imam oḳolre boail ḳorse era hoḳol-u ḳomzur, oile shoriotor bade Allar ḳosom mafik zenre boail ḳora oise, ein-u ḳas mayar fut, hor-hameshakur imamotir lagi enre kamil banail oise. Amrar boyanor mul befar oilo, amrar oula eḳzon fordan imam asoin, zein behesto arshe-azimo Allar ḍainor toḳto toshrif raḳsoin. Tain hou asol pak zaga, mani behesti ebadot ḳanat ebadoti korra, i ebadot ḳana to kunu manshor ator banail nae, ḳali Mabude nize banaisoin. Foshu kurbani ar lilla-sodga adae ḳora oilo forteḳ fordan imamor dayitto, erlagi ou fordan imamor gese-o kurbanir zinish taḳte oibo. Tain zudi oḳon duniat taḳta te imamoti korta farla na one, ḳaron shoriotor hukum mafik kurbani dibar imam to asoin-u. Hi imam oḳlor ḳam oilo behesti ḳamor nomuna ba saya, zela Musae hi ebadot ḳana bananir shomoy Allae Musare hushiar ḳori koila, “Dekio, ou faṛor ufre tumare zela noksha deḳailam, ekkere ou laḳan ḳori hoḳolta banaio.” Oile oḳon amra deḳram, Isae imamotir ze dayitto faisoin, iṭa hi imam oḳol taki bout bala, zela Allar loge manshor milonor aro bala eḳ usillar lagi tain zimmadar oisoin. I usilla agor usilla taki bout bala; i usilla to bout bala bala oadar ufre ḳaim oise. Allar loge amrar milonor foyla usilla zudi nikut oito, te dusra usilla ḳaimor kunu zorur asil na. Oile Allae tarar dush deḳaisoin, zela Asmani Kitabe ḳoy, Mabude ḳoira, Huno, ola eḳ oḳt aibo, zebla ami Boni Israil ar Ehuda gusṭir lagi, amar loge milonor eḳ noya usilla ḳaim ḳormu. Ou noya usilla agor hi usillar laḳan nae, Mishor desh taki tarar moy-murobbi oḳolre, azad ḳori anar bala ze usilla ḳorslam. Ḳaron tara amar usillar ufre ṭik roise na, erlagi ami-o tarar log saṛi disi, ikan Mabude ḳoiram. Oile ami Mabude eoḳan-o ḳoiram, i zomanar bade ami Boni Israilor loge, amar noya ou usilla ḳaim ḳormu, amar shoriot tarar dilor maze dimu, tarar ontoror maze ami lekia dimu, ami tarar Alla oimu, tara oiba amar proza. Tara hoḳole-u tarar ari-forire, zarzir bai-biradorre ila talim deoa lagto nae bule, tumra Allare sino. Tara huru-boṛo hokkole emne-u to amare sinba, ḳaron ami tarar hokkol naformani maf ḳormu, tarar gunare ar kunudin-u mono raḳtam nae. Te buza zae, ‘noya usilla’ ḳota ḳoia tain foyla usillare furan banaisoin, ar zeta osol-furan oizae, ita to zoldi kori araizae. Allar loge manshor milonor foyla usillar maze, Allar ebadotir lagi nanan nomunar niom-ḳanun asil, ar duniat ebadot ḳorar lagi ekḳan ebadot ḳanar ḳota-o leḳa asil. Hou niom mafik ekḳan ebadot-tambu banail oisil, hi ebadot-tambur foyla kuṭat asil serag dani, fobitro ruṭi ar ita raḳar ṭebul. I foyla kuṭar nam asil Pak Zaga. Dusra fordar bitre arok kuṭa asil, hi dusra kuṭar nam asil Ḳas Pak Zaga ba Herem Shorif. I kuṭar maze asil, shunadi banail agor-kushboy zalani ṭebul, shunadi lefa shahadot shonduk, shondukor bitre asil shunar boyamo bora kudroti kani manna, imam Harunor laṭi, ou laṭit kudroti ful fuṭisil. Aro asil Allar loge milonor usilla leḳa hou duio shahadot fattor. Hi shondukor ufre asil Allar zalali shunar dui Karubi, otar ḍaḳnaguin hou shondukor ḍaknir ufre milia deoa asil, ar ono-u gunar kofora adae ḳora oito. Ita hokkoltar kuṭinaṭi boyan ḳora oḳon zorur nae. I hokkolta zuit ḳorar bade imam oḳole imamoti ḳamor lagi hamesha foyla kuṭar bitre hamaita. Oile dusra kuṭat, mani Herem Shorifo ḳali fordan imam sabe bosoro eḳbar-u hamaita farta, tain-o kurbanir lou bina hino hamaita farta na. Tan nizor guna ar tan ḳoumor na-zana hoḳol gunar mafir lagi, kurbanir lou loia hono hamaita. Te Pak Ruhe deḳaia dira, i duniar foyla ebadot ḳana zotodin ḳaim ase, otodin hi Herem Shorifo hamanir fot kula oito nae. Hi ebadot ḳana oilo i zomanar lagi eḳ nishana, i nishanae amrare batai dey, ou laḳan kurbani ar lilla-sodgae ebadotḳarir bibeḳor kutkuti bab dur ḳorto fare na. Ita to ḳali kaoa-daoa, ozu-gusolor befar, hokkolta-u ḳali zaira shoriot, dilor kunta nae. I shoriot ḳaim asil, aro bala kunu usilla aibar ag forzonto. Oile oḳon zoto bala bala befar aise, al-Mosi to ou noya torikar fordan imam oisoin. Tain aro ijjoti aro beshi ḳamil ebadot ḳana oia aisoin. I ebadot ḳana kunu manshor ator banail nae, ikan i duniar duniabi kunta nae. Kunu goru ba sagolor lou ato loia tain hino hamaisoin na. Ḳali tan nizor zan kurbanir lou dia eḳbar-u hi Herem Shorifḳano hamaisoin, hamaia amrare hor-hameshakur lagi kalas ḳorsoin. Age zera nafaḳ bonizito, tarar lagi goru ba sagolor lou ar ḍeki-gorur zalail sali siṭaia fak-saf ḳora oito, oile itae to erar shorilor bairgala ḳali fak-saf oito. Te zein hor-hameshakur zinda ruhur mazdia, be-guna kurbani oia tan nizor zanre Allar name shofia dilaisoin, hi al-Mosir loue amrar dilre nafaki ḳam-ḳaz taki aro ḳoto beshi forimane fak-saf ḳorbo, zate amra zinda Allar ebadot-bondegi kortam fari. Ar foyla usilla salu taḳte manshe zeta guna ḳorsla, ou gunar at taki kalas ḳorar niote, kofora hishabe al-Mosir mout oise. Allae zerare daotdi ania siroḳalin mouroshi shompod dibar oada ḳorsoin, al-Mosi to erar lagi-u noya usillar zimmadar oisoin. Ou mouroshi shompod oḳon manshe faibar shuzug oise, ḳaron duniabi niome mouroshi shompodor kunu osiot-nama ḳamo lagaite oile, foyla ou osiot ḳorrar mout oise ḳori forman dorḳar oy. Manshor moutor bade tar osiot-nama ḳamo lage, osiot ḳorra zinda taḳte ita kunu ḳamo lage na. Ṭik ou laḳan-u, Allar loge milonor foyla usilla-o, moutor lou saṛa ḳamo lagail oise na. Hozrot Musae shoriotor tamam hukum-ahkam Boni Israilre zananir bade, tain bisal ar sagolor lour loge fani mishaila, bade lal rong kora meṛar ruma ar esub gasor ḍeṭadi Allai shoriot kitabor ufre, ar hokkol manshor gotro siṭaia dila. Musae ḳoila, “I lou oilo Allai milonor hou usillar lou, ze usilla mafik solar lagi Allae tumrare hukum disoin.” Ou nomunae tain ebadot ḳana ar ebadoti ḳamor hokkol mal-samanar ufre-o lou siṭaia dila. Asol ḳota oilo, Musar shoriot mafik beshir bag zinish-u lou dia fak-saf oite oy, kurbanir lou saṛa kunumonte-u gunar mafi faoa zae na. Zeta zinish oḳol ḳali behesti zinishor nishana, otare kurbanir foshur loudi fak-saf ḳora zorur asil, oile zeta zinish asol behesti, itare fak-saf ḳorar lagi to aro mohan kurbanir zorur. Ar al-Mosi to hou nishanar zinishor laḳan, manshor ator banail kunu Herem Shorifo hamaisoin na, tain ḳali asol behesto hamaisoin, zate amrar nazator lagi Allar samne oḳon azir oita faroin. Hoḳol fordan imame kurbanir foshur lou loia zela forteḳ bosor Herem Shorifo hamani lage, al-Mosi to i laḳan bare bare kurbani oar lagi behesto toshrif nisoin na. I laḳan oile to dunia foyda taki oḳon forzonto tain bare bare ḳoshṭo faia kurbani oite oilo one. Oile tain to aḳeri zomanat aia ḳali eḳbar-u zair oisoin, zate nizore kurbani dia tamam gunar kofora oin. Allae to ṭik koria dilaisoin, hokkol manshor ḳali eḳbar moron oibo, ar moron bade bisar. Ṭik ou laḳan, bout manshor gunar buza boibar lagi al-Mosire-o ḳali eḳbar-u kurbani deoa oise. Tain dusrabar toshrif anba, oile gunar kofora bonar lagi aita nae. Ḳali zera ashik oia tan lagi bar sar, tarare furafur nazat ḳorar lagi dusrabar aiba. Shoriot oilogi kali eḳ nishana, itae bobishotor niamotor ḳota batai dey, iṭa to asol kunu befar nae. Erlagi-u zera Allar ebadot ḳorar kiali oy, shoriotor niome tara bosor bosor eḳoi laḳan kurbani dia to kunumonte-u kamil oito fare na. Shoriote zudi tarare furafur kamil banailito, te to foshu kurbani deoa eḳbare-u bond oigelo one. Ebadot ḳorra oḳol zudi eḳbare-u fak-saf bonizito, te era nizore ar gunagar mono ḳorlo na one. Oile ou foshu kurbanie tarare forteḳ bosor iad ḳoraia dey zen, tara ashole gunagar. Muloto, sagol ba bisalor loue manshor gunare kunu laḳan-u saf ḳorto fare na. Erlagi-u al-Mosie duniat toshrif anar ḳalo Allar dorbaro ḳoisoin, Foshu kurbani ba dan-sodga to ashole tumi sao na, oile amare ekḳan ḳaya diso bilai dibar lagi. Zalail kurbani ba gunar koforar kurbanie tumi to kushi oiso na. Teu ami koilam, O Alla, deḳoukka, ami to ono aisi; tumar Kalam Shorifo zela ase, amar zonom oibo ou zogoto, tumar munshare ḳaim ḳorar lagi, ar hasau ami aisi. Ufror ayat oḳlor maze al-Mosie foyla ḳoira, “Foshu kurbani ba dan-sodga to ashole tumi sao na, zalail kurbani ba gunar koforar kurbanie tumi to kushi oiso na.” Shoriotor hukum mafik ou kurbani oḳol adae ḳora oile-o, al-Mosie ola ḳoila. Bador ayato tain hirbar ḳoila, “Deḳoukka, ami to ono aisi, tumar munshare ḳaim ḳorar lagi.” Te buza zae, dusra usillare ḳaim ḳorar niote, tain foyla usillare batil ḳorilila. Erlagi Alla Pakor hou munsha mafik Isa al-Mosir ḳayare ḳali eḳbar-u kurbani deoa oisil, ou kurbanir bole Allar dorbaro amrare fak-saf ḳora oise. Forteḳ imam sabe fortidin azir oia Allar ebadoti koroin ar bare bare kurbani adae ḳoroin, ta-o ou laḳan kurbanie kunudin-u gunare doia saf ḳorto fare na. Oile al-Mosie to siroḳalor gunar mafir lagi kali eḳbar-u kurbani oia, arshe-azimo Allar ḍainor toḳto toshrif raḳsoin. Ar hou shomoy taki tain bar saira, zotodin forzonto dushmon oḳolre tan faor tolat falaia surmar ḳora na oy, otodin bar saiba. Ḳaron tan ou eḳbaror kurbanir usillae zerare fak-saf ḳora oise, erare siroḳalor lagi-u tain furafur kamil ḳorsoin. Ou befare Allar Pak Ruhe-o amrar gese shakki dira, tain foyla ḳoisoin, Ami Mabude ḳoiram, i zomanar bade ami Boni Israilor loge, amar noya ou usilla ḳaim ḳormu, amar shoriot tarar dilor maze dimu, tarar ontoror maze ami lekia dimu. Bade hirbar ḳoira, Ami tarar naformani ar gunare ar kunudin-u mono raḳtam nae. Te buzrae ni, Allae zebla guna ar naformanire mafi dilain, erbade to gunar lagi kunuzat kurbanir-u zorur nai. Erlagi-u O bai oḳol, Hozrot Isa al-Mosir lour zoriae, amra behestor Herem Shorifo-u hamanir shaosh faisi. Al-Mosie amrar lagi noya ar zinda eḳ torika kulchoin, tan shoril kurbanir usillae amra zanu ou Herem Shorifor duaror forda faroia, Allar samne azir oitam fari. Te amrar eḳzon fordan imam-o asoin, Allar foribaror tamam manshor zimma to tan ato deoa oise. Erlagi ao, imanor mazdi amra furafur nichchit bonia ḳaṭi dile Allar dorbaro azir oi; ḳaron dushi bibeḳor at taki amrar dilre al-Mosir loue fak-saf banaise, ar forishkar fani dia amrare naoail oise. Mumin hishabe amrar dilo ze borosha ase ḳoia shikar ḳori, ao, ou boroshae furafur mozbut roia tan torikae soli, ḳaron zein oada ḳorsoin ein to shullo-ana hok-halali. Amra eḳe-oinnor lagi kial ḳori, mohobbot ar nek kam ḳorar lagi eḳe-oinnore shaosh-foramish dei. Kunu kunu zonor shobab oilo, tara zomato aia shorik oy na, oile amra zanu ou laḳan na oi. Al-Mosie dusrabar toshrif anar oḳt zoto gonaia aior, amra oto beshi kori eḳe-oinnore shaosh-foramish deoat roi. Alla Pakor hok torika zanar bade-o zudi amra zania-hunia guna ḳorat roi, te i gunar koforar lagi kunuzator kurbani nai. Ase ḳali Hashoror moydano ḳoṭin bisaror lagi ḍorai ḍorai bar saoa, ar Allar dushmon oḳolre zalaia sali korar gozobor ḍor. Kunu zone Musar shoriotor hukum-ahkamor borkelaf ḳorle, ere kunu maya-momota na ḳoria dui ba tinzonor shakki loia zane marilite oy. Te sinta ḳori deḳoukka, ze zone Allar ḳas mayar zon Ibnullare gin ḳore, he aro ḳoto boṛo azabor bagi oise! Ze lour usillae he fak-saf oise, Allai hou usillar loure he elami korse, ar ze Pak Ruhe rohomot boḳshia dein, hou ruhre-o beijjot ḳorse. Ashole amra to tanre sini-u, zein formaisoin, Naformanir shaza deoa amar-u ḳam, amol mafik bodla dimu tamam insan. Aroḳ ayato tain ḳoisoin, Mabude tan bonda oḳlor bisar ḳorba. Buzrae ni, zinda Allar samne azira deoa ḳoto boṛo mosibotor befar! Tumra hou dinor ḳota iad ḳoro, zebla Isar torikar nuror fot faia hari, bout nomunar zulum-mosibotor maze-o mozbut roislae. Kunu kunu shomoy shomazor samne beijjoti, zulum-ṭiṭḳari, ṭaṭṭa-moshkora hunia-o tumra nize ḳoshṭo shoijjo ḳorslae. Ar kunu kunu shomoy oinnor ufre ou laḳan ḳoshṭo aise hunia, tarar loge tumra-o dukito oislae. Tumrar mazor zera zel ḳaṭisla, tarar duke tumra-o duki oislae. Tumrar don-samana luṭ-faṭ ḳora oile-o kushi aslae, ashole buztae farslae, tumrar lagi aro bout bala bala samana zoma ase, ze samana siroḳal roibo. Te oḳon tumrar hi monobol kuaio na, ermaze to bout dami furuskar ase. Tumra mozbut roa dorḳar, zate Allae ze furuskar diba ḳori oada ḳorsoin, tan morzi mafik solia tumra-o hou furuskar fao. Allae to ḳoisoin, Ar tuṛa ḳoyḳan din baki ase, zein toshrif anar ḳota, tain toshrif aniliba, beshi deri korta nae. Amar dindar bondae imanor bole-u aḳer faibo, oile ḳeu ḳoredi fisli gele tar ufre ami kushi roitam nae. Oile amra to ḳoredi fislia binash oar manush nae. Zera iman ania nazat hasil ḳore, amra oilam hou dolor manush. Iman kita? Amra zeta faimu ḳori asha ḳorsi, ita oḳon na faile-o bade faimu-u faimu, ou ekinor nam-u iman. Ou imanor bole-u amra nichchit oia buzi, oḳon zeta amrar souke deḳram na, ita ashole-o ase. Ou imanor bole-u amrar moy-murobbi oḳole Allar ges taki tarif ḳamaisoin. Imane-u amra buzram zen, Allae tan kalamor bole-u asman-zominor hokkolta foyda ḳorsoin, ita amrar sokur deḳa kunu siz taki emne foyda oise na. Imanor bole Habile Allar name Kabilor saite bala kurbani adae ḳorla. Erlagi Allae Habilor befare bataila, ein eḳzon kamil manush. Te bout zomana age Habilor mout oile-o, imanor befare tain oḳono amrar loge matira. Imanor bolor lagi-u Idris nobir mout oilo na, Allae tanre zinda halote behesto tulia nilagi, duniat tanre tukaia millo na. Idrisre behesto tulia neoar age Allae zanaisla, Idris amar kushi mafik solchoin. Oile iman saṛa to ḳeu Allare kushi korto fare na. Zekunu manush Allar daro zaite saile, he ekin ḳora lagbo zen, Alla asoin, ar zera tan tallash ḳore, tain erare furuskar dein. Imanor bole Nuh nobir zomanat zeta goṭona deḳa gesil na, Allar hushiari faia tain ota ekin ḳorla, ekin ḳoria nizor foribarre basanir lagi ekḳan zaz banaila. Tan ou imani ḳamor mazdi zogotor naformanir forman deḳaila, ar Allar dorbaro forezgar hishabe goinno oigela, ḳali imanor bole-u ila oa zae. Imanor bole Ibrahim nobie Allar hukum faia-u nizor biṭa-maṭi saṛia roana dila. Allae tanre ze desh dita ḳori oada ḳorsoin, hi deshḳan kun zagat, ikan na zania-o tain roana oigela. Imanor bole tain Allar oada ḳora hou Kenan deshor bitre-o musafiror laḳan din ḳaṭaila. Tan loge aro zera hi oadar bagi asla, hou Isʼhak ar Iakubor laḳan tain-o tambue tambue roia zindegi kaṭaila. Ashole ze ṭaun hor-hamesha ḳaim roibo, hou behesti ṭaunor lagi tain bar saoat asla, i ṭaunor noksha-nomuna shoho hokkol ḳarigori shoyong Allar ḳam. Imanor bole Ibrahimor niaoladi Bibi Saerae aolad zonom deoar ḳemota faila, tarar hurutta foydar boyosh faroigele-o Ibrahime ekin ḳorsla, zein i oada ḳorsoin, ein to hok, ein nizor oada furaiba-u furaiba. Erlagi boyoshor bare morar foti ou eḳ Ibrahim taki oto manush zonom loila, zera asmanor tera ar doriar soror balur laḳan, gonia fuṛail zae na. Mozbut imane zindegi kaṭaia era hoḳlor mout oise, era ḳeu hi oadar fol bug korta farsoin na, ḳali duroi taki ita dekia hari kushi oisoin. I duniat tara musafirit aisoin, ikan tarar nizor boshot ḳana nae, ita to tara manchoin. Ar zera ikan manchoin, tara hoḳole-u shundor ḳori buzaisoin zen, tara nizor afon deshor tallash ḳorra. Ze zomin taki tara bar oia aisla, hi zominor ḳota kial ḳorle to tara hirbar hono hamanir shuzug faila one. Oile tara to aro bala eḳ desh, mani behestor tallash ḳorsla. Erlagi-u Alla Pake nizore tarar Alla ḳoia forisoy dite kunu shorom fain na, tain-u tarar lagia aramor eḳ ṭaun tiar ḳorsoin. Ibrahim nobi forikkat foṛia hari imanor bole-u tan fua Isʼhakre kurbani disla. Ze Ibrahimor loge Allae nize oada ḳorsoin, hou zone tan ḳas mayar futre kurbani dilaita saisoin. Ze futor befare Allae bataisla, “Tumar fua Isʼhakor ḳandanre-u tumar ḳandan ḳoia gona oibo.” Ibrahimor dilor ou ekine tain kurbani dite razi oisla zen, Allae to murdare-o zinda ḳorta faroin. Ar hasau moutor tol taki Isʼhakre firot faila. Imanor bole Isʼhake tan fuain Iakub ar Ishʼor bobishot zindegir lagi dua disla. Imanor bole Iakube moutor oḳto Iusufor duio fuare dua dila, tain nizor laṭir ufre bordi Allar ebadoti korla. Imanor bole Iusufe moutor oḳto ḳoisla, tan nizor zati Boni Israil Mishor desh taki bar oia zaiba, tara zaoar ḳalo tan aḍḍi-guḍḍire boia neoar hukum dila. Imanor bole-u Musar ma-bafe Musar zonmor bade tin mash forzonto lukaia toila, tara deḳsla, fuagu kub shundor, bashshar hukume-o tara ḍoraila na. Imanor bole-u Musae, tan buzdar oar bade Feraunor fuṛir goror nati koia forisoy dite razi oila na. Tain gunar maze roia tuṛa ḳoydin shuk kamanir saite, Allar bonda oḳlor loge milia zulum-mosibotor maze roa-u fosond ḳorla. Tain Mishoror hokkol zak-zomoḳor saite, al-Mosir name durnam hasilre-u beshi mulloban mono ḳorla, ḳaron tan nozor asil behesti furuskaror bae. Imanor bole tain Mishor taki baroi gela, bashshar gusare-o ḍoraila na. Niraḳar Allare dekilaisoin, oula mono ḳoria-u tain sobor ḳori roila. Imanor bole-u tain Azadi Id ar lou siṭaia deoar niom manla, zate Azrail firistae Boni Israilor foyla fuaintore na soin. Imanor bole-u manshe Nil doriar mazedi hukna maṭir fotor laḳan aṭia gela, oile Mishori oḳole ila zaoat lagia buṛia morla. Imanor bole-u Boni Israile Ziriho ṭaunor baunḍorir oal shatdin sokkor deoar bade emne-u foṛigelo. Imanor bole-u ou ṭaunor Rahba namor bodmaish beṭie Boni Israilor guia oḳolre memandari korae, hinor naforman oḳlor loge i beṭi binash oila na. Ar ḳoto zonor boyan ḳoitam? Zidaun, Barak, Shimshun, Ifta, Daud, Shamuel ar nobi oḳlor imani bolor boyan ḳorat lagle shomoye kulaito nae. Imanor bole era bout desh doḳol ḳorsoin, hok insaf ḳaim ḳorsoin, Allai oadar fayda hasil ḳorsoin, shinghor muk bond ḳorsoin, agunir kunḍolir tez ḳomailisoin, toluaror samon taki rehai faisoin, ḳomzur taki-o bol hasil ḳorsoin, jihador maze bol-ḳemota deḳaisoin, bin-deshi oḳlor fouzre ḳedaia disoin. Beṭinte tara zarzir murda oḳolre hirbar zinda halote faila. Aro boute zanor maya saṛia zulum-nirjaton shoijjo ḳoria morla, zate kiamotor bade behesti shuk fain. Boute ṭaṭṭa-moshkora ar mair-doir shoijjo ḳorsoin, boute ḍanḍa-beṛi shoho zel ḳaṭisoin. Manshe tarare fattordi iṭaisoin, ḳoratdi siria dui ṭukra ḳorsoin, toluardi zane marsoin. Tara zulum-mosibot, zala-zontrona faisoin, obabor ṭelae foshur samṛa findia shorom lukaisoin. I dunia tarar zuka asil na, tara faṛ-zongol, morubumi, ar gat-gaṛar maze roia duniar zindegi kaṭaisoin. Imanor bolor lagi era hokkole tarif ḳamaisoin, ta-o Allar oadar fol i duniat faisoin na. Ḳaron Allae amrar lagi hou zomana taki aro bala furuskar toisoin, zate amrare bad dia tara kamil na bonoin. Te amra deḳram, imani tezor bout shakki amrar sairobae ase. Erlagi ao, amra-o hoḳol zay-zamela horai, ze gunae amrare fesaia raḳe, otare horaia falai, ar douṛaora dolor loge oia doijjo dori hesh forzonto douṛai. Aukka, amrar nozor raki Malik Isar bae, aual taki aḳer forzonto tain oila amrar imanor mul kuṭi. Tan lagi ze kushi raḳa oise, ou kushir baedi saia, duk-koshṭor solibor ufror moutre-o ḳobul ḳorla, i beijjotire kunu dam dila na. Ar oḳon arshe-azimo Allar ḍainor toḳto tain toshrif raḳsoin. Te zein gunagar manshor oto boṛo dushmonire shoijjo ḳorla, tan befare sinta ḳoro, zate tumrar dilo kunu ḳomzuri ba nirasha na ae. Gunar loge laṛait lagia to lou baronir dosha tumrar oḳono oise na. Tumrar gaibi baf Allae, tan aolad hishabe tumrare ze nosiot ḳorsoin, tumra to ita fauriliso ni? Kitabo ase, O amar fut, Mabudor shashonre elami korio na, tain kunu damki dile, bezar oio na. Ḳaron Mabude zerare mohobbot ḳoroin, tarare-u shashon ḳoroin, zerare tain aolad hishabe ḳobul ḳorilain, era forteḳ zonre shaza dein. Shashon mono ḳoria tumra ḳoshṭo shikar ḳoro. Bafe-fute zelaḳan shomporko, Allae-o tumrar loge oula shomporko raḳsoin. Ila kunu fut ase ni, zare tar bafe shashon ḳoroin na? Hokkol futre-u shashon ḳora oy. Tumrare zudi shashon ḳora na oy, te to tumra funga, asol fut nae. Zano to, amrar duniabi baf oḳole amrare shashon ḳoroin, ar amra tarare ijjot ḳori. Te zein amrar asmani baf, tan gese gordona nuaia sola amrar lagi zorur nae ni, zate amra zindegi fai? Amrar duniabi baf oḳole zela bala mono ḳorta, ola amrare shashon ḳorta, ar ita to tuṛa ḳoydinor lagi, oile Allae to amrare shashon ḳorra zate amra-o tan fak-fobitrota hasil ḳori. Kunu shashonre-u kushir befar mono ḳora oy na, dukor befar-u mono oy, oile zera shashon mania sole, tara bade dindarir shantiala zindegi fae. Erlagi tumrar ḳomzur atre mozbut ḳoro, durbol aṭure shobol ḳoro. Tumra shida fote aṭo, zate lengṛa fao ar na ḳosḳe, borong bala oizae. Hoḳol manshor loge shantie boshot ḳora ar pak-pakiza oia solar lagi kiali o, ila na solle ḳeu malikor doroshon faitae nae. Hushiar roio, zate ḳeu Allar rohomot taki bad na foṛo. Kial rakio, tumrar mazor ḳeu zanu bishakto titta gasor zoṛor laḳan bar oia na satae, ar bout manshore nafaḳ na banae. Hozrot Iakubor bai Ishʼor laḳan kunu be-foti naforman foyda na oy. Ishe to ḳali eḳ oḳtor ḳanir lagi, tar nizor mouroshi malikana besilaise. Tumrar to zana-u ase, zudio bade he sokur fani falaia ḳandi kandi dua mangisil, oile touba ḳorar shuzug ar he faise na. Tumra nichchoy ila kunu faṛor ḳandat aiso na, ze faṛo atdi soa zae. Hou Tur faṛor zalail aguin, goin andair, hil-tufan, shingar aoaz, ba zure zure mat-ḳotar kunu aoazor gese-o aiso na. Zure zure mator ou aoaz zera hunchil, tara minot ḳori koisil, zate tarar loge ar batchit ḳora na oy. Tara Allar ou hukum shoito farsil na, Allae ḳoisla, “Zudi kunu foshue-o i faṛo soy, te tare-o fattor maria marilite oibo.” Ou shomoy zera Mabudor didar deḳsil, tara oto ḍor ḍoraisil zen, shoyong Musa nobie ḳoila, “Ḍoror suṭe ami kafiram.” Oile tumra to fobitro Sion faṛ ar zinda Allar ṭaunor ḳasat aiso, azar azar firistae zeḳano kushi-bashir mahfil ḳorra, hono aiso. I ṭaun oilogi, behesti Zeruzalem. Behesti katat zerar nam leḳa oigese, boṛo fuar laḳan zerare ijjot deoa oise, erar banail zomator daro aiso. Zein tamam manshor bisar ḳoroin, hou Allar ḳasat aiso. Ze forezgar oḳol furafur kamil oigesoin, erar ruhur mozliso aiso. Ze Isa Allar loge milonor noya usillar zimmadar, hou Isar gese aiso. Habilor lou taki aro mortuba-ala ze lou, tumra siṭail hou lour ḳasat aiso. Musa nobie Allai hushiarir ḳota duniar manshore zananir bade zera tan hushiarire elami korsil, era zebla rehai faisoin na, te zein behesto takia amrare hushiar ḳorra, tan hushiarire elami korle to ekkebare nichchit-u amra kunu rehai faitam nae. Erlagi kial rakio, zein hou batchit ḳorsoin, tan hukumre elami korio na. Hi amolo Alla Pakor mukor aoaze hara duniare ḳafaisil, oile oḳon tain ou oada ḳorsoin, “Ami dusrabar ḳali i duniare nae, asmanre-o ḳafaimu.” Te “dusrabar” ou shobdo taki buza zae zen, zeta zinish oḳol laṛa-saṛa ḳorail zae, mani zeta foyda ḳora oise, itare bad deoa oizibo, ar zetare laṛa-saṛa ḳora zae na, ota ḳaim roy. Buzra ni, ze bashshaire laṛa-saṛa ḳora zae na, amra to hou bashshai fairam, erlagi aukka, amra Allar dorbaro shukria zanai. Alla Pak ze nomunae kushi oin, ou nomunae amra tan ebadot ḳortam farmu, tanre ḍoraia, tazim ḳoria ebadot ḳormu. Ḳaron amrar Alla to binash ḳorra agunir laḳan. Tumra eḳe-oinnore afon bair laḳan hamesha maya ḳorio. Memandari kora faurio na. Zano ni, kunu kunu zone na sinia Allar firistar-o memandari korsoin. Zel ḳanat zeta manush bondi asoin, nizore-o ola bondi mono ḳoria tarare shaijjo ḳorio, ar zerar ufre zulum-mosibot ḳora or, nize ou mosiboto foṛso mono ḳoria, tarare kial ḳorio. Hoḳole-u bia-shadire ijjot ḳorio. Zamai-bour shomporkore fak-fobitro rakio. Mono rakio, Allae ku-nozori, zinakur ar luchcha oḳlor bisar ḳorba. Duniabi don-samanar lalos taki horia roio. Tumrar zeta ase, ota loia-u kushi roio. Allae bataisoin, Ami kunumonte-u tumare saṛtam nae, kunu halote-u tumare falaitam nae. Erlagi-u amra himmot ḳoria ḳoitam fariar, Mabud amar shohae asoin, ami ḍoraitam nae. Manshe amar kita ḳorto? Huno, ze buzurg oḳole tumrare Allar kalam talim disoin, tarar ḳota iad ḳorio. Tarar zindegir halotor ḳota balamonte sinta ḳoria, tumra-o tarar laḳan imane mozbut o. Isa al-Mosi gotoḳail zela asla, aiz-o ola asoin, ar hor-hamesha-u ola roiba. Nanan nomunar noya noya talime zanu tumrare be-fote na ney, ḳana-finar kuṭinaṭi bishoy na tukaia, borong Allar rohomotor ufre ḳaim ro. Ila kuṭinaṭi niomor ufre zera borosha ḳorto, itae to tarar kunu lab oise na. Amrar to ekḳan kurbani kana ase, ikanor kunta ḳaibar eḳtiar Musa nobir ebadot-tambur imam oḳlor nai. Gunar mafir lagi zobo ḳora foshur lou loia, Boni Israilor fordan imam oḳol ebadot ḳanar Herem Shorifo hamain, oile ou foshur aḍḍi-mangsho hoḳolta Boni Israilor kempor bare nia zalail oy. Ou laḳan Hozrot Isa-o Zeruzalem ṭaunor bare gia zulum-ḳoshṭo shoijjo ḳoria mout ḳobul ḳorla, zate tan nizor lour usillae manshore guna taki fak-saf ḳorta faroin. Oḳon aukka, amra-o tan bodnamre nizor ḳando loia kempor bare tan ḳandat zaigi. Ḳaron i duniat amrar lagi stayi kunu ṭaun nai, amra ḳali hou ṭaunor tallash ḳorram, ze ṭaunor didar bade faimu. Te oḳon amra al-Mosir zoriae hamesha Allar dorbaro zikir-azkar kurbani kori, mani duio ṭuṭe tan namor gunogan gai. Nek kam ḳora ar obabi manshore dan-ḳoyrat bilani faurio na, ḳaron ou laḳan kurbanie Alla Pak kushi oin. Tumrar murobbi oḳlor hukum mania tarar gese mata nuaia roio, Allar dorbaro hishab deoa lagbo ḳori tara hamesha tumrar zanor faradar oia ḳam ḳorra. Oḳon tara zate kushi mone ita ḳoroin, erlagi tumra baiddo roio. Tara zudi mono duk faia tumrar lagi ḳam ḳoroin, te tumrar balai oito nae. Amrar lagi dua ḳorio. Amra to zani, amrar bibeḳ saf-sofa ase, hokkol befare hok fote soltam sai. Ami kas ḳori tumrar gese ou dua sairam, zate zoldi kori ami hirbar tumrar loge mulaḳat ḳortam fari. Allar loge amrar milon, hor-hameshakur usilla, furafur ḳaim ḳorar lagia, amrar malik Hozrot Isa, nizor lou bilai dia, meṛa falor mohan raḳal bonisoin. Hozrot Isar moutor bade, shanti deura Alla Pake, murda taki tanre zinda ḳorisoin. Hoḳol nek kamor tofik deukka, tan morzi zugaia solar, ar tain zeta fosond ḳoroin, dilo otar eshki deukka, Isa al-Mosir zoriae, en mohima hor-hamesha rouk, Amin. Bai oḳol, tumrar gese minot ḳorram, tumra biroḳto na oia i nosiot huno, ami kub shoṭḳaṭe leḳlam. Huno, amrar bai Timotie ḳalas faisoin, tain zudi shomoy moto amar ono ain, te ami tumrar gese aoar shomoy tane loge loia aimu. Tumra nizor murobbi oḳolre, ar pak bonda oḳolre amar salam zanaio. Itali deshor manshe tumrare salam zanaira. Tumra hoḳlor ufre Allar rohomot ḳaim rouk. Amin. Ami Iakub, Alla ar Hozrot Isa al-Mosir gulam, duniar nanan desho sitrail Boni Israilor baro gusṭir manshore salam zanairam. O amar bai oḳol, tumra zebla nanan zator forikkar maze foṛo, i shomoy ita kub kushir befar mono ḳorio. Zano to, imanor forikkae tumrare tir taḳar ḳemota baṛai dey. Ar i tir taḳar ḳemotare ḳamo lagao, zate tumra kamil ar ḳaṭi oia tumrar kunu ḳomti na roy. Tumrar maze ḳeuror zudi aḳolor ḳomti taḳe, te he zanu Allar gese sae, teu faibo. Tain kunu bezari bab na ania hokkolre-u behishab dan ḳoroin, ḳali ate firain na. Oile he mono kunu shondoy na rakia ekin ḳoria saite oibo. Ze shondoy ḳore he to doriar ḍeur laḳan, tare aula-zaula batashe uṛaia loia zae. Ilaḳan manshe zanu Mabudor ges tone kunta faoar asha na ḳore, he to du-dila manush, tar hoḳol ḳamo-u oshanti. Ze imandar bai gorib, tare boṛo banaisoin ḳoria he nizore mubarok mono ḳorouk. Ar ze doni, tare huru banaisoin ḳoria he-o nizore mubarok mono ḳorouk, ḳaron he gash fulor laḳan zoria foṛizibo. Shuruz zebla uṭe, i shomoy tar teze gash hukai zae, ful zoria foṛizae, ar tar shundor nosṭo oizae. Doni manush-o olaḳan tar bestotar maze zoria foṛizibo. Mubarok hou zon, ze zon forikkar shomoy mozbut roy. Forikkat kamiab oile joyor mala hishabe he aḳer faibo. Ou mala tan ashik oḳolre diba ḳori shoyong Alla Pake oada ḳorsoin. Kunu manshe gunar bae eshki oia zanu na ḳoy, Allae amare gunar fote ṭanira. Kunu naformanir fote-u Allare ṭana zae na, tain-o ḳeurore i fote nein na. Oile manshor nizor dile-u ṭania nia tare fando falae. Bade dilor bod niot fura oile gunar bis feṭo loy, ar guna boṛo oia moutor zonom dey. O amar mayar bai oḳol, tumra ou laḳan bul ḳorio na. Hokkol bala ar nikut dan to behest tone lamia ae, zein asmani nur oḳol foyda ḳorsoin, hou Allar ges tone ae. Ou nur oḳol sebar laḳan ḍulaḍuli korle-o, tain ila ḳoroin na. Tain nizor kushie amrare hok kalam dia tan bonda banaisoin, amra zanu ashraful moḳlukat, shrisṭir shera manush oi. O amar mayar bai oḳol, mono rakio, tumra age huno bade mato, zoldi gusa ḳorio na. Manshe gusa ḳorle Allar dorbaro kunu bala ḳam ḳorto fare na. Gotike tumra hoḳol zator haram ar naformani ḳam bad dilao. Tumrar dilor maze ze kalam rua oise, norom dile ou kalam ḳobul ḳoro. Tumrare toranir ḳemota i kalamor ase. Allar kalam ḳali hunle-u oito nae, olaḳan amol-o ḳoro. Kalam hunia zudi amol na ḳoro, te tumra nizore ṭogirae. Ḳeu zudi i kalam hunia amol na ḳore, te he ou manshor laḳan, ze aynat nizor sera dekia zaegi, bade horia gia faurilae tar sera kilaḳan. Oile ze ḳaṭi ain manshore azad ḳore, ar ou ainor bae nozor rakia zera hamesha ziail roy, ita hunia hari faure na, amol ḳore, tara hoḳol ḳamo mubarok oibo. Ze manshe nizore forezgar mono ḳore, oile nizor zifrare shamlae na, he to tar nizore ṭoge, tar hokkol ebadoti-u misa. Etim oḳolre ar ṛaṛi beṭintore bifodor shomoy shae-shaijjo ḳora, erloge duniar hoḳol naformani taki nizore fak-saf raḳa-u oilo, Allar nozoro ḳaṭi ar sohi ebadoti. O amar bai oḳol, tumra zebla amrar kudroti malik Hozrot Isa al-Mosir ufre iman ancho, te hoḳolre eḳ nozore dekio. Doro, eḳzon manush tumrar mozlis ḳanat shundor ḳafoṛ-sufoṛ findia ato shunar angṭi lagaia ailo, ar moyla ḳafoṛ findia eḳzon gorib manush-o ailo. Tumra zudi shundor ḳafoṛ-ala manshor mukedi saia ḳo, “Afne ou bala zagaḳano boukka,” ar gorib beṭare ḳo, “Oba, tui hono uba, arnae amar faor ḳandat bo,” te tumra nizor maze har-for ḳorrae na ni, ar shoytani niote bisar ḳorrae na ni? O amar mayar bai oḳol, huno. I duniar gorib manshore Allae fosond ḳorsoin na ni imane doni bananir lagi? Allar ashik manshore Allae ze bashshai deoar oada ḳorsla, i bashshair malik oar lagi tain gorib oḳolre fosond ḳorsoin na ni? Oile tumra to i gorib oḳolre elami korso. Doni oḳole kita tumrare zulum ḳore na ni? Tara-u to tumrare ṭania-sesṛaia bisaro loia zae. Ze mohan namor ḳatire tumrare ḍaḳa oy, tara kita i namre loia kufuri korer na ni? Pak Kitabo leḳa ase, “Tumar ari-forire nizor laḳan maya ḳorio,” tumra zudi hasau Allar bashshair ou hukum amol ḳoro, te to bala-u ḳorrae. Oile tumra zudi hoḳolre eḳ nozore na deḳo, te to guna ḳorrae, ar shoriotor borkelaf ḳoria dushi oirae. Ḳeu zudi shoriotor hokkol hukum amol ḳoria-o ḳali eḳ hukum bange, te dora oibo he asta shoriot-u omainno ḳorse. Ḳaron zein ḳoisoin, “Zina ḳorio na,” tain-u hirbar ḳoisoin, “Kun ḳorio na.” Te tumi zudi zina na ḳoria kun ḳoro, tebou to shoriotor borkelaf ḳorso. Ze aine manshore azad ḳore, ou ain dia-u tumrar bisar oibo. Gotike buzi-huni mat mato ar ḳam ḳoro. Mono rakio, ze manshe doya ḳorse na, bisaror shomoy tare-o doya ḳora oito nae. Hashoror moydano doyagir oḳole-u doya faibo. O amar bai oḳol, ḳeu zudi koy amar iman ase, oile amol na ḳore, te fayda kita oibo? I imane tare basaito farbo ni? Mono ḳoro, tumrar kunu bai ba boinor goro ḳani nai, findar ḳafoṛ-o nai. I halote zudi tare ḳo, “Tumar balai ouk, ḳaia-findia shuke ro,” oile tar nidan horanir lagi kunu ufae na ḳoro, te tar kunu fayda oilo ni? Olaḳan ze imanor loge amol nai, i iman to murda. Mono ḳoro ḳeu ḳoilo, “Tumar iman ase ar amar amol ase.” Ṭik ase, tumar amol saṛa iman amare deḳao, ar ami tumare amar amolor maz dia iman deḳaimu. Tumi ekin ḳorso Alla eḳ, kub bala ḳota. Bute-o to ola ekin ḳore, ar Allar ḍore ḳafe. O be-aḳol, tumare ami kila buzaitam, amol saṛa iman to kunu ḳamor nae? Amrar baf Ibrahime zebla tan fua Isʼhakre kurbani deoar lagi kurbanir zagat nisla, i shomoy kita tan i ḳamor lagi tanre forezgar hishabe ḳobul ḳora oise na ni? Tumi to deḳso, tan iman ar amol eḳloge ḳam ḳorsil, ar amolor lagi-u iman kamiab oilo. Olaḳan Pak Kitabor ayat fura oilo, “Ibrahime Allar oadae iman anae, Allae tanre dindar ḳoia ḳobul ḳorla.” Tan ufadi dila Allar dust. Tumra to deḳlae, amolor lagi manshore forezgar hishabe ḳobul ḳora oy, ḳali imanor lagi nae. Ou laḳan hou silan beṭi Rahbare-o tair amolor lagi forezgar hishabe ḳobul ḳora oisil na ni? Tai to hou duio guiare lukaia rakia, dusra fotedi sohi-salamote bar ḳori disil. Ou halote amra buztam fari, ruhu saṛa ḳaya murda, amol saṛa iman-o murda. O amar bai oḳol, tumra hoḳol ustad oio na. Tumra to zano, amra ustad gotike amrar bisar aro ḳoṭin oibo. Amra hoḳol-u nanan nomunae be-foti oi. Ḳeu zudi zoban dia kunu guna na ḳore, te he kamil manush, tar asta shoril-u shamlaito farbo. Guṛare shamlanir lagi muko lagam lagaia amra zebae ichcha obae nitam fari. Ar ḳaṛalie-o huru ek kaṛal doria boṛo boṛo zazre tufani batash ṭelia, zebae kushi obae nito fare. Oula zifra kub huru oile-o bout boṛo boṛo mat mate. Ar shamainno aguine kila boṛo zongol zalaito fare! Zifra-o ola eḳ aguin. Amrar shorilor maze zifra eḳṭa ḳarafir banḍar, Zahannamor aguine zifrare zalae ar zifrae asta shorilre zalaia ḳolonki banaia, amrar zindegit aguin dorae. Manshe zudio hokkol zator foshu-faki, haf-bichchu ar doriar boṛo boṛo masre shamlaise ar oḳono shamlae, oile-o huru-muru zifrare ḳeu shamlaito fare na. Ikan kub sonchol ar ḳaraf, bezuita bishe bora. Eḳ zifra dia-u amrar gaibi baf Allar tarif ḳori, hirbar ou zifra dia-u Allar surote foyda ḳora manshore boddua dei. Eḳ muk taki-u tarif ar boddua bar oia ae. Bai oḳol, ita to ṭik nae. Zornar muk taki eḳloge miṭa ar titta fani bar oia ae ni? Bai oḳol, am gaso kita jam dore ni? Ar angur gaso am dore ni? Oula titta fanir maze miṭa fani mile na. Tumrar maze aḳol-hekmot ala ḳeu ase ni? Taḳle he bala amol-ḳaislote norom oia ota deḳauk. Oile tumrar dil zudi ingshae titta oia shartoe bora taḳe, te tumra boṛai koria hasare misa banaio na. Ilaḳan hekmot behest tone ae na, ita dunia, ḳaraf nofs, ar Iblis taki-u ae. Ḳaron ze zagat ingsha ar shartofori taḳe, i zagat fitna-fosad ar hoḳol zator naformani taḳe. Oile behest taki ze hekmot ae, ikṭa oilo ḳaṭi. Ikṭa shantie bora, soborala ar norom mizazi, doya ar hok kame bora, tar maze kunu har-for ba bonḍami nai. Zara shomazo shantir bis siṭae, tarar fol oilo forezgar zindegi. Tumrar maze kuai tone mair-dorbar ar ḳaijja foyda oy? Tumrar shukor ḳaishe shorilor ze rifue laṛai kore, ogu taki-u ae. Zeta tumrar nae, ota tumra mone mone sao, erlagi tumra kun ḳoro. Ar lalos ḳoro oile fao na, erdae tumra mair-dorbar ar ḳaijja ḳoro. Tumra to sao na, erdae fao na. Ar saile-o fao na, ḳaron tumra to bod niote sao, zela tumrar monor ḳaish fura oy. O beiman oḳol, tumra kita zano na ni, duniar loge dustir mani Allar loge dushmoni? Ze duniar mayae buṛi zae, he Allar dushmon oizae. “Amrar bitre ze ruhu deoa oise, ikṭae amrare ingshar bae ṭane.” Pak Kitabor ou talim kunu emne batail oise ni? Oile ita taki amrar ufre Allar rohomot aro beshi. Erlagi kitabor maze leḳa ase, “Boṛai korrar ufre Allae at tuloin, oile norom manshore rohom ḳoroin.” Gotike tumra Allar zimmae roia Shoytanor mukabila ḳoro, teu he tumrar ges tone bagibo. Allar bae sao, teu tain-o tumrar bae saiba. O gunagar oḳol, tumra nizore fak-saf ḳoro, O du-dila manush, tumrar dil ḳaṭi koro. Duke ḳator oia ahazari koro, ashir bodla ḳando, kushir bodla mattom ḳoro. Mabudor dorbaro noto o, teu tain tumrare usa ḳorba. O bai oḳol, tumra eḳzone aroḳzonor gibot gaio na. Ḳeu zudi bair bodnam gae ba tar bisar ḳore, er mani he shoriotor bodnam ḳorlo ar shoriotor bisar ḳorlo. Tumi zudi shoriotor bisar ḳoro, te to shoriot manrae na, ulṭa tar bisar ḳorat ḳaṛa oiso. Shoriot ar bisaror ḳemota ḳali eḳzonor ato-u ase. Tain-u basain, tain-u maroin. Te ari-forir bisar ḳorra tumi aroḳzon ḳe? Huno, tumra zara ḳo, aiz ba ḳail amra omuk ṭauno zaimugi, gia hono eḳ boros roia ḳay-ḳarbar ḳoria lab ḳormu. Oile ḳailkur ḳobor to tumra zano na. Tumrar zindegi-u ba kita? Tumrar zindegi to ḳosu fatar fani, tuṛa shomoy taḳe, bade foṛizae. Erdae ila na ḳoia ola ḳo, “Inshalla, amra hayati faimu, ar ota-hota ḳormu.” Oile tumra to boṛai koria fuṭani deḳairae. Ilaḳan fuṭani bala nae. Ḳeu zudi zania-o bala ḳam na ḳore, te he gunar bagi oibo. O doni oḳol, huno, tumrar ufre ze mosibot ar, itar lagi tumra ḳando ar ahazari koro. Tumrar don-shompod binash oigese, tumrar ḳafoṛ-sufoṛ undure ḳaṭilise. Tumrar shuna-rufat zongare dorilise, i zongare tumrar bifokke shakki dibo, ar agunir laḳan tumrar gust ḳaibo. Ita to kiamotor lagi tumra dola ḳori toiso. Huno, tumrar dan daora ḳamlar ze beton aṭḳaiso, ou betone oḳon sillaia ahazari korer. I kamlaintor ahazari Alla Rabbul Alaminor ḳano gia azise. Duniar bukut bilashita ar rong-tamshar maze tumra din ḳaṭaiso, duzoḳor kuraḳ bonar lagi nizore kub fulfula banaiso. Tumra ni-oforadire dushi shaibosto ḳoria kun ḳorso, oile era kunu protibad ḳorse na. Gotike O amar mayar bai oḳol, amrar malike toshrif anar ag forzonto tumra ḳoshṭo ḳoria tuṛa sobor ḳoro. Tumra to deḳso, giroste bala foshol faoar lagi megor ashae kila sobor ḳori boi roy. Tumra-o ola sobor ḳoro, ostir oio na, ḳaron malike kub zoldi-u toshrif anra. O bai oḳol, tumra zate Allar nozoro dushi na bono, erlagi tumra ḳali eḳzone aroḳzonor kut tukanit roio na. Huno, bisar ḳorar lagi to Alla Pak amrar samne aia ubai roisoin. O mayar bai oḳol, ze nobi-rosul oḳole Mabudor name toblig korsla, tarar ḳoshṭo ar soboror ḳota sinta ḳori deḳo. Tara to ḳoshṭo faia-o tir roisoin, erlagi amra tarar gunogan gai. Tumra to Aiyub nobir soboror ḳota bala ḳori zano, ar eoḳan zano, Allae bade tanre kila rohom ḳorsla. Alla to doya-mayar shagor. O amar bai oḳol, amar asol ḳota oilo, tumra kunuzat ḳosom ḳorio na. Asmanor name-o na, zominor name-o na, ola kunu name-u ḳosom ḳorio na. Er bodla tumrar oy ḳan oy, ar na ḳan na ouk, zate tumra bisaror daṛo na foṛo. Tumrar maze ḳeu mosiboto taḳle he dua ḳorouk. Ḳeu shuke taḳle hamd-ḳaoali gauk. Ḳeuror bemar oile he zomator murobbi oḳolre daot deuk, tara aia Allar nam loia tar matat tel dia dua ḳoroukka. Teu imanor sate dua ḳorar ḳatire Allae i bemarire shifa ḳorba. He zudi guna-o ḳoria taḳe, te tar guna maf ḳora oibo. Erlagi tumra eḳzone aroḳzonor gese zarzir guna shikar ḳoro, ar eḳe-oinnor lagi dua ḳoro, zate bala oitae faro. Forezgar oḳlor munazat asanoḳ bolala. Ilias nobi amrar laḳan-u roḳtoe-mangshoe manush asla. Tain dile-zane dua ḳorla meg na oar lagi, hasau shaṛe tin boros kunu meg oilo na. Bade tain megor lagi dua ḳorla, teu meg oilo, ar zomino foshol folilo. O amar bai oḳol, tumrar maze ḳeu zudi be-foti oizae, ar ḳeu tare firaia ane, te zanio, ze manshe kunu gunagarre be-fot tone firaia ane, he ou gunagaror zan basae ar tar guna beshi oile-o mafi fae. Allar fosond ḳora zoto bonda oḳol Fonto, Galatia, Kappadokia, Asiya ar Bitunia desho sitria bin-deshi hishabe boshot ḳorra, tarar gese ami al-Mosir sahabi Fitore ou sohifaḳan leḳram. Gaibi baf Allae tan munshae tumrare fosond ḳorsoin ar Pak Ruhe fobitro ḳorsoin. Er uddesho oilo, tumra zate Isa al-Mosir baiddo o ar tan lou siṭaia tumrare fak-saf ḳora oy. Allae tumrare besh ḳori rohomot ar shanti dan ḳoroukka. Hou Alla Pakor tarif ouk, zein amrar Malik Isa al-Mosir Mabud ar gaibi baf. Tain Isa al-Mosire mora taki zinda ḳoria, tan moha doyae amrare noya zonom dan ḳorsoin, ete amra eḳ zinda asha faisi. Mani amra ola eḳ donor asha faisi, ze don kunudin nosṭo oito nae, hara zibon noya taḳbo, ermaze ḳaraf kunta taḳto nae. Nazator i don tumrar lagi behesto raḳa oise. Tumra furafur nazat na faoa forzonto, Allai shoktie imanor mazdi tumrare hefazote raḳa oise. Ou nazat ṭik kora oise, aḳerator shomoy zair oar lagi. Zudio ḳoy dinor lagi nanan zat forikkar mazdi tumra oḳon duk-koshṭo ḳorrae, ta-o ou nazator ashae to tumrar mon kushie bora. Ou forikka oḳol soler, tumra zen imane ḳaṭi oḳan forman ḳorar lagi. Ar Isa al-Mosir zair oar shomoy, tumra zanu tarif, gourob ar shomman fao. Ze shuna koy oizae, ou shunare-o agunit fuṛia zasai kora oy. Ar tumrar imanor dam to ou shunar saite-o bout beshi, erlagi ou forikka soler. Zudio al-Mosire tumra deḳso na, tebou tumra tanre mohobbot ḳorrae. Ar oḳono tanre souke na deḳle-o, kushi oia tanre ekin ḳorrae, i kushi to bashae ḳoa zae na, ita ḳali behesti kushi. Ḳaron tumrar imanor aḳeri fol fairae, ikṭa oilo tumrar zanor furafur nazat. Ze dua tumrar faoar ḳota, i befare bout age nobi oḳole bataisoin. Tara ou nazator befar zanar lagi bout kuz-ḳobor ḳorsoin. Tarar dilo al-Mosir ruhe age-u shakki dia ḳoisoin, tanre ḳoshṭo ḳorte oibo ar bade tain mohima faiba. Nobi oḳole zanta saisla, al-Mosir ou ruhe kun shomoykur ar kun halotor ḳota tarare zanaira. Oile Allae tarare deḳaia disoin, tara zeta bataira ita dia tarar nizor kezmot na ḳoria, tumrar kezmot ḳorra. Asman taki faṭail Pak Ruhu dia, zera tumrar gese al-Mosir befare kush-ḳobri toblig korsoin, tara tumrare nobi oḳlor ḳota-u zanaisoin. Firista oḳole-o ita befar zanar lagi kiali. Erlagi tumrar monre hozag koro ar nizore shamlaia raḳo. Al-Mosi zair oar bade ze rohomot tumra faibae, ou rohomoti nazat faoar lagi furafur asha loia tumra bar sao. Tumrar agor obuz halotor ḳaraf ḳam-ḳaz mafik zindegi kaṭaio na, borong Allar hukum manra aolad hishabe din ḳaṭao. Zein tumrare daot disoin, tain zela fobitro, tumra-o oula hoḳol sola-firat fobitro o. Pak Kitabo Allae ḳoisoin, “Ami fobitro, erlagi tumra-o fobitro o.” Allae forteḳ manshor amol-nama dekia bisar ḳoroin, ḳeur mukor bae saia bisar ḳoroin na. Erlagi tanre zudi tumra gaibi baf ḍaḳo, te zotodin tumra ou duniat musafir halote taḳbae, otodin tumra tanre ḍoraia zindegi kaṭao. Tumra zano, tumrar baf-dada taki faoa beḳama sal-cholonor fot taki, koy oar zuka shuna-rufar laḳan kunuta dia tumrare azad ḳora oise na. Borong tumrare azad ḳora oise, al-Mosir moha dami lou dia, nikut-niskolonko meṛa-baichchar lou dia. Dunia foyda oar age-u Allae tanre ṭik kori raḳsoin, oile ou hesh-mesh shomoy tain tumrar lagi-u zair oisoin. Allae enre mora taki zinda ḳori tulia mohima dan ḳorsoin ar tan mazdi tumra Allar ufre iman ancho. Erlagi-u tumrar iman ar asha Allar ufre-u ase. Oḳon hok-halali mania, tumrar dilre fak-saf ḳorso ar imandar bai oḳol zebla tumrar gese mayar manush oisoin, te ami koiram, tumra eḳe-oinnore dile-zane maya ḳoro. Ze bis nosṭo oizae, tumrar zonom to ila bisor nae. Borong zeta nosṭo oy na, ota taki-u tumrar noya zonom oise. Ou bis oilo Allar siroḳalin zinda kalam. Allar kalamo leḳa ase, Hoḳol manush-u gashor laḳan, gash fulor laḳan tara shundor; gash hukai zae, ful-o zori zae, ḳali Allar kalam roy siroḳal. Ar ou kalam-u oilo kush-ḳobri, zeta tumrar gese toblig kora oise. Erlagi oinno manshor ḳeti korar hoḳol zat ku-motlob, sol-soturi, bonḍami, ingsha, ar hoḳol zat nindar mat-ḳota tumrar dil taki horai deo. Geda huruttaintor dudor fiasor laḳan tumra ḳaṭi ruhani dudor kiali o, ar ou dud ḳaia ḳaia zanu tumra boṛo oia nazat fao. Malik Isar meherbanir moza to tumra faiso-u. Te tumra tan gese ao. Tain-u oila agor nobi oḳlor ḳoa hou “zinda fattor”, ze fattorre manshe dam dise na, oile Allar gese ikṭa moha dami ar fosondor fattor. Ar tumra tan torika ḳobul ḳorae, tumrare-o zinda fattoror laḳan Alla Pak roibar fobitro Kaba gor banani or. Erlagi Allai imam sab hishabe tumrare alada ḳori raḳa oise, zate tumra oula ruhani kurbani deo, zeta Isa al-Mosir ḳatire Allae ḳobul ḳoroin. Allar kalamo ase: Huno, ami eḳṭa moha dami fattor fosond ḳorsi; ikṭare Zeruzalemo ian kuṭi hishabe gaṛisi. Ze zone tan ufre iman ane, he kunumonte-u shorminda oito nae. Ar tumra iman anae, tumrar gese hou fattor moha dami oigese. Oile zera iman anche na, tarar belae kitabor ou ḳota-u ḳaṭe: Raz mestoir oḳole ze fattorre beḳama ḳoia falai disil, oḳṭa dia-u goror ian kuṭi oilo. Ar, Ikṭa oula fattor, ze fattoro manshe usṭa ḳaibo, tarar asaṛ ḳaia foṛar ḳaron oibo. Manshe Allar kalam mane na, gotike-u usṭa ḳae. Ita to tarar ḳofali dosha. Oile tumra to ila nae, tumra oilae Allar fosond ḳora ḳandan, bashshai imamor dol, fobitro zati, tan afon proza. Tain tumrare andair taki nizor nuror foro daot ḳori anchoin, tan gunogan ḳorar lagi. Age to tumra Allar proza aslae na, oile oḳon oiso. Age tan maya-mohobbot-o faiso na, oḳon faiso. Bai oḳol, i duniat tumra musafir hishabe ami tumrare minot ḳori koiram, tumra shorilor bod ḳaish taki basia ro, itae to tumrar ruhur bifokke zuddo ḳore. Zera Allare sine na, tarar maze tumra hok fote solo. Teu tara tumrare dushi koia ninda ḳorle-o, tumrar hoḳol bala ḳam dekia kiamotor din Allar gourob ḳorbo. Tumra Malik Isar ḳatire manshor banail shashon-bebosta manio. Deshor razare manio, ein to deshor fordan. Tan montri ar hakimre manio, oforadir shaza ar bala zonre furuskar dibar lagi tain erare raḳsoin. Allar munsha oilo, tumra bala ḳam ḳoria buṛboḳ manshor beḳama mat-ḳota bond ḳoro. Tumra nichchoy shadin, ta-o naformanire guria raḳar lagi i shadinota bebohar ḳorio na. Borong nizore Allar gulam mono ḳoro. Hoḳol manshore ijjot ḳoro, tumrar imandar bai oḳolre mohobbot ḳoro, Allare ḍorao ar deshor razare ijjot deo. Ar baṛir gulam oḳolre ḳoiram, tumra munibre ijjot deo ar tarar ḳotat ro. Ze munib bala ar doyalu, ḳali zen tarar ḳotat taḳtae, ila kunta nae. Oile zera ḳoṭu bebohar ḳore, tarar ḳotat-o ro. Ola ḳeu zudi ḳamoḳa duk-koshṭo fae ar Allare mono rakia ita shoijjo ḳorilae, te furuskar faibo. Oboshsho oforador lagi mair ḳaia tumra zudi shoijjo ḳoro, te tarif ḳorar kunta ase ni? Oile bala ḳamor lagi tumra zudi koshṭo faia-o shoijjo ḳorilao, te ita Allar dorbaro tarifor laḳ, Allae tumrare otar lagi-u daot disoin. Al-Mosie-o ḳoshṭo shoijjo ḳoria nomuna deḳaisoin, te tumra-o tan faor tale tale solo. Tain kunu guna ḳorsoin na, tan muko asil na kunu sol-soturi. Manshe tanre gali dile-o, tain firia gali disoin na. Ḳoshṭor shomoy er bodla loiba ḳoia ḍor-boy-o deḳaisoin na, borong zein hok bisar ḳoroin tan ato nizore shofi disoin. Tain nizor shoril dia amrar gunar buza boisoin gasor ṭukrar solibo, zate gunar babote amra moria hari, fak-forezgarie zinda roi. Tan shorilor ḳaṭa-sirae tumrar shifa oise. Age to tumra be-fote zaoa meṛar laḳan aslae, oile ze raḳale tumrar dilor deḳa-huna ḳoroin, oḳon tan gese-u firia aiso. Olaḳan, zamair goror hoḳol bouaintore ḳoiram, tumra zarzir zamair ḳotae solo. Zudio kunu kunu zamaie Allar kalamre dam dey na, ta-o tumrar sal-cholone zanu tarare al-Mosir bae ṭania ane. Teu i befare tumrar ekḳan ḳota-o mata lagto nae. Tumrar fobitro zindegir halot dekia, ar Allar ḍor-ḳofe sola dekia tara nize-u aibo. Nanan nomunae hazi-faṛi sulor kufa bandia, shuna-rufar goyna lagaia, ar dami dami kafoṛ findia nizore hazanit roio na. Borong ze shundor kunudin nosṭo oito nae, hou nomunae sola-fira ar shantir ḳaislot dia nizor dilre hazao. Allar nozoro ota-u to moha dami. Ṭik olaḳan agor zomanar allaoala beṭinte, Allar ufre borosha ḳoria zamair baiddo roia nizore hazaita. Hozrot Ibrahimor bibi Saera-o tan zamair baiddo asla ar tanre munib ḳoia ḍakita. Tumra-o manshore na ḍoraia zudi nek kam ḳoro, te oḳṭa-u forman oibo, tumra Bibi Saerar zoiggo aolad. Ar zamai oḳolre-o ḳoiram, tumra bibeḳ-buddi kaṭaia bour loge solo. Tara-o to tumrar logor ḳomzur manush ar Allar rohomotor dan hishabe tara-o tumrar loge zindegi faibo. Erlagi tarare ijjot deo, zate Allar dorbaro tumrar munazat beḳama na zae. Heshe hoḳolre ḳoiram, tumra hoḳol eḳ-dila o, eḳe-oinnor duke duki o, baiaintore maya ḳoro, doyalu ar norom dilor manush o. Oinnayor bodla oinnae ḳorio na, ḳeu gali dile firia gali dio na. Borong tarar lagi dua saio, ola solar lagi-u Allae tumrare daot disoin, ila ḳorle tumra rohomot faibae. Zela Zobur Shorifo ase, Ze zone shuki zindegi kaṭaito sae ar shudin deḳar asha ḳore, he bad ḳota taki tar zifrare, sol-soturi taki ṭuṭre shamlauk. Bad ḳam taki firia bala ḳam ḳorouk, shantir ashik oia er ḳore ḳore rouk. Forezgaror ufre to Mabudor nozor, tarar dua hunar lagi tan ḳan ḳaṛa, oile bad ḳam ḳorrar ufre, Malik Moular bod nozor. Tumra zudi bala bala ḳamor ashik o, te ḳe tumrar ḳeti korbo? Forezgarir fote solar lagi zudio tumrar ḳoshṭo oy, ta-o tumra mubarok. Ar tumrare zetae ḍor deḳain itare ḍoraio na, ostir oio na, borong al-Mosire nizor dilo malik hishabe ḳobul ḳoro. Tumrar asha-borosha zudi keu zanto sae, te tar zuaf dibar lagi hamesha zuit roio. Oile i zuaf norom shure dio. Tumrar dil saf rakio, Isayi ummot hishabe zera tumrar bala sal-cholonor ninda ḳore, tara zanu shorminda oy. Bod ḳam ḳoria ḳoshṭo faoa taki to, Allar morzi oile nek kam ḳoria ḳoshṭo faoa bout bala. Mono rakio, amrar gunar mafir lagi al-Mosie-o eḳbar ḳoshṭo ḳorsoin, naformanre basanir lagi hou forezgar zone zan disoin, amrare Allar dorbaro fosanir lagi. Shorile tanre mara oisil, oile ruhe zinda ḳora oise. Ar ruhe tain bondi ruhu oḳlor gese gia toblig korsoin. Ou ruhu oḳol to Nuh nobir zomanar obaiddo manshor ruhu. Tan zaz bananir shomoy, Allar lamba soborgarir ḳalo era obaiddo roisoin, ou zazo uṭia ḳali aṭzon manshe gozobi fani taki zan basaisil. I fani oilo al-Mosir name torikabondir eḳṭa nishana, zetae oḳon tumrar zan base. Torikabondie tumrar shorilor moyla saf oy na, ḳali Allar dorbaro saf dilor shae dey. Hozrot Isa al-Mosi mora taki zinda oia uṭae tumrar zan base, tain behesto gesoin ar Alla Pakor ḍain galar toḳto boat asoin. Asmanor firista oḳol, ḳemotar malik oḳol ar raza oḳol tan odine asoin. Al-Mosie nizor shorilo ḳoshṭo shoijjo ḳorsoin ḳori, tumrar dilor babre-o olaḳan ḳoro. Shorilo zar ḳoshṭo oise, he to gunar zalo bondi roise na. Erlagi he zotodin duniat ase, otodin bod ḳaishe na solia ḳali Allai munshae zindegi kaṭae. Allare zera sine na, tarar laḳan tumra-o age zina-bodmaishi, mouz-furti, matlami, hoi-hulla ar zogoinno murtifuza ḳoria din ḳaṭaitae. Oile oḳon tumra tarar loge oia olaḳan beshamal naformani korrae na dekia, tara taijjub bonia tumrar ninda gaira. Ta-o zein zinda ar murda oḳlor bisaror lagi zuit asoin, tara tan gese-u hishab-nikash dite oibo. Erlagi-u murda oḳlor gese-o kush-ḳobri toblig kora oisil, zate manush hishabe tarar shorili bisar oile-o, ruhani zogoto tara Allar laḳan zinda roin. Oḳon to hokkoltar hesh shomoy aichche. Erlagi tumrar monre ṭik koro, nizore shamlaia raḳo, zate munazato kamiab o. Asol ḳota oilo, tumra eḳe-oinnore dil taki mohobbot ḳoro, ḳaron maya-mohobbote bout guna guria raḳe. Kunuzat bitishona na deḳaia, tumra eḳe-oinnor memandari koro. Allar ges taki zein zelaḳan niamot faiso, ou donor ḳaṭi kazanchi hishabe itare eḳe-oinnor kezmoto lagao. Ḳeu zudi toblig koroin, te ou laḳan ḳoroukka zate buza zae, ita Allai buli. Ar zein kezmot ḳoroin, ein Allar deoa bol-shoktie kezmot ḳoroukka, zate hokkoltat-u al-Mosir usillae Allar tarif oy. Tarif ar kudroti ḳemota hor-hamesha tan-u. Amin. Bai oḳol, tumra oḳon zibon-moron forikkat foṛia taijjub oio na, mono ḳorio na ita asanok kunta goṭer. Borong tumra al-Mosir ḳoshṭor bagi oirae ḳori kushi koro, zate tan mohima zair oar shomoy-o tumra amud-furtie kushi-bashi kortae faro. Al-Mosir namor lagi tumra zudi beijjot o, te tumra nek-kofali. Ḳaron Allar mohima-ala Pak Ruhu tumrar ufre ase. Tumrar mazor ḳeu zanu suri, kun ba kunuzat oforadi hishabe, emonki foror ḳame nak golaia ḳoshṭo na ḳorouk. Oile ḳeu zudi Isayi imandar hishabe duk-koshṭo ḳore, te he shorminda na ouk, borong Isayi forisoyor lagi Allar tarif ḳorouk. Bisaror shomoy aichche, ar Allar fosond ḳora bonda oḳolredi-u bisar shuru oibo. Ita zudi amrar maz taki-u shuru oy, te zera Allar kush-ḳobri manche na, tarar dosha kilan oibo? Allar kalamo ase, Allaraia manshor zanor sodma oile, gunagar ar be-dine muk lukaibo kuai? Oile Allar morzie zera duk-koshṭo ḳorer, tara nek kam ḳori kori nizor zanre hou hok-halal foyda ḳorrar ato shofi deuk. Oḳon zomator murobbi oḳolre ḳoiram, ami-o to eḳzon murobbi, ami nizor souke al-Mosir duk-koshṭo deḳsi, ar tan ze mohima zair oibo, ou mohimat-o shorik oimu. Ami minot ḳori koiram, Allai ze meṛar fal tumrar aotae asoin, erar raḳali koro. Tarar imamoti koro, ḳora lagbo ḳori na ḳoria ba duniabi labor ashae na ḳoria, kush dile ḳoro. Allae to ola imamoti-u asha ḳoroin. Tumrar aotae zera ase, erar ufre musoddori korio na, borong falor raḳali koria tarar gese nomuna bono. Teu hou fordan raḳal Isae zebla duniat hirbar toshrif anba, ou shomoy tumra furuskar hishabe ola eḳ joyor mala faibae zeta kunudin binash oito nae. Ou laḳan zuan oḳole-o tumrar murobbire mania solo. Gulamir beshe hoḳole-u eḳe-oinnor kezmot ḳoro, zela Allar kalamo ase, Allae ohonkarir birudde taḳoin, norom dilor manshore rohom ḳoroin. Erlagi Allar ḳemotar samne tumra noto o, teu shomoy moto Allae tumrare usa ḳorba. Allae to tumrare loia-u sinta ḳoroin, erlagi hoḳol sinta-babnar bar tan ufre dilao. Tumra nizore shamlaia raḳo ar hushiar o. Ḳaron tumrar dushmon Iblise gorzon ḳorra bagor laḳan, tumrare ḳailito ḳori kaf doria gurer. Erlagi imane mozbut roia tar mukabila ḳoro. Tumra to zano, duniar hoḳol zagat tumrar imandar baiainte eḳoi laḳan duk-koshṭo ḳorer. Rohmanur rohim Alla Pake tumrare daot disoin al-Mosir loge oia tan sirostayi mohimar bagi oar lagi. Tuṛa ḳoydin duk-koshṭo ḳoria harle, tain nize-u tumrare ṭik-ṭak korba ar tir raḳba, tumrare boloban ḳoria mozbut kuṭir ufre ḳaṛa ḳoraiba. Tan raz-ḳemota hor-hamesha zari rouk. Amin. Ou siṭikan ami Silas mohrir sabredi kub ḳom ḳotae tumrar gese leḳaisi, ami tanre hok-halal bai mono ḳori. Ami sairam Allar ḳas rohomotor ou shakki hunia tumrar shaosh baṛouk, ar tumra ono tir oia ro. Allae tumrar loge zerare fosond ḳorsoin, hou Babil ṭaunor mumin oḳole tumrare salam zanaira, ar amar dormor fua Markuse-o tumrare salam zanaira. Tumra eḳe-oinne mohobbote golagoli korio. Tumra zera al-Mosir afon zon oiso, tumrar ufre shanti nazil ouk. Amin. Ami Saimon-Fitor, Hozrot Isa al-Mosir eḳzon gulam ar sahabi. Tumra zera amrar laḳan, amrar Alla ar toraneala Isa al-Mosir fak-forezgarie eḳoi laḳan moha dami iman hasil ḳorso, ami tumrar gese leḳram. Alla Pak ar amrar malik Hozrot Isare furafur sinar mazdi, tumrar ufre besh ḳori rohomot ar shanti nazil ouk. Zein tan nizor mohima ar gune amrare daot disoin, tanre furafur sinar mazdi tan kudrote amra ola niamot faisi, zate amra forezgar bonia zindegi kaṭai. Tan mohima ar gune amrar loge moha dami ar bout boṛo boṛo oada ḳorsoin, zate tumra duniabi hoḳol bod ḳaish taki basia Allai gunor bagi o. Erdae tumra kub kiali oia, imanor loge nek kaislot, nek kaislotor loge al-Mosire sinar aḳol, i aḳolor loge nizore shamlani, shamlanir loge doijjo ar doijjor loge forezgari, forezgarir loge eḳe-oinne maya, ar eḳe-oinne mayar loge Allai mohobbote baṛo. Tumrar maze zudi ita gunagun taḳe, ar ita boria foṛat roy, te amrar Malik Isa al-Mosire furafur sinaḳan tumrar beḳama-behuda zaito nae. Oile ze zonor maze ita gunagun nai, he to anda, he kunta-u buze na. Ḳaron agor ze guna taki tare fak-saf ḳora oise, ikan he faurilise. Erlagi bai oḳol huno, Allae zen hasau tumrare daot disoin ar fosond ḳorsoin, ita nichchit ḳorar lagi aro beshi kiali o. Ila ḳorle tumra kunu shomoy usṭa ḳaitae nae. Ar amrar malik toraneala Isa al-Mosir hameshakur bashshait tumrare ador ḳori harail oibo. Erlagi, ami hamesha tumrare ota befare mono ḳorai diram, zudio ita tumrar zana ase ar tumrar gese ze hokikot aise, itat tiro aso. Ashole ami mono ḳorram, ami zotodin tambur laḳan ou shorile basia roimu, otodin tumrare ota mono ḳorai dia hozag raḳa usit. Ḳaron ami to ar beshi din ou shorile roitam nae, amrar Malik Isa al-Mosie ikan amare forishkar zanai disoin. Te amar moutor bade-o hamesha zate ota mono raḳtae faro, ami ou menot-o ḳormu. Amrar Malik Isa al-Mosir kudroti shokti ar tan hirbar toshrif anar ḳota zananit gia, amra kunu banail kichcha ḳoisi na. Amra to nizor souke tan mohima deḳsi. Asman taki zalal ar shanor ze aoaz ailo, “Ein-u amar ḳas mayar zon Ibnulla, en ufre ami kub kushi,” ou aoazor mazdi al-Mosie tan gaibi baf Allar ges taki ijjot ar gourob faisoin. Amra zebla tan loge hou fobitro faṛo aslam, ou shomoy nizor ḳane behestor ou gaibi aoaz hunchi. Ar amrar lagi aro boṛo forman oilo, Pak Kitabo nobi oḳole zotota batai gesoin. Andarir maze tumrar souk zelaḳan rushonir bae taḳe, ṭik olaḳan zoto shomoy bian oise na ar tumrar dilo fozoror shuk-tera uṭse na, oto shomoy tumra nobi oḳlor ḳotae kiali o, teu tumrar bala oibo. Ar ḳas ḳori mono rakio, kitabor mazor kunu ḳota nobi oḳlor mongoṛa nae. Ḳaron nobi oḳole tarar ichchamoto kunu ḳota ḳoisoin na, ḳali Pak Ruhur bole Allar deoa buli bataisoin. Mono rakio, Boni Israilor maze zela bonḍo nobi oḳol asla, tumrar maze-o oula bonḍo ustad oḳol taḳba. Tara lukai lukai omon bul talim dibo, ze talime manshore binash ḳore ar ze malike tarare azad ḳorar lagi korid ḳorsoin, ou malikre forzonto tara oshikar ḳorbo. Olaḳan kub zoldi tara nizor ufre binash ḍakia anbo. Tarar deḳa-deki bout manush ḳobisi fote zaibo, tarar lagi-u Isayi hok torikar bodnam oibo. Lub-lalos ḳoria sol-soturir mat matia, nizor labor ashae tara tumrare ḳamo lagaibo. Tarar faona shaza to bout din taki bar sar, tarar binash-o beshi deri nae. Emonki agor firista oḳole zebla guna ḳorsla, ou shomoy Allae tarare rehai disoin na, borong duzoḳor andairor gato falaia tarar bisar ḳorar lagi raḳsoin. Ar tain hou agor duniare-o rehai disoin na, borong ou be-din oḳolre boinnar fanidi marsoin. Oile Nuh nobi ar oinno shatzonre tain basaisoin. Ḳaron Nuh nobie forezgarir ḳota toblig korta. Ar Allae Sadum ar Amura ṭaunre aguin dia zalaia sali koria, onor manshore shaza disla. Ou nomunae tain deḳaisla, be-din oḳlor dosha kilaḳan oy. Ta-o Lut nobire tain basaisoin. Ein to forezgar manush asla, hinor naforman oḳlor beshamal bab dekia tain kub ḳoshṭo faita. Din din tarar aḳam-kuḳam ar ḳota-barta hunta. Shoriotor bifokke tarar naformani dekia, ou forezgar zonor mono kub duk lagto. Firista oḳol shokti ar ḳemotae era taki bout boṛo oile-o, ou batuni shordaror bifokke Mabudor dorbaro bodnam gaia kunu nalish dein na. Be-aḳol zongli zanuar oḳole na buzia zela nizor kushie sole ar dora ḳaia more, ou bonḍo ustad oḳol-o otar laḳan. Tara zeta buze na, otar-o bodnam gae. Erlagi ou zongli zanuaror laḳan tarar binash ase, ḳarafir bodla babot tarar lagi-o ḳarafi ase. Dinor belae-o mouz-furti koria mod ḳaite tarar bala lage. Tara to tumrar ḳanir talor tu ar gu. Tara zebla tumrar loge boia mezbani kae, ou shomoy tara bonḍami korte kub aram fae. Tarar souk zinae bora, gunar ḳam kunu shomoy bond ḳore na. Ostir manshore be-fote ṭania ney. Tarar mon lub-lalosor ustad. Iguin to lannoti! Tara Balam bin Bauror laḳan sohi fot saṛia be-fote gesegi. Ou bonḍo pir Balam to haram ḳamai-ruzgaror fagol asil, oile ola bod ḳamor lagi he buba gadar domok kaise. Ou gadae manush bulie matia tar faglamit bada dise. Ita manush to fanir hukna kuar laḳan ar batashor kuṛullar laḳan. Tarar lagi goin andair zoma raḳa ase. Tara boṛo boṛo beḳama mat mate. Ar zera tuṛa age ku-fot saṛia zan basanir lagi bagisoin, ota manshore shorilor ḳaishe solia bodmaishi korar indon dey. Hou bonḍo ustad oḳole ḳosom ḳaia ḳoy manshore azad ḳorto, oile tara nize-u noforoti ḳamor gulam. Zano to, ḳeu zudi kuntar gese arizae, te he itar gulam. Te amrar malik ar toraneala Isa al-Mosire sinia hari zogotor ḳarafi taki horia aia-o, ḳeu zudi hirbar gia ou ḳarafir zalo aṭḳae, te tarar foyla dosha taki hesh dosha aro mondo. Forezgarir fot sinar bade-o tarar gese shomzail ou fobitro hukumor ulṭa gese, er taki aro bala asil i fot na sina. Tarar befare ou silleḳ-u shoṭik, “Kukre nizor bomi firia ḳae,” ar “Shuorre naoaile-o feḳo foṛia goṛiae.” Mayar bai oḳol, ikan oilo tumrar gese leḳa amar dui nombor siṭi, i duio siṭit-u ami tumrare kial ḳorai diram ar tumrar dilre hozag korram. Ami sairam, fobitro nobi oḳole age zotota bataisoin, ar amrar toraneala malike tumrar gesor sahabi oḳlor mazdi ze hukum disoin, ota mono raḳo. Kub kial ḳori buzio, aḳeri zomanat rong-tamsha ḳorra oḳole rong-tamsha loia aziba, tara zarzir ḳaishe solba. Tara ḳoiba, “Kita ba, hein aibar lagi ze oada asil, itar kita oilo? Duniar shuru taki zelaḳan solchil, amrar baf-dadar moronor bad taki oḳono to olaḳan-u soler.” Ashole itae to ichcha ḳori-u faurilae, bout din age Allar kalamor bole asman foyda oise ar fanire horai dia zomin bar ḳora oisil, fanire zominor sairo galabae dola ḳora oisil. Bade hou fanie boinna oia hi zomanar duniare binash ḳorsil. Ar hou kalamor bole, oḳonkur asman-zominre aguindi zalaibar lagi raḳa or. Aḳeri bisar din forzonto itare ola rokka ḳora or, hou din be-din oḳlor shorbonash oibo. Ta-o bai oḳol, tumra ikan faurio na, malikor gese eḳ din eḳ azar bosoror homan ar eḳ azar bosor eḳ dinor homan. Kunu kunu manshe mono ḳoroin, malike tan oada furon ḳorte deri korra, ikan ṭik nae. Ashole tain tumrar bae sobor ḳoria roisoin, tain saira na ḳeu binash ouk, borong hoḳolre touba ḳorar shuzug dira. Oile Malik Isa aibar din to suror laḳan aḳta-u aibo. Hou din asmane hu hu aoaz ḳoria binash oibo ar foyda ḳora hoḳolta aguine golia milai zibo. Dunia ar ermaze zotota ḳora oise, hokkolta zair oibo. Olaḳan hokkolta binash oibo zania, tumra kilaḳan roa zorur? Tumra fak-fobitro roia forezgar zindegi kaṭaia, Allar ṭik kora dinor lagi ashik oia bar sao. Hou din to asman zoli zoli binash oibo ar foyda ḳora hoḳolta aguine golizibo. Oile amra Alla Pakor oada ḳora noya asman, noya zominor bar sairam, zeḳano ḳali forezgarir ṭikana. Erlagi bai oḳol, tumra zebla ou dinor lagi bar saoat aso, te kub kial ḳoro, ou din tain zanu tumrare nikut-niskolonko halote shantir maze deḳoin. Ar amrar malikor lamba soborgarire manshor zan basanir shuzug mono ḳorio. Ou eḳoi kota Allar deoa aḳole amrar mayar bai Pauluse-o tumrar gese leḳsoin. Tan hokkol siṭit-u ou befare leḳoin. Er maze kisu befar ase zeta buza ḳoṭin, ḳali be-aḳol ar bedisha zone oinnainno kitabor laḳan itar manio bodlaia, nizor shorbonash ḍakia ane. Bai oḳol, ou ḳota oḳol tumra age-u zancho, erlagi hushiar o zate ou naforman manshor bule tumrare bul fote na ney, ar imani bit taki na horae. Tumra amrar malik ar toraneala Isa al-Mosir rohomote ar tanre sinar takkote baṛia uṭo. Oḳon ar hor-hamesha tan mohima zari rouk. Amin. Hoḳol foyla taki-u zein asla, zanre nizor souke deḳsi, zan mukor aoaz amra hunchi, kub kial ḳori azmaia saisi ar nizor ate dora-soa ḳorsi, hou zindegi kalamor boyani leḳram. Ou zindegi to i duniat zair oisla, amrar nizor souke i zindegire deḳsi, dekia hari tan befare shakki diram. Behesti baf Alla Pakor gese zein asla ar amrar maze zair oisla, aḳeri ou zindeganir ḳota-u tumrare zanairam. Ou ze zonre amra deḳsi, zan mukor buli hunchi, tan befare-u tumrare ḳoiram. Zate ota hunar bade amrar loge tumrar-o ḳatir-dusti oy. Amrar ou ḳatir oilogi, gaibi baf Alla Pak ar tan ḳas mayar zon Ibnulla Isa al-Mosir loge. Te amra ita leḳram, zate amra ar tumrar kushi-bashi fura oy. Amra al-Mosir muk taki ita hunia hari, oḳon tumrare-o zanairam, Alla Pak to nur. Tan maze andarir kunu siṭa-fuṭa-o nai. Ar amra andarir maze solia zudi koi, Alla Pak ar amrar maze ḳatir-dusti ase, te to amra misa matram, shoṭik kam ḳorram na. Oile Alla Pak zela nuror maze boshot ḳoroin, oula amra-o zudi nuror fore soli, te amra eḳe-oinne ḳatir-dusti ase, ar tan ḳas mayar zon Isa Ibnullar fobitro loue amrar tamam guna-ḳosuri fak-saf ḳore. Oḳon amra zudi koi, amra muṭe-u gunagar nae, te amra nize nizore ṭogiar, ete forman oy amrar maze Allai hokikoti nai. Amra zudi zarzir gunar shikarukti dilai, te tan afon hok-halali ar fak-forezgarir gune, loge loge gunar mafi dilain, tamam naformani taki amrare fak-saf ḳorilain. Oḳon amra zudi koi, amra kunu guna ḳorsi na, te amra tanre-u misa matra banailam, ete forman mile, amrar dilor maze tan kalam nai. O amar sabal oḳol, ami tumrar gese ita leḳram, zate tumra gunar ḳam taki basia ro. Erbade-o ḳeu zudi kunu guna ḳorilae, te behesti babar dorbaro amrar eḳzon fak-forezgar shafayatḳari asoin, tan nam Isa al-Mosi. Zano ni tain kita ḳorsoin? Amrar gunar kofora hishabe tan nizor zan kurbani disoin. Ḳali amrar nae, borong duniar hoḳol manshor gunar koforar lagi disoin. Oḳon amra tanre sini ni? Nichchoy sini, amra tan hoḳol hukum-ahkam manle buza zaibo, amra tanre sini. Ar ze manshe ḳoy tanre sine, sinia-o tan hukum-ahkam mane na, he misa mate, tar dilo hokikoti nai. Oile ze zone tan kalam mafik sole, tar dilor maze nichchoy Allai mohobbot shullo-ana folise. Te amra tan maze boshot ḳori ni? Oy, ou monte buza zae amra tan maze boshot ḳori: ar tan maze boshot ḳori koile, amrar lagi zorur oilo, tain zela solchoin, amra-o ola sola. O shuna oḳol, ami to tumrar gese noya kunu hukumor ḳota leḳram na, borong ola eḳ hukumor ḳota leḳram, zeṭa foyla taki-u asil. Tumra age taki ze kalam huncho, oṭa-u oilo hou furana hukum. Iṭare furana ḳoile-o ashole iṭa noya. Ou hukumor hokikotie Isa al-Mosi solta, ar tumrar zindegit-o ita ase. Deḳrae ni, andair ḳaṭi zar, asol nur oḳon zair or. Kunu manshe zebla ḳoy, he Allai nuror foro ase, otoso tar baire ginnae, he ashole andarit roise. Ar ze manshe tar baire maya-mohobbot ḳore, he nuror foro boshot ḳore, erlagi he asaṛ ḳaoar ḍor nai. Oile zegie tar baire ginnae, he to andarit foṛi roise, andarir maze sola-fira ḳore. Ashole andaire tare anda banailise, erlagi he zane-u na, he kun fotedi zar. O sabal oḳol, ami tumrar gese leḳram, zano ni, al-Mosir namor ḳatire, tumrar tamam guna-ḳosuri maf ḳora oigese. O baf oḳol, ami afnaintor gese-o leḳram, foyla taki-u zein asoin, afnara to tanre sinoin. O zuan oḳol, ami tumrare leḳram, Iblisor logor moha-laṛait to, tumitain ziti geso. O hurutta oḳol, ami tumrare leḳlam, tumra to behesti bafre siniliso. O baf oḳol, ami afnaintore leḳlam, afnara to tanre sinilisoin, zein hokkoltar foyla taki-u asoin. O nouzuan oḳol, ami tumrare leḳlam, tumra-u boloban, Allar kalam tumrar dilo gata, Iblisor logor moha-laṛait tumra zitso. Oḳon kial ḳori huno, tumra i dunia ar zogot-shongsharor kunutar mayat foṛio na. Ze manush duniar mayat foṛizae, he to nizor behesti bafre mohobbot ḳore na. Zano to, duniat zeta mile, ita oilo, roḳto-mangshor ḳaish, souḳor lub-lalos ar shongsharor bahaduri, ita kunuṭa-u behesti bafor ges taki ae na, ḳali dunia taki ae. Te duniabi zogot-shongsharor hokkol bahadurir din fuṛai zar, oile ze bondae Allar morzi zugai sole, he to siroḳal ṭikia roibo. Baba oḳolre, kiamot daro aichche. Te tumra nichchoy huncho, Kane-Dorjal aoar shomoy oigese. Ar asol ḳota oilo, ermaze bout dorjal aia harsoin. Ota dekia amra buziar, hasau kiamot daro aichche. Ou dorjal oḳol to amrar maz taki-u bar oisoin. Ta-o era ashole amrar torikat asil na, amrar torikar oile to amrar loge roilo one. Tara bar oia gesegi kori-u buza zae, tara ḳeu amrar nae. Oile tumra to hou fobitro zonor ges taki kelafoti faiso ar hoḳole-u hok aḳol faiso. Tumra hokikoti sino na mono ḳoria ami tumrar gese leḳram ni? Na, ila kunta nae. Ashole tumra hokikoti sino, ar hok taki kunumonte-u na-hok baroy na, erlagi-u tumrare leḳlam. Hozrot Isa-u Allar oada ḳora al-Mosi, ikan zegie shikar ḳore na, he to nichchit misa matra. Gaibi baf ar tan ḳas mayar zon Ibnullare zegie oshikar ḳore, he-u oilo dorjal. Ou mayar zonre zegie oshikar ḳore, behesti bafor loge tar kunu ḳatir-shomporko nai, ar ze manshe mayar zonre shikar ḳore, tar loge to behesti bafor-o ḳatir-shomporko ase. Te foyla taki tumra zeta hunia airae, ita zanu tumrar dilo gata roy. Ita dilo roile, behesti baf ar tan ḳas mayar zonor loge tumra-o gata roibae. Ar iṭa-u oilo hou aḳeri zindegi, ze zindegi al-Mosie amrare dibar oada ḳorsoin. Huno, tumrare zeguinte be-foti banaito sae, otar forisoy zananir lagi ami ita leḳlam. Ashole al-Mosi taki tumra ze ḳelafoti faiso, ou ḳelafoti to tumrar dilo boshot ḳore. Erlagi dusra ḳeuror ges taki talim nibar kunu zorur nae, ou ḳelafotir ruhe tumrare dorḳari hoḳolta hikaiba. Tain to hok, tan maze na-hok kunta nai. Oḳon al-Mosir maze boshot ḳorar lagi tain zela talim disoin, tumra ṭik oula ro. O sabal oḳol, amar foramish oilo, tan maze boshot ḳorat ro, teu tain zebla hirbar zaira oiba, ou shomoy amra shaosh faimu, tan samne aite shorom ḳorto nae. Ar tumra zebla ekin ḳoro tain shullo-ana fak-forezgar, te eoḳan-o ekin ḳorio, ze bonda nek kamor ashik, tar zonom to shoyong Allar nur taki. Huno, behesti bafe amrare ḳoto beshi maya ḳoroin! Tain amrare tan aolad ḳoia ḍaḳoin, ar ashole-o amra tan aolad. Ta-o i zogote amrare sine na, ḳaron zogote ou gaibi bafre-o sine na. O shuna oḳol, oḳon to amra Allar aolad bonchi, erbade kita bonmu, ikan oḳono zani na. Ḳali zani, al-Mosi zebla dusrabar zair oiba, hou shomoy amra-o tan laḳan oimu. Amra to tanre tan asol surote deḳar shuzug faimu. Ar zoto manshe al-Mosir ufre ila asha ḳore, tara nizore al-Mosir laḳan ḳaṭi bananit roy. Ze manshe guna ḳore, he Allar hukum-ahkam bange, Allar hukum banga-u to guna. Tumrar zana ase, al-Mosi oila be-guna masum, tain gunare ḳedanir lagi duniat zair oila. Erlagi zera tan maze boshot ḳore, tara gunar fote sole na. Gunar gato zeguin foṛi roin, iguinte tanre deḳse-o na, sinche-o na. O sabal oḳol, tumrare zanu ḳeu be-fote nito na fare. Al-Mosi to fak-forezgar, ar nek kamor ashik oḳol-o tan laḳan forezgar oy. Oile gunar fotor ashik zera, tara Shoytanor murid, Iblis-Shoytane to foyla taki-u guna ḳorer. Tar ḳamre binash ḳorar niote, oḳon Allar ḳas mayar zon Ibnulla i duniat zair oila. Te ze bondar zonom oise Allar nur taki, tar bitre Allar nuror bis boshot ḳore, erlagi he gunar gato foṛi roy na. Allai nur taki zonom oise ḳori, he gunar ḳamo foṛi roito fare na. Ar zarzir amol deḳle-u buza zae, ḳe Allar aolad, ḳe Shoytanor fut: zeta manush nek fote sole na, tar mumin baire mohobbot ḳore na, he to Allar manush nae. Tumra mulo taki-u ikan hunia airae, amrar lagi forz oilo, eḳe-oinnore mohobbot ḳora. Te amra zanu Baba Adomor fut Kabilor laḳan na oi. He asil Iblisor murid, ingsha ḳoria tar afon baire kun ḳorsil. Zano ni ḳene kun ḳorsil? He hamesha naformani ḳam ḳorto, oile tar baie nek kam ḳorto. O bai oḳol, duniar manshe zudi tumrare ginnae, te taijjub oio na. Amra to amrar mumin baire mohobbot ḳori, erlagi buzram, amra moron taki basia zindegit aisi. Zera mohobbot ḳore na, tara to moronor gato foṛi roise. Nizor baire zegie ginnae, he to kuni. Ar tumrar zana ase, kunu kunir dilo aḳeri zindegi boshot ḳore na. Al-Mosie amrar lagi tan nizor zan bilai disla, oḳan taki-u amra buzchi, mohobbot ḳare ḳoy. Oḳon amrar bair lagi-o amrar zan bilai deoa zorur. Shongsharo ḳaia-findia basar bebosta zar ase, he tar bair obab dekia-o zudi souk muzia boiroe, te tar bitre kila Allai mohobbot boshot ḳore? Baba oḳolre, amra ḳali mukor maya na deḳaia, ḳamor mazdi zanu asol mohobbot deḳai. Teu amra buzmu, amra hokor loge asi. Ar hok Allar samne amrar dilor tosolli aibo. Ḳaron amrar dile-u zudi amrare dushi koia ray dey, te Alla Pak to i dil taki bout mohan, hokkolta-u zanoin. Erlagi koiram, O shuna oḳol, amrar afon dile zudi amrare dushi shaibosto na ḳore, te shaosh ḳoria Allar dorbaro azira ditam farmu. Ar tan gese amra zeta mangimu, ita tain diba. Ḳaron amra tan hukum-ahkam mania soli, ar ze ḳam ḳorle tain kushi oin, ḳali ou ḳam ḳori. Tan hukum oilo, amra zanu tan ḳas mayar zon Ibnulla Isa al-Mosir ufre iman ani, ar eḳe-oinnore mohobbot ḳori. Ou hukum-u tain amrare disoin. Ar ze bondae tan hukum mania sole, he tan maze-u boshot ḳore, ola tain-o tar maze boshot ḳoroin. Oḳon tain amrare ze Pak Ruhu dan ḳorsoin, ou ruhur mazdi amra buziar, tain amrar dilo boshot ḳoroin. O shuna oḳol, duniat bout bonḍo nobi bar oisoin. Erlagi keu zudi aia ḳoy, ami ruhur bole matiram, te tumra zoldi bishash ḳorio na, borong zasai koria deḳo, i ruhu Allar ges taki aise ki na. Allai ruhre sinar niom oilo, ze ruhe shikar ḳore manush surote Isa al-Mosie duniat toshrif anchoin, ou ruhu Allar ges taki aise. Oile ze ruhe ou Isare shikar ḳore na, i ruhu Allar ges taki aise na. Ita oilo Kane-Dorjalor ruhu, ou dorjalor ruhu aibar ḳota tumra age huncho, ar oḳono he ou zogoto ase. Oile O sabal oḳol, tumra to Allar manush, hou bonḍo oḳlor ufre tumra zitiso. Tumrar dilo ze ruhu asoin, ein to i zogotor ruhu taki bout mohan. Ashole ou bonḍo oḳol to ou zogotor, erlagi tara ḳali zogotor buli bule, ar zogote-o tarar buli mane. Ar amra oilam Allar manush. Allare zera sine, tara amrar buli mane. Oile zera Allar nae, tara amrar ḳota hune na. Ou nomunae amra dukabaz ruhu ar Allai hok ruhre sini. O shuna oḳol, Allar deoa dan oilo mohobbot, erlagi amra zanu eḳe-oinne mohobbot ḳori. Ze bondar dilo mohobbot ase, tar zonom oise Allar nur taki, he Alla Pakre sine. Ar zegur bitre mohobbot nai, he to Alla Pakre sine na, ḳaron Alla nize-u to mohobbot. Alla Pakor mohobbot amrar maze ou nomunae zair oise, tain tan ḳas mayar zon Ibnullare ou duniat bezisoin, zate en usillae amra aḳeri zindegi hasil ḳortam fari. Ar amra zen Alla Pakre mohobbot ḳorslam ila kunta nae, borong tain nize-u amrare mohobbot ḳoria, amrar gunar kofora oibar lagi, tan ḳas mayar zon Ibnullare zogoto faṭai dila, oḳṭare-u ḳoy mohobbot. O shuna oḳol, Alla Pake zebla amrare ola mohobbot ḳorla, te amrar lagi-o zorur oilo eḳe-oinnore mohobbot ḳora. Allare to ḳeu kunudin deḳse na. Oḳon amra zudi eḳe-oinnore mohobbot ḳori, te buza zaibo, tain amrar dilo boshot ḳoroin, tan mohobbote amrar dilo furafur fol dorse. Amrare tan ruhu mubarok dan ḳorsoin, erlagi buzram, amra tan maze boshot ḳori, ar tain-o amrar maze boshot ḳoroin. Amra nize deḳsi, dekia hari ou shakki diram, zogotor toraneala ḳanḍari hishabe, gaibi bafe tan ḳas mayar zon Ibnullare bezisoin. Erlagi ze zone shikar ḳore, Hozrot Isa-u oila Allar ḳas mayar zon Ibnulla, tar dilo shoyong Alla Pak boshot ḳoroin, ar he-o Allar maze boshot ḳore. Amrar loge Allar ze mohobbot ase, ikan amra zani, zania ekin-o ḳori. Ashole Alla nize-u mohobbot. Mohobbotor maze ze bonda boshot ḳore, he Allar maze-u boshot ḳore, ar Alla Pak-o tar maze boshot ḳoroin. Ou nomunae mohobbot amrar dilor maze furafur folala oy. Teu kiamotor din amra shaoshi boni, ḳaron ou zogoto amra tan ronge rongi gesi. Mohobbotor maze kunu ḍor-boy nai, shullo-ana mohobbote borong ḍor-boyre ḳedai dey. Ḍor-boyor maze to shaza faoar bab-shab ase, erlagi ḍor-boy zar bitre, he mohobbotor shullo-ana fol dorse na. Te amra Alla Pakre mohobbot ḳori, ḳaron tain amrare foyla mohobbot ḳorsoin. Ar ze manshe ḳoy, he Alla Pakre mohobbot ḳore, ḳoia tar mumin baire ginnae, he to misa matra. Ḳaron nizor souke deḳa baire zegie mohobbot ḳore na, a-deḳa Allare kila mohobbot ḳorbo? Amra to tan ges taki ou hukum faisi, ze bondae Alla Pakre mohobbot ḳore, he zanu tar baire-o mohobbot ḳore. Hozrot Isa-u oila Allar oada ḳora hou al-Mosi, ikan zera ekin ḳore, tarar zonom oise Allar nur taki. Zano ni, ze manshe kunu ma-bafre mohobbot ḳore, he erar aoladre-o mohobbot ḳorbo. Te Alla Pakor aoladre mohobbotor befar kila buzaitam? Alla Pakre mohobbot ḳoria tan hukum-ahkam mania solle-u buza zae, amra hasau tan aoladre mohobbot ḳori. Allar hukum-ahkam mania sola-u oilo Allare mohobbot ḳora. Ar tan hukum-ahkam mana to kub ḳoṭin kunu ḳam nae. Ḳaron Allar nuror aolad oḳol i zogotor ufre joyi oin, ar zogotor laṛait ze zinishor bole joyi oisi, ikṭa oilo amrar iman. Hozrot Isa-u oila Allar ḳas mayar zon Ibnulla, ikan zera ekin ḳore, i zogotor laṛait tara-u ḳali joyi oy. Isa al-Mosi oila hou zon, zein fani ar lour bole duniat aisoin. Tain ḳali fanir zoriae nae, borong hou pak gusolor fani ar solibo zan kurbanir lour bole aisoin. Ita befare Allai Pak Ruhe shakki dira, ar ou ruhu to hok. Ashole tino shakkie shakki dira: ruhu, fani ar lou, ou tin shakkir shakki eḳ shoman. Manshor mukor shakki zebla amra mani, te Allar deoa shakki to aro mozbut, tan ḳas mayar zon Ibnullar befare tain ola shakki disoin. Ar ou mayar zonor ufre zera iman ane, tarar dile-o oula shakki dey. Oḳon Allai shakkire zera manche na, tara to shoyong Allare-u misa matra banailise, ḳaron Allae nize tan mayar zonor befare ze shakki disoin, tara ita manche na. Tan shakki oilo, tain nize amrare aḳerator zindegi dan ḳorsoin, ou zindegi tan ḳas mayar zonor gese ase. Ze manshe ou mayar zonre faise, he zindegi-o faise. Ar Allar hou mayar zonre zera faise na, tara i zindegi-o faise na. Baiainre, tumra zera Isa Ibnullar ufre iman ancho, tumrare zananir lagi ami ita leḳlam, tumra aḳerator zindegi failiso. Oḳon amra tan dorbaro ou shaosh faisi, tan morzi mafik amra kunta magile, ita tain hunba. Amra zebla zani, amra zeta magi ita tain hunoin, te eoḳan-o zani, tan dorbaro amra zeta magisi, ita nichchit failisi. Ḳeu zudi kunu mumin baire ola ek guna ḳorat deḳe, ze guna moutor foti nae, te he aroz ḳorle Allae hou baire hefazot ḳorba. Ami ino ou laḳan gunar ḳota ḳoiram, zerar guna moutor foti nae. Oile mono rakio, moutor foti guna-o ase, ila gunar befare aroz ḳorar lagi ami koiram na. Ashole hoḳol zator naformani-u guna, oile hoḳol guna to moutor foti nae. Amra zani, Allar nur taki ze bonda oḳlor zonom oise, era gunar ḳamo bondi roy na. Borong Allar nure zonom loa hou ḳas mayar zone tarar zanor hefazot ḳoroin, Iblise tarare ḳobza ḳorto fare na. Ar amra to zani, ḳali amra-u oilam Allar manush, bad-baki asta zogot-u Iblisor faor tole. Amra eoḳan-o zani, Allar ḳas mayar zon aia hari amrare ou aḳol disoin, zate hok Allare amra sini. Te hok Allar loge amrar milon oise, mani tan ḳas mayar zon Isa al-Mosir loge amrar milon oise. Tain-u to hok Alla, tain-u aḳeri zindegi. O sabal oḳol, hoḳol nomunar murtifuza taki basia ro. Amin. Ami hou murobbie ita leḳram, Allar fosondor hou Begom Sayebani ar tan aolad oḳlor gese. Allai hokor ḳatire ami zarare mohobbot ḳori, ḳali ami nae, aro zoto manshe Allai hok zanchoin tara hoḳole zare mohobbot ḳoroin, ou tumrar gese leḳram. Ou hok to oḳon amrar bitre boshot ḳore ar hor-hamesha amrar loge roibo. Hok ar mohobbotor ḳatire, gaibi baf Alla Pak ar ou bafor ḳas mayar zon Ibnulla, ein-u Isa al-Mosi, erar torof taki rohomot, meherbani ar shanti amrar loge roibo. Gaibi bafe zela hukum disoin, hou hukum mafik afnar ḳoyzon fua-fuṛin Allai hokor fote soler dekia ami kub kushi oisi. O mayar Sayebani, afnar gese amar eḳṭa onurud ase, amra zanu forteḳe eḳe-oinnore mohobbot ḳori. Ar ou ze onurud ami koriar, iṭa to noya kunu hukum nae, borong mulo taki-u amra ou hukum faislam. Allar hukum mafik sola-u oilo mohobbot. Tumra foyla taki ze hukumor ḳota hunia airae, olaḳan mohobbotor fote solo. Duniat oḳon bout laḳan dukabaz bar oisoin. Zetae ḳoin, manush surote Hozrot Isa al-Mosi duniat aisoin na, ila mat zera mate era oilo hou dukabaz ar Kane-Dorjal. Te tumra hushiar roio, zate tumrar menotor fol na araia shullo-ana furuskar ḳamaitae faro. Zeta manshe al-Mosir deoa talimor shima faroi zain, tan talimor bitre roin na, tarar dilor bitre Alla nai. Oile ze manush tan talimor ufre tir roy, tar dilor maze gaibi baf ar tan ḳas mayar zon Ibnulla, i duiozon-u asoin. Kunu ustad tumrar gese aile he zudi ou laḳan talim na dey, te tare salam ḳorio na, ar tumrar baṛit asroy-o dio na. Tare zegie salam ḳorbo, he to ogur bod ḳamor bagi oibo. Tumrar gese to amar aro bout ḳota leḳar asil, oile ḳagoz-ḳolome hoḳolta leḳtam sairam na. Borong amar kial oilo, ami nize aia tumrar loge boia samna-samni gof ḳormu, teu hoḳlor bitoror kushi miṭbo. Afnar ze boinre Allae fosond ḳorsoin, tan aolad oḳole afnare salam zanaira. Amin. Allai hokor ḳatire ami zare mohobbot ḳori, amar mayar dust Gousor gese, ami hou murobbie ita leḳram. O mayar dust, ami dua ḳoriar tumar hokkolta zanu shoṭik babe sole, aro saiar tumar dil zela bala tumar shoril-gotor-o zanu ola bala taḳe. Tumar oḳan taki koyzon mumin bai aia ḳoila, Allai hokor befare tumi bule mozbut aso, ikan hunia ami kub kushi oisi. Amar aolad oḳol Allai hokor fote solra hunia kushi lager, ikan taki boṛo ar kunu kushir ḳobor oy ni? O mayar dust, tumar osina hou musafir baiainre zela kezmot ḳorso, ita to ḳaṭi muminor ḳam. Tumar maya-mohobbotor ḳota tara zomator huru-boṛo hoḳlor samne ḳoise. Oḳon Allar kushi mafik tarare sohi-salamote faṭanir bebosta ḳori deo, te aro bala oibo. Tara ḳali al-Mosir tobligo bar oisoin, torikar baira manshor ges taki kunu shaijjo loisoin na. Erlagi ou laḳan manshore shaijjo ḳora zorur, zate hok kamo amra-o shorik taki. Ami age zomator gese ekḳan siṭi leḳslam, oile ḳobis Ditrife zomator netagiri ḳorto sae, erlagi he amrar ḳota hune na. Oḳon he zeta ḳorer, ami aia hari ita hoḳolre zanaimu. He amrare ingsha ḳoria bout misa bodnam roṭaise. Ḳali ikan nae, mumin kunu baire he maner na, ar oinno zera manto sae, tarare-o bada der, emonki zomat taki bar ḳori der. O mayar dust, tumi bod ḳamor ḳoredi na douṛaia borong nek kam ḳoro. Ze manshe nek kam ḳore he oilo Allar bonda, ar zegie bod ḳam ḳore, he to Allar doroshon faise na. Zano ni, hoḳole-u Dimitri bair shunam gaira, emonki shoyong Allar hoke-o en tarif ḳorra. Amra-o en tarif ḳorram, ar tumi to zano amrar mukor ḳota hasa. Baire, tumar gese leḳar boutta asil, oile ḳolome-ḳalie hoḳolta leḳram na. Asha ase, kub zoldi tumar loge deḳa-shakkat oibo, ou shomoy mukamuki hoḳolta gof ḳormu. Tumar dust oḳole-o tumare salam zanaisoin. Amrar hoḳol bondu-bandobre salam zanaio. Assalamu alaikum. Ami Ehuda to sahabi Iakubor bai ar Hozrot Isa al-Mosir gulam. Amrar gaibi baf Alla Pake zerare mohobbot ḳoroin, zera Allai daot faisoin, ar Isa al-Mosie zerar hefazot ḳoroin, ou sohifaḳan ami erar gese leḳram. Tumrar ufre besh ḳori meherbani, shanti ar mohobbot zari rouk. O mayar dust oḳol, amra hoḳole mili ze nazator bagi oisi, ou nazator befare ami kub kiali oia tumrar gese leḳtam saisi. Ermaze buzlam, aro dorḳar ase imanor lagi laṛair befare lekia tumrare utshaho deoa. Allae tan pak bonda oḳolre siroḳalor lagi ze imani don disoin, ou Isayi imanor fokke dile-zane laṛai kora to zorur. Itar zorur oise, ḳaron zeta manshe be-dini ḳamor shaza faibar ḳota ag taki-u leḳa asil, tole tole ota manush aia tumrar dolo hamai gese. Amrar Allar rohomotre tarar bod ḳaish miṭanir atiar banaise, ar amrar eḳmatro Malik Isa al-Mosir ulṭa sole. Te ou befar to tumra kub bala ḳori-u zano, ta-o ami kali oḳan mono ḳorai diram, Mishor desh taki Boni Israilre azad ḳoria anar bade, tarar mazor zetae iman anchil na, malike tarare binash ḳorsla. Ar zeta firista oḳole nizor day-dayitto adae na ḳoria, nizor ashon taki hori gesla, Allae tarare siroḳal dori shikoldi bandia goin andair goro raḳsoin Hashoror dinor lagi. Ou laḳan Hozrot Lut nobir zomanar Sadum, Amura ar ḳanda-ḳasar hoḳol ṭaunor manshe otar laḳan zina ḳorsil, ḳali zina nae, tara kub ḳobisi zina ḳorae siroḳal dori duzoḳo zolbo, ita oilo eḳṭa nishana. Erbade-o ou bonḍo ustad oḳol, zetae baze kuab deki deki talim dein, tara ḳobisi ḳam ḳoroin, kunuzat shashon manoin na, ar batuni shordar oḳlor bodnam gain. Emonki asmanor shordar firista Mikaile zebla Hozrot Musar lash loia Iblisor loge torka-torki korsla, ou shomoy tain Iblis-Shoytanor bodnam gaia dushi shaibosto ḳorar shaosh ḳorla na, borong koila, “Malike zanu tumare bond ḳoroin.” Oile ou bonḍo ustad oḳole zeta buze na otar bodnam gae, ar zongli zanuaror laḳan nizor aḳole nizor shorbonash goṭae. Ita to lannoti! Iguin Baba Adomor lannoti fut Kabilor laḳan bonchoin. Duniabi labor ashae tara hou bonḍo nobi Balamor ḳaishor ato nizore shofi dise. Ar Musa nobir bae bigṛi zaora hou neta Kurahor laḳan tarar binash ase. Te ou lannoti ota aia zebla be-shoromor laḳan tumrar mezbani kae, ou shomoy ita oizain tumrar ḳanir talor moyla. Tara ḳali nizor shartor danda ḳore. Tara oila asmano uṛra huda megor kuṭi, ba bagano duibar mora-hukna fol gas, zegie fol na dorae, zoṛe-foṛe huria tulia falail oise. Ar tara oila tufanor ḳalor doriar ḍeur laḳan, doriar ḍeue zela fenare bashaia tule, tarar bod ḳamor shorom-o ola bashia uṭe. Tara oila sairobae sokkor deora terar laḳan, itar hesh dosha oilo hor-hameshakur lagi zoma raḳa goin andair. Baba Adomor ḳandanor shat nombor zon Hozrot Idrise-o ota manshor befare ḳoia gesoin, “Huno, manshor bisar ḳorar lagi, Malik Moulae tan azar azar fobitro firista loia aira. Zetae be-dini ḳam ḳorsoin ar tan birudde lannoti mat matisoin, oḳon ou be-din gunagar oḳlor faona hishabe tain itare furafur dushi shaibosto ḳorat aira.” Itae to hamesha-u na-sobri koroin, nizor ḳofalre dushoin ar tarar bod ḳaishor boshe soloin. Tarar hoḳol mato nizor boṛai-beṭagiri deḳain, sharto hasilor lagi manshor bozona ḳoroin. Oile O mayar dust oḳol, ami tumrare ḳoiram, amrar Malik Isa al-Mosir sahabi oḳole age zeta bataisoin, ita mono rakio. Era tumrare ou hushiari dita na ni, “Aḳeri zomanat forezgarre ṭaṭṭa-moshkora ḳorra eḳzat manush aiba, aia tarar be-dini bod ḳaish mafik solba.” Duniabi babor ita manshe ḳali doladoli lagain, tarar bitre Allai Pak Ruhu nai. Ta-o mayar baiain, tumrar ou nikut fak-fobitro imanor ufre bor ḳoria nizore goṛia tulat ro, ar Pak Ruhe kamil oia munazat ḳorat ro. Allar mohobbotor maze nizore bandia raḳo, ar aḳeri zindegi faibar ashae amrar Malik Isa al-Mosir meherbanir lagi bar sao. Tumrar maze zerar imane loṛa-soṛa ḳore, tarare doya ḳoro. Aguin taki tulia ania manshor zan basao. Ar gunar bod ḳaishor zalae zetar zindegi borbad oigese, itar finnor nafak kafoṛ ḳanre-o ginna ḳoro, ar nizore hefazote rakia tarare doya ḳoro. Ar ze Allae tumrare usṭa ḳaoa taki basain, zein nikut halote tumrare kushi-bashie tan shan-tozollir samne azir ḳorta faroin, hou eḳmatro Alla zein amrar zan basain, tan zalal-shan, mohima, kudroti bol-shokti, ar raz-ḳemota amrar Malik Isa al-Mosir usillae zair ouk, hokkol zugor ag taki oḳon forzonto ar zuge zuge hor-hamesha-u ola ouk. Amin. Ou kitabo zotota leḳa oise, ita Alla Pake Isa al-Mosire zanaisoin, ar al-Mosie ita zair ḳorsoin. Tuṛa dinor bitre zeta zeta befar nichchit goṭibo, ita zate tan gulam oḳole zanoin. Al-Mosie tan firista faṭaia nizor gulam sahabi Hannanre ita hoḳolta zanaila. Sahabi Hannane Allar kalam ar Isa al-Mosir shakkir befare zoto doroshon deḳla, ou doroshonor befare-u tain zobanbondi dila. Ar hou zon-u nek-kofali, zein i kalamor agam ḳobor oḳol tilaot ḳoroin, ar tara-o nek-kofali, zera i kalam hunoin, hunia hari amol ḳoroin; ḳaron shomoy to daro aichche. Tain amrare loia eḳ bashshai tiar ḳoria, tan gaibi baf Allar ebadotir lagi imam banaisoin. Tan mohima ar kudroti bol hor-hamesha boail rouk. Amin. Huno, tain megor saḳat oia toshrif anra, forteḳe tanre soukdi deḳbo, zara laḳṛidi banail solibo gatia tanre zane marilisil tara-o deḳbo, ar tan lagi duniar hoḳol zatie zure zure ḳandiba. Oula-u ouk, Amin. Alla Mabude bataira, “Ami-u Alif ar Ya, zein asoin, zein asla ar zein hamesha roiba. Ami-u shorbo-shoktiman.” Ami to tumrar bai Hannan, Hozrot Isar ummot oae ami-o tumrar laḳan eḳoi koshṭo, eḳoi bashshai ar eḳoi soboror bagi oisi. Allar kalam toblig korae ar Isar fokke zobanbondi deoae amare Patmus namor difo nia bonobash deoa oisil. Ermaze Hozrot Isar fobitro din, eḳ Robibare ami Allai Pak Ruhur maze furafur ḍubi gelam, omon shomoy amar ḳoredi shingar aoazor laḳan eḳ aoaz hunlam. Hunlam, kunu eḳzone amare ḳoira, “Huno, tumi oḳon zeta deḳrae, ita ek kitabo leḳo, lekia Ifis, Izmir, Forgam, Tuatira, Sardi, Filadilfia ar Laodikea ṭaunor shato zomator gese faṭao.” Amar loge zein matira, tanre deḳar kiale ami koredi gurlam, guria deki, shunar shatṭa serag dani. Ou serag danir mazḳano bin-Adomor laḳan eḳzonre deḳlam. Tan finno fao forzonto lamba fainjabi, ar bukur ufre shunali eḳ foṭṭi. Tan matar sul dudor laḳan dola soḳsoḳa. Tan souk agunir lukkar laḳan. Fao oilogi, aguindi zalaia manjia forishkar ḳora soḳsoḳa fitolor laḳan, ar tan golar aoaz oilo, zure zure ḳol-kolaia zaoa fanir futor laḳan. Tan mukor surot asil fura zolmol ḳorra shuruzor laḳan. Tan muk taki darail ekḳan toluar bar oilo, i toluaror duio galabae dar asil, ar tan ḍain ato asil asmanor shatṭa tera. Tane dekia ami morar laḳan tan faor ḳandat foṛi roilam. Teu tan nizor ḍainor at amar ufre toia ḳoila, “Ḍoraio na. Ami-u aual ar ami-u aḳer, ami-u Haiul-Kaiyum, zein nize nize hor-hamesha asi. Amar mout oisil, oile oḳon ami zug zug dori siroḳal zinda asi. Mout ar ḳoyboror sabi amar ato ase. Erlagi-u tumi oḳon zeta deḳrae, er age zeta goṭise ar bade zeta goṭibo, ita hokkolta tumi lekia to. Tumi shunar ze shatṭa serag dani deḳso ar amar ḍain ato shatṭa tera deḳso, itar mani oilo, shato tera oilo shat zomator shatzon firista, shatṭa serag dani oilo hou shato zomat.” Ifis ṭaunor zomator firistar gese leḳo: Zein nizor ḍain ato asmanor shatṭa tera doria, shunar shatṭa serag danir mazḳano sola-fira ḳoroin, tain ou ḳota ḳoira, Ami to tumrar ḳam-ḳaz, tumrar menot ar tumrar soboror ḳota-o zani. Ami zani, tumra kunuzat bod manshore shoijjo ḳortae faro na, ar sahabi na oia-o zeguinte nizore sahabi koia forisoy dein, tarare forikka ḳoria deḳso, ar forman-o faiso tara zen beimani mater. Tumrar bout sobor ase, tumra amar lagi bout ḳoshṭo ḳorrae, kunumonte heran oiso na. Oile tumrar birudde to amar nalish ase, tumra foyla amare zela mohobbot ḳortae, oḳon ita bad dilaiso. Tuṛa sinta ḳori deḳo, tumra ḳoto usa taki koto lamat lami geso. I halot taki dil bodlaia, age zeta ḳortae oḳon hirbar ola ḳoro. Ar zudi dil na firao, te ami tumrar gese aia tumrar serag danikan zaga taki horailimu. Tumrar to eḳṭa gun ase, Nikulayti oḳole zeta ḳam ḳoroin tumra itare ginna ḳoro, ar ami-o itare gin ḳori. Zar ḳan ase he hunouk, Pak Ruhe zomat oḳolre kita bataira. Ze zon joyi oibo tare ami Alla Pakor Zannatul-Ferdousor zindegi-gasor fol ḳaite dimu. Izmir ṭaunor zomator firistar gese ou ḳota leḳo: Zein aual ar aḳer, zein mara gesla, bade zinda oisoin, tain oḳan ḳoira, Ami to tumrar obab-onoṭon ar ḳoshṭor ḳota zani, oile erbade-o tumra doni. Zeta manshe ḳaṭi Ihudi name nizor forisoy dey, otoso Ihudir amol nai, borong Iblisor dolor manush, itae tumrar birudde kita matira ami to zani. Tumra ze mosibotor maze foṛbae, i mosibotre eḳdom ḍoraio na. Zano ni, Iblise forikka ḳorar niote tumrar mazor ḳoyzonre zelo dibo, hono tumra dosh din ḳoshṭo faibae. Huno, imanor fote tumra moron forzonto hok-halal roio, teu joyor mala hishabe ami tumrare aḳeror zindegi dimu. Zar ḳan ase he hunouk, Pak Ruhe zomat oḳolre kita bataira. Ze zon joyi oibo, dusrabaror moute, mani duzoḳe tar ḳeti korar kunu shaiddo nai. Forgam ṭaunor zomator firistar gese ou ḳota leḳo: Dar-ala ze toluaror duio galabae dar ase, ou toluaror malike oḳan ḳoira, Tumra kun zagat boshot ḳorrae ita to ami zani, ikano Iblisor shinghashon ase. Oile amar befare tumra hok-halal aso, amar ufror imanre oshikar ḳorso na. Amar toblig korra hou hok-halal zon Antipasre zebla shohid ḳora oisil, Iblisor aḳrar maze, tumrar ṭauno tare kun ḳora oisil, hou shomoy-o tumrar imanre oshikar ḳorso na. Ta-o tumrar birudde amar kisu mat ase. Tumrar ono ola kisu manush asoin, zetae Musa nobir amolor bonḍo nobi Balamor talime soloin. Ou Balame bashsha Balakre hikaisil, zate he devtar murtir samnor foshad ḳaoaia ar zina ḳoraia, Boni Israilre gunar fote ney. Ita saṛa-o Nikulayti oḳlor talime zeta soloin, ota ḳoygu-o tumrar ono asoin. Erlagi i halot taki tumra dil bodlao, ar na bodlile ami kub zoldi tumrar daro aimu, aia amar mukor toluardi tarar loge jihad ḳormu. Zar ḳan ase he hunouk, Pak Ruhe zomat oḳolre kita bataira. Ze zon joyi oibo, ami tare lukail behesti manna taki tuṛa manna ar eḳṭa dola fattor dimu. Ou fattoror ufre omon eḳ nam leḳa taḳbo, i nam ḳeu sine na; ze zone ou fattor faibo, ḳali he-u i nam sinbo. Tuatira ṭaunor zomator firistar gese ou ḳota leḳo: Allar ḳas mayar zon Ibnulla, tan souk oilo agunir lukkar laḳan, fao duioḳan manjia forishkar ḳora soḳsoḳa fitolor laḳan, tain oḳan ḳoira, Ami to tumrar ḳam-ḳaz, tumrar maya-mohobbot, iman, kezmot ar tumrar soboror ḳota zani. Ar eoḳan-o zani, tumra age zeta ḳam ḳorso, oḳon er taki aro beshi ḳam ḳorrae. Oile tumra to Izabel namor ou beṭire asroy dirae, erlagi tumrar birudde amar ekḳan ḳota ase, tai nizore nobi koia forisoy dey. Amar bonda oḳolre tai zina ḳora ar devtar samnor foshad ḳaoa hikaia be-fote nergi. Ou zina taki touba ḳorar lagi ami taire shomoy dislam, oile tai touba ḳorte razi nae. Huno, erlagi ami taire eḳ bisnat falaia toimu, tair loge zetae zina ḳoroin, itae zudi touba na ḳoroin, te tarare-o boṛo mosiboto falaimu. Tair fua-fuṛinre-o ami marilimu. Teu hoḳol zomate zaniliba, ami to manshor dilor ar monor ḳobor raki. Ami amol-nama dekia tumra forteḳ zonor fol dimu. Tuatira zomator baki mumin oḳolre ḳoiram, tumra zera ou beṭir ḳotae solo na, manshe zetare Iblisor goin talim ḳoin, tumra zera hou fot sino na, ami tumrare dusra kunu bar ditam nae. Ḳali tumrar zeta ase, ami na aoa forzonto oḳnainre tumra mozbut ḳori doria roio. Amar gaibi bafe zela hokkol zatir ufre amare ḳemota disoin, zera joyi oibo, tarare-o ami ou ḳemota dimu. Ami ze ḳame kushi oi ou ḳam zera aḳer forzonto ḳorbo, tara i ḳemota faiba. Tara luar laṭi dia itare shashon ḳorba, ar maṭir fatilor laḳan itare surmar ḳorba. Zera joyi oibo, ami tare fozoror shuk-tera-o dimu. Zar ḳan ase he hunouk, Pak Ruhe zomat oḳolre kita bataira. Sardi ṭaunor zomator firistar gese leḳo: Allar shat nomunar ruhu ar shatṭa tera zein doria raḳsoin, tain oḳan ḳoira, Tumrar ḳam-ḳaz to ami zani. Tumra zinda aso ḳoria tumrar bout shunam ase, oile ashole to tumra murda. Tumra hozag oia uṭo, ar bad-baki zotota morar foti oigese, itare bol zugao. Huno, amar Allar samne tumrar ekḳan ḳam-o ami shoṭik deḳsi na. Erlagi tumra zeta faiso ar zeta huncho, ota iad raḳo ar amol ḳoro. Tumrar oḳonkur halot taki dil bodlao. Tumra zudi hozag na o, te ami suror laḳan lukaia aimu, kun bala tumrar gese aimu, tumra ṭer-u faitae nae. Te ou Sardi zomato tumrar ola ḳoyzon manush asoin zerar lebaso kunu kut nai, mani tarar sal-cholon ḳarafir bae gese na. Tara forezgar bonda, erlagi tara forishkar dola lebas findia amar loge sola-fira ḳorba. Ze zon joyi oibo, he ola dola lebas finbo. Aḳerator zindegi kata taki tar nam ami kunudin-o fustam nae. Borong amar gaibi baf ar tan firista oḳlor samne ami tare amar ḳoia shikar ḳormu. Zar ḳan ase he hunouk, Pak Ruhe zomat oḳolre kita bataira. Filadilfia ṭaunor zomator firistar gese leḳo: Zein hok ar fak-fobitro, zen ato Bashsha Daud nobir sabi ase, zein kulle ar ḳeu bond ḳorto fare na, ar bond ḳorle ḳeu kulto fare na, tain oḳan ḳoira, Ami to tumrar ḳam-ḳaz zani. Huno, ami tumrar samne ekḳan duar kula raḳlam, ikan bond ḳorar ḳemota ḳeuror nai. Ami to zani, tumra kub ḳomzur, erbade-o tumra amar hukum amol ḳorso ar amare oshikar ḳorso na. Zera Ihudi koia nizor forisoy dey otoso asol Ihudi nae, Iblis-Shoytanor dolor hou beiman oḳolre ami tumrar gese anaimu, tumrar fao-o dorai kodombusi koraimu, ar tarare zanai dimu ami tumrare mohobbot ḳori. Tumrare sobor ḳorar lagi ami ze hukum dislam ita tumra mancho; erlagi i duniar ufre mosibotor ze shomoy aia azer, hou shomoy taki ami tumrare hefazot ḳormu. Duniar manshore forikka ḳorar lagi ou mosibotor shomoy aibo. Huno, ami kub zoldi airam. Tumrar zeta ase otare mozbut ḳori doria raḳo, zate tumrar joyor mala ḳeu ḳaṛia nito na fare. Ze zon joyi oibo, tare ami amar Allar goror eḳṭa kuṭi banaimu, he ar kunudin bar oia zaito nae. Ami tar ufre amar Allar nam ar Allar ṭaunor nam-o leḳmu. Hou ṭaun oilogi noya Zeruzalem. Behestor maz taki, amar Allar daro taki hou ṭaun lamia aibo. Ar ze zon joyi oibo, tar ufre ami amar noya namḳan-o leḳmu. Zar ḳan ase he hunouk, Pak Ruhe zomat oḳolre kita bataira. Laodikea ṭaunor zomator firistar gese leḳo: Zen nam Amin, zein hok-halal shakki, zein Allar foyda ḳora hokkoltar mul kuṭi, tain oḳan ḳoira, Tumrar ḳam-ḳazor ḳota to ami zani. Tumra oilae na ṭanḍa, na gorom. Tumra hoy ṭanḍa na oy gorom oile bala oilo one. Oile tumra to umli gorom, na ṭanḍa, na gorom, erlagi ami amar mukor sefor laḳan tu ḳori tumrare falai dimu. Tumra to ḳoirae, tumra bout doni, tumra boṛoluk oigeso, erlagi tumrar kuntar obab nai. Ita kub bala ḳota, oile ashole to tumra buzrae na, tumra kub duki, ḳangal, gorib, anda ar lemṭa aso. Erlagi ami tumrare ou ufodesh diram, aguindi zalail ḳaṭi shuna tumra amar ges taki loia neo, zate tumra hasaror doni oitae faro. Amar ges taki dola lebas loia nia findo, teu tumrare ar lemṭa deḳa zaito nae. Amar ges taki sokut laganir surma loia neo, teu tumra hasaror souke deḳbae. Huno, ami zerare maya ḳori, tarar dush-tiruti deḳai dei ar shashon-o ḳori. Erlagi tumra umli gorom taki fura gorom oia touba ḳoro. Zano ni, ami duaror gese ubaia duaro ṭukairam. Amar golar aoaz hunia zudi keu tar duar kulia dey, te ami tar bitre hamaimu, tar loge ḳana-dana ḳaimu ar he-o amar loge ḳana-dana ḳaibo. Ami zela joyi oia amar gaibi bafor loge tan fobitro arshor kursit boisi, ṭik ou laḳan ze zon joyi oibo, tare-o ami amar loge amar kursit boar odikar dimu. Zar ḳan ase he hunouk, Pak Ruhe zomat oḳolre kita bataira. Erbade ami doroshon deḳlam, behestor ekḳan duar kula ase. Ar ami tan golar aoaz hunlam, shingar aoazor laḳan zein age matisla, tain amare ḍaḳ dila, ḳoila, “Tumi ono uṭia ao. Ami oḳon tumare deḳaimu, erbade kita kita nichchit goṭibo.” Ḍaḳ hunar loge loge-u ami Pak Ruhe kamil oilam, ar deḳlam, behestor maze ekḳan toḳt ase, ou toḳtor ufre eḳzon boat asoin. En surot oilo, dami hira ar lal monir laḳan. I toḳtor sairo galabae asil rongdenu, ita deḳte ekkere ḳosua fanna monir laḳan. Ou toḳtor sairo ḳandabae aro sobbishḳan toḳt asil, hou toḳto boat asla sobbishzon murobbi neta. Erar lebas asil dola soḳsoḳa ar matat asil shunar taz. Mazḳanor toḳt taki megor zilkani, guṛ-guṛi ḍaḳ ar bezuita ṭaṭari shobdo baronit asil. Er samne shatṭa mushal zalail asil, i mushal oilo Allar shat nomunar ruhu. Toḳtor samne foṭikor golashor laḳan forishkar ḳasor eḳ doria asil. Ar ou mazor toḳtor sairo galat sairzon zandar asil, erar samne-fise duiobae souk oḳole bora. Foyla zandarṭa deḳte shinghor laḳan, dusraṭa bisalor laḳan, tin nomborṭa manshor laḳan ar sair nomborṭa uṛal deora silor laḳan. Ou sairo zandaror forteḳor soyṭa ḳori ḍaḳna asil, ar bare-bitore sairobae souk asil. Tara din-rait hamesha ou zikir ḳorra, “Kuddusun, kuddusun, kuddusun, Rabbu Ilahul Kadir, kana wa-hua kainus saiyatin. Fobitro, fobitro, fobitro Alla Mabud Shorbo-shoktiman, zein asla, zein asoin, ar zein hamesha roiba.” Zein siroḳalin zinda, zein toḳto boat asoin, ou zandar oḳole zebla-u tan tarif, shomman ar shukria zanain, ou shomoy zein toḳto boat asoin, zein siroḳalin zinda, en samne hou sobbishzon murobbi neta noto oia soizda ḳoroin. I neta oḳole zarzir matar taz shinghashonor samne kulia toia ḳoin, “O amrar Mabud Alla, tumi to ijjot, tarif ar kudroti ḳemotar zoiggo. Tumi-u to hoḳolta foyda ḳorso, tumar morzie hoḳolta foyda oise ar ṭikia ase.” Ou toḳtor maze zein boat asla, tan ḍainor ato ami ekḳan kitab deḳlam. Kitabor bare-bitore kunta leḳa ase, ikan shatṭa sil dia sil-sappoṛ mara. Bade ami deḳlam, kub shoktiala eḳzon firistae zure zure ḳoira, “Ila zoiggo ḳeu asoin ni, zein ou sil-sappoṛ bangia kitabḳan kulta farba?” Oile asman-zomin ba fatalor maze ila ḳeu millo na, zein ikan kula ba er bitor deḳar zoiggo. Teu ami Hannanor kub ḳandon ailo, ḳaron i kitabḳan kular ba er bitor deḳar zoiggo eḳzon-o faoa gelo na. Bade hou murobbi neta oḳlor mazor eḳzone amare ḳoila, “Oba, ḳandio na. Huno, zein Ehuda ḳandanor shingho, Daud nobir bongshodor, tain zitisoin. Tain ou shato sil-sappoṛ bangia kitabḳan kulta farba.” Ami aro deḳlam, murobbi neta oḳlor, sairo zandaror, ar ou toḳtor mazḳano eḳ meṛa-baichcha ubai roise. Deḳte mono oilo, i baichchare zobo ḳora oise. I meṛa-baichchar shatṭa hing ar shatṭa souk. Allar ze shat nomunar ruhre duniar maze faṭail oy, ou shato souk oilo hou shato ruhu. Bade ou meṛa-baichcha aia, toḳto zein boat asla, en ḍain at taki ou kitabḳan nila. Kitab neoar bade hou sairo zandare ar sobbishzon murobbi netae ou meṛa-baichchare soizda ḳorla. Era forteḳor ato egu ḳori sharinda, ar agor-kushboye bora egu shunar baṭi asil. I agor-kushboy oilo Allar pak bonda oḳlor dua-munazat. Ar tara noya ou gozol gaila, “Ḳali tumi-u shoṭik zon ou kitabḳan nibar, nia er sil-sappoṛ kulbar. Tumare to zane mara oisil. Tumi tumar lou dia hokkol ḳandan taki, Allar lagi manush ḳorid ḳorso. Hokkol zator bulie matra manush, hoḳol desh ar zati taki-o ḳalas ḳorso. Erare loia tumi eḳ bashshai kaim ḳorso, amrar Allar ebadotir lagi imam banaiso, era-u asta zogoto bashshai korba.” Bade ami sailam, ar hou toḳt, sairo zandar ar murobbi neta oḳlor sairobae bout firista oḳlor aoaz hunlam. Ino hazare hazar, kuṭi kuṭi firista asla. Era zure zure ou gozol ḳoila, “Ze meṛa-baichchare zobo ḳora oisil, ein-u ḳemota, don-doulot, aḳol, bol-shokti, ijjot, gourob ar tarif faoar zoiggo.” Erbade ami hunlam, asmano, zomino, fatalo ar doriar maze zoto zandar ase, ba itar bitre aro zotota ase, era hokkole oḳan ḳoira, “Toḳtor maze zein boat asoin, tain ar ou meṛa-baichchar, tarif, ijjot, gourob ar ḳemota hor-hamesha zari rouk.” Teu hou sairo zandare ḳoila, “Amin.” Ar hou murobbi neta oḳol noto oia soizda ḳorla. Bade ami deḳlam, hou meṛa-baichchae zebla shato sil-sappoṛor maz taki foyla sil bangira, ou shomoy hou sairo zandaror mazor eḳzone ṭaṭa foṛar aoazor laḳan zure ḳoila, “Ao.” Teu ami saia deḳlam, dola eḳṭa guṛa, er ufre zein soar oisoin tan ato tir-donuḳ ase. Tan matat taz lagail oilo, tain joy ḳorar lagi joy ḳori kori roana oila. Ar tain zebla dusra sil bangila, ou shomoy ami dusra zandaror aoaz hunlam, ein ḳoila, “Ao.” Teu lal churuk aroḳṭa guṛa bar oilo, ar er ufre zein soar oisoin, enre ou ḳemota deoa oilo, zate tain dunia taki hoḳol shanti kaṛia neingi, manshe eḳe-oinnore kun ḳoroin, enre boṛo ekḳan toluaro deoa oilo. Bade meṛa-baichchae zebla tin nombor sil bangila, ou shomoy ami tin nombor zandaror aoaz hunlam, tain ḳoila, “Ao.” Teu ami deḳlam, eḳṭa ḳala guṛa. Er ufre zein soar oisoin, tan ato ekḳan falla ase. Ar ami hunlam, hou sairzon zandaror mazḳan taki keu zanu ḳoira, “Eḳ dinare ḳali eḳ sher gom ba eḳ dinare tin sher barli mile. Oile tumi zoytun ar angur gasor ḳeti korio na.” Ou meṛa-baichchae zebla sair nombor sil bangila, ou shomoy ami hunlam, sair nombor zandare ḳoila, “Ao.” Teu ami saia deḳlam, sali rongor ek guṛa, ou guṛar zein soar, en nam oilo mout ar tan ḳore ḳore ḳoybore aṭer. Erare duniar sair baṭor mazor eḳ baṭor ufre ḳemota deoa oilo, zate tara toluar dia, nidan dia, gozobi mout ar zongli zanuar dia manshor zan nein. Bade tain zebla fas nombor sil bangila, ou shomoy ami deḳlam, kurbani kanar tole ou laḳan manshor ruhu oḳol ase, zerare Allar kalamor lagi ar Hozrot Isar fokke zobanbondi deoar lagi zane mara oise. Era zure zure ḳoila, “O fak-fobitro hokkani Moula, amrare kun ḳorar bisar ḳorte ar bodla loite, tumi duniar manshore ar ḳotodin shomoy ditae?” Teu era hoḳolre dola lebas dan ḳora oilo, ar ḳoa oilo, tarar logor kezmotgar ar tarar zoto baiainre tarar nomunae shohid ḳora oibo, erar shongḳa fura na oa forzonto, aro kisu din bar saite oibo. Bade ami deḳlam, meṛa-baichchae soy nombor sil bangila, ou shomoy kub boṛo boisal oilo. Shuruzor rong oigelo ḳala siai ar bora sandor rong oilo lour laḳan lal. Tufan aile zela ḍumur gas taki kasa fol-o tufane falai dey, ṭik oula asmanor tera oḳol kulia zominor ufre foṛigelo. Asta asman dola oia ḳagozor fuṭla laḳan bonia gaib oigelo. Faṛ-forbot ar dif oḳol-o zarzir zaga taki horigelo. Ar duniar hoḳol raza-bashshain, namḳora zon, sifair fordan, zomidar, foyluan, gulam ba azad forteḳ zon-u faṛor gate gate, fattoror aoṛe lukailo. Tara ou faṛ ar fattor oḳolre ḳoilo, “Amrar ufre aia foṛo, zein toḳto boat asoin tan souḳor samon taki ar meṛa-baichchar gozob taki amrare lukao. Tarar gozobi hou kiamotor din to aichche, oḳon ar ṭikia taḳar shaiddo ḳar ase?” Erbade ami deḳlam, duniar sair kunat sairzon firista ubai roisoin. Tara duniat, doriat ar hoḳol gas-falat batash hamanir duar bond ḳorar lagi ubaisoin. Bade ami deḳlam, fube taki aroḳzon firista uṭia aira, zinda Allar sil-sappoṛ tan gese ase. Tain aia ze sairzon firistare dunia ar doriar ḳeti korar lagi ḳemota deoa oisil, hou sairo firistare zure zure ḍakia ḳoila, “Amra zotoboil amrar Allar gulam oḳlor ḳofalo sil na marsi, otoboil tumra duniar, doriar ba gas-falar ḳeti korio na.” Bade ami hou sil-sappoṛ mara manshor foriman hunlam. Boni Israilor hoḳol ḳandan taki eḳ laḳ sousallish azar zonre sil mara oise. Ehuda ḳandanor baro azar zon sil mara; Ruben ḳandan taki baro azar; Sadu ḳandan taki baro azar; Ashir ḳandan taki baro azar; Noftali kandan taki baro azar; Manosha ḳandan taki baro azar; Shimion ḳandan taki baro azar; Lebi kandan taki baro azar; Isaḳor ḳandan taki baro azar; Sobulon ḳandan taki baro azar; Iusuf ḳandan taki baro azar; Bin-Iamin ḳandan taki baro azar zon sil mara. Bade ami deḳlam, forteḳ desh, hoḳol ḳandan, hoḳol zati ar hoḳol zator bulie matra bout manush dola oisoin, erare gonia fuṛanir shaiddo ḳeuror nai. Era dola lebas findia ḳezur fata ato loia, hou toḳt ar meṛa-baichchar samne ubai roisoin. Tara zure zure ḳoira, “Amrar Alla zein toḳto boat asoin, ar meṛa-baichchar ato-u, gunar mafi ar nazat ase.” Erbade tamam firista oḳol, hou toḳtor, hou murobbi neta oḳlor ar sairo zandaror sairo ḳandabae ubaila. Tara toḳtor samne soizdat foṛia ḳoila, “Amin. Tarif, gourob, aḳol ar shukria, ijjot, ḳemota ar bol-shokti, zuge zuge amrar Allar-u ouk. Amin.” Bade murobbi neta oḳlor mazor eḳzone amare ḳoila, “Buzrae ni, dola lebas finda ou manush oḳol ḳe, era kuai taki aisoin?” Ami tanre ḳoilam, “O malik, ita to afne-u zanoin.” Teu tain ḳoila, “Era oila hou zon oḳol, zera hou moha mosibotor maz taki aise. Tarar lebasre meṛa-baichchar loudi doia dola banaise. Erlagi era Allar toḳtor samne ase; tara din-rait behesti ebadot ḳanar maze ebadot-bondegi korra. Ar toḳto zein boat asoin, tain nize erar ufre tambu ṭanai diba. Erar ar kunudin buk lagto nae, fanir fiase dorto nae; shuruzor tez erar gotro lagto nae, kunu gorom-o lagto nae. Toḳtor mazor meṛa-baichchae-u erar raḳali korba. Tain erare abe-hayator zindegi-fanir zornar gese loia zaiba, ar Allae erar souḳor fani fusia diba.” Bade ou meṛa-baichchae zebla shat nombor sil-sappoṛ bangila, ou shomoy onuman ada gonṭa shomoy behesto kunu aoaz huna gelo na. Ar ze shatzon firista Allar samne ubat taḳoin, ami erare deḳlam, erar ato shatṭa shinga deoa oilo. Erbade aroḳzon firista aia kurbani kanar samne ubaila. Tan ato shunar agor-kushboy dani. Toḳtor samnor agor zalanir shunar ṭebulor ufre zalanir lagi bout agor-kushboy tanre deoa oilo, Allar tamam pak bonda oḳlor dua-munazator loge mishanir lagi ita deoa oilo. Erlagi hou firistar ator agor-kushboyor dumar loge, pak bonda oḳlor dua-munazat-o Allar samne uṭlo. Bade ou firistae kurbani kana taki aguin nia agor danit borla, boria ita duniat falaila. Teu ṭaṭari aoaz, megor ḍaḳ, zilkani, ar boisal oilo. Ar hou ze shatzon firistar ato shatṭa shinga asil, era ou shinga bazanir lagi zuit oila. Foyla firistae shinga bazanir loge loge lou maḳail hil ar aguin zomino falail oilo. Teu zominor tin baṭor eḳ baṭ, gas-gasalir tin baṭor eḳ baṭ, ar hoḳol gash-fata zoli gelo. Erbade dusra firistae tan shinga fukila. Ou shomoy zalail faṛor laḳan muṭa eḳ siz doriat falail oilo. Itae doriar tin baṭor eḳ baṭ fani lou oigelo. Doriar tin baṭor eḳ baṭ zandar morigelo, tin baṭor eḳ baṭ zaz binash oigelo. Bade tin nombor firistae tan shinga fukila. Teu asmanor soḳsoḳa biraṭ eḳ tera boṛo mushalor laḳan zoli zoli tole foṛlo, iṭa aia hoḳol gang, ḳal-bilor tin baṭor eḳ baṭor ufre foṛlo. Ou terar nam asil Nagdana. Iṭa foṛia tin baṭor eḳ baṭ fani titta-zohor oigelo, i fanir lagi bout zon morla. Ar sair nombor firistae zebla shinga fukila, ou shomoy sand, shuruz ar tera, ita hokkoltar tin baṭor eḳ ongsho zoḳom oigelo, teu hoḳoltar tin baṭor eḳ baṭ andair oigelo, erlagi dinor tin baṭor eḳ baṭo ar raitor tin baṭor eḳ baṭo kunuzat rushoni roilo na. Bade ami sailam, saia deki, eḳṭa sil faki bout usat asmanor mazedi uṛer, ar he zure zure mater, “Baki ze tinzon firistae shinga fukiba, tarar shinga fukile duniar bashinda oḳlor ufre gozob, gozob, gozob lambo.” Bade fas nombor firistae shinga fukila, teu ami deḳlam, asmanor eḳṭa tera behest taki duniat foṛlo. Ou terare habia duzoḳor sabi deoa oilo. Teu he habia duzoḳor duar kullo, bout boṛo ḍomḳa taki zela duma baroy, i duzoḳ taki ola duma bar oilo. Ou duzoki dumae asman ar shuruz andair oigelo. Hou duma taki bout fongofal bar oia duniat aila. Itare duniar ḳakṛa-bisar laḳan ḳemota deoa oilo. Tarare hukum deoa oilo, tara zanu duniar kunu gash-fata, gas-fala ba hag-torḳarir ḳeti na ḳore. Ḳali zeta manshor ḳofalo Allar sil-sappoṛ mara nai, otar ḳeti koroin. Ita manshore zane marar kunu ḳemota tarare deoa oilo na, oile fas mash forzonto zala-zontrona dibar ḳemota deoa oilo. Ḳakṛa-bisae kunu manshore ḳamoṛ dile zela bish-bedona oy, ou fongofale ḳamṛaile-o ola oibo. Hou shomoy manshe mout mangiba, ta-o mout oito nae. Tara morta saiba oile moron tarar ges taki bagibo. I fongofal oḳol deḳte zuddor lagi zuit ḳora guṛar laḳan. Tarar matat shunar tazor laḳan siz asil, ar mukor goṭon oilo manshor laḳan. Tarar sul oilo beṭintor sulor laḳan ar dat oilo shinghor dator laḳan. Tarar bukur maze asil luar fator laḳan ḳoshḳosha sal. Zuddor guṛar gaṛi ṭania guṛar fal eḳloge gele zela aoaz oy, tarar ḍaḳnar aoaz-o asil ou laḳan. Tarar leinj ar leinjor mukor bish-dat asil ḳakṛa-bisar laḳan. Fas mash dori manshore ḳoshṭo dibar ḳemota i leinjo ase. Habia duzoḳor firista asla ou fongofalor raza. Ibrani bashae i firistar nam oilo Abaddon, ar Iunani ba Grik bashae er nam oilo Apollion, mani gozobi firista. Foyla gozob horlo, oile huno, aro duiṭa gozob aia azer. Bade soy nombor firistae tan shinga fukila. Teu Allar samnor agor zalanir shunar ṭebulor sairṭa hingor ges taki ami eḳzonre oḳan ḳoite hunlam, ein hou shinga-ala soy nombor firistare ḳoila, “Moha gang Furator maze ze sairzon firista aṭoḳ asoin, tarare kulia deo.” Erlagi hou sairo firistare saṛi deoa oilo. Duniar tin baṭor eḳ baṭ manshore marar lagi ou firista oḳolre shoṭik shomoy, shoṭik din, mash ar bosoror lagi zuit ḳori raḳa oisil. Bade ami hunlam, guṛat soṛia zaoa ou sifair foriman asil bish kuṭi. Ou doroshono ami zoto guṛain ar guṛ-soar oḳol deḳlam, i soarre deḳte ola laglo, erar bukur ufror fouzi lebas agunir laḳan lal, aḳashor laḳan lil ar gondoḳor laḳan oldia. Guṛaintor ḳolla asil shinghor ḳollar laḳan, itar muko taki aguin, duma ar gondoḳ bar or. Erar mukor ou aguin, duma ar gondoḳor gozobdi tin baṭor eḳ baṭ manush mara oilo. I guṛaintor leinj ar mukor maze-u asil tarar bol, i leinj asil du-muki hafor laḳan. Ou leinjdi tara manshor ḳeti kore. Oile ou gozobor bade-o zeta manush zita roila, tara nizor ator banail murtifuza taki touba ḳorlo na. Tara nanan nomunar butor puja, ar zetae deḳoin na, hunoin na ba aṭa-sola ḳorta faroin na ota murtir puja ḳorat roila. Shuna, rufa, fitol, fattor ar laḳṛidi banail murtifuzat roila. Erloge kun-ḳarafi, zadu-ṭuna, zina ar suri taki-o touba ḳorlo na. Bade ami deḳlam, behest taki kub shoktiala aroḳzon firista lamia aira. Megor saḳa asil tan lebas, tan muk shuruzor laḳan soḳsoḳa, tan fao asil agunir kuṭir laḳan. Tan matar ufre asil rongdenu. Tan ato huru-muru ekḳan kitab kula asil. Tan ḍainor fao doriat ar bauor fao zominor ufre toia, shinghor laḳan kub zure gorzia uṭila. Ou gorzonor loge loge-u ṭaṭa foṛar moto shatṭa aoaz oilo. Ou shato aoaz hunia ami leḳat laglam; ermaze behest taki ou shobdo ailo, “Huno, ou shato ṭaṭari aoaze zeta ḳoisoin, ita batuni raḳo, lekio na.” Bade hou firista, zenre ami doria ar zominor ufre ubat deḳslam, tain behestor bae nizor ḍain at tulla. Tulia zein hor-hamesha siroḳal zinda asoin, zein asman, zomin, doria ar itar mazor hokkolta foyda ḳorsoin, tan name ḳosom ḳaia ḳoila, “Ar to deri oito nae. Oile shat nombor firistae shinga fukibar din Allar batuni lila-ḳela fura oibo. Allae tan nizor gulam, nobi oḳlor gese zela bataisla, oula-u folibo.” Behest taki age ze shobdo hunchilam, ein hirbar amare ḳoila, “Huno, doria ar zominor ufre ze firista ubat asoin, tan gese zao, gia tan at taki kula kitabḳan neo.” Teu ami en gese gia ḳoilam, ou huru-muru kitabḳan amar ato deoar lagi. Tain ḳoila, “Aichcha neogi, nia ḳailao. Ikane tumar feṭre titta ḳorilibo, oile tumar muko mou laḳan miṭa lagbo.” Ou ami hi firistar ator huru-muru kitabḳan nia ḳaililam. Ḳaite shomoy hasau amar muko mou laḳan miṭa laglo, ar gilia harle asta feṭ titta oigelo. Bade amare ḳoa oilo, “Tumi bout desh, bout zati, nanan bulie matra manush, ar bashshar befare hirbar ohi zanaite oibo.” Bade mafibar lagi laṭir laḳan eḳṭa nol amar ato deoa oilo, ar eḳzone ḳoila, “Huno, fobitro Baytul-Mukaddos Kaba Shorif ar kurbani kanare mafo. Mafia hono zera ebadot ḳore tarar foriman gono. Oile ou Kaba goror uṭanre mafio na, ikan bad deo, ikan to bidormi oḳolre deoa oise. Tara beyallish mash dori i fobitro zagaḳanre faodi koslaibo. Ar ami amar duizon shakkire ola ḳemota dimu, i ḳemota faia era ḳator oia solar soṭ findia, eḳ azar dui-sho shaiṭ din nobir laḳan ohi bataiba.” Era oila hou zoytun gas zuṛa, ar hou serag dani zuṛa, tara to din-duniar malikor samne ubat asoin. Ḳeu tarar ḳeti korte saile, tarar muk taki aguin bar oia hi dushmon oḳolre zalailibo. Zekunu zone tarar ḳeti korat lagle ou doshae mout oibo. Era zotodin nobi halote ohi bataiba, otodin zate kunu meg na oy erlagi asmanor duar bond ḳori dibar ḳemota tarar ase. Fanire lou banani, ar zotobar kushi otobar zekunu gozob ḍalia zogotor ḳeti korar ḳemota-o tarar ase. Tarar zobanbondi deoa shesh oigele habia duzoḳ taki hou zanuar uṭia aia tarar loge laṛai koria, tarare araia kun ḳorbo. Ar tarar lash hou mohan ṭaunor rastar maze foṛi roibo, ze ṭauno tarar malikre solibor ufre loṭḳaia kun ḳora oisil. I ṭaunor nam ṭik Sadum ba Mishor na oile-o eḳoi laḳan-u ḳaraf. Bade hou shaṛe tin din faroia harle Allar deoa zan erar bitre hamailo, teu era fao-o bordi ubaila. Ar zoto zone erare deḳla, hoḳole-u ḍoraia ḳafila. Bade era hunla, behest taki ḍakia zure zure ḳoa or, “Tumra ono uṭia aio.” Teu era nizor dushmonor samne eḳ megor saḳat oia behesto gelagi. Ou shomoy kub boṛo boisal oilo, ar hi ṭaunor dosh baṭor eḳ baṭ bangi gelo. Boisale shat azar manush morla. Ita dekia bad-baki hoḳole ḍoraia behestor Allar tarif ḳorat lagla. Ou nomunae dusra gozob faroilo, oile huno, tin nombor gozob kub zoldi aia azibo. Bade shat nombor firistae tan shinga fukila. Teu behestor maze zure zure elan ḳora oilo, “Oḳon to duniar bashshai amrar Mabud ar tan Mosir hukum-o aise. Tain zug zug dori siroḳal bashshai korba.” Bade hou sobbishzon murobbi neta, zera Allar samne zarzir toḳto boat asla, era Allare soizda ḳoria ḳoila, “O Shorbo-shoktiman Mabud Alla, tumi age-o aslae ar oḳono aso. Amra tumar shukur-guzar ḳorram, tumi to tumar moha ḳemota ato loia oḳon bashshai korrae. Hokkol zatie gusa ḳoria sillaise, te oḳon tumar gozob ḍalibar shomoy oigese. Murda oḳlor bisaror shomoy aise, ar tumar afon gulam nobi oḳlor, tumar pak bonda oḳlor, huru-boṛo zotozone tumare ḍorain, tarare furuskar dibar shomoy aise. Ar zera duniar ḳeti korse, tarare binash ḳorar shomoy-o aise.” Bade Allar behestor ebadot ḳanar duar kula oilo, ar er bitre Allai shahadot shonduk deḳa gelo. Ou shomoy megor zilkani, guṛ-guṛi ḍaḳ, ṭaṭa foṛa, boisal ar kub beshi hil-meg oilo. Bade asmanor maze ek kudroti karbar deḳa gelo, eḳzon beṭi manush asoin, tan finno asil shuruz ar faor tole sand, en matat ase baroṭa tera dia gata eḳṭa taz. Beṭir goro hurutta oita, erlagi hurutta oar bedonae beṭie ḳali sillaira. Erbade asmano arok karbar deḳa gelo, agunir laḳan lal eḳ biraṭ danob. Tar shatṭa mata ar doshṭa hing, shato matat shatṭa taz lagail. Tar leinjuṛdi baṛiaia asmanor tin baṭor eḳ baṭ terare duniat falai dilo. Ar ze beṭir goro hurutta oita, ou danob aia beṭir samne ou nomunae ubat asil zen, beṭir goro hurutta oite-u he ḳailito. Beṭir goro eḳ fua foyda oilo, ou fuae hokkol zatire luar laṭi dia shashon ḳorba. Ou huruttare Alla ar tan toḳtor gese su mari tulia neoa oilo. Ar ou beṭi manush morubumir bae bagia gelagi. Allae hi morubumir maze beṭir lagi ekḳan zaga zuit ḳorsila, ein hono eḳ azar dui-sho shaiṭ din lalon-falon faiba. Bade behesto zuddo lagigelo. Firista Mikail ar tan odinor firista oḳole hou danobor loge laṛai korla, ar hou danobe-o tar sela-samsare loia erar loge laṛai korlo. Laṛait hi danob arigelo, ar tarare behest taki bar ḳori deoa oilo. Hou danobre ar tar sela-samsa oḳolre duniat falai deoa oilo. Ou danob oilo hou furana haf, zegur nam Iblis-Shoytan, he duniar hoḳol manshore be-foti banae. Bade ami hunlam, behest taki eḳzone zure zure ḳoira, “Oḳon to amrar Allar nazat, tan bol-shokti, tan bashshai ar tan Mosir ḳemota azir oigese. Ḳaron zegie amrar baiaintore dushi banaito, tare to behest taki falai deoa oise. He din-rait hamesha amrar Allar gese tarar name nalish dito. Meṛa-baichchar lou ar zarzir tobligi zobanbondir bole tara Iblisre araisoin. Tara nizor ḳayare beshi maya na ḳoria, zan dite-o zuit asla. “Erlagi-u O behest, tumi kushi koro. Tumra zera behest bashi, tumra-o furti koro. Oile afsus dunia ar doriar lagi, Iblis to tarar gese lamigese. He gusae fush-fash ḳorer, he to zane-u, tar shomoy ar beshi nai.” Hou danobe zebla deḳlo tare duniat falai deoa oise, dekia hou ze beṭir goro fua foyda oisil, he ou beṭir ḳore laglo. Erlagi ou beṭire kub boṛo eḳ sil fakir dukan ḍaḳna deoa oilo, beṭie ou ḍaḳnadi uṛal dia morubumit nizor zagat zaita farba. Hono hou danob-hafor souḳor aoṛe shaṛe tin bosor tanre lalon-falon ḳora oibo. Teu hi hafe tar muk taki fani bar ḳoria ek gang banaililo, gangor fute beṭire bashai nitogi kori. Oile duniae beṭire shaijjo ḳorlo, i hafe ze fani bar ḳorlo, duniar maṭie a ḳoria i fanire ḳaililo. Erlagi i danob-hafe beṭir bae aro beshi gusa ḳorlo, he beṭir oinno aolad oḳolre, mani zera Allar hukume sole ar Hozrot Isar fokke zobanbondi dey, tarar loge zuddo ḳorat gelo. Gia he doriar soror balur ufre ubai roilo. Bade ami deḳlam, doria taki eḳ zanuar uṭer, tar doshgu hing, shatgu ḳolla, forteḳ hingor matat eḳṭa ḳori taz, ar fortek kollar ufre nanan kufuri nam leḳa. I zanuargu deḳte sitabagor laḳan, tar fao oilo ballukor faor laḳan, ar muk oilo shinghor mukor laḳan. Hou danobe tar shokti, tar godi ar moha ḳemota ou zanuarre dilailo. I zanuaror eḳṭa ḳollar maze omon eḳ zoḳom asil, ou zoḳome he morar laḳ oigesil, oile zoḳomṭa bala oigelo. Ita dekia duniar hoḳol manush taijjub bonia tar ḳore ḳore gelo. Ar hou danobe tare i ḳemota disil ḳori manshe hou danobre soizda ḳorlo, erloge ou zanuarre-o soizda ḳorlo. Tara ḳoilo, “I zanuaror laḳan ar ḳe ase? Tar loge laṛai korar ḳemota ḳar ase?” I zanuarre kufuri buli ar beṭagiri mator muk deoa oilo. Beyallish mash dori tar ḳam salanir ḳemota failo. Erlagi he Allar birudde kufuri mat matilo, he Allar nam, tan boshot ḳana ar behest bashi oḳlor bodnam ḳorat roilo. Tare ḳemota deoa oilo, he Allar pak bonda oḳlor birudde zuddo ḳoria zitito farbo. Ar fortek kandan, forteḳ desh, forteḳ zati, forteḳ nomunar bulie matra manshor ufre-o tare ḳemota deoa oilo. Ita dekia duniabi hoḳol manshe tare soizda ḳorbo. Zogot foyda ḳorar age ze meṛa-baichchare zobo ḳorar ḳota shaibosto ḳora oise, hou meṛa-baichchar zindegi katat zerar nam nai, era forteḳe tare soizda ḳorbo. Zar ḳan ase, he hunouk: Ze zon bondi oar ḳota, he to bondi oibo-u. Toluaror tole zar kun oar ḳota, he ola kun oibo. Erlagi pak bonda oḳole mozbut iman ar sobor ḳora zorur. Bade ami deḳlam, zomin taki aroḳṭa zanuar bar oia ailo. Meṛar hingor laḳan tar dui hing ase, oile he matito hou danobor laḳan. Ou meṛar hing-ala zanuare hou foyla zanuaror hoḳol ḳemota bebohar ḳorto. Duniar hoḳol manshore he zur ḳoria hou zoḳom bala oa foyla zanuarre soizda ḳoraito. He hoḳlor samne boṛo boṛo keramoti ḳam ḳorto, emonki asman taki zomino aguin lamaia deḳaito. Hou foyla zanuaror lagi zoto laḳan keramoti deḳanir ḳemota tare deoa oisil, ota deḳaia he manshore be-foti banailo. Foyla ze zanuar toluaror sed ḳaia-o basi gesil, tar eḳṭa murti bananir lagi dusra zanuare manshore foramish dilo. Ar murtir bitre zan haranir ḳemota tare deoa oilo, zate i murtie matito fare, ar zera i murtire soizda ḳorto nae, tarare zane marar ḳemota-o tare deoa oilo. He huru-boṛo, doni-gorib, munib ba gulam hoḳolre baiddo ḳorlo, zarzir ḍain ato ba ḳofalor ufre eḳṭa sil marar lagi. Erlagi ou sil saṛa ḳeu kunu siz ḳorid-bikir ufae roilo na. I sil asil hou zanuaror nam ba namor marka nombor. Ita hoḳolta buzte bout aḳolor dorḳar. Zar aḳol ase he ou zanuaror namor horofor nombor gonouk, ita to kunu manshor namor nombor. Er foriman oilo, 666; soy-sho soyshoṭṭi. Bade ami saia deki, hou meṛa-baichcha Zeruzalemor fobitro Sion faṛor ufre ubai roisoin. Tan loge asoin eḳ laḳ sousallish azar manush. Tarar ḳofalor ufre ou meṛa-baichcha ar tan gaibi bafor nam leḳa ase. Erbade ami behest taki zure zure ḳol-kolaia zaoa fanir futor aoaz ar zure ṭaṭa foṛar shobdor laḳan eḳ aoaz hunlam. Amar mono oilo, kunu sharinda bazaora dole sharinda bazaira. Era hou toḳt, hou sairo zandar ar hou murobbi neta oḳlor samne eḳ noya gozol gaira. Kunu manshe i gozol hikto farlo na, ḳali dunia taki kalas ḳori neoa ou eḳ laḳ sousallish azar zon saṛa. Era to hou manush, zera kunu beṭintor loge zina ḳoria nizor ḳayare nafaḳ banaise na. Ou meṛa-baichcha ze zagat zain, tara-o en ḳore ḳore roin. Alla ar meṛa-baichchar name ḳetor foyla foshol hishabe erare zogotor manshor ges taki kalas ḳora oisil. Era kunudin-o misa mat matisoin na, era shullo-ana nikut. Bade ami aroḳzon firista deḳlam, ein asmanor mazedi uṛira. Duniat boshot ḳorra forteḳ desh, fortek kandan, forteḳ bashae matra ar forteḳ zatir manshor lagi siroḳalin kushir ḳobor tan gese ase. Tain zure zure elan ḳorla, “Alla Pakre ḍorao, tan ijjot-tarif ḳoro, tan bisaror shomoy aichche. Zein asman-zomin, doria ar ḳal-bil, gang oḳol foyda ḳorsoin, tan ebadot ḳoro.” Bade tan ḳore ḳore dusra firista aia ḳoila, “Binash oigelo, binash oigelo, hou namḳora Babil ṭaun binash oigelo. Ze ṭaune tair zinar ḳamor ḳoṛa nisha-fani hoḳol zatire ḳaoaise, tai binash oigelo.” Bade tin nombor firista erar ḳore ḳore aia zur golae ḳoila, “Kunu manshe zudi ou zanuar ar ogur murtir puja ḳore, ogur sil tar ato ba ḳofalo lagae, te he-o Allai gozobi nisha-fani kaite oibo. Ou nishar loge kunuzat fani na mishaia Allai gozobi baṭit bora oise. Fobitro firista oḳol ar Allai meṛa-baichchar samne, aguin ar gondoḳ dia i manshore shaza deoa oibo. Ze agunit itare zalail oibo, i agunir duma kunudin bond oito nae. Ze manshe ou zanuar ar tar murtir puja ḳorbo, ogur namor hou sil lagaibo, he din-rait kunu shomoy-u azab taki rehai faito nae.” Erlagi zera Allar hukum mane ar Hozrot Isar torikar imane mozbut roy, Allar ou pak bonda oḳole i halotor maze sobor taḳa zorur. Bade ami hunlam, behest taki eḳzone ḳoira, “Ou ayat leḳo, oḳon taki malikor torikat roia zoto zonor zan zaibo, era-u nek-kofali.” Pak Ruhe ou shakki dira, “Nichchoy era-u nek-kofali. Tarar ḳam-ḳaz taki tara rehai faiba, ḳaron tarar ḳamor fol tarar loge loge roibo.” Bade ami saia deḳlam, dola eḳ megor saḳa, ou saḳar ufre bin-Adomor laḳan ḳeu eḳzon boat asoin. Tan matat shunar taz ar ato asil darail ḳasi. Bade aroḳzon firista behesti ebadot ḳana taki bar oia aila, ar zein megor ufre boat asla tanre zure sillaia ḳoila, “Duniar foshol ḳaṭibar shomoy oise, foshol furafur faki gese, afnar ḳasi lagaukka ar foshol ḳaṭoukka.” Teu ou megor saḳar ufre zein boat asla, ein duniat tan ḳasi lagaila ar duniar foshol ḳaṭa oilo. Bade behestor ebadot ḳana taki aroḳzon firista bar oia aila, tan gese-o ekḳan darail ḳasi asil. Erbade kurbani kanar ges taki eḳzon firista bar oia aila, tan ḳemota asil agunir ufre. Aia tain zure zure hou ḳasi-ala firistare ḍakia ḳoila, “Tumar darail ḳasikan lagao ar duniar angur gas taki anguror soṛin ḳaṭia dola ḳoro, ita to faki gese.” Teu hou firistae duniat tan ḳasi lagaila ar duniar angur gasor hoḳol angur dola ḳoria, angur maṛar gato falaila. Ou gat oilo Allar gozobor moha gat. Ṭaunor bare angur maṛar gato i angur maṛia harle, ita taki lou bar oilo, i lour boinnae guṛaintor lagam forzonto aia soilo. Loue eḳ azar soy-sho stadia (onuman dui-sho mail) zaga ḍubi gelo. Bade ami behestor maze aroḳṭa lila-ḳela deḳlam, iṭa boṛo mohan taijjubi. Ami deḳlam, shatzon firista asoin, erar ato aḳeri shatṭa gozob. Itare aḳeri gozob ḳoar ḳaron oilo, oguin dia Alla Pakor gusar shesh foysala oibo. Bade ami deḳlam, aguin-ala ek kasor doria, ar zoto manshe hou zanuar, tar murti ba tar namor nomboror ufre zitsoin, tarare-o deḳlam. Deḳlam, tara Allar deoa sharinda ato loia ḳasor doriar faro ubai roisoin. Tara Allar bonda Musa nobir ar hou meṛa-baichchar ou ḳaoali gaira, “O Shorbo-shoktiman Mabud Alla, tumar lila-ḳela ḳoto mohan ar asanoḳ! O tamam zatir bashsha, ḳoto hok ar shoṭik tumar fot! O Mabud, tumare ḍoraito nae kun zone? Kun zone tumar namor tarif ḳorto nae? Ḳali tumi-u to fak-fobitro, tamam zati-u aibo tumar dorbaro, hokkole-u tumar ebadot ḳorbo, tumar hok bisar to zair oigese.” Erbade ami deḳlam, behestor hou shahadot tambur bitoror fobitro Kaba gorḳan kula oilo. Ou shomoy hou shatzon firistae shatṭa gozob loia Kaba gor taki bar oia aila. Tarar finnor lebas asil soḳsoḳa forishkar ar bukut asil shunali foṭṭi. Hou sairzon zandaror eḳzone ou shato firistare shatṭa shunar baṭi dila. I shato baṭi bora asil ḳali Alla Pakor gusa, zein zuge zuge hor-hamesha zinda asoin. Allar kudroti mohima taki ze duma baronit asil, ou dumae asta gor borigelo. Ar ou shatzon firistar shatṭa gozob na furani forzonto ḳeu gia Kaba goro hamaito farlo na. Bade ami hunlam, hou Kaba gor taki eḳzone ou shato firistare zure zure ḍakia ḳoira, “Tumra zao, gia Allar gozobe bora ou shato baṭi duniar ufre ufoit ḳori ḍali deo.” Teu foyla firistae gia tan baṭi duniar ufre ufoit ḳorla. Erlagi zarar gotro hou zanuaror sil asil, zera tar murtir puja ḳorto, ita hokkolṭir gotro eḳ zator kub bad bish fuṛa deḳa dilo. Dusra firistae tan baṭi doriar ufre ufoit ḳorla. Teu doriar hoḳol fani mora manshor lour laḳan oigelo, doriar hoḳol zandar morigelo. Ar tin nombor firistae tan baṭi gang ar hoḳol ḳal-bilor ufre ufoit ḳorla. Erlagi ita oigelo lour gang ar ḳal-bil. Ar ami hunlam, fanir ufre ze firistar ḳemota asil, ein ḳoira, “O fak-fobitro Alla, tumi age-o aslae, oḳono aso. Tumi hok-insafḳari, tumi-u to i gozobi shaza dirae. Iguinte pak bonda oḳlor lou zoraise, nobi oḳlor-o lou zoraise. Erdae-u tumi itare ou lou ḳabairae, ita-u tarar shoṭik faona shaza.” Ami hunlam, kurbani kanae shae dila, “O Shorbo-shoktiman Mabud Alla, tumar hoḳol bisar-u hok ar shoṭik.” Sair nombor firistae tan baṭi shuruzor ufre ufoit ḳorla. Teu shuruzre ḳemota deoa oilo, manshore agunit zalaia kulosh tular lagi. Ou shomoy kub gorome manshor shoril zoligelo, ar ou gozob oḳlor ufre zan ḳemota ase, hou Allar birudde tara kufuri mat matilo. Ototar bade-o tara touba ḳorlo na, ba Allar tarif-o ḳorlo na. Bade fas nombor firistae hou zanuaror godir ufre tan baṭi ufoit ḳorla. Teu i zanuaror bashshai andair oigelo. Manshe zala-zontronae zarzir zibo ḳamṛailo. Ou zala-zontrona ar shorilor bish fuṛar ḳarone tara behesti Allar birudde kufuri mato roilo, otar bade-o tarar bod ḳamor lagi touba ḳorlo na. Ar soy nombor firistae hou moha gang Furator ufre tan gozobi baṭi ufoit ḳorla. Teu gangor fani hukaia fubor deshor raza oḳlor zaibar fot oilo. Ou shomoy ami deḳlam, bengor laḳan tinṭa but. I tinoṭa hou danob, hou zanuar ar hou bonḍo nobir muk taki bar oia aise. Ou but oḳole keramoti ḳam deḳanit asil. Tara hara zogotor raza oḳolre ekḳano dola ḳorlo, Shorbo-shoktiman Allar hou mohan dino zuddo ḳorar lagi. Mono rakio, Hozrot Isae ḳoira, “Huno, ami to suror laḳan niralae aimu. Te doinno hou zon, ze zon hozag roibo ar nizor lebas findia roibo, zate he lemṭa oia gura na lage, ar manshe tar shorom na deḳe.” Ibrani bashae ze zagar nam Ar-Mazaddun, but oḳole hou razaintore ania ono dola ḳorla. Bade shat nombor firistae tan baṭi batashor ufre ufoit ḳorla. Ou shomoy behesti ebadot ḳanar toḳt taki zure zure ou aoaz oilo, “Oḳon oise.” Teu megor zilkani, guṛ-guṛi ḍaḳ ar ṭaṭa foṛto laglo, erloge ola bezuita boisal oilo, ila boisal duniat manush foyda taki oḳon forzonto kunudin oise na. Hou mohan ṭaun tin ṭukra oigelo, duniar nanan zatir ṭaun oḳol surmar oigelo. Ar Alla Pakor mono oilo, hou namḳora Babil ṭaunor ḳota, tain tan nizor gozobi nisha-fanir fiala boria ou Babilre ḳabaila. Ou shomoy tamam dif oḳol bagia gelogi, faṛ oḳolre ar deḳa gelo na. Asman taki boṛo boṛo fattoror laḳan hil oḳol manshor ufre foṛat roilo. Ita eḳo fattoror uzon oilo, onuman eḳ mon. Ou hilor gozobor lagi manshe Allar birudde kufuri mat matilo, ita asil kub marattok gozob. Ze shatzon firistar ato shatṭa baṭi asil, erar mazor eḳzone aia amare ḳoila, “Ao, aia deḳo, bout fanir ufre ze moha bodmaishni boise, tair kita shaza oibo. Zogotor raza oḳole tair loge zina ḳorsla, honor manshe tair zinar nisha-fani kaia ṭal oisla.” Bade hou firistae ruhani halote amare morubumit nila. Hono ami deḳlam, lal rongor eḳ zanuaror ufre eḳ beṭi boiroise. Ou zanuaror gotro bout kufuri nam leḳa ase. Ogur shatgu ḳolla ar doshgu hing deḳlam. Ou beṭie lal ar baingoni rongor kub dami kafoṛ findise, tai shuna ar dami dami moni-muktar goynadi hazise. Tair ato zinar moyla ar nanan nomunar noforoti zinishe bora shunar eḳ fiala. Tair ḳofalo ola eḳ nam leḳa asil, i leḳar ek gufon mani asil. I nam oilo, “Namḳora Babil ṭaun, bodmaish beṭin ar zogotor hoḳol noforoti zinishor ma.” Ami deḳlam, ou beṭie Allar pak bonda oḳlor lou ar zera Hozrot Isar ḳota toblig kore, erar lou ḳaia ṭal oigese. Taire dekia ami asanoḳ taijjub oilam. Teu hou firistae amare ḳoila, “Tumi taijjub oigelae ḳene? Ou beṭir befare, ar ze zanuare taire boia ner, zegur shatgu ḳolla ar doshgu hing, itar gufon bed ami tumare zanaiar. Tumi ze zanuar deḳsilae, igu age asil, oḳon nai, bade he habia duzoḳ taki uṭia aia siroḳalor lagi shaza faibo. Hou zera ou zogotor manush, zetar nam duniar foyla taki-u Allar zindegi katat leḳa nai, tara ou zanuarre dekia taijjub oiziba, ḳaron igu age asil, oḳon nai, otoso hirbar deḳa dibo. “Huno, oḳon zeta batail oibo, ita buzar lagi aḳolor dorḳar. Ou shato ḳolla oilogi, shatṭa faṛ, ze faṛor ufre ou beṭi boise. Ou shato ḳollare shatzon raza-o buza zaibo. Erar mazor fas raza age-u shesh oigese. Eḳzon oḳon ase ar eḳzon oḳono aise na. Ou raza aia harle tuṛa ḳoydin roite-u oibo. Hou ze zanuar age asil oḳon nai, he shatzonor mazor eḳzon oile-o, he ashole aṭ nombor raza. Bade he hor-hamesha siroḳal shaza faibo. “Ar tumi ze doshgu hing deḳso, ita oilogi doshzon raza. Tara oḳono razotto ḳora shuru ḳorse na, oile hou zanuaror loge raza bonia tara kub ḳom shomoy razotto ḳorar ḳemota faibo. I raza oḳlor mon oibo eḳoi laḳan, tara hoḳole tarar ḳemota ar eḳtiar hou zanuarre dilaibo. Tara meṛa-baichchar loge zuddo ḳorbo, ar meṛa-baichchae tarare araiba. Ḳaron tain oila malik oḳlor malik, bashsha oḳlor bashsha. Ar tan loge zera roiba tarare daot deoa oise, ar basia algail oise, tara hok-halali.” Bade ou firistae amare ḳoila, “Tumi ze fani deḳso, ze fanir ufre ou moha bodmaishni boise, ita oilogi bout desh, bout manush, bout zati ar bout zator bulie matra manush. Ar ze doshgu hing deḳso, itae ar ou zanuare i bodmaishnire bade ginnaiba, tara taire fotor hokir banaia lemṭa ḳorba, ar tair gust ḳaiba, heshe taire agunit falai zalaiba. Er ḳaron oilo, Allae tarar dilor maze ola eḳ niot disoin, zate tan morzi furafur fole. Erlagi tara eḳmot oia hou zanuarre hokkol ḳemota dilaiba, zate Allar kalam furafur folibar ag forzonto he razotto ḳore. Tumi ze beṭire deḳso, igu oilogi hou namḳora ṭaun, i ṭaune zogotor hoḳol razaintor ufre razotto ḳorer.” Itar bade ami aroḳzon firistare deḳlam, tain behest taki lamia aira. Tan bout boṛo ḳemota ase, tan mohimar bole asta duniae zolmol ḳorlo. Tain zure zure ḳoila, “Binash oigese, binash oigese, hou namḳora Babil ṭaun. Ikan oḳon butor aḳra oise, hokkol nomunar but-ferotor aḳra, nafaḳ ar zogoinno fakintor boshot ḳana oise. Ḳaron ikane tair zinar ḳamor bezuita nisha-fani duniar hoḳol zatire ḳabaise. Zogotor raza oḳole tair loge zina ḳorse, zogotor befari shodagor oḳole oḳanor tale tale lagam saṛa nishae doni bonche.” Bade ami hunlam, behest taki aroḳzone ḳoira, “O amar bonda oḳol, tumra Babil ṭaun taki bar oia ao, zate tumra tair gunar bagi na o. Ar tair ufre zeta gozob nazil oibo, ita gozobe tumrare na fae. Tair guna gia to asmano lagigese, tair naformanir bae Allae kial ḳorsoin. Oinno zonor loge tai zela ḳorse, tumra-o tair loge ola ḳoro, tair ḳamor furafur faona taire deo. Ze fialar maze tai oinnor lagi naformani gulaito, ou fialat tair furafur shaza, shullo-ana shaza gulia taire ḳabao. Tai nizore loia zotoḳan boṛai korse, zoto beshi bilashitar maze zindegi kaṭaise, ṭik otoḳan zontrona ar duk taire deo. Tai to mone mone ḳoy, ‘Ami kunu ṛaṛi beṭi ni? Ami to ranir ashono boisi, ami kunumonte-u duḳ-mosiboto foṛtam nae.’ Erlagi tair ufre eḳdine-u hoḳol gozob foṛbo. I gozob oilo mout, bilaf-ahazari ar nidan. Taire aguindi zalail oibo, ḳaron zein tair bisar ḳorba, i Alla Mabud kub boloban.” Zogotor zoto raza oḳole ogur loge zina ḳorse, tair loge hoi-hulla ḳori bilashi din ḳaṭaise, taire zalanir bala tair duma dekia otae ḳandiba, tair lagi ahazari korba. Tair zontrona dekia tara ḍoraia duroi ubaia ḳoiba, “Haere Babil, haere hae! Oto namḳora ṭaun, oto ḳemota-ala ṭaun! Ola zoldi tumar ufre gozob ailo ni?” Zogotor befari shodagor oḳole-o tair lagi kandiba ar ahazari korba, ḳaron tarar mal-samana oḳon kunu manshe loito nae. Tarar ita mal-samana oilo, shuna, rufa, dami dami moni-mukta, dami dami kafoṛ, baingoni rongor bashshai kafoṛ, reshmi ar lal ḳafoṛ, nanan nomunar kushboy-ala laḳṛi, attir datdi banail nanan siz, dami laḳṛidi banail siz, fitol, lua ar marbel fattordi banail nanan samana, ḍailchini, elais, agor-kushboy, mura-ator, loban-agor, anguror rosh, zoytunor tel, moyda-gom, goru-meṛa, guṛa ar guṛar gaṛi, erloge ḳorida gulam-bandi oḳol. Hou shodagor oḳole ḳoiba, “O Babil, tumi ze aram-ayesh faitae saislae, ita to tumar ges taki horigese. Tumar hoḳol don-samana, zak-zomoḳ binash oigese. Ita to ar kunudin-u firot faoa zaito nae.” Zeta shodagor oḳole ota malor bebsha ḳoria doni oisla, tair zontrona dekia hou befari oḳole ḍoraia duroi ubai roiba. Tara ḳandi kandi mattom ḳoria ḳoiba, “Ish, haere hae, dami dami moslin ḳafoṛ, baingoni ar lal rongor bashshai kafoṛ finda Babil ṭaun, shuna ar dami dami moni-mukta dia hazail-faṛail oto namḳora ṭaun! Oto zoldi tumar oto don-samanar banḍar binash oigelo ni?” Shodagori zazor sharong ar kaftan oḳole, naia oḳole, zaz ar falor naia ḳarbari oḳole duroi ubaia ita deḳba. Taire zalanir shomoy tair duma dekia tara sillaia ḳoiba, “I ṭaunor laḳan namḳora, zogotor ar kunu ṭaun asil ni?” Tara nizor matat duil maḳaia silla-silli korba ar ḳandi kandi mattom ḳoria ḳoiba, “Haere hae, hou namḳora Babil ṭaun, haere hae! Doriar maze zerar zaz solasol ḳore, tara to zazor ḳamai dia boṛoluk oisla, oḳon deḳrae ni, oto zoldi kila hoḳolta binash oigelo!” Ou shomoy hou firistae ḳoila, “O behest, tumi furti koro, ou ṭaunre binash ḳorae kushi koro. O Allar pak bonda oḳol, nobi-rosul oḳol ar sahabi oḳol, furti koro. Ogie tumrar birudde zotota ḳorsil, oḳon Allae tair bisar ḳorsoin.” Bade kub shoktiala eḳ firistae biraṭ eḳ fattor ania doriat falaia ḳoila, “Huno, ou namḳora Babil ṭaunre-o ola ḍekka mari falai deoa oibo, taire ar kunudin faoa zaito nae. Zera sharinda bazae, gan gae ar bashi ba shinga bazae, tarar aoaz ar kunudin tumar maze huna zaito nae. Ar kunudin-u tumar maze kunuzator mestori milto nae. Kunu moshla fishar faṭar aoaz kunudin huna zaito nae. Tumar maze kunudin kunu battir for zolto nae. Daman-koinar golar aoaz ar kunudin tumar maze huna zaito nae. Ḳaron asta zogotor maze tumar shodagor oḳol namḳora asil, zogotor hoḳol zati tumar sol-soturir zadue fagol oizito. Ar nobi-rosul oḳolre, Allar pak bonda oḳolre, ar zoto manshore i zogoto kun ḳora oise, tarar lou to tumar ou Babil ṭauno milche.” Erbade ami behestor maze bout manshor biṛor aoaz hunlam. Tara ḳoira, “Alhamdulilla! Mohima ar ḳemota, aḳerator nazat, hokkolta-u amrar Allar. Tan bisar to hok ar shoṭik. Ze ṭaune nizor zinar ḳam dia asta duniare nafaḳ banaisil, hou moha-bodmaishnire Allae shaza disoin. Tan mayar gulam oḳlor lour bodla, tain ogur ges taki loisoin.” Era hirbar ḳoila, “Alhamdulilla! Ogur maz taki hor-hamesha duma bar oibo.” Alla Pak zein toḳto boat asoin, hou sobbishzon murobbi netae ar hou sairo zandare tanre soizda ḳoria ḳoila, “Amin! Alhamdulilla.” Ou shomoy behesti toḳto taki eḳzone ḳoila, “O Allar mayar gulam oḳol, tumra zera Allare ḍorao, tumra huru-boṛo hokkole amrar Allar tarif ḳoro.” Bade ami bout manshor biṛor aoaz ba zure zure ḳol-kolaia fani foṛar aoaz ba zure ṭaṭa foṛar aoazor laḳan ou ḳota ḳanain hunlam, “Alhamdulilla! Amrar Shorbo-shoktiman Mabud Allae bashshai kora shuru ḳorsoin. Ao, amra monor kushie furti kori, ar tan tarif ḳori, ḳaron meṛa-baichchae shadi korar shomoy oigese, tan ḳoina zuit oia hazigesoin. Tanre soḳsoḳa forishkar dami kafoṛ findail oise.” I kafoṛ oilo Allar pak bonda oḳlor forezgari sal-cholon. Bade hou firistae amare ḳoila, “Tumi oḳan leḳo, meṛa-baichchar shadir mozliso zerare daot deoa oise, tara mubarok.” Tain eoḳan ḳoila, “Ita oilo Allar kalam, ita ḳaṭi hasa.” Teu ami ou firistare soizda ḳorar niote tan fao-o foṛlam, oile tain amare ḳoila, “Hae, hae! Ita kita ḳorrae, ami-o to tumar laḳan gulam, ar tumar ze mumin bai oḳole Hozrot Isar fokke zobanbondi deoat roy, ami tarar laḳan-o gulam. Te ḳali Allare soizda ḳoro. Ou Isar zobanbondi-u oilo, nobi-rosul oḳlor zobanbondir mul kuṭi.” Bade ami deḳlam, behestor duar kula, ar hono dola eḳṭa guṛa ase. Hou guṛar ufre zein toshrif raḳsoin, tan nam oilo, hok ar hok-halali. Tain fak-forezgarie bisar-insaf ar zuddo ḳoroin. Tan souk oilo zalail soḳsoḳa agunir laḳan, tan matat bout taz ase. Tan shorilo omon eḳ nam leḳa, ze namor mani tain saṛa dusra ḳeu zane na. Tan finno ase lour maze ḍubail lebas, ar tan nam oilo, “Kalimatulla, Allar kalam.” Ar behestor sifai oḳole dami saf-sutra dola lebas findia, dola guṛar ufre soar oia tan ḳore ḳore zaira. Tain zate zogotor hoḳol zatire shaza dita faroin, otar lagi tan muk taki ekḳan darail toluar bar oia ailo. Tain luar laṭi dia tamam zatire shashon ḳorba, ar angur maṛar gato manshe zela faodi angur maṛoin, Shorbo-shoktiman Allar lannoti gozobdi tain ola maṛiba. Tan urator maze ar tan lebaso ou nam leḳa ase, “Bashsha oḳlor bashsha, malik oḳlor malik.” Bade ami deḳlam, shuruzor maze eḳzon firista ubai roisoin. Asmanor maze zeta fakinte uṛira, tain era hoḳolre zure zure ḍakia ḳoila, “Ao, Allar dorbaro moha-daot ḳaoar lagi ekḳano dola o, zate tumra aia gust ḳaitae faro, bashsha, fordan sifai, foyluan oḳol, guṛain ar guṛaintor soar oḳol, azad ar gulam, huru-boṛo hoḳol manshor gust ḳao.” Erbade ami deḳlam, ou guṛat zein soar oisoin, en loge ar en sifai dolor loge zuddo ḳorar lagi hou zanuar, asta duniar raza oḳol, tarar shoinno-sifai dol loia ekḳano dola oila. Teu hou zanuarre doria aṭok kora oilo, ar ze bonḍo nobie tar fokko loia asanok kam deḳaito, tare-o dora oilo. Zeta manshe hou zanuaror sil lagaise, tar murtir puja ḳorse, ou bonḍo nobie tar asanok kam deḳaia ota manshore be-foti banaise. I duioṭare zinda halote, zalail gondoḳor agunir maze falani oilo. Hou dola guṛar ufre zein boat asla, tan muk taki ze darail toluar bar oia aisil, oḳandi tarar logor shango-pango oḳolre kun ḳora oilo. Erlagi hoḳol fakinte feṭ boria otar gust ḳaila. Erbade ami deḳlam, behest taki eḳzon firista lamia aira. Tan ato asil habia duzoḳor sabi, ar kub boṛo eḳsa longor. Tain hou danobre dorla, igu oilo hou furana haf, er nam oilo Iblis ba Shoytan. Tare doria eḳ azar bosoror lagi bandila, bandia habia duzoḳo falaila. Bade ou duzoḳor duaro tala lagaia er ufre sil-sappoṛ marla, zate he ou eḳ azar borosor maze bar oia, duniar kunu zatire be-foti banaito na fare. Heshe tare tuṛa ḳoydinor lagi saṛa oibo. Bade ami deḳlam, bout toḳt ase. Zera ou toḳtor ufre boisoin, erare bisar ḳorar ḳemota deoa oise. Allar kalam ar Hozrot Isar befare zobanbondi deoae zerare gordan mara oisil, erar ruhu oḳolre-o ami deḳlam. Era hou zanuarre ba tar murtire puja ḳorse na, ar ato ba ḳofalor ufre tar sil-o lagaise na. Era zinda oia uṭla, uṭia eḳ azar bosor dori al-Mosir loge bashshai korla. Ou eḳ azar bosor gia harle Shoytanre tar zel ḳana taki kalas deoa oibo. Teu he gia asta zogotor hoḳol zatire, mani Iazuz-Mazuzre be-foti banaibo, ar zuddo ḳorar lagi tarare ekḳano dola ḳorbo. Tar manush oiba, doriar soror balur laḳan, ita gonia furani zaito nae. Ou shomoy ami deḳlam, tara asta dunia taki baroi gia Allar pak bonda oḳlor roar zaga, Allar mayar ṭaunre gia berililo. Oile asman taki Allai aguin lamia itare zalaililo. Ar ze Iblise erare be-foti banaisil, tare doria zalail gondoḳor agunir gato falail oilo. Hou zanuar ar bonḍo nobire age-u ou gato falail oisil. Hono tara siroḳal roiba, ar dine-raite zala-zontronar azab faiba. Bade ami deḳlam, boṛo ekḳan dola toḳt, ou toḳto eḳzon boat asoin. Tan samna taki asman ar dunia bagigelo, kunuḳano erar zaga roilo na. Erbade deḳlam, huru-boṛo tamam murda oḳol ou toḳtor samne ubai roisoin. Bade ḳoyḳan ḳata kula oilo, erbade aro ekḳan ḳata kula oilo, ikanor nam zindegi ḳata. Ou ḳata oḳlor maze hou murda oḳlor zeta amol-nama leḳa oisil, hou amol mafik tarar aḳeri bisar ḳora oilo. Doriar maze zoto murda oḳol asla, doriae erar lash bar ḳori dilo. Ar mout ar ḳoyboror maze zeta murdain asla, mout ar ḳoybore tarare bar ḳori dilo. Forteḳ zonre tar nizor amol-nama mafik bisar ḳora oilo. Heshe mout ar ḳoyborre-o agunir gato falail oilo. Ou agunir gato foṛa-u oilo dusrabar mout mani, aḳeri mout. Zerar nam hou zindegi katat millo na, tarare-u agunir gato falail oilo. Bade ami ekḳan noya asman ar noya zomin deḳlam. Foyla asman ar foyla zomin milai gese, kunu doria-o ar roilo na. Ami deḳlam, hou fobitro ṭaun, mani noya Zeruzalem. Ikan behestor maz taki ar Allar dorbaro taki lamia ar. Kunu biar ḳoinare zela damandor lagi hazail oy, ou ṭaunre-o ola shundor ḳori hazail oisil. Bade ami hunlam, hou behestor toḳto taki eḳzone zure zure ḳoira, “Oḳon manshor maze roar lagi Alla Pakor zaga oise. Tain manshor loge boshot ḳorba, ar tara oiba tan bonda. Tain shoyong tarar loge roiba, tarar Alla oiba. Tain erar sokur fani fusia diba. Ar kunu moron oito nae, duk, ḳandon, ḳoshṭo ar roito nae, agor ita hoḳolta-u shesh oigese.” Toḳto zein boat asla tain ḳoila, “Huno, ami hokkoltare noya ḳori foyda ḳoriar.” Bade tain hirbar ḳoila, “Amar ou ḳotaḳan leḳo, ḳaron ita ekin ḳorar laḳ hasa.” Tain amare eoḳan ḳoila, “Shesh oigese. Ami-u Alif ar Ya, aual ar aḳer. Huno, zar fanir fiase dorse, tare ami abe-hayator zindegi-fanir zorna taki bina foyshae fani dimu. Ze zon joyi oibo, he ita hoḳoltar odikar faibo. Ami oimu tar Alla, ar he oibo amar fut. Oile ḳa-purush, beiman, haramkur, kuni, zinakur, zadugir, murtifuza ḳorra, ar hoḳol nomunar misa matra oḳol zalail aguin ar gondoḳor gato roiba. Er nam-u oilo dusrabaror mout.” Hou ze shatzon firistar ato aḳeri shato gozob bora shatṭa baṭi asil, erar mazor eḳzone amar ḳandat aia ḳoila, “Ao, ami tumare ḳoina-beṭi deḳaimu, mani meṛa-baichchar boure deḳaimu.” Bade hou firistae ruhani halote amare boṛo eḳ usa faṛor ufre loia gela. Nia Allar mohimae soḳsoḳa ze fobitro Zeruzalem ṭaun, behestor maz taki ar Allar dorbaro taki lamia aoat asil, ou firistae amare ota deḳaila. I ṭaunor rong kub dami moni-muktar laḳan soḳsoḳa, foṭikor golashor nomunae dami hirar laḳan. Hou ṭauno boṛo ekḳan usa oal asil, ou oalo baroḳan geiṭ asil, baro geiṭo barozon firista asla. Ou geiṭor ufre Boni Israilor baro ḳandanor nam leḳa. I geiṭor tinḳan fubedi, tinḳan utoredi, tinḳan douknedi ar tinḳan foismedi asil. I ṭaunor oalor baroṭa filar asil, itar ufre meṛa-baichchar barozon sahabir baroḳan nam leḳa. Amar loge zein batchit ḳorat asla tan ato shunar eḳṭa nol asil, zate tain ou ṭaun, ṭaunor geiṭ ar oal mafita faroin. I ṭaun asil sair kuni gul, lambae ar faṛe shoman. Bade tain ou noldi ṭaunḳan mafile, ikan lamba, faṛ ar usae oilo baro azar stadia (onuman deṛ azar mail). Bade tain oal mafila, i oal asil eḳ-sho sousallish at usa. Manshor ator mafor laḳan i firistae-o mafila. I oalḳan hiradi banail, ar i ṭaun asil foṭikor golashor laḳan ḳaṭi shunadi banail. Ṭaunor oalor filar oḳlor maze dami dami moni-mukta lagail asil. Foyla filar hirar, dusraṭa akik monir, tin nomborṭa tama moni, sair nomborṭa fanna moni, fas nomborṭa shuruz moni, soy nomborṭa iakut moni, shat nomborṭa lil moni, aṭ nomborṭa boidurjo moni, noy nomborṭa fit moni, dosh nomborṭa ufol moni, egaro nomborṭa firuz moni, ar baro nomborṭa foddorag moni. Baroḳan geiṭ baroṭa muktadi banail. Fortek geiṭ asil eḳoṭa dami muktar. Ṭaunor rasta asil foṭikor golashor laḳan ḳaṭi shunadi banail. I ṭauno ami kunu ebadot ḳana deḳlam na, Shorbo-shoktiman Alla Mabud ar meṛa-baichcha-u asla inor ebadot ḳana. I ṭaunre for ḳorar lagi kunu san-shuruzor zorur nai. Allar nuror mohimae for dey, ar meṛa-baichcha-u oila inor batti. Hoḳol zatir manush ou nuror fore sola-fira ḳorba, duniar bashsha oḳole tarar zak-zomoḳ loia ou ṭauno aiba. Dinor bala kunu shomoy-u i ṭaunor geiṭ bond oito nae, ar hino kunu rait oito nae. Tamam zatir ijjot ar gourob ono ana oibo. Nafak kunu siz, haramkur ba misa matra kunu manush, kunudin-o ino hamaito farto nae. Ḳali meṛa-baichchar zindegi ḳaṭar maze zerar nam leḳa ase, tara-u hamaiba. Erbade hou firistae amare abe-hayat, mani zindegi-fanir gang deḳaila. Ikṭa deḳte soḳsoḳa ḳasor laḳan. Iṭa Alla Pak ar hou meṛa-baichchar toḳtor daro taki bar oia, ṭaunor boṛo gollir mazḳanedi zaoat asil. Ar ou gangor duio faro zindegi-gas asil. Ou gasainto baro zator fol dore. Forteḳ mashe mashe fol dore, ou gasor fatae hoḳol zatir manshor bemar shifa oy. Kunuzat lannot ar roito nae. Alla Pak ar meṛa-baichchar toḳt ou ṭauno roibo, ar tan gulam oḳole tan ebadot ḳorba. Tara tan fobitro muk deḳba, tarar ḳofalo tan nam leḳa taḳbo. Ar kunu rait oito nae, tarar lagi lemor ba shuruzor foror zorur oito nae, ḳaron Alla Mabudor nur-u oibo tarar for. Tara hor-hamesha siroḳal dori bashshai korba. Bade hou firistae amare ḳoila, “Ita hoḳolta ekin ḳorar laḳ hasa. Alla Mabud, zein age tan nobi oḳlor mazdi batchit ḳorsoin, tain nizor firistare disoin, zate tuṛa ḳoydinor maze zeta goṭibo, ou firistae ita tan gulam oḳolre deḳain.” Hozrot Isae ḳoira, “Huno, ami kub zoldi-u airam. Ze zone ou kitabor hoḳol ayator agam ḳobor amol ḳore, he-u nek-kofali.” Te Isa al-Mosir sahabi ami Hannane ita deḳsi ar hunchi. Hoḳolta huna ar deḳar bade, ze firistae amare ita deḳaisoin, ami tanre soizda ḳorar niote tan fao-o foṛlam. Oile tain amare ḳoila, “Na, na! Tumi amare nae, ḳali Alla Pakre soizda ḳoro. Ami to ḳali tumar laḳan gulam, tumar baiain mani nobi oḳlor laḳan ar i kitabor hoḳol ayat zera mane, tarar laḳan-u gulam.” Erbade tain amare ḳoila, “Ou kitabor kunu agam ḳobor tumi lukaia rakio na, ḳaron shomoy gonaia aichche. Zegie naformani korer, he ola ḳorat rouk. Zegu ḳobis, igu tar ḳobisit rouk. Ar forezgar zone forezgari korat rouk, fak-fobitro zon fak-fobitro rouk.” Hozrot Isae ḳoira, “Huno, ami kub zoldi airam, ar forteḳ manshor amol-namar furuskar amar ato ase. Ami-u Alif ar Ya, aual ar aḳer, shuru ar shesh. “Tara-u nek-kofali, zera nizor ḳafoṛ-sufoṛ doia forishkar ḳore, zate zindegi-gasor fol ḳaoar odikar fae, ar geiṭedi gia fobitro ṭauno hamae. Kukror laḳan zogoinno manush, zadugir, zinakur, kuni, murtifuza ḳorra, ar zetae misa mat fosond ḳore, misar maze sole, ita hokkolṭi bare foṛi roise. “Te ami Isae amar firistare faṭaisi, zate ein zomat oḳlor lagi tumrar gese ota hoḳol befare zobanbondi dein. Ami to Bashsha Daudor ḳandan ar mul zoṛ, fozoror soḳsoḳa shuk-tera.” Pak Ruhe ar ḳoinae ḳoira, “Ao.” Ar ze zone ou ḳota huner, he-o ḳouk, “Ao.” Fanir fiase zare dorse, he auk. Ze zone fani kaito sae, he bina foyshae zindegi-fani kauk. Ze zone ou kitabor hoḳol agam ḳobor hune, tar gese ami ou zobanbondi diar, ḳeu zudi ou ayat oḳlor loge dusra kunta baṛae, te Allae-o ou kitabo leḳa hoḳol nomunar gozob tar zindegit baṛaiba. Ar ou kitabor ayat oḳol taki keu zudi kunta bad dey, te Allae-o i kitabo leḳa zindegi-gas ar fobitro ṭaunor odikar, tar zindegi taki bad diba. Ou befar oḳol loia zein zobanbondi dira, tain ḳoira, “Hasau, ami kub zoldi airam.” Amin. Hozrot Isa, afne toshrif anoukka. Allar tamam pak bonda oḳlor ufre, Hozrot Isar rohomot zari rouk. Amin. Ḳotom